GEN 1:1 Lepopun Kot a föri läng me fanüfan.
GEN 1:2 Nge fanüfan a kotongau o pön, a pwal lölö o rochokich ekis meinisin, nge Ngünün Kot a tümwünü ewe lölö.
GEN 1:3 Mürin, Kot a apasa, “Epwe saram.” Iwe, a saramala.
GEN 1:4 Iwe, Kot a küna ewe saram pwe a öch. Iwe, a aimwü rochopwak seni saram,
GEN 1:5 o aita ngeni saram rän, nge rochopwak a aita ngeni pwin. Iwe, seni lesosor tori lekuniol pwal tori lesosorun ewe eu rän, iei ewe aeuin rän.
GEN 1:6 Iwe, Kot a apasa, “Epwe fis kiännin ewe lölö, pwe epwe imwüfesen lölön pekitä me lölön pekitiu.”
GEN 1:7 Mürin, Kot a föri ewe kiä pwe lölön pekitä me lölön pekitiu resap chüen chufengen. Iwe, a fis.
GEN 1:8 Nge ewe kiä Kot a aita ngeni läng. Iwe, seni lesosor tori lekuniol pwal tori lesosorun ewe eu rän, iei ewe aruuen rän.
GEN 1:9 Mürin, Kot a pwal apasa, “Lölön pekitiu repwe chufengen lon lenier pwe epwe pwä lenien pwasapwas.” Iwe, a pwal fis.
GEN 1:10 Iwe, Kot a aita ngeni ewe lenien pwasapwas fanü, nge ewe lenien lölö a aita ngeni matau. Iwe, Kot a küna pwe a öch meinisin.
GEN 1:11 Mürin a pwal apasa, “Fanü epwe amärätä fetil me iräkis mi püsin afisätä föür, pwal sokun irä mi ukua, a pwal wor föür lor, pwe repwe püsin sokuni sokur won fanüfan.” Iwe, a fis.
GEN 1:12 Iwe, fanü a amärätä fetil me iräkis mi ua, pwal sokopaten irä mi ukua, a pwal wor föür lor pwe repwe sokuni sokur. Iwe, Kot a küna pwe a öch meinisin.
GEN 1:13 Iwe, seni lesosor tori lekuniol pwal tori lesosorun ewe eu rän, iei ewe aülüngatin rän.
GEN 1:14 Mürin, Kot a apasa, “Ekewe saram repwe pwäla fän läng pwe repwe aimwüfeseni rän me pwin o asisila kinikinin fansoun me rän me ier kana.
GEN 1:15 Repwe nonom fän läng o asarama unusen fanüfan.” Iwe, a fis.
GEN 1:16 Iei usun Kot a föri ruu saram mi watte: akkar mi tin lerän, maram mi tin lepwin, a pwal föri fü kana.
GEN 1:17 Iwe, Kot a alenieer fän läng pwe repwe asarama fanüfan,
GEN 1:18 repwe nemeni rän me pwin o aimwüfeseni saram me rochopwak. Iwe, Kot a küna pwe a öch meinisin.
GEN 1:19 Iwe, seni lesosor tori lekuniol pwal tori lesosorun ewe eu rän, iei ewe arüanün rän.
GEN 1:20 Mürin, Kot a apasa, “Ekewe lenien lölö repwe masou ren mönümanau, nge mansüsü repwe äkäs fän läng.”
GEN 1:21 Iei usun Kot a föri chomong sokun man mi watte me kükün pwe matau epwe masou rer. A pwal föri chomong sokun mansüsü. Iwe, Kot a küna pwe a öch meinisin.
GEN 1:22 Iwe, Kot a afeiöchüür o üreniir pwe repwe nöünöü o achomongeer, pwe matau epwe masou rer. Nge mansüsü kana repwe chomongola won fanüfan.
GEN 1:23 Iwe, seni lesosor tori lekuniol pwal tori lesosorun ewe eu rän, iei ewe alimuen rän.
GEN 1:24 Mürin, Kot a apasa, “Fanü epwe afisätä sokun man meinisin: Manfesir, mantötö me manmwacho, ekewe mi watte me kükün, eman me eman lon en me sokun.” Iwe, a fis.
GEN 1:25 Iei usun Kot a föriir meinisin, eman me eman lon en me sokun. Iwe, a küna pwe ra öch meinisin.
GEN 1:26 Mürin, Kot a apasa, “Sipwe föri aramas mi wewe ngenikich pwe repwe nemeni ekewe ikenen leset me ekewe mansüsü me ekewe man meinisin won unusen fanüfan.”
GEN 1:27 Iei usun Kot a föri aramas lon püsin lapalapan, eman mwän me eman fefin.
GEN 1:28 Iwe, Kot a afeiöchüür o üreniir, “Oupwe nöünöü o achomongakemi pwe fanüfan epwe masou remi o nom fän nemeniemi. Oupwe nemeni ekewe ikenen leset me ekewe mansüsü me mönün won unusen fanüfan.”
GEN 1:29 Mürin, Kot a pwal apasa, “Üa ngenikemi ekewe iräkis meinisin won fanüfan mi afisätä föür, pwal ekewe irä meinisin mi ukua, a pwal wor föür lor, pwe oupwe mongö seniir.
GEN 1:30 Nge ekewe fetil meinisin üa ngeni ekewe manmwacho, ekewe mantötö me mansüsü, pwal ngeni ekewe sokopaten man meinisin won fanüfan, pwe repwe mongö seniir.” Iwe, a fis.
GEN 1:31 Iwe, Kot a nengeni meinisin mine a föri o küna pwe a fokun öch. Iwe, seni lesosor tori lekuniol pwal tori lesosorun ewe eu rän, iei ewe awonuen rän.
GEN 2:1 Iei usun Kot a awesala läng me fanüfan me meinisin mine a wor lor.
GEN 2:2 Nge lon ewe afisuen rän Kot a aükätiu an we angang o asösö seni an kewe angang meinisin.
GEN 2:3 Iwe, Kot a afeiöchü o apini ewe afisuen rän, pun lon ewe rän a asösö seni an angangen föri läng me fanüfan.
GEN 2:4 Iei uruwon mine a fis, lupwen Kot a föri läng me fanüfan. 2.4-25 Lon ewe rän, lupwen Kot ewe Samol mi Lapalap a föri fanüfan me läng,
GEN 2:5 esamwo wor iräkis me fetil mi mär seni lon ewe pwül, pun Kot ewe Samol mi Lapalap esamwo apüngätiu üt, esamwo pwal wor eman aramas mi föri angangen tanipi.
GEN 2:6 Nge eu nikapwor a ötütä seni won pwül o achöchönala unusen ewe fanü.
GEN 2:7 Mürin, Kot ewe Samol mi Lapalap a föri eman aramas seni pwülün fanü o wussalong lon pwötün enienin ngasangasen manau. Iei usun manau a tori ewe aramas.
GEN 2:8 Mürin, Kot a föri eu tanipi lon fanüen ötiu itan Eten. Ikenan a alenia ewe aramas a föri.
GEN 2:9 Iwe, seni lon ewe pwül Kot ewe Samol mi Lapalap a amärätä sokun irä meinisin mi apwapwai aramas le katol o mürina le mongö. Nge lukalapen ewe tanipi a amärätä ewe irän manau, pwal ewe irän silei öch me ngau.
GEN 2:10 Iwe, eu chanpupu a achöchönü ewe tanipi Eten o puwu seni. Ikenan a kinikinfesen lon rüanü chanpupu.
GEN 2:11 Ewe aeuin chanpupu itan Pison a pula ünükün unusen ewe fanü Hefila, ia a wor kolt ie.
GEN 2:12 Iwe, kolten ei fanü a mürina. Ikenan a pwal wor apach mi pwokus me ewe fau aüchea itan oniks.
GEN 2:13 Ewe aruuen chanpupu itan Kihon a pula ünükün unusen ewe fanü Kuus.
GEN 2:14 Ewe aülüngatin chanpupu itan Tikris a pula ötiuen ewe fanü Asiria. Nge ewe arüanün chanpupu itan Oifrat.
GEN 2:15 Mürin, Kot ewe Samol mi Lapalap a alenia ewe aramas lon ewe tanipi Eten pwe epwe tanipini o tümwünü.
GEN 2:16 Iwe, Kot ewe Samol mi Lapalap a allük ngeni ewe aramas, “Ka tongeni mongö seni irän ei tanipi meinisin,
GEN 2:17 nge seni ewe irän silei öch me ngau kosap fokun mongö. Pun lon ränin om kopwe mongö seni, kopwe fokun mäla.”
GEN 2:18 Mürin, Kot ewe Samol mi Lapalap a pwal apasa, “Esap öch pwe ewe aramas epwe chök eman. Üpwe föri eman alisian mi wewe ngeni.”
GEN 2:19 Iwe, Kot ewe Samol mi Lapalap a föri seni pwül sokun mönün lemäl, pwal sokun mansüsü meinisin. Mürin a uweereto ren ewe aramas, pun a mochen silei met epwe aita ngeniir. Nge mine ewe aramas epwe aita ngeni ekewe mönümanu, iei repwe iteni.
GEN 2:20 Iei usun ewe aramas a aita ekewe manfetal, ekewe mansüsü pwal ekewe mönün lemäl meinisin. Nge fän äsengesin ewe aramas esap wor eman alisian mi wewe ngeni.
GEN 2:21 Iei mine Kot ewe Samol mi Lapalap a apüngätiu och möürüchou won ewe aramas. Iwe, lupwen an möür Kot a angeawu efoch chürärän o apacha ngeni fituk lemon ewe kinas.
GEN 2:22 Nge seni chürärän ewe aramas Kot ewe Samol mi Lapalap a föri eman fefin o uwato ren.
GEN 2:23 Iwe, ewe aramas a apasa, “Iei chün chüi, nge fitukan fitukei. Epwe iteni etien mwän, pun a pop seni mwän.”
GEN 2:24 Iei mine eman mwän epwe likiti saman me inan o pachei ngeni pwülüan, nge ekewe ruoman repwe wiliti eu chök inis.
GEN 2:25 Iwe, ewe mwän me pwülüan we ra selela, nge resap säw.
GEN 3:1 Iwe, ewe serepenit a tipachemsolä seni ekewe man meinisin Kot ewe Samol mi Lapalap a föriir. Iwe, a aisini ewe fefin, “Ifa usun, Kot a wesewesen apasa pwe ousap fokun mongö seni ekewe irän ei tanipi?”
GEN 3:2 Nge ewe fefin a pälüeni ewe serepenit, “Äm aia tongeni mongö seni ekewe uän irän ei tanipi.
GEN 3:3 Nge Kot a apasa pwe aisap fokun mongö seni uän ewe irä a nonom lukalapen ei tanipi, aisap pwal atapa. Pun are aipwe mongö seni, aipwe mäla.”
GEN 3:4 Iwe, ewe serepenit a üreni ewe fefin, “Apwi, ousap fokun mäla.
GEN 3:5 Pun Kot a silei pwe lon ränin ämi oupwe mongö seni, mesemi epwe nela. Iwe, oupwe wewe ngeni Kot o silei mine a öch pwal mine a ngau.”
GEN 3:6 Nge lupwen ewe fefin a nenengeni ewe irä, a mefi pwe a mürina le mongö o apwapwai aramas le katol, a pwal aüchea ren an afisätä tipachem. Iei popun ewe fefin a angei uän ewe irä o mongö. Mürin a ngeni pwülüan we, iwe, a pwal mongö.
GEN 3:7 Lon ewe chök otun meser me ruoman a nela. Iwe, ra mefi pwe ra selela. Iei mine ra teifengeni chön irä fiik pwe pwölüpwölür.
GEN 3:8 Iwe, lekuniol, lupwen fansoun patapat, ewe mwän me pwülüan we ra rong pwe Kot ewe Samol mi Lapalap a fetal lon ewe tanipi. Iwe, ra op seni lein irän ewe tanipi.
GEN 3:9 Nge Kot ewe Samol mi Lapalap a köri ewe mwän o aisini, “Ia ka nom ie?”
GEN 3:10 Ewe mwän a pälüeni, “Üa rong mwaataaten om fetal lon ei tanipi, nge üa niuokus, pun üa selela. Iei popun üa op.”
GEN 3:11 Iwe, Kot a aisini, “Iö a asile ngonuk pwe ka selela? Ifa usun, ka mongö seni ewe irä üa allük pwe kosap mongö seni?”
GEN 3:12 Ewe mwän a pälüeni, “Ewe fefin en ka ngeniei pwe pwülüei, neminewe a ngeniei uän ewe irä, iwe, üa mongö.”
GEN 3:13 Mürin, Kot ewe Samol mi Lapalap a aisini ewe fefin, “Pwota ka föri ei sokun?” Nge ewe fefin a pälüeni, “Ewe serepenit a atupuei, iei mine üa mongö.”
GEN 3:14 Iwe, Kot ewe Samol mi Lapalap a üreni ewe serepenit, “Pokiten om föri ei, en kopwe anümamau me lein ekewe manfesir me manmwacho meinisin. Kopwe tö won upwom o eni pwül lon ränin manauom meinisin.
GEN 3:15 Üpwe afiukemi me ewe fefin, pwal mwirimwirum me mwirimwirin. Men epwe puri mökürom, nge en kopwe küw apilipilin pechen.”
GEN 3:16 Iwe, Kot a üreni ewe fefin, “Üpwe fokun alapala weiresin om pwopwo. Fän cheuch kopwe nöünöü. Kopwe tipeni pwülüom we, nge i epwe nemenuk.”
GEN 3:17 Mürin, Kot a üreni ewe mwän, “Pokiten om aüselinga alon pwülüom we o mongö seni ewe irä üa allük pwe kosap mongö seni, pwülün fanü epwe anümamau pokitom. Kopwe angang weires lon ränin manauom meinisin pwe epwe wor anom mongö.
GEN 3:18 Pwül epwe amäri ngonuk iräfölüföl me pötöwölingau, nge kopwe mongö irän lemäl.
GEN 3:19 Kopwe mongö anom fän molonom tori om kopwe wiliti pwül ka för seni. Pun pwül en, iei popun om kopwe wiliti pwül.”
GEN 3:20 Iwe, Atam a aita ngeni pwülüan Efa, pun i inelapen chokewe meinisin mi manau.
GEN 3:21 Nge Kot ewe Samol mi Lapalap a föri üf seni ünüchen man o aüföüfa ngeni Atam me pwülüan we.
GEN 3:22 Mürin, Kot ewe Samol mi Lapalap a apasa, “Iei a fis pwe ewe aramas a wewe ngenikich, pun a silei öch me ngau. Nge esap tufich, pwe epwe pwal aitiela pöün o angei seni uän ewe irän manau o mongö pwe epwe manau tori feilfeilachök.”
GEN 3:23 Iei popun Kot ewe Samol mi Lapalap a asüela ewe aramas seni ewe tanipi Eten, pwe epwe tuw ewe pwül a för seni.
GEN 3:24 Mürin än Kot asüela ewe aramas, a anomu Keropim ötiuen ewe tanipi Eten, pwal efoch ketilas mi pulopulen ekkei o märäkul, pwe repwe mamasa ewe al a ale ngeni ewe irän manau.
GEN 4:1 Iwe, Atam a kon ren Efa pwülüan we, nge neminewe a pwopwo. Iwe, lupwen a nöüni Kain, Efa a apasa, “Üa nöüni eman ät ren än ewe Samol mi Lapalap alilis.”
GEN 4:2 Mürin a pwal nöüni Epel pwin Kain. Iwe, Epel eman chon fofol sip, nge Kain eman chon tanipi.
GEN 4:3 Iwe, ekoch fansoun mürin a fis pwe Kain a eäni asor uän irä seni lon tanipin ngeni ewe Samol mi Lapalap.
GEN 4:4 Nge Epel a eäni asor mwänichien folenian sip pwal seni kirisir. Iwe, ewe Samol mi Lapalap a efich Epel me an asor,
GEN 4:5 nge Kain me an asor esap efich. Iei mine Kain a fokun chou, nge won mesan a wowongau.
GEN 4:6 Mürin, ewe Samol mi Lapalap a aisini Kain, “Pwota ka chou, nge met ka wowongau ren?
GEN 4:7 Ifa usun, are ka föri mine a pwüng, üsap etiwa om asor? Nge pokiten ka föri mine a ngau, tipis a operuk lükün asamom. Iwe, a mochen nemenuk, nge en kopwe akufu.”
GEN 4:8 Iwe, Kain a kapas ngeni Epel pwin we, “Sipwe feila lemäl.” Nge lupwen ar nonomfengen ikenan, Kain a ü ngeni pwin, a turufi o niela.
GEN 4:9 Mürin, ewe Samol mi Lapalap a aisini Kain, “Ifa i pwiüm we Epel?” Nge Kain a pälüeni, “Üsap silei. Ifa usun, ngang chon tümwünün pwii?”
GEN 4:10 Nge ewe Samol mi Lapalap a üreni, “Met ka föri? Chan pwiüm we a köriei seni won pwül.
GEN 4:11 Iwe, kopwe nom fän anümamau o kasüela seni ei fanü mi amasawala awan pwe epwe ünümi chan pwiüm we ka niela.
GEN 4:12 Lupwen om kopwe tanipini ewe fanü, esap chüen ngonuk uän fotom. Kopwe nomofetal o süsüfeil won fanüfan.”
GEN 4:13 Iwe, Kain a üreni ewe Samol mi Lapalap, “A kon watte liwinin ai tipis. Esap ki ngeniei ai üpwe uwei.
GEN 4:14 Ikenai ka asüeila seni ei fanü pwal seni fän mesom, pwe üpwe nomofetal o süsüfeil won fanüfan. Iwe, epwe fis pwe iö epwe künaei, epwe nieila.”
GEN 4:15 Nge ewe Samol mi Lapalap a üreni, “Apwi! Iö epwe niikela, epwe angei chappan fän fisu.” Iwe, ewe Samol mi Lapalap a föri eu asisil won Kain pwe are eman epwe küna, esap niela.
GEN 4:16 Mürin, Kain a feil seni fän mesen ewe Samol mi Lapalap o imweimw lon ewe fanü itan Not ötiuen Eten.
GEN 4:17 Iwe, Kain a kon ren pwülüan we, nge neminewe a pwopwo, a nöüni eman ät o aita ngeni Enok. Mürin, Kain a aüetä eu telinimw o aita ngeni iten nöün we Enok.
GEN 4:18 Iwe, mi wor eman nöün Enok mwän itan Irat. Irat semen Mehujael, Mehujael semen Metusael, nge Metusael semen Lamek.
GEN 4:19 Iwe, Lamek a pwülüeni ruoman fefin, eman itan Ata, nge eman itan Sila.
GEN 4:20 Ata a nöüni Japal, i semelapen chokewe ra fofol man o imweimw lon imw mangaku.
GEN 4:21 Nge pwin Japal itan Jupal, i semelapen chokewe mi sile ettik pisekin ettik.
GEN 4:22 Iwe, Sila a nöüni Tupalkain, i eman mi silelap le föri pisek seni mächä. Nge fefinen Tupalkain itan Naama.
GEN 4:23 Iwe, Lamek a üreni pwülüan kewe, “Ata me Sila, oupwe rongorong ai kapas, ämi pwülüen Lamek, oupwe aüseling ai fos. Üa niela eman mwän pokiten a akinasaei, üa niela eman alüal pokiten a sukuei.
GEN 4:24 Are manauen Kain epwe mö fän fisu, manauen Lamek epwe mö fän fik me fisu.”
GEN 4:25 Iwe, Atam a pwal kon ren pwülüan we, nge neminewe a pwopwo o nöüni eman ät. Iwe, a aita ngeni Set, pun a apasa, “Kot a ngeniei eman nei siwilin Epel, ätewe Kain a niela.”
GEN 4:26 Set a pwal nöüni eman ät o aita ngeni Enos. Lon ena fansoun aramas ra popuetä le köri iten ewe Samol mi Lapalap.
GEN 5:1 Iei uruwon mwirimwirin Atam. Lupwen Kot a föri ewe aramas, a föri lon püsin lapalapan.
GEN 5:2 A föri eman mwän me eman fefin. Nge wesin an föriir, a afeiöchüür o aita ngeniir aramas.
GEN 5:3 Lupwen Atam a ierini ipükü ilik, a nöüni eman ät mi wewe ngeni püsin lapalapan, iwe, a aita ngeni Set.
GEN 5:4 Iwe, ükükün ierin manauen Atam mürin an nöüni Set walüpükü, a pwal wor nöün mwän me fefin.
GEN 5:5 Nge ierin manauen Atam meinisin tiwepükü ilik. Mürin a mäla.
GEN 5:6 Iwe, lupwen Set a ierini ipükü limu, a nöüni Enos.
GEN 5:7 Nge ierin manauen Set mürin än Enos uputiu walüpükü fisu, a pwal wor nöün mwän me fefin.
GEN 5:8 Nge ierin manauen Set meinisin tiwepükü engol me ruu. Mürin a mäla.
GEN 5:9 Iwe, lupwen Enos a ierini tiwe, a nöüni Kenan.
GEN 5:10 Nge ierin manauen Enos mürin än Kenan uputiu walüpükü engol me limu, a pwal wor nöün mwän me fefin.
GEN 5:11 Nge ierin manauen Enos meinisin tiwepükü limu. Mürin a mäla.
GEN 5:12 Iwe, lupwen Kenan a ierini fik, a nöüni Mahalalel.
GEN 5:13 Nge ierin manauen Kenan mürin än Mahalalel uputiu walüpükü faik, a pwal wor nöün mwän me fefin.
GEN 5:14 Nge ierin manauen Kenan meinisin tiwepükü engol. Mürin a mäla.
GEN 5:15 Iwe, lupwen Mahalalel a ierini wone me limu, a nöüni Jaret.
GEN 5:16 Nge ierin manauen Mahalalel mürin än Jaret uputiu walüpükü ilik, a pwal wor nöün mwän me fefin.
GEN 5:17 Nge ierin manauen Mahalalel meinisin walüpükü tiwe me limu. Mürin a mäla.
GEN 5:18 Iwe, lupwen Jaret a ierini ipükü wone me ruu, a nöüni Enok.
GEN 5:19 Nge ierin manauen Jaret mürin än Enok uputiu walüpükü, a pwal wor nöün mwän me fefin.
GEN 5:20 Nge ierin manauen Jaret meinisin tiwepükü wone me ruu. Mürin a mäla.
GEN 5:21 Iwe, lupwen Enok a ierini wone me limu, a nöüni Metusala.
GEN 5:22 Nge mürin än Metusala uputiu, Enok a chiechiefengen me Kot ülüpükü ier, a pwal wor nöün mwän me fefin.
GEN 5:23 Iwe, ierin manauen Enok meinisin ülüpükü wone me limu.
GEN 5:24 Enok a chiechifengen me Kot. Mürin esap chüen nom, pun Kot a angei.
GEN 5:25 Iwe, lupwen Metusala a ierini ipükü walik me fisu, a nöüni Lamek.
GEN 5:26 Nge ierin manauen Metusala mürin än Lamek uputiu füpükü walik me ruu, a pwal wor nöün mwän me fefin.
GEN 5:27 Nge ierin manauen Metusala meinisin tiwepükü wone me tiu. Mürin a mäla.
GEN 5:28 Iwe, lupwen Lamek a ierini ipükü walik me ruu, a nöüni eman ät.
GEN 5:29 A aita ngeni Noa o apasa, “Ätei epwe angasakich seni weiresin angangen pöüch, pokiten ewe pwül a anümamau me ren ewe Samol mi Lapalap.”
GEN 5:30 Nge ierin manauen Lamek mürin än Noa uputiu limupükü tiwe me limu, a pwal wor nöün mwän me fefin.
GEN 5:31 Iwe, ierin manauen Lamek meinisin füpükü fik me fisu. Mürin a mäla.
GEN 5:32 Iwe, lupwen Noa a ierini limupükü, a nöüni Säm, Ham me Jafet.
GEN 6:1 Iwe, lupwen aramas ra popuetä chomongola won fanüfan, a pwal wor nöür föpwül.
GEN 6:2 Nge nöün Kot kewe chon läng mi ngauala ra nenengeni liöchün nöün aramas föpwül. Iwe, ra pwülüeni chokewe ra efich.
GEN 6:3 Mürin, ewe Samol mi Lapalap a apasa, “Ngüni esap nonom lon aramas tori feilfeilachök, pun aramas fituk chök. Iwe, ränin manauan epwe ipükü rüe ier chök.”
GEN 6:4 Lon ena fansoun, pwal lon fansoun mürin a wor mwänämong won fanüfan, ir chokewe nöün aramas föpwül ra nöünöü me won nöün Kot kewe chon läng mi ngauala. Nge ekei mwänämong ra iteföüla lon ar nemenem me pwora lon ewe fansoun lomlom.
GEN 6:5 Iwe, ewe Samol mi Lapalap a küna pwe än aramas föföringau a fokun wattela won fanüfan, nge ekiekin leluker a chök ngauala fansoun meinisin.
GEN 6:6 Iwe, ewe Samol mi Lapalap a lamalamala ren an föri aramas won fanüfan, letipan a pwal fokun weires ren.
GEN 6:7 Iei mine a apasa, “Üpwe arosala föriei aramas me won fanüfan, pwal manfetal me mantötö me ekewe mansüsü. Pun üa lamalamala ren ai föriir.”
GEN 6:8 Nge Noa a küna ümöümöch me ren Kot.
GEN 6:9 Iei uruwon Noa. Noa eman chon pwüng, i chök a föföröch lein pilon kana, a pwal chiechifengen me Kot.
GEN 6:10 Iwe, a wor ülüman nöün Noa mwän iter Säm, Ham me Jafet.
GEN 6:11 Nge chon fanüfan ra fokun föföringau fän mesen Kot o eäni föförün mwäneson ekis meinisin.
GEN 6:12 Iwe, Kot a nengeni fanüfan o küna pwe a unusen ngau, pun ekewe aramas meinisin ra chök alapala ar föför mi ngau.
GEN 6:13 Nge Kot a üreni Noa, “Üpwe fokun arosala ekewe aramas meinisin, pun fanüfan a uren föförün mwäneson me rer. Üpwe fokun aroserela o ataala fanüfan.
GEN 6:14 Kopwe föri efoch waimw seni ewe irä itan kofer. Kopwe refi lon, kopwe pwal apacha ngeni apach lon me lükün.
GEN 6:15 Iei usun om kopwe föri: langataman epwe ükükün föpükü lime fiit, chölapan fik me limu fiit, nge tekian faik me limu fiit.
GEN 6:16 Kopwe föri osun ewe waimw o likiti eu leni fan lefilen ewe os me etippan ükükün engol me walü inis. Kopwe pwal föri asamalapan lepekin. Epwe wor sässärin fan, sässärin lukalapan me sässärin won.
GEN 6:17 Ngang üpwe awarato eu noter won fanüfan pwe epwe arosala mönümanau meinisin won fanüfan. Meinisin mine a manau won fanüfan epwe mäla.
GEN 6:18 Nge ngang üpwe föri ai pwon ngonuk. Oupwe tolong lon ewe waimw, ämi me noum kewe mwän, pwal pwülüom me pwülüer kewe.
GEN 6:19 Iwe, kopwe pwal uwalong lon ewe waimw akaruoman man seni man meinisin, eman ätemwän me eman liefefin, pwe repwe etuk le manau.
GEN 6:20 Akaruoman seni iteiten sokun mansüsü me manfetal me mantötö repwe feilong reöm pwe repwe manau.
GEN 6:21 Iwe, kopwe pwal uwalong sokun mongö meinisin o iseni pwe amötümi me amötür.”
GEN 6:22 Iwe, Noa a föri meinisin mine Kot a allük ngeni.
GEN 7:1 Iwe, ewe Samol mi Lapalap a üreni Noa, “Oupwe tolong lon ewe waimw ämi me chon leimwom, pun ngang üa küna pwe en ka pwüng mwen pilom kana.
GEN 7:2 Kopwe angei fisu pea seni iteiten sokun man mi limöch meinisin ra fich ngeni asor, eman ätemwän me eman liefefin, pwal eu pea seni iteiten sokun man mi limengau resap fich ngeni asor, eman ätemwän me eman liefefin.
GEN 7:3 Kopwe pwal angei fisu pea seni iteiten sokun mansüsü meinisin, eman ätemwän me eman liefefin, pun ekewe sokopaten mönümanau meinisin repwe manau won unusen fanüfan.
GEN 7:4 Mürin fisu rän üpwe apüngätiu üt won fanüfan lon ükükün faik rän me faik pwin. Üpwe arosala seni won fanüfan ekewe mönümanau meinisin üa föriir.”
GEN 7:5 Iwe, Noa a föri meinisin mine ewe Samol mi Lapalap a allük ngeni.
GEN 7:6 Iwe, lupwen Noa a ierini wonopükü, ewe noter a tori fanüfan.
GEN 7:7 Nge Noa me nöün kewe, pwal pwülüan me pwülüer kewe ra tolong lon ewe waimw pwe repwe sü seni feiengauen ewe noter.
GEN 7:8 Iwe, pwal akaruoman seni iteiten sokun man mi limöch me ekewe man mi limengau, pwal akaruoman seni iteiten sokun mansüsü me mantötö, eman ätemwän me eman liefefin,
GEN 7:9 ra etalong Noa lon ewe waimw usun Kot a allük ngeni.
GEN 7:10 Nge fisu rän mürin, ewe noter a tori fanüfan.
GEN 7:11 Iwe, lupwen Noa a ierini wonopükü, lon engol me fisuen ränin ewe aruuen maram, ra möküla lenien kolukun failol pwe koluk a puächetä, ra pwal suk asammwachon läng
GEN 7:12 pwe üt a püngfochofochetiu won fanüfan lon ükükün faik rän me faik pwin.
GEN 7:13 Lon ewe chök ränin, Noa me nöün kewe iter Säm, Ham me Jafet pwal pwülüan me pwülüen nöün kewe ülüman mwän ra tolong lon ewe waimw,
GEN 7:14 ir me iteiten sokun manmwacho meinisin, sokun manfetal me sokun mantötö pwal sokun mansüsü meinisin.
GEN 7:15 Iwe, akaruoman seni iteiten sokun mönümanau meinisin ra eti Noa le tolong lon ewe waimw,
GEN 7:16 eman ätemwän me eman liefefin. Ra tolong, pun iei usun Kot a allük ngeni Noa. Mürin, ewe Samol mi Lapalap a apüngala ewe asam.
GEN 7:17 Iwe, a noter won fanüfan lon ükükün faik rän. Nge lupwen ewe koluk a fefeitä, ewe waimw a pwal feitä tori a tekia seni fanü.
GEN 7:18 Ewe koluk a nonomola o feitä, feitä won fanüfan, nge ewe waimw a maanüla won ewe koluk.
GEN 7:19 Iwe, ewe koluk a chök feitä, feitä, feitä won fanüfan tori ekewe chuk mi fokun tekia seni chuk meinisin ra kokola.
GEN 7:20 Ewe koluk a chök fefeitä o pwölüöla ekewe chuk, nge alololun seni won ewe koluk feitiu won ungen ekewe chuk ükükün rüe me limu fiit.
GEN 7:21 Ekewe mönümanau meinisin mi nom won fanüfan ra mäla: mansüsü, manfesir, manmwacho me man meinisin mi mwökütüküt won fanüfan, pwal tori aramas meinisin.
GEN 7:22 Meinisin mi eäni ngasangasen manau o nom won fanüfan ra mäla.
GEN 7:23 Iwe, Kot a arosala mönümanau meinisin mi nom won fanüfan: aramas, manfetal, mantötö me mansüsü. Ir meinisin ra rosola seni won fanüfan. Noa chök a manau me chokewe mi eti lon ewe waimw.
GEN 7:24 Nge ewe koluk a nonomola won fanüfan lon ükükün ipükü lime rän.
GEN 8:1 Nge Kot a chechemeni Noa me ekewe man meinisin mi eti lon ewe waimw. Iwe, a tinato eu asepwäl won fanüfan. Iwe, ewe koluk a kisikisitiu.
GEN 8:2 Ekewe lenien kolukun failol ra morola, ekewe asammwachon läng ra kapüngüla, nge üt esap chüen püngütiu.
GEN 8:3 Iwe, ewe koluk a chök kisikisitiu, nge mürin ipükü lime rän a morotiu.
GEN 8:4 Nge lon engol me fisuen ränin ewe afisuen maram ewe waimw a fanetä won eu chukun Ararat.
GEN 8:5 Iwe, ewe koluk a chök kisikisitiu tori ewe aengolun maram. Nge lon ewe aeuin ränin ewe aengolun maram ra pwätä ungen ekewe chuk.
GEN 8:6 Mürin faik rän Noa a sukala asammwachon ewe waimw, i a föri,
GEN 8:7 o ässala eman machang . Iwe, ewe machang a chök äsfeil tori ewe koluk a pwasala me won fanüfan.
GEN 8:8 Mürin, Noa a ässala eman lisom, pun a mochen silei are ewe koluk a pwasala me won fanüfan.
GEN 8:9 Nge ewe lisom esap küna lenian ia epwe sotiu ie, pokiten ewe koluk a chüen pwölüöla unusen fanüfan. Iei mine a liwinto ren Noa lon ewe waimw. Iwe, Noa a angewu o angealong ewe lisom lon ewe waimw.
GEN 8:10 Nge Noa a pwal witiwit lon ükükün fisu rän. Mürin a ässisefäliela ewe lisom seni won ewe waimw.
GEN 8:11 Iwe, ewe lisom a liwinsefälito lekuniol, nge a ilei echö chön irä olif mi manau. Iei mine Noa a silei pwe ewe koluk a morola seni won fanüfan.
GEN 8:12 Mürin, Noa a pwal witiwit fisu rän o ässala ewe lisom. Iwe, esap chüen liwinsefälito ren.
GEN 8:13 Nge lupwen Noa a ierini wonopükü eu, lon aeuin ränin ewe aeuin maram, ewe koluk a pwasala seni won fanüfan. Iwe, Noa a atomwala osun ewe waimw o küna pwe a ekis pwas won fanü.
GEN 8:14 Nge lon rüe me fisuen ränin ewe aruuen maram, a wesewesen pwas fanü.
GEN 8:15 Iwe, Kot a üreni Noa,
GEN 8:16 “Oupwe towu me lon ewe waimw, en me pwülüom, pwal noum me pwülüer kewe.
GEN 8:17 Kopwe pwal atowu ekewe mönümanau meinisin mi etuk, ekewe mansüsü me manfetal me mantötö, pwe repwe nöünöü o achomongerela won fanüfan.”
GEN 8:18 Iei mine Noa me nöün kewe ra towu seni ewe waimw, pwal pwülüan me pwülüen nöün kewe.
GEN 8:19 Pwal ekewe manfetal me mantötö meinisin, ekewe mansüsü me ekewe man meinisin mi mwökütüküt won fanüfan ra towu me lon ewe waimw lon en me sokun.
GEN 8:20 Mürin, Noa a senätä eu rongen asor fän iten ewe Samol mi Lapalap. Iwe, a angei eman man seni iteiten sokun man mi limöch me iteiten sokun mansüsü mi limöch, o eäniir asoren kek won ewe rongen asor.
GEN 8:21 Nge lupwen ewe Samol mi Lapalap a tini pwoöchün ewe asor, a ekieki lon lelukan, “Üsap chüen anümamaua fanüfan pokiten aramas. Üa silei pwe ekiekin leluken aramas a ngau seni lekisikisin. Üsap chüen arosala mönümanau meinisin, usun üa piin föri.
GEN 8:22 Lon ükükün fansoun fanüfan a nom esap chüen ükütiu fofot me kinikin, patapat me pwichikar, räs me efen, rän me pwin.”
GEN 9:1 Iwe, Kot a afeiöchü Noa me nöün kewe o üreniir, “Oupwe nöünöü o achomongakemi pwe fanüfan epwe masou remi.
GEN 9:2 Ekewe manfetal me mansüsü, ekewe mantötö me ikenen leset meinisin repwe niueitikemi. Üa atolongeer fän nemeniemi.
GEN 9:3 Üa ngenikemi ekewe man meinisin mi manau pwe ochämi, usun üa fen ngenikemi uän ekewe irä pwe enemi.
GEN 9:4 Eu chök, ousap fokun ochoch fituk mi cha, pun manau a chüen nom lon.
GEN 9:5 Are eman epwe niela eman aramas, üpwe fokun liwini ngeni. Iteiten man me iteiten aramas mi niela eman aramas üpwe liwini ar föför ngeni mäla.
GEN 9:6 Kot a föri aramas lon püsin lapalapan. Iei mine iö epwe niela eman aramas, i epwe pwal ninnila ren aramas.
GEN 9:7 Nge ämi oupwe nöünöü o achomongakemi pwe fanüfan epwe masou remi.”
GEN 9:8 Iwe, Kot a üreni Noa me nöün kewe,
GEN 9:9 “Iei üpwe föri ai pwon ngonuk me mwirimwirum kana,
GEN 9:10 pwal ngeni ekewe mönümanau meinisin mi nom reöm: ekewe mansüsü me manfesir me ekewe manmwacho meinisin mi etukowu me lon ewe waimw.
GEN 9:11 Iei masouen ai we pwon ngonuk: Esap chüen fis mälan ekewe mönümanau meinisin ren pwal eu noter. Esap fokun chüen fis pwal eu noter mi ataela fanüfan.”
GEN 9:12 Kot a pwal apasa, “Iei asisilen ewe pwon esemwüch üa föri lefilei me ämi me ekewe mönümanau meinisin mi nom remi.
GEN 9:13 Üpwe anomu ai resim won kuchu pwe asisilen ewe pwon lefilei me fanüfan.
GEN 9:14 Iwe, lupwen üpwe awara kuchu won fanüfan, nge a pwal pwä ewe resim won,
GEN 9:15 üpwe chechemeni ai we pwon lefilei me ämi me ekewe mönümanau meinisin, pwe esap chüen fisisefäl eu noter mi arosala mönümanau meinisin.
GEN 9:16 Iwe, lupwen ewe resim a nonom won kuchu, üpwe nenengeni o chechemeni ewe pwon esemwüch lefilei me ekewe mönümanau meinisin won fanüfan.
GEN 9:17 Iei asisilen ewe pwon üa föri lefilei me mönümanau meinisin won fanüfan.”
GEN 9:18 Iwe, iten nöün Noa kewe mwän ra towu seni lon ewe waimw: Säm, Ham me Jafet. Nge Ham semen Kanaan.
GEN 9:19 Ekei ülüman nöün Noa ir semelapen chon fanüfan meinisin.
GEN 9:20 Iwe, Noa eman chon tanipi, i aemanün chon fotuki irän wain.
GEN 9:21 Nge lupwen a ün seni ewe wain, a puchala ren. Iwe, a kon lon imwan imw mangaku, nge a selela.
GEN 9:22 Iwe, lupwen Ham semen Kanaan a küna saman we lon an selela, a towu lükün o asile ngeni pwin kewe ruoman.
GEN 9:23 Mürin, Säm me Jafet ra angei och mangaku, ra anomu won afarer o fetalsökürülong pwe repwe pwölüöla semer we lon an selela. Iwe, meser ra kul seni semer we pwe resap küna lon an selela.
GEN 9:24 Nge lupwen Noa a nela seni an puch o rong mine nöün we setiputur a föri ngeni,
GEN 9:25 a apasa, “Kanaan epwe anümamau. Pwin kana repwe nöüni amanau.”
GEN 9:26 A pwal apasa, “Sipwe mwareiti ewe Samol mi Lapalap än Säm we Kot. Nge Säm epwe nöüni Kanaan amanau.
GEN 9:27 Kot epwe awattela fanüen Jafet, nge epwe imweimw lon imwen Säm. Iwe, Jafet epwe nöüni Kanaan amanau.”
GEN 9:28 Iwe, Noa a manau mürin ewe noter lon ükükün ülüpükü lime ier.
GEN 9:29 Nge ükükün ierin manauen Noa tiwepükü lime. Mürin a mäla.
GEN 10:1 Iei mwirimwirin nöün Noa kewe mwän Säm, Ham me Jafet. Iwe, a wor nöür mwän mürin ewe noter won fanüfan.
GEN 10:2 Iwe, nöün Jafet mwän: Komer, Makok, Matai, Jafan, Tupal, Mesek me Tiras.
GEN 10:3 Nge nöün Komer mwän: Askenas, Rifat me Tokarma.
GEN 10:4 Nge nöün Jafan mwän: Elisha, Tarsis, pwal ekewe chon Kit me chon Totan.
GEN 10:5 Iwe, ekewe aramas mi nonom aroset ra pop seniir. Iei mwirimwirin Jafet lon tettelin fanüer me ar fos, pwal lon tettelin ar famili me ar ainang.
GEN 10:6 Iwe, nöün Ham mwän: Kush, Isip, Put me Kanaan.
GEN 10:7 Nge nöün Kush mwän: Sepa, Hawila, Sapta, Raama me Sapteka. Nge nöün Raama mwän: Shepa me Tetan.
GEN 10:8 Iwe, Kush a nöüni Nimrot. I aemanün sounemenem won fanüfan mi nemeni aramas fän pöchökül.
GEN 10:9 Nge Nimrot eman chon tapweri man, pwal eman chon pwora mi ü ngeni Kot. Iei mine aramas ra apasa lon ar mwiitun: Eman mi usun chök Nimrot ewe chon tapweri man, pwal ewe chon pwora mi ü ngeni Kot.
GEN 10:10 Iwe, Nimrot a popuetä mwün lon Papilon, Erech, Akkat me Kalne. Ir meinisin ra nom lon ewe fanü Papilon.
GEN 10:11 Nge seni ei fanü Nimrot a pwal feila Asiria o aüetä ekewe telinimw Ninifa, Rehopot Ir, Kala
GEN 10:12 me Resen mi nom lefilen Ninifa me Kala, ewe telinimw mi fokun watte.
GEN 10:13 Iwe, ekewe mwirimwirin Isip ekewe chon Lut, chon Anam, chon Lehap, chon Naftu,
GEN 10:14 chon Patrus, chon Kaslu me chon Kaftor, ir ekewe aramas chon Filistia ra pop seniir.
GEN 10:15 Iwe, Kanaan semen Siton nöün we mwänichi me Het.
GEN 10:16 Nge mwirimwirin Kanaan pwal ekewe chon Jepus, chon Amor, chon Kirkas,
GEN 10:17 chon Kiw, chon Ark, chon Sin,
GEN 10:18 chon Arwat, chon Semar me chon Hamat. Mürin, chon ekewe ainangen Kanaan ra chöfetal,
GEN 10:19 pwe kiännin fanüer a seni Siton wenewenen Kerar tori Kasa, a pwal weneiti Sotom me Komora, Atma me Sepoim, pwal tori Lasa.
GEN 10:20 Ir meinisin mwirimwirin Ham lon tettelin ar ainang, ar fos, fanüer me mwür.
GEN 10:21 Iwe, Säm ewe mwänichi pwin Jafet i än nöün Eper kewe mwän meinisin lewo.
GEN 10:22 Iwe, nöün Säm mwän: Elam, Ashur, Arpaksat, Lut me Aram.
GEN 10:23 Ekewe mwirimwirin Aram ekewe chon Us, chon Hul, chon Keter me chon Mesek.
GEN 10:24 Iwe, Arpaksat semen Shela, nge Shela semen Eper.
GEN 10:25 A wor ruoman nöün Eper mwän. Iwe, iten ewe mwänichi Pelek , pun lon fansoun manauan ekewe aramasen fanüfan ra imwüfesen. Nge iten pwin we Joktan.
GEN 10:26 Iwe, ekewe mwirimwirin Joktan ekewe chon Almotat, chon Selef, chon Hasarmawet, chon Jera,
GEN 10:27 chon Hatoram, chon Usal, chon Tikla,
GEN 10:28 chon Opal, chon Apimael, chon Sepa,
GEN 10:29 chon Ofair, chon Hawila me chon Jopap. Ir meinisin mwirimwirin Joktan.
GEN 10:30 Iwe, kiännin fanüer seni Mesa tori Sefar lon ewe fanü mi chukuchukutä, mi nom ötiu.
GEN 10:31 Ir meinisin mwirimwirin Säm lon tettelin ar ainang, ar fos, fanüer me mwür.
GEN 10:32 Ekei aramas meinisin ir mwirimwirin nöün Noa kewe lon tettelin ar ainang me mwür. Iwe, ekewe ainangen aramas meinisin ra pop seniir o chonisefäli fanüfan mürin ewe noter.
GEN 11:1 Lepoputan, chon fanüfan meinisin ra eäni eu chök fos pwal eu chök sokun kapas.
GEN 11:2 Nge lupwen aramas ra sai ngeni ötiu, ra küna eu fanü mi sosonöch itan Papilon. Iwe, ra nonom ikenan.
GEN 11:3 Iwe, ra kapasfengen lefiler, “Ou etto, sipwe föri pilak seni pwül o umwuniir.” Iwe, a wor ar pilak fän iten aüetä imw me ar apach ra küna me fän pwül fän iten sessen pilak.
GEN 11:4 Mürin ra apasa, “Ou etto, sipwe aüetä eu telinimw fän itach, pwal eu imw mi tekia, ungan epwe tori läng. Pun sipwe afisätä itach ren pwe sisap toropasfeil won unusen fanüfan.”
GEN 11:5 Iwe, ewe Samol mi Lapalap a feitiu me läng pwe epwe nengeni ewe telinimw me ewe imw tekia ekewe aramas ra aüetä.
GEN 11:6 Mürin, ewe Samol mi Lapalap a apasa, “Eu chök mwichen aramas ir meinisin, nge eu chök ar fos lefiler. Ekärän iei poputän met ra föri, nge mürin repwe chök föri meinisin mine ra ekiekin föri, nge epwe chök tufich ngeniir.
GEN 11:7 Ousipwe feitiu ikenan o alikofifi ar fos pwe esap wor eman epwe chüen wewe ren kapasen eman.”
GEN 11:8 Iei usun ewe Samol mi Lapalap a atoropasafeseniir won unusen fanüfan. Iwe, ra ükütiu me aüetä ewe telinimw.
GEN 11:9 Iei mine ewe telinimw a iteni Papilon, pun ikenan ewe Samol mi Lapalap a alikofifi fosun aramas meinisin, a pwal atoropasafeseniir seni ikenan tori won unusen fanüfan.
GEN 11:10 Iei uruwon mwirimwirin Säm. Iwe, ruu ier mürin ewe noter won fanüfan, lupwen Säm a ierini ipükü, a nöüni Arpaksat.
GEN 11:11 Iwe, ierin manauen Säm mürin än Arpaksat uputiu limepükü, a pwal wor nöün mwän me fefin.
GEN 11:12 Iwe, lupwen Arpaksat a ierini ilik me limu, a nöüni Shela.
GEN 11:13 Nge ierin manauen Arpaksat mürin än Shela uputiu föpükü ülüngat, a pwal wor nöün mwän me fefin.
GEN 11:14 Iwe, lupwen Shela a ierini ilik, a nöüni Eper.
GEN 11:15 Nge ierin manauen Shela mürin än Eper uputiu föpükü ülüngat, a pwal wor nöün mwän me fefin.
GEN 11:16 Iwe, lupwen Eper a ierini ilik me rüanü, a nöüni Pelek.
GEN 11:17 Nge ierin manauen Eper mürin än Pelek uputiu föpükü ilik, a pwal wor nöün mwän me fefin.
GEN 11:18 Iwe, lupwen Pelek a ierini ilik, a nöüni Reu.
GEN 11:19 Nge ierin manauen Pelek mürin än Reu uputiu ruupükü tiu, a pwal wor nöün mwän me fefin.
GEN 11:20 Iwe, lupwen Reu a ierini ilik me ruu, a nöüni Seruk.
GEN 11:21 Nge ierin manauen Reu mürin än Seruk uputiu ruupükü fisu, a pwal wor nöün mwän me fefin.
GEN 11:22 Iwe, lupwen Seruk a ierini ilik, a nöüni Nahor.
GEN 11:23 Iwe, ierin manauen Seruk mürin än Nahor uputiu ruupükü, a pwal wor nöün mwän me fefin.
GEN 11:24 Iwe, lupwen Nahor a ierini rüe me tiu, a nöüni Tara.
GEN 11:25 Nge ierin manauen Nahor mürin än Tara uputiu ipükü engol me tiu, a pwal wor nöün mwän me fefin.
GEN 11:26 Iwe, lupwen Tara a ierini fik, a nöüni Apram, Nahor me Haran.
GEN 11:27 Iei uruwon mwirimwirin Tara. Tara semen Apram, Nahor me Haran, nge Haran semen Lot.
GEN 11:28 Iwe, Haran a mäla lon Ur lon ewe fanü Papilon, ewe telinimw a uputiu lon, lupwen saman Tara a chüen manau.
GEN 11:29 Iwe, pwülüen Apram Sarai, nge pwülüen Nahor Milka. Iwe, Haran semen Milka me Iska.
GEN 11:30 Nge Sarai esap nöünöü, pun a rit.
GEN 11:31 Iwe, Tara a angei Apram nöün we me Lot nöün Haran pwin Apram we, pwal Sarai pwülüen Apram. Iwe, ra towu seni ewe telinimw Ur lon ewe fanü Papilon, pwe repwe feila lon ewe fanü Kanaan. Nge lupwen ra tori ewe telinimw Haran, ra imweimw ikenan.
GEN 11:32 Iwe, Tara a mäla lon Haran, lupwen a ierini ruupükü limu.
GEN 12:1 Lon ewe fansoun ewe Samol mi Lapalap a üreni Apram, “Kopwe towu seni fanüom, seni aramasom pwal seni imwen semom, pwe kopwe feila lon ewe fanü ngang üpwe aiti ngonuk.
GEN 12:2 Iwe, üpwe achomonga mwirimwirum kana pwe ir repwe wiliti eu mwü mi watte, üpwe pwal afeiöchuk o alapala itom pwe kopwe eman wän feiöch.
GEN 12:3 Iwe, üpwe afeiöchü ekewe chon afeiöchuk, nge afeiengaua ekewe chon afeiengauok. Iwe, chon ekewe mwü meinisin won fanüfan repwe küna feiöch reöm.”
GEN 12:4 Iwe, lupwen Apram a ierini fik me limu, a sai seni Haran, usun ewe Samol mi Lapalap a üreni, nge Lot a eti.
GEN 12:5 Iwe, Apram a angei Sarai pwülüan we me Lot nöün pwin, pwal pisekir meinisin ra achufengeni me nöür kewe chon angang ra nöüniir amanau me lon Haran. Iwe, ra towu pwe repwe feila lon ewe fanü Kanaan. Iwe, lupwen ra tori,
GEN 12:6 Apram a saifeil lon ewe fanü tori ewe leni itan Sikem, ia a wor ie ewe irä ook mi pin än More. Lon ena fansoun ekewe chon Kanaan ra nom lon ewe fanü.
GEN 12:7 Iwe, ewe Samol mi Lapalap a pwä ngeni Apram o üreni, “Ei fanü üpwe ngeni mwirimwirum kana.” Mürin, Apram a senätä eu rongen asor ikenan fän iten ewe Samol mi Lapalap mi pwä ngeni.
GEN 12:8 Seni ikenan a feila ngeni ewe fanü mi chukuchukutä ötiuen Petel. Iwe, a aüetä imwan imw mangaku lefilen Petel mi nom lotou me Ai mi nom ötiu. Nge ikenan a pwal senätä eu rongen asor fän iten ewe Samol mi Lapalap o fel ngeni.
GEN 12:9 Mürin, Apram a sai seni eu leni tori pwal eu o fetaleiti peliörün ewe fanü Kanaan.
GEN 12:10 Nge a fis lengita lon ewe fanü Kanaan. Iei mine Apram a feila Isip o nonom ikenan, pun ewe lengita a fokun chou won ewe fanü.
GEN 12:11 Nge lupwen a arap ngeni Isip, a kapas ngeni Sarai pwülüan we, “Üa silei pwe en eman fefin mi fokun liöch.
GEN 12:12 Lupwen ekewe chon Isip repwe künok, repwe apasa pwe en pwülüei. Iwe, repwe nieila, nge en kopwe manau.
GEN 12:13 Iei mine kopwe apasa pwe en fefinei. Mürin repwe eäni kirikiröch ngeniei o amanauaei pokitom.”
GEN 12:14 Iwe, lupwen Apram a tolong lon Isip, ekewe chon Isip ra küna pwe ewe fefin a fokun liöch.
GEN 12:15 Nge lupwen nöün Farao kewe nöüwis ra küna neminewe, ra ainga ngeni Farao. Iwe, ra angei Sarai o emwenato lon imwen Farao.
GEN 12:16 Nge Farao a fokun eäni kirikiröch ngeni Apram pokiten Sarai. Iwe, a fang ngeni sip, kow, aas, chon angang mwän me chon angang fefin me kamel.
GEN 12:17 Nge ewe Samol mi Lapalap a ariaföüü Farao me chon leimwan meinisin ren sokun feiengau mi lapalap pokiten Sarai pwülüen Apram we.
GEN 12:18 Mürin, Farao a körato Apram o apasa, “Pwota ka föri ngeniei ei sokun? Pwota kosap asile ngeniei pwe neminei pwülüom?
GEN 12:19 Pwota ka apasa pwe neminei fefinom? Ina popun üa angei pwe pwülüei. Kopwe angei pwülüom ei o sü seniei.”
GEN 12:20 Mürin, Farao a allük ngeni nöün kewe chon angang pwe repwe emwenala Apram. Iwe, ra angei Apram me pwülüan we me mettochun meinisin o emwenawu seni ewe fanü Isip.
GEN 13:1 Iwe, Apram a liwinto seni Isip o feila peliörün Kanaan, i me pwülüan me pisekin meinisin. Nge Lot a pwal eti.
GEN 13:2 Iwe, Apram a fokun wöü, pun a wor fokun chomong folenian man pwal an silifer me an kolt.
GEN 13:3 Mürin a sai seni ikenan, a sai seni eu leni tori pwal eu o feila ngeni Petel. Iwe, a tori ewe leni lefilen Petel me Ai ia imwan imw mangaku a nom ie me mwan.
GEN 13:4 A pwal tori ewe leni ia a senätä ie eu rongen asor me mwan. Ikenan Apram a fel ngeni ewe Samol mi Lapalap.
GEN 13:5 Nge Lot mi eti Apram a pwal wor nöün sip me kow, a pwal wor an famili me nöün chon angang.
GEN 13:6 Iei mine ewe fanü esap chüen ku ngeni ar repwe nonomfengen lon eu chök leni, pun a wor chomong folenier man.
GEN 13:7 Nge a wor aninifengen lefilen nöün Apram kewe chon fofol man me nöün Lot kewe chon fofol man. Lon ena fansoun ekewe chon Kanaan me chon Peres ra imweimw lon ewe fanü.
GEN 13:8 Mürin, Apram a kapas ngeni Lot, “Esap öch pwe epwe wor aninifengen lefilei me en, pwal lefilen nei chon fofol man me noum, pun en nei.
GEN 13:9 Ifa usun, esap suk ngonuk unusen ei fanü? Kose mochen imwü seniei. Are ka mochen feila pelimöngün ei fanü, ngang üpwe feila pelifichin, nge are ka mochen feila pelifichin, ngang üpwe feila pelimöngün.”
GEN 13:10 Nge Lot a nenefeil o küna pwe unusen ewe fanü ünüpen ewe chanpupu Jortan a wöün koluk ekis meinisin, usun chök ewe tanipin ewe Samol mi Lapalap, pwal usun chök ewe fanü Isip awenewenen Soar. Iei usun ewe fanü me mwen än ewe Samol mi Lapalap atai Sotom me Komora.
GEN 13:11 Iei mine Lot a filätä unusen ewe fanü ünüpen ewe chanpupu Jortan fän itan o feila ngeni ötiu. Iei usun ekewe ruoman ra imwüfesen.
GEN 13:12 Iwe, Apram a nonom lon ewe fanü Kanaan. Nge Lot a imweimw lon ekewe telinimw mi nom lon ewe lemolun Jortan o aüetä imwan imw mangaku arap ngeni Sotom.
GEN 13:13 Nge ekewe re Sotom ra fokun föföringau o tipis ngeni ewe Samol mi Lapalap.
GEN 13:14 Mürin än Lot feila seni Apram, ewe Samol mi Lapalap a kapas ngeni Apram, “Kopwe netä seni lon leniom o nengeni efeng me ör, ötiu me lotou,
GEN 13:15 pun unusen ewe fanü ka küna üpwe ngenikemi me mwirimwirum kana pwe oupwe fanüeni tori feilfeilachök.
GEN 13:16 Üpwe achomonga mwirimwirum kana usun pien aroset. Iwe, are eman a tongeni aleani pien aroset, epwe pwal tongeni aleani mwirimwirum.
GEN 13:17 Kopwe feila o siamüfetal lon unusen ewe fanü, pun ngang üpwe ngonuk.”
GEN 13:18 Iei mine Apram a atomwala imwan imw mangaku o feila. A aüetä imwan lein ekewe irä ook än Mamre lon ewe leni itan Hepron o nonom ikenan. Iwe, ikenan a pwal senätä eu rongen asor fän iten ewe Samol mi Lapalap.
GEN 14:1 Iwe, lon ewe fansoun Amrafel ewe kingen Papilon, Ariok ewe kingen Ellasar, Ketor Laomer ewe kingen Elam me Tital ewe kingen Koim
GEN 14:2 ra feila o maun ngeni Pera ewe kingen Sotom, Pirsa ewe kingen Komora, Sinap ewe kingen Atma, Semeper ewe kingen Sepoim pwal ngeni ewe kingen Pela, a pwal iteni Soar.
GEN 14:3 Iwe, Pera me chienan kewe ra achufengeni nöür mwichen sounfiu lon ewe lemolun Sitim, iei ewe Setin Mäla ikenai.
GEN 14:4 Iwe, lon ükükün engol me ruu ier ra angang ngeni Ketor Laomer, nge lon ewe engol me ülüngatin ier ra ütä o pälüeni.
GEN 14:5 Iwe, lon engol me rüanün ier Ketor Laomer me ailan kewe king ra akufu ekewe chon Refa lon Asterot Karnaim, ekewe chon Sus lon Ham, ekewe chon Em lon Safei Kiriataim,
GEN 14:6 pwal ekewe chon Hor won ekewe chukun Etom, ra pwal tapweriir tori El Paran lon kiännin ewe fanüapö.
GEN 14:7 Mürin ra kul o liwinsefäliti En Mispat, a pwal iteni Kates. Ra liapeni unusen ewe fanüen chon Amalek me chon Amor mi nom lon Hasason Tamar.
GEN 14:8 Iwe, ekewe kingen Sotom, Komora, Atma, Sepoim me Pela, a pwal iteni Soar, ra achufengeni ar kewe mwichen sounfiu lon ewe lemolun Sitim
GEN 14:9 o maun ngeni Ketor Laomer ewe kingen Elam, Tital ewe kingen Koim, Amrafel ewe kingen Papilon me Ariok ewe kingen Ellasar. Iwe, föman king ra maun ngeni limman.
GEN 14:10 Iwe, lemolun Sitim a wor chomong pwang ra ur ren apach mi lölö . Nge lupwen ekewe kingen Sotom me Komora ra süla me nöür kewe sounfiu, ekoch ra turutiu lor, nge ekewe lusun ra süla won ekewe chuk.
GEN 14:11 Iwe, ekewe föman king ra angei pisekin chon Sotom me chon Komora meinisin pwal tori ener mongö o süla far.
GEN 14:12 Ra pwal uwala Lot nöün pwin Apram mi imweimw lon Sotom, me pisekin meinisin.
GEN 14:13 Iwe, eman chon süla seniir a feito o apworausa ei pworaus ngeni Apram ewe re Ipru mi nonom lein ekewe irä ook än Mamre ewe chon Amor, pwin Eskol me Aner. Iwe, ir ailen Apram.
GEN 14:14 Nge lupwen Apram a rong pwe nöün pwin we a oola, a körifengeni ülüpükü engol me walüman nöün chon angang mi uputiu lon imwan o sipeöch le maun, a ngeniir pisekin maun o tapweri ekewe chon liapenala Lot tori Tan.
GEN 14:15 Ikenan Apram a aimwüfeseni nöün kewe chon angang lon kükün mwich o maun ngeniir lepwin. Iwe, a akufuur o tapweriir tori Hopa efengin Tamaskus.
GEN 14:16 Mürin, Apram a aliwinato ekewe pisek meinisin, a pwal aliwinato Lot nöün pwin we me an pisek, pwal tori ekewe fefin me ekewe aramas mi oola meinisin.
GEN 14:17 Iwe, lupwen Apram a liwinto seni an akufu Ketor Laomer me chienan kewe king, ewe kingen Sotom a towu pwe epwe churi me lemolun Safe, a pwal iteni Lemolun King.
GEN 14:18 Iwe, Melkisetek ewe kingen Salem a uwato pilawa me wain ren Apram. Melkisetek eman souasor nöün ewe Kot mi Unusen Tekia.
GEN 14:19 Iwe, a afeiöchü Apram o apasa, “Kopwe feiöch, Apram, me ren ewe Kot mi Unusen Tekia, a föri läng me fanüfan.
GEN 14:20 Sipwe mwareiti ewe Kot mi Unusen Tekia, a atolonga chon oputom fän nemeniom.” Mürin, Apram a ngeni Melkisetek eu leengol seni choon wokun meinisin.
GEN 14:21 Iwe, ewe kingen Sotom a üreni Apram, “Kopwe aliwini ngeniei ekewe aramas, nge choon wokum kopwe eäni.”
GEN 14:22 Nge Apram a üreni ewe kingen Sotom, “Üa akapel ngeni ewe Samol mi Lapalap, ewe Kot mi Unusen Tekia, a föri läng me fanüfan,
GEN 14:23 üsap angei och seni mine ka eäni, üsap pwal mwo nge angei emwü terech are efoch ririn sus, pwe kete üra pwe en ka awöüü Apram.
GEN 14:24 Üsap fokun angei och fän itei lükün mine nei kewe chon angang ra mongö. Nge ekewe mwän mi etiei, Aner me Eskol me Mamre, repwe angei wiser.”
GEN 15:1 Iwe, wesin ewe maun ewe Samol mi Lapalap a kapas ngeni Apram lon künaan, “Kosap niuokus Apram. Ngang tittum, nge liwinum epwe fokun watte.”
GEN 15:2 Nge Apram a apasa, “Ai Samol me ai Kot, met ka tongeni ngeniei, nge esap wor nei. Nei chon angang Elieser seni Tamaskus epwe wöüni wöüi meinisin.”
GEN 15:3 Iwe, Apram a pwal apasa, “Nengeni, kosamwo ngeniei eman nei. Iei popun eman nei kewe chon angang mi uputiu lon imwei epwe wöüni wöüi.”
GEN 15:4 Mürin, ewe Samol mi Lapalap a kapassefäl ngeni Apram, “Elieser esap wöüni woum, nge püsin eman noum mwän epwe wöüni.”
GEN 15:5 Nge Kot a üreni Apram pwe epwe towu me lon imwan. Mürin a kapas ngeni, “Kopwe netä läng o aleani ekewe fü. Ifa usun, ka tongeni aleaniir? Iei usun mwirimwirum kana repwe chomong usun chomongun ekewe fü.”
GEN 15:6 Iwe, Apram a lükü ewe Samol mi Lapalap o küna pwüng me ren Kot pokiten an lükülük.
GEN 15:7 Mürin, Kot a üreni, “Ngang ewe Samol mi Lapalap. Üa emwenukowu seni Ur lon ewe fanü Papilon, pwe üpwe ngonuk ei fanü pwe kopwe fanüeni.”
GEN 15:8 Nge Apram a aisini, “Ai Samol me ai Kot, met üpwe silei ren pwe üpwe fanüeni ei fanü?”
GEN 15:9 Iwe, a pälüeni, “Kopwe uwato rei eman kow esamwo nöünöü, eman liefefinin kuuch me eman ätemwänin sip ir me ülüman ülüngat ierir, pwal ruoman lisom, eman watte me eman kükün.
GEN 15:10 Iwe, Apram a uwato ren Kot ekewe man meinisin, a kinifeseniir lon ruu kinikin o anomu eu kinikin won eu pekin, nge eu kinikin won pwal eu pekin. Nge ekewe machang esap kinifeseniir.
GEN 15:11 Iwe, lupwen machang mi mwacho ra sotiu won fituken ekewe man, Apram a asürela.
GEN 15:12 Nge lupwen akkar a arap ngeni an epwe tup, och möürüchou a tori Apram, pwal och niuokus me rochopwak mi fokun watte a püngütiu won.
GEN 15:13 Iwe, ewe Samol mi Lapalap a üreni Apram, “Iei kopwe fokun silei pwe mwirimwirum kana repwe wasöla lon eu fanü sap fanüer. Aramas repwe nöüniir amanau ikenan, repwe küna riaföü lon ükükün föpükü ier.
GEN 15:14 Nge ngang üpwe apwüngü chon ewe fanü ra nöüniir amanau. Iwe, mürin repwe towu seni ewe fanü fän pisek mi chomong.
GEN 15:15 Nge en kopwe mäla o peias fän kinamwe lon om chinlap.
GEN 15:16 Iwe, lon arüanün tettel mwirimwirum kewe repwe liwinsefälito ikei, pun esamwo tori otun ai üpwe apwüngü än ekewe chon Amor föföringau.”
GEN 15:17 Nge lupwen akkar a tuputiu, lupwen a kirochola, och ötüötün um me efoch töl mi ngetenget a fetal lefilen ekewe kinikinin fituken man.
GEN 15:18 Iwe, lon ewe rän ewe Samol mi Lapalap a föri eu pwon ngeni Apram o apasa, “Üpwe ngeni mwirimwirum kana ei fanü, seni ewe chanpupun Isip tori ewe chanpupu mi watte itan Oifrat,
GEN 15:19 ewe fanüen chon Ken, chon Kenis me chon Katmon,
GEN 15:20 ewe fanüen chon Hit, chon Peris me chon Refa,
GEN 15:21 pwal tori fanüen ekewe chon Amor, chon Kanaan, chon Kirkas me chon Jepus.”
GEN 16:1 Iwe, Sarai pwülüen Apram esamwo nöünöü. Nge a wor eman nöün kewe chon angang itan Hakar, eman fin Isip.
GEN 16:2 Iwe, Sarai a üreni Apram, “Nengeni, ewe Samol mi Lapalap esap mwüt ngeniei ai üpwe nöünöü. Iei mine kopwe pwülüeni nei we chon angang. Eli epwe fis pwe epwe wor nei me ren.” Iwe, Apram a aüselinga alon Sarai.
GEN 16:3 Iei mine Sarai a angei Hakar nöün we chon angang ewe fin Isip o ngeni Apram pwe epwe pwülüeni. Ei a fis mürin än Apram nom lon ewe fanü Kanaan lon ükükün engol ier.
GEN 16:4 Iwe, Apram a kon ren Hakar, nge a pwopwo me won. Nge lupwen a mefi pwe a pwopwo, a lamalamtekia won Sarai an samol.
GEN 16:5 Mürin, Sarai a üreni Apram, “Tipisum ei, pwe ei riaföü a toriei. Üa ngonuk nei chon angang pwe kopwe pwülüeni. Nge lupwen a mefi pwe a pwopwo, a lamalamtekia woi. Ewe Samol mi Lapalap epwe eäni apwüng lefilach pwe epwe pwä iö a pwüng.
GEN 16:6 Iwe, Apram a üreni Sarai, “Noum we chon angang a nom fän nemeniom. Kopwe föri ngeni mine ka mochen.” Iei mine Sarai a amiriti Hakar, nge neminewe a süla.
GEN 16:7 Nge nöün ewe Samol mi Lapalap chon läng a küna Hakar ünükün eu chönüttu lon fanüapö mi nom lepekin ewe al a ale ngeni Sur.
GEN 16:8 Iwe, ewe chon läng a aisini, “Hakar nöün Sarai chon angang, ia ka feito me ie, nge ia kopwe feila ie?” Iwe, Hakar a pälüeni, “Üa sü seni ai samol Sarai.”
GEN 16:9 Nge ewe chon läng a üreni, “Kopwe liwiniti om samol o anomuk fän nemenian.”
GEN 16:10 Mürin, nöün ewe Samol mi Lapalap chon läng a pwal üreni, “Üpwe fokun achomongala mwirimwirum pwe esap wor eman a tongeni aleaniir pokiten chomongur.
GEN 16:11 Nengeni ka pwopwo, nge kopwe nöüni eman ät. Iwe, kopwe aita ngeni Ismael , pun ewe Samol mi Lapalap a rongorong om siön riaföü.
GEN 16:12 Iwe, noum epwe usun chök eman aas mi mwacho, epwe ü ngeni aramas meinisin, nge aramas meinisin repwe pwal ü ngeni. Iwe, epwe nonom lon fanüan o tipepöchökül ngeni aramasan.”
GEN 16:13 Iwe, Hakar a aita ngeni ewe Samol mi Lapalap mi kapas ngeni me mwan, “En eman Kot mi nenengeniei.” Pun a apasa, “Ellet, üa küna ewe mi fen nenengeniei.”
GEN 16:14 Iei mine aramas ra aita ngeni ewe chönüttu mi nom lefilen Kates me Peret Peer Lahairoi .
GEN 16:15 Iwe, Hakar a nöüni eman ät me won Apram. Iwe, Apram a aita ngeni nöün we Ismael.
GEN 16:16 Apram a ierini walik me wonu, lupwen Hakar a nöüni Ismael.
GEN 17:1 Iwe, lupwen Apram a ierini tiwe me tiu, ewe Samol mi Lapalap a pwä ngeni o üreni, “Ngang ewe Kot mi Unusen Manaman. Kopwe manau me fän mesei o unusen föföröch.
GEN 17:2 Iwe, üpwe anüküchara ai pwon lefilei me en, üpwe pwal fokun achomonga mwirimwirum.”
GEN 17:3 Iwe, Apram a chapetiu lepwül, nge Kot a üreni,
GEN 17:4 “Iei ai we pwon ngonuk: En kopwe semen chomong ainang.
GEN 17:5 Iei mine kosap chüen iteni Apram , nge kopwe iteni Apraham , pun üa awisok pwe kopwe semen chomong ainang.
GEN 17:6 Üpwe fokun achomongala mwirimwirum o förätä chomong ainang senuk, epwe pwal wor king me lein mwirimwirum kana.
GEN 17:7 Iwe, üpwe apwönüetä ai we pwon lefilei me ämi me mwirimwirum kana lon tettelir meinisin. Ai we pwon epwe nonom tori feilfeilachök pwe ngang üpwe om Kot, üpwe pwal än mwirimwirum kana Kot.
GEN 17:8 Iwe, üpwe ngonuk pwal ngeni mwirimwirum kana unusen ewe fanü Kanaan ka wasöla lon. Iwe, repwe fanüeni ewe fanü tori feilfeilachök, nge ngang üpwe ar Kot.”
GEN 17:9 Iwe, Kot a üreni Apraham, “Nge en kopwe pwal apwönüetä ai we pwon, ämi me mwirimwirum lon tettelir meinisin.
GEN 17:10 Iei ai we pwon ngonuk me mwirimwirum kana oupwe apwönüetä: Nöümi ät meinisin repwe sirkomsais.
GEN 17:11 Oupwe sirkomsaisi ewe kükün inis. Iei asisilen ewe pwon lefilei me ämi.
GEN 17:12 Oupwe sirkomsaisi iteiten ät, lupwen a tori walu ränin, seni eu täppin aramas tori pwal eu. Oupwe pwal sirkomsaisi ekewe amanau mi uputiu lon ämi kewe famili me chokewe oua möniir seni ekewe chon ekis, ir sap mwirimwirimi.
GEN 17:13 Ir meinisin repwe sirkomsais. Iei usun ai we pwon mi fis won inisimi epwe nonom tori feilfeilachök.
GEN 17:14 Iteiten mwän esap sirkomsais epwe kärila me lein aramasan, pun a atai ai we pwon.”
GEN 17:15 Iwe, Kot a pwal üreni Apraham, “Kosap chüen aita ngeni pwülüom we Sarai, nge kopwe aita ngeni Sara .
GEN 17:16 Üpwe afeiöchü Sara, nge üpwe ngonuk eman ät me ren. Ewer, üpwe afeiöchü pwe epwe inelapen chomong ainang, epwe pwal wor king me lein mwirimwirin kana.”
GEN 17:17 Iwe, Apraham a chapetiu lepwül, a takir o ekieki lon lelukan, “Ifa usun, eman mönükol epwe uputiu ngeni eman chinlap mi ierini ipükü? Nge Sara mi ierini tiwe epwe tongeni nöünöü?”
GEN 17:18 Iwe, Apraham a üreni Kot, “Amwo Ismael epwe manau o feiöch me fän mesom.”
GEN 17:19 Nge Kot a üreni Apraham, “Apwi, Sara pwülüom we epwe nöüni eman noum ät. Iwe, kopwe aita ngeni Isaak . Üpwe apwönüetä ai pwon esemwüch ngeni, pwal ngeni mwirimwirin kana.
GEN 17:20 Nge üa pwal aüselingok fän iten Ismael. Üpwe fokun afeiöchü o achomongala nöün pwal mwirimwirin kana. Iwe, epwe semen engol me ruoman samol, nge üpwe föri pwe mwirimwirin repwe eu mwü mi fokun watte.
GEN 17:21 Nge ai we pwon üpwe apwönüetä ngeni Isaak noum we, ätewe Sara epwe nöüni mürin eu ier.”
GEN 17:22 Iwe, lupwen Kot a wes me fos ngeni Apraham, a feitä seni.
GEN 17:23 Lon ewe chök ränin, Apraham a angei Ismael nöün we me ekewe amanau meinisin mi uputiu lon imwan, pwal chokewe a möniir, o sirkomsaisiir meinisin, usun Kot a allük ngeni.
GEN 17:24 Iwe, Apraham a ierini tiwe me tiu, lupwen a sirkomsais.
GEN 17:25 Nge Ismael nöün we a ierini engol me ülüngat, lupwen a sirkomsais.
GEN 17:26 Iwe, lon ewe chök ränin, Apraham me Ismael nöün we ra sirkomsais,
GEN 17:27 pwal tori nöün kewe amanau ät me mwän meinisin, ir mi uputiu lon imwan, pwal chokewe a möniir seni chon ekis. Irfengen meinisin ra sirkomsais.
GEN 18:1 Iwe, ewe Samol mi Lapalap a pwä ngeni Apraham lein ekewe irä ook än Mamre, lupwen a mot leasamalapen imwan imw mangaku leolokenin ewe rän.
GEN 18:2 Iwe, lupwen a netä, a küna ülüman mwän ra ütä ekis toau seni. Nge lupwen a küneer, a mümütüla rer pwe epwe churiir. Iwe, a chapetiu lepwül
GEN 18:3 o apasa, “Ai kana samol, are üa küna ümöümöch me remi, ousap feila seniei ngang nöümi chon angang.
GEN 18:4 Repwe uwato remi ekis koluk pwe oupwe talü pechemi. Iwe, oupwe asösö fän ewe irä,
GEN 18:5 nge ngang üpwe feila o angei elülü mongö pwe oupwe chünikemi. Iwe, mürin oupwapw feila. A öch pwe oua feito rei ngang nöümi chon angang.” Iwe, ra üreni, “Kopwe föri usun om apasa.”
GEN 18:6 Iwe, Apraham a müttirilong lon imwan imw mangaku o üreni Sara, “Kopwe müttir angei eu tuk pilawa mi mürina, kopwe öüwa o umuni.”
GEN 18:7 Mürin, Apraham a mümütüla ngeni ewe lenien man o angei eman apanen kow mi ipwötükai o annö. Iwe, a ngeni eman nöün chon angang mi müttir amoota fitukan.
GEN 18:8 Iwe, Apraham a uwato rer pwötö me milik me fituken ewe kow o ngeniir. Iwe, lupwen ar mongö, Apraham a ütä rer fän ewe irä.
GEN 18:9 Iwe, ra aisini, “Ifa i Sara pwülüom we?” Nge Apraham a pälüeniir, “A nom leimw.”
GEN 18:10 Iwe, ewe Samol mi Lapalap a üreni, “Üpwe fokun liwinto reöm mürin eu ier. Nge Sara pwülüom we epwe nöüni eman ät.” Iwe, Sara a rongorong ei kapas me aropen asamalapen ewe imw mangaku me lükisökürün.
GEN 18:11 Nge Apraham me Sara ra wesewesen chinlap, iei popun Sara esap chüen tongeni nöünöü.
GEN 18:12 Iei mine Sara a takir o ekieki lon lelukan, “Ifa usun, ngang üpwe chüen eäni mochenin fituk lon ai chinlap, nge ai samol a pwal chinlap?”
GEN 18:13 Mürin, ewe Samol mi Lapalap a üreni Apraham, “Pwota Sara a takir o ekieki lon lelukan, ‘Ifa usun, üpwe wesewesen tongeni nöünöü lon ai chinlap?’
GEN 18:14 Ifa usun, epwe wor och ewe Samol mi Lapalap esap tufich ngeni? Üpwe fokun liwinto reöm mürin eu ier, usun üa fen pwon ngonuk me mwan. Lon na otun Sara epwe nöüni eman ät.”
GEN 18:15 Nge Sara a niuokus, iei mine a amam o apasa, “Üsap takir.” Nge ewe Samol mi Lapalap a pälüeni, “Apwi, ka wesewesen takir.”
GEN 18:16 Iwe, ekewe mwän ra ütä o feila ngeni eu leni ia ra tongeni netiu won Sotom me ie. Nge Apraham a etiir pwe epwe emweni ngeniir aler.
GEN 18:17 Mürin, ewe Samol mi Lapalap a apasa, “Pwota üpwe aopa seni Apraham mine üpwe föri?
GEN 18:18 Pun üa silei pwe Apraham epwe wiliti eu mwü mi fokun watte o pöchökül, nge mwün fanüfan meinisin repwe küna ar feiöch me ren.
GEN 18:19 Iwe, üa fen afili pwe epwe aiti ngeni nöün me chon leimwan me mwirimwirin kana usun ar repwe aleasochisiei o föri mine a pwüng me wenechar. Iwe, are repwe föri iei usun, ngang ewe Samol mi Lapalap üpwe atoto won Apraham mine üa fen pwon ngeni.”
GEN 18:20 Mürin, ewe Samol mi Lapalap a üreni Apraham, “Kapasen atutur usun än chon Sotom me Komora föföringau a watte, nge ar kewe tipis ra fokun chou.
GEN 18:21 Üpwe feitiu rer o nengeni are a pwüng ekewe kapasen atutur mi toriei. Nge are esap pwüng, üpwe pwal silei.”
GEN 18:22 Iwe, ekewe ruoman mwän ra feila seni ikenan pwe repwe feila Sotom. Nge Apraham a chök ütä fän mesen ewe Samol mi Lapalap.
GEN 18:23 Mürin, Apraham a kan ngeni o aisini, “Ifa usun, kopwe wesewesen niela chon pwüng fiti chon pwüngingau?
GEN 18:24 Eli epwe wor lime chon pwüng lon ewe telinimw. Kopwe pwal nirela, nge kosap amanaua ewe telinimw fän iten ekewe lime chon pwüng ra nonom lon?
GEN 18:25 Ese tufich om kopwe föri ina usun, pwe kopwe niela ekewe chon pwüng fiti chon pwüngingau, pwe chon pwüng repwe chök wewe ngeni chon pwüngingau. Ese tufich om kopwe föri ina usun. Ifa usun, ewe Souapwüngün unusen fanüfan esap eäni apwüng fän pwüng?”
GEN 18:26 Iwe, ewe Samol mi Lapalap a pälüeni, “Are üpwe küna lime chon pwüng lon ewe telinimw Sotom, üpwe amanaua unusen chon ewe telinimw fän iten ekewe lime.”
GEN 18:27 Mürin Apraham a kapassefäl ngeni, “Kose mochen kopwe amusala ai kapaspat ngonuk, ai Samol, pun ngang pwül me falang chök.
GEN 18:28 Eli esap tori lime chon pwüng, nge faik me limman chök. Ifa usun, kopwe atai unusen ewe telinimw fän iten ekewe limman rese nom?” Iwe, Kot a pälüeni, “Are üpwe küna faik me limman, üsap atai ewe telinimw.”
GEN 18:29 Nge Apraham a kapassefäl ngeni, “Eli a chök wor faik mi nom lon.” Iwe, Kot a pälüeni, “Üsap atai fän iten ekewe faik.”
GEN 18:30 Mürin, Apraham a üreni, “Kose mochen kosap chou ngeniei, ai Samol, are üpwe pwal kapas fän eu. Eli a chök wor ilik mi nom lon.” Nge Kot a pälüeni, “Üsap atai, are üpwe küna ilik.”
GEN 18:31 Iwe, Apraham a pwal apasa, “Kose mochen kopwe amusala pwe üa chök kapaspat ngonuk, ai Samol. Eli rüe chök ra nom lon.” Nge Kot a pälüeni, “Üsap atai ewe telinimw fän iten ekewe rüe.”
GEN 18:32 Iwe, Apraham a kapassefäl, “Kose mochen kosap chou ngeniei, ai Samol. Üpwe kapassefäl pwal fän eu chök. Eli epwe wor engol mi nom lon.” Nge Kot a pälüeni, “Üsap fokun atai ewe telinimw fän iten ekewe engol.”
GEN 18:33 Iwe, lupwen ewe Samol mi Lapalap a wes me kapas ngeni Apraham, a feila seni. Nge Apraham a liwiniti lenian.
GEN 19:1 Iwe, lupwen ekewe ruoman chon läng ra tori Sotom lekuniol, Lot a mot lon asamalapen tittin Sotom. Nge lupwen Lot a küneer, a ütä o feila rer. Iwe, a chapetiu lepwül
GEN 19:2 o üreniir, “Ai kana samol, ouse mochen oupwe tolong lon imwei ngang nöümi chon angang. Iwe, oupwe talü pechemi o möür rei. Nge lesosorusich oupwe pwätä o sopwela ämi sai.” Nge ir ra pälüeni, “Apwi, äm aipwe chök nonom lükün.”
GEN 19:3 Nge Lot a fokun peseer pwe repwe eti. Iei mine ra tolong lon imwan. Iwe, Lot a amolätä eu mongö fän iter, a pwal umuni pilawa esap wor iis lon. Iwe, ra mongö.
GEN 19:4 Nge mwen ar möür, ekewe re Sotom meinisin, ekewe alüal me chinlap ra feito seni ekis meinisin o pwelifeili imwen Lot.
GEN 19:5 Iwe, ra kölong ren Lot o apasa, “Ikafa ir ekana mwän ra feito reöm lon ei pwinin? Kopwe emwenirewu pwe aipwe föföringau ngeniir.”
GEN 19:6 Iwe, Lot a towu rer o apüngala asamalapen imwan me lükün sökürün.
GEN 19:7 Iwe, a üreniir, “Pwipwi kana, üa tüngor ngenikemi pwe ousap föri ei sokun föför mi ngau.
GEN 19:8 Nengeni, mi wor ruoman nei föpwül resamwo pwüpwülü. Üpwe emwenirewu remi pwe oupwe föri ngeniir mine oua mochen. Nge ousap föföringau ngeni ekewe mwän, pun üa etiweer lon imwei pwe üpwe tümwünüür.”
GEN 19:9 Nge ekewe re Sotom ra pälüeni, “Kopwe süla! En ka feito pwe kopwe wasöla rem, nge iei ka apwüngükem. Iei mine aipwe aweiresuk lap seniir.” Iwe, ra ki ngeni Lot fän pöchökül, ra pwal kan ngeni pwe repwe ripi asamalapen imwan.
GEN 19:10 Nge ekewe ruoman mwän ra angewu o angealong Lot pwe epwe nom rer leimw. Iwe, ra anükala ewe asamalap.
GEN 19:11 Mürin ra achuna ekewe mwän meinisin mi nonom lükün asamalapen ewe imw, seni alüal tori chinlap, pwe resap tongeni küna ewe asamalap.
GEN 19:12 Nge ekewe ruoman mwän ra aisini Lot, “Ifa usun, mi pwal wor aramasom ikei, pwülüen noum kewe föpwül, are noum ät me nengin, are pwal eman märärum? Kopwe emwenirewu seni lon ei telinimw.
GEN 19:13 Pun äm aipwe ataala. Kapasen atutur usun föföringauen aramasen ei leni a fokun wattela fän mesen ewe Samol mi Lapalap. Iei popun a tinikeemito pwe aipwe atai.”
GEN 19:14 Iwe, Lot a towu ren kofotun nöün kewe föpwül o üreniir, “Oupwe feil seni ikei, pun ewe Samol mi Lapalap epwe atai ei telinimw.” Nge ir me ruoman ra ekieki pwe a chök urumwot.
GEN 19:15 Iwe, lupwen a tö mallen rän, ekewe chon läng ra amüttiri Lot o üreni, “Kopwe müttir angei pwülüom me noum kewe ruoman föpwül mi nom reöm o sü pwe kosap pwal feiengaueni feiengauen ei telinimw.”
GEN 19:16 Nge lupwen Lot a mang, ekewe mwän ra turufi pöün pwal pöün pwülüan me nöün kewe ruoman föpwül o aweinerewu lükün ewe telinimw, pun ewe Samol mi Lapalap a ümöümöch ngeniir.
GEN 19:17 Iwe, lupwen ra aweinerewu lükün, eman leir a üreniir, “Oupwe kaila o amanauakemi, nge ousap nesefäl. Ousap pwal üla lon ewe lemol, nge oupwe süla ngeni ekewe chuk pwe oute mäla.”
GEN 19:18 Nge Lot a pälüeni, “Apwi, sap ina, ai Samol!
GEN 19:19 Noum ei chon angang a küna ümöümöch me reöm, ka pwal fokun kirikiröch ren om amanauaei. Nge ngang üsap tongeni süla ngeni ekewe chuk. Eli feiengau epwe toriei pwe üpwe mäla me mwen üpwe tori ekewe chuk.
GEN 19:20 Nengeni, mi wor eu kükün telinimw, a kanoto pwe üpwe tongeni sülong lon. Kose mochen kopwe mwüt ngeniei pwe üpwe sülong lon. Ifa usun, esap kükün ewe telinimw? Iwe, ikenan üpwe tongeni manau me ie.”
GEN 19:21 Iwe, a pälüeni, “Ewer, üa tipeeu ngeni om ei tüngor, üsap ataala ewe telinimw ka kapas usun.
GEN 19:22 Kopwe kaila o süla ikenan, pun üsap tongeni föri och me mwen om kopwe tori.” Iei popun ewe telinimw a iteni Soar .
GEN 19:23 Iwe, akkar a tötä, lupwen Lot a tori Soar.
GEN 19:24 Mürin, ewe Samol mi Lapalap a apüngätiu seni läng ütten primston me ekkei won Sotom me Komora.
GEN 19:25 Iwe, a ataala ekewe telinimw pwal unusen ewe lemol, pwe aramasen ekewe telinimw meinisin ra rosola, a pwal tala mine a mär won ewe fanü.
GEN 19:26 Nge pwülüen Lot mi nom kukumwir a nesefäl o wiliti efoch üresalt.
GEN 19:27 Iwe, lesosorusich Apraham a pwätä o feila won ewe leni ia a ütä ie fän mesen ewe Samol mi Lapalap me mwan.
GEN 19:28 Iwe, a netiuei Sotom me Komora me unusen ewe lemol, nge a chök küna och ötün ekkei a ötütä seni ewe fanü, a wewe ngeni ötün eu um mi fokun watte.
GEN 19:29 Iwe, a fis pwe lupwen Kot a ataala ekewe telinimwen ewe lemol, a chechemeni Apraham. Iwe, a emwenawu Lot seni lon ewe feiengau, lupwen a ataala ekewe telinimw Lot a imweimw lon.
GEN 19:30 Iwe, mürin, Lot a towu seni Soar o nonom won ekewe chuk me nöün kewe ruoman föpwül, pun a niuokus an epwe imweimw lon Soar. Iwe, ra nonom lon eu föüimw.
GEN 19:31 Iwe, lon eu rän ewe finichi a üreni ewe setipütür, “Samach ei a chinlap, nge esap wor eman mwän won ei fanü a tongeni pwülüenikich pwe epwe wor nöüch.
GEN 19:32 Etto, sipwe aünü ngeni samach ei wain, mürin sipwe kon ren pwe epwe wor mwirimwirin.”
GEN 19:33 Iwe, ra aünü ngeni semer we wain lon ewe pwinin. Iwe, ewe finichi a tolong o kon ren. Nge Lot esap mefi, lupwen nöün we a kon ren, pwal lupwen a pwätä.
GEN 19:34 Iwe, sorotän ewe rän ewe finichi a üreni ewe setipütür, “Üa kon ren semei lepwin ewe. Sipwe pwal aünü ngeni samach ei wain lepwin ei. Mürin, en kopwe tolong o kon ren pwe epwe wor mwirimwirin.”
GEN 19:35 Iwe, ra pwal aünü ngeni semer we wain lon ewe pwinin, nge ewe setipütür a tolong o kon ren. Nge Lot esap pwal mefi, lupwen nöün we a kon ren, pwal lupwen a pwätä.
GEN 19:36 Iei usun nöün Lot kewe ruoman föpwül ra pwopwo me won semer we.
GEN 19:37 Iwe, ewe finichi a nöüni eman ät o aita ngeni Moap. Iwe, tori ikenai i semelapen ekewe chon Moap.
GEN 19:38 Nge ewe setipütür a pwal nöüni eman ät o aita ngeni Pen Ami. Iwe, tori ikenai i semelapen ekewe chon Amon.
GEN 20:1 Iwe, Apraham a sai seni Mamre o sai ngeni peliör tori ewe fanü itan Nekep. Iwe, a nom lefilen Kates me Sur, a pwal wasöla lon Kerar.
GEN 20:2 Nge Apraham a apasa usun Sara pwülüan we pwe fefinan. Iwe, Apimelek ewe kingen Kerar a titi Sara pwe epwe feito ren.
GEN 20:3 Nge Kot a pwä ngeni Apimelek lon an tan lepwin o üreni, “Kopwe le mäla, pokiten ka angei neminewe, nge a wor pwülüan.”
GEN 20:4 Nge Apimelek esamwo kon ren. Iei mine a apasa, “Ai Samol, ifa usun, kopwe nieila me aramasei, nge esap wor äm tipis?
GEN 20:5 Ifa usun, ätenan esap püsin apasa ngeniei pwe neminan fefinan? Ifa usun, neminan esap pwal apasa pwe mongean ätenan? Iwe, ren wenecharen letipei me limöchün pei ngang üa föri ei sokun föför.”
GEN 20:6 Mürin, Kot a kapas ngeni lon an tan, “Ewer, üa silei pwe ka föri ena sokun föför ren wenecharen letipom. Ngang ewe üa apetuk seni om tipis ngeniei, iei mine üsap mwüt ngonuk pwe kopwe atapa.
GEN 20:7 Iei kopwe chök aliwinala ngeni ätenan pwülüan we, pun i eman soufos. Iwe, epwe iotek fän itom pwe kopwe manau. Nge are kosap aliwinala, kopwe silei pwe kopwe wesewesen mäla, en me aramasom kewe meinisin.”
GEN 20:8 Iei mine Apimelek a pwätä lesosorusich, a körato nöün kewe nöüwis meinisin o apworausa ngeniir ekewe mettoch meinisin. Iwe, ekewe mwän ra fokun niuokus.
GEN 20:9 Mürin, Apimelek a körato Apraham o üreni, “Met ei ka föri ngenikem? Met ai tipis ngonuk pwe ka awarato eu tipis watte woi pwal won mwüi? Esap wor eman epwe föri ei sokun föför ka föri ngeniei.”
GEN 20:10 Iwe, Apimelek a pwal aisini Apraham, “Pwota ka föri ei sokun föför?”
GEN 20:11 Nge Apraham a pälüeni, “Üa föri ei, pun üa ekieki pwe aramasen ei leni resap niueiti Kot, iwe, repwe nieila pokiten pwülüei we.
GEN 20:12 Ellet, neminei wesewesen fefinei pun nöün semei, nge esap nöün inei. Iwe, üa chök pwülüeni.
GEN 20:13 Nge lupwen Kot a aiti ngeniei pwe üpwe feila seni imwen semei o siamüfetal, üa üreni pwülüei we, ‘Iei usun kopwe pwäri om kirikiröch ngeniei. Lon ekewe leni meinisin sia tori kopwe apasa pwe ngang mongeom.’”
GEN 20:14 Mürin, Apimelek a angei sip me kow pwal chon angang mwän me chon angang fefin o ngeni Apraham. A pwal aliwini ngeni Apraham Sara pwülüan we.
GEN 20:15 Iwe, Apimelek a üreni Apraham, “Nengeni, fanüei a nom mwom, kopwe nonom ia ka mochen nonom ie.”
GEN 20:16 A pwal üreni Sara, “Nengeni, üa ngeni mongeom we engeröü föün moni silifer. Ei epwe alletä ngeni ekewe aramas mi nonom reöm pwe kosap tipis. Ir meinisin repwe silei pwe kosap föri och mi mwäl.”
GEN 20:17 Mürin, Apraham a iotek ngeni Kot fän iter. Iwe, Kot a apöchökülätä Apimelek me pwülüan me nöün kewe chon angang fefin pwe ra tongeni nöünöü.
GEN 20:18 Pun me mwan ewe Samol mi Lapalap a föri pwe ekewe fefin mi nom lon imwen Apimelek ra rit pokiten mine a fis ngeni Sara pwülüen Apraham we.
GEN 21:1 Iwe, ewe Samol mi Lapalap a eäni kirikiröch ngeni Sara o apwönüetä mine a fen pwon ngeni.
GEN 21:2 Iwe, Sara a pwopwo o nöüni eman ät ngeni Apraham lon an chinlap. Ei a fis lon ewe fansoun Kot a fen kapas usun.
GEN 21:3 Nge Apraham a aita ngeni nöün we Isaak.
GEN 21:4 Iwe, Apraham a sirkomsaisi Isaak nöün we, lupwen a tori walü ränin, usun Kot a allük ngeni.
GEN 21:5 Nge Apraham a ierini ipükü, lupwen Isaak a uputiu ngeni.
GEN 21:6 Iwe, Sara a üra, “Kot a apwapwaei o atakiriei, nge meinisin mi rong ei pworaus repwe pwal etiei le takir.”
GEN 21:7 A pwal üra, “Iö a tongeni ürü ngeni Apraham pwe Sara epwe oupwu semirit? Nge iei üa wesewesen nöüni eman ät ngeni Apraham lon an chinlap.”
GEN 21:8 Iwe, ewe ät Isaak a mämäritä, nge lupwen a mwü seni oupw, Apraham a föri eu kametip mi watte lon ewe ränin.
GEN 21:9 Lon eu rän Sara a küna Ismael nöün Hakar we ewe fin Isip, ätewe a nöüni me won Apraham, pwe a urumwotiti Isaak nöün we.
GEN 21:10 Iei mine a üreni Apraham, “Kopwe asüela ewe chon angang me nöün we. Pun nöün ewe chon angang esap eti nei we le wöüni woum.”
GEN 21:11 Iwe, Apraham a fokun oput alon Sara usun Ismael nöün we.
GEN 21:12 Nge Kot a üreni Apraham, “Kosap oput alon Sara usun ewe ät me noum we chon angang fefin. Kopwe föri meinisin mine Sara a ürenuk, pun mwirimwirin Isaak chök ikkei ir mwirimwirum kewe üa pwon ngonuk.
GEN 21:13 Nge üpwe pwal föri seni nöün ewe chon angang fefin eu mwichen aramas mi chomong, pun i pwal noum.”
GEN 21:14 Iei mine Apraham a pwätä lesosorusich, a angei mongö me eu rumen koluk o isetä won afaren Hakar. Iwe, a tinirela me nöün we ät. Iwe, Hakar a feila o süsüfeil lon ewe fanüapön Peersepa.
GEN 21:15 Nge lupwen a pöla ewe koluk seni lon ewe rume, a likitala nöün we fän efoch irä.
GEN 21:16 Mürin, a feila seni o mottiu awenewenan, nge toauan ina epwe ükükün lime ngaf. Pun a apasa, “Üsap tongeni nengeni mälan ewe ät.” Iwe, lupwen a mot ikenan, ewe ät a popuetä le kechü.
GEN 21:17 Nge Kot a aüselinga kechüen ewe ät. Iwe, nöün Kot we chon läng a köri Hakar seni lon läng o üreni, “Met ka weires ren, Hakar? Kosap niuokus, pun Kot a aüselinga kechüen ewe ät seni ewe ia a nom ie.
GEN 21:18 Kopwe ütä, apwätäi ewe ät o achipa, pun ngang üpwe föri seni eu mwichen aramas mi chomong.”
GEN 21:19 Mürin, Kot a anelai mesen Hakar pwe a küna eu chönüttu. Iwe, a feila ngeni, a alölöü ewe rumen koluk o aünü nöün we.
GEN 21:20 Nge Kot a tümwünü ewe ät pwe a mämäritä. Iwe, a nonom lon fanüapö, nge a fokun föükus le likapich.
GEN 21:21 Iwe, lupwen a nonom lon ewe fanüapön Paran, inan we a angei eman pwülüan seni ewe fanü Isip.
GEN 21:22 Lon ewe fansoun Apimelek me Fikol ewe meilapen nöün mwichen sounfiu ra feila ren Apraham o üreni, “Kot a etuk lon meinisin mine ka föri.
GEN 21:23 Iei mine kopwe pwon fän akapel ngeniei ikenai me fän mesen Kot, pwe kosap angangingau ngeniei are ngeni nei kewe are pwal ngeni mwirimwiri kewe. Usun ngang üa kirikiröch ngonuk, iei usun en kopwe pwal kirikiröch ngeniei, pwal ngeni ewe fanü ia ka wasöla lon.”
GEN 21:24 Nge Apraham a üreni, “Ina, üpwe pwon fän akapel ngonuk.”
GEN 21:25 Iwe, lupwen Apraham a apwüngü Apimelek pokiten eu chönüttu nöün kewe chon angang ra angei fän pöchökül,
GEN 21:26 Apimelek a üreni, “Üsap silei iö a föri ena sokun föför. En kosap asile ngeniei, üsamwo rongorong usun tori ikenai.”
GEN 21:27 Mürin, Apraham a angei sip me kow o ngeni Apimelek. Iei usun ekewe ruoman mwän ra pwonfengen.
GEN 21:28 Nge Apraham a aimwüela füman apanen sip seni me lein nöün pwiin sip.
GEN 21:29 Iwe, Apimelek a aisini Apraham, “Met wewen ekewe füman apanen sip en ka aimwüela?”
GEN 21:30 Iwe, a pälüeni, “Ekewe füman apanen sip kopwe angei seniei, pwe repwe eu pisekin pwärätä pwe ngang üa tuw ei chönüttu.”
GEN 21:31 Iei mine ewe leni a iteni Peersepa , pun ikenan ir me ruoman ra pwon fän akapel.
GEN 21:32 Mürin ar pwonfengen lon Peersepa, Apimelek me Fikol ewe meilapen nöün mwichen sounfiu ra ütä o liwiniti ewe fanü Filistia.
GEN 21:33 Iwe, Apraham a fotuki efoch irä itan tamarisk lon Peersepa. Ikenan a fel ngeni ewe Samol mi Lapalap, ewe Kot mi nom tori feilfeilachök.
GEN 21:34 Iwe, Apraham a wasöla lon ewe fanü Filistia fansoun langatam.
GEN 22:1 Mürin ekoch fansoun Kot a sotuni Apraham o üreni, “Apraham.” Nge i a pälüeni, “Ngang iei.”
GEN 22:2 Iwe, Kot a üreni, “Kopwe angei Isaak noum aleman, ka echeni, o feila won ewe fanü Moria. Ikenan kopwe eäni asoren kek ngeniei won eu chuk üpwe aiti ngonuk.”
GEN 22:3 Iei mine Apraham a pwätä lesosorusich, a äsätta mwüch fän iten ewe asoren kek o rietä won nöün aas. A pwal angei Isaak nöün we me ruoman nöün kewe chon angang, pwe repwe eti. Iwe, ra feila lon ewe leni Kot a aiti ngeni.
GEN 22:4 Nge lon aülüngatin ränin ar sai, Apraham a küna ewe leni me toau.
GEN 22:5 Mürin, Apraham a üreni nöün kewe chon angang, “Oupwe nonom ikei me ewe aas. Nge äm me ätei aipwe feila ikenan o fel ngeni Kot. Iwe, are aipwe wes, aipwe liwinto remi.”
GEN 22:6 Mürin, Apraham a angei ewe mwüchün asoren kek o isetä won afaren Isaak nöün we. Nge ewe ekkei me ewe naif a püsin uwei. Iwe, lupwen ra mwinemwinela,
GEN 22:7 Isaak a kapas ngeni Apraham, “Semei!” Nge i a aisini, “Met ka mochen, nei?” Iwe, Isaak a pälüeni, “Üa küna pwe a wor rech ekkei me mwüch, nge ifa ewe sip sipwe eäni asoren kek?”
GEN 22:8 Nge Apraham a pälüeni, “Nei, Kot epwe püsin amolätä eman sip fän iten ach asoren kek.” Iwe, ra mwinemwinela ir me ruoman.
GEN 22:9 Iwe, lupwen ra tori ewe leni Kot a aiti ngeni, Apraham a senätä eu rongen asor o isetä ewe mwüch won. Mürin a föti Isaak nöün we o akona won mwüchün ewe rongen asor.
GEN 22:10 Mürin, Apraham a aitiela pöün o angei ewe naif pwe epwe niela nöün we.
GEN 22:11 Nge nöün ewe Samol mi Lapalap chon läng a köri Apraham me lon läng, “Apraham! Apraham!” Iwe, a pälüeni, “Ngang iei.”
GEN 22:12 Nge ewe chon läng a apasa, “Kosap afeiengaua ewe ät. Iei üa silei pwe ka niueiti Kot, pun kosap achika noum aleman seni.”
GEN 22:13 Iwe, Apraham a nenela o küna eman ätemwänin sip a mwöch lein pötöwöl ren mächän. Iwe, Apraham a feila, a angei ewe ätemwänin sip o eäni asor won ewe rongen asoren kek siwilin nöün we.
GEN 22:14 Iei mine Apraham a aita ngeni ewe leni “Ewe Samol mi Lapalap epwe amolätä.” Nge tori ikenai aramas ra apasa, “Won chukun ewe Samol mi Lapalap epwe molotä.”
GEN 22:15 Iwe, nöün ewe Samol mi Lapalap chon läng a körisefäli Apraham me lon läng
GEN 22:16 o üreni, “Ewe Samol mi Lapalap a apasa: Üa akapelüei. Pokiten ka föri ei pwe kosap achika noum aleman,
GEN 22:17 ngang üpwe fokun afeiöchuk, üpwe pwal achomongala mwirimwirum kana pwe repwe usun chök chomongun ekewe fün läng, pwal usun pien aroset. Iwe, mwirimwirum kana repwe nemeni fanüen ekewe chon oputeer.
GEN 22:18 Chon ekewe mwü won unusen fanüfan repwe feiöch me ren mwirimwirum kana, pun en ka aleasochis ngeni ai kapas.”
GEN 22:19 Iwe, Apraham a liwiniti nöün kewe chon angang. Mürin, ra mwinemwinela Peersepa. Iwe, Apraham a nonom ikenan.
GEN 22:20 Mürin ekoch fansoun Apraham a rongorong pwe Milka a pwal nöünöü me won Nahor pwin we.
GEN 22:21 Iwe, iten ewe mwänichi Us, nge iten pwin kewe Pus, Kemuel semen Aram,
GEN 22:22 Keset, Haso, Piltas, Jitlaf me Petuel.
GEN 22:23 Iwe, Petuel semen Repeka. Ikkei ir ekewe walüman Milka a nöüni me won Nahor pwin Apraham we.
GEN 22:24 Nge wülüpwülüen Nahor itan Rehuma a nöüni Tepa, Kaham, Tahas me Maaka.
GEN 23:1 Iwe, ükükün ierin manauen Sara ipükü rüe me fisu.
GEN 23:2 Iwe, Sara a mäla lon Kiriat Arpa, a pwal iteni Hepron, lon ewe fanü Kanaan. Nge Apraham a tolong ren pwe epwe kechüeiti Sara o ngüngüres won.
GEN 23:3 Mürin, Apraham a ütä seni ewe somä, a feila ren ekewe chon Hit o üreniir,
GEN 23:4 “Ngang eman wasöla mi siamü remi. Ouse mochen oupwe amömö ngeniei eu fanü pwe ai lenien peias, pun üa mochen peiaseni ai ei somä.”
GEN 23:5 Nge ekewe chon Hit ra üreni Apraham,
GEN 23:6 “Äm samol, kopwe aüselingakem. En eman samol mi lap leim. Kopwe peiaseni om we somä lon eu äm lenien peias mi mürina seni meinisin. Ese wor eman leim epwe amwöchü senuk an lenien peias ika epetuk seni om kopwe peiaseni om we somä.”
GEN 23:7 Mürin, Apraham a chapetiu mwen ekewe chon Hit
GEN 23:8 o üreniir, “Are iei letipemi pwe üpwe peiaseni ai we somä, ouse mochen oupwe tüngor ngeni Efron nöün Soar we fän itei,
GEN 23:9 pwe epwe amömö ngeniei an we pwangen achau lon Makpela, a nom lesopolan tanipin we. Epwe amömö ngeniei ren unusen liwinin fän mesemi pwe üpwe eäni lenien peias.”
GEN 23:10 Nge Efron a püsin mot lein ekewe chon Hit lon ewe lenien mwicheich lon asamalapen an telinimw. Iwe, a üreni Apraham me fän mesen ekewe chon Hit meinisin,
GEN 23:11 “Apwi ai samol, kopwe aüselingaei. Üpwe fang ngonuk unusen ewe tanipi me ewe pwangen achau mi nom lon. Üpwe fang ngonuk ewe tanipi me fän mesen aramasei kei pwe kopwe peiaseni om we somä lon.”
GEN 23:12 Mürin, Apraham a chapetiu mwen chon ewe fanü
GEN 23:13 o kapas ngeni Efron me fän meser meinisin, “Kose mochen kopwe pwal aüselingaei. Üpwe mönätiu liwinin ewe tanipi. Kose mochen kopwe angei liwinin pwe üpwe tongeni peiaseni ai we somä ikenan.”
GEN 23:14 Iwe, Efron a üreni Apraham,
GEN 23:15 Ai samol, kopwe aüselingaei. Mön ei fanü engol paun silifer a chök möngin me rech. Kopwe chök peiasenala om we somä.”
GEN 23:16 Iwe, Apraham a tipeeu ngeni Efron. A kiloni ewe silifer Efron a fos usun me mwan fän mesen ekewe chon Hit, pwe epwe ngeni ükükün engol paun silifer. Iwe, Apraham a aea ewe kilo ekewe chon amömö lon ewe leni ra aea.
GEN 23:17 Iei usun Apraham a eäni ewe tanipin Efron lon Makpela a nonom ötiuen Mamre, ewe tanipi me ewe pwangen achau mi nom lon, pwal ekewe irä meinisin mi nom won unusen ewe fanü.
GEN 23:18 Iwe, a anükünük me fän mesen ekewe chon Hit ra mwich lon asamalapen an we telinimw, pwe Apraham a eäni ewe tanipi.
GEN 23:19 Mürin, Apraham a peiaseni Sara pwülüan we lon ewe pwangen achau lon Makpela ötiuen Mamre a pwal iteni Hepron, lon ewe fanü Kanaan.
GEN 23:20 Iei usun ewe tanipi me ewe pwangen achau mi nom lon, än ekewe chon Hit me lom, Apraham a eäni pwe an lenien peias.
GEN 24:1 Iwe, Apraham a chinlapala, pun ierin a chomong. Nge ewe Samol mi Lapalap a afeiöchü Apraham lon meinisin mine a föri.
GEN 24:2 Iwe, Apraham a üreni ewe meilapen nöün kewe chon angang mi nemeni an kewe pisek meinisin, “Kopwe sökalong poum fän aföi,
GEN 24:3 pun kopwe pwon fän akapel ngeni ewe Samol mi Lapalap, ewe Koten läng me fanüfan, pwe kosap tüngor pwülüen nei we me lein ekewe fin Kanaan, ewe ia üa nonom ie.
GEN 24:4 Nge kopwe feila lon fanüei ren aramasei kewe pwe kopwe kütta eman pwülüen Isaak nei we.”
GEN 24:5 Iwe, ewe chon angang a üreni, “Eli ewe föpwül esap mochen etieito ikei. Ifa usun, üpwe uwala noum we ngeni ewe fanü ka feito seni?”
GEN 24:6 Nge Apraham a pälüeni, “Kopwe afäli pwe kosap uwala nei we ikenan.
GEN 24:7 Ewe Samol mi Lapalap, ewe Koten läng mi emwenieiwu seni imwen semei pwal seni poputän fanüei, i a pwon ngeniei fän akapel pwe epwe ngeni mwirimwiri kana ei fanü. Kot epwe tinala nöün chon läng, pwe epwe akom mwom pwe kopwe angei pwülüen nei we seni ikenan.
GEN 24:8 Nge are ewe fefin esap mochen etuk, en kopwe ngas seni om pwon fän akapel ngeniei. Nge kosap fokun uwala nei we ikenan.”
GEN 24:9 Iei mine ewe chon angang a sökalong pöün fän afön an samol Apraham o pwon fän akapel ngeni pwe epwe föri usun mine a apasa.
GEN 24:10 Mürin, ewe chon angang a angei seni an samol engol kamel pwal chomong sokun lifang o feila lon ewe telinimwen Nahor mi nom efeng lon ewe fanü Mesopotamia.
GEN 24:11 Iwe, lupwen ewe chon angang a tori ewe leni, a asösöü ekewe kamel lükün ewe telinimw ünükün eu chönüttu. Ei otun a tori lekuniol, lupwen fefin ra feito pwe repwe üfüf koluk.
GEN 24:12 Iwe, a iotek, “Ai Samol mi Lapalap, än ai samol Apraham we Kot, kose mochen kopwe atufichiei ikenai o eäni kirikiröch ngeni ai we samol Apraham.
GEN 24:13 Üa ütä ikei ünükün ei chönüttu, ia nöün chon ewe telinimw föpwül repwe feito ie o üfüf koluk.
GEN 24:14 Iwe, amwo epwe iei usun: Are üpwe tüngor ngeni eman föpwül, ‘Kose mochen apäa om na rume pwe üpwe ünümi ekis koluk seni,’ nge i epwe üra, ‘Kopwe ün, nge üpwe pwal aünü noum kewe kamel,’ neminewe epwe ina i ewe ka filätä pwe pwülüen noum we chon angang Isaak. Ren ei ngang üpwe silei pwe ka eäni kirikiröch ngeni ai we samol.”
GEN 24:15 Iwe, lupwen esamwo wes me iotek, Repeka a war o uwei eu an rumen koluk won afaran. Iwe, Repeka nöün Petuel we föpwül, nge Petuel nöün Milka pwülüen Nahor we, nge Nahor pwin Apraham.
GEN 24:16 Iwe, ewe föpwül a fokun liöch, nge esamwo pwal pwüpwülü. Iwe, a tötiu lon ewe chönüttu o alölöü an we rume. Iwe, lupwen a tötä,
GEN 24:17 ewe chon angang a mümütüto ren o üreni, “Kose mochen ngeniei ekkum ünümei koluk seni om na rume.”
GEN 24:18 Nge Repeka a pälüeni, “Kopwe ün ai samol.” Iwe, a müttir uwätiu an we rume me won afaran o aünü ewe mwän ewe koluk.
GEN 24:19 Iwe, lupwen Repeka a wes me aünü, a pwal üreni, “Ngang üpwe pwal üfi ünümen noum kewe kamel tori ar repwe möt.”
GEN 24:20 Mürin, a müttir ninalong ewe koluk lon ewe lenien ün o mümütsefälila ngeni ewe chönüttu pwe epwe üfi ünümen ekewe kamel koluk tori ra möt.
GEN 24:21 Iwe, ewe mwän a chök fanafanala o newenewen ngeni, pun epwe pi ika ewe Samol mi Lapalap a afeiöchü an sai, ika esap afeiöchü.
GEN 24:22 Iwe, lupwen ekewe kamel ra wes me ün, ewe mwän a angei efoch ring o ngeni ewe föpwül, nge choun ewe ring ina epwe eu lelimu aunus. Iwe, a pwal ngeni ruu lälä seni kolt fän iten pöün, nge choun eu lälä ina epwe rüanü aunus.
GEN 24:23 Mürin a aisini, “Kose mochen üreniei ika en nöün iö? Ifa usun, epwe wor lenien äm asösö lon imwen semom?”
GEN 24:24 Nge Repeka a pälüeni, “Ngang nöün Petuel, nge semei nöün Milka pwülüen Nahor we.”
GEN 24:25 Iwe, a pwal apasa, “Mi fokun wor lenien om asösö rem, mi pwal wor fetilipwas me enen noum kewe man.”
GEN 24:26 Mürin, ewe mwän a chapetiu lepwül o fel ngeni ewe Samol mi Lapalap.
GEN 24:27 Iwe, a apasa, “Üpwe mwareiti ewe Samol mi Lapalap än ai samol Apraham we Kot, pwe esap amwöchü seni ai samol an tong me an allükülük. Pun ewe Samol mi Lapalap a wenewenen emweniei tori imwen aramasen semen ai we samol.”
GEN 24:28 Iwe, ewe föpwül a mümütüla lon imwen inan we o apworausa ekewe mettoch meinisin.
GEN 24:29 Nge a wor eman mongeen Repeka itan Lapan. Iwe, ätewe a mümütüla ren ewe mwän mi nom ünükün ewe chönüttu.
GEN 24:30 Pun lupwen Lapan a küna ewe ring me ekewe lälä won pöün fefinan we, a pwal rong mine Repeka a apworausa usun alon ewe mwän ngeni, a feila ren nöün Apraham we chon angang mi ütä ren nöün kewe kamel ünükün ewe chönüttu.
GEN 24:31 Iwe, Lapan a üreni, “Kopwe etiei, chon feiöch me ren ewe Samol mi Lapalap. Pwota ka chök ükü ikei? Üa fen amolätä leniom lon imwei, pwal lenien ekewe kamel.”
GEN 24:32 Iei mine ewe mwän a tolong leimw. Nge Lapan a apichala ririn ekewe kamel, a pwal ngeniir fetilipwas me mongö. Iwe, a uwato koluk ren ewe mwän me chienan kewe pwe repwe talü pecher.
GEN 24:33 Nge lupwen a uwato mongö ren ewe mwän, ätewe a üreni, “Üsap fokun mongö tori üpwe wes me apworausa pworausei.” Mürin, Lapan a pälüeni, “Kopwe pworaus.”
GEN 24:34 Iwe, a apasa, “Ngang nöün Apraham we chon angang.
GEN 24:35 Ewe Samol mi Lapalap a fokun afeiöchü ai samol pwe a wöümong. A ngeni chomong pwiin sip me kow, silifer me kolt, chon angang mwän me chon angang fefin, pwal kamel me aas kana.
GEN 24:36 Nge lupwen Sara pwülüen ai we samol a chinlap, a nöüni eman ät me won. Iwe, Apraham a ngeni nöün we wöün meinisin.
GEN 24:37 Ai samol a üreniei pwe üpwe pwon fän akapel ngeni. Iwe, a apasa, ‘Kosap tüngor pwülüen nei we me lein ekewe fin Kanaan, ewe ia üa nonom ie.
GEN 24:38 Nge kopwe feila ren aramasen semei o kütta eman pwülüen nei we alüal.’
GEN 24:39 Nge ngang üa üreni ai samol, ‘Eli ewe föpwül esap mochen etieito.’
GEN 24:40 Iwe, a üreniei, ‘Ewe Samol mi Lapalap üa aleasochis ngeni epwe tinato nöün chon läng pwe epwe etuk o afeiöchü om sai. Kopwe angei eman pwülüen nei we alüal seni aramasen semei.
GEN 24:41 Iwe, lupwen kopwe tori aramasei kewe, kopwe ngas seni om we pwon fän akapel ngeniei. Nge are resap mochen mwüt ngonuk ewe föpwül, kopwe chök ngas seni om we pwon fän akapel ngeniei.’
GEN 24:42 Iwe, lupwen üa tori ünükün ewe chönüttu ikenai, üa iotek, ‘Ai Samol mi Lapalap, än ai samol Apraham we Kot, kose mochen afeiöchü ai ei sai.
GEN 24:43 Üa ütä ikei ünükün ei chönüttu. Amwo epwe iei usun: Are eman föpwül a feito pwe epwe üfüf koluk, nge üpwe tüngor ngeni, “Kose mochen ngeniei ekkum ünümei koluk seni om na rume,”
GEN 24:44 nge i epwe üra, “Kopwe ün, nge üpwe pwal aünü noum kewe kamel,” neminewe epwe ina i ewe ka filätä pwe pwülüen nöün ai we samol.’
GEN 24:45 Iwe, mwen üsamwo wes le iotek lon lelukei, Repeka a feito o uwei an we rumen koluk won afaran. A tötiu lon ewe chönüttu pwe epwe üfüf koluk. Iwe, ngang üa tüngor ngeni, ‘Kose mochen kopwe aünüei.’
GEN 24:46 Iwe, a müttir isetiu an we rume seni won afaran o apasa, ‘Kopwe ün, nge üpwe pwal aünü noum kewe kamel.’ Iwe, üa ün, nge a pwal aünü ekewe kamel.
GEN 24:47 Mürin üa aisini, ‘En nöün iö?’ Iwe, a pälüeni, ‘Ngang nöün Petuel, nge semei nöün Milka pwülüen Nahor we.’ Mürin üa apachätä ewe ring won pwötün o anomu ekewe lälä won pöün.
GEN 24:48 Iwe, üa chapetiu lepwül o fel ngeni ewe Samol mi Lapalap. Üa mwareiti ewe Samol mi Lapalap än ai samol Apraham we Kot, pun a emwenieito won efoch al mi wenechar, pwe üpwe tüngor eman föpwül seni aramasen ai samol pwe pwülüen nöün we alüal.
GEN 24:49 Iei kopwe pwäri ngeniei are kopwe eäni kirikiröch me allükülük ngeni ai we samol. Nge ika kosap, kopwe pwal pwäri ngeniei pwe üpwe silei mine üpwe föri.”
GEN 24:50 Mürin, Lapan me Petuel ra pälüeni, “Ei mettoch a pop seni ewe Samol mi Lapalap. Äm aisap tongeni filätä och me lükün ei.
GEN 24:51 Iei i Repeka. Kopwe angei o uwala pwe epwe pwülüen nöün om we samol usun ewe Samol mi Lapalap a püsin apasa.”
GEN 24:52 Iwe, lupwen nöün Apraham we chon angang a rong ar kewe kapas, a chapetiu lepwül o fel ngeni ewe Samol mi Lapalap.
GEN 24:53 Mürin, ewe chon angang a uwawu fout seni silifer me kolt pwal mangaku o ngeni Repeka. Iwe, a pwal kisen ngeni mongeen Repeka we me inan pisek mi aüchea.
GEN 24:54 Mürin, ewe chon angang me chienan kewe ra mongö o ün, ra pwal möür ikenan. Nge lupwen ra pwätä lesosor, ewe chon angang a apasa, “Ouse mochen oupwe mwüt ngeniei pwe üpwe liwinla ren ai samol.”
GEN 24:55 Nge mongeen Repeka me inan we ra üreni, “Kose mochen mwüt ngenikem ewe föpwül epwe mwo ekis nonom rem, eli lon ükükün engol rän. Mürin epwap feila.”
GEN 24:56 Nge ewe chon angang a pälüeni, “Ouse mochen ousap amwöchüei, pun ewe Samol mi Lapalap a afeiöchü ai sai. Ouse mochen oupwe mwüt ngeniei pwe üpwe liwinla ren ai samol.”
GEN 24:57 Iwe, ra üreni, “Aipwe köri Repeka o aisini met letipan.”
GEN 24:58 Mürin ra körato o aisini, “Ifa usun, ka mochen eti ei mwän?” Nge Repeka a pälüeni, “Ewer, üpwe eti.”
GEN 24:59 Iwe, ra tinala Repeka fefiner we me nöün chon angang fefin, pwal nöün Apraham chon angang me chienan kewe.
GEN 24:60 Ra afeiöchü Repeka o üreni, “En fefinem kopwe inelapen aramas mi chomong usun pien aroset. Mwirimwirum kana repwe nemeni ekewe telinimwen chon oputeer.”
GEN 24:61 Mürin Repeka me nöün kewe chon angang fefin ra amolätä ar sai, ra tötä won ekewe kamel pwe repwe eti nöün Apraham we chon angang. Iei usun ir meinisin ra feila.
GEN 24:62 Iwe, Isaak a liwinto seni ewe chönüttu Peer Lahairoi, pun a nonom lon ewe fanü Nekep.
GEN 24:63 Iwe, Isaak a feila lemäl lekuniol pwe epwe iotek. Nge lupwen a chimwetä, a küna pwe eu mwichen kamel a feito.
GEN 24:64 Iwe, pwal Repeka a chimwetä. Nge lupwen a küna Isaak, a tötiu seni wan we kamel
GEN 24:65 o aisini ewe chon angang, “Iö ewe mwän pekila a fetal lemäl pwe epwe sounikich?” Ewe chon angang a pälüeni, “Iei i ai we samol.” Iwe, Repeka a angei och mangaku o pwölüöla won mesan.
GEN 24:66 Nge ewe chon angang a apworausa ngeni Isaak usun meinisin mine a föri.
GEN 24:67 Mürin, Isaak a emwenalong Repeka lon imwen Sara inan we. Iwe, a pwülüeni o echeni. Iei usun Isaak a chipila mürin än inan we mäla.
GEN 25:1 Iwe, Apraham a pwüpwülüsefäl ngeni eman fefin itan Katura.
GEN 25:2 Neminewe a nöüni me won Apraham Simran, Joksan, Metan, Mitian, Ispak me Sua.
GEN 25:3 Joksan semen Sepa me Tetan, nge ekewe mwirimwirin Tetan ekewe chon Asur, chon Letus me chon Leum.
GEN 25:4 Iwe, a wor limman nöün Mitian mwän: Efah, Efer, Hanok, Apita me Eltaa. Ir meinisin mwirimwirin Katura.
GEN 25:5 Iwe, Apraham a ngeni Isaak wöün meinisin.
GEN 25:6 Nge lupwen a chüen manau, a ngeni nöün kewe mwän me won Hakar me Katura lifanger. Mürin a tinirela ngeni ewe fanüen ötiu pwe repwe toauela seni Isaak nöün we.
GEN 25:7 Iwe, ierin manauen Apraham ipükü fik me limu.
GEN 25:8 Mürin, Apraham a mäla lupwen a wesewesen chinlap. Iwe, a chufengen me an kewe lewo.
GEN 25:9 Nge nöün kewe Isaak me Ismael ra peiaseni lon ewe pwangen achau lon Makpela ötiuen Mamre, a nom lon ewe tanipin Efron nöün Sohar we, ewe re Hit.
GEN 25:10 Iei ewe tanipi Apraham a möni seni ekewe chon Hit. Ikenan ra peiaseni Apraham ünükün Sara pwülüan we.
GEN 25:11 Iwe, mürin än Apraham mäla Kot a afeiöchü Isaak nöün we. Nge Isaak a nonom arun ewe chönüttu Peer Lahairoi.
GEN 25:12 Iei uruwon mwirimwirin Ismael nöün Apraham we, Hakar ewe fin Isip a nöüni me won, lupwen Sara a nöüni chon angang.
GEN 25:13 Ikkei iten nöün Ismael kewe mwän lon tettelin ar uputiu: Nepaiot ewe mwänichi, Ketar, Atpeel, Mipsam,
GEN 25:14 Misma, Tuma, Massa,
GEN 25:15 Hatat, Tema, Jetur, Hafis me Ketema.
GEN 25:16 Nöün Ismael kei, ir ekewe engol me ruoman samolun ar kewe ainang lon tettelin sopur me lenier kewe.
GEN 25:17 Iwe, ierin manauen Ismael ipükü ilik me fisu. Mürin a mäla o chufengen me an kewe lewo.
GEN 25:18 Iwe, ekewe mwirimwirin Ismael ra nonom lon ewe fanü seni Hawila tori Shur ötiuen Isip awenewenen Asiria. Nge ra nonom lon fanüer o tipepöchökül ngeni pwir kewe ekewe mwirimwirin Apraham.
GEN 25:19 Iei pworausen Isaak nöün Apraham we.
GEN 25:20 Iwe, Isaak a ierini faik, lupwen a pwülüeni Repeka nöün Petuel we ewe re Siria seni Mesopotamia. Nge Repeka fefinen Lapan we.
GEN 25:21 Iwe, Isaak a ikiotek fän äsengesin pwülüan we, pun a rit. Nge ewe Samol mi Lapalap a aüselinga an iotek, iei mine Repeka a pwopwo.
GEN 25:22 Nge a wor nöün lippwe, ra fiufengen lon lukan. Iwe, Repeka a apasa, “Met popun a fis ngeniei ei sokun lapalap?” Iwe, a feila pwe epwe aisini ewe Samol mi Lapalap usun.
GEN 25:23 Nge ewe Samol mi Lapalap a üreni, “Ruu ainang ra nonom lon lukom, nge ruu mwichen aramas repwe uputiu senuk. Iwe, ekewe ruu mwich repwe aimwüfesen, nge eu leir epwe pöchökül mwen eu. Iwe, ewe mi lap epwe angang ngeni ewe mi kis.”
GEN 25:24 Iwe, lupwen a tori fansoun an nöünöü, a wor nöün lippwe.
GEN 25:25 Iwe, ewe aeumanün mi uputiu akom a parapar ünüchan, nge unusen inisin a ülöül usun ülen man. Iei mine ra aita ngeni Esau .
GEN 25:26 Mürin pwin we a uputiu, nge pöün a amwöchü apilipilin pechen Esau. Iei mine ra aita ngeni Jakop . Iwe, Isaak a ierini wone, lupwen Repeka a nöünöü.
GEN 25:27 Iwe, lupwen ekewe ät ra mämäritä, Esau a fokun foukus le likapich manmwacho, eman mi sani le nom lemäl. Nge Jakop eman mwän mi mosonoson, a chök nonom leimw.
GEN 25:28 Iwe, Isaak a echeni Esau, pun a sani le ochoch liapan man. Nge Repeka a echeni Jakop.
GEN 25:29 Iwe, lon eu rän, lupwen Jakop a amoota och mongö, Esau a liwinto seni lemäl, nge a fokun echik.
GEN 25:30 Iwe, Esau a üreni Jakop, “Kose mochen ngeniei och seni ewe mongö mi par pwe üpwe mongö, pun üa fokun echik.” Iei popun ra aita ngeni Etom .
GEN 25:31 Nge Jakop a pälüeni, “Üpwe ngonuk ei mongö, are kopwe amömö ngeniei wisom wisen mwänichi.”
GEN 25:32 Mürin, Esau a üreni, “Nengeni, üpwe le mäla. Met echök lomoten ai wiseni ewe wisen mwänichi.”
GEN 25:33 Nge Jakop a pälüeni, “Kopwe akomwen akapel ngeniei pwe kopwe ngeniei wisom we.” Iei mine Esau a akapel ngeni o amömö ngeni wisan we wisen mwänichi.
GEN 25:34 Mürin, Jakop a ngeni Esau pilawa me ewe mongö mi par. Iwe, Esau a mongö o ün, a pwal ütä o feila. Iei usun Esau a aücheangaua wisan we wisen mwänichi.
GEN 26:1 Iwe, a fis lengita lon ewe fanü usun chök ewe a fis me lom lupwen fansoun Apraham. Nge Isaak a saila Kerar ren Apimelek ewe kingen Filistia.
GEN 26:2 Iwe, ewe Samol mi Lapalap a pwä ngeni o apasa, “Kosap feila Isip, nge kopwe chök nomotiu lon ewe fanü ia ngang üpwe aiti ngonuk pwe kopwe nom ie.
GEN 26:3 Kopwe wasöla lon ei fanü, nge ngang üpwe etuk o afeiöchuk. Iwe, üpwe ngenikemi me mwirimwirum kana ei fanü meinisin, üpwe pwal apwonüetä mine üa pwon fän akapel ngeni Apraham semom we.
GEN 26:4 Ngang üpwe achomongala mwirimwirum kana pwe repwe usun chök chomongun fün läng, üpwe pwal ngeniir unusen ei fanü. Iwe, chon ekewe mwü meinisin won fanüfan repwe küna feiöch reöm,
GEN 26:5 pun Apraham a aleasochisi aloi o tümwünüöchü meinisin mine üa allük ngeni.”
GEN 26:6 Iwe, Isaak a chök nonom Kerar.
GEN 26:7 Nge lupwen ekewe re Kerar ra kapas ngeni usun pwülüan we, a üreniir, “Neminei fefinei,” pun a niuokus le apasa pwe i pwülüan. A chök ekieki pwe ekewe re Kerar repwe niela pokiten Repeka, pun a fokun liöch.
GEN 26:8 Nge lupwen a nonom ikenan fansoun langatam, Apimelek ewe kingen Filistia a nenewu seni lon asammwachon imwan o küna Isaak pwe a romi Repeka pwülüan we.
GEN 26:9 Iwe, Apimelek a körato Isaak o üreni, “Neminan wesewesen pwülüom. Pwota ka apasa pwe i fefinom?” Nge Isaak a pälüeni, “Üa chök ekieki pwe üpwe ninniila pokitan.”
GEN 26:10 Mürin, Apimelek a üra, “Pwota ka föri ngenikem ei sokun? A fokun tongeni fis pwe eman lein ekewe aramas epwe kon ren pwülüom we. Nge en kopwe awarato tipis wom.”
GEN 26:11 Iei mine Apimelek a fönöü nöün aramas meinisin, “Are eman epwe atapa ei mwän ika pwülüan, epwe mäla.”
GEN 26:12 Iwe, Isaak a tanipi lon ewe fanü, nge lon ena ier a kinikin fän ipükü lap seni mine a fotuki, pun ewe Samol mi Lapalap a afeiöchü Isaak.
GEN 26:13 Iwe, a pisekisekila, a pwal fefeitä tori a fokun wöümong.
GEN 26:14 A wor chomong nöün pwiin sip me kow, pwal chomong nöün chon angang, iei mine ekewe chon Filistia ra lolowo ngeni.
GEN 26:15 Iwe, ekewe chon Filistia ra ireela ekewe chönüttu meinisin nöün saman kewe chon angang ra tuw lupwen fansoun Apraham saman we.
GEN 26:16 Mürin, Apimelek a üreni Isaak, “Kopwe sü senikem, pun ka pöchökül o wöümong senikem.”
GEN 26:17 Iei mine Isaak a feila seni ikenan, a säla lemolun Kerar o nom ikenan.
GEN 26:18 Iwe, Isaak a tusefäli ekewe chönüttu ra fen tu lupwen fansoun Apraham saman we, pun ekewe chon Filistia ra ireerela mürin än Apraham mäla. Iwe, a aita ngeniir ekewe it saman we a fen aita ngeniir.
GEN 26:19 Nge lupwen nöün Isaak kewe chon angang ra tuw eu chönüttu lon ewe lemol o küna eu koluk mi puächetä,
GEN 26:20 ekewe chon fofol man seni Kerar ra anini ngeni nöün Isaak kewe chon fofol man o apasa, “Ei koluk äm.” Iei mine Isaak a aita ngeni ewe chönüttu Esek , pun ra anini ngeni.
GEN 26:21 Mürin, nöün Isaak kewe chon angang ra pwal tuw eu chönüttu, nge ra pwal fitikoko ngeni won. Iei mine Isaak a aita ngeni ewe chönüttu Sitna .
GEN 26:22 Iwe, seni ikenan a feila ekis o tuw pwal eu chönüttu. Mürin resap chüen anini won. Iei mine a aita ngeni Rehopot , pun a apasa, “Iei ewe Samol mi Lapalap a wäsi leniach pwe sipwe chomongola won ei fanü.”
GEN 26:23 Nge seni ikenan Isaak a feila Peersepa.
GEN 26:24 Iwe, ewe Samol mi Lapalap a pwä ngeni lon ewe chök pwin o apasa, “Ngang än semom Apraham we Kot. Kosap niuokus, pun ngang üa etuk, üpwe pwal afeiöchuk o achomongala mwirimwirum kana pokiten ai pwon ngeni nei we chon angang Apraham.”
GEN 26:25 Iei mine Isaak a senätä eu rongen asor ikenan o fel ngeni ewe Samol mi Lapalap. A pwal aüetä imwan imw mangaku, nge nöün kewe chon angang ra pwal tuw eu chönüttu.
GEN 26:26 Mürin, Apimelek a feila seni Kerar pwe epwe churi Isaak, nge Ahussat nöün chon öüröür me Fikol ewe meilapen nöün mwichen sounfiu ra eti.
GEN 26:27 Iwe, Isaak a aisiniir, “Pwota oua feito rei, nge oua fen oputaei o asüeila senikemi?”
GEN 26:28 Nge ir ra pälüeni, “Am aia küna pwe ewe Samol mi Lapalap a wesewesen etuk. Iei mine aia mochen pwe sipwe pwonfengen fän akapel o föri eu pwonen atipeeufengen lefilach.
GEN 26:29 Iwe, kosap afeiengauakem usun chök äm aisap pwal afeiengauok. Aia chök kirikiröch ngonuk o tinukela fän kinamwe. Iei en ka feiöch me ren ewe Samol mi Lapalap.”
GEN 26:30 Iwe, Isaak a föri eu kametip mi watte, nge ra mongöfengen o ünfengen.
GEN 26:31 Nge lesosorusich ra pwätä o pwonfengen fän akapel. Mürin, Isaak a tinirela, nge ra imwüfesen fän kinamwe.
GEN 26:32 Iwe, lon ewe chök ränin, nöün Isaak kewe chon angang ra feito ren, ra apworausa ngeni usun ewe chönüttu ra tuw o apasa, “Äm aia küna koluk.”
GEN 26:33 Iwe, Isaak a aita ngeni ewe chönüttu Sepa . Iei mine ewe telinimw a iteni Peersepa tori ikenai.
GEN 26:34 Iwe, lupwen Esau a ierini faik, a pwülüeni ruoman fin Hit: Jutit nöün Peeri we, me Pasemat nöün Elon we.
GEN 26:35 Nge ra fokun ariaföüü Isaak me Repeka.
GEN 27:1 Iwe, lupwen Isaak a chinlap, mesan ra toputop pwe esap chüen tongeni küna. Iwe, a köri Esau nöün we mwänichi o apasa, “Nei!” Nge Esau a pälüeni, “Ngang iei.”
GEN 27:2 Iwe, Isaak a üreni, “Ka küna pwe üa chinlap, nge üsap silei inet üpwe mäla.
GEN 27:3 Iei kopwe angei om kewe pisekin likapich o feila lemäl pwe kopwe liapeni eman uchäi manmwacho.
GEN 27:4 Iwe, kopwe föri och mongö mi anö usun ai mwon o uwato rei pwe üpwe mongö. Pun üa mochen afeiöchuk mwen ai üpwe mäla.”
GEN 27:5 Nge Repeka a rongorong mine Isaak a eäni kapas ngeni Esau nöün we. Iwe, lupwen Esau a feila lemäl pwe epwe liapeni eman manmwacho,
GEN 27:6 Repeka a üreni Jakop nöün we, “Üa rong pwe semom a kapas ngeni pwiüm Esau,
GEN 27:7 ‘Kopwe uwato eman manmwacho rei o föri och mongö mi anö fän itei pwe üpwe mongö. Pun üa mochen afeiöchuk me fän mesen ewe Samol mi Lapalap mwen ai üpwe mäla.’
GEN 27:8 Iei mine nei, kopwe aleasochisi mine üpwe ürenuk.
GEN 27:9 Kopwe feila o uwato ruoman apanen kuuch mi aümanau pwe üpwe föri och mongö mi anö fän iten semom we usun an mwon.
GEN 27:10 Mürin kopwe uwala ren semom pwe epwe mongö o afeiöchuk mwen an epwe mäla.”
GEN 27:11 Nge Jakop a üreni Repeka inan we, “Ka silei pwe Esau pwii we eman mwän mi fokun ülöül, nge ngang üsap fokun ülöül.
GEN 27:12 Eli semei epwe atapaei, nge epwe mefi pwe üa atupu. Iwe, epwe anümamauaei, nge esap afeiöchüei.”
GEN 27:13 Nge inan we a üreni, “Nei, ewe anümamau epwe nonom woi. Kopwe chök aleasochisi aloi, kopwe feila o uwato rei ekewe kuuch.”
GEN 27:14 Iei mine Jakop a feila o uweereto ren inan we. Nge neminewe a föri eu mongö mi anö usun Isaak a mwon.
GEN 27:15 Mürin, Repeka a angei üfen Esau mi fokun öch ra nom lon imwan o aüföüfa ngeni Jakop.
GEN 27:16 Nge silin ekewe kuuch a tükümi ngeni pöün me üan pwe epwe ülöül ren.
GEN 27:17 Mürin, Repeka a ngeni Jakop ewe mongö mi anö me ewe pilawa a amolätä.
GEN 27:18 Iwe, Jakop a tolong lon äseengen saman we o üra, “Semei!” Nge Isaak a pälüeni, “Ngang iei, nei, nge en iö, Esau ika Jakop?”
GEN 27:19 Iwe, Jakop a üreni saman we, “Ngang Esau noum we mwänichi. Üa föri mine ka akünöü ngeniei. Kose mochen kopwe pwätä o ochoch liapei ei man pwe kopwe afeiöchüei.”
GEN 27:20 Nge Isaak a aisini nöün we, “Nei, ifa usun, met popun ka müttir le liap?” Nge a pälüeni, “Pun ewe Samol mi Lapalap om we Kot a aliapaei.”
GEN 27:21 Mürin, Isaak a üreni Jakop, “Nei, kopwe kineto rei pwe üpwe atapok o silei, are en ka wesewesen nei we Esau are eman.”
GEN 27:22 Iei mine Jakop a kan ngeni saman, nge ätewe a atapa o apasa, “Ngingimw a usun chök ngingin Jakop, nge poum ra usun chök pöün Esau.”
GEN 27:23 Iwe, Isaak esap silleni Jakop, pun pöün ra ülöül usun pöün pwin Esau. Nge lupwen an epwe le afeiöchü,
GEN 27:24 a aisinisefäli, “Ifa usun, en wesewesen nei Esau?” Iwe, Jakop a pälüeni, “Ewer!”
GEN 27:25 Mürin, Isaak a üreni, “Kopwe uwato rei mine ka liapeni pwe üpwe ochoch o afeiöchuk.” Iwe, Jakop a uwato ren, nge Isaak a mongö. A pwal uwato ünüman wain, nge a ün.
GEN 27:26 Mürin, Isaak a üreni Jakop, “Nei, kopwe kineto o mitiriei.”
GEN 27:27 Iwe, lupwen Jakop a kineto o mitiri, saman we Isaak a tini pwoon üfan, a afeiöchü o apasa, “Pwoon nei a usun chök pwoon eu mälämäl ewe Samol mi Lapalap a afeiöchü.
GEN 27:28 Iwe, Kot epwe fang ngonuk amurenipwin seni läng me pwülüöchün fanü pwe anom me ünümom repwe somwola.
GEN 27:29 Chon ekewe mwü repwe angang ngonuk, nge chomong mwichen aramas repwe chapetiu me mwom. Kopwe samolun pwiüm kana, nge nöün inom repwe chapetiu me mwom. Epwe anümamau iö epwe anümamauok, nge epwe feiöch iö epwe afeiöchuk.”
GEN 27:30 Iwe, wesin än Isaak afeiöchü Jakop, nge lupwen Jakop ekärän towu seni saman, Esau pwin we a war seni an likapich man.
GEN 27:31 Iwe, Esau a pwal föri och mongö mi anö o uwato ren saman. A üreni saman we, “Kose mochen kopwe pwätä o ochoch liapei ei man pwe kopwe afeiöchüei.”
GEN 27:32 Nge Isaak a aisini, “En iö?” Nge Esau a pälüeni, “Ngang Esau noum mwänichi.”
GEN 27:33 Iwe, Isaak a fokun chechech o apasa, “Iö chök ewe chon likapich man a uwato liapan rei? Üa mongö meinisin mwen kosamwo feito, üa pwal afeiöchü. Ewer, epwe fokun feiöch.”
GEN 27:34 Iwe, lupwen Esau a rong mine saman we a üreni, a fokun kechü lon an letipeta o tüngor ngeni saman, “Kose mochen kopwe pwal afeiöchüei.”
GEN 27:35 Nge Isaak a pälüeni, “Pwiüm we a feito fän tipachemsolä o angeala feiöchum we.”
GEN 27:36 Iwe, Esau a apasa, “A let pwe itan Jakop. Pun iei aruuen an atupuei. Iwe, a angeala wisei we wisen mwänichi, nge iei a angeala feiöchi we.” Mürin a aisini saman we, “Ifa usun, esap wor pwal eu feiöch ka iseis fän itei?”
GEN 27:37 Nge Isaak a pälüeni Esau, “Nengeni, üa seikätä Jakop pwe epwe om samol, nge pwin kana meinisin repwe angang ngeni. Iwe, anan me ünüman repwe somwola. Met chök üpwe pwal föri ngonuk, nei?”
GEN 27:38 Iwe, Esau a tüngormau ngeni saman we, “Ifa usun, a chök wor eu om feiöch, semei? Kose mochen kopwe pwal afeiöchüei.” Nge Esau a leüömong le kechü.
GEN 27:39 Mürin, Isaak saman we a pälüeni, “Kopwe imweimw toau seni pwülüöchün fanü, pwal seni amurenipwinin läng.
GEN 27:40 Kopwe manau ren noum ketilas, nge kopwe angang ngeni pwiüm. Iwe, lupwen om kopwe pöchökülela, epwap fis pwe kopwe towu seni fän nemeneman.”
GEN 27:41 Iwe, Esau a koum ngeni Jakop pokiten ewe feiöch saman we a afeiöchü ngeni. Iwe, Esau a apasa ngeni püsin i, “Ränin kechüeiti semei, lupwen epwe mäla, a arapoto. Mürin üpwap niela Jakop.”
GEN 27:42 Nge eman a asile ngeni Repeka alon Esau. Iei mine a köri Jakop o üreni, “Esau pwiüm we a achipa lelukan ren an ekiekin niikala.
GEN 27:43 Iei mine, nei, kopwe aleasochisi mine üpwe ürenuk. Kopwe ütä o sükaila ren mongeei we Lapan lon Haran.
GEN 27:44 Iwe, kopwe nonom ren ekoch fansoun tori epwe kisikisila än pwiüm we koum ngonuk.
GEN 27:45 Iwe, lupwen epwe wes an song ngonuk, epwe pwal manlükala mine ka föri ngeni, ngang üpwap titila reöm pwe kopwe liwinto seni ikenan. Pwota ämi me ruoman oupwe mä seniei lon eu chök rän?”
GEN 27:46 Mürin, Repeka a üreni Isaak, “Ngang üsap chüen mochen manau pokiten pwülüen Esau kewe fin Hit. Are Jakop epwe pwal pwülüeni eman lein ekei fin Hit, epwe fen öch ai üpwe mäla.”
GEN 28:1 Mürin, Isaak a köri Jakop, a afeiöchü o fönöü, “Kosap fokun pwüpwülü ngeni eman fin Kanaan.
GEN 28:2 Nge kopwe feila Mesopotamia lon imwen Petuel semen inom we. Iwe, kopwe tüngor seni ikenan eman föpwül nöün Lapan mongeen inom we pwe kopwe pwülüeni.
GEN 28:3 Amwo ewe Kot mi Unusen Manaman epwe afeiöchuk, epwe pwal aupwuk o achomongokola pwe kopwe wiliti eu mwichen aramas mi chomong.
GEN 28:4 Amwo epwe afeiöchuk me mwirimwirum kana usun an afeiöchü Apraham, pwe kopwe fanüeni ewe fanü ka wasöla lon, ewe fanü Kot a fen ngeni Apraham!”
GEN 28:5 Iei usun Isaak a kapas ngeni Jakop o tinala Mesopotamia ren Lapan nöün Petuel ewe re Siria. Nge Lapan mongeen Repeka inen Jakop me Esau.
GEN 28:6 Iwe, Esau a silei pwe Isaak a afeiöchü Jakop o tinala Mesopotamia, pwe epwe tüngor eman pwülüan seni ikenan. A pwal rong pwe Isaak a fönöü Jakop lupwen an afeiöchü, pwe esap fokun pwüpwülü ngeni eman fin Kanaan.
GEN 28:7 Iwe, a pwal küna pwe Jakop a aleasochis ngeni saman me inan o feila Mesopotamia.
GEN 28:8 Iwe, lupwen Esau a mefi pwe Isaak saman we a oput ekewe fin Kanaan,
GEN 28:9 a feila ren Ismael nöün Apraham we o angei eman nöün föpwül itan Mahalat pwe pwülüan lükün pwülüan kewe. Iwe, Mahalat fefinen Nepajot.
GEN 28:10 Iwe, Jakop a feila seni Peersepa pwe epwe feila Haran.
GEN 28:11 Nge lupwen akkar a tup, a tori eu leni o pwini epwin ikenan. Iwe, Jakop a angei eföü fau me lon ewe leni pwe epwe ülleni, a kon o möür.
GEN 28:12 Iwe, a tan pwe efoch latta a ititä seni won fanüfan, nge lesopun a tori läng. Iwe, nöün Kot kewe chon läng ra tötä o tötiu won.
GEN 28:13 Nge ewe Samol mi Lapalap a ü asen ewe latta o apasa, “Ngang ewe Samol mi Lapalap än semom Apraham me Isaak we Kot. Ewe fanü ka kon won üpwe ngonuk me mwirimwirum kana.
GEN 28:14 Iwe, mwirimwirum repwe chomong usun chök pwülmoromoren fanü. Oupwe chonifetalei ewe fanü tori lotou me ötiu, pwal tori efeng me ör. Iwe, chon ekewe mwü meinisin won fanüfan repwe feiöch me reöm me mwirimwirum kana.
GEN 28:15 Ngang üpwe etuk o tümwünuk ekis meinisin ia kopwe feila ie, üpwe pwal aliwiniiketo won ei fanü, pun ngang üsap likituk tori üpwe apwönüetä meinisin mine üa pwon ngonuk.”
GEN 28:16 Iwe, lupwen Jakop a nela seni an möür, a apasa, “Ellet, ewe Samol mi Lapalap a nonom lon ei leni, nge ngang üsap silei.”
GEN 28:17 Nge Jakop a niuokus o apasa, “A men eniuokus ei leni! Achiöü fokun ikei imwen Kot me asamen läng.”
GEN 28:18 Iwe, Jakop a pwätä lesosorusich, a angei ewe fau a ülleni lon ewe pwin, a aüetä o ninätä lö won pwe eföü föün achem.
GEN 28:19 Iwe, a aita ngeni ewe leni Petel . Nge iten ewe telinimw me lom Lus.
GEN 28:20 Mürin, Jakop a pwon ngeni ewe Samol mi Lapalap, “Are kopwe etiei o tümwünüei won alen ai sai, are kopwe pwal ngeniei enei me üfei
GEN 28:21 pwe üpwe liwiniti imwen semei fän kinamwe, iwe, en kopwe ai Kot.
GEN 28:22 Iwe, ewe fau üa aüetä pwe eföü föün achem epwe wiliti eu imwenfelin Kot, nge seni mettoch meinisin mine kopwe ngeniei üpwe ngonuk eu leengolun.
GEN 29:1 Iwe, Jakop a sopwela an sai tori ewe fanüen chon ötiu.
GEN 29:2 Nge lupwen a nenefetal, a küna eu chönüttu lon ewe mälämäl. Iwe, ülüpwi pwiin sip ra kon ünükün, pun iei ewe koluk chon ewe fanü ra aünü nöür kewe man seni. Iwe, ewe chönüttu a pinepin ngeni eföü fau mi fokun föümong.
GEN 29:3 Iwe, lupwen ekewe pwiin man meinisin ra chufengen arun, ekewe chon mas ra akulu ewe fau seni leawen ewe chönüttu o aünü ekewe sip. Mürin ra pineesefäliela ewe chönüttu ngeni ewe fau.
GEN 29:4 Iwe, Jakop a üreni ekewe chon mas, “Pwii kana, ia oua feito me ie?” Nge ra pälüeni, “Äm aia feito seni Haran.”
GEN 29:5 Mürin, Jakop a aisiniir, “Ifa usun, oua silei Lapan nöün Nahor we?” Nge ra pälüeni, “Ewer, aia silei.”
GEN 29:6 Iwe, Jakop a pwal aisiniir, “Ifa usun, a pöchökül?” Nge ra üreni, “Ewer, a pöchökül. Nengeni, iei i Rahel nöün we föpwül a feito me nöün sip kana.”
GEN 29:7 Nge Jakop a üreniir, “A chüen leoloas, nge esamwo tori fansoun pwe ekewe man repwe mwuchifengen. Oupwe aünü ekewe sip o emwenirela pwe repwe mongö.”
GEN 29:8 Nge ra pälüeni, “Äm aisap tongeni föri ei are ekewe pwiin man resamwo chufengen meinisin. Mürin, aipwe akulu ewe fau seni leawen ewe chönüttu o aünü ekewe sip.”
GEN 29:9 Iwe, lupwen Jakop me ekewe mwän ra chüen kapasfengen, Rahel a feito me nöün saman kewe sip, pun i a tümwünüür.
GEN 29:10 Nge lupwen Jakop a küna Rahel nöün Lapan mongeen inan we, pwal nöün Lapan kewe sip, a akulu ewe fau seni leawen ewe chönüttu o aünü ekewe sip nöün mongeen inan we.
GEN 29:11 Mürin, Jakop a mitiri Rahel o kechü fän leüömong.
GEN 29:12 Iwe, Jakop a pwäri ngeni Rahel pwe i a pwal semeni saman, pun i nöün Repeka. Iei mine Rahel a mümütüla o apworausa ngeni saman we.
GEN 29:13 Nge lupwen Lapan a rong usun pworausen Jakop nöün fefinan we, a mümütüla pwe epwe churi. Iwe, a romi, a pwal mitiri o emwenala lon imwan. Nge lupwen Jakop a pwäri ngeni Lapan usun pworausan meinisin,
GEN 29:14 Lapan a üreni, “Ellet, en chüi me fitukei.” Iwe, Jakop a nonom ren Lapan eu maram.
GEN 29:15 Mürin, Lapan a üreni Jakop, “Ifa usun, epwe tufich om kopwe chök angang ngeniei pokiten en aramasei, nge esap wor liwinum? Apwi, kopwe chök pwäri ngeniei ükükün om mochen.”
GEN 29:16 Nge a wor ruoman nöün Lapan föpwül, iten ewe finichi Lea, nge iten ewe mi kis fan Rahel.
GEN 29:17 Iwe, Lea a mesengau, nge Rahel a meseöch o fokun liöch.
GEN 29:18 Jakop a efich Rahel. Iei mine a apasa, “Üpwe angang ngonuk lon ükükün fisu ier fän iten noum föpwül Rahel ewe mi kis, pwe üpwe pwülüeni.”
GEN 29:19 Lapan a üreni, “A öch ai üpwe ngonuk mwen ai üpwe ngeni eman. Kopwe chök nonom rei.”
GEN 29:20 Iei mine Jakop a angang lon ükükün fisu ier fän iten Rahel. Nge me ren Jakop ekewe fisu ier ra chök wewe ngeni ekoch rän pokiten an echeni ewe föpwül.
GEN 29:21 Mürin, Jakop a üreni Lapan, “Kopwe ngeniei pwülüei pwe üpwe pwülüeni, pun a wes ierin ai angang.”
GEN 29:22 Iei mine Lapan a körifengeni ekewe chon Haran meinisin o föri eu kametip mi watte.
GEN 29:23 Nge lupwen a pwinila, a angei nöün we föpwül Lea o ngeni Jakop. Iwe, a pwülüeni.
GEN 29:24 Lapan a pwal angei nöün we chon angang Silpa o ngeni Lea pwe epwe chon angang ngeni.
GEN 29:25 Nge lesosor, Jakop a küna pwe a pwülüeni Lea. Iwe, a feila ren Lapan o üreni, “Pwota ka föri ei sokun ngeniei? Ifa usun, üsap angang ngonuk fän iten Rahel? Pwota ka atupuei?”
GEN 29:26 Nge Lapan a pälüeni, “Esap pwüngün fanüem pwe ewe mi kis epwe akomwen pwüpwülü mwen ewe finichi.
GEN 29:27 Kopwe chök awesala ei wiken apwapwan apwüpwülü, mürin aipwe ngonuk pwal ewe mi kis. Nge liwinin om kopwe le pwülüeni Rahel, kopwe angang ngeniei pwal fisu ier.”
GEN 29:28 Iwe, Jakop a tipeeu ngeni. Nge lupwen a wes ewe wik, Lapan a ngeni Jakop nöün we föpwül Rahel pwe pwülüan.
GEN 29:29 Lapan a angei nöün we chon angang Pila o ngeni Rahel pwe epwe chon angang ngeni.
GEN 29:30 Iwe, Jakop a pwal pwülüeni Rahel, nge a efich Rahel mwen Lea. Mürin, Jakop a angang ngeni Lapan pwal fisu ier.
GEN 29:31 Iwe, lupwen ewe Samol mi Lapalap a küna pwe Lea a sochowun me ren Jakop, a anöünöü, nge Rahel a rit.
GEN 29:32 Iwe, Lea a pwopwo, a nöüni eman ät o aita ngeni Rupen . Pun a apasa, “Ewe Samol mi Lapalap a küna ai riaföü, ellet iei pwülüei we epwe tongeei.”
GEN 29:33 Mürin, Lea a pwopwosefäl o nöüni eman ät. Iwe, a apasa, “Pokiten ewe Samol mi Lapalap a rong pwe ngang üa sochowun, a pwal ngeniei ei ät.” Iei mine a aita ngeni Simeon .
GEN 29:34 Nge Lea a pwal pwopwosefäl o nöüni pwal eman ät. Iwe a apasa, “Iei otun pwülüei we epwe pach ngeniei, pun üa nöüni ngeni ülüman ät.” Iei mine a aita ngeni Lefi .
GEN 29:35 Mürin, Lea a pwal pwopwosefäl o nöüni eman ät. Iwe, a apasa, “Iei üpwe mwareiti ewe Samol mi Lapalap.” Iei mine a aita ngeni Juta . Mürin a ükütiu le nöünöü.
GEN 30:1 Nge lupwen Rahel a küna pwe esap nöünöü me won Jakop, a lolowo ngeni pwin we. Nge a üreni Jakop, “Kopwe föri mine üpwe nöünöü ren. Pun are kosap, üpwe mäla.”
GEN 30:2 Iwe, Jakop a song ngeni Rahel o apasa, “Ifa usun, ngang siwilin Kot mi amwöchü senuk om kopwe pwopwo?”
GEN 30:3 Nge Rahel a apasa, “Iei i nei we chon angang Pila. Kopwe kon ren pwe epwe nöünöü me womw. Nge ngang üpwe nöüni nöün.”
GEN 30:4 Iei mine Rahel a ngeni Jakop nöün we chon angang Pila pwe epwe pwülüeni. Iwe, Jakop a kon ren.
GEN 30:5 Iwe, Pila a pwopwo o nöüni ngeni Jakop eman ät.
GEN 30:6 Mürin, Rahel a apasa, “Kot a alletätä ai pwüng, a pwal rong ai iotek o ngeniei eman ät.” Iei mine a aita ngeni Tan .
GEN 30:7 Pila nöün Rahel we chon angang a pwal pwopwo o nöüni ngeni Jakop aruomanün nöün ät.
GEN 30:8 Mürin Rahel a apasa, “Fän pöchökül üa aülap ngeni pwii, nge üa akufu.” Iei mine a aita ngeni ewe ät Naftali .
GEN 30:9 Iwe, lupwen Lea a küna pwe a ük le nöünöü, a angei nöün we chon angang Silpa o ngeni Jakop pwe epwe pwülüeni.
GEN 30:10 Mürin nöün Lea we chon angang Silpa a nöüni eman ät me won Jakop.
GEN 30:11 Nge Lea a apasa, “Feiöch a toriei!” Iei mine a aita ngeni ewe ät Kat .
GEN 30:12 Mürin, nöün Lea we chon angang Silpa a nöüni aruomanün nöün ät me won Jakop.
GEN 30:13 Nge Lea a üra, “Pwapwa a toriei. Iei ekewe fefin repwe apasa pwe ngang üa pwapwa.” Iei mine a aita ngeni ewe ät Aser .
GEN 30:14 Iwe, lupwen fansoun resin wiich Rupen a feila lemäl, a küna ekoch föün apelin omung o uwato ren Lea inan we. Iwe, Rahel a üreni Lea, “Kose mochen kopwe ngeniei ekoch seni ekewe apelin omung noum we a kini.”
GEN 30:15 Nge Lea a aisini, “Ifa usun, ese naf om angei seniei pwülüei? Ka pwal mochen angei seniei ekewe apelin omung nei we a kini?” Iwe, Rahel a pälüeni, “Ika kopwe ngeniei ekewe apelin omung, Jakop epwe kon reöm lepwin ei.”
GEN 30:16 Nge lupwen Jakop a liwinto seni lemäl lekuniol, Lea a feila pwe epwe churi. Iwe, a üreni Jakop, “Kopwe fokun kon rei lepwin ei, pun üa mönuk seni Rahel ren kinien nei we apelin omung.” Iei mine Jakop a kon ren lon ewe pwin.
GEN 30:17 Iwe, Kot a aüselinga Lea, pwe a pwopwo o nöüni ngeni Jakop alimmanün nöün ät.
GEN 30:18 Mürin, Lea a apasa, “Kot a ngeniei liwini, pun üa mwüt ngeni pwülüei nei we chon angang.” Iwe, a aita ngeni ewe ät Isakar .
GEN 30:19 Iwe, Lea a pwal pwopwosefäl o nöüni ngeni Jakop awonomanün nöün ät.
GEN 30:20 Mürin, Lea a apasa, “Kot a lifang ngeniei eu lifang mi aüchea. Iei pwülüei epwe wesewesen nonom rei, pun üa nöüni ngeni wonoman ät.” Iwe, a aita ngeni ewe ät Sepulon .
GEN 30:21 Iwe, Lea a pwal nöüni eman nengin o aita ngeni Tina.
GEN 30:22 Mürin, Kot a chechemeni Rahel, a aüselinga an tüngor o anöünöü.
GEN 30:23 Iei mine Rahel a pwopwo, a nöüni eman ät o apasa, “Kot a angei seniei ai itengau.”
GEN 30:24 Iwe, a aita ngeni Josef o apasa, “Amwo ewe Samol mi Lapalap epwe apacha ngeniei pwal eman ät.”
GEN 30:25 Mürin än Rahel nöüni Josef, Jakop a üreni Lapan, “Kose mochen mwüt ngeniei pwe üpwe liwiniti poputän fanüei.
GEN 30:26 Kopwe ngeniei pwülüei me nei kewe, pun liwinin ai angang ngonuk. Kopwe mwüt ngeniei pwe üpwe feila, pun en ka silei ükükün ai angang ngonuk.”
GEN 30:27 Nge Lapan a pälüeni, “Kose kan mochen kopwe aüselingaei. Üa fen silei seni ai pwee pwe ewe Samol mi Lapalap a afeiöchüei fän äsengesum.
GEN 30:28 Kopwe üreniei mine üpwe ngonuk pwe liwinin om angang, pun üpwe ngonuk.”
GEN 30:29 Iwe, Jakop a üreni, “En ka püsin silei usun ai angang ngonuk pwal usun ai tümwünüöchü noum kewe man.
GEN 30:30 Pun mwen ai feito reöm noum kewe man ra chokisikis, nge iei ra fokun chomongola. Iwe, ewe Samol mi Lapalap a afeiöchuk ren ai angang meinisin üa föri. Nge inet ngang üpwe püsin tümwünü imwei?”
GEN 30:31 Iwe, Lapan a aisini, “Met sokun liwin üpwe ngonuk?” Nge Jakop a pälüeni, “Kosap ngeniei och mettoch. Üpwe pwal tümwünü noum kewe pwiin man, are kopwe chök tipeeu ngeni mine üpwe ürenuk.
GEN 30:32 Ikenai üpwe fetal lein noum kewe pwiin man o aimwü iteiten sip me kuuch mi mwakelekel me tiketik, pwal iteiten apanen sip mi chochol. Ekei man ina chök liwinin ai angang.
GEN 30:33 Iei ai wenechar epwe pwä me mürin, lupwen kopwe feito o nenengeni liwinin ai angang. Nge ika ka küna eman kuuch esap mwakelekel ika tiketik, ika eman apanen sip esap chochol, iwe, kopwe silei pwe üa soläniir.”
GEN 30:34 Nge Lapan a üreni, “A öch, epwe usun chök mine ka apasa.”
GEN 30:35 Iwe, lon ewe chök rän, Lapan a aimwü ekewe ätemwänin kuuch pwal ekewe liefefinin kuuch mi mwakelekel me tiketik, pwal meinisin mi ekis pwech me ekewe apanen sip mi chochol. Iwe, a anomuur fän tümwünüen nöün kewe mwän.
GEN 30:36 Mürin, Lapan a atoauala ekewe pwiin man seni i me Jakop ükükün fetalin ülüngat rän. Nge Jakop a tümwünü ekewe lusun pwiin man nöün Lapan.
GEN 30:37 Mürin, Jakop a angei fönupun ekewe irä iter poplar, almont me plein, a atika ekis ünücher pwe epwe pwä mwakelekelin pwechepwecher.
GEN 30:38 Iwe, a fotukätiu ekei fönupun irä lon lenien ünümen ekewe man koluk pwe repwe nom fän meser, lupwen ra etto pwe repwe ün. Iwe, lupwen a tori fansoun ar mochen etieti o ra etto pwe repwe ün,
GEN 30:39 a fis pwe ra pwüpwülüfengen o pwopwo mwen ekewe fönupun irä. Iwe, ra nöünöü mi mwakelekel me tiketik o chükelekel.
GEN 30:40 Mürin, Jakop a aimwü ekewe apanen sip o awena mesen ekewe lusun man ngeni nöün Lapan kewe man mi mwakelekel me chochol. Iei usun a aimwüela nöün kewe pwiin man, pwe resap chufengen me nöün Lapan kewe pwiin man.
GEN 30:41 Iwe, iteiten fansoun ekewe man mi kitinup a tori fansoun ar mochen etieti, Jakop a fotukätiu ekewe fönupun irä mwen mesen ekewe man lon lenien ünümer koluk pwe repwe pwüpwülüfengen lein ekewe fönupun irä.
GEN 30:42 Nge esap fotukätiu ekewe fönupun irä mwen ekewe man mi kichüchü. Iei mine a fis pwe ekewe man mi kichüchü nöün Lapan, nge ekewe mi kitinup nöün Jakop.
GEN 30:43 Iei usun Jakop a fokun pisekisekila. A wor chomong nöün pwiin man, nöün chon angang fefin me nöün chon angang mwän, pwal nöün kamel me aas kana.
GEN 31:1 Iwe, Jakop a rong pwe nöün Lapan kewe mwän ra apasa, “Jakop a angei meinisin mine än samach. A fokun wöümongola ren wöün samach.”
GEN 31:2 Jakop a pwal küna pwe Lapan esap chüen wopwapwa ngeni usun me mwan.
GEN 31:3 Mürin, ewe Samol mi Lapalap a üreni Jakop, “Kopwe liwinla won fanüen semom kewe pwal ren aramasom, nge ngang üpwe etuk.”
GEN 31:4 Iwe, Jakop a körato Rahel me Lea lon ewe mälämäl ia a tümwünü ie ekewe pwiin man.
GEN 31:5 Iwe, a üreniir, “Üa küna pwe sememi we esap chüen wopwapwa ngeniei usun me mwan. Nge än semei we Kot a etiei.
GEN 31:6 Ämi oua silei pwe üa angangöch ngeni sememi we ren unusen ai tufich.
GEN 31:7 Iwe, sememi we a atupuei o awilala liwinin ai angang fän engol, nge Kot esap mwüt ngeni pwe epwe ataala ai feiöch.
GEN 31:8 Are a apasa, ‘Ekewe man mi tiketik repwe liwinin om angang,’ mürin ekewe man meinisin ra nöünöü mi tiketik. Nge are a apasa, ‘Ekewe man mi mwakelekel repwe liwinin om angang,’ mürin ekewe man meinisin ra nöünöü mi mwakelekel.
GEN 31:9 Iei usun Kot a angei seni sememi we nöün kewe man o ngeniei.
GEN 31:10 Iwe, lon fansoun ekewe man ra pwüpwülüfengen pwe repwe pwopwo, üa küna lon ai tan pwe ekewe ätemwänin kuuch ra pwülüeni ekewe man mi mwakelekel me tiketik me chükelekel.
GEN 31:11 Iwe, nöün Kot we chon läng a köriei lon ai tan, ‘Jakop.’ Nge ngang üa apasa, ‘Ngang iei.’
GEN 31:12 Iwe, ewe chon läng a pwal apasa, ‘Kopwe nenengeni ekewe ätemwänin kuuch meinisin mi pwülüeni ekewe man ra mwakelekel me tiketik pwal chükelekel. Pun ngang üa küna meinisin mine Lapan a föri ngonuk.
GEN 31:13 Ngang ewe Kot mi pwä ngonuk me lon Petel, ewe ia ka epiti ewe fau ie o pwon ngeniei. Kopwe amolokotä o feila seni ei fanü pwe kopwe liwiniti poputän fanüom.’”
GEN 31:14 Mürin Rahel me Lea ra üreni Jakop, “Esap chüen wor wisem me ren semem.
GEN 31:15 A föri ngenikem usun mine a föri ngeni chon ekis. A eänikem amömö, nge a püsin eitala ewe moni a angei, lupwen a eänikem amömö.
GEN 31:16 Iwe, ekewe wöü meinisin Kot a fen angei seni semem we, äm me nöüm kewe aia eäni. Iei mine kopwe chök föri mine Kot a ürenuk.”
GEN 31:17 Iwe, Jakop a ütä o ekietä nöün kewe me pwülüan kewe won ekewe kamel.
GEN 31:18 A emwenala nöün kewe man meinisin a nöüni o uweela pisekin kewe meinisin a eäni lon Mesopotamia, pwe epwe feila ren Isaak saman we lon ewe fanü Kanaan.
GEN 31:19 Nge lupwen Lapan a feila pwe epwe fichi ülen nöün kewe sip, Rahel a soläni nöün saman we uluulun anün leimw.
GEN 31:20 Iwe, Jakop a tükümi seni Lapan ewe re Siria, pwe esap asile ngeni an epwe feila seni.
GEN 31:21 Jakop a süla o uwala meinisin mine a eäni. A feila pekilan ewe chanpupu Oifrat o awena mesan ngeni ewe fanü mi chukuchukutä lon Kiliat.
GEN 31:22 Iwe, ülüngat rän mürin eman a asile ngeni Lapan pwe Jakop a sü.
GEN 31:23 Iwe, Lapan a angei aramasan pwe repwe eti le tapweri Jakop. Nge mürin fisu rän ra tori i me won ewe fanü mi chukuchukutä lon Kiliat.
GEN 31:24 Nge Kot a kapas ngeni Lapan ewe re Siria lon an tan lepwin o üreni, “Kopwe fokun föröchü pwe kosap kapas pöchökül ngeni Jakop.”
GEN 31:25 Iwe, lupwen Lapan a tori Jakop, Jakop a fen aüetä imwan imw mangaku won ewe fanü mi chukuchukutä lon Kiliat. Pwal Lapan me aramasan ra aüetä imwer imw mangaku ikenan.
GEN 31:26 Iwe, Lapan a üreni Jakop, “Pwota ka föri ei pwe ka tükümi seniei om süla o uwala nei kewe fefin usun chök chon oola lon maun?
GEN 31:27 Pwota ka süla lemonomon? Pwota kosap asile ngeniei pwe üpwe afeilakemi fän pwapwa me köl, ren tikin keseng me kitar?
GEN 31:28 Pwota kosap mwüt ngeniei pwe üpwe mitiri nei kewe fefin me nöür kewe? Ewer, ka chök umwes lon mine ka föri.
GEN 31:29 Iwe, ngang üa tongeni afeiengauok. Nge än semom we Kot a üreniei lepwin ewe, ‘Kopwe fokun föröchü pwe kosap kapas pöchökül ngeni Jakop.’
GEN 31:30 Iwe, iei ka fen feila, pun ka fokun positi chon leimwen semom. Nge pwota ka soläni nei kewe uluulun anün leimw?”
GEN 31:31 Nge Jakop a üreni Lapan, “Üa niuokus, pun üa ekieki pwe kopwe angei seniei noum kewe fefin fän pöchökül.
GEN 31:32 Nge ewe eman kopwe küna me ren noum kewe uluulun anün leimw, epwe mäla. Iei kopwe kütta mwen mesen aramasom kei o angei mine om me lein ai kewe pisek.” Nge Jakop esap silei pwe Rahel a soläni ekewe uluulun anü.
GEN 31:33 Iwe, Lapan a tolong lon imwen Jakop, lon imwen Lea, pwal lon imwen ekewe ruoman chon angang fefin, nge esap küna nöün kewe uluulun anü. Mürin, a towu seni imwen Lea o tolong lon imwen Rahel.
GEN 31:34 Nge Rahel a angei ekewe uluulun anü, a aopala fän an lenien mot o mottiu won. Iei ewe lenien mot ra aea won nöür kewe kamel. Iwe, Lapan a kütta ekewe uluulun anü lon unusen ewe imw, nge esap küneer.
GEN 31:35 Iwe, Rahel a üreni saman we, “Semei, kose mochen kosap song ngeniei pwe üsap ütä mwom, pun üa samaun fefin.” Iei usun Lapan a kütta nöün kewe uluulun anün leimw ekis meinisin, nge esap küneer.
GEN 31:36 Mürin, Jakop a song o anini ngeni Lapan. Iwe, a kapas ngeni, “Met ai pwüngingau? Are met ai tipis pwe ka tapweriei fän choun om song?
GEN 31:37 Iei ka kütta lein ai pisek meinisin. Nge met sokun pisekin lon imwomw ka küna? Kopwe iseis ikei mwen aramasei me aramasom pwe repwe filätä iö leich a pwüng.
GEN 31:38 Rüe ier üa nom reöm. Noum kewe liefefinin sip me kuuch esap mwetela nöür. Üsap fokun ochoch eman noum ätemwänin kuuch seni noum kewe pwiin man.
GEN 31:39 Iwe, mine manmwacho ra niela, ngang üsap uwato reöm, pwe üa püsin liwini. En ka angei seniei liwinin ekewe man eman a soläniir lerän ika lepwin.
GEN 31:40 Iei usun mine a fis ngeniei: Lerän üa riaföü ren pwichikaren akkar, nge lepwin üa föü pwe üsap tongeni möür.
GEN 31:41 Lon ükükün rüe ier üa nonom reöm. Üa angang ngonuk lon ükükün engol me rüanü ier fän iten noum kewe ruoman fefin, pwal wonu ier fän iten noum kewe pwiin man. Nge en ka awilala liwinin ai angang fän engol.
GEN 31:42 Are än semei we Kot esap nonom rei, än Apraham we Kot, ewe Isaak a niueiti, ellet iei en kopwe tinieila fän ai asöülapö. Nge Kot a küna ai riaföü me angangen pei o apwünguk lepwin ewe.”
GEN 31:43 Mürin, Lapan a pälüeni Jakop, “Ekei fefin nei, ekei semirit nei, ekei pwiin man nei. Meinisin mine ka küna ai. Nge met ngang üpwe tongeni föri ikenai ngeni nei kei fefin me nöür kei semirit?
GEN 31:44 Iwe, kopwe etto pwe sipwe föri eu pwonen atipeeufengen. Ousipwe achukuchukätä fau pwe eu pisekin pwärätä lefilen en me ngang.”
GEN 31:45 Iei mine Jakop a angei eföü fau o aüetä pwe epwe eföü föün achem.
GEN 31:46 A pwal üreni aramasan kewe pwe repwe ionifengeni fau.” Iwe, ra achukuchukätä fau o mongö arun.
GEN 31:47 Iwe, Lapan a aita ngeni ewe leni Jekar Sahatuta , nge Jakop a aita ngeni Kaleet .
GEN 31:48 Mürin, Lapan a üreni Jakop, “Ei ioien fau epwe eu pisekin pwärätä lefilen en me ngang.” Iei popun ewe leni a iteni Kaleet,
GEN 31:49 nge ewe föün achem a iteni Mispa , pun Lapan a apasa, “Ewe Samol mi Lapalap epwe mamasa lefilen en me ngang, lupwen sia toaufesen.
GEN 31:50 Are kopwe ariaföüü nei kewe fefin, ika kopwe pwal angei ekoch pwülüom lükün nei kewe fefin, kopwe chök chechemeni pwe Kot epwe chon pwärätä lefilen en me ngang, inamwo ika esap wor eman a nom rech.”
GEN 31:51 Mürin, Lapan a pwal üreni Jakop, “Nengeni, ei ioien fau me ei föün achem üa anomu lefilen en me ngang.
GEN 31:52 Ei ioien fau me ei föün achem eu pisekin pwärätä. Üsap fokun feila reöm pekilan ei ioien fau pwe üpwe afeiengauok. Nge en kosap pwal feito rei pekiton ei ioien fau me ewe föün achem pwe kopwe afeiengauaei.
GEN 31:53 Än Apraham me Nahor we Kot, än semer we Kot epwe souapwüng lefilach.” Mürin, Jakop a pwon fän akapel fän iten ewe chök Kot Isaak a niueiti, pwe epwe apwönüetä ewe pwon.
GEN 31:54 Iwe, Jakop a niela eman man o eäni asor ngeni Kot won ewe chuk. A pwal köri aramasan kewe pwe repwe eti le mongö. Mürin ar mongöfengen ra möür lon ewe pwin won ewe chuk.
GEN 31:55 Nge lesosorusich Lapan a pwätä, a mitiri nöün kewe fefin me nöür kewe o afeiöchüür. Mürin a feila seniir o liwiniti lenian.
GEN 32:1 Iwe, lupwen Jakop a saila, nöün Kot kewe chon läng ra churi.
GEN 32:2 Nge lupwen Jakop a küneer, a apasa, “Ikei nöün Kot kewe mwichen sounfiu.” Iei mine a aita ngeni ewe leni Mahanaim .
GEN 32:3 Iwe, Jakop a tinala ekoch chon künö pwe repwe akomwola mwan o feila ren Esau pwin we mi nom Seir lon ewe fanü Etom.
GEN 32:4 Iwe, a öüröüreer o üreniir pwe iei usun mine repwe apasa ngeni Esau, “Ngang noum chon angang Jakop, üa wasöla ren Lapan o nom ren tori ikenai.
GEN 32:5 A wor nei kow, aas, sip me kuuch, pwal nei chon angang mwän me chon angang fefin. Iei üa tinala nei kei chon künö pwe repwe asile ngonuk, ai samol, usun pwe kopwe ümöümöch ngeniei.”
GEN 32:6 Iwe, ekewe chon künö ra liwinto ren Jakop o apworausa ngeni, “Aia churi Esau pwiüm we. Iwe, i epwe feito pwe epwe churuk, nge föpükü mwän ra eti.”
GEN 32:7 Nge lupwen Jakop a rong ei pworaus, a fokun niuokus o riaföü. Iwe, a aimwüfeseni lon ruu mwich an we mwichen aramas mi nom ren, pwal nöün kewe mwichen sip me kuuch, kow me kamel kana.
GEN 32:8 Pun a ekieki, “Are Esau epwe war o niela eu mwich, ewe pwal eu mwich epwe tongeni süla.”
GEN 32:9 Mürin, Jakop a iotek, “Ai Samol mi Lapalap, en än semei Apraham me Isaak we Kot, en ka üreniei, ‘Kopwe liwiniti fanüom pwal aramasom, nge ngang üpwe atoto feiöch womw.’
GEN 32:10 Üa kon aücheangau ngeni om kirikiröch me om tipelükülük meinisin ka eäni ngeniei noum chon angang. Pun ei chök wok a nom rei, lupwen üa pwerela pekilan ei chanpupu Jortan, nge ikenai üa wiliti ruu mwich.
GEN 32:11 Kose mochen kopwe amanauaei seni lepöün pwii, fokun seni lepöün Esau. Pun üa niuokus pwe epwe feito o nikeemila meinisin, pwal ekewe in me ekewe semirit.
GEN 32:12 Nge en ka pwon ngeniei pwe kopwe atoto feiöch woi o achomonga mwirimwiri usun pien aroset pwe esap wor eman a tongeni aleaniir pokiten chomonguur.”
GEN 32:13 Iwe, Jakop a asösö ikenan lon ewe pwinin. Nge lesosor a angei seni nöün kewe pwiin man mine epwe lifang ngeni Esau pwin we:
GEN 32:14 rüepükü liefefinin kuuch me rüe ätemwänin kuuch, rüepükü liefefinin sip me rüe ätemwänin sip,
GEN 32:15 ilik liefefinin kamel me apaner, faik liefefinin kow me engol ätemwänin kow, rüe liefefinin aas me engol ätemwänin aas.
GEN 32:16 Ekei man meinisin Jakop a inetiir lon eu me eu mwich o anomuur fän tümwünüen nöün kewe chon angang. Iwe, a üreniir, “Oupwe akom mwei, nge eu mwich epwe ekis toau seni pwal eu.”
GEN 32:17 Iwe, a öüröüra ewe aemanün nöün chon angang, “Are Esau pwii we epwe churuk o aisinuk, ‘Ifa usun, en nöün iö? Ia kopwe feila ie? Nge nöün iö ekewe man ra akom mwom?’,
GEN 32:18 mürin kopwe pälüeni, ‘Ir meinisin nöün noum we chon angang Jakop. A tinireto pwe an lifang ngeni an samol Esau. Nge Jakop a pwal tapweto mürim.’”
GEN 32:19 Iwe, a pwal öüröüra ewe aruomanün me ewe aülümanün nöün chon angang tori chokewe meinisin mi tümwünü ekewe pwiin man, “Ikkei chök ekewe kapas oupwe üreni Esau, lupwen oupwe churi.
GEN 32:20 Nge oupwe pwal üreni, ‘Noum chon angang Jakop a tapweto mürim.’” Pun Jakop a ekieki, “Eli ewe lifang a akom mwei epwe chäri pwii. Mürin, lupwen üpwe küna mesan, eli epwe chä ngeniei.”
GEN 32:21 Iei usun ekewe lifang ra akomwola mwan, nge Jakop a chök nom ren an we mwich lon ewe pwinin.
GEN 32:22 Iwe, lon ewe chök pwinin Jakop a pwätä o angei pwülüan kewe ruoman me nöün kewe ruoman chon angang fefin pwal nöün kewe engol me eman ät. Iwe, ra feila pekilan ewe chanpupu Jappok.
GEN 32:23 Mürin an tinirela pekilan ewe chanpupu, a pwal tinala pisekin meinisin.
GEN 32:24 Nge Jakop a chök alemanüla. Mürin, eman mwän a feito o aülap ngeni tori a tö mallen rän.
GEN 32:25 Nge lupwen ewe mwän a mefi pwe esap tongeni akufu Jakop, a pisiri wilan pwe a rü chün, lupwen an aülap ngeni.
GEN 32:26 Mürin, ewe mwän a apasa, “Kose mochen likitieila, pun a tö mallen rän.” Nge Jakop a pälüeni, “Üsap fokun likitukela are kosap afeiöchüei.”
GEN 32:27 Nge ewe mwän a aisini, “Ifa itom?” Iwe, a pälüeni, “Itei Jakop.”
GEN 32:28 Nge ewe mwän a üreni, “Kosap chüen iteni Jakop, pwe kopwe iteni Israel . Pun ka fiu ngeni Kot me aramas, nge en ka win.”
GEN 32:29 Mürin, Jakop a tüngor ngeni ewe mwän, “Kose mochen kopwe asile ngeniei itom.” Nge i a pälüeni, “Pwota ka ais itei?” Iwe, a afeiöchü Jakop ikenan.
GEN 32:30 Iwe, Jakop a apasa, “Üa küna won mesen Kot, nge üa chüen manau.” Iei mine a aita ngeni ewe leni Peniel .
GEN 32:31 Iwe, akkar a tötä, lupwen Jakop a feila seni Peniel, nge a likoi ren wilan.
GEN 32:32 Iei popun chon Israel resap ochoch ewe fituk a nom won chün wilan man tori ikenai pokiten ewe mwän a pisiri won wilan Jakop.
GEN 33:1 Iwe, Jakop a netä o küna pwe Esau a war me föpükü mwän. Iei popun Jakop a aimwüfeseni nöün kewe o ngeni Lea me Rahel nöür, a pwal ngeni ekewe ruoman chon angang fefin nöür.
GEN 33:2 Iwe, a akomwa ekewe ruoman chon angang fefin me nöür kewe, mürin Lea me nöün kewe, nge Rahel me Josef ra kükümwir.
GEN 33:3 Nge Jakop a akom mwer meinisin, a chapetiu lepwül fän fisu tori a kan ngeni pwin.
GEN 33:4 Nge Esau a mümütüto ren, a romi o mitiri. Iwe, ra kechüfengen me ruoman.
GEN 33:5 Nge lupwen Esau a netä, a küna ekewe fefin me nöür kewe o aisini Jakop, “Nöün iö kana mi nom reöm?” Jakop a pälüeni, “Ai samol, ir meinisin nei, Kot a ngeniei lon an ümöümöch.”
GEN 33:6 Mürin ekewe chon angang fefin me nöür kewe ra arapoto o chapetiu mwen Esau.
GEN 33:7 Pwal usun chök Lea me nöün kewe ra arapeto o chapetiu me mwan, nge lesopolan Rahel me Josef ra arapeto o chapetiu me mwan.
GEN 33:8 Iwe, Esau a aisini, “Met ka mochen ren ekewe mwich meinisin üa churiir?” Nge Jakop a pälüeni, “Üa mochen küna ümöümöch me reöm, ai samol.”
GEN 33:9 Iwe, Esau a üreni, “Pwii, üa menemenöch ren mine üa eäni. Kopwe chök amwöchü mine ka eäni.”
GEN 33:10 Nge Jakop a üreni, “Apwi, are üa küna ümöümöch me reöm, kose mochen kopwe etiwa ai we lifang ngonuk. Ellet, lupwen üa küna mesom usun chök nge üa küna mesen Kot, pun ka etiwaei lon om ümöümöch.
GEN 33:11 Kose mochen kopwe angei ai ei lifang üa uwato reöm. Pun Kot a fokun kisäsew ngeniei, iei popun a fokun naf ngeniei mine üa eäni.” Iwe, Jakop a pesei Esau tori a angei ekewe lifang.
GEN 33:12 Mürin Esau a apasa, “Ousipwe popuetä ach sai, nge ngang üpwe wisen akom mwemi.”
GEN 33:13 Nge Jakop a üreni, “Ai samol, ka silei pwe ekewe semirit ra apwangapwang, nge üa pwal wisen tümwünü ekewe pwiin sip me kow ra nöünöü. Iwe, are ekewe chon angang repwe amüttirirela lon eu chök rän, repwe fokun mäla meinisin.
GEN 33:14 Kose mochen kopwe akomwola mwei, nge ngang üpwe mangeni mangen ekewe man me semirit, tori üpwe churuk lon Etom.”
GEN 33:15 Iwe, Esau a apasa, “Kose mochen üpwe likiti ngonuk ekoch kei mwän mi nom rei.” Nge Jakop a üreni, “Ina chök i. Amwo üpwe chök küna ümöümöch me reöm, ai samol.”
GEN 33:16 Iei mine Esau a liwiniti Etom lon ewe chök ränin.
GEN 33:17 Nge Jakop a saila Sukot. Iwe, a aüetä imwan o förätä lenien nöün kewe man. Iei mine ewe leni a iteni Sukot .
GEN 33:18 Iwe, lupwen Jakop a liwinto seni Mesopotamia, a tori ewe telinimw Sikem lon ewe fanü Kanaan fän kinamwe. Iwe, a aüetä imwan imw mangaku lükün ewe telinimw.
GEN 33:19 Pun Jakop a möni ewe fanü seni nöün Hamor kewe mwän, semen Sikem we, won ipükü föün moni silifer.
GEN 33:20 Iwe, ikenan Jakop a senätä eu rongen asor o aita ngeni El Elohe Israel .
GEN 34:1 Iwe, lon eu rän Tina nöün Lea me Jakop we föpwül a feila kukulou ren fin ewe fanü.
GEN 34:2 Nge lupwen Sikem nöün Hamar we ewe re Hiw, i pwal samolun ewe fanü, a küna Tina, a achomanauei o kon ren.
GEN 34:3 Iwe, leluken Sikem a pach ngeni Tina nöün Jakop we föpwül, pwe a fokun tongei o fos pwetete ngeni.
GEN 34:4 Iei mine Sikem a kapas ngeni Hamor saman we, “Kopwe tüngor ei föpwül pwe üpwe pwülüeni.”
GEN 34:5 Iwe, Jakop a rong pwe Sikem a achomanauei nöün we föpwül Tina. Nge lon ei otun, nöün Jakop kewe mwän ra tümwünü nöür kewe man lemäl. Iei mine Jakop a chök fanafanala tori ar repwe liwinto.
GEN 34:6 Mürin, Hamor semen Sikem a feila ren Jakop pwe epwe kapas ngeni.
GEN 34:7 Iwe, lupwen nöün Jakop kewe mwän ra rong ei pworaus, ra müttir liwinto me lemäl. Ra chou o fokun song, pun Sikem a föri och föför mi äsäw lon Israel ren an konfengen me nöün Jakop we föpwül. Pun a ngau ei sokun föför än eman epwe föri.
GEN 34:8 Iwe, Hamor a kapas ngeni Jakop, “Leluken nei we mwän Sikem a mochen riri ngeni noum we föpwül. Üa tüngor ngonuk, kose mochen kopwe mwüt ngeni pwe epwe pwülüeni.
GEN 34:9 Ousipwe pwüpwülüfengen. Oupwe ngenikem nöümi föpwül, nge ämi oupwe angei nöüm föpwül pwe oupwe pwülüeni.
GEN 34:10 Oupwe nonom rem, nge ewe fanü epwe suk ngenikemi. Oupwe nonom lon, oupwe pwal föri ämi angang o kamö fanüemi.”
GEN 34:11 Mürin, Sikem a üreni Jakop me mongeen Tina kewe, “Amwo üpwe küna ümöümöch me remi, nge üpwe ngenikemi meinisin mine oupwe tüngor seniei.
GEN 34:12 Oupwe chök üreniei ükükün mine oua mochen pwe üpwe kiseni ngenikemi. Iwe, üpwe ngenikemi meinisin mine oupwe tüngor seniei, nge oupwe chök ngeniei ewe föpwül pwe üpwe pwülüeni.”
GEN 34:13 Iwe, nöün Jakop kewe mwän ra atupu Sikem me Hamor saman we ren ar kapas, pokiten än Sikem aitengaua Tina fefiner we.
GEN 34:14 Iwe, ra üreni, “Äm aisap tongeni mwüt ngeni eman esap sirkomsais pwe epwe pwülüeni fefinem, pun aipwe itengau ren.
GEN 34:15 Nge äm aipwe chök tipeeu ngeni, ika ämi mwän meinisin oupwe sirkomsais usun chök äm.
GEN 34:16 Mürin äm aipwe ngenikemi nöüm kewe föpwül, äm aipwe pwal angei nöümi kewe föpwül. Iwe, äm aipwe nonom remi pwe sipwe eu chök mwichen aramas.
GEN 34:17 Nge are ousap mochen aüselingakem o sirkomsais, äm aipwe angei fefinem o feila.”
GEN 34:18 Iwe, Hamor me Sikem nöün we mwän ra efich ar kewe kapas.
GEN 34:19 Iwe, ewe alüal esap mang le föri mine ra üra, pun a fokun tongei nöün Jakop we föpwül. Iwe, Sikem ewe mi lap lon an famili.
GEN 34:20 Iei mine Hamor me Sikem nöün we ra feila lon ewe lenien amwicheich le asamalapen telinimwer we o üreni mwänin ewe telinimw,
GEN 34:21 “Ekei mwän ra mochen chiechi ngenikich. Ousipwe mwüt ngeniir pwe repwe nonom rech won fanüach, pwe repwe föri ar angang, pun ewe fanü a pwal naf ngeniir. Iwe, ousipwe pwülüeni nöür kewe föpwül, nge kich sipwe ngeniir nöüch kewe föpwül pwe repwe pwülüeniir.
GEN 34:22 Nge ir ra chök tipeeu ngeni ar repwe nonom rech pwe sipwe eu chök mwichen aramas, ika iteiten mwän leich repwe sirkomsais usun chök ir ra sirkomsais.
GEN 34:23 Ifa usun, sisap nöüni nöür man, sisap pwal pisekini pisekir meinisin? Sipwe chök tipeeu ngeniir pwe repwe nonom rech.”
GEN 34:24 Iwe, aramasen ewe telinimw meinisin ra aüselinga alon Hamor me Sikem, nge iteiten mwänin ewe telinimw ra sirkomsais.
GEN 34:25 Iwe, mürin ülüngat rän, lupwen ra onoson, ruoman nöün Jakop kewe mwän Simeon me Lefi mongeen Tina ra angei nöür ketilas, ra anifilong lon ewe telinimw o niela ekewe mwän meinisin.
GEN 34:26 Ra pwal niela Hamor me Sikem nöün we. Mürin ra angei Tina seni lon imwen Sikem o süla fan.
GEN 34:27 Mürin, nöün Jakop kewe mwän ra feito won ekewe somä o angei pisekin ewe telinimw fän pöchökül pokiten fefiner we a itengau rer.
GEN 34:28 Ra pwal angei nöür kewe pwiin sip me kow me nöür kewe aas me meinisin mine a nom lon ewe telinimw, pwal lon ewe mälämäl.
GEN 34:29 Iwe, ra uweeala wöür meinisin mi nom lon imwer, pwal nöür semirit me pwülüer.
GEN 34:30 Mürin, Jakop a üreni Simeon me Lefi, “Ämi oua ariaföüüei, pun oua föri mine chon ekei fanü, chon Kanaan me chon Peris repwe oputaei ren. Kich sa chokükün. Nge are ra chufengen pwe repwe maun ngenikich, ngang me chon leimwei meinisin aipwe rosola.”
GEN 34:31 Nge ra apasa, “Ifa usun, a öch an epwe föri ngeni fefinem ei, usun chök an föri ngeni eman fin lisowu?”
GEN 35:1 Iwe, Kot a üreni Jakop, “Kopwe feila Petel o nonom ikenan. Iwe, kopwe senätä eu rongen asor ikenan fän itei ngang ewe Kot mi pwä ngonuk, lupwen ka sü seni Esau pwiüm we.”
GEN 35:2 Iei mine Jakop a kapas ngeni chon leimwan me chokewe meinisin mi eti, “Oupwe pöütala ekewe uluulun anümwäl mi wor remi, oupwe pwal limetikemi o siwili üfemi.
GEN 35:3 Mürin, ousipwe ütä o feila Petel pwe üpwe senätä eu rongen asor fän iten ewe Kot a aüselingaei lon ränin ai riaföü, a pwal etiei ekis meinisin ia üa feila ie.”
GEN 35:4 Iwe, ra ngeni Jakop ar kewe uluulun anümwäl mi nom rer, pwal niouter kewe mi nom won selinger. Nge Jakop a ireerela meinisin fän ewe irä ook a arap ngeni Sikem.
GEN 35:5 Iwe, lupwen Jakop me an we mwich ra popuetä ar sai, eu niuokus watte me ren Kot a tori chon ekewe telinimw mi nom ünükür pwe resap tapweriir.
GEN 35:6 Iwe, Jakop me ekewe aramas meinisin mi eti ra tori Lus, a pwal iteni Petel, lon ewe fanü Kanaan.
GEN 35:7 Ikenan a senätä eu rongen asor o aita ngeni ewe leni El Petel , pun ikenan Kot a pwä ngeni Jakop, lupwen a sü seni pwin we.
GEN 35:8 Iwe, Tepora ewe chon tümwünü Repeka seni an kükün a mäla, nge ra peiaseni fän efoch ook pekitiuen Petel. Iei mine ra aita ngeni ewe irä Allon Pakut .
GEN 35:9 Mürin än Jakop liwinto seni Mesopotamia, Kot a pwäsefäl ngeni o afeiöchü.
GEN 35:10 Iwe, Kot a kapas ngeni, “Itom Jakop, nge kosap chüen iteni Jakop, pwe kopwe le iteni Israel.” Iei mine a iteni Israel.
GEN 35:11 Iwe, a pwal üreni, “Ngang ewe Kot mi Unusen Manaman. Kopwe upw o chomongola. Kopwe wiliti eu mwichen aramas, nge chomong mwicheichen aramas me king kana repwe pop senuk.
GEN 35:12 Ewe fanü üa fen ngeni Apraham me Isaak üpwe pwal ngonuk me mwirimwirum kana.”
GEN 35:13 Mürin, Kot a feitä seni Jakop.
GEN 35:14 Nge Jakop a aüetä eföü föün achem won ewe leni ia Kot a kapas ngeni me ie, a pwal ninätiu asoren ün me lö won.
GEN 35:15 Iei mine Jakop a aita ngeni ewe leni Petel, ewe ia Kot a kapas ngeni me ie.
GEN 35:16 Mürin, Jakop me an famili ra sai seni Petel. Iwe, lupwen resamwo arap ngeni Efrat, Rahel a tori an cheuchen fam, nge a weires an epwe nöünöü.
GEN 35:17 Iwe, lupwen a fokun weires ren an cheuch, ewe chon afam a üreni, “Kosap niuokus, pun kopwe nöüni pwal eman ät.”
GEN 35:18 Nge lupwen a arap ngeni än Rahel epwe mäla, a aita ngeni ewe ät Pen Oni , nge saman we a aita ngeni Peniamin .
GEN 35:19 Iwe, lupwen Rahel a mäla, ra peiaseni lepekin ewe al a ale ngeni Efrat, a pwal iteni Petleem.
GEN 35:20 Nge Jakop a aüetä eföü föün achem won peiasan. Iei ewe föün achem won peiasen Rahel a chüen nom tori ikenai.
GEN 35:21 Mürin, Israel a sopwela an sai o aüetä imwan imw mangaku pekilan ewe imw tekia lon Eter.
GEN 35:22 Iwe, lupwen Israel a nonom lon ewe fanü, Rupen a kon ren Pila ülüpwülüen saman we, nge Israel a rong usun.
GEN 35:23 Iwe, a wor engol me ruoman nöün Jakop mwän. Iwe, nöün me won Lea: Rupen nöün Jakop we mwänichi, Simeon, Lefi, Juta, Isakar me Sepulon.
GEN 35:24 Nge nöün me won Rahel: Josef me Peniamin.
GEN 35:25 Iwe, Pila nöün Rahel we chon angang a nöüni rüoman mwän Tan me Naftali.
GEN 35:26 Nge Silpa nöün Lea we chon angang a pwal nöüni ruoman mwän Kat me Aser. Ikkei ir nöün Jakop mwän a nöüniir me lon Mesopotamia.
GEN 35:27 Iwe, Jakop a feito ren Isaak saman we lon Mamre mi arap ngeni Kiriat Arpa ika Hepron, ewe ia Apraham me Isaak ra wasöla ie.
GEN 35:28 Nge ierin manauen Isaak ipükü walik.
GEN 35:29 Iwe, Isaak a mäla, lupwen a fokun chinlapala, o chufengen me an kewe lewo. Iwe, nöün kewe ruoman mwän Esau me Jakop ra peiaseni.
GEN 36:1 Iei uruwon ekewe mwirimwirin Esau a pwal iteni Etom.
GEN 36:2 Iwe, Esau a pwülüeni ekei fin Kanaan: Ata nöün Elon fefin, ewe re Hit, pwal Oholipama nöün Ana fefin, nge Ana nöün Sipeon ewe re Hiw.
GEN 36:3 Esau a pwal pwülüeni Pasemat nöün Ismael fefin, fefinen Nepajot.
GEN 36:4 Iwe, Ata a nöüni me won Esau Elifas, Pasemat a nöüni Reuel,
GEN 36:5 nge Oholipama a nöüni Jeus, Jalam me Kora. Ikkei ir nöün Esau kewe mwän a nöüniir me lon ewe fanü Kanaan.
GEN 36:6 Iwe, Esau a angei pwülüan kewe pwal nöün kewe mwän me fefin me chon leimwan meinisin. A pwal angei nöün kewe pwiin man me pisekin meinisin a eäni me lon ewe fanü Kanaan. Iwe, a aimwü seni Jakop pwin we o feila lon pwal eu fanü.
GEN 36:7 A feila, pun wöür ra kon chomong pwe resap tongeni nomfengen, nge ewe fanü ra nom lon esap naf ngeniir pokiten chomongun nöür kewe pwiin man.
GEN 36:8 Iei popun Esau mi pwal iteni Etom a nonom lon ewe fanü mi chukuchukutä lon Etom.
GEN 36:9 Iei uruwon ekewe mwirimwirin Esau, ir än ekewe chon Etom mi nonom lon ewe fanü mi chukuchukutä lon Etom kewe lewo.
GEN 36:10 Iwe, nöün Esau kewe mwän: Elifas, a nöüni me won Ata, nge Reuel, a nöüni me won Pasemat.
GEN 36:11 Nge nöün Elifas kewe mwän: Teman, Omar, Sefo, Katam me Kenas.
GEN 36:12 Elifas nöün Esau we a pwal nöüni Amalek me won ülüpwülüan we itan Timna. Ekei mwän meinisin nöün nöün Ata pwülüen Esau.
GEN 36:13 Nge nöün Reuel kewe mwän: Nahat, Sera, Samma me Missa. Ekei mwän nöün nöün Pasemat pwülüen Esau.
GEN 36:14 Iwe, Oholipama nöün Ana fefin, nge Ana nöün Sipeon mwän, a nöüni me won Esau pwülüan we: Jeus, Jalam me Kora.
GEN 36:15 Iwe, ikkei ir ekewe samol me lein ekewe mwirimwirin Esau. Elifas nöün Esau we mwänichi, nge nöün kewe mwän ir samol iter Teman, Omar, Sefo, Kenas,
GEN 36:16 Kora, Katam me Amalek. Ätekei ir ekewe samol mwirimwirin Elifas mi nom lon ewe fanü Etom, pwal ir nöün nöün Ata mwän.
GEN 36:17 Nge Reuel nöün Esau we a pwal wor nöün kewe mi samol iter Nahat, Sera, Samma me Missa. Ätekei ir ekewe samol mwirimwirin Reuel mi nom lon ewe fanü Etom, pwal ir nöün nöün Pasemat pwülüen Esau we.
GEN 36:18 Iwe, Oholipama pwülüen Esau a pwal wor nöün kewe mi samol iter Jeus, Jalam me Kora. Ätekei ir ekewe samol mwirimwirin Oholipama pwülüen Esau nöün Ana we fefin.
GEN 36:19 Ätekei meinisin ir mwirimwirin Esau, a pwal iteni Etom, nge pwal ir ar kewe samol.
GEN 36:20 Iwe, nöün Seir kewe mwän ewe re Hor mi nonom lon ewe fanü Etom: Lotan, Sopal, Sipeon, Ana,
GEN 36:21 Tison, Eser me Tisan. Ätekei ir ekewe samolun chon Hor nöün Seir kewe mwän mi nom lon ewe fanü Etom.
GEN 36:22 Iwe, nöün Lotan kewe mwän Hori me Heman, nge Timna fefinen Lotan.
GEN 36:23 Nöün Sopal kewe mwän Alwan, Manahat, Epal, Sefo me Onam.
GEN 36:24 Nge nöün Sipeon kewe mwän Aia me Ana. Iwe, Ana ätewe mi küna ewe koluk mi pwichikar lon ewe fanüapö, lupwen a tümwünü nöün saman kewe aas.
GEN 36:25 Iwe, Tison nöün Ana mwän, nge Oholipama nöün fefin.
GEN 36:26 Nge nöün Tison kewe mwän: Hemtan, Espan, Itran me Cheran.
GEN 36:27 Iwe, nöün Eser kewe mwän: Pilan, Saawan me Akan.
GEN 36:28 Nge nöün Tisan kewe mwän: Us me Aran.
GEN 36:29 Iwe, ekewe samolun chon Hor iter Lotan, Sopal, Sipeon, Ana,
GEN 36:30 Tison, Eser me Tisan. Ätekei ir ekewe samolun chon Hor lon tettelin ar ainang mi nom lon ewe fanü Etom.
GEN 36:31 Ikkei ir ekewe king mi nemenem lon ewe fanü Etom, lupwen esamwo wor king mi nemenem lon Israel.
GEN 36:32 Pela nöün Peor a kingen Etom, iten an telinimw Tinhapa.
GEN 36:33 Iwe, mürin än Pela mäla, Jopap nöün Sera seni Posra a siwili lon wisan wisen king.
GEN 36:34 Nge mürin än Jopap mäla, Husam seni fanüen chon Teman a siwili lon wisan wisen king.
GEN 36:35 Mürin än Husam mäla, Hatat nöün Petat a siwili lon wisan wisen king. Hatat ewe mi akufu chon Mitian me lon ewe fanü Moap. Iwe, iten an telinimw Awit.
GEN 36:36 Nge mürin än Hatat mäla, Samla seni Masreka a siwili lon wisan wisen king.
GEN 36:37 Iwe, mürin än Samla mäla, Shaul seni ewe telinimw Rehopot mi nom arun ewe chanpupu Oifrat a siwili lon wisan wisen king.
GEN 36:38 Mürin än Shaul mäla, Paalanan nöün Akpor a siwili lon wisan wisen king.
GEN 36:39 Iwe, mürin än Paalanan nöün Akpor mäla, Hatat a siwili lon wisan wisen king. Iten an telinimw Pau, nge iten pwülüan Mehetapel nöün Matret we fefin, nge Matret nöün Mesahap fefin.
GEN 36:40 Iwe, ikkei ir ekewe samol, ir mwirimwirin Esau lon tettelin ar kewe ainang me lenier: Timna, Alwa, Jetet,
GEN 36:41 Oholipama, Ela, Pinon,
GEN 36:42 Kenas, Teman, Mipsar,
GEN 36:43 Maktiel me Iram. Ätekei ir ekewe samolun Etom lon tettelin en me lenian me lon ewe fanü ra fanüeni. Nge Esau än chon Etom lewo.
GEN 37:1 Iwe, Jakop a nonom lon ewe fanü Kanaan, ia saman a wasöla ie me lom.
GEN 37:2 Iwe, iei pworausen än Jakop famili. Lupwen Josef a ierini engol me fisu, a eti pwin kewe nöün Pila me Silpa ülüpwülüen saman we le fofol sip. Nge Josef a apworausa ngeni semer we usun föföringauen pwin kewe.
GEN 37:3 Iwe, Israel a echeni Josef lap seni nöün kewe meinisin, pun a nöüni lupwen an chinlap. Iwe, a aüföüfa ngeni echö üf mi lingöch.
GEN 37:4 Nge lupwen pwin kewe ra küna pwe semer we a echeni Josef lap seniir meinisin, ra oputa Josef, nge resap chüen tongeni wokekei are kapas pwapwa ngeni.
GEN 37:5 Iwe, lon eu pwin Josef a eäni eu tan. Nge lupwen a apworausa ngeni pwin kewe usun, ra chök alapala ar oput.
GEN 37:6 Josef a üreniir, “Oupwe rongorong pworausen ai ei tan.
GEN 37:7 Sia pilükü irän wiich. Iwe, pilüküei we a püsin ütä, nge pilüküemi kewe ra pwelifeili o chap ngeni.”
GEN 37:8 Nge pwin kewe ra aisini, “Ifa usun, ka ekieki pwe en kopwe nemenikem, are ka ekieki pwe kopwe äm samol?” Iwe, ra chök fokun alapala ar oput pokiten pworausen an we tan.
GEN 37:9 Mürin, Josef a pwal eäni eu tan o apworausa ngeni pwin kewe. Iwe, a apasa, “Üa pwal eäni eu tan. Lon ai we tan akkar me maram me engol me eföü fü ra chapetiu fän mesei.”
GEN 37:10 Nge lupwen a apworausa an we tan ngeni saman me pwin kewe, saman we a apwüngü o aisini, “Met sokun tan en ka eäni? Ifa usun, äm me inom me pwiüm kewe aipwe wesewesen feito o chapetiu lepwül fän mesom?”
GEN 37:11 Iwe, pwin kewe ra lolowo ngeni, nge saman we a amwöchü an kewe kapas lon lelukan.
GEN 37:12 Iwe, pwin Josef kewe ra feila arun Sikem pwe repwe tümwünü nöün semer kewe sip.
GEN 37:13 Iwe, Israel a üreni Josef, “Ka silei pwe pwiüm kewe ra tümwünü ekewe sip arun Sikem? Etto, üpwe tinukela rer.” Nge Josef a pälüeni, “Ewer, üpwe feila.”
GEN 37:14 Iwe, Israel a üreni, “Kopwe feila o pi are a öch pworausen pwiüm kewe me ekewe sip. Mürin, kopwe liwinto o asileto rei.” Iei mine Israel a tinala Josef seni ewe lemolun Hepron. Nge lupwen Josef a tori Sikem,
GEN 37:15 eman mwän a küna lon an fetalfeil lon ekewe mälämäl. Iwe, a aisini Josef, “Met ka kütta?”
GEN 37:16 Nge Josef a pälüeni, “Üa kütta pwii kewe. Kose mochen kopwe aiti ngeniei ia ra tümwünü ie nöüm kewe sip.”
GEN 37:17 Nge ewe mwän a üreni, “Ra fen feila ekis, pun üa rong pwe ra kapasfengen lefiler pwe repwe feila Totan.” Iei mine Josef a tapwela mürin pwin kewe, nge a küneer me Totan.
GEN 37:18 Iwe, pwin kewe ra küna Josef me toau. Nge lupwen esamwo arap ngeniir, ra pwüngüpwüngfengen lemonomon usun ar repwe niela.
GEN 37:19 Iwe, ra kapasfengen lefiler, “Nengeni, a war ewe chon tan.
GEN 37:20 Ou etto, sipwe niela o aturalong lon eu kewe pwang. Mürin sipwap üra pwe eman manmwacho a ochei. Iwe, sipwe pi ika epwe fis pwüngün mine a eäni tan.”
GEN 37:21 Nge lupwen Rupen a rong ar pwüngüpwüng, a ekiekin angasa Josef seniir. Iwe, a apasa, “Ouse mochen sisap niela pwiich.
GEN 37:22 Ousap afeiengaua. Oupwe aturätiu lon ei pwang ikei lon fanüapö, nge ousap niela.” Rupen a apasa ei, pun a ekiekin amanaua Josef seniir o aliwinala ren saman we.
GEN 37:23 Iwe, lupwen Josef a tori pwin kewe, ra turufi o pwiliti seni üfan mi lingöch.
GEN 37:24 Iwe, ra angei o aturalong lon eu pwang mi pö esap wor koluk lon.
GEN 37:25 Mürin, ra mottiu pwe repwe mongö. Nge lupwen ra chimwetä, ra küna eu mwichen chon Ismael me nöür kewe kamel ra feito me Kiliat. Iwe, ekewe kamel ra uwou sokun apach mi pwokus me säfei mi aüchea itan mör, pwe repwe uwala Isip.
GEN 37:26 Iwe, Juta a üreni pwin kewe, “Met lomoten ach sipwe niela pwiich o tukumala ach föför?”
GEN 37:27 Ou etto, sipwe amömöla pwiich ei ngeni ekanan chon Ismael. Nge ousisap niela. Pun i pwiich pwal fitukach.” Iwe, pwin kewe ra tipeeu ngeni.
GEN 37:28 Nge lupwen ekewe chon amömö seni Mitian ra toriir, ra efietä Josef me lon ewe pwang o amömöla ngeni ekewe mwirimwirin Ismael ren rüe föün moni silifer. Iwe, ekewe chon Ismael ra uwala Josef Isip.
GEN 37:29 Nge lupwen Rupen a liwinto ren ewe pwang o küna pwe Josef esap chüen nom lon, a kamwei üfan fän an letipeta.
GEN 37:30 Iwe, a liwinla ren pwin kewe o apasa, “Ese chüen nom ewe ät. Met üpwe föri iei?”
GEN 37:31 Mürin ra niela eman kuuch o iselong üfen Josef we lon chan.
GEN 37:32 Iwe, ra tinala ewe üf mi lingöch ren semer we o asile ngeni, “Iei ei üf aia küna. Kopwe nenengeni ika üfen noum we ika esap üfan.”
GEN 37:33 Iwe, Jakop a sileni ewe üf o apasa, “Ei üf wesewesen üfen nei we, eman manmwacho a ochei. Ellet, inisin Josef a tatakis.”
GEN 37:34 Mürin, Jakop a kamwei üfan fän an letipeta, a üföüfolong echö üf seni tuk o kechüeiti nöün we lon chomong rän.
GEN 37:35 Iwe, nöün kewe mwän me fefin meinisin ra sotun achipa, nge Jakop esap mochen chipila. Iwe, a üra, “Lon ai letipeta üpwe feitiu lon lenien sotup ren nei ät.” Iei usun Jakop a kechüeiti Josef.
GEN 37:36 Nge lon ewe fansoun, ekewe chon Mitian ra fen amömöla Josef lon Isip ngeni Potifar, eman nöün Farao nöüwis, pwal i ewe meilapen mwichen sounfiu mi wisen tümwünü imwen Farao.
GEN 38:1 Lon ena fansoun a fis pwe Juta a feila seni pwin kewe o wasöla ren eman re Atullam itan Hira.
GEN 38:2 Ikenan Juta a küna eman föpwül nöün eman re Kanaan itan Shua. Iwe, a pwüpwülü ngeni o kon ren.
GEN 38:3 Nge ewe föpwül a pwopwo, a nöüni eman ät o aita ngeni Er.
GEN 38:4 Mürin, a pwal pwopwo, a nöüni eman ät o aita ngeni Onan.
GEN 38:5 Nge lupwen a nonom Kesip, a pwal nöüni eman ät o aita ngeni Shela.
GEN 38:6 Iwe, Juta a kütta eman föpwül itan Tamar pwe pwülüen Er nöün we mwänichi.
GEN 38:7 Nge Er nöün Juta mwänichi a fokun föföringau fän mesen ewe Samol mi Lapalap. Iei mine ewe Samol mi Lapalap a niela.
GEN 38:8 Mürin, Juta a üreni Onan, “Kopwe pwülüeni pwülüen pwiüm we pwe epwe wor mwirimwirin, pun iei usun pwüngün ngeni eman a mä pwin.
GEN 38:9 Nge Onan a silei pwe esap tongeni nöüni nöün me won pwülüen pwin we. Iwe, lupwen a kon ren pwülüen pwin, a chök akusätiu chan lepwül pwe esap wor mwirimwirin pwin.
GEN 38:10 Nge ewe Samol mi Lapalap a oput mine Onan a föri, iei popun a pwal niela.
GEN 38:11 Mürin, Juta a üreni Tamar pwülüen nöün we, “Kopwe liwiniti imwen semom o nonom lon om lipich, tori Shela nei we epwe mwän.” Juta a apasa ei, pun a niuokus pwe Shela epwe pwal mäla usun chök pwin kewe. Iei mine Tamar a liwinla lon imwen saman.
GEN 38:12 Feilfeil pwülüen Juta nöün Shua we fefin a mäla. Nge lupwen a wes än Juta letipeta, a feila Timnat pwe epwe fichi ülen nöün kewe sip, nge chienan Hira ewe re Atullam a eti.
GEN 38:13 Iwe, eman a asile ngeni Tamar pwe semen pwülüan we a feila Timnat pwe epwe fichi ülen nöün kewe sip.
GEN 38:14 Mürin, Tamar a pwilitawu üfan üfen lipichsefäl, a filiti inisin ngeni echö mangaku, a pwölüöla won mesan o mottiu leasamalapen Enaim ünükün ewe al a ale ngeni Timnat. Pun a silei pwe Shela a tori ierin mwän, nge resamwo apwüpwülüa ngeni.
GEN 38:15 Iwe, lupwen Juta a küna neminewe, a ekieki pwe i eman fefin mi amömö inisin fän iten lisowu, pun a pwölüöla won mesan.
GEN 38:16 Iwe, a feila ren lükün ewe al o üreni, “Etto, üpwe kon reöm.” Pun esap silei pwe pwülüen nöün we. Nge Tamar a aisini, “Met kopwe liwini ngeniei ika kopwe kon rei?”
GEN 38:17 Iwe, Juta a pälüeni, “Üpwe tinala reöm eman apanen kuuch.” Nge Tamar a üra, “Kose mochen kopwe ngeniei asisilen om pwon tori kopwe tinato rei ewe kuuch?”
GEN 38:18 Nge Juta a aisini, “Met sokun mettoch üpwe ngonuk pwe asisilen ai pwon?” Iwe, Tamar a pälüeni, “Kopwe ngeniei noum ringen pwau fiti selin, pwal wokum na mi nom lepoum.” Iwe, a ngeni neminewe ekewe mettoch. Mürin a kon ren, nge neminewe a pwopwo me won.
GEN 38:19 Mürin, Tamar a liwiniti imwan, a pwilitätiu ewe mangaku, a pwölü ngeni won mesan, o pwilitalong üfan üfen lipichsefäl.
GEN 38:20 Iwe, Juta a tinala Hira chienan we pwe epwe uwala ewe apanen kuuch ren ewe fefin o angei seni ekewe asisilen an pwon. Nge Hira esap chüen küna.
GEN 38:21 Iwe, a aisini mwänin ewe leni, “Ifa i ewe fefin mi amömö inisin fän iten lisowu a nom Enaim ünükün ewe al?” Nge ra palüeni, “Ese wor eman fefin mi amömö inisin a nom ikei.”
GEN 38:22 Iei popun a liwinla ren Juta o apasa, “Üsap küna ewe fefin. Nge mwänin ewe leni ra apasa pwe esap wor eman fefin mi amömö inisin fän iten lisowu a nom ikenan.”
GEN 38:23 Nge Juta a üreni, “Ina chök, epwe chök nöüni ekewe mettoch pwe site uren takir. En ka püsin silei pwe üa tinala ewe apanen kuuch ren ewe fefin, nge kosap küna.”
GEN 38:24 Iwe, ina epwe ülüngat maram mürin, eman a asile ngeni Juta, “Tamar pwülüen noum we a tipisin lisowu, nge a pwal pwopwo.” Iwe, Juta a apasa, “Oupwe emwenawu pwe sipwe keni.”
GEN 38:25 Nge lupwen ra emwenawu Tamar, a tinala pworaus ren semen pwülüan we o apasa, “Ngang üa pwopwo me won ewe mwän mine nöün ekei mettoch. Üa tüngor ngonuk pwe kopwe nengenifichi, ika nöün iö ei ringen pwau fiti selin me ei wok.”
GEN 38:26 Nge Juta a sileni ekewe mettoch o apasa, “Neminan a pwüng seniei, pun üsap apwüpwülüa ngeni nei mwän Shela.” Nge Juta esap chüen kon ren.
GEN 38:27 Iwe, lupwen a tori fansoun an epwe nöünöü, a pwä pwe a wor nöün lippwe lon lukan.
GEN 38:28 Nge lupwen a tori an cheuchen fam, eman a sikiwu pöün. Iwe, ewe chon afam a amwöchü pöün, a rii ngeni emwü terech mi par o apasa, “Ätei a akomwen uputiu.”
GEN 38:29 Nge lupwen a siksefälielong pöün, pwin we a uputiu. Mürin, ewe chon afam a apasa, “Oo, iei usun ka püsin amökkawu!” Iei mine a iteni Peres .
GEN 38:30 Mürin, pwin we a uputiu, nge a wor ewe terech mi par won pöün. Iwe, a iteni Sera.
GEN 39:1 Iwe, ekewe mwirimwirin Ismael ra uwala Josef Isip. Nge eman re Isip itan Potifar, eman nöün Farao nöüwis, pwal i ewe meilapen mwichen sounfiu mi wisen tümwünü imwen Farao, a möni Josef seni ekewe chon Ismael, lupwen ra uwato.
GEN 39:2 Nge ewe Samol mi Lapalap a eti Josef pwe a fisiöch an angang meinisin. Iwe, a nonom lon imwen an samol ewe re Isip.
GEN 39:3 Ätewe a küna pwe ewe Samol mi Lapalap a eti Josef o apwönüetä an angang meinisin a föri.
GEN 39:4 Iwe, Potifar a ümöümöch ngeni Josef, iei mine a afili pwe epwe angang ngeni. A seikätä Josef pwe epwe tümwünü imwan me pisekin meinisin.
GEN 39:5 Nge seni ewe otun Potifar a seikätä Josef pwe epwe tümwünü imwan me pisekin meinisin, ewe Samol mi Lapalap a afeiöchü imwan pokiten Josef. Iwe, än ewe Samol mi Lapalap feiöch a nonom won meinisin mine Potifar a eäni lon imwan pwal won fanüan.
GEN 39:6 Iei mine Potifar a anomu fän nemenemen Josef meinisin mine a eäni. Iwe, Potifar esap chüen tümwünü och mettoch pwe anan mongö chök. Nge Josef a fokun äteöch o mesemesöch.
GEN 39:7 Mürin ekoch fansoun pwülüen an we samol a sani Josef o üreni, “Kopwe kon rei.”
GEN 39:8 Nge Josef esap tipeeu ngeni. Iwe, a üreni pwülüen an we samol, “Nengeni, ai samol esap chüen tümwünü och mettoch lon imwan, nge a anomu meinisin mine a eäni fän nemeniei.
GEN 39:9 Ai nemenem lon ei imw a usun chök an nemenem. Ai samol esap amwöchü seniei och mettoch chilon chök en, pun en pwülüan. Ifa usun, üpwe föri och föför mi fokun ngau o tipis ngeni Kot?”
GEN 39:10 Iwe, neminewe a kakapas ngeni Josef rän me rän pwe epwe kon ren ika nom ren, nge i esap aüselinga alon.
GEN 39:11 Nge lon eu rän, lupwen Josef a tolong lon ewe imw pwe epwe föri an angang, esap wor eman lein ekewe chon angang a nom lon ewe imw.
GEN 39:12 Ewe fefin a turufi Josef, a amwöchü üfan o üreni, “Kopwe kon rei.” Nge Josef a likitala üfan we lepöün o sü seni me lon ewe imw.
GEN 39:13 Iwe, lupwen ewe fefin a küna pwe Josef a likiti üfan lepöün o süwu lükün ewe imw,
GEN 39:14 a körato nöün kewe chon angang o üreniir, “Nengeni, Potifar a uwato rech eman re Ipru pwe epwe turunufasekich. Iwe, a tolong rei pwe epwe kon rei, nge üa puchör.
GEN 39:15 Nge lupwen a rong ai pupuchör, a likitala üfan rei o süla lükün.”
GEN 39:16 Iwe, ewe fefin a iseis üfen Josef ren, tori an samol a liwiniti imwan.
GEN 39:17 Mürin, ewe fefin a asile ngeni pwülüan we ewe chök pworaus, “Ewe re Ipru ka uwato rech pwe sipwe nöüni amanau a tolong rei pwe epwe turunufaseei.
GEN 39:18 Nge lupwen üa pupuchör, a likitala üfan rei o süla lükün.”
GEN 39:19 Iwe, lupwen än Josef samol a rong ewe pworaus pwülüan we a asile ngeni, a fokun song.
GEN 39:20 Iwe, Potifar a angei nöün chon angang Josef o aturalong lon imwen fötek, ia nöün ewe king chon fötek ra fötek ie. Iwe, Josef a nonom lon ewe imwen fötek.
GEN 39:21 Nge ewe Samol mi Lapalap a eti Josef o eäni kirikiröch ngeni, pwe a küna ümöümöch me ren ewe chon nemeni ewe imwen fötek.
GEN 39:22 Iwe, ewe chon nemeni ewe imwen fötek a lükü ngeni Josef ekewe chon fötek meinisin mi nom lon ewe imwen fötek, pwe epwe tümwünüür. Josef a pwal nemeni ekewe angang meinisin ra fis lon ewe imwen fötek.
GEN 39:23 Iwe, ewe chon nemeni ewe imwen fötek esap chüen ekiekin püsin tümwünü mine a fen nom fän nemenien Josef, pun ewe Samol mi Lapalap a eti Josef o afeiöchü an angang meinisin.
GEN 40:1 Iwe, mürin ekoch fansoun, ewe chon amolätä ünümen ewe kingen Isip, pwal nöün chon umuni anan pilawa ra tipis ngeni ar we samol ewe kingen Isip.
GEN 40:2 Farao a song ngeni nöün kewe ruoman nöüwis, ewe meilapen chon amolätä ünüman me ewe meilapen chon umuni anan pilawa.
GEN 40:3 Iwe, a fötekiniir lon imwen ewe meilapen sounfiu mi wisen tümwünü imwen Farao. Iei ewe imwen fötek Josef a pwal nom lon.
GEN 40:4 Iwe, ewe meilapen sounfiu a anomuur fän tümwünüen Josef pwe epwe angang ngeniir. Iwe, lupwen ra nonom lon ewe imwen fötek ekoch fansoun,
GEN 40:5 ewe chon amolätä ünümen ewe kingen Isip me ewe chon umuni anan pilawa ra tan lon eu chök pwin. Nge ar kewe tan a sokofesen wewen.
GEN 40:6 Iwe, lupwen Josef a churi nöün Farao kewe nöüwis lesosor, a küna pwe ra wololilen.
GEN 40:7 Iei mine a aisiniir, “Met popun pwe oua wololilen ikenai?”
GEN 40:8 Iwe, ra pälüeni, “Äm aia tan, nge ese wor eman a tongeni awewe ngenikem äm kewe tan.” Nge Josef a üreniir, “Kot chök a tongeni awewei tan. Iwe, oupwe pwäri ngeniei ämi kewe tan.”
GEN 40:9 Iei mine ewe meilapen chon amolätä ünümen Farao a pwäri an we tan ngeni Josef, “Lon ai we tan üa küna efoch irän wain,
GEN 40:10 nge a wor ülüfoch keangan. Iwe, lupwen a pwüküwu fasaran, etin a pwal suk, nge uan kewe ra müttir nup.
GEN 40:11 Iwe, üa amwöchü än Farao kap. Üa pwal angei uän ewe irän wain o ungutalong lon ewe kap. Mürin üa isenalong lepöün Farao.”
GEN 40:12 Iwe, Josef a üreni, “Iei wewen om na tan: Ekewe ülüfoch keang ülüngat rän.
GEN 40:13 Mürin ülüngat rän Farao epwe echimwätä mökürom o atolongasefäliik lon wisom. Iwe, kopwe isenalong lepöün Farao an kap usun chök me lom, lupwen ka wisen amolätä ünüman.
GEN 40:14 Nge kose mochen kopwe chechemeniei lupwen om kopwe feiöchsefäl. Iwe, kopwe kirikiröch ngeniei o achemenieitä fän mesen Farao, kopwe pwal alisiei pwe üpwe towu seni ei imwen fötek.
GEN 40:15 Pun ra soläniei seni ewe fanüen chon Ipru, nge pwal ikei üsap föri och mi ngau pwe repwe aturueilong lon imwen fötek.”
GEN 40:16 Iwe, lupwen ewe meilapen chon umuni pilawa a rong pwe a öch wewen ewe tan, a üreni Josef, “Ngang üa pwal tan. Iwe, lon ai we tan a wor ülüngat chük üa aüwomonga.
GEN 40:17 Nge lon ewe chük mi nom asan, a wor chomong sokun pilawa fän iten Farao. Iwe, machang ra mongö seni lon ewe chük.”
GEN 40:18 Iwe, Josef a üreni, “Iei wewen om na tan: Ekewe ülüngat chük ülüngat rän.
GEN 40:19 Mürin ülüngat rän Farao epwe echimwätä mökürom, pun epwe pökü üom, nge inisum epwe aitiuätä won efoch irä. Iwe, machang repwe feito o ochei fitukom.”
GEN 40:20 Iwe, ülüngat rän mürin, a fis ränin uputiuen Farao. Iwe, a föri eu kametip mi watte fän iten nöün kewe nöüwis meinisin o echimwätä möküren ewe meilapen chon amolätä ünüman pwal möküren ewe meilapen chon umuni anan pilawa.
GEN 40:21 Iwe, a atolongasefäli ewe meilapen chon amolätä ünüman lon wisan pwe epwe isenalong ewe kap lepöün.
GEN 40:22 Nge ewe meilapen chon umuni anan pilawa a aitiuätä won efoch irä, usun Josef a fen aiti ngeniir.
GEN 40:23 Nge ewe meilapen chon amolätä ünümen Farao esap chüen chechemeni Josef, pwe a manlükala.
GEN 41:1 Mürin ruu ier Farao a tan pwe a ütä ünükün ewe chanpupu Nil.
GEN 41:2 Iwe, a küna pwe füman kow mi öch o kitinup ra towu me lon ewe chanpupu Nil o mongö fetilin ünükün.
GEN 41:3 Mürin, pwal füman kow mi ngau o kichüchü ra towu müriir, ra ütä ren ekewe kow mi öch ünükün ewe chanpupu Nil.
GEN 41:4 Iwe, ekewe kow mi ngau o kichüchü ra ochei ekewe füman kow mi öch o kitinup. Mürin Farao a nela.
GEN 41:5 Iwe, a möürsefäl, nge a pwal tansefäl. A küna füumw uän wiich ra pwüküwü seni efoch chök wasan, nge ra fokun masou o umwumong.
GEN 41:6 Mürin ra pwal pwüküwu füumw üän wiich, nge ra pön o pwas ren asepwälin ötiu.
GEN 41:7 Nge ekewe füumw üän wiich mi pön ra oromala ekewe füumw uän wiich mi masou o umwumong. Iwe, lupwen Farao a nela, a mefi pwe a tan.
GEN 41:8 Iwe, lesosor Farao a riaföü lon letipan. Iei mine a titi ekewe soupwe me ekewe soutipachemen Isip meinisin o üreniir an kewe tan. Nge esap wor eman leir a tongeni awewe ngeni Farao an kewe tan.
GEN 41:9 Lon ewe chök otun, ewe meilapen chon amolätä ünümen Farao a üreni, “Ikenai üa chechemeni ai tipis.
GEN 41:10 Iwe, lupwen en ka song ngeni ewe meilapen chon umuni pilawa pwal ngeniei o aturukeemilong lon fötek lon imwen ewe meilapen sounfiu mi wisen tümwünü imwomw,
GEN 41:11 äm me ruoman aia tan lon eu chök pwin. Nge äm kewe tan a sokofesen wewen.
GEN 41:12 Iwe, a wor eman alüal seni chon Ipru a etikem, i chon angang ngeni ewe meilapen sounfiu. Nge lupwen aia pwäri ngeni äm kewe tan, i a awewe ngeni eman me eman leim usun wewen an we tan.
GEN 41:13 Iwe, a fis usun an awewe ngenikem, pun ngang üa tosefälilong lon wisei, nge ewe chon umuni pilawa a itiuätä won efoch irä.”
GEN 41:14 Mürin, Farao a titi Josef. Iwe, ra müttir emwenawu seni lon ewe imwen fötek. Nge lupwen a wes me fichi möküran o siwili üfan, a tolong fän mesen Farao.
GEN 41:15 Iwe, Farao a üreni Josef, “Ngang üa tan, nge ese wor eman a tongeni awewe ngeniei wewen. Nge üa rong pworausom, pwe lupwen ka rong eu tan, ka tongeni awewei.”
GEN 41:16 Nge Josef a üreni Farao, “Ai king, sap ngang üa tufich ngeni, nge Kot epwe pwäri ngonuk mine kopwe feiöch ren.”
GEN 41:17 Mürin, Farao a üreni Josef, “Nengeni, lon ai we tan üa ütä ünükün ewe chanpupu Nil.
GEN 41:18 Iwe, füman kow mi öch o kitinup ra towu me lon ewe chanpupu Nil o mongö fetilin ünükün.
GEN 41:19 Mürin pwal füman kow ra towu me mürir, ra fokun ngau o kichüchü. Üsamwo küküna ei sokun kow lon unusen ewe fanü Isip.
GEN 41:20 Iwe, ekewe kow mi kichüchü o ngau ra ochei ekewe füman kow mi kitinup, ra towu me mwan.
GEN 41:21 Nge wesin ar ocheer, ese wor eman a küna pwe ra ocheer, pun ra chüen kichüchü usun me mwan. Mürin üa nela.
GEN 41:22 Iwe, lupwen üa möürsefäl, üa pwal tan pwe üa küna füum uän wiich mi masou o umwumong, ra pwüküwu seni efoch chök wasan.
GEN 41:23 Mürin, füum uän wiich mi pön o pwas ren asepwälin ötiu ra pwüküwu me mürir.
GEN 41:24 Iwe, ekewe füum uän wiich mi pön ra oromala ekewe füum üan wiich mi umwumong. Nge lupwen üa pwäri ngeni ekewe soupwe ai kewe tan, esap wor eman leir a tongeni awewe ngeniei wewer.”
GEN 41:25 Mürin, Josef a üreni Farao, “Om kewe ruu tan eu chök wewen. Kot a pwäri ngonuk mine a ekiekin föri.
GEN 41:26 Ekewe füman kow mi öch ra wewe ngeni fisu ier, nge ekewe füum uän wiich mi umwumong ra pwal wewe ngeni fisu ier. Ekewe ruu tan eu chök wewen.
GEN 41:27 Ekewe füman kow mi ngau o kichüchü ra towu mürir, pwal ekewe füum uän wiich mi pön o pwas ren asepwälin ötiu ra wewe ngeni fisu ierin lengita.
GEN 41:28 A chök fis mine üa fen ürenuk. Kot a pwäri ngonuk mine a ekiekin föri.
GEN 41:29 Fisu ierin räs mi watte repwe feito won unusen ei fanü Isip.
GEN 41:30 Nge mürin ekewe fisu ierin räs mi watte, pwal fisu ierin lengita repwe feito. Iwe, aramas repwe manlükala ewe räs mi watte won ei fanü Isip, pun ewe lengita epwe ataala ewe fanü.
GEN 41:31 Iwe, epwe fis pwe chon ewe fanü resap chüen chechemeni ewe räs mi watte fän äsengesin ewe lengita epwe feito me mürin, pun epwe fokun chou.
GEN 41:32 Nge wewen om tan fän ruu pwe Kot a fen amolätä ekewe mettoch, nge epwe pwal müttir afisätä.
GEN 41:33 Iei mine a öch om kopwe filätä eman mwän mi mirit o tipachem, epwe seikitä won ei fanü Isip.
GEN 41:34 Mürin kopwe pwal awisa ekoch nöüwis won ewe fanü, pwe repwe angei eu lelimu seni mine aramas ra kini lupwen ekewe fisu ierin räs mi watte.
GEN 41:35 Repwe ionifengeni ekei mongö meinisin lon ekewe ierin räs mi watte repwe fefeito, repwe pwal iseni ekewe föün wiich fän nemenien Farao o tümwünüöchü pwe epwe wor mongö lon ekewe telinimw.
GEN 41:36 Nge ewe mongö epwe iseis fän iten chon ei fanü fän äsengesin ekewe fisu ierin lengita repwe tori ei fanü Isip. Ren ei, chon ei fanü resap feiengau ren ewe lengita.”
GEN 41:37 Iwe, Farao me nöün kewe nöüwis meinisin ra tipeeu ngeni ei akot.
GEN 41:38 Mürin, Farao a aisini nöün kewe nöüwis, “Ifa usun, sipwe tongeni küna eman mwän usun chök ätei, Ngünün Kot a nonom won?”
GEN 41:39 Iei mine Farao a üreni Josef, “Esap wor eman mi wewe ngonuk ren miritum me tipachemum, pun Kot a pwäri ngonuk ekei mettoch meinisin.
GEN 41:40 Iwe, kopwe nemeni imwei, nge nei aramas meinisin repwe aleasochisi alom. Ren chök leniei lenien king üpwe tekia senuk.”
GEN 41:41 Iwe, Farao a pwal üreni Josef, “Iei üa seikuketä pwe kopwe nemeni unusen ei fanü Isip.”
GEN 41:42 Mürin, Farao a üttawu an ringen impwang seni won aütün o sökalong won aütün Josef. A pwal aüfaüfa ngeni mangaku mi aüchea o amwärämwära ngeni epa mwärämwär seni kolt fän üan.
GEN 41:43 Iwe, Farao a pwal ngeni Josef aruofochun wan woken pwe epwe wawafeil, nge aramas ra akom mwan o kökkö, “Oupwe chapetiu.” Iwe, ina usun Farao a awisa Josef pwe epwe nemeni unusen ewe fanü Isip.
GEN 41:44 Farao a pwal üreni Josef, “Ngang Farao, nge ese wor eman won unusen ewe fanü Isip epwe föri och lükün tipom.”
GEN 41:45 Iwe, Farao a aita ngeni Josef Safenat Panea, a pwal ngeni eman pwülüan itan Asenat nöün Potifera, ewe souasoren ewe telinimw On. Mürin, Josef a saifeil won unusen ewe fanü Isip.
GEN 41:46 Iwe, Josef a ierini ilik, lupwen a popuetä an angang ngeni Farao ewe kingen Isip. Mürin, Josef a feila seni fän mesen Farao o saifeil won unusen ewe fanü Isip.
GEN 41:47 Iwe, lupwen ekewe fisu ierin räs mi watte, pwül a amärätä chomong föün irä.
GEN 41:48 Lon ekewe fisu ier Josef a ionifengeni ekewe mongö mi chomong a wor won ewe fanü Isip. Iwe, lon iteiten telinimw ra iseis ekewe mongö mi mär ünükün.
GEN 41:49 Nge Josef a iseis chomong, chomong föün wiich, tori esap chüen tongeni aükük, pun a chomong usun pien aroset.
GEN 41:50 Iwe, mwen ekewe ierin lengita, Asenat nöün Potifera, ewe souasoren On, a nöüni ruoman ät me won Josef.
GEN 41:51 Iwe, Josef a aita ngeni nöün mwänichi Manasa , pun a apasa, “Kot a amanlükala seniei ai riaföü meinisin, pwal ai positi chon leimwen semei.”
GEN 41:52 Nge ewe aruomanün a aita ngeni Efraim , pun a apasa, “Kot a fang ngeniei nei lon ei fanü üa weires lon.”
GEN 41:53 Iwe, ekewe fisu ierin räs mi watte ra wesila lon ewe fanü Isip,
GEN 41:54 nge ekewe fisu ierin lengita ra popuetä usun Josef a ürü. Iwe, a fis lengita won ekewe fanü meinisin, nge lon ewe fanü Isip a wor mongö.
GEN 41:55 Iwe, lupwen chon Isip meinisin ra echik, ra tüngor ngeni Farao pwe epwe ngeniir mongö. Nge Farao a üreniir, “Oupwe feila ren Josef o föri mine a apasa.”
GEN 41:56 Iwe, lupwen ewe lengita a wattela o tori unusen ewe fanü Isip, Josef a sukala ekewe imwen iseis mongö o amömöla ngeni chon Isip meinisin.
GEN 41:57 Iwe, aramas seni ekis meinisin ra pwal feito Isip ren Josef pwe repwe kamö mongö, pun ewe lengita a fokun chouiti unusen fanüfan.
GEN 42:1 Iwe, lupwen Jakop a rong pwe mi wor mongö lon Isip, a üreni nöün kewe mwän, “Pwota oua chök nonom?
GEN 42:2 Üa rong pwe a wor wiich lon Isip. Oupwe feila o kamö anach wiich pwe sipwe manau, nge sisap mäla.”
GEN 42:3 Iei mine pwin Josef kewe engol ra feila pwe repwe kamö eneer wiich lon Isip.
GEN 42:4 Nge Jakop esap tinala Peniamin pwin Josef we, pun a niuokus pwe och feiengau epwe tori lupwen an etiir.
GEN 42:5 Iei usun nöün Israel kewe ra eti ekewe aramas le feila Isip pwe repwe kamö eneer wiich, pun a pwal fis lengita lon ewe fanü Kanaan.
GEN 42:6 Iwe, lon ewe fansoun Josef a kepinan ewe fanü, nge i chök a tongeni amömö ngeni chon fanü meinisin. Iwe, pwin Josef kewe ra pwal feito ren o chapetiu lepwül me mwan.
GEN 42:7 Iwe, lupwen Josef a küna pwin kewe, a sileniir, nge a chök föri ngeniir usun esap sisileer. A kapas pöchökül ngeniir o aisiniir, “Oua feito me ia?” Nge ra pälüeni, “Aia feito seni ewe fanü Kanaan pwe aipwe kamö mongö.”
GEN 42:8 Iwe, Josef a sileni pwin kewe, nge pwin kewe resap sileni.
GEN 42:9 Iwe, Josef a chechemeni an kewe tan a tana usur o üreniir, “Ämi chon operi fanü. Oua chök feito pwe oupwe operi ia esap wor tümwünün fanüem me ie.”
GEN 42:10 Nge ra üreni, “Apwi äm samol, äm noum chon angang aia chök feito pwe aipwe kamö mongö.
GEN 42:11 Äm meinisin nöün eman chök mwän. Äm aramas wenechar, nge aisap operi fanü.”
GEN 42:12 Iwe, Josef a üreniir, “Apwi, ämi oua wesewesen feito pwe oupwe operi ia esap wor tümwünün fanüem me ie.”
GEN 42:13 Nge ir ra apasa, “Äm noum chon angang aia engol me ruoman pwipwi nöün eman chök mwän lon ewe fanü Kanaan. Ewe setipütür a nom ren semem iei, nge eman a mäla.”
GEN 42:14 Nge Josef a chök üreniir, “Ellet, üa fen ürenikemi pwe ämi oua chon operi fanü.
GEN 42:15 Iei usun üpwe alletätä ämi kapas: Mwo manauen Farao, ousap feila seni ikei, ika pwimi we setipütür esap feito.
GEN 42:16 Oupwe tinala eman leimi pwe epwe uwato pwimi we. Nge ämi kewe lusun oupwe nonom lon imwen fötek, pwe epwe pwä leten ämi kewe kapas ika ämi oua wenechar. Nge are esap ina, mwo manauen Farao, ämi oua wesewesen chon operi fanü.”
GEN 42:17 Mürin, Josef a atururolong lon imwen fötek o anomuur ie lon ükükün ülüngat rän.
GEN 42:18 Nge lon aülüngatin rän Josef a üreniir, “Ngang eman mi niueiti Kot. Iei oupwe föri mine üpwe ürenikemi pwe oupwe manau.
GEN 42:19 Are ämi oua aramas wenechar, eman leimi epwe nonom lon imwen fötek, nge ämi kewe lusun oupwe feila o uwala wiich ren ämi famili mi echik.
GEN 42:20 Iwe, oupwe uwato rei pwimi we setipütür pwe epwe pwä leten ämi kapas, nge ousap mäla.” Iwe, ra föri iei usun.
GEN 42:21 Mürin ra kapasfengen lefiler, “Ellet, sia angei liwinin mine sia föri ngeni pwich Josef, pun sia küna riaföün lelukan lupwen an tüngor ngenikich pwe sipwe angasala, nge sisap aüseling. Iei mine ei riaföü a torikich.”
GEN 42:22 Nge Rupen a pälüeniir, “Ifa usun, üsap fen ürenikemi pwe ousap föri och tipis ngeni ewe ät? Nge ämi ousap mochen aüselinga aloi. Iei liwinin mine sia föri ngeni a torikich.”
GEN 42:23 Iwe, resap silei pwe Josef a wewe ren ar fos, pun eman a wisen aföü lefiler.
GEN 42:24 Iwe, Josef a kul seniir, a feila o kechü. Nge lupwen a liwinto rer, a kapassefäl ngeniir. A angei Simeon seni lefiler o föti me mwer.
GEN 42:25 Iwe, Josef a allük ngeni nöün chon angang pwe repwe amasoua än pwin kewe tuk ren wiich, repwe pwal aliwinalong nöür moni lon en me an tuk o ngeniir amötür. Iwe, ra föri iei usun ngeniir.
GEN 42:26 Iwe, wesin ar rietä ar kewe tuken wiich won nöür kewe aas, ra la.
GEN 42:27 Nge lupwen eman leir a sukala an we tuk pwe epwe amongöü nöün aas lon ewe leni ia repwe möür ie, a küna nöün moni leawen an we tuk.
GEN 42:28 Iwe, a üreni pwin kewe, “Eman a aliwinalong nei ei moni, a nom leawen ai ei tuk.” Nge lupwen ra küna, ra fokun mairü, ra chechech o aisfengen lefiler, “Met ei, Kot a föri ngenikich?”
GEN 42:29 Nge lupwen ra tori Jakop semer we lon ewe fanü Kanaan, ra apworausa ngeni meinisin mine a fis ngeniir,
GEN 42:30 “Ewe mwän, i samolun ewe fanü, a kapas pöchökül ngenikem, pun a ekieki pwe äm chon operi fanü.
GEN 42:31 Nge äm aia üreni, ‘Äm aramas wenechar, aisap chon operi fanü.
GEN 42:32 Äm aia engol me ruoman pwipwi nöün eman chök sam. Eman a mäla, nge ewe setipütür a chüen nom ren saman lon ewe fanü Kanaan.’
GEN 42:33 Iwe, ewe mwän, i samolun ewe fanü, a pälüenikem, ‘Iei usun üpwe alletä ika ämi aramas wenechar. Oupwe likitala rei eman pwimi, nge ämi kewe lusun oupwe feila o uwala wiich ren ämi famili mi echik.
GEN 42:34 Iwe, oupwe uwato rei pwimi we setipütür. Mürin üpwe wesewesen silei pwe ämi sap chon operi fanü, nge ämi aramas wenechar. Iwe, ngang üpwe pwal aliwini ngenikemi pwimi ei, nge ämi oupwe tongeni kamö mine oua mochen lon ei fanü.’”
GEN 42:35 Iwe, lupwen ra ninätiu ar kewe tuk, iteiten eman me eman a nom an tükütükün moni lon. Nge lupwen ir me semer we ra küna ekewe tükütükün moni, ra fokun niuokus.
GEN 42:36 Mürin, Jakop semer we a kapas ngeniir, “Ämi oua angei seniei nei kana: Josef ese chüen nom, pwal Simeon ese chüen nom. Nge iei oua pwal mochen uwala Peniamin. Esap chüen ki ngeniei ei riaföü.”
GEN 42:37 Nge Rupen a üreni saman we, “Kopwe niela nei kewe ruoman ät, ika ngang üsap aliwinato Peniamin reöm. Kopwe lükü ngeniei pwe üpwe tümwünü, üpwe pwal aliwinato reöm.”
GEN 42:38 Nge Jakop a apasa, “Nei esap fokun etikemiila, pun pwin a mäla, nge i chök a lusun. Pun are och feiengau epwe tori i won alen ämi sai, oupwe atolongaei fän mökürei mi üwan lon lenien sotup ren ai letipeta.”
GEN 43:1 Iwe, ewe lengita a fokun watte won ewe fanü.
GEN 43:2 Nge lupwen a itela enen än ewe familien Jakop mongö ra kamö lon Isip, Jakop a üreni nöün kewe, “Oupwe liwinsefälila Isip o kamö ekis anach mongö.”
GEN 43:3 Nge Juta a üreni, “Ewe mwän a fokun kapas pöchökül ngenikem pwe aisap küna mesan, are pwim we esap etikem.
GEN 43:4 Are kopwe tinikeemila me Peniamin, aipwe feila o kamö anom mongö.
GEN 43:5 Nge are kosap mwütala, aisap feila, pun ewe mwän a kapas ngenikem pwe aisap küna mesan, are pwim we esap etikem.”
GEN 43:6 Iwe, Israel a ais, “Pwota oua atoto woi ei riaföü ren ämi asile ngeni ewe mwän pwe mi pwal wor eman pwimi?”
GEN 43:7 Nge ra pälüeni, “Ewe mwän a ais tichik usum me usun äm kewe famili. A pwal ais, ‘Ifa usun sememi, a chüen manau? A pwal wor eman pwimi?’ Äm aia chök pälüeni an kewe kapas ais. Ifa usun, ren met aia tongeni silei, pwe epwe allük ngenikem pwe aipwe uwala pwim?”
GEN 43:8 Iwe, Juta a üreni Israel saman we, “Kopwe mwüt ngeniei ewe ät pwe epwe etiei. Iwe, aipwe müttir feila pwe äm meinisin me en pwal tori nöüm kewe kükün sipwe manau, nge sisap mäla ren ei echik.
GEN 43:9 Ngang üpwe pwon fän itan pwe üpwe siwili. Kopwe echimwa seniei mön manauan. Nge are üsap aliwinato reöm lon an pöchökül, epwe ukei chök tori feilfeilachök.
GEN 43:10 Iei äm aia fen mang. Nge are aipwe müttir feila, iei aipwe le fen liwinto fän aruuan.”
GEN 43:11 Mürin, semer we a üreniir, “Are a ina usun, oupwe angei ekoch seni ekewe uän irä mi mürina seni lon ei fanü o uwalong lon ämi kewe tuk, pwe oupwe eäni lifang ngeni ewe mwän. Oupwe uwala ekis lö mi pwokus, ekis chönün chunen, irä mi mwiik, säfei mi aüchea itan mör, pwal ekoch föün irä iter pistachio me almont.
GEN 43:12 Nge oupwe pwal uwala en me an ruu tükütükün moni pwe oupwe aliwinala ewe moni oua küna leawen ämi kewe tuk. Eli eman a chök rukala.
GEN 43:13 Iwe, oupwe pwal uwala pwimi o müttir feila ren ewe mwän.
GEN 43:14 Amwo ewe Kot mi Unusen Manaman epwe föri pwe ewe mwän epwe ümöümöch ngenikemi, pwe epwe aliwini ngenikemi pwimi Simeon me Peniamin. Nge are ese chüen wor nei, iwe, sipwe fetei.”
GEN 43:15 Iei mine nöün Jakop kewe mwän ra angei ekewe lifang me en me an ruu tükütükün moni. Iwe, ra saila Isip, nge Peniamin a etiir. Nge lupwen ra tori, ra tolong ren Josef o ütä mwan.
GEN 43:16 Nge lupwen Josef a küna pwe Peniamin a etiir, a kapas ngeni nöün we chon angang mi tümwünü imwan, “Kopwe etiwa ekewe mwän lon imwei, kopwe pwal ni eman man o amoota fitukan, pun ekewe mwän repwe etiei le mongön leoloas.”
GEN 43:17 Iwe, ewe chon angang a föri usun mine Josef a allük ngeni o emwenala ekewe mwän lon imwen Josef.
GEN 43:18 Nge ekewe mwän ra fokun niuokus, pun ra emwenirela lon imwen Josef. Iwe, ra kapasfengen lefiler, “Ra chök emwenikicheto ikei pokiten ewe moni ra uwalong lon ach kewe tuk lon aeuin ach feito, pwe epwe wor popun an atipisikich o nöünikich chon angang me nöüch kewe aas.”
GEN 43:19 Iwe, ra etto ren ewe chon angang mi tümwünü imwen Josef o kapas ngeni me lon ewe asamalap,
GEN 43:20 “Amusala äm samol, aia fen feito fän eu pwe aipwe kamö mongö.
GEN 43:21 Nge lupwen aia tori ewe leni ia aipwe möür ie o sukala äm kewe tuk, iteiten eman me eman leim a küna an moni leawen an tuk. Nge äm moni a chüen unus. Iei mine aia aliwinisefälieto.
GEN 43:22 Nge iei aia pwal uwato moni lükün ewe, pwe aipwe kamö enem. Äm aisap silei iö a uwalong äm we moni lon äm kewe tuk.”
GEN 43:23 Iwe, ewe chon angang a pälüeni, “Oupwe kinamwe, nge ousap niuokus, pun ämi we Kot me än sememi we Kot a fang ngenikemi ewe moni lon ämi kewe tuk, pwe ämi moni a toriei.” Mürin a emwenawu Simeon rer.
GEN 43:24 Nge ewe chon angang a etiwa ekewe mwän lon imwen Josef, a ngeniir koluk pwe repwe talü pecher o amongöü nöür kewe aas.
GEN 43:25 Mürin ra amolätä ar kewe lifang pwe repwe ngeni Josef, lupwen epwe war leoloas, pun ra rong pwe repwe mongö ren.
GEN 43:26 Iwe, lupwen Josef a liwinto lon imwan, ra uwalong ren ekewe lifang ra uwei o chapetiu lepwül me mwan.
GEN 43:27 Nge Josef a aisiniir usun nonomur, mürin a pwal ais, “Ifa usun, a chüen pöchökül sememi we ewe chinlap oua fen kapas usun me mwan? Ifa usun, a chüen manau?”
GEN 43:28 Iwe, ra pälüeni, “Semem noum we chon angang a chüen manau o pöchökül. Iwe, ra chapetiu me mwan fän chomong.
GEN 43:29 Iwe, lupwen Josef a chimwetä, a küna Peniamin pwin we nöün inan o ais, “Ifa usun, iei i pwimi we setipütür oua fen kapas ngeniei usun? Kot epwe ümöümöch ngonuk, nei.”
GEN 43:30 Mürin, Josef a müttir sap seniir, pun lelukan a fokun mwökütüküt ren an tongei pwin we. Iwe, a kütta ekis ia epwe kechü ie. Iei mine a tolong lon rumwan o kechü.
GEN 43:31 Mürin a oresi won mesan o towu, nge a apwosu an kechü o üra pwe repwe uwato mongö.
GEN 43:32 Iwe, ekewe chon angang ra aimwüela enen Josef, enen pwin kewe pwal enen ekewe chon Isip ra eti Josef le mongö. Pun ekewe chon Isip resap mochen mongö ngeni chon Ipru, pokiten ra fokun anioputeer.
GEN 43:33 Iwe, ra amota ekewe pwipwi lon en me tettelin ierin manauan mwen Josef, seni ewe mwänichi tori ewe setipütür. Iwe, ra fokun weitifengeniir usun.
GEN 43:34 Iwe, ra angei wiser mongö seni än Josef chepel, nge Peniamin a angei limu wisan. Iwe, ra ünüfengen o pwapwafengen me Josef.
GEN 44:1 Iwe, Josef a allük ngeni nöün we chon angang mi tümwünü imwan, “Kopwe amasoua än ekewe mwän tuk ngeni mongö won ükükün met ra tongeni uwala. Kopwe pwal uwalong nöür kewe moni meinisin leawen ar kewe tuk.
GEN 44:2 Nge kopwe uwalong ai we kap, ewe kap silifer, leawen än ewe setipütür tuk, pwal ewe moni fän iten ewe wiich.” Iwe, ewe chon angang a föri usun mine Josef a allük ngeni.
GEN 44:3 Iwe, lesosorusich ra tinala ekewe mwän me nöür kewe aas.
GEN 44:4 Nge lupwen resamwo toau seni ewe telinimw, Josef a üreni nöün we chon angang mi tümwünü imwan, “Kopwe müttir tapweri ekewe mwän. Nge lupwen kopwe toriir, kopwe kapas ngeniir, ‘Pwota oua liwini ngau ngeni mürina? Pwota oua soläni än ai samol we kap silifer?
GEN 44:5 Sap iei ewe kap ai samol a akaea le ün, a pwal akaea le asisil? Ämi oua fokun föföringau.’”
GEN 44:6 Iwe, lupwen ewe chon angang a toriir, a chök apasa ekewe kapas Josef a aiti ngeni.
GEN 44:7 Nge ra üreni, “Pwota ka eäni ei sokun fos, äm samol? Äm noum chon angang aisap fokun föri ei sokun föför!
GEN 44:8 Ka silei pwe aia fen aliwinato reöm seni ewe fanü Kanaan ewe moni aia küna leawen äm kewe tuk. Pwota äm aipwe tongeni soläni seni imwen om samol silifer ika kolt?
GEN 44:9 Are ka küna ewe kap ren eman lein äm noum chon angang, ätewe epwe le mäla. Nge äm meinisin kopwe nöünikem amanau.”
GEN 44:10 Iwe, ewe chon angang a üreniir, “Ewer, epwe ina usun mine oua apasa. Ewe eman ngang üpwe küna me ren ewe kap, i chök üpwe nöüni amanau, nge ämi lusun ousap tipis.”
GEN 44:11 Mürin ra müttir en me ekietiu an tuk lepwül o sukala.
GEN 44:12 Iwe, nöün Josef we chon angang a küttafichi ewe kap. A popuetä me ren än ewe mwänichi tuk o ükütiu me ren ewe setipütür. Iwe, a küna ewe kap me lon än Peniamin tuk.
GEN 44:13 Iwe, ra kamwei üfer fän ar letipeta. Mürin ra en me ekietä an tuk won nöün aas o liwiniti ewe telinimw.
GEN 44:14 Iwe, lupwen Juta me pwin kewe ra tori imwen Josef, ätewe a chüen nom. Iwe, ra chapala lepwül me mwan.
GEN 44:15 Nge Josef a aisiniir, “Pwota oua föri ei sokun föför? Ifa usun, ämi ousap silei pwe ngang eman mwän mi tongeni asisilätä mettoch?”
GEN 44:16 Mürin, Juta a pälüeni, “Met aipwe tongeni ürenuk, äm samol? Met aipwe pälüeni? Ren met äm aipwe tongeni alletä äm pwüngüöch? Kot a pwärawu äm pwüngingau. Äm meinisin kopwe nöünikem amanau, sap chök ätewe ka küna me ren ewe kap.”
GEN 44:17 Nge Josef a üreniir, “Esap ina, üsap föri iei usun. Ewe eman üa küna me ren ewe kap, i chök epwe nei amanau. Nge ämi kewe lusun oupwe liwiniti sememi fän kinamwe.”
GEN 44:18 Iwe, Juta a kanoto ren Josef o üreni, “Ai samol, kose mochen kopwe mwüt ngeniei ngang noum chon angang pwe üpwe apasätä och kapas ngonuk. Kose mochen kosap song ngeniei, pun en ka wewe chök me Farao.
GEN 44:19 Ai samol, ka aisinikem äm noum chon angang, ‘Ifa usun, a chüen manau sememi? A pwal wor pwimi?’
GEN 44:20 Lon ena fansoun äm aia pälüenuk, ‘Ewer, a chüen manau semem, nge a chinlap. A pwal wor eman pwim we setipütür, semem a nöüni lon an chinlap. Iwe, pwin ewe setipütür a mäla, nge ese chüen wor eman nöün inan pwe i chök. Iwe, saman we a fokun tongei.’
GEN 44:21 Mürin ka ürenikem pwe aipwe uwato reöm pwim we pwe kopwe küna.
GEN 44:22 Nge äm aia ürenuk, äm samol, ‘Ewe ät esap tongeni likitala saman, pun are epwe likitala, saman we epwe mäla.’
GEN 44:23 Mürin, ka ürenikem äm noum kei chon angang, ‘Ousap chüen tongeni küna mesei, are ousap uwato pwimi we setipütür rei.’
GEN 44:24 Nge lupwen äm aia liwinla ren semem noum we chon angang, aia asile ngeni alom kewe.
GEN 44:25 Mürin, semem we a ürenikem, ‘Oupwe liwinsefälila Isip pwe oupwe kamö ekis anach mongö.’
GEN 44:26 Nge äm aia üreni, ‘Äm aisap tongeni feila. Are pwim we setipütür epwe etikem, aipwe feila. Pun aisap tongeni küna mesen ewe mwän, are pwim we setipütür esap etikem.’
GEN 44:27 Mürin, semem noum we chon angang a ürenikem, ‘Oua silei pwe Rahel pwülüei we a chök nöüni ngeniei ruoman ät.
GEN 44:28 Iwe, eman a feil seniei, nge oua apasa pwe eman manmwacho a atatakisi inisin, pun üse chüen küna me mürin.
GEN 44:29 Iwe, are oua pwal angei seniei ei ät, nge och feiengau epwe tori, oupwe atolongaei fän mökürei mi üwan lon lenien sotup ren ai letipeta.’
GEN 44:30 Are üpwe liwiniti semei noum we chon angang, nge ewe ät esap etikem, epwe fokun mäla,
GEN 44:31 lupwen epwe küna pwe ewe ät esap etikem. Pun manauen semei we a riri ngeni manauen ewe ät. Iwe, äm noum chon angang kana aipwe atolonga semem noum we chon angang fän möküran mi üwan lon lenien sotup ren an letipeta.
GEN 44:32 Pun ngang noum chon angang üa pwon ngeni semei we fän iten ewe ät. Üa apasa ngeni pwe are üsap aliwinato ren ei ät, epwe ukei chök lon unusen manauei me fän mesen semei.
GEN 44:33 Iei mine kose kan mochen kopwe mwüt ngeniei ngang noum chon angang, pwe üpwe le siwili ei ät pwe kopwe nöüniei amanau. Kopwe pwal mwüt ngeni ei ät pwe epwe liwiniti saman we fiti pwin kewe.
GEN 44:34 Pun ifa usun ai üpwe tongeni liwiniti semei, are ewe ät esap etiei? Üsap tongeni küna ewe riaföü epwe tori semei.”
GEN 45:1 Mürin, Josef esap chüen tongeni aposalong an kechü fän mesen chokewe mi ü arun. Iwe, a kökkö, “Aramas meinisin repwe towu seni ikei!” Iei mine esap wor eman a nom ren Josef, lupwen a pwäri i ngeni pwin kana.
GEN 45:2 Iwe, a fokun leüömong le kechü pwe ekewe re Isip me chon leimwen Farao ra rong.
GEN 45:3 Mürin, Josef a üreni pwin kewe, “Ngang Josef. Ifa usun, semei a chüen manau?” Nge pwin kewe resap tongeni pälüeni, pun ra fokun rükö ren.
GEN 45:4 Iwe, Josef a kapas ngeni pwin kewe, “Ouse mochen oupwe kineto rei.” Iwe, ra kineto ren. Nge Josef a apasa, “Ngang pwimi Josef, ätewe oua amömöla Isip.
GEN 45:5 Iwe, ousap aürek ren, ousap pwal tekitekila ren ämi amömöeila ikei, pun Kot a tinieito mwemi pwe üpwe amanaua aramas.
GEN 45:6 Pun ruu ier a fis lengita lon ei fanü. Nge pwal limu ier repwe feito esap fis angangen fofot are kinikin lor.
GEN 45:7 Iwe, Kot a tinieito mwemi pwe üpwe amanauakemi ren ei angang mi amwarar o föri met ämi me mwirimwirimi kana oupwe manau ren.
GEN 45:8 Iei mine sap ämi oua tinieito ikei, pwe Kot. Iwe, Kot a awisaei pwe ngang üpwe eman sam ngeni Farao, üpwe pwal samolun unusen imwan o nemeni unusen ei fanü Isip.
GEN 45:9 Oupwe kaila ren semei we o asile ngeni pwe iei alon Josef nöün we, ‘Kot a seikieitä pwe üpwe samolun unusen ei fanü Isip. Kopwe feito rei, nge kosap mang.
GEN 45:10 Kopwe nonom lon ewe fanü Kosen pwe kopwe arap ngeniei, en me noum me nöün noum kewe, pwal noum sip me kow me meinisin mine ka eäni.
GEN 45:11 Are ka nom lon Kosen, üpwe tongeni tümwünuk. Pun limu ierin lengita repwe pwal feito, nge üsap mochen pwe en me chon leimwom me noum kewe man oupwe echik.’
GEN 45:12 Nengeni, oua püsin küna, pwal en pwii Peniamin ka küna pwe püsin ngang üa fos ngenikemi.
GEN 45:13 Oupwe fokun apworausa ngeni semei usun ai nemenem lon Isip, pwal usun meinisin mine oua küna. Oupwe kaila o uwato semei ikei.”
GEN 45:14 Mürin, Josef a romi Peniamin o kechü won üan, nge Peniamin a pwal kechü won üen Josef.
GEN 45:15 Iwe, a pwal mitiri pwin kewe meinisin nge kechü. Mürin, pwin kewe ra kapas ngeni.
GEN 45:16 Iwe, lupwen ei pworaus a tori imwen Farao pwe pwin Josef ra war, Farao me nöün kewe nöüwis ra fokun pwapwa ren.
GEN 45:17 Iwe, Farao a üreni Josef, “Kopwe üreni pwiüm kewe pwe repwe isetä ar kewe pisek won nöür kewe aas o liwiniti ewe fanü Kanaan.
GEN 45:18 Repwe uwato semer me chon leimwer meinisin o feito rei. Iwe, ngang üpwe ngeniir eu fanü mi fokun mürina me lon ei fanü, pwe epwe wor ener mongö mi mürina me lon ei fanü.
GEN 45:19 Kopwe pwal üreniir pwe repwe uwala woken seni ei fanü Isip, pwe wän nöür semirit me pwülüer. Repwe pwal uwato semer we o feito meinisin.
GEN 45:20 Resap lolileniti pisekir repwe likitala, pun öchün pisekin unusen ei fanü Isip repwe pisekini.”
GEN 45:21 Iwe, nöün Israel kewe ra föri iei usun. Nge Josef a ngeniir woken usun alon Farao ngeni, a pwal ngeniir amötür.
GEN 45:22 Iwe, a pwal ngeni eman me eman leir echö üf mi lingöch, nge a ngeni Peniamin ülüpükü föün moni silifer me limachö üf mi lingöch.
GEN 45:23 Nge a tinala ren saman engol aas mi uwou pisek mi mürina seni Isip, pwal engol liefefinin aas mi uwou föün wiich, pilawa me ekoch mongö fän iten an sai.
GEN 45:24 Mürin a afeilai pwin kewe. Nge mwen ar feila, a fönöör, “Ousap aninifengen won al.”
GEN 45:25 Iwe, ra feila seni Isip o liwiniti ewe fanü Kanaan ren semer we Jakop.
GEN 45:26 Iwe, ra asile ngeni, “Josef a chüen manau. A samolun unusen ewe fanü Isip.” Nge leluken Jakop esap mwökütüküt ren, pun esap tongeni lükü ar kapas.
GEN 45:27 Nge lupwen ra apworausa ngeni meinisin mine Josef a üreniir, a pwal küna ekewe woken Josef a tinato ren pwe epwe wawa, iwe, leluken Jakop semer we a manauala.
GEN 45:28 Iwe, Israel a apasa, “Iei üa lükülük. Josef nei we a chüen manau. Üpwe feila o nengeni mwen ai üpwe mäla.”
GEN 46:1 Iwe, Israel a alükülükü an pisek meinisin o popuetä an sai. Nge lupwen a tori Peersepa, a asor ngeni än saman Isaak we Kot.
GEN 46:2 Iwe, Kot a kapas ngeni Israel lon künan lepwin, “Jakop, Jakop.” Nge a üra, “Ngang iei.”
GEN 46:3 Iwe, Kot a üreni, “Ngang Kot, än semom we Kot. Kosap niuokus le feila Isip, pun ikenan üpwe föri senuk eu mwü mi fokun watte.
GEN 46:4 Ngang üpwe etukela Isip, nge üpwe pwal aliwinato mwirimwirum kana lon ei fanü. Iwe, Josef epwe amääk me lon Isip.”
GEN 46:5 Mürin, Jakop a feila seni Peersepa. Iwe, nöün kewe mwän ra uwala Jakop semer we me nöür semirit pwal pwülüer won ekewe woken, Farao a tinala ren pwe epwe wawa.
GEN 46:6 Iwe, ra pwal uwala nöür pwin man me ar pisek meinisin ra eäni me lon ewe fanü Kanaan o feila Isip.
GEN 46:7 Iwe, Jakop a uwala Isip mwirimwirin kana meinisin: nöün mwän pwal nöün nöün kewe mwän, nöün fefin pwal nöün nöün kewe fefin.
GEN 46:8 Ikkei iten ekewe mwirimwirin Jakop mi eti le feila Isip: Rupen nöün Jakop we mwänichi.
GEN 46:9 Nge nöün Rupen kewe mwän: Hanok, Pallu, Hesron me Karmi.
GEN 46:10 Simeon me nöün kewe mwän: Jemuel, Jamin, Ohat, Jakin, Sohar me Shaul nöün eman fin Kanaan.
GEN 46:11 Lefi me nöün kewe mwän: Kerson, Kohat me Merari.
GEN 46:12 Juta me nöün kewe mwän: Er, Onan, Shela, Peres me Sera. Nge Er me Onan ra fen mäla lon ewe fanü Kanaan. Iwe, nöün Peres kewe mwän: Hesron me Hamul.
GEN 46:13 Isakar me nöün kewe mwän: Tola, Puwa, Jashup me Shimron.
GEN 46:14 Sepulon me nöün kewe mwän: Seret, Elon, Jaleel.
GEN 46:15 Ir meinisin nöün Jakop kewe mwän, pwal Tina nöün we fefin Lea a nöüni me won lon Mesopotamia. Iwe, iteiten mwirimwirin meinisin me won Lea ilik me ülüman.
GEN 46:16 Iwe, Kat me nöün kewe mwän: Sifion, Hakki, Shuni, Espon, Eri, Aroti me Areli.
GEN 46:17 Aser me nöün kewe mwän: Imna, Ishwa, Ishwi, Peria me Sera fefiner we. Nge nöün Peria kewe mwän: Heper me Malkiel.
GEN 46:18 Ikkei ir mwirimwirin Jakop a nöüni me won Silpa ewe chon angang Lapan a ngeni Lea nöün we fefin, iteiter meinisin engol me wonoman.
GEN 46:19 Iwe, nöün Rahel kewe mwän pwülüen Jakop we: Josef me Peniamin.
GEN 46:20 Nge Asenat nöün Potifera, ewe souasoren On, a nöüni me won Josef Manasa me Efraim lon ewe fanü Isip.
GEN 46:21 Nge nöün Peniamin kewe mwän: Pela, Peker, Ashpel, Kera, Naaman, Ehi, Rosh, Muppim, Huppim me Art.
GEN 46:22 Ikkei ir mwirimwirin Jakop a nöüni me won Rahel, iteiter meinisin engol me föman.
GEN 46:23 Iwe, Tan me nöün mwän: Hushim.
GEN 46:24 Naftali me nöün kewe mwän: Jaseel, Kuni, Jeser me Shillem.
GEN 46:25 Ikkei ir mwirimwirin Jakop kewe, a nöüni me won Pila ewe chon angang Lapan a ngeni Rahel nöün we fefin, iteiter meinisin füman.
GEN 46:26 Iwe, iteiten mwirimwirin Jakop meinisin ra etala Isip wone me wonoman, nge pwülüen nöün kewe mwän resap alea.
GEN 46:27 Nge nöün Josef kewe mwän mi uputiu lon Isip ruoman. Iwe, kapachelapen chon leimwen Jakop meinisin ra feito Isip fik.
GEN 46:28 Iwe, Jakop a tinala Juta ren Josef pwe epwe akomwola mwan lon ewe fanü Kosen. Iwe, ra tori ewe fanü Kosen.
GEN 46:29 Nge Josef a amolätä wan woken pwe epwe feila o churi Israel saman we lon Kosen. Iwe, lupwen a churi, a romi saman o kechü won üan fansoun langatam.
GEN 46:30 Nge Israel a üreni Josef, “Iei üpwe tongeni mäla, pun üa küna mesom, üa pwal silei pwe ka chüen manau.”
GEN 46:31 Mürin, Josef a üreni pwin kewe me chon leimwen saman meinisin, “Üpwe feila o asile ngeni Farao pwe pwii kewe me chon leimwen semei meinisin ra feito rei seni ewe fanü Kanaan.
GEN 46:32 Üpwe asile ngeni pwe ämi chon fofol man, pun iei ämi angang seni me lom. Oua pwal uwato nöümi pwiin sip me kow me pisekimi meinisin.
GEN 46:33 Nge lupwen Farao epwe körikemiito o ais, ‘Met ämi angang?’,
GEN 46:34 oupwe pälüeni pwe ämi chon fofol man seni ämi kükün tori ikenai, usun chök sememi kewe. Mürin epwe mwüt ngenikemi pwe oupwe nonom lon ewe fanü Kosen. Pun chon Isip ra anioputäsini chon fofol man.”
GEN 47:1 Iwe, Josef a feila ren Farao o üreni, “Semei me pwii kewe ra feito seni ewe fanü Kanaan fiti nöür pwiin sip me kow me pisekir meinisin. Iei ra nonom lon ewe fanü Kosen.”
GEN 47:2 Josef a pwal angei liman me lein pwin kewe o emwenireto fän mesen Farao.
GEN 47:3 Iwe, Farao a aisini pwin Josef kewe, “Met ämi angang?” Nge ir ra pälüeni, “Äm noum kei chon angang aia chon fofol man usun chök semem kewe.”
GEN 47:4 Iwe, ra pwal üreni Farao, “Äm aia etto pwe aipwe nonom lon ei fanü, pun ewe lengita a fokun chouiti ewe fanü Kanaan, pwe esap wor fetil fän iten nöüm kewe pwiin man. Iei mine aia tüngor ngonuk, kopwe mwüt ngenikem pwe aipwe nonom lon ewe fanü Kosen.”
GEN 47:5 Mürin, Farao a üreni Josef, “Semom me pwiüm kewe ra feito reöm.
GEN 47:6 Ewe fanü Isip a mwümwü ngonuk. Kopwe alenia semom me pwiüm kewe lon ewe fanü Kosen, ewe fanü mi mürina seni meinisin. Nge are ka silei ekoch me leir mi lipwäköch le fofol man, kopwe awisa ngeniir pwe repwe foleni nei pwiin man.”
GEN 47:7 Mürin, Josef a pwal panalong Jakop saman we pwe epwe ütä fän mesen Farao. Iwe, Jakop a afeiöchü Farao.
GEN 47:8 Nge Farao a aisini Jakop, “Fite ükükün ierin manauom?”
GEN 47:9 Iwe, Jakop a pälüeni, “Ierin ai siamüfetal ipükü ilik. A chokükün ierin manauei, a pwal aweires, nge esap tori ükükün ierin manauen semelapei kewe lon ar siamüfetal.”
GEN 47:10 Mürin, Jakop a afeiöchü Farao o feila seni.
GEN 47:11 Iwe, Josef a alenia saman me pwin kewe o ngeniir eu fanü mi mürina seni meinisin lon Isip pwe repwe fanüeni, usun Farao a allük. Iwe, a ngeniir ewe fanü Rameses.
GEN 47:12 Nge Josef a amongöü saman me pwin kewe me chon leimwen saman meinisin aükük ngeni iteiter.
GEN 47:13 Nge lon ewe fansoun esap chüen wor mongö lon unusen ewe fanü, pun ewe lengita a fokun chou. Iwe, chon ewe fanü Isip me Kanaan ra apwangapwangala ren ewe lengita.
GEN 47:14 Iwe, Josef a ionifengeni ewe moni meinisin, pun aramasen ewe fanü Isip me Kanaan ra möni ngeni ener wiich. Iwe, Josef a iseni ewe moni lon imwen Farao.
GEN 47:15 Nge lupwen a itela nöün ekewe aramasen Isip me Kanaan moni, chon Isip meinisin ra feito ren Josef o üreni, “Kose mochen kopwe ngenikem enem mongö. Kopwe alisikem pwe aisap mäla. Ese chüen wor nöüm moni.”
GEN 47:16 Nge Josef a pälüeniir, “Are esap chüen wor nöümi moni, oupwe ngeniei nöümi man, nge ngang üpwe ngenikemi mongö.”
GEN 47:17 Iei mine ra uwato nöür man ren Josef. Nge Josef a siwili ngeni mongö ekewe oris, pwiin sip me kow, pwal ekewe aas. Iwe, a ngeniir mongö siwilin nöür kewe man lon ewe ier.
GEN 47:18 Nge lupwen ewe ier a la, ekewe chon Isip ra pwal feito ren Josef o apasa, “Aisap mochen tükümi senuk, äm samol, pwe nöüm moni a itela. Nge ka pwal nöüni nöüm pwiin man. Ese chüen wor och lusun aipwe tongeni ngonuk pwe inisim chök me fanüem.
GEN 47:19 Kopwe alisikem pwe aisap mäla, nge fanüem esap feiengau. Kopwe mönikem me fanüem pwe siwilin enem mongö. Iwe, Farao epwe nöünikem amanau, epwe pwal fanüeni fanüem. Kose mochen kopwe ngenikem wiich pwe aipwe manau, pwal fotäm föün irä, pwe aipwe fotuki ewe fanü pwe esap pön.”
GEN 47:20 Iei mine Josef a möni unusen ewe fanü Isip fän iten Farao. Pun chon Isip meinisin ra amömöla fanüer pokiten ewe lengita a fokun chouitiir. Iei usun Farao a fanüeni unusen ewe fanü.
GEN 47:21 Mürin, Josef a asilefeili lon unusen ewe fanü Isip pwe ekewe aramas repwe nöün Farao amanau.
GEN 47:22 Iwe, fanüen ekewe souasor chök esap möni, pun wiser me ren Farao. Ra manau seni wiser kewe Farao a ngeniir, iei mine resap amömöla fanüer.
GEN 47:23 Iwe, Josef a kapas ngeni ekewe aramas, “Nengeni, ikenai üa mönikemi me fanüemi fän iten Farao. Iei oupwe angei ekei föün irä pwe oupwe fotuki ei fanü.
GEN 47:24 Nge lupwen fansoun kinikin oupwe ngeni Farao eu lelimu, nge rüanü lelimu oupwe püsin eäni, pwe epwe wor fotämi me enemi pwal enen chon leimwemi me nöümi semirit.”
GEN 47:25 Iwe, ra apasa, “En ka amanauakem. Äm samol, kose mochen kopwe kirikiröch ngenikem. Farao epwe nöünikem amanau.”
GEN 47:26 Iei mine Josef a föri eu allük usun ewe fanü Isip, a chüen fis tori ikenai, pwe Farao epwe angei eu lelimu seni uän fotar irä. Nge fanüen ekewe souasor chök Farao esap angei.
GEN 47:27 Iwe, ekewe chon Israel ra nonom lon Isip lon ewe sop itan Kosen. Iwe, ra pisekisekila ikenan, ra aupwuretiu o fokun chomongola.
GEN 47:28 Iwe, Jakop a manau lon ewe fanü Isip lon ükükün engol me fisu ier, pwe unusen ierin manauen Jakop ipükü faik me fisu.
GEN 47:29 Nge lupwen a arap fansoun än Israel epwe mäla, a körato Josef nöün we o üreni, “Are üa küna cheni me reöm, kopwe sökalong poum fän aföi o pwon ngeniei pwe kopwe kirikiröch o tipelükülük ngeniei. Kosap peiaseniei lon Isip,
GEN 47:30 nge kopwe uweeila seni Isip pwe üpwe peias lon lenien peiasen semei kewe.” Iwe, Josef a apasa, “Üpwe föri mine ka üreniei.”
GEN 47:31 Nge Jakop a apasa, “Kopwe akapel ngeniei pwe kopwe föri ei.” Iwe, Josef a akapel ngeni. Mürin, Israel a iotekin kilisou won an peet.
GEN 48:1 Ekoch fansoun mürin ra asile ngeni Josef, “Semom a samau.” Iei mine Josef a angei nöün kewe ruoman ät iter Manasa me Efraim o uweerela ren.
GEN 48:2 Lupwen ra asile ngeni Jakop pwe Josef nöün we a feito ren, a achocho ngeni an epwe mot won an peet.
GEN 48:3 Iwe, Jakop a üreni Josef, “Ewe Kot mi Unusen Manaman a pwä ngeniei me lon Lus lon ewe fanü Kanaan o afeiöchüei.
GEN 48:4 Iwe, a kapas ngeniei, ‘Üpwe aupwuk o achomongok pwe kopwe wiliti eu mwichen aramas mi chomong, üpwe pwal ngeni mwirimwirum kana ei fanü pwe repwe fanüeni tori feilfeilachök.
GEN 48:5 Iwe, noum kana ruoman ät ra uputiu ngonuk me lon ei fanü Isip mwen ai feito lon ei fanü, ir nei. Efraim me Manasa üpwe fokun nöüniir usun chök Rupen me Simeon.
GEN 48:6 Nge ekewe mi uputiu müriir en kopwe nöüni. Ir repwe wiseni wisen Manasa me Efraim.
GEN 48:7 Iwe, lupwen üa saito seni Mesopotamia, nge üsamwo arap ngeni Efrat, Rahel a mäla lon ewe fanü Kanaan. Üa fokun letipeta ren mälan Rahel. Iwe, üa peiaseni lükün ewe al a ale ngeni Efrat, a pwal iteni Petleem.”
GEN 48:8 Nge lupwen Israel a küna nöün Josef kewe ät, a ais, “Nöün iö ätekei?”
GEN 48:9 Iwe, Josef a üreni saman we, “Ir nei, Kot a ngeniei me lon ei fanü.” Nge Israel a apasa, “Kose mochen kopwe emwenireto pwe üpwe afeiöchüür.”
GEN 48:10 Nge mesen Israel a toputop pokiten an chinlap, pwe esap chüen tongeni künaöchü. Iwe, Josef a uweereto ren saman, nge Jakop a romiir o mitiriir.
GEN 48:11 Iwe, Israel a üreni Josef, “Üsap fokun ekieki pwe üpwe chüen küna mesom. Nge nengeni, Kot a mwüt ngeniei pwe üpwe pwal küna noum kei ät.”
GEN 48:12 Mürin, Josef a angeir me won afön Israel o chapetiu lepwül.
GEN 48:13 Iwe, Josef a amwöchü pöür me ruoman o anomu Efraim pelimöngün Israel, nge Manasa a anomu pelifichin. Iwe, ekewe ruoman ät ra kineto ren.
GEN 48:14 Nge Israel a afangara pöün o isetä pöüifichin won möküren Efraim ewe mi kis, nge pöüimöngün a isetä won möküren Manasa ewe mwänichi.
GEN 48:15 Mürin a afeiöchü Josef o apasa, “Ewe Kot semelapei kewe Apraham me Isaak ra angang ngeni, ewe Kot mi emweniei lon unusen ränin manauei tori ikenai,
GEN 48:16 pwal ewe chon läng mi amanauaei seni feiengau meinisin epwe afeiöchü ekei ät. Iwe, repwe iteni itei me iten semelapei kewe Apraham me Isaak tori feilfeilachök, repwe pwal fokun chomongola won fanüfan.
GEN 48:17 Nge lupwen Josef a küna pwe saman a isetä pöüifichin won möküren Efraim, a oput. Iei mine a amwöchü pöün saman pwe itä epwe amwökütü seni won möküren Efraim o isetä won möküren Manasa.
GEN 48:18 Iwe, a üreni saman, “Sap ina, semei, pun ätei ewe mwänichi. Kopwe isetä pöüifichum won möküran.”
GEN 48:19 Nge saman we esap tipeeu ngeni. Iei mine a apasa, “Nei, üa silei, üa silei. Manasa epwe pwal wiliti eu mwichen aramas, epwe pwal iteüöch. Nge pwin we mi kis epwe iteüöch seni, mwirimwirin kana repwe pwal wiliti chomong mwichen aramas.”
GEN 48:20 Iwe, lon ewe chök ränin a afeiöchüür o apasa, “Chon Israel repwe eäni kapasen afeiöch itemi, pun repwe apasa, ‘Kot epwe föri ngonuk usun chök a föri ngeni Efraim me Manasa.’” Iei usun Jakop a akomwa Efraim mwen Manasa.
GEN 48:21 Mürin, Israel a üreni Josef, “Nengeni, üpwe le mäla, nge Kot epwe etikemiila o aliwinikemiila lon fanüen semelapemi kewe.
GEN 48:22 Ngang üa ngonuk eu kinikinin fanü, nge üsap ngeni pwiüm kewe, ewe fanü üa angei seni chon Amor fän pöchökülen ai ketilas me ai likapich.”
GEN 49:1 Iwe, Jakop a köri nöün kewe mwän o üreniir, “Oupwe mwicheto rei pwe üpwe asile ngenikemi mine epwe torikemi lon ekewe fansoun repwe feito.
GEN 49:2 Oupwe chufengen o aüseling, ämi nei kana, oupwe aüselinga aloi.
GEN 49:3 Rupen, en nei mwänichi, ai tufich me akomwen ai pöchökül, ka fokun tekia lon om ling me om nemenem.
GEN 49:4 Nge ka mwökütüküt usun nonon leset. Kosap chüen tekia, pun ka kon ren ülüpwülüei. Ewer, ka alimengaua kiei ren om tolong lon.
GEN 49:5 Simeon me Lefi, ämi pwipwi. Oua eäni nöümi ketilas pisekin afeiengau.
GEN 49:6 Üsap eti ämi mwichen pwüngüpwüng, üsap pwal choni ämi mwich. Pun lon ämi song oua niela mwän, oua pwal pwapwaiti le sorongauei ätemwänin kow.
GEN 49:7 Üpwe anümamaua ämi song, pun a fokun chou. Üpwe pwal anümamaua ämi lingeringer, pun a ngau. Üpwe aimwüfesenikemi lon ewe fanüen Jakop o atoropasakemi lon Israel.
GEN 49:8 Juta, pwiüm kana repwe mwareituk. Poum epwe nonom won üen chon oputom, nge nöün semom kana repwe chapetiu mwom.
GEN 49:9 Juta, en eman apanen laion! Nei, ka fefeitä o pöchökülela ren liapom. Ka töpworo o konola usun chök eman laion, pwal usun chök eman liefefinin laion. Iö a pwora le apwökuk?
GEN 49:10 Esap mwöküt senuk, Juta, ewe asisilen samol, nge mwirimwirum kana repwe nemenem fansoun meinisin tori epwe war ätewe mine an ewe nemenem. Iwe, chon ekewe mwü meinisin repwe aleasochis ngonuk.
GEN 49:11 Ka ri noum nienifön aas ngeni efoch irän wain mi mürina. Iwe, ka ötüüwelong üfom lon wain, üfom owokot ka ötüüwelong lon chönün uän wain.
GEN 49:12 Mesom ra parachol seni wain, nge ngiüm ra pwechepwech seni milik.
GEN 49:13 Sepulon, kopwe nonom aroset, nge arosetum epwe wiliti eu nomun ilen sip, kiännin fanüom epwe tori arun Siton.
GEN 49:14 Isakar, ka eman aas mi pöchökül, ka konetiu lefilen ekewe tuk man ra uwei.
GEN 49:15 Iwe, lupwen ka küna pwe om lenien asösö a öch, ka pwal küna pwe ewe fanü a mürina, ka rotiu pwe kopwe uwou mettoch mi chou won afarom. Iwe, ka fangatä pwe kopwe angang usun eman amanau.
GEN 49:16 Tan, kopwe souapwüng won aramasom usun chök ekewe lusun ainangen Israel.
GEN 49:17 Tan, kopwe wewe ngeni eman serepenit lepekin al, eman serepenit mi fokun poison won al, a küw apilipilin pechen oris, pwe ewe mi wawa epwe seletä.
GEN 49:18 Ai Samol mi Lapalap, üa asüküsükü om kopwe amanauaei.
GEN 49:19 Kat, eu mwichen chon solä repwe fiu ngonuk, nge en kopwe kul o tapweriir fän pwora.
GEN 49:20 Aser, anom mongö epwe somwola, kopwe amwolätä mongö mi mürina, a fich ngeni enen king.
GEN 49:21 Naftali, ka wewe ngeni eman chia mi pichila, nge apanom ra fokun mürina.
GEN 49:22 Josef, ka wewe ngeni efoch irä mi ua, ka fot ünükün eu chanpupu, nge palom ra tori won tit.
GEN 49:23 Chon likapich ra fokun maun ngonuk, ra likapichiik o ariaföüuk.
GEN 49:24 Nge om likapich a mei. Poum ra fokun lifech ren pöün än Jakop we Kot mi Manaman, ra pöchökül ren iten ewe Chon Mas, ewe Achauen Israel.
GEN 49:25 Än semom we Kot epwe alisuk, ewe Kot mi Unusen Manaman epwe afeiöchuk ren feiöch seni läng, pwal ren ewe feiöch seni fän pwül. Kopwe feiöch ren chomong man me chomong semirit.
GEN 49:26 Än semom we afeiöch a manaman seni än semelapei kewe afeiöch, a watte seni kiännin ekewe chuk mi nonom tori feilfeilachök. Ekei feiöch repwe nonom womw, en ewe mi imwü seni pwiüm kewe.
GEN 49:27 Peniamin, ka eman wolif mi mwacho. Lesosor ka ochei liapom, nge lekuniol ka aineti lusun liapom.”
GEN 49:28 Iei ekewe engol me ruu ainangen Israel, pwal iei usun mine semer we a üreniir, lupwen a afeiöchü eman me eman ren eu feiöch mi fich ngeniir.
GEN 49:29 Mürin, Jakop a fönöü nöün kewe, “Iei üpwe le mäla o churi ai kewe lewo. Oupwe peiaseniei ren semei kewe lon ewe pwangen achau a nom lon ewe tanipin Efron ewe re Hit.
GEN 49:30 Ei pwangen achau a nom lon ewe tanipi Makpela ötiuen Mamre lon ewe fanü Kanaan, Apraham a mönifengeni me ewe tanipi seni Efron ewe re Hit, pwe an lenien peias.
GEN 49:31 Ikenan ra peiaseni Apraham me Sara pwülüan we, ra pwal peiaseni Isaak me Repeka pwülüan we. Iwe, ikenan ngang üa pwal peiaseni Lea.
GEN 49:32 Iwe, iei ewe tanipi me ewe pwangen achau mi nom lon, Apraham a möni seni ekewe re Hit.”
GEN 49:33 Nge lupwen Jakop a awesala an fönöü nöün kewe mwän, a numätä pechen won an peet, mürin a müchüla ngasangasan. Iwe, a chufengen me an kewe lewo.
GEN 50:1 Iwe, Josef a chapela won saman we, a kechü won o mitiri.
GEN 50:2 Mürin, Josef a allük ngeni nöün kewe chon angang mi sousäfei pwe repwe säfeeni saman. Iei mine ekewe sousäfei ra säfeeni Israel.
GEN 50:3 Iwe, lupwen faik rän ra angang won, pun iei aükükün ränin ar angangen säfeeni. Nge chon Isip meinisin ra kechüeiti lon ükükün fik rän.
GEN 50:4 Iwe, wesin ekewe ränin kechü, Josef a kapas ngeni nöün Farao nöüwis, “Are üa küna ümöümöch me remi, ouse mochen oupwe üreni Farao ai kei kapas.
GEN 50:5 Lupwen semei we a arap ngeni an epwe mäla, a üreniei, pwe üpwe pwon fän akapel pwe üpwe peiaseni lon an we peias a püsin amolätä fän itan lon ewe fanü Kanaan. Iei mine üa tüngor ngonuk, pwe kopwe mwüt ngeniei pwe üpwe feila o peiaseni semei. Mürin üpwe liwinsefälito.”
GEN 50:6 Nge Farao a üreni, “Kopwe feila o peiaseni semom usun om pwon ngeni fän akapel.”
GEN 50:7 Iwe, Josef a feila Kanaan pwe epwe peiaseni saman. Nge nöün Farao kewe nöüwis me ekewe meilapen chon leimwan pwal ekewe meilapen chon Isip meinisin ra eti.
GEN 50:8 Pwal chon leimwen Josef, pwin kana me chon leimwen saman ra eti. Nge nöür kewe semirit pwal nöür pwin sip me kow ra likiti lon ewe fanü Kosen.
GEN 50:9 Iwe, chon wawa woken me chon wawa oris ra pwal etala Josef. Ir meinisin eu mwich mi fokun watte.
GEN 50:10 Iwe, lupwen ra tori ewe lenien wichiwich umwun wiich lon Atat ötiuen ewe chanpupu Jortan, ra kechü fän leüömong. Ikenan Josef a kechüeiti saman we lon ükükün fisu rän.
GEN 50:11 Iwe, lupwen ekewe chon Kanaan ra küna ar kechü lon Atat ewe lenien wichiwich umwun wiich, ra apasa, “Oo, iei a fis eu mwichen kechüomong ren chon Isip.” Iei mine ra aita ngeni ewe leni Apel Misraim , a nom ötiuen ewe chanpupu Jortan.
GEN 50:12 Iwe, nöün Jakop kewe mwän ra föri ngeni usun mine a allük ngeniir.
GEN 50:13 Ra uweala semer we ngeni ewe fanü Kanaan o peiaseni lon ewe pwangen achau mi nom lon ewe tanipi Makpela ötiuen Mamre, Apraham a mönifengeni me ewe tanipi seni Efron ewe re Hit, pwe epwe an lenien peias.
GEN 50:14 Mürin än Josef wes le peiaseni saman we, a liwinla Isip fiti pwin kewe me meinisin mi eti le peiaseni saman.
GEN 50:15 Iwe, mürin än semer we a mäla, pwin Josef kewe ra kapasfengen lefiler, “Met sipwe föri, ika Josef a chüen oputakich o liwini ngenikich ach kewe föföringau meinisin sa föri ngeni.”
GEN 50:16 Iei mine ra tinala eman chon künö ren Josef pwe epwe asile ngeni, “Semom a allük ngenikem mwen an mäla pwe aipwe ürenuk,
GEN 50:17 ‘Kose mochen kopwe amusala än pwiüm kewe föföringau, pun ra tipis ren mine ra föri ngonuk.’ Iwe, iei aia tüngor ngonuk, ika kose mochen kopwe amusala ewe föföringau äm chon angang ngeni än semom we Kot aia föri.” Iwe, lupwen ar kapas ngeni, Josef a kechü.
GEN 50:18 Mürin, pwin kewe ra püsin feito ren, ra chapetiu mwan o apasa, “Kose mochen kopwe nöünikem amanau.”
GEN 50:19 Nge Josef a üreniir, “Ousap niuokus, pun ngang üa nom fän nemenien Kot.
GEN 50:20 Ewer, ämi oua ekiekin föföringau ngeniei, nge Kot a awili ngeni mürina pwe epwe amanaua chomong aramas, usun a fis ikenai.
GEN 50:21 Iei mine ousap niuokus, pun ngang üpwe tümwünükemi me nöümi semirit.” Iei usun a chächäriir ren an kapas pwetete ngeniir.
GEN 50:22 Iwe, Josef a nonom lon Isip me chon leimwen saman meinisin. Ükükün ierin manauen Josef ipükü engol.
GEN 50:23 Iwe, Josef a küna aülüngatin tettelin nöün Efraim. Ra pwal uwato ren Josef nöün Makir kewe o anomu won afön. Nge Makir nöün Manasa.
GEN 50:24 Iwe, Josef a üreni pwin kewe, “Ngang üpwe le mäla. Nge Kot epwe fokun alisikemi, epwe emwenikemiiwu seni ei fanü o aliwinikemiila lon ewe fanü a pwon ngeni Apraham, Isaak me Jakop.”
GEN 50:25 Mürin, Josef a üreni nöün Israel kewe pwe repwe pwon fän akapel ngeni. Iwe, a apasa, “Oupwe pwon ngeniei pwe ika Kot epwe emwenikemiiwu seni ei fanü, oupwe uwala chüi.”
GEN 50:26 Iwe, Josef a mäla, lupwen a ierini ipükü engol. Ra säfeeni o iseni lon eu pwor lon Isip.
EXO 1:1 Iwe, ikkei iten nöün Jakop kewe mwän ra etala Isip, eman me eman fiti an famili:
EXO 1:2 Rupen, Simeon, Lefi me Juta,
EXO 1:3 Isakar, Sepulon me Peniamin,
EXO 1:4 Tan, Naftali, Kat me Aser.
EXO 1:5 Iwe, mwirimwirin Jakop kewe meinisin ükükün fik aramas, nge Josef a fen nom Isip.
EXO 1:6 Mürin, Josef me pwin kana ra mäla, pwal pilor meinisin.
EXO 1:7 Nge ekewe chon Israel ra fokun up o chomongola, ra chochoola o fokun pöchökülela pwe ewe fanü Isip a ti rer.
EXO 1:8 Mürin a seikitä eman kingen Isip mi fö, esap silei usun Josef.
EXO 1:9 Iwe, ewe king a üreni nöün kewe aramas, “Ekei aramasen Israel ra kon chomong o pöchökül senikich.
EXO 1:10 Ou etto, sipwe le sorongaueer pwe resap chüen chomongola. Pun ika maun epwe torikich, repwe eti chon oputach le fiu ngenikich, repwe pwal sü seni fanüach.”
EXO 1:11 Iei mine ra filätä chon nemeni ekewe aramasen Israel, pwe repwe ariaföüür ren angangochou le aüetä än Farao telinimwen iseis iter Pitom me Rameses.
EXO 1:12 Nge usun lapalan ar riaföü, iei usun pwal chomongolar me chochoolar won ewe fanü. Iei popun ekewe chon Isip ra fokun niueiti chon Israel.
EXO 1:13 Iwe, ekewe chon Isip ra nöüniir amanau
EXO 1:14 o fokun eweiresiir ren angangochou. Ra wisen angang ngeni pwülüpar o föri pilak, ra pwal föri chomong sokun angangen lemal. Nge lon ar angang meinisin ra chök nöüniir amanau.
EXO 1:15 Mürin, ewe kingen Isip a üreni Sifra me Pua, ekewe ruoman chon afamw,
EXO 1:16 “Lupwen oua afamwa ekewe fin Ipru, oupwe nengeniöchü nöür. Pun ika eman ät, oupwe ni, nge ika eman nengin, oupwe amanaua.”
EXO 1:17 Nge ekewe chon afamw ra niueiti Kot. Iei mine resap apwönüetä än ewe kingen Isip allük, nge ra fen amanaua ekewe ät.
EXO 1:18 Iwe, ewe kingen Isip a körato ekewe chon afamw o aisiniir, “Pwota oua föri iei usun pwe oua amanaua ekewe ät?”
EXO 1:19 Iwe, ekewe chon afamw ra üreni Farao, “Pun ekewe fin Ipru resap wewe ngeni ekewe fin Isip, pwe ra pöchökül o nöünöükai mwen eman chon afamw epwe toriir.”
EXO 1:20 Iwe, Kot a afeiöchü ekewe chon afamw. Nge ekewe aramasen Israel ra chomongola o pöchökülela.
EXO 1:21 Pokiten ekewe chon afamw ra niueiti Kot, i a fang ngeniir püsin nöür.
EXO 1:22 Mürin, Farao a allük ngeni nöün aramas meinisin, “Iteiten ät mi uputiu ngeni chon Ipru oupwe atururolong lon ewe chanpupu Nil, nge iteiten nengin oupwe amanaueer.”
EXO 2:1 Lon ena fansoun, eman mwän seni ewe ainangen Lefi a pwülüeni eman fefin seni ewe ainangen Lefi.
EXO 2:2 Ewe fefin a pwopwo o nöüni eman ät. Nge lupwen a küna äteöchün nöün we, a aopala lon ükükün ülüngat maram.
EXO 2:3 Nge lupwen esap chüen tongeni aopala, a föw eu pasikit seni wowo o pwiliongei ngeni mastik me apach. Iwe, a akonala ewe semirit lon o uwala lein wowoon aropen ewe chanpupu Nil.
EXO 2:4 Iwe, fefinen ewe ät a ütä ekis toau pwe epwe küna met epwe fis ngeni.
EXO 2:5 Mürin, nöün Farao fefin a etiu ren ewe chanpupu pwe epwe tütü lon, nge nöün kewe chon angang fefin ra fetal ünükün ewe chanpupu. Iwe, neminewe a küna ewe pasikit lein ekewe wowo o akünöü ngeni eman nöün chon angang pwe epwe uwato ren.
EXO 2:6 Lupwen neminewe a suki ewe pasikit, a küna eman ät, nge a kechü. Iwe, a tongei o apasa, “Iei i eman lein ekewe semiritin Ipru.”
EXO 2:7 Mürin, fefinan we a kapas ngeni nöün Farao we fefin, “Ifa usun, ka mochen üpwe feila o körato eman fin Ipru pwe epwe oupwu ngonuk ewe semirit?”
EXO 2:8 Iwe, nöün Farao we fefin a pälüeni, “Ewer, kopwe feila.” Iei mine ewe nengin a feila o kökköri inen ewe semirit.
EXO 2:9 Iwe, nöün Farao we fefin a üreni inen ewe semirit. “Kopwe eki ei semirit pwe kopwe oupwu ngeniei, nge ngang üpwe ngonuk liwinum.” Iei mine ewe fefin a eki ewe semirit o akoupwu.
EXO 2:10 Nge lupwen ewe semirit a märitä, neminewe a ekiela ren nöün Farao we fefin. Iwe, a nöüni o aita ngeni Moses, pun a apasa, “Üa ekiwu me lon koluk.”
EXO 2:11 Iwe, mürin eu fansoun, lupwen Moses a mwän, a feila ren aramasan ekewe chon Ipru o küneer lon ar angang weires. Iwe, a küna eman re Isip a wichi eman aramasan.
EXO 2:12 Iwe, Moses a nenefetal, nge lupwen a mefi pwe esap wor eman a küna, a niela ewe re Isip o ireela fän pi.
EXO 2:13 Sorotän ewe rän, lupwen a pwal feila rer, a küna ruoman re Ipru ra aninifengen. Iwe, Moses a aisini ewe mi mwäl, “Pwota ka wichi chienom?”
EXO 2:14 Ätewe a pälüeni, “Iö a filuketä pwe kopwe samol me souapwüng wom? Ka ekieki pwe kopwe pwal nieila usun om niela ewe re Isip?” Mürin, Moses a niuokus o ekieki, “Ellet, ewe föför a pwä.”
EXO 2:15 Lupwen Farao a rong ei pworaus, a kütta Moses pwe epwe niela. Nge Moses a süla seni Farao o feila Mitian pwe epwe nonom ikenan. Iwe, a mottiu arun eu chönüttu.
EXO 2:16 Iwe, eman souasor seni Mitian a wor füman nöün föpwül, ra feito ren ewe chönüttu pwe repwe üfüf koluk o alölöü ekewe lenien ün, pwe repwe aünü nöün semer kewe sip.
EXO 2:17 Nge ekoch chon fofol man ra pwal feito o asüela ekewe föpwül. Mürin, Moses a ütä o alisi ekewe föpwül le aünü nöür kewe sip.
EXO 2:18 Lupwen ekewe föpwül ra liwiniti semer we itan Setiro, a aisiniir, “Pwota oua müttirito ikenai?”
EXO 2:19 Iwe, ra apasa, “Eman re Isip a penikem seni ekewe chon fofol man, a pwal üfi koluk fän itach o aünü ekewe sip.”
EXO 2:20 Iwe, Setiro a aisini nöün kewe föpwül, “Ifa i ätena? Pwota oua likiti? Oupwe körato pwe epwe mongö rech.”
EXO 2:21 Nge Moses a tipeeu ngeni an epwe nonom ren ewe mwän. Mürin, Setiro a ngeni Moses nöün föpwül Sipora pwe epwe pwülüeni.
EXO 2:22 Iwe, neminewe a nöüni eman ät, nge Moses a aita ngeni Kersom, pun a apasa, “Ngang eman chon siamü lon fanüen ekis.”
EXO 2:23 Mürin chomong ier ra la, ewe kingen Isip a mäla. Nge ekewe aramasen Israel ra chök ngüngü fän riaföün än chon Isip nöüniir amanau, ra pwal siö pwe eman epwe alisiir. Nge ar siö pokiten ar riaföü a tori Kot.
EXO 2:24 Iwe, Kot a rongorong ar siö o chechemeni an we pwon ngeni Apraham, Isaak me Jakop.
EXO 2:25 A küna ekewe aramasen Israel lon ar riaföü o ekieki usur.
EXO 3:1 Lon ena fansoun Moses a foleni epwi pwiin sip nöün semen pwülüan we itan Setiro ewe souasoren Mitian. A emwenala folenian sip lotoun ewe fanüapö o tori ewe chukun Kot itan Horep.
EXO 3:2 Iwe, ewe chon läng nöün ewe Samol mi Lapalap a pwä ngeni Moses lon pulopulen ekkei seni lon efoch iräfölüföl. Lupwen Moses a neneloi, a mefi pwe ewe irä a pulopul, nge esap karala.
EXO 3:3 Iwe, a apasa, “Üpwe feila ikenan o atola ei metoch mi amwarar, pun pwota enan iräfölüföl esap karala?”
EXO 3:4 Lupwen ewe Samol mi Lapalap a küna pwe Moses a feila ikenan, a kökköwu me lon ewe iräfölüföl, “Moses, Moses!” Moses a pälüeni, “Ngang iei.”
EXO 3:5 Iwe, Kot a apasa, “Kosap arapoto. Kopwe pwilitawu ipwom sus, pun ei leni ka ütä won a pin.”
EXO 3:6 A pwal apasa, “Ngang än om kewe lewo Apraham, Isaak me Jakop we Kot.” Iwe, Moses a pwölü mesan, pun a niuokus an epwe nenengeni Kot.
EXO 3:7 Mürin, ewe Samol mi Lapalap a apasa, “Üa küna riaföün nei aramas mi nonom Isip o rongorong ar siö pokiten än chon Isip nemenemengau ngeniir, üa pwal silei ar weires meinisin.
EXO 3:8 Iwe, üa feitiu pwe üpwe angaseer seni chon Isip, üpwe pwal emwenirewu seni ewe fanü o emwenirelong lon eu fanü mi öch o watte, eu fanü mi pwülüöch o fanüeräs, fanüen chon Kanaan, chon Hit, chon Amor, chon Peris, chon Hiw me chon Jepus.
EXO 3:9 Iei än ekewe aramasen Israel siö a toriei, üa pwal küna ar riaföü me ren chon Isip.
EXO 3:10 Etto, üpwe tinukela ren Farao pwe kopwe emwenawu nei kewe aramasen Israel seni lon Isip.”
EXO 3:11 Nge Moses a üreni Kot, “Ngang iö pwe üpwe tongeni feila ren Farao o emwenawu ekewe aramasen Israel seni lon Isip?”
EXO 3:12 Iwe, Kot a pälüeni, “Ngang üpwe etuk. Ei epwe eu asisil ngonuk pwe ngang üa tinuk: Are ka emwenawu ekewe aramas seni lon Isip, epwe fis pwe oupwe fel ngeniei won ei chuk.”
EXO 3:13 Mürin, Moses a kapas ngeni Kot, “Nge ika üpwe churi ekewe aramasen Israel o üreniir, ‘Än ämi kewe lewo we Kot a tinieito remi,’ nge ir repwe aisiniei, ‘Ifa itan?’ iwe, met üpwe pälüeni ngeniir?”
EXO 3:14 Nge Kot a üreni Moses, “Ngang ngang echök. Iei usun mine kopwe üreni ekewe aramasen Israel, ‘Ewe mi iteni Ngang a tinieito remi.’”
EXO 3:15 Iwe, Kot a pwal üreni Moses, “Kopwe kapas ngeni ekewe aramasen Israel: Ewe Samol mi Lapalap, än ämi kewe lewo Apraham, Isaak me Jakop we Kot a tinieito remi. Iei itei tori feilfeilachök, nge ren ei it oupwe chechemeniei seni eu täppin aramas tori eu täppin.
EXO 3:16 Iwe, kopwe feila o achufengeni ekewe souakomwen Israel, kopwe üreniir: Ewe Samol mi Lapalap, än ämi kewe lewo Apraham, Isaak me Jakop we Kot a pwä ngeniei o üreniei, ‘Üa nenengenikemi o küna mine a fis ngenikemi lon Isip.
EXO 3:17 Iwe, üa pwon ngenikemi pwe üpwe emwenikemiiwu seni lon Isip, ewe leni ia oua riaföü ie, o emwenikemiilong lon fanüen chon Kanaan, chon Hit, chon Amor, chon Peris, chon Hiw me chon Jepus, eu fanü mi pwülüöch o fanüeräs.’
EXO 3:18 Iwe, repwe aüselinga om kapas, mürin ämi me ekewe souakomwen Israel oupwe feila ren ewe kingen Isip o üreni, ‘Ewe Samol mi Lapalap än chon Ipru we Kot a churikem. Iei aia tüngor ngonuk pwe kopwe mwüt ngenikem pwe aipwe saila lon fanüapö ükükün ülüngat rän, pun aipwe asor ngeni äm we Kot ewe Samol mi Lapalap.’
EXO 3:19 Nge üa fen silei pwe ewe kingen Isip esap mwüt ngenikemi pwe oupwe feila, tori eman mi manaman a pöchökül ngeni.
EXO 3:20 Iei mine üpwe aitiela pei o afeiengaua chon Isip ren ekewe manaman meinisin ngang üpwe afisätä lefiler. Mürin epwe mwüt ngenikemi pwe oupwe feila.
EXO 3:21 Üpwe pwal föri pwe ekewe chon Isip repwe ümöümöch ngeni ekei aramas, pwe lupwen oupwe feila, ousap feila fän asöülapö.
EXO 3:22 Iwe, ekewe fefin meinisin repwe tüngor seni chon arur me chokewe ra imweimw rer fout seni silifer me kolt, pwal üf, pwe oupwe foute ngeni nöümi ät me nengin. Iei usun oupwe angeala pisekin chon Isip.”
EXO 4:1 Mürin, Moses a üra, “Nge ika resap mochen lüküei, resap pwal aüselinga aloi? Met üpwe föri ika repwe apasa, ‘Ewe Samol mi Lapalap esap pwä ngonuk?’”
EXO 4:2 Iwe, ewe Samol mi Lapalap a aisini, “Met na mi nom lepoum?” Nge Moses a üra, “Efoch wok.”
EXO 4:3 Iwe, Kot a üreni, “Kopwe aturätiu ena wok lepwül.” Iei mine a aturätiu. Iwe, a wiliti eman serepenit, nge Moses a sü seni.
EXO 4:4 Mürin, ewe Samol mi Lapalap a kapas ngeni Moses, “Kopwe pworotiu o turufi wükün.” Iei mine Moses a pworotiu o turufi, nge a wilisefäliti efoch wok me lepöün.
EXO 4:5 Iwe, ewe Samol mi Lapalap a üreni, “Ren ei repwe lükü pwe ngang ewe Samol mi Lapalap än ar kewe lewo Apraham, Isaak me Jakop we Kot a pwä ngonuk.”
EXO 4:6 Iwe, ewe Samol mi Lapalap a pwal üreni Moses, “Kopwe sökalong poum lon üfom.” Iwe, a sökalong, nge lupwen a sökawu, pöün a rupun pwötür usun chök pwechepwechen snow.
EXO 4:7 Mürin, Kot a üreni, “Kopwe söksefälielong poum lon üfom.” Iwe, a sökalong, nge lupwen a sökawu, pöün a pwal pöchökül usun chök inisin.
EXO 4:8 Iwe, Kot a pwal üreni, “Are resap mochen lükuuk ika ekieki ewe aeuin manaman, eli repwe lükü aruuan.
EXO 4:9 Nge ika resap mochen lükü ekei ruu manaman ika afäli alom, kopwe üfi koluk seni ewe chanpupu Nil o ninätiu won pwül. Iwe, ewe koluk ka üfi epwe wiliti cha me won pwül.”
EXO 4:10 Nge Moses a üreni ewe Samol mi Lapalap, “Ai Samol, sap ngang eman mi sousile kapas seni me lom pwal tori ei fansoun ka kapas ngeniei ngang noum ei chon angang, pwe ngang eman mi angangau le kapas.”
EXO 4:11 Mürin, ewe Samol mi Lapalap a üreni Moses, “Iö a föri awen aramas? Iö a föri pwe aramas resap tongeni kapas ika rongorong? Iö a föri pwe repwe küna mwer ika repwe chun? Sap ngang ewe Samol mi Lapalap?
EXO 4:12 Iei mine kopwe feila, nge ngang üpwe alisuk le kapas o aiti ngonuk mine kopwe eäni fos.”
EXO 4:13 Nge Moses a üreni, “Ai Samol, kose mochen kopwe tinala eman.”
EXO 4:14 Mürin, ewe Samol mi Lapalap a song ngeni Moses o üreni, “Ifa usun, esap nom Aaron pwiüm we seni ewe ainangen Lefi? Üa silei pwe a tongeni angöch le kapas. A fen nom won al pwe epwe feito o churuk, nge lupwen epwe künok, epwe pwapwa lon lelukan.
EXO 4:15 Iwe, en kopwe kapas ngeni o aiti ngeni mine epwe apasa, nge ngang üpwe emwelieliakemi me ruoman o aiti ngenikemi mine oupwe föri.
EXO 4:16 Aaron epwe kapas ngeni aramas fänäsengesum, epwe pwal aweni awom, nge en kopwe usun chök Kot ngeni.
EXO 4:17 Iwe, kopwe angei ei wok pwe kopwe föri ekewe manaman ren.”
EXO 4:18 Mürin, Moses a liwinla ren semen pwülüan itan Setiro o kapas ngeni, “Kose mochen kopwe mwüt ngeniei pwe üpwe liwinla ren aramasei mi nom Isip o pi ika ra chüen manau.” Iwe, Setiro a üreni Moses, “Kopwe feila fän kinamwe.”
EXO 4:19 Nge ewe Samol mi Lapalap a üreni Moses me lon Mitian, “Kopwe liwinla Isip, pun ekewe aramas meinisin mi mochen niikela ra mäla.”
EXO 4:20 Iei mine Moses a angei pwülüan me nöün kana o amoteer won eman aas. Iwe, a liwinla lon ewe fanü Isip. Nge Moses a amwöchü lepöün ewe wokun Kot.
EXO 4:21 Iwe, ewe Samol mi Lapalap a üreni Moses, “Lupwen kopwe liwinla Isip, kopwe pi pwe kopwe föri ekewe manaman meinisin fän mesen Farao üa atufichi ngonuk. Nge ngang üpwe aföreai lelukan pwe esap mwüt ngeni ekewe aramas pwe repwe feila.
EXO 4:22 Mürin, en kopwe kapas ngeni Farao, ‘Iei alon ewe Samol mi Lapalap: Israel nei mwänichi.
EXO 4:23 Iwe, üpwe ürenuk pwe kopwe mwüt ngeni nei we pwe epwe feila o fel ngeniei. Nge ika kosap mwüt ngeni, üpwe niela noum mwänichi.’”
EXO 4:24 Iwe, lon ar sai, lupwen ra asösö lepwin, ewe Samol mi Lapalap a churi Moses, pun a ekiekin niela.
EXO 4:25 Mürin, Sipora a angei esät sättin fau mi ken o sirkomsaisi nöün ät. Iwe, a angei ünüchen ewe kükün inis, a pachei ngeni pechen Moses o apasa, “Ellet, en eman re reimwen cha ngeniei.”
EXO 4:26 Iei mine ewe Samol mi Lapalap a likitala Moses, lupwen neminewe a apasa, “En eman re reimwen cha,” pun a kapas fän iten ewe sirkomsais.
EXO 4:27 Iwe, ewe Samol mi Lapalap a üreni Aaron, “Kopwe feila lon ewe fanüapö pwe kopwe churi Moses.” Iwe, a feila o churi Moses awenewenen ewe chukun Kot. Iwe, a mitiri.
EXO 4:28 Mürin, Moses a apworausa ngeni Aaron mine ewe Samol mi Lapalap a tini ren, a pwal asile ngeni ekewe manaman meinisin Kot a amwir ngeni pwe epwe föri.
EXO 4:29 Mürin, Moses me Aaron ra feila o amwichafengeni ekewe souakomwen aramasen Israel meinisin.
EXO 4:30 Iwe, Aaron a üreniir meinisin mine ewe Samol mi Lapalap a kapas ngeni Moses. Nge Moses a pwal föri ekewe manaman fän mesen ekewe aramas meinisin.
EXO 4:31 Iwe, ra lükü. Nge lupwen ra rong pwe ewe Samol mi Lapalap a äämwa ekewe aramasen Israel o küna ar riaföü, ra chapetiu o fel ngeni Kot.
EXO 5:1 Mürin, Moses me Aaron ra feila ren Farao o üreni, “Iei alon ewe Samol mi Lapalap ewe Koten Israel, ‘Kopwe mwüt ngeni nei aramas pwe repwe feila o föri eu chulap fän itei lon fanüapö.’”
EXO 5:2 Nge Farao a pälüeniir, “Iö na ewe Samol mi Lapalap pwe üpwe aüselinga alon o mwütala Israel? Üsap silei ewe Samol mi Lapalap, üsap pwal mwüt ngeni Israel epwe feila.”
EXO 5:3 Iwe, ra pälüeni, “Än chon Ipru Kot a churikem. Kose mochen mwüt ngenikem pwe äm aipwe saila lon fanüapö lon ükükün ülüngat rän. Pun aipwe asor ngeni äm we Kot ewe Samol mi Lapalap, pwe esap apwüngükem ren mätter ika maun.”
EXO 5:4 Nge ewe kingen Isip a üreni Moses me Aaron, “Pwota oua mochen uweela ekewe aramas seni ar angang weires? Oupwe feila, föri ämi angang.”
EXO 5:5 Farao a pwal üreniir, “Nengeni, ekewe aramas ra kon chomong seni chon Isip, nge ämi oua mochen aüküretiu seni ar angang.”
EXO 5:6 Lon ewe chök rän, Farao a allük ngeni ekewe chon nemeni ekewe aramas fän pöchökül me ekewe souemwenin angang,
EXO 5:7 “Ousap chüen ngeni ekewe aramas fetilipwas le föri pilak usun me lom, pun repwe feila püsin ioni.
EXO 5:8 Nge repwe chök föri ükükün förier pilak usun me mwan. Ousap fokun akisikisätiu, pun ra chipwang. Iei mine ra apasa lon ar siö, ‘Kopwe mwüt ngenikem pwe aipwe feila o asor ngeni äm we Kot.’
EXO 5:9 Oupwe achouu ar angang. Oupwe angangeer pwe esap wor fansoun ar rongorong kapas chofana.”
EXO 5:10 Mürin ekewe chon nemenem fän pöchökül me ekewe souemwenin angang ra feila ren ekewe aramas o üreniir, “Iei alon Farao, ‘Üsap chüen ngenikemi fetilipwas.
EXO 5:11 Oupwe püsin feila o kütfetal fetilipwas, nge iteiten föriemi pilak esap fokun kisikisitiu.’”
EXO 5:12 Iei mine ekewe aramas ra fetalfeil won unusen ewe fanü Isip pwe repwe ionifengeni fetilipwas.
EXO 5:13 Iwe, ekewe chon nemenem fän pöchökül ra inemoucheer o apasa, “Oupwe awesöchü ükükün föriemi pilak lon eu me eu rän usun chök me mwan, lupwen a wor ämi fetilipwas.”
EXO 5:14 Iwe, ekewe souemwenin angang seni Israel mi kefilitä me ren nöün Farao chon nemenem ra kawet. Iwe, ra aisiniir, “Pwota ousap awesöchü föriemi pilak näneu me ikenai usun me mwan?”
EXO 5:15 Mürin ekewe souemwenin angang seni Israel ra feito ren Farao o siö ngeni, “Pwota ka föri iei usun ngenikem äm noum chon angang?
EXO 5:16 Resap ngenikem fetilipwas, nge ra ürenikem pwe aipwe föri pilak. Iei ra wichikem äm noum chon angang, nge ei püsin mwälin noum aramas.”
EXO 5:17 Nge Farao a pälüeniir, “Oua chök chipwang, oua chök chipwang, iei mine oua apasa, ‘Kopwe mwüt ngenikem pwe äm aipwe feila o asor ngeni ewe Samol mi Lapalap.’
EXO 5:18 Oupwe liwinla iei o angang. Esap wor eman epwe ngenikemi fetilipwas, nge epwe chök wor ükükün föriemi pilak usun me mwan.”
EXO 5:19 Iwe, ekewe souemwenin angang seni Israel ra küna pwe ra nonom lon osupwang watte, lupwen ra rongorong pwe ükükün förier pilak lon eu rän esap fokun kisikisitiu.
EXO 5:20 Nge lupwen ra towu seni Farao, ra churi Moses me Aaron, pun ra witiwitiir.
EXO 5:21 Iwe, ra üreniir, “Ewe Samol mi Lapalap epwe nenengeni o apwüngükemi, pun oua apwongauakem fän mesen Farao me nöün chon angang, oua pwal föri met repwe niikem ren.”
EXO 5:22 Mürin, Moses a sap ngeni ewe Samol mi Lapalap o apasa, “Ai Samol, pwota ka afeiengaua ekei aramas? Pwota mwo chök ke fen akünöüeito ikei?
EXO 5:23 Pun seni ewe fansoun üa churi Farao o kapas ngeni fän itom, a fen afeiengaua ekei aramas, nge kosap föri och pwe kopwe angasala noum kei aramas.”
EXO 6:1 Mürin, ewe Samol mi Lapalap a üreni Moses, “Iei kopwe le küna mine üpwe föri ngeni Farao. Pun ren pei mi manaman üpwe pöchökül ngeni Farao pwe epwe tinirewu, ewer, epwe asürela seni fanüan.”
EXO 6:2 Iwe, Kot a üreni Moses, “Ngang ewe Samol mi Lapalap.
EXO 6:3 Üa pwä ngeni Apraham, Isaak me Jakop ren itei we Kot mi Unusen Manaman, nge üsap asile ngeniir itei ei Samol mi Lapalap.
EXO 6:4 Üa pwal föri ai pwon ngeniir pwe üpwe ngeniir ewe fanü Kanaan, ewe fanü ra fen asösö lon usun chon siamü.
EXO 6:5 Nge iei üa rong än ekewe aramasen Israel ngüngü ren ar riaföü, pun chon Isip ra amwöchüretiu o nöüniir amanau. Iwe, üa chechemeni ai pwon ngeniir.
EXO 6:6 Iei mine kopwe üreni ekewe aramasen Israel, ‘Ngang ewe Samol mi Lapalap. Üpwe emwenikemiiwu seni fän ämi angangochou ngeni chon Isip, üpwe pwal angasakemi seni ar nöünikemi amanau o amanauakemi fän pei mi manaman pwal ren apwüng mi lapalap.
EXO 6:7 Iwe, üpwe nöünikemi pwe oupwe aramasei, nge ngang üpwe ämi Kot. Oupwe silei pwe ngang ewe Samol mi Lapalap ämi we Kot mi emwenikemiiwu seni fän ämi angangochou lon Isip.
EXO 6:8 Üpwe pwal emwenikemiilong lon ewe fanü, üa pwon ngeni Apraham, Isaak me Jakop pwe üpwe ngenikemi pwe fanüemi. Ngang ewe Samol mi Lapalap.’”
EXO 6:9 Iwe, Moses a üreni ekewe aramasen Israel ekei kapas, nge ir resap aüselinga, pun a tatakis letiper ren än chon Isip nöüniir amanau.
EXO 6:10 Mürin, ewe Samol mi Lapalap a kapas ngeni Moses,
EXO 6:11 “Kopwe feila o üreni Farao ewe kingen Isip pwe epwe mwüt ngeni ekewe aramasen Israel pwe repwe towu seni fanüan.”
EXO 6:12 Nge Moses a üreni ewe Samol mi Lapalap, “Nengeni, ekewe aramasen Israel resap aüselingaei. Ifa usun, Farao epwe mochen aüselingaei, nge ngang fen eman mi angangau le kapas?”
EXO 6:13 Nge ewe Samol mi Lapalap a kapas ngeni Moses me Aaron, a akünöörela ren ekewe aramasen Israel pwal ren Farao ewe kingen Isip, pwe repwe emwenawu ekewe aramasen Israel seni ewe fanü Isip.
EXO 6:14 Ikkei ir mwänirelan ar kewe cho. Nöün Rupen kewe mwän ewe mwänichien nöün Israel: Hanok, Pallu, Hesron me Karmi. Ätekei ir än ar kewe cho lewo mi iteni iter.
EXO 6:15 Nge nöün Simeon kewe mwän: Jemuel, Jamin, Ohat, Jakin, Sohar me Shaul nöün eman fin Kanaan. Ätekei ir än ar kewe cho lewo mi iteni iter.
EXO 6:16 Ikkei iten nöün Lefi kewe mwän lon tettelin mwirimwirir: Kerson, Kohat me Merari. Ätekei ir än ar kewe cho lewo mi iteni iter. Iwe, ierin manauen Lefi ükükün ipükü ilik me fisu.
EXO 6:17 Iwe, nöün Kerson kewe mwän: Lipni me Shimei, a pwal wor chomong mwirimwirir.
EXO 6:18 Nge nöün Kohat kewe mwän: Amram, Ishar, Hepron me Ussiel. Iwe, ierin manauen Kohat ükükün ipükü ilik me ülüngat.
EXO 6:19 Iwe, nöün Merari kewe mwän: Mali me Mushi. Ir meinisin än Lefi kewe cho lon tettelin mwirimwirir.
EXO 6:20 Amram a pwülüeni Jokopet fefinen saman we. Iwe, Jokopet a nöüni me won Amram: Aaron me Moses. Nge ierin manauen Amram ükükün ipükü ilik me fisu.
EXO 6:21 Iwe, nöün Ishar kewe mwän: Kora, Nefek me Sikri.
EXO 6:22 Nge nöün Ussiel kewe mwän: Misael, Elsafan me Sitri.
EXO 6:23 Iwe, Aaron a pwülüeni Elisepa nöün Aminatap fefin, fefinen Nashon. Neminewe a nöüni me won Aaron: Natap, Apihu, Eleasar me Itamar.
EXO 6:24 Iwe, nöün Kora kewe mwän: Assir, Elkana me Apiasaf. Ir än Kora kewe cho lewo.
EXO 6:25 Iwe, Eleasar nöün Aaron mwän a pwülüeni eman lein nöün Putiel fefin. Neminewe a nöüni me won Pinehas. Ikkeiir mwänirelan än Lefi cho lon en me an famili.
EXO 6:26 Ikkeiir Aaron me Moses, ätekewe ewe Samol mi Lapalap a kapas ngeniir, “Oupwe emwenawu ekewe aramasen Israel seni lon ewe fanü Isip lon tettelin en me an cho.”
EXO 6:27 Moses me Aaron ir ätekewe mi fos ngeni Farao ewe kingen Isip usun ar repwe emwenawu ekewe aramasen Israel seni Isip.
EXO 6:28 Lon ewe rän, lupwen ewe Samol mi Lapalap a kapas ngeni Moses me lon ewe fanü Isip,
EXO 6:29 a üreni, “Ngang ewe Samol mi Lapalap. Kopwe asile ngeni Farao ewe kingen Isip meinisin mine üa ürenuk.”
EXO 6:30 Nge Moses a üreni ewe Samol mi Lapalap, “Ngang eman mi angangau le kapas. Ifa usun, Farao epwe mochen aüselingaei?”
EXO 7:1 Mürin, ewe Samol mi Lapalap a üreni Moses, “Nengeni, üpwe awisok pwe kopwe usun chök eman kot ngeni Farao, nge Aaron pwiüm we epwe usun chök noum soufos.
EXO 7:2 Kopwe asile ngeni Aaron mine üa allük ngonuk, nge Aaron pwiüm we epwe kapas ngeni Farao, pwe epwe mwüt ngeni ekewe aramasen Israel repwe towu seni fanüan.
EXO 7:3 Nge ngang üpwe aföreai lelukan. Inamwo ika a chomong ai asisil me ai manaman üa föri lon Isip,
EXO 7:4 Farao esap mochen aüselingakemi. Iei mine üpwe afeiengaua Isip ren apwüng mi lapalap, nge üpwe emwenawu nei aramasen Israel seni Isip lon tettelin en me an cho.
EXO 7:5 Mürin ekewe chon Isip repwe mefi pwe ngang ewe Samol mi Lapalap, lupwen üpwe aitiela pei won Isip pwe üpwe afeiengaua o emwenawu ekewe aramasen Israel seni me leir.”
EXO 7:6 Iwe, Moses me Aaron ra föri meinisin mine ewe Samol mi Lapalap a allük ngeniir.
EXO 7:7 Lon ewe fansoun, lupwen ra kapas ngeni Farao, Moses a ierini walik, nge Aaron a ierini walik me ülüngat.
EXO 7:8 Iwe, ewe Samol mi Lapalap a üreni Moses me Aaron,
EXO 7:9 “Ika Farao epwe ürenikemi, ‘Oupwe alükülükü wisemi ren ämi oupwe föri manaman,’ en kopwe üreni Aaron, ‘Kopwe angei wokum o monetiu fän mesen Farao pwe epwe wiliti eman serepenit.’”
EXO 7:10 Iei usun Moses me Aaron ra feila ren Farao o föri usun mine ewe Samol mi Lapalap a allük ngeniir. Iwe, Aaron a monetiu wokun we fän mesen Farao me nöün kewe nöüwis, nge a wiliti eman serepenit.
EXO 7:11 Mürin, Farao a titi ekewe soutipachem me soupöüt, pwal ir ekewe sourongen Isip. Iwe, ra föri usun mine Aaron a föri.
EXO 7:12 Iteiten eman me eman leir a monetiu wokun, iwe, ra wiliti serepenit. Nge wokun Aaron we a aromala wokur kewe.
EXO 7:13 Nge Farao a chök tipeföreala pwe esap mochen aüselinger, usun ewe Samol mi Lapalap a fen apasa.
EXO 7:14 Mürin, ewe Samol mi Lapalap a üreni Moses, “Farao a chök tipeföreala, esap mochen mwüt ngeni ekewe aramas pwe repwe feila.
EXO 7:15 Lesosorun lesor kopwe feila souni Farao ünükün ewe chanpupu Nil, lupwen epwe feila ikenan. Iwe, kopwe uwei ewe wok mi wiliti eman serepenit me mwan.
EXO 7:16 Iwe, kopwe üreni, ‘Ewe Samol mi Lapalap, än chon Ipru we Kot a tinieito reöm pwe üpwe ürenuk, “Kopwe mwüt ngeni nei aramas pwe repwe feila o fel ngeniei lon fanüapö. Nge tori iei kosap mwo aüselingaei.”
EXO 7:17 Iei alon ewe Samol mi Lapalap, “Ren ei kopwe silei pwe ngang ewe Samol mi Lapalap: Üpwe wichi kolukun lon ewe chanpupu Nil ren woki mi nom lepei pwe epwe wiliti cha.
EXO 7:18 Iwe, ikenen lon ewe chanpupu Nil repwe mäla, nge ewe chanpupu epwe fokun pongau pwe ekewe chon Isip resap tongeni ün ewe koluk.” ’”
EXO 7:19 Iwe, ewe Samol mi Lapalap a üreni Moses, “Kopwe kapas ngeni Aaron pwe epwe angei wokun o aitiela pöün won kolukun Isip meinisin, won ekewe chanpupu me warawaren koluk, won ekewe nasen koluk me ekewe pwangen koluk meinisin, pwe repwe wiliti cha. Iwe, epwe chök cha won unusen ewe fanü Isip, pwal lon mwo nge sepi mi för seni mwüch me fau.”
EXO 7:20 Iwe, Moses me Aaron ra föri meinisin mine ewe Samol mi Lapalap a allük ngeniir. Aaron a aitiela wokun o wichi kolukun lon ewe chanpupu Nil, pwe kolukun meinisin a wiliti cha. Ei a föri me fän mesen Farao me nöün kewe nöüwis.
EXO 7:21 Iwe, ikenen lon ewe chanpupu Nil ra mäla, nge kolukun lon ra fokun pongau, pwe chon Isip resap tongeni ün seni. Iwe, a cha won unusen ewe fanü Isip.
EXO 7:22 Mürin, ekewe sourongen Isip ra pwal föri ei sokun manaman ren ronger. Iei mine Farao a chök tipeförea, pwe esap mochen aüselinga Moses me Aaron, usun mine ewe Samol mi Lapalap a fen apasa.
EXO 7:23 Iwe, Farao a liwiniti imwan, nge esap ekieki usun lon lelukan.
EXO 7:24 Nge chon Isip meinisin ra tufetal pwang ünükün ewe chanpupu Nil pwe repwe kütta ünümer koluk, pun resap tongeni ün seni ewe chanpupu Nil.
EXO 7:25 Iwe, ewe Samol mi Lapalap a angauala kolukun lon ewe chanpupu Nil lon ükükün fisu rän.
EXO 8:1 Mürin, ewe Samol mi Lapalap a üreni Moses, “Kopwe feila ren Farao o kapas ngeni, ‘Iei alon ewe Samol mi Lapalap, “Kopwe mwüt ngeni nei aramas pwe repwe feila o fel ngeniei.
EXO 8:2 Nge ika kosap mwüt ngeniir pwe repwe feila, üpwe ariaföüü unusen fanüom ren kairü.
EXO 8:3 Iwe, ewe chanpupu Nil epwe uren kairü. Repwe tolong lon imwom, lon om rumwen annut pwal won om peet. Iwe, repwe tolong lon imwen noum kewe nöüwis pwal lon imwen noum kewe aramas, repwe tolong lon om lenien um me sepien öüwöü pilawa.
EXO 8:4 Ekewe kairü repwe mwetemwetfetal womw, won noum kewe aramas me noum kewe nöüwis.” ’”
EXO 8:5 Iwe, ewe Samol mi Lapalap a üreni Moses, “Kopwe kapas ngeni Aaron pwe epwe aitiela pöün fiti wokun won ekewe chanpupu me ekewe warawar, pwal won ekewe nasen koluk, pwe kairü repwe tötä won ewe fanü Isip.”
EXO 8:6 Iei mine Aaron a aitela pöün won kolukun Isip. Iwe, ekewe kairü ra tötä o pwölüela ewe fanü Isip.
EXO 8:7 Nge ekewe sourongen Isip ra pwal föri ei sokun manaman ren ronger, pwe ra pwal atötäi kairü won ewe fanü Isip.
EXO 8:8 Mürin, Farao a körato Moses me Aaron o üreniir, “Oupwe tüngorei ewe Samol mi Lapalap, pwe epwe angei ekewe kairü seniei pwal seni nei aramas. Nge ngang üpwe mwüt ngeni ekewe aramasen Israel pwe repwe feila o asor ngeni ewe Samol mi Lapalap.”
EXO 8:9 Iwe, Moses a üreni Farao, “Kose mochen, en chök kopwe püsin filätä inet üpwe tüngor fän itom pwal fän iten noum kewe nöüwis me noum kewe aramas, pwe ekewe kairü repwe sü senuk pwal seni imwom, nge repwe chök nonom lon ewe chanpupu Nil.”
EXO 8:10 Iwe, Farao a üreni, “Lesor.” Nge Moses a üra, “Epwe fis usun om apasa, pwe kopwe silei pwe esap wor eman kot mi wewe ngeni äm we Kot ewe Samol mi Lapalap.
EXO 8:11 Ekewe kairü repwe sü senuk pwal seni imwom, repwe sü seni noum kewe nöüwis me noum kewe aramas, nge repwe chök nonom lon ewe chanpupu Nil.”
EXO 8:12 Iwe, Moses me Aaron ra feila seni Farao. Mürin, Moses a tüngormamau ngeni ewe Samol mi Lapalap usun ekewe kairü i a awarato won Farao.
EXO 8:13 Iwe, ewe Samol mi Lapalap a föri usun mine Moses a tüngorei. Ekewe kairü ra mäla seni lon ekewe imw tori lükün, pwal tori lemal.
EXO 8:14 Ra ionifengeniir o achukuchukuretä, nge ewe fanü a pwongau rer.
EXO 8:15 Iwe, lupwen Farao a küna pwe a ekis ngasala, a pwal tipeföreala pwe esap mochen aüselinga Moses me Aaron, usun mine ewe Samol mi Lapalap a fen apasa.
EXO 8:16 Mürin, ewe Samol mi Lapalap a üreni Moses, “Kopwe kapas ngeni Aaron pwe epwe aitiela wokun o wichi pwülün ewe fanü, pwe pwülümoromorun won unusen ewe fanü Isip epwe wiliti nikken.”
EXO 8:17 Iwe, ra föri iei usun. Aaron a aitiela pöün fiti wokun o wichi pwülün ewe fanü, pwe pwülümoromorun unusen ewe fanü Isip a wiliti nikken, nge ra küw aramas me man.
EXO 8:18 Iwe, ekewe sourong ra pwal sotuni ronger pwe repwe afisätä nikken, nge resap tongeni. Ekewe nikken ra küw aramas me man.
EXO 8:19 Mürin, ekewe sourong ra üreni Farao, “Ei pöün Kot a föri.” Nge Farao a fen tipeföreala pwe esap mochen aüselinga Moses me Aaron, usun mine ewe Samol mi Lapalap a fen apasa.
EXO 8:20 Mürin, ewe Samol mi Lapalap a üreni Moses, “Kopwe pwätä lesosorusich o feila souni Farao, lupwen epwe feila ren ewe koluk. Iwe, kopwe üreni, ‘Iei alon ewe Samol mi Lapalap: Kopwe mwüt ngeni nei aramas repwe feila pwe repwe fel ngeniei.
EXO 8:21 Nge ika kosap mochen mwüt ngeniir, üpwe tinato pwiin loong womw, won noum kewe nöüwis me noum kewe aramas, pwal lon imwom. Iwe, lon imwen chon Isip meinisin epwe uren pwiin loong, pwal ewe pwül ra nom won.
EXO 8:22 Nge lon ena ränin üpwe tiela ewe fanü Kosen, ewe ia nei aramas ra nonom ie, pwe esap wor pwiin loong rer. Ren ei kopwe silei pwe ngang ewe Samol mi Lapalap üa nonom lon ei fanü.
EXO 8:23 Iwe, üpwe aimwü lefilen nei aramas me noum aramas. Ei manaman epwe fis lesor.’”
EXO 8:24 Iwe, ewe Samol mi Lapalap a apwönüetä mine a apasa. Chomong pwiin loong ra ässilong lon imwen Farao pwal lon imwen nöün kewe nöüwis tori lon unusen ewe fanü Isip, pwe ewe fanü a ngauala ren ekewe loong.
EXO 8:25 Mürin, Farao a kökkörato Moses me Aaron o üreniir, “Oupwe feila o asor ngeni ämi we Kot, nge lon chök ei fanü.”
EXO 8:26 Nge Moses a üra, “Esap öch ika epwe ina usun. Pun ekewe mönün asor aia eäni asor ngeni ewe Samol mi Lapalap äm we Kot ra anioput ngeni chon Isip. Nge ika aia eäni asor ekewe mönün asor mi anioput me fän meser, ifa usun, resap monei ngenikem fau?
EXO 8:27 Äm aipwe fokun sai lon ükükün ülüngat rän lon fanüapö pwe aipwe asor ngeni ewe Samol mi Lapalap äm we Kot, usun a allük ngenikem.”
EXO 8:28 Nge Farao a üreniir, “Üpwe mwüt ngenikemi pwe oupwe feila o asor ngeni ewe Samol mi Lapalap ämi we Kot lon fanüapö, nge ousap chök feila toau. Oupwe pwal iotekin tüngor fän itei.”
EXO 8:29 Iwe, Moses a üra, “Nengeni, lupwen üpwe feila senuk, üpwe iotek ngeni ewe Samol mi Lapalap pwe lesor ekewe pwiin loong repwe sü senuk, seni noum kewe nöüwis me noum kewe aramas. Nge en Farao kosap chüen atupukem ren om kosap mwüt ngeni ekewe aramas pwe repwe feila o asor ngeni ewe Samol mi Lapalap.”
EXO 8:30 Mürin, Moses a towu seni fän mesen Farao o iotek ngeni ewe Samol mi Lapalap.
EXO 8:31 Iwe, ewe Samol mi Lapalap a föri usun mine Moses a tüngor. A asüela ekewe pwiin loong seni Farao, seni nöün kewe nöüwis me nöün kewe aramas. Esap nonom mwo eman.
EXO 8:32 Nge Farao a chök tipeförea pwal lon ei fansoun, pwe esap mwüt ngeni ekewe aramas pwe repwe feila.
EXO 9:1 Mürin, ewe Samol mi Lapalap a üreni Moses, “Kopwe feila ren Farao o kapas ngeni, ‘Iei alon ewe Samol mi Lapalap än chon Ipru we Kot, “Kopwe mwüt ngeni nei aramas pwe repwe feila o fel ngeniei.
EXO 9:2 Pun ika kosap mochen mwüt ngeniir pwe repwe feila, nge ka pwal chök amwöchüür,
EXO 9:3 Ngang ewe Samol mi Lapalap üpwe afeiengaua noum man mi nom lemäl ren eu mäfeiengau. Üpwe afeiengaua ekewe oris, ekewe aas, ekewe kamel, ekewe kow me ekewe sip.
EXO 9:4 Nge üpwe aimwü lefilen nöün chon Israel man me nöün chon Isip man, pwe esap wor eman me lein nöün chon Israel man epwe mäla.” ’”
EXO 9:5 Iwe, ewe Samol mi Lapalap a filätä eu rän o apasa, “Lesor ngang ewe Samol mi Lapalap üpwe awarato feiengau won ei fanü.”
EXO 9:6 Iwe, sorotän ewe rän, ewe Samol mi Lapalap a awarato ewe feiengau. Ekewe man meinisin nöün chon Isip ra mäla, nge esap wor eman me lein nöün chon Israel man a mäla.
EXO 9:7 Farao a tinala eman pwe epwe sachei, nge a pwä pwe esap wor eman me lein nöün chon Israel man a mäla. Nge Farao a fen tipeföreala, pwe esap mochen mwüt ngeni ekewe aramas pwe repwe feila.
EXO 9:8 Mürin, ewe Samol mi Lapalap a üreni Moses me Aaron, “Oupwe tukei ngeni pöümi falang seni eu lenien um mi watte. Iwe, Moses epwe moneetä läng me fän mesen Farao,
EXO 9:9 nge epwe wiliti pwülümoromor won unusen ewe fanü Isip. Iwe, ewe pwülümoromor epwe afisätä mach mi usun ruup won aramas me man lon unusen ewe fanü Isip.”
EXO 9:10 Iei mine ra tukei falang seni eu lenien um mi watte, ra ütä me fän mesen Farao, nge Moses a moneetä läng. Iwe, a afisätä mach mi usun ruup won aramas me man.
EXO 9:11 Ekewe sourong resap tongeni ütä mwen Moses pokiten inisir a kula ren mach, pun ekewe sourong me chon Isip meinisin ra mach.
EXO 9:12 Nge ewe Samol mi Lapalap a atipeföreai Farao pwe esap aüselinga Moses me Aaron, usun mine ewe Samol mi Lapalap a fen üreni Moses.
EXO 9:13 Mürin, ewe Samol mi Lapalap a üreni Moses, “Kopwe pwätä lesosorusich pwe kopwe ütä fän mesen Farao o kapas ngeni, ‘Iei alon ewe Samol mi Lapalap än chon Ipru we Kot, “Kopwe mwüt ngeni nei aramas pwe repwe feila o fel ngeniei.
EXO 9:14 Lon ei fansoun üpwe tinätiu womw pwal won noum kewe nöüwis me noum kewe aramas unusen ai kewe afeiengau meinisin, pwe kopwe silei pwe esap wor eman won unusen fanüfan mi wewe ngeniei.
EXO 9:15 Üa fen tongeni aitiela pei o afeiengauok me noum kewe aramas ren mätter, pwe manauemi epwe müchüla me won fanüfan.
EXO 9:16 Nge üa mwüt ngonuk pwe kopwe manau tori ikenai, pwe üpwe pwäri ngonuk ai manaman, pwe itei epwe föüla won unusen fanüfan.
EXO 9:17 Pokiten ka chüen lamalamtekia ngeni nei aramas ren om kosap mwüt ngeniir pwe repwe feila,
EXO 9:18 lesor lon ei otun üpwe apüngätiu ütten fau mi chou won ei fanü, esap mwo fis ei sokun fän eu lon Isip seni poputän mwün tori ikenai.
EXO 9:19 Iei mine kopwe titila pwe repwe emwenala noum man lon lenien op, pwal meinisin mine a nom lemäl. Pun aramas me man meinisin mi nom lemäl nge resap op, repwe mäla ren ewe ütten fau epwe püngütiu wor.” ’”
EXO 9:20 Iwe, iö mi niueiti alon ewe Samol mi Lapalap me lein nöün Farao kewe nöüwis, a amüttiri le asüelong le imw ekewe aramas a nöüniir amanau me nöün man.
EXO 9:21 Nge iö esap afäli alon ewe Samol mi Lapalap, a chök likitala lemäl ekewe aramas a nöüniir amanau me nöün man.
EXO 9:22 Mürin, ewe Samol mi Lapalap a üreni Moses, “Kopwe aitietä poum läng pwe epwe püngütiu ütten fau won unusen ewe fanü Isip, won aramas me man, pwal won ekewe irän lemäl.”
EXO 9:23 Iwe, lupwen Moses a aitietä wokun läng, ewe Samol mi Lapalap a tinätiu chopulap, ütten fau me fifi mi küri fanü. Iei usun ewe Samol mi Lapalap a apüngätiu ütten fau won ewe fanü Isip.
EXO 9:24 Iwe, ei ütten fau mi püngütiu fiti fifi, eu ütten fau mi fokun chou, esap mwo fis ei sokun fän eu lon Isip seni poputän mwün.
EXO 9:25 Ei ütten fau a ni aramas me man meinisin mi nom lemäl won unusen ewe fanü Isip, a pwal atai iräkis me irämong meinisin mi nom lemäl.
EXO 9:26 Nge lon chök ewe fanü Kosen, ewe ia ekewe aramasen Israel ra nom ie, esap püngütiu ütten fau.
EXO 9:27 Mürin, Farao a titi Moses me Aaron o üreniir, “Üa tipis lon ei fansoun. Ewe Samol mi Lapalap a pwüng, nge ngang me nei kewe aramas aia mwäl.
EXO 9:28 Oupwe iotekin tüngor ngeni ewe Samol mi Lapalap pwe epwe aükätiu ewe chopulap me ütten fau, pun a kon lapalap. Üpwe mwüt ngenikemi pwe oupwe feila, nge üsap chüen amwöchükemi.”
EXO 9:29 Moses a üreni Farao, “Lon ewe otun üpwe towu seni ei telinimw, üpwe aitietä pei o iotek ngeni ewe Samol mi Lapalap. Iwe, ewe chopulap epwe kaüla, esap pwal chüen püng ütten fau. Ren ei kopwe silei pwe ewe Samol mi Lapalap a fanüeni fanüfan.
EXO 9:30 Nge üa silei pwe en me noum kewe nöüwis ousap mwo niueiti Kot ewe Samol mi Lapalap.”
EXO 9:31 Iwe, ekewe irä iter fläks me parli ra tala, pun ekewe parli ra ua, nge ekewe fläks ra et.
EXO 9:32 Nge ekewe irä iter wiich me spelt resap ta, pun ra pwükümang.
EXO 9:33 Moses a feila seni Farao o towu lükün ewe telinimw, a aitietä pöün o iotek ngeni ewe Samol mi Lapalap. Iwe, ewe chopulap me ütten fau ra kaüla, nge ewe üt ese chüen püngütiu won fanüfan.
EXO 9:34 Nge lupwen Farao a küna pwe ewe üt, ewe ütten fau me ewe chopulap ra kaüla, a pwal tipissefäl. I me nöün kewe nöüwis ra chök tipeförea usun me mwan.
EXO 9:35 Iei usun Farao a chök tipeförea, pwe esap mwüt ngeni ekewe aramas pwe repwe feila, usun mine ewe Samol mi Lapalap a fen kapas ngeni Moses.
EXO 10:1 Mürin, ewe Samol mi Lapalap a kapas ngeni Moses, “Kopwe feila ren Farao, pun ngang üa fen aföreai letipan me letipen nöün kewe nöüwis, pwe üpwe föri ekewe manaman me leir.
EXO 10:2 Nge en kopwe eäni apworaus ngeni noum me nöün noum mine üa föri ngeni chon Isip, pwal usun ekewe manaman üa föri me leir. Ren ei oupwe silei pwe ngang ewe Samol mi Lapalap.”
EXO 10:3 Iwe, Moses me Aaron ra feila ren Farao o üreni, “Iei alon ewe Samol mi Lapalap än chon Ipru we Kot, ‘Ifa ükükün fansoun om kosap mochen atekisonok me fän mesei? Kopwe mwüt ngeni nei aramas pwe repwe feila o fel ngeniei.
EXO 10:4 Pun ika kosap mochen mwüt ngeni nei aramas pwe repwe feila, lesor üpwe le awarato lifichimas lon fanüom.
EXO 10:5 Repwe pwölüela unusen ewe fanü, pwe ewe pwül esap chüen ling. Iwe, repwe eni met lusun ewe ütten fau esap atai, repwe pwal eni fotämi irä meinisin mi nom lemäl.
EXO 10:6 Iwe, imwom epwe ur rer, pwal imwen noum kewe nöüwis me imwen chon Isip meinisin. Sememi me semen sememi resap mwo küna ei sokun fän eu, seni fansoun ar uputiu tori ikenai.’” Mürin, Moses a kul seni Farao o feila.
EXO 10:7 Mürin, nöün Farao kewe nöüwis ra aisini Farao, “Ifa ükükün fansoun än ewe mwän epwe afeiengauakich? Kopwe mwüt ngeni ekewe mwän pwe repwe feila o fel ngeni ewe Samol mi Lapalap ar we Kot. Kose mwo silei pwe Isip a tala?”
EXO 10:8 Iwe, ra aliwinato Moses me Aaron ren Farao, nge a üreniir, “Oupwe feila pwe oupwe fel ngeni ewe Samol mi Lapalap ämi we Kot. Nge iö kana repwe feila?”
EXO 10:9 Moses a üreni, “Äm aipwe feila fiti nöüm kükün me chinlap, nöüm mwän me fefin pwal nöüm kewe sip me kow. Pun äm aipwe föri eu chulap ngeni ewe Samol mi Lapalap.”
EXO 10:10 Mürin, Farao a pälüeniir, “Ewe Samol mi Lapalap epwe etikemi ika üpwe mwüt ngenikemi me nöümi kana kükün pwe oupwe feila. A pwä pwe oua ekiekingau.
EXO 10:11 Apwi! Ämi mwän chök oupwe feila o fel ngeni ewe Samol mi Lapalap, pun iei ämi tüngor.” Iwe, ra asüela Moses me Aaron seni fän mesen Farao.
EXO 10:12 Mürin, ewe Samol mi Lapalap a üreni Moses, “Kopwe aitiela poum won ewe fanü Isip pwe ekewe lifichimas repwe feito won ewe fanü o eni irän lon, ekewe irä meinisin mi chüen nom mürin ewe ütten fau.”
EXO 10:13 Iei mine Moses a aitiela wokun won ewe fanü Isip, nge ewe Samol mi Lapalap a awarato asepwälin ötiu won ewe fanü lon unusen ewe rän me pwin. Nge sorotän ewe rän ewe asepwälin ötiu a fen awarato ekewe lifichimas.
EXO 10:14 Iwe, ekewe lifichimas ra wareiti unusen ewe fanü Isip o sotiu won. Ei sokun ochochen pwiin lifichimas ese mwo pwäpwä me mwan, esap pwal pwä me mürin.
