﻿MATHIƠ.
16.
Du mơnih Pharisi sơ̆ng Sađuse truh tơnia tô lòng Yàng Jêsu. Buơl guñu yòng Pô brơi buơl guñu 'buh sa nàl-c̆rih mư̆ng lơngì. 
Bloh Pô đờm: “Tŭ glai diơŭ truh, nư̆n buơl guhã đờm lài: ‘Hơrơi pơgi glai-glo rơŭ siàm, kơyoa lơngì mơr-yah.’ 
Lăm glai ờm rìng, buơl guhã đờm: ‘Hơrơi ni rơŭ hũ hơjàn-angĭn, kơyoa lơngì mơr-yah sơ̆ng kơdơ̆r.’ Buơl guhã thơu kràn-kơnăl loh-làng glai-glo pơsơlih, bloh 'buh kràn-kơnăl jiơ̆ng nàl pơto mư̆ng tŭ-hơrơi ơu? 
Jơi-pơtiàn mơsak-jơhà dri-sơnoh ni yòng sa nàl-c̆rih, bloh buơl guñu rơŭ 'buh hũ brơi sa nàl-c̆rih lơi rơlau tơ nàl-c̆rih mơnih gơnuăr-hwơ̆r Jôna.” Bloh nư̆n Pô luơi buơl guñu bloh nau. 
Tŭ nau truh tơ gah dih ia bơjơ, nư̆n ka du mơnih tui-mơgru thơu la buơl guñu wơ̆rglai apăn pah tui. 
Yàng Jêsu đờm sơ̆ng buơl guñu: “Kơrmăp rùp bĕ sơ̆ng c̆ơ-kơrhia mư̆ng tơpơi mơnih Pharisi sơ̆ng Sađuse.” 
Du mơnih tui-mơgru đờm tămbơyai sơ̆ng gơŭ: “Pô-Pơto đờm yơu nư̆n la kơyoa buơl gudrơi 'buh apăn pah tui.” 
Bloh Yàng Jêsu thơu pơnuaĭ nư̆n sơ̆ng đờm: “Ơ du mơnih tơkì pơnuaĭ păng-tui! Kơđa hơgĕ buơl guhã đờm tămbơyai sơ̆ng gơŭ mư̆ng bruă buơl guhã 'buh hũ pah? 
Buơl guhã sơđaŭ ka wờng ơu rơi? Buơl guhã dò sơdơ̆r lơma boh pah brơi tơ lơma rơbơu mơnih 'bơ̆ng, sơ̆ng buơl guhã duơ̆n wơ̆ hũ hơdùm bài pah dơlah ơu? 
Halài tơjuh boh pah brơi tơ pà rơbơu mơnih 'bơ̆ng, sơ̆ng buơl guhã duơ̆n wơ̆ hũ hơdùm bài pah dơlah? 
Kơđa hơgĕ buơl guhã 'buh wờng lài Kơu 'buh iơŭ đờm mư̆ng pah? Bloh păl c̆ơ-kơrhia bĕ mư̆ng tơpơi mơnih Pharisi sơ̆ng Sađuse.” 
Tŭ nư̆n ka du mơnih tui-mơgru wờng lài 'buh iơŭ Pô đờm pơđăr buơl guñu c̆ơ-kơrhia mư̆ng tơpơi ngă pah, bloh păl c̆ơ-kơrhia mư̆ng pơnuaĭ mơnih Pharisi sơ̆ng Sađuse pơto-pơsài. 
Tŭ Yàng Jêsu nau tơma lăm c̆àr-tơnah plơi-prŏng Sesare Philip, Pô tơnia du mơnih tui-mơgru: “Tui pơnuaĭ ràng đờm nư̆n Anà Mơnih la aràng sơi?” 
Du mơnih tui-mơgru đờm: “Hũ du mơnih nư̆n đờm la Jăng 'Baptis, du mơnih pơkơ̆n đờm la Eli, du mơnih pơkơ̆n wơ̆ đờm la Jeremi halài sa aràng lăm du mơnih gơnuăr-hwơ̆r.” 
Pô đờm lài: “Dò buơl guhã, buơl guhã đờm Kơu la aràng sơi?” 
Simôn Pier đờm lài: “Pô-Pơto la Pô Krist, Anà Yàng Pô Lơngì, Pô hơdiŭ rài pơdò rài.” 
