﻿មាថាយ.
4.
ជេសរី​ឞ្រាស​ហ្វេង​អ្វែស​លែវ​ឞ្រាស​យេឆូ ​ហាន់​តា​ឞ្រី​រាទាស គៃ​មា​អ៝ន់​ឆាតាង់ ​អី​កោរាញ​មពោល​ឞ្រាស​អ្យើស​នទើម​ពាង់។ 
ឞ្រាស​យេឆូ ​អ៝ត់​ឆោង​ឆា ៤០ នាង់ ៤០ នារ ឞើស​កើយ​នៃ​ពាង់​ជី​ង៝ត​ងាន់​រ៝។ 
ជេសរី​ឆាតាង់ ​អី​ឞូ​ក្វាល់​លាស​«កោរាញ​នទើម»​ដ៝ង់ ហាន់​ទាច់​អា​ពាង់ លាស​មា​ពាង់៖ “លាស​មៃ​ក៝ន​កោរាញ​ឞ្រាស​ងាន់​ងេន ល៝ង់​មៃ​ដាៈ​លុ​អាបាៈ​អ្យា​អ៝ន់​ជេង​នទើ​ឆោង​ឆា!” 
យើន​មា​ឞ្រាស​យេឆូ ​អើស​មា​ពាង់៖ “មោ​អោស។ លែៈ​ឞូ​ញចីស​ជេស​តា​នាវ​កោរាញ​ឞ្រាស​ងើយ៖ «ឞូនុយ្ស​មោ​អោស​រេស​តាៈ​ឞើស​នទើ​ឆោង​ឆា​ទើម‌ រេស​តាៈ​ឞើស​ទឹង​លែៈ​នាវ​ងើយ​លោស​តាៈ​ឞើស​មឞូង​កោរាញ​ឞ្រាស»”។ 
ជេស​ឞើស​នៃ​កោរាញ​មពោល​ឞ្រាស​អ្យើស​អី​នៃ​លែវ​ឞ្រាស​យេឆូ ​លាប់​តា​ប៝ន​ក្វ៝ង់​យេរូឆាលឹម ​អី​ប៝ន​ក្ល៝ស​អ្វែស ជេសរី​អ៝ន់​ពាង់​តា​កាលើ​ច៝រ​ញីស​ជាន​ឞ្រាស​មា​កោរាញ​ឞ្រាស តា​នតុក​អី​ទុត​ព្រេស​នៃ។ 
ពាង់​លាស​មា​ឞ្រាស​យេឆូ ៖ “លាស​មៃ​ក៝ន​កោរាញ​ឞ្រាស​ងាន់​ងេន ល៝ង់​មៃ​ញឆាត់​ជឹត​ទ៝ង់​ឆូ យ៝រ​លាស​លែៈ​ឞូ​ញចីស​ជេស​តា​នាវ​កោរាញ​ឞ្រាស​ងើយ៖ «កោរាញ​ឞ្រាស​ដាៈ​មពោល​តោង​ពារ់​ពាង់​នើម​អ៝ន់​កើល​មៃ» គែស​ញចីស​ដ៝ង់៖ «តី​តោង​ពារ់​ទ្រើ​មៃ‌ មោ​អោស​អ៝ន់​ជ៝ង់​មៃ​គែស​ញចិញ​មា​លុ»”។ 
ឞ្រាស​យេឆូ ​អើស​មា​ពាង់៖ “តា​នាវ​កោរាញ​ឞ្រាស​ងើយ​លែៈ​ញចីស​កើត​នអា៖ «លើយ​អោស​រាល៝ង​នាវ​ទើយ​កោរាញ​ឞ្រាស​អី​ឞ្រាស​ខាន់​អៃ​មៃ​យើក​មឞាស»”។ 
ជេសរី​កោរាញ​មពោល​ឞ្រាស​អ្យើស​អី​នៃ​លែវ​ឞ្រាស​យេឆូ ​ហាវ​តា​កាលើ​យោក​ទុត​ព្រេស ញហើ​អ៝ន់​ពាង់​ឆៃ​ទឹង​លែៈ​ឞ្រី​ទាក​តា​នែស​នតូ​អ្យា នទ្រែល​មា​ទឹង​លែៈ​នទើ​ខ្លៃ​តា​ឞ្រី​ទាក​នៃ។ 
ពាង់​លាស​មា​ឞ្រាស​យេឆូ ៖ “លាស​មៃ​ពាន់​យើក​មឞាស​មា​គ៝ប់ ទឹង​លែៈ​នទើ​អី​នៃ​គ៝ប់​អ៝ន់​មា​មៃ​ម៝ត់​អ្វាញ់​ទាទេ!” 
