﻿កោរាញ​អ៝ស​ម៝ន.
4.
ទោល​ពេត្រោស ​នទ្រែល​យោហាន ​ហោម​អែ​ងើយ​មា​ផូង​ប៝ន​លាន ជេសរី​គែស​មពោល​កោរាញ​ជាន​ឞ្រាស មពោល​ឆាដោឆី  នទ្រែល​មា​អី​កោរាញ​តាហែន​ញីស​ជាន​ឞ្រាស​ហាន់​ត៝ត់​តា​នៃ។ 
ខាន់​ពាង់​ជី​នូយ្ស​ហោ​ងាន់​មា​ឞារ​ហៃ​កោរាញ​អ៝ស​ម៝ន​នៃ ឆៃ​ខាន់​ពាង់​នតុម​នតី​ផូង​ប៝ន​លាន​មា​ឞ្រាស​យេឆូ ​មឞើស​មា​ឞូ​លាស៖ ឞូនុយ្ស​ខឹត​ហោម​ទ៝ក់​រេស​ដ៝ង់​យ៝រ​មា​លែៈ​គែស​ឞ្រាស​យេឆូ ​ខឹត​ទ៝ក់​រេស។ 
ជេសរី​ខាន់​ពាង់​ញុប​ឞារ​ហៃ​កោរាញ​អ៝ស​ម៝ន​នៃ​ក្រុង​តា​ត្រោម​នទ្រូង​ទូ​នាង់​រាអាង យ៝រ​លាស​នោក​នៃ​ឞ្រី​លែៈ​អុច​ង៝​មោ​ហោម​អោស​ឞ្លាវ​ផាត​ទោយ្ស។ 
យើន​មា​អ៝ក់​ងាន់​ឞូ​ឆឹត​ញឆីង​មា​ឞ្រាស​យេឆូ  ឞូនុយ្ស​អី​តាង់​នាវ​កោរាញ​អ៝ស​ម៝ន​ងើយ​នៃ។ ឞូនុយ្ស​អី​ញឆីង​មា​ឞ្រាស​យេឆូ ​អាបៃ​អ្យា ទឹង​លែៈ​ឞូ​ក្លោ​ក្លាប់​លាស​គែស ៥០០០ នុយ្ស ជេសរី​គែស​ឞូ​អូរ​ក៝ន​ឆែ​ដ៝ង់។ 
ត៝ត់​អោយ​តៃ​រី គែស​មពោល​កោរាញ​ជាន​ឞ្រាស ផូង​នើម​នតី​នាវ​វៃ​ផូង​អីឆ្រាអែល  នទ្រែល​មា​មពោល​កោរាញ​អាបាៈ​អេង​ជឹត ខាន់​ពាង់​វាច់​រាបុន​ទូ​នតុក​តា​ប៝ន​យេរូឆាលឹម ។ 
តា​នៃ​គែស​កោរាញ​ជាន​ឞ្រាស​រាញា​អានាស  រាញា​កៃផាស  រាញា​យោហាន  រាញា​អាលេកឆាន់ត្រុស  នទ្រែល​មា​លែៈ​រានាក់​វ៝ល់​មពោល​កោរាញ​ជាន​ឞ្រាស​លាប់​រាបុន​នទ្រែល​តា​រី​ដ៝ង់។ 
ខាន់​ពាង់​ដាៈ​ឞូ​លែវ​ឞារ​ហៃ​កោរាញ​អ៝ស​ម៝ន​នៃ​គុ​តា​ងក្លាង​ងគូល​រី ជេសរី​អោប​ខាន់​ពាង់៖ “ឞើស​តាៈ​នាវ​ទើយ​ខាន់​មៃ​ជាន​ការ​អី​នៃ​មេស? ឞូ​ម៝ស​អ៝ន់​ខាន់​មៃ​ជាន​ការ​អី​នៃ?” 
