﻿កោរាញ​អ៝ស​ម៝ន.
28.
ត៝ត់​ហេន​លែៈ​ក្លាយ្ស​ជេស រី​មើ​គឹត​នាល់​លាស​គោល​ទាក​អី​នៃ​រាញា​គោល​ទាក​មាលីត ។ 
ឞូនុយ្ស​តា​គោល​ទាក​អី​នៃ​ខាន់​ពាង់​រ៝ម​ហេន​អ្វែស​ងាន់ មោ​ហោម​អោស​ឞ្លាវ​នតឹត។ ខាន់​ពាង់​ឆុញ​អុញ​ជាៈ​ទឹង​លែៈ​ផូង​ហេន​រី​ហាន់​ញជ៝រ់​អុញ យ៝រ​លាស​នោក​នៃ​គែស​មីស នទ្រែល​មា​ជី​កាត់​ដ៝ង់។ 
ពោល ​ទោញ​រាកែស​រាកោញ​ទូ​មពឺ​តេៈ​តា​អុញ​រី គែស​ទូ​មល៝ម់​ឞេស​កូ​ទោស​អុញ​ហូង​លោស​ឞើស​នៃ ចោក​តី​ពោល ​រី។ 
ឞូនុយ្ស​តា​គោល​ទាក​នៃ​ឆៃ​ឞេស​ខាន​តា​តី​ពោល ​រី ខាន់​ពាង់​តឹម​លាស៖ “ឞូនុយ្ស​អី​នៃ​លែៈ​តាៈ​ងខឹត​ឞូ​រ៝ ឞ៝ល​លាស​ពាង់​មហែ​ក្លាយ្ស​តាៈ​ឞើស​ទាក​វាច់​ទាក​វារ់​កាដោយ ឞ្រាស​អី​ព្លើង​នាវ​អ្យើស​មោ​អោស​អ៝ន់​ពាង់​រេស”។ 
ជេសរី​ពាង់​រាតែស​ឞេស​នៃ​អា​អុញ​ឆូ យើន​មា​ពោល ​នើម​រី​មោ​អោស​ជី។ 
ឞូនុយ្ស​តា​គោល​ទាក​នៃ ឞូ​ក៝ប់​អ្វាញ់​ពាង់​មោរ​ឆាក់​ជាន់ មោ​លាស​ចោត​ខឹត។ ត៝ត់​មា​ជ៝ៈ​ឞូ​មោ​អោស​ឆៃ​ពាង់​គែស​នាវ​ជី ជេសរី​ឞូ​ព្លាច់​នាវ​មឹន លាស​ពាង់​ឞ្រាស​ច្រាវ។ 
ទាច់​តា​នតុក​នៃ​គែស​នែស​ទូ​នតុក ជេង​នែស​ទូ​ហ្វេ​កោរាញ​តា​គោល​ទាក​នៃ​រាញា​ពូព្លេស  ពាង់​រ៝ម​ហេន​អ្វែស​ងាន់​អ៝ន់​ហេន​គុ​តា​នៃ​ពែ​នារ។ 
អី​ឞឹ​ពូព្លេស ​រី​ជី​ក៝ប នទ្រែល​មា​ជី​វាញ់​នទុល​ឞិច​តា​គ្រែ ពោល ​ហាន់​តា​ជៃ​ពាង់​រី មឞើស​ឆើម​តេៈ​តី​តា​ពាង់ ជាន​អ៝ន់​ពាង់​ឞាស។ 
កើត​នទ្រី​ទឹង​គែស​ឞូនុយ្ស​ជី​ទឹង​លែៈ​តា​គោល​ទាក​នៃ ខាន់​ពាង់​លែវ​ឞាល់​ហាន់​តា​ពោល  ជេសរី​ឞាស​ទាទេ។ 