EXO 10:15 Ekewe lifichimas ra pwölüela won unusen ewe fanü pwe a kiroch rer. Ra eni irän ewe fanü meinisin mi chüen nom mürin ewe ütten fau, pwal uän ekewe irä. Esap chüen wor och mi arauarau won ekewe irätam me iräkis won unusen ewe fanü Isip.
EXO 10:16 Iwe, Farao a müttir titi Moses me Aaron o üreniir, “Üa tipis ngeni ewe Samol mi Lapalap ämi we Kot, pwal ngenikemi.
EXO 10:17 Iei oupwe amusala ai tipis pwal fän eu, oupwe iotekin tüngor ngeni ewe Samol mi Lapalap ämi we Kot pwe epwe angasaei seni ei mäfeiengau.”
EXO 10:18 Mürin, Moses a feila seni Farao o iotekin tüngor ngeni ewe Samol mi Lapalap.
EXO 10:19 Iwe, ewe Samol mi Lapalap a siwili ewe asepwälin ötiu ngeni enienin lotou a ässätä ekewe lifichimas o pönirelong lon ewe Setipar. Esap fokun nonom mwo eman lifichimas lon unusen ewe fanü Isip.
EXO 10:20 Nge ewe Samol mi Lapalap a aföreai letipen Farao pwe esap mwüt ngeni ekewe aramasen Israel repwe feila.
EXO 10:21 Mürin, ewe Samol mi Lapalap a üreni Moses, “Kopwe aitietä poum läng pwe epwe fis rochopwak won ewe fanü Isip, eu rochopwak esap wor eman a tongeni emereirei lon.”
EXO 10:22 Iei mine Moses a aitietä pöün läng. Iwe, a fis rochopwak watte lon unusen ewe fanü Isip lon ükükün ülüngat rän.
EXO 10:23 Ekewe chon Isip resap tongeni künafengeniir, esap pwal wor eman mi mwöküt seni lenian lon ükükün ülüngat rän. Nge lon lenien aramasen Israel a wor saram.
EXO 10:24 Mürin, Farao a körato Moses o üreni, “Oupwe feila o fel ngeni ewe Samol mi Lapalap, nöümi ra pwal tongeni etikemi, nge oupwe chök likitätiu foleniemi sip me kow.”
EXO 10:25 Nge Moses a üreni, “Kopwe mwüt ngenikem man fän iten sokun asor me asoren kek, pwe aipwe tongeni asor ngeni ewe Samol mi Lapalap äm we Kot.
EXO 10:26 Äm aipwe pwal uwei foleniem man. Esap fokun wor eman leir epwe tiwetiu. Äm aipwe püsin angei seni foleniem man fän iten äm fel ngeni ewe Samol mi Lapalap äm we Kot. Äm aisap mwo silei meni sokun man ika ifa ükükün aipwe eäni asor ngeni ewe Samol mi Lapalap, tori aipwe tikeri ewe leni.”
EXO 10:27 Nge ewe Samol mi Lapalap a aföreai letipen Farao, pwe esap mwüt ngeniir pwe repwe feila.
EXO 10:28 Iwe, Farao a üreni Moses, “Kopwe sü seniei. Kopwe afäliik pwe kosap künasefäli mesei, pun lon ewe rän kopwe küna mesei kopwe fokun mäla.”
EXO 10:29 Nge Moses a üra, “Mi pwüng reöm. Üsap künasefäli mesom.”
EXO 11:1 Iwe, ewe Samol mi Lapalap a üreni Moses, “Mi chüen wor eu feiengau üpwe awarato won Farao pwal won chon Isip. Mürin epwe mwüt ngenikemi pwe oupwe feila. Nge lupwen epwe mwüt ngenikemi pwe oupwe feila, epwe asüfocheekemiila.
EXO 11:2 Kopwe asilei ngeni ekewe aramasen Israel, pwe eman me eman mwän pwal fefin epwe tüngor seni chon arun fout seni silifer me kolt.”
EXO 11:3 Iwe, ewe Samol mi Lapalap a fang ngeni ekewe aramas ümöümöch me ren ekewe chon Isip. Nge Moses a fokun iteföüla lon ewe fanü Isip fän mesen nöün Farao kewe nöüwis pwal fän mesen ekewe chon Isip.
EXO 11:4 Mürin, Moses a üreni Farao, “Iei alon ewe Samol mi Lapalap: Lukenipwinei üpwe asaifetal lemenen Isip.
EXO 11:5 Mwänichien lon ei fanü Isip meinisin repwe mäla, seni nöün Farao mwänichi, epwe siwili lon wisan wisen king, tori mwänichien nöün chon angang fefin amanau mi pwoni wiich, pwal tori mweinöün ekewe man meinisin.
EXO 11:6 Iwe, epwe wor ngüngüres mi leüömong won unusen ewe fanü Isip, eu ngüngüres esamwo fifis me mwan, esap pwal fissefäl.
EXO 11:7 Nge lein chon Israel esap wor eman aramas ika man epwe feiengau, sap mwo nge eman kolak epwe awuwu ngeniir. Ren ei oupwe silei pwe ngang ewe Samol mi Lapalap üa föri eu aimwü lefilen chon Isip me chon Israel.”
EXO 11:8 Iwe, Moses a sopwela le kapas, “Noum kei nöüwis meinisin repwe feito rei, repwe chapetiu fän mesei o tüngor rei, ‘Oupwe feila, en me ekana aramas meinisin ka wisen emweniir.’ Mürin üpwe feila.” Iwe, Moses a feila seni Farao fän watten an song.
EXO 11:9 Iwe, ewe Samol mi Lapalap a kapas ngeni Moses, “Farao esap fokun aüselingakemi, pwe ai kewe manaman repwe chomongola lon ewe fanü Isip.”
EXO 11:10 Mürin, Moses me Aaron ra föri ekei manaman meinisin fän mesen Farao. Nge ewe Samol mi Lapalap a aföreai letipen Farao, pwe esap mwüt ngeni ekewe aramasen Israel pwe repwe towu seni fanüan.
EXO 12:1 Iwe, ewe Samol mi Lapalap a üreni Moses me Aaron lon ewe fanü Isip,
EXO 12:2 “Ei maram epwe iei aeuin maramen ier ngenikemi.
EXO 12:3 Kopwe kapas ngeni ekewe chon Israel, pwe lon engolun pwinin ei maram eman me eman mwän epwe angei eman lam fän iten en me an famili, eman lam nge eu famili.
EXO 12:4 Nge ika eu famili a chokükün pwe esap it eman lam rer, repwe inetfengen won me chon arur. Repwe püsin aükü ükükün fiteman aramas repwe eti, pwal ükükün ochän eman.
EXO 12:5 Ewe man oupwe afili, epwe eman ätemwän eu ierin esap wor terin. Oupwe angei seni me lein ekewe pwiin sip ika kuuch.
EXO 12:6 Oupwe iseis ekewe lam tori engol me rüanün pwinin ei maram. Nge lekuniolupwin unusen ewe mwichen chon Israel repwe niela nöür lam.
EXO 12:7 Mürin repwe angei ekis chan ewe lam o tofi ngeni penkasamen imwer lepekin me ruepek, pwal me asan, ewe ia ra ochoch ewe lam ie.
EXO 12:8 Iwe, lon ewe pwin repwe arapa fitukan o ochoch fiti pilawa esap wor iis lon me chön irä mi kipwin.
EXO 12:9 Ousap ochamas ika kuku lon koluk, nge oupwe arapa fiti möküran me pechen pwal masouen lon.
EXO 12:10 Iwe, ousap fokun likiti ekis lusun tori lesosor. Nge mine esap it remi tori lesosor oupwe kenala.
EXO 12:11 Epwe iei usun lapalapemi le mongö: Oupwe ri lukalapemi, oupwe ipweip sus o amwöchü wokumi lepöümi. Oupwe tawat le mongö. Ei Pasofer än ewe Samol mi Lapalap.
EXO 12:12 Pun lon ewe pwinin üpwe fetalfeil lon ewe fanü Isip o niela ekewe mwänichi meinisin lein aramas me ekewe mweinöün man. Iwe, üpwe awarato ai apwüng won ekewe koten Isip meinisin, pun ngang ewe Samol mi Lapalap.
EXO 12:13 Ewe cha epwe eu asisilen imwemi, pun lupwen üpwe küna ewe cha, üpwe lus me womi. Esap wor feiengau epwe kükemi, lupwen üpwe afeiengaua ekewe chon Isip.
EXO 12:14 Ei rän epwe eu ränin chulap fän itemi. Lon ei rän oupwe chechemeni mine ngang ewe Samol mi Lapalap üa föri. Seni eu täppin aramas tori eu täppin oupwe föri pwüngün ei rän tori feilfeilachök.
EXO 12:15 Lon ükükün fisu rän oupwe mongö pilawa esap wor iis lon. Lon aeuin rän oupwe atowu ewe pilawa a wor iis lon me lon imwemi, pun ika eman me leimi epwe mongö och fiti iis seni aeuin rän tori afisuan, epwe käriwu me lein chon Israel.
EXO 12:16 Iwe, lon aeuin rän oupwe föri eu mwich mi pin, pwal lon ewe afisuen rän. Ousap angang lon ekana rän, mine chök oupwe eni oupwe amolätä.
EXO 12:17 Oupwe föri ewe chulapen mongö pilawa esap wor iis lon, pun lon ewe rän üa emwenawu ämi mwicheichen aramas seni lon ewe fanü Isip. Iei mine oupwe föri pwüngün ei rän seni eu täppin aramas tori eu täppin feilfeilachök.
EXO 12:18 Iwe, lekuniolupwinin ewe engol me rüanün ränin ewe aeuin maram oupwe mongö pilawa esap wor iis lon tori lekuniolupwinin ewe rüe me aeuin rän.
EXO 12:19 Iwe, lon ükükün fisu rän esap wor lon imwemi pilawa mi wor iis lon, pun ika eman epwe mongö och fiti iis, epwe käriwu me lein ekewe aramasen Israel. Ese lifilifil ika i eman chon ekis ika i eman chon wilipos.
EXO 12:20 Ousap fokun mongö och fiti iis, pun lon leniemi meinisin oupwe chök mongö pilawa esap wor iis lon.”
EXO 12:21 Mürin, Moses a körato ekewe souakomwen Israel meinisin o üreniir, “Oupwe afili ekewe man fän itemi ükükün chochon ämi famili o niela ewe lamen Pasofer.
EXO 12:22 Iwe, oupwe angei ulun ewe irä itan isop o otukalong lon ewe sepien cha. Mürin oupwe tofi ewe cha ngeni penkasamen imwemi lepekin me ruepek pwal asan. Nge esap wor eman epwe towu seni imwan tori lesosor.
EXO 12:23 Pun ewe Samol mi Lapalap epwe fetalfeil lon ewe fanü pwe epwe niela chon Isip. Nge lupwen epwe küna ewe cha won penkasamen imwemi lepekin me ruepek pwal asan, epwe lus me won imwemi. Iwe, esap mwüt ngeni ewe chon ninni epwe tolong lon imwemi o niikemi.
EXO 12:24 Oupwe föri pwüngün ei rän fän itemi pwal fän iten nöümi kana tori feilfeilachök.
EXO 12:25 Iwe, lupwen oupwe tori ewe fanü ewe Samol mi Lapalap a pwon pwe epwe ngenikemi, oupwe tümwünü pwüngün angangen ei rän.
EXO 12:26 Pun lupwen nöümi repwe aisinikemi, ‘Met wewen ei angang?’,
EXO 12:27 oupwe üreniir, ‘Iei asorun än ewe Samol mi Lapalap Pasofer. Pun a lus me won imwen ekewe aramasen Israel lon Isip, lupwen a niela ekewe re Isip, nge esap niikich.’” Mürin, ekewe aramas ra chapetiu o fel ngeni Kot.
EXO 12:28 Iwe, ekewe aramasen Israel ra feila o föri meinisin usun mine ewe Samol mi Lapalap a allük ngeni Moses me Aaron.
EXO 12:29 Iwe, lukenipwin ewe Samol mi Lapalap a niela mwänichi meinisin lon ewe fanü Isip, seni nöün Farao mwänichi epwe siwili lon wisan wisen king, tori mwänichien nöün chon fötek mi nom lon imwen fötek, pwal mweinöün ekewe man meinisin.
EXO 12:30 Iwe, Farao a pwätä lon ewe pwinin, i me nöün kewe nöüwis me chon Isip meinisin. Iwe, a fokun wor kechü me ngüngüres watte lon Isip, pun lon imw meinisin a wor mönümä.
EXO 12:31 Nge lon chök ewe pwinin Farao a titi Moses me Aaron o üreniir, “Oupwe towu seni lein nei aramas, ämi me ekewe aramasen Israel. Oupwe feila! Oupwe fel ngeni ewe Samol mi Lapalap, usun oua fen apasa.
EXO 12:32 Oupwe angei nöümi sip me kow o feila usun oua fen apasa, nge oupwe pwal afeiöchüei.”
EXO 12:33 Iwe, ekewe chon Isip ra pesei ngeni ekewe chon Israel pwe repwe müttir towu seni ewe fanü, pun ra apasa, “Kich meinisin sipwe le mäla.”
EXO 12:34 Iwe, ekewe aramas ra angei ener pilawa mi öüwöü esamwo wor iis lon fiti sepier le öüwöü o firoskini, pwe repwe öüafara.
EXO 12:35 Nge ekewe aramasen Israel ra fen föri usun mine Moses a üreniir, pun ra tüngor seni ekewe chon Isip fout seni silifer me kolt pwal mangaku.
EXO 12:36 Iwe, ewe Samol mi Lapalap a ngeni ekewe aramas ümöümöch me ren ekewe chon Isip, pwe ra mwüt ngeniir mine ra tüngor. Iei usun ra angeala wöün chon Isip.
EXO 12:37 Iwe, ekewe aramasen Israel ra sai seni Rameses, pwe repwe sai ngeni Sukot. Iteiten ekewe mwän mi asai wonopükü ngeröü lükün fefin me semirit.
EXO 12:38 Pwal chomong sokopaten mwichen aramas ra etiir fiti chomong pwiin sip me kow.
EXO 12:39 Ra umuni ewe pilawa esap wor iis lon ra uweela seni Isip. Pokiten chon Isip ra asürela, resap tongeni witiwit pwe ewe pilawa epwe po, resap pwal tongeni amolätä amötür.
EXO 12:40 Iwe, ekewe aramasen Israel ra nonom Isip lon ükükün föpükü ilik ier.
EXO 12:41 Lon amüchülan ränin ekewe föpükü ilik ier, ekewe mwicheichen aramas än ewe Samol mi Lapalap meinisin ra towu seni ewe fanü Isip.
EXO 12:42 Nge lon ewe pwinin ewe Samol mi Lapalap a mamas pwe epwe emwenirewu seni ewe fanü Isip. Iei mine ekewe aramasen Israel repwe mamas lon ei pwinin pwe repwe asamolu ewe Samol mi Lapalap, seni eu täppin aramas tori eu täppin.
EXO 12:43 Iwe, ewe Samol mi Lapalap a kapas ngeni Moses me Aaron, “Iei allükün ewe Pasofer: Esap wor eman re ekis epwe mongö seni.
EXO 12:44 Nge iteiten amanau mi mön moni ra tongeni mongö seni mürin ar sirkomsais.
EXO 12:45 Esap wor eman chon siamü ika chon angang mi angei liwin epwe tongeni mongö seni.
EXO 12:46 Oupwe mongö ewe mongön Pasofer lon en me imwan, nge ousap uweela och fituk lükün imwemi. Ousap kupi efoch chün ewe lamen Pasofer.
EXO 12:47 Iwe, ekewe chon Israel meinisin repwe föri pwüngün ei rän.
EXO 12:48 Nge ika eman re ekis mi nom remi a mochen choni ewe mongön Pasofer än ewe Samol mi Lapalap, mwänin lon an we famili meinisin repwe akomwen sirkomsais. Mürin epwe tongeni choni. Iwe, epwe usun chök eman re wiliposun ewe fanü. Nge eman esap sirkomsais esap tongeni mongö seni.
EXO 12:49 Iwe, epwe eu chök allük fän iten ekewe re wilipos me re ekis mi nom remi.”
EXO 12:50 Iei usun ekewe aramasen Israel ra föri meinisin mine ewe Samol mi Lapalap a allük ngeni Moses me Aaron.
EXO 12:51 Iwe, lon ewe chök ränin ewe Samol mi Lapalap a emwenawu ekewe aramasen Israel lon mwicheicher seni lon ewe fanü Isip.
EXO 13:1 Iwe, ewe Samol mi Lapalap a üreni Moses,
EXO 13:2 “Oupwe apini fän itei ekewe mwänichi meinisin. Iwe, meinisin mine a akomwen uputiu lein aramas me man lon Israel nei.”
EXO 13:3 Iwe, Moses a üreni ekewe aramas, “Oupwe chechemeni ei rän, ewe rän oua towu seni Isip, ewe leni ia ra nöünikemi amanau ie. Pun lon ei rän ewe Samol mi Lapalap a emwenikemiiwu ren pöün mi manaman. Ousap mongö pilawa mi wor iis lon.
EXO 13:4 Pun lon ei rän fän ewe maram Apip oua towu seni Isip.
EXO 13:5 Iwe, lupwen ewe Samol mi Lapalap epwe emwenikemiilong lon ewe fanüen chon Kanaan, chon Hit, chon Amor, chon Hiw me chon Jepus, ewe fanü i a pwon fän akapel ngeni ämi kewe lewo pwe epwe ngeniir, eu fanü mi pwülüöch me fanüeräs, oupwe föri ei angang iteiten ier lon ei chök maram.
EXO 13:6 Oupwe mongö pilawa esap wor iis lon lon ükükün fisu rän, nge lon ewe afisuen rän oupwe föri eu chulap ngeni ewe Samol mi Lapalap.
EXO 13:7 Oupwe fokun mongö pilawa esap wor iis lon lon ükükün fisu rän. Esap wor pilawa mi wor iis lon epwe pwä remi, esap pwal wor iis epwe pwä lon leniemi meinisin.
EXO 13:8 Lon ewe rän oupwe awewei ngeni en me nöün mwän, ‘Iei achechemenien usun mine ewe Samol mi Lapalap a föri ngeniei, lupwen üa towu seni Isip.’
EXO 13:9 Ei epwe usun chök eu asisil won pöümi pwal eu pisekin achem won chamwemi, pwe oupwe chök leaweni än ewe Samol mi Lapalap kewe allük. Pun ewe Samol mi Lapalap a emwenikemiiwu seni Isip ren pöün mi manaman.
EXO 13:10 Iei mine oupwe föri pwüngün ei angang iteiten ier, lupwen a tori fansoun.”
EXO 13:11 “Iwe, lupwen ewe Samol mi Lapalap epwe emwenikemiilong lon ewe fanü Kanaan o fang ngenikemi ewe fanü usun a fen pwon fän akapel ngenikemi me ämi kewe lewo,
EXO 13:12 oupwe aimwüela fän iten ewe Samol mi Lapalap ät meinisin mi akomwen uputiu. Ekewe ätemwänin man meinisin mi akomwen uputiu repwe nöün ewe Samol mi Lapalap.
EXO 13:13 Iwe, iteiten ätemwänin aas meinisin mi akomwen uputiu epwe akasiwil ngeni eman lam. Nge ika ousap mochen akasiwili, oupwe kupi üen ewe aas. Iteiten eman me eman mwänichi me lein nöümi mwän oupwe möni.
EXO 13:14 Nge ika nöümi mwän repwe aisinikemi lon kan rän mwach, ‘Met wewen ei föför?’, oupwe üreniir, ‘Ewe Samol mi Lapalap a emwenikeemiwu seni Isip ren pöün mi manaman, ewe leni ia ra nöünikem amanau ie.
EXO 13:15 Pun lupwen Farao a tipeförea ren an esap mochen mwüt ngenikem pwe aipwe feila, ewe Samol mi Lapalap a niela mwänichien ewe fanü Isip meinisin, mwänichien aramas me mweinöün man. Iei mine aia eäni asor ngeni ewe Samol mi Lapalap ätemwänin man meinisin mi akomwen uputiu. Nge ekewe mwänichien lein nöüm mwän aia möni.’
EXO 13:16 Ei epwe usun chök eu asisil won pöümi pwal eu pisekin achem won chamwemi. Pun ewe Samol mi Lapalap a emwenikichewu seni Isip ren pöün mi pöchökül.”
EXO 13:17 Iwe, lupwen Farao a mwüt ngeni ekewe aramas pwe repwe towu seni Isip, Kot esap emwenirela won alen fanüen chon Filistia, inamwo ika a mochomoch. Pun Kot a apasa, “Eli ekewe aramas repwe ekieksefäl o liwiniti Isip, lupwen epwe toriir maun.”
EXO 13:18 Iei mine Kot a emwenirela lükün ewe fanü won efoch al mi alelong lon fanüapö tori ewe Setipar. Iwe, ekewe aramasen Israel ra towu seni Isip fän ar pisekin maun.
EXO 13:19 Nge Moses a uwei chün Josef usun i a tüngorei ekewe aramasen Israel repwe pwon fän akapel pwe repwe uwei chün. Pun Josef a apasa, “Kot epwe fokun alisikemi, nge lupwen oupwe towu, oupwe uwei chüi seni ikei.”
EXO 13:20 Iwe, ekewe chon Israel ra feil seni Sukot o tori Etam mi nom ünükün ewe fanüapö. Ikenan ra asösö.
EXO 13:21 Nge ewe Samol mi Lapalap a akakom mwer. A emweniir won aler lerän ren eu ürekuchu, nge lepwin ren eu üreekkei pwe epwe ngeniir saram. Iei usun ra tongeni sai lerän me lepwin.
EXO 13:22 Ewe ürekuchu esap feil seni ekewe aramas lerän, pwal ewe üreekkei esap feil seniir lepwin.
EXO 14:1 Iwe, ewe Samol mi Lapalap a üreni Moses,
EXO 14:2 “Kopwe üreni ekewe aramasen Israel pwe repwe liwinsefäl o asösö sasape ngeni Pihahirot lefilen Miktol me ewe Setipar. Iwe, repwe asösö arun ewe Setipar akawenewenen Paalsefon.
EXO 14:3 Pun Farao epwe ekieki pwe ekewe aramasen Israel ra rukola lon ewe fanü o mwöchülong lon fanüapö.
EXO 14:4 Iwe, ngang üpwe aföreai letipen Farao pwe epwe tapweriir. Pun üpwe alinga itei won Farao me nöün mwicheichen sounfiu, pwe chon Isip meinisin repwe silei pwe ngang ewe Samol mi Lapalap.” Iwe, ekewe chon Israel ra föri iei usun.
EXO 14:5 Iwe, lupwen ra apworausa ngeni ewe kingen Isip pwe ekewe aramasen Israel ra sü, Farao me nöün kewe nöüwis ra siwili ar ekiek fän iter. Ra apasa, “Met ei sa föri? Pwota sa mwüt ngeni ekewe chon Israel pwe ra towu seni ar angang ngenikich?”
EXO 14:6 Iei mine Farao a anükünükü wan woken me oris o emwichato nöün sounfiu.
EXO 14:7 A nuki wonopükü woken me oris mi nükünüköch, pwal meinisin lusun wokenin me orisin Isip, nge a wor eman meilap won iteiten efoch me efoch.
EXO 14:8 Nge ewe Samol mi Lapalap a aföreai leluken Farao ewe kingen Isip, pwe a tapweri ekewe aramasen Israel, lupwen ra töpworawu.
EXO 14:9 Iwe, ewe pöisein Isip meinisin wän Farao oris me woken, fiti sounfiu mi wawa oris me sounfiu mi fetal ra tapweriir o toriir, lupwen ra asösö arosetin Pihahirot akawenewenen Paalsefon.
EXO 14:10 Lupwen Farao a arap ngeniir, ekewe aramasen Israel ra chimwätä o küna pwe ekewe chon Isip ra telito müriir. Iwe, ra fokun niuokus o siö ngeni ewe Samol mi Lapalap.
EXO 14:11 Ra üreni Moses, “Ifa usun, esap wor lenien peias lon Isip, pwe ka emwenikeemiwu pwe aipwe mäla lon fanüapö? Pwota ka föri iei usun ngenikem pwe ka emwenikeemiwu seni Isip?
EXO 14:12 Esap iei usun mine äm aia ürenuk me Isip, pwe kopwe chök likitikeemila pwe aipwe angang ngeni ekewe chon Isip? Pun epwe fen mürina ngenikem pwe ekewe chon Isip repwe nöünikem amanau, lap seni äm aipwe mäla lon fanüapö.”
EXO 14:13 Nge Moses a üreni ekewe aramas, “Ousap niuokus, oupwe üpos o nengeni usun än ewe Samol mi Lapalap amanauakemi ikenai. Pun ekewe re Isip oua küneer ikenai, ousap chüen künasefäliir.
EXO 14:14 Ewe Samol mi Lapalap epwe fiu fän itemi, nge ämi oupwe chök fanafanala.”
EXO 14:15 Mürin, ewe Samol mi Lapalap a üreni Moses, “Pwota ka siö ngeniei? Kopwe üreni ekewe aramas pwe repwe chök feila mwer.
EXO 14:16 Iwe, en kopwe aitietä wokum o aitiela poum won ewe sät pwe kopwe kinifeseni, pwe ekewe aramasen Israel repwe fetal won pwasapwas epin ewe sät.
EXO 14:17 Nge ngang üpwe aföreai letipen chon Isip pwe repwe tapwelong müriir. Iwe, üpwe alingaei won Farao me nöün mwicheichen sounfiu, won wan woken me oris, pwal won nöün sounfiu mi wawa oris.
EXO 14:18 Iwe, ekewe chon Isip repwe silei pwe ngang ewe Samol mi Lapalap, lupwen üpwe pwärala ai ling won Farao me wan woken me oris, pwal won nöün sounfiu mi wawa oris.”
EXO 14:19 Mürin, nöün Kot we chon läng mi akom mwen ewe mwicheichen chon Israel a feila lükisökürür. Pwal ewe ürekuchu a mwöküt seni mwer o ütä lükisökürür,
EXO 14:20 pwe epwe nonom lefilen ewe mwicheichen re Isip me ewe mwicheichen chon Israel. Lon ewe pwinin, ewe ürekuchu a rochopwak kuku ngeni ekewe re Isip, nge a asarama kuku ngeni chon Israel, pwe resap tongeni chufengen lon unusen ewe pwin.
EXO 14:21 Mürin, Moses a aitiela pöün won ewe sät, nge ewe Samol mi Lapalap a aliwini ewe sät ren enienin ötiu mi fokun pöchökül lon unusen ewe pwin, pwe ewe sät a pwasatä, nge ewe lölö a kinikinfesen.
EXO 14:22 Iwe, ekewe aramasen Israel ra fetal lukalapen ewe sät won pwasapwas, nge ewe lölö a usun chök etip lepelifichir me lepelimöngür.
EXO 14:23 Iwe, ekewe re Isip pwal nöün Farao oris, wan woken me nöün sounfiu mi wawa oris meinisin ra tapwerirelong lukalapen ewe sät.
EXO 14:24 Nge wünümweerän ewe Samol mi Lapalap a netiu me lon ewe üreekkei me ürekuchu won ekewe mwicheichen re Isip o afitikokoor,
EXO 14:25 pun a mwöch willen war woken, pwe ra weires le kul. Iwe, ekewe re Isip ra apasa, “Ousipwe sü seniir, pun ewe Samol mi Lapalap a peni chon Israel o fiu ngenikich.”
EXO 14:26 Mürin, ewe Samol mi Lapalap a üreni Moses, “Kopwe aitiela poum won ewe sät pwe lölön lon epwe liwinfengen won ekewe re Isip, won war woken pwal won nöür sounfiu mi wawa oris.”
EXO 14:27 Iei mine Moses a aitiela pöün won ewe sät, nge lesosorusich ewe sät a liwinfengen usun chök me mwan. Iwe, ekewe re Isip ra süwu me lon, nge ewe Samol mi Lapalap a amopuretiu lukalapen ewe sät.
EXO 14:28 Lölön lon a liwinfengen o pwölüela ekewe woken me ekewe sounfiu mi wawa oris, nöün Farao mwichen sounfiu meinisin mi tapweralong chon Israel lon ewe sät. Esap fokun wor eman leir a chüen manau.
EXO 14:29 Iwe, ekewe aramasen Israel ra fetal won pwasapwas epin ewe sät, nge ewe lölö a usun chök etip lepelifichir me lepelimöngür.
EXO 14:30 Lon ena rän ewe Samol mi Lapalap a amanaua chon Israel seni ekewe re Isip. Iwe, ekewe chon Israel ra küna somän ekewe re Isip arosetin ewe leni.
EXO 14:31 Lupwen ekewe chon Israel ra küna än ewe Samol mi Lapalap manaman a föri ngeni ekewe re Isip, ra meniniti ewe Samol mi Lapalap, ra pwal lükü i me nöün we chon angang Moses.
EXO 15:1 Mürin, Moses me ekewe aramasen Israel ra köl ei köl ngeni ewe Samol mi Lapalap, “Üpwe köl ngeni ewe Samol mi Lapalap, pun an win a fokun amwarar. A aturalong lon ewe sät ewe oris me ewe mi wisen wawa.
EXO 15:2 Ewe Samol mi Laplap ai pöchökül me ai köl, i a amanauaei. I ai Kot, üpwe mwareiti, i än semelapei we Kot, üpwe alinga.
EXO 15:3 Ewe Samol mi Lapalap eman soumaun, itan Samol mi Lapalap.
EXO 15:4 A aturalong leset nöün Farao woken me oris, pwal nöün mwicheichen sounfiu. Nöün meilapen sounfiu mi lipwäköch ra mop lon ewe Setipar.
EXO 15:5 Iwe, lölön lon a pwölürela, ra kokotiu epin ewe sät usun eföü fau.
EXO 15:6 Ai Samol mi Lapalap, pöüifichum a lingela lon an manaman. Ai Samol mi Lapalap, pöüifichum a atatakisi chon oputok.
EXO 15:7 Lon unusen om manaman ka aturätiu chokewe mi pälüenuk, ka tinato om song mi pöchökül, pwe a fisiir usun fetilipwas.
EXO 15:8 Ren enienin lon pwötum ewe sät a chukuchukutä, ewe lölön lon a ütä usun etip, epin ewe sät a pöchökülela me lukalapan.
EXO 15:9 Ewe chon oputakem a apasa, ‘Üpwe tapweriir, üpwe liapeniir o ineti liapei, üpwe ameseikaei wor. Iwe, üpwe üttawu nei ketilas, pei epwe aroserela.’
EXO 15:10 Nge en ka pönato asepwälum, ewe sät a pwölürela, ra kokotiu usun pilom lon ewe lölö mi lapalap.
EXO 15:11 Ai Samol mi Lapalap, iö a wewe ngonuk lein ekewe kot? Iö a wewe ngonuk lon om pin mi tekia, pwal lon om föför mi ling o eniwokus me lon om föri manaman?
EXO 15:12 Ka aitiewu pöüifichum, nge fanüfan a oromala chon oputem.
EXO 15:13 Lon om tong ellet ka emweni ekewe aramas ka amanaueer, ka emwenirela ren om pöchökül ngeni leniom mi pin.
EXO 15:14 Lupwen chon ekewe mwü ra rongorong usun, ra chechech, niuokus watte a tori ekewe chon Filistia.
EXO 15:15 Ekewe samolun Etom ra fokun niuokus, ekewe aramas mi pwora seni Moap ra chechech, nge chokewe ra nonom lon Kanaan ra fokun rükö ren ar niuokus.
EXO 15:16 Niuokus me rükö a feitiu wor. Ai Samol mi Lapalap, pokiten manamanen poum ir ra chouchoula usun eföü fau, tori noum aramas ra nuula, tori chokewe ka angaseer ra nuula.
EXO 15:17 Ai Samol mi Lapalap, en kopwe emwenirelong lon ewe fanü o fotukiretiu won chukum, ewe leni ka püsin föri pwe kopwe nonom lon, ewe leni mi pin ka afisätä ren poum, ai Samol mi Lapalap.
EXO 15:18 En Samol mi Lapalap kopwe nemenem tori feilfeilachök.”
EXO 15:19 Ekewe aramasen Israel ra fetal won pwasapwasen epin ewe sät. Nge lupwen nöün Farao oris me wan woken pwal nöün sounfiu mi wawa oris ra pwal tolong lon, ewe Samol mi Lapalap a aliwinato lölön ewe sät wor.
EXO 15:20 Iwe, Miriam fefinen Aaron eman soufos fefin a angei an pisekin kaktai, nge ekewe fefin meinisin ra tapwela mürin fän ar pisekin kaktai o pworuk.
EXO 15:21 Miriam a emweniir le köl, “Sipwe köl ngeni ewe Samol mi Lapalap, pun an win a fokun amwarar. A aturalong lon ewe sät ekewe oris me ätekewe mi wisen wawa.”
EXO 15:22 Mürin, Moses a emwenala chon Israel seni ewe Setipar o emwenirelong lon ewe fanüapön Sur. Iwe, ra sai lon ewe fanüapö ükükün ülüngat rän, nge resap künakün koluk.
EXO 15:23 Nge lupwen ra tori Mara, resap tongeni ün kolukun Mara, pun a maras. Iei mine ewe leni a iteni Mara .
EXO 15:24 Iwe, ekewe aramas ra lal ngeni Moses o üreni, “Met aipwe ünümi?”
EXO 15:25 Mürin, Moses a kökköri ewe Samol mi Lapalap, nge ewe Samol mi Lapalap a aiti ngeni efoch irä. Iwe, a aturalong ewe irä lon ewe koluk, mürin ewe koluk a öchün ün. Ikenan ewe Samol mi Lapalap a ngeniir an allük me pwüüng pwe repwe apwönüretä. Ikenan a sotuniir
EXO 15:26 o apasa, “Are oupwe likiitü le aüselinga mweliei ngang ewe Samol mi Lapalap ämi we Kot o föri mine a pwüng me fän mesei, are oupwe aleasochis ngeni ai kewe allük o apwönüetä ai kewe pwüüng meinisin, üsap uwato womi eu lein ekewe samau üa uwato won chon Isip, pun ngang ewe Samol mi Lapalap ämi sousafei.”
EXO 15:27 Mürin ra tori Elim, ia a wor ie engol me ruu chönüttu pwal fik irä palm. Iwe, ra asösö ikenan arun ewe koluk.
EXO 16:1 Mürin ekewe chon Israel meinisin ra feil seni Elim. Nge lon engol me limuen ränin aruuen maram mürin ar towu seni Isip ra tori ewe fanüapön Sin a nom lefilen Elim me Sinai.
EXO 16:2 Nge unusen ewe mwichen chon Israel ra lal ngeni Moses me Aaron lon ewe fanüapö.
EXO 16:3 Iwe, ra üreniir, “Amwo aipwe fen mäla ren pöün ewe Samol mi Lapalap lon Isip, lupwen aia mot ngeni ekewe sepien fituk o mongö chomong sokun mongö. Nge ämi oua emwenikeemilong lon ei fanüapö pwe oupwe nikem meinisin ren echik.”
EXO 16:4 Mürin, ewe Samol mi Lapalap a üreni Moses, “Üpwe apüngätiu mongö remi seni läng. Iwe, ekewe aramas repwe towu iteiten rän o ioni ükükün mongön eu chök rän, pwe üpwe sotuniir ika repwe apwönüetä ai allük ika resap.
EXO 16:5 Iwe, lon awonuen rän repwe amolätä ionier mongö, nge epwe ükükün mongön ruu rän.”
EXO 16:6 Mürin, Moses me Aaron ra üreni ekewe aramasen Israel meinisin, “Lekuniolei oupwe mefi pwe ewe Samol mi Lapalap i ewe mi emwenikemiiwu seni Isip.
EXO 16:7 Nge lesosor oupwe küna lingen ewe Samol mi Lapalap, pun a rongorong ämi lal ngeni. Pun iö äm pwe oua lal ngenikem?”
EXO 16:8 Moses a pwal üra, “Ewe Samol mi Lapalap epwe ngenikemi fituk lekuniol pwe oupwe ochoch, nge lesosor epwe ngenikemi pilawa ükükün ämi mochen, pun a rongorong ämi lal ngeni. Pun iö äm? Ousap lal ngenikem, pwe oua lal ngeni ewe Samol mi Lapalap.”
EXO 16:9 Mürin, Moses a kapas ngeni Aaron, “Kopwe üreni ekewe aramasen Israel meinisin pwe repwe kanoto fän mesen ewe Samol mi Lapalap, pun a rongorong ar lal.”
EXO 16:10 Iwe, lupwen Aaron a fofos ngeni ekewe aramas, ra kul ngeni ewe fanüapö, nge lon ei otun lingen ewe Samol mi Lapalap a pwä lon ewe kuchu.
EXO 16:11 Iwe, ewe Samol mi Lapalap a üreni Moses,
EXO 16:12 “Üa rongorong än ekewe aramasen Israel lal. Kopwe üreniir, ‘Lefäf oupwe ochoch fituk, nge lesosor oupwe mongö pilawa ükükün mötümi. Mürin oupwe silei pwe ngang ewe Samol mi Lapalap ämi we Kot.’”
EXO 16:13 Iwe, lon ewe kuniolun mansüsü iter kweil ra ässito o pwölüela ewe leni ia ra nonom ie. Nge lesosor amurenipwin a nom pwelin ünükün ewe leni.
EXO 16:14 Nge lupwen ewe amurenipwin a morola, a wor won pwülün ewe fanüapö och sättin mettoch mi chächäk usun snow.
EXO 16:15 Iwe, lupwen aramasen Israel ra küna, ra kapasfengen lefiler, “Met ei?” Pun resap silei met ewe. Nge Moses a üreniir, “Iei ewe mongö ewe Samol mi Lapalap a fangoto remi pwe oupwe mongö.
EXO 16:16 Iei usun ewe Samol mi Lapalap a allük, ‘Oupwe ionifengeni ei mettoch iteiten eman me eman ükükün anan. Oupwe angei ina epwe ükükün masouen esop kalon fän iten eu pöpön mökür lon en me imwan imw mangaku.’”
EXO 16:17 Iwe, ekewe aramasen Israel ra föri iei usun. Ra ionifengeni ewe mettoch, ekoch ra ioni chomong, nge ekoch kükün seni.
EXO 16:18 Nge lupwen ra aükük mine ra ioni, a pwä pwe ätewe mi chomong ionian esap wor somwan, nge ätewe mi kükün ionian esap nafangau ionian. Eman me eman a chök ioni ükükün anan.
EXO 16:19 Mürin, Moses a üreniir, “Ousap isoni ekis seni ewe mongö tori lesosor.”
EXO 16:20 Nge ekoch me leir resap aüselinga alon Moses, pun ra iseis och tori lesosor. Iwe, ewe mongö a wul o pongau. Nge Moses a song ngeniir.
EXO 16:21 Iteiten lesosor ra ionifengeni ewe mongö, eman me eman ükükün anan. Nge lupwen akkar a pwichikar, a telila ewe mongö.
EXO 16:22 Iwe, lon awonuen rän ra ionifengeni ükükün masouen eu kalon fän iten eman me eman. Nge lupwen ekewe meilapen chon Israel ra feito ren Moses o asile ngeni,
EXO 16:23 Moses a üreniir, “Iei usun mine ewe Samol mi Lapalap a allük pwe lesor eu ränin asösö, eu ränin sapat mi pin fän iten ewe Samol mi Lapalap. Ikenai oupwe umuni mine oua mochen umuni, oupwe pwal kuku mine oua mochen kuku, nge mine a lusun, oupwe iseis ngeni lesor.”
EXO 16:24 Iei mine ra iseis ener mongö ngeni lesor, usun Moses a allük ngeniir, nge esap pongau, esap pwal wul.
EXO 16:25 Iwe, Moses a üra, “Oupwe eni ei mongö ikenai, pun ikenai ewe ränin sapat fän iten ewe Samol mi Lapalap. Ikenai ousap küna ei mongö me lükün.
EXO 16:26 Lon ükükün wonu rän oupwe ionifengeni ei mongö, nge lon afisuen rän, ewe ränin sapat, esap wor ewe mongö.”
EXO 16:27 Iwe, lon afisuen rän ekoch me lein ekewe aramas ra towu lükün pwe repwe ioni ewe mongö, nge resap künakün.
EXO 16:28 Mürin, ewe Samol mi Lapalap a üreni Moses, “Ifa ükükün fansoun ämi ousap mochen aleasochisi ai kewe allük me pwüüng?
EXO 16:29 Oupwe chechemeni pwe ngang ewe Samol mi Lapalap üa ngenikemi ewe ränin sapat, iei mine üa pwal ngenikemi ükükün mongön ruu rän lon ewe awonuen rän. Nge lon ewe afisuen rän eman me eman leimi epwe chök nom lon lenian, esap wor eman epwe towu seni.”
EXO 16:30 Iei usun ekewe aramas ra asösö lon ewe afisuen rän.
EXO 16:31 Iwe, ekewe chon Israel ra aita ngeni ewe mongö mana. A usun kükün föün irä mi oleolepwech, nge nennan a usun chök nennen okasi mi nofit ngeni chönün chunen.
EXO 16:32 Moses a üra, “Iei usun mine ewe Samol mi Lapalap a allük, ‘Oupwe iseis ei mongö ükükün masouen esop kalon, epwe nom pwe mwirimwirimi repwe küna ei mongö üa amongöü ngenikemi lon fanüapö, lupwen üa emwenikemiiwu seni Isip.’”
EXO 16:33 Iei mine Moses a üreni Aaron, “Kopwe angei eu pör, kopwe iseis ükükün masouen esop kalon mana lon o anomu fän mesen ewe Samol mi Lapalap, epwe nom fän iten mwirimwirimi.”
EXO 16:34 Usun mine ewe Samol mi Lapalap a allük ngeni Moses, iei usun Aaron a iseis ewe mongö mwen ekewe allük, pwe epwe nonom ie.
EXO 16:35 Iwe, ekewe aramasen Israel ra mongö ewe mana lon ükükün faik ier tori ra tikeri fanü mi so. Ra mongö ewe mana tori ra ipwelong lon kiännin ewe fanü Kanaan.
EXO 16:36 Ewe aükük ra eäni longolong fän iten mettoch mi pwas lon ena fansoun, ina epwe ükükün limu kalon.
EXO 17:1 Iwe, ekewe chon Israel meinisin ra towu seni ewe fanüapön Sin o sai seni eu leni tori pwal eu, usun ewe Samol mi Lapalap a allük ngeniir. Iwe, ra tori Refitim o aüetä imwer. Nge ikenan esap wor ünümer koluk.
EXO 17:2 Iei mine ekewe aramas ra anini ngeni Moses o üreni, “Kopwe aünükem koluk.” Iwe, Moses a üreniir, “Pwota oua anini ngeniei? Pwota oua sotuni ewe Samol mi Lapalap?”
EXO 17:3 Nge ekewe aramas ra fokun kakan koluk, pwe ra lal ngeni Moses o apasa, “Pwota ka emwenikeemiwu seni Isip? Ifa usun, kopwe niikem me nöüm pwal nöüm pwiin man ren om emwenikeemito lon ei leni ese wor koluk lon?”
EXO 17:4 Iwe, Moses a siö ngeni ewe Samol mi Lapalap, “Met üpwe föri ngeni ekei aramas? Arapakan chök ar repwe monei ngeniei fau.”
EXO 17:5 Mürin, ewe Samol mi Lapalap a kapas ngeni Moses, “Kopwe nuki ekoch seni ekewe souakomwen Israel o akomwola mwen ekewe aramas. Kopwe feila o uwei ewe wok ka wichi ngeni ewe chanpupu Nil.
EXO 17:6 Ngang üpwe ütä o sounuk won ewe achau mi nom lepekin ewe chuk Horep. Kopwe wichi ewe achau pwe koluk epwe puwu seni, pwe ekewe aramas repwe tongeni ün.” Iwe, Moses a föri iei usun fän mesen ekewe souakomwen Israel.
EXO 17:7 Iwe, a aita ngeni ewe leni Massa me Meripa , pun ekewe aramasen Israel ra anini ngeni Moses, ra pwal sotuni ewe Samol mi Lapalap ren ar apasa, “Ifa usun, ewe Samol mi Lapalap a nom leich ika esap?”
EXO 17:8 Iwe, chon Amalek ra war pwe repwe maun ngeni chon Israel lon Refitim.
EXO 17:9 Nge Moses a üreni Josua, “Kopwe filätä ekoch mwän o feila pwe kopwe maun ngeni ekewe chon Amalek. Nge lesor ngang üpwe ütä won ungen ewe chuk fän ewe wokun Kot mi nom lepei.”
EXO 17:10 Josua a föri mine Moses a üreni, a feila o maun ngeni ekewe chon Amalek. Nge Moses, Aaron me Hur ra feitä won ungen ewe chuk.
EXO 17:11 Iwe, lupwen Moses a aitietä pöün, chon Israel ra win. Nge lupwen a uwätiu pöün, chon Amalek ra win.
EXO 17:12 Nge pöün Moses a malülü. Iei mine ra angei eföü fau o amotätiu Moses won. Nge Aaron me Hur ra amwöchätä pöün, eman epek pwal eman epek. Iei usun pöün Moses ra itifochetä tori akkar a tuputiu.
EXO 17:13 Iwe, Josua a akufu ekewe sounfiun Amalek meinisin o nirela.
EXO 17:14 Mürin, ewe Samol mi Lapalap a üreni Moses, “Kopwe makei ei pworaus lon eu puk pwe aramas repwe chechemeni. Kopwe pwal üreni Josua pwe üpwe fokun arosala ekewe chon Amalek, pwe esap wor eman epwe chechemeniir me won fanüfan.
EXO 17:15 Iwe, Moses a senätä eu rongen asor o aita ngeni ‘Ewe Samol mi Lapalap ai filaik’ .
EXO 17:16 A apasa, “Pokiten ekewe chon Amalek ra maun ngeni ekewe chon Israel, ewe Samol mi Lapalap epwe maun ngeni ekewe chon Amalek seni eu täppin aramas tori eu täppin.”
EXO 18:1 Iwe, Setiro ewe souasor seni Mitian semen pwülüen Moses a rongorong meinisin mine Kot a föri fän iten Moses pwal fän iten nöün aramasen Israel, lupwen a emwenirewu seni Isip.
EXO 18:2 Lon ena fansoun Setiro a anomu Sipora pwülüen Moses, pun Moses a likiti ngeni
EXO 18:3 me nöün kewe ruoman ät. Iwe, iten eman Kersom, pun Moses a apasa, “Ngang eman chon siamü lon fanüen chon ekis.”
EXO 18:4 Nge iten pwal ewe eman Elieser, pun a apasa, “Än semei we Kot a alisiei o angasaei seni än Farao mochen nieila.”
EXO 18:5 Iwe, Setiro semen pwülüen Moses a feito fiti nöün Moses kewe me pwülüan we lon ewe fanüapö ia Moses a nom ie arap ngeni ewe chukun Kot.
EXO 18:6 Iwe, eman a asile ngeni Moses, “Setiro semen pwülüom we a war fiti pwülüom we me nöün kewe ruoman ät.”
EXO 18:7 Iei mine Moses a feila pwe epwe churi semen pwülüan we. Iwe, a pworotiu me mwan o mitiri, nge wesin ar akaisfengen usun pworauser, ra tolong lon imwen Moses imw mangaku.
EXO 18:8 Mürin, Moses a apworausa ngeni semen pwülüan we meinisin mine ewe Samol mi Lapalap a föri ngeni Farao me chon Isip meinisin, lupwen a angasa chon Israel. A pwal apworausa ngeni usun chomong weires a toriir lupwen ar sai, pwal usun än ewe Samol mi Lapalap amanaueer.
EXO 18:9 Iwe, Setiro a pwapwaäsini än ewe Samol mi Lapalap föför mürina meinisinn ngeni chon Israel, pwe a angaserewu seni fän nemenien ekewe chon Isip.
EXO 18:10 Iwe, Setiro a apasa, “Üpwe mwareiti ewe Samol mi Lapalap, a angasakemiiwu seni fän nemenien chon Isip, pwal seni lepöün Farao.
EXO 18:11 Iei üa silei pwe ewe Samol mi Lapalap a tekia seni ekewe kot meinisin, pun a angasa ekewe aramasen Israel seni lepöün chon Isip, lupwen ra turunufaseer.”
EXO 18:12 Mürin, Setiro semen pwülüen Moses a eäni asoren kek me sokun asor ngeni Kot, nge Aaron me ekewe souakomwen Israel ra feito pwe repwe mongöfengen me semen pwülüen Moses fän mesen Kot.
EXO 18:13 Iwe, sorotän ewe rän Moses a mot pwe epwe eäni kapwüngün ekewe aramas. Nge ekewe aramas ra ütä ünükün Moses seni lesosor tori lekuniol.
EXO 18:14 Iwe, lupwen semen pwülüen Moses a küna meinisin mine Moses a föri fän iten ekewe aramas, a aisini, “Met ei ka föri fän iten ekewe aramas? Pwota ka mot akaleman le eäni kapwüng, nge ekewe aramas ra ütä ünükum seni lesosor tori lekuniol?”
EXO 18:15 Iwe, Moses a üreni semen pwülüan we, “Ekewe aramas ra feito rei pwe üpwe kütta letipen Kot fän iter.
EXO 18:16 Lupwen ra fitikokofengen, ra feito rei pwe üpwe apwüngü lefilen eman me eman, üa pwal asile ngeniir än Kot allük me pwüüng.”
EXO 18:17 Mürin, semen pwülüen Moses a üreni, “Esap öch ngonuk mine ka föri.
EXO 18:18 En me ekewe aramas oupwe chök apwangapwangala, pun ei angang a kon chou ngonuk, kosap tongeni akaleman le föri.
EXO 18:19 Iei kopwe aüselinga aloi. Üpwe aiti ngonuk mefiei, nge Kot epwe etuk. En kopwe tupuni ekewe aramas fän mesen Kot le uwato ar fitikoko ren.
EXO 18:20 Kopwe pwal aiti ngeniir än Kot allük me pwüüng o afata ngeniir mine a pwüng ngeni manauer, pwal mine repwe föri.
EXO 18:21 Nge kopwe filätä me lein ekewe aramas mwän mi lipwäköch o meniniti Kot, ir mi wenechar o oput lifangen amichimich. Ekei sokun mwän kopwe seikiretä, pwe repwe nemenem won ngeröü me pükü, won lime me engol aramas.
EXO 18:22 Iwe, ir repwe eäni kapwüngün ekewe aramas fansoun meinisin. Iteiten fitikoko mi weires repwe uwato reöm, nge ekewe fitikoko mi kis repwe püsin apwüngü. Iei usun ewe angang epwe ekis mecheres ngonuk, nge ir repwe pwal mwärelong fän om weires.
EXO 18:23 Are kopwe föri ei, Kot epwe apöchökülok pwe kopwe tufichin sopwela ei angang. Iwe, ekei aramas meinisin repwe pwal liwiniti lenier fän kinamwe.”
EXO 18:24 Iwe, Moses a aüselinga alon semen pwülüan we o apwönüetä meinisin mine a üra.
EXO 18:25 A filätä mwän mi lipwäköch me lein chon Israel meinisin o seikiretä pwe repwe nemenem won ekewe aramas, won ngeröü me pükü, won lime me engol.
EXO 18:26 Iwe, ra eäni kapwüngün ekewe aramas fansoun meinisin. Ekewe fitikoko mi weires ra uwato ren Moses, nge ekewe fitikoko mi kis ra püsin apwüngü.
EXO 18:27 Mürin, Moses a afeilai semen pwülüan we pwe a liwiniti poputän fanüan.
EXO 19:1 Iwe, lon aeuin ränin ewe aülüngatin maram mürin än ekewe aramasen Israel towu seni Isip, lon ewe chök rän ra tolong lon ewe fanüapön Sinai.
EXO 19:2 Iwe, lupwen ra sai seni Refitim, ra tori ewe fanüapön Sinai o nom ie. Ikenan chon Israel ra aüetä imwer imw mangaku sasape ngeni ewe chuk.
EXO 19:3 Mürin, Moses a feitä won ewe chuk ren Kot, nge ewe Samol mi Lapalap a kökköri Moses me won ewe chuk o üreni, “Iei usun mine kopwe üreni ekewe mwirimwirin Jakop ir ekewe aramasen Israel,
EXO 19:4 ‘Oua fen küna mine üa föri ngeni chon Isip, pwal usun üa uweekemi usun eman ikel a uwei nöün won pöükässin o uweekemiito rei.
EXO 19:5 Iei mine ika oupwe aleasochisi aloi o apwönüetä ai we pwon, mürin oupwe wesewesen nei aramas. Inamwo ika unusen fanüfan ai, nge üa filikemiitä me lein aramas meinisin,
EXO 19:6 pwe oupwe eu mwichen souasor me eu mwü mi pin fan itei.’ Ikkei ekei kapas kopwe asile ngeni ekewe aramasen Israel.”
EXO 19:7 Iwe, Moses a feitiu o körifengeni ekewe souakomwen ekewe aramas, a apworausa ngeniir ekewe kapas meinisin mine ewe Samol mi Lapalap a allük ngeni.
EXO 19:8 Mürin, ekewe aramas ra pälüenipökü o apasa, “Meinisin mine ewe Samol mi Lapalap a apasa aipwe föri.” Nge Moses a asile ngeni ewe Samol mi Lapalap alon ekewe aramas.
EXO 19:9 Iwe, ewe Samol mi Lapalap a üreni Moses, “Üpwe feito reöm lon eu kuchuchol, pwe ekewe aramas repwe rongorong lupwen üpwe kapas ngonuk, repwe pwal lükuk fansoun meinisin.” Mürin, Moses a asile ngeni ewe Samol mi Lapalap alon ekewe aramas.
EXO 19:10 Iwe, ewe Samol mi Lapalap a üreni Moses, “Kopwe feila ren ekewe aramas o apiniir ikenai me lesor. Repwe sopuni üfer
EXO 19:11 o amoleretä ngeni ewe aülüngatin rän. Pun lon ewe aülüngatin rän ngang ewe Samol mi Lapalap üpwe feitiu won ungen ewe chuk Sinai mwen mesen ekewe aramas meinisin.
EXO 19:12 Iwe, kopwe föri eu kiä pwelin ünükün ewe chuk o üreniir, ‘Oupwe afälikemi pwe ousap feitä won ewe chuk ika arap ngeni kiännin. Pun iö epwe ipwetä won ewe chuk epwe fokun mäla.
EXO 19:13 Esap wor eman epwe atapa ätewe mi ipwetä won ewe kiä, nge repwe chök monei ngeni fau ika likapichi, ese lifilifil ika man ika aramas, esap tongeni manau. Nge lupwen ewe rappwa epwe tikitam, aramas repwe tongeni feitä won ewe chuk.’”
EXO 19:14 Mürin än Moses feitiu seni ewe chuk ren ekewe aramas, a apiniir, nge ir ra sopuni üfer.
EXO 19:15 Iwe, Moses a üreni ekewe aramas, “Oupwe amolakemi ngeni ewe aülüngatin rän, ousap kon ren eman fefin.”
EXO 19:16 Nge lesosorun ewe aülüngatin rän a fis chopulap me fifi. A wor eu kuchuchol won ewe chuk, a pwal tik eu rappwa mi tikimong. Iwe, ekewe aramas mi nom lon ewe leni ra chechech ren ar niuokus.
EXO 19:17 Mürin, Moses a emwenawu ekewe aramas seni lon lenier pwe repwe churi Kot. Iwe, ra ütä fäsonun ewe chuk.
EXO 19:18 Ewe chuk Sinai a pwölüla ren ötüöt, pun ewe Samol mi Lapalap a feitiu won lon ekkei. Nge ötün a ötütä usun ötün eu lenien um mi watte o unusen ewe chuk a fokun chechech.
EXO 19:19 Iwe, ewe rappwa a chök titikimongola. Mürin Moses a kapas, nge Kot a pälüeni ren chopulap.
EXO 19:20 Mürin, ewe Samol mi Lapalap a feitiu won ungen ewe chuk Sinai o kökkörätä Moses won. Iwe, Moses a feitä won ungen ewe chuk.
EXO 19:21 Nge ewe Samol mi Lapalap a üreni Moses, “Kopwe feitiu o fönöü ekewe aramas, pwe resap tolong lon kiännin ewe chuk ren ar mochen nenengeniei, pwe chomong rete mäla.
EXO 19:22 Pwal ekewe souasor mi kanoto rei repwe apiniir, pwe üsap afeiengaueer.”
EXO 19:23 Nge Moses a kapas ngeni ewe Samol mi Lapalap, “Ekewe aramas resap tongeni feitä won ewe chuk Sinai. Pun en ka püsin allük ngenikem pwe aipwe föri kiännin ewe chuk o apini.”
EXO 19:24 Iwe, ewe Samol mi Lapalap a üreni Moses, “Kopwe feitiu o emwenätä Aaron. Nge kosap mwüt ngeni ekewe souasor me ekewe aramas ar repwe tolong lon ewe kiä o feitä rei, pwe ngang üsap afeiengaueer.”
EXO 19:25 Iwe, Moses a feitiu ren ekewe aramas o apworauseer.
EXO 20:1 Iwe, ikkei ekewe kapas meinisin Kot a apasa,
EXO 20:2 “Ngang ewe Samol mi Lapalap om Kot, üa emwenukowu seni ewe fanü Isip, ewe leni ia ra nöünuk amanau ie.
EXO 20:3 Kosap eäni eman kot lüki.
EXO 20:4 Kosap föri uluulun anümwäl fän itom, kosap pwal alapalapa och mettochun pekitä lon läng are och mettochun pekitiu won fanüfan are och mettochun lon lölön failol.
EXO 20:5 Kosap chapetiu ngeniir are fel ngeniir, pun ngang ewe Samol mi Lapalap om Kot eman Kot mi lukomong. Üa liwini än samasam föföringau won nöür kana tori aülüngatin are arüanün tettelin chokana mi oputaei.
EXO 20:6 Nge üa kirikiröch ngeni ngeröün mwirimwirin chokana mi echeniei o aleasochisi ai allük kana.
EXO 20:7 Kosap föüniwäli itei ngang ewe Samol mi Lapalap om Kot. Pun ngang ewe Samol mi Lapalap üpwe ngeni iteiten eman me eman chappen tipisin an föünimwäli itei.
EXO 20:8 Kopwe tümwünü ewe ränin sapat pwe kopwe pinini.
EXO 20:9 Wonu rän kopwe akangang o föri om angang meinisin.
EXO 20:10 Nge ewe afisuen rän ewe ränin sapat fän itei ngang ewe Samol mi Lapalap om Kot. Kosap föri och angang lon, sap en are noum mwän are noum fefin, sap noum chon angang mwän are chon angang fefin, sap pwal noum man are ewe chon ekis mi nom leäpärum.
EXO 20:11 Pun lon wonu rän ngang ewe Samol mi Lapalap üa föri läng me fanüfan, pwal matau me meinisin mine a wor lor. Nge lon afisuen rän üa asösö. Iei mine üa afeiöchü ewe ränin sapat o apini.
EXO 20:12 Kopwe asamolu semom me inom, pwe ränin manauom repwe chomongola lon ewe fanü ngang ewe Samol mi Lapalap om Kot üpwe ngonuk.
EXO 20:13 Kosap niela aramas.
EXO 20:14 Kosap lisowu.
EXO 20:15 Kosap solä.
EXO 20:16 Kosap eäni kapas chofana usun chon arum.
EXO 20:17 Kosap mocheniaiti imwen chon arum, kosap pwal mochenia ngeni pwülüen chon arum are ngeni nöün chon angang mwän me chon angang fefin, kosap pwal mocheniaiti nöün kow me nöün aas are meinisin mine chon arum a eäni.
EXO 20:18 Iwe, lupwen ekewe aramas meinisin ra rong ewe chopulap me tikin ewe rappwa o küna ewe fifi me ewe ötüöt mi ötütä seni ewe chuk, ra niuokus o chechech. Ra ütato me toau
EXO 20:19 o üreni Moses, “En kopwe kapas ngenikem, nge äm aipwe rongorong. Nge Kot esap kapas ngenikem pwe aisap mäla.”
EXO 20:20 Mürin, Moses a üreni ekewe aramas, “Ousap niuokus. Pun Kot a feito pwe epwe sotunikemi, pwe oupwe sopwela le niueiti Kot, nge ousap föri tipis.”
EXO 20:21 Iwe, ekewe aramas ra chök ütato me toau, nge Moses a kan ngeni ewe kuchuchol Kot a nom lon.
EXO 20:22 Mürin, ewe Samol mi Lapalap a üreni Moses, “Iei usun mine kopwe eäni kapas ngeni ekewe aramasen Israel: Oua fen püsin küna pwe üa fos ngenikemi seni läng.
EXO 20:23 Ousap föri kot seni silifer lüki, ousap pwal föri kot seni kolt fän itemi.
EXO 20:24 Iwe, oupwe föri eu rongen asor seni pwül fän itei, pwe oupwe eäni ämi asoren kek me asoren kinamwe won seni nöümi sip me kow. Ekewe leni meinisin üa filätä pwe oupwe fel ngeniei ie üpwe feito remi o afeiöchükemi me ie.
EXO 20:25 Nge ika oupwe föri eu rongen asor seni fau, ousap föri seni fau mi fal. Pun ika oua faleer, oua angauala ewe rongen asor.
EXO 20:26 Ousap feitä won ai rongen asor ren latö, pwe ämi selela esap pwätiu won.”
EXO 21:1 “Ikkei ekewe allük kopwe aiti ngeni ekewe aramasen Israel:
EXO 21:2 Lupwen kopwe möni eman chon angang re Ipru, epwe angang ngonuk lon ükükün wonu ier, nge lon ewe afisuen ier epwe ngasala, nge esap mönätiu och.
EXO 21:3 Are a tolong lon an angang lon an lipich, epwe pwal towu lon an lipich. Iwe, are a tolong nge mi pwüpwülü, epwe pwal towufengen me pwülüan.
EXO 21:4 Iwe, are än ewe chon angang samol epwe ngeni eman pwülüan, nge a nöünöü ät me nengin me won, ewe fefin me nöün repwe nöün ewe samol, nge ewe mwän chök epwe feila.
EXO 21:5 Nge are ewe chon angang epwe apasa, ‘Üa tongei ai samol pwal pwülüei me nei, üsap mochen ngasala,’
EXO 21:6 mürin, an we samol epwe emwenala lon imwenfel ren Kot. Epwe anomu lon ewe asamalap ika ren üren ewe asamalap o pwangeni selingan ngeni efoch pwangapwang. Mürin i epwe chon angang ngeni an we samol lon ränin manauan meinisin.
EXO 21:7 Iwe, lupwen eman aramas epwe amömöla nöün fefin pwe epwe chon angang, neminewe esap ngasala usun ekewe chon angang mwän.
EXO 21:8 Are an samol a ekiekin pwülüeni, nge mürin esap chüen efich, epwe mwütätä pwe eman epwe mönisefäli. Esap tufich an epwe amömöla ngeni chon ekis pokiten a kirikiringau ngeni.
EXO 21:9 Nge are ewe samol a filätä nöün chon angang fefin pwe kofotun nöün mwän, epwe tümwünü usun eman nöün fefin.
EXO 21:10 Iwe, are ewe samol epwe pwal pwülüeni eman me lükün nöün chon angang, esap tongeni akisätiu anan me üfan me an pwüngün pwüpwülü.
EXO 21:11 Nge are esap föri ngeni ekewe ülüngat mettoch, neminewe epwe ngasala, nge esap mönätiu och moni.”
EXO 21:12 “Iwe, eman mi wichi eman aramas pwe a mäla, epwe fokun ninnila.
EXO 21:13 Nge ika esap amolätä lon an ekiek an epwe niela ewe aramas, pwe a chök föri fän chechengau, epwe tongeni sü ngeni eu leni üpwe filätä fän itemi.
EXO 21:14 Nge ika eman a ekiekietä lon lelukan pwe epwe nisoläi eman, ätewe kopwe ätekini seni ai rongen asor pwe epwe ninnila.
EXO 21:15 Eman mi wichi saman ika inan epwe ninnila.
EXO 21:16 Eman mi soläni eman aramas, inamwo ika a amömöla ika a chüen nom ren, nge lupwen a pwäla, epwe chök ninnila.
EXO 21:17 Eman mi otteki saman ika inan epwe ninnila.
EXO 21:18 Iwe, are mwän ra aninifengen, nge eman a wüsi ngeni eman eföü fau ika öfölü ngeni pöün, nge ätewe mi feiengau esap mäla, pwe a chök akonoson,
EXO 21:19 mürin, ika a pwätäsefäl o wokuukuni, ätewe mi wüsi esap chüen tipis. Nge epwe mönätiu liwinin fansoun an esap tongeni angang, pwal liwinin mine epwe pöchökülöch ren.
EXO 21:20 Iwe, are eman mwän a wichi nöün amanau mwän ika amanau fefin ren efoch wok pwe ewe amanau a mäla ren, ätewe epwe angei chappen an föför.
EXO 21:21 Nge ika ewe amanau epwe chüen manau eu ika ruu rän, ätewe mi wichi esap angei chappen an föför, pun ewe amanau ina nöün moni.
EXO 21:22 Iwe, are ekoch mwän ra fiufengen, nge eman leir a üngüri eman fefin mi pwopwo pwe a lus seni nöün, nge esap pwal fis feiengau me mürin, ätewe mi üngüri ewe fefin epwe püngütiu liwinin ükükün än pwülüen ewe fefin filätä, pwal ükükün mine ekewe soukapwüng repwe apwüngala.
EXO 21:23 Nge are epwe fis feiengau me mürin, kopwe liwini manau ngeni manau,
EXO 21:24 eföü mas ngeni eföü mas, efoch ngi ngeni efoch ngi, efoch pau ngeni efoch pau, efoch peche ngeni efoch peche,
EXO 21:25 eu kar ngeni eu kar, eu kinas ngeni eu kinas, me eu mwoochol ngeni eu mwoochol.
EXO 21:26 Iwe, are eman mwän a öfölü eföü mesen nöün amanau mwän ika amanau fefin, nge a chunela, ätewe epwe mwüt ngeni ewe amanau epwe ngasala, pwe ina liwinin mesan we mi feiengau.
EXO 21:27 Nge are ewe mwän a tülü ngin nöün amanau mwän ika amanau fefin, ätewe epwe mwüt ngeni ewe amanau epwe ngasala pwe ina liwinin ngin we mi tül.”
EXO 21:28 “Iwe, are eman ätemwänin kow a opura eman mwän ika eman fefin pwe a mäla, ewe ätemwänin kow epwe momon ngeni fau, nge esap wor eman epwe ochei fitukan. Nge mine nöün ewe ätemwänin kow esap tipis.
EXO 21:29 Iwe, ika ewe ätemwänin kow a fen örüni opuropur me mwan, nge ätewe mine nöün ewe kow a fen silei o esap föti, iwe, are epwe niela eman mwän ika eman fefin, ewe ätemwänin kow epwe momon ngeni fau, nge mine nöün ewe ätemwänin kow epwe pwal ninnila.
EXO 21:30 Nge ika a püngüla pwe ewe mi tipis epwe püngütiu penmanauan ren moni, epwe püngütiu ükükün mine a filitä fän iten mön manauan.
EXO 21:31 Iwe, are eman ätemwänin kow a opura nöün eman mwän ät ika nengin pwe a mäla, epwe chök fis ngeni pwüngün ewe allük me mwan.
EXO 21:32 Nge ika ewe ätemwänin kow a opura eman amanau mwän are amanau fefin pwe a mäla, ätewe mine nöün ewe ätemwänin kow epwe ngeni än ewe amanau samol ilik föün moni silifer , nge ewe ätemwänin kow epwe momon ngeni fau.
EXO 21:33 Iwe, are eman aramas a suki pwölüpwölün eu pwang ika tuw eu pwang, nge esap pwölü, pwe eman ätemwänin kow ika eman aas a turulong lon,
EXO 21:34 ewe än ewe pwang epwe liwini ewe man. Iwe, epwe liwini won moni ngeni mine nöün ewe man, nge ewe man mi mä epwe nöün.
EXO 21:35 Iwe, are nöün eman aramas ätemwänin kow a afeiengaua pwal nöün eman aramas kow, nge a mäla, repwe amömöla ewe ätemwänin kow mi chüen manau o inetifengeni liwinin. Nge fituken ewe man mi mäla repwe pwal inetifengeni.
EXO 21:36 Iwe, ika a pwä pwe a fen örüni opuropur me mwan, nge ätewe mine nöün esap föti, epwe möni ngeni ewe mine nöün ewe kow eman ätemwänin kow mi manau, nge ewe man mi mäla epwe nöün.”
EXO 22:1 “Iwe, are eman aramas a soläi eman kow ika eman sip o niela ika amömöla, ätewe epwe liwini limman kow fän iten eman, pwal föman sip fän iten eman. Ewe chon solä epwe aliwinisefäli liwinin mine a soläni fiti liwinin an tipis. Nge are esap wor och ren, repwe amömöla ewe mwän.
EXO 22:2 Are eman a liapeni eman chon solä lepwin o wichi, nge a mäla, esap wor liwinin tipisin nimanau ngeni.
EXO 22:3 Are eman a niela eman chon solä lupwen a ränila, epwe wor liwinin tipisin nimanau ngeni.
EXO 22:4 Are ewe man a chüen nom ren ewe chon solä o manau, ese lifilifil ika eman kow, ika eman aas, ika eman sip, epwe liwini ruoman man fän iten eman.
EXO 22:5 Are eman aramas a amongöü ngeni nöün man fetilin eu mälämäl ika fetilin eu tanipin wain, nge a mwüt ngeni nöün man pwe repwe pwal eni fetilin än eman tanipi, ätewe epwe liwini ngeni ua mi mürina seni püsin an mälämäl ika an tanipin wain.
EXO 22:6 Nge are a wor eu kar mi küri iräfölüföl, pwe a ngeteri irän wiich mi pilük, ika irän wiich resamwo pöküpök, ika unusen eu tanipin wiich, ätewe mi popuetä ewe kar epwe liwinisefäli meinisin mine a karala.
EXO 22:7 Are eman a ngeni chon arun nöün moni ika pisekin pwe epwe iseis, nge eman a soläi, iwe, are a pwä ewe chon solä, epwe aliwini fän ruu mine a soläni.
EXO 22:8 Nge are ewe chon solä esap pwä, ätewe mi iseis ewe pisek lon imwan epwe feito lon imwenfel o pwärätä pwe esap angei pisekin ewe aramas.
EXO 22:9 Are eman aramas a silleni mettochun ren eman o apasa pwe an, ese lifilifil ika eman kow ika eman aas, eman sip ika üf, ika och mettoch a pöüt seni, ekewe ruoman repwe feito lon imwenfel. Nge ewe eman, Kot a atipisi, epwe liwini ngeni chon arun fän ruu.
EXO 22:10 Are eman a ngeni chon arun nöün aas ika nöün kow ika nöün sip ika sokun man pwe epwe tütümwünüetiu, iwe, are ewe man a mäla, ika feiengau, ika eman a süla fan, nge esap wor eman a küna,
EXO 22:11 ewe chon tümwünü ewe man epwe feila lon imwenfel o eäni eu akapel pwe esap angei nöün chon arun man. Iwe, ewe mine nöün ewe man epwe lükü ewe akapel, nge ewe mi tümwünü ewe man esap mönätiu liwinin.
EXO 22:12 Nge are eman a soläni ewe man seni ewe chon tümwünü, ewe chon tümwünü epwe mönätiu liwinin ewe man ngeni mine nöün.
EXO 22:13 Are eman manmwacho a ni ewe man, ewe chon tümwünü epwe uwato ewe man pwe an pisekin pwärätä, nge esap liwini mine a mäla ren manmwacho.
EXO 22:14 Are eman a tüngor eman man seni chon arun, nge ewe man a feiengau ika mäla, lupwen ewe mine nöün ese nom, ätewe mi tüngor epwe wisen mönätiu liwinin ewe man.
EXO 22:15 Nge are ewe mine nöün a nom, ätewe mi tüngor esap wisen mönätiu liwinin. Iwe, are eman a satani eman man, nge a feiengau, ewe sata a iwe chök liwinin.”
EXO 22:16 “Are eman mwän a atupu eman föpwül esamwo tori mwän, esap pwal kofot, nge a kon ren, epwe ngeni kisan o pwülüeni.
EXO 22:17 Nge are semen ewe föpwül esap fokun tipeeu ngeni an epwe pwülüeni, ewe chon atuputup epwe mönätiu ükükün ewe kis a fis lupwen apwüpwülüen eman föpwül esamwo tori mwän.
EXO 22:18 Oupwe niela ekewe sourong fefin meinisin.
EXO 22:19 Eman mi kon ren eman man epwe ninnila.
EXO 22:20 Eman mi asor ngeni eman kot lüki ngang ewe Samol mi Lapalap, ätewe epwe fokun ninnila.
EXO 22:21 Ousap föri och mi mwäl ngeni wasöla ika ariaföüür, pun oua fen piin wasöla lon ewe fanü Isip.
EXO 22:22 Ousap ariaföüü ekewe fefin mi mä pwülüer ika ekewe mi mäsen.
EXO 22:23 Pun are oua ariaföüür, nge ir repwe siö ngeniei, üpwe fokun aüselinga ar siö.
EXO 22:24 Üpwe fokun song ngenikemi o nikemi lon maun pwe pwülüemi repwe lipichsefäl, nge nöümi repwe mäsen.
EXO 22:25 Iwe, are ka mwüt ngeni eman moni me lein nei aramas mi mwelele pwe epwe paroni, kosap usun eman mi awattela winnen nöün moni. Kosap fokun angei seni winnan.
EXO 22:26 Are ka angei üfen eman chon arum pwe asisilen an liwinimang ngonuk, kopwe fokun aliwini ngeni mwen akkar esamwo tuputiu.
EXO 22:27 Pun ina chök üfan a pwölü ngeni inisin. Met chök epwe chenikameni le annut? Nge are epwe siö ngeniei, üpwe rongorong, pun üa eäni tong.
EXO 22:28 Kosap turunufasei Kot, kosap pwal otteki samolun aramasom.
EXO 22:29 Kosap amanga le uwato rei mwen uän kiniom wiich, pwal mwen ungutiom wain. Iwe, kopwe ngeniei noum mwänichi.
EXO 22:30 Kopwe pwal ngeniei mweinöün noum kow me noum sip. Ewe apanan epwe nom ren inan lon ükükün fisu rän, nge lon awaluen rän kopwe uwato rei.
EXO 22:31 Iwe, ämi oupwe aramas mi pin fän itei. Iei mine ousap ochoch fituken man mi mäla ren manmwacho, nge oupwe aochocha ngeni kolak kana.”
EXO 23:1 “Iwe, kosap apworausafetalei eu pworaus mi mwäl. Kosap alisi eman aramasangau ren om pwärätä mine a pwüngingau.
EXO 23:2 Kosap eti eu mwichemongun aramas le föri mine a ngau. Nge lupwen ka pwärätä lon kapwüng, kosap sorei mine a pwüng ren om pelieni eu mwichemongun aramas.
EXO 23:3 Kosap pwal apaap ngeni eman chon mwelele lon an kapwüng.
EXO 23:4 Iwe, are ka küna nöün chon oputok kow ika nöün aas pwe a malechela, kopwe aliwinala ren.
EXO 23:5 Nge are ka küna eman aas nöün eman chon oputok pwe a turula fän wosan mi chou, kosap feil seni o likiti ngeni chök, nge kopwe alisi le ekietä ewe aas.
EXO 23:6 Kosap sorei mine a pwüng fän iten eman chon mwelele lon an kapwüng.
EXO 23:7 Kosap atipisimwäli eman, kosap pwal anipweni mine eman chon pwüng epwe mäla ren, pun üsap amusafatei eman mi föri ei sokun föför mi ngau.
EXO 23:8 Iwe, kosap angei lifangen amichimich, pun ei sokun lifang a achuna mesen nöüwis o sorei pwüngün chokewe mi pwüng.
EXO 23:9 Iwe, ousap ariaföüü eman chon ekis, pun oua silei usun nonomun eman chon ekis, pokiten oua fen piin wasöla lon ewe fanü Isip.”
EXO 23:10 “Iwe, lon wonu ier oupwe fotuki fanüemi o kini uan.
EXO 23:11 Nge lon ewe afisuen ier ousap fotuki ewe fanü, nge oupwe likiti pwe ekewe chon mwelele me lein aramasemi repwe mongö seni mine a püsin pwükütä. Iwe, mine ir ra likiti, manmwacho repwe tongeni mongö. Iei usun oupwe pwal föri ren ämi tanipin irän wain me tanipin irä olif.
EXO 23:12 Iwe, lon wonu rän oupwe föri ämi angang, nge lon ewe afisuen rän oupwe asösö. Pun nöümi kow me nöümi aas repwe asösö, pwal nöümi amanau mi uputiu lon imwemi me ekewe chon ekis mi angang ngenikemi repwe ngasatä.
EXO 23:13 Oupwe afäli meinisin mine üa ürenikemi. Ousap iotek ngeni pwal ekoch kot, ousap fokun mwo nge föüni iter.”
EXO 23:14 “Iwe, fän ülüngat lon eu ier oupwe föri eu chulap ngeniei.
EXO 23:15 Iwe, oupwe föri ewe chulapen mongö pilawa esap wor iis lon. Oupwe mongö pilawa esap wor iis lon ükükün fisu rän, usun üa fen allük ngenikemi. Oupwe föri ei lon ewe fansoun üa filätä, lon ewe maram Apip, pun lon ewe maram oua towu seni Isip. Esap wor eman epwe feito rei fän an asöülapö.
EXO 23:16 Iwe, oupwe föri eu chulapen fansoun kinikin mwen uän fotämi irä seni mine oua fotuki lon ämi mälämäl. Oupwe pwal föri eu chulapen fansoun ionalong leamüchülan ier, lupwen oua ionifengeni uän fotämi irä seni ämi mälämäl.
EXO 23:17 Iwe, fän ülüngat lon eu ier nöümi kewe mwän meinisin repwe feito rei o fel ngeniei ngang ewe Samol mi Lapalap ämi we Kot.
EXO 23:18 Ousap eäni asor ngeniei chan ewe mönün asor fiti pilawa mi wor iis lon, ousap pwal iseis tori lesosor kirisin ewe mönün asor oua eäni lupwen fansoun chulap.
EXO 23:19 Oupwe uwato öchün mwen uän fanüemi lon imwei ngang ewe Samol mi Lapalap ämi we Kot. Ousap kuku eman apanen kuuch lon chönün oupwun ewe inelap.”
EXO 23:20 “Nengeni, üpwe tinato eman chon läng mwemi, pwe epwe tümwünükemi won ewe al o emwenikemi ngeni ewe leni üa amolätä.
EXO 23:21 Oupwe aüselinga alon o aleasochis ngeni, pun ngang üa tinala remi. Ousap ü ngeni, pun esap amusala ämi ü ngeni.
EXO 23:22 Nge are oupwe aüselingafichi alon o föri meinisin mine üa apasa, üpwe oput chon oputemi o ü ngeni chon ü ngenikemi.
EXO 23:23 Iwe, nei chon läng epwe akom mwemi o emwenikemi ngeni fanüen chon Amor, chon Hit, chon Peris me chon Kanaan, chon Hiw me chon Jepus. Iwe, üpwe aroserela meinisin.
EXO 23:24 Nge ämi ousap chapetiu ngeni ar kewe kot are fel ngeniir, ousap pwal apirü föförür. Iwe, oupwe fokun aturala ar kewe uluulun anümwäl o atatakisi ekewe ür ra fel ngeni.
EXO 23:25 Are oupwe fel ngeniei ngang ewe Samol mi Lapalap ämi we Kot, üpwe afeiöchü enemi mongö me ünümemi koluk, üpwe pwal angei senikemi sokun samau.
EXO 23:26 Esap wor eman fefin epwe lus nöün, esap pwal wor eman epwe rit me lon fanüemi. Üpwe aunusöchü ränin manauemi.
EXO 23:27 Iwe, üpwe föri pwe chon ü ngenikemi repwe niuokusitiei. Üpwe afitikokoi aramas meinisin, chokewe oupwe maun ngeniir, üpwe pwal föri pwe chon oputemi repwe kul senikemi o süla.
EXO 23:28 Üpwe tinala niuokus me rükö lein chon oputemi, pwe ekewe chon Hiw, chon Kanaan me chon Hit repwe süla me mwemi.
EXO 23:29 Iwe, üsap asürela lon eu chök ier, pwe ewe fanü esap pönüla, nge ekewe manmwacho resap chomongola o afeiengauakemi.
EXO 23:30 Ekis me ekis üpwe asürela seni mwemi, tori oupwe chomongola o fanüeni ewe fanü.
EXO 23:31 Iwe, ngang üpwe föri kiän fanüemi seni ewe Setipar tori ewe matau watte, pwal seni ewe fanüapö tori ewe chanpupu Oifrat. Üpwe atolonga fän nemeniemi chon ewe fanü, nge ämi oupwe asürela seni mwemi.
EXO 23:32 Ousap föri eu pwon ngeniir ika ngeni ar kewe kot.
EXO 23:33 Iwe, ousap mwüt ngeniir pwe repwe nonom lon fanüemi, pwe resap atupukemilong lon tipis. Pun ika oupwe fel ngeni ar kewe kot, epwe fokun eu lenien likatup ngenikemi.”
EXO 24:1 Iwe, Kot a üreni Moses, “Kopwe feitä rei won ewe chuk, ämi me Aaron, Natap me Apihu, pwal fik souakomwen chon Israel. Nge lupwen oua chüen ekis toau, oupwe fel ngeniei.
EXO 24:2 En chök Moses kopwe kan ngeniei. Nge ekewe lusun resap kanetä, pwal ekewe aramas resap fitätä.”
EXO 24:3 Iwe, Moses a feila o üreni ekewe aramas alon ewe Samol mi Lapalap meinisin, pwal ekewe allük meinisin. Nge ekewe aramas meinisin ra pälüenipökü o apasa, “Meinisin mine ewe Samol mi Lapalap a apasa aipwe föri.”
EXO 24:4 Nge Moses a makei meinisin alon ewe Samol mi Lapalap. Iwe, a pwätä lesosorusich, a senätä eu rongen asor me fäsonun ewe chuk, pwal engol me ruofoch ürefau fän iten eu me eu ekewe engol me ruu ainangen Israel.
EXO 24:5 Mürin a tinala alüal seni me lein ekewe aramasen Israel ra eäni asoren kek, ra pwal eäni asor ätemwänin kow pwe asoren kinamwe ngeni ewe Samol mi Lapalap.
EXO 24:6 Iwe, Moses a angei esopun chan ekewe mönün asor o ninalong lon ekewe sepi, nge esop a uti ngeni ewe rongen asor.
EXO 24:7 Mürin a angei ewe puken pwon o aleani ngeni ekewe aramas. Iwe, ra apasa, “Meinisin mine ewe Samol mi Lapalap a apasa aipwe aleasochisi o föri.”
EXO 24:8 Iwe, Moses a angei ewe cha lon ekewe sepi, a ütätä won ekewe aramas o apasa, “Iei chan ewe pwon ewe Samol mi Lapalap a föri ngenikemi pwe longolongun ekei kapas meinisin.”
EXO 24:9 Mürin, Moses me Aaron, Natap me Apihu pwal fik souakomwen chon Israel ra feitä won ewe chuk.
EXO 24:10 Iwe, ra küna ewe Koten Israel. Fän pechen a usun chök ewe fau aüchea itan safaia, pwal usun chök arauarauen läng, lupwen a kürüfat.
EXO 24:11 Nge Kot esap afeiengaua ekewe souemwenin chon Israel. Iwe, ra nenengeni Kot, mürin ra mongöfengen o ünfengen.
EXO 24:12 Iwe, ewe Samol mi Lapalap a üreni Moses, “Kopwe feitä rei won ewe chuk o witiwit ikenan. Pun üpwe ngonuk ekewe fau mi chöpöp üa makei won ekewe allük pwe kopwe aiöü ngeni ekewe aramas.
EXO 24:13 Mürin, Moses a ütä me nöün chon angang Josua o feitä won ewe chukun Kot.
EXO 24:14 Nge a kapas ngeni ekewe souakom, “Oupwe witikem ikei, tori aipwe liwinsefälitikemi. Iwe, Aaron me Hur repwe nom remi, nge iö a wor an fitikoko, epwe feila rer.”
EXO 24:15 Lupwen Moses a feitä won ewe chuk, ewe kuchu a pwölüela ewe chuk.
EXO 24:16 Iwe, lingen ewe Samol mi Lapalap a nonom won ewe chuk Sinai, nge ewe kuchu a pwölüela ewe chuk lon ükükün wonu rän. Nge lon ewe afisuen rän Kot a kökköwu ren Moses me lon ewe kuchu.
EXO 24:17 Iwe, lingen ewe Samol mi Lapalap a pwäpwäla fän mesen ekewe aramasen Israel usun chök eu ekkei mi ngetenget me won ungen ewe chuk.
EXO 24:18 Mürin, Moses a tolong lon ewe kuchu o feitä won ewe chuk. Nge Moses a nonom won ewe chuk lon ükükün faik rän me faik pwin.
EXO 25:1 Iwe, ewe Samol mi Lapalap a kapas ngeni Moses,
EXO 25:2 “Kopwe üreni ekewe chon Israel pwe repwe uwato ar alilis ngeniei. Kopwe angei seni eman me eman aramas mine a mochen fang ngeniei seni letipan.
EXO 25:3 Iwe, epwe iei usun ewe alilis kopwe angei seniir: kolt, silifer me piras,
EXO 25:4 mangaku mi arauarau me parachol me parapar, pwal mangaku mi pwechepwech, mangaku seni ülöülen kuuch,
EXO 25:5 silin ätemwänin sip mi kapar me silin man mi mürina, pwal pap seni ewe irä itan akasia,
EXO 25:6 noppuk fän iten ekewe lamp, uän irä mi pwokus me chöön fän iten löön epit, pwal fän iten apach mi pwokus,
EXO 25:7 fau aüchea itan oniks me sokun fau aüchea fän iten alingen ewe üf itan efot, pwal fän iten ewe chechen leupw.
EXO 25:8 Mürin, ekewe aramas repwe föri ewe imw mi pin fän itei pwe üpwe imweimw lefiler.
EXO 25:9 Repwe föri ewe imwenfel seni mangaku me pisekin lon meinisin won ükükün mine üpwe aiti ngonuk.”
EXO 25:10 “Kopwe föri eu pworofel seni ewe irä akasia langataman ükükün faik me limu inis, nge chölapan me tekian ükükün rüe mi fisu inis.
EXO 25:11 Iwe, lon me lükün kopwe apacha ngeni kolt mi mürina, kopwe pwal alinga ngeni kolt mi chipwechip ünükün me won ewe pworofel.
EXO 25:12 Kopwe föri fofoch ring seni kolt o apacheretä ngeni pwokukun me rüanü, ruofoch me epek, pwal ruofoch me epek.
EXO 25:13 Iwe, kopwe falei ruofoch ämwär seni ewe irä akasia o apachätä kolt wor.
EXO 25:14 Kopwe sökirelong lon ekewe ring mi pachetä lepekin ewe pworofel, pwe aramas ra tongeni ämwära.
EXO 25:15 Iwe, ekewe ämwär repwe chök nonom lon ringen ewe pworofel, nge resap sökuwu seniir.
EXO 25:16 Mürin kopwe iseis lon ewe pworofel ekewe rüepek fau mi chöpöp üpwe ngonuk, ekewe allük ra mak won.
EXO 25:17 Kopwe pwal föri öppüngün seni kolt mi mürina, langataman ükükün faik me limu inis, nge chölapan rüe me fisu inis. Iei lenien ai ümöümöch.
EXO 25:18 Kopwe pwal föri uluulun ruoman kerop seni kolt won lesopun ewe öppüng me ruosop, nge kopwe chök necheer ngeni ama.
EXO 25:19 Ekewe kerop repwe nonom lesopun ewe öppüng me ruosop, nge repwe chök förunus me ewe öppüng.
EXO 25:20 Iwe, pöükässin ekewe kerop repwe itila o meresila, pwe repwe ochunoi won ewe öppüng, nge won meser repwe säpefengen o wenetiu ngeni ewe öppüng.
EXO 25:21 Iwe, kopwe iseis lon ewe pworofel ekewe rüepek fau mi chöpöp ngang üpwe ngonuk, ekewe allük ra mak won o apüngü ngeni ewe öppüng.
EXO 25:22 Iei ewe leni ia üpwe churuk me ie. Iwe, seni ei leni lefilen ekewe ruoman kerop mi nom won ewe pworofel üpwe kapas ngonuk o aiti ngonuk ekewe allük fän iten chon Israel.”
EXO 25:23 “Iwe, kopwe föri eu chepel seni ewe irä akasia langataman ükükün ilik me wonu inis, chölapan ükükün engol me walu inis, nge tekian rüe me fisu inis.
EXO 25:24 Kopwe apacha ngeni kolt mi mürina, kopwe pwal alinga ngeni kolt mi chipwechip ünükün me won ewe chepel.
EXO 25:25 Iwe, kopwe föri aaman won pwelin ünükün tekian ükükün ülüngat inis, kopwe pwal alinga ngeni kolt mi chipwechip.
EXO 25:26 Iwe, kopwe föri fofoch ring seni kolt o apacheretä ngeni lepwokukun me rüanü, ia ekewe fofoch pechen ra nom ie.
EXO 25:27 Ekewe ring repwe kuku ngeni aamen ewe chepel, nge ämwärin repwe sökulong lon ekewe ring, pwe aramas ra tongeni ämwära.
EXO 25:28 Kopwe falei ekewe ämwär seni ewe irä akasia o apachätä kolt wor.
EXO 25:29 Kopwe pwal föri sepi me kap me rume, pwe repwe nonom fän iten ewe asoren ün. Iwe, kopwe föriir meinisin seni kolt mi mürina.
EXO 25:30 Iwe, kopwe iseis ekewe pilawa mi pin won ewe chepel, pwe repwe nom fän mesei fansoun meinisin.”
EXO 25:31 “Iwe, kopwe föri eu lenien atittin seni kolt mi mürina, kopwe pwal auluulu motongan me popun o necheer ngeni ama. Iwe, alingan meinisin, ekewe uluulun pön irä me kirupun repwe förunus me ewe lenien atittin.
EXO 25:32 Epwe pwal wor wonofoch keangan repwe keang seni ewe popun, ülüfoch me epek, pwal ülüfoch me epek.
EXO 25:33 Won eu me eu keangan epwe wor ülüpö uluulun pön irä usun chök pön ewe irä itan almont. Nge iteiten pön irä epwe wor kirupun me fan. Ina usun lapalapen ekewe wonofoch keang mi keang seni popun ewe lenien atittin.
EXO 25:34 Iwe, won popun epwe wor fapö uluulun pön irä usun chök pön ewe irä almont, epwe pwal wor föföü kirupur,
EXO 25:35 eföü kirup epwe nom fän iteiten ekewe leni, ia ekewe wonofoch keang ra keang seni ie.
EXO 25:36 Nge ekewe kirup me ekewe keang repwe förunus, pwe unusen ewe lenien atittin epwe för seni kolt mi mürina, epwe pwal auluul o nechenech ngeni ama.
EXO 25:37 Kopwe pwal föri fisu lamp fän iten ewe lenien atittin. Ekewe lamp repwe nom won pwe repwe asarama mwan.
EXO 25:38 Iwe pisekin ewe lenien atittin, ekewe fich me lenien mooch repwe pwal för seni kolt mi mürina.
EXO 25:39 Ewe lenien atittin me pisekin meinisin repwe för seni ina epwe ükükün fik me limu paun kolt mi mürina.
EXO 25:40 Kopwe tümwünü pwe kopwe chök föri meinisin usun mine üa aiti ngonuk me won ewe chuk.”
EXO 26:1 “Iwe, kopwe föri ewe imwenfel ren engol pekin mangaku mi mürina o pwechepwech, mangaku mi arauarau me parochol me parapar. Eman mi silelap le chü epwe chüri liosun kerop wor.
EXO 26:2 Iwe, ekewe pekin mangaku meinisin repwe nönöfengen, langatamer ükükün engol me rüanü iach, nge chölaper ruu iach.
EXO 26:3 Limu pekin mangaku repwe tetefengen, nge limu pekin repwe pwal tetefengen pwe epwe wor ruachö cheech.
EXO 26:4 Kopwe tei pwäken mi arauarau ünükün ewe echön cheech me epek, kopwe pwal föri ina usun won ewe aruachön.
EXO 26:5 Iwe, kopwe teätä lime pwäken ünükün ewe echön cheech me epek, kopwe pwal teätä lime pwäken ünükün ewe aruachön cheech me epek. Iwe, ekewe pwäken repwe chök wenefengen.
EXO 26:6 Mürin kopwe föri lime ökkük seni kolt o ökküküfengeni ekewe cheech. Iei usun ewe imwenfel seni mangaku epwe unus.
EXO 26:7 Iwe, kopwe föri engol me echö pekin mangaku seni ülöülen kuuch, pwe pwölüpwölün ewe imwenfel.
EXO 26:8 Iwe, ekewe engol me echö pekin mangaku repwe chök nönöfengen, ükükün langatamen echö pekin engol me limu iach, nge ükükün chölapan ruu iach.
EXO 26:9 Kopwe teifengeni limachö pekin mangaku pwe repwe chök eu cheech, pwal wonachö pwe epwe wor aruachön cheech. Nge ewe awonachön pekin kopwe numätä won ewe alimachön me fän mesen ewe imwenfel.
EXO 26:10 Mürin kopwe teätä lime pwäken ngeni ünükün ewe echön cheech me epek, kopwe pwal teätä lime pwäken ngeni ünükün ewe aruachön cheech me epek.
EXO 26:11 Kopwe föri lime ökkük seni piras o ökküküfengeni ekewe pwäken. Iei usun om kopwe achufengeni ekewe pwölüpwöl pwe repwe echö chök.
EXO 26:12 Iwe pokiten ewe pwölüpwöl a langatam seni ewe imwenfel, esop seni epekin mangaku epwe sapwilitiu me lesopun.
EXO 26:13 Ewe pwölüpwöl a chömong seni ewe imwenfel, iei mine esop iach epwe sapwilitiu me lepekin me ruu o pwölüela.
EXO 26:14 Kopwe pwal föri echö pwölüpwöl mi kapar seni silin ätemwänin sip pwal echö pwölüpwöl seni silin man mi mürina.
EXO 26:15 Iwe, kopwe föri papen ewe imwenfel seni mangaku seni ewe irä akasia, nge ekewe pap repwe üwenewenetä.
EXO 26:16 Langatamen echö me echö ekewe pap ükükün engol me limu fiit, nge chölapan rüe me fisu inis.
EXO 26:17 Nge fän iteiten echö pap epwe wor ruu oupun pwe repwe tongeni afoufengen. Iei usun kopwe föri ngeni papen ewe imwenfel meinisin.
EXO 26:18 Iwe, kopwe föri rüe pap fän iten peliörün ewe imwenfel seni mangaku.
EXO 26:19 Kopwe pwal föri faik along seni silifer o anomuur fän ekewe rüe pap, ruu along fän iteiten echö pap, pwe oupun repwe sökulong lon pwangen ekewe along.
EXO 26:20 Nge fän iten peliefengin ewe imwenfel seni mangaku kopwe pwal föri rüe pap
EXO 26:21 me faik alongur seni silifer, ruu along fän iteiten echö pap.
EXO 26:22 Iwe, fän iten lükisökürün ewe imwenfel seni mangaku me pelilotoun kopwe föri wonachö pap.
EXO 26:23 Kopwe pwal föri ruachö pap fän iten lepwokukun ewe imwenfel seni mangaku me lükisökürün.
EXO 26:24 Ekewe ruachö pap repwe pachefengen seni fan tori asan o ökkükfengen ren efoch ring. Iei usun om kopwe föri ngeni ekewe ruachö pap fän iten ekewe ruu pwokuku.
EXO 26:25 Ina usun epwe wor waluchö pap pwal engol me wonu alongur seni silifer, ruu along fän iteiten echö pap.
EXO 26:26 Iwe, kopwe föri ömwöch seni ewe irä akasia, limefoch fän iten papen lepekin ewe imwenfel seni mangaku me epek,
EXO 26:27 limefoch fän iten papen me pwal epek, nge limefoch fän iten pappen lükisökürün me pelilotoun.
EXO 26:28 Ewe ömwöch mi nom lukalapen ekewe pap epwe seni fän mesen ewe imwenfel seni mangaku tori lükisökürün.
EXO 26:29 Iwe, kopwe apacha ngeni kolt ekewe pap, kopwe pwal föri ringen wor seni kolt, pwe ekewe ömwöch repwe sökülong lor. Kopwe pwal apachätä kolt won ekewe ömwöch.
EXO 26:30 Lupwen kopwe aüetä ewe imwenfel seni mangaku, kopwe chök aüetä lon aükükün mine ka küna me won ewe chuk.
EXO 26:31 Iwe, kopwe föri echö cheech seni mangaku mi arauarau me parachol me parapar, pwal mangaku mi pwechepwech o mürina. Eman mi silelap le chü epwe chüri liosun kerop won.
EXO 26:32 Iwe, kopwe ökkükätä ewe cheech won fofoch ür seni ewe irä akasia mi pwölüpwöl ngeni kolt. Won ekewe ür epwe wor ökkük seni kolt, epwe pwal wor rüanü alongur seni silifer.
EXO 26:33 Kopwe aitiuätä ewe cheech won ekewe ökkük o anomu ewe pworofel pekilongan. Ewe cheech epwe refifeseni ewe rumw mi pin seni ewe rumw mi unusen pin.
EXO 26:34 Iwe, kopwe anomu ewe öppüng won ewe pworofel o iseni lon ewe rumw mi unusen pin.
EXO 26:35 Kopwe anomu ewe chepel pekiton ewe cheech me peliefengin lon ewe imwenfel seni mangaku. Nge ewe lenien atittin kopwe anomu peliörün awenewenen ewe chepel.
EXO 26:36 Iwe, kopwe föri echö cheech fän iten asamalapen ewe imwenfel seni mangaku mi arauarau me parachol me parapar, pwal seni mangaku mi pwechepwech o mürina, epwe pwal chü.
EXO 26:37 Iwe, kopwe föri ökkük seni kolt fän iten ei cheech me limefoch ür seni ewe irä akasia o apacha ngeniir kolt. Kopwe pwal föri limu alongur seni piras.
EXO 27:1 Iwe, kopwe föri ewe rongen asoren kek seni ewe irä akasia, langataman me chölapan repwe chök nönöfengen ükükün eu esop fiit, nge tekian epwe ükükün rüanü esop fiit.
EXO 27:2 Iwe, kopwe pwal föri fofoch mächä won ekewe rüanü lepwokukun, nge ekewe mächä repwe förunus me ewe rongen asor. Kopwe pwal apachätä piras ngeni won unusen ewe rongen asor.
EXO 27:3 Kopwe föri nape fän iten falangen me molien lon, pwal söföl me sepi fän iten chan ekewe mönün asor, pwal chü. Kopwe föri ekei pisek meinisin seni piras.
EXO 27:4 Iwe, kopwe pwal föri äpäwunan seni piras o apachätä fofoch ring ngeni pwokukun me rüanü.
EXO 27:5 Kopwe anomu äpäwunan fän aamen ewe rongen asor, pwe epwe nom seni lukalapan tori fan.
EXO 27:6 Kopwe falei ämwärin ewe rongen asor seni ewe irä akasia o apachätä piras wor.
EXO 27:7 Iwe, ekewe ämwär repwe sökulong lon ekewe ring me lepekin ewe rongen asor me rüepek, pwe aramas ra tongeni ämwära.
EXO 27:8 Kopwe föri ewe rongen asoren kek seni pap, nge epwe pöön lon. Iwe, kopwe chök föri usun mine üa aiti ngonuk me won ewe chuk.
EXO 27:9 Iwe, kopwe föri eu leni lükün ewe imwenfel seni mangaku. Lepeliörün ewe leni epwe tit ngeni mangaku mi pwechepwech, langataman ükükün lime iach.
EXO 27:10 Epwe wor rüe üran me rüe alongur seni piras, nge ökkükün won ekewe ür pwal mächän lefiler me asan repwe för seni silifer.
EXO 27:11 Iwe, lepeliefengin ewe leni epwe pwal tit ngeni mangaku, langataman ükükün lime iach, epwe pwal wor rüe üran me rüe alongur seni piras, nge ökkükün won ekewe ür pwal mächän lefiler me asan repwe för seni silifer.
EXO 27:12 Iwe, lepelilotoun ewe leni epwe tit ngeni mangaku chölapan ükükün rüe me limu iach, epwe pwal wor engol üran me engol alongur.
EXO 27:13 Nge fän mesen ewe leni me peliötiuan chölapan epwe pwal ükükün rüe me limu iach.
EXO 27:14 Iwe, lepekin ewe asamalap me epek epwe tit ngeni mangaku langataman ükükün fisu esop iach, epwe pwal wor ülüfoch üran me ülüngat alongur.
EXO 27:15 Nge lepekin ewe asamalap me pwal epek epwe tit ngeni mangaku langataman ükükün fisu esop iach, epwe pwal wor ülüfoch üran me ülüngat alongur.
EXO 27:16 Won asamalapen ewe leni lükün ewe imwenfel seni mangaku epwe wor echö cheech mi för seni mangaku mi arauarau me parachol me parapar, pwal seni mangaku mi pwechepwech o mürina, epwe pwal chü. Langatamen ewe cheech epwe ükükün engol iach. Epwe pwal wor fofoch üran me rüanü alongur.
EXO 27:17 Iwe, lefilen iteiten ekewe üren ewe tit mi nom pwelin ünükün ewe leni lükün ewe imwenfel seni mangaku epwe wor mächä me ökkükün wor mi för seni silifer, epwe pwal wor alongur seni piras.
EXO 27:18 Iwe, langatamen ewe leni lükün ewe imwenfel seni mangaku epwe ükükün lime iach, chölapan rüe me limu iach, nge tekian tittin ükükün ruu esop iach. Iwe, ewe tit epwe för seni mangaku mi pwechepwech, nge alongun üran repwe för seni piras.
EXO 27:19 Ekewe pisek meinisin ra aea le angang lon ewe imwenfel seni mangaku, pwal chüfölün me chüfölün ewe leni lükün repwe för seni piras.”
EXO 27:20 “Kopwe allük ngeni ekewe chon Israel pwe repwe uwato noppuk mi mürina seni föün olif mi üsüs fän iten ewe lenien atittin, pun laman repwe tittinfochofoch.
EXO 27:21 Iwe, lon ewe imw mangaku ia aramas ra churiei ie, pekiton etippen ewe pworofel Aaron me nöün kewe mwän repwe amolätä ekewe lamp, pwe repwe tittin fän mesen ewe Samol mi Lapalap seni lekuniol tori lesosor. Ei allük epwe pöchökül tori feilfeilachök, seni eu täppin aramasen Israel tori pwal eu täppin.”
EXO 28:1 “Iwe, kopwe körato reöm Aaron pwiüm we seni lein ekewe chon Israel fiti nöün kewe mwän iter Natap, Apihu, Eleasar me Itamar, pwe repwe angang ngeniei lon wisen souasor.
EXO 28:2 Iwe, kopwe tei üf mi pin fän iten Aaron pwiüm we, pwe epwe pwäla lingen wisan me iteüöchün.
EXO 28:3 Kopwe kapas ngeni ekewe soutete üa asilelapeer o atufichiir pwe repwe tei üfen Aaron. Mürin epwe afeiöch pwe epwe angang ngeniei lon wisen souasor.
EXO 28:4 Ikkei ekewe pisek repwe tei: echö chechen leupw, echö üf itan efot, echö owokot, echö sööch mi pwechepwech o sikapoot, eu akkaw me efoch pelit. Iwe, repwe tei ekei üf mi pin fän iten Aaron pwiüm we me nöün kewe mwän, pwe repwe angang ngeniei lon wisen souasor.
EXO 28:5 Iwe, ekewe soutete repwe aea terech kolt me mangaku mi arauarau me parachol me parapar, pwal mangaku mi pwechepwech le tete.
EXO 28:6 Repwe föri ewe üf itan efot seni terech kolt, pwal seni mangaku mi arauarau me parachol me parapar, pwal seni mangaku mi pwechepwech, nge eman soutete epwe föri ei angang.
EXO 28:7 Iwe, repwe föri ruachö chechen won afaran o teiretä lekochun me won afaren ewe üf, pwe ekewe ruu pekin repwe pachefengen.
EXO 28:8 Kiren ewe riri won ewe efot epwe usun chök kiren ewe efot, pun epwe för seni terech kolt, pwal seni mangaku mi arauarau me parachol me parapar, pwal seni mangaku mi pwechepwech.
EXO 28:9 Iwe, kopwe angei ruoföü fau aüchea iter oniks o ruputi wor iten nöün Israel kewe mwän.
EXO 28:10 Iten wonoman leir kopwe ruputi won ewe eföü, nge iten pwal ekewe wonoman kopwe ruputi won ewe aruoföün lon tettelin ar uputiu.
EXO 28:11 Iwe, kopwe ruputi iten nöün Israel kewe mwän won ekewe ruoföü fau usun chök eman chon fala fau aüchea a rup won ringen pwau, kopwe pwal föri lenien ömwöchür seni kolt.
EXO 28:12 Iwe, kopwe amasatä ekewe ruoföü fau won chechen won afaren ewe üf itan efot, pwe föün achema iten nöün Israel kewe mwän. Iei usun Aaron epwe uwei iter won afaran me ruu pwe ngang ewe Samol mi Lapalap üpwe chechemeniir fansoun meinisin.
EXO 28:13 Kopwe pwal föri lenien ömwöch seni kolt
EXO 28:14 me ruofoch säl seni kolt mi mürina. Kopwe ona ekewe säl usun chök lül o rietä ngeni ekewe lenien ömwöch.
EXO 28:15 Iwe, kopwe tei ewe chechen leupw pwe eu lenien pwärätä letipen Kot. Eman soutete epwe föri ei angang. Kopwe föri seni terech kolt me mangaku mi arauarau me parachol me parapar, pwal seni mangaku mi pwechepwech, usun chök ewe efot.
EXO 28:16 Iwe, langataman me chölapen ewe cheech repwe nönöfengen, ükükün tiu inis, nge epwe pwal wor ruu säsärin.
EXO 28:17 Mürin kopwe amasalong won ewe cheech rüanü telin fau aüchea. Won aeuin telin epwe wor ülüföü fau iter sartoniks, topas me karpunkel.
EXO 28:18 Won aruuen telin epwe wor ülüföü fau iter emeralt, safaia me taiamont.
EXO 28:19 Iwe, won aülüngatin telin epwe wor ülüföü fau iter iasint, akit me ametist,
EXO 28:20 nge won arüanün telin epwe wor ülüföü fau iter peril, oniks me iasper. Iwe, kopwe amaserelong lon lenien ömwöchür kewe seni kolt.
EXO 28:21 Iei usun epwe wor engol me ruoföü fau ükükün iteiten nöün Israel kewe mwän. Iwe, iteiten eföü me eföü kewe fau epwe rup iten ekewe engol me ruu ainangen Israel won, nge ewe mak epwe usun chök rupun won ringen pwau.
EXO 28:22 Iwe, kopwe föri selin ewe chechen leupw seni kolt mi mürina usun chök lül mi kon.
EXO 28:23 Kopwe pwal föri ruofoch ring seni kolt o apacheretä lepwokukun won ewe cheech me ruu.
EXO 28:24 Iwe, ekewe ruofoch säl seni kolt kopwe ri ngeni ekewe ruofoch ring mi nom lepwokukun ewe chechen leupw.
EXO 28:25 Nge lesopun ekewe ruofoch säl repwe riri ngeni ekewe ruu lenien ömwöch mi nom won ekewe chechen won afaren ewe efot me fän mesan.
EXO 28:26 Iwe, kopwe pwal föri ruofoch ring seni kolt o apacheretä lepwokukun ewe cheech me fan, pwe repwe nom lefilen ewe cheech me ewe efot.
EXO 28:27 Kopwe föri pwal ruofoch ring seni kolt o apacheretä lesopun me fän ekewe ruachö chechen won afaren ewe efot me fän mesan, pwe epwe nom lekochun ewe efot asen ewe riri.
EXO 28:28 Iwe, ringen ewe chechen leupw repwe riri ngeni ringen ewe efot ren efoch säl mi arauarau, pwe epwe nom asen ririn ewe üf, pwe esap nükütomotom me won.
EXO 28:29 Iwe, lupwen Aaron epwe tolong lon ewe leni mi pin, epwe uwala iten nöün Israel kewe mwän won ewe chechen leupw mi nom fän mwärin pwe ngang ewe Samol mi Lapalap üpwe chechemeni nei aramas fansoun meinisin.
EXO 28:30 Kopwe iselong ewe Urim me ewe Tumim lon ewe chechen leupw, pwe repwe nonom fän mwärin Aaron, lupwen epwe tolong fän mesei. Iei usun Aaron epwe uwei fän mwärin ewe minen asisila letipei ngeni chon Israel fansoun meinisin, lupwen epwe tolong fän mesei.
EXO 28:31 Iwe, kopwe tei ewe owokot seni chök mangaku mi arauarau, epwe nom fän ewe efot.
EXO 28:32 Me lukalapen ewe owokot epwe wor leawan usun chök leawen eu üf, nge ünükün leawan epwe wor leisin pwe esap tongeni kam.
EXO 28:33 Iwe, lepwülün kopwe teätä uluulun apel seni mangaku mi arauarau me parachol me parapar, kopwe pwal teätä pel seni kolt lefiler.
EXO 28:34 Epwe iei usun: eu pel, eföü apel, eu pel, eföü apel won pwelin lepwülün ewe owokot.
EXO 28:35 Iwe, Aaron epwe üföüf ei üf, lupwen a föri an angang. Iwe, ekewe pel repwe nech, lupwen epwe tolong fän mesei lon ewe leni mi pin, pwal lupwen epwe towu. Ei epwe fis pwe esap mäla.
EXO 28:36 Iwe, kopwe angei kolt mi mürina o achöpöpü, kopwe pwal ruputi ekei kapas won usun rupun won ringen pwau, ‘A pin me ren ewe Samol mi Lapalap’.
EXO 28:37 Kopwe rietä ewe kolt mi chöpöp won eten mesen ewe akkaw ren efoch säl mi arauarau.
EXO 28:38 Iwe, Aaron epwe uwei won chamwan. Aaron epwe uwei sokun pupungau mi pach ngeni ekewe asor ekewe chon Israel ra apini, ese lifilifil met sokun asor ra eäni. Iwe, ewe kolt mi chöpöp epwe nom fochofoch won chamwan, pwe ekewe asor repwe tiw me rei ngang ewe Samol mi Lapalap.
EXO 28:39 Mürin kopwe föri ewe sööch seni mangaku mi pwechepwech o sikapoot me ewe akkaw seni mangaku mi pwechepwech o mürina, kopwe pwal tei efoch pelit epwe chü.
EXO 28:40 Nge kopwe pwal tei sööch me pelit me akkaw fän iten nöün Aaron kewe mwän, pwe epwe pwäla lingen wiser me iteüöchür.
EXO 28:41 Iwe, ekewe üf kopwe aüföüfa ngeni Aaron pwiüm we, pwal ngeni nöün kewe mwän. Kopwe epitiir o afeiöchüür, kopwe pwal apiniir pwe repwe angang ngeniei lon wiser wisen souasor.
EXO 28:42 Iwe, kopwe tei ar rauesesin lon seni mangaku mi pwechepwech, nge ükükür epwe seni won wila tori lepwäsuk, pwe epwe pwölüla ar selela.
EXO 28:43 Iwe, Aaron me nöün kewe mwän repwe aea, lupwen repwe tolong lon ewe imw mangaku ia aramas ra churiei ie, pwal lupwen repwe kan ngeni ewe rongen asor pwe repwe föri ar angang ngeniei lon ewe leni mi pin. Iei usun resap tipis ika mäla. Nge ei epwe eu allük esemüch ngeni Aaron me mwirimwirin kana.”
EXO 29:1 “Iei usun mine kopwe föri, lupwen kopwe apini Aaron me nöün kewe mwän pwe repwe föri ar angang ngeniei lon wisen souasor. Kopwe angei eman nienifön ätemwänin kow me ruoman ätemwänin sip esap wor terir,
EXO 29:2 kopwe pwal angei pilawa mi amas seni föün wiich mi mürina o föri pilawa esap wor iis lon, sokun pilawa mi tonafengen me apüra, pwal nokop mi toto ngeni apüra.
EXO 29:3 Iwe, kopwe iseniir lon eu chüük o uweefengenireto me ewe ätemwänin kow me ekewe ätemwänin sip.
EXO 29:4 Kopwe pwal emwenato Aaron me nöün kewe mwän ren asamalapen ewe imw mangaku ia aramas ra churiei ie o atütüür.
EXO 29:5 Mürin kopwe angei ekewe üf o aüföüfa ngeni Aaron. Ewe sööch epwe akom, mürin ewe owokot, pwal mürin ewe üf itan efot, nge ewe chechen leupw epwe nom won. Iwe, ririn ewe efot mi mürina kopwe pwal riri ngeni lukalapan.
EXO 29:6 Iwe, kopwe eimweimwa ngeni ewe akkaw o rietä ewe kolt mi chöpöp won, iei ewe mwärämwär mi pin.
EXO 29:7 Mürin kopwe angei ewe löön epit o ninätiu won möküran pwe kopwe epiti.
EXO 29:8 Iwe, kopwe pwal emwenato nöün Aaron kewe mwän o aüföüfa ngeniir ekewe sööch,
EXO 29:9 kopwe pwal peliti ngeniir ekewe pelit o eimweimwa ngeniir ekewe akkaw. Ren pwüngün ei föför ir me mwirimwirir repwe wiseni wisen souasor tori feilfeilachök. Iei usun kopwe afeiöchü Aaron me nöün kewe mwän.
EXO 29:10 Mürin kopwe emwenato ewe ätemwänin kow mwen ewe imw mangaku ia aramas ra churiei ie. Iwe, Aaron me nöün kewe mwän repwe isetä pöür won möküren ewe ätemwänin kow,
EXO 29:11 nge en kopwe niela ewe kow fän mesei leasamalapen ewe imwenfel seni mangaku.
EXO 29:12 Iwe, kopwe angei ekis chan ewe ätemwänin kow o aea poum le tofi ngeni mächän ewe rongen asor, nge ewe lusun cha kopwe ninätiu ünükün ewe rongen asor.
EXO 29:13 Mürin kopwe angei kirisin meinisin mi pwölüela pisekin lon inisin, pwal mwärekeon ammünün me ekewe ruoföü föün lon fiti kirisir o kenirela won ewe rongen asor.
EXO 29:14 nge fituken ewe ätemwänin kow me silin pwal taran kopwe kenirela lükün ewe ia chon Israel ra nonom ie, pun iei eu asoren tipis fän iten ekewe souasor.
EXO 29:15 Mürin kopwe angei eman lein ekewe ätemwänin sip, nge Aaron me nöün kewe mwän repwe isetä pöür won möküran.
EXO 29:16 Iwe, kopwe niela ewe ätemwänin sip, kopwe angei chan o äsupufetalei ngeni pwelin ewe rongen asor.
EXO 29:17 Mürin kopwe kinikisietiu fituken ewe ätemwänin sip o limeti pisekin lon inisin pwal pöün me pechen. Iwe, kopwe achufengeniir meinisin fiti möküran
EXO 29:18 o kenala kinikinin ewe ätemwänin sip meinisin won ewe rongen asor. Iei eu asoren kek ngang ewe Samol mi Lapalap üa efich pwoon.
EXO 29:19 Iwe, kopwe angei ewe aruomanün ätemwänin sip, nge Aaron me nöün kewe mwän repwe isetä pöür won möküran.
EXO 29:20 Mürin kopwe niela ewe ätemwänin sip, kopwe angei ekis chan o tofi ngeni emin fän pelifichin selingen Aaron, pwal ngeni emin fän pelifichin selingen nöün kewe mwän, kopwe pwal tofi ngeni aütülapen pelifichin pöür me pecher, nge ewe lusun cha kopwe äsupufetalei ngeni pwelin ewe rongen asor.
EXO 29:21 Iwe, kopwe angei ekis cha me won ewe rongen asor me ewe löön epit o äsupu ngeni Aaron me üfan, pwal ngeni nöün kewe mwän me üfer. Iwe, Aaron me üfan kewe repwe pin, pwal nöün kewe mwän me üfer.
EXO 29:22 Kopwe pwal angei kirisin ewe ätemwänin sip, kirisin ükün, ewe kiris mi pwölüela pisekin lon inisin, mwärekeon ammünün, ekewe ruoföü föün lon fiti kirisir, pwal pelifichin pechen, pun ei ätemwänin sip eu asoren afeiöch.
EXO 29:23 Iwe, kopwe angei eföü pilawa, eföü pilawa mi tonafengen me apüra, pwal echö nokop seni lon chükün ewe pilawa esap wor iis lon mi nom fän mesei.
EXO 29:24 Ekei mettoch meinisin kopwe isenalong lepöün Aaron me lepöün nöün kewe mwän, pwe repwe assawereto fän mesei, pun eu asoren assaw.
EXO 29:25 Mürin kopwe angei ekei mettoch seni lepöür o kenirela won ewe rongen asor pwe epwe pach ngeni ewe asoren kek. Iei eu asor ngang ewe Samol mi Lapalap üa efich pwoon.
EXO 29:26 Kopwe pwal angei leupwen ewe ätemwänin sip fän iten afeiöchün Aaron o assawa fän mesei, pun eu asoren assaw. Iei ükükün inetum.
EXO 29:27 Iwe, kopwe apini kinikinin fituken ewe ätemwänin sip, ewe asoren afeiöch, pwe inetin Aaron me nöün kewe mwän: ewe leupw me ewe peche a fen assaw.
EXO 29:28 Ikkei inetin Aaron me nöün kewe mwän, repwe angei me ren ekewe chon Isrel iteiten fansoun meinisin. Pun iei ewe asor ekewe chon Israel repwe fang ngeniei seni ar kewe asoren kinamwe.
EXO 29:29 Mürin än Aaron mäla üfan kewe mi pin nöün kewe mwän repwe pwal üföüf le epit o afeiöch far, lupwen repwe seikitä ngeni wisen souasor.
EXO 29:30 Iwe, nöün we mi siwili lon wisan wisen souasor epwe üföüf ekewe üf lon ükükün fisu rän, lupwen an tolong lon ewe imw mangaku ia aramas ra churiei iei, pwe epwe föri an angang lon ewe leni mi pin.
EXO 29:31 Iwe, kopwe angei fituken ewe ätemwänin sip fän iten asoren afeiöch o amota lon eu leni mi pin.
EXO 29:32 Aaron me nöün kewe mwän repwe ochoch fituken ewe ätemwänin sip o mongö ekewe pilawa mi nom lon ewe chüük leasamalapen ewe imw mangaku ia aramas ra churiei ie.
EXO 29:33 Iei usun repwe mongö ewe asor a fis amusamusen tipis ren, lupwen ra afeiöch o apinipinila. Nge esap wor eman lükür epwe mongö seni, pun a pin.
EXO 29:34 Iwe, sorotän ewe rän, are a chüen wor ekis lusun fituk me pilawa seni ewe asoren afeiöch, kopwe kenirela meinisin pwe esap wor eman epwe mongö, pun ra pin.
EXO 29:35 Iei usun kopwe föri ngeni Aaron me nöün kewe mwän meinisin mine üa allük ngonuk. Lon ükükün fisu rän epwe fis angangen afeiöch wor.
EXO 29:36 Iwe, iteiten rän kopwe eäni asoren amusamusen tipis eman ätemwänin kow. Kopwe pwal alimöchü ewe rongen asor ren om föri asoren limelim fän itan. Mürin kopwe epiti pwe epwe pin.
EXO 29:37 Lon ükükün fisu rän kopwe föri asoren limelim fän iten ewe rongen asor, kopwe pwal apini. Mürin, ewe rongen asor epwe unusen pin, nge meinisin mine epwe toori epwe pwal pin.”
EXO 29:38 “Ikkei ekewe mettoch kopwe eäni asor won ewe rongen asor: Iteiten rän tori feilfeilachök kopwe eäni asor ruoman lam eu ierir.
EXO 29:39 Ewe aemanün kopwe eäni asor lesosor, nge ewe aruomanün kopwe eäni lekuniol.
EXO 29:40 Iwe, kopwe afiti ngeni ewe aemanün lam ruu paun pilawa mi mürina nofitfengen me eu kuoch apüra seni föün olif mi üsüs, pwal eu kuoch wain pwe eu asoren ün.
EXO 29:41 Nge ewe aruomanün lam kopwe eäni asor lekuniol, kopwe pwal afiti ngeni ewe asoren mongö me asoren ün usun chök ewe asor a fis lesosor. Ei epwe eu asor ngang ewe Samol mi Lapalap üa efich pwoon.
EXO 29:42 Ei asoren kek mwirimwirimi kana repwe eäni fansoun meinisin me leasamalapen ewe imwenfel seni mangaku fän mesei ngang ewe Samol mi Lapalap. Iei ei leni üpwe churikemi ie pwe üpwe kapas ngenikemi.
EXO 29:43 Eiia üpwe churi chon Israel ie, ei leni epwe pin, pun ai ling epwe nom lon.
EXO 29:44 Iwe, üpwe apini ewe imwenfel seni mangaku me ewe rongen asor, üpwe pwal apini Aaron me nöün kewe mwän pwe repwe pin o angang ngeniei lon wiser wisen souasor.
EXO 29:45 Iwe, üpwe imweimw lein ekewe chon Israel pwe üpwe ar Kot.
EXO 29:46 Nge ir repwe silei pwe ngang ewe Samol mi Lapalap ar we Kot, üa emwenirewu seni lon ewe fanü Isip pwe üpwe imweimw lefiler. Ngang ewe Samol mi Lapalap ar we Kot.”
EXO 30:1 “Iwe, kopwe föri eu rongen asoren ötüöt seni ewe irä akasia, pwe kopwe keni ewe apach mi pwokus won.
EXO 30:2 Langataman me chölapan repwe chök nönöfengen, ükükür engol me walu inis. Iwe, tekian epwe ükükün ilik me wonu inis, nge mächän kewe fofoch kopwe förunuseifengeni me ewe rongen asor.
EXO 30:3 Iwe, kopwe apacha kolt mi mürina ngeni won me lepekin, pwal ngeni mächän kewe, kopwe pwal alinga ngeni kolt mi chipwechip ünükün me won.
EXO 30:4 Kopwe föri ruofoch ring seni kolt o apacheretä fän alingan we me epek, kopwe pwal föri ina usun me epek. Iwe, ekewe ämwär repwe sökulong lon ekewe ring pwe aramas repwe tongeni ämwära.
EXO 30:5 Kopwe falei ämwärin kewe seni ewe irä akasia o apachätä kolt wor.
EXO 30:6 Kopwe anomu ei rongen asoren ötüöt mwen chechen ewe leni ia ewe pworofel a nom ie, pwe epwe nom awenewenen öppüngün, iei ewe lenien ai ümöümöch ia üpwe churuk ie.
EXO 30:7 Iteiten lesosor Aaron epwe keni apach mi pwokus won, lupwen a amolätä ekewe lamp.
EXO 30:8 Nge lekuniol, lupwen Aaron epwe keni ekewe lamp, epwe pwal keni apach mi pwokus won ewe rongen asoren ötüöt. Iei ewe asoren ötüöt mwirimwirimi kana repwe eäni ngeni ewe Samol mi Lapalap fansoun meinisin.
EXO 30:9 Iwe, ousap eäni asor apach esap fich ngeni won ewe rongen asoren ötüöt, ousap pwal eäni asoren kek ika asoren mongö ika asoren ün won.
EXO 30:10 Fän eu lon eu ier Aaron epwe föri ewe angangen elimelima ewe rongen asoren ötüöt ren an tofi ngeni mächän kewe chan ewe mönün asoren amusamusen tipis. Ei epwe fis iteiten ier seni eu täppin aramas tori eu täppin. Ei rongen asoren ötüöt a unusen pin fän itei ngang ewe Samol mi Lapalap.”
EXO 30:11 Iwe, ewe Samol mi Lapalap a kapas ngeni Moses,
EXO 30:12 “Lupwen kopwe angei iteiten chon Israel, eman me eman mi alealong lon ewe iteit epwe mönätiu liwinin manauan ngeniei, pwe esap wor och feiengau epwe küw lon ewe fansoun kopwe aleaniir.
EXO 30:13 Iwe, iei ükükün mine eman mi alealong lon ewe iteit epwe mönätiu: eu lelimu aunus silifer, epwe för won ewe kilo ra aea le aükük lon ewe imw mi pin. Iwe, ewe eu lelimu aunus silifer repwe eäni asor ngeniei.
EXO 30:14 Iteiten eman me eman mi alealong lon ewe iteit seni ier rüe feitä epwe eäni ei asor ngeniei ngang ewe Samol mi Lapalap.
EXO 30:15 Chon pisekisek resap mönätiu lap seni ükükün eu lelimu aunus, nge chon wöüngau resap mönätiu kis seni, lupwen ra eäni asor ngeniei liwinin manauer.
EXO 30:16 Iwe, kopwe angei ei moni seni chon Israel fän iten angangen ewe imw mangaku ia aramas ra churiei ie. Nge ngang ewe Samol mi Lapalap üpwe chechemeni ekewe chon Israel pokiten ra mönätiu liwinin manauer.”
EXO 30:17 Iwe, ewe Samol mi Lapalap a kapas ngeni Moses,
EXO 30:18 “Kopwe föri eu sepi me motongan seni piras fän iten angangen töttöl. Kopwe anomu ewe sepi lefilen ewe imwenfel seni mangaku me ewe rongen asor, kopwe pwal alölöü ngeni koluk.
EXO 30:19 Iwe, Aaron me nöün kewe mwän repwe talü pöür me pecher ngeni.
EXO 30:20 Repwe fokun chiri ngeniir koluk pwe resap mäla, lupwen repwe tolong lon ewe imwenfel seni mangaku ika lupwen repwe kan ngeni ewe rongen asor, pwe repwe föri ar angang o keni ekewe asor ngeniei.
EXO 30:21 Iwe, repwe talü pöür me pecher pwe resap mäla. Ei epwe eu allük ngeni Aaron me mwirimwirin kana repwe apwönüetä seni eu täppin aramas tori eu täppin.”
EXO 30:22 Iwe, ewe Samol mi Lapalap a pwal kapas ngeni Moses,
EXO 30:23 “Kopwe angei ekei mettoch mi fokun pwokus: engol me ruu paun safei mi aüchea itan mör, ewe sokun mi lölö, wonu paun sinamon mi pwoarar me wonu paun kalamus mi pwokus,
EXO 30:24 pwal engol me ruu paun kasia, repwe för won ewe kilo ra aea le aükük lon ewe imw mi pin, me eu kalon noppuk seni föün olif.
EXO 30:25 Seni ekei mettoch kopwe föri eu löön epit mi pin usun chon föri lö ra föri.
EXO 30:26 Mürin kopwe angei ewe löön epit o epiti ngeni ewe imw mangaku, ia aramas ra churiei ie, me ewe pworofel,
EXO 30:27 kopwe pwal epiti ewe chepel me pisekin, ewe lenien atittin me pisekin, ewe rongen asoren ötüöt,
EXO 30:28 ewe rongen asoren kek me pisekin meinisin, pwal ewe sepien töttöl me motongan.
EXO 30:29 Iwe, kopwe apini ekei mettoch pwe repwe unusen pin, nge meinisin mine epwe tooriir epwe pin.
EXO 30:30 Mürin, kopwe epiti Aaron me nöün kewe mwän o apiniir pwe repwe angang ngeniei lon wisen souasor.
EXO 30:31 Iwe, kopwe üreni ekewe chon Israel, ‘Ei lö ai löön epit mi pin, epwe pin ngenikemi seni eu täppin aramas tori eu täppin.
EXO 30:32 Ousap aea ei lö le epiti ngeni aramas, ousap pwal föri sokun lö usun chök ei, pun a pin, nge epwe pwal pin ngenikemi.
EXO 30:33 Eman mi föri ei sokun lö ika epiti ngeni eman lükün Aaron me mwirimwirin kana epwe käriwu seni aramasan.’”
EXO 30:34 Mürin, ewe Samol mi Lapalap a kapas ngeni Moses, “Kopwe angei ekei mettoch mi pwokus iter stakte, onika, kalpanum me apach mi pwokus, nge ükükür epwe wewefengen.
EXO 30:35 Kopwe föri seniir eu minen asoren ötüöt, epwe pwokus usun lö förien ewe chon föri lö, epwe pwal nofit ngeni salt, nge epwe limöch o pin.
EXO 30:36 Iwe, ekis seni ewe minen asoren ötüöt kopwe üsi tori epwe moromor o isetiu mwen ewe pworofel lon ewe imwenfel seni mangaku, ewe ia üpwe churuk ie. Ei epwe eu mettoch mi unusen pin ngenikemi.
EXO 30:37 Lupwen oupwe föri püsin ämi minen ötüöt mi pwokus, ousap apirü usun ei minen asoren ötüöt. Ei epwe pin ngenikemi, pun och mi pin fän itei.
EXO 30:38 Nge eman mi apirü ei sokun minen ötüöt mi pwokus pwe a sani pwonnan, epwe käriwu seni aramasan.”
EXO 31:1 Iwe, ewe Samol mi Lapalap a kapas ngeni Moses,
EXO 31:2 “Iei üa filätä Pesalel nöün Uri, nge Uri nöün Hur seni ewe ainangen Juta.
EXO 31:3 Üa fen ngeni i Ngüni o fang ngeni silelap me tipachem me tufichin föri sokopaten angang meinisin,
EXO 31:4 a pwal sip le ekiekietä mettoch mi fö. Iwe, a sile angang ngeni kolt, silifer me piras,
EXO 31:5 a pwal sile angangen nechei fau aüchea pwe repwe maseöchülong lon lenier, pwal angangen fala irä me sokopaten angang.
EXO 31:6 Iwe, üa pwal filätä Oholiap nöün Ahisamak seni ewe ainangen Tan pwe epwe alisi Pesalel. Üa pwal atufichi aramas meinisin mi sile sokun angang pwe repwe tufichin föri meinisin mine üa aiti ngonuk:
EXO 31:7 Ewe imwenfel seni mangaku, ewe pworofel me öppüngün won, pwal pisekin lon meinisin,
EXO 31:8 ewe chepel me pisekin, ewe lenien atittin seni kolt mi mürina me pisekin meinisin, ewe rongen asoren ötüöt,
EXO 31:9 ewe rongen asoren kek me pisekin meinisin, ewe sepien töttöl me motongan,
EXO 31:10 ekewe üf mi mürina o pin, ewe souasor Aaron epwe üföüf, pwal üfen nöün kewe mwän repwe üföüf, lupwen ra föri ar angangen souasor,
EXO 31:11 ewe löön epit me ewe minen asoren ötüöt mi pwokus fän iten ewe leni mi pin. Repwe föri meinisin ükükün mine üa allük ngonuk.”
EXO 31:12 Iwe, ewe Samol mi Lapalap a kapas ngeni Moses,
EXO 31:13 “Kopwe üreni ekewe aramasen Israel, ‘Oupwe apini ai ränin sapat, pun epwe eu asisil lefilei me ämi seni eu täppin aramas tori eu täppin. Ren ei oupwe silei pwe ngang ewe Samol mi Lapalap üa apinikemi.
EXO 31:14 Oupwe apini ewe ränin sapat, pun a pin ngenikemi. Iteiten aramas mi aüangaua pinin ewe rän epwe ninnila. Ewer, iteiten aramas mi föri och angang lon ränin sapat epwe käriwu seni aramasan.
EXO 31:15 Lon ükükün wonu rän oupwe föri ämi angang, nge ewe afisuen rän ewe ränin sapat, eu ränin asösö a pin me rei. Iteiten aramas mi föri och angang lon ränin sapat epwe ninnila.
EXO 31:16 Iei mine ekewe chon Israel repwe apini ewe ränin sapat o aüöchü pinin seni eu täppin aramas tori eu täppin, pwe asisilen eu pwon esemüch.
EXO 31:17 Ei rän eu asisil lefilei me chon Israel tori feilfeilachök. Pun lon ükükün wonu rän ngang ewe Samol mi Lapalap üa föri läng me fanüfan, nge lon ewe afisuen rän üa ükütiu le angang o asösö.’”
EXO 31:18 Iwe, lupwen Kot a wes me kapas ngeni Moses me won ewe chuk Sinai, a ngeni ekewe rüepek fau mi chöpöp, ewe ia a mak ie ekewe allük püsin Kot a makei wor.
EXO 32:1 Iwe, lupwen ekewe chon Israel ra küna pwe Moses a mangetiu me won ewe chuk, ra mwichefengen ren Aaron o üreni, “Etto, kopwe föri ngenikem uluulun eman kot epwe akom mwach, pun sisap silei mine a fis ngeni Moses, ewe mwän a emwenikichewu seni lon ewe fanü Isip.”
EXO 32:2 Nge Aaron a üreniir, “Oupwe ettatiu ekewe ierring seni kolt seni selingen pwülüemi, pwal seni selingen nöümi mwän me fefin o uweereto rei.”
EXO 32:3 Iei mine ekewe aramas meinisin ra ettatiu nöür ierring seni kolt seni selinger o uwato ren Aaron.
EXO 32:4 Iwe, a angei seniir ekewe kolt, a ateli o ninalong lon eu lenien auluulu uluulun eman kow. Mürin, ekewe aramas ra apasa, “Iei i om we Kot, Israel, ewe mi emwenukowu seni lon ewe fanü Isip.”
EXO 32:5 Lupwen Aaron a küna ei föför, a senätä eu rongen asor me mwen ewe uluulun kow o arongafeili, “Lesor epwe fis eu chulap fän iten ewe Samol mi Lapalap.”
EXO 32:6 Iwe, ekewe aramas ra pwätä lesosorusich o eäni asoren kek me asoren kinamwe. Nge wesin ar asor ra mottiu pwe repwe momongö o ükün. Mürin ra ütä o urumwotongau.
EXO 32:7 Mürin, ewe Samol mi Lapalap a kapas ngeni Moses, “Kopwe müttiritiu, pun noum kewe aramas ka emwenirewu seni lon ewe fanü Isip ra föri föför mi ngau.
EXO 32:8 Ra müttir aleasolap ngeni ekewe allük üa ngeniir, ra föri eu uluulun kow seni kolt fän iter, ra fel ngeni, ra pwal asor ngeni o apasa, ‘Iei i om we Kot Israel, ewe mi emwenukowu seni lon ewe fanü Isip.’
EXO 32:9 Üa küna ekei aramas pwe ir aramas mi tipepöchökül o ülöförea.
EXO 32:10 Iei mine kopwe mwüt ngeniei pwe üpwe aroserela, pun üa fokun song ngeniir. Mürin üpwe föri senuk eu mwichen aramas mi chomong.”
EXO 32:11 Nge Moses a tütüngor ngeni an we Kot ewe Samol mi Lapalap fän iten ekewe chon Israel o apasa, “Ai Samol mi Lapalap, pwota ka fokun song ngeni noum kei aramas ka emwenirewu seni lon ewe fanü Isip ren om manaman, pwal ren poum mi fokun manaman?
EXO 32:12 Ifa usun, ka mochen pwe ekewe chon Isip repwe apasa, ‘A chök emwenirewu, pun a ekiekin afeiengaueer. A mochen nirela won ekewe chuk o aroserela seni won fanüfan?’ Kopwe likitala om song mi pöchökül, kopwe pwal siwili om ekiekin afeiengaua noum kewe aramas.
EXO 32:13 Kopwe chechemeni noum kewe chon angang Apraham, Isaak, me Israel, pun ka pwon fän akapel ngeniir fän püsin itom o üreniir pwe kopwe achomongala mwirimwirir usun fün läng, kopwe pwal ngeni mwirimwirir unusen ewe fanü, pwe repwe fanüeni tori feilfeilachök usun ka fen pwon ngeniir.”
EXO 32:14 Mürin, ewe Samol mi Lapalap a siwili an ekiekin afeiengaua nöün aramas.
EXO 32:15 Iwe, Moses a kul o feitiu me won ewe chuk, nge a uwei ekewe rüepek fau mi chöpöp lepöün, ekewe allük ra mak wor me rüepek.
EXO 32:16 Iwe, ekei rüepek fau Kot a püsin falei o makei ekewe allük wor.
EXO 32:17 Nge lupwen Josua a rong akürangen ekewe aramas mi mweireir, a üreni Moses, “A fis akürangen maun lon lenier.”
EXO 32:18 Nge Moses a üreni, “Ei akürang sap akürangen aramas mi win ika kuf, nge mine üa rong ngingin aramas mi köl.”
EXO 32:19 Iwe, lupwen Moses a arap ngeni lenien ekewe chon Israel, a küna ewe uluulun kow me ekewe aramas ra pworuk ünükün. Mürin, Moses a fokun lingeringer, pwe a aturätiu me lepöün ekewe rüepek fau o amökküür me fäsonun ewe chuk.
EXO 32:20 A angei ewe uluulun kow ra föri, a atelala o atatakisi, a pwal wüsi o atoropasafeili moromoran lon koluk. Mürin a echimwa ekewe chon Israel pwe repwe ünümi ewe koluk.
EXO 32:21 Iwe, Moses a aisini Aaron, “Met ekei aramas ra föri ngonuk pwe ka uwato wor eu tipis mi lapalap?”
EXO 32:22 Nge Aaron a üreni, “Ai samol, kosap fokun song ngeniei. Ka püsin silei usun ekei aramas, pwe ra müttir ngeni le föri mine a ngau.
EXO 32:23 Pun ra apasa ngeniei, ‘Kopwe föri ngenikem uluulun eman kot epwe akom mwem. Pun aisap silei mine a fis ngeni Moses, ewe mwän mi emwenikichewu seni ewe fanü Isip.’
EXO 32:24 Iei mine üa üreniir, ‘Iteiten eman me eman mi wor an fout seni kolt epwe uttawu.’ Mürin ra ngeniei ar kewe kolt, nge ngang üa atururolong lon ekkei. Iwe, a fis ei uluulun kow.”
EXO 32:25 Iwe, Moses a küna pwe ekewe aramas ra parangarang, pun Aaron a mwüt ngeniir pwe repwe parangarang. Iei mine ra asäw me ren chon oputeer.
EXO 32:26 Mürin, Moses a ütä leasamalapen lenier we o leüömong le kökkö, “Iön pekin ewe Samol mi Lapalap? Oupwe feito rei.” Iwe, ekewe mwän meinisin seni ewe ainangen Lefi ra mwicheto ren.
EXO 32:27 Moses a üreniir, “Iei alon ewe Samol mi Lapalap, ewe Koten Israel: Iteiten eman me eman mwän epwe rietä nöün ketilas lepekin o asaifetal lon ei leni seni eu asamalap tori pwal eu. Iwe, epwe ni pwin me chiechian me chon arun.”
EXO 32:28 Iei usun ekewe mwän seni ewe ainangen Lefi ra föri mine Moses a apasa. Lon ewe rän ina epwe ükükün ülüngeröü mwän ra mäla me lein ekewe aramas.
EXO 32:29 Mürin, Moses a üreniir, “Ikenai oua püsin apinikemi fän iten angangen ewe Samol mi Lapalap, pokiten oua niela püsin nöümi mwän ika püsin pwimi. Iwe, Kot a afeiöchükemi ikenai.”
EXO 32:30 Sorotän ewe rän Moses a üreni ekewe aramas, “Oua föri eu tipis mi lapalap. Iei üpwe feitä ren ewe Samol mi Lapalap. Eli üpwe tongeni föri angangen amusamusen ämi tipis.”
EXO 32:31 Mürin, Moses a liwinsefälitä ren ewe Samol mi Lapalap o üreni, “Üa lolilen, pun ekei aramas ra föri eu tipis mi lapalap. Ra föri kot fän iter seni kolt.
EXO 32:32 Iwe, kose mochen kopwe amusala ar tipis. Nge ika kosap mochen, üa tüngor ngonuk, kopwe pwal talawu itei seni om puk ia ka makei iten noum kana ie.”
EXO 32:33 Nge ewe Samol mi Lapalap a üreni Moses, “Iteiten iö mi tipis ngeniei üpwe talawu itan seni ai puk.
EXO 32:34 Iei kopwe feila. Kopwe emwenala ekewe aramas ngeni ewe leni üa fen kapas ngonuk usun. Nengeni, nei chon läng epwe akom mwom. Nge epwe war ewe fansoun üpwe liwini ngeniir liwinin ar tipis.”
EXO 32:35 Iwe, ewe Samol mi Lapalap a awarato feiengau won ekewe aramas, pokiten ra fel ngeni ewe kow Aaron a föri.
EXO 33:1 Mürin, ewe Samol mi Lapalap a üreni Moses, “Kopwe feila seni ikei, ämi me ekewe aramas ka emwenirewu seni ewe fanü Isip. Kopwe emwenirela ngeni ewe fanü üa fen pwon fän akapel ngeni Apraham, Isaak me Jakop pwe üpwe ngeni mwirimwirir.
EXO 33:2 Iwe, üpwe tinala eman chon läng pwe epwe akom mwom, üpwe pwal asüewu ekewe chon Kanaan, chon Amor, chon Hit, chon Peris, chon Hiw me chon Jepus.
EXO 33:3 Kopwe feila lon ewe fanü mi pwülüöch o fanüeräs. Nge üsap etikemi, pwe üsap arosakemiila me won al, pun ämi eu mwichen aramas mi ülöförea o tipepöchökül.”
EXO 33:4 Iwe, lupwen ekewe aramas ra rongorong ekei fos mi eniwokus, ra letipeta. Nge esap wor eman a foutei.
EXO 33:5 Pun ewe Samol mi Lapalap a fen üreni Moses, “Kopwe üreni ekewe aramasen Israel: Ämi eu mwichen aramas mi ülöförea me tipepöchökül. Ika üpwe etikemi fansoun mochomoch echök, üpwe arosakemiila. Iei mine oupwe ettatiu foutemi iei, pwe üpwe silei mine üpwe föri ngenikemi.”
EXO 33:6 Iei mine ekewe aramasen Israel resap chüen fouteer seni ewe fansoun ra nom ren ewe chuk Horep.
EXO 33:7 Iwe, Moses a angei ewe imw mangaku o aüetä lükün toau seni ewe ia chon Israel ra nonom ie. Iwe, a aita ngeni ewe imw imwenfel seni mangaku ia aramas ra churi Kot ie. Nge iteiten eman me eman mi mochen churi ewe Samol mi Lapalap, a feila ngeni ewe imwenfel seni mangaku a nom lükün ewe leni ia ra nonom ie.
EXO 33:8 Iteiten fansoun Moses a feila ngeni ewe imw mangaku, aramas meinisin ra ütä leasamalapen imwer o nenela mürin Moses tori a tolong lon ewe imw mangaku.
EXO 33:9 Lupwen Moses a tolong lon, ewe ürekuchu a feitiu o ü leasamalapen ewe imw mangaku. Iwe, ewe Samol mi Lapalap a fos ngeni Moses.
EXO 33:10 Nge lupwen ekewe aramas meinisin ra küna pwe ewe ürekuchu a ü leasamalapen ewe imw mangaku, ir meinisin ra chapetiu lepwül, eman me eman lon en me asamalapen imwan.
EXO 33:11 Iei usun ewe Samol mi Lapalap a fos newenewen ngeni Moses, usun eman aramas a fofos ngeni chienan. Nge lupwen Moses a liwiniti lenier, nöün chon angang Josua nöün Nun we mwän esap towu seni ewe imw mangaku.
EXO 33:12 Iwe, Moses a üreni ewe Samol mi Lapalap, “Nengeni, ka kapas ngeniei pwe üpwe emwenala ekei aramas ngeni ewe fanü, nge kosap asile ngeniei iö kopwe tini pwe epwe etiei. Nge ka fen üreniei, ‘Üa sileek, ka pwal küna ümöümöch me rei.’
EXO 33:13 Iei mine üa tüngor ngonuk, ika üa küna ümöümöch me reöm, kopwe aiti ngeniei om akot pwe üpwe sileek o küküna ümöümöch me reöm. Kopwe pwal chechemeni pwe ekei aramas noum.”
EXO 33:14 Iwe, Kot a pälüeni, “Püsin ngang üpwe etuk, üpwe pwal asösök.”
EXO 33:15 Mürin, Moses a üreni, “Are en kosap püsin etikem, kosap pwal atokeemiwu seni ikei.
EXO 33:16 Ren met epwe pwä pwe aia küna ümöümöch me reöm, äm me noum aramas? Ifa usun, esap pwä, lupwen ka püsin etikem? Ren ei äm me noum aramas aipwe sokola seni aramas meinisin won fanüfan.”
EXO 33:17 Iwe, ewe Samol mi Lapalap a üreni Moses, “Üpwe fokun föri meinisin mine ka tüngor, pun üa sileek, ka pwal küna ümöümöch me rei.”
EXO 33:18 Mürin, Moses a üreni, “Kose mochen kopwe aküna ngeniei lingom.”
EXO 33:19 Iwe, Kot a üreni, “Üpwe awora ai kirikiröch pwe epwe akom mwom, üpwe pwal asilefeili me mwom itei we ‘Samol mi Lapalap’. Iwe, üpwe ümöümöch ngeni iö üa mochen ümöümöch ngeni, üpwe pwal eäni tong ngeni iö üa mochen eäni tong ngeni.
EXO 33:20 Nge kosap tongeni küna won mesei, pun esap wor eman epwe manau ika epwe küna won mesei.”
EXO 33:21 Mürin, ewe Samol mi Lapalap a üra, “Nengeni, mi wor eu leni ünüki ia ka tongeni ütä won eu achau ie.
EXO 33:22 Nge lupwen ai ling epwe waroto, üpwe aopokolong lon pwangen ei achau o pwölü ngonuk pei, tori üpwe lüla senuk.
EXO 33:23 Mürin üpwe asü pei pwe kopwe küna lükisöküri, nge won mesei kosap tongeni küna.”
EXO 34:1 Iwe, ewe Samol mi Lapalap a üreni Moses, “Kopwe falei rüepek fau mi chöpöp usun chök ekewe me mwan. Iwe, üpwe ruputi wor ekewe kapas mi mak won ekewe fau mi chöpöp ka amökküür me mwan.
EXO 34:2 Kopwe amoloketä lesosorun lesor, pwe kopwe feitä won ewe chuk Sinai. Kopwe churiei ikenan won ungen ewe chuk.
EXO 34:3 Esap wor eman epwe etuketä, esap pwal wor eman aramas epwe nomofetal won ewe chuk. Pwal ekewe pwiin sip me kow resap tongeni mongöfetal fäsonun ewe chuk.”
EXO 34:4 Iei mine Moses a falei rüepek fau mi chöpöp usun chök ekewe me mwan. Iwe, a pwätä lesosorusich o feitä won ewe chuk Sinai, usun ewe Samol mi Lapalap a allük ngeni. Nge a uwei lepöün ekewe rüepek fau mi chöpöp.
EXO 34:5 Mürin, ewe Samol mi Lapalap a feitiu lon eu kuchu, a ütä ren Moses ikenan o kökköri itan we Samol mi Lapalap.
EXO 34:6 Iwe, ewe Samol mi Lapalap a lü seni Moses o kökkö, “Ngang ewe Samol mi Lapalap, ngang ewe Samol mi Lapalap, ngang eman Kot mi eäni ümöümöch me kirikiröch, üa songomang, üa pwal wöün tong me allükülük.
EXO 34:7 Üa eäni tong ngeni ngeröü o amusala föföringau me pupungau me tipis. Nge üsap amusafatei chon tipis, pwe üa liwini än samasam tipis won nöür me nöün nöür tori aülüngatin me arüanün tettelin aramas.”
EXO 34:8 Iwe, Moses a müttir chapetiu lepwül o fel ngeni.
EXO 34:9 A apasa, “Ai Samol, are üa wesewesen küna ümöümöch me reöm, üa tüngor ngonuk pwe kopwe etikem. Mi pwüng pwe ir aramas mi ülöförea me tipepöchökül, nge kopwe amusala äm föföringau me äm tipis o atolongakem lon tettelin noum.”
EXO 34:10 Mürin, Kot a üreni Moses, “Iei üpwe föri eu pwon lefilei me ekewe chon Israel. Üpwe föri manaman me fän mesen ekei aramas meinisin, sokun manaman resamwo fis won unusen fanüfan ika lon eu mwü. Iwe, ekewe aramas meinisin ka nom leir repwe küna ekewe föför mi eniwokus ngang ewe Samol mi Lapalap üpwe föri fän itom.
EXO 34:11 Oupwe aleasochisi mine üa allük ngenikemi ikenai. Üpwe asüela seni me mwemi ekewe chon Amor, chon Kanaan, chon Hit, chon Peris, chon Hiw me chon Jepus.
EXO 34:12 Iwe, oupwe afälikemi pwe ousap föri eu pwon ngeni chon ewe fanü ia oupwe feila ie, pwe resap wiliti eu lenien likatup ngenikemi.
EXO 34:13 Nge oupwe amökkätiu ar kewe rongen asor, oupwe atatakisi ar kewe ürefau mi pin o pöküetiu ar kewe uluulun ewe anüfefin Asera.
EXO 34:14 Ousap fel ngeni pwal eman kot, pun ngang ewe Samol mi Lapalap itei lukomong, ngang eman Kot mi lukomong won aramasei.
EXO 34:15 Iwe, ousap föri eu pwonen atipeeu ngeni chon ewe fanü, pun ar fel me asor ngeni ar kewe kot a usun chök angangen lisowu me rei. Repwe körikemi, nge ämi oupwe etiir le mongö seni ar kewe asor ra asomä ngeniir.
EXO 34:16 Nge are oua apwüpwülüa nöümi mwän ngeni nöür föpwül mi fel ngeni ar kewe kot, ir repwe atupu nöümi mwän pwe repwe pwal föri iei usun.
EXO 34:17 Ousap föri uluulun kot seni mächä fän itemi.
EXO 34:18 Iwe, oupwe föri ewe chulapen mongö pilawa esap wor iis lon. Lon ükükün fisu rän oupwe mongö pilawa esap wor iis lon, usun üa fen allük ngenikemi. Oupwe föri ei lon ewe fansoun üa filätä, lon ewe maram Apip, pun lon ewe maram oua towu seni Isip.
EXO 34:19 Iwe, ekewe mwänichi meinisin nei, pwal ekewe ätemwänin mweinöün man seni ekewe pwiin kow me sip nei.
EXO 34:20 Nge eman mweinöün aas epwe akasiwil ngeni eman nienifön sip. Iwe, ika kosap mochen akasiwili, kopwe kupi üen ewe aas. Nöümi mwänichi meinisin oupwe möni. Esap wor eman epwe feito rei fän an asöülapö.
EXO 34:21 Iwe, wonu rän oupwe föri ämi angang, nge lon ewe afisuen rän oupwe asösö. Pwal lupwen fansoun tuw pwül me fansoun kinikin oupwe asösö.
EXO 34:22 Iwe, oupwe föri ewe chulapen wiik, ewe fansoun kinikin mwen uän irän wiich, pwal ewe chulapen ionalong uän fanüemi leamüchülan eu ier.
EXO 34:23 Fän ülüngat lon eu ier nöümi mwän meinisin repwe feito o fel ngeniei ngang Kot ewe Samol mi Lapalap, ewe Koten Israel.
EXO 34:24 Pun üpwe asüela chon ekewe mwü seni mwemi o awatteloi kiännin fanüemi. Nge esap wor eman epwe mocheniaiti fanüemi, lupwen oupwe feila fän ülüngat lon eu ier, pwe oupwe fel ngeniei ngang ewe Samol mi Lapalap ämi we Kot.
EXO 34:25 Iwe, ousap eäni asor ngeniei chan ewe mönün asor fiti pilawa mi wor iis lon, ousap pwal iseis och seni ewe mönün asoren Pasofer tori lesosor.
EXO 34:26 Oupwe uwato öchün mwen uän fanüemi lon imwei ngang ewe Samol mi Lapalap ämi we Kot. Ousap kuku eman apanen kuuch lon chönün oupun ewe inelap.”
EXO 34:27 Mürin, ewe Samol mi Lapalap a üreni Moses, “Kopwe makei ekei kapas, pun ai pwon ngonuk me ekewe chon Israel a nom lon ekei kapas.”
EXO 34:28 Iwe, Moses a nom ren ewe Samol mi Lapalap lon ükükün faik rän me faik pwin. Esap mongö, esap pwal ünümi koluk. Iwe, Kot a ruputi won ekewe fau mi chöpöp kapasen ewe pwon, ekewe engol allük.
EXO 34:29 Iwe, Moses a feitiu seni won ewe chuk Sinai o amwöchü lepöün ekewe rüepek fau mi chöpöp ia a mak ie ekewe engol allük. Nge lupwen a feitiu, Moses esap silei pwe won mesan a saramaram pokiten an kapasfengen me Kot.
EXO 34:30 Iwe, lupwen Aaron me ekewe aramasen Israel meinisin ra küna Moses pwe won mesan a saramaram, ra niuokus ar repwe kan ngeni.
EXO 34:31 Nge Moses a kökköriir. Iwe, Aaron me ekewe souemwenin ewe mwichen chon Israel ra liwinsefälito ren, nge Moses a fos ngeniir.
EXO 34:32 Mürin, ekewe aramasen Israel meinisin ra kanoto ren. Iwe, Moses a aiti ngeniir ekewe allük meinisin ewe Samol mi Lapalap a fen ngeni me won ewe chuk Sinai.
EXO 34:33 Iwe, lupwen Moses a wes me kapas ngeniir, a pwölüela won mesan ngeni echö mangaku.
EXO 34:34 Nge iteiten fansoun än Moses tolong lon ewe imw mangaku ren ewe Samol mi Lapalap pwe epwe kapas ngeni, a särifala ewe pwölüpwöl me won mesan tori a pwal towusefäl. Iwe, lupwen a towu, a apworausa ngeni ekewe aramasen Israel mine Kot a allük ngeni.
EXO 34:35 Ekewe aramasen Israel ra küna won mesen Moses pwe a saramaram. Mürin, Moses a pwal pwölüsefäliela won mesan tori a tösefälilong lon ewe imw mangaku, pwe epwe kapas ngeni Kot.
EXO 35:1 Iwe, Moses a emwichafengeni ekewe chon Israel meinisin o üreniir, “Ikkei än ewe Samol mi Lapalap allük ngenikemi pwe oupwe föri.
EXO 35:2 Lon wonu rän oupwe föri ämi angang, nge ewe afisuen rän epwe eu ränin sapat mi pin ngenikemi, eu ränin asösö fän iten ewe Samol mi Lapalap. Eman mi föri och angang lon ei rän epwe ninnila.
EXO 35:3 Ousap kaküw ekkei lon leniemi meinisin lon ewe ränin sapat.”
EXO 35:4 Iwe, Moses a üreni ekewe chon Israel meinisin, “Ikkei än ewe Samol mi Lapalap allük ngenikemi:
EXO 35:5 Oupwe uwato eu alilis fän iten ewe Samol mi Lapalap seni mine oua eäni. Eman mi fangafangöch seni lelukan epwe uwato an alilis fän iten ewe Samol mi Lapalap: kolt, silifer me piras,
EXO 35:6 mangaku mi arauarau me parachol me parapar, pwal mangaku mi pwechepwech, mangaku seni ülöülen kuuch,
EXO 35:7 silin ätemwänin sip mi kapar me silin man mi mürina, pwal pap seni ewe irä akasia,
EXO 35:8 noppuk fän iten ekewe lamp, uän irä mi pwokus me chön fän iten löön epit, pwal fän iten apach mi pwokus,
EXO 35:9 fau aüchea itan oniks me sokun fau aüchea fän iten elingen ewe üf itan efot, pwal fän iten ewe chechen leupw.”
EXO 35:10 “Iwe, ekewe mwän meinisin mi lipwäköch le angang me leimi repwe feito o föri meinisin mine ewe Samol mi Lapalap a allük: ewe imwenfel
EXO 35:11 me eimweimwan seni mangaku, pwölüpwölün me ökkükün, papan me ömwöchün, üran me alongun,
EXO 35:12 ewe pworofel fiti ämwärin me öppüngün, pwal ewe cheech mi pwölüpwöl
EXO 35:13 ngeni ewe chepel fiti ämwärin me pisekin meinisin, ewe pilawa mi pin,
EXO 35:14 pwal ewe lenien atittin epwe asarama ewe leni me pisekin meinisin, ekewe lamp me noppuk seni föün olif fän iten alölör pwe repwe tin,
EXO 35:15 ewe rongen asoren ötüöt fiti ämwärin, ewe löön epit me ewe apach mi pwokus, pwal ewe cheech fän iten asamalapen ewe imwenfel seni mangaku,
EXO 35:16 ewe rongen asoren kek fiti äpäwunan seni piras, ämwärin me pisekin meinisin, ewe sepien töttöl me motongan,
EXO 35:17 ewe tit mangaku fän iten ewe leni lükün ewe imwenfel, ekewe ür me alongur, pwal ewe cheech fän iten asamalapen ewe leni lükün ewe imwenfel,
EXO 35:18 chüfölün ewe imwenfel me chüfölün ewe leni lükün, pwal ekewe säl,
EXO 35:19 ekewe üf mi ling fän iten ekewe souasor mi angang lon ewe leni mi pin, ikkei ekewe üf mi pin fän iten ewe souasor Aaron me nöün kewe mwän, pwe repwe üföüf le föri ar angangen souasor.”
EXO 35:20 Iwe, ekewe aramasen Israel meinisin ra feila seni fän mesen Moses.
EXO 35:21 Mürin ra liwinto eman me eman fän mefien letipan, pwal fän püsin an mochen, o uwato ar alilis ren ewe Samol mi Lapalap fän iten ewe imw mangaku ia aramas ra churi Kot ie me angangan meinisin, pwal fän iten ekewe üf mi pin.
EXO 35:22 Iwe, ra feito mwän me fefin. Ir meinisin ra uwato mwärämwär, ierring, ringen won pau, lälä me sokopaten fout ren mochenin letiper. Iteiten eman me eman a fangala an fout seni kolt ngeni ewe Samol mi Lapalap.
EXO 35:23 Nge chokewe mi wor rer mangaku mi arauarau me parachol me parapar, pwal mangaku mi pwechepwech, mangaku seni ülöülen kuuch me silin ätemwänin sip mi kapar me silin man mi mürina, ra uwato.
EXO 35:24 Iteiter meinisin mi tongeni alisi ren silifer me piras ra uwato ar alilis ren ewe Samol mi Lapalap. Nge iön mi wor an pap seni ewe irä itan akasia mi öchiti ewe angang ra uwato.
EXO 35:25 Iwe, ekewe fefin mi lipwäköch le föri terech ra uwato terech mi arauarau me parachol me parapar, pwal mangaku mi pwechepwech.
EXO 35:26 Ra pwal föri terech seni ülen kuuch ren mochenin letiper.
EXO 35:27 Nge ekewe meilap ra uwato fau aüchea itan oniks me sokun fau aüchea fän iten ewe üf itan efot, pwal fän iten ewe chechen leupw.
EXO 35:28 Ra pwal uwato uän irä mi pwokus me noppuk fän iten ekewe lamp, fän iten löön epit pwal fän iten apach mi pwokus.
EXO 35:29 Iwe, ekewe aramasen Israel meinisin mwän me fefin mi mochen ra uwato ar alilis ren ewe Samol mi Lapalap seni mefien letiper fän iten ewe angang meinisin ewe Samol mi Lapalap a allük ngeni Moses pwe epwe fis.
EXO 35:30 Mürin, Moses a üreni ekewe aramasen Israel, “Iei ewe Samol mi Lapalap a filätä Pesalel nöün Uri we mwän, nge Uri nöün Hur seni ewe ainangen Juta.
EXO 35:31 Iwe, Kot a fen ngeni Pesalel Ngünün o fang ngeni an tufich me tipachem me silelap, pwal tufichin föri sokopaten angang meinisin,
EXO 35:32 pwe a sip le ekiekietä mettoch mi fö. Iwe, a sile angang ngeni kolt, silifer me piras,
EXO 35:33 a pwal sile angangen nechei fau aüchea pwe repwe maseöchülong lon lenier, pwal angangen fala irä me sokopaten angang.
EXO 35:34 Iwe, Kot a pwal atufichi Pesalel me Oholiap nöün Aisamak we mwän seni ewe ainangen Tan, pwe repwe lipwäköch le aiti ngeni aramas met ra sile.
EXO 35:35 A amasoueer ren tufich le föri sokopaten angang, pun ir sousile sokopaten angangen pau me chon ekiekietä mettoch mi fö, pwal chon chü mangaku mi arauarau me parachol me parapar, pwal mangaku mi pwechepwech, pwal chon tür. Ir ätekewe mi sipeöch le angang me ekiekietä mettoch mi fö.
EXO 36:1 Iwe, Pesalel me Oholiap repwe föri ewe angang, pwal ekewe mwän meinisin ewe Samol mi Lapalap a ngeniir tufich me tipachem pwe repwe sipeöch le föri unusen angangen ewe imw mi pin. Nge repwe chök föri usun mine ewe Samol mi Lapalap a allük ngeniir.
EXO 36:2 Mürin, Moses a körato Pesalel me Oholiap, pwal ekewe mwän ewe Samol mi Lapalap a fang ngeniir ar tufich, pwal ir mi mochen feito o föri ewe angang seni mochenin letiper.
EXO 36:3 Iwe, ra angei seni Moses ekewe alilis meinisin ekewe aramasen Israel ra uwato seni mochenin letiper fän iten angangen ewe imw mi pin. Nge iteiten lesosor ekewe aramas ra chök wakato ar alilis seni mochenin letiper,
EXO 36:4 pwe ekewe mwän mi föri ekewe sokopaten angang won ewe imw mi pin ra likitala ar angang, ra feito ren Moses
EXO 36:5 o üreni, “Ekewe aramas ra kon uwato chomong lap seni aükükün ewe angang ewe Samol mi Lapalap a allük ngenikem pwe aipwe föri.”
EXO 36:6 Mürin, Moses a allük pwe repwe asilefeili lon unusen ewe leni, pwe esap wor eman mwän ika fefin epwe chüen uwato och fän iten alilisin ewe imw mi pin. Iei mine ekewe aramas resap chüen uwato ar alilis rer,
EXO 36:7 pun ekewe pisek mi fen wor ra ku ngeni ewe angang meinisin, ra pwal somwola.
EXO 36:8 Iwe, ekewe mwän meinisin mi silelap me lein chokewe mi angang ngeni ewe imwenfel seni mangaku ra föri ewe imwenfel ren engol pekin mangaku mi mürina o pwechepwech, mangaku mi arauarau me parachol me parapar. Förün a unusen mürina, nge ekewe chon silelap le chü ra chüri liosun kerop wor.
EXO 36:9 Iwe, ekewe pekin mangaku meinisin ra nönnöfengen, langatamer ükükün engol me rüanü iach, nge chölaper ruu iach.
EXO 36:10 Ra teifengeni limu pekin mangaku, nge ekewe limu pekin ra pwal teifengeni, pwe a wor ruachö cheech.
EXO 36:11 Mürin ra tei pwäken mi arauarau ünükün ewe echön cheech me epek, ina usun ra pwal föri won ewe aruachön cheech.
EXO 36:12 Iwe, ra teätä lime pwäken ünükün ewe echön cheech me epek, ra pwal teätä lime pwäken ünükün ewe arüachön cheech me epek. Iwe, ekewe pwäken ra chök wenefengen.
EXO 36:13 Ra pwal föri lime ökkük seni kolt o ökküküfengeni ekewe cheech. Iei usun ewe imwenfel seni mangaku a unus.
EXO 36:14 Mürin ra föri engol me echö pekin mangaku seni ülöülen kuuch pwe pwölüpwölün ewe imwenfel.
EXO 36:15 Iwe, ekewe engol me echö pekin mangaku ra chök nönnöfengen ükükün langatamen echö pekin engol me limu iach, nge ükükün chölapan ruu iach.
EXO 36:16 Iwe, ra teifengeni limachö pekin mangaku pwe repwe chök eu cheech, ra pwal teifengeni ekewe wonachö pwe epwe wor aruachön cheech.
EXO 36:17 Mürin ra teätä lime pwäken ngeni ünükün ewe echön cheech me epek, ra pwal teätä lime pwäken ngeni ünükün ewe aruachön cheech me epek.
EXO 36:18 Iwe, ra föri lime ökkük seni piras o ökküküfengeni ekewe pwölüpwöl pwe repwe echö chök.
EXO 36:19 Ra pwal föri echö pwölüpwöl mi kapar seni silin ätemwänin sip, pwal echö pwölüpwöl seni silin man mi mürina.
EXO 36:20 Mürin ra föri papen ewe imwenfel seni mangaku seni ewe irä akasia, nge ekewe pap ra üwenewenetä.
EXO 36:21 Iwe, langatamen echö me echö kewe pap ükükün engol me limu fiit, nge chölaper rüe me fisu inis.
EXO 36:22 Nge fän iteiten echö pap a wor ruu oupun pwe ra tongeni afoufengen. Iei usun ra föri ngeni papen ewe imwenfel seni mangaku meinisin.
EXO 36:23 Iwe, ra föri rüe pap fän iten peliörün ewe imwenfel seni mangaku.
EXO 36:24 Mürin ra föri faik along seni silifer o anomuur fän ekewe rüe pap, ruu along fän iteiten echö pap, pwe oupun ra sökulong lon pwangen ekewe along.
EXO 36:25 Ra pwal föri rüe pap fän iten peliefengin ewe imwenfel seni mangaku
EXO 36:26 me faik alongur seni silifer, ruu along fän iteiten echö pap.
EXO 36:27 Iwe, ra föri wonachö pap fän iten lükisökürün ewe imwenfel seni mangaku me pelilotoun.
EXO 36:28 Ra pwal föri ruachö pap fän iten lepwokukun ewe imwenfel seni mangaku me lükisökürün.
EXO 36:29 Ekewe ruachö pap ra pachfengen seni fan tori asan o ökkükfengen ren efoch ring. Iei usun ra föri ngeni ekewe ruachö pap fän iten ekewe ruu pwokuku.
EXO 36:30 Ina usun a wor walüchö pap, pwal engol me wonu alongur seni silifer, ruu along fän iteiten echö pap.
EXO 36:31 Iwe, ra föri ömwöch seni ewe irä akasia, limefoch fän iten papen lepekin ewe imwenfel seni mangaku me epek,
EXO 36:32 limefoch fän iten papan me pwal epek, nge limefoch fän iten papen lükisökürün me pelilotoun.
EXO 36:33 Ra pwal föri ewe ömwöch mi nom lukalapen ekewe pap seni fän mesen ewe imwenfel seni mangaku tori lükisökürün.
EXO 36:34 Iwe, ra apacha ngeni kolt ekewe pap o föri ringen wor seni kolt, pwe ekewe ömwöch repwe sökulong lor. Ra pwal apachätä kolt won ekewe ömwöch.
EXO 36:35 Mürin ra föri echö cheech seni mangaku mi arauarau me parachol me parapar, pwal mangaku mi pwechepwech o mürina. Nge ekewe chon silelap le chü ra chüri liosun kerop won.
EXO 36:36 Iwe, ra pwal föri fofoch üren ewe cheech seni ewe irä akasia o apacha ngeniir kolt. Nge won ekewe ür a wor ökkükür seni kolt, a pwal wor rüanü alongur seni silifer.
EXO 36:37 Ra föri echö cheech mi chü fän iten asamalapen ewe imwenfel seni mangaku mi arauarau me parachol me parapar, pwal seni mangaku mi pwechepwech o mürina.
EXO 36:38 Ra pwal föri limefoch ür fiti ökkükür fän iten ewe cheech. Iwe, asen ekewe ür fiti ömwöchür ra apachätä kolt won. Ra pwal föri limu alongur seni piras.
EXO 37:1 Iwe, Pesalel a föri ewe pworofel seni ewe irä akasia, langataman ükükün faik me limu inis, nge chölapan me tekian ükükün rüe me fisu inis.
EXO 37:2 A apacha ngeni kolt mi mürina lon me lükün o föri elingen ünükün me won seni kolt mi chipwechip.
EXO 37:3 Iwe, a föri fofoch ring seni kolt o apacheretä ngeni pwokukun me rüanü, ruofoch ring me epek, pwal ruofoch me epek.
EXO 37:4 Mürin a falei ämwär seni ewe irä akasia o apachätä kolt wor.
EXO 37:5 A sökalong ekewe ämwär lon ekewe ring mi pachetä lepekin ewe pworofel, pwe aramas ra tongeni ämwära.
EXO 37:6 A föri öppüngün seni kolt mi mürina, langataman ükükün faik me limu inis, nge chölapan rüe me fisu inis.
EXO 37:7 A pwal nechei uluulun ruoman kerop seni kolt won lesopun ewe öppüng me ruosop,
EXO 37:8 eman kerop won me esop, nge eman won me pwal esop. Iwe, ewe öppüng me ekewe kerop mi nom lesopun me ruosop ra chök förunusfengen.
EXO 37:9 Iwe, pöükässin ekewe kerop ra itila o meresila, pwe ra ochunoi won ewe öppüng, nge won meser ra sapefengen o wenetiu ngeni ewe öppüng.
EXO 37:10 Iwe, a pwal föri eu chepel seni ewe irä akasia, langataman ükükün ilik me wonu inis, chölapan ükükün engol me walü inis, nge tekian rüe me fisu inis.
EXO 37:11 Mürin a apacha ngeni kolt mi mürina o föri elingen ünükün me won seni kolt mi chipwechip.
EXO 37:12 Iwe, a pwal föri aamen won pwelin ünükün, tekian ükükün ülüngat inis, o föri och eling won seni kolt mi chipwechip.
EXO 37:13 A föri fofoch ring seni kolt o pacheretä ngeni pwokukun me rüanü ia ekewe fofoch pechen ra nom ie.
EXO 37:14 Ekewe ring ra kükü ngeni aamen ewe chepel, pun ekewe ämwär ra sökulong lor, pwe aramas ra tongeni ämwära.
EXO 37:15 Iwe, a falei ämwärin ewe chepel seni ewe irä akasia o apachätä kolt wor.
EXO 37:16 A pwal föri pisekin won ewe chepel seni kolt mi mürina: sepi me peleich, kap me rume fän iten ewe asoren ün.
EXO 37:17 Mürin a föri eu lenien atittin seni kolt mi mürina, nge motongan me popun a auluul o nechenech ngeni ama. Iwe, elingan meinisin, ekewe uluulun pön irä me kirupun ra förunus me ewe lenien atittin.
EXO 37:18 A pwal wor wonofoch keangan ra keang seni ewe popun, ülüfoch me epek, pwal ülüfoch me epek.
EXO 37:19 Iwe, won eu me eu keangan a wor ülüpö uluulun pön irä usun chök pön ewe irä itan almont, nge iteiten pön irä a wor kirupun me fan. Ina usun lapalapen ekewe wonofoch keang mi keang seni popun ewe lenien atittin.
EXO 37:20 Nge won popun a wor fapö uluulun pön irä usun chök pön ewe irä almont, a pwal wor föföü kirupur.
EXO 37:21 Iwe, a wor äkääföü kirup a nom fän iteiten ekewe leni ia ekewe fofoch keang ra keang seni ie.
EXO 37:22 Nge ekewe kirup me ekewe keang ra förunus. Ina usun unusen ewe lenien atittin a för seni kolt mi mürina, a auluul o nechenech ngeni ama.
EXO 37:23 Iwe, a pwal föri fisu lamp fän iten ewe lenien atittin, ekewe fich me lenien mooch seni kolt mi mürina.
EXO 37:24 Ewe lenien atittin me pisekin meinisin a föriir seni ina epwe ükükün fik me limu paun kolt mi mürina.
EXO 37:25 Mürin a föri eu rongen asoren ötüöt seni ewe irä akasia, langataman me chölapan ra chök nönnöfengen ükükür engol me walü inis. Iwe, tekian ükükün ilik me wonu inis, nge mächän kewe fofoch ra förunusfengen me ewe rongen asor.
EXO 37:26 Iwe, a apacha kolt mi mürina ngeni won me lepekin meinisin, pwal ngeni mächän kewe, a pwal elinga ngeni kolt mi chipwechip ünükün me won.
EXO 37:27 A föri ruofoch ring seni kolt o apacheretä fän alingan we me epek. A pwal föri ina usun me epek, pwe ekewe ämwär ra sökulong lor, pwe aramas ra tongeni ämwära.
EXO 37:28 A falei ekewe ämwär seni ewe irä akasia o apachätä kolt wor.
EXO 37:29 Iwe, a pwal föri löön epit mi pin me apach mi pwokus usun chon föri lö ra föri.
EXO 38:1 Mürin a föri ewe rongen asoren kek seni ewe irä akasia. Langataman me chölapan ra chök nönnöfengen ükükür fisu esop fiit, nge tekian ükükün rüanü esop fiit.
EXO 38:2 A pwal föri fofoch mächä won ekewe rüanü lepwokukun. Nge ekewe mächä ra chök förunusfengen me ewe rongen asoren kek, a pwal apachätä piras ngeni won unusen ewe rongen asor.
EXO 38:3 A föri pisekin ewe rongen asoren kek meinisin: ekewe nape me söföl, ekewe sepi fän iten chan ekewe mönün asor me chü me sepi fän iten molien lon. Ekewe pisek meinisin a föriir seni piras.
EXO 38:4 Iwe, a föri äpäwunen ewe rongen asoren kek seni piras, nge ewe äpäwun a nom fän aaman seni lukalapan tori fan.
EXO 38:5 Iwe, won ewe äpäwun mi för seni piras a pwal apachätä fofoch ring ngeni pwokukun me rüanü fän iten ekewe ämwär.
EXO 38:6 A pwal falei ekewe ämwär seni ewe irä akasia o apachätä piras wor.
EXO 38:7 Iwe, a sökalong ekewe ämwär lon ekewe ring mi pachetä lepekin ewe rongen asor me rüepek, pwe aramas ra tongeni ämwära. A föri ewe rongen asoren kek seni pap, nge lon a pön.
EXO 38:8 Iwe, ewe lenien töttöl me motongan seni piras a föri seni ekewe kilasen ori seni piras a angei me ren ekewe fefin mi angang leasamalapen ewe imw mangaku ia aramas ra churi Kot ie.
EXO 38:9 Mürin a föri ewe leni lükün ewe imwenfel seni mangaku. Lepeliörün ewe leni a tit ngeni mangaku mi pwechepwech, langataman ükükün lime iach.
EXO 38:10 Iwe, a wor rüe üran me rüe alongur seni piras, nge ökkükün won ekewe ür pwal mächän lefiler me asan ra för seni silifer.
EXO 38:11 Nge lepeliefengin ewe leni a pwal tit ngeni mangaku langataman ükükün lime iach, a pwal wor rüe üran me rüe alongur seni piras. Iwe, ökkükün won ekewe ür pwal mächän lefiler me asan ra för seni silifer.
EXO 38:12 Iwe, lepelilotoun ewe leni a tit ngeni mangaku, chölapan ükükün rüe me limu iach, a pwal wor engol üran me engol alongur. Nge ökkükün won ekewe ür pwal mächän lefiler me asan ra för seni silifer.
EXO 38:13 Nge fän mesen ewe leni me peliötiuan chölapan ükükün rüe me limu iach.
EXO 38:14 Iwe, lepekin ewe asamalap me epek a tit ngeni mangaku langataman ükükün fisu esop iach, a pwal wor ülüfoch üran me ülüngat alongur.
EXO 38:15 Pwal ina chök usun ewe epek, pun lepekin ewe asamalap me rüepek a tit ngeni mangaku langataman ükükün fisu esop iach, a pwal wor ülüfoch üran me ülüngat alongur.
EXO 38:16 Iwe, unusen pwelin ewe leni lükün ewe imwenfel seni mangaku a tit ngeni mangaku mi pwechepwech.
EXO 38:17 Alongun ekewe ür ra för seni piras, nge ökkükün won ekewe ür me mächän lefiler ra för seni silifer. Asen ekewe ür a pwal pwölüpwöl ngeni silifer, nge mächän lefiler meinisin ra för seni silifer.
EXO 38:18 Iwe, ewe cheech mi chü fän iten asamalapen ewe leni lükün a för seni mangaku mi arauarau me parachol me parapar, pwal seni mangaku mi pwechepwech. Langatamen ewe cheech ükükün engol iach, nge tekian a nönnöfengen chök me mangakun ewe tittin lükün ükükün ruu esop iach.
EXO 38:19 Iwe, mi wor fofoch üren ewe asamalap me rüanü alongur mi för seni piras. Nge ökkükür me pwölüpwölün aser pwal mächän lefiler ra för seni silifer.
EXO 38:20 Nge chüfölün ewe imwenfel seni mangaku meinisin tori chüfölün unusen pwelin ewe leni lükün ra för seni piras.
EXO 38:21 Ikkei iteiten pisekin ewe imwenfel seni mangaku, ewe ia ekewe allük ra nom ie. Ekewe mwän seni ewe ainangen Lefi ra föri ewe angangen alea fän emwenien Itamar nöün ewe souasor Aaron we mwän, usun Moses a allük ngeniir.
EXO 38:22 Iwe, Pesalel nöün Uri we mwän, nge Uri nöün Hur seni ewe ainangen Juta, a föri meinisin mine ewe Samol mi Lapalap a allük ngeni Moses.
EXO 38:23 A pwal wor chienan itan Oholiap nöün Aisamak we mwän seni ewe ainangen Tan. I eman sousilelap le angangen pau me ekiekietä mettoch mi fö, a pwal sile chü mangaku mi arauarau me parachol me parapar, pwal mangaku mi pwechepwech.
EXO 38:24 Iwe, ewe kolt meinisin ra aea ren angangen kaütän ewe imw mi pin ükükün ruungeröü ipükü tiue me limu paun, nge ra för won ewe kilo ra aea le aükük lon ewe imw mi pin. Ei kolt än aramas alilis.
EXO 38:25 Iwe, ewe silifer seni chokewe mi alealong lon iteiten ar we mwich ükükün füngeröü limepükü lime paun, a för won ewe kilo ra aea le aükük lon ewe imw mi pin.
EXO 38:26 Iteiten eman me eman mi alealong lon ewe iteit seni rüe ier feitä a püngütiu eu lelimu aunus silifer a för won ewe kilo ra aea le aükük lon ewe imw mi pin. Iteiter meinisin wonopükü ülüngatngeröü limepükü lime mwän.
EXO 38:27 Iwe, ekewe ipükü alongun ewe imw mi pin pwal alongun üren ewe cheech ra för seni füngeröü limepükü paun silifer, pun eu along nge fik me limu paun.
EXO 38:28 Nge seni ekewe lime paun silifer Pesalel a föri ökkükün ekewe ür me pwölüpwölün aser, a pwal föri mächän lefiler seniir.
EXO 38:29 Iwe, fesinien ekewe aramas piras ükükün limungeröü ülüpükü engol paun.
EXO 38:30 Seni ei ükükün piras a föri alongun asamalapen ewe imw mangaku ia aramas ra churi Kot ie, ewe rongen asoren kek me ewe äpäwun, pwal pisekin ewe rongen asoren kek meinisin,
EXO 38:31 a pwal föri alongun unusen pwelin ewe leni lükün, alongun asamalapan me chüfölün ewe imwenfel seni mangaku meinisin, pwal chüfölün pwelin ewe leni lükün.
EXO 39:1 Iwe, ra tei üf mi mürina seni ekewe mangaku mi arauarau me parachol me parapar fän iten ewe angang lon ewe leni mi pin. Ra tei üf mi pin fän iten Aaron usun ewe Samol mi Lapalap a fen allük ngeni Moses.
EXO 39:2 Iwe, ra tei ewe üf itan efot seni mangaku mi arauarau me parachol me parapar, pwal seni mangaku mi pwechepwech, ra pwal aea terech kolt.
EXO 39:3 Ra wüsi kolt pwe a chöpöpüla, mürin ra ämetätiu o türünifengeni me ekewe mangaku mi arauarau me parachol me parapar, pwal mangaku mi pwechepwech lon sokopaten fout.
EXO 39:4 Ra föri ruachö chechen won afaren ewe efot o teiretä lekochun me won afaran, pwe ekewe ruu pekin ra pachefengen.
EXO 39:5 Iwe, kiren ewe riri mi nom won ewe efot a usun chök kiren ewe üf, pun a för seni terech kolt me mangaku mi arauarau me parachol me parapar, pwal mangaku mi pwechepwech, usun ewe Samol mi Lapalap a fen allük ngeni Moses.
EXO 39:6 Ra nechei ekewe fau aüchea iter oniks o amaserelong lon lenien ömwöchür seni kolt, ra pwal ruputi iten nöün Israel kewe mwän wor, usun chök rupun won ringen pwau.
EXO 39:7 Iwe, ra amaseretä won chechen won afaren ewe efot, pwe föün ächema iten nöün Israel kewe mwän, usun ewe Samol mi Lapalap a fen allük ngeni Moses.
EXO 39:8 Mürin ra föri ewe chechen leupw mi mürina seni terech kolt me mangaku mi arauarau me parachol me parapar, pwal mangaku mi pwechepwech, usun chök förün ewe efot.
EXO 39:9 Iwe, ewe chechen leupw a wor ruu säsärin, nge langataman me chölapan ra nönnöfengen ükükür tiu inis.
EXO 39:10 Won ewe cheech ra amasalong rüanü telin fau aüchea. Iwe, won aeuin telin a wor ülüföü fau iter sartius, topas me karpunkel.
EXO 39:11 Nge won aruuen telin a wor ülüföü fau iter emeralt, safaia me taiamont.
EXO 39:12 Iwe, won aülüngatin telin a wor ülüföü fau iter iasint, akit me ametist,
EXO 39:13 nge won aruanün telin a wor ülüföü fau iter peril, oniks me iasper. Ir meinisin ra kamasolong lon lenien ömwöchür kewe seni kolt.
EXO 39:14 Iei usun a wor engol me ruoföü fau aüchea ükükün iteiten nöün Israel kewe mwän. Iwe, iteiten eföü me eföü kewe fau a rup wor iten ekewe engol me ruu ainangen Israel, nge ewe mak a usun chök rupun won ringen pwau.
EXO 39:15 Mürin ra föri selin ewe chechen leupw seni kolt mi mürina usun chök lül mi kon.
EXO 39:16 Ra pwal föri ruu lenien ömwöch pwal ruofoch ring seni kolt o apacheretä lepwokukun won ewe chechen leupw me ruu.
EXO 39:17 Mürin ra riri ekewe ruofoch säl seni kolt ngeni ekewe ruofoch ring mi nom lepwokukun ewe chechen leupw.
EXO 39:18 Nge lesopun ekewe ruofoch säl ra riri ngeni ekewe ruu lenien ömwöch mi nom won ekewe chechen won afaren ewe efot me fän mesan.
EXO 39:19 Iwe, ra pwal föri ruofoch ring seni kolt o apacheretä lepwokukun ewe cheech me fan, pwe repwe nom lefilen ewe cheech me ewe efot.
EXO 39:20 Mürin ra pwal föri ruofoch ring seni kolt o apacheretä lesopun me fän ekewe rüachö chechen won afaren ewe efot me fän mesan, pwe a nom lekochun ewe efot asen ewe riri.
EXO 39:21 Iwe, ra rifengeni ringen ewe chechen leupw ngeni ringen ewe efot ren efoch säl mi arauarau, pwe a nom asen ririn ewe efot, nge esap nükütomotom me won. Iei usun ewe Samol mi Lapalap a fen allük ngeni Moses.
EXO 39:22 Mürin ra tei ewe owokot mi nom fän ewe efot seni chök mangaku mi arauarau.
EXO 39:23 Iwe, leawen ewe owokot a usun chök leawen echö üf, nge ünükün leawan a wor leisin, pwe esap tongeni kam.
EXO 39:24 Nge lepwülün ra teätä uluulun apel seni mangaku mi arauarau me parachol me parapar, pwal mangaku mi pwechepwech.
EXO 39:25 Ra pwal föri pel seni kolt mi mürina o teiretä lefilen ekewe uluulun apel won pwelin lepwülün ewe owokot.
EXO 39:26 A iei usun: eu pel, eföü apel, eu pel, eföü apel won pwelin lepwülün ewe owokot ra üföüf le angang. Iei usun ewe Samol mi Lapalap a fen allük ngeni Moses.
EXO 39:27 Iwe, ra tei ekewe sööch seni mangaku mi mürina o pwechepwech fän iten Aaron me nöün kewe mwän.
EXO 39:28 Ra pwal tei ewe akkaw mi watte me ekewe mi kükün, pwal ekewe rauesesin lon seni mangaku mi mürina o pwechepwech.
EXO 39:29 Nge ewe pelit a för seni mangaku mi mürina o pwechepwech, pwal seni mangaku mi arauarau me parachol me parapar, a pwal chü. Iei usun ewe Samol mi Lapalap a fen allük ngeni Moses.
EXO 39:30 Iwe, ra föri epa mwärämwär mi pin seni kolt mi mürina o ruputi ewe kapas won, “A pin me ren ewe Samol mi Lapalap”. Nge makan a usun rupun won ringen pwau.
EXO 39:31 Mürin ra föti ngeni efoch säl mi arauarau pwe epwe riritiu won ewe akkaw, usun ewe Samol mi Lapalap a fen allük ngeni Moses.
EXO 39:32 Iei usun a wesöchüla meinisin angangen ewe imwenfel seni mangaku ia aramas ra churi Kot ie. Iwe, ekewe aramasen Israel ra föri meinisin usun mine ewe Samol mi Lapalap a fen allük ngeni Moses.
EXO 39:33 Ra uwato ewe imwenfel seni mangaku ren Moses, ewe imw mangaku me pisekin meinisin, ökkükün, papan, ömwöchün, üran me alongun.
EXO 39:34 Ra uwato ekewe pwölüpwöl mi kapar seni silin ätemwänin sip, pwal silin man mi mürina me ewe chechen lefil,
EXO 39:35 ewe pworofel ekewe allük ra nom lon fiti ämwärin me öppüngün,
EXO 39:36 ewe chepel me pisekin won meinisin, pwal ewe pilawa mi pin.
EXO 39:37 Ra pwal uwato ewe lenien atittin mi för seni kolt mi mürina fiti laman kewe lon lenien ömwöchür me sokopaten pisekin meinisin, pwal ewe noppuk seni föün olif fän iten alölön,
EXO 39:38 ewe rongen asoren ötüöt seni kolt, ewe löön epit me ewe apach mi pwokus, pwal chechen ewe asamalapen ewe imw mangaku.
EXO 39:39 Mürin ra uwato ewe rongen asoren kek seni piras, äpäwunan seni piras, ämwärin me sokopaten pisekin meinisin, ewe sepien töttöl me motongan,
EXO 39:40 ewe tit mangaku fän iten ewe leni lükün, üran me alongur, chechen asamalapen ewe leni lükün, selin me chüfölün pwal sokopaten pisekin angangen ewe imwenfel seni mangaku ia aramas ra churi Kot ie.
EXO 39:41 Ra pwal uwato ekewe üf mi ling fän iten ekewe souasor mi angang lon ewe leni mi pin, ikkei ekewe üf mi pin fän iten ewe souasor Aaron me nöün kewe mwän, pwe repwe üföüf le föri ar angangen souasor.
EXO 39:42 Iei usun ekewe aramasen Israel ra föri meinisin mine ewe Samol mi Lapalap a fen allük ngeni Moses.
EXO 39:43 Iwe, Moses a ouwasacha ewe angang meinisin o küna pwe ra föri usun mine ewe Samol mi Lapalap a fen allük. Iwe, Moses a afeiöchüür.
EXO 40:1 Iwe, ewe Samol mi Lapalap a üreni Moses,
EXO 40:2 “Lon aeuin ränin ewe aeuin maram kopwe aüetä ewe imwenfel seni mangaku ia aramas ra churi Kot ie.
EXO 40:3 Kopwe anomu lon ewe imwenfel seni mangaku ewe pworun allük, nge kopwe ti ngeni echö cheech.
EXO 40:4 Iwe, kopwe uwalong ewe chepel o atettelöchü pisekin won. Mürin kopwe uwalong ewe lenien atittin o isetä laman won.
EXO 40:5 Kopwe pwal uwalong ewe rongen asoren ötüöt seni kolt o anomu mwen ewe pworofel. Mürin kopwe eitiuätä chechen asamalapen ewe imwenfel.
EXO 40:6 Kopwe anomu ewe rongen asoren kek mwen asamalapen ewe imwenfel seni mangaku.
EXO 40:7 Kopwe pwal anomu ewe sepien töttöl lefilen ewe imwenfel seni mangaku me ewe rongen asoren kek o alölöü koluk lon.
EXO 40:8 Iwe, kopwe aüetä ewe tit mangaku pwelin ewe leni lükün o eitiuätä chechen asamalapan.
EXO 40:9 Mürin kopwe angei ewe löön epit o epiti ewe imwenfel seni mangaku me mettochun lon meinisin, kopwe pwal apini me pisekin lon meinisin. Iwe, epwe pin.
EXO 40:10 Kopwe pwal epiti ewe rongen asoren kek me pisekin meinisin o apini pwe epwe unusen pin.
EXO 40:11 Iwe, kopwe pwal epiti ewe sepien töttöl me motongan o apini.
EXO 40:12 Mürin kopwe emwenato Aaron me nöün kewe mwän ren asamalapen ewe imwenfel seni mangaku o atütüür.
EXO 40:13 Iwe, kopwe aüföüfa ngeni Aaron ekewe üf mi pin, kopwe pwal epiti o apini, pwe epwe angang ngeniei lon wisen souasor.
EXO 40:14 Kopwe pwal emwenato nöün Aaron kewe mwän o aüföüfa ngeniir ekewe sööch mi pwech,
EXO 40:15 kopwe epitiir usun om epiti semer we, pwe repwe angang ngeniei lon wisen souasor. Pun ar kepit epwe atolongeer me mwirimwirir lon wisen souasor seni eu täppin aramas tori eu täppin.”
EXO 40:16 Iwe, Moses a föri meinisin usun mine ewe Samol mi Lapalap a allük ngeni.
EXO 40:17 Lon aeuin ränin ewe aeuin maram, lon aruuen ierin ar towu seni Isip ewe imwenfel seni mangaku a kaütä o apinipinila.
EXO 40:18 Iwe, Moses a aüetä ewe imwenfel seni mangaku. A fotuki alongun o aüetä papan, a pwal sökalong ömwöchür o aüetä üran.
EXO 40:19 Mürin, Moses a emeresala ewe mangaku won ewe imwenfel o isetä pwölüpwölün won, usun mine ewe Samol mi Lapalap a fen allük ngeni.
EXO 40:20 A pwal angei ekewe allük o isenirelong lon ewe pworofel, a sökalong ämwärin o isetä öppüngün won.
EXO 40:21 Mürin, Moses a uwalong ewe pworofel lon ewe imwenfel seni mangaku o eitiuätä ewe chechen lefil pwe a tiela ewe pworofel, usun ewe Samol mi Lapalap a fen allük ngeni.
EXO 40:22 Iwe, a iseis ewe chepel peliefengin me lon ewe imwenfel seni mangaku pekiton ewe cheech.
EXO 40:23 A pwal isetä ekewe pilawa o atettelöchü me won ewe chepel fän mesen ewe Samol mi Lapalap, usun ewe Samol mi Lapalap a fen allük ngeni.
EXO 40:24 Iwe, a iseis ewe lenien atittin awenewenen ewe chepel peliörün me lon ewe imwenfel seni mangaku.
EXO 40:25 A pwal isetä ekewe lamp won o atineer me fän mesen ewe Samol mi Lapalap, usun ewe Samol mi Lapalap a fen allük ngeni.
EXO 40:26 Mürin a iseis ewe rongen asor seni kolt lon ewe imwenfel seni mangaku kükü ngeni ewe cheech
EXO 40:27 o keni apach mi pwokus won, usun ewe Samol mi Lapalap a fen allük ngeni.
EXO 40:28 Iwe, a pwal eitiuätä chechen asamalapen ewe imwenfel.
EXO 40:29 Mürin a iseis ewe rongen asoren kek leasamalapen ewe imwenfel seni mangaku, o eäni asoren kek me asoren mongö won, usun ewe Samol mi Lapalap a fen allük ngeni.
EXO 40:30 A pwal iseis ewe sepien töttöl lefilen ewe imwenfel seni mangaku me ewe rongen asor o alölöü koluk lon.
EXO 40:31 Iwe, Moses me Aaron me nöün kewe mwän ra talü pöür me pecher lon.
EXO 40:32 Lupwen ra tolong lon ewe imwenfel seni mangaku, pwal lupwen ra kan ngeni ewe rongen asor, ra limetiir lon ewe koluk, usun ewe Samol mi Lapalap a fen allük ngeni Moses.
EXO 40:33 Iwe, a pwal aüetä ewe tit mangaku pwelin ewe leni lükün ewe imwenfel seni mangaku me ewe rongen asor o eitiuätä chechen asamalapen ewe leni lükün. Iei usun Moses a awesi ewe angang.
EXO 40:34 Mürin, ewe kuchu a pwölüela ewe imwenfel seni mangaku, nge lingen ewe Samol mi Lapalap a aürala lon.
EXO 40:35 Iwe, Moses esap tufichin tolong lon ewe imwenfel seni mangaku, pun ewe kuchu a chök nonom won, nge lingen ewe Samol mi Lapalap a aürala lon.
EXO 40:36 Lon unusen ar sai, iteiten fansoun, lupwen ewe kuchu a witä seni won ewe imwenfel seni mangaku, ekewe aramasen Israel ra sopwela ar sai.
EXO 40:37 Nge lupwen ewe kuchu a üla won, resap sai tori ewe rän ewe kuchu a witä.
EXO 40:38 Pun lon unusen ar sai kuchun ewe Samol mi Lapalap a nom won ewe imwenfel seni mangaku lerän, nge lepwin ekkei a nom lon ewe kuchu. Ei a fis me fän mesen ekewe chon Israel meinisin.
LEV 1:1 Iwe, ewe Samol mi Lapalap a kökköri Moses seni lon ewe imw mangaku ia aramas ra churi Kot ie o ngeni ekei allük
LEV 1:2 fän iten ekewe aramasen Israel, pwe repwe apwönüetä, lupwen ra asor: Are eman aramas leimi epwe uwato an asor ngeni ewe Samol mi Lapalap, epwe uwato eman mönün asor seni lein nöün kow are sip are kuuch.
LEV 1:3 Are an asor epwe eu asoren kek seni nöün pwiin kow, epwe uwato eman ätemwänin kow esap wor terin ren asamalapen ewe imwenfel seni mangaku, pwe ewe Samol mi Lapalap epwe etiwa.
LEV 1:4 Iwe, epwe anomu pöün won möküren ewe mönün asoren kek, nge Kot epwe etiwa an asoren amusamusen an tipis.
LEV 1:5 Mürin, epwe niela ewe ätemwänin kow fän mesen ewe Samol mi Lapalap, nge ekewe sousor nöün Aaron kewe mwän repwe uwato ewe cha o uti ngeni pwelin ünükün ewe rongen asor mi nom leasamalapen ewe imwenfel seni mangaku.
LEV 1:6 Epwe etika silin ewe mönün asor o pökükisietiu fitukan.
LEV 1:7 Nge nöün ewe souasor Aaron kewe mwän repwe aküüw ekkei won ewe rongen asor o sonätä mwüch won.
LEV 1:8 Iwe, ekewe souasor repwe isenöchüätä kinikinin ewe mönün asor pwal möküran me kirisin won mwüchün ewe ekkei mi nom won ewe rongen asor.
LEV 1:9 Nge ewe aramas epwe talü ngeni koluk pisekin lon inisin ewe mönün asor me pechen. Mürin, ewe souasor epwe kenala meinisin me won ewe rongen asor pwe eu asoren kek ewe Samol mi Lapalap a efich pwoon.
LEV 1:10 Iwe, are an asor epwe eu asoren kek seni nöün sip are kuuch, epwe uwato eman ätemwän esap wor terin.
LEV 1:11 Epwe niela ewe mönün asor peliefengin ewe rongen asor fän mesen ewe Samol mi Lapalap, nge ekewe souasor nöün Aaron kewe mwän repwe uti chan ngeni pwelin ünükün ewe rongen asor.
LEV 1:12 Iwe, epwe pökükisietiu fitukan, nge ewe souasor epwe isenöchü won mwüchün ewe ekkei mi nom won ewe rongen asor fiti möküran me kirisin.
LEV 1:13 Nge ewe aramas epwe talü ngeni koluk pisekin lon inisin me pechen. Iwe, ewe souasor epwe uwato unusan meinisin o kenala me won ewe rongen asor. Pun iei eu asoren kek ewe Samol mi Lapalap a efich pwoon.
LEV 1:14 Nge are an asor ngeni ewe Samol mi Lapalap epwe eu asoren kek seni machang, epwe uwato eman lisom ika eman apansüsün lisom.
LEV 1:15 Iwe, ewe souasor epwe uwato ewe machang ren ewe rongen asor, epwe ämäräkulu möküran pwe epwe tü o keni me won ewe rongen asor. Nge chan ewe machang epwe asürätiu lepekin ewe rongen asor.
LEV 1:16 Mürin, epwe angei chükünükanan me masouan o moneretiu lon ewe lenien falang peliötiuen ewe rongen asor.
LEV 1:17 Epwe pwal amwöchü pöükässin o ekis pwiliela, nge esap wesewesen pwilifeseni. Iwe, ewe souasor epwe kenala me won mwüchün ekkein ewe rongen asor. Pun ei eu asoren kek ewe Samol mi Lapalap a efich pwoon.
LEV 2:1 Iwe, are eman epwe uwato eu asoren mongö fän iten an asor ngeni ewe Samol mi Lapalap, epwe eäni asor pilawa mi amas o mürina, epwe pwal ninätiu won apüra seni föün olif me apach mi pwokus.
LEV 2:2 Iwe, epwe uwato ren ekewe souasor nöün Aaron kewe mwän. Nge ewe souasor epwe tukei ekumwuch seni ewe pilawa mi amas o mürina fiti ewe apüra me unusen ewe apach mi pwokus o kenala me won ewe rongen asor, iei asisilan pwe a asor meinisin. Pun ei eu asor ewe Samol mi Lapalap a efich pwoon.
LEV 2:3 Nge lusun ewe asoren mongö epwe fän iten Aaron me nöün kewe mwän. Ei kinikinin asor a unusen pin, pun och kinikin seni ewe asoren mongö ngeni ewe Samol mi Lapalap.
LEV 2:4 Iwe, are kopwe uwato eu asoren mongö mi um pwe kopwe eäni asor, epwe chök pilawa mi mürina esap wor iis lon mi nofit ngeni apüra, ika sokun pilawa usun nokop esap wor iis lon mi toto ngeni apüra.
LEV 2:5 Nge are om asor epwe eu asoren mongö mi furain lon eu furaipan, epwe chök seni pilawa mi mürina esap wor iis lon, epwe pwal nofit ngeni apüra.
LEV 2:6 Iwe, kopwe kinikisietiu o ninätiu apüra won, pun eu asoren mongö.
LEV 2:7 Nge are om asor eu asoren mongö mi kuk lon eu nape, epwe seni pilawa mi mürina o nofit ngeni apüra.
LEV 2:8 Iwe, kopwe uwato ren ewe Samol mi Lapalap ewe asoren mongö mi för seni ekei mettoch o ngeni ewe souasor, nge i epwe uwato ren ewe rongen asor.
LEV 2:9 Iwe, ewe souasor epwe angei eu kinikin seni ewe asoren mongö, iei asisilan pwe a asor meinisin, o keni me won ewe rongen asor, pun ei eu asor ewe Samol mi Lapalap a efich pwoon.
LEV 2:10 Nge lusun ewe asoren mongö epwe fän iten Aaron me nöün kewe mwän. Ei kinikinin asor a unusen pin, pun och kinikin seni ewe asoren mongö ngeni ewe Samol mi Lapalap.
LEV 2:11 Iwe, kosap uwato ren ewe Samol mi Lapalap asoren mongö mi wor iis lon. Pun kosap kenala pilawa fiti iis me chönün chunen pwe om asor ngeni ewe Samol mi Lapalap.
LEV 2:12 Ka tongeni uwato ekei sokun asor ren ewe Samol mi Lapalap pwe om asoren mwen ua, nge kosap keniir won ewe rongen asor, pun resap eu asor mi pwoöch.
LEV 2:13 Iwe, om kewe asoren mongö meinisin kopwe saltei, pun salt asisilen ewe pwon lefilom me Kot. Kopwe achu salt ngeni om kewe asor meinisin.
LEV 2:14 Lupwen kopwe eäni asoren mongö ngeni ewe Samol mi Lapalap seni mwen uän fotom irä, kopwe eäni asor föün wiich mi fö, repwe pwal üsüs o tüün.
LEV 2:15 Iwe, kopwe ninätä apüra won o iseis apach mi pwokus won, pun eu asoren mongö.
LEV 2:16 Iwe, ewe souasor epwe keni eu kinikin seni ekewe föün wiich mi üsüs pwal seni ewe apüra, iei asisilan pwe a asor meinisin, epwe pwal keni unusen ewe apach mi pwokus. Pun ei eu asor ngeni ewe Samol mi Lapalap.
LEV 3:1 Iwe, are eman aramas epwe eäni eu asoren kinamwe, epwe eäni asor eman ätemwän ika eman liafefin seni nöün kow, nge epwe chök eäni asor ngeni ewe Samol mi Lapalap eman man esap wor terin.
LEV 3:2 Iwe, epwe anomu pöün won möküren an we mönün asor o niela leasamalapen ewe imw mangaku ia aramas ra churi Kot ie. Nge ekewe souasor nöün Aaron kewe mwän repwe uti chan ngeni pwelin ünükün ewe rongen asor.
LEV 3:3 Nge seni ewe mönün asoren kinamwe epwe eäni asor won ekkei ngeni ewe Samol mi Lapalap ewe kiris mi pwölüela pisekin lon inisin meinisin,
LEV 3:4 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün.
LEV 3:5 Mürin, nöün Aaron kewe mwän repwe keni me won ewe rongen asor asen ewe asoren kek mi nom won mwüchün ewe ekkei. Ei eu asor ewe Samol mi Lapalap a efich pwoon.
LEV 3:6 Iwe, are eman aramas epwe eäni eu asoren kinamwe ngeni ewe Samol mi Lapalap seni nöün sip eman ätemwän ika eman liafefin, epwe chök eäni asor eman man esap wor terin.
LEV 3:7 Are epwe eäni asor eman sip, epwe uwato fän mesen ewe Samol mi Lapalap,
LEV 3:8 epwe anomu pöün won möküren an we mönün asor o niela mwen ewe imwenfel seni mangaku. Nge nöün Aaron kewe mwän repwe uti chan ngeni pwelin ünükün ewe rongen asor.
LEV 3:9 Iwe, seni ewe mönün asoren kinamwe epwe eäni asor won ekkei ngeni ewe Samol mi Lapalap ekei kinikin: kirisin, unusen kirisin mechan, epwe rei kükü ngeni chülapan, ewe kiris mi pwölüela pisekin lon inisin meinisin,
LEV 3:10 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün.
LEV 3:11 Iwe, ewe souasor epwe keni ekei kinikin me won ewe rongen asor, pwe eu asoren mongö ngeni ewe Samol mi Lapalap.
LEV 3:12 Nge are epwe eäni asor eman kuuch, epwe uwato fän mesen ewe Samol mi Lapalap,
LEV 3:13 epwe anomu pöün won möküran o niela mwen ewe imwenfel seni mangaku. Nge nöün Aaron kewe mwän repwe uti chan ngeni pwelin ünükün ewe rongen asor.
LEV 3:14 Mürin, epwe eäni asor ngeni ewe Samol mi Lapalap seni ewe mönün asor ewe kiris mi pwölüela pisekin lon inisin meinisin,
LEV 3:15 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün.
LEV 3:16 Iwe, ewe souasor epwe keniir won ewe rongen asor pwe eu asoren mongö mi pwoöch. Kirisin ekewe mönün asor meinisin än ewe Samol mi Lapalap.
LEV 3:17 Ousap ochoch kiris ika ün cha. Ei epwe eu allük ngenikemi tori feilfeilachök seni eu täppin aramas tori eu täppin ekis meinisin ia oua nom ie.
LEV 4:1 Iwe, ewe Samol mi Lapalap a kapas ngeni Moses,
LEV 4:2 pwe epwe üreni ekewe aramasen Israel: Are eman a tipisin chechengau le föri mine ewe Samol mi Lapalap a allük pwe esap föri, iei usun mine epwe föri:
LEV 4:3 Are ewe souasor mi lap a tipis o ren an tipis a atoto tipis won ekewe aramas, epwe uwato ngeni ewe Samol mi Lapalap eman nienifön ätemwänin kow esap wor terin, pwe epwe eäni asor fän iten an tipis.
LEV 4:4 Iwe, epwe uwato ewe ätemwänin kow leasamalapen ewe imwenfel seni mangaku, epwe anomu pöün won möküran o niela me fän mesen ewe Samol mi Lapalap.
LEV 4:5 Mürin, ewe souasor mi lap epwe angei ekis chan ewe ätemwänin kow o uwato lon ewe imwenfel seni mangaku.
LEV 4:6 Epwe atukalong aütün lon ewe cha o äsupu fän fisu ekis seni ewe cha mwen chechen lon ewe leni mi pin fän mesen ewe Samol mi Lapalap.
LEV 4:7 Ewe souasor epwe pwal tofätä ekis seni ewe cha won mächän ewe rongen asoren ötüöt mi nom lon ewe imwenfel seni mangaku fän mesen ewe Samol mi Lapalap. Nge lusun chan ewe ätemwänin kow epwe ninätiu lepopun ewe rongen asoren kek mi nom leasamalapen ewe imwenfel seni mangaku.
LEV 4:8 Iwe, seni ei asoren tipis epwe angei kirisin ewe ätemwänin kow meinisin, ewe kiris mi pwölüela pisekin lon inisin meinisin,
LEV 4:9 ekewe ruoföü föün lon fiti kirisin wor mi kükü ngeni fitukesaran wänüükün pwal mwärekeon ammünün.
LEV 4:10 Iwe, ewe souasor epwe keniir won ewe rongen asoren kek, usun chök mine a föri ngeni ewe mönün asoren kinamwe.
LEV 4:11 Nge silin ewe ätemwänin kow me fitukan meinisin, pwal möküran me pechen, pisekin lon inisin fiti taran,
LEV 4:12 unusen ewe ätemwänin kow epwe uwawu lon eu leni mi limöch lükün ewe ia ra nonom ie. Iwe, epwe keni won ekkei seni mwüch, ia ra ninala ie ewe falang.
LEV 4:13 Iwe, are unusen ewe mwichen aramasen Israel epwe tipisin chechengau, nge resap mefi pwe ra föri mine ewe Samol mi Lapalap a allük ngeniir pwe resap föri, ra atoto tipis wor.
LEV 4:14 Nge are ra mefi pwe ra tipis, ewe mwichen aramas epwe emwenato mwen ewe imwenfel seni mangaku eman nienifön ätemwänin kow fän iten asoren tipis.
LEV 4:15 Iwe, ekewe souakomwen ewe mwich repwe anomu pöür won möküren ewe ätemwänin kow o niela me fän mesen ewe Samol mi Lapalap.
LEV 4:16 Mürin, ewe souasor mi lap epwe uwato ekis seni chan ewe ätemwänin kow lon ewe imwenfel seni mangaku.
LEV 4:17 Epwe atukalong aütün lon ewe cha o äsupu fän fisu mwen chechen lon ewe leni mi pin fän mesen ewe Samol mi Lapalap.
LEV 4:18 Iwe, ewe souasor epwe pwal tofätä ekis seni ewe cha won mächän ewe rongen asoren ötüöt mi nom fän mesen ewe Samol mi Lapalap lon ewe imwenfel seni mangaku. Nge lusun ewe cha epwe ninätiu lepopun ewe rongen asoren kek mi nom leasamalapen ewe imwenfel seni mangaku.
LEV 4:19 Mürin epwe angei kirisin ewe mönün asor meinisin o kenala me won ewe rongen asor.
LEV 4:20 Usun mine a föri ngeni ewe mönün asoren tipis, iei usun epwe pwal föri ngeni ei ätemwänin kow. Ren ei ewe souasor epwe föri asoren amusamusen tipis fän iten ekewe aramas, pwe ar tipis epwe musala.
LEV 4:21 Mürin epwe uwala ewe ätemwänin kow lükün ewe ia ra nonom ie o kenala, usun a kenala ewe ätemwänin kow fän iten an tipis. Iei eu asoren tipis fän iten ewe mwichen aramas.
LEV 4:22 Iwe, are eman samol a tipisin chechengau le föri mine an we Kot ewe Samol mi Lapalap a allük ngeni pwe esap föri, a atoto tipis won.
LEV 4:23 Iwe, are a mefi pwe a tipis, epwe uwato eman ätemwänin kuuch esap wor terin fän iten an asor.
LEV 4:24 Epwe anomu pöün won möküren ewe kuuch o niela me lon ewe leni ia ra ni ie ekewe mönün asoren kek fän mesen ewe Samol mi Lapalap. Iei eu asoren tipis.
LEV 4:25 Mürin, ewe souasor epwe angei ekis chan ewe mönün asoren tipis o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asoren kek.
LEV 4:26 Nge kirisin meinisin epwe kenala me won ewe rongen asor, usun a kenala kirisin ewe mönün asoren kinamwe. Iei usun ewe souasor epwe föri asoren amusamusen tipis fän iten ewe samol, pwe an tipis epwe musala.
LEV 4:27 Iwe, are eman me lein ekewe aramas a tipisin chechengau le föri mine ewe Samol mi Lapalap a allük ngeni pwe esap föri, a atoto tipis won.
LEV 4:28 Nge are a mefi pwe a tipis, epwe uwato eman liafefinin kuuch esap wor terin, pwe an asor fän iten an tipis.
LEV 4:29 Epwe anomu pöün won möküren ewe mönün asoren tipis o niela me lon ewe leni ia ra niela ie ekewe mönün asoren kek.
LEV 4:30 Mürin, ewe souasor epwe angei ekis chan ewe mönün asoren tipis o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asor.
LEV 4:31 Mürin, epwe aserala kirisin meinisin, usun a aserala kirisin ekewe mönün asoren kinamwe. Iwe, ewe souasor epwe keni me won ewe rongen asor, pwe ewe Samol mi Lapalap epwe efich pwoon. Iei usun ewe souasor epwe föri asoren amusamusen tipis fän iten ewe aramas, pwe an tipis epwe musala.
LEV 4:32 Iwe, are eman aramas a uwato eman sip pwe an asoren tipis, epwe uwato eman liafefin esap wor terin.
LEV 4:33 Epwe anomu pöün won möküren ewe mönün asor o niela me lon ewe leni ia ra niela ie ekewe mönün asoren kek, pwe eu asoren tipis.
LEV 4:34 Mürin, ewe souasor epwe angei ekis chan ewe mönün asor o tofätä won mächän ewe rongen asoren kek, nge lusun ewe cha epwe ninätiu lepopun ewe rongen asor.
LEV 4:35 Iwe, epwe aserala kirisin meinisin, usun a aserala kirisin ewe sip a ninnila fän iten asoren kinamwe. Mürin, ewe souasor epwe kenala ewe kiris won ewe rongen asor asen ewe asoren kek ngeni ewe Samol mi Lapalap. Ren ei ewe souasor epwe föri asoren amusamusen tipis fän iten ewe aramas, pwe an tipis epwe musala.
LEV 5:1 Are eman a kökkö me ren ewe soukapwüng pwe epwe pwärätä lon kapwüng mine a küna ika rongorong, nge esap mochen pwärätä, ätewe a tipis.
LEV 5:2 Nge are eman a atapa och mettoch mi limengau, ese lifilifil ika inisin eman manmwacho mi limengau men mä ika inisin eman manfesir mi limengau men mä ika inisin eman mantötö mi limengau men mä, inamwo ika esap mefi, a chök limengau o tipis ren.
LEV 5:3 Iwe, are eman a atapa limengauen eman aramas, nge esap mefi, ese lifilifil met sokun limengau a atapa o limengau ren, are epwe mefi, lon ewe otun epwe tipis.
LEV 5:4 Nge are eman a chiekai le akapel, nge esap ekieki usun, ese lifilifil met sokun akapel eman aramas epwe chiekai won mine a ngau ika öch, are epwe mefi, lon ewe otun epwe tipis.
LEV 5:5 Iwe, are eman aramas a tipis ren och lein ekei föför, epwe pwärätä an tipis
LEV 5:6 o uwato ren ewe Samol mi Lapalap fän iten an tipis eman liafefinin sip ika kuuch seni nöün man pwe an asoren tipis. Nge ewe souasor epwe föri asoren amusamusen tipis fän iten ewe aramas.
LEV 5:7 Nge are ewe aramas esap tufich ngeni an epwe uwato eman sip, epwe chök uwato ren ewe Samol mi Lapalap fän iten an asoren tipis ruoman lisom ika ruoman apansüsün lisom. Eman lisom epwe fän iten asoren tipis, nge eman fän iten asoren kek.
LEV 5:8 Iwe, epwe uweereto ren ewe souasor, nge ätewe epwe akomwen eäni asor ewe eman fän iten asoren tipis. Epwe ämäräkulu möküran, nge esap wesewesen tünüöla.
LEV 5:9 Mürin epwe äsupu ekis chan ewe mönün asoren tipis ngeni lepekin ewe rongen asor, nge lusun ewe cha epwe asupwätiu lepopun ewe rongen asor. Iei eu asoren tipis.
LEV 5:10 Mürin epwe eäni asor ewe aruomanün fän iten asoren kek lon pwüngün asoren kek. Iei usun ewe souasor epwe föri asoren amusamusen tipis fän iten ewe aramas. Iwe, an tipis epwe musala.
LEV 5:11 Nge are ewe aramas esap tufich ngeni an epwe uwato ruoman lisom ika ruoman apansüsün lisom, epwe chök uwato ruu paun pilawa mi amas o mürina fän iten asoren an tipis. Iwe, esap nofiti ngeni apüra seni föün olif, esap pwal ninätä apach mi pwokus won, pun eu asoren tipis.
LEV 5:12 Iwe, epwe uwato ren ewe souasor, nge ewe souasor epwe tukei ekumwuch seni, iei asisilan pwe a asor meinisin, o kenala me won ewe rongen asor asen ewe asoren kek ngeni ewe Samol mi Lapalap. Iei eu asoren amusamusen tipis.
LEV 5:13 Iei usun ewe souasor epwe föri asoren amusamusen tipis fän iten än ewe aramas tipis ren eu me eu lein ekewe föför, pwe epwe musala. Nge lusun ewe asor epwe än ewe souasor, usun a fis ren ewe asoren mongö.
LEV 5:14 Iwe, ewe Samol mi Lapalap a ngeni Moses ekei allük:
LEV 5:15 Are eman aramas esap allükülük o tipisin chechengau ren an tümwününgau ngeni mettoch mi pin me ren ewe Samol mi Lapalap, epwe uwato eman ätemwänin sip esap wor terin, pwe an asoren pupungau ngeni ewe Samol mi Lapalap. Nge ükükün liwininin ewe mönün asor kopwe aükük won aüchean föün silifer mi alongolong won ewe kilo ra aea lon ewe imw mi pin. Iei eu asoren pupungau.
LEV 5:16 Iwe, epwe liwinietiu ekewe mettoch mi pin a tümwününgau ngeni, nge epwe pwal apacha ngeni eu lelimu o ngeni ewe souasor. Ewe souasor epwe föri asoren pupungau ren ewe ätemwänin sip pwe amusamusen än ewe aramas tipis, pwe epwe musala.
LEV 5:17 Iwe, are eman a tipis ren an föri mine ewe Samol mi Lapalap a allük ngeni pwe esap föri, inamwo ika esap mefi, a chök tipis, nge an föför esepwüng a nonom won.
LEV 5:18 Iwe, epwe uwato ren ewe souasor eman ätemwänin sip esap wor terin. Nge liwinin ewe mönün asor me reöm epwe usun chök liwinin ewe mönün asoren pupungau. Iwe, ewe souasor epwe föri asoren amusamusen tipis fän iten än ewe aramas föför a chechengau ren, pwe epwe musala.
LEV 5:19 Iei eu asoren pupungau, pun ewe aramas a tipis ngeni ewe Samol mi Lapalap.
LEV 6:1 Iwe, ewe Samol mi Lapalap a ngeni Moses ekei allük:
LEV 6:2 Are eman a tipis ngeni ewe Samol mi Lapalap ren an atupu chon arun, pun esap mochen aliwini mine a wisen tütümwünü are amwöchü, ika ren an soläni och, ika ren an ariaföüü chon arun,
LEV 6:3 are a küna och mine a pöütüla, nge a chofana won, are a akapelmwäl won och ika a föri sokopaten tipis aramas ra föri, iei usun mine epwe föri:
LEV 6:4 Are eman a tipis, epwe aliwini mine a soläni, are mine a angei seni aramas fän pöchökül, epwe pwal aliwini mine eman a awisa pwe epwe tütümwünü, are mine a pöütüla, nge a küna,
LEV 6:5 pwal ekewe mettoch meinisin a akapelmwäl won. Iwe, epwe aliwini unusan, nge epwe pwal apacha ngeni eu lelimu o ngeni mine än ewe mettoch lon ewe ränin a eäni an asoren pupungau.
LEV 6:6 Iwe, epwe uwato ren ewe souasor eman ätemwänin sip esap wor terin, pwe an asoren pupungau ngeni ewe Samol mi Lapalap. Nge liwinin ewe mönün asor me reöm epwe usun chök liwinin ewe mönün asoren pupungau.
LEV 6:7 Iwe, ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas. Iwe, an kewe tipis meinisin a föri repwe musala.
LEV 6:8 Iwe, ewe Samol mi Lapalap a üreni Moses,
LEV 6:9 pwe epwe ngeni Aaron me nöün kewe mwän ekei allükün asoren kek: Ewe asoren kek epwe nom won ewe rongen asor unusen pwin tori lesosor, nge ekkeiin won epwe chök kükü.
LEV 6:10 Iwe, ewe souasor epwe üföüfolong üfan mi pwechepwech o aealong an raueses mi pwechepwech. Mürin epwe tukei falangen ekkeiin ewe asoren kek mi nom won ewe rongen asor o iseis ünükün.
LEV 6:11 Mürin epwe siwili üfan kewe o uwawu ewe falang lon eu leni mi limöch lükün ewe ia ra nonom ie.
LEV 6:12 Iwe, ewe ekkei won ewe rongen asor epwe chök kükü, nge esap fokun kunula. Iteiten lesosor ewe souasor epwe sosoni ewe ekkei, epwe pwal atettelöchü ewe mönün asoren kek o kenala kirisin ekewe mönün asoren kinamwe won.
LEV 6:13 Iwe, ekkei epwe chök kükü fochofoch won ewe rongen asor, esap fokun tongeni kunula.
LEV 6:14 Nge iei allükün ewe asoren mongö: Nöün Aaron kewe mwän repwe uwato ewe asoren mongö ngeni ewe Samol mi Lapalap mwen ewe rongen asor.
LEV 6:15 Iwe, eman leir epwe angei ekumwuch pilawa mi amas o mürina seni ewe asoren mongö me ewe apüra seni föün olif, pwal unusen ewe apach mi pwokus mi nom won, o kenala me won ewe rongen asor, iei asisilan pwe a asor meinisin. Iei eu asor ewe Samol mi Lapalap a efich pwoon.
LEV 6:16 Nge lusun ewe asoren mongö Aaron me nöün kewe mwän repwe mongö. Iwe, repwe mongö ewe asoren mongö esap wor iis lon me lon eu leni mi pin lon ewe leni lükün ewe imw mangaku ia aramas ra churi Kot ie.
LEV 6:17 Iwe, resap tongeni umuni ewe pilawa fiti iis. Ewe Samol mi Lapalap a ngeniir pwe inetir seni ewe asoren mongö. Iei eu asor mi unusen pin usun chök ewe asoren tipis me ewe asoren pupungau.
LEV 6:18 Iteiten mwän me lein ekewe mwirimwirin Aaron repwe mongö seni. Iei inetir seni ewe asor ngeni ewe Samol mi Lapalap, seni eu täppin aramas tori eu täppin. Esap fokun wor eman lükür epwe atapa ekewe asor, pun iö a atapa epwe feiengau ren pinin.
LEV 6:19 Iwe, ewe Samol mi Lapalap a ngeni Moses ekei allük
LEV 6:20 fän iten afeiöchün eman souasor i mwirimwirin Aaron: Lon ewe rän, lupwen eman leir a kepit, epwe eäni asor ngeni ewe Samol mi Lapalap ruu paun pilawa mi amas o mürina usun chök ükükün ewe asoren mongö ra eäni iteiten rän. Esop seni ewe asor epwe eäni asor lesosor, nge esop lekuniol.
LEV 6:21 Iwe, epwe nokopuni fiti apüra lon eu furaipan, epwe aipwötü o kinikisietiu usun eu asoren mongö. Mürin epwe eäni asor pwe epwe eu asor ewe Samol mi Lapalap a efich pwoon.
LEV 6:22 Ewe souasor mi kepit me lein nöün Aaron kewe mwän pwe epwe siwili Aaron, epwe eäni ei asor ngeni ewe Samol mi Lapalap fansoun meinisin. Iwe, unusen ei asor epwe kek.
LEV 6:23 Iteiten än eman souasor asoren mongö epwe kek meinisin. Esap wor eman epwe tongeni mongö seni.
LEV 6:24 Iwe, ewe Samol mi Lapalap a pwal kapas ngeni Moses,
LEV 6:25 pwe epwe ngeni Aaron me nöün kewe mwän ekei allükün asoren tipis: Lon ewe leni ia ra niela ie ewe mönün asoren kek repwe pwal niela ie ewe mönün asoren tipis fän mesen ewe Samol mi Lapalap. Ei asor a unusen pin.
LEV 6:26 Ewe souasor mi föri ei angangen asoren tipis epwe pwal mongö seni ewe asor lon ewe leni mi pin lükün ewe imw mangaku ia aramas ra churi Kot ie.
LEV 6:27 Iwe, iö a atapa fituken ewe mönün asor epwe feiengau ren pinin. Nge lupwen chan ewe mönün asor a sükiti echö üf, kopwe limeti me lon eu leni mi pin.
LEV 6:28 Are fituken ewe mönün asor a kuk lon eu sepi mi för seni pwül, ewe sepi epwe ömmök. Nge are a kuk lon eu sepi mi för seni piras, ewe sepi epwe töttölöch o chichi lon koluk.
LEV 6:29 Iteiten mwän mi wiseni ewe wisen souasor ra tongeni mongö seni ewe asor. Ei asor a unusen pin.
LEV 6:30 Nge resap tongeni mongö seni ewe sokun asoren tipis ra uwala chan lon ewe imwenfel seni mangaku, pwe repwe föri asoren amusamusen tipis lon ewe leni mi pin. Ei asor epwe kekila.
LEV 7:1 Iwe, iei allükün ewe asoren pupungau mi unusen pin:
LEV 7:2 Lon ewe leni ia ra niela ie ewe mönün asoren kek, repwe pwal niela ie ewe mönün asoren pupungau, nge chan ewe mönün asor epwe utut ngeni pwelin ünükün ewe rongen asor.
LEV 7:3 Ewe souasor epwe eäni asor kirisin ewe mönün asor meinisin: Kirisin mechan pwal ewe kiris mi pwölüela pisekin lon inisin,
LEV 7:4 ekewe ruoföü föün lon fiti kirisin wor mi kükü ngeni fitukesaran wänüükün, pwal mwärekeon ammünün.
LEV 7:5 Iwe, ewe souasor epwe kenirela won ewe rongen asor, pwe eu asor ngeni ewe Samol mi Lapalap. Iei eu asoren pupungau.
LEV 7:6 Iteiten ekewe mwän mi wiseni ewe wisen souasor ra tongeni mongö seni ewe asor. Nge repwe chök mongö lon eu leni mi pin, pun eu asor mi unusen pin.
LEV 7:7 Mi wor eu chök allükün asoren pupungau me asoren tipis: Ewe souasor mi föri ewe asoren amusamusen tipis epwe eäni fituken ewe mönün asor.
LEV 7:8 Iwe, ewe souasor mi föri än ekewe aramas asoren kek epwe eäni silin ewe mönün asoren kek.
LEV 7:9 Iteiten asoren mongö mi um pwal meinisin mine a kuk lon nape ika furain lon furaipan epwe fän iten ewe souasor mi föri ewe angangen asor.
LEV 7:10 Nge ekewe asoren mongö resap mwot, ese lifilifil ika mi nofit ngeni apüra ika resap nofit, repwe fän iten nöün Aaron kewe mwän meinisin, epwe inetöchfengen lefiler.
LEV 7:11 Iwe, iei allükün ekewe asoren kinamwe aramas ra eäni ngeni ewe Samol mi Lapalap:
LEV 7:12 Are eman a eäni ewe asoren kinamwe pwe asoren kilisou, epwe uwato an mönün asor o achu ngeni pilawa esap wor iis lon mi nofit ngeni apüra, pwal sokun pilawa usun nokop esap wor iis lon mi toto ngeni apüra, pwal pilawa mi mürina o nofitöch ngeni apüra.
LEV 7:13 Nge lupwen a eäni an asoren kinamwe fän iten kilisou, epwe pwal uwato pilawa mi wor iis lon.
LEV 7:14 Iwe, epwe angei eföü pilawa seni iteiten ewe sokun asoren mongö o eäni asor ngeni ewe Samol mi Lapalap. Iei än ewe souasor mi uti chan ewe mönün asoren kinamwe ngeni ewe rongen asor.
LEV 7:15 Nge ewe aramas epwe ocheela fituken an mönün asoren kinamwe fän iten kilisou lon ewe chök ränin a asor. Esap tongeni likiti och tori lesosor.
LEV 7:16 Iwe, are ewe aramas a eäni an asor fän iten pwon ika seni püsin letipan, epwe ochei fituken ewe mönün asor lon ewe rän a asor, nge lusun a pwal tongeni ochei sorotan.
LEV 7:17 Nge lusun fituken ewe mönün asor mi chüen nom tori aülüngatin rän epwe kek.
LEV 7:18 Iwe, are eman a ochei fituken ewe mönün asoren kinamwe lon aülüngatin rän, ewe asor esap tiw me ren Kot, esap pwal wor lomotan ngeni ätewe mi eäni, pun a limengau. Nge ätewe mi ochei ewe fituk epwe mwärei an tipis.
LEV 7:19 Esap wor eman epwe ochoch fituk mi torii och mettoch mi limengau, epwe chök kek. Chokewe meinisin mi limöch ra tongeni ochei fituken ewe mönün asoren kinamwe.
LEV 7:20 Nge are eman aramas mi nom lon och limengau a ochei fituken ewe mönün asoren kinamwe än ewe Samol mi Lapalap, ewe aramas epwe käriwu seni aramasan.
LEV 7:21 Iwe, are eman a atapa och mettoch mi limengau, ese lifilifil ika eman aramas mi limengau ika eman man mi limengau ika och sokun mettoch mi anioput, nge mürin a ochei fituken ewe mönün asoren kinamwe än ewe Samol mi Lapalap, ätewe epwe käriwu seni aramasan.
LEV 7:22 Iwe, ewe Samol mi Lapalap a ngeni Moses ekei allük
LEV 7:23 fän iten ekewe aramasen Israel: Ousap ochoch kirisin kow ika sip ika kuuch.
LEV 7:24 Iwe, kirisin eman man mi püsin mäla ika kirisin eman mi tatakis ren manmwacho oua tongeni aea fän iten och, nge ousap fokun tongeni ochei.
LEV 7:25 Iteiten eman me eman aramas mi ochei kirisin ekewe man ra eäni asor won ekkei ngeni ewe Samol mi Lapalap epwe käriwu seni aramasan.
LEV 7:26 Ekis meinisin ia oua nonom ie ousap fokun ün cha, ese lifilifil ika chan mansüsü ika chan man.
LEV 7:27 Iteiten eman me eman aramas mi ün cha epwe käriwu seni aramasan.
LEV 7:28 Iwe, ewe Samol mi Lapalap a pwal ngeni Moses ekei allük
LEV 7:29 fän iten ekewe aramasen Israel: Eman mi eäni an asoren kinamwe ngeni ewe Samol mi Lapalap epwe uwato eu kinikin pwe an asor ngeni ewe Samol mi Lapalap.
LEV 7:30 Epwe püsin uwato ekewe asor ngeni ewe Samol mi Lapalap. Iwe, epwe uwato kirisin ewe mönün asor pwal leupwan, pwe ewe leupw epwe assaw fän mesen ewe Samol mi Lapalap.
LEV 7:31 Iwe, ewe souasor epwe kenala ewe kiris won ewe rongen asor, nge leupwen ewe mönün asor epwe fän iten Aaron me nöün kewe mwän.
LEV 7:32 Oupwe ngeni ewe souasor pelifichin pechen ämi mönün asoren kinamwe.
LEV 7:33 Iö me lein nöün Aaron kewe mwän a eäni asor chan ewe mönün asoren kinamwe pwal kirisin, i epwe eäni pelifichin pechen ewe mönün asor pwe ina inetin.
LEV 7:34 Pun üa angei seni än ekewe aramasen Israel mönün asoren kinamwe leupwan mi assaw pwal pechen o ngeni ewe souasor Aaron me nöün kewe mwän. Iei ekewe kinikin ekewe aramasen Israel repwe ngeni ekewe souasor fansoun meinisin.
LEV 7:35 Iei inetin Aaron me nöün kewe mwän seni ekewe asor ngeni ewe Samol mi Lapalap, mi apinipin fän iter lon ewe ränin ar tolong lon wisen souasor.
LEV 7:36 Ewe Samol mi Lapalap a allük pwe ekewe aramasen Israel repwe ngeniir inetir kei lon ewe ränin ra kepit, pwe wiser fansoun meinisin seni eu täppin aramas tori eu täppin.
LEV 7:37 Iwe, iei allükün ewe asoren kek, ewe asoren mongö, ewe asoren tipis, ewe asoren pupungau, ewe asoren apinipin me ewe asoren kinamwe.
LEV 7:38 Ikei ekewe allük ewe Samol mi Lapalap a ngeni Moses me won ewe chuk Sinai lon ewe ränin a allük ngeni ekewe aramasen Israel pwe repwe uwato ar asor ngeni lon ewe fanüapön Sinai.
LEV 8:1 Iwe, ewe Samol mi Lapalap a üreni Moses,
LEV 8:2 “Kopwe emwenato Aaron me nöün kewe mwän leasamalapen ewe imw mangaku ia aramas ra churiei ie, kopwe pwal uwei ekewe üf, ewe löön epit, ewe nienifön ätemwänin kow fän iten asoren tipis me ekewe ruoman ätemwänin sip, pwal ewe chükün pilawa esap wor iis lon.
LEV 8:3 Mürin kopwe pwal amwichafengeni ekewe aramas meinisin ikenan.”
LEV 8:4 Iwe, Moses a föri usun mine ewe Samol mi Lapalap a allük ngeni o amwichafengeni ekewe aramas meinisin.
LEV 8:5 Iwe, Moses a üreni ekewe aramas, “Iei usun mine ewe Samol mi Lapalap a allük ngeniei pwe üpwe föri.”
LEV 8:6 Mürin, Moses a emwenato Aaron me nöün kewe mwän o atütüür.
LEV 8:7 A aüföüfa ngeni Aaron ewe söch o peliti ngeni ewe pelit, a pwal aüföüfa ngeni ewe owokot me ewe üf itan efot o ri ngeni ririn ewe efot mi türmürina.
LEV 8:8 Iwe, a pachetä won ewe chechen leupw o uwalong ewe Urim me ewe Tumim lon .
LEV 8:9 A pwal aimweimwa ngeni Aaron ewe akkaw o rietä won eten mesan ewe kolt mi chöpöp, ewe mwärämwär mi pin, usun ewe Samol mi Lapalap a allük ngeni.
LEV 8:10 Mürin, Moses a angei ewe löön epit o epiti ngeni ewe imw mangaku ia aramas ra churi Kot ie, me meinisin mine a nom lon, a pwal apiniir.
LEV 8:11 Iwe, a angei ekis seni ewe löön epit o äsupu fän fisu ngeni ewe rongen asor, a epiti ewe rongen asor me pisekin meinisin pwal ewe lenien töttöl me motongan, pwe repwe pin.
LEV 8:12 A pwal ninätiu ekis seni ewe löön epit won möküren Aaron o epiti pwe epwe pin.
LEV 8:13 Mürin, Moses a emwenato nöün Aaron kewe mwän, a aüföüfa ngeniir ekewe söch o peliti ngeniir ekewe pelit, a pwal aimweimwa ngeniir ekewe akkaw, usun ewe Samol mi Lapalap a allük ngeni.
LEV 8:14 Mürin, Moses a emwenato ewe ätemwänin kow fän iten asoren tipis, nge Aaron me nöün kewe mwän ra isetä pöür won möküran.
LEV 8:15 Iwe, Moses a niela ewe mönün asor, a angei ekis chan o aea pöün le tofi ewe cha ngeni mächän ewe rongen asor me fofoch, pwe epwe alimöchü ewe rongen asor. Nge lusun ewe cha a ninätiu lepopun ewe rongen asor o apini, pwe epwe föri asoren amusamusen limengauen ewe rongen asor.
LEV 8:16 Mürin, Moses a angei kirisin pisekin lon inisin ewe mönün asor me mwärekeon ammünün, pwal ekewe ruoföü föün lon fiti kirisir, o kenirela won ewe rongen asor.
LEV 8:17 Nge silin ewe ätemwänin kow me fitukan pwal taran a kenirela lükün ewe ia ra nonom ie, usun ewe Samol mi Lapalap a allük ngeni.
LEV 8:18 Mürin, Moses a emwenato ewe ätemwänin sip fän iten asoren kek. Nge Aaron me nöün kewe mwän ra isetä pöür won möküran.
LEV 8:19 Iwe, Moses a niela ewe ätemwänin sip o uti chan ngeni pwelin ünükün ewe rongen asor.
LEV 8:20 Mürin a kinikisietiu fituken ewe ätemwänin sip o kenala möküran me ekewe kinikin pwal kirisin.
LEV 8:21 Iwe, a talü ekewe pisekin lon inisin me pechen ngeni koluk o kenala unusen ewe ätemwänin sip won ewe rongen asor pwe eu asoren kek ngeni ewe Samol mi Lapalap a efich pwoon. Iei usun ewe Samol mi Lapalap a allük ngeni Moses.
LEV 8:22 Mürin, Moses a pwal emwenato ewe aruomanün ätemwänin sip fän iten afeiöchün ekewe souasor. Nge Aaron me nöün kewe mwän ra isetä pöür won möküran.
LEV 8:23 Iwe, Moses a niela ewe ätemwänin sip, a angei ekis chan o tofi ngeni emin fän pelifichin selingen Aaron, pwal ngeni aütülapen pelifichin pöün me pechen.
LEV 8:24 Mürin, Moses a pwal emwenato nöün Aaron kewe mwän. Iwe, a tofi ekis ewe cha ngeni emin fän pelifichin selinger pwal ngeni aütülapen pelifichin pöür me pecher. Nge lusun ewe cha a uti ngeni pwelin ünükün ewe rongen asor.
LEV 8:25 Iwe, a angei kirisin ewe mönün asor, kirisin mechan me kirisin won pisekin lon inisin meinisin, mwärekeon ammünün pwal ekewe ruoföü föün lon fiti kirisir me pelifichin pechen.
LEV 8:26 A pwal angei eföü pilawa seni lon chükün ewe pilawa esap wor iis lon mi nom fän mesen ewe Samol mi Lapalap, pwal eföü pilawa mi nofitfengen me apüra, me echö nokop, o iseniir won kirisin ewe mönün asor pwal won pelifichin pechen.
LEV 8:27 Iwe, ekei mettoch meinisin Moses a isenalong lepöün Aaron me nöün kewe mwän, nge ir ra assawerela fän mesen ewe Samol mi Lapalap pwe eu asoren assaw.
LEV 8:28 Mürin, Moses a angei ekei mettoch seni lepöür o kenirela won ewe rongen asor fiti ewe asoren kek pwe eu asoren afeiöch ewe Samol mi Lapalap a efich pwoon.
LEV 8:29 Iwe, Moses a pwal angei leupwen ewe mönün asor o assawa pwe eu asoren assaw fän mesen ewe Samol mi Lapalap. Iei inetin Moses me won ewe ätemwänin sip, ewe asoren afeiöch. Moses a föri meinisin mine ewe Samol mi Lapalap a allük ngeni.
LEV 8:30 Mürin, Moses a angei ekis seni ewe löön epit me ekis ewe cha mi nom won ewe rongen asor o äsupu ngeni Aaron me üfan, pwal ngeni nöün kewe mwän me üfer. Iei usun a apini Aaron me nöün kewe mwän me üfer.
LEV 8:31 Iwe, Moses a üreni Aaron me nöün kewe mwän, “Oupwe kuku ewe fituk leasamalapen ewe imw mangaku ia aramas ra churi Kot ie. Ikenan oupwe pwal ochei ewe fituk o mongö ewe pilawa mi nom lon ewe chükün asoren afeiöch. Pun iei usun Kot a allük ngeniei pwe oupwe föri.
LEV 8:32 Nge lusun ewe fituk me ewe pilawa oupwe kenala.
LEV 8:33 Iwe, ousap towu lükün asamalapen ewe imwenfel seni mangaku ükükün fisu rän, tori repwe wesöchüla ränin afeiöchümi. Pun angangen afeiöchümi epwe fis lon ükükün fisu rän.
LEV 8:34 Ewe Samol mi Lapalap a allük pwe epwe fis asoren amusamusen tipis fän itemi, usun a fen fis ikenai.
LEV 8:35 Iwe, oupwe nonom leasamalapen ewe imwenfel seni mangaku lerän me lepwin lon ükükün fisu rän, pwe oupwe föri mine ewe Samol mi Lapalap a awisa ngenikemi pwe ousap mäla. Pun iei usun Kot a allük ngeniei.”
LEV 8:36 Iwe, Aaron me nöün kewe mwän ra föri ekewe mettoch meinisin usun mine ewe Samol mi Lapalap a allük ngeni Moses.
LEV 9:1 Iwe, wesin ekewe ränin afeiöch, Moses a köri Aaron me nöün kewe mwän pwal ekewe souakomwen Israel.
LEV 9:2 Iwe, a üreni Aaron, “Kopwe angei eman nienifön ätemwänin kow fän iten asoren tipis, pwal eman ätemwänin sip fän iten asoren kek, nge esap wor terir. Iwe, kopwe eäniir asor fän mesen ewe Samol mi Lapalap.
LEV 9:3 Mürin kopwe üreni ekewe aramasen Israel: Oupwe angei eman ätemwänin kuuch fän iten asoren tipis, pwal eman nienifön kow me eman lam fan iten asoren kek, nge ir me ruoman eu ierir, esap pwal wor terir.
LEV 9:4 Oupwe pwal angei eman ätemwänin kow me eman ätemwänin sip fän iten asoren kinamwe o eäniir asor fän mesen ewe Samol mi Lapalap fiti eu asoren mongö mi nofit ngeni apüra, pun ikenai ewe Samol mi Lapalap epwe pwä ngenikemi.”
LEV 9:5 Iwe, ra uwato mwen ewe imwenfel seni mangaku meinisin mine Moses a allük ngeniir. Nge ekewe aramas meinisin ra kaneto o ütä fän mesen ewe Samol mi Lapalap.
LEV 9:6 Iwe, Moses a apasa, “Iei usun mine ewe Samol mi Lapalap a allük pwe oupwe föri, pwe lingen ewe Samol mi Lapalap epwe pwä ngenikemi.”
LEV 9:7 Mürin, Moses a üreni Aaron, “Kopwe kan ngeni ewe rongen asor o eäni om asoren tipis me om asoren kek, pwe kopwe föri asoren amusamusen tipis fän itom me ekewe aramas. Kopwe pwal eäni ewe asor fän iten ekewe aramas o föri asoren amusamusen ar tipis, usun ewe Samol mi Lapalap a fen allük.”
LEV 9:8 Iwe, Aaron a kan ngeni ewe rongen asor o niela ewe nienifön ätemwänin kow, pwe epwe eäni asoren tipis fän püsin itan.
LEV 9:9 Nge nöün Aaron kewe mwän ra uwato chan ewe mönün asor ren. Iwe, Aaron a otukalong aütün lon ewe cha o tofi ngeni mächän ewe rongen asor, nge lusun a ninätiu lepopun ewe rongen asor.
LEV 9:10 Iwe, kirisin ewe mönün asoren tipis me ekewe föün lon pwal mwärekeon ammünün a kenirela won ewe rongen asor, usun ewe Samol mi Lapalap a fen allük ngeni Moses.
LEV 9:11 Nge fituken ewe mönün asor me silin a kenirela lükün ewe ia aramas ra nonom ie.
LEV 9:12 Mürin, Aaron a niela an we mönün asoren kek. Iwe, nöün Aaron kewe mwän ra uwato chan ewe mönün asor ren, nge Aaron a uti ngeni pwelin ünükün ewe rongen asor.
LEV 9:13 Ra pwal ngeni eu me eu kinikinin ewe mönün asoren kek pwal möküran, nge Aaron a kenirela won ewe rongen asor.
LEV 9:14 Iwe, a talü pisekin lon inisin me pechen o kenirela fiti ewe asoren kek won ewe rongen asor.
LEV 9:15 Mürin, Aaron a uwato än ekewe aramas asor. Iwe, a angei ewe ätemwänin kuuch pwe asoren tipis fän iten ekewe aramas, o niela. Iwe, a föri angangen asoren tipis, usun chök ewe aeuin asoren tipis a föri fän püsin itan.
LEV 9:16 A pwal uwato ewe mönün asoren kek o eäni asor lon pwüngün angangen allükün.
LEV 9:17 Iwe, a pwal uwato ewe asoren mongö, a angei ekumwuch seni o keni me won ewe rongen asor pach ngeni ewe asoren kek mi fis iteiten rän.
LEV 9:18 Mürin, Aaron a pwal niela ewe ätemwänin kow me ewe ätemwänin sip pwe asoren kinamwe fän iten ekewe aramas. Iwe, nöün Aaron kewe mwän ra uwato chan ekewe mönün asor ren, nge Aaron a uti ngeni pwelin ünükün ewe rongen asor.
LEV 9:19 Iwe, ra angei kirisin ewe ätemwänin kow me kirisin ewe ätemwänin sip, iei ewe mechan mi kiris echök, ewe kiris mi pwölüela pisekin lon inisir, ekewe föün lor me mwärekeon ammünür,
LEV 9:20 o iseis meinisin won leupwen ekewe mönün asor. Mürin Aaron a angei ewe kiris o kenala won ewe rongen asor.
LEV 9:21 Nge ekewe leupwan me pelifichin pechen, Aaron a assawa pwe eu asoren assaw fän mesen ewe Samol mi Lapalap, pun iei usun Moses a fen allük.
LEV 9:22 Iwe, wesin än Aaron eäni ekewe asoren tipis me asoren kek pwal asoren kinamwe, a aitiela pöün won ekewe aramas o afeiöchüür. Mürin a feitiu seni ewe rongen asor.
LEV 9:23 Mürin, Moses me Aaron ra tolong lon ewe imw mangaku ia aramas ra churi Kot ie. Nge lupwen ra towu, ra afeiöchü ekewe aramas. Iwe, lingen ewe Samol mi Lapalap a pwä ngeni ekewe aramas meinisin.
LEV 9:24 Iwe, ewe Samol mi Lapalap a tinato ekkei o kenala ewe asoren kek me ewe kiris mi nom won ewe rongen asor. Nge lupwen ekewe aramas meinisin ra küna, ra mweireir ren ar pwapwa o chapetiu lepwül.
LEV 10:1 Iwe, nöün Aaron kewe mwän iter Natap me Apihu ra angei en me an sepien asoren ötüöt, ra uwalong ekkei lon o iseis apach mi pwokus won. Nge ei asor esap pin fän mesen ewe Samol mi Lapalap, pun eu sokun asor Kot esap allük ngeniir.
LEV 10:2 Iwe, ewe Samol mi Lapalap a tinato ekkei o kenirela pwe ra mäla fän mesan.
LEV 10:3 Mürin, Moses a üreni Aaron, “Iei usun wewen mine ewe Samol mi Lapalap a apasa: Üpwe pwärätä pwe ngang üa pin me lein chokewe ra kan ngeniei, nge üpwe pwal alinga ai ling fän mesen aramas meinisin.” Iwe, Aaron a chök fanafanala.
LEV 10:4 Mürin, Moses a körato Misael me Elsafan nöün Ussiel mwän, nge Ussiel pwin semen Aaron. Iwe, a üreniir, “Oupwe kaneto o ekiela pwimi seni lon ewe imwenfel seni mangaku, pwe oupwe ekirewu lükün ewe ia aramas ra nonom ie.”
LEV 10:5 Iwe, ra feito o ekirewu lükün ewe ia aramas ra nonom ie, usun Moses a apasa, nge ekewe somä ra chüen üföüf üfer üfen souasor.
LEV 10:6 Mürin, Moses a üreni Aaron me nöün kewe mwän iter Eleasar me Itamar, “Ousap atorongauei möküremi, ousap pwal kamwei üfemi pwe asisilen ämi letipeta, pwe ousap mäla, nge ewe Samol mi Lapalap esap pwal song ngeni unusen ewe mwichen aramas. Nge pwimi ekewe chon Israel meinisin repwe kechüeiti afeiengauen ewe kar, ewe Samol mi Lapalap a afisätä.
LEV 10:7 Ousap towu seni leasamalapen ewe imwenfel seni mangaku, pwe ousap mäla. Pun än ewe Samol mi Lapalap löön epit a nonom womi.” Iwe, ra föri usun mine Moses a kapas ngeniir.
LEV 10:8 Iwe, ewe Samol mi Lapalap a kapas ngeni Aaron,
LEV 10:9 “En me noum kana mwän ousap ünümi wain are sakau mi pwichikar, lupwen oupwe tolong lon ewe imw mangaku ia aramas ra churiei ie, pwe ousap mäla. Iei eu allük esemwüch ngenikemi me mwirimwirimi kana, seni eu täppin aramas tori eu täppin.
LEV 10:10 Oupwe alefila lefilen mettoch mi pin me mettoch resap pin, pwal lefilen mettoch mi limengau me mettoch mi limöch.
LEV 10:11 Oupwe pwal aiöü ngeni ekewe aramasen Israel ekewe allük meinisin ngang ewe Samol mi Lapalap üa ngeni Moses pwe epwe aiti ngeniir.”
LEV 10:12 Iwe, Moses a üreni Aaron me nöün kewe mwän mi chüen manau iter Eleasar me Itamar, “Oupwe angei ewe asoren mongö lusun ewe asor won ekkei ngeni ewe Samol mi Lapalap, pwe oupwe mongö ewe pilawa esap wor iis lon lükün ewe rongen asor. Pun ei asor a unusen pin.
LEV 10:13 Oupwe mongö ei asor lon eu leni mi pin, pun iei inetum me inetin noum kewe mwän seni ewe asor ngeni ewe Samol mi Lapalap. Pun iei usun Kot a allük ngeniei.
LEV 10:14 Nge en me noum kewe mwän me fefin oupwe ochoch leupwen ewe mönün asor mi assaw pwal pechen lon sokun leni mi limöch. Pun iei inetum me inetin noum kewe mwän seni än ekewe aramasen Israel asoren kinamwe.
LEV 10:15 Iwe, pechen ewe mönün asor pwal leupwan mi assaw repwe uweefengenireto me kirisin ekewe asor, pwe repwe assawa fän mesen ewe Samol mi Lapalap, pun eu asoren assaw. Iwe, ei epwe inetum me inetin noum kewe pwe wisemi fansoun meinisin, usun ewe Samol mi Lapalap a fen allük.”
LEV 10:16 Iwe, Moses a ais tichik usun mine ra föri ngeni ewe ätemwänin kuuch, ewe mönün asoren tipis. Nge a pwä pwe a kekila. Iwe, Moses a song ngeni Eleasar me Itamar, nöün Aaron kewe mwän mi chüen manau, a pwal üreniir,
LEV 10:17 “Pwota ousap ochoch fituken ewe mönün asoren tipis lon ewe leni mi pin? Pun ei mettoch a unusen pin, a ainet ngenikemi pwe oupwe uwei föföringauen ewe mwichen aramas ren ämi föri asoren amusamusen tipis fän iter fän mesen ewe Samol mi Lapalap.
LEV 10:18 Nengeni, ousap fen uwalong chan ewe mönün asor lon ewe leni mi pin. Pwüngün itä oupwe ochei fituken ewe mönün asor lon ewe leni mi pin usun üa allük ngenikemi.”
LEV 10:19 Iwe, Aaron a üreni Moses, “Nengeni, ikenai ekewe aramas ra eäni ar asoren tipis me asoren kek fän mesen ewe Samol mi Lapalap, nge ekei sokun feiengau ra toriei. Ifa usun, epwe pwüng fän mesen ewe Samol mi Lapalap ai üpwe ochei fituken ewe mönün asoren tipis?”
LEV 10:20 Nge lupwen Moses a rongorong ekei kapas, a menemen ren.
LEV 11:1 Iwe, ewe Samol mi Lapalap a kapas ngeni Moses me Aaron,
LEV 11:2 “Oupwe üreni ekewe aramasen Israel, ‘Ikkei ir ekewe mönümanau oua tongeni ochoch me lein man meinisin won fanüfan:
LEV 11:3 Oua tongeni ochoch ekewe man meinisin mi keang kün pachapacher o lülüsefäli ener.
LEV 11:4 Nge ousap ochoch ekewe man mi chök lülüsefäli ener ika keang chök kün pachapacher: Ewe kamel epwe limengau ngenikemi, pun a lülüsefäli anan, nge esap keang kün pachapachan.
LEV 11:5 Pwal ewe man itan pächer mi nom won achau epwe limengau ngenikemi, pun a lülüsefäli anan, nge esap keang kün pachapachan.
LEV 11:6 Iwe, ewe üsangi epwe limengau ngenikemi, pun a lülüsefäli anan, nge esap keang kün pachapachan.
LEV 11:7 Nge pik epwe pwal limengau ngenikemi, pun a keang kün pachapachan, nge esap lülüsefäli anan.
LEV 11:8 Ousap fokun ochoch fituken ekei man, ousap pwal fokun atapa ekei man men mä, pun repwe limengau ngenikemi.
LEV 11:9 Iwe, oua tongeni mongö ekewe ik meinisin mi nom lon koluk ika leset a wor ililir me töröüner.
LEV 11:10 Nge ekewe mönümanau mi nom leset ika lon koluk esap wor ililir me töröüner, ese lifilifil ika ra kükün ika ra watte, repwe anioput ngenikemi.
LEV 11:11 Iwe, repwe chök anioput ngenikemi. Ousap mongö fituker, nge are ra mäla, repwe pwal anioput ngenikemi.
LEV 11:12 Mönümanau meinisin mi nom lon koluk ika leset esap wor ililir me töröüner repwe chök anioput ngenikemi.
LEV 11:13 Iwe, ikkei iten ekewe machang ousap ochoch fituker, pun repwe anioput ngenikemi: Ikel me sokopaten ikel iter wolcher me osprei,
LEV 11:14 ekewe machang iter kait me sokopaten machang iter falkon,
LEV 11:15 iteiten sokopaten ängä,
LEV 11:16 ewe machang itan ostrich, kawakawen lepwin, nipöüwanei, sokopaten kawakaw,
LEV 11:17 fukuro, niwanök me ewe machang itan ipis,
LEV 11:18 niaupinik, ekewe machang iter pelikan me karion wolcher,
LEV 11:19 öröpwech pwal iteiten sokopaten örö, ewe machang itan hupo me pöüte.
LEV 11:20 Iwe, ekewe kükün man meinisin mi äkkäs, nge ra pwal tö won fofoch aütür, repwe anioput ngenikemi.
LEV 11:21 Nge me lein ekewe kükün man mi äkkäs o tö won fofoch aütür oua tongeni mongö ekewe mi wor aför, pwe ra tongeni mwetemwet won pwül.
LEV 11:22 Ikkei ir ekewe kükün man oua tongeni mongö: sokopaten lifichimas, sokopaten lifichimas mi äkkäsfetal, sokopaten korongi, pwal sokun lifichimas mi nom won fetil.
LEV 11:23 Nge ekewe lusun kükün man mi äkkäs, a pwal wor fofoch aütür, repwe anioput ngenikemi.
LEV 11:24 Are ämi oua atapa ekei man, oupwe limengau. Iwe, eman mi atapa ekei man men mä, epwe limengau tori lekuniol.
LEV 11:25 Nge eman mi uwei eman lein ekei man men mä epwe sopuni üfan o limengau tori lekuniol.
LEV 11:26 Iteiten man mi kinikin kün pachapacher, nge resap keang ika resap pwal lülüsefäli ener, repwe limengau ngenikemi. Eman mi atapa ekei man men mä epwe pwal limengau.
LEV 11:27 Iwe, ekewe man mi fetal won pöür me pecher, nge a chök wor kün aütür, repwe limengau ngenikemi. Eman mi atapa ekei man men mä epwe limengau.
LEV 11:28 Nge eman mi uwei ekei man men mä epwe sopuni üfan o limengau tori lekuniol. Ekei man repwe limengau ngenikemi.
LEV 11:29 Iwe, ikkei ir ekewe mantötö mi tö won pwül repwe limengau ngenikemi: eman man itan wisel, nakich, sokopaten koluf,
LEV 11:30 litopach, niparoch, kuel, sokun kuel mi nom leppi me niküch.
LEV 11:31 Ekei man me lein ekewe mantötö repwe limengau ngenikemi. Eman mi atapa inisir men mä epwe limengau tori lekuniol.
LEV 11:32 Nge ika eman lein ekei man a mäla o turutiu won och mettoch, ewe mettoch epwe limengau, ese lifilifil ika a för seni mwüch, ika echö üf, ika silin man, ika eu tuk, ika sokopaten sepi aramas ra aea. Iwe, ewe mettoch epwe soso lon koluk, epwe pwal limengau tori lekuniol, nge mürin epwe limöch.
LEV 11:33 Iwe, are eman me lein ekewe man men mä epwe turulong lon eu sepi mi för seni pwül, meinisin mine a nom lon epwe limengau, kopwe pwal amökkü ewe sepi.
LEV 11:34 Nge are chichin ewe sokun sepi mi limengau a niti och mongö, ewe mongö epwe limengau, pwal kolukun ün mi nom lon epwe limengau.
LEV 11:35 Iwe, are eman lein ekewe kükün man men mä a torii och mettoch, epwe limengau, ese lifilifil ika eu lenien um ika eu sitof, repwe chök katala. Iwe, ekei mettoch ra limengau, repwe pwal limengau ngenikemi.
LEV 11:36 Nge ika ewe man epwe turulong lon kolukun eu miich ika eu chönüttu, epwe chök limöch. Iwe, nge mine a torii ekewe kükün man men mä epwe limengau.
LEV 11:37 Are eman lein ekewe kükün man men mä a turutiu won föün irä fän iten fofot, ekewe föün irä repwe chök limöch.
LEV 11:38 Iwe, are ekewe föün irä ra nom lon chöchön, nge eman lein ekewe man men mä a turutiu won, ekewe föün irä repwe limengau ngenikemi.
LEV 11:39 Iwe, are eman lein ekewe man ämi mi tongeni ochoch a püsin mäla, nge eman a atapa, ätewe epwe limengau tori lekuniol.
LEV 11:40 Nge eman mi ochoch ewe man men mä epwe sopuni üfan, i epwe pwal nom lon tettelin chon limengau tori lekuniol. Iwe, eman mi eki ewe man mi mä epwe sopuni üfan, epwe pwal nom lon tettelin chon limengau tori lekuniol.
LEV 11:41 Iteiten mantötö mi tö won pwül repwe anioput ngenikemi. Ousap fokun ocheer.
LEV 11:42 Man meinisin mi tö won upwer lepwül, pwal meinisin mi tö won fofoch pecher ika lap seni, ousap ocheer, pun ra anioput.
LEV 11:43 Ousap alimengauakemi ren ekewe mantötö, pwe ousap nom lon tettelin chon limengau.
LEV 11:44 Pun ngang ewe Samol mi Lapalap ämi we Kot. Iei mine oupwe püsin apinikemi pwe oupwe pin, pun ngang üa pin. Ousap püsin alimengauakemi ren ekewe mantötö mi tö won pwül.
LEV 11:45 Ngang ewe Samol mi Lapalap üa emwenikemiiwu seni ewe fanü Isip pwe üpwe ämi Kot. Iei mine oupwe pin, pun ngang üa pin.’”
LEV 11:46 Iei ewe allük fänäsengesin ekewe man me machang, fänäsengesin mönümanau meinisin mi nom leset me lekoluk, pwal fänäsengesin ekewe mantötö meinisin mi tö won pwül.
LEV 11:47 Ei allük a alefila lefilen mine a limengau ika limöch, pwal lefilen ekewe mönümanau aramas ra tongeni ochoch me ekewe resap tongeni ochoch.
LEV 12:1 Iwe, ewe Samol mi Lapalap a ngeni Moses ekei allük
LEV 12:2 fän iten ekewe aramasen Israel: Are eman fefin a pwopwo o nöüni eman ät, neminewe epwe nom lon tettelin chon limengau lon ükükün fisu rän, usun chök an limengau lon fansoun an samaun fefin.
LEV 12:3 Nge lon awaluen rän ewe kükün ät epwe sirkomsais.
LEV 12:4 Mürin, ewe fefin epwe pwal witiwit lon ükükün ilik me ülüngat rän tori epwe limöch seni chan. Esap tongeni atapa och mettoch mi pin, esap pwal tongeni feila ren ewe imwenfel seni mangaku tori a unus ränin an limelim.
LEV 12:5 Nge are ewe fefin a nöüni eman nengin, neminewe epwe limengau lon ükükün ruu wik, usun chök an limengau lon fansoun an samaun fefin. Mürin epwe pwal witiwit lon ükükün wone me wonu rän tori epwe limöch seni chan.
LEV 12:6 Iwe, lupwen ra wesöchüla ränin an limelim, ese lifilifil ika an limelim fän iten eman ät ika eman nengin, epwe uwato eman lam eu ierin leasamalapen ewe imw mangaku ia aramas ra churi Kot ie ren ewe souasor, pwe an asoren kek, epwe pwal uwato eman apansüsün lisom ika eman lisom pwe an asoren tipis.
LEV 12:7 Iwe, ewe souasor epwe eäniir asor fän mesen ewe Samol mi Lapalap o föri asoren amusamusen tipis fän iten ewe fefin. Mürin epwe limöch seni chan. Iei ewe allük fän iten ekewe fefin mi nöünöü, ese lifilifil ika ra nöüni ät ika nengin.
LEV 12:8 Nge are ewe fefin esap tufich ngeni an epwe uwato eman lam, epwe chök uwato ruoman lisom ika ruoman apansüsün lisom, eman fän iten asoren kek, nge pwal eman fän iten asoren tipis. Iwe, ewe souasor epwe föri asoren amusamusen tipis fän iten ewe fefin pwe epwe limöch.
LEV 13:1 Iwe, ewe Samol mi Lapalap a üreni Moses me Aaron,
LEV 13:2 “Are eman aramas a wor och pwo won inisin, ika och tir ika och tikepwechepwech, a tongeni wiliti eu kilingau mi afeiengau won inisin, repwe emwenala ren ewe souasor Aaron ika ren eman lein mwirimwirin kewe.
LEV 13:3 Iwe, ewe souasor epwe nenengenöchü ewe kilingau won inisin ewe aramas. Nge are a pwechepwechela ülöülen ewe ia a kilingau ie, are a pwal pwä pwe ewe kilingau a enalong silin, ewe aramas a eäni eu kilingau mi afeiengau. Iwe, wesin än ewe souasor nenengenöchü ewe aramas, epwe anomu lon tettelin chon limengau.
LEV 13:4 Nge are ewe kilingau a pwechepwech won, nge esap enalong silin, are ülöülan resap pwal pwechela, ewe souasor epwe aimwüela ewe aramas lon ükükün fisu rän.
LEV 13:5 Iwe, lon ewe afisuen rän ewe souasor epwe nenengenöchüsefäli ewe aramas. Nge are a küna pwe ewe kil esap lapala, esap pwal töfetal won silin, ewe souasor epwe aimwüela ewe aramas pwal lon ükükün fisu rän.
LEV 13:6 Iwe, lon afisuen rän ewe souasor epwe nenengenöchüsefäli ewe aramas. Nge are ewe kil a aromomo, esap pwal töfetal won silin, ewe souasor epwe anomu lon tettelin chon limöch. Ewe kil och tir echök. Ewe aramas epwe sopuni üfan, mürin epwe limöch.
LEV 13:7 Nge are ewe tir a töfetal won silin ewe aramas mürin an pwäri ngeni ewe souasor inisin o nom lon tettelin chon limöch, ewe aramas epwe liwinsefälila ren ewe souasor.
LEV 13:8 Iwe, ewe souasor epwe nenengenöchüsefäli ewe aramas. Nge are ewe tir a töfetal won silin, ewe souasor epwe anomu ewe aramas lon tettelin chon limengau, pun a eäni och kilingau mi afeiengau.
LEV 13:9 Iwe, are eman aramas a eäni och kilingau mi afeiengau, repwe emwenala ewe aramas ren ewe souasor,
LEV 13:10 pwe epwe nenengenöchü. Nge are a wor eu pwo mi pwechepwech o ülöülen ewe ia a pwo ie ra pwechela, are a pwal parapar fituken lon ewe pwo,
LEV 13:11 iei eu kilingau mi afeiengau won inisin ewe aramas mi nom seni chök me lom. Iwe, ewe souasor epwe anomu i lon tettelin chon limengau. Esap chüen aimwüela ewe aramas ren an epwe nenengenisefäli, pun a fen limengau.
LEV 13:12 Nge are ewe souasor a küna pwe ewe kilingau a rangewu won inisin ewe aramas o chöüla won inisin seni won möküran tori pechen,
LEV 13:13 ewe souasor epwe nenengenöchü ewe aramas. Are ewe kilingau mi afeiengau a pwölüela unusen inisin, ewe souasor epwe anomu ewe aramas lon tettelin chon limöch. Iwe, pokiten unusen inisin a pwechela, a limöch.
LEV 13:14 Nge are a pwä fituk mi parapar won inisin ewe aramas, epwe limengau.
LEV 13:15 Iwe, ewe souasor epwe nenengenöchü ewe fituk mi parapar o anomu ewe aramas lon tettelin chon limengau. Fituk mi parapar a limengau, pun iei eu kilingau mi afeiengau.
LEV 13:16 Nge are ewe fituk mi parapar won ewe aramas a siwil ngeni fituk mi pwechepwech, epwe feito ren ewe souasor.
LEV 13:17 Iwe, ewe souasor epwe nenengenöchü ewe aramas. Nge are ewe kil a pwechela, ewe souasor epwe anomu ewe chon samau lon tettelin chon limöch, pun a limöch.
LEV 13:18 Are a wor eu mach mi fen mo won inisin eman aramas,
LEV 13:19 nge mürin a pwüküwu eu pwo mi pwech lerasen ewe mach ika eu pwo mi tikeparepwech, ewe aramas epwe aküna ngeni ewe souasor inisin.
LEV 13:20 Iwe, ewe souasor epwe nenengenöchü machen ewe aramas. Pun ika a pwä pwe ewe kil lon ewe mach a enalong silin o ülöülan ra pwechela, ewe souasor epwe anomu ewe aramas lon tettelin chon limengau. Iei eu kilingau mi afeiengau a pwüküwu me lon ewe mach.
LEV 13:21 Are ewe souasor a nenengenöchü ewe mach o küna pwe ülöülen won resap pwechela, are ewe kil lon esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän.
LEV 13:22 Nge are ewe kil a töfetal won inisin ewe aramas, ewe souasor epwe anomu lon tettelin chon limengau, pun iei eu kilingau mi afeiengau.
LEV 13:23 Nge ika ewe kil esap lapala, esap pwal töfetal, a chök eu lemomon mach. Iwe, ewe souasor epwe anomu ewe aramas lon tettelin chon limöch.
LEV 13:24 Are eman a kar, nge mürin ewe kar a wiliti eu kil mi tikeparepwech ika pwech,
LEV 13:25 ewe souasor epwe nenengenöchü ewe kar. Nge are ülöülen ewe ia a kar ie a pwechela, are ewe kil a pwal enalong silin, iei eu kilingau mi afeiengau. Iwe, ewe souasor epwe anomu ewe aramas lon tettelin chon limengau, pun a samaun rupun pwötür.
LEV 13:26 Are ewe souasor a nenengenöchü ewe kar o küna pwe ülöülen won resap pwechela, are ewe kil esap pwal enalong silin pwe a aromomo, mürin ewe souasor epwe aimwüela ewe aramas lon ükükün fisu rän.
LEV 13:27 Iwe, lon afisuen rän ewe souasor epwe nenengenisefäli ewe aramas. Nge are ewe kil a töfetal won inisin, ewe souasor epwe anomu ewe aramas lon tettelin chon limengau, pun iei eu kilingau mi afeiengau.
LEV 13:28 Nge are ewe kil esap lapala, esap pwal töfetal won silin pwe a aromomo, a chök eu pwo seni ewe kar. Iwe, ewe souasor epwe anomu ewe aramas lon tettelin chon limöch, pun iei eu lemomon kar.
LEV 13:29 Are eman mwän ika eman fefin a kilingau won möküran ika won ngächin,
LEV 13:30 ewe souasor epwe nenengenöchü ewe kilingau. Nge are ewe kilingau a enalong silin, are ülöülen won ra pwal oleol o ülöngau, ewe souasor epwe anomu ewe aramas lon tettelin chon limengau. Iei eu kil mi pwerik, eu kilingau mi afeiengau won möküran ika won ngächin.
LEV 13:31 Nge are ewe souasor a nenengenöchü ewe kilingau mi pwerik o küna pwe esap enalong silin, esap pwal wor ülöülan mi chol won, ewe souasor epwe aimwüela ewe aramas mi üri kilingau mi pwerik lon ükükün fisu rän.
LEV 13:32 Iwe, lon afisuen rän ewe souasor epwe nenengenöchüsefäli kilingauen ewe aramas. Nge are ewe kil mi pwerik esap lapala, are esap wor ülöülen won mi oleol, esap pwal enalong silin,
LEV 13:33 ewe aramas epwe räisöü, nge esap räisöü won ewe kil mi pwerik. Mürin, ewe souasor epwe aimwüela ewe aramas pwal lon ükükün fisu rän.
LEV 13:34 Iwe, lon afisuen rän ewe souasor epwe nenengenöchüsefäli kilingauen ewe aramas. Nge are ewe kil mi pwerik esap lapala, esap pwal enalong silin, ewe souasor epwe anomu ewe aramas lon tettelin chon limöch. Iwe, epwe sopuni üfan, mürin epwe limöch.
LEV 13:35 Nge are ewe kil mi pwerik a töfetal won inisin mürin an nom lon tettelin chon limöch,
LEV 13:36 ewe souasor epwe nenengenöchüsefäli ewe aramas. Pun ika ewe kil mi pwerik a töfetal won inisin, ewe souasor esap chüen ekiekin kütta ewe ülöül mi oleol, pun ewe aramas a limengau.
LEV 13:37 Nge are ewe souasor a küna pwe ewe kil mi pwerik esap lapala, pwe ra pwükütä ülöülan mi chol won o ewe kil mi pwerik a mo, ewe aramas a limöch. Iwe, ewe souasor epwe anomu i lon tettelin chon limöch.
LEV 13:38 Are a wor tikepwechepwech won inisin eman mwän ika eman fefin,
LEV 13:39 ewe souasor epwe nenengenöchü ewe aramas. Nge are ewe tikepwechepwech won inisin esap nien lingewu, a chök üri eu kil. Iwe, ewe aramas a limöch.
LEV 13:40 Are eman mwän a mworola meten möküran, ewe aramas a mongopal, nge a chök nom lon tettelin chon limöch.
LEV 13:41 Iwe, are eman mwän a mworola meten möküren eten mesan me meten esen mongön, a chök pal eten mesan, nge a nom lon tettelin chon limöch.
LEV 13:42 Nge are a wor eu kil mi parepwech won pallen möküran ika won eten mesen ewe mwän, iei eu kilingau mi afeiengau a üri won möküran ika won eten mesan.
LEV 13:43 Mürin, ewe souasor epwe nenengenöchü ewe mwän. Nge are ewe pwo won pallen möküran ika won eten mesan a tikeparepwech usun chök eu kilingau mi afeiengau won inis,
LEV 13:44 ewe aramas a limengau. Iwe, ewe souasor epwe anomu ewe aramas lon tettelin chon limengau, pun a eäni eu kilingau mi afeiengau won möküran.
LEV 13:45 Iwe, eman mi eäni eu kilingau mi afeiengau epwe üföüf üf mi kam o atorongaua möküran, epwe pwal pwölüela awan o kökkö, “Üa limengau, üa limengau.”
LEV 13:46 Epwe chök nonom lon tettelin chon limengau lon ükükün langatamen fansoun an eäni ewe samau. Iwe, epwe imwüla lon lenian lükün ewe ia aramas ra nonom ie.
LEV 13:47 Iwe, are a wor niwangir won echö üf, ese lifilifil ika ewe üf a för seni ülen man ika seni sokun silin irä,
LEV 13:48 are a nom won echö mangaku mi för seni sokun silin irä ika seni ülen man, are a pwal nom won silin man ika won och pisek mi för seni silin man,
LEV 13:49 are ei niwangir a anüefetil ika anüepar, iei eu niwangir mi chöfetal. Iwe, repwe aküna ngeni ewe souasor.
LEV 13:50 Ewe souasor epwe nenengenöchü ewe niwangir o aimwüela ewe pisek lon ükükün fisu rän.
LEV 13:51 Nge lon afisuen rän epwe nenengenöchüsefäli ewe niwangir. Iwe, are ewe niwangir a lapala won ewe üf ika won ewe mangaku ika won ewe silin man, ese lifilifil met sokun aean ewe silin man, ewe niwangir a fokun ngau, ewe pisek a limengau.
LEV 13:52 Iwe, ewe souasor epwe kenala ewe pisek. Pokiten ewe niwangir a fokun ngau, epwe chök kekila.
LEV 13:53 Nge are ewe souasor a nenengenöchüsefäli o küna pwe ewe niwangir esap lapala won ewe üf ika won ewe mangaku ika won och seni silin man,
LEV 13:54 ewe souasor epwe allük pwe repwe sopuni ewe pisek mi niwangir. Mürin epwe aimwüela pwal lon ükükün fisu rän.
LEV 13:55 Mürin, ewe souasor epwe nenengenöchüsefäli ewe pisek mi niwangir mürin an sop. Nge are ewe niwangir esap siwil anüanün, inamwo are esap pwal lapala, ewe pisek a chök limengau. Kopwe chök kenala ewe pisek, ese lifilifil ika ewe niwangir mi ngau a nom lon ika lükün.
LEV 13:56 Nge are ewe souasor a nenengenöchüsefäli o küna pwe ewe niwangir a aromomo mürin an sop, epwe kamwewu ewe ia a niwangir ie me won ewe üf ika ewe silin man ika ewe mangaku.
LEV 13:57 Iwe, are ewe niwangir a pwäsefäl me mürin won ewe üf ika won ewe mangaku ika won och pisek seni silin man, ewe niwangir a chöfetal. Kopwe chök kenala ewe pisek mi ngau niwangirin.
LEV 13:58 Nge are niwangirin ewe üf ika ewe mangaku ika och pisek mi för seni silin man a mola mürin om sopuni, kopwe chök sopuni fän aruuan. Mürin epwe limöch.”
LEV 13:59 Iei ewe allük fän iten ewe niwangir mi fokun ngau won üf mi för seni ülen man ika seni sokun silin irä ika won mangaku are pwal och pisek mi för seni silin man, pwe epwe fat ika och pisek a limöch ika a limengau.
LEV 14:1 Iwe, ewe Samol mi Lapalap a ngeni Moses
LEV 14:2 ekei allük fän iten eman mi eäni eu kilingau mi afeiengau lon ränin an limelim: Repwe emwenato ewe aramas ren ewe souasor,
LEV 14:3 nge ewe souasor epwe feila lükün ewe leni ia aramas ra nonom ie. Iwe, ewe souasor epwe nenengenöchü ewe chon samau. Nge are ewe kilingau mi afeiengau a mola seni,
LEV 14:4 ewe souasor epwe allük pwe repwe uwato fän iten ewe epwe limelim ruoman machang mi manau o limöch, mwüch seni ewe irä itan setar, ekam mangaku mi par pwal ülün ewe irä itan isop.
LEV 14:5 Iwe, ewe souasor epwe allük pwe repwe niela eman me lein ekewe machang asen eu sepi mi för seni pwül, nge lon ewe sepi epwe wor koluk mi mürina.
LEV 14:6 Mürin epwe angei ewe machang mi chüen manau fiti ewe mwüch seni ewe irä setar, ewe ekam mangaku mi par me ülün ewe irä isop, o atukurelong lon chan ewe machang a fen ninnila asen ewe koluk mi mürina.
LEV 14:7 Iwe, epwe äsupu ewe cha fän fisu won ewe aramas, pwe epwe limöch seni an kilingau mi afeiengau. Mürin, ewe souasor epwe anomu ewe aramas lon tettelin chon limöch, epwe pwal ässala ewe machang mi chüen manau lemäl.
LEV 14:8 Nge ewe aramas mi mochen limöch epwe sopuni üfan o räisöü ülöülan meinisin, epwe pwal tütü pwe epwe limöch. Mürin a tongeni tolong lon ewe leni ia aramas ra nonom ie, nge epwe chök nom lükün imwan lon ükükün fisu rän.
LEV 14:9 Iwe, lon afisuen rän epwe räisöüla möküran meinisin pwal alüsan me fötün, epwe pwal räisöü ülöülan meinisin. Mürin epwe sopuni üfan o tütü. Iwe, epwe limöch.
LEV 14:10 Nge lon awaluen rän epwe uwato ruoman ätemwänin lam me eman liefefinin lam eu ierir esap wor terir. Epwe pwal uwato limu paun pilawa mi amas o mürina a nofitfengen me apüra, pwal ina epwe ükükün esop kuoch noppuk.
LEV 14:11 Iwe, ewe souasor mi föri ewe angangen limelim epwe emwenato ewe aramas mi mochen limelim fiti an kewe asor mwen ewe Samol mi Lapalap leasamalapen ewe imw mangaku ia aramas ra churi Kot ie.
LEV 14:12 Mürin, ewe souasor epwe angei eman me lein ekewe ätemwänin lam o eäni asor fän iten asoren pupungau fitifengen me ewe esop kuoch noppuk. Iwe, epwe assaweer fän mesen ewe Samol mi Lapalap pwe eu asoren assaw.
LEV 14:13 Mürin epwe niela ewe lam lon ewe leni mi pin, ewe ia ra niela ie ewe mönün asoren tipis me ewe mönün asoren kek. Pun ewe asoren pupungau inetin ewe souasor usun chök ewe asoren tipis, a pwal unusen pin.
LEV 14:14 Iwe, ewe souasor epwe angei ekis chan ewe mönün asoren pupungau o tofi ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen.
LEV 14:15 Mürin, ewe souasor epwe angei ekis seni ewe esop kuoch noppuk o ninalong lon pelimöngün püsin pöün.
LEV 14:16 Iwe, epwe atukalong aütün pelifichin pöün lon ewe noppuk o äsupu fän fisu ekis seni ewe noppuk fän mesen ewe Samol mi Lapalap.
LEV 14:17 Nge ekis seni ewe noppuk mi chüen nom lepöün epwe tofi ngeni emin fän pelifichin selingen ätewe mi mochen limöch, pwal ngeni aütün pelifichin pöün me pechen. Nge epwe chök tofätä ewe noppuk won ewe ia a fen tofätä ie chan ewe mönün asoren pupungau.
LEV 14:18 Iwe, lusun ewe noppuk mi chüen nom lepöün epwe epiti ngeni möküren ätewe mi mochen limöch. Ren ei ewe souasor epwe föri asoren amusamusen tipis fän iten ewe aramas fän mesen ewe Samol mi Lapalap.
LEV 14:19 Mürin, ewe souasor epwe eäni ewe asoren tipis, pwe epwe föri asoren amusamusen tipis fän iten ätewe mi mochen limöch seni an limengau. Nge mürin epwe niela ewe mönün asoren kek.
LEV 14:20 Iwe, ewe souasor epwe keni ewe asoren kek me ewe asoren mongö won ewe rongen asor. Iei usun ewe souasor epwe föri asoren amusamusen tipis fän iten ewe aramas. Iwe, epwe limöch.
LEV 14:21 Nge are ewe aramas a wöüngau pwe esap tufich ngeni an epwe uwato ei ükükün, epwe chök uwato eman ätemwänin lam fän iten asoren pupungau epwe assaw, pwe epwe fis asoren amusamusen tipis fän itan. Epwe pwal uwato ruu paun pilawa mi amas o mürina nofitfengen me apüra fän iten asoren mongö, pwal ina epwe ükükün esop kuoch noppuk.
LEV 14:22 Iwe, epwe pwal uwato ruoman lisom ika ruoman apansüsün lisom ükükün chök an tongeni, eman epwe fän iten asoren tipis, nge ewe eman epwe fän iten asoren kek.
LEV 14:23 Iwe, lon awaluen rän epwe uwato ekei mönün asor fän iten an limelim ren ewe souasor leasamalapen ewe imwenfel seni mangaku mwen ewe Samol mi Lapalap.
LEV 14:24 Mürin, ewe souasor epwe angei ewe lam me ewe esop kuoch noppuk fän iten asoren pupungau o assaweer fän mesen ewe Samol mi Lapalap, pwe eu asoren assaw.
LEV 14:25 Iwe, ewe souasor epwe niela ewe lam fän iten asoren pupungau. Mürin epwe angei ekis chan o tofi ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen.
LEV 14:26 Epwe pwal ninalong ekis ewe noppuk lon pelimöngün püsin pöün
LEV 14:27 o äsupu fän fisu ekis seni ewe noppuk ren aütün pelifichin pöün fän mesen ewe Samol mi Lapalap.
LEV 14:28 Mürin, ewe souasor epwe tofi ekis seni ewe noppuk mi chüen nom lepöün ngeni emin fän pelifichin selingen ätewe mi mochen limöch, pwal ngeni aütülapen pelifichin pöün me pechen. Nge epwe chök tofätä ewe noppuk won ewe ia a fen tofätä ie chan ewe mönün asoren pupungau.
LEV 14:29 Iwe, lusun ewe noppuk mi chüen nom lepöün ewe souasor epwe epiti ngeni möküren ätewe mi mochen limöch, pwe epwe föri asoren amusamusen tipis fän itan fän mesen ewe Samol mi Lapalap.
LEV 14:30 Mürin, epwe eäni asor ekewe ruoman lisom ika ekewe ruoman apansüsün lisom ükükün än ewe aramas tongeni.
LEV 14:31 Epwe eäni asor eman fän iten asoren tipis, nge ewe eman fän iten asoren kek fitifengen me ewe asoren mongö. Iei usun ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas mi mochen limöch.
LEV 14:32 Iei ewe allük fän iten ewe aramas mi eäni ewe kilingau mi afeiengau esap tufich ngeni an epwe uwato ekewe sokun asor fän iten an limelim.”
LEV 14:33 Iwe, ewe Samol mi Lapalap a üreni Moses me Aaron,
LEV 14:34 “Lupwen oupwe tolong lon ewe fanü Kanaan üpwe ngenikemi pwe fanüemi, nge üpwe awora eu nuumw mi chöfetal lon eu imw won fanüemi,
LEV 14:35 ätewe imwan ewe epwe feito o asile ngeni ewe souasor, ‘Üa küna och me lon imwei mi usun chök nuumw.’
LEV 14:36 Mürin, ewe souasor epwe allük pwe chon ewe imw repwe towu seni fiti pisekir me mwen an epwe tolong pwe epwe nenengenöchü ewe nuumw, pwe esap wor och mettoch mi nom lon ewe imw epwe tolong lon tettelin limengau. Mürin, ewe souasor epwe tolong lon ewe imw
LEV 14:37 o nenengenöchü ewe nuumw. Nge are anüen ewe nuumw mi nom won etippen ewe imw a aroanüen fetil ika aroanüepar, are ewe nuumw a pwal ekis pwangenalong ewe etip,
LEV 14:38 ewe souasor epwe towu me lon asamalapen ewe imw o lokkenala lon ükükün fisu rän.
LEV 14:39 Nge lon afisuen rän ewe souasor epwe liwinsefäliti ewe imw o nenengeni. Iwe, are ewe nuumw a lapala won etippen ewe imw,
LEV 14:40 ewe souasor epwe allük pwe repwe ämwetawu ekewe fau mi nuumw o atururela lon eu leni mi limengau lükün ewe telinimw.
LEV 14:41 Iwe, epwe pwal allük pwe repwe örööti omwotowun etippen pwelin lon ewe imw. Nge mine ra örööti repwe aturalong lon eu leni mi limengau lükün ewe telinimw.
LEV 14:42 Mürin repwe angei ekoch fau o siwilirelong lerasen ekewe fau ra kämwetewu, repwe pwal omwotowusefäli ewe imw.
LEV 14:43 Nge are ewe nuumw a pwüküsefälitä lon ewe imw mürin ar ämwetawu ekewe fau me ar örööti omwotowun ewe imw, pwal lupwen ar omwotowusefäli,
LEV 14:44 ewe souasor epwe feila o nengeni. Iwe, are ewe nuumw a lapala lon ewe imw, ewe nuumw a fokun ngau. Ewe imw a limengau.
LEV 14:45 Iwe, ewe imw epwe kata, nge föün, irän me omwotowun meinisin repwe uweerewu seni lon ewe telinimw o atururela lon eu leni mi limengau.
LEV 14:46 Nge iö mi tolong lon ewe imw, lupwen a kesipela, epwe limengau tori lekuniol.
LEV 14:47 Iö kana ra konola lon ewe imw ika mongö lon repwe sopuni üfer.
LEV 14:48 Are ewe souasor epwe feito o nenengenöchü ewe imw, nge ewe nuumw esap pwüküsefäl mürin ar omwotowu ewe imw, ewe souasor epwe anomu ewe imw lon tettelin limöch, pun ewe nuumw a mola.
LEV 14:49 Iwe, ren angangen limelimen ewe imw, ewe souasor epwe angei ruoman kükün machang pwal mwüch seni ewe irä setar, ekam mangaku mi par me ülün ewe irä isop.
LEV 14:50 Epwe niela eman lein ekewe machang asen eu sepi mi för seni pwül, nge lon ewe sepi epwe wor koluk mi mürina.
LEV 14:51 Mürin epwe angei ewe mwüch seni ewe irä setar, ülün ewe irä isop me ewe ekam mangaku mi par fiti ewe machang mi chüen manau, o atukurelong lon chan ewe machang a fen ninnila asen ewe koluk mi mürina. Iwe, epwe äsupu ewe cha fän fisu ngeni ewe imw.
LEV 14:52 Iei usun ewe souasor epwe limeti ewe imw ren chan ewe machang me ewe koluk mi mürina, ren ewe machang mi chüen manau me ewe mwüch seni ewe irä setar, pwal ren ülün ewe irä isop me ewe ekam mangaku mi par.
LEV 14:53 Mürin epwe ässala ewe machang mi chüen manau seni lon ewe telinimw, pwe epwe ässila lemäl. Iei usun ewe souasor epwe föri asoren limelim fän iten ewe imw, iwe, epwe limöch.”
LEV 14:54 Ikkei ekewe allük fän iten sokopaten kilingau mi afeiengau: fän iten kilingau mi pwerik,
LEV 14:55 fän iten niwangirin üf ika nuumw lon imw,
LEV 14:56 fän iten pwoon won inis ika tir ika och tikepwechepwech.
LEV 14:57 Ren ekei allük epwe pwä inet eman aramas ika och mettoch a limengau ika limöch. Ikkei ekewe allük fän iten kilingau mi afeiengau, fän iten niwangir me nuumw.
LEV 15:1 Iwe, ewe Samol mi Lapalap a ngeni Moses me Aaron ekei allük
LEV 15:2 fän iten ekewe aramasen Israel: Are och chönü a towu seni ewe kükün inis seni eman mwän, ewe chönü a limengau,
LEV 15:3 ese lifilifil ika ewe chönü a chüen pu seni ika a ükütiu, a chök limengau.
LEV 15:4 Iteiten kieki ätewe mi pu seni och chönü a kon lon epwe limengau. Pwal mettoch meinisin mine ätewe a mot won repwe limengau.
LEV 15:5 Iwe, eman mi atapa kien ätewe epwe sopuni üfan o tütü, nge epwe limengau tori lekuniol.
LEV 15:6 Nge iö a mot won och mettoch ätewe mi pu seni och chönü a fen mot won, epwe sopuni üfan o tütü, nge epwe limengau tori lekuniol.
LEV 15:7 Nge iö a atapa inisin ätewe mi pu seni och chönü epwe sopuni üfan o tütü, nge epwe limengau tori lekuniol.
LEV 15:8 Iwe, are ätewe mi pu seni och chönü a atufätä won eman mi limöch, ätewe mi limöch epwe sopuni üfan o tütü, nge epwe limengau tori lekuniol.
LEV 15:9 Nge iteiten sokun lenien mot aramas ra aea le mot won man epwe limengau, are ätewe mi pu seni och chönü a mot won.
LEV 15:10 Iö a atapa och mettoch ätewe mi pu seni och chönü a chouni, epwe limengau tori lekuniol. Nge iö a eki ei sokun mettoch epwe sopuni üfan o tütü, nge epwe limengau tori lekuniol.
LEV 15:11 Iwe, are ätewe mi pu seni och chönü epwe atapa eman, nge esap mwo rupuri pöün lon koluk, ätewe a atapa epwe sopuni üfan o tütü, nge epwe limengau tori lekuniol.
LEV 15:12 Nge are ätewe mi pu seni och chönü epwe atapa eu sepi mi för seni pwül, ewe sepi epwe ömmök. Nge ika ewe sepi a för seni mwüch, epwe chök töttöl lon koluk.
LEV 15:13 Lupwen ewe chönü a ükütiu le pu, ewe mwän epwe püsin aawit lon ükükün fisu rän fän iten an limelim. Mürin epwe sopuni üfan o tütü lon koluk mi mürina pwe epwe limöch.
LEV 15:14 Iwe, lon awaluen rän epwe angei ruoman lisom ika ruoman apansüsün lisom, epwe feito fän mesen ewe Samol mi Lapalap leasamalapen ewe imw mangaku ia aramas ra churi Kot ie, o ngeni ewe souasor ekewe lisom.
LEV 15:15 Nge ewe souasor epwe eäniir asor, eman fän iten asoren tipis, nge ewe eman fän iten asoren kek. Ren ei ewe souasor epwe föri asoren amusamusen tipis fän mesen ewe Samol mi Lapalap fän iten ätewe mi pu seni och chönü.
LEV 15:16 Iwe, are ewe chan mwän a towu seni eman mwän, epwe atütü unusen inisin, nge epwe limengau tori lekuniol.
LEV 15:17 Nge iteiten üf me iteiten mettoch mi för seni silin man a tup lon ewe chan mwän, repwe sop, repwe pwal limengau tori lekuniol.
LEV 15:18 Are eman mwän a kon ren eman fefin o ewe chan mwän a towu, ir me ruoman repwe tütü, nge repwe limengau tori lekuniol.
LEV 15:19 Iwe, are eman fefin a samaun fefin, neminewe epwe nom lon an limengau lon ükükün fisu rän. Nge iö a atapa ewe fefin epwe limengau tori lekuniol.
LEV 15:20 Mettoch meinisin neminewe a kon lon ika mot won lupwen an samaun fefin repwe limengau.
LEV 15:21 Iö a atapa kien neminewe epwe sopuni üfan o tütü, nge epwe limengau tori lekuniol.
LEV 15:22 Nge iö a atapa och mettoch neminewe a mot won, epwe sopuni üfan o tütü, epwe pwal limengau tori lekuniol.
LEV 15:23 Ese lifilifil are neminewe a mot lon kieki ika och mettoch, lupwen eman a atapa, epwe chök limengau tori lekuniol.
LEV 15:24 Are eman mwän a kon ren eman fefin mi samaun fefin, limengauan a nom won ewe mwän. Iwe, ewe mwän epwe limengau lon ükükün fisu rän, nge iteiten kieki ätewe a kon lon epwe pwal limengau.
LEV 15:25 Are eman fefin a pu seni cha lon chomong rän, nge sap lon fansoun an samaun fefin, ika lupwen a lula fansoun an samaun fefin, epwe chök limengau lon ükükün fansoun an pu seni cha. Epwe limengau usun chök limengauan lon ränin an samaun fefin.
LEV 15:26 Iwe, kieki meinisin neminewe a kon lon lupwen ränin an pu seni cha repwe limengau, usun limengauen ekewe kieki a kon lon lupwen an samaun fefin. Nge mettoch meinisin neminewe a mot won repwe pwal limengau, usun limengauen mine a mot won lupwen an samaun fefin.
LEV 15:27 Iö a atapa ekewe mettoch epwe pwal limengau. Iwe, epwe sopuni üfan o tütü, nge epwe limengau tori lekuniol.
LEV 15:28 Nge lupwen a ükütiu le pu seni neminewe chan, epwe püsin aawit lon ükükün fisu rän, mürin epwe limöch.
LEV 15:29 Iwe, lon awaluen rän epwe angei ruoman lisom are ruoman apansüsün lisom o uweerela ren ewe souasor leasamalapen ewe imw mangaku ia aramas ra churi Kot ie.
LEV 15:30 Mürin, ewe souasor epwe eäniir asor eman fän iten asoren tipis, nge ewe eman fän iten asoren kek. Iei usun, ewe souasor epwe föri asoren amusamusen tipis fän mesen ewe Samol mi Lapalap fän iten limengauen neminewe mi pu seni cha.
LEV 15:31 Iwe, ewe Samol mi Lapalap a üreni Moses pwe epwe aiti ngeni ekewe aramasen Israel usun ar repwe aimwürela seni ekewe mettoch mi alimengaueer, pwe resap mäla lon ar limengau ren ar apiningaua ewe imwenfel seni mangaku mi nom lefiler.
LEV 15:32 Ikkei ekewe allük fän iten eman mwän mi pu seni och chönü ika mi towu seni ewe chan mwän,
LEV 15:33 pwal fän iten eman fefin mi samaun fefin, fän iten eman mwän ika eman fefin mi pu seni och, pwal fän iten eman mwän a kon ren eman fefin mi limengau.
LEV 16:1 Iwe, ewe Samol mi Lapalap a kapas ngeni Moses mürin mälan nöün Aaron kewe ruoman mwän, ra mäla lupwen ar eäni asor mine esap pin fän mesen ewe Samol mi Lapalap.
LEV 16:2 Iwe, ewe Samol mi Lapalap a üreni Moses, “Kopwe asile ngeni Aaron pwiüm we, pwe esap tolong inet chök a mochen lon ewe leni mi unusen pin pekilan ewe cheech mwen ewe öppüng mi nom won ewe pworofel, pwe esap mäla. Pun üpwe pwä lon ewe kuchu asen ewe öppüng.
LEV 16:3 Iei usun pwüngün än Aaron epwe tolong lon ewe leni mi unusen pin: Epwe uwato eman nienifön ätemwänin kow fän iten asoren tipis, pwal eman ätemwänin sip fän iten asoren kek.
LEV 16:4 Iwe, epwe üföüf ewe üf mi pin o pwechepwech, pwal ewe rauesesin lon mi pwechepwech, epwe peliti ngeni ewe pelit mi pwechepwech o imweimw ewe akkau mi pwechepwech. Ikkei ekewe üf mi pin. Iwe, epwe tütü, mürin epwe üföüfolong ekewe üf mi pin.
LEV 16:5 Aaron epwe pwal angei seni ekewe aramasen Israel ruoman ätemwänin kuuch fän iten asoren tipis me eman ätemwänin sip fän iten asoren kek.
LEV 16:6 Iwe, Aaron epwe eäni asor ewe ätemwänin kow pwe asoren tipis fän püsin itan, o föri asoren amusamusen an tipis me än an famili tipis.
LEV 16:7 Mürin, epwe angei ekewe ruoman kuuch o anomuur fän mesen ewe Samol mi Lapalap leasamalapen ewe imw mangaku ia aramas ra churi Kot ie.
LEV 16:8 Ikenan Aaron epwe asisil won ekewe ruoman kuuch, eman fän iten ewe Samol mi Lapalap, nge ewe eman fän iten Asasel .
LEV 16:9 Iwe, Aaron epwe uwato ewe kuuch mi kuw ewe asisil fän iten ewe Samol mi Lapalap o eäni asoren tipis.
LEV 16:10 Nge ewe kuuch a kuw ewe asisil fän iten Asasel Aaron epwe pwal uwato fän mesen ewe Samol mi Lapalap, nge men manau. Mürin epwe tinala ewe kuuch lon fanüapö ren Asasel, pwe epwe uweala än ekewe aramas tipis.
LEV 16:11 Iwe, Aaron epwe uwato ewe ätemwänin kow pwe asoren tipis fän püsin itan, o föri asoren amusamusen an tipis me än an famili tipis. Epwe niela ewe ätemwänin kow pwe asoren tipis fän püsin itan.
LEV 16:12 Mürin epwe angei eu sepien asoren ötüöt mi masou ren molien ekkei seni ewe rongen asor mi nom fän mesen ewe Samol mi Lapalap. Epwe pwal angei ruukumuch apach mi pwokus o kinikisitiu. Iwe, epwe uwala ekei mettoch pekilan ewe cheech lon ewe leni mi unusen pin
LEV 16:13 o isetä ewe apach mi pwokus won ewe ekkei mi nom fän mesen ewe Samol mi Lapalap, pwe ötüötün ewe apach mi pwokus epwe pwölüela ewe öppüng mi nom won ewe pworofel, pwe esap mäla.
LEV 16:14 Iwe, epwe angei ekis chan ewe ätemwänin kow o äsupu ren aütün ngeni lepekin me fän mesen ewe öppüng, epwe pwal äsupu fän fisu ngeni mwen ewe pworofel.
LEV 16:15 Mürin, epwe niela ewe kuuch pwe asoren tipis fän iten ekewe aramas o uwalong chan lon ewe leni mi unusen pin. Iwe, epwe föri ngeni chan ewe kuuch usun mine a föri ngeni chan ewe ätemwänin kow. Epwe äsupu ewe cha ngeni won ewe öppüng pwal ngeni mwen ewe pworofel.
LEV 16:16 Iei usun Aaron epwe föri asoren limelim fän iten ewe leni mi unusen pin pokiten limengauen ekewe aramasen Israel, pwal pokiten ar pupungau me ar tipis meinisin. Iei usun epwe pwal föri fän iten ewe imwenfel seni mangaku mi nom rer lon lenier mi limengau.
LEV 16:17 Iwe, esap wor eman epwe nom lon ewe imwenfel seni mangaku, lupwen Aaron a tolong lon ewe leni mi unusen pin pwe epwe föri asoren amusamusen tipis, tori an epwe towu wesin an föri asoren amusamusen tipis fän püsin itan, fän iten an famili, pwal fän iten ekewe chon Israel meinisin.
LEV 16:18 Mürin epwe towu ren ewe rongen asoren kek mi nom fän mesen ewe Samol mi Lapalap, pwe epwe föri asoren limelim fän iten ewe rong. Iwe, epwe angei ekis chan ewe ätemwänin kow, pwal ekis chan ewe kuuch, o tofätä won mächän ewe rong.
LEV 16:19 Iwe, epwe pwal äsupu ren aütün ekis chan ekewe mönün asor fän fisu won ewe rong, pwe epwe alimöchü seni limengauen ekewe aramasen Israel o apini.
LEV 16:20 Are Aaron a wes me föri ewe asoren limelim fän iten ewe leni mi unusen pin, ewe imw mangaku ia aramas ra churi Kot ie, me ewe rongen asor, epwe uwato ewe kuuch mi manau.
LEV 16:21 Mürin, Aaron epwe anomu pöün me ruofoch won möküren ewe kuuch mi manau o pwärätä won än chon Israel föföringau meinisin, ar pupungau me ar tipis meinisin. Iwe, epwe anomu ekewe tipis won möküren ewe kuuch o tinala lon fanüapö ren eman mwän mi fil fän iten ewe angang.
LEV 16:22 Iwe, ewe kuuch epwe uweela ar föföringau meinisin ngeni eu leniapö. Nge ätewe mi emwenala ewe kuuch epwe chök likitala lon leniapö.
LEV 16:23 Mürin, Aaron epwe tolong lon ewe imwenfel seni mangaku o pwilitawu ekewe üf mi pwech a üföüf lupwen an tolong lon ewe leni mi unusen pin. Iwe, epwe likitiir ikenan.
LEV 16:24 Epwe tütü lon eu leni mi pin o üföüfolong üfan kewe. Mürin, epwe towu o eäni an asoren kek me än ekewe aramas asoren kek, pwe epwe föri asoren amusamusen tipis fän itan pwal fän iten ekewe aramas.
LEV 16:25 Iwe, kirisin ewe mönün asoren tipis epwe keni me won ewe rongen asor.
LEV 16:26 Nge ätewe mi afeilai ewe kuuch ren Asasel epwe sopuni üfan o tütü. Mürin epwe tongeni tolong lon ewe leni ia ra nonom ie.
LEV 16:27 Iwe, repwe uwala lükün ewe ia ra nonom ie ekewe mönün asoren tipis, iei ewe ätemwänin kow me ewe kuuch, mine char ewe Aaron a fen uwala lon ewe leni mi unusen pin pwe asoren amusamusen tipis. Iwe, silir me fituker pwal tarer repwe kek.
LEV 16:28 Nge ätewe mi wisen keniir epwe sopuni üfan o tütü, mürin epwe tongeni tolong lon ewe leni ia ra nonom ie.
LEV 16:29 Iwe, ei epwe eu allük ngenikemi oupwe apwönüetä fansoun meinisin. Lon aengolun ränin ewe afisuen maram oupwe echikefel, ousap pwal föri och angang, sap ämi are ekewe chon ekis mi nom remi.
LEV 16:30 Pun lon ewe rän epwe fis asoren amusamusen tipis fän itemi pwe oupwe limöch. Mürin oupwe limöch fän mesen ewe Samol mi Lapalap seni ämi tipis meinisin.
LEV 16:31 Iwe, ei ränin sapat epwe eu ränin asösö remi, nge ämi oupwe echikefel. Iei eu allük oupwe apwönüetä fansoun meinisin.
LEV 16:32 Nge ewe souasor mi kepit o apinipin ngeni wisen souasor lon lenien saman epwe föri asoren amusamusen tipis, nge epwe üföüf ekewe üf mi pwechewech o pin.
LEV 16:33 Iwe, epwe föri asoren limelim fän iten ewe leni mi unusen pin, fän iten ewe imw mangaku ia aramas ra churi Kot ie, pwal fän iten ewe rongen asor. Epwe pwal föri asoren amusamusen tipis fän iten ekewe souasor me ekewe aramas meinisin.
LEV 16:34 Ei epwe eu allük oupwe apwönüetä fansoun meinisin, pwe epwe fis asoren amusamusen tipis fän eu lon eu ier fän äsengesin aramasen Israel pokiten ar tipis kana.” Iwe, Moses a föri usun mine ewe Samol mi Lapalap a allük ngeni.
LEV 17:1 Iwe, ewe Samol mi Lapalap a kapas ngeni Moses,
LEV 17:2 pwe epwe ngeni Aaron me nöün kewe mwän pwal ekewe aramasen Israel meinisin ekei allük:
LEV 17:3 Are eman chon Israel a niela eman kow ika eman sip ika eman kuuch pwe an asor lon ewe leni ia ra nonom ie ika lükün,
LEV 17:4 nge esap uwato ewe man leasamalapen ewe imw mangaku ia aramas ra churi Kot ie, pwe epwe fang ngeni ewe Samol mi Lapalap mwen an imwenfel, ewe mwän epwe nom lon tipisin nimanau. Iwe, pokiten a föri ei, iei mine epwe käriwu seni aramasan.
LEV 17:5 Popun ei allük pwe ekewe aramasen Israel repwe uwato ar kewe mönün asor ren ewe Samol mi Lapalap, nge resap chüen nirela lon ekewe maasies. Repwe uweereto ren ewe souasor leasamalapen ewe imwenfel seni mangaku o nirela, pwe ar asoren kinamwe.
LEV 17:6 Iwe, ewe souasor epwe äsupu chan ewe mönün asor ngeni ewe rongen asor än ewe Samol mi Lapalap leasamalapen ewe imwenfel seni mangaku, epwe pwal keni kirisin pwe ewe Samol mi Lapalap epwe efich pwoon.
LEV 17:7 Iwe, repwe ükütiu le kirikiringau ngeni ewe Samol mi Lapalap ren ar niela ar kewe mönün asor ngeni ekewe anün rochopwak. Ei epwe eu allük fän iter pwe repwe apwönüetä fansoun meinisin seni eu täppin aramas tori eu täppin.
LEV 17:8 Kopwe pwal üreniir: Iteiten eman me eman me lein chon Israel ika me lein ekewe chon ekis mi nom rer a eäni eu asoren kek ika och sokun asor,
LEV 17:9 nge esap uwato leasamalapen ewe imwenfel seni mangaku pwe epwe eäni asor ngeni ewe Samol mi Lapalap, ätewe epwe käriwu seni lein aramasan.
LEV 17:10 “Iwe, are eman aramas me lein chon Israel ika eman chon ekis mi nom rer a ün cha, ngang üpwe ü ngeni ewe aramas o ärawu me lein aramasan.
LEV 17:11 Pun manauen mönümanau meinisin a nom lon cha. Üa ngenikemi ei cha pwe oupwe föri asoren amusamusen tipis fän iten manauemi won ewe rongen asor. Iwe ren cha chök a fis amusamusen tipis, pun manau a nom lon.
LEV 17:12 Iei mine üa üreni ekewe aramasen Israel: Esap wor eman leimi ika eman chon ekis mi nom remi epwe ün cha.
LEV 17:13 Iwe, are eman leimi ika eman chon ekis mi nom remi epwe liapeni man ika machang mi öchün ochoch, epwe asürala chan o pwölü ewe cha ngeni pwül.
LEV 17:14 Pun chan iteiten mönümanau ina manauan. Iei mine üa ürenikemi ämi aramasen Israel: Ousap ünümi chan eman mönümanau, pun chan iteiten mönümanau ina manauan. Iö a ün cha epwe käriwu me lein aramasan.
LEV 17:15 Nge iteiten aramas, ese lifilifil ika eman chon Israel ika eman chon ekis, mi ochoch fituken eman man mi püsin mäla ika mi mäla ren manmwacho, epwe sopuni üfan o tütü, nge epwe limengau tori lekuniol. Mürin epwe limöch.
LEV 17:16 Nge ika esap sopuni üfan o tütü, an pwüngingau epwe chök nonom won.”
LEV 18:1 Iwe, ewe Samol mi Lapalap a kapas ngeni Moses,
LEV 18:2 “Kopwe üreni ekewe aramasen Israel: Ngang ewe Samol mi Lapalap ämi we Kot.
LEV 18:3 Ousap föri sokun föför ekewe chon Isip ra föri lon ewe leni ia oua piin nonom ie me mwan. Ousap pwal föri sokun föför ekewe aramas ra föri lon ewe fanü Kanaan ewe ia üpwe emwenikemiila ie. Ousap apirü ar föför.
LEV 18:4 Oupwe aleasochis ngeni ai kewe allük o apwönüetä ai kewe pwüüng. Ngang ewe Samol mi Lapalap ämi we Kot.
LEV 18:5 Iei mine oupwe fokun apwönüetä ai kewe allük me pwüüng, pun are eman aramas epwe aleasochisiir, epwe manau. Ngang ewe Samol mi Lapalap.
LEV 18:6 Iwe, esap wor eman me leimi epwe oror ngeni püsin aramasan ren an epwe lisowu ngeni. Ngang ewe Samol mi Lapalap.
LEV 18:7 Kosap turunufasei semom ren om lisowu ngeni inom. Pokiten neminewe inelapom, kosap fokun lisowu ngeni.
LEV 18:8 Kosap lisowu ngeni pwülüen semom, pun ka turunufasei semom ren.
LEV 18:9 Kosap lisowu ngeni fefinom, ese lifilifil ika neminewe nöün semom ika nöün inom mi uputiu lon leniom ika ekis.
LEV 18:10 Kosap lisowu ngeni nöün noum mwän föpwül ika nöün noum fefin föpwül, pun ka püsin turunufaseek ren.
LEV 18:11 Kosap pwal lisowu ngeni nöün pwülüen semom föpwül, pun nöün semom, nge pwal i fefinom.
LEV 18:12 Kosap lisowu ngeni fefinen semom, pun i fituken semom.
LEV 18:13 Kosap lisowu ngeni pwin inom, pun i fituken inom,
LEV 18:14 kosap pwal turunufasei pwin semom ren om oror ngeni pwülüan pwe kopwe lisowu ngeni, pokiten neminewe pwal i inom.
LEV 18:15 Kosap fokun lisowu ngeni pwülüen noum mwän.
LEV 18:16 Kosap lisowu ngeni pwülüen pwiüm, pun ka turunufasei pwiüm ren.
LEV 18:17 Iwe, kosap pwülüenifengeni eman fefin me nöün föpwül, kosap pwal lisowu ngeni nöün nöün neminewe mwän föpwül ika nöün nöün fefin föpwül, pun ir fitukfengen. Ei sokun föför a fokun ngau.
LEV 18:18 Kosap pwal angei pwin pwülüom pwe kopwe eäni aruu, lupwen pwülüom a chüen manau.
LEV 18:19 Iwe, kosap oror ngeni eman fefin pwe kopwe lisowu ngeni, lupwen neminewe a limengau ren an samaun fefin.
LEV 18:20 Kosap pwal lisowu ngeni pwülüen chon arum, pun ei sokun föför kopwe püsin limengau ren.
LEV 18:21 Iwe, kosap eäni asor eman noum ngeni ewe kot itan Molok. Ren ei ka turunufasei itei, pun ngang ewe Samol mi Lapalap om we Kot.
LEV 18:22 Kosap lisowu ngeni eman mwän usun om lisowu ngeni eman fefin, pun ei sokun föför a anioput.
LEV 18:23 Kosap pwal lisowu ngeni eman man, pun ei sokun föför kopwe püsin limengau ren. Iwe, eman fefin esap pwal mwüt ngeni inisin eman man pwe epwe lisowu ngeni, pun ei sokun föför a fokun ngau o ässäw.
LEV 18:24 Iwe, ousap püsin alimengauakemi ren ekei sokun föför. Pun aramasen ekewe mwü üpwe asürela me mwemi ra alimengaueer ren ekei föför.
LEV 18:25 Pwal ewe fanü a limengau ren. Iei mine üpwe apwüngü ewe fanü, pwe epwe musäsinawu ekewe aramas mi nonom won.
LEV 18:26 Nge ämi oupwe apwönüetä ai kewe allük me pwüüng, pwe ousap föri och seni ekei föför mi anioput, sap eman leimi ika eman chon ekis mi nom remi.
LEV 18:27 Pun ekewe aramas mi nom mwemi lon ewe fanü ra föri ekei sokun föför mi anioput meinisin. Iei mine ewe fanü a limengau ren.
LEV 18:28 Iwe, are oua alimengaua ewe fanü, epwe pwal musäsinikemiiwu, usun a musäsinawu aramasen ekewe mwü mi akomw le nom lon ewe fanü.
LEV 18:29 Pun iö a föri eu me lein ekewe föför mi anioput, ewe aramas epwe käriwu me lein aramasan.
LEV 18:30 Iei mine oupwe apwönüetä ai allük ngenikemi, pwe ousap föri eu me lein ekewe föför mi anioput aramas ra piin föri mwen ämi tolong lon ei fanü. Ousap pwal fokun alimengauakemi ren ekei föför, pun ngang ewe Samol mi Lapalap ämi we Kot.”
LEV 19:1 Iwe, ewe Samol mi Lapalap a kapas ngeni Moses,
LEV 19:2 pwe epwe üreni ekewe chon Israel meinisin, “Ämi oupwe pin, pun ngang ewe Samol mi Lapalap ämi Kot üa pin.
LEV 19:3 Iteiten eman me eman epwe meniniti inan me seman. Oupwe pinini ai kewe ränin sapat, pun ngang ewe Samol mi Lapalap ämi we Kot.
LEV 19:4 Ousap kul seniei o fel ngeni uluulun anümwäl, ousap pwal föri fän itemi uluulun kot seni mächä, pun ngang ewe Samol mi Lapalap ämi we Kot.
LEV 19:5 Lupwen oupwe eäni asoren kinamwe ngeniei ngang ewe Samol mi Lapalap, oupwe föri pwüngün ewe asor, pwe ngang üpwe etiwa.
LEV 19:6 Oupwe ochoch ewe mönün asor oua eäni lon ewe chök rän ika sorotän ewe rän. Nge mine a lusun tori aülüngatin rän oupwe kenala.
LEV 19:7 Iwe, are oupwe ochoch och seni ewe mönün asor lon aülüngatin rän, epwe eu föför mi anioput, ngang üsap etiwa ewe asor.
LEV 19:8 Iteiten eman mi ochoch ei sokun asor epwe püsin angei chappen an föför pokiten an apiningaua eu mettoch mi pin me ren ewe Samol mi Lapalap. Iwe, ewe aramas epwe käriwu me lein aramasan.
LEV 19:9 Iwe, lupwen oupwe kini resin fanüemi, ousap kiniela uän tanipimi tori kiännin, ousap pwal rusifengeni mine a turutiu seni kiniemi wiich.
LEV 19:10 Ousap kiniela uän fotämi irän wain meinisin, ousap pwal rusi ekewe uän irän wain mi morotiu lon tanipimi. Oupwe likitirela fän iten ekewe chon wöüngau me ekewe chon ekis, pun ngang ewe Samol mi Lapalap ämi we Kot.
LEV 19:11 Ousap solä, ousap pwal atuputup ika chofana ngeni chon arumi.
LEV 19:12 Ousap akapelmwäli itei, pwe ousap apiningaua itei ren. Ngang ewe Samol mi Lapalap ämi we Kot.
LEV 19:13 Ousap ariaföüü chon arumi, ousap pwal angei och seni fän pöchökül. Ousap mwo nge amwöchü liwinin eman chon angang lon unusen eu pwin tori lesosor.
LEV 19:14 Ousap turunufasei eman mi selingepüng, ousap pwal likatupu eman mi mesechun. Nge oupwe meninitiei, pun ngang ewe Samol mi Lapalap ämi we Kot.
LEV 19:15 Ousap sorei mine a pwüng lon ämi kapwüng. Ousap peni eman mi wöüngau ika awina eman mi lap, nge oupwe eäni kapwüng ngeni chon arumi fän pwüng.
LEV 19:16 Ousap fetalfeil lein aramasemi o luapas, ousap pwal föri och mi afeiengau ngeni manauen chon arumi, pun ngang ewe Samol mi Lapalap.
LEV 19:17 Kosap oput pwiüm lon lelukom, nge kopwe fönöü chon arum, pwe kosap tolong lon tipis pokitan.
LEV 19:18 Kosap püsin ngeni ätewe mi tipis ngonuk chappen an föför, kosap pwal chou ngeni eman lein aramasom. Nge kopwe echeni chon arum usun püsin om echenuk, pun ngang ewe Samol mi Lapalap.
LEV 19:19 Iwe, kopwe aleasochisi ai kewe allük: Kosap apwüpwülüafengeni sokopaten man, kosap amora ruu sokun föün irä lon eu chök tanipi, kosap pwal üföüf echö üf seni ruu sokun kireen mangaku.
LEV 19:20 Iwe, are eman mwän a lisowu ngeni eman amanau fefin mi fen kofot ngeni eman, nge neminewe esap mwo kamö, esap pwal mwo ngasala, epwe fokun fis kapwüng ngeniir, nge resap ninnila, pun neminewe esap mwo ngas.
LEV 19:21 Ewe mwän epwe uwato eman ätemwänin sip leasamalapen ewe imw mangaku ia aramas ra churiei ie, pwe an asoren pupungau ngeniei ngang ewe Samol mi Lapalap.
LEV 19:22 Ren ei ätemwänin sip ewe souasor epwe föri asoren amusamusen tipis fän mesei ngang ewe Samol mi Lapalap fän iten än ewe mwän tipis. Iwe, ewe tipis ätewe a föri epwe mus seni.
LEV 19:23 Lupwen oupwe tolong lon ewe fanü Kanaan o fotuki sokopaten irän mongö, ousap eni uar lon ükükün ülüngat ier, pun ra pin ngenikemi.
LEV 19:24 Iwe, lon ewe arüanün ier uar meinisin repwe eu asoren kilisou mi pin fän itei ngang ewe Samol mi Lapalap.
LEV 19:25 Nge lon ewe alimuen ier oua tongeni eni uar. Ren ei uän fotämi irä repwe chomongola. Ngang ewe Samol mi Lapalap ämi we Kot.
LEV 19:26 Ousap ochoch och fituk a chüen wor cha lon. Ousap föri angangen pwee ika pöüt.
LEV 19:27 Ousap pwal fichi meten möküren asen selingemi ika amocha alüsemi.
LEV 19:28 Ousap nekelekei inisimi fän iten mönümä, ousap ichi sokopaten lios womi. Ngang ewe Samol mi Lapalap. x Lif 21.5; Tut 14.1
LEV 19:29 Kosap turunufasei noum fefin ren om mwüt ngeni pwe epwe amömö inisin fän iten lisowu, pwe ewe fanü esap wiliti fanüen chon lisowu, esap pwal uren föföringau.
LEV 19:30 Kopwe pinini ai ränin sapat o meniniti imwei mi pin. Ngang ewe Samol mi Lapalap.
LEV 19:31 Kosap feila ren watawa ika ren sourong, kosap angei ar öüröür, pwe kosap limengau rer. Ngang ewe Samol mi Lapalap om we Kot.
LEV 19:32 Kopwe ütä me mwen eman mi pwech möküran o asamolu ekewe chinlap, kopwe meninitiei ngang ewe Samol mi Lapalap om we Kot.
LEV 19:33 Iwe, lupwen eman chon ekis a wasöla lon fanüemi, ousap kirikiringau ngeni.
LEV 19:34 Ewe chon ekis mi nom remi epwe usun chök eman re wilipos leimi. Kopwe echeni i usun püsin om echenuk, pun ämi oua fen piin wasöla lon ewe fanü Isip. Ngang ewe Samol mi Lapalap ämi we Kot.
LEV 19:35 Iwe, ousap eäni sokun aükük mi solä, lupwen oua aükük langatam, chou ika iteit.
LEV 19:36 Oupwe nöünöü kilo me föün kilo mi pwüngüöch, pwal eu aükük mi pwüngüöch. Ngang ewe Samol mi Lapalap ämi we Kot mi emwenikemiiwu seni ewe fanü Isip.
LEV 19:37 Iwe, oupwe aleasochisi ai kewe allük me pwüüng meinisin o apwönüretä: Ngang ewe Samol mi Lapalap.”
LEV 20:1 Iwe, ewe Samol mi Lapalap a kapas ngeni Moses,
LEV 20:2 pwe epwe üreni ekewe aramasen Israel, “Are eman me lein ekewe aramasen Israel ika eman me lein ekewe chon ekis mi nom lon Israel epwe eäni asor eman nöün ngeni Molok, epwe fokun ninnila. Iwe, aramasen ewe fanü repwe monei ngeni fau.
LEV 20:3 Püsin ngang üpwe ü ngeni ewe aramas o ärawu me lein aramasan, pun a eäni asor ngeni Molok eman nöün. Ren ei a pwal apiningaua imwei mi pin o turunufasei itei mi pin.
LEV 20:4 Nge are aramasen ewe fanü ra ömönüngau seni föförün ätewe mi eäni asor nöün ngeni Molok pwe resap niela,
LEV 20:5 püsin ngang üpwe ü ngeni ewe aramas me an famili o ärirewu me lein aramaser. Iwe, üpwe ärawu ätewe me chokewe meinisin mi eti le fel ngeni Molok.
LEV 20:6 Iwe, are eman aramas a feila ren watawa me sourong pwe epwe angei an öüröür seniir, ngang üpwe ü ngeni ewe aramas o ärawu me lein aramasan.
LEV 20:7 Iei mine oupwe püsin apinikemi pwe oupwe pin, pun ngang ewe Samol mi Lapalap ämi we Kot.
LEV 20:8 Oupwe aleasochisi ai kewe allük o apwönüretä. Ngang ewe Samol mi Lapalap üa apinikemi.
LEV 20:9 Iteiten eman me eman mi otteki saman ika inan epwe fokun ninnila. Pokiten an otteki saman ika inan chan epwe ukan chök.
LEV 20:10 Iwe, are eman mwän a lisowu ngeni pwülüen chon arun, ir me ruoman, ewe mwän me ewe fefin, repwe ninnila.
LEV 20:11 Eman mwän mi lisowu ngeni pwülüen saman a turunufasei saman. Ir me ruoman repwe ninnila, nge char epwe uker chök.
LEV 20:12 Are eman a lisowu ngeni pwülüen nöün mwän, ir me ruoman repwe ninnila. Ra föri tipisin lisowu lefilen märär, char epwe uker chök.
LEV 20:13 Nge are eman mwän a lisowu ngeni eman mwän usun chök an lisowu ngeni eman fefin, ir me ruoman ra föri och föför mi anioput. Iwe, repwe ninnila, nge char epwe uker chök.
LEV 20:14 Are eman mwän a pwülüenifengeni eman fefin me inan, ei föför a fokun ngau. Iwe, ewe mwän me ekewe ruoman fefin repwe kek, pwe esap wor föföringau leimi.
LEV 20:15 Nge are eman mwän a kon ren eman man, ewe mwän epwe ninnila. Oupwe pwal niela ewe man.
LEV 20:16 Are eman fefin a oror ngeni eman man pwe epwe lisowu ngeni, ewe fefin me ewe man repwe ninnila, nge char epwe uker chök.
LEV 20:17 Iwe, are eman mwän a pwülüeni fefinan, ese lifilifil ika nöün saman ika nöün inan, nge ra künafengeni selelar, ei eu föför repwe säw ren fän mesen aramas. Iwe, repwe käriwu seni aramaser. Ewe mwän a lisowu ngeni fefinan, iei mine epwe angei chappen an föföringau.
LEV 20:18 Nge are eman mwän a kon ren eman fefin lupwen an samaun fefin o lisowu ngeni, ätewe a pwärala lenien samaun neminewe, nge neminewe a apwälai lenien an samau. Iei mine ir me ruoman repwe käriwu me lein aramaser.
LEV 20:19 Iwe, kosap lisowu ngeni pwin inom ika fefinen semom, pun ren ei föför ka aseleloi fitukom. Ir me ruoman repwe angei chappen ar föföringau.
LEV 20:20 Are eman mwän a kon ren pwülüen pwin saman ika pwülüen mwänin inan, a turunufasei pwin saman ika mwänin inan. Iwe, ir me ruoman repwe angei chappen ar föför, pun repwe mäla, nge esap wor nöür.
LEV 20:21 Nge are eman mwän a pwülüeni pwülüen pwin, ei föför a fokun ngau. Ätewe a turunufasei pwin, iei popun esap wor nöür.
LEV 20:22 Iei mine oupwe aleasochisi ai kewe allük me pwüüng meinisin pwe oupwe föriir. Are oua föri iei usun, ewe fanü Kanaan ia üpwe emwenikemiilong ie esap musäsinikemiiwu.
LEV 20:23 Ousap angei örünien chon ekewe mwü üpwe asürela me mwemi. Pun ir ra föri ekei mettoch meinisin, iei mine ngang üa fokun oputeer.
LEV 20:24 Nge üa pwon ngenikemi pwe üpwe ngenikemi fanüer pwe oupwe fanüeni, ewe fanü mi pwülüöch o fanüeräs. Ngang ewe Samol mi Lapalap ämi we Kot üa aimwükemiila seni chon ekewe mwü.
LEV 20:25 Iei mine oupwe fokun alefila lefilen man mi limöch me man mi limengau, pwal lefilen machang mi limengau me machang mi limöch. Ousap alimengauakemi ren ämi ochoch man ika machang ika sokopaten man mi tö won pwül, pun üa aimwürela pwe repwe limengau me remi.
LEV 20:26 Ämi oupwe pin fän itei, pun ngang ewe Samol mi Lapalap üa pin. Üa aimwükemiila seni chon ekewe mwü pwe oupwe nei.
LEV 20:27 Iwe, eman mwän ika eman fefin i watawa ika sourong epwe ninnila. Oupwe monei ngeni fau, nge chan epwe ukun chök.”
LEV 21:1 Iwe, ewe Samol mi Lapalap a kapas ngeni Moses, “Kopwe üreni ekewe souasor nöün Aaron kewe mwän, pwe esap wor eman me leir epwe püsin alimengaua ren somän märärin,
LEV 21:2 chilon chök ren somän fitukan: inan, saman, nöün mwän, nöün fefin, pwin
LEV 21:3 ika ren fefinan esamwo wor pwülüan mi nom lon imwan.
LEV 21:4 Esap fokun püsin alimengaua ren somän aramasen pwülüan, pwe esap apiningaua wisan.
LEV 21:5 Iwe, ekewe souasor resap tongeni reipöpöla ulungen mökürer ika amwocha alüser, resap pwal tongeni nekelekei inisir, lupwen ra letipeta.
LEV 21:6 Iwe, repwe pin fän itei, nge resap aitengaua itei. Pun ir ra eäni ewe asoren mongö ngeniei ngang ewe Samol mi Lapalap. Iei mine ekewe souasor repwe pin.
LEV 21:7 Resap pwüpwülü ngeni fin lisowu ika fefin ra piin tori mwän, resap pwal pwüpwülü ngeni fefin mi mwü seni pwülüer. Pun ekewe souasor ra pin fän itei.
LEV 21:8 Iei mine ekewe aramas repwe föri met ewe souasor epwe pin me rer, pun a eäni ewe asoren mongö ngeniei. Ngang ewe Samol mi Lapalap üa pin, üa pwal apinikemi.
LEV 21:9 Iwe, are eman fefin nöün eman souasor a püsin alimengaua ren an amömö inisin fän iten lisowu, a aitengaua saman. Iwe, neminewe epwe kek.
LEV 21:10 Iwe, ewe souasor mi lap me lein pwin kana, a kepit möküran ren lö o apinipin pwe epwe üföüf ekewe üf mi pin, esap atorongaua möküran ika kamwei üfan, lupwen a letipeta.
LEV 21:11 Ewe souasor mi lap esap fokun kaneto ren eman somä, sap mwo nge ren somän saman ika inan, pwe esap limengau ren.
LEV 21:12 Esap fokun towu seni ewe imw mi pin, esap pwal apiningaua imwei mi pin, pun a apinipin ren ai we löön epit: Ngang ewe Samol mi Lapalap.
LEV 21:13 Iwe, epwe chök pwüpwülü ngeni eman fefin esamwo tori mwän.
LEV 21:14 Esap pwüpwülü ngeni eman fefin mi mä pwülüan ika eman mi mwü seni pwülüan, esap pwal pwüpwülü ngeni eman fefin a piin tori mwän ika eman fefin mi amömö inisin fän iten lisowu. Nge epwe chök angei eman pwülüan, eman fefin esap mwo tori mwän seni me lein aramasan,
LEV 21:15 pwe esap atolonga nöün kewe lon tettelin chon limengau me lein aramasan. Pun ngang ewe Samol mi Lapalap üa apini pwe epwe souasor mi lap.”
LEV 21:16 Iwe, ewe Samol mi Lapalap a pwal kapas ngeni Moses,
LEV 21:17 “Kopwe üreni Aaron: Esap wor eman me lein mwirimwirum kana mi wor terin epwe kaneto pwe epwe eäni asoren mongö ngeniei. Ei epwe fis seni eu täppin aramas tori eu täppin.
LEV 21:18 Pun esap wor eman mi mesechun ika mwen, are eman a ter won mesan ika a timwo, epwe föri ewe angangen asor,
LEV 21:19 sap pwal eman a ter efoch pechen ika efoch pöün,
LEV 21:20 are a chuk sökürün ika ningenge, are a ülen ik lon mesan ika kilingau mi pwerik ika fas, are fokun.
LEV 21:21 Esap fokun wor eman mwirimwirin ewe souasor Aaron epwe eäni ekewe asor ngeniei, are a wor terin. Pokiten a wor terin, esap tongeni eäni asoren mongö ngeniei.
LEV 21:22 A tongeni mongö seni ewe asoren mongö aramas ra uwato fän itei, ewe asoren mongö mi unusen pin pwal ewe mi pin.
LEV 21:23 Nge esap tongeni kan ngeni ewe chechen lefil ika ewe rongen asor, pokiten a wor terin, pwe esap apiningaua imwei mi pin. Pun ngang ewe Samol mi Lapalap üa apini ekewe mettoch.”
LEV 21:24 Mürin, Moses a asile ngeni Aaron me nöün kewe mwän pwal ngeni aramasen Israel meinisin ekei kapas meinisin.
LEV 22:1 Iwe, ewe Samol mi Lapalap a kapas ngeni Moses,
LEV 22:2 “Kopwe üreni Aaron me nöün kewe mwän pwe repwe tümwünüöchüür ren ekewe asor mi pin ekewe chon Israel ra apini fän itei, pwe resap aitengaua itei mi pin: Ngang ewe Samol mi Lapalap.
LEV 22:3 Iwe, kopwe üreniir, ‘Are eman me lein mwirimwirimi a kan ngeni ekewe asor mi pin ekewe aramasen Israel ra apini fän itei, lupwen a wor an limengau, ewe aramas esap chüen tongeni föri ewe angangen souasor. Ei epwe fis seni eu täppin aramas tori eu täppin. Ngang ewe Samol mi Lapalap.
LEV 22:4 Iwe, are eman mwirimwirin Aaron a üri kilingau mi afeiengau ika a pu seni och chönü, esap tongeni mongö seni ekewe asor mi pin tori a limöchsefäl. Eman souasor mi atapa och mettoch mi limengau, pun a torii somä, ika a atapa eman mwän mi towu seni ewe chan mwän, i epwe limengau.
LEV 22:5 Nge are eman souasor a atapa sokun mantötö mi limengau, ika a atapa eman aramas mi limengau, ese lifilifil met sokun an limengau,
LEV 22:6 ätewe mi atapa ei sokun limengau epwe limengau tori lekuniol. Iwe, esap tongeni mongö seni ekewe asor mi pin, are esap akomw le tütü.
LEV 22:7 Nge lupwen akkar a tuputiu, epwe limöch. Mürin a tongeni mongö seni ekewe asor mi pin, pun ekei asor anan.
LEV 22:8 Iwe, esap ochoch eman man mi püsin mäla ika eman mi mäla ren manmwacho, pun epwe limengau ren: Ngang ewe Samol mi Lapalap.
LEV 22:9 Ekewe souasor meinisin repwe apwönüetä ai kewe allük, pwe resap atoto tipis wor o mäla pokiten ar lükümach ngeni ai kewe allük. Ngang ewe Samol mi Lapalap üa apiniir.
LEV 22:10 Iwe, esap wor eman me lükün familien ewe souasor a tongeni mongö seni ewe asor mi pin, sap mwo nge eman wasölan ewe souasor ika eman nöün chon angang mi mö a tongeni mongö seni.
LEV 22:11 Nge are eman souasor a möni ren moni eman amanau pwe nöün, ika eman amanau a uputiu lon imwan, ätewe epwe tongeni mongö seni enen ewe souasor.
LEV 22:12 Iwe, are nöün eman souasor fefin a pwüpwülüwu lükün an ainang, neminewe esap tongeni mongö seni ekewe asor mi pin.
LEV 22:13 Nge are eman fefin nöün eman souasor a mä pwülüan ika mwü seni pwülüan, esap pwal wor nöün, are a liwiniti imwen saman pwe a usun chök lekükünün, neminewe a tongeni mongö seni enen saman. Nge eman me lükün familien ewe souasor esap tongeni mongö seni.
LEV 22:14 Iwe, are eman aramas lükün familien souasor a mongö och seni ewe asor mi pin fän chechengau, ätewe epwe uwato siwilin ren ewe souasor, nge epwe pacheetä eu lelimu ngeni mine a angei.
LEV 22:15 Iwe, ekewe souasor resap fokun apiningaua än ekewe aramasen Israel asor mi pin ra eäni asor ngeniei
LEV 22:16 ren ar mwüt ngeni ekewe aramas pwe repwe mongö seni ekewe asor mi pin. Ren ei repwe atoto tipis me pupungau wor. Pun ngang ewe Samol mi Lapalap üa apini ekewe asor.’”
LEV 22:17 Iwe, ewe Samol mi Lapalap a pwal kapas ngeni Moses,
LEV 22:18 pwe epwe ngeni Aaron me nöün kewe mwän pwal ekewe aramasen Israel meinisin ekei allük: Are eman me lein chon Israel ika eman me lein ekewe chon ekis mi wasöla lon Israel a uwato an asor ngeni ewe Samol mi Lapalap, ese lifilifil ika mön eu pwon ika eu asor seni püsin letipan pwe eu asoren kek,
LEV 22:19 epwe chök uwato eman ätemwänin kow ika sip ika kuuch esap wor terin, pwe Kot epwe etiwa.
LEV 22:20 Iwe, ousap eäni asor eman man a wor terin, pun Kot esap etiwa ei sokun asor senikemi.
LEV 22:21 Nge are eman a eäni asor eu asoren kinamwe ngeni ewe Samol mi Lapalap, pwe epwe apwönüetä an pwon ika epwe chök asor seni püsin letipan, epwe uwato seni lein nöün kow ika sip eman man mi mürina, esap fokun wor terin, pwe Kot epwe etiwa.
LEV 22:22 Iwe, ousap eäni asor ngeni ewe Samol mi Lapalap eman man mi chun ika ter ika pök, ousap pwal uwato eman mi pu seni och chönü ika kilingau ika fas. Ousap eäniir le asor won ewe rongen asor ngeni ewe Samol mi Lapalap.
LEV 22:23 Iwe, eman kow ika eman sip mi wor efoch pechen a kon langatam ika mochomoch oua tongeni uwato fän iten asor seni püsin letipemi. Nge ei sokun man esap tufich ngeni asoren pwon.
LEV 22:24 Ousap eäni asor ngeni ewe Samol mi Lapalap eman man mi mwochol föün ochoun ika pachach ika pök ika kinas. Ousap fokun föri ei sokun lapalap lon fanüemi.
LEV 22:25 Ousap pwal eäni asor ei sokun man oua angei me ren eman chon ekis pwe asoren mongö ngeni ämi Kot. Iwe, a wor terir, iei mine Kot esap etiwa ewe asor senikemi.
LEV 22:26 Iwe, ewe Samol mi Lapalap a ngeni Moses ekei allük:
LEV 22:27 Are a uputiu eman apanen kow ika sip ika kuuch, ewe apanan epwe nom ren inelapan lon ükükün fisu rän. Nge seni ewe awaluen rän oua tufichin eäni asor ngeni ewe Samol mi Lapalap.
LEV 22:28 Iwe, ese lifilifil ika ewe inelap eman kow ika eman sip, ousap nipökü ewe inelap me apanan lon eu chök rän.
LEV 22:29 Are oua eäni asor eu asoren kilisou ngeni ewe Samol mi Lapalap, oupwe asor lon pwüngüöchün ewe angang, pwe Kot epwe etiwakemi.
LEV 22:30 Oupwe ochoch ewe mönün asor lon ewe chök rän oua eäni asor, nge ousap likiti och tori lesosor.
LEV 22:31 Iei alon ewe Samol mi Lapalap, “Oupwe aleasochisi ai kewe allük o föriir. Ngang ewe Samol mi Lapalap.
LEV 22:32 Ousap aitengaua itei mi pin, pun ngang üpwe pin me ren ekewe aramasen Israel. Ngang ewe Samol mi Lapalap mi apinikemi.
LEV 22:33 Üa emwenikemiiwu seni ewe fanü Isip pwe üpwe ämi Kot: Ngang ewe Samol mi Lapalap.”
LEV 23:1 Iwe, ewe Samol mi Lapalap a ngeni Moses
LEV 23:2 ekei allük fän iten ekewe chulap mi kefilitä, lupwen ekewe aramasen Israel repwe mwichefengen o fel ngeni:
LEV 23:3 Lon ükükün wonu rän oupwe angang, nge ewe afisuen rän eu ränin sapat ränin asösö mi pin, eu fansoun mwich mi pin. Ousap föri och angang lon, pun eu ränin sapat fän iten ewe Samol mi Lapalap lon leniemi meinisin.
LEV 23:4 Ikkei ekewe chulap mi kefilitä me ren ewe Samol mi Lapalap, ekewe fansoun mwich mi pin, oupwe asilefeili lon ekewe fansoun ra kefilitä.
LEV 23:5 Iwe, lekuniolun ewe engol me rüanün ränin ewe aeuin maram epwe fis än ewe Samol mi Lapalap Pasofer.
LEV 23:6 Nge lon engol me limuen ränin ewe chök maram epwe fis än ewe Samol mi Lapalap we chulapen mongö pilawa esap wor iis lon. Lon ükükün fisu rän oupwe mongö pilawa esap wor iis lon.
LEV 23:7 Iwe, lon aeuin rän oupwe afisi eu mwich mi pin. Ousap föri och angang lon.
LEV 23:8 Lon iteiten ekewe fisu rän oupwe eäni eu asor ngeni ewe Samol mi Lapalap. Nge lon ewe afisuen rän oupwe pwal afisi eu mwich mi pin. Ousap föri och angang lon.
LEV 23:9 Iwe, ewe Samol mi Lapalap a kapas ngeni Moses,
LEV 23:10 pwe epwe üreni ekewe aramasen Israel: Lupwen oupwe tolong lon ewe fanü, ewe Samol mi Lapalap epwe ngenikemi, o kini uan, oupwe uwato epilük mwen kiniemi uän wiich ren ewe souasor.
LEV 23:11 Iwe, ewe souasor epwe assawa ewe pilük fän mesen ewe Samol mi Lapalap sorotän ewe ränin sapat, pwe Kot epwe etiwakemi.
LEV 23:12 Lon ewe ränin ämi oupwe assawa ewe pilük, oupwe pwal eäni asor eman ätemwänin lam eu ierin esap wor terin, pwe eu asoren kek ngeni ewe Samol mi Lapalap.
LEV 23:13 Iwe, oupwe afiti ngeni rüanü paun pilawa mi amas o mürina pwe asoren mongö, epwe pwal nofitfengen me apüra. Ei epwe eu asor ewe Samol mi Lapalap a efich pwoon. Nge oupwe pwal afiti ngeni eu kuoch wain pwe asoren ün.
LEV 23:14 Ousap fokun mongö pilawa ika föün irän wiich mi tüün ika föün mi fö tori ewe chök rän oua uwato ei asor ngeni Kot. Ei epwe eu allük oupwe apwönüetä ämi me mwirimwirimi kana seni eu täppin aramas tori eu täppin lon leniemi meinisin.
LEV 23:15 Iwe, oupwe aleani ükükün fisu wik seni sorotän ewe ränin sapat, ewe rän oua uwato ewe pilük fän iten asoren assaw.
LEV 23:16 Lon alimeen rän, sorotän ewe afisuen sapat, oupwe uwato ren ewe Samol mi Lapalap pwal eu asoren mongö seni ekewe föün irän wiich mi fö.
LEV 23:17 Oupwe uwato seni lon en me imwan ruofoch pilawa pwe repwe assaw. Ekewe pilawa repwe för seni rüanü paun pilawa mi amas o mürina, repwe um fiti iis, pwe ämi mwen ua ngeni ewe Samol mi Lapalap.
LEV 23:18 Oupwe pwal afiti ngeni ewe pilawa füman lam eu ierir esap wor terir, pwal eman nienifön ätemwänin kow me ruoman ätemwänin sip. Ekei man repwe eu asoren kek ngeni ewe Samol mi Lapalap fiti ämi asoren mongö me asoren ün. Ei epwe eu asor ewe Samol mi Lapalap a efich pwoon.
LEV 23:19 Oupwe pwal eäni asor eman ätemwänin kuuch fän iten asoren tipis, me ruoman ätemwänin lam eu ierir pwe asoren kinamwe.
LEV 23:20 Iwe, ewe souasor epwe assawa ekewe ruoman lam fitifengen me ewe pilawan mwen ua, pwe eu asoren assaw fän mesen ewe Samol mi Lapalap. Ekei asor repwe pin me ren ewe Samol mi Lapalap fän iten ewe souasor.
LEV 23:21 Iwe, lon ewe chök ränin oupwe asilefeili pwe epwe fis eu mwich mi pin. Ousap föri och angang lon. Iei eu allük mwirimwirimi kana repwe apwönüetä seni eu täppin aramas tori eu täppin lon leniemi meinisin.
LEV 23:22 Iwe, lupwen oupwe kini resin fanüemi, ousap kiniela uän tanipimi tori kiännin, ousap pwal rusifengeni mine a turutiu seni kiniemi wiich. Iwe, oupwe likitirela fän iten chon wöüngau me chon ekis. I ewe Samol mi Lapalap ämi we Kot.
LEV 23:23 Iwe, ewe Samol mi Lapalap a kapas ngeni Moses,
LEV 23:24 pwe epwe üreni ekewe aramasen Israel: Lon aeuin ränin ewe afisuen maram oupwe afisi eu ränin asösö mi pin, eu ränin achem fiti tikin rappwa, eu fansoun mwich mi pin.
LEV 23:25 Ousap föri och angang lon, nge oupwe eäni eu asor ngeni ewe Samol mi Lapalap.
LEV 23:26 Iwe, ewe Samol mi Lapalap a ngeni Moses ekei allük:
LEV 23:27 Lon aengolun ränin ei afisuen maram epwe fis ewe ränin ächächä. Iwe, epwe eu fansoun mwich mi pin fän itemi, nge oupwe echikefel o eäni asor ngeni ewe Samol mi Lapalap.
LEV 23:28 Ousap föri och angang lon ewe rän, pun eu ränin ächächä, pwe epwe fis asoren amusamusen tipis fän itemi fän mesen ewe Samol mi Lapalap ämi we Kot.
LEV 23:29 Nge iö esap echikefel epwe käriwu seni lein aramasan.
LEV 23:30 Are eman epwe föri och angang lon ewe chök rän, ewe Samol mi Lapalap epwe afeiengaua ewe aramas me lein aramasan.
LEV 23:31 Ousap fokun föri och angang. Iei eu allük oupwe apwönüetä, ämi me mwirimwirimi kana, seni eu täppin aramas tori eu täppin lon leniemi meinisin.
LEV 23:32 Ei rän epwe eu ränin asösön sapat mi pin, ämi oupwe echikefel lon. Seni lekuniolun ewe atiuen ränin ewe maram tori lekuniolun sorotan oupwe apwönüetä ämi asösön sapat.
LEV 23:33 Iwe, ewe Samol mi Lapalap a ngeni Moses ekei allük
LEV 23:34 fän iten ekewe aramasen Israel: Lon engol me limuen ränin ewe afisuen maram epwe fis ewe chulapen likachoch ngeni ewe Samol mi Lapalap lon ükükün fisu rän.
LEV 23:35 Lon aeuin rän epwe fis eu mwich mi pin. Ousap föri och angang lon.
LEV 23:36 Iwe, lon ükükün fisu rän oupwe eäni asor ngeni ewe Samol mi Lapalap. Nge lon awaluen rän oupwe föri eu mwich mi pin o eäni asor ngeni ewe Samol mi Lapalap. Ei mwich a fokun aüchea. Ousap föri och angang lon ewe rän.
LEV 23:37 Ikkei ekewe chulap mi kefilitä me ren ewe Samol mi Lapalap. Oupwe asilefeiliir pwe fansoun mwich mi pin fän iten eäni asor ngeni ewe Samol mi Lapalap, ekewe asoren kek me asoren mongö, sokun asor me asoren ün lon akoten pwüngün fän iten eu me eu rän.
LEV 23:38 Ekei chulap me ekei asor repwe fis lükün än ewe Samol mi Lapalap kewe ränin sapat, pwal lükün ämi lifang, ämi asoren pwon me ämi asor meinisin seni püsin letipemi, oua fang ngeni ewe Samol mi Lapalap.
LEV 23:39 Nge lon engol me limuen ränin ewe afisuen maram, lupwen oua wes me ionifengeni uän fanüemi, oupwe pwal föri eu chulap ngeni ewe Samol mi Lapalap lon ükükün fisu rän. Iwe, ewe aeuin rän epwe eu ränin asösö mi pin, nge ewe awaluen rän epwe pwal eu ränin asösö mi pin.
LEV 23:40 Lon aeuin rän oupwe angei uän irä mi mürina, pan irä palm, pan irä mi muresires, pwal palen ewe irä itan willow mi mär lükün chanpupu. Iwe, oupwe fokun pwapwa fän mesen ewe Samol mi Lapalap ämi we Kot lon ükükün fisu rän.
LEV 23:41 Iteiten ier oupwe föri ei chulap ngeni ewe Samol mi Lapalap lon ükükün fisu rän. Iei eu allük fän itemi me mwirimwirimi seni eu täppin aramas tori eu täppin. Iwe, oupwe föri ewe chulap lon ewe afisuen maram.
LEV 23:42 Iwe, chon wiliposun Israel meinisin repwe imweimw likachoch lon ükükün fisu rän.
LEV 23:43 pwe mwirimwirimi repwe silei pwe ewe Samol mi Lapalap a üreni ekewe aramasen Israel pwe repwe imweimw likachoch, lupwen a emwenirewu seni ewe fanü Isip. I ewe Samol mi Lapalap ämi we Kot.
LEV 23:44 Iei usun Moses a asile ngeni ekewe aramasen Israel ekewe allük usun än ewe Samol mi Lapalap kewe chulap mi kefilitä, pwe repwe apwönüretä.
LEV 24:1 Iwe, ewe Samol mi Lapalap a üreni Moses,
LEV 24:2 pwe epwe allük ngeni ekewe aramasen Israel, pwe repwe uwato noppuk mi mürina seni föün olif mi üsüs fän iten ekewe lamp lon ewe imwenfel seni mangaku, pwe repwe tittin fochofoch.
LEV 24:3 Iwe, Aaron epwe tümwünüfochei ekewe lamp fän mesen ewe Samol mi Lapalap, pwe repwe tin seni lekuniol tori lesosor lükün ewe cheech mi refiela ewe pworofel lon ewe leni mi unusen pin. Ei epwe eu allük fän itan me mwirimwirin kana seni eu täppin aramas tori eu täppin.
LEV 24:4 Aaron epwe tümwünüfochei ekewe lamp mi nom won ewe lenien atittin a för seni kolt mi mürina pwe repwe tin fochofoch me fän mesen ewe Samol mi Lapalap.
LEV 24:5 “Iwe, kopwe angei rüe me rüanü paun pilawa mi amas o mürina pwe kopwe umuni engol me ruoföü pilawa seni.
LEV 24:6 Kopwe atetteliir lon ruu tettel won ewe chepel mi för seni kolt mi mürina a nom fän mesen ewe Samol mi Lapalap, akawonoföü repwe nom won eu tettel.
LEV 24:7 Kopwe pwal iseis ren eu me eu tettel apach mi pwokus o mürina, pwe eu kinikinin ewe asoren mongö akasiwilin ewe pilawa, pwe epwe eu asor epwe kek ngeni ewe Samol mi Lapalap.
LEV 24:8 Iteiten ränin sapat Aaron epwe atettelöchü ewe pilawa fän mesen ewe Samol mi Lapalap. Ekei pilawa ekewe aramasen Israel repwe wisen awora iteiten fansoun.
LEV 24:9 Iwe, ekewe pilawa enen Aaron me nöün kewe mwän, repwe mongö lon eu leni mi pin. Pun ewe pilawa eu kinikin mi unusen pin seni ekewe asor ngeni ewe Samol mi Lapalap fän iten ekewe souasor.”
LEV 24:10 Iwe, a wor eman mwän nöün eman fin Israel, nge saman eman re Isip. Ätei a feila lein chon Israel o anini ngeni eman wesewesen re Israel me lon ewe leni ia ra nonom ie.
LEV 24:11 Nge lon ar anini nöün ewe fin Israel we mwän a turunufasei iten ewe Samol mi Lapalap le ottek. Iei mine ra emwenato ren Moses. (Iwe, iten inan we Selomit nöün Tepri fefin seni ewe ainangen Tan.)
LEV 24:12 Iwe, ra kalapusei tori repwe silei letipen ewe Samol mi Lapalap fän itan.
LEV 24:13 Mürin, ewe Samol mi Lapalap a üreni Moses,
LEV 24:14 “Kopwe emwenawu ätewe mi ottek lükün ewe leni ia oua nonom ie. Nge meinisin mi rong an fos repwe iseis pöür won möküran, pwe asisilen ar atipisi. Mürin ekewe chon Israel meinisin repwe monei ngeni fau.
LEV 24:15 Kopwe üreni ekewe aramasen Israel: Iö a otteki Kot epwe angei liwinin an tipis.
LEV 24:16 Nge iö a turunufasei iten ewe Samol mi Lapalap epwe ninnila. Ekewe chon Israel meinisin repwe monei ngeni fau. Eman mi turunufasei ewe it mi pin epwe ninnila, ese lifilifil ika i eman chon ekis mi nom leimi ika eman chon wilipos.
LEV 24:17 Iwe, eman mi niela eman aramas epwe ninnila.
LEV 24:18 Nge eman mi niela nöün eman man, epwe akasiwili ewe man, pun manau akasiwilin manau.
LEV 24:19 Iwe, are eman aramas a afeiengaua chon arun pwe a ter, epwe pwal fis ngeni usun mine a föri.
LEV 24:20 Are eman a kupi chün eman, epwe pwal kupukup chün, are eman a afeiengaua mesen eman, mesan epwe pwal feiengau, nge are eman a tülü ngiin eman, ngiin epwe pwal tütül. Usun eman a afeiengaua eman aramas pwe a ter, iei usun epwe pwal fis ngeni.
LEV 24:21 Eman mi niela nöün eman man epwe akasiwili ewe man, nge eman mi niela eman aramas epwe ninnila.
LEV 24:22 Iwe, epwe wor eu chök allük fän iten chon ekis mi nom leimi me chon wilipos, pun ngang ewe Samol mi Lapalap ämi we Kot.”