ឞ្រាស​យេឆូ ​លាស៖ “ហើយ​ឆាតាង់  អ៝ន់​មៃ​ទូ​ហ៝ម់! យ៝រ​លាស​តា​នាវ​កោរាញ​ឞ្រាស​ងើយ​លែៈ​ញចីស​ជេស៖ «ដាៈ​ខាន់​អៃ​មៃ​យើក​មឞាស​មា​កោរាញ​ឞ្រាស​អី​ឞ្រាស​ខាន់​អៃ​មៃ​នើម‌ ជាន​ការ​អ្យាត់​នាវ​ទូ​ហ្វេ​ពាង់​អី​នៃ​ទើម»”។ 
ជេសរី​កោរាញ​មពោល​ឞ្រាស​អ្យើស​អី​នៃ​ទូ​ឞើស​ឞ្រាស​យេឆូ ​នៃ ទោ​មា​គែស​ផូង​តោង​ពារ់​កោរាញ​ឞ្រាស​វាច់​តា​ឞ្រាស​យេឆូ  ឆើម​កើល​ជាន​ការ​អ៝ន់​នទើ​ឆោង​ឆា​មា​ពាង់។ 
ត៝ត់​ឞ្រាស​យេឆូ ​គឹត​យោហាន-​បាប់តែម ​លែៈ​ឞូ​ក្រុង​តា​នទ្រូង ជេសរី​ពាង់​លោស​ឞើស​ឞ្រី​យូដា ​ព្លឹ​គុ​តៃ​តា​ឞ្រី​កាលីលេ ។ 
ពាង់​ហាន់​តា​ប៝ន​នាឆារែត  ជេសរី​ហាន់​គុ​តា​ប៝ន​កាពើនិម ​អី​ទាច់​កេង​ងលៅ​ក្វ៝ង់​កាលីលេ  តា​នហារ់​ឞ្រី​មពោល​ឆាបូលោន  ដាស​មា​ឞ្រី​មពោល​នាប់តាលី ។ ឞារ​មពោល​អី​នៃ​ជេង​មពោល​អីឆ្រាអែល ​តា ១២ មពោល​ខាន់​ពាង់​ដ៝ង់។ 
ពាង់​គុ​តា​នៃ​គៃ​មា​តឹម​ទី​ដាស​នាវ​ងើយ​អេឆាយ ​អី​ឞូនុយ្ស​នតើយ្ស​នាវ​ងើយ​កោរាញ​ឞ្រាស​កាល់​អែ​នើស​លែៈ​ញចីស​ជេស៖ 
«អើ​ឞ្រី​មពោល​ឆាបូលោន  នទ្រែល​មា​ឞ្រី​មពោល​នាប់តាលី  អី​រ៝ៈ​ត្រ៝ង​រ៝ៈ​មែង​ទាក​ងលៅ​ក្វ៝ង់​កាលីលេ  អើ​ឞ្រី​មពែស​កាល់​តី​ទាក​រាលាយ​យោរដាន់  ឞ្រី​កាលីលេ ​នតុក​អ៝ក់​ផូង​អី​មោ​ទី​ផូង​អីឆ្រាអែល ​គុ! 