ខាន់​ពាង់​គែស​នាវ​យើក​មា​ហេន​អ៝ន់​នទើ​អ៝ក់​មា​ហេន។ ត៝ត់​នារ​ហេន​លោស​ញច៝​ទូក​ឞើស​នតុក​នៃ ខាន់​ពាង់​កើល​នទើ​អ៝ន់​ហេន​ទែ​មា​ទ៝ង់។ 
ហេន​គុ​តា​គោល​ទាក​នៃ​គែស​ពែ​ខៃ ជេសរី​ហេន​ញច៝​ទូ​មល៝ម់​ទូក​ក្វ៝ង់ រាញា​«ដីអោឆាកោរ »។ ទូក​អី​នៃ​តាៈ​ឞើស​ប៝ន​អាលេកឆាន់ត្រី  ញឆ្រុង​គុ​តា​គោល​ទាក​នៃ​តា​ខៃ​ឆ្យាល​ពោស។ 
ត៝ត់​តា​ប៝ន​ឆីរាកុស  ហេន​គុ​តា​ប៝ន​នៃ​ពែ​នារ។ 
ជេស​ឞើស​នៃ​ហេន​ញច៝​រ៝ៈ​មែង​ត៝ត់​តា​ប៝ន​រេកេម ។ ត៝ត់​អោយ​តៃ​គែស​ឆ្យាល​តាៈ​មពែស​ឞើស​ទ៝ង់​រី ហេន​ញច៝​ឞារ​នារ​ទឹង​ត៝ត់​តា​ប៝ន​ពូតីយោលី ។ 
តា​ប៝ន​នៃ​ហេន​ម៝ប់​មា​ផូង​ញឆីង​អាបាៈ ខាន់​ពាង់​ជាៈ​ហេន​គុ​តា​នៃ​ពើស​នារ។ តាៈ​ឞើស​នៃ​ត៝ត់​តា​ប៝ន​រោម ​ហេន​ឞ្រោៈ​ហាន់​មា​ជ៝ង់។ 
ផូង​ញឆីង​តា​ប៝ន​រោម ​រី ខាន់​ពាង់​តាង់​លឺ​ឞូ​ងក៝ច​ហេន គែស​ខាន់​ពាង់​អាបាៈ​ហាន់​ច្វាៈ​ហេន​ត៝ត់​តា​នតុក​ឞូ​តាច់​ទ្រាប់​រាញា​អាប់ផេស  នទ្រែល​មា​គែស​អាបាៈ​អេង​ជឹត​ហាន់​ច្វាៈ​ហេន​តា​ប៝ន​គែស​ជៃ​វែស​ឞិច​ពែ​មល៝ម់។ ត៝ត់​ពោល ​ឆៃ​ខាន់​ពាង់​រី ពាង់​លាស​អ្វែស​មា​កោរាញ​ឞ្រាស ជេសរី​ពាង់​គែស​ឆឹត​នហ៝ម់​ឆឹត​ឆ្វាន​ហោ​ងាន់។ 
ហេន​ត៝ត់​តា​ប៝ន​រោម ​រី កោរាញ​តាហែន​ញជុន​ឞូនុយ្ស​ទោយ្ស​មា​កោរាញ​តាហែន​ក្វ៝ង់​តា​មពោល​កោរាញ​តាហែន​ញជ្រាង់ យើន​មា​ពោល ​ឞូ​អ៝ន់​ពាង់​គុ​ជៃ​អេង។ គែស​ទូ​ហ្វេ​តាហែន​គុ​អ្វាញ់​ពាង់។ 
ត៝ត់​ពែ​នារ​នៃ ពោល ​ក្វាល់​មពោល​កោរាញ​ផូង​អីឆ្រាអែល ​តា​ប៝ន​រោម ​តឹម​រាបុន។ ត៝ត់​ឞូ​លែៈ​រឹង​តា​រី​ទាទេ​ជេស ពោល ​ងើយ៖ “អើ​អ៝ស​នោ​កោញ​វា គ៝ប់​មោ​ព្រ៝ត​អោស​គែស​នាវ​តឹម​រាទ៝ង់​ដាស​ផូង​អីឆ្រាអែល  មោ​លាស​ដាស​នាវ​វៃ​ផូង​អូ​ចែ​ឞ៝ន់​កាល់​អែ។ ឞូ​ញុប​ចាប់​គ៝ប់​តា​ប៝ន​យេរូឆាលឹម  ជេសរី​ញជុន​គ៝ប់​តា​តី​ផូង​រោម ។ 