ឞ្រាស​ហ្វេង​អ្វែស​អី​ក្ល៝ស​អ្វែស​គុ​តា​ពេត្រោស  អ៝ន់​ពាង់​ងើយ​កើត​នអា៖ “ទាន់​កោស​មឞាស​មា​កោរាញ​ឞ្រី​យូដា  នទ្រែល​មា​ទឹង​លែៈ​មពោល​កោរាញ​អេង​ជឹត។ 
នារ​អ្យា​ខាន់​មៃ​អោប​ហេន​មា​នទើ​អ្វែស​ហេន​ជាន​មា​ទូ​ហ្វេ​ឞូនុយ្ស​រាវែន​អ្យា​ឞើស​តាៈ​នាវ​ទើយ។ 
ទាន់​មា​ខាន់​មៃ នទ្រែល​មា​ទឹង​លែៈ​ប៝ន​លាន​ផូង​អីឆ្រាអែល ​អ៝ន់​គឹត​មា​នាវ​អ្យា៖ ឞូ​ក្លោ​អី​ទ៝ក់​ឞើស​នាប់​ខាន់​មៃ​អ្យា​ពាង់​គែស​អ្វែស​ឆាក់​ជាន់ នាវ​ទើយ​អី​នៃ​តាៈ​ឞើស​កោរាញ​យេឆូ​ក្រីស ​ប៝ន​នាឆារែត  អី​ខាន់​មៃ​លែៈ​ងខឹត​តា​ឆី​តឹម​រាកាង់​នើស យើន​មា​កោរាញ​ឞ្រាស​រាក្លាយ្ស​អ៝ន់​ពាង់​ទ៝ក់​រេស​ដ៝ង់។ 
តា​នាវ​កោរាញ​ឞ្រាស​ងើយ​លែៈ​គែស​ញចីស​កើត​នអា៖ «លុ​ឞ្ល៝ន​ង្វាយ​អឹ​អី​ខាន់​មៃ​អី​ឞូនុយ្ស​ឞ្លាវ​ជាន​ជៃ​លែៈ​មអារ់​លើយ‌ យើន​មា​លុ​ឞ្ល៝ន​អី​នៃ​ជេង​លុ​ឞ្ល៝ន​ទុត​ន៝ប់​ខ្លៃ​រាលាវ​ឞូ​ច្រាវ​មា​ជាន​ជៃ»។ កោរាញ​យេឆូ ​ជេង​លុ​ឞ្ល៝ន​អី​នៃ ជេសរី​ខាន់​មៃ​ជេង​ឞូនុយ្ស​ឞ្លាវ​ជាន​ជៃ​អី​នៃ។ 
មោ​ហោម​អោស​គែស​ឞូនុយ្ស​អេង​ជឹត​មា​ទើយ​រាក្លាយ្ស​ឞូនុយ្ស​តា​នែស​នតូ​អ្យា មោ​ហោម​អោស​គែស​ឞូនុយ្ស​អេង​ជឹត​កោរាញ​ឞ្រាស​អ៝ន់​មា​ឞូនុយ្ស​គៃ​មា​រាក្លាយ្ស​ឞ៝ន់”។ 
ឆៃ​ពេត្រោស ​នទ្រែល​យោហាន ​គែស​នូយ្ស​នហ៝ម់​ឞាញ់​ងើយ​កើត​នៃ ខាន់​ពាង់​មោ​វ៝ត់​អោស​នទ្រ៝ត់​ហីស​រាហ៝ល់​តា​នូយ្ស​នហ៝ម់​ងាន់ យ៝រ​លាស​ឞូ​គឹត​ឞារ​ហៃ​ខាន់​ពាង់​នៃ​ជេង​ឞូនុយ្ស​ប៝ន​លាន​ទើម មោ​អោស​ព្រ៝ត​លាប់​នតី។ យើន​មា​ឞូ​គឹត​ខាន់​ពាង់​នើស​វៃ​គុ​នទ្រែល​ឞ្រាស​យេឆូ ។ 