ផូង​ប៝ន​លាន​តា​នៃ​ខាន់​ពាង់​តឹម​ឞាន​មា​គុ​តា​នាវ​ង៝ ក្លាច​មា​នាវ​ខឹត មោ​គែស​នាវ​រានើម‌ ខាន់​ពាង់​តឹម​ឞាន​មា​ឆៃ​នាវ​អាង​ទុត​ក្វ៝ង់ អាង​ងាន់ អ៝ន់​ខាន់​ពាង់​គែស​នាវ​រានើម​យ៝រ​មា​នទើ​អី​គែស​តា​ឞ្រី​ខាន់​ពាង់»។ 
នតើម​ឞើស​នោក​នៃ​ឞ្រាស​យេឆូ ​មឞើស​ងក៝ច៖ “រាគ៝ល់​ហ៝ម់​នូយ្ស​នហ៝ម់​អ្យើស​ខាន់​អៃ​មៃ យ៝រ​លាស​នាវ​កោរាញ​ឞ្រាស​ម៝ត់​អ្វាញ់​ឞើយ​មា​ត៝ត់​ងាន់​រ៝”។ 
គែស​ទូ​នារ​រី​ឞ្រាស​យេឆូ ​ហាន់​ឞ្រោៈ​រ៝ៈ​មែង​ទាក​ងលៅ​ក្វ៝ង់​កាលីលេ ពាង់​ឆៃ​ឞារ​ហៃ​អ៝ស​នោ​គុ​ឆែង​ជាល​តា​ទាក​នៃ ឆីមោន ​អី​ឞូ​ក្វាល់​ពេត្រោស ​ដ៝ង់ នទ្រែល​មា​អ៝ន់ទ្រេ ។ ឞារ​ហៃ​ខាន់​ពាង់​អី​នៃ​ជេង​ឞូនុយ្ស​ជាន​ការ​វាង់​កា​ទើម។ 
ជេសរី​ឞ្រាស​យេឆូ ​លាស​មា​ខាន់​ពាង់៖ “ហើយ​អ៝ស​នោ ហោៈ​តឹង​គ៝ប់គ៝ប់​អ៝ន់​ខាន់​មៃ​ហាន់​ជ៝យ​ឞូនុយ្ស​អ្យាត់​នាវ​គ៝ប់ តឹម​ឞាន​មា​ឆែង​កា”។ 
ទោ​មា​ឞារ​ហៃ​ខាន់​ពាង់​រី​នត្លើយ​ជាល​ព្រុង​តា​នៃ ជេសរី​តឹង​ឞ្រាស​យេឆូ ​រ៝។ 
ហាន់​ត៝ត់​អា​នាប់​ឞ្រាស​យេឆូ ​ឆៃ​ឞារ​ហៃ​អ៝ស​នោ​អា​អេង​ជឹត យាកើ  នទ្រែល​មា​យោហាន ​អី​ក៝ន​ឆេបេដេ ។ ខាន់​ពាង់​ទោល​គុ​ឆុល​ជាល​តា​ទូក នទ្រែល​មា​អី​ឞឹ​ខាន់​ពាង់​នើម។ ឞ្រាស​យេឆូ ​ក្វាល់​ជាៈ​ឞារ​ហៃ​ខាន់​ពាង់​នៃ​ហាន់​នទ្រែល​ពាង់។ 
ជេសរី​ខាន់​ពាង់​នត្លើយ​ទូក នត្លើយ​ឞឹ​ខាន់​ពាង់​នើម​តា​រី ហាន់​តឹង​ឞ្រាស​យេឆូ ​រ៝។ 
ឞ្រាស​យេឆូ ​ហាន់​លាម​ឞ្រី​កាលីលេ ពាង់​នតី​ផូង​ប៝ន​លាន​តា​ញីស​រាបុន​ផូង​អីឆ្រាអែល ​ខាន់​ពាង់​នើម។ ពាង់​មឞើស​ងក៝ច​នាវ​មហែ​មហាន​អ្វែស​មា​នាវ​កោរាញ​ឞ្រាស​ម៝ត់​អ្វាញ់ ជេសរី​ជាន​ឞាស​ទឹង​លែៈ​នាវ​ជី​អាប់​នតីល។ 
ឞូ​លឺ​ឞ្រាស​យេឆូ ​លាម​ឞ្រី​ឆីរី ​ដ៝ង់​អី​តឹម​ទាច់​មា​ឞ្រី​កាលីលេ ។ ជេសរី​ឞូ​ញជុន​លែវ​ទឹង​លែៈ​ឞូនុយ្ស​អី​គែស​នាវ​ជី​អា​ពាង់ ឞូនុយ្ស​គែស​នាវ​ជី​ក្វែត​អាប់​នតីល ឞូនុយ្ស​ឞ្រាស​អ្យើស​លើស ឞូនុយ្ស​ឞ្រុត នទ្រែល​មា​ឞូនុយ្ស​រាវែន​ជ៝ង់​រាវែន​តី ពាង់​ជាន​ឞាស​ទាទេ។ 
ជេសរី​គែស​ឞូនុយ្ស​ផូង​អ៝ក់​តឹង​ពាង់ ខាន់​ពាង់​តាៈ​ឞើស​ឞ្រី​កាលីលេ  តាៈ​ឞើស​ឞ្រី​ដេកាពោលីស  តាៈ​ឞើស​ប៝ន​ក្វ៝ង់​យេរូឆាលឹម  តាៈ​ឞើស​ឞ្រី​យូដា  នទ្រែល​មា​តាៈ​ឞើស​កាល់​តី​ទាក​រាលាយ​យោរដាន់ ។ 