ជេស​ផូង​រោម ​អោប​ជែក​គ៝ប់​រី ខាន់​ពាង់​អុច​បើក​លើយ​គ៝ប់ យ៝រ​លាស​ឞូ​មោ​អោស​ឆៃ​នាវ​តីស​តា​គ៝ប់​ត៝ត់​មា​ខឹត​ឆាក់។ 
តីស​មា​មពោល​កោរាញ​ឞ្រី​យូដា ​មោ​អុច​អោស កើត​នទ្រី​ទឹង​អ្យាត់​មា​គ៝ប់​ហាវ​ម៝ប់​ត៝ត់​មា​កោរាញ​កាដាច់​អ្យា។ យើន​មា​មោ​ទី​អោស​លាស​គ៝ប់​អ្យា​គៃ​មា​អុច​នតោន​ផូង​ឞាល់​មពោល​ឞ៝ន់​នើម។ 
កើត​នទ្រី​ទឹង​គ៝ប់​អុច​ក្វាល់​ខាន់​មៃ អុច​ម៝ប់​ខាន់​មៃ គៃ​មា​តឹម​ងើយ​ឞាល់។ យ៝រ​មា​នាវ​រានើម​ផូង​អីឆ្រាអែល ​អី​កោរាញ​ឞ្រាស​ញជ្វាល់​ឞ្រាស​ក្រីស ​គៃ​មា​រាក្លាយ្ស​ផូង​ឞ៝ន់ ទឹង​គែស​មា​គ៝ប់​គែស​រាឆែ​រាវាក់​កើត​នអា”។ 
ផូង​នៃ​អើស​មា​ពាង់៖ “ហេន​មោ​អោស​ព្រ៝ត​ទើន​ឆ៝ម់បុត​តាៈ​ឞើស​ឞ្រី​យូដា ​មា​នាវ​មៃ​អ្យា មោ​ព្រ៝ត​ដ៝ង់​គែស​ឞូនុយ្ស​ហាន់​មឞើស​ងក៝ច មោ​លាស​ងើយ​នាវ​អ្យើស​ឞើស​មៃ។ 
យើន​មា​ហេន​អុច​អ្យាត់​នាវ​មៃ​ងើយ​តាៈ​ឞើស​នាវ​មឹន​មៃ​នើម យ៝រ​លាស​ហេន​លែៈ​គឹត​ឞូ​តឹម​រាទ៝ង់​ដាស​មា​មពោល​ខាន់​មៃ​អី​ញឆីង​មា​យេឆូ ​អាប់​នតុក”។ 
ជេសរី​ខាន់​ពាង់​តឹម​នាល​នារ​តឹម​ម៝ប់​ឞាល់​តៃ​ទូ​តឹ​ជឹត។ ត៝ត់​នារ​នៃ​គែស​ឞូនុយ្ស​អ៝ក់​ងាន់​ហាន់​តា​ជៃ​ពោល ​គុ​រី។ ជេសរី​ពាង់​មឞើស​ងក៝ច​នាវ​ខ្លៃ​នាវ​កោរាញ​ឞ្រាស​អុច​ម៝ត់​អ្វាញ់​មា​ឞូនុយ្ស នតើម​ឞើស​អោយ​ត៝ត់​មាង់។ ពាង់​ឆ៝ៈ​ឆ៝ម់បុត​នាវ​វៃ​មោឆេ  នទ្រែល​មា​ឆ៝ម់បុត​មពោល​ឞូនុយ្ស​នតើយ្ស​នាវ​ងើយ​កោរាញ​ឞ្រាស​កាល់​អែ​នើស មឞើស​ងក៝ច​ជាៈ​ខាន់​ពាង់​ឆឹត​ញឆីង​មា​ឞ្រាស​យេឆូ ។ 
