﻿កោរាញ​អ៝ស​ម៝ន.
15.
ឞើស​កើយ​នៃ​គែស​ឞូនុយ្ស​អាបាៈ​តាៈ​ឞើស​ឞ្រី​យូដា  នតុម​នតី​ផូង​ញឆីង​តា​ប៝ន​អ៝ន់តីយោក ​កើត​នអា៖ “លាស​ខាន់​មៃ​មោ​គែស​ក៝ស​នតោ​តឹង​នាវ​វៃ​មោឆេ  ខាន់​មៃ​មោ​អោស​ទើយ​គែស​រាក្លាយ្ស”។ 
ល៝ង់​ពោល  នទ្រែល​មា​បារនាបាស ​រី​តឹម​រាលាច់ តឹម​អោប​រាខេល​ដាស​ផូង​នៃ​ទុត​ហោ។ ជេសរី​ផូង​ញឆីង​ដាៈ​ពោល  ដាៈ​បារនាបាស  នទ្រែល​មា​ឞូនុយ្ស​ញឆីង​អាបាៈ​អេង​ជឹត​ហាន់​តា​ប៝ន​យេរូឆាលឹម ​រី អុច​ម៝ប់​ផូង​កោរាញ​អ៝ស​ម៝ន នទ្រែល​មា​ផូង​កោរាញ​ផូង​ញឆីង​មា​ឞ្រាស​ក្រីស ​អេង​ជឹត​គៃ​មា​ញច្រាៈ​នាវ​អី​នៃ។ 
ផូង​ញឆីង​កើល​ត្រ៝ង​មា​ខាន់​ពាង់។ ខាន់​ពាង់​ឞ្រោៈ​គ្លាត់​រ៝ៈ​ឞ្រី​ផេនីស  នទ្រែល​មា​រ៝ៈ​ឞ្រី​ឆាមារី ។ អាប់​នតុក​ខាន់​ពាង់​ម៝ប់​ផូង​ញឆីង ខាន់​ពាង់​មឞើស​ងក៝ច​ទឹង​លែៈ​នាវ​ផូង​អី​មោ​ទី​ផូង​អីឆ្រាអែល ​លែៈ​ឆឹត​ញឆីង​មា​ឞ្រាស​យេឆូ ។ នាវ​អី​នៃ​ជាន​អ៝ន់​ទឹង​លែៈ​ផូង​ញឆីង​គែស​នាវ​រាម់​មអាក​ហោ​ងាន់។ 
ត៝ត់​តា​ប៝ន​យេរូឆាលឹម ​រី ផូង​អី​ញឆីង​មា​ឞ្រាស​ក្រីស  មពោល​កោរាញ​អ៝ស​ម៝ន នទ្រែល​មា​ផូង​កោរាញ​ផូង​ញឆីង​រាន​វើត​ទើន​ខាន់​ពាង់​ទាទេ។ ជេសរី​ខាន់​ពាង់​មឞើស​ងក៝ច​មា​ផូង​នៃ​ទឹង​លែៈ​នាវ​កោរាញ​ឞ្រាស​ជាន​តា​អាប់​នតុក​ខាន់​ពាង់​រី​នើស។ 
តា​នៃ​គែស​ផូង​ផារីឆី ​អាបាៈ​ញឆីង​មា​ឞ្រាស​យេឆូ  ខាន់​ពាង់​ទ៝ក់​លាស៖ “អ្យាត់​មា​ផូង​ញឆីង​អី​មោ​ទី​ផូង​អីឆ្រាអែល ​គែស​ក៝ស​នតោ នទ្រែល​មា​ដាៈ​ខាន់​ពាង់​ញអោត​នាវ​វៃ​មោឆេ ​ដ៝ង់”។ 
ជេសរី​មពោល​កោរាញ​អ៝ស​ម៝ន នទ្រែល​មា​ផូង​កោរាញ ខាន់​ពាង់​រាបុន​គៃ​មា​មេត​អ្វាញ់​នាវ​អី​នៃ។ 
