﻿មាថាយ.
7.
“ខាន់​អៃ​មៃ​លើយ​អោស​អ្វាញ់​នាវ​តីស​ឞូ គៃ​មា​លើយ​អ៝ន់​កោរាញ​ឞ្រាស​អ្វាញ់​នាវ​តីស​ខាន់​អៃ​មៃ។ 
លាស​ខាន់​អៃ​មៃ​អ្វាញ់​នាវ​តីស​ឞូ កោរាញ​ឞ្រាស​អ្វាញ់​នាវ​តីស​ខាន់​អៃ​មៃ​កើត​នៃ​ដ៝ង់។ កោរាញ​ឞ្រាស​រាញ្វែស​អ៝ន់​មា​ខាន់​អៃ​មៃ តឹង​ខាន់​អៃ​មៃ​រាញ្វែស​អ៝ន់​ឞូ​នៃ​ដ៝ង់។ 
នាវ​តីស​ឞូនុយ្ស​ជេង​តឹម​ឞាន​មា​នទើ​តា​ត្រោម​មាត់។ មើម​ខាន់​អៃ​មៃ​អ្វាញ់​ឆៃ​នទ្រុយ្ស​តា​ត្រោម​មាត់​អ៝ស​នោ​ខាន់​អៃ​មៃ​ទើម តីស​មា​អ្វាញ់​មោ​អោស​ឆៃ​ម៝ង់​រាលាត​តា​ត្រោម​មាត់​ខាន់​អៃ​មៃ​នើម? 
លាស​គែស​ម៝ង់​រាលាត​តា​ត្រោម​មាត់​ខាន់​អៃ​មៃ​នើម មើម​ទើយ​លាស​មា​អ៝ស​នោ៖ «អ៝ន់​គ៝ប់​ងខែៈ​នទ្រុយ្ស​នៃ»? 
អើ​ឞូនុយ្ស​មរោស! អ៝ន់​ឆ៝ៈ​រាលាត​តា​ត្រោម​មាត់​ខាន់​អៃ​មៃ​នើម​នៃ​ល៝រ​ប៝ត់ រី​មើ​ឆៃ​នហេល​នទ្រុយ្ស​តា​ត្រោម​មាត់​អ៝ស​នោ ទឹង​ឞ្លាវ​ងខែៈ​នទ្រុយ្ស​នៃ”។ 
“លើយ​អោស​មអារ់​នទើ​ក្ល៝ស​អ្វែស​អ៝ន់​មា​ឆ៝ មោ​ទើយ​មអារ់​អ៝ន់​មា​ឆុរ​ដ៝ង់ ក្លាច​លាស​ពាង់​ជ៝ត​រាប្លាច ជេសរី​រាទោស​ព្លឹ​កាប់​ខាន់​អៃ​មៃ​នើម។ កើត​នទ្រី​ដ៝ង់​អ៝ន់​គឹត​មើម​ទឹង​នតី​នាវ​កោរាញ​ឞ្រាស​អ៝ន់​មា​ឞូនុយ្ស​អី​មោ​អុច​អ្យាត់”។ 
“ទាន់​មរ៝​មរាង់​ហ៝ម់​មា​កោរាញ​ឞ្រាស​ទឹង​ពាង់​អ៝ន់​មា​ខាន់​អៃ​មៃ។ ជ៝យ​មរ៝​មរាង់​ហ៝ម់​ទឹង​ឆៃ។ ក្វាល់ ​មរ៝​មរាង់​ហ៝ម់​ឞើស​ទីស​មពោង​ទឹង​កោរាញ​ឞ្រាស​ពើក​អ៝ន់​មា​ខាន់​អៃ​មៃ​រ៝។ 
យ៝រ​លាស​ឞូ​ម៝ស​ទាន់ មរា​គែស ឞូ​ម៝ស​ជ៝យ​មរា​ឆៃ ជេសរី​ឞូ​ម៝ស​អី​ក្វាល់​ឞើស​ទីស​មពោង មរា​ពើក​អ៝ន់​មា​ពាង់។ 
តា​មពោល​ខាន់​អៃ​មៃ​វៃ​គែស​ដ៝ង់ លាស​ក៝ន​ទាន់​ព្យាង់​អ៝ន់​ងខើង​លុ​មា​ពាង់​ច្រាវ? 
លាស​ក៝ន​ទាន់​កា ឞឹ​ពាង់​អ៝ន់​ងខើង​ឞេស​គែស​កាច់​មា​ពាង់​ច្រាវ​ឞើស? 