ឞូ​ជ៝យ​នាវ​មា​អើស​មោ​ហោម​គែស​អោស យ៝រ​លាស​ឆៃ​ឞូនុយ្ស​រាវែន​អី​លែៈ​ឞាស​រី​នើស​ទ៝ក់​នទ្រែល​តា​រី​ដ៝ង់។ 
ជេសរី​ឞូ​ដាៈ​ខាន់​ពាង់​ពែ​នុយ្ស​នៃ​លោស​ឞើស​នតុក​ផាត​ទោយ្ស​នៃ​ទូ​នទ៝ម់ គៃ​មា​តឹម​ញច្រាៈ​នាវ។ 
ផូង​កោរាញ​អី​នៃ​លាស​កើត​នអា៖ “មើម​ឞ៝ន់​ជាន​មា​ឞារ​ហៃ​ឞូនុយ្ស​នៃ? ទឹង​លែៈ​ប៝ន​លាន​តា​ប៝ន​យេរូឆាលឹម ​អ្យា​លែៈ​ឞូ​គឹត​នហេល​ងាន់​នាវ​ខ្លៃ​ខាន់​ពាង់​ជាន​នៃ​លែៈ​នាវ​ងាន់ ឞ៝ន់​មោ​ហោម​អោស​ទើយ​រាលាច់​ដ៝ង់។ 
គៃ​មា​លើយ​អ៝ន់​នាវ​អ្យា​តាង់​ត៝ត់​មា​ឞូនុយ្ស​អា​អេង​ដ៝ង់ លាស​នទ្រី​អ៝ន់​ឞ៝ន់​ឞ្វៃ​មឞ្រាម​លើយ​ហោម​អ៝ន់​ខាន់​ពាង់​មឞើស​មា​យេឆូ ​នៃ​ជឹត”។ 
ជេសរី​ក្វាល់​ឞារ​ហៃ​ខាន់​ពាង់​នៃ​លាប់ ឞ្វៃ​មោ​អ៝ន់​ខាន់​ពាង់​មឞើស​ងក៝ច នតុម​នតី​ឞូ​មា​ឞ្រាស​យេឆូ  ឞ្វៃ​ទុត​ហោ​រ៝។ 
ជេសរី​ពេត្រោស ​នទ្រែល​យោហាន ​អើស​មា​ខាន់​ពាង់៖ “ល៝ង់​ខាន់​មៃ​មឹន​ហែស ម៝ស​នាវ​អី​ទី​តា​នាប់​មាត់​កោរាញ​ឞ្រាស៖ អ៝ន់​ហេន​អ្យាត់​តឹង​នាវ​ខាន់​មៃ មោ​លាស​អ្យាត់​តឹង​នាវ​កោរាញ​ឞ្រាស? 
ហេន​មោ​ឞ្លាវ​អោស​គុ​អ្យាត់​ឆាក់​ហ៝ៈ​នាវ​អី​ហេន​ឆៃ​ហេន​តាង់​នៃ”។ 
ឞូ​ជ៝យ​នាវ​មា​តេៈ​ទោយ្ស​មោ​ឆៃ​អោស យ៝រ​លាស​លែៈ​ប៝ន​លាន​អី​គុ​តា​រី​រានេ​កោរាញ​ឞ្រាស​ទាទេ​យ៝រ​មា​ឆៃ​នាវ​អី​នៃ។ ឞូ​ក្លាច​ផូង​ប៝ន​លាន​ជាន​នាវ​អុស​អាស កើត​នទ្រី​ឞូ​ទែ​ឞ្វៃ​មឞ្រាម​ខាន់​ពាង់​ទូ​តឹ​ជឹត​ទើម ជេសរី​បើក​អ៝ន់​ឆឹត។ 
ឞូនុយ្ស​អី​ឞាស​យ៝រ​មា​នាវ​ទើយ​លែៈ​នាវ​នៃ ពាង់​លែៈ​រាលាវ ៤០ នាម់។ 
ជេស​ឞូ​បើក​ខាន់​ពាង់​នៃ ពេត្រោស ​នទ្រែល​យោហាន  ហាន់​ម៝ប់​តា​មពោល​ខាន់​ពាង់​នើម មឞើស​ងក៝ច​អី​នាវ​មពោល​កោរាញ​ជាន​ឞ្រាស នទ្រែល​មា​ផូង​កោរាញ​អេង​ជឹត​អី​ឞ្វៃ​ខាន់​ពាង់​រី​នើស។ 