ទោល​នៃ​គែស​នាវ​តឹម​ញច្រាៈ​ឞាល់​ទុត​ហោ ជេសរី​ពេត្រោស ​ទ៝ក់ ពាង់​លាស៖ “ហើយ​អ៝ស​នោ ខាន់​មៃ​លែៈ​គឹត​ជេស​កោរាញ​ឞ្រាស​កើយ្ស​គ៝ប់​តា​ផូង​ខាន់​មៃ​លែៈ​ជ៝ៈ​ជេស គៃ​មា​មឞើស​ងក៝ច​នាវ​មហែ​មហាន​អ្វែស​អ៝ន់​មា​ផូង​អី​មោ​ទី​ផូង​អីឆ្រាអែល  អ៝ន់​ខាន់​ពាង់​ឆឹត​ញឆីង។ 
ជេសរី​កោរាញ​ឞ្រាស​អី​គឹត​ទឹង​លែៈ​នូយ្ស​នហ៝ម់​ឞូនុយ្ស ឞ៝ន់​គឹត​ពាង់​រ៝ម​ផូង​អី​នៃ យ៝រ​មា​ឞ៝ន់​លែៈ​ឆៃ​ពាង់​អ៝ន់​ឞ្រាស​ហ្វេង​អ្វែស​អី​ក្ល៝ស​អ្វែស​គុ​តា​ខាន់​ពាង់ កើត​ពាង់​អ៝ន់​មា​ឞ៝ន់​នើស​ដ៝ង់។ 
កោរាញ​ឞ្រាស​មោ​គែស​អោស​កើប​ឞ៝ន់​ដាស​មា​ខាន់​ពាង់​ជេង​អេងៗ។ កោរាញ​ឞ្រាស​ជាន​នូយ្ស​នហ៝ម់​ខាន់​ពាង់​ជេង​ក្ល៝ស​អ្វែស យ៝រ​មា​ខាន់​ពាង់​ញឆីង។ 
អាបៃ​អ្យា​ម៝ស​នាវ​ខាន់​មៃ​អុច​តឹម​រាទ៝ង់​មា​កោរាញ​ឞ្រាស​ដាៈ​ខាន់​ពាង់​ជាន​នទើ​រាលាវ​មា​កោរាញ​ឞ្រាស​នើម​ដាៈ? មើម​ទឹង​ខាន់​មៃ​អុច​អ៝ន់​ផូង​អី​មោ​ទី​ផូង​អីឆ្រាអែល ​អ្យាត់​ទឹង​លែៈ​តឹង​នាវ​វៃ​ឞ៝ន់? ផូង​អូ​ចែ​ឞ៝ន់ នទ្រែល​មា​ឞ៝ន់​នារ​អ្យា​មោ​ទើយ​អ្យាត់​ទឹង​លែៈ​នាវ​វៃ​អី​នៃ​ដ៝ង់។ 
មោ​ទី​អោស! ឞ៝ន់​មោ​គែស​អោស​នាវ​រាក្លាយ្ស​យ៝រ​មា​អ្យាត់​នាវ​វៃ​អី​នៃ ឞ៝ន់​ញឆីង​មើ​គែស​នាវ​រាក្លាយ្ស​យ៝រ​មា​នាវ​អ្វែស​កោរាញ​យេឆូ  ជេសរី​ខាន់​ពាង់​កើត​នទ្រី​ដ៝ង់”។ 
ជេស​ពេត្រោស ​ងើយ​លែៈ​ផូង​គុ​រាបុន​តា​រី​អ្យាត់​ឆាក់​រាត់​ងាត់ ជេសរី​ខាន់​ពាង់​ក៝ប់​អ្យាត់​ពោល  នទ្រែល​មា​បារនាបាស ​មឞើស​ងក៝ច​នាវ​ខ្លៃ​លែៈ​នាវ​ងាន់ នទ្រែល​មា​នាវ​មឞេន​ទឹង​លែៈ​អី​កោរាញ​ឞ្រាស​ជាន​តា​ងក្លាង​ផូង​អី​មោ​ទី​ផូង​អីឆ្រាអែល ​នើស។ 