ឞ៝ល​លាស​ខាន់​អៃ​មៃ​ជេង​ឞូនុយ្ស​តីស​កាដោយ ខាន់​អៃ​មៃ​ហោម​ឞ្លាវ​អ៝ន់​នទើ​អ្វែស​មា​ក៝ន​ខាន់​អៃ​មៃ​ដ៝ង់។ លាស​នទ្រី​កោរាញ​ឞ្រាស​ឞឹ​ខាន់​អៃ​មៃ​អី​គុ​តា​កាលើ​ត្រោក​រាលាវ​ឞើស​នៃ​អ៝ន់​នទើ​អ្វែស​មា​ឞូ​ម៝ស​ទាន់​ឞើស​ពាង់”។ 
“តា​អាប់​នតីល​នទើ ម៝ស​នាវ​អុច​អ៝ន់​ឞូ​ជាន​មា​ខាន់​អៃ​មៃ អ៝ន់​ខាន់​អៃ​មៃ​ជាន​មា​ឞូ​ល៝រ។ នាវ​អី​នៃ​ជេង​តឹម​ទី​ដាស​នាវ​វៃ នទ្រែល​មា​នាវ​ឞូនុយ្ស​នតើយ្ស​នាវ​ងើយ​កោរាញ​ឞ្រាស​លែៈ​ញចីស។ 
អ៝ន់​ខាន់​អៃ​មៃ​លាប់​រ៝ៈ​មពោង​មពេរ​ហ្វេត យ៝រ​លាស​មពោង​មពេរ​អី​ហាន់​តា​នាវ​រ៝ស​ហេង​ហ្វី នទ្រែល​មា​ត្រ៝ង​អី​ញជុន​តា​នាវ​រ៝ស​ហេង​ទើស​ងាន់​មា​ហាន់ គែស​អ៝ក់​ឞូនុយ្ស​លាប់​រ៝ៈ​មពោង​មពេរ​អី​នៃ។ 
យើន​មា​មពោង​មពេរ​អី​ហាន់​តា​នាវ​រេស​នហ៝​រ៝​ហ្វេត នទ្រែល​មា​ត្រ៝ង​អី​ញជុន​តា​នាវ​រេស​នហ៝​រ៝​ជេរ​មា​ហាន់ គែស​ដេៈ​ទើម​ឞូនុយ្ស​ជ៝យ​ឆៃ​ត្រ៝ង​អី​នៃ”។ 
“អ៝ន់​ខាន់​អៃ​មៃ​ញជ្រាង់​ហ៝ម់​មា​ឞូនុយ្ស​នតើយ្ស​ងក្លាៈ​នាវ​ងើយ​កោរាញ​ឞ្រាស។ ខាន់​ពាង់​វាច់​អា​ខាន់​អៃ​មៃ​មលែស អ្វាញ់​តឹម​ឞាន​មា​ឞែ​ឞ្យាប់ យើន​មា​តា​ត្រោម​នូយ្ស​នហ៝ម់​ខាន់​ពាង់​រី​ជាញ​តឹម​ឞាន​មា​ឆ៝​ឞ្រី​ងាន់។ 
ខាន់​អៃ​មៃ​គឹត​នាល់​ខាន់​ពាង់​តាៈ​ឞើស​នទើ​ខាន់​ពាង់​ជាន តឹម​ឞាន​មា​ឞូ​គឹត​នាល់​តើម​ឆី​តាៈ​ឞើស​ព្លៃ​ពាង់។ ឞូ​មោ​ព្រ៝ត​អោស​ពែៈ​ព្លៃ​យុងយារ​ប៝ន មោ​លាស​ពែៈ​ព្លៃ​រាវី ​តាៈ​ឞើស​ពុម​ល៝ក​ដ៝ង់។ 
លាស​នទ្រី​ទឹង​លែៈ​តើម​ឆី​អ្វែស ព្លៃ​ពាង់​អ្វែស យើន​មា​តើម​ឆី​អ្យើស ព្លៃ​ពាង់​អ្យើស​ដ៝ង់។ 
មោ​ព្រ៝ត​គែស​អោស​លាស​តើម​អ្វែស​អី​ព្លៃ​អ្យើស តើម​អ្យើស​អី​ព្លៃ​អ្វែស។ 
ទឹង​លែៈ​តើម​ឆី​ព្លៃ​មោ​អ្វែស ឞូ​កាល់​ពូរ​លើយ​តា​អុញ។ 