គែស​ឞូនុយ្ស​អាបាៈ​ឞូ​អ្យាត់​នាវ​ពាង់​ងើយ​នៃ គែស​ឞូនុយ្ស​អាបាៈ​ទាង់​ក៝​មោ​អ្យាត់​អោស។ 
ពោល ​ឆៃ​ខាន់​ពាង់​ទូ​លោស​ឞើស​នតុក​នៃ​មោ​គែស​ទូ​នតោរ​នាវ ពាង់​លាស​ជឹត៖ “ឞ្រាស​ហ្វេង​អ្វែស​អី​ក្ល៝ស​អ្វែស​លែៈ​មឞើស​ជេស​មា​អូ​ចែ​ឞ៝ន់​កាល់​អែ​នើស ពាង់​មឞើស​តឹង​មា​ឞូនុយ្ស​នតើយ្ស​នាវ​ងើយ​កោរាញ​ឞ្រាស​រាញា​អេឆាយ  ជេង​ទី​ងាន់ កើត​នអា៖ 
«ហាន់​ជ៝យ​ហ៝ម់​ផូង​ប៝ន​លាន​នៃ ជេសរី​មឞើស​ងក៝ច​មា​ខាន់​ពាង់៖ «ខាន់​អៃ​មៃ​តាង់​បាបើ​តីស​មា​មោ​វ៝ត់‌ អ្វាញ់​ងាន់​តីស​មា​មោ​អោស​ឆៃ»‌ 
យ៝រ​លាស​នាវ​មឹន​ខាន់​ពាង់​អ្យា​ជ៝ៈ​ងាន់​វ៝ត់‌ តោរ​លែៈ​ញឆេត‌ ខាន់​ពាង់​លែៈ​ញេប​មាត់។ កើត​នទ្រី​ទឹង​ខាន់​ពាង់​អ្វាញ់​មោ​ឆៃ‌ អ្យាត់​មោ​តាង់ នាវ​មឹន​ខាន់​ពាង់​មោ​វ៝ត់។ ជេសរី​លាស​ខាន់​ពាង់​មោ​កើត​នអា ខាន់​ពាង់​រាគ៝ល់​នូយ្ស​នហ៝ម់​ព្លឹ​ឆឹត​មា​គ៝ប់‌ គៃ​មា​គ៝ប់​ជាន​ឞាស​នាវ​ជី អ៝ន់​ខាន់​ពាង់​អ្វែស​លាង់»។ 
កើត​នទ្រី​អ៝ន់​ខាន់​មៃ​គឹត កោរាញ​ឞ្រាស​មឞើស​ងក៝ច​នាវ​ពាង់​រាក្លាយ្ស​អ្យា​មា​ផូង​មោ​ទី​ផូង​អីឆ្រាអែល  ខាន់​ពាង់​មរា​អ្យាត់​រ៝”។ 
លោច​ជេស​ពោល ​ងើយ​នាវ​នៃ ផូង​អីឆ្រាអែល ​អី​នៃ​ទូ​លោស​នអ៝ប់​មា​តឹម​ញច្រាៈ​នទ្រាង់​ខាន់​ពាង់​នើម​ហោ​ងាន់។ 
ពោល ​គុ​តា​ជៃ​ពាង់​ងខោម​រី​ជ៝ៈ​ឞារ​នាម់​ងាន់ ឞូ​ម៝ស​អី​ហាន់​ម៝ប់​ពាង់ ពាង់​រ៝ម​ទាទេ។ 
ពាង់​មឞើស​ងក៝ច​នាវ​កោរាញ​ឞ្រាស​អុច​ម៝ត់​អ្វាញ់​មា​ឞូនុយ្ស នទ្រែល​មា​នតុម​នតី​ឞូ​មា​នាវ​កោរាញ​យេឆូ​ក្រីស ។ ពាង់​ឞាញ់​ហោ​ងាន់ មោ​គែស​ឞូ​ឞ្វៃ​ពាង់​ដ៝ង់៕៚