ជេស​ឞារ​ហៃ​ខាន់​ពាង់​នៃ​ងើយ​លែៈ​ផ្យៅ យាកើ ​លាស​កើត​នអា៖ “ហើយ​អ៝ស​នោ ខាន់​មៃ​អ្យាត់​នាវ​គ៝ប់​ងើយ​ប៝ត់។ 
ពេត្រោស ​លែៈ​មឞើស​ជេស​នទើស​នើស មើម​ទឹង​កោរាញ​ឞ្រាស​ញហើ​នាវ​យោៈ​អ៝ន់​មា​ឞូនុយ្ស​អី​មោ​ទី​ផូង​អីឆ្រាអែល ​ឞោក​ទាក គៃ​មា​កើយ្ស​ឞូនុយ្ស​ឞើស​ខាន់​ពាង់​មា​ជេង​ផូង​ប៝ន​លាន​ពាង់​នើម​ដ៝ង់។ 
នាវ​អ្យា​ជេង​តឹម​ទី​ដាស​នាវ​ទូ​ហ្វេ​ឞូនុយ្ស​នតើយ្ស​នាវ​ងើយ​កោរាញ​ឞ្រាស​កាល់​អែ​នើស​លែៈ​ញចីស​កើត​នអា៖ 
«កោរាញ​ឞ្រាស​លាស៖ «ជេសរី​តៃ​គ៝ប់​ព្លឹ​ដ៝ង់‌ គ៝ប់​រាទ៝ក់​តៃ​ឞ្រី​ទាក​កាដាច់​ដាវីត ​អី​លែៈ​រាល៝ម់‌ គ៝ប់​រាទ៝ក់​ឞ្រី​ទាក​អី​នៃ​តឹម​ឞាន​មា​ឞូ​ងក្រា​ជៃ​អី​លែៈ​រាល៝ម់‌ គ៝ប់​អ៝ន់​ឞ្រី​ទាក​អី​នៃ​ជេង​អ្វែស​តៃ​ទូ​តឹ​ជឹត‌ 
គៃ​មា​អ៝ន់​ផូង​ឞូនុយ្ស​អេង​ជ៝យ​គ៝ប់​ដ៝ង់‌ ឞ៝ល​លាស​ផូង​អី​មោ​ទី​ផូង​អីឆ្រាអែល  ទឹង​លែៈ​ឞូនុយ្ស​អី​គ៝ប់​លែៈ​ក្វាល់​ជេស​ជេង​ប៝ន​លាន​គ៝ប់​នើម​ទាទេ‌ នទ្រី​គ៝ប់​លាស។ 
គ៝ប់​លែៈ​អើម​អ៝ន់​ឞូ​គឹត​នទើ​អ្យា​ឞើស​កាល់​អែ​នើស​ងាន់»»។ 
លាស​នទ្រី​តឹង​មា​នាវ​គ៝ប់​មឹន លើយ​ឞ៝ន់​ជាន​អ៝ន់​គែស​នាវ​ជេរ​មា​ផូង​អី​មោ​ទី​ផូង​អីឆ្រាអែល ​អី​ឆឹត​ញឆីង​មា​កោរាញ​ឞ្រាស។ លើយ​អោស​ឞ៝ន់​អ៝ន់​ខាន់​ពាង់​អ្យាត់​មា​ទឹង​លែៈ​នាវ​វៃ​ឞ៝ន់។ 
អ៝ន់​ឞ៝ន់​ញចីស​ឆ៝ម់បុត​មឞើស​មា​ខាន់​ពាង់​កើត​នអា៖ លើយ​ឆា​នទើ​អោប​ឞ្រាស លើយ​តឹម​ទ៝ង់ លើយ​ឆា​ព្វាច់​មពោមពា​(ឆ្យុម)​អី​មោ​គែស​លាច់​អ៝ន់​លោស​មហាម​លែៈ​តា​ឆាក់ នទ្រែល​មា​លើយ​ឆា​មហាម។ 