ជេស​មពោល​ខាន់​ពាង់​តាង់​កើត​នៃ ខាន់​ពាង់​មឞើស​ឆើម​ក្វាល់​កោរាញ​ឞ្រាស​ទ្រើវ​ទូ​នតោរ​នាវ៖ “ហើយ​កោរាញ​ឞ្រាស មៃ​នើម​ញជេង​ត្រោក ញជេង​នែស​នតូ ញជេង​ទាក​វាច់​ទាក​វារ់ នទ្រែល​មា​ទឹង​លែៈ​នទើ​អី​គុ​តា​នៃ​ដ៝ង់។ 
លែៈ​មៃ​ងើយ​មា​ឞ្រាស​ហ្វេង​អ្វែស​អី​ក្ល៝ស​អ្វែស​តា​កាដាច់​ដាវីត ​ហេន​កាល់​អែ​នើស​ជេង​ឞូនុយ្ស​ជាន​ការ​មា​មៃមៃ​លាស​អ៝ន់​ពាង់​ញចីស​កើត​នអា៖ «មើម​ទឹង​ផូង​អី​មោ​ទី​ផូង​អីឆ្រាអែល  ឞូ​ជី​នូយ្ស​ទុត​ហោ? មើម​ទឹង​ផូង​អី​នៃ​អុច​តឹម​លើស​មា​នទើ​កោរាញ​ឞ្រាស​លែៈ​អុច? ខាន់​ពាង់​មោ​អោស​ឞ្លាវ​ជាន​មា​នទើ​អី​នៃ។ 
មពោល​កាដាច់​តា​នែស​នតូ​អ្យា‌ នទ្រែល​មា​មពោល​កោរាញ‌ ឞូ​តឹម​ទី​នាវ​តឹម​រាទ៝ង់​ដាស​កោរាញ​ឞ្រាស នទ្រែល​មា​ដាស​ឞ្រាស​ក្រីស ​អី​លែៈ​កោរាញ​ឞ្រាស​នើម​កើយ្ស​មា​ជេង​កោរាញ»។ 
នហេល​នានេៈ​ងាន់​តា​ប៝ន​អ្យា កាដាច់​ហេរោត  នទ្រែល​មា​កោរាញ​ក្វ៝ង់​ពុនតេស-​ពីលាត  នអ៝ប់​មា​មពោល​មោ​ទី​ផូង​អីឆ្រាអែល  នទ្រែល​មា​មពោល​ប៝ន​លាន​ផូង​អីឆ្រាអែល  នោក​នៃ​នើស​ខាន់​ពាង់​តឹម​ទី​នាវ គៃ​មា​ងខឹត​កោរាញ​យេឆូ  អី​ឞូនុយ្ស​ក្ល៝ស​អ្វែស​ជាន​ការ​មា​មៃ អី​មៃ​លែៈ​កើយ្ស​អ៝ន់​ជេង​ឞ្រាស​ក្រីស ។ 
មៃ​គែស​នាវ​ទើយ​មា​ខាន់​ពាង់​ទឹង​លែៈ នទ្រី​ខាន់​ពាង់​អី​នៃ​លែវ​ឞាល់​ជាន​កើត​លែៈ​នទើ​អី​មៃ​លែៈ​អុច​ខាន់​ពាង់​ជាន​ឞើស​កាល់​អែ​នើស​ទើម។ 
អាបៃ​អ្យា ហើយ​កោរាញ​ឞ្រាស ទាន់​មៃ​អ្វាញ់​លែៈ​នាវ​ឞូ​មឞ្រាម​នៃ ជេសរី​ទាន់​មៃ​អ៝ន់​មា​ហេន​អី​ឞូនុយ្ស​ជាន​ការ​មា​មៃ អ៝ន់​ហេន​នូយ្ស​នហ៝ម់​ឞាញ់​មឞើស​ងក៝ច​នាវ​មៃ​ងើយ។ 