LEV 24:23 Mürin än Moses üra ekei kapas ngeni ekewe aramasen Israel, ra emwenawu ätewe mi ottek lükün ewe ia ra nonom ie o monei ngeni fau tori a mäla. Iei usun ekewe aramasen Israel ra föri usun mine ewe Samol mi Lapalap a allük ngeni Moses.
LEV 25:1 Iwe, ewe Samol mi Lapalap a kapas ngeni Moses me won ewe chuk Sinai o üreni,
LEV 25:2 pwe epwe ngeni ekewe aramasen Israel ekei allük: Lupwen oupwe tolong lon ewe fanü ewe Samol mi Lapalap epwe ngenikemi, epwe fis eu ierin sapat ngeni ewe Samol mi Lapalap won ewe fanü.
LEV 25:3 Lon ükükün wonu ier oupwe fotuki fanüemi. Oupwe pwal pökütolei ämi tanipin wain o kini uan lon ükükün wonu ier.
LEV 25:4 Nge lon ewe afisuen ier epwe fis eu ierin asösö won ewe fanü, eu ierin sapat ngeni ewe Samol mi Lapalap. Ousap fotuki fanüemi ika pökütolei ämi tanipin wain.
LEV 25:5 Ousap kini mine a püsin pwükütä, ousap pwal ionifengeni uän ekewe irän wain resap pökütol. Iwe, epwe fis eu ierin asösö won ewe fanü.
LEV 25:6 Iwe, ewe fanü a fis ewe ierin sapat won epwe awora enemi mongö fän itemi me fän iten nöümi amanau mwän me fefin, fän iten nöümi chon angang mi mö pwal fän iten ekewe chon ekis mi nom remi.
LEV 25:7 Epwe awora enen nöümi pwiin manfesir pwal enen ekewe manmwacho mi nom lon fanüemi, pun meinisin mine a püsin ua epwe fän iten mongö.
LEV 25:8 Iwe, kopwe aleani fisu ierin sapat ika fisu alea ngeni fisu ier, pwe ükükün ekewe fisu ierin sapat repwe faik me tiu ier.
LEV 25:9 Mürin, lon aengolun ränin ewe afisuen maram, lon ewe ränin ächächä, oupwe ettikifeili ewe rappwa mi tikimong lemenen unusen fanüemi.
LEV 25:10 Oupwe apini ewe alimeen ier o asilefeili lemenen unusen fanüemi, pwe aramasan meinisin ra ngasala. Ei ier epwe eu ierin supili fän itemi, lupwen eman me eman leimi epwe angeisefäli püsin fanüan a amömö me lom, nge eman me eman amanau epwe liwiniti en me an famili.
LEV 25:11 Iwe, ewe alimeen ier epwe eu ierin supili fän itemi. Ousap fofot, ousap pwal ionifengeni mine a püsin pwükütä, ousap pwal ionifengeni uän ekewe irän wain resap pökütol.
LEV 25:12 Pun iei eu ierin supili epwe pin me remi. Oupwe chök mongö seni mine a püsin pwükütä me won ewe fanü.
LEV 25:13 Iwe, lon ewe ierin supili eman me eman leimi epwe angeisefäli fanüan.
LEV 25:14 Nge are ka amömöla ngeni chon arum eu fanü ika möni seni chon arum eu fanü, ousap kirikiringaufengen lefilemi.
LEV 25:15 Are kopwe möni seni chon arum eu fanü, kopwe liwini ngeni ükükün fitu ier mürin ewe supili, nge i epwe amömö ngonuk ükükün fitu ier ka tongeni kini uän irän ewe fanü.
LEV 25:16 Iwe, are ekewe ier ra chomong, liwinin ewe fanü epwe pwal watte. Nge are ekewe ier ra chokükün, liwinin epwe pwal kükün, pun chon arum epwe amömö ngonuk ükükün fitu ier ka tongeni kini uän irän ewe fanü.
LEV 25:17 Ousap kirikiringaufengen lefilemi, nge oupwe meniniti ewe Samol mi Lapalap ämi we Kot.
LEV 25:18 Iei mine oupwe aleasochisi än ewe Samol mi Lapalap allük o apwönüetä an kewe pwüüng, pwe oupwe nonom lon ewe fanü fän kinamwe.
LEV 25:19 Iwe, ewe fanü epwe efisätä ua, pwe ämi oupwe mongö o möt, oupwe pwal nonom lon ewe fanü fän kinamwe.
LEV 25:20 Nge are oupwe ais, ‘Meta aipwe eni lon ewe afisuen ier, are aisap tongeni fofot ika ionifengeni uän ekewe irä?’
LEV 25:21 Ewe Samol mi Lapalap epwe tinato an feiöch womi lon ewe awonuen ier, pwe ewe fanü epwe efisätä ua fän iten ükükün ülüngat ier.
LEV 25:22 Nge are oupwe fofot lon ewe awaluen ier, oupwe chök chüen mongö ekewe uän lom oua kini lon ewe awonuen ier. Tori lon ewe atiuen ier, lupwen oupwe kini ekewe ua mi fö, oupwe chüen mongö ekewe uän lom.
LEV 25:23 Iei mine ousap amömö ewe fanü tori feilfeilachök. Pun ei fanü fanüen Kot, nge ämi oua usun chök chon ekis me chon siamü won.
LEV 25:24 Ei allük a fän iten unusen ewe fanü oua fanüeni, pwe oupwe mwütätä ngeni ätewe a amömöla fanü pwe epwe fanüenisefäli.
LEV 25:25 Iwe, are eman chon Israel a wöüngauala o amömöla eu kinikinin fanüan, eman fitukan epwe feito o mönisefäli mine pwin a amömöla.
LEV 25:26 Nge are esap wor eman fitukan epwe tongeni möni, püsin i a tongeni mönisefäli, lupwen a wor an tufich.
LEV 25:27 Iwe, epwe aleani ekewe ier seni ewe fansoun a amömöla ewe fanü o liwini ngeni ätewe a möni ewe fanü me mwan ükükün liwinin ekewe lusun ier tori ewe ierin supili. Mürin a tongeni fanüenisefäli fanüan.
LEV 25:28 Nge are esap naf liwinin pwe epwe mönisefäli fanüan, ätewe mi möni epwe chök fanüeni tori ewe ierin supili. Iwe, lon ewe ierin supili ätewe mi amömöla ewe fanü me mwan epwe fanüenisefäli fanüan.
LEV 25:29 Are eman aramas a amömöla imwan mi nom lon eu telinimw mi tit, a tongeni mönisefäli lon ünükün unusen eu ier mürin an amömöla.
LEV 25:30 Nge ika esap mönisefäli lon ükükün unusen eu ier, ätewe mi möni ewe imw mi nom lon ewe telinimw mi tit epwe imweni, i me mwirimwirin kana seni eu täppin aramas tori eu täppin. Iwe, lon ewe ierin supili ewe imw esap liwiniti mine kaimwan.
LEV 25:31 Nge ekewe imw mi nom lon sop resap tit repwe usun chök fanü. Iwe, aramas ra tongeni mönisefäliir, nge lon ewe ierin supili repwe liwiniti mine kaimwer.
LEV 25:32 Nge chon ewe ainangen Lefi ra tongeni mönisefäli imwer mi nom lon ar kewe telinimw fansoun meinisin.
LEV 25:33 Iwe, are eman chon ewe ainangen Lefi esap mönisefäli imwan, ewe imw a amömöla lon ar ewe telinimw epwe liwinsefäl ngeni lon ewe ierin supili. Pun ekewe imw mi nom lon ekewe telinimwen chon ewe ainangen Lefi wesewesen imwer lein ekewe aramasen Israel.
LEV 25:34 Nge ekewe fanü mi nom pwelin ünükün ar kewe telinimw resap fokun tongeni amömöla, pun ekei fanü fanüer tori feilfeilachök.
LEV 25:35 Are eman pwiüm chon Israel a wöüngauala pwe esap chüen wor püsin an tufich, en kopwe atufichi, usun ka atufichi eman chon ekis ika eman wasöla, pwe epwe tongeni nomomola reöm won ewe fanü.
LEV 25:36 Iwe, kosap angei manauen an liwinimang ngonuk. Nge kopwe niueiti om we Kot o mwüt ngeni pwiüm we chon Israel an epwe nonomola reöm won ewe fanü.
LEV 25:37 Kosap ngeni pwiüm we chon Israel noum moni pwe kopwe angei seni manauan, kosap pwal amömö ngeni anom mongö pwe kopwe angei winom ren.
LEV 25:38 Ei allük än ewe Samol mi Lapalap ämi we Kot mi emwenikemiiwu seni ewe fanü Isip, pwe epwe ngenikemi ewe fanü Kanaan, epwe pwal ämi Kot.
LEV 25:39 Are eman pwiüm chon Israel mi nom reöm a wöüngauala pwe a amömöla püsin inisin ngonuk, kosap anganga usun eman noum amanau.
LEV 25:40 Epwe nom reöm usun eman chon angang mi mö ika usun eman wasöla. Epwe angang ngonuk tori ewe ierin supili.
LEV 25:41 Mürin epwe feila senuk fiti nöün kana. Epwe liwiniti püsin an famili o liwinsefäliti fanüen saman.
LEV 25:42 Pun ekewe chon Israel nöün ewe Samol mi Lapalap chon angang i a emwenirewu seni ewe fanü Isip. Kosap amömömörela pwe aramas repwe nöüniir amanau.
LEV 25:43 Kosap nemeni pwiüm we chon Israel fän pöchökül, nge kopwe niueiti om we Kot.
LEV 25:44 Nge are oua mochen kamö mwän me fefin pwe oupwe nöüniir amanau, oua tongeni möniir seni ekewe mwü mi nom ünükümi.
LEV 25:45 Oua pwal tongeni kamö nöümi chon angang me lein ekewe chon ekis mi wasöla remi, chokewe mi uputiu lon fanüemi. Ikkei ir oua tongeni nöüniir amanau.
LEV 25:46 Iwe, oua tongeni eäniir amwirinimä ngeni nöümi kewe mwän pwe repwe nöüniir amanau tori ar mäla. Ikkei ir oua tongeni nöüniir amanau, nge pwimi kewe chon Israel ousap nemeniir fän pöchökül.
LEV 25:47 Are eman chon ekis ika eman wasöla mi nom reöm a pisekisekila, nge pwiüm we chon Israel a wöüngauala pwe a amömöla püsin inisin ngeni ewe chon ekis ika ngeni eman eterekesin ewe chon ekis,
LEV 25:48 eman epwe tongeni mönisefäli mürin an amömöla püsin inisin. Iwe, eman me lein pwin kana a tongeni mönisefäli.
LEV 25:49 Pwal pwin saman ika nöün pwin saman ika eman märärin seni an famili a tongeni mönisefäli. Nge are a pisekiseksefälila, a pwal tongeni püsin mönisefäli inisin.
LEV 25:50 Iwe, repwe pwüngüpwüngfengen i me ätewe mi möni o alea seni ewe ier a amömöla püsin inisin ngeni tori ewe ierin supili. Iwe, liwinin an epwe ngasala epwe aükük ngeni iteiten ekewe ier. Nge ränin an nonom ren ätewe mi nöüni amanau repwe usun chök ränin eman chon angang mi mö.
LEV 25:51 Are mi chüen wor chomong ier tori ewe ierin supili, ewe mi ngasala epwe mönätiu och kinikin mi watte me lon ewe moni, ewe eman mi nöüni amanau a püngütiu fän itan.
LEV 25:52 Nge are ra chokükün ekewe ier tori ewe ierin supili, repwe pwüngüpwüngfengen me ätewe mi möni. Pun ükükün ekewe ier a angang ngeni epwe pwal kisikisila ewe moni epwe mönätiu fän iten an epwe ngasala.
LEV 25:53 Iwe, epwe usun chök eman chon angang mi mö lon eu me eu ier. Ätewe mi nöüni amanau esap tongeni nemeni fän pöchökül.
LEV 25:54 Nge are esap mö lon ekei sokun lapalap, i me nöün kewe repwe ngasala lon ewe ierin supili.
LEV 25:55 Pun ekewe aramasen Israel ir nöün ewe Samol mi Lapalap chon angang. Ir nöün chon angang a emwenirewu seni ewe fanü Isip: I ewe Samol mi Lapalap ar Kot.
LEV 26:1 Iwe, ewe Samol mi Lapalap a apasa, “Ousap föri fän itemi uluulun anü, ousap aüetä uluulun anü ika ür, ousap pwal aüetä eföü fau mi auluul ngeni anü lon fanüemi pwe oupwe fel ngeni. Pun ngang ewe Samol mi Lapalap ämi we Kot.
LEV 26:2 Oupwe apiniöchü ai kewe ränin sapat o meniniti imwei mi pin. Ngang ewe Samol mi Lapalap.
LEV 26:3 Iwe, are oupwe apwönüetä ai kewe pwüüng o aleasochisi ai kewe allük,
LEV 26:4 ngang üpwe ngenikemi üt lon fansoun öch, pwe irän ewe fanü repwe märitä o ua.
LEV 26:5 Iwe, fansoun ämi wichi umwun wiich epwe soposopola tori fansoun ämi kini föün irän wain, nge fansoun ämi kini föün irän wain epwe soposopola tori fansoun ämi fofot. Iwe, epwe wor chomong enemi mongö, oupwe pwal nom lon fanüemi fän kinamwe.
LEV 26:6 Üpwe fang ngenikemi kinamwe lon ewe fanü, oupwe konola o annut, nge esap wor eman epwe eniwokusukemi. Üpwe atoaua seni ewe fanü manmwacho, esap pwal chüen fis maun lon fanüemi.
LEV 26:7 Oupwe tapweri chon oputakemi ren ketilas, nge ir repwe kuf remi.
LEV 26:8 Iwe, limman senikemi repwe akufu ipükü, nge ipükü repwe akufu engol ngeröü. Iei usun chon oputakemi repwe kuf remi lon maun.
LEV 26:9 Üpwe ümöümöch ngenikemi, üpwe aupukemi o achomongakemi, üpwe pwal apwönüetä ai pwon ngenikemi.
LEV 26:10 Räsin fanüemi epwe fokun chomong, pwe oupwe chüen mongö mongön ewe ier a la tori oupwe aturala ewe mongö minen lom seni ämi lenien iseis, pwe epwe wor lenien ewe mongö mi fö.
LEV 26:11 Iwe, üpwe imweimw lefilemi lon imwei mi pin, nge üsap oputakemi.
LEV 26:12 Üpwe nonom remi pwe üpwe ämi Kot, nge ämi oupwe nei aramas.
LEV 26:13 Ngang ewe Samol mi Lapalap ämi we Kot, üa emwenikemiiwu seni ewe fanü Isip, pwe resap chüen nöünikemi amanau. Iwe, üa kupi ewe waas mi nom won afaremi, pwe oupwe wenetä le fetal.”
LEV 26:14 Iwe, ewe Samol mi Lapalap a apasa, “Are ousap mochen aleasochisi aloi, ousap pwal apwönüetä ai kewe allük meinisin, ngang üpwe apwüngükemi.
LEV 26:15 Are oua oput ai kewe pwüüng o purätiu ai kewe allük, are ousap apwönüetä ai kewe allük meinisin, pwe oua atai ai pwon ngenikemi,
LEV 26:16 iei usun mine üpwe föri ngenikemi: Üpwe awarakaieto womi niuokus watte, fius me pwichikar mi atopwala mesemi o akisikisala pöchökülen inisimi. Iwe, epwe solap ämi fofot, pun chon oputakemi repwe eni uän fotämi.
LEV 26:17 Üpwe ü ngenikemi, nge oupwe kuf ren chon oputakemi. Chokewe mi oputakemi repwe nemenikemi. Iwe, ämi oupwe sü, ngei esap wor eman a tapwerikemi.
LEV 26:18 Lupwen ekei feiengau ra torikemi, nge ousap mochen aleasochisi aloi, üpwe awatteloi ai apwüngükemi fän fisu pokiten ämi tipis.
LEV 26:19 Iwe, üpwe aükätiu ämi lamalamtekia me ülöförea. Üpwe föri pwe üt esap püngütiu won fanüemi, nge ewe fanü epwe pwasapwas o pöchökül usun mächä.
LEV 26:20 Epwe solapmwälila ämi pöchökül le angang ngeni ewe pwül, pun irän fanüemi resap mämäritä, resap pwal ua.
LEV 26:21 Mürin, are oua chüen lükümach ngeniei pwe ousap mochen aleasochisi aloi, üpwe awatteloi ämi riaföü, pwe epwe fän fisu lap seni me mwan pokiten ämi tipis.
LEV 26:22 Iwe, üpwe tinala ekewe manmwacho pwe repwe afeiengauakemi. Repwe niela nöümi semirit o ochei nöümi man, repwe pwal achokisikisikemiila pwe alen fanüemi repwe pönüla.
LEV 26:23 Are üpwe apwüngükemi iei usun, nge ousap kul ngeniei, pwe oua chüen ü ngeniei,
LEV 26:24 mürin ngang üpwe pwal ü ngenikemi o afeiengauakemi fän fisu lap seni me mwan pokiten ämi tipis.
LEV 26:25 Üpwe awarato maun womi, pwe iei chappen ämi atai ewe pwon. Nge are oua sülong lon ämi kewe telinimw, üpwe tinala mätter leimi. Oupwe tolong fän nemenien chon oputakemi.
LEV 26:26 Lupwen üpwe akisikisala enemi mongö, epwe fis pwe engol fefin repwe umuni ener pilawa lon eu chök um. Mürin repwe paunei ewe pilawa o ineti. Iwe, oupwe mongö, nge ousap möt ren.
LEV 26:27 Are iei mwo ai ariaföüükemi, nge ousap mochen aleasochisiei pwe oua chök sopwela le ü ngeniei,
LEV 26:28 mürin üpwe pwal ü ngenikemi lon ai song o püsin emiritikemi fän fisu lap seni me mwan pokiten ämi tipis.
LEV 26:29 Iwe, pokiten watten ämi echik oupwe ochei fituken püsin nöümi ät me nengin.
LEV 26:30 Üpwe atai ämi kewe lenien fel won ekewe leni tekia o pökükisietiu ämi kewe rongen asoren ötüöt. Üpwe pwal moneetä inisin ämi kewe somä won ämi kewe uluulun anümwäl mi tatakis. Iwe, üpwe fokun oputakemi.
LEV 26:31 Üpwe atai ämi kewe telinimw o apönü ämi kewe leni mi pin. Üsap fokun etiwa ämi kewe asor oua keni.
LEV 26:32 Ewer, üpwe fokun ataela fanüemi, pwe chon oputakemi mi lefanüla lon repwe mairü ren.
LEV 26:33 Iwe, üpwe awarato maun womi o atoropasafeilikemi lein ekewe mwü. Fanüemi epwe tala, nge ämi kewe telinimw repwe tatakis.
LEV 26:34 Mürin, ewe fanü epwe pwapwaiti an kewe ierin asösö lon ükükün fansoun a tala. Lupwen oua oola lon fanüen chon oputakemi, ewe fanü epwe asösö o pwapwaiti an kewe ierin sapat.
LEV 26:35 Iwe, ükükün fansoun ewe fanü a tala lon, ina pwal ükükün fansoun an epwe asösö, pun esap asösö lon ämi kewe ierin sapat, lupwen oua nonom won.
LEV 26:36 Nge üpwe awora niuokus lon leluken chokewe me leimi mi chüen manau lon fanüen chon oputer, pwe repwe sü ren mwataten echö chön irä mi äs ren asepwäl, usun chök eman aramas a sü lupwen maun. Iwe, repwe turula, nge esap wor eman a tapweriir.
LEV 26:37 Eman epwe tumula won eman, usun chök aramas ra tumula ren ar sü lupwen maun, nge esap wor eman a tapweriir. Epwe wor ämi pireir, pwe ousap tongeni ü ngeni chon oputakemi.
LEV 26:38 Iwe, oupwe mäla lein chon ekewe mwü, nge fanüen chon oputakemi epwe oromikemiila.
LEV 26:39 Nge chokewe me leimi mi chüen manau lon fanüen chon oputer, epwe üttüla inisir pokiten ar föföringau, pwal pokiten an semer föföringau.
LEV 26:40 Mürin epwe fis pwe repwe pwärätä ar föföringau, pwal än semer kewe föföringau ra föri ngeniei lon ar ekisolä me ü ngeniei,
LEV 26:41 iei popun ngang üa pwal ü ngeniir o tinirela lon fanüen chon oputer. Iwe, lupwen leluker mi ülöförea epwe tekison pwe ra angei chappen ar tipis,
LEV 26:42 ngang üpwe chechemeni ai pwon ngeni Jakop, ai pwon ngeni Isaak me ai pwon ngeni Apraham, üpwe pwal chechemeni ewe fanü.
LEV 26:43 Nge akom ekewe aramas repwe likitala ewe fanü, pwe ewe fanü epwe pwapwaiti an kewe ierin asösö, lupwen a tala. Iwe, repwe angei chappen ar tipis, pun ra purätiu ai kewe allük o oput ai kewe pwüüng.
LEV 26:44 Nge inamwo are ra nom lon fanüen chon oputer, üsap likitirela, üsap pwal oputeer. Iei mine üsap fokun aroserela o atai ai pwon ngeniir. Pun ngang ewe Samol mi Lapalap ar we Kot.
LEV 26:45 Pun fän äsengesiir üpwe chechemeni ai pwon ngeni ar kewe lewo, chokewe üa emwenirewu seni ewe fanü Isip fän mesen ekewe mwü, pwe üpwe ar Kot. Ngang ewe Samol mi Lapalap.”
LEV 26:46 Iwe, ikkei ekewe allük me pwüüng ewe Samol mi Lapalap a ngeni Moses me won ewe chuk Sinai fän iten ekewe aramasen Israel.
LEV 27:1 Iwe, ewe Samol mi Lapalap a ngeni Moses
LEV 27:2 ekei allük fän iten ekewe aramasen Israel: Are eman aramas a eäni pwon ngeni ewe Samol mi Lapalap eman aramas, ewe aramas epwe tongeni kepichila seni ewe pwon, are ewe mi eäni ewe pwon epwe mönätiu ükükün liwinin aüchean.
LEV 27:3 Iwe, ükükün liwinin aüchean eman mwän seni ier rüe tori wone epwe lime föün moni silifer, nge epwe för won ewe kilo ra aea le aükük lon ewe imw mi pin.
LEV 27:4 Nge are ewe aramas eman fefin, ükükün liwinin aüchean epwe ilik föün moni silifer.
LEV 27:5 Iwe, are ewe aramas a lefilen ier limu tori rüe, ükükün liwinin aüchean epwe rüe föün moni silifer fän iten eman ät, nge engol föün moni silifer fän iten eman nengin.
LEV 27:6 Nge are ewe aramas a lefilen eu maram tori limu ier, ükükün liwinin aüchean epwe limeföü föün moni silifer fän iten eman ät, nge ülüföü föün moni silifer fän iten eman nengin.
LEV 27:7 Iwe, are ewe aramas a ierini wone feitä, ükükün liwinin aüchean epwe engol me limeföü föün moni silifer fän iten eman mwän, nge engol föün moni silifer fän iten eman fefin.
LEV 27:8 Nge are eman aramas a wöüngau pwe esap tongeni mönätiu ükükün liwinin aüchean ewe aramas a eäni pwon won, epwe emwenato ewe aramas fän mesen ewe souasor. Iwe, ewe souasor epwe aüküsefäli liwinin aüchean, nge epwe alongolong won ükükün tufichin ätewe a eäni ewe pwon.
LEV 27:9 Are eman a eäni pwon eman man me lein ekewe sokun man aramas ra eäni asor ngeni ewe Samol mi Lapalap, ekei man meinisin aramas ra fangala ngeni ewe Samol mi Lapalap ra pin.
LEV 27:10 Iwe, ätewe esap tongeni akasiwili ewe man ngeni pwal eman, esap pwal tongeni akasiwili eman mi öch ngeni eman mi ngau ika eman mi ngau ngeni eman mi öch. Nge are a akasiwili eman man ngeni eman, ewe man a angei akom me akasiwilin we repwe pin me ruoman.
LEV 27:11 Nge are a eäni pwon eman man mi limengau esap tufich an epwe eäni asor ngeni ewe Samol mi Lapalap, ewe aramas epwe uwato ewe man fän mesen ewe souasor.
LEV 27:12 Iwe, ewe souasor epwe filätä ika men lapalapöch ika men lapalapangau. Nge ükükün aüchean mine ewe souasor epwe aükü ngeni epwe chök ina.
LEV 27:13 Nge are ewe aramas a mochen mönisefäli ewe man, epwe pacheetä eu lelimu ngeni ükükün liwinin aüchean ren moni.
LEV 27:14 Iwe, are eman aramas a fangala imwan pwe epwe pin fän iten ewe Samol mi Lapalap, ewe souasor epwe aükü ükükün liwinin aüchean ewe imw o filätä ika men öch ika men ngau. Nge ükükün mine ewe souasor epwe aükü ngeni epwe chök ina.
LEV 27:15 Nge are ätewe mi fangala imwan ngeni Kot a mochen mönisefäli, epwe pacheetä eu lelimu ngeni ükükün liwinin aüchean ewe imw ren moni. Mürin epwe pwal imwenisefäli.
LEV 27:16 Iwe, are eman aramas a fangala eu kinikin seni fanüan me won saman ngeni ewe Samol mi Lapalap, ükükün liwinin aüchean epwe alongolong won ükükün mine a tongeni fotutiu won. Iwe, ükükün liwinin iteiten wone paun föün parli a tongeni fot won epwe engol föün moni silifer.
LEV 27:17 Are ewe aramas a fangala fanüan ngeni Kot lon ewe ierin supili, ükükün liwinin aüchean epwe unus.
LEV 27:18 Nge are a fangala fanüan mürin ewe ierin supili, ewe souasor epwe aükü ükükün liwinin aüchean, nge epwe alongolong won ükükün fitu ier mi chüen nom tori ewe ierin supili me mürin. Iwe, ükükün liwinin aüchean epwe kotur won ükükün ekewe ier ra fen wes.
LEV 27:19 Iwe, are ätwe mi fangala ewe fanü ngeni Kot a mochen mönisefäli, epwe pacheetä eu lelimu ngeni ükükün liwinin aüchean ewe fanü ren moni. Mürin epwe pwal fanüenisefäli.
LEV 27:20 Nge are esap mochen mönisefäli ewe fanü, ika a amömöla ngeni eman, esap chüen wor an pwüng won me mürin.
LEV 27:21 Are ewe fanü a pichila lon ewe ierin supili, ei fanü epwe pin fansoun meinisin usun chök eu fanü a fen pin fän iten ewe Samol mi Lapalap. Iwe, ewe souasor epwe fanüeni.
LEV 27:22 Nge are eman a fangala ngeni ewe Samol mi Lapalap eu fanü sap fanüan me won saman pwe a möni,
LEV 27:23 ewe souasor epwe aükü liwinin aüchean seni fansoun än ewe aramas fangala tori ewe ierin supili. Iwe, ewe aramas epwe mönätiu ükükün liwinin aüchean mi kaük lon ewe chök rän. Ei moni a fän iten ewe Samol mi Lapalap.
LEV 27:24 Nge lon ewe ierin supili ewe fanü epwe liwiniti ätewe mi amömöla, pun fanüan me won saman.
LEV 27:25 Iwe, iteiten aükükün liwinin epwe för won ewe kilo ra aea le aükük lon ewe imw mi pin.
LEV 27:26 Iwe, esap wor eman a tongeni fangala ngeni Kot eman mweinöün nöün man pwe an asor seni püsin letipan, pun a fen nöün ewe Samol mi Lapalap. Ese lifilifil ika ätemwänin kow ika sip, ir nöün ewe Samol mi Lapalap.
LEV 27:27 Nge are ewe man eman mweinöü me lein ekewe man mi limengau, ätewe nöün ewe man a tongeni mönisefäli won ükükün liwinin aüchean a fen kaük ngeni, nge epwe pacheetä eu lelimu ngeni. Nge are esap mönisefäli, repwe amömöla ewe man won ükükün liwinin aüchean a fen kaük ngeni.
LEV 27:28 Nge are eman aramas a apini och mettoch seni mine an fän iten ewe Samol mi Lapalap pwe epwe katala, ese lifilifil ika eman aramas ika nöün man ika fanüan me won saman, esap tufich an epwe amömöla are mönisefäli. Iteiten mettoch mi pin pwe repwe katala ra unusen pin fän iten ewe Samol mi Lapalap.
LEV 27:29 Eman aramas mi apinipin pwe epwe kärila esap tufich pwe epwe mösefäl, nge epwe ninnila.
LEV 27:30 Iwe, ämi leengol meinisin seni ewe fanü, ese lifilifil ika föün irän wiich mi mär won pwül ika uän sokopaten irä, än ewe Samol mi Lapalap. Ekewe leengol meinisin ra pin fän iten ewe Samol mi Lapalap.
LEV 27:31 Nge are eman aramas a mochen mönisefäli eu kinikin seni an leengol, epwe mönätiu ükükün liwinin, nge epwe pwal pacheetä eu lelimu ngeni.
LEV 27:32 Iwe, eu leengol seni ekewe kow me sip meinisin, iteiten engolun man meinisin mi alea repwe pin fän iten ewe Samol mi Lapalap.
LEV 27:33 Esap wor eman epwe eiipöni ika ewe man a mürina ika a ngau, esap pwal akasiwili ngeni eman. Nge are a akasiwili ewe man ngeni eman, ewe man a fen nom me akasiwilin we repwe pin me ruoman, nge esap wor eman a tongeni mönisefäliir.
LEV 27:34 Iwe, ikkei ekewe allük ewe Samol mi Lapalap a ngeni Moses fän iten ekewe aramasen Israel me won ewe chuk Sinai.
NUM 1:1 Iwe, lon aeuin ränin ewe aruuen maram lon aruuen ier mürin än chon Israel towu seni ewe fanü Isip, ewe Samol mi Lapalap a kapas ngeni Moses me lon ewe imw mangaku ia aramas ra churi Kot ie mi nom lon ewe fanüapön Sinai,
NUM 1:2 “Oupwe angei iteiten ekewe aramasen Israel meinisin, iteiten eu me eu famili lon ar kewe cho. Oupwe makei iten eman me eman mwän
NUM 1:3 seni ier rüe feitä mi tongeni fiti maun. Ämi me Aaron oupwe nampaniir lon eu me eu mwich.
NUM 1:4 Iwe, epwe wor eman mwän seni eu me eu ainang i mwänirelan an cho, epwe alisikemi.
NUM 1:5 Ikkei iten ekewe mwän repwe alisikemi: Elisur nöün Seteur mwän seni ewe ainangen Rupen,
NUM 1:6 Selumiel nöün Surisatai mwän seni ewe ainangen Simeon,
NUM 1:7 Nason nöün Aminatap mwän seni ewe ainangen Juta,
NUM 1:8 Netanel nöün Suar mwän seni ewe ainangen Isakar,
NUM 1:9 Eliap nöün Helon mwän seni ewe ainangen Sepulon,
NUM 1:10 nge seni mwirimwirin Josef kewe: Elisama nöün Amihut mwän seni ewe ainangen Efraim, pwal Kamaliel nöün Petasur mwän seni ewe ainangen Manasa,
NUM 1:11 Apitan nöün Kiteoni mwän seni ewe ainangen Peniamin,
NUM 1:12 Ahieser nöün Amisatai mwän seni ewe ainangen Tan,
NUM 1:13 Pakiel nöün Okran mwän seni ewe ainangen Aser,
NUM 1:14 Eliasaf nöün Teuel mwän seni ewe ainangen Kat,
NUM 1:15 Ahira nöün Enan mwän seni ewe ainangen Naftali.”
NUM 1:16 Ikkei ir ätekewe mi kefilitä seni ekewe chon Israel, ir ekewe souemwenin än semer ainang pwal mwänirelan ekewe eterekesin Israel.
NUM 1:17 Iwe, Moses me Aaron ra körato ekei mwän mi föü iter.
NUM 1:18 Nge ir ra amwichafengeni ekewe aramasen Israel meinisin lon aeuin ränin ewe aruuen maram. Iwe, ra angei iteiten chon Israel lon en me an famili me än semer cho o makei iten eman me eman mwän seni ier rüe feitä,
NUM 1:19 usun ewe Samol mi Lapalap a allük ngeni Moses. Iei usun Moses a angei iteiter lon ewe fanüapön Sinai.
NUM 1:20 Iwe, seni mwirimwirin Rupen nöün Israel we mwänichi, ekewe mwän meinisin seni ier rüe feitä mi tongeni fiti maun, ra aleaniir o makei iten eman me eman lon en me an famili me än semer cho.
NUM 1:21 Iwe, ükükün seni ewe ainangen Rupen faik me wonungeröü limepükü mwän.
NUM 1:22 Seni mwirimwirin Simeon ekewe mwän meinisin seni ier rüe feitä mi tongeni fiti maun, ra aleaniir o makei iten eman me eman lon en me an famili me än semer cho.
NUM 1:23 Iwe, ükükün seni ewe ainangen Simeon lime me tiwungeröü ülüpükü mwän.
NUM 1:24 Seni mwirimwirin Kat ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:25 Iwe, ükükün seni ewe ainangen Kat faik me limungeröü wonopükü lime mwän.
NUM 1:26 Seni mwirimwirin Juta ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:27 Iwe, ükükün seni ewe ainangen Juta fik me rüanüngeröü wonopükü mwän.
NUM 1:28 Seni mwirimwirin Isakar ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:29 Iwe, ükükün seni ewe ainangen Isakar lime me rüanüngeröü föpükü mwän.
NUM 1:30 Seni mwirimwirin Sepulon ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:31 Iwe, ükükün seni ewe ainangen Sepulon lime me fisungeröü föpükü mwän.
NUM 1:32 Seni nöün Josef kewe mwän, ekewe mwirimwirin Efraim, ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:33 Iwe, ükükün seni ewe ainangen Efraim faikngeröü limepükü mwän.
NUM 1:34 Seni mwirimwirin Manasa ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:35 Iwe, ükükün seni ewe ainangen Manasa ilik me ruungeröü rüepükü mwän.
NUM 1:36 Seni mwirimwirin Peniamin ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:37 Iwe, ükükün seni ewe ainangen Peniamin ilik me limungeröü föpükü mwän.
NUM 1:38 Seni mwirimwirin Tan ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:39 Iwe, ükükün seni ewe ainangen Tan wone me ruungeröü füpükü mwän.
NUM 1:40 Seni mwirimwirin Aser ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:41 Iwe, ükükün seni ewe ainangen Aser faik me eungeröü limepükü mwän.
NUM 1:42 Seni mwirimwirin Naftali ekewe mwän meinisin seni ier rüe feitä mi tongeni fiti maun, ra aleaniir o makei iter lon en me an famili me än semer cho.
NUM 1:43 Iwe, ükükün seni ewe ainangen Naftali lime me ülüngatngeröü föpükü mwän.
NUM 1:44 Ikkei ir ekewe mwän Moses me Aaron ra aleaniir, nge ekewe engol me ruoman souemwenin Israel mi tupuni en me än saman cho ra alisiir.
NUM 1:45 Iwe, kapachelapen iteiten mwänin Israel seni lon än semer kewe cho seni ier rüe feitä mi tongeni fiti maun
NUM 1:46 ükükün wonopükü ülüngatngeröü limepükü lime mwän.
NUM 1:47 Nge chon ewe ainangen Lefi resap alealong lon iteiten ekewe lusun ainang.
NUM 1:48 Pun ewe Samol mi Lapalap a üreni Moses,
NUM 1:49 “Kosap aleani chon ewe ainangen Lefi, kosap pwal alearelong lein ekewe re Israel mi tongeni fiti maun.
NUM 1:50 Nge kopwe awisa ekewe mwän seni ewe ainangen Lefi pwe repwe tümwünü ewe imwenfel seni mangaku ia ekewe allük ra nom ie me pisekin meinisin. Iwe, repwe mwärefetalei ewe imwenfel me pisekin meinisin o tümwünüöchüür, repwe pwal aüetä imwer imw mangaku pwelin ünükün.
NUM 1:51 Iwe, ekewe mwän seni ewe ainangen Lefi repwe atomwala ewe imwenfel seni mangaku, lupwen ekewe chon Israel repwe sai, nge repwe pwal aüsefäli, lupwen ekewe chon Israel repwe asösö. Iwe, are eman me lükür epwe kan ngeni ei imwenfel, epwe ninnila.
NUM 1:52 Iwe, ekewe lusun aramasen Israel repwe aüetä imwer imw mangaku lon en me an mwich pwal fän en me an filäik.
NUM 1:53 Nge ekewe mwän seni ewe ainangen Lefi repwe aüetä imwer imw mangaku pwelin ünükün ewe imwenfel seni mangaku o tümwünü pwe esap wor eman epwe arap ngeni, pwe ngang üsap song ngeni ekewe aramasen Israel.”
NUM 1:54 Iwe, ekewe aramasen Israel ra föri meinisin mine ewe Samol mi Lapalap a allük ngeni Moses.
NUM 2:1 Iwe, ewe Samol mi Lapalap a üreni Moses me Aaron,
NUM 2:2 “Eman me eman ekewe aramasen Israel epwe aüetä imwan imw mangaku fän filäiken an mwich pwal fän asisilen än saman cho. Repwe aüetä imwer kewe pwelin ünükün ewe imwenfel seni mangaku.
NUM 2:3 Iwe, peliötiuen ewe imwenfel seni mangaku awenewenen meserän chon ewe ainangen Juta me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Juta Nason nöün Aminatap mwän.
NUM 2:4 Iteiten ekewe mwän lon än Nason mwich ükükün fik me rüanüngeröü wonopükü.
NUM 2:5 Iwe, chon ewe ainangen Isakar repwe aüetä imwer ünükür. Iten nöür souemwen Netanel nöün Suar mwän.
NUM 2:6 Iteiten ekewe mwän lon än Netanel mwich ükükün lime me rüanüngeröü föpükü.
NUM 2:7 Nge chon ewe ainangen Sepulon repwe nom ünükür. Iten nöür souemwen Eliap nöün Helon mwän.
NUM 2:8 Iteiten ekewe mwän lon än Eliap mwich ükükün lime me fisungeröü föpükü.
NUM 2:9 Iwe, iteiten chokewe meinisin mi imweimw lon kinikinin Juta lon tettelin ar kewe mwich ükükün ipükü walik me wonungeröü föpükü mwän. Ir repwe wisen akomw lupwen fansoun ar sai.
NUM 2:10 Iwe, peliörün ewe imwenfel seni mangaku chon ewe ainangen Rupen me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Rupen Elisur nöün Seteur mwän.
NUM 2:11 Iteiten ekewe mwän lon än Elisur mwich ükükün faik me wonungeröü limepükü.
NUM 2:12 Iwe, chon ewe ainangen Simeon repwe aüetä imwer ünükür. Iten nöür souemwen Selumiel nöün Surisatai mwän.
NUM 2:13 Iteiten ekewe mwän lon än Selumiel mwich ükükün lime me tiwungeröü ülüpükü.
NUM 2:14 Nge chon ewe ainangen Kat repwe nom ünükür. Iten nöür souemwen Eliasaf nöün Reuel mwän.
NUM 2:15 Iteiten ekewe mwän lon än Eliasaf mwich ükükün faik me limungeröü wonopükü lime.
NUM 2:16 Iwe, iteiten chokewe meinisin mi imweimw lon kinikinin Rupen lon tettelin ar kewe mwich ükükün ipükü lime me eungeröü föpükü lime mwän. Ir repwe nom lon tettel nampa ruu lupwen fansoun ar sai.
NUM 2:17 Mürin ekei ruu mwich chon ewe ainangen Lefi mi nom lukalaper repwe sai o eki pisekin ewe imwenfel seni mangaku. Usun tettelin ar nom lon lenier, iei usun pwal tettelin ar sai, eu me eu mwich lon an tettel fän en me an filäik.
NUM 2:18 Iwe, pelilotoun ewe imwenfel seni mangaku chon ewe ainangen Efraim me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Efraim Elisama nöün Amihut mwän.
NUM 2:19 Iteiten ekewe mwän lon än Elisama mwich ükükün faik ngeröü limepükü.
NUM 2:20 Iwe, chon ewe ainangen Manasa repwe nom ünükür. Iten nöür souemwen Kamaliel nöün Petasur mwän.
NUM 2:21 Iteiten ekewe mwän lon än Kamaliel mwich ükükün ilik me ruungeröü ruopükü.
NUM 2:22 Nge chon ewe ainangen Peniamin repwe nom ünükür. Iten nöür souemwen Apitan nöün Kiteoni mwän.
NUM 2:23 Iteiten ekewe mwän lon än Apitan mwich ükükün ilik me limungeröü föpükü.
NUM 2:24 Iwe, iteiten chokewe meinisin mi imweimw lon kinikinin Efraim lon tettelin ar kewe mwich ükükün ipükü walungeröü ipükü mwän. Ir repwe nom lon tettel nampa ülüngat lupwen fansoun ar sai.
NUM 2:25 Iwe, peliefengin ewe imwenfel seni mangaku chon ewe ainangen Tan me ekewe mwich mi chu ngeni lon an kinikin repwe aüetä imwer imw mangaku fän ar filäik lon tettelin en me an mwich. Iten souemwenin ewe ainangen Tan Ahieser nöün Amisatai mwän.
NUM 2:26 Iteiten ekewe mwän lon än Ahieser mwich ükükün wone me ruungeröü füpükü.
NUM 2:27 Iwe, chon ewe ainangen Aser repwe aüetä imwer ünükür. Iten nöür souemwen Pakiel nöün Okran mwän.
NUM 2:28 Iteiten ekewe mwän lon än Pakiel mwich ükükün faik me eungeröü limepükü.
NUM 2:29 Nge chon ewe ainangen Naftali repwe nom ünükür. Iten nöür souemwen Ahira nöün Enan mwän.
NUM 2:30 Iteiten ekewe mwän lon än Ahira mwich ükükün lime me ülüngatngeröü föpükü.
NUM 2:31 Iwe, iteiten chokewe meinisin mi imweimw lon kinikinin Tan ükükün ipükü lime me fisungeröü wonopükü mwän. Iwe, repwe nom mwirichikin lupwen fansoun ar sai fän en me an filäik.”
NUM 2:32 Iwe, ikkei ir ekewe aramasen Israel ra alealong lon en me än saman cho. Nge kapachelapen meinisin mi alea lon tettelin ar kewe mwich lon lenier kewe ükükün wonopükü ülüngatngeröü limepükü lime mwän.
NUM 2:33 Nge chon ewe ainangen Lefi resap alealong lein ekewe aramasen Israel, usun ewe Samol mi Lapalap a allük ngeni Moses.
NUM 2:34 Iei usun ekewe aramasen Israel ra föri meinisin mine ewe Samol mi Lapalap a allük ngeni Moses. Iwe, ra aüetä imwer imw mangaku fän ar filäik, ra pwal sai en me lon an famili lon tettelin än semer kewe cho.
NUM 3:1 Iwe, iei pworausen än Aaron me Moses famili lon ewe fansoun, lupwen ewe Samol mi Lapalap a kapas ngeni Moses me won ewe chuk Sinai.
NUM 3:2 Ikkei iten nöün Aaron kewe mwän: Natap ewe mwänichi, Apihu, Eleasar me Itamar.
NUM 3:3 Ir ätekewe mi kepit o afeiöch pwe repwe angang lon wiser wisen souasor.
NUM 3:4 Nge Natap me Apihu ra mäla, lupwen ra eäni asor ekkei esap pin me fän mesen ewe Samol mi Lapalap lon ewe fanüapön Sinai. Iwe, ätekei esap wor nöür. Iei mine Eleasar me Itamar ra angang lon wisen souasor lupwen fansoun manauen Aaron semer we.
NUM 3:5 Iwe, ewe Samol mi Lapalap a üreni Moses,
NUM 3:6 “Kopwe emwenato chon ewe ainangen Lefi mwen ewe souasor Aaron pwe repwe angang ngeni.
NUM 3:7 Iwe, repwe föri sokun angang ngeni Aaron, pwal ngeni unusen ewe mwichen chon Israel mwen ewe imw mangaku ia aramas ra churiei ie o föri angangen ewe imwenfel seni mangaku.
NUM 3:8 Iwe, repwe tümwünü pisekin ewe imwenfel seni mangaku meinisin o föri sokun angang fän iten ekewe aramasen Israel ren ar angang ngeni ewe imwenfel seni mangaku.
NUM 3:9 Chon ewe ainangen Lefi repwe wisen angang ngeni Aaron me nöün kewe mwän. Ir repwe tiwewu seni me lein ekewe aramasen Israel pwe repwe angang ngeni.
NUM 3:10 Iwe, kopwe awisa Aaron me nöün kewe mwän pwe repwe föri angangen wiser wisen souasor. Nge are eman me lükür epwe angelong lon ewe wis, epwe ninnila.”
NUM 3:11 Iwe, ewe Samol mi Lapalap a üreni Moses,
NUM 3:12 “Nengeni, üa filätä ekewe mwän seni ewe ainangen Lefi seni me lein ekewe aramasen Israel, pwe repwe tupuni ekewe mwänichi me lein ekewe aramasen Israel. Iwe, ekewe mwän seni ewe ainangen Lefi repwe nei,
NUM 3:13 pun ekewe mwänichi meinisin nei. Lon ewe rän, lupwen üa niela ekewe mwänichi meinisin lon ewe fanü Isip, üa apini fän itei ekewe mwänichi lon Israel meinisin, seni mwänichien aramas tori man. Iwe, ir repwe nei. Ngang ewe Samol mi Lapalap.”
NUM 3:14 Iwe, ewe Samol mi Lapalap a üreni Moses me lon ewe fanüapön Sinai,
NUM 3:15 “Kopwe angei iteiten mwän seni ewe ainangen Lefi lon tettelin ar kewe cho me ar famili. Kopwe aleani iteiter seni eu maram feitä.”
NUM 3:16 Iwe, Moses a angei iteiter, usun mine ewe Samol mi Lapalap a allük ngeni.
NUM 3:17 Ikkei iten nöün Lefi kewe mwän: Kerson, Kohat me Merari.
NUM 3:18 Nge ikkei iten nöün Kerson kewe mwän, ir lewon ar kewe cho: Lipni me Shimei.
NUM 3:19 Iwe, iten nöün Kohat kewe mwän, ir lewon ar kewe cho: Amram, Ishar, Hepron me Usiel.
NUM 3:20 Nge iten nöün Merari kewe mwän, ir lewon ar kewe cho: Mali me Mushi. Ikkei ir lewon ekewe familien Lefi lon tettelin än semer cho.
NUM 3:21 Iwe, än Kerson cho ekewe familien Lipni me Shimei.
NUM 3:22 Iteiten mwän meinisin ra alea seni eu maram feitä ükükün fisungeröü limepükü.
NUM 3:23 Iwe, ekewe familien än Kerson cho repwe aüetä imwer imw mangaku pelilotoun ewe imwenfel seni mangaku.
NUM 3:24 Nge Eliasaf nöün Lael mwän epwe mwänirelan än Kerson cho.
NUM 3:25 Iwe, wisen nöün Kerson kewe mwän, repwe tümwünü ewe imwenfel seni mangaku, pwölüpwölün kewe me chechen asamalapan,
NUM 3:26 ekewe mangaku mi tit ngeni ewe leni lükün ewe imwenfel seni mangaku, pwal ewe chech fän iten asamalapen ewe leni mi pwelifeili ewe imwenfel seni mangaku me ewe rongen asor. Repwe tümwünü selin pwal meinisin mine ra aea fän iten ar angang.
NUM 3:27 Iwe, än Kohat cho ekewe familien Amram, Ishar, Hepron me Usiel.
NUM 3:28 Iteiten mwän meinisin ra alea seni eu maram feitä ükükün walungeröü wonopükü. Ir ra wisen tümwünü ewe imw mi pin.
NUM 3:29 Iwe, ekewe familien än Kohat cho repwe aüetä imwer imw mangaku peliörün ewe imwenfel seni mangaku.
NUM 3:30 Nge Elisafan nöün Usiel mwän epwe mwänirelan än Kohat cho.
NUM 3:31 Iwe, wiser repwe tümwünü ewe pworofel, ewe chepel, ewe lenien atittin, ekewe rongen asor, ekewe sepi fän iten ewe imw mi pin ekewe souasor ra aea le angang, pwal ewe cheech mi refiela ewe rum mi unusen pin me sokopaten pisek meinisin ra aea lon ar angang.
NUM 3:32 Nge Eleasar nöün ewe souasor Aaron we mwän epwe meilapen ekewe souemwenin ewe ainangen Lefi, epwe pwal nemelapei chokewe mi tümwünü ewe imw mi pin.
NUM 3:33 Iwe, än Merari cho ekewe familien Mali me Mushi.
NUM 3:34 Iteiten mwän meinisin ra alea seni eu maram feitä ükükün wonungeröü ruopükü.
NUM 3:35 Iwe, Suriel nöün Apihail mwän epwe mwänirelan än Merari cho. Repwe aüetä imwer imw mangaku peliefengin ewe imwenfel seni mangaku.
NUM 3:36 Nge wisen nöün Merari kewe mwän repwe tümwünü pappen ewe imwenfel seni mangaku, ekewe amwöch, ekewe ür me alongur me pisekin meinisin ra aea lon ar angang.
NUM 3:37 Repwe pwal tümwünü üren pwelin ewe leni lükün ewe imwenfel seni mangaku fiti alongur, chüfölür me selir.
NUM 3:38 Iwe, mwen ewe imwenfel seni mangaku me peliötiu sasape ngeni meserän Moses me Aaron me nöün kewe mwän repwe aüetä imwer imw mangaku. Iwe, wiser repwe föri sokun angangen souasor fän iten ekewe aramasen Israel lon ewe leni mi pin. Nge are eman me lükür epwe angelong lon ewe angang, epwe ninnila.
NUM 3:39 Iwe, Moses me Aaron ra angei iteiten ekewe mwän seni ewe ainangen Lefi meinisin lon en me an famili fän än ewe Samol mi Lapalap allük. Nge kapachalapen ekewe mwän meinisin seni eu maram feitä ükükün rüe me ruungeröü.
NUM 3:40 Iwe, ewe Samol mi Lapalap a üreni Moses, “Kopwe angei iteiten ekewe mwänichi seni ekewe aramasen Israel meinisin o makei iter seni eu maram feitä.
NUM 3:41 Mürin kopwe angei ekewe mwän seni ewe ainangen Lefi pwe akasiwilin ekewe mwänichi meinisin me lein ekewe aramasen Israel, pwe nei. Ngang ewe Samol mi Lapalap. Kopwe pwal angei fän itei nöün chon ewe ainangen Lefi man pwe akasiwilin mweinöün ekewe aramasen Israel man meinisin.”
NUM 3:42 Iei mine Moses a angei iteiten mwänichi meinisin me lein ekewe aramasen Israel, usun ewe Samol mi Lapalap a allük ngeni.
NUM 3:43 Iwe, iteiten ekewe mwänichi meinisin seni eu maram feitä ükükün rüe me ruungeröü ruopükü fik me ülüman.
NUM 3:44 Iwe, ewe Samol mi Lapalap a üreni Moses,
NUM 3:45 “Kopwe apini ekewe mwän seni ewe ainangen Lefi pwe repwe nei akasiwilin ekewe mwänichi meinisin me lein ekewe aramasen Israel. Kopwe pwal aimwüela nöün chon ewe ainangen Lefi man pwe akasiwilin mweinöün chon Israel man. Iwe, ekewe mwän seni ewe ainangen Lefi nei: Ngang ewe Samol mi Lapalap.
NUM 3:46 Nge ren mön ekewe ruopükü fik me ülüman mwänichi seni ekewe aramasen Israel mi som seni iteiten ekewe mwän seni ewe ainangen Lefi,
NUM 3:47 kopwe angei limeföü föün silifer fän iten eman me eman. Iwe, kopwe föri won ewe kilo ra aea le aükük lon ewe imw mi pin.
NUM 3:48 Iwe, kopwe angei ewe moni a püng fän iten mön ekewe aramas mi som seni iteiten ekewe mwän seni ewe ainangen Lefi o ngeni Aaron me nöün kewe mwän.”
NUM 3:49 Iei mine Moses a angei mön ekewe aramas mi som seni iteiten ekewe mwän seni ewe ainangen Lefi.
NUM 3:50 Iwe, ükükün ewe moni a angei seni ekewe mwänichi nöün ekewe aramasen Israel engeröü ülüpükü wone me limeföü föün silifer. Nge ewe moni a för won ewe kilo ra aea le aükük lon ewe imw mi pin.
NUM 3:51 Iwe, Moses a ngeni Aaron me nöün kewe mwän ewe moni usun ewe Samol mi Lapalap a allük ngeni.
NUM 4:1 Iwe, ewe Samol mi Lapalap a üreni Moses me Aaron,
NUM 4:2 “Oupwe angei iteiten nöün Kohat kewe mwän seni me lein chon ewe ainangen Lefi lon ar famili me än semer cho.
NUM 4:3 Oupwe aleaniir seni ier ilik feitä tori ier lime, ir ätekewe mi fich ngeni ewe angang lon ewe imw mangaku ia aramas ra churiei ie.
NUM 4:4 Iwe, wisen nöün Kohat kewe mwän me lon ewe imwenfel seni mangaku, repwe tümwünü ekewe mettoch mi unusen pin.
NUM 4:5 Iwe, lupwen ekewe chon Israel repwe sai, Aaron me nöün kewe mwän repwe tolong lon ewe imwenfel seni mangaku o ettätiu ewe chechen lefil pwe repwe pwölü ngeni ewe pworofel.
NUM 4:6 Mürin repwe pwölü ngeni echö pwölüpwöl seni silin man mi mürina, repwe pwal ameresala won echö mangaku mi arauarau o sökalong ämwärin kewe.
NUM 4:7 Iwe, repwe ameresala echö mangaku mi arauarau won ewe chepel ia ewe pilawa mi pin a nom ie. Mürin repwe iseis won ekewe peleich, ekewe sepi fän iten ewe apach mi pwokus, sokun sepi me ekewe rume fän iten ewe asoren ün. Iwe, ewe pilawa epwe chök nonom won ewe chepel fansoun meinisin.
NUM 4:8 Mürin repwe ameresala wor echö mangaku mi parachol, repwe pwölü ngeni echö pwölüpwöl seni silin man mi mürina o sökalong ämwärin kewe.
NUM 4:9 Iwe, repwe angei echö mangaku mi arauarau o pwölü ngeni ewe lenien atittin fiti laman, fichin me sepian, pwal ekewe rume fän iten ewe noppuk ra aea le alölöü ngeni.
NUM 4:10 Mürin repwe tukumalong ewe lenien atittin fiti pisekin meinisin lon echö pwölüpwöl seni silin man mi mürina o iseis won ewe lenien keki.
NUM 4:11 Iwe, Aaron me nöün kewe mwän repwe ameresala won ewe rongen asor seni kolt echö mangaku mi arauarau. Repwe pwal pwölü ngeni echö pwölüpwöl seni silin man mi mürina o sökalong ämwärin kewe.
NUM 4:12 Repwe angei ekewe pisek meinisin ra aea le angang lon ewe imw mi pin o isenirelong lon echö mangaku mi arauarau. Mürin repwe pwölürela fän echö pwölüpwöl seni silin man mi mürina o iseniir won eu lenien keki.
NUM 4:13 Repwe pwal tukeila falangen ewe rongen asor o ameresala echö mangaku mi parachol won ewe rongen asor.
NUM 4:14 Iwe, repwe iseis won ewe pwölüpwöl ekewe pisek meinisin ra aea le angang won ewe rongen asor: ekewe sepi fän iten moli, ekewe fook, ekewe sofel, ekewe sepi me pisekin meinisin. Mürin repwe ameresala won echö pwölüpwöl seni silin man mi mürina o sökalong ämwärin kewe.
NUM 4:15 Nge are Aaron me nöün kewe mwän ra wes le pwölüela ekewe pisek mi pin me mettochun meinisin lupwen fansoun än chon Israel repwe sai, mürin nöün Kohat kewe mwän repwe feito o mwärei ekewe pisek. Nge resap tongeni atapa ekewe pisek mi pin pwe resap mäla. Ikkei pisekin ewe imwenfel seni mangaku nöün Kohat kewe mwän ra wisen mwärei.
NUM 4:16 Iwe, Eleasar nöün ewe souasor Aaron we mwän epwe wisen tümwünü ewe noppuk fän iten ekewe lamp, ewe apach mi pwokus, ewe asoren mongö me ewe lön epit. Epwe pwal nemelapei unusen ewe imwenfel seni mangaku me masouen lon meinisin.”
NUM 4:17 Iwe, ewe Samol mi Lapalap a üreni Moses me Aaron,
NUM 4:18 “Oupwe tümwünü pwe ekewe familien än Kohat cho resap rosola me lein chon ewe ainangen Lefi.
NUM 4:19 Iwe, iei usun mine oupwe föri ngeniir pwe repwe manau, nge resap mäla lupwen repwe kan ngeni ekewe mettoch mi unusen pin: Aaron me nöün kewe mwän repwe tolong o awisa eman me eman ngeni an angang mine epwe uwei.
NUM 4:20 Nge ekewe mwän seni än Kohat cho resap fokun tolong lon pwe repwe katol ekewe mettoch mi pin, pwe resap mäla.”
NUM 4:21 Iwe, ewe Samol mi Lapalap a üreni Moses,
NUM 4:22 “Kopwe pwal angei iteiten nöün Kerson kewe mwän lon ar famili me än semer cho.
NUM 4:23 Kopwe aleaniir seni ier ilik feitä tori ier lime, ir ätekewe mi fich ngeni ewe angang lon ewe imw mangaku ia aramas ra churiei ie.
NUM 4:24 Iei än ekewe familien Kerson angang me mine repwe uwei:
NUM 4:25 Ewe imwenfel seni mangaku, chechan me pwölüpwölün kewe, ewe pwölüpwöl seni silin man mi mürina mi nom asan me chechen asamalapan,
NUM 4:26 ewe tit mangaku fän iten ewe leni lükün mi pweli ewe imwenfel seni mangaku me ewe rongen asor, chechen asamalapen tolong, pwal selir me pisekin ar angang meinisin. Iwe, repwe föri ekewe angang meinisin a weneitiir fän iten ekewe pisek.
NUM 4:27 Iwe, Aaron me nöün kewe mwän repwe emweni än nöün Kerson kewe mwän angang ren meinisin mine repwe uwei, pwal ren meinisin mine repwe föri. Nge en kopwe awisa ngeniir meinisin mine repwe uwei.
NUM 4:28 Iei ekewe angang än familien nöün Kerson kewe mwän me lon ewe imwenfel seni mangaku. Nge ar angang epwe nom fän nemelapen Itamar nöün ewe souasor Aaron we mwän.
NUM 4:29 Iwe, kopwe angei iteiten nöün Merari kewe mwän lon ar famili me än semer cho.
NUM 4:30 Kopwe aleaniir seni ier ilik feitä tori ier lime, ir ätekewe mi fich ngeni ewe angang lon ewe imw mangaku ia aramas ra churiei ie.
NUM 4:31 Iei wiser lon ar angang, pwe repwe uwei pappen ewe imwenfel seni mangaku fiti amwöchür, ekewe ür me alongur,
NUM 4:32 üren pwelin ewe leni lükün fiti alongur, ekewe chüföl me ekewe säl fiti pisekir meinisin me pisekinginir. Iwe, kopwe awisa ngeni eman me eman mine epwe uwei.
NUM 4:33 Iei än familien nöün Merari kewe mwän angang. Unusen ar angang lon ewe imwenfel seni mangaku epwe nom fän nemelapen Itamar nöün ewe souasor Aaron we mwän.”
NUM 4:34 Iwe, Moses me Aaron me ekewe souemwenin chon Israel ra aleani iteiten nöün Kohat kewe mwän lon ar famili me än semer cho
NUM 4:35 seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku.
NUM 4:36 Iteiter lon ar kewe famili ükükün ruungeröü füpükü lime mwän.
NUM 4:37 Iei iteiten nöün Kohat kewe mwän lon ar kewe famili mi angang lon ewe imwenfel seni mangaku. Ir ätekewe Moses me Aaron ra aleaniir fän än ewe Samol mi Lapalap allük ngeni Moses.
NUM 4:38 Iwe, iei iteiten nöün Kerson kewe mwän lon ar famili me än semer cho
NUM 4:39 seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku.
NUM 4:40 Iteiter lon ar kewe famili ükükün ruungeröü wonopükü ilik mwän.
NUM 4:41 Iei iteiten nöün Kerson kewe mwän lon ar kewe famili mi angang lon ewe imwenfel seni mangaku. Ir ätekewe Moses me Aaron ra aleaniir fän än ewe Samol mi Lapalap allük.
NUM 4:42 Iwe, iei iteiten nöün Merari kewe mwän lon ar kewe famili me än semer cho
NUM 4:43 seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku.
NUM 4:44 Iteiter lon ar kewe famili ükükün ülüngeröü ruopükü mwän.
NUM 4:45 Iei iteiten nöün Merari kewe mwän lon ar kewe famili Moses me Aaron ra aleaniir fän än ewe Samol mi Lapalap allük ngeni Moses.
NUM 4:46 Iei usun Moses, Aaron me ekewe souemwenin chon Israel ra aleani chon ewe ainangen Lefi lon ar kewe famili me än semer cho
NUM 4:47 seni ier ilik feitä tori ier lime, ir ätekewe mi fich ngeni ewe angang lon ewe imwenfel seni mangaku me ewe angangen keki pisekin meinisin.
NUM 4:48 Iteiten chokewe mi alea ükükün walungeröü limepükü walik mwän.
NUM 4:49 Iwe, fän än ewe Samol mi Lapalap allük ngeni Moses eman me eman a angei wisan fän iten an angang ika wosan. Iei usun Moses a föri meinisin mine ewe Samol mi Lapalap a allük ngeni.
NUM 5:1 Iwe, ewe Samol mi Lapalap a üreni Moses,
NUM 5:2 “Kopwe allük ngeni ekewe aramasen Israel pwe repwe atowu iteiten aramas mi üri kilingau mi afeiengau seni ewe leni ia ra nonom ie, me iteiten aramas mi pu seni och chönü, pwal iteiten aramas mi limengau ren an torii eman somä.
NUM 5:3 Oupwe atorowu lükün ewe leni ia oua nonom ie, ese lifilifil ika mwän ika fefin, pwe resap alimengaua leniemi kewe, ewe ia üa nonom ie.”
NUM 5:4 Iwe, ekewe aramasen Israel ra aleasochis ngeni o atowu ekewe chon limengau lükün ewe ia ra nonom ie, usun ewe Samol mi Lapalap a üreni Moses.
NUM 5:5 Iwe, ewe Samol mi Lapalap a üreni Moses,
NUM 5:6 “Kopwe üreni ekewe aramasen Israel: Are eman aramas a föri och föför mi mwäl ngeni eman o atai an allükülük ngeni ewe Samol mi Lapalap ren, ewe aramas a tipis.
NUM 5:7 Iwe, epwe pwärätä an tipis a föri o aliwini unusen mine a mwäl won. Nge epwe pwal apachätä eu lelimu ngeni o aliwinisefäli ngeni ätewe a wor an mwäl ngeni.
NUM 5:8 Iwe, are ewe aramas a mäla, nge esap wor märärin mi tongeni angei mine ewe mi mwäl epwe aliwinisefäli, ewe mettoch epwe la ngeni ewe Samol mi Lapalap fän iten ewe souasor. Nge epwe pwal pach ngeni eman ätemwänin sip pwe ewe souasor epwe föri asoren amusamusen tipis fän itan.
NUM 5:9 Iwe, ekewe lifang mi pin meinisin ekewe aramasen Israel ra uwato ren ewe souasor repwe an.
NUM 5:10 Iteiten ekewe mettoch eman aramas a apini epwe än ewe souasor. Nge iteiten mettoch eman aramas a fang ngeni ewe souasor epwe pwal an.”
NUM 5:11 Iwe, ewe Samol mi Lapalap a kapas ngeni Moses,
NUM 5:12 “Kopwe üreni ekewe aramasen Israel: A tongeni fis pwe ekiekin lukomong a tolong lon leluken eman mwän pwe a öümöüm ngeni pwülüan. A ekieki pwe pwülüan a kirikiringau ngeni o püsin alimengaua ren än eman mwän kon ren.
NUM 5:13 Nge ewe mwän esap nien silei, pun ewe fefin a tukumala, esap pwal wor eman chon atipisi, pun esap wor eman a seretä wor.
NUM 5:14 A pwal tongeni fis pwe ekiekin lukomong a tolong lon leluken eman mwän pwe a öümöüm ngeni pwülüan, nge neminewe esap kirikiringau ngeni.
NUM 5:15 Lon ekei lapalap me ruu, ewe mwän epwe emwenato pwülüan we ren ewe souasor. Iwe, epwe uwato pwe eu asor fän iten neminewe ülüngat paun pilawa mi amas seni föün parli. Nge esap niniitä apüra won, esap pwal iseis apach mi pwokus won, pun ei eu asor seni eman mwän mi lukomong, eu asoren alelet, pwe mine a let epwe pwäla.
NUM 5:16 Iwe, ewe souasor epwe emwenato ewe fefin o anomu fän mesen ewe Samol mi Lapalap.
NUM 5:17 Mürin, ewe souasor epwe üfi koluk mi pin lon eu sepi mi för seni pwül, epwe pwal tukei ekis moromoren pwülün lon ewe imwenfel seni mangaku o uwalong lon ewe koluk pwe epwe maras.
NUM 5:18 Iwe, mürin ewe souasor epwe atomwa möküren ewe fefin o uwalong lon pöün ewe asoren alelet, iei ewe asoren lukomong. Nge ewe souasor epwe kamwöch lon pöün ewe koluk mi maras a atoto anümamau.
NUM 5:19 Mürin, ewe souasor epwe üreni ewe fefin pwe epwe tipeeu ngeni ewe pwon fän akapel i epwe eäni ngeni. Epwe apasa, ‘Are kosap lisowu ngeni eman o alimengauok lupwen om ei pwüpwülü, kosap feiengau ren ewe anümamau ewe koluk mi maras a atoto.
NUM 5:20 Nge are ka lisowu ngeni eman lupwen om ei pwüpwülü o püsin alimengauok,
NUM 5:21 (iei otun ewe souasor epwe atolonga ewe fefin fän anümamauen ewe pwon mi fis fän akapel, mürin epwe sopwela le fos), ewe Samol mi Lapalap epwe föri pwe aramasom repwe leaweni itom lon ar ottek, epwe pwal föri pwe kopwe rit, nge lukom epwe pwola.
NUM 5:22 Iwe, ei koluk mi atoto anümamau epwe tolong leutum pwe lukom epwe pwo, kopwe pwal rit.’ Iwe, ewe fefin epwe pälüeni, ‘Üa tipeeu ngeni. Epwe fis iei usun.’
NUM 5:23 Mürin, ewe souasor epwe makeetiu ekei kapasen anümamau lon eu puk o talü ekewe kapas lon ewe koluk mi maras.
NUM 5:24 Iwe, mwen an epwe aünü ngeni ewe fefin ewe koluk mi maras a atoto anümamau o afisätä metek mi weires,
NUM 5:25 ewe souasor epwe angei seni lepöün ewe fefin ewe asoren mongö, epwe assawa me fän mesen ewe Samol mi Lapalap o uwato ren ewe rongen asor.
NUM 5:26 Iwe, ewe souasor epwe tukei ekumwuch seni ewe asoren mongö, iei asisilan pwe a asor meinisin, o kenala me won ewe rongen asor. Mürin epwe aünü ngeni ewe fefin ewe koluk.
NUM 5:27 Iwe, are neminewe a püsin alimengaua o kirikiringau ngeni pwülüan, ewe koluk mi atoto anümamau, ewe souasor a aünü ngeni, epwe tolong leutun o afisätä metek mi weires pwe lukan epwe pwo, epwe pwal rit. Iwe, aramasan repwe leaweni itan lon ar ottek.
NUM 5:28 Nge are ewe fefin esap tipis, esap küw ewe feiengau, nge epwe tongeni nöünöü.
NUM 5:29 Iei ewe allük fän iten eman mwän mi lukomong, lupwen pwülüan a lisowu ngeni eman o püsin alimengaua, lupwen an pwüpwülü,
NUM 5:30 ika lupwen ekiekin lukomong a tolong lon leluken eman mwän, pwe a öümöüm ngeni pwülüan. Iwe, ätewe epwe anomu ewe fefin fän mesen ewe Samol mi Lapalap, nge ewe souasor epwe föri ngeni unusen pwüngün ei allük.
NUM 5:31 Iwe, esap wor än ewe mwän tipis, nge ewe fefin epwe püsin mwärelong fän liwinin an tipis.”
NUM 6:1 Iwe, ewe Samol mi Lapalap a kapas ngeni Moses,
NUM 6:2 pwe epwe üreni ekewe aramasen Israel: Are eman mwän ika eman fefin a eäni och sokun pwon pwe epwe püsin apini fän iten ewe Samol mi Lapalap ren an epwe eman Nasir,
NUM 6:3 epwe püsin apini seni wain me sakau mi pwichikar. Esap fokun ün finikar mi för seni wain ika seni sakau mi pwichikar, esap pwal ün chönün föün wain are ochoch föün minefö ika mi apwas.
NUM 6:4 Iwe, ükükün ekewe rän meinisin a apini lon esap fokun ochei och mi pop seni irän wain, esap mwo nge eni ekewe kükün föün lon ika silin föün wain.
NUM 6:5 Iwe, ükükün ekewe rän meinisin a pwonen apinipin lon esap fichi möküran. Tori wesöchülan ekewe rän a püsin apini fän iten ewe Samol mi Lapalap, i epwe pin. Iwe, epwe apwükü möküran pwe epwe langatam.
NUM 6:6 Iwe, ükükün ekewe rän meinisin a püsin apini lon fän iten ewe Samol mi Lapalap esap fokun kan ngeni eman somä.
NUM 6:7 Ese lifilifil ika saman ika inan ika pwin ika fefinan a mäla, esap fokun püsin alimengaua ren an kan ngeniir. Pun meten möküran asisilen an apinipin fän iten Kot.
NUM 6:8 Ükükün ekewe rän meinisin a apini lon epwe pin fän iten ewe Samol mi Lapalap.
NUM 6:9 Nge are eman aramas a müttir mäla ünükün pwe möküran mi pin a limengau, epwe reipöpöla möküran lon afisuen rän, iei ränin an limöchsefäl.
NUM 6:10 Iwe, lon awaluen rän epwe uwato ruoman lisom ika ruoman apansüsün lisom ren ewe souasor leasamalapen ewe imw mangaku ia aramas ra churi Kot ie.
NUM 6:11 Iwe, ewe souasor epwe eäni asor eman leir fän iten asoren tipis, nge ewe eman fän iten asoren kek. Iwe, epwe föri asoren amusamusen tipis fän iten ätewe, pun a tipis ren an kan ngeni ewe somä. Iwe, epwe apinisefäli möküran lon ewe chök ränin
NUM 6:12 o püsin apini fän iten ewe Samol mi Lapalap ükükün ekewe rän a pwon pwe epwe apinipin lon. Iwe, epwe pwal uwato eman ätemwänin lam eu ierin fän iten asoren pupungau. Nge ewe fansoun mesemwan esap chüen alea, pun a limengau lon fansoun an apinipin.
NUM 6:13 Iwe, iei ewe allük fän iten ewe Nasir, lupwen a wes ränin an apinipin. Repwe emwenato leasamalapen ewe imwenfel seni mangaku,
NUM 6:14 nge i epwe uwato an asor ngeni ewe Samol mi Lapalap ülüman man esap wor terir: eman ätemwänin lam eu ierin pwe asoren kek, eman liefefinin lam eu ierin pwe asoren tipis, pwal eman ätemwänin sip pwe asoren kinamwe.
NUM 6:15 Epwe pwal uwato lon eu chük pilawa esap wor iis lon, pilawa mi mürina a nofit ngeni apüra, pwal sokun pilawa usun nokop mi toto ngeni apüra, fitifengen me ekewe asoren mongö me asoren ün.
NUM 6:16 Iwe, ewe souasor epwe uwato ekei mettoch fän mesen ewe Samol mi Lapalap o eäni asor än ewe Nasir asoren tipis me asoren kek.
NUM 6:17 Epwe pwal eäni asor ewe ätemwänin sip pwe asoren kinamwe ngeni ewe Samol mi Lapalap fitifengen me ewe pilawa esap wor iis lon seni lon ewe chük. Epwe pwal eäni asor ewe asoren mongö me asoren ün.
NUM 6:18 Iwe, ewe Nasir epwe reipöpöla möküran mi apinipin leasamalapen ewe imwenfel seni mangaku. Mürin epwe angei meten möküran o isetä won ekkein ewe asoren kinamwe.
NUM 6:19 Iwe, wesin an reipöpöla möküran, ewe souasor epwe angei pöün ewe ätemwänin sip mi kuk, epwe pwal angei me lon ewe chük eföü pilawa mi mürina me echö nokop esap wor iis lor o isenirelong lepöün ewe Nasir.
NUM 6:20 Mürin, ewe souasor epwe assaweer pwe eu asoren assaw fän mesen ewe Samol mi Lapalap. Ikei ekewe kinikin mi pin epwe än ewe soausor fitifengen me ewe leup mi assaw me ewe angan. Mürin ewe Nasir a tongeni ün wain.
NUM 6:21 Iei ewe allük fän iten eman Nasir mi angei ewe pwon. An asor ngeni ewe Samol mi Lapalap epwe alongolong won ükükün ewe pwonen Nasir. Nge lükün ekei asor a pwal tongeni asor ükükün an tufich. Iwe, epwe apwönüetä pwüngün ewe pwon a angei o föri ükükün allükün ewe pwonen Nasir.
NUM 6:22 Iwe, ewe Samol mi Lapalap a kapas ngeni Moses,
NUM 6:23 “Kopwe üreni Aaron me nöün kewe mwän pwe repwe eäni ekei kapasen afeiöch ngeni ekewe aramasen Israel:
NUM 6:24 ‘Ewe Samol mi Lapalap epwe afeiöchükemi o tümwünükemi,
NUM 6:25 ewe Samol mi Lapalap epwe netiu womi fän an kirikiröch o ümöümöch ngenikemi,
NUM 6:26 ewe Samol mi Lapalap epwe wopwapwa ngenikemi o fang ngenikemi kinamwe.’
NUM 6:27 Iei usun repwe föüni itei won ekewe aramasen Israel, nge ngang üpwe afeiöchüür.”
NUM 7:1 Iwe, lon ewe rän, lupwen Moses a wes le aüetä ewe imwenfel, a pwal apiti o apini fiti pisekin meinisin. A pwal apiti o apini ewe rongen asor fiti pisekin meinisin.
NUM 7:2 Mürin, ekewe souemwenin Israel, ir mwänirelan ar cho pwal souemwenin ar kewe ainang mi nemenem won chokewe mi alea,
NUM 7:3 ra uwato ar kewe asor ngeni ewe Samol mi Lapalap: wonofoch woken mi imweimw me engol me ruoman ätemwänin kow, efoch woken nge ruoman souemwen, pwal iteiten eman me eman souemwen nge eman ätemwänin kow. Ra uweereto leasamalapen ewe imwenfel seni mangaku.
NUM 7:4 Mürin, ewe Samol mi Lapalap a üreni Moses,
NUM 7:5 “Kopwe angei ekei asor seniir o ngeni ekewe mwän seni ewe ainangen Lefi pwe repwe aea le angang ngeni ewe imwenfel seni mangaku fän awenewenen en me wisan.”
NUM 7:6 Iwe, Moses a angei ekewe woken me ekewe ätemwänin kow o ngeni ekewe mwän seni ewe ainangen Lefi.
NUM 7:7 Iwe, a ngeni nöün Kerson kewe mwän ruofoch woken me föman ätemwänin kow fän awenewenen angangen wiser kewe.
NUM 7:8 Nge fofoch woken me waluman ätemwänin kow a ngeni nöün Merari kewe mwän fän awenewenen angangen wiser kewe. Ir meinisin ra nom fän nemenemen Itamar nöün ewe souasor Aaron we mwän.
NUM 7:9 Nge nöün Kohat kewe mwän esap ngeniir och, pun ir ra wisen tümwünü ekewe mettoch mi pin repwe mwärei won afarer.
NUM 7:10 Lon ewe rän, lupwen ewe rongen asor a kepit, ekewe souemwen ra pwal uwato ar kewe asor fän iten apinipinin ewe rongen asor o anomu mwen ewe rongen asor.
NUM 7:11 Pun ewe Samol mi Lapalap a üreni Moses, “Kopwe üreniir pwe repwe uwato ar kewe asor fän iten apinipinin ewe rongen asor, eman souemwen nge eu rän.”
NUM 7:12 Iwe, lon aeuin rän Nason nöün Aminatap we mwän seni ewe ainangen Juta a uwato an asor.
NUM 7:13 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina a nofit ngeni apüra pwe asoren mongö.
NUM 7:14 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:15 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:16 A pwal eäni asor eman ätemwänin kuuch fän iten asoren tipis,
NUM 7:17 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Nason nöün Aminatap we mwän.
NUM 7:18 Iwe, lon aruuen rän Netanel nöün Suar we mwän ewe souemwenin ewe ainangen Isakar a uwato an asor.
NUM 7:19 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:20 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:21 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:22 A pwal eäni asor eman ätemwänin kuuch fän iten asoren tipis,
NUM 7:23 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Netanel nöün Suar we mwän.
NUM 7:24 Nge lon aülüngatin rän Eliap nöün Helon we mwän ewe souemwenin ewe ainangen Sepulon a uwato an asor.
NUM 7:25 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:26 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:27 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:28 A pwal eäni asor eman ätemwänin kuuch fän iten asoren tipis,
NUM 7:29 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Eliap nöün Helon ewe mwän.
NUM 7:30 Iwe, lon arüanün rän Elisur nöün Seteur we mwän, ewe souemwenin ewe ainangen Rupen a uwato an asor.
NUM 7:31 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:32 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:33 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:34 A pwal eäni asor eman ätemwänin kuuch fän iten asoren tipis,
NUM 7:35 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Elisur nöün Seteur we mwän.
NUM 7:36 Nge lon alimuen rän Selumiel nöün Surisatai we mwän, ewe souemwenin ewe ainangen Simeon a uwato an asor.
NUM 7:37 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:38 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:39 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:40 A pwal eäni asor eman ätemwänin kuuch fän iten asoren tipis,
NUM 7:41 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Selumiel nöün Surisatai we mwän.
NUM 7:42 Iwe, lon awonuen rän Eliasaf nöün Teuel we mwän, ewe souemwenin ewe ainangen Kat a uwato an asor.
NUM 7:43 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:44 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:45 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:46 A pwal eäni asor eman ätemwänin kuuch fän iten asoren tipis,
NUM 7:47 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Eliasaf nöün Teuel we mwän.
NUM 7:48 Nge lon afisuen rän Elisama nöün Amihut we mwän, ewe souemwenin ewe ainangen Efraim a uwato an asor.
NUM 7:49 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:50 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:51 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:52 A pwal eäni asor eman ätemwänin kuuch fän iten asoren tipis,
NUM 7:53 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Elisama nöün Amihut we mwän.
NUM 7:54 Iwe, lon awaluen rän Kamaliel nöün Petasur we mwän, ewe souemwenin ewe ainangen Manasa a uwato an asor.
NUM 7:55 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:56 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:57 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:58 A pwal eäni asor eman ätemwänin kuuch fän iten asoren tipis,
NUM 7:59 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Kamaliel nöün Petasur we mwän.
NUM 7:60 Nge lon atiuen rän Apitan nöün Kiteoni we mwän, ewe souemwenin ewe ainangen Peniamin a uwato an asor.
NUM 7:61 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:62 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:63 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:64 A pwal eäni asor eman ätemwänin kuuch fän iten asoren tipis,
NUM 7:65 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Apitan nöün Kiteoni we mwän.
NUM 7:66 Iwe, lon aengolun rän Ahieser nöün Amisatai we mwän, ewe souemwenin ewe ainangen Tan, a uwato an asor.
NUM 7:67 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:68 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:69 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:70 A pwal eäni asor eman ätemwänin kuuch fän iten asoren tipis,
NUM 7:71 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Ahieser nöün Amisatai we mwän.
NUM 7:72 Nge lon engol me aeuin rän Pakiel nöün Okran we mwän, ewe souemwenin ewe ainangen Aser, a uwato an asor.
NUM 7:73 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:74 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:75 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:76 A pwal eäni asor eman ätemwänin kuuch fän iten asoren tipis,
NUM 7:77 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Pakiel nöün Okran we mwän.
NUM 7:78 Iwe, lon engol me ruuen rän Ahira nöün Enan we mwän, ewe souemwenin ewe ainangen Naftali, a uwato an asor.
NUM 7:79 A eäni asor eu peleich seni silifer ükükün choun ülüngat eu lerüanü paun, pwal eu sepi seni silifer ükükün choun eu ülüngat lerüanü paun, a för won ewe kilo ra aea le aükük lon ewe imw mi pin. Nge ir me ruu ra ur ren pilawa mi amas o mürina, a nofit ngeni apüra pwe asoren mongö.
NUM 7:80 A pwal eäni asor eu sepi seni kolt ükükün choun rüanü aunus, a ur ren apach mi pwokus,
NUM 7:81 eman nienifön ätemwänin kow, eman ätemwänin sip me eman ätemwänin lam eu ierin fän iten asoren kek.
NUM 7:82 A pwal eäni asor eman ätemwänin kuuch fän iten asoren tipis,
NUM 7:83 pwal ruoman ätemwänin kow, liman ätemwänin sip, liman ätemwänin kuuch pwal liman ätemwänin lam eu ierir fän iten asoren kinamwe. Iei ükükün ewe asor än Ahira nöün Enan we mwän.
NUM 7:84 Iwe, ie ükükün asoren apinipinin ewe rongen asor seni ekewe souemwenin Israel lon ewe rän a kepit: engol me ruu peleich seni silifer, engol me ruu sepi seni silifer pwal engol me ruu sepi seni kolt.
NUM 7:85 Iwe, ükükün choun eu me eu peleich seni silifer ülüngat eu lerüanü paun, nge ükükün choun eu me eu sepi seni silifer eu ülüngat lerüanü paun, pwe ükükün choun ewe silifer seni ekewe sepi meinisin wone paun, a för won ewe kilo ra aea le aükük lon ewe imw mi pin.
NUM 7:86 Iwe, ükükün choun eu me eu ekewe engol me ruu sepi seni kolt mi ur ren apach mi pwokus rüanü aunus, a för won ewe kilo ra aea le aükük lon ewe imw mi pin. Nge ükükün choun ewe kolt seni ekewe sepi meinisin ülüngat paun.
NUM 7:87 Iwe, ükükün ekewe man fän iten ewe asoren kek: engol me ruoman ätemwänin kow, engol me ruoman ätemwänin sip me engol me ruoman ätemwänin lam eu ierir repwe chu ngeni ekewe asoren mongö, pwal engol me ruoman ätemwänin kuuch fän iten asoren tipis.
NUM 7:88 Nge ükükün ekewe man fän iten ewe asoren kinamwe: rüe me föman ätemwänin kow, wone ätemwänin sip, wone ätemwänin kuuch me wone ätemwänin lam eu ierir. Iei ükükün asoren apinipinin ewe rongen asor mürin an kepit.
NUM 7:89 Iwe, lupwen Moses a tolong lon ewe imw mangaku ia aramas ra churi Kot ie, pwe epwe kapas ngeni ewe Samol mi Lapalap, a rongorong eu möngüngü a fosowu seni lefilen ekewe ruoman kerop mi nom won öppüngün ewe pworofel. Iwe, Kot a kapas ngeni Moses.
NUM 8:1 Iwe, ewe Samol mi Lapalap a kapas ngeni Moses,
NUM 8:2 “Kopwe üreni Aaron pwe lupwen epwe pacheetä ekewe fisu lamp won ewe lenien atittin, epwe föri pwe tiner epwe asarama mwan.”
NUM 8:3 Iwe, Aaron a föri iei usun. A pacheetä ekewe lamp won ewe lenien atittin pwe tiner epwe asarama mwan, usun ewe Samol mi Lapalap a allük ngeni Moses.
NUM 8:4 Iei usun förün ewe lenien atittin: a för seni kolt mi nechenech seni alongun tori ekewe uluulun pön irän won. Moses a föri ewe lenien atittin usun mine ewe Samol mi Lapalap a aiti ngeni.
NUM 8:5 Iwe, ewe Samol mi Lapalap a üreni Moses,
NUM 8:6 “Kopwe aimwüela ekewe mwän seni ewe ainangen Lefi seni lein ekewe aramasen Israel o limetiir.
NUM 8:7 Iei usun angangen om kopwe limetiir: Kopwe äsupu wor ewe kolukun limelim, nge ir repwe räisöü ülöülen unusen inisir, repwe pwal sopuni üfer o püsin limetiir.
NUM 8:8 Mürin repwe angei eman nienifön ätemwänin kow o achu ngeni ewe asoren mongö seni pilawa mi amas o mürina a nofit ngeni apüra. Nge en kopwe angei pwal eman nienifön ätemwänin kow fän iten asoren tipis.
NUM 8:9 Iwe, kopwe emwenato ekewe mwän seni ewe ainangen Lefi mwen ewe imw mangaku ia aramas ra churiei ie, o amwichafengeni ekewe aramasen Israel meinisin.
NUM 8:10 Iwe, lupwen ka aüteer fän mesei, ekewe aramasen Israel repwe anomu pöür wor.
NUM 8:11 Mürin, Aaron epwe fangala ngeniei ekewe mwän seni ewe ainangen Lefi pwe eu asoren assaw seni ekewe aramasen Israel, pwe ir repwe wisen föri ai angang.
NUM 8:12 Mürin, ekewe mwän seni ewe ainangen Lefi repwe anomu pöür won ekewe ätemwänin kow. Iwe, en kopwe eäni asor ngeniei eman fän iten asoren tipis, nge eman fän iten asoren kek, pwe kopwe föri asoren amusamusen tipis fän iter.
NUM 8:13 Iwe, kopwe apini fän itei ekewe mwän seni ewe ainangen Lefi pwe repwe eu asor ngeniei, nge Aaron me nöün kewe mwän repwe nemeniir.
NUM 8:14 Iei usun kopwe aimwüela ekewe mwän seni ewe ainangen Lefi seni lein ekewe aramasen Israel pwe ir repwe nei.
NUM 8:15 Iwe, wesin om limetiir o apiniir fän itei, ekewe mwän seni ewe ainangen Lefi repwe tolong lon ewe imwenfel seni mangaku o föri ar angang.
NUM 8:16 Pun ir eu lifang mi unus ngeniei seni lein ekewe aramasen Israel. Üa angeir pwe repwe nei, akasiwilin ekewe mwänichi me lein ekewe aramasen Israel meinisin.
NUM 8:17 Iwe, ekewe mwänichi meinisin seni lein ekewe aramasen Israel me ekewe mweinöün man nei. Lon ewe rän üa niela ekewe mwänichi meinisin lon ewe fanü Isip, üa apiniir fän itei.
NUM 8:18 Nge üa angei ekewe mwän seni ewe ainangen Lefi akasiwilin ekewe mwänichi meinisin me lein ekewe aramasen Israel.
NUM 8:19 Iwe, üa ngeni Aaron me nöün kewe ekewe mwän seni ewe ainangen Lefi pwe eu lifang seni ekewe aramasen Israel, pwe repwe föri ar angang ngeni ekewe chon Israel lon ewe imwenfel seni mangaku, repwe pwal föri asoren amusamusen tipis fän iter, pwe esap toriir mätter, lupwen repwe kaneto ren ewe imw mi pin.”
NUM 8:20 Iei usun Moses me Aaron me ekewe aramasen Israel meinisin ra föri ngeni ekewe mwän seni ewe ainangen Lefi meinisin mine ewe Samol mi Lapalap a allük ngeni Moses.
NUM 8:21 Iwe, ekewe mwän seni ewe ainangen Lefi ra püsin limetiir o sopuni üfer. Nge Aaron a apiniir pwe repwe eu asor ngeni ewe Samol mi Lapalap o föri asoren amusamusen tipis fän iter, pwe repwe limöch.
NUM 8:22 Mürin, ekewe mwän seni ewe ainangen Lefi ra tolong lon ewe imwenfel seni mangaku, pwe repwe föri angangen wiser fän nemenien Aaron me nöün kewe mwän. Usun ewe Samol mi Lapalap a allük ngeni Moses fän iter, iei usun ekewe aramas ra föri ngeniir.
NUM 8:23 Iwe, ewe Samol mi Lapalap a üreni Moses,
NUM 8:24 “Iei ewe akot ngeni ekewe mwän seni ewe ainangen Lefi: Seni ier rüe me limu feitä repwe tolong lon ewe imwenfel seni mangaku o föri angangen lon.
NUM 8:25 Nge lupwen ra ierini lime, repwe ükütiu seni angangen wiser.
NUM 8:26 Iwe, ra tongeni alisi chiener kewe le föri ewe angangen lon ewe imwenfel seni mangaku, nge esap chüen wor ar nemenem. Iei usun kopwe awisa ekewe mwän seni ewe ainangen Lefi ngeni wiser.”
NUM 9:1 Iwe, lon aeuin maramen ewe aruuen ier mürin än chon Israel towu seni ewe fanü Isip, ewe Samol mi Lapalap a kapas ngeni Moses me lon ewe fanüapön Sinai,
NUM 9:2 “Kopwe üreni ekewe aramasen Israel pwe repwe föri ewe Pasofer lon fansoun mi filitä.
NUM 9:3 Lekuniolupwinin ewe engol me rüanün ränin ei maram repwe föri ewe Pasofer, repwe pwal föri pwüngün me allükün meinisin.”
NUM 9:4 Iei mine Moses a üreni ekewe aramasen Israel pwe repwe föri ewe Pasofer.
NUM 9:5 Iwe, lekuniolupwinin ewe engol me rüanün ränin ewe aeuin maram ra föri ewe Pasofer lon ewe fanüapön Sinai. Ekewe aramasen Israel ra föri meinisin mine ewe Samol mi Lapalap a allük ngeni Moses.
NUM 9:6 Nge mi wor ekoch mwän ra limengau ren ar atapa eman somä, iei mine resap tongeni eti ewe pasofer lon ewe rän. Iwe, ra feito ren Moses me Aaron lon ewe ränin o üreniir,
NUM 9:7 “Äm aia limengau ren äm atapa eman somä. Pwota äm aisap tongeni eäni ewe asor ngeni ewe Samol mi Lapalap fiti ekewe lusun aramasen Israel lon ewe fansoun mi filitä?”
NUM 9:8 Iwe, Moses a üreniir, “Oupwe mwo ekis witiwit tori üpwe silei mine ewe Samol mi Lapalap epwe allük usumi.”
NUM 9:9 Iwe, ewe Samol mi Lapalap a kapas ngeni Moses,
NUM 9:10 “Kopwe üreni ekewe aramasen Israel: Are eman mwän seni leimi ika seni mwirimwirimi kana a limengau ren an atapa eman somä ika a toau seni fanüan, ätewe epwe pwal tongeni föri ewe Pasofer ngeniei.
NUM 9:11 Ekei sokun aramas repwe tongeni föri ewe Pasofer lekuniolupwinin ewe engol me rüanün ränin ewe aruuen maram. Repwe ochoch ewe lamen Pasofer o mongö pilawa esap wor iis lon fiti chön irä mi kipwin.
NUM 9:12 Nge resap likiti och tori lesosor, resap pwal kupi efoch chün. Iwe, repwe chök föri pwüngün allükün ewe Pasofer meinisin.
NUM 9:13 Nge eman mwän mi limöch, esap pwal toau seni fanüan, are i esap mochen föri ewe Pasofer, epwe käriwu me lein aramasan, pun esap eäni ewe asor ngeniei lon ewe fansoun mi filitä. Iwe, ewe aramas epwe angei chappen an tipis.
NUM 9:14 Nge are eman chon ekis mi nom remi a mochen föri ewe pasofer ngeniei, epwe chök föri lon pwüngün me allükün ewe Pasofer. Iwe, epwe chök wor eu allük fän iten chon ekis me chon wilipos.”
NUM 9:15 Iwe, lon ewe rän ewe imwenfel seni mangaku a kaütä, iei ewe ia ekewe allük ra nom ie, ewe kuchu a pwölüela. Nge seni lekuniol tori lesosor ewe kuchu asen ewe imwenfel seni mangaku a usun chök ekkei.
NUM 9:16 Iei usun a fis fansoun meinisin. Ewe kuchu a pwölüela ewe imwenfel seni mangaku lerän, nge lepwin a usun chök ekkei.
NUM 9:17 Iwe, iteiten fansoun, lupwen ewe kuchu a wiitä seni won ewe imwenfel seni mangaku, ekewe aramasen Israel ra sai. Nge ewe ia ewe kuchu a üla ie, ekewe aramasen Israel ra aüetä imwer.
NUM 9:18 Iwe, ekewe aramasen Israel ra sai fän än ewe Samol mi Lapalap allük, ra pwal aüetä imwer fän an allük. Ükükün fansoun än ewe kuchu nom asen ewe imwenfel seni mangaku, pwal iei ükükün fansoun ra nonom lon ewe leni.
NUM 9:19 Iwe, are ewe kuchu a nonomotam asen ewe imwenfel seni mangaku lon chomong rän, ekewe aramasen Israel resap sai, pun ra aleasochis ngeni ewe Samol mi Lapalap.
NUM 9:20 Lon ekoch fansoun ewe kuchu a nom asen ewe imwenfel seni mangaku ekoch chök rän. Iwe, fän än ewe Samol mi Lapalap allük ra nom lon ewe leni, nge fän an allük ra pwal sai.
NUM 9:21 Iwe, lon ekoch fansoun ewe kuchu a chök üla seni lekuniol tori lesosor. Nge lesosor, lupwen ewe kuchu a wiitä, ra sai. Ika mwo lerän ika lepwin, lupwen ewe kuchu a wiitä, ra sai.
NUM 9:22 Ese lifilifil are ewe kuchu a üla asen ewe imwenfel seni mangaku ruu rän ika eu maram ika eu ier, ekewe aramasen Israel ra chök nonom lon lenier, nge resap sai. Nge lupwen ewe kuchu a wiitä, ra chök sai.
NUM 9:23 Iwe, fän än ewe Samol mi Lapalap allük ra nonom lon lenier, nge fän an allük ra pwal sai. Ra chök aleasochis ngeni än ewe Samol mi Lapalap allük Moses a ngeniir.
NUM 10:1 Iwe, ewe Samol mi Lapalap a üreni Moses,
NUM 10:2 “Kopwe föri ruofoch rappwa seni silifer mi nechenech ngeni ama. Iwe, kopwe ettikiir, lupwen kopwe körifengeni ekewe aramasen Israel, pwal lupwen repwe atomwala imwer.
NUM 10:3 Iwe, lupwen ekewe ruofoch rappwa repwe tikitam, ekewe aramasen Israel meinisin repwe mwichefengen reöm leasamalapen ewe imw mangaku ia aramas ra churiei ie.
NUM 10:4 Nge ika efoch chök a tik, ekewe souemwen, ekewe mwänirelan ekewe ainangen Israel repwe mwichefengen reöm.
NUM 10:5 Iwe, lupwen oupwe ettiki ewe tikin asilesil mi tikimoch, ekewe aramas mi nonom peliötiuen ewe imwenfel seni mangaku repwe sai.
NUM 10:6 Nge lupwen oupwe ettiki ewe tikin asilesil mi tikimoch fän aruuan, ekewe mi nonom peliörün repwe sai. Ewe tikin asilesil mi tikimoch epwe tik iteiten fansoun repwe sai.
NUM 10:7 Iwe, lupwen ekewe aramasen Israel repwe mwichefengen, oupwe chök ettikitama ekewe rappwa, nge ousap ettiki ewe tikin asilesil mi tikimoch.
NUM 10:8 Iwe, nöün Aaron kewe mwän ekewe souasor repwe ettiki ekewe rappwa. Ei epwe eu allük fochofoch ngenikemi seni eu täppin aramas tori eu täppin.
NUM 10:9 Iwe, lupwen oupwe feila maun ngeni chon oputakemi mi ariaföüükemi me lon fanüemi, oupwe ettiki ewe tikin asilesilen maun ren ekewe rappwa. Mürin, ngang ewe Samol mi Lapalap ämi we Kot üpwe alisikemi o amanauakemi seni chon oputakemi.
NUM 10:10 Oupwe ettiki ekewe rappwa pwal lon ränin ämi pwapwa, lupwen fansoun ämi kewe chulap mi kefilitä me lepoputän ekewe maram. Oupwe ettiki ekewe rappwa lupwen fansoun ämi eäni asoren kek me asoren kinamwe. Mürin üpwe alisikemi. Ngang ewe Samol mi Lapalap ämi we Kot.”
NUM 10:11 Iwe, lon aruuen ränin ewe aruuen maram lon aruuen ier mürin än chon Israel towu seni Isip, ewe kuchu a wiitä seni won ewe imwenfel seni mangaku ewe ia ekewe allük ra nom ie.
NUM 10:12 Iwe, ekewe aramasen Israel ra sai seni ewe fanüapön Sinai lon tettelir. Iwe, ewe kuchu a üla lon ewe fanüapön Paran.
NUM 10:13 Ekkärän iei aeuin ar sai fän än ewe Samol mi Lapalap allük ngeni Moses.
NUM 10:14 Iwe, ekewe mwich mi nom lon kinikinin Juta ra akom le sai lon tettelir fän ar filäik. Nge Nason nöün Aminatap mwän i souemwenin chon ewe ainangen Juta.
NUM 10:15 Iwe, Netanel nöün Suar mwän i souemwenin chon ewe ainangen Isakar.
NUM 10:16 Nge Eliap nöün Helon mwän i souemwenin chon ewe ainangen Sepulon.
NUM 10:17 Iwe, mürin än ewe imwenfel seni mangaku katomwola, nöün Kerson me Merari kewe mwän mi wisen mwärei ra sai.
NUM 10:18 Mürin ekewe mwich mi nom lon kinikinin Rupen ra sai lon tettelir fän ar filaik. Nge Elisur nöün Seteur mwän i souemwenin chon ewe ainangen Rupen.
NUM 10:19 Iwe, Selumiel nöün Surisatai mwän i souemwenin chon ewe ainangen Simeon.
NUM 10:20 Nge Eliasaf nöün Teuel mwän i souemwenin chon ewe ainangen Kat.
NUM 10:21 Mürin, än Kohat cho ra sai. Ra mwärei ekewe mettoch mi pin. Nge lupwen ra tori ewe leni ia ra asösö ie, ewe imwenfel seni mangaku a fen kaütä.
NUM 10:22 Mürin, ekewe mwich mi nom lon kinikinin Efraim ra sai lon tettelir fän ar filaik. Nge Elisama nöün Amihut mwän i souemwenin chon ewe ainangen Efraim.
NUM 10:23 Iwe, Kamaliel nöün Petasur mwän i souemwenin chon ewe ainangen Manasa.
NUM 10:24 Nge Apitan nöün Kiteoni mwän i souemwenin chon ewe ainangen Peniamin.
NUM 10:25 Iwe, ekewe mwich mi nom lon kinikinin Tan ra kükümwirifoch seni ekewe mwich meinisin. Ra sai lon tettelir fän ar filaik, nge Ahieser nöün Amisatai mwän i souemwenin chon ewe ainangen Tan.
NUM 10:26 Iwe, Pakiel nöün Okran mwän i souemwenin chon ewe ainangen Aser.
NUM 10:27 Nge Ahira nöün Enan mwän i souemwenin chon ewe ainangen Naftali.
NUM 10:28 Iei tettelin än ekewe aramasen Israel sai lon ar kewe mwich iteiten fansoun ar sai.
NUM 10:29 Iwe, Moses a üreni Hopap nöün Setiro we mwän ewe re Mitian, nge Setiro semen pwülüen Moses, “Iei äm aipwe le sai ngeni ewe leni ewe Samol mi Lapalap a pwon pwe epwe ngenikem. Kopwe etikem, nge äm aipwe kirikiröch ngonuk, pun ewe Samol mi Lapalap a pwon pwe epwe awöüü ekewe chon Israel.”
NUM 10:30 Nge Hopap a üreni, “Üsap etikemi. Üpwe liwinsefäliti poputän fanüei me aramasei.”
NUM 10:31 Iwe, Moses a üra, “Üa tüngoreek, kose mochen kosap likitikem. Pun en ka silei ia aipwe aüetä imwem ie lon ewe fanüapö. En kopwe emwenikem.
NUM 10:32 Iwe, are kopwe etikem, aipwe pwal ngonuk ewe feiöch ewe Samol mi Lapalap epwe ngenikem.”
NUM 10:33 Iwe, ekewe aramasen Israel ra sai seni chukun ewe Samol mi Lapalap o sai lon ükükün ülüngat rän. Nge än ewe Samol mi Lapalap we pworun pwon a akomwola mwer, pwe epwe kütta ia repwe asösö ie.
NUM 10:34 Iwe, kuchun ewe Samol mi Lapalap a nom wor lerän iteiten fansoun lupwen ra sai seni lenier.
NUM 10:35 Iwe, iteiten fansoun lupwen ewe pworofel a sai, Moses a apasa, “Äm Samol mi Lapalap, kopwe ütä o atoropasafeili chon pälüenuk, nge ekewe mi oputok repwe sü me mwom.”
NUM 10:36 Nge iteiten fansoun lupwen ewe pworofel a asösö, Moses a apasa, “Äm Samol mi Lapalap, kopwe liwinto ren ekei ngeröüröün chon Israel.”
NUM 11:1 Nge ekewe aramas ra popuetä le lal ngeni ewe Samol mi Lapalap usun ar weires. Iwe, lupwen ewe Samol mi Lapalap a rong, a song o awora eu ekkei lefiler. A küwu me leir o kenala eu kinikinin lesopun ewe ia ra nonom ie.
NUM 11:2 Mürin, ekewe aramas ra siö ngeni Moses. Nge Moses a iotek ngeni ewe Samol mi Lapalap. Iwe, ewe ekkei a kunula.
NUM 11:3 Iwe, ra aita ngeni ewe leni Tapera , pun ewe ekkei seni ewe Samol mi Lapalap a küwu me leir.
NUM 11:4 Iwe, a wor eu mwichen chon ekis mi ngau mi eti ekewe chon Israel lon ar sai. Ekei aramas ra mwäräkich won fituk, pwal ekewe aramasen Israel ra lalsefäl o apasa, “Amwo sia fen ochoch fituk.
NUM 11:5 Sia chechemeni ekewe ik sia mongö lon Isip, nge sisap möni. Sia pwal chechemeni ach ochoch küri me senia, nengi me anion pwal ninnikü.
NUM 11:6 Nge iei sia chök apwangapwangala. Esap fokun wor och sokun mongö lükün ewe mana sia küna.”
NUM 11:7 Iwe, ewe mana a usun chök kükün föün irä, nge anüwan a oleolepwech.
NUM 11:8 Iwe, ekewe aramas ra fetalfeil o ionifengeni ewe mana, ra pwal fööira lon lenien fööir ika wüsi lon lenien wüsüs. Mürin ra kuku lon nape o nokopuni. Iwe, nennan a usun nennen nokop mi firain lon apüra.
NUM 11:9 Iwe, lupwen amurenipwin a püngütiu lepwin won ewe ia ra nonom ie, ewe mana a pwal püngütiu.
NUM 11:10 Iwe, Moses a rong än ekewe aramas lal lon en me asamalapen imwan imw mangaku lon iteiten en me an famili. Iwe, ewe Samol mi Lapalap a fokun song, nge Moses a weires ren.
NUM 11:11 Iwe, Moses a aisini ewe Samol mi Lapalap, “Pwota ka aweiresiei ngang noum chon angang? Pwota kosap ümöümöch ngeniei pwe ka fen uwätä woi weiresin tümwünün ekei aramas meinisin?
NUM 11:12 Ifa usun, upun woi ir meinisin? Ir nei, pwe kopwe üreniei pwe üpwe pwisiir lepei usun eman chon tümwün a pwisi eman mönükol mi chüen oupw? Ifa usun, üpwe pwisirelong lon ewe fanü ka pwon ngeni ar kewe lewo pwe kopwe ngeniir?
NUM 11:13 Ia üpwe küt me ie fituk pwe üpwe ngeni ekei aramas meinisin? Pun ra lal ngeniei o üra, ‘Kopwe ngenikem fituk pwe aipwe ochoch.’
NUM 11:14 Ngang üsap tufich le akaleäman ngeni weiresin tümwünün ekei aramas, pun a kon chou ngeniei.
NUM 11:15 Nge are kopwe föri iei usun ngeniei, kopwe ümöümöch ngeniei o nieila iei chök pwe üsap chüen küna ei sokun weires.”
NUM 11:16 Iwe, ewe Samol mi Lapalap a üreni Moses, “Kopwe körato rei fik mwän seni lein ekewe souakomwen Israel, chokewe ka sileer pwe ir souakom me sounemenemen ekewe aramas. Kopwe emwenireto ren ewe imw mangaku ia aramas ra churiei ie, pwe repwe etuk le ütä ikenan.
NUM 11:17 Ngang üpwe feitiu o kapas ngonuk ikenan. Iwe, üpwe angei och manamanen ewe ngün mi nom womw o isetä wor. Repwe etuk le mwärelong fän weiresin tümwünün ekewe aramas pwe kosap akaleäman le mwärelong fan.
NUM 11:18 Iwe, kopwe üreni ekewe aramas, ‘Oupwe apinikemi fän iten lesor pwe oupwe ochoch fituk. Pun ewe Samol mi Lapalap a rongorong ämi lal pwal ämi apasa: Iö epwe ngenikem ochäm fituk? Pun aia nonomöch lon Isip. Iei mine ewe Samol mi Lapalap epwe ngenikemi fituk pwe oupwe ochoch.
NUM 11:19 Nge ousap ochoch fituk lon eu chök rän ika ruu rän ika limu rän ika engol rän ika rüe rän,
NUM 11:20 pwe lon unusen eu maram, tori epwe nipoon ngenikemi o notä womi. Pun oua oput ewe Samol mi Lapalap mi nom lefilemi o lal ngeni lupwen oua apasa: Pwota mwo chök sia towu seni Isip?’”
NUM 11:21 Nge Moses a üreni Kot, “Iei üa emweni wonopükü ngeröü aramas, nge en ka apasa pwe kopwe ngeniir fituk, pwe repwe ochoch lon ükükün unusen eu maram.
NUM 11:22 Ifa usun, epwe naf ekewe pwiin sip me kow, pwe repwe ninnila fän iter? Ika epwe naf ngeniir ikenen leset meinisin?”
NUM 11:23 Nge ewe Samol mi Lapalap a pälüeni Moses, “Ifa usun, a aükük ai manaman? Iei kopwe küna ika ai kapas ngonuk epwe fis ika esap fis.”
NUM 11:24 Iwe, Moses a feila o asile ngeni ekewe aramas än ewe Samol mi Lapalap kapas. A emwichato fik mwän seni me lein ekewe souakomwen ekewe aramas o anomuur pwelin ewe imwenfel seni mangaku.
NUM 11:25 Mürin, ewe Samol mi Lapalap a feitiu lon ewe kuchu o kapas ngeni Moses. A angei och manamanen ewe ngün mi nom won Moses o isetä won ekewe fik souakom. Iwe, lupwen ewe ngün a nom wor, ra osuni. Nge mürin resap chüen osunisefäli.
NUM 11:26 Nge mi wor ruoman mwän iter Eltat me Metat ra alealaong lein ekewe fik ra chök nom lon ewe ia ra nonom ie, nge resap feila ren ewe imwenfel seni mangaku. Iwe, ewe ngün a feito wor pwe ra pwal osuni me ewe ia ra nonom ie.
NUM 11:27 Iwe, eman alüal a säla ren Moses o üreni, “Eltat me Metat ra osuni me lon ewe leni ia ra nonom ie.”
NUM 11:28 Nge Josua nöün Nun mwän, nöün Moses we soualilis seni lealüalün, a apasa, “Ai samol Moses, kopwe aükätiu ar osuni.”
NUM 11:29 Nge Moses üreni, “Ifa usun, ka apangau won wisei? Amwo, nöün ewe Samol mi Lapalap aramas meinisin repwe soufos, pwe epwe anomu Ngünün wor.”
NUM 11:30 Mürin, Moses me ekewe souakomwen Israel ra liwiniti ewe ia ekewe aramasen Israel ra nonom ie.
NUM 11:31 Iwe, ewe Samol mi Lapalap a awora och asepwäl mi pönato mansüsü iter kweil seni lematau. Iwe, ra nom pwelin ewe ia ekewe aramasen Israel ra nonom ie ükükün langatamen än eman sai lon eu rän me lepelian meinisin, nge ra ässitiu tori ükükün ülüngat fiit seni won pwül.
NUM 11:32 Iwe, ekewe aramas ra ütä o ionifengeni ekewe kweil lon unusen ewe rän me unusen ewe pwin tori unusen ewe rän mürin. Nge ätewe mi chokükün ionian a ioni ükükün ülüngat ngeröü wonopükü paun. Iwe, ra apwaseer pwelin ünükün lenier we.
NUM 11:33 Nge lupwen ra chüen ochoch ewe fituk, nge esamwo itela, ewe Samol mi Lapalap a fokun song ngeniir, pwe a niela ekewe aramas ren eu mätter mi watte.
NUM 11:34 Iei popun ewe leni a iteni Kiprot-atawa , pun ikenan ra peiaseni ekewe aramas mi mwäräkich.
NUM 11:35 Iwe, ekewe aramas ra sai seni Kiprot-atawa o sai ngeni Haserot. Iwe, ra nonom Haserot.
NUM 12:1 Iwe, Miriam me Aaron ra esita Moses pokiten ewe fin Kuus Moses a pwülüeni.
NUM 12:2 Ra apasa, “Ifa usun, ewe Samol mi Lapalap a chök wesewesen fos ngeni Moses? Esap pwal fos ngenikich?” Iwe, ewe Samol mi Lapalap a rong ei fos.
NUM 12:3 Nge Moses eman mwän mi tipetekison, a fokun tipetekison seni aramasen fanüfan meinisin.
NUM 12:4 Iwe, ewe Samol mi Lapalap a müttir kapas ngeni Moses, Aaron me Miriam, “Oupwe towu ämi me ülüman o feila ren ewe imw mangaku ia aramas ra churiei ie.” Iwe, ir me ülüman ra feila.
NUM 12:5 Mürin, ewe Samol mi Lapalap a feitiu lon eu ürekuchu, a ütä leasamalapen ewe imwenfel seni mangaku o körato Aaron me Miriam. Iwe, ir me ruoman ra feito.
NUM 12:6 Iwe, a üreniir, “Oupwe aüseling ai kapas: Are mi wor eman soufos leimi, ngang ewe Samol mi Lapalap üpwe pwäri ngeni üsi lon künan, üpwe pwal kapas ngeni lon an tan.
NUM 12:7 Nge esap iei usun ren nei ei chon angang Moses. Pun üa lükü ngeni nei aramasen Israel meinisin.
NUM 12:8 Üa fos newenewen ngeni lon kapas mi fat, nge sap lon kapas monomon. Nge i a fen küna lapalapei. Pwota chök ousap niuokus le esita nei ei chon angang Moses?”
NUM 12:9 Iwe, ewe Samol mi Lapalap a song ngeniir. Mürin a feila seniir.
NUM 12:10 Nge lupwen ewe kuchu a wiitä seni ewe imw mangaku, nengeni, Miriam a üri rupun pwötür pwe inisin a pwechepwech usun snow. Iwe, Aaron a sap ngeni Miriam o küna pwe a üri rupun pwötür.
NUM 12:11 Mürin, Aaron a üreni Moses, “Ai samol, kose mochen kosap amwöchü äm tipis aia föri ngonuk lon äm miritingau.
NUM 12:12 Kosap mwütätä pwe Miriam epwe wewe ngeni eman mi mäla, lupwen a uputiu, mi pweila esop fitukan.”
NUM 12:13 Iwe, Moses a siö ngeni ewe Samol mi Lapalap, “Üa tüngor ngonuk ai Kot, kose mochen kopwe apöchöküla neminei.”
NUM 12:14 Nge ewe Samol mi Lapalap a üreni Moses, “Ifa usun, are saman a atufa mesan, neminewe esap säw lon ükükün fisu rän? Epwe kaimwüla lükün ewe ia oua nonom ie lon ükükün fisu rän, mürin a tongeni liwinsefäl.”
NUM 12:15 Iei mine Miriam a imwüla lükün ewe ia ra nonom ie lon ükükün fisu rän. Iwe, ekewe aramas resap sai tori Miriam a liwiniti lenier we.
NUM 12:16 Iwe, mürin, ekewe aramas ra sai seni Haserot tori ewe fanüapön Paran o nonom ikenan.
NUM 13:1 Iwe, ewe Samol mi Lapalap a üreni Moses,
NUM 13:2 “Kopwe tinala ekoch mwän pwe repwe operi ewe fanü Kanaan, ewe fanü üpwe ngeni ekewe aramasen Israel. Kopwe tinala akaeman souemwen seni eu me eu ainangen semelaper kewe.”
NUM 13:3 Iei mine Moses a tinirela seni ewe fanüapön Paran, usun ewe Samol mi Lapalap a allük. Nge ekewe mwän meinisin ir mwänirelan ekewe aramasen Israel.
NUM 13:4 Iwe, ikkei iter: Samua nöün Sakur mwän seni ewe ainangen Rupen,
NUM 13:5 Safat nöün Hori mwän seni ewe ainangen Simeon,
NUM 13:6 Kalep nöün Jefune mwän seni ewe ainangen Juta,
NUM 13:7 Ikal nöün Josef mwän seni ewe ainangen Isakar,
NUM 13:8 Hosea nöün Nun mwän seni ewe ainangen Efraim,
NUM 13:9 Palti nöün Rafu mwän seni ewe ainangen Peniamin,
NUM 13:10 Katiel nöün Soti mwän seni ewe ainangen Sepulon,
NUM 13:11 Kati nöün Susi mwän seni ewe ainangen Josef, wesewesen seni ewe ainangen Manasa,
NUM 13:12 Amiel nöün Kemali mwän seni ewe ainangen Tan,
NUM 13:13 Setur nöün Mikael mwän seni ewe ainangen Aser,
NUM 13:14 Napi nöün Wofsi mwän seni ewe ainangen Naftali,
NUM 13:15 Keuel nöün Maki mwän seni ewe ainangen Kat.
NUM 13:16 Ikkei ir ekewe mwän Moses a tinirela pwe repwe operi ewe fanü. Nge Hosea nöün Nun we mwän Moses a aita ngeni Josua.
NUM 13:17 Iwe, lupwen Moses a tinirela, a üreniir, “Oupwe feitä lon ewe fanü Nekep o feila ngeni ewe fanü mi chukuchukutä,
NUM 13:18 pwe oupwe ouwasacha lapalapen ewe fanü, are ekewe aramas mi nonom won ra pöchökül ika apwangapwang, are ra chokükün ika chomong.
NUM 13:19 Oupwe ouwasacha are ewe fanü a mürina ika ngau, are ar kewe telinimw ra imweimw lon telinimw resap tit ika telinimw mi pöchökül tittir,
NUM 13:20 are ewe fanü a fanüeräs ika esap, are a mär irä won ika esap. Oupwe tipepwora o uwato ekoch föün irän ewe fanü.” Iwe, ei fansoun a otun nupun mwen uän irän wain.
NUM 13:21 Iwe, ekewe chon op ra feitä o operi ewe fanü seni ewe fanüapön Sin tori Rehop arap ngeni ewe al a ale ngeni Hamat.
NUM 13:22 Ra feitä akomw lon ewe fanü Nekep o tori Hepron ia Ahiman, Sesai me Talmai, ekewe mwirimwirin Anak, ra imweim ie. Nge ewe telinimw Hepron a kaütä fisu ier mwen ewe telinimw Soan lon Isip a kaütä.
NUM 13:23 Iwe, ra tori ewe lemolun Eskol, ewe ia ra kini me ie eumw umwun föün wain mi umwumong. Iwe, ruoman leir ra ämwära won efoch ämwär. Ra pwal uwato ekoch föün apel me föün fiik.
NUM 13:24 Iwe, ra aita ngeni ewe leni lemolun Eskol pokiten ewe umwun föün wain ekewe re Israel ra kini me ikenan.
NUM 13:25 Iwe, amüchülan faik rän, ekewe chon op ra liwinto seni ar operi ewe fanü.
NUM 13:26 Iwe, ra feito ren Moses me Aaron me ekewe aramasen Israel meinisin mi nom lon Kates lon ewe fanüapön Paran. Iwe, ra apworausa ngeniir pworauser, ra pwal apii ngeniir uän irän ewe fanü.
NUM 13:27 Iwe, ra üreni Moses, “Äm aia tori ewe fanü ia ka tinikeemila ie. Ewe fanü eu fanü mi pwülüöch o fanüeräs, nge iei uan.
NUM 13:28 Nge ekewe aramas mi nonom lon ewe fanü ra pöchökül, pwal ekewe telinimw ra watte o pöchökül tittir. Iwe, ikenan aia pwal mwo nge küna ekewe mwirimwirin Anak mi mwänemong.
NUM 13:29 Ekewe chon Amalek ra nonom lon ewe fanü Nekep. Iwe, ekewe chon Hit, chon Jepus me chon Amor ra nonom lon ewe fanü mi chukuchukutä, nge ekewe chon Kanaan ra nonom aroset me aropen ewe chanpupu Jortan.”
NUM 13:30 Iwe, Kalep a amosonosona ekewe aramas mi mwichefengen ren Moses o üreniir, “Ousipwe feitä iei chök o liapeni ewe fanü, pun sia fokun tongeni.”
NUM 13:31 Nge chienen Kalep kewe mi eti le feitä ra apasa, “Sisap tongeni fiu ngeni ekewe aramas, pun ra kon pöchökül senikich.”
NUM 13:32 Iei usun ra apworausa ngeni ekewe aramasen Israel pworaus mi mwäl fän iten ewe fanü ra operi. Ra apasa, “Ewe fanü aia fetalfeil lon eu fanüen ochoch aramas. Nge ekewe aramas aia küneer ra fokun mwänätam.
NUM 13:33 Iwe, ikenan aia pwal küna ekewe mwänämong, ekewe mwirimwirin Anak. Nge äm aia awewe ngenikem lifichimas me lükür, pwal usun chök me rer.”
NUM 14:1 Mürin, ekewe aramasen Israel meinisin ra leüömong le puchör o kechü lon unusen ewe pwin.
NUM 14:2 Iwe, ra lal ngeni Moses me Aaron o üreniir, “Amwo aipwe fen mäla chök lon ewe fanü Isip, ika aipwe fen mäla lon ei fanüapö.
NUM 14:3 Pwota ewe Samol mi Lapalap a emwenikeemito lon ei fanü pwe aipwe mäla lon maun, nge pwülüem me nöüm kewe semirit repwe oola? Epwe fen öch äm aipwe liwinsefäliti Isip.”
NUM 14:4 Iwe, ra kapasfengen lefiler, “Ousipwe le filätä eman nöüch souemwen pwe sipwe liwiniti Isip.”
NUM 14:5 Mürin, Moses me Aaron ra chapetiu won pwül fän mesen ekewe aramasen Israel meinisin mi mwichefengen.
NUM 14:6 Nge Josua nöün Nun mwän me Kalep nöün Jefune mwän, chienen chokewe mi operi ewe fanü Kanaan, ra kamwei üfer fän ar letipeta.
NUM 14:7 Iwe, ra üreni ekewe aramasen Israel meinisin, “Ewe fanü aia saifetal lon o operi fokun eu fanü mi unusen mürina.
NUM 14:8 Are ewe Samol mi Lapalap epwe kirikiröch ngenikich, epwe emwenikichelong o ngenikich ewe fanü mi pwülüöch o fanüeräs.
NUM 14:9 Nge ousap fokun ü ngeni ewe Samol mi Lapalap, ousap pwal niuokusiti aramasen ewe fanü, pun ir chök okufuach. Iwe, ar apilükülük a sü seniir, nge ewe Samol mi Lapalap a etikich. Ousap fokun niuokusitiir.”
NUM 14:10 Nge ekewe aramas meinisin ra üra pwe repwe monei ngeniir fau. Mürin, lingen ewe Samol mi Lapalap a pwä won ewe imwenfel seni mangaku ngeni ekewe aramasen Israel meinisin.
NUM 14:11 Iwe, ewe Samol mi Lapalap a üreni Moses, “Ifa ükükün fansoun än ekei aramas turunufaseei? Ifa ükükün fansoun ar resap mochen lüküei, inamwo ika ra fen küna ekewe manaman üa föri lefiler?
NUM 14:12 Üpwe ni ngeniir mätter o aroserela. Nge üpwe föri senuk eu mwü mi watte o pöchökül seniir.”
NUM 14:13 Nge Moses a üreni ewe Samol mi Lapalap, “En ka emwenawu ekei aramas seni Isip fän om manaman. Epwe ifa usun, ika ekewe chon Isip repwe rongorong usun mine ka föri ngeniir?
NUM 14:14 Repwe asile ngeni chon ei fanü ei pworaus. Ir ra fen rongorong pwe en ai Samol mi Lapalap ka nom lein ekei aramas, pun en ka newenewen ngeniir, pwal om kuchu a ütä wor, nge en ka akomw mwer lon eu ürekuchu lerän me eu üreekkei lepwin.
NUM 14:15 Are ka nipöküela ekei aramas iei chök, chon ekewe mwü mi rongorong usun mine ka föri repwe apasa,
NUM 14:16 ‘Pokiten ewe Samol mi Lapalap esap tongeni emwenalong ekewe aramas lon ewe fanü a pwon pwe epwe ngeniir, iei mine a nirela lon ewe fanüapö.’
NUM 14:17 Nge iei üa tüngor ngonuk, ai Samol, kopwe pwäri om manaman ngenikem usun ka fen apasa lon om pwon,
NUM 14:18 ‘Ewe Samol mi Lapalap a songomang o wöün tong, a amusala föföringau me pupungau, nge esap amusafatei chon tipis, pwe a liwini än samasam tipis won nöür tori aülüngatin me arüanün tettelin aramas.’
NUM 14:19 Kose mochen kopwe amusala än ekei aramas tipis lon om tong mi lapalap, usun ka fen amusala än ekewe aramas tipis seni ewe fansoun ar towu seni Isip tori iei.”
NUM 14:20 Mürin, ewe Samol mi Lapalap a üreni Moses, “Üa amusala ar tipis usun ka tüngor.
NUM 14:21 Nge ellet mwo manauei me ai we ling mi aura unusen fanüfan,
NUM 14:22 esap wor eman lein ekewe mwän repwe tolong lon ewe fanü. Ra küna ai ling me ai kewe manaman üa föriir lon Isip pwal lon ewe fanüapö, nge ra chök sotuniei fän chomong, resap pwal aleasochisi aloi.
NUM 14:23 Esap wor eman leir epwe tolong lon ewe fanü üa pwon fän akapel ngeni ar kewe lewo. Esap fokun wor eman me lein chokewe mi turunufaseei repwe tolong lon ewe fanü.
NUM 14:24 Nge nei chon angang Kalep üpwe emwenalong lon ewe fanü a fen piin feila lon, pwe mwirimwirin repwe fanüeni, pun a sokola ekiekin lelukan, a pwal fokun aleasochisiei.
NUM 14:25 Iwe, pokiten ekewe chon Amalek me chon Kanaan ra nonom lemolun ewe fanü, lesor ämi oupwe kul o feila lon ewe fanüapö won ewe al a ale ngeni ewe Setipar.”
NUM 14:26 Iwe, ewe Samol mi Lapalap a üreni Moses me Aaron,
NUM 14:27 “Ifa ükükün fansoun än ei mwichen aramasangau lal ngeniei? Üa ku ren ai rongorong än ekei aramas lal ngeniei.
NUM 14:28 Oupwe üreniir pwe iei aloi ngang ewe Samol mi Lapalap, ‘Mwo manauei, mine oua apasa, iei üpwe föri ngenikemi.
NUM 14:29 Ämi oupwe mätiu lon ei fanüapö. Nge esap wor eman me lein iteitemi seni ier rüe feitä mi lal ngeniei,
NUM 14:30 epwe tolong lon ewe fanü üa pwon fän akapel pwe oupwe fanüeni, chilon chök Kalep nöün Jefune mwän me Josua nöün Nun mwän.
NUM 14:31 Nge nöümi semirit oua apasa pwe repwe oola, ngang üpwe emwenirelong lon ewe fanü ämi oua oputa, pwe repwe fanüeni.
NUM 14:32 Nge ämi oupwe mätiu lon ei fanüapö.
NUM 14:33 Iwe, nöümi repwe chon fofol man lon ewe fanüapö lon ükükün faik ier, repwe pwal riaföü pokiten ämi ousap allükülük, tori ewe amüchülan me leimi epwe mätiu lon ewe fanüapö.
NUM 14:34 Ükükün iteiten ekewe faik rän oua operi ewe fanü, iei ükükün ierin ämi oupwe uwei liwinin ämi föföringau. Pun eu ier epwe fän iten eu rän. Iei usun oupwe mefi weiresin ai ü ngenikemi lon ükükün faik ier.’
NUM 14:35 Ellet üpwe föri ei ngeni unusen ei mwich mi ngau ra chufengen lon ar ü ngeniei: Repwe mätiu o rosola lon ei fanüapö. Ngang ewe Samol mi Lapalap üa kapas.”
NUM 14:36 Nge ekewe mwän Moses a tinirela pwe repwe operi ewe fanü, ir ätekewe mi liwinto o uwato pworaus mi mwäl usun ewe fanü, pwe unusen ewe mwichen aramas ra popuetä lal ngeni Moses, ra mäla.
NUM 14:37 Pokiten ar uwato och pworaus mi mwäl usun ewe fanü, ra mäla ren och mätter fän mesen ewe Samol mi Lapalap.
NUM 14:38 Nge Josua nöün Nun mwän me Kalep nöün Jefune mwän ra manau me lein ätekewe mi feila operi ewe fanü.
NUM 14:39 Iwe, lupwen Moses a apworausa ekei kapas ngeni ekewe aramasen Israel meinisin, ra fokun lolilen.
NUM 14:40 Iwe, lesosorusichin sorotän ewe rän ra pwätä o feitä won ewe fanü mi chukuchukutä, pun ra apasa, “Sa mefi pwe sa tipis. Nge iei ousipwe feitä ngeni ewe fanü ewe Samol mi Lapalap a pwon ngenikich.”
NUM 14:41 Nge Moses a üreniir, “Pwota oua chök sopwela le purätiu än ewe Samol mi Lapalap allük? Ämi ousap win.
NUM 14:42 Ousap feitä pwe oute kuf ren chon oputakemi, pun ewe Samol mi Lapalap esap etikemi.
NUM 14:43 Pun ekewe chon Amalek me chon Kanaan ra nom ikenan, repwe nikemi lon maun. Pokiten oua kul seni ewe Samol mi Lapalap, i esap chüen etikemi.”
NUM 14:44 Iwe, ekewe aramas ra chök ouucho le feitä ngeni ewe fanü mi chukuchukutä. Nge ewe pworofel än ewe Samol mi Lapalap pwal Moses ra chök nonom lon ewe leni ia ra nonom ie.
NUM 14:45 Mürin, ekewe chon Amalek me ekewe chon Kanaan mi nom lon ewe fanü mi chukuchukutä ra feitiu o maun ngeniir. Ra akufu ekewe chon Israel o tapweriir tori Horma.
NUM 15:1 Iwe, ewe Samol mi Lapalap a ngeni Moses
NUM 15:2 ekei allük fän iten ekewe aramasen Israel pwe repwe apwönüetä me lon ewe fanü i epwe ngeniir pwe repwe fanüeni:
NUM 15:3 “Oupwe eäni asor ngeni ewe Samol mi Lapalap eman ätemwänin kow, ika eman ätemwänin sip, ika kuuch, pwe ämi soren kek ika sokun asoren pwon, ika asor seni püsin letipemi, ika asor lupwen fansoun ekewe chulap mi kefilitä, pwe eu asor ewe Samol mi Lapalap a efich pwoon.
NUM 15:4 Iwe, ewe aramas mi uwato an asor epwe pwal eäni asoren mongö ngeni ewe Samol mi Lapalap ruu paun pilawa mi amas o mürina nofitfengen me eu kuoch apüra.
NUM 15:5 Epwe pwal eäni asoren ün eu kuoch wain o achu ngeni eman me eman lam fän iten asoren kek ika sokun asor.
NUM 15:6 Iwe, are epwe eäni asor eman ätemwänin sip, epwe achu ngeni rüanü paun pilawa mi amas o mürina nofitfengen me eu esop kuoch apüra pwe eu asoren mongö.
NUM 15:7 Nge fän iten asoren ün epwe eäni asor eu esop kuoch wain pwe eu asor ewe Samol mi Lapalap a efich pwoon.
NUM 15:8 Iwe, lupwen ewe aramas epwe eäni asor ngeni ewe Samol mi Lapalap eman ätemwänin kow fän iten asoren kek ika sokun asoren pwon ika asoren kinamwe,
NUM 15:9 epwe achu ngeni ewe ätemwänin kow wonu paun pilawa mi amas o mürina nofitfengen me esop kalon apüra, pwe eu asoren mongö.
NUM 15:10 Epwe pwal eäni asoren ün esop kalon wain pwe eu asor ewe Samol mi Lapalap a efich pwoon.
NUM 15:11 Iei usun oupwe föri fän iten iteiten eman me eman ätemwänin kow ika ätemwänin sip, fän iten iteiten eman me eman ätemwänin lam ika apanen kuuch.
NUM 15:12 Ükükün iteiten ekewe mönün asor oupwe eäni asor, epwe pwal ina ükükün mine oupwe achu ngeniir.
NUM 15:13 Iwe, chon Israel meinisin, ir chon wilipos repwe föri pwüngün ekei lapalap, lupwen repwe asor ngeni ewe Samol mi Lapalap, pwe i epwe efich pwoon.
NUM 15:14 Nge are eman chon ekis mi siamüfetal remi, ika eman chon ekis mi nonom leimi seni eu täppin aramas tori eu täppin, a mochen eäni eu asor ngeni ewe Samol mi Lapalap, i a efich pwoon, epwe föri pwüngün mine oua föri.
NUM 15:15 Iwe, epwe chök wor eu allük fän itemi me fän iten ekewe chon ekis mi nom remi. Ei epwe eu allük tori feilfeilachök seni eu täppin aramas tori eu täppin. Ämi me ekewe chon ekis oua wewe chök me fän mesen ewe Samol mi Lapalap.
NUM 15:16 Iwe, epwe fokun wor eu chök allük me pwüng fän itemi me fän iten ekewe chon ekis mi nom remi.”
NUM 15:17 Iwe, ewe Samol mi Lapalap a ngeni Moses
NUM 15:18 pwal ekoch allük usun asor fän iten ekewe aramasen Israel, pwe repwe apwönüetä me lon ewe fanü i epwe emwenirelong lon:
NUM 15:19 “Lupwen oupwe eni mongön ewe fanü, oupwe aimwüela eu kinikin seni, pwe eu asor ngeni ewe Samol mi Lapalap.
NUM 15:20 Lupwen oua umuni pilawa, ewe efochun mwen öüwämi pilawa seni föün wiich mi fö oupwe eäni asor ngeni ewe Samol mi Lapalap usun chök ekewe föün wiich oua eäni asor seni ewe lenien wichiwich umwun wiich.
NUM 15:21 Oupwe eäni asor ngeni ewe Samol mi Lapalap eföü pilawa seni mwen öüwämi pilawa. Ei allük epwe fän itemi seni eu täppin aramas tori eu täppin.
NUM 15:22 Ewe Samol mi Lapalap a ngenikemi ekei allük meinisin Moses a aiti ngenikemi. Are oua atai eu lein ekei allük, nge sap ren mochenin letipemi,
NUM 15:23 ika mwirimwirimi kana ra pwal atai,
NUM 15:24 nge ewe mwichen aramas esap mefi pwe a mwäl, ikei mine oupwe föri: Unusen ewe mwichen aramas epwe eäni asor eman nienifön ätemwänin kow fän iten asoren kek ewe Samol mi Lapalap a efich pwoon. Repwe achu ngeni ewe asoren mongö me asoren ün usun mine a pwüng. Repwe pwal eäni asor eman ätemwänin kuuch fän iten asoren tipis.
NUM 15:25 Iwe, ewe souasor epwe föri asoren amusamusen tipis fän iten unusen ewe mwichen chon Israel. Ar föför mi mwäl epwe musala, pun esap fis seni mochenin letiper, ra pwal uwato ar asoren kek ewe Samol mi Lapalap a efich pwoon, me ar asoren tipis.
NUM 15:26 Iwe, unusen ewe mwichen chon Israel me ekewe chon ekis mi nom leir epwe musala ar mwäl, pun iteiter meinisin ra pachelong lon ewe föför mi mwäl esap fis ren mochenin letiper.
NUM 15:27 Iwe, are eman aramas a tipisin chechengau, epwe eäni asor eman liefefinin kuuch eu ierin fän iten asoren tipis.
NUM 15:28 Iwe, ewe souasor epwe föri asoren amusamusen tipis fän mesen ewe Samol mi Lapalap fän iten ewe aramas mi föri och mwäl, lupwen a tipisin chechengau. Iwe, epwe musala an tipis.
NUM 15:29 Iwe, epwe wor eu chök allük fän iten ätewe mi tipisin chechengau, ese lifilifil ika i eman lein ekewe aramasen Israel ika eman chon ekis mi nom leir.
NUM 15:30 Nge are eman a tipis seni mochenin letipan, ese lifilifil ika i eman chon wilipos ika eman chon ekis, ätewe a turunufasei ewe Samol mi Lapalap. Ewe aramas epwe käriwu seni me lein aramasan.
NUM 15:31 Pokiten ewe aramas a oput än ewe Samol mi Lapalap kapas o purätiu an allük, epwe wesewesen käriwu. An tipis epwe chök nonom won.”
NUM 15:32 Iwe, lupwen ekewe aramasen Israel ra nom lon ewe fanüapö, ra küna eman mwän a os mwüüch lon ewe ränin sapat.
NUM 15:33 Nge chokewe mi küna ätewe mi os mwüüch, ra emwenato ren Moses me Aaron pwal ren ekewe aramas meinisin.
NUM 15:34 Iwe, ra kalapusei ewe mwän, pun esap fat mine epwe fis ngeni.
NUM 15:35 Mürin, ewe Samol mi Lapalap a üreni Moses, “Ewe mwän epwe ninnila. Ekewe aramas meinisin repwe monei ngeni fau me lükün ewe ia oua nonom ie.”
NUM 15:36 Iei mine ekewe aramas meinisin ra emwenala ewe mwän lükün ewe ia ra nonom ie o monei ngeni fau tori a mäla, usun ewe Samol mi Lapalap a allük ngeni Moses.
NUM 15:37 Iwe, ewe Samol mi Lapalap a kapas ngeni Moses,
NUM 15:38 “Kopwe üreni ekewe aramasen Israel: Oupwe föri sokun fout lepwülün üfemi, ämi me mwirimwirimi kana. Oupwe pwal pacheetä won iteiten fout efoch säl mi arauarau.
NUM 15:39 Iwe, lupwen oupwe küna ewe fout, oupwe chechemeni ai kewe allük meinisin pwe oupwe aleasochisiir. Nge ousap tapwela ekiekin lelukemi me künan mesemi, usun a mecheres ngenikemi.
NUM 15:40 Iei usun oupwe chechemeni ai kewe allük meinisin o aleasochisiir pwe oupwe pin fän itei ngang ämi we Kot.
NUM 15:41 Ngang ewe Samol mi Lapalap ämi we Kot, üa emwenikemiiwu seni ewe fanü Isip pwe üpwe ämi Kot: Ngang ewe Samol mi Lapalap ämi we Kot.”
NUM 16:1 Iwe, Kora nöün Isar, nge Isar nöün Kohat, nge i nöün Lefi mwän, pwal Tatan me Apiram nöün Eliap kewe mwän me On nöün Pelet mwän seni ewe ainangen Rupen
NUM 16:2 ra ü ngeni Moses. A pwal chu ngeniir ükükün ruopükü lime chon Israel, ir souemwen mi iteüöch, ra fil seni ewe mwichen aramas pwe repwe nöür souemwen.
NUM 16:3 Iwe, ra mwichfengen o ü ngeni Moses me Aaron. Iwe, ra üreniir, “Ämi oua kon alapala nemeniemi. Pun unusen ei mwichen aramas a pin, nge ewe Samol mi Lapalap a nom lefiler. Pwota oua püsin atekiakemiitä won än ewe Samol mi Lapalap mwich?”
NUM 16:4 Iwe, lupwen Moses a rong ekei kapas, a chapetiu lepwül o iotek.
NUM 16:5 Mürin a üreni Kora me chienan kewe meinisin, “Lesosorun lesor ewe Samol mi Lapalap epwe pwärätä iön nöün pwal iön a pin. Epwe pwal pwärätä iön a mwüt ngeni pwe epwe kan ngeni. Ätewe Kot a filätä epwe kan ngeni.
NUM 16:6 Iei usun oupwe föri: Lesor, ämi Kora me chienom kewe meinisin oupwe angei sepien asoren ötüöt.
NUM 16:7 Oupwe uwalong ekkei lor o iseis apach mi pwokus wor fän mesen ewe Samol mi Lapalap. Nge ätewe ewe Samol mi Lapalap epwe filätä, i epwe pin. Ämi kana mwän seni ewe ainangen Lefi oua kon alapala nemeniemi.”
NUM 16:8 Iwe, Moses a pwal üreni Kora, “Iei oupwe aüseling, ämi chon ewe ainangen Lefi.
NUM 16:9 Ifa usun, esap naf ngenikemi pwe än chon Israel we Kot a aimwükemi seni ewe mwichen chon Israel, a pwal mwüt ngenikemi pwe oupwe kan ngeni o föri angangen lon än ewe Samol mi Lapalap imwenfel seni mangaku? Oua pwal ü mwen ewe mwichen aramas pwe oupwe angang ngeniir.
NUM 16:10 Kot a mwüt ngenikemi me pwimi kewe seni ewe ainangen Lefi pwe oupwe kan ngeni. Nge iei oua pwal kütta ewe wisen souasor.
NUM 16:11 Iei mine oua ü ngeni ewe Samol mi Lapalap, ämi me chienom kewe mi mwichefengen. Pun iö Aaron pwe oua lal ngeni?”
NUM 16:12 Mürin, Moses a titi Tatan me Apiram nöün Eliap kewe mwän. Nge ir ra üra, “Äm aisap feila.
NUM 16:13 Ifa usun, esap naf me reöm pwe ka emwenikeemiwu seni ewe fanü mi pwülüöch o fanüeräs, pwe kopwe nikem lon ewe fanüapö? Ifa usun, kopwe pwal seikuketä pwe kopwe samol wom?
NUM 16:14 Kosap fokun emwenikeemilong lon eu fanü mi pwülüöch o fanüeräs, kosap pwal ngenikem fanü me tanipin wain pwe aipwe fanüeni. Ifa usun, kopwe pwal atupu ekei aramas? Äm aisap feila.”
NUM 16:15 Mürin, Moses a fokun song ren ekei kapas o üreni ewe Samol mi Lapalap, “Kosap etiwa ar kewe asor. Ngang üsap mwo nge angei eman aas seniir, üsap pwal föri och mi mwäl ngeniir.”
NUM 16:16 Iwe, Moses a üreni Kora, “Ämi me chienom kewe meinisin, oupwe feito lesor ren ewe imw mangaku ia aramas ra churi Kot ie, ämi pwal Aaron.
NUM 16:17 Iwe, eman me eman leimi epwe angei an sepien asoren ötüöt, epwe iseis apach mi pwokus lon o uwato fän mesen ewe Samol mi Lapalap. Iwe, epwe wor ruopükü lime sepien asoren ötüöt, pwal en me Aaron oupwe uwato ämi sepien asoren ötüöt.”
NUM 16:18 Iei mine ekewe mwän meinisin ra angei ar sepien asoren ötüöt, ra uwalong ekkei lor o iseis apach mi pwokus wor. Iwe, ra ütä leasamalapen ewe imwenfel seni mangaku, nge Moses me Aaron ra pwal ütä rer.
NUM 16:19 Mürin, Kora a amwichafengeni ekewe aramas meinisin leasamalapen ewe imwenfel seni mangaku, pwe repwe ü ngeni Moses me Aaron. Iwe, lingen ewe Samol mi Lapalap a pwä ngeni ewe mwichen aramas meinisin.
NUM 16:20 Iwe, ewe Samol mi Lapalap a üreni Moses me Aaron,
NUM 16:21 “Oupwe aimwükemi seni ekei aramas pwe üpwe aroserela fän eu chök.”
NUM 16:22 Nge ir ra chapetiu lepwül o apasa, “Äm Kot, en popun manauen aramas meinisin. Ifa usun, kopwe song ngeni unusen ewe mwichen aramas are eman chök mwän a tipis?”
NUM 16:23 Mürin, ewe Samol mi Lapalap a kapas ngeni Moses,
NUM 16:24 “Kopwe üreni ekewe aramas pwe repwe sü seni imwen Kora, Tatan me Apiram.”
NUM 16:25 Mürin, Moses a feila ren Tatan me Apiram, nge ekewe souakomwen Israel ra tapwela mürin.
NUM 16:26 Iwe, a üreni ekewe aramas, “Üa tüngor ngenikemi, oupwe feil seni imwen ekei mwän mi föföringau. Ousap atapa och pisekir, pwe ousap pwal etiir le tolong lon ewe feiengau epwe toriir pokiten ar kewe tipis.”
NUM 16:27 Iei mine ekewe aramas ra sü seni imwen Kora, Tatan me Apiram. Nge Tatan me Apiram ra towu o ütä leasamalapen imwer kewe fiti pwülüer me nöür mwän pwal nöür semirit.
NUM 16:28 Iwe, Moses a üra, “Ren ei oupwe silei pwe ewe Samol mi Lapalap a akünöüei pwe üpwe föri ekei föför meinisin, nge üsap püsin ekiekietä.
NUM 16:29 Are ekei mwän ra mäla lon sokun mälan armamas, ika a fis ngeniir mine a fis ngeni aramas meinisin, ewe Samol mi Lapalap esap akünöüei.
NUM 16:30 Nge are ewe Samol mi Lapalap epwe afisätä och mettoch mi fö, are ewe pwül epwe sangfesen o oromirela fiti pisekir meinisin pwe ra feilmanauetiu lon lenien sotup, oupwe silei pwe ekei mwän ra turunufasei ewe Samol mi Lapalap.”
NUM 16:31 Iwe, wesin chök än Moses üra ekei kapas, ewe pwül fän Tatan me Apiram a sangfesen
NUM 16:32 o oromirela fiti ar famili meinisin, pwal chienen Kora kewe mwän meinisin me pisekir meinisin.
NUM 16:33 Iei usun ir meinisin ra feilmanauetiu lon lenien sotup fiti pisekir meinisin. Iwe, ewe pwül a pwölürela pwe ra mola seni me lein ewe mwichen aramas.
NUM 16:34 Iwe, ekewe chon Israel meinisin mi nom ünükür ra sü, lupwen ra rong ar puchör. Ra puchör le apasa, “Sipwe sü pwe ewe pwül esap pwal oromikichela.”
NUM 16:35 Nge ekkei a feitiu seni ewe Samol mi Lapalap o kenala ekewe ruopükü lime mwän mi eäni ekewe asoren ötüöt.
NUM 16:36 Mürin, ewe Samol mi Lapalap a kapas ngeni Moses,
NUM 16:37 “Kopwe üreni Eleasar nöün ewe souasor Aaron we mwän, epwe angei ekewe sepien asoren ötüöt seni lon molien ewe ekkei, pun ra pin. Epwe pwal atoropasala molien ewe ekkei ekis toau.
NUM 16:38 Nge ekewe sepien asoren ötüöt än ekewe mwän mi mäla pokiten ar tipis, repwe nechenech o achöpöp pwe pwölüpwölün ewe rongen asor. Pokiten ra aea le asor me fän mesen ewe Samol mi Lapalap, iei mine ra pin. Iwe, repwe eu asisilen fön ngeni ekewe aramasen Israel.”
NUM 16:39 Mürin, ewe souasor Eleasar a angei ekewe sepien asoren ötüöt mi för seni piras, chokewe mi kar ra aea le asor. Iwe, a necheer o achöpöpüür pwe pwölüpwölün ewe rongen asor.
NUM 16:40 Iwe, ekei pisek repwe achema ngeni ekewe aramasen Israel, pwe esap wor eman epwe kanoto pwe epwe keni apach mi pwokus fän mesen ewe Samol mi Lapalap, chilon chök ekewe mwirimwirin Aaron, pwe esap fis ngeni usun mine a fis ngeni Kora me chienan kewe. Iwe, ra föri meinisin usun mine ewe Samol mi Lapalap a allük ngeni Moses fän iten Eleasar.
NUM 16:41 Nge sorotän ewe rän ekewe aramasen Israel ra lal ngeni Moses me Aaron o apasa, “Ämi oua niela nöün ewe Samol mi Lapalap aramas.”
NUM 16:42 Iwe, lupwen ekewe aramas ra chufengen pwe repwe ü ngeni Moses me Aaron, ra kul ngeni ewe imw mangaku ia aramas ra churi Kot ie o küna pwe ewe kuchu a pwölüöla o lingen Kot a pwä.
NUM 16:43 Mürin, Moses me Aaron ra feito ren asamalapen ewe imw mangaku ia aramas ra churi Kot ie.
NUM 16:44 Nge ewe Samol mi Lapalap a üreni Moses,
NUM 16:45 “Oupwe merela seni ei mwichen aramas pwe üpwe aroserela fän eu chök.” Iwe, ir me ruoman ra chapetiu lepwül.
NUM 16:46 Mürin, Moses a üreni Aaron, “Kopwe angei om sepien asoren ötüöt, kopwe atolonga ekkei seni won ewe rongen asor o iseis apach mi pwokus won. Kopwe müttir uwala ren ewe mwichen aramas o föri asoren amusamusen tipis fän iter. Pun än ewe Samol mi Lapalap song a feitiu, nge ewe mätter a fen popuetä.”
NUM 16:47 Iei mine Aaron a angei ewe sepien asoren ötüöt, usun Moses a üreni, o säla lein ekewe aramas. Nge lupwen Aaron a küna pwe ewe mätter a fen popuetä lein ekewe aramas, a iseis apach mi pwokus lon ewe sepien asoren ötüöt o föri asoren amusamusen tipis fän iten ekewe aramas.
NUM 16:48 Iwe, a ütä lefilen ekewe mi mäla me ekewe mi manau, nge ewe mätter a kaüla.
NUM 16:49 Iwe, iteiten chokewe mi mäla ren ewe mätter ükükün engol me rüanüngeröü füpükü lükün chokewe mi mäla pokiten ar eti Kora le tipis.
NUM 16:50 Nge lupwen ewe mätter a kaüla, Aaron a liwinla ren Moses leasamalapen ewe imw mangaku ia aramas ra churi Kot ie.
NUM 17:1 Iwe, ewe Samol mi Lapalap a kapas ngeni Moses,
NUM 17:2 “Kopwe üreni ekewe aramasen Israel pwe repwe uwato engol me ruofoch wok, epwe efoch nge fän iten souemwenin eu me eu ar kewe ainang. Kopwe ruputi iten eman me eman won en me wokun.
NUM 17:3 Nge kopwe ruputi iten Aaron won wokun Lefi we. Epwe wor efoch wok fän iten eman me eman souemwenin eu me eu ainang.
NUM 17:4 Mürin, kopwe isenirelong lon ewe imw mangaku ia aramas ra churiei ie mwen ewe pworofel, ewe ia üa churuk ie.
NUM 17:5 Iwe, wokun ätewe üa filätä epwe fasar. Iei usun üpwe aükätiu än ekewe aramas lal ngonuk.”
NUM 17:6 Iwe, Moses a apworausa ngeni ekewe aramasen Israel ekei kapas. Iwe, nöür kewe souemwen ra ngeni Moses engol me ruofoch wok, efoch wok nge eman souemwenin ar kewe ainang. Nge wokun Aaron we a pwal nom leir.
NUM 17:7 Iwe, Moses a isenalong ekewe wok lon ewe imwenfel seni mangaku mwen än ewe Samol mi Lapalap we pworofel.
NUM 17:8 Iwe, sorotän ewe rän Moses a tolong lon ewe imwenfel seni mangaku. A küna wokun Aaron we fän iten ewe ainangen Lefi pwe a fasar, a et, a pwal wor pöön irä won o uani föün almont mi maaw.
NUM 17:9 Mürin, Moses a uwawu ekewe wok seni mwen än ewe Samol mi Lapalap we pworofel o appii ngeni ekewe aramasen Israel meinisin. Iwe, ra küna mine a fis, nge eman me eman souemwen a angei wokun.
NUM 17:10 Iwe, ewe Samol mi Lapalap a üreni Moses, “Kopwe aliwinalong wokun Aaron we mwen ewe pworofel, pun epwe nom pwe eu asisilen fön ngeni ekewe chon ü ngeniei. Ren ei epwe wes ar lal ngeniei, pwe resap mäla.”
NUM 17:11 Iei usun Moses a föri mine ewe Samol mi Lapalap a allük ngeni.
NUM 17:12 Nge ekewe aramasen Israel ra üreni Moses, “Nengeni, äm aia rosola. Äm aipwe mäla, äm meinisin aipwe mäla.
NUM 17:13 Eman me eman mi kan ngeni än ewe Samol mi Lapalap imwenfel seni mangaku epwe mäla. Ifa usun, äm meinisin aipwe mäla?”
NUM 18:1 Iwe, ewe Samol mi Lapalap a üreni Aaron, “Ämi me noum kewe mwän pwal chon än semom ainang oupwe mwärelong fän ekewe pupungau mi fis ngeni ewe imw mi pin. Nge ämi me noum kewe mwän oupwe pwal mwärelong fän pupungauen wisemi wisen souasor.
NUM 18:2 Iwe, kopwe pwal emwenato pwiüm kewe chon ewe ainangen Lefi, repwe etuk o alisuk, lupwen ämi me noum kewe mwän oua föri ämi angang lon ewe imwenfel seni mangaku.
NUM 18:3 Iwe, ir repwe angang ngonuk o föri sokun angangen ewe imwenfel seni mangaku. Nge resap kan ngeni pisekin ewe imw mi pin ika ngeni ewe rongen asor pwe ämi me ir ousap mäla.
NUM 18:4 Iwe, repwe etuk le föri angangen ewe imwenfel seni mangaku me sokun angangen lon meinisin. Nge esap wor eman lükür epwe etikemi lon ewe angang.
NUM 18:5 Nge ämi me noum kewe oupwe föri angangen lon ewe imwenfel seni mangaku me angangen ewe rongen asor, pwe esap chüen fis ai song won ekewe aramasen Israel.
NUM 18:6 Ngang püsin üa filätä pwimi kewe chon ewe ainangen Lefi seni lein ekewe aramasen Israel pwe eu lifang ngenikemi. Ir ra imwüla fän itei pwe repwe föri angangen ewe imwenfel seni mangaku.
NUM 18:7 Nge ämi chök me noum kewe mwän oupwe föri angangen wisen souasor won ewe rongen asor, pwal angangen lon ewe rumw mi unusen pin. Iei wisemi, pun üa lifang ngenikemi ewe wisen souasor. Nge are eman me lükün epwe kan ngeni ewe imw mi pin, epwe ninnila.”
NUM 18:8 Mürin, ewe Samol mi Lapalap a üreni Aaron, “Ngang püsin üa ngenikemi mine a imwüla seni ekewe asor ra eäni asor ngeniei. Mettoch meinisin mine ekewe aramasen Israel ra apini, üa ngenikemi me noum kewe mwän pwe inetimi tori feilfeilachök.
NUM 18:9 Ämi oupwe eni ewe kinikin esap kekila seni ekewe asor mi unusen pin. Seni ekewe lifang meinisin aramas ra uwato rei pwe eu asor mi unusen pin, ese lifilifil ika asoren mongö, ika asoren tipis, ika asoren pupungau, ekei kinikin repwe fän itemi me noum kewe mwän.
NUM 18:10 Oupwe mongö ekei asor lon eu leni mi unusen pin. Iteiten mwän a tongeni mongö seniir. Oupwe chechemeni pwe ra pin fän itemi.
NUM 18:11 Pwal iei inetimi: Än ekewe aramasen Israel lifang ra eäni asor, pwal ar kewe asoren assaw meinisin. Ekei asor üa ngenikemi me noum kewe mwän me fefin, pwe inetimi tori feilfeilachök. Iteiten ir mi limöch me lein chon leimwom repwe tongeni mongö seni.
NUM 18:12 Üa pwal ngenikemi öchün apüra me öchün wain meinisin, pwal öchün föün wiich meinisin aramas ra fang ngeniei pwe ar mwen ua.
NUM 18:13 Iwe, mwen uän irä meinisin mi mär won fanüer ra uwato rei repwe enemi. Iteiten ir mi limöch me lein chon leimwom repwe tongeni mongö seni.
NUM 18:14 Iteiten mettoch meinisin aramas ra apini fän itei me lon Israel repwe om.
NUM 18:15 Meinisin mine a akomwen uputiu me lein aramas ika man chon Israel ra eäni asor ngeniei repwe noum. Nge mwänichien aramas repwe liwini ngonuk won moni pwal usun chök mweinöün man mi limengau.
NUM 18:16 Iwe, ren ekewe mwänichi repwe möni ngonuk, lupwen repwe eu maram, nge ükükün mör epwe limeföü föün silifer mi för won ewe kilo ra aea le aükük lon ewe imw mi pin.
NUM 18:17 Nge mweinöün eman kow ika sip ika kuuch resap tongeni möni ngonuk, pun ra pin. Kopwe äsupu char ngeni won ewe rongen asor o kenala kirisir pwe eu asor üa efich pwoon.
NUM 18:18 Nge fituker ochom, usun chök ewe leup seni ewe asor mi assaw me ewe pelifichin pechen pwal ochom.
NUM 18:19 Iwe, ekewe asor mi pin meinisin ekewe aramasen Israel ra asor ngeniei ngang üa ngenikemi me noum kewe mwän me fefin pwe inetimi tori feilfeilachök. Iei eu pwon esap tongeni tala tori feilfeilachök, üa föri ngenikemi me mwirimwirum kana.”
NUM 18:20 Iwe, ewe Samol mi Lapalap a pwal üreni Aaron, “Kosap fanüeni eu fanü me lon Israel, esap pwal wor inetum me leir. Pun ngang inetum me wisom me lein ekewe aramasen Israel.
NUM 18:21 Iwe, üa ngeni chon ewe ainangen Lefi än chon Israel leengol meinisin ra uwato rei, pwe wiser fän iten ar angang lon ewe imwenfel seni mangaku.
NUM 18:22 Ekewe aramasen Israel resap chüen kanoto ren ewe imwenfel seni mangaku, pwe resap tipis o mäla.
NUM 18:23 Nge chon ewe ainangen Lefi repwe föri angangen ewe imwenfel seni mangaku o wisen tümwünü seni sokun limengau. Ei epwe eu allük tori feilfeilachök seni eu täppin aramas tori eu täppin. Iwe, esap pwal wor wisen chon ewe ainangen Lefi fanü me lein ekewe aramasen Israel.
NUM 18:24 Pun än ekewe aramasen Israel leengol ra eäni asor ngeniei üa ngeni chon ewe ainangen Lefi pwe wiser. Iei popun üa üreniir pwe esap wor wiser fanü me lein ekewe aramasen Israel.”
NUM 18:25 Iwe, ewe Samol mi Lapalap a kapas ngeni Moses,
NUM 18:26 “Kopwe pwal üreni chon ewe ainangen Lefi: Lupwen oupwe angei seni ekewe aramasen Israel ewe leengol ewe Samol mi Lapalap a ngenikemi pwe wisemi, ämi oupwe pwal eäni asor ngeni ewe Samol mi Lapalap eu leengol seni ewe leengol oua angei.
NUM 18:27 Ren ämi eäni ekewe asoren leengol, oua usun chök chon Israel mi eäni asor eu leengol seni ar föün wiich me ar wain.
NUM 18:28 Iei usun pwal ämi oupwe eäni asor ngeni ewe Samol mi Lapalap seni ämi leengol meinisin oua angei seni ekewe aramasen Israel. Iwe, oupwe ngeni ewe souasor Aaron mine än ewe Samol mi Lapalap.
NUM 18:29 Iwe, seni ekewe lifang meinisin oua angei, oupwe eäni asor ngeni ewe Samol mi Lapalap ewe kinikin mi fokun mürina o pin.
NUM 18:30 Iwe, kopwe pwal üreni chon ewe ainangen Lefi: Lupwen oua wes le eäni asor mine a fokun mürina, ewe lusun epwe usun chök ekewe föün wiich seni püsin ämi lenien wichiwich umwun wiich, pwal usun chök ewe wain seni ämi lenien üchüch föün irän wain ngenikemi.
NUM 18:31 Iwe, ewe lusun oupwe tongeni mongö ekis meinisin, ämi me chon leimwemi. Pun iei liwinimi fän iten ämi angang lon ewe imwenfel seni mangaku.
NUM 18:32 Lupwen oua eäni asor ewe kinikin mi fokun mürina, esap wor tipisin ämi mongö ewe lusun ekis meinisin. Nge oupwe föröchü pwe ousap apiningaua än ekewe aramasen Israel asor mi pin, pwe ousap mäla.”
NUM 19:1 Iwe, ewe Samol mi Lapalap a üreni Moses me Aaron,
NUM 19:2 “Iei pwüngün ewe allük ewe Samol mi Lapalap a allük: Kopwe üreni ekewe aramasen Israel pwe repwe nukieto eman kow mi par esamwo nöünöü, esap wor terin ika ngauan, esap pwal uwei mwo efoch waas fän eu.
NUM 19:3 Iwe, oupwe ngeni ewe souasor Eleasar ewe kow. Nge ewe kow epwe nukunukula lükün ewe ia oua imweimw ie o ninnila me fän mesan.
NUM 19:4 Mürin, ewe souasor Eleasar epwe angei ekis chan ewe kow won aütün o äsupu fän fisu ngeni awenewenen asamalapen ewe imwenfel seni mangaku.
NUM 19:5 Nge ewe kow epwe kekila me fän mesen Eleasar: silin, fitukan, chan pwal taran epwe chök kekila.
NUM 19:6 Iwe, ewe souasor epwe angei mwüüch seni ewe irä setar, ülün ewe irä isop pwal ekam mangaku mi par o moneerelong lon ewe ekkei.
NUM 19:7 Mürin, ewe souasor epwe sopuni üfan o tütü. Iwe, mürin epwe tolong lon ewe ia oua nonom ie, nge epwe nom lon tettelin chon limengau tori lekuniol.
NUM 19:8 Nge ätewe mi kenala ewe kow epwe sopuni üfan o tütü, epwe pwal nom lon tettelin chon limengau tori lekuniol.
NUM 19:9 Mürin, eman mwän mi limöch epwe tukei falangen ewe kow o iseis lükün ewe ia oua nonom ie lon eu leni mi limöch. Iwe, ewe falang epwe iseis fän iten ekewe aramasen Israel pwe epwe nofit me koluk, pwe epwe wor kolukun limelim. Pun ei koluk kolukun limeti tipis.
NUM 19:10 Nge ätewe mi tukei falangen ewe kow epwe sopuni üfan o nom lon tettelin chon limengau tori lekuniol. Ei epwe eu allük tori feilfeilachök fän iten ekewe aramasen Israel, pwal fän iten ekewe chon ekis mi nom leir.
NUM 19:11 Iwe, eman mi atapa eman somä epwe nom lon tettelin chon limengau lon ükükün fisu rän.
NUM 19:12 Iwe, epwe alimelima ren ewe kolukun limelim lon aülüngatin me afisuen rän, mürin epwe limöch. Nge are esap alimelima lon aülüngatin me afisuen rän, esap limöch.
NUM 19:13 Iwe, iö a atapa inisin eman somä, nge esap alimelima, a alimengaua än ewe Samol mi Lapalap we imwenfel seni mangaku. Ewe aramas epwe käriwu seni ekewe chon Israel. Pokiten ewe kolukun limelim esap utututä won, ätewe epwe nom lon tettelin chon limengau, nge an limengau epwe chök nonom won.
NUM 19:14 Iwe, iei ewe allük lupwen eman aramas a mäla lon eu imw mangaku: Iteiten eman me eman mi tolong lon ewe imw mangaku, pwal iteiten eman me eman mi nom lon epwe nom lon tettelin chon limengau lon ükükün fisu rän.
NUM 19:15 Nge iteiten sepi esap wor pwölüpwölün mi riritä won epwe pwal limengau.
NUM 19:16 Iwe, iö a atapa eman somä mi mäla ren ketilas, ika eman somä mi chök püsin mäla me lemäl, ika chün eman somä, ika eu peias, epwe nom lon tettelin chon limengau lon ükükün fisu rän.
NUM 19:17 Iwe, repwe angei ekis falangen ewe kow mi kekila fän iten asoren tipis o nofiti ngeni koluk mi limöch lon eu sepi fän iten ewe mi limengau.
NUM 19:18 Mürin, eman aramas mi limöch epwe angei ülün ewe irä isop, epwe atukalong lon ewe koluk o äsupu won ewe imw mangaku, won pisekin lon meinisin pwal won ekewe aramas mi nom lon. Epwe pwal äsupu won ätewe mi atapa chün eman somä ika atapa eman mi ninnila, ika atapa eman somä mi püsin mäla, ika atapa eu peias.
NUM 19:19 Iwe, ewe aramas mi limöch epwe äsupu ewe koluk won ätewe mi nom lon tettelin chon limengau lon aülüngatin me afisuen rän. Iei usun epwe alimelima ätewe mi limengau lon afisuen rän. Iwe, ätewe mi limengau epwe sopuni üfan o tütü, nge lekuniol epwe limöch.
NUM 19:20 Iwe, are eman aramas a nom lon tettelin chon limengau, nge esap kütta limelim, ätewe epwe käriwu seni ewe mwichen aramas, pun i a alimengaua än ewe Samol mi Lapalap leni mi pin. Pokiten ewe kolukun limelim esap utututä won, a limengau.
NUM 19:21 Ei epwe eu allük fän itemi fansoun meinisin. Iwe, ätewe mi äsupu ewe kolukun limelim epwe sopuni üfan. Nge ätewe mi atapa ewe kolukun limelim epwe nom lon tettelin chon limengau tori lekuniol.
NUM 19:22 Iwe, mettoch meinisin ewe aramas mi limengau a atapa epwe limengau, nge eman mi atapa ekei mettoch epwe pwal limengau tori lekuniol.”
NUM 20:1 Iwe, lon aeuin maram ekewe aramasen Israel meinisin ra tori ewe fanüapön Sin o nonom lon Kates. Nge Miriam a mäla o peias ikenan.
NUM 20:2 Iwe, ikenan esap wor koluk fän iten ekewe aramas. Iei mine ra mwichefengen o ü ngeni Moses me Aaron.
NUM 20:3 Iwe, ekewe aramas ra anini ngeni Moses o üreni, “Amwo aia eti pwim kewe ra mäla fän mesen ewe Samol mi Lapalap.
NUM 20:4 Pwota oua emwenato nöün ewe Samol mi Lapalap mwichen aramas lon ei fanüapö pwe aipwe mäla ikei, äm me nöüm kewe man?
NUM 20:5 Pwota oua emwenikeemiwu seni Isip o emwenikeemilong lon ei leni mi ngau. Ei leni esap eu lenien fot föün wiich, esap pwal mär irä fiik me irän wain me apel won. Iwe, esap pwal wor ünümem koluk ikei.”
NUM 20:6 Mürin, Moses me Aaron ra feila seni ekewe aramas, ra feila ren asamalapen ewe imwenfel seni mangaku o chapetiu lepwül. Iwe, lingen ewe Samol mi Lapalap a pwä ngeniir,
NUM 20:7 nge ewe Samol mi Lapalap a üreni Moses,
NUM 20:8 “Kopwe angei ewe wok mi nom ren ewe pworofel o emwichato ekewe aramas meinisin, ämi me Aaron pwiüm we. Oupwe fos me fän meser ngeni ewe achau pwe epwe atowu kolukun lon. Iei usun kopwe atowu koluk seni lon ewe achau fän iter, pwe kopwe aünü ekewe aramas me nöür man.”
NUM 20:9 Iwe, Moses a angei ewe wok usun ewe Samol mi Lapalap a allük ngeni.
NUM 20:10 Iwe, Moses me Aaron ra emwichafengeni ekewe aramas meinisin mwen ewe achau. Iwe, Moses a üreniir, “Oupwe rongorong, ämi chon ü ngeniei. Ifa usun, äm aipwe atowu koluk seni lon ei achau fän itemi?”
NUM 20:11 Mürin, Moses a aitiela wokun o wichi ewe achau fän ruu. Iwe, ewe koluk a pumongowu, pwe ekewe aramas me nöür kewe man ra ün.
NUM 20:12 Nge ewe Samol mi Lapalap a üreni Moses me Aaron, “Pokiten ousap lüküei, ousap pwal apiniöchüei me fän mesen ekewe aramasen Israel, iei mine ousap emwenirelong lon ewe fanü üpwe ngeniir.”
NUM 20:13 Ei a fis me arun ewe kolukun Meripa , ewe ia ekewe aramasen Israel ra anini ngeni ewe Samol mi Lapalap ie, nge i a pwärätä me leir pwe a pin.
NUM 20:14 Iwe, Moses a tinala chon künö seni lon Kates ren ewe kingen Etom pwe repwe üreni, “Iei alon pwiüm kewe chon Israel: En ka püsin silei usun ewe riaföü a torikem.
NUM 20:15 Ka silei usun än äm kewe lewo feila Isip. Iwe, äm aia nonom lon Isip fansoun langatam. Nge ekewe chon Isip ra ariaföüükem me äm kewe lewo.
NUM 20:16 Iwe, lupwen aia siö ngeni ewe Samol mi Lapalap, a rong äm siö o tinato eman chon läng pwe epwe emwenikeemiwu seni Isip. Iwe, iei aia nom lon Kates, eu telinimw mi nom ünükün fanüom.
NUM 20:17 Kose mochen kopwe mwüt ngenikem pwe aipwe pwerelong lon fanüom. Äm aisap pwerelong lon om tanipin wiich ika tanipin wain, aisap pwal ün koluk seni ekewe chönüttu. Äm aipwe chök fetal won än ewe king alelap, nge aisap kul ngeni pelifichin ika pelimöngün tori aipwe pwerewu seni fanüom.”
NUM 20:18 Nge ewe kingen Etom a pälüeni, “Ousap fokun pwerelong lon fanüei, pun are oupwe pwerelong, äm aipwe maun ngenikemi.”
NUM 20:19 Iwe, ekewe aramasen Israel ra üreni, “Äm aipwe chök fetal won ewe alelap. Nge are äm me nöüm man aipwe ün seni om koluk, aipwe möni. Kopwe chök mwüt ngenikem pwe aipwe pwerelong, esap pwal wor och lükün.”
NUM 20:20 Nge ewe kingen Etom a pälüeni, “Ousap fokun pwerelong lon fanüei.” Iwe, ewe kingen Etom fiti chomong nöün sounfiu ra towu pwe repwe maun ngeniir.
NUM 20:21 Iwe, pokiten ekewe chon Etom resap mwüt ngeni chon Israel pwe repwe pwerelong lon fanüer, iei mine ekewe chon Israel ra kul seni o pwerela won efoch al.
NUM 20:22 Iwe, ekewe aramasen Israel meinisin ra sai seni Kates o tori ewe chuk Hor.
NUM 20:23 Iwe, ewe Samol mi Lapalap a üreni Moses me Aaron me fäsonun ewe chuk Hor won kiännin ewe fanü Etom,
NUM 20:24 “Aaron epwe mäla o chufengen me an kewe lewo. Pun Aaron esap tolong lon ewe fanü üpwe ngeni ekewe aramasen Israel, pokiten oua ü ngeni ai allük arun ewe kolukun Meripa.
NUM 20:25 Kopwe emwenätä Aaron me Eleasar nöün we mwän won ewe chuk Hor.
NUM 20:26 Mürin, kopwe pwiliti seni Aaron üfan kewe üföüfen souasor o aüföüfätä won Eleasar. Iwe, Aaron epwe mäla ikenan o chufengen me an kewe lewo.”
NUM 20:27 Iwe, Moses a föri usun mine ewe Samol mi Lapalap a allük ngeni. Ra mwinetä won ewe chuk Hor fän mesen ekewe aramas meinisin.
NUM 20:28 Iwe, Moses a pwiliti seni Aaron üfan kewe o aüföüfätä won Eleasar nöün we mwän. Iwe, Aaron a mäla ikenan won ungen ewe chuk. Mürin, Moses me Eleasar ra feitiu me won ewe chuk.
NUM 20:29 Nge lupwen ekewe aramasen Israel meinisin ra silei pwe Aaron a mäla, ir meinisin ra kechüeiti Aaron lon ükükün ilik rän.
NUM 21:1 Nge lupwen ewe kingen Arat ewe re Kanaan mi nonom lon ewe fanü Nekep a rongorong pwe chon Israel ra feito won ewe al ngeni Atarim, a maun ngeni chon Israel o liapeni ekoch leir.
NUM 21:2 Mürin, chon Israel ra föri eu pwon ngeni ewe Samol mi Lapalap o üra, “Are kopwe fangelong ekei aramas fän nemenemem, äm aipwe wesewesen aroserela o ataela ar kewe telinimw.”
NUM 21:3 Iwe, ewe Samol mi Lapalap a rongorong än chon Israel kapas o atolonga ekewe chon Kanaan fän nemeniir. Iwe, ra wesewesen aroserela o ataela ar kewe telinimw. Iei mine ra aita ngeni ewe leni Horma .
NUM 21:4 Iwe, ekewe chon Israel ra feila seni ewe chuk Hor o sai won ewe al mi ale ngeni ewe Setipar, pwe repwe pwelila lükün ewe fanü Etom. Iwe, ekewe aramas resap chüen engila fän weiresin ar sai
NUM 21:5 o eäni kapasen ü ngeni Kot me Moses. Ra apasa, “Pwota ka emwenikeemiwu seni Isip pwe aipwe mäla lon ewe fanüapö? Pun esap wor mongö ikei, esap pwal wor koluk, nge äm aia noow ei mongö esap ngünü.”
NUM 21:6 Mürin, ewe Samol mi Lapalap a tinato serepenit mi poison lein ekewe aramas. Iwe, ra küw chomong aramasen Israel, pwe ra mäla.
NUM 21:7 Iwe, ekewe aramas ra feito ren Moses o üreni, “Äm aia tipis, pun aia eäni kapasen ü ngenikemi me ewe Samol mi Lapalap. Kopwe tüngor ngeni ewe Samol mi Lapalap pwe epwe angei senikem ekewe serepenit.” Iei mine Moses a iotek fän iten ekewe aramas.
NUM 21:8 Mürin, ewe Samol mi Lapalap a üreni Moses, “Kopwe föri uluulun eman serepenit seni piras o eitiuätä won efoch mwüüch. Nge lupwen ekewe serepenit ra küw eman, epwe manau are i epwe nenengeni ewe uluulun serepenit.”
NUM 21:9 Iei mine Moses a föri uluulun eman serepenit seni piras o eitiuätä won efoch mwüüch. Iwe, are eman serepenit a küw eman aramas, nge a nenengeni ewe uluulun serepenit seni piras, a manau.
NUM 21:10 Iwe, ekewe aramasen Israel ra sopwela ar sai tori Opot o aüetä imwer ie.
NUM 21:11 Mürin ra sai seni Opot tori Ieaparim lon ewe fanüapö ötiuen ewe fanü Moap. Ikenan ra aüetä imwer.
NUM 21:12 Iwe, ra pwal sai seni ikenan o sai ngeni ewe lemolun Seret o aüetä imwer ie.
NUM 21:13 Mürin ra pwal sai seni ikenan o aüetä imwer lon ewe fanüapö efengin ewe chanpupu Arnon chöülan ewe fanüen chon Amor. Pun ewe chanpupu Arnon kiän lefilen Moap me chon Amor.
NUM 21:14 Iei mine a mak lon ewe puken maun än ewe Samol mi Lapalap, “Wahep lon Sufa me ekewe lemol, ewe chanpupu Arnon
NUM 21:15 me pwokuren ekewe lemol mi chöütiu tori ewe telinimw Ar pwal tori kiännin Moap.”
NUM 21:16 Iwe, seni ikenan ra sai tori Peer. Iei ewe chönüttu ia ewe Samol mi Lapalap a kapas ngeni Moses me ie, “Kopwe emwichafengeni ekewe aramas pwe ngang üpwe ngeniir koluk.”
NUM 21:17 Iwe, lon ewe fansoun ekewe chon Israel ra kölü ei köl: “Kopwe michitä en chönüttu. Sipwe köl ngeni.
NUM 21:18 Iei ewe chönüttu ekewe samol ra tuw, pwal ekewe mi iteföüla. Ra tuw ngeni ewe wokun samol, pwal ngeni wokur.” Iwe, seni ewe fanüapö ra saila ngeni Matana.
NUM 21:19 Iwe, ra sai seni Matana tori Nahaliel, nge seni Nahaliel tori Pamot.
NUM 21:20 Mürin ra sai seni Pamot tori ewe lemol mi nom lon kinikinin Moap fäsonun ungen ewe chuk Piska mi sasapetiu won ewe fanüapö.
NUM 21:21 Mürin, ekewe chon Israel ra tinala chon künö ren Sihon ewe kingen Amor pwe repwe üreni,
NUM 21:22 “Kose mochen kopwe mwüt ngenikem pwe aipwe pwerelong lon fanüom. Äm aisap kul ngeni om tanipin wiich ika tanipin wain, aisap pwal ün koluk seni ekewe chönüttu. Äm aipwe chök fetal won än ewe king alelap tori aipwe pwerewu seni fanüom.”
NUM 21:23 Nge Sihon esap mochen mwüt ngeni ekewe chon Israel pwe repwe pwerelong lon fanüan. Iwe, a emwichafengeni nöün kewe sounfiu meinisin o feila lon ewe fanüapö pwe epwe maun ngeni chon Israel. Iwe, lupwen a tori Jahas, a maun ngeniir.
NUM 21:24 Nge ekewe chon Israel ra niela Sihon me chomong nöün sounfiu o liapeni fanüan seni ewe chanpupu Arnon tori ewe chanpupu Japok. Nge ra chök tori kiännin fanüen chon Amon, pun a pöchökül tittin kiännin.
NUM 21:25 Iwe, ekewe chon Israel ra liapeni ekewe telinimwen chon Amor meinisin o imweimw lor. Ra pwal imweimw lon Hespon me wisoposopun meinisin.
NUM 21:26 Pun Hespon telinimwen Sihon ewe kingen chon Amor, ätewe mi maun ngeni ewe minen lomun kingen Moap o liapeni fanüan meinisin tori ewe chanpupu Arnon.
NUM 21:27 Iei popun ekewe souköl ra köl, “Oupwe feito ngeni Hespon. Oupwe aüetä o anükünüköchü ewe telinimwen Sihon.
NUM 21:28 Pun nöün Sihon mwichen sounfiu a towu seni Hespon usun ekkei. A kenala ewe telinimw Ar lon Moap o amochala ekewe chukuchukutä arun ewe chanpupu Arnon.
NUM 21:29 Feiengauemi chon Moap! A iei sopolomi, ämi aramas mi fel ngeni Kemos. Ämi kot a föri pwe nöümi kewe mwän ra choisä, nge nöümi kewe fefin ra oola ren Sihon ewe kingen chon Amor.
NUM 21:30 Nge iei sia aroserela seni Hespon tori Tipon, pwal tori Nofa me Metepa.”
NUM 21:31 Iwe, ekewe chon Israel ra nonom lon fanüen chon Amor.
NUM 21:32 Mürin, Moses a tinala chon op pwe repwe operi ewe telinimw Jaser. Iwe, ekewe chon Israel ra liapeni ewe telinimw me wisoposopun kewe o asüela ekewe chon Amor mi nonom ikenan.
NUM 21:33 Mürin ra kul o feitä ngeni Pasan. Nge Ok ewe kingen Pasan me nöün sounfiu meinisin ra towu pwe repwe maun ngeniir me lon Etrei.
NUM 21:34 Nge ewe Samol mi Lapalap a üreni Moses, “Kosap niuokusiti Ok, pun üa atolonga i me nöün aramas meinisin pwal fanüan fän nemeniom. Iwe, kopwe föri ngeni usun mine ka föri ngeni Sihon ewe kingen chon Amor mi nonom lon Hespon.”
NUM 21:35 Iei mine chon Israel ra niela Ok me nöün kewe mwän pwal nöün aramas meinisin tori esap chüen wor eman lusun. Mürin ra fanüeni fanüan.
NUM 22:1 Mürin, ekewe aramasen Israel ra sai tori ewe maasiesin Moap ötiuen ewe chanpupu Jortan sasape ngeni Jeriko. Ikenan ra aüetä imwer imw mangaku.
NUM 22:2 Nge Palak nöün Sipor mwän a rong meinisin mine chon Israel ra föri ngeni ekewe chon Amor.
NUM 22:3 Iwe, chon Moap ra fokun niuokus ren chomongun ekewe aramasen Israel, pwe ra chechech pokiten ar niuokusitiir.
NUM 22:4 Iwe, ekewe chon Moap ra kapas ngeni ekewe souakomwen Mitian, “Ei mwichemongun aramas epwe asomwa meinisin mine a nom ünüküch, usun eman ätemwänin kow a asomwa fetilin lemäl.” Nge Palak nöün Sipor mwän a kingen Moap lon ewe fansoun.
NUM 22:5 Iwe, a tinala chon künö ren Palam nöün Peor mwän lon Petor, a arap ngeni ewe chanpupu Oifrat lon ewe fanü Amaw. Iwe, ra uwei ngeni alon Palak o üreni, “Eu mwichen aramas a feito seni Isip, a pwölüela unusen ewe fanü o nonom kükü ngeniei.
NUM 22:6 Kose mochen kopwe feito iei o anümamaua ngeniei ekei aramas, pun ir ra kon pöchökül seniei. Eli üpwe tongeni akufuur o asürela seni ewe fanü. Pun üa silei pwe iö en ka afeiöchü a feiöch, nge iö ka anümamaua a anümamau.”
NUM 22:7 Iwe, ekewe souakomwen Moap me ekewe souakomwen Mitian ra feila ren Palam o uweela owun eman soupwe. Nge lupwen ra tori, ra apworausa ngeni alon Palak.
NUM 22:8 Iwe, Palam a üreniir, “Oupwe pwinii epwin ikei pwe üpwe aiti ngenikemi usun mine ewe Samol mi Lapalap a aiti ngeniei.” Iei usun ekewe souakom seni Moap ra nom ren Palam.
NUM 22:9 Iwe, Kot a feito ren Palam o aisini, “Iö ekewe mwän ra nom reöm?”
NUM 22:10 Nge Palam a üreni Kot, “Palak ewe kingen Moap a tinireto rei pwe repwe üreniei,
NUM 22:11 pwe eu mwichen aramas a feito seni Isip o pwölüela unusen ewe fanü. A titi ngang pwe üpwe anümamaueer ngeni, pwe epwe tongeni maun ngeniir o asürela.”
NUM 22:12 Nge Kot a üreni Palam, “Kosap etiirela. Kosap anümamaua ekewe aramas, pun ir ra feiöch.”
NUM 22:13 Iwe, Palam a pwätä lesosor o üreni nöün Palak kewe chon künö, “Oupwe liwinla lon fanüemi, pun ewe Samol mi Lapalap esap mwüt ngeniei pwe üpwe etikemi.”
NUM 22:14 Iei mine ekewe chon künö ra ütä o liwinla ren Palak. Iwe, ra üreni, “Palam esap mochen etikem.”
NUM 22:15 Mürin, Palak a pwal tinisefäliela eu mwichen souakom mi chocho o iteföüla seni ätekewe.
NUM 22:16 Iwe, ra feito ren Palam o üreni alon Palak, “Kosap mwüt ngeni och epwe epetuk seni om kopwe feito rei.
NUM 22:17 Pun üpwe ngonuk chomong liwinum, nge meinisin mine ka üreniei üpwe föri. Kose mochen kopwe chök feito o anümamaua ngeniei ekei aramas.”
NUM 22:18 Nge Palam a pälüeni nöün Palak kewe chon künö, “Are Palak epwe fen ngeniei an silifer me kolt meinisin mi nom lon imwan, üsap tongeni föri och mi watte ika kis pwe üpwe tongeni lukumach ngeni ewe allük än ewe Samol mi Lapalap ai we Kot.
NUM 22:19 Nge iei üa tüngor ngenikemi pwe oupwe pwal pwinii epwin ikei, pwe üpwe silei ika ewe Samol mi Lapalap epwe pwal üreniei och.”
NUM 22:20 Iwe, Kot a feito ren Palam lon ewe pwinin o üreni, “Are ekei mwän ra feito pwe repwe köruk, kopwe etiir. Nge kopwe chök föri mine ngang üpwe ürenuk.”
NUM 22:21 Iwe, Palam a pwätä lesosor, a rietä ewe lenien mot won nöün aas, a tötä won o eti ekewe souakomwen Moap.
NUM 22:22 Nge Kot a fokun song pokiten an feila. Iwe, Palam a sai won nöün we aas, nge ruoman nöün chon angang ra eti. Iwe, nöün ewe Samol mi Lapalap chon läng a ütä lon ewe al pwe epwe pinei an sai.
NUM 22:23 Iwe, ewe aas a küna nöün ewe Samol mi Lapalap we chon läng a ütä lon ewe al o amwöchü efoch ketilas lepöün. Iwe, ewe aas a müttir rikiwu seni ewe al o feilong lemäl. Nge Palam a wichi ewe aas pwe epwe liwiniti ewe al.
NUM 22:24 Mürin, nöün ewe Samol mi Lapalap we chon läng a ütä won efoch al mi chökis, a nom lefilen ruu tanipin wain, nge a pwal wor tit lepekin me rüepek.
NUM 22:25 Iwe, lupwen ewe aas a küna nöün ewe Samol mi Lapalap we chon läng, a üngüri lepekin ewe tit o achacha pechen Palam ngeni. Iei mine Palam a pwal wichisefäli ewe aas.
NUM 22:26 Mürin, nöün ewe Samol mi Lapalap we chon läng a akomwola mwan o ütä won eu leni mi fokun chökis, ia esap wor ie eman epwe tongeni rikiwu ngeni pelifichin ewe al ika pelimöngün.
NUM 22:27 Iwe, lupwen ewe aas a küna nöün ewe Samol mi Lapalap we chon läng, a aüpwäsukutiu fän Palam. Nge Palam a fokun song o wichi ewe aas ngeni wokun.
NUM 22:28 Mürin, ewe Samol mi Lapalap a afosa ewe aas pwe a aisini Palam, “Met üa föri ngonuk pwe ka wichiei fän ülüngat.”
NUM 22:29 Iwe, Palam a pälüeni, “Pokiten ka urumwoteei. Amwo itä a fen wor efoch ketilas lepei pwe üpwe niikela.”
NUM 22:30 Iwe, ewe aas a pwal aisini Palam, “Ifa usun, sap ngang noum aas ka wakkawa lon unusen manauom tori ikenai? Ifa usun, üa fen föri ngonuk ei sokun me mwan?” Nge Palam a pälüeni, “Ap.”
NUM 22:31 Mürin, ewe Samol mi Lapalap a aneneloi mesen Palam pwe a küna nöün ewe Samol mi Lapalap we chon läng mi ütä lukalapen ewe al o amwöchü efoch ketilas. Iwe, Palam a rotiu o chapetiu lepwül.
NUM 22:32 Nge nöün ewe Samol mi Lapalap we chon läng a üreni, “Pwota ka wichi noum we aas fän ülüngat? Üa feito pwe üpwe pinei om al pun om ei sai esap pwüng me rei.
NUM 22:33 Iwe, noum we aas a künaei o rik me mwei fän ülüngat. Nge are esap rik me mwei, ellet üpwe niikela iei chök, nge ewe aas epwe manau.”
NUM 22:34 Mürin, Palam a üreni nöün ewe Samol mi Lapalap we chon läng, “Ngang üa tipis. Üsap silei pwe en ka ü lon ewe al o epetiei. Iei mine are ai ei sai a ngau me reöm, üpwe liwinsefäl.”
NUM 22:35 Nge nöün ewe Samol mi Lapalap we chon läng a üreni Palam, “Kopwe eti ekewe mwän. Nge kopwe üra ekewe chök kapas üpwe ürenuk.” Iei mine Palam a eti nöün Palak kewe souakom.
NUM 22:36 Iwe, lupwen Palak a rongorong pwe Palam a war, a feila pwe epwe churi lon Ar eu telinimw ünükün ewe chanpupu Arnon mi nom lon kiännin ewe fanü Moap.
NUM 22:37 Iwe, Palak a aisini Palam, “Ifa usun, üsap titi en pwe kopwe feito rei? Pwota kose mochen feito? Ifa usun, ka ekieki pwe üsap tongeni liwiniik?”
NUM 22:38 Nge Palam a pälüeni Palak, “Nengeni, üa feito reöm. Nge ifa usun, a wor ai pöchökül iei pwe üpwe tongeni apasa och? Üpwe chök apasa ekewe kapas Kot a üreniei.”
NUM 22:39 Mürin, Palam a eti Palak. Iwe, ra tori Kiriat-husot.
NUM 22:40 Ikenan Palak a eäni asor ätemwänin kow me sip o ngeni Palam me ekewe souakom mi nom ren ekoch kinikin seni ekewe mönün asor.
NUM 22:41 Nge sorotän ewe rän Palak a emwenato Palam won ewe chuk Pamot-paal, ia a tongeni küna me ie eu kinikinin ewe mwichen chon Israel.
NUM 23:1 Iwe, Palam a üreni Palak, “Kopwe senätä fän itei fisu rongen asor ikei o uwato füman ätemwänin kow me füman ätemwänin sip.”
NUM 23:2 Iwe, Palak a föri usun mine Palam a üreni. Iwe, Palak me Palam ra eäni asor eman ätemwänin kow me eman ätemwänin sip won eu me eu kewe rongen asor.
NUM 23:3 Mürin, Palam a üreni Palak, “Kopwe ütä lükün om kei asoren kek, nge ngang üpwe feila ekis. Eli ewe Samol mi Lapalap epwe feito o churiei. Iwe, meinisin mine epwe pwäri ngeniei üpwe ürenuk.” Iwe, a feitä won eu chukuchukutä mi amasawa.
NUM 23:4 Iwe, Kot a churi Palam, nge Palam a üreni, “Üa amolätä fisu rongen asor o eäni asor eman ätemwänin kow me eman ätemwänin sip won eu me eu.”
NUM 23:5 Iwe, ewe Samol mi Lapalap a aiti ngeni Palam mine epwe apasa. Mürin a üreni, “Kopwe liwinla ren Palak, nge epwe ina chök alom ngeni.”
NUM 23:6 Iei mine Palam a liwinla ren Palak o küna pwe a chüen ütä lükün an kewe asoren kek, nge ekewe souakomwen Moap meinisin ra nom ren.
NUM 23:7 Mürin, Palam a popuetä an kapasen osuni o üra, “Palak ewe kingen Moap a emwenieito seni Aram, seni ewe chuk mi nom ötiu. A üreniei, ‘Kopwe feito o anümamaua ngeniei ekewe mwirimwirin Jakop, kopwe feito o eniwa ekewe chon Israel.’
NUM 23:8 Ifa usun ai üpwe tongeni anümamaua chokewe Kot esap anümamaueer? Ifa usun ai üpwe tongeni eniwa chokewe ewe Samol mi Lapalap esap eniweer?
NUM 23:9 Üa küna ekewe chon Israel seni me won ungen ekewe chukuachau mi tekia, üa nenengeniir seni won ekewe chukutekison. Üa küna eu mwichen aramas mi imwüla lon lenier, resap mochen ar repwe wewe ngeni ekewe mwü.
NUM 23:10 Iö a tongeni aleani ekewe mwirimwirin Jakop mi usun pien fanü, nge iö a tongeni aleani eu lerüanün ewe mwichen chon Israel? Amwo üpwe määni mään ekewe chon pwüng. Amwo sopolan manauei epwe usun sopolan manauer.”
NUM 23:11 Mürin, Palak a üreni Palam, “Met ei ka föri ngeniei? Üa körukoto pwe kopwe anümamaua chokewe üa oputeer. Nge iei ka chök afeiöchüür.”
NUM 23:12 Iwe, Palam a üra, “Ifa usun, üpwe tongeni apasa och me lükün mine ewe Samol mi Lapalap a aiti ngeniei?”
NUM 23:13 Mürin, Palak a üreni Palam, “Kopwe etieila lon pwal eu leni ia ka tongeni küna ekewe aramas me ie. Pun kopwe chök küna eu kinikin seni ar we mwich, nge sap unuser. Iwe, kopwe anümamaueer ngeniei seni ikenan.”
NUM 23:14 Iwe, a emwenala Palam ngeni ewe lemälen Sofim won ungen ewe chuk Piska. Ikenan a pwal senätä fisu rongen asor o eäni asor eman ätemwänin kow me eman ätemwänin sip won eu me eu kewe rongen asor.
NUM 23:15 Nge Palam a üreni Palak, “Kopwe ütä ikei lükün om kei asoren kek, nge ngang üpwe churi ewe Samol mi Lapalap ikenan.”
NUM 23:16 Iwe, ewe Samol mi Lapalap a churi Palam o aiti ngeni mine epwe apasa. Mürin a üreni, “Kopwe liwinla ren Palak, nge epwe ina chök alom ngeni.”
NUM 23:17 Iwe, Palam a liwinla ren Palak o küna pwe a chüen ütä lükün an kewe asoren kek, nge ekewe souakomwen Moap ra nom ren. Iwe, Palak a aisini, “Met ewe Samol mi Lapalap a apasa?”
NUM 23:18 Mürin, Palam a popuetä an kapasen osuni o üra, “Kopwe ütä, Palak, o rongorong. Kopwe aüselingaei, en nöün Sipor we mwän.
NUM 23:19 Kot esap eman aramas pwe epwe chofana, esap pwal i nöün aramas pwe epwe ekieksefäl. Ifa usun, epwe apasa och, nge esap föri? Ika epwe pwonei och, nge esap apwönüetä?
NUM 23:20 Ngang üa angei eu allük pwe üpwe afeiöchü chon Israel. Kot a afeiöchüür, nge üsap tongeni sorei.
NUM 23:21 Üsap küna pwe epwe wor feiengau ika osukosuk ngeni ekewe chon Israel lon ekewe fansoun repwe feito. Ewe Samol mi Lapalap ar Kot a nom rer, ra pwärätä fän mweireir pwe i ar king.
NUM 23:22 Kot a emwenirewu seni Isip, ar pöchökül a usun chök pöchökülen eman ätemwänin kow mi mwacho.
NUM 23:23 Pun esap wor och pöüt ika och rong epwe küw ekewe chon Israel o afeiengaueer. Lon ei fansoun repwe apasa usun ekewe aramasen Israel, ‘Nengeni mine Kot a föri fän iter.’
NUM 23:24 Ekewe aramasen Israel ra pwätä usun eman liefefinin laion, ra öüröürela usun eman ätemwänin laion esap konola tori epwe asomwala liapan o ünümi chan chokewe a nirela.”
NUM 23:25 Mürin, Palak a üreni Palam, “Are kosap mochen anümamaueer, kosap pwal afeiöchüür.”
NUM 23:26 Nge Palam a üreni Palak, “Ifa usun, üsap ürenuk pwe meinisin mine ewe Samol mi Lapalap a apasa üpwe fokun föri?”
NUM 23:27 Mürin, Palak a üreni Palam, “Kopwe etto pwe üpwe emwenuk ngeni pwal eu leni. Eli Kot epwe efich om kopwe anümamaueer ngeniei seni ikenan.”
NUM 23:28 Iei mine Palak a emwenätä Palam won ungen ewe chuk Peor ia ra tongeni nenetiuei ewe fanüapö me ie.
NUM 23:29 Iwe, Palam a üreni Palak, “Kopwe senätä ikei fisu rongen asor fän itei o uwato rei füman ätemwänin kow me füman ätemwänin sip.”
NUM 23:30 Iwe, Palak a föri usun mine Palam a üreni. A eäni asor eman ätemwänin kow me eman ätemwänin sip won eu me eu kewe rongen asor.
NUM 24:1 Iwe, lupwen Palam a silei, pwe mochenin ewe Samol mi Lapalap pwe Israel epwe feiöch, esap feila pwe epwe föri och asisil usun me mwan, nge a newenewen ngeni ewe fanüapö.
NUM 24:2 Iwe, a küna ekewe chon Israel lon ewe leni ia ra nonom ie en me lon an ainang. Iwe, Ngünün Kot a feito won,
NUM 24:3 pwe a popuetä an kapasen osuni o üra, “Iei alon Palam nöün Peor we mwän. Iei alon ewe mwän mi fat mesan,
NUM 24:4 alon ätewe mi rongorong än Kot kapas, ätewe mi wor künan seni Ewe mi Unusen Manaman. A chapetiu, nge mesan esap pwölüpwöl:
NUM 24:5 A fokun mürina imwemi kewe imw mangaku me leniemi kewe ämi chon Israel.
NUM 24:6 Ra usun chök tettelin ekewe irä palm mi langatam telin, pwal usun chök ekewe tanipi ünükün eu chanpupu. Iwe, ra usun chök irä mi pwokus itan aloes, ewe Samol mi Lapalap a fotuki, pwal usun chök ekewe irä setar ünükün ekewe chanpupu.
NUM 24:7 Iwe, koluk epwe pupu seni ar lenien koluk, repwe fotuki fotar pwükil lon pwülüchöchön. Ar king epwe tekia seni ewe king Akak, nge mwür epwe fefeitä.
NUM 24:8 Kot a emwenirewu seni Isip, ar pöchökül a usun chök pöchökülen eman ätemwänin kow mi mwacho. Iwe, repwe asomwala ekewe mwü mi ü ngeniir, repwe kupi chüür o atatakisiir, repwe pwal posu ngeniir wokur kewe esefich.
NUM 24:9 Ewe mwün Israel a wewe ngeni eman laion mi pwora. Lupwen a konola, esap wor eman a tongeni apwätäi. Ra feiöch chon afeiöchü chon Israel, nge ra anümamau chon anümamaueer.
NUM 24:10 Mürin, Palak a fokun song ngeni Palam, a öüwu pöün o üreni, “Üa körukoto pwe kopwe anümamaua chokewe üa oputeer. Nge iei ka fen afeiöchüür fän ülüngat.
NUM 24:11 Iei mine kopwe süla lon fanüom. Üa pwon ngonuk pwe üpwe liwiniik, nge ewe Samol mi Lapalap a amwöchü senuk liwinum.”
NUM 24:12 Nge Palam a üreni Palak, “Üa fen üreni noum kewe chon künö ka tinireto rei,
NUM 24:13 pwe inamwo ika kopwe ngeniei om silifer me kolt meinisin mi nom lon imwom, üsap tongeni lükümach ngeni än ewe Samol mi Lapalap kapas, pwe üpwe föri letipei. Ikamwo a öch ika a ngau, üpwe chök apasa mine ewe Samol mi Lapalap a kapas ngeniei.
NUM 24:14 Iei üpwe liwinla ren aramasei kewe. Nge üpwe asile ngonuk mine ekewe aramasen Israel repwe föri ngeni noum aramas lon ekan rän mwach.”
NUM 24:15 Mürin, Palam a popuetä an kapasen osuni o üra, “Iei alon Palam nöün Peor we mwän. Iei alon ewe mwän mi fat mesan,
NUM 24:16 alon ätewe mi rongorong än Kot kapas o angei ewe tipachem seni Ewe mi Unusen Tekia, ätewe mi wor künan seni Ewe mi Unusen Manaman. A chapetiu, nge mesan esap pwölüpwöl:
NUM 24:17 Üa küna i, nge esap iei, üa nenengeni, nge esap kanoto. Eföü fü epwe tötä seni Israel, eman king epwe ütä seni lon Israel pwe epwe nemenem. Epwe amökü möküren ekewe chon Moap o niela ekewe mwirimwirin Set meinisin.
NUM 24:18 Epwe akufu chokewe mi oput i me lon Etom o fanüeni fanüer. Nge Israel epwe chök win.
NUM 24:19 Eman sounemenem epwe towu seni ekewe mwirimwirin Jakop, epwe arosala chokewe mi chüen manau meinisin.”
NUM 24:20 Mürin Palam a nenela won Amalek o eäni an kapasen osuni usun, “Amalek, ewe mwü mi akom me lein ekewe mwü meinisin, nge sopolan epwe unusen tala.”
NUM 24:21 Nge lupwen a nenela won chon Ken, a eäni an kapasen osuni usur, “Inamwo are lenien imwemi ra pöchökül o lerasen imwemi ra nom won ekewe achau,
NUM 24:22 nge ämi chon Ken oupwe rosola, lupwen oupwe oola ren chon Asur.”
NUM 24:23 Mürin a eäni an kapasen osuni o üra, “Iö epwe tongeni manau, lupwen Kot a föri ei?
NUM 24:24 Iwe, sipen maun repwe feito seni Kittim o akufu chon Asur me chon Eper. Nge pwal ir repwe fokun mäla me mürin.”
NUM 24:25 Mürin, Palam a ütä o liwinla ngeni lenian. Nge Palak a pwal liwinla ngeni lenian.
NUM 25:1 Iwe, lupwen ekewe chon Israel ra nonom lon Sittim, ekewe mwän ra lisowu ngeni ekewe fin Moap.
NUM 25:2 Iwe, ekewe fin Moap ra aweineer pwe repwe etiir le asor ngeni ar kewe kot. Iwe, ekewe aramas ra etiir le mongö seni ewe asor o chapetiu ngeni ar kewe kot.
NUM 25:3 Iei usun ekewe chon Israel ra etiir le fel ngeni Paal me lon Peor. Nge ewe Samol mi Lapalap a fokun song ngeniir.
NUM 25:4 Iwe, ewe Samol mi Lapalap a üreni Moses, “Kopwe angei ekewe samolun aramas meinisin, kopwe nirela o eitiweer fän akar me fän mesei, pwe pöchökülen ai song epwe kul seni ekewe chon Israel.”
NUM 25:5 Iwe, Moses a üreni ekewe soukapwüng lon Israel, “Eman me eman leimi epwe niela chokewe seni en me an ainang mi eti ekewe chon Moap le fel ngeni Paal me lon Peor.”
NUM 25:6 Nge nengeni, eman me lein ekewe aramasen Israel a feito o emwenato lon imwan eman fin Mitian fän mesen Moses pwal fän mesen ekewe aramasen Israel meinisin, lupwen ra kechü leasamalapen ewe imw mangaku ia aramas ra churi Kot ie.
NUM 25:7 Iwe, lupwen Pineas nöün Eleasar mwän, nge Eleasar nöün ewe souasor Aaron mwän, a küna ei, a ütä o towu seni ewe mwichen aramas. A angei efoch siles
NUM 25:8 o tapwelong mürin ewe re Israel me ewe fefin lon ewe rumwen lon o posurifengeniir me ruoman. Iei usun ewe mätter a ükütiu seni ekewe aramasen Israel.
NUM 25:9 Nge chokewe ra fen mäla ren ewe mätter ükükün rüe me rüanüngeröü.
NUM 25:10 Iwe, ewe Samol mi Lapalap a üreni Moses,
NUM 25:11 “Pineas a akulu ai song seni ekewe aramasen Israel. Pokiten i a lukomonguni ai lukomong wor, iei mine üsap chüen arosala ekewe aramasen Israel lon ai lukomong.
NUM 25:12 Iei mine kopwe üreni Pineas pwe üpwe föri ai pwonen kinamwe ngeni.
NUM 25:13 Ei pwon epwe fän itan me fän iten mwirimwirin pwe repwe wiseni ewe wisen souasor tori feilfeilachök. Pun a lukomong woi o föri asoren amusamusen tipis fän iten ekewe aramasen Israel.”
NUM 25:14 Iwe, iten ewe re Israel mi ninnilafengen me ewe fin Mitian Simri nöün Salu mwän, i samolun eu famili seni ewe ainangen Simeon.
NUM 25:15 Nge iten ewe fin Mitian mi ninnila Kospi nöün Sur fefin. Iwe, Sur i samolun eu cho lon Mitian.
NUM 25:16 Iwe, ewe Samol mi Lapalap a üreni Moses,
NUM 25:17 “Oupwe afeiengaua ekewe chon Mitian o nirela.
NUM 25:18 Pun ir ra afeiengauakemi, lupwen ra atupukemi me lon Peor, pwal mine a fis ren Kospi fefiner we, nöün eman samolun Mitian fefin, neminewe mi ninnila lon ewe rän, lupwen a fis ewe mätter pokiten ewe föför lon Peor.”
NUM 26:1 Mürin ewe mätter, ewe Samol mi Lapalap a üreni Moses me Eleasar nöün ewe souasor Aaron we mwän,
NUM 26:2 “Oupwe angei iteiten ekewe aramasen Israel meinisin seni ier rüe feitä lon en me an famili, meinisin mi tongeni fiti maun.”
NUM 26:3 Iwe, Moses me ewe souasor Eleasar ra kapas ngeni ekewe aramas me lon ewe maasiesin Moap arun ewe chanpupu Jortan sasape ngeni Jeriko o üreniir,
NUM 26:4 pwe repwe angei iteiten ekewe mwän seni ier rüe feitä, usun ewe Samol mi Lapalap a fen allük ngeni Moses. Ikkei ir ekewe aramasen Israel mi towu seni ewe fanü Isip:
NUM 26:5 Ekewe mwirimwirin Rupen, nöün Israel we mwänichi lon tettelin ar kewe cho: än Hanok cho, än Palu cho,
NUM 26:6 än Hesron cho me än Karmi cho.
NUM 26:7 Iteiter meinisin me lon ewe ainangen Rupen faik me ülüngatngeröü füpükü ilik mwän.
NUM 26:8 Iwe, nöün Palu mwän: Eliap.
NUM 26:9 Nge nöün Eliap kewe mwän: Nemuel, Tatan me Apiram. Ätekei Tatan me Apiram ra kefilitä seni ewe mwichen aramas pwe nöür nöüwis. Ra ü ngeni Moses me Aaron o eti än Kora mwich le ü ngeni ewe Samol mi Lapalap.
NUM 26:10 Mürin, ewe pwül a sangfesen o oromirela fiti Kora. Iei usun ekewe aramas ra mäla, nge ekkei a kenala ekewe ruopükü lime mwän. Iwe, a fis pwe ir eu lenien eniweniw.
NUM 26:11 Nge nöün Kora kewe mwän resap mäla.
NUM 26:12 Iwe, ekewe mwirimwirin Simeon lon tettelin ar kewe cho: än Nemuel cho, än Jamin cho, än Jakin cho,
NUM 26:13 än Sera cho me än Shaul cho.
NUM 26:14 Iteiter meinisin me lon ewe ainangen Simeon rüe me ruungeröü ruopükü mwän.
NUM 26:15 Iwe, ekewe mwirimwirin Kat lon tettelin ar kewe cho: än Sefon cho, än Haki cho, än Shuni cho,
NUM 26:16 än Osni cho, än Eri cho,
NUM 26:17 än Arot cho me än Areli cho.
NUM 26:18 Iteiter meinisin me lon ewe ainangen Kat faik ngeröü limepükü mwän.
NUM 26:19 Iwe, nöün Juta kewe mwän Er me Onan. Nge Er me Onan ra mäla lon ewe fanü Kanaan.
NUM 26:20 Iwe, ekewe mwirimwirin Juta lon tettelin ar kewe cho: än Shela cho, än Peres cho me än Sera cho.
NUM 26:21 Nge ekewe mwirimwirin Peres: än Hesron cho me än Hamul cho.
NUM 26:22 Iteiter meinisin me lon ewe ainangen Juta fik me wonungeröü limepükü mwän.
NUM 26:23 Iwe, ekewe mwirimwirin Isakar lon tettelin ar kewe cho: än Tola cho, än Puwa cho,
NUM 26:24 än Jasup cho me än Simron cho.
NUM 26:25 Iteiter meinisin me lon ewe ainangen Isakar wone me rüanüngeröü ülüpükü mwän.
NUM 26:26 Iwe, ekewe mwirimwirin Sepulon lon tettelin ar kewe cho: än Seret cho, än Elon cho me än Jalel cho.
NUM 26:27 Iteiter meinisin me lon ewe ainangen Sepulon wone ngeröü limepükü mwän.
NUM 26:28 Iei ekewe mwirimwirin Josef lon tettelin ar kewe cho mi pop seni Manasa me Efraim:
NUM 26:29 Ekewe mwirimwirin Manasa: än Makir cho me än Kiliat cho. (Iwe, Makir semen Kiliat.)
NUM 26:30 Nge ekewe mwirimwirin Kiliat: än Jeser cho, än Helek cho,
NUM 26:31 än Asriel cho, än Sekem cho,
NUM 26:32 än Semita cho me än Hefer cho.
NUM 26:33 Nge Selofehat nöün Hefer we mwän esap wor nöün mwän, pwe a chök wor nöün fefin. Iwe, ikkei iten nöün Selofehat kewe fefin: Mala, Noa, Hokla, Milka me Tirsa.
NUM 26:34 Iteiter meinisin me lon ewe ainangen Manasa lime me ruungeröü füpükü mwän.
NUM 26:35 Iwe, ekewe mwirimwirin Efraim lon tettelin ar kewe cho: än Sutela cho, än Peker cho me än Tahan cho.
NUM 26:36 Nge ekewe mwirimwirin Sutela: än Eran cho.
NUM 26:37 Iteiter meinisin me lon ewe ainangen Efraim ilik me ruungeröü limepükü mwän. Ikkei ir ekewe mwirimwirin Josef lon tettelin ar kewe cho.
NUM 26:38 Iwe, ekewe mwirimwirin Peniamin lon tettelin ar kewe cho: än Pela cho, än Aspel cho, än Ahiram cho,
NUM 26:39 än Sefufam cho me än Hufam cho.
NUM 26:40 Nge ekewe mwirimwirin Pela: än Art cho me än Naaman cho.
NUM 26:41 Iteiter meinisin me lon ewe ainangen Peniamin faik me limungeröü wonopükü mwän.
NUM 26:42 Iwe, ekewe mwirimwirin Tan lon tettelin ar we cho: än Suham cho.
NUM 26:43 Iteiter meinisin me lon ewe ainangen Tan wone me rüanüngeröü föpükü mwän.
NUM 26:44 Iwe, ekewe mwirimwirin Aser lon tettelin ar kewe cho: än Imna cho, än Iswi cho me än Peria cho.
NUM 26:45 Nge ekewe mwirimwirin Peria: än Heper cho me än Malkiel cho.
NUM 26:46 Iwe, iten nöün Aser we fefin Sera.
NUM 26:47 Iteiter meinisin me lon ewe ainangen Aser lime me ülüngatngeröü föpükü mwän.
NUM 26:48 Iwe, ekewe mwirimwirin Naftali lon tettelin ar kewe cho: än Jaseel cho, än Kuni cho,
NUM 26:49 än Jeser cho me än Sillem cho.
NUM 26:50 Iteiter meinisin me lon ewe ainangen Naftali faik me limungeröü föpükü mwän.
NUM 26:51 Iwe, kapachalapen ekewe re Israel meinisin ükükün wonopükü eungeröü füpükü ilik mwän.
NUM 26:52 Iwe, ewe Samol mi Lapalap a üreni Moses,
NUM 26:53 “Ewe fanü epwe ainet ngeni ekei aramas pwe repwe fanüeni, epwe alongolong won iteiter.
NUM 26:54 Are eu ainang a watte, kopwe awattei fanüan, nge are eu ainang a kükün, kopwe pwal akükünü fanüan. Iteiten eu me eu ainang epwe angei fanüan won ükükün chochon.
NUM 26:55 Nge ewe fanü epwe inet ren üttüt. Repwe angei fanüer lon tettelin iten än semer kewe ainang.
NUM 26:56 Iwe, fän pwüngün ar üttüt, fanüer epwe ainet ngeni ekewe ainang watte me kükün.”
NUM 26:57 Iwe, ikkei tettelin chon ewe ainangen Lefi lon ar kewe cho: än Kerson cho, än Kohat cho me än Merari cho.
NUM 26:58 Ikkei pwal ekoch cho seni ewe ainangen Lefi: än Lipni cho, än Hepron cho, än Mali cho, än Mushi cho me än Kora cho. Nge Kohat semen Amram.
NUM 26:59 Iwe, iten pwülüen Amram Jokopet, nöün Lefi fefin a nöüni me Isip. Nge Jokopet a nöüni me won Amram: Aaron, Moses me Miriam fefiner we.
NUM 26:60 Iwe, Aaron a nöüni Natap, Apihu, Eleasar me Itamar.
NUM 26:61 Nge Natap me Apihu ra mäla, lupwen ra eäni asor ngeni ewe Samol mi Lapalap ekkei esap pin.
NUM 26:62 Iwe, iteiten mwän seni ewe ainangen Lefi seni eu maram feitä ükükün rüe me ülüngat ngeröü. Ir resap alealong lon iteiten ekewe aramasen Israel, pokiten resap angei fanüer me leir.
NUM 26:63 Iwe, ikkei ekewe iteit Moses me ewe souasor Eleasar ra aleani, lupwen ra angei iteiten ekewe aramasen Israel lon ewe maasiesin Moap arun ewe chanpupu Jortan sasape ngeni Jeriko.
NUM 26:64 Nge lon ei iteit esap wor eman mwän me lein chokewe Moses me ewe souasor Aaron ra fen aleani, lupwen ra angei iteiten ekewe aramasen Israel lon ewe fanüapön Sinai.
NUM 26:65 Pun ewe Samol mi Lapalap a apasa pwe ir meinisin repwe mäla lon ewe fanüapö. Esap wor eman mwän me leir a chüen manau, chilon chök Kalep nöün Jefune mwän me Josua nöün Nun mwän.
NUM 27:1 Iwe, nöün Selofehat kewe fefin ra feito o uwato ar tüngor. Iwe, Selofehat nöün Hefer mwän, nge Hefer nöün Kiliat mwän, nge Kiliat nöün Makir mwän, nge Makir nöün Manasa mwän seni än Manasa cho, nge Manasa nöün Josef we mwän. Iwe, iten nöün Selofehat kewe fefin Mala, Noa, Hokla, Milka me Tirsa.
NUM 27:2 Iwe, ra üta leasamalapen ewe imw mangaku ia aramas ra churi Kot ie fän mesen Moses me ewe souasor Eleasar, pwal fän mesen ekewe souemwen me ekewe aramas meinisin. Iwe, ra apasa,
NUM 27:3 “Semem we a mäla lon ewe fanüapö. Nge esap wor nöün mwän. I esap eman lein än Kora we mwich mi chufengen le ü ngeni ewe Samol mi Lapalap, pwe a mäla pokiten püsin an tipis.
NUM 27:4 Pwota iten semem epwe töttöluwu seni an cho pokiten esap wor nöün mwän? Oupwe ngenikem eu fanü me lein fanüen pwin semem.”
NUM 27:5 Iwe, Moses a asile ngeni ewe Samol mi Lapalap ar tüngor.
NUM 27:6 Nge ewe Samol mi Lapalap a üreni Moses,
NUM 27:7 “Än nöün Selofehat kewe fefin tüngor a pwüng. Kopwe afanüeer me lein fanüen pwin semer, pun fanüer we won semer epwe toriir.
NUM 27:8 Iwe, kopwe üreni ekewe aramasen Israel: Are eman mwän a mäla, nge esap wor nöün mwän, nöün fefin epwe fanüeni fanüan.
NUM 27:9 Nge are esap wor nöün fefin, pwin ewe mwän repwe fanüeni fanüan.
NUM 27:10 Nge are esap wor pwin, pwin saman kewe repwe fanüeni fanüan.
NUM 27:11 Nge are esap wor pwin saman we, eman me lein an eterekes mi kükü ngeni epwe fanüeni fanüan. Ei epwe eu pwüng me eu allük fän iten ekewe aramasen Israel, usun ngang ewe Samol mi Lapalap üa allük ngonuk.”
NUM 27:12 Iwe, ewe Samol mi Lapalap a üreni Moses, “Kopwe feitä won ewe chukuchukutä Aparim o nenneloi ewe fanü üa ngeni ekewe aramasen Israel.
NUM 27:13 Nge lupwen ka küna ewe fanü, pwal en kopwe mäla o chufengen me om kewe lewo usun pwiüm Aaron.
NUM 27:14 Pun oua lükümach ngeni ai kewe kapas me lükün ekewe koluk me lon ewe fanüapön Sin, lupwen ekewe aramas ra lal ngeniei, nge ämi ousap apiniöchüei fän meser.” (Ikkei ekewe kolukun Meripa lon Kates lon ewe fanüapön Sin.)
NUM 27:15 Iwe, Moses a üreni ewe Samol mi Lapalap,
NUM 27:16 “En Samol mi Lapalap popun manauen mönümanau meinisin, kose mochen kopwe filätä eman mwän epwe emweni ei mwichen aramas,
NUM 27:17 epwe akakomweer le emweniir lon mettoch meinisin, pwe noum mwichen aramas esap wewe ngeni eu pwiin sip esap wor ar chon mas.”
NUM 27:18 Iwe, ewe Samol mi Lapalap a üreni Moses, “Kopwe emwenato Josua nöün Nun we mwän o iseis poum won, pun Ngüni a nom won.
NUM 27:19 Kopwe aütäi fän mesen ewe souasor Eleasar pwal fän mesen ekewe aramas meinisin, pwe kopwe ngeni wisan.
NUM 27:20 Kopwe isetä won ekis om nemenem, pwe ekewe aramasen Israel meinisin repwe aleasochisi.
NUM 27:21 Epwe ütä fän mesen ewe souasor Eleasar, nge Eleasar epwe kütta letipei fän itan ren ewe Urim . Iwe, fän än Eleasar kapas Josua fiti ekewe aramasen Israel meinisin repwe föri sokopaten ar angang meinisin.”
NUM 27:22 Iwe, Moses a föri usun mine ewe Samol mi Lapalap a allük ngeni. A emwenato Josua o aütäi fän mesen ewe souasor Eleasar me ekewe aramas meinisin.
NUM 27:23 Iwe, a iseis pöün won o awisa ngeni wisan usun ewe Samol mi Lapalapa a aiti ngeni.
NUM 28:1 Iwe, ewe Samol mi Lapalap a üreni Moses,
NUM 28:2 “Kopwe allük ngeni ekewe aramasen Israel: Oupwe tümwünü pwe oupwe uwato rei ekewe asor fän itei lon ekewe fansoun mi kefilitä, ekewe asoren mongö üa efich pwoon.
NUM 28:3 Iwe, kopwe üreniir: Iei ewe asor oupwe eäni asor ngeni ewe Samol mi Lapalap. Iteiten rän oupwe chök äkeäni asor ruoman ätemwänin lam eu ieriir esap wor terir.
NUM 28:4 Iwe, ewe aemanün oupwe eäni asor lesosor, nge ewe aruomanün oupwe eäni lekuniol.
NUM 28:5 Oupwe pwal achu ngeni ruu paun pilawa mi amas o mürina mi nofitfengen me eu kuoch apüra seni föün olif mi wüsüs pwe asoren mongö.
NUM 28:6 Iei ewe asoren kek epwe chök fifis iteiten rän, usun a fen kefis me fäsonun ewe chuk Sinai, pwe eu asor ewe Samol mi Lapalap a efich pwoon.
NUM 28:7 Nge fän iten eman me eman lam epwe wor asoren ün eu kuoch wain. Oupwe ninätiu ei asoren ün ngeni ewe Samol mi Lapalap lon ewe leni mi pin.
NUM 28:8 Iwe, ewe aruomanün lam oupwe eäni asor lekuniol. Oupwe pwal achu ngeni ewe asoren mongö me ewe asoren ün, usun chök ewe asor a fis lesosor, pwe eu asor ewe Samol mi Lapalap a efich pwoon.”
NUM 28:9 “Iwe, lon ewe ränin sapat oupwe eäni asor ruoman ätemwänin lam eu ierir esap wor terir, pwal rüanü paun pilawa mi amas o mürina mi nofitfengen me apüra, pwe eu asoren mongö me ewe asoren ün.
NUM 28:10 Iei ewe asoren kek epwe fis iteiten ränin sapat lükün ewe asoren kek me ewe asoren ün mi chök fifis iteiten rän.
NUM 28:11 Iwe, lepoputän iteiten maram oupwe eäni asoren kek ngeni ewe Samol mi Lapalap ruoman nienifön ätemwänin kow, eman ätemwänin sip, füman ätemwänin lam eu ierir esap wor terir.
NUM 28:12 Iwe, wonu paun pilawa mi amas o mürina mi nofitfengen me apüra epwe chu ngeni eman me eman ätemwänin kow, rüanü paun pilawa mi amas mi nofitfengen me apüra epwe chu ngeni ewe ätemwänin sip,
NUM 28:13 nge ruu paun pilawa mi amas o mürina mi nofitfengen me apüra epwe chu ngeni eman me eman lam pwe asoren mongö. Iei eu asoren kek ewe Samol mi Lapalap a efich pwoon.
NUM 28:14 Iwe, ikkei ekewe asoren ün: esop kalon wain epwe chu ngeni eman me eman ätemwänin kow, eu esop kuoch wain epwe chu ngeni ewe ätemwänin sip, nge eu kuoch wain epwe chu ngeni eman me eman lam. Iei ewe asoren kek epwe fis iteiten maram lon eu ier.
NUM 28:15 Iwe, oupwe pwal eäni asor ngeni ewe Samol mi Lapalap eman ätemwänin kuuch pwe asoren tipis. Ei asor epwe fis lükün ewe asoren kek me ewe asoren ün mi chök fifis iteiten rän.”
NUM 28:16 “Iwe, lon engol me rüanün ränin ewe aeuin maram epwe fis än ewe Samol mi Lapalap Pasofer.
NUM 28:17 Nge lon engol me limuen ränin ewe chök maram epwe fis eu chulap. Lon ükükün fisu rän oupwe mongö pilawa esap wor iis lon.
NUM 28:18 Iwe, lon aeuin rän oupwe afisi eu mwich mi pin. Ousap föri och angang lon.
NUM 28:19 Oupwe eäni eu asoren kek ngeni ewe Samol mi Lapalap ruoman nienifön ätemwänin kow, eman ätemwänin sip me füman ätemwänin lam eu ierir. Oupwe pii pwe esap wor terir.
NUM 28:20 Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni eman me eman ätemwänin kow, rüanü paun epwe chu ngeni ewe ätemwänin sip,
NUM 28:21 nge ruu paun pilawa epwe chu ngeni eman me eman kewe füman lam.
NUM 28:22 Oupwe pwal eäni asoren tipis eman ätemwänin kuuch, pwe epwe fis asoren amusamusen tipis fän itemi ren.
NUM 28:23 Iwe, oupwe eäni ekei asor lükün ewe asoren kek mi chök fifis iteiten lesosor.
NUM 28:24 Iei usun oupwe eäni asor iteiten rän lon ükükün fisu rän. Ei eu asoren mongö ewe Samol mi Lapalap a efich pwoon, epwe fis lükün ewe asoren kek me ewe asoren ün mi chök fifis iteiten rän.
NUM 28:25 Iwe, lon afisuen rän oupwe pwal afisi eu mwich mi pin. Ousap föri och angang lon.
NUM 28:26 Iwe, oupwe pwal afisi eu mwich mi pin lon ewe ränin kinikinin mwen ua, lupwen oupwe eäni ewe asoren mongö seni ekewe föün wiich mi fö ngeni ewe Samol mi Lapalap lon ewe chulapen wiik. Ousap föri och angang lon.
NUM 28:27 Nge oupwe eäni asoren kek ruoman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon.
NUM 28:28 Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni eman me eman ätemwänin kow, rüanü paun epwe chu ngeni ewe ätemwänin sip,
NUM 28:29 nge ruu paun pilawa epwe chu ngeni eman me eman kewe füman lam.
NUM 28:30 Iwe, oupwe pwal eäni asor eman ätemwänin kuuch, pwe epwe fis asoren amusamusen tipis fän itemi ren.
NUM 28:31 Iwe oupwe eäni ekei asor fitifengen me ekewe asoren ün lükün ewe asoren kek me ewe asoren mongö mi chök fifis iteiten rän. Oupwe pii pwe esap wor terin ekewe mönün asor.
NUM 29:1 Iwe, lon aeuin ränin ewe afisuen maram oupwe afisi eu mwich mi pin. Ousap föri och angang lon. Ei rän eu ränin ämi oupwe ettiki ekewe rappwa.
NUM 29:2 Oupwe eäni asoren kek eman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir.
NUM 29:3 Epwe pwal chu ngeniir ewe pilawa mi amas o mürina mi nofitfengen me apüra. Iwe, wonu paun pilawa epwe chu ngeni ewe ätemwänin kow, pwal rüanü paun epwe chu ngeni ewe ätemwänin sip,
NUM 29:4 nge ruu paun epwe chu ngeni eman me eman kewe füman lam.
NUM 29:5 Iwe, oupwe pwal eäni asoren tipis eman ätemwänin kuuch pwe epwe fis asoren amusamusen tipis fän itemi ren.
NUM 29:6 Ekei asor repwe fis lükün ewe asoren kek lepoputän maram me ewe asoren mongö mi chu ngeni, pwal lükün ewe asoren kek mi chök fifis iteiten rän me ewe asoren mongö me asoren ün mi chu ngeni lon pwüngün allükür. Ei eu asor ewe Samol mi Lapalap a efich pwoon.
NUM 29:7 Iwe, lon engolun ränin ei afisuen maram oupwe afisi eu mwich mi pin. Oupwe echikefel, ousap pwal föri och angang lon.
NUM 29:8 Nge oupwe eäni asoren kek eman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir.
NUM 29:9 Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni ewe ätemwänin kow, rüanü paun pilawa epwe chu ngeni ewe ätemwänin sip,
NUM 29:10 nge ruu paun epwe chu ngeni eman me eman kewe füman lam.
NUM 29:11 Oupwe pwal eäni asoren tipis eman ätemwänin kuuch lükün ewe asoren amusamusen tipis, pwal lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:12 Iwe, lon engol me limuen ränin ewe afisuen maram oupwe afisi eu mwich mi pin. Ousap föri och angang lon, nge oupwe föri eu chulap ngeni ewe Samol mi Lapalap lon ükükün fisu rän.
NUM 29:13 Iwe, lon aeuin rän oupwe eäni asoren kek engol me ülüman nienifön ätemwänin kow, ruoman ätemwänin sip me engol me föman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir.
NUM 29:14 Epwe pwal chu ngeniir ewe asoren mongö pilawa mi amas o mürina mi nofitfengen me apüra. Iwe, wonu paun pilawa epwe chu ngeni eman me eman kewe engol me ülüman ätemwänin kow, rüanü paun epwe chu ngeni eman me eman kewe ruoman ätemwänin sip,
NUM 29:15 nge ruu paun epwe chu ngeni eman me eman kewe engol me föman lam.
NUM 29:16 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:17 Nge lon aruuen rän oupwe eäni asor engol me ruoman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir.
NUM 29:18 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür.
NUM 29:19 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:20 Iwe, lon aülüngatin rän oupwe eäni asor engol me eman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir.
NUM 29:21 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür.
NUM 29:22 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:23 Iwe, lon arüanün rän oupwe eäni asor engol nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir.
NUM 29:24 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür.
NUM 29:25 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:26 Nge lon alimuen rän oupwe eäni asor tiueman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir.
NUM 29:27 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür.
NUM 29:28 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:29 Iwe, lon awonuen rän oupwe eäni asor waluman nienifön ätemwänin kow, ruoman ätemwänin sip me engol me föman lam eu ierir. Ir meinisin esap wor terir.
NUM 29:30 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür.
NUM 29:31 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:32 Nge lon afisuen rän oupwe eäni asor füman nienifön ätemwänin kow, ruoman ätemwänin sip me engol me föman ätemwänin lam eu ierir. Ir meinisin esap wor terir.
NUM 29:33 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür.
NUM 29:34 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:35 Iwe, lon awaluen rän oupwe pwal afisi eu mwich mi pin. Ousap föri och angang lon.
NUM 29:36 Oupwe eäni asoren kek eman nienifön ätemwänin kow, eman ätemwänin sip me füman ätemwänin lam eu ierir, pwe ewe Samol mi Lapalap epwe efich pwoon. Ir meinisin esap wor terir.
NUM 29:37 Iwe, ewe asoren mongö me asoren ün repwe chu ngeni ekewe ätemwänin kow, ekewe ätemwänin sip me ekewe lam ükükün iteiter lon pwüngün allükür.
NUM 29:38 Oupwe pwal eäni asoren tipis eman ätemwänin kuuch lükün ewe asoren kek mi chök fifis iteiten rän me ewe asoren mongö me asoren ün mi chu ngeni.
NUM 29:39 Ikkei ekewe asor oupwe eäni asor ngeni ewe Samol mi Lapalap lon ämi kewe ränin chulap mi kefilitä. Repwe chu ngeni ämi kewe asoren pwon me asor seni püsin letipemi, ämi kewe asoren kek me asoren mongö me asoren ün pwal ämi kewe asoren kinamwe.”
NUM 29:40 Iwe, Moses a asile ngeni ekewe aramasen Israel wesewesen meinisin mine ewe Samol mi Lapalap a allük ngeni.
NUM 30:1 Iwe, Moses a üreni ekewe mwänirelan ainangen ekewe aramasen Israel, “Iei usun mine ewe Samol mi Lapalap a allük:
NUM 30:2 Are eman mwän a eäni eu pwon ngeni ewe Samol mi Lapalap, pwe epwe fang ngeni och, ika a akapel pwe epwe pölüküela och, ätei esap tongeni atai an pwon. Epwe chök apwönüetä meinisin mine a apasawu seni awan.
NUM 30:3 Nge are eman föpwül mi chüen nom lon imwen saman a eäni eu pwon ngeni ewe Samol mi Lapalap, pwe epwe fang ngeni och, ika a pwon pwe epwe pölüküela och,
NUM 30:4 are saman a rongorong an pwon me an akapel, nge esap apasa och ngeni, mürin ewe föpwül epwe föri meinisin mine a eäni pwon.
NUM 30:5 Nge are saman we esap tipeeu ngeni lon ewe rän, lupwen a rongorong usun, ewe föpwül esap wisen föri mine a eäni pwon. Iwe, ewe Samol mi Lapalap epwe amusala an tipis, pun saman we esap tipeeu ngeni.
NUM 30:6 Nge are neminewe epwe pwüpwülü, lupwen a chüen nom fän an pwon ika fän mine a awakai won,
NUM 30:7 are pwülüan epwe rong usun, nge esap apasa och ngeni lon ewe ränin, mürin ewe föpwül epwe föri meinisin mine a eäni pwon.
NUM 30:8 Iwe, are pwülüan we esap tipeeu ngeni lon ewe rän, lupwen a rongorong usun, epwe atai än ewe fefin pwon, pwal mine a awakai won. Iwe, ewe Samol mi Lapalap epwe amusala an tipis.
NUM 30:9 Nge eman fefin mi mä pwülüan ika eman mi mwü seni pwülüan epwe fokun apwönüetä an kewe pwon meinisin.
NUM 30:10 Iwe, are eman fefin a eäni eu pwon me lon imwen pwülüan, ika a pwon pwe epwe pölüküela och,
NUM 30:11 are pwülüan a rongorong, nge esap apasa och, esap pwal pälüeni, mürin ewe fefin epwe fokun apwönüetä an kewe pwon meinisin.
NUM 30:12 Nge are pwülüan a atai ekewe pwon lon ewe rän, lupwen a rongorong usun, meinisin mine ewe fefin a apasawu fän iten an kewe pwon pwal fän iten an akapel esap wisen apwönüetä. Iwe, pwülüan a atai ekewe pwon, nge ewe Samol mi Lapalap epwe amusala än ewe fefin tipis.
NUM 30:13 Iteiten pwon me iteiten akapel eman fefin a eäni, pwülüan a tongeni anüküchara ika atai.
NUM 30:14 Nge are pwülüen ewe fefin esap apasa och ngeni lon ekoch rän, mürin a anüküchara än ewe fefin we pwon me an we akapel meinisin ra nom won. Pwülüan we a anüküchareer, pun esap apasa och ngeni lon ewe rän, lupwen a rongorong usun.
NUM 30:15 Nge are a ataar ekoch fansoun mürin an rong usur, epwe mwärelong fän än neminewe tipis.”
NUM 30:16 Ikkei ekewe allükün pwon ewe Samol mi Lapalap a allük ngeni Moses usun lefilen eman mwän me pwülüan, pwal usun lefilen eman sam me nöün föpwül, lupwen a chüen nom lon imwen saman.
NUM 31:1 Iwe, ewe Samol mi Lapalap a üreni Moses,
NUM 31:2 “Kopwe ngeni ekewe chon Mitian chappen ar föför ngeni chon Israel. Mürin kopwap mäla.”
NUM 31:3 Iwe, Moses a üreni ekewe aramas, “Oupwe amolätä ekoch mwän me leimi, pwe repwe feila maun ngeni ekewe chon Mitian o ngeniir chappen ar föför fän iten ewe Samol mi Lapalap.
NUM 31:4 Oupwe tinala lon maun engeröü mwän seni eu me eu kewe ainangen Israel.”
NUM 31:5 Iei mine ra filätä engeröü mwän seni eu me eu ainang, pwe ükükün engol me ruungeröü re Israel ra molotä ngeni maun.
NUM 31:6 Mürin, Moses a tinirela ngeni maun, pwal Pinehas nöün ewe souasor Eleasar mwän mi uwei ekewe pisek seni ewe imw mi pin, pwal ekewe rappwa ra nöünöü le ettiki ewe tikin asilesilen maun.
NUM 31:7 Iwe, ra maun ngeni ekewe chon Mitian usun ewe Samol mi Lapalap a allük ngeni Moses, o niela mwän meinisin.
NUM 31:8 Ra pwal achu ngeni niier kewe ekewe limman king seni Mitian iter Efi, Rekem, Sur, Hur me Repa. Ra pwal niela Palam nöün Peor we mwän.
NUM 31:9 Iwe, ekewe aramasen Israel ra liapeni ekewe fin Mitian me nöür semirit. Ra pwal angei pwe choon wokur nöür pwiin kow me sip, pwal pisekir meinisin.
NUM 31:10 Nge ra pwal kenala än chon Mitian kewe telinimw me ekewe leni ia ra nonom ie.
NUM 31:11 Iwe, ra angei choon wokur meinisin ra liapeni, pwal ekewe aramas me man,
NUM 31:12 o uweereto ren Moses me ewe souasor Eleasar pwal ren ekewe aramasen Israel meinisin mi nom lon ewe maasiesin Moap arun ewe chanpupu Jortan sasape ngeni Jeriko.
NUM 31:13 Iwe, Moses me ewe souasor Eleasar me ekewe souemwenin ekewe aramas meinisin ra feila lükün ewe ia ra nonom ie, pwe repwe churiir.
NUM 31:14 Nge Moses a song ngeni ekewe meilapen mwichen sounfiu, ir ätekewe mi nemenem won ngeröü me pükü ra liwinto seni maun.
NUM 31:15 Iwe, a üreniir, “Pwota oua amanaua ekana fefin meinisin?
NUM 31:16 Ir chokewe mi chei än Palam aüraür ngeniir, pwal ir popun pwe ekewe aramasen Israel ra kul seni ewe Samol mi Lapalap ren ewe föför ra föri me lon Peor. Iei mine ewe mätter a tori än ewe Samol mi Lapalap mwichen aramas.
NUM 31:17 Iei popun, iei oupwe niela iteiten ät me lein ekewe semirit, pwal iteiten fefin mi tori mwän.
NUM 31:18 Nge oupwe amanaua ekewe nengin meinisin resamwo tori mwän fän itemi.
NUM 31:19 Ämi meinisin mi niela aramas, pwal ämi mi atapa somä, oupwe mwo nonom lükün ewe ia aramas ra nonom ie lon ükükün fisu rän. Oupwe püsin alimöchükemi me ekewe föpwül oua liapeniir lon aülüngatin me afisuen rän.
NUM 31:20 Oupwe pwal limeti iteiten üf, iteiten pisek seni silin man, iteiten mettoch mi för seni ülen kuuch pwal iteiten pisek seni irä.”
NUM 31:21 Iwe, ewe souasor Eleasar a üreni ekewe sounfiu mi liwinto seni maun, “Iei pwüngün ewe allük ewe Samol mi Lapalap a allük ngeni Moses:
NUM 31:22 Mettoch meinisin resap tongeni karala: kolt, silifer, piras, mächä, tin me pilom
NUM 31:23 oupwe limetiir lon ekkei pwe repwe limöch. Nge repwe pwal limelim ren ewe kolukun limelim. Iwe, mettoch meinisin mi tongeni karala oupwe limetiir ren koluk.
NUM 31:24 Oupwe sopuni üfemi lon afisuen rän pwe oupwe limöch. Mürin oupwe tolong lon ewe ia aramas ra nonom ie.”
NUM 31:25 Iwe, ewe Samol mi Lapalap a üreni Moses,
NUM 31:26 “Ämi me ewe souasor Eleasar pwal mwänirelan ekewe familien ewe mwichen aramas oupwe aleani ekewe aramas me man meinisin ra liapeni.
NUM 31:27 Mürin kopwe ineti liaper kewe lon ruu kinikin lefilen ekewe sounfiu mi feila maun me ekewe aramas meinisin.
NUM 31:28 Iwe, seni inetin ekewe sounfiu mi feila maun kopwe aimwüela fän iten ewe Samol mi Lapalap eman seni iteiten limepükü aramas ika kow ika aas ika sip ika kuuch.
NUM 31:29 Kopwe angeir o ngeni ewe souasor Eleasar pwe eu asor ngeni ewe Samol mi Lapalap.
NUM 31:30 Nge seni inetin ekewe aramasen Israel, kopwe aimwüela eman seni iteiten lime aramas ika kow ika aas ika sip ika kuuch ika sokopaten man o ngeni ekewe mwän seni ewe ainangen Lefi mi wisen angang ngeni än ewe Samol mi Lapalap we imwenfel seni mangaku.”
NUM 31:31 Iwe, Moses me ewe souasor Eleasar ra föri usun mine ewe Samol mi Lapalap a allük ngeni Moses.
NUM 31:32 Iwe, iei ükükün unusen liapen ekewe sounfiu: Wonopükü fik me limungeröü sip,
NUM 31:33 fik me ruungeröü kow,
NUM 31:34 wone me eungeröü aas
NUM 31:35 me ilik me ruungeröü föpwül resamwo tori mwän.
NUM 31:36 Iwe, esopun liaper inetin ekewe sounfiu mi feila maun ükükün ülüpükü ilik me fisungeröü limepükü sip.
NUM 31:37 Nge inetin ewe Samol mi Lapalap seni ei ükükün: wonopükü fik me limman sip.
NUM 31:38 Iwe, inetir kow ükükün ilik me wonungeröü. Nge seni ei ükükün, fik me ruoman inetin ewe Samol mi Lapalap.
NUM 31:39 Iwe, inetir aas ükükün ilik ngeröü limepükü. Nge seni ei ükükün, wone me eman inetin ewe Samol mi Lapalap.
NUM 31:40 Iwe, inetir aramas ükükün engol me wonungeröü. Nge seni ei ükükün, ilik me ruoman inetin ewe Samol mi Lapalap.
NUM 31:41 Iwe, Moses a ngeni ewe souasor Eleasar inetin ewe Samol mi Lapalap pwe eu asor fän itan, usun ewe Samol mi Lapalap a allük ngeni.
NUM 31:42 Iwe, esopun liapen ekewe sounfiu Moses a aimwüela pwe inetin ekewe aramasen Israel.
NUM 31:43 Iwe, inetin ekewe aramas ükükün ülüpükü ilik me fisungeröü limepükü sip,
NUM 31:44 ilik me wonungeröü kow,
NUM 31:45 ilik ngeröü limepükü aas
NUM 31:46 me engol me wonungeröü aramas.
NUM 31:47 Iwe, seni esopun liaper inetin ekewe aramasen Israel Moses a angei eman seni iteiten lime aramas ika man o ngeni ekewe mwän seni ewe ainangen Lefi mi wisen tümwünü än ewe Samol mi Lapalap we imwenfel seni mangaku, usun ewe Samol mi Lapalap a allük ngeni Moses.
NUM 31:48 Mürin, ekewe meilap mi nemeni ekewe mwichen sounfiu ra feito ren Moses
NUM 31:49 o üreni, “Äm noum chon angang aia aleani ekewe sonfiu mi nom fän nemenemem, nge esap wor eman a mäla me leim.
NUM 31:50 Iei aia uwato ekewe mettoch seni kolt pwe eu asor fän iten ewe Samol mi Lapalap seni mine eman me eman a angei: lälä me sokun fouten won pau, ring won pau me ierring me sokopaten fout, pwe aipwe eäni asor liwinin manauem ngeni ewe Samol mi Lapalap.”
NUM 31:51 Iwe, Moses me ewe souasor Eleasar ra angei seniir ekewe sokopaten fout seni kolt.
NUM 31:52 Nge ekewe kolt meinisin ekewe meilap mi nemeni ekewe mwichen sounfiu ra eäni asor ngeni ewe Samol mi Lapalap ina epwe ükükün föpükü rüe paun.
NUM 31:53 Nge ekewe sounfiu ra chök en me angei liapan fän püsin itan.
NUM 31:54 Iwe, Moses me ewe souasor Eleasar ra angei ewe kolt seni ekewe meilapen sounfiu o iseis lon ewe imwenfel seni mangaku fän mesen ewe Samol mi Lapalap pwe eu pisekin achem fän iten ekewe aramasen Israel.
NUM 32:1 Iwe, chon ekewe ainangen Rupen me Kat a wor chomong nöür pwiin kow. Iwe, ra küna pwe won ewe fanü Jaser pwal won ewe fanü Kiliat ra mürina le foleni kow.
NUM 32:2 Iei mine chon ekewe ainangen Rupen me Kat ra feito o üreni Moses me ewe souasor Eleasar, pwal ekewe souemwenin ekewe aramas,
NUM 32:3 “Ewe fanü ünükün Atarot, Tipon, Jaser, Nimra, Hespon, Eleale, Sepam, Nepo me Peon,
NUM 32:4 ewe fanü ewe Samol mi Lapalap a akufu me fän mesen ekewe aramasen Israel, a mürina le foleni kow won. Iwe, äm noum chon angang a wor chomong nöüm kow.
NUM 32:5 Kose mochen kopwe mwüt ngenikem ei fanü pwe aipwe fanüeni. Kosap nukikeemila pekilan ewe chanpupu Jortan.”
NUM 32:6 Nge Moses a üreni chon ekewe ainangen Kat me Rupen, “Ifa usun, pwimi kewe repwe feila ngeni maun, nge ämi oupwe chök nonom ikei?
NUM 32:7 Pwota oupwe atipetipa leluken ekewe aramasen Israel pwe resap feila pekilan ewe chanpupu Jortan o tolong lon ewe fanü ewe Samol mi Lapalap a ngeniir?
NUM 32:8 Iei usun mine semelapemi kewe ra pwal föri, lupwen üa tinirela seni Kates-parnea pwe repwe operi ewe fanü.
NUM 32:9 Iwe, ra feila tori ewe lemolun Eskol o küna ewe fanü, nge lupwen ra liwinto, ra atipetipa leluken ekewe aramasen Israel, pwe resap feila o tolong lon ewe fanü ewe Samol mi Lapalap a ngeniir.
NUM 32:10 Iwe, lon ewe rän ewe Samol mi Lapalap a fokun song o pwon fän akapel,
NUM 32:11 ‘Ellet, esap wor eman me lein ekewe mwän seni ier rüe feitä mi towu seni Isip repwe küna ewe fanü üa pwon fän akapel pwe üpwe ngeni Apraham, Isaak me Jakop. Pun ir resap fokun aleasochis ngeniei.
NUM 32:12 Chilon chök Kalep nöün Jefune we mwän ewe chon Kenis me Josua nöün Nun we mwän, pun ir ra fokun aleasochis ngeniei ngang ewe Samol mi Lapalap.’
NUM 32:13 Iwe, ewe Samol mi Lapalap a fokun song ngeni chon Israel o föri pwe repwe rikifetal lon ewe fanüapö lon ükükün faik ier, tori ra rosola ewe pilon aramas mi föföringau me fän mesen ewe Samol mi Lapalap.
NUM 32:14 Nge iei ämi oua chök tolong lemürürün sememi kewe, ämi eu täppin aramas mi tipis. Oua chök alapala än ewe Samol mi Lapalap song mi pöchökül ngeni Israel.
NUM 32:15 Pun are oua kul seni ämi aleasochis ngeni Kot, i epwe likitisefäliela ekei aramas lon ewe fanüapö. Ren ei ämi oupwe awarato feiengau wor.”
NUM 32:16 Mürin, ra kanoto ren Moses o apasa, “Äm aipwe chök aüetä tittin sip ikei fän iten nöüm kewe pwiin sip pwal telinimw fän iten pwülüem me nöüm kewe semirit.
NUM 32:17 Nge äm aipwe angei pisekin maun o feila mwen ekewe aramasen Israel tori aipwe emweniir ngeni lenier. Nge pwülüem me nöüm kewe semirit repwe nonom lon ekewe telinimw mi pöchökül tittir, pwe resap feiengau ren chon ei fanü.
NUM 32:18 Äm aisap liwiniti imwem tori ekewe aramasen Israel repwe angei en me fanüan.
NUM 32:19 Äm aisap angei och fanü seniir pekilan ewe chanpupu Jortan. Pun aia fen angei inetim fanü me ötiuen ei chanpupu Jortan.”
NUM 32:20 Mürin, Moses a üreniir, “Are oua wesewesen mochen föri iei usun, iei oupwe angei pisekin maun o feila maun fän emwenien ewe Samol mi Lapalap.
NUM 32:21 Ämi mwän meinisin mi molotä ngeni maun oupwe feila pekilan ewe chanpupu Jortan fän emwenien ewe Samol mi Lapalap, tori i epwe asüela chon oputan me mwan.
NUM 32:22 Mürin, ika ewe fanü a nom fän nemenian, ämi oupwe liwinla, pun oua apwönüetä mine oua pwon ngeni ewe Samol mi Lapalap me ekewe chon Israel. Mürin, ewe Samol mi Lapalap epwe alletätä pwe ei fanü mi nom ötiuen ewe chanpupu Jortan fanüemi.
NUM 32:23 Nge are ousap apwönüetä ämi pwon, oua tipis ngeni ewe Samol mi Lapalap. Oupwe silei pwe liwinin ämi tipis epwe fokun torikemi.
NUM 32:24 Iwe, oupwe aüetä telinimw fän iten pwülüemi me nöümi semirit me tit fän iten nöümi sip. Nge oupwe apwönüetä mine oua eäni pwon.”
NUM 32:25 Iwe, chon ekewe ainangen Kat me Rupen ra üreni Moses, “Äm noum chon angang aipwe föri mine en äm samol ka eäni allük.
NUM 32:26 Nöüm semirit me pwülüem, pwal nöüm pwiin sip me kow meinisin repwe chök nonom lon ekewe telinimwen Kiliat.
NUM 32:27 Nge äm meinisin aia molotä pwe aipwe feila pekilan ewe chanpupu Jortan o maun fän emwenien ewe Samol mi Lapalap, usun en äm samol ka allük.”
NUM 32:28 Iwe, Moses a ngeni ewe souasor Eleasar me Josua nöün Nun we mwän, pwal ngeni mwänirelan ekewe familien ekewe ainangen Israel ei allük fän äsengesiir,
NUM 32:29 “Are ekewe mwän seni chon ekewe ainangen Kat me Rupen mi molotä ngeni maun repwe etikemi le feila pekilan ewe chanpupu Jortan fän emwenien ewe Samol mi Lapalap, nge ewe fanü epwe nom fän nemeniemi, mürin oupwe ngeniir ewe fanü Kiliat pwe repwe fanüeni.
NUM 32:30 Nge are resap etikemi le feila maun pekila, repwe chök fafanü remi lon ewe fanü Kanaan.”
NUM 32:31 Iwe, chon ekewe ainangen Kat me Rupen ra apasa, “Äm noum chon angang aipwe föri mine ewe Samol mi Lapalap a ürenikem.
NUM 32:32 Äm aipwe feila pekilan ewe chanpupu Jortan o tolong lon ewe fanü Kanaan fän emwenien ewe Samol mi Lapalap pwe aipwe maun. Nge inetim fanü epwe chök nom rem ötiuen ewe chanpupu Jortan.”
NUM 32:33 Mürin, Moses a ngeni chon ekewe ainangen Kat me Rupen, pwal ngeni ewe esopun ewe ainangen Manasa nöün Josef we mwän ewe mwün Sihon ewe kingen chon Amor me ewe mwün Ok ewe kingen Pasan, unusen ewe fanü me telinimwan meinisin fiti ekewe leni ünükür.
NUM 32:34 Iwe, chon ekewe ainangen Kat ra aüsefälietä ekewe telinimw Tipon, Atarot, Aroer,
NUM 32:35 Arotsofan, Jaser, Jokpeha,
NUM 32:36 Petnimra me Petharan. Iwe, ra aüetä tit ünükün ekewe telinimw, pwal tit fän iten nöür kewe sip.
NUM 32:37 Iwe, chon ekewe ainangen Rupen ra aüsefälietä ekewe telinimw Hespon, Eleale, Kiriataim,
NUM 32:38 Nepo me Paalmeon, nge ra siwili iter. Ra pwal aüsefälietä Sipma. Iwe, ra aitasefäli ekewe telinimw ra aüsefäliretä.
NUM 32:39 Iwe, ekewe mwirimwirin Makir, nge Makir nöün Manasa we mwän, ra feila Kiliat o liapeni, ra pwal asüela ekewe chon Amor mi nonom won.
NUM 32:40 Iwe, Moses a ngeni ekewe mwirimwirin Makir ewe fanü Kiliat. Iwe, ra nonom lon.
NUM 32:41 Nge Jair eman mwirimwirin Manasa a feila o liapeni wisoposopun ewe fanü Kiliat. Iwe, a aita ngeniir Hawot-jair.
NUM 32:42 Nge Nopa a feila o liapeni Kenat me wisoposopun kewe. Iwe, a aita ngeni Nopa püsin itan we.
NUM 33:1 Iei tettelin än ekewe aramasen Israel sai, lupwen ra towu seni ewe fanü Isip lon ar kewe ainang fän emwenien Moses me Aaron.
NUM 33:2 Iwe, Moses a makeetiu iteiten eu me eu kewe leni ra sai seni, usun ewe Samol mi Lapalap a allük ngeni. Iwe, iei tettelin ar sai seni eu leni tori pwal eu leni.
NUM 33:3 Iwe, ekewe aramasen Israel ra sai seni Rameses lon engol me limuen ränin ewe aeuin maram, eu rän mürin ewe pasofer. Ra töpworawu me fän mesen ekewe chon Isip meinisin,
NUM 33:4 lupwen ra peiaseni nöür kewe mwänichi meinisin ewe Samol mi Lapalap a nirela me lefiler. Ren ei ewe Samol mi Lapalap a pwärätä pwe i a manaman seni ekewe koten Isip.
NUM 33:5 Iwe, ekewe aramasen Israel ra sai seni Rameses o aüetä imwer lon Sukot.
NUM 33:6 Ra pwal sai seni Sukot o aüetä imwer lon Etam mi nom lesopun ewe fanüapö.
NUM 33:7 Iwe, ra sai seni Etam o liwiniti Pihahirot mi nom ötiuen Paal-sefon. Ra aüetä imwer arap ngeni Miktol.
NUM 33:8 Mürin ra sai seni Pi-hahirot, ra pwerelong lukalapen ewe matau o feilong lon ewe fanüapö. Iwe, lupwen ra sai lon ewe fanüapön Etam lon ükükün ülüngat rän, ra tori Mara o aüetä imwer ikenan.
NUM 33:9 Ra pwal sai seni Mara tori Elim o aüetä imwer, pun mi wor engol me ruu chönüttu me fik irä palm ikenan.
NUM 33:10 Mürin ra sai seni Elim o aüetä imwer arun ewe Setipar.
NUM 33:11 Iwe, ra sai seni ewe Setipar o aüetä imwer lon ewe fanüapön Sin.
NUM 33:12 Mürin ra sai seni ewe fanüapön Sin o aüetä imwer lon Tofka.
NUM 33:13 Iwe, ra sai seni Tofka o aüetä imwer lon Alus.
NUM 33:14 Ra pwal sai seni Alus o aüetä imwer lon Refitim, ewe ia esap wor ie ünümen ekewe aramas koluk.
NUM 33:15 Iwe, ra sai seni Refitim o aüetä imwer lon ewe fanüapön Sinai.
NUM 33:16 Mürin ra sai seni ewe fanüapön Sinai o aüetä imwer lon Kiprotatawa.
NUM 33:17 Ra pwal sai seni Kiprotatawa o aüetä imwer lon Haserot.
NUM 33:18 Iwe, ra sai seni Haserot o aüetä imwer lon Ritma.
NUM 33:19 Ra pwal sai seni Ritma o aüetä imwer lon Rimon-peres.
NUM 33:20 Mürin ra sai seni Rimon-peres o aüetä imwer lon Lipna.
NUM 33:21 Ra pwal sai seni Lipna o aüetä imwer lon Risa.
NUM 33:22 Iwe, ra sai seni Risa o aüetä imwer lon Kehelata.
NUM 33:23 Mürin ra sai seni Kehelata o aüetä imwer fäsonun ewe chuk Sefer.
NUM 33:24 Iwe, ra sai seni fäsonun ewe chuk Sefer o aüetä imwer lon Harata.
NUM 33:25 Mürin ra sai seni Harata o aüetä imwer lon Makhelot.
NUM 33:26 Ra pwal sai seni Makhelot o aüetä imwer lon Tahat.
NUM 33:27 Mürin ra sai seni Tahat o aüetä imwer lon Tera.
NUM 33:28 Iwe, ra sai seni Tera o aüetä imwer lon Mitka.
NUM 33:29 Mürin ra sai seni Mitka o aüetä imwer lon Hasmona.
NUM 33:30 Ra pwal sai seni Hasmona o aüetä imwer lon Moserot.
NUM 33:31 Iwe, ra sai seni Moserot o aüetä imwer lon Penejaakan.
NUM 33:32 Mürin ra sai seni Penejaakan o aüetä imwer lon Horhakitkat.
NUM 33:33 Ra pwal sai seni Horhakitkat o aüetä imwer lon Jotpata.
NUM 33:34 Iwe, ra sai seni Jotpata o aüetä imwer lon Aprona.
NUM 33:35 Mürin ra sai seni Aprona o aüetä imwer lon Esionkeper.
NUM 33:36 Ra pwal sai seni Esionkeper o aüetä imwer lon Kates lon ewe fanüapön Sin.
NUM 33:37 Iwe, ra sai seni Kates o aüetä imwer fäsonun ewe chuk Hor lekiännin ewe fanü Etom.
NUM 33:38 Iwe, ewe souasor Aaron a feitä won ewe chuk Hor fän än ewe Samol mi Lapalap allük o mäla ikenan. Ei a fis lon afaiken ier mürin än ekewe aramasen Israel towu seni ewe fanü Isip lon aeuin ränin ewe alimuen maram.
NUM 33:39 Iwe, Aaron a ierini ipükü rüe me ülüngat, lupwen a mäla me won ewe chuk Hor.
NUM 33:40 Iwe, ewe kingen Arat, ewe re Kanaan mi nonom lon ewe fanü Nekep lon Kanaan a rong pwe ekewe aramasen Israel ra feito.
NUM 33:41 Iwe, ekewe aramasen Israel ra sai seni fäsonun ewe chuk Hor o aüetä imwer lon Salmona.
NUM 33:42 Ra pwal sai seni Salmona o aüetä imwer lon Punon.
NUM 33:43 Mürin ra sai seni Punon o aüetä imwer lon Opot.
NUM 33:44 Iwe, ra sai seni Opot o aüetä imwer lon Ie-Aparim lon ewe fanü Moap.
NUM 33:45 Mürin ra sai seni Ie-Aparim o aüetä imwer lon Tiponkat.
NUM 33:46 Ra pwal sai seni Tiponkat o aüetä imwer lon Almontiplataim.
NUM 33:47 Iwe, ra sai seni Almontiplataim o aüetä imwer won ewe chukuchukutä Aparim kükü ngeni ewe chuk Nepo.
NUM 33:48 Mürin ra sai seni ewe chukuchukutä Aparim o aüetä imwer lon ekewe maasiesin Moap arun ewe chanpupu Jortan sasape ngeni Jeriko.
NUM 33:49 Iwe, ra aüetä imwer arun ewe chanpupu Jortan seni Pet-jesimot tori Apel-sittim mi nom lon ekewe maasiesin Moap.
NUM 33:50 Iwe, ewe Samol mi Lapalap a kapas ngeni Moses me lon ekewe maasiesin Moap arun ewe chanpupu Jortan sasape ngeni Jeriko,
NUM 33:51 “Kopwe üreni ekewe aramasen Israel: Lupwen oupwe feila pekilan ewe chanpupu Jortan o tolong lon ewe fanü Kanaan,
NUM 33:52 oupwe asüela me mwemi chon ewe fanü meinisin. Oupwe ataela ar kewe uluulun anümwäl seni fau ika seni mächä meinisin, oupwe pwal atatakisi ar kewe lenien fel won ekewe leni tekia meinisin.
NUM 33:53 Iwe, oupwe angei ewe fanü o nonom lon, pun üa ngenikemi ewe fanü pwe oupwe fanüeni.
NUM 33:54 Oupwe aineti ewe fanü ren üttüt, aükük ngeni chochon ämi kewe cho pwe repwe fanüeni. Are eu ainang a watte, oupwe awattei fanüan, nge are eu ainang a kükün, oupwe pwal akükünü fanüan. Meni fanü eman a ütti, epwe pwal fanüeni. Oupwe fanüeni ewe fanü aükük ngeni chochon ainangen sememi kewe.
NUM 33:55 Nge are ousap asüela chon ewe fanü me mwemi, chokewe oua mwüt ngeniir pwe repwe nonom repwe usun chök och mökün mettoch mi ken lon mesemi, pwal usun chök iräfölüföl lepekimi. Iwe, repwe ariaföüükemi lon ewe fanü ia oupwe nonom ie.
NUM 33:56 Are osap asürela, ngang üpwe föri ngenikemi mine üa ekiekin föri ngeniir.”
NUM 34:1 Iwe, ewe Samol mi Lapalap a kapas ngeni Moses,
NUM 34:2 “Kopwe allük ngeni ekewe aramasen Israel o üreniir: Lupwen oupwe tolong lon ewe fanü Kanaan, ewe fanü üpwe ngenikemi pwe oupwe fanüeni, epwe iei unusen kiännin:
NUM 34:3 Kiännin fanüemi me peliör epwe seni ewe fanüapön Sin feila won kiännin Etom. Epwe popuetä me lesopun ewe Setin Mäla me ötiu.
NUM 34:4 Iwe, epwe kul me örün ewe chukuchukutä Akrapim o pwerelong ngeni Sin tori örün Kates-parnea. Mürin epwe pwere ngeni lotouefeng tori Hasaratar o pwerelong Asmon.
NUM 34:5 Iwe, ewe kiä epwe kul seni Asmon o feila ngeni ewe öüwön Isip, nge epwe müchütiu me arun ewe matau watte.
NUM 34:6 Iwe, kiännin fanüemi me pelilotou epwe arosetin ewe matau watte.
NUM 34:7 Nge iei kiännin fanüemi me peliefeng: Epwe seni ewe matau watte tori ewe chuk Hor.
NUM 34:8 Iwe, seni ewe chuk Hor epwe tori wenewenen Hamat, mürin kiännin epwe feitä tori Setat
NUM 34:9 o feila ngeni Sifron, nge epwe müchütiu me Hasarenan. Iei kiännin fanüemi me peliefeng.
NUM 34:10 Iwe, kiännin fanüemi me peliötiu epwe seni Hasarenan tori Sefam.
NUM 34:11 Iwe, seni Sefam ewe kiä epwe feila tori Ripla peliötiuen Ain o chöüla tori ewe chukuchukutä ötiuen ewe nomun Kenesaret.
NUM 34:12 Mürin epwe feila ör o ouwäreer me ewe chanpupu Jortan, nge epwe müchütiu me arun ewe Setin Mäla. Iei fanüemi me pwelin kiännin.”
NUM 34:13 Iwe, Moses a allük ngeni ekewe aramasen Israel o üreniir, “Iei ewe fanü oupwe fanüeni ren üttüt. Ei fanü epwe ainet ngeni ekewe tiu esop ainang, usun ewe Samol mi Lapalap a allük.
NUM 34:14 Pun chon ekewe ainangen Rupen me Kat me esopun ewe ainangen Manasa ra fen angei fanüer iteiter lon en me an famili.
NUM 34:15 Ekei ruu esop ainang ra fen angei fanüer ötiuen ewe chanpupu Jortan sasape ngeni Jeriko.”
NUM 34:16 Iwe, ewe Samol mi Lapalap a üreni Moses,
NUM 34:17 “Ikkei iten ekewe mwän repwe ineti ngenikemi ewe fanü oupwe fanüeni: Ewe souasor Eleasar me Josua nöün Nun we mwän.
NUM 34:18 Oupwe pwal angei eman souemwen seni eu me eu ainang, pwe repwe alisikemi le ineti ewe fanü oupwe fanüeni.
NUM 34:19 Ikkei iten ekewe souemwen: Kalep nöün Jefune we mwän seni ewe ainangen Juta,
NUM 34:20 Semuel nöün Amihut mwän seni ewe ainangen Simeon,
NUM 34:21 Elitat nöün Chislon mwän seni ewe ainangen Peniamin,
NUM 34:22 pwal ewe souemwen Pukki nöün Joki mwän seni ewe ainangen Tan.
NUM 34:23 Haniel nöün Efot mwän seni ewe ainangen Manasa,
NUM 34:24 Kemuel nöün Siftan mwän seni ewe ainangen Efraim,
NUM 34:25 Elisafan nöün Parnak mwän seni ewe ainangen Sepulon,
NUM 34:26 Paltiel nöün Asan mwän seni ewe ainangen Isakar,
NUM 34:27 Ahihut nöün Selomi mwän seni ewe ainangen Aser,
NUM 34:28 pwal Petahel nöün Amihut mwän seni ewe ainangen Naftali.
NUM 34:29 Ikkei ir ekewe mwän ewe Samol mi Lapalap a allük ngeniir pwe repwe ineti ewe fanü Kanaan ngeni ekewe aramasen Israel.”
NUM 35:1 Iwe, ewe Samol mi Lapalap a kapas ngeni Moses lon ewe maasiesin Moap arun ewe chanpupu Jortan sasape ngeni Jeriko,
NUM 35:2 “Kopwe allük ngeni ekewe aramasen Israel pwe repwe ngeni chon ewe ainangen Lefi ekoch telinimw seni ar kewe leni ra lenieni, pwe repwe imweimw lon. Repwe pwal ngeniir ekewe fanü mi nom pwelin ünükün ekewe telinimw.
NUM 35:3 Iwe, chon ewe ainangen Lefi repwe imweimw lon ekewe telinimw, nge ekewe fanü ünükün repwe fän iten nöür kewe pwiin kow me sip me nöür kewe man meinisin.
NUM 35:4 Ekewe fanü ünükün ekewe telinimw ämi oupwe ngeni chon ewe ainangen Lefi repwe seni pwelin tittin ewe telinimw feila ükükün engeröü limepükü fiit.
NUM 35:5 Iwe, oupwe aükü ewe fanü lükün ewe telinimw, me peliötiuan epwe ükükün ülüngatngeröü fiit, me peliörün ülüngatngeröü fiit, me pelilotoun ülüngatngeröü fiit, me peliefengin pwal ülüngatngeröü fiit. Nge ewe telinimw epwe nom lukalapan. Ekei fanü mi chu ngeni ar kewe telinimw epwe fanüer fän iten nöür kewe man.
NUM 35:6 Oupwe ngeni chon ewe ainangen Lefi ekewe wonu telinimwen op, ia oupwe mwüt ngeni ewe mi niela aramas epwe süla ie. Nge oupwe pwal achu faik me ruu telinimw ngeni ekewe wonu.
NUM 35:7 Iwe, ekewe telinimw meinisin oupwe ngeni chon ewe ainangen Lefi repwe ükükün faik me walu, fiti ekewe fanü ünükür fän iten nöür kewe man.
NUM 35:8 Ekewe telinimw oupwe ngeni chon ewe ainangen Lefi seni fanüen ekewe aramasen Israel epwe aükük ngeni ükükün fanüen eu me eu ainang. Seni ekewe ainang watte oupwe ngeniir chomong, nge seni ekewe ainang kükün oupwe ngeniir ekoch chök.”
NUM 35:9 Iwe, ewe Samol mi Lapalap a kapas ngeni Moses,
NUM 35:10 “Kopwe üreni ekewe aramasen Israel: Lupwen oupwe feila pekilan ewe chanpupu Jortan o tolong lon ewe fanü Kanaan,
NUM 35:11 oupwe filätä ekoch telinimw pwe repwe telinimwen op fän itemi, pwe eman mwän mi niela eman aramas fän chechengau epwe tongeni sü ngeniir.
NUM 35:12 Ekewe telinimw repwe aopa ätewe mi niela eman aramas seni ewe mi kütta liwinin chan aramasan, pwe esap mäla me mwen an epwe apwüng fän mesen ewe mwichen aramas.
NUM 35:13 Oupwe fangala wonu telinimwen op.
NUM 35:14 Oupwe fangala ülüngat telinimw ötiuen ewe chanpupu Jortan, pwal ülüngat telinimw lon ewe fanü Kanaan, pwe repwe ämi telinimwen op.
NUM 35:15 Ekewe wonu telinimw repwe lenien op fän iten ekewe aramasen Israel, pwal fän iten ekewe chon ekis mi nom leir me ekewe ir mi wiliposola. Iwe, iteiten eman mi niela eman aramas fän chechengau epwe tongeni sü ngeniir.
NUM 35:16 Nge are eman mwän a wichi eman ren och pisek seni mächä, nge ewe aramas a mäla ren, ätewe eman chon niela aramas. Iwe, epwe ninnila.
NUM 35:17 Iwe, are eman mwän a monei ngeni eman eföü fau mi tongeni amälai eman, nge ewe aramas a mäla ren, ätewe eman chon niela aramas. Iwe, epwe ninnila.
NUM 35:18 Nge are eman mwän a wichi eman ren och pisek seni mwüch mi tongeni amälai eman, nge ewe aramas a mäla ren, ätewe eman chon niela aramas. Iwe, epwe ninnila.
NUM 35:19 Nge ewe chon kütta liwinin chan aramasan epwe püsin niela ätewe mi niela ewe aramas. Lupwen a tori ewe aramas, epwe niela.
NUM 35:20 Nge are eman mwän a posu eman pokiten an oput, ika a monei och ngeni eman seni anaia a op ie, nge ewe aramas a mäla ren,
NUM 35:21 ika a afönü eman pokiten an oput, nge ewe aramas a mäla ren, ätewe epwe ninnila, pun i eman chon niela aramas. Iwe, ewe chon kütta liwinin chan aramasan epwe niela ätewe, lupwen a tori.
NUM 35:22 Nge are eman mwän a posu eman esap oput, ika a monei och ngeni, nge esap op,
NUM 35:23 ika a monei eföü fau mi tongeni amälai eman, nge esap küna ätewe a küüw, are ewe aramas a mäla ren, nge i esap oput ätewe, esap pwal mochen afeiengaua,
NUM 35:24 ewe mwichen aramas epwe föri kapwüng lefilen ätewe mi niela ewe aramas me ewe mi kütta liwinin chan aramasan lon pwüngün ekei allük.
NUM 35:25 Iwe, ewe mwichen aramas epwe amanaua ewe mi niela aramas seni ätewe mi kütta liwinin chan aramasan. Iwe, repwe aliwinala ätewe ngeni an telinimwen op a fen süri me mwan, pwe epwe imweimw lon tori ewe souasor mi lap a kepit ren ewe lö mi pin epwe mäla.
NUM 35:26 Nge are ewe mi niela eman aramas epwe towu fän eu lükün kiännin an telinimwen op a süri,
NUM 35:27 nge ewe chon kütta liwinin chan aramasan epwe küna ätewe o niela, ätei esap tipisin niela aramas.
NUM 35:28 Pun ewe mi niela eman aramas epwe fokun nonom lon an telinimwen op tori ewe souasor mi lap epwe mäla. Nge mürin än ewe souasor mi lap mäla, ewe mi niela aramas a tongeni liwiniti fanüan.”
NUM 35:29 “Iwe, ikei ekewe allük me pwüng fän itemi seni eu täppin aramas tori eu täppin me lon leniemi meinisin:
NUM 35:30 Are eman a niela eman aramas, ewe chon niela epwe ninnila fän pwüngün pwärien ekoch chon pwärätä. Nge esap wor eman aramas epwe ninnila fän pwärien eman chök chon pwärätä.
NUM 35:31 Ousap fokun etiwa liwinin kepichilan manauen eman chon niela aramas mi tipisin mäla, nge epwe chök ninnila.
NUM 35:32 Ousap pwal fokun etiwa liwinin kepichilan manauen ätewe mi süri an telinimwen op, pwe epwe liwiniti fanüan mwen än ewe souasor mi lap mäla.
NUM 35:33 Iwe, ousap alimengaua ewe fanü oua nonom won. Pun nimanauei eman a alimengaua ewe fanü. Nge esap tongeni fis asoren limelim fän iten ewe fanü pokiten ewe angangen nimanau a fis won, chilon chök ika ätewe mi nimanauei eman epwe ninnila.
NUM 35:34 Ousap fokun alimengaua ewe fanü oua nonom won. Pun ngang ewe Samol mi Lapalap üa imweimw lein ekewe aramasen Israel.”
NUM 36:1 Iwe, ekewe mwänirela seni ekewe familien än Kiliat cho, nge Kiliat nöün Makir, nge Makir nöün Manasa, nge Manasa nöün Josef we mwän ra feito o kapas fän mesen Moses me ekewe souemwen, ir mwänirelan än ekewe aramasen Israel famili.
NUM 36:2 Iwe, ra üra, “Ewe Samol mi Lapalap a allük ngonuk, en äm samol, pwe kopwe ineti ewe fanü ren üttüt ngeni ekewe aramasen Israel pwe repwe fanüeni. A pwal allük ngonuk pwe ewe fanü inetin Selofehat pwim we kopwe ngeni nöün kewe fefin.
NUM 36:3 Nge are ir ra pwüpwülü ngeni mwän seni pwal eu kewe ainangen Israel, inetir fanü epwe imwü seni inetin semelapem kewe o pach ngeni inetin ewe ainang ra pwüpwülülong lon. Iei usun ewe fanü epwe imwü seni kinikinin inetim.
NUM 36:4 Nge lupwen a tori än ekewe aramasen Israel ierin supili, inetir fanü epwe chök pach ngeni inetin ewe ainang ra pwüpwülülong lon. Iwe, inetir fanü epwe wesewesen imwü seni inetin ainangen semelapem kewe.”
NUM 36:5 Mürin, Moses a ngeni ekewe aramasen Israel ekei allük seni ewe Samol mi Lapalap o üreniir, “A pwüng mine chon ewe ainangen mwirimwirin Josef ra apasa.
NUM 36:6 Iei usun mine ewe Samol mi Lapalap a allük fän iten nöün Selofehat kewe fefin: Repwe tongeni pwülüeni iö ra sani, nge repwe chök pwüpwülülong lon familien än semer ainang.
NUM 36:7 Iwe, inetin ekewe aramasen Israel fanü esap tongeni amwet seni eu ainang ngeni pwal eu ainang. Pun iteiten eman me eman seni ekewe aramasen Israel epwe kamwöchüla won inetin än saman ainang.
NUM 36:8 Nge iteiten fefin mi fafanü me lon eu ainang seni lon ekewe ainangen Israel epwe pwülüeni eman mwän seni ainangen saman. Iei usun eman me eman me lein ekewe aramasen Israel epwe fanüeni inetin me won saman.
NUM 36:9 Iwe, esap tufich pwe inetin eman fanü epwe amwet seni eu ainang ngeni pwal eu ainang. Pun iteiten eu me eu kewe ainangen Israel epwe kamwöchüla won püsin inetin fanü.”
NUM 36:10 Iwe, nöün Selofehat kewe fefin ra föri usun mine ewe Samol mi Lapalap a allük ngeni Moses.
NUM 36:11 Pun Mala, Tirsa, Hokla, Milka me Noa ra pwüpwülü ngeni nöün pwin semer mwän.
NUM 36:12 Ra pwüpwülülong lon än ewe ainangen Manasa cho, nge Manasa nöün Josef we mwän. Iwe, inetir fanü a chök nomotiu lon än semer ainang.
NUM 36:13 Ikkei ekewe allük me pwüng ewe Samol mi Lapalap a allük ngeni Moses fän iten ekewe aramasen Israel, lupwen ra nom lon ekewe maasiesin Moap arun ewe chanpupu Jortan sasape ngeni Jeriko.
DEU 1:1 Ikkei ekewe kapas Moses a üreni chon Israel meinisin, lupwen ra nom lon ewe fanüapö ötiuen ewe chanpupu Jortan. Iei ewe lemolun Jortan mi sasape ngeni Suf lefilen Paran me epek me Tofel, Lapan, Haserot me Tisahap me pwal epek.
DEU 1:2 Iwe, ükükün ränin ar sai seni ewe chuk Horep feila ngeni chukuchukutän Etom tori Kates-parnea engol me eu rän.
DEU 1:3 Iwe, lon aeuin ränin ewe engol me aeuin maram lon afaiken ier mürin ar towu seni Isip, Moses a kapas ngeni ekewe aramasen Israel meinisin mine ewe Samol mi Lapalap a allük ngeni fän äsengesiir.
DEU 1:4 Ei a fis mürin an akufu Sihon ewe kingen chon Amor mi nemenem lon Hespon, pwal Ok ewe kingen Pasan mi nemenem lon Astarot me Etrei.
DEU 1:5 Iwe, lupwen ekewe aramas ra nom ötiuen ewe chanpupu Jortan lon ewe fanü Moap, Moses a popuetä le awewei ngeniir ei allük. Iwe, a apasa,
DEU 1:6 “Ewe Samol mi Lapalap ach we Kot a kapas ngenikich me fäsonun ewe chuk Horep, ‘A naf fansoun ämi nonom ren ei chuk.
DEU 1:7 Iei oupwe kul o sai. Oupwe sai ngeni fanüen chon Amor mi chukuchukutä, pwal ngeni fanüen chon aruur lon ewe lemolun Jortan. Oupwe sai ngeni ewe fanü mi chukuchukutä me ewe fanü mi maasies, ngeni ewe fanü Nekep me ewe fanü aroset, ewe fanüen chon Kanaan me Lepanon tori ewe chanpupu watte itan Oifrat.
DEU 1:8 Nengeni, üa ngenikemi ewe fanü. Oupwe tolong o fanüeni ewe fanü ngang ewe Samol mi Lapalap üa pwon fän akapel pwe üpwe ngeni ämi kewe lewo Apraham, Isaak me Jakop, pwal ngeni mwirimwirir kana.’”
DEU 1:9 Iwe, Moses a üreni ekewe aramas, “Lon ewe fansoun sa nom ren ewe chuk Horep üa ürenikemi, ‘Esap tufich ngeniei ai üpwe akaleäman le mwärelong fän weiresin tümwünümi.
DEU 1:10 Ewe Samol mi Lapalap ämi we Kot a achomongakemiila pwe ikenai oua chomong usun ekewe fün läng.
DEU 1:11 Amwo ewe Samol mi Lapalap än ämi kewe lewo we Kot epwe alapala iteitemi fän engeröü lap seni iteitemi iei. Iwe, epwe pwal afeiöchükemi usun a fen pwon ngenikemi.
DEU 1:12 Ifa usun, epwe tufich ai üpwe akaleäman le mwärelong fän weiresin tümwünümi me choun ämi anini?
DEU 1:13 Oupwe filätä mwän mi mirit me tipachem me mwokos seni ämi kewe ainang, pwe üpwe seikiretä womi.’
DEU 1:14 Iwe, ämi oua pälüeni: Ekei kapas ka ürenikem ra mürina pwe aipwe föriir.
DEU 1:15 Iei usun üa angei ekewe mwänirelan ämi ainang mi mirit o mwokos o anomuur womi, pwe ekoch repwe nemenem won ngeröü me pükü, ekoch won lime me engol, nge ekoch repwe meilapen ämi kewe ainang.
DEU 1:16 Iwe, lon ewe fansoun üa allük ngeni nöümi souapwüng, ‘Oupwe aüselinga ekewe fitikoko mi fis lefilen pwimi o apwüngü fän pwüng, ese lifilifil ika ewe fitikoko a fis lefilen pwimi chon Israel, ika lefilen eman chon Israel me eman chon ekis.
DEU 1:17 Ousap lifilifil aramas lon ämi kapwüng. Oupwe aüseling ngeni ekewe mi kis usun chök ngeni ekewe mi lap. Ousap niuokusiti mesen aramas, pun ewe kapwüng än Kot. Nge are ewe fitikoko a kon weires ngenikemi, oupwe uwato rei pwe üpwe apwüngala.’
DEU 1:18 Iwe, lon ewe fansoun üa allük ngenikemi usun ekei mettoch meinisin pwe oupwe föriir.”
DEU 1:19 “Iwe, sa sai seni ewe chuk Horep o pwerelong lon unusen ewe fanüapö mi watte o eniwokus, usun oua küna. Sa pwal pwerelong lon fanüen chon Amor mi chukuchukutä, usun ewe Samol mi Lapalap ach we Kot a allük ngenikich. Iwe, lupwen sa tori Kates-parnea,
DEU 1:20 üa ürenikemi, ‘Ämi oua tori ewe fanüen chon Amor mi chukuchukutä, ewe ia ewe Samol mi Lapalap ach we Kot epwe ngenikich.
DEU 1:21 Nengeni, ewe Samol mi Lapalap ämi we Kot a ngenikemi ewe fanü. Oupwe feitä o fanüeni, usun ewe Samol mi Lapalap än ämi kewe lewo we Kot a ürenikemi. Ousap niuokus, ousap pwal apilükingau.’
DEU 1:22 Mürin, ämi meinisin oua feito rei o üreniei: Ousipwe tinala mwän me mwach, pwe repwe ouwasacha o operi ewe fanü fän itach. Iwe, repwe asileto pworaus rech usun ewe al sipwe aleni me lapalapen ekewe telinimw sipwe toriir.
DEU 1:23 Ekei kapas ra öch me rei. Iei mine üa filätä engol me ruoman mwän me leimi, eman seni eu me eu ainang.
DEU 1:24 Iwe, ra feila o feitä won ewe fanü mi chukuchukutä, ra pwal tori ewe lemolun Eskol o operi.
DEU 1:25 Iwe, ra angei ekoch uän irän ewe fanü o uwätiu rech. Ra pwal uwato pworaus pwe ewe fanü ewe Samol mi Lapalap ach we Kot epwe ngenikich a mürina.
DEU 1:26 Nge oua ü ngeni ewe allük än ewe Samol mi Lapalap ämi we Kot, pwe ousap mochen feila lon ewe fanü.
DEU 1:27 Iwe, oua lal lon imwemi imw mangaku o üra, ‘Pokiten ewe Samol mi Lapalap a oput äm, a emwenikeemiwu seni ewe fanü Isip pwe epwe atokeemilong fän nemenien ekewe chon Amor o arosakeemila.
DEU 1:28 Ia aipwe feila ie? Pwiim ra akükünüela letipem ren ar apasa, pwe ekewe aramas ra watte o mwänemong senikem. Ar kewe telinimw ra pwal pöchökül, nge tittir ra tori läng. Nge ikenan ra pwal küna ekewe mwirimwirin Anak.’
DEU 1:29 Mürin üa ürenikemi, ‘Ousap niueitiir ika niuokusitiir.
DEU 1:30 Ewe Samol mi Lapalap ämi we Kot mi akom mwemi epwe püsin fiu fän itemi, usun oua fen küna pwe a fiu fän itemi me lon Isip.
DEU 1:31 Lon ewe fanüapö oua pwal küna usun ewe Samol mi Lapalap a emwenikemi lon ekewe al meinisin tori ei leni, usun eman mwän a eki nöün.’
DEU 1:32 Ikkei mwo ai kei kapas, nge ämi ousap lükü ewe Samol mi Lapalap ämi we Kot,
DEU 1:33 ewe a akom mwemi lon ewe al, pwe epwe kütta eu leni ia oupwe aüetä imwemi imw mangaku ie. Iwe, a akom mwemi lon ekkei lepwin, pwe epwe aiti ngenikemi ewe al oupwe fetal won, a pwal akom mwemi lon ewe kuchu lerän.”
DEU 1:34 “Iwe, ewe Samol mi Lapalap a rongorong ämi kapas, a song o pwon fän akapel,
DEU 1:35 ‘Esap wor eman me lein ekei mwän seni ei täppin aramas mi ngau epwe küna ewe fanü mi mürina üa pwon fän akapel pwe üpwe ngeni ämi kewe lewo,
DEU 1:36 chilon chök Kalep nöün Jefune we mwän, i epwe küna ewe fanü. Iwe, üpwe ngeni i me mwirimwirin kana ewe fanü a fen fetal won, pun a fokun aleasochis ngeniei ren unusen lelukan.’
DEU 1:37 Iwe, ewe Samol mi Lapalap a pwal song ngeniei pokitemi o üra, ‘Pwal en kosap tolong lon ewe fanü.
DEU 1:38 Nge Josua nöün Jefune we mwän mi angang ngonuk epwe tolong. Kopwe apöchöküla lelukan, pun epwe atolonga chon Israel lon ewe fanü pwe repwe fanüeni.’
DEU 1:39 Mürin, ewe Samol mi Lapalap a üra, ‘Nöümi semirit oua apasa pwe repwe oola, ir nöümi kewe resap mwo silei met mi öch ika met mi ngau lon ei rän, repwe tolong lon. Iwe, üpwe ngeniir ewe fanü pwe repwe fanüeni.
DEU 1:40 Nge ämi oupwe kul o sai ngeni ewe fanüapö awenewenen ewe Setipar.’”
DEU 1:41 “Mürin oua üreniei, ‘Äm aia tipis ngeni ewe Samol mi Lapalap. Iei aipwe feila o maun, usun ewe Samol mi Lapalap äm we Kot a allük ngenikem.’ Iwe, iteiten eman me eman mwän me leimi a rietä an pisekin maun ngeni lukalapan o ekieki pwe epwe mecheres an epwe feitä lon ewe fanü mi chukuchukutä.
DEU 1:42 Nge ewe Samol mi Lapalap a kapas ngeniei, ‘Kopwe üreniir pwe resap feitä o maun, pun ngang üsap nom lefiler. Iwe, repwe kuf ren chon oputeer.’
DEU 1:43 Iwe, üa ürenikemi ekei kapas, nge ämi ousp mochen aüselinga. Oua chök ü ngeni än ewe Samol mi Lapalap allük o öücho le feitä lon ewe fanü mi chukuchukutä.
DEU 1:44 Mürin, ekewe chon Amor mi nonom lon ewe fanü mi chukuchukutä ra towu o asükemiila, usun achi ra asü aramas, ra pwal akufukemi me lon Etom tori Horma.
DEU 1:45 Mürin, oua liwinsefäl o kechiu fän mesen ewe Samol mi Lapalap. Nge i esap rongorong mweliemi ika aüselingakemi.
DEU 1:46 Iei usun oua nonomotam Kates lon chomong rän.”
DEU 2:1 “Mürin sa kul o saila ngeni ewe fanüapö awenewenen ewe Setipar, usun ewe Samol mi Lapalap a kapas ngeniei. Iwe, sa saifetal won ewe chukuchukutän Etom lon chomong rän.
DEU 2:2 Mürin, ewe Samol mi Lapalap a üreniei,
DEU 2:3 ‘A naf fansoun ämi saifetal won ewe fanü mi chukuchukutä. Oupwe kul o feila ngeni efeng.’
DEU 2:4 A pwal üreniei pwe üpwe allük ngenikemi, ‘Iei a arapakan ämi pwerelong lon fanüen pwimi ekewe mwirimwirin Esau mi nom lon Etom. Iwe, repwe niuokusitikemi. Nge oupwe tümwünüöchükemi,
DEU 2:5 pwe ousap maun ngeniir. Pun üsap ngenikemi fanüer, sap mwo nge ükükün puun pechen eman aramas. Pun üa ngeni Esau ewe chuk Etom pwe epwe fanüeni.
DEU 2:6 Oupwe kamö seniir enemi mongö me ünümemi koluk ren moni.’
DEU 2:7 Iwe, ewe Samol mi Lapalap ämi we Kot a afeiöchü angangen pöümi meinisin. I a tümwünü ämi saifetal lon ewe fanüapö mi watte. Ewe Samol mi Lapalap ämi we Kot a etikemi lon ekei faik ier, pwe ousap osupwang ren och mettoch.
DEU 2:8 Iei usun sa saila seni pwiich ekewe mwirimwirin Esau mi nonom lon Etom o feila won ewe alen Arapa mi feito seni Elat me Esionkeper. Mürin sa kul o sailong won ewe al ngeni ewe fanüapön Moap.
DEU 2:9 Iwe, ewe Samol mi Lapalap a üreniei, ‘Kosap öpünüpün ngeni chon Moap ika maun ngeniir, pun üsap ngonuk och seni fanüer pwe kopwe fanüeni. Üa ngeni ekewe chon Moap ir ekewe mwirimwirin Lot ewe fanü Ar pwe repwe fanüeni.’”
DEU 2:10 (Me lom ekewe chon Em ra nonom ikenan, ir eu mwichen aramas mi watte o chomong, ra pwal mwänemong usun ekewe mwirimwirin Anak.
DEU 2:11 Iwe, ra pwal iteni chon Refa usun chök ekewe mwirimwirin Anak, nge chon Moap ra aita ngeniir chon Em.
DEU 2:12 Iwe, ekewe chon Hor ra pwal nonom lon Etom me lom, nge ekewe mwirimwirin Esau ra asürela seni fanüer, ra aroserela o nonom lon lenier. Iei usun chon Israel ra pwal föri ngeni chon ewe fanü ewe Samol mi Lapalap a ngeniir pwe fanüer.)
DEU 2:13 “Mürin, ewe Samol mi Lapalap a apasa, ‘Oupwe ütä o feila pekilan ewe öüwö Seret.’ Iei mine sa feila pekilan ewe öüwö Seret.
DEU 2:14 Iwe, seni ewe fansoun lupwen sa towu seni Kates-parnea tori sa feila pekilan ewe öüwö Seret ükükün ilik me walü ier. Lon ei fansoun unusen ewe täppin aramas ir sounfiu ra rosola, usun ewe Samol mi Lapalap a pwon fän akapel pwe epwe fis ngeniir.
DEU 2:15 Pun a let pwe ewe Samol mi Lapalap a ü ngeniir tori ra rosola meinisin me lon ewe leni ia ra nonom ie.
DEU 2:16 Iwe, lupwen ekewe sounfiu meinisin ra mäla me lein ekewe aramas,
DEU 2:17 ewe Samol mi Lapalap a üreniei,
DEU 2:18 ‘Lon ei rän kopwe le pwerelong lon kiännin Moap me lon Ar.
DEU 2:19 Nge lupwen kopwe arap ngeni kiännin fanüen chon Amon, kosap öpünüpün ngeniir ika maun ngeniir, pun üsap ngonuk och seni fanüer pwe kopwe fanüeni. Pun üa ngeni ekewe chon Amon ir ekewe mwirimwirin Lot ewe fanü pwe fanüer.’”
DEU 2:20 (Ei fanü a pwal iteni fanüen chon Refa, pun me lom chon Refa ra nonom ikenan. Nge ekewe chon Amon ra aita ngeniir chon Samsum.
DEU 2:21 Iwe, chon Samsum eu mwichen aramas mi watte o chomong, ra pwal mwänemong usun ekewe mwirimwirin Anak. Nge ewe Samol mi Lapalap a aroserela, lupwen chon Amon ra asürela seni fanüer o nonom lon lenier.
DEU 2:22 Iei usun Kot a föri fän iten ekewe chon Etom, ir mwirimwirin Esau mi nonom lon Etom. A arosala chon Hor, lupwen chon Etom ra asürela seni fanüer o nonom lon lenier tori ikenai.
DEU 2:23 Iwe, ekewe chon Kaftor mi feito seni Kaftor ra arosala ekewe chon Aw mi nonom lon ekewe sop tori Kasa. Iwe, ra nonom lon lenier.)
DEU 2:24 “Mürin, ewe Samol mi Lapalap a üreniei, ‘Iei kopwe ütä o sai. Kopwe pwerela pekilan ewe lemolun Arnon. Nengeni, üa atolonga fän nemeniom Sihon ewe re Amor, kingen Hespon, fiti fanüan. Kopwe maun ngeni o popuetä le fanüeni fanüan.
DEU 2:25 Seni ikenai üpwe popuetä le eniwa o eniwokusu ekewe aramas meinisin mi nom won fanüfan pokitom. Iwe, repwe rong usun pworausom, repwe chechech o niueituk.’”
DEU 2:26 “Mürin üa tinala chon künö seni ewe fanüapö Ketemot ren Sihon ewe kingen Hespon, pwe repwe uwala kapasen kinamwe o üreni,
DEU 2:27 ‘Kopwe mwüt ngenikem pwe aipwe pwerelong lon fanüom. Aipwe chök fetal won ewe al, nge aisap kul ngeni pelifichin ika pelimöngün.
DEU 2:28 Kopwe amömö ngenikem enem mongö me ünümem koluk. Kopwe chök mwüt ngenikem pwe aipwe pwerelong lon fanüom,
DEU 2:29 usun ekewe mwirimwirin Esau mi nonom lon Etom me ekewe chon Moap mi nonom lon Ar ra mwüt ngenikem. Aipwe chök fetal won ewe al tori aipwe feila pekilan ewe chanpupu Jortan o tolong lon ewe fanü ewe Samol mi Lapalap äm we Kot epwe ngenikem.’
DEU 2:30 Nge Sihon ewe kingen Hespon esap mwüt ngenikich pwe sipwe pwerelong. Pun ewe Samol mi Lapalap ämi we Kot a apöchöküla mefian o atipeföreai lelukan, pwe epwe atolonga Sihon fän nemeniemi, usun a fis ikenai.
DEU 2:31 Iwe, ewe Samol mi Lapalap a üreniei, ‘Nengeni, üa popuetä le atolonga Sihon me fanüan fän nemeniemi. Oupwe popuetä le tolong lon fanüan o fanüeni.’
DEU 2:32 Mürin, Sihon me nöün sounfiu meinisin ra towu pwe repwe maun ngenikich me arun ewe telinimw Jahas.
DEU 2:33 Nge ewe Samol mi Lapalap ach we Kot a atolonga i fän nemeniach. Iwe, sa akufu Sihon me nöün kewe mwän pwal nöün aramas meinisin.
DEU 2:34 Lon ewe fansoun sa pwal liapeni an kewe telinimw meinisin o unusen atarela. Sa pwal niela mwän, fefin me semirit, nge sisap amanaua eman.
DEU 2:35 Ekewe chök pwiin man pwal mine sa liapeni me lon ekewe telinimw sa angei fän itach pwe choon wokuch.
DEU 2:36 Iwe, seni Aroer mi nom ünükün lemolun ewe chanpupu Arnon pwal seni ewe telinimw mi nom lon ewe lemol tori Kiliat esap wor eu tittin telinimw mi tekia sisap atai. Ewe Samol mi Lapalap a atolongeer meinisin fän nemeniach.
DEU 2:37 Nge sisap kan ngeni fanüen chon Amon ika ngeni ewe fanü arun ewe chanpupu Japok me ekewe telinimw mi nom lon ewe fanü mi chukuchukutä, pwal ekewe leni meinisin ewe Samol mi Lapalap esap mwüt ngenikich pwe sipwe tolong lon.”
DEU 3:1 “Mürin sa kul o feila won ewe al a ale ngeni Pasan. Iwe, Ok ewe kingen Pasan me nöün sounfiu meinisin ra towu pwe repwe maun ngenikich me arun ewe telinimw Etrei.
DEU 3:2 Nge ewe Samol mi Lapalap a üreniei, ‘Kosap niuokusiti ewe king, pun üa atolonga fän nemeniom, i me nöün kewe sounfiu meinisin pwal fanüan. Iwe, kopwe föri ngeni usun mine ka föri ngeni Sihon ewe kingen chon Amor mi nemenem lon Hespon.’
DEU 3:3 Iei usun ewe Samol mi Lapalap ach we Kot a pwal atolonga fän nemeniach Ok ewe kingen Pasan me nöün kewe sounfiu meinisin. Iwe, sa nirela meinisin, pwe esap wor eman a chüen manau.
DEU 3:4 Lon ena fansoun sa pwal liapeni an kewe telinimw meinisin, pwe esap wor eu telinimw sisap liapeni. Sa angei seniir ükükün wone telinimw, unusen kinikinin ewe fanü Arkop, mwün ewe king Ok seni Pasan.
DEU 3:5 Ekei telinimw meinisin ra fokun pöchökül, a pwal wor tittir mi tekia, asamalaper me lokkur. Sa pwal liapeni chomong sop esap wor tit ünüküür.
DEU 3:6 Iwe, sa niela mwän me fefin me semirit meinisin, usun sa pwal föri ngeni Sihon ewe kingen Hespon. Sa pwal ataela ekewe telinimw meinisin.
DEU 3:7 Nge ekewe pwiin man meinisin, pwal mine sa liapeni me lon ar kewe telinimw sa angei fän itach pwe choon wokuch.
DEU 3:8 Lon ena fansoun sa angei ewe fanü seni ekewe ruoman kingen chon Amor mi nom ötiuen ewe chanpupu Jortan, seni lemolun ewe chanpupu Arnon tori ewe chuk Hermon.”
DEU 3:9 (Iwe, ekewe chon Siton ra aita ngeni ewe chuk Hermon Sirion, nge ekewe chon Amor ra aita ngeni Senir.)
DEU 3:10 “Sa angei seniir ekewe telinimw meinisin mi nom won ewe fanü mi sonosonöch, unusen ewe fanü Kiliat me unusen ewe fanü Pasan tori ekewe telinimw Saleka me Etrei mi nom lon fanüen Ok ewe kingen Pasan.”
DEU 3:11 (Iwe, Ok ewe kingen Pasan amüchülan me lein ekewe chon Refa mi chüen manau. An peet a för seni mächä ükükün langataman engol me ülüngat fiit, nge chölapan ükükün wonu fiit, a kaük won än aramas aükük. Ewe peet a chüen nom lon Rapa ewe telinimwen chon Amon.)
DEU 3:12 “Iwe, lon ena fansoun, lupwen sa fanüeni ei fanü, üa ngeni chon ekewe ainangen Rupen me Kat ewe fanü efengin Aroer mi nom ünükün lemolun ewe chanpupu Arnon, pwal esop seni chukuchukutän ewe fanü Kiliat me telinimwan kewe.
DEU 3:13 Nge lusun ewe fanü Kiliat me unusen Pasan ewe mwün Ok, iei unusen ewe fanü Arkop, üa ngeni esopun ewe ainangen Manasa.” (Iwe, unusen ewe fanü Pasan a fanüen chon Refa me lom.
DEU 3:14 Iwe, Jair seni ewe ainangen Manasa a liapeni unusen ewe fanü Arkop, iei ewe fanü Pasan tori kiännin fanüen chon Kesur me chon Makat. Iwe, a aita ngeni ekewe sop Hawot-jair püsin itan we. Iei usun ra chüen iteni tori ikenai.)
DEU 3:15 “Iwe, ewe fanü Kiliat üa ngeni chon ewe eterekesin Makir.
DEU 3:16 Üa pwal ngeni chon ekewe ainangen Rupen me Kat ewe fanü seni Kiliat tori lemolun ewe chanpupu Arnon. Nge lukalapen ewe lemol iei kiännin fanüer me peliör, nge kiännin fanüer me peliefeng ewe chanpupu Japok, iei pwal kiännin fanüen chon Amon.
DEU 3:17 Üa pwal ngeniir ewe fanü Arapa. Nge kiännin me pelilotou a fiti ewe chanpupu Jortan seni ewe Nomun Kalili tori ewe Setin Arapa, iei ewe Setin Mäla, fätiuen ewe chuk Piska mi nom ötiu.
DEU 3:18 Lon ena fansoun üa allük ngenikemi, ‘Ewe Samol mi Lapalap ämi we Kot a ngenikemi ei fanü pwe oupwe fanüeni. Ekewe mwän meinisin mi sip le maun me leimi repwe angei pisekin maun o akomwola pekilan ewe chanpupu Jortan mwen pwimi kewe aramasen Israel.
DEU 3:19 Nge pwülüemi me nöümi semirit pwal nöümi pwiin man repwe nonom lon ekewe telinimw üa fen ngenikemi, pun üa silei pwe a wor chomong nöümi pwiin man.
DEU 3:20 Oupwe eti pwimi kewe chon Israel le maun tori ewe Samol mi Lapalap a asösöör, usun ämi oua pwal asösö. Iwe, ir repwe fanüeni ewe fanü ewe Samol mi Lapalap epwe ngeniir me lotoun ewe chanpupu Jortan. Mürin, eman me eman epwe liwiniti püsin fanüan üa fen ngeni.’
DEU 3:21 Lon ena fansoun üa pwal allük ngeni Josua, ‘Mesom a fen küna meinisin mine ewe Samol mi Lapalap om we Kot a föri ngeni ekewe ruoman king. Iei usun ewe Samol mi Lapalap epwe föri ngeni ekewe mwü meinisin kopwe toriir me pekila.
DEU 3:22 Kosap niuokusitiir, pun ewe Samol mi Lapalap om we Kot epwe püsin maun fän itom.’”
DEU 3:23 “Iwe, lon ena fansoun üa tüngormau ngeni ewe Samol mi Lapalap o üreni,
DEU 3:24 ‘Ai Kot, Samol mi Lapalap, ka chök popuetä le pwäri ngeniei ngang noum chon angang om tekia me poum mi manaman. Pun meni sokun kot a wor lon läng ika won fanüfan a tongeni föri ekei sokun angang me föför mi manaman usun en ka föri?
DEU 3:25 Üa tüngor ngonuk pwe kopwe mwüt ngeniei üpwe pwerela pekilan ewe chanpupu Jortan o küna ewe fanü mi mürina, ewe fanü mi chukuchukutä o fokun mürina, pwal ewe chuk Lepanon.’
DEU 3:26 Nge ewe Samol mi Lapalap a song ngeniei pokitemi pwe esap aüselingaei. Iwe, a fen üreniei, ‘Ko le ükütiu, kosap chüen kapas ngeniei usun ei mettoch.
DEU 3:27 Kopwe feitä won ungen ewe chuk Piska o nenela pelilotoun me peliefengin ewe fanü, pwal peliörün me peliötiuan. Kopwe nenengeniöchü ewe fanü, pun kosap feila pekilan ewe chanpupu Jortan.
DEU 3:28 Nge kopwe akünöü Josua, kopwe apworai o apöchöküla letipan, pun i epwe akom mwen ekewe aramas le feila pekila, epwe pwal afanüa ngeniir ewe fanü, en kopwe chök nenengeni.’
DEU 3:29 Iei usun sa chök nonom lon ewe lemol sasape ngeni Pet-peor.”
DEU 4:1 Mürin, Moses a üreni ekewe aramas, “Ämi chon Israel, iei oupwe rongorong ngeni ekewe allük me pwüüng üpwe aiti ngenikemi, oupwe pwal aleasochisiir. Mürin oupwe manau, oupwe pwal tolong o fanüeni ewe fanü ewe Samol mi Lapalap än ämi kewe lewo we Kot epwe ngenikemi.
DEU 4:2 Ousap apachätä och ngeni ekewe kapas üa allük ngenikemi, ousap pwal aimwü och seni. Iwe, oupwe aleasochis ngeni ekewe allük än ewe Samol mi Lapalap ämi we Kot, usun üa allük ngenikemi.
DEU 4:3 Iwe, ämi oua püsin küna mine ewe Samol mi Lapalap a föri me lon Paal-peor. Pun ewe Samol mi Lapalap ämi we Kot a arosala seni leimi ekewe mwän meinisin mi fel ngeni Paal seni Peor.
DEU 4:4 Nge ämi mi nüküchar won ewe Samol mi Lapalap ämi we Kot, oua chüen manau tori ikenai.
DEU 4:5 Nengeni, üa aiti ngenikemi ekewe allük me pwüüng usun ewe Samol mi Lapalap ai we Kot a allük ngeniei, pwe oupwe apwönüretä lon ewe fanü ämi oupwe le tolong lon pwe oupwe fanüeni.
DEU 4:6 Oupwe aleasochisiir o apwönüretä, pun ren ei epwe pwä ngeni chon ekewe mwü ämi tipachem me mirit. Iwe, lupwen repwe rongorong ekei allük meinisin, repwe apasa, ‘Ellet, chon ei mwü mi lapalap eu mwichen aramas mi tipachem o mirit.’
DEU 4:7 Pun meni mwü mi watte a wor an kot mi kan ngeni, usun ewe Samol mi Lapalap ach we Kot a kan ngenikich iteiten fansoun sa köri pwe epwe alisikich?
DEU 4:8 Nge meni mwü mi watte a wor an allük me pwüüng mi fokun pwüngüöch, usun ekei allük meinisin üa aiti ngenikemi ikenai?”
DEU 4:9 “Iwe, oupwe afälikemi o tümwünükemi pwe ousap manlükala ekewe mettoch mesemi ra fen küna, ousap pwal mwüt ngeni pwe repwe ettiwu seni lon lelukemi lon ränin manauemi meinisin. Nge oupwe aiti ngeni nöümi me nöün nöümi,
DEU 4:10 usun mine a fis lon ewe rän oua ütä fän mesen ewe Samol mi Lapalap ämi we Kot me fäsonun ewe chuk Horep, lupwen a üreniei, ‘Kopwe amwichato rei ekewe aramas pwe repwe rongorong ai kapas o kaiö usun ar repwe meninitiei lon ränin manauer meinisin won fanüfan. Iei usun repwe pwal aiti ngeni nöür.’
DEU 4:11 Iwe, oua kanoto o ütä me fäsonun ewe chuk, lupwen ekkei a ngetengetetä seni ewe chuk tori fän läng. A pwal wor kuchuchol me rochokichin rochopwak.
DEU 4:12 Mürin, ewe Samol mi Lapalap a kapas ngenikemi seni lukalapen ewe ekkei. Ämi oua rongorong ngingin ekewe kapas, nge ousap küna lapalapan. Mi chök wor eu möngüngü.
DEU 4:13 Iwe, Kot a asile ngenikemi an pwon, ekewe engol allük, a allük ngenikemi pwe oupwe aleasochisiir. A pwal makeer won rüepek fau mi chöpöp.
DEU 4:14 Lon ewe fansoun ewe Samol mi Lapalap a allük ngeniei, pwe üpwe aiti ngenikemi ekewe allük me pwüng, pwe oupwe aleasochisiir me lon ewe fanü ämi oupwe pwerelong lon pwe oupwe fanüeni.”
DEU 4:15 Iwe, lon ewe rän ewe Samol mi Lapalap a kapas ngenikemi seni lon ewe ekkei me won ewe chuk Horep, ousap küna lapalapan. Iei mine oupwe fokun afälikemi,
DEU 4:16 pwe ousap tipis ren ämi föri eu uluulun anümwäl fän itemi lon lapalapen sokopaten uluul, usun uluulun eman mwän ika fefin,
DEU 4:17 uluulun sokun man mi nom won fanüfan, uluulun sokun machang mi äkkäs fän läng,
DEU 4:18 uluulun sokun man mi tö won pwül, pwal uluulun sokun ikenen leset meinisin.
DEU 4:19 Oupwe tümwünükemi, pwe lupwen oupwe netä läng o küna akkar me maram me fü kana pwal masouen fän läng meinisin ousap tupula o fel ngeniir ika pwal angang ngeniir. Pun ewe Samol mi Lapalap ämi we Kot a mwütätä ngeni chon ekewe mwü won fanüfan ekei mettoch pwe repwe fel ngeniir.
DEU 4:20 Nge ewe Samol mi Lapalap a angeekemi o emwenikemiiwu seni Isip mi wewe ngeni eu lenien ketel mächä, pwe epwe nöünikemi, usun a fis ikenai.
DEU 4:21 Iwe, ewe Samol mi Lapalap a pwal song ngeniei pokitemi o pwon fän akapel pwe üsap tongeni feila pekilan ewe chanpupu Jortan o tolong lon ewe fanü mi mürina ewe Samol mi Lapalap ämi we Kot epwe ngenikemi pwe oupwe fanüeni.
DEU 4:22 Pun ngang üpwe mäla lon ei fanü, nge üsap feila pekilan ewe chanpupu Jortan. Nge ämi oupwe feila pekila pwe oupwe fanüeni ewe fanü mi mürina.
DEU 4:23 Oupwe püsin äfälikemi pwe ousap manlükala ewe pwon ewe Samol mi Lapalap ämi we Kot a föri ngenikemi. Ousap föri eu uluulun anümwäl lon lapalapen mettoch meinisin i a pinei senikemi.
DEU 4:24 Pun ewe Samol mi Lapalap ämi we Kot a usun chök eu ekkei mi kü, pwal eman Kot mi lukomong.
DEU 4:25 Iwe, lupwen epwe wor nöümi kana me nöün nöümi, nge oua nomotam lon ewe fanü, a tongeni fis pwe oupwe tipis ren ämi föri uluulun anümwäl lon lapalapen sokopaten mettoch. Iwe, ren ämi föri mine a ngau me fän mesen ewe Samol mi Lapalap, oupwe asonga.
DEU 4:26 Ikenai üpwe köri läng me fanüfan pwe repwe atipisikemi, pwe are ousap aleasochisiei, oupwe müttir rosola meinisin seni lon ewe fanü ämi oupwe fanüeni mürin ämi feila pekilan ewe chanpupu Jortan. Ousap manauatam won, nge oupwe fokun mäla.
DEU 4:27 Iwe, ewe Samol mi Lapalap epwe atoropasafeilikemi lein chon ekewe mwü, nge ekoch echök me leimi repwe manau lon ekewe fanü ia ewe Samol mi Lapalap epwe asükemiila ie.
DEU 4:28 Ikenan oupwe angang ngeni sokopaten kot mi för seni mwüch me fau resap tongeni küna ika rongorong ika mongö ika tini, pun ir förien pöün aramas.
DEU 4:29 Nge ika oupwe kütta ewe Samol mi Lapalap ämi we Kot me ikenan, oupwe küna are oupwe kütta ren unusen lelukemi me unusen ngünümi.
DEU 4:30 Iwe, lupwen oua nom lon riaföü, nge ekei mettoch meinisin repwe torikemi lon kan rän mwach, mürin oupwe liwiniti ewe Samol mi Lapalap ämi we Kot o aleasochis ngeni.
DEU 4:31 Pun ewe Samol mi Lapalap ämi we Kot eman Kot mi eäni ümöümöch, esap likitikemi ika nikemi, esap pwal manlükala an pwon fän akapel ngeni ämi kewe lewo.
DEU 4:32 Iwe, oupwe ais tichik usun ekewe fansoun ra la mwen ämi uputiu, seni ewe rän Kot a föri aramas won fanüfan. Oupwe pwal ais tichik seni epek läng tori epek, ika eu sokun mettoch mi manaman a fen fis, ika aramas ra fen rongorong usun ei sokun lapalap.
DEU 4:33 Ifa usun, mi wor aramas ra rongorong mwelien eman kot seni lon ekkei usun ämi oua rongorong, nge ra chüen manau?
DEU 4:34 Are ifa usun, mi wor eman kot a fen sotuni le feito o angeawu eu mwichen aramas seni eu mwü fän püsin itan ren asisil me manaman, ren maun, ren pöün mi manaman o aköüpöü, pwal ren watten föför mi eniwokus, usun ewe Samol mi Lapalap ämi we Kot a föri fän itemi lon Isip me fän mesemi?
DEU 4:35 Ekei mettoch ra fis ngenikemi, pwe oupwe silei pwe ewe Samol mi Lapalap i wesewesen Kot, esap pwal wor eman lükün.
DEU 4:36 A aronga ngenikemi mwelian seni läng pwe epwe emiritikemi. Nge won fanüfan a aküna ngenikemi an ekkei mi lapalap, oua pwal rongorong an kapasowu me lon ewe ekkei.
DEU 4:37 Iwe, pokiten a echeni ämi kewe lewo o afili mwirimwirir, a emwenikemiiwu seni Isip ren an nonom ngenikemi, pwal ren an manaman mi lapalap.
DEU 4:38 A asüela me mwemi ekewe mwü mi watte o pöchökül senikemi, pwe epwe emwenikemiilong lon fanüer o ngenikemi pwe oupwe fanüeni, usun a fis ikenai.
DEU 4:39 Iei mine ikenai oupwe chechemeni o iseis lon lelukemi pwe ewe Samol mi Lapalap i wesewesen Kot lon läng pwal won fanüfan, esap pwal wor eman lükün.
DEU 4:40 Iwe, oupwe aleasochisi an kewe pwüüng me an kewe allük üa ngenikemi ikenai, pwe oupwe feiöch ämi me mwirimwirimi, oupwe pwal manauatam lon ewe fanü ewe Samol mi Lapalap ämi we Kot epwe ngenikemi pwe fanüemi tori feilfeilachök.”
DEU 4:41 Mürin, Moses a aimwüela ülüngat telinimw ötiuen ewe chanpupu Jortan,
DEU 4:42 pwe ewe mi niela eman aramas epwe tongeni sü ngeniir. Eman mi niela chon arun fän chechengau, nge esap oput i me mwan epwe tongeni sü ngeni eu me lein ekei telinimw o amanaua manauan.
DEU 4:43 Ikkei iten ekewe telinimw: Peser mi nom lon ewe fanüapö mi sosonöch fän iten chon ewe ainangen Rupen, Ramot mi nom lon ewe fanü Kiliat fän iten chon ewe ainangen Kat, me Kolan mi nom lon Pasan fän iten chon ewe ainangen Manasa.
DEU 4:44 Iwe, ikkei ekewe allük Moses a ngeni ekewe aramasen Israel.
DEU 4:45 Ikkei ekewe pwüüng me allük Moses a asile ngeni ekewe aramasen Israel, lupwen ra towu seni Isip,
DEU 4:46 o nonom lon ewe lemol ötiuen ewe chanpupu Jortan sasape ngeni Pet-peor lon fanüen Sihon ewe kingen chon Amor mi nemenem lon Hespon. Iwe, Moses me ekewe aramasen Israel ra akufu Sihon, lupwen ra towu seni Isip.
DEU 4:47 Ra fanüeni fanüan, pwal fanüen Ok ewe kingen Pasan. Ir ekewe ruoman kingen chon Amor mi nonom ötiuen ewe chanpupu Jortan.
DEU 4:48 Iwe, fanüer a popuetä seni Aroer mi nom ünükün lemolun ewe chanpupu Arnon o tori ewe chuk Sirion, a pwal iteni Hermon.
DEU 4:49 A pwal pachelong unusen ewe fanü Arapa mi nom ötiuen ewe chanpupu Jortan tori ewe Setin Mäla fätiuen ewe chuk Piska.
DEU 5:1 Iwe, Moses a körifengeni chon Israel meinisin o üreniir, “Ämi chon Israel, oupwe aüselinga ekewe allük me pwüüng üpwe aronga ngenikemi ikenai. Oupwe kaiö ekewe allük o tümwünüöchüür, pwe oupwe apwönüretä.
DEU 5:2 Ewe Samol mi Lapalap ach we Kot a föri eu pwon ngenikich me fäsonun ewe chuk Horep.
DEU 5:3 Ewe Samol mi Lapalap esap föri ei pwon ngeni semelapach kewe, nge a föri ngenikich meinisin mi chüen manau o nom ikei ikenai.
DEU 5:4 Iwe, ewe Samol mi Lapalap a fos newenewen ngenikemi me won ewe chuk seni lukalapen ewe ekkei.
DEU 5:5 Lon ena fansoun üa ü lefilen ewe Samol mi Lapalap me ämi, pwe üpwe asile ngenikemi alon ewe Samol mi Lapalap. Pun ämi oua niuokus pokiten ewe ekkei, iei mine ousap feitä won ewe chuk. Iwe, Kot a apasa:
DEU 5:6 Ngang ewe Samol mi Lapalap om Kot, üa emwenukowu seni ewe fanü Isip, ewe leni ia ra nöünuk amanau ie.
DEU 5:7 Kosap eäni eman kot lüki.
DEU 5:8 Kosap föri uluulun anümwäl fän itom kosap pwal alapalapa och mettochun pekitä lon läng are och mettochun pekitiu won fanüfan are och mettochun lon lölön failol.
DEU 5:9 Kosap chapetiu ngeniir are fel ngeniir, pun ngang ewe Samol mi Lapalap om Kot, eman Kot mi lukomong. Üa liwini än samasam föföringau won nöür kana tori aülüngatin are arüanün tettelin chokana mi oputaei.
DEU 5:10 Nge üa kirikiröch ngeni ngeröün mwirimwirin chokana mi echeniei o aleasochisi ai allük kana.
DEU 5:11 Kosap föünimwäli itei ngang ewe Samol mi Lapalap om Kot. Pun ngang ewe Samol mi Lapalap üpwe ngeni eman me eman chappen tipisin an föünimwäli itei.
DEU 5:12 Kopwe tümwünü ewe ränin sapat pwe kopwe pinini, usun ngang ewe Samol mi Lapalap om Kot üa allük ngonuk.
DEU 5:13 Wonu rän kopwe akangang o föri om angang meinisin.
DEU 5:14 Nge ewe afisuen rän ewe ränin sapat fän iten ngang ewe Samol mi Lapalap om Kot. Kosap föri och angang lon, sap en are noum mwän are noum fefin, sap noum chon angang mwän are chon angang fefin, sap pwal noum ätemwänin kow are noum aas are noum sokopaten man are ewe chon ekis mi nom leäpärum. Iwe, noum chon angang mwän me chon angang fefin repwe asösö usun chök en.
DEU 5:15 Kopwe chechemeni pwe en ka pwal eman chon angang lon ewe fanü Isip, nge ngang ewe Samol mi Lapalap üa emwenukowu ren pei mi manaman o aköüpöü. Iei mine ngang ewe Samol mi Lapalap üa allük ngonuk pwe kopwe tümwünü ewe ränin sapat.
DEU 5:16 Kopwe asamolu semom me inom, usun ngang ewe Samol mi Lapalap om Kot üa allük ngonuk, pwe ränin manauom repwe chomongola, kopwe pwal feiöch me lon ewe fanü ngang ewe Samol mi Lapalap om Kot üpwe ngonuk.
DEU 5:17 Kosap niela aramas.
DEU 5:18 Kosap lisowu.
DEU 5:19 Kosap solä.
DEU 5:20 Kosap eäni kapas chofana usun chon arum.
DEU 5:21 Kosap mochenia ngeni pwülüen chon arum, kosap pwal mocheniaiti imwen chon arum are fanüan, are nöün chon angang mwän me chon angang fefin, are nöün kow me nöün aas are meinisin mine chon arum a eäni.
DEU 5:22 Ikkei ekewe allük ewe Samol mi Lapalap a asile ngenikemi, lupwen oua mwichfengen me fäsonun ewe chuk. Iwe, a kapas ngenikemi fän mwelian mi leüömong seni lukalapen ewe ekkei, ewe kuchu me ewe rochokich. Nge esap chüen apachätä och. Mürin a makeretä won rüepek fau mi chöpöp o ngeniei.”
DEU 5:23 “Iwe, lupwen oua rongorong ewe möngüngü seni lukalapen ewe rochopwak lon ewe fansoun ewe chuk a kar, ekewe mwänirelan ämi kewe ainang me nöümi kewe souakom meinisin ra feito rei o apasa,
DEU 5:24 ‘Ewe Samol mi Lapalap ach Kot a pwäri ngenikich an ling me an tekia, sa pwal rongorong mwelian seni lukalapen ewe ekkei. Ikenai kich sa küna pwe aramas ra tongeni manau, inamwo ika Kot a fos ngeniir.
DEU 5:25 Nge pwota kich sipwe mäla iei? Pun ei ekkei mi watte epwe arosakichela. Are kich sipwe rongsefäl mwelien ewe Samol mi Lapalap ach we Kot, sipwe fokun mäla.
DEU 5:26 Pun ifa usun, mi wor eman aramas me lein aramas meinisin a rongorong mwelien ewe Kot mi manau, a fosewu seni lukalapen ekkei usun kich sa rongorong, nge a chüen manau?
DEU 5:27 En kopwe kan ngeni ewe Samol mi Lapalap ach we Kot o aüselinga meinisin mine epwe apasa. Mürin, kopwe asile ngenikem meinisin mine ewe Samol mi Lapalap ach Kot epwe kapas ngonuk. Nge äm aipwe aüselinga o aleasochisi.’
DEU 5:28 Iwe, lupwen ewe Samol mi Lapalap a rongorong ämi kapas ngeniei, a üreniei, ‘Üa rongorong än ekewe aramas kapas ra ürenuk. A wesewesen pwüng meinisin mine ra apasa.
DEU 5:29 Amwo leluker epwe iei chök usun iteiten fansoun, pwe repwe meninitiei o aleasochisi ai kewe allük meinisin, pwe repwe feiöch me mwirimwirir tori feilfeilachök.
DEU 5:30 Iwe, kopwe feila o üreniir pwe repwe liwinsefäliti imwer imw mangaku.
DEU 5:31 Nge en Moses kopwe ütä rei ikei. Iwe, üpwe aiti ngonuk ekewe allük me pwüüng meinisin, nge en kopwe aiti ngeni ekewe aramas, pwe repwe apwönüretä me lon ewe fanü üpwe ngeniir pwe fanüer.’
DEU 5:32 Iei mine ämi chon Israel oupwe tümwünüöchü le apwönüetä usun mine ewe Samol mi Lapalap ämi we Kot a allük ngenikemi. Ousap aleasolap ngeni ekewe allük.
DEU 5:33 Nge oupwe aleasochisi än ewe Samol mi Lapalap ämi we Kot kewe allük a ngenikemi, pwe oupwe manau o feiöch, oupwe pwal manauatam lon ewe fanü oupwe fanüeni.”
DEU 6:1 “Iwe, ikkei ekewe allük me pwüüng ewe Samol mi Lapalap ämi we Kot a allük ngeniei, pwe üpwe aiti ngenikemi pwe oupwe apwönüeretä me lon ewe fanü oupwe sailong lon pwe oupwe fanüeni.
DEU 6:2 Iei mine ämi me mwirimwirimi kana oupwe meniniti ewe Samol mi Lapalap ämi we Kot lon ränin manauemi meinisin ren ämi aleasochisi an kewe pwüüng me allük meinisin üa ngenikemi, pwe ränin manauemi repwe chomongola.
DEU 6:3 Iei mine ämi chon Israel oupwe aüseling ngeni ekewe allük o tümwünüöchü le apwönüretä, pwe oupwe feiöch o fokun chomongola, oupwe pwal nonomola lon ewe fanü mi pwülüöch o fanüeräs, usun ewe Samol mi Lapalap än ämi kewe lewo we Kot a pwon ngenikemi.
DEU 6:4 Kopwe aüseling Israel: Ewe Samol mi Lapalap ach Kot i chök ewe Samol mi Lapalap.
DEU 6:5 Kopwe echeni ewe Samol mi Lapalap om Kot ren unusen lelukom, ren unusen ngünum, pwal ren unusen tufichum.
DEU 6:6 Ekei kapas üa allük ngonuk ikenai repwe nom lon lelukom.
DEU 6:7 Iwe, kopwe achocho le aiti ngeni noum kewe ekei kapas, kopwe pwal fos usur lupwen kopwe mot lon imwom pwal lupwen kopwe fetal won al, lupwen kopwe konola pwal lupwen kopwe pwätä.
DEU 6:8 Kopwe fötiretä won poum pwe eu pisekin achem, kopwe pwal fötiretä won chamwom.
DEU 6:9 Iwe, kopwe makeretä won penkasamen imwom pwal won asamalapen om telinimw.”
DEU 6:10 “Iwe, ewe Samol mi Lapalap ämi we Kot epwe emwenikemiila lon ewe fanü a fen pwon fän akapel ngeni ämi kewe lewo Apraham, Isaak me Jakop pwe epwe ngenikemi, eu fanü mi wor telinimw watte o mürina, nge sap aüemi,
DEU 6:11 epwe pwal wor imw mi ur ren chomong mettoch mi mürina, nge sap ämi oua amasoueer, epwe pwal wor chönüttu, nge sap tuemi, pwal tanipin wain me iriän olif, nge sap fotukiemi. Iwe, lupwen oupwe mongö o möt,
DEU 6:12 oupwe afälikemi pwe ousap manlükala ewe Samol mi Lapalap mi emwenikemiiwu seni ewe fanü Isip, ewe ia ra nöünikemi amanau ie.
DEU 6:13 Oupwe meniniti ewe Samol mi Lapalap ämi we Kot. Oupwe fel ngeni i chök o eäni itan le pwon fän akapel.
DEU 6:14 Ousap fel ngeni pwal ekoch kot, ekewe kot än ekewe aramas mi nom arumi.
DEU 6:15 Are oupwe föri iei usun, ewe Samol mi Lapalap ämi we Kot mi nom lefilemi epwe song ngenikemi o arosakemiila seni won fanüfan, pun ewe Samol mi Lapalap eman Kot mi lukomong.
DEU 6:16 Iwe, ousap sotuni ewe Samol mi Lapalap ämi we Kot, usun oua fen sotuni me lon Masa.
DEU 6:17 Oupwe fokun aleasochisi ekewe allük me pwüüng än ewe Samol mi Lapalap ämi we Kot, usun mine a allük ngenikemi.
DEU 6:18 Oupwe föri mine a pwüng o mürina me fän mesen ewe Samol mi Lapalap pwe oupwe feiöch. Oupwe pwal tolong o fanüeni ewe fanü mi mürina ewe Samol mi Lapalap a fen pwon fän akapel pwe epwe ngeni ämi kewe lewo.
DEU 6:19 Oupwe pwal tongeni asüela chon oputemi, usun ewe Samol mi Lapalap a pwon ngenikemi.
DEU 6:20 Iwe, are nöümi repwe aisinikemi lon kan fansoun mwach, ‘Met wewen ekewe allük me pwüüng ewe Samol mi Lapalap ach we Kot a allük ngenikemi?’
DEU 6:21 Mürin oupwe üreniir, ‘Äm aia nöün Farao amanau me lon Isip, nge ewe Samol mi Lapalap a emwenikeemiwu seni Isip ren pöün mi manaman.
DEU 6:22 Iwe, ewe Samol mi Lapalap a föri asisil me manaman mi lapalap o afeiengau ngeni chon Isip me Farao, pwal ngeni chon leimwan meinisin me fän mesem.
DEU 6:23 A emwenikeemiwu me ikenan, pwe epwe emwenikeemilong o ngenikem ewe fanü a fen pwon fän akapel pwe epwe ngeni ach kewe lewo.
DEU 6:24 Mürin, ewe Samol mi Lapalap a allük ngenikem pwe aipwe aleasochsi ekei allük meinisin o meniniti ewe Samol mi Lapalap ach we Kot, pwe aipwe feiöch iteiten fansoun, nge i epwe amwöchü manauem, usun a fis ikenai.
DEU 6:25 Are aipwe tümwünüöchü le aleasochisi ekei allük meinisin me fän mesen ewe Samol mi Lapalap ach we Kot usun a allük ngenikem, äm aipwe pwüng ren.’”
DEU 7:1 “Iwe, ewe Samol mi Lapalap ämi we Kot epwe emwenikemiilong lon ewe fanü oukärän tolong lon pwe oupwe fanüeni, epwe pwal asüela chomong mwü me mwemi: ekewe chon Hit, chon Kirkas, chon Amor, chon Kanaan, chon Peris, chon Hiw me chon Jepus, ir ekewe fisu mwü mi watte o pöchökül senikemi.
DEU 7:2 Iwe, lupwen ewe Samol mi Lapalap ämi we Kot epwe atolongeer lepöümi, nge ämi oua akufuur, oupwe fokun aroserela meinisin. Ousap föri eu pwon ngeniir, ousap pwal ümöümöch ngeniir.
DEU 7:3 Iwe, ousap pwüpwülü ngeniir, ousap pwal apwüpwülüa nöümi föpwül ngeni nöür mwän, ika nöümi mwän ngeni nöür föpwül.
DEU 7:4 Pun repwe atoka nöümi seni ewe Samol mi Lapalap pwe repwe fel ngeni pwal ekoch kot. Mürin, ewe Samol mi Lapalap epwe song ngenikemi o müttir arosakemiila.
DEU 7:5 Nge iei usun mine oupwe föri ngeniir: Oupwe amökätiu ar kewe rongen asor o atatakisi ar kewe ür mi pin, oupwe pwal pöküetiu ar kewe uluulun ewe anüfefin Asera o kenala ar kewe uluulun anümwäl mi fal.
DEU 7:6 Pun ämi eu mwichen aramas mi pin fän iten ewe Samol mi Lapalap ämi we Kot. A afilikemi seni lein ekewe aramas meinisin mi nom won fanüfan, pwe epwe nöünikemi.
DEU 7:7 Ewe Samol mi Lapalap esap tongeekemi o afilikemi pokiten oua chomong seni ekewe ekoch mwichen aramas, pun oua chokisikis seni ekewe mwichen aramas meinisin.
DEU 7:8 Nge ei a fis pokiten ewe Samol mi Lapalap a tongeekemi o amwöchü an pwon a pwon fän akapel ngeni ämi kewe lewo. Iei mine ewe Samol mi Lapalap a emwenikemiiwu ren pöün mi manaman o angasakemi seni ewe leni ia ra nöünikemi amanau ie, seni fän nemenien Farao ewe kingen Isip.
DEU 7:9 Iei mine oupwe silei pwe ewe Samol mi Lapalap ämi we Kot a wesewesen Kot, eman Kot mi allükülük, a tümwünü an pwon o pwärätä an tong ngeni ngeröün täppin aramas mi echeni o aleasochisi an allük kana.
DEU 7:10 Nge chokewe mi oputa i epwe nirela. Pun esap mang le awena ngeni ätewe a oputa i liwinin an föför.
DEU 7:11 Iei mine oupwe tümwünüöchü le apwönüetä ekewe allük me pwüüng üa ngenikemi ikenai.”
DEU 7:12 “Iwe, are oupwe aüselinga ekei allük, are oupwe tümwünüöchü le apwönüretä, mürin ewe Samol mi Lapalap ämi we Kot epwe pwal apwönüetä an we pwon o pwäri an tong ngenikemi, usun a fen pwon fän akapel ngeni ämi kewe lewo.
DEU 7:13 Iwe, Kot epwe tongekemi, epwe afeiöchükemi o achomongakemi pwe epwe wor chomong mwirimwirimi. Epwe pwal afeiöchü uän fotämi irä, fotämi wiich, fotämi irän wain me irä olif. Epwe pwal achomongala nöümi pwiin kow me apanen nöümi pwiin sip me lon ewe fanü Kot a fen pwon fän akapel ngeni ämi kewe lewo pwe epwe ngenikemi.
DEU 7:14 Oupwe feiöch mwen aramas meinisin won fanüfan. Esap wor eman mwän me leimi epwe ingau chan, esap pwal wor eman fefin epwe rit, esap pwal wor nöümi man me lein nöümi pwiin kow epwe fokun.
DEU 7:15 Iwe, ewe Samol mi Lapalap epwe epeti senikemi samau meinisin. Ekewe samaungau oua sileer me lon Isip resap ariaföüükemi. Nge Kot epwe anomuur won chokewe meinisin mi oputakemi.
DEU 7:16 Iwe, oupwe arosala ekewe aramas meinisin ewe Samol mi Lapalap ämi we Kot epwe atolongeer fän nemeniemi. Ousap tongeer, ousap pwal fel ngeni ar kewe kot, pun ei epwe eu lenien likatup ngenikemi.
DEU 7:17 Iwe, are oupwe ekieki lon lelukemi: Ekei mwü ra watte senikem. Ifa usun, äm aipwe tongeni asürela seni fanüer?
DEU 7:18 Ousap niuokusitiir, nge oupwe chök chechemeni mine ewe Samol mi Lapalap ämi we Kot a föri ngeni Farao pwal ngeni chon Isip meinisin.
DEU 7:19 Oupwe chechemeni ekewe feiengau mi watte oua küna ren mesemi, ekewe asisil me manaman, pwal än ewe Samol mi Lapalap emwenikemiiwu ren pöün mi manaman o aköüpöü. Ewe Samol mi Lapalap ämi we Kot epwe föri ngeni ekewe aramas meinisin oua niuokusitiir usun mine a fen föri ngeni chon Isip.
DEU 7:20 Iwe, ewe Samol mi Lapalap epwe pwal tinato feiengau lefiler, tori chokewe mi chüen manau o op me mwemi repwe rosola.
DEU 7:21 Ousap fokun niuokusitiir, pun ewe Samol mi Lapalap ämi we Kot a nom remi, i eman Kot mi lapalap o eniwokus.
DEU 7:22 Iwe, ewe Samol mi Lapalap ämi we Kot epwe asüela chon ekewe mwü me mwemi ekis me ekis. Ousap tongeni aroserela fän eu chök, pwe ekewe manmwacho resap chomongola o afeiengauakemi.
DEU 7:23 Ewe Samol mi Lapalap ämi we Kot epwe atolonga chon oputemi fän nemeniemi, epwe pwal efisätä fitikoko watte lefiler tori ra rosola.
DEU 7:24 Epwe pwal atolonga ar kewe king fän nemeniemi, nge ämi oupwe nirela pwe esap wor eman epwe chüen chechemeniir. Esap wor eman aramas epwe tongeni ü ngenikemi tori oupwe aroserela meinisin.
DEU 7:25 Oupwe kenala ar kewe uluulun kot mi fal. Ousap mochenia ngeni ewe silifer me kolt mi nom wor, ousap pwal angei och fän itemi, pwe ousap tup ren. Pun ekei mettoch ra anioput me ren ewe Samol mi Lapalap ämi we Kot.
DEU 7:26 Ousap uwalong lon imwemi uluulun anümwäl mi anioput, pwe ousap anümamau rer. Nge oupwe oput o cheang ngeni, pun ei sokun mettoch a anümamau me ren ewe Samol mi Lapalap.”
DEU 8:1 “Iwe, oupwe tümwünüöchü le apwönüetä ekewe allük meinisin üa allük ngenikemi ikenai, pwe oupwe manau o chomongola, oupwe pwal tolong o fanüeni ewe fanü ewe Samol mi Lapalap a fen pwon fän akapel pwe epwe ngeni ämi kewe lewo.
DEU 8:2 Oupwe chechemeni usun än ewe Samol mi Lapalap ämi we Kot emwenikemiila lon ewe fanüapö lon ekewe faik ier ra la. A awarato weires womi pwe epwe atekisonakemi o sotunikemi, pwe epwe silei met mi nom lon lelukemi, ika oupwe aleasochisi an kewe allük ika ousap.
DEU 8:3 Iwe, a atekisonakemi o esen ngenikemi pwe oupwe echik. Mürin a amongö ngenikemi mana, och mongö ousap küküna, pwal semelapemi kewe resap küküna me mwan. Ei a föri, pwe epwe aiti ngenikemi pwe aramas resap manau ren mongö chök, pwe ra manau ren ekewe kapas meinisin mi towu seni awen ewe Samol mi Lapalap.
DEU 8:4 Iwe, üfemi oua üföüf resap kamwala, nge pechemi resap pwo lon ekewe faik ier ra la.
DEU 8:5 Iei mine oupwe mefi lon lelukemi pwe ewe Samol mi Lapalap ämi we Kot a emiritikemi, usun eman mwän a emiriti nöün.
DEU 8:6 Iwe, oupwe föri usun mine ewe Samol mi Lapalap ämi we Kot a allük ngenikemi, oupwe awena manauemi ngeni an kewe allük o meniniti.
DEU 8:7 Pun ewe Samol mi Lapalap ämi we Kot epwe emwenikemilong lon eu fanü mi mürina, eu fanüen öüwö me puäch me miich mi michitä me lon ekewe lemol pwal won ekewe chuk.
DEU 8:8 Ewe fanü eu fanüen wiich me parli, irän wain me fiik me apel, eu fanüen irä olif me chönün chunen.
DEU 8:9 Iwe, lon ewe fanü esap ätittin enemi mongö, ousap pwal osun och mettoch. Oua tongeni angei mächä seni föün ei fanü, oua pwal tongeni tuuw kapa seni fän ekewe chuk.
DEU 8:10 Iwe, oupwe mongö o mötüla, oupwe pwal mwareiti ewe Samol mi Lapalap ämi we Kot fän iten ewe fanü mi mürina a ngenikemi.”
DEU 8:11 “Iwe, oupwe afälikemi pwe ousap manlükala ewe Samol mi Lapalap ämi we Kot ren ämi aleasolap ngeni an kewe allük me pwüüng üa ngenikemi ikenai.
DEU 8:12 Iwe, lupwen oua mongö o mötüla, lupwen oua pwal aüetä imw mi mürina o imweimw lor,
DEU 8:13 lupwen nöümi pwiin kow me sip ra chomongola, pwal nöümi kolt me silifer me meinisin mine a wor remi a chomongola,
DEU 8:14 ousap lamalamtekia lon lelukemi o manlükala ewe Samol mi Lapalap ämi we Kot mi emwenikemiiwu seni ewe fanü Isip, ewe leni ia ra nöünikemi amanau ie.
DEU 8:15 Pun i a emwenikemiilong lon ewe fanüapö mi watte o eniwokus, ia a wor ie serepenit mi poison me chöükö. Lon ewe fanü mi pwasapwas pwülün, pun esap wor kolukun, a aünükemi koluk seni lon ewe achau mi fokun pöchökül.
DEU 8:16 Iwe, a pwal amongökemi mana lon ewe fanüapö, eu mongö ämi kewe lewo resap küküna me mwan. A awarato weires womi pwe epwe atekisonakemi o sotunikemi, pun epwe afeiöchükemi lesopolan.
DEU 8:17 Iei mine oupwe afälikemi pwe ousap ekieki lon lelukemi: Äm pöchökül me äm tufich ra atoto äm pisekisek.
DEU 8:18 Nge oupwe chechemeni ewe Samol mi Lapalap ämi we Kot, pun i a ngenikemi pöchökül pwe oupwe pisekisek. Iwe, a apwönüetä an pwon a eäni fän akapel ngeni ämi kewe lewo, usun a fis ikenai.
DEU 8:19 Nge are oua manlükala ewe Samol mi Lapalap ämi we Kot o kul ngeni pwal ekoch kot pwe oupwe angang o fel ngeniir, üa fokun fönökemi ikenai pwe oupwe wesewesen rosola.
DEU 8:20 Are ousap mochen aleasochisi alon ewe Samol mi Lapalap ämi we Kot, oupwe wesewesen rosola usun chök chon ekewe mwü ewe Samol mi Lapalap epwe arosala me mwemi.”
DEU 9:1 “Oupwe aüseling ämi chon Israel: Iei oupwe feila pekilan ewe chanpupu Jortan pwe oupwe fanüeni fanüen chon ekewe mwü mi watte o pöchökül senikemi, chor ra imweimw lon telinimw mi watte o tit tori läng.
DEU 9:2 Ir eu mwichen aramas mwirimwirin Anak, ra watte o mwänemong, oua sileer, oua pwal rong usun pworauser pwe esap wor eman a tongeni ü ngeniir.
DEU 9:3 Iei mine oupwe silei ikenai pwe ewe Samol mi Lapalap ämi we Kot a akomwola mwemi usun chök eu ekkei mi kü. Iwe, epwe akufuur o nirela me mwemi, nge ämi oupwe asürela o müttir aroserela, usun ewe Samol mi Lapalap a pwon ngenikemi.
DEU 9:4 Iwe, mürin än ewe Samol mi Lapalap asürela me mwemi, ousap ekieki lon lelukemi pwe a afanüa ngenikemi ei fanü pokiten ämi pwüng. Apwi, ewe Samol mi Lapalap a asüela chon ekewe mwü me mwemi pokiten ar föföringau.
DEU 9:5 Ousap tolong o fanüeni fanüer pokiten ämi pwüng me wenecharen lelukemi, nge pokiten än chon ekewe mwü föföringau ewe Samol mi Lapalap ämi we Kot a asürela me mwemi, pwe epwe apwönüetä ewe pwon a eäni fän akapel ngeni ämi kewe lewo Apraham, Isaak me Jakop.
DEU 9:6 Iei mine oupwe silei pwe ewe Samol mi Lapalap esap ngenikemi ewe fanü mi mürina pwe oupwe fanüeni pokiten ämi pwüng, pun ämi eu mwichen aramas mi tipeförea.”
DEU 9:7 “Iwe, oupwe chechemeni, nge ousap manlükala usun oua asonga ewe Samol mi Lapalap me lon ewe fanüapö. Seni ewe ränin oua towu seni Isip tori oua tolong lon ei fanü oua ü ngeni ewe Samol mi Lapalap.
DEU 9:8 Pwal me fäsonun ewe chuk Horep oua asonga ewe Samol mi Lapalap, pwe i a fokun song ngenikemi o ekiekin nikemiila.
DEU 9:9 Lupwen üa feitä won ewe chuk pwe üpwe angei ekewe rüepek fau mi chöpöp, ia a mak ie kapasen ewe pwon ewe Samol mi Lapalap a eäni ngenikemi, üa nonom won ewe chuk lon ükükün faik rän me faik pwin. Üsap mongö, üsap pwal ün.
DEU 9:10 Mürin, ewe Samol mi Lapalap a ngeniei ekewe rüepek fau mi chöpöp, a makei wor ngeni öütün ekewe fos meinisin a ürenikemi me won ewe chuk seni lukalapen ewe ekkei lon ewe ränin oua mwichefengen.
DEU 9:11 Iwe, amüchülan ekewe faik rän me faik pwin, ewe Samol mi Lapalap a ngeniei ekewe rüepek fau mi chöpöp, ia a mak ie kapasen ewe pwon.
DEU 9:12 Mürin, ewe Samol mi Lapalap a üreniei, ‘Kopwe müttiritiu seni ikei, pun noum kewe aramas ka emwenirewu seni Isip ra föföringau. Ra müttir tokola seni mine üa allük ngeniir o föri eu uluulun anümwäl fän iter.’
DEU 9:13 Iwe, ewe Samol mi Lapalap a pwal üreniei, ‘Üa nengeni ekei aramas o küna pwe ir eu mwichen aramas mi tipeförea.
DEU 9:14 Kopwe mwüt ngeniei pwe üpwe aroserela o tölala iter seni won fanüfan. Mürin üpwe föri senuk eu mwichen aramas mi pöchökül o chomong seniir.’
DEU 9:15 Iei mine üa liwinsefälitiu me won ewe chuk, nge ewe chuk a kar. Iwe, ekewe rüepek fau ia a mak ie kapasen ewe pwon ra nom lepei.
DEU 9:16 Lupwen üa nenengeni, üa küna pwe oua tipis ngeni ewe Samol mi Lapalap ämi we Kot. Oua föri fän itemi eu uluulun kow, oua pwal müttir aleasolap ngeni ekewe allük ewe Samol mi Lapalap a ngenikemi.
DEU 9:17 Iei mine üa aturätiu ekewe rüepek fau mi nom lepei o amökküür me fän mesemi.
DEU 9:18 Mürin üa chapetiu fän mesen ewe Samol mi Lapalap faik rän me faik pwin usun me mwan. Üsap mongö, üsap pwal ün pokiten ämi tipis meinisin oua föri, pun oua föri mine a ngau fän mesen ewe Samol mi Lapalap, oua pwal asonga.
DEU 9:19 Pun üa niuokusiti än ewe Samol mi Lapalap song ngenikemi me an lingeringeritikemi, pwe a ekiekin arosakemiila. Nge ewe Samol mi Lapalap a aüselinga ai tüngor lon pwal ei fansoun.
DEU 9:20 Iwe, ewe Samol mi Lapalap a pwal song ngeni Aaron, pwe a ekiekin niela. Iei mine üa pwal tüngor fän äsengesin Aaron lon ewe chök fansoun.
DEU 9:21 Mürin üa angei ewe uluulun kow oua föri, ewe mettoch oua tipis ren, o aturalong lon ekkei. Üa pwal amökkü o atatakisi tori a usun chök pipisüsü. Mürin üa aturalong pipisüsün lon ewe öüwö mi pu seni ewe chuk.
DEU 9:22 Iwe, oua pwal asonga ewe Samol mi Lapalap me lon Tapera, Masa me Kiprot-attawa.
DEU 9:23 Nge lupwen ewe Samol mi Lapalap a tinikemiila seni Kates-parnea, a ürenikemi pwe oupwe feitä o angei ewe fanü a ngenikemi pwe oupwe fanüeni, ämi oua ü ngeni ewe allük än ewe Samol mi Lapalap ämi we Kot. Ousap lükü i, ousap pwal aleasochisi alon.
DEU 9:24 Seni ewe rän üa silekemi, oua chök ü ngeni ewe Samol mi Lapalap.
DEU 9:25 Iei mine üa chapetiu fän mesen ewe Samol mi Lapalap lon ekewe faik rän me faik pwin, pun üa silei pwe a fokun ekiekin arosakemiila.
DEU 9:26 Iwe, üa tüngor ngeni, ‘Ai Kot Samol mi Lapalap, kosap arosala noum aramas, pun ir noum, ka angeseer ren om manaman, ka pwal emwenirewu seni Isip ren poum mi manaman.
DEU 9:27 Kopwe chechemeni noum kewe chon angang Apraham, Isaak me Jakop. Kosap nenengeni än ekewe aramas tipeförea ika ar föföringau ika ar tipis.
DEU 9:28 Pun chon Isip repwe apasa: Pokiten ewe Samol mi Lapalap esap tufichin emwenirelong lon ewe fanü a pwon ngeniir, a pwal oputeer, iei mine a emwenirewu pwe epwe nirela lon ewe fanüapö.
DEU 9:29 Nge ir noum aramas ka nöüniir, ka emwenirewu seni Isip ren om manaman mi lapalap, pwal ren poum mi aköüpöü.’”
DEU 10:1 “Iwe, lon ewe fansoun ewe Samol mi Lapalap a üreniei, ‘Kopwe falei rüepek fau mi chöpöp usun chök ekewe me mwan, o feitä rei won ewe chuk. Kopwe pwal föri eu pworofel seni mwüch.
DEU 10:2 Iwe, üpwe ruputi wor ekewe kapas mi mak won ekewe me mwan ka amökküür. Mürin kopwe isenirelong lon ewe pworofel.’
DEU 10:3 Iei mine üa föri eu pworofel seni ewe irä akasia, üa pwal falei rüepek fau mi chöpöp usun ekewe me mwan. Mürin üa feitä won ewe chuk o uweetä ekewe rüepek fau mi chöpöp lepei.
DEU 10:4 Iwe, ewe Samol mi Lapalap a ruputi won ekewe rüepek fau mi chöpöp usun maken won ekewe me mwan. A makei ekewe engol allük a fen ürenikemi, lupwen a kapasowu me won ewe chuk seni lukalapen ewe ekkei lon ränin ämi mwichefengen. Mürin, ewe Samol mi Lapalap a ngeniei ekewe rüepek fau.
DEU 10:5 Iwe, üa kul o liwinsefälitiu me won ewe chuk. Üa isenalong ekewe rüepek fau mi chöpöp lon ewe pworofel üa föri me mwan, usun ewe Samol mi Lapalap a allük ngeniei. Iwe, seni ewe fansoun ra nom ikenan.”
DEU 10:6 (Iwe, ekewe aramasen Israel ra sai seni Peerot Penejaakan tori Mosera. Ikenan Aaron a mäla o peias. Nge Eleasar nöün mwän a siwili lon wisan wisen souasor.
DEU 10:7 Iwe, seni ikenan ra sai ngeni Kutkota, nge seni Kutkota ra sai ngeni Jotpata, eu fanüen öüwö.
DEU 10:8 Lon ewe fansoun ewe Samol mi Lapalap a aimwüela chon ewe ainangen Lefi pwe repwe mwärei än ewe Samol mi Lapalap we pworun pwon. Repwe pwal ü fän mesen ewe Samol mi Lapalap pwe repwe angang ngeni o afeiöchü aramas ngeni itan, usun ra föri tori ikenai.
DEU 10:9 Iei mine esap wor inetin me wisen chon ewe ainangen Lefi fanü me lein ekewe ainangen Israel. Iwe, ewe Samol mi Lapalap i wiser, usun a fen pwon ngeniir.)
DEU 10:10 “Iwe, üa nonom won ewe chuk lon ükükün faik rän me faik pwin, usun ewe aeuin fansoun. Iwe, ewe Samol mi Lapalap a pwal aüselingaei lon ei fansoun o tipeeu ngeniei pwe esap arosakemiila.
DEU 10:11 Mürin, ewe Samol mi Lapalap a üreniei, ‘Kopwe feila o emwenala ekewe aramas, pwe repwe tolong o fanüeni ewe fanü üa fen pwon fän akapel ngeni ar kewe lewo pwe üpwe ngeniir.’”
DEU 10:12 “Iwe, ämi chon Israel, met ewe Samol mi Lapalap ämi we Kot a mochen pwe oupwe föri? A chök mochen pwe oupwe meniniti i o föri meinisin mine a allük ngenikemi. Oupwe echeni o angang ngeni seni unusen lelukemi me unusen ngünümi.
DEU 10:13 Iwe, oupwe aleasochisi än ewe Samol mi Lapalap allük me pwüüng üa allük ngenikemi lon ei rän pwe oupwe feiöch.
DEU 10:14 Ewe läng mi fokun tekia pwal fanüfan me masouan meinisin än ewe Samol mi Lapalap ämi we Kot.
DEU 10:15 Nge ewe Samol mi Lapalap a pwapwaäsini le echeni ämi kewe lewo o afilikemi me lein chon ekewe mwü meinisin, pun ämi mwirimwirir, usun a fis tori ikenai.
DEU 10:16 Iei mine oupwe limeti lelukemi, nge ousap chüen tipeförea.
DEU 10:17 Pun ewe Samol mi Lapalap ämi we Kot, i eman Kot mi tekia seni ekewe kot me ekewe samol meinisin, eman Kot mi tekia o manaman pwal eniwokus, esap lifilifil aramas, esap pwal angei lifangen amichimich.
DEU 10:18 A eäni pwüng ngeni ekewe mi mäsen me fefin mi mä pwülüer, a pwal tongei ekewe chon ekis, a amongöniir o öüföüfeer.
DEU 10:19 Iei mine oupwe tongei ekewe chon ekis, pun oua piin wasöla lon ewe fanü Isip.
DEU 10:20 Iwe, oupwe meniniti ewe Samol mi Lapalap ämi we Kot, oupwe angang ngeni o fitipacheiti, oupwe chök eäni itan le pwon.
DEU 10:21 Iwe, oupwe mwareiti i chök. I ämi we Kot mi föri fän itemi ekei mettoch mi manaman o eniwokus mesemi ra küneer.
DEU 10:22 Iwe, lupwen ämi kewe lewo ra feila Isip, ra chök ükükün fik aramas. Nge ikenai ewe Samol mi Lapalap a achomongakemiila, pwe oua chomong usun chök ekewe füün läng.”
DEU 11:1 “Iwe, oupwe echeni ewe Samol mi Lapalap ämi we Kot o aleasochisi an akot, an öüröür, an kewe allük me pwüüng iteiten fansoun meinisin.
DEU 11:2 Ikenai oupwe chechemeni pwe sap nöümi kewe mi küna ika mefi än ewe Samol mi Lapalap emirit, pwe ämi. Oua küna an tekia me pöün mi manaman o aköüpöü.
DEU 11:3 Iwe, oua küna an kewe manaman me an kewe föför a föriir me lon Isip ngeni Farao ewe kingen Isip me unusen fanüan.
DEU 11:4 Oua pwal küna mine a föri ngeni ewe mwichen sounfiun Isip, ngeni nöür oris me war woken, usun an amopuretiu lon ewe Setipar, lupwen ra tapwerikemi, pwal usun än ewe Samol mi Lapalap a aroserela.
DEU 11:5 Iwe, oua silei mine a föri ngenikemi me lon ewe fanüapö tori oua feito lon ei leni,
DEU 11:6 pwal mine a föri ngeni Tatan me Apiram nöün Eliap kewe mwän seni ewe ainangen Rupen. Oua küna usun ewe pwül a sangfesen o oromirela fän mesen chon Israel meinisin fiti chon leimwer, pwal imwer imw mangaku, nöür chon angang me nöür man meinisin mi nom rer.
DEU 11:7 Iwe, oua püsin küna ren mesemi ekei föför mi manaman meinisin ewe Samol mi Lapalap a föri.”
DEU 11:8 “Iwe, oupwe aleasochisi ekewe allük üa allük ngenikemi ikenai, pwe oupwe pöchökül le feila pekilan ewe chanpupu Jortan o tolong lon ewe fanü oupwe le pwerelong lon pwe oupwe fanüeni.
DEU 11:9 Iwe, ren ämi aleasochisi ekewe allük, oupwe pwal manauatam lon ewe fanü ewe Samol mi Lapalap a pwon fän akapel ngeni ämi kewe lewo pwe epwe ngeniir me mwirimwirir, ewe fanü mi pwülüöch o fanüeräs.
DEU 11:10 Pun ewe fanü oupwe le tolong lon pwe oupwe fanüeni esap usun ewe fanü Isip oua towu seni. Ikenan oua angang weires le fotuki föün irä o föri warawar, pwe koluk epwe puwu ngeniir, usun eman a föri ngeni eu tanipin iasai.
DEU 11:11 Nge ewe fanü oupwe le pwerelong lon pwe oupwe fanüeni eu fanüen chukuchukutä me lemol mi chöchön ren üt seni läng,
DEU 11:12 pwal eu fanü ewe Samol mi Lapalap ämi we Kot a tümwünü. Iwe, mesan a nenengeni ewe fanü seni lepoputän eu ier tori lesopolan.