អ៝ន់​ឞ៝ន់​ដាៈ​ខាន់​ពាង់​អ្យាត់​នាវ​ដេៈ​អ្យា​ទើម យ៝រ​លាស​ឞើស​កាល់​អែ​នើស​ងាន់ ឞូ​វៃ​មឞើស​ងក៝ច​នាវ​វៃ​មោឆេ ​តា​អាប់​ប៝ន នទ្រែល​មា​ឞូ​រ៝ៈ​ឆ៝ម់បុត​មោឆេ ​អី​គែស​ញចីស​នាវ​វៃ​អី​នៃ​អ៝ន់​មា​ឞូ​តាង់​តា​ញីស​រាបុន​ផូង​អីឆ្រាអែល ​តា​អាប់​នារ​ឆាបាត់ ​អី​នារ​រាលូ​ឞ៝ន់​ដ៝ង់”។ 
ជេសរី​មពោល​កោរាញ​អ៝ស​ម៝ន ផូង​កោរាញ​ផូង​ញឆីង​មា​ឞ្រាស​ក្រីស  នទ្រែល​មា​ទឹង​លែៈ​ផូង​ញឆីង ខាន់​ពាង់​លែៈ​អុច​កើយ្ស​ឞូនុយ្ស​តា​ផូង​ខាន់​ពាង់​រី គៃ​មា​ដាៈ​ហាន់​នទ្រែល​ពោល  នទ្រែល​មា​បារនាបាស ​តា​ប៝ន​អ៝ន់តីយោក ​រី។ ខាន់​ពាង់​កើយ្ស​យូដាស ​ក្វាល់​បារឆាបាស ​ដ៝ង់ នទ្រែល​មា​ឆីលាស ។ ឞារ​ហៃ​ខាន់​ពាង់​នៃ​ជេង​ផូង​កោរាញ​តា​ញីស​ឞ្រាស​តា​ប៝ន​យេរូឆាលឹម ។ 
ជេសរី​ខាន់​ពាង់​នទឹ​ទូ​ឞ្លាស​ឆ៝ម់បុត​អ៝ន់​មា​ឞារ​ហៃ​ខាន់​ពាង់​រី។ តា​ឆ៝ម់បុត​នៃ​ញចីស​លាស​កើត​នអា៖ “ហើយ​អ៝ស​នោ​កោញ​វា ហេន​អ្យា​ជេង​មពោល​កោរាញ​អ៝ស​ម៝ន ជេង​ផូង​កោរាញ​ផូង​ញឆីង​តា​យេរូឆាលឹម ។ ហេន​ជេង​អ៝ស​នោ​ខាន់​អៃ​មៃ​អី​ញចីស​ឆ៝ម់បុត​អ្យា​គៃ​មា​អុច​អោប​នាវ​អ្វែស​លាង់​ផូង​អី​មោ​ទី​ផូង​អីឆ្រាអែល ​អី​ឆឹត​ញឆីង គុ​តា​ប៝ន​អ៝ន់តីយោក  ឞ្រី​ឆីរី  នទ្រែល​មា​ឞ្រី​កីលីកៀ ។ 
ហេន​តាង់​លឺ គែស​ផូង​ញឆីង​អាបាៈ​អី​តាៈ​ឞើស​ប៝ន​យេរូឆាលឹម ​ជាន​អ៝ន់​ផូង​ខាន់​អៃ​មៃ​គែស​នាវ​មឹន​រាវៃ​តា​នូយ្ស​នហ៝ម់ យ៝រ​មា​តាង់​នាវ​ខាន់​ពាង់​នៃ​លាស។ ខាន់​ពាង់​អី​នៃ​ហេន​មោ​គែស​អោស​ដាៈ។ 