Yàng Jêsu đờm sơ̆ng ñu: “Ơ Simôn anà Jôna! Lơngai-pơtuah tơ hã, kơyoa 'buh iơŭ drah sơ̆ng rơlo akhàn-tơbiă pơnuaĭ ni tơ hã, bloh la Ama Kơu dò tơ ngŏ lơngì. 
Dò Kơu, Kơu đờm sơ̆ng hã: Hã la Pier, Kơu rơŭ bơ̆ Tơrpuơl Goh-Sơc̆ih Kơu tơ ngŏ boh pơtơu ni, du bơh 'băng lơgăr-atơu rơŭ 'buh pha-jai jiơ̆ng Tơrpuơl nư̆n. 
Kơu rơŭ jào kai-kăl bơh 'băng Lơgăr Lơngì tơ hã, tơgrơ̆ pơnuaĭ hơgĕ hã akă tơ ala lơ̆n, kŭng rơŭ kơđòng akă tơ ngŏ lơngì, sơ̆ng tơgrơ̆ pơnuaĭ hơgĕ hã tơleh tơ ala lơ̆n, kŭng rơŭ hũ tơleh tơ ngŏ lơngì.” 
Bloh nư̆n Pô pơkơŭ du mơnih tui-mơgru 'buh hũ đờm tơ aràng sơi thơu Pô la Pô Krist. 
Mư̆ng tŭ nư̆n, Yàng Jêsu tơma đờm loh-làng tơ du mơnih tui-mơgru Pô thơu lài Pô păl nau truh tơ plơi-prŏng Jerusalem, păl kŏng lô pơnuaĭ pơđì-pơđoa gleh-glăr kơyoa mư̆ng du mơnih gơnuăr-tha, du mơnih gơnuăr apăn-akŏ pơyă phơ̆n duh-dơlbăt sơ̆ng du mơnih gơnuăr-pơto pơnuaĭ adăt-adia, sơ̆ng păl kŏng pơmơtai, bloh nư̆n klơu hơrơi hơdơi rơŭ hơdiŭ wơ̆. 
Pier ba Pô tơbiă krơi sa gah, sơ̆ng đờm khă 'buah lài: “Khoai Yàng, Yàng Pô Lơngì 'buh tŭ lơi ngă yơu nư̆n ơu. Pơnuaĭ nư̆n rơŭ 'buh tơbiă truh tơ Pô-Pơto ơu!” 
Bloh Pô pơtrah wơ̆ đờm sơ̆ng Pier: “Ơ Satăn, rŭt gơdŭn bĕ gah rŏng Kơu! Hã ngă krơh jơhà tơ Kơu. Kơyoa hã 'buh sơnư̆ng truh bruă Yàng Pô Lơngì, bloh mĭn sơnư̆ng truh bruă jơi anà mơnih.” 
Bloh nư̆n Yàng Jêsu đờm sơ̆ng du mơnih tui-mơgru lài: “Yah aràng sơi khiăng tui Kơu, păl prah luơi rùp-phŭn drơi, glăm kơyơu pơkăl drơi bloh tui Kơu. 
Kơyoa aràng sơi khiăng dŏng pơnuaĭ hơdiŭ drơi, nư̆n rơŭ lơhiă, dò aràng sơi kơyoa Kơu bloh lơhiă pơnuaĭ hơdiŭ, nư̆n rơŭ duah hũ wơ̆. 
Yah mơnih lơi hũ abih dun-ya bloh lơhiă bơngă-joa drơi, nư̆n rơŭ hũ kwơ-màng hơgĕ? Mơnih nư̆n rơŭ mă hơgĕ tô pơsơlih bơngă-joa drơi wơ̆? 
Kơyoa Anà Mơnih rơŭ truh lăm pơnuaĭ màng-kơc̆rà Ama drơi, găm sơ̆ng du mơnih gơdrưh. Tŭ nư̆n, Pô rơŭ brơi phơ̆n mơyòm-brơi tơ yàu aràng, tui sơ̆ng bruă buơl guñu ngă. 
Iơŭ biă, Kơu đờm sơ̆ng buơl guhã, lăm du mơnih dò dơ̆ng tơ anih ni, hũ du mơnih rơŭ 'buh mơtai dơlhơu tơ tŭ 'buh Anà Mơnih truh lăm lơgăr Pô.” 