DEU 11:13 Iwe, are oua aleasochisi ekewe allük üa allük ngenikemi ikenai, pwe oupwe echeni ewe Samol mi Lapalap ämi we Kot o angang ngeni seni unusen lelukemi me unusen ngünümi,
DEU 11:14 i epwe fang ngenikemi üt fän iten fanüemi lon fansoun öch, epwe ngenikemi ewe ütten leefen me ütten leräs, pwe oupwe tongeni ionalong kiniemi föün wiich me föün wain me ämi föün olif, pwe epwe wor ämi apüra.
DEU 11:15 Iwe, epwe apwükü fetil lon ämi tanipi fän iten nöümi pwiin kow, nge ämi oupwe mongö o mötüla.
DEU 11:16 Oupwe afälikemi pwe ousap tupula o tokola ren ämi angang ngeni pwal ekoch kot o fel ngeniir.
DEU 11:17 Iwe, are oupwe föri iei usun, ewe Samol mi Lapalap epwe song ngenikemi. Epwe apüngala läng pwe esap püng üt, nge ewe fanü esap ua. Mürin oupwe müttir rosola seni ewe fanü mi mürina, ewe Samol mi Lapalap epwe ngenikemi.
DEU 11:18 Iei mine oupwe atolonga ai kei kapas lon lelukemi pwal lon ämi ekiek. Oupwe fötiretä won pöümi pwe eu pisekin achem, oupwe pwal fötiretä won chamwemi.
DEU 11:19 Iwe, oupwe aiti ngeni nöümi kewe ekei kapas, oupwe fos usur lupwen oua mot lon imwemi pwal lupwen oua fetal won al, lupwen oua konola pwal lupwen oua pwätä.
DEU 11:20 Oupwe makeretä won penkasamen imwemi pwal won asamalapen ämi kewe telinimw,
DEU 11:21 pwe ränin manauemi me ränin manauen nöümi repwe chomongola me lon ewe fanü ewe Samol mi Lapalap a pwon fän akapel ngeni ämi kewe lewo pwe epwe ngeniir lon ükükün fansoun läng a nom asen fanüfan.
DEU 11:22 Iwe, are oua achocho le föri pwüngün ekei allük meinisin üa allük ngenikemi pwe oupwe apwönüretä, are oua echeni ewe Samol mi Lapalap ämi we Kot o föri meinisin mine a allük ngenikemi, are oua pwal fitipacheiti,
DEU 11:23 mürin ewe Samol mi Lapalap epwe asüela me mwemi chon ekei mwü meinisin, oupwe pwal fanüeni fanüen chon ekewe mwü mi watte o pöchökül senikemi.
DEU 11:24 Ekewe leni meinisin ia pechemi repwe ipwelong ie epwe fanüemi. Iwe, kiännin fanüemi epwe seni ewe fanüapö mi nom ör tori ewe chuk Lepanon mi nom efeng, pwal seni ewe chanpupu Oifrat mi nom ötiu tori ewe matau watte mi nom lotou.
DEU 11:25 Iwe, esap wor eman aramas epwe tongeni ü ngenikemi. Ewe Samol mi Lapalap epwe föri pwe oupwe eu minen eniwokus me eniweniw ngeni chon ewe fanü meinisin ia oupwe ipwelong ie, usun a fen pwon ngenikemi.
DEU 11:26 Nengeni, ikenai üa anomu mwemi feiöch me anümamau.
DEU 11:27 Oupwe feiöch are oua aleasochisi än ewe Samol mi Lapalap ämi we Kot kewe allük üa ngenikemi ikenai.
DEU 11:28 Nge oupwe anümamau, are oua aleasolap ngeni än ewe Samol mi Lapalap ämi we Kot kewe allük, are oua tok seni ekei allük üa ngenikemi ikenai o fel ngeni pwal ekoch kot ousap sileer me lom.
DEU 11:29 Iwe, lupwen ewe Samol mi Lapalap ämi we Kot epwe emwenikemiilong lon ewe fanü oupwe le pwerelong lon pwe oupwe fanüeni, oupwe apasa ewe kapasen feiöch seni won ewe chuk Kerisim, nge ewe kapasen anümamau seni won ewe chuk Epal.
DEU 11:30 (Ekei chuk ra nom pekilan ewe chanpupu Jortan lotoun ewe al sasape ngeni epiläng lon fanüen chon Kanaan mi nonom lon Arapa awenewenen Kilkal ünükün ewe irä ook mi nom lon More.)
DEU 11:31 Ämi oupwe le feila pekilan ewe chanpupu Jortan, pwe oupwe fanüeni ewe fanü ewe Samol mi Lapalap ämi we Kot epwe ngenikemi. Iwe, lupwen oupwe fanüeni o nonom lon,
DEU 11:32 oupwe tümwünüöchü le apwönüetä ekewe allük me pwüüng meinisin üa ngenikemi ikenai.”
DEU 12:1 “Ikkei ekewe allük me pwüüng oupwe tümwünüöchü le apwönüetä lon ränin manauemi meinisin me lon ewe fanü ewe Samol mi Lapalap än ämi kewe lewo we Kot a ngenikemi pwe fanüemi.
DEU 12:2 Iwe, ekewe fanü oupwe angei seni chon ekewe mwü, oupwe fokun ataela me lon ekewe leni meinisin ia ekewe aramas ra fel ngeni ar kewe kot ie, won ekewe chukutekia me won ekewe chukutekison, pwal fän iteiten irä mi muresires.
DEU 12:3 Oupwe amökkätiu ar kewe rongen asor, oupwe atatakisi ar kewe ür mi pin o kenala ar kewe uluulun ewe anüfefin Asera. Oupwe pwal pöküetiu ar kewe uluulun anümwäl liosun ar kewe kot o amoola iter seni lon ewe leni.
DEU 12:4 Ousap fel ngeni ewe Samol mi Lapalap ämi we Kot usun ekei aramas ra fel ngeni ar kewe kot.
DEU 12:5 Nge oupwe feila ngeni ewe chök leni ewe Samol mi Lapalap ämi we Kot epwe filätä seni lein fanüen ämi kewe ainang meinisin, pwe aramas repwe fel ngeni ie, epwe pwal föri pwe lenian. Ikenan oupwe feila ie,
DEU 12:6 ikenan oupwe pwal uwala ämi asoren kek me ämi kewe sokopaten asor, ämi eu leengol me ämi kewe asor oua fang, ämi asoren pwon me asor seni püsin letipemi, pwal ekewe mweinöün nöümi pwiin kow me sip.
DEU 12:7 Iwe, ikenan oupwe mongö me fän mesen ewe Samol mi Lapalap ämi we Kot, oupwe pwal pwapwa me chon leimwemi ren meinisin mine oupwe föri, pun ewe Samol mi Lapalap ämi we Kot a afeiöchükemi.
DEU 12:8 Iwe, ousap föri usun mine oua föri me lom. Pun tori ikenai iteiten eman me eman a chök föri mine a pwüng me ren.
DEU 12:9 Pun ousamwo tori ewe lenien asösö, ewe fanü ewe Samol mi Lapalap epwe ngenikemi pwe fanüemi.
DEU 12:10 Nge lupwen oupwe pwerela pekilan ewe chanpupu Jortan o nonom lon ewe fanü ewe Samol mi Lapalap ämi we Kot epwe ngenikemi pwe fanüemi, lupwen epwe pwal asösöükemi seni chon oputakemi mi nom ünükümi, pwe oupwe nonom lon fän kinamwe,
DEU 12:11 oupwe uwato meinisin mine üa allük ngenikemi ren ewe leni ewe Samol mi Lapalap ämi we Kot epwe filätä pwe aramas repwe fel ngeni ie. Oupwe uwato ämi asoren kek me ämi kewe sokopaten asor, ämi eu leengol me ämi kewe asor oua fang, ämi asoren pwon meinisin oua pwonei ngeni ewe Samol mi Lapalap.
DEU 12:12 Iwe, oupwe pwapwa fän mesen ewe Samol mi Lapalap ämi we Kot, ämi me nöümi mwän me nöümi fefin, nöümi chon angang mwän me chon angang fefin, pwal ekewe mwän seni ewe ainangen Lefi mi nom lon ämi kewe telinimw, pun esap wor fanüer me wiser remi.
DEU 12:13 Oupwe afälikemi pwe ousap eäni ämi asor lon iteiten leni oua sani.
DEU 12:14 Nge oupwe chök eäni lon ewe leni ewe Samol mi Lapalap epwe filätä seni lein fanüen ämi kewe ainang. Ikenan oupwe eäni ämi kewe asoren kek, ikenan oupwe pwal föri meinisin mine üa allük ngenikemi.
DEU 12:15 Nge oua tongeni niela man o ochoch fituker ekis meinisin me lon ämi kewe telinimw ükükün ämi mochen, pwal ükükün än ewe Samol mi Lapalap ämi we Kot a afeiöchukemi. Chokewe mi limengau me chokewe mi limöch repwe tongeni mongö, usun ra ochoch chia ika sokun chia itan kasele.
DEU 12:16 Nge ousap fokun ünümi ewe cha, pwe oupwe ninätiu lepwül usun koluk.
DEU 12:17 Iwe, ousap mongö ewe eu leengolun kiniemi föün wiich ika ünümi ewe eu leengolun ünümemi wain ika eäni ewe eu leengolun ämi apüra lon ämi kewe telinimw. Ousap pwal ochoch mweinöün nöumi pwiin kow ika sip. Ousap ochoch ämi asoren pwon oua pwon won, ika ämi asor seni püsin letipemi, ika ekewe sokopaten asor oua fang.
DEU 12:18 Nge oupwe mongö ekei asor fän mesen ewe Samol mi Lapalap ämi we Kot lon ewe leni a filätä, ämi me nöümi mwän me nöümi fefin, nöümi chon angang mwän me chon angang fefin, pwal ekewe mwän seni ewe ainangen Lefi mi nom lon ämi kewe telinimw. Iwe, oupwe pwapwa fän mesen ewe Samol mi Lapalap ämi we Kot ren meinisin mine oua föri.
DEU 12:19 Nge oupwe afälikemi pwe ousap manlükala ekewe mwän seni ewe ainangen Lefi lon ükükün ränin manauemi won fanüemi.
DEU 12:20 Iwe, lupwen ewe Samol mi Lapalap ämi we Kot epwe awatteloi fanüemi usun a fen pwon ngenikemi, nge oua mochen ochoch fituk, pokiten oua mwäräkich won fituk, oupwe tongeni ochoch fituk ükükün ämi mochen.
DEU 12:21 Are ewe leni, ewe Samol mi Lapalap ämi we Kot epwe filätä pwe aramas repwe fel ngeni ie, a kon toau senikemi, oua tongeni niela eman man seni nöümi pwiin kow ika sip ewe Samol mi Lapalap a ngenikemi. Iwe, oua tongeni ochoch ewe fituk me lon ämi kewe telinimw ükükün ämi mochen, usun üa fen allük ngenikemi.
DEU 12:22 Usun oua ochoch chia ika sokun chia itan kasele, iei usun oupwe pwal tongeni ochoch ei fituk. Iwe, chokewe mi limengau pwal chokewe mi limöch ra tongeni ochoch.
DEU 12:23 Nge ousap fokun ünümi ewe cha, pun manau a nom lon cha. Iei mine ousap tongeni eni ewe manau mi nom lon ewe fituk.
DEU 12:24 Ousap ünümi ewe cha, nge oupwe ninätiu lepwül usun koluk.
DEU 12:25 Iwe, ousap ünümi, pwe ämi me mwirimwirimi kana oupwe feiöch, pokiten oua föri mine a pwüng me fän mesen ewe Samol mi Lapalap.
DEU 12:26 Nge ekewe mettoch mi pin oua wisen eäni asor, pwal ämi kewe asoren pwon oupwe uweerela lon ewe leni ewe Samol mi Lapalap a filätä.
DEU 12:27 Iwe, oupwe eäni ämi asoren kek, ewe fituk me ewe cha won ewe rongen asor än ewe Samol mi Lapalap ämi we Kot. Oupwe pwal eäni ekewe asor oua tongeni ochoch fituker, nge chan ekewe mönün asor epwe ninitiu won ewe rongen asor än ewe Samol mi Lapalap ämi we Kot.
DEU 12:28 Iwe, oupwe fokun aleasochisi ekei kapas meinisin üa allük ngenikemi, pwe oupwe feiöch ämi me mwirimwirimi kana tori feilfeilachök, pokiten oua föri mine a mürina o pwüng me fän mesen ewe Samol mi Lapalap ämi we Kot.”
DEU 12:29 “Iwe, ewe Samol mi Lapalap epwe arosala chon ekewe mwü me mwemi, chokewe oupwe angei seniir fanüer pwe oupwe fanüeni o nonom lon.
DEU 12:30 Mürin ar rosola oupwe afälikemi pwe ousap tup ren ämi apirüür, ousap pwal ais usun ar kewe kot o apasa: Ifa lapalapen än chon ekei mwü fel ngeni ar kewe kot? Pun äm aipwe pwal föri ina usun.
DEU 12:31 Ousap fokun fel ngeni ewe Samol mi Lapalap ämi we Kot usun ir ra fel ngeni ar kewe kot. Pun lon ar fel ngeni ar kewe kot ra föri sokun föför mi anioput ewe Samol mi Lapalap a oput. Ra fen mwo nge keni nöür ät me nengin ngeni ar kewe kot.
DEU 12:32 Iwe, oupwe tümwünüöchü le föri meinisin mine üa allük ngenikemi. Ousap apacha och ngeni ika angei och seni.
DEU 13:1 Iwe, are eman soufos ika eman soutan a ütä me leimi o pwäri ngenikemi pwe epwe fis eu asisil ika manaman,
DEU 13:2 are ewe asisil ika manaman a kapas usun a fis, nge mürin a pwal apasa: Ousipwe fel ngeni pwal ekoch kot o angang ngeniir, sokun kot ousap sileer me mwan,
DEU 13:3 ousap aüselinga än ewe soufos ika ewe soutan kapas. Pun ewe Samol mi Lapalap ämi we Kot a sotunikemi pwe epwe silei ika oua echeni i seni unusen lelukemi me unusen ngünümi.
DEU 13:4 Oupwe fetalla mürin ewe Samol mi Lapalap ämi we Kot o meniniti, oupwe apwönüetä an kewe allük o aleasochisi alon, oupwe pwal fel ngeni o fitipacheiti.
DEU 13:5 Nge ewe soufos ika soutan epwe ninnila, pun a aiti ngenikemi pwe oupwe ü ngeni ewe Samol mi Lapalap ämi we Kot mi emwenikemiiwu seni ewe fanü Isip o angasakemi seni ewe leni ia ra nöünikemi amanau ie. A pwal sotuni le atokakemi seni mine ewe Samol mi Lapalap ämi we Kot a allük ngenikemi pwe oupwe föri. Iei usun oupwe atowu ewe mi ngau seni lefilemi.
DEU 13:6 Iwe, are wesewesen pwiüm ika püsin noum mwän ika noum fefin ika püsin pwülüom ka fokun tongei, ika chiechiom ka fokun aücheani epwe atupuk lemonomon o apasa: Ousipwe feila o fel ngeni pwal ekoch kot, sokun kot en ika om kewe lewo ousap sileer me mwan,
DEU 13:7 ekewe kot än ekewe aramas mi nom unukum, ese lifilifil ika ra kan ngonuk ika ra toau senuk, seni lesopun ewe fanü tori pwal lesopun,
DEU 13:8 kosap tupula ren ika aüselinga. Iwe, kosap fokun tongei ika ächika ewe aramas, kosap pwal tukumala an kapas.
DEU 13:9 Nge kopwe fokun niela. En kopwe akomwen monei ngeni fau, mürin ekewe aramas meinisin repwe monei ngeni fau.
DEU 13:10 Kopwe monei ngeni fau pwe epwe mäla, pun a ekiekin atokokola seni ewe Samol mi Lapalap om we Kot, ewe mi emwenukowu seni ewe fanü Isip o angasok seni ewe leni ia ra nöünuk amanau ie.
DEU 13:11 Mürin, chon Israel meinisin repwe rong usun o niuokus, pwe esap chüen wor eman me leimi epwe föri ei sokun föföringau.
DEU 13:12 Iwe, are oua rongorong usun eu lein ämi kewe telinimw ewe Samol mi Lapalap ämi we Kot epwe ngenikemi pwe oupwe imweimw lon,
DEU 13:13 pwe aramasingau seni leimi ra fetalfeil lein aramasen ewe telinimw o atokerela ren ar apasa: Ousipwe feila o fel ngeni pwal ekoch kot, sokun kot ämi ousap sileer me mwan,
DEU 13:14 mürin oupwe achocho le kütta o akais pwüngün ei pworaus. Nge are a let o pwüng pwe ei föför mi anioput a fis leimi,
DEU 13:15 oupwe fokun niela chon ewe telinimw ren ketilas. Oupwe ataela unusen ewe telinimw o niela chon pwal mönün lon ren ketilas.
DEU 13:16 Iwe, oupwe ionifengeni me lukalapen ewe telinimw pisekin lon meinisin o kenala ewe telinimw fiti pisekin meinisin, pwe eu asoren kek mi unus ngeni ewe Samol mi Lapalap ämi we Kot. Ewe telinimw epwe chök eu ioien pipi, nge esap fokun kaüsefälitä.
DEU 13:17 Ousap amwöchü och me lein ekewe mettoch oupwe kenala, pwe ewe Samol mi Lapalap epwe emwen seni an song mi watte o ümöümöch ngenikemi. Iwe, epwe pwal tongeekemi o achomongakemi, usun a fen pwon fän akapel ngeni ämi kewe lewo,
DEU 13:18 are oua aleasochisi alon ewe Samol mi Lapalap ämi we Kot o tümwünü an kewe allük meinisin üa allük ngenikemi ikenai, are oua pwal föri mine a pwüng fän mesan.”
DEU 14:1 “Iwe, ämi nöün ewe Samol mi Lapalap ämi we Kot. Iei mine ousap nekelekelei inisimi ika reipöpöla möküremi, lupwen oua letipeta ren eman mi mäla.
DEU 14:2 Pun ämi eu mwichen aramas mi pin fän iten ewe Samol mi Lapalap ämi we Kot. I a afilikemi me lein ekewe mwichen aramas meinisin mi nom won fanüfan, pwe oupwe nöün aramas.”
DEU 14:3 “Iwe, ousap ochoch man mi anioput me ren ewe Samol mi Lapalap.
DEU 14:4 Ikkei ekewe man oua tongeni ochoch: Kow, sip me kuuch,
DEU 14:5 chia me sokopaten chia iter kasele me ropak, kuuch mi mwacho, pwal sokun kuuch mi mwacho itan ipeks, ewe man itan antelop me sip mi nom won chuk.
DEU 14:6 Iteiten man meinisin mi keang kün pachapacher, ra pwal lülüsefäli ener, oupwe ochoch.
DEU 14:7 Nge seni me lein ekewe man mi lülüsefäli ener ika keang kün pachapacher ousap ochoch: kamel, üsangi, ewe man itan pacher mi nom won achau. Pokiten ra lülüsefäli ener, nge esap keang kün pachapacher, repwe limengau ngenikemi.
DEU 14:8 Iwe, ewe pik epwe pwal limengau ngenikemi, pokiten a keang kün pachapachan, nge esap lülüsefäli anan. Ousap ochoch fituker, ousap pwal atapa ekewe man, lupwen ra mäla.
DEU 14:9 Iwe, ekewe ik meinisin mi nom lon koluk ika leset a wor ililir me töröüner oua tongeni mongö.
DEU 14:10 Nge ekewe mönümanau meinisin esap wor ililir me töröüner ousap mongö, pun repwe limengau ngenikemi.
DEU 14:11 Oua tongeni ochoch machang meinisin mi limöch.
DEU 14:12 Nge ikkei ir ekewe machang ousap ochoch: Ikel me sokopaten ikel iter wolcher me osprei,
DEU 14:13 ekewe machang iter pusar me sokopaten machang iter falkon,
DEU 14:14 iteiten sokopaten ängä,
DEU 14:15 ewe machang itan ostrich, kawakawen lepwin, nipöüwanei me sokopaten kawakaw,
DEU 14:16 kükün fuküro me watten fuküro, niaüpinik,
DEU 14:17 ekewe machang iter pelikan, karion, wolcher me kormoran mi usun chök niwanök,
DEU 14:18 öröpwech pwal sokopaten örö, ewe machang itan hupo me pöüte.
DEU 14:19 Iwe, ekewe kükün man meinisin mi äkkäs repwe limengau ngenikemi. Ousap fokun ocheer.
DEU 14:20 Nge ekewe kükün man mi limöch oua tongeni ocheer meinisin.
DEU 14:21 Iwe, ousap ochoch man mi püsin mäla. Oua tongeni ngeni ewe chon ekis mi nom lon ämi kewe telinimw pwe ochan. Oua pwal tongeni amömö ngeni eman chon siamü. Pun ämi eu mwichen aramas mi pin fän iten ewe Samol mi Lapalap ämi we Kot. Iwe, ousap kukuw eman apanen kuuch lon chönün oupwun ewe inelap.”
DEU 14:22 “Iwe, oupwe aimwüela eu leengolun uän fotämi irä meinisin iteiten ier.
DEU 14:23 Mürin oupwe feila ren ewe leni ewe Samol mi Lapalap ämi we Kot epwe filätä pwe aramas repwe fel ngeni ie. Ikenan oupwe mongö ewe eu leengolun uän fotämi wiich o ünümi ewe eu leengolun ünümemi wain. Oupwe pwal eäni ewe eu leengolun ämi apüra o ochei mweinöün nöümi kow me sip fän mesan. Iei usun oupwe kaiö pwe oupwe meniniti ewe Samol mi Lapalap ämi we Kot iteiten fansoun.
DEU 14:24 Iwe, lupwen ewe Samol mi Lapalap a afeiöchükemi, nge esap ki ngenikemi le uwala ämi eu leengol ren ewe leni ewe Samol mi Lapalap ämi we Kot epwe filätä pwe aramas repwe fel ngeni ie, pun a kon toau senikemi, nge ewe al a kon langatam ngenikemi,
DEU 14:25 mürin oupwe akasiwili ewe eu leengol ngeni moni. Iwe, oupwe angei ewe moni o uwala ren ewe leni ewe Samol mi Lapalap ämi we Kot epwe filätä.
DEU 14:26 Ikenan oupwe kamö won ewe moni ngeni mine oua mochen. Oua tongeni kamö kow ika sip ika wain ika sokopaten minen ün ika mine oua chök mwoneiti. Iwe, oupwe mongö o pwapwa ikenan fän mesen ewe Samol mi Lapalap ämi we Kot, ämi me chon leimwemi.
DEU 14:27 Nge ousap manlükala chon ewe ainangen Lefi mi nom lon ämi kewe telinimw, pun esap wor fanüer me wiser leimi.
DEU 14:28 Iwe, amüchülan iteiten ülüngat ier oupwe uwato ämi kewe eu leengol meinisin seni uän fotämi irä lon ewe chök ier o iseis lon ämi kewe telinimw.
DEU 14:29 Ei mongö epwe fän iten chon ewe ainangen Lefi, pun esap wor fanüer me wiser leimi. Epwe pwal fän iten ekewe chon ekis, ekewe mi mäsen me ekewe fefin mi mä pwülüer mi nom lon ämi kewe telinimiw. Repwe feito o mongö tori repwe möt. Are oua föri iei usun, ewe Samol mi Lapalap ämi we Kot epwe afeiöchü angangen pöümi meinisin.”
DEU 15:1 “Iwe, amüchülan iteiten fisu ier oupwe amusala än aramas liwinimang ngenikemi.
DEU 15:2 Nge iei usun lapalapen ämi amusala: Ewe chon mwütätä liwinimang epwe amusa mine a ngeni chon arun. Esap fokun echimwa seni pwin we chon Israel ewe liwinimang, pun a tori ewe fansoun ewe Samol mi Lapalap a filätä pwe aramas repwe amusala liwinimang.
DEU 15:3 Iwe, oua tongeni echimwa seni eman chon ekis pwe epwe ngenikemi an liwinimang. Nge meinisin mine pwimi kewe chon Israel ra angei senikemi oupwe amusala.
DEU 15:4 Ewe Samol mi Lapalap ämi we Kot epwe afeiöchükemi lon ewe fanü epwe ngenikemi pwe oupwe fanüeni. Esap wor eman epwe wöüngau leimi,
DEU 15:5 are oupwe chök aleasochisi alon ewe Samol mi Lapalap ämi we Kot o tümwünüöchü le apwönüetä ekei allük meinisin üa ngenikemi ikenai.
DEU 15:6 Lupwen ewe Samol mi Lapalap ämi we Kot epwe afeiöchükemi usun a pwon ngenikemi, oupwe mwütätä pisek ngeni chomong mwü, nge ämi ousap paaro seniir, oupwe pwal nemenem won chomong mwü, nge ir resap nemenem womi.
DEU 15:7 Iwe, are mi wor eman pwimi mi wöüngau lon ämi kewe telinimw mi nom lon ewe fanü ewe Samol mi Lapalap ämi we Kot epwe ngenikemi, ousap apöchöküla lelukemi are kichingau ngeni.
DEU 15:8 Nge oupwe suki pöümi ngeni pwimi we o mwüt ngeni ükükün mine a tüngor, ese lifilifil met an osupwang.
DEU 15:9 Oupwe afälikemi pwe esap wor ekiek mi ngau lon lelukemi, pwe oua apasa: A arap ewe afisuen ier, ewe ierin musala. Ousap pwal wowongau ngeni pwimi we mi wöüngau pwe ousap ngeni och. Pun pwimi epwe siö ngeni ewe Samol mi Lapalap o aturukemi, nge ämi oupwe tipis ren.
DEU 15:10 Iwe, oupwe kichiöch le fang ngeni pwimi we, nge ousap ekipwichi lon lelukemi, lupwen oua fang ngeni och. Pun are oua kichiöch, ewe Samol mi Lapalap ämi we Kot epwe afeiöchükemi lon ämi angang meinisin, pwal lon meinisin mine oua popuetä le föri.
DEU 15:11 Pun epwe wor chon wöüngau lon ewe fanü fansoun meinisin. Iei mine üa allük ngenikemi pwe oupwe fokun suki pöümi ngeni pwimi kewe mi osupwang o wöüngau lon ewe fanü.”
DEU 15:12 “Iwe, are eman a amömö ngenikemi eman re Ipru ika eman fin Ipru, epwe angang ngenikemi ükükün wonu ier, nge lon afisuen ier oupwe angasala.
DEU 15:13 Lupwen oupwe angasala, ousap afeiloi fän an asöülapö.
DEU 15:14 Nge oupwe fangemong ngeni sip seni nöümi pwiin sip, wiich seni ämi lenien wichiwich umwun wiich, pwal wain seni ämi lenien üchüch föün wain. Iwe, oupwe ngeni seni mine ewe Samol mi Lapalap ämi we Kot a afeiöchü ngenikemi.
DEU 15:15 Oupwe chechemeni pwe ra piin nöünikemi amanau me lon ewe fanü Isip, nge ewe Samol mi Lapalap ämi we Kot a angasakemi. Iei mine üa ngenikemi ei allük ikenai.
DEU 15:16 Nge are ewe chon angang mwän epwe ürenikemi pwe esap mochen feila senikemi, pun a tongeekemi me ämi famili pokiten a tiueöch me remi,
DEU 15:17 mürin oupwe angei efoch pwangapwang o pwangeni selingan appwere ngeni asamalapen imwemi. Iwe, oupwe nöüni amanau lon ränin manauan meinisin. Oupwe pwal föri iei usun ngeni nöümi chon angang fefin.
DEU 15:18 Iwe, lupwen oua angasala ewe chon angang pwe epwe feila senikemi, ousap weires ren. Pun ükükün mine oua liwini ngeni, lupwen a angang ngenikemi wonu ier, a chök ükükün esopun liwinin eman chon angang mi mö. Mürin, ewe Samol mi Lapalap ämi we Kot epwe afeiöchükemi lon meinisin mine oupwe föri.”
DEU 15:19 “Iwe, ekewe ätemwänin mweinöü meinisin seni nöümi pwiin kow me sip oupwe apini fän iten ewe Samol mi Lapalap ämi we Kot. Ousap nöüni le angang ekewe mweinöün nöümi kow, ousap pwal fichi ülöülen mweinöün nöümi sip.
DEU 15:20 Iwe, ämi me chon leimwemi oupwe ochei ekewe mweinöün man iteiten ier me fän mesen ewe Samol mi Lapalap ämi we Kot lon ewe leni epwe filätä.
DEU 15:21 Nge are a wor terin, are a mwok ika chun ika a wor och sokun terin mi ngau, ousap eäni asor ngeni ewe Samol mi Lapalap ämi we Kot.
DEU 15:22 Oupwe chök ochei me lon ämi kewe telinimw. Chokewe mi limengau me chokewe mi limöch ra tongeni ochoch seni, usun ämi ochoch chia ika sokun chia itan kasele.
DEU 15:23 Nge ousap chök ünümi chan ewe man, pwe oupwe ninätiu lepwül usun koluk.”
DEU 16:1 “Iwe, oupwe chechemeni ewe maram Apip, pwe oupwe föri ewe Pasofer fän iten ewe Samol mi Lapalap ämi we Kot. Pun lon ewe maram Apip ewe Samol mi Lapalap ämi we Kot a emwenikemiiwu lepwin seni ewe fanü Isip.
DEU 16:2 Oupwe feila o eäni asor ewe mönün Pasofer seni nöümi pwiin sip ika kow ngeni ewe Samol mi Lapalap ämi we Kot me lon ewe leni i epwe filätä pwe aramas repwe fel ngeni ie.
DEU 16:3 Ousap mongö pilawa mi wor iis lon fitifengen me ewe mönün Pasofer. Iwe, lon ükükün fisu rän oupwe mongö pilawa esap wor iis lon, usun oua föri, lupwen oua sü seni ewe fanü Isip fän tawat. Oupwe mongö ei pilawa mi iteni pilawan riaföü lon ränin manauemi meinisin, pwe oupwe chechemeni ewe rän oua towu seni lon ewe fanü Isip.
DEU 16:4 Iwe, esap wor pilawa mi wor iis lon epwe pwä remi lon leniemi meinisin lon ükükün fisu rän. Ousap fokun likiti och lusun seni fituken ewe mönün asor oua eäni lon pwinin ewe aeuin rän tori lesosor.
DEU 16:5 Ousap tongeni eäni asor ewe mönün Pasofer lon ämi kewe telinimw ewe Samol mi Lapalap ämi we Kot epwe ngenikemi.
DEU 16:6 Nge oupwe eäni asor ewe mönün Pasofer lon ewe chök leni ewe Samol mi Lapalap ämi we Kot epwe filätä pwe aramas repwe fel ngeni ie. Oupwe eäni ewe asor lekuniol, lupwen akkar a tuputiu, pun lon ei fansoun oua towu seni Isip.
DEU 16:7 Oupwe kukuw ewe mönün Pasofer o ochoch me lon ewe leni ewe Samol mi Lapalap epwe filätä. Nge lesosor oupwe liwiniti imwemi.
DEU 16:8 Iwe, lon ükükün wonu rän oupwe mongö pilawa esap wor iis lon. Nge lon afisuen rän epwe fis eu mwich mi pin fän iten ewe Samol mi Lapalap ämi we Kot. Ousap föri och angang lon ewe rän.
DEU 16:9 Iwe, oupwe aleani fisu wiik seni ewe fansoun ekärän aeuin ämi pökü ekewe irän wiich.
DEU 16:10 Mürin oupwe föri ewe chulapen wiik ngeni ewe Samol mi Lapalap ämi we Kot ren ämi eäni asor seni püsin letipemi ükükün mine ewe Samol mi Lapalap ämi we Kot a afeiöchü ngenikemi.
DEU 16:11 Iwe, oupwe pwapwa me fän mesen ewe Samol mi Lapalap ämi we Kot lon ewe leni epwe filätä pwe aramas repwe fel ngeni ie, ämi me nöümi mwän me fefin, nöümi chon angang mwän me chon angang fefin, pwal chon ewe ainangen Lefi mi nom lon ämi kewe telinimw, ekewe chon ekis, ekewe mi mäsen me ekewe fefin mi mä pwülüer ra nom leimi.
DEU 16:12 Oupwe chechemeni pwe ra piin nöünikemi amanau me lon Isip. Iwe, oupwe tümwünüöchü le apwönüetä ekei allük.
DEU 16:13 Mürin ämi ionalong föün wiich seni ewe lenien wichiwich me wain seni ewe lenien üchüch oupwe pwal föri ewe chulapen likachoch lon ükükün fisu rän.
DEU 16:14 Oupwe pwapwa lon ämi chulap, ämi me nöümi mwän me fefin, nöümi chon angang mwän me chon angang fefin, pwal chon ewe ainangen Lefi, ekewe chon ekis, ekewe mi mäsen me ekewe fefin mi mä pwülüer ra nom lon ämi kewe telinimw.
DEU 16:15 Iwe, lon ükükün fisu rän oupwe föri ewe chulap ngeni ewe Samol mi Lapalap ämi we Kot lon ewe leni i epwe filätä. Oupwe fokun pwapwa, pun ewe Samol mi Lapalap epwe afeiöchü uän fotämi irä me angangen pöümi meinisin.
DEU 16:16 Iwe, fän ülüngat lon eu ier nöümi mwän meinisin repwe feito o fel ngeni ewe Samol mi Lapalap ämi we Kot lon ewe leni i epwe filätä. Repwe feito ren ewe chulapen mongö pilawa esap wor iis lon, ren ewe chulapen wiik me ewe chulapen likachoch. Iwe, resap tongeni feito fän ar asöülapö.
DEU 16:17 Iteiten eman me eman mwän epwe fang usun an tufich ükükün mine ewe Samol mi Lapalap ämi we Kot a afeiöchü ngeni.”
DEU 16:18 “Iwe, oupwe afili soukapwüng me nöüwis ükükün ekewe ainang lon ämi kewe telinimw meinisin ewe Samol mi Lapalap epwe ngenikemi. Repwe eäni kapwüng ngeni ekewe aramas fän pwüng.
DEU 16:19 Ousap sorei mine a pwüng, ousap pwal lifilifil aramas. Ousap angei lifangen amichimich, pun ei sokun lifang a achuna mesen chon mirit, pwe ra sorei pwüngün chokewe mi pwüng.
DEU 16:20 Oupwe fokun eäni pwüng echök, pwe oupwe manau o fanüeni ewe fanü ewe Samol mi Lapalap ämi we Kot epwe ngenikemi.
DEU 16:21 Iwe, lupwen oupwe senätä eu rongen asor fän iten ewe Samol mi Lapalap ämi we Kot, ousap pwal fotuki och sokun irä pwe uluulun ewe anüfefin Asera ünükün.
DEU 16:22 Ousap pwal aütai efoch ür mi pin, pun ewe Samol mi Lapalap ämi we Kot a oput.
DEU 17:1 Iwe, ousap eäni asor ngeni ewe Samol mi Lapalap ämi we Kot eman ätemwänin kow ika eman sip mi wor terin, ese lifilifil met sokun. Pun ei sokun asor a anioput ngeni ewe Samol mi Lapalap ämi we Kot.
DEU 17:2 Iwe, are a fis me lon eu lein ämi kewe telinimw Kot epwe ngenikemi, pwe eman mwän ika eman fefin a föri mine a ngau me fän mesen ewe Samol mi Lapalap ämi we Kot ren an purätiu än Kot we pwon,
DEU 17:3 are a feila o angang ngeni pwal ekoch kot, are a fel ngeniir, ika a fel ngeni akkar ika maram ika ngeni ekewe fü ewe Samol mi Lapalap esap tipeeu ngeni,
DEU 17:4 nge oua rong usun me ren eman, mürin oupwe achocho le ais usun. Iwe, are a let o allükülük pwe ei sokun föför mi anioput a fis lon Israel,
DEU 17:5 mürin oupwe emwenato ewe mwän ika fefin mi föri mine a ngau ren asamalapen ämi telinimw o monei ngeni fau ewe aramas tori a mäla.
DEU 17:6 Nge epwe chök ninnila, are a wor ruoman ika ülüman chon pwärätä an tipis. Esap wor eman epwe ninnila are a wor eman chök chon pwärätä.
DEU 17:7 Iwe, ekewe chon pwärätä repwe akomwen monei ngeni fau, mürin ekewe lusun aramas repwe monei ngeni fau tori a mäla. Iei usun oupwe limetawu me leimi mine a ngau.
DEU 17:8 Iwe, are eu kapwüng a kon weires ngenikemi, kapwüngün nimanau, kapwüngün fitikoko, kapwüngün feiengau ika pwal ekoch kapwüng mi weires ngenikemi ra fis me lon ämi kewe telinimw, oupwe feila ren ewe leni ewe Samol mi Lapalap ämi we Kot epwe filätä.
DEU 17:9 Oupwe feila ren ekewe souasor ir chon ewe ainangen Lefi me ewe souapwüng mi wiseni ewe wis lon ewe fansoun. Oupwe aisiniir, nge ir repwe aiti ngenikemi pwüngün.
DEU 17:10 Mürin oupwe chök föri usun mine ra aiti ngenikemi me lon ewe leni ewe Samol mi Lapalap epwe filätä. Iwe, oupwe tümwünüöchü le föri meinisin mine ra emweni ngenikemi.
DEU 17:11 Oupwe chök föri mine ra aiti ngenikemi, pwal mine ra apwüngala. Ousap fokun tokola seni.
DEU 17:12 Nge are eman a aücho pwe esap aleasochis ngeni mine a kapwüngüla me ren ewe soukapwüng ika souasor mi angang ngeni ewe Samol mi Lapalap ämi we Kot, ewe aramas epwe fokun ninnila. Iei usun oupwe limetawu mine a ngau seni lon Israel.
DEU 17:13 Mürin, ekewe aramas meinisin repwe rongorong usun o niuokus pwe resap chüen aüchosefäl.”
DEU 17:14 “Iwe, lupwen oupwe tolong lon ewe fanü ewe Samol mi Lapalap ämi we Kot epwe ngenikemi pwe oupwe fanüeni o nonom lon, nge mürin oua apasa, ‘Aipwe eäni eman king usun ekewe mwü meinisin ra nom ünüküm,’
DEU 17:15 oupwe chök seikätä eman king ewe Samol mi Lapalap ämi we Kot a filätä. Oupwe chök eäni eman king seni leimi. Ousap eäni eman chon ekis king.
DEU 17:16 Nge ewe king esap achomongala nöün oris, esap pwal tinala aramas Isip pwe repwe kamö nöün oris, pun ewe Samol mi Lapalap a ürenikemi pwe ousap fokun liwinsefäliti ewe fanü.
DEU 17:17 Iwe, ewe king esap achomongala pwülüan pwe lelukan esap tokola seni Kot, esap pwal fokun achomonga nöün silifer ika kolt.
DEU 17:18 Lupwen epwe tolong lon wisan wisen king lon mwün, epwe apirüelong lon eu puk ekei allük fän itan seni ewe puk mi nom fän tümwünüen ekewe souasor ir chon ewe ainangen Lefi.
DEU 17:19 Ewe puk epwe nom ren, pwe epwe aleani lon ränin manauan meinisin, epwe pwal tongeni kaiö seni usun an epwe meniniti ewe Samol mi Lapalap an we Kot ren an aleasochisi kapasen ekewe allük me ekewe pwüüng meinisin.
DEU 17:20 Ren ei esap lamalamtekia lelukan won pwin kewe chon Israel, esap pwal aleasolap ngeni ewe allük. Mürin epwe nemenem fansoun langatam lon mwün lon Israel, ir me mwirimwirin kana.”
DEU 18:1 “Iwe, ekewe souasor ir chon ewe ainangen Lefi esap wor inetir ika wiser fanü lon Israel. Repwe mongö ekewe asor won ekkei ngeni ewe Samol mi Lapalap, pwal ekewe sokopaten asor, pun iei wiser.
DEU 18:2 Esap wor wiser fanü me lein pwir kewe chon Israel. Ewe Samol mi Lapalap i wiser, usun a fen pwon ngeniir.
DEU 18:3 Iei wesewesen wisen ekewe souasor seni än ekewe aramas asor, ese lifilifil ika seni eman ätemwänin kow ika sip. Repwe ngeni ewe souasor pöün me fituken sapan pwal chükükanan.
DEU 18:4 Oupwe ngeni ekewe souasor mwen uän fotämi wiich, mwen chönün uän fotämi irän wain me ämi apüra seni föün olif, oupwe pwal ngeni aeuin fichiemi ülöülen nöümi sip.
DEU 18:5 Pun ewe Samol mi Lapalap ämi we Kot a filätä i me nöün kewe mwän seni lein ämi kewe ainang meinisin, pwe epwe angang fän iten ewe Samol mi Lapalap tori feilfeilachök.
DEU 18:6 Iwe, are eman mwän seni ewe ainangen Lefi epwe feila seni eu lein ämi kewe telinimw, ia a imweimw ie, o feito ren ewe leni ewe Samol mi Lapalap epwe filätä, ese lifilifil inet epwe feito seni mochenin letipan,
DEU 18:7 a tongeni angang ngeni ewe Samol mi Lapalap ämi we Kot usun chök chienan kewe seni ewe ainangen Lefi mi angang ikenan fän mesen ewe Samol mi Lapalap.
DEU 18:8 Iwe, epwe wor inetin mongö usun chök inetin chienan kewe, inamwo ika a fen angei moni seni mine an me won saman a amömöla.”
DEU 18:9 “Iwe, lupwen oupwe tolong lon ewe fanü ewe Samol mi Lapalap ämi we Kot epwe ngenikemi, ousap apirü ekewe föför mi anioput chon ekewe mwü ra föri.
DEU 18:10 Esap wor eman me leimi epwe keni eman nöün ät ika nengin pwe an asor ngeni anümwäl, esap pwal wor leimi eman soupwe, are eman souasisil, are eman souwo, are eman sourong,
DEU 18:11 are eman soupöüt, are eman souamwöngün, are eman souawarawar, are eman souasomä.
DEU 18:12 Pun chokewe mi föri ekei sokun föför ra anioput me ren ewe Samol mi Lapalap. Iwe, pokiten ekei föför mi anioput ewe Samol mi Lapalap ämi we Kot a asüela chon ekewe mwü me mwemi.
DEU 18:13 Nge ämi oupwe unusen föföröch me fän mesen ewe Samol mi Lapalap ämi we Kot.
DEU 18:14 Pun chon ekewe mwü ämi oupwe fanüeni fanüer ra aüselinga souasisil me soupwe. Nge ewe Samol mi Lapalap esap mwüt ngenikemi pwe opwe föri iei usun.”
DEU 18:15 “Iwe, ewe Samol mi Lapalap ämi we Kot epwe awora eman soufos me leimi usun ngang, nge ämi oupwe aleasochisi.
DEU 18:16 Pun oua tüngor ngeni ewe Samol mi Lapalap ämi we Kot lon ewe ränin oua mwichfengen me fäsonun ewe chuk Horep, lupwen oua apasa, ‘Aisap mochen rongsefäl mwelien ewe Samol mi Lapalap äm we Kot, aisap pwal mochen künasefäli ewe ekkei mi lapalap pwe aisap mäla.’
DEU 18:17 Nge ewe Samol mi Lapalap a üreniei, ‘Meinisin mine ra apasa a pwüng.
DEU 18:18 Ngang üpwe awora eman soufos me lein pwir usun en. Üpwe emwelielia pwe epwe kapas ngeniir meinisin mine üa allük ngeni.
DEU 18:19 Nge are eman esap aleasochisi ai kewe kapas ätewe epwe apasa fän itei, püsin ngang üpwe apwüngü.
DEU 18:20 Iwe, are eman soufos epwe osunimwäli och kapas fän itei, nge ngang üsap allük ngeni, are eman epwe kapas fän iten pwal ekoch kot, ewe soufos epwe mäla.’
DEU 18:21 Nge are oua ekieki lon lelukemi, ‘Met sipwe silei ren ika ewe kapas sap alon ewe Samol mi Lapalap?’
DEU 18:22 Are eman soufos a kapas fän iten ewe Samol mi Lapalap, nge pwüngün ewe kapas esap fis ika esap let, iei ewe kapas esap alon ewe Samol mi Lapalap. Ewe soufos a osuni fän püsin mefian, iei mine ousap niuokusiti.”
DEU 19:1 “Iwe, lupwen ewe Samol mi Lapalap ämi we Kot a arosala chon ekewe mwü o ngenikemi fanüer, nge oua angei seniir fanüer o imweimw lon ar kewe telinimw me imwer kewe,
DEU 19:2 oupwe aimwüela ülüngat telinimw fän itemi lon ewe fanü ewe Samol mi Lapalap ämi we Kot epwe ngenikemi pwe oupwe fanüeni.
DEU 19:3 Iwe, oupwe kinifeseni lon ülüngat kinikin ewe fanü ewe Samol mi Lapalap ämi we Kot epwe ngenikemi pwe oupwe fanüeni o anükünüköchü ekewe al mi ale ngeni ekewe telinimw, pwe iteiten eman mi niela eman aramas epwe tongeni sü ngeniir.
DEU 19:4 Are eman aramas a niela chon arun fän chechengau, nge esap oput i me mwan, ätewe a tongeni süla lon eu kewe telinimw o amanaua manauan.
DEU 19:5 A tongeni fis ei lapalap, pwe eman mwän me chon arun ra feila lemäl pwe repwe pöküpök irä. Nge lupwen a pöüätä ewe kouk pwe epwe pökü ewe irä, mächän ewe kouk a mwetewu seni pachan o küw ewe chon arun pwe a mäla. Ätewe a tongeni sü ngeni eu me lein ekewe telinimw o amanaua manauan.
DEU 19:6 Iwe, epwe fis pwe ewe chon kütta liwinin chan aramasan epwe tapweri ätewe fän an lingeringer, epwe liapeni o niela, pokiten ewe al ngeni ewe telinimw a kon langatam. Nge pwüngün pwe ätewe esap wisen mäla, pokiten esap oput chon arun me mwan.
DEU 19:7 Iei mine üa allük ngenikemi pwe oupwe aimwüela ülüngat telinimw.
DEU 19:8 Nge lupwen ewe Samol mi Lapalap ämi we Kot epwe awatteela kiännin fanüemi o ngenikemi unusen ewe fanü, usun a fen pwon fän akapel ngeni ämi kewe lewo,
DEU 19:9 mürin oupwe achu pwal ülüngat telinimw ngeni ekei ülüngat. I epwe ngenikemi ei fanü, are oua apwönüetä ekewe allük meinisin üa allük ngenikemi ikenai ren ämi echeni ewe Samol mi Lapalap ämi we Kot o awena manauemi fansoun meinisin ngeni mine a aiti ngenikemi.
DEU 19:10 Ren ei oupwe pinei än chokewe resap tipis repwe ninnila me lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, pwe tipisin niela aramas esap nonom womi.
DEU 19:11 Nge are eman a oput chon arun, are a operi o niela, mürin a süla lon eu lein ekewe telinimw,
DEU 19:12 ekewe souakomwen an telinimw repwe titi seni ikenan. Iwe, repwe atolonga ewe mi niela eman aramas lepöün ätewe mi kütta liwinin chan aramasan, pwe epwe niela.
DEU 19:13 Ousap fokun tongei, nge oupwe alimöchüala ewe fanü seni tipisin nimanauei aramas esap wor ar tipis, pwe oupwe feiöch.
DEU 19:14 Iwe, lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, ousap amwökütü kiän fanüen chon arumi ekewe reikewe ra förätä.”
DEU 19:15 “Iwe, eman chök chon pwärätä esap naf an epwe tongeni atipisi eman mwän pwe a föri föförün mwäneson ika sokun föför mi ngau. Nge ren pwärien ruoman ika ülüman chon pwärätä a tongeni fis pwüngün ar atipisi.
DEU 19:16 Are eman chon pwärätä mi ngau a atipisimwäli eman aramas,
DEU 19:17 ekewe ruu pekin mi aninifengen repwe feito fän mesen ewe Samol mi Lapalap, fän mesen ekewe souasor me ekewe soukapwüng mi wor wiser lon ewe fansoun.
DEU 19:18 Iwe, ekewe soukapwüng repwe ais tichik won ewe föför. Nge are a pwä pwe ewe chon pwärätä a chofana, nge an aturu pwin we esap pwüng,
DEU 19:19 mürin oupwe föri ngeni usun mine a ekiekin föri ngeni pwin we. Iei usun oupwe limetawu ewe mi ngau seni lefilemi.
DEU 19:20 Iwe, ekewe aramas meinisin repwe rong usun o niuokus, pwe resap chüen föri ei sokun föför mi ngau lefilemi.
DEU 19:21 Ousap tongei ei sokun aramas, pun oupwe liwini manau ngeni manau, eföü mas ngeni eföü mas, efoch ngi ngeni efoch ngi, efoch pau ngeni efoch pau, efoch peche ngeni efoch peche.”
DEU 20:1 “Iwe, lupwen oupwe feila maun ngeni chon oputakemi, nge oua küna oris me woken pwal eu mwichen sounfiu mi chomong senikemi, ousap niuokusitiir. Pun ewe Samol mi Lapalap ämi we Kot mi emwenikemiiwu seni ewe fanü Isip epwe etikemi.
DEU 20:2 Lupwen oupwe amol ngeni maun, ewe souasor epwe feito o kapas ngeni ekewe sounfiu.
DEU 20:3 Epwe üreniir, ‘Oupwe rongorong ämi chon Israel. Oua amol ikenai pwe oupwe feila maun ngeni chon oputakemi. Esap kükünüla letipemi. Ousap niuokus ika chechech, ousap pwal niueitiir.
DEU 20:4 Pun ewe Samol mi Lapalap ämi we Kot epwe etikemi o fiu fän itemi ngeni chon oputakemi, pwe epwe awinakemi.’
DEU 20:5 Mürin ekewe meilap repwe kapas ngeni ekewe sounfiu o üreniir, ‘Ifa usun, epwe wor eman mwän ikei mi aüetä imwan, nge esamwo asopwu? Ätewe epwe liwiniti imwan. Pun a tongeni mäla lon maun, nge pwal eman mwän epwe asopwu imwan.
DEU 20:6 Are ifa usun, epwe wor eman mwän ikei mi fotuki irän wain, nge esamwo ochei uan? Ätewe epwe liwiniti imwan. Pun a tongeni mäla lon maun, nge pwal eman mwän epwe ochei uän fotan irän wain.
DEU 20:7 Ifa usun, epwe wor eman mwän ikei mi kofot ngeni eman fefin, nge esamwo pwülüeni? Ätewe epwe liwiniti imwan, pun a tongeni mäla lon maun, nge pwal eman mwän epwe pwülüeni kofotun.’
DEU 20:8 Mürin, ekewe meilap repwe pwal üreni ekewe sounfiu, ‘Ifa usun, epwe wor eman mwän ikei mi niuokus o kükün letipan? Ätewe epwe liwiniti imwan, pwe leluken chienan kewe resap apwangapwangala usun lelukan.’
DEU 20:9 Lupwen ekewe meilap ra wes le kapas ngeni ekewe aramas, ekewe samolun sounfiu repwe kefilitä pwe repwe emweni ekewe aramas.
DEU 20:10 Iwe, lupwen oupwe feila ngeni eu telinimw pwe oupwe maun ngeni, oupwe akomwen eäni eu pwonen kinamwe ngeni.
DEU 20:11 Are chon ewe telinimw repwe tipeeu ngenikemi o suki ngenikemi asamalapen ar telinimw, ekewe aramas meinisin mi nom lon repwe angang ngenikemi fän weires.
DEU 20:12 Nge ika resap kinamwe ngenikemi, pwe ra maun ngenikemi, oupwe pwelifeili ewe telinimw fän pisekin maun.
DEU 20:13 Iwe, lupwen ewe Samol mi Lapalap ämi we Kot a mwüt ngenikemi pwe oupwe liapeni ewe telinimw, oupwe niela mwänin ewe telinimw meinisin ren ketilas.
DEU 20:14 Nge ekewe fefin me ekewe semirit, ekewe pwiin kow me pisekin meinisin mine a nom lon oupwe angei fän itemi pwe liapemi. Iwe, oupwe pwapwa ren choon wokumi oua angei seni chon oputemi, ewe Samol mi Lapalap a ngenikemi.
DEU 20:15 Iei usun oupwe föri ngeni ekewe telinimw meinisin mi toau senikemi, resap nom lon kinikinin ekewe mwü mi kan ngenikemi.
DEU 20:16 Nge are oua liapeni ekewe telinimw lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, ousap amanaua eman mönümanau lon.
DEU 20:17 Oupwe fokun arosala chon Hit, chon Amor, chon Kanaan, chon Peris, chon Hiw me chon Jepus, usun ewe Samol mi Lapalap ämi we Kot a fen allük ngenikemi.
DEU 20:18 Pun repwe aiti ngenikemi pwe oupwe föri ar kewe föför mi anioput, ir ra föri lon ar fel ngeni ar kewe kot, pwe oupwe tipis ngeni ewe Samol mi Lapalap ämi we Kot.
DEU 20:19 Iwe, lupwen oupwe pwelifeili eu telinimw fän pisekin maun fansoun langatam o maun ngeni pwe oupwe liapeni, ousap pöküela ekewe irä ren kouk, pun oua tongeni mongö seniir. Ifa usun, ekewe irän lemäl ir aramas pwe oupwe maun ngeniir?
DEU 20:20 Nge ekewe irä ousap tongeni mongö seniir, oua tongeni pökürela, pwe oupwe föri pisekin maun seni mwüchür o aea le maun ngeni ewe telinimw mi maun ngenikemi, tori a kuf.”
DEU 21:1 “Iwe, are a fis lon ewe fanü ewe Samol mi Lapalap ämi we Kot epwe ngenikemi pwe oupwe fanüeni, pwe eman a küna eman mi ninnila lemäl, nge esap pwä iö a niela,
DEU 21:2 mürin, nöümi kewe souakom me nöümi kewe soukapwüng repwe feito lon ewe leni. Iwe, repwe aükü toauen ewe leni, ia ewe somä a nom ie, ngeni ekewe telinimw mi nom ünükün.
DEU 21:3 Mürin, ekewe souakom mine telinimwer ewe a kon kan ngeni ewe somä, repwe angei eman nienifön kow esamwo angang o mwärei efoch waas.
DEU 21:4 Iwe, ekewe souakomwen ewe telinimw repwe emwenala ewe nienifön kow lon eu lemol ia a pupu koluk ie, esamwo tu pwülün, esap pwal mwo fot irä won. Iwe, ikenan repwe kupi üen ewe nienifön kow.
DEU 21:5 Mürin, ekewe souasor ir chon ewe ainangen Lefi repwe pwal feito, pun ewe Samol mi Lapalap ämi we Kot a filiretä pwe repwe angang ngeni, repwe pwal afeiöchü aramas fän itan. Iwe, mine ra apasatä lon iteiten kapwüngün fitikoko ika kapwüngün feiengau epwe fis.
DEU 21:6 Mürin, ekewe souakom meinisin seni ewe telinimw mi kon kan ngeni ewe somä repwe talü pöür me won ewe nienifön kow a kupukup üan me lon ewe lemol.
DEU 21:7 Iwe, repwe pwärätä o apasa, ‘Äm aisap nimanauei ei aramas, aisap pwal küna iö a niela.
DEU 21:8 Äm Samol mi Lapalap, kopwe amusala än noum aramasen Israel tipis, chokewe ka angaseer seni Isip. Kosap anomu won noum aramasen Israel tipisin nimanauei eman esap wor an tipis.’ Ren ei ewe tipisin nimanau epwe musala.
DEU 21:9 Iei usun oupwe limetawu seni me leimi tipisin nimanauei eman esap wor an tipis, pun oua föri mine a pwüng fän mesen ewe Samol mi Lapalap.”
DEU 21:10 “Iwe, a tongeni fis pwe ka feila maun ngeni chon oputom, nge ewe Samol mi Lapalap a atolongeer lepoum pwe kopwe liapeniir.
DEU 21:11 Are ka küna me lein ekewe chon oola eman fefin mi liöch pwe ka sani o mochen angei pwe pwülüom,
DEU 21:12 kopwe emwenala neminewe lon imwom. Iwe, ewe fefin epwe reipöpöla möküran o fichiela ükkün,
DEU 21:13 epwe pwal pwilitawu üfan a üföüf lupwen an oola o nonom lon imwom, pwe epwe kechüeiti saman me inan lon ükükün eu maram. Mürin ka tongeni pwülüeni, nge i epwe pwülüom.
DEU 21:14 Nge are a fis pwe kosap chüen sani me mürin, kopwe mwüt ngeni pwe epwe feila ia a mochen feila ie. Nge kosap amömöla neminewe ren moni, kosap pwal föri ngeni usun mine ka föri ngeni eman amanau, pun ka fen kon ren.”
DEU 21:15 “Iwe, are eman mwän a pwülüeni ruoman fefin, eman a tongei, nge eman esap sani, mürin ir me ruoman ra nöünöü me won. Nge are neminewe ewe mwän esap sani a nöüni ewe mwänichi,
DEU 21:16 mürin, lupwen epwe ineti wöün ngeni nöün kewe mwän, esap tongeni ngeni ätewe nöün neminewe a tongei ewe wisen mwänichi, nge epwe ngeni ätewe nöün neminewe esap sani, pun i wesewesen mwänichi.
DEU 21:17 Iwe, epwe föri pwüngün inetin mwänichi ngeni ewe mwänichi nöün neminewe esap sani ren an epwe ngeni ruu inetin seni meinisin mine a eäni. Pokiten i aemanün nöün lon an pöchökül, iei mine ewe wisen mwänichi an.”
DEU 21:18 “Iwe, are eman mwän a nöüni eman ät mi tipeförea o lükümach, esap mochen aleasochisi alon saman ika inan, are ra fen emiriti, nge esap fokun aleasochsiir,
DEU 21:19 mürin saman me inan repwe angei o emwenala ren ekewe souakomwen an we telinimw pwe epwe kapwüng.
DEU 21:20 Iwe, repwe üreni ekewe souakom, ‘Iei i nöüm mi tipeförea o lükümach, esap mochen aleasochisi alom, a mongömong o ünüpuch.’
DEU 21:21 Mürin, mwänin ewe telinimw meinisin repwe monei ngeni fau tori a mäla. Iei usun oupwe atowu ewe mi ngau seni leimi. Iwe, chon Israel meinisin repwe rong usun o niuokus.”
DEU 21:22 “Iwe, are eman mwän a föri eu föför mi fokun ngau pwe a tipisin mäla ren, nge mürin ra niela o eitiuätä won efoch irä,
DEU 21:23 inisin esap tongeni nom won ewe irä lon unusen ewe pwin. Nge kopwe peiaseni ewe mwän lon ewe chök ränin, pun eman aramas mi itiuätä won irä a anümamau me ren Kot. Kosap alimengaua ewe fanü ewe Samol mi Lapalap epwe ngonuk pwe kopwe fanüeni.
DEU 22:1 Iwe, are ka küna nöün pwiüm chon Israel kow ika sip pwe a malechela, kosap äsäpäsäp seni, nge kopwe aliwinala ren.
DEU 22:2 Nge are ätewe nöün ewe man a toau senuk ika kosap silei nöün iö, kopwe uwala ewe man lon imwom. Iwe, epwe nom reöm tori pwiüm chon Israel epwe kütta. Mürin kopwe aliwini ngeni.
DEU 22:3 Iei usun kopwe pwal föri ngeni nöün aas, ngeni üfan me iteiten mettoch meinisin mine a pöütüla seni pwiüm chon Israel, nge en ka küna. Kosap tükümala pwe ka küna.
DEU 22:4 Are ka küna pwe nöün pwiüm chon Israel aas ika kow a turutiu lepekin efoch al, kosap äsäpäsäp seni, nge kopwe alisi le ekisefälietä.
DEU 22:5 Iwe, esap wor eman fefin epwe üföüf üfen eman mwän, esap pwal wor eman mwän epwe üföüf üfen eman fefin. Pun ewe Samol mi Lapalap ämi we Kot a oput eman mi föri ekei sokun föför.
DEU 22:6 Are a fis pwe ka küna me won efoch irä ika me won pwül eu fasen machang mi wor apanan ika sokul lon, nge ewe inelap a mot lon, kosap angei ewe inelap me apanan kewe.
DEU 22:7 Kopwe mwüt ngeni ewe inelap pwe epwe ässila, nge ekewe apanan ka tongeni angei. Ren ei kopwe feiöch o manauatam.
DEU 22:8 Iwe, lupwen kopwe aüetä eu imw mi fö, kopwe föri eu tit won osun pwe kosap atoto won imwom tipisin nimanau, lupwen eman epwe turutiu me won o mäla.
DEU 22:9 Iwe, kosap amora pwal eu sokun föün irä lon om tanipin wain. Are ka föri, uan meinisin repwe pin, uän ekewe föün irä ka amora pwal uän ekewe irän wain.
DEU 22:10 Kosap achufengeni eman ätemwänin kow me eman aas le tuw pwül.
DEU 22:11 Kosap pwal üföüf echö üf mi för seni ülen sip me seni silin irä.
DEU 22:12 Kopwe teätä sokun fout lepwülün ufom owokot lesopun me rüanü.”
DEU 22:13 “Iwe, are eman mwän a pwülüeni eman fefin o kon ren, nge mürin a pöütala,
DEU 22:14 a pwal atipisi ngeni föför mi ässäw o aitengaua ren an apasa: Üa pwülüeni ei fefin, nge lupwen üa kon ren, üsap küna me won ewe pisekin pwärätä pwe esamwo tori mwän.
DEU 22:15 Mürin, semen ewe föpwül me inan repwe angei ewe pisekin pwärätä pwe esamwo tori mwän o uwala ren ekewe souakom me lon asamalapen ewe telinimw.
DEU 22:16 Iwe, semen ewe föpwül epwe üreni ekewe souakom, ‘Üa ngeni ei mwän nei föpwül pwe epwe pwülüeni, nge iei a pöütala.
DEU 22:17 A pwal atipisi ngeni föför mi ässäw o apasa pwe esap küna me won ewe pisekin pwärätä pwe esamwo tori mwän. Nge iei ewe pisekin pwärätä pwe nei föpwül esamwo tori mwän.’ Iwe, repwe emeresala ewe üf fän mesen ekewe souakomwen ewe telinimw.
DEU 22:18 Mürin, ekewe souakomwen ewe telinimw repwe angei ewe mwän o wichi,
DEU 22:19 repwe pwal angei seni ipükü föün silifer o ngeni semen ewe föpwül, pun a aitengaua eman föpwül esamwo tori mwän me lon Israel. Iwe, ätewe epwe pwülüeni ewe föpwül, nge esap tongeni pöütala lon ränin manauan meinisin.
DEU 22:20 Nge are ewe pworaus a pwüng pwe ewe pisekin pwärätä an esamwo tori mwän esap pwä me won ewe föpwül,
DEU 22:21 repwe emwenawu ewe föpwül ren asamalapen imwen saman. Iwe, mwänin lon an telinimw repwe monei ngeni fau pwe epwe mäla, pun a föri eu föför mi ngau ren an lisowu me lon imwen saman. Iei usun oupwe limetawu ewe mi ngau seni leimi.
DEU 22:22 Iwe, are a pwä pwe eman mwän a kon ren pwülüen eman mwän, ir me ruoman repwe ninnila, ewe mwän mi kon ren ewe fefin, pwal ewe fefin. Iei usun oupwe limetawu ewe mi ngau seni lon Israel.
DEU 22:23 Are eman mwän a churi eman föpwül mi kofot esamwo tori mwän me lon eu telinimw o kon ren,
DEU 22:24 oupwe emwenirewu me ruoman leasamalapen ewe telinimw o monei ngeniir fau pwe repwe mäla. Ewe föpwül epwe ninnila, pun esap köri eman epwe alisi, nge a fen nom lon eu telinimw. Nge ewe mwän epwe ninnila, pun a tipis ngeni pwülüen chon arun. Iei usun oupwe limetawu ewe mi ngau seni leimi.
DEU 22:25 Nge are eman mwän a churi eman föpwül mi kofot me lemäl, are a achomanauei o kon ren, ewe mwän chök epwe ninnila.
DEU 22:26 Nge ewe föpwül ousap föri ngeni och, pun esap föri och föför epwe ninnila ren. Ei föför a usun chök än eman mwän turufi chon arun o niela.
DEU 22:27 Iwe, ewe mwän a achomanauei ewe föpwül me lemäl o neminewe mi kofot a kökkö pwe eman epwe alisi, nge esap wor eman a tongeni alisi.
DEU 22:28 Are eman mwän a churi eman föpwül esamwo tori mwän, esap pwal mwo kofot, are a achomanauei o kon ren, nge mürin ra pwä,
DEU 22:29 ewe mwän epwe ngeni semen ewe föpwül lime föün silifer, epwe pwal pwülüeni ewe föpwül, pun a tipis ngeni. Esap tongeni pöütala lon ränin manauan meinisin.
DEU 22:30 Esap wor eman mwän epwe turunufasei saman ren an pwülüeni pwülüen saman, esap pwal kon ren.”
DEU 23:1 “Iwe, esap wor eman mwän mi tatakis föün ika pöküela ewe kükün inis epwe choni nöün ewe Samol mi Lapalap we mwichen aramas.
DEU 23:2 Esap wor eman upun rerewöl, esap pwal wor eman mwirimwirin epwe choni nöün ewe Samol mi Lapalap we mwichen aramas tori aengolun pilon.
DEU 23:3 Iwe, esap fokun wor eman chon Amon ika chon Moap, esap pwal wor eman mwirimwirin epwe choni nöün ewe Samol mi Lapalap we mwichen aramas, inamwo are a tori aengolun pilon.
DEU 23:4 Pun resap sounikemi fän pilawa me koluk won ewe al, lupwen oua towu seni Isip. Nge ra fen möni Palam nöün Peor we mwän seni Petor lon Mesopotamia, pwe epwe anümamauakemi.
DEU 23:5 Nge ewe Samol mi Lapalap ämi we Kot esap rongorong ngeni Palam, pwe a fen sorei ewe anümamau ngeni feiöch fän itemi, pun a tongeekemi.
DEU 23:6 Ousap kütta ar kinamwe ika ar pisekisek lon ränin manauemi meinisin.
DEU 23:7 Ousap oput ekewe chon Etom, pun ir aramasemi. Ousap pwal oput ekewe chon Isip, pun oua piin wasöla lon fanüer.
DEU 23:8 Iwe, mwirimwirir kewe mi uputiu lon aülüngatin pilon ra tongeni choni än ewe Samol mi Lapalap mwich.”
DEU 23:9 “Iwe, lupwen oua feila maun ngeni chon oputemi, nge oua nom lon ewe lenien sounfiu, oupwe tümwünükemi seni sokun mettoch mi limengau meinisin.
DEU 23:10 Are mi wor eman mwän leimi esap limöch pokiten chan mwän a towu seni lepwin, ätewe epwe towu seni ewe lenien sounfiu o nonom lükün,
DEU 23:11 lupwen a tori lekuniol epwe tütü, nge lupwen akkar a tuputiu, a tongeni tösefälilong lon ewe lenien sounfiu.
DEU 23:12 Iwe, epwe wor eu leni lükün ewe lenien sounfiu, ia oua tongeni feila o ngasala ie.
DEU 23:13 Epwe pwal wor remi efoch söföl lükün ämi pisekin sounfiu. Pun lupwen oupwe feila lükün, oupwe tuw eu pwang o irela ämi kiten mongö.
DEU 23:14 Pun ewe Samol mi Lapalap a fetalfeil leimi lon ämi lenien sounfiu, pwe epwe amanauakemi o akufu chon oputakemi me mwemi. Iei mine ämi lenien sounfiu epwe pin, pwe Kot esap küna och limengau me reömi o kul senikemi.”
DEU 23:15 “Iwe are eman amanau a sü seni an samol o süla reöm, kosap aliwini ngeni an samol.
DEU 23:16 Epwe nonom reöm lon ewe leni a filätä ika lon eu lein ekewe telinimw ia a sani ie. Kosap ariaföüü.
DEU 23:17 Iwe, esap wor eman re Israel ika eman fin Israel epwe amömö inisin fän iten lisowu lon angangen lamalam.
DEU 23:18 Kosap uwato liwinin eman fin lisowu ika liwinin eman mwän mi lisowu lon imwen ewe Samol mi Lapalap om we Kot pwe liwinin om pwon, pun ekei sokun aramas ra anioput me ren ewe Samol mi Lapalap om we Kot.
DEU 23:19 Kosap mwüt ngeni pwiüm chon Israel och mettoch fän iten om kopwe angei winnan won moni ika won mongö ika won och mettoch ka mwütätä.
DEU 23:20 Iwe, seni eman chon ekis ka tongeni angei winnen och mettoch ka mwüt ngeni, nge seni pwiüm kosap fokun angei winnen ewe mettoch ka mwüt ngeni. Are ka föri iei usun, ewe Samol mi Lapalap epwe afeiöchuk lon om angang meinisin ka föri lon ewe fanü kopwe tolong lon pwe kopwe fanüeni.
DEU 23:21 Iwe, are ka eäni eu pwon ngeni ewe Samol mi Lapalap om we Kot, kosap tunala fansoun om kopwe apwönüetä. Pun ewe Samol mi Lapalap om we Kot epwe fokun angei senuk mine ka eäni pwon, nge en kopwe tipis, are kosap apwönüetä.
DEU 23:22 Nge kosap tipis, are kosap eäni eu pwon.
DEU 23:23 Kopwe tümwünüöchü le apwönüetä meinisin mine ka apasa lon om pwon, pun ka püsin föri ei pwon seni letipom ngeni ewe Samol mi Lapalap.
DEU 23:24 Are kopwe tolong lon än chon arum tanipin wain, ka tongeni ochoch föün irän wain tori ka möt, nge kosap kinikinilong lon om chüük.
DEU 23:25 Iwe, lupwen om kopwe tolong lon än chon arum tanipin wiich esamwo pöküpök, ka tongeni tülü umwun kewe, nge kosap pökü ngeni efoch kama.”
DEU 24:1 “Iwe, are eman mwän a pwülüeni eman fefin, nge mürin esap chüen sani, pun a küna och ter me won, ätewe epwe makei echö toropwen mwüfesen. Iwe, epwe ngeni neminewe ewe toropwe o tinala seni imwan.
DEU 24:2 A tongeni fis, pwe mürin an feila seni imwan, pwal eman mwän a pwülüeni.
DEU 24:3 Nge are aruomanün pwülüan a pwal oput o makei echö toropwen mwüfesen, mürin a ngeni neminewe o tinala seni imwan, ika ewe aruomanün pwülüan a mäla,
DEU 24:4 ätewe mi pwülüeni me mwan o tinala, esap tongeni pwülüenisefäli, pun a limengau. Ei sokun föför a anioput me fän mesen ewe Samol mi Lapalap. Kosap awarato tipis won ewe fanü ewe Samol mi Lapalap epwe ngonuk pwe kopwe fanüeni.
DEU 24:5 Iwe, are eman mwän a pwüpwülüfö, esap feila maun, esap pwal tolong lon och sokun angang. Epwe chök nom lon lenian lon ükükün eu ier, pwe repwe pwapwafengen me pwülüan.”
DEU 24:6 “Iwe, esap wor eman a tongeni angei seni eman an lenien üsüs, sap mwo nge ewe föün üsüs fän iten asisilen an liwinimang, pun epwe usun chök nge a angei seni mine a manau seni.
DEU 24:7 Are a pwä pwe eman aramas a soläni eman lein pwin kewe chon Israel, mürin a nöüni amanau ika a amömöla, ewe chon solä epwe ninnila. Iei usun kopwe limetawu ewe mi ngau seni leimi.
DEU 24:8 Iwe, lupwen a toruk samaun rupun pwötür, kopwe afäluk pwe kopwe tümwünüöchü le apwönüetä meinisin mine ekewe souasor ir chon ewe ainangen Lefi ra aiti ngonuk. Kopwe tümwünüöchü le apwönüetä mine üa allük ngeniir.
DEU 24:9 Kopwe chechemeni mine ewe Samol mi Lapalap om we Kot a föri ngeni Miriam, lupwen oua towu seni Isip.
DEU 24:10 Are ka mwüt ngeni chon arum och mettoch, kosap tolong lon imwan, pwe kopwe angei ewe asisilen an liwinimang ngonuk.
DEU 24:11 Kopwe chök ütä lükün, nge ewe mwän ka mwüt ngeni och mettoch epwe uwawu reöm ewe asisilen liwinimang.
DEU 24:12 Nge are ewe mwän a wöüngau, kosap annut fän üfan a ngonuk.
DEU 24:13 Iwe, lupwen akkar a tuputiu, kopwe aliwinala ngeni an we asisilen lwinimang, pwe a tongeni annut fän üfan owokot o afeiöchuk. Ren ei föför kopwe küna pwüng fän mesen ewe Samol mi Lapalap om we Kot.
DEU 24:14 Iwe, kosap ariaföüü eman chon angang mi mö a wöüngau o mwelele, ese lifilifil ika i eman pwiüm chon Israel ika eman chon ekis mi imweimw lon eu lein om kewe telinimw.
DEU 24:15 Nge kopwe ngeni liwinin lon ewe rän a angang ngonuk mwen akkar esamwo tuputiu. Pokiten ewe mwän a wöüngau, a ekieki liwinin. Nge are ka amwöchü seni, epwe siö ngeni ewe Samol mi Lapalap, nge en kopwe tipis ren.
DEU 24:16 Iwe, ekewe sam resap ninnila fän iten än nöür tipis, nge ekewe nau resap ninnila fän iten än semer tipis. Iteiten eman me eman epwe ninnila fän iten püsin an tipis.
DEU 24:17 Kosap sorei mine a pwüng ngeni eman chon ekis ika eman mi mäsen, kosap pwal angei üfen eman fefin mi mä pwülüan fän iten asisilen an liwinimang.
DEU 24:18 Kopwe chechemeni pwe ra nounuk amanau me lon ewe fanü Isip, nge ewe Samol mi Lapalap om we Kot a angasok seni ikenan. Iei mine üa allük ngonuk pwe kopwe föri iei usun.
DEU 24:19 Lupwen ka kini uän wiich lon om tanipi o manlükala eu pilük, kosap liwiniti om tanipi pwe kopwe angei. Kopwe likitala fän iten ekewe chon ekis, ekewe mi mäsen me ekewe fefin mi mä pwülüer. Ren ei ewe Samol mi Lapalap om Kot epwe afeiöchuk lon om angang meinisin.
DEU 24:20 Lupwen ka wichiki om irä olif, kosap wichikisefäli palan. Kopwe likitala ekoch föün fän iten ekewe chon ekis, ekewe mi mäsen me ekewe fefin mi mä pwülüer.
DEU 24:21 Nge lupwen ka kini uän om irän wain lon om tanipi, kosap kinisefäli me mürin. Kopwe likitala ekoch föün fän iten ekewe chon ekis, ekewe mi mäsen me ekewe fefin mi mä pwülüer.
DEU 24:22 Iwe, kopwe chechemeni pwe ra nounuk amanau me lon ewe fanü Isip. Iei mine üa allük ngonuk pwe kopwe föri iei usun.
DEU 25:1 Iwe, are mi wor anini lefilen ruoman mwän, nge ra tori kapwüng, ekewe soukapwüng repwe eäni kapwüng lefiler. Iwe, repwe amusa ätewe esap tipis o apwüngü ätewe mi tipis.
DEU 25:2 Are a pwüngüla pwe ätewe mi tipis epwe wichiwich, ewe soukapwüng epwe üreni pwe epwe chapala pwe epwe wichiwich me fän mesan aükük ngeni ükükün an tipis.
DEU 25:3 Nge ätewe mi wichi ewe chon tipis esap tongeni wichi lap seni fän faik. Pun are wichiwichin epwe lap seni fän faik, pwiüm we chon Israel epwe itengau me reöm.
DEU 25:4 Kosap föti awen eman ätemwänin kow, lupwen a puri ekewe irän wiich pwe föün repwe towu.”
DEU 25:5 “Iwe, are ruoman pwipwi ra nonomfengen o eman me leir a mäla, nge esap wor nöün mwän, pwülüen ätewe mi mäla esap tongeni pwüpwülü ngeni eman lükün ewe famili. Pwin pwülüan epwe feito ren o pwülüeni, epwe pwal föri pwüngün pwülüen pwin ngeni neminewe.
DEU 25:6 Ewe aemanün nöün ät neminewe a nöüni me won epwe iteit seni iten pwin we mi fen mäla, pwe iten pwin esap mola seni lon Israel.
DEU 25:7 Nge are ewe mwän esap mochen pwülüeni pwülüen pwin we, neminewe epwe feila ren ekewe souakom leasamalapen ewe telinimw o apasa, ‘Pwin pwülüei esap mochen pwe iten pwin we epwe sopwosopwola me lon Israel. Esap mochen föri pwüngün pwülüen pwin ngeniei.’
DEU 25:8 Mürin, ekewe souakom repwe körato ätewe o kapas ngeni. Nge are a chök sopwela an ekiek o üra, ‘Üsap fokun mochen pwülüeni,’
DEU 25:9 pwülüen pwin we epwe feila ren fän mesen ekewe souakom, epwe pwilitawu ipwen ätewe sus o atufa won mesan. Iwe, epwe apasa, ‘Iei usun mine a fis ngeni ewe mwän esap mochen oupwätiu familien pwin, pwe epwe wor mwirimwirin.’
DEU 25:10 Iwe, än ewe mwän famili me lon Israel epwe iteni: Ewe famili mi pwilipwiliwu ipwan sus.”
DEU 25:11 “Iwe, are ruoman mwän ra fiufengen, nge pwülüen eman leir a feito pwe epwe alisi pwülüan we seni lepöün ätewe mi awata, are a turufi an we kükün inis,
DEU 25:12 kopwe pöküela pöün neminewe, nge kosap tongei.
DEU 25:13 Kosap nöünöü ruu sokun föün kilo, eföü mi chou me eföü mi pän.
DEU 25:14 Kosap pwal aea ruu sokun aükük, eu mi watte me eu mi kükün.
DEU 25:15 Om kilo me om aükük epwe üküköch me pwüng, pwe kopwe manauatam lon ewe fanü ewe Samol mi Lapalap om we Kot epwe ngonuk.
DEU 25:16 Pun ewe Samol mi Lapalap om we Kot a oput chokewe meinisin mi föri ekei sokun föförün atuputup.”
DEU 25:17 “Iwe, oupwe chechemeni mine ekewe chon Amalek ra föri ngenikemi, lupwen oua towu seni Isip.
DEU 25:18 Oupwe chechemeni usun ar maun ngenikemi me won ewe al, lupwen oua apwangapwang o malülü. Pwe ra ärala ekewe mi nom mürimi, chokewe meinisin mi asaimang pokiten ar apwangapwang, nge resap meniniti Kot.
DEU 25:19 Iei mine, lupwen ewe Samol mi Lapalap ämi we Kot epwe ngenikemi ewe fanü o asösökemi seni chon oputakemi meinisin mi nom ünükümi, oupwe fokun niela ekewe chon Amalek, pwe esap wor eman epwe chüen chechemeniir. Ousap fokun manlükala mine üa ürenikemi.”
DEU 26:1 “Iwe, lupwen ka tolong lon ewe fanü ewe Samol mi Lapalap om we Kot epwe ngonuk pwe kopwe fanüeni, lupwen ka pwal fafanü o nonom lon,
DEU 26:2 kopwe angei ekoch mwen ua ka kini seni uän ekewe irä meinisin mi mär lon pwül me won ewe fanü ewe Samol mi Lapalap epwe ngonuk, kopwe isenirelong lon eu chük o feila ngeni ewe leni ewe Samol mi Lapalap om we Kot epwe filätä pwe aramas repwe fel ngeni ie.
DEU 26:3 Iwe, kopwe feila ren ewe souasor mi wiseni ewe wis lon ewe fansoun o üreni, ‘Üa pwärätä ngeni ewe Samol mi Lapalap ai we Kot ikenai pwe üa tolong lon ewe fanü ewe Samol mi Lapalap a pwon fän akapel ngeni ai kewe lewo pwe epwe ngenikich.’
DEU 26:4 Mürin, ewe souasor epwe angei ewe chük seni lepoum o iseis mwen ewe rongen asor än ewe Samol mi Lapalap om we Kot.
DEU 26:5 Iwe, mürin kopwe apasa ekei kapas me fän mesen ewe Samol mi Lapalap om we Kot, ‘Ai we lewo eman re Aramea mi siamüfetal, a feila Isip me an mwich mi kükün o nonom ikenan. Iwe, ikenan a wiliti eu mwü mi watte o pöchökül pwal chocho.
DEU 26:6 Nge ekewe chon Isip ra aweiresikich o ariaföüükich, ra pwal angangachoukich ren ar nöünikich amanau.
DEU 26:7 Mürin sa siö ngeni ewe Samol mi Lapalap än ach kewe lewo we Kot. Iwe, a rong mweliach o küna ach riaföü, ach angangachou me ach weires.
DEU 26:8 Iwe, ewe Samol mi Lapalap a emwenikichewu seni Isip ren pöün mi manaman o aköüpöü, fän eniweniu mi lapalap, pwal fän asisil me manaman.
DEU 26:9 A emwenikichelong lon ei leni o ngenikich ei fanü, eu fanü mi pwülüöch o fanüeräs.
DEU 26:10 Iei üa uwato mwen uän ewe pwül ewe Samol mi Lapalap a ngeniei.’ Mürin kopwe isetiu ewe chük mwen ewe Samol mi Lapalap om we Kot o fel ngeni.
DEU 26:11 Iwe, kopwe pwapwa ämi me chon ewe aingangen Lefi me ekewe chon ekis mi nom reöm ren ekewe mettoch meinisin mi mürina ewe Samol mi Lapalap om we Kot a ngenikemi me chon leimwom.
DEU 26:12 Iwe, kopwe uwätiu om eu leengol seni uän fotom irä meinisin iteiten mürin ülüngat ier o ngeni chon ewe aingangen Lefi, ngeni ekewe chon ekis, ekewe mi mäsen me ekewe fefin mi mä pwülüer, pwe repwe mongö o möt lon ar kewe telinimw.
DEU 26:13 Are ka wes me uwätiu, mürin kopwe apasa ekei kapas fän mesen ewe Samol mi Lapalap om we Kot, ‘Üa atowu me lon imwei ekewe eu leengol meinisin mi pin o ngeni chon ewe ainangen Lefi, ngeni ekewe chon ekis, ekewe mi mäsen me ekewe fefin mi mä pwülüer, usun ka allük ngeniei lon om kewe allük meinisin. Üsap purätiu eu lein om kewe allük, üsap pwal manlükirela.
DEU 26:14 Üsap mongö seni ewe eu leengol lupwen üa letipeta, üsap pwal amwökütü och seni lupwen üa limengau, ika eäni asor och seni ngeni somä. Üa aleasochisi alom, en ai Samol mi Lapalap, o föri meinisin mine ka allük ngeniei.
DEU 26:15 Kopwe netiu seni leniom mi pin, seni läng, o afeiöchü noum aramasen Israel, kopwe pwal afeiöchü ewe fanü ka ngenikem, usun ka fen pwon fän akapel ngeni äm kewe lewo, ewe fanü mi pwülüöch o fanüeräs.’
DEU 26:16 “Iwe, ikenai ewe Samol mi Lapalap ämi we Kot a allük ngenikemi ekei allük me pwüüng pwe oupwe aleasochisir. Iei mine oupwe tümwünüöchü le apwönüretä seni unusen lelukemi me unusen ngünümi.
DEU 26:17 Ämi oua pwärätä ikenai pwe ewe Samol mi Lapalap i ämi we Kot, oua pwal pwon pwe oupwe aleasochisi alon o apwönüetä an kewe allük me pwüüng.
DEU 26:18 Iwe, ewe Samol mi Lapalap a pwärätä usumi ikenai, pwe ämi eu mwichen aramas a wesewesen aücheani o nöüni, usun a fen pwon ngenikemi, nge ämi oupwe aleasochisi an kewe allük meinisin.
DEU 26:19 Epwe seikikemiitä won ekewe mwü meinisin i a afisiretä, pwe aramas repwe mwareitikemi o aitöchükemi, repwe pwal alingakemi. Iwe, oupwe eu mwichen aramas mi pin fän iten ewe Samol mi Lapalap ämi we Kot, usun a fen pwon ngenikemi.”
DEU 27:1 Iwe, Moses me ekewe souakomwen Israel ra allük ngeni ekewe aramas o üreniir, “Oupwe aleasochisi ekewe allük meinisin üa allük ngenikemi ikenai.
DEU 27:2 Lon ewe rän, lupwen oupwe pwerela pekilan ewe chanpupu Jortan o pwerelong lon ewe fanü ewe Samol mi Lapalap ämi we Kot epwe ngenikemi, oupwe senätä fau mi watte o amotouur ngeni pweech,
DEU 27:3 oupwe pwal makei wor ekei allük meinisin. Lupwen oua tolong lon ewe fanü mi pwülüöch o fanüeräs, ewe Samol mi Lapalap än ämi kewe lewo we Kot a fen pwon ngenikemi,
DEU 27:4 o nom pekilan ewe chanpupu Jortan, oupwe senätä ekewe fau me won ewe chuk Epal o amotouur ngeni pweech, usun üa allük ngenikemi ikenai.
DEU 27:5 Ikenan oupwe senätä eu rongen asor seni fau, nge ousap falei ekewe fau ren pisekin angang seni mächä.
DEU 27:6 Iwe, oupwe senätä eu rongen asor ngeni ewe Samol mi Lapalap seni fau resap fal o eäni asoren kek me won ngeni ewe Samol mi Lapalap ämi we Kot.
DEU 27:7 Oupwe pwal eäni ämi asoren kinamwe ikenan o mongö ewe asor. Iwe, oupwe pwapwa me fän mesen ewe Samol mi Lapalap ämi we Kot.
DEU 27:8 Oupwe makeöchü ekewe allük meinisin won ekewe fau.”
DEU 27:9 Mürin, Moses me ekewe souasor ir chon ewe ainangen Lefi ra üreni ekewe chon Israel meinsin, “Oupwe mosonoson o aüselingaei, ämi chon Israel. Ikenai oua wiliti nöün ewe Samol mi Lapalap ämi we Kot mwichen aramas.
DEU 27:10 Iei mine oupwe aleasochisi alon ewe Samol mi Lapalap ämi we Kot o apwönüetä an kewe allük me pwüüng üa allük ngenikemi ikenai.”
DEU 27:11 Iwe, lon ewe chök ränin Moses a allük ngeni ekewe aramas o üreniir,
DEU 27:12 “Lupwen oua pwerela pekilan ewe chanpupu Jortan, ikei iten ekewe ainang repwe ütä me won ewe chuk Kerisim pwe repwe afeiöchü ekewe aramas: Simeon, Lefi Juta, Isakar, Josef me Peniamin.
DEU 27:13 Nge ikei iten ekewe ainang repwe ütä me won ewe chuk Epal pwe repwe eäni ekewe kapasen anümamau: Rupen, Kat, Aser, Sepulon, Tan me Naftali.
DEU 27:14 Mürin, ekewe mwän seni ewe ainangen Lefi repwe pwärätä ngeni ekewe chon Israel meinisin ekei kapas fän mwelier mi leüömong,
DEU 27:15 ‘A anümamau eman mwän mi föri eu uluulun anümwäl seni mwüch ika seni mächä o fel ngeni lemonomon, pun ei mettoch mi för ren pöün eman soufal a anioput me ren ewe Samol mi Lapalap.’ Nge ekewe aramas meinisin repwe apasa, ‘Amen.’
DEU 27:16 ‘A anümamau eman mwän esap asamolu saman me inan.’ Nge ekewe aramas meinisin repwe apasa, ‘Amen.’
DEU 27:17 ‘A anümamau eman mwän a amwökütü kiännin fanüen chon arun.’ Nge ekewe aramas meinisin repwe apasa, ‘Amen.’
DEU 27:18 ‘A anümamau eman mwän a atokala eman mi mesechun seni alan.’ Nge ekewe aramas meinisin repwe apasa, ‘Amen.’
DEU 27:19 ‘A anümamau eman mwän a sorei mine a pwüng ngeni eman chon ekis, eman mi mäsen me eman fefin mi mä pwülüan.’ Nge ekewe aramas meinisin repwe apasa, ‘Amen.’
DEU 27:20 ‘A anümamau eman mwän mi kon ren pwülüen saman, pun a turunufasei saman ren.’ Nge ekewe aramas meinisin repwe apasa, ‘Amen.’
DEU 27:21 ‘A anümamau eman mwän mi kon ren eman man.’ Nge ekewe aramas meinisin repwe apasa, ‘Amen.’
DEU 27:22 ‘A anümamau eman mwän mi kon ren fefinan, ese lifilifil ika neminewe nöün saman föpwül ika nöün inan föpwül.’ Nge ekewe aramas meinisin repwe apasa, ‘Amen.’
DEU 27:23 ‘A anümamau eman mwän mi kon ren inen pwülüan.’ Nge ekewe aramas meinisin repwe apasa, ‘Amen.’
DEU 27:24 ‘A anümamau eman mwän a niela chon arun lemonomon.’ Nge ekewe aramas meinisin repwe apasa, ‘Amen.’
DEU 27:25 ‘A anümamau eman mwän mi angei eu lifangen amichimich, pwe epwe niela eman aramas esap wor an tipis.’ Nge ekewe aramas meinisin repwe apasa, ‘Amen.’
DEU 27:26 ‘A anümamau eman mwän esap aleasochisi ekei allük o apwönüretä meinisin.’ Nge ekewe aramas meinisin repwe apasa, ‘Amen.’”
DEU 28:1 “Iwe, are oupwe aleasochisi alon ewe Samol mi Lapalap ämi we Kot o tümwünüöchü le apwönüetä an kewe allük meinisin üa ngenikemi ikenai, i epwe atekiakemiitä mwen ekewe mwü meinisin won fanüfan.
DEU 28:2 Ekei feiöch meinisin repwe feito womi o akom mwemi, are oupwe aleasochisi alon ewe Samol mi Lapalap ämi we Kot.
DEU 28:3 Ewe Samol mi Lapalap epwe afeiöchü ämi kewe telinimw, epwe pwal afeiöchü ämi kewe tanipi.
DEU 28:4 Iwe, ewe Samol mi Lapalap epwe afeiöchükemi o ngenikemi chomong nöümi, epwe achomonga uän ämi pwül, nöümi pwiin man repwe up, nöümi apanen kow me apanen sip repwe chomongola.
DEU 28:5 Epwe afeiöchü ämi chük pwe epwe wor chomong uän irä lor, epwe pwal afeiöchü ewe mongö oua amolätä seni.
DEU 28:6 Oupwe feiöch lon mettoch meinisin mine oupwe föri.
DEU 28:7 Iwe, ewe Samol mi Lapalap epwe akufu chon oputemi mi ü ngenikemi. Repwe feito won efoch al pwe repwe maun ngenikemi, nge repwe süla me mwemi won fufoch al.
DEU 28:8 Ewe Samol mi Lapalap ämi we Kot epwe afeiöchü ämi lenien iseis, epwe pwal afeiöchü meinisin mine oua föri. Iwe, epwe afeiöchükemi lon ewe fanü i epwe ngenikemi.
DEU 28:9 Iwe, ewe Samol mi Lapalap ämi we Kot epwe aükemiitä pwe oupwe eu mwichen aramas mi pin fän itan, usun a fen pwon ngenikemi fän akapel, are oua aleasochisi alon o föri meinisin mine a allük ngenikemi.
DEU 28:10 Mürin, aramasen fanüfan meinisin repwe küna pwe ewe Samol mi Lapalap a filikemiitä pwe oupwe nöün aramas, repwe pwal niuokusitikemi.
DEU 28:11 Iwe, ewe Samol mi Lapalap epwe awöüükemi, epwe achomonga upun womi me nöümi pwiin kow, epwe pwal achomonga uän ämi pwül lon ewe fanü ewe Samol mi Lapalap a fen pwon fän akapel ngeni ämi kewe lewo pwe epwe ngenikemi.
DEU 28:12 Ewe Samol mi Lapalap epwe suki ngenikemi läng an lenien iseis mettoch mi aüchea, pwe epwe apüngätiu üt won fanüemi lon fansoun öch o afeiöchü angangen pöümi meinisin. Ämi oupwe mwütawu mettoch ngeni chomong mwü, nge ousap paaro seniir.
DEU 28:13 Ewe Samol mi Lapalap epwe föri pwe ämi ewe mökür, nge ousap ewe mechan. Iwe, oupwe chök nonom won, nge ousap nom fan, are oua aleasochisi ekewe allük än ewe Samol mi Lapalap ämi we Kot üa allük ngenikemi ikenai, o tümwünüöchü le apwönüretä.
DEU 28:14 Ousap fokun aleasolap ngeni ekei kapas üa allük ngenikemi ikenai, ousap fel ngeni pwal ekoch kot o angang ngeniir.”
DEU 28:15 “Nge are ousap aleasochisi alon ewe Samol mi Lapalap ämi we Kot, ousap pwal tümwünüöchü le apwönüetä an kewe allük me pwüüng meinisin üa allük ngenikemi ikenai, mürin ekei anümamau repwe feito womi o nonom mwemi.
DEU 28:16 Ewe Samol mi Lapalap epwe anümamaua ämi kewe telinimw, epwe pwal anümamaua ämi kewe tanipi.
DEU 28:17 Epwe anümamaua masouen ämi kewe chük pwe esap wor chomong uän irä lor, epwe pwal anümamaua ewe mongö oua amolätä seni.
DEU 28:18 Epwe anümamauakemi pwe esap wor chomong nöümi, esap pwal wor chomong uän ämi pwül, nöümi apanen kow me apanen sip repwe chokükünüla.
DEU 28:19 Oupwe anümamau lon mettoch meinisin mine oua föri.
DEU 28:20 Iwe, ewe Samol mi Lapalap epwe tinato womi anümamau, fitikoko me apwüng lon meinisin mine oua föri tori oupwe mäla o müttir rosola pokiten ämi föför mi ngau me ämi likitala Kot.
DEU 28:21 Ewe Samol mi Lapalap epwe awarato mätter ngenikemi, tori i epwe amochakemiila me won ewe fanü oupwe le tolong lon pwe oupwe fanüeni.
DEU 28:22 Ewe Samol mi Lapalap epwe afeiengaukemi ren fius me pwichikar me pwo. Epwe tinala won fanüemi pwichikar watte me pwasapwas, moi me mesenipik. Ekei feiengau repwe torikemi tori oupwe rosola.
DEU 28:23 Iwe, ewe läng asemi epwe usun chök piras, nge ewe fanü fami epwe usun chök mächä.
DEU 28:24 Ewe Samol mi Lapalap epwe awili üt ngeni pi me pipisüsü o apüngätiu won fanüemi tori oupwe rosola.
DEU 28:25 Iwe, ewe Samol mi Lapalap epwe föri pwe oupwe kuf ren chon oputemi. Oupwe feila won efoch al pwe oupwe maun ngeniir, nge oupwe sü me mwer won fufoch al. Chon ekewe mwü meinisin won fanüfan repwe fokun niuokus, lupwen repwe küna mine a fis ngenikemi.
DEU 28:26 Ekewe machang meinisin pwal ekewe manmwacho won fanüfan repwe ochei somämi, nge esap wor eman epwe asürela.
DEU 28:27 Ewe Samol mi Lapalap epwe afeiengauakemi ren mach usun a fis ngeni chon Isip, epwe afeiengauakemi ren pwo me kilingau me pwerik, nge esap wor säfeian pwe oupwe tongeni pöchökül ren.
DEU 28:28 Ewe Samol mi Lapalap epwe pwal afeiengauakemi pwe oupwe umwes me mesechun me sokongau.
DEU 28:29 Oupwe atapfeil leoloas usun eman mi mesechun a atapfeil lon rochopwak, nge ousap küna alen ämi oupwe fefeitä. Iwe, aramas repwe chök ariaföüükemi o soläni pisekimi fansoun meinisin, nge esap wor eman epwe alisikemi.
DEU 28:30 Are eman leimi a kofot ngeni eman föpwül, eman mwän epwe angei o kon ren. Oupwe aüetä eu imw, nge ousap nom lon, oupwe fotuki irän wain, nge ousap ochei uan.
DEU 28:31 Repwe niela nöümi ätemwänin kow me fän mesemi, nge ousap ochoch fituker. Repwe angei senikemi nöümi aas fän pöchökül, nge resap aliwini ngenikemi, repwe pwal angei nöümi sip o ngeni chon oputemi, nge esap wor eman epwe alisikemi.
DEU 28:32 Nöümi mwän me fefin repwe oola lon fanüen chon ekis. Iwe, oupwe küna ren mesemi, oupwe pwal letipeta ren ämi positiir iteiten rän, nge esap wor ämi tufich pwe oupwe tongeni angaseer.
DEU 28:33 Chon eu mwü ousap sileer me mwan repwe mongö uän fanüemi me uän ämi angang meinisin. Iwe, repwe chök ariaföüükemi o atatakisikemi fansoun meinisin,
DEU 28:34 pwe oupwe umwesila ren mine oupwe küna.
DEU 28:35 Ewe Samol mi Lapalap epwe afeiengaua pwäsukumi me pechemi ren mach mi fokun emetek, epwe würi seni fän pechemi tori won möküremi, nge ousap tongeni pöchökül ren.
DEU 28:36 Iwe, ewe Samol mi Lapalap epwe emwenikemiila me ämi king oua seikätä womi ngeni eu mwü, ämi me ämi kewe lewo ousap silei me mwan. Ikenan oupwe angang ngeni pwal ekoch kot mi för seni mwüch me fau.
DEU 28:37 Aramas repwe mairü ren mine a fis ngenikemi, repwe leawenikemi ren kapasen ämängau me kapasen turunufas me lein chon ekewe mwü, ia ewe Samol mi Lapalap epwe emwenikemiila ie.
DEU 28:38 Iwe, oupwe amorafeili chomong föün irä lon ämi tanipi, nge kiniemi ua repwe chokükün, pun ekewe lifichimas repwe chök eni.
DEU 28:39 Oupwe fotuki irän wain o angang ngeniir, nge ousap ioni föür ika ünümi chönün uar, pun muun repwe chök eni.
DEU 28:40 Epwe wor irä olif lon unusen fanüemi, nge ousap epitikemi ewe noppuk seni, pun ekewe föün olif repwe chök mwor.
DEU 28:41 Epwe wor nöümi mwän me fefin, nge ousap nöüniir, pun repwe chök oola lon maun.
DEU 28:42 Ekewe lifichimas repwe eni ämi kewe irä meinisin me uän ämi pwül.
DEU 28:43 Iwe, ewe chon ekis mi nom remi epwe fefeitä o tekiatä, nge ämi oupwe fefeitiu o tekisonitiu.
DEU 28:44 Ewe chon ekis epwe mwüt ngenikemi mettoch, nge ämi ousap tongeni ngeni och. Iwe, i epwe ewe mökür, nge ämi oupwe mechan.
DEU 28:45 Ekei anümamau meinisin repwe torikemi, repwe tapwerikemi o tokumweekemi tori oupwe rosola, pun ousap aleasochisi alon ewe Samol mi Lapalap ämi we Kot, ousap pwal tümwünü an kewe allük me pwüüng a allük ngenikemi.
DEU 28:46 Iwe, ekei anümamau repwe eu asisil me eu manaman ngenikemi me mwirimwirimi kana tori feilfeilachök.
DEU 28:47 Iwe, ewe Samol mi Lapalap ämi we Kot a afeiöchükemi ren chomong feiöch, nge ämi ousap angang ngeni fän meseik me pwapwan lelukemi.
DEU 28:48 Iei mine ewe Samol mi Lapalap epwe tinato remi chon oputemi, pwe oupwe angang ngeniir fän echik me kaka, fän selela me osupwangen mettoch meinisin. Iwe, Kot epwe anomu won üemi efoch waas seni mächä tori epwe arosakemiila.
DEU 28:49 Ewe Samol mi Lapalap epwe pwal awarato womi eu mwü seni toau, seni lesopun fanüfan, chon repwe eäni eu fos ousap wewe ren. Iwe, repwe müttir feito womi usun eman ikel mi äkkäs.
DEU 28:50 Repwe afochongau, resap meniniti ekewe mi chinlap, resap pwal tongei ekewe semirit.
DEU 28:51 Iwe, repwe ochei nienifön nöümi pwiin kow o eni uän ämi pwül, nge ämi oupwe mäla ren echik. Resap pwal likiti fän itemi wiich, wain ika apüra, nienifön nöümi pwiin kow ika nöümi pwiin sip, tori ra arosakemiila.
DEU 28:52 Iwe, repwe pwelifeili fän pisekin maun ämi kewe telinimw meinisin me lon unusen fanüemi ewe Samol mi Lapalap epwe ngenikemi, tori ämi kewe tit mi tekia o pöchökül oua eäniir apilükülük repwe turula.
DEU 28:53 Pokiten chon oputemi repwe pwelifeilikemi fän pisekin maun o fokun ariaföüükemi, oupwe ochei fituken mwirimwirimi, fituken nöümi ät me nengin ewe Samol mi Lapalap ämi Kot a ngenikemi.
DEU 28:54 Iwe, ewe mwän mi fokun äteson me leimi epwe maicha won mongö ngeni pwin, ngeni püsin pwülüan me nöün semirit mi chüen nom ren.
DEU 28:55 Esap aochocheer fituken nöün a ochei, pun esap chüen wor och lusun, pokiten chon oputemi ra pwelifeilikemi fän pisekin maun o fokun ariaföüükemi lon ämi kewe telinimw meinisin.
DEU 28:56 Iwe, ewe fefin mi fokun lieson me leimi, esap mwo nge ipweri pwül pokiten a fokun son, epwe maicha won mongö ngeni püsin pwülüan, ngeni nöün ät me nengin.
DEU 28:57 Epwe maicha won ewe chienen mönükol me nöün we a nöüni, pun epwe ocheer lemonomon fän iten watten an osupwangen mongö, pokiten chon oputemi ra pwelifeili ämi kewe telinimw fän pisekin maun o fokun ariaföüükemi.
DEU 28:58 Iwe, are ousap tümwünüöchü le föri ekei allük meinisin mi mak lon ei puk, are ousap pwal meniniti iten ewe Samol mi Lapalap ämi we Kot, ewe it mi ling o eniweniw,
DEU 28:59 mürin, ewe Samol mi Lapalap epwe awarato ngenikemi me mwirimwirimi kana feiengau mi fokun lapalap, mi chou o müchümang, pwal samauchou mi müchümang.
DEU 28:60 Epwe tinsefälieto womi ekewe samaun Isip meinisin oua niuokusitiir. Iwe, repwe fitipacheitikemi.
DEU 28:61 Ewe Samol mi Lapalap epwe pwal awarato ngenikemi sokopaten samau me riaföü meinisin resap mak lon ei puken allük, tori oupwe rosola.
DEU 28:62 Ika mwo oua chomong usun fün läng, ämi mi chüen manau oupwe chök chokükünüla pokiten ousap aleasochisi alon ewe Samol mi Lapalap ämi we Kot.
DEU 28:63 Iwe, usun ewe Samol mi Lapalap a pwapwa le afeiöchükemi o achomongakemi, iei usun epwe pwal pwapwa le afeiengauakemi o arosakemiila. Ewe fanü oupwe le tolong lon pwe oupwe fanüeni, oupwe pwal sä seni.
DEU 28:64 Mürin, ewe Samol mi Lapalap epwe atoropasafeilikemi lein chon ekewe mwü meinisin seni esopun fanüfan tori esopun. Ikenan oupwe angang ngeni pwal ekoch kot mi för seni mwüch me fau, ämi me ämi kewe lewo ousap sileer me mwan.
DEU 28:65 Nge lupwen oupwe nom lein chon ekewe mwü, ousap kinamwe, esap pwal wor lenien asösö ia oua tongeni nom ie. Ikenan ewe Samol mi Lapalap epwe ngenikemi eu lelukniuokus, meseattong me ekilolilen.
DEU 28:66 Iwe, manauemi a chök nom fän öücchüng, lepwin me lerän oupwe niuokus, pwe esap wor apilüköchün manauemi.
DEU 28:67 Lesosor oupwe älälei, ‘Amwo epwe lekuniol,’ nge lekuniol oupwe älälei, ‘Amwo epwe lesosor,’ pokiten lelukemi a chök niuokus, pwal pokiten mine mesemi ra küna.
DEU 28:68 Iwe, ewe Samol mi Lapalap epwe tinisefälikemiila Isip won sip, inamwo ika a fen ürenikemi pwe ousap chüen saisefäl ngeni ewe fanü. Ikenan oupwe püsin eänikemi amömö ngeni chon oputakemi, pwe repwe nöünikemi amanau, nge esap wor eman epwe mochen mönikemi.”
DEU 29:1 Ikkei kapasen ewe pwon ewe Samol mi Lapalap a allük ngeni Moses fän iten ekewe aramasen Israel me lon ewe fanü Moap, lükün ewe pwon a fen föri ngeniir me fäsonun ewe chuk Horep.
DEU 29:2 Iwe, Moses a körifengeni chon Israel meinisin o üreniir, “Oua küna meinisin mine ewe Samol mi Lapalap a föri fän mesemi ngeni Farao ewe kingen Isip, ngeni nöün kewe nöüwis meinisin, pwal ngeni unusen fanüan.
DEU 29:3 Oua püsin küna ekewe riaföü mi watte, ekewe asisil me ekewe manaman mi lapalap.
DEU 29:4 Nge tori ikenai ewe Samol mi Lapalap esap ngenikemi ekiek mi mirit, mas mi nenela me seling mi rongorong.
DEU 29:5 Iwe, a emwenikemi lon ewe fanüapö lon ükükün faik ier. Üfemi oua üföüf pwal ipwemi sus resap kamwala.
DEU 29:6 Ousap mongö pilawa, ousap pwal ün wain ika sokopaten minen ün. Ewe Samol mi Lapalap a föri ei pwe oupwe silei pwe i ämi Kot.
DEU 29:7 Nge lupwen sa tori ei leni, Sihon ewe kingen Hespon pwal Ok ewe kingen Pasan ra feito pwe repwe maun ngenikich, nge sa akufuur.
DEU 29:8 Sa angei fanüer o ngeni chon ewe ainangen Rupen me Kat me esopun ewe ainangen Manasa, pwe repwe fanüeni.
DEU 29:9 Iei mine oupwe tümwünüöchü le apwönüetä kapasen ei pwon, pwe oupwe fefeitä lon meinisin mine oua föri.
DEU 29:10 Iwe, ikenai ämi meinisin oua ü fän mesen ewe Samol mi Lapalap ämi we Kot. Ekewe mwänirelan ämi ainang, nöümi souakom me nöümi kewe meilap, ekewe re Israel meinisin,
DEU 29:11 nöümi semirit me pwülüemi, ekewe chon ekis mi nom leimi, ir ätekewe mi os ämi mwüch o üfi ünümemi koluk,
DEU 29:12 ämi meinisin oua ü ikei, pwe oupwe tolong fän ewe pwon mi fis fän akapel, ewe Samol mi Lapalap ämi we Kot a föri ngenikemi ikenai.
DEU 29:13 Ei pwon a aükemiitä ikenai pwe ämi oupwe nöün aramas, nge i epwe ämi Kot, usun a fen pwon ngeni ämi kewe lewo, ngeni Apraham, Isaak me Jakop.
DEU 29:14 Iwe, ewe Samol mi Lapalap a föri ei pwon fän akapel, sap ngenikemi chök,
DEU 29:15 pwe pwal ngeni mwirimwirich resamwo uputiu, usun chök ngenikich meinisin mi nom ikei ikenai fän mesen ewe Samol mi Lapalap ach we Kot.
DEU 29:16 Iwe, oua silei usun ach nonom lon ewe fanü Isip, pwal usun ach pwerelong lukalapen fanüen chon ekewe mwü sa lu seniir.
DEU 29:17 Oua küna ar kewe uluulun anümwäl mi anioput ra för seni mwüch me fau, seni silifer me kolt.
DEU 29:18 Oupwe afälikemi pwe esap wor me leimi eman mwän ika fefin, eu famili ika eu ainang ikenai epwe tokola seni ewe Samol mi Lapalap ach we Kot, pwe epwe feila o fel ngeni koten ekewe mwü. Pun ika eman epwe föri iei usun, epwe usun chök waaren efoch irä pwennan a märitä o uani ua mi poison me maras,
DEU 29:19 Oupwe pwal afälikemi pwe esap wor eman me leimi a püsin ikeetä, lupwen a rong kapasen ei pwon mi fis fän akapel o ekieki lon lelukan, ‘Üpwe chök feiöch, inamwo ika üa chei mochenin lelukei mi ülöförea.’ Ei epwe chök afeiengaua ämi meinisin, chokewe mi mürina me chokewe mi ingau.
DEU 29:20 Iwe, ewe Samol mi Lapalap esap amusala än ätewe tipis. An song me an lukomong epwe küw ewe mwän, nge ekewe anümamau meinisin ra mak lon ei puk repwe nonom won, tori ewe Samol mi Lapalap epwe amoola itan seni won fanüfan.
DEU 29:21 Ewe Samol mi Lapalap epwe aimwüela ewe mwän seni chon ekewe ainangen Israel meinisin, pwe epwe afeiengaua ren ekewe anümamau meinisin ra nom lon ewe pwon mi mak lon ei puken allük.
DEU 29:22 Iwe, ekewe täppin aramas repwe up me mürin, ir mwirimwirimi kewe me ekewe chon ekis mi feito seni fanü toau repwe küna feiengauen ewe fanü me samaun chon, ewe Samol mi Lapalap epwe aworato wor.
DEU 29:23 Unusen ewe fanü epwe fokun tala o pönüla ren pirimston me salt, pwe esap wor eman a tongeni fotuki ika ämärätä och won, esap pwal pwük fetil won. Ewe fanü epwe usun chök Sotom me Komora, Atma me Sepoim, lupwen ewe Samol mi Lapalap a ataarala lon an song me lingeringer.
DEU 29:24 Iwe, chon ekewe mwü meinisin repwe ais, ‘Pwota ewe Samol mi Lapalap a föri iei usun ngeni ewe fanü? Met popun a kon watte an song?’
DEU 29:25 Mürin, aramas repwe apasa, ‘Popun a fis ei pwe ekewe chon Israel ra atai ewe pwon ewe Samol mi Lapalap än ar kewe lewo we Kot a föri ngeniir, lupwen a emwenirewu seni ewe fanü Isip.
DEU 29:26 Iwe, ra feila o angang ngeni pwal ekoch kot o fel ngeniir, sokun kot resap sileer me mwan, Kot esap pwal mwüt ngeniir pwe repwe fel ngeniir.
DEU 29:27 Iei mine ewe Samol mi Lapalap a fokun song ngeni nöün aramas o awarato won ei fanü ekei anümamau meinisin mi mak lon ei puk.
DEU 29:28 Iwe, ewe Samol mi Lapalap a wiiretä seni fanüer lon an song me chou me lingeringer watte o monerela lon pwal eu fanü, usun a fis ikenai.’
DEU 29:29 Iwe, ekewe mettoch mi monomon än ewe Samol mi Lapalap ach we Kot. Nge ekewe mettoch mi pwäpwäla kapasen ei allük meinisin ach me än nöüch kana tori feilfeilachök, pwe sipwe aleasochisiir.”
DEU 30:1 “Iei üa mwüt ngenikemi pwe oupwe filätä lefilen feiöch me anümamau. Are ekei anümamau meinisin repwe fis ngenikemi, lupwen oua nom lein chon ekewe mwü ia ewe Samol mi Lapalap a asükemiila ie, ämi oupwe chechemeni pwe iei püsin filiemi.
DEU 30:2 Nge are ämi me mwirimwirimi kana oupwe liwiniti ewe Samol mi Lapalap ämi we Kot o aleasochisi an kewe allük ren unusen lelukemi me unusen ngünümi lon meinisin mine üa allük ngenikemi ikenai,
DEU 30:3 mürin, ewe Samol mi Lapalap ämi we Kot epwe afeiöchüsefälikemi o eäni tong ngenikemi. Iwe, epwe achusefälikemi seni lein ekewe aramas, ia ämi we Kot a atoropasafeilikemi ie.
DEU 30:4 Inamwo ika oua toropasfeil tori lesopun fanüfan, ewe Samol mi Lapalap ämi we Kot epwe achusefälikemi o angeikemi seni ikenan.
DEU 30:5 Ewe Samol mi Lapalap ämi we Kot epwe emwenikemiilong lon ewe fanü, ämi kewe lewo ra fen fanüeni, pwe oupwe fanüenisefäli. Iwe, epwe alapala wöümi o achomongakemiila seni chomongun ämi kewe lewo.
DEU 30:6 Ewe Samol mi Lapalap ämi we Kot epwe limeti lelukemi me leluken mwirimwirimi kewe, pwe oupwe echeni i ren unusen lelukemi pwal ren unusen ngünümi, pwe oupwe manau.
DEU 30:7 Ewe Samol mi Lapalap ämi we Kot epwe anomu ekei anümamau meinisin won chon oputemi mi ariaföüükemi.
DEU 30:8 Nge ämi oupwe aleasochisisefäli alon ewe Samol mi Lapalap o apwönüetä an kewe allük meinisin üa allük ngenikemi ikenai.
DEU 30:9 Iwe, ewe Samol mi Lapalap epwe fokun afeiöchü angangen pöümi meinisin o achomonga mwirimwirimi, epwe oupu nöümi pwiin man o achomonga uän ämi pwül. Pun ewe Samol mi Lapalap epwe pwapwa le afeiöchüsefälikemi, usun a pwapwa le afeiöchü ämi kewe lewo.
DEU 30:10 Ei epwe fis, are oupwe aleasochisi alon ewe Samol mi Lapalap ämi we Kot o apwönüetä an kewe allük me pwüüng ra mak lon ei puken allük, are oua pwal kuliti ewe Samol mi Lapalap ämi we Kot ren unusen lelukemi me unusen ngünümi.
DEU 30:11 Pun ei allük üa allük ngenikemi ikenai esap kon förea ngenikemi, esap pwal toweires ngenikemi.
DEU 30:12 Esap nom läng pwe oupwe üra, ‘Iö epwe feitä läng fän itach o uwätiu ei allük rech pwe sipwe rongorong o aleasochisi?’
DEU 30:13 Esap pwal nom pekilan ewe matau pwe oupwe üra, ‘Iö epwe feila pekilan ewe matau fän itach o uwato rech ei allük, pwe sipwe rongorong o aleasochisi?’
DEU 30:14 Nge ewe kapas a fokun kan ngenikemi, oua silei o amwöchü lükün, iei mine oupwe aleasochisi.
DEU 30:15 Nengeni, ikenai üa iseis mwemi manau me feiöch, pwal mäla me feiengau.
DEU 30:16 Are oupwe aleasochisi ekewe allük än ewe Samol mi Lapalap ämi we Kot üa allük ngenikemi ikenai, are oupwe pwal echeni i o aleasochisi alon pwe oupwe apwönüetä an kewe allük meinisin, an kewe pwüüng me an kewe öüröür, mürin oupwe manau o chomongola. Iwe, ewe Samol mi Lapalap ämi we Kot epwe afeiöchükemi lon ewe fanü oupwe le tolong lon pwe oupwe fanüeni.
DEU 30:17 Nge are oupwe tokola, ousap pwal mochen aleasochisi alon, are oupwe fel ngeni pwal ekoch kot o angang ngeniir,
DEU 30:18 üpwe asile ngenikemi ikenai pwe oupwe mäla. Ousap fokun manauatam lon ewe fanü oupwe le feila lon pekilan ewe chanpupu Jortan pwe oupwe fanüeni.
DEU 30:19 Iwe, üa kökköri läng me fanüfan pwe repwe chon pwärätä usumi ikenai, pwe üa anomu mwemi manau me mäla, feiöch me anümamau. Iei mine oupwe filätä manau, pwe ämi me mwirimwirimi kana oupwe manau.
DEU 30:20 Oupwe echeni ewe Samol mi Lapalap ämi we Kot, oupwe aleasochisi alon o fitipacheiti. Pun ren ei oupwe manau o ränin manauemi repwe langatamala lon ewe fanü ewe Samol mi Lapalap a pwon fän akapel pwe epwe ngeni ämi kewe lewo Apraham, Isaak me Jakop.”
DEU 31:1 Iwe, Moses a sopwela le apasa ekei kapas ngeni ekewe chon Israel meinisin
DEU 31:2 o üreniir, “Ngang üa ierini ipükü rüe ikenai. Üsap chüen tufichin ai üpwe emwenikemi. Nge ewe Samol mi Lapalap a pwal üreniei pwe üsap tongeni feila pekilan ewe chanpupu Jortan.
DEU 31:3 Iwe, ewe Samol mi Lapalap ämi we Kot epwe püsin feila mwemi pekila. Epwe arosala chon ekei mwü me mwemi, pwe oupwe angei seniir fanüer. Nge Josua epwe emwenikemi usun ewe Samol mi Lapalap a fen apasa.
DEU 31:4 Ewe Samol mi Lapalap epwe akufu chon ekewe mwü usun a akufu Sihon me Ok ekewe kingen chon Amor o ataela fanüer, lupwen a aroserela.
DEU 31:5 Ewe Samol mi Lapalap epwe atolongeer lepöümi, nge ämi oupwe föri ngeniir ükükün meinisin mine üa allük ngenikemi.
DEU 31:6 Oupwe apöchökülakemi o tipepwora, nge ousap niuokus are niueitiir, pun ewe Samol mi Lapalap ämi we Kot epwe etikemi. Esap tümwününgau ngenikemi, esap pwal likitikemi.”
DEU 31:7 Mürin, Moses a körato Josua o kapas ngeni me fän mesen ekewe chon Israel meinisin, “Kopwe apöchökülok o tipepwora. Pun en kopwe emweni ekei aramas le tolong lon ewe fanü ewe Samol mi Lapalap a pwon fän akapel ngeni ar kewe lewo pwe epwe ngeniir. Kopwe pwal ainet ngeniir ewe fanü o afanüeer.
DEU 31:8 Iwe, ewe Samol mi Lapalap i epwe akom mwom, epwe etuk, nge esap tümwününgau ngonuk, esap pwal likituk. Kosap niuokus ika rükö.”
DEU 31:9 Iwe, Moses a makeelong ei allük lon eu puk o ngeni ekewe souasor seni ewe ainangen Lefi mi mwärei ewe pworun pwon än ewe Samol mi Lapalap, a pwal ngeni ekewe souakomwen chon Israel.
DEU 31:10 Mürin, Moses a allük ngeniir, “Lesopolan iteiten fisu ier, lon ewe ierin än aramas liwinimang a musala, lon ewe chulapen likachoch,
DEU 31:11 lupwen chon Israel repwe feito pwe repwe fel ngeni ewe Samol mi Lapalap ämi we Kot lon ewe leni i epwe filätä, oupwe aleani ei allük fän mesen chon Israel meinisin pwe repwe rongorong.
DEU 31:12 Iwe, oupwe emwichafengeni ekewe aramas, mwän, fefin me semirit, pwal ekewe chon ekis mi nom lon ämi kewe telinimw, pwe meinisin repwe rongorong o kaiö usun ar repwe meniniti ewe Samol mi Lapalap ämi we Kot o tümwünüöchü le apwönüetä kapasen ei allük meinisin.
DEU 31:13 Iwe, nöür resamwo silei ei allük repwe rong o kaiö usun ar repwe meniniti ewe Samol mi Lapalap ämi we Kot lon ükükün ränin ar nonom lon ewe fanü oupwe le feila lon pekilan ewe chanpupu Jortan, pwe oupwe fanüeni.”
DEU 31:14 Iwe, ewe Samol mi Lapalap a üreni Moses, “Iei ränin om mäla a arapoto. Kopwe köri Josua pwe oupwe feitopök lon ewe imwenfel seni mangaku pwe üpwe ngeni wisan.” Iwe, Moses me Josua ra feila lon ewe imwenfel seni mangaku.
DEU 31:15 Mürin, ewe Samol mi Lapalap a pwä ngeniir me lon ewe imw lon eu ürekuchu. Iwe, ewe ürekuchu a ü leasamalapen ewe imwenfel seni mangaku.
DEU 31:16 Iwe, ewe Samol mi Lapalap a üreni Moses, “A arapakan om kopwe le mäla o nom ren om kewe lewo. Mürin, ekei aramas repwe föri usun chök angangen lisowu ren ar fel ngeni pwal ekoch koten ewe fanü ia repwe feila ie. Iwe, repwe likitieila o ataela ai we pwon üa föri ngeniir.
DEU 31:17 Lupwen epwe fis ei, üpwe fokun song ngeniir. Üpwe likitirela o amona mesei seniir pwe repwe rosola. Iwe, chomong feiengau me riaföü repwe toriir, pwe repwe ais lon ewe ränin, ‘Ifa usun, ekei feiengau ra torikich pokiten ach Kot esap nom lefilach?’
DEU 31:18 Lon ewe ränin üpwe fokun amona mesei pokiten ekewe föför mi ngau ra föri, pun ra fel ngeni pwal ekoch kot.
DEU 31:19 Iei mine kopwe makei ei köl o aiti ngeni ekewe aramasen Israel, pwe repwe kökölü. Pun ei köl epwe wisen pwärätä fän itei o ü ngeni ekewe aramasen Israel.
DEU 31:20 Iwe, üpwe emwenirelong lon ewe fanü mi pwülüöch o fanüeräs üa pwon fän akapel pwe üpwe ngeni ar kewe lewo. Nge lupwen epwe wor chomong ener mongö pwe ra möt o kitinupula, mürin repwe kul ngeni pwal ekoch kot o fel ngeniir. Iwe, repwe pöütieila o atai ai we pwon.
DEU 31:21 Nge lupwen chomong feiengau me riaföü repwe toriir, ei köl epwe ü ngeniir usun eman chon pwärätä pwe mwirimwirir kana resap fokun manlükala. Pun mwen ai emwenirela lon ewe fanü üa pwon fän akapel pwe üpwe ngeniir, üa fen silei ar ekiek ra ekiekietä.”
DEU 31:22 Iwe, lon ewe chök ränin Moses a makei ei köl o aiti ngeni ekewe aramasen Israel.
DEU 31:23 Mürin, ewe Samol mi Lapalap a awisa Josua nöün Nun we mwän ngeni wisan o apasa, “Kopwe apöchökülok o tipepwora, pun en kopwe emwenalong ekewe aramasen Israel lon ewe fanü üa pwon fän akapel pwe üpwe ngeniir. Ngang üpwe etuk.”
DEU 31:24 Iwe, lupwen Moses a awesöchüela le makeelong lon eu puk kapasen ei allük meinisin,
DEU 31:25 a allük ngeni ekewe mwän seni ewe ainangen Lefi mi mwärei än ewe Samol mi Lapalap pworun pwon,
DEU 31:26 “Oupwe angei ei puken allük o iseni lepekin ewe pworun pwon än ewe Samol mi Lapalap ämi we Kot, pwe epwe nom ikenan, pun a wisen pwärätä o ü ngenikemi.
DEU 31:27 Pun üa silei ämi lükümach o tipepöchökül. Nengeni, ikenai, lupwen üa chüen manau ngenikemi, oua lükümach ngeni ewe Samol mi Lapalap. Nge epwe fen ifa usun mürin ai mäla?
DEU 31:28 Oupwe emwichato rei souakomwen ämi kewe ainang meinisin, pwal ekewe meilap, pwe üpwe apasa ekei kapas me fän meser o kökköri läng me fanüfan pwe repwe chon pwärätä usur.
DEU 31:29 Pun üa silei pwe mürin ai mäla oupwe fokun föri föför mi ngau o aleasolap ngeni mine üa allük ngenikemi. Iwe, lon kan rän mwach feiengau epwe torikemi, pun oupwe föri mine a ngau me fän mesen ewe Samol mi Lapalap o asonga ren ämi uluulun anümwäl oua föriir.
DEU 31:30 Mürin, Moses a apasa kapasen ei köl seni lepoputan tori lesopolan, nge ekewe chon Israel meinisin ra rongorong ngeni:
DEU 32:1 Ämi läng, oupwe aüselinga ai kei kapas, nge en fanüfan, kopwe rongorong mine üa apasa.
DEU 32:2 Amwo ai kapasen kait epwe püngütiu usun üt, ai kapas epwe wüch usun amurenipwin, epwe usun chimwo won ewe fetil mi pwüküfö, pwal usun püngün üt won iräkis.
DEU 32:3 Pun üpwe asilefeili iten ewe Samol mi Lapalap. Oupwe ingemwareiti tekian ach Kot.
DEU 32:4 I ewe achau, an föför ra unusen mürina, pun an kewe al meinisin ra pwüng. I eman Kot mi allükülük, esap wor an mwäl, a pwüng o wenechar.
DEU 32:5 Nge ämi chon Israel oua föri föför mi ngau ngeni Kot. Ousap chüen iteni nöün, pun a wor terimi. Ämi eu täppin aramas mi ngau o rikirik.
DEU 32:6 Ifa usun, iei ämi kilisou ngeni ewe Samol mi Lapalap, ämi aramas mi tiparoch o umwes? Ifa usun, sap i sememi we mi förikemi, a afisikemiitä pwe oupwe eu mwü.
DEU 32:7 Oupwe chechemeni ewe fansoun lom, oupwe ekieki usun ekewe täppin aramasen lom. Oupwe aisini sememi, ir repwe aiti ngenikemi mine a fis. Oupwe pwal aisini ekewe souakom, ir repwe apworausa ngenikemi usun ewe pworaus.
DEU 32:8 Lupwen ewe mi Unusen Tekia a ngeni chon ekewe mwü fanüer, lupwen a aimwüfeseni ekewe aramas, a föri kiännin lefilen ekewe aramas won ükükün iteiten nöün Israel kewe mwän.
DEU 32:9 Nge a filätä ekewe mwirimwirin Jakop pwe ir repwe püsin nöün aramas.
DEU 32:10 Kot a küneer me lon eu fanü mi pön, me lon eu leni mi pön o uren sokun wörüwör. A pwelifeiliir o foleniir, a tümwünüür usun chök fituken lon mesan.
DEU 32:11 Usun eman ikel a mamasa fasan o äkkäs asen nöün kewe apansüsü, usun a ameresala pöükässin far o amwöchüür pwe repwe nom won, a pwal uweeretä won pöükässin,
DEU 32:12 iei usun ewe Samol mi Lapalap a chök emweni nöün aramas. Esap pwal wor eman kot ünükün.
DEU 32:13 A föri pwe ekewe mwirimwirin Jakop repwe nemeni ekewe lenien tekia won fanüfan o amongöü ngeniir uän ekewe tanipi. A amötü ngeniir chönün chunen seni lon achau, pwal apüra seni lon achau mi pöchökül.
DEU 32:14 Kot a aünü ngeniir milik seni ekewe pwiin kow me sip. A aochocha ngeniir kirisin ekewe nienifön sip me ekewe ätemwänin sip, pwal fituken kow me ätemwänin kuuch seni Pasan, a pwal amongöü ngeniir föün wiich mi fokun mürina. Iwe, a aünü ngeniir wain seni chönün föün irän wain.
DEU 32:15 Nge Jesurun a kitinupula o rochongau, a kitinupula, a wattela o misimis. Mürin a likitala Kot ewe mi föri, a turunufasei ewe Achau an Chon Amanau.
DEU 32:16 Iwe, chon Israel ra kupeti leluken Kot ren ekewe koten lükün, ra asonga ren ar uluulun anümwäl mi anioput.
DEU 32:17 Ra asor ngeni anüroch, nge sap ir kot, ra asor ngeni ekewe kot resap fokun sileer me mwan, ngeni minefön kot ra kärän chök pwä, sokun kot ar kewe lewo resap niueitiir.
DEU 32:18 Ra likitala ewe Achau mi nöüniir, ra manlükala ewe Kot mi ngeniir manau.
DEU 32:19 Lupwen ewe Samol mi Lapalap a küna ar föför, a song o pöütala nöün mwän me fefin.
DEU 32:20 Iwe, a apasa, “Üpwe amona mesei seniir o pii met sopolar. Pun ir eu täppin aramas mi ngau, aramas resap allükülük.
DEU 32:21 Ra kupeti lelukei ren eman kot sap i kot, ra pwal asongaei ren ar uluulun anümwäl. Iei mine üpwe kupeti leluker ren chokewe sap ir eu mwü, üpwe asongeer ren eu mwü mi umwes.
DEU 32:22 Pun eu ekkei a ngetenget ren ai song, epwe küri epin lenien sotup, epwe kenala fanüfan me mine a mär won, epwe pwal keni longolongun ekewe chuk.
DEU 32:23 Iwe, üpwe ionätä feiengau wor, üpwe pwal eitala ai kewe föün esefich wor.
DEU 32:24 Repwe mäla ren echik, repwe rosola ren pwichikar watte me mätter mi afeiengau. Üpwe tinala rer manmwacho me serepenit mi poison pwe repwe küür.
DEU 32:25 Iwe, aramas repwe mäla ren maun lon alen ekewe telinimw, nge lon ekewe imw epwe fis niuokus watte. Alüal me föpwül repwe rosola, pwal mönükol mi chüen oup me chinlap.
DEU 32:26 Pwüngün ai ekiek pwe üpwe aroserela, pwe esap wor eman epwe chüen chechemeniir.
DEU 32:27 Nge üa oput än chon oputeer tunosikesik, pun repwe wewengau ren o apasa, ‘Püsin kich sa awinnakich, ei esap förien ewe Samol mi Lapalap.’
DEU 32:28 Iwe, chon Israel eu mwü esap wor chon öüreer, esap wor ar mirit.
DEU 32:29 Are epwe wor ar tipachem, repwe wewe ren o ekieki usun sopolar.
DEU 32:30 Pwota eman mwän epwe tongeni tapweri engeröü, pwota ruoman repwe tongeni asüela engol ngeröü? Ifa usun, esap fis ei pokiten ar Kot a amömörela, pokiten ewe Samol mi Lapalap a asechirela?
DEU 32:31 Pun ekewe chon oputeer ra püsin silei pwe ar kewe kot resap usun än chon Israel Kot.
DEU 32:32 Iwe, ar irän wain a feito seni ekewe irän wain lon Sotom, pwal seni ekewe tanipi lon Komora. Ar kewe föün irän wain ra poison, umwur ra maras.
DEU 32:33 Ar wain a usun poisonun serepenit me natanaten sokun serepenit mi fokun afeiengau.
DEU 32:34 Ifa usun, ewe Samol mi Lapalap esap iseis ei lon an imwen iseis, esap lokeelong lon an lenien iseis?
DEU 32:35 Iwe, ewe Samol mi Lapalap epwe ngeniir chappen ar föför me liwiningauer lon ewe fansoun, lupwen pecher epwe mit. Ränin ar feiengau a arap, ar kapwüng epwe warakai.
DEU 32:36 Pun ewe Samol mi Lapalap epwe apwüngü nöün aramas o tongeäsini nöün kewe chon angang, lupwen a küna pwe esap chüen wor ar pöchökül, esap pwal chüen wor eman lusun, ese lifilifil ika ir amanau ika chon ngas.
DEU 32:37 Mürin, ewe Samol mi Lapalap epwe aisiniir, ‘Ia ra nom ie ämi kewe kot, ewe achau oua op fan?
DEU 32:38 Oua aochocheer kirisin ämi kewe asor o aünü ngeniir wainin ämi asoren ün. Repwe feito o alisikemi, repwe pwal tümwünükemi.
DEU 32:39 Iei oupwe mefi pwe fokun ngang chök ewe Kot, esap wor eman kot ünüki. Ngang üa niela, üa pwal amanaua, üa akinasa, üa pwal amoela. Esap wor eman a tongeni ettiwu me lepei.
DEU 32:40 Pun üa aitietä pei läng o pwon fän akapel: Mwo manauei mi nom rei tori feilfeilachök,
DEU 32:41 lupwen üa seimi nei ketilas mi mweriweriw pwe üpwe eäni kapwüng, ngang üpwe ngeni chon pälüeniei chappen ar föför o apwüngü chon oputaei.
DEU 32:42 Woki kewe föün esefich repwe ün cha, nei ketilas epwe ochoch fituk, chan chokewe mi ninnila me chan chon oola, pwal möküren samolun chon oputaei.’
DEU 32:43 Ämi chon ekewe mwü, oupwe fiti nöün ewe Samol mi Lapalap kewe aramas le meseik, pun epwe apwüngü chokewe meinisin mi niela nöün chon angang o ngeni chon ü ngeni chappen ar föför, epwe pwal limeti fanüen nöün aramas seni tipis.”
DEU 32:44 Iwe, Moses me Josua nöün Nun we mwän ra feito o apasa kapasen ei köl ngeni ekewe aramas meinisin.
DEU 32:45 Nge lupwen Moses a wes me apasa ekei kapas meinisin ngeni chon Israel meinisin,
DEU 32:46 a pwal üreniir, “Oupwe iseis lon lelukemi ekei kapas meinisin üa pwäri ngenikemi ikenai, pwe oupwe tongeni eäniir allük ngeni nöümi, pwe pwal ir repwe tümwünüöchü le apwönüetä kapasen ei allük meinisin.
DEU 32:47 Pun ei allük esap fos pön ngenikemi, ngei fen manauemi. Oupwe aleasochisi pwe oupwe manauatam lon ewe fanü oupwe le pwerela lon pekilan ewe chanpupu Jortan, pwe oupwe fanüeni.”
DEU 32:48 Iwe, ewe Samol mi Lapalap a kapas ngeni Moses lon ewe chök ränin,
DEU 32:49 “Kopwe feitä won ei chukun Aparim itan Nepo mi nom lon ewe fanü Moap sasape ngeni Jeriko. Kopwe neneloi ewe fanü Kanaan üpwe ngeni ekewe aramasen Israel pwe repwe fanüeni.
DEU 32:50 Iwe, ewe chuk kopwe feitä won, kopwe mäla me ie o chufengen me om kewe lewo, usun Aaron pwiüm we a mäla me won ewe chuk Hor o chufengen me an kewe lewo.
DEU 32:51 Pun ämi ruoman ousap allükülük woi me lein ekewe aramasen Israel me arun ewe kolukun Meripa arap ngeni Kates me lon ewe fanüapön Sin, ousap pwal pwärätä pwe üa pin me lein ekewe aramasen Israel.
DEU 32:52 Iwe, kopwe nenengeni chök ewe fanü me toau, nge kosap tolong lon ewe fanü üpwe ngeni ekewe aramasen Israel.”
DEU 33:1 Iei ewe kapasen feiöch Moses ewe aramasen Kot a afeiöchü ngeni ekewe aramasen Israel mwen an mäla.
DEU 33:2 Iwe, a apasa, “Ewe Samol mi Lapalap a feito seni ewe chuk Sinai, a saramoto woch seni ewe chuk Seir, a tineto seni ewe chuk Paran, a feito seni ekewe engol ngeröün chon pin, ekkei mi ngetenget a nom lepelifichin.
DEU 33:3 Ellet, a tongei nöün aramas. Nöün chon pin ra nom lepöün. Iwe, ra chapetiu arun pechen o angei an öüröür,
DEU 33:4 ewe allük Moses a ngenikich pwe epwe än mwirimwirin Jakop.
DEU 33:5 Ewe Samol mi Lapalap a kingen Jesurun, lupwen ekewe ainangen Israel me ar kewe souemwen meinisin ra chufengen.”
DEU 33:6 Iwe, Moses a apasa usun ewe ainangen Rupen, “Chon ewe ainangen Rupen repwe manau, nge resap mäla, nge nöür mwän repwe chokükün.”
DEU 33:7 A apasa usun ewe ainangen Juta, “Ai Samol mi Lapalap, kopwe rongorong än chon Juta siö, kopwe aliwinisefäliir ngeni ekewe lusun ainang. Kopwe maun fän iter, kopwe alisiir le fiu ngeni chon oputeer.”
DEU 33:8 Nge a apasa usun ewe ainangen Lefi, “Kopwe ngeni chon ewe ainangen Lefi noum kewe chon pin om Tumim me om Urim . Ka sotuniir me Masa, ka anini ngeniir me arun ewe kolukun Meripa.
DEU 33:9 Ra kapas usun semer me iner, ‘Üsap sileer.’ Resap aücheani pwiir, resap pwal silei nöür. Nge ra apwönüetä om kewe kapas o tümwünü om pwon.
DEU 33:10 Iwe, repwe aiti ngeni ekewe mwirimwirin Jakop om pwüng, pwal ngeni ekewe chon Israel om allük. Repwe iseis apach mi pwokus fän mesom o eäni asoren kek won om rongen asor.
DEU 33:11 Ai Samol mi Lapalap, kopwe afeiöchü ar tufich o etiwa angangen pöür. Kopwe kupi wilen chon pälüeniir me chon oputeer, pwe resap chüen ütäsefäl.”
DEU 33:12 Iwe, a apasa usun ewe ainangen Peniamin, “Iei chon ewe ainang ewe Samol mi Lapalap a echeniir, ra nom ren fän kinamwe. A tümwünüür fansoun meinisin o imweimw rer lon fanüer mi chukutekison.”
DEU 33:13 Nge a apasa usun ewe ainangen Josef, “Ewe Samol mi Lapalap epwe afeiöchü fanüer ren ewe amurenipwin seni läng, pwal ren ewe koluk mi nom fan.
DEU 33:14 Repwe feiöch ren uän ar irä mi fokun mürina akkar a tineitiir, pwal ren mine a uamong iteiten maram.
DEU 33:15 Repwe feiöch ren ekewe irä mi mürina ra mär won ekewe chukun lom, ren ekewe uän irä mi somola ra mär won ekewe chukutekison mi nom tori feilfeilachök,
DEU 33:16 ren ekewe lifang mi mürina seni pwül me meinisin mine a mär won, pwal ren än Kot we chen, ewe mi nom lon ewe iräfölüföl mi pulopul. Ekewe feiöch repwe feito won chon ewe ainangen Josef, pun i ewe samol me lein pwin kana.
DEU 33:17 Iwe, lingen Josef a usun chök lingen mweinöün ätemwänin kow, nge mächän ra usun chök mächän eman ätemwänin kow mi mwacho. Ren mächän kewe epwe purei ekewe aramas meinisin tori lesopun fanüfan. Iei usun lapalapen ekewe engol ngeröün aramas seni ewe ainangen Efraim, pwal ekewe ngeröün seni ewe ainangen Manasa.”
DEU 33:18 Iwe, a apasa usun ekewe ainangen Sepulon me Isakar, “Chon ewe ainangen Sepulon repwe pwapwa lupwen ar saifetal lematau. Nge chon ewe ainangen Isakar repwe pwapwa lon imwer.
DEU 33:19 Repwe körato chon ekewe mwü ngeni chukur. Ikenan repwe eäni asor mi pwüng. Repwe angei wöür seni leset, pwal ekewe mettoch mi aüchea ra nom fän pi.”
DEU 33:20 Nge a apasa usun ewe ainangen Kat, “Oupwe mwareiti Kot mi awatteela fanüer. Kat a öüröürela usun eman laion pwe epwe nomwuti pau ika mökür.
DEU 33:21 Ra filätä eu fanü mi mürina seni meinisin pwe repwe fanüeni, pun wisen eman chon nemenem a iseis fän iter. Iwe, lupwen mwänirelan ekewe aramas ra mwichefengen, ra apwönüetä än ewe Samol mi Lapalap allük me pwüüng.”
DEU 33:22 Iwe, a apasa usun ewe ainangen Tan, “Ewe ainangen Tan eman apanen laion mi mwetewu seni Pasan.”
DEU 33:23 Nge a apasa usun ewe ainangen Naftali, “Än Kot echeni chon ewe ainangen Naftali a somosomola, a ur ren feiöchün ewe Samol mi Lapalap. Ra lölöni ewe nomun Kalili o fanüeni ewe fanü ör.”
DEU 33:24 Iwe, a apasa usun ewe ainangen Aser, “Chon ewe ainangen Aser repwe kon feiöch mwen ekewe ainangen Israel. Repwe kon aüchea me lein pwiir kana, repwe wöü ren chomong apüra seni föün olif.
DEU 33:25 Iwe, lokkun asamalapen ar kewe telinimw repwe för seni mächä me piras. Lon ükükün ränin manauer ina pwal ükükün ar repwe pöchökül.”
DEU 33:26 Esap wor eman usun än Jesurun we Kot, a sai lemenen läng pwe epwe feito o alisuk, a pwal sai lein ekewe kuchu lon an ling.
DEU 33:27 Ewe Kot mi nom lon fansoun esemüch om lenien op, a iseni fomw pöün mi nom tori feilfeilachök. Iwe, a asüela chon oputom me mwom o ürenuk pwe kopwe aroserela meinisin.
DEU 33:28 Iei mine chon Israel ra nonom fän kinamwe, ekewe mwirimwirin Jakop ra imwüla lon eu fanüen wiich me wain, ia läng a apüngätiu amurenipwin ie.
DEU 33:29 Israel, ka feiöch. Iö a wewe ngonuk? En eu mwichen aramas mi küna manau me ren ewe Samol mi Lapalap. I tittum me om soualilis, pwal i noum ketilas mi ewinnok. Chon oputom repwe feito reöm o pwarorotiu ngonuk, nge en kopwe puriretiu.
DEU 34:1 Iwe, Moses a feitä seni ewe maasiesin Moap tori ewe chuk Nepo won ungen Piska mi sasape ngeni Jeriko. Ikenan ewe Samol mi Lapalap a aküna ngeni unusen ewe fanü seni Kiliat tori Tan,
DEU 34:2 unusen ewe fanü Naftali, ewe fanü Efraim me ewe fanü Manasa, unusen ewe fanü Juta tori ewe matau watte mi nom lotou.
DEU 34:3 A pwal aküna ngeni ewe fanü Nekep me ewe fanü seni ewe lemolun Jeriko, ewe telinimw ia a wor ie chomong irä palm, tori Soar.
DEU 34:4 Mürin, ewe Samol mi Lapalap a üreni Moses, “Iei ewe fanü üa pwon fän akapel ngeni Apraham, Isaak me Jakop pwe üpwe ngeni mwirimwirir. Üa mwüt ngonuk pwe kopwe nenengeni ewe fanü ren mesom, nge kosap tolong lon.”
DEU 34:5 Iei usun Moses nöün ewe Samol mi Lapalap we chon angang a mäla ikenan lon ewe fanü Moap, usun mine ewe Samol mi Lapalap a apasa.
DEU 34:6 Iwe, Kot a peiaseni Moses lon ewe lemol lon ewe fanü Moap sasape ngeni Pet-peor. Nge esap wor eman a silei lenien peiasan tori ikenai.
DEU 34:7 Moses a ierini ipükü rüe, lupwen a mäla. Mesan resap toputop, nge an pöchökül esap kisila.
DEU 34:8 Iwe, ekewe aramasen Israel ra kechüeiti Moses me lon ewe maasiesin Moap lon ükükün ilik rän, tori fansoun ar kechü me letipeta a wes.
DEU 34:9 Iwe, Josua nöün Nun we mwän a ur ren tipachem, pun Moses a iseis pöün won. Iei mine ekewe aramasen Israel ra aleasochisi Josua o föri usun mine Moses a allük ngeniir fän alon ewe Samol mi Lapalap.
DEU 34:10 Seni ewe fansoun esap wor eman soufos lon Israel usun Moses, ätewe ewe Samol mi Lapalap a fos newenewen ngeni.
DEU 34:11 Esap wor eman usun Moses a föri asisil me manaman ewe Samol mi Lapalap a akünöü ngeni, pwe epwe föri me lon ewe fanü Isip ngeni Farao me nöün kewe nöüwis meinisin, pwal ngeni unusen fanüan.
DEU 34:12 Esap wor eman soufos a föri manaman mi pöchökül me föför mi lapalap o eniwokus usun Moses a föri me fän mesen ekewe chon Israel meinisin.
JOS 1:1 Iwe, mürin än Moses nöün ewe Samol mi Lapalap chon angang mäla, ewe Samol mi Lapalap a üreni Josua nöün Nun we mwän, ätewe mi angang ngeni Moses,
JOS 1:2 “Nei chon angang Moses a mäla. Iei mine kopwe ütä iei o feila pekilan ei chanpupu Jortan, ämi me ekei aramas meinisin, pwe oupwe feila lon ewe fanü üpwe ngeni ekewe aramasen Israel.
JOS 1:3 Ekewe leni meinisin ia oupwe ipwelong ie üa ngenikemi, usun üa fen pwon ngeni Moses.
JOS 1:4 Kiän fanüemi epwe seni ewe fanüapö mi nom ör tori ewe chuk Lepanon mi nom efeng, seni ewe chanpupu watte itan Oifrat mi nom ötiu, unusen ewe fanüen chon Hit tori ewe matau watte mi nom lotou.
JOS 1:5 Esap wor eman epwe tongeni ü ngonuk lon ränin manauom meinisin. Usun üa eti Moses, iei usun üpwe pwal etuk. Üsap tümwününgau ngonuk, üsap pwal likituk.
JOS 1:6 Kopwe apöchökülok o tipepwora. Pun en kopwe afanüa ekei aramas ngeni ewe fanü üa pwon fän akapel ngeni ar kewe lewo pwe üpwe ngeniir.
JOS 1:7 Kopwe chök apöchökülok o tipepwora, kopwe pwal tümwünüöchü om kopwe apwönüetä ekewe allük meinisin Moses nei we chon angang a allük ngonuk. Kosap fokun aleasolap ngeniir, pwe kopwe fefeitä lon meinisin mine kopwe föri.
JOS 1:8 Kosap ükütiu le apworausa masouen ei puken allük, kopwe ekieki usun lerän me lepwin, pwe kopwe tümwünüöchü om kopwe apwönüetä meinisin mine a mak lon. Mürin kopwe feiöch o fefeitä lon meinisin mine kopwe föri.
JOS 1:9 Ifa usun, üsap allük ngonuk pwe kopwe apöchökülok o tipepwora? Kosap niuokus, kosap pwal rükö, pun ngang ewe Samol mi Lapalap om Kot üpwe etuk ekis meinisin ia kopwe feila ie.”
JOS 1:10 Mürin Josua a allük ngeni ekewe meilapen ekewe aramas,
JOS 1:11 pwe repwe pwerefetal lemenen ewe leni ia ekewe aramas ra nonom ie, o allük ngeniir, “Oupwe amolätä amötümi. Pun mürin ülüngat rän oupwe pwerela pekilan ewe chanpupu Jortan o pwerelong lon ewe fanü ewe Samol mi Lapalap a ngenikemi pwe oupwe fanüeni.”
JOS 1:12 Nge Josua a üreni chon ekewe ainangen Rupen me Kat pwal esopun ewe ainangen Manasa,
JOS 1:13 “Oupwe chechemeni ekewe kapas Moses nöün ewe Samol mi Lapalap we chon angang a ürenikemi, pwe ewe Samol mi Lapalap ämi we Kot epwe amolätä eu lenien asösö fän itemi o ngenikemi ei fanü.
JOS 1:14 Pwülüemi, nöümi semirit me nöümi pwiin man repwe chök nonom lon ei fanü Moses a ngenikemi ötiuen ewe chanpupu Jortan. Nge ekewe sounfiu meinisin me leimi repwe akomwola mwen pwimi fän pisekin maun o alisiir,
JOS 1:15 tori ewe Samol mi Lapalap epwe asösöü pwimi usun chök ämi. Iwe, repwe fanüeni ewe fanü ewe Samol mi Lapalap ämi we Kot a ngeniir. Mürin oupwe liwiniti ewe fanü pwe oupwe fanüeni, ewe fanü Moses nöün ewe Samol mi Lapalap we chon angang a fen ngenikemi me ötiuen ewe chanpupu Jortan.”
JOS 1:16 Iwe, ra üreni Josua, “Meinisin mine ka allük ngenikem aipwe föri, nge ia ka tinikeemila ie aipwe feila.
JOS 1:17 Äm aipwe aleasochisiik usun chök äm aia aleasochisi Moses lon mettoch meinisin. Eu chök, amwo ewe Samol mi Lapalap epwe etuk usun an eti Moses.
JOS 1:18 Nge iö a ü ngeni om allük o aleasolap ngeni alom, ese lifilifil met ka allük ngeni, ätewe epwe ninnila. Kopwe chök apöchökülok o tipepwora.”
JOS 2:1 Iwe, Josua nöün Nun we mwän a tinala seni Sitim ruoman mwän lemonomon, pwe repwe operi ewe fanü. Iwe, a üreniir, “Oupwe feila o ouwasacha ewe fanü, akaeuin ewe telinimw Jeriko.” Iwe, ra feila, ra tolong lon imwen eman fin lisowu itan Rahap o nonom ikenan.
JOS 2:2 Iwe, ewe pworaus a tori ewe kingen Jeriko pwe ekoch re Israel ra feito lon ei pwinin, pwe repwe sachei ewe fanü.
JOS 2:3 Mürin, ewe kingen Jeriko a titi Rahap o üreni, “Kopwe emwenato ekewe mwän mi feito reöm lon imwom. Pun ra feito pwe repwe sachei unusen ewe fanü.”
JOS 2:4 Nge ewe fefin a angei ekewe ruoman mwän o aopeer. Iwe, a apasa, “Mi pwüng pwe ekewe mwän ra feito rei, nge ngang üsap silei ia ra feito me ie.
JOS 2:5 Me mwen än ewe asamalap epwe kapüng lepwin, ekewe mwän ra towu. Üsap silei ia ra feila ie. Oupwe müttir tapweriir, pun oua chüen tongeni liapeniir.”
JOS 2:6 Nge ewe fefin a fen emwenätä ekewe mwän won ewe imw o aopeer fän fetilipwas seni ewe irä itan fläks, neminewe a atettelöchü me mwan won ewe imw.
JOS 2:7 Iei mine nöün ewe king kewe chon künö ra tapwerirela won ewe al ngeni ewe chanpupu Jortan tori ekewe aropetepeetin ewe chanpupu. Nge lon ewe chök otun ekewe chon tap ra towu, ewe asamalap a kapüng.
JOS 2:8 Iwe, me mwen än ekewe mwän konola, ewe fefin a feitä rer won ewe imw
JOS 2:9 o üreniir, “Üa silei pwe ewe Samol mi Lapalap a ngenikemi ei fanü. Iwe, äm aia niuokusitikemi, nge chon ewe fanü meinisin ra rükö pokitemi.
JOS 2:10 Pun aia rong usun ewe Samol mi Lapalap a apwasatä lölön ewe Setipar me mwemi, lupwen oua towu seni Isip. Aia pwal rong usun ämi niela ekewe ruoman kingen chon Amor iter Sihon me Ok ra nom ötiuen ewe chanpupu Jortan.
JOS 2:11 Iwe, lupwen äm aia rongorong ei pworaus, lelukem a kisikisila, nge esap chüen wor tipepwora ren eman aramas pokitemi. Pun ewe Samol mi Lapalap ämi Kot, i ewe Kot mi nom won läng pwal won fanüfan.
JOS 2:12 Iei oupwe pwon ngeniei fän akapel fän iten ewe Samol mi Lapalap, pwe oupwe kirikiröch ngeni chon leimwen semei usun üa kirikiröch ngenikemi. Iwe, oupwe ngeniei eu asisil mi let
JOS 2:13 o pwon ngeniei pwe oupwe amanaua semei me inei, mongeei me pwii me aramaser meinisin. Iwe, oupwe angasakem seni mäla.”
JOS 2:14 Nge ekewe mwän ra üreni, “Manauem akasiwilin manauemi. Are ousap akafat äm ei angang, äm aipwe kirikiröch o allükülük ngenikemi, lupwen ewe Samol mi Lapalap epwe ngenikem ei fanü.”
JOS 2:15 Mürin, ewe fefin a aürüretiu won efoch säl me lon asammwachon imwan, pun imwan a kaütä won tittin ewe telinimw.
JOS 2:16 Iwe, a üreni ekewe mwän, “Oupwe feila won ekewe chukuchukutä pwe ekewe chon tap resap churikemi. Oupwe op ikenan lon ükükün ülüngat rän, tori ekewe chon tap repwe liwin. Mürin oupwap feila.”
JOS 2:17 Nge ekewe mwän ra üreni, “Äm aipwe apwönüetä ewe pwon en ka üra sipwe pwonfengen won fän akapel. Nge en kopwe föri iei usun:
JOS 2:18 Lupwen aipwe tolong lon ewe fanü, kopwe rietä ei säl mi par won ewe asammwacho ka aürükeemitiu me lon. Kopwe pwal emwichato lon imwom semom me inom, mongeom me chon leimwen semom meinisin.
JOS 2:19 Are eman epwe towu seni imwom o nom won al, chan epwe ukun chök, nge äm aisap tipis. Nge are eman a angeetä won eman lein chokewe mi nom lon imwom, chan epwe ukem chök.
JOS 2:20 Nge are ka akafat äm ei angang, äm aisap tipis ngeni om we pwon ka üra sipwe pwonfengen won fän akapel.”
JOS 2:21 Iwe, ewe fefin a üra, “Epwe fis meinisin usun mine oua apasa.” Iwe, a tinirela. Nge mürin ar feila, a rietä ewe säl mi par won ewe asammwacho.
JOS 2:22 Iwe, ekewe mwän ra feitä won ekewe chukuchukutä o nonom ikenan lon ükükün ülüngat rän, tori ekewe chon tap ra liwinsefäl. Iwe, ekewe chon tap ra kütteer won unusen ewe al, nge resap küneer.
JOS 2:23 Mürin ekewe ruoman mwän ra feitiu seni ekewe chukuchukutä, ra pwerela pekilan ewe chanpupu o feila ren Josua nöün Nun we mwän. Iwe, ra apworausa ngeni meinisin usun mine a fis ngeniir.
JOS 2:24 Iwe, ra üreni Josua, “Ellet, ewe Samol mi Lapalap a ngenikich unusen ewe fanü. Pwal chon ewe fanü meinisin ra fokun rükö pokitach.”
JOS 3:1 Iwe, lesosorusich Josua me ekewe aramasen Israel meinisin ra sai seni Sitim. Ra tori ewe chanpupu Jortan o aüetä imwer ikenan me mwen ar repwe feila pekilan.
JOS 3:2 Mürin ülüngat rän, ekewe meilap ra fetalfeil lemenen ewe ia ekewe aramas ra nonom ie.
JOS 3:3 Iwe, ra üreni ekewe aramas, “Lupwen oua küna pwe ekewe souasor ra mwärei än ewe Samol mi Lapalap we pworofel, ina otun ämi oupwe pwal sai seni leniemi o tapwela mürir,
JOS 3:4 pwe oupwe silei ewe al oupwe pwerela won. Pun ämi ousap mwo pwerela won ei al me mwan. Nge epwe wor wäwän lefilemi me ewe pworofel ina epwe ükükün esop mail, pwe ousap kan ngeni.”
JOS 3:5 Iwe, Josua a üreni ekewe aramas, “Oupwe apinikemi, pun lesor ewe Samol mi Lapalap epwe föri manaman lefilemi.”
JOS 3:6 Nge Josua a üreni ekewe souasor, “Oupwe eki ewe pworofel o akomwola mwen ekewe aramas.” Iwe, ra eki ewe pworofel o akomwola mwen ekewe aramas.
JOS 3:7 Iwe, ewe Samol mi Lapalap a üreni Josua, “Ikenai üpwe popuetä le atekioketä me fän mesen chon Israel meinisin, pwe repwe silei pwe ngang üa etuk usun üa eti Moses.
JOS 3:8 Iwe, kopwe allük ngeni ekewe souasor mi mwärei ewe pworofel, pwe lupwen repwe tori ünükün ewe chanpupu Jortan, repwe tolong o üla lon.”
JOS 3:9 Nge Josua a üreni ekewe aramasen Israel, “Oupwe kanoto o rongorong än ewe Samol mi Lapalap ämi we Kot kewe kapas.”
JOS 3:10 Josua a pwal üra, “Ren ei oupwe silei pwe ewe Kot mi Manau a nom lefilemi, epwe wesewesen asüela me mwemi ekewe chon Kanaan, chon Hit, chon Hiw, chon Peris, chon Kirkas, chon Amor me chon Jepus.
JOS 3:11 Nengeni, ewe pworofel än ewe Samol mi nemeni unusen fanüfan epwe akomwola mwemi o tolong lon ewe chanpupu Jortan.
JOS 3:12 Iei oupwe filätä engol me ruoman mwän seni ekewe ainangen Israel, akaeman seni eu me eu ainang.
JOS 3:13 Nge lupwen pechen ekewe souasor mi mwärei ewe pworofel än ewe Samol mi Lapalap, ewe mi nemeni unusen fanüfan, repwe ipwelong lon ewe chanpupu Jortan, pupun ewe koluk epwe kaüla. Nge ewe koluk mi putiu me asan epwe aioifengen.”
JOS 3:14 Iwe, ekewe aramas ra sai seni ewe ia ra nonom ie, pwe repwe pwerela pekilan ewe chanpupu, nge ekewe souasor mi mwärei ewe pworofel ra akom mwer.
JOS 3:15 Iwe, ewe chanpupu a urowu ekis meinisin tori ünükün, pun ei otun fansoun räs. Nge lupwen ekewe souasor mi mwärei ewe pworofel ra tori ewe chanpupu Jortan o ipwelong lepetepeetan,
JOS 3:16 ewe koluk mi putiu me asan a popuetä aioifengen me toau tori Atam eu telinimw mi nom ünükün Saretan. Nge ewe koluk mi putiu ngeni ewe Setin Mäla esap chüen pu. Iwe, ekewe aramas ra pwerela pekila akawenewenen Jeriko.
JOS 3:17 Nge lupwen chon Israel meinisin ra pwerela pekila won pwül mi pwasapwas, ekewe souasor mi mwärei än ewe Samol mi Lapalap we pworofel ra ütä won pwasapwas lukalapen ewe chanpupu Jortan, tori chon Israel meinisin ra toola pekilan ewe chanpupu.
JOS 4:1 Iwe, lupwen chon Israel meinisin ra toola pekilan ewe chanpupu Jortan, ewe Samol mi Lapalap a üreni Josua,
JOS 4:2 “Kopwe filätä engol me ruoman mwän me lein ekewe aramas, akaeman seni eu me eu ainang.
JOS 4:3 Kopwe allük ngeniir pwe repwe angei engol me ruoföü fau seni lukalapen ewe chanpupu Jortan, seni chök ewe leni ia ekewe souasor ra ütä ie. Repwe uweerela pekila o iseniretiu lon ewe leni ia oupwe asösö ie lepwinei.”
JOS 4:4 Mürin Josua a körato engol me ruoman mwän seni lein ekewe aramasen Israel, ätekewe i a filiretä, akaeman seni eu me eu ainang.
JOS 4:5 Iwe, Josua a üreniir, “Oupwe akomwola mwen ewe pworofel än ewe Samol mi Lapalap ämi we Kot o tolong lukalapen ewe chanpupu Jortan. Iwe, eman me eman leimi epwe angei eföü fau o mwärei won afaran fän iten eu me eu ekewe ainangen Israel.
JOS 4:6 Ekei fau repwe achema ngenikemi mine Kot a föri. Lupwen nöümi repwe aisinikemi lon kan fansoun mwach, ‘Met wewen ekei fau ngenikemi?’,
JOS 4:7 mürin oupwe üreniir, ‘Lölön ewe chanpupu Jortan a kaüla, lupwen aia pwerela lon ewe chanpupu fän än ewe Samol mi Lapalap we pworofel.’ Iei mine ekei fau repwe föün achem ngeni ekewe aramasen Israel tori feilfeilachök.”
JOS 4:8 Iwe, ekewe re Israel ra föri usun mine Josua a allük ngeniir. Ra angei engol me ruoföü fau seni lukalapen ewe chanpupu Jortan, eföü fän iten eu me eu ekewe ainangen Israel, usun ewe Samol mi Lapalap a üreni Josua. Iwe, ra uwala ekewe fau lon ewe leni ia ra asösö ie, o iseniretiu ikenan.
JOS 4:9 Iwe, Josua a pwal senätä engol me ruoföü fau lukalapen ewe chanpupu Jortan lon ewe leni ia ekewe souasor mi mwärei ewe pworofel ra ütä ie. Iwe, ekewe fau ra nom ikenan tori ikenai.
JOS 4:10 Nge ekewe souasor mi mwärei ewe pworofel ra ü lukalapen ewe chanpupu Jortan, tori ekewe aramas ra wes le föri mine ewe Samol mi Lapalap a allük ngeni Josua. Ekei kapas meinisin Moses a fen allük ngeni Josua. Iwe, ekewe aramas ra pwerela fän pacheu.
JOS 4:11 Iwe, lupwen ekewe aramas meinisin ra toola pekilan ewe chanpupu Jortan, än ewe Samol mi Lapalap we pworofel me ekewe souasor ra pwal pwerela pekila fän mesen ekewe aramas.
JOS 4:12 Iwe, chon ekewe ainangen Rupen me Kat pwal esopun ewe ainangen Manasa ra pwerela pekila mwen ekewe aramasen Israel fän ar pisekin maun, usun Moses a amwirimwir ngeniir.
JOS 4:13 Iwe, ina epwe ükükün faik ngeröü mi molotä fän ar pisekin maun, ra pwerela pekila tori ewe maasiesin Jeriko fän mesen ewe Samol mi Lapalap, pwe repwe maun.
JOS 4:14 Lon ewe rän, ewe Samol mi Lapalap a atekiatä Josua me fän mesen chon Israel meinisin. Iwe, ra meniniti Josua lon ränin manauan meinisin, usun ar meniniti Moses.
JOS 4:15 Iwe, ewe Samol mi Lapalap a üreni Josua,
JOS 4:16 “Kopwe allük ngeni ekewe souasor mi mwärei ewe pworofel, pwe repwe towu me lon ewe chanpupu Jortan.”
JOS 4:17 Iei mine Josua a allük ngeni ekewe souasor pwe repwe towu.
JOS 4:18 Iwe, lupwen ekewe souasor mi mwärei än ewe Samol mi Lapalap we pworofel ra towu seni lukalapen ewe chanpupu Jortan o ipwetä won pwül mi pwasapwas, lölön ewe chanpupu a liwiniti lenian o urowu ünükün ekis meinisin usun mesemwan.
JOS 4:19 Iwe, ekewe aramas ra towu me lon ewe chanpupu Jortan lon aengolun ränin ewe aeuin maram. Ra aüetä imwer lon Kilkal ötiuen kiännin Jeriko.
JOS 4:20 Nge Josua a senätä me lon Kilkal ekewe engol me ruoföü fau ra angei me lon ewe chanpupu Jortan.
JOS 4:21 Iwe, a üreni ekewe aramasen Israel, “Are nöümi repwe aisinikemi lon kan fansoun mwach, ‘Met wewen ekei fau?’
JOS 4:22 mürin oupwe üreniir, ‘Chon Israel ra pwereto lon ewe chanpupu won pwül mi pwasapwas.’
JOS 4:23 Pun ewe Samol mi Lapalap ämi we Kot a apwasatä ewe chanpupu Jortan fän itemi, tori oua pwerela pekilan, usun mine a fen föri ngeni ewe Setipar, lupwen a apwasatä fän itach, tori sia pwerela pekilan.
JOS 4:24 Iei usun aramasen fanüfan meinisin repwe silei pwe ewe Samol mi Lapalap a fokun manaman. Nge ämi oupwe meniniti ewe Samol mi Lapalap ämi we Kot tori feilfeilachök.”
JOS 5:1 Iwe, lupwen ekewe kingen chon Amor meinisin mi nom lotoun ewe chanpupu Jortan me ekewe kingen chon Kanaan meinisin mi nom aroset ra rongorong, pwe ewe Samol mi Lapalap a apwasatä lölön ewe chanpupu Jortan fän iten ekewe aramasen Israel tori ra pwerela pekila, a kisikisila leluker o ra rükö pokiten ekewe aramasen Israel.
JOS 5:2 Lon ena fansoun ewe Samol mi Lapalap a üreni Josua, “Kopwe föri sar seni fau mi pöchökül o sirkomsaisi ekewe re Israel resamwo sirkomsais.”
JOS 5:3 Iei mine Josua a föri sar seni fau mi pöchökül o sirkomsaisi ekewe re Israel me lon Kipeat-haaralot.
JOS 5:4 Mi wor popun pwe Josua a sirkomsaisiir. Pun lon ekewe faik ier, lupwen ekewe aramasen Israel ra sai lon ewe fanüapö, nöür kewe ät resamwo sirkomsais.
JOS 5:5 Nge ekewe mwän meinisin me lein ekewe aramas mi towu seni Isip ra fen sirkomsais. Iwe, sopolan ekewe faik ier ekewe mwän meinisin mi tori ierin sounfiu lupwen ar towu seni Isip ra rosola, pokiten resap aleasochisi alon ewe Samol mi Lapalap.
JOS 5:6 Pun a pwon fän akapel ngeniir, pwe esap mwüt ngeniir pwe repwe küna ewe fanü mi pwülüöch o fanüeräs a pwon ngeni ar kewe lewo, pwe epwe ngeniir.
JOS 5:7 Iwe, nöür kewe, Kot a amäriretä me mürir, Josua a sirkomsaisiir. Pun ir resap sirkomsais lupwen ar sai.
JOS 5:8 Iwe, wesin ewe angangen sirkomsais won ekewe aramas meinisin, ra nonom lon ewe leni ia ra nom ie, tori ra pöchökülsefäl.
JOS 5:9 Nge ewe Samol mi Lapalap a üreni Josua, “Ikenai üa angei senikemi ämi itengau me ren chon Isip.” Iei mine ewe leni a iteni Kilkal tori ikenai.
JOS 5:10 Iwe, lupwen ekewe aramasen Israel ra nom lon Kilkal, ra föri ewe Pasofer lekuniolun ewe engol me rüanün ränin ewe maram lon ewe maasiesin Jeriko.
JOS 5:11 Nge sorotän mürin ewe Pasofer, lon ewe chök ränin, ra mongö seni mine a mär lon ewe fanü. Ra mongö pilawa esap wor iis lon me föün wiich mi kapwich.
JOS 5:12 Iwe, seni lesosorun ewe rän ra mongö seni mine a mär lon ewe fanü, esap chüen wor enen ekewe aramasen Israel mana. Nge ra mongö seni uän irän ewe fanü Kanaan lon ewe ier.
JOS 5:13 Lupwen Josua a nom arun Jeriko, a küna eman mwän mi ütä me mwan, a amwöchü efoch ketilas. Iwe, Josua a feila ren o aisini, “Ifa usun, en peliem ika pelien chon oputakem?”
JOS 5:14 Nge ewe mwän a pälüeni, “Apwi, üa feito, pun ngang ewe chon nemenemen än ewe Samol mi Lapalap mwichen sounfiu.” Iwe, Josua a chapetiu lepwül, a fel ngeni o aisini, “Ai samol, met ka mochen akünöü ngeniei ngang noum chon angang?”
JOS 5:15 Iwe, ewe chon nemenemen än ewe Samol mi Lapalap mwichen sounfiu a üreni Josua, “Kopwe pwilitawu ipwom sus, pun ei leni ka ütä won a pin.” Iwe, Josua a föri iei usun.
JOS 6:1 Iwe, asamalapen ewe telinimw Jeriko ra kapüngüla pwe ekewe aramasen Israel resap tongeni tolong lon. Esap wor eman a tongeni towu ika tolong.
JOS 6:2 Nge ewe Samol mi Lapalap a üreni Josua, “Nengeni, üa atolonga Jeriko fän nemeniom fiti an king me nöün kewe sounfiu mi pöchökül o pwora.
JOS 6:3 Oupwe karis lükün pwelin ewe telinimw, pwe ekewe sounfiu meinisin repwe pweli ewe telinimw fän eu. Oupwe föri iei usun lon ükükün wonu rän.
JOS 6:4 Füman souasor repwe uwei fisu rappwa seni mächän ätemwänin sip me mwen ewe pworofel. Nge lon afisuen rän oupwe karis lükün pwelin ewe telinimw fän fisu, nge ekewe souasor repwe ettiki ekewe rappwa.
JOS 6:5 Iwe, lon ewe otun, lupwen oupwe rongorong tikin ekewe rappwa pwe ra tikitam, ekewe aramas meinisin repwe leüömong le arükak. Iwe, tittin ewe telinimw epwe turutiu, nge ekewe aramas repwe töfochofocholong lon seni en me awenewenen lenian.
JOS 6:6 Iwe, Josua nöün Nun we mwän a körato ekewe souasor o üreniir, “Oupwe eki ewe pworofel, nge füman me leimi repwe uwei fisu rappwa seni mächän ätemwänin sip me mwen än ewe Samol mi Lapalap we pworofel.”
JOS 6:7 Mürin, Josua a üreni ekewe aramas, “Oupwe feila o karis lükün pwelin ewe telinimw, nge ekewe mwän mi eäni pisekin maun repwe akomwola mwen än ewe Samol mi Lapalap we pworofel.”
JOS 6:8 Nge wesin än Josua kapas ngeni ekewe aramas, ekewe füman souasor mi uwei ekewe fisu rappwa me fän mesen ewe Samol mi Lapalap ra popuetä le fetal o ettiki ekewe rappwa, nge chokewe mi mwärei än ewe Samol mi Lapalap we pworofel ra tapwela mürir.
JOS 6:9 Iwe, ekewe mwän mi eäni pisekin maun ra akom mwen ekewe souasor mi ettiki ekewe rappwa. Nge eu mwichen sounfiu a pwal tapweto mürin ewe pworofel, lupwen ekewe rappwa ra tikifochofoch.
JOS 6:10 Nge Josua a allük ngeni ekewe aramas, “Ousap arükak ika lalal, esap pwal wor eu kapas epwe towu seni awemi tori ewe rän üpwe ürenikemi pwe oupwe arükak. Mürin oupwap arükak.”
JOS 6:11 Iwe, Josua a allük pwe repwe apwelifeili fän eu än ewe Samol mi Lapalap we pworofel lükün ewe telinimw. Mürin ra liwiniti ewe leni ia ra nonom ie o pwinipwin ikenan.
JOS 6:12 Iwe, Josua a pwätä lesosorusich, nge ekewe souasor ra eki än ewe Samol mi Lapalap we pworofel.
JOS 6:13 Ekewe füman souasor mi uwei ekewe fisu rappwa ra akomwola mwen än ewe Samol mi Lapalap we pworofel o atikifochei ekewe rappwa. Iwe, ekewe mwän mi eäni pisekin maun ra akom mwer, nge eu mwichen sounfiu a tapweto mürin än ewe Samol mi Lapalap we pworofel, lupwen ekewe rappwa ra tikifochofoch.
JOS 6:14 Iwe, lon aruuen rän ra pwal karis lükün pwelin ewe telinimw fän eu. Mürin ra liwiniti ewe leni ia ra nonom ie. Ra föri iei usun lon ükükün wonu rän.
JOS 6:15 Iwe, lon afisuen rän ra pwätä lesosorusich o karis lükün pwelin ewe telinimw fän fisu usun chök me mwan. Nge lon ewe chök rän ra karis lükün pwelin ewe telinimw fän fisu.
JOS 6:16 Nge lupwen ekewe souasor ra ettiki ekewe rappwa lon afisuen fansoun ar karis, Josua a üreni ekewe aramas, “Oupwe arükak. Pun ewe Samol mi Lapalap a ngenikemi ewe telinimw.
JOS 6:17 Iwe, ewe telinimw me mettoch meinisin mi nom lon repwe pin fän iten ewe Samol mi Lapalap pwe repwe katala. Chilon chök Rahap ewe fin lisowu me meinisin mi nom ren lon imwan repwe manau, pun a aopa ekewe chon künö sia tiniir.
JOS 6:18 Nge ämi oupwe afälikemi ren ekewe mettoch mi pin repwe kata. Pun lupwen oupwe apiniir pwe repwe kata, nge mürin oua angei och seniir, oupwe atoto tatakis me feiengau won lenien chon Israel.
JOS 6:19 Nge silifer me kolt meinisin me ekewe sepi mi för seni piras me mächä ra pin fän iten ewe Samol mi Lapalap. Repwe tolong lon än ewe Samol mi Lapalap lenien iseis.”
JOS 6:20 Iwe, ekewe souasor ra ettiki ekewe rappwa. Lon ewe otun ekewe aramas ra rongorong tikin rappwa, ra leüömong le arükak, nge ewe tit a turutiu. Mürin ekewe aramas ra töfochofocholong lon ewe telinimw seni en me awenewenen lenian o liapeni ewe telinimw.
JOS 6:21 Iwe, ra ataala mettochun lon ewe telinimw meinisin o niela mwän me fefin, semirit me chinlap, ätemwänin kow me sip me aas ren nöür ketilas.
JOS 6:22 Iwe, Josua a üreni ekewe ruoman mwän mi operi ewe fanü, “Oupwe tolong lon imwen ewe fin lisowu o emwenawu me aramasan meinisin, usun oua fen pwon ngeni fän akapel.”
JOS 6:23 Iei mine ekewe alüal mi piin operi ewe fanü ra tolong lon o emwenawu Rahap pwal saman me inan, mongean me aramasan meinisin. Iwe, ra emwenirewu meinisin o anomuur lükün ewe leni ia chon Israel ra nom ie.
JOS 6:24 Mürin ra keni ewe telinimw me meinisin mine a nom lon. Nge silifer me kolt, pwal ekewe sepi mi för seni piras me mächä ra iseis lon ewe lenien iseis lon imwen ewe Samol mi Lapalap.
JOS 6:25 Nge Josua a amanaua Rahap ewe fin lisowu me chon leimwen saman meinisin, pwal aramasan meinisin, pokiten a aopa ekewe chon künö Josua a tinirela pwe repwe operi Jeriko. Iwe, ekewe mwirimwirin Rahap ra nom lon Israel tori ikenai.
JOS 6:26 Lon ei fansoun Josua a eäni ei pwon fän akapel ngeni chon Israel o apasa, “A anümamau me ren ewe Samol mi Lapalap eman mwän mi aüsefälietä ewe telinimw Jeriko. Iö a föri longolongun ewe telinimw, nöün mwänichi epwe mäla. Nge iö a apachätä asamalapan, nöün setiputur epwe mäla.”
JOS 6:27 Iei usun ewe Samol mi Lapalap a eti Josua, iwe, an iteüöch a chöfetal lon unusen ewe fanü.
JOS 7:1 Nge ekewe chon Israel ra atai allükün ekewe mettoch mi pin repwe kata. Pun Akan nöün Karmi we mwän, nge Karmi nöün Sapti, nge Sapti nöün Sera seni ewe ainangen Juta, a angei ekoch ekewe mettoch repwe kata. Iwe, ewe Samol mi Lapalap a fokun song ngeni ekewe aramasen Israel.
JOS 7:2 Iwe, Josua a tinala ekoch mwän seni Jeriko ngeni Ai mi arap ngeni Pet-awen ötiuen Petel. Iwe, a üreniir, “Oupwe feila o operi ewe fanü.” Nge wesin än ekewe mwän operi ewe fanü,
JOS 7:3 ra liwiniti Josua o üreni, “Kosap tinala ekewe aramas meinisin pwe repwe maun ngeni Ai. Kopwe chök mwütätä ükükün ruu ika ülüngat ngeröü mwän repwe feila o maun ngeni. Kosap aweiresi ekewe aramas meinisin le tinirela ikenan, pun chon Ai ra chokükün.”
JOS 7:4 Iei mine ina epwe ükükün ülüngat ngeröü chök mwän seni lein ekewe aramas ra feila. Nge lupwen ra maun ngeni ekewe chon Ai, ra sü rer.
JOS 7:5 Iwe, ekewe chon Ai ra niela ina epwe ükükün ilik me wonoman mwän me leir. Ra pwal tapweriir seni ewe asamalap tori Separim o nirela me lon ewe pwokur. Iwe, leluken chon Israel a kisikisila o rükö.
JOS 7:6 Mürin, Josua me ekewe souakomwen Israel ra kamwei üfer, ra chapetiu lepwül mwen än ewe Samol mi Lapalap we pworofel tori lekuniol. Ra pwal tukotuketä won mökürer pwül moromor pwe asisilen ar letipeta.
JOS 7:7 Iwe, Josua a apasa, “Ai Samol me ai Kot, pwota chök ka fen emwenikeemito pekiton ewe chanpupu Jortan? Ifa usun, kopwe atokeemilong lepöün chon Amor pwe repwe arosakeemila? Amwo sipwe menemen le nonom pekilan ewe chanpupu Jortan.
JOS 7:8 Ai Samol, met ngang üpwe chüen apasa, nge iei chon Israel ra sü me mwen chon oputeer?
JOS 7:9 Pun ekewe chon Kanaan me chon ewe fanü meinisin repwe rong usun. Iwe, repwe pwelikeemila o nikeemila meinisin. Nge met en kopwe föri pwe epwe wor meninum me ren aramas?”
JOS 7:10 Nge ewe Samol mi Lapalap a üreni Josua, “Kopwe ütä. Pwota ka chapetiu lepwül?
JOS 7:11 Chon Israel ra tipis. Ra atai ai we pwon üa allük ngeniir. Ra angei ekoch ekewe mettoch mi pin repwe kata. Ra solä o chofana, ra pwal achuelong ekewe mettoch lon püsin pisekir.
JOS 7:12 Iei mine ekewe aramasen Israel resap tongeni pwora ngeni chon oputeer. Ra sü me mwer, pun ir ra püsin atoto feiengau wor. Üsap chüen etikemi, tori oupwe ataela ekewe mettoch mi pin ngenikemi.
JOS 7:13 Kopwe ütä o apini ekewe aramas. Kopwe üreniir pwe repwe apiniir o amol ngeni lesor. Pun iei aloi, ngang ewe Samol mi Lapalap ewe Koten Israel, ‘Ämi chon Israel, a wor mettoch leimi mi pin ngenikemi. Ousap tongeni pwora ngeni chon oputakemi, tori oupwe ataela ekewe mettoch mi pin ngenikemi.’
JOS 7:14 Iei mine lesosorun lesor eu me eu kewe ainang epwe mwicheto, nge ewe ainang ewe Samol mi Lapalap a asilla, eu me eu eterekesin lon epwe mwicheto. Iwe, ewe eterekes ewe Samol mi Lapalap a asilla, eu me eu familien lon epwe mwicheto, nge ewe famili ewe Samol mi Lapalap a asilla, eman me eman mwänin lon epwe feito.
JOS 7:15 Iwe, ätewe mi siil pwe a anomu ekewe mettoch mi pin ngeni epwe kekila, i me chon an famili pwal an mettoch meinisin, pokiten a atai än ewe Samol mi Lapalap we pwon, pwal pokiten a föri eu föför mi äsäw me lon Israel.”
JOS 7:16 Iwe, Josua a pwätä lesosorusich o amwichato chon Israel lon eu me eu ainang, nge ewe ainangen Juta a siil.
JOS 7:17 Mürin a amwichato eu me eu eterekesin Juta, nge ewe eterekesin Sera a siil. Iwe, a amwichato eu me eu familien ewe eterekesin Sera, nge ewe familien Sapti a siil.
JOS 7:18 Mürin a amwenato eman me eman mwän seni ewe familien Sapti, nge Akan nöün Karmi we mwän a siil. Karmi nöün Sapti, nge Sapti nöün Sera seni ewe ainangen Juta.
JOS 7:19 Mürin Josua a üreni Akan, “Nei, kopwe kapas wenechar fän mesen ewe Samol mi Lapalap ewe Koten Israel o pwärätä meinisin. Iei kopwe üreniei met ka föri, nge kosap aopala och seniei.”
JOS 7:20 Iwe, Akan a üreni Josua, “Ellet üa tipis ngeni ewe Samol mi Lapalap ewe Koten Israel. Iei usun mine ngang üa föri:
JOS 7:21 Lupwen üa küna me lein liapach kewe echö owokot mi ling minen Papilon, pwal limu paun silifer me efoch fochun kolt ükükün choun rüe aunus, üa mocheniaitiir o angeer. Üa aopeer fän pwül lon imwei imw mangaku, nge ewe silifer a nom far.”
JOS 7:22 Iwe, Josua a tinala ekoch chon künö. Ra sä ngeni imwen Akan we o küna ekewe mettoch ra kaop lon, nge ewe silifer a nom far.
JOS 7:23 Iwe, ra angeer seni lon ewe imw mangaku o uweerela ren Josua me ekewe aramasen Israel meinisin. Iwe, ra iseniretiu fän mesen ewe Samol mi Lapalap.
JOS 7:24 Mürin, Josua me chon Israel meinisin ra angei Akan nöün Sera we mwän, ewe silifer, ewe owokot me ewe fochun kolt, pwal nöün mwän me fefin, nöün ätemwänin kow, nöün aas me sip, imwan imw mangaku me meinisin mine a eäni. Iwe, ra uweeretä ren ewe lemolun Akor.
JOS 7:25 Iwe, Josua a üreni, “Pwota ka atoto woch feiengau? Ewe Samol mi Lapalap epwe atoto womw feiengau ikenai.” Iwe, chon Israel meinisin ra monei fau ngeni Akan me aramasan tori ra mäla. Mürin ra keniir.
JOS 7:26 Iwe, ra achukuchukätä wor eu ioien fau mi tekia a nom tori ikenai. Mürin ewe Samol mi Lapalap a ükütiu le song. Iei mine ewe leni a iteni lemolun Akor tori ikenai.
JOS 8:1 Iwe, ewe Samol mi Lapalap a üreni Josua, “Kosap niuokus ika rükö. Kopwe feila o maun ngeni Ai, nge ekewe sounfiu meinisin repwe etuk. Nengeni, üa atolonga fän nemeniom ewe kingen Ai me nöün aramas, an telinimw me fanüan.
JOS 8:2 Iwe, kopwe föri ngeni Ai me an king usun mine ka fen föri ngeni Jeriko me an king. Nge liapemi me ekewe manfetal oupwe püsin angei pwe choon wokumi. Oupwe operi ewe telinimw me pelilotoun.”
JOS 8:3 Iei mine Josua me ekewe sounfiu meinisin ra feitä Ai. Iwe, Josua a filätä ükükün ilik ngeröü sounfiu mi pöchökül me pwora o tinirela lepwin.
JOS 8:4 Nge a allük ngeniir, “Oupwe operi ewe telinimw me lepelilotoun. Ousap toau seni, nge ämi meinisin oupwe chök molotä.
JOS 8:5 Iwe, äm me ekewe aramas meinisin mi nom rei aipwe fetaliti ewe telinimw. Nge lupwen chon ewe telinimw repwe towu pwe repwe fiu ngenikem usun me mwan, äm aipwe sü me mwer.
JOS 8:6 Iwe, repwe towu o cherikem tori aipwe panirela toau seni ewe telinimw. Repwe ekieki pwe aia sü me mwer usun me mwan.
JOS 8:7 Mürin ämi oupwe ütä seni ämi lenien op o tolong lon ewe telinimw, pun ewe Samol mi Lapalap ämi we Kot epwe atolonga lepöümi.
JOS 8:8 Iwe, lupwen oupwe liapeni ewe telinimw, oupwe kenala, pun iei usun ewe Samol mi Lapalap a allük. Oupwe pii pwe oupwe föri mine üa allük ngenikemi.”
JOS 8:9 Mürin, Josua a tinirela. Iwe, ra feila ren ewe lenien op o witiwit pelilotoun Ai lefilen Petel me Ai. Nge Josua a nom ren ekewe aramas lon ewe pwinin.
JOS 8:10 Iwe, Josua a pwätä lesosorusich o körifengeni ekewe sounfiu. Mürin a akomwola mwer, nge ekewe souakomwen Israel ra eti.
JOS 8:11 Iwe, ekewe sounfiu meinisin mi eti ra kan ngeni mwen ewe telinimw o asösö peliefengin Ai, nge eu lemol a nom lefiler me Ai.
JOS 8:12 Iwe, Josua a angei ina epwe ükükün limungeröü mwän o anomuur lon eu lenien op pelilotoun ewe telinimw lefilen Petel me Ai.
JOS 8:13 Iei usun ra alenia ekewe sounfiu: Ewe mwich mi watte a nom peliefengin ewe telinimw, nge ewe mwich mi op a nom pelilotoun. Nge Josua a nom lon ewe lemol lon ewe pwinin.
JOS 8:14 Iwe, lupwen ewe kingen Ai a küna ekewe re Israel, ir me mwänin ewe telinimw meinisin ra müttir towu lesosor o feila ren ewe lemolun Jortan, pwe repwe maun ngeniir. Nge ewe king esap silei pwe mi wor chon op lükisökürün ewe telinimw.
JOS 8:15 Mürin, Josua me ekewe re Israel meinisin ra tipin timär o sü ngeni ewe fanüapö.
JOS 8:16 Iei mine ekewe meilapen ewe telinimw ra körifengeni ekewe aramas meinisin mi nom lon, pwe repwe tapweri ekewe re Israel. Nge lupwen ra tapweri Josua, ra toauala seni ewe telinimw.
JOS 8:17 Esap wor eman mwän mi chüen nom lon Ai ika Petel, pwe meinisin ra tapweri chon Israel. Ra sukala chök asamalapen ewe telinimw o likitala, nge esap wor eman a mamasa.
JOS 8:18 Iwe, ewe Samol mi Lapalap a üreni Josua, “Kopwe aitietä wokum siles ngeni Ai, pun üpwe atolonga ewe telinimw lepoum.” Iwe, Josua a aitietä wokun siles ngeni ewe telinimw.
JOS 8:19 Lon ewe otun ewe mwichen chon op a müttir ütä seni lon lenier, ra sälong lon ewe telinimw o liapeni. Iwe, ra müttir kenala ewe telinimw.
JOS 8:20 Nge lupwen ekewe re Ai ra nenesökür, ra küna ötüötün ekkei seni ewe telinimw mi ötütä läng. Iwe, esap chüen wor ia repwe süla ie, pun ekewe re Israel mi sü ngeni ewe fanüapö ra kul o fiu ngeni ekewe re Ai mi tapweriir.
JOS 8:21 Pun lupwen Josua me ekewe re Israel meinisin ra küna ötütän ekkei seni ewe telinimw pokiten ekewe chon op ra liapeni o kenala, ra kul o niela ekewe re Ai.
JOS 8:22 Mürin, ekewe re Israel mi nom lon ewe telinimw Ai ra towu pwe repwe maun ngeni ekewe re Ai. Iei usun ekewe re Israel ra pweliela ekewe re Ai ekoch me epek, nge pwal ekoch me ewe epek. Iwe, ekewe re Israel ra nirela tori esap chüen wor eman mi manau, esap pwal wor eman a tongeni süla.
JOS 8:23 Nge ewe kingen Ai ra amanaua o emwenato ren Josua.
JOS 8:24 Iwe, ekewe re Israel ra niela ekewe re Ai meinisin me lon ewe fanü mi amassawa ia ra tapwerirela ie. Mürin, ra liwinsefäl ngeni Ai o niela chon meinisin.
JOS 8:25 Iwe, unusen aramasen Ai meinisin ra mäla lon ewe ränin ükükün engol me ruungeröü.
JOS 8:26 Pun Josua esap aitietiu pöün mi amwöchü wokun siles, tori chon Ai meinisin ra rosola.
JOS 8:27 Nge ekewe chon Israel ra angei ekewe man me ekewe pisek seni ewe telinimw pwe choon wokur, pun iei usun ewe Samol mi Lapalap a allük ngeni Josua.
JOS 8:28 Iwe, Josua a kenala Ai o awili ngeni eu ioien mettoch mi tatakis, usun a nom tori ikenai.
JOS 8:29 A pwal forusi ewe kingen Ai won efoch irä tori lekuniol. Nge lupwen akkar a tuputiu, Josua a allük pwe repwe apichätiu inisin me won ewe irä. Iwe, ra moneetiu leasamalapen ewe telinimw o achukuchukätä won eu ioien fau mi watte a nom tori ikenai.
JOS 8:30 Iwe mürin, Josua a senätä eu rongen asor ngeni ewe Samol mi Lapalap ewe Koten Israel me won ewe chuk Epal.
JOS 8:31 Ewe rongen asor a för seni fau resap fal, esap wor eman a aea pisekin angang seni mächä wor, usun mine Moses nöün ewe Samol mi Lapalap we chon angang a allük ngeni chon Israel, pwal usun a mak lon ewe puken allük me ren Moses. Iwe, ra eäni asoren kek ngeni ewe Samol mi Lapalap won, pwal asoren kinamwe.
JOS 8:32 Iwe, ikenan me fän mesen ekewe aramasen Israel, Josua a makei won ekewe fau ekewe allük Moses a fen makei me mwan.
JOS 8:33 Iwe, ekewe chon Israel meinisin, ekewe souakom, ekewe meilap pwal ekewe soukapwüng fiti ekewe chon ekis mi nom rer ra ütä lepekin ewe pworofel me rüepek fän mesen ekewe souaso ir mwirimwirin Lefi mi mwärei än ewe Samol mi Lapalap we pworun pwon. Esopun ar mwich a ütä o sap ngeni ewe chuk Keresim, nge esop a ütä o sap ngeni ewe chuk Epal. Moses nöün ewe Samol mi Lapalap we chon angang a allük me lepoputän pwe repwe föri iei usun, lupwen repwe angei ewe feiöch.
JOS 8:34 Mürin, Josua a aleani kapasen ewe allük meinisin, kapasen ewe feiöch me kapasen ewe anümamau, usun meinisin mine a mak lon ewe puken allük.
JOS 8:35 Iwe, esap wor eu kapas Josua a likiti seni ekewe kapas meinisin Moses a allük, pwe a aleaniir meinisin me fän mesen unusen ewe mwichen chon Israel, me fän mesen ekewe fefin, ekewe semirit me ekewe chon ekis mi nom rer.
JOS 9:1 Iwe, pworausen än chon Israel win a tori ekewe king meinisin mi nom lotoun ewe chanpupu Jortan, lon ewe fanü mi chukuchukutä me ewe fanü tekison, unusen arosetin ewe matau watte tori ewe chuk Lepanon. Ir ekewe kingen chon Hit, chon Amor, chon Kanaan, chon Peris, chon Hiw me chon Jepus.
JOS 9:2 Ra chufengen o tipeeufengen pwe repwe fiu ngeni Josua me chon Israel.
JOS 9:3 Nge lupwen ekewe aramasen Kipeon, ir chon Hiw, ra rong usun mine Josua a föri ngeni Jeriko me Ai,
JOS 9:4 ra ekiekietä pwe repwe eäni angangen atuputup. Ra feila o amolätä amötür, ra uwätä tuk mi mesingau won nöür aas, pwal lenien wain seni silin man mi mesingau me kamwakam me apinas.
JOS 9:5 Ra pwal ipweip sus mi mesingau me apinas o üföüf üf mi mesingau. Iwe, amötür a pwasapwas o topur.
JOS 9:6 Iwe, ra feila ren Josua lon ewe leni ia chon Israel ra nonom ie me lon Kilkal. Ra üreni Josua me ekewe re Israel, “Äm aia feito seni fanü toau pwe aipwe tüngor ngenikemi pwe sipwe eäni eu pwonen atipeeufengen.”
JOS 9:7 Nge ekewe re Israel ra üreni ekewe re Hiw, “Eli oua chök kan ngenikem. Ifa usun ach sipwe tongeni eäni eu pwonen atipeeufengen?”
JOS 9:8 Iwe, ra üreni Josua, “Äm aipwe noum chon angang.” Nge Josua a aisiniir, “Ämi chon ia? Ia oua feito me ie?”
JOS 9:9 Iwe, ra üreni, “Äm noum chon angang aia feito seni fanü toau pokiten iten ewe Samol mi Lapalap om we Kot. Pun aia rong pworausan, usun mine a föri me lon Isip,
JOS 9:10 pwal meinisin mine a föri ngeni ekewe ruoman kingen chon Amor, ra nom ötiuen ewe chanpupu Jortan, iten eman Sihon ewe kingen Hespon, pwal iten ewe eman Ok ewe kingen Pasan mi nom lon Astarot.
JOS 9:11 Iwe, nöüm souakom me chon fanüem meinisin ra ürenikem, pwe aipwe angei amötüm fän iten äm sai o feito pwe aipwe churikemi. Aipwe pwal ürenikemi pwe äm aipwe nöümi chon angang. Aipwe tüngor ngenikemi pwe sipwe eäni eu pwonen atipeeufengen.
JOS 9:12 Ikkei enem pilawa. Mi chüen pwichikar, lupwen aia uwei seni imwem lon ewe ränin aia popuetä saito remi. Nge nengeni, iei ra pwasapwas o topur.
JOS 9:13 Ekei lenien wain seni silin man ra minefö, lupwen aia alölöör, nge nengeni, ra kam. Üfem kei me ipwem sus ra mesingau pokiten äm saitam.”
JOS 9:14 Iwe, ekewe re Israel ra etiwa mine ra ngeniir o mongö, nge resap akomwen ais öüröürer me ren ewe Samol mi Lapalap.
JOS 9:15 Iwe, Josua a föri eu pwonen atipeeu ngeni ekewe re Kipeon pwe epwe amanaueer. Nge ekewe souemwenin ewe mwichen Israel ra pwon fän akapel ngeniir pwe repwe apwönüetä ewe pwon.
JOS 9:16 Iwe, ülüngat rän mürin ar föri ewe pwonen atipeeu, ekewe chon Israel ra rong pwe ekewe aramas ir chon arur mi nom lefiler.
JOS 9:17 Mürin ekewe aramasen Israel ra saila o tori än ekewe aramas telinimw lon aülüngatin rän. Nge iten ar kewe telinimw Kipeon, Kefira, Pereot me Kiriat-jearim.
JOS 9:18 Nge ekewe aramasen Israel resap tongeni nirela pokiten än nöür kewe souemwen pwon fän akapel ngeniir iten ewe Samol mi Lapalap ewe Koten Israel. Mürin, unusen ewe mwichen Israel a lal ngeni ekewe souemwen.
JOS 9:19 Iwe, ekewe souemwen meinisin ra üreni unusen ewe mwichen Israel, “Äm aia fen eäni pwon fän akapel ngeniir iten ewe Samol mi Lapalap ewe Koten Israel. Iei mine sisap tongeni afeiengaueer.
JOS 9:20 Nge iei meta sipwe föri ngeniir: Sipwe amanaueer, pwe än Kot song esap feitiu woch pokiten sia eäni ngeniir ewe pwon fän akapel.
JOS 9:21 Sipwe amanaueer, nge repwe chon uwos mwüch me chon üfüf koluk fän itach meinisin.” Iwe, ra föri usun mine nöür souemwen ra üreniir.
JOS 9:22 Iwe, Josua a körato ekewe chon Kipeon o üreniir, “Pwota oua atupukem o üra pwe ämi oua feito seni fanü toau, ngei oua fen nom lefilem?
JOS 9:23 Ren ei oua anümamau. Aramas repwe nöünikemi amanau fansoun meinisin, oupwe uwos mwüch o üfüf koluk fän iten imwen ai Kot.”
JOS 9:24 Iwe, ekewe chon Kipeon ra üreni Josua, “Äm noum chon angang aia rongorong pwe a let mine ewe Samol mi Lapalap om we Kot a allük ngeni nöün we chon angang Moses, pwe epwe ngenikemi unusen ewe fanü o arosala chon meinisin me mwemi. Iei mine aia chüngümongüw manauem pokitemi o föri ei föför.
JOS 9:25 Nengeni, iei äm aia nom fän nemeniom. Kopwe föri ngenikem mine a mürina o pwüng me reöm.”
JOS 9:26 Iei usun mine Josua a föri ngeniir: A amanaueer seni ekewe chon Israel pwe resap nirela.
JOS 9:27 Seni ewe fansoun Josua a nöüniir amanau pwe repwe chon uwos mwüch me chon üfüf koluk fän iten ekewe chon Israel, pwal fän iten än ewe Samol mi Lapalap we rongen asor. Iwe, ra föri ei angang tori ikenai lon ewe leni ewe Samol mi Lapalap a filätä.
JOS 10:1 Iwe, Atonisetek ewe kingen Jerusalem a rong pwe Josua a liapeni Ai o fokun ataela. A föri ngeni Ai me an king usun mine a föri ngeni Jeriko me an king. A pwal rong pwe chon Kipeon ra kinamwe ngeni chon Israel o nonom lefiler.
JOS 10:2 Ren ei ewe king me nöün aramas ra fokun niuokus. Pun Kipeon eu telinimw mi watte usun ekewe telinimwen king, a pwal watte seni Ai, nge mwänin lon meinisin ra fokun pwora.
JOS 10:3 Iei mine Atonisetek ewe kingen Jerusalem a tinala pworaus ren Hoham kingen Hepron, Piram kingen Jarmut, Japia kingen Lakis pwal Tepir kingen Eklon o üreniir,
JOS 10:4 “Oupwe etto rei o alisiei pwe sipwe maun ngeni Kipeon. Pun chon Kipeon ra kinamwe ngeni Josua me ekewe aramasen Israel.”
JOS 10:5 Mürin, ewe kingen Jerusalem, ewe kingen Hepron, ewe kingen Jarmut, ewe kingen Lakis me ewe kingen Eklon, ir ekewe limman kingen chon Amor, ra amwichafengeni nöür sounfiu meinisin o feila Kipeon, ra pwelifeili ewe telinimw o maun ngeni.
JOS 10:6 Nge ekewe chon Kipeon ra titi Josua me lon Kilkal ewe ia a nom ie o üreni, “Kosap asechikeemila äm noum chon angang. Kopwe müttir feito rem, kopwe amanauakem o alisikem. Pun ekewe kingen chon Amor meinisin mi nom lon ewe fanü mi chukuchukutä ra chufengen o maun ngenikem.”
JOS 10:7 Iei mine Josua a feitä seni Kilkal, ir me ekewe sounfiu meinisin fiti ekewe mi pwora o pöchökül.
JOS 10:8 Iwe, ewe Samol mi Lapalap a üreni Josua, “Kosap niuokusiitir, pun üa fen awinnok. Esap wor eman me leir epwe tongeni ü ngonuk.”
JOS 10:9 Iwe, Josua a fetal seni Kilkal lon unusen ewe pwin o aserengaua ekewe sounfiun Amor.
JOS 10:10 Iwe, ewe Samol mi Lapalap a atolongeer lon niuokus watte, lupwen ra küna ekewe chon Israel. Nge Josua a fokun akufuur o nirela me lon Kipeon, a pwal tapweriretiu won ewe al ngeni Pet-horon o sopwela le nirela tori Aseka me Maketa.
JOS 10:11 Iwe, lupwen ra sü me mwen ekewe chon Israel o sütiu won ewe al ngeni Pet-horon tori Aseka, ewe Samol mi Lapalap a apüngätiu ütten fau mi watte wor seni läng, pwe ra mäla. Iwe, a wor chomong mi mäla pokiten ewe ütten fau, lap seni chokewe ekewe re Israel ra nirela ren ketilas.
JOS 10:12 Iwe, lon ewe ränin, lupwen ewe Samol mi Lapalap a atolonga ekewe chon Amor lepöün chon Israel, Josua a kapas ngeni ewe Samol mi Lapalap o apasa me fän mesen ekewe chon Israel, “Akkar, kopwe üla me asen Kipeon, nge en, maram, kopwe üla me asen ewe lemolun Aialon.”
JOS 10:13 Iwe, akkar a üla pwal ewe maram, tori ekewe chon Israel ra akufu chon oputeer. Ei pworaus a mak lon nöün Iasar puk. Iwe, akkar a üla me lukalapen läng, nge a mang le tuputiu lon ükükün unusen eu rän.
JOS 10:14 Iwe, esap wor eu rän usun ei rän lon ekewe fansoun mwan ika me mürin, pwe ewe Samol mi Lapalap a aüselinga alon eman aramas. Pun ewe Samol mi Lapalap a maun fän iten Israel.
JOS 10:15 Mürin, Josua me nöün sounfiu meinisin ra liwiniti Kilkal ewe ia ra nom ie.
JOS 10:16 Iwe, ekewe limman king ra süla o op lon ewe fööimw lon Maketa.
JOS 10:17 Nge eman a küneer o asile ngeni Josua pwe ra op lon ewe fööimw lon Maketa.
JOS 10:18 Mürin Josua a üra, “Oupwe pünüweto fau mi watte mesen ewe fööimw, oupwe pwal awisa ekoch mwän pwe repwe mamaseer.
JOS 10:19 Nge püsin ämi ousap nonom ikenan, pwe oupwe tapweri chon oputakemi. Oupwe maun ngeniir me lükisökürür, nge ousap mwüt ngeniir pwe repwe tolong lon ar kewe telinimw. Pun ewe Samol mi Lapalap ämi we Kot a awinnakemi.”
JOS 10:20 Iwe, Josua me ekewe re Israel ra nirela o aroserela, chilon chök ekoch mi süri ekewe telinimw mi tit.
JOS 10:21 Mürin ra liwin ngeni Josua lon Maketa ewe ia ra nom ie fän kinamwe. Iwe, esap wor eman me lon ewe fanü a tongeni pälüeni eman lein ekewe aramasen Israel.
JOS 10:22 Mürin Josua a apasa, “Oupwe suki ewe fööimw o emwenato rei ekewe limman king.”
JOS 10:23 Iwe, ra suki ewe fööimw o emwenawu ekewe limman king ren Josua: ewe kingen Jerusalem, ewe kingen Hepron, ewe kingen Jarmut, ewe kingen Lakis me ewe kingen Eklon.
JOS 10:24 Nge lupwen ra emwenireto ren, Josua a körato ekewe re Israel meinisin o üreni ekewe samolun sounfiu mi eti le maun, “Oupwe kanoto o ipwetä won üwen ekei king.” Mürin ra kanoto o ipwetä won üwer.
JOS 10:25 Iwe, Josua a üreniir, “Ousap niuokus ika rükö. Oupwe apöchökülakemi o tipepwora. Pun iei usun ewe Samol mi Lapalap epwe föri ngeni chon oputemi meinisin, chokewe oupwe maun ngeniir.”
JOS 10:26 Mürin, Josua a niela ekewe king o aitiueretä won limefoch irä. Iwe, ra nikemeittiu won ekewe irä tori lekuniol.
JOS 10:27 Nge lupwen akkar a tuputiu, Josua a allük pwe repwe apichiretiu me won ekewe irä. Iwe, ra atururolong lon ewe fööimw, ewe ia ra piin op ie, o pineela mesen ewe fööimw ngeni fau mi watte. Iwe, ekewe fau ra chüen nom tori ikenai.
JOS 10:28 Iwe, lon ewe rän Josua a liapeni Maketa o ataela, a pwal niela ewe kingen lon o fokun arosala aramasan. Esap amanaua eman. A föri ngeni ewe kingen Maketa usun mine a piin föri ngeni ewe kingen Jeriko.
JOS 10:29 Mürin, Josua me nöün sounfiu meinisin ra feil seni Maketa o feila Lipna. Iwe, ra maun ngeni.
JOS 10:30 Iwe, ewe Samol mi Lapalap a pwal atolonga fän nemenien chon Israel ewe telinimw me an king. Iwe, Josua a niela chon o arosala chokewe meinisin mi nom lon, nge esap amanaua eman. A föri ngeni kingen ewe telinimw usun mine a piin föri ngeni ewe kingen Jeriko.
JOS 10:31 Mürin, Josua me nöün sounfiu meinisin ra pwal feil seni Lipna o feila Lakis. Iwe, ra pwelifeili ewe telinimw fän ar pisekin maun o maun ngeni.
JOS 10:32 Nge ewe Samol mi Lapalap a atolonga Lakis fän nemenien chon Israel. Iwe, Josua a liapeni ewe telinimw lon aruuen rän o niela aramasen lon meinisin, usun mine a piin föri ngeni Lipna.
JOS 10:33 Mürin, Horam ewe kingen Keser a feito pwe epwe alisi chon Lakis. Nge Josua a niela ewe king me nöün sounfiu, tori esap chüen wor eman mi manau.
JOS 10:34 Iwe, Josua me nöün sounfiu meinisin ra feil seni Lakis o feila Eklon. Ra pwelifeili ewe telinimw fän ar pisekin maun o maun ngeni.
JOS 10:35 Iwe, ra liapeni ewe telinimw lon ewe chök ränin o niela aramasen lon meinisin, usun mine ra piin föri ngeni Lakis.
JOS 10:36 Mürin, Josua me nöün sounfiu meinisin ra feitä seni Eklon o feila Hepron. Iwe, ra maun ngeni.
JOS 10:37 Ra liapeni ewe telinimw o niela chon fiti ar we king. Ra pwal atai wisoposopun kewe o niela aramasen lor meinisin. Josua esap amanaua eman, nge a fokun ataala ewe telinimw o arosala aramasen lon meinisin, usun mine a piin föri ngeni Eklon.
JOS 10:38 Mürin, Josua me nöün sounfiu meinisin ra kul ngeni Tepir o maun ngeni.
JOS 10:39 Iwe, Josua a liapeni ewe telinimw me an we king pwal wisoposopun meinisin. Ra fokun niela aramasen lon meinisin. Josua esap amanaua eman. Usun mine a piin föri ngeni Hepron me Lipna me ar kewe king, iei usun a pwal föri ngeni Tepir me an king.
JOS 10:40 Iwe, Josua a liapeni unusen ewe fanü: ewe fanü mi chukuchukutä me ewe fanü Nekep, ewe fanü mi tekison me ewe fanü mi pal, a pwal liapeni ar kewe king. Esap amanaua eman, nge a fokun arosala meinisin, usun ewe Samol mi Lapalap ewe Koten Israel a allük.
JOS 10:41 Iwe, Josua a akufu chon ekewe fanü seni Kates-parnea tori Kasa, unusen chon ewe fanü Kosen tori Kipeon.
JOS 10:42 Iwe, Josua a liapeni ekei king meinisin me fanüer fän eu chök, pokiten ewe Samol mi Lapalap ewe Koten Israel a maun fän iten chon Israel.
JOS 10:43 Mürin, Josua me nöün sounfiu meinisin ra liwiniti Kilkal, ewe leni ia ra nom ie.
JOS 11:1 Iwe, lupwen Japin ewe kingen Hasor a rong pworausen än chon Israel win, a titi Jopap kingen Maton pwal ewe kingen Simron me ewe kingen Aksaf.
JOS 11:2 A pwal titi ekewe king seni ewe fanü mi chukuchukutä mi nom efeng, seni ewe lemolun Jortan örün ewe nomun Kaliläa, seni ewe fanü tekison, pwal seni ewe fanü mi pal itan Tor mi nom lotou.
JOS 11:3 Iwe, a titi ekewe chon Kanaan mi nom ötiu me lotou, ekewe chon Amor, chon Hit, chon Peris me chon Jepus mi nom lon ewe fanü mi chukuchukutä, pwal ekewe chon Hiw mi nom fäsonun ewe chuk Hermon lon ewe fanü Mispa.
JOS 11:4 Iwe, ra feito me nöür kewe sounfiu meinisin lon mwicheicher mi fokun watte, ükükün chochor usun föün pien aroset. A pwal wor rer chomong oris me woken.
JOS 11:5 Iwe, ekei king meinisin ra achufengeni nöür kewe mwichen sounfiu, ra feito o nonomfengen arun ewe kolukun Merom, pwe repwe maun ngeni Israel.
JOS 11:6 Nge ewe Samol mi Lapalap a üreni Josua, “Kosap niuokusitiir, pun iei otun lesor üpwe atolongeer meinisin lepöün chon Israel, nge ir mei mä. Kopwe pökü selin pechen nöür kewe oris o kenala war kewe woken.”
JOS 11:7 Iwe, Josua me nöün kewe sounfiu meinisin ra aserengaueer me arun ewe kolukun Merom o maun ngeniir.
JOS 11:8 Iwe, ewe Samol mi Lapalap a awinna chon Israel, pwe ra akufuur o tapweriir tori Sitonlap me Misrefot-maim, pwal tori ewe lemolun Mispa mi nom ötiu. Iwe, ra nirela meinisin tori esap chüen wor eman mi manau.
JOS 11:9 Iwe, Josua a föri ngeniir usun mine ewe Samol mi Lapalap a allük ngeni. A pökü selin pechen nöür kewe oris o kenala war kewe woken.
JOS 11:10 Mürin Josua a kulsefäl, a liapeni Hasor o niela an king. Lon ena fansoun Hasor a samolun telinimwen ekewe mwü.
JOS 11:11 Iwe, ra niela chon ewe telinimw meinisin o fokun aroserela. Esap chüen wor eman mi manau me lon. Josua a pwal kenala Hasor.
JOS 11:12 Iwe, Josua a liapeni ekewe telinimw me ar kewe king meinisin, a niela aramasen lor o fokun aroserela, usun Moses nöün ewe Samol mi Lapalap we chon angang a fen allük.
JOS 11:13 Nge ekewe chon Israel resap kenala ekewe telinimw mi kaütä won chukutekison, chilon chök Hasor Josua a kenala.
JOS 11:14 Ekewe chon Israel ra angei mine ra liapeni me lon ekewe telinimw pwal ekewe pwiin man pwe choon wokur. Nge ekewe aramas meinisin ra nirela. Resap fokun amanaua eman.
JOS 11:15 Usun mine ewe Samol mi Lapalap a allük ngeni nöün we chon angang Moses, iei usun Moses a allük ngeni Josua. Nge Josua esap likiti och, pwe a föri meinisin mine ewe Samol mi Lapalap a allük ngeni Moses.
JOS 11:16 Iwe, Josua a liapeni unusen ewe fanü: Ewe fanü mi chukuchukutä me ewe fanü tekison mi nom efeng me ör, unusen ewe fanü Kosen me ewe fanü Nekep pwal ewe lemolun Jortan.
JOS 11:17 Iei ükükün ewe fanü seni ewe chuk Halak mi nom ör arap ngeni Etom tori Paal-kat mi nom efeng lon ewe lemolun Lepanon fäsonun ewe chuk Hermon. Iwe, a liapeni kingen ekewe fanü o nirela.
JOS 11:18 Josua a maun ngeni ekewe king meinisin fansoun langatam.
JOS 11:19 Ekewe aramasen Israel ra liapeni ekewe telinimw meinisin lon maun, pun esap fokun wor eu me leir a kinamwe ngeniir, chilon chök ewe telinimw Kipeon, ia ekewe chon Hiw ra nom ie.
JOS 11:20 Pun ewe Samol mi Lapalap a aföreai leluker pwe repwe ü ngeni Israel lon maun. Ren ei ra atoto feiengau wor pwe ra fokun rosola, nge esap wor eman a ümöümöch ngeniir. Iei usun ewe Samol mi Lapalap a allük ngeni Moses.
JOS 11:21 Lon ena fansoun Josua a feito o arosala ekewe mwänämong ir mwirimwirin Anak seni ewe fanü mi chukuchukutä, seni Hepron me Tepir, seni Anap me unusen ewe fanü mi chukuchukutä me lon Juta me Israel. Josua a fokun aroserela, a pwal ataala ar kewe telinimw.
JOS 11:22 Iwe, esap wor eman mwirimwirin Anak a chüen manau lon fanüen ekewe aramasen Israel, chilon chök ekoch mi chüen nom lon Kasa, lon Kat pwal lon Astot.
JOS 11:23 Iei usun Josua a liapeni unusen ewe fanü fän alon ewe Samol mi Lapalap ngeni Moses. Iwe, Josua a ngeni chon Israel ewe fanü pwe repwe fanüeni lon ükükün inetin eu me eu ainang. Mürin ewe fanü a kinamwe, pun esap chüen wor maun.
JOS 12:1 Iwe, ekewe aramasen Israel ra fen liapeni o fanüeni ewe fanü ötiuen ewe chanpupu Jortan seni ewe lemolun Arnon tori ewe chuk Hermon, pwal unusen ewe lemolun Jortan me peliötiu. Ra pwal akufu kingen ekei fanü.
JOS 12:2 Ra akufu Sihon ewe kingen chon Amor mi nom lon Hespon. A nemeni ewe fanü seni Aroer mi nom lepökütiwen ewe lemolun Arnon, pwal ewe telinimw lukalapen ewe lemol tori ewe chanpupu Japok kiännin fanüen chon Amon. Iei esopun Kiliat.
JOS 12:3 A pwal nemeni ewe lemolun Jortan tori ewe nomun Kaliläa me peliötiu, fetal ngeni Pet-jesimot, pwal tori ewe Setin Mäla ator ngeni fäsonun ewe chuk Piska me peliör.
JOS 12:4 Ra pwal akufu Ok ewe kingen Pasan, eman me lein ekewe mwirimwirin Refa mi chüen manau, a nom lon Astarot me Etrei.
JOS 12:5 A nemeni ewe chuk Hermon me Saleka me unusen ewe fanü Pasan tori kiännin fanüen chon Kesur me chon Makat, pwal esopun Kiliat tori kiännin fanüen Sihon ewe kingen Hespon.
JOS 12:6 Iwe, Moses nöün ewe Samol mi Lapalap we chon angang me ekewe aramasen Israel ra akufu ekei ruoman king. Nge Moses a ngeni chon ekewe ainangen Rupen me Kat pwal ewe esopun ainangen Manasa fanüer pwe repwe fanüeni.
JOS 12:7 Iwe, Josua me ekewe aramasen Israel ra akufu ekewe king meinisin mi nom pelilotoun ewe chanpupu Jortan seni Paal-kat mi nom lon ewe lemolun Lepanon tori ewe chuk Halak mi nom ör arap ngeni Etom. Iwe, Josua a ngeni ekewe ainangen Israel fanüer pwe repwe fanüeni lon ükükün en me inetin.
JOS 12:8 A ngeniir ewe fanü mi chukuchukutä me ewe fanü tekison, ewe lemolun Jortan me ewe fanü mi pal, ewe fanüapö me ewe fanü Nekep. Ekei fanü fanüen chon Hit, chon Amor, chon Kanaan, chon Peris, chon Hiw me chon Jepus.
JOS 12:9 Ikkei ir kingen ekewe telinimw Josua me ekewe chon Israel ra akufu: Ewe kingen Jeriko me ewe kingen Ai mi nom lükün Petel,
JOS 12:10 ewe kingen Jerusalem me ewe kingen Hepron,
JOS 12:11 ewe kingen Jarmut me ewe kingen Lakis,
JOS 12:12 ewe kingen Eklon me ewe kingen Keser,
JOS 12:13 ewe kingen Tepir me ewe kingen Keter,
JOS 12:14 ewe kingen Horma me ewe kingen Arat,
JOS 12:15 ewe kingen Lipna me ewe kingen Atulam,
JOS 12:16 ewe kingen Maketa me ewe kingen Petel,
JOS 12:17 ewe kingen Tapua me ewe kingen Hefer,
JOS 12:18 ewe kingen Afek me ewe kingen Lasaron,
JOS 12:19 ewe kingen Maton me ewe kingen Hasor,
JOS 12:20 ewe kingen Simron-meron me ewe kingen Aksaf,
JOS 12:21 ewe kingen Tanak me ewe kingen Mekito,
JOS 12:22 ewe kingen Ketes me ewe kingen Jokneam lon Karmel,
JOS 12:23 ewe kingen Tor lon Nafat-tor me ewe kingen Koiim lon Kaliläa
JOS 12:24 pwal ewe kingen Tirsa. Iwe, iteiten ekewe king meinisin ükükün ilik me eman.
JOS 13:1 Iwe, lupwen Josua a fokun chinlap, ewe Samol mi Lapalap a üreni, “Ka fokun chinlapala, nge a chüen wor chomong fanü ousamwo liapeni.
JOS 13:2 Iei ewe fanü ousamwo liapeni: Unusen kinikinin fanüen chon Filistia me chon Kesur.
JOS 13:3 Ewe fanü seni ewe chanpupu Sihor mi nom ötiuen Isip pwere ngeni efeng tori kiännin Ekron, iei fanüen chon Kanaan. Nge mi wor limman sounemenemen chon Filistia, ra nom lon Kasa, Astot, Askelon, Kat me Ekron. Ousamwo pwal liapeni fanüen chon Aw mi nom ör,
JOS 13:4 unusen fanüen chon Kanaan me Meara, fanüen chon Siton tori Afek mi nom arun kiännin fanüen chon Amor,
JOS 13:5 ewe fanüen chon Kepal me unusen ewe fanü Lepanon kükü ngeni ötiu, seni Paal-kat mi nom fäsonun ewe chuk Hermon tori ewe al mi ale ngeni Hamat,
JOS 13:6 pwal ekewe fanüen chon Siton meinisin mi chukuchukutä lefilen Lepanon me Misrefot-maim. Ngang üpwe püsin asüela me mwen ekewe aramasen Israel chon ekewe fanü meinisin. Nge kopwe chök ineti ewe fanü ngeni ekewe chon Israel pwe repwe fanüeni, usun üa fen allük ngonuk.
JOS 13:7 Iei mine kopwe ineti ei fanü ngeni ekewe tiu ainang me ewe esopun ainangen Manasa, pwe repwe fanüeni.”
JOS 13:8 Iwe, ewe esopun ainangen Manasa me chon ekewe ainangen Rupen me Kat ra fen angei fanüer me ren Moses pekilan ewe chanpupu Jortan me peliötiuan, usun Moses nöün ewe Samol mi Lapalap we chon angang a fen ineti ngeniir.
JOS 13:9 Fanüer a poputä seni Aroer mi nom lepökütiwen ewe lemolun Arnon pwal ewe telinimw mi nom lukalapen ewe lemol me unusen ewe fanü mi sosonöch seni Metepa tori Tipon,
JOS 13:10 fiti ekewe telinimw meinisin än Sihon ewe kingen chon Amor mi nemenem lon Hespon tori kiännin fanüen chon Amon.
JOS 13:11 Ra pwal fanüeni Kiliat me ewe fanüen chon Kesur me chon Makat, unusen ewe chuk Hermon me unusen Pasan tori Saleka.
JOS 13:12 Iei unusen ewe mwün Ok, ätewe a nemenem lon Astarot me Etrei, i amüchülan mwirimwirin chon Refa. Iwe, Moses a akufu ekei aramas o asürela seni fanüer.
JOS 13:13 Nge ekewe aramasen Israel resap asüela chon Kesur me chon Makat seni fanüer. Iei mine ra nonom lein chon Israel tori ikenai.
JOS 13:14 Iwe, Moses esap ngeni chon ewe ainangen Lefi eu fanü pwe repwe fanüeni. Nge repwe angei inetir seni ekewe asor aramas ra uwato pwe repwe kek fän iten ewe Samol mi Lapalap ewe Koten Israel, pun iei usun Kot a fen kapas ngeni Moses.
JOS 13:15 Iwe, Moses a ngeni chon ewe ainangen Rupen fanüer a aükük ngeni ükükün ar kewe famili.
JOS 13:16 Iei kinikinin fanüer seni Aroer mi nom lepökütiwen ewe lemolun Arnon, pwal ewe telinimw mi nom lukalapen ewe lemol me unusen ewe fanü mi sosonöch tori Metepa
JOS 13:17 me Hespon fiti wisoposopun kewe meinisin mi nom lon ewe fanü mi sonosonöch, pwal ekewe telinimw Tipon, Pamot-paal me Pet-paalmeon,
JOS 13:18 Jahas, Ketemot me Mefaat,
JOS 13:19 Kiriat-aim, Sipma me Seret-sahar mi nom won palapalatän ewe lemol,
JOS 13:20 Pet-peor, ekewe palen ewe chuk Piska me Pet-jesimot.
JOS 13:21 Ikkei ekewe telinimw meinisin mi nom won ewe fanü mi sosonöch me unusen ewe mwün Sihon ewe kingen chon Amor mi nemenem lon Hespon. Sihon ätewe Moses a akufu fiti ekewe souemwenin Mitian iter Ewi, Rekem, Sur, Hur me Repa. Ir ekewe samolukis nöün Sihon mi nom lon ewe fanü.
JOS 13:22 Iwe, pwal Palaam nöün Peor we mwän ewe soupwe a fitilong lein chokewe ekewe aramasen Israel ra niela.
JOS 13:23 Iwe, ewe chanpupu Jortan kiännin fanüen ekewe aramasen Rupen me pelilotou. Iei fanüen chon ewe ainangen Rupen fiti ar kewe telinimw me wisoposopur a aükük ngeni ükükün ar kewe famili.
JOS 13:24 Iwe, Moses a pwal ngeni chon ewe ainangen Kat fanüer a aükük ngeni ükükün ar kewe famili.
JOS 13:25 Iwe, kinikinin fanüer: Jaser me ekewe telinimwen Kiliat meinisin pwal esopun fanüen chon Amon tori Aroer mi nom ötiuen Rapa,
JOS 13:26 pwal seni Hespon tori Rammat-mispa me Petonim, seni Mahanaim tori kiännin ewe telinimw Tepir.
JOS 13:27 Ra pwal eäni ekewe telinimw lon ewe lemolun Jortan iter Pet-haram, Pet-nimra, Sukkot me Safon, pwal lusun ewe mwün Sihon ewe kingen Hespon. Nge kiännin fanüer me pelilotou ewe chanpupu Jortan, ator ngeni ewe nomun Kaliläa me peliefeng.
JOS 13:28 Iei fanüen chon Kat fiti ar kewe telinimw me wisoposopur a aükük ngeni ükükün ar kewe famili.
JOS 13:29 Iwe, Moses a ngeni esopun chon ewe ainangen Manasa fanüer a aükük ngeni ükükün ar kewe famili.
JOS 13:30 Iwe, fanüer a poputä seni Mahanaim, pachelong unusen Pasan, iei unusen mwün Ok ewe kingen Pasan me ekewe telinimwen Jair meinisin lon Pasan ükükün wone telinimw,
JOS 13:31 pwal esopun Kiliat, Astarot me Etrei ekewe samolun telinimwen mwün Ok lon Pasan. Ikkei inetin esopun mwirimwirin Makir nöün Manasa we mwän a aükük ngeni ükükün ar kewe famili.
JOS 13:32 Ikkei ekewe fanü Moses a aineti me lon ewe maasiesin Moap pekilan ewe chanpupu Jortan ötiuen Jeriko.
JOS 13:33 Nge Moses esap ngeni chon ewe ainangen Lefi eu fanü pwe repwe fanüeni. Pun a üreniir pwe repwe angei inetir seni ekewe asor aramas ra uwato ngeni ewe Samol mi Lapalap ewe Koten Israel.
JOS 14:1 Iei pworausen inetin ewe fanü Kanaan mi nom lotoun ewe chanpupu Jortan ngeni ekewe aramasen Israel. Ewe souasor Eleasar me Josua nöün Nun we mwän, pwal souemwenin än semer kewe cho seni ekewe ainangen Israel ra aineti ewe fanü ngeniir.
JOS 14:2 Iwe, ra angei fanüer ren üttüt, usun ewe Samol mi Lapalap a fen allük fän iten ekewe tiu esop ainang.
JOS 14:3 Pun Moses a fen ngeni ekewe ruu esop ainang fanüer ötiuen ewe chanpupu Jortan.
JOS 14:4 Pun ekewe mwirimwirin Josef ra ruu ainang, ekewe ainangen Manasa me Efraim. Nge chon ewe ainangen Lefi resap angei eu kinikin me lon ewe fanü, pwe ra chök angei telinimw pwe repwe imweimw lon fiti ekewe fanü ünükür fän iten nöür man.
JOS 14:5 Iwe, ekewe aramasen Israel ra aineti ewe fanü ren üttüt, usun mine ewe Samol mi Lapalap a allük ngeni Moses.
JOS 14:6 Lon eu rän ekoch re Juta ra feito ren Josua lon Kilkal. Iwe, eman me leir itan Kalep nöün Jefune we mwän, ewe re Kenis, a üreni Josua, “En ka silei mine ewe Samol mi Lapalap a üreni Moses ewe aramasen Kot me lon Kates-parnea usun en me ngang.
JOS 14:7 Ngang üa ierini faik lupwen Moses nöün ewe Samol mi Lapalap we chon angang a tinieila seni Kates-parnea pwe üpwe operi ewe fanü. Iwe, üa uwato ren eu pworaus usun mefien lelukei.
JOS 14:8 Nge pwii kewe mi etiei le feila ra akisikisala leluken ekewe aramas. Nge ngang üa fokun apwönüetä letipen ewe Samol mi Lapalap ai we Kot.
JOS 14:9 Iwe, lon ewe ränin Moses a pwon fän akapel ngeniei o apasa, ‘Ellet, ewe fanü ka fen ipwetiu won epwe fanüom me noum kana tori feilfeilachök, pokiten ka apwönüetä letipen ewe Samol mi Lapalap ai we Kot.’
JOS 14:10 Nengeni, iei ewe Samol mi Lapalap a amanauaei usun a apasa. Iei a faik me limu ier seni ewe fansoun ewe Samol mi Lapalap a eäni ei kapas ngeni Moses, lupwen chon Israel ra fetalfeil lon ewe fanüapö. Ikenai üa ierini walik me limu.
JOS 14:11 Ngang üa chüen pöchökül tori ikenai, usun pöchökülei lon ewe fansoun Moses a tinieila. Ikenai üa chüen pöchökül le feila maun usun chök lepöchökülei me lom.
JOS 14:12 Iei mine kopwe ngeniei ewe fanü mi chukuchukutä, ewe Samol mi Lapalap a fen pwon ngeniei lon ewe ränin. Ka pwal rong lon ewe fansoun pwe ekewe mwirimwirin Anak ra nom ikenan, nge ar kewe telinimw ra watte o pöchökül tittir. Eli ewe Samol mi Lapalap epwe etiei pwe üpwe asürela, usun a fen apasa.”
JOS 14:13 Iwe, Josua a afeiöchü Kalep. A ngeni Kalep nöün Jefune we mwän ewe telinimw Hepron pwe epwe telinimweni.
JOS 14:14 Iei mine ekewe mwirimwirin Kalep nöün Jefune we mwän, ewe re Kenis, ra telinimweni Hepron tori ikenai, pun Kalep a fokun apwönüetä letipen ewe Samol mi Lapalap ewe Koten Israel.
JOS 14:15 Iwe, iten Hepron me lom telinimwen Arpa. Nge Arpa eman mwän mi iteföüla me lein mwirimwirin Anak. Iwe, ewe fanü a kinamwe, pun esap chüen wor maun.
JOS 15:1 Iwe, iei ewe fanü mi ainet ngeni chon ewe ainangen Juta a aükük ngeni ükükün ar kewe famili. Iwe, peliörün fanüer a poputä me won kiännin Etom ewe fanüapön Sin kuku ngeni ör.
JOS 15:2 Mürin, kiännin fanüer me peliör a fetal seni lesopolan ewe Setin Mäla, ewe nom mi sasape ngeni ör.
JOS 15:3 A feila örün ewe chukuchukutä Akrapim, a pwerela tori Sin o feitä örün Kates-parnea, a pwal pwerela ünükün Hesron, a feitä tori Atar o pweliela ngeni Karka.
JOS 15:4 Mürin, ewe kiä a pwerela tori Asmon, a feila ngeni ewe öüwön Isip o müchütiu me ren ewe mataulap. A iei kiännin fanüer me peliör.
JOS 15:5 Iwe, kiännin fanüer me peliötiu ewe Setin Mäla tori mesen ewe chanpupu Jortan. Nge kiännin fanüer me peliefeng a poputä seni ewe Setin Mäla mesen ewe chanpupu Jortan.
JOS 15:6 A feila tori Pet-hokla o pwerela efengin Pet-arapa. Mürin, kiännin ewe fanü a feila tori ewe fau föün Pohan nöün Rupen we mwän.
JOS 15:7 Ewe kiä a pwal feila seni lon ewe lemolun Akor tori Tepir. Iwe, a feila efeng o weneiti Kilkal mi sasape ngeni ewe chukuchukutän Atumim peliörün ewe lemol. A pwal pwerela tori ekewe kolukun En-semes o müchütiu me En-rokel.
JOS 15:8 Mürin, ewe kiä a feitä ren ewe lemolun Hinnom tori peliörün me won ekewe chukun Jepus, ia ewe telinimw Jerusalem a nom ie. Iwe, a pwal feitä tori won ungen ewe chuk mi nom sasape ngeni ewe lemolun Hinnom me pelilotou pwal amüchülan ewe lemolun Refaim me peliefeng.
JOS 15:9 Mürin, ewe kiä a feila seni ungen ewe chuk tori ekewe koluk mi puächetä me lon Neftoa. Nge seni ikenan a feila ngeni ewe telinimw mi arap ngeni ewe chuk Efron o pwelila tori Paala, iei Kiriat-jearim.
JOS 15:10 Iwe, ewe kiä a pwal pwelila lotoun Paala tori ewe chukun Seir, a pwerela tori won ewe chuk Jearim me peliefeng, iei Chesalon, a pwal feitiu tori Pet-semes o pwerela Timna.
JOS 15:11 Mürin a pwerela tori won ewe chukutekison efengin Ekron o pwelila ngeni Sikkeron, a pwal pwerela tori ewe chuk Paala o pwerewu tori Japneel. Mürin, ewe kiä a müchütiu me ren ewe mataulap.
JOS 15:12 Nge kiännin fanüer me pelilotou arosetin ewe mataulap. Iei kiännin pwelin fanüen aramasen Juta a aükük ngeni ükükün ar kewe famili.
JOS 15:13 Iwe, Josua a ngeni Kalep nöün Jefune we mwän eu kinikinin fanü me lein fanüen ekewe aramasen Juta, usun ewe Samol mi Lapalap a allük ngeni. Iwe, a ngeni Kalep Hepron ewe telinimw än Arpa, nge Arpa semen Anak.
JOS 15:14 Iwe, Kalep a asüela seni ewe telinimw mwirimwirin Anak kewe ülüman mwän iter Sesai, Ahiman me Talmei.
JOS 15:15 Mürin, Kalep a feila seni ikenan o maun ngeni chon Tepir. Nge iten Tepir me lom Kiriat-sefer.
JOS 15:16 Iwe, Kalep a apasa, “Iö a akufu o liapeni Kiriat-sefer, üpwe ngeni nei we föpwül Aksa pwe pwülüan.”
JOS 15:17 Iwe, Otniel nöün Kenas we mwän, nge Kenas pwin Kalep, a liapeni ewe telinimw. Iwe, Kalep a ngeni nöün we föpwül Aksa pwe pwülüan.
JOS 15:18 Nge lupwen neminewe a feito ren Otniel, ätewe a pesei ngeni pwe epwe tüngorei saman we eu tanipi. Iwe, neminewe a tötiu seni wan aas, nge Kalep a aisini, “Met ka mochen?”
JOS 15:19 Nge neminewe a üreni, “Kopwe ngeniei eu feiöch. Pokiten ka ngeniei eu fanü mi pwasapwas lon Nekep, kopwe pwal ngeniei ekewe koluk mi puächetä.” Mürin Kalep a ngeni neminewe ekewe koluk mi puächetä ra nom asan, pwal ekewe ra nom fan.
JOS 15:20 Iwe, iei fanüen chon ewe ainangen Juta a aükük ngeni ükükün ar kewe famili.
JOS 15:21 Iwe, än chon ewe ainangen Juta kewe telinimw kükü ngeni ör arap ngeni kiännin Etom iter: Kapseel, Eter me Jakur,
JOS 15:22 Kina, Timona me Atata,
JOS 15:23 Ketes, Hasor me Itnan,
JOS 15:24 Sif, Telem me Pealot,
JOS 15:25 Hasor-hatata me Keriot-hesron, iei Hasor,
JOS 15:26 Amam, Sema me Molota,
JOS 15:27 Hasar-kata, Hesmon me Pet-pelet,
JOS 15:28 Hasar-sual, Peer-sepa me Pisiotia,
JOS 15:29 Paala, Iim me Esem,
JOS 15:30 Eltolat, Chesil me Horma,
JOS 15:31 Siklak, Matmana me Sansana,
JOS 15:32 Lepaot, Silim, Ain me Rimon, ükükür meinisin rüe me tiu telinimw fiti wisoposopur.
JOS 15:33 Nge iten ekewe telinimw lon ewe fanü tekison: Estaol, Sora me Asna,
JOS 15:34 Sanoa, En-kanim, Tapua me Enam,
JOS 15:35 Jarmut, Atullam, Soko me Aseka,
JOS 15:36 Sa-araim, Atitaim, Ketera me Keterotaim, ükükür meinisin engol me rüanü telinimw fiti wisoposopur.
JOS 15:37 Iwe, pwal Senan, Hatasa me Miktalkat,
JOS 15:38 Tilean, Mispa me Jokteel,
JOS 15:39 Lakis, Poskat me Eklon,
JOS 15:40 Kapon, Lamam me Chitlis,
JOS 15:41 Keterot, Pet-takon, Naama me Maketa, ükükür meinisin engol me wonu telinimw fiti wisoposopur.
JOS 15:42 Iwe, pwal Lipna, Eter me Asan,
JOS 15:43 Ifta, Asna me Nesip,
JOS 15:44 Keila, Aksip me Maresa, ükükür meinisin tiu telinimw fiti wisoposopur.
JOS 15:45 Iwe, pwal Ekron me telinimwan me wisoposopun,
JOS 15:46 pwal ekewe telinimw meinisin ünükün Astot fiti wisoposopur seni Ekron tori ewe mataulap.
JOS 15:47 Iwe, pwal Astot me Kasa fiti telinimwer me wisoposopur tori ewe öüwö mi nom won ewe kiän Isip me arosetin ewe mataulap.
JOS 15:48 Iwe, ikkei iten ekewe telinimw lon ewe fanü mi chukuchukutä: Samir, Jatir me Soko,
JOS 15:49 Tana me Kiriat-sefer, iei Tepir,
JOS 15:50 Anap, Estemo me Anim,
JOS 15:51 Kosen, Holon me Kilo, ükükür meinisin engol me eu telinimw fiti wisoposopur.
JOS 15:52 Iwe, pwal Arap, Tuma me Esan,
JOS 15:53 Janim, Pet-tapua me Afeka,
JOS 15:54 Humta, Kiriat-arpa, iei Hepron, pwal Sior, ükükür meinisin tiu telinimw fiti wisoposopur.
JOS 15:55 Pwal Maon, Karmel, Sif me Jutta,
JOS 15:56 Jesreel, Jokteam me Sanoa,
JOS 15:57 Kain, Kipea me Timna, ükükür meinisin engol telinimw fiti wisoposopur.
JOS 15:58 Iwe, pwal Halul, Pet-sur me Ketor,
JOS 15:59 Ma-arat, Pet-anot me Eltekon, ükükür meinisin wonu telinimw fiti wisoposopur.
JOS 15:60 Iwe, Kiriat-paal, iei Kiriat-jearim, pwal Rapa, ükükün ruu telinimw fiti wisoposopur.
JOS 15:61 Iwe, ikkei iten ekewe telinimw lon ewe fanüapö: Pet-arapa, Mitin me Sekaka,
JOS 15:62 Nipsan, ewe telinimwen salt me Enketi, ükükür meinisin wonu telinimw fiti wisoposopur.
JOS 15:63 Nge ekewe aramasen Juta resap tongeni asüela ekewe chon Jepus mi imweimw lon Jerusalem. Iei mine ekewe chon Jepus ra nomofengen me ekewe aramasen Juta lon Jerusalem tori ikenai.
JOS 16:1 Iwe, iei inetin mwirimwirin Josef fanü: Kiännin me peliör a poputä seni ewe chanpupu Jortan ünükün Jeriko peliötiuen ekewe kolukun Jeriko. Seni Jeriko a feilong lon ewe fanüapö o feitä lon ewe fanü mi chukuchukutä tori Petel.
JOS 16:2 Seni Petel a pwerela tori Lus o pwerela tori Atarot, iei fanüen ekewe chon Ark.
JOS 16:3 Mürin a pweretiu ngeni lotou tori kiännin fanüen chon Jaflet, pwal tori kiännin Pet-horon-fan, a pwal tori Keser o müchütiu me ren ewe mataulap.
JOS 16:4 Iei ewe fanü ekewe mwirimwirin Manasa me Efraim nöün Josef kewe mwän ra angei.
JOS 16:5 Iwe, iei fanüen chon ewe ainangen Efraim lon tettelin ar kewe famili: Kiännin fanüer seni Atarot-atar feila ngeni ötiu tori Pet-horon-asan.
JOS 16:6 Iwe, ewe kiä a pwerela seni ikenan tori ewe matau watte. Nge ewe telinimw Mikmetat a nom won kiännin me efeng. Mürin ewe kiä mi pwere ngeni ötiu a pwelila ngeni Tanat-silo o pwerela peliötiu tori Janoa.
JOS 16:7 Mürin a pweretiu seni Nanoa tori Atarot, pwal tori Naara, a pwal akü Jeriko o müchütiu me ren ewe chanpupu Jortan.
JOS 16:8 Nge ewe kiä a pwal pwerela seni Tappua ngeni lotou tori ewe öüwö Kana o müchütiu me ren ewe matau watte. Iei ükükün fanüen chon ewe aingangen Efraim lon tettelin ar kewe famili,
JOS 16:9 chufengen me ekewe telinimw mi imwüla fän iter lon fanüen chon ewe ainangen Manasa, eu me eu telinimw fiti wisoposopun.
JOS 16:10 Nge resap asüela ekewe chon Kanaan mi nom lon Keser. Iei mine ekewe chon Kanaan ra nonom lein chon ewe ainangen Efraim tori ikenai, nge ra angang weires ren än aramas nöüniir amanau.
JOS 17:1 Iwe, iei ewe fanü mi ainet ngeni chon ewe ainangen Manasa nöün Josef mwänichi. Nge Makir nöün Manasa mwänichi semen Kiliat, a inetini Kiliat me Pasan ra nom peliötiuen ewe chanpupu Jortan, pun i eman chon maun mi iteföüla.
JOS 17:2 Nge ewe fanü mi nom pelilotoun ewe chanpupu Jortan a pwal ainet ngeni lusun chon ewe ainangen Manasa lon tettelin ar kewe famili: Apieser, Helek, Asriel, Sekem, Hefer me Semita. Ikkei ir ekewe mwän mwirimwirin Manasa nöün Josef we mwän lon tettelin ar kewe famili.
JOS 17:3 Nge Selofeat nöün Hefer we mwän esap wor nöün mwän, pwe a chök wor nöün fefin. Iwe, Selofeat nöün Hefer we mwän, nge Hefer nöün Kiliat, nge Kiliat nöün Makir, nge Makir nöün Manasa we mwän. Iwe, ikkei iten nöün Selofeat kewe fefin: Mala, Noa, Hokla, Milka me Tirsa.
JOS 17:4 Ra feito ren ewe souasor Eleasar, ren Josua nöün Nun we mwän, pwal ren ekewe souemwen o üreniir, “Ewe Samol mi Lapalap a allük ngeni Moses, pwe epwe ngenikem fanüem usun chök märärim kewe mwän.” Iei mine Josua a ngeniir fanüer me lein fanüen pwin semer, usun ewe Samol mi Lapalap a allük.
JOS 17:5 Iei popun chon ewe ainangen Manasa ra sereni engol kinikinin fanü lükün ewe fanü Kiliat me Pasan ra nom ötiuen ewe chanpupu Jortan,
JOS 17:6 pokiten mwirimwirin Manasa kewe fefin ra pwal angei fanüer usun chök ekewe mwän. Nge ewe fanü Kiliat a ainet ngeni ekewe lusun chon ewe ainangen Manasa.
JOS 17:7 Iwe, kiännin fanüen Manasa a popuetä seni Aser tori Mikmeta mi nom ötiuen Sikem. Mürin ewe kiä a pwerela ngeni peliör tori fanüen chon En-tapua.
JOS 17:8 Iwe, Manasa a fanüeni ewe fanü Tapua, nge ewe telinimw Tapua mi nom won kiännin fanüen chon ewe ainangen Manasa än chon ewe ainangen Efraim.
JOS 17:9 Mürin, ewe kiä a pweretiu tori ewe öüwö Kana. Iwe, ekewe telinimw peliörün ewe öüwö än chon ewe ainangen Efraim, nge ra nom lein ekewe telinimwen chon ewe ainangen Manasa. Mürin kiännin fanüer a pwerela peliefengin ewe öüwö o müchütiu me ren ewe mataulap.
JOS 17:10 Iwe, ewe fanü mi nom ör fanüen chon ewe ainangen Efraim, nge ewe fanü mi nom efeng fanüen chon ewe ainangen Manasa, nge ewe mataulap kiännin fanüer me pelilotou. Iwe, kiännin fanüer me efeng fanüen chon Aser, nge kiännin fanüer me ötiu fanüen chon Isakar.
JOS 17:11 Iwe, a pwal wor än Manasa telinimw lon fanüen Isakar me Aser iter: Pet-sean me Ipleam fiti wisoposopur, pwal ekewe telinimw Tor me Entor, Taanak me Mekito fiti chor me wisoposopur, pwal eu leülüngatin ewe fanü Nafat.
JOS 17:12 Nge chon ewe ainangen Manasa resap tongeni eäni ekewe telinimw, pun ekewe chon Kanaan ra chök amwöchümwöchütiu le nom lon ewe fanü.
JOS 17:13 Nge lupwen ekewe aramasen Israel ra pöchökülela, resap asüela ekewe chon Kanaan meinisin, nge ra chök aweiresiir ren angangochou.
JOS 17:14 Iwe, chon ewe ainangen Josef ra üreni Josua, “Pwota ka ngenikem eu chök kinikinin fanü pwe fanüem? Nge äm aia kon chomong, pun ewe Samol mi Lapalap a fokun afeiöchükem.”
JOS 17:15 Iwe, Josua a üreniir, “Are ämi chon ewe ainangen Efraim oua kon chomong, nge fanüemi a kükün ngenikemi, oupwe feitä ren ewe wöllap, oupwe limeti ewe fanü fän itemi, ewe fanüen chon Peris me chon Refa.”
JOS 17:16 Nge chon ewe ainangen Josef ra apasa, “Ewe fanü mi chukuchukutä esap naf ngenikem. Nge ekewe chon Kanaan meinisin mi nom lon ewe maasies a wor war woken seni mächä, chokewe mi nom Pet-sean pwal lon wisoposopun me chokewe mi nom lon ewe lemolun Jesreel.”
JOS 17:17 Mürin, Josua a üreni chon ekewe ainangen Efraim me Manasa, “Ämi oua kon chomong, oua pwal pöchökül. Ousap fanüeni eu chök fanü,
JOS 17:18 nge oupwe pwal fanüeni ewe fanü mi chukuchukutä. Inamwo are ewe fanü a wöllap, oupwe limeti o fanüeni tori leamüchülan kiännin. Pun oupwe asüela ekewe chon Kanaan, inamwo are a wor war woken seni mächä, are ra pwal pöchökül.”
JOS 18:1 Mürin, unusen ewe mwichen aramasen Israel ra mwichefengen lon Silo o aüetä ewe imwenfe sen mangaku ikenan. Iwe, ewe fanü mi nom mwer a oola,
JOS 18:2 nge mi chüen wor fisu ainang me lein ekewe ainangen Israel esap mwo ainet ngeniir fanüer.
JOS 18:3 Iei mine Josua a üreni ekewe aramasen Israel, “Pwota ina saromangemi le feila o fanüeni ewe fanü ewe Samol mi Lapalap än ämi kewe lewo we Kot a ngenikemi?
JOS 18:4 Oupwe filätä ülüman mwän seni eu me eu ainang. Üpwe tinirela pwe repwe fetalfeil lon unusen ewe fanü o makei tichikin lapalapan, nge repwe anomu lon ar ekiek meni kinikin epwe öchiti eu me eu ainang. Mürin, repwe liwinto rei.
JOS 18:5 Repwe ineti ewe fanü lon fisu kinikin. Iwe, chon ewe ainangen Juta repwe chök nom lon fanüer me ör, nge chon ewe ainangen Josef repwe nom lon fanüer me efeng.
JOS 18:6 Nge ämi oupwe alapalapa ewe fanü lon fisu kinikin o uwato ewe alapalap rei ikei. Mürin üpwe ütti üttiemi me fän mesen ewe Samol mi Lapalap ach we Kot.
JOS 18:7 Nge esap wor kinikinin fanüen chon ewe ainangen Lefi me leimi, pun ewe wisen souasor ngeni ewe Samol mi Lapalap iei wiser. Nge chon ekewe ainangen Kat me Rupen pwal esopun ewe ainangen Manasa ra fen angei fanüer me peliötiuen ewe chanpupu Jortan, Moses nöün ewe Samol mi Lapalap chon angang a ngeniir.”
JOS 18:8 Iwe, lupwen ekewe mwän ra popuetä ar sai pwe repwe makei tichikin lapalapen ewe fanü, Josua a öüröüreer o üreniir, “Oupwe fetalfeil lon ewe fanü o makei tichikin lapalapan. Mürin oupwe liwinto rei. Iwe, üpwe ütti üttiemi me fän mesen ewe Samol mi Lapalap ikei lon Silo.”
JOS 18:9 Iei mine ekewe mwän ra feila o fetalfeil lon ewe fanü. Ra makeelong lon eu puk lapalapen ewe fanü pwal eu me eu kewe telinimw lon ekewe fisu kinikin. Mürin ra liwinto ren Josua lon Silo ewe ia ra nom ie.
JOS 18:10 Nge Josua a ütti üttier fanü me fän mesen ewe Samol mi Lapalap lon Silo. Mürin a aineti ewe fanü o ngeni eu me eu kewe lusun ainangen Israel inetin.
JOS 18:11 Iwe, aeuin kinikinin ewe fanü a ainet ngeni chon ewe ainangen Peniamin a aükük ngeni ükükün ar kewe famili. Kinikinin fanüer a nom lefilen fanüen chon ekewe ainangen Juta me Josef.
JOS 18:12 Iwe, kiännin fanüer me peliefeng a popuetä ren ewe chanpupu Jortan. Mürin a feitä won ewe chukuchukutä peliefengin Jeriko, a pwal feitä o pwerela ngeni lotou won ewe fanü mi chukuchukutä o müchütiu lon ewe fanüapön Pet-awen.
JOS 18:13 Nge seni ikenan ewe kiä a pwerela ngeni ör wenewen ngeni Lus tori won chukuchukutän Lus, iei Petel. Mürin, ewe kiä a feitiu won ewe chuk mi nom peliörün Pet-horon-fan tori Atarot-atar.
JOS 18:14 Nge lepelian me lotou ewe kiä a pwelitiu ngeni ör seni ewe chuk mi nom ör sasape ngeni Pet-horon, nge a müchütiu me Kiriat-paal, iei Kiriat-jearim, eu telinimwen chon ewe ainangen Juta. Iei kiännin me pelilotou.
JOS 18:15 Iwe, kiännin me peliör a popueta me lesopun Kiriat-jearim mi nom lotou o pwerela tori ekewe koluk mi puächetä me lon Neftoa.
JOS 18:16 Mürin, ewe kiä a feitiu fäsonun ewe chuk mi sapechöchö ngeni ewe lemolun Hinnom mi nom peliefengin müchütiuen ewe lemolun Refaim. A pwal fitätiu ewe lemolun Hinnom peliörün ekewe chukun chon Jepus o feitiu tori En-rokel.
JOS 18:17 Mürin, ewe kiä a pwelila ekis ngeni efeng o pwerela tori Ensemes. Seni ikenan a pwerela tori Kelilot mi sasape ngeni ewe palen Atumim. Mürin a feitiu tori ewe fau föün Pohan nöün Rupen we mwän.
JOS 18:18 A pwal pwerela peliefengin won ekewe chukuchukutä sasape ngeni ewe lemolun Jortan o feitiu tori ewe lemol.
JOS 18:19 Mürin, ewe kiä a pwerela peliefengin won ekewe chukuchukutän Pet-hokla o müchütiu me peliefengin ewe Setin Mäla amüchütiuen ewe chanpupu Jortan me ör. Iei kiännin me peliör.
JOS 18:20 Nge ewe chanpupu Jortan kiännin me peliötiu. Iei unusen pwelin kiännin fanüen chon ewe ainangen Peniamin a aükük ngeni ükükün ar kewe famili.
JOS 18:21 Iwe, ikkei iten ekewe telinimwen chon ewe ainangen Peniamin a aükük ngeni ükükün ar kewe famili: Jeriko, Pet-hokla me Emek-kesis,
JOS 18:22 Pet-arapa, Semaraim me Petel,
JOS 18:23 Awim, Para me Ofra,
JOS 18:24 Chefar-amoni, Ofni me Kepa, ükükür meinisin engol me ruu telinimw fiti wisoposopur.
JOS 18:25 Pwal Kipeon, Rama me Peerot,
JOS 18:26 Mispa, Chefira me Mosa,
JOS 18:27 Rekem, Irpeel me Tarala,
JOS 18:28 Sela, Haelef me Jepus, iei Jerusalem, Kipea me Kiriat-jearim, ükükür meinisin engol me rüanü telinimw fiti wisoposopur. Iei fanüen chon ewe ainangen Peniamin a aükük ngeni ükükün ar kewe famili.
JOS 19:1 Iwe, aruuen kinikinin ewe fanü a ainet ngeni chon ewe ainangen Simeon a aükük ngeni ükükün ar kewe famili. Nge fanüer a nom lukalapen fanüen chon ewe ainangen Juta.
JOS 19:2 Iwe, iei inetir me lon ewe fanü ekei telinimw iter: Peer-sepa, Sepa me Molata,
JOS 19:3 Hasar-sual, Pala me Esem,
JOS 19:4 Eltolat, Petul me Horma,
JOS 19:5 Siklak, Pet-markopot me Hasar-susa,
JOS 19:6 Pet-lepaot me Saruhen, ükükür meinisin engol me ülüngat telinimw fiti wisoposopur.
JOS 19:7 Pwal Ain, Rimmon, Eter me Asan, ükükür meinisin rüanü telinimw fiti wisoposopur,
JOS 19:8 me ekewe sop meinisin mi pweli ekei telinimw tori Paalat-peer me Rama lon ewe fanü Nekep. Iei inetin chon ewe ainangen Simeon me lon ewe fanü a aükük ngeni ükükün ar kewe famili.
JOS 19:9 Pokiten fanüen chon ewe ainangen Juta a kon watte ngeniir, chon ewe ainangen Simeon ra angei eu kinikin me lukalapen fanüer pwe inetir.
JOS 19:10 Iwe, aülüngatin kinikinin ewe fanü a ainet ngeni chon ewe ainangen Sepulon a aükük ngeni ükükün ar kewe famili. Iwe, ükükün ewe fanü ra angei a tori Sarit.
JOS 19:11 Seni ikenan ewe kiä a pwerela ngeni lotou o feila ngeni Mareal, a akkü Tapeset o tori ewe öüwö mi nom peliötiuen Jokneam.
JOS 19:12 Nge seni Sarit ewe kiä a pwal pwerela ngeni ötiu tori kiännin Chislot-tapor. Seni ikenan a pwerela tori Taperat o feitä tori Jafia.
JOS 19:13 Seni ikenan ewe kiä a pwerela ngeni ötiu tori Kat-hefer me Etkasin, nge lupwen a pwerela tori Rimmon, a pwelila ngeni Nea.
JOS 19:14 Iwe, me peliefeng ewe kiä a pwerela ngeni Hanaton o müchütiu me lemolun Iftahel.
JOS 19:15 Nge lükün ekei telinimw a pwal wor ekoch iter: Katta, Nahalal, Simron, Itala me Petleem , ükükün engol me ruu telinimw fiti wisoposopur.
JOS 19:16 Iei fanüen chon ewe ainangen Sepulon, ar kewe telinimw fiti wisoposopur, a aükük ngeni ükükün ar kewe famili.
JOS 19:17 Iwe, arüanün kinikinin ewe fanü a ainet ngeni chon ewe ainangen Isakar a aükük ngeni ükükün ar kewe famili.
JOS 19:18 Iwe, a pachelong lon kiännin fanüer ekei telinimw: Jesreel, Chesulot me Sunem,
JOS 19:19 Hafaraim, Sion me Anaharat,
JOS 19:20 Rapit, Kision me Epes,
JOS 19:21 Remet, En-kanim, En-hata me Pet-pases.
JOS 19:22 Ewe kiä a pwal akkü Tapor, Sahasuma me Pet-semes o müchütiu me arun ewe chanpupu Jortan. A wor ükükün engol me wonu telinimw fiti wisoposopur.
JOS 19:23 Iei fanüen chon ewe ainangen Isakar, ar kewe telinimw fiti wisoposopur, a aükük ngeni ükükün ar kewe famili.
JOS 19:24 Iwe, alimuen kinikinin ewe fanü a ainet ngeni chon ewe ainangen Aser a aükük ngeni ükükün ar kewe famili.
JOS 19:25 Iwe, a pachelong lon kiännin fanüer ekei telinimw: Helkat, Hali, Peten me Aksaf,
JOS 19:26 Alamelek, Amat me Misal. Nge me pelilotou ewe kiä a akkü Karmel me Sihor-lipnat.
JOS 19:27 Mürin, ewe kiä a pwelila ngeni ötiu, a pwerela tori Pet-takon o akkü Sepulon pwal ewe lemolun Iftahel, a pwerela efeng tori Pet-emek me Neier. Mürin a sopwela le pwerela efeng tori Kapul,
JOS 19:28 Epron, Rehop, Hamon me Kana tori Sitonlap.
JOS 19:29 Mürin ewe kiä a pwelila tori Rama pwal tori ewe telinimw mi pöchökül tittin itan Tirus. Mürin, ewe kiä a pwelila tori Hosa o müchütiu me arun ewe mataulap. Iwe, a pwal pachelong ekei telinimw iter: Mahalap me Aksip,
JOS 19:30 Uma, Afek me Rehop, ükükün rüe me ruu telinimw fiti wisoposopur.
JOS 19:31 Iei fanüen chon ewe ainangen Aser, ar kewe telinimw fiti wisoposopur, a aükük ngeni ükükün ar kewe famili.
JOS 19:32 Iwe, awonuen kinikinin ewe fanü a ainet ngeni chon ewe ainangen Naftali a aükük ngeni ükükün ar kewe famili.
JOS 19:33 Kiännin a pwerela seni Helef tori ewe irä ook lon Saananim, a pwal pwerela tori Atami-nekep me Japneel tori Lakum, nge a müchütiu me arun ewe chanpupu Jortan.
JOS 19:34 Mürin ewe kiä a pwelila ngeni lotou tori Asnot-tapor. Nge seni ikenan a pwerela tori Hukok, a akkü Sepulon me peliör o Aser me pelilotou, pwal ewe chanpupu Jortan me peliötiu.
JOS 19:35 Iwe, ar kewe telinimw mi pöchökül tittir iter: Sitim, Ser, Hamat, Rakat me Kineret,
JOS 19:36 Atama, Rama me Hasor,
JOS 19:37 Ketes, Etrei me En-hasor,
JOS 19:38 Jiron, Miktalel, Horem, Pet-anat me Pet-semes, ükükün engol me tiu telinimw fiti wisoposopur.
JOS 19:39 Iei fanüen chon ewe ainangen Naftali, ar kewe telinimw fiti wisoposopur, a aükük ngeni ükükün ar kewe famili.
JOS 19:40 Iwe, afisuen kinikinin ewe fanü a ainet ngeni chon ewe ainangen Tan a aükük ngeni ükükün ar kewe famili.
JOS 19:41 Ikkei iten ekewe telinimw mi nom lon kiännin fanüer: Sora, Estaol me Ir-semes,
JOS 19:42 Sa-alapin, Aijalon me Itla,
JOS 19:43 Elon, Timna me Ekron,
JOS 19:44 Elteke, Kipeton me Paalat,
JOS 19:45 Jehut, Pene-perak me Kat-rimon,
JOS 19:46 Me-jarkon me Rakon, pwal ewe fanü mi sasape ngeni Jopa.
JOS 19:47 Nge lupwen ekewe chon Tan resap tongeni färelong lon ewe fanü, ra feitä o maun ngeni Lesem. Mürin ar liapeni ewe telinimw o niela chon, ra tolong o imweimw lon. Nge ra aita ngeni Lesem iten semelaper we Tan.
JOS 19:48 Iei fanüen chon ewe ainangen Tan, ar kewe telinimw fiti wisoposopur, a aükük ngeni ükükün ar kewe famili.
JOS 19:49 Iwe, lupwen ra wes le aineti ekewe kinikinin fanü ngeni ekewe aramasen Israel pwe fanüer, ekewe aramasen Israel ra ngeni Josua nöün Nun we mwän eu fanü me lein fanüer pwe fanüan.
JOS 19:50 Iwe, fän än ewe Samol mi Lapalap allük ra ngeni Josua ewe telinimw a tüngor seniir. Ra ngeni ewe telinimw Timnat-sera mi nom won chukuchukutän ewe fanü Efraim. Iwe, a aüsefälietä ewe telinimw o imweimw lon.
JOS 19:51 Iwe, ikkei ekewe kinikinin fanü ewe souasor Eleasar me Josua nöün Nun we mwän, pwal souemwenin än semer kewe cho seni ekewe ainangen Israel ra aineti ren üttüt me fän mesen ewe Samol mi Lapalap lon Silo me leasamalapen ewe imwmangaku ia aramas ra churi Kot ie. Iei usun ra wes le aineti ewe fanü.
JOS 20:1 Mürin, ewe Samol mi Lapalap a kapas ngeni Josua,
JOS 20:2 “Kopwe üreni ekewe aramasen Israel pwe repwe filätä ekewe telinimwen op, usun üa fen allük ngeni Moses pwe epwe ürenikemi.
JOS 20:3 Are eman aramas a niela eman fän chechengau, nge esap fän letipan, epwe tongeni sü ngeniir pwe epwe op seni ewe mi kütta liwinin chan aramasan.
JOS 20:4 Iwe, epwe tongeni sü ngeni eu lein ekewe telinimwen op, epwe ütä leasamalapan o apworausa ngeni ekewe souakomwen ewe telinimw mine a fis ngeni. Mürin, repwe emwenalong lon ewe telinimw o alenia pwe epwe nom rer.
JOS 20:5 Nge are ewe mi kütta liwinin chan aramasan a tapweri, ekewe souakom resap asechalong ewe mi niela eman aramas lepöün. Repwe tümwünü, pokiten a niela chon arun fän chechengau, nge esap oput i me mwan.
JOS 20:6 Iwe, ewe mi niela eman aramas epwe chök nom lon ewe telinimw tori a fis kapwüngün fän mesen ewe mwichen aramas. Nge lupwen ewe souasor mi lap mi wiseni ewe wis lon ewe fansoun a mäla, ina otun ewe aramas a tongeni liwiniti telinimwan we a sü seni.”
JOS 20:7 Iei mine ra aimwüela Ketes me lon Kalilea lon chukuchukutän ewe fanü Naftali me Sikem lon chukuchukutän ewe fanü Efraim, pwal Kiriat-arapa, iei Hepron lon chukuchukutän ewe fanü Juta me lotoun ewe chanpupu Jortan.
JOS 20:8 Nge ötiuen ewe chanpupu Jortan me Jeriko ra filätä Peser mi nom lon ewe fanüapö won ewe fanü mi sosonöch seni fanüen chon ewe ainangen Rupen, nge Ramot lon Kiliat seni fanüen chon ewe ainangen Kat, pwal Kolan lon Pasan seni fanüen chon ewe ainangen Manasa.
JOS 20:9 Ikkei ekewe telinimwen op mi kefilitä fän iten ekewe aramasen Israel meinisin, pwal fän iten chon ekis mi siamü lefiler. Pun iteiten eman me eman mi niela eman aramas fän chechengau a tongeni sü ngeniir, pwe esap mäla ren ätewe mi kütta liwinin chan aramasan, tori a fis kapwüngün fän mesen ewe mwichen aramas.
JOS 21:1 Iwe, ekewe souemwenin än Lefi cho ra feito ren ewe souasor Eleasar, ren Josua nöün Nun we mwän, pwal ren souemwenin än ekewe ainangen Israel cho.
JOS 21:2 Iwe, ra üreniir me lon Silo lon ewe fanü Kanaan, “Ewe Samol mi Lapalap a allük ngeni Moses pwe epwe wor telinimwem aipwe imweimw lon, pwal ekewe fanü ünükür fän iten nöüm man.”
JOS 21:3 Iei mine ekewe aramasen Israel ra ngeni chon ewe ainangen Lefi ekei telinimw pwal ekewe fanü ünükür fän iten nöür man seni lon fanüer fän än ewe Samol mi Lapalap allük.
JOS 21:4 Iwe, ekewe familien lon ewe eterekesin Kohat seni ewe ainangen Lefi ra akomwen angei inetir telinimw ren üttüt. Ekewe famili ir mwirimwirin ewe souasor Aaron, ra angei ren pwüngün üttüt ükükün engol me ülüngat telinimw seni chon ekewe ainangen Juta, Simeon me Peniamin.
JOS 21:5 Nge ekewe lusun me lon ewe eterekesin Kohat ra angei ren pwüngün üttüt ükükün engol telinimw seni chon ekewe ainangen Efraim, Tan me esopun ewe ainangen Manasa.
JOS 21:6 Iwe, ekewe famili lon ewe eterekesin Kerson ra angei ren pwüngün üttüt ükükün engol me ülüngat telinimw seni chon ekewe ainangen Isakar, Aser me Naftali, pwal seni esopun ewe ainangen Manasa me lon Pasan.
JOS 21:7 Nge ekewe famili lon ewe eterekesin Merari ra angei ükükün engol me ruu telinimw seni chon ekewe ainangen Rupen, Kat me Sepulon.
JOS 21:8 Iwe, ekewe aramasen Israel ra ngeni chon ewe ainangen Lefi ekei telinimw, pwal ekewe fanü ünükür fän iten nöür man ren pwüngün üttüt, usun ewe Samol mi Lapalap a fen allük ngeni Moses.
JOS 21:9 Ikkei iten ekewe telinimw chon ekewe ainangen Juta me Simeon
JOS 21:10 ra ngeni ekewe mwirimwirin Aaron, ir seni ewe eterekesin Kohat seni ewe ainangen Lefi, pun ewe üttüt a toriir akom.
JOS 21:11 Iwe, ra ngeniir ewe telinimw än Arpa. (Ewe mwän Arpa semen Anak.) Iei ewe telinimw a iteni Hepron, a nom won chukuchukutän ewe fanü Juta. Ra pwal ngeniir ewe fanü ünükün fän iten nöür man.
JOS 21:12 Nge ekewe tanipi ünükün ewe telinimw me wisoposopun kewe ra fen ngeni Kalep nöün Jefune we mwän pwe fanüan.
JOS 21:13 Iei usun ra ngeni mwirimwirin ewe souasor Aaron ewe telinimw Hepron, ewe telinimwen op fän iten eman mi niela eman aramas, pwal ekewe fanü ünükün fän iten nöür man. Ra pwal ngeniir Lipna,
JOS 21:14 Jattir me Estemoa,
JOS 21:15 Helon me Tepir,
JOS 21:16 Ain, Jutta me Pet-semes pwal ekewe fanü ünükür fän iten nöür man, ükükün tiu telinimw seni ekei ruu ainang.
JOS 21:17 Iwe, seni ewe ainangen Peniamin ra ngeniir Kipeon me Kepa,
JOS 21:18 Anatot me Almon pwal ekewe fanü ünükür fän iten nöür man, ükükün rüanü telinimw.
JOS 21:19 Iwe, mwirimwirin ewe souasor Aaron ra angei ükükün engol me ülüngat telinimw pwal ekewe fanü ünükür fän iten nöür man.
JOS 21:20 Iwe, ekewe lusun familien lon ewe eterekesin Kohat seni ewe ainangen Lefi ra angei telinimwer kewe seni ewe ainangen Efraim.
JOS 21:21 Iwe, ra ngeniir Sikem ewe telinimwen op, pwal ekewe fanü ünükün fän iten nöür man lon chukuchukutän ewe fanü Efraim. Ra pwal ngeniir Keser,
JOS 21:22 Kipsaim me Pet-horon, pwal ekewe fanü ünükür fän iten nöür man, ükükün rüanü telinimw.
JOS 21:23 Nge seni ewe ainangen Tan ra ngeniir Elteke me Kipeton,
JOS 21:24 Aijalon me Kat-rimon, pwal ekewe fanü ünükür fän iten nöür man, ükükün rüanü telinimw.
JOS 21:25 Iwe, seni esopun ewe ainangen Manasa ra ngeniir Taanak me Kat-rimon, pwal ekewe fanü ünükür fän iten nöür man, ükükün ruu telinimw.
JOS 21:26 Iwe, ekewe lusun familien lon ewe eterekesin Kohat ra angei ükükün engol telinimw, pwal ekewe fanü ünükür fän iten nöür man.
JOS 21:27 Nge chon ewe eterekesin Kerson, ir seni ewe ainangen Lefi, ra angei seni esopun ewe ainangen Manasa ewe telinimw Kolan lon Pasan ewe telinimwen op, pwal Pestera me ekewe fanü ünükür fän iten nöür man, ükükün ruu telinimw.
JOS 21:28 Iwe, seni ewe ainangen Isakar ra angei Kision me Taperat,
JOS 21:29 Jarmut me En-kanim pwal ekewe fanü ünükür fän iten nöür man, ükükün rüanü telinimw.
JOS 21:30 Nge seni ewe ainangen Aser ra pwal angei ekewe telinimw Misal me Apton,
JOS 21:31 Helkat me Rehop, pwal ekewe fanü ünükür fän iten nöür man, ükükün rüanü telinimw.
JOS 21:32 Iwe, seni ewe ainangen Naftali ra angei ekewe telinimw Kates lon Kaliläa, ewe telinimwen op, Hamot-tor me Kartan, pwal ekewe fanü ünükür fän iten nöür man, ükükün ülüngat telinimw.
JOS 21:33 Iwe, ekewe familien lon ewe eterekesin Kerson ra angei ükükün engol me ülüngat telinimw, pwal ekewe fanü ünükür fän iten nöür man.
JOS 21:34 Iwe, ekewe lusun chon ewe ainangen Lefi, ir familien lon ewe eterekesin Merari ra angei seni ewe ainangen Sepulon ekewe telinimw Jokneam me Karta,
JOS 21:35 Timna me Nahalal, pwal ekewe fanü ünükür fän iten nöür man, ükükün rüanü telinimw.
JOS 21:36 Iwe, seni ewe ainangen Rupen ra angei ekewe telinimw Peser me Jahas,
JOS 21:37 Ketemot me Mefaat, pwal ekewe fanü ünükür fän iten nöür man, ükükün rüanü telinimw.
JOS 21:38 Nge seni ewe ainangen Kat ra angei ekewe telinimw Ramot lon Kiliat ewe telinimwen op, pwal Mahanaim,
JOS 21:39 Hespon me Jaser, pwal ekewe fanü ünükür fän iten nöür man, ükükün rüanü telinimw.
JOS 21:40 Iwe, ekewe familien lon ewe eterekesin Merari, ir lusun chon ewe ainangen Lefi, ra angei ren üttüt ükükün engol me ruu telinimw.
JOS 21:41 Iwe, chon ewe ainangen Lefi ra angei seni lein fanüen ekewe aramasen Israel ükükün faik me walu telinimw, pwal ekewe fanü ünükür fän iten nöür man.
JOS 21:42 Iwe, eu me eu ekei telinimw a wor fanü pwelin ünükün fän iten nöür man. Iei usun lapalapen ekei telinimw meinisin.
JOS 21:43 Iei usun ewe Samol mi Lapalap a ngeni chon Israel unusen ewe fanü a fen pwon fän akapel ngeni ar kewe lewo. Iwe, ra angei fanüer o nonom lon.
JOS 21:44 Iwe, ewe Samol mi Lapalap a fang ngeniir kinamwe ekis meinisin, usun a fen pwon ngeni ar kewe lewo. Esap wor eman chon oputeer a tongeni ü ngeniir, pun ewe Samol mi Lapalap a awinner, pwe ra akufu chon oputeer meinisin.
JOS 21:45 Iwe, ekewe pwon meinisin ewe Samol mi Lapalap a eäni ngeni ekewe chon Israel ra pwönüetä. Esap wor eu me leir esap pwönüetä.
JOS 22:1 Mürin, Josua a körifengeni chon ekewe ainangen Rupen me Kat pwal esopun ewe ainangen Manasa.
JOS 22:2 Iwe, a üreniir, “Ämi oua tümwünü meinisin mine Moses nöün ewe Samol mi Lapalap we chon angang a allük ngenikemi, oua pwal aleasochisi aloi lon meinisin mine üa allük ngenikemi.
JOS 22:3 Seni ekewe fansoun ra la tori ikenai ousap likitala pwimi kewe. Oua pwal fokun aleasochisi ekewe allük än ewe Samol mi Lapalap ämi we Kot.
JOS 22:4 Iwe, iei ewe Samol mi Lapalap ämi we Kot a fang kinamwe ngeni pwimi kewe, usun a fen pwon ngeniir. Iei mine oupwe liwiniti leniemi lon fanüemi, ewe fanü Moses nöün ewe Samol mi Lapalap we chon angang a ngenikemi me ötiuen ewe chanpupu Jortan.
JOS 22:5 Oupwe fokun aleasochisi ekewe allük me pwüüng Moses nöün ewe Samol mi Lapalap we chon angang a allük ngenikemi: Oupwe echeni ewe Samol mi Lapalap ämi we Kot, oupwe föri letipan o aleasochis ngeni an kewe allük, oupwe pwal fitipacheiti o angang ngeni ren unusen lelukemi me unusen ngünümi.”
JOS 22:6 Iwe, Josua a afeiöchüür o tinirela. Nge ir ra liwiniti lenier.
JOS 22:7 Moses a fen ngeni ewe esopun ainangen Manasa fanüer me lon Pasan. Nge Josua a ngeni pwal ewe esopun ainangen Manasa fanüer me ünükün fanüen pwir me lon ewe fanü lotoun ewe chanpupu Jortan. Iwe, lupwen Josua a tinirela ngeni lenier o afeiöchüür,
JOS 22:8 a üreniir, “Oupwe liwiniti leniemi fän pisekisek, fän nöümi man mi chomong, fän silifer, kolt, piras me mächä, pwal fän üf mi chomong. Oupwe aineti ngeni pwimi kewe liapemi seni chon oputakemi.”
JOS 22:9 Mürin, chon ekewe ainangen Rupen me Kat pwal ewe esopun ainangen Manasa ra imwüfesen me ekewe aramasen Israel me lon Silo lon ewe fanü Kanaan o liwiniti lenier lon ewe fanü Kiliat. Pun iei wesewesen fanüer ra fanüeni fän än ewe Samol mi Lapalap allük ngeni Moses.
JOS 22:10 Iwe, lupwen chon ekewe ainangen Rupen me Kat pwal ewe esopun ainangen Manasa ra tori Kelilot aropen ewe chanpupu Jortan me lon ewe fanü Kanaan, ra senätä eu rongen asor mi fokun watte ikenan.
JOS 22:11 Iwe, ekewe aramasen Israel ra rong pwe chon ekewe ainangen Rupen me Kat pwal ewe esopun ainangen Manasa ra senätä eu rongen asor lekiännin ewe fanü Kanaan lon Kelilot arun ewe chanpupu Jortan won ewe pekin fanüen aramasen Israel.
JOS 22:12 Nge lupwen ekewe aramasen Israel ra rong ei pworaus, unusen ar mwich a chufengen lon Silo pwe repwe maun ngeniir.
JOS 22:13 Mürin, ekewe aramasen Israel ra tinala Pineas nöün ewe souasor Eleasar we mwän ren chon ekewe ainangen Rupen me Kat pwal ren ewe esopun ainangen Manasa lon ewe fanü Kiliat.
JOS 22:14 Nge engol samol ra eti Pineas, akaeman seni eu me eu ainangen Israel, pwal ir souemwenin ekewe famili lon ekewe eterekesin Israel.
JOS 22:15 Iwe, ra tori chon ekewe ainangen Rupen me Kat pwal ewe esopun ainangen Manasa me lon Kiliat o üreniir,
JOS 22:16 “Iei alon unusen än ewe Samol mi Lapalap we mwich: Pwota oua kirikiringau ngeni ewe Koten Israel? Pwota oua tok seni ewe Samol mi Lapalap o senätä eu rongen asor fän itemi ikenai lon ämi ü ngeni ewe Samol mi Lapalap?
JOS 22:17 Ifa usun, sisap mwo ker ren ewe tipis a fis me lon Peor, ewe tipis sisamwo limöch seni tori ikenai? Ifa usun, än ewe Samol mi Lapalap mwichen aramas esap fen feiengau ren mätter pokiten ewe tipis?
JOS 22:18 Ifa usun, oupwe le tok seni ewe Samol mi Lapalap ikenai? Nge are ämi oua ü ngeni ewe Samol mi Lapalap ikenai, i epwe song ngeni unusen ewe mwichen aramasen Israel lesor.
JOS 22:19 Nge are fanüemi esap öch ngeni ämi oupwe fel lon, oupwe feito pekito lon fanüen ewe Samol mi Lapalap, ewe ia an imwenfel seni mangaku a nom ie. Oupwe angei eu fanü fän itemi me lon fanüem. Nge ousap chök ü ngeni ewe Samol mi Lapalap, ousap pwal atolongakem le ü ngeni ren ämi senätä fän itemi eu rongen asor lükün ewe rongen asor än ewe Samol mi Lapalap ach we Kot.
JOS 22:20 Oupwe chechemeni, pwe lupwen Akan nöün Sera we mwän a aleasolap ngeni ewe allük ren an angei ekewe mettoch mi pin repwe kata, än Kot song a tori unusen ewe mwichen Israel. Sap Akan chök a mäla fän iten an tipis.”
JOS 22:21 Mürin, chon ekewe ainangen Rupen me Kat pwal ewe esopun ainangen Manasa ra üreni ekewe souemwenin ekewe famili lon Israel,
JOS 22:22 “Kot i ewe Samol mi Lapalap, ewe mi Manaman! Kot i ewe Samol mi Lapalap, ewe mi Manaman, a silei met popun äm föri ei föför, nge Israel epwe pwal silei. Are äm aia föri ei föför ren äm ü ngeni ewe Samol mi Lapalap ika ren äm aleasolap ngeni, ousap amanauakem ikenai.
JOS 22:23 Nge are aia senätä eu rongen asor pwe aipwe tok seni ewe Samol mi Lapalap, ika aia eäni asoren kek ika asoren mongö ika asoren kinamwe won, ewe Samol mi Lapalap epwe ngenikem liwinin äm tipis.
JOS 22:24 Nge wesewesen popun äm aia föri ei, seni äm niuokus, pwe lon ekan fansoun mwach mwirimwirimi repwe üreni mwirimwirim, ‘Ifa lefilemi me ewe Samol mi Lapalap ewe Koten Israel?
JOS 22:25 Pun ewe Samol mi Lapalap a föri pwe ewe chanpupu Jortan kiän lefilem me ämi chon ekewe ainangen Rupen me Kat. Esap wor wisemi me won ewe Samol mi Lapalap.’ Ren ei mwirimwirimi repwe aükätiu mwirimwirim le fel ngeni ewe Samol mi Lapalap.
JOS 22:26 Iei mine aia kapasfengen, ‘Ousipwe senätä eu rongen asor iei, sap fän iten asoren kek ika sokun asor.
JOS 22:27 Nge ei rongen asor epwe eu pisekin pwärätä lefilach pwal lefilen mwirimwirich, pwe äm aia wesewesen fel ngeni ewe Samol mi Lapalap lon imwan mi pin ren äm asoren kek me sokun asor, pwal asoren kinamwe, nge mwirimwirimi resap tongeni apasa ngeni mwirimwirim lon ekan fansoun mwach, pwe esap wor wiser me won ewe Samol mi Lapalap.’
JOS 22:28 Iwe, äm aia ekieki, are epwe iei alor ngenikem ika ngeni mwirimwirim lon ekan fansoun mwach, äm aipwe üreniir, ‘Oupwe nenengeni liosun än ewe Samol mi Lapalap rongen asor äm kewe lewo ra föri. Sap fän iten asoren kek ika sokun asor, ngei eu pisekin pwärätä lefilach me ämi’
JOS 22:29 Äm aisap fokun ekieki ei sokun, pwe aipwe ü ngeni ewe Samol mi Lapalap o tok seni ikenai ren äm senätä eu rongen asor fän iten asoren kek, asoren mongö me sokun asor lükün än ewe Samol mi Lapalap äm we Kot rongen asor mi nom mwen imwan imwenfel.”
JOS 22:30 Iwe, lupwen ewe souasor Pineas me ekewe samolun ewe mwichen aramas, ir souemwenin ekewe familien chon Israel mi eti, ra rong alon chon ekewe ainangen Rupen, Kat me Manasa, ra pwapwa ren.
JOS 22:31 Nge Pineas nöün ewe souasor Eleasar we mwän a üreniir, “Ikenai sia silei pwe ewe Samol mi Lapalap a nom lefilach, pun ämi ousap ü ngeni ewe Samol mi Lapalap. Ren ei oua amanaua ekewe aramasen Israel seni än ewe Samol mi Lapalap apwüng.”
JOS 22:32 Mürin, Pineas nöün ewe souasor Eleasar we mwän me ekewe samol ra liwin seni chon ekewe ainangen Rupen me Kat me lon ewe fanü Kiliat o liwinla ngeni ewe fanü Kanaan ren ekewe aramasen Israel. Iwe, ra uwei ngeniir ei pworaus.
JOS 22:33 Iwe, ei pworaus a apwapwai ekewe aramasen Israel. Ra mwareiti Kot, nge resap chüen kapas usun ar repwe maun ngeni chon ekewe ainangen Rupen me Kat o atai fanüer ia ra nom ie.
JOS 22:34 Nge chon ekewe ainangen Rupen me Kat ra aita ngeni ewe rongen asor “Pisekin Pwärätä”, pun ra apasa, “Iei eu pisekin pwärätä lefilach pwe ewe Samol mi Lapalap i Kot.”
JOS 23:1 Iwe, a la chomong fansoun mürin än ewe Samol mi Lapalap ngeni chon Israel kinamwe seni chon oputeer mi nom ünükür. Lon ei fansoun Josua a fokun chinlap.
JOS 23:2 Iwe, Josua a körifengeni chon Israel meinisin, nöür kewe souemwen me souakom, nöür kewe soukapwüng me nöür kewe meilap o üreniir, “Iei ngang üa fokun chinlap.
JOS 23:3 Ämi oua küna meinisin mine ewe Samol mi Lapalap ämi we Kot a föri ngeni ekei mwü meinisin fän itemi. Pun ewe Samol mi Lapalap ämi we Kot a maun fän itemi.
JOS 23:4 Nengeni, üa fen aineti ngenikemi fanüen chon ekewe mwü resamwo oola usun chök pwal fanüen chon ekewe mwü üa arosala chor, seni ewe chanpupu Jortan me ötiu tori ewe mataulap mi nom lotou, pwe fanüen ämi kewe ainang.
JOS 23:5 Iwe, ewe Samol mi Lapalap ämi we Kot epwe püsin tinirewu me mwemi, epwe pwal asürela, lupwen oupwe tolong lon fanüer, nge ämi oupwe fanüeni fanüer, usun ewe Samol mi Lapalap a fen pwon ngenikemi.
JOS 23:6 Iei mine oupwe fokun aleasochis o apwönüetä meinisin mine a mak lon än Moses we puken allük. Ousap fokun aleasolap ngeni.
JOS 23:7 Ousap chiechifengen me chon ekei mwü mi chüen nom leimi, ousap pwal föüni iten ar kewe kot ika eäniir akapel, ousap angang ngeniir ika fel ngeniir.
JOS 23:8 Nge oupwe fitipachei ewe Samol mi Lapalap ämi we Kot, usun oua fen föri tori ikenai.
JOS 23:9 Pun ewe Samol mi Lapalap a fen asüela me mwemi ekewe mwü watte o pöchökül. Nge tori ikenai esap wor eman aramas a tongeni ü ngenikemi.
JOS 23:10 Iwe, eman mwän me leimi epwe tongeni asüela engeröü mwän, pun ewe Samol mi Lapalap ämi we Kot a maun fän itemi usun a fen pwon ngenikemi.
JOS 23:11 Iei mine oupwe fokun afälikemi pwe oupwe echeni ewe Samol mi Lapalap ämi we Kot.
JOS 23:12 Nge are oupwe tok seni o pach ngeni chon ekewe mwü mi chüen nom leimi, are oupwe pwal pwüpwülüfengen me ir,
JOS 23:13 oupwe fokun silei pwe ewe Samol mi Lapalap ämi we Kot esap chüen asüela chon ekei mwü me mwemi. Nge ir repwe afeiengau ngenikemi usun chök eu lenien likatup ika eu sär, pwal usun chök metekin efoch wokun wichiwich eman a wichi ngeni sökürümi ika efoch fölün irafölüföl lon mesemi, tori oupwe rosola seni ewe fanü mi mürina, ewe Samol mi Lapalap ämi we Kot a ngenikemi.
JOS 23:14 Iwe, iei a tori fansoun ai üpwe le mäla. Ämi meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi mürina meinisin a pwon ngenikemi. Iteiten ekewe pwon a eäni ngenikemi ra pwönüetä, nge esap wor eu me leir esap pwönüetä.
JOS 23:15 Nge usun ewe Samol mi Lapalap ämi we Kot a apwönüetä ekewe pwon meinisin a eäni ngenikemi, iei usun epwe pwal atoto womi ekewe feiengau meinisin a kapas usun, tori epwe arosakemiila seni won ei fanü mi mürina a ngenikemi.
JOS 23:16 Are oua atai ewe pwon ewe Samol mi Lapalap ämi we Kot a eäni ngenikemi, are oupwe angang ngeni pwal ekoch kot o fel ngeniir, ewe Samol mi Lapalap epwe song ngenikemi. Oupwe müttir rosola seni ewe fanü mi mürina a ngenikemi.”
JOS 24:1 Mürin, Josua a emwichafengeni ekewe ainangen Israel meinisin lon Sikem. A körifengeni ekewe souakom, ekewe souemwen, ekewe soukapwüng me ekewe meilapen Israel. Iwe, ra feito fän mesen Kot.
JOS 24:2 Iwe, Josua a üreni ekewe aramasen Israel meinisin, “Iei alon ewe Samol mi Lapalap ewe Koten Israel, ‘Me lomlom, ämi kewe lewo ra nom pekilan ewe chanpupu Oifrat o fel ngeni pwal ekoch kot. Eman me leir itan Tera semen Apraham me Nahor.
JOS 24:3 Mürin üa angei Apraham ämi we lewo seni ewe fanü pekilan ewe chanpupu o emwenifeili lon ewe fanü Kanaan, üa pwal awora chomong mwirimwirin. Üa ngeni Apraham Isaak,
JOS 24:4 mürin üa ngeni Isaak Jakop me Esau. Iwe, üa ngeni Esau ewe chukuchukutän Etom pwe epwe fanüeni, nge Jakop me nöün kewe ra feila Isip.
JOS 24:5 Mürin üa tinala Moses me Aaron, üa pwal ariaföüü chon Isip ren sokun feiengau üa föri ngeniir. Nge mürin üa emwenikemiiwu.
JOS 24:6 Üa emwenawu ämi kewe lewo seni Isip. Nge ekewe chon Isip ra tapweriir fän war woken me chon wawa oris o toriir me ren ewe Setipar.
JOS 24:7 Iwe, lupwen ämi kewe lewo ra siö ngeniei, üa awora rochopwak lefiler me ekewe chon Isip, üa pwal föri pwe ewe matau a pwölürela o amopuur. Ämi oua silei mine üa föri ngeni ekewe chon Isip. Iwe, oua nom lon ewe fanüapö fansoun langatam.
JOS 24:8 Mürin üa emwenikemiila lon fanüen chon Amor mi nom ötiuen ewe chanpupu Jortan. Iwe, ra maun ngenikemi, nge ngang üa awinnakemi. Ämi oua fanüeni fanüer, nge ngang üa aroserela me mwemi.
JOS 24:9 Mürin, Palak ewe kingen Moap nöün Sippor we mwän a maun ngenikemi. Iwe, a titi Palam nöün Peor we mwän pwe epwe anümamauakemi.
JOS 24:10 Nge ngang üsap mochen aüselinga Palam, iei mine a afeiöchükemi. Iei usun üa amanauakemi seni Palak.
JOS 24:11 Mürin oua feila pekilan ewe chanpupu Jortan o tori Jeriko. Iwe, ekewe re Jeriko ra maun ngenikemi, pwal ekewe chon Amor, chon Peris, chon Kanaan, chon Hit, chon Kirkas, chon Hiw me chon Jepus. Nge üa akufuur meinisin o awinnakemi.
JOS 24:12 Iwe, üa atolongeer lon niuokus me rükö, pwe üpwe asüela ekewe ruoman kingen chon Amor me mwemi. Ei esap fis ren nöümi ketilas ika wokumi esefich.
JOS 24:13 Iwe, üa ngenikemi eu fanü ämi ousap angang ngeni, üa pwal ngenikemi telinimw pwe oupwe imweimw lon, nge sap aüemi, oua pwal ochoch föün irä seni ekewe tanipin irän wain me olif, nge sap fotukiemi.’
JOS 24:14 Iei mine oupwe meniniti ewe Samol mi Lapalap o angang ngeni fän leten lelukemi pwal fän allükülüköch. Oupwe pöütala ekewe kot ämi kewe lewo ra fel ngeniir me pekilan ewe chanpupu Oifrat pwal me Isip, nge oupwe chök angang ngeni ewe Samol mi Lapalap.
JOS 24:15 Nge ika ousap mochen angang ngeni ewe Samol mi Lapalap, ikenai oupwe filätä iö oupwe angang ngeni. Oupwe filätä ika oupwe angang ngeni ekewe kot ämi kewe lewo ra angang ngeniir me lon ewe fanü pekilan ewe chanpupu Oifrat, ika än chon Amor kewe kot mine fanüer we oua nom lon. Nge ngang me chon leimwei, äm aipwe angang ngeni ewe Samol mi Lapalap.”
JOS 24:16 Iwe, ekewe aramas ra üreni, “Äm aisap fokun likitala ewe Samol mi Lapalap o angang ngeni pwal ekoch kot.
JOS 24:17 Pun ewe Samol mi Lapalap äm we Kot, i a emwenikeemiwu me äm kewe lewo seni ewe fanü Isip, ewe leni ia ra nöünikem amanau ie. Aia küna ekewe manaman i a föri. A tümwünükem lon unusen äm sai lein chon ekewe mwü meinisin ia aia pwerela ie.
JOS 24:18 Iwe, ewe Samol mi Lapalap a asüela me mwem chon ekewe mwü meinisin, pwal ekewe chon Amor mi nom lon ewe fanü. Iei mine pwal äm aipwe angang ngeni ewe Samol mi Lapalap, pun i äm Kot.”
JOS 24:19 Nge Josua a üreni ekewe aramas, “Ämi ousap tongeni angang ngeni ewe Samol mi Lapalap, pun i eman Kot mi pin, i pwal eman Kot mi lukomong. Esap mochen amusala ämi pupungau me tipis.
JOS 24:20 Are oua likitala ewe Samol mi Lapalap o angang ngeni pwal ekoch koten ekis, i epwe kul o afeiengauakemi. Epwe arosakemiila mürin an afeiöchükemi.”
JOS 24:21 Nge ekewe aramas ra üreni Josua, “Apwi, äm aipwe chök angang ngeni ewe Samol mi Lapalap.”
JOS 24:22 Mürin, Josua a üreni ekewe aramas, “Ämi oua püsin chon pwärätä fän itemi, pwe oua filätä ewe Samol mi Lapalap pwe oupwe angang ngeni.” Nge ir ra üreni, “Äm aia chon pwärätä.”
JOS 24:23 Mürin, Josua a üreniir, “Oupwe pöütala ekewe koten ekis mi nom remi o akulu lelukemi ngeni ewe Samol mi Lapalap ewe Koten Israel.”
JOS 24:24 Iwe, ekewe aramas ra üreni Josua, “Äm aipwe chök angang ngeni äm Kot ewe Samol mi Lapalap, aipwe pwal aleasochis ngeni alon.”
JOS 24:25 Iwe, lon ewe ränin Josua a angei än ekewe aramas pwon, a pwal föri allük me pwüüng fän iter me lon Sikem.
JOS 24:26 Iwe, Josua a makei ekei kapas lon än Kot we puken allük. Iwe, a angei eföü fau watte o aüetä fän ewe irä ook lon ewe leni mi pin än ewe Samol mi Lapalap.
JOS 24:27 Nge Josua a üreni ekewe aramas meinisin, “Nengeni, ewe fau epwe eu pisekin pwärätä ngenikich, pun a rongorong ekewe kapas meinisin ewe Samol mi Lapalap a ürenikich. Iei mine epwe eu pisekin atuttur ngenikemi, are oua ü ngeni ämi we Kot.”
JOS 24:28 Mürin, Josua a tinala ekewe aramas eman me eman ngeni fanüan.
JOS 24:29 Mürin an fis ekei mettoch, Josua nöün Nun we mwän, nöün ewe Samol mi Lapalap we chon angang, a mäla, lupwen a ierini ipükü engol.
JOS 24:30 Iwe, ekewe aramas ra peiaseni lon püsin fanüan me lon Timnat-sera mi nom won chukuchukutän ewe fanü Efraim peliefengin ewe chuk Kaas.
JOS 24:31 Iwe, chon Israel ra angang ngeni ewe Samol mi Lapalap lon ränin manauen Josua meinisin, pwal lon ränin manauen ekewe souakom mi manauatam seni Josua, ir mi silei ekewe föför meinisin ewe Samol mi Lapalap a föri fän iten Israel.
JOS 24:32 Iwe, ekewe aramasen Israel ra peiaseni chün Josef ra uwato me Isip. Ra peiaseni lon Sikem, lon kinikinin ewe fanü Jakop a möni won ükükün ipükü föün moni silifer seni nöün Hamor kewe mwän, nge Hamor semen Sikem. Ei fanü a wiliti fanüen mwirimwirin Josef.
JOS 24:33 Mürin, Eleasar nöün Aaron we mwän a mäla. Iwe, ra peiaseni lon Kipea ewe telinimw mi nom won chukuchukutän ewe fanü Efraim, ra ngeni Pineas nöün we mwän.
JDG 1:1 Mürin än Josua mäla, ekewe aramasen Israel ra aisini ewe Samol mi Lapalap, “Iö lein ekewe ainang epwe akom le feila o maun ngeni ekewe chon Kanaan?”
JDG 1:2 Iwe, ewe Samol mi Lapalap a pälüeni, “Chon ewe ainangen Juta repwe feila. Ngang üa mwüt ngeniir pwe repwe fanüeni ewe fanü.”
JDG 1:3 Nge chon ewe ainangen Juta ra üreni chon ewe ainangen Simeon, “Oupwe etikem le feila lon ewe fanü a fen ainet ngenikem ren üttüt, pwe sipwe maun ngeni ekewe chon Kanaan. Mürin äm aipwe pwal etikemi le feila lon ewe fanü a fen ainet ngenikemi ren üttüt.” Iei mine chon ewe ainangen Simeon ra eti chon ewe ainangen Juta.
JDG 1:4 Lupwen ra feila maun, ewe Samol mi Lapalap a awinner, pwe ra akufu ekewe chon Kanaan me chon Peris. Iwe, ra niela ükükün engol ngeröü mwän me leir me lon Pesek.
JDG 1:5 Ikenan ra sereni ewe king Atoni-pesek o maun ngeni, ra pwal akufu ekewe chon Kanaan me chon Peris.
JDG 1:6 Iwe, Atoni-pesek a süla. Nge ra tapweri, ra liapeni o pöküela aütülapen pöün me pechen.
JDG 1:7 Mürin, Atoni-pesek a apasa, “A wor fik king üa pöküela aütülapen pöür me pecher, ra achchupi ener me fän ai chepel. Usun üa föri ngeniir, iei usun Kot a pwal föri ngeniei.” Iwe, ra emwenala ewe king Jerusalem, nge a mäla ikenan.
JDG 1:8 Iwe, ekewe re Juta ra maun ngeni Jerusalem. Ra liapeni o niela chon ren ketilas, ra pwal kenala ewe telinimw.
JDG 1:9 Mürin ra feila pwe repwe maun ngeni ekewe chon Kanaan mi nonom lon ewe fanü mi chukuchukutä, lon ewe fanü Nekep, pwal lon ewe fanü tekison.
JDG 1:10 Iwe, chon Juta ra pwal feila maun ngeni ekewe chon Kanaan mi imweimw lon Hepron. Nge iten Hepron me lom Kiriat-arapa. Iwe, ra akufu Sesai, Ahiman me Talmai.
JDG 1:11 Iwe, seni ikenan ekewe re Juta ra feila o maun ngeni chon Tepir. Nge iten Tepir me lom Kiriat-sefer.
JDG 1:12 Nge Kalep a apasa, “Iö epwe maun ngeni Kiriat-sefer o liapeni, üpwe ngeni nei föpwül Aksa pwe pwülüan.”
JDG 1:13 Iwe, Otniel nöün Kenas we mwän, nge Kenas pwin Kalep kükün, a liapeni ewe telinimw. Mürin, Kalep a ngeni nöün föpwül Aksa pwe pwülüan.
JDG 1:14 Nge lupwen neminewe a feito ren Otniel, ätei a pesei ngeni pwe epwe tüngorei saman we eu tanipi. Neminewe a tötiu seni wan aas, nge Kalep a aisini, “Met ka mochen?”
JDG 1:15 Iwe, neminewe a üreni saman we, “Kopwe ngeniei eu feiöch. Pokiten ka anomuei lon ewe fanü Nekep, kopwe pwal ngeniei ekewe koluk mi puächetä.” Mürin Kalep a ngeni neminewe ekewe koluk mi puächetä me asan, pwal ekewe fan.
JDG 1:16 Iwe, ekewe mwirimwirin semen pwülüen Moses, ekewe chon Ken, ra eti ekewe chon Juta le feila seni ewe telinimw Jeriko, ia a wor ie chomong irä palm, tori ewe fanüapön Juta mi nom lon ewe fanü Nekep arap ngeni Arat. Iwe, ra feila o nonom ikenan ren ekewe aramas.
JDG 1:17 Mürin ekewe re Juta ra fiti ekewe re Simeon le maun. Ra akufu ekewe chon Kanaan mi imweimw lon Sefat o ataela unusen ewe telinimw. Iei mine ewe telinimw a iteni Horma .
JDG 1:18 Iwe, ekewe re Juta ra pwal liapeni Kasa, Askelon me Ekron me ekewe fanü ünükür.
JDG 1:19 Ewe Samol mi Lapalap a eti ekewe chon Juta, pwe ra liapeni ewe fanü mi chukuchukutä o fanüeni. Nge resap tongeni asüela aramasen lon ewe maasies, pun a wor war woken seni mächä.
JDG 1:20 Iwe, ra ngeni Kalep ewe telinimw Hepron, usun Moses a fen apasa. Ätei a asüela seni lon Hepron ekewe ülüman mwän ir mwirimwirin Anak.
JDG 1:21 Nge chon ewe ainangen Peniamin resap asüela ekewe chon Jepus mi imweimw lon Jerusalem. Iei mine ekewe chon Jepus ra nonomfengen lon Jerusalem me chon ewe ainangen Peniamin tori ikenai.
JDG 1:22 Iwe, chon ekewe ainangen Efraim me Manasa ra pwal feila maun ngeni Petel, nge ewe Samol mi Lapalap a etiir.
JDG 1:23 Ra tinala ekoch mwän pwe repwe operi Petel mi iteni Lus me lom.
JDG 1:24 Iwe, ekewe chon operi Petel ra küna eman mwän mi towu seni ewe telinimw. Ra üreni, “Kose mochen aiti ngenikem ewe alen tolong lon ewe telinimw, nge äm aipwe kirikiröch ngonuk.”
JDG 1:25 Iei mine ewe mwän a aiti ngeniir ewe alen tolong lon ewe telinimw. Iwe, chon ekewe ainangen Efraim me Manasa ra niela chon ewe telinimw ren ketilas, nge ra amanaua ewe mwän me chon an famili meinisin.
JDG 1:26 Mürin, ewe mwän a feila lon fanüen chon Hit. Ikenan a aüetä eu telinimw o aita ngeni Lus. Iei iten ewe telinimw tori ikenai.
JDG 1:27 Iwe, chon ewe ainangen Manasa resap asüela chon ewe telinimw Pet-sean, Taanak, Tor, Ipleam me Mekito pwal chon wisoposopur meinisin. Pun ekewe chon Kanaan mi nonom lon ewe fanü ra chök amwöchümwöchütiu lon.
JDG 1:28 Nge lupwen chon Israel ra pöchökülela, ra aweiresi ekewe chon Kanaan ren angangen kinrosi, nge resap fokun asürela meinisin.
JDG 1:29 Iwe, chon ewe ainangen Efraim resap pwal asüela ekewe chon Kanaan mi imweimw lon ewe telinimw Keser, iei mine chon Kanaan ra chök nonom leir.
JDG 1:30 Iwe, chon ewe ainangen Sepulon resap asüela chon ekewe telinimw Kitron me Nahalol. Iei mine ekewe chon Kanaan ra chök nonom leir, nge ra wisen angangen kinrosi ngeniir.
JDG 1:31 Iwe, chon ewe ainangen Aser resap asüela chon ekewe telinimw Ako me Siton, Alap me Aksip, Helpa, Afik me Rehop.
JDG 1:32 Nge ekewe chon ewe ainangen Aser ra chök nonom lein chon Kanaan, ir chon wiliposen ewe fanü, pun resap asürela.
JDG 1:33 Iwe, chon ewe ainangen Naftali resap asüela chon ekewe telinimw Pet-semes me Pet-anat, nge ra chök nonom lein ekewe chon Kanaan, ir chon wiliposen ewe fanü. Nge chon ekewe telinimw Pet-semes me Pet-anat ra wisen angangen kinrosi ngeniir.
JDG 1:34 Nge ekewe chon Amor ra etia chon ewe ainangen Tan ngeni ewe fanü mi chukuchukutä, pun resap mwüt ngeniir pwe repwe feitiu lon ewe maasies.
JDG 1:35 Iwe, ekewe chon Amor ra chök amwöchümwöchütiu le imweimw lon Har-heres, Aijalon me Saal-pim. Nge lupwen chon ekewe ainangen Efraim me Manasa ra chomongola, ra aweiresiir ren angangen kinrosi.
JDG 1:36 Iwe, kiännin fanüen chon Amor a pwerela seni ewe palen Akrapim tori Sela feitä.
JDG 2:1 Iwe, nöün ewe Samol mi Lapalap chon läng a feitä seni Kilkal tori Pokim o üreni ekewe chon Israel, “Üa emwenikemiila seni Isip o emwenikemiilong lon ewe fanü üa pwon fän akapel pwe üpwe ngeni ämi kewe lewo. Üa apasa, ‘Üsap fokun atai ai pwon ngenikemi.
JDG 2:2 Nge ämi ousap pwonfengen me chon ei fanü. Oupwe atai ar kewe rongen asor.’ Nge ämi ousap aleasochis ngeni ai allük. Pwota oua föri ei?
JDG 2:3 Iei mine üa apasa pwe üsap asüela chon ei fanü me mwemi. Ir repwe ariaföüükemi, nge ar kewe kot repwe eu lenien likatup ngenikemi.”
JDG 2:4 Lupwen nöün ewe Samol mi Lapalap we chon läng a üreni ekewe aramasen Israel meinisin ekei kapas, ekewe aramas ra leüömong le kechü.
JDG 2:5 Iwe, ra aita ngeni ewe leni Pokim . Ikenan ra asor ngeni ewe Samol mi Lapalap.
JDG 2:6 Mürin än Josua tinala ekewe aramasen Israel, ra feila eman me eman ngeni fanüan pwe repwe fanüeni.
JDG 2:7 Iwe, ekewe aramas ra angang ngeni ewe Samol mi Lapalap lon fansoun manauen Josua meinisin, pwal lon fansoun manauen ekewe souakom mi manauatam seni Josua, ir mi küna ekewe föför mi manaman meinisin ewe Samol mi Lapalap a föri fän iten ekewe chon Israel.
JDG 2:8 Iwe, Josua nöün Nun we mwän, nöün ewe Samol mi Lapalap we chon angang, a mäla, lupwen a ierini ipükü engol.
JDG 2:9 Mürin, ekewe aramas ra peiaseni lon fanüan me lon Timnat-sera mi nom won chukuchukutän ewe fanü Efraim peliefengin ewe chuk Kaas.
JDG 2:10 Nge lupwen ewe pilon aramas meinisin ra pwal tapwela mürin semer kewe le mäla, a märitä eu pilon me mürir resap silei ewe Samol mi Lapalap, resap pwal silei ekewe föför a föri fän iten chon Israel.
JDG 2:11 Mürin, ekewe aramasen Israel ra föri mine a ngau me fän mesen ewe Samol mi Lapalap o angang ngeni ekewe anü Paal.
JDG 2:12 Ra likitala ewe Samol mi Lapalap än ar kewe lewo we Kot mi emwenirewu seni ewe fanü Isip. Ra pwal popuetä le fel ngeni pwal ekoch kot än ekewe aramas mi nom ünükür. Ren ei ra asonga ewe Samol mi Lapalap.
JDG 2:13 Iwe, ra likitala ewe Samol mi Lapalap o angang ngeni ekewe anü Paal me Astarot.
JDG 2:14 Iei mine ewe Samol mi Lapalap a song ngeni chon Israel o mwüt ngeni ekoch aramas pwe repwe soläni pisekir fän pöchökül, a pwal asechirela ngeni chon oputer mi nom ünükür, pwe repwe nom fän nemenier, nge resap chüen tongeni pwora ngeniir.
JDG 2:15 Iteiten fansoun, lupwen chon Israel ra feila maun, ewe Samol mi Lapalap a ü ngeniir o akufuur, usun a fen pwon fän akapel ngeniir. Iwe, ra fokun riaföü.
JDG 2:16 Mürin, ewe Samol mi Lapalap a filätä soukapwüng, repwe amanaua chon Israel seni fän nemenemen chokewe mi soläni pisekir fän pöchökül.
JDG 2:17 Nge ir resap aleasochis ngeni nöür kewe soukapwüng. Ra kirikiringau ngeni ewe Samol mi Lapalap o fel ngeni pwal ekoch kot. Iwe, ra müttir tokola seni än semelaper kewe föför. Pun semelaper kewe ra aleasochis ngeni än ewe Samol mi Lapalap allük, nge ir resap föri iei usun.
JDG 2:18 Iwe, iteiten fansoun, lupwen ewe Samol mi Lapalap a filätä soukapwüng fän iter, a eti ewe soukapwüng o amanaua ekewe aramas seni chon oputeer lon ükükün ränin manauen ewe soukapwüng. Pun ewe Samol mi Lapalap a tongeäsiniir pokiten ar riaföü ren chokewe mi ariaföüür o aweiresiir.
JDG 2:19 Nge iteiten fansoun, lupwen eman soukapwüng a mäla, ekewe aramas ra kulsefäl o föföringau lap seni semelaper kewe. Ra angang ngeni pwal ekoch kot o fel ngeniir. Iwe, resap fokun mochen likitala ar föför mi ngau ika ükütiu le tipeförea.
JDG 2:20 Iei mine ewe Samol mi Lapalap a fokun song ngeni chon Israel o apasa, “Pokiten ekei aramas ra atai ai pwon üa pwon ngeni ar kewe lewo, nge resap aleasochisi aloi,
JDG 2:21 seni ikenai üsap chüen asüela me mwer chon ekewe mwü Josua a likitiir, lupwen a mäla.
JDG 2:22 Üpwe nöünöü ir le sotuni chon Israel ika repwe föri mine ngang ewe Samol mi Lapalap üa üreniir, usun ar kewe lewo ra föri, ika resap.”
JDG 2:23 Iei usun ewe Samol mi Lapalap a mwüt ngeni chon ekewe mwü pwe repwe nonometiu, nge esap müttir asürela, ir chokewe resap tolong fän nemenien Josua.
JDG 3:1 Iwe, ewe Samol mi Lapalap a likiti ekoch mwü lon ewe fanü pwe epwe sotuni chon Israel rer, chokewe resap mwo eti maun fän eu lon Kanaan.
JDG 3:2 Popun chök an likitiir pwe epwe aiti ngeni ekewe pilon aramasen Israel wiwiin maun, fokun ngeni chokewe resap eti maun me lom.
JDG 3:3 Ikkei ir chon ekewe mwü mi nonometiu: ekewe limman samolun Filistia me ekewe chon Kanaan meinisin, ekewe chon Siton me chon Hiw mi nom won ewe chuk Lepanon, seni ewe chuk Paal-hermon tori ewe al a ale ngeni Hamat.
JDG 3:4 Chon ekei mwü ra chök nonometiu pwe chon Israel repwe sosot rer, pwe epwe pwä ika ra aleasochisi än ewe Samol mi Lapalap kewe allük Moses a ngeni ar kewe lewo.
JDG 3:5 Iei mine ekewe aramasen Israel ra nonom lein ekewe chon Kanaan, chon Hit, chon Amor, chon Peris, chon Hiw me chon Jepus.
JDG 3:6 Iwe, ekewe chon Israel ra angei nöür kewe föpwül pwe pwülüer, nge ra apwüpwülüa nöür föpwül ngeni nöün chon ekewe mwü alüal, ra pwal fel ngeni ar kewe kot.
JDG 3:7 Iwe, ekewe chon Israel ra manlükala ewe Samol mi Lapalap ar we Kot. Ra föri mine a ngau me fän mesan o fel ngeni ekewe anü Paal me Astarot.
JDG 3:8 Iei mine ewe Samol mi Lapalap a song ngeni ekewe chon Israel o asechirela ngeni Kusan-risataim ewe kingen Mesopotamia. Iwe, ekewe aramasen Israel ra angang ngeni Kusan-risataim lon ükükün walu ier.
JDG 3:9 Nge lupwen ekewe aramasen Israel ra siö ngeni ewe Samol mi Lapalap, a filätä eman chon amanau fän iter, pwe epwe amanaueer. Iwe, iten ätei Otniel nöün Kenas we mwän, nge Kenas pwin Kalep kükün.
JDG 3:10 Iwe, Ngünün ewe Samol mi Lapalap a feitiu won Otniel pwe a soukapwüngün Israel. A feila maun, nge ewe Samol mi Lapalap a atolonga Kusan-risataim ewe kingen Mesopotamia fän nemenian, pwe a akufu.
JDG 3:11 Iei mine a wor kinamwe lon ewe fanü lon ükükün faik ier. Mürin, Otniel nöün Kenas we mwän a mäla.
JDG 3:12 Iwe, ekewe aramasen Israel ra pwal förisefäli mine a ngau me fän mesen ewe Samol mi Lapalap. Iei mine ewe Samol mi Lapalap a apöchöküla Eklon ewe kingen Moap, pwe a ü ngeni chon Israel.
JDG 3:13 Eklon a amwichato ren ekewe chon Amon me chon Amalek. Ra feila maun ngeni chon Israel o akufuur. Ra liapeni ewe telinimw Jeriko, ia a wor irä palm ie.
JDG 3:14 Iwe, ekewe aramasen Israel ra angang ngeni Eklon ewe kingen Moap lon ükükün engol me walu ier.
JDG 3:15 Mürin, ekewe aramasen Israel ra siö ngeni ewe Samol mi Lapalap, nge i a filätä eman chon amanau fän iter itan Ehut nöün Kera we mwän, eman re Peniamin. Nge Ehut eman tamöng. Iwe, ekewe aramasen Israel ra tini ngeni Ehut ar takises ngeni Eklon ewe kingen Moap.
JDG 3:16 Nge Ehut a föri fän itan efoch ketilas mi ken me rüepek ükükün langataman eu esop fiit o rietä won pelifichin wänükün me fän üfan.
JDG 3:17 Mürin a uwala ngeni Eklon ewe kingen Moap ewe takises. Nge Eklon eman mwän mi fokun kitinup.
JDG 3:18 Iwe, lupwen Ehut a wes me ngeni Eklon ewe takises, a tinala ekewe aramas mi wisen uwei ewe takises, pwe repwe liwinla.
JDG 3:19 Püsi i a pwal etiir tori ekewe fau mi fal arun Kilkal. Mürin a kul o liwiniti Eklon. Iwe, a üreni Eklon, “Mi wor eu pworaus monomon ngonuk king.” Mürin, ewe king a üreni nöün kewe chon angang pwe repwe towu. Iwe, ir meinisin ra towu seni fän mesan.
JDG 3:20 Iwe, Ehut a kan ngeni ewe king, lupwen i chök a mot lon rumwan mi apatapat won ewe imw o üreni, “Mi wor eu pworaus fän itom seni Kot.” Iwe, ewe king a ütä seni lenian.
JDG 3:21 Mürin Ehut a angetiu won pöüimöngün, a angei nöün ketilas seni won pelifichin wänükün o posu ngeni luken ewe king.
JDG 3:22 Iwe, pachen ewe ketilas a kokolong, pwe ewe kiris a pwölüela ewe ketilas, pun Ehut esap üttawu ewe ketilas me lon luken Eklon. Iwe, limengauan a towu.
JDG 3:23 Mürin, Ehut a towu seni ewe rumwen won, a apüngala ekewe asam o lokuniir.
JDG 3:24 Iwe, mürin än Ehut feila, ekewe chon angang ra feito. Nge lupwen ra küna pwe asamen ewe rumwen won ra lok, ra ekieki pwe a feila lon ewe lenien ngasala lon rumwan mi apatapat.
JDG 3:25 Iwe, ra witiwit fansoun langatam tori resap chüen silei met repwe ekieki. Nge lupwen ewe king esap fokun suki ekewe asam, ra angei ki o sukiir. Iwe, ra küna pwe ar samol a kon lon ewe rum, nge a mäla.
JDG 3:26 Lupwen ekewe chon angang ra witiwit, Ehut a süla, a pwerela pekilan ekewe fau mi fal o süla tori Seira.
JDG 3:27 Nge lupwen a tori won chukuchukutän ewe fanü Efraim, a ettiki ewe rappwa pwe ekewe re Israel repwe mwicheto ren, pwe repwe maun. Mürin, ra etatiu Ehut seni won ewe fanü mi chukuchukutä, nge i a akom mwer.
JDG 3:28 Iwe, a üreniir, “Oupwe tapweto müri, pun ewe Samol mi Lapalapa atolonga ekewe chon Moap mi oputakemi fän nemeniemi.” Iei mine ra tapwetiu mürin o liapeni ekewe petepeeten ewe chanpupu Jortan, ia ekewe chon Moap ra pwepwer ie. Iwe, resap mwüt ngeni eman aramas pwe epwe pwerela pekila.
JDG 3:29 Lon ewe fansoun ra niela ina epwe ükükün engol ngeröü sounfiun Moap, ir meinisin mwän mi pöchökül o inisöch. Esap wor eman a tongeni süla.
JDG 3:30 Iwe, lon ena rän Moap a tolong fän nemenien Israel, nge a wor kinamwe lon ewe fanü Israel lon ükükün walik ier.
JDG 3:31 Mürin Ehut, Samkar nöün Anat we mwän a filitä. Iwe, i a amanaua chon Israel ren an niela ükükün wonopükü chon Filistia ren efoch wichiwichin kow.
JDG 4:1 Mürin än Ehut mäla, ekewe aramasen Israel ra pwal förisefäli mine a ngau me fän mesen ewe Samol mi Lapalap.
JDG 4:2 Iei mine ewe Samol mi Lapalap a asechirela ngeni Japin ewe kingen Kanaan mi nemenem lon Hasor. Iwe, ewe samolun nöün mwichen sounfiu itan Sisera, a imweimw lon Haroset-hakoim.
JDG 4:3 A wor ükükün tiupükü wän Sisera woken mi för seni mächä. Iwe, a fokun ariaföüü chon Israel lon ükükün rüe ier. Mürin, ekewe chon Israel ra siö ngeni ewe Samol mi Lapalap pwe epwe alisiir.
JDG 4:4 Lon ena fansoun Tepora ewe soufos fefin pwülüen Lapitot a soukapwüngün Israel.
JDG 4:5 Iwe, neminewe a soun momot fän efoch irä palm mi nom lefilen Rama me Petel won chukuchukutän ewe fanü Efraim. Iwe, ekewe aramasen Israel ra feito ren pwe epwe eäni ar kapwüng.
JDG 4:6 Lon eu rän, Tepora a titi Parak nöün Apinoam we mwän seni Ketes mi nom lon Naftali. Iwe, a üreni Parak, “Ewe Samol mi Lapalap, ewe Koten Israel a allük ngonuk, ‘Kopwe feila o amwichafengeni ükükün engol ngeröü mwän seni ekewe ainangen Naftali me Sepulon o emwenirela ngeni ewe chuk Tapor.
JDG 4:7 Üpwe panawu Sisera ewe samolun nöün Japin sounfiu. Epwe churuk me arun ewe chanpupu Kison fiti wan woken me nöün sounfiu. Iwe, üpwe föri met kopwe akufu ren.’”
JDG 4:8 Mürin, Parak a üreni Tepora, “Are en kopwe etiei, üpwe feila. Nge are kosap etiei, üsap feila.”
JDG 4:9 Iwe, Tepora a üra, “Üpwe fokun etuk. Nge ei sokun lapalap ka eäni, kosap ling ren, pun ewe Samol mi Lapalap epwe atolonga Sisera lepöün eman fefin.” Mürin, Tepora a ütä o eti Parak tori Ketes.
JDG 4:10 Iwe, Parak a amwichato chon ewe ainangen Sepulon me Naftali lon Ketes, nge ükükün engol ngeröü mwän ra tapwela mürin, pwal Tepora a eti.
JDG 4:11 Nge Heper ewe re Ken a imwü seni chon Ken ekewe mwirimwirin Hopap semen pwülüen Moses. Iwe, a aüetä imwan imw mangaku arun ewe irä ook lon Sananim, arap ngeni Ketes.
JDG 4:12 Iwe, lupwen Sisera a rongorong pwe Parak nöün Apinoam we mwän a feitä won ewe chuk Tapor,
JDG 4:13 a titi wan kewe woken meinisin ükükün tiupükü woken seni mächä, pwal nöün sounfiu meinisin mi nom fän nemenian, pwe repwe feila seni Haroset-hakoim tori ewe chanpupu Kison.
JDG 4:14 Mürin, Tepora a üreni Parak, “Kopwe feila. Pun iei ewe rän ewe Samol mi Lapalap a awinnok lon pwe kopwe akufu Sisera. Ifa usun, ewe Samol mi Lapalap esap akom mwom?” Iei mine Parak a feitiu seni ewe chuk Tapor, nge engol ngeröü mwän ra tapwela mürin.
JDG 4:15 Iwe, ewe Samol mi Lapalap a eniwa Sisera me nöün sounfiu meinisin mi wawa woken, lupwen Parak a maun ngeniir. Mürin, Sisera a tötiu seni wan woken o süla.
JDG 4:16 Nge Parak a tapweri ekewe woken me ekewe sounfiu tori Haroset-hakoim. Iwe, nöün Sisera sounfiu ra mäla meinisin ren ketilas. Esap wor eman a chüen manau.
JDG 4:17 Nge Sisera a sü ngeni imwen Jael pwülüen Heper ewe re Ken. Pun mi wor kinamwe lefilen Japin ewe kingen Hasor me ewe familien Heper ewe re Ken.
JDG 4:18 Iwe, Jael a towu seni imwan pwe epwe churi Sisera. A üreni, “Kopwe pwereto, ai samol, kopwe pwereto rei, nge kosap niuokus.” Iei mine a pwere ngeni o tolong lon ewe imw. Nge Jael a pwölüela fän echö planket.
JDG 4:19 Iwe, Sisera a üreni, “Kose mochen kopwe ngeniei ekis koluk pwe üpwe ünümi, pun üa kaka.” Nge neminewe a suki ewe lenien milik o aünü ngeni. Mürin a pwal pwölüela.
JDG 4:20 Nge Sisera a üreni Jael, “Kopwe ütä leasamalapen ewe imw, nge are eman aramas epwe feito o aisinuk ika eman a nom ikei, kopwe üreni, ‘Ap.’”
JDG 4:21 Mürin Jael pwülüen Heper a angei efoch chüfölün imw me efoch ama, a anifelong ren lupwen a kon o möürüchou ren an malülü, a amaanätiu ewe chuföl won esen mongön tori a pweretiu lepwül. Iwe, Sisera a mäla.
JDG 4:22 Lupwen Parak a tapweri Sisera, a tori imwen Jael. Neminewe a towu seni imwan pwe epwe churi. Iwe, a üreni, “Kopwe etto, üpwe apii ngonuk ewe mwän ka kütta.” Iei mine Parak a tolong lon imwan. Ikenan a küna Sisera a kon o mäla, nge efoch chüfölün imw a fotolong won esen mongön.
JDG 4:23 Lon ewe ränin, Kot a mwüt ngeni ekewe aramasen Israel pwe repwe akufu Japin ewe kingen Kanaan.
JDG 4:24 Iwe, ekewe aramasen Israel ra chök pöchökülela ngeni Japin ewe kingen Kanaan tori ra wesewesen niela.
JDG 5:1 Iwe, lon ewe ränin, Tepora me Parak nöün Apinoam we mwän ra köl ei köl:
JDG 5:2 “Sipwe mwareiti ewe Samol mi Lapalap fän iten ekewe souemwen mi emweni chon Israel, fän iten ekewe aramas mi fangala inisir ren mochenin letiper.
JDG 5:3 Oupwe rongorong ämi king, oupwe aü selingemi ämi samol, üpwe köl ngeni ewe Samol mi Lapalap, üpwe kölün mwareiti ewe Samol mi Lapalap ewe Koten Israel.
JDG 5:4 Lupwen ka feila seni ewe chuk Seir, en Samol mi Lapalap, lupwen ka karis seni ewe fanü Etom, fanüfan a chechech o läng a apüngätiu üt, ewer, ekewe kuchu ra apüngätiu koluk.
JDG 5:5 Ekewe chuk ra chechech fän mesen ewe Samol mi Lapalap, ewe chuk Sinai a chechech fän mesen ewe Samol mi Lapalap ewe Koten Israel.
JDG 5:6 Lon ränin Samkar nöün Anat we mwän, lon ränin Jael ekewe mwichen aramas me man mi sai resap chüen sai, nge ekewe chon sai ra fetal won al mi chökis.
JDG 5:7 Ekewe sop lon Israel ra pön, ewer, ra pön tori en Tepora ka ütä, ka ütä pwe kopwe eman inelap lon Israel.
JDG 5:8 Lupwen chon Israel ra filätä ekewe kot mi fö, maun a tolong lon fanüer. Ifa usun, a wor ren faik ngeröü sounfiun Israel tittin maun ika siles?
JDG 5:9 Lelukei a pwapwa ren ekewe meilapen Israel, pwal ren ekewe aramas mi fangala inisir ren mochenin letiper. Sipwe mwareiti ewe Samol mi Lapalap.
JDG 5:10 Ämi mi wawa aas mi pwechepwech, ämi mi mot lon planket mi fokun mürina, pwal ämi mi fetal won al, oupwe köl.
JDG 5:11 Oupwe aüseling tikin musik arun ekewe chönüttu. Ikenan ra kakapasen mwareiti än ewe Samol mi Lapalap föför mi pwüng, an pwora me win lon ekewe sop lon Israel. Mürin, nöün ewe Samol mi Lapalap aramas ra karisitiu ngeni asamalapen ar kewe telinimw.
JDG 5:12 Kopwe pwätä, kopwe pwätä en Tepora. Kopwe pwätä, kopwe pwätä o chietä echö köl. Kopwe ütä, en Parak nöün Apinoam we mwän, kopwe emwenala noum kewe chon oola.
JDG 5:13 Ekewe lusun aramas tekia ra karisitiu, nöün ewe Samol mi Lapalap aramas ra karisitiu rei pwe repwe maun ngeni ekewe chon pwora.
JDG 5:14 Ra feitiu seni ewe fanü Efraim, ir chokewe mi nonom lon fanüen chon Amalek, nge chon ewe ainangen Peniamin ra tapweto müriir. Iwe, ekewe meilap ra karisitiu seni Makir, nge chokewe mi nemenem ra karisitiu seni Sepulon.
JDG 5:15 Ekewe samol seni chon ewe ainangen Isakar ra eti Tepora. Ewer, chon ewe ainangen Isakar ra eti Parak. Ra sätiu mürin lon ewe lemol. Nge chon ewe ainangen Rupen ra kakapasfengen usun met repwe föri.
JDG 5:16 Pwota oua chök nonom lon ekewe lenien sip pwe oupwe rongorong tikin aangün fän iten ekewe pwiin sip? Ewer, chon ewe ainangen Rupen ra kakapasfengen usun met repwe föri.
JDG 5:17 Chon ewe ainangen Kat ra chök nonom peliötiuen ewe chanpupu Jortan. Nge pwota chon ewe ainangen Tan ra chök nonom ren ekewe sip? Pwal chon ewe ainangen Aser ra chök nonom aroset lon ekewe lenien ilen sip.
JDG 5:18 Nge ekewe aramasen Sepulon me Naftali ra fangala manauer lon feiengauen mäla lon ekewe lenien wiirasen maun mi tekia.
JDG 5:19 Ekewe king ra feito o maun. Ekewe kingen Kanaan ra maun me lon Taanak arun ekewe kolukun Mekito. Nge esap wor liaper silifer.
JDG 5:20 Ekewe fün läng ra maun, ekewe fü mi mwökütfeil ra maun ngeni Sisera.
JDG 5:21 Pupun ewe chanpupu Kison a opurela, pupun ewe chanpupu Kison mi pumong. Üpwe kakaris fän pöchökül.
JDG 5:22 Mürin, chopuchopun pechen ekewe oris ra chopumong ren ar sässä, pokiten chon wawa ra süsüla.
JDG 5:23 ‘Oupwe anümamaua chon ewe telinimw Meros,’ nöün ewe Samol mi Lapalap chon läng a apasa. ‘Oupwe fokun anümamaueer, pun resap feito pwe repwe alisi ewe Samol mi Lapalap le maun ngeni ekewe chon pwora.’
JDG 5:24 Iwe, epwe fokun feiöch Jael pwülüen Heper ewe re Ken, epwe fokun feiöch me lein ekewe fefin mi imweimw lon imw mangaku.
JDG 5:25 Sisera a tüngor seni koluk, nge neminewe a ngeni milik, a uwato ren soon milik lon eu sepien samol.
JDG 5:26 A angei ewe chüfölün imw, a pwal angei ewe ama won pöüifichin. Iwe, a amaani Sisera o amökkü möküran, a posu o atatakisi esen mongön.
JDG 5:27 Sisera a mwörürütiu, a turula arun pechen neminewe. A mwörürütiu arun pechen o turula, nge ewe ia a turula ie, ikenan a mäla.
JDG 5:28 Iwe, inen Sisera a nennewu lefichen asammwachon imwan, a nennewu me lon ewe asammwacho o urä, ‘Pwota wän Sisera woken a mang le feito? Pwota chopuchopun pechen orisin wan woken resamwo chopuchoputo?’
JDG 5:29 Nge eman me lein ekewe finesamol mi fokun tipachem a pälüeni, ewer, a püsin pälüeni an kapas ais,
JDG 5:30 ‘Ifa usun, resap küna o aineti liaper? Iteiten eman me eman sounfiu epwe angei eman föpwül ika ruoman. Ra liapeni mangaku mi anüepat fän iten Sisera, ra liapeni mangaku mi anüepat o chü, ruachö mangaku mi anüepat o chü fän iten üei.’
JDG 5:31 Ai Samol mi Lapalap, iei usun repwe rosola chon oputom meinisin. Nge chokewe mi echenuk repwe usun chök akkar, lupwen a tötä fän lingan.” Iwe, a wor kinamwe lon ewe fanü lon ükükün faik ier.
JDG 6:1 Iwe, ekewe aramasen Israel ra pwal föri mine a ngau me fän mesen ewe Samol mi Lapalap. Iei mine a atolongeer fän nemenien chon Mitian lon ükükün fisu ier.
JDG 6:2 Nge chon Mitian ra fokun nemenemengau ngeniir. Iei mine ekewe aramasen Israel ra opolong lon ekewe pwang mi nom won ekewe chuk, lon ekewe föimw, pwal lon ekewe leni mi pöchökül.
JDG 6:3 Pun iteiten fansoun ekewe chon Israel ra fotuki föün irä, ekewe chon Mitian, chon Amalek me ekewe aramas mi nom ötiu ra feito o maun ngeniir.
JDG 6:4 Iwe, ra asoi fanüer o ataela mine a märitä me won tori ünükün Kasa. Ra pwal angei nöür sip me kow me aas meinisin, nge resap likiti och fän iten chon Israel, pwe repwe manau seni.
JDG 6:5 Pun ra feito fiti nöür man me imwer imw mangaku, usun epwi pwiin lifichimas. Iwe, esap wor eman a tongeni aleaniir me nöür kamel. Iei mine ewe fanü a tala, lupwen ra tolong lon.
JDG 6:6 Iwe, chon Israel ra fokun mwelele pokiten chon Mitian. Iei mine ra siö ngeni ewe Samol mi Lapalap pwe epwe alisiir.
JDG 6:7 Lupwen ekewe aramasen Israel ra siö ngeni ewe Samol mi Lapalap pokiten ekewe chon Mitian,
JDG 6:8 ewe Samol mi Lapalap a tinala rer eman soufos. Iwe, a üreniir, “Iei alon ewe Samol mi Lapalap ewe Koten Israel: Üa emwenikemiiwu seni Isip, ewe leni ia ra nöünikemi amanau ie.
JDG 6:9 Üa angasakemi seni chon Isip, pwal seni chokewe mi ariaföüükemi lon ei fanü. Üa asürela me mwemi o ngenikemi fanüer.
JDG 6:10 Iwe, üa ürenikemi, ‘Ngang ewe Samol mi Lapalap ämi we Kot. Ousap fel ngeni än chon Amor kewe kot, ir chokewe oua fen nonom lon fanüer.’ Nge ämi ousap aüselinga aloi.”
JDG 6:11 Mürin, nöün ewe Samol mi Lapalap chon läng a feito Ofra o mottiu fän ewe irä ook än Joas seni ewe eterekesin Apieser. Nge Kition nöün we mwän a wichiwich umwun wiich lon ewe lenien üchüch wain, pun a aopala seni chon Mitian.
JDG 6:12 Iwe, nöün ewe Samol mi Lapalap we chon läng a pwä ngeni Kition o üreni, “Ewe Samol mi Lapalap a etuk, en sounfiu mi pwora.”
JDG 6:13 Nge Kition a üreni, “Ai Samol, ika ewe Samol mi Lapalap a wesewesen etikem, pwota a fis ngenikem ekewe mettoch? Nge ikafa ekewe föför mi amwarar aia rong seni semelapem kewe, lupwen ra apworausa ngenikem usun än ewe Samol mi Lapalap emwenirewu seni Isip? Nge iei ewe Samol mi Lapalap a pöütikeemila o asechikeemilong lepöün chon Mitian.”
JDG 6:14 Iwe, ewe Samol mi Lapalap a kul ngeni o üreni, “Kopwe feila lon om na pöchökül o angasala chon Israel seni lepöün chon Mitian. Ngang üa tinukela.”
JDG 6:15 Nge Kition a üreni, “Ai Samol, epwe ifa usun ai üpwe tongeni amanaua chon Israel? Nengeni, ai eterekes a chokükün seni meinisin lon ewe ainangen Manasa, nge ngang ese wor manei lon ai famili.”
JDG 6:16 Iwe, ewe Samol mi Lapalap a üreni, “Ngang üpwe etuk, nge en kopwe akufu chon Mitian usun chök om kopwe akufu eman chök aramas.”
JDG 6:17 Nge Kition a üreni, “Are üa küna ümöümöch me reöm, kopwe pwäri ngeniei eu asisil, pwe üpwe silei pwe en ai Samol mi Lapalap ka fos ngeniei.
JDG 6:18 Üa tüngor ngonuk pwe kosap feila seni ikei tori üpwe liwinto reöm o uwato ai asoren mongö ngonuk.” Iwe, a üreni, “Üpwe nonom ikei tori kopwe liwinto.”
JDG 6:19 Iwe, Kition a liwinla leimwan o amolätä eman apanen kuuch, pwal pilawa esap wor iis lon seni ilik paun pilawa mi amas. Mürin, a iseis ewe fituk lon eu pasikit, nge setin a anomu lon eu nape o uweerela ren ewe chon läng mi nom fän ewe irä ook.
JDG 6:20 Iwe, nöün Kot we chon läng a üreni, “Kopwe angei ewe fituk me ewe pilawa esap wor iis lon o iseniir won ei achau, kopwe pwal ninätiu wor setin ewe.” Iwe, a föri iei usun.
JDG 6:21 Mürin, nöün ewe Samol mi Lapalap we chon läng a aitiewu wokun mi nom lepöün o tiki ngeni ewe fituk me ewe pilawa esap wor iis lon. Iwe, a küütä ekkei seni ewe achau o kenala ewe fituk me ewe pilawa. Mürin, ewe chon läng a morukola seni fän mesan.
JDG 6:22 Nge lupwen Kition a mefi pwe i nöün ewe Samol mi Lapalap we chon läng, a üra, “Ai Samol me ai Kot, osupwangei, pun iei üa küna noum we chon läng ren mesei.”
JDG 6:23 Ewe Samol mi Lapalap a üreni, “Kinamwe epwe toruk. Kosap niuokus, pun kosap mäla.”
JDG 6:24 Mürin, Kition a senätä eu rongen asor ngeni ewe Samol mi Lapalap ikenan o aita ngeni: Ewe Samol mi Lapalap i ewe Koten kinamwe. Iwe, tori ikenai ei rongen asor a chüen nom lon Ofra lon fanüen chon ewe eterekesin Apieser.
JDG 6:25 Iwe, lon ewe pwinin ewe Samol mi Lapalap a üreni Kition, “Kopwe angei nöün semom ätemwänin kow, ewe aruomanün ätemwänin kow fisu ierin o ataela än semom rongen asor fän iten ewe anü Paal. Kopwe pwal pöküetiu uluulun ewe anüfefin Asera mi nom ünükün.
JDG 6:26 Kopwe senätä eu rongen asor ngeni ewe Samol mi Lapalap om we Kot won ungen ewe leni mi pöchökül o atettelöchü föün. Mürin kopwe angei ewe aruomanün ätemwänin kow o eäni asoren kek, nge kopwe eäni mwüch uluulun ewe anüfefin Asera kopwe pöküetiu.”
JDG 6:27 Iei mine Kition a filätä engol mwän seni lein nöün chon angang o föri usun mine ewe Samol mi Lapalap a üreni. Iwe, a föri lepwin, nge sap lerän, pun a niuokusiti an famili me mwänin ewe telinimw.
JDG 6:28 Iwe, lupwen mwänin ewe telinimw ra pwätä lesosorusich, ra küna pwe ewe rongen asor fän iten ewe anü Paal a tala, nge uluulun ewe anüfefin Asera mi nom ünükün a pöküpökütiu. Iwe, ewe aruomanün ätemwänin kow a fen kek won ewe rongen asor mi sesetä.
JDG 6:29 Iwe, ra kapasfengen lefiler, “Iö a föri ei sokun?” Nge mürin ar alewoi o akais ra apasa, “Kition nöün Joas we mwän a föri ei.”
JDG 6:30 Mürin, mwänin ewe telinimw ra üreni Joas, “Kopwe emwenawu noum we mwän pwe aipwe niela, pun a ataela ewe rongen asor fän iten ewe anü Paal o pöküetiu uluulun ewe anüfefin Asera mi nom ünükün.”
JDG 6:31 Nge Joas a kapas ngeni chokewe meinisin mi ütä ünükün fän ar song, “Ifa usun, ämi oua mochen fiu fän iten ewe anü Paal? Ika oua mochen peni? Iö epwe fiu fän iten ewe anü Paal epwe ninnila lesosorun lesor. Are Paal eman kot, epwe püsin fiu fän itan, pun an rongen asor a kata.”
JDG 6:32 Iwe, lon ena ränin ra aita ngeni Kition Jerupaal , pun ra apasa, “Likiti ngeni ewe anü Paal pwe epwe püsin fiu ngeni Kition, pokiten a ataela an rongen asor.”
JDG 6:33 Mürin, ekewe chon Mitian meinisin, ekewe chon Amalek me ekewe aramas mi nom ötiu ra chufengen, ra pwereto pekiton ewe chanpupu Jortan o nonom lon ewe lemolun Jesreel.
JDG 6:34 Nge Ngünün ewe Samol mi Lapalap a feitiu won Kition. Iwe, a ettiki eu rappwa, pwe chon ewe eterekesin Apieser repwe rong o tapwela mürin.
JDG 6:35 Iwe, Kition a tinala chon künö lemenen ewe fanü Manasa. Nge chon ewe ainangen Manasa ra rong ewe kö o tapwela mürin. Kition a pwal tinala chon künö ren chon ekewe ainangen Aser, Sepulon me Naftali. Iwe, pwal ir ra feila pwe repwe chu ngeniir.
JDG 6:36 Mürin, Kition a üreni Kot, “Are en kopwe angasa Israel rei, usun ka fen apasa,
JDG 6:37 nengeni, iei üa isenätiu och ülöülen sip won ewe lenien wichiwich umwun wiich. Are epwe wor amurenipwin won ewe ülöülen sip echök, nge won unusen ewe pwül epwe pwasapwas, mürin üpwe silei pwe en kopwe angasa Israel rei, usun ka fen apasa.”
JDG 6:38 Iwe, a fis iei usun. Lupwen Kition a pwätä lesosorusichin sorotän ewe rän, a unguti ewe ülöülen sip, nge ükükün ewe koluk a ungutawu seni a aura eu sepi.
JDG 6:39 Mürin, Kition a üreni Kot, “Kose mochen kosap song ngeniei, nge kopwe mwüt ngeniei pwe üpwe pwal kapas fän eu. Kose mochen mwüt ngeniei pwe üpwe föri pwal eu sosot ren ei ülöülen sip. Üa tüngor pwe epwe pwasapwas won ewe chök ülöülen sip, nge won unusen ewe pwül epwe chöchön ren amurenipwin.”
JDG 6:40 Iwe, Kot a föri iei usun lon ewe pwinin. Pun won ewe ülöülen sip a pwasapwas, nge won unusen ewe pwül a chöchön ren amurenipwin.
JDG 7:1 Mürin, Jerupaal, iei i Kition me ekewe aramas meinisin mi eti, ra pwätä lesosorusich, ra feila o nonom ünükün ewe puächen koluk lon Harot. Nge lenien chon Mitian a nom peliefengir ren ewe chukuchukutän More lon ewe lemol.
JDG 7:2 Iwe, ewe Samol mi Lapalap a üreni Kition, “Ekei aramas mi etuk ra kon chomong me rei, pwe üpwe föri pwe ekewe chon Mitian repwe kuf rer. Pun chon Israel repwe tunosikesik ngeniei o üra pwe ra püsin amanaueer ren ar pöchökül.
JDG 7:3 Iei mine kopwe asilefeili ei pworaus lein ekewe aramas, ‘Iö me leimi a niuokus o chechech epwe liwin me won ei chuk Kiliat o liwiniti lenian.’” Iwe, rüe me ruungeröü mwän ra liwin, nge engol ngeröü ra chüen nom.
JDG 7:4 Nge ewe Samol mi Lapalap a üreni Kition, “Ekei aramas ra chüen kon chomong. Kopwe emweniretiu ren ewe koluk, nge ngang üpwe aimwürela fän itom ikenan. Are üpwe ürenuk, ‘Ei mwän epwe etuk,’ ätewe epwe etuk. Nge are üpwe ürenuk, ‘Ei mwän esap etuk,’ ätewe esap etuk.”
JDG 7:5 Iei mine Kition a emwenätiu ekewe aramas ren ewe koluk. Nge ewe Samol mi Lapalap a üreni, “Iteiten eman me eman mi üfi koluk ngeni pöün o mitiri usun eman kolak a mitiri koluk, kopwe aimwüela. Nge ekewe mi fotopwäsuk le ün, repwe pwal imwüla.”
JDG 7:6 Iwe, iteiten chokewe mi mitiri koluk seni lepöür ükükün ülüpükü mwän. Nge ekewe lusun meinisin ra fotopwäsuk le ün.
JDG 7:7 Iwe, ewe Samol mi Lapalap a üreni Kition, “Ren ekewe ülüpükü mwän mi mitiri ewe koluk üpwe amanauakemi o föri pwe ekewe chon Mitian repwe kuf rer. Nge ekewe lusun meinisin repwe en me liwiniti lenian.”
JDG 7:8 Iwe, Kition a tinala ekewe lusun chon Israel ngeni en me lenian, nge ekewe ülüpükü mwän a amwöchüretiu. Ir ätekewe mi angei seni chiener kewe mi liwin pisekir me nöür kewe rappwa. Iwe, lenien ekewe chon Mitian a nom fan lon ewe lemol.
JDG 7:9 Lon ewe chök pwinin ewe Samol mi Lapalap a üreni Kition, “Kopwe pwätä o feitiu lon lenien chon Mitian pwe kopwe maun ngeniir, pun üpwe föri met kopwe akufuur ren.
JDG 7:10 Nge are ka niuokus le feitiu, Pura noum we chon angang epwe etuketiu.
JDG 7:11 Iwe, kopwe rongorong mine repwe üra, mürin kopwe pwora le feitiu o maun ngeni ewe leni.” Mürin, Kition me Pura nöün chon angang ra feitiu ren ewe lenien mamas än ekewe sounfiu.
JDG 7:12 Iwe, ekewe chon Mitian me chon Amalek, pwal ekewe aramas meinisin seni ötiu ra nom lon ewe lemol, usun epwi pwiin lifichimas ren chomongur. Nge nöür kamel ese lea, pun ra usun chök föün pien aroset.
JDG 7:13 Lupwen Kition a feito, a rong pwe eman mwän a apworausa ngeni chienan we an tan. A üreni, “Üa eäni eu tan pwe üa küna eföü pilawa seni parli a sokopenelong lon leniach. A küw eu imw mangaku pwe a turutiu o tala.”
JDG 7:14 Nge chienan a üreni, “Ei a pwärätä pwe iei fokun nöün Kition we ketilas, i nöün Joas we mwän, eman re Israel. Esor och wewen lükün. Kot a mwüt ngeni Kition pwe epwe akufu ewe mwicheichen sounfiun Mitian meinisin.”
JDG 7:15 Iwe, lupwen Kition a rong ei tan me wewen, a fel ngeni Kot. Iwe, a liwinla ren lenien chon Israel o üreniir, “Oupwe pwätä, pun ewe Samol mi Lapalap a mwüt ngenikich pwe sipwe akufu ewe mwicheichen sounfiun Mitian.”
JDG 7:16 Iwe, a ineti ekewe ülüpükü mwän lon ülüngat mwich, a pwal ngeniir meinisin rappwa me pör mi pön, nge a wor töl lon ekewe pör.
JDG 7:17 Iwe, a üreniir, “Oupwe nenengeniei o föri usun mine üa föri. Lupwen üpwe tori ororun lenier, oupwe chök föri usun mine üa föri.
JDG 7:18 Lupwen aipwe ettiki nöüm rappwa, äm me chokewe mi etiei, pwal ämi oupwe ettiki nöümi kewe rappwa pwelin ünükün ewe lenien sounfiu o arukak, ‘Fän iten ewe Samol mi Lapalap, pwal fän iten Kition.’”
JDG 7:19 Iwe, Kition me ekewe ipükü mwän mi eti ra tori ororun ewes leni, lupwen fansoun lepoputän aruuen akasiwilin chon mas lukenipwin. Ekewe sounfiu ra chök kärän popuetä le mas. Mürin, ra ettiki nöür kewe rappwa o amökkü ekewe pör mi nom lepöür.
JDG 7:20 Iwe, ekewe ruu mwich ra pwal ettiki nöür kewe rappwa o amökkü ekewe pör. Lon pöüimöngür ra amwöchü ekewe töl, nge lon pöüifichir ra amwöchü nöür kewe rappwa o kökkö, “Ewe ketilas fän iten ewe Samol mi Lapalap, pwal fän iten Kition.”
JDG 7:21 Ra ütä eman me eman lon pwelin ünükün lenien ekewe sounfiun Mitian. Nge ekewe sounfiun Mitian meinisin ra ssä, ra puchör o süla.
JDG 7:22 Nge lupwen ekewe re Israel ra ettiki nöür kewe ülüpükü rappwa, ewe Samol mi Lapalap a föri pwe iteiten eman me eman sounfiun Mitian a fiu ngeni püsin chienan. Iwe, ewe mwichen sounfiu a süla tori Petsita sasape ngeni Serera, pwal tori ewe kiännin Apel-mehola arun Tappat.
JDG 7:23 Mürin, ra enieto ekewe re Israel seni ekewe ainangen Naftali me Aser, pwal unusen ewe ainangen Manasa. Iwe, ra feito o tapweri ekewe chon Mitian.
JDG 7:24 Iwe, Kition a tinala chon künö ren ekewe aramas mi nom lemenen ewe chukuchukutän Efraim, pwe repwe üreniir, “Oupwe feitiu o maun ngeni ekewe chon Mitian. Oupwe tokumweer o elliapa ekewe koluk tori Pet-para, pwal ewe chanpupu Jortan, pwe chon Mitian resap tongeni pwerela pekila.” Iei mine ekewe re Efraim meinisin mi kököto ngeni ewe maun ra feito o liapeni ekewe koluk tori Pet-para, pwal ewe chanpupu Jortan.
JDG 7:25 Ra pwal liapeni ekewe ruoman samolun Mitian iter Orep me Seep. Iwe, ra niela Orep me ren ewe achau lon Orep, nge Seep ra niela me ren ewe lenien üchüch wain lon Seep. Mürin ra tapweri ekewe chon Mitian, o uwato möküren Orep me Seep ren Kition ötiuen ewe chanpupu Jortan.
JDG 8:1 Mürin, ekewe re Efraim ra üreni Kition, “Pwota ka föri ei ngenikem pwe kosap körikem, lupwen ka feila maun ngeni chon Mitian?” Iwe, ra fokun anini ngeni.
JDG 8:2 Nge Kition a üreniir, “Met ngang üa föri epwe fen nönnö ngeni mine ämi oua föri? Ifa usun, esap mürina rusien chon Efraim föün irän wain mürin fansoun räs, lap seni resin föün irän wain än chon ewe eterekesin Apieser?
JDG 8:3 Kot a fangelong lepöümi ekewe samolun Mitian iter Orep me Seep. Met ngang üa tongeni föri epwe fen nönnö ngeni mine ämi oua föri?” Mürin an üreniir ekei kapas, ar song a kisikisitiu.
JDG 8:4 Iwe, Kition me ekewe ülüpükü mwän mi eti ra tori ewe chanpupu Jortan o pwerela pekilan. Ra malülü, nge ra chök tapweriir.
JDG 8:5 Lupwen ra tori Sukot, Kition a üreni mwänin ewe telinimw, “Ouse mochen oupwe ngeni nei kei sounfiu ekoch fochun pilawa. Ra fokun malülü, nge ngang üa chüen mochen tapweri ekewe kingen Mitian iter Sepa me Salmuna.”
JDG 8:6 Nge ekewe meilapen Sukot ra apasa, “Ifa usun, ka fen liapeni Sepa me Salmuna, ina äm aipwe wisen ngeni noum kewe sounfiu pilawa?”
JDG 8:7 Mürin, Kition a üreniir, “Iwe, ina. Lupwen ewe Samol mi Lapalap epwe mwüt ngeniei pwe üpwe liapeni Sepa me Salmuna, üpwe atatakisi fitukemi ngeni ekewe iräfölüföl seni lon fanüapö, pwal ngeni ekewe nikouloul.”
JDG 8:8 Iwe, seni ikenan Kition a feitä Penuel o kapas ngeni ekewe re Penuel ekewe chök kapas. Nge ir ra pwal pälüeni usun chök än ekewe re Sukot pälüen.
JDG 8:9 Iei mine Kition a üreni ekewe re Penuel, “Lupwen üpwe liwinto fän kinamwe, üpwe atai ei imw tekia.”
JDG 8:10 Iwe, Sepa me Salmuna ra nom Karkor ren nöür sounfiu, ina epwe ükükün engol me limungeröü mwän, ikkei ir lusun ewe mwichen sounfiu seni ötiu. Pun ra mäla ükükün ipükü rüe ngeröü sounfiu mi sile maun won ketilas.
JDG 8:11 Iwe, Kition a feitä won alen ekewe aramas mi imweimw lon imw mangaku peliötiuen Nopa me Jokpeha o maun ngeni ekewe sounfiu, lupwen ra tümwününgauela.
JDG 8:12 Iwe, Sepa me Salmuna ekewe kingen Mitian ra sü. Nge Kition a tapweriir o liapeniir, a pwal fokun aniuokusu nöür kewe sounfiu pwe ra toropasfeil.
JDG 8:13 Mürin, Kition nöün Joas we mwän a liwinto seni maun me won palen Heres.
JDG 8:14 Iwe, a liapeni eman alüalün Sukot o aisini iten ekewe meilap me souakomwen Sukot. Iwe, ewe alüal a makeetiu iten fik me füman mwän.
JDG 8:15 Mürin, Kition a feito ren ekewe re Sukot o üreniir, “Nengeni, ikkei ir Sepa me Salmuna, ekewe oua turunufaseei rer ren ämi apasa, ‘Ifa usun, ka fen liapeni Sepa me Salmuna, ina äm aipwe wisen ngeni noum kewe sounfiu mi malülü pilawa?’”
JDG 8:16 Iwe, Kition a angei ekewe souakomwen ewe telinimw Sukot o wichiir ren iräfölüföl seni lon fanüapö, pwal ren nikouloul.
JDG 8:17 A pwal atai ewe imw tekia lon Penuel o niela mwänin lon ewe telinimw.
JDG 8:18 Mürin, Kition a aisini Sepa me Salmuna, “Ifa lapalapen ekewe mwän oua nirela me lon Tapor?” Nge ir ra pälüeni, “Ir ra chök usum, eman me eman leir a lapalapeni lapalapen eman nöün king.”
JDG 8:19 Iwe, Kition a üreniir, “Ir pwii, nöün inei. Mwo manauen ewe Samol mi Lapalap, are ousap nirela, üsap pwal nikemiila.”
JDG 8:20 Mürin, a üreni Jeter nöün mwänichi, “Kopwe ütä o niir.” Nge ewe ät esap ütti nöün ketilas, pun a niuokus pokiten i a chüen kükün.
JDG 8:21 Iwe, Sepa me Salmuna ra üreni Kition, “Kopwe püsin ütä o nikeemila. Pun a nom reöm pöchökülen eman mwän.” Iei mine Kition a ütä o niela Sepa me Salmuna, a pwal angei ekewe fout mi lapalapeni lapalapen epek maram, ra nom won üen nöür kamel.
JDG 8:22 Mürin, ekewe re Israel ra üreni Kition, “Kopwe nemenikem, ämi me mwirimwirum kana. Pun en ka angasakem seni chon Mitian.”
JDG 8:23 Nge Kition a üreniir, “Üsap nemenikemi, nge nei mwän esap pwal nemenikemi. Ewe Samol mi Lapalap epwe nemenikemi.”
JDG 8:24 Iwe, Kition a pwal üreniir, “A wor ai tüngor ngenikemi. Eman me eman leimi epwe ngeniei liapan iering seni mine oua liapeni.” Pun ekewe sonfiun Mitian ir mwirimwirin Ismael ra soun nöünöü iering seni kolt.