កើត​នទ្រី​ហេន​លែៈ​តឹម​ទី​ទូ​នតោរ​នាវ កើយ្ស​ឞូនុយ្ស​តា​ផូង​ហេន គៃ​មា​ដាៈ​ខាន់​ពាង់​ហាន់​ម៝ប់​ខាន់​អៃ​មៃ នទ្រែល​មា​ពោល  នទ្រែល​បារនាបាស ។ ពោល  នទ្រែល​មា​បារនាបាស ​អ្យា​អី​ហេន​រ៝ង់​ហោ​ងាន់។ 
ឞារ​ហៃ​ខាន់​ពាង់​អ្យា​លែៈ​ឞើយ​មា​ខឹត​ឆាក់ ជាន​ការ​មា​កោរាញ​យេឆូ​ក្រីស ។ 
ហេន​ញជ្វាល់​យូដាស  នទ្រែល​មា​ឆីលាស  គៃ​មា​ខាន់​ពាង់​មឞើស​ងក៝ច​មា​មឞូង​ខាន់​ពាង់​នើម​នាវ​អី​លែៈ​គែស​ញចីស​អ្យា​អ៝ន់​ខាន់​អៃ​មៃ​មា​តាង់​ដ៝ង់។ 
ឞ្រាស​ហ្វេង​អ្វែស​អី​ក្ល៝ស​អ្វែស នទ្រែល​មា​ផូង​ហេន​មឹន​អុច​អ៝ន់​ខាន់​អៃ​មៃ​ទែរ​ទឹង​លែៈ​នទើ​អ្យា​ទើម៖ វែរ​លើយ​ឆា​ព្វាច់​អោប​ឞ្រាស វែរ​លើយ​ឆា​មហាម វែរ​លើយ​ឆា​ព្វាច់​មពោមពា​(ឆ្យុម)​អី​មោ​គែស​លាច់​អ៝ន់​លោស​មហាម​លែៈ​តា​ឆាក់ វែរ​លើយ​តឹម​ទ៝ង់។ មោ​ទី​អោស​លាស​ហេន​ឆ៝ៈ​ដ៝ង់​នាវ​វៃ​អេង​ជឹត​ដាៈ​ខាន់​អៃ​មៃ​ញអោត។ លាស​ខាន់​អៃ​មៃ​ទែរ​លែៈ​នទើ​អ្យា​ជេង​អ្វែស​ងាន់។ ទាន់​នាវ​គុ​ងាវ​ខាន់​អៃ​មៃ​អ៝ន់​គែស​នាវ​ដាប់​មពាន់ ទាន់​លែៈ​ទុត​អ្យា”។ 
ជេស​ខាន់​ពាង់​តឹម​នតិញ​ឞាល់ ខាន់​ពាង់​ហាន់​ត៝ត់​តា​ប៝ន​អ៝ន់តីយោក  ជេសរី​រាគូម​ទឹង​លែៈ​ផូង​ញឆីង នទឹ​ឆ៝ម់បុត​អី​នៃ​មា​ខាន់​ពាង់។ 
ជេស​រ៝ៈ​ឆ៝ម់បុត​នៃ ទឹង​លែៈ​ខាន់​ពាង់​រាម់​មអាក​ទាទេ យ៝រ​លាស​តា​ឆ៝ម់បុត​នៃ​គែស​ងើយ​នហាវ​នូយ្ស​នហ៝ម់​ខាន់​ពាង់។ 
យូដាស  នទ្រែល​មា​ឆីលាស ​ជេង​ឞូនុយ្ស​នតើយ្ស​នាវ​ងើយ​កោរាញ​ឞ្រាស ខាន់​ពាង់​នតី​អ៝ក់​ងាន់​គៃ​មា​នហាវ​នូយ្ស​នហ៝ម់​ផូង​ញឆីង នទ្រែល​មា​អ៝ន់​ញអោត​ន៝ប់​នាវ​ញឆីង។ 