លាស​នទ្រី​ទឹង​ខាន់​អៃ​មៃ​ទើយ​គឹត​នាល់​ឞូនុយ្ស​នតើយ្ស​ងក្លាៈ យ៝រ​មា​ឆៃ​នទើ​ពាង់​ជាន”។ 
“ឞូនុយ្ស​ទើយ​លាប់​តា​នាវ​កោរាញ​ឞ្រាស​ម៝ត់​អ្វាញ់ មោ​ទើន​ក្វាល់​គ៝ប់ «អើ​កោរាញ អើ​កោរាញ»​ទើម​អោស។ ពាង់​អី​ជាន​តឹង​កោរាញ​ឞ្រាស​ឞឹ​គ៝ប់​គុ​តា​កាលើ​ត្រោក​អុច ពាង់​អី​នៃ​ទើម​ទើយ​លាប់។ 
តា​នារ​ផាត​ទោយ្ស​ទឹង​លែៈ​ឞូនុយ្ស មរា​គែស​អ៝ក់​ឞូនុយ្ស​លាស​មា​គ៝ប់៖ «អើ​កោរាញ អើ​កោរាញ ហេន​វៃ​នតើយ្ស​នាវ​ងើយ​មៃ ហេន​វៃ​មព្រើស​ឞ្រាស​អ្យើស​មា​រាញា​ឆាក់​មៃ នទ្រែល​មា​អ៝ក់​ងាន់​ហេន​ជាន​នាវ​ខ្លៃ​មា​រាញា​ឆាក់​មៃ»។ 
យើន​មា​តា​នោក​នារ​នៃ​តៃ គ៝ប់​លាស​មា​ឞូនុយ្ស​អី​នៃ៖ «អើ​ផូង​ក្វែ​ផូង​អ្យើស ទូ​ងាយ​ហ៝ម់​ឞើស​គ៝ប់គ៝ប់​មោ​អោស​គឹត​នាល់​ខាន់​អៃ​មៃ»”។ 
“ឞូ​ម៝ស​តាង់​នាវ​គ៝ប់​ងើយ​អ្យា ជេសរី​ជាន​តឹង​កើត ពាង់​អី​នៃ​ជេង​តឹម​ឞាន​មា​ឞូនុយ្ស​ឞ្លាវ​មឹន​ជាន​ជៃ​ពាង់​នើម​តាម់​មែស​កុយ្ស​នតូ​អ៝ន់​ជ្រូ។ 
ឞ៝ល​លាស​គែស​មីស​ក្វ៝ង់ គែស​ទាក​ក្វ៝ង់​រាលាប​ហ៝ច នទ្រែល​មា​គែស​ឆ្យាល​ខោម​អ៝ន់​ងគើ​កាដោយ​ដ៝ង់ ជៃ​អី​នៃ​មោ​អោស​ទើយ​រាល៝ម់ យ៝រ​លាស​មែស​ពាង់​លែៈ​ឞូ​តាម់​អ៝ន់​ន៝ប់។ 
យើន​មា​ឞូ​ម៝ស​លែៈ​តាង់​ជេស​នាវ​គ៝ប់​ងើយ​អ្យា តីស​មា​មោ​អោស​ជាន​តឹង​កើត ពាង់​អី​នៃ​ជេង​តឹម​ឞាន​មា​ឞូនុយ្ស​ម៝ល់​ជាន​ជៃ​ពាង់​នើម​ងគ៝ន់​ទើម​តា​កាលើ​នែស។ 
លាស​គែស​មីស​ក្វ៝ង់ គែស​ទាក​រាលាប​ហ៝ច នទ្រែល​មា​គែស​ឆ្យាល​ខោម​អ៝ន់​ងគើ​កាដោយ​ដ៝ង់ ជៃ​អី​នៃ​រាល៝ម់​អ្យើស​លែៈ​ផ្យៅ​រ៝”។ 
ត៝ត់​មា​លែៈ​ជេស​ឞ្រាស​យេឆូ ​ងើយ​ទឹង​លែៈ​នាវ​អី​នៃ ផូង​ប៝ន​លាន​គុ​អ្យាត់​នទ្រ៝ត់​ហីស​រាហ៝ល់​ងាន់​តាង់​នាវ​ពាង់​នតី​អី​នៃ‌ 
យ៝រ​លាស​នាវ​ពាង់​នតី​នើស​គែស​នាវ​ទើយ​ងាន់ មោ​គែស​អោស​កើត​នើម​នតី​នាវ​វៃ​ផូង​អីឆ្រាអែល ​ខាន់​ពាង់។ 