JDG 8:25 Iwe, ra üreni, “Äm aipwe pwapwa le ngonuk.” Iwe, ra emeresala echö mangaku, nge eman me eman mwän a uwätiu lon liapan iering.
JDG 8:26 Iwe, choun ekewe iering seni kolt Kition a tüngor ina epwe ükükün faik me ülüngat paun kolt. Nge esap alealong ekewe fout mi lapalapeni lapalapen epek maram, ekewe fouten fän üw, ekewe üf mi parachol ekewe kingen Mitian ra üföüf, pwal ekewe afouten won üen nöür kamel.
JDG 8:27 Iwe, Kition a föri seni ewe kolt echö üf itan efot o iseni lon an telinimw itan Ofra. Iwe, chon Israel meinisin ra likitala Kot o fel ngeni ewe efot ikenan. Ewe efot a pwal wiliti eu lenien likatup ngeni Kition me an famili.
JDG 8:28 Iei usun chon Mitian ra kuf ren ekewe aramasen Israel, pwe resap chüen ü ngeniir. Iwe, a wor kinamwe lon ewe fanü lon ränin manauen Kition lon ükükün faik ier.
JDG 8:29 Mürin, Kition nöün Joas we mwän a feila o nonom lon püsin imwan.
JDG 8:30 Nge mi wor ükükün fik nöün Kition mwän ir wesewesen nöün, pun a wor chomong pwülüan.
JDG 8:31 Iwe, a wor eman ülüpwülüan mi nom Sikem, a pwal nöüni me won eman ät. Nge Kition a aita ngeni Apimelek.
JDG 8:32 Iwe, Kition nöün Joas we mwän a mäla lupwen a fokun chinlap. Ra peiaseni lon peiasen Joas seman we me lon Ofra telinimwen chon ewe eterekesin Apieser.
JDG 8:33 Mürin chök än Kition mäla, ekewe aramasen Israel ra kulsefäl seni Kot o fel ngeni ekewe anü Paal, ra pwal filätä Paal-perit pwe ar kot.
JDG 8:34 Iwe, ekewe aramasen Israel resap chüen angang ngeni ewe Samol mi Lapalap ar we Kot mi amanaueer seni chon oputer meinisin mi nom pwelin ünükür.
JDG 8:35 Resap pwal kirikiröch ngeni ewe familien Jerupaal, iei i Kition, fän iten ekewe föför mi mürina meinisin a föri ngeni chon Israel.
JDG 9:1 Iwe, Apimelek nöün Kition we mwän a feila Sikem ren mongeen inan, pwal ren unusen än inan we eterekes, o kapas ngeniir,
JDG 9:2 “Oupwe asile ngeni chon Sikem meinisin ai kei kapas ais, ‘Met epwe öch ngenikemi? Ir me fik nöün Kition kewe mwän repwe nemenikemi, ika eman chök?’ Nge oupwe chechemeni pwe pwal ngang eman fitukemi me chami.”
JDG 9:3 Iwe, mongeen inan ra asile ngeni ekewe re Sikem ekei kapas meinisin fän itan. Mürin ra päi ngeni Apimelek pwe repwe eti, pun ra apasa, “I pwich.”
JDG 9:4 Iwe, ra ngeni Apimelek ükükün fik föün moni silifer seni lon ewe imwen Paal-perit. Nge ren ei moni Apimelek a möni mwän mi mwäneson me lomotongau, pwe repwe tapwela mürin.
JDG 9:5 Iwe, a feila ren imwen saman we lon Ofra o niela ükükün fik pwin kewe nöün Kition won eföü chök fau. Nge Jotam nöün Kition setiputur a chüen manau, pun a op.
JDG 9:6 Mürin, chon ewe telinimw Sikem meinisin me chon Pet-milo ra mwichefengen ren ewe üren achem fän ewe irä ook lon Sikem, o seikätä Apimelek pwe epwe nöür king.
JDG 9:7 Lupwen ei pworaus a tori Jotam, a feila o ütä won ungen ewe chuk Kerisim. Iwe, a leüömong le kökkö o kapas ngeniir, “Oupwe aüselingaei, ämi re Sikem, pwe Kot epwe pwal aüselingakemi.
JDG 9:8 A nonom, ekewe irä ra chufengen pwe repwe seikätä eman king, pwe epwe nemeniir. Iwe, ra üreni ewe irä olif, ‘Kopwe nemenikem.’
JDG 9:9 Nge ewe irä olif a pälüeniir, ‘Ifa usun ai üpwe ükütiu le afisätä noppuk ekewe kot me aramas ra ling ren, pwe üpwe nemenikemi?’
JDG 9:10 Mürin, ekewe irä ra üreni ewe irä fiik, ‘En kopwe feito o nemenikem.’
JDG 9:11 Nge ewe irä fiik a pälüeniir, ‘Ifa usun ai üpwe ükütiu le afisätä uai mi mürina o arar, pwe üpwe feila o nemenikemi?’
JDG 9:12 Iwe, ekewe irä ra pwal üreni ewe irän wain, ‘En kopwe feito o nemenikem.’
JDG 9:13 Nge ewe irän wain a pälüeniir, ‘Ifa usun ai üpwe ükütiu le afisätä wain mi apwapwai ekewe kot me aramas, pwe üpwe feila o nemenikemi?’
JDG 9:14 Mürin, ekewe irä meinisin ra üreni ewe iräfölüföl, ‘En kopwe feito o nemenikem.’
JDG 9:15 Iwe, ewe iräfölüföl a pälüeni ekewe irä, ‘Are a wesewesen let ämi mochen seikieitä pwe üpwe ämi king, oupwe feito o op fän nüri. Nge are ousap mochen, ekkei epwe towu seni palei kewe mi föl o kenala ekewe irä setar won Lepanon.’”
JDG 9:16 Mürin, Jotam a üra, “Ifa usun, oua wesewesen föri mine a mürina o let ren ämi seikätä Apimelek pwe epwe king? Ifa usun, oua föri mine a pwüng ngeni Kition me chon leimwan o liwini ngeni semei ükükün mine a föri ngenikemi?
JDG 9:17 Oupwe chechemeni pwe semei a maun fän itemi, a fang manauan o amanauakemi seni chon Mitian.
JDG 9:18 Nge ämi oua ü ngeni chon leimwen semei ikenai o niela nöün kewe fik mwän won eföü chök fau. Iwe, oua seikätä Apimelek nöün nöün we chon angang fefin mwän pwe epwe king won chon Sikem pokiten i pwimi.
JDG 9:19 Are oua wesewesen föri mine a mürina o let ngeni Kition me chon leimwan ikenai, mürin oupwe pwapwaiti Apimelek, nge i epwe pwapwaitikemi.
JDG 9:20 Nge are esap iei usun, ekkei epwe küwu seni Apimelek o kenala chon Sikem me chon Pet-milo. Ekkei epwe pwal küwu seni chon Sikem me chon Pet-milo o kenala Apimelek.”
JDG 9:21 Iwe, Jotam a müttir ssä o süla, a tori Peer o nonom ikenan, pun a niuokusiti Apimelek pwin we.
JDG 9:22 Iwe, Apimelek a nemeni Israel lon ükükün ülüngat ier.
JDG 9:23 Mürin, Kot a tinato och ekingau lefilen Apimelek me ekewe re Sikem. Iwe, ekewe re Sikem ra kirikiringau ngeni Apimelek.
JDG 9:24 Ei a fis pokiten ewe föringau mi fis ngeni nöün Kition kewe fik mwän epwe wor chappan, pwe char epwe ukun Apimelek pwiir we mi nirela, epwe pwal ukun ekewe re Sikem mi apöchöküla ngeni pwe epwe niela pwin kewe.
JDG 9:25 Iwe, ekewe re Sikem ra tinala ekoch mwän pwe repwe asesera Apimelek me won ungen ekewe chuk. Ekewe mwän ra pwal angei fän pöchökül pisekin chokewe mi feila won ewe al. Ei pworaus a tori Apimelek.
JDG 9:26 Mürin, Kaal nöün Epet we mwän a mwöküt ngeni Sikem me aramasan. Nge ekewe re Sikem ra anomu ar apilükülük won Kaal.
JDG 9:27 Iwe, ekewe aramas ra feila lon ar kewe tanipin wain o kini ekewe föün irän wain, ra pwal üchü ekewe föün o föri eu kametip. Iwe, ra feila lon imwen ar kot, ra mongö o ün, ra pwal eäni kapasen turunufas usun Apimelek.
JDG 9:28 Mürin, Kaal a üra, “Iö Apimelek, pwe oukich chon Sikem sipwe angang ngeni? Ifa usun, sap i nöün Kition we mwän, nge Sepul kisin fan? Ousipwe angang ngeni ekewe mwirimwirin Hamor i semelapen chon Sikem. Pwota chök sipwe angang ngeni Apimelek?
JDG 9:29 Amwo ekei aramas repwe fen nom fän nemeniei. Mürin, üpwe asüela Apimelek, üpwe pwal üreni, ‘Kopwe achomongala noum sounfiu o feito pwe sipwe maun.’”
JDG 9:30 Iwe, lupwen Sepul ewe mi nemeni ewe telinimw a rongorong alon Kaal nöün Epet we mwän, a fokun song.
JDG 9:31 A tinala chon künö ren Apimelek mi nom Aruma, pwe repwe üreni, “Kaal nöün Epet we mwän me aramasan ra feito Sikem o atipetipa chon ewe telinimw pwe repwe ü ngonuk.
JDG 9:32 Iei mine kopwe feito lepwin, ämi me ekewe mwän mi nom reöm, nge oupwe chök witiwit lemäl.
JDG 9:33 Iwe, lesosorusich, lupwen akkar a tötä, oupwe pwätä o maun ngeni ewe telinimw. Nge lupwen Kaal me ekewe mwän mi nom ren ra towu pwe repwe maun ngonuk, kopwe föri ngeniir ükükün om tongeni.”
JDG 9:34 Iei mine Apimelek me ekewe mwän meinisin mi nom ren ra feito lepwin o op ünükün Sikem lon rüanü mwich.
JDG 9:35 Iwe, Kaal nöün Epet we mwän a towu o ütä leasamalapen ewe telinimw. Lon ena chök otun Apimelek me ekewe mwän mi nom ren ra ütä seni ar lenien op.
JDG 9:36 Lupwen Kaal a küna ekewe mwän, a üreni Sepul, “Nengeni, a wor mwän ra feito seni won ungen ekewe chuk.” Nge Sepul a üreni, “Ka chök küna ngünüen ekewe chuk ra usun mwän.”
JDG 9:37 Iwe, Kaal a pwal ürenisefäli, “Nengeni, a wor mwän ra feitiu seni lukalapen ewe fanü, nge eu mwich a pwal feito seni akawenewenen ewe ook soupwe ra pwee fan.”
JDG 9:38 Mürin, Sepul a üreni Kaal, “Ifa chök alom we ka üra, ‘Iö Apimelek pwe sipwe angang ngeni.’ Sap ikkei ir ekewe mwän ka turunufasei? Iei kopwe towu o maun ngeniir.”
JDG 9:39 Iwe, Kaal a emwenawu ekewe re Sikem o maun ngeni Apimelek.
JDG 9:40 Nge Apimelek a tapweri Kaal pwe a sü me mwan, nge chomong ra mäla won ewe al tori asamalapen ewe telinimw.
JDG 9:41 Iwe, Apimelek a nom lon Aruma, nge Sepul a asüela Kaal me aramasan, pwe resap chüen tongeni nonom lon Sikem.
JDG 9:42 Iwe, sorotän ewe rän ekewe aramasen Sikem ra feila lemäl. Nge Apimelek a rong usun.
JDG 9:43 Iei mine Apimelek a angei nöün kewe mwän o aimwüfeseniir lon ülüngat mwich. Iwe, ra op o witiwit lemäl. Nge lupwen Apimelek a küna pwe ekewe aramas ra towu seni ewe telinimw, a ütä pwe epwe maun ngeniir.
JDG 9:44 Iwe, Apimelek me an mwich mi eti ra müttir ssä ngeni asamalapen ewe telinimw o ütala lon, nge ekewe ruu mwich ra cheri meinisin mi nom lemäl o nirela.
JDG 9:45 Mürin, Apimelek a maun ngeni ewe telinimw lon unusen ewe rän tori a liapeni o niela aramasen lon. A pwal atai ewe telinimw o amorafeili salt won.
JDG 9:46 Iwe, lupwen aramasen ewe imw tekia lon Sikem ra rong mine a fis, ra tolong lon ewe leni mi pöchökül fän ewe imwenfelin El-perit.
JDG 9:47 Nge lupwen Apimelek a rong ewe pworaus, pwe ekewe aramas meinisin seni ewe imw tekia lon Sikem ra chufengen,
JDG 9:48 a feitä won ewe chuk Salmon, ir me ekewe mwän mi eti. Iwe, Apimelek a angei nöün we kouk, a pökü epilük mwüch o ekietä won afaran. A pwal üreni ekewe mwän mi eti, “Oupwe müttir le föri mine oua küna pwe ngang üa föri.”
JDG 9:49 Iei mine eman me eman leir a pökü epilük mwüch, a tapwela mürin Apimelek o isetiu won ewe leni mi pöchökül. Mürin ra kenala ewe mwüch, pwe ekewe aramas meinisin seni ewe imw tekia mi nom lon ewe leni ra mäla, ina epwe ükükün engeröü mwän me fefin.
JDG 9:50 Mürin, Apimelek a feila Tepes, a maun ngeni ewe telinimw o liapeni.
JDG 9:51 Nge a wor eu imw tekia mi pöchökül lukalapen ewe telinimw. Iwe, aramasen ewe telinimw meinisin ekewe mwän me fefin ra süiti ewe imw tekia. Ra apüngürelong lon o feitä won ewe imw.
JDG 9:52 Lupwen Apimelek a tori ewe imw tekia pwe epwe maun ngeni, a kan ngeni asamalapan pwe epwe keni.
JDG 9:53 Nge eman fefin a aturätiu eu nüüf seni fau won möküren Apimelek, pwe a amökkü pören möküran.
JDG 9:54 Mürin, Apimelek a müttir körato ewe alüal mi wisen uwei an tittin maun, o üreni, “Kopwe üttawu noum ketilas o nieila, pwe aramas resap üra rei pwe eman fefin a nieila.” Iwe, ewe alüal a posu pwe a mäla.
JDG 9:55 Nge lupwen ekewe re Israel ra küna pwe Apimelek a mäla, ra en me liwinla lon lenian.
JDG 9:56 Iei usun Kot a ngeni Apimelek chappen an tipis a föri ngeni saman ren an püsin niela pwin kewe fik.
JDG 9:57 Iwe, Kot a pwal föri pwe ekewe re Sikem ra angei chappen ar föföringau, usun Jotam nöün Kition we mwän a apasa lupwen a anümamaueer.
JDG 10:1 Mürin än Apimelek mäla a ütä Tola nöün Pua we mwän, nge Pua nöün Toto mwän, pwe epwe angasa Israel. Tola eman mwän seni ewe ainangen Isakar a nom lon Samir won chukuchukutän ewe fanü Efraim.
JDG 10:2 Iwe, a soukapwüng lon Israel lon ükükün rüe me ülüngat ier. Mürin a mäla, nge ra peiaseni lon Samir.
JDG 10:3 Nge mürin än Tola mäla a ütä Jair ewe re Kiliat. Iwe, a soukapwüng lon Israel lon ükükün rüe me ruu ier.
JDG 10:4 A wor ilik nöün mwän mi wawa ilik aas, a pwal wor ilik ar telinimw lon ewe fanü Kiliat mi chüen iteni Hawot-jair tori ikenai.
JDG 10:5 Iwe, Jair a mäla, nge ra peiaseni lon Kamon.
JDG 10:6 Iwe, ekewe aramasen Israel ra pwal förisefäli mine a ngau me fän mesen ewe Samol mi Lapalap, pwe ra angang ngeni ekewe anü Paal me Astarot, ngeni ekewe koten Siria me Siton, ekewe koten Moap me än chon Amon pwal än chon Filistia kewe kot. Ra likitala ewe Samol mi Lapalap o ükütiu le angang ngeni.
JDG 10:7 Iei mine ewe Samol mi Lapalap a fokun song ngeni chon Israel o asechirela ngeni chon Filistia me chon Amon
JDG 10:8 mi aweiresiir o ariaföüür lon ena fansoun. Iwe, lon ükükün engol me walu ier ra ariaföüü ekewe aramasen Israel meinisin mi nom ötiuen ewe chapupu Jortan lon Kiliat ewe fanüen chon Amor.
JDG 10:9 Iwe, ekewe chon Amon ra pwal pwereto pekiton ewe chanpupu Jortan, pwe repwe pwal maun ngeni chon ekewe ainangen Juta, Peniamin me Efraim. Iei mine chon Israel ra fokun riaföü.
JDG 10:10 Mürin, ekewe aramasen Israel ra siö ngeni ewe Samol mi Lapalap o apasa, “Äm aia tipis ngonuk, pun aia likitukela, en äm Kot, o angang ngeni ekewe anü Paal.”
JDG 10:11 Nge ewe Samol mi Lapalap a üreni ekewe aramasen Israel, “Lupwen ekewe chon Isip me chon Amor, ekewe chon Amon me chon Filistia,
JDG 10:12 pwal ekewe chon Siton, chon Amalek me chon Maon ra ariaföüükemi me lom, oua siö ngeniei. Ifa usun, ngang üsap angasakemiiwu seni fän nemenier?”
JDG 10:13 Nge oua chök likitieila o angang ngeni pwal ekoch kot. Iei mine üsap chüen amanauakemi.
JDG 10:14 Oupwe feila o siö ngeni ekewe kot oua filiretä. Ir repwe amanauakemi lon fansoun ämi riaföü.”
JDG 10:15 Nge ekewe aramasen Israel ra üreni ewe Samol mi Lapalap, “Äm aia tipis. Kopwe chök föri ngenikem mine a mürina ngonuk. Nge äm aia tüngor ngonuk pwe kopwe chök amanauakem ikenai.”
JDG 10:16 Mürin, ra pöütala ar kewe koten ekis mi nom rer o angang ngeni ewe Samol mi Lapalap. Iwe, Kot a chüngüw ekewe chon Israel lon ar riaföü.
JDG 10:17 Lupwen chon Amon ra amolätä ngeni maun o nonom lon Kiliat, ekewe aramasen Israel ra pwal chufengen o nonom lon Mispa.
JDG 10:18 Iwe, ekewe aramasen Kiliat me nöür kewe souemwen ra kapasfengen lefiler, “Iö epwe popuetä le maun ngeni ekewe chon Amon, i epwe nemeni chon Kiliat meinisin.”
JDG 11:1 Iwe, Jefta ewe re Kiliat eman sounfiu mi fokun pwora, nge i nöün eman fin lisowu. Semen Jefta a iteni Kiliat.
JDG 11:2 Nge Kiliat a pwal nöünöü ät me won wesewesen pwülüan. Iwe, lupwen nöün pwülüan kewe ät ra märitä, ra asüela Jefta o üreni, “Kosap wiseis me won semem, pun en nöün eman fefin.”
JDG 11:3 Mürin, Jefta a sü seni pwin kewe o nom lon ewe fanü Top. Ikenan mwän mi lomotongau ra chu ngeni o etifetalei.
JDG 11:4 Iwe, mürin eu fansoun, a fis pwe chon Amon ra maun ngeni chon Israel.
JDG 11:5 Nge lupwen ekewe chon Amon ra popuetä maun ngeni chon Israel, ekewe souakomwen Kiliat ra feila pwe repwe angei Jefta seni ewe fanü Top.
JDG 11:6 Iwe, ra üreni Jefta, “Kopwe etto pwe kopwe nöüm souemwen, pwe aipwe tongeni maun ngeni ekewe chon Amon.”
JDG 11:7 Nge Jefta a üreni ekewe souakomwen Kiliat, “Ifa usun, ämi ousap oputaei o asüeila seni lon imwen semei? Pwota oua feito rei iei, lupwen oua nom lon osupwang?”
JDG 11:8 Nge ekewe souakomwen Kiliat ra üreni Jefta, “Ina popun äm aia kul ngonuk iei pwe kopwe etikem le maun ngeni ekewe chon Amon, kopwe pwal nemeni chon Kiliat meinisin.”
JDG 11:9 Iwe, Jefta a üreniir, “Are oupwe aliwinisefälieila lon leniei, pwe üpwe maun ngeni ekewe chon Amon, nge ewe Samol mi Lapalap epwe atolongeer lepei, ngang üpwe nemenikemi.”
JDG 11:10 Mürin, ekewe souakomwen Kiliat ra üreni Jefta, “Ewe Samol mi Lapalap epwe chon pwärätä lefilach. Äm aipwe fokun föri usun ka apasa.”
JDG 11:11 Iei mine Jefta a eti ekewe souakomwen Kiliat, nge ekewe aramas ra seikätä pwe i epwe nemeniir o emweniir. Iwe, Jefta a apasasefäli ekei kapas meinisin me fän mesen ewe Samol mi Lapalap me lon Mispa.
JDG 11:12 Mürin, Jefta a tinala chon künö ren ewe kingen chon Amon pwe repwe üreni, “Met punum ngenikem pwe ka feito o maun ngeni fanüem?”
JDG 11:13 Iwe, ewe kingen chon Amon a üreni nöün Jefta kewe chon künö, “Lupwen chon Israel ra feito seni Isip, ra angei fanüei seni ewe chanpupu Arnon tori ewe chanpupu Japok, pwal tori ewe chanpupu Jortan. Iei mine oupwe aliwini ewe fanü fän kinamwe.”
JDG 11:14 Nge Jefta a tinsefäliela ekewe chon künö ren ewe kingen chon Amon
JDG 11:15 pwe repwe üreni, “Iei alon Jefta: Chon Israel resap angei fanüen chon Moap me chon Amon.
JDG 11:16 Nge iei usun mine a fis: Lupwen chon Israel ra feito seni Isip, ra pwerelong lon ewe fanüapö tori ewe Setipar, ra pwal tori Kates.
JDG 11:17 Mürin, chon Israel ra tinala chon künö ren ewe kingen Etom pwe repwe üreni, ‘Äm aia tüngor, kopwe mwüt ngenikem pwe aipwe pwerela lon fanüom.’ Nge ewe kingen Etom esap mochen aüseling. Iwe, ra pwal titila ren ewe kingen Moap, nge ätewe esap pwal mochen. Iei mine chon Israel ra chök nom lon Kates.
JDG 11:18 Mürin ra sai lemenen ewe fanüapö o pwelila lükün ewe fanü Etom me ewe fanü Moap. Ra feila peliötiuen ewe fanü Moap o aüetä imwer lepekin ewe chanpupu Arnon me epek, nge resap tolong lon ewe fanü Moap, pun ewe chanpupu Arnon kiännin fanüen chon Moap.
JDG 11:19 Mürin, chon Israel ra tinala chon künö ren Sihon kingen chon Amor mi nom lon Hespon. Iwe, ra üreni, ‘Äm aia tüngor, kopwe mwüt ngenikem pwe aipwe feila lon fanüom, pwe aipwe tori fanüem.’
JDG 11:20 Nge Sihon esap lükülük ren chon Israel ar repwe pwerela lon fanüan. Iei mine a amwichafengeni nöün sounfiu meinisin, ra feila o nonom Jahas o maun ngeni chon Israel.
JDG 11:21 Iwe, ewe Samol mi Lapalap, ewe Koten Israel a atolonga Sihon me nöün sounfiu meinisin fän nemenien chon Israel, pwe ra akufuur. Iei mine chon Israel ra angei o fanüeni unusen ewe fanü ekewe chon Amor ra fanüeni me mwan.
JDG 11:22 Iwe, ra liapeni o fanüeni unusen fanüen ekewe chon Amor seni ewe chanpupu Arnon mi nom ör tori ewe chanpupu Japok mi nom efeng, pwal seni ewe fanüapö mi nom ötiu tori ewe chanpupu Jortan mi nom lotou.
JDG 11:23 Iei usun ewe Samol mi Lapalap, ewe Koten Israel, a asüela ekewe chon Amor me mwen nöün aramasen Israel. Met om pwüüng pwe ka ekiekin fanüeni fanüer iei?
JDG 11:24 Ämi oupwe fanüeni ewe fanü Kemos ämi we kot a ngenikemi. Nge äm aipwe fanüeni ekewe fanü meinisin ewe Samol mi Lapalap a ngenikem.
JDG 11:25 Ifa usun, en ka mürina seni Palak nöün Sipor we mwän ewe kingen Moap? Ifa usun, Palak a anini ngeni chon Israel ika a maun ngeniir?
JDG 11:26 Lon ükükün ülüpükü ier ekewe aramasen Israel ra nonom lon Hespon me Aroer me wisoposopur, pwal lon ekewe telinimw meinisin arun ewe chanpupu Arnon. Pwota kosap angeesefäli ekewe fanü lon ena fansoun?
JDG 11:27 Iei mine üsap tipis ngonuk, nge en ka mwäl ren om maun ngeniei. Ewe Samol mi Lapalap, ewe Soukapwüng, epwe eäni kapwüng lefilen ekewe aramasen Israel me ekewe aramasen Amon.”
JDG 11:28 Nge ewe kingen chon Amon esap aüselinga än Jefta pworaus a tinala ren.
JDG 11:29 Mürin, Ngünün ewe Samol mi Lapalap a feitiu won Jefta. Iwe, Jefta a pwerela lemenen Kiliat me Manasa o liwiniti Mispa lon Kiliat. Seni ikenan a pwerela ren ekewe chon Amon.
JDG 11:30 Iwe, Jefta a eäni eu pwon ngeni ewe Samol mi Lapalap o üra, “Are kopwe mwüt ngeniei pwe üpwe akufu ekewe chon Amon,
JDG 11:31 mürin, lupwen üpwe liwin seni ai akufu ekewe chon Amon, iö chök a towu seni leasamalapen imwei pwe epwe churiei, epwe nöün ewe Samol mi Lapalap. Iwe, üpwe eäni asoren kek ngonuk.”
JDG 11:32 Mürin, Jefta a feila pekila ren ekewe chon Amon pwe epwe maun ngeniir. Iwe, ewe Samol mi Lapalap a mwüt ngeni pwe a akufuur.
JDG 11:33 A ataela ükükün rüe telinimw seni Aroer tori Minit, pwal tori Apel-keramim o niela chomong. Iei mine ekewe chon Amon ra nom fän nemenien chon Israel.
JDG 11:34 Mürin, Jefta a liwiniti imwan lon Mispa. Nge nengeni, nöün föpwül a towu pwe epwe churi fän pisekin ettik me pworuk. Iwe, neminewe nöün aleman, esap wor eman nöün mwän ika fefin lükün.
JDG 11:35 Iwe, lupwen Jefta a küna nöün föpwül, a kamwei üfan o üra, “Osupwangei, nei föpwül, ka atatakisi letipei. En popun pwe riaföü mi lap a toriei. Pun üa fen eäni eu pwon ngeni ewe Samol mi Lapalap, nge üsap tongeni atai.”
JDG 11:36 Nge ewe föpwül a üreni, “Semei, are ka eäni eu pwon ngeni ewe Samol mi Lapalap, kopwe föri ngeniei usun mine ka eäni pwon, pun ewe Samol mi Lapalap a ngeni chon oputom ekewe chon Amon chappen ar föför ngonuk.”
JDG 11:37 A pwal üreni seman, “Kopwe mwüt ngeniei eu chök ai tüngor, pwe üpwe feila lon ükükün ruu maram o fetalfeil won ekewe chuk, äm me chienei, pwe üpwe kechüeitiei pwe üpwe mäla, nge üsap mwo pwüpwülü.”
JDG 11:38 Iwe, Jefta a üreni, “Kopwe feila.” A tinala lon ükükün ruu maram. Iwe, ewe föpwül me chienan ra feila won ekewe chuk o kechüeiti an epwe mäla, nge esap mwo pwüpwülü.
JDG 11:39 Mürin ekewe ruu maram ewe föpwül a liwiniti saman, nge i a föri ngeni usun mine a eäni pwon ngeni ewe Samol mi Lapalap. Iwe, ewe föpwül a mäla nge esap fokun tori eman mwän. Ren ei a fis eu örüni lon Israel,
JDG 11:40 pwe ekewe föpwülün Israel ra feila ekis lon ükükün rüanü rän iteiten ier, pwe repwe kechüeiti ewe föpwül nöün Jefta ewe re Kiliat.
JDG 12:1 Iwe, ekewe re Efraim ra kö pwe repwe feila maun. Ra feila pekilan ewe chanpupu Jortan ren Safon o üreni Jefta, “Pwota ka feila pekila o maun ngeni chon Amon, nge kosap kökkörikem pwe aipwe etuk? Aipwe kenukelong lon imwom.”
JDG 12:2 Nge Jefta a üreniir, “Äm me aramasei a wor äm koumfengen me chon Amon, nge lupwen üa körikemi, ämi ousap amanauaei seni lepöür.
JDG 12:3 Iwe, lupwen üa küna pwe ousap alisiei, üa püsin fangala manauei o feila pekila pwe üpwe maun ngeni chon Amon. Nge ewe Samol mi Lapalap a atolongeer lepei. Pwota oua feito rei ikenai pwe oupwe maun ngeniei?”
JDG 12:4 Mürin, Jefta a amwichafengeni ekewe re Kiliat meinisin, a maun ngeni chon Efraim o akufuur. Ekewe chon Efraim ra apasa, “Ämi chon Kiliat oua chök choisä seni Efraim me Manasa.”
JDG 12:5 Iwe, ekewe re Kiliat ra liapeni petepeeten ewe chanpupu Jortan mwen ekewe re Efraim. Nge are eman lein ekewe re Efraim mi süsüfetal a feito o tüngor, “Oupwe mwüt ngeniei pwe üpwe feila pekila,” ekewe re Kiliat ra aisini, “Ifa usun, en eman re Efraim?” Iwe, lupwen a apasa, “Ap,”
JDG 12:6 ekewe re Kiliat ra üreni, “Kopwe apasa, ‘Shipolet.’” Nge are i a apasa, ‘Sipolet,’ pun esap tongeni anewenewaöchü ewe kapas, mürin ra turufi o niela arun petepeeten ewe chanpupu Jortan. Lon ena fansoun ra mäla faik me ruungeröü re Efraim.
JDG 12:7 Iwe, Jefta ewe re Kiliat a soukapwüng lon Israel lon ükükün wonu ier. Mürin, Jefta a mäla, nge ra peiaseni lon an we telinimw lon Kiliat.
JDG 12:8 Mürin Jefta, Ipsan seni Petleem a soukapwüng lon Israel.
JDG 12:9 Iwe, a wor ükükün ilik nöün Ipsan mwän pwal ilik nöün fefin. A apwüpwülüa nöün kewe fefin lükün an eterekes, nge a uwato ilik fefin seni lükün an eterekes pwe pwülüen nöün kewe mwän. Iwe, Ipsan a soukapwüng lon Israel lon ükükün fisu ier.
JDG 12:10 Mürin, Ipsan a mäla, nge ra peiaseni lon Petleem.
JDG 12:11 Iwe, mürin Ipsan, Elon ewe re Sepulon a soukapwüng lon Israel lon ükükün engol ier.
JDG 12:12 Mürin, Elon a mäla, nge ra peiaseni lon Aijalon lon ewe fanü Sepulon.
JDG 12:13 Iwe, mürin Elon, Apton nöün Hilel we mwän ewe re Piraton a soukapwüng lon Israel.
JDG 12:14 A wor ükükün faik nöün Apton mwän, pwal ilik nöün nöün mwän mi wawa fik aas. Iwe, a soukapwüng lon Israel lon ükükün walu ier.
JDG 12:15 Mürin, Apton a mäla, nge ra peiaseni lon Piraton lon ewe fanü Efraim won chukuchukutän fanüen chon Amalek.
JDG 13:1 Iwe, ekewe aramasen Israel ra pwal förisefäli mine a ngau me fän mesen ewe Samol mi Lapalap. Iei mine ewe Samol mi Lapalap a atolongeer fän nemenien ekewe chon Filistia lon ükükün faik ier.
JDG 13:2 Iwe, mi wor eman mwän lon Sora seni ewe ainangen Tan itan Manoa. Nge pwülüan esap nöünöü, pun a rit.
JDG 13:3 Iwe, nöün ewe Samol mi Lapalap chon läng a pwä ngeni ewe fefin o üreni, “Nengeni, kosap nöünöü, pun ka rit. Nge iei kopwe pwopwo o nöüni eman ät.
JDG 13:4 Kopwe afäluk pwe kosap ün wain ika sakau mi pwichikar, kosap pwal mongö och mi limengau.
JDG 13:5 Nge lupwen noum ät a uputiu, kosap fichi möküran, pun ewe ät epwe eman Nasir, eu sokun aramas mi imwüla fän iten Kot seni an uputiu. Iwe, i epwe popuetä le angasa chon Israel seni chon Filistia.”
JDG 13:6 Mürin, ewe fefin a feila ren pwülüan o üreni, “Eman aramasen Kot a feito rei, nge won mesan a usun chök won mesen eman nöün Kot chon läng mi fokun eniwokus. Üsap aisini ia a feito me ie, nge i esap üreniei itan.
JDG 13:7 Iwe, a chök üreniei, ‘Kopwe pwopwo o nöüni eman ät. Iei mine seni ikenai kosap ün wain ika och sakau mi pwichikar, kosap pwal mongö och mi limengau. Pun ewe ät epwe eman Nasir, eu sokun aramas mi imwüla fän iten Kot seni an uputiu tori an mäla.’”
JDG 13:8 Mürin, Manoa a iotek ngeni ewe Samol mi Lapalap o üreni, “Ai Samol, üa tüngor ngonuk pwe kopwe mwüt ngeni ewe aramasen Kot, ka piin tinato, epwe liwinsefälito rem, pwe epwe aiti ngenikem mine aipwe föri ngeni ewe ät epwe uputiu.”
JDG 13:9 Iwe, Kot a aüselinga än Manoa iotek, pun nöün Kot we chon läng a liwinsefälito ren ewe fefin mi mot lemäl. Nge Manoa pwülüan we esap nom ren.
JDG 13:10 Mürin, ewe fefin a müttir säla ren pwülüan we o üreni, “Nengeni, ewe mwän mi feito rei ponlon ewe a pwäsefäl ngeniei.”
JDG 13:11 Iwe, Manoa a ütä o tapwela mürin pwülüan we, a feito ren ewe mwän o aisini, “Ifa usun, en ewe mwän ka kapas ngeni pwülüei ei?” Nge i a üra, “Ewer, ngang.”
JDG 13:12 Mürin, Manoa a aisini, “Lupwen om kapas epwe fis, epwe ifa usun lapalapen manauen ewe ät, nge met epwe föri?”
JDG 13:13 Nge nöün ewe Samol mi Lapalap we chon läng a üreni Manoa, “Pwülüom we epwe afäli meinisin mine üa üreni.
JDG 13:14 Esap tongeni mongö och mine a feito seni ewe irän wain ika ün wain ika sakau mi pwichikar, esap pwal mongö och mi limengau. Epwe tümwünü meinisin mine üa allük ngeni.”
JDG 13:15 Mürin, Manoa a üreni nöün ewe Samol mi Lapalap we chon läng, “Kose mochen kopwe ekis witiwit, pwe aipwe amolätä eman apanen kuuch fän itom.”
JDG 13:16 Nge nöün ewe Samol mi Lapalap we chon läng a üreni Manoa, “Are mwo oua mochen üpwe witiwit, üsap mongö enemi mongö. Nge are oua mochen amolätä och, oupwe eäni asoren kek ngeni ewe Samol mi Lapalap.” Pun Manoa esap silei pwe i nöün ewe Samol mi Lapalap we chon läng.
JDG 13:17 Iwe, Manoa a aisini nöün ewe Samol mi Lapalap we chon läng, “Ifa itom, pwe aipwe asamoluk, lupwen om we kapas epwe fis?”
JDG 13:18 Nöün ewe Samol mi Lapalap we chon läng a pälüeni, “Pwota ka ais itei? Pun itei a men amwarar.”
JDG 13:19 Mürin, Manoa a angei eman apanen kuuch me ewe asoren mongö o eäniir asor won ewe achau ngeni ewe Samol mi Lapalap mi föri mettoch mi amwarar.
JDG 13:20 Nge lupwen ewe ekkei a ngetetä seni ewe rongen asor, nöün ewe Samol mi Lapalap we chon läng a fitätä ngetengetan we. Iwe, lupwen Manoa me pwülüan we ra küna ei, ra chapetiu lepwül.
JDG 13:21 Mürin, Manoa a silei pwe i nöün ewe Samol mi Lapalap we chon läng. Iwe, nöün ewe Samol mi Lapalap we chon läng esap chüen pwäsefäl ngeni Manoa me pwülüan we.
JDG 13:22 Iwe, Manoa a üreni pwülüan we, “Sipwe fokun mäla, pun sa küna Kot.”
JDG 13:23 Nge pwülüan we a üreni, “Are ewe Samol mi Lapalap a ekiekin nikich, esap etiwa ach we asoren kek me asoren mongö, esap pwal pwäri ngenikich ika asile ngenikich ekei mettoch meinisin.”
JDG 13:24 Iwe, ewe fefin a nöüni eman ät o aita ngeni Samson. Ewe ät a mämäritä, nge ewe Samol mi Lapalap a afeiöchü.
JDG 13:25 Iwe, Ngünün ewe Samol mi Lapalap a popuetä le amwökütükütü Samson, lupwen a nonom lon Mahane-tan lefilen Sora me Estaol.
JDG 14:1 Iwe, lon eu rän Samson a feitiu Timna, nge ikenan a küna eman lein ekewe föpwülün Filistia.
JDG 14:2 Mürin a liwinla o üreni saman me inan, “Üa küna eman ekewe föpwülün Filistia me lon Timna. Iei oupwe tüngor ngeniei neminewe pwe üpwe pwülüeni.”
JDG 14:3 Nge saman me inan ra üreni, “Ifa usun, esap wor eman fefin me lein ekewe föpwül nöün märärum ika lein aramasach meinisin, ina kopwe feila o angei eman pwülüom seni ekewe chon Filistia resap sirkomsais?” Nge Samson a üreni saman, “Kopwe tüngor ngeniei neminewe, pun üa fokun sani.”
JDG 14:4 Iwe, saman me inan resap silei pwe ei ekiek a feito seni ewe Samol mi Lapalap, pun a kütta och popun an epwe maun ngeni ekewe chon Filistia. Lon ena fansoun ekewe chon Filistia ra nemeni Israel.
JDG 14:5 Mürin, Samson a etatiu saman me inan lon Timna. Nge lupwen a tori ekewe tanipin wain me lon Timna, eman nienifön laion a müttir feito o wörüwör ngeni.
JDG 14:6 Iwe, Ngünün ewe Samol mi Lapalap a feitiu won Samson o apöchöküla, pwe a pwilifeseni ewe laion usun eman a pwili eman apanen kuuch, nge esap wor och lepöün. Nge Samson esap apworausa ngeni saman ika inan mine a föri.
JDG 14:7 Mürin, Samson a feitiu o kapas ngeni ewe fefin, nge a fokun sani neminewe.
JDG 14:8 Iwe, mürin ekoch fansoun, Samson a liwiniti neminewe pwe epwe apwüpwülü ngeni. Lupwen an fetal a rikiwu seni ewe al pwe epwe katol chün ewe laion a niela. Nge nengeni, a wor epwi chunen lon chün, pwal chönün chunen.
JDG 14:9 Iwe, Samson a tukei ewe chönün chunen o ünümi nge fefetal. A pwal tori saman me inan o ngeniir och seni. Iwe, ra ün, nge Samson esap apworausa ngeniir pwe a angei ewe chönün chunen seni chün ewe laion.
JDG 14:10 Mürin, semen Samson a feitiu ren ewe fefin, nge Samson a föri eu kametip ikenan, pun iei mine ekewe alüal ra föri.
JDG 14:11 Lupwen ekewe aramas ra küna Samson, ra emwenato ilik chienan pwe repwe nom ren.
JDG 14:12 Iwe, Samson a üreniir, “Iei üpwe eäni ngenikemi eu asisil. Are oua tongeni pwäri ngeniei wewen mwen an epwe wes ekewe fisu ränin kametip, üpwe ngenikemi ilik üf mi pwechepwech, pwal ilik üföüfen kametip.
JDG 14:13 Nge are ousap tongeni pwäri ngeniei wewen, mürin ämi oupwe ngeniei ilik üf mi pwechepwech me ilik üföüfen kametip.” Iwe, ra üreni Samson, “Kopwe apasa ngenikem om asisil pwe aipwe rongorong.”
JDG 14:14 Samson a üreniir, “Mongö a towu seni eman mi momongö, nge arar a towu seni eman mi pöchökül.” Iwe, mürin ülüngat rän resap tongeni asilla ewe asisil.
JDG 14:15 Nge lon arüanün rän ra üreni pwülüen Samson, “Kopwe echimwa pwülüom na pwe epwe pwäri ngenikem wewen ewe asisil. Nge are kosap, äm aipwe kenikemi me chon leimwen semom. Ifa usun, oua titi äm pwe aipwe feito ikei, pwe oupwe awöüngauakem?”
JDG 14:16 Iei mine pwülüen Samson a kechü ngeni o üreni, “Ka chök oput ngang, kosap tongeei. Ka eäni eu asisil ngeni chon fanüei, nge kosap pwäri ngeniei wewen.” Samson a üreni neminewe, “Nengeni, üsap mwo nge pwäri ngeni semei ika inei. Pwota üpwe pwäri ngonuk?”
JDG 14:17 Iwe, neminewe a kechü ngeni Samson lon ükükün ekewe fisu ränin kametip. Nge lon ewe afisuen rän, Samson a pwäri ngeni wewen, pun neminewe a fokun echimwa. Mürin, neminewe a apworausa wewen ewe asisil ngeni chon fanüan kewe.
JDG 14:18 Nge lon ewe afisuen rän mwen akkar a tuputiu, ekewe mwänin ewe telinimw ra üreni Samson, “Met a arar seni chönün chunen? Nge met a pöchökül seni eman laion?” Samson a üreniir, “Are ämi ousap tuw pwül ren nei ätemwänin kow, ämi ousap silei wewen ai asisil.”
JDG 14:19 Iwe, Ngünün ewe Samol mi Lapalap a feitiu won Samson o apöchöküla, pwe a feitiu Askalon o niela ilik mwän me lon ewe telinimw. A angei seniir chchon wokun o ngeni ätekewe mi asilla ewe asisil ekewe ilik üföüfen kametip. Mürin, a liwiniti imwen saman fän an song mi watte.
JDG 14:20 Nge pwülüen Samson ra apwüpwülüa ngeni chienen Samson, ätewe mi eti lupwen an apwüpwülü.
JDG 15:1 Mürin ekoch fansoun, lon fansoun kinikin wiich, Samson a feila pwe epwe churi pwülüan we o uwei eman apanen kuuch. A üreni semen neminewe, “Üpwe tolong ren pwülüei lon ewe rum.” Nge ätewe esap mwüt ngeni an epwe tolong.
JDG 15:2 Iwe, semen neminewe a üra, “Üa fokun ekieki pwe ka wesewesen oput neminewe. Iei mine üa apwüpwülüa ngeni chienom. Ifa usun, pwin kükün esap liöch seni? Üa tüngor ngonuk pwe kopwe angei neminewe pwe akasiwilin.”
JDG 15:3 Nge Samson a üreniir, “Lon ei otun esap tipisi are üpwe afeiengaua ekewe re Filistia.”
JDG 15:4 Iei mine Samson a feila o turufi ülüpükü foks, a pwal angei töl. Iwe, a fötifengeni iteiten mechen eman foks ngeni mechen eman o iseis efoch töl lefiler.
JDG 15:5 Nge lupwen a keni ekewe töl, a asüela ekewe foks pwe repwe süla lon än ekewe chon Filistia tanipin wiich resamwo pöküpök, pwe ekewe pilükün wiich me ewe wiich esamwo pöküpök ra karala, pwal ekewe tanipin olif.
JDG 15:6 Mürin, ekewe chon Filistia ra ais, “Iö a föri ei?” Nge ra pälüeni, “Samson, pwülüen nöün ewe re Timna, pun ra angei seni pwülüan we o apwüpwülüa ngeni chienan.” Iei mine ekewe re Filistia ra feito o kenala ewe fefin me saman we.
JDG 15:7 Samson a üreniir, “Ika iei usun mine oua föri, üpwe pwon fän akapel pwe üsap ükütiu le afeiengauakemi tori üpwe wes le ngenikemi chappen ämi föför.”
JDG 15:8 Iwe, a fokun fiu ngeniir fän song o niela chomong. Mürin, a feitiu o nonom lon pwangen ewe achau lon Etam.
JDG 15:9 Mürin, ekewe chon Filistia ra feila, ra tolong lon ewe fanü Juta o maun ngeni ewe telinimw Lehi.
JDG 15:10 Nge ekewe re Juta ra aisiniir, “Pwota oua feito pwe oupwe maun ngenikem?” Iwe, ra pälüeni, “Äm aia feito pwe aipwe föti Samson o föri ngeni usun mine i a föri ngenikem.”
JDG 15:11 Mürin, ülüngeröü re Juta ra feitiu ren pwangen ewe achau lon Etam o üreni Samson, “Kosap silei pwe ekewe chon Filistia ra nemenikich? Met ei ka föri ngenikem?” Nge Samson a üreniir, “Usun mine ir ra föri ngeniei, iei usun ngang üa pwal föri ngeniir.”
JDG 15:12 Iwe, ekewe re Juta ra üreni Samson, “Äm aia feitiu reöm pwe aipwe fötuk o atolongok lepöün chon Filistia.” Nge Samson a üreniir, “Oupwe pwon fän akapel ngeniei pwe ousap püsin nieila.”
JDG 15:13 Mürin, ekewe re Juta ra üreni, “Apwi, äm aipwe chök fötuk o atolongok lepöür, nge aisap niikela.” Iwe, ra föti Samson ren ruofoch säl mi fö o emwenato seni ewe achau.
JDG 15:14 Iwe, lupwen Samson a tori Lehi, ekewe chon Filistia ra feila fän mweireir pwe repwe churi. Nge Ngünün ewe Samol mi Lapalap a feitiu won Samson o apöchöküla, pwe a mwüti ekewe ruofoch säl mi föfö ngeni pöün, usun eman a mwüti terech mi kar.
JDG 15:15 Mürin, Samson a küna chün ngächin eman aas ekärän mäla, a müttir angei o aea le niela engeröü mwän.
JDG 15:16 Iwe, Samson a apasa, “Ren chün ngächin eman aas üa achukuchukätä pwal achukuchukätä niei aramas. Ren chün ngächin eman aas üa niela engeröü mwän.”
JDG 15:17 Iwe, lupwen a wes me kapas, a pöütala ewe chün ngächin aas. Iei mine ewe leni a iteni Ramat-lehi .
JDG 15:18 Mürin, Samson a fokun kaka, a kökköri ewe Samol mi Lapalap o apasa, “Ka föri ei angangen ngasala mi lapalap rei ngang noum ei chon angang. Nge ifa usun, üpwe mäla iei ren ai kaka o tolong lepöün chokewe resap sirkomsais?”
JDG 15:19 Mürin, Kot a asanga ewe pwang lon ewe pwül mi nom lon Lehi, pwe koluk a michitä seni. Iwe, lupwen Samson a ün, a pöchökülsefäl. Iei mine ewe leni a iteni En-hakkore , a nom lon Lehi tori ikenai.
JDG 15:20 Iwe, Samson a soukapwüng lon Israel lon ükükün rüe ier lupwen fansoun chon Filistia ra nemeni ewe fanü.
JDG 16:1 Iwe, lon eu rän Samson a feila Kasa. Ikenan a küna eman fin lisowu, a tolong o kon ren.
JDG 16:2 Nge lupwen ekewe chon Kasa ra rong pwe Samson a nom, ra pweliela ewe leni, ra operi o witiwiti lon unusen ewe pwin leasamalapen ewe telinimw. Iwe, ra mosonoson lon unusen ewe pwin, pun ra apasa, “Ousipwe witiwit tori a ränila lesosor, mürin sipwe niela.”
JDG 16:3 Nge Samson a chök kon tori lukenipwin. Mürin a pwätä, a kamwöch asamalapen ewe telinimw me üran kewe ruofoch o üttiretä meinisin fiti lokkun. A iseniretä won afaran o uweeretä won ungen ewe chukutekison peliötiuen Hepron.
JDG 16:4 Mürin ekoch fansoun, Samson a sani eman fefin itan Telila mi nom lon ewe lemolun Sorek.
JDG 16:5 Iwe, ekewe samolun chon Filistia ra feito ren neminewe o üreni, “Kopwe echimwa Samson o kütta met popun a kon watte an pöchökül. Kopwe pwal kütta ren met aipwe tongeni turufi pwe aipwe tongeni föti o akufu. Mürin aipwe en me ngonuk engeröü ipükü föün moni silifer.”
JDG 16:6 Iwe, Telila a üreni Samson, “Kose mochen kopwe pwäri ngeniei met popun a kon watte om pöchökül, pwal met ka tongeni föfö ren pwe eman epwe tongeni akufuk.”
JDG 16:7 Nge Samson a üreni, “Are repwe föti ngeniei fufoch säl mi fö o ngüt, mürin üpwe apwangapwang usun chök aramas meinisin.”
JDG 16:8 Mürin, ekewe samolun Filistia ra uwato ren neminewe fufoch säl mi fö o ngüt, nge neminewe a föti Samson ren.
JDG 16:9 Iwe, a wor ekoch mwän mi op o witiwit lon ewe rum lukalapen imwen neminewe. Nge neminewe a köri Samson, “Samson, ekewe re Filistia repwe le turufuk.” Nge Samson a mwüti ekewe säl usun chök uput a mwü, lupwen ekkei a küri. Iei usun monomonen an pöchökül esap pwä.
JDG 16:10 Iwe, Telila a üreni Samson, “Nengeni, ka turunufaseei o chofana ngeniei. Kose mochen kopwe pwäri ngeniei met eman a tongeni föti ngonuk.”
JDG 16:11 Nge Samson a üreni, “Are repwe föti ngeniei säl mi fö resap piin aea, mürin üpwe apwangapwang usun chök aramas meinisin.”
JDG 16:12 Iei mine Telila a angei säl mi fö, a föti Samson o kökkö, “Samson, ekewe re Filistia repwe le turufuk.” Iwe, ekewe mwän ra op o witiwit lon ewe rum lukalapen ewe imw. Nge Samson a mwüti ekewe säl seni pöün usun terech.
JDG 16:13 Mürin, Telila a üreni Samson, “Tori ikenai ka chök turunufaseei o chofana ngeniei. Kopwe pwäri ngeniei met eman a tongeni föti ngonuk.” Nge Samson a üreni, “Are kopwe türünalong füchoch meten mökürei lon eu tür o annüküretiu ren ewe chüfölün tür, mürin üpwe apwangapwang usun chök aramas meinisin.”
JDG 16:14 Iwe, lupwen Samson a annut, Telila a angei füchoch meten möküran o türünirelong lon ewe tür. A pwal annüküretiu ren efoch chüföl o kökkö, “Samson, ekewe re Filistia repwe le turufuk.” Iwe, Samson a nennela le annut, a üttawu ewe chüföl, ewe ipo me ewe tür.
JDG 16:15 Mürin, Telila a üreni Samson, “Ifa usun om kopwe tongeni apasa pwe ka tongeei, nge lelukom a toau seniei. En ka turunufaseei fän ülüngat, nge kosap pwäri ngeniei popun om pöchökül.”
JDG 16:16 Iwe, lupwen neminewe a arianikisi Samson rän me rän o echimwa, a mos ren pwe a mochen mäla.
JDG 16:17 Mürin, Samson a pwäri ngeni Telila unusen monomonen lelukan o üreni, “Esap mwo fich mökürei fän eu, pun ngang eman Nasir, eu sokun aramas mi imwüla fän iten Kot seni ai uputiu. Are epwe fich mökürei, mürin ai pöchökül epwe sü seniei, nge üpwe apwangapwang usun chök aramas meinisin.”
JDG 16:18 Iwe, lupwen Telila a mefi pwe Samson a pwäri ngeni unusen monomonen lelukan, a titi ekewe samolun chon Filistia o üreniir, “Oupwe feito iei chök, pun a pwäri ngeniei unusen monomonen lelukan.” Mürin, ekewe samolun chon Filistia ra feito ren neminewe o uweato ewe moni.
JDG 16:19 Iwe, Telila a aünätä Samson won afön o föri met epwe anutela ren. Iwe a köri eman mwän, pwe a fichiela ekewe füchoch meten möküren Samson. Mürin a popuetä le ariaföüü Samson, nge an pöchökül a sü seni.
JDG 16:20 Mürin, Telila a kökkö, “Samson, ekewe re Filistia repwe le turufuk.” Iwe, Samson a nennela le annut o ekieki, “Üpwe apichiei o feila usun mesemwan.” Nge Samson esap silei pwe ewe Samol mi lapalap a likitala.
JDG 16:21 Iwe, ekewe chon Filistia ra turufi Samson o alusawu föün mesan. Mürin, ra emwenätiu ngeni Kasa o föti ngeni selipiras. Iwe, Samson a wisen föira föün wiich lon ewe lenien föir me lon imwen fötek.
JDG 16:22 Nge meten möküren Samson ra pwal pwüksefäl mürin an fich.
JDG 16:23 Iwe, ekewe samolun chon Filistia ra mwichfengen, pwe repwe eäni eu asor mi watte ngeni Takon ar we kot o föri eu mwichen apwapwa. Pun ra apasa, “Ach kot a atolonga lepöüch Samson ewe chon oputakich.”
JDG 16:24 Nge lupwen ekewe aramas ra küna Samson, ra mwareiti ar kot o üra, “Ach kot a atolonga lepöüch ewe chon oputakich, ätewe mi ataela fanüach o niela chomong leich.”
JDG 16:25 Lupwen leluker a fokun mwänek, ra apasa, “Oupwe körato Samson pwe epwe sipai ngenikich.” Iei mine ra kökkörawu Samson me lon imwen fötek, nge i a sipai ngeniir. Mürin, ra aütai lefilen ekewe üren ewe imw.
JDG 16:26 Iwe, Samson a üreni ewe ät mi amwöchü pöün, “Kopwe mwüt ngeniei pwe üpwe atapa ekewe ür ewe imw a ü won, pun üpwe ünnü ngeniir.”
JDG 16:27 Nge ewe imw a ur ren mwän me fefin, pwal ekewe samolun chon Filistia meinisin ra nom lon. Nge won ewe imw me asan mi wor ina epwe ükükün ülüngeröü mwän me fefin mi katol Samson, lupwen a sipai ngeniir.
JDG 16:28 Mürin, Samson a iotek ngeni ewe Samol mi Lapalap, “Ai Samol me ai Kot, üa tüngor ngonuk kopwe chechemeniei. Ai Kot, kose mochen kopwe apöchökülaei pwal fän eu chök o mwüt ngeniei, pwe üpwe ngeni ekei chon Filistia chappen ar föför ngeniei fän iten mine ra föri ngeni mesei kei ruoföü.
JDG 16:29 Iwe, Samson a angaloi ekewe ruofoch üren lukalap ewe imw a ü won, o tinifeseniir, pöüifichin a tini efoch, nge pöüimöngün a tini pwal ewe efoch.
JDG 16:30 Iwe, Samson a üra, “Üpwe eti ekewe chon Filistia le mäla.” Mürin a tiniir fän unusen an pöchökül, pwe ewe imw a turutiu won ekewe samol me ekewe aramas meinisin mi nom lon. Iwe, chokewe Samson a nirela lupwen an mäla ra chomong seni chokewe a nirela lupwen a manau.
JDG 16:31 Mürin, pwin kewe me unusen an famili ra feitiu o angei somän, ra uweela o peiaseni lefilen Sora me Estaol lon peiasen Manoa saman we. Iwe, Samson a soukapwüng lon Israel lon ükükün rüe ier.
JDG 17:1 Iwe, a wor eman mwän itan Maika a nom won chukuchukutän ewe fanü Efraim.
JDG 17:2 Ätei a üreni inan, “Lon ewe fansoun eman a soläni senuk ekewe engeröü ipükü föün moni silifer, ngang üa rongorong pwe ka anümamaua ewe chon solä. Nengeni, ekewe föün moni silifer ra nom rei. Ngang üa angeer.” Mürin inan we a üreni, “Nei, kopwe feiöch me ren ewe Samol mi Lapalap.”
JDG 17:3 Iwe, lupwen ätewe a aliwini ekewe engeröü ipükü föün moni silifer ngeni inan, neminewe a üra, “Iei üa apini ai silifer fän iten ewe Samol mi Lapalap, pwe ewe anümamau esap küw nei ei. Eman epwe falei eu uluulun anümwäl o apachatä silifer won. Iei üpwe aliwini ngonuk ewe silifer.”
JDG 17:4 Mürin, ätewe a aliwini ewe moni ngeni inan, nge neminewe a angei ruupükü föün moni silifer o ngeni eman chon föri pisek seni silifer. Ätewe a falei eu uluulun anümwäl o apachatä silifer won. Iwe, Maika a anomu lon imwan.
JDG 17:5 Ei mwän Maika a wor eu an lenien fel. Iwe, Maika a pwal föri echö üf itan efot me ekoch uluulun anün leimw o seikätä eman nöün kewe mwän pwe epwe souasor.
JDG 17:6 Lon ekana fansoun esap wor eman king lon Israel. Eman me eman aramas a chök föri mine a pwüng me ren.
JDG 17:7 Iwe, a wor eman alüal seni Petleem lon Juta mi nom ren chon ewe ainangen Juta. Ätewe eman mwän seni ewe ainangen Lefi.
JDG 17:8 Ei mwän a feila seni Petleem lon Juta pwe epwe kütta eu leni ia a tongeni nonom ie. Nge lon an sai a tori imwen Maika lon chukuchukutän ewe fanü Efraim.
JDG 17:9 Iwe, Maika a aisini, “Ia ka feito me ie?” Nge ätewe a pälüeni, “Ngang eman mwän seni ewe ainangen Lefi seni Petleem lon Juta, nge üa siamüfetal pwe üpwe kütta eu leni ia üpwe tongeni nonom ie.”
JDG 17:10 Iwe, Maika a üreni, “Kopwe nom rei pwe kopwe eman semei me eman nei souasor. Nge ngang üpwe ngonuk engol föün moni silifer iteiten ier, üpwe pwal ngonuk ufom me anom.”
JDG 17:11 Iwe, ewe mwän seni ewe ainangen Lefi a tipeeu ngeni an epwe nom ren Maika. Nge ewe alüal a usun chök eman nöün kewe mwän me ren.
JDG 17:12 Mürin, Maika a seikätä ewe mwän seni ewe ainangen Lefi pwe epwe nöün souasor. Nge ewe alüal a nom ren lon imwan.
JDG 17:13 Iwe, Maika a üra, “Iei üa silei pwe ewe Samol mi Lapalap epwe afeiöchüei, pun a nom rei eman nei souasor seni ewe ainangen Lefi.”
JDG 18:1 Iwe, lon ekana fansoun esap wor eman king lon Israel. Lon ena fansoun chon ewe ainangen Tan ra kütta eu fanü fän iter pwe repwe nonom lon, pun resap mwo angei fanüer me lein ekewe ainangen Israel.
JDG 18:2 Iei mine ekewe chon Tan ra filätä limman mwän mi pwora seni lon unusen ar ainang. Ra tinirela seni Sora me Estaol o üreniir pwe repwe operi ewe fanü o ouwasacha. Iwe, ra tori chukuchukutän ewe fanü Efraim lon imwen Maika o pwinipwin ikenan.
JDG 18:3 Nge lupwen ra nom ikenan ren imwen Maika, ra silleni ngingin ewe alüal seni ewe ainangen Lefi. Iwe, ra sap ngeni o üreni, “Iö a emwenukoto ikei? Met ka föri lon ei leni? Met om angang ikei?”
JDG 18:4 Nge ätewe a üreniir, “Iei usun mine Maika a föri ngeniei. A möniei pwe üpwe eman nöün souasor.”
JDG 18:5 Iwe, ra üreni, “Äm aia tüngoreek, kopwe aisini Kot pwe aipwe silei ika äm sai epwe fisiöch.”
JDG 18:6 Nge ewe souasor a üreniir, “Oupwe feila fän kinamwe. Ämi sai a nom fän emwenien ewe Samol mi Lapalap.”
JDG 18:7 Mürin, ekewe limman mwän ra feila o tori ewe telinimw Lais. Iwe, ra küna ekewe aramas mi nonom ikenan, pwe ra nom fän kinamwe usun chon Siton. Ra mosonoson, nge resap ekieki pwe eman epwe maun ngeniir, esap pwal wor och mine ra osupwang ren me won fanüfan, pun ra fokun pisekisek. Ra pwal küna pwe ra toau seni chon Siton, nge resap chiechi ngeni mwo eman.
JDG 18:8 Iwe, lupwen ekewe limman mwän ra liwiniti Sora me Estaol, aramaser kewe ra aisiniir, “Met pworausemi?”
JDG 18:9 Nge ir ra pälüeni, “Oupwe ütä, ousipwe feila o maun ngeni chon Lais. Pun äm aia küna ewe fanü pwe a fokun pwülüöch. Ifa usun, oupwe chök momot ikei? Oupwe müttir feila o tolong lon ewe fanü pwe oupwe fanüeni.
JDG 18:10 Lupwen oupwe feila, oupwe tori eu mwichen aramas resap ekieki pwe eman epwe maun ngeniir. Ewe fanü a watte, esap pwal wor och mine a osupwang ren, nge Kot a ngenikemi ewe fanü.”
JDG 18:11 Iwe, ükükün wonopükü mwän seni ewe ainangen Tan ra feila seni Sora me Estaol fän ar pisekin maun.
JDG 18:12 Ra feitä o nonom ünükün Kiriat-jearim lon Juta. Iei popun pwe ewe leni pelilotoun Kiriat-jearim a iteni Mahane-tan tori ikenai.
JDG 18:13 Seni ikenan ra feila ngeni chukuchukutän ewe fanü Efraim o tori imwen Maika.
JDG 18:14 Mürin, ekewe limman mwän mi piin feila pwe repwe operi ewe fanü ünükün Lais ra üreni chiener, “Ifa usun, oua silei pwe lon eu ekei imw a wor echö efot, ekoch uluulun anün leimw me eu uluulun anü mi fal, a kapachetä silifer won? Iei mine oupwe ekieki mine oupwe föri.”
JDG 18:15 Iwe, ra rik seni ewe al o feila ren imwen ewe alüal seni ewe ainangen Lefi lon lenien Maika o aisini usun an nonom.
JDG 18:16 Nge ekewe wonopükü re Tan ra ütä leasamalapen tittin ewe leni fän ar pisekin maun.
JDG 18:17 Iwe, ekewe limman mwän mi piin operi ewe fanü ra tolong lon ewe imw o angei ewe uluulun anü mi fal a kapachetä silifer won, ewe efot me ekewe uluulun anün leimw, lupwen ewe souasor a ütä ren ekewe wonopükü mwän mi nom leasamalapen tittin ewe leni fän ar pisekin maun.
JDG 18:18 Iwe, lupwen ekewe limman mwän ra tolong lon imwen Maika o angei ewe uluulun anü mi fal a kapachetä silifer won, ewe efot me ekewe uluulun anün leimw, ewe souasor a aisiniir, “Met oua föri?”
JDG 18:19 Nge ir ra üreni, “Kopwe chök fanafanala, kosap apasa och, kopwe etikem pwe kopwe eman semem me eman nöüm souasor. Ifa usun, esap mürina om kopwe souasor ngeni unusen eu ainang me eu eterekesin lon Israel lap seni om kopwe souasor ngeni chon leimwen eman mwän chök?”
JDG 18:20 Ren ekei kapas ewe souasor a fokun pwapwa lon lelukan. A angei ewe efot, ekewe uluulun anün leimw me ewe uluulun anü mi fal o eti ekewe aramas.
JDG 18:21 Mürin, ekewe aramas ra kul o feila, nge nöür semirit, nöür man me pisekir ra akom mwer.
JDG 18:22 Iwe, lupwen ra toauela seni imwen Maika, Maika a kökkörawu ekewe mwän mi nom lon ekewe imw lükün imwan, pwe repwe tapweri ekewe chon Tan. Iwe, ra kan ngeni ekewe chon Tan
JDG 18:23 o leüömong le kökkö ngeniir. Nge ir ra kulsefäl o aisini Maika, “Met om osukosuk, pwe ka tapwerikem me om ei mwich?”
JDG 18:24 Nge Maika a pälüeniir, “Pwota oua fen aisiniei met ai osukosuk? Ämi oua angei ai kewe kot üa föriir me nei we souasor o süla far.”
JDG 18:25 Iwe, ekewe chon Tan ra üreni, “Kosap anini ngenikem pwe mwän mi nisosong rese turufuk o nikemiila me chon leimwom.”
JDG 18:26 Mürin, ekewe chon Tan ra feila won aler. Nge lupwen Maika a küna pwe ra kon pöchökül mwan, a kul o liwinsefäl ngeni lenian.
JDG 18:27 Mürin än ekewe chon Tan angei mine Maika a föri pwal nöün we souasor ra feila Lais, ra tori eu mwichen aramas mi mosonoson, resap ekieki pwe eman epwe maun ngeniir. Iwe, ra nirela ren ketilas o kenala ewe telinimw.
JDG 18:28 Esap wor eman mi angaseer, pun ar telinimw a toau seni Siton, resap pwal chiechi ngeni mwo eman. Iwe, Lais a nom lon ewe lemol arap ngeni Pet-rehop. Nge ekewe chon Tan ra aüsefälietä ewe telinimw o imweimw lon.
JDG 18:29 Iwe, ra aita ngeni ewe telinimw Tan, iten mwirimwirin ar we lewo nöün Israel we. Nge iten ewe telinimw me mwan Lais.
JDG 18:30 Iwe, ekewe chon Tan ra aütai ewe uluulun anü mi fal pwe repwe fel ngeni, nge Jonatan me nöün kewe mwän pwal mwirimwirir ra souasor ngeni ewe ainangen Tan tori fansoun ar oola seni ewe fanü. Iwe, Jonatan nöün Kersom we mwän, nge Kersom nöün Moses mwän.
JDG 18:31 Nge förien Maika we uluulun anü mi fal a nom ikenan lon ükükün fansoun ewe imwen Kot a nom lon Silo.
JDG 19:1 Iwe, lon ena fansoun, lupwen esap wor eman king lon Israel, eman mwän seni ewe ainangen Lefi a wasöla won chukuchukutän ewe fanü Efraim mi toauala. Ätewe a angei eman ülüpwülüan seni Petleem lon Juta.
JDG 19:2 Iwe, ülüpwülüan a song ngeni, a sü seni o liwiniti imwen seman mi nom Petleem lon Juta. A nom ikenan lon ükükün rüanü maram.
JDG 19:3 Mürin, pwülüan we a ütä o feila mürin, pwe epwe fos pwetete ngeni o aliwinisefäli. Nge eman nöün chon angang me ruoman aas ra eti. Iwe, neminewe a emwenalong lon imwen saman, nge lupwen semen ewe föpwül a küna, a etiwa fän pwapwa.
JDG 19:4 Mürin, semen ülüpwülüan we a pesei pwe epwe nom ren lon ükükün ülüngat rän. Ra mongö o ün, ra pwal pwinipwin ikenan.
JDG 19:5 Iwe, lon arüanün rän ra pwätä lesosorusich, nge ewe mwän seni ewe ainangen Lefi a amolätä ngeni an epwe feila. Nge semen ewe föpwül a üreni pwülüen nöün we, “Kopwe chunuk me mwen om kopwe feila.”
JDG 19:6 Iei mine ekewe ruoman mwän ra mottiu, ra mongö o ünfengen. Iwe, semen ewe föpwül a üreni ewe mwän, “Kose mochen kopwe pwal pwinini epwin o pwapwa.”
JDG 19:7 Nge lupwen ewe mwän seni ewe ainangen Lefi a ütä pwe epwe feila, semen ülüpwülüan we a pesei tori a pwal pwinipwinsefäl.
JDG 19:8 Iwe, lon alimuen rän ewe mwän seni ewe ainangen Lefi a pwätä lesosorusich pwe epwe feila. Nge semen ewe föpwül a üreni, “Kopwe chunuk o witiwit tori leolopal.” Iwe, ra mongöfengen.
JDG 19:9 Nge lupwen ewe mwän me ülüpwülüan we pwal nöün chon angang ra ütä pwe repwe feila, semen ülüpwülüan we a üreni, “Nengeni, a arapakan epwe le lekuniol, kose mochen kopwe nonom rei pwal lon ei pwin. A arapakan epwe le pwinila. Kopwe pwinipwin ikei o pwapwa. Iwe, lesor kopwe pwätä lesosorusich o sai ngeni leniom.”
JDG 19:10 Nge ewe mwän esap mochen pwinini pwal epwin. Iei mine a ütä, a feila o sai wenewen ngeni Jepus, iei Jerusalem, pwal nöün kewe ruoman aas mi uwou pisek me ülüpwülüan we ra eti.
JDG 19:11 Lupwen ra arap ngeni Jepus, a pwinila. Iwe, ewe chon angang a üreni an samol. “Ousipwe rik ngeni ewe telinimwen chon Jepus o pwinipwin lon.”
JDG 19:12 Nge an we samol a üreni, “Apwi, sisap rik ngeni ewe telinimwen chon ekis, ir resap chon Israel. Nge sipwe feila Kipea.”
JDG 19:13 A pwal üreni nöün we chon angang, “Ousipwe feila pwe sipwe achocho ngeni ach sipwe tori Kipea ika Rama o pwinipwin ie.”
JDG 19:14 Iei mine ra feila won aler, nge ewe akkar a tuputiu, lupwen ra arap ngeni Kipea lon fanüen chon ewe ainangen Peniamin.
JDG 19:15 Iwe, ra rik ngeni Kipea pwe repwe pwinipwin ikenan. Ra tolong lon ewe telinimw o mot lon ewe lenien amwicheich, nge esap wor eman a etiweer lon imwan pwe repwe pwinipwin.
JDG 19:16 Lon ewe chök kuniolun, eman chinlap mwän a liwinto seni an angang lemäl. Wesewesen lenien ewe mwän won chukuchukutän ewe fanü Efraim, nge iei a nom lon Kipea. Nge chon ewe leni chon ewe ainangen Peniamin.
JDG 19:17 Iwe, ewe chinlap mwän a küna ewe chon siamü lon ewe lenien amwicheich o aisini, “Ia ka feito me ie? Nge ia kopwe feila ie?”
JDG 19:18 Nge ewe mwän seni ewe ainangen Lefi a pälüeni, “Äm aia feito seni Petleem lon Juta, pwe aipwe le feila ngeni chukuchukutän ewe fanü Efraim mi toauala, ia üa feito me ie. Üa feila Petleem lon Juta, nge iei üpwe liwiniti leniei. Iwe, esap wor eman a etiwaei lon imwan.
JDG 19:19 A wor rei fetilipwas me enen nöüm aas. A pwal wor pilawa me wain fän itei, fän iten ülüpwülüei me nei we chon angang. Esap wor och am aia osupwang ren.
JDG 19:20 Iwe, ewe chinlap mwän a üreni, “Ngang üpwe pwapwa le etiwook lon imwei. Üpwe tümwünü ngonuk meinisin mine ka osupwang ren. Eu chök, kosap annut lon ei lenien amwicheich.”
JDG 19:21 Iei mine a emwenirela lon imwan, a pwal amongöü nöür kewe aas. Nge ir ra talü pecher, ra mongö o ün.
JDG 19:22 Iwe, lupwen ra pwapwafengen, mwän mi manauangau seni ewe telinimw ra pweli ewe imw o sukuolong asaman. Ra üreni ewe chinlap mwän mine imwan we, “Kopwe atowu ewe mwän mi tolong lon imwomw pwe äm aipwe pwülüeni.”
JDG 19:23 Nge ewe chinlap a towu rer o üreniir, “Apwi, pwii, ouse mochen ousap föri ei sokun lapalap mi fokun ngau. Ei mwän nei wasöla, ousap fokun föri ei sokun föför mi anioput.
JDG 19:24 Nengeni, iei i nei föpwül esamwo tori mwän me ülüpwülüen ei mwän, üpwe emwenirewu remi. Oupwe föri ngeniir mine oua mochen, nge ousap föri ei sokun föför mi anioput ngeni ewe mwän.”
JDG 19:25 Nge ekewe mwän resap mochen aüselinga. Iei mine ewe mwän seni ewe ainangen Lefi a angei ülüpwülüan we o tinawu rer. Iwe, ra achomanauei o turunufasei lon unusen ewe pwin. Nge lupwen a tö mallen rän, ra likitala.
JDG 19:26 Lupwen a arap ngeni an epwe le rän, ewe fefin a feito o turula lükün asamalapen imwen ewe chinlap mwän, ia pwülüan we a nom ie. A nom ikenan tori a ränila.
JDG 19:27 Iwe, pwülüen neminewe a pwätä lesosor, nge lupwen a suki asamalapen ewe imw o towu pwe epwe sopwela an sai, a küna ülüpwülüan we mi kon ünükün asamalapen ewe imw, nge pöün a itila won penkasamen ewe imw me fan.
JDG 19:28 Iwe, a üreni, “Kopwe pwätä, pun sipwe feila.” Nge neminewe esap kapas. Iei mine ewe mwän a ekietä neminewe won ewe aas o sopwela an sai.
JDG 19:29 Nge lupwen a tori imwan, a angei efoch naif, a kamwöch ülüpwülüan we o kinikisietiu inisin lon engol me ruu kinikin. Mürin, a tinala ekewe kinikin ren ekewe engol me ruu ainangen Israel.
JDG 19:30 Iwe, meinisin mi küna ei ra apasa, “Ei sokun mettoch esamwo fis. Esamwo pwä ei sokun föför seni ewe fansoun ekewe aramasen Israel ra towu seni Isip tori ikenai. Oupwe ekieki usun, oupwe pwüngüpwüngfengen o apasätä mefiemi won.”
JDG 20:1 Mürin, ekewe aramasen Israel meinisin ra feito seni ewe telinimw Tan mi nom efeng me Persepa mi nom ör, pwal seni ewe fanü Kiliat mi nom ötiu. Ra chufengen fän tipeeu fän mesen ewe Samol mi Lapalap me lon Mispa.
JDG 20:2 Iwe, ekewe souemwenin chon ekewe ainangen Israel meinisin ra feito lon ewe mwich än nöün Kot kewe aramas. A pwal wor ükükün föpükü ngeröü sounfiu fän nöür ketilas.
JDG 20:3 Nge ekewe chon Peniamin ra rong pwe ekewe aramasen Israel ra feila Mispa. Iwe, ekewe aramasen Israel ra üreni ewe mwän seni ewe ainangen Lefi, “Kopwe apworausa ngenikem usun ei föför mi fokun ngau a fis.”
JDG 20:4 Mürin pwülüen ewe fefin mi ninnila a üreniir, “Üa tori Kipea lon fanüen Peniamin, äm me ülüpwülüei we o pwinipwin ikenan.
JDG 20:5 Iwe, ekewe re Kipea ra feito lepwin o pwelifeili ewe imw üa nom lon. Ra ekiekin nieila, ra pwal achomanauei ülüpwülüei we, pwe a mäla.
JDG 20:6 Mürin üa angei ülüpwülüei we, üa kinikisietiu inisin o tinala ekewe kinikin ren ekewe engol me ruu ainangen Israel. Pun ekewe re Kipea ra föri och föför mi anioput o fokun ngau lon Israel.
JDG 20:7 Ämi aramasen Israel meinisin mi mwichfengen ikei, oupwe pwüngüpwüngfengen o apasätä pwüngün ei mettoch.”
JDG 20:8 Iwe, ekewe aramas meinisin ra ütä fän tipeeu o apasa, “Esap wor eman leich epwe feila lon imwan, esap fokun wor eman leich epwe liwiniti lenian.
JDG 20:9 Iei usun mine sipwe föri ngeni Kipea: Sipwe feila o maun ngeni Kipea fän pwüngün üttüt.
JDG 20:10 Iwe, sipwe filätä engol mwän seni ipükü me lein ekewe ainangen Israel meinisin, pwal ipükü mwän seni engeröü, nge engeröü mwän seni engol ngeröü, repwe uwato mongö fän iten ekewe aramas mi feila pwe repwe maun ngeni chon Kipea lon Peniamin, pokiten ewe föför mi fokun ngau ra föri lon Israel.”
JDG 20:11 Iei usun ekewe re Israel ra chufengen fän tipeeu pwe repwe maun ngeni ewe telinimw.
JDG 20:12 Iwe, ekewe ainangen Israel ra tinala ekoch mwän ren unusen ewe ainangen Peniamin pwe repwe üreniir, “Met ei sokun föföringau a fis me leimi?
JDG 20:13 Oupwe fangewu ekewe mwän mi manauangau seni Kipea, pwe aipwe nirela o atowu ewe mi ngau seni lon Israel.” Nge chon ewe ainangen Peniamin resap mochen aüselinga alon pwiir kewe aramasen Israel.
JDG 20:14 Iwe, chon ewe ainangen Peniamin ra feito seni ar kewe telinimw o chufengen lon Kipea, pwe repwe feila maun ngeni ekewe aramasen Israel.
JDG 20:15 Iteiten chon ewe ainangen Peniamin mi kö ngeni maun ra feito seni ar kewe telinimw lon ewe ränin ükükün rüe me wonungeröü mwän mi sile maun fän ketilas. Mi pwal wor ükükün füpükü mwän seni Kipea mi kefil.
JDG 20:16 Iwe, me lein ekewe mwän meinisin mi wor füpükü tamöng mi kefil. Iteiten eman me eman a tongeni monei eföü fau ngeni emet meten mökür, nge a küw.
JDG 20:17 Nge lükün ekei re Peniamin mi wor ükükün föpükü ngeröü mwän seni ekewe re Israel, ir meinisin sounfiu mi sile maun fän ketilas.
JDG 20:18 Iwe, ekewe aramasen Israel ra feila Petel o aisini Kot, “Iö me leim epwe akomwen feila maun ngeni chon Peniamin?” Nge ewe Samol mi Lapalap a pälüeniir, “Chon ewe ainangen Juta repwe akomwen feila.”
JDG 20:19 Mürin, ekewe re Israel ra ütä lesosor, ra feila o nom arap ngeni Kipea.
JDG 20:20 Iwe, ra feila pwe repwe maun ngeni chon Peniamin o atetteli ar mwichen sounfiu akawenewenen Kipea.
JDG 20:21 Nge ekewe chon Peniamin ra towu seni Kipea o niela ükükün rüe me ruungeröü re Israel lon ewe chök rän.
JDG 20:22 Mürin, ekewe aramasen Israel ra feila o kechü fän mesen ewe Samol mi Lapalap tori lekuniol. Iwe, ra aisini, “Ifa usun, äm aipwe feilasefäl o maun ngeni pwim kewe chon Peniamin?” Nge ewe Samol mi Lapalap a pälüeni, “Oupwe feila o maun ngeniir.” Mürin, ekewe re Israel ra tipepworasefäl o atettelisefäli ar mwichen sounfiu lon ewe chök leni ia ra piin atetteliir ie me mwan.
JDG 20:24 Iwe, lon aruuen rän ekewe re Israel ra kan ngeni ekewe chon Peniamin pwe repwe maun ngeniir.
JDG 20:25 Nge ekewe chon Peniamin ra towu seni Kipea lon aruuen rän o niela ükükün engol me walungeröü re Israel, ir meinisin mwän mi sile maun fän ketilas.
JDG 20:26 Mürin, ekewe aramasen Israel meinisin ra feila Petel. Ikenan ra mot o kechü fän mesen ewe Samol mi Lapalap o achuun lon ewe rän tori lekuniol, ra pwal eäni asoren kek me asoren kinamwe fän mesen ewe Samol mi Lapalap.
JDG 20:27 Iwe, ekewe aramasen Israel ra aisini ewe Samol mi Lapalap mine repwe föri. Lon ena fansoun än Kot we pworofel a nom ikenan,
JDG 20:28 nge Pineas nöün Eleasar we mwän, nge Eleasar nöün Aaron mwän, a wisen angang ngeni. Iwe, ekewe aramasen Israel ra aisini, “Ifa usun, äm aipwe feilasefäl o maun ngeni pwim kewe chon Peniamin, ika aipwe emwen?” Nge ewe Samol mi Lapalap a pälüeniir, “Oupwe feila, pun lesor üpwe awinnakemi pwe oupwe akufuur.”
JDG 20:29 Mürin, ekewe chon Israel ra anomu ekoch chon op pwelin unükün Kipea.
JDG 20:30 Iwe, ekewe re Israel ra feila pwe repwe maun ngeni chon Peniamin lon aülüngatin rän. Ra atettelisefäliir pwe repwe maun ngeni Kipea usun me mwan.
JDG 20:31 Nge ekewe chon Peniamin ra towu pwe repwe maun ngeni ekewe aramas. Iwe, ra toauela seni ewe telinimw o popuetä le niela ekoch lein ekewe re Israel usun me mwan. Ra niir me lon ekewe alelap, efoch mi ale ngeni Petel, nge efoch ngeni Kipea pwal lon ewe amassawa. Ra niela ina epwe ükükün ilik re Israel.
JDG 20:32 Iwe, ekewe chon Peniamin ra apasa, “Ra pwal kuf rech usun chök me mwan.” Nge ekewe re Israel ra apasa, “Ousipwe sü seniir o panirela ngeni ekewe alelap toau seni ewe telinimw.”
JDG 20:33 Nge lupwen ekewe re Israel meinisin ra mwöküt seni lenier o atetteliir me lon Paal-tamar, chokewe mi op ra pwal sä seni lenier me pelilotoun Kipea.
JDG 20:34 Iwe, ükükün engol ngeröü mwän mi kefil seni lein unusen chon Israel ra maun ngeni Kipea. Ewe maun a fokun weires, nge ekewe chon Peniamin resap silei pwe ra arap ngeni feiengau.
JDG 20:35 Iwe, ewe Samol mi Lapalap a akufu chon Peniamin mwen ekewe re Israel. Lon ewe ränin, ekewe re Israel ra niela ükükün rüe me limungeröü ipükü re Peniamin, ir meinisin mwän mi sile maun fän ketilas.
JDG 20:36 Mürin, ekewe chon Peniamin ra mefi pwe ra kuf. Ekewe re Israel ra tipin sü me mwen ekewe chon Peniamin, pun ra lükü ekewe mwän mi op pwelin ünükün Kipea.
JDG 20:37 Iwe, ekewe mwän mi op ra müttir towu seni ar lenien op o cheri Kipea. Ra niela chon ewe telinimw meinisin ren ketilas.
JDG 20:38 Nge mi wor eu asisil ekewe re Israel me ekewe chon op ra tipeeufengen won, pwe lupwen epwe wor och ötüöt mi ötütä seni ewe telinimw,
JDG 20:39 ekewe re Israel mi tipin sü repwe kulsefäl o maun. Iei chon Peniamin ra fen popuetä le niela ina epwe ükükün ilik re Israel. Iwe, ra apasa, “Ellet, ra kuf rech usun me mwan.”
JDG 20:40 Nge lupwen ewe ötüöt a ötütä seni lon ewe telinimw, ekewe chon Peniamin ra nenesökür o küna pwe unusen ewe telinimw a kar.
JDG 20:41 Mürin, ekewe re Israel ra kul, nge ekewe chon Peniamin ra rükö, pun ra mefi pwe repwe le feiengau.
JDG 20:42 Iei mine ra sü me mwen ekewe re Israel o sü ngeni ewe fanüapö, nge resap tongeni sü seni ewe maun. Pwal ekewe re Israel mi towu seni ewe telinimw ra niela ekewe chon Peniamin ikenan.
JDG 20:43 Iwe, ra appafengeni ekewe chon Peniamin, ra tapweriir o niretiu seni Noha tori akawenewenen Kipea me peliötiu.
JDG 20:44 Iwe, ükükün engol me walungeröü chon Peniamin ra mäla, ir meinisin sounfiu mi pwora.
JDG 20:45 Nge ekewe lusun chon Peniamin ra kul o sü ngeni ewe fanüapö ren ewe achau mi nom Rimon. Iwe, ükükün limungeröü mwän ra mätiu lon ekewe alelap. Nge chon Israel ra pwal achocho le tapweriir tori Kitom o niela pwal ruungeröü mwän.
JDG 20:46 Iei mine unusen chon Peniamin mi mäla lon ewe ränin ükükün rüe me limungeröü mwän mi sile maun fän ketilas. Ir meinisin sounfiu mi pwora.
JDG 20:47 Nge ükükün wonopükü mwän ra kul o sü ngeni ewe fanüapö ren ewe achau mi nom Rimon. Ikenan ra nom fän ewe achau lon ükükün rüanü maram.
JDG 20:48 Mürin, ekewe re Israel ra kul o maun ngeni ekewe chon Peniamin. Ra niela aramas me man ren ketilas, pwal meinisin mine ra küna. Iwe, ra pwal kenala ekewe telinimw meinisin ra tolong lon.
JDG 21:1 Iwe, lupwen ekewe re Israel ra nom Mispa, ra pwon fän akapel pwe esap wor eman me leir epwe apwüpwülüa nöün föpwül ngeni eman re Peniamin.
JDG 21:2 Mürin ar maun, ekewe aramasen Israel ra feito Petel o nom ikenan fän mesen Kot tori lekuniol. Ra alapatä mwelier o fokun kechüengau.
JDG 21:3 Iwe, ra apasa, “Äm Samol mi Lapalap, Koten Israel. Pwota a fis ei sokun lapalap lon Israel? Pwota eu ainang esap chüen nom lon Israel ikenai?”
JDG 21:4 Nge sorotän ewe rän ekewe aramas ra pwätäkai, ra senätä eu rongen asor o eäni asoren kek me asoren kinamwe won.
JDG 21:5 Mürin, ekewe aramasen Israel ra ais, “Iö lein chon ekewe ainangen Israel esap feito lon ewe mwich me fän mesen ewe Samol mi Lapalap lon Mispa?” Pun ra eäni eu pwon mi aüchea fän akapel, pwe ätewe esap feito Mispa ren ewe Samol mi Lapalap epwe ninnila.
JDG 21:6 Iwe, ekewe aramasen Israel ra tongei pwiir kewe chon ewe ainangen Peniamin o apasa, “Ikenai eu ainang a käriwu seni Israel.
JDG 21:7 Met sipwe föri pwe epwe wor pwülüen chokewe mi chüen manau? Pun sa pwon fän akapel ngeni ewe Samol mi Lapalap pwe sisap ngeniir eman me lein nöüch föpwül pwe pwülüer.”
JDG 21:8 Mürin ra ais, “Iö lein chon ekewe ainangen Israel esap feitä Mispa ren ewe Samol mi Lapalap?” Iwe, a pwä pwe esap wor eman seni Japes-kiliat a feito ren ewe leni o fiti ewe mwich.
JDG 21:9 Pun lupwen ra alea iteiten ekewe aramas, a pwä pwe esap wor eman chon Japes-kiliat a nom.
JDG 21:10 Iei mine ewe mwich a tinala Japes-kiliat ükükün engol me ruungeröü mwän mi fokun pwora o allük ngeniir, “Oupwe feila o niela chon Japes-kiliat ren ketilas, oupwe pwal niela fefin me semirit.
JDG 21:11 Iei usun mine oupwe föri: Iteiten mwän me iteiten fefin mi pwüpwülü oupwe fokun aroserela.”
JDG 21:12 Iwe, ra küna me lein ekewe chon Japes-kiliat ükükün föpükü föpwül resamwo tori mwän. Ra emwenireto ngeni ewe leni lon Silo mi nom lon ewe fanü Kanaan.
JDG 21:13 Mürin, unusen ewe mwich a tinala pworausen kinamwe ngeni ekewe chon Peniamin mi nom fän ewe achau lon Rimon.
JDG 21:14 Lon ena fansoun ekewe chon Peniamin ra liwinsefäl. Iwe, ekewe chon Israel ra ngeniir ekewe föpwül ra amanaueer me lein ekewe fin Japes-kiliat. Nge ekewe föpwül resap ku ngeniir.
JDG 21:15 Iwe, ekewe aramas ra tongei chon Peniamin, pun ewe Samol mi Lapalap a föri eu aimwü lefilen ekewe ainangen Israel.
JDG 21:16 Mürin, ekewe souakomwen ewe mwich ra ais, “Met sipwe föri pwe epwe wor pwülüen chokewe mi chüen manau, pun ekewe fin Peniamin ra rosola?”
JDG 21:17 Iwe, ra üra, “Ekewe chon Peniamin mi chüen manau epwe fokun wor mwirimwirir pwe esap mola eu ainang me lon Israel.
JDG 21:18 Nge sisap tongeni apwüpwülüa ngeniir nöüch föpwül, pun sa pwon fän akapel pwe iö leich a apwüpwülüa nöün föpwül ngeni ekewe chon Peniamin epwe anümamau.”
JDG 21:19 Mürin ra apasa, “Nengeni, epwe wor eu chulap fän iten ewe Samol mi Lapalap mi fis iteiten ier lon Silo.” Nge Silo a nom efengin Petel peliötiuen ewe alelap seni Petel tori Sikem örün Lepona.
JDG 21:20 Iei mine ra öüröüra ngeni ekewe chon Peniamin o üreniir, “Oupwe feila o op lon ekewe tanipin wain.
JDG 21:21 Iwe, oupwe mamasa ika ekewe föpwülün Silo ra towu pwe repwe pworuk, mürin ämi oupwe towu seni ekewe tanipin wain o tur en me pwülüan me lein ekewe föpwülün Silo. Iwe, oupwe nukirela lon ewe fanü Peniamin.
JDG 21:22 Nge lupwen semer ika mongeer repwe feito o anini ngenikemi, ämi oupwe üreniir, ‘Oupwe mwütiretä ngenikem fän kirikiröch. Pun äm aisap angang pwülüem fän iten eman me eman leim lon maun. Nge ämi ousap pwal ngenikem nöümi föpwül. Pun are oupwe föri iei usun, oupwe tipis ren ämi atai ewe pwon.’”
JDG 21:23 Iwe, ekewe chon Peniamin ra föri mine ra üreniir. Iteiten eman me eman leir a angei pwülüan seni lein ekewe föpwül mi pworuk o uweerela. Mürin, ra liwiniti fanüer, ra aüsefälietä ekewe telinimw o imweimw lor.
JDG 21:24 Lon ena fansoun ekewe aramasen Israel ra feila seni ikenan o liwiniti en me an ainang me an famili pwal en me fanüan.
JDG 21:25 Iwe, lon ekana fansoun esap wor eman king lon Israel. Eman me eman aramas a chök föri mine a pwüng me ren.
RUT 1:1 Lon mwün ekewe soukapwüng a fis lengita lon ewe fanü Israel. Iwe, eman mwän seni Petleem lon ewe fanü Juta a feila pwe epwe nonom lon ewe fanü Moap, i me pwülüan me nöün kewe ruoman alüal.
RUT 1:2 Iwe, iten ewe mwän Elimelek, iten pwülüan we Naomi, nge iten nöün kewe ruoman alüal Maalon me Kilion. Ir chon ewe eterekesin Efrat seni Petleem lon Juta. Iwe, lupwen ra nonom lon ewe fanü Moap,
RUT 1:3 Elimelek pwülüen Naomi a mäla. Nge Naomi chök me nöün kewe ruoman alüal ra nonom.
RUT 1:4 Iwe, ekewe alüal ra pwülüeni ruoman fin Moap, iten eman Orpa, nge iten ewe eman Rut. Iwe, lupwen ra nonom ikenan ina epwe ükükün engol ier,
RUT 1:5 ekewe ruoman alüal Maalon me Kilion ra pwal mäla. Iei usun Naomi a chök nonom mürin mälan nöün kewe me pwülüan we.
RUT 1:6 Iwe, lupwen Naomi a chüen nom lon ewe fanü Moap, a rong pwe ewe Samol mi Lapalap a afeiöchü nöün aramas o aresisefäli fanüer. Mürin, Naomi a amolätä an epwe towu seni ewe fanü Moap, nge pwülüen nöün kewe ra eti.
RUT 1:7 Iei mine ra towu seni Moap, pwe repwe liwiniti ewe fanü Juta. Nge lupwen ra mwinemwinela won ewe al,
RUT 1:8 Naomi a üreni pwülüen nöün kewe, “Oupwe liwinla en me lon imwen inan. Amwo ewe Samol mi Lapalap epwe kirikiröch ngenikemi, usun ämi oua kirikiröch ngeni ekewe mönümä, pwal ngeniei.
RUT 1:9 Ewe Samol mi Lapalap epwe föri pwe oupwe künökünsefäl en me pwülüan.” Iwe, a mitiriir, nge ir ra kechü fän leüömong.
RUT 1:10 Iwe, ra üreni Naomi, “Apwi, äm aipwe etuk le liwinla ren aramasom.”
RUT 1:11 Nge Naomi a üreniir, “Oupwele liwinla, nei föpwül. Pwota oua mochen etiei? Ifa usun, oua ekieki pwe üpwe chüen tufichin nöünöü pwe epwe wor pwülüemi?
RUT 1:12 Oupwele liwinla, nei föpwül, oupwele liwinla. Pun ngang üa fen chinlap pwe üsap chüen tongeni pwüpwülüsefäl. Nge ika üpwe üra pwe a wor ai apilükülüköch, ika epwe pwal wor pwülüei lepwinei pwe üpwe nöünöü ät,
RUT 1:13 ifa usun, oupwe witiwit tori ra mämäritä? Are if usun, ämi oua mochen kaüla seni ämi pwüpwülü? Apwi, nei föpwül, oua silei pwe ei esap tufich. Üa fokun tongeekemi ren ämi riaföü, pun ewe Samol mi Lapalap a ü ngeniei.”
RUT 1:14 Mürin ra kechüsefäl fän leüömong. Iwe, Orpa a mitiri inen pwülüan o liwiniti fanüan we, nge Rut a chök romi.
RUT 1:15 Iwe, Naomi a üreni Rut, “Nengeni, pwülüen pwin pwülüom we a fen liwinla ren aramasan me an kewe kot. Kopwe chök pwal tapwela mürin.”
RUT 1:16 Nge Rut a üra, “Kosap apiitaei pwe üpwe likituk. Kopwe mwüt ngeniei pwe üpwe etuk. Ia en kopwe feila ie, pwal ngang üpwe feila ie, nge ia en kopwe nonom ie, pwal ngang üpwe nonom ie. Aramasom repwe pwal aramasei, nge om Kot epwe pwal ai Kot.
RUT 1:17 Ia en kopwe mäla ie, pwal ngang üpwe mäla ie, ikenan üpwe pwal peias ie. Amwo ewe Samol mi Lapalap epwe fokun apwüngüei, are üpwe likituk, nge mäla chök epwe aimwüfesenikich.”
RUT 1:18 Nge lupwen Naomi a küna weiresin tipen Rut pwe a chök mochen eti, esap chüen apasa och.
RUT 1:19 Iei usun ekewe ruoman ra mwinemwinela Petleem. Iwe, lupwen ra tori Petleem, chon ewe telinimw meinisin ra mwökütüküt rer. Nge ekewe fin Petleem ra ais, “Ifa usun, wesewesen iei i Naomi?”
RUT 1:20 Iwe, a üreniir, “Ousap aita ngeniei Naomi , nge oupwe aita ngeniei Mara , pun Ewe mi Unusen Manaman a amarasa letipei.
RUT 1:21 Lupwen ai feila üa uren feiöch, nge ewe Samol mi Lapalap a aliwinieito fän ai asöülapö. Pwota oua aita ngeniei Naomi, are ewe Samol mi Lapalap Ewe mi Unusen Manaman a ü ngeniei o afeiengauaei?”
RUT 1:22 Iei usun Naomi a liwinto me Moap, nge Rut ewe fin Moap pwülüen nöün we a eti. Iwe, ra tori Petleem, lupwen fansoun resin parli a popuetä.
RUT 2:1 Iwe, a wor eman märärin pwülüen Naomi we, eman mwän mi pisekisek seni ewe ainangen Elimelek itan Poas.
RUT 2:2 Iwe, lon eu rän Rut ewe fin Moap a üreni Naomi, “Kopwe mwüt ngeniei pwe üpwe feila lon ekewe tanipi o rusi umwun parli ekewe chon pöküpök ra likitala. Üa lükü pwe üpwe küna eman mi mwüt ngeniei pwe üpwe rus me mürin.” Iwe, Naomi a üreni, “Kopwe feila, nei föpwül.”
RUT 2:3 Iei mine Rut a feila lon ekewe tanipi o rusi umwun parli mi tur seni ekewe chon angangen räs. Iwe, a fis pwe a tori tanipin Poas, ätewe seni ewe ainangen Elimelek.
RUT 2:4 Mürin, Poas a feito seni Petleem, a kapong ngeni ekewe chon angangen räs o apasa, “Ewe Samol mi Lapalap epwe etikemi.” Nge ir ra pälüeni, “Ewe Samol mi Lapalap epwe afeiöchuk.”
RUT 2:5 Iwe, Poas a aisini ewe mi nemeni ekewe chon angangen räs, “Nöün iö ena föpwül?”
RUT 2:6 Nge ätewe a pälüeni, “Neminan ewe fin Moap a eti Naomi le liwinto seni ewe fanü Moap.
RUT 2:7 A tüngor ngeniei pwe üpwe mwüt ngeni an epwe rusifengeni ekewe umwun parli mi tur seni ekewe chon angangen räs. Iwe, a feito lesosor o likiitü le rurus tori iei, nge esamwo asösö fän eu.”
RUT 2:8 Mürin Poas a üreni Rut, “Kopwe rongorong, nei föpwül. Kosap feila o rus lon pwal eu tanipi, kosap sü seni ikei, nge kopwe chök nonom ren nei kewe chon angang fefin.
RUT 2:9 Kopwe chök nenengeni ewe tanipi ia nei chon angangen räs ra angang ie, iwe, kopwe chök tapwela mürir. Üa fen allük ngeni nei kewe chon angang mwän pwe resap turunufaseek. Nge lupwen ka kaka, kopwe chök feila ren ekewe rumen koluk o ünümi mine nei kewe chon angang mwän ra üfato.”
RUT 2:10 Iwe, Rut a chapetiu won pwül o aisini, “Pwota ka eäni kirikiröch ngeniei o afäliei, nge ngang eman fin ekis?”
RUT 2:11 Nge Poas a pälüeni, “Üa fen rong meinisin mine ka föri ngeni inen pwülüom seni fansoun mälan pwülüom we. Üa pwal silei usun om likitala semom me inom me poputän fanüom o feito ren eu mwichen aramas kosap sileer me mwan.
RUT 2:12 Ewe Samol mi Lapalap epwe liwini ngonuk meinisin mine ka föri, nge liwinum epwe unus me ren ewe Samol mi Lapalap ewe Koten Israel, ewe ka feito ren pwe kopwe op fän pöün.”
RUT 2:13 Mürin Rut a üreni, “Ka fokun ümöümöch ngeniei, ai samol, pun ka echipaei o kapas pwetete ngeni noum chon angang fefin, inamwo ika sap ngang eman lein noum kei chon angang fefin.”
RUT 2:14 Iwe, lupwen fansoun mongö Poas a üreni Rut, “Etto ikei, kopwe mongö ekis pilawa o ottuku lon ei wain.” Iwe, a momotfengen me ekewe chon angangen räs, nge Poas a ngeni och föün wiich mi kapwich. Iwe, a mongö tori a mötüla, nge a chüen wor lusun.
RUT 2:15 Iwe, mürin än Rut feila pwe epwe rus, Poas a üreni nöün kewe chon angang mwän, “Oupwe mwüt ngeni neminan pwe epwe rus me lein ekewe pilük, nge ousap pinei.
RUT 2:16 Oupwe pwal üttawu ekoch umwun parli seni ekewe pilük o likiti ngeni neminan pwe epwe rusi, nge ousap apwüngü.”
RUT 2:17 Iwe, Rut a rus lon ewe tanipi tori lekuniol. Mürin a wichi mine a rusi, nge ükükün rusian parli ina epwe ükükün rüe me limu paun.
RUT 2:18 Iwe, a ekieta rusian we o feilong lon ewe telinimw. A aküna ngeni inen pwülüan we mine a rusi, a pwal ngeni lusun ewe mongö a iseis mürin an möt.
RUT 2:19 Nge Naomi a üreni, “Ia ka rus ie ikenai? Tanipin iö ka angang lon? Amwo Kot epwe afeiöchü ewe mwän a afäliik.” Iwe, Rut a apworausa ngeni Naomi pwe a angang lon tanipin eman mwän itan Poas.
RUT 2:20 Iwe, Naomi a kapas ngeni Rut, “Amwo ewe Samol mi Lapalap epwe afeiöchü Poas. Kot esap likitala an eäni kirikiröch ngenikich chon manau me ekewe mi mäla.” Naomi a pwal üra, “Ätewe eman märärich mi kan ngenikich, eman mi wisen tümwünükich.”
RUT 2:21 Mürin Rut a apasa, “Ätewe a pwal üreniei pwe üpwe chök rurus me mürin nöün kewe chon angang tori ra awesala angangen ewe räs.”
RUT 2:22 Iwe, Naomi a kapas ngeni Rut, “Mi mürina, nei föpwül, pwe kopwe chök eti ekewe chon angang fefin lon tanipin Poas pwe kosap küna turunufas me lon pwal eu tanipi.”
RUT 2:23 Iei mine Rut a pach ngeni nöün Poas kewe chon angang fefin le rurus tori wesilan resin parli me resin wiich. Nge a chök nonom ren inen pwülüan we.
RUT 3:1 Iwe, ekoch fansoun mürin Naomi a üreni Rut, “Nei föpwül, ifa usun, esap öch ai üpwe kütta eman pwülüom pwe epwe wor leniom ia kopwe kinamwe ie?
RUT 3:2 Kopwe chechemeni pwe Poas eman märärich, ätewe ka fen nonom ren nöün kewe chon angang fefin. Kopwe rongorong. Lepwinei epwe wichi parli lon ewe lenien wichiwich.
RUT 3:3 Iei mine kopwe tütü o epituk, kopwe pwal üföüf ufom mi mürina. Mürin kopwe feitiu ren ewe lenien wichiwich, nge kosap pwärukela ngeni ewe mwän tori an epwe pwi le mongö o ün.
RUT 3:4 Iwe, lupwen epwe konola, kopwe nenengeni ewe leni ia a kon ie. Nge lupwen a annut, kopwe feila ren, kopwe särifätä pwölüpwölün pachapachan o konola ünükün. Iwe, epwe ürenuk mine kopwe föri.”
RUT 3:5 Nge Rut a pälüeni, “Meinisin mine ka üreniei üpwe föri.”
RUT 3:6 Iwe, Rut a feitiu ren ewe lenien wichiwich o föri usun chök mine inen pwülüan we a üreni.
RUT 3:7 Nge lupwen Poas a pwi le mongö o ün, letipan a pwapwa. A feila lesopun ewe chukun föün parli o konola pwe epwe annut. Mürin, Rut a anifeto, a särifätä pwölüpwölün pachapachan o konola ünükün.
RUT 3:8 Nge lukenipwin ewe mwän a mefi o kulu, a weitifengeni pwe a küna eman fefin mi kon ünükün pechen.
RUT 3:9 Iwe, a aisini, “En iö?” Nge neminewe a pälüeni, “Ngang Rut noum we chon angang fefin. Pokiten en märärin pwülüei we, ka wisen tümwünüei. Kose mochen sipwe pwüpwülü.”
RUT 3:10 Iwe, Poas a üreni, “Kopwe feiöch me ren ewe Samol mi Lapalap, nei föpwül. Ei föförün kirikiröch ka föri a fen lapala seni ewe ka föri me mwan ngeni inen pwülüom we. Pun kosap tapwela mürin ekewe alüal, ika ra wöüngau ika pisekisek.
RUT 3:11 Nge iei kosap niuokus, Rut. Üpwe apwönüetä meinisin mine ka tüngor. Chienei meinisin lon ei telinimw ra silei pwe en eman fefin mi mürina.
RUT 3:12 Mi pwüng pwe ngang eman märärin pwülüom we mi wisen tümwünuk, nge mi wor eman märärin mi kan ngonuk lap seniei.
RUT 3:13 Iwe, kopwe chök nonom lon ei pwinin. Nge lesosorun lesor sipwe pi are ätewe epwe föri wisan ngonuk usun wisen märärin pwülüom. Are epwe föri ina usun, a öch. Nge are esap mochen föri wisan ngonuk, üa akapel iten ewe Kot mi Manau pwe üpwe föri wisei ngonuk. Iwe, kopwe chök kokon tori lesosorun lesor.”
RUT 3:14 Iei mine Rut a konola ünükün pachapachen Poas tori lesosor. Iwe, a pwätä mwen eman esamwo tongeni silleni eman. Pun Poas esap mochen pwe eman epwe silei, pwe Rut a feito ren ei lenien wichiwich umwun parli.
RUT 3:15 Iwe, Poas a üreni Rut, “Kopwe uwato ena mangaku ka pwölü ngonuk o ameresala ikei.” Iwe, neminewe a föri iei usun, nge Poas a aükü ngeni ina epwe ükükün lime paun parli o ekietä won Rut. Mürin a liwinla ngeni ewe telinimw.
RUT 3:16 Nge lupwen Rut a tori lenien inen pwülüan we, Naomi a aisini, “Met pworausom, nei föpwül?” Iwe, Rut a apworausa meinisin mine Poas a föri ngeni.
RUT 3:17 A pwal apasa, “Poas a üreniei pwe üsap liwinto reöm fän asöülapö, iei mine a ngeniei ei ükükün parli.”
RUT 3:18 Iwe, Naomi a üreni, “Rut, kopwe chök witiwit tori om kopwe silei met epwe fis ngonuk. Pun Poas esap kinamwe tori epwe awesala ei mettoch ikenai.”
RUT 4:1 Iwe, Poas a feila ren asamalapen ewe telinimw lon ewe lenien chulap o mottiu ikenan. Mürin, märärin Elimelek we mi fokun kan ngeni, ätewe Poas a fen kapas usun, a feito. Iwe, Poas a kökkö ngeni, “Ätenan, kopwe feito o mottiu ikei.” Iwe, a feito o mottiu.
RUT 4:2 Mürin Poas a fili engol ätemiritin ewe telinimw o üreniir pwe repwe pwal mottiu. Iwe, ra mottiu.
RUT 4:3 Mürin a üreni märärin we, “Naomi neminewe mi liwinto seni ewe fanü Moap a ekiekin amömöla eu kinikinin fanüen pwich we Elimelek.
RUT 4:4 Iei mine üa ekiekin pworaus ngonuk usun. Iwe, are ka mochen möni ei fanü, kopwe mönätiu iei me fän mesen ätekei mi mot ikei. Nge are kosap mochen möni, kopwe chök asile ngeniei. Pun esap wor än eman pwüüng me lukum an epwe tongeni möni, nge ngang mürum.” Iwe, a üreni, “Ngang üpwe möni ewe fanü.”
RUT 4:5 Iwe, Poas a üreni, “Mi öch. Nge lon ränin om kopwe möni ewe fanü seni Naomi, kopwe pwal angei Rut ewe fin Moap pwülüen ewe mi mäla, pwe kopwe aupwätiu mwirimwirin ewe mi mäla pwe repwe fanüeni fanüan.”
RUT 4:6 Nge ewe mwän a apasa, “Are iei usun, üsap mochen möni ewe fanü, pun mwirimwiri kewe resap tongeni fanüeni me mürin. Kopwe siwiliei le möni, pun ngang üsap tongeni möni.”
RUT 4:7 Iwe, iei usun örünien chon Israel me lom, pwe lupwen eman a mochen alleta an möni och seni eman ika akasiwili pisek me fanü, ewe chon amömö epwe pwiliti seni pechen eipw ipwan sus o ngeni ewe chon kamö. Iei usun ar alleta angangen amömö lon Israel.
RUT 4:8 Iwe, lupwen ewe mwän a apasa ngeni Poas, “Kopwe püsin möni,” a pwal pwiliti seni pechen eipw ipwan sus o ngeni Poas.
RUT 4:9 Mürin Poas a üreni ekewe ätemirit me aramas meinisin mi nom, “Ikenai ämi nei chon pwärätä pwe üa möni seni Naomi meinisin mine än Elimelek, pwal meinisin mine än Kilion me Maalon.
RUT 4:10 Üa pwal angei Rut ewe fin Moap pwülüen mäwe Maalon pwe üpwe pwülüeni o aupwätiu mwirimwirin ewe mi mäla, pwe repwe fanüeni fanüan. Iwe, iei usun iten ewe mi mäla esap mola me lein pwin kana pwal me lein aramasen poputän telinimwan. Ikenai ämi nei chon pwärätä.”
RUT 4:11 Mürin ekewe aramas meinisin me ekewe ätemirit mi nom arun asamalapen ewe telinimw ra apasa, “Fokun äm chon pwärätä. Amwo ewe Samol mi Lapalap epwe föri pwe pwülüom we epwe usun chök Rahel me Lea ra aupwätiu ekewe ainangen Israel. Amwo kopwe feiöch me lon ewe eterekesin Efrat, kopwe pwal iteüöch lon Petleem.
RUT 4:12 Amwo ewe Samol mi Lapalap epwe fang ngonuk mwirimwirum ren ei föpwül, pwe om famili epwe usun chök ewe familien Peres nöün Juta me Tamar.”
RUT 4:13 Iei mine Poas a pwülüeni Rut. Iwe, lupwen a kon ren, ewe Samol mi Lapalap a afeiöchü pwe a pwopwo o nöüni eman ät.
RUT 4:14 Iwe, ekewe fefin ra üreni Naomi, “Ousipwe mwareiti ewe Samol mi Lapalap. A fokun fang ngonuk eman mwirimwirum ikenai. Amwo itan epwe iteüöch lon Israel.
RUT 4:15 I epwe echipok o fokun tümwünuk lon om chinlap, pun a upu seni pwülüen noum we mi tongeek o öchü ngonuk lap seni füman noum mwän.”
RUT 4:16 Mürin Naomi a angei ewe semirit o anomu won afön pwe epwe tümwünü.
RUT 4:17 Nge ekewe fefin mi nom arun ra apasa, “Eman ät a uputiu ngeni Naomi.” Iwe, ra aita ngeni ewe ät Opet. Iwe, Opet semen Jesi, nge Jesi semen Tafit.
RUT 4:18 Iei mwirimwirin Peres: Peres semen Hesron,
RUT 4:19 Hesron semen Ram, Ram semen Aminatap,
RUT 4:20 Aminatap semen Nason, Nason semen Salmon,
RUT 4:21 Salmon semen Poas, Poas semen Opet,
RUT 4:22 Opet semen Jesi, nge Jesi semen Tafit.
1SA 1:1 Mi wor eman mwän lon Ramataim-sofim seni chukuchukutän ewe fanü Efraim itan Elkana nöün Jeroham we mwän, Jeroham nöün Elihu, Elihu nöün Tohu, nge Tohu nöün Suf seni ewe ainangen Efraim.
1SA 1:2 Iwe, a wor ruoman pwülüen Elkana, iten eman Hana, pwal iten eman Penina. Iwe, a wor nöün Penina kana, nge Hana esap wor nöün.
1SA 1:3 Iwe, iteiten ier Elkana e sou feitä seni an telinimw pwe epwe fel o asor ngeni ewe Samol mi Unusen Manaman me lon Silo. Ikenan nöün Eli kewe ruoman mwän iter Hofni me Pineas ra wisen souasorun ewe Samol mi Lapalap.
1SA 1:4 Iwe, iteiten fansoun, lupwen Elkana a asor, a ngeni Penina pwülüan we pwal nöün ät me nengin en me an kinikin seni ewe asor.
1SA 1:5 Elkana a mwo tongei Hana, nge a chök ngeni eu kinikin, pun ewe Samol mi Lapalap esap awora nöün.
1SA 1:6 Nge Penina a akuf ngeni Hana, a fokun sou asonga o ämängaua, pun ewe Samol mi Lapalap esap awora nöün.
1SA 1:7 Iei usun a fis iteiten ier. Iteiten fansoun, lupwen Hana a feitä ren imwen ewe Samol mi Lapalap, Penina a asonga. Iei mine Hana a kechü, nge esap mochen mongö.
1SA 1:8 Iwe, Elkana pwülüan we a aisini, “Hana, pwota ka kechü? Pwota kosap mochen mongö? Nge pwota ka letipeta? Üsap aüchea me reöm lap seni engol noum mwän?”
1SA 1:9 Lon ewe rän, lupwen ra wes me mongö o ün me lon Silo, Hana a ütä o feila fän mesen Kot. Lon ei otun ewe souasor Eli a mot won eu lenien mot ünükün üren asamalapen imwen ewe Samol mi Lapalap.
1SA 1:10 Iwe, a fokun weires lon letipen Hana, a fokun iotek nge kechü ngeni ewe Samol mi Lapalap.
1SA 1:11 A eäni eu pwon o apasa, “Ai Samol mi Unusen Manaman, kose mochen kopwe nenengeniei. Kopwe küna ai riaföü o chechemeniei, kosap manlükieila ngang noum chon angang fefin. Are ka mochen ngeniei eman ät, ngang üa pwon pwe üpwe ngonuk ewe ät lon ükükün ränin manauan meinisin, esap pwal fich möküran.”
1SA 1:12 Iwe, lupwen Hana a sopwela le iotek, Eli a nenengeni awan.
1SA 1:13 Pun Hana a iotek nge möngününgün, tinawan chök ra mwökütüküt, nge esap wor mwelielian. Iei mine Eli a ekieki pwe i eman fefin mi pulas.
1SA 1:14 Iwe, Eli a üreni Hana, “Ifa ükükün fansoun om kopwe pulas? Kopwe ükütiu le ün wain.”
1SA 1:15 Nge Hana a üreni, “Apwi, ai samol, ngang üsap ün wain ika sakau mi pwichikar, ngang eman fefin mi fokun riaföü. Iei üa pwärawu mine a nom lon lelukei fän mesen ewe Samol mi Lapalap.
1SA 1:16 Kosap ekieki pwe ngang noum chon angang fefin eman mi manauangau, pun lon unusen ei fansoun üa iotek lon ai weires me riaföü mi lapalap.”
1SA 1:17 Mürin, Eli a üreni, “Kopwe feila fän kinamwe, ewe Koten Israel epwe ngonuk pälüen om tüngor.”
1SA 1:18 Iwe, Hana a üra, “Amwo ngang noum chon angang fefin üpwe küna ümöümöch me reöm.” Mürin a feila o mongö, nge won mesan esap chüen wololilen.
1SA 1:19 Iwe, sorotän ewe rän Elkana me an famili ra pwätä lesosorusich o fel ngeni ewe Samol mi Lapalap. Mürin ra liwiniti lenier lon Rama. Iwe, Elkana a kon ren Hana pwülüan we, nge ewe Samol mi Lapalap a chechemeni än neminewe tüngor.
1SA 1:20 Nge lupwen a tori fansoun, Hana a pwopwo o nöüni eman ät. Iwe, a aita ngeni Samuel, pun a apasa, “Üa tüngor ätei seni ewe Samol mi Lapalap.”
1SA 1:21 Iwe, lupwen a tori fansoun ar we asor, Elkana me chon leimwan meinisin ra feitä Silo pwe repwe eäni ewe asor mi fis iteiten ier ngeni ewe Samol mi Lapalap, epwe pwal apwönüetä an pwon.
1SA 1:22 Nge Hana esap etiir le feitä. A üreni pwülüan we, “Lon ewe otun ewe semirit epwe mwü seni oupw, üpwe uweela lon imwen ewe Samol mi Lapalap, pwe epwe nonom ikenan fansoun meinisin.”
1SA 1:23 Iwe, Elkana pwülüan we a üreni, “Kopwe föri mine a mürina me reöm. Kopwe chök nonom tori ka mwüti ewe semirit seni oupw. Amwo ewe Samol mi Lapalap epwe apwönüetä an kapas.” Iei mine Hana a chök nonom lon imwan o tümwünü nöün we ät.
1SA 1:24 Nge mürin än Hana mwüti seni oupw, a uwala Silo fiti eman ätemwänin kow ülüngat ierin, ilik paun pilawa mi amas me eu rumen wain. Iwe, a uwala ewe semirit lon imwen ewe Samol mi Lapalap lon Silo, nge a chüen kükün.
1SA 1:25 Mürin ar niela ewe ätemwänin kow, ra uwala ewe semirit ren Eli.
1SA 1:26 Iwe, Hana a üreni, “Ai samol, ka chüen chechemeniei? Ngang ewe fefin mi ütä ikei, ka künaei, lupwen üa iotek ngeni ewe Samol mi Lapalap.
1SA 1:27 Üa tüngor ei semirit. Iwe, ewe Samol mi Lapalap a ngeniei pälüen ai tüngor.
1SA 1:28 Iei mine üa fang ngeni ewe Samol mi Lapalap ei ät. Lon unusen manauan i epwe nöün ewe Samol mi Lapalap.” Mürin ra fel ngeni ewe Samol mi Lapalap ikenan.
1SA 2:1 Iwe, Hana a pwal iotek o apasa, “Üa pwapwa lon lelukei ren ewe Samol mi Lapalap, üa chimwetä ren ewe Samol mi Lapalap. Üa ämängaua chon oputaei, pun üa pwapwa ren an angasaei.
1SA 2:2 Esap wor eman mi pin usun ewe Samol mi Lapalap, esap wor eman lükün i, esap pwal wor eu achau usun ach we Kot.
1SA 2:3 Ousap chüen fos lamalamtekia, kapasen tunesikesik esap chüen towu seni lon awemi. Pun ewe Samol mi Lapalap eman Kot mi silei mettoch meinisin, i a apwüngü än aramas meinisin föför.
1SA 2:4 Nöün ekewe sounfiu mi pwora föün esefich ra kup, nge chokewe mi mwatötö repwe pöchökülela.
1SA 2:5 Iwe, ekewe mi pisekisek me mwan ra chon angang fän iten ener mongö, nge ekewe mi echik me mwan resap chüen echik. Neminewe mi rit a nöüni füman, nge neminewe mi wor chomong nöün a aleman.
1SA 2:6 Ewe Samol mi Lapalap a niela aramas, a pwal amanaueer, a atolonga aramas lon lenien sotup, a pwal amanaueretä.
1SA 2:7 Iwe, ewe Samol mi Lapalap a föri pwe aramas repwe wöüngau, a pwal föri pwe repwe pisekisek, a atekisona aramas, a pwal atekiaretä.
1SA 2:8 A aütai ekewe chon wöüngau seni lon pwül, a ekiewu chon mwelele seni lon ewe ioien falang, a amoteer ren ekewe samol o alenier won än chon iteföüla lenien mot. Pun ekewe longolongun fanüfan än ewe Samol mi Lapalap. I a aüetä fanüfan wor.
1SA 2:9 Iwe, a tümwünü manauen nöün kewe mi allükülük, nge ekewe chon föföringau repwe mäla lon rochopwak. Pun eman aramas esap win ren püsin an pwora.
1SA 2:10 Ekewe chon ü ngeni ewe Samol mi Lapalap repwe rosola. Kot epwe apüngätiu chopulap wor seni lon läng. Ewe Samol mi Lapalap epwe apwüngü unusen fanüfan, epwe ngeni nöün king pöchökül o awinna nöün we mi kepit.”
1SA 2:11 Mürin, Elkana a liwiniti lenian lon Rama. Nge ewe ät a nonom lon Silo o angang ngeni ewe Samol mi Lapalap fän emwenien ewe souasor Eli.
1SA 2:12 Nge nöün Eli kewe mwän ra aramasangau. Resap meniniti ewe Samol mi Lapalap,
1SA 2:13 resap pwal föri pwüngün wisen ekewe souasor me ren ekewe aramas. Are eman mwän a eäni asor eman mönün asor, nöün ewe souasor chon angang epwe feito fän efoch fok mi ülükeang, lupwen ewe fituk a chüen kuk,
1SA 2:14 o chüralong ewe fok lon ewe pan ika pakku ika kama ika nape. Nge meinisin mine a pachetä won ewe fok, ewe souasor epwe angei pwe ochan. Iei usun ra föri ngeni ekewe chon Israel meinisin mi feito Silo.
1SA 2:15 Nge nöün ewe souasor chon angang epwe pwal feito me mwen kirisin ewe mönün asor epwe kek o üreni ätewe mi eäni ewe asor, “Kopwe ngeniei fituk fän iten ewe souasor pwe epwe furainei. Pun esap mochen ochoch senuk fituk mi kuk, pwe fituk mi amas.”
1SA 2:16 Nge are ewe mwän epwe üreni, “Witi mwo ekis, pun ewe kiris epwe akom le kek, mürin kopwe angei ükükün om mochen,” ewe chon angang epwe apasa, “Apwi, kopwe chök ngeniei iei, nge are kosap mochen, üpwe chök angei fän pöchökül.”
1SA 2:17 Iei usun än ekewe alüal tipis a fokun wattela me fän mesen ewe Samol mi Lapalap, pun ra turunufasei ewe asor ngeni ewe Samol mi Lapalap.
1SA 2:18 Nge ewe ät Samuel a angang fän mesen ewe Samol mi Lapalap. A üföüf echö üf itan efot seni mangaku mi pwechepwech.
1SA 2:19 Iwe, inan a tei fän itan echö kükün owokot o uweetä ren iteiten ier, lupwen a eti pwülüan we le feitä pwe epwe eäni ewe asor mi fis iteiten ier.
1SA 2:20 Eli a afeiöchü Elkana me pwülüan we o apasa, “Ewe Samol mi Lapalap epwe fang ngonuk noum me won ewe fefin fän iten ätewe a fangala ngeni ewe Samol mi Lapalap.” Mürin ra liwiniti lenier.
1SA 2:21 Iwe, ewe Samol mi Lapalap a afeiöchü Hana, iei mine a pwal wor ülüman nöün ät me ruoman nengin. Nge ewe ät Samuel a mämäritä o föri an angang ngeni ewe Samol mi Lapalap.
1SA 2:22 Iwe, Eli a fokun chinlap. A rong meinisin usun mine nöün kewe mwän ra föri ngeni chon Israel meinisin, pwal usun ar kon ren ekewe fefin mi angang leasamalapen ewe imwenfel seni mangaku.
1SA 2:23 Iei mine a üreniir, “Pwota oua föri ekei sokun föför? Pun üa rong seni ekewe aramas meinisin usun ämi föför mi ngau.
1SA 2:24 Nei mwän, oupwe ükütiu le föri ei sokun föför. Pun mine üa rongorong seni nöün ewe Samol mi Lapalap kewe aramas ra apworausafetalei, esap eu pworaus mi öch.
1SA 2:25 Are eman aramas a tipis ngeni eman aramas, Kot epwe aför lefiler. Nge are eman aramas a tipis ngeni ewe Samol mi Lapalap, iö epwe tüngor fän itan?” Nge ekewe alüal resap aüselinga alon semer we, pun a fen letipen ewe Samol mi Lapalap pwe epwe nirela.
1SA 2:26 Nge ewe ät Samuel a mämäritä lon löllön o küna ümöümöch me ren ewe Samol mi Lapalap pwal me ren aramas.
1SA 2:27 Iwe, eman aramasen Kot a feito ren Eli o üreni, “Iei alon ewe Samol mi Lapalap, ‘Üa püsin pwäriei ngeni om we lewo Aaron, lupwen i me chon leimwan ra nom Isip fän nemenemen Farao.
1SA 2:28 Üa fili i seni ekewe ainangen Israel meinisin pwe epwe nei souasor, epwe angang ngeni ai rongen asor, epwe pwal keni apach mi pwokus o üföüf ewe üf itan efot me fän mesei. Üa ngeni chon leimwen Aaron ai asor won ekkei meinisin seni ekewe aramasen Israel.
1SA 2:29 Pwota chök oua turunufasei ai kewe mönün asor me ai kewe asor üa allük ngenikemi? Ka asamolu noum kewe mwän lap seniei ren om mwütätä pwe repwe ekitinupuur ren ekewe kinikinin asor mi fokun mürina seni än nei kewe aramasen Israel asor meinisin ra eäni ngeniei.’
1SA 2:30 Iei mine ewe Samol mi Lapalap ewe Koten Israel a apasa, ‘Üa pwon me lom pwe om kewe lewo me mwirimwirir repwe wiseni ewe wis tori feilfeilachök. Nge iei üa apasa pwe esap chüen ina usun. Pun chokewe mi asamoluei üpwe asamoluur, nge chokewe mi turunufaseei repwe küna turunufas.
1SA 2:31 Epwe war ewe fansoun, lupwen üpwe niela ekewe alüal lon om famili me om cho pwe esap wor eman mwän lon om famili epwe tori chinlap,
1SA 2:32 kopwe pwal nenengeni ewe osukosuk mi fis ngeni imwei. Inamwo ika üa afeiöchü chon Israel, nge esap wor eman me lon om famili epwe tori chinlap tori feilfeilachök.
1SA 2:33 Nge iö me leimi ngang üsap aräla seni an angang ngeni ai we rongen asor epwe chök kekechü o letipeta. Nge mwirimwirum kana repwe mäla, lupwen ra mwän.
1SA 2:34 Iwe, mine epwe fis ngeni noum kewe ruoman mwän Hofni me Pineas epwe eu asisil ngonuk: Ir me ruoman repwe mäla lon eu chök rän.
1SA 2:35 Nge ngang üpwe awora fän itei eman souasor mi allükülük, ätewe epwe föri letipei o apwönüetä ai ekiek. Iwe, ngang üpwe awora mwirimwirin, nge i epwe angang fansoun meinisin me fän mesen nei we mi kepit.
1SA 2:36 Iwe iteiten eman me eman mi chüen manau lein mwirimwirum kana epwe feito ren ei souasor o chapetiu me fän mesan o tüngor eföü moni silifer ika anan mongö, epwe pwal tüngor ngeni pwe epwe atolonga lon lenien eman ekewe souasor, pwe epwe wor ekis anan mongö.’”
1SA 3:1 Iwe, ewe ät Samuel a angang ngeni ewe Samol mi Lapalap fän emwenien Eli. Lon ena fansoun än ewe Samol mi Lapalap kapas esap kon nien chööw, esap pwal wor künaen aramas fän chomong.
1SA 3:2 Lon eu pwin Eli a kon lon lenian, nge mesan a toputopula pwe esap chüen tongeni küna mwan.
1SA 3:3 Nge Samuel a annut lon imwenfelin ewe Samol mi Lapalap, ia än Kot we pworofel a nom ie. Iwe, wünümweerän, lupwen ewe lenien atittin esamwo kunula,
1SA 3:4 ewe Samol mi Lapalap a kökkö, “Samuel, Samuel!” Nge Samuel a üra, “Ngang iei.”
1SA 3:5 A säla ren Eli o apasa, “Ngang iei, en ka kökköriei.” Nge Eli a üreni, “Ngang üsap köruk, kopwe liwinla o konsefälila.” Iei mine Samuel a feila o konola.
1SA 3:6 Iwe, ewe Samol mi Lapalap a kökkösefäl, “Samuel!” Samuel a pwätä, a feila ren Eli o üreni, “Ngang iei, en ka kökköriei.” Nge Eli a üreni, “Üsap kökköruk nei, kopwe liwinla o konsefälila.”
1SA 3:7 Lon ei fansoun Samuel esamwo silei ewe Samol mi Lapalap, pun ewe Samol mi Lapalap esamwo kapas ngeni fän eu.
1SA 3:8 Lupwen ewe Samol mi Lapalap a körisefäli Samuel fän aülüngatin, Samuel a pwätä, a feila ren Eli o üreni, “Ngang iei, en ka kökköriei.” Mürin, Eli a mefi pwe ewe Samol mi Lapalap a köri ewe ät.
1SA 3:9 Iei mine Eli a üreni Samuel, “Kopwe feila o kon. Nge are Kot epwe köruk, kopwe apasa, ‘Kopwe kapas ai Samol mi Lapalap, pun ngang noum chon angang üa aüseling.’” Iei mine Samuel a feila o kon lon lenian.
1SA 3:10 Iwe, ewe Samol mi Lapalap a feito, a ütä o kökkö usun me mwan, “Samuel, Samuel!” Samuel a üreni, “Kopwe kapas, ngang noum chon angang üa aüseling.”
1SA 3:11 Mürin, ewe Samol mi Lapalap a üreni Samuel, “Nengeni, ngang üpwe föri och lon Israel, nge iteiten eman me eman mi rongorong usun epwe mäirü ren.
1SA 3:12 Lon ewe rän üpwe apwönüetä ngeni Eli meinisin mine üa kapas usun chon leimwan seni lepoputan tori lesopolan.
1SA 3:13 Pun üa fen üreni pwe iei üpwe apwüngü chon leimwan tori feilfeilachök, pokiten a silei ewe föföringau nöün kewe mwän ra turunufaseei ren, nge esap apwüngüür.
1SA 3:14 Iei mine üa pwon fän akapel ngeni chon leimwen Eli, pwe ar föföringau esap tongeni musala ren sokopaten asor tori feilfeilachök.”
1SA 3:15 Iwe, Samuel a konola tori lesosor. Mürin a pwätä o suki asamalapen imwen ewe Samol mi Lapalap. Nge Samuel a niuokus le apworausa ngeni Eli künan.
1SA 3:16 Mürin, Eli a köri Samuel o üreni, “Samuel, nei ät.” Nge Samuel a apasa, “Ngang iei.”
1SA 3:17 Iwe, Eli a üreni, “Met ewe, Kot a ürenuk? Kosap tukumala och seniei. Kot epwe apwünguk, are kosap üreniei meinisin mine a ürenuk.”
1SA 3:18 Iei mine Samuel a apworausa ngeni meinisin, nge esap tukumala och seni. Nge Eli a apasa, “Nemen chök ewe Samol mi Lapalap. Epwe föri mine a öch me ren.”
1SA 3:19 Iwe, Samuel a mämäritä. Nge ewe Samol mi Lapalap a eti. Esap wor eu an kapas esap pwönüetä.
1SA 3:20 Iei mine chon Israel meinisin seni Tan tori Peersepa ra silei pwe Samuel wesewesen eman nöün ewe Samol mi Lapalap soufos.
1SA 3:21 Iwe, ewe Samol mi Lapalap a pwäsefäl me lon Silo. Ikenan a püsin pwä ngeni Samuel o kapas ngeni. Iwe, chon Israel meinisin ra aüselinga än Samuel kapas.
1SA 4:1 Lon ena fansoun chon Israel ra feila pwe repwe maun ngeni chon Filistia. Iwe, ra nonom lon Epineser, nge ekewe chon Filistia ra nonom Afek.
1SA 4:2 Iwe, ekewe chon Filistia ra tettel o maun ngeni chon Israel. Nge lupwen ewe maun a wattela, chon Israel ra kuf ren chon Filistia mi niela ina epwe ükükün rüanüngeröü mwän lon ewe lenien maun.
1SA 4:3 Nge lupwen ekewe sounfiu ra liwiniti lenier we, ekewe souakomwen Israel ra üra, “Pwota ewe Samol mi Lapalap a mwüt ngeni chon Filistia pwe repwe akufukich ikenai? Ousipwe angei än ewe Samol mi Lapalap we pworofel seni Silo o ekieto ikei pwe Kot epwe nom lefilach o amanauakich seni chon oputakich.”
1SA 4:4 Iei mine ekewe aramas ra tinala ekoch Silo, pwe repwe uwato seni ikenan ewe pworofel än ewe Samol mi Unusen Manaman mi mot asen ekewe kerop. Iwe, nöün Eli kewe ruoman mwän Hofni me Pineas ra etala än Kot we pworofel.
1SA 4:5 Iwe, lupwen än ewe Samol mi Lapalap we pworofel a tori lenier we, chon Israel meinisin ra mweireir fän leüömong, pwe ewe fanü a chechech ren.
1SA 4:6 Nge lupwen ekewe chon Filistia ra rongorong akürangen ewe mweireir, ra ais, “Met wewen ei watten mweireir a fis lon lenien chon Ipru?” Iwe, lupwen ra silei pwe än ewe Samol mi Lapalap we pworofel a nom lon ewe leni,
1SA 4:7 ra niuokus o apasa, “Eman kot a feito lon ewe leni. Sipwe feiengau! Pun ei sokun lapalap esamwo fis me mwan.
1SA 4:8 Sipwe feiengau. Iö a tongeni angasakich seni manamanen ekei kot mi pöchökül? Ikkei ir ekewe kot mi afeiengaua ekewe chon Isip ren sokopaten feiengau me lon ewe fanüapö.
1SA 4:9 Oupwe tipepwora o atipemwänikemi, ämi chon Filistia, pwe ekewe chon Ipru resap nöünikemi amanau, usun ämi oua nöüniir amanau. Oupwe atipemwänikemi le fiu.”
1SA 4:10 Iei mine ekewe chon Filistia ra maun, nge chon Israel ra kuf. Ra süla iteiten eman me eman ngeni lenian. Iwe, a fis eu ninni mi fokun lapalap, pun ra mäla ükükün ilik ngeröü sounfiun Israel mi fetal.
1SA 4:11 Iwe, än Kot we pworofel a oola, nge nöün Eli kewe ruoman mwän Hofni me Pineas ra mäla.
1SA 4:12 Lon ewe chök ränin eman re Peniamin a sä seni ewe lenien maun o tori Silo fän üfan mi kamwakam, a pwal wor pwül won möküran.
1SA 4:13 Lupwen ätewe a tori Silo, Eli a mot won an lenien mot o nennela won ewe al, pun a aüreki än Kot we pworofel. Iwe, lupwen ewe mwän a tolong lon ewe telinimw o apworausa ewe pworaus, chon ewe telinimw meinisin ra kechü fän leüomong.
1SA 4:14 Nge lupwen Eli a rong puchörün ar kechü, a ais, “Met ei ra puchör ren?” Mürin, ewe mwän a müttir feila ren Eli pwe epwe apworausa ngeni ewe pworaus.
1SA 4:15 Lon ei fansoun Eli a tiue me walu ierin, nge mesan a chunela pwe esap chüen küna mwan.
1SA 4:16 Iwe, ewe mwän a üreni Eli, “Ngang üa sü seni ewe maun o feito ikei ikenai.” Mürin Eli a ais, “Met pworausom, nei?”
1SA 4:17 Ewe mwän a üreni, “Chon Israel ra sü me mwen ekewe chon Filistia. A pwal fis eu ninni mi lapalap ngeni ekewe aramas. Noum kewe ruoman mwän Hofni me Pineas ra pwal mäla, nge än Kot we pworofel a oola.”
1SA 4:18 Nge lupwen a föüni än Kot we pworofel, Eli a selengetä o tur seni an lenien mot lükün ewe asamalap, a kup popun üan o mäla, pun a chinlap o kitinup. Eli a soukapwüng lon Israel lon ükükün faik ier.
1SA 4:19 Iwe, lon ewe fansoun pwülüen nöün Eli we mwän itan Pineas mi pwopwo a arapakan ngeni an epwe nöünöü. Nge lupwen a rong ewe pworaus pwe än Kot we pworofel a oola, pwal semen pwülüan me pwülüan ra mäla, a cheri an cheuchen nöünöü o nöünöüla.
1SA 4:20 Lupwen neminewe a kon o arap ngeni an epwe mäla, ekewe fefin mi tümwünü ra apasa ngeni, “Kosap niuokus, pun ka nöüni eman ät.” Nge neminewe esap pälüeni och ika aüselinga.
1SA 4:21 Iwe, a aita ngeni ewe ät Ikapot, pun a apasa, “Ewe ling a feil seni Israel,” pokiten än Kot we pworofel a oola, pwal pokiten semen pwülüan me pwülüan we ra mäla.
1SA 4:22 Iwe, a apasa, “Ewe ling a feil seni Israel, pun än Kot we pworofel a oola.”
1SA 5:1 Iwe, lupwen ekewe chon Filistia ra liapeni än Kot we pworofel, ra uwala seni Epineser tori Astot.
1SA 5:2 Mürin, ekewe chon Filistia ra angei än Kot we pworofel, ra uwalong lon imwen ar we uluulun anü Takon o iseis ünükün.
1SA 5:3 Iwe, lupwen ekewe aramasen Astot ra pwätä lesosorusichin sorotän ewe rän, ra küna pwe ar we uluulun anü Takon a chapala lepwül mwen än ewe Samol mi Lapalap we pworofel. Iwe, ra angei Takon o aüsefälietä won lenian.
1SA 5:4 Nge lupwen ra pwal pwätä lesosorusichin sorotän ewe rän, ra küna pwe ar we uluulun anü Takon a chapala lepwül mwen än ewe Samol mi Lapalap we pworofel. Iwe, möküran me pöün me ruofoch ra pöküla o nom won amwüchün fän ewe asamalap, inisin chök a nom.
1SA 5:5 Iei mine nöün Takon kewe souasor, pwal meinisin mi tolong lon imwen Takon lon Astot resap ipwetä won amwüchün fän asamalapen imwan tori ei fansoun.
1SA 5:6 Iwe, ewe Samol mi Lapalap a afeiengaua ekewe chon Astot me chon wisoposopun kewe. A ataela fanüer o ariaföüür ren pwo.
1SA 5:7 Nge lupwen ekewe aramasen Astot ra küna mine a fis, ra apasa, “Äm aisap mochen pwe än ewe Koten Israel we pworofel epwe nom rem, pun ar we Kot a afeiengauakem, pwal äm we kot Takon.”
1SA 5:8 Iei mine ra titi ekewe samolun chon Filistia meinisin o amwichafengeniir. Iwe, ra ais, “Met sipwe föri ngeni än ewe Koten Israel we pworofel?” Nge ir ra pälüeni, “Oupwe uwala än ewe Koten Israel we pworofel lon Kat.” Iei mine ra uwala lon Kat.
1SA 5:9 Nge mürin ar uwala ikenan, ewe Samol mi Lapalap a afeiengaua chon ewe telinimw o awarato wor niuokus watte. A ariaföüü aramasen ewe telinimw seni semirit tori chinlap, pwe pwo ra pwüküwu me wor.
1SA 5:10 Iei mine ra tinala Ekron än Kot we pworofel. Nge lupwen än Kot we pworofel a tori Ekron, ekewe aramasen Ekron ra puchöretä, “Ra uwato rech än ewe Koten Israel we pworofel, pwe epwe nikich meinisin.”
1SA 5:11 Iei mine ra titi ekewe samolun chon Filistia meinisin o amwichafengeniir. Iwe, ra üreniir, “Oupwe asü senikem än ewe Koten Israel ei pworofel pwe epwe liwiniti püsin lenian, nge esap nikem me nöüm aramas.” A wor mäla ren niuokus watte lemenen unusen ewe telinimw, pun Kot a fokun afeiengaueer.
1SA 5:12 Iwe, ekewe aramas resap mäla a üriir pwo, nge än chon ewe telinimw puchör a tori läng.
1SA 6:1 Iwe, än ewe Samol mi Lapalap we pworofel a nom lon fanüen chon Filistia lon ükükün fisu maram.
1SA 6:2 Mürin, ekewe chon Filistia ra titi ekewe souasor me ekewe soupwe o aisiniir, “Met aipwe föri ngeni än ewe Samol mi Lapalap ei pworofel? Oupwe ürenikem met epwe fiti, lupwen aipwe aliwini ngeni lenian.”
1SA 6:3 Nge ra üreniir, “Are oupwe tinala än ewe Koten Israel ei pworofel, ousap tinala fän pön, nge oupwe aliwinala ren fiti eu asoren tipis. Mürin oupwe pöchökülsefäl, oupwe pwal silei pwota esap ükütiu le afeiengauakemi.”
1SA 6:4 Mürin, ra aisiniir, “Met sokun ewe asoren tipis aipwe tinala ren?” Ra pälüeni, “Oupwe tinala limeföü uluulun pwoo seni kolt, pwal limman uluulun nakich seni kolt ükükün iteiten samolun chon Filistia. Pun eu chök mätter a ürikemi meinisin, pwal nöümi kewe samol.
1SA 6:5 Oupwe föri uluulun pwoomi me uluulun ekewe nakich mi ataela ewe fanü. Iwe, oupwe meniniti ewe Koten Israel, eli epwe ükütiu le afeiengauakemi, pwal ämi kewe kot me fanüemi.
1SA 6:6 Pwota oupwe aföreai letipemi usun chon Isip me Farao ra aföreai letiper? Ifa usun, mürin än Kot awarato feiengau wor, resap mwüt ngeni ekewe aramas pwe repwe feila?
1SA 6:7 Iei oupwe amolätä efoch woken minefö me ruoman kow mi nöünöü, esamwo wor efoch waas a nom won üer. Oupwe ämwäralong won üer efoch waas o fötiir ngeni ewe woken. Nge apanen ekewe kow oupwe angei seniir o aliwinirela ngeni lenier.
1SA 6:8 Iwe, oupwe angei än ewe Samol mi Lapalap we pworofel o uwätä won ewe woken. Oupwe pwal iseis lon eu pwor ekewe uluulun pwo me nakich seni kolt o anomu ünükün pwe oupwe tinala ren, pwe ämi asoren tipis. Mürin oupwe tinala ewe woken, pwe epwe püsin feila lon alan.
1SA 6:9 Oupwe mamasa. Are epwe feitä ngeni püsin fanüan won ewe al ngeni Pet-semes, mürin sipwe silei pwe ewe Koten Israel a awarato ngenikich ei feiengau mi lapalap. Nge are esap feitä, sipwe pwal silei pwe esap afeiengauakich, pwe a chök püsin fis ngenikich.”
1SA 6:10 Iwe, ekewe mwän ra föri iei usun. Ra angei ruoman kow mi nöünöü, ra ämwäralong won üer efoch waas o fötiir ngeni ewe woken, nge apaner kewe ra likitiir lon lenier.
1SA 6:11 Mürin ra iseis än ewe Samol mi Lapalap we pworofel won ewe woken, pwal ewe pwor, ekewe uluulun nakich me uluulun pwo seni kolt ra nom lon.
1SA 6:12 Iwe, ekewe kow ra fetal wenewen ngeni Pet-semes won ewe alelap. Ra fetal nge puchör, nge resap rik ngeni pelifich ika ngeni pelimöng. Ekewe samolun chon Filistia ra tapwela mürin tori kiännin Pet-semes.
1SA 6:13 Lon ewe otun ekewe aramasen Pet-semes ra kini fotar wiich lon ewe mälämäl. Iwe, lupwen ra netä o küna ewe pworofel, ra fokun pwapwa.
1SA 6:14 Ewe woken a tori tanipin Josua seni Pet-semes o kaüla ikenan, ia a nom ie eföü fau mi föümong. Iwe, ekewe aramas ra ässätta mwüchün ewe woken o eäni asoren kek ekewe ruoman kow ngeni ewe Samol mi Lapalap.
1SA 6:15 Iwe, ekewe mwän seni ewe ainangen Lefi ra uwätiu än ewe Samol mi Lapalap we pworofel, pwal ewe pwor mi nom ünükün, ia ekewe uluulun nakich me pwo seni kolt ra nom ie, o iseniir won ewe fau mi föümong. Lon ewe ränin ekewe re Pet-semes ra eäni asoren kek me sokun asor ngeni ewe Samol mi Lapalap.
1SA 6:16 Iwe, ekewe limman samolun chon Filistia ra nengeni mine ekewe aramas ra föri, mürin ra liwinla Ekron lon ewe chök ränin.
1SA 6:17 Iwe, ekewe uluulun pwo seni kolt ekewe chon Filistia ra tinala pwe ar asoren tipis ngeni ewe Samol mi Lapalap: eföü fän iten Astot, eföü fän iten Kasa, eföü fän iten Askelon, eföü fän iten Kat, me eföü fän iten Ekron.
1SA 6:18 Mi pwal wor uluulun nakich seni kolt ükükün iteiten ekewe telinimwen chon Filistia meinisin mi nom fän nemenien ekewe limman samol, ekewe telinimw mi tit me ekewe sop resap tit. Iwe, tori ikenai ewe fau mi föümong, ewe ia ra isetä ie än ewe Samol mi Lapalap we pworofel, a eföü föün pwärätä mi nom lon tanipin Josua seni Pet-semes.
1SA 6:19 Iwe, ewe Samol mi Lapalap a niela ükükün fik mwän me lein ekewe re Pet-semes, pun ra nennelong lon ewe pworofel. Iwe, ekewe aramas ra letipeta, pun ewe Samol mi Lapalap a niela chomong me leir.
1SA 6:20 Mürin, ekewe re Pet-semes ra üra, “Iö a tongeni ütä fän mesen ewe Samol mi Lapalap, ewe Kot mi pin? Iö sipwe tinala ren ei pworofel, pwe Kot epwe toau senikich?”
1SA 6:21 Iei mine ra tinala chon künö ren ekewe chon Kiriat-jearim pwe repwe üreniir, “Ekewe chon Filistia ra aliwini än ewe Samol mi Lapalap we pworofel. Oupwe feito o angei ngenikemi.”
1SA 7:1 Mürin, ekewe re Kiriat-jearim ra feito, ra angei än ewe Samol mi Lapalap we pworofel o uweela ngeni imwen Apinatap mi nom won eu chuk. Iwe, ra apini nöün we mwän Eleasar pwe epwe tümwünü än ewe Samol mi Lapalap we pworofel.
1SA 7:2 Iwe, a la ekoch fansoun seni ewe rän ewe pworofel a nom lon Kiriat-jearim, ina epwe ükükün rüe ier. Mürin, chon Israel meinisin ra siö ngeni ewe Samol mi Lapalap pwe epwe alisiir.
1SA 7:3 Iwe, Samuel a üreni chon Israel meinisin, “Are oua kul ngeni ewe Samol mi Lapalap ren unusen lelukemi, oupwe pöütala ekewe koten ekis me ekewe uluulun ewe anüfefin Astarot mi nom remi o atolongakemi fän nemenien ewe Samol mi Lapalap, pwe oupwe angang ngeni i chök. Mürin epwe angasakemi seni fän nemenien ekewe chon Filistia.”
1SA 7:4 Iei mine chon Israel ra pöütala ekewe uluulun Paal me Astarot o angang ngeni ewe Samol mi Lapalap chök.
1SA 7:5 Mürin, Samuel a üreni ekewe chon Israel meinisin, “Oupwe mwicheto lon Mispa, nge ngang üpwe iotek ngeni ewe Samol mi Lapalap fän itemi.”
1SA 7:6 Iei mine ra mwichfengen lon Mispa. Iwe, ra üfi koluk o ninätiu me mwen ewe Samol mi Lapalap, ra pwal echikefel lon ewe ränin o pwärätä, “Äm aia tipis ngeni ewe Samol mi Lapalap.” Iwe, Samuel a soukapwüngün Israel lon Mispa.
1SA 7:7 Nge lupwen ekewe chon Filistia ra rongorong pwe ekewe aramasen Israel ra mwichefengen lon Mispa, ekewe samolun chon Filistia fiti nöür sounfiu ra feito pwe repwe maun ngeni chon Israel. Lupwen ekewe aramasen Israel ra rongorong usun, ra niuokusiti ekewe chon Filistia.
1SA 7:8 Iwe, ra üreni Samuel, “Kosap ükütiu le siö ngeni ewe Samol mi Lapalap ach we Kot fän item, pwe i epwe amanauakem seni fän nemenien ekewe chon Filistia.”
1SA 7:9 Mürin, Samuel a angei eman lam mi chüen ün oupw o eäni asoren kek mi unus ngeni ewe Samol mi Lapalap. Iwe, Samuel a siö ngeni ewe Samol mi Lapalap fän iten chon Israel, nge ewe Samol mi Lapalap a aüselinga.
1SA 7:10 Lupwen Samuel a eäni ewe asoren kek, ekewe chon Filistia ra kaneto pwe repwe maun ngeni chon Israel. Nge ewe Samol mi Lapalap a apüngü chopulap mi leüömong ngeni ekewe chon Filistia lon ewe ränin, pwe ra rukorukfengen o kuf me mwen ekewe chon Israel.
1SA 7:11 Nge ekewe chon Israel ra towu seni Mispa, ra tapweri ekewe chon Filistia o nirela lepekin al tori fän Pet-kar.
1SA 7:12 Mürin, Samuel a eki eföü fau o aüetä lefilen Mispa me Jesana. Iwe, a aita ngeni Epineser , pun a apasa, “Tori iei ewe Samol mi Lapalap a alisikich.”
1SA 7:13 Iei usun ekewe chon Filistia ra kuf, nge resap chüen tolong lon fanüen chon Israel. Iwe, ewe Samol mi Lapalap a ü ngeni ekewe chon Filistia lon unusen ränin manauen Samuel.
1SA 7:14 Iwe, ekewe chon Filistia ra aliwini ngeni chon Israel ekewe telinimw ra liapeni seniir lefilen Ekron me Kat. Iei usun ekewe chon Israel ra angeesefäli fanüer mi nom fän nemenien ekewe chon Filistia. A pwal wor kinamwe lefilen chon Israel me chon Amor.
1SA 7:15 Iwe, Samuel a soukapwüng lon Israel lon ükükün ränin manauan meinisin.
1SA 7:16 Iteiten ier a feila Petel, Kilkal me Mispa o eäni kapwüng ngeni chon Israel lon ekei leni meinisin.
1SA 7:17 Mürin, Samuel a liwiniti imwan lon Rama. Ikenan a pwal eäni kapwüng ngeni chon Israel. Iwe, a senätä eu rongen asor ngeni ewe Samol mi Lapalap lon Rama.
1SA 8:1 Iwe, lupwen Samuel a chinlapala, a awisa nöün kewe mwän pwe repwe soukapwüng lon Israel.
1SA 8:2 Iten nöün we mwänichi Joel, nge iten ewe kükün Apia. Iwe, ra soukapwüng lon Persepa.
1SA 8:3 Nge nöün kewe mwän resap manaueni manauen semer, pwe ra chök kütta ar win, ra pwal angei lifangen amichimich o sorei pwüngün kapwüng.
1SA 8:4 Mürin, ekewe souakomwen chon Israel meinisin ra chufengen o feito ren Samuel lon Rama.
1SA 8:5 Iwe, ra üreni, “Nengeni, en ka chinlap, nge noum kewe mwän resap manaueni manauom. Iei mine kopwe filätä eman ach king epwe nemenikich, usun chök ekewe mwü meinisin.
1SA 8:6 Nge Samuel esap pwapwa ngeni ei tüngor, pwe i epwe filätä eman ar king pwe epwe nemeniir. Iwe, Samuel a iotek ngeni ewe Samol mi Lapalap.
1SA 8:7 Nge ewe Samol mi Lapalap a üreni Samuel, “Kopwe aüselinga alon ekewe aramas lon meinisin mine ra ürenuk. Pun resap pöütukela, nge ra pöütieila pwe üsap nöür king.
1SA 8:8 Usun ekewe föför meinisin ra föri ngeniei seni ewe rän üa emwenirewu seni Isip tori ikenai, pwe ra likitieila o angang ngeni pwal ekoch kot, iei usun ra pwal föri ngonuk.
1SA 8:9 Iei mine kopwe aüselinga alor. Nge eu chök, kopwe fokun fönöör o aiti ngeniir usun pwüngün wisen ewe king epwe nemeniir.”
1SA 8:10 Iei mine Samuel a apworausa än ewe Samol mi Lapalap kewe kapas meinisin ngeni ekewe aramas mi tüngor seni eman king.
1SA 8:11 Iwe, Samuel a apasa, “Iei usun pwüngün wisen ewe king epwe nemenikemi: Epwe angei nöümi kewe mwän o awiseer pwe repwe uwei wan kewe woken, repwe pwal nöün chon wawa oris o sä me mwen wan woken.
1SA 8:12 Epwe filätä ekoch pwe repwe meilapen sounfiu won ngeröü, pwal ekoch won lime. Ekoch repwe wisen tuw pwülün fanüan o kini uän an räs, nge ekoch repwe wisen föri an pisekin maun me pisekin wan woken.
1SA 8:13 Epwe angei nöümi kewe fefin pwe repwe chon för lö, chon kuk me chon um pilawa.
1SA 8:14 Epwe angei senikemi öchün ämi kewe tanipi, ämi tanipin wain me tanipin olif, o ngeni nöün kewe nöüwis.
1SA 8:15 Epwe pwal angei eu leengolun föün fotämi wiich me wain o ngeni nöün kewe meilap me nöün kewe nöüwis.
1SA 8:16 Epwe angei nöümi chon angang mwän me chon angang fefin, pwal öchün lein nöümi kow me aas, pwe repwe angang ngeni.
1SA 8:17 Epwe angei eu leengol seni nöümi pwiin sip, epwe pwal nöünikemi amanau.
1SA 8:18 Lon ena fansoun oupwe fokun siö pokiten ämi king, oua püsin filätä fän itemi, nge ewe Samol mi Lapalap esap aüselingakemi.”
1SA 8:19 Iwe, ekewe aramas resap fokun mochen aüselinga alon Samuel. Ra apasa, “Apwi, äm aia mochen pwe epwe wor eman äm king.
1SA 8:20 Mürin aipwe usun chök ekewe mwü meinisin. Epwe wor äm king epwe nemenikem, epwe akom mwem o eäni äm maun.”
1SA 8:21 Iwe, Samuel a rongorong än ekewe aramas kapas meinisin, mürin a asilesefäli ngeni ewe Samol mi Lapalap.
1SA 8:22 Nge ewe Samol mi Lapalap a üreni Samuel, “Kopwe aüselinga alor o filätä eman ar king.” Mürin Samuel a üreni ekewe re Israel pwe repwe liwinla lon en me an telinimw.
1SA 9:1 Mi wor eman mwän mi pisekisek lon ewe fanü Peniamin itan Kis, i nöün Apiel we mwän, nge Apiel nöün Seror, Seror nöün Pekorat, nge Pekorat nöün Afia seni ewe ainangen Peniamin.
1SA 9:2 Iwe, a wor eman mwän itan Saul, i eman alüal mi äteöch. Esap wor eman mwän me lein ekewe aramasen Israel mi äteöch seni, a pwal langatam seni aramas meinisin seni afaran tori ulungen möküran.
1SA 9:3 Iwe, a fis pwe ekoch nöün Kis kewe aas ra mwälechela. Iei mine Kis a üreni Saul nöün we, “Kopwe angei eman lein ekewe chon angang pwe epwe etuk le feila kütta ekewe aas.”
1SA 9:4 Iei mine ra feila lemenen chukuchukutän ewe fanü Efraim, pwal lemenen ewe fanü Salisa, nge resap küneer. Ra pwal feila lemenen ewe fanü Saalim, nge resap pwal nom ikenan. Mürin, ra feila lemenen ewe fanü Peniamin, nge resap küneer.
1SA 9:5 Iwe, lupwen ra tori ewe fanü Suf, Saul a üreni nöün we chon angang, “Sipwe le liwinla, pun semei epwe ükütiu le ekieki ekewe aas, nge ina epwe le aürekikich.”
1SA 9:6 Nge ewe chon angang a üreni Saul, “Nengeni, mi wor eman soufos lon ei telinimw, i eman mwän mi iteföüla. Meinisin mine a apasa a fisitä. Sipwe le feila ren. Eli a tongeni pwäri ngenikich ia sipwe tongeni küna ekewe aas me ie.
1SA 9:7 Mürin, Saul a üreni nöün we chon angang, “Nge are sipwe feila, met sipwe uwala ren ewe mwän? Pun anach mongö lon ach tuk a it, nge esap wor eu lifang sipwe uwala ren ewe soufos. Iwe, met echök sipwe ngeni?”
1SA 9:8 Nge ewe chon angang a üreni Saul, “Iei mi wor rei eföü kükün föün moni silifer. Üpwe ngeni ewe soufos pwe epwe pwäri ngenikich ia sipwe küt ie.”
1SA 9:9 Lon Israel me lom, lupwen eman aramas a feila pwe epwe aisini Kot och kapas ais, epwe apasa, “Ousipwe feila ren ewe souwo.” Pun ätewe mi iteni soufos ikenai a iteni souwo me lom.
1SA 9:10 Iwe, Saul a üreni nöün we chon angang, “A öch mine ka apasa. Sipwe feila ren.” Iei mine ra feila lon ewe telinimw ia ewe soufos a nom ie.
1SA 9:11 Iwe, lupwen ra feitä won ewe chukutekison o feila ngeni ewe telinimw, ra churi ekoch föpwül mi towu seni ewe telinimw pwe repwe üfüf koluk. Ra aisiniir, “Ifa usun, a nom ewe soufos lon enan telinimw?”
1SA 9:12 Nge ra pälüeni, “Ewer, a nom. A chök akomwola mwemi. Oupwe müttirila mürin. Iei ekärän chök tolong lon ewe telinimw, pun ekewe aramas repwe eäni ar asor ikenai won ewe lenien fel won ewe chuk.
1SA 9:13 Lon ewe otun oupwe tolong lon ewe telinimw, oupwe küna mwen än epwe feitä ren ewe lenien fel pwe epwe mongö. Pun ekewe aramas resap mongö tori epwe war, pokiten i epwe afeiöchü ewe asor. Mürin, chokewe mi kökköto repwe mongö. Oupwe müttir feitä, pun oupwe churi iei chök.”
1SA 9:14 Iei mine ra feitä ren ewe telinimw. Nge lupwen ra tolong lon, ra küna Samuel won ewe al pwe epwe towu o feitä ren ewe lenien fel won ewe leni tekia.
1SA 9:15 Iwe, ewe rän me mwen än Saul feito, ewe Samol mi Lapalap a fen pwäri ngeni Samuel,
1SA 9:16 “Lesor lon ei chök otun üpwe tinala reöm eman mwän seni ewe fanü Peniamin, ätewe kopwe epiti pwe epwe samol won nei kewe aramasen Israel. Epwe amanaua nei aramas seni ekewe chon Filistia. Pun üa küna ar riaföü, nge ar siö a toriei.”
1SA 9:17 Nge lupwen Samuel a küna Saul, ewe Samol mi Lapalap a üreni, “Ina i ewe mwän üa kapas ngonuk usun. Iei i ätewe epwe nemenem won nei aramas.”
1SA 9:18 Mürin, Saul a kan ngeni Samuel lon asamalapen ewe telinimw o üreni, “Kose mochen aiti ngeniei ia imwen ewe soufos a nom ie.”
1SA 9:19 Nge Samuel a üreni Saul, “Ngang ewe soufos. Kopwe akomwotä mwei ren ewe lenien fel, pun ikenai kopwe etiei le mongö. Nge lesosorun lesor üpwe pwäri ngonuk mine a nom lon lelukom o afeilook.
1SA 9:20 Nge noum kewe aas mi mwälechela ülüngat rän a la kosap chüen ekieki usur, pun ra pwä. Ifa usun, än chon Israel mochen a weneiti iö? Sap ämi me chon leimwen semom meinisin?”
1SA 9:21 Iwe, Saul a aisini, “Ifa usun, sap ngang eman chon Peniamin seni ewe ainang mi chokükün me lein ekewe ainangen Israel? Ifa usun, ai famili sap eu famili mi tekison seni ekewe familien ainangen Peniamin? Pwota ka fos iei usun ngeniei?”
1SA 9:22 Mürin, Samuel a emwenala Saul me nöün we chon angang lon ewe lenien mwich o amoteer me mwen chokewe mi kö ina epwe ükükün ilik aramas.
1SA 9:23 Iwe, Samuel a üreni ewe chon kuk, “Kopwe uwato ewe kinikinin fituk üa ngonuk me mwan o ürenuk pwe kopwe aimwüela.”
1SA 9:24 Iei mine ewe chon kuk a angei pechen ewe mönün asor me mine a pach ngeni o iseni mwen Saul. Nge Samuel a üreni, “Nengeni, iei ewe kinikin a imwüla fän itom. Kopwe mongö, pun a imwüla fän itom tori ei fansoun mi kefilitä pwe kopwe eti ekewe chon kö le mongö.” Iei mine Saul a eti Samuel le mongö lon ewe ränin.
1SA 9:25 Iwe, lupwen ra feitiu seni ewe lenien fel o tolong lon ewe telinimw, eu peet a molotä won eu imw fän iten Saul, Iwe, a konola o annut.
1SA 9:26 Nge ünümweerän Samuel a kökkötä ren Saul won ewe imw, “Kopwe pwätä pwe üpwe tinukela won om al.” Iwe, Saul a pwätä, nge i me Samuel ra feila won ewe al.
1SA 9:27 Iwe, lupwen ra tori lesopolan ewe telinimw, Samuel a üreni Saul, “Kopwe üreni ewe chon angang pwe epwe akomwola mwach. Nge lupwen a feila, en kopwe üla ekis fansoun pwe üpwe asile ngonuk än Kot kapas.”
1SA 10:1 Mürin, Samuel a angei eu rumen lö o ninätiu won möküren Saul, a mitiri o üreni, “Ewe Samol mi Lapalap a epituk pwe kopwe samolun nöün aramasen Israel. Kopwe nemenem won nöün ewe Samol mi Lapalap aramas o angaseer seni chon oputeer mi nom ünükür. Nge ei epwe eu asisil ngonuk, pwe ewe Samol mi Lapalap a epituk pwe kopwe samolun nöün aramas:
1SA 10:2 Lupwen kopwe feil seniei ikenai, kopwe churi ruoman mwän ünükün peiasen Rahel me lon Selsa lon kinikinin ewe fanü Peniamin. Iwe, repwe ürenuk pwe ekewe aas ka feila o kütteer ra pwä. Iei semom a ükütiu le ekieki ekewe aas, nge a aürekikemi o apasa, ‘Met üpwe för ngeni nei we mwän?’
1SA 10:3 Mürin kopwe feila seni ikenan o tori ewe ook lon Tapor. Ikenan kopwe churi ülüman mwän mi feitä Petel pwe repwe asor ngeni Kot. Eman ina epwe nuki ülüman apanen kuuch, eman epwe uwei ülüfoch pilawa, nge eman epwe uwei eu rumen wain seni silin man.
1SA 10:4 Iwe, repwe kapong ngonuk o fang ngonuk ruofoch pilawa, nge kopwe angei seniir.
1SA 10:5 Mürin kopwe feila Kipiat-elohim ia a wor ie eu mwichen sounfiun Filistia. Lupwen kopwe tori ewe telinimw, kopwe churi eu mwichen soufos ra feitiu seni ewe lenien fel won ewe chuk, nge chon ettik kitar me pisekin kaktai, aangün me ükülele ra akom mwer. Iwe, ekewe soufos repwe osuni.
1SA 10:6 Mürin, Ngünün ewe Samol mi Lapalap epwe fokun feitiu womw. Iwe, kopwe etiir le osuni, nge manauom epwe siwil.
1SA 10:7 Lupwen ekei asisil repwe toruk, kopwe föri meinisin mine ka wisen föri, pun Kot epwe etuk.
1SA 10:8 Iwe, kopwe akomwetiu me mwei Kilkal. Ngang üpwe feila reöm pwe üpwe eäni asoren kek me asoren kinamwe. Kopwe witiwitiei lon ükükün fisu rän, tori üpwe feito reöm o ürenuk mine kopwe föri.”
1SA 10:9 Nge lupwen Saul a kul seni Samuel pwe epwe feila, Kot a fang ngeni eu leluk mi fö. Iwe, ekewe asisil meinisin ra fisitä lon ewe ränin.
1SA 10:10 Lupwen Saul me nöün we chon angang ra tori Kipea, a churi eu mwichen soufos. Lon ei otun Ngünün Kot a feitiu won Saul pwe a osuni me leir.
1SA 10:11 Iwe, lupwen ekewe aramas mi silei Saul me lom ra küna pwe a eti ekewe soufos le osuni, ra kapasfengen lefiler, “Met a fis ngeni nöün Kis ei mwän? Ifa usun, Saul a pwal eman lein ekewe soufos?”
1SA 10:12 Nge eman mwän me lon ewe leni a apasa, “Ifa iten semer?” Iei mine a fis ei mwiitun, “Ifa usun, Saul a pwal eman lein ekewe soufos?”
1SA 10:13 Nge lupwen Saul a wes me osuni, a feila ngeni ewe lenien fel won ewe chuk.
1SA 10:14 Iwe, pwin semen Saul a churi Saul me nöün we chon angang o aisiniir, “Ia oua feila ie? Saul a üreni, “Aia kütta ekewe aas. Nge lupwen aisap küneer, aia feila ren Samuel.”
1SA 10:15 Mürin, pwin semen Saul a üreni, “Kose mochen pwäri ngeniei mine Samuel a ürenikemi.”
1SA 10:16 Nge Saul a üreni pwin seman, “A afata ngenikem pwe ekewe aas ra pwä.” Nge esap pwäri ngeni pwin saman we mine Samuel a kapas ngeni usun an epwe king.
1SA 10:17 Iwe, Samuel a amwichafengeni ekewe aramasen Israel fän mesen ewe Samol mi Lapalap me lon Mispa
1SA 10:18 o üreniir, “Iei alon ewe Samol mi Lapalap ewe Koten Israel, ‘Üa emwenikemiwu seni Isip o amanauakemi seni ekewe chon Isip, pwal seni chon ekewe mwü mi ariaföüükemi.’
1SA 10:19 Nge ikenai oua pöütala ämi we Kot mi amanauakemi seni ämi feiengau me riaföü meinisin. Ämi oua apasa, ‘Kopwe seikätä eman nöüm king.’ Iei mine iei oupwe feito fän mesen ewe Samol mi Lapalap lon en me an ainang, pwal lon en me an eterekes.”
1SA 10:20 Mürin, Samuel a emwenato ekewe ainangen Israel meinisin pwe epwe fis üttüt wor. Iwe, ewe ainangen Peniamin a är.
1SA 10:21 Mürin a emwenato ewe ainangen Peniamin lon en me an famili. Iwe, ewe familien Matri a är. Lesopolan a emwenato eman me eman mwän seni ewe familien Matri. Iwe, Saul nöün Kis we mwän a är. Nge lupwen ra kütta Saul, resap tongeni küna.
1SA 10:22 Iei mine ra aissefäl ngeni ewe Samol mi Lapalap, “Ifa usun, ewe mwän a feito ikei?” Nge ewe Samol mi Lapalap a pälüeni, “Ina i, a op lein ekana pisek.”
1SA 10:23 Mürin ra sä o nukieto seni ikenan. Nge lupwen a ü lein ekewe aramas, a langatam seniir meinisin seni afaran tori ulungen möküran.
1SA 10:24 Iwe, Samuel a üreni ekewe aramas meinisin, “Iei i ewe mwän ewe Samol mi Lapalap a filätä. Esap fokun wor eman mi wewe ngeni lein ekewe aramas meinisin.” Iwe, ekewe aramas meinisin ra kökkö fän leüömong, “Ewe king epwe manauatam.”
1SA 10:25 Mürin, Samuel a aiti ngeni ekewe aramas pwüngün wisen eman king me an angang. Iwe, a makerelong lon eu puk o iseis lon eu leni mi pin. Mürin Samuel a tinsefälirela eman me eman ngeni lenian.
1SA 10:26 Iwe, pwal Saul a liwiniti lenian lon Kipea, nge mwän mi pöchökül o pwora ra eti, pun Kot a angang lon leluker.
1SA 10:27 Nge mi wor ekoch mwän mi aramasangau ra üra, “Ren met ei mwän a tongeni amanauakich?” Iwe, ra aücheangaua, nge resap uwato ar lifang ren. Nge Saul a chök asorongorongola.
1SA 11:1 Mürin eu fansoun Nahas ewe kingen Amon fiti nöün sounfiu ra feitä o pwelifeili Japes-kiliat, pwe repwe maun ngeni. Iwe, ekewe re Japes meinisin ra üreni Nahas, “Kopwe mwüt ngenikem pwe sipwe föri eu pwonen atipeeufengen, nge en kopwe nemenikem.”
1SA 11:2 Nge Nahas a üreniir, “Üpwe föri ewe pwonen atipeeu ngenikemi won eu chök lapalap, pwe üpwe olusawu pelifichin föün mesemi, pwe üpwe awarato itengau won chon Israel meinisin.”
1SA 11:3 Iwe, ekewe souakomwen Japes ra üreni, “Kopwe mwüt ngenikem ükükün fisu rän pwe aipwe tinala chon künö lemenen fanüen chon Israel meinisin. Nge are esap wor eman epwe alisikem, mürin aipwe fangatä ngonuk.”
1SA 11:4 Lupwen ekewe chon künö ra tori Kipea än Saul telinimw, ra apworausa ei pworaus ngeni ekewe aramas. Mürin, ekewe aramas meinisin ra kechü fän leüömong.
1SA 11:5 Lon ewe otun Saul a liwinto seni lemäl o tapweto mürin nöün kewe ätemwänin kow. Iwe, a ais, “Met a fis ngeni ekewe aramas? Pwota ra kechü?” Mürin ra apworausa ngeni pworausen ekewe re Japes.
1SA 11:6 Nge lupwen Saul a rongorong ekei kapas, Ngünün Kot a fokun feitiu won. Iwe, a fokun song.
1SA 11:7 Mürin a angei ruoman ätemwänin kow, a pökükisiretiu o tinifetaleer ngeni chon künö lemenen unusen ewe fanü Israel, pwe repwe asilefeili, “Iö esap tapwela mürin Saul me Samuel le feila maun, iei usun mine epwe fis ngeni nöün ätemwänin kow.” Mürin, eu niuokus me ren ewe Samol mi Lapalap a tori ekewe aramas, pwe ra feito fän tipeeu pwe repwe maun.
1SA 11:8 Iwe, lupwen Saul a achufengeniir o aleaniir me lon Pesek, iteiten ekewe re Israel ülüpükü ngeröü, nge iteiten ekewe re Juta ilik ngeröü.
1SA 11:9 Mürin ra üreni ekewe chon künö mi feito seni Japes-kiliat, “Iei usun oupwe üreni aramasemi kewe: Lesor, lupwen akkar a tinekeniken, epwe fis ämi ngasala.” Iwe, lupwen ekewe chon künö ra liwin o üreni ekewe re Japes ekei kapas, ra pwapwa.
1SA 11:10 Iei mine ekewe re Japes ra üreni Nahas, “Lesor äm aipwe fangatä ngonuk pwe kopwe föri ngenikem ükükün mine ka mochen.”
1SA 11:11 Nge sorotän ewe rän Saul a ineti ekewe aramas lon ülüngat mwich. Iwe, lupwen a tori wilingäch, ra sälong lukalapen lenien ekewe sounfiun Amon o nirela tori fansoun akkar a tinekeniken. Nge chokewe mi chüen manau ra toropasfeil pwe esap wor ruoman ra nonomfengen.
1SA 11:12 Mürin, ekewe aramas ra üreni Samuel, “Iö a apasa pwe Saul esap nemenikich? Oupwe emwenato ekewe mwän pwe sipwe nirela.”
1SA 11:13 Nge Saul a üra, “Esap fokun wor eman mwän epwe ninnila ikenai, pun ewe Samol mi Lapalap a angasa chon Israel ikenai.”
1SA 11:14 Mürin, Samuel a üreni ekewe aramas, “Ousipwe feila Kilkal o anükücharasefäli mwüüch we me ikenan.”
1SA 11:15 Iei mine ekewe aramas meinisin ra feila Kilkal. Ikenan ra seikätä Saul me fän mesen ewe Samol mi Lapalap, pwe epwe king. Ra pwal eäni asoren kinamwe ngeni ewe Samol mi Lapalap ikenan. Nge Saul me ekewe chon Israel meinisin ra fokun pwapwa.
1SA 12:1 Iwe, Samuel a kapas ngeni chon Israel meinisin, “Nengeni, üa aüselinga alomi lon meinisin mine oua üreniei o seikätä eman nöümi king.
1SA 12:2 Iei a wor ämi we king epwe emwenikemi. Ngang üa chinlap, a pwal pwech mökürei, nge nei kewe mwän ra nom remi. Üa emwenikemi seni lealüali tori ikenai.
1SA 12:3 Ngang üa nom iei. Oupwe pwärätä ngauei fän mesen ewe Samol mi Lapalap, pwal fän mesen nöün we mi kepit. Iö üa angei nöün ätemwänin kow ika nöün aas? Iö üa atupu ika ariaföüü. Seni iö üa angei och lifangen amichimich pwe üpwe achuna mesei ren? Oupwe pwärätä ngauei, nge ngang üpwe aliwini ngenikemi mine üa angei.”
1SA 12:4 Iwe, ekewe aramas ra üreni Samuel, “Kosap atupukem ika ariaföüükem, kosap pwal angei och seni eman aramas.”
1SA 12:5 Nge Samuel a üreniir, “Ewe Samol mi Lapalap a küna, pwal nöün we mi kepit a küna ikenai pwe ousap oori ngeniei och.” Iwe, ra üreni, “Ewer, Kot a küna.”
1SA 12:6 Iwe, Samuel a üreni ekewe aramas, “Ewe Samol mi Lapalap i ewe mi filätä Moses me Aaron o emwenawu ämi kewe lewo seni ewe fanü Isip.
1SA 12:7 Iei oupwe ütä lon en me lenian, nge ngang üpwe aturukemi fän mesen ewe Samol mi Lapalap ren an kewe föför meinisin a föri ngenikemi, lupwen a amanauakemi me ämi kewe lewo.
1SA 12:8 Lupwen Jakop me an famili ra feila Isip, nge chon Isip ra ariaföüür, ämi kewe lewo ra siö ngeni ewe Samol mi Lapalap. Iwe, ewe Samol mi Lapalap a tinato Moses me Aaron pwe repwe emwenawu ämi kewe lewo seni Isip o afanüa ngeniir ei fanü.
1SA 12:9 Nge ra manlükala ewe Samol mi Lapalap ar we Kot. Iei mine a mwüt ngeni Sisera ewe samolun mwichen sounfiu seni Hasor, pwal ekewe chon Filistia me ewe kingen Moap pwe repwe maun ngeni ämi kewe lewo o akufuur.
1SA 12:10 Mürin ra siö ngeni ewe Samol mi Lapalap o apasa, ‘Äm aia tipis, pun aia likitukela en äm Samol mi Lapalap o angang ngeni ekewe uluulun Paal me Astarot. Nge iei kopwe angasakem seni chon oputakem. Iwe, äm aipwe angang ngonuk.’
1SA 12:11 Mürin, ewe Samol mi Lapalap a tinato Kition me Parak, Jefta me ngang. Aia angasakemi seni chon oputakemi mi nom ünükümi, pwe oua nom fän kinamwe.
1SA 12:12 Nge lupwen oua küna, pwe Nahas ewe kingen chon Amon a feito pwe epwe maun ngenikemi, oua pöütala ewe Samol mi Lapalap ämi we Kot i fen ämi king o üreniei, ‘Äm aia mochen eman king epwe nemenikem.’
1SA 12:13 Iei i ewe king oua tüngor, oua pwal filätä. Nengeni, ewe Samol mi Lapalap a seikätä eman nöümi king.
1SA 12:14 Are oua meniniti ewe Samol mi Lapalap o angang ngeni, are oua pwal aüselinga alon, nge ousap ü ngeni an kewe allük, are ämi me nöümi king mi nemenikemi oupwe tapwela mürin ewe Samol mi Lapalap ämi we Kot, oupwe feiöch.
1SA 12:15 Nge are ousap aüselinga alon ewe Samol mi Lapalap, nge oua ü ngeni an allük, mürin ewe Samol mi Lapalap epwe ü ngenikemi me ämi king.
1SA 12:16 Iei mine oupwe ütä o nengeni ei manaman mi lapalap ewe Samol mi Lapalap epwe le föri me mwemi.
1SA 12:17 Ifa usun, sap iei fansoun esap püng üt? Nge iei ngang üpwe tüngor ngeni ewe Samol mi Lapalap pwe epwe tinato chopulap me üt. Mürin ämi oupwe silei o küna pwe iei eu föför mi fokun ngau oua föri me fän mesen ewe Samol mi Lapalap, pun oua tüngor eman king fän itemi.”
1SA 12:18 Iei mine Samuel a tüngor ngeni ewe Samol mi Lapalap, nge i a tinato chopulap me üt lon ewe ränin. Iwe, ekewe aramas meinisin ra fokun niuokusiti ewe Samol mi Lapalap me Samuel.
1SA 12:19 Mürin, ekewe aramas meinisin ra üreni Samuel, “Kopwe iotek ngeni ewe Samol mi Lapalap om we Kot fän iten noum kei chon angang pwe aisap mäla. Pun aia apacha ngeni äm kewe tipis meinisin ei föför mi ngau, pwe äm aia tüngor eman king fän item.”
1SA 12:20 Iwe, Samuel a üreni ekewe aramas, “Ousap niuokus. Ewer, oua föri ei föför mi ngau, nge ousap chök kul seni ewe Samol mi Lapalap, nge oupwe angang ngeni ren unusen lelukemi.
1SA 12:21 Ousap angang ngeni ekewe anümwäl mi lomotongau, resap tongeni afeiöchükemi ika amanauakemi, pun ra lomotongau.
1SA 12:22 Ewe Samol mi Lapalap esap pöütikemiila pokiten itan mi tekia, pun a efich pwe ämi oupwe nöün aramas.
1SA 12:23 Nge ngang won inisi, esap fokun tufich ngeniei pwe üpwe tipis ngeni ewe Samol mi Lapalap ren ai üpwe ükütiu le iotek fän itemi. Ngang üpwe aiti ngenikemi mine a öch o pwüng.
1SA 12:24 Nge eu chök, oupwe meniniti ewe Samol mi Lapalap o angang ngeni ren unusen lelukemi fän allükülük. Pun oupwe ekieki usun ekewe mettoch mi amwarar Kot a föri fän itemi.
1SA 12:25 Nge are ämi oua chök sopwela le föri föför mi ngau, oupwe feiengau, ämi me nöümi we king.”
1SA 13:1 Iwe, Saul a ierini faik , lupwen a tolong lon wisan wisen king. Nge lupwen a nemenem lon Israel lon ükükün ruu ier,
1SA 13:2 Saul a filätä ülüngeröü mwän seni Israel. Iwe, rüengeröü ra nom ren Saul lon Mikmas pwal lon chukuchukutän ewe fanü Petel, nge engeröü ra nom ren Jonatan lon Kipea lon ewe fanü Peniamin. Nge ekewe lusun aramas a tinirela lon en me lenian.
1SA 13:3 Iwe, Jonatan a niela ewe mwichen sounfiun Filistia mi nom lon Kepa. Nge ekewe chon Filistia ra rong usun. Mürin Saul a tinala chon künö lemenen unusen ewe fanü, pwe repwe ettiki rappwa o asilefeili pwe ekewe chon Ipru repwe feito ngeni maun.
1SA 13:4 Iwe, chon Israel meinisin ra rong pwe Saul a niela eu mwichen sounfiun Filistia, ra pwal rong pwe chon Filistia ra oputeer. Iei mine ekewe aramas ra kökköto pwe repwe eti Saul le maun lon Kilkal.
1SA 13:5 Iwe, ekewe chon Filistia ra amwichafengeniir pwe repwe maun ngeni chon Israel ükükür ilik ngeröü woken me wonongeröü chon wawa oris, nge ükükün ekewe sounfiu usun föün pien aroset ren chomongur. Ra feitä Mikmas ötiuen Pet-awen o nonom ikenan.
1SA 13:6 Nge lupwen ekewe sounfiun Israel ra küna pwe ra oleelim, pun ra fokun nom lechach, ra op lon föimw, lon pwang, fän achau, lon ekewe nas pwal lon ekewe chönüttu.
1SA 13:7 Ekoch me leir ra feila won ekewe petepeeten ewe chanpupu Jortan tori ewe fanü Kat me ewe fanü Kiliat. Iwe, Saul a chüen nom lon Kilkal, nge ekewe aramas meinisin mi nom ren ra chechech fän ar niuokus.
1SA 13:8 Saul a witiwiti Samuel lon ükükün fisu rän, ewe fansoun mi fil me ren Samuel. Nge Samuel esap feito Kilkal. Iei mine ekewe aramas ra toropasfeil seni Saul.
1SA 13:9 Mürin, Saul a apasa, “Oupwe uwato rei ewe asoren kek, pwal ewe asoren kinamwe.” Iwe, Saul a eäni ewe asoren kek.
1SA 13:10 Nge lon ewe otun a wes me eäni ewe asoren kek, Samuel a war. Iwe, Saul a feila pwe epwe churi o kapong ngeni.
1SA 13:11 Samuel a ais, “Met ka föri?” Saul a pälüeni, “Lupwen üa küna pwe ekewe aramas ra toropasfeil seniei, en kosap pwal war lon ewe fansoun ka pwonei, nge ekewe chon Filistia ra pwal mwichefengen lon Mikmas,
1SA 13:12 üa ekieki, ‘Iei ekewe chon Filistia repwe le feito o maun ngeniei me lon Kilkal, nge üsamwo tüngor ngeni ewe Samol mi Lapalap pwe epwe ümöümöch ngeniei.’ Iei mine üa ököpöchöü o eäni ewe asoren kek.”
1SA 13:13 Iwe, Samuel a üreni Saul, “Ka föri mine a umwes. Kosap aleasochisi än ewe Samol mi Lapalap om we Kot allük a allük ngonuk. Pun ika ka aleasochis, ewe Samol mi Lapalap epwe apöchöküla mwum lon Israel tori feilfeilachök.
1SA 13:14 Nge iei mwum esap chüen soposopola. Ewe Samol mi Lapalap a kütta eman mwän mi lelukeni lelukan o seikätä pwe epwe samol won nöün aramas, pun kosap aleasochis ngeni mine a allük ngonuk.”
1SA 13:15 Mürin, Samuel a feila seni Kilkal o feila Kipea lon ewe fanü Peniamin. Nge Saul a aleani iteiten ekewe aramas mi nom ren ina epwe ükükün wonopükü mwän.
1SA 13:16 Iwe, Saul me Jonatan nöün we mwän, pwal ekewe aramas mi nom rer ra nom Kepa lon ewe fanü Peniamin. Nge ekewe chon Filistia ra nom lon Mikmas.
1SA 13:17 Iwe, ekewe sounfiun Filistia mi kütta liaper ra towu seni lenier lon ülüngat mwich. Eu mwich a feila ngeni Ofra lon ewe fanü Sual,
1SA 13:18 eu mwich a feila ngeni Pet-horon, nge pwal eu mwich a feila ngeni ewe kiä mi sapetiu ngeni ewe lemolun Sepoim akawenewenen ewe fanüapö.
1SA 13:19 Lon ena fansoun esap wor eman chon angang ngeni mächä a nom lemenen unusen ewe fanü Israel, pun ekewe chon Filistia resap fokun mwüt ngeni ekewe chon Ipru pwe repwe föri ketilas me siles.
1SA 13:20 Nge eman me eman ekewe chon Israel a feitiu ren ekewe chon Filistia pwe epwe seimi an pisekin tuw pwül, an küwa, nöün kouk ika nöün kama.
1SA 13:21 Nge liwinin än eman seimi eu pisekin tuw pwül me efoch küwa ruoföü föün moni silifer, nge liwinin än eman seimi efoch kouk me efoch wichiwichin kow eföü kükün föün moni silifer.
1SA 13:22 Iei mine lon ewe ränin, lupwen ewe maun a poputä, esap wor efoch ketilas ika siles lepöün ekewe sounfiu meinisin mi eti Saul me Jonatan, chilon chök Saul me Jonatan nöün we mwän.
1SA 13:23 Iwe, eu mwichen sounfiun Filistia a feila pwe epwe somwei ewe al mi chökis ngeni Mikmas.
1SA 14:1 Lon eu rän Jonatan a üreni ewe alüal mi uwei an pisekin maun, “Etto, sipwe feila ren ewe mwichen sounfiun Filistia mi nom pekila.” Nge Jonatan esap üreni saman usun.
1SA 14:2 Saul a nom leamwüchülan ewe telinimw Kipea fän efoch apel lon Mikron. Nge ekewe sounfiu mi eti ina epwe ükükün wonopükü mwän.
1SA 14:3 Pwal Ahia nöün Ahitup we a nom ren, a üföüf echö üf itan efot. Ahia pwin Ikapot nöün Pineas we, nge Pineas nöün Eli, nöün ewe Samol mi Lapalap we souasor lon Silo. Iwe, ekewe aramas resap silei pwe Jonatan a la.
1SA 14:4 Nge lon ewe al mi chökis, ewe ia Jonatan a ekiekin feila ie ren ewe mwichen sounfiun Filistia, a wor ruu achau mi uluulukenitä me lepekin ewe al me ruepek. Iwe, iten ewe eu Poses, nge iten pwal ewe eu Sene.
1SA 14:5 Iwe, ewe eu achau mi uluulukenitä a nom efeng sap ngeni Mikmas, nge pwal ewe eu a nom ör sap ngeni Kepa.
1SA 14:6 Iwe, Jonatan a üreni ewe alüal mi uwei an pisekin maun, “Etto, sipwe feila pekila ren ewe mwichen sounfiu resap sirkomsais. Eli ewe Samol mi Lapalap epwe alisikich. Pun esap wor och a tongeni pinei än ewe Samol mi Lapalap alilis ren chomong ika chokükün.”
1SA 14:7 Iwe, nöün chon uwei pisekin maun a üreni, “Kopwe föri meinisin mine ka ekiekin föri. Ngang üpwe etuk, mine ka ekieki, pwal ina ai ekiek.”
1SA 14:8 Mürin, Jonatan a üreni, “Ina, sipwe feila pekila ren ekewe mwän o pwärikichela ngeniir.
1SA 14:9 Are repwe ürenikich pwe sipwe witiwit tori repwe feito rech, mürin sipwe chök üla lon leniach, nge sisap feitä rer.
1SA 14:10 Nge are repwe üra pwe sipwe feitä rer, mürin sipwe feitä, pun ewe Samol mi Lapalap a awinnakich pwe sipwe akufuur. Ei epwe eu asisil ngenikich.”
1SA 14:11 Iei mine ir me ruoman ra pwärirela ngeni ekewe sounfiun Filistia. Nge ekewe sounfiun Filistia ra apasa, “Nengeni, ekewe re Ipru ra towu seni ekewe pwang ia ra op ie.”
1SA 14:12 Mürin ra kökköla ren Jonatan me nöün we chon uwei pisekin maun o apasa, “Oupwe feito rem, äm aipwe apii ngenikemi och.” Nge Jonatan a üreni nöün we chon uwei pisekin maun, “Kopwe tapweto müri. Ewe Samol mi Lapalap a awinna chon Israel pwe repwe akufuur.”
1SA 14:13 Mürin, Jonatan a tötä won ewe chuk, nge nöün we chon uwei pisekin maun a tapwetä mürin. Iwe, Jonatan a akufu ekewe sounfiun Filistia, nge nöün chon uwei pisekin maun a nirela me mürin.
1SA 14:14 Lon ewe aeuin ninni Jonatan me nöün we chon uwei pisekin maun ra niela ina epwe ükükün rüe mwän me won eu leni ükükün esopun lainen eu eikerin fanü.
1SA 14:15 Mürin eu niuokus watte a tori ewe mwichen sounfiu, pwal tori ekewe aramas mi nom lemäl. Ewe mwichen sounfiu pwal ekewe aramas mi kütta liaper ra chechech fän ar niuokus. Iwe, ewe fanü a pwal chechech. Kot a tinato niuokus watte.
1SA 14:16 Iwe, nöün Saul chon mas mi nom Kipea lon ewe fanü Peniamin ra küna pwe chomong aramasen Filistia ra säfetal fän ar osukchöü.
1SA 14:17 Mürin, Saul a üreni ekewe aramas mi nom ren, “Oupwe aleani iteitemi o pii iö a towu senikich.” Iwe, lupwen ra aleani iteiter, a pwä pwe Jonatan me nöün chon uwou pisekin maun resap nom.
1SA 14:18 Iwe, Saul a üreni Ahia, “Kopwe uwato än Kot we pworofel ikei.” Pun lon ewe fansoun än Kot we pworofel a nom ren ekewe aramasen Israel.
1SA 14:19 Nge lupwen Saul a chüen kapas ngeni ewe souasor, ewe akürang lon ewe lenien sounfiun Filistia a lapala. Iwe, Saul a üreni ewe souasor, “Ina chök, esap wor fansoun ach sipwe angei öüröürach me ren Kot.”
1SA 14:20 Mürin, Saul me nöün kewe sounfiu meinisin ra chufengen o feila maun. Iwe, ra küna pwe iteiten eman me eman re Filistia a niela püsin chienan ren ketilas, nge ar fitikoko a fokun watte.
1SA 14:21 Ekoch re Ipru mi nom ren ekewe re Filistia me mwan o etiretä lon ewe lenien sounfiu ra kul o eti ekewe re Israel mi nom ren Saul me Jonatan.
1SA 14:22 Nge lupwen ekewe re Israel meinisin mi op won chukuchukutän ewe fanü Efraim ra rong pwe ekewe chon Filistia ra sü, pwal ir ra feito o choni chiener kewe le maun. Iwe, ewe maun a chöüla pekilan Pet-awen.
1SA 14:23 Iei usun ewe Samol mi Lapalap a angasa chon Israel lon ewe ränin.
1SA 14:24 Iwe, ekewe re Israel ra weires lon ewe ränin, pun Saul a eäni eu pwon fän akapel ngeni ekewe aramas o apasa, “Epwe anümamau ewe mwän mi mongö och me mwen lekuniol tori üpwe ngeni ekewe chon oputaei chappen ar föför.” Iei mine ekewe sounfiu resap neni och mongö.
1SA 14:25 Iwe, ekewe sounfiu meinisin ra tolong lon eu wöllap, nge a wor chönün chunen won ewe pwül.
1SA 14:26 Lupwen ra tolong lon ewe wöllap, ra küna pwe ewe chönün chunen a sup, nge esap wor eman a uwalong ekis lon awan, pun ra niuokusiti ewe pwon fän akapel.
1SA 14:27 Nge Jonatan esap rong mine saman we a allük fän akapel ngeni ekewe aramas. Iei mine a aitiela wokun mi nom lepöün, a chüralong ülülan lon ewe fasen chunen o ünümi chönün. Iwe, a mefi pöchökül ren.
1SA 14:28 Mürin, eman lein ekewe sounfiu a üreni, “Semom a fokun allük fän akapel ngenikem pwe eman mi mongö och ikenai epwe anümamau. Ina popun äm aia aiengauen echik.”
1SA 14:29 Mürin, Jonatan a üra, “Semei a aweiresi chon ei fanü. Nengeni, üa mefi pöchökül, pun üa neni ekis seni ei chönün chunen.
1SA 14:30 Epwe fen mürina, are ekewe aramas repwe mongö seni liaper mine ra angei seni chon oputer ikenai. Mürin epwe wor chomong chon Filistia mi ninnila.”
1SA 14:31 Lon ewe ränin ekewe re Israel ra akufu ekewe re Filistia seni Mikmas tori Aialon. Nge ekewe aramas ra fokun aiengauen echik.
1SA 14:32 Iei mine ra ürüng won liaper, ra angei sip me ätemwänin kow me nienifön kow o nirela lepwül. Mürin ra ochei ewe fituk fiti chan.
1SA 14:33 Iwe, mürin ra apworausa ngeni Saul, “Nengeni, ekewe aramas ra tipis ngeni ewe Samol mi Lapalap ren ar ochei fituk fiti cha.” Nge Saul a üra, “Ämi oua kirikiringau. Oupwe pünüoto rei eföü fau mi watte.”
1SA 14:34 Saul a pwal üra, “Oupwe fetalfeil lein ekewe aramas o üreniir, ‘Iteiten eman me eman mwän epwe uwato nöün ätemwänin kow ika nöün sip, epwe niela ikei o ochei. Ousap tipis ngeni ewe Samol mi Lapalap ren ämi ochei fituk fiti cha.’” Iei mine eman me eman lein ekewe aramas a uwato nöün ätemwänin kow lon ewe pwinin o niela ikenan.
1SA 14:35 Iwe, Saul a senätä eu rongen asor ngeni ewe Samol mi Lapalap. Iei aeuin rongen asor a senätä.
1SA 14:36 Mürin, Saul a apasa, “Ousipwe feitiu o tapweri ekewe chon Filistia lepwinei, sipwe liapeni seniir pisekir tori epwe ränila, nge sisap amanaua eman leir.” Iwe, ekewe aramas ra üra, “Kopwe föri mine a mürina me reöm.” Nge ewe souasor a apasa, “Ousipwe akom le mwir me won Kot.”
1SA 14:37 Iei mine Saul a aisini Kot, “Ifa usun, üpwe feitiu o maun ngeni ekewe chon Filistia? Ifa usun, kopwe awinna chon Israel?” Nge Kot esap pälüeni lon ewe ränin.
1SA 14:38 Mürin, Saul a üreni souemwenin ekewe aramas, “Oupwe etto ikei, ousipwe kütta iö a tipis ikenai.
1SA 14:39 Pun mwo manauen ewe Samol mi Lapalap mi amanaua Israel, are ewe mi tipis epwe fen Jonatan nei we mwän, epwe fokun mäla.” Nge esap wor eman lein ekewe mwän a pälüeni och.
1SA 14:40 Mürin, Saul a üreni ekewe chon Israel meinisin, “Ämi oupwe nom won epek, nge äm me Jonatan nei we mwän aipwe nom won epek.” Iwe, ekewe aramas ra üreni Saul, “Kopwe föri mine a mürina me reöm.”
1SA 14:41 Iei mine Saul a iotek ngeni ewe Samol mi Lapalap ewe Koten Israel, “Ai Samol mi Lapalap, pwota kosap pälüeniei ngang noum chon angang ikenai? Are ei tipis a nom woi ika won Jonatan nei we mwän, kopwe asisila ren ewe Urim. Nge are ei tipis a nom won noum aramasen Israel, kopwe asisila ren ewe Tumim.” Iwe, Jonatan me Saul ra sil, nge ekewe aramas ra ngasala.
1SA 14:42 Mürin, Saul a üra, “Oupwe asisila lefilem me Jonatan nei we mwän.” Nge Jonatan a sil.
1SA 14:43 Mürin, Saul a üreni Jonatan, “Kopwe üreniei mine ka föri.” Iwe, Jonatan a üreni, “Üa neni ekis chönün chunen won ülülen ewe wok mi nom lepei. Ngang iei, üa molotä ngeni ai üpwe mäla.”
1SA 14:44 Nge Saul a apasa, “Kot epwe nieila, are en Jonatan kosap fokun ninnila.”
1SA 14:45 Mürin, ekewe aramas ra üreni Saul, “Ifa usun, Jonatan epwe mäla, ätewe mi awinna Israel ngeni eu win mi lapalap? Ese fokun tufich. Mwo manauen ewe Samol mi Lapalap, esap fokun morotiu emet meten möküran lepwül. Pun mine a föri ikenai, a föri ren än Kot alisi ngeni.” Iei usun ekewe aramas ra angasa Jonatan pwe esap mäla.
1SA 14:46 Mürin, Saul a ükütiu le maun ngeni ekewe chon Filistia. Nge ekewe chon Filistia ra liwiniti püsin lenier.
1SA 14:47 Iwe, mürin än Saul tolong lon wisan wisen king lon Israel, a maun ngeni chon oputan meinisin mi nom ünükün. A maun ngeni chon Moap, chon Amon me chon Etom, ngeni ekewe kingen Sopa pwal ngeni ekewe chon Filistia. Ekis meinisin ia a maun ie a win.
1SA 14:48 A fiu fän pwora o akufu chon Amalek. A angasa chon Israel seni ekewe sounfiu mi angei pisekir fän pöchökül.
1SA 14:49 Iwe, ikkei iten nöün Saul kewe mwän: Jonatan, Iswi me Malkisua. Nge nöün kewe ruoman fefin, iten ewe finichi Merap, nge iten ewe setiputur Mikal.
1SA 14:50 Iwe, iten pwülüen Saul Ahinoam nöün Ahimas we fefin. Nge ewe mi nemeni nöün mwichen sounfiu itan Apner nöün Ner we mwän, nge Ner pwin semen Saul.
1SA 14:51 Iwe, Kis semen Saul, nge Ner semen Apner. Nge Kis me Ner nöün Apiel.
1SA 14:52 Lon unusen ränin manauen Saul i a chök maun ngeni ekewe chon Filistia fän pöchökül. Iei mine, lupwen Saul a küna eman mwän mi waasöch ika eman mi pwora, a angei ngeni o atolonga lon an mwichen sounfiu.
1SA 15:1 Iwe, Samuel a üreni Saul, “Ewe Samol mi Lapalap a tinieito, pwe üpwe epituk pwe kopwe king won nöün aramasen Israel. Iei mine kopwe aüselinga alon ewe Samol mi Lapalap.
1SA 15:2 Iei alon ewe Samol mi Unusen Manaman, ‘Üpwe apwüngü ekewe chon Amalek pokiten ar kewe lewo ra ü ngeni chon Israel, lupwen ra towu seni Isip.
1SA 15:3 Iei kopwe feila, kopwe maun ngeni chon Amalek o wesewesen ataela meinisin mine ar. Kosap achikeer, nge kopwe niela mwän me fefin, semirit me ekewe mi chüen oupw, pwal nöür ätemwänin kow me sip, nöür kamel me aas.’”
1SA 15:4 Iei mine Saul a amwichafengeni ekewe sounfiu o aleani iteiter me lon Telaim. Iwe, iteiter ükükün rüepükü ngeröü sounfiun Israel mi fetal me engol ngeröü re Juta.
1SA 15:5 Iwe, lupwen Saul me nöün mwichen sounfiu ra tori ewe telinimwen chon Amalek, ra op o witiwit lon ewe lemol.
1SA 15:6 Nge Saul a üreni ekewe chon Ken, “Oupwe feila o towu seni lein ekewe chon Amalek, pwe üsap arosakemiila fitiir. Pun oua kirikiröch ngeni ekewe aramasen Israel meinisin, lupwen ra towu seni Isip.” Iei mine ekewe chon Ken ra towu seni lein ekewe chon Amalek.
1SA 15:7 Iwe, Saul a maun ngeni ekewe chon Amalek o akufuur seni Hawila tori Sur mi nom ötiuen Isip.
1SA 15:8 Iwe, a liapeni Akak ewe kingen chon Amalek, nge a chüen manau, a pwal fokun arosala ekewe aramas meinisin ren ketilas.
1SA 15:9 Nge Saul me ekewe aramas ra achika Akak, resap pwal niela ekewe sip me ätemwänin kow mi fokun öch, ekewe man mi öümanau me ekewe nienifön sip me meinisin mine a mürina. Nge meinisin mine esap nien mürina pwal meinisin mine a lomotongau ra fokun arosala.
1SA 15:10 Mürin, ewe Samol mi Lapalap a üreni Samuel,
1SA 15:11 “Üa lamalamala ren ai seikätä Saul pwe epwe king, pun a kul seniei o aleasolap ngeni ai kewe allük.” Iwe, Samuel a riaföü o siö ngeni ewe Samol mi Lapalap lon unusen ewe pwin.
1SA 15:12 Nge lesosorusich Samuel a pwätä pwe epwe churi Saul lon ewe soran. Iwe, Samuel a rong pwe Saul a feila Karmel o aüetä eföü föün achem fän itan pokiten an win. Mürin a feila Kilkal.
1SA 15:13 Iwe, Samuel a feila ren Saul, nge Saul a üreni, “Kopwe feiöch me ren ewe Samol mi Lapalap. Üa aleasochis ngeni än ewe Samol mi Lapalap allük.”
1SA 15:14 Nge Samuel a ais, “Pwota chök üa rongorong tikin sip me wörüwörün ätemwänin kow?”
1SA 15:15 Saul a üra, “Ekewe sounfiu ra uweereto seni ekewe chon Amalek. Pun ra achika ekewe sip me ätemwänin kow mi fokun öch, pwe repwe eäniir asor ngeni ewe Samol mi Lapalap om we Kot. Nge ekewe lusun äm aia fokun aroserela.”
1SA 15:16 Mürin, Samuel a üreni Saul, “Kopwe ükütiu le kapas! Ngang üpwe ürenuk mine ewe Samol mi Lapalap a eäni kapas ngeniei lepwinewe.” Saul a üreni, “Kopwe kapas.”
1SA 15:17 Iwe, Samuel a üra, “Lupwen ka ekieki usum pwe ka tekison, Kot a seikukutä won ekewe ainangen Israel. Ewe Samol mi Lapalap a epituk pwe kopwe king lon Israel.
1SA 15:18 A tinukela pwe kopwe fokun arosala ekewe chon Amalek mi tipis. A urenuk pwe kopwe maun ngeniir tori ka nirela meinisin.
1SA 15:19 Pwota kosap aleasochisi alon ewe Samol mi Lapalap? Pwota ka ürüng won mine ka liapeni o föri mine a ngau me fän mesen ewe Samol mi Lapalap?”
1SA 15:20 Nge Saul a üreni Samuel, “Ngang üa aleasochisi alon ewe Samol mi Lapalap. Üa feila ia a akünöüeila ie. Üa fokun arosala ekewe chon Amalek o emwenato Akak ar we king.
1SA 15:21 Nge ekewe sounfiu ra angei sip me ätemwänin kow mi fokun mürina seni mine ra liapeni, ekei man repwe ninnila, pun ra pin fän iten Kot. Ra uweereto pwe repwe eäniir asor ngeni ewe Samol mi Lapalap om we Kot me lon Kilkal.”
1SA 15:22 Mürin, Samuel a apasa, “Ifa usun, ewe Samol mi Lapalap epwe efich asoren kek me sokun asor usun an efich aleasochisi alon? Nengeni, aleasochis a mürina seni asor, nge aüseling a mürina seni ach eäni asor iwien ätemwänin sip.
1SA 15:23 Pun lükümach a wewe ngeni tipisin pwee, nge ülöförea a wewe ngeni föföringau me angangen anümwäl. Pokiten ka pöütala alon ewe Samol mi Lapalap, i a pwal pöütukela pwe kosap chüen king.”
1SA 15:24 Mürin, Saul a üreni Samuel, “Üa tipis ren ai purätiu än ewe Samol mi Lapalap allük pwal om kapas, pun üa niuokusiti ekewe aramas o aleasochisi alor.
1SA 15:25 Iei mine üa tüngor ngonuk, kopwe amusala ai tipis o etiei le liwinla Kilkal pwe üpwe fel ngeni ewe Samol mi Lapalap.”
1SA 15:26 Nge Samuel a üreni Saul, “Ngang üsap etuk le liwinla. Pun ka pöütala alon ewe Samol mi Lapalap, nge i a pöütukela pwe kosap chüen king lon Israel.”
1SA 15:27 Mürin, Samuel a kul pwe epwe feila, nge Saul a amwöchü lepwülün üfan owokot pwe a kam.
1SA 15:28 Iwe, Samuel a üreni, “Ewe Samol mi Lapalap a kamwei senuk mwün Israel ikenai o ngeni eman chon arum mi mürina senuk.
1SA 15:29 Ewe mi Allükülük lon Israel esap chofana ika ekieksefäl, pun i esap eman aramas pwe epwe ekieksefäl.”
1SA 15:30 Mürin, Saul a apasa, “Üa tipis, nge kopwe chök pwäri om meninitiei iei me fän mesen ekewe souakomwen nei aramas me chon Israel meinisin. Kopwe etiei le liwinla pwe üpwe fel ngeni ewe Samol mi Lapalap om we Kot.”
1SA 15:31 Iei mine Samuel a eti Saul le liwinla Kilkal, nge Saul a fel ngeni ewe Samol mi Lapalap.
1SA 15:32 Mürin, Samuel a apasa, “Oupwe emwenato rei Akak ewe kingen chon Amalek.” Nge Akak a feito ren fän pwapwa, pun a ekieki, “Ellet, ewe weiresin mäla a wes.”
1SA 15:33 Nge Samuel a apasa, “Usun noum ketilas a niela nöün chomong inelap pwe esap chüen wor nöür, iei usun epwe pwal fis ngeni inom, pwe esap chüen wor nöün.” Iwe, Samuel a pökükisietiu Akak fän mesen ewe Samol mi Lapalap me lon Kilkal.
1SA 15:34 Mürin, Samuel a feila Rama. Nge Saul a feitä ngeni imwan mi nom lon Kipea, iei fanüan.
1SA 15:35 Samuel esap chüen künasefäli Saul tori ränin an mäla. Nge Samuel a letipeta usun Saul. Iwe, ewe Samol mi Lapalap a lamalamala ren an seikätä Saul pwe epwe king lon Israel.
1SA 16:1 Iwe, ewe Samol mi Lapalap a üreni Samuel, “Ifa ükükün fansoun om kopwe letipeta usun Saul, pun üa aturätiu seni wisan wisen king lon Israel? Kopwe alölöü om rume ngeni lö o feila Petleem ren eman mwän itan Jesi, pun üa filätä fän itei eman me lein nöün kewe mwän pwe epwe king.”
1SA 16:2 Nge Samuel a üreni, “Ifa usun ai üpwe tongeni feila? Are Saul a rong usun, epwe nieila.” Iwe, ewe Samol mi Lapalap a apasa, “Kopwe uwei eman nienifön kow o üreniir pwe ka feito pwe kopwe eäni eu asor ngeni ewe Samol mi Lapalap.
1SA 16:3 Kopwe köri Jesi pwe epwe eti ewe asor, nge ngang üpwe aiti ngonuk mine kopwe föri. Kopwe epiti fän itei ätewe üpwe aiti ngonuk.”
1SA 16:4 Iwe, Samuel a föri usun mine ewe Samol mi Lapalap a allük ngeni o feila Petleem. Nge ekewe souakomwen ewe telinimw ra feito fän chechech pwe repwe churi. Iwe, ra aisini, “Ka feito fän kinamwe?”
1SA 16:5 Nge Samuel a pälüeniir, “Ewer, üa feito fän kinamwe. Üa feito pwe üpwe eäni eu asor ngeni ewe Samol mi Lapalap. Oupwe apinikemi o etiei le asor.” Iwe, Samuel a apini Jesi me nöün kewe mwän o köriir pwe repwe eti ewe asor.
1SA 16:6 Iwe, lupwen ra feito, Samuel a nenengeni Eliap o ekieki, “Ellet, iei i ätewe ewe Samol mi Lapalap a epiti, iei a ütä me fän mesan.”
1SA 16:7 Nge ewe Samol mi Lapalap a üreni Samuel, “Kosap nengeni an lapalapöch ika an mwänetam, pun üa pöütala. Pun ngang üsap nenengeni usun aramas ra nenengeni. Aramas ra nenengeni lapalapen mesen eman, nge ngang üa nenengeni leluken aramas.”
1SA 16:8 Mürin, Jesi a köri Apinatap pwe epwe pwerela mwen Samuel. Nge Samuel a üra, “Ewe Samol mi Lapalap esap pwal filätä ätei.”
1SA 16:9 Mürin, Jesi a emwenato Sama mwen Samuel, nge Samuel a üra, “Ewe Samol mi Lapalap esap pwal filätä ätei.”
1SA 16:10 Iwe, Jesi a emwenato füman nöün kewe mwän mwen Samuel. Nge Samuel a üreni Jesi, “Ewe Samol mi Lapalap esap fokun filätä eman lein ätekei.”
1SA 16:11 Mürin, Samuel a aisini Jesi, “Ifa usun, ikkei ir chök noum kewe mwän meinisin?” Nge Jesi a pälüeni, “Mi chüen wor eman setiputur, nge a tümwünü ekewe sip.” Iwe, Samuel a üreni Jesi, “Kopwe tinala eman pwe epwe emwenato, pun kich sisap mot ngeni mongö tori epwe war.”
1SA 16:12 Iei mine Jesi a tinala eman pwe epwe emwenato. Iwe, Tafit a woparapar, a mesesaramaram o äteöch. Ewe Samol mi Lapalap a üreni Samuel, “Iei i ätewe üa filätä. Kopwe epiti.”
1SA 16:13 Iwe, Samuel a angei ewe rumen lö o epiti Tafit me fän mesen pwin kewe. Iwe, Ngünün ewe Samol mi Lapalap a fokun feitiu won Tafit seni lon ewe rän tori feilfeila. Mürin, Samuel a ütä o liwiniti Rama.
1SA 16:14 Iwe, Ngünün ewe Samol mi Lapalap a feil seni Saul, nge eman ngün mi afeiengau seni ewe Samol mi Lapalap a ariaföüü.
1SA 16:15 Iwe, nöün Saul kewe chon angang ra üreni, “Nengeni, eman ngün mi afeiengau seni Kot a ariaföüuk.
1SA 16:16 Äm samol, kopwe allük ngenikem pwe aipwe kütta eman mwän mi silelap le ettik kitar. Iwe, lupwen ewe ngün mi afeiengau seni Kot epwe feitiu womw, i epwe ettiki ewe kitar pwe kopwe chikarsefäl.”
1SA 16:17 Iei mine Saul a üreni nöün kewe chon angang, “Oupwe kütta fän itei eman mwän mi silelap le ettik kitar o emwenato rei.
1SA 16:18 Iwe, eman lein ekewe chon angang a üra, “Üa küna eman mwän nöün Jesi ewe re Petleem, a silelap le ettik. I eman mwän mi pwora, eman soumaun, a pwal silelap le fos o äteöch, nge ewe Samol mi Lapalap a eti.”
1SA 16:19 Mürin, Saul a tinala chon künö ren Jesi pwe repwe üreni, “Kopwe tinato rei Tafit noum we mwän mi nom ren ekewe sip.”
1SA 16:20 Iei mine Jesi a tinala Tafit ren Saul fiti eman nienifön kuuch, eman aas mi uwou pilawa me eu rumen wain.
1SA 16:21 Iwe, Tafit a feito ren Saul o tolong lon an angang ngeni. Nge Saul a fokun tongei Tafit, iei mine a filätä i pwe epwe uwei an pisekin maun.
1SA 16:22 Mürin, Saul a tinala pworaus ren Jesi o apasa, “Kopwe mwüt ngeni Tafit pwe epwe angang ngeniei, pun üa fokun echeni.”
1SA 16:23 Iwe, iteiten fansoun, lupwen ewe ngün mi afeiengau seni Kot a feitiu won Saul, Tafit a angei ewe kitar o ettiki. Mürin, Saul a kinamwela o chikarsefäl, nge ewe ngün mi afeiengau a sü seni.
1SA 17:1 Iwe, ekewe chon Filistia ra amwichafengeni ar mwichen sounfiu pwe repwe maun. Ra achufengeniir lon Soko, eu telinimwen Juta, o nonom lon Efes-tamim lefilen Soko me Aseka.
1SA 17:2 Nge Saul me ekewe re Israel ra pwal mwichefengen o nom lon ewe lemolun Ela. Ikenan ra atettel lon tettelir pwe repwe maun ngeni ekewe re Filistia.
1SA 17:3 Ekewe re Filistia ra nom won eu chuk me epek, nge ekewe re Israel ra nom won eu chuk me pwal epek, nge eu lemol a nom lefiler.
1SA 17:4 Iwe, a towu eman mwän mi pwora seni lenien sounfiun Filistia itan Koliat seni Kat, ükükün langataman tiu fiit.
1SA 17:5 A imweimw eu akau seni piras, a pwal üföüf echö sekit, choun ina epwe ükükün ipükü rüe me limu paun piras.
1SA 17:6 A wor chechen pechen seni piras, nge efoch kükün siles seni piras a nom won sökürün.
1SA 17:7 Amwüchün wokun siles a oumong usun chök öün efoch öüün waaseres, nge choun ewe mas mi nom mesen wokun siles ina epwe ükükün engol me limu paun mächä. Iwe, nöün chon uwei an tittin maun a akom mwan.
1SA 17:8 Koliat a ütä o puchörüla ren ekewe re Israel o apasa, “Pwota oua feito o atettelikemi pwe oupwe maun? Ifa usun, sap ngang eman re Filistia, nge ämi nöün Saul amanau? Oupwe filätä eman mwän fän itemi, epwe feito rei o fiu ngeniei.
1SA 17:9 Are a akufuei o nieila, äm aipwe nöümi amanau. Nge are ngang üa akufu o niela, ämi oupwe nöüm amanau.”
1SA 17:10 Mürin, ewe re Filistia a üra, “Üpwe apälüa ekewe re Israel ikenai, oupwe tinato rei eman mwän pwe aipwe fiu.”
1SA 17:11 Lupwen Saul me ekewe re Israel meinisin ra rongorong än ewe re Filistia kei kapas, ra rükö o fokun niuokus.
1SA 17:12 Iwe, Tafit nöün Jesi eman re Efrat seni Petleem lon Juta. Jesi a wor waluman nöün mwän. Lon fansoun mwün Saul, ewe mwän a fen chinlap o ieritam.
1SA 17:13 Iwe, nöün Jesi kewe ülüman mwän mi watte ra eti Saul le maun. Ewe mwänichi itan Eliap tapweto Apinatap, nge ewe aülümanün Sama.
1SA 17:14 Nge Tafit ewe setiputur. Iwe, lupwen ekewe ülüman mi watte ra eti Saul,
1SA 17:15 Tafit a akaliwin lefilen ewe leni ia Saul a nom ie me Petleem, pwe epwe tümwünü nöün saman sip.
1SA 17:16 Iwe, lon ükükün faik rän ewe re Filistia a pwäto, a ütä iteiten lesosor me lekuniol o witi iö epwe fiu ngeni.
1SA 17:17 Lon eu rän Jesi a üreni Tafit nöün we mwän, “Kopwe angei ilik paun föün wiich mi tün me ekei engol fochun pilawa fän iten pwiüm kewe o müttir uweerela ngeni ewe ia ra nom ie.
1SA 17:18 Kopwe pwal angei ekei engol chiis o uweerela ren ewe meilapen sounfiu. Kopwe pii usun pwiüm kewe o uwato och pisekin pwärätä seniir.”
1SA 17:19 Lon ei fansoun ewe king Saul me pwin Tafit kewe, pwal ekewe re Israel ra nom lon ewe lemolun Ela pwe repwe maun ngeni ekewe re Filistia.
1SA 17:20 Iwe, Tafit a pwätä lesosorusich o likitala ekewe sip ren eman chon tümwün, a angei ekewe mongö o feila, usun Jesi a allük ngeni. A tori ewe lenien sounfiu, lupwen ekewe sounfiun Israel ra towu lon ewe wirasen maun fän ar akarükaken maun.
1SA 17:21 Iwe, ekewe re Israel me ekewe re Filistia ra tötöfengen pwe repwe maun, eu mwichen sounfiu me pwal eu ra awesewesfengen.
1SA 17:22 Nge Tafit a likiti ekewe mongö ngeni ewe chon tümwünü pisek, a säla ren ewe mwichen sounfiu o kapong ngeni pwin kewe.
1SA 17:23 Lupwen a chüen kapas ngeniir, Koliat ewe mwän mi pwora eman re Filistia seni Kat a towu seni ewe mwichen sounfiun Filistia o üra ekewe kapas usun chök me mwan. Iwe, Tafit a rongorong an kewe kapas.
1SA 17:24 Nge lupwen ekewe re Israel ra küna ewe mwän, meinisin ra sü seni, pun ra fokun niuokus.
1SA 17:25 Iwe, ekewe re Israel ra kapasfengen lefiler, “Oua küna ei mwän mi feito? Ellet a feito pwe epwe apälüa Israel. Iö mi niela ätei, ewe king epwe lifang ngeni pisek mi chomong, epwe pwal apwüpwülüa ngeni nöün fefin o angasala chon leimwen saman seni takises me lon Israel.”
1SA 17:26 Tafit a aisini ekewe mwän mi nom ünükün, “Met epwe fis ngeni ewe mwän mi niela ei re Filistia o uwei seni Israel ewe itengau? Pun iö ei re Filistia esap sirkomsais, pwe epwe apälüa ewe mwichen sounfiu nöün ewe Kot mi manau?”
1SA 17:27 Iwe, ekewe aramas ra pälüeni lon ewe chök pälüen, “Iei usun epwe fis ngeni ewe mwän mi niela ätenan.”
1SA 17:28 Nge Eliap pwin Tafit watte a rong mine Tafit a eäni kapas ngeni ekewe mwän. Iwe, Eliap a fokun song ngeni Tafit o üreni, “Pwota ka feito ikei? Iö ka likiti ngeni ekewe ekoch sip lon ewe fanüapö? Üa silei om lamalamtekia me ekiekingauen lelukom. Pun ka chök feito pwe kopwe katol ewe maun.”
1SA 17:29 Iwe, Tafit a ais, “Meta üa föri iei? Üsap mwo nge ais och?”
1SA 17:30 Mürin, a kul seni pwin we o kul ngeni pwal eman. Iwe, a pwal fos ngeni lon ewe chök ititin, nge ekewe aramas ra pälüeni usun chök mesemwan.
1SA 17:31 Iwe, ekoch ekewe re Israel ra rongorong mine Tafit a apasa o apworausa ngeni Saul. Mürin, Saul a titi Tafit.
1SA 17:32 Tafit a üreni Saul, “Ai king, esap wor eman epwe niueiti ei re Filistia. Pun ngang noum ei chon angang üpwe feila o fiu ngeni.”
1SA 17:33 Nge Saul a üreni Tafit, “En kosap pwäk le feila fiu ngeni ewe re Filistia, pun en eman chök alüalät, nge i eman soumaun seni lealüalün.”
1SA 17:34 Tafit a üreni Saul, “Ngang noum ei chon angang üa wisen tümwünü sip fän iten semei. Iwe, lupwen a feito eman laion ika eman pear o turufi eman nienifön sip seni ewe pwiin sip,
1SA 17:35 üa tapweri, üa fiu ngeni o amanaua ewe man seni leawan. Nge lupwen ewe manmwacho a ü ngeniei, üa turufi ölüsan, üa fiu ngeni o niela.
1SA 17:36 Ngang noum ei chon angang üa fen kakawet laion me pear. Iwe, ei re Filistia esap sirkomsais epwe usun chök ekewe manmwacho, pun a apälüa ewe mwichen sounfiu nöün ewe Kot mi manau.
1SA 17:37 Ewe Samol mi Lapalap mi amanauaei seni ewe laion me ewe pear epwe pwal amanauaei seni ei re Filistia.” Saul a üreni Tafit, “Kole feila, ewe Samol mi Lapalap epwe etuk.”
1SA 17:38 Mürin, Saul a aüföüfa Tafit ngeni üfan üföüfen maun. A eimweimwa ngeni eu akau mi för seni piras o aüföüfa ngeni echö sekit mächä.
1SA 17:39 Iwe, Tafit a pwal rietä nöün Saul ketilas won üfan o sotuni le fetal, nge esap tongeni, pun esap örüniir. Mürin, Tafit a üreni Saul, “Üsap tongeni fetal fän ekei pisek.” Iei mine Tafit a pwilitätiu ekei üf.
1SA 17:40 Mürin a angei wokun, a fili limeföü fau mi motoutou seni ewe öüwö o isenirelong lon an pwotou. Iwe, a feila o kan ngeni ewe re Filistia fän nöün öülül.
1SA 17:41 Iwe, ewe re Filistia a pwal feito o kan ngeni Tafit, nge nöün chon uwei an tittin maun a akom mwan.
1SA 17:42 Nge lupwen a nenengeni Tafit, a küna pwe Tafit a chüen eman alüalät, a woparapar o äteöch.
1SA 17:43 Iwe, a turunufasei. A üreni Tafit, “Ifa usun, ngang eman kolak pwe ka feito rei fän wok?” Iwe, a otteki ngeni Tafit iten an kewe kot.
1SA 17:44 A üreni Tafit, “Kopwe feito rei, ngang üpwe aochocha ngeni ekewe machang me ekewe manmwacho fitukom.”
1SA 17:45 Mürin, Tafit a üreni ewe re Filistia, “En ka feito rei fän efoch ketilas, efoch fisika me efoch siles. Nge ngang üa feila reöm fän iten ewe Samol mi Unusen Manaman, ewe Kot än ewe mwichen sounfiun Israel en ka apälüa.
1SA 17:46 Ikenai ewe Samol mi Lapalap epwe atolongok lepei, nge ngang üpwe niikela o pöküela üom. Üpwe pwal ngeni ekewe machang me ekewe manmwacho somän ekewe sounfiun Filisita. Mürin, aramasen fanüfan meinisin repwe silei pwe mi wor eman Kot lon Israel.
1SA 17:47 Nge chokei meinisin mi nom ikei repwe silei pwe ewe Samol mi Lapalap a amanaua nöün aramas sap ren ketilas me siles. Pun ewe maun än ewe Samol mi Lapalap, nge i epwe atolongakemi meinisin fän nemeniem.”
1SA 17:48 Iwe, lupwen ewe re Filistia a kaneto pwe epwe fiu ngeni Tafit, Tafit a müttir sä ngeni ewe wirasen maun pwe epwe fiu ngeni.
1SA 17:49 Iwe, Tafit a rölong lon an we pwotou, a angei eföü fau o anomu lon an we öülül. Mürin a nouti ewe fau o küw won eten mesen Koliat. Iwe, ewe fau a kokolong lon eten mesan pwe a turula o chapala won pwül.
1SA 17:50 Iei usun Tafit a akufu o niela Koliat ren eu öülün me eföü fau, nge sap ren ketilas.
1SA 17:51 Mürin, Tafit a säla o ütä won Koliat. A üttawu nöün Koliat we ketilas me lon sittan o pöküela üan. Iwe, lupwen ekewe re Filistia ra küna pwe nöür soumaun a mäla, ra sü.
1SA 17:52 Nge ekewe re Israel me re Juta ra ütä fän arükak o tapweri ekewe re Filistia tori Kat pwal tori asamalapen ewe telinimw Ekron. Iwe, ekewe re Filistia mi kinas ra turula o mäla won ewe al ngeni Sa-araim, pwal ngeni Kat me Ekron.
1SA 17:53 Lupwen ekewe re Israel ra liwinto seni ar tapweri ekewe re Filistia, ra angei ekewe pisek mi nom lon ewe lenien sounfiun Filistia.
1SA 17:54 Nge Tafit a angei möküren Koliat o uwala Jerusalem, nge än Koliat kewe pisekin maun a uwala lon imwan.
1SA 17:55 Iwe, lupwen Saul a küna pwe Tafit a feila pwe epwe fiu ngeni ewe re Filistia, a aisini Apner ewe chon nemeni ewe mwichen sounfiu, “Apner, nöün iö ewe alüalät?” Nge Apner a pälüeni, “Mwo manauom ai king, üsap silei.”
1SA 17:56 Ewe king a apasa, “Kopwe aisfetal ika nöün iö ewe alüal.”
1SA 17:57 Lupwen Tafit a liwinto seni an niela Koliat, Apner a emwenala ren Saul, nge möküren Koliat a chüen nom lepöün.
1SA 17:58 Iwe, Saul a aisini, “En nöün iö?” Nge Tafit a pälüeni, “Ngang nöün noum chon angang Jesi ewe re Petleem.”
1SA 18:1 Iwe, lupwen Tafit a wes me kapas ngeni Saul, Jonatan nöün Saul we a pwipwi ngeni Tafit seni lon letipan o echeni usun an püsin echeni.
1SA 18:2 Lon ewe ränin Saul a angei Tafit pwe epwe nom ren, nge esap chüen mochen mwüt ngeni pwe epwe liwiniti imwen saman.
1SA 18:3 Mürin, Jonatan a eäni eu pwon ngeni Tafit pwe repwe pwipwifengen tori feilfeilachök, pun a echeni usun an echeni püsin manauan.
1SA 18:4 Jonatan a pwilitawu üfan a üföüf o ngeni Tafit, a pwal ngeni üfan üfen maun, pwal mwo nge nöün ketilas, nöün likapich me an pelit.
1SA 18:5 Iwe, a fisiöch än Tafit angang ekis meinisin ia Saul a tinala ie. Iei mine Saul a seikätä pwe epwe eman chon nemeni sounfiu. Ei akot ekewe aramas me nöün Saul kewe meilapen sounfiu ra fokun tipeeu ngeni.
1SA 18:6 Lupwen ekewe sounfiu ra liwiniti lenier mürin än Tafit niela Koliat, ekewe fefin ra towu seni ekewe telinimwen Israel meinisin pwe repwe churi ewe king Saul. Ra köl fän pwapwa o pworuk fän pisekin kaktai me pisekin ettik.
1SA 18:7 Iwe, lupwen ekewe fefin ra pworuk, ra eäni lon ar köl, “Saul a niela ngeröü, nge Tafit a niela lap seni engol ngeröü.”
1SA 18:8 Mürin, Saul a fokun song, pun a oput ekei kapas. Iwe, a apasa, “Ra ngeni Tafit lap seni engol ngeröü, nge ngang ra ngeniei ngeröü. Met chüen mangen an epwe nemeni ewe mwü?”
1SA 18:9 Iwe, Saul a meselolowo ngeni Tafit seni lon ewe ränin feila.
1SA 18:10 Nge sorotän ewe rän, eman ngün mi afeiengau seni Kot a feitiu won Saul pwe a arochorochfeil lon imwan. Lon ei otun Tafit a ettiki ewe kitar, usun a föri iteiten rän, nge Saul a amwöchü efoch siles lepöün.
1SA 18:11 Iwe, Saul a posu ngeni Tafit ewe siles, pun a ekiekin apwera ngeni ewe tit. Nge Tafit a mär seni fän ruu.
1SA 18:12 Iwe, Saul a niuokusiti Tafit, pun ewe Samol mi Lapalap a eti Tafit, nge a likitala i.
1SA 18:13 Iei mine Saul a tinala Tafit seni fän mesan o seikätä pwe epwe meilapen engeröü sounfiu. Iwe, Tafit a emweni ekewe mwän le maun.
1SA 18:14 Iwe, a fisiöch än Tafit angang meinisin, pun ewe Samol mi Lapalap a eti.
1SA 18:15 Nge lupwen Saul a küna pwe än Tafit angang a fisiöch, a lapala an niuokusiti.
1SA 18:16 Nge ekewe chon Israel me chon Juta meinisin ra tongei Tafit, pun i a fokun emwenöchüür le maun.
1SA 18:17 Mürin, Saul a üreni Tafit, “Iei i nei finichi Merap, üpwe ngonuk pwe pwülüom. Nge kopwe chök angang ngeniei fän pwora o eäni än ewe Samol mi Lapalap maun.” Pun Saul a ekieki, “Ekewe chon Filistia repwe niela Tafit, nge sap ngang.”
1SA 18:18 Nge Tafit a üreni Saul, “Ngang iö, nge iön aramasei me familien semei me lon Israel pwe üpwe pwülüeni nöün king?”
1SA 18:19 Nge lupwen a tori fansoun pwe Merap nöün Saul we föpwül epwe le itä pwülüeni Tafit, Saul a apwüpwülüa ngeni Atriel ewe re Mehola.
1SA 18:20 Iwe, Mikal nöün Saul we föpwül a efich Tafit. Iwe, lupwen ra asile ngeni Saul ei pworaus, a fokun sani.
1SA 18:21 Pun Saul a ekieki, “Üpwe apwüpwülüa Mikal ngeni Tafit, pwe epwe eu lenien likatup ngeni, nge ekewe chon Filistia repwe niela.” Iei mine Saul a üreni Tafit fän aruuan, “Iei üpwe apwüpwülüa ngonuk nei.”
1SA 18:22 Mürin, Saul a allük ngeni nöün kewe chon angang, pwe repwe kapas ngeni Tafit le monomon o üra, “Ewe king a fokun sanuk, pwal nöün kewe nöüwis meinisin ra echenuk. Iei a tori otun om kopwe pwülüeni nöün ewe king.”
1SA 18:23 Iwe, nöün Saul kewe chon angang ra apworausa ekei kapas ngeni Tafit. Nge Tafit a üra, “Ifa usun, oua ekieki pwe a mecheres ngeniei ai üpwe pwülüeni nöün ewe king? Ngang eman aramas mi wöüngau, esap pwal wor itei.”
1SA 18:24 Iwe, nöün Saul kewe chon angang ra asile ngeni Saul mine Tafit a apasa.
1SA 18:25 Mürin, Saul a üreniir pwe repwe asile ngeni Tafit, “Ewe king esap mochen och kiis, chilon chök ipükü ünüchen ewe kükün inis seni ekewe chon Filistia, pwe epwe ngeni chon oputan chappen ar föför.” Iei usun Saul a ekieki pwe ekewe chon Filistia repwe niela Tafit.
1SA 18:26 Nge lupwen nöün Saul kewe chon angang ra üreni Tafit ekei kapas, Tafit a pwapwaiti pwe epwe pwülüeni nöün ewe king föpwül. Iwe, mwen an epwe müch ewe fansoun mi kaüküla,
1SA 18:27 Tafit me nöün sounfiu ra feila o niela rüepükü re Filistia. Iwe, a uwato ünüchen kükün inisir o aleaniretiu ngeni ewe king, pwe epwe tongeni pwülüeni nöün. Mürin Saul a ngeni Tafit nöün föpwül Mikal pwe pwülüan.
1SA 18:28 Lupwen Saul a küna o mefi pwe ewe Samol mi Lapalap a eti Tafit, nge Mikal nöün föpwül a pwal tongei,
1SA 18:29 a lapala an niuokusiti Tafit. Iei mine Saul a oput Tafit lon ränin manauan meinisin.
1SA 18:30 Iwe, iteiten fansoun, lupwen ekewe samolun Filistia ra feito pwe repwe maun, Tafit a angangöch le maun lap seni nöün Saul kewe meilapen sounfiu. Iei mine Tafit a fokun iteföüla.
1SA 19:1 Iwe, Saul a kapas ngeni Jonatan nöün we mwän, pwal ngeni nöün kewe chon angang meinisin, pwe repwe niela Tafit. Nge Jonatan nöün we mwän a fokun tongei Tafit.
1SA 19:2 Iei mine a üreni Tafit, “Saul semei we a anennok pwe epwe niik. Kopwe afäluk lesosorun lesor, kopwe nom lon eu leni mi monomon o op.
1SA 19:3 Nge ngang üpwe feila o ütä ünükün semei lon ewe mälämäl, ia en ka op ie. Üpwe kapas ngeni semei usum, nge are üa silei och, üpwe asile ngonuk.”
1SA 19:4 Iwe, Jonatan a kapasöch usun Tafit ngeni Saul saman we o üreni, “Ai king, kosap tipis ngeni noum chon angang Tafit, pun i esap tipis ngonuk, nge an föför a fen öch ngonuk.
1SA 19:5 Pun a fangala manauan, lupwen a niela Koliat, nge ewe Samol mi Lapalap a afisi eu win mi lapalap fän iten chon Israel meinisin. En ka küna o fokun pwapwa ren. Pwota ka mochen tipis ngeni Tafit, eman mwän esap wor an tipis, ren om ekiekin niela, nge esap wor popun?”
1SA 19:6 Iwe, Saul a aüselinga alon Jonatan o pwon fän akapel, “Mwo manauen ewe Samol mi Lapalap, Tafit esap ninnila.”
1SA 19:7 Iei mine Jonatan a kökköri Tafit o pwäri ngeni ekei pworaus meinisin. Mürin, a emwenala Tafit ren Saul pwe a angang ngeni usun me mwan.
1SA 19:8 Iwe, a pwal fisisefäl maun. Nge Tafit a feila maun ngeni ekewe chon Filistia o fokun akufuur, pwe ra sü me mwan.
1SA 19:9 Lon eu rän eman ngün mi afeiengau seni ewe Samol mi Lapalap a feitiu won Saul, lupwen a mot lon imwan o amwöchü wokun siles lepöün. Nge Tafit a ettiki ewe kitar.
1SA 19:10 Iwe, Saul a angei wokun siles o ekiekin apwera Tafit ngeni ewe etiip. Nge Tafit a müttir olu wokun Saul we, pwe a chök küw ewe etiip. Iwe, Tafit a süla seni Saul.
1SA 19:11 Lon ewe pwinin Saul a tinala chon künö ren imwen Tafit pwe repwe aköürü Tafit, pun a ekiekin niela Tafit lon ewe sorotän. Nge Mikal pwülüen Tafit a üreni, “Are kosap kütta manauom lon ei pwinin, lesor kopwe ninnila.”
1SA 19:12 Iei mine Mikal a aürätiu Tafit me lon eu asamwacho. Iwe, Tafit a süla.
1SA 19:13 Mürin, Mikal a angei eu uluulun anün leimw o akonala won ewe peet, a anomu eu mangaku seni ülöülen kuuch won möküran o pwölüela fän echö chenikam.
1SA 19:14 Lupwen Saul a tinala ekewe chon künö pwe repwe angei Tafit, Mikal a apasa, “Tafit a samau.”
1SA 19:15 Nge Saul a tinsefälila ekewe chon künö pwe repwe püsin nenengeni Tafit o üreniir, “Oupwe ekieto rei Tafit won an peet pwe üpwe niela.”
1SA 19:16 Nge lupwen ekewe chon künö ra tolong lon ewe imw, ra küna pwe eu uluulun anün leimw a nom won ewe peet, nge eu mangaku seni ülöülen kuuch a nom won möküran.
1SA 19:17 Saul a aisini Mikal, “Pwota ka atupuei o mwüt ngeni ewe chon oputaei pwe a sü seniei?” Nge Mikal a pälüeni, “A üreniei pwe epwe nieila, are üsap mwüt ngeni pwe epwe sü.”
1SA 19:18 Iwe, Tafit a süla o sü ngeni Samuel lon Rama. A apworausa ngeni meinisin mine Saul a föri ngeni. Mürin, ir me Samuel ra feila o nom lon Naiot.
1SA 19:19 Iwe, a wor eman a asile ngeni Saul pwe Tafit a nom Naiot lon Rama.
1SA 19:20 Mürin, Saul a tinala chon künö pwe repwe turufi Tafit. Iwe, lupwen ra küna ewe mwichen soufos pwe ra osuni, nge Samuel a akom mwer, Ngünün Kot a feitiu won nöün Saul kewe chon künö pwe ra pwal osuni.
1SA 19:21 Lupwen ei pworaus a tori Saul, a pwal tinala eu mwichen chon künö, nge ir ra pwal osuni. Mürin, Saul a tinala chon künö fän aülüngatin, nge ir ra pwal osuni.
1SA 19:22 Mürin, püsin i a feila Rama o tori ewe chönüttu mi watte lon Seku. Iwe, a ais, “Ia Samuel me Tafit ra nom ie?” Eman a üra pwe ra nom Naiot lon Rama.
1SA 19:23 Iei mine Saul a feila ngeni Naiot lon Rama. Nge Ngünün Kot a pwal feitiu won Saul, pwe lupwen an fetal a osuni tori a tori Naiot.
1SA 19:24 Iwe, Saul a pwal pwilitala üfan, a pwal osuni me fän mesen Samuel o kon fän üfan üföüfen lon lon unusen ewe rän me lon unusen ewe pwin. Iei mine a fis ewe kapas, “Ifa usun, Saul a pwal eman lein ekewe soufos?”
1SA 20:1 Mürin, Tafit a sü seni Naiot lon Rama, a feila ren Jonatan o aisini, “Met ü föri? Met ai pupungau? Nge met ai tipis ngeni semom we, pwe a küttaei pwe epwe nieila?”
1SA 20:2 Nge Jonatan a üreni Tafit, “Kosap ekieki ena sokun. Kosap fokun mäla. Nengeni, semei esap föri och mettoch mi watte ika kükün, are esap akomwen pwäri ngeniei. Pwota semei epwe aopala ei föför seniei? Esap ina usun.”
1SA 20:3 Nge Tafit a pälüeni, “Semom we a fokun silei pwe en ka fokun echeniei. Ina popun a ekieki pwe esap öch om kopwe silei an we föför, pwe kete letipeta ren. Nge ellet, mwo manauen ewe Samol mi Lapalap me manauom, a chök wor eu ipw lefilei me mäla.”
1SA 20:4 Mürin, Jonatan a üreni Tafit, “Meinisin mine ka apasa üpwe föri fän itom.”
1SA 20:5 Nge Tafit a üreni Jonatan, “Lesor pwinin elingeling. Ngang üpwe wisen eti ewe king le mongö. Kopwe mwüt ngeniei pwe üpwe feila o op lemäl tori lekuniolun ewe aülüngatin rän.
1SA 20:6 Are semom we a mefi pwe üsap nom, mürin kopwe üra, ‘Tafit a fokun tüngoreei pwe üpwe mwüt ngeni an epwe feila Petleem an we telinimw. Pun ei otun unusen an we famili a kan afisi an asor iteiten ier me ikenan.’
1SA 20:7 Iwe, are semom we epwe apasa, ‘A mürina,’ mürin ngang üa tongeni kinamwe. Nge are epwe song ren, kopwe silei pwe a ekiekin afeiengauaei.
1SA 20:8 Iei mine kopwe kirikiröch ngeniei ngang noum chon angang, pun ka fen eäni eu pwon mi pin ngeniei. Nge are a wor ai pupungau, kopwe püsin nieila, pun pwota kopwe emwenieila ren semom pwe i epwe nieila?”
1SA 20:9 Iwe, Jonatan a üra, “Kosap fokun ekieki ena sokun. Are üpwe silei pwe semei we a ekiekin afeiengauok, ifa usun, üsap pwäri ngonuk?”
1SA 20:10 Mürin, Tafit a aisini Jonatan, “Iö epwe asile ngeniei are semom epwe pälüenuk fän song?”
1SA 20:11 Iwe, Jonatan a üreni Tafit, “Etto, sipwe feila lemäl.” Iei mine ra feilapök lemäl.
1SA 20:12 Mürin, Jonatan a üreni Tafit, “Ewe Samol mi Lapalap, ewe Koten Israel, epwe ach chon pwärätä. Ei otun lesor ika lon aülüngatin rän üpwe engingi semei. Are epwe ekiöch ngonuk, üpwe tinala pworaus o pwäri ngonuk.
1SA 20:13 Nge are semei a ekiekin afeiengauok, ewe Samol mi Lapalap epwe nieila, are üsap pwäri ngonuk o tinukela pwe kopwe feila fän kinamwe. Ewe Samol mi Lapalap epwe etuk usun a eti semei.
1SA 20:14 Are ngang üpwe chüen manau, kopwe eäni ngeniei än ewe Samol mi Lapalap kirikiröch. Nge are üpwe mäla,
1SA 20:15 kosap aükätiu om kirikiröch seni chon leimwei tori feilfeilachök, pwal lupwen ewe Samol mi Lapalap epwe ärawu seni won fanüfan chon oputom meinisin.”
1SA 20:16 Iei usun Jonatan a eäni eu pwon ngeni ewe familien Tafit o üra, “Ewe Samol mi Lapalap epwe ngeni chon oputen Tafit chappen ar föför.”
1SA 20:17 Iwe, Jonatan a föri pwe Tafit a pwonsefäl won an tong ngeni, pun Jonatan a echeni Tafit usun an echeni püsin manauan.
1SA 20:18 Mürin Jonatan a üreni Tafit, “Lesor pwinin elingeling. Repwe mefi pwe kosap nom, pun leniom epwe pön.
1SA 20:19 Nge lon ewe aülüngatin rän repwe fokun mefi pwe kosap nom. Mürin kopwe feila ren ewe leni ia ka op ie me mwan. Kopwe op ikenan ünükün ewe ioien fau.
1SA 20:20 Iwe, üpwe likapichi ngeni lepekin ewe ioien fau ülüföü föün esefich, usun üpwe likapichi ngeni eu lenien ännen.
1SA 20:21 Mürin üpwe tinala eman ät o üreni pwe epwe kütta ekewe föün esefich. Are üpwe üreni ewe ät, ‘Nengeni, ekewe esefich ra nom pekitoom, kopwe angeer,’ mürin ka tongeni feito. Pun mwo manauen ewe Samol mi Lapalap, kopwe manau, nge kosap feiengau.
1SA 20:22 Nge are üpwe apasa ngeni ewe ät, ‘Nengeni, ekewe föün esefich ra nom pekiloom,’ mürin kopwe feila, pun ewe Samol mi Lapalap a tinukela.
1SA 20:23 Nge mine en me ngang sa kapasfengen usun, ewe Samol mi Lapalap epwe chon pwärätä lefilach tori feilfeilachök.”
1SA 20:24 Iei mine Tafit a op lemäl. Nge lupwen a tori pwinin elingeling, ewe king a mot ngeni chepel pwe epwe mongö.
1SA 20:25 Iwe, ewe king a mot won lenian kükü ngeni ewe etiip usun me mwan, Jonatan a mot sasape ngeni, Apner a mot ünükün, nge lenien Tafit a pön.
1SA 20:26 Iwe, Saul esap apasa och lon ewe ränin, pun a ekieki, “Eli a fis och ngeni pwe a nom lon tettelin chon limengau.”
1SA 20:27 Nge lon ewe aruuen rän lesosorun mürin ewe pwinin elingeling lenien Tafit a chüen pön. Iwe, Saul a aisini Jonatan, “Pwota Tafit esap etto nänew ika ikenai pwe epwe eti ei mongö?”
1SA 20:28 Nge Jonatan a pälüeni Saul, “Tafit a fokun tüngorei pwe üpwe mwüt ngeni an epwe feila Petleem.
1SA 20:29 Iwe, a üra, ‘Kose mochen mwüt ngeniei pwe üpwe feila, pun ai famili a eäni och asor lon ewe telinimw, nge pwi a allük ngeniei pwe üpwe nom ikenan. Iei mine, are üa küna ümöümöch me reöm, kopwe mwüt ngeniei pwe üpwe feila o churi pwii kana.’ Iei popun pwe esap nom lon lenian ren om we chepel.”
1SA 20:30 Mürin, Saul a song ngeni Jonatan o üreni, “En nöün eman fefin mi lükümach o tipeförea. Üa silei pwe ka peni Tafit, ka püsin asäwok ren pwal inelapom.
1SA 20:31 Pun lon ükükün tamen manauen Tafit won fanüfan wisom wisen king me mwum esap fisitä. Iei mine kopwe müttir titi Tafit o emwenato rei, pun epwe fokun ninnila.”
1SA 20:32 Mürin, Jonatan a aisini Saul, “Pwota epwe ninnila? Meta a föri?”
1SA 20:33 Nge Saul a posu ngeni Jonatan wokun siles pwe epwe niela. Mürin, Jonatan a silei pwe saman a fokun ekiekin niela Tafit.
1SA 20:34 Iwe, Jonatan a ütä seni ewe chepel fän an lingeringerin song, nge esap mongö lon ewe aruuen ränin ewe maram, pun a lolilenäsini Tafit, pokiten saman a aitengaua.
1SA 20:35 Lesosorun sorotän ewe rän Jonatan a feila lemäl pwe epwe churi Tafit usun a pwon ngeni, nge eman kükün ät a eti.
1SA 20:36 Iwe, Jonatan a üreni ewe ät, “Kopwe säla o kütta ekewe föün esefich üpwe likapichirela.” Nge lupwen ewe ät a säla, Jonatan a likapichiela eföü föün esefich pekilan ewe ät.
1SA 20:37 Lupwen ewe ät a tori ewe leni, ia Jonatan a likapichiela ewe föün esefich ie, Jonatan a kökköla mürin, “Ifa usun, ewe föün esefich esap nom pekiloom?
1SA 20:38 Kopwe müttir, kosap mang, kosap chök ütä.” Iwe, ewe ät a angei ewe föün esefich o feito ren an samol,
1SA 20:39 nge esap silei wewen. Jonatan chök me Tafit ra silei wewen ei lapalap.
1SA 20:40 Iwe, Jonatan a ngeni ewe ät an pisekin maun o üreni, “Kopwe feila o uweerela lon ewe telinimw.”
1SA 20:41 Mürin än ewe ät feila, Tafit a ütä me ünükün ewe ioien fau, a chapetiu lepwül o tütiu fän ülüngat. Iwe, ra mitirifengeniir o kechüfengen, tori Tafit a kon leüömong le kechü.
1SA 20:42 Iwe, Jonatan a üreni Tafit, “Kopwe feila fän kinamwe. Sa eäni ewe pwonen pwipwifengen fän akapel iten ewe Samol mi Lapalap, pwe i epwe chon pwärätä lefilach pwal lefilen mwirimwiri me mwirimwirum tori feilfeilachök.” Mürin, Tafit a feila, nge Jonatan a liwiniti ewe telinimw.
1SA 21:1 Iwe, Tafit a feila Nop ren ewe souasor Ahimelek. Nge Ahimelek a feito fän chechech pwe epwe churi Tafit o aisini, “Pwota ka akaleman chök, nge esap wor eman a etuk?”
1SA 21:2 Iwe, Tafit a üreni Ahimelek, “Ewe king a awisa ngeniei och angang o üreniei pwe üsap asile ngeni eman usun ewe angang i a tini ngeniei ika ewe wis a awisa ngeniei. Iei mine üa pwon ngeni ekewe mwän repwe etiei pwe üpwe churiir lon eu leni.
1SA 21:3 Ifa usun, met a wor reöm? Ika mi wor reöm limefoch pilawa ika met echök a wor ikei, kopwe ngeniei.”
1SA 21:4 Nge ewe souasor a üreni Tafit, “Esap wor rei och sokun pilawa, nge pilawa mi pin chök. Ifa usun ekewe mwän, ra tümwünü inisir seni fefin?”
1SA 21:5 Iwe, Tafit a pälüeni ewe souasor, “Ellet, fefin resap kan ngenikem iteiten fansoun, lupwen aia feila ngeni äm sai. Pisekin ekewe mwän ra pin pwal mwo nge lupwen iteiten äm sai. Ifa usun, esap fen lapala pinin pisekir ikenai?”
1SA 21:6 Iei mine ewe souasor a ngeni Tafit ewe pilawa mi pin. Pun esap wor pilawa ikenan, nge ewe pilawa mi pin chök, a kärän chök angei seni fän mesen ewe Samol mi Lapalap pwe epwe akasiwil ngeni pilawa mi umufö lon ewe ränin.
1SA 21:7 Iwe, lon ewe ränin a wor eman mwän me lein nöün Saul chon angang a nom ikenan, pun a nomotiu lon ewe imw mi pin fän mesen ewe Samol mi Lapalap. Iten ei mwän Toek eman re Etom, i meilapen nöün Saul chon tümwünü man.
1SA 21:8 Iwe, Tafit a üreni Ahimelek, “Ifa usun, mi wor reöm efoch siles ika efoch ketilas ka tongeni ngeniei? Pun ngang üsap uwei efoch nei ketilas ika ai pisekin maun, pokiten än ewe king angang a fokun tawat.”
1SA 21:9 Nge ewe souasor a üra, “A nom ewe ketilas nöün Koliat ewe re Filistia en ka niela me lon ewe lemolun Ela. A tükütük lon echö mangaku o nom lükün ewe üf itan efot. Are ka mochen angei, kopwe angei, pun esap wor efoch lükün ena mi nom ikei.” Nge Tafit a üra, “Esap wor efoch ketilas mi mürina lükün na, kose mochen kopwe ngeniei.”
1SA 21:10 Lon ewe ränin Tafit a süla seni Saul o feila ren Akis ewe kingen Kat.
1SA 21:11 Nge nöün Akis chon angang ra aisini Akis, “Ifa usun, esap iei i Tafit kingen ewe fanü Israel? Sap i ewe mwän ekewe fefin ra kölüfengeni usun lon ar pworuk: Saul a niela ngeröü, nge Tafit a niela lap seni engol ngeröü?”
1SA 21:12 Iwe, Tafit a ekieki ekei kapas lon lelukan o fokun niuokusiti Akis ewe kingen Kat.
1SA 21:13 Iei mine Tafit a siwili sokun me fän meser, a pwomweni pwomwen eman mi umwes o kitipöppö, lupwen ra amwöchü. A pwal sukusukuw asamalapen tittin ar telinimw o asürätiu atufan won ölüsan.
1SA 21:14 Mürin, Akis a üreni nöün kewe chon angang, “Nengeni, ewe mwän a umwes. Pwota oua fen emwenato rei?
1SA 21:15 Ifa usun, esap wor rei mwän mi umwes, pwe oua pwal emwenato rei ei mwän pwe epwe aweiresiei ren an sokuni sokun chon umwes me fän mesei? Ifa usun, ei mwän epwe nom lon imwei?”
1SA 22:1 Iwe, Tafit a feila seni Kat o süla lon ewe föimw mi nom asen ewe telinimw Atulam. Nge lupwen pwin kewe me chon leimwen saman meinisin ra rong usun, ra feila ren ikenan.
1SA 22:2 Pwal chokewe meinisin mi nom lon riaföü, meinisin mi wor ar liwinimang me meinisin mi kinamwengau ra chufengen ren, nge Tafit a nöür souemwen. Iwe, iteiten chokewe mi nom ren ina epwe ükükün föpükü mwän.
1SA 22:3 Seni ikenan Tafit a feila Mispa lon Moap o üreni ewe kingen Moap, “Kose mochen kopwe mwüt ngeni semei me inei pwe repwe nom reöm, tori üpwe silei mine Kot epwe föri fän itei.”
1SA 22:4 Iwe, a likitiir ren ewe kingen Moap, nge ir ra nom ren lon unusen ewe fansoun Tafit a nom lon ewe lenien op mi pöchökül.
1SA 22:5 Mürin, ewe soufos itan Kat a feito ren Tafit o üreni, “Kosap chök nom lon ewe lenien op mi pöchökül. Kopwe feila lon ewe fanü Juta.” Iei mine Tafit a feil seni ikenan o feila lon ewe wöllapen Heret.
1SA 22:6 Iwe, Saul a rong pwe Tafit me ekewe mwän mi eti ra pwä. Saul a nom Kipea o mot fän efoch irä itan tamarisk won ewe pal, a kamwöch wokun siles, nge nöün kewe meilap meinisin ra ütä ünükün.
1SA 22:7 Iwe, Saul a üreni nöün kewe meilap mi ütä ünükün, “Oupwe rongorong, ämi re Peniamin. Ifa usun, Tafit epwe ngeni eman me eman leimi fanü me tanipin wain? Ifa usun, epwe atolongakemi lon wisen meilapen sounfiu won ngeröü me pükü?
1SA 22:8 Iei popun pwe ämi meinisin oua rawangauaei? Esap wor eman me leimi a pwäri ngeniei pwe nei mwän a föri eu pwonen atipeeu ngeni Tafit. Esap wor eman me leimi a chüngüei ika pwäri ngeniei pwe nei mwän a etipetipa Tafit nei we chon angang, pwe epwe ü ngeniei o opooperiei, usun a fis ikenai.”
1SA 22:9 Mürin, Toek ewe re Etom mi ütä lein nöün Saul kewe meilap a pälüeni, “Üa küna Tafit, lupwen a feito Nop ren Ahimelek nöün Ahitup we mwän.
1SA 22:10 Iwe, Ahimelek a angei öüröür seni ewe Samol mi Lapalap fän iten Tafit, a ngeni amötün, a pwal ngeni ewe ketilas nöün Koliat ewe re Filistia.”
1SA 22:11 Mürin, ewe king a titi ewe souasor Ahimelek me chon leimwen saman meinisin, ir ekewe souasor mi nom Nop. Ir meinisin ra feila ren ewe king.
1SA 22:12 Iwe, Saul a üra, “Kopwe aüseling, Ahimelek.” Nge Ahimelek a apasa, “Ewer, ai samol.”
1SA 22:13 Iwe, Saul a üreni, “Pwota oua rawangauaei, en me Tafit? Pwota ka mwüt ngeni pilawa me efoch ketilas, ka pwal angei öüröür seni Kot fän itan? Iei mine a ü ngeniei o opooperiei usun a fis ikenai.”
1SA 22:14 Mürin, Ahimelek a pälüeni ewe king, “Ai king, iö me lein noum chon angang a allükülük usun Tafit? A pwülüeni noum we föpwül, a pwal meilapen ewe mwichen sounfiu mi tümwünuk o iteüöch me lein chon leimwom.
1SA 22:15 Ifa usun, epwe kärän ikenai ai üpwe angei öüröür seni Kot fän itan? Apwi! Üa tüngor pwe en ai king kosap tip ngeniei ngang noum chon angang och ika ngeni chon leimwen semei meinisin. Pun ngang noum chon angang üsap fokun silei och usun ei pworaus.”
1SA 22:16 Nge ewe king a üra, “Ahimelek, ämi me chon leimwen semom meinisin oupwe fokun mäla.”
1SA 22:17 Mürin, ewe king a üreni ekewe sounfiu chon mas mi ütä ünükün, “Oupwe kul o niela nöün ewe Samol mi Lapalap kewe souasor, pun ra peni Tafit. Ra silei pwe Tafit a sü, nge resap pwäri ngeniei.” Nge nöün ewe king kewe nöüwis resap mochen angatä won nöün ewe Samol mi Lapalap kewe souasor, pwe repwe nirela.
1SA 22:18 Mürin, ewe king a üreni Toek, “En kopwe kul o niela ekewe souasor.” Iei mine Toek a kul o nirela. Lon ena rän a niela ükükün walik me limman souasor mi üföüf ewe üf itan efot.
1SA 22:19 Iwe, Saul a pwal niela meinisin mine a nom lon Nop ewe telinimwen souasor. A niela mwän me fefin, semirit me ekewe mönükol pwal kow, aas me sip.
1SA 22:20 Nge eman lein nöün Ahimelek kewe mwän itan Apiatar a süla o feila ren Tafit.
1SA 22:21 Apiatar a apworausa ngeni Tafit pwe Saul a niela nöün ewe Samol mi Lapalap kewe souasor.
1SA 22:22 Iwe, Tafit a üreni Apiatar, “Lupwen Toek ewe re Etom a nom ikenan lon ewe ränin, üa silei pwe epwe asile ngeni Saul pwe üa nom Nop. Ngang popun pwe aramasen chon leimwen semom meinisin ra mäla.
1SA 22:23 Kopwe nom rei, nge kosap niuokus. Pun ätewe mi mochen niikela a pwal mochen nieila. Kopwe chök nom rei pwe kopwe manau.”
1SA 23:1 Iwe, ra apworausa ngeni Tafit pwe ekewe chon Filistia ra maun ngeni chon Keila o soläni masouen ekewe lenien wichiwich umwun wiich.
1SA 23:2 Iei mine Tafit a aisini ewe Samol mi Lapalap, “Ifa usun, üpwe feila o maun ngeni ekewe chon Filistia?” Nge ewe Samol mi Lapalap a üreni Tafit, “Kopwe feila, kopwe maun ngeni ekewe chon Filistia o amanaua chon Keila.”
1SA 23:3 Nge nöün Tafit kewe aramas ra üreni, “Äm aia fen niuokus ikei lon Juta. Nge epwe fen ifa are aipwe feila Keila o maun ngeni ekewe mwichen sounfiun Filistia?”
1SA 23:4 Mürin, Tafit a aisinisefäli ewe Samol mi Lapalap. Nge ewe Samol mi Lapalap a pälüeni, “Kopwe feila Keila, pun ngang üpwe awinnok pwe kopwe akufu ekewe chon Filistia.”
1SA 23:5 Iei mine Tafit me nöün kewe aramas ra feila Keila o maun ngeni ekewe chon Filistia. Ra niela chomong me leir o uweela nöür man. Iei usun Tafit a amanaua ekewe aramasen Keila.
1SA 23:6 Iwe, lupwen Apiatar nöün Ahimelek we mwän a süla Keila ren Tafit, a uweela echö efot.
1SA 23:7 Mürin, eman a asile ngeni Saul pwe Tafit a nom Keila. Iwe, Saul a üra, “Kot a atolonga Tafit lepei. Pun a püsin fötekinalong ren an tolong lon eu telinimw mi wor asamalapan me lokun.”
1SA 23:8 Iwe, Saul a titi nöün kewe sounfiu pwe repwe feila Keila o pwelifeili Tafit me nöün kewe aramas fän pisekin maun.
1SA 23:9 Nge lupwen Tafit a rongorong pwe Saul a ekiekin maun ngeni, a üreni ewe souasor Apiatar pwe epwe uwato ren ewe efot.
1SA 23:10 Mürin, Tafit a iotek, “Ai Samol mi Lapalap, Koten Israel, ngang noum chon angang üa rongorong pwe Saul a ekiekin feito Keila o ataela ewe telinimw pokitei.
1SA 23:11 Ifa usun, ekewe re Keila repwe fangatä ngang ngeni Saul? Ifa usun, Saul epwe feito usun ngang noum chon angang üa rongorong? Ai Samol mi Lapalap, Koten Israel, üa fokun tüngor ngonuk pwe kopwe asile ngeniei pälüen ai kei kapas ais ngonuk.” Iwe, ewe Samol mi Lapalap a üra, “Saul epwe feito.”
1SA 23:12 Mürin, Tafit a aisini, “Ifa usun, ekewe re Keila repwe fangatä äm me nei aramas ngeni Saul?” Nge ewe Samol mi Lapalap a pälüeni, “Ewer, repwe fangatä ämi.”
1SA 23:13 Mürin, Tafit me nöün aramas ina epwe ükükün wonopükü mwän ra ütä o feil seni Keila. Iwe, ra feila ekis meinisin ia ra tongeni feila ie. Nge lupwen Saul a rongorong pwe Tafit a süla seni Keila, esap chüen feila.
1SA 23:14 Iwe, Tafit a nonom lon ekewe lenien op mi pöchökül lon ewe fanüapö, pwal won chukuchukutän ewe fanüapön Sif. Iwe, Saul a kütta Tafit iteiten rän, nge Kot esap atolonga lepöün.
1SA 23:15 Iwe, Tafit a silei pwe Saul a feito pwe epwe niela. Lon ena fansoun, lupwen Tafit a nom lon Hores me lon ewe fanüapön Sif,
1SA 23:16 Jonatan nöün Saul we a feila ren Tafit lon Hores o apöchöküla lelukan lon an lükü Kot.
1SA 23:17 Iwe, a üreni, “Kosap niuokus. Pun Saul semei we esap tongeni afeiengauok. En kopwe kingen chon Israel, nge ngang üpwe kis fomw. Semei we mwo nge a pwal silei usun ei.”
1SA 23:18 Iwe, ekewe ruoman ra föri eu pwon fän mesen ewe Samol mi Lapalap. Mürin, Jonatan a liwiniti lenian, nge Tafit a nonomola lon Hores.
1SA 23:19 Mürin, ekewe chon Sif ra feila ren Saul mi nom lon Kipea o üreni, “Tafit a op leim lon ekewe lenien op mi pöchökül lon Hores won ewe chukutekisonun Hakila mi nom peliörün Jesimon.
1SA 23:20 Kopwe feito iei, äm king, inet echök ka mochen feito, nge wisem pwe aipwe fangatä Tafit ngonuk.”
1SA 23:21 Nge Saul a üra, “Ewe Samol mi Lapalap epwe afeiöchükemi, pun oua tongeei.
1SA 23:22 Oupwe feila o aletöchü pwe oupwe silei o küna ewe leni ia Tafit a op ie, pwal iö a küna ikenan. Pun ra apworausa ngeniei pwe a fokun tipachemsolä.
1SA 23:23 Iei mine oupwe küttaöchü ekewe lenien op ia a op ie o liwinsefälito rei fän pworaus mi pwüng. Mürin, ngang üpwe etikemi. Nge are epwe nom lon ewe fanü, üpwe kütta o elliapa lein ekewe eterekesin chon Juta meinisin.”
1SA 23:24 Iei mine ra feila o akomwola Sif mwen Saul. Iwe, Tafit me nöün kewe aramas ra nom lon ewe fanüapön Maon lon ewe fanü Arapa örün Jesimon.
1SA 23:25 Nge Saul me nöün kewe aramas ra feila pwe repwe kütta. Iwe, eman a asile ngeni Tafit ei pworaus, iei mine a feitiu ren ewe achau o nom lon ewe fanüapön Maon. Nge lupwen Saul a rong usun, a feila lon ewe fanüapön Maon pwe epwe tapweri Tafit.
1SA 23:26 Iwe, Saul me nöün kewe aramas ra pwer epek ewe chuk, nge Tafit me nöün kewe aramas ra pwer pwal ewe epek. Mürin, Tafit me nöün kewe aramas ra amüttirir pwe repwe sü seni Saul, pun Saul me nöün kewe aramas ra pachetä müriir pwe repwe liapeniir.
1SA 23:27 Lon ewe chök otun eman chon künö a feito ren Saul o üreni, “Kopwe müttir liwinsefäl, pun ekewe chon Filistia ra tolong lon ewe fanü.”
1SA 23:28 Iei mine Saul a ükütiu le tapweri Tafit o liwinla pwe epwe maun ngeni ekewe chon Filistia. Iei popun pwe ewe leni a iteni Achauen Süla.
1SA 23:29 Nge Tafit a feila seni ikenan o nonom lon ekewe lenien op mi pöchökül lon Engeti.
1SA 24:1 Iwe, lupwen Saul a liwinto seni an tapweri ekewe chon Filistia, eman a üreni, “Tafit a nom lon ewe fanüapön Engeti.”
1SA 24:2 Mürin, Saul a angei ülüngeröü mwän mi sipeöch le maun seni lon unusen Israel o feila pwe epwe kütta Tafit me nöün kewe aramas arap ngeni ekewe Achauen Kuuch mi mwacho.
1SA 24:3 Iwe, a tori ekewe lenien sip mi nom lepekin al, ia a wor ie eu föimw. Saul a tolong lon ewe föimw pwe epwe ngasala, nge Tafit me nöün kewe mwän ra mot epichikin ewe föimw.
1SA 24:4 Iwe, nöün Tafit kewe aramas ra üreni, “Iei ewe rän ewe Samol mi Lapalap a kapas ngonuk usun, pwe epwe atolonga chon oputom fän nemenemom, nge en kopwe föri ngeni mine a öch me reöm.” Mürin, Tafit a anifa Saul o pökü lepwülün üfan owokot, nge Saul esap mefi.
1SA 24:5 Nge mürin, Tafit a mengiringir lon lelukan, pokiten a pökü lepwülün üfen Saul.
1SA 24:6 Iwe, a üreni nöün kewe aramas, “Ewe Samol mi Lapalap epwe epeti ai üpwe afeiengaua ai samol pwe üpwe angetä won, pun i ewe mi kepit me ren ewe Samol mi Lapalap.”
1SA 24:7 Iei usun Tafit a fönöü nöün kewe aramas ren ekei kapas, nge esap mwüt ngeniir pwe repwe niela Saul. Iwe, Saul a ütä, a towu seni ewe föimw o feila won alan.
1SA 24:8 Mürin, Tafit a pwal ütä, a towu seni ewe föimw o kökköla mürin Saul, “Ai samol me ai king.” Nge lupwen Saul a nennesökür, Tafit a chapetiu lepwül o asamolu.
1SA 24:9 Iwe, Tafit a üreni Saul, “Pwota ka aüselinga alon ekewe aramas mi apasa pwe Tafit a ekiekin afeiengauok?
1SA 24:10 Ikenai ka püsin küna pwe ewe Samol mi Lapalap a atolongok fän nemeniei me lon ewe föimw. Ekoch nei kewe aramas ra peseei pwe üpwe niikela, nge ngang üa achikok. Üa üreniir pwe üsap angetä womw, en ai samol, pun en ewe mi kepit me ren ewe Samol mi Lapalap.’
1SA 24:11 Nengeni, semei, ka küna lepwülün üfom owokot me lepei. Üa pökü lepwülün üfom owokot, nge üsap niikela. Iei kopwe mefi o silei pwe esap wor och ai ekiek mi ngau ika rawangau ngonuk. Ngang üsap tipis ngonuk, nge en ka fen elliapaei pwe kopwe nieila.
1SA 24:12 Amwo ewe Samol mi Lapalap epwe atowu iö a pwüng leich, i epwe pwal ngonuk chappen om föför ngeniei, nge ngang üsap angetä womw.
1SA 24:13 Usun mwiitunen ekewe re lom a apasa, ‘Eman aramas mi ngau chök a föri föför mi ngau.’ Nge ngang üsap fokun angetä womw.
1SA 24:14 Ifa usun, iö en ewe kingen Israel ka ekiekin niela? Iö ka tapweri? Ka tapweri eman kolak mi mäla ika eman kütoulom?
1SA 24:15 Iei mine ewe Samol mi Lapalap epwe soukapwüng o atowu iö a pwüng leich. I epwe nenengeni ei lapalap o peniei, epwe pwal angasaei seni lepoum.”
1SA 24:16 Iwe, lupwen Tafit a wes le kapas ngeni Saul, Saul a üra, “Ifa usun, iei wesewesen mweliom nei mwän Tafit?” Mürin, Saul a kechü fän leüömong.
1SA 24:17 A üreni Tafit, “En ka pwüng lap seniei. Ka liwini ngeniei mine a mürina, nge ngang üa liwini ngonuk mine a ngau.
1SA 24:18 Ikenai ka pwärätä usun om kirikiröch ngeniei. Ewe Samol mi Lapalap a atolongaei fän nemeniom, nge en kosap nieila.
1SA 24:19 Ifa usun, ika eman mwän epwe seretä won chon oputan, epwe tongeni amanaua? Amwo ewe Samol mi Lapalap epwe liwini ngonuk mine a mürina ren mine ka föri ngeniei ikenai.
1SA 24:20 Iei üa silei pwe en kopwe wesewesen king, nge ewe mwün Israel epwe fisitä reöm.
1SA 24:21 Iei mine kopwe pwon ngeniei fän akapel fän iten ewe Samol mi Lapalap pwe kosap ärala mwirimwiri, kosap pwal amoela itei me iten chon leimwen semei.”
1SA 24:22 Iwe, Tafit a eäni ei pwon fän akapel ngeni Saul. Mürin, Saul a liwiniti lenian, nge Tafit me nöün kewe aramas ra feitä ren ewe lenien op mi pöchökül.
1SA 25:1 Iwe, Samuel a mäla, nge chon Israel meinisin ra mwichefengen pwe repwe kechüeiti. Iwe, ra peiaseni lon lenian lon Rama. Mürin, Tafit a feitiu lon ewe fanüapön Paran.
1SA 25:2 A wor eman mwän lon Maon mi wor fanüan lon Karmel. Ei mwän a fokun pisekisek. A wor ülüngeröü nöün sip me engeröü nöün kuuch. Iwe, a fichi ülöülen nöün sip lon Karmel.
1SA 25:3 Iten ewe mwän Napal, eman seni ewe eterekesin Kalep, nge iten pwülüan Apikael. Iwe, ewe fefin a miritöch o liöch, nge ewe mwän a aramasangau o miritingau.
1SA 25:4 Iwe, Tafit a rong me lon ewe fanüapö pwe Napal a fichi ülöülen nöün sip.
1SA 25:5 Iei mine Tafit a tinala engol alüal Karmel pwe repwe churi Napal o uwei an kapong ngeni.
1SA 25:6 Iwe, a aiti ngeniir usun mine repwe üreni Napal, “Üa kapong ngonuk. Kinamwe epwe toruk me chon leimwom meinisin, epwe pwal tori meinisin mine ka nöüni.
1SA 25:7 Üa rongorong pwe mi wor noum chon fichi ülöülen sip. Iwe, noum chon masen sip ra nom rem, nge äm aisap aweiresiir, esap pwal pöütüla och seniir lon ükükün ewe fansoun ra nom lon Karmel.
1SA 25:8 Kopwe püsin aisini noum kewe chon angang, pun ir repwe apworausa ngonuk. Iei mine kopwe eäni ümöümöch ngeni nei kana alüal, pun äm aia feito lon ränin kametip. Kose mochen kopwe fang ngeni noum kewe chon angang, pwal ngeniei ngang noum mwän Tafit mine a nom reöm.”
1SA 25:9 Iwe, lupwen nöün Tafit kewe alüal ra feito ren Napal, ra üreni ekewe kapas meinisin fän iten Tafit. Mürin ra witiwit.
1SA 25:10 Nge Napal a pälüeni nöün Tafit kewe alüal, “Iö na Tafit? Iö nöün Jesi na mwän? Lon ei fansoun a wor chomong chon angang mi süla seni ar samol.
1SA 25:11 Ifa usun, üpwe angei enei pilawa, ünümei koluk me ochäi fituk, üa amolätä fän iten nei chon fichi ülöülen sip, o ngeni ekewe mwän üsap silei ia ra feito me ie?”
1SA 25:12 Iei mine nöün Tafit kewe alüal ra kul, ra liwinla o apworausa ngeni Tafit ekei kapas.
1SA 25:13 Iwe, Tafit a üreni nöün kewe aramas, “Ämi meinisin oupwe rietä nöümi ketilas.” Mürin, iteiten eman me eman mwän a rietä nöün ketilas, pwal Tafit mwo nge a rietä nöün. Iwe, ina epwe ükükün föpükü mwän ra feila mürin Tafit, nge rüöpükü ra nom ngeni ekewe pisek.
1SA 25:14 Nge eman me lein nöün Napal kewe chon angang a üreni Apikael pwülüen Napal, “Tafit a tinato chon künö seni lon ewe fanüapö pwe repwe kapong ngeni äm samol, nge i a rochongau ngeniir.
1SA 25:15 Nge ekewe mwän ra fokun öch ngenikem. Resap aweiresikem, esap pwal pöütüla och senikem lon ükükün tamen ewe fansoun aia etiir le nom lon ekewe mälämäl.
1SA 25:16 Ir ra usun chök tittim lepwin me lerän lon unusen ewe fansoun aia nom rer le tütümwünü ekewe sip.
1SA 25:17 Iei mine kopwe ekieköchü o pii mine kopwe föri, pun feiengau epwe tori äm samol me chon leimwan meinisin. Nge äm samol a fokun aramasangau, pwe esap wor eman a tongeni kapas ngeni.”
1SA 25:18 Mürin, Apikael a müttir angei rüöpükü fochun pilawa, ruu rumen wain, limman sip mi fen wes le kuk, ina epwe ükükün wone paun wiich mi tün, ipükü umwun föün wain mi apwas me rüöpükü nokop seni fik mi apwas. Iwe, a anomuur won ekoch aas.
1SA 25:19 Mürin, a üreni nöün kewe chon angang mwän, “Oupwe akomwola mwei, ngang üpwe tapwela mürimi.” Nge i esap asilei och ngeni Napal pwülüan we.
1SA 25:20 Lupwen Apikael a sätiu won nöün aas lon eu pwokur me epek, Tafit me nöün kewe aramas ra pwal pweretiu me ewe epek. Iwe, neminewe a churiir.
1SA 25:21 Nge Tafit a apasa me mwan, “Ellet, a fokun solap ai tümwünü mine än ewe mwän lon ewe fanüapö pwe esap pöütüla och mine an. Nge i a liwini ai öch ngeni ngau.
1SA 25:22 Kot epwe nieila, are üsap niela nöün Napal kewe mwän meinisin me mwen lesosor.”
1SA 25:23 Iwe, lupwen Apikael a küna Tafit, a müttir tötiu seni waan aas, a chapetiu lepwül o tütiu me mwen Tafit.
1SA 25:24 A chapetiu arun pechen Tafit o apasa, “Ai samol, ewe tipis epwe chök nonom woi. Üa tüngor ngonuk pwe kopwe mwüt ngeniei ngang noum chon angang fefin pwe üpwe kapas ngonuk. Kose mochen kopwe rongorong aloi ngang noum chon angang fefin.
1SA 25:25 Amwo ai samol esap nenengeni ei mwän Napal mi aramasangau. Pun wewen itan iei usun pwal manauan. Itan ei Napal wewen umwes, iei popun i a pwal umwes. Nge ngang noum chon angang fefin üsap küna noum kewe alüal ka tinireto.
1SA 25:26 Iwe, ai samol, ewe Samol mi Lapalap a pinei om kopwe niela chon oputom, pwal om kopwe ngeniir chappen ar föför. Mwo manauen ewe Samol mi Lapalap pwal mwo manauom, chon oputom me chokewe mi mochen afeiengauok repwe küna apwüng usun chök Napal.
1SA 25:27 Iei ewe lifang ngang noum chon angang üa uwato ngonuk en ai samol. Kopwe ngeni ekewe aramas mi etuk.
1SA 25:28 Üa tüngor ngonuk pwe kopwe amusala ai pupungau. Ewe Samol mi Lapalap epwe ngenikemi me mwirimwirum kana ewe wisen king, pun ka eäni än ewe Samol mi Lapalap maun, nge kosap föri och mi ngau lon ränin manauom meinisin.
1SA 25:29 Are eman epwe tapweruk o ekiekin niikela, ewe Samol mi Lapalap om we Kot epwe tümwünuk usun eman aramas a tümwünü an pisek mi fokun aüchea ngeni. Nge epwe moneela manauen chon oputom, usun eman a monei eföü fau ren eu öülül.
1SA 25:30 Nge lupwen ewe Samol mi Lapalap epwe apwönüetä ekewe pwon mi mürina meinisin a pwon fän itom, lupwen epwe pwal seikuketä king won Israel,
1SA 25:31 esap wor popun pwe kopwe lolilen ika mengiringir pokiten om kosap nimanauei chokewe resap tipis, ika pokiten om kosap ngeniir chappen ar föför. Nge lupwen ewe Samol mi Lapalap epwe afeiöchuk en ai samol, kopwe chechemeniei ngang noum chon angang fefin.”
1SA 25:32 Iwe, Tafit a üreni Apikael, “Üa mwareiti ewe Samol mi Lapalap ewe Koten Israel mi tinuketo ikenai pwe kopwe churiei.
1SA 25:33 Kopwe feiöch, pun ka mirit, ka epetiei seni tipisin nimanauei aramas, pwal seni ai üpwe ngeni aramas chappen ar föför.
1SA 25:34 Ewe Samol mi Lapalap a pineei seni ai mochen afeiengauok. Mwo manuen ewe Koten Israel, are kosap müttir feito o churiei, ellet esap fokun wor eman nöün Napal mwän epwe chüen manau lesosorun lesor.
1SA 25:35 Mürin, Tafit a angei ekewe mongö neminewe a uwato ren. Iwe, a üreni, “Kopwe feila lon imwom fän kinamwe. Üa aüselinga alom o mwütätä om tüngor.”
1SA 25:36 Iwe, Apikael a liwinto ren Napal. Nge Napal a föri eu kametip lon imwan usun än eman king kametip. Iwe, a pwapwa lon lelukan, pun a fokun pulas. Iei mine neminewe esap fokun apworausa ngeni och tori a ränila.
1SA 25:37 Nge lon ewe sosoran, lupwen a wes än Napal pulas, pwülüan we a apworausa ngeni ekei mettoch meinisin. Iwe, Napal a cheri och metekin föün ngasangasan pwe inisin a usun chök nge a mä.
1SA 25:38 Nge ina epwe ükükün engol rän mürin, ewe Samol mi Lapalap a nii Napal pwe a mäla.
1SA 25:39 Iwe, lupwen Tafit a rongorong pwe Napal a mäla, a üra, “Üa mwareiti ewe Samol mi Lapalap mi ngeni Napal chappen an turunufaseei, a pwal epetiei ngang nöün chon angang seni föför mi ngau. Ewe Samol mi Lapalap a liwini ngeni Napal liwinin an föföringau.” Mürin, Tafit a tinala pworaus ren Apikael o tüngorei pwe epwe pwülüeni.
1SA 25:40 Iwe, lupwen nöün Tafit kewe chon angang ra feito ren Apikael lon Karmel, ra üreni, “Tafit a tinikeemito reöm, pwe aipwe angeuk, pun a mochen pwülüenuk.”
1SA 25:41 Iwe, Apikael a chapetiu lepwül o apasa, “Ngang nöün chon angang fefin üa molotä pwe üpwe angang ngeni o talü pechen nöün ai samol kewe chon angang.”
1SA 25:42 Mürin, Apikael a müttir ütä o tötä won wan aas, nge nöün kewe limman chon angang fefin ra eti. Iwe, Apikael a tapwela mürin nöün Tafit kewe chon künö, nge Tafit a pwülüeni.
1SA 25:43 Lon ei fansoun Tafit a fen pwülüeni Ahinoam seni Jesreel, nge iei a pwal pwülüeni Apikael.
1SA 25:44 Nge Saul a angei Mikal nöün we fefin pwülüen Tafit o apwüpwülüa ngeni Palti nöün Lais we seni Kalim.
1SA 26:1 Iwe, ekewe chon Sif ra feito ren Saul me lon Kipea o apasa, “Tafit a op won ewe chukun Hakila mi nom akawenewenen Jesimon.”
1SA 26:2 Iei mine Saul a feila ren ewe fanüapön Sif fiti ülüngeröü re Israel mi sipeöch le maun, pwe epwe kütta Tafit ikenan.
1SA 26:3 Iwe, Saul a nom ünükün ewe al won ewe chukun Hakila akawenewenen Jesimon. Nge Tafit a chök nonom lon ewe fanüapö. Lupwen Tafit a rongorong pwe Saul a tapweralong lon ewe fanüapö,
1SA 26:4 a tinala chon operiir. Iwe, a silei me rer pwe Saul a wesewesen feito.
1SA 26:5 Mürin, Tafit a feila ren ewe leni ia Saul a nom ie. Iwe, a küna ewe ia Saul a möür ie me Apner nöün Ner we mwän, ewe meilapen nöün mwichen sounfiu. Saul a kon lukalapen ewe ia ra nom ie, nge ewe mwichen sounfiu ra kon pwelin ünükün.
1SA 26:6 Mürin, Tafit a aisini Ahimelek ewe re Hit me Apisai pwin Joap nöün Seruia we mwän, “Iö epwe etiei le feitiu ren Saul lon ewe leni ia a nom ie?” Iwe, Apisai a pälüeni, “Ngang üpwe etuk le feitiu.”
1SA 26:7 Iei mine Tafit me Apisai ra feitiu ren ewe mwichen sounfiu lepwin o küna Saul pwe a möür lukalapen ewe leni. Wokun siles a fotetiu lepwül asen möküran, nge Apner me ewe mwichen sounfiu ra möür pwelin ünükün.
1SA 26:8 Mürin, Apisai a üreni Tafit, “Ikenai Kot a atolonga ätei mi oput en fän nemeniom. Iei mine kopwe mwüt ngeniei pwe üpwe apwera Saul ngeni ewe pwül ren ai posu ngeni woki ei siles fän eu chök, nge üsap posu fän ruu.”
1SA 26:9 Nge Tafit a üreni Apisai, “Kosap niela ätewe. Pun iö a tongeni angeetä won nöün ewe Samol mi Lapalap mi kepit, nge esap tipis?”
1SA 26:10 Iwe, Tafit a pwal üra, “Mwo manauen ewe Samol mi Lapalap, üa silei pwe Kot epwe püsin niela, ika epwe tori an mäla, ika epwe mäla lon maun.
1SA 26:11 Ewe Samol mi Lapalap epwe epeti ai üpwe angeetä won nöün we mi kepit. Nge iei sipwe angei wokun siles mi nom asen möküran me an rumen koluk pwe sipwe feila.”
1SA 26:12 Iwe, Tafit a angei ewe siles me ewe rumen koluk seni asen möküren Saul, mürin ra feila. Esap wor eman a küna ika silei mine ra föri, esap pwal wor eman mi nennela. Pun ir meinisin ra möür, pokiten ewe Samol mi Lapalap a awarato eu möürüchou wor.
1SA 26:13 Mürin, Tafit a feila pekilan ewe lemol me epek o ütä won ungen ewe chuk, nge toauen lefiler a men toau.
1SA 26:14 Iwe, Tafit a kökkö ngeni ewe mwichen sounfiu pwal ngeni Apner o aisini, “Apner, ifa usun, ka tongeni rongorong mweliei?” Mürin, Apner a pälüeni, “En iö ka köri ewe king?”
1SA 26:15 Tafit a üreni Apner, “Ifa usun, sap en eman mwän? Iö a wewe ngonuk me lon Israel? Pwota kosap mamasaöchü om samol me om king? Pun eman me lein ekewe aramas a tolong pwe epwe niela ewe king om we samol.
1SA 26:16 En kosap föri wisom, Apner. Mwo manauen ewe Samol mi Lapalap, ämi meinisin oupwe mäla, pun ousap mamasaöchü ämi samol nöün ewe Samol mi Lapalap mi kepit. Oupwe nennefetal. Ia a nom ie wokun ewe king siles me an rumen koluk mi nom asen möküran?”
1SA 26:17 Iwe, Saul a silleni ngingin Tafit o ais, “Ifa usun, sap iei mweliom nei mwän Tafit?” Nge Tafit a pälüeni, “Ewer, ai samol me ai king.”
1SA 26:18 A pwal üra, “Pwota en ai samol ka chök tatapweriei ngang noum chon angang? Met üa föri? Met sokun föför üa tipis ngonuk won?
1SA 26:19 Iei mine ai samol me ai king kopwe rongorong aloi ngang noum chon angang. Are ewe Samol mi Lapalap a amwökütükütuk pwe kopwe ü ngeniei, amwo epwe etiwa eu asor o siwili an ekiek. Nge are aramas ra amwökütükütuk, amwo repwe anümamau me fän mesen ewe Samol mi Lapalap. Pun ra asüeila seni fanüei, me ren ewe Samol mi Lapalap pwe üpwe süla ngeni eu fanü ia üa chök tongeni angang ngeni ekewe koten ekis ie.
1SA 26:20 Kosap mwütätä pwe üpwe ninnila lon fanüen chon ekis toau seni fän mesen ewe Samol mi Lapalap. Pun ewe kingen Israel a towu pwe epwe nieila usun eman kutoulom, usun eman mi kütta ewe machang itan patrich me won ekewe chuk pwe epwe liapeni.”
1SA 26:21 Mürin, Saul a apasa, “Ngang üa föri mine a mwäl. Kopwe liwinto, nei mwän Tafit, pun ngang üsap chüen afeiengauok pokiten manauei a aüchea me reöm ikenai. Ellet, ngang üa föri föförün eman mi umwes, üa pwal fokun mwäl.”
1SA 26:22 Nge Tafit a apasa, “Iei wokum we siles, ai king. Eman lein ekewe alüal epwe feito o angei.
1SA 26:23 Ewe Samol mi Lapalap a liwiniöchü iteiten aramas fän iten an föförün pwüng me an allükülük. Ikenai ewe Samol mi Lapalap a atolongok fän nemeniei, nge ngang üsap angeetä wom en nöün ewe Samol mi Lapalap we mi kepit.
1SA 26:24 Nengeni, usun manauom a aüchea me rei, iei usun manauei epwe aüchea me ren ewe Samol mi Lapalap, epwe pwal angasaei seni ekewe riaföü meinisin.”
1SA 26:25 Mürin, Saul a üreni Tafit, “Kot epwe afeiöchuk nei mwän Tafit. Kopwe föri föför mi lapalap o asopöchüür.” Iwe, Tafit a feila lon alan, nge Saul a liwiniti lenian.
1SA 27:1 Iwe, Tafit a ekieki lon lelukan, “Lon eu kei rän Saul epwe nieila. Esap wor och mi mürina seni ai üpwe süla lon fanüen chon Filistia. Mürin, Saul epwe ükütiu le küttaei ekis meinisin lon ewe fanü Israel, üpwe pwal sechiwu seni lepöün.”
1SA 27:2 Iei mine Tafit me nöün kewe wonopükü aramas ra towu seni fanüer o feila ren Akis nöün Maok we mwän, ewe kingen Kat.
1SA 27:3 Iwe, Tafit me nöün kewe aramas fiti en me chon leimwan ra nom ren Akis lon Kat, pwal pwülüen Tafit kewe ruoman Ahinoam seni Jesreel me Apikael seni Karmel piin pwülüen mä we Napal.
1SA 27:4 Nge lupwen Saul a rongorong pwe Tafit a süla Kat, esap chüen kütta.
1SA 27:5 Iwe, Tafit a üreni Akis, “Are ngang üa küna ümöümöch me reöm, kopwe mwüt ngeniei eu leni me lon eu lein ekewe telinimwen ei fanü, pwe üpwe imweimw ie. Pun pwota ngang noum chon angang üpwe nom reöm lon ewe telinimwen king?”
1SA 27:6 Iei mine Akis a ngeni Tafit ewe telinimw Siklak lon ewe ränin. Iei popun Siklak a eu telinimwen ekewe kingen Juta tori ikenai.
1SA 27:7 Tafit a nonom lon fanüen chon Filistia ükükün eu ier me rüanü maram.
1SA 27:8 Iwe, Tafit me nöün kewe aramas ra feila o tolong lon fanüen chon Kesur, chon Kirsi me chon Amalek. Pun seni me lom ir ra nonom lon ewe fanü tori Sur, pwal tori ewe fanü Isip.
1SA 27:9 Lupwen Tafit a maun ngeni ewe fanü, a niela ekewe mwän me fefin meinisin, a pwal angei ekewe sip me kow, ekewe aas me kamel, pwal ekewe üf, o liwiniti Akis.
1SA 27:10 Nge lupwen Akis a ais, “Ia ka angei me ie liapom ikenai?”, Tafit a pälüeni, “Üa angei seni ewe fanü Nekep lon Juta,” ika “seni ewe Nekep fanüen ewe eterekesin Jeramel,” ika “seni ewe Nekep fanüen chon Ken.”
1SA 27:11 Iwe, Tafit a niela mwän me fefin meinisin, pwe resap tongeni liwinla Kat o apworausa usun mine Tafit me nöün kewe aramas ra wesewesen föri. Iei usun mine Tafit a föri lon ükükün ewe fansoun a nonom lon fanüen chon Filistia.
1SA 27:12 Nge Akis a lükü Tafit, pun a ekieki, “Tafit a püsin föri mine epwe uren koput me ren nöün aramasen Israel, iei mine epwe nei chon angang fansoun meinisin.”
1SA 28:1 Iwe, lon ekana rän ekewe chon Filistia ra achufengeni nöür mwichen sounfiu, pwe repwe maun ngeni chon Israel. Nge Akis a üreni Tafit, “Kopwe silei pwe ämi me noum kewe aramas oupwe etiei le feila maun.”
1SA 28:2 Iwe, Tafit a üreni Akis, “A men fokun öch, ngang noum chon angang, kopwe püsin küna mine üa tongeni föri.” Nge Akis a üreni Tafit, “Men fokun öch. Üpwe awisok pwe kopwe nei chon tümwünüei lon unusen manauom.”
1SA 28:3 Lon ewe fansoun Samuel a mäla, chon Israel meinisin ra kechüeiti o peiaseni lon Rama püsin telinimwan. Iwe, Saul a asüela ekewe watawa me sourong seni ewe fanü.
1SA 28:4 Iwe, ekewe sounfiun Filistia ra mwichefengen, ra feila o nom lon Sunem. Nge Saul a achufengeni sounfiun Israel meinisin o nom won ewe chuk Kilpoa.
1SA 28:5 Lupwen Saul a küna ewe mwichen sounfiun Filistia, a niuokus o fokun chechech fän mwärin.
1SA 28:6 Iei mine Saul a aisini ewe Samol mi Lapalap mine epwe föri, nge ewe Samol mi Lapalap esap pälüeni ren tan ika ren Urim ika ren soufos.
1SA 28:7 Mürin, Saul a üreni nöün kewe chon angang, “Oupwe kütta fän itei eman watawa fefin pwe üpwe feila ren o aisini.” Nge nöün chon angang ra üreni, “Mi wor eman watawa fefin lon Entor.”
1SA 28:8 Iwe, Saul a asokala lapalapan o siwili üfan. A feila ren ewe fefin lepwin, nge ruoman mwän ra eti. Saul a üreni ewe fefin, “Kopwe angei öüröürei seni eman ngün. Kopwe fokun awarato fän itei ewe ngün üpwe föüni ngonuk itan.”
1SA 28:9 Iwe, ewe fefin a üreni, “Ka fokun silei mine Saul a föri, pwe a ärawu seni ewe fanü ekewe watawa me sourong. Pwota ka anomu och lenien likatup fän iten manauei, pwe kopwe awarato ai mäla?”
1SA 28:10 Nge Saul a pwon fän akapel iten ewe Samol mi Lapalap ngeni ewe fefin, “Mwo manauen ewe Samol mi Lapalap, esap wor feiengau epwe toruk ren ei föför.”
1SA 28:11 Mürin, ewe fefin a aisini, “Ngünün iö üpwe awarato fän itom?” Saul a pälüeni, “Kopwe awarato ngünün Samuel.”
1SA 28:12 Lupwen ewe fefin a küna ngünün Samuel, a leüömong le puchör o üreni Saul, “Pwota ka atupuei? En king Saul.”
1SA 28:13 Nge ewe king a üreni neminewe, “Kosap niuokus. Met ka küna?” Ewe fefin a üreni Saul, “Üa küna lapalapen eman ngün a tötä seni fän pwül.”
1SA 28:14 Iwe, Saul a aisini, “Ifa usun lapalapan?” Nge neminewe a pälüeni, “Ngünün eman chinlap mwän a feitä, nge a üföüf echö owokot.” Mürin, Saul a mefi pwe iei i ngünün Samuel, a chapetiu lepwül o asamolu.
1SA 28:15 Mürin, Samuel a aisini Saul, “Pwota ka aosukosukaei ren om awaraeito?” Nge Saul a üra, “Ngang üa nom lon riaföü watte. Pun ekewe chon Filistia ra maun ngeniei, nge Kot a kul seniei, esap pwal chüen pälüeniei ren ekewe soufos ika ren tan. Iei mine üa köruketo pwe kopwe üreniei mine üpwe föri.”
1SA 28:16 Iwe, Samuel a üra, “Pwota ka aisiniei, nge ewe Samol mi Lapalap a kul senuk o wiliti chon oputom?
1SA 28:17 Ewe Samol mi Lapalap a föri ngonuk usun mine a fen kapas me rei. Pun a angei senuk ewe mwü o ngeni chon arum Tafit.
1SA 28:18 Pokiten kosap aleasochisi alon ewe Samol mi Lapalap, kosap pwal fokun arosala ekewe chon Amalek, iei mine ewe Samol mi Lapalap a föri ei föför ngonuk ikenai.
1SA 28:19 Pwal ei epwe fis. Ewe Samol mi Lapalap epwe atolongok me ekewe chon Israel fän nemenien ekewe chon Filistia. Iwe, lesor ämi me noum kewe mwän oupwe nom rei. Nge ewe Samol mi Lapalap epwe pwal atolonga ewe mwichen sounfiun Israel fän nemenien ekewe chon Filistia.”
1SA 28:20 Lon ewe chök otun Saul a turuwenewenela lepwül o fokun niuokus ren mine Samuel a apasa. Esap wor an pöchökül, pun esap mongö lon unusen ewe rän me ewe pwin.
1SA 28:21 Iwe, lupwen ewe fefin a feito ren Saul, a küna pwe a fokun niuokus. A üreni, “Ngang noum chon angang fefin üa aleasochis ngonuk. Üa püsin fang manauei o aüselinga mine ka üreniei.
1SA 28:22 Kose mochen kopwe aüselinga aloi ngang noum chon angang fefin. Üpwe uwato reöm ekis mongö. Kopwe mongö pwe kopwe pöchökül, lupwen kopwe liwinla ngeni leniom.”
1SA 28:23 Iwe, Saul a apasa, “Üsap fokun mochen mongö.” Nge ekewe mwän mi eti me ewe fefin ra pesei pwe epwe mongö. Iwe, a aüselinga alor, a ütä me lepwül o mot won ewe peet.
1SA 28:24 Nge a wor ren ewe fefin eman nienifön kow mi aümanau. Iwe, a müttir niela, a pwal angei pilawa mi amas, a öüwa o umuni pilawa esap wor iis lon.
1SA 28:25 Mürin a iseis ewe mongö fän mesen Saul me ekewe mwän mi eti. Iwe, ra mongö. Mürin, ra ütä o feila lon ewe pwinin.
1SA 29:1 Iwe, ekewe chon Filistia ra achufengeni ar mwichen sounfiu meinisin lon Afek. Nge ekewe chon Israel ra nom ren ewe puächen koluk mi nom lon Jesreel.
1SA 29:2 Iwe, lupwen ekewe samolun chon Filistia ra pwerela fiti ar mwichen sounfiu lon iteiter pükü me ngeröü, Tafit me nöün aramas ra pwerela mürir fiti ewe king Akis.
1SA 29:3 Nge ekewe meilapen sounfiun Filistia ra aisini, “Met ekei re Ipru ra föri ikei?” Iwe, Akis a pälüeniir, “Iei i Tafit, nöün Saul ewe kingen Israel meilapen sounfiu, a fen nonom rei fansoun langatam. Seni ewe fansoun a süto rei, üsap küna och mi ngau ren tori ikenai.”
1SA 29:4 Nge ekewe meilapen sounfiun Filistia ra song ngeni Akis o üreni, “Kopwe aliwinala ewe mwän pwe epwe liwiniti ewe leni ka afanüa ngeni. Esap fokun etikich le feila maun, pun epwe tongeni ü ngenikich lupwen fansoun maun. Ifa usun, ren met ewe mwän epwe tongeni chä ngeni an samol? Esap chä ngeni ren an niela ekei mwän?
1SA 29:5 Ifa usun, sap iei i Tafit, ätewe ekewe fefin ra kölüfengeni, lupwen ra pworuk, ‘Saul a niela ngeröü, nge Tafit a niela lap seni engol ngeröü?’”
1SA 29:6 Mürin, Akis a kökköri Tafit o üreni, “Mwo manauen ewe Samol mi Lapalap, en ka wenechar. Me rei üa tipeeu ngeni om kopwe etiei le feila maun. Pun ngang üsap küna och mi mwäl reöm seni ewe rän ka feito rei tori ikenai. Nge ekewe samol resap tipeeu ngonuk.
1SA 29:7 Iei mine kopwe liwinla iei fän kinamwe. Nge kosap föri och mine ekewe samolun sounfiun Filistia ra oput.”
1SA 29:8 Tafit a aisini Akis, “Ifa usun, met echök üa föri? Met ka küna ngeniei ngang noum chon angang seni ewe fansoun üa popuetä angang ngonuk tori ikenai? Pwota üsap tongeni etuk, ai samol me ai king, le feila maun ngeni chon oputom?”
1SA 29:9 Nge Akis a pälüeni Tafit, “Üa silei pwe esap wor om mwäl me rei, usun eman nöün Kot chon läng esap wor an mwäl. Nge ekewe meilapen sounfiun Filistia ra üra pwe kosap etikem le feila maun.
1SA 29:10 Iei mine ämi me nöün om we samol Saul kewe chon angang mi etuk oupwe fokun pwätä lesosorusichin lesor o feila, lupwen epwe ränila.”
1SA 29:11 Iei mine Tafit me nöün kewe aramas ra feila lesosorusich pwe repwe liwiniti ewe fanüen chon Filistia. Nge ekewe chon Filistia ra feila Jesreel.
1SA 30:1 Iwe, lupwen Tafit me nöün kewe aramas ra tori Siklak lon ewe aülüngatin rän, ekewe chon Amalek ra akomwen feito won ewe fanü Nekep pwal lon Siklak, pwe repwe küt liaper. Ra pwal liapeni Siklak o kenala.
1SA 30:2 Ra uwala ekewe fefin me meinisin mi nom lon, ekewe mi kükün me ekewe mi watte. Iwe, resap niela eman, nge ra chök uweerela o feila won aler.
1SA 30:3 Iwe, lupwen Tafit me nöün kewe aramas ra feito ren ewe telinimw, ra küna pwe a kar, nge pwülüer pwal nöür mwän me fefin ra oola.
1SA 30:4 Mürin, Tafit me chokewe mi nom ren ra kechü, tori resap chüen pöchökül le kechü.
1SA 30:5 Iwe, pwülüen Tafit kewe ruoman ra pwal oola, iter Ahinoam seni Jesreel me Apikael piin pwülüen mä we Napal seni Karmel.
1SA 30:6 Iwe, Tafit a fokun riaföü, pun ekewe aramas ra ekiekin monei ngeni fau, pokiten ir meinisin ra letipengau ren nöür kewe mwän me fefin mi oola. Nge leluken Tafit a pöchökülsefäl ren ewe Samol mi Lapalap an we Kot.
1SA 30:7 Iwe, Tafit a üreni ewe souasor Apiatar nöün Ahimelek we mwän, “Kopwe uwato rei ewe efot.” Iei mine Apiatar a uwato ren Tafit ewe efot.
1SA 30:8 Iwe, Tafit a aisini ewe Samol mi Lapalap, “Ifa usun, üpwe tapweri ei mwichen sounfiu? Ifa usun, üpwe tongeni liapeniir?” Nge Kot a pälüeni, “Kopwe tapweriir, pun kopwe fokun liapeniir o amanaua ekewe mi oola.”
1SA 30:9 Iei mine Tafit a feila fiti ekewe wonopükü mwän mi nom ren. Iwe, ra tori ewe öüwö Pesor, ia ekoch me leir ra nomotiu ie.
1SA 30:10 Tafit echök a sopwela an tapweriir fiti föpükü mwän. Iwe, rüöpükü mwän ra nomotiu, pun ra men fokun malülü pwe resap chüen tongeni pwerela pekilan ewe öüwö Pesor.
1SA 30:11 Iwe, ra küna eman re Isip me lon ewe fanü mi amassawa o emwenato ren Tafit. Ra amongöni pilawa o aünü koluk,
1SA 30:12 ra pwal ngeni eu kinikinin echö nokop seni fik me ruoumw föün wain mi pwas. Nge lupwen a wes me mongö, a aiepöchökül, pun esap mongö o ün lon ükükün ülüngat rän me ülüngat pwin.
1SA 30:13 Iwe, Tafit a aisini, “En nöün iö? Ia ka feito me ie?” Nge ätewe a pälüeni, “Ngang eman alüal seni Isip, nöün eman re Amalek amanau. Ai samol a likitieila, pun a toriei och samau ülüngat rän a la.
1SA 30:14 Äm aia küt liapem lon ewe fanü Nekep fanüen chon Cheret, lon fanüen chon Juta, pwal lon ewe fanü Nekep fanüen Kalep, äm aia pwal kenala Siklak.”
1SA 30:15 Tafit a aisini, “Ifa usun, ka tongeni emwenieila ren ewe mwichen chon küt liaper?” Nge i a pälüeni, “Kopwe pwon fän akapel ngeniei iten Kot, pwe kosap nieila ika atolongaei lepöün ai samol, mürin üpwe emwenukela ren ewe mwichen chon küt liaper?”
1SA 30:16 Iwe, lupwen a emwenala Tafit ren ewe leni, ra küna ekewe chon Amalek pwe ra toropasfeil won unusen ewe fanü, ra momongö o ükün, ra pwal pworuk pokiten liaper mi chomong ra angei seni fanüen chon Filistia me fanüen chon Juta.
1SA 30:17 Sorotän ewe rän, Tafit a maun ngeni ekewe chon Amalek seni lesosorusich tori lekuniol. Esap wor eman me leir a tongeni süla, chilon chök föpükü alüal mi süla won war kamel.
1SA 30:18 Iwe, Tafit a aliwinala meinisin mine ekewe chon Amalek ra angei. A pwal amanaua ekewe aramas meinisin pwal pwülüan kewe ruoman.
1SA 30:19 Esap wor eman a pöüt seniir, ese lifilifil ika ekewe mi kükün ika ekewe mi watte, nöür ät ika nöür nengin, pwal meinisin mine ekewe chon Amalek ra liapeni ika mine ra chök angei, Tafit a aliwininala meinisin.
1SA 30:20 Iwe, Tafit a pwal angesefäli ekewe pwiin sip me kow. Iwe, nöün kewe aramas ra emwenala ekei man me mwen pwal ekewe ekoch pwin man o apasa, “Ikkei ir ekewe man Tafit a liapeni.”
1SA 30:21 Mürin, Tafit a feito ren ekewe rüöpükü mwän, chokewe ra nonometiu ren ewe öüwö Pesor, pun resap tongeni tapwela mürin Tafit pokiten ra fokun malülü. Iwe, ra feila pwe repwe churi Tafit me ekewe aramas ra eti. Lupwen Tafit a kan ngeni ekewe aramas, a kapong ngeniir.
1SA 30:22 Iwe, ekoch mwän mi ngau me manauangau me lein ekewe mwän mi eti Tafit ra üra, “Pokiten ätekewe resap etikem, äm aisap ngeniir och seni mine aia liapeni o aliwinato, chilon chök pwe eman me eman epwe angei pwülüan me nöün kana o feila.”
1SA 30:23 Mürin, Tafit a üreniir, “Pwi kana, ousap fokun föri iei usun ren mine ewe Samol mi Lapalap a fang ngenikich. I a tümwünükich seni feiengau o awinnakich pwe sa akufu ewe mwichen chon küt liaper mi fiu ngenikich.
1SA 30:24 Esap wor eman a tipeeu ngenikemi won ei ekiek. Pun ükükün inetin ätewe mi feila maun epwe chök ükükün inetin ätewe mi nonometiu ren ekewe pisek, repwe chök nönnöpök.”
1SA 30:25 Iwe, Tafit a föri pwe ei lapalap epwe eu allük me pwüng fän iten chon Israel seni ewe ränin tori ikenai.
1SA 30:26 Iwe, lupwen Tafit a tori Siklak, a tinala ekoch kinikinin liapan ren chiechian ekewe souakomwen chon Juta o üreniir, “Iei eu lifang fän itemi seni mine üa liapeni me ren chon oputen ewe Samol mi Lapalap.”
1SA 30:27 Iwe, a tinala ekewe lifang ren ekewe aramas mi nom lon Petel me Ramot mi nom lon ewe fanü Nekep, pwal ren chokewe mi nom lon Jatir,
1SA 30:28 lon Aroer, Sifmot me Estemoa,
1SA 30:29 lon Rakal, lon ekewe telinimwen chon Jeramel me chon Ken,
1SA 30:30 lon Horma, Porasan me Atak,
1SA 30:31 lon Hepron pwal lon ekewe leni meinisin ia Tafit me nöün aramas ra nonomfeil ie.
1SA 31:1 Iwe, ekewe chon Filistia ra maun ngeni ekewe chon Israel. Nge ekewe chon Israel ra süla me mwen ekewe chon Filistia o chomong ra mätiu won ewe chuk Kilpoa.
1SA 31:2 Iwe, ekewe chon Filistia ra cherikaei Saul me nöün kewe mwän. Ra niela Jonatan, Apinatap me Malkisua nöün Saul kewe mwän.
1SA 31:3 Iwe, ewe maun a fokun pöchökülela ngeni Saul. Nge lupwen ekewe chon likapich ra rangeiti Saul, ra fokun akinasa.
1SA 31:4 Mürin, Saul a üreni nöün chon uwei an pisekin maun, “Kopwe üttawu noum ketilas o posu ngeniei, pwe ekei aramas resap sirkomsais resap feito pwe repwe posuei o urumotitiei.” Nge nöün chon uwei an pisekin maun esap mochen, pun a fokun niuokus. Iei mine Saul a angei nöün ketilas o püsin posu ngeni.
1SA 31:5 Iwe, lupwen nöün Saul chon uwei an pisekin maun a küna pwe Saul a mäla, a pwal posu ngeni nöün ketilas o eti Saul le mäla.
1SA 31:6 Iei usun Saul me nöün kewe ülüman mwän, pwal nöün chon uwei an pisekin maun me nöün kewe aramas meinisin ra mälapök lon eu chök rän.
1SA 31:7 Nge lupwen ekewe chon Israel mi nom won pwal epekin ewe lemol me chokewe mi nom ötiuen ewe chanpupu Jortan ra küna pwe ekewe sounfiun Israel ra sü, nge Saul me nöün kewe mwän ra mäla, ra likitala ar kewe telinimw o süla. Mürin, ekewe chon Filistia ra feito o imweimw lor.
1SA 31:8 Nge sorotän ewe rän, lupwen ekewe chon Filistia ra feito pwe repwe angei pisekin ekewe somä, ra küna Saul me nöün kewe ülüman mwän ra mätiu won ewe chuk Kilpoa.
1SA 31:9 Iwe, ra pökü üen Saul o pwilitawu üfan üföüfen maun. Ra pwal tinala chon künö lemenen fanüen chon Filistia, pwe repwe asilefeili ewe pworaus mi mürina ngeni ar kewe uluulun anümwäl me ekewe aramas.
1SA 31:10 Iwe, ra iseis üfen Saul üföüfen maun lon ewe imwenfelin ewe anüfefin Astarot, nge inisin ra emeitiua won tittin ewe telinimw Petsan.
1SA 31:11 Nge lupwen ekewe chon Japes-kiliat ra rongorong mine ekewe chon Filistia ra föri ngeni Saul,
1SA 31:12 ekewe mwän meinisin mi pwora o pöchökül ra ütä o fetal lon unusen ewe pwin tori Petsan. Iwe, ra angei inisin Saul me nöün kewe mwän me won tittin ewe telinimw Petsan, ra liwiniti Japes o keniir ikenan.
1SA 31:13 Mürin ra angei chüür o peiaseniir fän efoch irä itan tamarisk, me lon ewe telinimw Japes, ra pwal öchüün lon ükükün fisu rän.
2SA 1:1 Iwe, mürin än Saul mäla, Tafit a liwinto seni an akufu ekewe chon Amalek o nonom Siklak lon ükükün ruu rän.
2SA 1:2 Nge lon aülüngatin rän eman mwän a feito seni ewe leni ia nöün Saul mwichen sounfiu ra nom ie. Iwe, üfan a kam, a pwal wor pwül won möküran, asisilen an letipeta. Lupwen a feito ren Tafit, a chapetiu lepwül o asamolu.
2SA 1:3 Tafit a aisini, “Ia ka feito me ie?” Ätewe a pälüeni, “Üa sü seni ewe lenien sounfiun Israel.”
2SA 1:4 Tafit a üreni, “Kopwe apworausa ngeniei mine a fis.” Ätewe a üreni, “Ekewe sounfiun Israel ra sü seni ewe maun, nge chomong leir ra mäla. Iwe, Saul me nöün we mwän Jonatan ra pwal mäla.”
2SA 1:5 Mürin, Tafit a aisini ewe alüal mi apworausa ngeni ewe pworaus, “Pwota ka silei pwe Saul me Jonatan ra mäla?”
2SA 1:6 Ewe alüal a pälüeni, “A chök fis pwe üa nom won ewe chuk Kilpoa. Ikenan üa küna Saul pwe a aünna ngeni wokun siles, nge ekewe woken me chokewe mi wawa oris seni sounfiun Filistia ra kaneto ngeni.
2SA 1:7 Lupwen a nennesökür, a künaei o kökköriei. Iwe, üa pälüeni, ‘Ngang iei.’
2SA 1:8 Saul a aisiniei, ‘En chon ia?’ Üa pälüeni, ‘Ngang eman re Amalek.’
2SA 1:9 Mürin, Saul a üreniei, ‘Kopwe feito rei o nieila, pun üa fokun kinas, nge üa chüen manau.’
2SA 1:10 Iei mine üa feila ren o niela, pun üa silei pwe esap chüen tongeni manau mürin an turula. Mürin üa angei mwärin seni won möküran, pwal an lälä seni won pöün, o uweereto reöm en ai samol.”
2SA 1:11 Mürin, Tafit a kamwei üfan, nge nöün kewe aramas mi nom ren ra pwal kamwei üfer.
2SA 1:12 Ra ngüngüres o kechü, ra pwal öchüün tori lekuniol fän iten Saul me Jonatan, pwal fän iten nöün ewe Samol mi Lapalap aramas ekewe chon Israel, pun chomong ra mäla lon maun.
2SA 1:13 Iwe, Tafit a aisini ewe alüal mi apworausa ngeni ewe pworaus, “Ia ka feito me ie?” Ätewe a pälüeni, “Ngang nöün eman chon Amalek mi siamü lon ei fanü.”
2SA 1:14 Tafit a aisini, “Pwota kosap niuokus le angatä won nöün ewe Samol mi Lapalap we mi kepit, nge ka niela?”
2SA 1:15 Mürin, Tafit a körato eman lein ekewe mwän mi eti o üreni, “Kopwe niela ätenan.” Iwe, a niela ätewe pwe a mäla.
2SA 1:16 Pun Tafit a fen üreni ewe re Amalek, “Chaom epwe ukum chök, pun kapasen awom a püsin etipisuk ren om apasa pwe ka niela nöün ewe Samol mi Lapalap we mi kepit.”
2SA 1:17 Mürin, Tafit a eäni ei kölün kechü won Saul me Jonatan nöün we mwän
2SA 1:18 o apasa pwe repwe aiti ngeni ekewe aramasen Juta. (Ei kölün kechü a mak lon ewe puken Jasar.)
2SA 1:19 “Israel, noum kewe souemwen ra ninnila me won ekewe chuk, ekewe chon pwora ra mäla.
2SA 1:20 Ousap apworausa ei pworaus lon Kat, ousap pwal asilefeili lon ekewe alen Askelon, pwe ekewe föpwülün Filistia resap pwapwa, ekewe föpwül nöün chokewe resap sirkomsais resap meseik.
2SA 1:21 Ämi kewe chukun Kilpoa, amwo esap wor amurenipwin ika üt epwe püngütiu womi, esap pwal wor uän ämi tanipi fän iten asor. Pun ikenan än ekewe mi pwora tittin maun ra limengau ren cha, än Saul tittin maun esap chüen kepit ngeni lö.
2SA 1:22 Nöün Jonatan likapich esap lomotongau, pun a asükü chan ekewe mi mäfeiengau o tililong lon fituken ekewe mi pwora. Nge nöün Saul ketilas esap liwinto fän asöülapö.
2SA 1:23 Saul me Jonatan ra chen me ren aramas o eäni kirikiröch. Resap imwüfesen lon ar manau, pwal lon ar mäla. Ra müttir seni ekewe ikel o pöchökül seni ekewe laion.
2SA 1:24 Ämi föpwülün Israel, oupwe kechüeiti Saul mi aüfa ngenikemi üf mi parapar o fokun mürina, a pwal fouteekemi ren fout seni kolt.
2SA 1:25 Ekewe sounfiu mi pwora ra mäla lon maun. Jonatan a mätiu won ekewe chuk.
2SA 1:26 Üa letipeta fän itom, pwii Jonatan. Ka fokun aüchea me rei. Om tongeei a fokun mürina lap seni än fefin tong.
2SA 1:27 Ekewe chon pwora ra mäla, ekewe pisekin maun ra tala.”
2SA 2:1 Mürin ekoch fansoun Tafit a aisini ewe Samol mi Lapalap, “Ifa usun, üpwe feila lon eu kewe telinimwen Juta?” Ewe Samol mi Lapalap a pälüeni, “Kopwe feila.” Iwe, Tafit a ais, “Meni telinimw üpwe feila lon?” Ewe Samol mi Lapalap a üreni, “Kopwe feila Hepron.”
2SA 2:2 Iei mine Tafit a feila Hepron, pwal pwülüan kewe ruoman iter Ahinoam seni Jesreel me Apikael piin pwülüen mä we Napal seni Karmel.
2SA 2:3 Tafit a pwal emwenala ekewe mwän mi nom ren fiti en me an famili. Iwe, ra imweimw lon ekewe telinimw ünükün Hepron.
2SA 2:4 Mürin, ekewe re Juta ra feito Hepron o epiti Tafit pwe epwe kingen chon Juta. Lupwen ra apworausa ngeni Tafit pwe ekewe re Japes-kiliat ra peiaseni Saul,
2SA 2:5 Tafit a tinala chon künö ren ekewe re Japes-kiliat pwe repwe üreniir, “Ewe Samol mi Lapalap epwe afeiöchükemi, pun oua pwärätä ämi kirikiröch ngeni Saul ämi we samol ren ämi peiaseni.
2SA 2:6 Ewe Samol mi Lapalap epwe pwal kirikiröch me allükülük ngenikemi. Pwal ngang üpwe öch ngenikemi, pun oua föri ei föför.
2SA 2:7 Iei oupwe pöchökül o pwora, pun Saul ämi samol a mäla, nge chon Juta ra epitiei pwe üpwe ar king.”
2SA 2:8 Iwe, Apner nöün Ner we mwän, ewe meilapen nöün Saul mwichen sounfiu, a angei Isiposet nöün Saul we mwän o emwenalong Mahanaim mi nom pekilan ewe chanpupu Jortan.
2SA 2:9 Ikenan Apner a seikätä Isiposet pwe epwe kingen Kiliat, Aser, Jesreel, Efraim me Peniamin, pwal unusen Israel.
2SA 2:10 Isiposet a ierini faik, lupwen a tolong lon wisan wisen king lon Israel. A nemenem lon ükükün ruu ier. Nge chon ewe ainangen Juta ra eti Tafit.
2SA 2:11 Iwe, Tafit a king lon Hepron o nemeni unusen Juta seni ikenan lon ükükün fisu ier me wonu maram.
2SA 2:12 Iwe, Apner me nöün Isiposet kewe sounfiu ra towu seni Mahanaim o feila Kipeon.
2SA 2:13 Nge Joap nöün Seruia we mwän me nöün Tafit kewe sounfiu ra pwal towu seni lenier o churiir arun ewe nomun Kipeon. Iwe, ra mottiu, eu mwich a nom epekin ewe nom, nge eu mwich a nom pwal epek.
2SA 2:14 Iwe, Apner a üreni Joap, “Ekewe alüal repwe ütä o fiufengen me mwach.” Joap a üra, “Ina, repwe fiu.”
2SA 2:15 Mürin ra ütä o apälüfengen, engol me ruoman seni ewe ainangen Peniamin me Isiposet, pwal engol me ruoman seni nöün Tafit kewe sounfiu.
2SA 2:16 Iwe, eman me eman a turufi möküren pälüan o en me posu lepekin pälüan ngeni nöün ketilas. Iei usun ir meinisin ra mälapök. Iei mine ewe leni a iteni Helkat-hasurim , a nom Kipeon.
2SA 2:17 Lon ewe ränin a fis eu maun mi fokun pöchökül. Nge Apner me ekewe sounfiun Israel ra kuf ren nöün Tafit kewe sounfiu.
2SA 2:18 Iwe, nöün Seruia kewe ülüman mwän Joap, Apisai me Asael ra nom ikenan. Asael a müttir le sä usun eman chia mi mwacho.
2SA 2:19 Iwe, Asael a tapweri Apner, nge lon an tapweri a sä wenewen ngeni.
2SA 2:20 Mürin, Apner a nennesökür o ais, “Ifa usun, en Asael?” Nge i a pälüeni, “Ewer, ngang Asael.”
2SA 2:21 Iwe, Apner a üreni, “Kopwe rik ngeni pelifichum ika pelimöngum o turufi eman lein ekewe alüal, pwe kopwe angei seni an kewe pisekin maun.” Nge Asael esap mochen kaüla seni an tapweri.
2SA 2:22 Mürin, Apner a kapassefäl ngeni Asael, “Kopwe kaüla seni om tapweriei. Pwota üpwe niikela? Epwe ifa usun ai üpwe nenengeni mesen pwiüm Joap me mürin?”
2SA 2:23 Nge Asael esap fokun mochen kaüla seni. Iei mine Apner a posu ngeni lukan mesen wokun siles, pwe a pwerewu me lükün sökürün. Iwe, a turutiu lepwül o mäla ikenan. Nge meinisin mi feito ren ewe leni ia Asael a turutiu o mäla ie, ra ükütä.
2SA 2:24 Iwe, Joap me Apisai ra tapweri Apner. Nge lupwen akkar a tuputiu, ra tori ewe chuk Ama arap ngeni Kia won ewe al a ale ngeni ewe fanüapön Kipeon.
2SA 2:25 Nge ekewe re Peniamin ra achufengeniir ren Apner pwe ra eu mwich, o ütä won ungen eu chuk.
2SA 2:26 Mürin, Apner a köla ren Joap, “Ifa usun, ach maunfengen epwe chök soposopola? Ifa usun, kosap silei pwe lesopolan feiengau echök? Inet kopwe üreni noum aramas pwe repwe ükütiu le tapweri pwiir?”
2SA 2:27 Nge Joap a üra, “Mwo manauen Kot, are kosap apasa iei, ellet ekei mwän resap ükütiu le tapweri pwiir tori lesosor.”
2SA 2:28 Mürin, Joap a ettiki ewe rappwa pwe ekewe mwän repwe ükütiu le tapweri chon Israel. Iei mine ar maunfengen a ükütiu.
2SA 2:29 Iwe, Apner me nöün kewe sounfiu ra feilong lon ewe lemolun Jortan lon unusen ewe pwin, ra feila pekilan ewe chanpupu Jortan o fetal lon ewe sosoran tori ra tori Mahanaim.
2SA 2:30 Lupwen Joap a liwinto seni an tapweri Apner, a amwichafengeni ekewe mwän meinisin o küna pwe engol me tiueman nöün Tafit kewe sounfiu resap chüen nom fiti Asael.
2SA 2:31 Nge nöün Tafit kewe sounfiu ra niela ükükün ülüpükü wone nöün Apner kewe sounfiu seni ewe ainangen Peniamin.
2SA 2:32 Iwe, Joap me nöün kewe mwän ra angei inisin Asael o peiaseni lon peiasen saman lon Petleem. Mürin ra fetal lon unusen ewe pwin, nge lupwen a ränila, ra tori Hepron.
2SA 3:1 Iwe, ewe maun lefilen pelien Saul me pelien Tafit a fis lon fansoun langatam. Iwe, Tafit a pöpöchökülela, nge ekewe chon ü ngeni ra akapwangapwangala.
2SA 3:2 Iwe, ikkei ir nöün Tafit kewe mwän mi uputiu me lon Hepron: Iten ewe mwänichi Amnon, a nöüni me won Ahinoam seni Jesreel.
2SA 3:3 Iten aruomanün Chileap, a nöüni me won Apikael piin pwülüen mä we Napal seni Karmel. Iten aülümanün Apsalom, a nöüni me won Maka, nge Maka nöün Talmai we fefin, ewe kingen Kesur.
2SA 3:4 Iten afömanün Atonia, a nöüni me won Hakit, iten alimanün Sefatia, a nöüni me won Apital.
2SA 3:5 Iten awonomanün Itream, a nöüni me won Ekla. Ikei ir nöün Tafit kewe mwän meinisin mi uputiu me lon Hepron.
2SA 3:6 Iwe, lupwen a fis maun lefilen pelien Saul me pelien Tafit, Apner a apöchöküla an nemenem won pelien Saul.
2SA 3:7 A wor eman ülüpwülüen Saul itan Rispa nöün Aia fefin. Lon eu rän Isiposet a üreni Apner, “Pwota ka kon ren ülüpwülüen semei?”
2SA 3:8 Mürin, Apner a fokun song ren mine Isiposet a apasa. Iwe, a üra, “Ifa usun, ka wesewesen ekieki pwe üa angang ngeni Juta? Tori ikenai üa pwärala ai allükülük ngeni chon leimwen Saul semom we, ngeni pwin kewe pwal ngeni chiechian kewe. Üsap föri met Tafit epwe akufuk ren. Nge ikenai ka atipisiei ren eman fefin.
2SA 3:9 Kot epwe nieila, are üsap afisätä fän iten Tafit mine ewe Samol mi Lapalap a pwon ngeni fän akapel.
2SA 3:10 Üpwe angei ewe wisen king seni Saul me mwirimwirin kana o seikätä Tafit pwe epwe king won Israel me Juta, pwe epwe nemenem seni Tan tori Persepa.”
2SA 3:11 Nge Isiposet a fokun niuokusiti Apner, iei mine esap tongeni apasa och fos ngeni.
2SA 3:12 Iwe, Apner a tinala chon künö ren Tafit lon Hepron o apasa, “Iö a nemeni ei fanü? Sipwe eäni eu pwonen atipeeufengen, nge ngang üpwe alisuk le aliwini ngonuk aramasen Israel meinisin.”
2SA 3:13 Tafit a üra, “Men öch, sipwe eäni eu pwonen atipeeufengen. Nge eu chök üa mochen kopwe föri. Kopwe emwenato Mikal nöün Saul we fefin, pun kosap tongeni küna mesei, are kosap emwenato.”
2SA 3:14 Mürin, Tafit a tinala chon künö ren Isiposet nöün Saul we mwän o apasa, “Kopwe ngeniei pwülüei Mikal üa liwinietiu ipükü ünüchen ewe kükün inis seni ekewe re Filistia fän itan pwe üpwe pwülüeni.”
2SA 3:15 Iei mine Isiposet a titi Mikal o angei seni pwülüan Paltiel nöün Lais we mwän.
2SA 3:16 Nge Paltiel a eti Mikal fän kechü won unusen ewe al tori Pahurim. Mürin, Apner a üreni, “Kopwe liwinla.” Iwe, a liwinla.
2SA 3:17 Iwe, Apner a churi ekewe souakomwen Israel o üreniir, “A fansoun langatam ämi mochen pwe Tafit epwe ämi king.
2SA 3:18 Iei otun oupwele apwönüetä. Pun ewe Samol mi Lapalap a pwon ngeni Tafit o apasa, ‘Ren nei chon angang Tafit üpwe amanaua nei armasen Israel seni ekewe chon Filistia, pwal seni chon oputeer meinisin.’”
2SA 3:19 Iwe, Apner a pwal kapas ngeni chon ewe ainangen Peniamin. Mürin a feila ren Tafit lon Hepron, pwe epwe üreni meinisin mine chon Israel me unusen chon ewe ainangen Peniamin ra tipeeu won pwe repwe föri.
2SA 3:20 Iwe, lupwen Apner me rüe mwän ra feito ren Tafit lon Hepron, Tafit a föri eu kametip fän iter.
2SA 3:21 Mürin, Apner a üreni Tafit, “Üpwe feila o achufengeni aramasen Israel meinisin reöm, en ai samol me ai king, pwe repwe föri eu pwonen atipeeu ngonuk, pwe kopwe nemeni meinisin ükükün mochenin letipom!” Mürin, Tafit a tinala Apner pwe epwe feila fän kinamwe.
2SA 3:22 Iwe, lon ewe otun nöün Tafit kewe aramas me Joap ra liwinto seni ar küt liaper o uwato chomong liaper. Nge Apner esap chüen nom ren Tafit lon Hepron, pun Tafit a fen tinala pwe a feila fän kinamwe.
2SA 3:23 Lupwen Joap me unusen ewe mwichen sounfiu mi eti ra feito, eman a asile ngeni Joap pwe Apner nöün Ner we mwän a feito ren king Tafit, nge ewe king a afeilai fän kinamwe.
2SA 3:24 Mürin, Joap a feila ren ewe king o üra, “Met ka föri? Nengeni, Apner a feito reöm. Pwota ka mwüt ngeni pwe a liwinla?
2SA 3:25 Ka silei pwe Apner nöün Ner we mwän a feito pwe epwe atupuk, epwe pwal ouwasacha mwökütükütum o silei meinisin mine ka föri.”
2SA 3:26 Lupwen Joap a towu seni fän mesen Tafit, a tinala chon künö mürin Apner. Iwe, ra aliwinisefälieto Apner seni ewe chönüttu lon Sira. Nge Tafit esap silei usun.
2SA 3:27 Iwe, lupwen Apner a liwiniti Hepron, Joap a emwenala ngeni ewe asamalap pwe epwe ita fos ngeni le monomon. Ikenan a posu luken Apner pwe a mäla, pokiten Apner a niela Asael pwin we.
2SA 3:28 Nge lupwen Tafit a rong ei pworaus me mürin, a üra, “Ngang me chon mwüi aisap fokun tipis tori feilfeilachök me fän mesen ewe Samol mi Lapalap pokiten mälan Apner nöün Ner we mwän.
2SA 3:29 Liwinin ei tipis epwe nom won Joap me chon leimwen saman meinisin. Amwo epwe wor lein mwirimwirin Joap mi towu seni inisir chönü mi limengau, ika aramas mi rupun pwötür, ika aramas mi öüreer, ika aramas mi mäla lon maun, ika aramas mi tütüngorfetal ener.”
2SA 3:30 Iwe, Joap me Apisai pwin we ra nimanauei Apner, pokiten Apner a niela Asael pwiir we me lon ewe maun lon Kipeon.
2SA 3:31 Mürin, Tafit a üreni Joap me ekewe aramas meinisin mi eti, “Oupwe kamwei üfemi, oupwe üföüf üf seni tuk o kechüeiti Apner.” Nge ewe king Tafit a tapwela mürin ewe pwor ewe somä a nom lon.
2SA 3:32 Iwe, ra peiaseni Apner lon Hepron, nge ewe king a leüömong le kechü ünükün peiasen Apner. Pwal aramas meinisin ra kechü.
2SA 3:33 King Tafit a eäni ei kölün kechü, “Pwota Apner a mäla usun eman aramasangau a mäla?
2SA 3:34 Poum resap ririfengen, nge pecheöm resap fötek. Usun eman a turula mwen chon föföringau, iei usun ka turula.” Iwe, aramas meinisin ra kechüeitisefäli Apner.
2SA 3:35 Mürin, ekewe aramas meinisin ra feito ren Tafit pwe repwe pesei pwe epwe mongö, lupwen a chüen rän. Nge Tafit a pwon fän akapel o apasa, “Kot epwe nieila, ika üa mongö mwen akkar esamwo tuputiu.”
2SA 3:36 Iwe, ekewe aramas meinisin ra küna ei lapalap o pwapwa ngeni, pwal mettoch meinisin mine ewe king a föri ekewe aramas ra pwapwa ngeni.
2SA 3:37 Lon ewe ränin aramas meinisin lon Israel ra weweiti, pwe esap letipen ewe king pwe Apner nöün Ner we mwän epwe mäla.
2SA 3:38 Mürin, ewe king a üreni nöün kewe aramas, “Ifa usun, oua silei pwe eman samol ika eman mi lap a mäla lon Israel ikenai?
2SA 3:39 Inamwo ika üa eman king mi kepit, nge üa chök apwangapwang ikenai. Nöün Seruia kei mwän ra kon pöchökül mwei. Ewe Samol mi Lapalap epwe liwini ngeni ewe chon föföringau ükükün an föföringau.”
2SA 4:1 Iwe, lupwen Isiposet nöün Saul we mwän a rong pwe Apner a mäla me lon Hepron, esap chüen wor an apilükülük, nge chon Israel meinisin ra rükö.
2SA 4:2 A wor ruoman mwän ren Isiposet, ir meilapen ewe mwichen sounfiu mi kütta liaper, iten eman Paana, iten pwal ewe eman Rekap. Ätekei nöün Rimon mwän ewe re Peniamin seni Perot. Iwe, Perot a nom lon kinikinin ewe fanü Peniamin.
2SA 4:3 Pun ekewe poputän aramasen Perot ra süla Kitaim o chon siamü ikenan tori ikenai.
2SA 4:4 Iwe, Jonatan nöün Saul we mwän a wor eman nöün mwän mi ter pechen itan Mefiposet. Ätei a ier limu, lupwen ewe pworaus usun än Saul me Jonatan mäla a feito seni Jesreel. Iwe, ewe chon tümwünü ewe ät a eki o süla fan. Nge lupwen a müttir le sü fan, ewe ät a turutiu pwe a mwen.
2SA 4:5 Iwe, Rekap me Paana ra feila o tori imwen Isiposet, lupwen a asösö leoloas otun pwichikaren akkar.
2SA 4:6 Ra tolong lukalapen ewe imw itä repwe angang wiich, nge ra posu luken Isiposet o süla.
2SA 4:7 Iei usun mine a fis: Lupwen ar tolong lon ewe imw, Isiposet a möür won an peet lon an rum. Iwe, ra posu o niela Isiposet, ra pwal pöküela üan. Mürin ra angei möküran o feila lon ewe lemolun Jortan lon unusen ewe pwin.
2SA 4:8 Iwe, ra uwala möküren Isiposet ren Tafit lon Hepron o üreni, “Iei möküren Isiposet nöün Saul we mwän ewe chon oputom mi elliapok o mochen niikela. Ikenai ewe Samol mi Lapalap a ngeni Saul me mwirimwirin kana chappen ar föför ngonuk, en äm samol me äm king.”
2SA 4:9 Nge Tafit a pälüeni Rekap me Paana pwin we, “Mwo manauen ewe Samol mi Lapalap mi amanauaei seni lon ai weires meinisin,
2SA 4:10 lupwen eman a feito rei lon Siklak o üreniei pwe Saul a mäla, a ekieki pwe a asileto rei eu pworaus mi mürina. Nge ngang üa turufi o niela. Iei ewe liwin üa ngeni fän iten an uwato ewe pworaus.
2SA 4:11 Nge epwe fen ifa usun, lupwen aramas mi ngau ra niela eman mwän mi pwüng me lon püsin imwan, lupwen an möür won an peet? Iei üpwe ngenikemi chappen ämi nimanauei Isiposet o ärikemiila seni won fanüfan.”
2SA 4:12 Mürin, Tafit a allük ngeni nöün kewe sounfiu pwe repwe niela Rekap me Paana. Iwe, ra nirela, ra pöküela pöür me pecher o aitiueretä ünükün ewe nomun Hepron. Nge ra angei möküren Isiposet o peiaseni lon peiasen Apner lon Hepron.
2SA 5:1 Mürin, chon ekewe ainangen Israel meinisin ra feito ren Tafit lon Hepron o üreni, “Nengeni, äm chaom me fitukom.
2SA 5:2 Lon ekewe fansoun lom, lupwen Saul a chüen nemenikem, en ewe ka fen emweni ewe mwichen sounfiun Israel lon maun. Iwe, ewe Samol mi Lapalap a pwal urenuk, ‘En kopwe chon masen nei aramasen Israel, kopwe pwal ar king.’”
2SA 5:3 Lupwen ekewe souakomwen Israel ra feito ren ewe king Tafit lon Hepron, Tafit a eäni eu pwonen atipeeu ngeniir fän mesen ewe Samol mi Lapalap lon Hepron. Iwe, ra epiti Tafit pwe epwe kingen Israel.
2SA 5:4 Tafit a ierini ilik, lupwen a tolong lon wisan wisen king, nge a nemenem lon ükükün faik ier.
2SA 5:5 Iwe, Tafit a nemeni Juta lon ükükün fisu ier me wonu maram me lon Hepron, nge a nemeni unusen Israel me Juta lon ükükün ilik me ülüngat ier me lon Jerusalem.
2SA 5:6 Iwe, Tafit me nöün kewe mwän ra feila Jerusalem pwe repwe maun ngeni ekewe chon Jepus, ir chon wiliposun ewe fanü mi apasa ngeni Tafit, “Kosap fokun tolong ikei, pun ekewe mwo mi mesechun me ekewe mi mwen repwe pineek.” Ra ekieki pwe Tafit esap tongeni tolong lon.
2SA 5:7 Nge Tafit a liapeni ewe leni mi pöchökül itan Sion, iei mine a iteni telinimwen Tafit.
2SA 5:8 Iwe, lon ena ränin Tafit a üra, “Iö a mochen niela ekewe chon Jepus epwe tötä me lon ewe alen koluk fän pwül o maun ngeni ekewe mi mwen me ekewe mi mesechun, chokewe ngang üa oputeer.” Iei mine a fis ei fos, “Ewe mi mesechun me ewe mi mwen resap tolong lon ewe imw.”
2SA 5:9 Mürin, Tafit a imweimw lon ewe leni mi pöchökül o aita ngeni telinimwen Tafit. Iwe, a aüetä ewe telinimw pwelin ünükün ewe leni popuetä seni ewe leni mi amasou peliötiuen ewe pal.
2SA 5:10 Nge Tafit a pöpöchökülela, pun Kot ewe Samol mi Unusen Manaman a eti.
2SA 5:11 Iwe, Hairam kingen Tirus a tinala chon künö ren Tafit, a pwal tinala irä setar, taikü me chon ses fau. Iwe, ra aüetä eu imw fän iten Tafit.
2SA 5:12 Iei mine Tafit a mefi pwe ewe Samol mi Lapalap a anüküchara lon wisan wisen king lon Israel, a pwal afefeitäi mwün fän iten nöün aramasen Israel.
2SA 5:13 Mürin än Tafit feito seni Hepron, a angei pwal ekoch ülüpwülüan me pwülüan lon Jerusalem. Iwe, a pwal wor nöün Tafit ät me nengin mi uputiu ngeni.
2SA 5:14 Iwe, ikkei iten nöün kewe mi uputiu ngeni me lon Jerusalem: Samua, Sopap, Natan, Salomon,
2SA 5:15 Ipar, Elisua, Nefek, Jafia,
2SA 5:16 Elisama, Eliata me Elifelet.
2SA 5:17 Iwe, lupwen ekewe chon Filistia ra rong pwe Tafit a seikitä kingen Israel, nöür kewe sounfiu ra feila pwe repwe aoi Tafit. Nge lupwen Tafit a rong usun, a feitiu ngeni ewe leni mi pöchökül.
2SA 5:18 Iwe, ekewe chon Filistia ra feito o chonifetalei lon ewe lemolun Refaim.
2SA 5:19 Nge Tafit a aisini ewe Samol mi Lapalap, “Ifa usun, üpwe feila maun ngeni ekewe chon Filistia? Ifa usun, kopwe awinnaei?” Iwe, ewe Samol mi Lapalap a üreni Tafit, “Kopwe feila maun, pun ngang üpwe fokun awinnok pwe kopwe akufu ekewe chon Filistia.”
2SA 5:20 Iei mine Tafit a feila Paal-perasim o akufu ekewe chon Filistia me ikenan. Iwe, Tafit a apasa, “Ewe Samol mi Lapalap a küütalong ekewe tettelin sounfiu mi oputaei usun puun eu chanpupu a pwangenalong ewe fanü ünükün.” Iei mine ewe leni a iteni Paal-perasim.
2SA 5:21 Iwe, lupwen ekewe chon Filistia ra sü, ra likitala nöür kewe uluulun anümwäl ikenan, nge Tafit me nöün kewe mwän ra uweerela.
2SA 5:22 Mürin, ekewe chon Filistia ra pwal feitosefäl o chonifetalei lon ewe lemolun Refaim.
2SA 5:23 Nge lupwen Tafit a aisini ewe Samol mi Lapalap usun mine epwe föri, i a üreni, “Kosap fetal wenewen ngeniir, nge kopwe pwelila lükisökürür o maun ngeniir seni akawenewenen ekewe irä pwokus.
2SA 5:24 Iwe, lupwen kopwe rongorong mwaataaten peche leülün ekewe irä pwokus, lon ena otun kopwe popuetä le maun ngeniir. Pun ngang ewe Samol mi Lapalap üpwe akomwola mwom, pwe üpwe niela ekewe sounfiun Filistia.”
2SA 5:25 Iwe, Tafit a föri usun mine ewe Samol mi Lapalap a allük ngeni o niela ekewe chon Filistia seni Kepa tori Keser.
2SA 6:1 Iwe, Tafit a achufengenisefäli ekewe re Israel meinisin mi kefil ükükür ilik ngeröü.
2SA 6:2 Mürin, Tafit me ekei aramas meinisin ra feila Pala lon Juta, pwe repwe angei seni ikenan än Kot we pworofel mi iteni iten ewe Samol mi Unusen Manaman, ewe mi mot won an lenien motun king asen ekewe kerop mi nom won ewe pworofel.
2SA 6:3 Iwe, ra angei än Kot we pworofel me lon imwen Apinatap mi nom won ewe chuk, o anomu won efoch minefön woken. Nge Usa me Ahio nöün Apinatap kewe mwän ra wisen uwei ewe minefön woken,
2SA 6:4 ia än Kot we pworofel a nom ie. Iwe, Ahio a feila mwen ewe pworofel.
2SA 6:5 Nge Tafit me chon Israel meinisin ra pworuk fän ar pöchökül me fän mesen ewe Samol mi Lapalap ren köl me tikin ükülele me kitar, pwal ren sokopaten pisekin kaktai.
2SA 6:6 Iwe, lupwen ra tori än Nakon lenien wichiwich umwun wiich, Usa a aitewu pöün o amwöchü än Kot we pworofel, pun ekewe ätemwänin kow ra chepetek.
2SA 6:7 Nge ewe Samol mi Lapalap a song ngeni Usa o niela me ikenan, pun a aitiewu pöün o amwöchü ewe pworofel. Iwe, Usa a mäla ikenan ünükün än Kot we pworofel.
2SA 6:8 Iei mine ewe leni a iteni Peres-usa tori ikenai. Mürin, Tafit a riaföü, pokiten ewe Samol mi Lapalap a niela Usa.
2SA 6:9 Lon ewe ränin Tafit a niuokusiti ewe Samol mi Lapalap o apasa, “Ifa usun, än ewe Samol mi Lapalap we pworofel epwe tongeni nom rei?”
2SA 6:10 Iei mine Tafit esap mochen angei än ewe Samol mi Lapalap we pworofel pwe epwe uwalong lon Jerusalem. Nge a uwala ngeni imwen Opet-etom ewe re Kit.
2SA 6:11 Iwe, än ewe Samol mi Lapalap we pworofel a nonom lon imwen Opet-etom ewe re Kit lon ükükün ülüngat maram. Nge ewe Samol mi Lapalap a afeiöchü Opet-etom me chon leimwan meinisin.
2SA 6:12 Iwe, eman a asile ngeni ewe king Tafit, “Ewe Samol mi Lapalap a afeiöchü chon leimwen Opet-etom me meinisin mine a eäni, pokiten än Kot we pworofel a nom ren.” Iei mine Tafit a feila, a uwei än Kot we pworofel seni imwen Opet-etom o uwala ngeni Jerusalem fän pwapwa.
2SA 6:13 Nge lupwen ekewe mwän mi eki än ewe Samol mi Lapalap we pworofel ra aipwala woneipw, Tafit a öürela o eäni asor eman ätemwänin kow me eman nienifön kow mi kitinup.
2SA 6:14 Iwe, Tafit a pworuk fän mesen ewe Samol mi Lapalap fän an pöchökül, nge a üföüf echö üf mi pwechepwech itan efot.
2SA 6:15 Iei usun Tafit me chon Israel meinisin ra uwala än ewe Samol mi Lapalap we pworofel fän mweireir me tikin rappwa.
2SA 6:16 Iwe, lupwen ra mwärelong än ewe Samol mi Lapalap we pworofel lon Jerusalem, Mikal nöün Saul we fefin a newu seni ewe asammwacho o küna ewe king Tafit pwe a mwetemwet o pworuk fän mesen ewe Samol mi Lapalap. Iwe, a turunufasei Tafit lon lelukan.
2SA 6:17 Iwe, ra uwato än ewe Samol mi Lapalap we pworofel o uwalong lon ewe imw mangaku Tafit a aüetä fän iten ewe pworofel. Mürin, Tafit a eäni asoren kek me asoren kinamwe ngeni ewe Samol mi Lapalap.
2SA 6:18 Lupwen Tafit a wes le eäni ekewe asoren kek me asoren kinamwe, a afeiöchü ekewe aramas fän iten ewe Samol mi Unusen Manaman.
2SA 6:19 Iwe, a aineti efoch pilawa, eu kinikinin fituk me echö nokop seni föün wain mi apwas ngeni eman me eman mwän me fefin me lein ewe mwicheichen aramasen Israel. Mürin, ekewe aramas meinisin ra liwiniti en me imwan.
2SA 6:20 Lupwen Tafit a liwiniti imwan pwe epwe afeiöchü chon an famili, Mikal nöün Saul we fefin a towu pwe epwe churi. Iwe, a üra, “Mwa met, ewe kingen Israel a püsin aitöchü ikenai. A püsin aselelai ikenai me fän mesen ekewe chon angang fefin nöün nöün kewe nöüwis, usun eman mi akkochofäsä a säwemang le püsin aselelai.”
2SA 6:21 Mürin, Tafit a üreni Mikal, “Ngang üa pworuk fän mesen ewe Samol mi Lapalap mi filiei mwen semom pwal mwen chon leimwan meinisin, pwe epwe seikieitä samolun chon Israel nöün ewe Samol mi Lapalap aramas. Iei mine üpwe pworuk fän mesen ewe Samol mi Lapalap.
2SA 6:22 Üpwe atekisonaei lap seni ei. Üpwe itengau me reöm, nge ren ekewe föpwül ka kapas usur üpwe iteüöch rer.”
2SA 6:23 Iwe, Mikal nöün Saul we fefin a rit tori ränin an mäla.
2SA 7:1 Iwe, lupwen ewe king Tafit a nom lon imwan, nge ewe Samol mi Lapalap a asösöü seni chon oputan meinisin mi nom ünükün,
2SA 7:2 ewe king a üreni ewe soufos Natan, “Nengeni, üa nom lon eu imw mi för seni ewe irä setar, nge än Kot we pworofel a chök nom lon eu imw mangaku.”
2SA 7:3 Iwe, Natan a üreni ewe king, “Kopwe föri meinisin mine ka ekieki lon lelukom, pun ewe Samol mi Lapalap a etuk.”
2SA 7:4 Nge lon ewe chök pwinin ewe Samol mi Lapalap a kapas ngeni Natan,
2SA 7:5 “Kopwe feila o üreni nei chon angang Tafit, pwe iei aloi ngang ewe Samol mi Lapalap: Kosap aüetä eu imwenfel fän itei pwe üpwe nom lon.
2SA 7:6 Pun üsap nom lon eu imwenfel seni ewe ränin üa emwenawu ekewe aramasen Israel seni Isip tori ikenai. Nge üa chök saifetal fän eu imw mangaku pwe imwei.
2SA 7:7 Lon ekewe leni meinisin ia üa saifetal ie me ekewe chon Israel meinisin üsamwo aisini eman lein ekewe souemwenin Israel, chokewe üa awiseer pwe repwe chon masen nei aramas, ‘Pwota ousap aüetä eu imwenfel seni irä setar fän itei?’
2SA 7:8 Iei mine kopwe üreni nei chon angang Tafit, pwe iei aloi ngang ewe Samol mi Unusen Manaman: Üa angeek seni om tümwünü sip lemäl pwe kopwe samolun nei aramasen Israel.
2SA 7:9 Üa etuk ekis meinisin ia ka feila ie, üa pwal ärala chon oputom meinisin me mwom. Üpwe aitöchü itom usun chök iteüöchün iten ekewe meilap won fanüfan.
2SA 7:10 Iwe, üpwe filätä eu leni fän iten nei aramasen Israel, üpwe fotukiretiu ikenan pwe repwe nonom lon püsin lenier, nge esap wor eman epwe chüen osukosukeer. Iwe, ekewe aramasangau resap chüen ariaföüür usun ra ariaföüür me lom,
2SA 7:11 lon ewe fansoun üa seikätä soukapwüng won nei aramasen Israel. Iwe, üpwe tümwünuk seni chon oputom meinisin. Ngang ewe Samol mi Lapalap üa pwal asile ngonuk pwe üpwe awora mwirimwirum.
2SA 7:12 Iwe, lupwen ränin manauom repwe müchüla o kopwe peias ren om kewe lewo, üpwe seikätä eman noum mwän pwe epwe king, üpwe pwal anüküchara mwün.
2SA 7:13 Ätewe epwe aüetä eu imw fän itei, nge ngang üpwe anüküchara an nemenem lon mwün tori feilfeilachök.
2SA 7:14 Iwe, ngang üpwe saman, nge i epwe nei. Lupwen epwe föföringau, üpwe emiriti ren wokun aramas, üpwe pwal wichi usun eman sam a wichi nöün.
2SA 7:15 Nge üsap angei seni ai tong ellet, usun üa angei seni Saul, ätewe üa pöütala me mwom.
2SA 7:16 Iwe, üpwe afisi mwirimwirum, nge mwum me om nemenem epwe nüküchar me fän mesei tori feilfeilachök.”
2SA 7:17 Iwe, Natan a apworausa ngeni Tafit ükükün ekei kapas meinisin ewe Samol mi Lapalap a pwäri ngeni.
2SA 7:18 Mürin, ewe king Tafit a tolong lon ewe imwenfel seni mangaku, a mot fän mesen ewe Samol mi Lapalap o iotek, “Ngang iö, ai Kot Samol mi Lapalap, nge iö mwirimwiri pwe ka emwenieito tori ei aükükün?
2SA 7:19 Nge ei mettoch a chök kükün me reöm, ai Kot Samol mi Lapalap. Ka pwal pwon fän iten mwirimwiri ngang noum chon angang lon kan fansoun mwach. Ifa usun, iei usun pwüngün om föför ngeni aramas, ai Kot Samol mi Lapalap?
2SA 7:20 Pwal met ngang üpwe chüen apasa ngonuk? Pun en ka sileei ngang noum chon angang, ai Kot Samol mi Lapalap.
2SA 7:21 En ka föri ekei föför mi lapalap pokiten ka pwon, pwal pokiten iei mochenin letipom, pwe ngang noum chon angang üpwe silei.
2SA 7:22 Ka men fokun manaman, ai Kot Samol mi lapalap. Esap wor eman Kot usun en, esap pwal wor eman Kot ünükum. Iei usun mine äm aia silei.
2SA 7:23 Ifa usun, mi wor aramasen eu mwü won fanüfan ra wewe ngeni noum aramasen Israel? Ka amanaueer pwe repwe noum aramas. Ka alinga itom o föri föför mi lapalap o eniweniw ren om asüela chon ekewe mwü me ar kewe kot me mwen noum aramas, chokewe ka amanaueer seni Isip.
2SA 7:24 Iwe, ka filätä ekewe aramasen Israel, pwe repwe noum tori feilfeilachök. Nge en, ai Samol mi Lapalap, ka wiliti ar Kot.
2SA 7:25 Iei ai Samol mi Lapalap kopwe apwönüetä tori feilfeilachök ewe pwon ka eäni ngeniei ngang noum chon angang, pwal ngeni mwirimwiri, o föri usun mine ka pwonei.
2SA 7:26 Iwe, itom epwe fokun itetekia tori feilfeilachök. Mürin, aramas repwe apasa, ‘Ewe Samol mi Unusen Manaman i Koten Israel.’ Nge mwirimwiri ngang noum chon angang repwe nonomola me fän mesom.
2SA 7:27 Pun en, ai Samol mi Unusen Manaman Koten Israel, ka pwärätä ngeniei ngang noum chon angang ekei kapas o apasa pwe kopwe awora mwirimwiri, pwe repwe king. Iei popun ngang üa tongeni eäni ei iotek ngonuk.
2SA 7:28 Ai Kot Samol mi Lapalap, en Kot, om kapas ra let. En ka pwonei ekei mettoch mi mürina ngeniei ngang noum chon angang.
2SA 7:29 Iei mine kose mochen kopwe afeiöchü mwirimwiri ngang noum chon angang, pwe repwe nonomola me fän mesom tori feilfeilachök. Pun en, ai Samol mi Lapalap, ka kapas, nge mwirimwiri kewe ngang noum chon angang repwe feiöch reöm tori feilfeilachök.
2SA 8:1 Iwe, mürin ekoch fansoun Tafit a maun ngeni ekewe chon Filistia, a akufuur o atolongeer fän nemenian. A angei Metek-ama seni fän nemenien ekewe chon Filistia.
2SA 8:2 Tafit a pwal akufu chon Moap. A akonerela won pwül lon tettelir o aükü ngeniir och aükük. Iwe, ekewe aramas mi küür ruu kinikinin ewe aükük a nirela, nge iö a küw ewe aülüngatin kinikin a amanaua. Iei usun ekewe chon Moap ra nom fän nemenien Tafit o takises ngeni.
2SA 8:3 Mürin, Tafit a pwal akufu Hatateser nöün Rehop we mwän ewe kingen Sopa, lupwen ätewe a feila pwe epwe aworasefäli an nemenem won ewe fanü arun ewe chanpupu Oifrat.
2SA 8:4 Tafit a liapeni seni Hatateser ükükün engeröü füpükü chon wawa oris me rüe ngeröü sounfiu mi fetal. A pwal pökü selin pechen ekewe oris meinisin mi nukunuk woken, nge a likiti ekoch oris fän iten ükükün ipükü woken.