ត៝ត់​ជ៝ៈ​ឞើស​កើយ​នៃ ផូង​ញឆីង​អ៝ន់​ខាន់​ពាង់​ព្លឹ​ឆឹត​តៃ​តា​នតុក​ផូង​កោរាញ​ផូង​ញឆីង​តា​ប៝ន​យេរូឆាលឹម ​អី​ដាៈ​ខាន់​ពាង់​ហាន់​រី​នើស​មា​នាវ​ដាប់​មពាន់។ 
យើន​មា​ឆីលាស ​ហោម​អែ​អុច​គុ​តៃ​តា​នតុក​ប៝ន​នៃ។ 
ល៝ង់​ពោល  នទ្រែល​មា​បារនាបាស  ខាន់​ពាង់​ហោម​គុ​តា​ប៝ន​អ៝ន់តីយោក ​នៃ​ដ៝ង់ ខាន់​ពាង់​នតី នហ៝​មា​មឞើស​ងក៝ច​នាវ​មហែ​មហាន​អ្វែស​កោរាញ​យេឆូ  នទ្រែល​មា​គែស​ឞូនុយ្ស​នតី​អាបាៈ​អ៝ក់​ដ៝ង់។ 
ជ៝ៈ​នារ​ឞើស​កើយ​នៃ ពោល ​លាស​មា​បារនាបាស ៖ “ហោៈ ឞ៝ន់​ព្លឹ​អោប​នាវ​អ្វែស​លាង់​អ៝ស​នោ​រ៝ៈ​ប៝ន​អី​ឞ៝ន់​លែៈ​ជេស​មឞើស​ងក៝ច​នាវ​កោរាញ​យេឆូ ​នើស គៃ​មា​គឹត​មើម​ខាន់​ពាង់​អាបៃ​អ្យា”។ 
បារនាបាស ​អុច​ជាៈ​យោហាន ​ក្វាល់​មារកោស  ហាន់​នទ្រែល​ខាន់​ពាង់‌ 
យើន​មា​ពោល ​មោ​អុច​អោស​រ៝ម​ពាង់ យ៝រ​លាស​អា​ល៝រ​នើស​ទោល​គុ​តា​ឞ្រី​ពាមផីលៀ ​ពាង់​នត្លើយ​ខាន់​ពាង់ មោ​អុច​អោស​ហាន់​ជាន​ការ​នទ្រែល​ខាន់​ពាង់​ជឹត។ 
ជេសរី​ឞារ​ហៃ​ខាន់​ពាង់​រី ជេង​គែស​នាវ​មឹន​តឹម​រាទ៝ង់​ឞាល់​ទុត​ហោ នហ៝​មា​ត៝ត់​តឹម​តែង​ឞាល់។ បារនាបាស ​ជាៈ​មារកោស ​ហាន់​នទ្រែល​ពាង់ ជេសរី​ខាន់​ពាង់​ជុរ​ញច៝​ទូក​ហាន់​ជឹត​គោល​ទាក​កីព្រ៝ស ។ 
ល៝ង់​ពោល ​រី ពាង់​កើយ្ស​ឆីលាស ​ហាន់​នទ្រែល​ពាង់។ ជេស​ផូង​ញឆីង​ទាន់​នាវ​អ្វែស​កោរាញ​ឞ្រាស​អ៝ន់​មា​ខាន់​ពាង់ ជេសរី​ខាន់​ពាង់​លោស​ឞើស​ប៝ន​នៃ។ 
ខាន់​ពាង់​ហាន់​គ្លាត់​រ៝ៈ​ឞ្រី​ឆីរី  នទ្រែល​មា​ឞ្រី​កីលីកៀ  នហ៝​មា​នតី​តា​ផូង​ញឆីង​មា​ឞ្រាស​ក្រីស ​រ៝ៈ​នតុក​អេងៗ​អ៝ន់​ញអោត​ន៝ប់​នាវ​ញឆីង។ 