ទាន់​មៃ​ញហើ​នាវ​ទើយ​មៃ​អ៝ន់​ហេន​ជាន​ឞាស​នាវ​ជី​ឞូ នទ្រែល​មា​អ៝ន់​ហេន​ជាន​នទើ​លែៈ​នាវ​អេងៗ។ ទាន់​មៃ​ជាន​នទើ​អី​នៃ​យ៝រ​មា​កោរាញ​យេឆូ ​អី​ឞូនុយ្ស​ក្ល៝ស​អ្វែស​ជាន​ការ​មា​មៃ​បាបើ”។ 
លោច​ជេស​នាវ​ខាន់​ពាង់​មឞើស​ឆើម​រី តា​ជៃ​ខាន់​ពាង់​គុ​រាបុន​នៃ​គែស​ងគើ នហ៝​មា​ឞ្រាស​ហ្វេង​អ្វែស​អី​ក្ល៝ស​អ្វែស​គុ​តា​ខាន់​ពាង់​ទាទេ​ងាន់។ ជេសរី​ខាន់​ពាង់​គែស​នូយ្ស​នហ៝ម់​ឞាញ់​ងាន់ គៃ​មា​មឞើស​ងក៝ច​នាវ​កោរាញ​ឞ្រាស។ 
ជេសរី​ទឹង​លែៈ​ផូង​ញឆីង ខាន់​ពាង់​គែស​នូយ្ស​នហ៝ម់​នាវ​មឹន​ទូ​នតោរ​នាវ​ទើម មោ​គែស​អោស​ទូ​ហ្វេ​ឞូនុយ្ស​អ្វាញ់​ទ្រាប់​នទើ​ពាង់​គែស ព្រាប់​ទ៝ង់​មា​ឆាក់​ពាង់​នើម​ទើម។ ខាន់​ពាង់​ឆ៝ៈ​លែៈ​ទ្រាប់​នទើ​គែស​នៃ​ទ៝ង់​នទ្រែល​ទាទេ។ 
មពោល​កោរាញ​អ៝ស​ម៝ន​គែស​នាវ​ឞ្រាស​ងាន់ ខាន់​ពាង់​លែវ​ឞាល់​មឞើស​ងក៝ច​ឞ្រាស​យេឆូ ​ទ៝ក់​រេស។ កោរាញ​ឞ្រាស​អ៝ន់​នាវ​អ្វែស​លាង់​អ៝ក់​ងាន់​មា​ខាន់​ពាង់។ 
លែៈ​មពោល​អី​នៃ​មោ​គែស​អោស​ទូ​ហ្វេ​គុ​អ៝ត់​ជី​ង៝ត យ៝រ​លាស​ឞូ​ម៝ស​អី​គែស​នែស គែស​ជៃ ខាន់​ពាង់​តាច់​លើយ ជេសរី​លែវ​ព្រាក់​អី​នៃ 
អ៝ន់​តា​មពោល​កោរាញ​អ៝ស​ម៝ន​រី។ ផូង​ញឆីង​ឆ៝ៈ​ព្រាក់​អី​នៃ​តឹម​ពាៈ​ម៝ស​នទើ​ខាន់​ពាង់​មោ​គែស​មោ​ត៝ង់។ 
គែស​ទូ​ហ្វេ​ឞូ​ក្លោ​រាញា​យោឆែប  មពោល​លេវី  តាៈ​ឞើស​គោល​ទាក​កីព្រ៝ស  មពោល​កោរាញ​អ៝ស​ម៝ន​រាញា​ពាង់​បារនាបាស  រាញា​អី​នៃ​គែស​នាវ​ខ្លៃ​លាស «ឞូនុយ្ស​កើល​ឞ៝ញ​លែង​ឞូ»។ 
ពាង់​អី​នៃ​គែស​នែស​ដ៝ង់ ជេសរី​ពាង់​តាច់​នែស​ពាង់​នើម ឆ៝ៈ​ព្រាក់​អ៝ន់​តា​មពោល​កោរាញ​អ៝ស​ម៝ន​រី។ 