2SA 8:5 Iwe, lupwen ekewe sounfiun Siria seni Tamaskus ra feito pwe repwe alisi Hatateser, Tafit a maun ngeniir o niela ükükün rüe me ruu ngeröü me leir.
2SA 8:6 Mürin, Tafit a anomu mwichen sounfiu lon Siria. Ekewe chon Siria ra nom fän nemenien Tafit o takises ngeni. Iwe, ewe Samol mi Lapalap a awinna Tafit ekis meinisin ia a feila ie.
2SA 8:7 Tafit a angei o uweela Jerusalem ekewe tittin maun seni kolt nöün Hatateser kewe meilap ra uwei.
2SA 8:8 Ewe king Tafit a pwal angei chomong piras seni Peta me Perotai ekewe telinimwen Hatateser.
2SA 8:9 Iwe, lupwen Toi ewe kingen Hamat a rong pwe Tafit a akufu nöün Hatateser kewe mwichen sounfiu meinisin,
2SA 8:10 a tinala nöün we mwän Joram ren ewe king Tafit, pwe epwe uwei an kapong ngeni o eäni kapasen etiwetiw ngeni pokiten an akufu Hatateser lon maun. Pun Hatateser a maun ngeni Toi fän chomong. Joram a pwal uwala lifang ren Tafit pisek seni silifer, kolt me piras.
2SA 8:11 Iwe, ekei pisek ewe king Tafit a apini fän iten ewe Samol mi Lapalap o achu ngeni ewe silifer me kolt a fen apini, pun liapan seni ekewe mwü meinisin a atolongeer fän nemenian.
2SA 8:12 A apini mine a liapeni seni Etom, Moap, pwal seni ekewe chon Amon, chon Filistia me Amalek, pwal liapan seni Hatateser nöün Rehop we mwän ewe kingen Sopa.
2SA 8:13 Iwe, än Tafit iteföüla a wattela, lupwen a liwinsefäl seni an niela engol me walu ngeröü chon Etom lon ewe lemolun salt.
2SA 8:14 Tafit a anomu mwichen sounfiu lemenen Etom, nge chon Etom meinisin ra nom fän nemenien Tafit. Iwe, ewe Samol mi Lapalap a awinna Tafit ekis meinisin ia a feila ie.
2SA 8:15 Iwe, Tafit a nemeni unusen Israel o föri mine a öch o pwüng ngeni nöün aramas meinisin.
2SA 8:16 Joap nöün Seruia we mwän i meilapen ewe mwichen sounfiu, nge Jehosafat nöün Ahilut we mwän a soumak.
2SA 8:17 Satok nöün Ahitup we mwän me Ahimelek nöün Apiatar we mwän ra souasor, nge Saraia a seketeri.
2SA 8:18 Penaia nöün Jehoiata we mwän i meilapen ekewe chon Cheret me chon Pelet, ir chon tümwünü ewe king, nge nöün Tafit kewe mwän ir nöün ewe king chon öüröür.
2SA 9:1 Iwe, lon eu rän Tafit a ais, “Ifa usun, a wor eman seni än Saul famili mi chüen manau, pwe üpwe kirikiröch ngeni fän iten Jonatan?”
2SA 9:2 Nge a wor eman chon angang seni lon än Saul famili itan Sipa, ra titi pwe epwe feito ren Tafit. Iwe, Tafit a aisini, “En Sipa?” A palüeni, “Ewer, ngang noum chon angang.”
2SA 9:3 Mürin, ewe king a aisini, “Ifa usun, esap wor eman seni än Saul famili mi chüen manau, pwe üpwe eäni kirikiröch ngeni, usun üa fen pwon ngeni Kot.” Sipa a üreni ewe king, “Mi wor eman nöün Jonatan mwän a chüen manau, nge a ter pechen.”
2SA 9:4 Iwe, ewe king a aisini, “Ia a nom ie?” Sipa a üreni, “A nom lon imwen Makir nöün Amiel we mwän lon Lotepar.”
2SA 9:5 Mürin, ewe king Tafit a tinala chon künö pwe repwe emwenato Mefiposet seni lon imwen Makir.
2SA 9:6 Iwe, lupwen Mefiposet nöün Jonatan we mwän, nge Jonatan nöün Saul, a feito ren Tafit, a chapetiu lepwül o asamolu. Tafit a apasa, “Mefiposet.” Nge i a üreni, “Ngang noum chon angang.”
2SA 9:7 Mürin, Tafit a üreni, “Kosap niuokus, pun ngang üpwe kirikiröch ngonuk fän iten Jonatan semom we. Ngang üpwe aliwini ngonuk ekewe fanü meinisin fanüen Saul semelapom we, nge en kopwe mongö seni ai chepel fansoun meinisin.”
2SA 9:8 Iwe, Mefiposet a chapetiusefäl ngeni Tafit o üra, “Met aücheai ngang noum chon angang, pwe kopwe kirikiröch ngeniei, nge ngang üa usun chök eman kolak mi mäla.”
2SA 9:9 Mürin, ewe king a titi Sipa nöün Saul we chon angang o üreni, “Meinisin mine än Saul pwal meinisin mine än chon an famili üa ngeni Mefiposet nöün om we samol.
2SA 9:10 Nge ämi me noum kewe mwän pwal noum kewe chon angang oupwe fotuki ewe fanü fän iten Mefiposet o uwato uan, pwe epwe wor enen än om we samol famili. Nge Mefiposet epwe mongö seni ai chepel fansoun meinisin.” Iwe, a wor engol me limman nöün Sipa mwän, pwal rüe chon angang.
2SA 9:11 Mürin, Sipa a üreni ewe king, “Ngang noum chon angang üpwe föri meinisin mine en ai samol me ai king ka allük ngeniei.” Iei mine Mefiposet a mongö seni än Tafit chepel usun chök eman lein nöün ewe king mwän.
2SA 9:12 A wor eman nöün Mefiposet kükün ät itan Mika. Iwe, chon än Sipa famili meinisin ra wiliti nöün Mefiposet chon angang.
2SA 9:13 Nge Mefiposet mi mä pechen me ruofoch a imweimw lon Jerusalem o mongö seni än ewe king chepel fansoun meinisin.
2SA 10:1 Ekoch fansoun mürin, Nahas ewe kingen chon Amon a mäla, nge Hanun nöün we mwän a siwili lon wisan wisen king.
2SA 10:2 Iwe, Tafit a üra, “Üpwe kirikiröch ngeni Hanun, usun Nahas saman we a kirikiröch ngeniei.” Iei mine Tafit a tinala nöün chon künö, pwe repwe aururu Hanun pokiten än saman mäla. Nge lupwen nöün Tafit kewe chon angang ra tori ewe fanüen chon Amon,
2SA 10:3 ekewe samolun chon Amon ra üreni Hanun ar we king, “Ifa usun, ka ekieki pwe Tafit a tinato chon aururuk pokiten an mochen asamolu semom? Ifa usun, Tafit esap fen tinato nöün chon angang reöm pwe repwe ouwasacha ewe telinimw o operi, pun repwe ataela?”
2SA 10:4 Iei mine Hanun a turufi nöün Tafit kewe chon angang, a räisöüla epekin alüsen eman me eman leir o pöküela üfer me won wilar. Mürin a tinirela.
2SA 10:5 Lupwen ra asile ngeni Tafit ei pworaus, a tinala chon künö pwe repwe uwala an pworaus ngeniir, pun ekewe mwän ra fokun säw. Iei alon ewe king, “Oupwe chök nonom lon Jeriko tori alüsemi epwe pwüksefäl. Mürin oupwap liwinto.”
2SA 10:6 Iwe, lupwen ekewe chon Amon ra mefi pwe Tafit a oput ir, ra titi o möni rüe ngeröü sounfiu mi fetal re Siria seni Peterehop me Sopa, ewe kingen Maaka fiti engeröü mwän, pwal engol me ruungeröü re Top.
2SA 10:7 Lupwen Tafit a rong usun, a tinala Joap me ewe mwichen sounfiu meinisin.
2SA 10:8 Iwe, ekewe re Amon ra feito o tettelila mwen asamalapen tittin ar we telinimw Rapa. Nge ekewe re Siria seni Sopa me Rehop me ekewe re Top pwal Maaka ra imwüla o tettelila lon ewe fanü mi amassawa.
2SA 10:9 Iwe, lupwen Joap a küna pwe ekewe sounfiu ra sousou me mwan me lükisökürün, a fili ekoch mwän mi pwora seni meinisin me lon Israel o atetteliir pwe repwe maun ngeni ekewe sounfiun Siria.
2SA 10:10 Nge ekewe lusun nöün sounfiu a atolongeer fän nemenien Apisai pwin we. Iwe, Apisai a atetteliir pwe repwe maun ngeni ekewe sounfiun Amon.
2SA 10:11 Joap a üreni Apisai, “Are ekewe re Siria ra kon pöchökül ngeniei, ina otun kopwe alisiei. Nge are ekewe re Amon ra kon pöchökül ngonuk, ina otun üpwe feila o alisuk.
2SA 10:12 Kopwe tipepwora. Sipwe tipen mwän fän iten nöüch aramas, pwal fän iten ekewe telinimwen ach we Kot. Nge ewe Samol mi Lapalap epwe föri mine a öch me ren.”
2SA 10:13 Mürin, Joap me nöün kewe sounfiu ra kaneto o maun ngeni ekewe sounfiun Siria. Iwe, ekewe sounfiun Siria ra sü me mwan.
2SA 10:14 Nge lupwen ekewe sounfiun Amon ra küna pwe ekewe sounfiun Siria ra sü, pwal ir ra sü me mwen Apisai o sülong lon ewe telinimw. Mürin, Joap a liwin seni an maun ngeni ekewe sounfiun Amon o feito Jerusalem.
2SA 10:15 Lupwen ekewe sounfiun Siria ra küna pwe ra kuf ren ekewe sounfiun Israel, ra achufengeniir meinisin.
2SA 10:16 Mürin, king Hatateser a titi o körato ekewe sounfiun Siria mi nom ötiuen ewe chanpupu Oifrat. Iwe, ra feito Hilam, nge Sopak ewe meilapen nöün Hatateser mwichen sounfiu a emweniir.
2SA 10:17 Lupwen ei pworaus a tori Tafit, a achufengeni ekewe sounfiun Israel meinisin, a feila pekilan ewe chanpupu Jortan o tori Helam. Iwe, ekewe sounfiun Siria ra atettelirela o maun ngeni Tafit.
2SA 10:18 Nge ekewe sounfiun Siria ra sü me mwen ekewe sounfiun Israel. Iwe, Tafit me nöün kewe sounfiu ra niela ükükün füpükü sounfiun Siria mi wawa woken, pwal faik ngeröü chon wawa oris, ra pwal akinasa Sopak ewe meilapen ar mwichen sounfiu pwe a mäla ikenan.
2SA 10:19 Iwe, lupwen ekewe king meinisin, ir mi nom fän nemenien Hatateser, ra küna pwe ra kuf ren ekewe sounfiun Israel, ra föri kinamwe ngeniir o atolongeer fän nemenier. Iei mine ekewe chon Siria ra niuokus ren ar repwe chüen alisi ekewe chon Amon.
2SA 11:1 Iwe, eu ier mürin, lepoputän fansoun leräs, lupwen ekewe king ra feila maun, Tafit a tinala Joap fiti nöün kewe meilap me ekewe sounfiun Israel meinisin. Ra akufu ekewe chon Amon o pwelifeili Rapa fän pisekin maun. Nge Tafit a chök nonom lon Jerusalem.
2SA 11:2 Iwe, a fis lon eu olopalan, lupwen Tafit a pwätä seni an lenien asösö o fetal won imwan imwen king, a küna seni won imwan eman fefin mi tütü. Nge ewe fefin a fokun liöch.
2SA 11:3 Mürin, Tafit a tini eman pwe epwe ais usun ewe fefin. Iwe, eman a üreni, “Pwota, nge Patsipa nöün Eliam we fefin pwülüen Uria ewe re Hit.”
2SA 11:4 Iei mine Tafit a tinala chon künö pwe repwe angei Patsipa. Iwe, neminewe a feito ren Tafit, nge Tafit a kon ren. Lon ewe otun neminewe a kärän wes seni an limelim seni an samaun fefin. Mürin, a liwiniti imwan.
2SA 11:5 Iwe, Patsipa a mefi pwe a pwopwo. A tinala pworaus ren Tafit o üreni, “Ngang üa pwopwo.”
2SA 11:6 Mürin, Tafit a tinala pworaus ren Joap o üra, “Kopwe tinato rei Uria ewe re Hit.” Iei mine Joap a tinala Uria ewe re Hit ren Tafit.
2SA 11:7 Iwe, lupwen Uria a feito ren, Tafit a aisini usun Joap pwal usun ekewe sounfiu, ika ra nonomöch, a pwal ais usun lapalapen ewe maun.
2SA 11:8 Mürin, Tafit a üreni Uria, “Kopwe feila lon imwom o asösö mwo ekis.” Nge lupwen Uria a towu seni ewe imwen king, Tafit a atapwala mürin eu lifang.
2SA 11:9 Nge Uria esap feila lon imwan, pwe a chök annut leasamalapen ewe imwen king fiti nöün ewe king kewe chon angang meinisin.
2SA 11:10 Lupwen ra üreni Tafit pwe Uria esap feila lon imwan, Tafit a aisini Uria, “Ifa usun, kosap liwinto seni eu leni mi toau? Pwota kosap feila lon imwom?”
2SA 11:11 Iwe, Uria a üreni Tafit, “Ewe pworofel pwal chon Israel me chon Juta ra nom lon imw mangaku lon wirasen maun, nge ai samol Joap me noum kewe meilap ra nom lon eu leni mi äsewewetä. Ifa usun ai üpwe feila lon imwei pwe üpwe mongö o ün pwal kon ren pwülüei? Mwo manauom, üsap föri iei usun.”
2SA 11:12 Mürin, Tafit a üreni Uria, “Kopwe nomotiu ikei ikenai, nge lesor üpwe tinukela.” Iei mine Uria a nom lon Jerusalem lon ewe rän tori sorotan.
2SA 11:13 Iwe, Tafit a körato pwe epwe mongö ren o ün, a pwal asakaua. Nge lon ewe kuniolun Uria esap pwal feila lon imwan, pwe a kon lon kian fiti nöün ewe king kewe chon angang.
2SA 11:14 Nge sorotän ewe rän Tafit a makei echö toropwe ngeni Joap o tini ngeni Uria.
2SA 11:15 Iwe, lon ewe toropwe a makei, “Kopwe akomwa Uria me mwen ewe ia ewe maun a kon pöchökül ie. Mürin kopwe kul seni pwe ekewe chon oputemi repwe niela.”
2SA 11:16 Lupwen Joap a pwelifeili ewe telinimw fän pisekin maun, a anomu Uria lon eu leni a silei pwe ekewe ätepwora ra nom ie.
2SA 11:17 Iwe, sounfiun ewe telinimw ra towu o maun ngeni Joap me nöün kewe sounfiu. Nge ekoch me lein nöün Tafit kewe sounfiu ra mäla, pwal Uria ewe re Hit a mäla.
2SA 11:18 Mürin, Joap a tinala eman chon künö ren Tafit pwe epwe apworausa ngeni meinisin usun mine a fis lon ewe maun.
2SA 11:19 Iwe, a aöüröüra ewe chon künö o apasa, “Lupwen kopwe wes le apworausa ngeni ewe king ekewe pworaus meinisin usun ewe maun,
2SA 11:20 mürin are a song o aisininuk, ‘Pwota oua kan ngeni ewe telinimw le maun? Ousap silei pwe repwe likapichitiu me won ewe tit?
2SA 11:21 Iö a niela Apimelek nöün Kition we mwän? Ifa usun, sap eman fefin a aturätiu eu nif seni fau me won ewe tit pwe a mäla lon Tepes? Pwota oua fokun kan ngeni ewe tit?’ Are epwe aisinuk lon ei ititin, kopwe apasa: Noum chon angang Uria ewe re Hit a pwal mäla.”
2SA 11:22 Iwe, ewe chon künö a feila o apworausa ngeni Tafit meinisin mine Joap a tini ngeni pwe epwe üra.
2SA 11:23 A üreni Tafit, “Ekewe chon oputem ra pöchökül senikem, ra towu pwe repwe maun ngenikem lon ewe mälämäl, nge äm aia tapweriir pwe ra süsefäliti asamalapen ewe telinimw.
2SA 11:24 Mürin, ekewe chon likapich ra likapichikem me won ewe tit. Iwe, ekoch lein noum kewe sounfiu ra mäla, pwal noum chon angang Uria ewe re Hit a mäla.”
2SA 11:25 Iwe, Tafit a üreni ewe chon künö, “Kopwe üreni Joap pwe esap aweiresi won ei mettoch, pun mäla a tongeni küw eman ika pwal eman lon maun. Oupwe chök apöchöküla ewe maun ngeni ewe telinimw o liapeni. Iei usun mine kopwe apöchöküla ngeni leluken Joap.”
2SA 11:26 Iwe, lupwen Patsipa a rong pwe pwülüan a mäla, a kechüeiti pwülüan we fän ngüngüres.
2SA 11:27 Nge lupwen ekewe ränin kechü ra wes, Tafit a titi neminewe o emwenato lon imwan. Iwe, Tafit a pwülüeni, nge Patsipa a nöüni eman ät me won. Nge ewe Samol mi Lapalap a oput ewe föför Tafit a föri.
2SA 12:1 Iwe, ewe Samol mi Lapalap a tinala ewe soufos Natan ren Tafit. Ätei a feito ren o üreni, “Mi wor ruoman mwän lon eu telinimw, eman me leir a pisekisek, nge eman a wöüngau.
2SA 12:2 Ewe mwän mi pisekisek a wor chomong nöün pwiin sip me kow.
2SA 12:3 Nge ewe mwän mi wöüngau esap wor nöün man, chilon chök eman apanen sip i a möni. Iwe, a tütümwünü ewe apanen sip, pwe ra märipökütä me püsin nöün kewe semirit. Ewe apanen sip a eti le mongö lon sepian o ün seni an kap, a pwal annut won upwan, pun a usun chök nge nöün nengin.
2SA 12:4 Lon eu rän a feito eman wasöla ren ewe mwän mi pisekisek. Nge ätewe esap mochen angei eman man seni nöün pwiin sip ika kow, pwe epwe amolätä enen ewe wasöla mi feito ren. Nge a angei ewe apanen sip nöün ewe mwän mi wöüngau o amolätä fän iten ewe wasöla.”
2SA 12:5 Mürin, Tafit a fokun song ren ewe mwän mi pisekisek. Iwe, a üreni Natan, “Mwo manauen ewe Samol mi Lapalap, ewe mwän mi föri ei sokun föför epwe mäla.
2SA 12:6 Epwe pwal liwini ewe apanen sip fän rüanü, pun a föri ei sokun föför, nge esap eäni tong.”
2SA 12:7 Iwe, Natan a üreni Tafit, “En ewe mwän. Iei alon ewe Samol mi Lapalap ewe Koten Israel, ‘Üa epituk pwe ka kingen Israel, üa pwal angasok seni Saul.
2SA 12:8 Üa ngonuk chon leimwen Saul me pwülüan kewe, üa pwal atolonga fän nemeniom ekewe chon Israel me chon Juta. Nge are ei esap mwo naf, üpwe pwal apacha chomong feiöch ngonuk.
2SA 12:9 Pwota ka aleasolap ngeni ai kewe kapas o föri mine a ngau me fän mesei? Ka niela Uria ewe ra Hit ren ketilas o angei pwülüan pwe kopwe pwülüeni. Ka niela ren nöün chon Amon ketilas.
2SA 12:10 Iei mine ewe feiengau ren ketilas esap chüen ükütiu me lein mwirimwirum, pun ka aleasolap ngeniei o angei pwülüen Uria we pwe pwülüom.’
2SA 12:11 Iei alon ewe Samol mi Lapalap, ‘Üpwe awarato om riaföü epwe pop seni püsin chon leimwom. Üpwe angei pwülüom kewe o ngeni eman mi kan ngonuk, nge i epwe kon rer lepwäpwäla.
2SA 12:12 En ka föri ei föför lemonomon, nge ngang üpwe föri pwal eu föför usun ei, epwe fis lepwäpwäla me fän mesen chon Israel meinisin.’”
2SA 12:13 Iwe, Tafit a üreni Natan, “Üa tipis ngeni ewe Samol mi Lapalap.” Nge Natan a üreni Tafit, “Ewe Samol mi Lapalap a amusala om tipis. Kosap mäla.
2SA 12:14 Nge pokiten ei föför ka awora popun än ekewe chon oput ewe Samol mi Lapalap repwe turunufasei i, iei mine ewe mönükol epwe upu ngonuk epwe mäla.”
2SA 12:15 Mürin, Natan a liwiniti imwan. Nge ewe Samol mi Lapalap a afeiengaua ewe mönükol pwülüen Uria a nöüni me won Tafit, pwe a fokun samau.
2SA 12:16 Iwe, Tafit a tütüngor ngeni Kot fän iten ewe mönükol pwe epwe chikarsefäl. A öchüna anan, a tolong lon rumwan o kon lepwül iteiten pwin.
2SA 12:17 Iwe, nöün kewe nöüwis mi nom lon imwan ra feito ren pwe repwe apwätäi seni lepwül, nge Tafit esap mochen, esap pwal etiir le mongö.
2SA 12:18 Lon afisuen rän ewe mönükol a mäla. Nge nöün Tafit kewe nöüwis ra niuokus ren ar repwe apworausa ngeni, pwe ewe mönüköl a mäla. Pun ra apasa, “Lupwen ewe mönükol a chüen manau, ese fen mochen aüselingakich, lupwen sa kapas ngeni. Epwe fen ifan mwo iei ach sipwe tongeni apasa ngeni, pwe ewe mönükol a mäla? Eli epwe tongeni püsin afeiengaua.”
2SA 12:19 Nge lupwen Tafit a küna pwe nöün kewe nöüwis ra mwöngününgünfengen, a mefi pwe ewe mönükol a mäla. Iwe, Tafit a aisiniir, “Ifa usun, ewe mönükol a mäla?” Nge ir ra üreni, “Ewer, a mäla.”
2SA 12:20 Mürin, Tafit a pwätä me lepwül, a tütü o epiti, a pwal siwili üfan. Iwe, a tolong lon imwen ewe Samol mi Lapalap o fel ngeni. Mürin a liwinla lon püsin imwan o ais anan mongö. Nge lupwen ra uwato ren, a mongö.
2SA 12:21 Mürin, nöün kewe nöüwis ra aisini, “Met wewen om föri ei? Ka öchüna anom o kechü fän iten ewe mönükol, lupwen a chüen manau. Nge lupwen ewe mönükol a mäla, ka pwätä o mongö.”
2SA 12:22 Iwe, Tafit a üra, “Üa öchüna enei o kechü, lupwen ewe mönükol a chüen manau, pun üa ekieki, ‘Io a tongeni silei, ika ewe Samol mi Lapalap epwe ümöümöch ngeniei, pwe ewe mönükol epwe manau?’
2SA 12:23 Nge iei a mäla, pwota üpwe chüen öchüna enei? Ifa usun, üpwe tongeni aliwinisefälieto pwe epwe manau? Ngang üpwe feila ren, nge i esap tongeni liwinto rei.”
2SA 12:24 Mürin, Tafit a aururu Patsipa pwülüan we, a feila ren o kon ren. Iwe, neminewe a pwopwo o nöüni eman ät, nge Tafit a aita ngeni Salomon. Iwe, ewe Samol mi Lapalap a echeni ewe ät.
2SA 12:25 Iei mine a tinala pworaus ren ewe soufos Natan pwe epwe aita ngeni ewe ät Jetitia , pun ewe Samol mi Lapalap a echeni.
2SA 12:26 Lon ei chök fansoun, Joap a maunei Rapa samolun telinimwen chon Amon o liapeni än ewe king lenien koluk.
2SA 12:27 Iwe, Joap a tinala chon künö ren Tafit o apasa, “Üa maunei ewe telinimw Rapa, nge üa fen liapeni kinikinin ewe lenien koluk.
2SA 12:28 Iei kopwe achufengeni ekewe lusun sounfiu, kopwe pwelifeili ewe telinimw o liapeni. Pun ika ngang üpwe liapeni ewe telinimw, epwe iteni itei.”
2SA 12:29 Iei mine Tafit a achufengeni ekewe sounfiu meinisin o feila Rapa, a maunei o liapeni.
2SA 12:30 Tafit a angei mwärin ar we king seni won möküran, ükükün choun fik me limu paun kolt, a pwal wor eföü fau aüchea won. Iwe, Tafit a isetä ewe mwärämwär won möküran, a pwal uwala chomong liapan seni ewe telinimw.
2SA 12:31 Iwe, Tafit a uwala ekewe aramas mi nom lon ewe telinimw o angangeer fän ngerenger, fän turupas me kouk seni mächä. A pwal angangeer fän weires le föri pilak. Iei usun a föri ngeni chon ekewe telinimwen Amon meinisin. Mürin, Tafit me nöün kewe sounfiu meinisin ra liwiniti Jerusalem.
2SA 13:1 Iwe, a wor eman fefinen Apsalom nöün Tafit we mwän itan Tamar, a fokun liöch. A fis pwe Amnon, pwal eman nöün Tafit mwän, a sani neminei.
2SA 13:2 Amnon a fokun riaföü, pwe a samau pokiten Tamar fefinan we. Pun Tamar eman föpwül esamwo tori mwän, iei popun Amnon a ekieki pwe esap fokun tufich an epwe ingeni.
2SA 13:3 Nge a wor eman chienen Amnon itan Jonatap nöün Simea mwän, nge Simea pwin Tafit. Iwe, Jonatap eman mi fokun tipachemsolä.
2SA 13:4 Jonatap a üreni Amnon, “En nöün king, pwota ka fokun aiengau iteiten rän? Kose mochen üreniei met popun.” Amnon a üreni, “Üa sani Tamar fefinen Apsalom pwii we.”
2SA 13:5 Iwe, Jonatap a üreni, “Kopwe konola won om peet o tipin asamauwuk. Nge lupwen semom we epwe feito pwe epwe äämwok, kopwe üreni, ‘Kopwe mwüt ngeni fefinei Tamar pwe epwe feito o ngeniei enei mongö. Epwe amolätä enei me fän mesei pwe üpwe küna, mürin epwe püsin ngeniei pwe üpwe mongö.’”
2SA 13:6 Iei mine Amnon a konola o tipin asamauwu. Nge lupwen ewe king a feito pwe epwe äämwa, Amnon a üreni, “Kose mochen mwüt ngeni fefinei Tamar epwe feito pwe epwe föri ruachö nokop me fän mesei, mürin epwe püsin ngeniei pwe üpwe mongö.”
2SA 13:7 Mürin, Tafit a titi Tamar me lon imwan o üreni, “Kopwe feila lon imwen Amnon mongeom we o amola ngeni anan mongö.”
2SA 13:8 Iei mine Tamar a feila lon imwen Amnon mongean we ewe ia a konola ie. Iwe, a angei pilawa o aüwa, a pwal föri nokop me fän mesan o furaineer.
2SA 13:9 Mürin a angei ewe furaipan o alopwätiu masouan pwe Amnon epwe mongö, nge Amnon esap mochen mongö. Iwe, a apasa, “Ämi meinisin oupwe towu seniei.” Iei mine ra towu seni.
2SA 13:10 Mürin, Amnon a üreni Tamar, “Kopwe uwato enei lon ewe rumwen annut o püsin ngeniei pwe üpwe mongö.” Iwe, Tamar a angei förian kewe nokop o uweerelong ren Amnon mongean we lon ewe rumwen annut.
2SA 13:11 Nge lupwen a ngeni ekewe mongö pwe epwe mongö, Amnon a turufi neminewe o üreni, “Etto, üpwe kon reöm.”
2SA 13:12 Nge Tamar a pälüeni, “Apwi, mongeei, kosap arianiei, pun ei sokun föför esap öch an epwe fis lon Israel. Kosap föri ngeniei ei sokun föför mi anioput.
2SA 13:13 Iwe, ia ngang üpwe feila ie fän ai säw? Nge en kopwe eman aramas mi anioput me lon Israel. Iei mine üa tüngor ngonuk, kopwe kapas ngeni ewe king, pun üa lükü pwe epwe mwüt ngonuk pwe sipwe pwüpwülü.”
2SA 13:14 Nge Amnon esap mochen aüselinga alon Tamar. Iwe, pokiten a pöchökül seni neminewe, a achomanauei o kon ren.
2SA 13:15 Mürin, Amnon a fokun oputangaua Tamar, pwe an oput i a lap seni an sani me mwan. Iwe, Amnon a üreni neminewe, “Kopwe ütä o süla.”
2SA 13:16 Nge Tamar a üreni, “Apwi, mongeei, pun om tinieila a kon lap ngauan seni ewe föför ka föri ngeniei.” Nge Amnon esap mochen aüselinga neminewe.
2SA 13:17 A köri ewe alüal mi wisen tütümwünü o üreni, “Kopwe asüela ei fefin seni fän mesei o lokunala ewe asam.”
2SA 13:18 Mürin, nöün Amnon we chon angang a asüela neminewe o lokunala ewe asam. Iwe, Tamar a üföüf echö üf mi lingöch, pun ei sokun üf nöün king föpwül esamwo toriir mwän ra üföüf me lom.
2SA 13:19 Iwe, Tamar a tukotuketä falangen ekkei won möküran o kamwei üfan mi lingöch, a pwal pwölüela mesan ren pöün o feila nge kechü fän leüömong.
2SA 13:20 Lupwen Apsalom mongean we a küna Tamar, a aisini, “Ifa usun, Amnon mongeom we a föri och föför mi ngau ngonuk? Kosap üreni eman och, fefinei, kosap ekieki usun lon lelukom, pun i mongeom.” Iwe, Tamar a nonom lon imwen Apsalom mongean we lon an letipeta me akaleman.
2SA 13:21 Iwe, lupwen ewe king Tafit a rong ekei pworaus meinisin, a fokun song.
2SA 13:22 Nge Apsalom esap apasa och fos mi öch ika mi ngau ngeni Amnon, pun a oput Amnon pokiten a achomanauei Tamar fefinan we.
2SA 13:23 Mürin ruu ier nöün Apsalom kewe chon fichi ülöülen sip ra fichi ülöülen nöün sip lon Paal-hasor küküngeni Efraim. Iwe, Apsalom a körato nöün ewe king kewe mwän meinisin.
2SA 13:24 Apsalom a pwal feito ren ewe king o üra, “Lon ei otun ra fichi ülöülen nei sip. Üa tüngor ngonuk pwe en ai king me noum kewe nöüwis oupwe feito o eti ai ei kametip.”
2SA 13:25 Nge ewe king a üreni Apsalom, “Apwi, nei, äm aisap feila meinisin, pwe aisap aweiresuk.” Iwe, Apsalom a pesei Tafit, nge esap feila, pwe a chök afeiöchü.
2SA 13:26 Mürin, Apsalom a üra, “Are kose mochen feila, üa tüngor ngonuk kopwe mwüt ngeni Amnon pwii we pwe epwe etikem.” Nge ewe king a aisini, “Pwota epwe etuk?”
2SA 13:27 Nge Apsalom a chök pesei Tafit tori a mwüt ngeni pwe Amnon me pwiin kewe meinisin repwe eti.
2SA 13:28 Mürin, Apsalom a allük ngeni nöün kewe chon angang, “Oupwe mamasa. Lupwen Amnon epwe pwapwa ren an ün wain, üpwe ürenikemi pwe oupwe awata o niela. Ousap niuokus. Pun ifa usun, sap ngang üa allük ngenikemi? Oupwe tipepwora o tipen mwän.”
2SA 13:29 Iei mine nöün Apsalom kewe chon angang ra niela Amnon, usun Apsalom a allük ngeniir. Mürin, nöün ewe king kewe mwän meinisin ra ütä, ra tötä won en me nöün aas o süla.
2SA 13:30 Nge lupwen ra chüen nom won al, ewe pworaus a tori Tafit, “Apsalom a niela noum kewe mwän meinisin, sap eman me leir a chüen manau.”
2SA 13:31 Mürin, ewe king a ütä, a kamwei üfan o konola lepwül. Iwe, nöün chon angang meinisin mi nom ünükün ra pwal kamwei üfer.
2SA 13:32 Nge Jonatap nöün Simea we mwän, nge Simea pwin Tafit a üra, “Ai samol, kosap ekieki pwe ra niela noum kewe mwän meinisin, nge Amnon chök a mäla. Pun seni ewe fansoun Amnon a achomanauei fefinan Tamar, won mesen Apsalom a fen pwärätä an ekiekin niela pwin we.
2SA 13:33 Iei mine, ai samol me ai king, kosap ekieki ei pworaus lon lelukom pwe noum kewe mwän meinisin ra mäla, pwe i Amnon chök a mäla.”
2SA 13:34 Lon chök ei otun Apsalom a süla. Iwe, ewe alüal mi mamas a netä o küna pwe chomong aramas ra feito seni ewe alen Horonaim lepekin ewe chuk. Iwe, ewe chon mamas a feila o asile ngeni ewe king ei pworaus.
2SA 13:35 Mürin, Jonatap a üreni ewe king, “Nengeni, noum kewe mwän ra feito. Usun mine ngang noum chon angang üa apasa, iei usun a fis.”
2SA 13:36 Iwe, lon ewe chök otun Jonatap a wes le kapas, nöün ewe king kewe mwän ra feito, ra puchörütä o kechü, nge ewe king pwal nöün kewe nöüwis meinisin ra fokun kechüangau.
2SA 13:37 Nge Apsalom a sü o feila ren Talmai nöün Amihut we mwän ewe kingen Kesur. Iwe, Tafit a kechüeiti Amnon nöün we mwän iteiten rän.
2SA 13:38 Apsalom a nom Kesur lon ükükün ülüngat ier.
2SA 13:39 Nge lupwen ewe king Tafit a chipela mürin än Amnon mäla, a fokun positi Apsalom.
2SA 14:1 Iwe, Joap nöün Seruia we mwän a mefi pwe Tafit a positi Apsalom.
2SA 14:2 Mürin, a titila Tekoa pwe eman fefin mi tipachem epwe feito seni ikenan. Lupwen a war, Joap a üreni, “Kopwe tipin lapalapeni lapalapen eman chon letipeta o üföüf üfen chon letipeta. Kosap epituk noppuk, nge kopwe pwomweni pwomwen eman fefin mi letipeta chomong rän fän iten eman mi mäla.
2SA 14:3 Mürin kopwe feila ren ewe king o kapas ngeni usun mine üpwe ürenuk.” Iwe, Joap a anöünöü neminewe pworaus.
2SA 14:4 Iwe, lupwen ewe fin Tekoa a tolong ren ewe king, a chapetiu lepwül o asamolu. A üra, “Kopwe alisiei, ai king.”
2SA 14:5 Nge ewe king a aisini, “Met om weires?” Neminewe a pälüeni, “Osupwangei, ngang eman fefin mi lipichsefäl, pun pwülüei a mäla.
2SA 14:6 Iwe, ngang noum chon angang fefin mi wor ruoman nei mwän. Lon eu rän ra aninifengen lemäl, nge esap wor eman mi amwöchüfeseniir. Iwe, ewe eman a awata ewe eman o niela.
2SA 14:7 Nge iei chon ai famili meinisin ra ü ngeniei o apasa, ‘Kopwe mwütawu ätewe mi awata pwin, pwe äm aipwe niela pokiten a nimanauei pwin.’ Are repwe föri ei, esap chüen wor eman alemwiri. Repwe angeala ai amwüchülan apilükülük o föri pwe esap chüen wor iten pwülüei ika mwirimwirin me won fanüfan.”
2SA 14:8 Mürin, ewe king a üreni ewe fefin, “Kopwe liwinla lon imwom, nge ngang üpwe alisuk lon om na weires.”
2SA 14:9 Nge ewe fin Tekoa a üreni ewe king, “Ai samol me ai king, ewe tipis epwe nom woi pwal won ai famili, nge en me om famili ousap tipis.”
2SA 14:10 Ewe king a üra, “Are eman epwe kapas pöchökül ngonuk, kopwe emwenato ätewe rei. Iwe, esap fokun chüen osukosukok.”
2SA 14:11 Mürin, neminewe a apasa, “Üa tongoreek, en ai king, pwe kopwe apelü iten ewe Samol mi Lapalap om we Kot, pwe ewe chon kütta liwinin chan aramasan esap chüen niela nei mwän pwe esap mäla.” Iwe, Tafit a apasa, “Mwo manauen ewe Samol mi Lapalap, sap mwo nge emet meten möküren noum mwän epwe morotiu lepwül.”
2SA 14:12 Mürin, ewe fefin a apasa, “Kose mochen kopwe mwüt ngeniei ngang noum chon angang fefin pwe üpwe apasa pwal eu kapas ngonuk, en ai samol me ai king.” Tafit a üra, “Kopwe kapas.”
2SA 14:13 Iwe, ewe fefin a apasa, “Nge pwota chök ka akota ei sokun mettoch mi mwäl ngeni nöün Kot aramas? Lupwen ka apasa ekei kapas, en ewe king ka püsin atipisuk, pun kosap mwüt ngeni noum we ka asüela pwe epwe liwinto.
2SA 14:14 Äm meinisin aipwe mäla, aia chök wewe ngeni koluk mi nitiu won pwül, ese wor eman a chüen tongeni üfisefälietä. Iwe, Kot esap angei manauen eman, nge a fen ekiekietä met epwe föri ngeni ewe mi kasüla, pwe esap nonom lon an toau seni.
2SA 14:15 Popun ai feito pwe üpwe apasatä ekei kapas ngonuk, en ai samol me ai king, pun ekewe aramas ra eniwokusuei. Ngang noum chon angang fefin üa ekieki pwe üpwe kapas ngonuk usun ei, eli kopwe apwönüetä ai tüngor.
2SA 14:16 Eli en, ai king, kopwe tipeeu ngeni om kopwe angasaei seni ätewe mi ekiekin äripökükeemila me nei mwän seni ewe fanü Kot a ngenikem.
2SA 14:17 Iwe, ngang noum chon angang fefin üa pwal ekieki pwe om kewe kapas repwe akinamweei. Pun en, ai samol me ai king, ka usun chök eman nöün Kot chon läng, ka silei lefilen öch me ngau. Ewe Samol mi Lapalap om we Kot epwe etuk.”
2SA 14:18 Mürin, ewe king a üreni ewe fefin, “Kosap tukumala seniei meinisin mine üpwe aisinuk.” Nge ewe fefin a üra, “Ai samol me ai king, kopwe kapas.”
2SA 14:19 Iwe, ewe king a ais, “Ifa usun, Joap a afalafala ngonuk ekei kapas meinisin?” Neminewe a pälüeni, “Mwo manauom, ai samol me ai king, üsap tongeni tükümi senuk mine ka eäni kapas ais ngeniei. Ewer, noum chon angang Joap a öüröüraei pwe üpwe föri ei o anöünöüei ekei kapas meinisin.
2SA 14:20 Noum chon angang Joap a föri ei pwe epwe öchüla ei lapalap. Nge en, ai samol, ka eäni tipachem usun än nöün Kot chon läng tipachem, pun ka silei mettoch meinisin mi fis won fanüfan.”
2SA 14:21 Mürin, ewe king a üreni Joap, “Ewer, üa mwütätä om tüngor. Kopwe feila o emwenisefälieto ewe alüal Apsalom.”
2SA 14:22 Iwe, Joap a chapetiu lepwül, a asamolu o afeiöchü ewe king. A apasa, “Ikenai ngang noum chon angang üa silei pwe üa küna ümöümöch me reöm, ai samol me ai king. Pun ka mwütätä ai we tüngor.”
2SA 14:23 Mürin, Joap a ütä, a feila Kesur o emwenato Apsalom Jerusalem.
2SA 14:24 Nge ewe king a üra, “Apsalom epwe feila o nom lon püsin imwan, pun üsap mochen küna mesan.” Iei mine Apsalom a nom lon püsin imwan, nge esap küna mesen ewe king.
2SA 14:25 Iwe, esap wor eman me lein chon Israel meinisin a iteföüla ren äteöchün usun Apsalom. Pun seni fän pechen tori won möküran esap wor och terin.
2SA 14:26 Iwe, möküren Apsalom a fokun pwük, iei mine a soun fichi iteiten ier, pun a kon chou ren. Iwe, ükükün choun meten möküran, lupwen a fich, limu paun, a kilo won än ewe king kilo.
2SA 14:27 Iwe, a wor nöün Apsalom ülüman ät me eman nengin itan Tamar. Neminei a fokun liöch.
2SA 14:28 Apsalom a nonom lon Jerusalem lon ükükün ruu ier, nge esap küna mesen ewe king.
2SA 14:29 Mürin, Apsalom a titi Joap pwe epwe tinala ren ewe king. Nge Joap esap mochen feito ren. Iwe, Apsalom a pwal titisefäl, nge Joap esap mochen feito.
2SA 14:30 Mürin, Apsalom a üreni nöün kewe chon angang, “Nengeni, fanüen Joap a nom ünükün fanüei. Won fanüan a mär parli, oupwe feila o kenala.” Iei mine nöün Apsalom kewe chon angang ra kenala ekewe parli won fanüen Joap.
2SA 14:31 Mürin, Joap a feito ren Apsalom lon imwan o aisini, “Pwota noum chon angang ra kenala ekewe parli won fanüei?”
2SA 14:32 Iwe, Apsalom a pälüeni Joap, “Nengeni, üa titila kapas reöm pwe kopwe feito rei, nge kosap feito. Pun üa mochen tinukela ren ewe king pwe kopwe aisini, ‘Pwota üa liwinto seni Kesur? Epwe fen mürina ai üpwe chök nom ikenan.’ Iei mine, Joap, kopwe föri met üpwe küna ren mesen ewe king. Nge are a wor ai tipis, epwe nieila.”
2SA 14:33 Iei mine Joap a feila ren ewe king o üreni alon Apsalom. Mürin, ewe king a titi Apsalom. Iwe, Apsalom a feito ren ewe king o chapetiu lepwül me mwan, nge ewe king a mitiri Apsalom.
2SA 15:1 Iwe, mürin ei pworaus, Apsalom a angei efoch woken fän itan me oris, pwal lime mwän repwe akakom mwan.
2SA 15:2 Apsalom a soun pwätä lesosorusich o ütä lükün alen asamalapen ewe telinimw. Nge are eman mwän a feito fän an weires pwe ewe king epwe eäni kapwüng won, Apsalom a kökköri o aisini, “Ka feito seni ia?” Nge lupwen ewe mwän a ürätä meni ainang a feito seni,
2SA 15:3 Apsalom a üreni, “Nengeni, om kewe tüngor ra mürina o pwüng, nge esap wor eman epwe alisuk seni pekin ewe king, lupwen ka pwärätä om kewe weires.”
2SA 15:4 Iwe, Apsalom a pwal apasa, “Amwo itä üpwe soukapwüng lon ei fanü. Mürin, iteiten eman me eman mi wor an kapwüng ika tüngor epwe feito rei, nge ngang üpwe apwüngü fän wenechar.”
2SA 15:5 Iwe, iteiten fansoun, lupwen eman aramas a kan ngeni Apsalom pwe epwe asamolu, Apsalom a aitiewu pöün o amwöchü, a pwal mitiri.
2SA 15:6 Iei usun Apsalom a föri ngeni chon Israel meinisin mi feito ren ewe king pwe epwe eäni kapwüngür. Ren ei, Apsalom a elliapa leluken ekewe chon Israel.
2SA 15:7 Iwe, mürin rüanü ier, Apsalom a üreni ewe king, “Kose mochen mwüt ngeniei ai üpwe feila Hepron pwe üpwe apwönüetä ai pwon üa eäni ngeni ewe Samol mi Lapalap.
2SA 15:8 Pun ngang noum we chon angang üa eäni eu pwon, lupwen üa nom Kesur lon Siria o apasa: Are ewe Samol mi Lapalap epwe wesewesen aliwinisefäliei ngeni Jerusalem, üpwe fel ngeni ewe Samol mi Lapalap lon Hepron.
2SA 15:9 Iwe, ewe king a üreni Apsalom, “Kopwe feila fän kinamwe.” Iei mine Apsalom a feila Hepron.
2SA 15:10 Mürin, Apsalom a tinala chon künö lemonomon lemenen ekewe ainangen Israel meinisin o üra, “Lon ewe otun oua rongorong tikin rappwa, oupwe leüömong le apasa: Apsalom a king lon Hepron!”
2SA 15:11 Iwe, rüepükü mwän seni Jerusalem mi kö ra eti Apsalom. Nge ra feila fän öchün letiper, pun resap silei och usun mine a akota.
2SA 15:12 Lupwen Apsalom a eäni an kewe asor, a pwal titi Ahitofel ewe re Kilo nöün Tafit we chon öüröür seni an telinimw. Iei usun ewe rawangau ngeni ewe king a fokun pöchökülela, nge ekewe aramas mi eti Apsalom ra chomongola.
2SA 15:13 Iwe, eman chon künö a feito ren Tafit o üreni, “Ekewe chon Israel ra pwon ngeni Apsalom, pwe repwe eti.”
2SA 15:14 Mürin, Tafit a üreni nöün kewe nöüwis meinisin mi nom ren lon Jerusalem, “Ousipwe feila o sü seni Apsalom, pun ika sisap, esap chüen wor alen ach sipwe sü seni. Oupwe müttir feila pwe esap torikäekich o afeiengauakich, esap pwal niela chon ei telinimw ren ketilas.”
2SA 15:15 Iwe, nöün ewe king kewe nöüwis ra üreni, “Äm noum chon angang aia molotä pwe aipwe föri meinisin mine en äm samol me äm king ka filätä.”
2SA 15:16 Iei mine ewe king a feila fiti chon leimwan meinisin, chilon chök ülüpwülüan kewe engol a likitiir pwe repwe tümwünü ewe imwen king.
2SA 15:17 Iwe, lupwen ewe king me ekewe aramas meinisin mi tapwela mürin ra towu seni ewe telinimw, ra kaüla ren ewe akamüchülan imw.
2SA 15:18 Iwe, nöün kewe meilap meinisin ra nom ünükün, nge ekewe chon Cheret me chon Pelet meinisin, pwal ekewe wonopükü chon Kit mi fen tapwela mürin seni Kat ra feila mwen ewe king.
2SA 15:19 Mürin, ewe king a üreni Itai ewe re Kit, “Pwota ke pwal etikem? Kopwe liwinla o nom ren ewe king mi fö, pun en eman chon ekis, pwal eman mi sä seni fanüom.
2SA 15:20 Ka chök kärän feito. Pwota üpwe peseek pwe kopwe etifeilikem ikenai. Nge püsin ngang üsap silei ia üpwe feila ie. Kopwe liwinla, nge chon fanüom kewe repwe etuk. Ewe Samol mi Lapalap epwe kirikiröch o allükülük ngonuk.”
2SA 15:21 Nge Itai a üreni ewe king, “Mwo manauen ewe Samol mi Lapalap, pwal mwo manauen ai samol me ai king, ekis meinisin ia en kopwe feila ie, pwal ngang noum chon angang üpwe feila ie, ese lifilifil ika fetal ngeni mäla ika fetal ngeni manau.”
2SA 15:22 Mürin, Tafit a üreni Itai, “Mi mürina, kopwe fitikem le feila.” Iei mine Itai ewe re Kit a feila fiti nöün aramas meinisin, pwal ekewe famili mi nom ren.
2SA 15:23 Iwe, chon ewe fanü meinisin ra leüömong le kechü, lupwen ekewe aramas meinisin ra feil seniir. Pwal ewe king fiti nöün kewe aramas meinisin ra feila pekilan ewe aüwa Kitron o feila ngeni ewe fanüapö.
2SA 15:24 Iwe, ewe souasor Satok a pwal nom fiti ekewe mwän seni ewe ainangen Lefi meinisin mi mwärei an Kot we pworofel. Ra püngüpüngütiu än Kot we pworofel ünükün Apiatar tori ekewe aramas meinisin ra feiliwu seni ewe telinimw.
2SA 15:25 Mürin, ewe king a kapas ngeni Satok, “Kopwe aliwinsefälielong än Kot we pworofel lon ewe telinimw. Are üa küna ümöümöch me ren ewe Samol mi Lapalap, i epwe aliwinsefälieto o mwüt ngeniei pwe üpwe künasefäli ewe pworofel me lenian.
2SA 15:26 Nge are Kot esap ümöümöch ngeniei, ngang üa molotä. Epwe chök föri ngeniei mine a mürina me ren.”
2SA 15:27 Iwe, ewe king a pwal üreni ewe souasor Satok, “Nengeni, oupwe liwiniti ewe telinimw fän kinamwe, ämi me Apiatar fiti Ahimas noum we mwän me Jonatan nöün Apiatar we mwän.
2SA 15:28 Nge ngang üpwe witiwit ren ekewe petepeeten ewe chanpupu Jortan mi tori ewe fanüapö, tori kopwe asileto pworaus rei.”
2SA 15:29 Iei mine Satok me Apiatar ra aliwinsefäliela Jerusalem än Kot we pworofel o nonom ikenan.
2SA 15:30 Iwe, Tafit a feitä won palen ewe chukun Olif nge kechü, esap ipweip sus, a pwal pwölü möküran asisilen an letipeta. Nge pwal ekewe aramas meinisin mi eti ra pwölü mökürer, ra feitä nge kechü.
2SA 15:31 Lupwen eman a asile ngeni Tafit pwe Ahitofel a nom lein chokewe mi fiti Apsalom lon an raw, Tafit a iotek, “Ai Samol mi Lapalap, üa tüngor ngonuk pwe kopwe sorei än Ahitofel öüröür pwe epwe fokun mwäl.”
2SA 15:32 Iwe, lupwen Tafit a tori won ungen ewe chuk ewe ia ra fel ngeni Kot ie, Husai chiechian we ewe re Ark a feito pwe epwe churi. Üfan a kam, nge won möküran a wor pwül.
2SA 15:33 Iwe, Tafit a üreni, “Are kopwe etiei, kopwe chök epetiei.
2SA 15:34 Nge are kopwe liwinsefäliti ewe telinimw o üreni Apsalom, ‘Ai king, ngang üpwe noum chon angang. Usun üa chon angang ngeni semom me lom, iei usun üpwe chon angang ngonuk,’ mürin ka tongeni alisiei ren om atai än Ahitofel öüröür.
2SA 15:35 Ekewe souasor Satok me Apiatar ra pwal nom reöm ikenan. Iei mine meinisin mine ka rongorong me lon imwen ewe king kopwe üreni Satok me Apiatar.
2SA 15:36 A nom rer nöür kewe ruoman mwän Ahimas me Jonatan. Kopwe tinireto pwe repwe asileto rei meinisin mine ka rongorong.”
2SA 15:37 Iei mine Husai chiechien Tafit a tolong lon ewe telinimw Jerusalem lon ewe chök otun Apsalom a pwal tolong.
2SA 16:1 Iwe, lupwen Tafit a feila ekis pekilan ungen ewe chuk, Sipa nöün Mefiposet we chon angang a churi, nge a emwenato ruoman aas mi wor lenien mot wor. Ekewe aas ra uwei rüöpükü fochun pilawa, ipükü umwun föün wain mi pwas, ipükü föün irän leräs me eu rumen wain.
2SA 16:2 Iwe, ewe king a aisini Sipa, “Pwota ka uwato ekei mettoch?” Nge Sipa a üreni, “Ekewe aas fän iten chon om famili pwe repwe wawa, ekewe pilawa me ekewe föün irän leräs fän iten ekewe mwän pwe repwe mongö, nge ewe wain fän iten chokewe mi malülü lon ewe fanüapö pwe repwe ün.”
2SA 16:3 Iwe, ewe king a ais, “Ifa i Mefiposet nöün nöün om we samol Saul?” Sipa a üreni ewe king, “A chök nonom lon Jerusalem, pun a ekieki pwe ikenai chon Israel repwe aliwinato ren mwün semen saman.”
2SA 16:4 Mürin, ewe king a üreni Sipa, “Meinisin mine än Mefiposet iei en kopwe eäni.” Nge Sipa a üra, “Üa asamoluk. Ai samol me ai king, amwo üpwe küna ümöümöch me reöm iteiten fansoun meinisin.”
2SA 16:5 Nge lupwen Tafit a tori Pahurim, a war eman mwän seni ewe familien chon leimwen Saul itan Simei nöün Kera we mwän. Iwe, lupwen a feito, a chök ottekichöüü Tafit.
2SA 16:6 Ätei a monei fau ngeni Tafit pwal ngeni nöün kewe nöüwis meinisin, pwal mwo nge ekewe sounfiu me ekewe mwän mi pwora meinisin ra nom ünükün Tafit.
2SA 16:7 Iwe, Simei a otteki Tafit o apasa, “Kopwe süla, kopwe süla. En eman mwän mi nimanauei aramas, en eman mi fokun föföringau.
2SA 16:8 Ewe Samol mi Lapalap a ngonuk chappen om nimanauei chon leimwen Saul. En ka angei seni mwün, nge iei ewe Samol mi Lapalap a ngeni Apsalom noum we mwän ewe mwü. Nengeni, a kuuk feiengau, pun en eman mwän mi nimanauei aramas.”
2SA 16:9 Mürin, Apisai nöün Seruia we mwän a üreni ewe king, “Pwota enan kolak mi mä a tongeni ottekiik, ai samol me ai king? Kopwe mwüt ngeniei pwe üpwe feila ren ikenan o pöküela üan.”
2SA 16:10 Nge ewe king a üra, “Pwal met wewen ngenikemi ämi nöün Seruia mwän? Are ätewe a ottekiei, pun ewe Samol mi Lapalap a üreni pwe epwe ottekiei, iön epwe tongeni üra: Pwota ka föri iei usun?”
2SA 16:11 Iwe, Tafit a üreni Apisai me nöün kewe nöüwis meinisin, “Püsin nei a ekiekin nieila. Pwota oua weitifengenikemi pwe ei re Peniamin a föri ei sokun? Oupwe chök likiti epwe ottek, pun ewe Samol mi Lapalap a üreni pwe epwe ottek.
2SA 16:12 Eli ewe Samol mi Lapalap epwe nenengeni ai riaföü o liwini ngeniei feiöch siwilin an ottekiei ikenai.”
2SA 16:13 Iei mine Tafit me nöün kewe mwän ra sopwela le fetal won ewe al. Nge Simei a fetal won ewe al lepekin ewe chuk sasape ngeni Tafit. A fetal nge ottek o momonei ngeni Tafit fau me pwül.
2SA 16:14 Iwe, ewe king me ekewe aramas meinisin mi eti ra tori ewe chanpupu Jortan, nge ra fokun malülü. Ikenan ewe king a asösö.
2SA 16:15 Lon chök ei fansoun Apsalom me ekewe re Israel meinisin ra tori Jerusalem, nge Ahitofel a pwal eti.
2SA 16:16 Iwe, lupwen Husai ewe re Ark chienen Tafit a feito ren Apsalom, a üreni, “Ewe king epwe manauatam! Ewe king epwe manauatam!”
2SA 16:17 Nge Apsalom a aisini Husai, “Ifa usun, iei ükükün om allükülük ngeni Tafit chienom we? Pwota kosap eti?”
2SA 16:18 Nge Husai a üreni Apsalom, “Apwi. Pun iö ewe Samol mi Lapalap me ekei aramas, pwal ekewe re Israel meinisin ra filätä, ätewe üpwe eti. Üpwe chök nonom reöm.
2SA 16:19 Pwal eu chök, iö üpwe angang ngeni? Pwota üsap angang ngeni nöün ai samol? Usun üa angang ngeni semom, iei usun üpwe pwal angang ngonuk.”
2SA 16:20 Mürin, Apsalom a üreni Ahitofel, “Kopwe öüra ngenikem mine aipwe föri.”
2SA 16:21 Ahitofel a üreni, “Kopwe tolong ren ekewe ülüpwülüen semom we, a likitiir pwe repwe tümwünü ewe imwen king. Mürin, chon Israel meinisin repwe rong pwe ka püsin föri met semom epwe oput ren en, nge chokewe meinisin mi nom reöm repwe pöchökülela.”
2SA 16:22 Iei mine ra aüetä eu imw mangaku won ewe imwen king fän iten Apsalom. Nge Apsalom a tolong o kon ren ekewe ülüpwülüen saman fän mesen chon Israel meinisin.
2SA 16:23 Iwe, lon ena fansoun än Ahitofel öüröür a aüchea usun chök än Kot. Iei usun Tafit me Apsalom ra aücheani än Ahitofel öüröür meinisin.
2SA 17:1 Mürin, Ahitofel a üreni Apsalom, “Kopwe mwüt ngeniei üpwe filätä engol me ruungeröü mwän, pwe üpwe feila o tapweri Tafit lepwinei.
2SA 17:2 Iwe, aipwe rangeiti, lupwen a malülü o tipemösök, üpwe atolonga lon niuokus watte, nge ekewe aramas meinisin mi nom ren repwe süla. Üpwe chök niela ewe king,
2SA 17:3 nge ekewe aramas meinisin üpwe emwenisefälireto reöm, usun eman a emwenato eman fin apwüpwülüsöfö ren pwülüan. Ka kütta manauen eman chök mwän, nge ekewe aramas meinisin repwe kinamwe.”
2SA 17:4 Iwe, ei öüröür a mürina me ren Apsalom me ekewe souakomwen Israel meinisin.
2SA 17:5 Mürin, Apsalom a üra, “Oupwe pwal körato Husai ewe re Ark, pwe sipwe rongorong mine i epwe apasa.”
2SA 17:6 Lupwen Husai a feito, Apsalom a üreni, “Iei usun mine Ahitofel a eäni öüröür. Ifa usun, sipwe föri mine Ahitofel a apasa? Ika ap, en kopwe apasa mine aipwe föri.”
2SA 17:7 Mürin, Husai a üreni Apsalom, “Än Ahitofel we öüröür esap öch lon ei fansoun.”
2SA 17:8 A pwal üra, “Ka silei pwe semom me nöün kewe mwän ra fokun pwora. Ra rochongau usun eman pear a rochongau, lupwen eman a angei seni nöün me lemäl. Pwal eu, semom a sip le maun, esap tongeni nom ren ekewe sounfiu lepwin.
2SA 17:9 Eli lon ei fansoun a op lon eu pwang ika lon pwal ekoch leni. Nge lupwen ekoch me lein noum kewe sounfiu repwe mäla lepoputän ewe maun, ir mi rongorong usun repwe apasa, ‘Mi wor eu ninni me lein ekewe aramas mi tapwela mürin Apsalom.’
2SA 17:10 Mürin epwe fis pwe pwal ekewe mwän mi fokun pwora, leluker a usun chök leluken eman laion, epwe fokun kisikisila letiper ren niuokus. Pun chon Israel meinisin ra silei pwe semom eman soumaun, nge chokewe mi eti ra pwora.
2SA 17:11 Nge iei ai öüröür ngonuk. Kopwe emwichato reöm chon Israel meinisin seni Tan tori Persepa, pwe repwe usun chök pien aroset ren chomongur, nge en kopwe akom mwer le feila maun.
2SA 17:12 Mürin sipwe maun ngeni Tafit me lon ekewe leni ia a nom ie, sipwe anifeto won usun amurenipwin a püngütiu won pwül. Iwe, i me ekewe mwän mi eti esap wor eman leir epwe chüen manau.
2SA 17:13 Nge are epwe tolong lon eu telinimw, chon Israel meinisin repwe uwato säl o üri ewe telinimw ngeni ewe lemol tori esap chüen wor emök fau epwe nom lon ewe leni.”
2SA 17:14 Iwe, Apsalom me ekewe re Isarel meinisin ra üra, “Än Husai öüröür a mürina seni än Ahitofel öüröür.” Pun ewe Samol mi Lapalap a filätä pwe epwe atai än Ahitofel we öüröür mi mürina o uwato feiengau won Apsalom.
2SA 17:15 Mürin, Husai a üreni ekewe souasor Satok me Apiatar, “Iei än Ahitofel öüröür a öüra ngeni Apsalom me ekewe souakomwen Israel, nge pwal iei ai we öüröür ngeniir.
2SA 17:16 Iei mine oupwe müttir tinala eman pwe epwe üreni Tafit: Lepwinei kosap nonom ren ekewe petepeeten ewe chanpupu mi tori ewe fanüapö, nge kopwe fokun feila pekilan ewe chanpupu Jortan, pwe en me ekewe aramas meinisin mi etuk ousap feiengau.”
2SA 17:17 Nge Jonatan me Ahimas ra witiwit lon Enrokel, pun resap mochen eman epwe küna ar repwe tolong lon ewe telinimw. Iwe, eman chon angang fefin a wisen uwei ngeniir pworaus, nge ir ra wisen uwei ngeni ewe king Tafit ekewe pworaus.
2SA 17:18 Nge eman ät a küneer o asile ngeni Apsalom. Iei mine ir me ruoman ra müttir feila o tolong lon imwen eman mwän lon Pahurim, ätewe a wor eu chönüttu lükün imwan. Iwe, ra tolong lon ewe chönüttu,
2SA 17:19 nge pwülüen ewe mwän a ameresala echö pwölüpwöl won awen ewe chönüttu o atoropasa föün wiich won, pwe esap wor eman a tongeni silleni pwe a wor aramas lon.
2SA 17:20 Lupwen nöün Apsalom kewe chon angang ra feito ren ewe fefin lon ewe imw, ra aisini, “Ikafair Ahimas me Jonatan?” Nge ewe fefin a üreniir, “Ra fen süla pekilan ewe öüwö.” Iwe, ra kütteer nge resap küneer, iei mine ra liwiniti Jerusalem.
2SA 17:21 Iwe, mürin ar feila, Jonatan me Ahimas ra tötä me lon ewe chönüttu, ra feila o apworausa ekewe pworaus ngeni ewe king Tafit. Ra üreni Tafit, “Kopwe ütä o müttir feila pekilan ewe chanpupu, pun iei än Ahitofel we öüröüren afeiengau fän itom.”
2SA 17:22 Iei mine Tafit me ekewe aramas meinisin mi eti ra feila pekilan ewe chanpupu Jortan. Iwe, lupwen a ränila, ir meinisin ra tori pekilan.
2SA 17:23 Nge lupwen Ahitofel a mefi pwe resap aleasochisi an öüröür, a rietä an lenien mot won waan aas o feila lon imwan lon puputän an telinimw. Iwe, a akotöchü lon imwan, mürin a forusala. Iei usun Ahitofel a mäla, nge ra peiaseni lon peiasen saman we.
2SA 17:24 Lupwen Tafit a tori Mahanaim lon chök ei otun, Apsalom a feila pekilan ewe chanpupu Jortan fiti ekewe re Israel meinisin.
2SA 17:25 Iwe, Apsalom a seikätä Amasa pwe epwe meilapen ewe mwichen sounfiu lon lenien Joap. Amasa nöün eman re Ismael mwän itan Jeter, a pwülüeni Apikail nöün Nahas we föpwül pwin Seruia inen Joap.
2SA 17:26 Iwe, Apsalom me ekewe chon Israel ra nonom lon ewe fanü Kiliat.
2SA 17:27 Iwe, lupwen Tafit a tori Mahanaim, Sopi nöün Nahas we mwän seni Rapa telinimwen chon Amon, me Makir nöün Amiel we mwän seni Lotepar, pwal Parsilai ewe re Kiliat seni Rokelim ra churi.
2SA 17:28 Ra uwato kieki, sepi me sokopaten sepi mi för seni pwül, pwal wiich, parli, pilawa mi amas, föün wiich mi tün, mame me sokopaten mame,
2SA 17:29 chönün chunen, soon milik me sip, pwal chiis seni kow. Ekei mongö meinisin ra uwato fän iten Tafit me ekewe aramas mi eti, pwe repwe mongö. Pun ra silei pwe ekewe aramas ra echik me kaka pwal malülü me lon ewe fanüapö.
2SA 18:1 Iwe, Tafit a achufengeni ekewe mwän mi eti, a kiniretiu lon ngeröü me pükü o seikätä chon nemenem wor.
2SA 18:2 Mürin, Tafit a tinala ekewe sounfiu lon ülüngat mwich, eu mwich a nom fän än Joap nemenem, eu mwich a nom fän än Apisai nemenem, pwin Joap we, pwal eu mwich a nom fän än Itai nemenem, ewe re Kit. Iwe, ewe king a üreni ekewe sounfiu, “Püsin ngang won inisi üpwe etikemi le feila.”
2SA 18:3 Nge ir ra üra, “Kosap feila. Pun ika äm aipwe sü, ika esop me leim epwe mäla, ekewe chon oputakem resap fokun ekiekikem. Nge en ka kon aüchea seni engol ngeröü leim. Iei mine epwe mürina pwe kopwe chök nom lon ewe telinimw o tinato alilisim.”
2SA 18:4 Iwe, ewe king a üreniir, “Meinisin mine a öch ngenikemi üpwe föri.” Iei mine ewe king a ütä lepekin asamalapen ewe telinimw, lupwen ekewe sounfiu meinisin ra karisiwu lon pükü me ngeröü.
2SA 18:5 Nge ewe king a allük ngeni Joap, Apisai me Itai, “Oupwe pwetete ngeni ewe alüal Apsalom fän itei.” Iwe, ekewe sounfiu meinisin ra rong mine ewe king a eäni allük ngeni ekewe chon nemenem fän iten Apsalom.
2SA 18:6 Iwe, än Tafit we mwichen sounfiu a towu lon ewe mälämäl o maun ngeni chon Israel lein ewe wöllap lon Efraim.
2SA 18:7 Ikenan ekewe sonfiun Israel ra kuf ren nöün Tafit kewe sounfiu. Iwe, ewe ninni a fokun watte lon ewe ränin, pun ükükün ruungeröü mwän ra mäla.
2SA 18:8 Iwe, ewe maun a chöüla won unusen ewe fanü. Nge chokewe mi mäla lein ewe wöllap lon ewe rän ra kon chomong seni ir mi mäla lon maun.
2SA 18:9 Iwe, a fis pwe Apsalom a sereni nöün Tafit kewe sounfiu. Nge Apsalom a wawa nöün aas. Iwe, lupwen ewe aas a säla fän umumun palen efoch irä ook mi fokun watte, möküran a fif won palan. A nikemeitiu won ewe irä, nge ewe aas a wawa a chök säla.
2SA 18:10 Iwe, eman nöün Tafit kewe sounfiu a üreni Joap, “Iei chök üa küna Apsalom a nikemeitiu won efoch ira ook.”
2SA 18:11 Nge Joap a üreni, “Mwa met, en ka küna Apsalom. Pwota kosap niela me ikenan? Ngang üpwe pwapwa le ngonuk engol föün moni silifer me efoch pelit.”
2SA 18:12 Nge ewe mwän a üreni Joap, “Are kopwe fen ngeniei engeröü föün moni silifer, ngang üsap angatä won nöün ewe king mwän. Pun aia rongorong än ewe king allük ngenikemi me Apisai me Itai, pwe oupwe tümwünü ewe alüal Apsalom fän itan.
2SA 18:13 Nge are üpwe aleasolap ngeni ewe king o niela Apsalom, ewe king epwe rongorong usun, pun esap wor och mettoch a monola seni, mürin en kosap peniei.”
2SA 18:14 Joap a üra, “Üsap mochen alusumwäli ai fansoun reöm.” Iwe, Joap a angei ülüfoch siles o posu ngeni leupwen Apsalom, lupwen a chüen manau o nikemeitiu won ewe irä ook.
2SA 18:15 Mürin, engol alüal nöün Joap chon uwei an pisekin maun ra pweliela Apsalom, ra awata o niela.
2SA 18:16 Mürin, Joap a ettiki ewe rappwa pwe repwe ükütiu le maun, nge nöün kewe sounfiu ra liwinsefälito seni ar tapweri ekewe chon Israel.
2SA 18:17 Iwe, ra uwei inisin Apsalom, ra aturalong lon eu pwang watte mi nom lein ewe wöllap o achukuchukätä won eu ioien fau mi fokun watte. Nge chon Israel meinisin ra en me süla ngeni püsin lenian.
2SA 18:18 Iwe, le manauen Apsalom a püsin aüetä fän itan eföü föün achem me lon ewe lemolun king, pun esap wor nöün mwän mi sopwela itan. Iei mine a aita ewe föün achem ngeni püsin itan, nge tori ikenai a chüen iteni föün achechemen Apsalom.
2SA 18:19 Mürin, Ahimas nöün Satok we mwän a üreni Joap, “Kopwe mwüt ngeniei üpwe säla o uwala ewe pworaus ngeni ewe king, pwe ewe Samol mi Lapalap a angasa i seni chon oputan.”
2SA 18:20 Nge Joap a üreni, “Kosap uwala pworaus ikenai. Ka tongeni uwala pworaus lon eu rän, nge ikenai kosap uwala pworaus, pun nöün ewe king we mwän a mäla.”
2SA 18:21 Mürin, Joap a üreni eman re Kus, “Kopwe feila o apworausa ngeni ewe king mine ka küna.” Iwe, ewe re Kus a chapetiu mwen Joap, mürin a säla.
2SA 18:22 Nge Ahimas nöün Satok we mwän a kapassefäl ngeni Joap, “Inamwo met epwe fis, kopwe chök pwal mwüt ngeniei pwe üpwe säla mürin ewe re Kus.” Iwe, Joap a üra, “Nei, pwota ka mochen säla? Kosap angei liwinin om uwala ei pworaus.”
2SA 18:23 Nge Ahimas a üra, “Inamwo met epwe fis, ngang üpwe chök säla.” Iei mine Joap a üreni, “Kopwe säla.” Mürin, Ahimas a säla won alen ewe lemolun Jortan o osunu ewe re Kus.
2SA 18:24 Lupwen Tafit a mot lefilen ewe asamalapen lon me ewe asamalapen lükün, ewe chon mamas a feitä won osun ewe asamalap arun tittin ewe telinimw. Nge lupwen a netä, a küna eman mwän a akaleman le sä.
2SA 18:25 Iwe, ewe chon mamas a kötiu ren ewe king o üreni mine a küna. Nge ewe king a üra, “Are ewe mwän a akaleman, a wor pworausan mi mürina.” Iwe, ewe mwän a akarapeto.
2SA 18:26 Mürin, ewe chon mamas a küna pwal eman mwän mi säto. Iwe, a kökkötiu ren ewe asamalap o üra, “Nengeni, pwal eman mwän a akaleman le sä.” Nge ewe king a üra, “Pwal i a uwato pworaus mi mürina.”
2SA 18:27 Iwe, ewe chon mamas a üra, “Üa ekieki, pwe ewe chon sä akom a usun chök säsän Ahimas nöün Satok we mwän.” Nge ewe king a üra, “Ahimas eman mwän mi mürina, epwe uwato pworaus mi mürina.”
2SA 18:28 Mürin, Ahimas a köto ren ewe king, “Meinisin a mürina.” Iwe, a chapetiu lepwül mwen ewe king o apasa, “Üpwe mwareiti ewe Samol mi Lapalap om we Kot a atolonga lepoum ekewe mwän mi pälüenuk en ai samol me ai king.”
2SA 18:29 Iwe, ewe king a ais, “Ifa usun ewe alüal Apasalom?” Nge Ahimas a pälüeni, “Lupwen Joap a tiniei ngang noum chon angang, üa küna eu parangarang mi watte, nge üsap silei met mi fis.”
2SA 18:30 Nge ewe king a üra, “Kopwe ekis märewu o ütä ikenan.” Iwe, a märewu o ütä.
2SA 18:31 Mürin, ewe re Kus a war o üreni ewe king, “Üa uwato pworaus mi mürina reöm en ai samol me ai king. Pun ewe Samol mi Lapalap a angasok ikenai seni chokewe meinisin mi ü ngonuk.”
2SA 18:32 Nge ewe king a aisini ewe re Kus, “Ifa usun ewe alüal Apsalom?” Ewe re Kus a pälüeni, “Amwo mine a fis ngeni ewe alüal epwe pwal fis ngeni ekewe chon oputom, en ai samol me ai king, pwal ngeni meinisin mi ükü ngonuk pwe repwe afeiengauok.”
2SA 18:33 Iwe, ewe king a fokun letipeta, a feila lon ewe rum asen ewe asamalap o kechü. A feitä, nge senituttun, “Wo ko nei mwän Apsalom, nei mwän, nei mwän Apsalom. Amwo üpwe siwiliik le mäla, Apsalom nei mwän, nei mwän.”
2SA 19:1 Iwe, eman a apworausa ngeni Joap pwe ewe king a kechü o ngüngüres fän iten Apsalom.
2SA 19:2 Iei mine ewe pwapwan win a wiliti letipeta lon ewe rän fän iten nöün Tafit kewe sounfiu meinisin, pun ra rong pwe ewe king a ngüngüres pokiten nöün we mwän.
2SA 19:3 Lon ewe ränin ekewe aramas ra änifelong lon ewe telinimw, usun sounfiu ra änifelong ren ar säw, lupwen ra kuf lon maun.
2SA 19:4 Iwe, ewe king a pwölüela mesan o leüömong le kechü, “Wo ko nei mwän Apsalom, Apsalom nei mwän, nei mwän.”
2SA 19:5 Mürin, Joap a tolong lon imwen ewe king o üreni, “Ikenai ka asäwa noum kewe aramas meinisin mi amanauok, mi amanaua noum kewe mwän me fefin, pwal pwülüom kewe me ülüpwülüom kewe.
2SA 19:6 Ka echeni chokewe mi oput en, nge ka oput chokewe mi echenuk. Pun ikenai ka afata ngenikem pwe esor aüchean noum kewe chon nemenem me noum kewe aramas me reöm. Ikenai üa mefi pwe are Apsalom epwe manau, nge äm meinisin aipwe mäla, kopwe pwapwa ren.
2SA 19:7 Iei mine kopwe towu o chärisefäli noum kewe aramas. Pun üa eäni pwon fän akapel iten ewe Samol mi Lapalap, pwe are kosap feila, esap wor eman me lein ekewe mwän epwe nom reöm lepwinei. Ei epwe kon ngau ngonuk lap seni ekewe feiengau meinisin ra toruk seni om alüal tori ikenai.”
2SA 19:8 Mürin, ewe king a feila o mot leasamalapen tittin ewe telinimw. Lupwen ei pworaus a tori ekewe sounfiu meinisin, pwe ewe king a mot leasamalapen tittin ewe telinimw, ir meinisin ra feito ren. 19.9-43 Iwe, chon Israel ra fen süla lon en me lenian.
2SA 19:9 Mürin, chon ekewe ainangen Israel meinisin ra aninifengen lefiler o apasa, “Ewe king a angasakich seni ekewe chon oputakich o amanauakich seni ekewe chon Filistia. Nge iei a süla seni ei fanü pokiten Apsalom.
2SA 19:10 Nge Apsalom, ätewe sa epiti pwe ach king, a mäla lon maun. Iei mine pwota ousap apasa pwe ewe king epwe liwinsefälito?”
2SA 19:11 Iwe, lupwen ewe king Tafit a rongorong usun än ekewe aramasen Israel kapas, a tinala pworaus ren ekewe souasor Satok me Apiatar o apasa pwe repwe üreni ekewe souakomwen Juta, “Pwota ämi oupwe kukumwir le aliwinisefäliei ngeni imwei?
2SA 19:12 Ämi märäri pwal ämi chai me fitukei. Pwota chök ämi oupwe kukumwir le aliwinisefäliei?”
2SA 19:13 Repwe pwal üreni Amasa, “Ifa usun, sap en chai me fitukei? Kot epwe nieila, are kosap tolong lon lenien Joap le meilapeni ai mwichen sounfiu seni ikenai.”
2SA 19:14 Ren ei kapas Tafit a liapeni leluken ekewe re Juta meinisin pwe ra fokun tipeeu. Iwe, ra tinala pworaus ren ewe king o apasa, “Kopwe liwinto, ämi me noum kewe aramas meinisin.”
2SA 19:15 Iei mine ewe king a liwinto ren ewe chanpupu Jortan. Nge chon Juta ra feila Kilkal, pwe repwe souni ewe king o emwenala pekilan ewe chanpupu Jortan.
2SA 19:16 Iwe, Simei nöün Kera we mwän ewe re Peniamin seni Pahurim a müttir chu ngeni ekewe re Juta le feito pwe epwe souni Tafit.
2SA 19:17 Iwe, engeröü mwän seni ewe ainangen Peniamin ra eti Simei. Sipa ewe chon angang lon imwen Saul me nöün kewe engol me limman mwän me rüe nöün chon angang ra pwal müttirila ren ewe chanpupu Jortan me mwen än ewe king epwe war.
2SA 19:18 Ra feila won petepeeten ewe chanpupu, pwe repwe uwato chon leimwen ewe king o föri mine ewe king a mochen. Nge lon ewe otun ewe king a amolätä an epwe feito pekiton ewe chanpupu Jortan, Simei nöün Kera we mwän a chapetiu me mwen ewe king
2SA 19:19 o üreni, “Ai samol, kose mochen kosap amwöchü ai tipis, kosap pwal chechemeni ai we föför esepwüng üa föri ngonuk, en ai samol me ai king, lon ewe rän ka feil seni Jerusalem. Kose mochen kosap chüen ekieki usun.
2SA 19:20 Pun ngang noum chon angang üa silei pwe üa tipis. Iei mine üa akomwoto ikenai me lein chon ekewe ainangen Israel meinisin, pwe üpwe churuk, en ai samol me ai king.”
2SA 19:21 Nge Apisai nöün Seruia we mwän a pälüeni, “Simei epwe fokun ninnila pokiten a otteki nöün ewe Samol mi Lapalap we mi kepit.”
2SA 19:22 Mürin, Tafit a üra, “Met wewen ngenikemi, ämi nöün Seruia mwän, pwe oua sotuniei. Pwota epwe wor eman epwe ninnila me lon Israel ikenai? Pun ikenai üa silei pwe üa kingsefäl lon Israel.”
2SA 19:23 Iwe, ewe king a üreni Simei, “Iei üa pwon ngonuk fän akapel pwe kosap mäla.”
2SA 19:24 Mürin, Mefiposet nöün nöün Saul we mwän a pwal feito pwe epwe churi ewe king. Esap chiri pechen, esap fichi alusan ika sopuni üfan seni ewe rän ewe king a towu seni Jerusalem tori ewe rän a liwinto fän kinamwe.
2SA 19:25 Iwe, lupwen Mefiposet a feito seni Jerusalem pwe epwe churi ewe king, ewe king a aisini, “Pwota kosap etiei, Mefiposet?”
2SA 19:26 Nge Mefiposet a pälüeni, “Ai samol me ai king, nei chon angang a atupuei. Pun üa üreni pwe epwe rietä ewe lenien mot won nei aas, pwe üpwe tongeni wawa o etuk, pokiten a mä pechei.
2SA 19:27 Nei chon angang a aitengauaei reöm, en ai samol me ai king. Nge en ka usun chök eman nöün Kot chon läng. Iei mine kopwe chök föri mine a öch me reöm.
2SA 19:28 Pun pwüngün pwe en, ai samol me ai king, kopwe niela chon leimwen semei meinisin. Nge en ka aleniaei ngang noum chon angang lein chokewe ra mongö seni om chepel. Esap chüen wor ai pwüng pwe üpwe siö ngonuk, en ai king.”
2SA 19:29 Iwe, ewe king a üreni, “Kosap chüen pwal apasa och usun. Pun üa fen apwüngala pwe ämi me Sipa oupwe inetifengeni fanüen Saul kewe.”
2SA 19:30 Nge Mefiposet a üreni ewe king, “Sipa epwe angei meinisin, üa menemenöch pwe en, ai samol me ai king, ka liwinto fän kinamwe.”
2SA 19:31 Iwe, Parsilai ewe re Kiliat a pwal feila seni Rokelim pwe epwe etala ewe king pekilan ewe chanpupu Jortan.
2SA 19:32 Parsilai eman mwän mi fokun ieritam, a walik ierin. Ätei a fokun pisekisek, a amongöni ewe king, lupwen a nom Mahanaim.
2SA 19:33 Iwe, ewe king a üreni Parsilai, “Kopwe etiei le feila Jerusalem, nge ngang üpwe wisen tümwünuk me ikenan.”
2SA 19:34 Nge Parsilai a üreni ewe king, “Esap chüen chomong lusun ierin manauei. Pwota ngang üpwe chüen fituk en ai king le feila Jerusalem?
2SA 19:35 Iei üa ierini walik. Üsap chüen tongeni alefila lefilen öch me ngau. Üsap chüen tongeni neni nennen enei ika ünümei, üsap pwal chüen tongeni rongorong ngingin än mwän me fefin köl. Pwota ngang noum chon angang üpwe alapala weiresum, en ai samol me ai king.
2SA 19:36 Pwota en ai king kopwe liwiniei lon ei sokun lapalap? Ngang noum chon angang üpwe chök ekis etukela pekilan ewe chanpupu Jortan.
2SA 19:37 Üa tüngor ngonuk, kopwe mwüt ngeniei pwe üpwe liwinla, pwe üpwe mäla lon ai telinimw arap ngeni peiasen semei me inei. Nge iei i nei mwän Chimham epwe angang ngonuk, kopwe angei pwe epwe etuk, en ai samol me ai king. Kopwe föri ngeni i meinisin mine a öch me reöm.”
2SA 19:38 Iwe, ewe king a üra, “Chimham epwe etieila Jerusalem, nge ngang üpwe föri ngeni meinisin mine a öch me reöm, pwal meinisin mine en ka mochen seniei üpwe föri ngonuk.”
2SA 19:39 Mürin, Tafit me nöün aramas meinisin ra feila pekilan ewe chanpupu Jortan. Iwe, Tafit a mitiri Parsilai o afeiöchü. Nge wesin an afeiöchü, Parsilai a liwiniti poputän fanüan.
2SA 19:40 Lupwen ewe king a feila pekilan ewe chanpupu Jortan o feila Kilkal, Chimham a etala. Iwe, ekewe re Juta meinisin me esopun re Israel ra pwal emwenala ewe king.
2SA 19:41 Mürin, ekewe re Israel meinisin ra feito ren ewe king o aisini, “Pwota pwiüm kewe re Juta ra angeek lemonomon me chon leimwom pwal noum kewe mwän o emwenikemiito pekiton ewe chanpupu Jortan?”
2SA 19:42 Mürin, ekewe re Juta ra pälüeniir, “Pokiten ewe king i märärim. Pwota oua song won ei mettoch? Ifa usun, ewe king a möni enem? Ifa usun, a ngenikem och lifang?”
2SA 19:43 Nge ekewe re Israel ra pälüeniir, “A wor engol tupwuum ren ewe king, iei mine a wor äm pwüng won Tafit lap senikemi. Pwota oua aücheangauakem? Ifa usun, sap äm aia akomwen kapas pwe sipwe aliwinato ach king?” Nge a pöchökül än ekewe re Juta kapas lap seni än ekewe re Israel kapas.
2SA 20:1 Iwe, a fis pwe eman mwän mi aramasangau itan Sepa nöün Pikri we mwän seni ewe ainangen Peniamin a nom lon Kilkal. Ätei a ettiki ewe rappwa o üra, “Sisap eti Tafit, sisap chiechi ngeni nöün Jesi we mwän. Ämi re Israel, oupwe liwiniti en me imwan.”
2SA 20:2 Iei mine ekewe re Israel ra likitala Tafit o tapwela mürin Sepa nöün Pikri we mwän. nge ekewe re Juta ra chök likitü le tapwela mürin ewe king seni ewe chanpupu Jortan tori Jerusalem.
2SA 20:3 Lupwen Tafit a tori imwan lon Jerusalem, a angei ülüpwülüan kewe engol, a likitirela pwe repwe tümwünü ewe imw o anomuur lon pwal eu imw fän tümwünüen chon mas. Iwe, ewe king a ngeniir alilisir, nge esap chök kon rer. Ra nonometiu lon ewe imw tori ränin ar mäla usun fefin mi mä pwülüer.
2SA 20:4 Mürin, ewe king a üreni Amasa, “Kopwe köri ekewe re Juta, pwe repwe mwicheto rei mürin ülüngat rän. Pwal en kopwe feito.”
2SA 20:5 Iei mine Amasa a feila pwe epwe körifengeni ekewe re Juta. Nge Amasa a mang seni ewe fansoun ewe king a aükü ngeni.
2SA 20:6 Iwe, ewe king a üreni Apisai, “Iei Sepa nöün Pikri we mwän epwe afeiengauakich lap seni Apsalom. Kopwe angei nei sounfiu o tapweri, pwe esap tolong lon ekewe telinimw mi wor tittir o sü senikich.”
2SA 20:7 Iei mine nöün Joap kewe sounfiu, ekewe chon Cheret me chon Pelet, pwal ekewe mwän mi pwora meinisin ra feiliwu seni Jerusalem fän nemenien Apisai pwe repwe tapweri Sepa nöün Pikri we mwän.
2SA 20:8 Lupwen ra tori ewe fau watte mi nom lon Kipeon, Amasa a churiir. Iwe, Joap a üföüf üfen sounfiu, a pwal fötätä won wänükün efoch pelit fiti nöün ketilas mi nom lon sittan. Nge lupwen a feil ngeni Amasa, nöün ketilas a turuwu seni sittan.
2SA 20:9 Iwe, Joap a üreni Amasa, “Ifa usum, pwii?” Mürin, Joap a amwöchü alusen Amasa won pöüifichin pwe epwe mitiri.
2SA 20:10 Nge Amasa esap afäli ewe ketilas mi nom lepöün Joap. Iwe, Joap a posu luken Amasa ngeni ewe ketilas pwe taran ra seliselitiu lepwül, nge esap posu fän ruu. Iwe, Amasa a mäla. Mürin, Joap me Apisai pwin we ra tapweri Sepa.
2SA 20:11 Nge eman lein nöün Joap kewe sounfiu a ütä ren Amasa o üra, “Io a tipeni Joap o peni Tafit epwe tapwela mürin Joap.”
2SA 20:12 Nge inisin Amasa a pwölüla ren chan me won ewe alelap. Iwe, eman me eman mi pwereto o küna Amasa a üla. Nge lupwen nöün Joap we sounfiu a küna pwe ekewe aramas meinisin ra üla, a uwala inisin Amasa seni ewe alelap ngeni ewe mälämäl o pwölüela ngeni echö üf.
2SA 20:13 Iwe, lupwen inisin Amasa esap chüen nom lon ewe alelap, ekewe aramas meinisin ra tapwela mürin Joap, pwe repwe tapweri Sepa.
2SA 20:14 Iwe, Sepa a feila lemenen fanüen ekewe ainangen Israel meinisin o tori ewe telinimw Apel Petmaka. Nge än Pikri we cho meinisin ra chufengen ren o tapweelong mürin lon ewe telinimw.
2SA 20:15 Iwe, ekewe sounfiu meinisin mi eti Joap ra feito o pweliela ewe telinimw Apel Petmaka ia Sepa a nom ie. Ra achukuchukätä pwül ünükün tittin ewe telinimw tori a apökü asen ewe tit me lükün, ra pwal tuw fän ewe tit pwe repwe aturätiu.
2SA 20:16 Mürin, eman fefin mi tipachem a köwu seni ewe telinimw, “Oupwe aüseling, oupwe aüseling! Oupwe üreni Joap epwe feito pwe üpwe kapas ngeni.”
2SA 20:17 Iwe, Joap a arap ngeni, nge ewe fefin a aisini, “Ifa usun, en Joap?” A pälüeni, “Ewer, ngang Joap.” Mürin, neminewe a üreni, “Kopwe aüseling ngeni aloi ngang noum chon angang fefin.” Joap a pälüeni, “Ngang üpwe aüseling.”
2SA 20:18 Mürin, ewe fefin a üra, “Mi wor eu kapasen lom ra kan üra, ‘Oupwe feila Apel o angei pälüen ämi kapas ais.’ Ren ei osukosuk a wesila.
2SA 20:19 Ai telinimw eu telinimw mi eäni kinamwe, a pwal allükülük me lon Israel. Nge iei ka mochen ataela eu telinimw mi wewe ngeni eman inelap me lon Israel. Pwota kopwe atatakisi mine än ewe Samol mi Lapalap?”
2SA 20:20 Nge Joap a pälüeni, “Apwi, ese fokun tufich me rei. Ese fokun tufich pwe üpwe atatakisi o ataela om ei telinimw.
2SA 20:21 Esap ina pwüngün äm ekiek. Nge eman mwän seni chukuchukutän ewe fanü Efraim itan Sepa nöün Pikri we mwän a ü ngeni ewe king Tafit. I chök oupwe fangewu, mürin üpwe liwin seni ei telinimw.” Iwe, ewe fefin a üreni Joap, “Nengeni, aipwe aturätiu möküran reöm me won ei tit.”
2SA 20:22 Mürin, ewe fefin a liwinla ren aramasen ewe telinimw meinisin o eäni kapas tipachem ngeniir. Iwe, ra pöküela üen Sepa o aturätiu möküran ren Joap. Joap a ettiki ewe rappwa, nge nöün kewe sounfiu ra säng seni ewe telinimw o liwiniti en me lenian. Nge Joap a liwiniti Jerusalem ren ewe king.
2SA 20:23 Iwe, Joap a nemeni unusen ewe mwichen sounfiun Israel, nge Penaia nöün Jehoiata we mwän a nemeni ekewe chon Cheret me chon Pelet.
2SA 20:24 Atoram a nemeni ewe mwichen chon angangen kinrosi, Jehosafat nöün Alihut we mwän i a soumak,
2SA 20:25 nge Sewa i a seketeri. Satok me Apiatar ir ra souasor,
2SA 20:26 nge Ira seni ewe telinimw Jair pwal eman nöün Tafit souasor.
2SA 21:1 Iwe, lon mwün Tafit a fis eu lengita lon ükükün ülüngat ier. Iei mine Tafit a churi ewe Samol mi Lapalap ren ei mettoch. Nge ewe Samol mi Lapalap a üra, “Saul me chon leimwan ra tipisin nimanau, pun Saul a niela chon Kipeon.”
2SA 21:2 Ekewe chon Kipeon sap ir aramasen Israel, nge ir chokewe mi chüen manau me lein ekewe chon Amor. Ekewe aramasen Israel ra pwon fän akapel pwe repwe tümwünüür, nge Saul a ekiekin aroserela lon an tiliken fän iten ekewe aramasen Israel me Juta. Iwe, ewe king Tafit a titi ekewe chon Kipeon
2SA 21:3 o aisiniir, “Met üpwe föri fän itemi? Met üpwe eäni ächächä, pwe oupwe afeiöchü nöün ewe Samol mi Lapalap kewe aramas?”
2SA 21:4 Nge ekewe chon Kipeon ra üreni, “Ei föför mi fis lefilem me Saul me chon leimwan esap wes ren silifer ika kolt. Äm aisap pwal mochen pwe chon Israel repwe mäla.” Mürin, Tafit a ais, “Met chök üpwe föri fän itemi?”
2SA 21:5 Iwe, ekewe chon Kipeon ra üreni ewe king, “Ewe mwän Saul a nikeemila o ekiekin arosakeemila, pwe esap chüen wor leniem lon unusen fanüen chon Israel.
2SA 21:6 Iei mine kopwe mwüt ngenikem füman mwän seni mwirimwirin Saul, pwe aipwe forusirela me fän mesen ewe Samol mi Lapalap lon Kipea ewe telinimwen Saul, ewe king ewe Samol mi Lapalap a filätä.” Iwe, ewe king a üra, “Üpwe ngenikemi ekewe mwän.”
2SA 21:7 Nge ewe king Tafit a achika Mefiposet nöün Jonatan we, nge Jonatan nöün Saul, pokiten ewe pwon a fis fän iten ewe Samol mi Lapalap lefilen i me Jonatan.
2SA 21:8 Iwe, ewe king a angei nöün Rispa kewe ruoman mwän a nöüni me won Saul iter Armoni me Mefiposet. Rispa nöün Aia we fefin. A pwal angei nöün Merap kewe limman mwän a nöüni me won Atriel nöün Parsilai we mwän ewe re Meholat. Merap nöün Saul we fefin.
2SA 21:9 Iwe, a ngeni ekewe chon Kipeon ekewe füman mwän, nge ekewe chon Kipeon ra forusirela me won ewe chuk me fän mesen ewe Samol mi Lapalap. Ekei füman mwän ra mäpök, ra ninnila lepoputän fansoun kinikin föün parli.
2SA 21:10 Mürin, Rispa nöün Aia we fefin a angei mangaku seni tuk o emeresala, pwe kian won ewe achau ia ekewe mi for ra nom ie. Iwe, a nom ikenan seni lepoputän fansoun kinikin tori üt a püngütiu won ekewe somä. Esap mwüt ngeni ekewe machang pwe repwe sotiu won ekewe somä lerän, esap pwal mwüt ngeni ekewe manmwacho pwe repwe feito lepwin o ocheer.
2SA 21:11 Nge lupwen Tafit a rongorong mine Rispa ülüpwülüen Saul we a föri,
2SA 21:12 a feila o angei chün Saul me chün Jonatan nöün Saul we mwän seni ekewe re Japes-kiliat. (Ir ätekewe mi angei lemonomon inisin Saul me Jonatan seni lukalapen ewe telinimw Petsan, ia ekewe chon Filistia ra forusirela ie lon ewe ränin ra niela Saul me won ewe chuk Kilpoa.)
2SA 21:13 Mürin, Tafit a uwato seni ikenan chün Saul me chün Jonatan, a pwal achufengeni chün ekewe füman mwän mi for.
2SA 21:14 Iwe, ra peiaseni chün Saul me chün Jonatan lon peiasen Kis semen Saul we lon Sela fanüen ekewe chon Peniamin. Ra föri meinisin mine ewe king a allük ngeniir. Mürin, Kot a aüselinga ekewe tüngor fän iten ewe fanü.
2SA 21:15 Iwe, a fissefäl maun lefilen ekewe chon Filistia me ekewe chon Israel. Tafit me nöün kewe sounfiu ra feila o maun ngeni ekewe chon Filistia. Lon ei otun Tafit a popuetä malülü.
2SA 21:16 Iwe, Ispi-penop eman mwirimwirin ekewe mwänämong a wokuni efoch siles ükükün choun ina epwe fisu esop paun piras, a pwal rietä won wänükün efoch ketilas minefö. Ätei a ekiekin niela Tafit.
2SA 21:17 Nge Apisai nöün Seruia we mwän a feito pwe epwe alisi Tafit. Iwe, a fiu ngeni ewe re Filistia o niela. Mürin, nöün Tafit kewe mwän ra tüngormau ngeni Tafit pwe esap chüen etiir le maun, pwe esap kunula än chon Israel apilükülük.
2SA 21:18 Mürin ei a fissefäl maun ngeni ekewe chon Filistia lon Kop. Iwe, Sipekai ewe re Husa a niela Saf, eman me lein mwirimwirin ekewe mwänämong.
2SA 21:19 A pwal fissefäl maun ngeni ekewe chon Filistia lon Kop. Nge Elhanan nöün Jair we mwän, eman re Petleem, a niela Koliat ewe re Kat, ätei a wokuni efoch siles, ilon a nönnö ngeni öwün efoch waaseres.
2SA 21:20 Iwe, a pwal fissefäl maun lon Kat, ia a nom ie eman mwän mi fokun tam. A wor wonofoch aütün pöün me ruofoch pwal wonofoch aütün pechen me ruofoch, pwe a wor ükükün rüe me fofoch aütün. Ätei pwal eman mwirimwirin ekewe mwänämong.
2SA 21:21 Lupwen ätei a turunufasei chon Israel, Jonatan nöün Simea we mwän a niela. Nge Simea pwin Tafit.
2SA 21:22 Ekei föman mwän ir mwirimwirin ekewe mwänämong lon Kat. Iwe, ra ninnila ren Tafit me nöün kewe sounfiu.
2SA 22:1 Iwe, Tafit a eäni ei köl ngeni ewe Samol mi Lapalap lon ewe rän ewe Samol mi Lapalap a angasa i seni chokewe meinisin mi oput, pwal seni Saul.
2SA 22:2 A apasa, “Ewe Samol mi Lapalap ai achau, i imwei imwen maun pwal i chon angasaei,
2SA 22:3 ai Kot ai achau ewe ia üa op ie. A epeti seniei feiengau usun eu tittin maun, a peniei o tümwünüei. I ai chon amanau, a tümwünüei o amanauaei seni föförün mwäneson.
2SA 22:4 Üa kökköri ewe Samol mi Lapalap, ewe mi fich ngeni ach sipwe mwareiti. A amanauaei seni chokewe mi oputaei.
2SA 22:5 Ekewe nonoon mäla ra pwelifeiliei, ekewe öütöüten feiengau ra puitiei,
2SA 22:6 ekewe feiengauen lenien sotup ra pwelifeiliei, ekewe likatupun mäla ra mochen säräei.
2SA 22:7 Üa kökköri ewe Samol mi Lapalap lon ai riaföü, üa siö ngeni ai Kot pwe epwe alisiei. A rongorong mweliei seni lon imwan imwenfel o aüselinga ai siö ngeni.
2SA 22:8 Iwe, fanüfan a chechech o mwöükük, nge longolongun läng a chechech o chüngüchüng pokiten än Kot song.
2SA 22:9 Ötüöt a ötüwu seni lon pwötün, nge ekkei lapalap a ngetewu seni lon awan, pwal moch mi sarara a küwu seni.
2SA 22:10 A tinenifeseni läng o feitiu. Kuchuchol ra nom fän pechen.
2SA 22:11 A wawa eman kerop o äs, a müttir feito won pöükässin asepwäl.
2SA 22:12 A pwölüela ngeni inisin rochopwak, kuchu mi malul o uren koluk ra pwelifeili.
2SA 22:13 Moochen ekkei a küwu seni lon ewe saramaram mi nom mwan.
2SA 22:14 Ewe Samol mi Lapalap a apüngü chopulap seni läng, ewe mi Unusen Tekia a aronga mwelian.
2SA 22:15 A esefichala wokun kewe föün esefich o atoropasa chon oputan, a afifi ngeniir inefi o asürela.
2SA 22:16 Mürin, epin matau a pwä, longolongun fanüfan a lingetä, lupwen ewe Samol mi Lapalap a apwüngü chon oputan o leüömong ngeniir fän an song.
2SA 22:17 Iwe, ewe Samol mi Lapalap a angetiu seni won ewe leni mi tekia o amwöchüei, a efieitä seni lon ekewe koluk mi alolol.
2SA 22:18 A angasaei seni chon pälüeniei mi pöchökül, seni chokewe mi oputaei, pun ra kon pöchökül ngeniei.
2SA 22:19 Iwe, ra münitiei lon ränin ai feiengau, nge ewe Samol mi Lapalap a tümwünüei.
2SA 22:20 A emwenieiwu lon eu leni mi chölap, a angasaei, pun a pwapwa rei.
2SA 22:21 Ewe Samol mi Laplap a liwiniöchüei, pun üa föri mine a pwüng, a afeiöchüei, pun esap wor ai tipis.
2SA 22:22 Üa aleasochisi än ewe Samol mi Lapalap kewe allük, nge üsap rik seni ai Kot ren och föför mi ngau.
2SA 22:23 Üa apwönüetä an kewe allük meinisin, nge üsap aleasolap ngeni an kewe pwüüng.
2SA 22:24 A silei pwe esap wor ai mwäl, pwe üa püsin tümwünüei seni tipis.
2SA 22:25 Iei mine ewe Samol mi Lapalap a liwiniöchüei, pokiten üa föri mine a pwüng. Pun a silei pwe esap wor ai tipis.
2SA 22:26 Ai Samol mi Lapalap, ka allükülük ngeni ir mi allükülük, ka pwal pwärätä om unusen pwüng ngeni ir mi unusen pwüng.
2SA 22:27 Ka pwärätä om limelimöch ngeni ir mi limelimöch, nge ekewe mi por manauer ka pwärätä om pöchökül ngeniir.
2SA 22:28 Ka angasa aramas mi tipetekison, nge chokewe mi lamalamtekia ka atekisoneretiu.
2SA 22:29 Ewer, ai Samol mi Lapalap, en ai saram, en ai Kot ka awili ai rochopwak ngeni saram.
2SA 22:30 Ewer, ren om alisiei üa tongeni fiu ngeni ekewe chon oputaei, ren en, ai Kot, üa tongeni mwet won eu tit.
2SA 22:31 Än Kot kewe föför ra unusen pwüng, Än ewe Samol mi Lapalap kapasen pwon ra let, i a usun chök eu tittin maun fän iten chokewe meinisin mi op ren.
2SA 22:32 Ewe Samol mi Lapalap i chök Kot. Kot echök ach achau.
2SA 22:33 Ei Kot ai lenien op mi pöchökül, i ewe mi anükünüköchü ai al.
2SA 22:34 A amüttiriei usun müttirin chia, a pwal aleniöchüei won ekewe leni mi tekia.
2SA 22:35 A asipaei ngeni maun, pwe üa tongeni pworefengeni efoch esefich seni piras.
2SA 22:36 Ai Samol mi Lapalap, ka amanauaei o epeti seniei feiengau, om alilis a atekiaeitä.
2SA 22:37 Ka achölapa ewe al üa fetal won, pwe pechei esap mit.
2SA 22:38 Üa tapweri chon oputaei o akufuur. Üsap kulsefäl seniir tori ra rosola.
2SA 22:39 Üa atururela pwe resap chüen tongeni ütä. Ra turula arun pechei.
2SA 22:40 Ka ngeniei pöchökül pwe üa tongeni maun, ka pwal akufu me mwei ekewe chon ü ngeniei.
2SA 22:41 Ka föri pwe ekewe chon pälüeniei ra sü seniei, üa arosala chokewe mi oputaei.
2SA 22:42 Ra nenefetalei iö epwe alisiir, nge esap wor eman a amanaueer. Ra siö ngeni ewe Samol mi Lapalap, nge esap pälüeniir.
2SA 22:43 Üa üsiir pwe ra usun chök pipisüsü, üa atatakisiir o ipweriretiu usun pwakaken lon ekewe al.
2SA 22:44 En ka angasaei seni ekewe aramas mi ü ngeniei, ka seikieitä pwe üpwe samolun ekewe mwü. Ekewe aramas üsap sileer me mwan ra nom fän nemeniei.
2SA 22:45 Chon ekis ra feito o chapetiu mwei, ra aleasochisiei lon ewe otun ra rong mweliei.
2SA 22:46 Chon ekis ra apilükingau, ra towu seni ar kewe lenien maun mi pöchökül fän chechech.
2SA 22:47 Ewe Samol mi Lapalap a manau. Üa mwareiti ai achau, üa ingeiti ai Kot mi amanauaei.
2SA 22:48 Kot a atufichiei pwe üpwe ngeni chon oputaei chappen ar föför, a anomu fai aramasen ekewe mwü.
2SA 22:49 A amanauaei seni ekewe chon pälüeniei. En ai Samol mi Lapalap ka atekiaeitä asen ekewe chon ü ngeniei o angasaei seni ekewe aramas mi mwäneson.
2SA 22:50 Iei mine üpwe ingemwareituk me lein chon ekewe mwü. Ai Samol mi Lapalap, üpwe kölün mwareituk.
2SA 22:51 Kot a awinna nöün we king ngeni eu win mi lapalap o pwäri an tong ellet ngeni nöün we mi kepit, ngeni Tafit me mwirimwirin kewe tori feilfeilachök.”
2SA 23:1 Iei alon Tafit nöün Jesi we mwän, alon ätewe ewe mi Unusen Tekia a atekiatä, ätewe mi kepit me ren än Jakop we Kot, ewe souköl me lon Israel. Ikei än Tafit kewe kapasen kasop:
2SA 23:2 “Ngünün ewe Samol mi Lapalap a fos me woi, an kapas a nom won chönawei.
2SA 23:3 Ewe Koten Israel a kapas, ewe Achauen Israel a üreniei: Ewe king mi nemeni aramas fän pwüng, mi nemenem fän an niuokusiti Kot,
2SA 23:4 a wewe ngeni saramen tötän akkar lesosor, lupwen esap wor kuchu, pwal usun saramen akkar mürin püngün üt mi ämärätä fetil won fanüfan.
2SA 23:5 Ewer, a öch lefilen chon leimwei me Kot. Pun a föri ngeniei eu pwon esemüch, eu pwon mi kotöch lon mettoch meinisin o nükünüköch. I epwe afisätä ai manau o ngeniei mochenin letipei meinisin.
2SA 23:6 Nge ekewe aramas mi manauangau ra usun iräfölüföl mi katurula, esap wor eman a tongeni ionifengeniir ren pöün.
2SA 23:7 Nge are eman aramas a ionifengeniir, a aea mächä ika ilon efoch siles, mürin ra kekkila.”
2SA 23:8 Ikkei iten nöün Tafit kewe sounfiu mi pwora: Aemanün Josep-pasepet eman re Takemon. Ätei i ewe meilap me lein ekewe ülüman, a aea wokun siles le niela ükükün walupükü mwän lon eu chök fansoun.
2SA 23:9 Ewe aruomanün lein ekewe ülüman mwän mi pwora Eleasar nöün Toto we mwän seni än Aho cho. Ätei a eti Tafit lon Pastamin, lupwen ekewe chon Filistia ra chufengen pwe repwe maun ngeniir. Nge lupwen ekewe re Israel ra timär,
2SA 23:10 Eleasar a chök ütala lon lenian o fiu ngeni ekewe chon Filistia tori pöün a mwöchüla won ewe ketilas. Iwe, ewe Samol mi Lapalap a afisi eu win mi lapalap lon ewe rän. Mürin, ekewe mwän mi timär ra liwinsefälito ren Eleasar o angei pisekin ekewe mi mäla.
2SA 23:11 Ewe aülümanün leir itan Sama nöün Aki we mwän ewe re Harar. Ekewe chon Filistia ra mwichefengen lon Lehi, ewe ia a nom ie eu tanipin mame. Iwe, ekewe chon Israel ra sü ren ekewe chon Filistia,
2SA 23:12 nge Sama a chök ütala lukalapen ewe tanipi o tümwünü, a pwal niela ekewe chon Filistia. Iwe, ewe Samol mi Lapalap a afisi eu win mi lapalap lon ewe rän.
2SA 23:13 Lupwen fansoun räs, ülüman me lein ekewe ilik meilapen sounfiu ra feila ren Tafit lon ewe föimw Atulam, nge eu mwichen chon Filistia a nom lon ewe lemolun Refaim.
2SA 23:14 Lon ena fansoun, Tafit a nom lon ewe lenien op mi pöchökül, nge eu mwichen sounfiun Filistia a nom lon Petleem.
2SA 23:15 Iwe, Tafit a äleäl, “Amwo eman epwe üfato ünümei koluk seni ewe chönüttu mi nom Petleem ren asamalapen ewe tit.”
2SA 23:16 Mürin, ekewe ülüman sounfiu mi pwora ra töfochofocholong lon lenien ekewe chon Filistia o üfi koluk seni ewe chönüttu mi nom Petleem ren asamalapen ewe tit. Iwe, ra uwato ren Tafit, nge Tafit esap mochen ünümi. A ninätiu ewe koluk pwe eu asor ngeni ewe Samol mi Lapalap
2SA 23:17 o üra, “Ai Samol mi Lapalap, üsap fokun tongeni ünümi ei koluk. Pun ika üpwe ünümi, epwe usun chök ai üpwe ünümi chan ekei mwän mi fangala manauer, lupwen ra feila.” Iei mine Tafit esap ünümi ewe koluk. Ekei föför ekewe ülüman sounfiu mi pwora ra föri.
2SA 23:18 Iwe, Apisai pwin Joap nöün Seruia we mwän i meilapen ekewe ilik. A aea wokun siles le niela ükükün ülüpükü mwän. Ren ei Apisai a pach ngeni ekewe ülüman le iteföüla.
2SA 23:19 a fokun iteföüla me lein ekewe ilik o wiliti nöür meilap, nge esap kon iteföüla usun ekewe ülüman.
2SA 23:20 Penaia nöün Jehoiata we mwän seni Kapsel, pwal i eman sounfiu mi pwora, a föri sokun föför mi amwarar. A niela ruoman sounfiun Moap mi fokun pöchökül. Lon eu rän a pwal tötiu lon eu pwang o niela eman laion, lupwen snow a püngütiu.
2SA 23:21 A pwal niela eman re Isip mi mwänemong. Ewe re Isip a amwöchü efoch siles, nge Penaia a feila ren fän efoch chök wok. Iwe, a turufi seni lepöün ewe re Isip wokun siles o ni ngeni.
2SA 23:22 Ikkei ekei föför Penaia a föri, iei mine a pach ngeni ekewe ülüman mwän mi pwora o iteföüla.
2SA 23:23 Ätei a fokun iteföüla me lein ekewe ilik, nge esap kon iteföüla usun ekewe ülüman. Iwe, Tafit a seikätä won nöün we mwichen sounfiu mi wisen tümwünü inisin.
2SA 23:24 Pwal ikkei iten ekewe mwän mi nom lon ewe iteit ilik: Asael pwin Joap, Elhanan nöün Toto we mwän seni Petleem,
2SA 23:25 Sama me Elika seni Harot,
2SA 23:26 Heles seni Pelet, Ira nöün Ikes we mwän seni Tekoa,
2SA 23:27 Apieser seni Anatot, Mepunai seni Husa,
2SA 23:28 Salmon seni Aho, Maharai seni Netofa,
2SA 23:29 Helep nöün Paana we mwän seni Netofa, Itai nöün Ripai we mwän seni Kipea mi nom lon ewe fanü Peniamin,
2SA 23:30 Penaia seni Piraton, Hitai seni ewe lemol mi nom arun Kaas,
2SA 23:31 Apialpon seni Arapa, Asmafet seni Pahurim,
2SA 23:32 Eliapa seni Salpon, nöün Jaasen kewe mwän, Jonatan,
2SA 23:33 Sama seni Harar, Ahiam nöün Sarar we mwän seni Harar,
2SA 23:34 Elifelet nöün Ahaspai seni Maaka, Eliam nöün Ahitofel we mwän seni Kilo,
2SA 23:35 Hesro seni Karmel, Parai seni Arap,
2SA 23:36 Ikal nöün Natan we mwän seni Sopa, Pani seni Kat,
2SA 23:37 Selek seni Amon, Naharai seni Perot, ätewe mi wisen uwou än Joap pisekin maun.
2SA 23:38 Ira me Karep seni Jattir
2SA 23:39 me Uria ewe re Hit. Iteiterfengen meinisin ükükün ilik me füman.
2SA 24:1 Iwe, ewe Samol mi Lapalap a pwal songsefäl ngeni chon Israel, pwe a pesei ngeni Tafit pwe epwe föri och mine repwe feiengau ren. A üra, “Kopwe feila o angei iteiten chon Israel me chon Juta.”
2SA 24:2 Iei mine ewe king a üreni Joap me ekewe meilapen mwichen sounfiu mi nom ren, “Oupwe feila lemenen ekewe ainangen Israel meinisin seni Tan tori Persepa o angei iteiten ekewe aramas, pun üa mochen silei iteiter.”
2SA 24:3 Nge Joap a üreni ewe king, “Amwo ewe Samol mi Lapalap om we Kot epwe awattela iteiten ekewe aramas fän ipükü seni me mwan, lupwen en ai samol me ai king ka chüen manau o küna. Pwota en ai samol ka pwapwaiti ei föför?”
2SA 24:4 Nge ewe king a pöchökül ngeni Joap me ekewe meilapen mwichen sounfiu, pwe ra aleasochisi alon. Iei mine ra feila seni fän mesen ewe king, pwe repwe angei iteiten ekewe aramasen Israel.
2SA 24:5 Ra feila pekilan ewe chanpupu Jortan o popuetä seni Aroer, pwal seni ewe telinimw mi nom lukalapen ewe lemol, ra feil ngeni Kat tori Jaser.
2SA 24:6 Mürin ra tori Kiliat pwal tori Kates lon fanüen chon Hit, ra pwal tori Tan. Nge seni Tan ra pwelila tori Siton,
2SA 24:7 ra pwal tori ewe telinimw Tirus mi pöchökül tittin, pwal tori ekewe telinimwen chon Hiw me chon Kanaan meinisin. Mürin, ra feila Persepa lon ewe fanü Nekep lon Juta.
2SA 24:8 Mürin tiu maram me rüe rän ra wes le fetalfeil lemenen unusen ewe fanü o liwiniti Jerusalem.
2SA 24:9 Iwe, Joap a ngeni ewe king unusen iteiten ekewe aramas. Lon Israel mi wor walupükü ngeröü mwän mi mwoot o sile maun fän ketilas, nge lon Juta mi wor limepükü ngeröü.
2SA 24:10 Nge mürin än Tafit angei iteiten ekewe aramas, a mengiringir lon lelukan. Iwe, a üreni ewe Samol mi Lapalap, “Üa fokun tipis ren mine üa föri. Iei mine üa tüngor ngonuk, kopwe amusala ai tipis ngang noum chon angang. Pun ngang üa föri mine a fokun mwäl.”
2SA 24:11 Nge mwen än Tafit pwätä lesosor, ewe Samol mi Lapalap a fen üreni Kat nöün Tafit we soufos,
2SA 24:12 “Kopwe feila o üreni Tafit pwe iei aloi ngang ewe Samol mi Lapalap. Ülüngat mettoch üa uwato reöm. Kopwe filätä eu me leir pwe üpwe föri ngonuk.”
2SA 24:13 Iei mine Kat a feito ren Tafit o üreni, “Ifa usun, ka mochen epwe fis lengita won fanüom lon ükükün ülüngat ier? Ika kopwe sü me mwen chon oputom lon ükükün ülüngat maram, lupwen repwe tapweruk? Ika epwe wor mätter won fanüom lon ükükün ülüngat rän? Iei kopwe ekieki o filätä pälüan, pwe üpwe liwinla o asile ngeni ewe mi tinieito.”
2SA 24:14 Mürin, Tafit a üreni Kat, “Ngang üa nom lon riaföü lapalap. Amwo ewe Samol mi Lapalap epwe apwüngükem, pun an ümöümöch a lapalap, nge aisap mochen pwe aramas repwe apwüngükem.
2SA 24:15 Iei mine ewe Samol mi Lapalap a tinato mätter won chon Israel seni lesosor tori ewe fansoun mi pwonola. Iwe, a wor ükükün fik ngeröü mwän mi mäla seni Tan tori Persepa.
2SA 24:16 Nge lupwen ewe chon läng a aitiela pöün ngeni Jerusalem pwe epwe afeiengaua aramasan, ewe Samol mi Lapalap a lamalamala pokiten ewe feiengau o üreni ewe chon läng mi eäni ewe angangen afeiengau lein ekewe aramas, “Kopwe ükütiu. Kopwe aitietiu poum.” Nge nöün ewe Samol mi Lapalap chon läng a nom ren ewe lenien wichiwich umwun wiich än Arauna ewe re Jepus.
2SA 24:17 Iwe, lupwen Tafit a küna ewe chon läng mi niela ekewe aramas, a kapas ngeni ewe Samol mi Lapalap, “Nengeni, ngang üa tipis o föri mine a fokun ngau. Nge met ekei aramas ra föri? Üa tüngor ngonuk pwe kopwe apwüngüei me chon leimwen semei.”
2SA 24:18 Lon ewe chök ränin Kat a feito ren Tafit o üreni, “Kopwe feitä ren ewe lenien wichiwich umwun wiich än Arauna ewe re Jepus o senätä eu rongen asor ngeni ewe Samol mi Lapalap.”
2SA 24:19 Iei mine Tafit a aleasochisi ekewe kapas Kat a üreni fän alon ewe Samol mi Lapalap o feitä.
2SA 24:20 Nge lupwen Arauna a chimwetä, a küna ewe king me nöün kewe nöüwis ra feitä ren. Iwe, Arauna a towu seni imwan, a chapetiu mwen ewe king
2SA 24:21 o aisini, “Pwota en ai samol me ai king ka feito rei ngang noum chon angang?” Nge Tafit a üreni, “Üa feito pwe üpwe möni om we lenien wichiwich umwun wiich, pwe üpwe senätä eu rongen asor ngeni ewe Samol mi Lapalap, pwe ewe mätter epwe ükütiu seni ekewe aramas.”
2SA 24:22 Mürin, Arauna a üreni Tafit, “Ai samol me ai king, kopwe angei o eäni asor mine a öch me reöm. Ikkei ir ekei ätemwänin kow fän iten asoren kek, pwal ewe pisekin wichiwich umwun wiich me waasen ekewe ätemwänin kow fän iten mwüch.
2SA 24:23 Ekei mettoch meinisin ai king üpwe ngonuk.” Iwe, Arauna a pwal üreni ewe king, “Ewe Samol mi Lapalap epwe etiwa om we asor.”
2SA 24:24 Nge ewe king a üreni Arauna, “Apwi, üpwe möni senuk won äükükün liwinin. Üsap mochen eäni asoren kek ngeni ewe Samol mi Lapalap ai we Kot mine üsap möni.” Iei mine Tafit a möni ewe lenien wichiwich umwun wiich me ekewe ätemwänin kow won ükükün lime föün moni silifer.
2SA 24:25 Mürin, Tafit a senätä eu rongen asor ngeni ewe Samol mi Lapalap o eäni asoren kek me asoren kinamwe won. Iei mine ewe Samol mi Lapalap a aüselinga ekewe tüngor fän iten ewe fanü, nge ewe mätter a ükütiu seni lon Israel.
1KI 1:1 Iwe, lupwen ewe king Tafit a chinlap o ieritam, a fokun würi föü, inamwo ika nöün chon angang ra pwölü ngeni palangket.
1KI 1:2 Iei mine nöün kewe nöüwis ra üreni, “Aipwe kütta eman föpwül fän itom, en äm samol me äm king, epwe angang ngonuk o tümwünuk, epwe pwal kon ünükum pwe kopwe ekis pwichikar.”
1KI 1:3 Mürin, ra kütta eman föpwül mi liöch lemenen unusen ewe fanü Israel. Iwe, ra küna Apisak, eman fin Sunam, o emwenato ren ewe king.
1KI 1:4 Ei föpwül a fokun liöch, a tümwünü ewe king o angang ngeni, nge ewe king esap pwüpwülü ngeni neminewe.
1KI 1:5 A wor eman nöün Tafit we mwän itan Atonia, a nöüni me won Akit. Ätei a seikätä püsin i o üra, “Ngang üpwe king.” A amolätä fän itan woken me chon wawa oris, pwal lime mwän repwe akom mwan.
1KI 1:6 Nge Tafit saman we esap fokun apwüngü fän eu ren an epwe aisini pwota a föri ei sokun lapalap. Atonia a pwal eman mwän mi fokun äteöch, a uputiu mürin Apsalom.
1KI 1:7 Iwe, Atonia a pwüngüpwüng ngeni Joap nöün Seruia we mwän, pwal ngeni ewe souasor Apiatar. Iwe, ra tipeeu ngeni o alisi ngeni an we ekiek.
1KI 1:8 Nge ewe souasor Satok me Penaia nöün Jehoiata we mwän, pwal ewe soufos Natan, Simei me Rei, pwal nöün Tafit kewe mwän mi pwora resap eti Atonia.
1KI 1:9 Lon eu rän Atonia a eäni asor sip, ätemwänin kow me man mi aümanau ren ewe Föün Serepenit mi nom ünükün Enrokel. Iwe, a köri pwin kewe nöün ewe king mwän me nöün ewe king kewe nöüwis seni Juta, pwe repwe eti le asor.
1KI 1:10 Nge esap köri ewe soufos Natan ika Penaia ika ekewe mwän mi pwora ika Salomon pwin we.
1KI 1:11 Mürin, Natan a feila ren Patsipa inen Salomon we o üreni, “Kosap rongorong pwe Atonia nöün Hakit we mwän a tolong lon wisen king, nge Tafit ach samol esap silei usun?
1KI 1:12 Iei mine kopwe föri mine üpwe öüröüra ngonuk, pwe kopwe amanaua manauom pwal manauen noum mwän Salomon.
1KI 1:13 Kopwe müttir tolong ren ewe king Tafit o üreni, ‘Ai samol me ai king, ifa usun, kosap pwon fän akapel ngeniei ngang noum chon angang fefin, pwe Salomon nei we mwän epwe siwiliik lon wisom wisen king? Pwota chök Atonia a wiseni ewe wisen king?’
1KI 1:14 Mürin, lupwen kopwe chüen fos ngeni ewe king, ngang üpwe pwal feito me mürum o anüküchara om kapas.”
1KI 1:15 Iei mine Patsipa a tolong ren ewe king lon rumwan. Lon ei fansoun ewe king a fokun chinlap, nge Apisak ewe fin Sunam a angang ngeni.
1KI 1:16 Iwe, Patsipa a chapetiu o asamolu ewe king. Nge ewe king a aisini, “Met ka mochen?”
1KI 1:17 Patsipa a üreni, “Ai samol, ka fen eäni pwon fän akapel iten ewe Samol mi Lapalap om we Kot ngeniei ngang noum chon angang fefin o üra, pwe Salomon nei we mwän epwe king me mürum.
1KI 1:18 Nge iei Atonia a wiseni ewe wisen king, nge en ai samol me ai king kosap silei usun.
1KI 1:19 Atonia a eäni asor chomong ätemwänin kow, man mi aümanau me sip. Iwe, a köri noum kewe mwän, ewe souasor Apiatar me Joap ewe meilapen ewe mwichen sounfiu, pwe repwe eti le asor. Nge esap köri Salomon noum chon angang.
1KI 1:20 Ai samol me ai king, iei chon Israel meinisin ra nenengenuk pwe kopwe üreniir iö epwe siwiliik lon wisom wisen king.
1KI 1:21 Are kosap üreniir, epwe fis pwe lupwen om kopwe mäla, repwe föri ngeniei me nei mwän Salomon usun mine ra föri ngeni chon föföringau.”
1KI 1:22 Iwe, lupwen Patsipa a chüen fos ngeni ewe king, ewe soufos Natan a war.
1KI 1:23 Ra üreni ewe king pwe ewe soufos Natan a war. Nge lupwen Natan a tolong ren ewe king, a chapetiu me mwan.
1KI 1:24 Iwe, a üra, “Ai samol me ai king, ifa usun, en ka apasa pwe Atonia epwe siwiliik lon wisom wisen king?
1KI 1:25 Ikenai Atonia a feila o eäni asor chomong ätemwänin kow, man mi aümanau me sip. A pwal köri noum kewe mwän meinisin, pwal Joap ewe meilapen sounfiu me ewe souasor Apiatar. Iei ra eti le mongö o ün, ra apasa, ‘Ewe king Atonia epwe manauatam.’
1KI 1:26 Nge ngang noum chon angang me ewe souasor Satok, pwal Penaia me noum chon angang Salomon, esap körikem.
1KI 1:27 Ifa usun, ei lapalap a fis seni en, ai samol me ai king, nge kosap asile ngeni noum kewe nöüwis iö epwe siwiliik lon wisom wisen king?”
1KI 1:28 Iwe, ewe king Tafit a pälüeni, “Kopwe körato Patsipa pwe epwe feito rei.” Iei mine Patsipa a tolong ren o ütä fän mesan.
1KI 1:29 Mürin, ewe king a pwon fän akapel o üreni, “Mwo manauen ewe Samol mi Lapalap, ewe mi amanauaei seni ai kewe riaföü meinisin,
1KI 1:30 üa fen eäni pwon fän akapel ngonuk iten ewe Samol mi Lapalap ewe Koten Israel o üra pwe Salomon noum we mwän epwe siwiliei lon wisei wisen king. Ikenai üpwe apwönüetä ai pwon ngonuk.”
1KI 1:31 Mürin, Patsipa a chapetiu, a asamolu ewe king Tafit o üra, “Amwo en ai samol me ai king kopwe manau tori feilfeilachök.”
1KI 1:32 Mürin, ewe king Tafit a apasa, “Oupwe körato ewe souasor Satok, ewe soufos Natan me Penaia.” Iwe, lupwen ra feito,
1KI 1:33 ewe king a üreniir, “Oupwe angei nei kewe nöüwis pwe repwe etikemi. Oupwe pwal amota Salomon nei we mwän won püsin nei aas o emwenala Kihon.
1KI 1:34 Iwe, ewe souasor Satok me ewe soufos Natan repwe epiti Salomon ikenan pwe epwe kingen Israel. Mürin oupwe ettiki ewe rappwa o kökkö fän leüömong, ‘Ewe king Salomon epwe manauatam.’
1KI 1:35 Mürin oupwe tapweto mürin Salomon, lupwen epwe feito ikei o mot won ai lenien motun king, pun i epwe siwiliei lon wisei wisen king. Üa filätä Salomon pwe epwe nemenem lon Israel me Juta.”
1KI 1:36 Iwe, Penaia a üreni ewe king, “Iei usun epwe fis. Amwo ewe Samol mi Lapalap om we Kot epwe anükü ekei kapas.
1KI 1:37 Usun ewe Samol mi Lapalap a etuk, en ai samol me ai king, iei usun epwe pwal eti Salomon, epwe pwal alapala mwün seni mwumw.”
1KI 1:38 Mürin, ewe souasor Satok, ewe soufos Natan me Penaia, pwal ekewe chon Cheret me chon Pelet ra amota Salomon won nöün ewe king Tafit we aas o emwenala Kihon.
1KI 1:39 Ikenan ewe souasor Satok a angei ewe löön epit a uwato seni ewe imwenfel seni mangaku, o epiti Salomon. Mürin, ra ettiki ewe rappwa, nge ekewe aramas meinisin ra kökkö, “Ewe king Salomon epwe manauatam.”
1KI 1:40 Iwe, ekewe aramas meinisin ra tapwetä mürin, ra ettiki aangün o mweireir fän pwapwa mi lapalap, pwe ewe pwül a chechech ren aküranger.
1KI 1:41 Iwe, lupwen Atonia me ekewe chon kökköto mi nom ren ra wes me kametip, ra rong ei akürang. Nge lupwen Joap a rong tikin ewe rappwa, a ais, “Met popun a fis ei akürang lon ewe telinimw?”
1KI 1:42 Lupwen a chüen kakapas, Jonatan nöün ewe souasor Apiatar we mwän a feito. Iwe, Atonia a üreni, “Kopwe tolong, pun en eman mwän mi öch, ka uwato pworaus mi öch.”
1KI 1:43 Nge Jonatan a üreni Atonia, “Apwi, üsap uwato pworaus mi öch. Ach samol ewe king Tafit a seikätä Salomon pwe a king.
1KI 1:44 A fen tinala ewe souasor Satok, ewe soufos Natan me Penaia, pwal ekewe chon Cheret me chon Pelet, pwe repwe eti. Ra amota Salomon won nöün ewe king we aas.
1KI 1:45 Nge ewe souasor Satok me ewe soufos Natan ra epiti me lon Kihon pwe epwe king. Seni ikenan ra feitä fän pwapwa, iei popun a wor akürang lon ewe telinimw. Iei ewe akürang oua rongorong.
1KI 1:46 Iwe, Salomon a siwili ewe king lon wisan wisen king.
1KI 1:47 Pwal nöün ewe king kewe nöüwis ra feito, pwe repwe kapong ngeni ach samol ewe king Tafit o üreni, ‘Amwo om we Kot epwe aitöchü iten Salomon lap seni itom, epwe pwal alapala mwün lap seni mwumw.’ Mürin, ewe king a chapetiu won an peet o fel ngeni Kot.
1KI 1:48 Iwe, ewe king a pwal apasa, ‘Üpwe mwareiti ewe Samol mi Lapalap ewe Koten Israel, pun a mwütätä pwe eman mwirimwiri epwe siwiliei lon wisei wisen king ikenai, lupwen üa chüen manau.’”
1KI 1:49 Mürin, nöün Atonia kewe chon kökköto ra niuokus, ra ütä o süfesen.
1KI 1:50 Pwal Atonia a niuokusiti Salomon. Iwe, a feila ren ewe imw mangaku ia aramas ra churi Kot ie o amwöchü mächän ewe rongen asor.
1KI 1:51 Nge eman a asile ngeni ewe king Salomon, pwe Atonia a niuokusiti o amwöchü mächän ewe rongen asor. A apasa, “Ewe king Salomon epwe pwon fän akapel ngeniei akom, pwe esap nieila ngang nöün chon angang.”
1KI 1:52 Iwe, Salomon a üra, “Are a alletä pwe epwe föför mürina, iwe, esap emet meten möküran epwe turutiu lepwül. Nge are a pwä och föföringau lon manauan, epwe fokun mäla.”
1KI 1:53 Mürin, ewe king Salomon a titi Atonia. Iwe, ra emwenätiu seni ewe rongen asor. A feito o asamolu ewe king Salomon. Nge Salomon a üreni, “Kopwe feila lon imwom.”
1KI 2:1 Iwe, lupwen a kan fansoun än Tafit epwe mäla, a körato Salomon nöün we mwän o öüröüra,
1KI 2:2 “Iei üpwe le mäla. Kopwe apöchökülok o etipemwäniik.
1KI 2:3 Kopwe apwönüetä än ewe Samol mi Lapalap om Kot kewe öüröür o aleasochisi an kewe pwüüng me allük, usun a mak lon än Moses puken allük, pwe kopwe feiöch lon mettoch meinisin mine ka föri, pwal ekis meinisin ana ie ka nom ie.
1KI 2:4 Are ka föri iei usun, ewe Samol mi Lapalap epwe apwönüetä an pwon a eäni ngeniei, lupwen a apasa, ‘Are mwirimwirum kewe repwe tümwünüöchü le apwönüetä ai kewe allük fän allükülük ren unusen leluker me unusen manauer, epwe chök wokkor, eman me leir epwe nemeni Israel iteiten fansoun.’
1KI 2:5 Nge ka pwal silei mine Joap nöün Seruia we mwän a föri ngeniei. Ka silei mine a föri ngeni ekewe ruoman meilapen mwichen sounfiun Israel Apner nöün Ner we mwän me Amasa nöün Jeter we mwän. Lon fansoun kinamwe a nirela o ngeniir chappen ar niela aramas lon fansoun maun. Ren ewe föför a föri ngeni ätekewe resap tipis, epwe püsin ukun chök, epwe pwal angei eselipäen an föför.
1KI 2:6 Iei mine kopwe aea om tipachem ren met kopwe föri ngeni, nge kosap mwüt ngeni pwe epwe mäla fän kinamwe lon an chinlap.
1KI 2:7 Nge kopwe kirikiröch ngeni nöün Parsilai kewe mwän ewe re Kiliat o mwüt ngeniir pwe repwe nom lein chokewe mi mongö seni om chepel. Pun ir ra eäni kirikiröch ngeniei, lupwen üa sü seni Apsalom pwiüm we.
1KI 2:8 Nge a pwal nom reöm Simei nöün Kera we mwän ewe re Peniamin seni Pahurim. A ottekiei ren och ottek mi fokun ngau lon ewe rän, lupwen üa feila ngeni Mahanaim. Iwe, lupwen a feito pwe epwe churiei arun ewe chanpupu Jortan, üa akapelü iten ewe Samol mi Lapalap o üra pwe üsap niela.
1KI 2:9 Nge en kopwe ngeni liwinin an tipis. Pun en ka tipachem, ka silei met kopwe föri ngeni. Kopwe chök niela lon an chinlap.”
1KI 2:10 Mürin, Tafit a mäla, nge ra peiaseni lon ewe telinimw mi iteni telinimwen Tafit.
1KI 2:11 Iwe, ükükün fansoun än Tafit nemenem lon Israel faik ier. A nom lon Hepron o nemenem lon ükükün fisu ier, nge lon Jerusalem ükükün ilik me ülüngat ier.
1KI 2:12 Iwe, Salomon a siwili Tafit saman we lon wisan wisen king, nge mwün a fokun pwönüetä.
1KI 2:13 Iwe, mürin Atonia nöün Hakit we mwän a feito ren Patsipa inen Salomon. Iwe, Patsipa a aisini, “Ka feito fän kinamwe?” Nge Atonia a pälüeni, “Ewer, üa feito fän kinamwe.”
1KI 2:14 Mürin, Atonia a üreni, “Mi wor och mine üpwe ürenuk.” Patsipa a pälüeni, “Kopwe apasa.”
1KI 2:15 Atonia a üreni, “Ka silei pwe ewe mwü mwüi, nge chon Israel meinisin ra fokun ekieki pwe ngang üpwe king. Nge ewe mwü a mwet me woi o tori pwii, pun iei fän letipen ewe Samol mi Lapalap pwe epwe mwüni.
1KI 2:16 Iwe, nge iei a wor eu ai tüngor ngonuk, nge kosap aliwiniei.” Patsipa a üreni, “Kopwe apasa.”
1KI 2:17 Iei mine Atonia a üreni, “Kose mochen kopwe tüngor ngeni king Salomon, pwe epwe ngeniei Apisak ewe fin Sunam pwe üpwe pwülüeni, pun üa silei pwe Salomon esap aliwinuk.”
1KI 2:18 Iwe, Patsipa a üra, “Mi fokun öch. Üpwe kapas ngeni ewe king fän itom.”
1KI 2:19 Iei mine Patsipa a feila ren ewe king Salomon pwe epwe kapas ngeni fän äsengesin Atonia. Iwe, ewe king a ütä, a kapong ngeni Patsipa o tuu ngeni. Mürin, a mot won lenian lenien motun king, nge ra pwal uwato eu lenien mot fän iten inan. Iwe, neminewe a mot lepelifichin.
1KI 2:20 Mürin, Patsipa a üra, “A wor eu ai kükün tüngor ngonuk, kose mochen kosap aliwiniei.” Iwe, ewe king a üreni, “Kopwe üra om tüngor, inei, pun ngang üsap aliwinuk.”
1KI 2:21 Patsipa a üra, “Kopwe mwütätä pwe Atonia pwiüm we epwe pwülüeni Apisak ewe fin Sunam.”
1KI 2:22 Iwe, ewe king a pälüeni inan we, “Pwota ka chök tüngor Apisak ewe fin Sunam pwe üpwe ngeni Atonia? Kopwe pwal tüngor ewe mwü fän itan, pun i pwii watte. Nge ewe souasor Apiatar me Joap nöün Seruia we mwän ra eti won pekin.”
1KI 2:23 Mürin, ewe king Salomon a akapel iten ewe Samol mi Lapalap o üra, “Kot epwe fen nieila, are Atonia esap püsin angei chappen an kewe kapas.
1KI 2:24 Mwo manauen ewe Samol mi Lapalap mi anükücharaei won än Tafit semei we lenien motun king, a pwal mwüt ngeniei me mwirimwiri pwe aipwe nemeni ei mwü usun a pwonei, Atonia epwe ninnila ikenai chök.”
1KI 2:25 Iei mine ewe king Salomon a tinala Penaia nöün Jehoiata we mwän, pwe epwe niela Atonia. Iwe, Penaia a niela Atonia.
1KI 2:26 Mürin, ewe king a üreni ewe souasor Apiatar, “Kopwe liwinla Anatot leniom we, pun pwüngün pwe kopwe mäla. Nge iei üsap niikela, pun ka chon kekiin ewe pworofel än Kot ewe Samol mi Lapalap me mwen Tafit semei we, ka pwal eti semei we lon an kewe riaföü meinisin.”
1KI 2:27 Iwe, Salomon a awesi Apiatar seni wisan we wisen souasor ngeni ewe Samol mi Lapalap. Iei usun a pwönüetä än ewe Samol mi Lapalap kapas a üra me lon Silo fän iten Eli me mwirimwirin kewe.
1KI 2:28 Lupwen ei pworaus a tori Joap, a sü ngeni imwen ewe Samol mi Lapalap o amwöchü mächän ewe rongen asor. Joap a eti pekin Atonia, nge esap eti Apsalom.
1KI 2:29 Nge lupwen eman a asile ngeni ewe king Salomon pwe Joap a sü ngeni imwen ewe Samol mi Lapalap o nom ünükün ewe rongen asor, Salomon a tinala Penaia pwe epwe niela Joap.
1KI 2:30 Iei mine Penaia a feila ren imwen ewe Samol mi Lapalap o üreni Joap, “Ewe king a allük pwe kopwe towu.” Nge Joap a üra, “Apwi, üpwe chök mäla ikei.” Mürin, Penaia a liwinla ren ewe king o asile ngeni mine Joap a eäni pälüen.
1KI 2:31 Iwe, ewe king a üreni Penaia, “Kopwe föri usun mine a apasa, kopwe niela o peiaseni. Iei usun kopwe angei seniei pwal seni chon leimwen semei liwinin tipisin än Joap nimanauei aramas, nge esap wor popun.
1KI 2:32 Ewe Samol mi Lapalap epwe ukun ngeni Joap liwinin an föförün nimanauei aramas. Pun Tafit semei we esap silei usun an niela ruoman mwän mi pwüng o mürina seni püsin i: Apner nöün Ner we mwän ewe meilapen sounfiun Israel me Amasa nöün Jeter we mwän ewe meilapen sounfiun Juta.
1KI 2:33 Iei usun tipisin än Joap nimanauei aramas epwe püsin ukun me mwirimwirin tori feilfeilachök. Nge epwe wor kinamwe seni ewe Samol mi Lapalap ngeni Tafit me mwirimwirin kana mi mot won an lenien motun king tori feilfeilachök.”
1KI 2:34 Iei mine Penaia a feila ren ewe imwenfel o niela Joap. Mürin ra peiaseni lon püsin peiasan lon ewe fanüapö.
1KI 2:35 Iwe, ewe king a seikätä Penaia pwe epwe meilapen ekewe sounfiu akasiwilin Joap. A pwal seikätä Satok pwe epwe souasor akasiwilin Apiatar.
1KI 2:36 Mürin, ewe king a titi Simei o üreni, “Kopwe aüetä imwom ikei lon Jerusalem o nonom lon, nge kosap towu seni ewe telinimw pwe kopwe feila ekis.
1KI 2:37 Pun lon ewe ränin kopwe towu o feila pekilan ewe öüwö Kitron, kopwe silei pwe kopwe fokun mäla. Chaom epwe ukum chök.”
1KI 2:38 Iwe, Simei a üreni ewe king, “Mine ka apasa a fokun öch. Usun en ai samol me ai king ka üra, iei usun ngang noum chon angang üpwe föri.” Iei mine Simei a nonom lon Jerusalem fansoun langatam.
1KI 2:39 Nge mürin ülüngat ier a fis pwe ruoman me lein nöün Simei kewe amanau ra süla ren Akis nöün Maka we mwän ewe kingen Kat. Iwe, lupwen eman a asile ngeni Simei pwe nöün kewe amanau ra nom Kat,
1KI 2:40 Simei a rietä eu lenien mot won nöün aas o feila Kat ren Akis, pwe epwe kütta nöün kewe amanau. Iwe, Simei a küneer o aliwinireto.
1KI 2:41 Nge lupwen eman a asile ngeni Salomon pwe Simei a towu seni Jerusalem o feila Kat, a pwal liwinsefäl,
1KI 2:42 ewe king a titi Simei o üreni, “Ifa usun, üsap föri pwe kopwe eäni pwon fän akapel iten ewe Samol mi Lapalap pwe kosap towu seni Jerusalem? Üa pwal ürenuk pwe lon ränin om kopwe towu o feila ekis, kopwe fokun mäla. Nge en ka üreniei pwe ka tipeeu ngeni meinisin mine üa apasa, kopwe pwal aleasochisi.
1KI 2:43 Pwota chök kosap apwönüetä mine ka pwon ngeni ewe Samol mi Lapalap? Pwota kosap pwal apwönüetä mine üa allük ngonuk?”
1KI 2:44 Iwe, ewe king a pwal üreni Simei, “Ka püsin silei ekewe föföringau meinisin ka föri ngeni Tafit semei we. Iei mine ewe Samol mi Lapalap epwe ukun ngonuk om föföringau.
1KI 2:45 Nge ewe Samol mi Lapalap epwe afeiöchüei, epwe pwal anüküchara mwün Tafit tori feilfeilachök.”
1KI 2:46 Mürin, ewe king a allük ngeni Penaia pwe epwe feila o niela Simei. Iwe, a feila o niela. Iei usun ewe mwü a fokun nüküchar fän nemenemen Salomon.
1KI 3:1 Iwe, Salomon a föri eu pwonen atipeeu ngeni Farao ewe kingen Isip ren an pwülüeni nöün föpwül. A emwenato neminei o anomu lon ewe telinimwen Tafit, tori a wes le aüetä püsin imwan, pwal imwen ewe Samol mi Lapalap me ewe tit mi pwelifeili Jerusalem.
1KI 3:2 Nge ekewe aramas ra chök eäni ar asor won ekewe lenien fel won ekewe leni tekia, pun esap mwo wor eu imwenfel mi kaütä fän iten ewe Samol mi Lapalap.
1KI 3:3 Iwe, Salomon a echeni ewe Samol mi Lapalap o apwönüetä än Tafit saman we öüröür ngeni. Eu chök, a föri an asor o kenala apach mi pwokus won ekewe lenien fel won ekewe leni tekia.
1KI 3:4 Lon eu rän ewe king Salomon a feila Kipeon pwe epwe asor ikenan, pun ina ewe lenien fel mi aüchea. A eäni engeröü mönün asoren kek won enan rongen asor.
1KI 3:5 Lon ewe pwin ewe Samol mi Lapalap a pwä ngeni Salomon lon an tan me lon Kipeon o üreni, “Met ka mochen ngang üpwe fang ngonuk.”
1KI 3:6 Salomon a üra, “En ka eäni tong mi lapalap ngeni noum chon angang Tafit semei we, pun i a allükülük o pwüng, a pwal wenechar lelukan ngonuk. Iwe, ka sopwela om tong mi lapalap ngeni ren om fang ngeni eman nöün mwän mi siwili lon wisan wisen king ikenai.
1KI 3:7 Nge iei, ai Kot Samol mi Lapalap, en ka awisaei ngang noum chon angang pwe üpwe siwili Tafit semei we lon wisan wisen king. Nge ngang eman mi chök ier kükün, üsap sile nemenem.
1KI 3:8 Iwe, ngang noum chon angang, üa nom lein noum aramas ka filiretä, eu mwichen aramas mi chowatte, esap wor eman a tongeni aleaniir ren chomongur.
1KI 3:9 Iei mine kopwe fang ngeniei ngang noum chon angang eu leluk mi mirit, pwe üpwe tongeni nemeni noum aramas fän pwüng o alefila mine a öch me mine a ngau. Ifa usun ai üpwe tongeni nemeni noum ei mwichen aramas mi chowatte?”
1KI 3:10 Iwe, ewe Samol mi Lapalap a efich mine Salomon a eäni tüngor.
1KI 3:11 Iei mine a üreni Salomon, “Pokiten ka tüngor mirit pwe kopwe emweni aramas fän pwüng, nge kosap tüngor fän itom pwe kopwe manauatam ika pisekisek, ika tüngor mälan chon oputom,
1KI 3:12 iei mine üpwe apwönüetä om tüngor. Üpwe fang ngonuk eu leluk mi mirit o tipachem, pwe esap wor eman mi wewe ngonuk lon kewe fansoun ra la, pwal lon kan fansoun repwe feito.
1KI 3:13 Üpwe pwal fang ngonuk mine kosap tüngor. Üpwe fang ngonuk pisekisek me iteüöch, pwe esap wor eman king epwe wewe ngonuk lon unusen manauom.
1KI 3:14 Nge are kopwe aleasochisiei o apwönüetä ai kewe allük me pwüüng usun Tafit semom we a föri, mürin üpwe alangatamala ränin manauom.”
1KI 3:15 Iwe, Salomon a nela o mefi pwe Kot a fos ngeni lon an tan. Mürin, a feila Jerusalem, a ütä me mwen än ewe Samol mi Lapalap we pworofel o eäni asoren kek me asoren kinamwe ngeni. Mürin a föri eu kametip fän iten nöün kewe nöüwis meinisin.
1KI 3:16 Lon eu rän, ruoman fefin mi amömö inisir fän iten lisowu ra feila ren ewe king o ütä fän mesan.
1KI 3:17 Iwe, eman me lein ekewe fefin a üra, “Ai samol, äm me ei fefin aia nom lon eu chök imw. Iwe, üa nöüni eman ät, lupwen neminewe a nom lon ewe imw.
1KI 3:18 Nge ülüngat rän mürin ai nöünöü, ei fefin a pwal nöüni eman ät. Äm chök ruoman aia nom lon ewe imw, esap wor chienem, fokun äm chök ruoman.
1KI 3:19 Iwe, nöün neminei ät a mäla lepwin, pun a chouni.
1KI 3:20 Mürin, neminei a pwätä lukenipwin, a angei nei nan ät mi kon ünüki lupwen ai annut, o akona fän mwärin, nge nöün ei ät mi mäla a akona fän mwäri.
1KI 3:21 Iwe, lupwen üa pwätä lesosor pwe üpwe oupu nei we, üa küna pwe ewe semirit a mäla. Nge lupwen üa nenengenöchü, üa silleni pwe esap wesewesen nei we.”
1KI 3:22 Nge pwal ewe eman fefin a üra, “Apwi, ei semirit mi manau nei, nge na mi mäla noum.” Mürin, ewe aemanün fefin a üra, “Apwi, ei semirit mi mäla noum, nge na mi manau nei.” Iei usun ra aninifengen me fän mesen ewe king.
1KI 3:23 Mürin, ewe king a apasa, “En ka apasa pwe ena semirit mi mäla sap noum, nge enan mi manau noum. Nge neminan a apasa pwe enan semirit mi manau nöün, nge ena mi mäla noum.”
1KI 3:24 Iwe, ewe king a üra pwe repwe uwato ren efoch ketilas. Nge lupwen ra uwato ren ewe ketilas,
1KI 3:25 ewe king a üra, “Oupwe tilenifeseni ewe semirit mi manau o ngeni ewe eman fefin epek, nge pwal ewe eman fefin epek.”
1KI 3:26 Mürin, ewe fefin mine nöün ewe mi manau a kapas ngeni ewe king, pokiten a fokun tongei nöün we, “Ai samol, kose mochen kopwe ngeni neminan ewe semirit mi manau, nge kosap fokun niela.” Nge ewe pwal eman a üra, “Esap wor eman leim epwe nöüni ewe semirit, oupwe chök tilenifeseni.”
1KI 3:27 Mürin, ewe king a apasa, “Ousap tilenifeseni ewe semirit, nge oupwe ngeni ewe aemanün fefin, pun ina i wesewesen inen ewe semirit.”
1KI 3:28 Iwe, lupwen chon Israel meinisin ra rongorong usun pwüngün ewe kapwüng ewe king a eäni, ra meniniti ewe king, pun ra mefi pwe Kot a fang ngeni tipachem, pwe epwe tongeni eäni kapwüng fän pwüng.
1KI 4:1 Iwe, ewe king Salomon a nemeni unusen Israel.
1KI 4:2 Ikkei ir nöün kewe meilap: Asaria nöün Satok we mwän i souasor mi lap.
1KI 4:3 Elihoref me Ahia nöün Sisa kewe mwän ir seketeri, nge Jehosafat nöün Ahilut we mwän i chon makei pworausen ewe mwü.
1KI 4:4 Penaia nöün Jehoiata we mwän i meilapen ewe mwichen sounfiu. Satok me Apiatar ir souasor.
1KI 4:5 Asaria nöün Natan we mwän i meilapen ekewe kepina. Saput nöün Natan we mwän i souasor me nöün ewe king souöüröür.
1KI 4:6 Ahisar i meilapen chon tümwünü imwen ewe king, nge Atoniram nöün Apta we mwän a wisen nemeni ewe mwichen chon angangen kinroosi.
1KI 4:7 Iwe, Salomon a filätä engol me ruoman kepina, pwe repwe nemeni ekewe engol me ruu kinikinin fanü lon Israel. Ir ra wisen amongöni ewe king me chon leimwan, eman leir nge eu maram lon eu ier.
1KI 4:8 Iwe, ikkei iten ekewe kepina me ekewe kinikin ra nemeni: Penhur a nemeni ewe chukuchukutän Efraim,
1KI 4:9 Penteker a nemeni Makas, Salpin, Pet-semes me Elon-pethanan.
1KI 4:10 Penheset a nemeni Arupot pwal Soko me unusen ewe fanü Hefer.
1KI 4:11 Pen-apinatap a nemeni unusen ewe fanü Tor. Ätei a pwülüeni Tafat nöün Salomon we fefin.
1KI 4:12 Paana nöün Ahilut we mwän a nemeni Tanak, Mekito me unusen Pet-sean mi nom ünükün Saretan örün Jesrel, pwal seni Pet-sean tori Apel-mehola achöüala ngeni pekilan Jokmeam.
1KI 4:13 Pen-keper a nemeni Ramot-kiliat pwal ekewe sopun Jair lon Kiliat. Jair eman mwirimwirin Manasa. Iwe, a pwal nemeni ewe fanü Arkop mi nom lon Pasan me wone telinimw mi watte a wor tittir, nge lokkun asamalaper a för seni piras.
1KI 4:14 Ahinatap nöün Ito we mwän a nemeni ewe fanü Mahanaim,
1KI 4:15 Ahimas a nemeni ewe fanü Naftali. Ätei a pwülüeni Pasemat, i pwal eman nöün Salomon kewe fefin.
1KI 4:16 Paana nöün Husai we mwän a nemeni ewe fanü Aser me Pealot.
1KI 4:17 Jehosafat nöün Parua we mwän a nemeni ewe fanü Isakar.
1KI 4:18 Simei nöün Ela we mwän a nemeni ewe fanü Peniamin.
1KI 4:19 Keper nöün Uri we mwän a nemeni ewe fanü Kiliat fanüen Sihon ewe kingen chon Amor, pwal fanüen Ok ewe kingen Pasan. Keper i chök kepina lon unusen ei fanü.
1KI 4:20 Iwe, chon Juta me chon Israel ra fokun chomong usun chök chomongun föün pien aroset. Ra momongö, ra ükkün o pwapwa.
1KI 4:21 Nge Salomon a nemeni ekewe mwü meinisin seni ewe chanpupu Oifrat tori fanüen ekewe chon Filistia, pwal tori kiännin Isip. Ra uwato ar takises ren o angang ngeni Salomon lon unusen ränin manauan.
1KI 4:22 Iwe, ükükün enen chon leimwen Salomon lon eu rän ina epwe ükükün ipükü walik me limu tuk pilawa mi mürina, pwal ina epwe ükükün ülüpükü fik me limu tuken sokun pilawa,
1KI 4:23 engol ätemwänin kow mi aümanau me rüe kow mi mongö seni lemäl, pwal ipükü sip lükün ekewe chia iter kasele me ropak, pwal chuko mi kitinup.
1KI 4:24 Salomon a nemeni unusen ewe fanü lotoun ewe chanpupu Oifrat, seni Tifsa tori Kasa, a pwal nemeni ekewe king meinisin mi nom lotoun ewe chanpupu Oifrat. Iwe, a wor an kinamwe ngeni ekewe mwü meinisin mi nom ünükün.
1KI 4:25 Lon unusen ränin manauen Salomon chon Juta me chon Israel ra nom lon kinamwe, seni Tan tori Persepa, eu me eu famili a nom fän püsin an irän wain me an irä fiik.
1KI 4:26 Mi pwal wor ükükün faik ngeröü lenien oris fän iten nöün Salomon oris mi nukei waan kewe woken me engol me ruungeröü chon wawa oris.
1KI 4:27 Iwe, ekewe kepina ra uwato ewe mongö fän iten ewe king Salomon, pwal fän iten chokewe meinisin mi mot ngeni an chepel, eman nge än eu maram. Iwe, ra tümwünü pwe esap wor och osupwang.
1KI 4:28 Ra pwal uwato parli me fetilipwas fän iten ekewe oris me ekewe oris mi fokun müttir lon ewe leni ia ra wisen uwato ie. Iwe, eman me eman a föri ükükün wisan.
1KI 4:29 Iwe, Kot a fang ngeni Salomon tipachem me ekialolol esor aükükün, a pwal ngeni chomong silelap usun chomongun föün pien aroset,
1KI 4:30 pwe än Salomon tipachem a lapalap seni än ekewe aramasen ötiu me än ekewe chon Isip tipachem.
1KI 4:31 Salomon a tipachem seni ekewe aramas meinisin, a tipachem seni Etan eman mwirimwirin Esr, pwal Heman, Kalkol me Tarta nöün Mahol kewe mwän. Iwe, iteüöchün a chöfetal lon ekewe mwü meinisin mi nom ünükün.
1KI 4:32 Salomon a pwal föri ükükün ülüngeröü mwiitun me engeröü limachö köl.
1KI 4:33 A kapas usun irä, seni ewe irä setar mi nom won Lepanon tori ewe irä isop mi mär won tit. A pwal kapas usun ekewe man, ekewe machang pwal ekewe mantötö me ekewe ik.
1KI 4:34 Iwe, kingen ekewe mwü won unusen fanüfan ra rong usun än Salomon tipachem, ra tinala aramas pwe repwe aüseling ngeni.
1KI 5:1 Iwe, lupwen Hairam ewe kingen Tirus a rongorong pwe Salomon a siwili saman we lon wisan wisen king, a tinala nöün chon künö ren. Pun Hairam a fen pwipwi ngeni Tafit.
1KI 5:2 Iwe, Salomon a tinala pworaus ren Hairam o üra,
1KI 5:3 “Ka silei pwe Tafit semei we esap tongeni aüetä eu imwenfel fän iten ewe Samol mi Lapalap an we Kot, pokiten chon ekewe mwü mi nom ünükün ra maun ngeni, tori ewe Samol mi Lapalap a atolongeer meinisin fän nemenian.
1KI 5:4 Nge iei ewe Samol mi Lapalap ai we Kot a fang ngeniei kinamwe lekiännin fanüei meinisin. Esap wor chon oputaei ika och mi afeiengauaei.
1KI 5:5 Iei mine üa ekiekin aüetä eu imwenfel fän iten ewe Samol mi Lapalap ai we Kot, usun i a fen üreni Tafit semei we, ‘Noum mwän üpwe seikätä pwe epwe siwiliik lon wisom wisen king, ätei epwe aüetä eu imwenfel fän itei.’
1KI 5:6 Iei mine kopwe tinala noum chon angang, pwe repwe pökü ekewe irä setar won Lepanon fän itei. Iwe, nei kewe chon angang repwe eti noum kewe chon angang, nge ngang üpwe wisen möni noum kewe chon angang won ükükün ewe liwin ka filätä. Pun ka silei pwe esap wor eman me lein nei kewe chon angang a sile fotopen usun ekewe re Siton.”
1KI 5:7 Iwe, lupwen Hairam a rongorong alon Salomon, a fokun pwapwa o apasa, “Üpwe mwareiti ewe Samol mi Lapalap ikenai mi fang ngeni Tafit eman nöün mwän mi tipachem, pwe epwe nemenem won ei mwü mi iteföüla.”
1KI 5:8 Mürin, Hairam a titila ei pworaus ren Salomon, “Üa rong ewe pworaus ka tinato rei. Üa molotä pwe üpwe föri meinisin mine ka mochen o awora ekewe irä setar me saipires.
1KI 5:9 Nei kewe chon angang repwe uwätiu ekewe irä seni Lepanon tori aroset. Iwe, repwe rifengeniir usun ärai, pwe repwe pwer lematau tori ewe leni ka filätä. Ikenan repwe atomwerela, nge noum kewe chon angang repwe angeiir. Nge en kopwe apwönüetä ai mochen ren om kopwe amongöni chon leimwei.”
1KI 5:10 Iei mine Hairam a ngeni Salomon ekewe irä setar me saipires won ükükün an mochen,
1KI 5:11 nge Salomon a ngeni Hairam ina epwe ükükün ipükü rüe me limungeröü tuk wiich, pwal ina epwe ükükün ipükü engol me limungeröü kalon apüra seni föün olif, pwe enen chon leimwan iteiten ier.
1KI 5:12 Iwe, ewe Samol mi Lapalap a ngeni Salomon tipachem usun a pwon ngeni. A wor kinamwe lefilen Hairam me Salomon, nge ir me ruoman ra föri eu pwonen atipeeufengen.
1KI 5:13 Iwe, ewe king Salomon a achufengeni eu mwichen chon angangen kinroosi seni lein chon Israel meinisin iteiter ilik ngeröü mwän.
1KI 5:14 A kiniir lon ülüngat mwich, eu mwich nge engol ngeröü. A tinala eu mwich pwe epwe angang lon Lepanon lon ükükün eu maram, nge ruu mwich repwe nom lon lenier lon ükükün ruu maram, nge repwe akasiwil. Iwe, Atoniram a wisen nemeni ewe mwichen chon angangen kinroosi.
1KI 5:15 A pwal wor ükükün fik ngeröü nöün Salomon chon uwochou me walik ngeröü chon tuw fau lon ewe fanü mi chukuchukutä.
1KI 5:16 Lükün ekei chon angang a pwal wor ükükün ülüngat ngeröü ülüpükü souemwenin angang mi nemeniir o tümwünü ewe angang.
1KI 5:17 Iwe, fän än ewe king allük ra tuw fau mi watte o mürina, pwe repwe föri longolongun ewe imwenfel ren fau mi fal.
1KI 5:18 Iei usun nöün Salomon me nöün Hairam kewe chon kaü imw, pwal ekewe re Kepal ra falei ekewe fau o amolätä ekewe irä, pwe repwe aüetä ewe imwenfel.
1KI 6:1 Iwe, lon ewe föpükü waliken ier mürin än ekewe aramasen Israel towu seni ewe fanü Isip, lon arüanün ierin än Salomon nemeni Israel, fän ewe maram Sif, iei aruuen maram, Salomon a popuetä le aüetä imwen ewe Samol mi Lapalap.
1KI 6:2 Ewe imwenfel ewe king Salomon a aüetä fän iten ewe Samol mi Lapalap ükükün langataman tiue fiit, chölapan ilik fiit me tekian faik me limu fiit.
1KI 6:3 Iwe, ewe kengkang mi nom mesen ewe imwenfel ükükün chölapan ilik fiit, a nönnöfengen me chölapen ewe imwenfel, nge langataman ükükün engol me limu fiit.
1KI 6:4 A föri asamwachon ewe imwenfel mi wattelong lon o ti ngeni mächä.
1KI 6:5 A pwal föri pwalangen lepekin me lükisökürün ewe imw won ülüngat sässärin o föri rumwen lor.
1KI 6:6 Iwe, aeuin sässär ükükün chölapan fisu esop fiit, ewe aruuen sässär ükükün chölapan tiu fiit, nge ewe aülüngatin sässär ükükün chölapan engol esop fiit. Pun Salomon a föri along mi iti seni pwelin ünükün etippen ewe imwenfel, pwe ekewe irälap resap tolong lon etippan.
1KI 6:7 Nge lupwen ra aüetä ewe imwenfel, ra aea fau mi fen fal me lon ewe lenien för fau. Iei mine esap wor eman a rong chopuchopun ama ika kouk ika och pisekin angang seni mächä, lupwen ewe imwenfel a kaütä.
1KI 6:8 Iwe, ewe asamen tolong lon ewe aeuin sässär a nom peliörün ewe imwenfel. A wor eu latö seni ewe aeuin sässär tori ewe aruuen sässär, pwal seni ewe aruuen sässär tori ewe aülüngatin.
1KI 6:9 Iei usun Salomon a aüetä ewe imwenfel o awesala. A aea irälap me pap seni ewe irä setar le tenchoni ewe imw.
1KI 6:10 Iwe, ükükün tekian lefilen eu me eu kewe ülüngat sässärin ewe pwalang mi nom ünükün ewe imwenfel fisu esop fiit, ra pach ngeni ewe imwenfel ren irälap seni ewe irä setar.
1KI 6:11 Iwe, ewe Samol mi Lapalap a üreni Salomon,
1KI 6:12 “Are kopwe aleasochisi ai kewe allük me pwüüng, pwe kopwe apwönüretä o föri pwüngür, mürin üpwe apwönüetä ngonuk ai pwon üa fen pwon ngeni Tafit semom we.
1KI 6:13 Iwe, üpwe imweimw lon ei imwenfel ka aüetä lein nei kewe aramasen Israel, nge üsap likitirela.”
1KI 6:14 Iei usun Salomon a aüetä ewe imwenfel o awesala.
1KI 6:15 A ccheni etippen lon ewe imwenfel ngeni pap seni ewe irä setar, seni fan tori tenchon. Nge lon ewe imwenfel a aea pap seni ewe irä saipires.
1KI 6:16 Nge lesopuchikin ewe imw me lon a refiela eu rum ükükün langataman ilik fiit o ccheni seni fan tori tenchon ngeni pap seni ewe irä setar. Ei rum a iteni rum mi unusen pin.
1KI 6:17 Iwe, ewe rum sosowun ewe rum mi unusen pin ükükün langataman wone fiit.
1KI 6:18 Nge ekewe pappen lon ewe imwenfel seni ewe irä setar a rup wor liosun pamkin me pön irä mi mas. Unusen lon ewe imwenfel a cchech ngeni pap seni ewe irä setar, pwe esap wor eföü fau a pwäwu.
1KI 6:19 Salomon a amolätä ewe rum mi unusen pin sosolong, pwe epwe iseis lon än ewe Samol mi Lapalap we pworofel.
1KI 6:20 Iwe, ewe rum mi unusen pin ükükün langataman ilik fiit, ükükün chölapan ilik fiit, nge ükükün tekian pwal ilik fiit. Salomon a apacha kolt mi mürina ngeni unusen lon ewe rum. A pwal föri eu rongen asor seni ewe irä setar.
1KI 6:21 Salomon a pwal apacha kolt mi mürina ngeni unusen lon ewe imwenfel o rietä sein seni kolt ngeni ewe lenien tolong lon ewe rum mi unusen pin mi fen kapachetä kolt won.
1KI 6:22 Iwe, a apachätä kolt won unusen ewe imwenfel me lon tori a kuula. A pwal apachätä kolt won unusen ewe rongen asoren ötüöt mi nom mwen ewe rum mi unusen pin.
1KI 6:23 Iwe, a föri uluulun ruoman kerop seni ewe irä olif o anomuur lon ewe rum mi unusen pin, langatamen eman me eman leir ükükün engol me limu fiit.
1KI 6:24 Eman me eman leir a wor ruofoch pöükässin, nge efoch me efoch pöükäs ükükün langataman fisu esop fiit. Nge seni ülülen efoch pöükäs tori ülülen pwal ewe efoch ükükün engol me limu fiit.
1KI 6:25 Iwe, pwal ewe eman kerop ükükün langataman engol me limu fiit. Ir me ruoman kewe kerop a nönnöfengen kaükür me lapalaper.
1KI 6:26 Iwe, ükükün langatamen eman me eman kerop engol me limu fiit.
1KI 6:27 Salomon a anomu ekewe uluulun kerop lon ewe rum mi unusen pin me lon ewe imwenfel. Nge pöükässin ekewe kerop ra meresila, pwe efoch pöükässin ewe eman a küw ewe etip me epek, nge efoch pöükässin pwal ewe eman a küw pwal etippen ewe epek. Nge pwal pöükässir kewe ruofoch ra itifengen me lukalapen ewe imwenfel.
1KI 6:28 A pwal apachätä kolt won ekewe uluulun kerop.
1KI 6:29 Iwe, Salomon a ruputi liosun kerop me irä palm pwal pöön irä mi mas won etippen pwelin unusen ewe rum mi unusen pin me ewe rum mi pin.
1KI 6:30 A pwal mwo nge pwölü ngeni kolt lon ewe rum mi unusen pin me ewe rum mi pin.
1KI 6:31 Salomon a föri ruu asam fän iten ewe lenien tolong lon ewe rum mi unusen pin seni ewe irä olif. Nge lapalapen irän penkasamer a wor limu ininin.
1KI 6:32 Iwe, won ekewe ruu asam mi för seni ewe irä olif a ruputi liosun kerop, irä palm me pön irä mi mas. A apachätä kolt won ekewe asam, pwal won ekewe liosun kerop me irä palm.
1KI 6:33 Salomon a pwal föri üren penkasamen ewe lenien tolong lon ewe rum mi pin seni ewe irä olif, nge tekian me chölapen ewe lenien tolong ra wewefengen.
1KI 6:34 A föri ruu asam seni ewe irä saipires, nge eu me eu kewe asam ra tongeni num fän ruu.
1KI 6:35 Iwe, a ruputi wor liosun kerop, irä palm me pön irä mi mas o apachätä kolt wor.
1KI 6:36 A pwal senätä tittin ewe leni mwen ewe imwenfel won ülüngat sässär ren fau mi fal, pwal eu sässär ren ewe irä setar.
1KI 6:37 Iwe, lon ewe arüanün ierin mwün Salomon fän ewe maram Sif, iei ewe aruuen maram, longolongun imwen ewe Samol mi Lapalap a för.
1KI 6:38 Nge lon ewe engol me euin ier fän ewe maram Pul, iei awaluen maram, ewe imwenfel a wesöchüla lon tichikin angangan me akotan meinisin. Iwe, Salomon a aüetä ei imwenfel lon ükükün fisu ier.
1KI 7:1 Iwe, lon ükükün engol me ülüngat ier, Salomon a aüetä püsin imwan o awesi unusan meinisin.
1KI 7:2 Iwe, a aüetä eu imw imwen wöllapen Lepanon, langataman ükükün ipükü lime fiit, chölapan ükükün fik me limu fiit, nge tekian ükükün faik me limu fiit. A wor ülüngat telin ür seni ewe irä setar, nge irälapan seni ewe irä setar ra nom won ekewe ür.
1KI 7:3 Iwe, a wor faik me limefoch ür, engol me limefoch won eu me eu telin. Osun ewe imw a seni ewe irä setar, nge ewe os a soposopowu won ekewe imwen iseis mi nom won ekewe ür.
1KI 7:4 Mi pwal wor asamwacho lon ülüngat tettel, nge eu asamwacho a sunu ngeni pwal eu.
1KI 7:5 Chölapen me tekian ekewe asam ra nönnöfengen, pwal chölapen me tekian ekewe asammwacho ra nönnöfengen, nge eu asammwacho a sunu ngeni pwal eu lon ülüngat tettel.
1KI 7:6 Iwe, Salomon a aüetä eu utten ür, langataman ükükün fik me limu fiit, nge chölapan faik me limu fiit. Mi wor eu kengkangan me fän mesan a wor üran, a pwal wor osun.
1KI 7:7 Salomon a pwal aüetä eu ut fän iten ewe lenien motun king, iei ewe utten kapwüng, ewe ia a eäni kapwüng ie. Iwe, a papeni ngeni ewe irä setar seni fan tori won.
1KI 7:8 Nge püsin imwan a nom lükisökürün ewe utten kapwüng, a wewefengen förün me ei ut. Salomon a pwal aüetä eu imw a wewefengen me ei ut fän iten nöün Farao we fefin a pwülüeni.
1KI 7:9 Ekei imw meinisin ra för seni fau mi mürina, ra fal lon aükük o ngerenger lepekir me lon, pwal lepekir me lükün. Iwe, ra aea ekewe fau won longolongun ekewe imw tori aser, pwal won tittin ewe leni lükün me tittin ewe leni mi watte.
1KI 7:10 Iwe, ekewe longolong ra för seni fau mi mürina o watte ükükün langatamen ekoch engol me ruu fiit, nge ekoch engol me limu fiit.
1KI 7:11 Nge won ekewe longolong a wor fau mi mürina ra fal lon aükük, pwal irälap seni ewe irä setar.
1KI 7:12 Iwe, tittin ewe leni watte mi nom pwelin lükün ewe imwen king a wor ülüngat sässärin fau mi fal, pwal eu sässär seni ewe irä setar. Pwal tittin ewe leni mwen imwen ewe Samol mi Lapalap me kengkangan ra för lon ei sokun lapalap.
1KI 7:13 Iwe, ewe king Salomon a titi Huram seni Tirus.
1KI 7:14 Huram nöün eman fefin mi mä pwülüan seni ewe ainangen Naftali, nge saman eman re Tirus. Ätei eman mi sile angang ngeni piras, a fokun tipachem me silelap me sipeöch le föri sokopaten angang ngeni piras. Iwe, a feito ren ewe king Salomon o föri an kewe angang meinisin.
1KI 7:15 Iwe, Huram a föri ruofoch ür seni piras, ükükün tekian efoch me efoch rüe me fisu fit, nge ükükün öün engol me walu fiit. Malülün ewe ür ükükün ülüngat inis, nge lon a pwang.
1KI 7:16 A pwal föri ruu leton seni piras, pwe repwe nom won ekewe ür. Nge tekian eu me eu kewe leton ükükün fisu esop fiit.
1KI 7:17 A afouta ekewe leton ngeni sein mi nut, füpa sein mi nut nge eu leton.
1KI 7:18 A pwal föri uluulun apel o apacheretä lon ruu tettel won pwelin ewe sein mi nut, pwe repwe pwölüela letonen ewe ür. Iwe, a föri iei usun ngeni pwal ewe eu leton.
1KI 7:19 Iwe, letonen ekewe ür ra usun lapalapen pön kiop, ükükün tekiar wonu fit.
1KI 7:20 Ekewe leton mi nom asen ekewe ür ra nom won eu leni mi kukumos ren ewe sein mi nut. Nge mi wor ruupükü uluulun apel lon ruu tettel pwelin eu me eu leton.
1KI 7:21 Iwe, Huram a aüetä ekewe ruofoch ür mesen kengkangen ewe imwenfel. Ewe efoch a aüetä me ör o aita ngeni Jakin, nge pwal ewe efoch a aüetä me efeng o aita ngeni Poas.
1KI 7:22 Ekewe leton mi usun lapalapen pön kiop ra nom asen ekewe ür. Iei usun angangen ekewe ür a wes.
1KI 7:23 Mürin, Huram a föri eu sepien koluk mi fokun watte seni piras. Iwe, a kumosumos, nge chölapan seni epek tori epek ükükün engol me limu fiit, alololun ükükün fisu esop fiit, nge pwelin won aaman ükükün faik me limu fiit.
1KI 7:24 Iwe, pwelin ünükün fän aamen ewe sepien koluk a wor ruu telin uluulun pamkin mi förunusfengen me ewe sepien koluk.
1KI 7:25 Ewe sepien koluk a nom won engol me ruoman uluulun ätemwänin kow, ülüman ra sape ngeni efeng, ülüman ra sape ngeni lotou, ülüman ra sape ngeni ör, nge ülüman ra sape ngeni ötiu. Iwe, ewe sepien koluk a nom wor, nge wänükür a sorolong fan.
1KI 7:26 Malülün ewe sepien koluk ükükün ülüngat inis, nge aaman a usun chök aamen eu kap, usun chök epö pön kiop mi mas. Iwe, masouen ewe sepi ina epwe ükükün engol ngeröü kalon koluk.
1KI 7:27 Huram a pwal föri engol kuruma seni piras. Langatamen me chölapen efoch me efoch ükükün wonu fiit, nge tekian ükükün rüanü esop fit.
1KI 7:28 Iei usun lapalapen förün ekewe kuruma: Mi wor lepekir, ra katupulong lon mächän ekewe pwokuku.
1KI 7:29 Iwe, won lepekir kewe a wor liosun laion, ätemwänin kow me kerop. Nge won mächän ekewe pwokuku, pwal asen me fän ekewe liosun laion me ätemwänin kow a wor lapalapen mwäramwär mi fires.
1KI 7:30 Iteiten efoch me efoch kewe kuruma a wor fofoch willan seni piras me waaser seni piras. Nge won ekewe rüanü pwokuku mi wor peres fän ewe sepi seni piras. Ekei peres ra fout ngeni lapalapen mwärämwär mi fires.
1KI 7:31 Mi pwal wor aamen pwangen won ekewe kuruma, a sükütä won ükükün engol me walu inis o kokotiu won ükükün fisu inis, nge pwangan a kukumos. Iwe, aropen pwelin ewe pwang a wor lios mi rup. Lepekin ekewe kuruma a wor rüanü pekin mi nönnöfengen, nge resap kumosumos.
1KI 7:32 Ekewe rüanü wiil ra nom fän ekewe pekin, nge waasen ekewe wiil ra chök förunusfengen me ewe kuruma. Iwe, tekian efoch wiil ükükün rüe me limu inis.
1KI 7:33 Ekewe wiil ra för usun chök willen woken. Iwe, waasen ekewe wiil me kukumosur, nikaütütür me lukalaper ra för seni piras meinisin.
1KI 7:34 Mi wor rüanü lenien kamwöch lon ekewe rüanü pwokukun iteiten efoch me efoch kuruma. Nge ekewe lenien kamwöch ra förunusfengen me ekewe kuruma.
1KI 7:35 Iwe, asen ekewe kuruma a wor eu rof mi kumosumos ükükün tekian tiu inis. Nge peresin me lepekin ewe kuruma ra förunusfengen me ewe kuruma.
1KI 7:36 Won peresin me lepekin ewe kuruma, pwal ekis meinisin ia a wor leni ie, Huram a ruputi liosun kerop, laion me irä palm, a pwal föri lapalapen mwärämwär mi fires pwelin ünükün.
1KI 7:37 Iei usun Huram a föri ekewe engol kuruma. Ir meinisin a wewefengen nönnör me lapalaper.
1KI 7:38 Huram a pwal föri engol sepi seni piras, eu sepi fän iten efoch me efoch kewe engol kuruma. Ükükün masouen eu me eu sepi ina epwe rüepükü ilik kalon koluk, nge chölapen eu me eu sepi ükükün wonu fiit seni epek tori epek.
1KI 7:39 Huram a anomu limefoch ekewe kuruma peliörün ewe imwenfel, nge limefoch a anomu peliefengin. Iwe, ewe sepien koluk mi fokun watte Huram a anomu lükün pwokukun ewe imwenfel me ötiuörün.
1KI 7:40 Huram a pwal föri nape, söföl me kükün sepi. Iei usun Huram a awesi ekewe angang meinisin a föri fän iten ewe king Salomon me won imwen ewe Samol mi Lapalap.
1KI 7:41 Ikkei mine Huram a föri: Ruofoch ür, ruu leton usun lapalapen sepi mi nom asen ekewe ür, me ruapa sein mi nut ra nom won ekewe ruu leton,
1KI 7:42 föpükü uluulun apel fän iten ekewe ruapa sein mi nut, ruu telin uluulun apel won epa sein mi nut pwe repwe nom won ekewe ruu leton,
1KI 7:43 engol kuruma me engol sepi mi nom won ekewe kuruma,
1KI 7:44 ewe sepien koluk mi fokun watte me ekewe engol me ruoman uluulun ätemwänin kow mi nom fan,
1KI 7:45 pwal nape, söföl me kükün sepi. Ekei pisek meinisin Huram a föri seni piras mi misimis fän alon ewe king Salomon fän iten imwen ewe Samol mi Lapalap.
1KI 7:46 Iwe, ewe king a föri ekei pisek me lon ewe lenien ketel me för pisek seni mächä lon pan seni pwülüpar lefilen Sukot me Saretan lon maasiesin ünükün ewe chanpupu Jortan.
1KI 7:47 Nge Salomon esap kiloni ekewe pisek, pun ra kon chomong. Iei mine esap fat ükükün choun ewe piras.
1KI 7:48 Iwe, Salomon a pwal föri pisekin lon imwen ewe Samol mi Lapalap meinisin seni kolt: Ewe rongen asor, ewe chepel fän iten ewe pilawa mi pin,
1KI 7:49 ekewe lenien atittin, limefoch ra nom peliör, nge limefoch ra nom peliefeng me mwen ewe rum mi unusen pin. A föri ekewe ululun pön irä, ekewe lamp me ekewe acchip,
1KI 7:50 ekewe kap, ekewe fich, ekewe sepi mi kükün, pwal ekewe sepi fän iten apach mi pwokus me ekewe sepi fän iten moli. Iwe, a pwal föri inisesin ekewe asamen ewe rum mi unusen pin me ekewe asamen lon ewe imwenfel. Ekei pisek meinisin ra för seni kolt.
1KI 7:51 Lupwen a wes ewe angang meinisin ewe king Salomon a föri won imwen ewe Samol mi Lapalap, Salomon a uwato ekewe pisek Tafit saman we a apini, ewe silifer me kolt me ekewe sepi, o iseniir lon ekewe lenien iseis pisek mi aüchea me lon imwen ewe Samol mi Lapalap.
1KI 8:1 Mürin, ewe king Salomon a körato ren ekewe souakomwen Israel me mwänirelan ekewe ainang meinisin, pwal ekewe souemwenin ekewe eterekesin Israel. Iwe, a amwichafengeniir lon Jerusalem, pwe repwe uwato lon ewe imwenfel än ewe Samol mi Lapalap we pworofel seni ewe telinimwen Tafit iei Sion.
1KI 8:2 Iwe, ekewe re Israel meinisin ra mwicheto ren ewe king Salomon lupwen fansoun ewe chulapen likachoch lon ewe maram Etanim, iei ewe afisuen maram.
1KI 8:3 Lupwen ekewe souakomwen Israel meinisin ra feito, ekewe souasor ra ekietä wor än ewe Samol mi Lapalap we pworofel,
1KI 8:4 o mwärela ren ewe imwenfel. Iwe, ekewe souasor me ekewe mwän seni ewe ainangen Lefi ra pwal uwala ewe imwenfel seni mangaku me ekewe pisek mi pin mi nom lon ren ewe imwenfel.
1KI 8:5 Iwe, ewe king Salomon me ekewe chon Israel meinisin mi mwichefengen ren ra nom mwen ewe pworofel o eäni asor chomong sip me ätemwänin kow, pwe ekewe mönün asor resap chüen tongeni lea.
1KI 8:6 Mürin, ekewe souasor ra uwalong än ewe Samol mi Lapalap we pworofel lon ewe imwenfel o anomu lon ewe rum mi unusen pin fän pöükässin ekewe kerop.
1KI 8:7 Pöükässin ekewe kerop mi meresiwu ra pwölüela won ewe pworofel me ämwärin kewe.
1KI 8:8 Ekewe ämwär ra kon langatam, pwe eman a tongeni küna lesopur seni ewe rum mi pin ika a ü mwen ewe rum mi unusen pin, nge esap wor eman a tongeni küneer me lükün. Ekewe ämwär ra nom ikenan tori ikenai.
1KI 8:9 Iwe, esap wor och lon ewe pworofel chilon chök ekewe rüepek fau mi chöpöp Moses a isenirelong lon me arun ewe chuk Horep. Iei ewe ia ewe Samol mi Lapalap a eäni eu pwon ngeni ekewe aramasen Israel, lupwen ra towu seni ewe fanü Isip.
1KI 8:10 Nge lupwen ekewe souasor ra towu seni lon ewe imwenfel, eu kuchu a aurala ewe imwenfel,
1KI 8:11 ina mine ekewe souasor resap chüen tongeni föri ar angang lon pokiten ewe kuchu. Pun än ewe Samol mi Lapalap ling a aurala ewe imwenfel.
1KI 8:12 Mürin, ewe king Salomon a iotek, “En Samol mi Lapalap ka anomu akkar lon läng, nge en ka filätä pwe kopwe nom lon rochokichin rochopwak.
1KI 8:13 Üa aüetä eu imwenfel mi amwarar fän itom, eu leni kopwe nom lon tori feilfeilachök.”
1KI 8:14 Iwe, ekewe aramasen Israel meinisin ra ütä, nge ewe king a kulu ngeniir o afeiöchüür.
1KI 8:15 Mürin a apasa, “Üpwe mwareiti ewe Samol mi Lapalap, ewe Koten Israel, mi apwönüetä mine a eäni pwon ngeni Tafit semei we, lupwen a üra,
1KI 8:16 ‘Seni ewe ränin üa emwenawu nei aramasen Israel seni Isip, üsap filätä eu telinimw me lein telinimwen ekewe ainangen Israel meinisin ia eu imwenfel epwe kaütä ie, pwe aramas repwe fel ngeniei ie. Nge üa filätä Tafit, pwe epwe nemeni nei aramasen Israel.’
1KI 8:17 Iwe, a nom lon än Tafit semei we ekiek, pwe epwe aüetä eu imwenfel fän iten ewe Samol mi Lapalap ewe Koten Israel.
1KI 8:18 Nge ewe Samol mi Lapalap a üreni Tafit semei we, ‘A mürina pwe ka ekiekin aüetä eu imwenfel fän itei.
1KI 8:19 Inamwo nge en kosap aüetä ewe imwenfel. Nge noum mwän epwe upu ngonuk, i epwe aüetä ewe imwenfel fän itei.’
1KI 8:20 Iei ewe Samol mi Lapalap a apwönüetä an we pwon a eäni. Pun üa siwili Tafit semei we lon wisan wisen king me lon Israel, usun ewe Samol mi Lapalap a fen pwon. Iwe, üa aüetä ei imwenfel fän iten ewe Samol mi Lapalap, ewe Koten Israel.
1KI 8:21 Ikenan üa pwal awora eu leni fän iten ewe pworofel, ia a nom ie ekewe rüepek fau mi chöpöp än ewe Samol mi Lapalap kapasen pwon a mak ie. Ekei kapasen pwon a eäni ngeni ach kewe lewo, lupwen a emwenirewu seni ewe fanü Isip.”
1KI 8:22 Mürin, Salomon a ütä mwen än ewe Samol mi Lapalap we rongen asor me fän mesen unusen ewe mwichen chon Israel. Iwe, a aitietä pöün läng
1KI 8:23 o iotek, “Ai Samol mi Lapalap, Koten Israel, esap wor eman kot a wewe ngonuk lon läng ika won fanüfan. Ka apwönüetä om pwon o pwäri om tong ellet ngeni noum kewe chon angang mi föri letipom ren unusen leluker.
1KI 8:24 Ka apwönüetä om pwon ngeni noum chon angang Tafit semei we. Ewer, ikenai a fis meinisin mine ka apasatä.
1KI 8:25 Nge iei, ai Samol mi Lapalap, Koten Israel, kopwe pwal apwönüetä om pwon ngeni Tafit semei we, pun ka üreni pwe epwe wor eman mwirimwirin, epwe wiseni ewe wisen king me lon Israel fansoun meinisin, are nöün kewe mwän repwe chök aleasochik o föri letipom usun i a föri letipom.
1KI 8:26 Iei mine, ai Kot, en ewe Koten Israel, kopwe apwönüetä om kapas ka eäni ngeni noum chon angang Tafit semei we.
1KI 8:27 Nge ifa usun en, äm Kot, kopwe wesewesen tongeni imweimw won fanüfan? Nengeni, kosap kuch lon läng pwal lon ewe läng mi unusen tekia. Ifa usun, kopwe tongeni kuch lon ei imwenfel üa aüetä?
1KI 8:28 Ai Samol mi Lapalap, ai Kot, ngang noum chon angang, kose mochen kopwe aüselinga ai iotek o apwönüetä ai tüngor üa eäni ngonuk ikenai.
1KI 8:29 Kopwe mamasa ei imwenfel lepwin me lerän, ewe leni ka kapas usun pwe en kopwe imweimw lon. Kopwe aüselinga ewe iotek ngang noum chon angang üa eäni ngonuk le sape ngeni ei leni.
1KI 8:30 Kopwe aüselinga ai kewe tüngor me än noum aramasen Israel kewe tüngor, lupwen aia iotek ngonuk le sape ngeni ei leni. Ewer, kopwe aüseling me läng ewe ia ka nom ie, nge lupwen ka rongorong, kopwe amusala äm tipis.
1KI 8:31 Iwe, are eman aramas epwe atipisi chon arun, o emwenala ren om ei rongen asor lon ei imwenfel, pwe epwe pwon fän akapel pwe esap tipis,
1KI 8:32 mürin kopwe aüseling me läng o apwüngü noum kewe chon angang. Kopwe atipisi ewe mi tipis o ukun ngeni an föför, nge kopwe pwärala pwüngün ewe chon pwüng o liwini ngeni won ükükün an pwüng.
1KI 8:33 Iwe, are noum aramasen Israel ra kuf ren chon oputer pokiten ar tipis ngonuk, nge mürin ra kulsefäl ngonuk o amusamus ngonuk, are ra iotek o tüngor ngonuk me lon ei imwenfel,
1KI 8:34 kopwe aüselingeer me läng o amusala ar tipis. Kopwe aliwinisefäliir ngeni ewe fanü ka fen ngeni ar kewe lewo.
1KI 8:35 Iwe, are üt esap püngütiu me läng pokiten ar tipis ngonuk, nge mürin ra iotek ngonuk le sape ngeni ei leni, are ra amusamus ngonuk o kul seni ar tipis pokiten ka ariaföüür,
1KI 8:36 mürin kopwe aüselingeer me läng o amusala än noum kewe chon angang ekewe aramasen Israel tipis. Iwe, kopwe aiti ngeniir mine a pwüng pwe repwe föri. Mürin kopwe apüngätiu üt won fanüom, ewe fanü ka ngeni noum aramas pwe repwe fanüeni.
1KI 8:37 Iwe, are a fis lengita lon ewe fanü, are a wor mätter ika moi ika mesenipik ika lifichimas ika muun, are chon oputer repwe pwelifeili eu lein ar kewe telinimw fän pisekin maun, ese lifilfil meni sokun riaföü ika samau a fis,
1KI 8:38 kopwe aüseling ar iotek. Iwe, are eman chök aramas ika noum aramasen Israel meinisin ra tüngor o aitiela pöür ngeni ei imwenfel, ese lifilifil met sokun iotek ika tüngor ra eäni, pun iteiten eman me eman a silei riaföün püsin lelukan,
1KI 8:39 mürin kopwe aüselingeer me läng ewe ia ka nom ie. Kopwe amusala ar tipis o liwini ngeni eman me eman ükükün an föför, pun en ka silei leluker, ewer, en echök ka silei leluken aramas meinisin.
1KI 8:40 Ren ei noum aramas repwe meninituk lon fansoun ar manau lon ewe fanü ka ngeni äm kewe lewo.
1KI 8:41 Nge are eman chon ekis, sap i eman lein noum aramasen Israel, epwe feito seni eu fanü toau fän iten itom,
1KI 8:42 pun ekewe aramas repwe rongorong itom mi iteföüla, pwal usun om kewe föför ka föriir ren poum mi manaman, are ewe chon ekis epwe feito o iotek le sap ngeni ei imwenfel,
1KI 8:43 kopwe aüselinga me läng ewe ia ka nom ie. Iwe, kopwe mwütätä meinisin mine ewe chon ekis a tüngor ngonuk. Ren ei ekewe aramasen fanüfan meinisin repwe silei itom o meninituk, usun noum kewe aramasen Israel ra föri, repwe pwal silei pwe ei imwenfel üa aüetä a eu leni ia aramas repwe fel ngonuk ie.
1KI 8:44 Iwe, are ka tinala noum aramas pwe repwe feila maun ngeni chon oputer, ese lifilifil ia ra nom ie, are ra iotek ngonuk, en ewe Samol mi Lapalap, le sape ngeni ei telinimw ka filätä, pwal ngeni ei imwenfel üa aüetä fän itom,
1KI 8:45 kopwe aüselinga ar iotek me tüngor me läng o alisiir.
1KI 8:46 Nge are noum aramas ra tipis ngonuk, pun esap wor eman esap föri tipis, nge ka song ngeniir o mwüt ngeni chon oputeer pwe repwe akufuur o uweerela lon fanüer mi toau ika arap,
1KI 8:47 nge are ra memef lon leluker o ekieksefäl me lon ewe fanü ia ra oola ie, are ra tüngor ngonuk me lon fanüen chon liapeniir o apasa, ‘Äm aia tipis o föri föför esepwüng me ngau,’
1KI 8:48 are ra kulsefälituk ren unusen leluker me lon fanüen chon oputer o iotek ngonuk le sape ngeni fanüer ka ngeni ar kewe lewo, are ra sape ngeni ei telinimw ka filätä, pwal ngeni ei imwenfel üa aüetä fän itom,
1KI 8:49 kopwe aüselinga ar iotek me ar tüngor me läng ewe ia ka nom ie o alisiir.
1KI 8:50 Iwe, kopwe amusala än noum kewe aramas tipis me pupungau ra föri ngonuk. Kopwe pwal awora tong lon leluken chokewe mi uweerela, pwe repwe tongeer.
1KI 8:51 Pun ir noum aramas ka nöüniir, ka emwenirewu seni Isip ewe leni mi wewe ngeni eu lenien ekkei mi fokun sarara.
1KI 8:52 Ai Samol me ai Kot, kose mochen kopwe netiu o aüselinga än noum chon angang tüngor, pwal än noum kewe aramasen Israel tüngor iteiten fansoun ra kökköruk pwe kopwe alisiir.
1KI 8:53 Pun en ka aimwürela seni lein ekewe aramasen fanüfan meinisin pwe kopwe nöüniir, usun Moses noum we chon angang a fen pwärätä fän alom, lupwen ka emwenawu äm kewe lewo seni Isip.”
1KI 8:54 Lupwen Salomon a wes le eäni ekei iotek me tüngor meinisin ngeni ewe Samol mi Lapalap, a ütä me mwen ewe rongen asor, ia a fotopwäsuk ie o eitietä pöün läng.
1KI 8:55 Iwe, a ütä o afeiöchü unusen ewe mwichen chon Israel fän mwelian mi osomong o apasa,
1KI 8:56 “Üpwe mwareiti ewe Samol mi Lapalap mi awora kinamwe ngeni nöün aramasen Israel usun a fen pwon. A apwönüetä an kewe pwon mi mürina meinisin a eäni ngeni Moses nöün we chon angang fän iten ekewe chon Israel.
1KI 8:57 Ewe Samol mi Lapalap ach Kot epwe etikich usun a eti ach kewe lewo. Amwo esap likitikichela ika pöütikichela.
1KI 8:58 Epwe akulu lelukach ngeni, pwe sipwe aleasochisi alon o apwönüetä an kewe allük me pwüüng meinisin a allük ngeni ach kewe lewo.
1KI 8:59 Amwo ewe Samol mi Lapalap ach we Kot epwe chechemeni lerän me lepwin ai kei kapas üa eäni le tüngor ngeni. Amwo epwe pwal alisiei ngang nöün chon angang me nöün aramasen Israel won ükükün ach osupwang iteiten rän.
1KI 8:60 Ren ei aramasen fanüfan meinisin repwe silei pwe ewe Samol mi Lapalap i chök Kot, esap pwal wor eman lükün.
1KI 8:61 Iei mine lelukemi epwe fokun wenechar ngeni ewe Samol mi Lapalap ach we Kot, oupwe aleasochisi an kewe allük o apwönüetä an kewe pwüüng, usun oua föri ikenai.”
1KI 8:62 Mürin, ewe king Salomon me ekewe chon Israel meinisin mi nom ren ra asor ngeni ewe Samol mi Lapalap.
1KI 8:63 Iwe, Salomon a eäni asoren kinamwe ngeni ewe Samol mi Lapalap ükükün rüe me ruungeröü ätemwänin kow me ipükü rüe ngeröü sip. Iei usun ewe king me ekewe aramasen Israel meinisin ra efinüna imwen ewe Samol mi Lapalap.
1KI 8:64 Lon ewe chök ränin ewe king a apini lukalapen ewe leni lükün mwen imwen ewe Samol mi Lapalap. Iwe, ikenan a eäni ekewe asoren kek me asoren mongö, pwal ekewe kinikinin kiris seni ekewe asoren kinamwe, pokiten ewe rongen asor seni piras mi nom fän mesen ewe Samol mi Lapalap a men kükün fän iten ekei sokopaten asor meinisin.
1KI 8:65 Iei usun Salomon me ekewe chon Israel meinisin mi nom ren ra föri ewe chulapen likachoch lon ewe fansoun. Iwe, eu mwichemongen aramas ra feito seni ewe al mi ale ngeni Hamat a nom efeng, pwal seni ewe öüwön Isip a nom ör. Ra föri efinünen ewe imwenfel lon ükükün fisu rän, nge lon ükükün fisu rän ra föri ewe chulapen likachoch.
1KI 8:66 Iwe, sorotän ewe rän Salomon a afeilai ekewe aramas. Iwe, ra afeiöchü ewe king o feila ngeni en me lenian fän meseik me pwapwan leluker pokiten ekewe feiöch meinisin ewe Samol mi Lapalap a awora ngeni Tafit nöün we chon angang, pwal ngeni nöün kewe aramasen Israel.
1KI 9:1 Lupwen Salomon a wes le aüetä imwen ewe Samol mi Lapalap me püsin imwan, pwal meinisin mine a mochen aüetä,
1KI 9:2 ewe Samol mi Lapalap a pwä ngeni Salomon fän aruuan, usun a fen pwä ngeni me lon Kipeon.
1KI 9:3 Iwe, ewe Samol mi Lapalap a üreni, “Üa aüselinga om iotek me om tüngor ka eäni ngeniei. Üa apini ei imwenfel ka aüetä pwe epwe eu leni üpwe imweimw lon tori feilfeilachök. Üpwe mamasa ei leni o tümwünü fansoun meinisin.
1KI 9:4 Nge en, are kopwe angang ngeniei fän wenechar me limöchün lelukom usun Tafit semom we a föri, are kopwe aleasochisi meinisin mine üa allük ngonuk o apwönüetä ai kewe allük me pwüüng,
1KI 9:5 mürin üpwe anüküchara mwum lon Israel tori feilfeilachök, usun üa fen pwon ngeni Tafit semelapom we ren ai apasa, ‘Epwe fokun wor eman mwirimwirum iteiten fansoun, epwe wiseni ewe wisen king me lon Israel.’
1KI 9:6 Nge are ämi me mwirimwirum kana oupwe kul seniei, are oua aleasolap ngeni ai kewe allük me pwüüng üa ngenikemi, are oupwe angang ngeni pwal ekoch kot o fel ngeniir,
1KI 9:7 mürin üpwe ärawu chon Israel seni lon ewe fanü üa ngeniir. Iwe, ei imwenfel üa apini fän itei üpwe aturawu me fän mesei, nge aramas repwe leaweni chon Israel ren kapsen ämängau me kapasen turunufas me lein chon ekewe mwü meinisin.
1KI 9:8 Iwe, ei imwenfel epwe wiliti eu ioien fau, nge meinisin mi pwereto lükün repwe mairü ren o turunufasei, repwe pwal ais, ‘Pwota ewe Samol mi Lapalap a föri ei sokun föför ngeni ei fanü me ei imwenfel.’
1KI 9:9 Iwe, aramas repwe pälüeni, ‘Pokiten ra likitala ewe Samol mi Lapalap ar we Kot mi emwenawu ar kewe lewo seni ewe fanü Isip. Ra pwal angei ekoch kot, ra fel ngeniir o angang ngeniir. Iei mine ewe Samol mi Lapalap a awarato wor ekei feiengau meinisin.’”
1KI 9:10 Iwe, lon ükükün rüe ier Salomon a aüetä imwen ewe Samol mi Lapalap me püsin imwan.
1KI 9:11 Hairam ewe kingen Tirus a ngeni Salomon irä setar me irä saipires me kolt ükükün an mochen. Iwe, amwüchülan ei angang king Salomon a ngeni Hairam rüe telinimw me lon ewe fanü Kalili.
1KI 9:12 Nge lupwen Hairam a feito seni Tirus pwe epwe katol ekewe telinimw Salomon a ngeni, Hairam esap saniir.
1KI 9:13 Iei mine a üreni Salomon, “Pwii, met sokun telinimw kei ka ngeniei.” Iei mine ra aita ngeni ewe fanü Kapul tori ikenai.
1KI 9:14 Nge Hairam a fen tinala ren ewe king ina epwe ükükün rüanü esop ton kolt.
1KI 9:15 Iwe, ewe king Salomon a nöünöü chon angangen kinroosi, lupwen a aüetä imwen ewe Samol mi Lapalap me püsin imwan, pwal lupwen a amasoua ewe leni peliötiuen ewe telinimw o aüetä tittin Jerusalem. A pwal nöüniir le aüsefälietä ekewe telinimw Hasor, Mekito me Keser.
1KI 9:16 (Iwe, Farao ewe kingen Isip a feila o liapeni ewe telinimw Keser. A kenala ewe telinimw o niela ekewe chon Kanaan mi imweimw lon. Mürin a lifang ngeni nöün we föpwül ewe telinimw, lupwen a pwülüeni Salomon.
1KI 9:17 Iei mine Salomon a aüsefälietä Keser). Salomon a pwal nöüni ekewe chon angangen kinroosi le aüetä Pethoron-fan,
1KI 9:18 Palat me Tamar mi nom lon ewe fanüapön Juta,
1KI 9:19 ekewe telinimw meinisin ia a nom ie an lenien iseis pisek me ekewe telinimw fän iten waan woken me nöün oris. Iwe, Salomon a pwal aüetä meinisin mine a chök mochen me lon Jerusalem, lon Lepanon pwal lon unusen ewe fanü a nemeni.
1KI 9:20 Iwe, Salomon a nöüni chon angang ekewe aramas mi chüen manau seni ekewe chon Amor, chon Hit, chon Peris, chon Hiw me ekewe chon Jepus. Ir sap aramasen Israel,
1KI 9:21 nge mwirimwirin chokewe mi chüen manau lon ewe fanü ekewe aramasen Israel resap tongeni aroserela. Ikkei ir chokewe Salomon a nöüniir amanau. Iei usun a chüen fis tori ikenai.
1KI 9:22 Nge Salomon esap nöüni amanau ekewe aramasen Israel. Ir ra wisen sounfiu, ra nöüwisen mwü, ra meilap, ra souemwen me chon nemeni chon wawa waan woken, ra pwal chon wawa oris.
1KI 9:23 Iwe, mi wor ükükün limepükü lime meilap mi wisen nemeni ekewe aramas mi föri än ewe king Salomon angangen kaü imw.
1KI 9:24 Nge nöün Farao fefin pwülüen Salomon a feitä seni ewe telinimwen Tafit o feila ngeni püsin imwan Salomon a aüetä fän itan. Mürin, Salomon a amasoua ewe leni peliötiuen ewe telinimw.
1KI 9:25 Iwe, fän ülüngat iteiten ier Salomon a sou eäni asoren kek me asoren kinamwe won ewe rongen asor a senätä fän iten ewe Samol mi Lapalap. A pwal eäni asor apach mi pwokus ngeni ewe Samol mi Lapalap. Iei usun a awesöchüela angangen ewe imwenfel.
1KI 9:26 Ewe king Salomon a pwal falei eu pöisein sip me lon Esion-keper mi arap ngeni Elat arosetin ewe Setipar lon ewe fanü Etom.
1KI 9:27 Nge ewe king Hairam a tinala nöün kewe sälo mi repi lematau won ei pöisei, pwe repwe angangfengen me nöün Salomon kewe chon angang.
1KI 9:28 Iwe, ra saila Ofair o uwato ren ewe king Salomon ina epwe ükükün engol me wonu ton kolt.
1KI 10:1 Lupwen ewe kiwinen Sepa a rongorong usun än Salomon iteföüla a tori me ren ewe Samol mi Lapalap, a feila pwe epwe sotuni Salomon ren kapas ais mi weires.
1KI 10:2 Iwe, neminewe a tori Jerusalem fiti chomong chon angang me kamel mi uwou nofitin mongö mi pwokus, kolt mi chomong, pwal fau aüchea. Iwe, lupwen a churi Salomon, a ais ngeni meinisin mine a ekieki lon lelukan.
1KI 10:3 Nge Salomon a pälüeni an kapas ais meinisin. Esap wor och mi weires ngeni ewe king an epwe tongeni palüeni.
1KI 10:4 Iwe, lupwen ewe kiwinen Sepa a küna än Salomon tipachem, ewe imw a aüetä fän itan,
1KI 10:5 ewe mongö mi nom won an chepel, usun än nöün kewe nöüwis mot ünükün, angangöchün nöün kewe chon angang me lingen üfer, nöün chon amolätä ünüman, pwal ekewe asoren kek a eäni me lon imwen ewe Samol mi Lapalap, neminewe a fokun mwar ren.
1KI 10:6 Mürin, ewe kiwin a üreni ewe king Salomon, “A let ewe pworaus üa rong me lon püsin fanüei usun om föför me om tipachem.
1KI 10:7 Nge ngang üsap mochen lükü ewe pworaus tori iei üa feito o küna ren püsin mesei. Nge nengeni, ra chök apworausa ngeniei esopun pworausom. Om tipachem me om pisekisek a kon senukula seni ewe pworaus üa rongorong.
1KI 10:8 Feiöchün pwülüom kewe. Feiöchün noum kei chon angang mi nom reöm iteiten fansoun o rongorong ngeni om tipachem.
1KI 10:9 Üpwe mwareiti ewe Samol mi Lapalap om we Kot mi pwapwaituk o atolongok lon ewe wisen king lon Israel. Pokiten ewe Samol mi Lapalap a echeni Israel tori feilfeilachök, iei mine a seikuketä pwe kopwe nöür king o eäni kapwüng me pwüng ngeniir.”
1KI 10:10 Mürin, neminewe a ngeni ewe king ina epwe ükükün limu ton kolt, chomong nofitin mongö me fau aüchea. Esap chüen wor ei ükükün chomongun nofitin mongö a torisefäli ewe king Salomon usun mine ewe kiwinen Sepa a ngeni.
1KI 10:11 Iwe, än Hairam pöisein sip mi uwato kolt seni Ofair, ra pwal uwato chomong irä itan alkum me fau aüchea.
1KI 10:12 Seni ekei irä alkum ewe king a föri arongorongen imwen ewe Samol mi Lapalap pwal arongorongen püsin imwan, a pwal föri ükülele me kitar seni fän iten ekewe souköl. Ei chomongun irä alkum esap chüen tori Israel ika pwä mürin ena fansoun.
1KI 10:13 Iwe, ewe king Salomon a ngeni ewe kiwinen Sepa meinisin mine a mochen ika tüngor lükün ekewe lifang a fen ngeni seni somwen wöün. Mürin, neminewe me nöün kewe chon angang ra liwiniti poputän fanüer.
1KI 10:14 Iwe, choun ewe kolt mi tori Salomon iteiten ier ina epwe ükükün rüe me limu ton,
1KI 10:15 lükün mine a tolong seni takisesin ekewe chon amömö me winnen ekewe chon amömö, pwal takises seni ekewe kingen Arapia meinisin me ekewe kepinan ewe fanü Israel.
1KI 10:16 Iwe, ewe king Salomon a föri rüepükü tittin maun mi watte o cheni ngeni kolt mi nechenech. Nge kolten eu me eu kewe tittin maun ina epwe ükükün engol me limu paun.
1KI 10:17 A pwal föri ülüpükü tittin maun mi kükün o cheni ngeni kolt mi nechenech. Nge kolten eu me eu kewe tittin maun mi kükün ina epwe ükükün rüanü paun. Iwe, ewe king a iseni ekei tittin maun lon ewe imwen wöllapen Lepanon.
1KI 10:18 Mürin, ewe king a pwal föri eu lenien motun king mi watte, a alinga ngeni ngiin äläfan o apachätä kolt mi mürina won.
1KI 10:19 Iwe, a wor wonu foson latön ewe lenien motun king, nge won ullulon ewe lenien mot me lon a wor uluulun möküren eman nienifön kow. Mi pwal wor lenien pau won lepekin me ruu, nge uluulun ruoman laion ra nom lükün ekewe lenien pau.
1KI 10:20 Nge mi pwal wor uluulun engol me ruoman laion won ewe latö, eman uluulun laion a nom lesopun me ruu ekewe wonu foso. Ei sokun lenien motun king esap fokun wor esin lon ekewe mwü.
1KI 10:21 Iwe, än ewe king Salomon kapen ün meinisin ra för seni kolt, pwal ekewe sepi meinisin mi nom lon ewe imwen wöllapen Lepanon ra för seni kolt mi mürina. Esap wor eu leir a för seni silifer, pun silifer esap kon aüchea lon fansoun manauen Salomon.
1KI 10:22 A pwal wor än ewe king pöisein sip mi kamö me amömö pisek mi fiti än Hairam pöisein sip. Iwe, fän eu lon iteiten ülüngat ier ei pöisein sip a liwinto o uwato kolt, silifer, ngiin äläfan me sokopaten mongki.
1KI 10:23 Iei usun ewe king Salomon a pisekisek me tipachem lap seni ekewe king meinisin won fanüfan.
1KI 10:24 Iwe, chon fanüfan meinisin ra mochen feito ren Salomon pwe repwe rongorong an tipachem Kot a fang ngeni.
1KI 10:25 Nge iteiten eman me eman mi feito a uwato an lifang: pisek seni silifer me kolt, üf, pisekin maun, nofitin mongö, oris me aas kana. Ei a chök fifis ier me ier.
1KI 10:26 Iwe, Salomon a achufengeni chomong woken me oris. A wor ren ükükün engeröü föpükü woken me engol me ruungeröü oris. A anomu ekoch lon ekewe telinimwen woken, nge ekoch a anomu ren lon Jerusalem.
1KI 10:27 Lupwen fansoun mwün ewe king Salomon, silifer a chomong lon Jerusalem usun chök chomongun fau, a pwal wor chomong irä setar usun chök chomongun ewe irä sikamor mi mär fäsonun ekewe chuk.
1KI 10:28 Nöün Salomon kewe oris ra feito seni Isip me Kue, pun nöün kewe chon kamö ra möniir seni Kue ren moni.
1KI 10:29 Iwe, ra kamö efoch woken seni Isip won ükükün wonopükü föün moni silifer, nge eman oris won ükükün ipükü lime föün moni silifer. Nge nöün ewe king chon amömö ra pwal amömösefäliela ekewe woken me oris ngeni ekewe kingen chon Hit me ekewe kingen Siria meinisin.
1KI 11:1 Iwe, ewe king Salomon a sani chomong fin ekis. Lükün nöün Farao we föpwül a pwal pwülüeni fin Moap, fin Amon, fin Etom, fin Siton me fin Hit.
1KI 11:2 Ikkei ekewe mwü ewe Samol mi Lapalap a kapas ngeni ekewe aramasen Israel usun, pwe resap pwüpwülü ngeniir, nge ir resap pwal pwüpwülü ngeniir, pun repwe fokun akulu leluker ngeni ar kewe kot. Nge Salomon a chök fitipacheiti ekewe fefin o tongeer.
1KI 11:3 A pwülüeni ükükün füpükü finesamol, a pwal wor ükükün ülüpükü ülüpwülüan me lükür. Nge pwülüan kewe ra akunala lelukan seni Kot.
1KI 11:4 Pun lupwen Salomon a chinlap, pwülüan kewe ra akulu lelukan pwe a fel ngeni ekewe koten ekis. Iwe, lelukan esap chüen unus ngeni ewe Samol mi Lapalap an we Kot epwe usun leluken Tafit saman we.
1KI 11:5 Pun Salomon a fel ngeni Astarot än chon Siton we anüfefin, pwal ngeni Molok än chon Amon we kot mi fokun anioput.
1KI 11:6 Iei usun Salomon a föri mine a ngau me fän mesen ewe Samol mi Lapalap, nge esap unusen allükülük ngeni ewe Samol mi Lapalap epwe usun Tafit saman we.
1KI 11:7 Salomon a aüetä me won ewe chuk ötiuen Jerusalem eu lenien fel ngeni Kemos än chon Moap kot mi fokun anioput, pwal ngeni Molok än chon Amon kot mi fokun anioput.
1KI 11:8 A pwal aüetä lenien fel fän iten pwülüan kewe ekewe fin ekis meinisin, pwe repwe tongeni keni apach mi pwokus o eäni asor ngeni ar kewe kot.
1KI 11:9 Iwe, ewe Samol mi Lapalap ewe Koten Israel a song ngeni Salomon, pun lelukan a kul seni. Inamwo an pwä ngeni fän ruu
1KI 11:10 o allük ngeni pwe esap fel ngeni pwal ekoch kot, nge Salomon esap aleasochisi mine ewe Samol mi Lapalap a allük ngeni.
1KI 11:11 Iei mine ewe Samol mi Lapalap a üreni Salomon, “Pokiten ka föri ei föför, pwe ka atai ai we pwon o aleasolap ngeni ai kewe pwüüng üa allük ngonuk, üpwe fokun angei senuk ewe mwü o ngeni eman lein noum kewe nöüwis.
1KI 11:12 Nge fän iten Tafit semom we, üsap föri ei lupwen ka chüen manau. Iwe, üpwe angei ewe mwü seni lepöün noum we mwän.
1KI 11:13 Üsap angei seni unusen ewe mwü, nge üpwe likiti ngeni eu chök ainang fän iten Tafit nei we chon angang, pwal fän iten Jerusalem ewe telinimw üa filätä.”
1KI 11:14 Iwe, ewe Samol mi Lapalap a pesei Hatat ewe re Etom, pwe epwe pälüeni o ü ngeni Salomon. Ätei eman mwirimwirin ewe kingen Etom.
1KI 11:15 Pun me lom, lupwen Tafit a maun ngeni Etom, Joap ewe meilapen sounfiu a feila ikenan, pwe epwe peiaseni ekewe mi ninnila.
1KI 11:16 Pun Joap me ekewe sounfiun Israel meinisin ra nom Etom lon ükükün wonu maram, nge lon ena fansoun ra ärala ekewe mwän meinisin lon Etom.
1KI 11:17 Nge Hatat a süla Isip fiti ekoch chon Etom nöün saman kewe chon angang. Lon ena fansoun Hatat a chüen eman chök kükün ät.
1KI 11:18 Iwe, ra sai seni Mitian o tori Paran, ra pwal nuki ekoch mwän seni Paran o feila Isip ren Farao ewe kingen Isip. Nge Farao a ngeni Hatat eu imw me eu fanü, a pwal ngeni anan mongö.
1KI 11:19 Hatat a fokun küna ümöümöch me ren Farao, pwe Farao a ngeni pwin Tapenes we pwe pwülüan. Tapenes pwülüen Farao i ewe kiwin.
1KI 11:20 Iwe, pwin Tapenes we a nöüni me won Hatat eman ät itan Kenupat. Tapenes a foleni ätei lon imwen Farao, nge Kenupat a nom ren nöün Farao kewe mwän.
1KI 11:21 Lupwen Hatat a rong me lon Isip pwe Tafit a mäla, pwal Joap ewe meilapen mwichen sounfiu, Hatat a üreni Farao, “Kose mochen mwüt ngeniei pwe üpwe liwiniti poputän fanüei.”
1KI 11:22 Nge Farao a aisini, “Ifa usun, üa tümwününgau ngonuk, pwe ka ekiekin liwiniti poputän fanüom?” Nge Hatat a üreni, “Apwi, kopwe chök mwüt ngeniei pwe üpwe le feila.”
1KI 11:23 Kot a pwal pesei Reson nöün Eliata we mwän, pwe epwe ü ngeni Salomon. Ätei Reson ewe mi sü seni an samol Hatateser ewe kingen Sopa.
1KI 11:24 Iwe, a amwichato ekoch aramas, nge i a wiliti souemwenin eu mwichen aramas mi küt liaper fän pöchökül. Ei a fis mürin Tafit a niela ekewe sounfiun Sopa. Iwe, Reson me an mwich ra feila Tamaskus o nonom ikenan. Ra seikätä Reson pwe epwe king lon Tamaskus.
1KI 11:25 Reson a ü ngeni chon Israel lon unusen ränin manauen Salomon o afeiengaueer usun chök Hatat. Iwe, lupwen a nemeni Siria, a oput chon Israel.
1KI 11:26 Pwal Jeropoam nöün Nepat we mwän eman re Efraim seni Sereta a ü ngeni ewe king, i eman nöün Salomon kewe nöüwis, iten inan Serua, eman fefin mi mä pwülüan.
1KI 11:27 Iei popun an ü ngeni ewe king. Salomon a amasoua ewe leni peliötiuen Jerusalem o pinela ewe pwang mi nom lon tittin ewe telinimwen Tafit saman we.
1KI 11:28 Iwe, ewe mwän Jeropoam a fokun lipwäköch. Nge lupwen Salomon a küna pwe ewe alüal a fokun achocho le angang, a awisa pwe epwe nemeni unusen ewe mwichen chon angangen kinroosi lon fanüen ekewe ainangen Manasa me Efraim.
1KI 11:29 Lon eu rän, lupwen Jeropoam a feila seni Jerusalem, ewe soufos Ahia seni Silo a churi me won al, lon eu fanü mi amassawa, nge ra chök ruomanüla. Iwe, Ahia a üföüf echö üf mi fö.
1KI 11:30 Mürin, Ahia a amwöchü püsin üfan mi fö a üföüf o kamwekisietiu lon engol me ruu kinikin.
1KI 11:31 Iwe, a üreni Jeropoam, “Kopwe angei fän itom engol kinikin. Pun iei alon ewe Samol mi Lapalap ewe Koten Israel: Nengeni, üpwe le angei seni Salomon ewe mwü o ngonuk engol ainang.
1KI 11:32 Nge Salomon epwe chök nemeni eu ainang fän iten nei chon angang Tafit, pwal fän iten Jerusalem, ewe telinimw üa filätä me lein telinimwen ekewe ainangen Israel meinisin.
1KI 11:33 Pun Salomon a likitieila o fel ngeni Astarot nöün chon Siton anüfefin me Kemos ewe koten Moap, pwal Molok ewe koten Amon. Salomon esap aleasochisiei, esap pwal föri mine a pwüng me fän mesei o apwönüetä ai kewe pwüüng me allük usun Tafit saman we a föri.
1KI 11:34 Nge üsap angei seni unusen ewe mwü, pun üpwe mwüt ngeni pwe epwe nemenem lon unusen ränin manauan. Ei üpwe föri fän iten Tafit nei we chon angang üa filätä, ätewe mi aleasochisi ai kewe allük me pwüüng.
1KI 11:35 Iwe, üpwe angei ewe mwü seni nöün Salomon we mwän o ngonuk engol ainang.
1KI 11:36 Nge eu ainang üpwe ngeni nöün we mwän, pwe epwe wor eman mwirimwirin Tafit nei we chon angang epwe sopwela le nemenem lon Jerusalem, ewe telinimw üa filätä pwe üpwe imweimw lon.
1KI 11:37 Iwe, Jeropoam, üpwe awisok pwe kopwe king lon Israel o nemenem won ükükün om mochen.
1KI 11:38 Are kopwe aüselinga meinisin mine üa allük ngonuk, are kopwe pwal aleasochisiei o föri mine a pwüng me fän mesei ren om apwönüetä ai kewe pwüüng me allük, usun Tafit nei we chon angang a föri, ngang üpwe etuk, üpwe pwal awisa ngonuk ewe wisen king lon Israel o fokun awora mwirimwirum lon ewe wis, usun üa awora mwirimwirin Tafit.
1KI 11:39 Pokiten än Salomon tipis üpwe atekisonätiu mwirimwirin Tafit, nge sap tori feilfeilachök.”
1KI 11:40 Iwe, Salomon a ekiekin niela Jeropoam. Iei mine Jeropoam a süla ren Sisak ewe kingen Isip o nonom Isip tori Salomon a mäla.
1KI 11:41 Iwe, lusun pworausen än Salomon föför meinisin, an angang meinisin me an tipachem a mak lon ewe puken uruwon Salomon.
1KI 11:42 Salomon a king lon unusen Israel me lon Jerusalem lon ükükün faik ier.
1KI 11:43 Iwe, Salomon a mäla, nge ra peiaseni lon ewe telinimwen Tafit saman we. Nge Rehopoam nöün we mwän a siwili lon wisan wisen king.
1KI 12:1 Iwe, Rehopoam a feila Sikem, pun chon Israel meinisin ra mwichefengen ikenan, pwe repwe seikätä Rehopoam lon wisen king.
1KI 12:2 Nge lupwen Jeropoam nöün Nepat we mwän mi nom Isip, ewe ia a süla ie seni ewe king Salomon, a rong usun, a liwinto seni Isip,
1KI 12:3 pun ekewe chon Israel ra titi i. Mürin, Jeropoam me ekewe chon Israel ra feito ren Rehopoam o üreni,
1KI 12:4 “Semom we a achouu ngenikem chomong angang. Iei mine kopwe apäna ngenikem ewe angang mi chou, semom we a achouu ngenikem, o amecheresikem, mürin äm aipwe angang ngonuk.”
1KI 12:5 Iwe, Rehopoam a üreniir, “Oupwe liwinla, nge mürin ülüngat rän oupwe liwinto rei pwe üpwe ngenikemi pälüen ämi tüngor.” Iei mine ekewe aramas ra feila.
1KI 12:6 Mürin, ewe king Rehopoam a angei öüröüran me ren ekewe chinlap mwän, ätekewe mi angang ngeni saman we, lupwen a chüen manau. Iwe, a aisiniir, “Met ämi öüröür ngeniei, pwe üpwe pälüeni ngeni ekei aramas?”
1KI 12:7 Ra üreni, “Are ka mochen eman chon angang ngeni ekei aramas ikenai, kopwe eäni kapas mürina ngeniir, lupwen kopwe pälüeni ar tüngor, mürin ir repwe noum chon angang fansoun meinisin.”
1KI 12:8 Nge Rehopoam a pöütala ewe öüröür a angei seni ekewe chinlap mwän o angei öüröüran me ren pilon kewe alüal mi angang ngeni.
1KI 12:9 Iwe, a aisiniir, “Met ämi öüröür, pwe sipwe pälüeni ngeni ekei aramas mi üreniei pwe üpwe apäna ngeniir ewe angang mi chou, semei we a achouu ngeniir?”
1KI 12:10 Iwe, pilon Rehopoam kewe alüal ra üreni, “Iei usun mine kopwe pälüeni ngeni ewe tüngor seni ekewe aramas, ‘Aütüngini a öümong seni lukalapen semei we.
1KI 12:11 Are mi pwüng pwe semei we a achouu ngenikemi chomong angang, ngang üpwe föri pwe epwe chou seni. Semei we a apwüngükemi fän wok, nge ngang üpwe apwüngükemi fän och wichiwich seni silin man mi ken.’”
1KI 12:12 Mürin ülüngat rän Jeropoam me ekewe aramas meinisin ra feito ren ewe king Rehopoam, usun i a fen kapas ngeniir pwe repwe liwinto.
1KI 12:13 Iwe, ewe king a kapas ngeni ekewe aramas fän pöchökül o pöütala öüröüran me ren ekewe chinlap mwän.
1KI 12:14 A kapas ngeniir fän öüröüran me ren ekewe alüal o üreniir, “Semei we a achouu ngenikemi chomong angang, nge ngang üpwe föri pwe epwe chou seni. Semei we a apwüngükemi fän wok, nge ngang üpwe apwüngükemi fän och wichiwich seni silin man mi ken.”
1KI 12:15 Iei usun ewe king esap aüselinga än ekewe aramas tüngor. Ei a fis me ren ewe Samol mi Lapalap, pwe epwe apwönüetä an kapas a eäni ngeni Ahia ewe re Silo fän iten Jeropoam nöün Nepat we mwän.
1KI 12:16 Iwe, lupwen chon Israel meinisin ra küna pwe ewe king esap aüselinga ar tüngor, ra pälüeni ewe king, “Pwota sipwe chiechi ngeni Tafit me an famili? Met sokun feiöch sa angei seniir? Ämi chon Israel, oupwe liwiniti en me lenian. Rehopoam, kopwe tümwünü püsin chon leimwom.” Iei mine chon Israel ra liwiniti en me lenian.
1KI 12:17 Nge Rehopoam a chök nemeni ekewe chon Israel mi imweimw lon ekewe telinimwen Juta.
1KI 12:18 Mürin, ewe king Rehopoam a tinala Atoniram ewe meilapen ewe mwichen chon angangen kinroosi ren ekewe chon Israel, nge ir ra monei ngeni fau, iwe a mäla. Mürin, ewe king Rehopoam a müttir tötä won waan woken o süla Jerusalem.
1KI 12:19 Seni ewe ränin tori ikenai ekewe chon Israel ra ü ngeni mwün Tafit me mwirimwirin.
1KI 12:20 Nge lupwen chon Israel meinisin ra rongorong pwe Jeropoam a liwinto seni Isip, ra titi i lon ar mwich. Iwe, ra seikätä Jeropoam pwe epwe kingen Israel. Esap wor eman mi eti ekewe mwirimwirin Tafit, chilon chök ewe ainangen Juta.
1KI 12:21 Iwe, lupwen Rehopoam a tori Jerusalem, a amwichafengeni ükükün ipükü walik ngeröü sounfiu mi kefil seni ewe ainangen Juta me Peniamin, pun a ekiekin maun ngeni chon Israel o aliwinisefäli mwün.
1KI 12:22 Nge Kot a üreni ewe soufos Semaia,
1KI 12:23 pwe epwe kapas ngeni Rehopoam nöün Salomon we mwän ewe kingen Juta, ngeni chon ekewe ainangen Juta me Peniamin meinisin, pwal ngeni ekewe lusun aramas,
1KI 12:24 “Iei aloi ngang ewe Samol mi Lapalap: Ousap feila pwe oupwe maun ngeni pwimi kewe chon Israel. Oupwe liwiniti en me lenian, pun ei mettoch mi fis a feito seniei.” Iwe, ra aleasochisi alon ewe Samol mi Lapalap o liwiniti en me lenian.
1KI 12:25 Iwe, Jeropoam a apöchöküla tittin ewe telinimw Sikem lon ewe fanü mi chukuchukutä me lon Efraim o imweimw ikenan. Mürin, a feila seni ikenan o apöchöküla tittin ewe telinimw Penuel.
1KI 12:26 Nge Jeropoam a ekieki lon lelukan, “Iei ewe mwü epwe liwiniti chon leimwen Tafit.
1KI 12:27 Are ekei aramas repwe feila o asor lon imwen ewe Samol mi Lapalap me lon Jerusalem, mürin repwe kulsefäl ngeni ar samol Rehopoam. Iwe, repwe nieila o liwiniti Rehopoam ewe kingen Juta.”
1KI 12:28 Mürin än ewe king Jeropoam ekieki usun ei mettoch, a föri ruu uluulun kow seni kolt o üreni ekewe aramas, “Ämi oua feila Jerusalem fansoun langatam pwe oupwe fel ngeni Kot. Ämi chon Israel, nengeni, ikkei ir ämi kewe kot mi emwenikemiiwu seni ewe fanü Isip.”
1KI 12:29 Iwe, a anomu eu kewe uluulun kow lon Petel, nge ewe eu a anomu lon Tan.
1KI 12:30 Ren ei mettoch ekewe aramasen Israel ra tipis, pun ra feila o fel ngeni ewe eu uluulun kow lon Petel, ra pwal feila o fel ngeni ewe pwal eu lon Tan.
1KI 12:31 Jeropoam a pwal aüetä lenien fel won ekewe leni mi tekia o filätä souasor me lein ekewe aramas meinisin, nge ir sap chon ewe ainangen Lefi.
1KI 12:32 Iwe, Jeropoam a pwal filätä eu ränin chulap lon engol me limuen ränin ewe awaluen maram, usun ewe ränin chulap mi fis lon Juta. Iwe, a asor won ewe rongen asor me lon Petel ngeni ekewe uluulun kow a püsin föri. A pwal anomu lon Petel ekewe souasor seni ekewe lenien fel won ekewe leni mi tekia i a föri.
1KI 12:33 Iwe, lon engol me limuen ränin ewe awaluen maram, ewe rän Jeropoam a püsin filätä, a feila Petel o asor won ewe rongen asor i a püsin senätä. Iei usun a afisätä eu ränin chulap fän iten ekewe aramasen Israel.
1KI 13:1 Iwe, lupwen Jeropoam a ütä ren ewe rongen asor, pwe epwe föri an asor, eman nöün Kot soufos seni Juta a tori Petel fän alon ewe Samol mi Lapalap.
1KI 13:2 Ewe soufos a kökkö ngeni ewe rongen asor fän alon ewe Samol mi Lapalap o apasa, “Rongen asor, rongen asor, iei alon ewe Samol mi Lapalap: Eman ät epwe uputiu me lon ewe familien Tafit itan Josia. Ätewe epwe eäni asor womw ekewe souasor seni ekewe lenien fel won ekewe leni mi tekia, ir ätekewe ra föri ar asor womw. Nge chün aramas repwe kek womw.”
1KI 13:3 Mürin, ewe soufos a föri eu asisil o apasa, “Iei ewe asisil ewe Samol mi Lapalap a kapas usun: Ewe rongen asor epwe möküfesen, nge falangen won epwe niiniitiu.”
1KI 13:4 Nge lupwen ewe king a rongorong än ewe soufos kapas ngeni ewe rongen asor lon Petel, a aitiewu pöün me ünükün ewe rongen asor o üra, “Oupwe turufi ätenan.” Lon ewe chök otun pöün Jeropoam we mi itini ngeni ewe soufos a mä, pwe esap chüen tongeni pworesefälielong.
1KI 13:5 Iwe, ewe rongen asor a möküfesen, nge ewe falang a niiniitiu me won, usun ewe soufos a fen kapas won fän alon ewe Samol mi Lapalap.
1KI 13:6 Mürin, ewe king a üreni ewe soufos, “Kose mochen kopwe tüngorei ewe Samol mi Lapalap om we Kot, pwe epwe ümöümöch ngeniei o iotek fän itei pwe pei epwe manausefäl.” Iwe, ewe soufos a tüngor ngeni ewe Samol mi Lapalap, nge pöün ewe king a manausefäl pwe a usun chök me mwan.
1KI 13:7 Iwe, ewe king a üreni ewe soufos, “Kopwe etiei lon imwei pwe kopwe chünuk, nge ngang üpwe ngonuk eu lifang.”
1KI 13:8 Nge ewe soufos a üreni ewe king, “Are kopwe fen fang ngeniei esopun woum, üsap etuk. Üsap fokun mongö ika ün och me lon ei leni.
1KI 13:9 Pun ewe Samol mi Lapalap a allük ngeniei pwe üsap mongö ika ün och, üsap pwal liwinsefäliti ewe al üa feila won.”
1KI 13:10 Iei mine a feila won efoch al, nge esap liwinsefäliti ewe al a feila won tori Petel.
1KI 13:11 Lon ei fansoun a wor eman soufos chinlap lon Petel. Iwe, nöün kewe mwän ra feito ren o apworausa ngeni meinisin mine ewe soufos seni Juta a föri me lon Petel lon ewe rän, pwal mine a apasa ngeni ewe king.
1KI 13:12 Mürin, semer we a aisiniir, “Meni al ewe mwän a pwerela won?” Nöün kewe mwän ra aiti ngeni ewe al ewe soufos seni Juta a pwerela won.
1KI 13:13 Iwe, a üreni nöün kewe mwän, “Oupwe rietä ewe lenien mot won nei we aas.” Mürin ar rietä ewe lenien mot won nöün we aas, a mottiu won
1KI 13:14 o tapwela mürin ewe soufos seni Juta. A tori, lupwen a momot fän efoch irä ook. Iwe, a aisini, “Ifa usun, en ewe soufos mi feito seni Juta?” Ätewe a pälüeni, “Ewer, ngang.”
1KI 13:15 Mürin a üreni, “Kopwe etiei lon imwei pwe kopwe mongö.”
1KI 13:16 Nge ewe soufos seni Juta a üreni, “Üsap tongeni etuk le liwinla lon imwom, üsap pwal tongeni etuk le mongö ika ün och me lon ei leni.
1KI 13:17 Pun ewe Samol mi Lapalap a allük ngeniei pwe üsap mongö ika ün och me ikenan, üsap pwal liwinsefäliti ewe al üa feila won.”
1KI 13:18 Iwe, ewe soufos chinlap a üreni ewe soufos seni Juta, “Ngang pwal eman soufos usun en. Eman chon läng a kapas ngeniei fän alon ewe Samol mi Lapalap o üra pwe üpwe aliwinisefäliikela lon imwei, pwe kopwe mongö o ün rei.” Nge ewe soufos chinlap a chofana ngeni.
1KI 13:19 Iei mine ewe soufos seni Juta a eti le liwinsefäl, a pwal mongö o ün lon imwan.
1KI 13:20 Iwe, lupwen ra mot ngeni chepel, alon ewe Samol mi Lapalap a tori ewe soufos chinlap mi aliwinisefäli ewe soufos seni Juta.
1KI 13:21 A kapas leüömong ngeni ewe soufos seni Juta, “Iei alon ewe Samol mi Lapalap: Pokiten ka aleasolap ngeni alon ewe Samol mi Lapalap om we Kot o tümwününgauei an allük,
1KI 13:22 ka pwal liwinsefäl pwe kopwe mongö o ün lon ei leni a kapas ngonuk usun pwe kosap mongö o ün lon, iei mine kopwe mäla, nge inisum esap peias lon peiasen om kewe lewo.”
1KI 13:23 Iwe, wesin an mongö o ün, ewe soufos chinlap a rietä ewe lenien mot won eman aas fän iten ewe soufos seni Juta o aliwinisefäli.
1KI 13:24 Nge lupwen ätewe a feila, eman laion a churi won al o niela. Iwe, inisin a nom won ewe al, nge ewe aas me ewe laion ra ütä ünükün.
1KI 13:25 Nge ekoch aramas mi pwerela ra küna inisin ewe soufos seni Juta won ewe al, pwal ewe laion a ütä ünükün. Ra tori ewe telinimw ia ewe soufos chinlap a imweimw ie, o apworausa ei pworaus.
1KI 13:26 Iwe, lupwen ewe soufos chinlap mi aliwinisefäli ewe soufos seni Juta a rong usun, a apasa, “Iei i ewe soufos mi aleasolapa alon ewe Samol mi Lapalap. Iei mine ewe Samol mi Lapalap a tinato ewe laion pwe epwe niela, usun a fen kapas ngeni me mwan.”
1KI 13:27 Mürin, ewe soufos chinlap a üreni nöün kewe mwän, “Oupwe rietä ewe lenien mot won nei we aas.” Iwe, ra rietä ewe lenien mot won nöün we aas.
1KI 13:28 Mürin, a feila o küna inisin ewe soufos seni Juta a chüen nom won ewe al, nge ewe aas me ewe laion ra ütä ünükün. Ewe laion esap ochei ewe inis, esap pwal niela ewe aas.
1KI 13:29 Iwe, ewe soufos chinlap a angei inisin ewe soufos seni Juta, a anomu won ewe aas o aliwinisefäliela Petel, pwe epwe kechüeiti o peiaseni.
1KI 13:30 Mürin a peiaseni ewe somä lon püsin peiasan. Nge ewe soufos chinlap me nöün kewe mwän ra kechüeiti o apasa, “Wokoo, pwii, pwii.”
1KI 13:31 Iwe, wesin an peiaseni, a üreni nöün kewe mwän, “Are üpwe mäla, oupwe peiaseniei lon peiasen ei soufos seni Juta. Oupwe anomu chüi lükün chün.
1KI 13:32 Pun mine a apasa fän alon ewe Samol mi Lapalap usun ewe rongen asor lon Petel pwal usun ekewe lenien fel mi nom lon ekewe telinimwen Samaria epwe fokun fis.”
1KI 13:33 Mürin fisitän ekei pworaus, Jeropoam esap kul seni an föför mi ngau, nge a chök seikätä souasor me lein ekewe aramas meinisin fän iten ekewe lenien fel won ekewe leni mi tekia. A apini iteiten eman me eman mi chök mochen pwe epwe souasorun ekewe lenien fel.
1KI 13:34 Iei ewe tipis chon leimwen Jeropoam ra tur lon, a awarato wor feiengau me mäla pwe ra rosola seni won fanüfan.
1KI 14:1 Iwe, lon ewe fansoun Apia nöün Jeropoam we ät a samau.
1KI 14:2 Jeropoam a üreni pwülüan, “Etto, kopwe asokala üfom, pwe esap wor eman a tongeni sillenuk pwe en pwülüei. Iwe, kopwe feila Silo ia Ahia ewe soufos a nom ie, ätewe mi apasa pwe üpwe kingen Israel.
1KI 14:3 Kopwe angei engol fochun pilawa, ekoch nokop me eu rumen chönün chunen, pwe kopwe uweela ren Ahia. Iwe, epwe ürenuk mine epwe fis ngeni ewe semirit.”
1KI 14:4 Iwe, pwülüen Jeropoam a föri iei usun. A feila Silo o tori imwen Ahia. Nge Ahia esap tongeni küna mwan, pun mesan ra toputop pokiten a chinlap.
1KI 14:5 Nge ewe Samol mi Lapalap a fen üreni Ahia, “Pwülüen Jeropoam epwe feito pwe epwe aisinuk usun nöün we ät, pun a samau. Ien me ien mine kopwe üreni.” Lupwen neminewe a feito, a pwomweni pwe itä i esap pwülüen Jeropoam we.
1KI 14:6 Iwe, lupwen Ahia a rong püngüpüngün pechen neminewe, lupwen a feito ren ewe asam, a üra, “Kopwe tolong pwülüen Jeropoam. Pwota ka pwomweni pwe itä en kosap pwülüen Jeropoam? Mi wor ai pworaus pöchökül fän itom.
1KI 14:7 Kopwe feila o üreni Jeropoam, ‘Iei alon ewe Samol mi Lapalap ewe Koten Israel: Üa atekiokotä seni lein ekewe aramas o awisok pwe kopwe emweni nei aramasen Israel.
1KI 14:8 Üa angei ewe mwü seni chon leimwen Tafit o ngonuk. Nge en kosap usun nei we chon angang Tafit mi apwönüetä ai kewe allük o aleasochisiei ren unusen lelukan, pun a föri mine a pwüng me fän mesei.
1KI 14:9 En ka föri mine a ngau lap seni chokewe meinisin ra akom mwom. Ka föri fän itom pwal ekoch kot me uluulun anü seni piras, ka pwal kulu sökürum ngeniei. Ren ei ka asongaei.
1KI 14:10 Iei mine üpwe aworato feiengau womw, üpwe ärala noum mwän meinisin seni ekewe kükün tori watte. Üpwe fokun arosala chon leimwom meinisin, usun eman aramas a pirumweela mettoch mi limengau, tori esap chüen wor och lusun.
1KI 14:11 Iwe, iteiten eman me eman me lein chon leimwom mi mäla me lon ewe telinimw kolak repwe ochei. Nge iteiten eman me eman mi mäla lemäl machang repwe ochei, pun ngang ewe Samol mi Lapalap üa kapas.’
1KI 14:12 Nge en pwülüen Jeropoam kopwe liwiniti imwom. Lon ewe otun kopwe tolong lon asamen ewe telinimw, ewe semirit epwe mäla.
1KI 14:13 Iwe, chon Israel meinisin repwe kechüeiti o peiaseni. I chök me lein chon leimwen Jeropoam epwe peias, pokiten a wor och me won, mine ewe Samol mi Lapalap ewe Koten Israel a efich.
1KI 14:14 Iwe, ewe Samol mi Lapalap epwe pwal seikätä eman king epwe nemeni Israel. Ätei epwe ärala chon leimwen Jeropoam lon ewe rän.
1KI 14:15 Ewe Samol mi Lapalap epwe apwüngü Israel pwe epwe mwaukuk usun efoch wowo a mänükünük lon koluk. Epwe üttätä chon Israel seni lon ewe fanü mi mürina a ngeni ar kewe lewo, epwe pwal atoropasafeiliir pekilan ewe chanpupu Oifrat, pun ra asonga ewe Samol mi Lapalap ren ar föri uluulun ewe anüfefin Asera.
1KI 14:16 Iwe, epwe asechala chon Israel pokiten än Jeropoam tipis a föri, pwal pokiten an emweni chon Israel ngeni tipis.”
1KI 14:17 Mürin, pwülüen Jeropoam a ütä o liwinsefäliti Tirsa. Nge lupwen a ipwelong lon asamen imwan, ewe semirit a mäla.
1KI 14:18 Iwe, chon Israel meinisin ra kechüeiti o peiaseni, usun ewe soufos Ahia nöün ewe Samol mi Lapalap we chon angang a apasa fän alon.
1KI 14:19 Iwe, lusun pworausen än Jeropoam föför meinisin, ekewe maun a eäni me an nemenem, a mak lon puken uruwon ekewe kingen Israel.
1KI 14:20 Iwe, Jeropoam a nemenem lon ükükün rüe me ruu ier. Mürin a mäla, nge Natap nöün we mwän a siwili lon wisan wisen king.
1KI 14:21 Iwe, Rehopoam nöün Salomon we mwän a ierini faik me eu, lupwen a tolong lon wisan wisen king o nemenem lon Juta. A nemenem lon ükükün engol me fisu ier me lon Jerusalem ewe telinimw ewe Samol mi Lapalap a filätä me lein telinimwen ekewe ainangen Israel meinisin, pwe aramas repwe fel ngeni ie. Iten inan Nama, eman fin Amon.
1KI 14:22 Nge chon Juta ra föri mine a ngau me fän mesen ewe Samol mi Lapalap o asonga ren ar tipis ra föri lap seni mine ar kewe lewo ra föri.
1KI 14:23 Ra aüetä fän iter lenien fel won ekewe leni mi tekia, ra pwal aüetä ekewe ür me uluulun ewe anüfefin Asera won iteiten chuk pwal fän iteiten irä mi muresires pwe repwe fel ngeniir.
1KI 14:24 Nge a pwal wor mwän me lon ewe fanü, ra fangala inisir fän iten lisowu lon ekewe lenien fel ngeni anümwäl. Iwe, chon Israel ra föri ekewe föför mi anioput usun chök chon ekewe mwü ewe Samol mi Lapalap a asürela me mwer.
1KI 14:25 Iwe, lon alimuen ierin mwün ewe king Rehopoam, Sisak ewe kingen Isip a feito o maun ngeni Jerusalem.
1KI 14:26 A angei ekewe pisek mi aüchea me lon imwen ewe Samol mi Lapalap, pwal ekewe pisek mi aüchea me lon imwen ewe king o uweerela meinisin. A pwal uweala ekewe tittin maun seni kolt meinisin Salomon a föriir.
1KI 14:27 Iwe, ewe king Rehopoam a föri tittin maun seni piras akasiwilin ekewe tittin maun seni kolt o ngeni ekewe meilapen chon mas mi mamasa asamalapen imwen ewe king, pwe repwe tümwünü.
1KI 14:28 Iteiten fansoun, lupwen ewe king a feila lon imwen ewe Samol mi Lapalap, ekewe chon mas ra eti o uwei ekewe tittin maun, mürin ra aliwinirela ngeni ewe rumwen chon mas.
1KI 14:29 Iwe, lusun pworausen än Rehopoam föför meinisin a mak lon puken uruwon ekewe kingen Juta.
1KI 14:30 Lon ei fansoun a chök fifis maun lefilen Rehopoam me Jeropoam.
1KI 14:31 Iwe, Rehopoam a mäla, nge ra peiaseni ren an kewe lewo lon ewe telinimwen Tafit. Nge Apia nöün we mwän a siwili lon wisan wisen king.
1KI 15:1 Iwe, lon ewe engol me waluen ierin mwün ewe king Jeropoam nöün Nepat we mwän, Apia a tolong lon wisan wisen king o nemeni Juta.
1KI 15:2 A nom lon Jerusalem o nemenem lon ükükün ülüngat ier. Iten inan we Maaka nöün Apsalom we fefin.
1KI 15:3 Apia a föri ekewe tipis meinisin saman we a föri me mwan, lelukan esap pwal unus ngeni ewe Samol mi Lapalap an we Kot usun leluken Tafit an we lewo.
1KI 15:4 Nge fän iten Tafit, ewe Samol mi Lapalap an we Kot a ngeni eman mwirimwirin, eman nöün mwän, pwe epwe nemenem me lon Jerusalem me mürin, a pwal anüküchara Jerusalem.
1KI 15:5 Pun Tafit a föri mine a pwüng me fän mesen ewe Samol mi Lapalap, nge lon unusen ränin manauan a aleasochis ngeni än Kot kewe allük, chilon chök ren ewe föför a fis ngeni Uria ewe re Hit.
1KI 15:6 Iwe, a chök fifis maun lefilen Rehopoam me Jeropoam lon unusen ränin manauer.
1KI 15:7 Nge lusun pworausen än Apia föför meinisin a mak lon puken uruwon ekewe kingen Juta. A pwal fis maun lefilen Apia me Jeropoam.
1KI 15:8 Iwe, Apia a mäla, nge ra peiaseni lon ewe telinimwen Tafit. Nge Asa nöün we mwän a siwili lon wisan wisen king.
1KI 15:9 Iwe, lon arüen ierin mwün Jeropoam ewe kingen Israel, Asa a tolong lon wisan wisen king lon Juta.
1KI 15:10 A nom lon Jerusalem o nemenem lon ükükün faik me eu ier. Iten inen saman we Maaka nöün Apsalom we fefin.
1KI 15:11 Asa a föri mine a pwüng me fän mesen ewe Samol mi Lapalap, usun Tafit an we lewo a föri.
1KI 15:12 A asüela seni ewe fanü ekewe mwän mi fangala inisir fän iten lisowu lon ekewe lenien fel ngeni anümwäl, a pwal aturala ekewe uluulun anümwäl saman we a föriir.
1KI 15:13 A pwal awesi Maaka inen saman we seni wisan wisen inelapen king, pun a föri eu uluulun ewe anüfefin Asera mi fokun anioput. Asa a pöküetiu ei uluulun anümwäl o kenala me arun ewe öüwö Kitron.
1KI 15:14 Iei mwo än Asa esap ataela ekewe lenien fel won ekewe leni mi tekia, nge lelukan a chök unus ngeni ewe Samol mi Lapalap lon ränin manauan meinisin.
1KI 15:15 Iwe, a uwato lon imwen ewe Samol mi Lapalap ekewe pisek saman we a apini, pwal ekewe pisek seni kolt me silifer püsin i a apini.
1KI 15:16 Iwe, a fis maun lefilen Asa ewe kingen Juta me Paasa ewe kingen Israel lon unusen ränin manauer.
1KI 15:17 Paasa ewe kingen Israel a feila Juta pwe epwe maun ngeni. A apöchökülala tittin ewe telinimw Rama o pineela än ekewe aramas repwe towu me tolong lon fanüen Asa ewe kingen Juta.
1KI 15:18 Mürin, Asa a angei ewe silifer me ewe kolt mi chüen nom lon ewe lenien iseis pisek aüchea me lon imwen ewe Samol mi Lapalap, pwal lon püsin imwan. Iwe, a ngeni nöün kewe nöüwis ekewe pisek o tinirela ren Penhatat nöün Taprimon we mwän, nge Taprimon nöün Hesion mwän ewe kingen Siria mi nom lon Tamaskus. Asa a pwal tinala pworaus o üra,
1KI 15:19 “Kose mochen epwe wor eu pwonen atipeeu lefilach, usun a fen fis lefilen semei me semom. Nengeni, üa tinala reöm silifer me kolt pwe ai lifang ngonuk. Kopwe atai om pwonen atipeeu ngeni Paasa ewe kingen Israel, pwe i me nöün sounfiu repwe towu seni fanüei.”
1KI 15:20 Iwe, ewe king Penhatat a aüselinga än ewe king Asa tüngor o tinala ekewe meilap me nöür mwichen sounfiu pwe repwe maun ngeni ekewe telinimwen Israel. Iwe, ra liapeni Ion, Tan, Apel-petmaka, pwal unusen ewe fanü Kalilea me unusen ewe fanü Naftali.
1KI 15:21 Iwe, lupwen ewe king Paasa a rong usun, a ükütiu le apöchöküla tittin ewe telinimw Rama o liwinsefäliti Tirsa.
1KI 15:22 Mürin, ewe king Asa a asilefeili eu allük ngeni chon Juta meinisin pwe repwe feito, esap wor eman epwe tiwela. Iwe, ra feito o uweela ekewe fau me ekewe ira Paasa a aea le apöchöküla tittin ewe telinimw Rama, nge ewe king Asa a eäniir le apöchöküla ngeni tittin ewe telinimw Kepa lon ewe fanü Peniamin me tittin ewe telinimw Mispa.
1KI 15:23 Iwe, lusun pworausen än Asa föför meinisin, an föförün pwora, pwal ekewe telinimw a aüetä, a mak lon puken uruwon ekewe kingen Juta. Nge lupwen a chinlapala, a samau pechen.
1KI 15:24 Iwe, Asa a mäla, nge ra peiaseni ren semelapan kewe lon ewe telinimwen Tafit. Nge Jehosafat nöün we mwän a siwili lon wisan wisen king.
1KI 15:25 Iwe, lon aruuen ierin mwün Asa ewe kingen Juta, Natap nöün Jeropoam we mwän a tolong lon wisan wisen king o nemeni Israel lon ükükün ruu ier.
1KI 15:26 Nge Natap a föri mine a ngau me fän mesen ewe Samol mi Lapalap, a tipis usun saman we o emweni chon Israel ngeni tipis.
1KI 15:27 Nge Paasa nöün Ahia we mwän seni ewe ainangen Isakar a rawangauei Natap o niela me lon Kipeton mi nom lon fanüen chon Filistia, lupwen Natap me chon Israel meinisin ra pwelifeili Kipeton fän pisekin maun.
1KI 15:28 Paasa a niela Natap o siwili lon wisan wisen king lon aülüngatin ierin än Asa ewe kingen Juta nemenem.
1KI 15:29 Iwe, lon ewe otun Paasa a wiseni ewe wisen king, a niela chon leimwen Jeropoam meinisin, esap fokun likiti mwo eman tori a aroserela meinisin, usun nöün Kot we chon angang Ahia ewe re Silo a fen apasa fän alon ewe Samol mi Lapalap.
1KI 15:30 Ei a fis pokiten än Jeropoam asonga ewe Samol mi Lapalap ewe Koten Israel ren an kewe tipis a föri, pwal ren an emweni chon Israel ngeni tipis.
1KI 15:31 Iwe, lusun pworausen än Natap föför meinisin a mak lon puken uruwon ekewe kingen Israel.
1KI 15:32 Nge a chök fifis maun lefilen Asa ewe kingen Juta me Paasa ewe kingen Israel lon unusen ränin manauer.
1KI 15:33 Iwe, lon aülüngatin ierin mwün Asa ewe kingen Juta, Paasa nöün Ahia we mwän a popuetä le nemeni unusen Israel. A nom lon Tirsa o nemenem lon ükükün rüe me rüanü ier.
1KI 15:34 Nge Paasa a föri mine a ngau me fän mesen ewe Samol mi Lapalap, a tipis usun Jeropoam a tipis o emweni chon Israel ngeni tipis.
1KI 16:1 Iwe, ewe Samol mi Lapalap a kapas ngeni ewe soufos Jehu nöün Hanani we mwän pwe epwe üreni Paasa,
1KI 16:2 “Üa aüüketä seni lepwül o seikuketä pwe kopwe emweni nei kewe aramasen Israel. Nge en ka tipis usun chök Jeropoam o emweni nei kewe aramasen Israel ngeni tipis. Iwe, ar tipis a asongaei.
1KI 16:3 Iei mine üpwe niikela o fokun arosala chon leimwom, üpwe föri ngeni chon leimwom usun mine üa föri ngeni chon leimwen Jeropoam nöün Nepat we mwän.
1KI 16:4 Iwe, iteiten eman me eman me lein chon leimwom mi mäla me lon ewe telinimw kolak repwe ochei. Nge iteiten eman me eman mi mäla lemäl machang repwe ochei.”
1KI 16:5 Nge lusun pworausen än Paasa föför meinisin, pwal an föförün pwora a mak lon puken uruwon ekewe kingen Israel.
1KI 16:6 Iwe, Paasa a mäla, nge ra peiaseni lon Tirsa. Nge Ela nöün we mwän a siwili lon wisan wisen king.
1KI 16:7 Iwe, ewe Samol mi Lapalap a kapas ngeni ewe soufos Jehu nöün Hanani we mwän fän iten Paasa me chon leimwan, pokiten än Paasa kewe föföringau meinisin a föriir me fän mesen ewe Samol mi Lapalap. A asonga ewe Samol mi Lapalap ren an föföringau a usun chök än chon leimwen Jeropoam föföringau, pwal ren an arosala chon leimwen Jeropoam.
1KI 16:8 Iwe, lon rüe me wonuen ierin mwün Asa ewe kingen Juta, Ela nöün Paasa we mwän a tolong lon wisan wisen king o nemeni Israel. A nom lon Tirsa o nemenem lon ükükün ruu ier.
1KI 16:9 Nge eman nöün kewe nöüwis itan Simri, i meilapen esopun waan Ela kewe woken, a rawangauei. Lon eu rän, lupwen Ela a nom Tirsa, a sakau me lon imwen Arsa, ätei ewe mi wisen tümwünü imwen ewe king me lon Tirsa.
1KI 16:10 Iwe, Simri a tolong lon ewe imw, a awata Ela o niela. Ei a fis lon rüe me fisuen ierin än Asa nemenem lon Juta. Iwe, Simri a siwili Ela lon wisan wisen king.
1KI 16:11 Iwe, lon ewe otun Simri a tolong lon wisan wisen king o nemenem, a niela chon leimwen Paasa meinisin. Esap amanaua mwo nge eman mwän me lein märärin Paasa ika me lein chienan kewe.
1KI 16:12 Iei usun Simri a arosala chon leimwen Paasa meinisin, usun ewe soufos Jehu a apasa fän iten Paasa fän alon ewe Samol mi Lapalap.
1KI 16:13 Ei a fis pokiten än Paasa me än Ela nöün we mwän tipis, pwal pokiten ar emweni chon Israel ngeni tipis. Iwe, ra asonga ewe Samol mi Lapalap ewe Koten Israel ren ar kewe uluulun anümwäl.
1KI 16:14 Nge lusun pworausen än Ela föför meinisin a mak lon puken uruwon ekewe kingen Israel.
1KI 16:15 Lon rüe me fisuen ierin mwün Asa ewe kingen Juta, Simri a nom lon Tirsa o nemeni Israel lon ükükün fisu rän. Lon ena fansoun ekewe sounfiun Israel ra pwelifeili ewe telinimw Kipeton mi nom lon fanüen chon Filistia, pwe repwe maun ngeni.
1KI 16:16 Lupwen ekei sounfiu ra rong pwe Simri a rawangaei ewe king o niela, ir meinisin ra seikätä Omri nöür we meilapen mwichen sounfiu, pwe epwe king lon Israel, lon ewe chök ränin me lon lenier we.
1KI 16:17 Mürin, Omri me nöün kewe sounfiu meinisin ra feila seni Kipeton o pwelifeili Tirsa fän pisekin maun.
1KI 16:18 Nge lupwen Simri a küna pwe ra liapeni ewe telinimw, a tolong lon ewe leni mi pöchökül me lon ewe imwen king, a kenala ewe imwen king i a nom lon o mäla.
1KI 16:19 Ei a fis pokiten än Simri tipis, pwe a föri mine a ngau me fän mesen ewe Samol mi Lapalap usun Jeropoam a föri, pwal pokiten an emweni chon Israel ngeni tipis.
1KI 16:20 Nge lusun pworausen än Simri föför me an rawangau a mak lon puken uruwon ekewe kingen Israel.
1KI 16:21 Mürin, ekewe aramasen Israel ra aimwüfesen lon ruu mwich. Esopun ekewe aramas ra tipeni Tipni nöün Kinat we mwän, pwe repwe seikätä lon wisan wisen king. Nge esopun ekewe aramas ra tipeni Omri.
1KI 16:22 Nge ekewe aramas mi tipeni Omri ra akufu chokewe mi tipeni Tipni. Iwe, Tipni a mäla, nge Omri a king.
1KI 16:23 Lon ilik me euin ierin mwün Asa ewe kingen Juta, Omri a tolong lon wisan wisen king o nemeni Israel. A nemenem lon ükükün engol me ruu ier, nge wonu ierin an nemenem a nom lon Tirsa.
1KI 16:24 Iwe, Omri a möni seni eman mwän itan Shemer ewe chukun Samaria won ükükün wonungeröü föün silifer. Mürin, a aüetä eu telinimw won ewe chuk o apöchöküla tittin. A aita ngeni ewe telinimw Samaria seni iten Shemer, ewe mi fanüeni ewe chuk me mwan.
1KI 16:25 Iwe, Omri a föri mine a ngau me fän mesen ewe Samol mi Lapalap, nge a fen föföringau lap seni chokewe meinisin mi akom mwan.
1KI 16:26 A föri ekewe föför mi ngau meinisin Jeropoam nöün Nepat we mwän a föri, a tipis usun Jeropoam o emweni chon Israel ngeni tipis. Iwe, ra asonga ewe Samol mi Lapalap ren ar fel ngeni ekewe uluulun anümwäl.
1KI 16:27 Nge lusun pworausen än Omri föför, pwal an föför mi pwora, a mak lon puken uruwon ekewe kingen Israel.
1KI 16:28 Iwe, Omri a mäla, nge ra peiaseni lon Samaria. Nge Ahap nöün we mwän a siwili lon wisan wisen king.
1KI 16:29 Iwe, lon ilik me waluen ierin mwün Asa ewe kingen Juta, Ahap nöün Omri we mwän a tolong lon wisan wisen king o nemeni Israel. Iwe, a nom lon Samaria o nemenem lon ükükün rüe me ruu ier.
1KI 16:30 Nge Ahap a föri mine a ngau me fän mesen ewe Samol mi Lapalap lap seni chokewe meinisin ra akom mwan.
1KI 16:31 A fen mecheres an epwe föri ekewe tipis ewe king Jeropoam a föriir, nge a pwal pwülüeni Isipel nöün Etpal we fefin, ewe kingen chon Siton. Iwe, a angang ngeni ewe anü Paal o fel ngeni.
1KI 16:32 A aüetä eu imwenfel fän iten ewe anü Paal me lon Samaria, a pwal senätä eu rongen asor fän itan o anomu lon ewe imwenfel.
1KI 16:33 Ahap a pwal föri uluulun ewe anüfefin Asera. A alapala an föföringau o asonga ewe Samol mi Lapalap ewe Koten Israel lap seni ekewe kingen Israel meinisin mi akom mwan.
1KI 16:34 Iwe, lupwen fansoun än Ahap nemenem, Hiel seni Petel a aüsefälietä ewe telinimw Jeriko. Lupwen a föri longolongun, Apiram nöün we mwänichi a mäla, nge lupwen a förätä asamalapen tittin ewe telinimw, Sekup nöün we setiputur a mäla, usun Josua nöün Nun we mwän a fen apasa fän alon ewe Samol mi Lapalap.
1KI 17:1 Iwe, eman sofos itan Elias seni Tispe lon Kiliat a üreni Ahap, “Mwo manauen ewe Samol mi Lapalap ewe Koten Israel, ewe Kot üa angang ngeni, esap püngütiu amurenipwin ika üt lon kei ier tori üpwe kapasefäl.”
1KI 17:2 Mürin, ewe Samol mi Lapalap a üreni Elias,
1KI 17:3 “Kopwe sü seni ikei, kopwe feila ngeni ötiu o aopok arun ewe öüwö Kirit ötiuen ewe chanpupu Jortan.
1KI 17:4 Kopwe ün koluk seni ewe öüwö, nge üa fen allük ngeni ekewe ängä pwe repwe uwala anom ikenan.”
1KI 17:5 Iei mine Elias a föri usun mine ewe Samol mi Lapalap a apasa. A feila o nom arun ewe öüwö Kirit ötiuen ewe chanpupu Jortan.
1KI 17:6 Iwe, ekewe ängä ra uwato ren Elias anan pilawa me ochan fituk iteiten lesosor me iteiten lekuniol, a pwal ün koluk seni ewe öüwö.
1KI 17:7 Nge mürin eu fansoun ewe öüwö a pwasatä, pun esap püng üt lon ewe fanü.
1KI 17:8 Mürin, ewe Samol mi Lapalap a üreni Elias,
1KI 17:9 “Iei kopwe feila Sarapat mi nom arun Siton, pwe kopwe nonom ie. Üa allük ngeni eman fefin mi mä pwülüan pwe epwe amongok me ikenan.”
1KI 17:10 Iei mine Elias a feila Sarapat. Nge lupwen a tori asamalapen tittin ewe telinimw, a küna eman fefin mi mä pwülüan a rusi mwüch. Iwe, Elias a kökköla ren neminewe o üreni “Kose mochen kopwe uwato rei ekis koluk lon eu rume pwe üpwe ün.”
1KI 17:11 Nge lupwen neminewe a feila pwe epwe uwato ewe koluk, Elias a köla mürin, “Kose mochen kopwe pwal uwato rei ekis pilawa.”
1KI 17:12 Iwe, neminewe a üreni, “Mwo manauen ewe Samol mi Lapalap om we Kot, esap mwo nge wor rei pilawa mi um. Mi chök wor ekumwuch pilawa mi amas lon eu sepi me ekis apüra lon eu rume. Iei üa rusi ekoch mwüch, pun üpwe feila o amolätä ewe mongö fän itei me fän iten nei we ät, pwe aipwe mongö. Mürin aipwap mäla ren echik.”
1KI 17:13 Nge Elias a üreni neminewe, “Kosap niuokus. Kopwe feila o föri usun mine ka apasa. Nge kopwe akomwen föri fän itei echö kükün nokop seni ewe pilawa o uwato rei, mürin kopwap föri anom me enen noum we ät.
1KI 17:14 Pun iei alon ewe Samol mi Lapalap ewe Koten Israel, ‘Ewe pilawa lon ewe sepi esap itela, nge ewe apüra lon ewe rume esap pöla tori ewe rän ewe Samol mi Lapalap epwe apüngätiu üt won ei fanü.’”
1KI 17:15 Iwe, ewe fefin mi mä pwülüan a feila o föri usun mine Elias a üreni. Nge Elias me neminewe, pwal chon leimwan meinisin ra momongö lon chomong rän.
1KI 17:16 Ewe pilawa lon ewe sepi esap itela, pwal ewe apüra lon ewe rume esap pöla, usun Elias a apasa fän alon ewe Samol mi Lapalap.
1KI 17:17 Ekoch fansoun mürin, nöün ewe fefin we ät a samau. Nge an samau a chök lapala pwe a mäla.
1KI 17:18 Iwe, neminewe a üreni Elias, “En aramasen Kot, pwota ka föri iei usun ngeniei? Ka feito pwe kopwe achema ngeni Kot ai kewe tipis pwe nei we ät a mäla.”
1KI 17:19 Nge Elias a üreni neminewe, “Kopwe uwato rei noum we ät.” Iwe, Elias a angei ewe ät seni fän mwärin neminewe, a uweetä lon rumwan we mi nom asan o akonala won an peet.
1KI 17:20 Mürin, Elias a iotek ngeni ewe Samol mi Lapalap, “Ai Kot Samol mi Lapalap. Pwota ka aworato feiengau won ei fefin mi mä pwülüan? Ei fefin a fen etiwaei, nge iei ka niela nöün we ät.”
1KI 17:21 Mürin, Elias a chapala won inisin ewe ät fän ülüngat o iotek ngeni ewe Samol mi Lapalap, “Ai Kot Samol mi Lapalap, kose mochen amanauasefäli ei ät.”
1KI 17:22 Iwe, ewe Samol mi Lapalap a aüselinga än Elias iotek o amanaua ewe ät, pwe a manausefäl.
1KI 17:23 Mürin, Elias a angei ewe ät, a uwätiu seni ewe rum asan o ngeni inan we mi nom lon ewe rumw fan. Iwe, a üreni, “Nengeni, a manau noum we ät.”
1KI 17:24 Iwe, ewe fefin a üreni Elias, “Iei üa silei pwe en eman aramasen Kot, nge alon ewe Samol mi Lapalap ka apasa a let.”
1KI 18:1 Iwe, mürin chomong rän ra la, lon aülüngatin ierin ewe lengita, ewe Samol mi Lapalap a üreni Elias, “Kopwe feila o pwärukela ngeni Ahap. Iwe, üpwe apüngätiu üt won ei fanü.”
1KI 18:2 Iei mine Elias a feila pwe epwe pwäri i ngeni Ahap. Lon ei fansoun ewe lengita a fokun watte me lon Samaria.
1KI 18:3 Iwe, Ahap a titi Opatia ewe meilapen chon tümwünü imwen ewe king. (Nge Opatia a fokun meniniti ewe Samol mi Lapalap.
1KI 18:4 Pun lupwen Isipel a popuetä le niela nöün ewe Samol mi Lapalap kewe soufos, Opatia a angei ipükü soufos o aopala akalime lon eu föimw, a amongöniir pilawa o aünüür koluk.)
1KI 18:5 Iwe, Ahap a üreni Opatia, “Sipwe feila lemenen ewe fanü ren ekewe puächen koluk meinisin, pwal lon ekewe lemol meinisin. Eli sipwe künakün fetil o amanaua ekewe oris me aas, pwe sisap wisen niela eman lein ekewe man.”
1KI 18:6 Iwe, ra tipeeufengen lefiler meni kinikinin ewe fanü eman me eman leir epwe ouwasacha. Ahap a feila won efoch al, nge Opatia a feila won pwal efoch.
1KI 18:7 Nge lupwen Opatia a nom won ewe al, Elias a churi. Iwe, Opatia a silleni Elias, a chapetiu lepwül o ais, “En wesewesen ai samol Elias?”
1KI 18:8 Elias a pälüeni, “Ewer, ngang Elias. Kopwe feila o üreni om samol pwe ngang Elias üa nom ikei.”
1KI 18:9 Iwe, Opatia a üra, “Met üa tipis ren, pwe kopwe fangelong ngang noum chon angang lepöün Ahap pwe epwe nieila?
1KI 18:10 Mwo manauen ewe Samol mi Lapalap om we Kot, esap wor eu mwichen aramas ika mwü, ia ai we samol esap tinala aramas ie pwe repwe küttok. Nge lupwen ewe mwichen aramas ika mwü ra apasa pwe kosap nom, Ahap a arianiir pwe repwe akapel are a let pwe rese künok.
1KI 18:11 Nge iei ka apasa pwe üpwe feila o üreni ai we samol pwe ka nom ikei.
1KI 18:12 Ina epwe fis pwe lon ewe otun üpwe feila senuk, Ngünün ewe Samol mi Lapalap epwe uweekela ngeni eu leni ngang üsap silei. Iwe, lupwen üpwe üreni Ahap pwe ka nom ikei, nge i esap tongeni künok, epwe nieila. Nge ngang noum chon angang üa fokun meniniti ewe Samol mi Lapalap seni leküküni.
1KI 18:13 Ifa usun, esap wor eman a ürenuk en ai samol mine üa föri, lupwen Isipel a popuetä le niela nöün ewe Samol mi Lapalap kewe soufos? Ifa usun, kosap rong pwe üa aopala ipükü mwän me lein nöün ewe Samol mi Lapalap kewe soufos, akalime lon eu föimw, üa pwal amongöniir pilawa o aünüür koluk?
1KI 18:14 Nge iei ka apasa pwe üpwe feila o üreni ai samol pwe ka nom ikei. Iwe, Ahap epwe nieila.”
1KI 18:15 Mürin, Elias a üra, “Mwo manauen ewe Samol mi Unusen Manaman, ewe Kot üa angang ngeni, üpwe fokun pwäriei ngeni Ahap ikenai.”
1KI 18:16 Iei mine Opatia a feila pwe epwe churi Ahap o asile ngeni ekei kapas. Mürin, Ahap a feila pwe epwe churi Elias.
1KI 18:17 Iwe, lupwen Ahap a küna Elias, a üreni, “Iei ka war, en ätewe mi atolonga Israel lon feiengau?”
1KI 18:18 Nge Elias a üreni, “Sap ngang üa atolonga Israel lon feiengau, ngei en me chon leimwen semom, pun oua aleasolap ngeni än ewe Samol mi Lapalap kewe allük o fel ngeni ekewe uluulun anü Paal.
1KI 18:19 Iei kopwe titi o amwichafengenieto rei chon Israel meinisin me won ewe chuk Karmel. Iwe, repwe pwal feito ekewe föpükü lime soufos nöün ewe anü Paal, pwal ekewe föpükü soufos nöün ewe anüfefin Asera mi mongö seni än Isipel chepel.”
1KI 18:20 Iwe, Ahap a titi ekewe aramasen Israel meinisin, a pwal amwichafengeni ekewe soufos me won ewe chuk Karmel.
1KI 18:21 Nge Elias a ütä fän mesen ekewe aramas meinisin o üra, “Ifa ükükün fansoun ämi oupwe tipemwaramwar won ruu ekiek? Are ewe Samol mi Lapalap i Kot, oupwe fel ngeni, nge are ewe anü Paal i Kot, oupwe chök fel ngeni.” Iwe, ekewe aramas resap pälüeni ngeni och kapas.
1KI 18:22 Mürin, Elias a üreni ekewe aramas, “Ngang echök üa chüen manau me lein nöün ewe Samol mi Lapalap kewe soufos. Nge mi wor ükükün föpükü lime soufos nöün ewe anü Paal.
1KI 18:23 Repwe emwenato rech ruoman ätemwänin kow. Iwe, nöün Paal kewe soufos repwe filätä eman ätemwänin kow fän iter, repwe pökükisietiu o anomu ekewe kinikin won ewe mwüch, nge resap fisi. Iwe, ngang üpwe amolätä ewe aruomanün ätemwänin kow o anomu won ewe mwüch, nge üsap pwal fisi.
1KI 18:24 Iwe, nöün Paal kewe soufos repwe iotek ngeni ar we Kot, nge ngang üpwe iotek ngeni ewe Samol mi Lapalap. Iwe, ewe Kot mi pälüeni ren ekkei, i wesewesen Kot.” Iwe, ekewe aramas meinisin ra apasa pwe ra tipeeu ngeni.
1KI 18:25 Mürin, Elias a üreni nöün ewe anü Paal kewe soufos, “Oupwe akomwen filätä eman ätemwänin kow o amolätä, pun ämi oua kon chomong. Oupwe iotek ngeni ämi we kot, nge ousap fisi ewe mwüch.”
1KI 18:26 Iwe, ra angei ewe ätemwänin kow ra emwenato rer o amolätä. Mürin ra iotek ngeni ewe anü Paal seni lesosor tori leoloas o kökkö, “Paal, kopwe aüseling o pälüenikem.” Nge esap wor och möngüngü, esap pwal wor eman a päpälü. Iwe, ra pworukfetal pwelin ünükün ewe rongen asor ra senätä.
1KI 18:27 Nge leoloas Elias a ämängaueer o üreniir, “Oupwe leüömong le kökkö, pun i eman kot. Eli a chök ekekiek ika atapwalapwal, ika a saifetal, eli a möür, nge ämi oupwe apwökü.”
1KI 18:28 Iei mine ra leüömong le kökkö, ra pwal akinaseer ren ketilas me siles usun ar örüni, tori char a süküwu.
1KI 18:29 Iwe, seni ewe oloasan tori fansoun asoren lekuniol ra akürang o sarawaraufetal, nge esap wor och möngüngü, esap wor eman a päpälü ika aüseling.
1KI 18:30 Mürin, Elias a üreni ekewe aramas meinisin, “Oupwe kaneto rei.” Iwe, ekewe aramas meinisin ra kaneto ren. Elias a senisefälietä än ewe Samol mi Lapalap rongen asor mi katala.
1KI 18:31 A angei engol me ruoföü fau ükükün iteiten ekewe engol me ruu ainang mi iteni iten nöün Jakop kewe mwän, ätewe ewe Samol mi Lapalap a aita ngeni Israel.
1KI 18:32 Iwe, a eäni ekei fau le senätä eu rongen asor fän iten ewe Samol mi Lapalap. A tuw eu warawar pwelin ünükün ewe rongen asor ükükün masouan ina epwe ükükün rüanü kalon koluk.
1KI 18:33 Iwe, a atettelöchü ewe mwüch, a pökükisietiu ewe ätemwänin kow o iseni won ewe mwüch. Mürin a üra, “Oupwe alölöü rüanü rumen koluk o ninätiu won ewe asoren kek pwal won ewe mwüch.” Iwe, ra föri.
1KI 18:34 Mürin a üra, “Oupwe föri fän aruuan.” Iwe, ra föri fän aruuan. A pwal üra, “Oupwe föri fän aülüngatin.” Iwe, ra föri fän aülüngatin.
1KI 18:35 Iwe, ewe koluk a pufetal pwelin ünükün ewe rongen asor, pwe ewe warawar a pwal uretä ren koluk.
1KI 18:36 Nge lupwen a tori fansoun asoren lekuniol, ewe soufos Elias a kan ngeni ewe rongen asor o iotek, “Ai Samol mi Lapalap, än Apraham, Isaak me Jakop we Kot, kopwe pwäri ikenai pwe en ewe Kot lon Israel, nge ngang noum chon angang. Kopwe pwal pwäri pwe üa föri ekei mettoch meinisin fän alom.
1KI 18:37 Kopwe pälüeniei, ai Samol mi Lapalap, kopwe pälüeniei, pwe ekei aramas repwe silei pwe en Kot ai Samol mi Lapalap, repwe pwal silei pwe en ka akulusefäli leluker.”
1KI 18:38 Mürin, ewe Samol mi Lapalap a tinätiu ekkei, a kenala ewe asor, ewe mwüch, ekewe fau, ewe pwül. A pwal apwasätä ewe koluk mi nom lon ewe warawar.
1KI 18:39 Iwe, lupwen ekewe aramas meinisin ra küna mine a fis, ra chapetiu lepwül o kökkö, “Ewe Samol mi Lapalap i Kot, ewe Samol mi Lapalap i chök Kot.”
1KI 18:40 Mürin, Elias a üreni ekewe aramas, “Oupwe turufi nöün ewe anü Paal kewe soufos. Ousap mwüt ngeni eman pwe epwe sü.” Iwe, ra turufiir, nge Elias a emweniretiu ren ewe öüwö Kison o nirela ikenan.
1KI 18:41 Iwe, Elias a üreni Ahap, “Kopwe feila mongö o ün, pun üa rong waasesin üt.”
1KI 18:42 Iei mine Ahap a feila pwe epwe mongö o ün. Nge Elias a feitä won ungen ewe chuk Karmel. A chapetiu lepwül o anomu möküran lefilen pwäsukun.
1KI 18:43 Iwe, Elias a üreni nöün chon angang, “Kopwe feila o nennewu lematau.” Iwe, a feila o nennewu, nge lupwen a liwinto, a apasa, “Üsap küna och.” Iwe, Elias a apasa fän fisu pwe epwe feila o nennewu.
1KI 18:44 Nge lupwen a tori fän afisuan, a liwinto o apasa, “Üa küna eu kükün kuchu a feitä seni lematau, usun ükükün pöün eman mwän.” Elias a üreni nöün we chon angang, “Kopwe feila ren Ahap o üreni pwe epwe amolätä waan woken o feila, pwe esap mwöch ren ewe üt.”
1KI 18:45 Ekis chök fansoun mürin a cholola fän läng ren kuchu fiti asepwäl, mürin a püngütiu watten üt. Iwe, Ahap a tötä won waan woken o liwinsefälila Jesrel.
1KI 18:46 Nge manamanen ewe Samol mi Lapalap a feitiu won Elias. Iwe, a rietä üfan lukalapan o säla me mwen Ahap tori Jesrel.
1KI 19:1 Iwe, ewe king Ahap a apworausa ngeni Isipel pwülüan we meinisin mine Elias a föri, pwal usun an niela ekewe soufos meinisin ren ketilas.
1KI 19:2 Mürin, Isipel a tinala eman chon künö ren Elias pwe epwe üreni, “Ekewe kot repwe nieila ika üsap föri ngonuk lesor lon ei otun usun mine ka föri ngeni ekewe soufos.”
1KI 19:3 Iwe, Elias a niuokus, a ütä o sü, pun a kütta manauan. A tori Persepa lon Juta o likiti nöün we chon angang ikenan.
1KI 19:4 Lupwen Elias a feila lon ewe fanüpö ükükün toauen sain eu rän, a tori efoch irä, a mottiu fan o älälei an epwe mäla. Iwe, a iotek, “Ai Samol mi Lapalap, a kon naf ngeniei ai weires, kopwe angei seniei manauei, pun ngang üsap mürina seni ai kewe lewo.”
1KI 19:5 Mürin a konola fän ewe irä o möür. Nge lon ei otun eman chon läng a atapa o üreni, “Kopwe pwätä o mongö.”
1KI 19:6 Iwe, a nennefeil o küna me ünümöküran eföü pilawa me eu rumen koluk. A mongö o ün, mürin a pwal konsefälila.
1KI 19:7 Iwe, nöün ewe Samol mi Lapalap we chon läng a liwinto fän aruuan, a atapa o üreni, “Kopwe pwätä o mongö, pun om sai epwe fokun toau ngonuk.”
1KI 19:8 Iei mine Elias a pwätä, a mongö o ün, mürin a fetal fän pöchökül ren ngünüwen ewe mongö lon ükükün faik rän me faik pwin tori Horep ewe chukun Kot.
1KI 19:9 Iwe, a tolong lon eu föimw o nonom ikenan lon ewe pwin. Lon ei otun ewe Samol mi Lapalap a üreni Elias, “Elias, meta ka föri ikei?”
1KI 19:10 Elias a üra, “Üa fokun tiliken le angang ngonuk, ai Samol mi Lapalap ewe Kot mi Unusen Manaman. Nge ekewe armasen Israel ra atai om we pwon, ra ataela om kewe rongen asor o niela noum kewe soufos meinisin ren ketilas. Ngang echök üa chüen manau. Nge ra pwal ekiekin nieila.”
1KI 19:11 Iwe, ewe Samol mi Lapalap a üreni, “Kopwe towu o ütä won ei chuk me mwei, pun ngang ewe Samol mi Lapalap üpwe le feila senuk.” Mürin, eu watten asepwäl mi fokun pöchökül a asönü ekewe chuk o amökkükisietiu ekewe achau me fän mesen ewe Samol mi Lapalap, nge ewe Samol mi Lapalap esap nom lon ewe asepwäl. Mürin ewe asepwäl a fis och chechechin fanü, nge ewe Samol mi Lapalap esap nom lon ewe chech.
1KI 19:12 Mürin ewe chechechin fanü a pwä och ekkei, nge ewe Samol mi Lapalap esap nom lon ewe ekkei. Nge mürin ewe ekkei a wor eu möngüngü mi leüökükün.
1KI 19:13 Lupwen Elias a rong ei möngüngü, a pwölüela won mesan ngeni üfan owokot, a towu seni ewe föimw o ütä mesan. Nge ewe möngüngü a aisini, “Elias, meta ka föri ikei?”
1KI 19:14 Elias a pälüeni, “Üa fokun tiliken le angang ngonuk, ai Samol mi Lapalap ewe Kot mi Unusen Manaman. Nge ekewe aramasen Israel ra atai om we pwon, ra ataela om kewe rongen asor o niela noum kewe soufos meinisin ren ketilas. Ngang echök üa chüen manau. Nge ra pwal ekiekin nieila.”
1KI 19:15 Iwe, ewe Samol mi Lapalap a üreni, “Kopwe liwinla won ewe al ngeni ewe fanüapö arun Tamaskus. Nge lupwen ka tori Tamaskus, kopwe epiti Hasael pwe epwe kingen Siria.
1KI 19:16 Kopwe epiti Jehu nöün Nimsi we mwän pwe epwe kingen Israel, kopwe pwal epiti Elisa nöün Safat we mwän seni Apel-mehola pwe epwe siwiliik lon ewe wisen soufos.
1KI 19:17 Iö epwe sü pokiten Hasael a ekiekin niela, Jehu epwe niela, nge iö epwe sü pokiten Jehu a ekiekin niela, Elisa epwe niela.
1KI 19:18 Nge üpwe amanaua fisungeröü aramas me lon Israel, chokewe meinisin resap fotopwäsuk ngeni uluulun ewe anü Paal ika mitiri.”
1KI 19:19 Iwe, Elias a feila seni ikenan o küna Elisa nöün Safat we mwän, a tuw pwül ren engol me ruoman pean ätemwänin kow, nge i a nom ren ewe engol me ruuen pea. Elias a feila ren o noutätä üfan owokot won Elisa.
1KI 19:20 Mürin, Elisa a likitala ekewe ätemwänin kow, a säla mürin Elias o üreni, “Kopwe mwüt ngeniei pwe üpwe feila o kapong ngeni semei me inei, mürin üpwe tapwela mürum.” Elias a üreni, “Kopwe liwinla. Ngang üsap epetuk.”
1KI 19:21 Mürin, Elisa a feil seni Elias, a angei ewe pean ätemwänin kow a wawa le tuw pwül o nirela. A eäni mwüch waasen ekewe ätemwänin kow le kuku fituker o aochocha ngeni ekewe aramas, iwe, ra ochoch. Mürin, Elisa a tapwela mürin Elias o angang ngeni.
1KI 20:1 Iwe, Penhatat ewe kingen Siria a amwichafengeni nöün sounfiu, nge ilik me ruoman king ra pwal eti fiti nöür oris me woken. Mürin, Penhatat a feila Samaria, a pwelifeili fän pisekin maun o maun ngeni.
1KI 20:2 Penhatat a tinala chon künö lon ewe telinimw ren Ahap ewe kingen Israel pwe repwe üreni, “Iei alon Penhatat:
1KI 20:3 Om silifer me om kolt ai, pwülüom kewe mi fokun liöch me noum kewe semirit ir pwal pwülüei me nei.”
1KI 20:4 Nge ewe kingen Israel a pälüeni, “Ai samol king Penhatat, üa tipeeu ngeni mine ka apasa. Ngang üpwe noum, pwal meinisin mine ai repwe om.”
1KI 20:5 Mürin, ekewe chon künö ra pwal feitosefäl ren Ahap o apasa, “Iei alon Penhatat: Üa tinawou pworaus reöm pwe kopwe fangetä ngeniei om silifer me kolt, pwal pwülüom kewe me noum kewe semirit.
1KI 20:6 Nge lesor lon ei otun üpwe tinala nei kewe nöüwis reöm, pwe repwe kütta o angei me lon imwomw pwal lon imwen noum kewe nöüwis mettoch meinisin ka aücheani o uweerela.”
1KI 20:7 Mürin, ewe kingen Israel a körifengeni ekewe souakomwen ewe fanü meinisin o üra, “Oua püsin küna pwe ei mwän a ekiekin afeiengauakich. A titito rei pwe üpwe ngeni pwülüei kewe me nei kewe semirit, pwal ai silifer me kolt, nge üa mwütiretä.”
1KI 20:8 Nge ekewe souakom me ekewe aramas meinisin ra üreni, “Kosap aüselinga ika tipeeu ngeni.”
1KI 20:9 Iei mine ewe king a üreni nöün Penhatat kewe chon künö, “Oupwe üreni ai samol ewe king, pwe meinisin mine a akomwen achimwa seniei ngang nöün chon angang üa tipeeu ngeni, nge ren ei üsap tongeni tipeeu ngeni.” Iwe, ekewe chon künö ra liwinsefälila o uweela ei pworaus ren Penhatat.
1KI 20:10 Mürin, Penhatat a titila ren Ahap o üra, “Ekewe kot repwe nieila, are üsap emwenato chomong aramas, repwe ataela Samaria, nge piipiin ewe telinimw epwe ükükün chök än eman me eman leir epwe tukei ekumwuch.”
1KI 20:11 Iwe, ewe king Ahap a pälüeni, “Oupwe üreni Penhatat pwe esap inetamas.”
1KI 20:12 Penhatat a rong ei pworaus, lupwen a sakaufengen me ekewe king lon imwer kewe imw mangaku. Mürin, a üreni nöün kewe sounfiu, “Oupwe atettelikemi pwe oupwe maun ngeni ewe telinimw.” Iwe, ra atetteliir pwe repwe maun ngeni.
1KI 20:13 Lon ewe fansoun eman soufos a feito ren Ahap ewe kingen Israel o üra, “Iei alon ewe Samol mi Lapalap, ‘Ka küna ei mwicheichen sounfiu mi watte? Üpwe ewinnok pwe kopwe akufuur. Mürin kopwe mefi pwe ngang ewe Samol mi Lapalap.’”
1KI 20:14 Nge Ahap a ais, “Iö epwe mwei ewe maun?” Ewe soufos a pälüeni, “Iei alon ewe Samol mi Lapalap, ‘Ekewe sounfiu alüal nöün kepinan ekewe sop.’” Mürin, Ahap a ais, “Iö epwe popuetä ewe maun?” Ewe soufos a pälüeni, “En.”
1KI 20:15 Iwe, Ahap a körifengeni ekewe sounfiu alüal nöün kepinan ekewe sop ükükür rüepükü ilik me ruoman. Mürin a pwal körifengeni ekewe sounfiun Israel ükükür füngeröü.
1KI 20:16 Iwe, ra feiliwu leoloas pwe repwe maun, lupwen Penhatat me ekewe ilik me ruoman king mi alisi ra sakaufengen lon imwer kewe imw mangaku o puchula.
1KI 20:17 Iwe, ekewe sounfiu alüal nöün kepinan ekewe sop ra feiliwu akom. Nge Penhatat a tinala chon ouwasacha ewe fanü. Iwe, ra liwinto o apworausa ngeni, “Mi wor mwän ra towu seni Samaria.”
1KI 20:18 Penhatat a üra, “Are ra towu fän iten ar kütta kinamwe, oupwe turumanaueer. Nge are ra towu fän iten ar repwe maun, oupwe chök turumanaueer.
1KI 20:19 Iei usun ekewe sounfiu alüal nöün kepinan ekewe sop ra akomw le towu seni ewe telinimw, nge ewe mwichen sounfiun Israel a tapwela müriir.
1KI 20:20 Iwe, iteiten eman me eman a chök niela pälüan, pwe ekewe chon Siria ra sü, nge ekewe sounfiun Israel ra tapweriir. Iwe, Penhatat ewe kingen Siria a pwal süla won eman oris, nge ekoch chon wawa oris ra eti.
1KI 20:21 Mürin, ewe kingen Israel a cherela, a liapeni ekewe oris me ekewe woken o niela ekewe chon Siria ren eu ninni mi fokun watte.
1KI 20:22 Mürin, ewe soufos a feito ren ewe kingen Israel o üreni, “Kopwe amolöchü noum kewe mwichen sounfiu o ekieköchü met kopwe föri. Pun lon eu ier ewe kingen Siria epwe liwinsefälito o maun ngonuk.”
1KI 20:23 Iwe, nöün ewe kingen Siria kewe nöüwis ra üreni, “Nöün chon Israel kewe kot ir anün won chuk, iei mine ra akufukich. Nge are sipwe maun ngeniir lon ewe maasies ellet sipwe akufuur.
1KI 20:24 Iei usun mine kopwe föri: Kopwe siwili ekei king meinisin o atolonga meilapen sounfiu lon lenier.
1KI 20:25 Kopwe körifengeni eu mwichen sounfiu mi chocho usun ewe mwichen sounfiu a sü senuk, kopwe pwal awora siwilin ekewe oris me woken usun me mwan. Mürin sipwe maun ngeni chon Israel me lon ewe maasies. Ellet sipwe akufuur.” Iwe, Penhatat a tipeeu ngeniir o föri mine ra apasa.
1KI 20:26 Iwe, lupwen a tori ewe ier mürin, Penhatat a körifengeni ekewe re Siria o feila Afek pwe epwe maun ngeni chon Israel.
1KI 20:27 Nge ekewe aramasen Israel ra pwal mwichefengen, ra angei ar pisekin maun o feila pwe repwe maun ngeni chon Siria. Iwe, ekewe sounfiun Israel ra nom lon lenier sasape ngeni ekewe sounfiun Siria, nge ra usun chök ruu kükün mwichen kuuch. Nge ekewe sounfiun Siria ra amasouala ewe fanü.
1KI 20:28 Iwe, eman soufos a feito o üreni ewe king Ahap, “Iei alon ewe Samol mi Lapalap, ‘Pokiten ekewe chon Siria ra apasa pwe ngang ewe Samol mi Lapalap eman anün won chuk, nge sap eman anün lemol, iei mine üpwe ewinnok pwe kopwe akufu ei mwicheichen sounfiu mi fokun watte. Mürin kopwe mefi pwe ngang ewe Samol mi Lapalap.”
1KI 20:29 Lon ükükün fisu rän ekewe chon Siria me ekewe chon Israel ra nom lon lenier, nge ra sasapefengen. Iwe, lon ewe afisuen rän ra maunfengen. Nge ekewe sounfiun Israel ra niela ükükün ipüküngeröü sounfiun Siria lon eu chök rän.
1KI 20:30 Nge ekewe lusun mi chüen manau ra sülong lon ewe telinimw Afek. Iwe, tittin ewe telinimw a turutiu wor o niela pwal ükükün rüe me fisungeröü. Penhatat a pwal sülong lon ewe telinimw o op lon rumwen eu imw.
1KI 20:31 Iwe, nöün kewe nöüwis ra feito ren o üreni, “Äm aia rong pwe ekewe kingen Israel ra eäni ümöümöch. Kopwe mwütätä pwe aipwe üföüf üf seni tuk o apweli säl ngeni üem, mürin aipwe feila ren ewe kingen Israel, eli epwe amanauok.”
1KI 20:32 Iei mine ra üföüf üf seni tuk o apweli säl ngeni üer, mürin ra feila ren ewe kingen Israel o üreni, “Noum chon angang Penhatat a tüngor ngonuk pwe kopwe amanaua.” Nge Ahap a üra, “Ifa usun, Penhatat a chüen manau? I usun chök eman pwii me rei.”
1KI 20:33 Mürin, ekewe mwän ra angei ekei kapas seni Ahap, pun ra ekieki pwe eu asisil mi mürina. Iei mine ra müttir le apasa, “Ewer, Penhatat pwiüm.” Mürin, Ahap a üra, “Oupwe feila o emwenato Penhatat.” Iwe, Penhatat a towu ren Ahap, nge Ahap a apasa pwe epwe tötä ren won waan woken.
1KI 20:34 Nge Penhatat a üreni Ahap, “Ekewe telinimw semei we a angei seni semom we üpwe aliwini ngonuk. Ka pwal tongeni aüetä imwen amömö fän itom me lon Tamaskus, usun semei we a föri me lon Samaria.” Iwe, Ahap a üra, “Pokiten ekei kapas üpwe angasokola.” Iei mine Ahap a föri eu pwonen atipeeu ngeni Penhatat o afeilai.
1KI 20:35 Iwe, eman mwän seni ewe mwichen soufos a üreni eman chienan fän än ewe Samol mi Lapalap allük, “Kopwe wichiei.” Nge ätewe esap mochen wichi.
1KI 20:36 Iei mine ewe soufos a üreni chienan we, “Pokiten kosap aleasochisi alon ewe Samol mi Lapalap, lon ewe otun ka feil seniei, eman laion epwe niikela.” Iwe, lon ewe otun ätewe a feil seni, eman laion a churi o niela.
1KI 20:37 Ewe soufos a pwal küna eman mwän o üreni, “Kopwe wichiei.” Iwe, ewe mwän a wichi ewe soufos o akinasa.
1KI 20:38 Mürin, ewe soufos a filitala won mesan pwe a sokola lapalapan, a feila o witiwiti ewe king won ewe al.
1KI 20:39 Nge lupwen ewe king Ahap a pwerela, ewe soufos a köla ren o üra, “Ngang noum chon angang üa nom lukalapen ewe maun, lupwen eman sounfiu a uwato rei eman mwän a liapeni o üra, ‘Kopwe tümwünü ei mwän. Ika a sü senuk, manauom epwe siwilin manauan, ika kopwe mönätiu ülüngat ngeröü föün moni silifer.’
1KI 20:40 Iwe, lupwen üa achocho le angang ikei me ikenan, ewe mwän a sü seniei.” Nge ewe king a üreni, “Ka püsin apwünguk, kopwe fokun püngütiu liwinin om tipis.”
1KI 20:41 Mürin, ewe soufos a müttir le apichi filifilin won mesan. Nge ewe king a asilla pwe i eman lein ekewe soufos.
1KI 20:42 Iwe, ewe soufos a üreni ewe king Ahap, “Iei alon ewe Samol mi Lapalap, ‘Pokiten ka angasala ewe mwän, ngang üa allük pwe epwe ninnila, iei mine manauom epwe siwilin manauan, nge noum aramas repwe siwilin manauen nöün aramas.’”
1KI 20:43 Mürin, ewe kingen Israel a liwinla leimwan me lon Samaria fän chou me song.
1KI 21:1 Iwe, ekoch fansoun mürin a fis ei pworaus: Napot ewe re Jesrel a wor eu an tanipin wain lon Jesrel ünükün imwen Ahap ewe kingen Samaria.
1KI 21:2 Lon eu rän, Ahap a üreni Napot, “Kopwe ngeniei om we tanipin wain pwe üpwe eäni tanipin iasai, pun a kan ngeni imwei. Üpwe siwili ngeni eu tanipin wain mi mürina seni, ika üpwe ngonuk liwinin won moni, are ka tipeeu ngeni.”
1KI 21:3 Nge Napot a üreni Ahap, “Ewe Samol mi Lapalap esap mwütätä ai üpwe ngonuk fanüei me won ai kewe lewo.”
1KI 21:4 Iwe, Ahap a liwiniti imwan fän chou me song pokiten än Napot kapas ngeni pwe esap mwüt ngeni fanüan me won an kewe lewo. Iwe, a konola won an peet o kulu ngeni etip, esap pwal mochen mongö.
1KI 21:5 Nge Isipel pwülüan we a tolong ren o aisini, “Pwota ka chou? Pwota kosap mochen mongö?”
1KI 21:6 Iwe, Ahap a üreni, “Üa kapas ngeni Napot, pwe epwe ngeniei an tanipin wain pwe üpwe möni won moni, ika üpwe siwili ngeni pwal eu tanipin wain, are a tipeeu ngeni. Nge i a pälüeni pwe esap ngeniei.”
1KI 21:7 Nge Isipel a üreni, “Ifa usun, en king lon Israel, ika sap en? Kopwe pwätä o mongö, kopwe pwapwa. Ngang üpwe angei ngonuk än Napot we tanipin wain.”
1KI 21:8 Mürin, Isipel a makei toropwe o saini iten Ahap won, a impwangei ngeni än Ahap impwang o tinala ren ekewe souakom me aramas tekia mi nom ren Napot lon Jesrel.
1KI 21:9 Lon ekewe toropwe Isipel a makei, “Oupwe asilefeili eu ränin echikefel o amwichafengeni ekewe aramas. Oupwe amota Napot won ewe lenien mot än chon iteföüla me lein ekewe aramas.
1KI 21:10 Oupwe pwal amota akawenewenan ruoman mwän mi manauangau, repwe atipisi Napot o üra pwe a otteki Kot me ewe king. Mürin oupwe emwenawu Napot lükün ewe telinimw o monei ngeni fau, pwe epwe mäla.”
1KI 21:11 Iwe, ekewe souakom me aramas tekia lon Jesrel ra föri usun mine Isipel a makei ngeniir lon ekewe toropwe.
1KI 21:12 Ra asilefeili eu ränin echikefel o amwichafengeni ekewe aramas. Iwe, ra amota Napot won ewe lenien mot än chon iteföüla me lein ekewe aramas.
1KI 21:13 Mürin, ekewe ruoman mwän mi manauangau ra tolong o mottiu akawenewenan. Iwe, ra atipisi Napot me fän mesen ekewe aramas o üra, “Napot a otteki Kot me ewe king.” Iei mine ra emwenawu Napot lükün ewe telinimw o monei ngeni fau pwe a mäla.
1KI 21:14 Mürin ra asilela ren Isipel o üra, “Napot a mäla.”
1KI 21:15 Iwe, lon ewe chök otun, lupwen Isipel a rong pwe Napot a mäla, a üreni Ahap, “Kopwe pwätä, kopwe angei än Napot we tanipin wain pwe om, ewe tanipi esap mochen ngonuk won moni. Pun Napot a mäla.”
1KI 21:16 Iwe, lon ewe chök otun, lupwen Ahap a rong pwe Napot a mäla, a pwätä o feila ren än Napot we tanipin wain pwe a eäni.
1KI 21:17 Mürin, ewe Samol mi Lapalap a üreni ewe soufos Elias seni Tispe,
1KI 21:18 “Kopwe feila o churi Ahap ewe kingen Israel mi nom Samaria. Nengeni, a nom lon än Napot we tanipin wain pwe a eäni.
1KI 21:19 Iwe, kopwe üreni pwe iei aloi ngang ewe Samol mi Lapalap, ‘Ifa usun, ka niela eman aramas, nge ka pwal angei an tanipi pwe om?’ Kopwe pwal üreni pwe iei mine ngang üa apasa usun, ‘Lon ewe chök leni ia kolak ra chönawei ie chan Napot, repwe pwal chönawei chaom ie.’”
1KI 21:20 Iwe, lupwen Ahap a küna Elias, a üreni, “Ifa usun, ka sereniei, en chon oputaei?” Elias a pälüeni, “Ewer, üa serenuk. Ka fangala inisum pwe kopwe föri mine a ngau me fän mesen ewe Samol mi Lapalap.
1KI 21:21 Iei mine ewe Samol mi Lapalap a ürenuk, ‘Üpwe awarato feiengau womw. Üpwe ärukala o arosala mwirimwirum, noum kewe mwän meinisin seni kükün tori watte me lon Israel.
1KI 21:22 Iwe, üpwe föri ngeni chon leimwom usun mine üa föri ngeni chon leimwen Jeropoam nöün Nepat we mwän, pwal ngeni chon leimwen Paasa nöün Ahia we mwän. Pun ka asongaei ren om emweni chon Israel ngeni tipis.’
1KI 21:23 Nge ewe Samol mi Lapalap a pwal üra usun Isipel, ‘Ekewe kolak repwe ochei Isipel me lon Jesrel.
1KI 21:24 Iteiten eman me eman me lein chon leimwom mi mäla me lon ewe telinimw kolak repwe ochei. Nge iteiten eman me eman mi mäla me lemäl machang repwe ochei.’”
1KI 21:25 (Iwe, esap wor eman mi fangela inisin, pwe epwe föri mine a ngau me fän mesen ewe Samol mi Lapalap usun Ahap, pun a pesepes me ren Isipel pwülüan we.
1KI 21:26 Ahap a föri föför mi fokun anioput ren an fel ngeni uluulun anümwäl, usun ekewe chon Amor ra föri, chokewe ewe Samol mi Lapalap a asürela me mwen ekewe aramasen Israel.)
1KI 21:27 Nge lupwen Ahap a rong ekei kapas, a kamwei üfan o üföüfolong üf seni tuk, a achüün o kon lon tuk, a pwal fetalfeil fän aiengau.
1KI 21:28 Mürin, ewe Samol mi Lapalap a üreni ewe soufos Elias,
1KI 21:29 “Ifa usun, ka küna usun än Ahap atekisonätiu me fän mesei? Pokiten an atekisonätiu me fän mesei, üsap awarato ewe feiengau lon ränin manauan. Nge lon ränin manauen nöün we mwän üpwe awarato ewe feiengau won chon leimwan.”
1KI 22:1 Iwe, esap wor maun lefilen Siria me Israel lon ükükün ülüngat ier.
1KI 22:2 Nge lon ewe aülüngatin ier Jehosafat ewe kingen Juta a feila pwe epwe churi Ahap ewe kingen Israel.
1KI 22:3 Iwe, ewe kingen Israel a üreni nöün kewe nöüwis, “Ifa usun, ousap silei pwe ewe telinimw Ramot-kiliat ach? Pwota sa chök likitala, nge sisap angesefäli seni ewe kingen Siria?”
1KI 22:4 Ahap a aisini Jehosafat, “Ifa usun, kopwe etiei le maun ngeni Ramot-kiliat?” Nge Jehosafat a pälüeni, “Ewer, üa molotä usun en, pwal nei kewe sounfiu me nei kewe oris ra molotä usun noum kewe.”
1KI 22:5 Nge Jehosafat a pwal üreni ewe kingen Israel, “Sipwe akomwen ais met öüröürach me ren ewe Samol mi Lapalap.”
1KI 22:6 Iei mine ewe kingen Israel a amwichafengeni ekewe soufos, ina epwe ükükün föpükü mwän, o aisiniir, “Ifa usun, üpwe feila maun ngeni Ramot-kiliat, ika üsap?” Nge ir ra üra, “Kopwe feila o maun ngeni ewe telinimw, ewe Samol epwe ewinnok.”
1KI 22:7 Nge Jehosafat a ais, “Ifa usun, esap wor pwal eman soufos nöün ewe Samol mi Lapalap, sipwe tongeni angei öüröürach me ren?”
1KI 22:8 Iwe, ewe kingen Israel a pälüeni, “Mi chüen wor eman mwän, sa tongeni angei öüröürach seni ewe Samol mi Lapalap me ren, itan Mikaia nöün Imla we mwän. Nge ngang üa oput, pun esap fän eu mwo an epwe osuni och mi mürina usi, pwe mi ngau chök.” Nge Jehosafat a üra, “King Ahap, kosap aloni na.”
1KI 22:9 Mürin, ewe kingen Israel a titi eman nöüwis o üreni, “Kopwe müttir feila o emwenato Mikaia.”
1KI 22:10 Iwe, Ahap ewe kingen Israel me Jehosafat ewe kingen Juta ra üföüf üfer kewe üfen king o mot won ar kewe lenien motun king me lon ewe lenien wichiwich umwun wiich lükün asamalapen tittin Samaria. Nge ekewe soufos meinisin ra osuni me mwer.
1KI 22:11 Iwe, eman me leir itan Setekia nöün Chenana we mwän a föri mächä fän itan seni mächä o üreni Ahap, “Iei alon ewe Samol mi Lapalap: Ekei mächä kopwe eäniir le maun ngeni ekewe chon Siria tori repwe rosola.”
1KI 22:12 Nge ekewe soufos meinisin ra pwal osuni iei chök usun o üra, “Kopwe feila Ramot-kiliat o liapeni. Ewe Samol mi Lapalap epwe ewinnok.”
1KI 22:13 Iwe, ewe chon künö mi feila köri Mikaia a üreni, “Nengeni, ekewe soufos ra alonipökü chök eu mine a mürina ngeni ewe king. Kopwe pwal apasa mine a mürina usun chök ir.”
1KI 22:14 Nge Mikaia a pälüeni, “Mwo manauen ewe Samol mi Lapalap, mine ewe Samol mi Lapalap a üreniei, ina chök üpwe apasatä.”
1KI 22:15 Iwe, lupwen Mikaia a feito ren ewe king, ewe king a aisini, “Mikaia, ifa usun, aipwe feila Ramot-kiliat o maun ngeni, ika aisap?” Nge Mikaia a pälüeni, “Kopwe feila o maun ngeni ewe telinimw. Ewe Samol mi Lapalap epwe ewinnok.”
1KI 22:16 Nge ewe king a üreni, “Fän fitu üpwe allük ngonuk, pwe kopwe chök kapas wenechar ngeniei, lupwen ka üreniei alon ewe Samol mi Lapalap?”
1KI 22:17 Mürin, Mikaia a apasa, “Üa küna chon Israel meinisin pwe ra toropasfeil won ekewe chuk usun sip esap wor ar chon mas. Nge ewe Samol mi Lapalap a üra: Ekei aramas esap wor ar samol. Iteiten eman me eman epwe liwiniti en me lenian fän kinamwe.”
1KI 22:18 Iwe, Ahap a üreni Jehosafat, “Ifa usun, üsap ürenuk pwe ätei esap osuni och mi mürina usi, pwe mi ngau chök?”
1KI 22:19 Mikaia a sopwela le kapas, “Iei kopwe aüselinga alon ewe Samol mi Lapalap: Üa küna ewe Samol mi Lapalap pwe a mot won an lenien motun king, nge unusen ewe mwichen chon läng ra ütä ünükün.
1KI 22:20 Iwe, ewe Samol mi Lapalap a ais, ‘Iö epwe atupu Ahap pwe epwe feila o mäla lon Ramot-kiliat?’ Iwe, eman a apasa och, nge pwal eman a apasa och.
1KI 22:21 Mürin, eman ngün a kaneto, a ü fän mesen ewe Samol mi Lapalap o üra, ‘Ngang üpwe atupu Ahap.’
1KI 22:22 Ewe Samol mi Lapalap a aisini, ‘Ren met?’ Ewe ngün a pälüeni, ‘Üpwe feila o föri pwe nöün kewe soufos meinisin repwe eäni kapas chofana.’ Iwe, Kot a üra, ‘En kopwe atupu Ahap, nge om angang epwe fisiöch. Kopwe feila o föri iei usun.’
1KI 22:23 Iei mine ewe Samol mi Lapalap a föri pwe noum kewe soufos meinisin ra eäni kapas chofana ngonuk, nge i a apwüngala pwe kopwe feiengau.”
1KI 22:24 Mürin, ewe soufos Setekia a kan ngeni Mikaia, a pösapei o üra, “Inet Ngünün ewe Samol mi Lapalap a towu seniei pwe epwe kapas ngonuk?”
1KI 22:25 Nge Mikaia a üra, “Kopwap püsin mefi lon ewe rän, lupwen kopwe tolong lon rumwen lon eu imw pwe kopwe op.”
1KI 22:26 Mürin, ewe kingen Israel a üreni eman nöün kewe nöüwis, “Kopwe turufi Mikaia o emwenala ren Amon kepinan ewe telinimw, pwal ren Joas nei we mwän.
1KI 22:27 Kopwe üreniir pwe repwe aturalong ei mwän lon imwen fötek o akükünü anan mongö me ünüman koluk tori üpwe liwinto fän kinamwe.”
1KI 22:28 Nge Mikaia a üra, “Are ka liwinto fän kinamwe, ewe Samol mi Lapalap esap kapas me rei.” A pwal apasa, “Oupwe aüselinga ai kei kapas, ämi aramas meinisin.”
1KI 22:29 Mürin, Ahap ewe kingen Israel me Jehosafat ewe kingen Juta ra feila Ramot-kiliat pwe repwe maun ngeni.
1KI 22:30 Nge Ahap a üreni Jehosafat, “Üpwe asokala üfei le feila maun, nge en kopwe üföüf üfom üfen king.” Iei mine ewe kingen Israel a asokala üfan o feila maun.
1KI 22:31 Nge ewe kingen Siria a allük ngeni ekewe ilik me ruoman meilapen waan woken, “Ousap maun ngeni aramas mi kis ika aramas mi lap, nge oupwe chök maun ngeni ewe kingen Israel.”
1KI 22:32 Iei mine, lupwen ekewe meilapen ekewe woken ra küna Jehosafat, ra apasa, “Ellet, inaan i ewe kingen Israel.” Mürin ra kul pwe repwe fiu ngeni. Nge Jehosafat a puchör.
1KI 22:33 Lupwen ekewe meilapen ekewe woken ra küna pwe sap i ewe kingen Israel, ra liwin seni ar tapweri.
1KI 22:34 Iwe, eman sounfiun Siria a chök äsesser le likapichiela wokun esefich, nge ewe esefich a küw ewe king Ahap lefilen fichin üfan üfen maun. Iei mine ewe king a üreni ewe mi wisen uwei waan woken, “Kopwe kul o uweeila seni ei maun, pun ngang üa kinas.”
1KI 22:35 Lon ewe rän ewe maun a pöchökülela, nge ewe king a chök aünnala won waan woken kulu ngeni ekewe chon Siria. Iwe, ewe cha seni kinasan a putiu lefön ewe woken, nge lekuniol a mäla.
1KI 22:36 Nge lupwen akkar a tuputiu, eman me lein ekewe sounfiun Israel a kökö, “Eman me eman mwän epwe liwiniti en me an telinimw me en me fanüan.”
1KI 22:37 Iei usun ewe king Ahap a mäla. Nge ra uwala Samaria o peiaseni ie.
1KI 22:38 Iwe, ra talü waan woken aropen ewe nomun koluk lon Samaria, ewe ia ekewe fin lisowu ra tütü ie, nge ekewe kolak ra chönawei chan Ahap, usun ewe Samol mi Lapalap a fen apasa.
1KI 22:39 Iwe, lusun pworausen än Ahap föför meinisin, imwan a aüetä o foute ngeni ngiin äläfan me ekewe telinimw meinisin a aüetä, a mak lon puken uruwon ekewe kingen Israel.
1KI 22:40 Iwe, Ahap a mäla, nge Ahasia nöün we mwän a siwili lon wisan wisen king.
1KI 22:41 Iwe, lon arüanün ierin mwün Ahap ewe kingen Israel, Jehosafat nöün Asa we mwän a tolong lon wisan wisen king o nemeni Juta,
1KI 22:42 lupwen a ierini ilik me limu. A nom lon Jerusalem o nemenem lon ükükün rüe me limu ier. Iten inan Asupa nöün Silhi we fefin.
1KI 22:43 Jehosafat a föri mine a pwüng me fän mesen ewe Samol mi Lapalap, usun Asa saman we a föri. Nge ekewe lenien fel won ekewe leni tekia resap katala. Iwe, ekewe aramas ra chök sopwela le asor o keni apach mi pwokus wor.
1KI 22:44 Jehosafat a pwal eäni kinamwe ngeni ewe kingen Israel.
1KI 22:45 Nge lusun pworausen än Jehosafat föför meinisin, an föförün pwora, pwal usun an kewe maun a mak lon puken uruwon ekewe kingen Juta.
1KI 22:46 Jehosafat a pwal arosala seni ewe fanü ekewe mwän meinisin mi chüen manau seni fansoun Asa saman we, chokewe mi fangala inisir fän iten lisowu lon ekewe lenien fel ngeni anümwäl.
1KI 22:47 Iwe, esap wor eman king lon Etom, ewe chök kisin mi fil me ren ewe kingen Israel a nemenem.
1KI 22:48 Jehosafat a falei ekoch sipen kamö me amömö pisek, repwe sai ngeni ewe fanü Ofair o uwato kolt. Nge resap fokun sai, pun ekewe sip ra mök me arun Esion-keper.
1KI 22:49 Mürin, Ahasia nöün Ahap we mwän a üreni Jehosafat, “Kopwe mwüt ngeni nei kewe chon angang, pwe repwe eti noum kewe chon angang le sai won ekewe sip.” Nge Jehosafat esap mochen.
1KI 22:50 Iwe, Jehosafat a mäla, nge ra peiaseni ren an kewe lewo lon ewe telinimwen Tafit. Jehoram nöün we mwän a siwili lon wisan wisen king.
1KI 22:51 Iwe, lon engol me fisuen ierin mwün Jehosafat ewe kingen Juta, Ahasia nöün Ahap we mwän a tolong lon wisan wisen king o nemeni Israel. A nom lon Samaria o nemenem lon ükükün ruu ier.
1KI 22:52 Ahasia a föri mine a ngau me fän mesen ewe Samol mi Lapalap. A apirü föförün Ahap saman we me Isipel inan we, a pwal apirü föförün Jeropoam nöün Nepat we mwän mi emweni Israel ngeni tipis.
1KI 22:53 Iwe, a angang ngeni ewe anü Paal o fel ngeni, usun chök saman we a föri. Ren ei a asonga ewe Samol mi Lapalap ewe Koten Israel.
2KI 1:1 Iwe, mürin än Ahap ewe kingen Israel mäla, chon Moap ra ü ngeni Israel.
2KI 1:2 Ahasia ewe kingen Israel a turuwu seni arongorongun won imwan me lon Samaria o fokun feiengau. Iei mine a tinala chon künö, pwe repwe feila ren Paalsepup ewe koten Ekron o aisini ika epwe chikarsefäl seni an feiengau.
2KI 1:3 Nge nöün ewe Samol mi Lapalap chon läng a üreni Elias ewe soufos seni Tispe, pwe epwe feila o churi ekewe chon künö seni ewe kingen Samaria o üreniir, “Ifa usun, esap wor eman Kot lon Israel, ina oupwe feila o aisini Paalsepup ewe koten Ekron?
2KI 1:4 Iei alon ewe Samol mi Lapalap ren ewe king, ‘Esap pwätä seni an kiekien samau, nge epwe fokun mäla.’” Iwe, Elias a feila o föri usun mine ewe Samol mi Lapalap a üreni.
2KI 1:5 Mürin, ekewe chon künö ra liwiniti ewe king, nge ätewe a aisiniir, “Pwota oua liwinsefäl?”
2KI 1:6 Nge ir ra pälüeni ewe king, “Mi wor eman mwän a churikem o ürenikem pwe aipwe liwinto reöm, en äm king, o ürenuk alon ewe Samol mi Lapalap, ‘Ifa usun, esap wor eman Kot lon Israel, ina kopwe titila o aisini Paalsepup ewe koten Ekron? Iei mine kosap pwätä seni om kiekien samau, nge kopwe fokun mäla.’”
2KI 1:7 Iwe, ewe king a aisiniir, “Ifa lapalapen ewe mwän mi churikemi o ürenikemi ekei kapas?”
2KI 1:8 Nge ir ra pälüeni, “Ewe mwän a üföüf echö üf seni ülen man o ri ngeni lukalapan efoch riri seni silin man.” Iwe, ewe king a üra, “I Elias seni Tispe.”
2KI 1:9 Mürin, ewe king a tinala eman meilapen sounfiu fiti lime nöün sounfiu, pwe repwe uwato Elias. Iwe, ewe meilap a feito ren Elias mi mot won ungen eu chuk o üreni, “En aramasen Kot, ewe king a allük ngonuk pwe kopwe feitiu.”
2KI 1:10 Nge Elias a üreni, “Are ngang eman aramasen Kot, ekkei epwe feitiu seni läng o kenikemiila me noum kewe lime sounfiu.” Mürin, ekkei a feitiu seni läng o kenala ewe meilap me nöün kewe lime sounfiu.
2KI 1:11 Iwe, ewe king a tinala ren Elias pwal eman meilapen sounfiu fiti lime nöün sounfiu. Ätewe a feila o üreni Elias, “En aramasen Kot, iei än ewe king allük ngonuk pwe kopwe feitiu iei chök.”
2KI 1:12 Nge Elias a üra, “Are ngang eman aramasen Kot, ekkei epwe feitiu seni läng o kenikemiila me noum kewe lime sounfiu.” Mürin, ekkei a feitiu seni läng o kenala ewe meilap me nöün kewe lime sounfiu.
2KI 1:13 Mürin, ewe king a tinala ewe aülümanün meilapen sounfiu fiti lime nöün sounfiu. Nge lupwen ewe aülümanün meilap a tori won ungen ewe chuk, a fotopwäsukitiu mwen Elias o tüngorei, “En aramasen Kot, üa tüngor ngonuk, kose mochen kopwe chüngüw manauei me manauen noum kei lime chon angang.
2KI 1:14 Nengeni, ekkei a feitiu seni läng o kenala ekewe ruoman meilapen sounfiu mi akom mwei fiti nöür kewe akalime sounfiu. Nge iei kose mochen kopwe chüngüw manauei.”
2KI 1:15 Mürin, nöün ewe Samol mi Lapalap we chon läng a kapas ngeni Elias, “Kopwe fitätiu ewe meilap, nge kosap niuokusiti.” Iei mine Elias a ütä o fitätiu ewe meilap ren ewe king.
2KI 1:16 Iwe, Elias a üreni ewe king, “Iei alon ewe Samol mi Lapalap, ‘Pokiten ka tinala chon künö pwe repwe aisini Paalsepup ewe koten Ekron, usun chök nge itä esap wor eman Kot lon Israel pwe kopwe tongeni aisini, iei mine kosap pwätä seni om kiekien samau, nge kopwe fokun mäla.’”
2KI 1:17 Iwe, Ahasia a mäla, usun Elias a apasa fän alon ewe Samol mi Lapalap. Nge Joram pwin we a siwili lon wisan wisen king, pun esap wor nöün Ahasia mwän. Iwe, Joram a popuetä le nemenem lon aruuen ierin mwün Jehoram nöün Jehosafat we mwän ewe kingen Juta.
2KI 1:18 Nge lusun pworausen än Ahasia föför meinisin a mak lon puken uruwon ekewe kingen Israel.
2KI 2:1 Lupwen a tori fansoun pwe ewe Samol mi Lapalap epwe le angeatä Elias läng lon eu ewiniär, Elias me Elisa ra feila seni Kilkal.
2KI 2:2 Iwe, Elias a üreni Elisa, “Üa tüngor ngonuk pwe kopwe le nonom ikei, pun ewe Samol mi Lapalap a tinieila Petel.” Nge Elisa a üra, “Mwo manauen ewe Samol mi Lapalap, pwal mwo manauom, üsap likituk.” Iei mine ra mwinela Petel.
2KI 2:3 Iwe, eu mwichen soufos mi nom Petel ra feila ren Elisa o üreni, “Ka silei pwe ewe Samol mi Lapalap epwe angei senuk om samol ikenai?” Nge Elisa a üra, “Ewer, üa silei. Nge ousap kapas usun.”
2KI 2:4 Mürin, Elias a üreni Elisa, “Üa tüngor ngonuk pwe kopwe le nonom ikei, pun ewe Samol mi Lapalap a tinieila Jeriko.” Nge Elisa a üra, “Mwo manauen ewe Samol mi Lapalap, pwal mwo manauom, üsap likituk.” Iei mine ra mwinela Jeriko.
2KI 2:5 Iwe, eu mwichen soufos mi nom Jeriko ra kaneto ren Elisa o üreni, “Ka silei pwe ewe Samol mi Lapalap epwe angei senuk om samol ikenai?” Nge Elisa a üra, “Ewer, üa silei. Nge ousap kapas usun.”
2KI 2:6 Mürin, Elias a üreni Elisa, “Üa tüngor ngonuk pwe kopwe le nonom ikei, pun ewe Samol mi Lapalap a tiniela ren ewe chanpupu Jortan.” Nge Elisa a üra, “Mwo manauen ewe Samol mi Lapalap, pwal mwo manauom, üsap likituk.” Iei mine ekewe ruoman ra mwinela.
2KI 2:7 Iwe, lime mwän seni ewe mwichen soufos ra pwal feila o ütä ekis toau seni Elias me Elisa, lupwen ekewe ruoman ra ü ünükün ewe chanpupu Jortan.
2KI 2:8 Mürin, Elias a angei üfan owokot, a numifengeni o opuli ewe koluk lon ewe chanpupu, pwe ewe koluk a kinikinfesen lon ruu pekin. Iwe, ekewe ruoman ra pwerela won pwasapwas tori epek.
2KI 2:9 Mürin ar tori ewe epek, Elias a üreni Elisa, “Kopwe tüngor mine üpwe föri fän itom me mwen än Kot epwe angeei senuk.” Nge Elias a üra, “Üa tüngor senuk kopwe mwüt ngeniei pwe üpwe angei ruu inet seni ngünum.”
2KI 2:10 Iwe, Elias a üra, “Om tüngor a weires. Nge are ka künaei, lupwen Kot epwe angeei senuk, epwe fis ngonuk om tüngor. Nge are kosap künaei, esap fis ngonuk.”
2KI 2:11 Lupwen ra chüen mwinela o kapasfengen, nengeni, efoch woken mi pulopulen ekkei me oris mi pulopulen ekkei ra aimwüfeseni ekewe ruoman, nge Elias a feitä läng lon eu ewiniär.
2KI 2:12 Iwe, Elisa a küna ei lapalap o kökkö, “Semei, semei! Ewe chon peni Israel mi manaman. Iei ka feil senikem.” Iwe, esap chüen küna Elias. Mürin, Elisa a kamwöch püsin üfan o kamweetiu lon ruu kinikin fän an letipeta.
2KI 2:13 Iwe, Elisa a angeetiuei üfen Elias we owokot mi tur seni, a liwinla o ütä aropen ewe chanpupu Jortan.
2KI 2:14 Mürin, a angei ewe üf, a opuli ewe koluk o üra, “Ifa i ewe Samol mi Lapalap än Elias we Kot?” Iwe, lupwen a opuli ewe koluk, ewe koluk a kinikinfesen lon ruu pekin, nge Elisa a pwerela epek.
2KI 2:15 Iwe, lupwen ewe mwichen soufos seni Jeriko ra küna mine Elisa a föri, ra üra, “Ngünün Elias a nom won Elisa.” Ra feito pwe repwe churi, iwe, ra chapetiu lepwül me mwan
2KI 2:16 o üreni, “Mi wor ükükün lime mwän mi pöchökül me leim äm noum chon angang. Aia tüngor, kopwe mwüt ngeniir pwe repwe feila o kütta om we samol. A tongeni fis pwe Ngünün ewe Samol mi Lapalap a uwei o likitala won eu lein ekewe chuk ika lon eu lein ekewe lemol.” Nge Elisa a üra, “Ousap tinirela.”
2KI 2:17 Nge lupwen ra ariani tori a säw, a üra, “Oupwe tinirela.” Iei mine ra tinala lime mwän. Lon ükükün ülüngat rän ra kütta Elias, nge resap küna.
2KI 2:18 Iwe, ra liwinto ren Elisa, lupwen a chüen nonom Jeriko, nge Elisa a üreniir, “Ifa usun, üsap ürenikemi pwe ousap feila?”
2KI 2:19 Iwe, ekewe re Jeriko ra feila ren Elisa o üreni, “Äm samol, nengeni, lenien ei telinimw a mürina, usun ka püsin küna. Nge ewe koluk a ngau, iei mine ewe fanü esap up.”
2KI 2:20 Iwe, Elisa a üra, “Oupwe uwato rei eu sepi mi fö o uwalong salt lon.” Iei mine ra uwato ren ewe sepi me ewe salt.
2KI 2:21 Mürin, Elisa a feila ren puächen ewe koluk, a aturalong ewe salt lon o üra, “Iei alon ewe Samol mi Lapalap, ‘Üa alimöchü ewe koluk. Seni ikenai esap chüen fis mäla ika mwetelan mönükol ren ewe koluk.’”
2KI 2:22 Iei mine ewe koluk a limöch tori ikenai, usun Elisa a apasa.
2KI 2:23 Mürin, Elisa a feila seni Jeriko tori Petel. Nge lupwen a fetal won al, ekoch kükün ät ra towu seni ewe telinimw, ra ngäri o kökkö, “Kopwe süla, en möküröpan, kopwe süla, en möküröpan.”
2KI 2:24 Elisa a kul, nge lupwen a küneer, a anümamaueer fän iten ewe Samol mi Lapalap. Mürin, ruoman liafefinin pear ra towu seni ewe wöllap o atatakisi inisin faik me ruoman me lein ekewe ät, pwe ra mäla.
2KI 2:25 Iwe, seni ikenan Elisa a feila ren ewe chuk Karmel, mürin a liwiniti Samaria.
2KI 3:1 Iwe, lon engol me waluen ierin mwün Jehosafat ewe kingen Juta, Joram nöün Ahap we mwän a tolong lon wisan wisen king o nemeni Israel. A nom lon Samaria o nemenem lon ükükün engol me ruu ier.
2KI 3:2 Joram a föri mine a ngau me fän mesen ewe Samol mi Lapalap, nge esap chök usun mine saman me inan ra föri. A ataela ewe fau mi pin fän iten ewe anü Paal saman we a falei.
2KI 3:3 Nge a chök kamwöch won ekewe tipis Jeropoam nöün Nepat we mwän a föri, lupwen a emweni Israel ngeni tipis. Iwe, esap likitala ekewe tipis.
2KI 3:4 Iwe, Mesa ewe kingen Moap a foleni sip. Iteiten ier a wisen ngeni ewe kingen Israel ükükün ipükü ngeröü nienifön sip me ülöülen ipükü ngeröü ätemwänin sip.
2KI 3:5 Nge lupwen Ahap ewe kingen Israel a mäla, ewe kingen Moap a ü ngeni Israel.
2KI 3:6 Iei mine ewe king Joram a feila seni Samaria o achufengeni chon Israel meinisin lon ewe chök otun, pwe repwe maun.
2KI 3:7 Mürin, a tinala pworaus ngeni Jehosafat ewe kingen Juta o üra, “Ewe kingen Moap a ü ngeniei. Ifa usun, kopwe etiei le maun ngeni Moap?” Nge Jehosafat a üra, “Üpwe etuk. Üa molotä usun en, pwal nei kewe sounfiu me nei kewe oris ra molotä usun noum kewe.”
2KI 3:8 Jehosafat a pwal aisini, “Meni al sipwe feila won?” Nge Joram a pälüeni, “Sipwe feila won ewe aletam mi alelong lon ewe fanüapön Etom.”
2KI 3:9 Iei usun ewe kingen Israel a feila, nge ewe kingen Juta me ewe kingen Etom ra eti. Nge mürin ar fetal lon ükükün fisu rän, esap chüen wor ünümen ekewe sounfiu ika ünümen nöür kewe man koluk.
2KI 3:10 Mürin, ewe kingen Israel a üra, “Feiengauach, ewe Samol mi Lapalap a körifengenikich kei ülüman king, pwe epwe atolongakich fän nemenien chon Moap.”
2KI 3:11 Nge king Jehosafat a ais, “Ifa usun, esap wor ikei eman nöün ewe Samol mi Lapalap soufos, pwe i epwe tongeni angei öüröürach me ren ewe Samol mi Lapalap?” Mürin, eman nöün ewe kingen Israel meilap a pälüeni, “A nom ikei Elisa nöün Sofat we mwän mi piin angang ngeni Elias.”
2KI 3:12 King Jehosafat a üra, “Än ewe Samol mi Lapalap kapas a nom ren.” Iei mine ewe kingen Israel, ewe kingen Juta me ewe kingen Etom ra feila ren Elisa.
2KI 3:13 Iwe, Elisa a üreni ewe kingen Israel, “Pwota ka feito rei pwe üpwe alisuk? Kopwe feila ren ekewe soufos semom me inom ra angei öüröürer seniir.” Nge ewe kingen Israel a üreni Elisa, “Apwi, ewe Samol mi Lapalap, i a körifengenikem kei ülüman king, pwe epwe atolongakem fän nemenien chon Moap.”
2KI 3:14 Nge Elisa a üra, “Mwo manauen ewe Samol mi Unusen Manaman, ewe üa angang ngeni. Are üsap aücheani Jehosafat ewe kingen Juta, üsap nenengenuk ika afäluk.
2KI 3:15 Nge iei oupwe emwenato rei eman mi sile ettik kitar.” Iwe, lupwen ätewe a ettiki ewe kitar, manamanen ewe Samol mi Lapalap a feito won Elisa.
2KI 3:16 Iwe, Elisa a üra, “Iei alon ewe Samol mi Lapalap, ‘Oupwe tuw chomong warawar lon ei lemol mi pwasapwas.
2KI 3:17 Inamwo ika ousap küna üt, esap pwal enien asepäl, nge ei lemol epwe uren koluk, pwe ämi me nöümi mwichen sounfiu pwal nöümi man oupwe tongeni ün.’
2KI 3:18 Nge ei och mettoch mi mecheres ngeni ewe Samol mi Lapalap. I epwe pwal ewinnakemi pwe oupwe akufu ekewe chon Moap.
2KI 3:19 Oupwe liapeni ekewe telinimw meinisin mi pöchökül tittir, pwal ekewe telinimw mi fokun mürina. Oupwe pöküela iteiten irä mi mürina o pineela ekewe puächen koluk meinisin, oupwe pwal aingauala ekewe tanipi mi mürina ren fau.”
2KI 3:20 Iwe, lesosorun ewe rän mürin, lupwen fansoun asor, koluk a puto seni akawenewenen Etom, tori ewe fanü a ur ren koluk.
2KI 3:21 Iwe, lupwen ekewe chon Moap meinisin ra rong pwe ekewe ülüman king ra feito pwe repwe maun ngeniir, ra körifengeni chokewe meinisin mi tongeni uwou pisekin maun, seni alüalät tori chinlap. Iwe, ra tettel won kiännin fanüer.
2KI 3:22 Lupwen ekewe chon Moap ra pwätä lesosorusich, ewe akkar a tineiti ewe koluk, nge itä me rer ewe koluk mi nom akawenewener a paraparen cha.
2KI 3:23 Iwe, ra üra, “Elleti cha. Eli ekewe ülüman king ra fiufengen o nifengeniir. Iei mine ousipwe feila o angei liapach.”
2KI 3:24 Nge lupwen ra tori ewe lenien chon Israel, ekewe chon Israel ra ütä o maun ngeni chon Moap, tori ra sü me mwer. Iwe, ekewe chon Israel ra tapweri ekewe chon Moap o nirela.
2KI 3:25 Ra ataela ekewe telinimw o monelong fau lon iteiten tanipi mi mürina tori ra pwölüla. Ra pwal pineela ekewe puächen koluk meinisin o pöküela ekewe irä mi mürina meinisin. Ewe telinimw Kir-hareset chök a chüen nom. Nge ekewe chon öülün ra pwelifeili ewe telinimw o maun ngeni.
2KI 3:26 Lupwen ewe kingen Moap a küna pwe epwe kuf lon ewe maun, a angei füpükü mwän mi wor nöür ketilas, pwe epwe süwu me akawenewenen ewe ia ewe kingen Etom a nom ie, nge ese tongeni.
2KI 3:27 Mürin, ewe kingen Moap a angei nöün mwänichi, ätewe itä epwe siwili lon wisan wisen king, o eäni asoren kek ngeni an we kot me won tittin ewe telinimw. Ren ei ekewe chon Israel ra fokun niuokus, iei mine ra kul seni ewe kingen Moap o liwiniti fanüer.
2KI 4:1 Iwe, eman fefin mi mä pwülüan, ätewe eman me lein ewe mwichen soufos, a siö ngeni Elisa o üreni, “Pwülüei we noum chon angang a mäla. En ka silei pwe i eman mi meniniti ewe Samol mi Lapalap. Nge iei ätewe pwülüei a liwinimang ngeni a feito, pwe epwe angei seniei nei kewe ruoman ät o nöüniir amanau pokiten ewe liwinimang.”
2KI 4:2 Elisa a aisini neminewe, “Met üpwe tongeni föri fän itom? Kopwe üreniei met a nom lon imwom.” Neminewe a üra, “Esap wor och mine a nom lon imwei, chilon chök eu kükün rume mi wor apüra lon.”
2KI 4:3 Mürin, Elisa a üra, “Kopwe feila ren chon arum o tüngor chomong rume mi pön seniir.
2KI 4:4 Mürin kopwe tolong lon imwom, ämi me noum kewe ät, o apüngala asaman. Kopwe angei ewe eu rume mi wor apüra lon o ninalong lölön lon ekewe rume meinisin. Nge lupwen eu me eu a ur, kopwe aimwüela.”
2KI 4:5 Iwe, neminewe a feila seni Elisa, a tolong lon imwan o apüngürelong me nöün kewe ät lon. Lupwen nöün kewe ät ra uwato ekewe rume ren, a niiniilong apüra lor.
2KI 4:6 Nge lupwen ekewe rume meinisin ra ur, a üreni eman lein nöün kewe ät, “Kopwe uwato pwal eu.” Iwe, nöün we a üreni, “Esap chüen wor.” Mürin a ükütiu pupun ewe apüra.
2KI 4:7 Iwe, neminewe a feila ren ewe soufos Elisa o apworausa ngeni mine a fis. Nge ätei a üreni, “Kopwe feila, kopwe amömöla ewe apüra o amusa om kewe liwinimang. Nge lusun ewe moni ämi me noum kewe ät oupwe manau seni.”
2KI 4:8 Iwe, lon eu rän Elisa a feila Shunem, ia eman fefin mi pisekisek a nom ie. Neminewe a pesei Elisa pwe epwe momongö ren. Iei mine iteiten fansoun, lupwen Elisa a feito Shunem, a feila ngeni imwen neminewe o mongö ren.
2KI 4:9 Iwe, ewe fefin a üreni pwülüan we, “Üa mefi pwe ätei a sou pwepwereto ikei eman aramasen Kot mi pin.
2KI 4:10 Sipwe föri eu kükün rum won imwach o atolonga fän itan eu peet, eu chepel, eu lenien mot me eu lamp, pwe iteiten fansoun an feito rech epwe nom lon.”
2KI 4:11 Lon eu rän, lupwen Elisa a feito Shunem, a feitä lon an rum o asösö lon.
2KI 4:12 Iwe, a üreni nöün we chon angang Kehasi, “Kopwe kökkörato ewe fin Shunem.” Nge lupwen a köri, neminewe a feito.
2KI 4:13 Iwe, Elisa a kapas ngeni Kehasi pwe epwe üreni neminewe, “Ka fokun aweiresuk fän item. Met ngang üpwe tongeni föri fän itom? Ka mochen üpwe awenuk ren ewe king ika ren ewe meilapen ewe mwichen sounfiu?” Nge lupwen Kehasi a asile ngeni neminewe ekei kapas, a pälüeni, “Esap wor ai osupwang, pun üa nom lein aramasei.”
2KI 4:14 Mürin, Elisa a aisini Kehasi, “Nge met echök üpwe tongeni föri fän itan?” Kehasi a pälüeni, “Esap wor nöün, nge iei pwülüan a chinlap.”
2KI 4:15 Iwe, Elisa a üra, “Kopwe köri neminewe.” Nge lupwen Kehasi a körato neminewe, ewe fefin a ütä leasamen ewe rum.
2KI 4:16 Elisa a üreni, “Lon ei otun mürin eu ier kopwe afiti eman ät.” Nge neminewe a üra, “Apwi, ai samol en aramasen Kot, kosap chofana ngeniei ngang noum chon angang fefin.”
2KI 4:17 Nge ewe fefin a pwopwo o nöüni eman ät lon ewe fansoun mürin eu ier, usun Elisa a kapas ngeni.
2KI 4:18 Iwe, lupwen ewe ät a mämäritä, lon eu rän a feila ren saman we mi nom ren ekewe chon pöküpök wiich.
2KI 4:19 Ekis chök mürin, ewe ät a kechü ngeni saman we o üreni, “A metek mökürei, a metek mökürei.” Nge saman we a üreni nöün chon angang, “Kopwe ekiela ewe ät ren inan we.”
2KI 4:20 Mürin, ewe chon angang a eki ewe ät o uweela ren inan we. Neminewe a anomu nöün won pechen tori leoloas, mürin a mäla.
2KI 4:21 Iwe, ewe fefin a uweätä ewe ät lon rumwen Elisa we o akonala won an peet, a apüngala ewe asam o feila.
2KI 4:22 Mürin a köri pwülüan we o üreni, “Kopwe tinato rei eman lein ekewe chon angang, pwal eman aas, pwe üpwe müttir feila ren ewe soufos Elisa o liwinikaito.”
2KI 4:23 Iwe, pwülüan we a aisini, “Pwota ka mochen feila ren ikenai? Pun ikenai esap pwinin alingeling ika ränin sapat.” Nge neminewe a üra, “Men öch.”
2KI 4:24 Mürin, neminewe a rietä ewe lenien mot won ewe aas o üreni nöün chon angang, “Kopwe amüttiri ewe aas, nge kosap amanga tori üpwe ürenuk.”
2KI 4:25 Iei usun ewe fefin a säla o tori Elisa mi nom won ewe chuk Karmel. Iwe, lupwen Elisa a küna pwe neminewe a feito, a üreni Kehasi nöün we chon angang, “Nengeni, ewe fin Shunem a feito.
2KI 4:26 Kopwe müttirila ren pwe kopwe churi o aisini, ika a pöchökül me pwülüan me nöün we ät.” Iwe, neminewe a üreni Kehasi, “A mürina meinisin.”
2KI 4:27 Nge lupwen a tori ewe chuk ren Elisa, a chapetiu mwan o kamwöch pechen. Iwe, Kehasi a feito pwe epwe asüela, nge Elisa a üreni, “Kopwe likiti neminei. Kosap küna pwe a nom lon riaföü mi lapalap? Nge ewe Samol mi Lapalap esap pwäri ngeniei och usun.”
2KI 4:28 Mürin, neminewe a üra, “Ai samol, ifa usun, üa tüngor senuk eman ät? Üsap ürenuk pwe kosap atupuei?”
2KI 4:29 Iwe, Elisa a üreni Kehasi, “Kopwe anükünükuk, kopwe angei woki o säla. Are kopwe churi eman, kosap kapong ngeni, nge are eman epwe kapong ngonuk, kosap pälüeni. Iwe, kopwe tolong lon ewe imw o anomu woki won mesen ewe ät.”
2KI 4:30 Mürin, inen ewe ät a üra, “Mwo manauen ewe Samol mi Lapalap, pwal mwo manauom, üsap likituk.” Iei mine Elisa a ütä o tapwela mürin neminewe.
2KI 4:31 Kehasi a akomwola o anomu ewe wok won mesen ewe ät. Nge esap wor och möngüngü ika asisilen manau. Iei mine Kehasi a liwinila pwe epwe churi Elisa o üreni, “Ewe ät esap nennela.”
2KI 4:32 Lupwen Elisa a tolong lon ewe imw, a küna pwe ewe ät a konola won an peet, nge a mäla.
2KI 4:33 Elisa a tolong lon ewe rum o apüngürelong me ewe ät lon. Iwe, a iotek ngeni ewe Samol mi Lapalap.
2KI 4:34 Mürin, a tötä won ewe peet o chapala won ewe ät, awan a nom won awen ewe ät, mesan ra nom won mesen ewe ät, nge pöün ra nom won pöün ewe ät. Nge lupwen a chapala won, inisin ewe ät a ekis pwichikar.
2KI 4:35 Mürin, Elisa a pwätä o fetal lon ewe rum, a pwal tösefälitä won ewe peet o chapala won ewe ät. Iwe, ewe ät a mwesi fän fisu o nennela.
2KI 4:36 Mürin, Elisa a körato Kehasi o üreni, “Kopwe körato ewe fin Shunem.” Iwe, Kehasi a körato neminewe. Nge lupwen a feito, Elisa a üreni, “Kopwe eki noum we ät.”
2KI 4:37 Iwe, neminewe a feito, a tütiu arun pechen Elisa o chapetiu lepwül. Mürin, a eki nöün we ät o feila.
2KI 4:38 Iwe, Elisa a liwinsefäliti Kilkal lupwen fansoun lengita lon ewe fanü. Nge lupwen ekewe soufos ra mwicheto ren, Elisa a üreni nöün we chon angang, “Kopwe isetä ewe nape mi watte won ewe ekkei o kuk suup fän iten ewe mwichen soufos.”
2KI 4:39 Nge eman me leir a feila lemäl pwe epwe kinikin iasai. Iwe, a küna efoch irä mi tö o fichielong chomong föün lepwülün üfan. Mürin, a liwinto o reikisirelong lon ewe suup, nge esap silei met sokun ekei föün irä.
2KI 4:40 Iwe, ra üfi ewe suup, pwe ekewe soufos repwe ün. Nge lupwen ra popuetä le ün, ra köpökütä, “Aramasen Kot, mi wor poison lon ewe suup.” Iwe, resap tongeni ün.
2KI 4:41 Nge Elisa a üra, “Oupwe uwato pilawa mi amas.” Iwe, lupwen ra uwato ren ewe pilawa a moneelong lon ewe nape o apasa, “Oupwe üfi ewe suup, pwe ekewe mwän repwe ün.” Iwe, esap chüen wor poison lon ewe suup.
2KI 4:42 Lon eu rän, eman mwän a feito seni Pal-salisa o uwato ren Elisa an mwen ua, rüe fochun pilawa seni föün parli, pwal ekoch umwun wiich mi kinikinifö. Iwe, Elisa a üreni nöün we chon angang, “Kopwe ngeni ekewe mwän ewe mongö pwe repwe mongö.”
2KI 4:43 Nge ewe chon angang a aisini, “Ifa usun, epwe naf ai üpwe amongöü ngeni ekei ipükü mwän ei mongö?” Nge Elisa a apasasefäli, “Kopwe ngeni ekewe mwän ewe mongö pwe repwe mongö. Pun iei alon ewe Samol mi Lapalap: Repwe mongö, nge epwe pwal wor lusur.”
2KI 4:44 Iei mine ewe chon angang a ngeniir ewe mongö. Iwe, ra mongö, nge a pwal wor lusur, usun ewe Samol mi Lapalap a fen apasa.
2KI 5:1 Iwe, Naeman ewe meilapen mwichen sounfiu nöün ewe kingen Siria i eman mwän mi itetekia me iteföüla me ren an samol, pun ewe Samol mi Lapalap a ewinna ekewe chon Siria ren Naeman. Ätei eman sounfiu mi fokun pwora, nge a rupun pwötür.
2KI 5:2 Nge a fis, pwe lupwen ekewe chon Siria ra kütta liaper lon Israel, ra uweela eman kükün nengin seni ei fanü. Ei nengin a angang ngeni pwülüen Naeman.
2KI 5:3 Iwe, ei nengin a kapas ngeni an samol fefin, “Amwo ai samol epwe feila ren ewe soufos mi nom lon Samaria. I epwe amoela an rupun pwötür.”
2KI 5:4 Lupwen Naeman a rong ei pworaus, a feila ren an samol ewe king o üreni, “Iön me iön usun alon ewe nengin seni ewe fanü Israel.”
2KI 5:5 Iwe, ewe kingen Siria a üreni Naeman, “Kopwe feila, nge ngang üpwe ngonuk echö toropwe kopwe uwala ren ewe kingen Israel.” Iei mine Naeman a feila, nge a pwal uwala ilik ngeröü föün moni silifer, wonongeröü föün moni kolt me engol üf mi mürina.
2KI 5:6 A pwal uwala ewe toropwe ren ewe kingen Israel. Iei masouen ewe toropwe, “Lupwen ei toropwe a toruk, kopwe silei pwe ngang üa tinala reöm nei na chon angang Naeman, pwe kopwe amoela an rupun pwötür.”
2KI 5:7 Nge lupwen ewe kingen Israel a aleani ewe toropwe, a kamwei üfan lon an rükö o üra, “Ifa usun, ngang Kot pwe üpwe tongeni niela eman o amanaua? Pwota a tinato rei ei mwän pwe üpwe amoela an rupun pwötür? A fat pwe a kütta eu popun pwe epwe fitikoko ngeniei.”
2KI 5:8 Nge lupwen ewe soufos Elisa a rong pwe ewe kingen Israel a kamwei üfan, a tinala pworaus ren o üreni, “Pwota ka kamwei üfom fän om rükö? Kopwe tinato rei ewe mwän, pwe epwe mefi pwe mi wor eman soufos lon Israel.”
2KI 5:9 Iei mine Naeman a feila fän waan oris me woken o üla ünükün asamalapen imwen Elisa.
2KI 5:10 Nge Elisa a tinala eman chon künö ren pwe epwe üreni, “Kopwe feila o tütü fän fisu lon ewe chanpupu Jortan. Iwe, inisum epwe kiliöch o limöch.”
2KI 5:11 Nge Naeman a feila fän an song o üra, “Üa fokun ekieki pwe ewe soufos epwe towu rei, epwe ütä o köri iten ewe Samol mi Lapalap an we Kot, epwe amwökütükütü pöün won ewe ia a rupun pwötür ie, pwe epwe mola.
2KI 5:12 Ifa usun, ekewe chanpupu Apana me Farpar mi nom lon Tamaskus resap mürina seni ekewe chanpupun Israel meinisin? Ifa usun, üsap tongeni tütü lor o limöch?” Iei mine Naeman a kul o feila fän an lingeringer.
2KI 5:13 Nge nöün kewe chon angang ra kaneto ren o üreni, “Semem, are ewe soufos epwe ürenuk pwe kopwe föri och mi weires, ifa usun, kosap föri? Nge pwota kosap mochen apwönüetä alon, lupwen a apasa, pwe kopwe chök tütü pwe kopwe limöch?”
2KI 5:14 Iei mine Naeman a feila ren ewe chanpupu Jortan o tütiu lon fän fisu, usun mine Elisa a kapas ngeni. Iwe, inisin Naeman a kiliöch o limöch usun chök inisin eman mönükol.
2KI 5:15 Mürin, Naeman me nöün kewe chon angang ra liwiniti Elisa. Iwe, a ütä fän mesan o üra, “Iei ükärän silei pwe esap wor eman Kot won unusen fanüfan lükün ewe Koten Israel. Kose mochen kopwe angei eu lifang seniei ngang noum chon angang.”
2KI 5:16 Nge Elisa a üra, “Mwo manauen ewe Samol mi Lapalap, ewe üa angang ngeni, üsap angei och senuk.” Iwe, Naeman a pesei ngeni pwe epwe angei, nge Elisa esap mochen.
2KI 5:17 Mürin, Naeman a üra, “Are kosap mochen angei eu lifang, üa tüngor ngonuk, pwe kopwe mwüt ngeniei pwe üpwe uwei och pwül ükükün uwosen ruoman aas. Pun seni ikenai ngang noum chon angang üsap chüen mochen eäni asoren kek ika och sokun asor ngeni eman kot lükün ewe Samol mi Lapalap.
2KI 5:18 Eu chök üa äleäl, pwe ewe Samol mi Lapalap epwe amusaeila, are üpwe eti ai samol le feila lon imwen ewe anü Rimon pwe epwe fel ikenan. Are üa amwöchätä pöün o eti le chapetiu me lon imwen ewe anü Rimon, ewe Samol mi Lapalap epwe amusala ei föför üa föri.”
2KI 5:19 Iwe, Elisa a üreni Naeman, “Kopwe feila fän kinamwe.” Mürin Naeman a feila. Nge lupwen a ekis chök toauala seni Elisa,
2KI 5:20 Kehasi nöün Elisa we chon angang a üra, “Ai samol a mwüt ngeni Naeman ewe re Siria pwe epwe feila, nge esap angei och seni mine a uwato. Mwo manauen ewe Samol mi Lapalap, üpwe säla mürin o angei och seni.”
2KI 5:21 Iei mine Kehasi a tapwela mürin Naeman. Nge lupwen Naeman a küna pwe eman a säto mürin, a tötiu seni waan woken pwe epwe churi. Iwe, a aisini, “Ifa usun, a öch pworausom?”
2KI 5:22 Kehasi a üreni, “Ewer, a öch pworausei. Ai samol a tiniei pwe üpwe ürenuk: Iei chök ruoman alüal seni ewe mwichen soufos ra feito rei seni chukuchukutän ewe fanü Efraim. Üa tüngor ngonuk, pwe kopwe ngeniir ülüngat ngeröü föün moni silifer me ruachö üf mi mürina.”
2KI 5:23 Nge Naeman a üreni, “Kose mochen kopwe angei wonongeröü föün moni silifer.” Iwe, Naeman a pesei Kehasi o uwalong wonongeröü föün moni silifer lon ruu tuk, a pwal angei ruachö üf mi mürina o iseniretä won ruoman nöün kewe chon angang. Iwe, ra akomwola fän ekewe pisek me mwen Kehasi.
2KI 5:24 Lupwen ra tori ewe chuk ia imwen Elisa a nom ie, Kehasi a angei seniir ekewe pisek o iseniir lon ewe imw. Mürin a tinala ekewe ruoman mwän, iwe, ra feila.
2KI 5:25 Nge Kehasi a tolong lon ewe imw o ütä fän mesen an samol. Iwe, Elisa a aisini, “Kehasi, ia ka feito me ie?” Kehasi a pälüeni, “Ngang noum chon angang üsap feila ekis.”
2KI 5:26 Nge Elisa a üreni, “Ifa usun, ngüni esap nom reöm, lupwen ewe mwän a tötiu seni waan woken pwe epwe sounuk? Ifa usun, iei fansoun pwe kopwe angei moni me üf, tanipin olif me wain, sip me kow, chon angang mwän me chon angang fefin?
2KI 5:27 Iei mine ewe rupun pwötür mi nom won Naeman epwe tökuk me mwirimwirum kana tori feilfeilachök.” Iwe, lupwen Kehasi a towu seni fän mesen Elisa, a rupun pwötür, pwe ünüchan a pwechepwech usun snow.
2KI 6:1 Iwe, lon eu rän ewe mwichen soufos mi nom fän nemenien Elisa ra üreni, “Ewe leni ia aia imweimw ie a kon kükün ngenikem.
2KI 6:2 Kopwe mwüt ngenikem pwe aipwe feila ren ewe chanpupu Jortan o pöküpök irä, pwe aipwe aüetä eu imw o nonom lon.” Iwe, Elisa a üreniir, “Oupwe feila.”
2KI 6:3 Mürin, eman me leir a üra, “Kose mochen kopwe etikem.” Elisa a üra, “Ewer, üpwe etikemi.”
2KI 6:4 Iei mine a etiir. Iwe, lupwen ra tori ewe chanpupu Jortan, ra pöküpök irä.
2KI 6:5 Nge lupwen eman a pökü efoch irä, mächän nöün kouk a turulong lon ewe koluk. Iwe, a puchör, “Osupwangei, ai samol, ewe kouk üa chök tüngor seni eman.”
2KI 6:6 Mürin, Elisa a aisini, “Ia a turutiu ie?” Nge lupwen a aiti ngeni ewe ia a turutiu ie, Elisa a pökü efoch amwüch o moneelong lon awenewenen ewe ia a turutiu ie, pwe mächän ewe kouk a piasetä.
2KI 6:7 Iwe, Elisa a üra, “Kopwe angei.” Iei mine a aitiewu pöün o angei mächän nöün we kouk.
2KI 6:8 Lon eu rän, lupwen ewe kingen Siria a maun ngeni Israel, a pwüngüpwüngfengen me ren nöün kewe meilap o üra, “Lon enan me enan leni üpwe nom ie me ai we mwichen sounfiu.”
2KI 6:9 Nge Elisa a tinala pworaus ren ewe kingen Israel, “Kopwe afäluk pwe kosap feila lon enan leni, pun ekewe chon Siria ra feitiu o op ikenan.”
2KI 6:10 Iei mine ewe kingen Israel a tinala pworaus ren ekewe aramas mi nom lon ewe leni ia Elisa a kapas ngeni usun, pwe repwe afäliir. Fän chomong Elisa a titi pworaus ngeni ewe king, pwe a tongeni afäli me lon ewe leni, pwe esap feiengau.
2KI 6:11 Iwe, ewe kingen Siria a fokun riaföü pokiten ei lapalap. A körifengeni nöün kewe meilap o üreniir, “Oupwe pwäri ngeniei iö me leimi pelien ewe kingen Israel.”
2KI 6:12 Nge eman me leir a üreni, “Esap wor eman me leim, ai samol me ai king. Nge ewe soufos Elisa mi nom lon Israel a pwäri ngeni ewe kingen Israel om kewe kapas, ka apasa me lon om rumwen annut.”
2KI 6:13 Iwe, ewe kingen Siria a üra, “Oupwe feila o kütta ia Elisa a nom ie, pwe üpwe tinala ekoch pwe repwe turufi.” Iwe, eman a asile ngeni pwe Elisa a nom lon Totan.
2KI 6:14 Iei mine ewe king a tinala eu mwichemongen sounfiu fiti oris me woken. Iwe, ra feila lepwin o pwelifeili ewe telinimw.
2KI 6:15 Lupwen nöün Elisa we chon angang a pwätä lesosorusich o towu lükün, a küna eu mwichen sounfiu mi wawa oris me woken, ra pwelifeili ewe telinimw. Iwe, ewe chon angang a üreni Elisa, “Sipwe feiengau, ai samol. Met sipwe föri?”
2KI 6:16 Nge Elisa a üreni, “Kosap niuokus, pun chokewe mi nom rech ra kon chomong seni chokewe mi nom rer.”
2KI 6:17 Mürin, Elisa a iotek, “Ai Samol mi Lapalap, üa tüngor ngonuk, kopwe aneneloi mesen nei ei chon angang pwe epwe küna.” Iei mine ewe Samol mi Lapalap a aneneloi mesen ewe alüal. Iwe, a küna pwe ewe chuk a kula ren oris me woken mi pulopulen ekkei, ra nom pwelin ünükün Elisa.
2KI 6:18 Iwe, lupwen ekewe chon Siria ra feitiu pwe repwe maun, Elisa a iotek, “Ai Samol mi Lapalap, üa tüngor ngonuk pwe kopwe achuna ekei aramas.” Iei mine ewe Samol mi Lapalap a achuneer, usun Elisa a tüngor lon an iotek.
2KI 6:19 Mürin, Elisa a feila ren ekewe sounfiun Siria o üreniir, “Esap iei ewe al, esap pwal iei ewe telinimw. Oupwe tapweto müri, pwe üpwe emwenikemiila ren ewe mwän oua kütta.” Iwe, Elisa a emwenirela Samaria.
2KI 6:20 Lon ewe chök otun, lupwen ra tolong lon ewe telinimw Samaria, Elisa a iotek, “Ai Samol mi Lapalap, kopwe aneneloi mesen ekei aramas.” Iei mine ewe Samol mi Lapalap a aneneloi meser, iwe ra küna pwe ra nom lukalapen ewe telinimw Samaria.
2KI 6:21 Lupwen ewe kingen Israel a küna ekewe sounfiun Siria, a aisini Elisa, “Semei, ifa usun, üpwe nirela?”
2KI 6:22 Nge Elisa a pälüeni, “Kosap nirela, pun kosap fen niela chokewe ka liapeniir lon maun. Kopwe amongöniir pilawa o aünüür koluk, pwe repwe mongö o ün, mürin repwe liwiniti ar samol.”
2KI 6:23 Iei mine ewe kingen Israel a amolätä eu kametip mi watte fän iter. Nge lupwen ra wes me mongö o ün, a tinirela. Iwe, ra liwiniti ar samol. Seni ei fansoun, ekewe chon Siria resap chüen tolong lon fanüen chon Israel pwe repwe küt liaper.
2KI 6:24 Iwe, ekoch fansoun mürin, Penhatat ewe kingen Siria a amwichafengeni nöün kewe sounfiu meinisin. Ra feila o pwelifeili Samaria fän pisekin maun.
2KI 6:25 Pokiten ra pwelifeili ewe telinimw Samaria fansoun langatam, a fis eu lengita mi watte me lon, pwe liwinin möküren eman aas a ükükün walik föün moni silifer, nge liwinin esop paun omun lisom a ükükün limu föün moni silifer.
2KI 6:26 Nge lupwen ewe kingen Israel a pwerela won tittin ewe telinimw, eman fefin a siö ngeni o üreni, “Kopwe alisiei, ai samol me ai king.”
2KI 6:27 Ewe king a üreni, “Are ewe Samol mi Lapalap esap alisuk, met sokun alilis üpwe alisi ngonuk? Üsap tongeni alisuk seni ewe lenien wichiwich umwun wiich ika seni ewe lenien üchüch wain.”
2KI 6:28 Mürin, ewe king a aisini ewe fefin, “Met om riaföü?” Nge neminewe a pälüeni, “Ekoch rän a la ei fefin a üreniei pwe üpwe mwütätä nei ät pwe aipwe ochei, nge sorotan aipwap ochei nöün.
2KI 6:29 Iei mine aia kuku nei ät o ochei. Nge sorotän ewe rän üa üreni neminewe pwe epwe mwütätä nöün ät pwe aipwe ochei, nge a aopala nöün we ät.”
2KI 6:30 Lupwen ewe king a rong än neminewe kewe kapas, a kamwei üfan fän an letipeta. Iwe, a chök pwerela won tittin ewe telinimw, nge ekewe aramas ra küna pwe a üföüf echö üf seni tuk fän üfan.
2KI 6:31 Iwe, ewe king a üra, “Amwo Kot epwe nieila, are üen Elisa nöün Safat we mwän esap pöküpök ikenai.”
2KI 6:32 Mürin, ewe king a tinala eman mwän pwe epwe angei Elisa. Lon ei otun, Elisa a mot lon imwan, nge ekewe souakom ra pwal mot ren. Nge me mwen än ewe chon künö war, Elisa a üreni ekewe souakom, “Ifa usun, oua küna ewe chon niela aramas, a fen tinato eman chon künö pwe epwe pökü üei? Oupwe pii pwe lupwen epwe war, oupwe apüngala ewe asam o achacha ngeni. Iei püsin ewe king a tapweto mürin.”
2KI 6:33 Nge lupwen Elisa a chüen fos ngeni ekewe souakom, ewe king a war o üra, “Ei riaföü a feito seni ewe Samol mi Lapalap. Pwota üpwe chüen witiwit ngeni ewe Samol mi Lapalap, pwe epwe alisikem?”
2KI 7:1 Elisa a pälüeni, “Oupwe aüselinga alon ewe Samol mi Lapalap. Lesor lon ei chök otun oua tongeni kamö lon ei telinimw Samaria engol paun pilawa mi amas o mürina, ika rüe paun föün parli won ükükün eföü föün moni silifer.”
2KI 7:2 Mürin, ewe meilap, ätewe mi wisen tümwünü ewe king, a üreni Elisa, “Inamwo are ewe Samol mi Lapalap epwe püsin suki asammwachon läng o tinato mongö, ei mettoch esap tongeni fis.” Nge Elisa a üreni, “Kopwe püsin küna ren mesom, nge kosap mongö seni.”
2KI 7:3 Iwe, a wor föman mwän mi rupun pwötür, ra nom lükün asamalapen ewe tittin Samaria. Ra kapasfengen lefiler, “Pwota sipwe chök momot ikei tori sipwe mäla?
2KI 7:4 Are sa filätä pwe sipwe tolong lon ewe telinimw, kich sipwe mäla ikenan, pun a wor lengita lon. Nge ika sipwe nom ikei, sipwe pwal mäla. Iei mine sipwe feila lon lenien sounfiun Siria. Are repwe amanauakich, sipwe manau, nge are repwe nikich, sipwe chök mäla.”
2KI 7:5 Iei mine ra ütä lekuniolupwin o feila lon lenien ekewe sounfiun Siria. Nge lupwen ra tori lesopun lenier we, esap fokun wor eman a nom ikenan.
2KI 7:6 Pun ewe Samol a föri pwe ekewe sounfiun Siria ra rongorong chopuchopun woken me oris, pwal akürangen eu mwichen sounfiu mi watte. Iei mine ra kapasfengen lefiler, “Ewe kingen Israel a möni ekewe kingen chon Hit me ekewe kingen Isip fiti nöür sounfiu, pwe repwe feito o maun ngenikich.”
2KI 7:7 Iei mine ra süla lekuniolupwin o likitala imwer imw mangaku, nöür oris me nöür aas. Ra chök likitala lenier o kütta manauer.
2KI 7:8 Nge lupwen ekewe mi rupun pwötür ra tori lesopun lenien ekewe sounfiu, ra tolong lon eu imw mangaku. Ra mongö o ün, ra pwal angei silifer me kolt me üf, ra feila o aopeer. Mürin, ra liwinto o tolong lon pwal eu imw mangaku, ra angei ekewe pisek lon, ra feila o aopeer.
2KI 7:9 Mürin, ekewe mi rupun pwötür ra kapasfengen lefiler, “Esap pwüng mine sa föri. Ei rän eu ränin pworaus mi mürina. Are sa ekieki ngenikich echök o witiwit tori lesosor, feiengau epwe torikich. Iei mine sipwe feila iei chök o apworausa ei pworaus ngeni nöün ewe king kewe meilapen sounfiu.”
2KI 7:10 Iei mine ra feito ren tittin ewe telinimw o kökkötä ren ekewe chon masen ewe asamalap, “Äm aia tori lenien ekewe sounfiun Siria, nge aisap küna eman ika rongorong mwelien eman. A chök wor oris me aas mi föfö, pwal ekewe imw mangaku.”
2KI 7:11 Mürin, ekewe chon mas ra kökkölong lon ewe telinimw o apworausa ei pworaus, ra pwal aronga ngeni chon leimwen ewe king.
2KI 7:12 Iwe, ewe king a pwätä lon ewe chök pwin o üreni nöün kewe nöüwis, “Üpwe ürenikemi mine ekewe chon Siria ra ekiekin föri ngenikich. Ra silei pwe kich sa echik. Iei mine ra likitala lenier, ra feila o op lon ewe fanü mi amassawa. Pun ra ekieki, pwe lupwen sipwe towu seni ewe telinimw o küt mongö, repwe turumanaueekich o tolong lon ewe telinimw.”
2KI 7:13 Nge eman me lein ekewe nöüwis a üra, “Sipwe tinala ekoch mwän, repwe angei limman oris seni ekewe mi chüen manau, pwe repwe feila o pii mine a fis. Pun ekewe aramas mi chüen manau ikei, repwe pwal feiengau usun chök chokewe mi fen mäla.”
2KI 7:14 Iei mine ra filätä ekoch mwän, nge ewe king a tinirela won ruofoch woken fiti oris, pwe repwe atapwa ekewe sounfiun Siria o pii mine a fis.
2KI 7:15 Iei mine ra atapwa ekewe sounfiun Siria tori ewe chanpupu Jortan. Nge won ewe al ra küna üf me pisek ekewe sounfiun Siria ra aturätiu, lupwen ra müttir le sü. Iwe, ekewe chon künö ra liwinto o apworausa ngeni ewe king mine ra küna.
2KI 7:16 Mürin, ekewe aramas ra towu seni ewe telinimw o cheri ewe lenien sounfiun Siria, pwe repwe angang pisek. Iwe, liwinin engol paun pilawa mi amas o mürina, ika rüe paun föün parli ükükün eföü föün moni silifer, usun ewe Samol mi Lapalap a fen apasa.
2KI 7:17 Nge ewe king a awisa ewe meilap, ätewe mi wisen tümwünü ewe king, pwe epwe tümwünü asamalapen tittin ewe telinimw. Iwe, ekewe aramas ra ipwetä won me lon ewe asamalap pwe a mäla, usun ewe soufos Elisa a fen apasa, lupwen ewe king a feito ren.
2KI 7:18 Pun lupwen Elisa a üreni ewe king, pwe lesor lon ei chök otun liwinin engol paun pilawa mi amas o mürina, ika rüe paun föün parli epwe ükükün eföü föün moni silifer me lon ei telinimw Samaria,
2KI 7:19 ewe meilap a pälüeni Elisa, “Inamwo are ewe Samol mi Lapalap epwe püsin suki asammwachon läng o tinato mongö, ei mettoch esap tongeni fis.” Nge Elisa a üreni, “Kopwe püsin küna ren mesom, nge kosap mongö seni.”
2KI 7:20 Iwe, iei usun a chök fis ngeni ewe meilap, pun ekewe aramas ra ipwetä won me leasamalapen tittin ewe telinimw pwe a mäla.
2KI 8:1 Iwe, me lom Elisa a üreni ewe fin Shunem, mine nöün ewe ät i a amanaua, “Kopwe feila ämi me chon leimwom, kopwe siamü ia ka tongeni nom ie. Pun ewe Samol mi Lapalap epwe awarato eu lengita won ei fanü lon ükükün fisu ier.”
2KI 8:2 Iei mine ewe fefin a föri usun mine Elisa a üreni. Ra feila me chon leimwan o siamü lon fanüen chon Filistia lon ükükün fisu ier.
2KI 8:3 Nge wesin ekewe fisu ier, lupwen ewe fefin a liwinto seni fanüen chon Filistia, a feila ren ewe king o tüngorei pwe epwe angeesefäli imwan me fanüan.
2KI 8:4 Lon ei otun ewe king a kakapas ngeni Kehasi nöün Elisa we chon angang o üreni, “Kopwe apworausa ngeniei ekewe manaman meinisin mi amwarar Elisa a föri.”
2KI 8:5 Nge lupwen Kehasi a apworausa ngeni ewe king usun än Elisa amanaua ewe ät, lon ei chök otun ewe fefin, mine nöün ewe ät Elisa a amanaua, a feito ren ewe king pwe epwe tüngorei an epwe angeesefäli imwan me fanüan. Iwe, Kehasi a üra, “Ai samol me ai king, iei i ewe fefin, pwal iei nöün we ät Elisa a amanaua.”
2KI 8:6 Iwe, lupwen ewe king a aisini ewe fefin are mi let ei pworaus, neminewe a alleta. Iei mine ewe king a filätä eman nöüwis fän iten neminewe o üreni pwe epwe aliwinisefäli meinisin mine än ewe fefin fiti liwinin uän fanüan seni ewe fansoun a feila seni ewe fanü tori ei fansoun.
2KI 8:7 Iwe, Elisa a feila Tamaskus. Lon ei otun Penhatat ewe kingen Siria a samau. Iwe, lupwen ra üreni ewe king pwe Elisa a feito,
2KI 8:8 ewe king a üreni eman lein nöün kewe nöüwis itan Hasael, “Kopwe angei eu lifang o feila churi Elisa, kopwe tüngor ngeni pwe epwe aisini ewe Samol mi Lapalap ika üpwe pöchökül seni ai samau.”
2KI 8:9 Iei mine Hasael a feila pwe epwe churi Elisa o uwala eu lifang ren, sokopaten pisek seni Tamaskus, ükükün uwosen faik kamel. Nge lupwen a feito ren Elisa, a üreni, “Noum mwän Penhatat ewe kingen Siria a tinieito reöm, pwe üpwe aisinuk ika epwe pöchökül seni an samau.”
2KI 8:10 Elisa a üreni, “Kopwe feila o üreni pwe epwe pöchökül. Nge ewe Samol mi Lapalap a pwäri ngeniei pwe epwe mäla.”
2KI 8:11 Iwe, Elisa a siwil wowon o newenewen ngeni Hasael tori Hasael a säw. Mürin Elisa a kechü.
2KI 8:12 Nge Hasael a ais, “Ai samol, pwota ka kechü?” Elisa a pälüeni, “Pokiten üa silei ekewe föför mi ngau kopwe föri ngeni ekewe aramasen Israel. Kopwe kenala ar kewe leni mi pöchökül o niela nöür kewe alüal ren ketilas, kopwe pwal apunätiu nöür kewe semirit, pwe repwe tatakis, o tineni luken ekewe fefin mi pwopwo.”
2KI 8:13 Iwe, Hasael a ais, “Met aücheai ngang noum chon angang mi usun chök eman kolak, pwe üpwe föri ekei sokun föför mi amwarar?” Nge Elisa a pälüeni, “Ewe Samol mi Lapalap a pwäri ngeniei pwe kopwe kingen Siria.”
2KI 8:14 Mürin, Hasael a feil seni Elisa o liwiniti Penhatat. Iwe, Penhatat a aisini, “Met Elisa a ürenuk?” Hasael a pälüeni, “A üreniei pwe kopwe pöchökülsefäl.”
2KI 8:15 Nge sorotän ewe rän Hasael a angei echö pilangket, a achöchönü o emeresala won mesen ewe king pwe a mäla. Iwe, Hasael a siwili Penhatat lon wisan wisen king.
2KI 8:16 Iwe, lon alimuen ierin mwün Joram nöün Ahap we mwän ewe kingen Israel, Jehoram nöün Jehosafat we mwän a tolong lon wisan wisen king o nemeni Juta,
2KI 8:17 lupwen a ierini ilik me ruu. A nom lon Jerusalem o nemenem lon ükükün walu ier.
2KI 8:18 Iwe, a tipis usun ekewe kingen Israel o föföringau usun chon leimwen Ahap, pun a pwülüeni nöün Ahap we fefin. Iwe, a föri mine a ngau me fän mesen ewe Samol mi Lapalap.
2KI 8:19 Nge ewe Samol mi Lapalap esap mochen ataela Juta fän iten nöün we chon angang Tafit, pun a pwon ngeni pwe epwe wor eman mwirimwirin epwe nemenem fansoun meinisin.
2KI 8:20 Iwe, lupwen fansoun mwün Jehoram, ekewe chon Etom ra ü ngeni Juta o seikätä püsin eman ar king.
2KI 8:21 Mürin, Jehoram fiti waan kewe woken meinisin ra feila tori Sair. Ikenan ekewe sounfiun Etom ra pwelifeiliir. Nge Jehoram me nöün kewe meilapen waan kewe woken ra sü seniir lepwin, pwal nöün kewe sounfiu ra süla ngeni lenier.
2KI 8:22 Iei usun chon Etom ra ütä, nge resap chüen nom fän nemenien Juta tori ikenai. Lon ewe chök fansoun Lipna a pwal ütä won mwün.
2KI 8:23 Nge lusun pworausen än Jehoram föför meinisin a mak lon puken uruwon ekewe kingen Juta.
2KI 8:24 Iwe, Jehoram a mäla, nge ra peiaseni ren an kewe lewo lon ewe telinimwen Tafit. Nge Ahasia nöün we mwän a siwili lon wisan wisen king.
2KI 8:25 Iwe, lon engol me ruuen ierin mwün Joram nöün Ahap we mwän ewe kingen Israel, Ahasia nöün Jehoram we a tolong lon wisan wisen king o nemeni Juta,
2KI 8:26 lupwen a ierini rüe me ruu. A nom lon Jerusalem o nemenem lon ükükün eu ier. Iten inan we Atalia, neminewe i nöün nöün Omri fefin, nge Omri i ewe kingen Israel.
2KI 8:27 Ahasia a tipis usun chon leimwen Ahap o föri mine a ngau me fän mesen ewe Samol mi Lapalap. Ahasia a chök föri usun mine ir ra föri, pun a pwülüeni eman fefin seni chon leimwen Ahap.
2KI 8:28 Iwe, ewe king Ahasia a eti ewe king Joram nöün Ahap we mwän le maun ngeni Hasael ewe kingen Siria me lon Ramot-kiliat. Ikenan ekewe sounfiun Siria ra akinasa Joram.
2KI 8:29 Iwe, ewe king Joram a liwinsefäl ngeni Jesrel, pwe epwe onoson o pöchökülsefäl seni kinasan kewe me ren chon Siria. Nge Ahasia ewe kingen Juta a feila Jesrel, pwe epwe churi Joram, pun a samau.
2KI 9:1 Iwe, ewe soufos Elisa a köri eman lein ekewe soufos o üreni, “Kopwe anükünükuk, kopwe angei ei rumeen lö o feila Ramot-kiliat.
2KI 9:2 Nge lupwen ka tori, kopwe kütta Jehu nöün Jehosafat we mwän, nge Jehosafat nöün Nimsi. Kopwe tolong ren o tüngor ngeni pwe epwe ütä seni lein chienan. Mürin, kopwe emwenalong lon eu rumwen lon.
2KI 9:3 Iwe, kopwe angei ei rumeen lö o ninätiu won möküran o apasa, ‘Iei alon ewe Samol mi Lapalap: Üa epituk pwe kopwe king lon Israel.’ Mürin, kopwe suki asamen ewe rum o süla, nge kosap mang.”
2KI 9:4 Iei mine ewe soufos alüal a feila Ramot-kiliat.
2KI 9:5 Nge lupwen a tori, a küna pwe ekewe meilapen sounfiu ra mwichefengen. Iwe, ewe soufos a üra, “Mi wor eu pworaus ngonuk, en meilap.” Nge Jehu a ais, “Ngeni iö me leim?” Ätewe a üra, “Ngeni en, meilap.”
2KI 9:6 Mürin, Jehu a ütä o tolong lon ewe imw. Nge ewe soufos alüal a ninätiu ewe lö won möküran o üreni, “Iei alon ewe Samol mi Lapalap ewe Koten Israel: Üa epituk pwe kopwe kingen nei kewe aramas o nemeni Israel.
2KI 9:7 Kopwe niela chon leimwen Ahap om we samol, pwe ngang üpwe ngeni Isipel chappen an niela nei kewe soufos, pwal chappen an niela nei kewe chon angang meinisin.
2KI 9:8 Pun unusen chon leimwen Ahap repwe rosola, nge üpwe ärala nöün mwän meinisin seni kükün tori watte me lon Israel.
2KI 9:9 Iwe, üpwe föri ngeni chon leimwen Ahap usun mine üa föri ngeni chon leimwen Jeropoam nöün Nepat we mwän, pwal ngeni chon leimwen Paasa nöün Ahia we mwän.
2KI 9:10 Kolak repwe ochei Isipel me lon kinikinin fanüen Jesrel, nge esap wor eman epwe peiaseni.” Mürin än ewe soufos alüal apasa ekei kapas, a suki asamen ewe rum o süla.
2KI 9:11 Iwe, lupwen Jehu a towu ren chienan kewe meilap, eman me leir a aisini, “A öch pworausom? Pwota ei alüal mi umwes a feito reöm?” Nge Jehu a pälüeniir, “Ämi oua silei ewe alüal me mine a apasa.”
2KI 9:12 Nge ir ra üra, “Apwi, äm aisap silei. Kopwe ürenikem iei.” Iwe, Jehu a üreniir, “Iei usun mine a eäni kapas ngeniei, ‘Iei alon ewe Samol mi Lapalap: Üpwe epituk pwe kopwe kingen Israel.’”
2KI 9:13 Mürin, ekewe meilap ra müttir angei üfer owokot o emeresirela won aeuin foson ewe latö pwe epwe ütä lon, ra pwal ettiki rappwa o kökkö, “Jehu a king.”
2KI 9:14 Mürin, Jehu nöün Jehosafat we mwän, nge Jehosafat nöün Nimsi mwän, a rawangauei Joram. Lon ei fansoun Joram me ekewe aramasen Israel meinisin ra peni Ramot-kiliat, pun Hasael ewe kingen Siria a maun ngeni.
2KI 9:15 Nge ewe king Joram a fen liwinsefäl ngeni Jesrel, pwe epwe onoson o pöchökülsefäl seni kinasan kewe me ren chon Siria, lupwen an maun ngeni Hasael ewe kingen Siria. Iwe, Jehu a üra, “Are oua tipeeu ngeni pwe üpwe king, oupwe pii pwe esap wor eman epwe sü seni ei telinimw o feila apworausa ei pworaus me lon Jesrel.”
2KI 9:16 Mürin, Jehu a tötä won waan woken o feila Jesrel, pun Joram a nom ikenan. Nge Ahasia ewe kingen Juta a pwal feito Jesrel pwe epwe churi Joram.
2KI 9:17 Iwe, ewe chon mas a ütä won ewe imw tekia lon Jesrel o küna Jehu me an mwich pwe ra feito. A üra, “Üa küna eu mwich a feito.” Joram a üreni, “Oupwe tinala eman chon wawa oris, pwe epwe churiir o aisiniir, ika ra feito fän kinamwe?”
2KI 9:18 Iei mine eman chon wawa oris a feila pwe epwe churiir o apasa, “Ewe king a mochen silei, ika oua feito fän kinamwe.” Nge Jehu a üreni, “Met wisom pwe kopwe ais usun kinamwe? Kopwe kul o tapweto müri.” Iwe, ewe chon mas a apworausa, “Ewe chon künö a toriir, nge esap liwinsefälito.”
2KI 9:19 Mürin, ewe king a tinala aruomanün chon wawa oris. Ätewe a tori ewe mwich o üra, “Ewe king a mochen silei, ika oua feito fän kinamwe.” Nge Jehu a pälüeni, “Met wisom pwe kopwe ais usun kinamwe? Kopwe kul o tapweto müri.”
2KI 9:20 Iwe, ewe chon mas a apworausa, “Ätewe a toriir, nge esap pwal liwinsefälito. Iwe, lapalapen chon uwei ei sai a usun chök lapalapen Jehu nöün Nimsi we mwän, pun an sai a eniweniw.”
2KI 9:21 Iwe, Joram a üra, “Oupwe amolätä wai woken.” Ra amolätä waan woken. Mürin, Joram ewe kingen Israel me Ahasia ewe kingen Juta ra sai won en me waan woken, pwe repwe churi Jehu. Iwe, ra churi Jehu won fanüen Napot ewe re Jesrel.
2KI 9:22 Nge lupwen Joram a küna Jehu, a aisini, “Ifa usun, Jehu, ka feito fän kinamwe?” Jehu a pälüeni, “Ifa usun, a tongeni fis kinamwe, are Isipel inom we a chök föföri ekewe angangen anümwäl me angangen roong?”
2KI 9:23 Mürin, Joram a akulu waan woken o sü, nge a kökkö ngeni Ahasia, “A fis rawangau, Ahasia.”
2KI 9:24 Nge Jehu a emeia an esefich fän pöchökül o peki lefilen pöüköröön Joram, pwe ewe föün esefich a küw föün ngasangasan. Iwe, a turula won waan woken o mäla.
2KI 9:25 Mürin, Jehu a üreni Pitkar nöün chon alilis, “Kopwe angei inisin Joram o moneela won fanüen Napot ewe re Jesrel. Kopwe chechemeni ewe fansoun en me ngang sa saipök me mürin Ahap saman we, lupwen ewe Samol mi Lapalap a eäni ei kapasen afeiengau usun,
2KI 9:26 ‘Nänew üa fokun küna chan Napot me nöün kewe mwän mi niiniila. Üpwe ngeni Ahap chappen an föför me won ei chök fanü.’ Iei mine kopwe angei inisin Joram o moneela won ei fanü, pwe epwe pwönüetä mine ewe Samol mi Lapalap a fen eäni pwon.”
2KI 9:27 Lupwen Ahasia ewe kingen Juta a küna mine a fis, a süla ngeni ewe telinimw Pet-hakan. Nge Jehu a tapweri o kökkö, “Oupwe pwal niela ätena.” Iwe, ra peki me lon waan woken, lupwen a sä won ewe al mi feitä Kur arap ngeni ewe telinimw Ipleam. Nge Ahasia a süla Mekito o mäla ikenan.
2KI 9:28 Iwe, nöün chon angang ra uwala Ahasia won efoch woken Jerusalem o peiaseni lon peiasan ren an kewe lewo lon ewe telinimwen Tafit.
2KI 9:29 Iwe, Ahasia a tolong lon wisan wisen king lon Juta lon engol me euin ierin mwün Joram nöün Ahap we mwän ewe kingen Israel.
2KI 9:30 Mürin, Jehu a feila Jesrel. Lupwen Isipel a rongorong usun, a achola ünükün föün mesan, a foutei won möküran o nenewu seni eu asammwachon imwan.
2KI 9:31 Iwe, lupwen Jehu a tolong lon ewe asamalap, Isipel a kötiu, “Ifa usun, ka feito fän kinamwe, en Simri, en mi niela om samol?”
2KI 9:32 Nge Jehu a netä ren ewe asammwacho o kökkötä, “Iö a nom won peki, iö a nom won peki?” Iwe, ruoman ika ülüman chon angang lon imwen king ra nenetiu ren.
2KI 9:33 Jehu a üreniir, “Oupwe aturätiu nemina.” Iei mine ra aturätiu Isipel, nge ekis chan a sükütä won ewe tit pwal won ekewe oris, lupwen ra ipweri inisin.
2KI 9:34 Iwe, Jehu a tolong lon imwen ewe king, a mongö o ün. Mürin a üra, “Oupwe pii ewe fefin mi anümamau o peiaseni, pun i nöün eman king.”
2KI 9:35 Nge lupwen ra feila pwe repwe peiaseni, ra chök küna pösökün möküran, chün pechen me chün pöün.
2KI 9:36 Iwe, lupwen ra liwinto ren Jehu o üreni mine a fis, a üra, “Iei usun mine ewe Samol mi Lapalap a fen apasa ngeni nöün we chon angang Elias seni Tispe, pwe kolak repwe ochei fituken Isipel me lon kinikinin fanüen Jesrel.
2KI 9:37 Nge somän Isipel epwe toropas usun koiasi won kinikinin fanüen Jesrel, pwe esor eman epwe tongeni apasa: Iei i Isipel.”
2KI 10:1 Iwe, a wor ükükün fik nöün Ahap mwän me lon Samaria. Jehu a makela toropwe ren ekewe sounemenemen ewe telinimw Samaria, ren ekewe souakom, pwal ren ekewe mi foleni nöün Ahap kewe mwän. Iei usun mine Jehu a makei lon ekewe toropwe,
2KI 10:2 “Ra nom remi, nöün ämi we king kewe mwän, a pwal wor remi woken me oris, pwal telinimw mi pöchökül tittir me pisekin maun. Lon ewe otun, lupwen ei toropwe a torikemi,
2KI 10:3 oupwe filätä eman me lein nöün ämi we king kewe mwän, ätewe mi mürina o pwora seniir meinisin, oupwe seikätä lon wisen king o maun fän itan.”
2KI 10:4 Nge ekewe sounemenem ra fokun niuokus o üra, “Nengeni, ekewe ruoman king resap tongeni fiu ngeni Jehu. Epwe ifa usun ach sipwe tongeni fiu ngeni?”
2KI 10:5 Iei mine ätewe mi wisen nemeni imwen ewe king me ätewe mi wisen nemeni ewe telinimw, pwal ekewe souakom me ekewe mi foleni nöün Ahap kewe mwän ra titila ren Jehu o üra, “Äm aia noum chon angang, aipwe föri meinisin mine kopwe ürenikem. Äm aisap seikätä eman pwe epwe king. Kopwe chök föri mine a mürina me reöm.”
2KI 10:6 Mürin, Jehu a makela rer aruachön toropwe. Iei usun mine a makei lon, “Are oua nom won peki o molotä ämi oupwe aleasochisiei, oupwe pökü üen nöün ämi we king kewe mwän o uwato rei me lon Jesrel lesor lon ei chök otun.” Iwe, nöün ewe king kewe mwän ükükün fik ra nom ren mwän mi iteföüla me lon ewe telinimw, pun ra foleniir.
2KI 10:7 Iwe, lupwen ewe toropwe a toriir, ra angei nöün ewe king kewe fik mwän o nirela, nge ra anomu mökürer lon chüük o tinirela Jesrel ren Jehu.
2KI 10:8 Nge lupwen ewe chon künö a feito ren Jehu o üreni pwe ra uwato möküren nöün ewe king kewe mwän, Jehu a üra, “Oupwe iseniir lon ruu ioi leasamalapen tittin ewe telinimw tori lesosor.”
2KI 10:9 Iwe, lon ewe sosoran, Jehu a feila ren ewe asamalap o üreni ekewe aramas meinisin, “Ämi ousap tipis. Ngang ätewe mi rawangauei king Joram o niela. Nge iö a niela ätekei meinisin?
2KI 10:10 Iei oupwe mefi pwe än ewe Samol mi Lapalap kapas meinisin usun chon leimwen Ahap ra pwönüetä. Pun ewe Samol mi Lapalap a föri usun mine nöün we chon angang Elias a apasa fän alon.”
2KI 10:11 Mürin, Jehu a niela chokewe meinisin mi chüen manau seni chon leimwen Ahap me lon Jesrel, pwal nöün kewe meilap mi iteföüla, chiechian kewe me nöün kewe souasor, tori esap chüen wor eman mi manau me leir.
2KI 10:12 Mürin, Jehu a towu seni Jesrel o feila Samaria. Nge lupwen a nom won ewe al o kan ngeni Pet-eket ewe lenien chon fofol sip,
2KI 10:13 Jehu a churi märärin Ahasia ewe kingen Juta o aisiniir, “Ämi märärin iö?” Nge ir ra pälüeni, “Äm märärin Ahasia. Äm aia feito, pwe aipwe churi än ewe king famili me än kiwin Isipel famili.”
2KI 10:14 Nge Jehu a üreni ekewe mwän mi eti, “Oupwe turumanaueer.” Iwe, ra turumanaueer o nirela ükükün faik me ruoman mwän ünükün ewe chönüttu lon Pet-eket. Jehu esap amanaua eman me leir.
2KI 10:15 Iwe, lupwen Jehu a feila seni ikenan, a churi Jonatap nöün Rekap we mwän, pun a feito pwe epwe churi. Jehu a kapong ngeni o aisini, “Ifa usun, lelukom a wenechar ngeniei usun lelukei ngonuk?” Jonatap a pälüeni, “Ewer.” Mürin, Jehu a üreni, “Ika a iei usun, sipwe kamwöchüpöüfengen.” Iei mine ra kamwöchüpöüfengen, nge Jehu a amwöchätä, pwe epwe mot ren won waan woken.
2KI 10:16 Iwe, Jehu a üreni, “Kopwe etiei pwe kopwe küna ai tiliken fän iten ewe Samol mi Lapalap.” Iwe, a eti Jehu le sai won waan woken.
2KI 10:17 Nge lupwen ra tori Samaria, Jehu a niela meinisin mi chüen manau seni chon leimwen Ahap, tori a aroserela usun Elias a apasa fän alon ewe Samol mi Lapalap.
2KI 10:18 Mürin, Jehu a achufengeni ekewe aramasen Samaria meinisin o üreniir, “E fen kükün än king Ahap angang ngeni ewe anü Paal. Nge ngang epwe kon watte ai angang ngeni.
2KI 10:19 Iei mine oupwe körato rei nöün Paal kewe soufos meinisin, ekewe chon fel ngeni, pwal nöün kewe souasor meinisin. Esap tiwela mwo eman, pun a wor eu asor mi watte üpwe eäni ngeni ewe anü Paal. Iteiten eman me eman mi tiwela epwe mäla.” Nge Jehu a föri ei fän rawangau, pwe epwe arosala chokewe meinisin mi fel ngeni ewe anü Paal.
2KI 10:20 Mürin, Jehu a allük, “Oupwe asilefeili eu mwich mi pin fän iten Paal.” Iwe, ra asilefeili ei pworaus.
2KI 10:21 Jehu a pwal tinala chon künö lemenen Israel meinisin, pwe repwe körato ekewe chon fel ngeni ewe anü Paal meinisin. Iwe, ra feito meinisin, pwe esap wor eman a tiwela. Ra tolong lon ewe imwen Paal, pwe ewe imw a urela seni esop tori esop.
2KI 10:22 Iwe, Jehu a üreni ätewe mi wisen tümwünü ekewe üf, “Kopwe uwawu ekewe üf mi pin fän iten chokewe meinisin mi fel ngeni Paal.” Iei mine a uwawu ekewe üf mi pin fän iter.
2KI 10:23 Mürin, Jehu me Jonatap nöün Rekap we mwän ra tolong lon ewe imwen Paal. Iwe, Jehu a üreni ekewe mi fel ngeni Paal, “Oupwe pii pwe esap wor eman nöün ewe Samol mi Lapalap chon angang epwe nom leimi, pwe ämi chök chon fel ngeni Paal.”
2KI 10:24 Iwe, Jehu a tolong, pwe epwe eäni asor ekewe mönün asor me asoren kek ngeni Paal. Nge Jehu a anomu walik mwän lükün ewe imwen Paal o üreniir, “Oupwe niela ekei aramas meinisin. Ika eman me leimi a mwütätä pwe eman me leir epwe süla, ätewe epwe mäla.”
2KI 10:25 Lon ewe otun, lupwen Jehu a wes le eäni ewe asoren kek, a üreni ekewe chon mas me ekewe meilap, “Oupwe tolong o nirela, nge ousap mwüt ngeni eman epwe süla.” Iwe, ra tolong o nirela ren ketilas o atururowu lükün. Mürin ra tolong lon ewe rumwen lon ewe imwen Paal,
2KI 10:26 ra uwawu ewe ür mi pin mi nom lon o kenala.
2KI 10:27 Iei usun ra atai ewe ür mi pin me ewe imwen Paal. Nge aramas ra eäni ewe imw lenien ngasala tori ikenai.
2KI 10:28 Iei usun Jehu a aükätiu än aramas fel ngeni ewe anü Paal me lon Israel.
2KI 10:29 Nge Jehu esap kul seni ekewe tipis Jeropoam nöün Nepat we mwän a föri, lupwen a emweni chon Israel ngeni tipis. Pun a sopwela le fel ngeni ekewe uluulun kow seni kolt mi nom lon Petel me Tan.
2KI 10:30 Iwe, ewe Samol mi Lapalap a üreni Jehu, “Pokiten ka angangöch le föri mine a pwüng fän mesei, ka pwal föri ngeni chon leimwen Ahap meinisin mine üa ürenuk, mwirimwirum kewe repwe wiseni ewe wisen king me lon Israel seni ei tettel tori arüanün.”
2KI 10:31 Nge Jehu esap aleasochis ngeni än ewe Samol mi Lapalap ewe Koten Israel allük ren unusen lelukan. Esap kul seni ekewe tipis Jeropoam a föri, lupwen a emweni Israel ngeni tipis.
2KI 10:32 Lon ekana rän ewe Samol mi Lapalap a popuetä le akükünüla ewe fanü Israel. Iwe, Hasael ewe kingen Siria a liapeni ekei kinikinin fanü me lon Israel:
2KI 10:33 Ewe fanü peliötiuen ewe chanpupu Jortan, unusen ewe fanü Kiliat, iei kinikinin chon ekewe ainangen Kat, Rupen me Manasa, seni Aroer mi nom lon ewe lemolun ewe chanpupu Arnon, tori Kiliat me Pasan.
2KI 10:34 Nge lusun pworausen än Jehu föför meinisin me an pwora a mak lon puken uruwon ekewe kingen Israel.
2KI 10:35 Iwe, Jehu a mäla, nge ra peiaseni lon Samaria. Nge Jehoahas nöün we mwän a siwili lon wisan wisen king.
2KI 10:36 Jehu a nom lon Samaria o nemeni Israel lon ükükün rüe me walu ier.
2KI 11:1 Iwe, lupwen Atalia inen Ahasia a silei pwe nöün we a ninnila, a allük pwe chon familien ewe king meinisin repwe ninnila.
2KI 11:2 Nge Jehosepa nöün ewe king Jehoram fefin, fefinen Ahasia, a angei Joas nöün Ahasia we ät lemonomon seni lein nöün ewe king kewe mwän repwe ninnila. Iwe, a aopalong ewe ät me nöün chon tümwün lon eu lenien iseis peet. Iei usun Jehosepa a aopala Joas seni Atalia, pwe esap ninnila.
2KI 11:3 Iwe, Joas a nom ren Jehosepa lon ükükün wonu ier, nge a op lon imwen ewe Samol mi Lapalap, lupwen Atalia a nemeni ewe fanü.
2KI 11:4 Nge lon ewe afisuen ier, ewe souasor Jehoiata a titi ekewe meilapen chon tümwünü ewe imwen king, pwe repwe feito ren lon imwen ewe Samol mi Lapalap. Iwe, a pesei ngeniir pwe repwe tipeeu ngeni an ekiek o pwon fän akapel me lon imwen ewe Samol mi Lapalap. Mürin a pwäri ngeniir nöün ewe king Ahasia we ät.
2KI 11:5 Iwe, a allük ngeniir, “Iei usun mine oupwe föri: Eu leülüngat me leimi mi popuetä ar angang lon ewe ränin sapat repwe mamasa imwen ewe king,
2KI 11:6 eu leülüngat repwe mamas lon ewe asamalap Sur, nge eu leülüngat repwe mamas lon ewe asamalap lükisökürün ekewe chon mas.
2KI 11:7 Nge ekewe ruu mwich me leimi mi wes le angang lon ewe ränin sapat repwe mamasa imwen ewe Samol mi Lapalap o tümwünü ewe king.
2KI 11:8 Iwe, oupwe ütä pwelin ünükün ewe king, eman me eman fän an pisekin maun. Nge iön a mochen atalong ämi tettel epwe ninnila. Oupwe eti ewe king ekis meinisin ia epwe feila ie.”
2KI 11:9 Iwe, ekewe meilap ra föri mine ewe souasor Jehoiata a allük ngeniir. Ra emwenato ren Jehoiata nöür kewe aramas, chokewe mi wes le angang lon ewe ränin sapat, pwal chokewe mi popuetä ar angang.
2KI 11:10 Nge ewe souasor Jehoiata a atowu ngeni ekewe meilap ekewe siles me tittin maun än ewe king Tafit mi nom lon imwen ewe Samol mi Lapalap.
2KI 11:11 Iwe, ekewe chon mas ra ütä pwelin ünükün ewe king fän ar pisekin maun, ra tettel arun ewe rongen asor me ewe imwenfel seni peliörün ewe imwenfel tori peliefengin.
2KI 11:12 Mürin, Jehoiata a emwenawu Joas nöün ewe king we ät, a isetä epa mwärämwär won möküran o ngeni ewe puken allük. Iwe, ra awisa ngeni ewe wisen king o epiti. Nge ekewe aramas ra alopolop o kökkö, “Ewe king epwe manauatam.”
2KI 11:13 Iwe, lupwen Atalia a rongorong akürangen ekewe chon mas me ekewe aramas, a feila lon imwen ewe Samol mi Lapalap ren ekewe aramas.
2KI 11:14 Lupwen a nenefetal, a küna ewe king a ütä ren ewe ür usun pwüngün örünier, nge ekewe meilap me ekewe chon ettik rappwa ra nom unükün. Iwe, aramasen ewe fanü meinisin ra mweireir o ettiki rappwa. Nge Atalia a kamwei üfan o puchör, “A fis rawangau, a fis rawangau!”
2KI 11:15 Mürin, ewe souasor Jehoiata a allük ngeni ekewe meilap mi nemeni ewe mwichen sounfiu, “Oupwe emwenawu neminewe lefilen ekewe chon mas mi tettel, nge are eman a tapwela mürin, oupwe niela ren ketilas.” Pun ewe souasor a üra, “Neminewe esap ninnila lon lenien ewe Samol mi Lapalap.”
2KI 11:16 Iei mine ra turufi neminewe, ra emwenalong lon asamalapen imwen ewe king, ia ekewe oris ra tolong me ie, o pwerela ngeni ewe imwen king. Ikenan ra niela ie.
2KI 11:17 Iwe, ewe souasor Jehoiata a föri eu pwon lefilen ewe Samol mi Lapalap me ewe king pwal ekewe aramas, pwe repwe nöün ewe Samol mi Lapalap aramas. A pwal föri eu pwon lefilen ewe king me ekewe aramas.
2KI 11:18 Mürin, aramasen ewe fanü meinisin ra tolong lon imwen ewe anü Paal o ataetiu. Ra atatakisi ekewe rongen asor me ekewe uluulun anü, ra pwal niela Matan nöün Paal we souasor me mwen ekewe rongen asor. Iwe, ewe souasor Jehoiata a anomu chon mas, pwe repwe mamasa imwen ewe Samol mi Lapalap.
2KI 11:19 Mürin, Jehoiata me ekewe meilapen sounfiu, ekewe chon tümwünü ewe king me ekewe chon tümwünü ewe imwen king pwal aramasen ewe fanü meinisin ra etala ewe king seni imwen ewe Samol mi Lapalap, ra pwerelong lon asamalapen ekewe chon mas tori imwen ewe king. Nge Joas a mottiu won ewe lenien motun king.
2KI 11:20 Iwe, aramasen ewe fanü meinisin ra meseik. Nge ewe telinimw a kinamwe mürin än Atalia ninnila ren ketilas me arun ewe imwen king.
2KI 11:21 Iwe, Joas a ierini fisu, lupwen a tolong lon wisan wisen king lon Juta.
2KI 12:1 Iwe, lon afisuen ierin mwün Jehu ewe kingen Israel, Joas a tolong lon wisan wisen king o nemeni Juta. A nom lon Jerusalem o nemenem lon ükükün faik ier. Iten inan Sipia seni Persepa.
2KI 12:2 Joas a föri mine a pwüng me fän mesen ewe Samol mi Lapalap lon ränin manauan meinisin, pun ewe souasor Jehoiata a öüröüra.
2KI 12:3 Nge ekewe lenien fel won ekewe leni tekia resap katala. Ekewe aramas ra chök sopwela le äkeäni ar asor o kekkeni apach mi pwokus wor.
2KI 12:4 Iwe, Joas a üreni ekewe souasor, pwe repwe ionifengeni ewe moni meinisin aramas ra uwato lon imwen ewe Samol mi Lapalap pwe ar asor mi pin, ewe moni eman me eman mwän a wisen püngütiu, pwal ewe moni eman a uwato fän püsin letipan.
2KI 12:5 Ekewe souasor repwe angei ewe moni seni aramaser, pwe repwe nöünöü le försefäli mine a ta me won ewe imwenfel.
2KI 12:6 Nge seni ewe fansoun tori rüe me ülüngatin ierin mwün ewe king Joas, ekewe souasor resamwo försefäli och mine a tala me won ewe imwenfel.
2KI 12:7 Iei mine ewe king Joas a körifengeni ewe souasor Jehoiata me ekewe lusun souasor o üreniir, “Pwota ousap försefäli ewe imwenfel? Iei ousap chüen angei moni seni aramasemi fän itemi, pun ewe moni epwe fän iten försefälin mine a ta me won ewe imwenfel.”
2KI 12:8 Iwe, ekewe souasor ra tipeeu ngeni pwe resap chüen angei moni seni aramaser, resap pwal chüen wisen försefäli mine a ta me won ewe imwenfel.
2KI 12:9 Mürin, ewe souasor Jehoiata a angei eu pwor, a föri eu pwang won öppüngün o iseni ünükün ewe rongen asor me pelifichin ewe asamen tolong lon imwen ewe Samol mi Lapalap. Iwe, ekewe souasor mi mamasa ewe lenien tolong ra atolonga lon ewe pwor ewe moni meinisin aramas ra uwato lon imwen ewe Samol mi Lapalap.
2KI 12:10 Nge lupwen ra küna pwe a wor chomong moni lon ewe pwor, nöün ewe king seketeri me ewe souasor mi lap ra feito, ra aleani ewe moni o tukeni.
2KI 12:11 Mürin ra ngeni ekewe souemwenin angangen imwen ewe Samol mi Lapalap ewe moni. Nge ewe moni ekewe souemwen ra möni ngeni ekewe taikü me ekewe chon kaü mi angang won imwen ewe Samol mi Lapalap,
2KI 12:12 ra pwal möni ngeni ekewe chon ses me ekewe chon falafal fau. Iwe, ra kamö won ei moni irä me fau mi fal fän iten försefälin mine a ta me won imwen ewe Samol mi Lapalap, pwal mettoch meinisin ra aea fän iten ei angang.
2KI 12:13 Nge seni ewe moni aramas ra uwato lon imwen ewe Samol mi Lapalap resap föri sepi seni silifer, fichin wikken ekewe lamp, sepi mi kükün, rappwa ika sokopaten sepi seni kolt ika silifer fän iten imwen ewe Samol mi Lapalap.
2KI 12:14 Pun unusen ewe moni ra ngeni ekewe chon angang mi försefäli mine a ta me won imwen ewe Samol mi Lapalap.
2KI 12:15 Nge resap ais repootun ewe moni seni ekewe mwän mi angei ewe moni pwe repwe möni ngeni ekewe chon angang, pun ekewe mwän ra fokun wenechar.
2KI 12:16 Nge ewe moni seni ekewe asoren pupungau me asoren tipis resap uwalong lon ewe pwor, pun nöün ekewe souasor.
2KI 12:17 Iwe, lon ewe fansoun Hasael ewe kingen Siria a feito, a maun ngeni ewe telinimw Kat o liapeni. Mürin, Hasael a sap pwe epwe feitä Jerusalem o maun ngeni.
2KI 12:18 Nge Joas ewe kingen Juta a angei ekewe lifang mi pin meinisin Jehosafat, Joram me Ahasia semelapan kewe ekewe kingen Juta ra apini fän iten ewe Samol mi Lapalap. A pwal angei püsin an kewe lifang mi pin, ewe kolt meinisin mi nom lon lenien iseis pisek mi aüchea me lon imwen ewe Samol mi Lapalap, pwal me lon püsin imwan o tinirela ren Hasael ewe kingen Siria. Mürin, Hasael a feila seni Jerusalem.
2KI 12:19 Nge lusun pworausen än Joas föför meinisin a mak lon puken uruwon ekewe kingen Juta.
2KI 12:20 Iwe, nöün Joas kewe nöüwis ra rawangauei o niela me lon Pet-milo won ewe al mi pweretiu ngeni Silla.
2KI 12:21 Ikei ir ekewe nöüwis mi niela Joas: Josakar nöün Simeat we mwän me Jehosapat nöün Somer we mwän. Iwe, ra peiaseni Joas ren an kewe lewo lon ewe telinimwen Tafit, nge Amasia nöün we mwän a siwili lon wisan wisen king.
2KI 13:1 Iwe, lon rüe me ülüngatin ierin mwün Joas nöün Ahasia we ewe kingen Juta, Jehoahas nöün Jehu we a tolong lon wisan wisen king o nemeni Israel. A nom lon Samaria o nemenem lon ükükün engol me fisu ier.
2KI 13:2 Jehoahas a föri mine a ngau me fän mesen ewe Samol mi Lapalap o föri ekewe tipis ewe king Jeropoam a föri, lupwen a emweni chon Israel ngeni tipis. Iwe, esap fokun likitala ekewe tipis.
2KI 13:3 Iei mine ewe Samol mi Lapalap a song ngeni chon Israel, pwe fansoun langatam a atolongeer fän nemenien Hasael ewe kingen Siria, pwal fän nemenien Penhatat nöün Hasael we mwän.
2KI 13:4 Mürin, Jehoahas a iotek ngeni ewe Samol mi Lapalap, nge ewe Samol mi Lapalap a aüselinga i, pun a küna usun än ewe kingen Siria ariaföüü chon Israel.
2KI 13:5 Iwe, ewe Samol mi Lapalap a fang ngeni chon Israel eman chon amanau mi angaserela seni ekewe chon Siria. Iei mine ekewe aramasen Israel ra nonom lon lenier fän kinamwe usun me lom.
2KI 13:6 Nge resap chök likitala ekewe tipis Jeropoam a föri, lupwen a emweniir ngeni tipis, pun ra chök sopwela le föriir. Iwe, uluulun ewe anüfefin Asera a pwal nonomotiu lon Samaria.
2KI 13:7 Iwe, esap chüen wor nöün Jehoahas mwichen sounfiu, chilon chök lime chon wawa oris, engol waan woken me engol ngeröü sounfiu mi fetal. Pun ewe kingen Siria a niela ekewe lusun o ipweriir pwe ra usun chök pwül moromor.
2KI 13:8 Nge lusun pworausen än Jehoahas föför meinisin, pwal an pwora, a mak lon puken uruwon ekewe kingen Israel.
2KI 13:9 Jehoahas a mäla, nge ra peiaseni lon Samaria. Iwe, Jehoas nöün we mwän a siwili lon wisan wisen king.
2KI 13:10 Iwe, lon ilik me fisuen ierin mwün Joas ewe kingen Juta, Jehoas nöün Jehoahas we mwän a tolong lon wisan wisen king o nemeni Israel. A nom lon Samaria o nemenem lon ükükün engol me wonu ier.
2KI 13:11 Nge Jehoas a pwal föri mine a ngau me fän mesen ewe Samol mi Lapalap. Esap likitala ekewe tipis meinisin ewe king Jeropoam a föri, lupwen a emweni chon Israel ngeni tipis, pwe a chök sopwela le föriir.
2KI 13:12 Nge lusun pworausen än Jehoas föför meinisin, pwal an pwora le maun ngeni Amasia ewe kingen Juta, a mak lon puken uruwon ekewe kingen Israel.
2KI 13:13 Iwe, Jehoas a mäla, nge ra peiaseni lon Samaria ren ekewe kingen Israel, nge Jeropoam nöün we mwän a siwili lon wisan wisen king.
2KI 13:14 Iwe, lupwen a tori Elisa ewe samau epwe mäla ren, Jehoas ewe kingen Israel a feila ren, a kechü ngeni o üra, “Semei, semei! En ewe chon peni Israel mi manaman.”
2KI 13:15 Nge Elisa a üreni, “Kopwe angei efoch esefich me ekoch föün.” Iei mine Jehoas a angei efoch esefich me ekoch föün.
2KI 13:16 Mürin, Elisa a üreni ewe kingen Israel, “Kopwe emeia ewe esefich.” Iwe, a emeia. Nge Elisa a anomu pöün won pöün ewe king
2KI 13:17 o üreni pwe epwe suki ewe asammwacho mi sap ngeni Siria. Iwe, a suki. Mürin, Elisa a üreni, “Kopwe pekiela ewe föün esefich.” Iwe, a pekiela. Nge Elisa a üra, “Enan wok wokun ewe Samol mi Lapalap föün esefich mi win, ewe föün esefich mi akufu Siria. Pun en kopwe maun ngeni ekewe chon Siria me lon Afek tori kopwe aroserela.”
2KI 13:18 Mürin, Elisa a üreni ewe kingen Israel, “Kopwe angei ekewe lusun föün esefich o wichi ewe pwül ngeniir.” Iwe, ewe king a angeer o wichi ewe pwül ngeniir fän ülüngat, mürin a ükütiu.
2KI 13:19 Ren ei Elisa a song ngeni ewe king o üreni, “Are kopwe wichi ewe pwül fän limu ika fän wonu, mürin kopwe akufu chon Siria tori repwe rosola. Nge iei kopwe chök akufu chon Siria fän ülüngat.”
2KI 13:20 Iwe, Elisa a mäla, nge ra peiaseni. Iteiten ier ekoch mwichen sounfiu seni Moap mi küt liaper ra sou tolong lon ewe fanü Israel.
2KI 13:21 Nge a fis, pwe lupwen ekoch aramas ra feila pwe repwe peiaseni eman mwän, ra küna ena sokun mwich. Iwe, ekewe aramas ra aturalong ewe somä lon peiasen Elisa o süla. Nge lon ewe otun ewe somä a torii chün Elisa, a manausefäl o ütä.
2KI 13:22 Iwe, Hasael ewe kingen Siria a ariaföüü chon Israel lon ükükün fansoun än Jehoahas nemenem.
2KI 13:23 Nge ewe Samol mi Lapalap a ümöümöch ngeni chon Israel, a tongeer o echeniir, pokiten an pwon ngeni Apraham, Isaak me Jakop. Iwe, esap mochen aroserela, esap pwal atoauerela seni fän mesan tori ikenai.
2KI 13:24 Iwe, lupwen Hasael ewe kingen Siria a mäla, Penhatat nöün we mwän a siwili lon wisan wisen king.
2KI 13:25 Mürin, Jehoas ewe kingen Israel a angeesefäli seni Penhatat nöün Hasael we mwän ekewe telinimw, ätewe a angei seni Jehoahas saman we lon maun. Fän ülüngat Jehoas a akufu Penhatat o angeesefäli ekewe telinimwen Israel.
2KI 14:1 Iwe, lon aruuen ierin mwün Jehoas nöün Jehoahas we ewe kingen Israel, Amasia nöün Joas we a tolong lon wisan wisen king o nemeni Juta,
2KI 14:2 lupwen a ierini rüe me limu. A nom lon Jerusalem o nemenem lon ükükün rüe me tiu ier. Iten inan Jehoatin seni Jerusalem.
2KI 14:3 Iwe, Amasia a föri mine a pwüng me fän mesen ewe Samol mi Lapalap, nge esap usun chök Tafit an we lewo. A chök apirü meinisin mine Joas saman we a föri.
2KI 14:4 Nge ekewe lenien fel won ekewe leni tekia resap katala. Iwe, ekewe aramas ra chök sopwela le eäni ar asor o keni apach mi pwokus wor.
2KI 14:5 Iwe, lon ewe otun, lupwen Amasia a kamwöchüla won unusen nemenemen mwün, a niela ekewe nöüwis mi niela saman we ewe king.
2KI 14:6 Nge esap niela nöür kewe, pwe a föri mine ewe Samol mi Lapalap a allük, usun a mak lon ewe puken allük än Moses, “Sam resap ninnila pokiten än nöür tipis, nge nau resap ninnila pokiten än semer tipis. Nge eman me eman epwe mäla pokiten püsin an tipis.”
2KI 14:7 Iwe, Amasia a niela engol ngeröü chon Etom me lon ewe Lemolun Salt o liapeni ewe telinimw Sela. Iwe, a aita ngeni ewe telinimw Jokteel, nge a chüen iteni ei it tori ikenai.
2KI 14:8 Mürin, Amasia a tinala chon künö ren Jehoas ewe kingen Israel pwe repwe üreni, “Kopwe feito pwe sipwe künafengenikich.”
2KI 14:9 Nge Jehoas ewe kingen Israel a tinala ei pworaus ren Amasia ewe kingen Juta, “Efoch iräfölüföl mi nom won Lepanon a tiitiila ren efoch setar won Lepanon o apasa, ‘Kopwe mwütätä noum föpwül pwe nei alüal epwe pwülüeni.’ Nge eman manmwacho a pwerela ren o purätiu ewe iräfölüföl.
2KI 14:10 Ka fokun akufu chon Etom, nge iei ka sikesik. Kopwe menemenöch ren om iteföüla o nomotiu lon leniom. Pwota kopwe awarato womw riaföü, pwe ämi me chon Juta oupwe feiengau?”
2KI 14:11 Nge Amasia esap mochen rongorong. Iei mine Jehoas ewe kingen Israel a feila pwe epwe maun ngeni Amasia ewe kingen Juta. Iwe, ra künafengeniir me lon Pet-semes lon ewe fanü Juta.
2KI 14:12 Iwe, chon Juta ra kuf ren chon Israel, pwe eman me eman a süla ngeni lenian.
2KI 14:13 Jehoas ewe kingen Israel a liapeni Amasia ewe kingen Juta arun Pet-semes. Mürin, Jehoas a feila Jerusalem o ataetiu tittin ewe telinimw seni ewe Asamalapen Efraim tori ewe Asamalapen Lepwokuku ükükün wonopükü fiit.
2KI 14:14 Iwe, Jehoas a angei ewe kolt me silifer meinisin, pwal ekewe sepi meinisin mi nom lon imwen ewe Samol mi Lapalap, a pwal angei ekewe pisek aüchea me lon imwen ewe king. A pwal uwala aramas o liwiniti Samaria.
2KI 14:15 Nge lusun pworausen än Jehoas kewe föför meinisin, an pwora me an maun ngeni Amasia ewe kingen Juta a mak lon puken uruwon ekewe kingen Israel.
2KI 14:16 Jehoas a mäla, nge ra peiaseni lon Samaria ren ekewe kingen Israel. Nge Jeropoam nöün we mwän a siwili lon wisan wisen king.
2KI 14:17 Iwe, Amasia ewe kingen Juta a manau lon ükükün engol me limu ier mürin än Jehoas ewe kingen Israel mäla.
2KI 14:18 Nge lusun pworausen än Amasia kewe föför meinisin a mak lon puken uruwon ekewe kingen Juta.
2KI 14:19 Iwe, ekewe chon oputa Amasia ra rawangauei me lon Jerusalem, nge Amasia a süla Lakis. Nge ra attapwa tori Lakis o niela me ikenan.
2KI 14:20 Mürin ra uwala inisin won oris lon Jerusalem o peiaseni ren an kewe lewo lon ewe telinimwen Tafit.
2KI 14:21 Iwe, ekewe aramasen Juta meinisin ra seikätä Ussia, pwe epwe siwili Amasia saman we lon wisan wisen king. Ussia a ierini engol me wonu, lupwen a seikitä.
2KI 14:22 Mürin än saman mäla, Ussia a liapenisefäli ewe telinimw Elat o aüsefälietä.
2KI 14:23 Iwe, lon engol me limuen ierin mwün Amasia nöün Joas we ewe kingen Juta, Jeropoam nöün Jehoas we a tolong lon wisan wisen king o nemeni Israel. A nom lon Samaria o nemenem lon ükükün faik me eu ier.
2KI 14:24 Jeropoam a föri mine a ngau me fän mesen ewe Samol mi Lapalap. Esap likitala ekewe tipis meinisin ewe king Jeropoam nöün Nepat we a föri, lupwen a emweni chon Israel ngeni tipis.
2KI 14:25 Jeropoam a angeesefäli ekewe kinikinin fanü chon Israel ra fanüeni me lom seni ewe al mi ale ngeni Hamat a nom efeng tori ewe Setin Mäla a nom ör, usun ewe Samol mi Lapalap ewe Koten Israel a kapas ngeni nöün we chon angang Sona nöün Amitai we mwän, ewe soufos seni Kat-hefer.
2KI 14:26 Iwe, ewe Samol mi Lapalap a küna pwe chon Israel meinisin seni ekewe amanau tori ekewe chon ngas ra nom lon riaföü watte, esap wor eman mi alisiir.
2KI 14:27 Nge sap tipen ewe Samol mi Lapalap pwe epwe arosala chon Israel seni won fanüfan. Iei mine a amanaueer ren Jeropoam nöün Jehoas we mwän.
2KI 14:28 Nge lusun pworausen än Jeropoam föför meinisin, an pwora me an maun, pwal usun an aliwinisefäli Tamaskus me Hamat ngeni Israel, a mak lon puken uruwon ekewe kingen Israel.
2KI 14:29 Iwe, Jeropoam a mäla, nge ra peiaseni ren ekewe kingen Israel, nge Sekaria nöün we mwän a siwili lon wisan wisen king.
2KI 15:1 Iwe, lon rüe me fisuen ierin mwün Jeropoam ewe kingen Israel, Ussia nöün Amasia we mwän a tolong lon wisan wisen king o nemeni Juta,
2KI 15:2 lupwen a ierini engol me wonu. A nom Jerusalem o nemenem lon ükükün lime me ruu ier. Iten inan Jekolia seni Jerusalem.
2KI 15:3 Iwe, Ussia a föri mine a pwüng me fän mesen ewe Samol mi Lapalap, usun chök Amasia saman we.
2KI 15:4 Nge ekewe lenien fel won ekewe leni tekia resap katala. Iwe, ekewe aramas ra chök sopwela le asor o keni ar apach mi pwokus wor.
2KI 15:5 Iwe, ewe Samol mi Lapalap a afeiengaua ewe king, pwe a üri rupun pwötür tori an mäla. A imwüla o nonom lon eu imw. Nge Jotam nöün ewe king we mwän a samolun chon leimwen ewe king o nemeni aramasen ewe fanü.
2KI 15:6 Nge lusun pworausen än Ussia föför meinisin a mak lon puken uruwon ekewe kingen Juta.
2KI 15:7 Iwe, Ussia a mäla, nge ra peiaseni ren an kewe lewo lon ewe telinimwen Tafit. Nge Jotam nöün we mwän a siwili lon wisan wisen king.
2KI 15:8 Iwe, lon ilik me waluen ierin mwün Ussia ewe kingen Juta, Sekaria nöün Jeropoam we mwän a tolong lon wisan wisen king o nemeni Israel. A nom lon Samaria o nemenem lon ükükün wonu maram.
2KI 15:9 Nge Sekaria a föri mine a ngau me fän mesen ewe Samol mi Lapalap, usun semelapan kewe ra föri. Esap likitala ekewe tipis ewe king Jeropoam nöün Nepat we a föri, lupwen a emweni chon Israel ngeni tipis.
2KI 15:10 Iwe, Salum nöün Japes we mwän a rawangauei ewe king Sekaria o niela me lon Ipleam. Mürin a siwili lon wisan wisen king.
2KI 15:11 Nge lusun pworausen än Sekaria föför meinisin a mak lon puken uruwon ekewe kingen Israel.
2KI 15:12 Iei usun ewe pwon ewe Samol mi Lapalap a eäni ngeni Jehu a pwönüetä, “Mwirimwirum kana repwe nom lon ewe wisen king lon Israel tori arüanün tettelin aramas.”
2KI 15:13 Iwe, lon ilik me tiuen ierin mwün Ussia ewe kingen Juta, Salum nöün Japes we mwän a tolong lon wisan wisen king o nemeni Israel. A nom lon Samaria o nemenem lon ükükün eu maram.
2KI 15:14 Mürin, Menahem nöün Kati we mwän a feila seni Tirsa o feila Samaria. Iwe, a niela Salum nöün Japes we mwän me lon Samaria o siwili lon wisan wisen king.
2KI 15:15 Nge lusun pworausen än Salum föför meinisin, ewe rawangau a föri, a mak lon puken uruwon ekewe kingen Israel.
2KI 15:16 Lon ena fansoun, lupwen Menahem a feila seni Tirsa, a ataela ewe telinimw Tapua me ekewe fanü ünükün. A pwal niela meinisin mi nom lon, pun resap fangatä ngeni an epwe tolong lon ar telinimw. Iei mine a ataela ewe telinimw, a pwal mwo nge esetina luken ekewe fefin mi pwopwo meinisin.
2KI 15:17 Iwe, lon ilik me tiuen ierin mwün Ussia ewe kingen Juta, Menahem nöün Kati we mwän a tolong lon wisan wisen king o nemeni Israel. A nom lon Samaria o nemenem lon ükükün engol ier.
2KI 15:18 Nge Menahem a föri mine a ngau me fän mesen ewe Samol mi Lapalap. Lon unusen ränin manauan esap likitala ekewe tipis Jeropoam nöün Nepat we mwän a föri, lupwen a emweni Israel ngeni tipis.
2KI 15:19 Iwe, Tiklat-pileser ewe kingen Asiria a tolong lon ewe fanü pwe epwe maun ngeni. Nge Menahem a ngeni Tiklat-pileser ilik me walu ton silifer pwe epwe alisi le anüküchara an nemenem.
2KI 15:20 Iwe, Menahem a angei ewe moni seni ekewe mwän mi pisekisek me lon Israel. A ariani seni iteiten eman me eman leir ükükün lime föün moni silifer, pwe epwe ngeni ewe kingen Asiria. Iei mine ewe kingen Asiria a liwinsefäl, nge esap nonomotiu lon ewe fanü.
2KI 15:21 Nge lusun pworausen än Menahem föför meinisin a mak lon puken uruwon ekewe kingen Israel.
2KI 15:22 Iwe, Menahem a mäla, nge ra peiaseni ren semelapan kewe, nge Pekahia nöün we mwän a siwili lon wisan wisen king.
2KI 15:23 Iwe, lon alimen ierin mwün Ussia ewe kingen Juta, Pekahia nöün Menahem we mwän a tolong lon wisan wisen king o nemeni Israel. A nom lon Samaria o nemenem lon ükükün ruu ier.
2KI 15:24 Nge Pekahia a föri mine a ngau fän mesen ewe Samol mi Lapalap. Esap likitala ekewe tipis Jeropoam nöün Nepat we mwän a föri, lupwen a emweni Israel ngeni tipis.
2KI 15:25 Iwe, eman nöün Pekahia meilapen sounfiu itan Peka nöün Remalia we mwän a rawangauei Pekahia. Lime re Kiliat ra eti, lupwen a niela Pekahia me lon Samaria lon ewe leni mi pöchökül me lon imwen ewe king. Mürin a siwili lon wisan wisen king.
2KI 15:26 Nge lusun pworausen än Pekahia föför meinisin a mak lon puken uruwon ekewe kingen Israel.
2KI 15:27 Iwe, lon lime me ruuen ierin mwün Ussia ewe kingen Juta, Peka nöün Remalia we mwän a tolong lon wisan wisen king o nemeni Israel. A nom lon Samaria o nemenem lon ükükün rüe ier.
2KI 15:28 Nge Peka a föri mine a ngau fän mesen ewe Samol mi Lapalap. Esap likitala ekewe tipis Jeropoam nöün Nepat we mwän a föri, lupwen a emweni chon Israel ngeni tipis.
2KI 15:29 Iwe, lupwen Peka a kingen Israel, Tiklat-pileser ewe kingen Asiria a feito o liapeni ekewe telinimw Ion, Apel-petmaka, Janoa, Ketes, Hasor, pwal ekewe fanü Kiliat, Kaliläa me Naftali. A pwal uweela ekewe aramas chon oola ngeni Asiria.
2KI 15:30 Mürin, Hosea nöün Ela we mwän a rawangauei ewe king Peka, a niela o siwili lon wisan wisen king. Ei a fis lon arüen ierin mwün Jotam nöün Ussia we mwän ewe kingen Juta.
2KI 15:31 Nge lusun pworausen än Peka föför meinisin a mak lon puken uruwon ekewe kingen Israel.
2KI 15:32 Iwe, lon aruuen ierin mwün Peka nöün Remalia we mwän ewe kingen Israel, Jotam nöün Ussia we mwän a tolong lon wisan wisen king o nemeni Juta,
2KI 15:33 lupwen a ierini rüe me limu. A nom lon Jerusalem o nemenem lon ükükün engol me wonu ier. Iten inan Jerusa nöün Satok we fefin.
2KI 15:34 Iwe, Jotam a föri mine a pwüng me fän mesen ewe Samol mi Lapalap, usun chök Ussia saman we.
2KI 15:35 Nge ekewe lenien fel won ekewe leni tekia resap katala. Ekewe aramas ra chök sopwela le asor o keni apach mi pwokus wor. Iwe, Jotam a förätä ewe asamalapen imwen ewe Samol mi Lapalap me efeng.
2KI 15:36 Nge lusun pworausen än Jotam föför meinisin a mak lon puken uruwon ekewe kingen Juta.
2KI 15:37 Lon ekana rän ewe Samol mi Lapalap a popuetä le tinala Resin ewe kingen Siria me Peka ewe kingen Israel, pwe repwe maun ngeni Juta.
2KI 15:38 Iwe, Jotam a mäla, nge ra peiaseni ren an kewe lewo lon ewe telinimwen Tafit. Nge Ahas nöün we mwän a siwili lon wisan wisen king.
2KI 16:1 Iwe, lon engol me fisuen ierin mwün Peka nöün Remalia we ewe kingen Israel, Ahas nöün Jotam we mwän a tolong lon wisan wisen king o nemeni Juta,
2KI 16:2 lupwen a ierini rüe. A nom lon Jerusalem o nemenem lon ükükün engol me wonu ier. Nge Ahas esap föri mine a pwüng me fän mesen ewe Samol mi Lapalap an we Kot, usun Tafit an we lewo a föri,
2KI 16:3 pwe a apirü än ekewe kingen Israel föför. A fen mwo nge keni püsin nöün ät pwe an asor ngeni ekewe uluulun anümwäl, usun än chon ekewe mwü föför mi anioput, ekewe mwü ewe Samol mi Lapalap a asürela me mwen ekewe aramasen Israel.
2KI 16:4 Iwe, Ahas a asor o keni apach mi pwokus lon ekewe lenien fel won ekewe leni tekia, won ekewe chuk, pwal fän iteiten irä mi muresires.
2KI 16:5 Mürin, Resin ewe kingen Siria me Peka ewe kingen Israel ra feito pwe repwe maun ngeni Jerusalem. Iwe, ra pwelifeili ewe telinimw fän pisekin maun, nge resap tongeni liapeni.
2KI 16:6 Lon ewe fansoun, ewe kingen Etom a angeesefäli ewe telinimw Elat o asüela ekewe chon Juta seni. Iwe, ekewe chon Etom ra feila Elat o nonom ikenan tori ikenai.
2KI 16:7 Iwe, Ahas a tinala chon künö ren Tiklat-pileser ewe kingen Asiria o üra, “Ngang noum chon angang mi nom fän nemenemom. Kopwe feito o amanauaei seni ewe kingen Siria, pwal seni ewe kingen Israel mi maun ngeniei.”
2KI 16:8 Ahas a pwal angei ewe silifer me kolt mi nom lon imwen ewe Samol mi Lapalap, pwal lon ewe lenien iseis pisek mi aüchea me lon imwen ewe king o tinala, pwe eu lifang ngeni ewe kingen Asiria.
2KI 16:9 Iwe, ewe kingen Asiria a aüselinga än Ahas tüngor. A feila pwe epwe maun ngeni Tamaskus, a liapeni ewe telinimw o uweela aramasan ngeni Kir, a pwal niela ewe king Resin.
2KI 16:10 Mürin, ewe king Ahas a feila Tamaskus, pwe epwe churi Tiklat-pileser ewe kingen Asiria. A küna eu rongen asor me lon Tamaskus o tinala ren ewe souasor Uria uluulun ewe rongen asor me tichikin kaükün.
2KI 16:11 Iei mine ewe souasor Uria a förätä eu rongen asor won aükükün mine ewe king Ahas a tinala ren, o awesala me mwen an epwe feito.
2KI 16:12 Lupwen ewe king a liwinto seni Tamaskus, a katol ewe rongen asor. Mürin, a kan ngeni o keni an asor won.
2KI 16:13 A kenala an asoren kek me asoren mongö o ninätiu an asoren ün won, a pwal äsupu chan an mönün asoren kinamwe won.
2KI 16:14 Nge ewe rongen asor seni piras än ewe Samol mi Lapalap mi nom lefilen än Ahas we rongen asor me ewe imwenfel Ahas a amwökütü seni lenian o anomu peliefengin an we rongen asor mi fö.
2KI 16:15 Mürin, ewe king Ahas a allük ngeni ewe souasor Uria, “Won ei rongen asor mi lap kopwe keni ewe asoren kek mi fis iteiten lesosor me ewe asoren mongö mi fis iteiten lekuniol, än ewe king asoren kek me asoren mongö, pwal än aramasen ei fanü meinisin asoren kek me ar asoren mongö me asoren ün. Kopwe pwal äsupu won chan ekewe mönün asoren kek me chan ekewe sokopaten mönün asor. Nge ewe rongen asor seni piras epwe fän itei, pwe üpwe eäni pwee won.”
2KI 16:16 Iwe, ewe souasor Uria a föri meinisin mine ewe king Ahas a allük ngeni.
2KI 16:17 Iwe, ewe king Ahas a etti lepekin ekewe kuruma o angei ekewe sepi me wor. A pwal angei ewe sepien koluk mi fokun watte mi nom won ekewe engol me ruoman ätemwänin kow seni piras, o anomu won eu longolong seni fau.
2KI 16:18 Ahas a pwal atomala ewe leni mi ekis tekia a nom ünükün imwen ewe Samol mi Lapalap, ewe ia ewe king a mot ie lon ränin sapat, pwal än ewe king alen tolong lon, pokiten a chächäri ewe kingen Asiria.
2KI 16:19 Nge lusun pworausen än Ahas föför meinisin a mak lon puken uruwon ekewe kingen Juta.
2KI 16:20 Iwe, Ahas a mäla, nge ra peiaseni ren an kewe lewo lon ewe telinimwen Tafit. Iwe, Hiskia nöün we mwän a siwili lon wisan wisen king.
2KI 17:1 Iwe, lon engol me ruuen ierin mwün Ahas ewe kingen Juta, Hosea nöün Ela we mwän a tolong lon wisan wisen king o nemeni Israel. A nom lon Samaria o nemenem lon ükükün tiu ier.
2KI 17:2 Hosea a föri mine a ngau me fän mesen ewe Samol mi Lapalap, nge esap kon usun ekewe kingen Israel mi akom mwan.
2KI 17:3 Iwe, Salmaneser ewe kingen Asiria a maun ngeni Hosea. Nge Hosea a fangatä o takises ngeni.
2KI 17:4 Nge lon eu rän Hosea a tinala chon künö ren So ewe kingen Isip o tüngorei pwe epwe alisi, esap pwal chüen takises ngeni ewe kingen Asiria, usun a piin föri iteiten ier. Iwe, lupwen ewe kingen Asiria a silei pwe Hosea a rawangauei, a turufi o aturalong lon imwen fötek.
2KI 17:5 Mürin, ewe kingen Asiria a tolong lon unusen ewe fanü o tori Samaria. Iwe, a pwelifeili ewe telinimw fän pisekin maun lon ükükün ülüngat ier.
2KI 17:6 Nge lon atiuen ierin mwün Hosea, ewe kingen Asiria a liapeni Samaria. A uweela ekewe chon Israel ngeni Asiria o anomu ekoch lon ewe telinimw Hala, ekoch lon Kosan arun ewe chanpupu Hapor, pwal ekoch lon ekewe telinimwen chon Metia.
2KI 17:7 Iwe, ei a fis pokiten ekewe aramasen Israel ra tipis ngeni ewe Samol mi Lapalap ar we Kot mi emwenirewu seni ewe fanü Isip, seni fän nemenemen Farao ewe kingen Isip. Iwe, ra fel ngeni pwal ekoch kot
2KI 17:8 o eäni örünien chon ekewe mwü ewe Samol mi Lapalap a fen asürela me mwen ekewe aramasen Israel, ra pwal eäni ekewe örüni ekewe kingen Israel ra atolonga.
2KI 17:9 Iwe, ekewe aramasen Israel ra föri sokun föför mi ngau ngeni ewe Samol mi Lapalap ar we Kot lemonomon. Ra aüetä fän iter ekewe lenien fel won ekewe leni tekia lon ar kewe telinimw meinisin, lon ekewe sop mi fokun kükün, pwal lon ekewe telinimw mi watte o pöchökül tittir.
2KI 17:10 Iwe, ra aüetä ür me uluulun ewe anüfefin Asera won iteiten chuk me fän iteiten irä mi muresires.
2KI 17:11 Ikenan won ekewe leni tekia meinisin ra keni apach mi pwokus, usun chon ekewe mwü ra föri, ekewe mwü ewe Samol mi Lapalap a fen asürela me mwer. Ra asonga ewe Samol mi Lapalap ren ar föföringau,
2KI 17:12 ra pwal fel ngeni uluulun anümwäl. Ikkei ekewe föför ewe Samol mi Lapalap a üreni pwe resap föri.
2KI 17:13 Nge ewe Samol mi Lapalap a tinala nöün kewe soukünö me soufos ren ekewe chon Israel me chon Juta, pwe repwe üreniir, “Oupwe likitala ämi föför mi ngau o aleasochisi ai kewe allük me pwüüng, ekewe allük meinisin üa allük ngeni ämi kewe lewo, üa pwal tinala remi nei kewe chon angang ekewe soufos, pwe repwe asile ngenikemi.”
2KI 17:14 Nge ekewe chon Israel resap aleasochis, pwe ra tipeförea, usun ar kewe lewo, ir chokewe resap lükü ewe Samol mi Lapalap ar we Kot.
2KI 17:15 Iwe, ra pöütala an kewe allük o atai ewe pwon a eäni ngeni ar kewe lewo, ra pwal aleasolap ngeni an kewe kapasen fön ngeniir. Ra fel ngeni ekewe uluulun anümwäl mi lomotongau o wiliti aramas mi lomotongau, ra pwal apirü föförün chon ekewe mwü mi nom pwelin ünükür, chokewe ewe Samol mi Lapalap a allük ngeniir pwe resap föri usun mine ir ra föri.
2KI 17:16 Ra aleasolap ngeni ekewe allük meinisin än ewe Samol mi Lapalap ar we Kot o föri ruu uluulun kow seni piras, ra pwal föri uluulun ewe anüfefin Asera pwe repwe fel ngeniir, ra pwal fel ngeni ekewe fün läng o angang ngeni ewe anü Paal.
2KI 17:17 Iwe, ra kenala nöür ät me nöür nengin pwe ar asor ngeni ekewe koten ekis, ra pwal föri pwee me roong o püsin fangala inisir, pwe repwe föri mine a ngau me fän mesen ewe Samol mi Lapalap o asonga.
2KI 17:18 Iei mine ewe Samol mi Lapalap a fokun song ren chon Israel o asürela seni fän mesan. Esap wor eu ainang a chüen nom, chilon chök ewe ainangen Juta.
2KI 17:19 Pwal mwo nge ekewe chon Juta resap aleasochis ngeni ekewe allük än ewe Samol mi Lapalap ar we Kot. Ra eäni ekewe örüni ekewe chon Israel ra atolonga.
2KI 17:20 Iei mine ewe Samol mi Lapalap a pöütala ekewe chon Israel meinisin, a ariaföüür o asechirelong lepöün chon solä, tori a asürela seni fän mesan.
2KI 17:21 Mürin än ewe Samol mi Lapalap aimwüela chon Israel seni chon Juta, chon Israel ra seikätä Jeropoam nöün Nepat we mwän pwe epwe ar king. Nge Jeropoam a atupu chon Israel, pwe repwe likitala ewe Samol mi Lapalap o emweniir ngeni ewe tipis mi lap.
2KI 17:22 Iwe, ekewe aramasen Israel ra chök föri ekewe tipis meinisin Jeropoam a föri, nge resap kul seniir,
2KI 17:23 tori ewe Samol mi Lapalap a asürela seni fän mesan, usun nöün kewe chon angang meinisin ekewe soufos ra fen apasa fän alon. Iei usun chon Israel ra oola seni fanüer o nom lon Asiria tori ikenai.
2KI 17:24 Iwe, ewe kingen Asiria a emwenato aramas seni Papilon, Kuta, Awa, Hata me Sefarwaim o anomuur lon ekewe telinimwen Samaria siwilin ekewe aramasen Israel mi oola. Ekei aramas ra fanüeni Samaria o imweimw lon ekewe telinimw.
2KI 17:25 Lepoputän ar nonom ikenan resap fel ngeni ewe Samol mi Lapalap. Iei mine ewe Samol mi Lapalap a tinala laion leir mi niela ekoch me leir.
2KI 17:26 Iwe, ra asile ngeni ewe kingen Asiria, “Ekewe aramas ka uweerela o anomuur lon ekewe telinimwen Samaria resap silei än ewe koten ewe fanü allük, iei mine ewe kot a tinala laion leir mi niela ekewe aramas.”
2KI 17:27 Mürin, ewe kingen Asiria a allük, “Oupwe tinala eman lein ekewe souasor oua uweato ikei. Ätewe epwe liwinla, epwe nonom ikenan o aiti ngeni ekewe aramas än ewe koten ewe fanü allük.”
2KI 17:28 Iei mine eman lein ekewe souasor ra uwereto seni Samaria a liwinla o imweimw lon Petel. Iwe, a aiti ngeni ekewe aramas usun ar repwe fel ngeni ewe Samol mi Lapalap.
2KI 17:29 Nge iteiten eu me eu mwichen aramas a chök sopwela le föri en me an uluulun anü o iseniir lon ekewe lenien fel won ekewe leni tekia ekewe chon Samaria ra fen aüetä. Iwe, ekewe mwichen aramas ra föri ei lon en me an telinimw ia ra imweimw ie.
2KI 17:30 Ekewe aramasen Papilon ra föri uluulun ewe anü Sukot-penot, ekewe aramasen Kut ra föri uluulun ewe anü Nerkal, ekewe aramasen Hata ra föri uluulun ewe anü Asima,
2KI 17:31 ekewe aramasen Awa ra föri uluulun ekewe anü Nipas me Tartak, nge ekewe chon Sefarwaim ra keni nöür semirit ngeni ar kewe anü Atramelek me Anamelek.
2KI 17:32 Ekei aramas ra fel ngeni ewe Samol mi Lapalap, nge ra pwal filätä me leir sokopaten aramas, pwe repwe föri angangen souasor lon ekewe lenien fel won ekewe leni tekia, repwe pwal asor fän iter ikenan.
2KI 17:33 Iei usun ra fel ngeni ewe Samol mi Lapalap, nge ra pwal fel ngeni püsin ar kewe kot lon örünien ekewe mwü, ewe ia ra feito me ie.
2KI 17:34 Iwe, tori ikenai ra chüen föri usun örünier me lom. Resap fel ngeni ewe Samol mi Lapalap, resap pwal aleasochis ngeni ekewe pwüüng me ekewe allük ewe Samol mi Lapalap a allük ngeni ekewe mwirimwirin Jakop, ätewe Kot a aita ngeni Israel.
2KI 17:35 Iwe, ewe Samol mi Lapalap a föri eu pwon ngeniir o allük ngeniir, “Ousap fel ngeni pwal ekoch kot ika chapetiu ngeniir, ousap angang ngeniir ika eäni asor ngeniir.
2KI 17:36 Nge oupwe chök fel ngeniei ngang ewe Samol mi Lapalap mi emwenikemiiwu seni ewe fanü Isip fän manaman mi lapalap, pwal fän pöchökül. Oupwe chapetiu ngeniei o eäni asor ngeniei.
2KI 17:37 Oupwe pwal aleasochisi ekewe pwüüng me allük kana üa makei fän itemi. Ousap fel ngeni pwal ekoch kot.
2KI 17:38 Ousap fokun manlükala ewe pwon üa föri ngenikemi. Ousap fel ngeni pwal ekoch kot,
2KI 17:39 nge oupwe chök fel ngeniei ngang ewe Samol mi Lapalap ämi we Kot. Iwe, ngang üpwe angasakemi seni chon oputakemi meinisin.”
2KI 17:40 Nge ekewe aramas resap aüseling, pwe ra chök föri usun örünier me lom.
2KI 17:41 Iei usun ekewe mwichen aramas ra fel ngeni ewe Samol mi Lapalap, nge ra pwal fel ngeni ar kewe uluulun anümwäl mi fal. Iwe, tori ikenai mwirimwirir kewe ra chök föri usun mine ar kewe lewo ra föri.
2KI 18:1 Iwe, lon aülüngatin ierin mwün Hosea nöün Ela we mwän ewe kingen Israel, Hiskia nöün Ahas we mwän a tolong lon wisan wisen king o nemeni Juta,
2KI 18:2 lupwen a ierini rüe me limu. A nom lon Jerusalem o nemenem lon ükükün rüe me tiu ier. Iten inan Api nöün Sekaria we fefin.
2KI 18:3 Hiskia a föri mine a pwüng me fän mesen ewe Samol mi Lapalap usun meinisin mine Tafit an we lewo a föri.
2KI 18:4 A ataela ekewe lenien fel won ekewe leni tekia, a kupi ekewe ür o pöküetiu uluulun ewe anüfefin Asera. A pwal atatakisi ewe uluulun serepenit seni piras Moses a föri, pun tori ekei rän ekewe aramasen Israel ra keni apach mi pwokus ngeni. Ei uluulun serepenit a iteni Nehustan.
2KI 18:5 Iwe, Hiskia a lükü ewe Samol mi Lapalap ewe Koten Israel. Esap wor eman king usun i me lein ekewe kingen Juta ra akom mwan ika tapweto mürin.
2KI 18:6 Pun Hiskia a kamwöchünük won ewe Samol mi Lapalap, esap fokun aleasolap ngeni, nge a apwönüetä ekewe allük meinisin ewe Samol mi Lapalap a allük ngeni Moses.
2KI 18:7 Iei mine ewe Samol mi Lapalap a eti Hiskia, nge meinisin mine Hiskia a föri a fisiöch. Iwe, a ü ngeni ewe kingen Asiria, esap pwal angang ngeni.
2KI 18:8 A akufu ekewe chon Filistia o atai fanüer seni ekewe sop mi fokun kükün tori ekewe telinimw mi watte o pöchökül tittir, pwal tori Kasa me ekewe fanü ünükün.
2KI 18:9 Iwe, lon arüanün ierin mwün Hiskia, iei afisuen ierin mwün Hosea nöün Ela ewe kingen Israel, Salmaneser ewe kingen Asiria a feito pwe epwe maun ngeni Samaria o pwelifeili ewe telinimw fän pisekin maun.
2KI 18:10 Mürin ülüngat ier Salmaneser a liapeni ewe telinimw. Iwe, Samaria a oola lon awonuen ierin mwün Hiskia, iei atiuen ierin mwün Hosea ewe kingen Israel.
2KI 18:11 Ewe kingen Asiria a uweela ekewe chon Israel ngeni Asiria o anomu ekoch lon ewe telinimw Hala, ekoch lon Kosan arun ewe chapupu Hapor, pwal ekoch lon ekewe telinimwen chon Metia.
2KI 18:12 Ei a fis pokiten ekewe chon Israel resap aleasochis ngeni alon ewe Samol mi Lapalap ar we Kot, nge ra atai an pwon o purätiu ekewe allük meinisin Moses nöün ewe Samol mi Lapalap we chon angang a allük ngeniir. Iwe, resap aüseling, resap pwal aleasochis.
2KI 18:13 Iwe, lon engol me rüanün ierin mwün ewe king Hiskia, Sanherip ewe kingen Asiria a feito, a maun ngeni ekewe telinimwen Juta mi pöchökül tittir o liapeniir.
2KI 18:14 Iei mine Hiskia ewe kingen Juta a titila ren ewe kingen Asiria mi nom Lakis o üreni, “Üa föri och föför mi mwäl. Kose mochen kopwe kaüla le maun ngeniei. Mine ka ariani seniei, üpwe ngonuk.” Iwe, ewe kingen Asiria a ariani seni Hiskia ükükün engol ton silifer me eu ton kolt.
2KI 18:15 Iwe, Hiskia a ngeni Sanherip ewe silifer meinisin mi nom lon imwen ewe Samol mi Lapalap, pwal lon lenien iseis pisek mi aüchea me lon imwen ewe king.
2KI 18:16 Lon ewe fansoun Hiskia a ettätiu ewe kolt seni ekewe asamalap, pwal seni ekewe üren penkasamen imwenfelin ewe Samol mi Lapalap, i a püsin apachatä me mwan, o ngeni ewe kingen Asiria.
2KI 18:17 Iwe, ewe kingen Asiria a tinala ülüman meilap seni Lakis, ewe meilapen nöüwis, ewe meilapen chon tümwünü imwen king me ewe meilapen sounfiu, pwe repwe feila Jerusalem ren ewe king Hiskia fiti eu mwichen sounfiu mi chomong. Nge lupwen ra tori Jerusalem, ra ütä arun ewe lenien puun koluk mi feitu me lon ewe nomun koluk asan ünükün ewe alelap a ale ngeni ewe leni, ia aramas ra apwecha mangaku ie.
2KI 18:18 Iwe, lupwen ra titi ewe king, Eliakim nöün Hilkia we mwän, ewe meilapen chon tümwünü imwen ewe king, Sepna ewe seketeri, pwal Joa nöün Asaf we mwän ewe soumak ra towu rer.
2KI 18:19 Iwe, ewe meilapen sounfiu a üreniir, “Oupwe asile ngeni Hiskia pwe iei alon ewe king mi lapalap, ewe kingen Asiria: Met ka anomu om apilükülük won?
2KI 18:20 Ka apasa pwe mi wor om silelap me pwora lon maun, nge om kapas ra pöön chök. Iö om apilükülük pwe ka ü ngeniei?
2KI 18:21 Ewer, ka apilükülükü Isip ewe liwo mi kupukai, epwe pwangeni pöün eman a itetä won. Iei usun lapalapen Farao ewe kingen Isip ngeni chokewe mi anomu ar apilükülük won.
2KI 18:22 Nge are oupwe apasa ngeniei, ‘Aia anomu äm apilükülük won äm Kot ewe Samol mi Lapalap,’ ifa usun, Hiskia esap ataela än Kot kewe lenien fel won ekewe leni tekia me an kewe rongen asor o apasa ngeni chon Juta me chon Jerusalem, ‘Oupwe chök fel ngeni Kot mwen ei rongen asor lon Jerusalem?’
2KI 18:23 Iwe, iei kopwe akuf ngeni ai samol ewe kingen Asiria. Ngang üpwe ngonuk ruongeröü oris, nge sipwe pii are epwe wor reöm ruongeröü sounfiu repwe wawa ekewe oris.
2KI 18:24 Ren met sokun lapalap ka tongeni pälüeni eman chök me lein ekewe samolun sounfiu mi kis nöün ai king, inamwo ika ka apilükülük won Isip fän iten woken me chon wawa oris.
2KI 18:25 Nge ifa usun, ka ekieki pwe ngang üa feito, pwe üpwe maun ngeni ei fanü o ataela lükün tipen ewe Samol mi Lapalap? Apwi, ewe Samol mi Lapalap a fen tinieito ikei pwe üpwe ataela ei fanü.”
2KI 18:26 Mürin, Eliakim me Sepna me Joa ra üreni ewe meilapen sounfiu, “Kose mochen kopwe kapas ngenikem äm noum kei chon angang lon fosun Aramaik, pun aia wewe ren, nge kosap kapas ngenikem lon fosun Juta mwen selingen ekewe aramas mi nom won tittin ewe telinimw.”
2KI 18:27 Nge ewe meilapen sounfiu a pälüeniir, “Ifa usun, ai samol a tinieito pwe üpwe eäni ei kapas ngeni ämi we king, pwal ngenikemi chök? Apwi, a pwal tinieito ren ekewe aramas mi mot won tittin ei telinimw, repwe püsin mongö ar kiten mongö me ünümi püsin chuchur usun chök ämi.”
2KI 18:28 Mürin, ewe meilapen sounfiu a kaneto o kökkö fän leüömong lon fosun Juta, “Oupwe aüselinga alon ewe king mi lapalap, ewe kingen Asiria.
2KI 18:29 Ousap mwüt ngeni Hiskia pwe epwe atupukemi, pun esap tongeni amanauakemi.
2KI 18:30 Ousap pwal tup ren än Hiskia michikemi ren an apasa, ‘Oupwe anomu ämi apilükülüköch won ewe Samol mi Lapalap, pun i epwe amanauakich, nge ei telinimw esap tolong lepöün ewe kingen Asiria.’
2KI 18:31 Iwe, ousap aüselinga alon Hiskia, pun ewe kingen Asiria a apasa pwe oupwe afisätä kinamwe ngeni o fangatä. Mürin, ämi meinisin oupwe ochoch seni püsin ämi irän wain me ämi irä fiik, oupwe pwal ünümi koluk seni püsin ämi chönüttu,
2KI 18:32 tori epwe feito o uweekemiila lon eu fanü usun chök fanüemi, eu fanü ia a wor ie wiich pwe epwe wor enemi, pwal tanipin wain pwe epwe wor ünümemi wain, eu fanüen irä olif me chönün chunen. Oupwe filätä manau, nge sap mäla. Iwe, ousap aüselinga alon Hiskia, lupwen a emweningauakemi ren an apasa pwe ewe Samol mi Lapalap epwe amanauakemi.
2KI 18:33 Ifa usun, mi wor eman lein koten ekewe mwü, a tufichin angasa fanüan seni ewe kingen Asiria?
2KI 18:34 Ikafa ir ekewe koten Hamat me Arpat? Ikafa ir ekewe koten Sefarwaim, Hena me Iwa? Ifa usun, ra angasa Samaria seni lepöün?
2KI 18:35 Iö me lein koten ekei fanü a tufichin angasa fanüan seni äm king? Ifa usun, oua chüen ekieki pwe ewe Samol mi Lapalap epwe tufichin angasa Jerusalem seni lepöün?”
2KI 18:36 Iwe, ekewe aramas ra chök fanafanala. Resap pälüeni eu an kewe kapas, pun ewe king a allük ngeniir pwe resap pälüeni och.
2KI 18:37 Mürin, Eliakim nöün Hilkia we mwän, ewe meilapen chon tümünü imwen ewe king, me Sepna ewe seketeri, pwal Joa nöün Asaf we mwän ewe soumak ra kamwi üfer fän ar letipeta, ra feila ren Hiskia o apworausa ngeni alon ewe meilapen sounfiun Asiria.
2KI 19:1 Iwe, lupwen ewe king Hiskia a rong ei pworaus, a pwal kamwei üfan fän an letipeta o üföüfolong üf seni tuk. Mürin a feila lon imwen ewe Samol mi Lapalap.
2KI 19:2 Nge a tinala Eliakim ewe meilapen chon tümwünü imwen ewe king, Sepna ewe seketeri, pwal ekewe souakom lein ekewe souasor, pwe repwe churi ewe soufos Aisea nöün Amos we mwän, nge ra üföüf üf seni tuk.
2KI 19:3 Iwe, ra üreni, “Iei alon Hiskia: Ei rän eu ränin riaföü me apwüng me itengau. Iwe, aia usun chök eman fefin a tori fansoun an epwe nöünöü, nge esap wor an pöchökül an epwe nöünätiu nöün.
2KI 19:4 Eli ewe Samol mi Lapalap om we Kot a rong alon ewe meilapen sounfiu, ätewe an samol ewe kingen Asiria a tinato pwe epwe turunufasei ewe Kot mi manau. Ewe Samol mi Lapalap om we Kot epwe apwüngü ren an kewe kapas a apasa. Iei mine kopwe iotek fän iten chokewe mi chüen manau.”
2KI 19:5 Iwe, lupwen nöün ewe king Hiskia kewe nöüwis ra feito ren Aisea,
2KI 19:6 Aisea a üreniir, “Oupwe asile ngeni ämi samol, pwe iei alon ewe Samol mi Lapalap, ‘Kosap niuokus ren ekewe kapas ka rongorong me ren nöün ewe kingen Asiria chon angang, ra eäni le turunufaseei.
2KI 19:7 Üpwe föri pwe ewe king epwe rongorong och pworaus o liwiniti poputän fanüan. Iwe, üpwe afeiengaua ren ketilas, pwe epwe mäla lon püsin fanüan.’”
2KI 19:8 Iwe, ewe meilapen sounfiun Asiria a rongorong pwe ewe kingen Asiria a feil seni Lakis o feila Lipna, pwe epwe maun ngeni. Iei mine a feila ikenan pwe epwe churi.
2KI 19:9 Iwe, eu pworaus a tori ewe kingen Asiria, pwe Tiraka, eman re Itiopia, ewe kingen Isip, a amolätä an epwe maun ngeni. Nge lupwen a rong ei pworaus, a tinala chon künö ren Hiskia fän echö toropwe.
2KI 19:10 Iei masouan, “Kopwe afäluk pwe om we Kot, ewe ka anomu om apilükülük won, esap atupuk ren an pwon ngonuk pwe Jerusalem esap olong lepei.
2KI 19:11 Ka rong mine ekewe kingen Asiria ra föri ngeni ekewe mwü meinisin, pwe ra fokun aroserela. Ifa usun, ka ekieki pwe en kopwe sü seni ewe feiengau?
2KI 19:12 Ai kewe lewo ra ataela ekewe telinimw Kosan, Haran, Resef, o niela ekewe aramasen Eten mi nom Telasar. Iwe, esap wor eman lein ar kewe kot a tongeni amanaueer.
2KI 19:13 Ia a nom ie kingen ekewe telinimw Hamat, Arpat, Sefarwaim, Hena me Iwa?”
2KI 19:14 Iwe, Hiskia a angei ewe toropwe seni lepöün ekewe chon künö o aleani. Mürin, a feila lon ewe imwenfel o oletala fän mesen ewe Samol mi Lapalap.
2KI 19:15 Hiskia a iotek ngeni ewe Samol mi Lapalap o üra, “Ai Samol mi Lapalap ewe Koten Israel, ka mot won ewe lenien motun king asen ekewe kerop. En chök ewe Koten ekewe mwü meinisin won fanüfan, ka pwal föri läng me fanüfan.
2KI 19:16 Ai Samol mi Lapalap, kopwe neto o nenengeni mine a fis ngenikem. Kopwe rongorong ekewe kapas meinisin Sanherip a tinato, pwe epwe turunufaseek ren, en ewe Kot mi manau.
2KI 19:17 Ai Samol mi Lapalap, a pwüng pwe ekewe kingen Asiria ra akufu chomong mwü o ataela fanüer,
2KI 19:18 ra pwal aturalong nöür kewe kot lon ekkei. Pun nöür kewe kot mi för seni mwüch me fau sap ir wesewesen Kot, nge förien aramas chök. Iei mine ra tala.
2KI 19:19 Nge iei, ai Kot Samol mi Lapalap, üa tüngor ngonuk, kopwe amanauakem seni Sanherip, pwe chon ekewe mwün fanüfan meinisin repwe silei pwe en chök Kot ewe Samol mi Lapalap.”
2KI 19:20 Mürin, Aisea nöün Amos we mwän a tinala ei pworaus ren Hiskia, “Iei alon ewe Samol mi Lapalap ewe Koten Israel, ‘Üa rongorong om iotek ngeniei usun Sanherip ewe kingen Asiria.
2KI 19:21 Ikei ekewe kapas ngang ewe Samol mi Lapalap üa aloni usun Sanherip: Ekewe chon Jerusalem ra takiriik o turunufaseek.
2KI 19:22 Iö ka urumwotei o turunufasei? Iö ka eäni kapas osomong ngeni? Nge iö ka newenewen ngeni fän lamalamtekia? Ka chök föri ei ngeniei ngang Ewe mi Pin lon Israel.
2KI 19:23 Ren noum chon künö ka turunufaseei ngang ewe Samol, ka pwal apasa fän om aingaing, “Won wäi woken mi chomong üa feitä won ungen ekewe chuk tori wochikin Lepanon. Üa pöküela setaren won mi fokun langatam, pwal saipiresin won mi fokun mürina. Üa tori wochikin o tolong lein wöllapan mi fokun pachefengen.
2KI 19:24 Üa pwal tuw chönüttu lon fanüen chon ekis o ünümi kolukun. Ren fän pechei üa amorätä ekewe chanpupun Isip meinisin.”
2KI 19:25 Ifa usun, kosamwo rongorong pwe üa ekiekietä ei me lomlom, üa pwal akota lon fansoun lom? Nge iei üa apwönüetä. Üa atufichuk pwe kopwe ataela telinimw mi pöchökül tittir, pwe repwe wewe ngeni ioien mettoch mi ta.
2KI 19:26 Iei mine esap chüen wor pöchökülen chon ekewe telinimw, nge ra niuokus o rükö. Iwe, ra wewe ngeni fetilin lemäl pwal fetil mi pwüküfö, ra pwal wewe ngeni fetilin won osun imw, a pwasala mwen an epwe märitä.
2KI 19:27 Nge ngang üa silei ia ka nom ie, om feila me om feito. Üa pwal silei om ü ngeniei fän om song mi watte.
2KI 19:28 Iwe, pokiten om ü ngeniei fän om song, pwal pokiten om sikesik a tori selingei, üpwe uwalong efoch ring lon pwötum, pwal efoch mächä lon awom, nge üpwe aliwinukela won ewe al ka feito won.’”
2KI 19:29 Mürin, Aisea a üreni ewe king Hiskia, “Ei epwe eu asisil ngonuk: Lon ei ier oupwe mongö mine a püsin mär, lon aruuen ier oupwe mongö mine a pwük seni waran, nge lon aülüngatin ier oupwe püsin fofot o kinikin, oupwe pwal tanipini irän wain o mongö seni uan.
2KI 19:30 Nge chokewe mi chüen manau lon Juta repwe märitä usun irä mi wor warer mi tötiu fän pwül, epwe pwal wor uar.
2KI 19:31 Pun lon Jerusalem, pwal won ewe chuk Sion repwe nom chokewe mi chüen manau. Iwe, ewe Samol mi Unusen Manaman epwe apwönüetä ei lon an tiliken.”
2KI 19:32 Iei mine ewe Samol mi Lapalap a apasa usun ewe kingen Asiria, “Esap tolong lon ei telinimw ika likapichielong eföü föün esefich lon, esap pwal kan ngeni ren eu tittin maun ika senätä eu ororen maun ünükün.
2KI 19:33 Iwe, epwe liwinla won ewe chök al a feito won, nge esap fokun tolong lon ei telinimw. Ngang ewe Samol mi Lapalap üa kapas.
2KI 19:34 Üpwe epeti ei telinimw seni feiengau, üpwe amanaua fän püsin itei, pwal pokiten ewe pwon üa eäni ngeni nei we chon angang Tafit.”
2KI 19:35 Iwe, lon ewe chök pwinin eman nöün ewe Samol mi Lapalap chon läng a feila o niela ipükü walik me limungeröü mwän lon ewe lenien sounfiun Asiria. Nge lupwen ekewe lusun ra pwätä lesosorusich, a chök wor somä ekis meinisin.
2KI 19:36 Mürin, Sanherip ewe kingen Asiria a sü, a liwiniti fanüan o imweimw lon Ninifa.
2KI 19:37 Lon eu rän, lupwen a fel lon imwen an we kot Nisrok, Atramelek me Sareser nöün kewe mwän ra niela ren ketilas o süla lon ewe fanü Ararat. Iwe, Esar-haton pwal eman nöün mwän a siwili lon wisan wisen king.
2KI 20:1 Iwe, lon ewe fansoun Hiskia a samau o arap ngeni an epwe mäla. Ewe soufos Aisea nöün Amos we mwän a feito ren o üreni, “Iei alon ewe Samol mi Lapalap, ‘Kopwe amola om amürinimä, pun kopwe mäla, nge kosap pöchökülsefäl.’”
2KI 20:2 Mürin, Hiskia a kul ngeni etippen rumwan, a iotek ngeni ewe Samol mi Lapalap o üra,
2KI 20:3 “Ai Samol mi Lapalap, üa tüngor ngonuk, kose mochen kopwe chechemeni pwe seni unusen letipei üa angang ngonuk fän allükülük, üa pwal föri mine a pwüng me reöm.” Iwe, Hiskia a fokun kechüangau.
2KI 20:4 Nge mwen än Aisea feila seni ewe leni lukalap mwen ewe imwen king, ewe Samol mi Lapalap a kapas ngeni,
2KI 20:5 “Kopwe liwiniti Hiskia ewe samolun nei aramas o üreni pwe iei aloi ngang ewe Samol mi Lapalap, än an we lewo Tafit we Kot, ‘Üa rong om iotek, üa pwal küna om kechü. Üpwe apöchökülok, nge mürin ülüngat rän kopwe feila lon ewe imwenfel.
2KI 20:6 Üpwe apacha ngeni ränin manauom pwal engol me limu ier. Üpwe angasakemi me chon ei telinimw seni ewe kingen Asiria. Üpwe peni ei telinimw fän püsin itei, pwal pokiten ewe pwon üa eäni ngeni nei we chon angang Tafit.’”
2KI 20:7 Mürin, Aisea a apasa, “Oupwe uwato eu tukutukun säfei seni uän ewe irä fiik o isetä won mmachen Hiskia.” Iwe, ra föri mine Aisea a apasa, nge Hiskia a pöchökülsefäl.
2KI 20:8 Iwe, Hiskia a aisini Aisea, “Ifan ewe asisil, pwe ewe Samol mi Lapalap epwe apöchökülaei, nge üpwe tufichin feila lon imwen ewe Samol mi Lapalap mürin ülüngat rän?”
2KI 20:9 Nge Aisea a pälüeni, “Iei ewe asisil seni ewe Samol mi Lapalap pwe epwe apwönüetä mine a eäni pwon ngonuk. Ifa usun, nürün ewe wok epwe feila won engol kinikin, ika epwe liwinsefälila won engol kinikin?”
2KI 20:10 Hiskia a pälüeni, “Epwe fen mecheres pwe nürün ewe wok epwe feila won engol kinikin. Üa filätä pwe epwe liwinsefälila won engol kinikin.”
2KI 20:11 Iwe, ewe soufos Aisea a siö ngeni ewe Samol mi Lapalap, nge ewe Samol mi Lapalap a aliwinisefäli nürün ewe wok won engol kinikin me won än Ahas we lenien aükük fansoun.
2KI 20:12 Lon ena fansoun ewe kingen Papilon itan Merotak-palatan nöün Palatan we mwän a rong pwe Hiskia a samau o pöchökülsefäl. Iwe, a tinala chon künö, pwe repwe uwala ren nöün toropwe me an lifang.
2KI 20:13 Iwe, Hiskia a etiweer fän pwapwa o aküna ngeniir an imwen iseis wöün, an silifer me kolt, an nofitin mongö me epit mi aüchea. Iwe, a pwal aküna ngeniir unusen an imwen pisekin maun me meinisin mine a nom lon an kewe imwen iseis. Esap fokun wor och mettoch lon imwan ika lon mwün esap aküna ngeniir.
2KI 20:14 Mürin, ewe soufos Aisea a feito ren ewe king Hiskia o aisini, “Met ekewe mwän ra apasa? Ia ra feito me ie?” Nge Hiskia a pälüeni, “Ra feito seni Papilon, ewe fanü mi toau.”
2KI 20:15 Iwe, Aisea a pwal aisini, “Meta ra küna me lon imwom?” Hiskia a pälüeni, “Ra küna meinisin mine a nom lon imwei. Esap fokun wor och lon ai kewe imwen iseis üsap aküna ngeniir.”
2KI 20:16 Mürin, Aisea a üreni Hiskia, “Kopwe rongorong alon ewe Samol mi Lapalap:
2KI 20:17 Lon kan fansoun repwe feito epwe fis pwe aramas repwe uwala lon ewe fanü Papilon meinisin mine a nom lon imwom, pwal meinisin mine om kewe lewo ra ionifengeni tori ikenai. Resap fokun likiti och.
2KI 20:18 Repwe pwal uwala ekoch lein noum kewe mwän mi upu ngonuk, pwe repwe chon angang lon imwen ewe kingen Papilon.”
2KI 20:19 Mürin, Hiskia a üreni Aisea, “A öch alon ewe Samol mi Lapalap ka üreniei.” Pun Hiskia a ekieki pwe epwe chök wor kinamwe me mwüöch lon ränin manauan.
2KI 20:20 Nge lusun pworausen än Hiskia föför me an pwora, pwal usun an föri ewe nomun koluk me ewe lenien puun koluk mi uwato koluk lon ewe telinimw, a mak lon puken uruwon ekewe kingen Juta.
2KI 20:21 Iwe, Hiskia a mäla, nge Manasa nöün we mwän a siwili lon wisan wisen king.
2KI 21:1 Iwe, Manasa a ierini engol me ruu, lupwen a tolong lon wisan wisen king. A nom lon Jerusalem o nemeni Juta lon ükükün lime me limu ier.
2KI 21:2 Manasa a föri mine a ngau me fän mesen ewe Samol mi Lapalap ren an föri ekewe föför mi anioput chon ekewe mwü ra föri, ir chokewe ewe Samol mi Lapalap a asürela me mwen ekewe aramasen Israel.
2KI 21:3 Pun a aüsefälietä ekewe lenien fel won ekewe leni tekia Hiskia saman we a atarela. A senätä rongen asor fän iten ewe anü Paal o föri uluulun ewe anüfefin Asera, usun Ahap ewe kingen Israel a föri, a pwal fel ngeni ekewe fün läng meinisin.
2KI 21:4 Iwe, Manasa a senätä sokopaten rongen asor lon ewe imwenfel, iei ewe leni ewe Samol mi Lapalap a fen kapas usun pwe aramas repwe fel ngeni ie.
2KI 21:5 Manasa a pwal senätä rongen asor fän iten ekewe fün läng meinisin me lon ekewe ruu lenien mwich mwen ewe imwenfel.
2KI 21:6 Iwe, a kenala nöün ät pwe eu asor, a pwal föri angangen souasisil me souwo o churi watawa me sourong. Manasa a föri chomong sokun föför mi ngau me fän mesen ewe Samol mi Lapalap o asonga i.
2KI 21:7 Manasa a anomu uluulun ewe anüfefin Asera a föri lon ewe imwenfel, iei ewe leni, ewe Samol mi Lapalap a kapas usun ngeni Tafit, pwal ngeni Salomon nöün we mwän, “Ei imwenfel me lon Jerusalem iei ewe leni üa filätä seni lenien ekewe ainangen Israel meinisin, pwe aramas repwe fel ngeniei ie tori feilfeilachök.
2KI 21:8 Üsap chüen mwüt ngeni aramas pwe repwe asüela chon Israel seni ewe fanü üa ngeni ar kewe lewo, are repwe chök tümwünüöchü meinisin mine üa allük ngeniir o aleasochisi ekewe allük meinisin nei we chon angang Moses a allük ngeniir.”
2KI 21:9 Nge ekewe chon Juta resap aleasochis ngeni ewe Samol mi Lapalap. Iwe, Manasa a atokerela pwe ra föri mine a ngau lap seni chon ekewe mwü ra föri, ir chokewe ewe Samol mi Lapalap a aroserela me mwen ekewe aramasen Israel.
2KI 21:10 Iei usun mine ekewe soufos nöün ewe Samol mi Lapalap kewe chon angang ra apasa fän alon,
2KI 21:11 “Manasa ewe kingen Juta a föri ekei föför mi fokun anioput. A föri sokun föför mi ngau lap seni mine ekewe chon Amor ra föri me mwan, o emweni chon Juta ngeni tipis ren an kewe uluulun anümwäl.
2KI 21:12 Iei mine ewe Samol mi Lapalap ewe Koten Israel a apasa, ‘Üpwe awarato won Jerusalem me Juta feiengau mi lapalap, pwe meinisin mi rongorong usun repwe mäirü ren.
2KI 21:13 Üpwe eäni ewe aükükün feiengau ngeni Jerusalem, usun üa eäni ngeni Samaria, o arosala chon, usun üa arosala chon leimwen Ahap. Üpwe alimelimala chon Jerusalem usun eman a alimelima eu sepi o achapätiu.
2KI 21:14 Üpwe pöütala chokewe mi chüen manau seni lein nei armas o asechirelong lepöün chon oputer. Iwe, repwe wiliti liapen me choon wokun chon oputer meinisin,
2KI 21:15 pun ra föri mine a ngau me fän mesei o asongaei seni ewe fansoun ar kewe lewo ra towu seni Isip tori ikenai.’”
2KI 21:16 Manasa a pwal niela chomong aramas esap wor ar tipis, pwe ekewe alen Jerusalem ra kula ren cha. Ei a föri lükün ewe tipis, pwe a emweni chon Juta ngeni ar repwe föri mine a ngau me fän mesen ewe Samol mi Lapalap.
2KI 21:17 Nge lusun pworausen än Manasa föför meinisin me ekewe tipis a föri a mak lon puken uruwon ekewe kingen Juta.
2KI 21:18 Iwe, Manasa a mäla, nge ra peiaseni lon ewe tanipi lükün imwan, ewe tanipin Usa. Iwe, Amon nöün we mwän a siwili lon wisan wisen king.
2KI 21:19 Iwe, Amon a ierini rüe me ruu, lupwen a tolong lon wisan wisen king. A nom lon Jerusalem o nemeni Juta lon ükükün ruu ier. Iten inan Mesulemet nöün Harus we fefin seni Jotpa.
2KI 21:20 Amon a föri mine a ngau me fän mesen ewe Samol mi Lapalap, usun Manasa saman we a föri.
2KI 21:21 A apirü föförün saman we o fel ngeni ekewe uluulun anümwäl, saman we a pwal fel ngeni.
2KI 21:22 Amon a likitala ewe Samol mi Lapalap än an kewe lewo we Kot o aleasolap ngeni an kewe allük.
2KI 21:23 Iwe, nöün Amon kewe nöüwis ra rawangauei o niela me lon imwan.
2KI 21:24 Nge ekewe aramasen Juta ra niela chokewe meinisin mi rawangauei ewe king Amon o seikätä Josia nöün we mwän, pwe epwe siwili lon wisan wisen king.
2KI 21:25 Nge lusun pworausen än Amon föför a mak lon puken uruwon ekewe kingen Juta.
2KI 21:26 Iwe, ra peiaseni Amon lon püsin peiasan me lon tanipin Usa, nge Josia nöün we mwän a siwili lon wisan wisen king.
2KI 22:1 Iwe, Josia a ierini walu, lupwen a tolong lon wisan wisen king. A nom lon Jerusalem o nemeni Juta lon ükükün ilik me eu ier. Iten inan Jetita nöün Ataia we fefin seni Poskat.
2KI 22:2 Josia a föri mine a pwüng me fän mesen ewe Samol mi Lapalap o föri mine Tafit an we lewo a föri, esap fokun aleasolap ngeni än Kot kewe allük.
2KI 22:3 Lon engol me waluen ierin mwün ewe king Josia, Josia a tinala ewe seketeri Safan ren imwen ewe Samol mi Lapalap. Iwe, Safan nöün Asalia we mwän, nge Asalia nöün Mesulam mwän. Ewe king a üreni,
2KI 22:4 “Kopwe feila ren ewe souasor mi lap Hilkia o üreni, pwe epwe pii ükükün ewe moni mi nom lon imwen ewe Samol mi Lapalap, ekewe mi mamasa ekewe asamalap ra ioni seni ekewe aramas.
2KI 22:5 Iwe, repwe ngeni ekewe souemwenin angangen ewe imwenfel ewe moni. Nge ir repwe möni ngeni ekewe chon angang mi försefäli mine a ta me won ewe imwenfel.
2KI 22:6 Repwe möni ngeni ekewe taikü, ekewe chon kaü imw me ekewe chon ses fau. Repwe pwal kamö won ei moni irä me fau mi fal, pwe repwe försefäli mine a ta me won ewe imwenfel.
2KI 22:7 Nge resap ais repootun ewe moni mi katolong lepöür, pun ekewe souemwenin angang ra wenechar.”
2KI 22:8 Iwe, ewe souasor mi lap Hilkia a üreni ewe seketeri Safan, “Üa küna ewe puken allük me lon imwen ewe Samol mi Lapalap.” Iwe, Hilkia a ngeni Safan ewe puk, nge Safan a aleani.
2KI 22:9 Mürin, ewe seketeri Safan a feito ren ewe king o apworausa ngeni, “Noum kewe chon angang ra angei ewe moni mi nom lon ewe imwenfel o ngeni ekewe souemwenin angangen ewe imwenfel.”
2KI 22:10 Safan a pwal üreni ewe king, “Ewe souasor Hilkia a ngeniei ei puk.” Iwe, Safan a aleani ewe puk ngeni ewe king.
2KI 22:11 Nge lupwen ewe king a rongorong kapasen ewe puken allük, a kamwei üfan fän an letipeta.
2KI 22:12 Mürin, ewe king a allük ngeni ewe souasor Hilkia me Ahikam nöün Safan we mwän, ngeni Akpor nöün Mikaia we mwän me ewe seketeri Safan, pwal ngeni Asaia nöün ewe king chon angang,
2KI 22:13 “Oupwe feila o aisini ewe Samol mi Lapalap fän itei, pwal fän iten ekewe chon Juta meinisin, usun ekewe kapas mi mak lon ei puk ra küna. Iwe, än ewe Samol mi Lapalap song a fokun watte ngenikich, pun ach kewe lewo resap aleasochis ngeni kapasen ei puk, resap pwal föri usun meinisin mine a mak lon.”
2KI 22:14 Iei mine ewe souasor Hilkia me Ahikam, Akpor, Safan, pwal Asaia ra feila ren ewe soufos fefin Hulta mi nom lon ewe aruuen kinikinin ewe telinimw Jerusalem, pwülüen neminei Salum nöün Tikwa we mwän, nge Tikwa nöün Haras. Salum a wisen tütümwünü üföüfen lon ewe imwenfel. Iwe, ra apworausa ngeni neminewe mine a fis.
2KI 22:15 Nge Hulta a üreniir, “Oupwe liwinla o üreni ewe mwän a tinikemiito rei,
2KI 22:16 pwe iei alon ewe Samol mi Lapalap ewe Koten Israel, ‘Üpwe awarato feiengau won ei leni, pwal won aramasan, usun meinisin mine a mak lon ewe puk ewe kingen Juta a aleani.
2KI 22:17 Pokiten ra likitieila o kenala apach mi pwokus ngeni pwal ekoch kot, pwe repwe asongaei ren ar kewe uluulun anümwäl ra püsin föri. Iei mine ai song epwe watte ngeni ei leni, nge esap wesila.’
2KI 22:18 Nge iei usun mine oupwe üreni ewe kingen Juta mi tinikemiito pwe oupwe aisini ewe Samol mi Lapalap ewe Koten Israel, pwe iei alon, ‘Ka aüselinga ai kewe kapas mi mak lon ewe puk,
2KI 22:19 ka pwal apwetetei lelukom o atekisonok me fän mesei, lupwen ka rongorong mine üa apasa usun feiengauen ei leni, pwal usun feiengauen aramasan, pwe repwe wiliti och minen eniwokus me anümamau. Iwe, ka kamwei üfom o kechü fän mesei, iei popun ngang üa pwal aüselinga om iotek.
2KI 22:20 Iei mine lupwen kopwe mäla, kopwe mäla fän kinamwe o peias ren om kewe lewo, nge kosap küna ewe feiengau üpwe awarato won ei leni.’” Iwe, ekewe mwän ra liwinla o uwala ekei kapas ren ewe king.
2KI 23:1 Mürin, ewe king Josia a titi ekewe souakomwen Juta me Jerusalem, nge ir meinisin ra mwicheto ren.
2KI 23:2 Iwe, ewe king a feila ren imwen ewe Samol mi Lapalap, nge ekewe souakomwen Juta me ekewe chon Jerusalem meinisin, pwal ekewe souasor me soufos, ekewe aramas kis me aramas lap meinisin ra eti. Ewe king a aleani ngeniir kapasen lon ewe puken pwon ra küna me lon imwen ewe Samol mi Lapalap.
2KI 23:3 Nge ewe king a ütä lon lenian ren ewe ür o eäni eu pwon me fän mesen ewe Samol mi Lapalap, pwe epwe aleasochis ngeni ewe Samol mi Lapalap o apwönüetä an kewe allük me pwüüng ren unusen lelukan me unusen ngünün. Epwe pwal föri pwüngün kapasen ewe pwon mi mak lon ei puk. Iwe, ekewe aramas meinisin ra tipeeu pwe repwe eti le apwönüetä ewe pwon.
2KI 23:4 Mürin, ewe king a allük ngeni ewe souasor mi lap Hilkia me ekewe souasor ir kisin fan, pwal ngeni ekewe chon mamasa asamalapen ewe imwenfel, pwe repwe atowu seni ewe imwenfel ekewe pisek meinisin aramas ra aea fän iten ar fel ngeni ewe anü Paal me ewe anüfefin Asera, pwal ngeni ekewe fün läng meinisin. Iwe, ewe king a kenirela lükün Jerusalem arap ngeni ewe lemolun Kitron o uweela falanger ngeni Petel.
2KI 23:5 A pwal asüela ekewe souasor mi angang ngeni anümwäl, chokewe ekewe kingen Juta ra filiretä pwe repwe keni apach mi pwokus lon ekewe lenien fel won ekewe leni tekia, lon ekewe telinimwen Juta, pwal pwelin ünükün Jerusalem. Ewe king a asüela chokewe meinisin mi keni apach mi pwokus ngeni ewe anü Paal, ngeni akkar me maram, ngeni ekewe muchiechien fü me ekewe fün läng meinisin.
2KI 23:6 Iwe, a uwawu uluulun ewe anüfefin Asera seni imwen ewe Samol mi Lapalap o uwala lükün Jerusalem lon ewe lemolun Kitron. Ikenan a kenala, a üsi molian tori a wiliti falang o moneela won lenien peiasen ekewe aramas.
2KI 23:7 Ewe king a pwal atai ekewe imw mi nom ren imwen ewe Samol mi Lapalap, imwen ekewe mwän mi fangala inisir fän iten lisowu fän iten ekewe anü. Ikenan ekewe fefin ra pwal türüni mangaku fän iten ewe anüfefin Asera.
2KI 23:8 Iwe, ewe king a titi ekewe souasor meinisin seni ekewe telinimwen Juta o atai pinin ekewe lenien fel won ekewe leni tekia seni Kepa tori Persepa, ia ekewe souasor ra keni apach mi pwokus ie. A pwal ataela ekewe rongen asor ngeni anü mi nom arun ewe asamalapen Josua kepinan ewe telinimw pelimöngün ewe asamalapen tolong lon ewe telinimw.
2KI 23:9 Nge ekewe souasorun ekewe lenien fel won ekewe leni tekia resap tongeni föri angangen asor won än ewe Samol mi Lapalap rongen asor lon Jerusalem. Nge ra tongeni mongö pilawa esap wor iis lon usun chök chiechier kewe souasor.
2KI 23:10 Iwe, ewe king Josia a pwal atai pinin Tofet ewe lenien fel ngeni anü mi nom lon ewe lemolun Pen-hinom, pwe esap chüen wor eman epwe tongeni kenala nöün ät ika nöün nengin pwe eu asor ngeni Molok.
2KI 23:11 A atowu ekewe oris ekewe kingen Juta ra apiniir fän iten ar fel ngeni akkar, ra piin nom ren ewe lenien tolong ngeni imwen ewe Samol mi Lapalap arun rumwen Natan-melek, eman nöüwis tekia. A pwal kenala ekewe woken ra wawa lon ar fel ngeni akkar.
2KI 23:12 Iwe, ewe king Josia a ataela ekewe rongen asor ekewe kingen Juta ra senätä won ewe rumwen Ahas mi nom asan. A pwal ataela ekewe rongen asor Manasa a senätä lon ekewe ruu leni mi nom mwen imwen ewe Samol mi Lapalap. A atatakisiir o moneela pipir lon ewe lemolun Kitron.
2KI 23:13 Iwe, ewe king Josia a atai pinin ekewe lenien fel won ekewe leni tekia mi nom peliötiuen Jerusalem me peliörün ewe Chukun Olif. Ekei lenien fel Salomon ewe kingen Israel a aüetä fän iten Astarot än chon Siton we anüfefin mi anioput, fän iten Kemos än chon Moap we kot mi anioput, pwal fän iten Molok än chon Amon we kot mi anioput.
2KI 23:14 Ewe king Josia a atatakisi ekewe ür mi pin o pöküetiu ekewe uluulun ewe anüfefin Asera, a pwal amasoua lenier kewe ren chün aramas.
2KI 23:15 Iwe, ewe king a pwal ataela ewe rongen asor mi nom Petel, ewe lenien fel won ewe leni tekia Jeropoam nöün Nepat we mwän a aüetä, ätewe a emweni chon Israel ngeni tipis. A atatakisi föün ei rongen asor tori a wiliti pipisüsü, a pwal kenala uluulun ewe anüfefin Asera.
2KI 23:16 Mürin, Josia a nenefeil, nge lupwen a küna ekoch peias mi nom won ewe chuk, a tinala aramas pwe repwe uwato chün ekewe somä seni lon ekewe peias. Iwe, a kenala ekewe chü won ewe rongen asor. Iei usun a atai pinin ewe rongen asor, usun ewe soufos a fen apasa, lupwen a osuni ekewe mettoch fän alon ewe Samol mi Lapalap.
2KI 23:17 Mürin, ewe king a ais, “Peiasen iö ewe üa küna ewe föün achem won?” Nge ekewe mwänin ewe telinimw Petel ra üreni, “Iei peiasen ewe soufos mi feito seni Juta o osuni ekei mettoch en ka föri ngeni ei rongen asor.”
2KI 23:18 Iwe, ewe king a üra, “Oupwe chök likiti. Esap wor eman epwe amwökütü chün.” Iei mine ra likiti chün, pwal chün ewe soufos seni Samaria.
2KI 23:19 Josia a pwal ataela ekewe lenien fel meinisin won ekewe leni tekia mi nom lon ekewe telinimwen Samaria, ekewe kingen Israel ra aüretä o asonga ewe Samol mi Lapalap rer. A föri ngeniir ükükün meinisin mine a föri me lon Petel.
2KI 23:20 Iwe, a niela me won ekewe rongen asor ekewe souasor meinisin mi angang lon ekewe lenien fel won ekewe leni tekia, a pwal kenala chün aramas wor. Mürin a liwiniti Jerusalem.
2KI 23:21 Iwe, ewe king Josia a allük ngeni ekewe aramas meinisin, “Oupwe föri ewe Pasofer ngeni ewe Samol mi Lapalap ämi we Kot, usun a mak lon ei puken pwon.”
2KI 23:22 Esap wor eu Pasofer mi wewe ngeni ei seni ewe fansoun ekewe soukapwüng ra nemeni Israel, ika lupwen fansoun ekewe kingen Israel, ika ekewe kingen Juta.
2KI 23:23 Lon engol me waluen ierin mwün ewe king Josia ekewe aramas ra föri ei Pasofer ngeni ewe Samol mi Lapalap me lon Jerusalem.
2KI 23:24 Iwe, ewe king Josia a pwal asüela ekewe watawa me sourong o pöütala ekewe anün leimw, ekewe uluulun anümwäl me ekewe mettoch meinisin mi anioput a küna me lon ewe fanü Juta pwal lon Jerusalem. Ei a föri pwe epwe anüküchara kapasen ewe allük mi mak lon ewe puk, ewe souasor Hilkia a küna me lon imwen ewe Samol mi Lapalap.
2KI 23:25 Esap wor eman king mi manau me mwen Josia ika me mürin, a wewe ngeni lon an angang ngeni ewe Samol mi Lapalap ren unusen lelukan, ren unusen ngünün pwal ren unusen an pöchökül, pun a aleasochisi än Moses kewe allük meinisin.
2KI 23:26 Nge ewe Samol mi Lapalap esap ükütiu seni an lingeringer mi fokun watte, pun a chüen song ngeni chon Juta, pokiten ekewe föför meinisin Manasa a föri.
2KI 23:27 Iwe, ewe Samol mi Lapalap a üra, “Üpwe atowu chon Juta seni fän mesei, usun üa atowu chon Israel. Üpwe pöütala ei telinimw Jerusalem üa filätä, pwal ewe imwenfel üa apasa usun pwe aramas repwe fel ngeniei ie.”
2KI 23:28 Nge lusun pworausen än ewe king Josia föför meinisin a mak lon puken uruwon ekewe kingen Juta.
2KI 23:29 Lupwen fansoun än Josia nemenem, Farao Neko ewe kingen Isip a feila ngeni ewe chanpupu Oifrat, pwe epwe alisi ewe kingen Asiria. Iwe, ewe king Josia a feila pwe epwe maun ngeni. Nge lupwen ra maunfengen, Farao Neko a niela Josia me lon Mekito.
2KI 23:30 Iwe, nöün chon angang ra uwala inisin won efoch woken seni Mekito tori Jerusalem o peiaseni lon püsin peiasan. Iwe, aramasen ewe fanü ra filätä Joahas nöün Josia we mwän, ra epiti o seikätä, pwe epwe siwili saman we lon wisan wisen king.
2KI 23:31 Iwe, Joahas a ierini rüe me ülüngat, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram. Iten inan Hamutal nöün Jeremaia fefin seni Lipna.
2KI 23:32 Joahas a föri mine a ngau me fän mesen ewe Samol mi Lapalap, usun chök mine an kewe lewo ra föri.
2KI 23:33 Iwe, Farao Neko a fötekini Joahas me lon Ripla lon ewe fanü Hamat, pwe esap chüen tongeni nemeni Juta. A pwal angei takises seni chon Juta ükükün fisu ngeröü limepükü paun silifer me fik me limu paun kolt.
2KI 23:34 Farao Neko a seikätä Eliakim nöün Josia we mwän, pwe epwe siwili saman we lon wisan wisen king. Iwe, a siwili itan ngeni Jehoiakim. Nge Farao Neko a uwala Joahas Isip. Iwe Joahas a mäla ikenan.
2KI 23:35 Iwe, Jehoiakim a ngeni Farao ewe silifer me ewe kolt won ükükün an mochen. A angei takisesin ewe fanü o angei silifer me kolt seni iteiten eman me eman chon ewe fanü won aükükün an tufich, pwe epwe wor mine epwe ngeni Farao Neko.
2KI 23:36 Iwe, Jehoiakim a ierini rüe me limu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Iten inan Sepita nöün Petaia fefin seni Ruma.
2KI 23:37 Nge Jehoiakim a föri mine a ngau me fän mesen ewe Samol mi Lapalap, usun chök mine an kewe lewo ra föri.
2KI 24:1 Iwe, lon fansoun än Jehoiakim nemenem, Nepukatnesar ewe kingen Papilon a tolong lon Juta. Jehoiakim a fangatä o nom fän nemeneman lon ükükün ülüngat ier. Mürin, Jehoiakim a ü ngeni Nepukatnesar.
2KI 24:2 Iwe, ewe Samol mi Lapalap a tinala mwichen sounfiu seni Papilon, Siria, Moap me Amon, pwe repwe maun ngeni Jehoiakim o ataela ewe fanü Juta, usun nöün kewe chon angang ekewe soufos ra fen apasa fän alon.
2KI 24:3 Ellet, ei feiengau a fis ngeni chon Juta fän än ewe Samol mi Lapalap allük, pwe epwe atorowu seni fän mesan pokiten ekewe tipis meinisin ewe king Manasa a föri,
2KI 24:4 pwal pokiten än Manasa niela chomong aramas esap wor ar tipis, pwe Jerusalem a kula ren char. Iwe, ewe Samol mi Lapalap esap amusala an tipis.
2KI 24:5 Nge lusun pworausen än Jehoiakim föför meinisin a mak lon puken uruwon ekewe kingen Juta.
2KI 24:6 Iwe Jehoiakim a mäla, nge Jehoiachin nöün we mwän a siwili lon wisan wisen king.
2KI 24:7 Nge ewe kingen Isip esap tösefäliwu seni fanüan, pun ewe kingen Papilon a liapeni meinisin mine a nom fän nemenien ewe kingen Isip me mwan seni ewe öüwön Isip tori ewe chanpupu Oifrat.
2KI 24:8 Iwe, Jehoiachin a ierini engol me walu, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram. Iten inan Nehusta nöün Elnatan we fefin seni Jerusalem.
2KI 24:9 Nge Jehoiachin a föri mine a ngau me fän mesen ewe Samol mi Lapalap, usun chök mine saman we a föri.
2KI 24:10 Lon ena fansoun nöün Nepukatnesar ewe kingen Papilon kewe meilap fiti nöür sounfiu ra feito Jerusalem o pwelifeili fän pisekin maun.
2KI 24:11 Nepukatnesar ewe kingen Papilon a pwal feito Jerusalem, lupwen nöün kewe sounfiu ra pwelifeili ei telinimw fän pisekin maun.
2KI 24:12 Iwe, Jehoiachin ewe kingen Juta a fangatä ren ewe kingen Papilon, i me inan, nöün chon angang me ekewe aramas tekia, pwal nöün kewe nöüwis meinisin. Lon awaluen ierin mwün, Nepukatnesar a fötekini Jehoiachin,
2KI 24:13 o uwala ekewe pisek aüchea meinisin seni lon imwen ewe Samol mi Lapalap, pwal seni lon imwen ewe king. A ettätiu ekewe kolt meinisin seni pisekin lon imwen ewe Samol mi Lapalap, Salomon ewe kingen Israel a föriir, pun iei usun ewe Samol mi Lapalap a fen apasa.
2KI 24:14 Iwe, ewe kingen Papilon a uwala ekewe chon oola meinisin seni Jerusalem, ekewe meilap me ekewe sounfiu mi pöchökül o pwora, irfengen meinisin engol ngeröü. A pwal uwala ekewe souangang me ekewe chon üsümächä. Esap chüen wor eman a nonom, chilon chök aramasen ewe fanü mi fokun mwelele.
2KI 24:15 Nepukatnesar a uwala Jehoiachin seni Jerusalem tori Papilon, fiti inen ewe king me pwülüan kewe, nöün kewe nöüwis me ekewe souakomwen ewe fanü.
2KI 24:16 A pwal uwala Papilon ükükün fisu ngeröü mwän mi pöchökül o pwora, pwal engeröü souangang me chon üsümächä, ir meinisin ra pöchökül o tufich ngeni maun.
2KI 24:17 Iwe, Nepukatnesar a seikätä Matania pwin semen Jehoiachin, pwe epwe siwili Jehoiachin lon wisan wisen king, nge a siwili itan ngeni Setekia.
2KI 24:18 Iwe, Setekia a ierini rüe me eu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Iten inan Hamutal nöün Jeremaia we fefin seni Lipna.
2KI 24:19 Nge Setekia a föri mine a ngau me fän mesen ewe Samol mi Lapalap usun chök mine Jehoiakim a föri.
2KI 24:20 Iwe, pokiten ewe Samol mi Lapalap a song ngeni ekewe chon Jerusalem me chon Juta, a asürela seni fän mesan. Nge Setekia a ü ngeni ewe kingen Papilon.
2KI 25:1 Iwe, lon atiuen ierin mwün Setekia, lon aengolun ränin ewe aengolun maram, Nepukatnesar ewe kingen Papilon a feito me an mwichen sounfiu meinisin, pwe epwe maun ngeni Jerusalem. Iwe, ra pwelifeili ewe telinimw fän pisekin maun o senätä eu ororen maun ngeni pwelin ünükün.
2KI 25:2 Iei usun ra pwelifeili ewe telinimw fän pisekin maun tori ewe engol me euin ierin mwün ewe king Setekia.
2KI 25:3 Nge lon atiuen ränin ewe arüanün maram ewe lengita lon ewe telinimw a fokun watte, pwe esap chüen wor mongö fän iten ekewe aramas.
2KI 25:4 Mürin, ekewe sounfiu ra pwangenalong tittin ewe telinimw. Iwe, mwo än ekewe sounfiun Papilon nom pwelin ünükün ewe telinimw, ewe king me ekewe sounfiu meinisin ra süla lepwin won ewe al ngeni ewe asamalap lefilen ekewe ruu tit ren tanipin ewe king. Iwe, ra süla ngeni akawenewenen ewe lemolun Jortan.
2KI 25:5 Nge ekewe sounfiun Papilon ra tapweri ewe king Setekia o tori me lon ewe maasiesin Jeriko. Iwe, nöün kewe sounfiu meinisin ra sü seni.
2KI 25:6 Mürin ra liapeni ewe king o emwenala ren ewe kingen Papilon mi nom Ripla. Ikenan ewe kingen Papilon a apwüngala mine epwe fis ngeni.
2KI 25:7 Iwe, ra niela nöün Setekia kewe mwän me fän mesan. Mürin ra alusawu föün mesan, ra föti ngeni sein seni piras o uwala Papilon.
2KI 25:8 Iwe, lon afisuen ränin ewe alimuen maram, iei ewe engol me tiuen ierin mwün ewe king Nepukatnesar seni Papilon, Napusaratan ewe meilapen sounfiu mi wisen tümwünü ewe king, i eman nöün ewe kingen Papilon nöüwis, a tolong Jerusalem.
2KI 25:9 A kenala imwen ewe Samol mi Lapalap me imwen ewe king, pwal ekewe imw meinisin lon Jerusalem. Iteiten imw mi aüchea a kenala.
2KI 25:10 Nge nöün kewe sounfiu ra pwal ataela ewe tit mi pwelifeili Jerusalem.
2KI 25:11 Mürin, Nepusaratan ewe meilapen sounfiu mi wisen tümwünü ewe king a uwala Papilon chokewe mi chüen manau me lon ewe telinimw me chokewe mi süla ren ewe kingen Papilon me mwan, pwal ekewe lusun aramas mi sipeöch le angang.
2KI 25:12 Nge a likiti lon Juta ekoch aramas mi mwelele, pwe repwe chon angang lon tanipin wain me chon tuw pwül.
2KI 25:13 Iwe, ekewe sounfiun Papilon ra pwal atatakisi ekewe ür seni piras, ekewe kuruma me ewe sepien koluk mi watte seni piras mi nom lon imwen ewe Samol mi Lapalap. Ra uwala ekewe piras meinisin Papilon.
2KI 25:14 Ra angeala ekewe nape, söföl, fich, sepi fän iten apach mi pwokus me sokopaten sepi seni piras, ekewe souasor ra aea le angang lon ewe imwenfel.
2KI 25:15 Iwe, ewe meilapen sounfiu mi wisen tümwünü ewe king a pwal angei ekewe sepi fän iten moli, me ekewe kükün sepi ra aea fän iten äsupu cha. Meinisin mine a för seni kolt me silifer a uwala.
2KI 25:16 Nge pirasen ekewe ruofoch ür, ewe sepien koluk mi watte me ekewe kuruma Salomon a föriir fän iten imwen ewe Samol mi Lapalap, a kon senukula chour.
2KI 25:17 Iwe, ekewe ruofoch ür ra nönnöfengen tekian efoch me efoch ükükün rüe me fisu fiit, mi pwal wor letoner seni piras ükükün tekiar rüanü esop fiit. A pwal wor sein mi nut me uluulun apel won pwelin ünükün ekewe leton, nge meinisin a för seni piras.
2KI 25:18 Nepusaratan ewe meilapen sounfiu mi wisen tümwünü ewe king a angei ewe souasor mi lap Seraia me Sefania ewe aruomanün souasor, pwal ekewe ülüman chon mamasa asamalapen ewe imwenfel.
2KI 25:19 A pwal angei seni lein chokewe mi chüen nom lon ewe telinimw ewe meilap mi nemeni ekewe sounfiu, limman nöün ewe king chon öüröür, ewe seketerin ewe meilapen sounfiu mi wisen makei iteiten ekewe aramas, me wone mwän mi iteföüla me lon ewe telinimw.
2KI 25:20 Iwe, Nepusaratan a angeer o uweerela ren ewe kingen Papilon mi nom Ripla.
2KI 25:21 Nge ewe kingen Papilon a awateer o nirela me lon Ripla lon ewe fanü Hamat. Iei usun chon Juta ra oola seni fanüer.
2KI 25:22 Iwe, Nepukatnesar ewe kingen Papilon a seikätä Ketalia nöün Ahikam we mwän, nge Ahikam nöün Safan, pwe epwe kepinan ekewe aramas mi chüen nom lon ewe fanü Juta, chokewe ewe king a likitirela.
2KI 25:23 Nge lupwen ekewe meilap me nöür kewe sounfiun Juta mi op lemäl ra rong, pwe ewe kingen Papilon a seikätä Ketalia pwe epwe kepina, ra feito meinisin ren Ketalia lon Mispa. Ikkei iten ekewe meilap: Ismael nöün Netania, Johanan nöün Karea, Seraia nöün Tanumet seni Netofat, me Jasania seni Maka.
2KI 25:24 Iwe, Ketalia a anükünükü an kapas fän akapel ngeniir me nöür kewe sounfiu o üreniir, “Ousap niuokusiti ekewe meilapen chon Papilon. Oupwe nomotiu lon ewe fanü o angang ngeni ewe kingen Papilon. Mürin meinisin epwe öch fän itemi.”
2KI 25:25 Nge lon ewe afisuen maram lon ei chök ier Ismael nöün Netania we mwän, nge Netania nöün Elisama seni familien ewe king, a feito Mispa fiti engol mwän o niela Ketalia. A pwal niela ekewe chon Juta me ekewe chon Papilon mi nom ren.
2KI 25:26 Mürin, ekewe aramas meinisin, ekewe mi kis me ekewe mi lap, pwal ekewe meilapen sounfiu ra ütä o süla Isip, pun ra fokun niuokusiti ekewe chon Papilon.
2KI 25:27 Iwe, lon ewe ier, lupwen Ewil-merotak a tolong lon wisan wisen king o nemeni Papilon, a eäni ümöümöch ngeni Jehoiachin ewe kingen Juta o atowu seni imwen fötek. Ei a fis lon rüe me fisuen ränin ewe engol me ruuen maram lon ilik me fisuen ierin än Jehoiachin oola.
2KI 25:28 Ewil-merotak a kirikiröch ngeni o seikätä asen ekewe king mi pwal oola o nom ren lon Papilon.
2KI 25:29 Iei mine Jehoiachin a pwilitawu üfan üföüfen fötek o üföüf och sokun üf. Iwe, lon ränin manauan meinisin a mongö seni än ewe king chepel.
2KI 25:30 Jehoiachin a pwal angei alilisin seni ewe king pwe atufichin an osupwang iteiten rän lon unusen ränin manauan.
1CH 1:1 Atam semen Set, Set semen Enos, Enos semen Kenan,
1CH 1:2 Kenan semen Mahalalel, Mahalalel semen Jaret,
1CH 1:3 Jaret semen Enok, Enok semen Metusala, Metusala semen Lamek,
1CH 1:4 Lamek semen Noa. Noa a wor nöün ülüman mwän: Säm, Ham me Jafet.
1CH 1:5 Iwe, ikkei ir nöün Jafet kewe mwän: Komer, Makok, Matai, Jafan, Tupal, Mesek me Tiras.
1CH 1:6 Ekewe mwirimwirin Komer ir ekewe chon Askenas, chon Rifat me chon Tokarma.
1CH 1:7 Nge ekewe mwirimwirin Jafan ir ekewe chon Elisha, chon Tarsis, chon Kit me chon Rotan.
1CH 1:8 Iwe, ikkei ir nöün Ham kewe mwän: Kush, Isip, Put me Kanaan.
1CH 1:9 Ekewe mwirimwirin Kush ir ekewe chon Sepa, chon Hawila, chon Sapta, chon Rama me chon Sapteka. Nge ekewe mwirimwirin Rama ir ekewe chon Shepa me chon Tetan.
1CH 1:10 Iwe, Kush semen Nimrot, nge Nimrot aemanün sounemenem won fanüfan mi nemeni aramas fän pöchökül.
1CH 1:11 Iwe, ekewe mwirimwirin Isip ir ekewe chon Lut, chon Anam, chon Lehap, chon Naftu,
1CH 1:12 chon Patrus, chon Kaslu, ekewe chon Filistia ra pop seniir, me chon Kaftor.
1CH 1:13 Iwe, Kanaan semen Siton nöün we mwänichi me Het.
1CH 1:14 Nge mwirimwirin Kanaan pwal ekewe chon Jepus, chon Amor, chon Kirkas,
1CH 1:15 chon Hiw, chon Ark, chon Sin,
1CH 1:16 chon Arwat, chon Semar me chon Hamat.
1CH 1:17 Iwe, ikkei ir nöün Säm kewe mwän: Elam, Ashur, Arpaksat, Lut, Aram, Us, Hul, Keter me Mesek.
1CH 1:18 Arpaksat semen Shela, nge Shela semen Eper.
1CH 1:19 A wor ruoman nöün Eper mwän, iten eman Pelek, pun lon fansoun manauan ekewe aramasen fanüfan ra imwüfesen, nge iten pwin we Joktan.
1CH 1:20 Iwe, ekewe mwirimwirin Joktan ir ekewe chon Almotat, chon Selef, chon Hasarmafet, chon Jera,
1CH 1:21 chon Hatoram, chon Usal, chon Tikla,
1CH 1:22 chon Epal, chon Apimael, chon Sepa,
1CH 1:23 chon Ofair, chon Hawila me chon Jopap. Ir meinisin mwirimwirin Joktan.
1CH 1:24 Iwe, tettelin ekewe mwirimwirin Säm: Arpaksat, Shela,
1CH 1:25 Eper, Pelek, Reu,
1CH 1:26 Seruk, Nahor, Tara me
1CH 1:27 Apram, iei i Apraham.
1CH 1:28 Iwe, mi wor ruoman nöün Apraham mwän: Isaak me Ismael.
1CH 1:29 Ikkei ir nöün Ismael kewe mwän lon tettelin ar uputiu: Nepaiot nöün we mwänichi, Ketar, Atpeel, Mipsam,
1CH 1:30 Misma, Tuma, Massa, Hatat, Tema,
1CH 1:31 Jetur, Nafis me Ketema.
1CH 1:32 Nge nöün Katura kewe mwän, ülüpwülüen Apraham, a nöüni me won: Simram, Joksan, Metan, Mitian, Ispak me Sua. Iwe, ikkei ir nöün Joksan kewe mwän: Shepa me Tetan.
1CH 1:33 Nge nöün Mitian kewe mwän: Efa, Efer, Hanok, Apita me Elta. Ätekei meinisin ir mwirimwirin Katura.
1CH 1:34 Apraham semen Isaak. Nge nöün Isaak kewe mwän Esau me Jakop.
1CH 1:35 Iwe, nöün Esau kewe mwän: Elifas, Reuel, Jeus, Jalam me Kora.
1CH 1:36 Nge nöün Elifas kewe mwän: Teman, Omar, Sefi, Katam, Kenas, Timna me Amalek.
1CH 1:37 Iwe, nöün Reuel kewe mwän: Nahat, Sera, Samma me Missa.
1CH 1:38 Iwe, nöün Seir kewe mwän: Lotan, Sopal, Sipeon, Ana, Tison, Eser me Tisan.
1CH 1:39 Nöün Lotan kewe mwän: Hori me Homan, nge Timna fefinen Lotan.
1CH 1:40 Iwe, nöün Sopal kewe mwän: Alian, Manahat, Epal, Sefi me Onam. Nge nöün Sipeon kewe mwän: Aia me Ana.
1CH 1:41 Nöün Ana we mwän Tison, nge nöün Tison kewe mwän: Hamran, Espan, Itran me Cheran.
1CH 1:42 Iwe, nöün Eser kewe mwän: Pilan, Saawan me Jakan. Nge nöün Tisan kewe mwän: Us me Aran.
1CH 1:43 Ikkei ir ekewe king ra nemeni ewe fanü Etom, lupwen esamwo wor king mi nemeni Israel: Pela nöün Peor we mwän seni ewe telinimw Tinhapa.
1CH 1:44 Iwe, mürin än Pela mäla, Jopap nöün Sera we mwän seni Posra a siwili lon wisan wisen king.
1CH 1:45 Nge mürin än Jopap mäla, Husam seni fanüen chon Teman a siwili lon wisan wisen king.
1CH 1:46 Iwe, mürin än Husam mäla, Hatat nöün Petat we mwän seni ewe telinimw Awit a siwili lon wisan wisen king. Ätei a akufu chon Mitian me lon ewe fanü Moap.
1CH 1:47 Nge mürin än Hatat mäla, Samla seni Masreka a siwili lon wisan wisen king.
1CH 1:48 Iwe, mürin än Samla mäla, Shaul seni ewe telinimw Rehopot mi nom arun ewe chanpupu Oifrat a siwili lon wisan wisen king.
1CH 1:49 Nge mürin än Shaul mäla, Paalanan nöün Akpor we mwän a siwili lon wisan wisen king.
1CH 1:50 Iwe, mürin än Paalanan mäla, Hatat seni ewe telinimw Pau a siwili lon wisan wisen king. Iten pwülüan Mehetapel nöün Matret we fefin, nge Matret nöün Mesahap fefin.
1CH 1:51 Mürin, Hatat a mäla. Iwe, ikkei ir ekewe samolun Etom: Timna, Alia, Jetet,
1CH 1:52 Oholipama, Ela, Pinon,
1CH 1:53 Kenas, Teman, Mipsar,
1CH 1:54 Maktiel me Iram.
1CH 2:1 Iwe, ikkei ir nöün Jakop kewe mwän: Rupen, Simeon, Lefi, Juta, Isakar, Sepulon,
1CH 2:2 Tan, Josef, Peniamin, Naftali, Kat me Aser.
1CH 2:3 Iwe, nöün Juta kewe mwän: Er, Onan me Shela. Ekei ülüman mwän Juta a nöüni me won Patsua ewe fin Kanaan. Er nöün Juta we mwänichi a föföringau me fän mesen ewe Samol mi Lapalap, iei mine Kot a niela.
1CH 2:4 Juta a pwal nöüni me won Tamar pwülüen nöün we: Peres me Sera. Iwe, ükükün nöün Juta mwän meinisin limman.
1CH 2:5 Iwe, nöün Peres kewe mwän: Hesron me Hamul.
1CH 2:6 Nöün Sera kewe mwän: Simri, Etan, Heman, Kalkol me Tara, irfengen meinisin limman.
1CH 2:7 Nge Karmi eman mwirimwirin Sera a wor eman nöün mwän itan Akar . Ätei ewe mi awarato feiengau won Israel ren an angemwäli ekewe mettoch repwe katala.
1CH 2:8 Iwe, nöün Etan we mwän Asaria.
1CH 2:9 Nöün Hesron kewe mwän: Jeramel, Ram me Kalep.
1CH 2:10 Ram semen Aminatap, nge Aminatap semen Nason samolun chon ewe ainangen Juta.
1CH 2:11 Nason semen Salma, Salma semen Poas,
1CH 2:12 Poas semen Opet, nge Opet semen Jesi.
1CH 2:13 Iwe, Jesi semen Eliap nöün mwänichi, Apinatap ewe aruomanün, Simea ewe aülümanün,
1CH 2:14 Netanel ewe afömanün, Ratai ewe alimmanün,
1CH 2:15 Osem ewe awonomanün, nge Tafit ewe setiputur.
1CH 2:16 Iwe, fefiner kewe Seruia me Apikael. A wor ülüman nöün Seruia mwän: Apisai, Joap me Asael.
1CH 2:17 Apikael a nöüni Amasa, nge semen Amasa itan Jeter, eman mwirimwirin Ismael.
1CH 2:18 Iwe, Kalep nöün Hesron we mwän a nöüni me won Asupa pwülüan we eman nengin itan Jeriot. Nge nöün kewe mwän me won Asupa: Jeser, Sopap me Arton.
1CH 2:19 Nge mürin än Asupa mäla, Kalep a pwülüeni Efrat o nöüni Hur me won.
1CH 2:20 Iwe, Hur semen Uri, nge Uri semen Pesalel.
1CH 2:21 Lupwen Hesron a ierini wone, a pwülüeni nöün Makir we fefin, nge Makir semen Kiliat. Iwe, neminewe a nöüni Sekup me won Hesron.
1CH 2:22 Sekup semen Jair, ätewe mi nemeni rüe me ülüngat telinimw me lon ewe fanü Kiliat.
1CH 2:23 Nge ekewe chon Kesur me chon Aram ra liapeni Hawotjair, Kenat me wisoposopun kewe ükükün wone telinimw. Ekewe aramas meinisin mi nom lon ekei leni ir mwirimwirin Makir semen Kiliat.
1CH 2:24 Iwe, mürin än Hesron mäla, Kalep a pwülüeni Efrat pwülüen Hesron saman we. Iwe, a nöüni Asur me won, nge Asur semelapen chon Tekoa.
1CH 2:25 Iwe, nöün Jeramel kewe mwän nöün Hesron we mwänichi: Ram ewe mwänichi, Puna, Oren, Osem me Ahia.
1CH 2:26 Mi pwal wor eman pwülüen Jeramel itan Atara, neminei inen Onam.
1CH 2:27 Iwe, nöün Ram kewe mwän: Maas, Jamin me Eker.
1CH 2:28 Nge nöün Onam kewe mwän: Shamai me Jata, nge nöün Shamai kewe mwän: Natap me Apisur.
1CH 2:29 Iten pwülüen Apisur Apihail, neminei a nöüni me won Apan me Molit.
1CH 2:30 Iwe, nöün Natap kewe mwän: Selet me Apaim. Selet a mäla, nge esap wor nöün.
1CH 2:31 Nöün Apaim mwän: Isi, nge nöün Isi: Sesan, nge nöün Sesan: Alai.
1CH 2:32 Nöün Jata kewe mwän pwin Samai: Jeter me Jonatan. Iwe, Jeter a mäla, nge esap wor nöün.
1CH 2:33 Nöün Jonatan kewe mwän: Pelet me Sasa. Ir meinisin mwirimwirin Jeramel.
1CH 2:34 Iwe, Sesan esap wor nöün mwän, pwe fefin chök. Nge mi wor eman re Isip nöün Sesan amanau itan Jara.
1CH 2:35 Sesan a apwüpwülüa nöün fefin ngeni Jara, nge neminei a nöüni Atai me won.
1CH 2:36 Iwe, Atai semen Natan, Natan semen Sapat,
1CH 2:37 Sapat semen Eflal, Eflal semen Opet,
1CH 2:38 Opet semen Jehu, Jehu semem Asaria,
1CH 2:39 Asaria semen Heles, Heles semen Eleasa,
1CH 2:40 Eleasa semen Sismai, Sismai semen Salum,
1CH 2:41 Salum semen Jekamia, nge Jekamia semen Elisama.
1CH 2:42 Iwe, Kalep pwin Jeramel a wor nöün kewe mwän. Iten nöün we mwänichi Mesa i semen Sif, Sif semen Maresa, nge Maresa semen Hepron.
1CH 2:43 Nöün Hepron kewe mwän: Kora, Tapua, Rekem me Sema.
1CH 2:44 Iwe, Sema semen Raham, Raham semen Jorkeam. Nge Rekem semen Samai,
1CH 2:45 Samai semen Maon, nge Maon semen Petsur.
1CH 2:46 Iwe, Efa ülüpwülüen Kalep a nöüni Haran, Mosa me Kases. Nge Haran a pwal wor eman nöün itan Kases.
1CH 2:47 Nöün Jatai kewe mwän: Rekem, Jotam, Keshan, Pelet, Efa me Saaf.
1CH 2:48 Nge Maka pwal eman ülüpwülüen Kalep, a nöüni Seper me Tirana.
1CH 2:49 Mürin a pwal nöüni Saaf semelapen chon Matmana me Sewa semelapen chon Makpena me chon Kipea. Nge nöün Kalep fefin a iteni Aksa.
1CH 2:50 Ikkei ir ekewe mwirimwirin Kalep: Hur, nöün Kalep we mwänichi, a nöüni me won Efrat, a wor nöün mwän: Sopal semelapen chon Kiriat-jearim.
1CH 2:51 Salma semelapen chon Petleem, me Haref semelapen chon Pet-kater.
1CH 2:52 Nge ekewe mwirimwirin Sopal semelapen chon Kiriat-jearim: Ekewe chon Haroe me esopun chon Menuhot,
1CH 2:53 pwal ekewe eterekes mi nom lon Kiriat-jearim: ekewe chon Itri, chon Put, chon Shumat me chon Mishra. Iwe, ekewe chon Sorat me chon Eshtaol ra pop seni ekei aramas.
1CH 2:54 Nge ekewe mwirimwirin Salma semelapen chon Petleem: Ekewe chon Netofat, chon Atrot-Petjoap, esopun chon Manahat me ekewe chon Sor.
1CH 2:55 Ikkei ekewe eterekesin ekewe soumak mi nom lon Japes: Ekewe chon Tirat, chon Shimeat me chon Sukat. Ir ekewe chon Ken ra feito seni Hamat, mwirimwirir ekewe chon leimwen Rekap.
1CH 3:1 Iwe, nöün Tafit kewe mwän mi upu ngeni me lon Hepron: Ewe mwänichi Amnon, a nöüni me won Ahinoam ewe fin Jesrel, ewe aruomanün Taniel, a nöüni me won Apikael ewe fin Karmel.
1CH 3:2 Ewe aülümanün Apsalom, a nöüni me won Maka nöün Talmai ewe kingen Kesur, ewe afömanün Atonia, a nöüni me won Hakit,
1CH 3:3 ewe alimanün Sefatia, a nöüni me won Apital, nge ewe awonomanün Itream, a nöüni me won Ekla.
1CH 3:4 Ikkei ir ekewe wonoman mwän Tafit a nöüni me lon Hepron, ewe ia a nom ie o nemenem lon ükükün fisu esop ier. Nge a pwal nom lon Jerusalem o nemenem lon ükükün ilik me ülüngat ier.
1CH 3:5 Iwe, nöün Tafit kewe föman mwän a nöüni me won Patsipa nöün Amiel we fefin me lon Jerusalem: Simea, Sopap, Natan me Salomon.
1CH 3:6 Mi pwal wor ekoch mwän Tafit a nöüni me lon Jerusalem: Ipar, Elisua, Elpelet,
1CH 3:7 Noka, Nefek, Jafia,
1CH 3:8 Elisama, Eliata me Elifelet, iteiter meinisin tiueman.
1CH 3:9 Ir meinisin nöün Tafit kewe mwän, lükün nöün kewe mwän me won ülüpwülüan kewe. Nge iten fefiner we Tamar.
1CH 3:10 Iwe, nöün Salomon we mwän Rehopoam, nöün Rehopoam Apia, nöün Apia Asa, nöün Asa Jehosafat,
1CH 3:11 nöün Jehosafat Jehoram, nöün Jehoram Ahasia, nöün Ahasia Joas,
1CH 3:12 nöün Joas Amasia, nöün Amasia Ussia, nöün Ussia Jotam,
1CH 3:13 nöün Jotam Ahas, nöün Ahas Hiskia, nöün Hiskia Manasa,
1CH 3:14 nöün Manasa Amon, nge nöün Amon Josia.
1CH 3:15 Iwe, a wor föman nöün Josia kewe mwän: Johanan ewe mwänichi, Jehoiakim, Setekia me Salum.
1CH 3:16 Nge nöün Jehoiakim kewe mwän: Jehoiachin me Setekia.
1CH 3:17 Ikkei ir mwirimwirin Jehoiachin kewe, ätewe mi oola Papilon. Nöün Jehoiachin kewe mwän: Sealtiel,
1CH 3:18 Malkiram, Petaia, Senasar, Jekamia, Hosama me Netapia.
1CH 3:19 Nöün Petaia kewe mwän: Serupapel me Shimei. Nge nöün Serupapel kewe mwän: Meshulam me Hanania pwal fefiner we itan Selomit.
1CH 3:20 A pwal wor limman nöün Serupapel mwän: Hasupa, Ohel, Perekia, Hasatia me Jusap-heset.
1CH 3:21 Nge nöün Hanania kewe mwän: Pelatia me Jesaia. Jesaia semen Refaia, Refaia semen Arnan, Arnan semen Opatia, nge Opatia semen Sekania.
1CH 3:22 Iwe, nöün Sekania we mwän Semaia. A wor limman nöün Semaia mwän: Hatus, Ikal, Paria, Nearia me Safat.
1CH 3:23 Iwe, a wor ülüman nöün Nearia mwän: Eli-oenai, Hiskia me Asrikam.
1CH 3:24 Nge nöün Eli-oenai kewe füman mwän: Hotawia, Eliasip, Pelaia, Akup, Johanan, Telaia me Anani.
1CH 4:1 Ikkei ir ekoch mwän ir mwirimwirin Juta: Peres, Hesron, Karmi, Hur me Sopal.
1CH 4:2 Iwe, Sopal semen Reaia, Reaia semen Jahat, nge Jahat semen Ahumai me Lahat. Ir än ekewe aramas mi nom lon Sora lewo.
1CH 4:3 Hur nöün Kalep we mwänichi a nöüni me won Efrat, iwe, mwirimwirin kewe poputän chon ewe telinimw Petleem. A wor ülüman nöün Hur kewe mwän: Etam, Penuel me Eser. Iwe a wor ülüman nöün Etam mwän: Jesreel, Isma me Itpas, nge iten fefiner Haselelponi. Penuel semelapen chon Ketor, nge Eser semelapen chon Husa.
1CH 4:5 Ashur semelapen chon Tekoa a wor ruoman pwülüan: Hela me Nara.
1CH 4:6 Iwe, Nara a nöüni föman mwän me won Ashur: Ahusam, Hefer, Temeni me Haashtari.
1CH 4:7 Nge Hela a nöüni ülüman mwän me won Ashur: Seret, Isar me Etnan.
1CH 4:8 Iwe, Kos semen Anup, Sopepa me ekewe eterekesin Aarel nöün Harum we mwän.
1CH 4:9 A wor eman mwän itan Japes, a kon iteföüla seni pwin kana. Iwe, inan we a aita ngeni Japes, pun a apasa, “Üa nöüni fän cheuch.”
1CH 4:10 Nge Japes a iotek ngeni ewe Koten Israel, “Ai Kot, kose mochen afeiöchüei o awatteela kiännin fanüei. Kopwe etiei o tümwünüei pwe üsap feiengauaei.” Iwe, Kot a apwönüetä mine a tüngor.
1CH 4:11 Iwe, Kelup pwin Sua, i semen Meir, nge Meir semen Eston.
1CH 4:12 Eston semen Petrafa, Pasea me Teina. Nge Teina semelapen chon Naash. Mwirimwirin ekei aramas ra nom lon Reka.
1CH 4:13 A wor ruoman nöün Kenas mwän: Otniel me Seraia. Iwe, nöün Otniel kewe mwän: Hatat me Meonotai.
1CH 4:14 Meonotai semen Ofra, nge Seraia semen Joap, i semelapen chon Keharas. Ei leni a iteni ei it, pokiten ekewe aramas mi nom lon ra sipeöch le angang.
1CH 4:15 Iwe, Kalep nöün Jefune we mwän a wor ülüman nöün mwän: Iru, Ela me Naam. Nge nöün Ela we mwän: Kenas.
1CH 4:16 Nöün Jehalelel kewe mwän: Sif, Sifa, Tiria me Asarel.
1CH 4:17 Iwe, nöün Esra kewe mwän: Jeter, Meret, Efer me Jalon. Iwe, Meret a pwülüeni Pitia nöün Farao we fefin. Neminei a nöüni eman nengin itan Miriam, me ruoman ät iter Samai me Ispa, i semelapen chon Estemoa. Meret a pwal pwülüeni eman fin Juta. Iwe, a nöüni me won Jeret i semelapen chon Ketor, Heper i semelapen chon Soko me Jekutiel i semelapen chon Sanoa.
1CH 4:19 Iwe, Hotia a pwülüeni fefinen Naham. Nge ekewe mwirimwirin neminei ir lepopun chon ewe eterekesin Karm mi nom lon Keila me chon ewe eterekesin Makat mi nom lon Estemoa.
1CH 4:20 Iwe, nöün Simon kewe mwän: Amnon, Rina, Penhanan me Tilon. Nge nöün Ishi kewe mwän: Sohet me Pensohet.
1CH 4:21 Iwe, Shela eman lein nöün Juta kewe mwän. Ekewe mwirimwirin Shela: Er i semelapen chon Leka, Lata i semelapen chon Maresa me ekewe eterekesin chon angang ngeni mangaku mi pwechepwech mi nom lon Pet-aspea,
1CH 4:22 pwal Jokim me ekewe chon Kosepa, Joas me Saraf mi pwülüeni fin Moap mwen ar liwiniti Petleem. (Ekei uruwo ra seni chök me lomlom.)
1CH 4:23 Ir chokewe mi föri sepi seni pwül, ra imweimw lon Netaim me Ketera o föri ar angang fän iten ewe king.
1CH 4:24 Iwe, ikkei ir nöün Simeon kewe mwän: Nemuel, Jamin, Jarip, Sera me Shaul.
1CH 4:25 Nöün Shaul mwän Salum, nöün Salum mwän Mipsam, nge nöün Mipsam mwän Misma.
1CH 4:26 Ekewe mwirimwirin Misma: Hamuel, nöün Hamuel mwän Sakur, nge nöün Sakur mwän Shimei.
1CH 4:27 Shimei a nöüni engol me wonoman mwän me wonoman fefin. Nge pwin kewe esap nien chomong nöür, iei mine esap pwal chomongola ewe ainangen Simeon usun ewe ainangen Juta.
1CH 4:28 Iwe, ekewe mwirimwirin Simeon ra nom lon Peersepa, Molata, Hasar-sual,
1CH 4:29 Pila, Esem, Tolat,
1CH 4:30 Petuel, Horma, Siklak,
1CH 4:31 Pet-markapot, Hasar-susim, Pet-piri me Saraim. Ikkei ar kewe telinimw tori Tafit a popuetä le nemenem.
1CH 4:32 Iwe, ra nom lon pwal limu telinimw iter Etam, Ain, Rimon, Token me Asan,
1CH 4:33 fiti wisoposopur kewe mi pwelifeili ekei telinimw achöüala ngeni Paalat. Ikkei ar kewe leni ia ra nom ie, a pwal wor uruwon ar kewe lewo.
1CH 4:34 Iwe, Mesopap, Jamalek me Josa nöün Amasia we mwän,
1CH 4:35 Joel, Jehu nöün Josipia, Josipia nöün Seraia, nge Seraia nöün Asiel,
1CH 4:36 pwal Eli-oenai, Jakopa, Jesohaia, Asaia, Atiel, Jesimiel, Penaia,
1CH 4:37 Sisa nöün Sifi, Sifi nöün Alon, Alon nöün Jetaia, Jetaia nöün Simri, nge Simri nöün Semaia we mwän.
1CH 4:38 Ekei mwän a föü iter ir souemwenin ar kewe cho. Pokiten ar kewe famili ra fokun wattela,
1CH 4:39 iei mine ra sai tori ewe lenien tolong lon Ketor kuku ngeni peliötiuen ewe lemol, pwe repwe kütta enen nöür kewe pwiin sip.
1CH 4:40 Ikenan ra küna enen nöür kewe pwiin sip mi fokun mürina, nge ewe fanü a pwal fokun wäwä, mosonoson me kinamwe. Iwe, chon ewe fanü me mwan ir mwirimwirin Ham.
1CH 4:41 Iwe, lon mwün Hiskia ewe kingen Juta, ekei aramas a fen mak iter ra feito, ra maun ngeni ekewe mwirimwirin Ham o ataela imwer imwen ekewe chon Meun mi nom ikenan. Ra aroserela meinisin, iei mine esap chüen wor mwirimwirir tori ikenai. Iwe, ra lenieni lenier, pun ikenan a wor enen nöür kewe pwiin sip.
1CH 4:42 Iwe, ükükün limepükü mwän seni chon ewe ainangen Simeon ra feila won chukuchukutän ewe fanü Seir, nge nöün Ishi kewe mwän Pelatia, Nearia, Refaia me Usiel ir nöür souemwen.
1CH 4:43 Ikenan ra niela ekewe lusun chon Amalek mi sü ngeni ei leni. Iwe, ra nonom ikenan tori ikenai.
1CH 5:1 Iwe, Rupen nöün Jakop we mwänichi. (I a uputiu akom, nge pokiten an kon ren ülüpwülüen saman, ewe wisen mwänichi a tori nöün Josef kewe mwän, nge Josef nöün Jakop we mwän. Iei mine esap makelong lon ewe uruwo lon tettelin mwänichi.
1CH 5:2 Iei mwo än Juta pöchökül me lein pwin kewe, pwal eman samol a pop seni, nge ewe wisen mwänichi a küw Josef.)
1CH 5:3 Iwe, nöün Rupen kewe mwän, nöün Jakop we mwänichi: Hanok, Palu, Hesron me Karmi.
1CH 5:4 Ikkei ir ekewe mwirimwirin Joel: Nöün Joel Semaia, nöün Semaia Kok, nöün Kok Simei,
1CH 5:5 nöün Simei Mika, nöün Mika Reaia, nöün Reaia Paal,
1CH 5:6 nge nöün Paal Pera. Ätei Tiklat-pileser ewe kingen Asiria a liapeni o uweala. Pera eman än chon ewe ainangen Rupen samol.
1CH 5:7 Iwe, ikkei ir märärin Pera kewe lon famili me famili, lupwen ra makelong lon tettelin uruwor: Jeiel ewe samol, Sakaria,
1CH 5:8 me Pela nöün Asas we mwän, Asas nöün Sema, nge Sema nöün Joel. Ätekei ra nonom lon ewe fanü seni Aroer tori Nepo me Paal-meon.
1CH 5:9 Ra pwal nonom ötiuen ewe fanü tori ewe fanüapö mi chöüla ngeni ewe chanpupu Oifrat, pun nöür pwiin man ra chomongola lon ewe fanü Kiliat.
1CH 5:10 Lupwen fansoun mwün ewe king Saul, chon ewe ainangen Rupen ra maun ngeni ekewe mwirimwirin Hakri o nirela. Iwe, ra nom lon imwer o fanüeni unusen ewe fanü ötiuen Kiliat.
1CH 5:11 Iwe, chon ewe ainangen Kat ra nonom peliefengin fanüen chon ewe ainangen Rupen me lon ewe fanü Pasan atowura ngeni Saleka:
1CH 5:12 Joel ewe samol, Safam ewe kisin fan, pwal Janai me Safat mi nom lon Pasan.
1CH 5:13 Nge ikkei ir märärir kewe lon tettelin ar kewe fisu cho: Mikael, Mesulam, Sepa, Jorai, Jakan, Sia me Eper.
1CH 5:14 Ir ekewe mwirimwirin Apihail nöün Huri we mwän: Huri nöün Jaroa, Jaroa nöün Kiliat, Kiliat nöün Mikael, Mikael nöün Jesisai, Jesisai nöün Jato, nge Jato nöün Pus.
1CH 5:15 Iwe, Ahi nöün Aptiel we mwän, nge Aptiel nöün Kuni, i mwänirelan än saman we cho.
1CH 5:16 Ra nonom lon Kiliat, lon Pasan me wisoposopun kewe, pwal lon ekewe maasies meinisin me lon ewe fanü Saron tori kiännir.
1CH 5:17 Iwe, ekei aramas meinisin ra makelong lon tettelin uruwor lon fansoun mwün Jotam ewe kingen Juta, pwal lon fansoun mwün Jeropoam ewe kingen Israel.
1CH 5:18 Iwe, chon ekewe ainangen Rupen, Kat me esopun ewe ainangen Manasa a wor nöür mwän mi pwora o sip le maun, ra uwou tittin maun me ketilas me esefich, iteiter faik me rüanüngeröü füpükü wone sounfiu mi molotä ngeni maun.
1CH 5:19 Ra maun ngeni chon ekewe ainangen Hakri, Jetur, Nafis me Notap.
1CH 5:20 Iwe, ra anomu ar apilükülük won Kot o siö ngeni pwe epwe alisiir le maun. Iei mine Kot a aüselinga ar tüngor, pwe ra tongeni akufu chon ewe ainangen Hakri me pelier meinisin.
1CH 5:21 Iwe, ra liapeni seniir limengeröü kamel, rüepükü limengeröü sip me rüengeröü aas, pwal ipüküngeröü aramas.
1CH 5:22 Nge ra pwal niela chomong aramas, pun Kot a alisiir lon ewe maun. Iwe, ra nonom lon fanüer tori ra oola.
1CH 5:23 Iwe, chon ewe esopun ainangen Manasa ra fokun chomong. Ra nom lon ewe fanü seni Pasan tori Pal-hermon, Senir me ewe chuk Hermon.
1CH 5:24 Ikkei ir ekewe mwänirelan ar kewe cho: Efer, Isi, Eliel, Asriel, Jeremaia, Hotawia me Jatiel. Ir meinisin sounfiu mi pwora o mwän mi iteföüla lon ar kewe cho.
1CH 5:25 Nge ir ra tipis ngeni än semelaper we Kot, ra kul seni ren ar kirikiringau ngeni o fel ngeni pwal ekoch kot än chon ekewe mwü, Kot a fen aroserela me mwer.
1CH 5:26 Iei mine ewe Koten Israel a föri pwe Pul ewe kingen Asiria mi pwal iteni Tiklat-pilneser epwe liapeni fanüer. Iwe, a uweala chon ekewe ainangen Rupen, Kat me esopun ewe ainangen Manasa o anomuur lon Hala, Hapor, Hara me arun ewe chanpupu Kosan. Iwe, ra nonom ikenan tori ikenai.
1CH 6:1 Iwe, ikkei ir nöün Lefi kewe mwän: Kersom, Kohat me Merari.
1CH 6:2 Nge nöün Kohat kewe mwän: Amram, Isar, Hepron me Usiel.
1CH 6:3 Iwe, nöün Amram kewe mwän: Aaron me Moses, pwal Miriam fefiner we. Nge nöün Aaron kewe mwän: Natap, Apihu, Eleasar me Itamar.
1CH 6:4 Iwe, Eleasar semen Pinehas, Pinehas semen Apisua,
1CH 6:5 Apisua semen Puki, Puki semen Usi,
1CH 6:6 Usi semen Seraia, Seraia semen Meraiot,
1CH 6:7 Meraiot semen Amaria, Amaria semen Ahitup,
1CH 6:8 Ahitup semen Satok, Satok semen Ahimas,
1CH 6:9 Ahimas semen Asaria, Asaria semen Johanan,
1CH 6:10 nge Johanan semen Asaria, i ätewe mi föri ewe angangen souasor lon ewe imwenfel Salomon a aüetä me lon Jerusalem.
1CH 6:11 Iwe, Asaria semen Amaria, Amaria semen Ahitup,
1CH 6:12 Ahitup semen Satok, Satok semen Salum,
1CH 6:13 Salum semen Hilkia, Hilkia semen Asaria,
1CH 6:14 Asaria semen Seraia, nge Seraia semen Jehosatak.
1CH 6:15 Iwe, Jehosatak a oola, lupwen ewe Samol mi Lapalap a tinala ekewe chon Juta me chon Jerusalem seni fanüer, pwe repwe oola ren ewe king Nepukatnesar.
1CH 6:16 Iwe, ikkei ir nöün Lefi kewe mwän: Kersom, Kohat me Merari.
1CH 6:17 Nge nöün Kersom kewe mwän: Lipni me Simei.
1CH 6:18 Nöün Kohat kewe mwän: Amram, Isar, Hepron me Usiel.
1CH 6:19 Nge nöün Merari kewe mwän: Mali me Musi. Iwe, ikkei än chon ewe ainangen Lefi kewe cho lon tettelin semelaper kewe.
1CH 6:20 Iwe, ekewe mwirimwirin Kersom: Lipni, nöün Lipni Jahat, nöün Jahat Sima,
1CH 6:21 nöün Sima Joa, nöün Joa Ito, nöün Ito Sera, nge nöün Sera Je-aterai.
1CH 6:22 Iwe, ekewe mwirimwirin Kohat: Aminatap, nöün Aminatap Kora, nöün Kora Asir,
1CH 6:23 nöün Asir Elkana, nöün Elkana Epiasaf, nöün Epiasaf Asir,
1CH 6:24 nöün Asir Tahat, nöün Tahat Uriel, nöün Uriel Usia, nge nöün Usia Saul.
1CH 6:25 Iwe, nöün Elkana kewe mwän: Amasai me Ahimot.
1CH 6:26 Nge ekewe mwirimwirin Ahimot: Elkana, nöün Elkana Sofai, nöün Sofai Nahat,
1CH 6:27 nöün Nahat Eliap, nöün Eliap Jeroham, nöün Jeroham Elkana, nge nöün Elkana Samuel.
1CH 6:28 Iwe, nöün Samuel kewe mwän: Joel ewe mwänichi me Apia ewe aruomanün.
1CH 6:29 Iwe, ekewe mwirimwirin Merari: Mali, nöün Mali Lipni, nöün Lipni Simei, nöün Simei Usa,
1CH 6:30 nöün Usa Simea, nöün Simea Hakia, nge nöün Hakia Asaia.
1CH 6:31 Ikkei ir ekewe mwän Tafit a awiseer pwe repwe chon köl me lon imwen ewe Samol mi Lapalap mürin än ewe pworofel a nom ikenan.
1CH 6:32 Iwe, ar angang, ra wisen köl me mwen ewe imw mangaku ia aramas ra churi Kot ie, tori Salomon a wes le aüetä imwen ewe Samol mi Lapalap me lon Jerusalem. Iwe, ra föri wiser lon tettelin ar angang.
1CH 6:33 Ikkei ir ekewe mwän me nöür kewe mi föri ewe angang: Seni än Kohat we cho Heman ewe souemwenin mwichen köl, i nöün Joel, nge Joel nöün Samuel,
1CH 6:34 Samuel nöün Elkana, Elkana nöün Jeroham, Jeroham nöün Eliel, Eliel nöün Toa,
1CH 6:35 Toa nöün Suf, Suf nöün Elkana, Elkana nöün Mahat, Mahat nöün Amasai,
1CH 6:36 Amasai nöün Elkana, Elkana nöün Joel, Joel nöün Asaria, Asaria nöün Sefania,
1CH 6:37 Sefania nöün Tahat, Tahat nöün Asir, Asir nöün Apiasaf, Apiasaf nöün Kora,
1CH 6:38 Kora nöün Isar, Isar nöün Kohat, Kohat nöün Lefi, nge Lefi nöün Jakop.
1CH 6:39 Iwe, Asaf eman märärin Heman a ütä lepelifichin fiti an mwichen köl. Iwe, Asaf nöün Perekia, nge Perekia nöün Simea,
1CH 6:40 Simea nöün Mikael, Mikael nöün Paseia, Paseia nöün Malkia,
1CH 6:41 Malkia nöün Etni, Etni nöün Sera, Sera nöün Ataia,
1CH 6:42 Ataia nöün Etan, Etan nöün Sima, Sima nöün Simei,
1CH 6:43 Simei nöün Jahat, Jahat nöün Kersom, nge Kersom nöün Lefi.
1CH 6:44 Iwe, Etan eman märärir seni än Merari we cho a ütä pelimöngün fiti an mwichen köl. Etan nöün Kisi, Kisi nöün Apti, Apti nöün Maluk,
1CH 6:45 Maluk nöün Hasapia, Hasapia nöün Amasia, Amasia nöün Hilkia,
1CH 6:46 Hilkia nöün Amsi, Amsi nöün Pani, Pani nöün Semer,
1CH 6:47 Semer nöün Mali, Mali nöün Musi, Musi nöün Merari, nge Merari nöün Lefi.
1CH 6:48 Iwe, chiener kewe ekewe mwän seni ewe ainangen Lefi, ra kefilitä pwe repwe wisen föri pwal ekewe ekoch angangen imwenfel.
1CH 6:49 Iwe, Aaron me mwirimwirin kana ra föri ewe angangen asor won ewe rongen asoren kek, pwal won ewe rongen asoren ötüöt, ra pwal föri angangen ewe leni mi unusen pin meinisin, pun ra föri asoren amusamusen tipis fän iten chon Israel, usun mine Moses nöün Kot we chon angang a allük.
1CH 6:50 Iwe, ikkei ir ekewe mwirimwirin Aaron: Eleasar, nöün Eleasar Pinehas, nöün Pinehas Apisua,
1CH 6:51 nöün Apisua Puki, nöün Puki Usi, nöün Usi Seraia,
1CH 6:52 nöün Seraia Meraiot, nöün Meraiot Amaria, nöün Amaria Ahitup,
1CH 6:53 nöün Ahitup Satok, nge nöün Satok Ahimas.
1CH 6:54 Ikkei ekewe leni me kiännir ia chon ewe ainangen Lefi ra nom ie. Iwe, iei wisen än Kohat we cho, ekewe mwirimwirin Aaron, pun ir ra akomwen angei inetir fän üttüt.
1CH 6:55 Ra ngeniir ewe telinimw Hepron lon ewe fanü Juta, pwal ekewe fanü pwelin ünükün fän iten nöür man.
1CH 6:56 Nge ekewe tanipi ünükün ewe telinimw me wisoposopun kewe ra ngeni Kalep nöün Jefune we mwän.
1CH 6:57 Ra ngeni ekewe mwirimwirin Aaron ekkei telinimw: Hepron ewe telinimwen op, Lipna, Jatir me Estemoa,
1CH 6:58 Hilen me Tepir,
1CH 6:59 Asan me Pet-semes, pwal ekewe fanü pwelin ünükür fän iten nöür man.
1CH 6:60 Ra pwal ngeniir ekewe telinimw Kepa, Alemet me Anatot, pwal ekewe fanü pwelin ünükür fän iten nöür man seni ewe ainangen Peniamin. Iwe, ekewe telinimw meinisin fän iten ar kewe famili ükükün engol me ülüngat.
1CH 6:61 Nge ekewe lusun seni än Kohat we cho ra angei wiser fän üttüt ükükün engol telinimw seni ewe esopun ainangen Manasa.
1CH 6:62 Iwe, ra ngeni än Kersom we cho ükükün engol me ülüngat telinimw aükük ngeni ükükün ar kewe famili. Ra angei ekei telinimw seni ekewe ainangen Isakar, Aser, Naftali me Manasa me lon Pasan.
1CH 6:63 Ra pwal ngeni än Merari we cho ükükün engol me ruu telinimw aükük ngeni ükükün ar kewe famili. Ra angei ekei telinimw seni ekewe ainangen Rupen, Kat me Sepulon.
1CH 6:64 Iei usun ekewe aramasen Israel ra ngeni chon ewe ainangen Lefi ekewe telinimw, pwal ekewe fanü pwelin ünükür fän iten nöür man.
1CH 6:65 Ekei telinimw a fen föü iter seni ekewe ainangen Juta, Simeon me Peniamin ra ngeniir ren üttüt.
1CH 6:66 Iwe, ekoch familien än Kohat we cho ra angei ar kewe telinimw seni ewe ainangen Efraim.
1CH 6:67 Iwe, ra ngeniir Sekem, ewe telinimwen op lon chukuchukutän ewe fanü Efraim, pwal Keser,
1CH 6:68 Jokmeam, Pet-horon,
1CH 6:69 Aialon, Kat-rimon, pwal ekewe fanü pwelin ünükür fän iten nöür man.
1CH 6:70 Ra pwal ngeni ekewe lusun familien än Kohat we cho ekewe telinimw Aner me Pileam, pwal ekewe fanü pwelin ünükür fän iten nöür man seni ewe esopun ainangen Manasa.
1CH 6:71 Iwe, ra ngeni ekewe familien än Kersom we cho ekei telinimw seni ewe esopun ainangen Manasa: Kolan lon Pasan me Astarot, pwal ekewe fanü pwelin ünükür fän iten nöür man.
1CH 6:72 Ra ngeniir Ketes me Taperat seni ewe ainangen Isakar,
1CH 6:73 pwal Ramot me Anem me ekewe fanü pwelin ünükür fän iten nöür man.
1CH 6:74 Iwe, ra ngeniir Masal me Apton seni ewe ainangen Aser,
1CH 6:75 pwal Hukok me Rehop me ekewe fanü pwelin ünükür fän iten nöür man.
1CH 6:76 Ra pwal ngeniir Ketes lon Kalili seni ewe ainangen Naftali, pwal Hamon me Kiriataim me ekewe fanü pwelin ünükür fän iten nöür man.
1CH 6:77 Iwe, ra ngeni ekewe lusun familien än Merari we cho ekei telinimw seni ewe ainangen Sepulon: Rimono me Tapor, pwal ekewe fanü pwelin ünükür fän iten nöür man.
1CH 6:78 Ra pwal ngeniir ekei telinimw seni ewe ainangen Rupen ötiuen ewe chanpupu Jortan pekilan Jeriko: Peser mi nom lon fanüapö me Jasa,
1CH 6:79 Ketemot me Mefat, pwal ekewe fanü pwelin ünükür fän iten nöür man.
1CH 6:80 Iwe, ra pwal ngeniir Ramot lon Kiliat me Mahanaim seni ewe ainangen Kat.
1CH 6:81 pwal Hespon me Jaser me ekewe fanü pwelin ünükür fän iten nöür man.
1CH 7:1 Iwe, ikkei ir nöün Isakar kewe föman mwän: Tola, Pua, Jasup me Simron.
1CH 7:2 Nge nöün Tola kewe wonoman mwän: Usi, Refaia, Jeriel, Jamai, Ipsam me Semuel. Ir mwänirelan ar kewe famili lon än Tola we cho, ra sounfiu mi pwora me lein pilor kewe. Iwe, iteiten mwirimwirir lon mwün Tafit rüe me ruungeröü wonopükü mwän.
1CH 7:3 Iwe, nöün Usi we mwän Israia. Nge nöün Israia: Mikael, Opatia, Joel me Isia. Ekei limman mwän ir samol.
1CH 7:4 Ätekei a wor chomong pwülüer me nöür mwän, iei mine a wor ükükün ilik me wonungeröü sounfiu mi molotä ngeni maun seni mwirimwirir.
1CH 7:5 Nge märärir kewe seni ekewe familien Isakar meinisin ükükün walik me fisungeröü sounfiu mi pwora, usun a mak lon tettelin uruwor.
1CH 7:6 Iwe, ikkei ir nöün Peniamin kewe ülüman mwän: Pela, Peker me Jetiael.
1CH 7:7 Nge nöün Pela kewe limman mwän: Espon, Usi, Usiel, Jerimot me Airi. Ir mwänirelan ar kewe famili. Iteiter mi mak lon tettelin uruwon mwirimwirir ükükün rüe me ruu ngeröü ilik me föman sounfiu mi pwora.
1CH 7:8 Iwe, nöün Peker kewe tiuman mwän: Semira, Joas, Elieser, Eli-oenai, Omri, Jeremot, Apia, Anatot me Alemet.
1CH 7:9 Iteiter mi mak lon tettelin uruwon mwirimwirir kewe lon ar kewe famili ükükün rüengeröü rüepükü sounfiu mi pwora.
1CH 7:10 Iwe, nöün Jetiael we mwän Pilan. Nge nöün Pilan kewe: Jeus, Peniamin, Ehut, Chenana, Setan, Tarsis me Aisar.
1CH 7:11 Ekei mwän meinisin ir mwänirelan ar kewe famili lon än Jetiael we cho. Iteiter mi mak lon tettelin uruwon mwirimwirir ükükün engol me fisungeröü rüepükü sounfiu mi pwora o molotä ngeni maun.
1CH 7:12 Iwe, än Supim me Hupim kewe cho ir mwirimwirin Ir, nge än Husim we cho ir mwirimwirin Aher.
1CH 7:13 Iwe, ikkei ir nöün Naftali kewe mwän: Jasiel, Kuni, Jeser me Salum, ir mwirimwirin Pila.
1CH 7:14 Iwe, ikkei ir nöün Manasa kewe mwän: Asriel me Makir, a nöüni me won ülüpwülüan seni Aramäa. Iwe, Makir semen Kiliat.
1CH 7:15 Makir a angei eman pwülüen Hupim me eman pwülüen Supim, nge iten fefinan we Maka. Iwe, aruomanün nöün Makir Selofehat, nge Selofehat a chök wor nöün fefin.
1CH 7:16 Iwe, Maka pwülüen Makir a nöüni ruoman ät o aita ngeniir Peres me Seres. Peres a wor ruoman nöün mwän iter Ulam me Rakem.
1CH 7:17 Nge nöün Ulam we mwän Petan. Ätekei meinisin ir mwirimwirin Kiliat, nge Kiliat nöün Makir, nge Makir nöün Manasa.
1CH 7:18 Iwe, fefinen Kiliat itan Hamoleket a nöüni Isot, Apieser me Mala.
1CH 7:19 Nge nöün Semita kewe mwän: Ahian, Sekem, Liki me Aniam.
1CH 7:20 Iwe, ikkei ir ekewe mwirimwirin Efraim: Sutela, nöün Sutela Peret, nöün Peret Tahat, nöün Tahat Eliata, nöün Eliata Tahat,
1CH 7:21 nöün Tahat Sapat, nge nöün Sapat Sutela. A pwal wor ruoman nöün Efraim mwän lükün Sutela: Eser me Eleat. Nge ekewe re wiliposun ewe fanü Kat ra niela ätekei, lupwen ra feitiu pwe repwe soläni nöür man.
1CH 7:22 Iwe, Efraim semer we a kechüeitiir lon chomong rän, nge pwin kewe ra feito ren pwe repwe echipa.
1CH 7:23 Mürin, Efraim a kon ren pwülüan, nge neminewe a pwopwo o nöüni eman ät. Efraim a aita ngeni Peria , pokiten ewe feiengau a tori an famili.
1CH 7:24 Iwe, iten nöün Efraim we fefin Seera. Neminei a aüetä Pet-horon-fan me Pet-horon-asan, pwal Usen-seera.
1CH 7:25 A pwal wor nöün Efraim mwän itan Refa. Nge mwirimwirin Refa: Resef, nöün Resef Tela, nöün Tela Tahan,
1CH 7:26 nöün Tahan Latan, nöün Latan Amihut, nöün Amihut Elisama,
1CH 7:27 nöün Elisama Nun, nge nöün Nun Josua.
1CH 7:28 Iwe, fanüer kewe me ar kewe lenien wilipos Petel me ekewe telinimw ünükün, feila ngeni Naran mi nom peliötiu me Keser mi nom pelilotou, pwal ekewe telinimw mi nom ünükür, pwal Sekem me Aia me ekewe telinimw mi nom ünükür.
1CH 7:29 Nge ekewe mwirimwirin Manasa ra imweimw lon Pet-sean, Tanak, Mekito me Tor, pwal lon ekewe telinimw mi nom ünükür. Iwe, ikei ekewe telinimw ekewe mwirimwirin Josef nöün Israel we mwän ra imweimw lon.
1CH 7:30 Iwe, ikkei ir nöün Aser kewe mwän: Imna, Iswa, Iswi me Peria, nge iten fefiner we Sera.
1CH 7:31 Nge nöün Peria kewe mwän: Heper me Malkiel, i semelapen chon Pirsait.
1CH 7:32 Heper semen Jaflet, Somer me Hotam, nge iten fefiner we Sua.
1CH 7:33 Nge nöün Jaflet kewe mwän: Pasa, Pimal me Aswat.
1CH 7:34 Iwe, pwin Jaflet itan Somer a wor nöün mwän: Roka, Jehupa me Aram.
1CH 7:35 Nge pwin Jeflet itan Hotam a pwal wor nöün mwän: Sofa, Imna, Seles me Amal.
1CH 7:36 Iwe, nöün Sofa kewe mwän: Sua, Harnefer, Sual, Peri, Imra,
1CH 7:37 Peser, Hot, Sama, Silsa, Itran me Pera.
1CH 7:38 Nge nöün Jeter kewe mwän: Jefune, Pispa me Ara.
1CH 7:39 Iwe, nöün Ula kewe mwän: Ara, Haniel me Risia.
1CH 7:40 Ätekei meinisin ir mwirimwirin Aser. Ir mwänirelan ar kewe cho, sounfiu mi kefil o pwora, pwal ir samol mi lap. Iwe, iteiter meinisin mi mak lon tettelin uruwor ükükün rüe me wonungeröü sounfiu mi molotä ngeni maun.
1CH 8:1 Iwe, a wor limman nöün Peniamin mwän: Pela nöün mwänichi, Aspel, Ahara,
1CH 8:2 Noha me Rafa.
1CH 8:3 Iwe, nöün Pela kewe mwän: Atar, Kera, Apihut,
1CH 8:4 Apisua, Naman, Ahoa,
1CH 8:5 Kera, Sefufan me Huram.
1CH 8:6 Iwe, ekewe mwirimwirin Ehut, ir mwänirelan ar kewe cho mi nom lon Kepa, nge ra oola lon Manahat.
1CH 8:7 Ikkei iter: Naman, Ahia me Kera, iei i semen Usa me Ahihut mi emweniir, lupwen ra oola.
1CH 8:8 Iwe, Saharaim a pöütala pwülüan kewe Husim me Para. Mürin, lupwen a nom lon ewe fanü Moap, a pwülüeni Hotes o nöüni füman mwän me won. Ikkei iter: Jopap, Sipia, Mesa, Malkam,
1CH 8:10 Jeus, Sakia me Mirma. Ätekei meinisin ir mwänirelan ar kewe cho.
1CH 8:11 A pwal wor nöün kewe mwän me won Husim iter: Apitup me Elpal.
1CH 8:12 Iwe, nöün Elpal kewe mwän: Eper, Misam me Semet. Semet a aüetä ekewe telinimw Ono me Lot, pwal ekewe telinimw ünükür.
1CH 8:13 Peria me Sema ir mwänirelan ar kewe cho mi imweimw lon Aialon, ir ätekewe mi asüela ekewe aramas mi nom lon ewe telinimw Kat.
1CH 8:14 Iwe, nöün Peria kewe mwän: Ahio, Sasak, Jeremot,
1CH 8:15 Sepatia, Arat, Eter,
1CH 8:16 Mikael, Ispa me Joha.
1CH 8:17 Nöün Elpal kewe mwän: Sepatia, Mesulam, Hiski, Heper,
1CH 8:18 Ismerai, Islia me Jopap.
1CH 8:19 Nge nöün Simei kewe mwän: Jakim, Sikri, Sapti,
1CH 8:20 Elienai, Siletai, Eliel,
1CH 8:21 Ataia, Peraia me Simrat.
1CH 8:22 Iwe, nöün Sasak kewe mwän: Ispan, Eper, Eliel,
1CH 8:23 Apton, Sikri, Hanan,
1CH 8:24 Hanania, Elam, Antotia,
1CH 8:25 Ipteia me Penuel.
1CH 8:26 Nge nöün Jehoram kewe mwän: Samserai, Seharia, Atalia,
1CH 8:27 Jaresia, Elia me Sikri.
1CH 8:28 Ätekei meinisin ir mwänirelan ar kewe cho me samol usun a mak lon tettelin uruwor. Iwe, ra imweimw lon Jerusalem.
1CH 8:29 Iwe, Jeiel a popuetä le aüetä ewe telinimw Kipeon o imweimw lon. Iten pwülüan Maka.
1CH 8:30 Iten nöün mwänichi Apton, mürin Sur, Kis, Paal, Ner, Natap,
1CH 8:31 Ketor, Ahio, Seker
1CH 8:32 me Miklot, i semen Simea. Ekei aramas ra pwal imweimw lon Jerusalem arap ngeni märärir kewe.
1CH 8:33 Iwe, Ner semen Kis, Kis semen Saul, nge Saul semen Jonatan, Malkisua, Apinatap me Espal .
1CH 8:34 Nöün Jonatan we mwän Merip-pal , nge Merip-pal semen Mika.
1CH 8:35 Nöün Mika kewe mwän: Piton, Melek, Tarea me Ahas.
1CH 8:36 Ahas semen Jehoata, nge Jehoata semen Alemet, Asmafet me Simri. Iwe, Simri semen Mosa,
1CH 8:37 Mosa semen Pinea, Pinea semen Rafa, Rafa semen Eleasa, nge Eleasa semen Asel.
1CH 8:38 Iwe, nöün Asel kewe wonoman mwän: Asrikam, Pokeru, Ismael, Searia, Opatia me Hanan.
1CH 8:39 Nge pwin Asel itan Esek a wor nöün mwän: Ulam ewe mwänichi, Jeus ewe aruomanün, Elifelet ewe aülümanün.
1CH 8:40 Iwe, nöün Ulam kewe mwän ir sounfiu mi pwora, ra pwal sip le esefich. A wor chomong nöür me nöün nöür kewe, ükükür ipükü lime mwän. Ätekei meinisin ir chon ewe ainangen Peniamin.
1CH 9:1 Iwe, chon Israel meinisin a mak iteiter lon tettelin uruwor o makelong lon ewe puken uruwon ekewe kingen Israel. Iwe, chon Juta ra oola Papilon pokiten ar tipis.
1CH 9:2 Ekewe akaeuin aramas mi liwinsefälito pwe repwe nomsefäl lon lenier kewe me lon ar kewe telinimw ir ekewe chon Israel, ekewe souasor, ekewe mwän seni ewe ainangen Lefi, pwal ekewe chon angang ngeni imwenfel.
1CH 9:3 A pwal wor aramas seni ekewe ainangen Juta, Peniamin, Efraim me Manasa, ra feila o imweimw lon Jerusalem.
1CH 9:4 Seni ewe ainangen Juta: Utai nöün Amihut, Amihut nöün Omri, Omri nöün Imri, nge Imri nöün Pani, i eman mwirimwirin Peres nöün Juta we mwän.
1CH 9:5 Seni ekewe mwirimwirin Shela: Asaia ewe mwänichi me nöün kewe mwän.
1CH 9:6 Nge seni ekewe mwirimwirin Sera: Jeuel me märärin kewe. Iteiten ekewe chon Juta meinisin wonopükü tiue.
1CH 9:7 Iwe, seni ewe ainangen Peniamin: Salu nöün Mesulam, Mesulam nöün Hotawia, nge Hotawia nöün Hasenua,
1CH 9:8 pwal Ipneia nöün Jehoram, Ela nöün Usi, Usi nöün Mikri me Mesulam nöün Sefatia, Sefatia nöün Reuel, nge Reuel nöün Ipnia.
1CH 9:9 Iwe, iteiten ekei aramas seni ewe ainangen Peniamin mi makelong lon tettelin uruwor tiuepükü lime me wonoman. Ätekei meinisin ir mwänirelan ar kewe cho.
1CH 9:10 Ikkei ir ekewe souasor mi imweimw lon Jerusalem: Jetaia, Jehoiarip, Jakin
1CH 9:11 me Asaria ewe mi lap lon imwen Kot, i nöün Hilkia, Hilkia nöün Mesulam, Mesulam nöün Satok, Satok nöün Meraiot, nge Meraiot nöün Ahitup,
1CH 9:12 Ataia nöün Jeroham, Jeroham nöün Pasur, Pasur nöün Malkia, pwal Masai nöün Atiel, Atiel nöün Jasera, Jasera nöün Mesulam, Mesulam nöün Mesilemit, nge Mesilemit nöün Imer.
1CH 9:13 Iwe, ekei souasor ir mwänirelan ar kewe cho iteiter engeröü füpükü wone mwän mi sip le föri angangen lon imwen Kot.
1CH 9:14 Ikkei ir ekewe mwän seni ewe ainangen Lefi mi imweimw lon Jerusalem: Semaia nöün Hasup, Hasup nöün Asrikam, nge Asrikam nöün Hasapia, eman mwirimwirin Merari,
1CH 9:15 pwal Pakpakar, Heres, Kalal me Matania nöün Mika, Mika nöün Sikri, nge Sikri nöün Asaf,
1CH 9:16 me Opatia nöün Semaia, Semaia nöün Kalal, nge Kalal nöün Jetutun, pwal Perekia nöün Asa, nge Asa nöün Elkana, ätewe mi nom lon wisoposopun lenien chon Netofa.
1CH 9:17 Ikkei ir ekewe chon tümwünü asamalapen ewe imwenfel mi imweimw lon Jerusalem: Salum, Akup, Talmon, Ahiman me märärir kewe. Iwe, Salum nöür we mi lap,
1CH 9:18 a wisen tümwünü ewe asamalapen king mi nom ötiu tori ikenai. Ätekei ir chon tümwünü asamalapen imwenfel, ra nom lon lenien ekewe mwän seni ewe ainangen Lefi.
1CH 9:19 Iwe, Salum nöün Kore, Kore nöün Epiasaf, Epiasaf nöün Kora, pwal märärin kewe seni än Kora cho, ra wisen föri ewe angangen tümwünü ewe lenien tolong lon ewe imwenfel, usun ar kewe lewo ra piin föri, lupwen ra tümwünü ewe lenien tolong lon imwen ewe Samol mi Lapalap.
1CH 9:20 Nge Pinehas nöün Eleasar a nemeniir me lom. Iwe, ewe Samol mi Lapalap a eti Pinehas.
1CH 9:21 Iwe, Sekaria nöün Meselemia a mamasa ewe asamalapen tolong lon ewe imw mangaku ia aramas ra churi Kot ie.
1CH 9:22 Ekei mwän meinisin mi kefil pwe repwe mamasa ekewe lenien tolong ükükün rüepükü engol me ruoman. Iwe, iteiter a mak lon tettelin uruwor me lon sopur. Ewe king Tafit me ewe soufos Samuel ra atolonga ar kewe lewo lon wiser, pun ra allükülük o wenechar.
1CH 9:23 Iwe, ir me mwirimwirir kewe ra wisen mamasa ekewe asamalapen imwen ewe Samol mi Lapalap.
1CH 9:24 Mi wor meilapen ekewe chon mamasa asamalap, ra nom ren ekewe rüanü pekin: ötiu, lotou, efeng me ör.
1CH 9:25 Nge märärir kewe mi nom lon sopur kewe ra wisen feito lon en me an fansoun, pwe repwe alisir lon ewe angang lon ükükün fisu rän.
1CH 9:26 Nge ekewe föman meilapen chon mamasa asamalap, ir ekewe mwän seni ewe ainangen Lefi, ra pwal wisen tümwünü ekewe rumwen lon ewe imwenfel me ekewe pisek aüchea mi nom lon.
1CH 9:27 Iwe, ra nonom pwelin ünükün ewe imwenfel, pun ra wisen mamasa o suki ekewe asamalap iteiten lesosor.
1CH 9:28 Iwe, ekoch me lein chon ewe ainangen Lefi ra wisen tümwünü ekewe pisek ra aea le angang lon imwenfel, pun ra wisen aleaniir, lupwen ra atorowu me atolongeer.
1CH 9:29 Pwal ekoch me leir ra fil pwe repwe tümwünü ekewe mettochun lon ewe imwenfel me ekewe sokopaten pisek mi pin, pwal ewe pilawa mi amas, ewe wain, ewe apüra, ewe apach mi pwokus me nofitin mongö.
1CH 9:30 Nge ekoch me lein ekewe souasor ra wisen nofitifengeni ekewe nofitin mongö.
1CH 9:31 Matitia eman lein ekewe mwän seni ewe ainangen Lefi, nöün Salum we mwänichi seni än Kora we cho, a wisen umuni ewe pilawa ra eäni le asor.
1CH 9:32 Nge ekoch me lein än Kohat we cho ra wisen föri ekewe pilawa mi pin, pwe repwe atetteliir won ewe chepel iteiten ränin sapat.
1CH 9:33 Iwe, ekewe mwänirela me lein ekewe chon köl seni ewe ainangen Lefi, ra nonom lon rumwen ewe imwenfel. Resap föri och angang me lükün, pun ra föri ar angang lerän me lepwin.
1CH 9:34 Ekei mwän meinisin ir souemwen pwal mwänirelan än semer kewe chon seni ewe ainangen Lefi mi makelong lon tettelin uruwor. Ra imweimw lon Jerusalem.
1CH 9:35 Iwe, Jeiel a popuetä le aüetä ewe telinimw Kipeon o imweimw lon. Iten pwülüan we Maka.
1CH 9:36 Iten nöün we mwänichi Apton, mürin Sur, Kis, Pal, Ner, Natap,
1CH 9:37 Ketor, Ahio, Sekaria me Miklot.
1CH 9:38 Nge Miklot semen Simeam. Ekei aramas ra pwal imweimw lon Jerusalem arap ngeni märärir kewe.
1CH 9:39 Iwe, Ner semen Kis, Kis semen Saul, nge Saul semen Jonatan, Malkisua, Apinatap me Espal .
1CH 9:40 Nöün Jonatan we mwän Merip-pal , nge Merip-pal semen Mika.
1CH 9:41 Nöün Mika kewe mwän: Piton, Melek, Taria me Ahas.
1CH 9:42 Ahas semen Jara, nge Jara semen Alemet, Asmafet me Simri. Iwe, Simri semen Mosa,
1CH 9:43 Mosa semen Pinea, Pinea semen Refaia, Refaia semen Eliasa, nge Eliasa semen Asel.
1CH 9:44 Iwe, nöün Asel kewe wonoman mwän: Asrikam, Pokeru, Ismael, Searia, Opatia me Hanan.
1CH 10:1 Iwe, ekewe chon Filistia ra maun ngeni ekewe chon Israel. Nge ekewe chon Israel ra süla me mwen ekewe chon Filistia o chomong ra mätiu won ewe chuk Kilpoa.
1CH 10:2 Ekewe chon Filistia ra cherikaei Saul me nöün kewe mwän. Iwe, ra niela Jonatan, Apinatap me Malkisua, nöün Saul kewe mwän.
1CH 10:3 Iwe, ewe maun a fokun pöchökülela ngeni Saul. Lupwen ekewe chon likapich ra rangeiti Saul, ra fokun akinasa.
1CH 10:4 Mürin, Saul a üreni nöün chon uwei an pisekin maun, “Kopwe üttawu noum ketilas o posu ngeniei, pwe ekewe aramas resap sirkomsais resap feito o urumwotitiei.” Nge nöün chon uwei an pisekin maun esap mochen, pun a fokun niuokus. Iei mine Saul a angei nöün ketilas o püsin posu ngeni.
1CH 10:5 Iwe, lupwen nöün Saul chon uwei an pisekin maun a küna pwe Saul a mäla, a pwal posu ngeni nöün ketilas o mäla.
1CH 10:6 Iei usun Saul me nöün kewe ülüman mwän ra mälapök, pwal chon leimwan meinisin.
1CH 10:7 Nge lupwen ekewe chon Israel mi nom lon ewe lemol ra küna pwe ekewe sounfiun Israel ra sü, nge Saul me nöün kewe mwän ra mäla, ra likitala ar kewe telinimw o süla. Mürin, ekewe chon Filistia ra feito o imweimw lor.
1CH 10:8 Nge sorotän ewe rän, lupwen ekewe chon Filistia ra feito pwe repwe angei pisekin ekewe somä, ra küna Saul me nöün kewe ülüman mwän ra mätiu won ewe chuk Kilpoa.
1CH 10:9 Iwe, ra angei pisekin Saul, ra pökü üan o pwilitawu üfan üföüfen maun. Ra pwal tinala chon künö lemenen fanüen chon Filistia, pwe repwe asilefeili ewe pworaus mi mürina ngeni ar kewe uluulun anümwäl me ekewe aramas.
1CH 10:10 Iwe, ra iseis üfen Saul üföüfen maun lon imwenfelin ar kewe kot o emeitiwa möküran lon imwenfelin Takon.
1CH 10:11 Nge lupwen ekewe chon Japes-kiliat ra rongorong meinisin mine ekewe chon Filistia ra föri ngeni Saul,
1CH 10:12 ekewe mwän meinisin mi pwora o pöchökül ra ütä, ra feila angei inisin Saul me inisin nöün kewe mwän o uweereto Japes. Iwe, ra peiaseni chür fän efoch irä ook me lon Japes o öchüün lon ükükün fisu rän.
1CH 10:13 Iei usun Saul a mäla pokiten esap allükülük won ewe Samol mi Lapalap. A aleasolap ngeni an kewe allük, a pwal kütta an öüröür seni eman watawa,
1CH 10:14 nge esap kütta an öüröür seni ewe Samol mi Lapalap. Iei mine ewe Samol mi Lapalap a niela Saul o awisa Tafit nöün Jesi we mwän, pwe epwe nemeni ewe mwü.
1CH 11:1 Mürin, chon Israel meinisin ra mwicheto ren Tafit lon Hepron o üreni, “Nengeni, äm chaom me fitukom.
1CH 11:2 Lon ekewe fansoun lom, lupwen Saul a chüen nemenikem, en ewe ka fen emweni ewe mwichen sounfiun Israel lon maun. Iwe, ewe Samol mi Lapalap om we Kot a ürenuk, ‘En kopwe chon masen nei aramasen Israel, kopwe pwal ar king.’”
1CH 11:3 Lupwen ekewe souakomwen Israel meinisin ra feito ren ewe king Tafit lon Hepron, Tafit a eäni eu pwonen atipeeu ngeniir fän mesen ewe Samol mi Lapalap me lon Hepron. Nge ir ra epiti Tafit pwe epwe kingen Israel, usun Samuel a fen apasa fän alon ewe Samol mi Lapalap.
1CH 11:4 Iwe, Tafit me chon Israel meinisin ra feila Jerusalem pwe repwe maun ngeni. Ei telinimw a iteni Jepus me lom, nge ekewe chon Jepus ra imweimw lon, pun ir chon wiliposun ewe fanü.
1CH 11:5 Iwe, ekewe chon Jepus ra üreni Tafit, “Kosap fokun tolong ikei.” Nge Tafit a liapeni ewe leni mi pöchökül itan Sion, iei mine a iteni telinimwen Tafit.
1CH 11:6 Tafit a üra, “Iö epwe akomwen niela ekewe chon Jepus, epwe meilapen ekewe mwichen sounfiu.” Iwe, Joap nöün Seruia we mwän a akomwen nirela, iei mine a wiseni ewe wisen meilap.
1CH 11:7 Pokiten Tafit a nom lon ewe leni mi pöchökül, iei mine a iteni telinimwen Tafit.
1CH 11:8 Iwe, Tafit a aüsefälietä ewe telinimw pwelin ünükün, a popuetä seni ewe leni mi amasou peliötiuen ewe pal o awesöchüela meinisin, nge Joap a aüsefälietä ekewe lusun leni lon ewe telinimw.
1CH 11:9 Nge Tafit a pöpöchökülela, pun ewe Samol mi Unusen Manaman a eti.
1CH 11:10 Ikkei ir ekewe meilapen nöün Tafit kewe sounfiu mi pwora. Ir ra seikätä Tafit pwe epwe king fiti chon Israel meinisin, o apöchöküla mwün, usun ewe Samol mi Lapalap a fen pwon.
1CH 11:11 Ikei iten nöün Tafit kewe sounfiu mi pwora: Aemanün Jasopeam seni än Hakmon cho. Ätei i ewe meilap me lein ekewe ülüman. A aea wokun siles le niela ükükün ülüpükü mwän lon eu chök fansoun.
1CH 11:12 Iwe, ewe aruomanün lein ekewe ülüman mwän Eleasar nöün Toto we mwän seni än Aho cho.
1CH 11:13 Ätei a eti Tafit lon Pas-tamin, lupwen ekewe chon Filistia ra chufengen, pwe repwe maun ngeniir. Lon ei leni a wor eu tanipin parli, ia ekewe chon Israel ra sü ren ekewe chon Filistia me ie.
1CH 11:14 Nge i a chök ütala lukalapen ewe tanipi o tümwünü, a pwal niela ekewe chon Filistia. Iwe, ewe Samol mi Lapalap a amanaueer ren eu win mi lapalap.
1CH 11:15 Iwe, lon eu rän ülüman me lein ekewe ilik meilapen sounfiu ra feila ngeni ewe achau ren Tafit lon ewe föimw Atulam, lupwen eu mwichen sounfiun Filistia a nom lon ewe lemolun Refaim.
1CH 11:16 Lon ena fansoun Tafit a nom lon ewe lenien op mi pöchökül, nge eu mwichen sounfiun Filistia a nom Petleem.
1CH 11:17 Iwe, Tafit a äleäl, “Amwo eman epwe üfato ünümei koluk seni ewe chönüttu mi nom Petleem ren asamalapen ewe tit.”
1CH 11:18 Mürin, ekewe ülüman sounfiu mi pwora ra töfochofocholong lon lenien ekewe chon Filistia o üfi koluk seni ewe chönüttu mi nom Petleem ren asamalapen ewe tit. Iwe, ra uwato ren Tafit, nge Tafit esap mochen ün. A ninätiu ewe koluk, pwe eu asor ngeni ewe Samol mi Lapalap
1CH 11:19 o üra, “Üsap fokun tongeni ünümi ei koluk, pun ika üpwe ünümi, epwe usun chök ai üpwe ünümi chan ekei mwän mi fangala manauer, lupwen ra uwato ei koluk.” Iei mine Tafit esap mochen ünümi ewe koluk. Ekei föför ekewe ülüman sounfiu mi pwora ra föri.
1CH 11:20 Iwe, Apisai pwin Joap i meilapen ekewe ilik. A aea wokun siles le niela ükükün ülüpükü mwän. Ren ei Apisai a pach ngeni ekewe ülüman le iteföüla.
1CH 11:21 Iwe, a fokun iteföüla me lein ekewe ilik o wiliti nöür meilap, nge esap kon iteföüla usun ekewe ülüman.
1CH 11:22 Iwe, Penaia nöün Jehoiata we mwän seni Kapsel, pwal i eman sounfiu mi pwora, a föri sokun föför mi amwarar. A niela ruoman sounfiun Moap mi fokun pöchökül. Lon eu rän a pwal tötiu lon eu pwang o niela eman laion, lupwen snow a püngütiu.
1CH 11:23 A pwal niela eman re Isip mi fokun langatam ükükün taman fisu esop fiit. Iwe, ewe re Isip a amwöchü efoch siles mi öümong usun chök öün waaseres, nge Penaia a feila ren fän efoch chök wok. A turufi seni lepöün ewe re Isip wokun siles o ni ngeni.
1CH 11:24 Ikkei ekei föför Penaia a föri. Iei mine a pach ngeni ekewe ülüman mwän mi pwora o iteföüla.
1CH 11:25 Ätei a fokun iteföüla me lein ekewe ilik, nge esap kon iteföüla usun ekewe ülüman. Iwe, Tafit a seikätä won nöün we mwichen sounfiu mi wisen tümwünü inisin.
1CH 11:26 Ikkei iten ekewe mwän mi pwora lon ewe mwichen sounfiu: Asael pwin Joap, Elhanan nöün Toto we mwän seni Petleem,
1CH 11:27 Samot seni Harot, Heles seni Pelet,
1CH 11:28 Ira nöün Ikes we mwän seni Tekoa, Apieser seni Anatot,
1CH 11:29 Sipekai seni Husa, Ilai seni Aho,
1CH 11:30 Maharai seni Netofa, Helet nöün Pana we mwän seni Netofa,
1CH 11:31 Itai nöün Ripai we mwän seni Kipea mi nom lon ewe fanü Peniamin, Penaia seni Piraton,
1CH 11:32 Hurai seni ewe lemol mi nom arun Kaas, Apiel seni Arpa,
1CH 11:33 Asmafet seni Paharum, Eliapa seni Salpon,
1CH 11:34 Hasem seni Kison, Jonatan nöün Sake we mwän seni Harar,
1CH 11:35 Ahiam nöün Sakar we mwän seni Harar, Elifal nöün Ur we mwän,
1CH 11:36 Hefer seni Mekera, Ahia seni Pelon,
1CH 11:37 Hesro seni Karmel, Narai nöün Espai we mwän,
1CH 11:38 Joel pwin Natan, Mipar nöün Hakri we mwän,
1CH 11:39 Selek seni Amon, Naharai seni Perot, nöün Joap chon uwei an pisekin maun,
1CH 11:40 Ira me Karep seni Jattir,
1CH 11:41 Uria ewe re Hit, Sapat nöün Alai we mwän,
1CH 11:42 Atina nöün Sisa we mwän, i eman souemwen seni ewe ainangen Rupen, a nemeni ilik sounfiu,
1CH 11:43 Hanan nöün Maka we mwän, Josafat seni Mitan,
1CH 11:44 Usia seni Astera, Sama me Jeiel nöün Hotam kewe mwän seni Aroer,
1CH 11:45 Jetiael nöün Simri we mwän me Joha pwin we seni Tis,
1CH 11:46 Eliel seni Mahawa, Jeripai me Josawia nöün Elnam kewe mwän, pwal Itma seni Moap,
1CH 11:47 Eliel, Opet me Jasiel seni Sopa.
1CH 12:1 Iwe, Tafit a nom lon Siklak, lupwen a sü seni ewe king Saul. Ikenan chomong sounfiu mi pwora ra feito ren Tafit pwe repwe alisi le maun.
1CH 12:2 Ra uwou esefich o angöch le esefichala ekewe föün esefich, ra pwal öüla ar föün öülün ren pöüifichir me pöüimöngür. Ätekei ir seni ewe ainangen Peniamin märärin Saul.
1CH 12:3 Iwe, iten nöür kewe meilap Ahieser me Joas, ätekei nöün Sema kewe mwän seni Kipea. Nge ikkei ir ekewe sounfiu: Jesiel me Pelet nöün Asmafet kewe mwän, Peraka me Jehu seni Anatot,
1CH 12:4 Ismaia seni Kipeon, eman sounfiu mi pwora, pwal eman souemwenin ekewe ilik, Jeremia, Jahasiel, Johanan me Josapat seni Ketera,
1CH 12:5 Elusai, Jerimot, Pealia, Semaria me Sefatia seni Haruf,
1CH 12:6 Elkana, Isia, Asarel, Joeser me Jasopeam seni än Kora we cho,
1CH 12:7 pwal Joela me Sepatia nöün Jeroham kewe mwän seni Ketor.
1CH 12:8 Mi wor ekoch mwän seni ewe ainangen Kat ra feila eti Tafit lon ewe leni mi pöchökül lon fanüapö, ir sounfiu mi pwora o silelap wiwiin maun, ra sip fän tittin maun me siles, nge won meser a usun chök won mesen ekewe laion, ra pwal müttir usun müttirin ekewe chia me won ekewe chuk.
1CH 12:9 Ikkei iter: Eser ewe meilap, ewe aruomanün Opatia, ewe aülümanün Eliap,
1CH 12:10 ewe afömanün Mismana, ewe alimanün Jeremia,
1CH 12:11 ewe awonomanün Atai, ewe afümanün Eliel,
1CH 12:12 ewe awalumanün Johanan, ewe atiuemanün Elsapat,
1CH 12:13 ewe aengolun Jeremia, ewe engol me aemanün Makpanai.
1CH 12:14 Ekei mwän seni ewe ainangen Kat ra meilapen ewe mwichen sounfiu, ekewe mi kis ra nemeni ipükü, nge ekewe mi lap ra nemeni engeröü.
1CH 12:15 Ikkei ir ekewe mwän mi fetal lon ewe chanpupu Jortan seni epek tori epek lon ewe aeuin maram, lupwen ewe chanpupu a puwu ekis meinisin. Iwe, ra asüela chokewe meinisin mi nom lon ekewe lemol me peliötiu me pelilotou.
1CH 12:16 Iwe, ekoch me lein chon ekewe ainangen Peniamin me Juta ra pwal feila ren Tafit lon ewe leni mi pöchökül.
1CH 12:17 Tafit a towu rer o üreniir, “Are oua feito rei pwe oupwe chiechi ngeniei o alisiei, ngang üpwe fokun tipeeu ngeni ach sipwe chiechifengen. Nge are oua ekiekin afangamäei ngeni chon oputaei, inamwo ika üsap föri och mi ngau, amwo än ach kewe lewo we Kot epwe küna o apwüngükemi.”
1CH 12:18 Mürin, Ngünün Kot a feitiu won Amasia ewe meilapen ekewe ilik. Iwe, a apasa, “Äm aia noum, Tafit, äm aipwe etuk, en nöün Jesi we mwän. Kinamwe, kinamwe epwe toruk. Kinamwe epwe tori chokewe mi alisuk. Pun om we Kot a alisuk.” Mürin, Tafit a etiweer o awisa ngeniir wisen meilapen nöün kewe sounfiu.
1CH 12:19 Iwe, ekoch sounfiu seni ewe ainangen Manasa ra chu ngeni Tafit, lupwen a feito me ekewe chon Filistia, pwe repwe maun ngeni Saul. Nge Tafit esap alisi ekewe chon Filistia. Pun mürin än ekewe samolun chon Filistia pwüngüpwüngfengen ra tinala Tafit. Ra ekieki pwe Tafit epwe rik ngeni an samol Saul, nge ir repwe feiengau.
1CH 12:20 Lupwen Tafit a liwiniti Siklak, ekei sounfiu seni ewe ainangen Manasa ra chu ngeni: Atna, Josapat, Jetiael, Mikael, Josapat, Elihu me Siletai. Ätekei meilapen ekewe mwicheichen ngeröün sounfiu lon Manasa.
1CH 12:21 Iwe, ra alisi Tafit le maun ngeni ekewe mwichen aramas mi küt liaper, pun ir meinisin sounfiu mi pöchökül o pwora, ra pwal chon nemenem lon an we mwichen sounfiu.
1CH 12:22 Iteiten rän mwän ra feito ren Tafit pwe repwe alisi, tori a wor eu an mwichen sounfiu mi fokun watte.
1CH 12:23 Iwe, chomong sounfiu mi uwei pisekin maun ra feila ren Tafit me lon Hepron, pwe repwe seikätä lon ewe wisen king siwilin Saul, usun mine ewe Samol mi Lapalap a fen apasa. Ikkei iteiten ekewe mwichen sounfiu:
1CH 12:24 Ekewe sounfiu seni ewe ainangen Juta mi uwou tittin maun me siles ükükün wonungeröü walupükü.
1CH 12:25 Seni ewe ainangen Simeon ätekewe mi pöchökül o pwora le maun ükükün fisungeröü ipükü.
1CH 12:26 Seni ewe ainangen Lefi ükükün rüanüngeröü wonopükü.
1CH 12:27 Pwal ewe samol Jehoiata eman mwirimwirin Aaron, nge ülüngeröü füpükü mwän ra eti.
1CH 12:28 Pwal Satok eman alüal mi pöchökül o pwora, nge rüe me ruoman meilap seni püsin chon leimwan ra eti.
1CH 12:29 Seni ewe ainangen Peniamin, ir märärin Saul, ükükün ülüngeröü, pun tori ei fansoun chomong me leir ra chüen pelieni chon leimwen Saul.
1CH 12:30 Seni ewe ainangen Efraim ükükün rüengeröü walupükü mwän mi pwora o pöchökül, ra iteföüla me lein än semer kewe cho.
1CH 12:31 Seni ewe esopun ainangen Manasa ükükün engol me walungeröü sounfiu mi kefil o föü iter, pwe repwe feila o seikätä Tafit pwe epwe king.
1CH 12:32 Seni ewe ainangen Isakar ükükün rüepükü samol me märärir meinisin mi nom fän nemenier. Ekei mwän ra weweiti fansoun o silei mine chon Israel repwe föri.
1CH 12:33 Seni ewe ainangen Sepulon ükükün limengeröü sounfiu mi sipeöch le maun, a wor ar sokopaten pisekin maun, pwe repwe alisi Tafit fän allükülük.
1CH 12:34 Seni ewe ainangen Naftali ükükün engeröü meilap, nge ükükün ilik me fisungeröü sounfiu mi uwou tittin maun me siles ra etiir.
1CH 12:35 Seni ewe ainangen Tan ükükün rüe me walungeröü wonopükü sounfiu mi molotä ngeni maun.
1CH 12:36 Seni ewe ainangen Aser ükükün faik ngeröü sounfiu mi sipeöch o molotä ngeni maun.
1CH 12:37 Seni ekewe ainangen Rupen me Kat, pwal seni ewe esopun ainangen Manasa ötiuen ewe chanpupu Jortan ükükün ipükü rüe ngeröü sounfiu mi uwou sokopaten pisekin maun meinisin.
1CH 12:38 Ekei sounfiu meinisin mi molotä ngeni maun ra feila Hepron fän pöchökülen ar ekiek, pwe repwe seikätä Tafit pwe epwe king won unusen Israel. Nge ekewe lusun chon Israel meinisin ra tipeeu ngeni ewe chök ekiek, pwe repwe seikätä Tafit pwe epwe king.
1CH 12:39 Iwe, ra nonom ikenan ren Tafit lon ükükün ülüngat rän, ra momongö o ükün, pun pwiir kewe chon Israel ra amolätä fän iter.
1CH 12:40 Pwal chon aruur kewe mi toau seni ekewe ainangen Isakar, Sepulon me Naftali ra feito o uwato mongö won nöür kewe aas me kamel, won sokopaten aas me ätemwänin kow. Ra uwou chomong sokun mongö: pilawa, nokop seni fiik, umwun föün wain mi apwas, wain me apüra, pwal ätemwänin kow me sip. Ei a fis, pun mi wor pwapwa me lon Israel.
1CH 13:1 Iwe, Tafit a pwüngüpwüngfengen me nöün kewe meilapen sounfiu meinisin mi nemenem won ngeröü me pükü.
1CH 13:2 Mürin, Tafit a kapas ngeni ekewe chon Israel meinisin, “Are a öch me remi, are a pwal letipen ewe Samol mi Lapalap ach we Kot, sipwe tinala chon künö ren pwiich kewe mi nom lon unusen ewe fanü Israel, pwal ren ekewe souasor me chon ewe ainangen Lefi mi nom lon ar kewe telinimw, pwe repwe feito rech.
1CH 13:3 Mürin, sipwe angesefälieto rech än ach we Kot we pworofel, pun sisap föri iei usun lupwen mwün Saul.”
1CH 13:4 Iwe, ewe mwicheichen aramas meinisin ra tipeeufengen pwe repwe föri iei usun, pun ei ekiek a pwüng me ren ekewe aramas meinisin.
1CH 13:5 Iwe, Tafit a achufengeni chon Israel meinisin seni ewe chanpupu Sihor lon Isip tori ewe alen tolong lon Hamat, pwe repwe angei ewe pworofel seni Kiriat-jearim.
1CH 13:6 Nge Tafit me chon Israel meinisin ra feila Pala, iei Kiriat-jearim mi nom lon ewe fanü Juta, pwe repwe angei seni ikenan än Kot we pworofel mi iteni iten ewe Samol mi Lapalap, ewe a mot won an lenien motun king asen ekewe kerop.
1CH 13:7 Iwe, ra angei än Kot we pworofel me lon imwen Apinatap o anomu won efoch minefön woken. Nge Usa me Ahio ra wisen uwei ewe woken.
1CH 13:8 Tafit me chon Israel meinisin ra pworuk fän unusen ar pöchökül me fän mesen Kot ren köl me tikin ükülele me kitar, pwal ren sokopaten pisekin kaktai me rappwa.
1CH 13:9 Lupwen ra tori än Chiton lenien wichiwich umwun wiich, Usa a eitiewu pöün o amwöchü än Kot we pworofel, pun ekewe ätemwänin kow ra chepetek.
1CH 13:10 Nge ewe Samol mi Lapalap a song ngeni Usa o niela, pun a eitiewu pöün o amwöchü ewe pworofel. Iwe, Usa a mäla ikenan me fän mesen Kot.
1CH 13:11 Mürin, Tafit a riaföü pokiten ewe Samol mi Lapalap a niela Usa. Iei mine ewe leni a iteni Peres-usa tori ikenai.
1CH 13:12 Lon ewe ränin Tafit a niuokusiti Kot o apasa, “Ifa usun, üpwe tongeni uwato än Kot we pworofel pwe epwe nom rei?”
1CH 13:13 Iei mine Tafit esap mochen angei ewe pworofel pwe epwe uwalong lon Jerusalem, nge a uwala ngeni imwen Opet-etom ewe re Kit.
1CH 13:14 Iwe, än Kot we pworofel a nonom ren Opet-etom lon imwan lon ükükün ülüngat maram. Nge ewe Samol mi Lapalap a afeiöchü chon leimwen Opet-etom, pwal meinisin mine a eäni.
1CH 14:1 Iwe, Hairam ewe kingen Tirus a tinala chon künö ren Tafit, a pwal tinala irä setar, chon ses fau me taikü, pwe repwe aüetä eu imw fän iten Tafit.
1CH 14:2 Iei mine Tafit a mefi, pwe ewe Samol mi Lapalap a anüküchara lon wisan wisen king lon Israel, a pwal fokun afefeitä mwün fän iten nöün aramasen Israel.
1CH 14:3 Iwe, Tafit a pwal angei ekoch pwülüan me lon Jerusalem, a pwal wor nöün ät me nengin me wor.
1CH 14:4 Ikkei iten nöün kewe a nöüniir me lon Jerusalem: Samua, Sopap, Natan, Salomon,
1CH 14:5 Ipar, Elisua, Elpelet,
1CH 14:6 Noka, Nefek, Jafia,
1CH 14:7 Elisama, Peliata me Elifelet.
1CH 14:8 Iwe, lupwen ekewe chon Filistia ra rong pwe Tafit a seikitä king won unusen Israel, ra feila meinisin pwe repwe aoi Tafit. Nge lupwen Tafit a rong usun, a feila pwe epwe maun ngeniir.
1CH 14:9 Iwe, ekewe chon Filistia ra feito lon ewe lemolun Refaim o angei liaper.
1CH 14:10 Nge Tafit a aisini Kot, “Ifa usun, üpwe feila maun ngeni ekewe chon Filistia? Ifa usun, kopwe awinnaei?” Iwe, ewe Samol mi Lapalap a üreni Tafit, “Kopwe feila maun ngeniir, nge üpwe awinnok.”
1CH 14:11 Iei mine Tafit a feila Pal-perasim o akufu ekewe chon Filistia me ikenan. Iwe, a apasa, “Kot a nöünöü ngang pwe üpwe küütalong ekewe tettelin sounfiu mi oputaei, usun puun eu chanpupu a pwangenalong ewe fanü ünükün.” Iei mine ewe leni a iteni Pal-perasim .
1CH 14:12 Lupwen ekewe chon Filistia ra sü, ra likitala ar kewe uluulun anümwäl ikenan. Nge Tafit a allük pwe repwe kenirela.
1CH 14:13 Mürin, ekewe chon Filistia ra feitosefäl pwe repwe angei liaper me lon ewe lemol.
1CH 14:14 Nge lupwen Tafit a aissefäl ngeni Kot, Kot a üreni, “Kosap fetal wenewen ngeniir, nge kopwe pwelila lükisökürür o maun ngeniir seni akawenewenen ekewe irä pwokus.
1CH 14:15 Iwe, lupwen kopwe rongorong mwataten peche le ülün ekewe irä pwokus, lon ena otun kopwe popuetä le maun ngeniir, pun ngang üpwe akomwowu mwom, pwe üpwe niela ekewe sounfiun Filistia.”
1CH 14:16 Tafit a föri usun mine Kot a allük ngeni. Iwe, ra niela ekewe sounfiun Filistia seni Kipeon tori Keser.
1CH 14:17 Iwe, iteüöchün Tafit a chöfetal lon ekewe fanü meinisin, nge ewe Samol mi Lapalap a föri pwe chon ekewe mwü meinisin ra niuokusiti Tafit.
1CH 15:1 Iwe, Tafit a aüetä imwan kewe lon ewe telinimwen Tafit. A pwal amolätä eu leni fän iten an Kot we pworofel o aüetä eu imw mangaku fän itan.
1CH 15:2 Mürin, Tafit a apasa, “Esap wor eman epwe tongeni mwärei än Kot we pworofel, pwe ekewe chök mwän seni ewe ainangen Lefi, pun ewe Samol mi Lapalap a filiretä, pwe repwe mwärei an pworofel o angang ngeni tori feilfeilachök.”
1CH 15:3 Iwe, Tafit a amwichafengeni ekewe chon Israel meinisin me lon Jerusalem, pwe repwe uwato än ewe Samol mi Lapalap we pworofel ngeni ewe leni Tafit a fen amolätä.
1CH 15:4 Iwe, Tafit a pwal achufengeni ekewe mwirimwirin Aaron me ekewe mwän seni ewe ainangen Lefi:
1CH 15:5 Seni än Kohat we cho Uriel ewe samol fiti ipükü rüe märärin kewe.
1CH 15:6 Seni än Merari we cho Asaia ewe samol fiti rüepükü rüe märärin kewe.
1CH 15:7 Seni än Kersom we cho Joel ewe samol fiti ipükü ilik märärin kewe.
1CH 15:8 Seni än Elisafan we cho Semaia ewe samol fiti rüepükü märärin kewe.
1CH 15:9 Seni än Hepron we cho Eliel ewe samol fiti walik märärin kewe.
1CH 15:10 Seni än Usiel we cho Aminatap ewe samol fiti ipükü engol me ruoman märärin kewe.
1CH 15:11 Mürin, Tafit a körifengeni ekewe souasor Satok me Apiatar, pwal wonoman mwän seni ewe ainangen Lefi: Uriel, Asaia, Joel, Semaia, Eliel me Aminatap.
1CH 15:12 Iwe, a üreniir, “Ämi mwänirelan än semelapemi kewe cho seni ewe ainangen Lefi, oupwe apinikemi, ämi me pwimi, pwe oupwe uwato ewe pworofel än ewe Samol mi Lapalap ewe Koten Israel lon ewe leni üa amolätä fän itan.
1CH 15:13 Pokiten ämi ousap mwärei ewe pworofel lon ewe aeuin fansoun, ewe Samol mi Lapalap ach we Kot a afeiengauakich, pun sisap aisini Kot usun mine sipwe föri ngeni.”
1CH 15:14 Iei mine ekewe souasor me ekewe mwän seni ewe ainangen Lefi ra apiniir, pwe repwe uwato ewe pworofel än ewe Samol mi Lapalap ewe Koten Israel.
1CH 15:15 Iwe, ekewe mwän seni ewe ainangen Lefi ra mwärei än Kot we pworofel won afarer fän ekewe ämwär, usun Moses a fen allük fän alon ewe Samol mi Lapalap.
1CH 15:16 Iwe, Tafit a pwal allük ngeni ekewe samolun chon ewe ainangen Lefi, pwe repwe filätä chon köl me lein pwiir kana, pwe repwe köl o ettiki sokopaten pisekin ettik fän pwapwa, repwe ettik kitar me ükülele o aea pisekin kaktai.
1CH 15:17 Iei mine ra filätä Heman nöün Joel we mwän me märärin we Asaf nöün Perekia we mwän, pwal märärir we Etan nöün Kusaia we mwän seni än Merari we cho.
1CH 15:18 Iwe, ikkei ir märärin kewe lon aruuen tettel mi etiir: Sekaria, Jasiel, Semiramot, Jehiel, Uni, Eliap, Penaia, Maseia, Matitia, Elifelehu me Mikneia, pwal ekewe chon mamasa asamalapen imwenfel Opet-etom me Jeiel.
1CH 15:19 Nge ekewe souköl Heman, Asaf me Etan ra wisen aea pisekin kaktai seni piras.
1CH 15:20 Sekaria, Asiel, Semiramot, Jehiel, Uni, Eliap, Maseia me Penaia ra wisen ettik ükülele lon ngingin Alamot .
1CH 15:21 Nge Matitia, Elifelehu, Mikneia, Opet-etom, Jeiel me Asasia ra wisen emwen fän kitar lon ngingin Seminit .
1CH 15:22 Iwe, Chenania i eman souköl, iei mine a fil pwe epwe emweni ewe mwichen köl seni ewe ainangen Lefi.
1CH 15:23 Perekia me Elkana ra fil pwe repwe mamasa asamalapen lenien ewe pworofel.
1CH 15:24 Ekewe souasor Sepania, Josafat, Netanel, Amasai, Sekaria, Penaia me Elieser ra fil pwe repwe ettiki ekewe rappwa me mwen än Kot we pworofel. Nge Opet-etom me Jehia ra pwal fil pwe repwe mamasa asamalapen lenien ewe pworofel.
1CH 15:25 Iwe, Tafit me ekewe souakomwen chon Israel, pwal ekewe chon nemenemen mwichen sounfiu ra feila pwe repwe uwato än ewe Samol mi Lapalap we pworofel seni imwen Opet-etom fän mweireiren pwapwa.
1CH 15:26 Pokiten Kot a alisi ekewe mwän seni ewe ainangen Lefi mi mwärei än ewe Samol mi Lapalap we pworofel, ra eäni asor füman ätemwänin kow me füman ätemwänin sip.
1CH 15:27 Iwe, Tafit a üföüf echö üf mi pwechepwech, usun chök ekewe mwän seni ewe ainangen Lefi meinisin mi mwärei ewe pworofel, pwal ekewe chon köl me Chenania ewe souemwenin ewe mwichen köl. Tafit a pwal üföüf echö üf itan efot.
1CH 15:28 Iei usun chon Israel meinisin ra uwato än ewe Samol mi Lapalap we pworofel fän mweireiren pwapwa, fän tikin sokopaten rappwa, fän kaktai, pwal fän tikin kitar me ükülele.
1CH 15:29 Nge lupwen ra mwärelong än ewe Samol mi Lapalap we pworofel lon Jerusalem, Mikal nöün Saul we fefin a newu seni ewe asammwacho o küna ewe king Tafit, pwe a pworuk o mwetemwet fän pwapwa. Iwe, a turunufasei Tafit lon lelukan.
1CH 16:1 Iwe, ra uwato än Kot we pworofel o anomu lon ewe imw mangaku Tafit a fen amolätä fän itan. Mürin, ra eäni asoren kek me asoren kinamwe ngeni Kot.
1CH 16:2 Nge lupwen Tafit a wes le eäni asoren kek me asoren kinamwe, a afeiöchü ekewe aramas fän iten ewe Samol mi Lapalap.
1CH 16:3 Tafit a pwal aineti mongö ngeni chon Israel meinisin. A ngeni eman me eman mwän me fefin efoch pilawa, eu kinikinin fituk me echö nokop seni föün wain mi apwas.
1CH 16:4 Iwe, Tafit a pwal filätä ekoch mwän seni ewe ainangen Lefi, pwe repwe angang me mwen än ewe Samol mi Lapalap we pworofel, repwe iotekin tüngor me iotekin kilisou o mwareiti ewe Samol mi Lapalap ewe Koten Israel.
1CH 16:5 Iwe, Asaf a fil pwe ar samol, ewe kisin fän Sekaria. Nge Jeiel, Semiramot, Jehiel, Matitia, Eliap, Penaia, Opet-etom me Jeiel ra wisen ettik kitar me ükülele. Asaf a wisen ettik ekewe pisekin kaktai,
1CH 16:6 nge ekewe souasor Penaia me Jahasiel ra wisen ettiki ekewe rappwa iteitan me mwen än Kot we pworofel.
1CH 16:7 Iwe, lon ewe ränin Tafit ekärän filätä, pwe Asaf me pwin kana repwe eäni ei kölün kilisou ngeni ewe Samol mi Lapalap:
1CH 16:8 Oupwe kilisou ngeni ewe Samol mi Lapalap, oupwe köri itan. Oupwe asilefeili an kewe föför me lein chon ekewe mwü.
1CH 16:9 Oupwe köl ngeni, oupwe kölün mwareiti i. Oupwe apworausa an kewe föför meinisin mi amwarar.
1CH 16:10 Oupwe fokun ingemwareiti itan mi pin. Chokewe mi kütta ewe Samol mi Lapalap repwe meseik.
1CH 16:11 Oupwe kütta ämi alilis me ren ewe Samol mi Lapalap, oupwe kütta i fansoun meinisin.
1CH 16:12 Oupwe chechemeni ekewe föför mi amwarar a föriir. Oupwe chechemeni ekewe manaman a föriir me an kewe kapwüng a eäni,
1CH 16:13 ämi mwirimwirin Apraham nöün Kot we chon angang, ämi mwirimwirin Jakop kewe, ätewe mi fil me ren.
1CH 16:14 Ewe Samol mi Lapalap i ach Kot, an kewe allük ra fän iten unusen fanüfan.
1CH 16:15 I a chechemeni an we pwon tori feilfeilachök, an we kapas a anüküchara ngeni engeröü täppin aramas.
1CH 16:16 A chechemeni ewe pwon a eäni ngeni Apraham, an pwon a eäni fän akapel ngeni Isaak.
1CH 16:17 A anüküchara ewe pwon ngeni Jakop pwe eu allük, pwal eu pwon esemüch.
1CH 16:18 Iwe, a apasa, “Üpwe ngonuk ewe fanü Kanaan pwe fanüom.”
1CH 16:19 Lupwen nöün Kot kewe aramas ra fokun chokükün, lupwen ra chon siamü lon ewe fanü Kanaan
1CH 16:20 o saifetal seni eu fanü tori pwal eu fanü, seni eu mwü tori pwal eu mwü,
1CH 16:21 Kot esap mwüt ngeni eman pwe epwe ariaföüür. A apwüngü ekewe king pokiter
1CH 16:22 o apasa, “Ousap atapa nei kewe mi fil, ousap afeiengaua nei kewe soufos.”
1CH 16:23 Oupwe köl ngeni ewe Samol mi Lapalap, ämi chon fanüfan meinisin. Oupwe arongafeili iteiten rän usun an amanaua aramas.
1CH 16:24 Oupwe asilefeili an ling me lein chon ekewe mwü, pwal an föför mi amwarar me lein ekewe aramas meinisin.
1CH 16:25 Pun ewe Samol mi Lapalap a tekia. Sipwe alapala ach mwareiti i, sipwe pwal niuokusiti i lap seni ekewe kot meinisin.
1CH 16:26 Pun än chon ekewe mwü kewe kot ra chök uluulun anümwäl. Nge ewe Samol mi Lapalap a föri ekewe läng.
1CH 16:27 Iteüöch me manaman ra nonom mwan, pöchökül me pwapwa ra nonom lon imwan mi pin.
1CH 16:28 Oupwe mwareiti ewe Samol mi Lapalap, ämi chon ekewe mwü meinisin, oupwe mwareiti än ewe Samol mi Lapalap ling me manaman.
1CH 16:29 Oupwe mwareiti lingen iten ewe Samol mi Lapalap. Oupwe uwato eu asor o feito fän mesan. Oupwe fel ngeni ewe Samol mi Lapalap fän üf mi pin.
1CH 16:30 Ämi chon fanüfan meinisin, oupwe chechech me mwan. Ewer, fanüfan a fokun nükünük, esap tongeni mwöküt seni lenian.
1CH 16:31 Ekewe läng repwe pwapwa, nge fanüfan epwe meseik. Ir repwe apasa me lein chon ekewe mwü, “Ewe Samol mi Lapalap a nemenem.”
1CH 16:32 Matau epwe ngüngü, pwal meinisin mine a nom lon, ekewe mälämäl repwe mweireir, pwal meinisin mine a nom lor.
1CH 16:33 Mürin, ekewe irän lein wöllap meinisin repwe köl fän pwapwa fän mesen ewe Samol mi Lapalap, pun i epwe feito pwe epwe apwüngü chon fanüfan.
1CH 16:34 Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.
1CH 16:35 Oupwe pwal apasa, “Kopwe amanauakem, äm Kot äm Chon Amanau. Kopwe achufengenikem o angasakem seni me lein chon ekewe mwü, pwe aipwe kilisou ngonuk o mwareiti itom mi pin.
1CH 16:36 Oupwe mwareiti ewe Samol mi Lapalap ewe Koten Israel seni fansoun esepop tori fansoun esemüch.” Mürin, ekewe aramas ra apasa, “Amen”, o mwareiti ewe Samol mi Lapalap.
1CH 16:37 Iwe, Tafit a awisa Asaf me märärin kana, pwe repwe angang fochofoch me mwen än ewe Samol mi Lapalap we pworofel, usun pwüngün angangen lon eu me eu rän me lon ewe leni ia ewe pworofel a nom ie.
1CH 16:38 Iwe, a pwal awisa Opet-etom nöün Jetutun we mwän me wone me waluman märärin kana, pwe repwe alisiir. Nge Opet-etom me Hosa ra wisen mamasa ekewe asamalap.
1CH 16:39 Iwe, Tafit a pwal awisa ewe souasor Satok me märärin kewe ekewe souasor, pwe repwe angang ngeni ewe Samol mi Lapalap me lon ewe lenien fel won ewe leni tekia mi nom lon Kipeon.
1CH 16:40 Repwe eäni asoren kek ngeni ewe Samol mi Lapalap won ewe rongen asoren kek iteiten lesosor me lekuniol, usun meinisin mine a mak lon än ewe Samol mi Lapalap we allük a allük ngeni chon Israel.
1CH 16:41 Iwe, a pwal nom rer Heman me Jetutun me ekewe lusun mi kefil o mak iter, pwe repwe kölün kilisou ngeni ewe Samol mi Lapalap, pun an tong ellet a nonom tori feilfeilachök.
1CH 16:42 Iwe, Heman me Jetutun ra wisen tümwünü ekewe rappwa me pisekin kaktai, pwal sokopaten pisekin ettik ra aea le ettiki ekewe köl mi pin. Nge nöün Jetutun kewe mwän ra kefil pwe repwe mamasa ewe asamalap.
1CH 16:43 Mürin, ekewe aramas meinisin ra liwinla lon en me imwan, pwal Tafit a liwiniti lenian, pwe epwe afeiöchü chon leimwan.
1CH 17:1 Iwe, lon eu rän, lupwen Tafit a nom lon imwan, a titi ewe soufos Natan o üreni, “Nengeni, üa nom lon eu imw mi för seni ewe irä setar, nge än ewe Samol mi Lapalap pworofel a chök nom lon eu imw mangaku.”
1CH 17:2 Natan a üreni Tafit, “Kopwe föri meinisin mine ka ekieki lon lelukom, pun Kot a etuk.”
1CH 17:3 Nge lon ewe chök pwinin, ewe Samol mi Lapalap a üreni Natan,
1CH 17:4 “Kopwe feila o üreni nei chon angang Tafit, pwe iei aloi ngang ewe Samol mi Lapalap, ‘Kosap aüetä eu imwenfel fän itei pwe üpwe nom lon.
1CH 17:5 Pun üsap nom lon eu imwenfel seni ewe ränin üa emwenawu chon Israel seni Isip tori ikenai, nge üa chök saifetal fän eu imw mangaku seni eu leni tori eu leni.
1CH 17:6 Lon ekewe leni meinisin ia üa saifetal ie me ekewe chon Israel meinisin, üsamwo aisini eman lein ekewe souemwenin Israel, chokewe üa awiseer pwe repwe chon masen nei aramas: Pwota ousap aüetä eu imwenfel seni irä setar fän itei?’
1CH 17:7 Iei mine kopwe üreni nei chon angang Tafit, pwe iei aloi ngang ewe Samol mi Unusen Manaman, ‘Üa angeek seni om tümwünü sip lemäl, pwe kopwe samolun nei aramasen Israel.
1CH 17:8 Üa etuk ekis meinisin ia ka feila ie, üa pwal ärala chon oputom meinisin me mwom. Iwe, üpwe aitöchü itom usun iteüöchün iten ekewe meilap won fanüfan.
1CH 17:9 Üpwe filätä eu leni fän iten nei aramasen Israel, üpwe fotukiretiu ikenan pwe repwe nonom lon püsin lenier, nge esap wor eman epwe chüen osukosukeer. Iwe, ekewe aramasangau resap chüen ariaföüür usun ar ariaföüür me lom,
1CH 17:10 lon ewe fansoun üa filätä soukapwüng won nei aramasen Israel. Iwe, üpwe akufu chon oputom meinisin. Nge üa pwal asile ngonuk, pwe ngang ewe Samol mi Lapalap üpwe awora mwirimwirum.
1CH 17:11 Iwe, lupwen ränin manauom repwe müchüla o kopwe peias ren om kewe lewo, üpwe seikätä eman noum mwän pwe epwe king, üpwe pwal anüküchara mwün.
1CH 17:12 Ätewe epwe aüetä eu imwenfel fän itei, nge ngang üpwe anüküchara an nemenem lon mwün tori feilfeilachök.
1CH 17:13 Iwe, ngang üpwe saman, nge i epwe nei. Üsap angei seni ai tong ellet, usun üa angei seni Saul, ätewe mi akom mwom.
1CH 17:14 Nge üpwe awisa pwe epwe nemeni nei aramas me mwüi tori feilfeilachök, pwe mwün epwe nonomola tori feilfeilachök.’”
1CH 17:15 Iwe, Natan a apworausa ngeni Tafit ükükün ekei kapas meinisin ewe Samol mi Lapalap a pwäri ngeni.
1CH 17:16 Mürin, ewe king Tafit a tolong lon ewe imwenfel seni mangaku, a mot fän mesen ewe Samol mi Lapalap o iotek, “Ngang iö, ai Kot Samol mi Lapalap, nge iö mwirimwiri, pwe ka emwenieito tori ei aükükün?
1CH 17:17 Nge ei mettoch a chök kükün me reöm, ai Kot. Ka pwal pwon fän iten mwirimwiri ngang noum chon angang lon kan fansoun mwach. Ka föri ngeniei usun eman aramas mi tekia seni aramas meinisin, ai Kot Samol mi Lapalap.
1CH 17:18 Pwal met üpwe chüen apasa ngonuk, pokiten ka aitöchüei ngang noum chon angang? Pun en ka sileei ngang noum chon angang.
1CH 17:19 Ai Samol mi Lapalap, seni mochenin letipom en ka föri ekei föför mi lapalap fän itei ngang noum chon angang, ka pwal pwäri ngeniei ekei kapasen pwon mi amwarar.
1CH 17:20 Ai Samol mi Lapalap, esap wor eman Kot usun en, esap pwal wor eman Kot ünükum. Iei usun mine äm aia silei.
1CH 17:21 Ifa usun, mi wor aramasen eu mwü won fanüfan ra wewe ngeni noum aramasen Israel? Ka amanaueer pwe repwe noum aramas. Itom a iteüöch ren om föri föför mi lapalap o eniweniw, pun ka asüela chon ekewe mwü me mwen noum aramas, chokewe ka amanaueer seni Isip.
1CH 17:22 Ka filätä ekewe aramasen Israel pwe repwe noum aramas tori feilfeilachök. Nge en, ai Samol mi Lapalap, ka wiliti ar Kot.
1CH 17:23 Iei, ai Samol mi Lapalap, kopwe apwönüetä tori feilfeilachök ewe pwon ka eäni ngeniei ngang noum chon angang, pwal ngeni mwirimwiri o föri usun mine ka pwonei.
1CH 17:24 Iwe, om pwon epwe nüküchar o itom epwe fokun itetekia tori feilfeilachök. Mürin, aramas repwe apasa, ‘Ewe Samol mi Unusen Manaman ewe Koten Israel, i än chon Israel Kot.’ Nge mwirimwiri ngang noum chon angang repwe nonomola me fän mesom.
1CH 17:25 Pun en ai Kot ka pwärätä ngeniei ngang noum chon angang ekei kapas o apasa, pwe kopwe awora mwirimwiri pwe repwe king. Iei popun ngang üa tongeni eäni ei iotek ngonuk.
1CH 17:26 Ai Samol mi Lapalap, en Kot, ka pwon ngeniei ngang noum chon angang ekei mettoch mi mürina.
1CH 17:27 Iei mine kose mochen kopwe afeiöchü mwirimwiri, pwe repwe nonomola me fän mesom tori feilfeilachök. Pun en, ai Samol mi Lapalap, ka afeiöchüür, iei mine repwe feiöch tori feilfeilachök.”
1CH 18:1 Iwe, mürin ekoch fansoun Tafit a maun ngeni ekewe chon Filistia, a akufuur o atolongeer fän nemenian. Iwe, a angei Kat me wisoposopun kewe seni fän nemenien ekewe chon Filistia.
1CH 18:2 Iwe, Tafit a pwal akufu chon Moap, pwe ekewe chon Moap ra nom fän nemenien Tafit o takises ngeni.
1CH 18:3 Tafit a pwal akufu Hatateser kingen Sopa mi kan ngeni Hamat, lupwen ätewe a feila, pwe epwe anüküchara an nemenem won ewe fanü arun ewe chanpupu Oifrat.
1CH 18:4 Tafit a liapeni seni Hatateser ükükün engeröü woken, fisungeröü chon wawa oris me rüengeröü sounfiu mi fetal. Iwe, Tafit a pökü selin pechen ekewe oris meinisin mi nukunuk woken, nge a likiti ekoch oris fän iten ükükün ipükü woken.
1CH 18:5 Nge lupwen ekewe sounfiun Siria seni Tamaskus ra feito pwe repwe alisi Hatateser ewe kingen Sopa, Tafit a maun ngeniir o niela ükükün rüe me ruungeröü me leir.
1CH 18:6 Mürin, Tafit a anomu mwichen sounfiu lon Siria, nge ekewe chon Siria ra nom fän nemenien Tafit o takises ngeni. Iwe, ewe Samol mi Lapalap a awinna Tafit ekis meinisin ia a feila ie.
1CH 18:7 Tafit a angei o uweela Jerusalem ekewe tittin maun seni kolt nöün Hatateser meilapen sounfiu ra uwei.
1CH 18:8 Iwe, Tafit a pwal angei chomong piras seni Tipat me Kun ekewe telinimwen Hatateser. Ren ei piras Salomon a föri ewe sepien koluk mi fokun watte, ekewe ür me ekewe sokopaten sepi seni piras fän iten ewe imwenfel.
1CH 18:9 Iwe, lupwen Toi ewe kingen Hamat a rong pwe Tafit a akufu nöün Hatateser ewe kingen Sopa kewe mwichen sounfiu meinisin,
1CH 18:10 a tinala nöün we mwän Joram ren ewe king Tafit, pwe epwe uwei an kapong ngeni o eäni kapasen etiwetiw ngeni, pokiten an akufu Hatateser lon maun. Pun Hatateser a maun ngeni Toi fän chomong. Iwe, Joram a pwal uwala lifang ren Tafit sokopaten pisek seni kolt, silifer me piras.
1CH 18:11 Ekei pisek ewe king Tafit a apini fän iten ewe Samol mi Lapalap o achu ngeni ewe silifer me kolt, a fen liapeni seni ekewe mwü meinisin, seni Etom, Moap, pwal seni ekewe chon Amon, ekewe chon Filistia me Amalek.
1CH 18:12 Iwe, Apisai nöün Seruia we mwän a niela engol me walungeröü chon Etom me lon ewe Lemolun Salt.
1CH 18:13 Tafit a anomu mwichen sounfiu lon Etom, nge chon Etom meinisin ra nom fän nemenien Tafit. Iwe, ewe Samol mi Lapalap a awinna Tafit ekis meinisin ia a feila ie.
1CH 18:14 Iwe, Tafit a nemeni unusen Israel o föri mine a öch o pwüng ngeni nöün aramas meinisin.
1CH 18:15 Joap nöün Seruia we mwän i meilapen ewe mwichen sounfiu, nge Jehosafat nöün Ahilut we mwän a soumak.
1CH 18:16 Satok nöün Ahitup we mwän me Ahimelek nöün Apiatar we mwän ra souasor, nge Seraia a seketeri.
1CH 18:17 Iwe, Penaia nöün Jehoiata we mwän i meilapen ekewe chon Cheret me chon Pelet, ir chon tümwünü ewe king, nge nöün Tafit kewe mwän ir meilapen chon angang ngeni ewe king.
1CH 19:1 Mürin ekoch fansoun Nahas ewe kingen chon Amon a mäla, nge Hanun nöün we mwän a siwili lon wisan wisen king.
1CH 19:2 Iwe, Tafit a üra, “Üpwe kirikiröch ngeni Hanun, pun Nahas saman we a kirikiröch ngeniei.” Iei mine Tafit a tinala chon künö, pwe repwe aururu Hanun pokiten än saman mäla. Iwe, lupwen nöün Tafit kewe chon angang ra feila ren Hanun lon fanüen chon Amon, pwe repwe aururu i,
1CH 19:3 ekewe samolun chon Amon ra üreni Hanun, “Ifa usun, ka ekieki pwe Tafit a tinato chon aururuk pokiten an mochen asamolu semom? Ifa usun, nöün chon angang resap feito pwe repwe ouwasacha o operi ewe fanü, pwe repwe ataela?”
1CH 19:4 Iei mine Hanun a turufi nöün Tafit kewe chon angang, a räisöüla alüser o pöküela üfer me lukalapen won wilar. Mürin a tinirela.
1CH 19:5 Iwe, ra feila. Nge lupwen ra asile ngeni Tafit pworausen ekewe mwän, a tinala chon künö pwe repwe uwala an pworaus ngeniir, pun ekewe mwän ra fokun säw. Iei alon ewe king, “Oupwe chök nonom lon Jeriko tori alüsemi epwe pwüksefäl. Mürin oupwap liwinto.”
1CH 19:6 Iwe, lupwen Hanun me ekewe chon Amon ra mefi pwe Tafit a oput ir, ra tinala chon künö fän ina epwe ükükün faik ton silifer, pwe repwe möni woken me chon wawa oris seni Mesopotamia, Aram-maka me Sopa.
1CH 19:7 Iwe, ra möni ilik me ruungeröü woken, pwal ewe king seni Maka me an mwichen sounfiu. Ra feito o nonom mwen Metepa. Pwal ekewe chon Amon ra kö seni ar kewe telinimw, pwe repwe feila maun.
1CH 19:8 Nge lupwen Tafit a rong ei pworaus, a tinala Joap me ewe mwichen sounfiu meinisin.
1CH 19:9 Iwe, ekewe chon Amon ra feito o tettelila mwen asamalapen tittin ar we telinimw Rapa, nge ekewe king mi feito pwe repwe alisiir ra imwüla o atetteliir lon ewe fanü mi amassawa.
1CH 19:10 Nge lupwen Joap a küna pwe ekewe sounfiu ra sousou me mwan me lükisökürün, a fili ekoch mwän mi fokun pwora me lon Israel o atetteliir, pwe repwe maun ngeni ekewe sounfiun Siria.
1CH 19:11 Nge ekewe lusun nöün sounfiu a atolongeer fän nemenien Apisai pwin we. Iwe, Apisai a atetteliir, pwe repwe maun ngeni ekewe sounfiun Amon.
1CH 19:12 Joap a üreni Apisai, “Are ekewe chon Siria ra kon pöchökül ngeniei, ina otun kopwe alisiei. Nge are ekewe chon Amon ra kon pöchökül ngonuk, ina otun üpwe feila o alisuk.
1CH 19:13 Kopwe tipepwora. Sipwe tipen mwän fän iten nöüch aramas, pwal fän iten ekewe telinimwen ach we Kot. Nge ewe Samol mi Lapalap epwe föri mine a öch me ren.”
1CH 19:14 Mürin, Joap me nöün kewe sounfiu ra kaneto o maun ngeni ekewe sounfiun Siria. Iwe, ekewe sounfiun Siria ra sü me mwan.
1CH 19:15 Nge lupwen ekewe sounfiun Amon ra küna pwe ekewe sounfiun Siria ra sü, pwal ir ra sü me mwen Apisai pwin Joap we o sülong lon ewe telinimw. Mürin, Joap a liwiniti Jerusalem.
1CH 19:16 Nge lupwen ekewe sounfiun Siria ra küna pwe ra kuf ren ekewe sounfiun Israel, ra tinala chon künö, pwe repwe emwenato ekewe re Siria mi nom ötiuen ewe chanpupu Oifrat, nge Sopak ewe meilapen nöün Hatateser mwichen sounfiu a emweniir.
1CH 19:17 Lupwen ei pworaus a tori Tafit, a achufengeni ekewe sounfiun Israel meinisin, a feila pekilan ewe chanpupu Jortan o apälüeer. Iwe, lupwen Tafit a atetteli nöün kewe sounfiu, pwe repwe maun ngeni ekewe sounfiun Siria, ekewe sounfiun Siria ra maun ngeni.
1CH 19:18 Nge ekewe sounfiun Siria ra sü me mwen ekewe sounfiun Israel. Iwe, Tafit me nöün kewe sounfiu ra niela seni ekewe re Siria füngeröü chon wawa woken me faik ngeröü sounfiu mi fetal, ra pwal niela Sopak ewe meilapen ar mwichen sounfiu.
1CH 19:19 Iwe, lupwen ekewe king mi nom fän nemenien Hatateser ra küna pwe ra kuf ren ekewe re Israel, ra föri kinamwe ngeni Tafit o atolongeer fän nemenian. Iei mine ekewe re Siria resap chüen mochen alisi ekewe chon Amon.
1CH 20:1 Iwe, eu ier mürin lon fansoun leräs, lupwen ekewe king ra feila maun, Joap a emwenawu ewe mwichen sounfiu o atai fanüen chon Amon. Nge Tafit a nonometiu Jerusalem. Iwe, Joap a pwelifeili ewe telinimw Rapa fän pisekin maun, a liapeni o ataela.
1CH 20:2 Tafit a angei mwärin ar we king seni won möküran, ükükün choun fik me limu paun kolt, a pwal wor eföü fau aüchea won. Iwe, Tafit a isetä ewe mwärämwär won möküran, a pwal uwala chomong liapan seni ewe telinimw.
1CH 20:3 Tafit a pwal uwala ekewe aramas mi nom lon ewe telinimw o aangangeer fän ngerenger, fän turupas me kouk seni mächä. Iei usun Tafit a föri ngeni chon ekewe telinimwen Amon meinisin. Mürin, Tafit me nöün kewe sounfiu meinisin ra liwiniti Jerusalem.
1CH 20:4 Mürin ekoch fansoun a fis maun ngeni ekewe chon Filistia me lon Keser. Iwe, Sipekai seni Husa a niela Sipai, eman me lein mwirimwirin ekewe mwänemong, pwal ekewe chon Filistia ra kuf.
1CH 20:5 Mürin, a pwal fissefäl maun ngeni ekewe chon Filistia. Nge Elhanan nöün Jair we mwän a niela Lami pwin Koliat ewe re Kat. Ätei a wokuni efoch siles ilon a nönnö ngeni öüwün efoch waseres.
1CH 20:6 A pwal fissefäl maun me lon Kat, ia a nom ie eman mwän mi fokun tam. A wor wonofch aütün pöün me ruofoch, pwal wonofoch aütün pechen me ruofoch, pwe a wor ükükün rüe me fofoch aütün. Ätei pwal eman mwirimwirin ekewe mwänemong.
1CH 20:7 Lupwen ätei a turunufasei chon Israel, Jonatan nöün Simea we mwän a niela, nge Simea pwin Tafit.
1CH 20:8 Ikkei ir mwirimwirin ekewe mwänemong lon Kat, ra ninnila ren Tafit me nöün kewe sounfiu.
1CH 21:1 Iwe, Satan a ü ngeni chon Israel o pesei ngeni Tafit pwe epwe angei iteiten chon Israel.
1CH 21:2 Iei mine Tafit a üreni Joap me ekewe meilapen mwichen sounfiu, “Oupwe feila o angei iteiten chon Israel seni Persepa tori Tan, mürin oupwe asileto rei pwe üpwe silei iteiter.”
1CH 21:3 Nge Joap a üra, “Amwo ewe Samol mi Lapalap epwe awattela iteiten nöün aramas fän ipükü seni me mwan. Ai samol me ai king, ifa usun, sap ir meinisin noum chon angang? Pwota ka ekiekietä ei sokun? Pwota kopwe atoto tipis won Israel?”
1CH 21:4 Nge ewe king a pöchökül ngeni Joap, pwe a aleasochisi alon. Iei mine Joap a feila lemenen unusen Israel, mürin a liwiniti Jerusalem.
1CH 21:5 Iwe, Joap a ngeni Tafit unusen iteiten ekewe aramas. Lon unusen Israel a wor ükükün eu million ipüküngeröü mwän mi sile maun fän ketilas, nge lon Juta mi wor ükükün föpükü fik ngeröü mwän mi sile maun fän ketilas.
1CH 21:6 Nge Joap esap alealong lon ewe iteit chon ewe ainangen Lefi me Peniamin, pun a fokun oput än ewe king allük.
1CH 21:7 Nge Kot esap tipeeu ngeni ei lapalap, iei mine a apwüngü chon Israel.
1CH 21:8 Iwe, Tafit a üreni Kot, “Üa fokun tipis ren mine üa föri. Nge iei üa tüngor ngonuk, kopwe amusa seniei ai tipis ngang noum chon angang. Pun ngang üa föri mine a fokun mwäl.”
1CH 21:9 Mürin, ewe Samol mi Lapalap a kapas ngeni Kat nöün Tafit we soufos,
1CH 21:10 “Kopwe feila o üreni Tafit pwe iei alon ewe Samol mi Lapalap: Ülüngat mettoch üa uwato reöm. Kopwe filätä eu me leir, pwe üpwe föri ngonuk.”
1CH 21:11 Iei mine Kat a feila ren Tafit o asile ngeni mine ewe Samol mi Lapalap a üreni. A apasa, “Iei kopwe filätä mine ka mochen:
1CH 21:12 Ika ka mochen pwe epwe fis lengita lon ükükün ülüngat ier? Ika ewe fanü epwe tala ren chon oputom lon ükükün ülüngat maram, lupwen chon oputom repwe akufuk fän nöür ketilas? Ika nöün ewe Samol mi Lapalap ketilas epwe kuuk, pwe epwe wor mätter lon ükükün ülüngat rän, lupwen nöün ewe Samol mi Lapalap we chon läng epwe niela aramas lemenen unusen ewe fanü Israel? Iei kopwe filätä pälüan, pwe üpwe liwinla o asile ngeni ewe mi tinieito.”
1CH 21:13 Mürin, Tafit a üreni Kat, “Ngang üa nom lon riaföü lapalap. Amwo ewe Samol mi Lapalap epwe apwüngüei, pun an ümöümöch a fokun lapalap, nge üsap mochen pwe aramas repwe apwüngüei.”
1CH 21:14 Iei mine ewe Samol mi Lapalap a tinato mätter won chon Israel, pwe ükükün fik ngeröü ra mäla.
1CH 21:15 Mürin a tinala eman chon läng Jerusalem, pwe epwe afeiengaua aramasan. Nge lupwen a amolätä pwe epwe afeiengaua, ewe Samol mi Lapalap a lamalamala pokiten ewe feiengau. Iwe, a üreni ewe chon läng, “Kopwe ükütiu. Kopwe eitietiu poum.” Nge nöün ewe Samol mi Lapalap we chon läng a ütä ren ewe lenien wichiwich umwun wiich än Arauna ewe re Jepus.
1CH 21:16 Iwe, Tafit a anetai mesan o küna nöün ewe Samol mi Lapalap we chon läng pwe a ütä lefilen fanüfan me läng, nge a amwöchü lepöün efoch ketilas mi itila won Jerusalem. Mürin, Tafit me ekewe souakom mi üföüf üf seni tuk ra chapetiu lepwül.
1CH 21:17 Iwe, Tafit a iotek, “Ai Kot, ifa usun, sap ngang ätewe mi allük pwe repwe angei iteiten ekewe aramas? Ngang ätewe mi tipis o föri mine a fokun ngau. Nge met ekei aramas ra föri? Üa tüngor ngonuk, ai Kot Samol mi Lapalap, pwe kopwe apwüngüei me chon leimwen semei. Nge kosap afeiengaua noum aramas ren ei mätter.”
1CH 21:18 Mürin, nöün ewe Samol mi Lapalap we chon läng a allük ngeni Kat pwe epwe üreni Tafit, pwe epwe feitä ren ewe lenien wichiwich umwun wiich än Arauna ewe re Jepus o senätä eu rongen asor ngeni ewe Samol mi Lapalap.
1CH 21:19 Iei mine Tafit a aleasochisi ekewe kapas Kat a üreni fän alon ewe Samol mi Lapalap o feila.
1CH 21:20 Iwe, Arauna me nöün kewe föman mwän ra wichiwich umwun wiich. Nge lupwen ra küna ewe chon läng, nöün kewe ra sü o op.
1CH 21:21 Nge lupwen Tafit a feito ren Arauna, Arauna a chimwetä o küna Tafit. Iwe, a towu seni ewe lenien wichiwich umwun wiich, a asamolu Tafit o chapetiu lepwül.
1CH 21:22 Iwe, Tafit a üreni Arauna, “Kopwe ngeniei om we lenien wichiwich umwun wiich, pwe üpwe senätä eu rongen asor ngeni ewe Samol mi Lapalap, pwe ewe mätter epwe ükütiu seni ekewe aramas. Kopwe amömö ngeniei won aükükün liwinin.”
1CH 21:23 Mürin, Arauna a üreni Tafit, “Kopwe chök angei. Ai samol me ai king, kopwe föri mine a öch me reöm. Nengeni, üpwe fangala ekei ätemwänin kow fän iten asoren kek, ekewe pisekin wichiwich umwun wiich fän iten amwüch, pwal ewe wiich fän iten asoren mongö. Üpwe ngonuk meinisin.”
1CH 21:24 Nge ewe king Tafit a üreni Arauna, “Apwi, ngang üpwe möni senuk won aükükün liwinin. Üsap mochen angei senuk och mine om pwe üpwe eäni asor ngeni ewe Samol mi Lapalap, üsap pwal mochen eäni asoren kek mine üsap möni.”
1CH 21:25 Iei mine Tafit a möni ngeni Arauna ükükün wonopükü föün moni kolt fän iten ewe lenien wichiwich umwun wiich.
1CH 21:26 Mürin, Tafit a senätä eu rongen asor ngeni ewe Samol mi Lapalap o eäni asoren kek me asoren kinamwe won. A pwal iotek ngeni ewe Samol mi Lapalap, nge i a pälüeni o tinätiu ekkei seni läng mi kenala ewe asor won ewe rongen asor.
1CH 21:27 Mürin, ewe Samol mi Lapalap a allük ngeni ewe chon läng, pwe epwe siksefälielong nöün ketilas lon tükütükün. Iwe, ewe chon läng a aleasochisi.
1CH 21:28 Lon ewe fansoun, lupwen Tafit a küna pwe ewe Samol mi Lapalap a pälüeni an tüngor me lon ewe lenien wichiwich umwun wiich än Arauna ewe re Jepus, a föri an kewe asor ikenan.
1CH 21:29 Pun lon ena fansoun än ewe Samol mi Lapalap imwenfel seni mangaku Moses a föri me lon ewe fanüapö, pwal ewe rongen asoren kek, a nom lon ewe lenien fel me lon Kipeon.
1CH 21:30 Nge Tafit esap tongeni feila ikenan pwe epwe churi Kot, pun a niuokusiti ewe ketilas nöün nöün ewe Samol mi Lapalap we chon läng.
1CH 22:1 Mürin, Tafit a üra, “Iei ewe leni ia ewe imwenfelin Kot ewe Samol mi Lapalap epwe kaütä ie, pwal lenien ewe rongen asoren kek fän iten chon Israel.”
1CH 22:2 Iwe, Tafit a allük, pwe ekewe chon ekis mi nom lon ewe fanü Israel repwe chufengen. A ngeniir ar angang o awisa ekoch ngeni ewe angangen fal fau, pwe repwe amolätä fau mi fal fän iten kaütän ewe imwenfelin Kot.
1CH 22:3 Tafit a pwal amolätä chomong mächä, pwe repwe föri chüföl fän iten ekewe asamalap me ekewe amwöch. A amolätä chomong piras esap wor eman a tongeni kiloni,
1CH 22:4 pwal chomong irä setar esap lea. Pun ekewe chon Siton me Tirus ra uwato chomong chomong irä setar ren Tafit.
1CH 22:5 Iwe, Tafit a üra, “Nei alüal Salomon a ier kükün, esamwo sip le angang, nge ewe imwenfel epwe aüetä fän iten ewe Samol mi Lapalap epwe fokun amwarar, epwe pwal föüla o ling lein chon ekewe fanü meinisin. Iei mine üpwe amolätä pisek fän itan.” Iei usun Tafit a amolätä chomong pisek me mwen an mäla.
1CH 22:6 Mürin, Tafit a körato Salomon nöün we mwän o allük ngeni pwe epwe aüetä eu imwenfel fän iten ewe Samol mi Lapalap ewe Koten Israel.
1CH 22:7 Iwe, Tafit a üreni Salomon, “Nei, üa ekieki lon lelukei pwe üpwe aüetä eu imwenfel fän iten ewe Samol mi Lapalap ai we Kot.
1CH 22:8 Nge ewe Samol mi Lapalap a üreniei, ‘En ka niela chomong aramas o eäni maun watte. En kosap aüetä eu imwenfel fän itei, pun ka asükü chan chomong aramas me fän mesei won fanüfan.
1CH 22:9 Nge eman ät epwe uputiu ngonuk, i epwe eman aramas mi eäni kinamwe. Ngang üpwe fang ngeni kinamwe seni chon oputan meinisin mi nom ünükün. Iwe, epwe iteni Salomon, nge ngang üpwe awora kinamwe me mosonoson lon Israel lon fansoun an nemenem.
1CH 22:10 Ätei epwe aüetä eu imwenfel fän itei. I epwe nei, nge ngang üpwe saman, üpwe pwal anüküchara an nemenem lon Israel, pwe mwün epwe soposopola tori feilfeilachök.’
1CH 22:11 Nei, amwo ewe Samol mi Lapalap epwe etuk, pwe kopwe tufichin aüetä imwen ewe Samol mi Lapalap om we Kot, usun i a fen kapas usum.
1CH 22:12 Eu chök, amwo ewe Samol mi Lapalap epwe fang ngonuk tipachem me silelap, lupwen epwe ngonuk nemenem won chon Israel, pwe kopwe tongeni apwönüetä ewe allük än ewe Samol mi Lapalap om we Kot.
1CH 22:13 Are kopwe tümwünüöchü le apwönüetä ekewe allük me pwüüng ewe Samol mi Lapalap a allük ngeni Moses fän iten chon Israel, mürin kopwefefeitä. Kopwe pöchökül o tipepwora, kosap niuokus, kosap pwal apilükingau.
1CH 22:14 Fän weires mi lapalap üa amolätä fän iten kaütän ewe imwenfel ina epwe ükükün ülüngeröü füpükü lime ton kolt, ilik me fisungeröü limepükü ton silifer, pwal piras me mächä esap wor eman a tongeni kiloni, pun a kon chomong. Üa pwal amolätä irä me fau. Nge en kopwe pwal apachatä och ngeni ei ükükün.
1CH 22:15 Mi wor reöm chomong souangang: chon fal fau, chon ses fau, taikü me sokopaten souangang resap lea, ra sipeöch le angang ngeni
1CH 22:16 kolt, silifer, piras me mächä. Iei kopwe popuetä le angang. Ewe Samol mi Lapalap epwe etuk.”
1CH 22:17 Mürin Tafit a allük ngeni ekewe souemwenin chon Israel meinisin, pwe repwe alisi Salomon nöün we.
1CH 22:18 Iwe, a üreniir, “Ewe Samol mi Lapalap ämi we Kot a etikemi. A fang ngenikemi kinamwe ekis meinisin. Pun i a mwüt ngeniei pwe üpwe akufu chon ei fanü meinisin. Iei ra nom fän nemenien ewe Samol mi Lapalap, pwal fän nemeniemi.
1CH 22:19 Iei oupwe anomu lon ämi ekiek pwal lon lelukemi, pwe oupwe angang ngeni ewe Samol mi Lapalap ämi we Kot. Oupwe popuetä le aüetä ewe imw mi pin imwen Kot ewe Samol mi Lapalap, pwe an we pworofel me an kewe sepi mi pin repwe nom lon ewe imwenfel mi kaütä fän itan.”
1CH 23:1 Iwe, lupwen Tafit a chinlap o ieritam, a seikätä Salomon nöün we mwän pwe epwe kingen Israel.
1CH 23:2 Iwe, Tafit a amwichafengeni ekewe souemwenin Israel meinisin, pwal ekewe souasor me ekewe mwän seni ewe ainangen Lefi.
1CH 23:3 Tafit a angei iteiten ekewe mwän seni ewe ainangen Lefi mi ierini ilik feitä ükükün ilik me walungeröü.
1CH 23:4 Mürin, Tafit a üra, “Rüe me rüanüngeröü seni ätekei repwe wisen emweni angangen imwenfelin ewe Samol mi Lapalap, nge wonungeröü repwe nöüwis me soukapwüng.
1CH 23:5 Rüanüngeröü repwe wisen mamasa ekewe asamalap, pwal rüanüngeröü repwe wisen mwareiti ewe Samol mi Lapalap ren sokopaten pisekin ettik üa föri fän iten kölün mwareiti Kot.”
1CH 23:6 Iwe, Tafit a kiniretiu lon ülüngat mwich lon tettelin nöün Lefi kewe mwän: Kersom, Kohat me Merari.
1CH 23:7 Iwe, nöün Kersom kewe mwän: Latan me Simei.
1CH 23:8 Nge nöün Latan kewe ülüman mwän: Jehiel ewe mwänichi, Setam me Joel.
1CH 23:9 Nöün Simei kewe ülüman mwän: Selomot, Hasiel me Haran. Ätekei ir mwänirelan än semer kewe cho seni ekewe mwirimwirin Latan.
1CH 23:10 Nöün Simei kewe föman mwän: Jahat, Sisa, Jeus me Peria.
1CH 23:11 Jahat ewe mwänichi, Sisa ewe aruomanün. Nge esap wor chomong nöün Jeus me Peria mwän, iei mine ir ra eu chök cho mi angangfengen.
1CH 23:12 Iwe, nöün Kohat kewe föman mwän: Amram, Isar, Hepron me Usiel.
1CH 23:13 Nöün Amram kewe mwän: Aaron me Moses. Iwe, Aaron me mwirimwirin kewe ra imwüla tori feilfeilachök, pwe repwe wisen tümwünü ekewe pisek mi unusen pin, repwe keni apach mi pwokus lupwen ar fel ngeni ewe Samol mi Lapalap, repwe pwal angang ngeni o afeiöchü ekewe aramas fän itan tori feilfeilachök.
1CH 23:14 Nge nöün Moses kewe mwän ewe aramasen Kot ra alealong lon ewe ainangen Lefi.
1CH 23:15 Nöün Moses kewe mwän: Kersom me Elieser.
1CH 23:16 Nge ewe samolun nöün Kersom kewe mwän Sepuel.
1CH 23:17 Iwe, mi wor eman chök nöün Elieser mwän itan Rehapia i samol. Nge mi wor chomong nöün Rehapia mwän.
1CH 23:18 Nöün Isar we mwän Selomit i samol.
1CH 23:19 Nöün Hepron kewe mwän: Jeria ewe mwänichi, Amaria ewe aruomanün, Jahasiel ewe aülümanün me Jekameam ewe afömanün.
1CH 23:20 Nöün Usiel kewe mwän: Mika ewe mwänichi me Isia ewe aruomanün.
1CH 23:21 Iwe, nöün Merari kewe mwän: Mali me Musi. Nge nöün Mali kewe mwän: Eleasar me Kis.
1CH 23:22 Eleasar a mäla, nge esap wor nöün mwän, pwe a chök wor nöün fefin. Iwe, märärir kewe nöün Kis kewe mwän ra pwülüeniir.
1CH 23:23 Nöün Musi kewe ülüman mwän: Mali, Eter me Jeremot.
1CH 23:24 Ätekei ir ekewe mwirimwirin Lefi lon tettelin ar kewe famili, ir mwänirelan än semer kewe cho, usun ra makelong lon ewe iteit ren en me püsin itan seni ier rüe feitä. Ir ra wisen föri angangen imwenfelin ewe Samol mi Lapalap.
1CH 23:25 Pun Tafit a apasa, “Pokiten ewe Samol mi Lapalap ewe Koten Israel a fang ngeni nöün aramas kinamwe o imweimw lon Jerusalem tori feilfeilachök,
1CH 23:26 iei mine ekewe mwän seni ewe ainangen Lefi resap chüen wisen mwärei ewe imwenfel seni mangaku ika och pisek ra aea le angang lon.”
1CH 23:27 Pokiten än Tafit kewe kapasen öüröür a eäni lesopolan, ra angei iteiten ekewe mwän seni ewe ainangen Lefi seni ier rüe feitä.
1CH 23:28 Iei ar angang, pwe repwe alisi ekewe souasor ir mwirimwirin Aaron ren angangen imwenfelin ewe Samol mi Lapalap. Ra wisen tümwünü ekewe leni lükün ewe imwenfel me ekewe rum mi nom lepekin, ra pwal wisen limeti ekewe pisek meinisin mi pin o föri sokopaten angangen lon.
1CH 23:29 Ra pwal wisen amolätä ekewe pilawa mi pin, ewe pilawa mi amas fän iten ewe asoren mongö, ekewe nokop seni pilawa esap wor iis lon, ewe asor mi furain, ewe asor mi nofitfengen me apüra, repwe pwal eäni ewe angangen kilo me aükük.
1CH 23:30 Iwe, repwe kilisou ngeni ewe Samol mi Lapalap o kölün mwareiti iteiten lesosor me iteiten lekuniol,
1CH 23:31 repwe pwal föri ar angang iteiten fansoun, lupwen a fis asoren kek ngeni ewe Samol mi Lapalap lon ekewe ränin sapat, fansoun popun maram, pwal lupwen ekewe ränin chulap. Repwe wisen angang ngeni ewe Samol mi Lapalap fansoun meinisin lon ar kewe mwich, pwal lon pwüngün ar angang a fen akot fän iter.
1CH 23:32 Iei usun ra wisen tümwünü ewe imw mangaku ia aramas ra churi Kot ie me ewe leni mi pin, repwe pwal alisi pwiir kewe ekewe mwirimwirin Aaron ren angangen imwenfelin ewe Samol mi Lapalap.”
1CH 24:1 Ikkei ekewe mwich seni ekewe mwirimwirin Aaron. Nöün Aaron kewe mwän: Natap, Apihu, Eleasar me Itamar.
1CH 24:2 Iwe, Natap me Apihu ra mäla mwen semer we, nge esap wor nöür. Iei mine Eleasar me Itamar ra wiseni ewe wisen souasor.
1CH 24:3 Tafit a kinietiu ekewe mwirimwirin Aaron lon eu me eu mwich lon ükükün ar kewe angang, nge Satok eman mwirimwirin Eleasar pwal Ahimelek eman mwirimwirin Itamar ra alisi.
1CH 24:4 Iwe, a pwä pwe mi wor chomong mwänirelan ekewe famili lein ekewe mwirimwirin Eleasar lap seni lein ekewe mwirimwirin Itamar. Iei mine ra kinietiu ekewe mwirimwirin Eleasar lon engol me wonu mwich, nge ekewe mwirimwirin Itamar ra kinietiu lon walu mwich.
1CH 24:5 Pokiten mi wor meilapen ewe leni mi pin, pwal nöün Kot kewe chon angang mi lap lein ekewe mwirimwirin Eleasar, pwal lein ekewe mwirimwirin Itamar, iei mine ra awisa ngeni eu me eu mwich an angang fän üttüt.
1CH 24:6 Iwe, ekewe mwirimwirin Eleasar me ekewe mwirimwirin Itamar ra akasiwil le üttüt. Ewe soumak Semaia nöün Netanel we mwän seni ewe ainangen Lefi, a makeetiu iter me fän mesen ewe king me nöün kewe nöüwis, Satok ewe souasor me Ahimelek nöün Apiatar we mwän, pwal fän mesen ekewe mwänirelan än ekewe souasor famili me mwänirelan än chon ewe ainangen Lefi famili.
1CH 24:7 Iei pwüngülan ar we üttüt: Ewe aeuin Jehoiarip a ütti, ewe aruuan Jetaia,
1CH 24:8 ewe aülüngatin Harim, ewe arüanün Seorim,
1CH 24:9 ewe alimuan Malkia, ewe awonuan Miamin,
1CH 24:10 ewe afisuan Hakos, ewe awaluan Apia,
1CH 24:11 ewe atiuan Jesua, ewe aengolun Sekania,
1CH 24:12 ewe engol me euin Eliasip, ewe engol me ruuan Jakim,
1CH 24:13 ewe engol me ülüngatin Hupa, ewe engol me me rüanün Jesepeap,
1CH 24:14 ewe engol me limuan Pilka, ewe engol me wonuan Imer,
1CH 24:15 ewe engol me fisuan Hesir, ewe engol me waluan Hapises,
1CH 24:16 ewe engol me tiuan Petaia, ewe arüeen Jeskel,
1CH 24:17 ewe rüe me euin Jakin, ewe rüe me ruuan Kamul,
1CH 24:18 ewe rüe me ülüngatin Telaia, ewe rüe me rüanün Masia.
1CH 24:19 Ikkei ir ekewe mwän mi kefilitä lon tettelin ar kewe angang, lupwen repwe feito lon imwenfelin ewe Samol mi Lapalap, pwe repwe föri pwüngün ar angang won mine a fen pwüngüla me ren Aaron ar we lewo, usun mine ewe Samol mi Lapalap ewe Koten Israel a allük ngeni.
1CH 24:20 Iwe, ikkei ir ekewe lusun mwänirelan mwirimwirin Lefi: Seni ekewe mwirimwirin Amram: Sepuel, nge seni ekewe mwirimwirin Sepuel: Jeteia.
1CH 24:21 Seni ekewe mwirimwirin Rehapia: Isia ewe samol.
1CH 24:22 Seni ekewe mwirimwirin Isar: Selomit, nge seni ekewe mwirimwirin Selomit: Jahat.
1CH 24:23 Nge nöün Hepron kewe mwän: Jeria ewe mwänichi, Amaria ewe aruomanün, Jahasiel ewe aülümanün, Jekameam ewe afömanün.
1CH 24:24 Iwe, seni ekewe mwirimwirin Usiel: Mika, nge seni ekewe mwirimwirin Mika: Samir.
1CH 24:25 Pwin Mika: Isia, nge seni nöün Isia kewe mwän Sekaria.
1CH 24:26 Iwe, nöün Merari kewe mwän: Mali me Musi pwal Jasia.
1CH 24:27 Nge ekewe mwirimwirin Merari seni Jasia: Peno, Soham, Sakur me Ipri.
1CH 24:28 Iwe, nöün Mali kewe mwän: Eleasar me Kis, nge esap wor nöün Eleasar.
1CH 24:29 Nöün Kis we mwän Jeramel.
1CH 24:30 Iwe, nöün Musi kewe mwän: Mali, Eter me Jerimot. Ikkei ir ekewe mwirimwirin Lefi lon tettelin ar kewe famili.
1CH 24:31 Iwe, iteiten eman me eman mwänirelan en me an famili pwal eman me eman pwin kükün ra üttüt, usun chök märärir kewe ekewe mwirimwirin Aaron. Ra üttüt fän mesen ewe king Tafit, Satok me Ahimelek, pwal fän mesen ekewe mwänirelan än ekewe souasor famili me mwänirelan än chon ewe ainangen Lefi famili, pwe epwe fat en me an angang.
1CH 25:1 Iwe, Tafit me nöün kewe meilap ra filätä ekoch nöün Asaf, Heman me Jetutun kewe mwän fän iten ewe angangen lon imwenfel, pwe repwe pwärätä än Kot kapas fiti tikin ükülele me kitar, pwal fän pisekin kaktai. Iei tettelin chokewe mi föri ei angang, pwal wiser:
1CH 25:2 Seni nöün Asaf kewe mwän: Sakur, Josef, Netania me Asarela. Ir ra nom fän emwenien Asaf, ätewe mi pwärätä än Kot kapas fän än ewe king ootoot.
1CH 25:3 Nge nöün Jetutun kewe wonoman mwän: Ketalia, Seri, Jesaia, Simei, Hasapia me Matitia. Ir ra nom fän emwenien Jetutun semer we, ätewe mi pwärätä än Kot kapas fiti tikin ükülele o eäni kölün kilisou me kölün mwareiti ewe Samol mi Lapalap.
1CH 25:4 Nöün Heman kewe mwän: Pukia, Matania, Usiel, Sepuel, Jerimot, Hanania, Hanani, Eliata, Kitalti, Romamtieser, Jospekasa, Maloti, Hotir me Mahasiot.
1CH 25:5 Ätekei meinisin ir nöün Heman kewe mwän, nge Heman nöün ewe king soufos. Kot a ngeni Heman ekei engol me föman nöün mwän pwal ülüman nöün fefin, usun a fen pwon ngeni, pwe epwe atekiatä i.
1CH 25:6 Ätekei meinisin ra nom fän emwenien semer we le köl me lon imwenfelin ewe Samol mi Lapalap. Ra köl fän pisekin kaktai, fän kitar me ükülele, pun iei wiser me lon ewe imwenfel. Nge Asaf, Jetutun me Heman ra nom fän än ewe king ootoot.
1CH 25:7 Iwe, iteiter meinisin fiti märärir kewe mi sile o ngiöch le köl ngeni ewe Samol mi Lapalap ükükün rüepükü walik me waluman.
1CH 25:8 Iwe, ra üttüt won tettelin ar kewe angang, ekewe alüal ra usun chök ekewe chinlap, ekewe sense ra usun chök ekewe chon kaiö.
1CH 25:9 Iei pwüngülan tettelin ar üttüt: Ewe aeuin Josef seni ewe familien Asaf a ütti, i me nöün kewe mwän me märärin kewe, iteiter meinisin engol me ruoman. Ewe aruuan Ketalia a ütti, i me nöün kewe mwän me märärin kewe, iteiter meinisin engol me ruoman.
1CH 25:10 Ewe aülüngatin Sakur a ütti, i me nöün kewe mwän me märärin kewe iteiter meinisin engol me ruoman.
1CH 25:11 Ewe arüanün Seri a ütti, i me nöün kewe mwän me märärin kewe iteiter meinisin engol me ruoman.
1CH 25:12 Ewe alimuan Netania a ütti, i me nöün kewe mwän me märärin kewe iteiter meinisin engol me ruoman.
1CH 25:13 Ewe awonuan Pukia a ütti, i me nöün kewe mwän me märärin kewe iteiter meinisin engol me ruoman.
1CH 25:14 Ewe afisuan Asarela a ütti, i me nöün kewe mwän me märärin kewe iteiter meinisin engol me ruoman.
1CH 25:15 Ewe awaluan Jeshaia a ütti, i me nöün kewe mwän me märärin kewe iteiter meinisin engol me ruoman.
1CH 25:16 Ewe atiuan Matania a ütti, i me nöün kewe mwän me märärin kewe iteiter meinisin engol me ruoman.
1CH 25:17 Ewe aengolun Simei a ütti, i me nöün kewe mwän me märärin kewe iteiter meinisin engol me ruoman.
1CH 25:18 Ewe engol me euin Usiel a ütti, i me nöün kewe mwän me märärin kewe iteiter meinisin engol me ruoman.
1CH 25:19 Ewe engol me ruuan Hasapia a ütti, i me nöün kewe mwän me märärin kewe iteiter meinisin engol me ruoman.
1CH 25:20 Ewe engol me ülüngatin Supael a ütti, i me nöün kewe mwän me märärin kewe iteiter meinisin engol me ruoman.
1CH 25:21 Ewe engol me rüanün Matitia a ütti, i me nöün kewe mwän me märärin kewe iteiter meinisin engol me ruoman.
1CH 25:22 Ewe engol me limuan Jeremot a ütti, i me nöün kewe mwän me märärin kewe iteiter meinisin engol me ruoman.
1CH 25:23 Ewe engol me wonuan Hanania a ütti, i me nöün kewe mwän me märärin kewe iteiter meinisin engol me ruoman.
1CH 25:24 Ewe engol me fisuan Jospekasa a ütti, i me nöün kewe mwän me märärin kewe iteiter meinisin engol me ruoman.
1CH 25:25 Ewe engol me waluan Hanani a ütti, i me nöün kewe mwän me märärin kewe iteiter meinisin engol me ruoman.
1CH 25:26 Ewe engol me tiuan Maloti a ütti, i me nöün kewe mwän me märärin kewe iteiter meinisin engol me ruoman.
1CH 25:27 Ewe arüeen Eliata a ütti, i me nöün kewe mwän me märärin kewe iteiter meinisin engol me ruoman.
1CH 25:28 Ewe rüe me euin Hotir a ütti, i me nöün kewe mwän me märärin kewe iteiter meinisin engol me ruoman.
1CH 25:29 Ewe rüe me ruuan Kitalti a ütti, i me nöün kewe mwän me märärin kewe iteiter meinisin engol me ruoman.
1CH 25:30 Ewe rüe me ülüngatin Mahasiot a ütti, i me nöün kewe mwän me märärin kewe iteiter meinisin engol me ruoman.
1CH 25:31 Ewe rüe me rüanün Romamtieser a ütti, i me nöün kewe mwän me märärin kewe iteiter meinisin engol me ruoman.
1CH 26:1 Ikkei ekewe mwich mi mamasa ekewe asamalapen imwenfel: Seni än Kora cho: Meselemia nöün Kore we mwän seni ewe familien Asaf.
1CH 26:2 Nge mi wor füman nöün Meselemia mwän: Sekaria ewe mwänichi, Jetiael, Sepatia, Jatniel,
1CH 26:3 Elam, Jehoanan me Elieho-enai.
1CH 26:4 Iwe, Kot a afeiöchü Opet-etom, pwe mi wor waluman nöün mwän: Semaia ewe mwänichi, Jehosapat, Joa, Sakar, Netanel,
1CH 26:5 Amiel, Isakar me Peuletai.
1CH 26:6 Nge Semaia nöün mwänichi we a pwal wor nöün mwän mi sounemenem lon än semer kewe cho, pun ir ra iteföüla lon ar tufich.
1CH 26:7 Iwe, nöün Semaia kewe mwän: Otni, Refael, Opet me Elsapat, pwal pwiir kewe Elihu me Semakia mi kon tufich.
1CH 26:8 Ir meinisin mwirimwirin Opet-etom. Ätekei pwal nöür kewe me märärir ra tufich ngeni ewe angang ükükür meinisin wone me ruoman.
1CH 26:9 Nge mi pwal wor nöün Meselemia kewe mwän pwal märärir kewe mi tufich ngeni ewe angang ükükür meinisin engol me waluman.
1CH 26:10 Iwe, Hosa seni än Merari cho a pwal wor nöün mwän: Simri i samol, inamwo ika sap i ewe mwänichi, nge saman a chök awisa ngeni ewe wisen samol,
1CH 26:11 pwal Hilkia ewe aruomanün, Tepalia ewe aülümanün me Sekaria ewe afömanün. Iwe, nöün Hosa kewe mwän me märärir kewe ükükür meinisin engol me ülüman.
1CH 26:12 Ekei mwich mi wisen mamasa ekewe asamalapen imwenfel fän emwenien ar kewe meilap, a wor ar angang lon imwen ewe Samol mi Lapalap usun chök märärir kewe chon ewe ainangen Lefi.
1CH 26:13 Iwe, iteiten eu me eu famili a üttüt won ekewe asamalap, ekewe alüal ra usun chök ekewe chinlap.
1CH 26:14 Iwe, Selemia a ütti ewe asamalap mi nom ötiu. Nge nöün we itan Sekaria, eman mwän mi tipachem le öüröür, a ütti ewe asamalap mi nom efeng.
1CH 26:15 Opet-etom a ütti ewe asamalap mi nom ör, nge nöün kewe mwän ra wisen tümwünü ekewe rumwen iseis pisek.
1CH 26:16 Iwe, Supim me Hosa ra ütti ewe asamalap mi nom lotou, pwal ewe asamalap Saleket mi nom won ewe aletä. Eu mwichen mamas a siwili eu mwichen mamas.
1CH 26:17 Me peliötiu a wor wonoman mwän seni ewe ainangen Lefi mi mamas iteiten rän, me peliefeng mi wor föman mi mamas iteiten rän, me peliör mi pwal wor föman mi mamas iteiten rän, nge ren ekewe rumwen iseis pisek a wor akaruoman ngeni iteiten rum.
1CH 26:18 Nge fän iten ewe uut mi nom pelilotou a wor föman mi nom ren ewe al, pwal ruoman mi nom ren ewe uut.
1CH 26:19 Ikkei ekewe mwich mi wisen mamasa ekewe asamalapen Imwenfel seni än Kora me än Merari kewe cho.
1CH 26:20 Iwe, chiener kewe seni ewe ainangen Lefi ra wisen tümwünü ewe lenien iseis pisek mi aüchea lon imwen Kot, pwal ekewe rumw ia ekewe pisek aramas ra fangala ngeni Kot ra nom ie.
1CH 26:21 Ekewe mwirimwirin Latan seni än Kerson we cho ir mwänirelan ar kewe famili mi lewoto seni Latan, ekei aramas ir aramasen Jehiel.
1CH 26:22 Iwe, nöün Jehiel kewe mwän Setam me Joel pwin we ra wisen tümwünü ewe lenien iseis pisek aüchea.
1CH 26:23 Nge seni lein än Amram, än Isar, än Hepron me än Usiel kewe cho a pwal wor aramas mi wor wiser.
1CH 26:24 Sepuel eman mwirimwirin Kersom, nge Kersom nöün Moses, i ewe meilap mi wisen tümwünü ewe lenien iseis pisek aüchea.
1CH 26:25 Iwe, Sepuel märärin Selomit mi lewoto seni Elieser pwin Kersom. Elieser semen Rehapia, Rehapia semen Jesaia, Jesaia semen Joram, Joram semen Sikri, nge Sikri semen Selomit.
1CH 26:26 Ei mwän Selomit me pwin kewe ra wisen tümwünü ekewe pisek aüchea ewe king Tafit me ekewe mwänirelan än semer kewe cho, ir meilap won ngeröü me pükü, pwal ekewe sounemenemen mwichen sounfiu ra fangala ngeni Kot.
1CH 26:27 Ra fangala ekei pisek seni liaper lon maun fän iten angangen tümwünün imwen ewe Samol mi Lapalap.
1CH 26:28 Iwe, Selomit me pwin kewe ra pwal wisen tümwünü meinisin mine ewe soufos Samuel me ewe king Saul, Apner nöün Ner we mwän me Joap nöün Seruia we mwän ra fangala ngeni Kot, pwal meinisin mine aramas ra fangala.
1CH 26:29 Iwe, seni me lein ekewe mwirimwirin Isar Chenania me nöün kewe mwän ra kefilitä, pwe repwe angang fän iten chon Israel lon pekin mwü lon wisen nöüwis me soukapwüng.
1CH 26:30 Iwe, seni me lein ekewe mwirimwirin Hepron Hasapia me märärin kewe iteiter meinisin engeröü füpükü mwän mi silelap ra wisen tümwünü ewe angang meinisin lon Israel me pelilotoun ewe chanpupu Jortan, ewe angang fän iten ewe Samol mi Lapalap, pwal ewe angang fän iten ewe king.
1CH 26:31 Jeria samolun ekewe mwirimwirin Hepron. Lon afaiken ierin mwün Tafit ra kütta sounfiu mi fokun pwora me lein ekewe mwirimwirin Hepron. Iwe, ra küneer pwe ra nom lon Jaser lon ewe fanü Kiliat.
1CH 26:32 Iwe, ewe king Tafit a filätä ükükün ruungeröü füpükü mwän mi silelap, ir mwänirelan än semer kewe cho seni märärin Jeria, pwe repwe tümwünü chon ewe ainangen Rupen me Kat, pwal esopun chon ewe ainangen Manasa lon ewe angang fän iten Kot, pwal ewe angang fän iten ewe king.
1CH 27:1 Iwe, iei tettelin ekewe chon Israel ir mwänirelan än semer kewe cho me ekewe sounemenem won ngeröü me pükü, pwal nöür kewe meilap mi wisen angang ngeni ewe king. Iteiten eu me eu maram lon eu ier eu me eu mwich ükükün rüe me rüanüngeröü mwän ra wisen föri ar angang fän emwenien ewe sounemenem mi emweniir lon ewe maram:
1CH 27:2 Iwe, Jasopeam nöün Saptiel we mwän a wisen nemeni ewe aeuin mwich lon aeuin maram, nge iteiten chon an mwich rüe me rüanüngeröü mwän.
1CH 27:3 Jasopeam eman mwirimwirin Peres, i samolun ekewe meilapen sounfiu meinisin lon aeuin maram.
1CH 27:4 Totai eman mwirimwirin Ahohi a wisen nemeni eu mwich lon aruuen maram, nge Miklot ewe mi kis fan. Iteiten chon an mwich rüe me rüanüngeröü mwän.
1CH 27:5 Iwe, ewe aülümanün sounemenem lon aülüngatin maram Penaia nöün ewe souasor Jehoiata. Ätei a samol, nge iteiten chon an mwich rüe me rüanüngeröü mwän.
1CH 27:6 Penaia i eman me lein ekewe ilik mwän mi pwora, a pwal nemeni ekewe ilik. Nge Amisapat nöün we mwän a siwili le nemeni an we mwich.
1CH 27:7 Ewe afömanün sounemenem lon arüanün maram Asael pwin Joap. Iwe, Sepatia nöün we mwän a siwili lon wisan, nge iteiten chon an mwich rüe me rüanüngeröü mwän.
1CH 27:8 Ewe alimanün sounemenem lon alimuen maram Samhut eman mwirimwirin Isra, nge iteiten chon an mwich rüe me rüanüngeröü mwän.
1CH 27:9 Nge ewe awonomanün sounemenem lon awonuen maram Ira nöün Ikes we mwän seni Tekoa, nge iteiten chon an mwich rüe me rüanüngeröü mwän.
1CH 27:10 Ewe afümanün sounemenem lon afisuen maram Heles, eman mwirimwirin Efraim seni Pelon, nge iteiten chon an mwich rüe me rüanüngeröü mwän.
1CH 27:11 Iwe, ewe awalumanün sounemenem lon awaluen maram Sipekai seni Husa, seni än Sera we cho, nge iteiten chon an mwich rüe me rüanüngeröü mwän.
1CH 27:12 Ewe atiuemanün sounemenem lon atiuen maram Apieser seni Anatot lon fanüen chon ewe ainangen Peniamin, nge iteiten chon an mwich rüe me rüanüngeröü mwän.
1CH 27:13 Ewe aengolun sounemenem lon aengolun maram Maharai seni än Sera we cho seni Netofa, nge iteiten chon an mwich rüe me rüanüngeröü mwän.
1CH 27:14 Ewe engol me emanün sounemenem lon engol me euin maram Penaia, eman mwirimwirin Efraim seni Piraton, nge iteiten chon an mwich rüe me rüanüngeröü mwän.
1CH 27:15 Nge ewe engol me ruomanün sounemenem lon engol me ruuen maram Heltai eman mwirimwirin Otniel seni Netofa, nge iteiten chon an mwich rüe me rüanüngeröü mwän.
1CH 27:16 Ikkei ir ekewe meilap mi nemeni ekewe ainangen Israel: Seni ewe ainangen Rupen Elieser nöün Sikri we mwän, seni ewe ainangen Simeon Sefatia nöün Maka we mwän,
1CH 27:17 seni ewe ainangen Lefi Hasapia nöün Kemuel we mwän, seni ewe familien Aaron Satok,
1CH 27:18 seni ewe ainangen Juta Elihu, eman me lein pwin Tafit kewe, seni ewe ainangen Isakar Omri nöün Mikael we mwän,
1CH 27:19 seni ewe ainangen Sepulon Ismaia nöün Opatia we mwän, seni ewe ainangen Naftali Jeremot nöün Asriel we mwän,
1CH 27:20 seni ewe ainangen Efraim Hosea nöün Asasia we mwän, seni ewe esopun ainangen Manasa mi nom lotou Joel nöün Petaia we mwän,
1CH 27:21 seni ewe esopun ainangen Manasa mi nom ötiu Ito nöün Sekaria we mwän, seni ewe ainangen Peniamin Jasiel nöün Apner we mwän,
1CH 27:22 nge seni ewe ainangen Tan Asarel nöün Jeroham we mwän. Ikkei ir ekewe meilapen ekewe ainangen Israel.
1CH 27:23 Ewe king Tafit esap angei iteiten chokewe resamwo ier rüe, pun ewe Samol mi Lapalap a pwon pwe epwe achomongala chon Israel usun chomongun ekewe fün läng.
1CH 27:24 Iwe, Joap nöün Seruia we mwän a popuetä le angei iteiten chon Israel, nge esap awesala. Kot a aworato feiengau won chon Israel pokiten ei, iei mine iteiten chon Israel esap makelong lon puken uruwon ewe king Tafit.
1CH 27:25 Ikkei ir ekewe meilap mi wisen tümwünü mettochun ewe king: Asmafet nöün Atiel we mwän a wisen tümwünü än ewe king lenien iseis, nge Jonatan nöün Usia we mwän a wisen tümwünü ekewe lenien iseis lon ewe fanü, lon ekewe telinimw me ekewe sop, pwal lon ekewe imw tekia.
1CH 27:26 Esri nöün Chelup we mwän a wisen nemeni chokewe mi angang lon ekewe tanipi,
1CH 27:27 Simei ewe re Rama a wisen tümwünü ekewe tanipin wain, nge Sapti ewe re Sifam a wisen tümwünü ewe lenien iseis wain.
1CH 27:28 Palhanan ewe re Keter a wisen tümwünü ekewe irä olif me sikamor mi nom fäsonun ekewe chuk me lotou, nge Joas a wisen tümwünü ewe lenien iseis apüra seni föün olif.
1CH 27:29 Sitrai ewe re Saron a wisen tümwünü ekewe pwiin kow mi nom lon ewe maasiesin Saron, nge Safat nöün Atlai we mwän a wisen tümwünü ekewe pwiin kow mi nom lon ekewe lemol.
1CH 27:30 Opil eman mwirimwirin Ismael a wisen tümwünü ekewe kamel, Jeteia seni Meronot a wisen tümwünü ekewe aas, nge Jasis eman mwirimwirin Hakri a wisen tümmwünü ekewe pwiin sip me kuuch.
1CH 27:31 Ir meinisin nöüwis mi souwani wöün ewe king Tafit.
1CH 27:32 Iwe, Jonatan pwin semen Tafit i eman souöüröür me eman mwän mi tipachem o silelap. I me Jehiel nöün Hakmoni we mwän ra wisen asukula nöün ewe king kewe mwän.
1CH 27:33 Ahitofel nöün ewe king souöüröür, nge Husai ewe re Ark chiechien ewe king.
1CH 27:34 Mürin än Ahitofel mäla, Jehoiata nöün Penaia we mwän me Apiatar ra siwili lon wisan. Nge Joap a sounemenemen än ewe king mwichen sounfiu.
1CH 28:1 Iwe, Tafit a amwichafengeni ekewe meilapen Israel meinisin me lon Jerusalem, meilapen ekewe ainang, meilapen ekewe mwich mi angang ngeni ewe king, ekewe sounemenem won ngeröü me pükü, ekewe nöüwis mi souwani wöün ewe king me chon tümwünü ekewe pwiin man nöün ewe king me nöün kewe mwän. A pwal amwichafengeni ekewe nöüwis mi wisen tümwünü ewe imwen king, ekewe mwän mi pwora me ekewe sounfiu mi sip le maun.
1CH 28:2 Mürin, ewe king Tafit a ütä mwer o üreniir, “Oupwe aüselingaei, pwii kana me nei aramas. Üa fen ekieki lon lelukei, pwe üpwe aüetä eu imw fän iten än ewe Samol mi Lapalap pworofel, fän iten lenien puun pechen ach we Kot. Iwe, üa amolätä pisek fän iten kaütän eu imwenfel.
1CH 28:3 Nge Kot a üreniei, ‘En kosap aüetä eu imw fän itei, pun en eman soumaun ka asükü chan aramas.’
1CH 28:4 Nge ewe Samol mi Lapalap ewe Koten Israel a filieitä seni me lein chon leimwen semei, pwe ngang me mwirimwiri kana repwe king lon Israel tori feilfeilachök. Pun a filätä ewe ainangen Juta pwe epwe awora eman souemwen, nge lon ewe ainangen Juta a filätä chon leimwen semei, nge me lein nöün semei kewe mwän a tipeniei o seikieitä, pwe üpwe king lon unusen Israel.
1CH 28:5 Iwe, ewe Samol mi Lapalap a fang ngeniei chomong nei mwän. Nge me lein nei kewe mwän meinisin a filätä Salomon, pwe epwe nemeni Israel, mwün ewe Samol mi Lapalap.
1CH 28:6 Iwe, a üreniei, ‘Salomon noum we mwän i epwe aüetä imwei pwal ai kewe leni ünükün, pun üa filätä i pwe epwe nei, nge ngang üpwe saman.
1CH 28:7 Üpwe anüküchara mwün tori feilfeilachök, are epwe achocho le sopwela le aleasochisi ai kewe allük me pwüüng, usun a föri ikenai.’
1CH 28:8 Iei mine nei aramas, üa fönöökemi me mwen ekei chon Israel meinisin nöün ewe Samol mi Lapalap mwichen aramas, pwal fän mesen ach we Kot, pwe oupwe fokun apwönüetä ekewe allük meinisin än ewe Samol mi Lapalap ach we Kot, pwe oupwe fanüeni ei fanü mi mürina, oupwe pwal ngeni nöümi pwe fanüer tori feilfeilachök.
1CH 28:9 Nge en Salomon nei mwän, kopwe lükü än semom we Kot, kopwe pwal angang ngeni ren unusen lelukom me mochenin letipom. Pun ewe Samol mi Lapalap a etittina letip meinisin o weweiti iteiten akot me ekiek. Are ka kul ngeni Kot, i epwe etiwok, nge are ka likitala i, i epwe pöütukela tori feilfeilachök.
1CH 28:10 Kopwe anomu lon om ekiek pwe ewe Samol mi Lapalap a filuketä, pwe kopwe aüetä imwan mi pin. Kopwe apöchökülok o föri ewe angang.”
1CH 28:11 Mürin, Tafit a ngeni Salomon liosun ewe imwenfel me kengkangan, liosun ekewe imw me ekewe lenien iseis pisek mi aüchea, liosun ekewe rumwen won me ekewe rumwen lon, pwal liosun ewe rum mi unusen pin, ia a fis ie asoren amusamusen tipis.
1CH 28:12 A pwal ngeni liosun ekewe mettoch meinisin a ekiekietä fän iten ekewe leni lükün imwen ewe Samol mi Lapalap, ekewe rum meinisin mi nom pwelin ünükün, ekewe lenien iseis pisek mi aüchea fän iten ewe imwenfel, pwal ekewe lenien iseis ekewe lifang mi pin.
1CH 28:13 Iwe, Tafit a pwal ngeni Salomon akoten ekewe mwichen souasor me chon ewe ainangen Lefi me tettelin ar angang ra wisen föri, pwal usun ar repwe tümwünü ekewe pisek ra aea le angang lon imwen ewe Samol mi Lapalap.
1CH 28:14 A apwüngala ükükün choun ewe kolt me silifer repwe aea le föri ekewe pisek fän iten eu me eu kewe sokopaten angang,
1CH 28:15 ükükün choun ewe kolt fän iten ekewe lenien atittin me ekewe lamp won, pwal ükükün choun ewe silifer fän iten ekewe lenien atittin me ekewe lamp won, aükük ngeni met repwe aea won eu me eu kewe lenien atittin.
1CH 28:16 Tafit a pwal apwüngala ükükün choun ewe kolt fän iten eu me eu kewe chepel fän iten ewe pilawa mi pin, pwal choun ewe silifer fän iten ekewe chepel seni silifer,
1CH 28:17 ükükün choun ewe kolt mi mürina fän iten ekewe fook, ekewe sepi me ekewe kap, pwal ükükün choun eu me eu kewe kükün sepi seni kolt me silifer
1CH 28:18 me choun ewe kolt mi mürina fän iten ewe rongen asoren ötüöt. A pwal ngeni Salomon liosun ewe woken, iei uluulun ekewe kerop seni kolt mi meresila pöükässir o pwölüela än ewe Samol mi Lapalap pworofel.
1CH 28:19 Iwe, Tafit a üra, “Ekei lapalap mi nom lon ewe akot a mak fän aitien ewe Samol mi Lapalap ngeniei, pwe üpwe apwönüetä.”
1CH 28:20 Mürin, Tafit a üreni Salomon nöün we, “Kopwe pöchökül o tipepwora, pwe kopwe föri ei angang. Kosap niuokus, kosap pwal tipemwaramwar, pun Kot ewe Samol mi Lapalap ai we Kot epwe etuk. I esap tümwününgau ngonuk, esap pwal likituk tori angangen imwan imwenfel epwe wes.
1CH 28:21 Ikkei ekewe mwichen souasor me ekewe mwän seni ewe ainangen Lefi ra molotä ar repwe föri angangen lon ewe imwenfel. A pwal wor reöm mwän mi sipeöch lon sokopaten angang, repwe alisuk lon ewe angang ren mochenin letiper. Pwal ekewe meilap me ekewe aramas meinisin ra nom fän nemeniom.”
1CH 29:1 Iwe, ewe king Tafit a üreni ewe mwichen aramas meinisin, “Salomon nei mwän, ätei Kot a filätä, a ier kükün, esamwo pwal sipeöch le angang, nge ewe angang a watte. Pun ei imw mi watte esap fän iten aramas, nge fän iten Kot ewe Samol mi Lapalap.
1CH 29:2 Ikkei ekewe pisek üa amolätä fän iten imwen ai we Kot ükükün ai tongeni: Kolt, silifer, piras, mächä me irä, pwe repwe aea le föri ekewe sokopaten pisek. Üa pwal amolätä chomong sokopaten fau aüchea, fau mi molupolup, pwal sokopaten fau itan marpel.
1CH 29:3 Nge lükün ekei pisek üa amolätä fän iten ewe imwenfel üa pwal achu ngeni kolt me silifer seni püsin ai lenien iseis pisek mi aüchea. Iwe, pokiten üa aücheani imwen ai we Kot, üa fangala fän itan ekei mettoch:
1CH 29:4 Ina epwe ükükün ipükü engol me limu ton kolt mi fokun mürina, me rüepükü wone ton silifer mi fokun mürina fän iten an epwe pachetä ngeni etippen ewe imwenfel,
1CH 29:5 pwe epwe wor kolt me silifer fän iten ar repwe aea le föri ekewe sokopaten pisek, pwal fän iten ekewe angang meinisin ekewe souangang repwe föri. Nge iö me leimi a pwal mochen fangala och seni letipan ngeni ewe Samol mi Lapalap?”
1CH 29:6 Mürin, ekewe mwänirelan än semer kewe cho, pwal souemwenin ekewe ainang, ekewe sounemenem won ngeröü me pükü, pwal ekewe meilap lon än ewe king angang ra fangala seni mochenin letiper ekei mettoch:
1CH 29:7 Ra fangala ina epwe ükükün ipükü tiue ton kolt me ülüpükü walik ton silifer, wonopükü fik me limu ton piras me ülüngatngeröü füpükü lime ton mächä fän iten angangen ewe imwenfel.
1CH 29:8 Nge iteiten eman me eman mi wor ren fau aüchea, a fangala lon ewe lenien iseis pisek aüchea lon imwen ewe Samol mi Lapalap fän tümwünüen Jehiel eman mwän seni än Kerson we cho.
1CH 29:9 Mürin, ekewe aramas ra pwapwa, pun nöür kewe souemwen ra fangala chomong seni mochenin letiper ngeni ewe Samol mi Lapalap. Ewe king Tafit a pwal fokun pwapwa ren.
1CH 29:10 Iwe, Tafit a mwareiti ewe Samol mi Lapalap me fän mesen ewe mwichen aramas meinisin o üra, “Üpwe mwareituk, ai Samol mi Lapalap, en än äm we lewo Jakop we Kot tori feilfeilachök.
1CH 29:11 Ai Samol mi Lapalap, en ewe mi tekia me manaman me ling me pwora me iteföüla. Pun meinisin mine a nom lon läng pwal won fanüfan om. Ai Samol mi Lapalap, om chök ewe mwü, en ka tekia o nemeni meinisin.
1CH 29:12 Wöü me iteüöch ra feito senuk. En ka nemeni mettoch meinisin ren om manaman me pöchökül, en ka tongeni atekiatä aramas o fang ngeniir pöchökül.
1CH 29:13 Iei äm aia kilisou ngonuk, äm Kot, aia pwal mwareiti itom mi ling.
1CH 29:14 Nge iö chök ngang, pwal iö chök nei aramas, pwe äm aia tongeni fang ei aükükün fän mochenin letipem? Pun mettoch meinisin ra feito senuk, nge mine äm aia fang ngonuk püsin om.
1CH 29:15 Pun äm aia chon ekis me chon siamü me mwom usun äm kewe lewo meinisin. Ränin manauem won fanüfan ra usun chök eu nür, nge esap wor äm apilükülük.
1CH 29:16 Ai Samol mi Lapalap äm Kot, ekei mettoch mi chomong äm aia amolätä fän iten kaütän eu imwenfel pwe aipwe alinga itom mi pin. Ekkei mettoch ra feito senuk, pwal meinisin om.
1CH 29:17 Ai Kot, üa silei pwe en ka sotuni leluken aramas, ka pwal efich wenechar. Fän wenecharen lelukei üa fangafangöch ekei mettoch meinisin. Nge iei üa küna noum aramas mi nom ikei, pwe ra pwal fangafangöch ngonuk fän pwapwa.
1CH 29:18 Ai Samol mi Lapalap, än äm kewe lewo Apraham, Isaak me Jakop we Kot, kopwe föri pwe ei lapalap me ekiek epwe chök fifis lon leluken noum aramas tori feilfeilachök, kopwe pwal föri pwe repwe allükülük ngonuk fansoun meinisin.
1CH 29:19 Kopwe atufichi Salomon nei ei, pwe epwe aleasochisi om kewe allük me om pwüüng ren unusen lelukan o apwönüretä meinisin, epwe pwal aüetä ei imwenfel mi watte üa fen amolätä ekei pisek fän itan.”
1CH 29:20 Mürin, Tafit a üreni ewe mwichen aramas meinisin, “Oupwe mwareiti ewe Samol mi Lapalap ämi we Kot.” Iwe, unusen ewe mwichen aramas ra mwareiti ewe Samol mi Lapalap än ar kewe lewo we Kot, ra rotiu o fel ngeni ewe Samol mi Lapalap, ra pwal asamolu ewe king.
1CH 29:21 Sorotän ewe rän ra asor ngeni ewe Samol mi Lapalap o eäni asoren kek ngeni engeröü ätemwänin kow, engeröü ätemwänin sip me engeröü nienifön sip fiti ar kewe asoren ün. Ra pwal eäni chomong asor fän iten chon Israel meinisin.
1CH 29:22 Iwe, lon ewe ränin, ekewe aramas ra mongö o ün me fän mesen ewe Samol mi Lapalap fän pwapwa mi lapalap. Mürin ra seikätä Salomon nöün Tafit we mwän fän aruuan pwe epwe king, ra epiti fän iten ewe Samol mi Lapalap pwe epwe nemeni Israel, ra pwal epiti Satok pwe epwe souasor.
1CH 29:23 Iei mine Salomon a mot won ewe lenien motun king, ewe Samol mi Lapalap a anüküchara pwe epwe siwili saman Tafit lon wisan wisen king. Iwe, Salomon a fefeitä lon mwün, nge chon Israel meinisin ra aleasochisi.
1CH 29:24 Iwe, ekewe sounemenem meinisin me ekewe mwän mi pwora, pwal nöün ewe king Tafit kewe mwän meinisin ra pwon pwe repwe eti ewe king Salomon fän allükülük.
1CH 29:25 Iwe, ewe Samol mi Lapalap a fokun atekiatä Salomon me mwen ekewe chon Israel meinisin o anomu won sokopaten lingen king lap seni än ekewe king lon Israel me mwan.
1CH 29:26 Iwe, Tafit nöün Jesi we mwän a nemeni unusen Israel
1CH 29:27 lon ükükün faik ier. A nom lon Hepron o nemenem lon ükükün fisu ier, mürin a nom lon Jerusalem o nemenem lon ükükün ilik me ülüngat ier.
1CH 29:28 Mürin, Tafit a mäla, lupwen a chinlap o ieritam, a wöümong o iteföüla. Nge Salomon nöün we a siwili lon wisan wisen king.
1CH 29:29 Iwe, pworausen än ewe king Tafit kewe föför seni lepoputän tori lesopolan an nemenem a mak lon än ekewe soufos Samuel, Natan me Kat puken uruwo.
1CH 29:30 Lon ekei puken uruwo a mak usun an nemenem, usun an win, pwal usun mine a fis ngeni i me chon Israel, pwal ngeni chon ekewe mwü meinisin mi nom ünükün.
2CH 1:1 Iwe, Salomon nöün Tafit we mwän a püsin anüküchara lon mwün, nge ewe Samol mi Lapalap an Kot a eti o fokun atekiatä.
2CH 1:2 Iwe, ewe king Salomon a kapas ngeni chon Israel meinisin, ngeni ekewe sounemenem won ngeröü me pükü sounfiu, ngeni ekewe soukapwüng, pwal ngeni ekewe souemwenin chon Israel meinisin, ir ekewe mwänirelan än semer kewe cho,
2CH 1:3 pwe repwe eti le feila ren ewe lenien fel won ewe leni tekia mi nom Kipeon. Mürin, Salomon me unusen ewe mwichen aramas ra feilapök ikenan, ewe ia än Kot we imwenfel seni mangaku a nom ie, Moses nöün ewe Samol mi Lapalap we chon angang a föri me lon ewe fanüapö.
2CH 1:4 Nge än Kot we pworofel a nom Jerusalem lon eu imw mangaku, ewe king Tafit a aüetä mürin an uwato ewe pworofel seni Kiriat-jearim.
2CH 1:5 Nge ewe rongen asor seni piras a nom mwen än ewe Samol mi Lapalap imwenfel seni mangaku lon Kipeon. Iei we rongen asor Pesalel nöün Uri we mwän, nge Uri nöün Hur, a föri. Iwe, Salomon me ewe mwichen aramas ra fel ngeni ewe Samol mi Lapalap ikenan.
2CH 1:6 Salomon a feitä ren ewe rongen asor seni piras mi nom ren ewe imwenfel seni mangaku mwe mwen ewe Samol mi Lapalap o eäni asor won engeröü mönün asoren kek.
2CH 1:7 Iwe, lon ewe pwinin Kot a pwä ngeni Salomon o üreni, “Met ka mochen üpwe fang ngonuk?”
2CH 1:8 Salomon a üreni Kot, “Ka eäni tong ellet mi lapalap ngeni Tafit semei we, ka pwal awisaei pwe üpwe siwili lon wisan wisen king.
2CH 1:9 Ai Kot Samol mi Lapalap, kose mochen kopwe apwönüetä om pwon ngeni Tafit semei we, pun en ka awisaei pwe üpwe king won eu mwichen aramas mi chomong esap wor eman a tongeni aleaniir.
2CH 1:10 Kopwe fang ngeniei tipachem me silelap, pwe üpwe tongeni emweni ekei aramas. Ifa usun ai üpwe tongeni nemeni noum aramas mi fokun chomong?”
2CH 1:11 Iwe, Kot a pälüeni än Salomon tüngor, “Pokiten ka ekieki ei lon lelukom, nge kosap tüngor pisekisek, wöü me iteüöch ika mälan chokewe mi oputok, kosap pwal tüngor fän itom pwe kopwe manauatam, nge ka tüngor om tipachem me silelap, pwe kopwe tongeni nemeni nei aramas ngang üa awisok pwe kopwe king wor,
2CH 1:12 iei mine üpwe fang ngonuk tipachem me silelap. Üpwe pwal fang ngonuk wöü me pisekisek me iteüöch, lap seni eman ekewe king mi akom mwom a eäni ika eman mi tapweto mürum epwe eäni.”
2CH 1:13 Mürin, Salomon a feila seni ewe imwenfel seni mangaku mi nom won ewe leni tekia lon Kipeon o liwinla Jerusalem. Iwe, a nemeni Israel.
2CH 1:14 Iwe, Salomon a achufengeni chomong woken me oris. A wor ren ükükün engeröü föpükü woken me engol me ruungeröü oris. A anomu ekoch lon ekewe telinimwen woken, nge ekoch a anomu ren lon Jerusalem.
2CH 1:15 Lon fansoun mwün ewe king Salomon, silifer me kolt ra chomong lon Jerusalem usun chök chomongun fau, a pwal wor chomong irä setar usun chök chomongun ewe irä sikamor mi mär fäsonun ekewe chuk.
2CH 1:16 Nöün Salomon kewe oris ra feito seni Isip me Kue, pun nöün kewe chon kamö ra möniir seni Kue ren moni.
2CH 1:17 Iwe, ra kamö efoch woken seni Isip won ükükün wonopükü föün moni silifer, nge eman oris won ükükün ipükü lime föün moni silifer. Nge nöün ewe king chon amömö ra pwal amömösefäliela ekewe woken me oris ngeni ekewe kingen chon Hit me ekewe kingen Siria meinisin.
2CH 2:1 Iwe, ewe king Salomon a ekiekietä pwe epwe aüetä eu imwenfel fän iten ewe Samol mi Lapalap, pwal eu imwen king fän püsin itan.
2CH 2:2 Mürin a awisa ükükün fik ngeröü mwän, pwe repwe keki mettoch mi chou me walik ngeröü chon tuw fau lon ewe fanü mi chukuchukutä, pwal ülüngat ngeröü wonopükü souemwenin angang mi nemeniir.
2CH 2:3 Iwe, Salomon a tinala pworaus ren Hairam ewe kingen Tirus o üra, “Kopwe tinato rei irä setar usun ka tinato ren Tafit semei we, pwe epwe aüetä püsin imwan ren.
2CH 2:4 Iei üpwe kärän popuetä le aüetä eu imw fän iten ewe Samol mi Lapalap ai we Kot. Epwe eu leni mi pin, ia äm me nei aramas aipwe fel ngeni Kot ie o keni apach mi pwokus seni nofitin mongö mi pwoarar iteiten rän, aipwe pwal uwato ren ekewe pilawa mi pin. Ikenan aipwe pwal eäni asoren kek iteiten lesosor me lekuniol, lon ekewe ränin sapat me popun maram, pwal lupwen fansoun ekewe chulap mi kefil fän iten ewe Samol mi Lapalap äm we Kot. Iei eu allük seni Kot fän iten chon Israel tori feilfeilachök.
2CH 2:5 Ewe imwenfel üpwe aüetä epwe fokun watte, pun äm Kot a fokun tekia seni ekewe kot meinisin.
2CH 2:6 Nge esap fokun wor eman a tongeni aüetä eu imw fän iten Kot, pun ewe läng mwo mi unusen tekia, nge esap tongeni kuch lon. Ngang iö, pwe üpwe aüetä eu imw fän itan, chilon chök pwe epwe eu leni ia üpwe keni ie apach mi pwokus me fän mesan?
2CH 2:7 Iei mine kopwe tinato rei eman mwän mi silelap le angang ngeni kolt, silifer, piras me mächä, mi silelap le türüni mangaku mi parachol me parapar me arauarau, epwe pwal sip le rup. Ätei epwe eti nei kewe souangang seni Juta me Jerusalem, Tafit semei we a fen filiretä.
2CH 2:8 Kopwe pwal tinato rei irä setar, saipires me alkum seni Lepanon, pun üa silei pwe noum chon angang ra sile pöküpök irä. Iwe, nei chon angang repwe eti noum chon angang,
2CH 2:9 pwe repwe amolätä chomong chomong pap fän itei, pun ewe imw üpwe aüetä epwe fokun watte o amwarar.
2CH 2:10 Ngang üpwe ngeni noum chon angang ekewe chon pöküpök irä ina epwe ükükün ipükü rüe me limu ngeröü tuk wiich mi kata, ipükü rüe me limu ngeröü tuk parli, ipükü engol me limu ngeröü kalon wain me ipükü engol me limu ngeröü kalon apüra seni föün olif.”
2CH 2:11 Mürin, Hairam ewe kingen Tirus a tinala pälüen ewe tüngor lon echö toropwe ngeni Salomon, “Pokiten ewe Samol mi Lapalap a echeni nöün aramas, iei mine a awisok pwe kopwe nöür king.”
2CH 2:12 Iwe, Hairam a pwal apasa lon an toropwe, “Üpwe mwareiti ewe Samol mi Lapalap ewe Koten Israel mi föri läng me fanüfan, pwe a ngeni king Tafit eman nöün mwän mi tipachem, a uren mirit me silelap, pwe epwe aüetä eu imwenfel fän iten ewe Samol mi Lapalap, pwal eu imwen king fän püsin itan.
2CH 2:13 Iei üpwe tinala reöm eman mwän mi sipeöch o uren silelap itan Huram.
2CH 2:14 I nöün eman fefin seni ewe ainangen Tan, nge saman eman re Tirus. Ätei eman mi sip le angang ngeni kolt, silifer, piras, mächä, fau me irä. A pwal sip le föri pisek seni mangaku mi parachol me arauarau me parapar, pwal mangaku mi pwechepwech. A tongeni föri sokopaten angangen rup o förätä iteiten lios ka awisa ngeni. Ätei epwe eti noum kewe souangang le angang me nöün Tafit semom we.
2CH 2:15 Iei mine, ai samol, kopwe tinato rem ekewe wiich me parli, apüra me wain ka fen kapas usun.
2CH 2:16 Nge äm aipwe pöküpök irä me Lepanon ükükün mine ka mochen, aipwe rifengeniir usun ärai o tinala reöm lematau ngeni Jopa, seni ikenan ka tongeni uweerela Jerusalem.”
2CH 2:17 Mürin, Salomon a angei iteiten ekewe chon ekis meinisin mi nom lon ewe fanü Israel, usun Tafit saman we a fen föri me lom. Iwe, a pwä pwe a wor ükükün ipükü lime me ülüngat ngeröü wonopükü chon ekis.
2CH 2:18 Salomon a awisa ükükün fik ngeröü me leir pwe repwe keki metoch mi chou, walik ngeröü pwe repwe tuw fau lon ewe fanü mi chukuchukutä, pwal ülüngatngeröü wonopükü souemwenin angang pwe repwe nemeni ekewe aramas o angangeer.
2CH 3:1 Mürin, Salomon a popuetä le aüetä imwen ewe Samol mi Lapalap lon Jerusalem me won ewe chuk Moria, ia ewe Samol mi Lapalap a pwä ngeni Tafit saman we ie. Iei ewe lenien wichiwich umwun wiich än Arauna ewe re Jepus, Tafit a fen amolätä.
2CH 3:2 Salomon a popuetä le aüetä ewe imwenfel lon aruuen maram lon ewe arüanün ierin mwün.
2CH 3:3 Iwe, longolongun ewe imwenfel Salomon a föri ükükün langataman tiue fiit, nge ükükün chölapan ilik fiit.
2CH 3:4 Ewe kengkang mi nom mesen ewe imwenfel ükükün langataman ilik fiit, a nönöfengen me chölapen ewe imwenfel, nge tekian ükükün ipükü walik fiit. Iwe, Salomon a apachatä kolt mi mürina me lon.
2CH 3:5 Nge ewe rum mi watte a cheni ngeni pap seni ewe irä saipires o apachatä kolt mi mürina won, a pwal ruputi liosun ewe irä palm me sein won.
2CH 3:6 Iwe, a afouta ewe imwenfel ren fau aüchea me kolt seni ewe fanü Parwaim.
2CH 3:7 A apacha kolt ngeni unusen lon ewe imwenfel: ngeni ekewe irälap, ekewe penkasam, ekewe etip me ekewe asam. A pwal ruputi liosun kerop won ekewe etiip.
2CH 3:8 Salomon a pwal föri ewe rum mi unusen pin. Langatamen ewe rum ükükün ilik fiit, a nönöfengen me chölapen ewe imwenfel, nge ükükün chölapan a pwal ilik fiit. Iwe, a aea rüe me limu ton kolt mi mürina le apachatä ngeni etippen ewe rum mi unusen pin.
2CH 3:9 Nge choun ekewe chüföl kolt ükükün rüe ounus. Iwe, a pwal apacha kolt ngeni etippen ekewe rumwen won.
2CH 3:10 Iwe, fän iten ewe rum mi unusen pin Salomon a föri uluulun ruoman kerop o apachatä kolt wor.
2CH 3:11 Unusen langatamen pöükässin ekewe kerop ükükün ilik fiit. Iwe, langatamen efoch pöükässin ewe aemanün kerop ükükün fisu esop fiit, a itila o küw etippen ewe imw. Nge langatamen ewe aruofochun pöükässin pwal ükükün fisu esop fiit, a itifengen me pöükässin pwal ewe eman kerop.
2CH 3:12 Langatamen efoch pöükässin ewe aruomanün kerop pwal ükükün fisu esop fiit, a itila o küw pwal etippen ewe imw me epek, nge aruofochun pöükässin a itifengen me pöükässin ewe aemanün kerop.
2CH 3:13 Iwe, langatamen pöükässin ekei ruoman kerop ükükün ilik fiit. Ekewe kerop ra ütä won pecher o sape ngeni ewe rum mi watte.
2CH 3:14 Iwe, Salomon a pwal föri echö chech seni mangaku mi arauarau me parachol me parapar, pwal mangaku mi pwechepwech, o chüri liosun kerop won.
2CH 3:15 Iwe, Salomon a föri ruofoch ür ükükün tekiar lime me ruu fiit o anomuur mesen ewe imwenfel. Won efoch me efoch kewe ür a pwal wor letoner tekian eu me eu ükükün fisu esop fiit.
2CH 3:16 A föri sein mi nut o apacheer ngeni won ekewe ür, a pwal föri ükükün ipükü uluulun apel o fötiretä won ekewe sein.
2CH 3:17 A aüetä ekewe ür mesen ewe imwenfel, efoch a nom peliör, nge pwal ewe efoch a nom peliefeng. Iwe, ewe mi nom peliör a aita ngeni Jakin, nge ewe mi nom peliefeng a aita ngeni Poas.
2CH 4:1 Iwe, Salomon a föri eu rongen asor seni piras, langataman me chölapan ükükün ilik fiit, nge tekian ükükün engol me limu fiit.
2CH 4:2 Mürin a föri eu sepien koluk mi fokun watte seni piras. Iwe, ewe sepi a kumosumos, chölapan seni epek tori epek ükükün engol me limu fiit, alololun ükükün fisu esop fiit, nge pwelin won aaman ükükün faik me limu fiit.
2CH 4:3 Iwe, pwelin ünükün ewe sepien koluk me fän aaman a wor ruu telin uluulun pamkin mi förunusfengen me ewe sepien koluk.
2CH 4:4 Ewe sepien koluk a nom won engol me ruoman uluulun ätemwänin kow, ülüman ra sape ngeni efeng, ülüman ra sape ngeni lotou, ülüman ra sape ngeni ör, nge ülüman ra sape ngeni ötiu. Iwe, ewe sepien koluk a nom wor, nge wänükür meinisin ra sorolong fan.
2CH 4:5 Malülün ewe sepien koluk ükükün ülüngat inis, nge aaman a usun chök aamen eu kap, pwal usun chök epö pön kiop mi mas. Iwe, masouen ewe sepi ina epwe ükükün engol me limu ngeröü kalon koluk.
2CH 4:6 A pwal föri engol sepi fän iten töttöl o anomu limu peliörün ewe imwenfel, nge limu a anomu peliefeng. Lon ekei sepi repwe chiri ekewe mönün asor ra eäni fän iten asoren kek, nge ewe sepien koluk mi fokun watte ekewe souasor repwe tütü seni.
2CH 4:7 Iwe, a föri engol lenien atittin seni kolt lon pwüngün lapalaper o anomuur lon ewe rum mi pin me lon ewe imwenfel, limefoch a anomu peliör, nge limefoch a anomu peliefeng.
2CH 4:8 A pwal föri engol chepel o anomuur lon ewe rum mi pin me lon ewe imwenfel, limu a anomu peliör, nge limu a anomu peliefeng. Iwe, a pwal föri ipükü sepi seni kolt.
2CH 4:9 Iwe, a föri ewe leni mwen ewe imwenfel fän iten ekewe souasor, pwal ewe leni watte lükün ewe imwenfel me ekewe asamalap lefiler, a pwal apachatä piras won ekewe asamalap.
2CH 4:10 Nge ewe sepien koluk mi fokun watte a anomu lükün pwokukun ewe imwenfel me ötiuörün.
2CH 4:11 Iwe, Huram a pwal föri nape, söföl me sepi. Iei usun Huram a awesi ekewe angang meinisin a pwon ngeni ewe king Salomon pwe epwe föri fän iten ewe imwenfel.
2CH 4:12 Ikkei mine Huram a föri: Ruofoch ür, ruu leton mi usun chök lapalapen sepi mi nom asen ekewe ür, ekewe ruapa sein mi nut ra nom won ekewe ruu leton,
2CH 4:13 föpükü uluulun apel fän iten ekewe ruapa sein mi nut, ruu telin uluulun apel won epa sein mi nut, pwe repwe nom won ekewe ruu leton,
2CH 4:14 ekewe kuruma me ekewe sepi mi nom won ekewe kuruma,
2CH 4:15 ewe sepien koluk mi fokun watte me ekewe engol me ruoman uluulun ätemwänin kow mi nom fan,
2CH 4:16 pwal nape, söföl me fook, me ekewe sokopaten pisek meinisin. Ekei pisek meinisin Huram a föri seni piras mi misimis fän alon ewe king Salomon fän iten imwen ewe Samol mi Lapalap.
2CH 4:17 Iwe, ewe king a föri ekei pisek me lon ewe lenien ketel me för pisek seni mächä lon paan seni pwülüpar lefilen Sukot me Saretan lon ewe maasies ünükün ewe chanpupu Jortan.
2CH 4:18 Salomon a föri chomong chomong ekei sokopaten pisek meinisin, nge esap wor eman a silei ükükün choun ewe piras a aea.
2CH 4:19 Iwe, Salomon a pwal föri ekewe pisek meinisin mi nom lon ewe imwenfel seni kolt: ewe rongen asor, ekewe chepel fän iten ewe pilawa mi pin,
2CH 4:20 ekewe lenien atittin me ar kewe lamp seni kolt mi mürina, repwe tin me mwen ewe rum mi unusen pin, usun a fen pwüngüla,
2CH 4:21 ekewe uluulun pön irä, ekewe lamp me ekewe achip,
2CH 4:22 ekewe fich, ekewe sepi, pwal ekewe sepi fän iten apach mi pwokus me ekewe sepi fän iten moli. Ekei pisek meinisin ra för seni kolt mi wesewesen mürina. Pwal ekewe asamen ewe rum mi unusen pin me ekewe asamen ewe rum mi pin ra för seni kolt.
2CH 5:1 Lupwen Salomon a awesi ekewe angang meinisin won imwen ewe Samol mi Lapalap, a uwato ekewe pisek meinisin, ewe silifer me kolt me ekewe sokopaten pisek meinisin Tafit saman we a apini, o isenirelong lon ekewe lenien iseis pisek mi aüchea me lon ewe imwenfel.
2CH 5:2 Mürin, ewe king Salomon a körato ren ekewe souakomwen Israel me mwänirelan ekewe ainang meinisin, pwal ekewe souemwenin ekewe eterekesin Israel. Iwe, a amwichafengeniir lon Jerusalem, pwe repwe uwato lon ewe imwenfel än ewe Samol mi Lapalap we pworofel seni ewe telinimwen Tafit, iei Sion.
2CH 5:3 Iwe, ekewe re Israel meinisin ra mwicheto ren ewe king lupwen fansoun ewe chulapen likachoch lon ewe afisuen maram.
2CH 5:4 Lupwen ekewe souakomwen Israel meinisin ra feito, ekewe mwän seni ewe ainangen Lefi ra ekietä wor ewe pworofel
2CH 5:5 o mwäreela ren ewe imwenfel. Iwe, ekewe souasor me ekewe mwän seni ewe ainangen Lefi ra pwal uwala ewe imwenfel seni mangaku me ekewe pisek mi pin meinisin mi nom lon ren ewe imwenfel.
2CH 5:6 Nge ewe king Salomon me ekewe chon Israel meinisin mi mwichefengen ren ra nom mwen ewe pworofel o eäni asor chomong sip me ätemwänin kow, pwe ekewe mönün asor resap chüen tongeni lea.
2CH 5:7 Mürin, ekewe souasor ra uwalong än ewe Samol mi Lapalap we pworofel lon ewe imwenfel o anomu lon ewe rum mi unusen pin fän pöükässin ekewe kerop.
2CH 5:8 Pöükässin ekewe kerop mi meresiwu ra pwölüela won ewe pworofel me ämwärin kewe.
2CH 5:9 Ekewe ämwär ra kon langatam, pwe eman a tongeni küna lesopur seni ewe rum mi pin, ika a ü mwen ewe rum mi unusen pin, nge esap wor eman a tongeni küneer me lükün. Iwe, ekewe ämwär ra nom ikenan tori ikenai.
2CH 5:10 Iwe, esap wor och lon ewe pworofel, chilon chök ekewe rüepek fau mi chöpöp, Moses a isenirelong lon me arun ewe chuk Horep. Iei ewe ia ewe Samol mi Lapalap a eäni eu pwon ngeni ekewe aramasen Israel, lupwen ra towu seni ewe fanü Isip.
2CH 5:11 Mürin, ekewe souasor ra towu seni lon ewe imwenfel. Ekewe souasor meinisin mi nom ra apiniir, ese lifilifil ika meni mwich ra choni.
2CH 5:12 Nge ekewe chon köl ir chon ewe ainangen Lefi: Asaf, Heman me Jetutun, nöür kewe mwän me märärir kewe ra üföüf üf mi pwechepwech o ütä peliötiuen ewe rongen asor. Ra eäni pisekin kaktai, kitar me ükülele, nge ipükü rüe souasor mi ettiki rappwa ra etiir.
2CH 5:13 Ekewe chon ettiki rappwa me ekewe chon köl ra chietäpök le mwareiti ewe Samol mi Lapalap o kilisou ngeni. Iwe, ra chietä ar köl fiti tikin rappwa, pisekin kaktai me sokopaten pisekin ettik o mwareiti ewe Samol mi Lapalap, “Kot a kirikiröch, an tong ellet a nonom tori feilfeilachök.” Lon ei otun imwen ewe Samol mi Lapalap a urela ren eu kuchu,
2CH 5:14 ina mine ekewe souasor resap chüen tongeni föri ar angang lon, pokiten ewe kuchu. Pun än ewe Samol mi Lapalap ling a aurala ewe imwenfel.
2CH 6:1 Mürin, ewe king Salomon a iotek, “En, Samol mi Lapalap, ka filätä pwe kopwe nonom lon rochokichin rochopwak.
2CH 6:2 Üa aüetä eu imwenfel mi amwarar fän itom, eu leni kopwe nom lon tori feilfeilachök.”
2CH 6:3 Iwe, ekewe aramasen Israel meinisin ra ütä, nge ewe king a kulu ngeniir o afeiöchüür.
2CH 6:4 Mürin a apasa, “Üpwe mwareiti ewe Samol mi Lapalap ewe Koten Israel mi apwönüetä mine a eäni pwon ngeni Tafit semei we, lupwen a üra,
2CH 6:5 ‘Seni ewe ränin üa emwenawu nei aramasen Israel seni Isip, üsap filätä eu telinimw me lein telinimwen ekewe ainangen Israel meinisin, ia eu imwenfel epwe kaütä ie pwe aramas repwe fel ngeniei ie, üsap pwal filätä eman mwän epwe samol won nei aramasen Israel.
2CH 6:6 Nge iei üa filätä Jerusalem pwe ina ewe leni aramas repwe fel ngeniei ie, üa pwal filätä Tafit pwe epwe nemeni nei aramasen Israel.’
2CH 6:7 Iwe, a nom lon än Tafit semei we ekiek pwe epwe aüetä eu imwenfel fän iten ewe Samol mi Lapalap ewe Koten Israel.
2CH 6:8 Nge ewe Samol mi Lapalap a üreni Tafit, ‘A mürina pwe ka ekiekin aüetä eu imwenfel fän itei.
2CH 6:9 Inamwo nge en kosap aüetä ewe imwenfel. Nge noum mwän, epwe upu ngonuk, i epwe aüetä ei imwenfel fän itei.’
2CH 6:10 Iei ewe Samol mi Lapalap a apwönüetä an we pwon a eäni. Pun üa siwili Tafit semei we lon wisan wisen king me lon Israel, usun ewe Samol mi Lapalap a fen pwon. Iwe, üa aüetä ei imwenfel fän iten ewe Samol mi Lapalap ewe Koten Israel.
2CH 6:11 Ikenan üa anomu ewe pworofel, ia a nom ie ekewe ruepek fau mi chöpöp än ewe Samol mi Lapalap kapasen pwon a mak ie. Ekei kapasen pwon a eäni ngeni ekewe aramasen Israel.”
2CH 6:12 Mürin, Salomon a ütä mwen än ewe Samol mi Lapalap we rongen asor me fän mesen unusen ewe mwichen Israel, o aitiela pöün pwe epwe iotek.
2CH 6:13 Iwe, Salomon a fen föri eu lenien ütä seni piras o anomu lukalapen ewe leni lükün imwenfel, langataman me chölapan ükükün walu fiit, nge tekian ükükün limu fiit. Iwe, a ütä won, mürin a fotopwäsuketiu fän mesen unusen ewe mwichen Israel, a aitietä pöün läng
2CH 6:14 o iotek, “Ai Samol mi Lapalap, Koten Israel, esap wor eman Kot a wewe ngonuk lon läng ika won fanüfan. Ka apwönüetä om pwon o pwäri om tong ellet ngeni noum kewe chon angang mi föri letipom ren unusen leluker.
2CH 6:15 Ka apwönüetä om pwon ngeni noum chon angang Tafit semei we. Ewer, ikenai a fis meinisin mine ka apasatä.
2CH 6:16 Nge iei, ai Samol mi Lapalap, Koten Israel, kopwe pwal apwönüetä om pwon ngeni Tafit semei we, pun ka üreni pwe epwe wor eman mwirimwirin epwe wiseni ewe wisen king me lon Israel fansoun meinisin, are nöün kewe mwän repwe chök aleasochisi om kewe allük, usun i a föri.
2CH 6:17 Iei mine, ai Samol mi Lapalap, Koten Israel, kopwe apwönüetä om kapas ka eäni ngeni noum chon angang Tafit.
2CH 6:18 Nge ifa usun, en äm Kot, kopwe wesewesen tongeni imweimw ren aramas won fanüfan? Nengeni, kosap kuch lon läng, pwal lon ewe läng mi unusen tekia. Ifa usun, kopwe tongeni kuch lon ei imwenfel üa aüetä?
2CH 6:19 Ai Samol mi Lapalap, ai Kot, ngang noum chon angang. Kose mochen kopwe aüselinga ai iotek o apwönüetä ai tüngor üa eäni ngonuk ikenai.
2CH 6:20 Kopwe mamasa ei imwenfel lerän me lepwin, ewe leni ka kapas usun pwe aramas repwe fel ngonuk ie. Kopwe aüselinga ewe iotek ngang noum chon angang üpwe eäni ngonuk le sape ngeni ei leni.
2CH 6:21 Kopwe aüselinga ai me än noum aramasen Israel kewe tüngor, lupwen aia iotek ngonuk le sape ngeni ei leni. Ewer, kopwe aüseling me läng ewe ia ka nom ie, nge lupwen ka rongorong, kopwe amusala äm tipis.
2CH 6:22 Iwe, are eman aramas epwe atipisi chon arun o emwenala ren om ei rongen asor lon ei imwenfel, pwe epwe pwon fän akapel pwe esap tipis,
2CH 6:23 mürin kopwe aüseling me läng o apwüngü noum kewe chon angang. Kopwe atipisi ewe mi tipis o ukun ngeni an föför, nge kopwe pwärala pwüngün ewe chon pwüng o liwini ngeni won ükükün an pwüng.
2CH 6:24 Iwe, are noum aramasen Israel ra kuf ren chon oputeer pokiten ar tipis ngonuk, nge mürin ra kulsefäl ngonuk o amusamus ngonuk, are ra iotek o tüngor ngonuk me lon ei imwenfel,
2CH 6:25 kopwe aüselingeer me läng o amusala ar tipis. Kopwe aliwinisefäliir ngeni ewe fanü ka fen ngeniir me ar kewe lewo.
2CH 6:26 Iwe, are üt esap püngütiu me läng pokiten ar tipis ngonuk, nge mürin ra iotek ngonuk le sape ngeni ei leni, are ra amusamus ngonuk o kul seni ar tipis pokiten ka ariaföüür,
2CH 6:27 mürin kopwe aüselingeer me läng o amusala än noum kewe chon angang ekewe aramasen Israel tipis. Iwe, kopwe aiti ngeniir mine a pwüng pwe repwe föri. Mürin kopwe apüngätiu üt won fanüom, ewe fanü ka ngeni noum aramas pwe repwe fanüeni.
2CH 6:28 Iwe, are a fis lengita lon ewe fanü, are a wor mätter ika moi ika mesenipik ika lifichimas ika muun, are chon oputeer repwe pwelifeili eu lein ar kewe telinimw fän pisekin maun, ese lifilifil met sokun riaföü ika samau a fis,
2CH 6:29 kopwe aüselinga ar iotek. Iwe, are eman chök aramas ika noum aramasen Israel meinisin ra tüngor o aitiela pöür ngeni ei imwenfel, ese lifilifil met sokun iotek ika tüngor ra eäni, pun iteiten eman me eman a silei riaföün püsin lelukan,
2CH 6:30 mürin kopwe aüselingeer me läng ewe ia ka nom ie. Kopwe amusala ar tipis o liwini ngeni eman me eman ükükün an föför, pun en ka silei leluker, ewer, en echök ka silei leluken aramas meinisin.
2CH 6:31 Ren ei noum aramas repwe meninituk o aleasochis ngonuk lon fansoun ar manau lon ewe fanü ka ngeni äm kewe lewo.
2CH 6:32 Nge are eman chon ekis, sap i eman lein noum aramasen Israel, epwe feito seni eu fanü toau pokiten a rongorong itom mi iteföüla, pwal usun om kewe föför ka föriir ren poum mi manaman, are ewe chon ekis epwe feito o iotek ngonuk le sape ngeni ei imwenfel,
2CH 6:33 kopwe aüselinga me läng ewe ia ka nom ie. Iwe, kopwe mwütätä meinisin mine ewe chon ekis a tüngor ngonuk. Ren ei ekewe aramasen fanüfan meinisin repwe silei itom o meninituk, usun noum aramasen Israel ra föri, repwe pwal silei pwe ei imwenfel üa aüetä a eu leni ia aramas repwe fel ngonuk ie.
2CH 6:34 Iwe, are ka tinala noum aramas pwe repwe feila maun ngeni chon oputeer, ese lifilifil ia ra nom ie, are ra iotek ngonuk le sape ngeni ei telinimw ka filätä, pwal ngeni ei imwenfel üa aüetä fän itom,
2CH 6:35 kopwe aüselinga ar iotek me ar tüngor me läng o alisiir.
2CH 6:36 Are noum aramas ra tipis ngonuk, pun esap wor eman esap föri tipis, nge ka song ngeniir o mwüt ngeni chon oputeer, pwe repwe akufuur o uweerela lon fanüer mi toau ika arap,
2CH 6:37 nge are ra memef lon leluker o ekieksefäl me lon ewe fanü ia ra oola ie, are ra iotek ngonuk o apasa, ‘Äm aia tipis o föri föför ese pwüng me ngau,’
2CH 6:38 are ra kulsefälituk ren unusen leluker me lon fanüen chon oputeer o iotek ngonuk le sape ngeni fanüer ka ngeni ar kewe lewo, are ra sape ngeni ei telinimw ka filätä, pwal ngeni ei imwenfel üa aüetä fän itom,
2CH 6:39 mürin kopwe aüselinga ar iotek me ar tüngor me läng ewe ia ka nom ie. Kopwe alisiir o amusala än noum aramas tipis ra föri ngonuk.
2CH 6:40 Ai Kot, kose mochen kopwe netiu wom iei o aü selingom ngeni ei iotek üa eäni me lon ei leni.
2CH 6:41 Ai Kot Samol mi Lapalap, kopwe feito iei o tolong lon ei imwenfel, pwe kopwe nonom lon tori feilfeilachök, en me ewe pworofel asisilen om manaman. Ai Kot Samol mi Lapalap, kopwe afeiöchü noum kewe souasor lon mine ra föri, nge noum kewe aramas repwe meseik pokiten om kirikiröch ngeniir.
2CH 6:42 Ai Kot Samol mi Lapalap, kosap likitala ewe king ka filätä. Kopwe chechemeni om tong ellet ka eäni ngeni noum we chon angang Tafit.”
2CH 7:1 Iwe, lupwen Salomon a wes me iotek, ekkei a püngütiu me läng o kenala ewe asoren kek me ekewe sokopaten asor, nge lingen ewe Samol mi Lapalap a aura ewe imwenfel.
2CH 7:2 Iwe, ekewe souasor resap tongeni tolong lon imwen ewe Samol mi Lapalap, pun lingen ewe Samol mi Lapalap a aura ewe imwenfel.
2CH 7:3 Nge lupwen ekewe chon Israel ra küna ewe ekkei, a püngütiu me läng, me lingen ewe Samol mi Lapalap won ewe imwenfel, ra chapetiu lepwül, ra fel ngeni ewe Samol mi Lapalap o kilisou ngeni. Iwe, ra apasa, “Ewe Samol mi Lapalap a kirikiröch, an tong ellet a nonom tori feilfeilachök.”
2CH 7:4 Mürin, ewe king Salomon me ekewe aramas meinisin ra asor ngeni ewe Samol mi Lapalap.
2CH 7:5 Iwe, ewe king a eäni asor ükükün rüe me ruungeröü ätemwänin kow me ipükü rüe ngeröü sip. Iei usun ewe king me ekewe aramas meinisin ra efinüna ewe imwenfel.
2CH 7:6 Nge ekewe souasor ra ütä me lon lenier, pwal ekewe mwän seni ewe ainangen Lefi, ra mwareiti ewe Samol mi Lapalap fän sokopaten pisekin ettik ewe king Tafit a föri pwe repwe aea le eäni ei kölün kilisou, ‘An tong ellet a nonom tori feilfeilachök,’ usun Tafit a awisa ngeniir. Iwe, ekewe souasor ra ettiki ekewe rappwa, nge ekewe chon Israel meinisin ra ütä.
2CH 7:7 Iwe, Salomon a epini lukalapen ewe leni lükün mwen imwen ewe Samol mi Lapalap. Ikenan a eäni ekewe asoren kek me asoren mongö, pwal kirisin ekewe mönün asoren kinamwe, pokiten ewe rongen asor seni piras Salomon a föri a men kükün fän iten ekewe sokopaten asor meinisin.
2CH 7:8 Lon ewe fansoun Salomon me ekewe chon Israel meinisin ra föri ewe chulapen likachoch lon ükükün fisu rän. Iwe, a wor eu mwichemongun aramas, ra feito seni ewe al mi ale ngeni Hamat a nom efeng, pwal seni ewe öüwön Isip a nom ör.
2CH 7:9 Ina usun ra föri efinünen ewe rongen asor lon ükükün fisu rän. Nge lon awaluen rän ra föri eu mwich mi pin.
2CH 7:10 Iwe, lon rüe me ülüngatin ränin ewe afisuen maram Salomon a afeilai ekewe aramas ngeni lenier. Ra feila fän meseik me pwapwan leluker pokiten ekewe feiöch meinisin ewe Samol mi Lapalap a fang ngeni Tafit me Salomon, pwal ngeni nöün aramasen Israel.
2CH 7:11 Lupwen Salomon a wes le aüetä imwen ewe Samol mi Lapalap me ewe imwen king, o awesöchüela mine a ekiekin föri me lon imwen ewe Samol mi Lapalap, pwal me lon püsin imwan,
2CH 7:12 ewe Samol mi Lapalap a pwä ngeni Salomon lepwin o üreni, “Üa aüselinga om iotek o filätä ei imwenfel pwe epwe eu leni ia aramas repwe asor ngeniei ie.
2CH 7:13 Are üsap apüngätiu üt me läng, ika üa tinala ekewe lifichimas, pwe repwe enala irän ewe fanü, ika üa tinala mätter lein nei aramas,
2CH 7:14 mürin, are nei aramas repwe atekisoneer, are repwe iotek ngeniei o küttaei, are repwe pwal kul seni ar föför mi ngau, ngang üpwe aüseling seni läng, üpwe amusala ar kewe tipis o auaisefäli fanüer.
2CH 7:15 Üpwe mamasa ei imwenfel o aüselinga ekewe iotek mi fis lon ei leni.
2CH 7:16 Pun ngang üa filätä ei imw o apini pwe epwe eu leni üpwe imweimw lon tori feilfeilachök. Üpwe mamasa ei leni o tümwünü fansoun meinisin.
2CH 7:17 Nge en, Salomon, are kopwe angang ngeniei, usun Tafit semom we a föri, are kopwe aleasochisi meinisin mine üa allük ngonuk o apwönüetä ai kewe allük me pwüüng,
2CH 7:18 mürin üpwe anüküchara mwumw, usun üa fen pwon ngeni Tafit semelapom we ren ai apasa, ‘Epwe wor eman mwirimwirum iteiten fansoun, epwe nemeni Israel.’
2CH 7:19 Nge are oupwe kul seniei o aleasolap ngeni ai kewe allük me pwüüng üa ngenikemi, are oupwe angang ngeni pwal ekoch kot o fel ngeniir,
2CH 7:20 mürin üpwe atokemiiwu seni ewe fanü üa ngenikemi. Nge ei imw üa apini fän itei, üpwe aturawu me fän mesei, pwe aramas repwe leaweni ren kapasen ämängau me kapasen turunufas me lein chon ekewe mwü meinisin.
2CH 7:21 Iwe, aramas meinisin mi pwereto lükün ei imwenfel mi fokun amwarar iei, repwe mäirü ren o ais, ‘Pwota ewe Samol mi Lapalap a föri ei sokun föför ngeni ei fanü me ei imwenfel?’
2CH 7:22 Mürin, aramas repwe pälüeni, ‘Pokiten ra likitala ewe Samol mi Lapalap än ar kewe lewo we Kot mi emwenirewu seni ewe fanü Isip, ra pwal angei ekoch kot, ra fel ngeniir o angang ngeniir. Iei mine ewe Samol mi Lapalap a aworato wor ekei feiengau meinisin.’”
2CH 8:1 Iwe, lon ükükün rüe ier Salomon a aüetä imwen ewe Samol mi Lapalap me püsin imwan.
2CH 8:2 Salomon a pwal aüsefälietä ekewe telinimw Hairam a ngeni, o alenia aramasen Israel lor.
2CH 8:3 Iwe, Salomon a feila Hamat-sopa o liapeni.
2CH 8:4 A aüsefälietä Palmira me lon ewe fanüapö me ekewe telinimw meinisin lon Hamot, ia a nom ie an kewe lenien iseis pisek.
2CH 8:5 A pwal aüsefälietä Pet-horon-asan me Pet-horon-fan, pwe a pöchökül tittir, a pwal wor asamalaper me lokkur.
2CH 8:6 Iwe, a aüsefälietä Palat me ekewe telinimw meinisin ia a nom ie an kewe lenien iseis pisek, pwal ekewe telinimw fän iten wan woken me nöün oris. Salomon a pwal aüetä meinisin mine a chök mochen me lon Jerusalem, lon Lepanon, pwal lon unusen ewe fanü a nemeni.
2CH 8:7 Salomon a nöüni chon angang ekewe aramas mi chüen manau seni ekewe chon Hit, chon Amor, chon Peris, chon Hiw me chon Jepus. Ir sap aramasen Israel,
2CH 8:8 nge mwirimwirin chokewe mi chüen manau lon ewe fanü, ekewe aramasen Irael resap aroserela. Ikkei ir chokewe ra angangen kinroosi ngeni Salomon, usun a chüen fis tori ikenai.
2CH 8:9 Nge ekewe aramasen Israel resap angangen kinroosi ngeni Salomon, pwe ra nöün sounfiu, nöün meilap, chon nemeni wan woken me nöün chon wawa oris.
2CH 8:10 Iwe, iteiten nöün ewe king Salomon kewe nöüwis mi nemeni ekei chon angang ükükün ruopükü lime.
2CH 8:11 Iwe, Salomon a uwala pwülüan nöün Farao we fefin seni ewe telinimwen Tafit ngeni ewe imw i a aüetä fän itan, pun a apasa, “Pwülüei esap nom lon imwen Tafit ewe kingen Israel, pun ekewe leni ra pin, ia än ewe Samol mi Lapalap pworofel a nom ie.”
2CH 8:12 Mürin, Salomon a eäni asoren kek ngeni ewe Samol mi Lapalap won än ewe Samol mi Lapalap rongen asor i a senätä me mwen kengkangen ewe imwenfel.
2CH 8:13 A eäni asor ükükün mine a wisen eäni lon eu me eu rän, usun mine Moses a allük fän iten ekewe ränin sapat, fansoun popun maram me ekewe ülüngat fansoun chulap mi fis iteiten ier: ewe chulapen mongö pilawa esap wor iis lon, ewe chulapen kini mwen uän irä me ewe chulapen likachoch.
2CH 8:14 Iwe, Salomon a awisa ekewe mwichen souasor ngeni ar angang, usun Tafit saman we a fen apwüngala. A awisa ekewe mwän seni ewe ainangen Lefi, pwe repwe kölün mwareiti Kot o alisi ekewe souasor lon ewe angang ra wisen föri iteiten rän. A pwal awisa ekewe mwichen chon mamas, pwe repwe mamasa ekewe asamalapen imwenfel, pun iei usun Tafit ewe aramasen Kot a fen allük.
2CH 8:15 Iwe, ra tichik le föri mine ewe king Tafit a allük ngeni ekewe souasor me ekewe mwän seni ewe ainangen Lefi usun ekewe sokopaten angang, pwal usun ekewe lenien iseis.
2CH 8:16 Iei usun än Salomon angang meinisin ra fis, seni ewe fansoun a popuetä longolongun imwen ewe Samol mi Lapalap tori a awesöchüela. Iwe, imwen ewe Samol mi Lapalap a unusöch.
2CH 8:17 Mürin, Salomon a feila Esion-keper me Elat arun ewe matau lon ewe fanü Etom.
2CH 8:18 Iwe, ewe king Hairam a tinala ren Salomon sip mi nom fän nemenien nöün meilap, pwal sälo mi repi lematau. Iwe, ra saila Ofair fiti nöün Salomon kewe chon angang o uwato seni ikenan ina epwe ükükün engol me wonu ton kolt ren ewe king Salomon.
2CH 9:1 Lupwen ewe kiwinnen Sepa a rongorong usun än Salomon iteföüla, a feila Jerusalem, pwe epwe sotuni Salomon ren kapas ais mi weires. A feito fän eu mwichemongun chon angang me kamel mi uwou nofitin mongö mi pwokus, kolt mi chomong me fau aüchea. Nge lupwen a churi Salomon, a ais ngeni meinisin mine a ekieki lon lelukan.
2CH 9:2 Iwe, Salomon a pälüeni an kewe kapas ais meinisin. Esap wor och mi weires ngeni ewe king Salomon an epwe tongeni pälüeni.
2CH 9:3 Nge lupwen ewe kiwinnen Sepa a küna än Salomon tipachem, ewe imw a aüetä fän itan,
2CH 9:4 ewe mongö mi nom won an chepel, usun än nöün kewe nöüwis mot ünükün, angangöchün nöün kewe chon angang me lingen üfer, nöün chon amolätä ünüman me üfer, pwal ekewe asoren kek a eäni me lon imwen ewe Samol mi Lapalap, neminewe a fokun mwar ren.
2CH 9:5 Mürin, ewe kiwin a üreni ewe king Salomon, “A let ewe pworaus üa rong me lon püsin fanüei usun om föför me om tipachem.
2CH 9:6 Nge ngang üsap mochen lükü ewe pworaus tori iei üa feito o küna ren püsin mesei. Nge nengeni, ra chök apworausa ngeniei esopun om tipachem mi lapalap. A kon senukula om tipachem seni ewe pworaus üa rong usum.
2CH 9:7 Feiöchün pwülüom kewe. Feiöchün noum kei chon angang mi nom reöm iteiten fansoun o rongorong ngeni om tipachem.
2CH 9:8 Üpwe mwareiti ewe Samol mi Lapalap om we Kot mi pwapwaituk o atolongok lon ewe wisen king, pwe kopwe nemenem fän itan. Pokiten om we Kot a echeni chon Israel o anüküchara mwür tori feilfeilachök, iei mine a seikuketä pwe kopwe nöür king o eäni kapwüng me pwüng ngeniir.”
2CH 9:9 Mürin, neminewe a ngeni ewe king ina epwe ükükün limu ton kolt, chomong nofitin mongö me fau aüchea. Esap chüen wor ena sokun nofitin mongö usun ekei, ewe kiwinnen Sepa a ngeni ewe king Salomon.
2CH 9:10 Iwe, nöün Hairam chon angang me nöün Salomon chon angang mi uwato kolt seni Ofair ra pwal uwato chomong irä itan alkum me fau aüchea.
2CH 9:11 Seni ekei irä alkum ewe king a föri natö ngeni imwen ewe Samol mi Lapalap, pwal ngeni imwan, a pwal föri ükülele me kitar seni fän iten ekewe souköl. Ei sokun irä esap tori ewe fanü Juta me mwan.
2CH 9:12 Iwe, ewe king Salomon a ngeni ewe kiwinnen Sepa meinisin mine a mochen ika tüngor. A ngeni neminei chomong lifang lap seni mine a uwato ren. Mürin, ewe kiwin me nöün kewe chon angang ra liwiniti poputän fanüer.
2CH 9:13 Iwe, choun ewe kolt mi tori Salomon iteiten ier ina epwe ükükün rüe me limu ton,
2CH 9:14 lükün mine a tolong seni takisesin ekewe chon kamö me chon amömö. Iwe, ekewe kingen Arapia meinisin me kepinan ewe fanü Israel ra pwal uwato kolt me silifer ren Salomon.
2CH 9:15 Iwe, ewe king Salomon a föri rüepükü tittin maun mi watte o cheni ngeni kolt mi nechenech. Nge kolten eu me eu kei tittin maun ina epwe ükükün engol me limu paun.
2CH 9:16 A pwal föri ülüpükü tittin maun mi kükün o cheni ngeni kolt mi nechenech. Nge kolten eu me eu kei tittin maun ina epwe ükükün walu paun. Iwe, ewe king a iseni ekei tittin maun lon ewe imwen wöllapen Lepanon.
2CH 9:17 Mürin, ewe king a pwal föri eu lenien motun king mi watte, a alinga ngeni ngiin äläfan o apachatä kolt mi mürina won.
2CH 9:18 Iwe, a wor wonu foson latön ewe lenien mot, pwal eu lenien puun pechen seni kolt mi pach ngeni ewe lenien mot. Mi pwal wor lenien pau won lepekin me ruu, nge uluulun eman laion a nom lükün eu me eu kewe lenien pau.
2CH 9:19 Nge mi pwal wor uluulun engol me ruoman laion won ewe latö, eman uluulun laion a nom lesopun me ruu ekewe wonu foso. Ei sokun lenien motun king esap fokun wor esin lon ekewe mwü.
2CH 9:20 Iwe, än ewe king Salomon kapen ün meinisin ra för seni kolt, pwal ekewe sepi meinisin mi nom lon ewe imwen wöllapen Lepanon ra för seni kolt mi mürina. Pun silifer esap kon aüchea lon fansoun manauen Salomon.
2CH 9:21 A pwal wor än ewe king pöisein sip mi kamö me amömö pisek, nge nöün Hairam kewe chon angang ra nom won. Iwe, fän eu lon iteiten ülüngat ier ei pöisein sip a liwinto o uwato kolt, silifer, ngiin äläfan me sokopaten mongki.
2CH 9:22 Iei usun ewe king Salomon a pisekisek me tipachem lap seni ekewe king meinisin won fanüfan.
2CH 9:23 Iwe, ekewe king meinisin ra feito ren Salomon pwe repwe rongorong an tipachem Kot a fang ngeni.
2CH 9:24 Nge iteiten eman me eman mi feito a uwato an lifang: pisek seni silifer me kolt, üf, pisekin maun, nofitin mongö me oris me aas kana. Ei a chök fifis ier me ier.
2CH 9:25 Iwe, a wor ükükün rüanüngeröü än Salomon leni fän iten ekewe oris me wan woken, a pwal wor engol me ruungeröü nöün oris. A anomu ekoch lon ekewe telinimwen woken, nge ekoch a anomu ren lon Jerusalem.
2CH 9:26 Salomon a nemeni ekewe king meinisin, seni ewe chanpupu Oifrat tori ewe fanüen chon Filistia, pwal tori kiännin Isip.
2CH 9:27 Iwe, lon fansoun mwün ewe king Salomon silifer a chomong lon Jerusalem usun chök chomongun fau, a pwal wor chomong irä setar usun chök chomongun ewe irä sikamor mi mär fäsonun ekewe chuk.
2CH 9:28 Iwe, Salomon a möni nöün kewe oris seni Isip pwal seni ekewe fanü meinisin.
2CH 9:29 Iwe, lusun pworausen än Salomon föför meinisin seni lepoputan tori lesopolan an nemenem a makelong lon än ewe soufos Natan puken uruwo, lon än Ahia ewe re Silo puken osuni, pwal lon puken künan ewe soufos Ito usun Jeropoam nöün Nepat we mwän.
2CH 9:30 Salomon a nom lon Jerusalem o nemeni unusen Israel lon ükükün faik ier.
2CH 9:31 Iwe, Salomon a mäla, nge ra peiaseni lon ewe telinimwen Tafit saman we. Nge Rehopoam nöün we mwän a siwili lon wisan wisen king.
2CH 10:1 Iwe, Rehopoam a feila Sikem, pun chon Israel meinisin ra mwichefengen ikenan, pwe repwe seikätä Rehopoam lon wisen king.
2CH 10:2 Nge lupwen Jeropoam nöün Nepat we mwän mi nom Isip, ewe ia a süla ie seni ewe king Salomon, a rong usun, a liwinto seni Isip.
2CH 10:3 Pun ekewe chon Israel ra titi i. Mürin, Jeropoam me ekewe chon Israel meinisin ra feito ren Rehopoam o üreni,
2CH 10:4 “Semom we a achouu ngenikem chomong angang. Iei mine kopwe apäna ngenikem ewe angang mi chou, semom we a achouu ngenikem, o amecheresikem, mürin äm aipwe angang ngonuk.”
2CH 10:5 Iwe, Rehopoam a üreniir, “Oupwe mwüt ngeniei ükükün ülüngat rän pwe üpwe ekieki usun ämi tüngor, mürin oupwe liwinsefälito. Iei mine ekewe aramas ra feila.
2CH 10:6 Mürin, ewe king Rehopoam a angei öüröüran me ren ekewe chinlap mwän, ätekewe mi angang ngeni saman we, lupwen a chüen manau. Iwe, a aisiniir, “Met ämi öüröür ngeniei, pwe üpwe pälüeni ngeni ekei aramas?”
2CH 10:7 Iwe, ra üreni, “Are kopwe kirikiröch ngeni ekei aramas o apwapwaar ren om fosöch ngeniir, mürin ir repwe noum chon angang fansoun meinisin.”
2CH 10:8 Nge Rehopoam a pöütala ewe öüröür a angei seni ekewe chinlap mwän o angei öüröüran me ren pilon kewe alüal mi angang ngeni.
2CH 10:9 Iwe, a aisiniir, “Met ämi öüröür, pwe sipwe pälüeni ngeni ekei aramas mi üreniei, pwe üpwe apäna ngeniir ewe angang mi chou semei we a achouu ngeniir?”
2CH 10:10 Iwe, pilon kewe alüal ra üreni, “Iei usun mine kopwe pälüeni ngeni ewe tüngor seni ekewe aramas: Aütüngini a öümong seni lukalapen semei we.
2CH 10:11 Are mi pwüng pwe semei we a achouu ngenikemi chomong angang, ngang üpwe föri pwe epwe chou seni. Semei we a apwüngükemi fän wok, nge ngang üpwe apwüngükemi fän och wichiwich seni silin man mi ken.”
2CH 10:12 Mürin ülüngat rän Jeropoam me ekewe aramas meinisin ra feito ren ewe king Rehopoam, usun i a fen apasa.
2CH 10:13 Iwe, ewe king a kapas ngeni ekewe aramas fän pöchökül o pöütala öüröüran me ren ekewe chinlap mwän.
2CH 10:14 A kapas ngeniir fän öüröüran me ren ekewe alüal o üreniir, “Semei we a achouu ngenikemi chomong angang, nge ngang üpwe föri pwe epwe chou seni. Semei we a apwüngükemi fän wok, nge ngang üpwe apwüngükemi fän och wichiwch seni silin man mi ken.”
2CH 10:15 Iei usun ewe king esap aüselinga än ekewe aramas tüngor. Ei a fis me ren Kot, ewe Samol mi Lapalap, pwe epwe apwönüetä an kapas a eäni ngeni Ahia ewe re Silo fän iten Jeropoam nöün Nepat we mwän.
2CH 10:16 Iwe, lupwen chon Israel meinisin ra küna pwe ewe king esap aüselinga ar tüngor, ra pälüeni ewe king, “Pwota sipwe chiechi ngeni Tafit me an famili. Met sokun feiöch sa angei seniir? Ämi chon Israel, oupwe liwiniti en me lenian. Rehopoam, kopwe tümwünü püsin chon leimwom.” Iei mine chon Israel meinisin ra liwiniti en me lenian.
2CH 10:17 Nge Rehopoam a chök nemeni ekewe chon Israel mi imweimw lon ekewe telinimwen Juta.
2CH 10:18 Mürin, ewe king Rehopoam a tinala Atoniram ewe meilapen ewe mwichen chon angangen kinroosi ren ekewe chon Israel, nge ir ra monei ngeni fau, iwe, a mäla. Mürin, ewe king Rehopoam a müttir tötä won wan woken o süla Jerusalem.
2CH 10:19 Seni ewe ränin tori ikenai ekewe chon Israel ra ü ngeni ewe mwün Tafit me mwirimwirin.
2CH 11:1 Iwe, lupwen Rehopoam a tori Jerusalem, a amwichafengeni ükükün ipükü walik ngeröü sounfiu mi kefil seni ekewe ainangen Juta me Peniamin, pun a ekiekin maun ngeni Israel o aliwinisefäli mwün.
2CH 11:2 Nge ewe Samol mi Lapalap a üreni ewe soufos Semaia,
2CH 11:3 pwe epwe kapas ngeni Rehopoam nöün Salomon we mwän ewe kingen Juta, pwal ngeni ekewe chon Israel meinisin mi nom lon Juta me Peniamin,
2CH 11:4 “Iei alon ngang ewe Samol mi Lapalap, ‘Ousap feila pwe oupwe maun ngeni pwimi kewe chon Israel. Oupwe liwiniti en me lenian, pun ei mettoch mi fis a feito seniei.’” Iwe, ra aleasochisi alon ewe Samol mi Lapalap o liwinla, nge resap feila maun ngeni Jeropoam.
2CH 11:5 Iwe, Rehopoam a imweimw lon Jerusalem o apöchöküla tittin ekei telinimw me lon Juta me Peniamin:
2CH 11:6 Petleem, Etam, Tekoa,
2CH 11:7 Pet-sur, Soko me Atulam,
2CH 11:8 Kat, Maresa, Sif,
2CH 11:9 Atoraim, Lakis, Aseka,
2CH 11:10 Sora, Aialon me Hepron.
2CH 11:11 Iwe, a pwal apöchöküla ekewe imwen maun lon ekei telinimw o anomu meilapen sounfiu lor. A iseis mongö, apüra me wain lor.
2CH 11:12 A pwal iseis tittin maun me siles lon ekei telinimw meinisin o fokun apöchöküleer. Iei usun a atolonga Juta me Peniamin fän nemenian.
2CH 11:13 Iwe, ekewe souasor me ekewe mwän seni ewe ainangen Lefi mi nom lemenen Israel ra likitala lenier, ia ra nom ie, o feito ren Rehopoam.
2CH 11:14 Ekewe mwän seni ewe ainangen Lefi ra mwo nge likitala fanüer, imwer me pisekir o feila Juta me Jerusalem, pokiten Jeropoam me nöün kewe mwän ra asürela, pwe resap tongeni föri angangen wiser wisen souasor ngeni ewe Samol mi Lapalap.
2CH 11:15 Nge Jeropoam a püsin filätä nöün souasor pwe repwe angang lon ekewe lenien fel won ekewe leni tekia, pwal ngeni ekewe uluulun kuuch me ekewe uluulun kow i a föri.
2CH 11:16 Iwe, chokewe mi mochen fel ngeni ewe Samol mi Lapalap, ewe Koten Israel, ren wesewesen leluker me lein chon ekewe ainangen Israel meinisin ra tapwela mürin chon ewe ainangen Lefi ngeni Jerusalem, pwe repwe tongeni asor ngeni ewe Samol mi Lapalap än ar kewe lewo we Kot.
2CH 11:17 Iwe, ra apöchöküla mwün Juta o ürenätä Rehopoam nöün Salomon we mwän lon ükükün ülüngat ier, pun ra föri usun mine ra fen föri lon mwün Tafit me Salomon.
2CH 11:18 Iwe, Rehopoam a pwülüeni Mahalat nöün Jerimot we fefin, nge Jerimot nöün Tafit we mwän. Iten inen Mahalat Apihail nöün Eliap we fefin, nge Eliap nöün Jesi we mwän.
2CH 11:19 Mahalat a nöüni ülüman mwän me won Rehopoam iter Jeus, Semaria me Saham.
2CH 11:20 Mürin, Rehopoam a pwülüeni Maka nöün Apsalom we fefin. Nge neminewe a nöüni me won Apia, Atai, Sisa me Selomit.
2CH 11:21 Rehopoam a echeni Maka nöün Apsalom we fefin lap seni pwülüan kewe me ülüpwülüan kewe meinisin. Iwe, a wor ükükün engol me waluman pwülüan me wone ülüpwülüan, a pwal wor ükükün rüe me waluman nöün mwän me wone nöün fefin.
2CH 11:22 Rehopoam a pwal filätä Apia nöün Maka we mwän, pwe epwe samol lap me lein pwin kewe, pun a ekiekin seikätä pwe epwe king.
2CH 11:23 Iwe, Rehopoam a tipachem lon an föför, pun a awisa nöün kewe mwän pwe repwe nom lon ekewe telinimw mi pchökül tittir meinisin lemenen ekewe fanü Juta me Peniamin. A pwal ngeniir chomong mongö o ngeniir chomong pwülüer.
2CH 12:1 Iwe, mürin än Rehopoam anüküchara mwün o pöchökülela lon an nemenem, a pöütala än ewe Samol mi Lapalap allük, nge chon Israel meinisin ra eti le föri iei usun.
2CH 12:2 Lon alimuen ierin mwün ewe king Rehopoam, Sisak ewe kingen Isip a feito o maun ngeni Jerusalem, pun ir resap allükülük ngeni ewe Samol mi Lapalap.
2CH 12:3 A feito fiti engeröü rüepükü woken me wone ngeröü chon wawa oris. Nge ekewe sounfiu mi eti seni Isip, ekewe chon Lipia, Suki me chon Itiopia resap lea.
2CH 12:4 Iwe, Sisak a liapeni ekewe telinimwen Juta mi pöchökül tittir o feila tori Jerusalem.
2CH 12:5 Mürin, ewe soufos Semaia a feila ren Rehopoam me ekewe samolun Juta mi chufengen lon Jerusalem, pokiten ra sü me mwen Sisak. Iwe, a üreniir, “Iei alon ewe Samol mi Lapalap ngenikemi: Ämi oua pöütieila, iei mine üa asechikemiilong lepöün Sisak.”
2CH 12:6 Mürin, ekewe samolun Israel me ewe king ra mefi ar tipis o apasa, “A pwüng mine ewe Samol mi Lapalap a föri.”
2CH 12:7 Iwe, lupwen ewe Samol mi Lapalap a küna ei, a kapassefäl ngeni Semaia o üreni, “Üa küna pwe ra mefi ar tipis. Üsap aroserela, nge üpwe ekis angaserela. Ai lingeringer esap unus ngeni Jerusalem ren Sisak.
2CH 12:8 Nge repwe angang ngeni Sisak, pwe repwe mefi sokofesenin ar angang ngeniei me ar angang ngeni kingen ekewe fanü.”
2CH 12:9 Lupwen Sisak ewe kingen Isip a maun ngeni Jerusalem o liapeni, a angei ekewe pisek mi aüchea me lon imwen ewe Samol mi Lapalap, pwal ekewe pisek mi aüchea me lon imwen ewe king, o uweerela meinisin. A pwal uweela ekewe tittin maun seni kolt meinisin Salomon a föriir.
2CH 12:10 Iwe, ewe king Rehopoam a föri tittin maun seni piras akasiwilin ekewe tittin maun seni kolt o ngeni ekewe meilapen chon mas mi mamasa asamalapen imwen ewe king.
2CH 12:11 Iteiten fansoun, lupwen ewe king a feila lon imwen ewe Samol mi Lapalap, ekewe chon mas ra eti o uwei ekewe tittin maun, mürin ra aliwinirela ngeni ewe rumwen chon mas.
2CH 12:12 Pokiten Rehopoam a atekisona, än ewe Samol mi Lapalap lingeringer a kul seni, pwe esap unusen afeiengaua, nge än chon Juta nonom lon lenier a öchsefäl.
2CH 12:13 Iwe, ewe king Rehopoam a anüküchara mwün o nemenem lon Jerusalem. Rehopoam a ierini faik me eu, lupwen a tolong lon wisan wisen king. A nemenem lon ükükün engol me fisu ier lon Jerusalem, ewe telinimw ewe Samol mi Lapalap a filätä me lein telinimwen ekewe ainangen Israel meinisin, pwe aramas repwe fel ngeni ie. Iten inan Naama, eman fin Amon.
2CH 12:14 Nge Rehopoam a föri mine a ngau me fän mesen ewe Samol mi Lapalap, pun esap kütta letipen ewe Samol mi Lapalap ren unusen lelukan.
2CH 12:15 Iwe, pworausen än Rehopoam kewe föför seni lepoputan tori lesopolan an nemenem a makelong lon än ewe soufos Semaia puken uruwo, pwal lon än ewe soufos Ito puken uruwo. Lon ei fansoun a chök fifis maun lefilen Rehopoam me Jeropoam.
2CH 12:16 Iwe, Rehopoam a mäla, nge ra peiaseni ren semelapan kewe lon ewe telinimwen Tafit, nge Apia nöün we mwän a siwili lon wisan wisen king.
2CH 13:1 Lon ewe engol me waluen ierin mwün Jeropoam, Apia a tolong lon wisan wisen king o nemeni Juta.
2CH 13:2 A nom lon Jerusalem o nemenem lon ükükün ülüngat ier. Iten inan we Mikaia nöün Uriel we fefin seni Kipea. Iwe, a fis maun lefilen Apia me Jeropoam.
2CH 13:3 Apia a feila maun, nge eu mwichen sounfiu mi fokun pwora ükükün föpükü ngeröü mwän ra eti. Nge Jeropoam a pwal atetteli nöün mwichen sounfiu mi fokun pwora ükükün walupükü ngeröü mwän, pwe epwe maun ngeni Apia.
2CH 13:4 Lupwen ekewe ruu mwichen sounfiu ra sapechöchöfengen won chukuchukutän ewe fanü Efraim, Apia a ütä won ewe chuk Semaraim o kökköla ren Jeropoam me nöün mwichen sounfiun Israel meinisin, “Oupwe aüselingaei.
2CH 13:5 Ousap silei pwe ewe Samol mi Lapalap ewe Koten Israel a eäni eu pwon mi fokun nüküchar ngeni Tafit me mwirimwirin kana, pwe repwe wisen nemeni Israel tori feilfeilachök?
2CH 13:6 Nge Jeropoam nöün Nepat we mwän, eman nöün Salomon nöüwis, a ütä o pälüeni an samol.
2CH 13:7 Iwe, ekoch mwän mi ngau esap wor aüchear ra chufengen ren, ra pöchökül le ü ngeni Rehopoam nöün Salomon we mwän, lupwen a chüen alüal o tipen olukat, pwe esap tongeni ü ngeniir.
2CH 13:8 Nge iei oua ekiekin ütä ngeni mwün ewe Samol mi Lapalap, a ngeni ekewe mwirimwirin Tafit pwe repwe nemenem lon. Oua eu mwich mi fokun watte, a pwal nom remi ekewe uluulun kow seni kolt Jeropoam a föri pwe ämi kewe kot.
2CH 13:9 Oua asüela nöün ewe Samol mi Lapalap kewe souasor, ekewe mwirimwirin Aaron me ekewe mwän seni ewe ainangen Lefi, nge oua filätä püsin nöümi souasor usun chök chon ekewe mwü. Iteiten eman me eman mi feito fän eman nienifön kow, ika fän füman ätemwänin sip a tongeni püsin apini, pwe epwe wiseni ewe wisen souasor fän iten ekewe uluulun anümwäl esap ir kot.
2CH 13:10 Nge me rem, ewe Samol mi Lapalap i äm we Kot, aisap likitala i. A wor rem souasor ir mwirimwirin Aaron mi angang ngeni ewe Samol mi Lapalap, pwal ekewe mwän seni ewe ainangen Lefi mi alisiir lon ar angang.
2CH 13:11 Iwe, ra eäni asoren kek o keni apach mi pwokus ngeni ewe Samol mi Lapalap iteiten lesosor me lekuniol. Ra pwal iseis ekewe pilawa mi pin won ewe chepel mi limöch o keni ekewe lamp won ewe lenien atittin mi för seni kolt iteiten lekuniol. Pun äm aia föri mine ewe Samol mi Lapalap äm we Kot a allük ngenikem, nge ämi oua pöütala i.
2CH 13:12 Nengeni, Kot a etikem, i nöüm souemwen, nge nöün kewe souasor ra pwal nom rem fän ar kewe rappwa, pwe repwe ettiki ewe tikin asilesilen maun, pwe aipwe maun ngenikemi. Ämi aramasen Israel, ousap maun ngeni ewe Samol mi Lapalap än ämi kewe lewo we Kot, pun ousap tongeni win.”
2CH 13:13 Iwe, Jeropoam a tinala ekoch nöün sounfiu, pwe repwe operifetaleer o maun ngeni chon Juta me lükisökürür, nge ekewe lusun sounfiun Israel ra nom mwen ekewe chon Juta.
2CH 13:14 Nge lupwen ekewe chon Juta ra nenefetal, ra küna pwe ewe maun a nom mwer pwal lükisökürür. Iwe, ra siö ngeni ewe Samol mi Lapalap pwe epwe alisiir, nge ekewe souasor ra ettiki ekewe rappwa.
2CH 13:15 Mürin, ekewe sounfiun Juta ra arükak o maun ngeni ekewe sounfiun Israel. Iwe, Kot a akufu Jeropoam me ekewe sounfiun Israel meinisin, pwe ra kuf ren Apia me ekewe sounfiun Juta.
2CH 13:16 Ekewe sounfiun Israel ra sü me mwen ekewe sounfiun Juta, nge Kot a föri pwe ekewe sounfiun Juta repwe akufuur.
2CH 13:17 Iwe, Apia me nöün kewe sounfiu ra niela ükükün limepükü ngeröü sounfiun Israel mi kefil, pwe a wor eu ninni mi fokun watte.
2CH 13:18 Iei usun ekewe sounfiun Juta ra akufu ekewe sounfiun Israel lon ewe fansoun, pun ra anomu ar apilükülük won ewe Samol mi Lapalap än ar kewe lewo we Kot.
2CH 13:19 Apia a tapweri Jeropoam o angei seni ekewe telinimw Petel, Jesana me Efron, pwal wisoposopur kewe.
2CH 13:20 Nge Jeropoam esap chüen pöchökülsefäl lon mwün lupwen fansoun mwün Apia. Iwe, ewe Samol mi Lapalap a niela pwe a mäla.
2CH 13:21 Nge Apia a fefeitä o pöchökülela. A angei engol me füman pwülüan, pwe a wor rüe me ruoman nöün mwän me engol me wonoman nöün fefin.
2CH 13:22 Iwe, lusun pworausen än Apia föför meinisin me an fos a makelong lon än ewe soufos Ito puken uruwo.
2CH 14:1 Iwe, Apia a mäla, nge ra peiaseni ren semelapan kewe lon ewe telinimwen Tafit. Nge Asa nöün we mwän a siwili lon wisan wisen king. Lon fansoun mwün Asa ewe fanü a kinamwe lon ükükün engol ier.
2CH 14:2 Iwe, Asa a föri mine a öch o pwüng me fän mesen ewe Samol mi Lapalap an we Kot.
2CH 14:3 A ataela än ekewe chon ekis rongen asor me ekewe lenien fel won ekewe leni tekia, a pwal aturala ekewe ürefau mi pin o pökükisietiu ekewe uluulun ewe anüfefin Asera.
2CH 14:4 Iwe, Asa a allük ngeni ekewe chon Juta, pwe repwe föri letipen ewe Samol mi Lapalap än ar kewe lewo we Kot o aleasochisi an kewe allük me pwüüng.
2CH 14:5 A pwal ataela ekewe lenien fel won ekewe leni tekia me ekewe rongen asoren ötüöt me lon ekewe telinimwen Juta meinisin. Iwe, ewe mwü a kinamwe fän nemenian.
2CH 14:6 Asa a aüetä telinimw mi pöchökül tittir lon Juta, pun ewe fanü a kinamwe. Iwe, esap fis maun lon ekana ier, pun ewe Samol mi Lapalap a fang ngeni kinamwe.
2CH 14:7 Asa a üreni ekewe chon Juta, “Ousipwe apöchöküla ekei telinimw o aüetä tit mi pöchökül me imw tekia ünükür, sipwe pwal föri asamalaper me lokkur. Sa chüen fanüeni ewe fanü, pun sa föri letipen ewe Samol mi Lapalap ach we Kot. Ewer, sa föri letipan, nge i a fang ngenikich kinamwe ekis meinisin.” Iei mine ra aüetä tittin ekewe telinimw o fefeitä.
2CH 14:8 Iwe, a wor än Asa mwichen sounfiu ükükün ülüpükü ngeröü mwän mi uwou tittin maun me siles seni Juta, pwal rüepükü walik ngeröü mi uwou tittin maun me esefich seni Peniamin. Ekei mwän meinisin ir sounfiu mi fokun pwora.
2CH 14:9 Iwe, Sera ewe re Itiopia a tolong lon Juta fiti eu mwichen sounfiu ükükün eu million mwän me ülüpükü woken, pwe epwe maun ngeni Asa. Iwe, a tori Maresa.
2CH 14:10 Nge Asa a towu pwe epwe maun ngeni Sera. Iwe, ra atetteli nöür mwichen sounfiu lon ewe lemolun Sefata arap ngeni Maresa, pwe repwe maunfengen.
2CH 14:11 Asa a siö ngeni ewe Samol mi Lapalap an we Kot o apasa, “Ai Samol mi Lapalap, esap wor eman usun en mi tongeni alisi chon apwangapwang le maun ngeni chon pöchökül. Ai Samol mi Lapalap äm we Kot, kose mochen kopwe alisikem, pun äm aia anomu äm apilükülük womw, nge aia feito pwe aipwe maun ngeni ei mwichemongun sounfiu fän itom. Ai Samol mi Lapalap, en äm Kot, esap wor eman a tongeni akufuk.”
2CH 14:12 Iei mine ewe Samol mi Lapalap a akufu ekewe sounfiun Itiopia, lupwen Asa me ekewe sounfiun Juta ra maun ngeniir. Iwe, ekewe sounfiun Itiopia ra sü,
2CH 14:13 nge Asa me nöün kewe sounfiu ra tapweriir tori Kerar. Iwe, chomong chomong sounfiun Itiopia ra mäla, pwe resap chüen tongeni achusefäliir o maun. Ra kuf me ren ewe Samol mi Lapalap me nöün mwichen sounfiu. Iwe, ekewe re Juta ra uweela chomong choon wokur.
2CH 14:14 Mürin, ra ataela ekewe telinimw meinisin ünükün Kerar, pun och eniweniw seni ewe Samol mi Lapalap a tori ekewe aramasen lor. Ekewe sounfiun Juta ra pwal angei chomong choon wokur seni ekewe telinimw meinisin, pun a wor chomong pisek lor.
2CH 14:15 Ra pwal niela ekewe chon masen man o uweela chomong chomong sip me kamel. Mürin, ra liwiniti Jerusalem.
2CH 15:1 Iwe, Ngünün ewe Samol mi Lapalap a feitiu won Asaria nöün Otet we mwän.
2CH 15:2 A towu seni ewe telinimw pwe epwe churi Asa. Iwe, a üreni, “Oupwe aüselingaei, Asa me chon Juta me Peniamin meinisin. Ewe Samol mi Lapalap a etikemi, lupwen oua eti i. Are oua kütta i, oupwe küna, nge are oua pöütala i, epwe pöütikemiila.
2CH 15:3 Fansoun langatam esap wor än chon Israel Kot mi wesewesen Kot, esap wor nöür souasor mi afalafaleer, esap pwal wor ar allük.
2CH 15:4 Nge lupwen ra tolong lon riaföü, ra kul ngeni ewe Samol mi Lapalap ewe Koten Israel. Ra kütta i o küna.
2CH 15:5 Lon ekewe fansoun esap wor eman aramas a tongeni saifetal fän kinamwe, pun chon ekewe fanü meinisin ra nonom lon osukosuk me fitikoko watte.
2CH 15:6 Eu mwü a maun ngeni pwal eu mwü, nge eu telinimw a maun ngeni pwal eu telinimw, pun Kot a aweiresiir ren sokopaten riaföü.
2CH 15:7 Nge ämi oupwe tipepwora, nge ousap apwangapwang, pun epwe wor liwinin ämi angang.”
2CH 15:8 Iwe, lupwen Asa a rongorong ekei kapas Asaria nöün Otet we mwän a osuni, a tipepwora. A ataela ekewe uluulun anümwäl mi anioput seni unusen ewe fanü Juta me Peniamin, pwal seni ekewe telinimw a liapeni me won chukuchukutän ewe fanü Efraim. A pwal försefäli än ewe Samol mi Lapalap we rongen asor mi nom mwen kengkangen imwen ewe Samol mi Lapalap.
2CH 15:9 Mürin, Asa a amwichafengeni chon Juta me Peniamin meinisin, pwal chokewe seni Efraim, Manasa me Simeon mi siamüfetal leir. Pun chomong aramas ra sü seni Israel o feila ren Asa, lupwen ra küna pwe ewe Samol mi Lapalap an we Kot a eti.
2CH 15:10 Iwe, ra mwichefengen lon Jerusalem lon aülüngatin maramen ewe engol me limuen ierin mwün Asa.
2CH 15:11 Lon ewe ränin ra asor ngeni ewe Samol mi Lapalap seni mine ra liapeni ükükün füpükü ätemwänin kow me fisungeröü sip.
2CH 15:12 Iwe, ra tipeeufengen le eäni eu pwon, pwe repwe fel ngeni ewe Samol mi Lapalap, än ar kewe lewo we Kot, ren unusen leluker me unusen ngünür.
2CH 15:13 Nge iö kana resap fel ngeni ewe Samol mi Lapalap ewe Koten Israel repwe ninnila, ese lifilifil ika i eman alüal ika eman chinlap, ika eman mwän ika eman fefin.
2CH 15:14 Iwe, ra pwon fän akapel ngeni ewe Samol mi Lapalap fän mwelier mi leüömong, fän akapwas, pwal ren tikin rappwa me säwi.
2CH 15:15 Chon Juta meinisin ra meseik pokiten ewe pwon fän akapel ra eäni ren unusen leluker. Ra pwal fel ngeni Kot ren wesewesen mochenin letiper. Iwe, ewe Samol mi Lapalap a etiweer o fang ngeniir kinamwe seni ekewe mwü mi nom ünükür.
2CH 15:16 Ewe king Asa a pwal awesi Maaka inelapen saman we seni wisan wisen inelapen king, pun a föri eu uluulun ewe anüfefin Asera mi fokun anioput. Iwe, Asa a pöküetiu o atatakisi ei uluulun anümwäl o kenala me arun ewe öüwö Kitron.
2CH 15:17 Inamwo än Asa esap ataela ekewe lenien fel won ekewe leni tekia meinisin me lon Israel, nge lelukan a unus ngeni ewe Samol mi Lapalap lon ränin manauan meinisin.
2CH 15:18 Iwe, a uwato lon ewe imwenfel ekewe pisek Apia saman we a apini fän iten Kot, pwal ekewe pisek seni silifer me kolt püsin i a apini.
2CH 15:19 Iwe, esap chüen fis maun tori ewe ilik me limuen ierin mwün Asa.
2CH 16:1 Iwe, lon ilik me wonuen ierin mwün Asa, Pasa ewe kingen Israel a feila Juta pwe epwe maun ngeni. Pasa a apöchöküla tittin ewe telinimw Rama o pinela än ekewe aramas repwe towu me tolong lon fanüen Asa ewe kingen Juta.
2CH 16:2 Mürin, Asa a angei silifer me kolt seni ewe lenien iseis pisek mi aüchea me lon imwen ewe Samol mi Lapalap, pwal lon püsin imwan, o tinala ren Penhatat ewe kingen Siria mi nom Tamaskus. Iwe, a tinala pworaus o üra,
2CH 16:3 “Kose mochen epwe wor eu pwonen atipeeu lefilach, usun a fen fis lefilen semei me semom. Nengeni, üa tinala reöm silifer me kolt pwe ai lifang ngonuk. Kopwe atai om pwonen atipeeu ngeni Pasa ewe kingen Israel, pwe i me nöün sounfiu repwe towu seni fanüei.”
2CH 16:4 Iwe, Penhatat a aüselinga än ewe king Asa tüngor o tinala ekewe meilap me nöür mwichen sounfiu, pwe repwe maun ngeni ekewe telinimwen Israel. Ra liapeni Ion, Tan me Apel-pet-maka, pwal ekewe telinimwen iseis pisek meinisin lon Naftali.
2CH 16:5 Nge lupwen ewe king Pasa a rongorong usun, a ükütiu le apöchöküla tittin ewe telinimw Rama o likitala ewe angang.
2CH 16:6 Mürin, ewe king Asa a amwichafengeni chon Juta meinisin. Iwe, ra uweela ekewe fau me ekewe irä, Pasa a aea le apöchöküla tittin ewe telinimw Rama o eäniir le apöchöküla ngeni tittin ekewe telinimw Kepa me Mispa.
2CH 16:7 Lon ena fansoun ewe soufos Hanani a feila ren Asa ewe kingen Juta o üreni, “Pokiten ka anomu om apilükülük won ewe kingen Siria, nge kosap anomu won ewe Samol mi Lapalap om we Kot, kosap akufu nöün ewe kingen Siria mwichen sounfiu.
2CH 16:8 Ifa usun, esap fokun watte än ekewe chon Itiopia me chon Lipia mwichen sounfiu fiti chomong chomong war woken me chon wawa oris? Nge pokiten ka anomu om apilükülük won ewe Samol mi Lapalap, i a mwütätä pwe kopwe akufuur.
2CH 16:9 Pun ewe Samol mi Lapalap a nenengeni unusen fanüfan, pwe epwe apöchöküla chokewe mi fang ngeni unusen letiper. Om ei föför a mwäl. Iei mine seni ei fansoun epwe chök fifis maun ngonuk.”
2CH 16:10 Mürin, Asa a song ngeni ewe soufos pokiten an kei kapas. A fokun lingeringer pwe a aturalong lon imwen fötek. Lon ewe chök fansoun Asa a pwal fokun ariaföüü ekoch me lein ekewe aramas.
2CH 16:11 Iwe, än Asa föför seni lepoputan tori lesopolan an nemenem a makelong lon puken uruwon ekewe kingen Juta me Israel.
2CH 16:12 Nge lon ilik me tiuen ierin mwün Asa, a tori pechen eu samau mi fokun watte. Nge lon an samau Asa esap kütta alilisin me ren ewe Samol mi Lapalap, nge a kütta alilisin me ren ekewe sousäfei.
2CH 16:13 Mürin, Asa a mäla lon faik me aeuin ierin mwün.
2CH 16:14 Iwe, ra peiaseni lon eu peias lon achau i a püsin tuw fän itan lon ewe telinimwen Tafit. Ra anomu inisin won echö pap mi uren sokopaten irä pwokus me löpwokus, ekewe souför lö ra amolätä. Ra pwal föri eu ekkei mi fokun watte fän iten ar asamolu.
2CH 17:1 Iwe, Jehosafat nöün Asa we mwän a siwili saman lon wisan wisen king. A fokun pöchökül lon an ekiekin ü ngeni Israel.
2CH 17:2 A anomu sounfiu lon ekewe telinimwen Juta mi pöchökül tittir o alenia mwichen sounfiu lon ewe fanü Juta, pwal lon ekewe telinimwen Efraim, ekewe telinimw Asa saman we a liapeni.
2CH 17:3 Iwe, ewe Samol mi Lapalap a eti Jehosafat, pun a apirü manauen saman we le poputän an nemenem, nge esap fel ngeni ekewe anü Paal.
2CH 17:4 A angang ngeni än saman we Kot o aleasochisi an kewe allük, nge esap föri usun mine ekewe chon Israel ra föri.
2CH 17:5 Iei mine ewe Samol mi Lapalap a apöchöküla mwün Jehosafat, nge chon Juta meinisin ra uwala lifang ren, pwe a wor chomong wöün me iteüöchün.
2CH 17:6 Iwe, a tipepwora le angang ngeni ewe Samol mi Lapalap, a pwal ataela ekewe lenien fel won ekewe leni tekia me ekewe uluulun ewe anüfefin Asera me lon Juta.
2CH 17:7 Iwe, lon aülüngatin ierin mwün Jehosafat a tinala nöün kewe nöüwis Penhail, Opatia, Sekaria, Netanel me Mikaia, pwe repwe sense lon ekewe telinimwen Juta.
2CH 17:8 Nge ekewe mwän seni ewe ainangen Lefi iter Semaia, Netania, Sepatia, Asael, Semiramot, Jehonatan, Atonia, Topia me Topatonia, pwal ekewe souasor Elisama me Jehoram ra etiir.
2CH 17:9 Ra uwei puken än ewe Samol mi Lapalap allük, pwe repwe nöünöü le aiti ngeni chon Juta. Iwe, ra feila lon ekewe telinimwen Juta meinisin o aiti ngeni ekewe aramas ekewe allük.
2CH 17:10 Iwe, ewe Samol mi Lapalap a aworato niuokus won chon ekewe mwü meinisin mi nom ünükün Juta, pwe resap maun ngeni Jehosafat.
2CH 17:11 Ekoch me lein ekewe chon Filistia ra uwato chomong silifer me sokopaten lifang ren Jehosafat. Nge ekewe chon Arapia ra pwal uwato ren ükükün fisungeröü füpükü ätemwänin sip me fisungeröü füpükü ätemwänin kuuch.
2CH 17:12 Iwe, Jehosafat a fokun fefeitä lon an nemenem. A aüetä imwen maun lon Juta, pwal telinimw, pwe epwe iseis pisek lor.
2CH 17:13 A wor chomong an pisek lon ekei telinimw. A pwal wor nöün meilapen sounfiu lon Jerusalem, mwän mi fokun pwora.
2CH 17:14 Iei tettelir lon ar kewe cho: Atna, ewe meilapen sounfiu seni Juta, a nemeni ükükün ülüpükü ngeröü mwän mi fokun pwora.
2CH 17:15 Jehohanan ewe mi tap mürin a nemeni ükükün rüepükü walik ngeröü sounfiu.
2CH 17:16 Nge ewe aülümanün Amasia nöün Sikri we mwän a nemeni ükükün rüepükü ngeröü mwän mi fokun pwora. Amasia a angang ngeni ewe Samol mi Lapalap ren püsin mochenin letipan.
2CH 17:17 Nge Eliata ewe meilapen sounfiu mi fokun pwora seni Peniamin a nemeni ükükün rüepükü ngeröü mwän mi uwou esefich me tittin maun.
2CH 17:18 Jehosapat ewe meilap mi tap mürin a nemeni ükükün ipükü walik ngeröü mi uwou pisekin maun.
2CH 17:19 Ikkei ir ekewe mwän mi angang ngeni ewe king lon Jerusalem, lükün chokewe ewe king a anomuur lon ekewe telinimw mi pöchökül tittir lon unusen Juta.
2CH 18:1 Iwe, lupwen Jehosafat ewe kingen Juta a fokun pisekisekila o iteföüla, a chiechi ngeni Ahap ewe kingen Israel, pun a apwüpwülüa nöün mwän ngeni nöün Ahap fefin.
2CH 18:2 Mürin ekoch ier Jehosafat a feila Samaria pwe epwe churi Ahap. Iwe, Ahap a niela chomong chomong sip me kow, pwe epwe föri eu kametip fän iten Jehosafat me ekewe aramas mi eti. Mürin, Ahap a pesei Jehosafat pwe epwe eti le maun ngeni Ramot-kiliat.
2CH 18:3 Iwe, Ahap a aisini Jehosafat, “Ifa usun, kopwe etiei le feila maun ngeni Ramot-kiliat?” Jehosafat a pälüeni, “Ewer, üa molotä usun en, pwal nei kewe sounfiu ra molotä usun noum kewe. Äm aipwe etuk le feila maun.”
2CH 18:4 Nge Jehosafat a pwal üreni ewe kingen Israel, “Sipwe akomwen ais met öüröürach me ren ewe Samol mi Lapalap.”
2CH 18:5 Iei mine ewe kingen Israel a amwichafengeni ekewe soufos ükükün föpükü mwän o aisiniir, “Ifa usun, üpwe feila maun ngeni Ramot-kiliat, ika üsap?” Nge ir ra üreni, “Kopwe feila o maun ngeni ewe telinimw. Kot epwe awinnok.”
2CH 18:6 Nge Jehosafat a ais, “Ifa usun, esap wor pwal eman soufos nöün ewe Samol mi Lapalap, sipwe tongeni angei öüröürach me ren?”
2CH 18:7 Iwe, ewe kingen Israel a üreni Jehosafat, “Mi chüen wor eman mwän sa tongeni angei öüröürach seni ewe Samol mi Lapalap me ren itan Mikaia nöün Imla we mwän. Nge ngang üa oput, pun esap fän eu mwo an epwe osuni och mi mürina usi, pwe mi ngau chök.” Nge Jehosafat a üreni, “King Ahap, kosap aloni na.”
2CH 18:8 Mürin, ewe kingen Israel a titi eman nöüwis o üreni, “Kopwe müttir emwenato Mikaia.”
2CH 18:9 Iwe, Ahap ewe kingen Israel me Jehosafat ewe kingen Juta ra üföüf üfer kewe üfen king o mot won ar kewe lenien motun king lon ewe lenien wichiwich umwun wiich lükün asamalapen tittin Samaria. Nge ekewe soufos meinisin ra osuni me mwer.
2CH 18:10 Iwe, eman me leir itan Setekia nöün Chenana we mwän a föri mächä fän itan seni mächä o üreni Ahap, “Iei alon ewe Samol mi Lapalap: Ekei mächä kopwe eäniir le maun ngeni ekewe chon Siria tori repwe rosola.”
2CH 18:11 Nge ekewe soufos meinisin ra pwal osuni iei chök usun o üra, “Kopwe feila Ramot-kiliat o liapeni. Ewe Samol mi Lapalap epwe awinnok.”
2CH 18:12 Iwe, ewe chon künö mi feila köri Mikaia a üreni, “Nengeni, ekewe soufos ra alonipökü chök eu mine a mürina ngeni ewe king. Kopwe pwal apasa mine a mürina usun chök ir.”
2CH 18:13 Nge Mikaia a pälüeni, “Mwo manauen ewe Samol mi Lapalap, mine ai Kot a üreniei, ina chök üpwe apasatä.”
2CH 18:14 Iwe, lupwen Mikaia a feito ren ewe king, ewe king a aisini, “Mikaia, ifa usun, aipwe feila Ramot-kiliat o maun ngeni, ika aisap?” Nge Mikaia a pälüeni, “Kopwe feila o maun ngeni ewe telinimw. Ewe Samol mi Lapalap epwe awinnok.”
2CH 18:15 Nge ewe king a üreni, “Fän fitu üpwe allük ngonuk, pwe kopwe chök kapas wenechar ngeniei, lupwen ka üreniei alon ewe Samol mi Lapalap?”
2CH 18:16 Mürin, Mikaia a apasa, “Üa küna chon Israel meinisin, pwe ra toropasfeil won ekewe chuk usun sip esap wor ar chon mas. Nge ewe Samol mi Lapalap a üra: Ekei aramas esap wor ar samol. Iteiten eman me eman epwe liwiniti en me lenian fän kinamwe.”
2CH 18:17 Iwe, Ahap a üreni Jehosafat, “Ifa usun, üsap ürenuk, pwe ätei esap osuni och mi mürina usi, pwe mi ngau chök?”
2CH 18:18 Mikaia a sopwela le kapas, “Iei kopwe aüselinga alon ewe Samol mi Lapalap: Üa küna ewe Samol mi Lapalap, pwe a mot won an lenien motun king, nge unusen ewe mwichen chon läng ra ütä ünükün.
2CH 18:19 Iwe, ewe Samol mi Lapalap a ais, ‘Iö epwe atupu Ahap ewe kingen Israel, pwe epwe feila o mäla lon Ramot-kiliat?’ Iwe, eman a apasa och, nge pwal eman a apasa och.
2CH 18:20 Mürin, eman ngün a kaneto, a ü fän mesen ewe Samol mi Lapalap o üreni, ‘Ngang üpwe atupu Ahap.’ Nge ewe Samol mi Lapalap a aisini, ‘Ren met?’
2CH 18:21 Ewe ngün a pälüeni, ‘Üpwe feila o föri pwe nöün kewe soufos meinisin repwe eäni kapas chofana.’ Iwe, Kot a üreni, ‘En kopwe atupu Ahap, nge om angang epwe fisiöch. Kopwe feila o föri iei usun.’
2CH 18:22 Iei mine ewe Samol mi Lapalap a föri pwe noum kei soufos meinisin ra eäni kapas chofana ngonuk. Nge i a apwüngala pwe kopwe feiengau.”
2CH 18:23 Mürin, ewe soufos Setekia a kan ngeni Mikaia, a pösapei o üreni, “Inet Ngünün ewe Samol mi Lapalap a towu seniei, pwe epwe kapas ngonuk?”
2CH 18:24 Nge Mikaia a üreni, “Kopwap püsin mefi lon ewe rän, lupwen kopwe tolong lon rumwen lon eu imw pwe kopwe op.”
2CH 18:25 Mürin, ewe king Ahap a üreni eman nöün kewe nöüwis, “Kopwe turufi Mikaia o emwenala ren Amon kepinan ewe telinimw, pwal ren Joas nei we mwän.
2CH 18:26 Kopwe üreniir pwe repwe aturalong ei mwän lon imwen fötek o akükünü anan pilawa me ünüman koluk tori üpwe liwinto fän kinamwe.”
2CH 18:27 Nge Mikaia a üreni, “Are ka liwinto fän kinamwe, ewe Samol mi Lapalap esap kapas me rei.” A pwal apasa, “Oupwe aüselinga ai kei kapas, ämi aramas meinisin.”
2CH 18:28 Mürin, Ahap ewe kingen Israel me Jehosafat ewe kingen Juta ra feila Ramot-kiliat, pwe repwe maun ngeni.
2CH 18:29 Nge Ahap a üreni Jehosafat, “Üpwe asokala üfei le feila maun, nge en kopwe üföüf üfom üfen king.” Iei mine ewe kingen Israel a asokala üfan o feila maun.
2CH 18:30 Nge ewe kingen Siria a allük ngeni ekewe meilapen wan woken, “Ousap maun ngeni aramas mi kis ika aramas mi lap, nge oupwe chök maun ngeni ewe kingen Israel.”
2CH 18:31 Iwe, lupwen ekewe meilapen ekewe woken ra küna Jehosafat, ra apasa, “Inan i ewe kingen Israel.” Iei mine ra kul pwe repwe fiu ngeni. Iwe, Jehosafat a puchör, nge ewe Samol mi Lapalap a alisi pwe a akuluur seni Jehosafat.
2CH 18:32 Pun lupwen ekewe meilapen ekewe woken ra küna pwe sap i ewe kingen Israel, ra liwin seni ar tapweri.
2CH 18:33 Iwe, eman sounfiun Siria a chök äsesser le likapichiela wokun esefich, nge ewe esefich a küw ewe king Ahap lefilen fichin üfan üfen maun. Iei mine ewe king a üreni ewe mi wisen uwei wan woken, “Kopwe kul o uweeila seni ei maun, pun ngang üa kinas.”
2CH 18:34 Lon ewe rän ewe maun a pöchökülela, nge ewe kingen Israel a chök aünnala won wan woken kulu ngeni ekewe chon Siria tori lekuniol. Nge lupwen akkar a tuputiu, a mäla.
2CH 19:1 Iwe, Jehosafat ewe kingen Juta a liwiniti imwan me lon Jerusalem fän kinamwe.
2CH 19:2 Nge ewe soufos Jehu nöün Hanani we mwän a feila pwe epwe churi ewe king Jehosafat. Iwe, a üreni, “Ifa usun, a pwüng om kopwe alisi ekewe aramasangau o peni chokewe mi oput ewe Samol mi Lapalap? Pokiten ei föför ka föri, ewe Samol mi Lapalap a song ngonuk.
2CH 19:3 Nge a wor ekoch föför mi mürina ka föri. Ka ataela ekewe uluulun ewe anüfefin Asera seni lon ewe fanü, ka pwal kütta letipen Kot ren unusen lelukom.”
2CH 19:4 Iwe, Jehosafat a imweimw lon Jerusalem, nge a pwal fetalfeil lein ekewe aramas seni Persepa mi nom ör tori chukuchukutän ewe fanü Efraim mi nom efeng, pwe epwe aliwinisefälireto ren ewe Samol mi Lapalap än ar kewe lewo we Kot.
2CH 19:5 A filätä soukapwüng lon iteiten eu me eu telinimw mi pöchökül tittir me lon ewe fanü Juta.
2CH 19:6 Iwe, a üreni ekewe soukapwüng, “Oupwe ekieköchü mine oupwe föri lon kapwüng. Pun ousap angei wisemi seni aramas, pwe seni ewe Samol mi Lapalap. I epwe nom remi, lupwen oua eäni kapwüng.
2CH 19:7 Iei mine oupwe niueiti ewe Samol mi Lapalap. Oupwe föröchü pwüngün ämi kapwüng, pun ewe Samol mi Lapalap ach we Kot esap tipeeu ngeni ämi atoka mine a pwüng, ika ämi lifilifil ngeni aramas, ika ämi angei lifangen amichimich.”
2CH 19:8 Iwe, lon Jerusalem Jehosafat a pwal filätä ekoch mwän seni ewe ainangen Lefi, ekoch souasor pwal ekoch mwänirelan ekewe famili lon Israel, pwe repwe eäni kapwüng won än aramas puri än ewe Samol mi Lapalap kewe allük o apwüngala pwüngün ar kewe osukosuk. Iwe, ra nonom lon Jerusalem.
2CH 19:9 Jehosafat a allük ngeniir, “Oupwe föri ämi angang fän ämi niuokusiti ewe Samol mi Lapalap, fän allükülük, pwal ren unusen lelukemi:
2CH 19:10 Iteiten fansoun, lupwen eu osukosuk a torikemi seni pwimi kewe chon Israel mi imweimw lon ekewe telinimw, ese lifilifil ika tipisin nimanau ika puri allük me pwüüng, mürin ämi oupwe aiti ngeniir pwüngün ar kewe osukosuk, pwe resap tipis ngeni ewe Samol mi Lapalap, nge i esap song ngenikemi me pwimi kewe. Iei usun mine oupwe föri pwe ousap tipis.
2CH 19:11 Ewe souasor mi lap Amaria a wisen atowu pwüngün ekewe kapwüng meinisin fän iten ekewe osukosuk lon pekin lamalam. Nge Sepataia nöün Ismael we mwän, ewe kepinan Juta, a wisen atowu pwüngün ekewe kapwüng meinisin fän iten ekewe osukosuk lon pekin mwü. Iwe, ekewe mwän seni ewe ainangen Lefi repwe nöümi nöüwis o angang ngenikemi. Oupwe tipepwora lon ämi angang, nge ewe Samol mi Lapalap epwe eti chokewe mi wenechar.”
2CH 20:1 Ekoch fansoun mürin, ekewe mwichen sounfiu seni Moap me Amon, pwal ekoch chon Meun ra tolong lon Juta, pwe repwe maun ngeni Jehosafat.
2CH 20:2 Iwe, ekoch mwän ra feito ren Jehosafat o üreni, “Eu mwichemongun aramas ra feito seni Etom, seni pekilan ewe Setin Mäla, pwe repwe maun ngonuk. Ra fen liapeni Hasason-tamar, iei Enketi.
2CH 20:3 Mürin, Jehosafat a niuokus, a kütta öüröüran me ren ewe Samol mi Lapalap o asilefeili eu ränin echikefel lemenen unusen ewe fanü Juta.
2CH 20:4 Iwe, chon ekewe telinimwen Juta meinisin ra feito o mwichefengen lon Jerusalem, pwe repwe kütta alilisir me ren ewe Samol mi Lapalap.
2CH 20:5 Mürin, Jehosafat a ütä me lein ewe mwichen chon Juta me chon Jerusalem mi chufengen me mwen ewe leni mi fö lükün ewe imwenfel.
2CH 20:6 Iwe, a iotek, “Äm Samol mi Lapalap, en äm kewe lewo we Kot. En ewe Koten läng, ka nemenem won ekewe mwün fanüfan meinisin. Ka fokun manaman o pöchökül, esap wor eman a tongeni ü ngonuk.
2CH 20:7 En äm Kot, ka asüela chon ei fanü, lupwen noum aramasen Israel ra tolong lon. Ka ngeni ekewe mwirimwirin Apraham chiechiom we ei fanü, pwe repwe fanüeni tori feilfeilachök.
2CH 20:8 Iwe, ir ra nonom lon o aüetä won eu imwenfel fän itom. Iwe, ra apasa,
2CH 20:9 ‘Are feiengau epwe torikem, are ka apwüngükem ren maun ika mätter ika echik, äm aipwe ütä fän mesom me mwen ei imwenfel ia aramas ra fel ngonuk ie. Are äm aipwe siö ngonuk lon äm riaföü, en kopwe aüselingakem o amanauakem.’
2CH 20:10 Nge iei ekewe re Amon me Moap me Etom ra feito o maun ngenikem. Iwe, lupwen äm kewe lewo ra feito seni Isip, kosap mwüt ngeniir pwe repwe tolong lon fanüen ekei aramas. Iei mine äm kewe lewo ra pwelila lükün fanüer, nge resap aroserela.
2CH 20:11 Nengeni, iei usun mine ra föri ngenikem. Ra feito, pwe repwe asükeemila seni ewe fanü en ka ngenikem pwe aipwe fanüeni.
2CH 20:12 En äm Kot, kopwe apwüngüür. Pun esap wor äm pöchökül ngeni ei mwichemongun aramas mi feito o maun ngenikem. Äm aisap silei mine aipwe föri, nge äm aia chök nenengenuk pwe kopwe alisikem.”
2CH 20:13 Iwe, ekewe re Juta meinisin, pwülüer me nöür kewe ra ütä me fän mesen ewe Samol mi Lapalap.
2CH 20:14 Nge Ngünün ewe Samol mi Lapalap a feitiu won Jaasiel me lukalapen ewe mwich. Ätei eman seni ewe ainangen Lefi, eman mwirimwirin Asaf. Iwe, Jaasiel nöün Sekaria we mwän, Sekaria nöün Penaia, Penaia nöün Jeiel, nge Jeiel nöün Matania.
2CH 20:15 Iwe, a üra, “Oupwe rongorong, en Jehosafat me ämi chon Juta me chon Jerusalem meinisin. Iei alon ewe Samol mi Lapalap ngenikemi, ‘Ousap niuokus, ousap pwal rükö ren ei mwichemongun aramas. Pun ei maun sap ämi, pwe än Kot.
2CH 20:16 Lesor oupwe feila pwe oupwe maun ngeniir. Repwe feitä won ewe pal mi aletä seni Sis. Oupwe küneer me lesopun ewe lemol ötiuen ewe fanüapön Jeruel.
2CH 20:17 Ämi ousap fiu lon ei maun. Oupwe atettelikemi o ükütä chök. Oupwe nengeni usun än ewe Samol mi Lapalap awinnakemi.’ Ämi chon Juta me chon Jerusalem, ousap niuokus, ousap pwal rükö. Lesor oupwe feila maun ngeniir, nge ewe Samol mi Lapalap epwe etikemi.”
2CH 20:18 Mürin, Jehosafat a chapetiu lepwül, nge chon Juta me chon Jerusalem meinisin ra pwal chapetiu me fän mesen ewe Samol mi Lapalap o fel ngeni.
2CH 20:19 Iwe, ekewe mwän seni ewe ainangen Lefi seni än Kohat me än Kora kewe cho ra ütä o kölün mwareiti ewe Samol mi Lapalap ewe Koten Israel fän leüömong.
2CH 20:20 Iwe, ekewe aramas ra pwätä lesosorusichin sorotän ewe rän o feila lon ewe fanüapön Tekoa. Nge lupwen ra feila, Jehosafat a ütä mwer o üreniir, “Oupwe aüselingaei, ämi chon Juta me chon Jerusalem. Oupwe anomu ämi apilükülük won ewe Samol mi Lapalap ämi we Kot, pwe oupwe üpöchökül, oupwe pwal lükü mine nöün kewe soufos ra ürenikemi, pwe oupwe win.”
2CH 20:21 Iwe, wesin an öüröüra ekewe aramas, ewe king a filätä ekoch chon köl, pwe repwe kölün mwareiti ewe Samol mi Lapalap fän üfer mi pin, repwe akomwola mwen ewe mwichen sounfiu o köl, “Ousipwe kilisou ngeni ewe Samol mi Lapalap, pun an tong ellet a nonom tori feilfeilachök.”
2CH 20:22 Nge lupwen ra popuetä le kölün mwareiti Kot, ewe Samol mi Lapalap a awarato niuokus watte won ekewe mwichen sounfiu seni Amon me Moap me Etom mi töki ewe fanü Juta.
2CH 20:23 Iwe, ekewe re Amon me Moap ra maun ngeni ekewe re Etom o wesewesen aroserela. Nge lupwen ra wes le aroserela, ra püsin sapefengen o nifengeniir.
2CH 20:24 Iwe, lupwen ekewe sounfiun Juta ra tori ewe imwen mamas mi tekia me lon ewe fanüapö o neneloi ewe mwichemongun aramas, ra chök küna somä mi nom won ewe pwül. Esap wor eman a tongeni süla.
2CH 20:25 Nge lupwen Jehosafat me nöün kewe sounfiu ra feila pwe repwe angei liaper seniir, ra küna pwiin kow mi chomong, pisek, üf me mettoch mi aüchea. Iwe, ra angei ekewe pisek fän iter, tori resap chüen tongeni uwei och. Lon ükükün ülüngat rän ra angei liaper, pun a kon chomong.
2CH 20:26 Nge lon arüanün rän ra mwichefengen lon ewe lemolun Peraka o mwareiti ewe Samol mi Lapalap. Iei mine ewe leni a iteni lemolun Peraka tori ikenai.
2CH 20:27 Mürin, Jehosafat a emwenala nöün kewe sounfiu ngeni Jerusalem fän pwapwa, pun ewe Samol mi Lapalap a akufu ekewe chon oputer.
2CH 20:28 Iwe, lupwen ra tori Jerusalem, ra feila ngeni imwen ewe Samol mi Lapalap fän tikin kitar me ükülele, pwal fän tikin rappwa.
2CH 20:29 Nge chon ekewe mwü meinisin lon ekewe fanü ra niuokusiti ewe Samol mi Lapalap, lupwen ra rongorong pwe i a akufu ekewe chon oput Israel.
2CH 20:30 Iei usun Jehosafat a nemenem fän kinamwe, pun an Kot a awora kinamwe lekiännin fanüan meinisin.
2CH 20:31 Iwe, Jehosafat a ierini ilik me limu, lupwen a tolong lon wisan wisen king. A nom lon Jerusalem o nemeni Juta lon ükükün rüe me limu ier. Iten inan Asupa nöün Silhi we fefin.
2CH 20:32 Jehosafat a föri mine a pwüng me fän mesen ewe Samol mi Lapalap, usun Asa saman we a föri.
2CH 20:33 Nge ekewe lenien fel won ekewe leni tekia resap katala. Ekewe aramas resap mwo kul ngeni än ar kewe lewo we Kot, pwe repwe angang ngeni ren unusen leluker.
2CH 20:34 Nge lusun pworausen än Jehosafat föför meinisin seni lepoputan tori lesopolan an nemenem a makelong lon puken uruwon Jehu nöün Hanani we mwän o pachelong lon puken uruwon ekewe kingen Israel.
2CH 20:35 Ekoch fansoun mürin, Jehosafat ewe kingen Juta a chiechi ngeni Ahasia ewe kingen Israel mi föri föför mi ngau.
2CH 20:36 Iwe, a eti Ahasia le föri pöisein sip mi kamö me amömö pisek me lon Esion-keper.
2CH 20:37 Nge Elieser nöün Totawahu we mwän seni Maresa a osuni usun feiengauen Jehosafat o üreni, “Pokiten ka chiechi ngeni Ahasia, ewe Samol mi Lapalap epwe ataela mine ka föri.” Iwe, ekewe sip ra tala, nge resap tongeni sai pwe repwe föri ar angang.
2CH 21:1 Iwe, Jehosafat a mäla, nge ra peiaseni ren an kewe lewo lon ewe telinimwen Tafit. Iwe, Jehoram nöün we mwän a siwili lon wisan wisen king.
2CH 21:2 Ikkei ir nöün Jehosafat ewe kingen Juta kewe mwän ir pwin Jehoram: Asaria, Jehiel, Sekaria, Asariahu, Mikael me Sefatia.
2CH 21:3 Iwe, semer we a lifang ngeniir chomong silifer me kolt me pisek mi aüchea, a pwal ngeni eman me eman eu kewe telinimw mi pöchökül tittir lon Juta. Nge ewe mwü a ngeni Jehoram, pun i ewe mwänichi.
2CH 21:4 Lupwen Jehoram a wiseni ewe wisen king o anüküchara mwün, a niela pwin kewe meinisin, a pwal niela ekoch me lein ekewe samolun Israel.
2CH 21:5 Jehoram a ierini ilik me ruu, lupwen a tolong lon wisan wisen king. A nom lon Jerusalem o nemenem lon ükükün walu ier.
2CH 21:6 Iwe, a tipis usun ekewe kingen Israel o föföringau usun chon leimwen Ahap, pun a pwülüeni nöün Ahap we fefin. Iwe a föri mine a ngau me fän mesen ewe Samol mi Lapalap.
2CH 21:7 Nge ewe Samol mi Lapalap esap mochen arosala ekewe mwirimwirin Tafit pokiten ewe pwon a eäni ngeni Tafit, pun a fen pwon ngeni, pwe epwe wor eman mwirimwirin, epwe nemenem fansoun meinisin.
2CH 21:8 Iwe, lupwen fansoun mwün Jehoram, ekewe chon Etom ra ü ngeni Juta o seikätä püsin eman nöür king.
2CH 21:9 Iei mine Jehoram me nöün kewe meilapen sounfiu ra tötä won war kewe woken o tolong lon ewe fanü Etom. Ikenan ekewe sounfiun Etom ra pwelifeiliir, nge Jehoram me nöün kewe meilapen wan kewe woken ra ütä lepwin o sü seniir.
2CH 21:10 Iei usun chon Etom ra ütä, nge resap chüen nom fän nemenien Juta tori ikenai. Lon ewe chök fansoun Lipna a pwal ütä won mwün, pun Jehoram a likitala ewe Samol mi Lapalap än an kewe lewo we Kot.
2CH 21:11 Jehoram a pwal mwo nge föri lenien fel ngeni ekewe uluulun anümwäl won chukuchukutän ewe fanü Juta o emweni ekewe chon Jerusalem me chon Juta ngeni tipis, pwe ra kul seni Kot.
2CH 21:12 Iwe, ewe soufos Elias a tinala echö toropwe ren Jehoram. Iei masouen ewe toropwe, “Iei alon ewe Samol mi Lapalap än Tafit om we lewo we Kot: En kosap apirü föförün Jehosafat semom we, ika föförün Asa semen semom we, ewe kingen Juta,
2CH 21:13 nge ka apirü föförün ekewe kingen Israel o emweni ekewe chon Juta me chon Jerusalem ngeni tipis, usun chök Ahap me nöün kana ra emweni chon Israel ngeni tipis. Ka pwal mwo nge niela pwiüm kewe mi mürina senuk.
2CH 21:14 Pokiten ka föri ekei föför, ewe Samol mi Lapalap epwe awarato eu feiengau watte won noum aramas, won noum kana me pwülüom kewe, pwal won mettochum meinisin ka eäni.
2CH 21:15 Nge püsin en kopwe samauni eu samau mi fokun weires ren samaun lukom, epwe ngauala rän me rän, tori tarom repwe seliseliwu.”
2CH 21:16 Iwe, ewe Samol mi Lapalap a föri, pwe ekewe chon Filistia me chon Arapia mi nom arap ngeni ekewe chon Itiopia ra oput Jehoram.
2CH 21:17 Iei mine ra töki Juta o maun ngeni. Ra uweela ekewe pisek meinisin me lon imwen ewe king, ra pwal uweela nöün kewe mwän me pwülüan kewe, pwe esap chüen wor eman nöün mwän a nom ren, chilon chök Ahasia nöün setiputur.
2CH 21:18 Iwe, mürin an fis ekei pworaus meinisin, ewe Samol mi Lapalap a asamaua Jehoram ren eu samaun luk esap tongeni pöchökül ren.
2CH 21:19 A chök sasamau, nge mürin ruu ier taran ra seliseliwu, pwe a mäla fän cheuch watte. Iwe, nöün aramas resap föri eu ekkei fän iten ar asamolu, usun ra piin föri ngeni an kewe lewo.
2CH 21:20 Jehoram a ierini ilik me ruu, lupwen a tolong lon wisan wisen king. A nom lon Jerusalem o nemenem lon ükükün walu ier. Iwe, a mäla, nge esap wor eman a letipeta usun. Ra peiaseni lon ewe telinimwen Tafit, nge sap lon peiasen ekewe king.
2CH 22:1 Iwe, ekewe chon Jerusalem ra seikätä Ahasia nöün Jehoram we setiputur, pwe epwe siwili saman we lon wisan wisen king. Pun ekoch chon küt liaper mi fiti ekewe chon Arapia ra feila lon ewe lenien chon Juta o niela nöün Jehoram kewe mwän mi watte meinisin. Iei mine Ahasia nöün Jehoram ewe kingen Juta a nemenem.
2CH 22:2 Ahasia a ierini rüe me ruu, lupwen a tolong lon wisan wisen king. A nom lon Jerusalem o nemenem lon ükükün eu ier. Iten inan we Atalia, i nöün nöün Omri we fefin.
2CH 22:3 Ahasia a pwal apirü föförün chon leimwen Ahap, pun inan we a pesei pwe epwe föri mine a ngau.
2CH 22:4 Iwe, a föri mine a ngau me fän mesen ewe Samol mi Lapalap, usun chon leimwen Ahap ra föri. Pun mürin än saman mäla, ir ra wisen nöün chon öüröür ngeni won mine epwe feiengau ren.
2CH 22:5 Ahasia a pwal aleasochis ngeni ar öüröür o eti Joram nöün Ahap ewe kingen Israel we mwän le maun ngeni Hasael ewe kingen Siria me lon Ramot-kiliat. Nge ekewe sounfiun Siria ra akinasa Joram.
2CH 22:6 Iwe, a liwinsefäl ngeni Jesrel, pwe epwe onoson o pöchökülsefäl seni kinasan kewe me ren chon Siria, lupwen a maun ngeni Hasael ewe kingen Siria me lon Rama. Nge Ahasia ewe kingen Juta a feila Jesrel, pwe epwe churi Joram, pun a samau.
2CH 22:7 Nge Kot a fen akota pwe än Ahasia feiengau epwe fis ren an feila äämwa Joram. Pun lupwen a tori Joram, a eti i le churi Jehu nöün Nimsi we mwän, ätei ewe Samol mi Lapalap a epiti pwe epwe arosala chon leimwen Ahap.
2CH 22:8 Iwe, lupwen Jehu a föri ngeni chon leimwen Ahap mine Kot a fen apwüngala, a pwal churi ekewe samolun Juta me nöün pwin Ahasia kewe mwän mi angang ngeni Ahasia. Iwe, Jehu a nirela meinisin.
2CH 22:9 Mürin a kütta Ahasia. Ekewe mwän mi eti ra küna Ahasia, lupwen a op me lon Samaria, ra emwenala ren Jehu o niela. Iwe, ra peiaseni, pun ra apasa, “I nöün nöün Jehosafat, ätewe mi angang ngeni ewe Samol mi Lapalap ren unusen lelukan.” Iwe, esap wor eman me lein chon leimwen Ahasia mi tongeni nemeni ewe mwü.
2CH 22:10 Iwe, lupwen Atalia inen Ahasia a silei pwe nöün we a ninnila, a allük pwe chon familien ewe kingen Juta meinisin repwe ninnila.
2CH 22:11 Nge Jehosepa nöün ewe king Jehoram fefin pwülüen ewe souasor Jehoiata a angei Joas nöün Ahasia we ät lemonomon seni lein nöün ewe king kewe mwän repwe ninnila. Iwe, a aopalong ewe ät me nöün chon tümwün lon eu lenien iseis peet. Pokiten Jehosepa nöün ewe king Jehoram fefin, pwal i fefinen Ahasia, iei mine a aopa Joas seni Atalia, pwe esap tongeni niela.
2CH 22:12 Iwe, Joas a op lon imwen ewe Samol mi Lapalap lon ükükün wonu ier, lupwen Atalia a nemeni ewe fanü.
2CH 23:1 Nge lon ewe afisuen ier Jehoiata a tipepwora o föri eu pwonen atipeeu ngeni ekewe meilapen sounfiu, ngeni Asaria nöün Jeroham we mwän, Ismael nöün Jehoanan we mwän, Asaria nöün Opet we mwän, Maseia nöün Ataia we mwän me Elisafat nöün Sikri we mwän.
2CH 23:2 Iwe, ra feila lemenen Juta o amwichafengeni chon ewe ainangen Lefi me ekewe mwänirelan ekewe cho seni ekewe telinimwen Juta meinisin. Nge lupwen ra feito Jerusalem,
2CH 23:3 unusen ewe mwichen aramas ra föri eu pwon ngeni ewe king lon imwen ewe Samol mi Lapalap. Jehoiata a üreniir, “Nengeni, iei i nöün ewe king we mwän. I epwe king, usun ewe Samol mi Lapalap a fen pwon fän iten ekewe mwirimwirin Tafit.
2CH 23:4 Iei usun mine oupwe föri: Ämi kewe souasor me ämi chon ewe ainangen Lefi mi popuetä ämi angang lon ewe ränin sapat, eu leülüngat me leimi repwe mamasa asamalapen ewe imwenfel,
2CH 23:5 eu leülüngat repwe mamasa imwen ewe king, nge eu leülüngat repwe nom ren ewe Asamalapen Longolong. Nge ekewe aramas meinisin repwe nom lon ewe leni lükün imwen ewe Samol mi Lapalap.
2CH 23:6 Ousap mwüt ngeni eman epwe tolong lon imwen ewe Samol mi Lapalap, chilon chök ekewe souasor me chon ewe ainangen Lefi mi föri ar angang. Ir chök repwe tongeni tolong, pun ra pin. Nge ekewe aramas meinisin repwe aleasochis ngeni mine ewe Samol mi Lapalap a allük o nom lükün.
2CH 23:7 Iwe, chon ewe ainangen Lefi repwe ütä pwelin ünükün ewe king, eman me eman fän an pisekin maun. Repwe eti ewe king ekis meinisin ia epwe feila ie. Nge iön a tolong lon ewe imwenfel epwe ninnila.”
2CH 23:8 Iwe, chon ewe ainangen Lefi me ekewe chon Juta meinisin ra föri meinisin mine ewe souasor Jehoiata a allük ngeniir. Eman me eman seni ekewe meilap a emwenato nöün aramas, chokewe mi wes le angang lon ewe ränin sapat, pwal chokewe mi popuetä ar angang. Pun ewe souasor Jehoiata esap asera ekewe mwich.
2CH 23:9 Mürin, ewe souasor Jehoiata a atowu ngeni ekewe meilap ekewe siles me ekewe tittin maun mi watte me kükün än ewe king Tafit mi nom lon ewe imwenfel.
2CH 23:10 Iwe, a atetteli ekewe mwän pwe repwe tümwünü ewe king, eman me eman fän an pisekin maun. Ra tettel arun ewe rongen asor me ewe imwenfel seni peliörün ewe imwenfel tori peliefengin.
2CH 23:11 Mürin, Jehoiata me nöün kewe mwän ra emwenawu Joas nöün ewe king we ät, ra isetä epa mwärämwär won möküran o ngeni ewe puken allük. Iwe, ra awisa ngeni ewe wisen king, ra epiti o kökkö, “Ewe king epwe manauatam.”
2CH 23:12 Nge lupwen Atalia a rongorong akürangen ekewe aramas mi sässä o mwareiti ewe king, a feila ren imwen ewe Samol mi Lapalap ren ekewe aramas.
2CH 23:13 Lupwen a nenefetal, a küna ewe king a ütä ren ewe ür arun asamalapen ewe imwenfel, nge ekewe meilap me ekewe chon ettik rappwa ra ütä ünükün ewe king. Iwe, aramasen ewe fanü meinisin ra mweireir o ettiki rappwa, nge ekewe chon köl ra emweni ewe mwich fän ar pisekin ettik le köl. Nge Atalia a kamwei üfan o puchör, “A fis rawangau, a fis rawangau!”
2CH 23:14 Mürin, ewe souasor Jehoiata a allük ngeni ekewe meilap mi nemeni ewe mwichen sounfiu, “Oupwe emwenawu neminewe lefilen ekewe chon mas mi tettel, nge are eman a tapwela mürin, oupwe niela ren ketilas.” Pun ewe souasor a üra, “Ousap niela neminewe lon lenien ewe Samol mi Lapalap.”
2CH 23:15 Iei mine ra turufi neminewe, ra emwenalong lon asamalapen imwen ewe king, ia ekewe oris ra tolong me ie. Ikenan ra niela ie.
2CH 23:16 Iwe, ewe souasor Jehoiata a föri eu pwon lefilen i me ekewe aramas meinisin pwal ewe king, pwe ir repwe nöün ewe Samol mi Lapalap aramas.
2CH 23:17 Mürin, ekewe aramas meinisin ra tolong lon imwen ewe anü Paal o ataetiu. Ra atatakisi ekewe rongen asor me ekewe uluulun anümwäl, ra pwal niela Matan nöün Paal we souasor me mwen ekewe rongen asor.
2CH 23:18 Iwe, Jehoiata a pwal awisa ekewe souasor seni ewe ainangen Lefi, pwe repwe nemeni angangen imwen ewe Samol mi Lapalap. Repwe föri ewe angang ewe king Tafit a fen akota ngeniir. Repwe pwal eäni ekewe asoren kek ngeni ewe Samol mi Lapalap, usun a fen mak lon än Moses kewe allük. Repwe föri ar angang fän meseik me köl, usun mine Tafit a fen allük.
2CH 23:19 Iwe, a pwal anomu chon masen asam arun asamalapen ewe imwenfel, pwe esap wor eman epwe tongeni tolong lon, are esap limöch.
2CH 23:20 Mürin, Jehoiata me ekewe meilapen sounfiu, ekewe aramas tekia me än ekewe aramas kewe kepina, pwal aramasen ewe fanü meinisin ra etala ewe king seni imwen ewe Samol mi Lapalap o pwerelong lon ewe asamalapen won tori imwen ewe king. Iwe, ra amota ewe king won ewe lenien motun king.
2CH 23:21 Ekewe aramas meinisin ra meseik, nge ewe telinimw a kinamwe mürin än Atalia ninnila ren ketilas.
2CH 24:1 Iwe, Joas a ierini fisu, lupwen a popuetä le nemeni Juta. A nom lon Jerusalem o nemenem lon ükükün faik ier. Iten inan we Sipia seni Persepa.
2CH 24:2 Joas a föri mine a pwüng me fän mesen ewe Samol mi Lapalap lon ükükün ränin manauen ewe souasor Jehoiata.
2CH 24:3 Nge Jehoiata a ngeni Joas ruoman pwülüan. Iwe, a wor nöün mwän me nöün fefin.
2CH 24:4 Ekoch fansoun mürin, Joas a ekiekietä pwe epwe försefäli mine a ta me won imwen ewe Samol mi Lapalap.
2CH 24:5 Iwe, a amwichafengeni ekewe souasor me chon ewe ainangen Lefi o üreniir, “Oupwe feila lon ekewe telinimwen Juta o ioni moni seni ekewe chon Israel meinisin, pwe sipwe försefäli mine a ta me won imwenfelin ach we Kot iteiten ier. Oupwe pi pwe oupwe amüttiri ewe angang.” Nge chon ewe ainangen Lefi resap müttir ngeni ewe angang.
2CH 24:6 Iei mine ewe king a titi ewe souasor mi lap Jehoiata o aisini, “Pwota kosap pesei ngeni chon ewe ainangen Lefi, pwe repwe angei seni ekewe chon Juta me chon Jerusalem ewe takises Moses nöün ewe Samol mi Lapalap we chon angang a apwüngala ngeni ekewe chon Israel fän iten ewe imwenfel seni mangaku, ia ekewe allük ra nom ie?”
2CH 24:7 Pun Atalia ewe fefin mi ngau me nöün kewe mwän ra tomwälilong lon ewe imwenfel. Ra pwal mwo nge aea ekewe pisek mi pin meinisin seni lon imwen ewe Samol mi Lapalap fän iten ar angang ngeni ekewe anü Paal.
2CH 24:8 Iwe, ewe king a allük, pwe ekewe mwän seni ewe ainangen Lefi repwe föri eu pwor o anomu lükün asamalapen imwen ewe Samol mi Lapalap.
2CH 24:9 Mürin, ra arongafeili lemenen Juta me Jerusalem, pwe aramas repwe uwato ewe takises fän iten ewe Samol mi Lapalap, Moses nöün Kot we chon angang a fen akom le angei seni ekewe chon Israel lon ewe fanüapö.
2CH 24:10 Iwe, ekewe souemwen me ekewe aramas meinisin ra uwato ar takises fän pwapwa o uwalong lon ewe pwor tori a urela.
2CH 24:11 Iteiten fansoun, lupwen ra küna pwe a wor chomong moni lon ewe pwor, ekewe mwän seni ewe ainangen Lefi ra uwala ewe pwor ren nöün ewe king kewe meilap. Iwe, nöün ewe king seketeri me ewe mi tupuni ewe souasor mi lap ra feito o apöla ewe pwor, mürin ra aliwinala ngeni lenian. Iei usun ra föri iteiten rän, pwe ra ionifengeni chomong moni.
2CH 24:12 Iwe, ewe king me Jehoiata ra ngeni ätekewe mi nemeni angangen imwen ewe Samol mi Lapalap ewe moni, nge ir ra möni ngeni ekewe chon ses fau me ekewe taikü, ngeni ekewe chon angang ngeni mächä me piras, pwe repwe försefäli mine a ta me won imwen ewe Samol mi Lapalap.
2CH 24:13 Chokewe mi föri ewe angang ra fokun achocho le angang ngeni ewe imwenfel. Ra försefäli mine a ta me won o apöchöküla, pwe a usun chök me mwan.
2CH 24:14 Nge lupwen ra wes le angang, ra uwato lusun ewe moni ren ewe king me Jehoiata. Ren ei moni ra föri pisek fän iten angangen lon imwen ewe Samol mi Lapalap, pwal fän iten ekewe asoren kek. Ra föri sepi me sokopaten pisek seni kolt me silifer. Iwe, ra eäni asoren kek lon imwen ewe Samol mi Lapalap iteiten fansoun lupwen ränin manauen Jehoiata.
2CH 24:15 Nge lupwen Jehoiata a chinlapala o ierini ipükü ilik, a mäla.
2CH 24:16 Iwe, ra peiaseni lon ewe telinimwen Tafit lein ekewe king, pun a föri föför mi mürina ngeni chon Israel, ngeni Kot me ewe imwenfel.
2CH 24:17 Nge mürin än Jehoiata mäla, ekewe samolun Juta ra feito o asamolu ewe king. Mürin, ewe king a aüselinga ar tüngor.
2CH 24:18 Iei mine ekewe aramas ra ükütiu le fel lon imwen ewe Samol mi Lapalap än semelaper we Kot o fel ngeni ekewe uluulun ewe anüfefin Asera me ekewe uluulun anümwäl. Ren ei Kot a song ngeni chon Juta me Jerusalem, pun ra tipis.
2CH 24:19 Inamwo än ewe Samol mi Lapalap tinala soufos leir, pwe repwe fönöör o aliwinisefäliir ngeni i, nge ekewe aramas resap mochen aüselingeer.
2CH 24:20 Mürin, Ngünün Kot a feitiu won Sekaraia nöün ewe souasor Jehoiata we mwän. Ätei a ütä wilitekia seni ekewe aramas o üreniir, “Iei alon Kot: Pwota oua purätiu än ewe Samol mi Lapalap kewe allük? Iei popun ousap tongeni feiöch. Pokiten oua likitala ewe Samol mi Lapalap, i a likitikemiila.”
2CH 24:21 Nge ekewe aramas ra rawangauei Sekaraia. Fän än ewe king allük ra monei ngeni fau lon ewe leni lükün imwen ewe Samol mi Lapalap.
2CH 24:22 Iei usun ewe king Joas esap chechemeni än Jehoiata semen Sekaraia kirikiröch ngeni, nge a niela nöün mwän. Iwe, lupwen än Sekaraia mäla a apasa, “Ewe Samol mi Lapalap a küna ei föför, i epwe ngonuk chappan.”
2CH 24:23 Iwe, lesopolan ewe ier ekewe sounfiun Siria ra feito pwe repwe maun ngeni Joas. Ra tolong lon Juta me Jerusalem o niela samolun ekewe aramas meinisin. Ra pwal angei chomong liaper o tinala ren ewe kingen Tamaskus.
2CH 24:24 Iei mwo chokükünün ewe mwichen sounfiun Siria, nge ewe Samol mi Lapalap a mwüt ngeniir pwe repwe akufu ewe mwichen sounfiun Juta mi chomong, pun ekewe chon Juta ra likitala ewe Samol mi Lapalap än ar kewe lewo we Kot. Iei usun ekewe sounfiun Siria ra apwüngü Joas.
2CH 24:25 Iwe, lupwen ra feil seni Joas, ra likitala lon an kinas mi fokun watte. Nge nöün nöüwis ra rawangauei o niela me won an peet, pun ra ngeni chappen an nimanauei nöün ewe souasor Jehoiata we mwän. Iei usun Joas a mäla. Iwe, ra peiaseni lon ewe telinimwen Tafit, nge resap peiaseni lon peiasen ekewe king.
2CH 24:26 Ätekewe mi rawangauei Joas iter Sapat nöün Simeat we mwän eman fin Amon, me Jehosapat nöün Simrit we mwän eman fin Moap.
2CH 24:27 Iwe, pworausen nöün Joas kewe mwän, ekewe kapasen osuni usun an feiengau, usun an försefäli mine a ta me won ewe imwenfel a makelong lon puken awewen uruwon ekewe king. Iwe, Amasia nöün we mwän a siwili lon wisan wisen king.
2CH 25:1 Iwe, Amasia a ierini rüe me limu, lupwen a tolong lon wisan wisen king. A nom lon Jerusalem o nemenem lon ükükün rüe me tiu ier. Iten inan we Jehoatin seni Jerusalem.
2CH 25:2 Amasia a föri mine a pwüng me fän mesen ewe Samol mi Lapalap, nge sap seni unusen lelukan.
2CH 25:3 Iwe, lon ewe otun, lupwen Amasia a kamwöchüla won unusen nemenemen mwün, a niela ekewe nöüwis mi niela saman we ewe king.
2CH 25:4 Nge esap niela nöür kewe, pwe a föri mine ewe Samol mi Lapalap a allük, usun a mak lon ewe puken allük än Moses, “Sam resap ninnila pokiten än nöür tipis, nge nau resap ninnila pokiten än semer tipis. Nge eman me eman epwe mäla fän iten püsin an tipis.”
2CH 25:5 Mürin, ewe king Amasia a amwichafengeni ekewe re Juta me Peniamin, a aimwürela lon eu me eu mwich lon en me än saman cho. Iwe, a atolongeer fän nemenien ekewe meilap mi nemeni ngeröü me pükü sounfiu. A körifengeni ätekewe mi ierini rüe feitä, nge a pwä pwe iteiter meinisin ükükün ülüpükü ngeröü mwän mi molotä ngeni maun o sipeöch fän wokur siles me tittin maun.
2CH 25:6 Iwe, Amasia a pwal möni ipükü ngeröü sounfiu mi pwora seni Israel won ina epwe ükükün rüanü ton silifer.
2CH 25:7 Nge eman soufos a feila ren ewe king o üreni, “Ai king, kosap mwüt ngeni ewe mwichen sounfiun Israel pwe repwe etuk, pun ewe Samol mi Lapalap esap eti ekewe chon Israel.
2CH 25:8 Nge are ka ekieki pwe kopwe pöchökül le maun pokiter, Kot epwe mwüt ngeni chon oputom pwe repwe akufuk. Pun Kot a manaman le alisi eman, a pwal manaman le akufu eman.”
2CH 25:9 Iwe, Amasia a aisini ewe soufos, “Nge met üpwe föri ren ekewe rüanü ton silifer üa fen möni ngeni ekewe sounfiun Israel?” Nge ewe soufos a pälüeni, “Ewe Samol mi Lapalap a tongeni fang ngonuk chomong lap seni ei.”
2CH 25:10 Mürin, Amasia a tinala ekewe sounfiu mi feito seni Israel, pwe repwe liwiniti lenier. Iwe, ra fokun song ren chon Juta o liwiniti lenier fän lingeringer.
2CH 25:11 Nge Amasia a tipepwora o emwenala nöün kewe sounfiu ngeni ewe Lemolun Salt. Ikenan a niela engol ngeröü sounfiun Etom.
2CH 25:12 Iwe, ekewe sounfiun Juta ra liapeni pwal engol ngeröü mi manau. Ra emwenirela won ungen eu achau o atururetiu me won, pwe inisir a möküfesen.
2CH 25:13 Nge ekewe sounfiun Israel Amasia a tinirela, pun esap mwüt ngeniir pwe repwe eti le feila maun, ra maun ngeni ekewe telinimwen Juta seni Samaria tori Pet-horon. Iwe, ra niela me lon ekewe telinimw ükükün ülüngatngeröü aramas o angei chomong liaper.
2CH 25:14 Iwe, lupwen Amasia a liwinto seni an niela ekewe chon Etom, a uwato ar kewe uluulun kot. A aütaar pwe an kot, a fel ngeniir o asor ngeniir.
2CH 25:15 Iei mine ewe Samol mi Lapalap a song ngeni Amasia o tinala eman soufos ren. Ätei a üreni, “Pwota ka fel ngeni än ekewe chon ekis kewe kot resap tongeni püsin angasa nöür aramas seni fän nemeniom?”
2CH 25:16 Nge lupwen a chüen kapas, ewe king a üreni, “Ifa usun, äm aia awisok pwe kopwe nöün ewe king chon öüröür? Kopwe ükütiu le fos. Ika kosap ükütiu, kopwe mäla.” Iei mine ewe soufos a ükütiu le fos, nge a üra, “Iei üa silei pwe Kot a fokun ekiekin niikela, pun ka föri ei, nge kosap aüselinga mine üa öüröüra ngonuk.”
2CH 25:17 Mürin än Amasia ewe kingen Juta angei an öüröür seni nöün chon öüröür, a tinala pworaus ngeni Jehoas nöün Jehoahas we mwän, nge Jehoahas nöün Jehu ewe kingen Israel. Iwe, a üreni, “Kopwe etto, sipwe künafengenikich.”
2CH 25:18 Nge Jehoas ewe kingen Israel a tinala ei pworaus ren Amasia ewe kingen Juta, “Efoch iräfölüföl mi nom won Lepanon a titila ren efoch setar won Lepanon o üra, ‘Kopwe mwütätä noum föpwül pwe nei alüal epwe pwülüeni.’ Nge eman manmwacho a pwerela ren o purätiu ewe iräfölüföl.
2CH 25:19 En ka apasa pwe ka akufu ekewe chon Etom. Ka lamalamtekia o sikesik ren. Nge iei kopwe nonomotiu lon leniom. Pwota kopwe awarato feiengau won en me chon Juta, pwe oupwe kuf?”
2CH 25:20 Nge Amasia esap mochen rongorong. Pun ei a fis seni Kot, pwe epwe mwüt ngeni chon oputer pwe repwe akufuur, pun ra fel ngeni än chon Etom kewe kot.
2CH 25:21 Iei mine Jehoas ewe kingen Israel a feila, pwe epwe maun ngeni ewe kingen Juta. Iwe, ra künafengeniir me lon Pet-semes lon ewe fanü Juta.
2CH 25:22 Nge ekewe chon Juta ra kuf ren chon Israel, pwe iteiten eman me eman a süla ngeni lenian.
2CH 25:23 Iwe, Jehoas ewe kingen Israel a liapeni Amasia ewe kingen Juta me arun Pet-semes o emwenala Jerusalem. A pwal ataetiu tittin Jerusalem seni ewe Asamalapen Efraim tori ewe Asamalapen Lepwokuku ükükün wonopükü fiit.
2CH 25:24 Iwe, Jehoas a angei ekewe kolt me silifer meinisin, pwal ekewe sepi meinisin mi nom lon ewe imwenfel fän tümwünüen Opet-etom o uweerela. A pwal angei ekewe pisek aüchea lon imwen ewe king pwal aramas o liwiniti Samaria.
2CH 25:25 Iwe, Amasia ewe kingen Juta a manau lon ükükün engol me limu ier mürin än Jehoas ewe kingen Israel mäla.
2CH 25:26 Nge lusun pworausen än Amasia kewe föför seni lepoputan tori lesopolan an nemenem a makelong lon puken uruwon ekewe kingen Juta me Israel.
2CH 25:27 Seni ewe fansoun, lupwen Amasia a kul seni ewe Samol mi Lapalap, ra rawangauei me lon Jerusalem. Iwe, a süla Lakis. Nge ra attapwa tori Lakis o niela me ikenan.
2CH 25:28 Mürin, ra uwala inisin won oris ngeni Jerusalem o peiaseni ren an kewe lewo lon ewe telinimwen Tafit.
2CH 26:1 Iwe, ekewe aramasen Juta meinisin ra seikätä Usia, pwe epwe siwili Amasia saman we lon wisan wisen king. Usia a ierini engol me wonu, lupwen a seikitä.
2CH 26:2 Mürin än ewe king Amasia mäla, Usia a liapenisefäli Elat o aüsefälietä.
2CH 26:3 Iwe, Usia a ierini engol me wonu, lupwen a tolong lon wisan wisen king. A nom lon Jerusalem o nemenem lon ükükün lime me ruu ier. Iten inan we Jekolia seni Jerusalem.
2CH 26:4 Iwe, Usia a föri mine a pwüng me fän mesen ewe Samol mi Lapalap, usun chök Amasia saman we a föri.
2CH 26:5 A angang ngeni Kot fän allükülük lon ränin manauen Sekaraia mi aiti ngeni usun an epwe niuokusiti Kot. Iwe, ewe Samol mi Lapalap a afeiöchü lon ükükün fansoun an angang ngeni.
2CH 26:6 Iwe, Usia a feila o maun ngeni ekewe chon Filistia. A ataetiu tittin ekewe telinimw Kat, Japne me Astot o aüetä telinimw arun Astot, pwal ekis meinisin lein ekewe chon Filistia.
2CH 26:7 Kot a alisi Usia le maun ngeni ekewe chon Filistia, ekewe chon Arapia mi nom lon Kurpaal, pwal ekewe chon Meun.
2CH 26:8 Iwe, ekewe chon Amon ra takises ngeni Usia. A pwal pöchökülela pwe an iteüöch a chöüla tori lekiännin Isip.
2CH 26:9 Usia a pwal aüetä o apöchöküla imw tekia lon Jerusalem arun ewe Asamalapen Lepwokuku, arun ewe Asamalapen Lemol me arun ewe Pwokukun ewe tit.
2CH 26:10 Iwe, a aüetä imw tekia lon ewe fanüapö o tuw chomong chönüttu, pun a wor chomong nöün pwiin man fäsonun ekewe chuk, pwal lon ekewe maasies. A pwal wor nöün chon tümwünü irän wain won ewe fanü mi chukuchukutä, pwal nöün chon tanipi won ewe fanü mi pwülüöch, pun a aücheani ewe pwül.
2CH 26:11 A pwal wor nöün Usia mwichen sounfiu mi molotä ngeni maun. Ra kinikin lon mwich mi alealong won ewe iteit Jeiel ewe seketeri me Maseia ewe meilap ra angei. Ätekei ra nom fän emwenien Hanania, eman me lein nöün ewe king nöüwis.
2CH 26:12 Iwe, iteiten ekewe meilapen sounfiu ükükün rüengeröü wonopükü mwän.
2CH 26:13 Eu mwichen sounfiu ükükün ülüpükü fisungeröü limepükü mwän mi tongeni maun fän pöchökül ra nom fän nemenier. Ir repwe alisi ewe king le maun ngeni chon oputan.
2CH 26:14 Iwe, Usia a amolätä tittin maun, siles, akkaw, sakit seni mächä, esefich me föün aülül fän iten unusen ewe mwichen sounfiu.
2CH 26:15 Lon Jerusalem a wor nöün chon angang mi sipeöch le ekiekietä minefön pisek. Iwe, ewe king a awisa ngeniir pwe repwe förätä mwesiin, repwe nom won ekewe imw tekia, pwal won ekewe pwokukun ewe tit, pwe repwe eppichi föün esefich me fau watte. Än Usia iteüöch a chöfetal ekis meinisin, pun Kot a alisi pwe a fokun pöchökül.
2CH 26:16 Nge lupwen Usia a pöchökülela, a lamalamtekia pwe a tolong lon feiengau. Iwe, a tipis ngeni ewe Samol mi Lapalap an we Kot o tolong lon imwenfelin ewe Samol mi Lapalap, pwe epwe keni apach mi pwokus me won ewe rongen asoren ötüöt.
2CH 26:17 Nge ewe souasor Asaria a tapwela mürin fiti walik nöün ewe Samol mi Lapalap souasor, ir mwän mi pworacho.
2CH 26:18 Ra ü ngeni ewe king Usia o üreni, “Esap wisom Usia, pwe kopwe keni apach mi pwokus ngeni ewe Samol mi Lapalap, nge wisen chök ekewe souasor ir mwirimwirin Aaron kewe mi apinipinila pwe repwe keni apach mi pwokus. Kopwe towu seni ei imw mi pin, pun ka föri mine a ngau. Ei lapalap esap atoto womw iteüöch seni Kot ewe Samol mi Lapalap.”
2CH 26:19 Mürin, Usia a fokun song ren ekewe souasor. Lon ewe chök otun a amwöchü lepöün eu sepien asoren ötüöt, pwe epwe keni apach mi pwokus. Nge lupwen a song, rupun pwötür a pwüküwu won chamwan. Ei a fis me fän mesen ekewe souasor lon imwen ewe Samol mi Lapalap me arun ewe rongen asoren ötüöt.
2CH 26:20 Lupwen ewe souasor mi lap Asaria me ekewe souasor meinisin ra nenengeni, ra küna pwe a rupun pwötür won chamwan. Iei mine ra müttir asüela lükün, pwal püsin i a müttir le towu, pun ewe Samol mi Lapalap a afeiengaua.
2CH 26:21 Iwe, ewe king Usia a rupun pwötür tori an mäla. Nge pokiten a rupun pwötür, a imwüla lon pwal eu imw, esap pwal tongeni tosefälilong lon imwen ewe Samol mi Lapalap. Iwe, Jotam nöün we mwän a tümwünü chon leimwen ewe king o nemeni aramasen ewe fanü.
2CH 26:22 Nge lusun pworausen än Usia kewe föför seni lepoputan tori lesopolan an nemenem ewe soufos Aisea nöün Amos we mwän a makelong lon eu puk.
2CH 26:23 Iwe, Usia a mäla, nge ra peiaseni ren peiasen ekewe king, nge sap lon peiasen ekewe king, pun Usia a rupun pwötür. Nge Jotam nöün we mwän a siwili lon wisan wisen king.
2CH 27:1 Iwe, Jotam a ierini rüe me limu, lupwen a tolong lon wisan wisen king. A nom lon Jerusalem o nemenem lon ükükün engol me wonu ier. Iten inan Jerusa nöün Satok we fefin.
2CH 27:2 Jotam a föri mine a pwüng me fän mesen ewe Samol mi Lapalap, usun chök Usia saman we. Nge mine a sokola seni won, pwe esap tomwälilong lon imwenfelin ewe Samol mi Lapalap. Nge ekewe aramas ra chök sopwela le föri föför mi ngau.
2CH 27:3 Iwe, Jotam a förätä ewe asamalap lon imwen ewe Samol mi Lapalap me efeng, a pwal awattei angangen won tittin Jerusalem lon ewe leni itan Ofel.
2CH 27:4 A pwal aüetä chomong telinimw won ewe fanü mi chukuchukutä lon Juta o aüetä imw pöchökül me imw tekia won ekewe leni mi wöllap.
2CH 27:5 Iwe, Jotam a maun ngeni ewe kingen Amon me nöün kewe sounfiu o akufuur. Mürin, ekewe chon Amon ra ngeni Jotam ina epwe ükükün rüanü ton silifer, lime ngeröü tuuk wiich me lime ngeröü tuuk parli lon ewe ier. Iwe, ra ngeni ei aükükün lon pwal aruuen me aülüngatin ier.
2CH 27:6 Iei usun Jotam a pöchökülela, pun a fokun aleasochis ngeni ewe Samol mi Lapalap an we Kot.
2CH 27:7 Nge lusun pworausen än Jotam föför meinisin, an kewe maun a eäni me an kewe angang a föri, a makelong lon puken uruwon ekewe kingen Israel me Juta.
2CH 27:8 Iwe, Jotam a ierini rüe me limu, lupwen a tolong lon wisan wisen king. A nom lon Jerusalem o nemenem lon ükükün engol me wonu ier.
2CH 27:9 Jotam a mäla, nge ra peiaseni ren an kewe lewo lon ewe telinimwen Tafit. Iwe, Ahas nöün we mwän a siwili lon wisan wisen king.
2CH 28:1 Iwe, Ahas a ierini rüe, lupwen a tolong lon wisan wisen king. A nom lon Jerusalem o nemenem lon ükükün engol me wonu ier. Nge Ahas esap föri mine a pwüng me fän mesen ewe Samol mi Lapalap usun Tafit an we lewo.
2CH 28:2 A apirü än ekewe kingen Israel föför, a pwal föri uluulun ewe anü Paal seni mächä.
2CH 28:3 Iwe, a keni apach mi pwokus lon ewe lemolun Pen-hinom, a pwal mwo nge keni nöün kewe ät pwe an asor ngeni ekewe uluulun anümwäl, usun än chon ekewe mwü föför mi anioput, ekewe mwü ewe Samol mi Lapalap a asürela me mwen ekewe aramasen Israel.
2CH 28:4 Ahas a pwal asor o keni apach mi pwokus lon ekewe lenien fel won ekewe leni tekia, won ekewe chuk, pwal fän iteiten irä mi muresires.
2CH 28:5 Iei mine ewe Samol mi Lapalap an we Kot a mwüt ngeni ewe kingen Siria pwe epwe akufu Ahas. Ätei a pwal liapeni eu mwichemongun aramas seni Juta o emwenirela Tamaskus. Kot a pwal mwüt ngeni Peka nöün Remalia we mwän ewe kingen Israel, pwe epwe akufu Ahas ren eu ninni mi fokun watte.
2CH 28:6 Pun Peka a niela ükükün ipükü rüe ngeröü sounfiun Juta mi fokun pwora lon eu chök rän. Ei a fis pokiten ra likitala ewe Samol mi Lapalap än ar kewe lewo we Kot.
2CH 28:7 Iwe, Sikri eman sounfiu seni Efraim a niela Maseia nöün ewe king mwän me Asrikam ewe meilapen chon tümwünü ewe imwen king, pwal Elkana ewe kisin fän ewe king.
2CH 28:8 Iwe, ekewe sounfiun Israel ra liapeni rüepükü ngeröü aramaser kewe chon Juta, fefin, ät me nengin. Ra pwal angei chomong choon wokur o uwala Samaria.
2CH 28:9 Nge eman nöün ewe Samol mi Lapalap soufos itan Otet a nom lon ewe telinimw Samaria. Ätei a towu lükün ewe telinimw, pwe epwe churi ewe mwichen sounfiu mi liwinla Samaria. Iwe, a üreniir, “Pokiten ewe Samol mi Lapalap än ämi kewe lewo we Kot a song ren chon Juta, iei mine a mwüt ngenikemi pwe oupwe akufuur. Nge ämi oua nirela ren eu ninni mi lapalap, pwe ngauen ewe föför a tori läng.
2CH 28:10 Nge iei oua ekiekin nemenemengau ngeni ekewe mwän me fefin seni Juta me Jerusalem o nöüniir amanau. Ifa usun, ousap silei pwe pwal ämi oua tipis ngeni ewe Samol mi Lapalap ämi we Kot?
2CH 28:11 Iei oupwe aüselingaei. Oupwe aliwinala aramasemi kewe chon Juta oua liapeniir, pun ewe Samol mi Lapalap a fokun lingeringeritikemi.”
2CH 28:12 Mürin, ekoch samol seni ewe ainangen Efraim iter Asaria nöün Johanan we mwän, Perekia nöün Mesilemot we mwän, Jehiskia nöün Salum we mwän me Amasa nöün Hatlai we mwän ra pwal pälüeni ätekewe mi liwinto seni maun
2CH 28:13 o üreniir, “Ousap uwato ekewe chon oola ikei, pun ren ei oua atoto woch tipis ngeni ewe Samol mi Lapalap mi chu ngeni ewe tipis me föföringau sa fen föri. Pun ach tipis a kon watte, pwe Kot a fokun lingeringeriti Israel.”
2CH 28:14 Iei mine ekewe sounfiu ra likitala ekewe chon oola me choon wokur me mwen ekewe samol me unusen ewe mwich.
2CH 28:15 Iwe, ekewe mwän mi fen föü iter ra angei ekewe chon oola o aüföüfa chokewe mi selela me leir ren ekewe üf ra angei lon maun. Ra aüföüfeer o aipweipweer, ra ngeniir ener me ünümer o säfeeni kinaser. Nge chokewe meinisin mi apwangapwang ra amoteer won ekewe aas o uweerela ren aramaser lon Jeriko ewe telinimw, ia a wor ie chomong irä palm. Mürin, ekewe chon Israel ra liwiniti Samaria.
2CH 28:16 Lon ena fansoun ewe king Ahas a titi Tiklat-pileser ewe kingen Asiria pwe epwe alisi.
2CH 28:17 Pun ekewe chon Etom ra tosefälilong lon ewe fanü, ra akufu chon Juta o uwala ekewe aramas mi oola.
2CH 28:18 Pwal ekewe chon Filistia ra tolong lon ekewe telinimw mi nom fäsonun ekewe chuk, pwal lon ewe fanü Nekep lon Juta. Iwe, ra liapeni Pet-semes, Aialon, Keterot, Soko pwal Timna me Kimso fiti wisoposopur. Iwe, ra imweimw ikenan.
2CH 28:19 Iwe, ewe Samol mi Lapalap a asapwilätiu Juta pokiten Ahas ewe kingen Juta, pun a apöchöküla föför mi ngau me lon Juta o fokun tipis ngeni ewe Samol mi Lapalap.
2CH 28:20 Mürin, Tiklat-pileser ewe kingen Asiria a feito ren Ahas, a ü ngeni o aweiresi, nge esap alisi.
2CH 28:21 Iwe, Ahas a angei ekewe pisek aüchea seni imwen ewe Samol mi Lapalap, seni imwen ewe king me imwen ekewe samol o ngeni ewe kingen Asiria. Nge esap wor alilisin me ren.
2CH 28:22 Nge lon an riaföü, ei king Ahas a fen alapala an tipis ngeni ewe Samol mi Lapalap.
2CH 28:23 A asor ngeni ekewe koten Siria mi akufu i o apasa, “Pokiten än ekewe kingen Siria kewe kot ra alisiir, ngang üpwe asor ngeniir pwe repwe pwal alisiei.” Nge ei a chök atoto feiengau won i me chon Israel meinisin.
2CH 28:24 Ahas a achufengeni ekewe sepi seni ewe imwenfel o atatakisiir. A pwal apüngala ekewe asamalapen imwen ewe Samol mi Lapalap o senätä rongen asor lon iteiten pwokukun Jerusalem.
2CH 28:25 Iwe, lon iteiten telinimwen Juta a föri lenien fel won ekewe leni tekia, pwe epwe keni apach mi pwokus ngeni pwal ekoch kot. Ren ei a fis, pwe ewe Samol mi Lapalap än an kewe lewo we Kot a song ngeni.
2CH 28:26 Nge lusun pworausen än Ahas föför seni lepoputan tori lesopolan an nemenem a makelong lon puken uruwon ekewe kingen Juta me Israel.
2CH 28:27 Ahas a mäla, nge ra peiaseni lon ewe telinimw Jerusalem, nge resap peiaseni lon peiasen ekewe kingen Israel. Iwe, Hiskia nöün we mwän a siwili lon wisan wisen king.
2CH 29:1 Iwe, Hiskia a ierini rüe me limu, lupwen a tolong lon wisan wisen king. A nom lon Jerusalem o nemenem lon ükükün rüe me tiu ier. Iten inan Apia nöün Sekaria we fefin.
2CH 29:2 Hiskia a föri mine a pwüng me fän mesen ewe Samol mi Lapalap, usun meinisin mine Tafit an we lewo a föri.
2CH 29:3 Iwe, lon aeuin ierin mwün Hiskia, lon ewe aeuin maram Hiskia a sukisefäli ekewe asamalapen imwen ewe Samol mi Lapalap, a pwal försefäli mine a ta me won.
2CH 29:4 A körato ekewe souasor me ekewe mwän seni ewe ainangen Lefi o amwichafengeniir lon ewe leni lükün imwenfel mi nom ötiuan.
2CH 29:5 Iwe, a üreniir, “Oupwe aüselingaei, ämi chon ewe ainangen Lefi. Oupwe apinikemi, oupwe pwal apini imwen ewe Samol mi Lapalap än ämi kewe lewo we Kot, o atowu ewe limengau seni ewe leni mi pin.
2CH 29:6 Pun ach kewe lewo ra tipis o föri mine a ngau me fän mesen ewe Samol mi Lapalap ach we Kot. Ra likitala Kot o akulu sökürür ngeni imwen ewe Samol mi Lapalap.
2CH 29:7 Ra pwal apüngala ekewe asamalapen kengkangen ewe imwenfel o kunuela ekewe lamp. Resap keni apach mi pwokus ika eäni asoren kek ngeni ewe Koten Israel me lon ewe leni mi pin.
2CH 29:8 Iei mine ewe Samol mi Lapalap a song ngeni chon Juta me chon Jerusalem o föri pwe ir eu lenien eniweniw me ämäirü me turunufas, usun oua püsin küna ren mesemi.
2CH 29:9 Nengeni, semelapach kewe ra mäla lon maun, nge nöüch mwän me fefin, pwal pwülüach ra oola pokiten ei föför.
2CH 29:10 Iwe, iei ekiekin lelukei, pwe üpwe föri eu pwon ngeni ewe Samol mi Lapalap ewe Koten Israel, pwe esap chüen song ngenikich.
2CH 29:11 Nei kana, iei ousap alusala fansoun, pun ewe Samol mi Lapalap a filikemiitä pwe oupwe nöün chon angang, oupwe ü fän mesan o angang ngeni, oupwe pwal keni apach mi pwokus ngeni.”
2CH 29:12 Iwe, ikkei iten ekewe mwän seni ewe ainangen Lefi mi popuetä ar angang: Seni ewe eterekesin Kohat Mahat nöün Amasai me Joel nöün Asaria. Seni ewe eterekesin Merari Kis nöün Apti me Asaria nöün Jehalelel. Seni ewe eterekesin Kerson Joa nöün Sima me Eten nöün Joa.
2CH 29:13 Seni ewe eterekesin Elisafan Simri me Jeuel. Seni ewe eterekesin Asaf Sekaria me Matania.
2CH 29:14 Seni ewe eterekesin Heman Jehuel me Simei, nge seni ewe eterekesin Jetutun Semaia me Usiel.
2CH 29:15 Ekei mwän ra achufengeni pwiir kewe seni ewe ainangen Lefi, nge ir meinisin ra apiniir. Mürin, ra tolong lon imwen ewe Samol mi Lapalap, pwe repwe limeti, usun ewe king a allük ngeniir fän alon ewe Samol mi Lapalap.
2CH 29:16 Iwe, ekewe souasor ra tolong lon imwen ewe Samol mi Lapalap lon ewe rumwen lon, pwe repwe limeti. Ra atowu ekewe mettoch mi limengau meinisin ra küna lon o uweerela lon ewe leni lükün ewe imwenfel. Nge ekewe mwän seni ewe ainangen Lefi ra angei ekewe mettoch mi limengau o uweerela ngeni ewe lemolun Kitron.
2CH 29:17 Iwe, lon aeuin ränin ewe aeuin maram ra popuetä ewe angangen apinipin, nge lon awaluen ränin ewe chök maram ra tori kengkangen imwen ewe Samol mi Lapalap. Mürin ra apini imwen ewe Samol mi Lapalap lon pwal ükükün walu rän. Nge lon engol me wonuen ränin ewe aeuin maram ra wes.
2CH 29:18 Mürin, ra feila ren ewe king Hiskia o üreni, “Äm aia limeti unusen imwen ewe Samol mi Lapalap, ewe rongen asoren kek me pisekin meinisin, pwal ewe chepel fän iten ewe pilawa mi pin me pisekin meinisin.
2CH 29:19 Iwe, ekewe pisek meinisin ewe king Ahas a pöütala lon fansoun mwün, lupwen a tipis, äm aia aliwinisefäliir o apiniir. Iei ra nom mwen än ewe Samol mi Lapalap we rongen asor.”
2CH 29:20 Mürin, ewe king Hiskia a pwätä lesosorusich o amwichafengeni ekewe nöüwisen ewe telinimw. Iwe, ra feilapök ren imwen ewe Samol mi Lapalap.
2CH 29:21 Ra emwenato füman ätemwänin kow, füman ätemwänin sip, füman lam, pwal füman ätemwänin kuuch pwe eu asoren tipis fän iten familien ewe king, fän iten chon Juta, pwal fän iten limelimen ewe leni mi pin. Iwe, Hiskia a allük ngeni ekewe souasor ir mwirimwirin Aaron, pwe repwe eäniir asor won än ewe Samol mi Lapalap rongen asor.
2CH 29:22 Iei mine ekewe souasor ra niela ekewe ätemwänin kow, ra angei ewe cha o uti ngeni ewe rongen asor. Mürin ra niela ekewe ätemwänin sip o uti char ngeni ewe rongen asor, ra pwal niela ekewe lam o uti char ngeni ewe rongen asor.
2CH 29:23 Lesopolan ra emwenato ekewe ätemwänin kuuch fän iten ewe asoren tipis ren ewe king me ewe mwichen aramas, nge ir ra iseis pöür wor.
2CH 29:24 Mürin, ekewe souasor ra nirela o ninätiu char won ewe rongen asor, pwe asoren amusamusen tipis fän iten chon Israel meinisin. Pun ewe king a allük pwe repwe eäni ewe asoren kek me asoren tipis fän iten chon Israel meinisin.
2CH 29:25 Iwe, ewe king Hiskia a alenia ekewe mwän seni ewe ainangen Lefi lon imwen ewe Samol mi Lapalap fän pisekin kaktai, fän kitar me ükülele, usun mine Tafit me Kat nöün ewe king we soufos, pwal ewe soufos Natan ra allük, pun ei allük ekewe soufos ra apasa fän alon ewe Samol mi Lapalap.
2CH 29:26 Iei mine ekewe mwän seni ewe ainangen Lefi ra ütä fän ekewe pisekin ettik än ewe king Tafit, nge ekewe souasor ra ütä fän ekewe rappwa.
2CH 29:27 Mürin, Hiskia a allük pwe repwe eäni ewe asoren kek won ewe rongen asor. Nge lupwen ra popuetä le eäni ewe asoren kek, ekewe aramas ra popuetä le köl ngeni ewe Samol mi Lapalap, nge ekewe chon ettik ra ettiki ekewe rappwa me ekewe sokopaten pisekin ettik.
2CH 29:28 Iwe, unusen ewe mwichen aramas ra fel ngeni Kot, ekewe chon köl ra köl, nge ekewe chon ettiki rappwa ra ettik tori ewe asoren kek a wes.
2CH 29:29 Nge lupwen ra wes le eäni ewe asor, ewe king me ekewe aramas meinisin mi nom ren ra chapetiu o fel ngeni Kot.
2CH 29:30 Iwe, ewe king Hiskia me nöün kewe nöüwis ra allük ngeni ekewe mwän seni ewe ainangen Lefi, pwe repwe kölün mwareiti ewe Samol mi Lapalap ren ekewe köl Tafit me ewe soufos Asaf ra föri. Iei usun ra kölün mwareiti Kot fän pwapwa, ra chapetiu o fel ngeni.
2CH 29:31 Mürin, Hiskia a üreni ekewe aramas, “Iei oua püsin apinikemi fän iten ewe Samol mi Lapalap. Oupwe kaneto o uwato ekewe asor me asoren kilisou lon imwen ewe Samol mi Lapalap.” Iei mine ra uwato ekewe asor me ekewe asoren kilisou, nge ekoch me leir ra pwal uwato man fän iten asoren kek seni mochenin letiper.
2CH 29:32 Iwe, iteiten ekewe mönün asor ekewe aramas ra uwato fän iten asoren kek ngeni ewe Samol mi Lapalap ükükün fik ätemwänin kow, ipükü ätemwänin sip me rüepükü lam.
2CH 29:33 Ra pwal uwato ekewe asor mi pin ükükün wonopükü ätemwänin kow me ülüngatngeröü sip.
2CH 29:34 Nge ekewe souasor ra men chokükün, iei popun resap tongeni atika silin ekewe mönün asoren kek meinisin. Iei mine pwiir kewe ekewe mwän seni ewe ainangen Lefi ra alisiir tori ewe angang a wes, pwal tori ekewe souasor meinisin ra apiniir. Pun ekewe mwän seni ewe ainangen Lefi ra tiliken le püsin apiniir lap seni ekewe souasor.
2CH 29:35 Iwe, lükün ekei chomongun asoren kek, ekewe souasor ra pwal keni kirisin ekewe mönün asoren kinamwe o ninätiu ekewe asoren ün mi chu ngeni ekewe asoren kek. Iei usun angangen fel lon imwen ewe Samol mi Lapalap a fisisefäl.
2CH 29:36 Nge Hiskia me ekewe aramas meinisin ra pwapwa, pokiten Kot a alisiir, pwe ra tongeni müttir föri ekei föför.
2CH 30:1 Iwe, Hiskia a tinala chon künö ren ekewe chon Israel me Juta meinisin, a pwal makela toropwe ngeni ekewe chon Efraim me Manasa, pwe repwe feito ren ewe imwenfel lon Jerusalem o föri ewe Pasofer ngeni ewe Samol mi Lapalap, ewe Koten Israel.
2CH 30:2 Ewe king me nöün kewe nöüwis, pwal ekewe aramasen Jerusalem meinisin ra tipeeufengen, pwe repwe föri ewe Pasofer lon ewe aruuen maram.
2CH 30:3 Pun resap tongeni föri ewe Pasofer lon ewe fansoun mi afat, pokiten ekewe souasor resap mwo püsin apiniir pwe epwe naf iteiter, pwal ekewe aramas resamwo chufengen lon Jerusalem.
2CH 30:4 Iwe, ei akot a pwüng me ren ewe king me ekewe aramas meinisin.
2CH 30:5 Iei mine ra tipeeufengen pwe repwe asilefeili lemenen Israel meinisin seni Persepa mi nom ör tori Tan mi nom efeng, pwe ekewe aramas repwe feito Jerusalem o föri ewe Pasofer ngeni ewe Samol mi Lapalap ewe Koten Israel. Pun me mwan esap wor eu mwichemongun aramas mi föri ewe Pasofer usun pwüngün akotun.
2CH 30:6 Fän än ewe king allük ekewe chon künö ra feila lemenen unusen Israel me Juta fän ekewe toropwe seni ewe king me nöün kewe nöüwis. Iei masouen ekewe toropwe, “Ämi aramasen Israel mi chüen manau o sü seni fän nemenien ewe kingen Asiria, oupwe kul ngeni ewe Samol mi Lapalap än Apraham, Isaak me Jakop we Kot, pwe i epwe kulsefäl ngeni ämi.
2CH 30:7 Ousap föri usun mine ämi kewe lewo me pwimi ekewe chon Israel ra föri. Ir resap allükülük ngeni ewe Samol mi Lapalap ar we Kot. Iei mine a atolongeer lon feiengau, usun oua küna ikenai.
2CH 30:8 Iei ousap tipeförea usun ämi kewe lewo, nge oupwe aleasochis ngeni ewe Samol mi Lapalap o feito ren imwan mi pin, i a apini tori feilfeilachök. Oupwe angang ngeni ewe Samol mi Lapalap ämi we Kot, pwe esap chüen song ngenikemi.
2CH 30:9 Pun are oua liwinsefäl ngeni ewe Samol mi Lapalap, mürin chokewe mi liapeni pwimi me nöümi kana repwe eäni tong ngeniir o mwüt ngeniir pwe repwe liwiniti ei fanü. Pun ewe Samol mi Lapalap a kirikiröch o ümöümöch, epwe etiwakemi ika oua liwinsefäl ngeni.”
2CH 30:10 Iei mine ekewe chon künö ra feila ngeni ekewe telinimw meinisin lemenen fanüen chon ekewe ainangen Efraim me Manasa, pwal tori chon ewe ainangen Sepulon. Nge ir ra takirin ämängaueer o turunufaseer.
2CH 30:11 Mi wor chök ekoch mwän seni ekewe ainangen Aser, Manasa me Sepulon ra atekisoneer o feito Jerusalem.
2CH 30:12 Nge Kot a pwal angang lon letipen chon Juta, pwe ra tipeeufengen o aleasochisi mine ewe king me ekewe nöüwis ra eäni allük fän alon ewe Samol mi Lapalap.
2CH 30:13 Iwe, lon ewe aruuen maram eu mwichemongun aramas ra mwichefengen lon Jerusalem, pwe repwe föri ewe chulapen mongö pilawa esap wor iis lon.
2CH 30:14 Ra atowu ekewe rongen asor mi nom lon Jerusalem, pwal ekewe rongen asoren ötüöt meinisin, o pöütirela lon ewe lemolun Kitron.
2CH 30:15 Iwe, lon engol me rüanün ränin ewe aruuen maram ra niela ewe lamen Pasofer. Nge ekewe souasor me ekewe mwän seni ewe ainangen Lefi resamwo apiniir ra fokun säw, iei mine ra püsin apiniir. Mürin, ra uwato ekewe asoren kek lon imwen ewe Samol mi Lapalap.
2CH 30:16 Ra ütä lon akawesewesen lenier, usun Moses ewe aramasen Kot a fen allük. Iwe, ekewe souasor ra angei chan ekewe mönün asor seni lepöün ekewe mwän seni ewe ainangen Lefi o äsupu ngeni ewe rongen asor.
2CH 30:17 Mi wor chomong aramas me lon ewe mwich resamwo alimöchüür, iei popun resap tongeni niela ar we lamen Pasofer. Iei mine ekewe mwän seni ewe ainangen Lefi ra wisen niela ekewe lamen Pasofer fän iter o apiniir fän iten ewe Samol mi Lapalap.
2CH 30:18 Pun eu mwichemongun aramas, chomong me leir ra feito seni ekewe ainangen Efraim, Manasa, Isakar me Sepulon resamwo püsin alimöchüür, nge ra mongö ewe mongön Pasofer lükün pwüngün akotun. Nge Hiskia a iotek fän iter o apasa, “Ai Samol mi Lapalap, en äm kewe lewo we Kot mi eäni kirikiröch, kopwe amusala tipisin ekei aramas
2CH 30:19 mi fel ngonuk ren unusen leluker, inamwo ika resap limöch, pun resap föri pwüngün allükün lon ewe leni mi pin.”
2CH 30:20 Iwe, ewe Samol mi Lapalap a rongorong än Hiskia iotek, a amusala än ekewe aramas tipis, nge esap afeiengaueer.
2CH 30:21 Ekewe aramasen Israel mi nom lon Jerusalem ra föri ewe chulapen mongö pilawa esap wor iis lon fän pwapwa mi lapalap lon ükükün fisu rän. Nge ekewe mwän seni ewe ainangen Lefi me ekewe souasor ra mwareiti ewe Samol mi Lapalap iteiten rän o köl ngeni fän pisekin ettik mi tikimong.
2CH 30:22 Iwe, Hiskia a apöchöküla leluken ekewe mwän seni ewe ainangen Lefi mi sipeöch le angang ngeni ewe Samol mi Lapalap. Ekewe aramas ra mongö wiser mongö lon ükükün fisu rän seni ekewe asoren kinamwe ra eäni asor, ra pwal kilisou ngeni ewe Samol mi Lapalap än ar kewe lewo we Kot.
2CH 30:23 Mürin, unusen ewe mwichen aramas ra tipeeufengen pwe repwe föri ewe chulap pwal lon ükükün fisu rän. Iei mine ra föri ewe chulap fän pwapwa pwal lon ükükün fisu rän.
2CH 30:24 Iwe, Hiskia ewe kingen Juta a ngeni ewe mwichen aramas ükükün engeröü ätemwänin kow me fisungeröü sip pwe ochar, nge ekewe nöüwis ra ngeniir ükükün engeröü ätemwänin kow me engol ngeröü sip. Iwe, chomong souasor ra püsin apiniir.
2CH 30:25 Iei usun ekewe aramasen Juta ra meseik, pwal ekewe souasor me ekewe mwän seni ewe ainangen Lefi, ekewe aramas mi feito seni Israel me ekewe chon ekis mi nonom lon Israel me Juta.
2CH 30:26 Iwe, a wor pwapwa watte lon Jerusalem, pun seni ewe fansoun mwün Salomon nöün Tafit ewe kingen Israel we mwän esamwo fis och usun ei lon Jerusalem.
2CH 30:27 Mürin, ekewe souasor me ekewe mwän seni ewe ainangen Lefi ra ütä o afeiöchü ekewe aramas. Iwe, Kot a aüselinga ar iotek me lon lenian mi pin lon läng o etiwa.
2CH 31:1 Iwe, wesin ar we chulap ekewe chon Israel mi eti ra feila lon ekewe telinimwen Juta, ra atatakisi ekewe ür o pöküetiu ekewe uluulun ewe anüfefin Asera. Ra pwal ataetiu ekewe rongen asor me ekewe lenien fel won ekewe leni tekia lemenen Juta me Peniamin meinisin, pwal lon Efraim me Manasa. Mürin ar atarala meinisin ekewe aramasen Israel meinisin ra liwiniti en me an telinimw lon en me fanüan.
2CH 31:2 Iwe, Hiskia a awisa ekewe souasor me ekewe mwän seni ewe ainangen Lefi lon ar kewe mwich, eu me eu mwich lon tettelin en me an angang, usun akoten wiser. Repwe eäni ekewe asoren kek me asoren kinamwe o angang lon imwen ewe Samol mi Lapalap, repwe pwal kilisou ngeni o kölün mwareiti i.
2CH 31:3 Iwe, ewe king a fangala mönün asor seni nöün pwiin man fän iten ekewe asoren kek mi fifis iteiten lesosor me lekuniol, ekewe asoren kek mi fis lon ekewe ränin sapat, lepopun maram, pwal lupwen ekewe ränin chulap mi kefilitä, usun a fen mak lon än ewe Samol mi Lapalap puken allük.
2CH 31:4 Hiskia a pwal allük ngeni ekewe aramas mi imweimw lon Jerusalem, pwe repwe uwala ekewe asor ngeni ekewe souasor me ekewe mwän seni ewe ainangen Lefi, pun iei wiser, pwe ir repwe tongeni fangala fansoun manauer ngeni ewe angang, ewe Samol mi Lapalap a fen allük usun.
2CH 31:5 Lon ewe otun ewe allük a chöfetal, ekewe aramasen Israel ra fangala fokun chomong mwen uän wiich, wain, apüra seni föün olif, chönün chunen me sokopaten uän irän lemäl meinisin. Ra pwal uwato eu leengolun mettochur meinisin.
2CH 31:6 Iwe, ekewe aramasen Israel me Juta mi imweimw lon ekewe telinimwen Juta ra pwal uwato eu leengolun nöür kewe pwiin kow me sip, pwal ekewe mettoch ra apini fän iten ewe Samol mi Lapalap ar we Kot. Iwe, ra uwato ekei mettoch o achukuchukuretä.
2CH 31:7 Lon ewe aülüngatin maram ra popuetä le uwato ekewe mettoch ra apini o achukuchukuretä, nge lon ewe afisuen maram ra awesala.
2CH 31:8 Lupwen Hiskia me nöün kewe nöüwis ra küna ekewe mettoch mi chukuchukutä, ra mwareiti ewe Samol mi Lapalap me nöün kewe aramasen Israel.
2CH 31:9 Iwe, Hiskia a kapas ais ngeni ekewe souasor me ekewe mwän seni ewe ainangen Lefi fän iten ekewe mettoch mi chukuchukutä.
2CH 31:10 Nge ewe souasor mi lap Asaria, eman mwirimwirin Satok, a pälüeni, “Seni ewe fansoun ekewe aramas ra popuetä le uwato ekewe lifang lon imwen ewe Samol mi Lapalap, äm aia mongö o mötüla, a pwal wor chomong lusun. Pun ewe Samol mi Lapalap a afeiöchü nöün aramas, pwe a wor ei lusun mi watte a chüen nom rem.”
2CH 31:11 Mürin, Hiskia a allük, pwe repwe amolätä ekoch rum me lon imwen ewe Samol mi Lapalap. Iwe, ra amoleretä.
2CH 31:12 Mürin, ekewe aramas ra uwato fän allükülük ekewe lifang, ekewe leengol me ekewe mettoch ra apini. Iwe, Konania, eman mwän seni ewe ainangen Lefi, i ewe meilapen chon tümwünü ekei mettoch, nge kisin fan pwin we itan Simei.
2CH 31:13 Iwe, Jehiel, Asasia, Nahat, Asael, Jerimot, Josapat, Eliel, Ismakia, Mahat me Penaia ra wisen angang fän Konania me Simei pwin we. Ir meinisin ra kefilitä seni ewe king Hiskia me ewe souasor mi lap Asaria.
2CH 31:14 Nge Kore nöün Imna we mwän seni ewe ainangen Lefi mi mamasa ewe asamalap mi nom ötiu, a wisen tümwünü ekewe asor aramas ra uwato ngeni Kot seni mochenin letiper, a pwal wisen ineti ekewe lifang ra uwato ngeni ewe Samol mi Lapalap me ekewe asor mi unusen pin.
2CH 31:15 Iwe, Eten, Miniamin, Jesua, Semaia, Amaria me Sekania ra alisi fän allükülük me lon ekewe telinimwen souasor. Ra aineti ekewe lifang mi pin ngeni chiener kewe lon en me an mwich, nge inetin ekewe chinlap a usun chök inetin ekewe alüal.
2CH 31:16 Ra pwal ineti ngeni ätekewe mi ierini ülüngat feitä mi makelong iter lon tettelin uruwor. Ra ineti ngeni meinisin mi tolong lon imwen ewe Samol mi Lapalap, lupwen ra föri ar angang lon en me wisan, pwal lon en me an mwich.
2CH 31:17 Iwe, ra pwal aineti ngeni ekewe souasor mi makelong iteiter lon tettelin uruwon ar kewe cho. Pwal ina usun chon ewe ainangen Lefi mi ierini rüe feitä a makelong iteiter lon tettelin wiser lon en me an mwich.
2CH 31:18 Ir meinisin a makelong iter lon ewe iteit fiti nöür semirit, pwülüer, nöür mwän me nöür fefin, pun ra allükülük lon wiser o püsin apiniir.
2CH 31:19 Nge me lein ekewe souasor ir mwirimwirin Aaron mi nom lon ar kewe telinimw ika lon ekewe fanü ünükür a wor mwän mi mak iter, ra wisen ineti ewe mongö ngeni iteiten eman me eman ekewe souasor, pwal ngeni iteiten eman me eman chon ewe ainangen Lefi mi makelong lon ewe iteit.
2CH 31:20 Iei usun mine Hiskia a föri lon unusen ewe fanü Juta. A föri mine a mürina o pwüng o allükülük me fän mesen ewe Samol mi Lapalap an we Kot.
2CH 31:21 Iwe, Hiskia a fefeitä, pun meinisin mine a föri lon an angang ngeni ewe imwenfel, pwal lon an aleasochis ngeni pwüngün ekewe allük me an kütta öüröüran me ren an we Kot, a föri seni unusen lelukan.
2CH 32:1 Mürin fisin ekei mettoch meinisin, lupwen Hiskia a angang ngeni ewe Samol mi Lapalap fän allükülük, Sanherip ewe kingen Asiria a feito o tooki Juta. A pwelifeili ekewe telinimw mi pöchökül tittir, pwe epwe maun ngeniir, pun a ekiekin liapeniir fän itan.
2CH 32:2 Nge lupwen Hiskia a silei pwe Sanherip a feito pwe epwe maun ngeni Jerusalem,
2CH 32:3 a pwüngüpwüngfengen me nöün kewe meilap, pwal nöün kewe mwän mi pwora, pwe repwe pineela ekewe puächen koluk mi nom ünükün ewe telinimw. Iwe, ra tipeeu ngeni an we ekiek.
2CH 32:4 Iwe, eu mwichemongun aramas ra chufengen o pineela ekewe puächen koluk meinisin me ewe öüwö mi pupulong lon ewe fanü, pun ra apasa, “Pwota ewe kingen Asiria epwe feito o küna chomong koluk?”
2CH 32:5 Mürin, Hiskia a tiliken lon an angang o senätä ekewe tit meinisin mi tala, a pwal aüetä imw tekia wor. Nge lükün ei tit a senätä pwal eu. A apöchöküla ewe leni mi amasou peliötiuen ewe telinimwen Tafit. A pwal föri pisekin maun me tittin maun mi fokun chomong.
2CH 32:6 Iwe, a awisa meilapen sounfiu, pwe repwe nemeni ekewe aramas o achufengeniir ren lon ewe lenien chulap arun asamalapen ewe telinimw. A eäni kapasen apöchökül ngeniir o üra,
2CH 32:7 “Oupwe apöchökülakemi o tipepwora. Ousap niuokus ika apilükingau me mwen ewe kingen Asiria me ewe mwichemongun sounfiu mi nom ren. Pun mi wor eman mi manaman a nom rech, lap seni ewe mi eti ätenan.
2CH 32:8 Pöchökülen aramas echök a nom ren, nge ewe mi nom rech ewe Samol mi Lapalap ach we Kot, i epwe alisikich o eäni ach ei maun.” Iwe, ekewe aramas ra apilüköch ren än Hiskia ewe kingen Juta kewe kapas.
2CH 32:9 Ekoch fansoun mürin, Sanherip ewe kingen Asiria mi pwelifeili Lakis fän pisekin maun fiti nöün mwichen sounfiu meinisin a tinala nöün kewe meilapen sounfiu ren ewe king Hiskia me ekewe aramasen Juta mi nom Jerusalem. Iwe, iei usun mine a akünö ngeniir,
2CH 32:10 “Ngang Sanherip ewe kingen Asiria üpwe aisinikemi: Met oua apilükülükü pwe oua nonomopos lon Jerusalem, lupwen üa pwelifeili fän pisekin maun?
2CH 32:11 Hiskia a emweningauekemi o atolongakemi lon mäla ren echik me kaka, pun a ürenikemi, ‘Ewe Samol mi Lapalap ach we Kot epwe angasakich pwe sisap tolong fän nemenien ewe kingen Asiria.’
2CH 32:12 Ifa usun, sap iei i chök Hiskia ewe mi ataela än Kot kewe lenien fel won ekewe leni tekia, pwal an kewe rongen asor, o allük ngeni chon Juta me chon Jerusalem, pwe repwe fel mwen eu chök rongen asor o keni me won ar mönün asor?
2CH 32:13 Ifa usun, ousap silei mine ngang me ai kewe lewo aia föri ngeni aramasen ekewe pwal ekoch fanü? Ifa usun, ekewe koten ekewe mwü ra tongeni angasa fanüer seni ai afeiengaueer?
2CH 32:14 Iö me lein ekewe koten ekewe mwü, ai kewe lewo ra ataela, a tongeni angasala nöün aramas seni fän nemeniei? Nge ifa usun, ämi Kot epwe tongeni angasakemiila seni fän nemeniei?
2CH 32:15 Iei mine ousap mwüt ngeni Hiskia pwe epwe atupukemi o emweningauekemi lon ekei lapalap. Ousap lükü i, pun esap wor eman koten ekewe mwü a tongeni angasa nöün aramas seni fän nemenien ekewe kingen Asiria. Ellet, ämi we Kot esap tongeni angasakemi seni fän nemeniei.”
2CH 32:16 Iwe, nöün Sanherip meilapen sounfiu ra chök alapala ar kapasingau usun Kot ewe Samol mi Lapalap, pwal usun nöün we chon angang Hiskia.
2CH 32:17 Sanherip a pwal makei echö toropwe o turunufasei ewe Samol mi Lapalap ewe Koten Israel, a apasa ekei ititen kapas lon, “Usun ekewe koten ekewe mwü resap tongeni angasa nöür aramas seni fän nemeniei, iei usun än Hiskia we Kot esap tongeni angasa nöün aramas seni fän nemeniei.”
2CH 32:18 Iwe, ra fokun leüömong le kapas lon fosun Juta ngeni ekewe aramasen Jerusalem mi nom won ewe tit, pwe repwe eniwokusuur o eniweer. Ei ra föri pwe repwe mecheres le liapeni ewe telinimw.
2CH 32:19 Ar fos usun ewe Koten Jerusalem a wewe ngeni ar fos usun än ekewe aramasen fanüfan kewe uluulun kot mi chök för ren pöün aramas.
2CH 32:20 Mürin, ewe king Hiskia me ewe soufos Aisea nöün Amos we mwän ra iotek o siötä läng pokiten ekei lapalap.
2CH 32:21 Iwe, ewe Samol mi Lapalap a tinala eman chon läng, a niela ekewe sounfiu mi pwora meinisin, ekewe sounemenem me ekewe meilap lon ewe leni ia nöün ewe kingen Asiria kewe sounfiu ra nom ie. Iei mine Sanherip a liwiniti fanüan fän säw. Nge lupwen a tolong lon imwen an kot, ekoch me lein nöün kewe mwän ra niela i me ikenan ren ketilas.
2CH 32:22 Iei usun ewe Samol mi Lapalap a amanaua Hiskia me chon Jerusalem seni Sanherip ewe kingen Asiria, pwal seni chon oputan meinisin. Iwe, Kot a föri pwe chon ekewe mwü ünükür ra kinamwe ngeniir.
2CH 32:23 Chomong aramas ra feito Jerusalem o uwato ar asor ren ewe Samol mi Lapalap. Ra pwal uwato ar lifang mi aüchea ren Hiskia ewe kingen Juta, pwe a iteföüla me ren chon ekewe mwü meinisin seni ei fansoun feila.
2CH 32:24 Iwe, lon ena fansoun Hiskia a samau o arap ngeni an epwe mäla. A iotek ngeni ewe Samol mi Lapalap, nge i a pälüeni o awora ngeni eu asisil, pwe a pöchökülsefäl.
2CH 32:25 Nge Hiskia esap kilisou ren ewe feiöch a fis ngeni, pun a lamalamtekia. Iei mine Kot a lingeringeriti i me chon Juta me Jerusalem.
2CH 32:26 Mürin, Hiskia a püsin atekisonätiu pokiten an lamalamtekia, pwal chon Jerusalem. Iei mine ewe Samol mi Lapalap esap apwüngüür lon fansoun manauen Hiskia.
2CH 32:27 Iwe, Hiskia a fokun pisekisekila o iteüöch. A föri an lenien iseis fän iten silifer me kolt, fän iten fau aüchea, nofitin mongö, tittin maun me sokopaten pisek mi mömong.
2CH 32:28 A aüetä imwen iseis fän iten föün wiich, wain me apüra seni föün olif, pwal lenien man fän iten sokopaten kow me sip.
2CH 32:29 A pwal aüetä telinimw fän itan. A fokun wor chomong nöün pwiin sip me kow, pun Kot a fang ngeni wöün mi somwola.
2CH 32:30 Ei mwän Hiskia a pinei michitän ewe koluk me asan lon Kihon o akusätiu pelilotou lon ewe telinimwen Tafit. Iwe, Hiskia a fefeitä lon an angang meinisin.
2CH 32:31 Nge lupwen ekewe chon künö seni ekewe samolun Papilon ra feito ren, pwe repwe ais usun ewe asisil mi fis lon ewe fanü, Kot a likiti ngeni püsin i, pwe epwe sotuni o silei meinisin mine a nom lon lelukan.
2CH 32:32 Nge lusun pworausen än Hiskia föför me an kewe föför mürina a makelong lon puken künan ewe soufos Aisea nöün Amos we mwän, pwal lon puken uruwon ekewe kingen Juta me Israel.
2CH 32:33 Iwe, Hiskia a mäla, nge ra peiaseni won ewe pal mi nom asen peiasen ekewe mwirimwirin Tafit. Iwe, chon Juta me chon Jerusalem meinisin ra pwärätä ar asamolu, lupwen a mäla. Nge Manasa nöün we mwän a siwili lon wisan wisen king.
2CH 33:1 Iwe, Manasa a ierini engol me ruu, lupwen a tolong lon wisan wisen king. A nom lon Jerusalem o nemeni Juta lon ükükün lime me limu ier.
2CH 33:2 Manasa a föri mine a ngau me fän mesen ewe Samol mi Lapalap ren an föri ekewe föför mi anioput chon ekewe mwü ra föri, ir chokewe ewe Samol mi Lapalap a asürela me mwen ekewe aramasen Israel.
2CH 33:3 Pun a aüsefälietä ekewe lenien fel won ekewe leni tekia, Hiskia saman we a atarela. A senätä rongen asor fän iten ewe anü Paal o föri uluulun ewe anüfefin Asera, a pwal fel ngeni ekewe fün läng meinisin.
2CH 33:4 Iwe, Manasa a senätä sokopaten rongen asor lon ewe imwenfel, iei ewe leni ewe Samol mi Lapalap a apasa usun, pwe aramas repwe fel ngeni ie tori feilfeilachök.
2CH 33:5 Nge Manasa a senätä rongen asor fän iten ekewe fün läng meinisin me lon ekewe ruu lenien mwich mwen ewe imwenfel.
2CH 33:6 Iwe, a kenala nöün ät pwe eu asor lon ewe lemolun Hinom, a pwal föri angangen souasisil me souwo me sourong o churi watawa me souawarawar. Manasa a föri chomong sokun föför mi ngau me fän mesen ewe Samol mi Lapalap o asonga i.
2CH 33:7 Manasa a föri eu uluulun anümwäl o anomu lon ewe imwenfel, iei ewe leni Kot a kapas usun ngeni Tafit pwal ngeni Salomon nöün we mwän, “Ei imwenfel me lon Jerusalem, iei ewe leni üa filätä seni lein lenien ekewe ainangen Israel meinisin, pwe aramas repwe fel ngeniei ie tori feilfeilachök.
2CH 33:8 Üsap chüen tinala chon Israel seni ewe fanü üa ngeni ar kewe lewo, are repwe chök tümwünüöchü meinisin mine üa allük ngeniir o aleasochisi ekewe allük me pwüüng meinisin ra angei seni Moses.”
2CH 33:9 Iwe, Manasa a atokala chon Juta me Jerusalem, pwe ra föri mine a ngau lap seni chon ekewe mwü ra föri, ir chokewe ewe Samol mi Lapalap a arosala me mwen ekewe aramasen Israel.
2CH 33:10 Iwe, ewe Samol mi Lapalap a kapas ngeni Manasa me nöün aramas, nge ir resap mochen aüselinga.
2CH 33:11 Iei mine ewe Samol mi Lapalap a mwüt ngeni ekewe sounemenemen ewe mwichen sounfiun ewe kingen Asiria, pwe repwe tolong lon Juta. Iwe, ra liapeni Manasa, ra kakiani o föti ngeni selipiras, mürin ra uwala Papilon.
2CH 33:12 Nge lupwen Manasa a nom lon riaföü, a tüngor pwe ewe Samol mi Lapalap än an kewe lewo we Kot epwe ümöümöch ngeni, a pwal fokun atekisonätiu me fän mesan.
2CH 33:13 A iotek ngeni Kot, nge i a etiwa an siö. A aüselinga an tüngor o aliwinisefäliela Jerusalem, pwe epwe nemenisefäli mwün. Mürin, Manasa a silei pwe ewe Samol mi Lapalap i Kot.
2CH 33:14 Ekoch fansoun mürin, Manasa a senisefälietä ewe tit me lükün ewe telinimwen Tafit lotoun ewe puächen koluk lon Kihon lon ewe lemol tori ewe lenien tolong ngeni ewe Asamalapen Ik, a sopwela ewe tit pwelin ewe leni itan Ofel o senätä pwe a fokun tekiatä. A pwal anomu sounemenemen ekewe mwichen sounfiu lon ekewe telinimwen Juta meinisin mi pöchökül tittir.
2CH 33:15 Manasa a atowu seni imwen ewe Samol mi Lapalap uluulun ekewe koten ekis me uluulun ewe anümwäl, a pwal ataela ekewe rongen asor i a senätä won ewe chuk ia imwen ewe Samol mi Lapalap a kaütä ie, pwal lon Jerusalem. Iwe, a atururela meinisin lükün ewe telinimw.
2CH 33:16 Manasa a pwal förisefäli än ewe Samol mi Lapalap rongen asor o eäni asoren kinamwe me asoren kilisou me won. Iwe, a allük ngeni chon Juta pwe repwe angang ngeni ewe Samol mi Lapalap ewe Koten Israel.
2CH 33:17 Iei mwo än ekewe aramas chüen asor lon ekewe lenien fel won ekewe leni tekia, nge ra chök asor ngeni ewe Samol mi Lapalap ar we Kot.
2CH 33:18 Nge lusun pworausen än Manasa föför, an iotek ngeni Kot, pwal ekewe kapas ekewe soufos ra eäni ngeni fän iten ewe Samol mi Lapalap ewe Koten Israel a makelong lon puken uruwon ekewe kingen Israel.
2CH 33:19 Än Manasa iotek, pwal usun än Kot etiwa an tüngor, an kewe tipis meinisin me an kirikiringau, pworausen ekewe leni tekia ia a aüetä ie ekewe lenien fel, pwal usun an aüetä uluulun ewe anüfefin Asera me ekewe uluulun anümwäl mwen an ekieksefäl, meinisin a makelong lon puken uruwon ekewe soufos.
2CH 33:20 Manasa a mäla, nge ra peiaseni lükün imwan. Iwe, Amon nöün we mwän a siwili lon wisan wisen king.
2CH 33:21 Iwe, Amon a ierini rüe me ruu, lupwen a tolong lon wisan wisen king. A nom lon Jerusalem o nemeni Juta lon ükükün ruu ier.
2CH 33:22 Amon a föri mine a ngau me fän mesen ewe Samol mi Lapalap, usun Manasa saman we a föri. A fel ngeni ekewe uluulun anümwäl meinisin, Manasa saman we a föri, o asor ngeniir.
2CH 33:23 Nge esap atekisonätiu o kul ngeni ewe Samol mi Lapalap, usun Manasa saman we a föri. Nge ei mwän Amon a chök alapala an tipis.
2CH 33:24 Iwe, nöün Amon kewe nöüwis ra rawangauei o niela me lon imwan.
2CH 33:25 Nge ekewe aramasen Juta ra niela chokewe meinisin mi rawangauei ewe king Amon o seikätä Josia nöün we mwän, pwe epwe siwili lon wisan wisen king.
2CH 34:1 Iwe, Josia a ierini walu, lupwen a tolong lon wisan wisen king. A nom lon Jerusalem o nemeni Juta lon ükükün ilik me eu ier.
2CH 34:2 Josia a föri mine a pwüng me fän mesen ewe Samol mi Lapalap o apirü mine Tafit an we lewo a föri, esap fokun aleasolap ngeni än Kot kewe allük.
2CH 34:3 Iwe, lon awaluen ierin mwün Josia, lupwen a chüen eman alüalät, a popuetä le fel ngeni än Tafit an we lewo we Kot. Nge lon engol me ruuen ierin mwün a popuetä le atai me lon Juta me Jerusalem ekewe lenien fel won ekewe leni tekia, ekewe uluulun ewe anüfefin Asera me ekewe uluulun anümwäl mi fal pwal ekewe uluulun anümwäl seni mächä.
2CH 34:4 Fän alon Josia ra amökätiu ekewe rongen asor ia aramas ra asor ngeni Paal ie. Ra ataetiu ekewe rongen asoren ötüöt mi nom aser o atatakisi ekewe uluulun ewe anüfefin Asera, ekewe uluulun anümwäl mi fal me ekewe uluulun anümwäl seni mächä. Iwe, ra fokun atatakisiir, pwe ra usun chök pwül moromor, o amorafeili ewe pwül won peiasen chokewe mi asor ngeniir.
2CH 34:5 A pwal kenala chün nöün Paal kewe souasor won ar kewe rongen asor. Ikei mine Josia a limetawu seni Juta me Jerusalem.
2CH 34:6 Iwe, lon ekewe telinimwen Manasa, Efraim me Simeon pwal tori Naftali, pwal lon ekewe leni mi tala ünükür,
2CH 34:7 Josia a amökätiu ekewe rongen asor o fokun atatakisi ekewe uluulun ewe anüfefin Asera me ekewe uluulun anümwäl, pwe ra wewe ngeni pwül moromor. A pwal ataetiu ekewe rongen asoren ötüöt meinisin lemenen unusen ewe fanü Israel. Mürin, Josia a liwiniti Jerusalem.
2CH 34:8 Iwe, lon ewe engol me waluen ierin mwün Josia, lupwen a wes me limeti ewe fanü me ewe imwenfel, ewe king Josia a tinala Safan nöün Asalia we mwän me Maseia kepinan ewe telinimw Jerusalem, pwal Joa nöün Joahas we mwän ewe soumak, pwe repwe försefäli mine a ta me won imwen ewe Samol mi Lapalap an we Kot.
2CH 34:9 Ra feila ren ewe souasor mi lap Hilkia o ngeni ewe moni aramas ra uwato lon ewe imwenfel. Iei ewe moni ekewe mwän seni ewe ainangen Lefi mi mamasa asamalapen ewe imwenfel ra ionifengeni seni chon ekewe ainangen Manasa me Efraim, seni chokewe meinisin mi chüen manau lon Israel, pwal seni chon ekewe ainangen Juta, Peniamin me chon Jerusalem meinisin.
2CH 34:10 Ei moni ra ngeni ekewe mwän mi emweni angangen imwen ewe Samol mi Lapalap, nge ir ra nöünöü ewe moni ren försefälin me kaüsefälin ewe imwenfel.
2CH 34:11 Ra ngeni ekewe taikü ei moni, pwal ngeni ekewe soukaü imw, pwe repwe kamö fau mi fal me pap fän iten ekewe aföü me ekewe pamping fän iten ekewe imw ekewe kingen Juta ra mwütätä pwe repwe tala.
2CH 34:12 Iwe, ekewe mwän ra angang fän allükülük. Nge Jahat me Opatia ekewe mwän seni ewe ainangen Lefi, ir mwirimwirin Merari, pwal Sekaria me Mesulam, ir mwirimwirin Kohat, ra nemeniir. Iwe, ekewe mwän seni ewe ainangen Lefi meinisin mi sipeöch le ettiki pisekin ettik
2CH 34:13 ra nemeni chokewe mi uwou mettoch mi chou o emweni meinisin mi föri sokopaten angang. Iwe, ekoch me lein ekewe mwän seni ewe ainangen Lefi ra pwal soumak, nöüwis me chon mamasa ekewe asamalap.
2CH 34:14 Iwe, lupwen ra uwawu ewe moni aramas ra uwato ren imwen ewe Samol mi Lapalap, ewe souasor Hilkia a küna ewe puken allük än ewe Samol mi Lapalap, ekewe allük Kot a ngeni Moses.
2CH 34:15 Mürin, Hilkia a üreni ewe seketeri Safan, “Üa küna ewe puken allük me lon imwen ewe Samol mi Lapalap.” Iwe, Hilkia a ngeni Safan ewe puk.
2CH 34:16 Nge Safan a uwala ewe puk ren ewe king o apworausa ngeni, “Noum kewe nöüwis ra föri meinisin mine ka awisa ngeniir.
2CH 34:17 Ra angei unusen ewe moni a nom lon imwen ewe Samol mi Lapalap o ngeni ekewe souemwenin angang me ekewe chon angang.”
2CH 34:18 Mürin, Safan a pwal üreni ewe king, “Ewe souasor Hilkia a ngeniei ei puk.” Iwe, Safan a aleani ewe puk ngeni ewe king.
2CH 34:19 Nge lupwen ewe king a rong kapasen ewe puken allük, a kamwei üfan fän an letipeta.
2CH 34:20 Mürin, ewe king a allük ngeni Hilkia me Ahikam nöün Safan we mwän, ngeni Apton nöün Mika we mwän, me ewe seketeri Safan, pwal ngeni Asaia nöün ewe king chon angang,
2CH 34:21 “Oupwe feila, oupwe aisini ewe Samol mi Lapalap fän itei, pwal fän iten chokewe mi chüen manau lon Israel me Juta usun ekewe kapas mi mak lon ei puk ra küna. Pun än ewe Samol mi Lapalap song a fokun watte ngenikich, pokiten ach kewe lewo resap aleasochisi alon, pwe repwe föri meinisin mine a mak lon ei puk.”
2CH 34:22 Iei mine Hilkia me chokewe ewe king a titi ra feila ren ewe soufos fefin Hulta mi nom lon aruuen kinikinin ewe telinimw Jerusalem. Pwülüen neminei Salum nöün Tikwa we mwän, nge Tikwa nöün Haras. Salum a wisen tütümwünü üföüfen lon ewe imwenfel. Iwe, ra apworausa ngeni neminewe mine a fis.
2CH 34:23 Nge Hulta a üreniir, “Oupwe liwinla o üreni ewe mwän mi tinikemiito rei,
2CH 34:24 pwe iei alon ewe Samol mi Lapalap ewe Koten Israel, ‘Üpwe awarato feiengau won ei leni, pwal won aramasan, ekewe anümamau meinisin mi mak lon ei puk mi alea ngeni ewe kingen Juta.
2CH 34:25 Pokiten ra likitieila o kenala apach mi pwokus ngeni pwal ekoch kot, ra pwal asongaei ren ar kewe uluulun anümwäl ra püsin föri. Iei mine ai song epwe watte ngeni ei leni, nge esap wesila.’
2CH 34:26 Nge iei usun mine oupwe üreni ewe kingen Juta mi tinikemiito pwe oupwe aisini ewe Samol mi Lapalap ewe Koten Israel, pwe iei alon, ‘Ka aüselinga ai kewe kapas mi mak lon ewe puk,
2CH 34:27 ka pwal apwetetei lelukom o atekisonok me fän mesei, lupwen ka rongorong ai kei kapasen afeiengau ngeni ei leni me aramasan, ka atekisonok me fän mesei, ka kamwei üfom o kechü me mwei, iei popun ngang üa aüselinga om iotek.
2CH 34:28 Iei mine, lupwen kopwe mäla, kopwe mäla fän kinamwe o peias ren om kewe lewo. Nge kosap küna ewe feiengau üpwe aworato won ei leni pwal won aramasan.’” Iwe, ekewe mwän ra liwinla o uwala ekei kapas ren ewe king.
2CH 34:29 Mürin, ewe king Josia a titi ekewe souakomwen Juta me Jerusalem, nge ir meinisin ra mwicheto ren.
2CH 34:30 Iwe, ewe king a feila ren imwen ewe Samol mi Lapalap, nge ekewe souakomwen Juta me ekewe chon Jerusalem meinisin, pwal ekewe souasor me ekewe mwän seni ewe ainangen Lefi, ekewe aramas kis me aramas lap, meinisin ra eti. Ewe king a aleani ngeniir kapasen lon ewe puken pwon meinisin ra küna me lon imwen ewe Samol mi Lapalap.
2CH 34:31 Nge ewe king a ütä lon lenian ren ewe ür o eäni eu pwon me fän mesen ewe Samol mi Lapalap, pwe epwe aleasochis ngeni ewe Samol mi Lapalap o apwönüetä an kewe allük me pwüüng ren unusen lelukan me unusen ngünün. Epwe pwal föri pwüngün kapasen ewe pwon mi mak lon ei puk.
2CH 34:32 Mürin, ewe king a pesei ngeni chokewe mi nom lon Jerusalem me Peniamin, pwe repwe tümwünü ei pwon. Iei mine ekewe chon Jerusalem ra aleasochisi pwüngün ewe pwon ra eäni ngeni än ar kewe lewo we Kot.
2CH 34:33 Iwe, Josia a ataela ekewe uluulun anümwäl mi anioput meinisin mi nom lon fanüen chon Israel o allük, pwe meinisin mi nom lon Israel repwe chök angang ngeni ewe Samol mi Lapalap ar we Kot. Iwe, lon unusen ränin manauen Josia resap tokola seni ar aleasochis ngeni ewe Samol mi Lapalap än ar kewe lewo we Kot.
2CH 35:1 Iwe, Josia a föri ewe Pasofer ngeni ewe Samol mi Lapalap me lon Jerusalem. Ra niela ekewe lamen Pasofer lon ewe engol me rüanün ränin ewe aeuin maram.
2CH 35:2 Josia a fili ngeni ekewe souasor en me an angang o apöchöküla leluker, pwe repwe föri angangen lon imwen ewe Samol mi Lapalap.
2CH 35:3 Iwe, a üreni ekewe mwän seni ewe ainangen Lefi mi aiti ngeni chon Israel meinisin än Kot kapas, ir ätekewe mi pin fän iten ewe Samol mi Lapalap, “Oupwe uwalong ewe pworofel lon ewe imwenfel Salomon nöün Tafit ewe kingen Israel we mwän a aüetä. Ousap chüen mwäreefetalei ei pworofel won afaremi. Iei oupwe angang ngeni ewe Samol mi Lapalap ämi we Kot, pwal ngeni nöün aramasen Israel.
2CH 35:4 Oupwe amolakemiitä lon en me än saman cho lon en me an mwich, o aleasochis ngeni mine Tafit ewe kingen Israel me Salomon nöün we mwän ra akota.
2CH 35:5 Oupwe ütä lon ewe leni mi pin lon en me an mwich seni ewe ainangen Lefi fän iten eu me eu famili seni ekewe aramasen Israel, pwe oupwe alisiir lon ewe angang.
2CH 35:6 Oupwe niela ekewe lamen Pasofer. Oupwe püsin apinikemi o amolätä ekewe mönün asor fän iten pwimi kewe ekewe chon Israel, pwe oupwe föri mine Moses a allük fän alon ewe Samol mi Lapalap.”
2CH 35:7 Iwe, Josia a fang ngeni ekewe aramasen Israel meinisin mi nom ren ükükün ilik ngeröü lam me nienifön kuuch, pwe ar mönün asoren Pasofer, pwal ülüngatngeröü ätemwänin kow. Ekei mönün asor ra towu seni nöün ewe king pwiin man.
2CH 35:8 Pwal nöün kewe nöüwis ra fangala nöür man seni mochenin letiper ngeni ekewe aramas, ngeni ekewe souasor me ekewe mwän seni ewe ainangen Lefi. Iwe, Hilkia, Sekaria me Jehiel, ir ekewe nöüwis lon imwenfel, ra ngeni ekewe souasor ükükün ruungeröü wonopükü lam me nienifön kuuch, pwe ar mönün asoren Pasofer, pwal ülüpükü ätemwänin kow.
2CH 35:9 Nge Konania me Semaia me Netanel pwin kewe, pwal Hasapia, Jeiel me Josapat, ekewe souemwenin chon ewe ainangen Lefi, ra ngeni ekewe mwän seni ewe ainangen Lefi ükükün limungeröü lam me nienifön kuuch, pwe ar mönün asoren Pasofer, pwal limepükü ätemwänin kow.
2CH 35:10 Iwe, lupwen ra wes le amolätä meinisin fän iten ewe Pasofer, ekewe souasor me ekewe mwän seni ewe ainangen Lefi ra ütä me lon lenier, usun mine ewe king a fen allük.
2CH 35:11 Ra niela ekewe lamen Pasofer, nge ekewe souasor ra äsupu ngeni ewe rongen asor ewe cha ra angei seni ekewe mwän seni ewe ainangen Lefi mi etika silin ekewe mönün asor.
2CH 35:12 Mürin, ra aimwüela ekewe mönün asoren kek, pwe repwe ineti ngeni ekewe aramasen Israel lon eu me eu ar kewe cho, pwe ir repwe eänir asor ngeni ewe Samol mi Lapalap, usun a fen mak lon än Moses puken allük. Iei usun ra pwal föri ngeni ekewe ätemwänin kow.
2CH 35:13 Iwe, ekewe mwän seni ewe ainangen Lefi ra arapa ewe lamen Pasofer won ekkei usun pwüngün allükün. Nge ekewe asor mi pin ra kuku lon nape, lon kama pwal lon paan, o müttir ineti ngeni ekewe aramasen Israel meinisin.
2CH 35:14 Mürin ei, ekewe mwän seni ewe ainangen Lefi ra amolätä ener pwal enen ekewe souasor, ir ekewe mwirimwirin Aaron, pun ekewe souasor ra achocho le eäni asor ekewe asoren kek me ekewe kinikinin kiris tori lepwin. Iei usun ra amolätä fän iter pwal fän iten ekewe souasor.
2CH 35:15 Nge ekewe chon köl ir mwirimwirin Asaf ra ütä lon lenier usun pwüngün ewe allük seni Tafit me Asaf, Heman me Jetutun nöün ewe king soufos. Iwe, ekewe chon masen ekewe asamalap mi ütä lon eu me eu kewe asamalap, resap feila seni lenier, pun pwiir kewe ekewe mwän seni ewe ainangen Lefi ra amolätä ewe Pasofer fän iter.
2CH 35:16 Iei usun unusen ewe angang ngeni ewe Samol mi Lapalap a fisitä lon ewe ränin fän iten ewe Pasofer, pwal fän iten ekewe asoren kek ra eäni won än ewe Samol mi Lapalap we rongen asor, usun ewe king Josia a allük.
2CH 35:17 Iwe, ekewe aramasen Israel meinisin mi feito ra föri ewe Pasofer lon ewe fansoun, ra pwal föri ewe chulapen mongö pilawa esap wor iis lon lon ükükün fisu rän.
2CH 35:18 Esap wor eu Pasofer usun ei a fis lon Israel seni fansoun manauen ewe soufos Samuel. Esap pwal wor eman lein ekewe kingen Israel me lom, a föri ei sokun Pasofer usun ei Josia a föri, fiti ekewe souasor me ekewe mwän seni ewe ainangen Lefi, ekewe chon Juta me chon Israel, pwal ekewe chon Jerusalem meinisin.
2CH 35:19 Iwe, ra föri ei Pasofer lon engol me waluen ierin mwün Josia.
2CH 35:20 Mürin än Josia awesala ekei mettoch meinisin fän iten ewe imwenfel, Neko ewe kingen Isip a feila pwe epwe maun lon Karkemis arun ewe chanpupu Oifrat. Iwe, Josia a feila pwe epwe maun ngeni.
2CH 35:21 Nge Neko a tinala chon künö ren pwe repwe üreni, “Met punum ngeniei, en kingen Juta? Ngang üsap feito pwe üpwe maun ngonuk ikenai, nge üpwe maun ngeni pwal eu mwü. Iwe, Kot a allük ngeniei pwe üpwe amüttiri ei maun. Kot a etiei, iei mine kopwe ükütiu le ü ngeni, pwe esap niikela.”
2CH 35:22 Iei mwo nge Josia esap fokun kul seni Neko. Esap mochen aüselinga ekewe kapas Neko a üreni fän alon Kot. A asokala üfan o feila maun ngeni me lon ewe maasiesin Mekito.
2CH 35:23 Iwe, lupwen ra maunfengen, nöün Neko kewe chon esefich ra peki ewe king Josia. Ewe king a üreni nöün kewe sounfiu, “Oupwe uweeila, pun üa fokun kinas.”
2CH 35:24 Iei mine nöün kewe sounfiu ra ekiewu Josia seni wan woken o ekietä won aruofochun wan woken. Mürin, ra uwala Jerusalem. Iwe, Josia a mäla, nge ra peiaseni lon peiasen ekewe king. Nge chon Juta me chon Jerusalem meinisin ra kechüeiti Josia.
2CH 35:25 Pwal ewe soufos Jeremaia a föri echö kölün kechü fän iten Josia. Nge ekewe chon köl mwän me fefin ra föüni iten Josia lon ar kölün kechü tori ikenai. Ei a wiliti eu örüni lon Israel. Iwe, ei köl a makelong lon ewe puken kölün kechü.
2CH 35:26 Nge lusun pworausen än Josia föför, an asamolu ewe Samol mi Lapalap me an aleasochisi mine a mak lon an kewe allük,
2CH 35:27 an kei föför meinisin seni lepoputan tori lesopolan an nemenem a makelong lon puken uruwon ekewe kingen Israel me Juta.
2CH 36:1 Iwe, aramasen ewe fanü ra filätä Joahas nöün Josia we mwän o seikätä pwe epwe siwili saman we lon wisan wisen king me lon Jerusalem.
2CH 36:2 Iwe, Joahas a ierini rüe me ülüngat, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram.
2CH 36:3 Mürin, Neko ewe kingen Isip a atowu Joahas seni wisan me lon Jerusalem. A pwal angei takises seni chon Juta ina epwe ükükün fisungeröü limepükü paun silifer me fik me limu paun kolt.
2CH 36:4 Iwe, Neko ewe kingen Isip a seikätä Eliakim pwin Joahas we, pwe epwe kingen Juta me Jerusalem, nge a siwili itan ngeni Jehoiakim. Nge Neko a angei Joahas o uweela Isip.
2CH 36:5 Iwe, Jehoiakim a ierini rüe me limu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Jehoiakim a föri mine a ngau me fän mesen ewe Samol mi Lapalap an we Kot.
2CH 36:6 Nge Nepukatnesar ewe kingen Papilon a feito o maun ngeni Jehoiakim. Iwe, a föti ngeni selimächä o uwala Papilon.
2CH 36:7 Nepukatnesar a pwal uwala ngeni Papilon ekoch pisek seni lon imwen ewe Samol mi Lapalap o anomuur lon imwan imwen king me lon Papilon.
2CH 36:8 Nge lusun pworausen än Jehoiakim föför, ekewe föför mi anioput a föriir me an kewe föför mi ngau, a makelong lon puken uruwon ekewe kingen Israel me Juta. Iwe, Jehoiachin nöün we mwän a siwili lon wisan wisen king.
2CH 36:9 Iwe, Jehoiachin a ierini engol me walu, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram me engol rän. A föri mine a ngau me fän mesen ewe Samol mi Lapalap.
2CH 36:10 Iwe, wesin ewe ier, ewe king Nepukatnesar a tinala chon künö pwe repwe uwala Jehoiachin Papilon fiti ekewe pisek aüchea seni lon imwen ewe Samol mi Lapalap. Mürin a seikätä Setekia pwin saman we, pwe epwe kingen Juta me Jerusalem.
2CH 36:11 Iwe, Setekia a ierini rüe me eu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier.
2CH 36:12 Setekia a föri mine a ngau me fän mesen ewe Samol mi Lapalap an we Kot. Esap atekisonätiu o aüselinga mine ewe soufos Jeremaia a eäni kapas ngeni fän alon ewe Samol mi Lapalap.
2CH 36:13 A pwal ü ngeni ewe king Nepukatnesar mi pesei ngeni an epwe eäni pwon fän akapel iten Kot pwe epwe allükülük. A chök tipepöchökül o tipeförea, nge esap kul ngeni ewe Samol mi Lapalap ewe Koten Israel.
2CH 36:14 Pwal ekewe souemwenin Juta, ekewe souasor me ekewe aramas ra fokun likitala Kot o apirü föförün chon ekewe mwü meinisin mi fokun anioput, ra pwal atai pinin imwen ewe Samol mi Lapalap, i a apini me lon Jerusalem.
2CH 36:15 Nge ewe Samol mi Lapalap än ar kewe lewo we Kot a chök sopwela le tinala nöün chon künö pwe repwe uwei an kapasen fön ngeniir, pun a tongei nöün aramas me imwan we imwenfel.
2CH 36:16 Nge ir ra chök sopwela le turunufasei nöün Kot kewe chon künö, ra oput an kapas o ämängaua nöün kewe soufos, tori ewe Samol mi Lapalap a aworato an lingeringer won nöün aramas, nge esap chüen wor eman a tongeni sü seni.
2CH 36:17 Iwe, Kot a tinala ren ekewe chon Juta ewe kingen Papilon, pwe epwe maun ngeniir. Ätei a niela nöür alüal ren ketilas me lon ar imwenfel, nge esap tongei alüal ika föpwül, chinlap mwän ika chon apwangapwang. Kot a atolongeer meinisin fän nemenien Nepukatnesar.
2CH 36:18 A pwal uwala Papilon pisekin ewe imwenfel meinisin, ekewe pisek kükün me watte, pwal ekewe pisek aüchea seni lon imwen ewe Samol mi Lapalap me ekewe pisek aüchea meinisin än ewe king me nöün kewe nöüwis.
2CH 36:19 Iwe, ra kenala ewe imwenfel o ataetiu tittin Jerusalem, ra pwal kenala ekewe imw watte o ataela ekewe pisek aüchea meinisin.
2CH 36:20 Iwe, ewe king Nepukatnesar a uwala Papilon chokewe mi chüen manau, nge ra wisen chon angang ngeni, pwal ngeni nöün kewe mwän, tori ewe mwün Persia a ütä.
2CH 36:21 Ren ei a pwönüetä mine Jeremaia a apasa fän alon ewe Samol mi Lapalap, pwe ewe fanü epwe pwapwaäsini an kewe ierin sapat. Lon ükükün ekewe rän meinisin ewe fanü a tala, a fisitä ekewe ierin sapat, tori fik ier ra wesila.
2CH 36:22 Iwe, lon aeuin ierin mwün Sirus ewe kingen Persia, ewe Samol mi Lapalap a amwökütükütü leluken Sirus pwe epwe föri pworausen asilesil ngeni unusen mwün. Ei a fis pwe epwe pwönüetä mine Jeremaia a apasa fän alon ewe Samol mi Lapalap. Iwe, Sirus ewe kingen Persia a maketiu,
2CH 36:23 “Iei aloi ngang Sirus ewe kingen Persia: Ewe Samol mi Lapalap, ewe Koten läng, a ngeniei ekewe mwün fanüfan meinisin. Iwe, a filiei pwe üpwe aüetä eu imwenfel fän itan me lon Jerusalem lon ewe fanü Juta. Ämi meinisin mi iteni nöün Kot aramas oupwe feila Jerusalem. Ewe Samol mi Lapalap ämi we Kot epwe etikemi.”
EZR 1:1 Iwe, lon aeuin ierin mwün Sirus ewe kingen Persia, ewe Samol mi Lapalap a amwökütükütü leluken Sirus pwe epwe föri pworausen asilesil ngeni unusen mwün. Ei a fis pwe epwe pwönüetä mine Jeremia a apasa fän alon ewe Samol mi Lapalap. Iwe, Sirus ewe kingen Persia a makeetiu,
EZR 1:2 “Iei aloi ngang Sirus ewe kingen Persia: Ewe Samol mi Lapalap, ewe Koten läng, a ngeniei ekewe mwün fanüfan meinisin. Iwe, a filiei pwe üpwe aüetä eu imwenfel fän itan me lon Jerusalem lon ewe fanü Juta.
EZR 1:3 Ämi meinisin mi iteni nöün Kot aramas, Kot epwe etikemi. Oupwe feila Jerusalem lon ewe fanü Juta, pwe oupwe aüsefälietä imwen ewe Samol mi Lapalap ewe Koten Israel, i ewe Kot mi nom Jerusalem.
EZR 1:4 Iwe, iteiten eman me eman mi chüen manau o mochen liwinsefäl, ese lifilifil ia a nom ie, epwe angei alilisin seni aramasen lenian. Epwe angei silifer me kolt, sokopaten pisek me man, pwal ekewe asor aramas ra fangala seni mochenin letiper fän iten ewe imwen Kot mi nom lon Jerusalem.”
EZR 1:5 Mürin, mwänirelan än semer kewe cho seni ewe ainangen Juta me Peniamin, ekewe souasor me ekewe aramas seni ewe ainangen Lefi, pwal ir meinisin Kot a amwökütükütü leluker ra ütä pwe repwe feila o aüsefälietä imwen ewe Samol mi Lapalap mi nom Jerusalem.
EZR 1:6 Nge chon arur meinisin ra alisiir ren pisek seni silifer, ren kolt me sokopaten pisek, ren man pwal ren pisek mi aüchea, fiti ekewe asor ra fangala seni mochenin letiper.
EZR 1:7 Iwe, ewe king Sirus a pwal atowu ekewe pisek Nepukatnesar a angei seni imwen ewe Samol mi Lapalap lon Jerusalem me lom o anomu lon imwen an kewe kot.
EZR 1:8 Iwe, Sirus ewe kingen Persia a atorolong fän nemenien Mitretat ewe chon tümwünü moni. Ätei a aleani ekewe pisek ngeni Sespasar ewe samolun Juta.
EZR 1:9 Iwe, iei iteiten ekewe pisek: Ilik sepi seni kolt, engeröü sepi seni silifer, rüe me tiu sepi fän iten apach mi pwokus,
EZR 1:10 ilik kükün sepi seni kolt me föpükü engol kükün sepi seni silifer, pwal engeröü sokopaten sepi.
EZR 1:11 Iwe, ekewe pisek meinisin seni kolt me silifer ükükür limungeröü föpükü. Ekei pisek meinisin Sespasar a uwala, lupwen i me ekewe chon oola ra towu seni Papilon o liwinsefäliti Jerusalem.
EZR 2:1 Iwe, chomong seni ekewe aramas mi oola lon Papilon ra liwinsefäliti Jerusalem me Juta lon en me poputän telinimwan. Ir chokewe ewe king Nepukatnesar a uweerela Papilon me lom.
EZR 2:2 Iwe, nöür kewe souemwen Serupapel, Jesua, Nehemia, Seraia, Reelaia, Mortekai, Pilsan, Mispar, Pikwai, Reum me Paana. Iei iteiten ekewe mwän seni ekewe aramasen Israel mi liwinsefäl seni ar oola:
EZR 2:3 Ekewe mwirimwirin Paros ükükün ruungeröü ipükü fik me ruoman.
EZR 2:4 Ekewe mwirimwirin Sefatia ükükün ülüpükü fik me ruoman.
EZR 2:5 Ekewe mwirimwirin Ara ükükün füpükü fik me limman.
EZR 2:6 Ekewe mwirimwirin Pahat-moap, ir mwirimwirin Jesua me Joap ükükün ruungeröü walupükü engol me ruoman.
EZR 2:7 Ekewe mwirimwirin Elam ükükün engeröü ruupükü lime me föman.
EZR 2:8 Ekewe mwirimwirin Satu tiwepükü faik me limman.
EZR 2:9 Ekewe mwirimwirin Sakai ükükün füpükü wone.
EZR 2:10 Ekewe mwirimwirin Pani ükükün wonopükü faik me ruoman.
EZR 2:11 Ekewe mwirimwirin Pepai ükükün wonopükü rüe me ülüman.
EZR 2:12 Ekewe mwirimwirin Askat ükükün engeröü ruupükü rüe me ruoman.
EZR 2:13 Ekewe mwirimwirin Atonikam ükükün wonopükü wone me wonoman.
EZR 2:14 Ekewe mwirimwirin Pikwai ükükün ruungeröü lime me wonoman.
EZR 2:15 Ekewe mwirimwirin Atin ükükün föpükü lime me föman.
EZR 2:16 Ekewe mwirimwirin Ater, ir mwirimwirin Hiskia, ükükün tiwe me waluman.
EZR 2:17 Ekewe mwirimwirin Pesai ükükün ülüpükü rüe me ülüman.
EZR 2:18 Ekewe mwirimwirin Jora ükükün ipükü engol me ruoman.
EZR 2:19 Ekewe mwirimwirin Hasum ükükün ruupükü rüe me ülüman.
EZR 2:20 Ekewe mwirimwirin Kipar ükükün tiwe me limman.
EZR 2:21 Iei iteiten ekewe mwän mi pwal liwinsefäl seni ar oola, lewor ra pop seni ekei telinimw: Seni Petleem ükükün ipükü rüe me ülüman.
EZR 2:22 Seni Netofa lime me wonoman.
EZR 2:23 Seni Anatot ükükün ipükü rüe me waluman.
EZR 2:24 Seni Asmafet ükükün faik me ruoman.
EZR 2:25 Seni Kiriat-jearim, Chefira me Peerot ükükün füpükü faik me ülüman.
EZR 2:26 Seni Rama me Kepa ükükün wonopükü rüe me eman.
EZR 2:27 Seni Mikmas ükükün ipükü rüe me ruoman.
EZR 2:28 Seni Petel me Ai ükükün ruupükü rüe me ülüman.
EZR 2:29 Seni Nepo ükükün lime me ruoman.
EZR 2:30 Seni Makpis ükükün ipükü lime me wonoman.
EZR 2:31 Seni pwal eu telinimw Elam ükükün engeröü ruupükü lime me föman.
EZR 2:32 Seni Harim ükükün ülüpükü rüe.
EZR 2:33 Seni Lot, Hatit me Ono ükükün füpükü rüe me limman.
EZR 2:34 Seni Jeriko ükükün ülüpükü faik me limman.
EZR 2:35 Seni Sena ükükün ülüngeröü wonopükü ilik.
EZR 2:36 Iei iteiten ekewe souasor mi liwinsefäl seni ar oola: Ekewe mwirimwirin Jetaia ir chon leimwen Jesua ükükün tiwepükü fik me ülüman.
EZR 2:37 Ekewe mwirimwirin Imer ükükün engeröü lime me ruoman.
EZR 2:38 Ekewe mwirimwirin Pasur ükükün engeröü ruupükü faik me füman.
EZR 2:39 Ekewe mwirimwirin Harim ükükün engeröü engol me füman.
EZR 2:40 Iei iteiten chon ewe ainangen Lefi mi liwinsefäl seni ar oola: Ekewe mwirimwirin Jesua me Katmiel, ir mwirimwirin Hotawia, ükükün fik me föman.
EZR 2:41 Iei iteiten ekewe chon köl: Ekewe mwirimwirin Asaf ükükün ipükü rüe me waluman.
EZR 2:42 Iei iteiten ekewe chon mamasa asamalapen imwenfel: Ekewe mwirimwirin Salum, Ater, Talmon, Akup, Hatita me Sopai, irfengen meinisin ipükü ilik me tiweman.
EZR 2:43 Ikkei ir ekewe chon angang ngeni imwenfel mi liwinsefäl seni ar oola: Ekewe mwirimwirin Siha, Hasufa me Tapaot,
EZR 2:44 Keros, Siaha me Paton,
EZR 2:45 Lepana, Hakapa me Akup,
EZR 2:46 Hakap, Samlai me Hanan,
EZR 2:47 Kittel, Kahar me Reaia,
EZR 2:48 Resin, Nekota me Kasam,
EZR 2:49 Usa, Pasea me Pesai,
EZR 2:50 Asna, Meunim me Nefisim,
EZR 2:51 Pakpuk, Hakufa me Harur,
EZR 2:52 Paslut, Mehita me Harsa,
EZR 2:53 Parkos, Sisera me Tema,
EZR 2:54 Nesia me Hatifa.
EZR 2:55 Ikkei ir mwirimwirin nöün Salomon kewe chon angang mi liwinsefäl seni ar oola: Ekewe mwirimwirin Sotai, Hasoferet me Peruta,
EZR 2:56 Jaala, Tarkon me Kittel,
EZR 2:57 Sefatia, Hatil, Pokeret-hasepaim me Ami.
EZR 2:58 Iwe, iteiten ekewe chon angang ngeni imwenfel me ekewe mwirimwirin nöün Salomon kewe chon angang ükükün ülüpükü tiwe me ruoman.
EZR 2:59 Ikkei iteiten chokewe mi feito seni ekewe telinimimw Telmela, Telharsa, Cherup, Atan me Imer, nge resap tongeni afata än semelaper kewe cho, ika ir mwirimwirin chon Israel:
EZR 2:60 Ekewe mwirimwirin Telaia, Topia me Nekota ükükün wonopükü lime me ruoman.
EZR 2:61 Nge seni lein ekewe souasor esap afat lewor: Ekewe mwirimwirin Hapaia, Hakos me Parsilai. Ätei a angei eman pwülüan seni ekewe fefin nöün Parsilai ewe re Kiliat o iteni iten semen pwülüan we.
EZR 2:62 Ikkei ir ekewe mwän ra kütta iter me lein chokewe mi makelong iter lon ewe puken uruwo, nge resap küna. Iei mine resap tongeni wiseni ewe wisen souasor, pun ra nom lon tettelin chon limengau.
EZR 2:63 Iwe, ewe kepina a üreniir pwe resap tongeni mongö seni ewe mongö mi unusen pin, tori epwe wor eman souasor mi tongeni kütta pwüngün ren ewe Urim me Tumim .
EZR 2:64 Iwe, iteiten unusen ewe mwichen aramas mi liwinsefäl seni ar oola ükükün faik me ruungeröü ülüpükü wone.
EZR 2:65 Nge nöür chon angang mwän me chon angang fefin resap alealong lon ei iteit ükükün fisungeröü ülüpükü ilik me füman. Mi pwal wor nöür chon köl mwän me fefin ükükün ruupükü.
EZR 2:66 Iwe, mi pwal wor nöür oris ükükün füpükü ilik me wonoman, nöür ätemwänin aas ükükün ruupükü faik me limman,
EZR 2:67 nöür kamel ükükün föpükü ilik me limman, nge nöür aas ükükün wonongeröü füpükü rüe.
EZR 2:68 Iwe, lupwen ekewe chon oola ra tori imwen ewe Samol mi Lapalap lon Jerusalem, ekoch me lein ekewe mwänirelan än semer kewe cho ra uwato ar asor seni mochenin letiper fän iten ewe imwen Kot, pwe epwe kaütä lon lenian me lom.
EZR 2:69 Iei ükükün mine ra tongeni fangala ngeni ewe angang: ina epwe ükükün engeröü ipükü paun kolt, ina epwe ükükün ülüngat ton silifer me ipükü üfen souasor.
EZR 2:70 Iwe, ekewe souasor, chon ewe ainangen Lefi me ekoch me lein ekewe aramas ra nonom lon Jerusalem me wisoposopun. Nge ekewe chon köl, ekewe chon mamasa asamalapen imwenfel, pwal ekewe chon angang ngeni ewe imwenfel me ekewe lusun chon Israel meinisin ra nonom lon en me an telinimw.
EZR 3:1 Iwe, lupwen a tori ewe afisuen maram, nge ekewe chon Israel ra nonom lon ar kewe telinimw, ra tipeeu le chufengen lon Jerusalem.
EZR 3:2 Mürin, Jesua nöün Jehosatak we mwän fiti chienan kewe souasor me Serupapel nöün Sealtiel we mwän fiti aramasan kewe ra senätä än ewe Koten Israel we rongen asor pwe repwe eäni asoren kek won, usun a mak lon ewe allük än Moses ewe aramasen Kot.
EZR 3:3 Inamwo ika ra niuokusiti ekewe aramas mi fen nom lon ewe fanü, nge ra chök senätä ewe rongen asor won lenian me lom o eäni asoren kek won ngeni ewe Samol mi Lapalap iteiten lesosor me lekuniol.
EZR 3:4 Iwe, ra föri ewe chulapen likachoch, usun a fen mak lon akotun. Ra eäni asoren kek iteiten rän aükük ngeni ükükün mine a fen pwüngüla fän iten eu me eu rän.
EZR 3:5 Lükün ei asor ra pwal eäni ekewe asoren kek mi fifis iteiten rän, ekewe asor mi fis lepopun maram, pwal lon än ewe Samol mi Lapalap kewe chulap meinisin mi kefilitä, me ekewe asor eman me eman a eäni seni mochenin letipan ngeni ewe Samol mi Lapalap.
EZR 3:6 Iwe, lon ewe aeuin ränin ewe afisuen maram ra popuetä le eäni asoren kek ngeni ewe Samol mi Lapalap. Nge longolongun imwenfelin ewe Samol mi Lapalap esamwo popuetä.
EZR 3:7 Mürin ra ngeni ekewe chon ses fau me ekewe taiku moni pwe liwinin ar angang. Ra pwal ngeni ekewe chon Siton me Tirus ener me ünümer me apüra, pwe repwe uwato irä setar seni Lepanon ngeni ewe matau o uweela tori Joppa, usun Sirus ewe kingen Persia a fen mwütätä.
EZR 3:8 Iwe, lon ewe aruuen maramen ewe aruuen ierin ar liwinla ren ewe imwen Kot lon Jerusalem, Serupapel nöün Sealtiel me Jesua nöün Jehosatak ra popuetä ewe angang, nge märärir kewe, ekewe souasor me chon ewe ainangen Lefi, pwal meinisin mi liwinla Jerusalem seni ar oola ra etiir. Iwe, ra awisa ekewe mwän seni ewe ainangen Lefi seni ier rüe feitä pwe repwe nemeni angangen ewe imwenfel.
EZR 3:9 Iwe, Jesua fiti nöün kewe mwän me aramasan, Katmiel me nöün kewe mwän, ir mwirimwirin Hotawia, pwal nöün Henatat me nöün nöün kewe fiti aramaser, ir meinisin seni ewe ainangen Lefi, ra nemeni ekewe chon angang ngeni ewe imwenfel.
EZR 3:10 Iwe, lupwen ekewe chon kaü imw ra föri longolongun imwenfelin ewe Samol mi Lapalap, ekewe souasor ra ütä rer fän üfer üföüfen souasor, pwal fän nöür kewe rappwa. Nge ekewe mwän seni ewe ainangen Lefi, ekewe mwirimwirin Asaf, ra ütä fän ar pisekin kaktai, pwe repwe mwareiti ewe Samol mi Lapalap usun Tafit ewe kingen Israel a aiti ngeniir me lom.
EZR 3:11 Iwe, ra kölün mwareiti ewe Samol mi Lapalap o kilisou ngeni, “Ewe Samol mi Lapalap a kirikiröch, an tong ellet ngeni chon Israel a nonom tori feilfeilachök.” Iwe, ekewe aramas ra leüömong le kökkö, lupwen ra mwareiti ewe Samol mi Lapalap, pun a fis longolongun ewe imwenfel.
EZR 3:12 Nge chomong me lein ekewe souasor me ekewe mwän seni ewe ainangen Lefi, pwal ekewe mwänirelan än semer kewe cho, ir ekewe chinlap mwän mi küna ewe aeuin imwenfel, ra leüömong le kechü, lupwen ra küna pwe a fis longolongun ei imwenfel. Nge pwal chomong me lein ekewe aramas ra fokun leüömong fän ar pwapwa.
EZR 3:13 Iwe, esap wor eman a tongeni weweiti ngingin ewe pwapwa fän leüömong me ngingin än ekewe aramas kechü, pun ngingir a fokun leüömong, pwe aramas ra tongeni rongorong me toau.
EZR 4:1 Iwe, lupwen ekewe chon oputa ekewe aramasen Juta me Peniamin ra rongorong, pwe ekewe chon oola mi liwinsefäl ra aüetä eu imwenfel ngeni ewe Samol mi Lapalap ewe Koten Israel,
EZR 4:2 ra feito ren Serupapel me ekewe mwänirelan än semelaper kewe cho o üreniir, “Oupwe mwüt ngenikem pwe aipwe etikemi le aüetä ewe imwenfel. Pun äm aia fel ngeni ewe Kot ämi oua fel ngeni. Äm aia pwal asor ngeni seni fansoun mwün Esar-haton ewe kingen Asiria mi tinikeemito ikei.”
EZR 4:3 Nge Serupapel, Jesua me ekewe mwänirelan än semer kewe cho me lon Israel ra üreniir, “Esap tufich pwe oupwe etikem le aüetä eu imwenfel fän iten äm we Kot. Äm chök aipwe aüetä ei imw fän iten ewe Samol mi Lapalap ewe Koten Israel, usun Sirus ewe kingen Persia a allük ngenikem.”
EZR 4:4 Mürin, ekewe aramas mi nom lon ewe fanü ra atipemwaramwara ekewe chon Juta o aniuoksuur pwe resap aüetä ewe imwenfel.
EZR 4:5 Ra pwal ngeni ekoch meilapen ewe mwün Persia lifangen amichimich pwe repwe epetiir lon ar angang. Ei ra föri lon fansoun mwün Sirus, pwal tori fansoun mwün Tarius ekewe kingen Persia.
EZR 4:6 Iwe, lon mwün Asuworos, lepoputän an nemenem, ekewe chon oputa chon Juta me Jerusalem ra makei echö toropwen atipisiir.
EZR 4:7 Iwe, pwal lon fansoun mwün Artaksasta ewe kingen Persia, Pislam, Mitretat me Tapel pwal chiechier kewe ra makei echö toropwe ngeni Artaksasta. Ewe toropwe a mak lon fosun Aramaik, pwal lon itechikin Aramaik.
EZR 4:8 Pwal Rehum ewe sounemenem me Simsai ewe soumak ra makei echö toropwen atutur fän iten Jerusalem ngeni ewe king Artaksasta lon ei lapalap:
EZR 4:9 Seni Rehum ewe sounemenem, Simsai ewe soumak, pwal chiechier kewe, ekewe soukapwüng, ekewe kepina, ekewe nöüwis, ekewe chon Persia, chon Erek, chon Papilon, pwal ekewe chon Elam seni Susa
EZR 4:10 me lusun chon ekewe mwü, Osnapar ätewe mi tekia o iteföüla a uweerela o anomuur lon ekewe telinimwen Samaria, pwal lon ewe fanü lotoun ewe chanpupu Oifrat.
EZR 4:11 Iei masouen ewe toropwe ra tinala, “Ngeni ewe king Artaksasta seni noum kewe chon angang, ekewe mwän seni ewe fanü lotoun ewe chanpupu Oifrat:
EZR 4:12 Aia mochen asile ngonuk, en äm king, pwe ekewe chon Juta mi feila senuk o feito ikei ra nonom Jerusalem. Ir ra aüsefälietä ewe telinimw mi ngau o afitikoko chök. Ra försefäli longolongun ewe telinimw o angang ngeni tittin kewe.
EZR 4:13 Iei aia mochen asile ngonuk, en äm king, pwe ika ei telinimw epwe kaüsefäl o tittin kewe repwe wesila, ekewe aramas resap chüen mönätiu ar kewe sokopaten takises, nge än ewe king moni tolong epwe kisikisila.
EZR 4:14 Nge pokiten äm aia angei äm tufich senuk, en äm king, äm aisap pwal mochen küna om itengau, iei mine äm aia tinala ei toropwe reöm o asile ngonuk ei föför,
EZR 4:15 pwe kopwe tongeni kütta pworausen ei telinimw lon ekewe puken uruwo än ekewe king ra akom mwom. Iwe, kopwe küna o silei me lon ei puken uruwo pwe ei telinimw eu telinimw mi afitikoko chök, a aosukosuka ekewe king me ekewe fanü, nge seni me lomlom aramasen lon ra chök päpälüeni mwü. Iei popun pwe ei telinimw a tala.
EZR 4:16 Äm aia asile ngonuk, en äm king, pwe ika ei telinimw epwe kaüsefäl o tittin kewe repwe wesila, mürin esap chüen wor om nemenem lon ewe fanü lotoun ewe chanpupu Oifrat.”
EZR 4:17 Iwe, ewe king a tinala pälüen ewe toropwe: “Üa kapong ngeni Rehum ewe sounemenem me Simsai ewe soumak, pwal ngeni chiechier kewe mi nom lon Samaria me ewe fanü lotoun ewe chanpupu Oifrat.
EZR 4:18 Ewe toropwe oua tinato rei, ra aleani o awewe ngeniei lon fosun fanüei.
EZR 4:19 Üa föri eu allük pwe repwe kütta pworausen ewe telinimw. Iwe, ra küna pwe ei telinimw a ü ngeni ekewe king seni me lomom, a pwal pwä pwe a uren chon afitikoko me chon pälüeni mwü.
EZR 4:20 Iwe, mi wor king mi pwora ra nemenem me lon Jerusalem pwal lon unusen ewe fanü lotoun ewe chanpupu Oifrat, nge aramas ra mönätiu sokopaten takises ngeniir.
EZR 4:21 Iei mine oupwe föri eu allük pwe ekei aramas repwe ükütiu le aüsefälietä ei telinimw tori üpwe pwal föri eu allük.
EZR 4:22 Oupwe tümwünü pwe ousap mang ngeni pwüngün ei allük, pwe ei osukosuk esap wattela o angauala winnen mwüi.”
EZR 4:23 Iwe, lupwen ewe toropwe seni ewe king Artaksasta a alea me fän mesen Rehum me Simsai ewe soumak pwal chiechier kewe, ra müttir feila Jerusalem ren ekewe chon Juta o aükätiu ar angang fän pöchökül.
EZR 4:24 Mürin, angangen won ewe imwen Kot lon Jerusalem a kaüla tori aruuen ierin mwün Tarius ewe kingen Persia.
EZR 5:1 Iwe, lon ena fansoun ekewe soufos Akai me Sekaraia eman mwirimwirin Ito ra osuni ngeni ekewe chon Juta mi nom lon Juta me Jerusalem fän iten ewe Koten Israel, pun Ngünün a nonom wor.
EZR 5:2 Mürin Serupapel nöün Sealtiel me Jesua nöün Jehosatak ra ütä o popuetä le aüsefälietä ewe imwen Kot lon Jerusalem. Nge nöün Kot kewe soufos ra etiir o alisiir.
EZR 5:3 Iwe, lon ewe chök fansoun Tatenai kepinan ewe fanü lotoun ewe chanpupu Oifrat me Setar-posenai pwal chiechier kewe ra feila rer o aisiniir, “Iö a mwütätä ngenikemi pwe oupwe aüetä ei imwenfel o awesala?
EZR 5:4 Ikafa iten ekewe mwän mi aüetä ei imw?”
EZR 5:5 Nge Kot a mamasa ekewe souakomwen chon Juta. Iwe, ekewe nöüwisen Persia resap aükätiu ar angang tori echö repoot epwe tori Tarius, nge Tarius epwe tinala pälüan lon echö toropwe.
EZR 5:6 Iei ewe repoot Tatenai kepinan ewe fanü lotoun ewe chanpupu Oifrat me Setar-posenai pwal chiechian kewe kepina mi nom lon ewe fanü lotoun ewe chanpupu Oifrat ra tinala ren ewe king Tarius.
EZR 5:7 Iwe, iei masouen ewe repoot: “Ngeni ewe king Tarius, aia äleäl amwo epwe wor kinamwe lon mwum.
EZR 5:8 Äm aia mochen asile ngonuk, en äm king, pwe aia feila lon ewe fanü Juta ren imwenfelin ewe Kot mi tekia. Ra aüetä ewe imw ren fau mi fokun watte o iseis irä lon ekewe etiip, nge ar angang a fokun fisiöch o fefeitä.
EZR 5:9 Mürin aia kapas ngeni ekewe souakom o aisiniir, ‘Iö a mwütätä ngenikemi pwe oupwe aüsefälietä ei imwenfel o awesala?’
EZR 5:10 Aia pwal aisiniir iter pwe aipwe asile ngonuk iten ekewe mwän mi emweniir.
EZR 5:11 Iwe, iei usun mine ra pälüeni ngenikem, ‘Äm aia chon angang ngeni ewe Koten läng me fanüfan. Aia aüsefälietä ewe imwenfel a fen kaü lon chomong ier ra la. Eman king mi tekia lon Israel a aüetä ewe imwenfel o awesala.
EZR 5:12 Nge pokiten äm kewe lewo ra asonga ewe Koten läng, iei mine a atolongeer fän nemenien Nepukatnesar ewe kingen Papilon, ewe re Kaltea. Ätei a ataela ei imwenfel o uwala ekewe aramas ngeni Papilon.
EZR 5:13 Nge lon aeuin ierin mwün Sirus ewe king mi nemeni Papilon, Sirus a föri eu allük pwe ei imwen Kot epwe kaüsefäl.
EZR 5:14 Iwe, a pwal atowu ekewe pisek seni kolt me silifer Nepukatnesar a angei seni ewe imwenfel lon Jerusalem o uwala lon ewe imwenfelin an kewe kot lon Papilon. Ekei pisek ewe king Sirus a ngeni eman mwän itan Ses-pasar. Ätewe ewe king a seikätä pwe epwe kepina lon Juta.
EZR 5:15 Iwe, Sirus a üreni Ses-pasar, “Kopwe angei ekei pisek, kopwe feila o anomuur lon ewe imwenfel lon Jerusalem, nge kopwe pwal aüsefälietä ewe imwen Kot won wesewesen lenian me lom.”
EZR 5:16 Mürin, ei mwän Ses-pasar a feito o föri longolongun ewe imwen Kot lon Jerusalem. Iwe, seni ewe fansoun tori lon ei otun aia chök akaüetä, nge esamwo wesila.’
EZR 5:17 Iei mine ika a öch me reöm, en äm king, kopwe kütta lon än ekewe king puken uruwo lon Papilon pwe kopwe küna ika ei allük a pwüngüla me ren ewe king Sirus fän iten kaüsefälin ei imwen Kot lon Jerusalem. Mürin kopwe asile ngenikem mefiom won ei pworaus.”
EZR 6:1 Mürin, ewe king Tarius a föri eu allük pwe repwe kütta ei pworaus lon än ekewe king puken uruwo mi iseis lon Papilon.
EZR 6:2 Iwe, ra küna eu puk me lon ewe telinimw Ekpatana lon ewe fanü Metia. Iei usun mine a mak lon:
EZR 6:3 “Lon aeuin ierin mwün ewe king Sirus, i a föri eu allük fän iten ewe imwen Kot lon Jerusalem epwe kaüsefäl, pwe epwe eu lenien asor me keni asor. Tekian ewe imw epwe ükükün tiwe fiit, nge chölapan epwe pwal tiwe fiit.
EZR 6:4 Etippan kewe epwe wor ülüngat sässärin fau mi watte me eu sässärin irä, nge liwinin ewe angang epwe towu seni än ewe king lenien iseis moni.
EZR 6:5 Iwe, ekewe pisek seni kolt me silifer, Nepukatnesar a angei seni ewe imwenfel lon Jerusalem o uwala Papilon, repwe aliwinala ngeni ewe imwenfel lon Jerusalem lon en me lenian. Oupwe iseniir lon ewe imwen Kot.”
EZR 6:6 Mürin Tarius a makei pälüen ewe toropwe: “En Tatenai kepinan ewe fanü lotoun ewe chanpupu Oifrat me Setar-posenai, pwal ämi chiechier kewe mi nom lon ewe fanü lotoun ewe chanpupu Oifrat, oupwe feila seni ewe leni.
EZR 6:7 Ousap epeti angangen ewe imwen Kot. Ewe kepinan chon Juta me ekewe souakom repwe aüsefälietä ei imwen Kot won wesewesen lenian me lom.
EZR 6:8 Nge üa pwal föri eu allük usun mine oupwe föri ngeni ekei souakomwen chon Juta fän iten kaüsefälin ei imwen Kot. Ewe liwin epwe unus ngeni ekei mwän. Epwe towu seni än ewe king lenien iseis moni seni takisesin ewe fanü lotoun ewe chanpupu Oifrat, pwe ewe angang esap kaüla.
EZR 6:9 Iteiten rän oupwe pwal ngeni ekewe souasor lon Jerusalem meinisin mine ra mochen, nge ousap amwöchü och seniir. Oupwe ngeniir nienifön ätemwänin kow, ätemwänin sip ika sip fän iten asoren kek ngeni ewe Koten läng, pwal wiich, salt, wain ika apüra,
EZR 6:10 pwe repwe tongeni eäni ekewe asor mi fich ngeni ewe Koten läng, repwe pwal iotek fän iten manauei me nei kewe mwän.
EZR 6:11 Üa pwal föri eu allük pwe ika eman a aleasolap ngeni ei allük, efoch irä epwe uttuwu seni imwan, aramas repwe akeni lesopun o apwera ngeni, nge imwan epwe tala o wiliti eu ioien pipi.
EZR 6:12 Amwo ewe Kot mi filätä ei leni pwe aramas repwe fel ngeni ie, epwe asapwilätiu ekewe king me chon ekewe mwü mi ü ngeni ei allük o ataela ei imwen Kot lon Jerusalem. Ngang Tarius üa föri ewe allük. Aramas repwe tichik le aleasochis ngeni.”
EZR 6:13 Mürin, Tatenai kepinan ewe fanü lotoun ewe chanpupu Oifrat me Setar-posenai, pwal chiechier kewe ra tichik le apwönüetä mine ewe king a allük ngeniir.
EZR 6:14 Iei mine ekewe souakomwen chon Juta ra sopwela le aüsefälietä ewe imwenfel, nge ar angang a fisiöch, pun ekewe soufos Akai me Sekaraia ra apöchöküla leluker ren ar afalafal. Iwe, ra awesala ar angang ngeni ewe imwenfel fän än ewe Koten Israel allük, pwal fän än Sirus, Tarius me Artaksasta ekewe kingen Persia allük.
EZR 6:15 Iwe, ei imwenfel a wesila lon aülüngatin ränin ewe maram Atar lon awonuen ierin mwün ewe king Tarius.
EZR 6:16 Mürin, ekewe aramasen Israel, ir ekewe souasor me ekewe mwäns seni ewe ainangen Lefi, pwal chokewe meinisin mi liwinto seni ar oola ra föri efinünen ei imwen Kot fän pwapwa.
EZR 6:17 Iwe, lon efinünen ei imwen Kot ra eäni asor ükükün ipükü ätemwänin kow, ruupükü ätemwänin sip me föpükü nienifön sip. Nge fän iten chon Israel meinisin ra eäni asoren tipis ükükün engol me ruoman ätemwänin kuuch aükük ngeni iteiten ekewe engol me ruu ainangen Israel.
EZR 6:18 Ra pwal awisa ekewe souasor me ekewe mwän seni ewe ainangen Lefi lon en me an mwich fän iten ewe angangen Kot lon Jerusalem, usun a fen mak lon än Moses we puk.
EZR 6:19 Iwe, lon ewe engol me rüanün ränin ewe aeuin maram chokewe mi liwinto seni ar oola ra föri ewe Pasofer.
EZR 6:20 Ekewe souasor me ekewe mwän seni ewe ainangen Lefi ra tipepök le alimöchüür, pwe ir meinisin ra limöch le föri ewe angang. Iwe, ekewe mwän seni ewe ainangen Lefi ra niela ekewe mönün Pasofer fän iten chokewe meinisin mi liwinto seni ar oola, fän iten chiechier kewe ekewe souasor, pwal fän iten püsin ir.
EZR 6:21 Iwe, ekewe aramasen Israel mi liwinto seni ar oola ra ochei ekewe mönün Pasofer, pwal meinisin mi chu ngeniir, ir chokewe mi aimwürela seni än aramasen ewe fanü kewe föför mi ngau, pwe repwe fel ngeni ewe Samol mi Lapalap ewe Koten Israel.
EZR 6:22 Lon ükükün fisu rän ra pwal föri ewe chulapen mongö pilawa esap wor iis lon fän pwapwa, pun ewe Samol mi Lapalap a apwapwaar ren an akulu leluken ewe kingen Asiria ngeniir, pwe a alisiir lon angangen ewe imwen Kot, ewe Koten Israel.
EZR 7:1 Mürin ei pworaus lon mwün Artaksasta ewe kingen Persia, mi wor eman mwän itan Esra. Iei uruwon an kewe lewo: Esra nöün Seraia we mwän, Seraia nöün Asaria, Asaria nöün Hilkia,
EZR 7:2 Hilkia nöün Salum, Salum nöün Satok, Satok nöün Ahitup,
EZR 7:3 Ahitup nöün Amaria, Amaria nöün Asaria, Asaria nöün Meraiot,
EZR 7:4 Meraiot nöün Serahia, Serahia nöün Usi, Usi nöün Puki,
EZR 7:5 Puki nöün Apisua, Apisua nöün Pinehas, Pinehas nöün Eleasar, nge Eleasar nöün Aaron ewe souasor mi lap.
EZR 7:6 Ei mwän Esra eman soumak mi fokun silei ekewe allük ewe Samol mi Lapalap ewe Koten Israel a ngeni Moses. Iwe, pokiten ewe Samol mi Lapalap an we Kot a ümöümöch ngeni, iei mine ewe king a mwüt ngeni meinisin mine a tüngor.
EZR 7:7 Iwe, lon ewe afisuen ierin mwün ewe king Artaksasta, Esra me ekoch aramasen Israel ra sai seni Papilon o feila Jerusalem fiti ekoch souasor me chon ewe ainangen Lefi, chon köl, chon mamasa asamalapen imwenfel me chon angang ngeni ewe imwenfel.
EZR 7:8 Iwe, ra tori Jerusalem lon ewe alimuen maram, lon afisuen ierin mwün ewe king.
EZR 7:9 Lon aeuin ränin ewe aeuin maram Esra a popuetä an sai seni Papilon, nge lon aeuin ränin ewe alimuen maram a tori Jerusalem, pun an we Kot a ümöümöch ngeni.
EZR 7:10 Iwe, Esra a lechüni o achocho le kaiö än ewe Samol mi Lapalap kewe allük pwe epwe apwönüretä, epwe pwal aiti ngeni chon Israel ekewe allük me pwüüng.
EZR 7:11 Iwe, iei masouen ewe toropwe ewe king Artaksasta a ngeni ewe souasor Esra, i ewe soumak mi silelapei än ewe Samol mi Lapalap kewe allük me pwüüng fän iten chon Israel,
EZR 7:12 “Seni Artaksasta ewe kingen king kana ngeni ewe souasor Esra, i ewe soumaken ekewe allük än ewe Koten läng.
EZR 7:13 Iei ngang üa föri eu allük pwe ekewe aramasen Israel meinisin, ekewe souasor me chon ewe ainangen Lefi mi nom lon mwüi, are ra mochen feila Jerusalem, repwe tongeni etuk.
EZR 7:14 Pun ngang ewe king me nei kewe füman souöüröür aia tinukela pwe kopwe kütta pworausen Juta me Jerusalem o pi ika ra aleasochisi än om we Kot kewe allük mi nom reöm.
EZR 7:15 Kopwe pwal uwala ewe silifer me kolt ngang me nei kewe souöüröür aia fangala seni mochenin letipem ngeni ewe Koten Israel, imwan we imwenfel a nom lon Jerusalem.
EZR 7:16 Kopwe pwal uwala ewe silifer me kolt kopwe ioni lon unusen ewe fanü Papilon, pwal ekewe asor seni ekewe aramasen Israel me ekewe souasor repwe fangala seni mochenin letiper fän iten imwen ar we Kot lon Jerusalem.
EZR 7:17 Ren ei moni kopwe asochisi le kamö ekewe ätemwänin kow, ekewe ätemwänin sip me ekewe nienifön sip fitifengen me ekewe asoren mongö me asoren ün. Kopwe eäniir asor won ewe rongen asor lon imwen om we Kot lon Jerusalem.
EZR 7:18 Nge lusun ewe silifer me kolt oua tongeni möni ngeni mine a öch me reöm me pwiüm kewe chon Israel, usun mine a fich ngeni letipen om we Kot.
EZR 7:19 Iwe, ekewe pisek ra ngonuk fän iten angangen lon imwen om we Kot, kopwe uwala meinisin fän mesen ewe Kot lon Jerusalem.
EZR 7:20 Nge ekewe pisek meinisin ka chüen mochen aea fän iten imwen om we kot, kopwe angei mön seni än ewe king lenien iseis moni.
EZR 7:21 Nge ngang Artaksasta ewe king üa allük ngeni ämi meinisin chon iseis moni lon ewe fanü lotoun ewe chanpupu Oifrat, pwe oupwe müttir awora ngeni ewe souasor Esra, ewe soumaken ewe allük än ewe Koten läng, meinisin mine a tüngor senikemi.
EZR 7:22 Epwe tori ükükün rüanü ton silifer, limepükü tuuk wiich, limepükü lime kalon wain me limepükü lime kalon apüra, nge salt esap wor kaükün.
EZR 7:23 Meinisin mine ewe Koten läng a allük fän iten imwan imwenfel epwe wesewesen fis, pwe an lingeringer esap pur woi me nei kewe mwän.
EZR 7:24 Üa pwal asile ngenikemi pwe esap wor eman a tongeni angei ekewe sokopaten takises seni ekewe souasor, seni chon ewe ainangen Lefi, ekewe chon köl, ekewe chon mamasa asamalapen imwenfel, ekewe chon angang ngeni ewe imwenfel ika pwal seni ekewe ekoch chon angang ngeni ei imwen Kot.
EZR 7:25 Nge en Esra, lon om tipachem om Kot a fang ngonuk, kopwe filätä ekewe samol me soukapwüng, repwe eäni kapwüngün ekewe aramas meinisin mi nom lon ewe fanü lotoun ewe chanpupu Oifrat, chokewe meinisin mi silei än om we Kot kewe allük. Nge chokewe resamwo silei ekewe allük, kopwe aiti ngeniir.
EZR 7:26 Nge iteiten eman me eman esap mochen aleasochisi än om we Kot allük pwal än ewe king allük, ätewe epwe tolong lon kapwüng o angei müttiri pwüngün an kapwüng ika epwe mäla, ika epwe sü seni fanüan, ika repwe angei mettochun meinisin, ika epwe tolong lon fötek.”
EZR 7:27 Iwe, Esra a apasa, “Üa mwareiti ewe Samol mi Lapalap än äm kewe lewo we Kot mi atolonga ei sokun ekiek lon leluken ewe king, pwe epwe alinga imwen ewe Samol mi Lapalap lon Jerusalem.
EZR 7:28 Kot a pwal föri pwe üa küna ümöümöch me ren ewe king me nöün kewe chon öüröür pwal nöün kewe nöüwis meinisin mi wor maner. Nge pokiten üa silei pwe ewe Samol mi Lapalap ai we Kot a ümöümöch ngeniei, üa tipepwora o apöchöküla ngeni ekewe souemwenin Israel pwe repwe etiei le liwinla Jerusalem.”
EZR 8:1 Ikkei iteiten ekewe mwänirelan än semer kewe cho me chokewe mi makelong iter lon ewe iteit ra etiei le feila seni Papilon o liwinla Jerusalem lon mwün ewe king Artaksasta:
EZR 8:2 Seni ekewe mwirimwirin Pinehas: Kersom, seni ekewe mwirimwirin Itamar: Taniel, seni ekewe mwirimwirin Tafit: Hatus nöün Sekania.
EZR 8:3 Seni ekewe mwirimwirin Paros: Sekaraia fiti ükükün ipükü lime mwän mi makelong iter lon ewe iteit.
EZR 8:4 Seni ekewe mwirimwirin Pahat-moap: Eliehonai nöün Seraia, nge ruupükü mwän ra eti.
EZR 8:5 Seni ekewe mwirimwirin Satu: Sekania nöün Jahasiel, nge ülüpükü mwän ra eti.
EZR 8:6 Seni ekewe mwirimwirin Atin: Epet nöün Jonatan, nge lime mwän ra eti.
EZR 8:7 Seni ekewe mwirimwirin Elam: Jesaia nöün Atalia, nge fik mwän ra eti.
EZR 8:8 Seni ekewe mwirimwirin Sefatia: Sepatia nöün Mikael, nge walik mwän ra eti.
EZR 8:9 Seni ekewe mwirimwirin Joap: Opatia nöün Jehiel, nge ruupükü engol me waluman mwän ra eti.
EZR 8:10 Seni ekewe mwirimwirin Pani: Selomit nöün Josifia, nge ipükü wone mwän ra eti.
EZR 8:11 Seni ekewe mwirimwirin Pepai: Sekaria nöün Pepai, nge rüe me waluman mwän ra eti.
EZR 8:12 Seni ekewe mwirimwirin Askat: Johanan nöün Hakatan, nge ipükü engol mwän ra eti.
EZR 8:13 Seni ekewe mwirimwirin Atonikam, ir chokewe mi liwinla Jerusalem lon eu fansoun mürin, iter: Elifelet, Jeuel me Semaia, nge wone mwän ra etiir.
EZR 8:14 Seni ekewe mwirimwirin Pikwai: Utai me Sakur, nge fik mwän ra etiir.
EZR 8:15 Iwe, üa amwichafengeni ekei aramas arun ewe chanpupu mi pupu ngeni ewe telinimw Ahawa. Ikenan aia nonom lon ükükün ülüngat rän. Iwe, lupwen üa nenengeni ewe mwichen aramas, üa küna pwe mi wor souasor leir, nge esap wor eman chon ewe ainangen Lefi.
EZR 8:16 Mürin üa titi ekewe souemwen Elieser, Ariel, Semaia, Elnatan, Jarip, Elnatan, Natan, Sekaria me Mesulam, üa pwal titi Joiarip me Elnatan, ir mwän mi silelap.
EZR 8:17 Iwe, üa tinirela ren Ito ewe souemwen lon ewe leni Kasifia o üreniir, pwe repwe tüngor ngeni Ito me pwin kewe ekewe chon angang ngeni ewe imwenfel, pwe repwe tinato rem chon angang ngeni Kot lon ewe imwenfel.
EZR 8:18 Iwe, pokiten äm we Kot a ümöümöch ngenikem, ra tinato rem eman mwän mi sipeöch le angang itan Serepia fiti nöün kewe mwän me aramasan ükükün engol me waluman. Iwe, Serepia eman mwirimwirin Mali, nge Mali nöün Lefi, nge Lefi nöün Israel.
EZR 8:19 Ra pwal tinato Hasapia me Jesaia, ir mwirimwirin Merari, fiti pwiir me nöür kewe ükükün rüe.
EZR 8:20 Iwe, ruupükü rüe chon angang ngeni ewe imwenfel ra pwal chu ngeniir, ir mwirimwirin chokewe Tafit me nöün kewe nöüwis ra awisa pwe repwe alisi ekewe mwän seni ewe ainangen Lefi. Ir meinisin a makelong iter lon ewe iteit.
EZR 8:21 Mürin üa asilefeili me arun ewe chanpupu Ahawa pwe epwe fis eu ränin echikefel, pwe aipwe atekisonakem me fän mesen äm we Kot o tüngor ngeni pwe epwe emwenikem lon äm sai o tümwünükem me nöüm pwal pisekim meinisin.
EZR 8:22 Pun üa säw le tüngorei ewe king eu mwichen sounfiu me chon wawa oris repwe tümwünükem won alem seni chon oputakem, pokiten üa üreni ewe king pwe äm Kot a afeiöchü meinisin mi lükü i, nge an song mi watte a tori meinisin mi likitala i.
EZR 8:23 Iei mine aia echikefel o tüngormau ngeni äm Kot pwe epwe tümwünükem. Iwe, a aüselinga äm iotek.
EZR 8:24 Mürin üa filätä me lein ekewe souemwenin souasor engol me ruoman: Serepia me Hasapia me engol pwiir.
EZR 8:25 Iwe, üa kiloni ewe silifer, ewe kolt me ekewe pisek o ngeniir. Ekei mettoch ewe king me nöün kewe chon öüröür pwal nöün kewe samol me chon Israel meinisin mi nonom ikenan ra fang ngenikem pwe ar asor ngeni imwen äm we Kot.
EZR 8:26 Iei ükükün mine üa ngeniir: ina epwe ükükün rüe me limu ton silifer, ina epwe ükükün ülüngat esop ton pisek seni silifer, pwal ina epwe ükükün ülüngat esop ton kolt,
EZR 8:27 rüe sepi seni kolt choun ina epwe ükükün engol me tiu paun me ruu sepi seni piras mi mürina o ling, ra aüchea usun sepi seni kolt.
EZR 8:28 Iwe, üa üreniir, “Ämi oua pin fän iten ewe Samol mi Lapalap, pwal ekei pisek ra pin. Ewe silifer me kolt eu asor mi fis seni mochenin letipen aramas ngeni ewe Samol mi Lapalap än ämi kewe lewo we Kot.
EZR 8:29 Oupwe tümwünüöchü ekei pisek tori oua kiloniir lon rumwen imwen ewe Samol mi Lapalap me mwen ekewe souemwenin ekewe souasor me ekewe mwän seni ewe ainangen Lefi, pwal me mwen mwänirelan än semer kewe cho lon Israel mi nom lon Jerusalem.”
EZR 8:30 Iei mine ekewe souasor me ekewe mwän seni ewe ainangen Lefi ra angei ewe silifer me ewe kolt pwal ekewe pisek mi kilo, pwe repwe uwala Jerusalem lon imwen äm we Kot.
EZR 8:31 Iwe, lon engol me ruuen ränin ewe aeuin maram aia feil seni ewe chanpupu Ahawa pwe aipwe feila Jerusalem. Iwe, äm we Kot a etikem o tümwünükem seni ekewe chon oputakem, pwal seni ekewe chon solä mi nom won ewe al.
EZR 8:32 Iwe, lupwen äm aia tori Jerusalem, aia asösö lon ükükün ülüngat rän.
EZR 8:33 Nge lon ewe arüanün rän aia feila lon imwen äm we Kot o kiloni ewe silifer me ewe kolt pwal ekewe pisek, o ngeni ewe souasor Meremot nöün Uria, nge Eleasar nöün Pinehas a nom ren, pwal ekewe mwän seni ewe ainangen Lefi iter Josapat nöün Jesua me Noatia nöün Pinui.
EZR 8:34 Iwe, ekewe pisek meinisin ra lea o kilo, nge chour a makelong lon eu puk.
EZR 8:35 Lon ewe fansoun chokewe mi liwinto seni ar oola ra eäni asoren kek ngeni ewe Koten Israel ükükün engol me ruoman ätemwänin kow fän iten chon Israel meinisin, tiwe me wonoman ätemwänin sip me fik me füman nienifön sip, pwal engol me ruoman ätemwänin kuuch fän iten asoren tipis. Ekei mönün asor meinisin ra eäni asoren kek ngeni ewe Samol mi Lapalap.
EZR 8:36 Iwe, ra pwal angei ewe toropwe seni ewe king o ngeni nöün ewe king kewe sounemenem me ekewe kepinan ewe fanü lotoun ewe chanpupu Oifrat. Mürin ir ra atowu ar alilis ngeni ekewe aramas pwal ngeni ewe imwen Kot.
EZR 9:1 Mürin ekei mettoch ra fis, ekewe souemwen ra feito o üreniei, “Ekewe aramasen Israel, ekewe souasor me ekewe mwän seni ewe ainangen Lefi resap aimwürela seni aramasen ekewe fanü ünüküür, seni ekewe chon Kanaan, chon Hit, chon Peris, chon Jepus, chon Amon, chon Moap, chon Isip me chon Amor. Ra chök föri ekewe föför mi anioput ir ra föri.
EZR 9:2 Pun ra angei ekoch me lein nöür föpwül o pwülüeniir, ra pwal apwüpwülüeer ngeni nöür mwän. Iei usun ekewe aramas mi pin ra afitiarfengen me aramasen ekewe fanü. Nge ei lapalap mi ngau ekewe nöüwis me ekewe samol ra akom le föri.”
EZR 9:3 Iwe, lupwen üa rongorong ei pworaus, üa kamwei üfei, üa pwal ütti meten mökürei me alüsei o mot fän ai letipeta.
EZR 9:4 Mürin, chokewe meinisin mi chechech ren alon ewe Koten Israel ra mwicheto rei, pokiten ekewe tipis mi ngau ekewe mi liwinto seni ar oola ra föri. Iwe, üa mot fän letipeta tori fansoun asor lekuniol.
EZR 9:5 Nge lupwen a tori fansoun asor lekuniol, üa ütä seni ewe ia üa letipeta ie, üa fotopwäsuk fän üfei mi kam o aitietä pei lon ai iotek ngeni ewe Samol mi Lapalap ai we Kot.
EZR 9:6 Iwe, üa apasa, “Ai Kot, üa fokun säw ai üpwe anetai mesei ngonuk. Pun äm kewe föföringau ra tekia seni mökürem, nge äm kewe tipis ra chukuchukutä tori läng.
EZR 9:7 Seni fansoun äm kewe lewo tori ikenai äm aia föri chomong tipis. Nge pokiten äm kewe föföringau, äm me äm kewe king pwal äm kewe souasor aia sechilong lepöün kingen ekewe fanü. Iwe, aia küna ninni, aia oola, ra soläni pisekim fän pöchökül, aia pwal fokun säw, usun a fis tori ikenai.
EZR 9:8 Nge iei, en Samol mi Lapalap äm Kot, ka ümöümöch ngenikem eu fansoun mochomoch ren om mwüt ngenikem äm ekoch mi chüen manau pwe aipwe liwinto seni äm oola o nonom lon ei leni mi pin fän kinamwe. Ren ei, ka awora ngenikem pöchökül o mwüt ngenikem pwe aipwe ekis ngasala seni än aramas nöünikem amanau.
EZR 9:9 Iei mwo än aramas nöünikem amanau, nge en äm Kot kosap likitikeemila lon äm riaföü. Ka föri pwe ekewe kingen Persia ra eäni kirikiröch ngenikem, pwe ra mwüt ngenikem pwe aipwe manau o aüsefälietä imwomw we imwenfel mi tala, ra pwal mwüt ngenikem pwe aipwe nom lon Juta me Jerusalem fän kinamwe.
EZR 9:10 Nge iei en äm Kot, met aipwe apasa ren ei lapalap mi fis? Pun äm aia aleasolap ngeni om kewe allük,
EZR 9:11 en ka allük ngeni noum kewe chon angang ekewe soufos, lupwen ka apasa, ‘Ewe fanü oua tolong lon pwe oupwe fanüeni, eu fanü mi limengau pokiten aramasen ekewe fanü ra aurala ren ar föför mi fokun anioput seni epek tori epek.
EZR 9:12 Iei mine ousap apwüpwülüa nöümi föpwül ngeni nöür alüal, ousap pwal apwüpwülüa nöümi alüal ngeni nöür föpwül. Ousap kütta ar kinamwe ika ar feiöch, pwe oupwe tongeni pöchökül o mongö uaöchün ewe fanü, oupwe pwal likiti ewe fanü ngeni mwirimwirimi, pwe repwe fanüeni tori feilfeilachök.’
EZR 9:13 Iei mwo ekei riaföü ra fis ngenikem pokiten äm kewe föför mi ngau me äm kewe tipis mi chomong, nge äm aia silei pwe om apwüngükem, en äm Kot, a kis seni liwinin äm tipis, ka pwal mwüt ngenikem ekoch mi chüen manau.
EZR 9:14 Ifa usun, aipwe chüen purisefäli om kewe allük o pwüpwülü ngeni ekei aramas mi föri ekewe föför mi anioput? Ifa usun, kosap song ngenikem tori äm aipwe rosola, pwe esap chüen wor eman mi chüen manau ika eman mi tongeni sü?
EZR 9:15 Ai Samol mi Lapalap Koten Israel, en ka pwüng, nge ka mwüt ngenikem pwe aia chüen manau. Äm aia pwärätä äm tipis ngonuk. Esap tufich ngenikem pwe aipwe feito fän mesom.”
EZR 10:1 Iwe, lupwen Esra a iotek o pwärätä ekewe tipis, lupwen a kechü o chapala won pwül me mwen ewe imwen Kot, eu mwichemongun mwän, fefin me semirit seni Israel ra mwicheto ren. Ir meinisin ra seningüngü le kechü.
EZR 10:2 Mürin, Sekania nöün Jehiel we mwän eman mwirimwirin Elam a kapas ngeni Esra, “Äm aia tipis ngeni äm Kot ren äm pwüpwülü ngeni ekewe fin ekis seni aramasen ekewe fanü ünüküm. Nge inamwo are a fis ei, mi chüen wor apilükülük fän iten Israel.
EZR 10:3 Iei mine aipwe föri eu pwon ngeni äm we Kot pwe aipwe pöütala pwülüem kei fin ekis me nöür kewe, usun en äm samol ka öüröüra ngenikem me chokewe mi niuokusiti än äm we Kot kewe allük. Äm aipwe föri usun mine a mak lon än Kot kewe allük.
EZR 10:4 Kopwe ütä, pun iei wisom pwe kopwe apöchöküla pwüngün ei allük, nge äm aipwe etuk. Kopwe apöchökülok o föri iei usun.”
EZR 10:5 Iei mine Esra a ütä o pesei ngeni ekewe souemwenin ekewe souasor me ekewe mwän seni ewe ainangen Lefi, pwal ngeni chon Israel meinisin, pwe repwe pwon fän akapel pwe repwe föri usun Sekania a fen apasa. Iwe, ra föri eu pwon fän akapel.
EZR 10:6 Mürin, Esra a feil seni lenian me mwen ewe imwen Kot o tolong lon rumwen Jehoanan nöün Eliasip we mwän. Iwe, a nonom ikenan lon unusen ewe pwin, nge esap mongö ika ün, pun a letipeta ren ekewe tipis chokewe mi liwinto seni ar oola ra föri.
EZR 10:7 Mürin, eu pworausen asilesil a tori unusen Juta me Jerusalem ngeni chokewe meinisin mi liwinto seni ar oola, pwe repwe mwichefengen lon Jerusalem.
EZR 10:8 Nge ika eman esap feito lon ükükün ülüngat rän, repwe angei seni pisekin meinisin, nge i epwe towu seni ewe mwich mi liwinto seni ar oola. Ei allük a feito seni ekewe nöüwis me ekewe souakom.
EZR 10:9 Iwe, mürin ülüngat rän ekewe re Juta me Peniamin meinisin ra mwichefengen me lon Jerusalem. Ei mwich a fis lon rüen ränin ewe atiuen maram. Iwe, ekewe aramas meinisin ra mot lon ewe leni mi amassawa me mwen ewe imwen Kot, ra chechech pokiten ei pworaus pwal pokiten püngümongun üt.
EZR 10:10 Iwe, ewe souasor Esra a ütä o üreniir, “Oua purätiu ewe allük o pwüpwülü ngeni ekewe fin ekis. Ren ei oua alapala än chon Israel tipis.
EZR 10:11 Iei oupwe pwärätä ämi tipis ngeni ewe Samol mi Lapalap än ämi kewe lewo we Kot o föri letipan. Oupwe imwü seni ekewe aramas lon ei fanü, pwal seni pwülüemi kewe ekewe fin ekis.”
EZR 10:12 Mürin, ewe mwichen aramas meinisin a pälüeni fän leüömong, “Mi pwüng. Äm aipwe föri usun mine ka apasa.
EZR 10:13 Nge ekewe aramas ra kon chomong, a pwal fansoun püngümongun üt. Äm aisap tongeni ütä lon ei leni mi amassawa. Nge ei angang sap angangen eu rän ika ruu rän chök, pun äm aia fokun pupungau lon ei föför.
EZR 10:14 Iwe, nöüm kewe nöüwis repwe nonomotiu lon Jerusalem o sopwela ei angang fän iten unusen ewe mwich. Mürin, meinisin mi pwüpwülü ngeni fin ekis repwe feito seni lon äm kewe telinimw lon en me an fansoun mi pwonola, nge ekewe souakom me ekewe soukapwüng seni lon en me an telinimw repwe fitireto. Ren ei än Kot lingeringer mi watte won ei föför epwe kul senikem.”
EZR 10:15 Iwe, Jonatan nöün Asahel we mwän me Jaseia nöün Tikwa we mwän echök ra pälüeni ei lapalap, nge Mesulam me Sapetai seni ewe ainangen Lefi ra alisiir.
EZR 10:16 Mürin, ekewe chon oola mi liwinto ra föri mine ra pwon. Ewe souasor Esra a filätä ekoch mwän, ir mwänirelan än semer kewe cho fän iten ar kewe famili o makeetiu iten eman me eman. Iwe, lon aeuin ränin ewe aengolun maram ra popuetä le kütta pworausen än eman me eman föför.
EZR 10:17 Nge lon aeuin ränin ewe aeuin maram a wesila ar angang ngeni ekewe mwän meinisin mi pwüpwülü ngeni fin ekis.
EZR 10:18 Ikkei iten ekewe mwän seni ekewe souasor mi pwüpwülü ngeni fin ekis: Maseia, Elieser, Jarip me Ketalia seni ewe familien Jesua nöün Jehosatak me pwin kewe.
EZR 10:19 Iwe, ra pwon pwe repwe pöütala pwülüer kewe. Iwe, ra eäni asor eman ätemwänin sip fän iten ar tipis.
EZR 10:20 Seni ewe familien Imer: Hanani me Sepatia,
EZR 10:21 seni ewe familien Harim: Maseia, Elia, Semaia, Jehiel me Usia,
EZR 10:22 seni ewe familien Pashur: Elio-enai, Maseia, Israel, Netanel, Josapat me Elasa.
EZR 10:23 Ikkei iten ekewe mwän seni ewe ainangen Lefi: Josapat, Simei, Kelaia, iei i Kelita, Petahia, Juta me Elieser.
EZR 10:24 Iwe, seni lein ekewe chon köl: Eliasip, nge seni lein ekewe chon mamasa ekewe asamalapen imwenfel: Salum, Telem me Uri.
EZR 10:25 Ikkei iten ekewe re Israel: Seni ewe familien Paros: Ramia, Isia, Malkia, Miamin, Eleasar, Hasapia me Penaia.
EZR 10:26 Seni ewe familien Elam: Matania, Sekaria, Jehiel, Apti, Jeremot me Elia.
EZR 10:27 Seni ewe familien Satu: Elio-enai, Eliasip, Matania, Jeremot, Sapat me Asisa.
EZR 10:28 Seni ewe familien Pepai: Jehohanan, Hanania, Sapai me Atlai.
EZR 10:29 Seni ewe familien Pani: Mesulam, Maluk, Ataia, Jasup, Seal me Jeremot.
EZR 10:30 Seni ewe familien Pahat-moap: Atna, Chelal, Penaia, Maseia, Matania, Pesalel, Pinui me Manasa.
EZR 10:31 Seni ewe familien Harim: Elieser, Isia, Malkia, Semaia, Simeon,
EZR 10:32 Peniamin, Maluk me Semaria.
EZR 10:33 Seni ewe familien Hasum: Matenai, Matata, Sapat, Elifelet, Jeremai, Manasa me Simei.
EZR 10:34 Seni ewe familien Pani: Matai, Amram, Uel,
EZR 10:35 Penaia, Peteia, Chelui,
EZR 10:36 Wania, Meremot, Eliasip,
EZR 10:37 Matania, Matenai me Jasu.
EZR 10:38 Seni ewe familien Pinui: Simei,
EZR 10:39 Selemia, Natan, Ataia,
EZR 10:40 Maknatepai, Sasai, Sarai,
EZR 10:41 Asarel, Selemia, Semaria,
EZR 10:42 Salum, Amaria me Josef.
EZR 10:43 Nge seni ewe familien Nepo: Jeiel, Matitia, Sapat, Sepina, Jatai, Joel me Penaia.
EZR 10:44 Ekei mwän meinisin ra pwüpwülü ngeni fin ekis. Iwe, ra pöütirela fiti nöür kewe.
NEH 1:1 Iei än Nehemia nöün Hakalia we mwän pworaus. Iwe, lon ewe maram Kislef, lon rüen ierin mwün Artaksasta, ngang Nehemia üa nom lon Susa samolun telinimwen ewe fanü.
NEH 1:2 Iwe, a fis pwe Hanani, eman me lein pwii kewe, a feito me ekoch mwän seni Juta. Üa aisiniir usun ekewe chon Juta mi chüen manau, chokewe mi liwinla seni ar oola lon Papilon, pwal usun Jerusalem.
NEH 1:3 Mürin ra üreniei, “Ekewe mi chüen manau seni ar oola o liwiniti ewe fanü ra nom lon weires watte me itengau. Tittin ewe telinimw Jerusalem a chüen tatiu, nge asamalapan kewe mi karala resamwo försefäl.”
NEH 1:4 Iwe, lupwen üa rongorong ei pworaus, üa mottiu o kechü, üa ngüngüres ekoch rän o echikefel me iotek fän mesen ewe Koten läng.
NEH 1:5 Üa apasa, “Ai Samol mi Lapalap Koten läng, en ewe Kot mi tekia, äm aia niuokusituk. Ka apwönüetä om pwon me tong ellet ngeni chokewe mi echenuk o aleasochisi om kewe allük.
NEH 1:6 Kose mochen kopwe nenengeniei o aüselinga ai iotek ngang noum ei chon angang üa eäni ngonuk lerän me lepwin fän iten ekewe aramasen Israel noum kewe chon angang. Üa pwärätä pwe äm aramasen Israel aia tipis ngonuk. Pwal ngang me chon leimwen semei, äm aia tipis.
NEH 1:7 Äm aia föri föför mi ngau o ü ngonuk, äm aisap aleasochisi om kewe allük me pwüüng ka allük ngeni noum chon angang Moses.
NEH 1:8 Kopwe chechemeni ewe kapas ka eäni ngeni noum chon angang Moses, lupwen ka apasa, ‘Are ämi chon Israel ousap allükülük ngeniei, üpwe atoropasakemi lein chon ekewe mwü.
NEH 1:9 Nge are oupwe liwinsefälitiei o aleasochisi ai kewe allük, ngang üpwe achufengenikemi o aliwinikemiila ngeni ewe leni üa filätä pwe aramas repwe fel ngeniei ie, inamwo are oua toropasfeil tori lesopun fanüfan.’
NEH 1:10 Ir noum chon angang me noum aramas, chokewe ka angaserela ren om manaman mi lapalap, pwal ren om pöchökül.
NEH 1:11 Ai Samol, kopwe aüselinga ai iotek, pwal än noum kewe chon angang iotek, ir mi pwapwa le meninituk. Kose mochen kopwe atufichiei ngang noum chon angang ikenai o mwüt ngeniei pwe üpwe küna ümöümöch me ren ei king.” Lon ei fansoun ngang eman chon amolätä ünümen ewe king.
NEH 2:1 Iwe, lon ewe maram Nisan, lon rüen ierin mwün ewe king Artaksasta, lupwen ünüman wain a molotä, üa angei ewe wain o ngeni ewe king fän ai wololilen. Nge me lom üsap mwo wololilen me fän mesan.
NEH 2:2 Iwe, ewe king a üreniei, “Pwota ka wololilen, nge kosap samau? Ei lolilen a chök fis seni lon lelukom.” Mürin üa fokun niuokus
NEH 2:3 o üreni ewe king, “Amwo ewe king epwe manau tori feilfeilachök. Pwota üsap wololilen are ewe telinimw lenien peiasen ai kewe lewo a tatakis, nge asamalapan kewe ra karala ren ekkei?”
NEH 2:4 Iwe, ewe king a aisiniei, “Met ka mochen tüngor seniei?” Mürin üa iotek ngeni ewe Koten läng.
NEH 2:5 Nge üa üreni ewe king, “Ika a öch me reöm, en ai king, nge ngang noum ei chon angang üa küna ümöümöch me reöm, kopwe mwüt ngeniei pwe üpwe feila Juta ren ewe telinimw ia peiasen ai kewe lewo ra nom ie, pwe üpwe aüsefälietä.”
NEH 2:6 Mürin, ewe king a aisiniei, nge ewe kiwiin a mot ünükün, “Ifa ükükün fansoun om kopwe nonom ikenan, nge inet kopwe liwinsefälito?” Iwe, üa üreni ükükün fansoun ai üpwe nonom ikenan. Mürin ewe king a tipeeu ngeni ai tüngor o mwüt ngeniei pwe üpwe feila.
NEH 2:7 Iwe, üa üreni ewe king, “Ika a öch me reöm en ai king, kopwe makei echö toropwe pwe üpwe uwala ren ekewe kepina lon ewe fanü lotoun ewe chanpupu Oifrat, pwe ir repwe mwüt ngeniei pwe üpwe sai tori ai üpwe tori Juta.
NEH 2:8 Kopwe pwal ngeniei echö toropwe pwe üpwe uwala ren Asaf, ewe mi tümwünü än ewe king lenien wöllap, pwe epwe ngeniei irä pwe üpwe föri pamping seni fän iten asamalapen ewe imw pöchökül mi nom mwen ewe imwenfel, fän iten tittin ewe telinimw, pwal fän iten ewe imw üpwe nonom lon.” Iwe, ewe king a mwüt ngeniei mine üa tüngor, pun ai we Kot a etiei.
NEH 2:9 Ewe king a pwal tinala ekoch meilapen mwichen sounfiu me eu mwichen chon wawa oris pwe repwe etiei. Iwe, lupwen üa tori ekewe kepina lon ewe fanü lotoun ewe chanpupu Oifrat, üa ngeniir nöün ewe king kewe toropwe.
NEH 2:10 Nge lupwen Sanpalat ewe re Horon me Topia ewe nöüwisen Amon ra rong ei pworaus, ra fokun oput pwe eman a feito pwe epwe kütta feiöchün chon Israel.
NEH 2:11 Iwe, üa tori Jerusalem o nonom ikenan lon ükükün ülüngat rän.
NEH 2:12 Nge üsap üreni eman mine Kot a atolonga lon lelukei, pwe üpwe föri fän iten Jerusalem. Mürin üa pwätä lepwin o towu seni imwei, nge ekoch chök mwän ra etiei. Iwe, esap wor eman man a nom rei, chilon chök ewe man üa wawa.
NEH 2:13 Iwe, üa towu seni ewe telinimw ren ewe Asamalapen Lemol lepwin o feila ren ewe Chönüttu Foks, pwal ren ewe Asamalapen Ioien Pipi. Üa ouwasacha tittin ewe telinimw Jerusalem mi tatiu me asamalapan kewe mi karala ren ekkei.
NEH 2:14 Mürin üa pwerela ren ewe Asamalapen Chönüttu, pwal ren ewe Nomun Koluk än ewe king. Nge esap wor ia nei man üa wawa epwe chüen fetal ie.
NEH 2:15 Iei mine üa feila lon ewe lemolun Kitron o ouwasacha tittin ewe telinimw. Mürin üa kul o liwiniti ewe telinimw o tolong lon ewe Asamalapen Lemol.
NEH 2:16 Nge nöüwisen ewe telinimw resap silei ia üa feila ie, ika met üa föri. Pun tori ei otun üsamwo asile och ngeni ekewe chon Juta me ekewe souasor, ekewe aramas tekia me ekewe nöüwis, pwal ngeni ekewe lusun aramas mi tongeni föri ewe angang.
NEH 2:17 Mürin üa üreniir, “Oua küna ewe weires sa nonom lon, pun Jerusalem a tala, nge asamalapan kewe ra karala. Ou etto, ousipwe senisefälietä tittin ei telinimw Jerusalem, pwe sisap chüen itengau.”
NEH 2:18 Iwe, üa apworausa ngeniir usun än Kot etiei o alisiei, üa pwal apworausa ngeniir ekewe kapas ewe king a üreniei. Iwe, ra üra, “Ousipwe popuetä le senisefälietä ewe tit.” Iei usun ra popuetä le föri ewe angang mi mürina.
NEH 2:19 Nge lupwen Sanpalat ewe re Horon me Topia ewe nöüwisen Amon pwal Kesem ewe re Arapia ra rong usun, ra esitakem o turunufaseekem. Iwe, ra üra, “Met popun oua föri ei? Ifa usun, oua mochen ü ngeni ewe king?”
NEH 2:20 Mürin üa üreniir, “Ewe Koten läng epwe atufichikem lon ei angang. Äm nöün chon angang, aipwe popuetä le senisefälietä ewe tit. Nge ämi, esap wor wisemi, esap wor ämi pwüng ika ämi uruwo lon Jerusalem.”
NEH 3:1 Iwe, ewe souasor mi lap Eliasip me pwin kewe souasor ra popuetä le försefäli ewe Asamalapen Sip. Ra apini ewe asamalap o amasalong ekewe asam lon lenier. Ra pwal senätä ewe tit tori ewe Imw Tekia itan Ipükü pwal tori ewe Imw Tekia imwen Hananel o apini.
NEH 3:2 Ekewe re Jeriko ra senätä ewe kinikin ünükün senier, nge Sakur nöün Imri we mwän a senisefälietä ewe kinikin ünükün senien ekewe re Jeriko.
NEH 3:3 Nöün Hasena kewe mwän ra förätä ewe Asamalapen Ik. Ra pachetä irän penkasaman o amasalong ekewe asam lon lenier, ra pwal apachätä amwöchür me lokkur kewe.
NEH 3:4 Meremot nöün Uria we mwän, nge Uria nöün Hakos, a senisefälietä ewe kinikin ünükün. Nge Mesulam nöün Perekia we mwän, nge Perekia nöün Mesesapel, a senisefälietä ewe kinikin ünükün senien Meremot. Iwe, Satok nöün Pana we mwän a senisefälietä ewe kinikin ünükün.
NEH 3:5 Ekewe chon Tekoa ra senisefälietä ewe kinikin ünükün senien Satok. Nge ar kewe aramas tekia resap pomwe ngeni pöür ewe angang nöür souemwen a awisa ngeniir.
NEH 3:6 Joiata nöün Pasea we mwän me Mesulam nöün Pesoteia ra försefäli ewe Asamalapen Lom. Ra pachetä penkasaman o amasalong ekewe asam lon lenier, ra pwal apachätä amwöchür me lokkur kewe.
NEH 3:7 Melatia ewe re Kipeon me Jaton ewe re Meronot, ekewe re Kipeon me re Mispa ra senisefälietä ewe kinikin ünükün tori imwen kepinan ewe fanü lotoun ewe chanpupu Oifrat.
NEH 3:8 Nge Usiel nöün Haraia we mwän seni ewe mwich mi angang ngeni kolt a senisefälietä ewe kinikin ünükün senier. Iwe, Hanania, eman me lein ekewe chon föri lö, a senisefälietä ünükün. Ra senisefälietä tittin Jerusalem tori ewe Tit mi Chölap.
NEH 3:9 Refaia nöün Hur we mwän, ewe sounemenemen esopun Jerusalem, a senisefälietä ewe kinikin ünükün.
NEH 3:10 Jetaia nöün Harumaf we mwän a senisefälietä ewe kinikin awenewenen imwan. Nge Hatus nöün Hasapneia a senisefälietä ewe kinikin ünükün.
NEH 3:11 Iwe, Malkia nöün Harim we mwän me Hasup nöün Pahat-moap ra senisefälietä ewe kinikin ünükün pwal ewe imw tekia Lenien Um.
NEH 3:12 Nge Salum nöün Haloes we mwän, ewe sounemenemen pwal ewe esopun Jerusalem, a senisefälietä ewe kinikin ünükün, i me nöün kewe fefin.
NEH 3:13 Iwe, Hanun me ekewe chon Sanoa ra försefäli ewe Asamalapen Lemol. Ra amasalong ekewe asam lon lenier o apachätä amwöchür me lokkur kewe. Ra pwal senisefälietä ewe tit ükükün engeröü limepükü fiit ator ngeni ewe Asamalapen Ioien Pipi.
NEH 3:14 Nge Malkia nöün Rekap we mwän, ewe sounemenemen ewe fanü Pet-hakerem, a försefäli ewe Asamalapen Ioien Pipi. A amasalong ekewe asam lon lenier o apachätä amwöchür me lokkur kewe.
NEH 3:15 Salum nöün Kolose we mwän, ewe sounemenemen ewe fanü Mispa, a försefäli ewe Asamalapen Chönüttu. A föri sissin o amasalong ekewe asam lon lenier, a pwal apachätä amwöchür me lokkur kewe. A pwal senisefälietä ewe tit arun ewe nomun koluk itan Sela ünükün än ewe king tanipi tori ewe latö mi feitiu seni ewe telinimwen Tafit.
NEH 3:16 Nge Nehemia nöün Aspuk we mwän, ewe sounemenemen esopun ewe fanü Petsur, a senisefälietä ewe tit ünükün tori ewe leni awenewenen peiasen Tafit, tori ewe nomun koluk aramas ra förätä, pwal tori imwen ekewe mwän mi pwora.
NEH 3:17 Ikkei iten ekewe mwän seni ewe ainangen Lefi mi senisefälietä ekoch kinikinin ewe tit: Rehum nöün Pani we mwän a senisefälietä ewe kinikin ünükün senien Nehemia. Nge Hasapia ewe sounemenemen esopun ewe fanü Keila, a senisefälietä ewe kinikin ünükün fän iten aramasen fanüan.
NEH 3:18 Pawai nöün Henatat, ewe sounemenemen pwal ewe esopun fanü Keila, a senisefälietä ewe kinikin ünükün.
NEH 3:19 Nge Eser nöün Jesua we mwän, ewe sounemenemen Mispa, a senisefälietä pwal eu kinikin ünükün awenewenen ewe al mi feitä ngeni ewe imwen iseis pisekin maun tori pwokukun ewe tit.
NEH 3:20 Paruk nöün Sapai we mwän a senisefälietä pwal eu kinikin ünükün seni pwokukun ewe tit tori asamalapen imwen ewe souasor mi lap Eliasip.
NEH 3:21 Meremot nöün Uria we mwän, nge Uria nöün Hakos, a senisefälietä pwal eu kinikin ünükün, seni asamalapen imwen Eliasip tori lesopun imwan.
NEH 3:22 Nge ekewe souasor mi imweimw ünükün Jerusalem ra senisefälietä ewe kinikin ünükün.
NEH 3:23 Peniamin me Hasup ra senisefälietä ewe kinikin awenewenen imwer. Nge Asaria nöün Maseia we mwän, nge Maseia nöün Anania, a senisefälietä ewe kinikin ünükün imwan.
NEH 3:24 Pinui nöün Henatat we mwän a senisefälietä pwal eu kinikin seni imwen Asaria tori pwokukun ewe tit.
NEH 3:25 Palal nöün Usai we mwän a senisefälietä ewe kinikin awenewenen ewe pwokuku me ewe imw tekia mi kouwu seni ewe imwen king mi nom asan arun ewe lenien chon mamas. Nge Petaia nöün Paros we mwän a senisefälietä ewe kinikin ünükün.
NEH 3:26 Nge ekewe chon angang ngeni ewe imwenfel mi nonom lon Ofel, eu kinikinin lon ewe telinimw Jerusalem, ra senisefälietä ewe kinikin ünükün tori awenewenen ewe Asamalapen Koluk mi nom ötiu, pwal tori ewe imw tekia mi kouwu.
NEH 3:27 Iwe, ekewe re Tekoa ra senisefälietä pwal eu kinikin seni ewe imw tekia o watte mi kouwu tori ewe tit ünükün Ofel.
NEH 3:28 Iwe, asen ewe Asamalapen Oris ekewe souasor ra senisefälietä ewe tit awenewenen en me püsin imwan.
NEH 3:29 Satok nöün Imer we mwän a senisefälietä ewe kinikin ünükün senier awenewenen püsin imwan. Nge Semaia nöün Sekania we mwän, ewe chon mamasa ewe asamalap mi nom ötiu, a senisefälietä ünükün.
NEH 3:30 Hanania nöün Selemia we mwän me Hanun ewe awonomanün nöün Salaf ra senisefälietä pwal eu kinikin ünükün. Nge Mesulam nöün Perekia we mwän a senisefälietä ewe tit ünükün awenewenen ewe ia a imweimw ie.
NEH 3:31 Malkia eman me lein chokewe mi angang ngeni kolt a senisefälietä eu kinikin ünükün tori imwen ekewe chon angang ngeni ewe imwenfel pwal imwen ekewe chon amömö awenewenen ewe Asamalapen Chon Mamas, pwal tori ewe rumw mi nom asen pwokukun ewe tit.
NEH 3:32 Nge chokewe mi angang ngeni kolt me ekewe chon amömö ra senisefälietä ewe tit seni ewe rumw mi nom asen pwokukun ewe tit tori ewe Asamalapen Sip.
NEH 4:1 Iwe, lupwen Sanpalat a rongorong pwe aia senisefälietä ewe tit, a song o fokun lingeringer. A esita ekewe chon Juta
NEH 4:2 o apasa me fän mesen chiechian kewe me ekewe sounfiun Samaria, “Met ekei chon Juta mi fokun apwangapwang ra föri? Ifa usun, repwe tongeni aüsefälietä ei telinimw? Ifa usun, ra ekieki pwe repwe tongeni föri ar asor o awesi ei angang lon eu chök rän? Ifa usun, repwe tongeni aeasefäl ekewe fau mi karala seni ewe ioien pipi?”
NEH 4:3 Nge Topia ewe re Amon mi nom ren a apasa, “Ellet, are eman foks epwe mwetetä won mine ra senisefälietä, epwe ataetiu ar tittin fau.”
NEH 4:4 Iwe, ngang Nehemeia üa iotek, “Äm Kot, kopwe aüselingakem, pun äm aia küna turunufas. Kopwe ukun ngeniir ar takirin ämängau o asechirela pwe aramas repwe angei ar pisek fän pöchökül, nge ir repwe oola lon eu fanü.
NEH 4:5 Kosap amusala ar pupungau, kosap pwal amoela ar tipis seni fän mesom. Pun ir ra turunufasei ekewe chon ses.”
NEH 4:6 Iei usun aia senätä unusen ewe tit tori tekian a esop, pun ekewe aramas ra achocho le angang.
NEH 4:7 Nge lupwen Sanpalat me Topia, pwal ekewe chon Arapia, ekewe chon Amon me ekewe chon Astot ra rongorong pwe angangen senisefälietä ewe tittin Jerusalem a soposopola, nge ekewe pwang ra arapakan pinela, ra fokun song.
NEH 4:8 Iwe, ra chufengen le föri ar rawangau usun ar repwe feito o maun ngeni Jerusalem, pwe repwe afisätä fitikoko lon.
NEH 4:9 Nge aia iotek ngeni äm Kot, aia pwal alenia chon mamas repwe tümwünükem seniir lerän me lepwin.
NEH 4:10 Lon ei fansoun ekewe chon Juta ra apasa, “Pöchökülen ekewe chon uwouchou a kisikisila, a pwal wor chomong ioien pipi. Äm aisap tongeni awesi ewe angang ngeni ewe tit.”
NEH 4:11 Nge ekewe chon oputakem ra apasa, “Mwen ar repwe silei äm rawangau ika künakem, äm aipwe nom lefiler o nirela pwe ewe angang epwe ükütiu.”
NEH 4:12 Mürin, ekewe chon Juta mi nonom rer ra feito o ürenikem fän chomong, “Chon oputakich repwe feito o maun ngenikich seni ekewe leni meinisin ia ra nonom ie.”
NEH 4:13 Iei mine üa alenia ekewe aramas lon tettelin ar kewe famili fän nöür ketilas, wokur siles me ar kewe esefich lon ekewe leni lükün ewe ia ewe tit esamwo tekia ie.
NEH 4:14 Iwe, lupwen üa küna pwe ekewe aramas ra niuokus, üa üreni ekewe aramas tekia, ekewe nöüwis pwal ekewe lusun aramas, “Ousap niuokusiti ekewe chon oputach. Oupwe chechemeni ewe Samol mi tekia, aramas ra niuokusiti. Oupwe maun fän iten pwimi kewe chon Juta fän iten nöümi ät me nengin, pwal fän iten pwülüemi me leniemi.”
NEH 4:15 Nge lupwen chon oputakem ra rongorong pwe aia silei usun ar ekiekin rawangauakem, ra mefi pwe Kot a ataela ar ekiek. Mürin äm meinisin aia liwin ngeni en me an angang won ewe tit.
NEH 4:16 Seni ewe ränin esop me lein nei kewe chon angang ra angang ngeni ewe tit, nge esop ra amwöchü siles, tittin maun me esefich o üföüf üfen maun. Nge ekewe souemwen ra apöchöküla leluken ekewe chon Juta meinisin
NEH 4:17 mi senätä ewe tit. Pwal chokewe mi uwou mettoch mi chou ra angang won efoch pöür, nge won efoch ra amwöchü ar pisekin maun.
NEH 4:18 Nge iteiten eman me eman mi senätä ewe tit a rietä nöün ketilas lepekin, lupwen an ses. Iwe, ewe mwän mi wisen ettiki ewe rappwan asilesil a nom ünüki.
NEH 4:19 Nge üa üreni ekewe aramas tekia, ekewe nöüwis pwal ekewe lusun aramas, “Ewe angang a watte o fis lon eu leni mi chölap, nge kich sia toaufesen lon en me an angang ngeni ewe tit.
NEH 4:20 Iwe, lupwen oua rong tikin ewe rappwan asilesil seni lon eu leni, oupwe mwicheto rem ikenan. Ach Kot epwe maun fän itach.”
NEH 4:21 Iei usun esopun äm we mwich a föri ewe angang, nge esop ra amwöchü ekewe siles seni lesosorusich tori lepwin, lupwen ekewe fü ra tin.
NEH 4:22 Lon ewe fansoun üa pwal üreni ekewe aramas, “Eman me eman mwän me nöün chon angang repwe nonometiu lon Jerusalem lepwin pwe repwe tongeni mamas lepwin, nge repwe pwal angang lerän.”
NEH 4:23 Iwe, esap wor eman me leim a siwili üfan, sap ngang ika chienei kewe, ika nei kewe chon angang, ika chokewe mi tümwünüei. Eman me eman a amwöchü an pisekin maun lepöün.
NEH 5:1 Iwe, a fis pwe ekewe mwän mi üküngau me pwülüer ra fokun siö pokiten pwiir kewe chon Juta.
NEH 5:2 Pun mi wor ekoch ra apasa, “Äm me nöüm kewe aia chomong. Aia tüngor pwe aipwe angei wiich pwe aipwe mongö o manau.”
NEH 5:3 Mi pwal wor ekoch ra apasa, “Äm aia amömö fanüem, äm tanipin wain me imwem kewe, pwe aipwe tongeni kamö wiich lon ei fansoun lengita.”
NEH 5:4 Nge mi pwal wor ekoch ra apasa, “Äm aia paro moni pwe aipwe tongeni püngütiu takises ngeni ewe king, nge aia eäni pwon fanüem me äm kewe tanipin wain.
NEH 5:5 Iwe, äm me pwim kewe chon Juta aia eu chök fituk, nöüm ra usun chök nöür. Iei mwo nge aipwe mwütätä nöüm mwän me fefin pwe aramas repwe nöüniir amanau. Ekoch me lein nöüm kewe fefin aramas ra fen nöüniir amanau. Nge esap wor äm pwäk pwe aipwe awesi ei lapalap, pun ekoch aramas ra fen fanüeni fanüem o eäni äm kewe tanipin wain.”
NEH 5:6 Iwe, lupwen üa rongorong ar kewe kapasen siö, üa fokun song.
NEH 5:7 Üa ekieki usun ei lapalap. Mürin üa apwüngü ekewe aramas tekia me ekewe nöüwis o üreniir, “Ämi oua angei manauen nöümi moni seni pwimi kewe chon Juta.” Iwe, üa amwichafengeni eu mwichemongun aramas pwe üpwe fos ngeniir won ei osukosuk.
NEH 5:8 Üa üreniir, “Ükükün äm tongeni äm aia mönisefäli pwim kewe chon Juta mi püsin amömörela ngeni chon ekewe mwü. Nge ämi oua fen ariani pwimi kewe, pwe repwe püsin amömörela ngenikemi.” Iwe, ekewe aramas tekia ra fanafanala, pun resap tongeni pälüeni och.
NEH 5:9 Iei mine üa üra, “Ei föför oua föri esap öch. Ifa usun, ousap niuokusiti ach we Kot o föri mine a pwüng, pwe chon ekewe mwü mi oputakich resap turunufaseekich?
NEH 5:10 Nge pwal ngang me pwii kewe me nei kewe chon angang äm aia mwütätä ngeni aramas moni me wiich. Ousipwe ükütiu le angei manauen nöüch moni seni ar liwinimang.
NEH 5:11 Ikenai oupwe aliwini ngeniir fanüer, ar tanipin wain me tanipin olif pwal imwer kewe, oupwe pwal amusala ar liwinimangen moni, wiich, wain me apüra.”
NEH 5:12 Mürin ra üra, “Äm aipwe aliwini ngeniir ekei mettoch, nge aisap chüen angei och seniir. Äm aipwe föri meinisin mine ka üra.” Iwe, üa körato ekewe souasor o pesei ngeni ekewe nöüwis pwe repwe pwon fän akapel me fän meser, pwe repwe föri usun mine ra eäni pwon.
NEH 5:13 Üa pwal äsupu pipin lenumun üfei o üra, “Iei usun Kot epwe äsupala iteiten eman me eman aramas seni lon imwan me lenian, ika esap apwönüetä ei pwon. Amwo epwe morotiu o pöla iei usun.” Iwe, unusen ewe mwichen aramas ra apasa “Amen”, ra pwal mwareiti ewe Samol mi Lapalap. Nge ekewe nöüwis ra föri usun mine ra eäni pwon.
NEH 5:14 Iwe, lon ewe fansoun üa fil pwe üpwe kepinan ewe fanü Juta, seni ewe arüeen ierin mwün ewe king Artaksasta tori ilik me ruuen ierin, lon ei ükükün engol me ruu ier äm me aramasei kewe aisap mongö ewe mongö wisen kepina.
NEH 5:15 Ekewe kepina mi akom mwei ra aweiresi ekewe aramas o angei seniir ener mongö o ünümer wain iteiten rän won ükükün faik föün moni silifer. Pwal nöür chon angang ra ariaföüü ekewe aramas. Nge ngang üsap föri iei usun, pun üa niuokusiti Kot.
NEH 5:16 Üa fangala ai pöchökül fän iten angangen ei tit, nge üsap fanüeni eu fanü. Pwal nei chon angang meinisin ra chufengen le föri ei angang.
NEH 5:17 Iwe, a pwal wor ipükü lime mwän, ir chon Juta me ekewe nöüwis, ra mot ngeni ai chepel, lükün chokewe mi feito rem seni chon ekewe mwü mi nom ünüküm.
NEH 5:18 Iwe, ükükün ewe mongö üa amolätä iteiten rän eman ätemwänin kow, wonoman sip mi mürina me chomong chuko. Üa pwal amolätä chomong wain lon iteiten engol rän. Üa atowu ekei mongö meinisin, nge üsap angei wisei mongö fän iten kepina, pun ekewe aramas ra fen weires ren ewe angang.
NEH 5:19 Ai Kot, kopwe chechemeni meinisin mine üa föri fän iten ekei aramas o afeiöchüei.
NEH 6:1 Iwe, Sanpalat me Topia pwal Kesem ewe re Arapia me ekewe lusun chon oputakem ra rongorong pwe üa awesala angangen ewe tit, esap pwal chüen wor eu pwang a nom won, nge lon ei fansoun üsamwo amasalong ekewe asam lon lenier.
NEH 6:2 Mürin, Sanpalat me Kesem ra titito rei o üra, “Kopwe feito pwe sipwe chufengen lon eu kewe sop lon ewe maasiesin Ono.” Nge ir ra ekiekin afeiengauei.
NEH 6:3 Iwe, üa tinala chon künö rer pwe repwe üreniir, “Üa föri eu angang mi fokun aüchea, üsap tongeni feila remi. Pwota ewe angang epwe kaüla pokiten ai likitala o feila remi?”
NEH 6:4 Ra titito rei fän rüanü lon ei chök ititin pworaus, nge iteitan ngang üa pälüeniir pwal lon ei chök ititin.
NEH 6:5 Mürin, Sanpalat a tinato nöün chon angang rei fän alimuan lon ei chök ititin fän echö toropwe esap appach o impwang.
NEH 6:6 Iei usun mine a mak lon ei toropwe, “Ei pworaus a chöfetal lein chon ekewe mwü, pwal Kesem a apasa, pwe en me ekewe re Juta oua ekiekin ü ngeni ewe mwü. Iei mine oua senisefälietä ewe tit. Nge soposopun ei pworaus, pwe en ka mochen pwe kopwe ar king.
NEH 6:7 Ka pwal awisa soufos pwe repwe asilefeili pworausom lon Jerusalem, pwe en ka king lon Juta. Iwe, iei ei pworaus epwe tori ewe king. Iei mine kopwe feito pwe sipwe pwüngüpwüngfengen won.”
NEH 6:8 Mürin üa tinala ren Sanpalat ei pworaus, “Ekei mettoch ka kapas usun resap pwüng, pun ka chök afisätä seni püsin lon om ekiek.”
NEH 6:9 Pun ir meinisin ra chök mochen aniuokusukem, pun ra ekieki pwe aipwe ükütiu le angang, pwe ewe angang esap wes. Nge üa iotek, “Ai Kot, kopwe apöchökülaei.”
NEH 6:10 Iwe, lon eu rän üa feila lon imwen Semaia nöün Telaia we mwän, nge Telaia nöün Meetapel mi mwelilong lon imwan. Ätei a üreniei, “Ousipwe chufengen lon imwen Kot me lon ewe leni mi pin o apüngala ekewe asam, pun repwe feito o niik. Lon eu pwin repwe feito o niikela.”
NEH 6:11 Nge üa üra, “Ngang eman mwän, üsap sü. Ifa usun, eman mwän usun ngang epwe opolong lon ewe imwenfel pwe epwe manau? Üsap tolong.”
NEH 6:12 Iwe, lupwen üa ekieki usun, üa mefi pwe Kot esap fos ngeni Semaia, nge i a eäni ei kapasen osuni ngeniei, pun Topia me Sanpalat ra möni.
NEH 6:13 Popun ra möni Semaia, pwe epwe aniuokusuei pwe üpwe tipis ren ai föri ei föför, nge ir repwe tongeni aitengauaei o turunufaseei.
NEH 6:14 Iwe, üa iotek, “Ai Kot, kopwe chechemeni mine Topia me Sanpalat ra föri. Kopwe pwal chechemeni ewe soufos fefin Noatia me ekewe lusun soufos mi mochen aniuokusuei.”
NEH 6:15 Iwe, lon rüe me limuen ränin ewe maram Elul ewe tit a wesila. Ra angang ngeni lon ükükün lime me ruu rän.
NEH 6:16 Lupwen ekewe chon oputakem ra rongorong usun, nge chon ekewe mwü ünüküm ra küna ei, ra fokun säw, pun ra mefi pwe ei angang a fis ren än Kot alilis ngenikem.
NEH 6:17 Lon ena fansoun ekewe aramas tekia seni Juta ra tinala chomong toropwe ren Topia, nge nöün Topia kewe toropwe ra pwal toriir.
NEH 6:18 Pun chomong chon Juta ra riri ngeni Topia ren eu pwon fän akapel, pokiten Topia i pwülüen nöün Sekania we fefin, nge Sekania nöün Ara. Iwe, Jehoanan nöün Topia we mwän a pwal pwülüeni nöün Mesulam we fefin, nge Mesulam nöün Perekia.
NEH 6:19 Iwe, ekewe aramas ra apworausa usun än Topia kewe föför mürina me fän mesei o asile ngeni i ai kewe kapas. Nge Topia a chök tinato rei toropwe pwe epwe aniuokusuei.
NEH 7:1 Iwe, lupwen ewe tit a wes le ses, a pwal försefäl ekewe asamalap, ekewe chon mamasa ekewe asamalapen imwenfel, ekewe chon köl me ekewe mwän seni ewe ainangen Lefi ra kefilitä ngeni en me an angang.
NEH 7:2 Mürin, üa awisa Hanani pwii we me Hanania ewe meilapen imwen maun pwe repwe nemeni Jerusalem. Hanania eman mwän mi fokun allükülük, a pwal niuokusiti Kot lap seni chomong chienan kewe.
NEH 7:3 Iwe, üa üreniir, “Ekewe asamalapen Jerusalem resap suk tori akkar a tinekeniken, nge repwe kapüng o lokkola, lupwen ekewe chon mas ra chüen mamas. Oupwe pwal filätä chon masen ewe tit seni lein ekewe chon Jerusalem, ekoch repwe mamasa lon en me an lenien mamas, nge ekoch repwe mamasa awenewenen en me imwan.”
NEH 7:4 Iwe, Jerusalem eu telinimw a chömong o watte, nge aramasen lon ra chokükün, esap pwal wor chomong imw mi kaütä.
NEH 7:5 Mürin, Kot a atolonga lon ai ekiek pwe üpwe amwichafengeni ekewe aramas tekia, ekewe nöüwis me ekewe aramas, pwe epwe mak iteiter lon tettelin uruwor. Iwe, üa küna ewe puken uruwon chokewe mi liwinsefälito akom, nge iei mine a mak lon:
NEH 7:6 Ikkeiir ekewe aramas mi oola lon Papilon ra liwinsefäliti Jerusalem me Juta lon en me poputän telinimwan. Ir chokewe ewe king Nepukatnesar a uweerela Papilon me lom.
NEH 7:7 Iwe, nöür kewe souemwen Serupapel, Jesua, Nehemia, Asaria, Ramia, Naamani, Mortekai, Pilsan, Misperet, Pikwai, Nehum me Paana. Iei iteiten ekewe mwän seni ekewe aramasen Israel mi liwinsefäl seni ar oola:
NEH 7:8 Ekewe mwirimwirin Paros ükükün ruungeröü ipükü fik me ruoman.
NEH 7:9 Ekewe mwirimwirin Sefatia ükükün ülüpükü fik me ruoman.
NEH 7:10 Ekewe mwirimwirin Ara ükükün wonopükü lime me ruoman.
NEH 7:11 Ekewe mwirimwirin Pahat-moap, ir mwirimwirin Jesua me Joap ükükün ruungeröü walupükü engol me waluman.
NEH 7:12 Ekewe mwirimwirin Elam ükükün engeröü ruupükü lime me föman.
NEH 7:13 Ekewe mwirimwirin Satu ükükün walupükü faik me limman.
NEH 7:14 Ekewe mwirimwirin Sakai ükükün füpükü wone.
NEH 7:15 Ekewe mwirimwirin Pinui ükükün wonopükü faik me waluman.
NEH 7:16 Ekewe mwirimwirin Pepai ükükün wonopükü rüe me waluman.
NEH 7:17 Ekewe mwirimwirin Askat ükükün ruungeröü ülüpükü rüe me ruoman.
NEH 7:18 Ekewe mwirimwirin Atonikam ükükün wonopükü wone me füman.
NEH 7:19 Ekewe mwirimwirin Pikwai ükükün ruungeröü wone me füman.
NEH 7:20 Ekewe mwirimwirin Atin ükükün wonopükü lime me limman.
NEH 7:21 Ekewe mwirimwirin Ater, ir mwirimwirin Hiskia ükükün tiue me waluman.
NEH 7:22 Ekewe mwirimwirin Hasum ükükün ülüpükü rüe me waluman.
NEH 7:23 Ekewe mwirimwirin Pesai ükükün ülüpükü rüe me föman.
NEH 7:24 Ekewe mwirimwirin Harif ükükün ipükü engol me ruoman.
NEH 7:25 Ekewe mwirimwirin Kipion ükükün tiue me limman.
NEH 7:26 Iei iteiten ekewe mwän mi pwal liwinsefäl seni ar oola, lewor ra pop seni ekei telinimw: Seni Petleem me Netofa ükükün ipükü walik me waluman.
NEH 7:27 Seni Anatot ükükün ipükü rüe me waluman.
NEH 7:28 Seni Pet-asmafet ükükün faik me ruoman.
NEH 7:29 Seni Kiriat-jearim, Chefira me Peerot ükükün füpükü faik me ülüman.
NEH 7:30 Seni Rama me Kepa ükükün wonopükü rüe me eman.
NEH 7:31 Seni Mikmas ükükün ipükü rüe me ruoman.
NEH 7:32 Seni Petel me Ai ükükün ipükü rüe me ülüman.
NEH 7:33 Seni pwal ewe eu telinimw Nepo ükükün lime me ruoman.
NEH 7:34 Seni pwal ewe eu telinimw Elam ükükün engeröü ruupükü lime me föman.
NEH 7:35 Seni Harim ükükün ülüpükü rüe.
NEH 7:36 Seni Jeriko ükükün ülüpükü faik me limman.
NEH 7:37 Seni Lot, Hatit me Ono ükükün füpükü rüe me eman.
NEH 7:38 Seni Sena ükükün ülüngeröü tiupükü ilik.
NEH 7:39 Iei iteiten ekewe souasor mi liwinsefäl seni ar oola: Ekewe mwirimwirin Jetaia, ir chon leimwen Jesua ükükün tiupükü fik me ülüman.
NEH 7:40 Ekewe mwirimwirin Imer ükükün engeröü lime me ruoman.
NEH 7:41 Ekewe mwirimwirin Pasur ükükün engeröü ruupükü faik me füman.
NEH 7:42 Ekewe mwirimwirin Harim ükükün engeröü engol me füman.
NEH 7:43 Iei iteiten chon ewe ainangen Lefi mi liwinsefäl seni ar oola: Ekewe mwirimwirin Jesua me Katmiel, ir mwirimwirin Hotawia ükükün fik me föman.
NEH 7:44 Iei iteiten ekewe chon köl: Ekewe mwirimwirin Asaf ükükün ipükü faik me waluman.
NEH 7:45 Iei iteiten ekewe chon mamasa asamalapen imwenfel: Ekewe mwirimwirin Salum, Ater, Talmon, Akup, Hatita me Sopai, irfengen meinisin ükükün ipükü ilik me waluman.
NEH 7:46 Ikkei ir ekewe chon angang ngeni imwenfel mi liwinsefäl seni ar oola: Ekewe mwirimwirin Siha, Hasufa me Tapaot,
NEH 7:47 Keros, Sia me Paton,
NEH 7:48 Lepana, Hakapa me Salmai,
NEH 7:49 Hanan, Kitel me Kahar,
NEH 7:50 Reaia, Resin me Nekota,
NEH 7:51 Kasam, Usa me Pasea,
NEH 7:52 Pesai, Meunim me Nefusesim,
NEH 7:53 Pakpuk, Hakufa me Harur,
NEH 7:54 Paslit, Mehita me Harsa,
NEH 7:55 Parkos, Sisera me Tema,
NEH 7:56 Nesia me Hatifa.
NEH 7:57 Ikkei ir mwirimwirin nöün Salomon kewe chon angang mi liwinsefäl seni ar oola: Ekewe mwirimwirin Sotai, Soferet me Perita,
NEH 7:58 Jala, Tarkon me Kitel,
NEH 7:59 Sefatia, Hatil, Pokeret-hasepaim me Amon.
NEH 7:60 Iwe, iteiten ekewe chon angang ngeni imwenfel me ekewe mwirimwirin nöün Salomon kewe chon angang ükükün ülüpükü tiue me ruoman.
NEH 7:61 Ikkei iteiten chokewe mi feito seni ekewe telinimw Telmela, Telharsa, Cherup, Aton me Imer, nge resap tongeni afata än semelaper kewe cho, ika ir mwirimwirin chon Israel:
NEH 7:62 Ekewe mwirimwirin Telaia, Topia me Nekota ükükün wonopükü faik me ruoman.
NEH 7:63 Nge seni lein ekewe souasor esap afat lewor: Ekewe mwirimwirin Hopaia, Hakos me Parsilai. Ätei a angei eman pwülüan seni ekewe fefin nöün Parsilai ewe re Kiliat o iteni iten semen pwülüan we.
NEH 7:64 Ikkei ir ekewe mwän ra kütta iter me lein chokewe mi makelong iter lon ewe puken uruwo, nge resap küna. Iei mine resap tongeni wiseni ewe wisen souasor, pun ra nom lon tettelin chon limengau.
NEH 7:65 Iwe, ewe kepina a üreniir pwe resap tongeni mongö seni ewe mongö mi unusen pin, tori epwe wor eman souasor mi tongeni kütta pwüngün ren ewe Urim me Tumim .
NEH 7:66 Iwe, iteiten unusen ewe mwichen aramas mi liwinsefäl seni ar oola ükükün faik me ruungeröü ülüpükü wone.
NEH 7:67 Nge nöür chon angang mwän me chon angang fefin resap alealong lon ei iteit ükükün fisungeröü ülüpükü ilik me füman. Mi pwal wor nöür chon köl mwän me fefin ükükün ruupükü faik me limman.
NEH 7:68 Iwe, a pwal wor nöür oris ükükün füpükü ilik me wonoman, nöür ätemwänin aas ükükün ruupükü faik me limman,
NEH 7:69 nöür kamel ükükün föpükü ilik me limman, nge nöür aas ükükün wonongeröü füpükü rüe.
NEH 7:70 Iwe, chomong lein ekewe aramas ra fangala pisek ngeni angangen ewe imwenfel: Ewe kepina a fangala ina epwe ükükün engol me tiu paun kolt, lime sepi me limepükü ilik üfen souasor.
NEH 7:71 Ekoch me lein ekewe mwänirelan än semer kewe cho ra pwal fangala ngeni angangen ewe imwenfel ina epwe ükükün ülüpükü fik me limu paun kolt me ina epwe ükükün eu euleülüngat ton silifer.
NEH 7:72 Nge ekewe lusun aramas ra fangala ina epwe ükükün ülüpükü fik me limu paun kolt me ina epwe ükükün eu eulerüanü ton silifer me wone me fücho üfen souasor.
NEH 7:73 Iwe, ekewe souasor me chon ewe ainangen Lefi, ekewe chon mamasa asamalapen imwenfel, ekewe chon köl, ekoch me lein ekewe aramas, ekewe chon angang ngeni ewe imwenfel me ekewe lusun chon Israel meinisin ra nonom lon en me an telinimw.
NEH 8:1 Iwe, lupwen a tori ewe afisuen maram, nge ekewe chon Israel ra nonom lon ar kewe telinimw, ir meinisin ra mwichefengen fän tipeeu lon Jerusalem lon ewe leni mi amassawa mwen ewe Asamalapen Koluk. Iwe, ra üreni Esra ewe sousile allük pwe epwe uwato än Moses we puken allük, ia a mak ie ekewe allük ewe Samol mi Lapalap a ngeni chon Israel.
NEH 8:2 Lon aeuin ränin ewe afisuen maram ewe souasor Esra a uwato ewe puken allük me mwen ewe mwichen aramas, ir ekewe mwän me fefin, pwal semirit meinisin mi tongeni weweiti.
NEH 8:3 A aleani ewe allük le sape ngeni ewe leni mi amassawa me mwen ewe Asamalapen Koluk seni lesosorusich tori leoloas. A aleani mwen ekewe mwän me fefin pwal ekewe semirit meinisin mi tongeni weweiti. Iwe, ekewe aramas meinisin ra aü selinger ngeni masouen ewe puken allük.
NEH 8:4 Nge Esra a ütä won eu lenien afalafal mi för seni irä, ra föri fän iten ei popun. Iwe, Matitia, Sema, Anaia, Uria, Hilkia me Maseia ra ü ünükün me lepelifichin. Nge Petaia, Misael, Malkia, Hasum, Haspatana, Sekaria me Mesulam ra ü ünükün me lepelimöngün.
NEH 8:5 Esra a suki ewe puk won lenian mi tekia, nge ekewe aramas meinisin ra chök nenengeni. Nge lupwen a suki ewe puk, ekewe aramas meinisin ra ütä.
NEH 8:6 Esra a mwareiti ewe Samol mi Lapalap ewe Kot mi Tekia, nge ekewe aramas meinisin ra aitietä pöür o apasa, “Amen, Amen.” Iwe, ra rotiu, ra chapetiu lepwül o fel ngeni ewe Samol mi Lapalap.
NEH 8:7 Mürin, ekewe aramas ra ütä lon en me lenian, nge ekewe mwän seni ewe ainangen Lefi iter Jesua, Pani, Serepia, Jamin, Akup, Sapetai, Hotia, Maseia, Kelita, Asaria, Josapat, Hanan me Pelaia ra awewei ngeniir ewe allük.
NEH 8:8 Ra aleaniöchü ewe puken allük än Kot, ra aföüü o aweweni, pwe ekewe aramas ra tongeni weweiti.
NEH 8:9 Iwe, lupwen ekewe aramas ra rongorong kapasen ewe allük, a mwökütüküt letiper pwe ra kechü. Iei mine ewe kepina Nehemia, ewe souasor Esra, i ewe sousile allük, me ekewe mwän seni ewe ainangen Lefi mi aiti ngeni ekewe aramas ewe allük ra üreni ekewe aramas meinisin, “Ei rän a pin fän iten ewe Samol mi Lapalap äm we Kot. Ousap letipeta ika kechü.”
NEH 8:10 Mürin, Nehemia a üreniir, “Oupwe liwiniti en me lenian, oupwe eni mongö mi anö o ünümi wain mi arar. Oupwe pwal tinala och seni enemi me ünümemi ngeni chokewe resap tongeni amolätä och. Pun ei rän a pin fän iten ewe Samol. Ousap letipeta, pun ewe pwapwa seni ewe Samol mi Lapalap epwe apöchökülakemi.”
NEH 8:11 Iei usun ekewe mwän seni ewe ainangen Lefi ra amosonosonala ekewe aramas meinisin o üreniir, “Oupwe chipila, pun ei rän a pin. Ousap letipeta.”
NEH 8:12 Mürin, ekewe aramas meinisin ra liwiniti en me lenian, ra mongö o ün fän watten pwapwa, ra pwal tinala och ngeni chokewe esap wor ener, pun ra weweiti ekewe kapas ra rongorong.
NEH 8:13 Iwe, lon aruuen ränin ewe maram ekewe mwänirelan än semer kewe cho seni ekewe aramas meinisin, pwal ekewe souasor me ekewe mwän seni ewe ainangen Lefi ra feitopök ren Esra ewe sousile allük, pwe repwe kaiö kapasen ewe allük.
NEH 8:14 Iwe, ra küna pwe a mak lon ewe allük Moses a allük fän alon ewe Samol mi Lapalap pwe ekewe aramasen Israel repwe nonom lon likachoch lupwen ewe fansoun chulapen likachoch lon afisuen maram.
NEH 8:15 Iei mine ra asilefeili o arongafeili lon ar kewe telinimw meinisin pwal lon Jerusalem, pwe aramas repwe feila won ekewe chuk o uwato palen ewe irä olif, mwoosor me palm, pwal palen sokopaten irä mi muresires, pwe repwe föri likachoch usun a fen mak lon ewe allük.
NEH 8:16 Mürin, ekewe aramas ra feila o uwato ekewe palen irä. Iwe, ra föri likachoch fän iter won en me imwan, lon ekewe leni lükün imwer, pwal lükün ewe imwen Kot, lon ekewe leni mi amassawa arun ewe Asamalapen Koluk me arun ewe Asamalapen Efraim.
NEH 8:17 Iwe, ekewe aramas meinisin mi liwinto seni ar oola ra föri likachoch o nonom lor. Pun seni fansoun Josua nöün Nun we mwän tori ei rän ekewe aramasen Israel resap föri mwo iei usun. Iwe, a fis watten pwapwa.
NEH 8:18 Seni aeuin ränin ewe chulap tori lesopolan Esra a aleani ewe puken allük än Kot ngeni ekewe aramas. Ra föri ewe chulap lon ükükün fisu rän, nge lon awaluen rän ra föri eu mwich mi pin, usun a mak lon ewe allük.
NEH 9:1 Iwe, lon rüe me rüanün ränin ei chök maram ekewe aramasen Israel ra mwichefengen, ra echikefel o üföüf üf seni tuk, ra pwal tukotuketä pwül won mökürer pwe asisilen ar letipeta pokiten ar tipis.
NEH 9:2 Iwe, ekewe chon Israel ra aimwürela seni ekewe chon ekis meinisin, ra ütä o pwärätä ar kewe tipis me än ar kewe lewo föföringau.
NEH 9:3 Lon ükükün ülüngat kulok ra ütä won lenier, lupwen än ewe Samol mi Lapalap ar we Kot puken allük a alea ngeniir, nge lon pwal ükükün ülüngat kulok ra pwärätä ar tipis o fel ngeni ewe Samol mi Lapalap ar we Kot.
NEH 9:4 Mi wor eu leni mi ekis tekia fän iten ekewe mwän seni ewe ainangen Lefi, ia Jesua, Pani, Katmiel, Sepania, Puni, Serepia, Pani me Chenani ra ütä ie. Ra leüömong le iotek ngeni ewe Samol mi Lapalap ar we Kot.
NEH 9:5 Mürin, ekewe mwän seni ewe ainangen Lefi Jesua, Katmiel, Pani Hasapneia, Serepia, Hotia, Sepania me Petaia ra apasa, “Oupwe ütä o mwareiti ewe Samol mi Lapalap ämi we Kot tori feilfeilachök. Oupwe mwareiti itan mi ling, a tekia seni ekewe feiöch meinisin me mine aramas ra mwareiti.”
NEH 9:6 Mürin, ekewe aramasen Israel ra eäni ei iotek, “En Kot, en chök ewe Samol mi Lapalap. Ka föri läng, ekewe sässärin läng mi fokun tekia, pwal mettochun lon meinisin. Ka föri fanüfan me meinisin mine a nom won, ekewe matau me masouen lor meinisin. En ka pwal ngeniir meinisin ar manau. Iwe, ekewe chon läng meinisin ra fel ngonuk.
NEH 9:7 En ewe Samol mi Lapalap, ewe Kot mi filätä Apram, ka emwenawu i seni Ur lon ewe fanü Papilon o siwili itan ngeni Apraham.
NEH 9:8 Ka küna pwe a allükülük ngonuk, ka föri eu pwon ngeni pwe kopwe ngeni mwirimwirin kana ewe fanüen chon Kaanan, chon Hit, chon Amor, chon Peris, chon Jepus me chon Kirkas, pwe repwe fanüeni. En ka apwönüetä om we pwon, pun ka pwüng.
NEH 9:9 Iwe, ka küna än äm kewe lewo riaföü me lon Isip o rongorong ar siö me arun ewe Setipar.
NEH 9:10 Ka föri asisil me manaman o afeiengaua Farao me nöün kewe nöüwis meinisin, pwal aramasen fanüan meinisin, pun ka silei pwe ra ariaföüü äm kewe lewo fän lamalamtekia. Ren ei föför itom a iteföüla tori ikenai.
NEH 9:11 Ka kinifeseni ewe matau me mwer pwe ra tongeni pwerelong lukalapan won pwasapwas, nge ka aturalong ekewe chon tapweriir le alololun ewe matau, usun eföü fau a turulong lon eu matau mi öütöüt.
NEH 9:12 Iwe, ka emweniir lerän ren eu ürekuchu, nge lepwin ka emweniir ren eu üreekkei, pwe epwe saram ewe al repwe fetal won.
NEH 9:13 Ka feitiu won ewe chuk Sinai seni läng, ka fos ngeniir o ngeniir ekewe pwüüng mi wenechar me ekewe allük mi pwüng o mürina.
NEH 9:14 Ka asile ngeniir pwe repwe apini om kewe ränin sapat, nge Moses noum we chon angang a ngeniir ekewe allük me pwüüng fän alom.
NEH 9:15 Ka ngeniir mongö seni läng lupwen ra echik, ka apuwowu koluk seni ewe achau lupwen ra kaka. Ka pwal üreniir pwe repwe tolong lon ewe fanü o fanüeni, usun ka fen pwon fän akapel pwe kopwe ngeniir.
NEH 9:16 Nge äm kewe lewo ra lamalamtekia o tipepöchökül, resap aleasochisi om kewe allük.
NEH 9:17 Resap fokun mochen aleasochis ngonuk, resap pwal ekieki ekewe manaman ka föri lefiler. Nge ra chök tipepöchökül o filätä eman souemwen, epwe aliwinirela Isip pwe aramas repwe nöüniir amanau. Nge en eman Kot mi amusala tipis, ka kirikiröch o ümöümöch, ka pwal songomang o wöün tong ellet. Iei mine kosap likitirela,
NEH 9:18 lupwen ra mwo nge föri fän iter uluulun eman nienifön kow seni mächä o üra, ‘Iei i äm we Kot mi emwenikeemiwu seni Isip,’ pwal lupwen ra fokun turunufaseek.
NEH 9:19 Pokiten ka fokun ümöümöch, kosap likitirela lon ewe fanüapö. Ewe ürekuchu mi emweniir won ewe al esap sü seniir lerän, nge ewe üreekkei, a asarama ewe al repwe fetal won, esap sü seniir lepwin.
NEH 9:20 Ka lifang ngeniir Ngünum mi mürina, pwe epwe öüröüreer, ka pwal amongö ngeniir om mana o aünü ngeniir koluk.
NEH 9:21 Lon ükükün faik ier ka tümwünüür lon ewe fanüapö, pwe resap osupwang ren och. Üfer kewe ra üföüf resap kamwala, nge pecher resap pwo.
NEH 9:22 Ka atolonga ekewe mwü me aramasen lor fän nemeniir, ka pwal afanüa ngeniir fanüer kewe meinisin. Iei mine ra fanüeni fanüen Sihon ewe kingen Hespon me fanüen Ok ewe kingen Pasan.
NEH 9:23 Ka achomonga mwirimwirir kewe pwe ra chomong usun chomongun ekewe fün läng, ka pwal emwenirelong lon ewe fanü, ka fen üreni ar kewe lewo pwe repwe tolong lon o fanüeni.
NEH 9:24 Iei mine mwirimwirir kewe ra tolong lon ewe fanü o fanüeni. En ka akufu me mwer ekewe chon Kaanan mi nom lon ewe fanü o atolonga fän nemenier ar kewe king me aramasen ewe fanü, pwe repwe tongeni föri ngeniir usun ar mochen.
NEH 9:25 Iwe, ra liapeni telinimw mi pöchökül tittir me fanü mi mürina o imweni ekewe imw mi ur ren mettoch mi mürina. Ra eäni ekewe chönüttu o tanipini ekewe tanipin wain me olif, pwal chomong sokopaten irä mi ua. Ra mongö o möt, ra pwal kitinupula. Ra fokun pwapwa ren ekewe mettoch mi mürina ka lifang ngeniir.
NEH 9:26 Iei mwo nge noum kewe aramas ra chök lükümach o ü ngonuk, ra pöütala om allük lükisökürür o niela noum kewe soufos mi fönöör pwe repwe kulsefälituk, ra pwal fokun turunufaseek.
NEH 9:27 Iei mine ka asechirelong lepöün chon oputeer mi ariaföüür. Iwe, lon fansoun ar riaföü ra siö ngonuk, nge en ka aüselingeer seni läng. Lon om ümöümöch mi lapalap ka ngeniir souemwen mi angaseer seni lepöün chon oputeer.
NEH 9:28 Nge lupwen ra kinamwe, ra försefäli mine a ngau me fän mesom. Mürin ka asechisefälirelong lepöün chon oputeer pwe repwe nemeniir. Nge lupwen ra ekieksefäl o siö ngonuk, ka aüselingeer seni läng. Fän chomong ka angaseer lon om ümöümöch.
NEH 9:29 Ka fönöör pwe repwe aleasochis ngeni om kewe allük. Nge ir ra chök lamalamtekia o aleasolap ngeniir. Iwe, ra tipis ren ar puri om kewe pwüüng, are eman epwe fen apwönüretä, epwe manau ren. Iwe, ra ülöförea o tipepöchökül, nge resap mochen aleasochis.
NEH 9:30 Chomong ier ka mosonotam ngeniir, ka ngeni noum kewe soufos Ngünum pwe repwe tongeni fönöör, nge resap mochen aüselinga. Iei mine ka atolongeer fän nemenien ekoch mwü.
NEH 9:31 Iei mwo nge lon om ümöümöch mi lapalap kosap likitirela ika aroserela. Pun en eman Kot mi kirikiröch o ümöümöch.
NEH 9:32 Äm Kot, en eman Kot mi tekia o manaman, aramas ra niuokusituk, ka apwönüetä om pwon me tong ellet ngenikem. Iei mine kopwe ekieki usun ekewe riaföü meinisin ra torikem, ra tori äm kewe king me samol, nöüm kewe souasor me soufos, äm kewe lewo me nöüm kewe aramas meinisin seni fansoun mwün ekewe kingen Asiria tori ikenai.
NEH 9:33 Nge en ka pwüng won meinisin mine ka föri ngenikem. En ka allükülük ngenikem, nge äm aia tipis ngonuk.
NEH 9:34 Äm kewe king me samol, äm kewe souasor me äm kewe lewo resap apwönüetä om kewe allük ika afäli om kewe pwüüng me om kewe kapasen fön ka ngeniir.
NEH 9:35 Pwal lupwen ra nemenem lon mwür o pwapwaäsini ekewe feiöch ra angei senuk me lon ewe fanü mi watte o pwülüöch ka ngeniir, ir resap kul seni ar kewe föför mi ngau o angang ngonuk.
NEH 9:36 Nengeni, aramas ra nöünikem amanau ikenai. Aramas ra nöünikem amanau me lon ewe fanü ka ngeni äm kewe lewo, pwe repwe pwapwaiti uan me ekewe mettoch mi mürina lon.
NEH 9:37 Iwe, uän ewe fanü mi watte a tori ekewe king, en ka awiseer pwe repwe nemenikem pokiten aia tipis. Ra pwal nemeni inisim me nöüm kewe man usun ar mochen, nge äm aia nom lon riaföü watte.”
NEH 9:38 Pokiten ekei mettoch mi fis, äm ekewe chon Israel aia föri eu pwon mi nükünük o makeetiu kapasan, nge äm kewe samol, nöüm kewe mwän seni ewe ainangen Lefi me nöüm souasor ra saini iter won o impwangei.
NEH 10:1 Iwe, ikkei iten chokewe mi saini iter: Ewe kepina Nehemia nöün Hakalia we mwän me Setekia.
NEH 10:2 Pwal ekei souasor iter: Seraia, Asaria me Jeremaia,
NEH 10:3 Pasur, Amaria me Malkia,
NEH 10:4 Hatus, Sepania me Maluk,
NEH 10:5 Harim, Meremot me Opatia,
NEH 10:6 Taniel, Kineton me Paruk,
NEH 10:7 Mesulam, Apia, me Miamin,
NEH 10:8 Masia, Pilkai me Semaia.
NEH 10:9 Ikkei iten ekewe mwän seni ewe ainangen Lefi: Jesua nöün Asania we mwän, Pinui seni ewe familien Henatat, me Katmiel,
NEH 10:10 pwal pwiir kewe iter Sepania, Hotia, Kelita, Pelaia me Hanan,
NEH 10:11 Mika, Rehop me Hasapia,
NEH 10:12 Sakur, Serepia me Sepania,
NEH 10:13 Hotia, Pani me Peninu.
NEH 10:14 Ikkei iten samolun ekewe aramas: Paros, Pahat-moap, Elam, Satu me Pani,
NEH 10:15 Puni, Askat me Pepai,
NEH 10:16 Atonia, Pikwai me Atin,
NEH 10:17 Ater, Hiskia me Asur,
NEH 10:18 Hotia, Hasum me Pesai,
NEH 10:19 Harif, Anatot me Nepai,
NEH 10:20 Makpias, Mesulam me Hesir,
NEH 10:21 Mesesapel, Satok me Jatua,
NEH 10:22 Pelatia, Hanan me Anaia,
NEH 10:23 Hosea, Hanania me Hasup,
NEH 10:24 Haloes, Pilha me Sopek,
NEH 10:25 Rehum, Hasapna me Maseia,
NEH 10:26 Ahia, Hanan me Anan,
NEH 10:27 Maluk, Harim me Paana.
NEH 10:28 Iwe, äm aramasen Israel, ekewe souasor, ekewe mwän seni ewe ainangen Lefi, ekewe chon mamasa asamalapen imwenfel, ekewe chon köl, ekewe chon angang ngeni imwenfel, pwal meinisin mi aimwürela seni aramasen ekewe fanü pokiten ar aleasochisi än Kot we allük fiti pwülüem, nöüm mwän me fefin, meinisin mi tongeni silei o weweiti ewe pwon,
NEH 10:29 aia chufengen me äm kewe souemwen le pwon fän akapel. Aia pwon fän akapel pwe aipwe apwönüetä än Kot we allük Moses nöün Kot we chon angang a ngenikem, aipwe pwal aleasochisi än ewe Samol mi Lapalap äm we Samol kewe allük me pwüüng meinisin. Nge iö kana ra atai ei pwon repwe anümamau.
NEH 10:30 Äm aisap apwüpwülüa nöüm kewe föpwül ngeni aramasen ei fanü ika apwüpwülüa nöüm alüal ngeni nöür föpwül.
NEH 10:31 Nge are aramasen ekewe fanü repwe uwato pisek ika wiich pwe repwe amömö lon ewe ränin sapat, äm aisap kamö seniir lon ewe ränin sapat ika lon eu rän mi pin. Äm aisap fotuki och lon iteiten afisuen ier, aia pwal amusala än pwiim kewe liwinimang.
NEH 10:32 Iwe, äm aia pwal püsin pwon pwe aipwe püngütiu eu lewalu aunus silifer iteiten ier fän iten angangen imwen äm we Kot:
NEH 10:33 Fän iten ekewe pilawa mi pin, ewe asoren mongö me ewe asoren kek mi fifis iteiten rän, fän iten ekewe asor mi fis lon ränin sapat, lon ekewe ränin popun maram, lon ekewe chulap mi kefil, fän iten ekewe asor mi pin, ekewe asoren tipis fän iten amusamusen än ekewe aramasen Israel tipis, pwal fän iten angangen lon imwen äm we Kot meinisin.
NEH 10:34 Äm kewe souasor, ekewe mwän seni ewe ainangen Lefi me ekewe aramas, aia pwal üttüt won iö lein än semelapem kewe cho epwe uwato amwüch lon imwen äm we Kot iteiten ier lon ewe fansoun mi afat, fän iten ekewe asor repwe kek won än ewe Samol mi Lapalap äm we Kot we rongen asor, usun a fen mak lon ewe allük.
NEH 10:35 Äm aia pwon pwe iteiten ier aipwe uwato mwen uän fotäm irä lon ewe imwenfel, pwal mwen uän ekewe sokopaten irä meinisin.
NEH 10:36 Äm aipwe uwato nöüm kewe mwänichi ren ekewe souasor mi angang lon imwen äm we Kot pwe nöün. Aipwe pwal uwato mweinöün nöüm pwiin kow me sip me kuuch, usun a fen mak lon ewe allük.
NEH 10:37 Äm aipwe pwal uwato ren ekewe souasor lon ekewe rumwen iseis lon imwen äm we Kot öüwäem pilawa seni mwen kiniem wiich, pwal äm kewe asor seni uän ekewe irä meinisin, seni ewe wain me apüra. Aipwe pwal uwala ewe eu leengolun uän äm pwül ren ekewe mwän seni ewe ainangen Lefi, pun ir ra wisen ioni ekewe leengol seni lon sopum kewe meinisin.
NEH 10:38 Nge ekewe souasor ir mwirimwirin Aaron repwe eti ekewe mwän seni ewe ainangen Lefi, lupwen repwe angei ekewe leengol. Iwe, ekewe mwän seni ewe ainangen Lefi repwe uwato eu leengol seni ekewe leengol lon ekewe rumwen iseis lon imwen äm we Kot.
NEH 10:39 Ekewe chon Israel me ekewe mwän seni ewe ainangen Lefi repwe uwato ekewe asor seni wiich, wain me apüra lon ekewe rumwen iseis ia ekewe pisek fän iten ewe imwenfel ra nom ie, pwal ia ekewe souasor mi angang, ekewe chon mamasa ekewe asamalapen imwenfel me ekewe chon köl ra nom ie. Äm aisap tümwününgau ngeni angangen imwen äm we Kot.
NEH 11:1 Iwe, ekewe souemwenin aramas ra nom lon Jerusalem. Nge ekewe lusun aramas ra üttüt won eu famili me lein engol famili pwe epwe feito o nonom lon Jerusalem ewe telinimw mi pin, nge ekewe tiu lusun repwe nonom lon en me an telinimw.
NEH 11:2 Iwe, ekewe aramas ra afeiöchü chokewe meinisin mi filätä seni mochenin letiper pwe repwe nonom lon Jerusalem.
NEH 11:3 Nge lon ekewe lusun telinimwen Juta ekewe chon Israel, ekewe souasor, ekewe mwän seni ewe ainangen Lefi, ekewe chon angang ngeni ewe imwenfel me ekewe mwirimwirin nöün Salomon kewe chon angang ra nonom lon en me lenian lon ar kewe telinimw. Ikkei iten ekewe samolun ewe fanü Juta mi nom lon Jerusalem:
NEH 11:4 Seni chon ewe ainangen Juta: Ataia nöün Usia we mwän, Usia nöün Sekaria, Sekaria nöün Amaria, Amaria nöün Sefatia, Sefatia nöün Malalel, nge Malalel eman mwirimwirin Peres.
NEH 11:5 Pwal Maseia nöün Paruk we mwän, Paruk nöün Kolhose, Kolhose nöün Hasaia, Hasaia nöün Ataia, Ataia nöün Joiarip, Joiarip nöün Sekaria, nge Sekaria eman mwirimwirin Sela.
NEH 11:6 Iwe, ekewe mwirimwirin Peres meinisin mi nom lon Jerusalem ükükün föpükü wone me waluman mwän mi pöchökül o pwora.
NEH 11:7 Nge seni chon ewe ainangen Peniamin: Salu nöün Mesulam we mwän, Mesulam nöün Joet, Joet nöün Petaia, Petaia nöün Kolaia, Kolaia nöün Maseia, Maseia nöün Itiel, nge Itiel nöün Jesaia,
NEH 11:8 pwal märärin kewe Kapai me Salai, irfengen meinisin ükükün tiwepükü rüe me waluman.
NEH 11:9 Iwe, Joel nöün Sikri ar sounemenem, nge Juta nöün Hasenua a kisin fan le nemenem lon ewe telinimw.
NEH 11:10 Ikkei iten ekewe souasor mi nom lon Jerusalem: Jetaia nöün Joiarip we mwän me Jakin,
NEH 11:11 Seraia nöün Hilkia we mwän, Hilkia nöün Mesulam, Mesulam nöün Satok, Satok nöün Meraiot, nge Meraiot nöün Ahitup, ewe mi nemeni ewe imwen Kot,
NEH 11:12 fiti märärir kewe mi föri angangen lon ewe imwenfel, irfengen meinisin ükükün walupükü rüe me ruoman. Iwe, pwal Ataia nöün Jeroham we mwän, Jeroham nöün Pelalia, Pelalia nöün Amsi, Amsi nöün Sekaria, Sekaria nöün Pasur, nge Pasur nöün Malkia,
NEH 11:13 fiti märärin kewe, ir mwänirelan än semer kewe cho, irfengen meinisin ükükün ruupükü faik me ruoman. Pwal Amasai nöün Asarel we mwän, Asarel nöün Asai, Asai nöün Mesilemot, nge Mesilemot nöün Imer,
NEH 11:14 fiti märärin kewe, ir sounfiu mi pwora, irfengen meinisin ükükün ipükü rüe me waluman. Iwe, Saptiel nöün Haketolim we mwän ar sounemenem.
NEH 11:15 Pwal ikkei iten ekewe mwän seni ewe ainangen Lefi: Semaia nöün Hasup we mwän, Hasup nöün Asrikam, Asrikam nöün Hasapia, nge Hasapia nöün Puni.
NEH 11:16 Iwe, Sapetai me Josapat ir samolun ekewe mwän seni ewe ainangen Lefi, ra wisen nemeni angangen ünükün ewe imwen Kot.
NEH 11:17 Pwal Matania nöün Mika we mwän, Mika nöün Sapti, nge Sapti eman mwirimwirin Asaf, i souemwenin ewe mwichen chon köl a wisen chietä ewe kölün kilisou lupwen fansoun iotek. Iwe, Pakpukia ewe aruomanün me lein märärin kewe, pwal Apta nöün Samua we mwän, Samua nöün Kalal, nge Kalal eman mwirimwirin Jetutun.
NEH 11:18 Iwe, ekewe mwän seni ewe ainangen Lefi meinisin mi nom lon Jerusalem ewe telinimw mi pin ükükün ruupükü walik me föman.
NEH 11:19 Iwe, iten ekewe chon mamasa asamalapen imwenfel Akup me Talmon fiti märärir kewe ükükün ipükü fik me ruoman.
NEH 11:20 Nge ekewe lusun chon Israel, ekewe lusun souasor me chon ewe ainangen Lefi ra nonom lon ekewe telinimwen Juta lon en me püsin fanüan.
NEH 11:21 Iwe, ekewe chon angang ngeni imwenfel ra nonom lon Ofel, eu kinikinin lon ewe telinimw Jerusalem, nge Siha me Kispa ra wisen nemeniir.
NEH 11:22 Iwe, ewe sounemenemen chon ewe ainangen Lefi mi nom lon Jerusalem itan Usi nöün Pani we mwän, Pani nöün Hasapia, Hasapia nöün Matania, nge Matania nöün Mika, eman me lein ekewe mwirimwirin Asaf, ir ekewe chon köl mi wisen köl lupwen ar fel lon ewe imwen Kot.
NEH 11:23 Pun mi wor eu allük fän iten ekewe chon köl me ren ewe king, a akota usun ar angang repwe föri iteiten rän.
NEH 11:24 Nge Petaia nöün Mesesapel we mwän seni ekewe mwirimwirin Sera nöün Juta a wisen tupuni ekewe aramasen Israel ngeni ewe kingen Persia won mettoch meinisin.
NEH 11:25 Ikkei ekewe telinimw me ekewe tanipi ünükür, ekoch chon ewe ainangen Juta ra nonom lon: Kiriat-arapa, Tipon me Jekapsel fiti wisoposopur kewe.
NEH 11:26 Ra pwal nom lon ekewe telinimw Jesua, Molota me Petpelet,
NEH 11:27 Hasar-sual me Persepa fiti wisoposopun kewe,
NEH 11:28 lon Siklak me Mekona fiti wisoposopun kewe.
NEH 11:29 Ra pwal nom lon En-rimon, Sora me Jarmut,
NEH 11:30 Sanoa me Atulam fiti wisoposopur kewe, lon Lakis me ekewe tanipi ünükün, pwal lon Aseka fiti wisoposopun kewe. Iei usun ekewe chon Juta ra nonom lon ewe fanü seni Persepa mi nom ör tori ewe lemolun Hinom mi nom efeng.
NEH 11:31 Nge chon ewe ainangen Peniamin ra nonom lon Kepa, Mikmas, Aia me Petel fiti wisoposopun kewe,
NEH 11:32 lon Anatot, Nop me Anania,
NEH 11:33 Hasor, Rama me Kitaim,
NEH 11:34 Hatit, Sepoim me Nepalat,
NEH 11:35 Lot me Ono, pwal lon ewe lemol ia ekewe mwän mi sipeöch le angang ra nom ie.
NEH 11:36 Iwe, ekoch aramas seni ewe ainangen Lefi mi nom lon fanüen chon Juta ra awiseer pwe repwe nonom lon fanüen chon Peniamin.
NEH 12:1 Ikkei ir ekewe souasor me ekewe mwän seni ewe ainangen Lefi mi liwinsefäl seni ar oola, ra etato Serupapel nöün Sealtiel we mwän me Jesua: Ekewe souasor Seraia, Jeremaia, Esra,
NEH 12:2 Amaria, Maluk me Hatus,
NEH 12:3 Sekania, Rehum me Meremot,
NEH 12:4 Ito, Kinetoi me Apia,
NEH 12:5 Miamin, Matia me Pilka,
NEH 12:6 Semaia, Joiarip me Jetaia,
NEH 12:7 Salu, Amok, Hilkia me Jetaia. Ikkei ir samolun lein ekewe souasor fiti märärir kewe lon ränin manauen ewe souasor mi lap Jesua.
NEH 12:8 Ikkei ir ekewe mwän seni ewe ainangen Lefi: Jesua, Pinui, Katmiel, Serepia, Juta me Matania, nge Matania fiti märärin kewe ra wisen chietä ekewe kölün kilisou.
NEH 12:9 Nge Pakpukia me Uno fiti märärir kewe ra ü awenewener lon ar mwichen köl mi likatatap.
NEH 12:10 Iwe, Jesua semen Joiakim, Joiakim semen Eliasip, nge Eliasip semen Joiata,
NEH 12:11 Joiata semen Jonatan, nge Jonatan semen Jatua.
NEH 12:12 Ikkei ir ekewe souasor, ir mwänirelan än semer kewe cho lon ränin manauen ewe souasor mi lap Joiakim: Meraia seni än Seraia we cho, Hanania seni än Jeremaia we cho,
NEH 12:13 Mesulam seni än Esra we cho, Jehoanan seni än Amaria we cho,
NEH 12:14 Jonatan seni än Maluki we cho, Josef seni än Sepania we cho,
NEH 12:15 Atna seni än Harim we cho, Helkai seni än Meraiot we cho,
NEH 12:16 Sekaria seni än Ito we cho, Mesulam seni än Kineton we cho,
NEH 12:17 Sikri seni än Apia we cho, Piltai seni än Miniamin-Moatia we cho,
NEH 12:18 Samua seni än Pilka we cho, Jehonatan seni än Semaia we cho,
NEH 12:19 Matenai seni än Joiarip we cho, Usi seni än Jetaia we cho,
NEH 12:20 Kalai seni än Salai we cho, Eper seni än Amok we cho,
NEH 12:21 Hasapia seni än Hilkia we cho, Netanel seni än Jetaia we cho.
NEH 12:22 Iwe, lon ränin manauen ekewe souasor mi lap Eliasip, Joiata, Johanan me Jatua a mak iteiten ekewe mwän seni ewe ainangen Lefi, ir mwänirelan än semer kewe cho, a pwal mak iteiten mwänirelan än ekewe souasor cho. Ei iteit a wes lon mwün Tarius ewe kingen Persia.
NEH 12:23 Nge iteiten ekewe mwän seni ewe ainangen Lefi, ir mwänirelan än semer kewe cho, a chök makelong lon ewe puken uruwo tori ränin Johanan nöün Eliasip we mwän.
NEH 12:24 Iwe, ikkei iten samolun ekewe mwän seni ewe ainangen Lefi: Hasapia, Serepia me Jesua nöün Katmiel we mwän, nge märärir kewe ra ü awenewener pwe repwe kölün mwareiti Kot o kilisou ngeni, usun Tafit ewe aramasen Kot a fen allük, eu mwich a likatatap mürin pwal eu mwich le köl.
NEH 12:25 Nge Matania, Pakpukia, Opatia, Mesulam, Talmon me Akup ra chon mamasa asamalapen ekewe imwen iseis arun asamalapen ewe imwenfel.
NEH 12:26 Ätekei ra föri ar angang lon ränin manauen Joiakim nöün Jesua we mwän, nge Jesua nöün Jehosatak, lon ränin manauen ewe kepina Nehemia, pwal lon ränin manauen ewe souasor Esra ewe sousile allük.
NEH 12:27 Iwe, lupwen fansoun efinünen ewe tittin Jerusalem ra kütta ekewe mwän seni ewe ainangen Lefi lon lenier kewe meinisin o emwenireto Jerusalem, pwe repwe föri efinünen ewe tit fän pwapwa, fän kölün kilisou, fän ar pisekin kaktai, fän tikin kitar me ükülele.
NEH 12:28 Iwe, ekewe chon köl seni familien chon ewe ainangen Lefi ra chufengen seni ekewe leni pwelin ünükün Jerusalem, seni ekewe sop ia ekewe chon Netofa ra nom ie,
NEH 12:29 pwal seni Pet-kilkal me ekewe fanü Kepa me Asmafet. Pun ekewe chon köl ra aüetä telinimw fän iter pwelin ünükün Jerusalem.
NEH 12:30 Iwe, ekewe souasor me ekewe mwän seni ewe ainangen Lefi ra püsin alimöchüür, ra pwal alimöchü ekewe aramas o föri angangen alimelim ngeni ekewe asamalap me ewe tit.
NEH 12:31 Mürin üa amwichafengeni ekewe samolun Juta won ewe tit o filätä ruu mwichen köl mi chocho, pwe repwe fetal won ewe tit o kölün kilisou. Eu mwich a fetal ngeni pelifich tori ewe Asamalapen Pipi.
NEH 12:32 Iwe, Hosaia a tapwela mürir fiti esopun ewe mwichen samolun chon Juta,
NEH 12:33 pwal Asaria, Esra me Mesulam,
NEH 12:34 Juta, Peniamin, Semaia me Jeremaia,
NEH 12:35 pwal ekoch souasor fän nöür kewe rappwa ra tapwela mürir me Sekaria nöün Jonatan we mwän, Jonatan nöün Semaia, Semaia nöün Matania, Matania nöün Mikaia, Mikaia nöün Sakur, nge Sakur nöün Asaf.
NEH 12:36 Iwe, märärin kewe ra tapwela mürin: Semaia, Asarel, Milalai, Kilalai, Maai, Netanel, Juta me Hanani fän ar pisekin ettik ra apirü seni förien Tafit ewe aramasen Kot. Nge Esra ewe sousile allük a akom mwer.
NEH 12:37 Iwe, lupwen ra tori ewe Asamalapen Chönüttu, ra fetal wenewenetä won ewe latö mi feitä ngeni ewe telinimwen Tafit o fetal won ewe al mi feitä won ewe tit asen imwen Tafit, ra pwal feila ngeni ewe Asamalapen Koluk mi nom ötiu.
NEH 12:38 Iwe, ewe aruuen mwich mi kölün kilisou a pwerela ngeni peliefengin me won ewe tit, nge ngang üa tapwela mürir fiti esopun ewe mwichen samolun ekewe aramas. Äm aia fetal asen ewe imw tekia Lenien Umw o fetal ngeni ewe tit mi chölap.
NEH 12:39 Seni ikenan aia feila asen ewe Asamalapen Efraim o feila ngeni ewe Asamalapen Lom, ngeni ewe Asamalapen Ik me ewe imw tekia imwen Hananel, pwal ngeni ewe imw tekia itan Ipükü tori ewe Asamalapen Sip. Iwe, aia kaüla ren ewe Asamalapen Chon Mamas.
NEH 12:40 Iei usun ekewe ruu mwich mi kölün kilisou ra tori ewe imwen Kot. Pwal ngang me esopun ewe mwichen nöüwis aia nom rer,
NEH 12:41 pwal ekewe souasor Eliakim, Maseia, Miniamin, Mikaia, Elioenai, Sekaria me Hanania ra ütä fän nöür kewe rappwa,
NEH 12:42 pwal Maseia, Semaia, Eleasar, Usi, Jehoanan, Malkia, Elam me Eser. Nge ekewe chon köl ra köl fän emwenien Jesraia.
NEH 12:43 Lon ena rän ra eäni asor chomong mönün asor, ra pwal meseik, pun Kot a föri pwe repwe meseik fän pwapwa mi watte. Pwal ekewe fefin me semirit ra meseik. Iwe, aramas ra rongorong me toau än chon Jerusalem pwapwa.
NEH 12:44 Iwe, lon ena fansoun ra filätä mwän repwe tümwünü ekewe rumw ia ra iseis ie ekewe lifang, ekewe mwen ua me ekewe leengol. Ra wisen ionifengeni seni ekewe tanipi mi nom ünükün ekewe telinimw ewe kinikin a fen pwüngüla lon allük o isenalong lon ekewe rumwen iseis fän iten ekewe souasor me ekewe mwän seni ewe ainangen Lefi. Iwe, ekewe chon Juta ra pwapwa ren angangen ekewe souasor me ekewe mwän seni ewe ainangen Lefi,
NEH 12:45 pun ra föri angangen ar we Kot me ewe angangen limelim. Pwal ekewe chon köl me ekewe chon mamasa asamalapen imwenfel ra föri ar angang usun Tafit me Salomon nöün we mwän ra allük.
NEH 12:46 Pun seni me lom lon ränin manauen Tafit me Asaf a wor chon emweni ekewe chon köl mi kölün mwareiti me kilisou ngeni Kot.
NEH 12:47 Iwe, lon ränin manauen Serupapel pwal lon ränin manauen Nehemia, chon Israel meinisin ra ngeni ekewe chon köl me chon mamasa asamalapen imwenfel wiser iteiten rän. Iwe, ra aimwüela wisen ekewe mwän seni ewe ainangen Lefi, nge ekewe mwän seni ewe ainangen Lefi ra aimwüela wisen ekewe mwirimwirin Aaron.
NEH 13:1 Iwe, lon ena fansoun, lupwen ra aleani än Moses we puken allük ngeni ekewe aramas, ra küna me lon pwe esap wor eman chon Amon ika chon Moap epwe tongeni choni nöün Kot we mwichen aramas.
NEH 13:2 Pun ir resap souni ekewe chon Israel fän pilawa me koluk, lupwen ra towu seni Isip, nge ra fen möni Palam pwe epwe pälüeniir o anümamaueer. Nge äm we Kot a sorei ewe anümamau ngeni feiöch.
NEH 13:3 Lupwen ekewe aramasen Israel ra rongorong ei allük, ra aimwüela seni ar we mwich chokewe meinisin ir mwirimwirin chon ekis.
NEH 13:4 Nge me lom ewe souasor Eliasip mi kefilitä, pwe epwe tümwünü ekewe rumwen iseis lon imwen äm we Kot, a pwipwi ngeni Topia.
NEH 13:5 Iwe, Eliasip a mwütätä ngeni Topia eu rumw watte ia ra iseis ie me mwan ewe asoren mongö, ewe apach mi pwokus, ekewe pisek fän iten imwenfel, ekewe asor fän iten ekewe souasor me ekewe leengolun wiich, wain me apüra fän iten ekewe mwän seni ewe ainangen Lefi, ekewe chon köl me ekewe chon mamasa asamalapen imwenfel.
NEH 13:6 Iwe, lupwen a fis ei lapalap, ngang üsap nom lon Jerusalem, pun lon ilik me ruuen ierin mwün Artaksasta ewe kingen Papilon üa liwiniti ewe king. Nge mürin eu fansoun üa tüngorei ewe king pwe epwe mwüt ngeniei ai üpwe liwinla.
NEH 13:7 Iwe, üa tori Jerusalem. Mürin üa küna ewe lapalap mi ngau Eliasip a föri, pwe a mwütätä ngeni Topia eu rumw me lon imwen Kot.
NEH 13:8 Iwe, üa fokun song o aturawu pisekin Topia meinisin seni lon ewe rumw.
NEH 13:9 Mürin üa allük pwe repwe föri angangen limelim lon ewe rumw, üa pwal aliwinala ekewe pisek fän iten ewe imwen Kot, ewe asoren mongö me ewe apach mi pwokus.
NEH 13:10 Üa pwal küna pwe ekewe aramas resap ngeni ekewe mwän seni ewe ainangen Lefi wiser. Iei mine ir me ekewe chon köl mi wisen föri ewe angang mi pin ra en me liwiniti an tanipi.
NEH 13:11 Iwe, üa apwüngü ekewe nöüwis o aisiniir, “Pwota ekewe aramas ra likitala ewe imwen Kot?” Iwe, üa amwichafengeni ekewe mwän seni ewe ainangen Lefi o atosefälirelong lon en me an angang.
NEH 13:12 Mürin, ekewe chon Juta meinisin ra uwato ekewe leengolun wiich, wain me apüra seni föün olif lon ekewe rumwen iseis.
NEH 13:13 Iwe, üa filätä ekoch mwän pwe repwe tümwünü ekewe rumwen iseis: ewe souasor Selemia, Satok ewe sousile allük me Petaia seni chon ewe ainangen Lefi. Nge ewe mi wisen alisiir Hanan nöün Sakur we mwän, nge Sakur nöün Matania. Iwe, a pwä pwe ätekei ir mwän mi allükülük, ra wisen ainetöchü ekewe mongö ngeni märärir kewe.
NEH 13:14 Ai Kot, kopwe chechemeniei fän äsengesin mine üa föri, nge kosap aücheangaua ai kewe föför mi mürina üa föri fän iten imwom me om kewe angang mi fis lon.
NEH 13:15 Lon ekana fansoun üa küna ekoch aramas me lon Juta, ra üchüch wain lon ewe ränin sapat. Pwal ekoch ra iseis wiich, wain, föün wain me fiik pwal sokopaten mettoch won nöür aas o uweereto Jerusalem lon ewe ränin sapat. Iwe, üa fönöör pwe resap amömö ewe mongö lon ewe ränin sapat.
NEH 13:16 Mi pwal wor re Tirus ra nom lon Jerusalem, ra uwato ik me sokopaten pisek o amömö ngeni ekewe aramasen Juta lon ewe ränin sapat.
NEH 13:17 Mürin üa apwüngü ekewe aramas tekia seni Juta o üreniir, “Pwota oua föri ei sokun föföringau pwe oua apiningaua pinin ewe ränin sapat?
NEH 13:18 Ifa usun, ämi kewe lewo resap pwal föri ei sokun föför, nge ach we Kot a atoto woch pwal won ei telinimw ekei feiengau meinisin? Nge ämi oua alapala än Kot lingeringer won Israel ren ämi apiningaua pinin ewe ränin sapat.”
NEH 13:19 Iwe, üa allük pwe ekewe asamalapen Jerusalem repwe kapüngüla, lupwen a popuetä pwinila me mwen ewe ränin sapat, nge resap tongeni suksefäl tori wesin ewe ränin sapat. Üa pwal anomu ekoch me lein nei chon angang ren ekewe asamalap, pwe esap wor eman a tongeni uwalong och mettoch lon ewe telinimw lon ewe ränin sapat.
NEH 13:20 Mürin, ekewe chon amömö mi amömö sokopaten pisek ra chök pwinipwin lükün tittin Jerusalem fän eu ika fän ruu.
NEH 13:21 Nge ngang üa fönöör o üreniir, “Pwota oua pwinipwin lükün ewe tit? Are oupwe försefäli, üpwe pöchökül ngenikemi.” Seni ei fansoun resap chüen feito lon ewe ränin sapat.
NEH 13:22 Iwe, üa allük ngeni ekewe mwän seni ewe ainangen Lefi, pwe repwe püsin alimöchüür, repwe feito o mamasa ekewe asamalap, pwe aramas repwe pinini pinin ewe ränin sapat. Ai Kot, kopwe chechemeniei fän äsengesin pwal ei föför üa föri, kopwe ümöümöch ngeniei lon om tong ellet mi fokun lapalap.
NEH 13:23 Lon ekana fansoun üa pwal küna re Juta mi pwüpwülü ngeni fin Astot, Amon me Moap.
NEH 13:24 Iwe, esop seni nöür kewe semirit ra eäni fosun Astot ika och sokun fosun aramas, nge resap tongeni eäni fosun Juta.
NEH 13:25 Iwe, üa apwüngüür o anümamaueer, nge ekoch me leir üa wichiir o ütti meten mökürer. Mürin, üa pesei ngeniir pwe repwe pwon fän akapel iten Kot, pwe resap fokun chüen apwüpwülüa nöür föpwül ngeni nöün ekewe chon ekis alüal, ika angei nöün ekewe chon ekis föpwül pwe pwülüen nöür alüal ika püsin pwülüer.
NEH 13:26 Üa üreniir, “Ifa usun, Salomon ewe kingen Israel esap tipis pokiten ena sokun fefin? Esap wor eman king usun i me lein kingen ekewe mwü meinisin. An Kot a fokun echeni o seikätä pwe epwe kingen Israel. Iei mwo ei, nge ekewe fin ekis ra tongeni emwenalong Salomon lon tipis.
NEH 13:27 Ifa usun, äm aipwe apirükemi o föri ekei föför mi fokun ngau, pwe aipwe aleasolap ngeni äm we Kot ren äm pwülüeni ekewe fin ekis?”
NEH 13:28 Iwe, eman seni nöün Jehoiata we mwän, nge Jehoiata nöün Eliasip ewe souasor mi lap, a pwülüeni eman föpwül nöün Sanpalat ewe re Pet-horon. Iei mine üa asüela Jehoiata seni Jerusalem.
NEH 13:29 Ai Kot, kopwe chechemeni ekei aramas, pun ra alimengaua ewe wisen souasor, ra pwal atai ewe pwon en ka föri ngeni ekewe souasor me ekewe mwän seni ewe ainangen Lefi.
NEH 13:30 Iei usun üa limeti ekewe aramas seni föförün ekewe chon ekis meinisin o akota wisen ekewe souasor me wisen ekewe mwän seni ewe ainangen Lefi, eman me eman ngeni an angang.
NEH 13:31 Iwe, üa pwal akota fansoun ineet ekewe aramas repwe uwato amwüchün ekewe asor me ekewe mwen ua. Ai Kot, kopwe chechemeni ei o afeiöchüei.
EST 1:1 Ei pworaus a fis lon ränin manauen Asuworos, i ewe Asuworos mi nemeni ipükü rüe me fisu sop seni Intia tori Itiopia.
EST 1:2 Lon ena fansoun ewe king Asuworos a mot won an lenien motun king lon Susa, samolun telinimwen ewe fanü.
EST 1:3 Iwe, lon aülüngatin ierin an nemenem a föri eu kametip fän iten nöün kewe samol me nöün kewe nöüwis meinisin. Iwe, ekewe samolun sounfiun Persia me Metia, pwal ekewe aramas tekia me kepinan ekewe sop ra nom ren.
EST 1:4 Lon ükükün ipükü walik rän king Asuworos a aiti ngeniir wöün mwün mi watte, pwal chomong sokun pisekin king mi amwarar o ling.
EST 1:5 Iwe, wesin ekewe rän, ewe king a föri eu kametip ngeni aramas meinisin mi nom lon Susa samolun telinimwen ewe fanü, ngeni aramas tekia me aramas tekison. Ewe kametip a fis lon ükükün fisu rän lon eu leni mi amassawa lükün ewe imwen king.
EST 1:6 Ewe leni a chech ngeni cheech mi pwech me arauarau, ra föfö ngeni säl mi fokun pwech pwal parachol lon ring seni silifer o riri ngeni üren lon ewe leni ra för seni ewe fau itan marpel. Mi pwal wor peet mi för seni kolt me silifer, nge won ewe lenien fetal a för seni ewe fau mi sokopat anüan seni marpel mi par me pwech me arauarau fetil.
EST 1:7 Ra ün wain lon chomong sokopaten kap seni kolt, nge ünümer wain me ren ewe king a fokun somwola.
EST 1:8 Iwe, a wor eu allük me ren ewe king ngeni nöün kewe chon angang, pwe resap echimwa eman lupwen ar repwe ngeni ünüman, nge repwe chök ngeni eman me eman ükükün an mochen ün.
EST 1:9 Lon ena chök fansoun kiwiin Fasti a pwal föri eu kametip fän iten ekewe fefin mi nom lon imwen ewe king Asuworos.
EST 1:10 Iwe, lon afisuen ränin ewe kametip, lupwen ewe king a pwapwa ren an ünümi wain, a allük ngeni Mehuman, Pista, Harpona, Pikta, Apakta, Setar me Karkas, ir nöün ewe king kewe füman chon angang mi angang ngeni,
EST 1:11 pwe repwe emwenato ren kiwiin Fasti fän mwärin mwärin kiwiin, pun a mochen einga ngeni ekewe aramas me ekewe nöüwis liöchün ewe kiwiin, pokiten a fokun liöch.
EST 1:12 Nge lupwen ekewe chon angang ra asile ngeni kiwiin Fasti än ewe king we allük, neminei esap mochen. Ren ei ewe king a wesewesen lingeringer o fokun song.
EST 1:13 Iei örünien ewe king pwe epwe angei öüröüran seni ekewe mi silelap allük me pwüng. Iei mine a körato ekewe sousile allük o aisiniir mine epwe föri.
EST 1:14 Ikkei ir ekewe mwän mi nom ren ewe king: Karsina, Setar, Atmata, Tarsis, Meres, Marsena me Memukan. Ir ekewe füman nöüwisen Persia me Metia mi tongeni churi ewe king iteiten fansoun o wiseni wis tekia lon mwün.
EST 1:15 Iwe, a aisiniir, “Met pwüngün ewe allük usun mine epwe fis ngeni kiwiin Fasti? Ngang king Asuworos üa tinala nei chon angang ren pwe repwe asile ngeni ai we allük, nge i esap fokun aleasochis ngeni.”
EST 1:16 Mürin, Memukan a pälüeni ei kapas ais me fän mesen ewe king me ekewe nöüwis, “Kiwiin Fasti esap chök tipis ngonuk en king, nge a pwal tipis ngeni ekewe nöüwis meinisin, pwal ngeni aramasen ekewe sop meinisin mi nom fän nemeniom, en äm king Asuworos.
EST 1:17 Iwe, ei föför ewe kiwiin a föri epwe chöfetal ngeni fefin meinisin. Mürin ir repwe lükümach ngeni pwülüer, pun repwe apasa, ‘King Asuworos a allük ngeni kiwiin Fasti pwe epwe feito ren, nge Fasti esap feito.’
EST 1:18 Seni ei fansoun, lupwen pwülüen ekewe nöüwisen Persia me Metia repwe rongorong usun föförün ewe kiwiin, repwe pwal tipepöchökül ngeni pwülüen nöün ewe king kewe nöüwis meinisin. Iwe, epwe chök lapala lükümach me osukosuk.
EST 1:19 Are en äm king ka tipeeu ngeni, kopwe föri eu allük pwe Fasti esap chüen feito fän mesen ewe king. Ei allük epwe pach ngeni allükün Persia me Metia, pwe esap wor eman a tongeni siwili. Mürin en äm king kopwe angei seni wisan wisen kiwiin o ngeni eman mi mürina seni.
EST 1:20 Iwe, are om ei allük epwe chöfetal lon unusen mumw mi fokun watte, ekewe fefin mi tekia me tekison meinisin repwe meniniti pwülüer.”
EST 1:21 Ei ekiek ewe king me ekewe nöüwis ra tipeeu ngeni. Iei mine ewe king a föri usun mine Memukan a apasa.
EST 1:22 A tinala toropwe ngeni ekewe sop meinisin mi nom fän nemenian, nge ekewe toropwe ra mak lon en me maken fanüan me fosun fanüan, pwe iteiten mwän epwe samolun an famili o nemeni aramasan.
EST 2:1 Ekoch fansoun mürin, lupwen än ewe king Asuworos song a kisikisila, a chechemeni Fasti me mine a föri ngeni, a pwal chechemeni ewe allük a fis fän itan.
EST 2:2 Mürin, nöün ewe king kewe nöüwis mi nom ren ra apasa ngeni, “Epwe öch ach sipwe kütta föpwül mi fokun liöch resamwo pwüpwülü fän itom, en äm king.
EST 2:3 Kopwe pwal afili nöüwis me lon ekewe sop meinisin mi nom fän nemeniom, pwe repwe achufengeni föpwül meinisin mi fokun liöch resamwo pwüpwülü lon ewe imwen fefin mi nom lon Susa samolun telinimwen ewe fanü. Iwe, repwe nonom fän tümwünüen Hekai nöün ewe king we chon angang mi wisen tümwünü pwülüen ewe king. Iwe, repwe föri ewe angangen epit ngeniir.
EST 2:4 Nge ewe föpwül, en äm king ka efich, epwe siwili Fasti lon wisan wisen kiwiin.” Iwe, ewe king a pwapwaiti ei ekiek, pwe a föri usun mine ra apasa.
EST 2:5 Iwe, lon Susa samolun telinimwen ewe fanü a wor eman re Juta seni ewe ainangen Peniamin itan Mortokai nöün Sair, eman mwirimwirin Simei me Kis.
EST 2:6 Mortokai eman lein ekewe chon oola seni Jerusalem lon fansoun Jekonia ewe kingen Juta a oola ren Nepukatnesar ewe kingen Papilon.
EST 2:7 Iwe, a wor eman nöün pwin semen Mortokai itan Hatasa, a pwal iteni Ester, Mortokai a angei o tümwünü, lupwen saman me inan ra mäla, pwe a usun chök eman nöün föpwül. Ei föpwül a fokun liöch o sengesengöch.
EST 2:8 Lupwen än ewe king allük a rongofeil, chomong föpwül ra chufengen lon Susa samolun telinimwen ewe fanü. Ra pwal angei Ester fiti ekewe föpwül o anomuur lon imwen ewe king fän tümwünüen Hekai, ätewe mi wisen tümwünü pwülüen ewe king.
EST 2:9 Iwe, Hekai a tongei Ester o kirikiröch ngeni. A amüttiri pwe repwe föri ewe angangen epit ngeni, a pwal ngeni wisan mongö. Iwe, a awisa füman föpwül seni chon angangen ewe imwen king, pwe repwe angang ngeni o alenieer lon eu leni mi mürina lon ewe imwen fefin.
EST 2:10 Nge Ester esap pwärätä pwe i eman lein ekewe chon Juta, pun Mortokai a allük ngeni pwe esap pwärätä.
EST 2:11 Iteiten rän Mortokai a fetalfeil lükün ewe imwen fefin, pwe epwe rong usun Ester me mine a fis ngeni.
EST 2:12 Iwe, ükükün fansoun än ekewe föpwül amol me mwen ar repwe tolong ren ewe king Asuworos engol me ruu maram. Wonu maram ekewe chon angang ngeniir ra eptiir lö mi pwokus me säfei mi aüchea itan mör, nge wonu maram ra epitiir lökasup me lömis.
EST 2:13 Lupwen a wes ei fansoun angangen epit ngeniir, eman me eman ekewe föpwül epwe tolong ren ewe king, nge epwe mwümwü ngeni mettoch meinisin mine a mochen uwei seni ewe imwen fefin tori ewe imwen king.
EST 2:14 Iwe, lekuniol a tolong ren ewe king, nge lesosor a towu o liwinla lon pwal eu imwen fefin, a nom fän tümwünüen Saskas nöün ewe king chon angang mi wisen tümwünü ülüpwülüen ewe king. Iwe, ewe föpwül esap tolongsefäl ren ewe king tori ewe king epwe sani o köri itan.
EST 2:15 Nge lupwen a tori fansoun pwe Ester epwe tolong ren ewe king, esap tüngor och mettoch lükün mine Hekai nöün ewe king chon angang a öüra ngeni, ewe mi wisen tümwünü ekewe fefin. Iwe, Ester a küna chenin me ren chokewe meinisin mi küna. Ester nöün Apihail föpwül, fefinen Mortokai, ätewe a angei pwe a usun chök eman nöün.
EST 2:16 Iwe, ra emwenala Ester lon imwen ewe king Asuworos lon ewe aengolun maram itan Tepet, lon afisuen ierin an nemenem.
EST 2:17 Ewe king a sani Ester lap seni ekewe föpwül meinisin, Ester a pwal küna chen me kirikiröch me ren lap seni ekewe föpwül meinisin. Iwe, ewe king a isetä ewe mwärin kiwiin won möküran o seikätä lon wisan wisen kiwiin, pwe epwe siwili Fasti.
EST 2:18 Mürin, ewe king a föri eu kametip mi watte ngeni ekewe samol me nöün kewe nöüwis fän iten Ester. Iwe, ewe king a pwal asilefeili eu ränin asösö lon ekewe fanü meinisin o fangala chomong lifang, usun a fichiti eman king.
EST 2:19 Iwe, lupwen ekewe föpwül ra chufengen fän aruuan, Mortokai a fil me ren ewe king pwe epwe eman nöün nöüwis.
EST 2:20 Nge Ester esap pwärätä pwe i eman lein ekewe chon Juta, usun mine Mortokai a allük ngeni. Pun Ester a aleasochisi Mortokai usun chök a aleasochisi, lupwen a chüen nom ren.
EST 2:21 Lon ewe fansoun, lupwen Mortokai a föri an angang leasamalapen imwen ewe king, Piktan me Teres, ir nöün ewe king chon angang mi wisen mamasa ewe lenien tolong ngeni imwen ewe king, ra song ngeni ewe king Asuworos o ekiekin niela.
EST 2:22 Iwe, Mortokai a silei ar ei ekiek o asile ngeni kiwiin Ester, nge Ester a asile ngeni ewe king fän iten Mortokai.
EST 2:23 Iwe, lupwen ra kütta pwüngün ei pworaus, a pwä pwe a let. Iei mine ra forusi ekewe ruoman mwän won irä. Mürin ra makeelong ei pworaus lon puken uruwon ewe fanü fän mesen ewe king.
EST 3:1 Ekoch fansoun mürin, king Asuworos a seikätä Haman nöün Hametata, eman mwirimwirin Akak, pwe epwe lap seni chienan nöüwis meinisin lon wisan.
EST 3:2 Iwe, ewe king a allük pwe nöün kewe nöüwis meinisin repwe fotopwäsuk mwen Haman o asamolu. Iwe, ekewe nöüwis meinisin ra föri iei usun, nge Mortokai esap fotopwäsuk mwan, esap pwal asamolu.
EST 3:3 Mürin, nöün ewe king kewe nöüwis mi angang ngeni ra aisini Mortokai, “Pwota ka puri än ewe king we allük?”
EST 3:4 Iteiten rän ra kapas ngeni, nge Mortokai esap mochen aüselingeer. Iwe, a üreniir, “Ngang eman chon Juta, üsap tongeni fotopwäsuk mwen Haman.” Mürin ra apworausa ngeni Haman usun, pun ra mochen küna ika Mortokai epwe tongeni sopwela an föför.
EST 3:5 Lupwen Haman a küna pwe Mortokai esap fotopwäsuk mwan, esap pwal asamolu, a fokun lingeringer.
EST 3:6 Nge lupwen Haman a silei pwe Mortokai eman chon Juta, esap chök ekiekin niela Mortokai, nge a pwal ekiekin arosala chon Juta meinisin mi nom fän nemenien Asuworos.
EST 3:7 Iwe, lon engol me ruuen ierin än ewe king Asuworos nemenem, lon ewe aeuin maram itan Nisan, Haman a allük pwe repwe pweei meni rän ika meni maram epwe öch fän iten an we ekiek. Iwe, a pwä pwe ewe engol me ülüngatin rän lon engol me ruuen maram itan Atar a öch. Iten ei sokun pwee Pur.
EST 3:8 Mürin, Haman a üreni ewe king Asuroworos, “A wor eu mwichen aramas mi toropasfeil lein ekewe aramas lon ekewe sop meinisin mi nom fän nemeniom. Ar allük kana ra sokofesen seni än ekewe lusun aramas allük, resap pwal aleasochis ngeni om kewe allük. Iei mine esap lomot ngonuk en ai king ar repwe manau.
EST 3:9 Nge ika en ai king kopwe tipeeu ngeni om kopwe föri eu allük pwe ekei aramas repwe mäla, mürin ngang üpwe atolonga ina epwe ükükün ülüpükü fik me limu ton silifer lepöün chokewe mi tümwünü noum moni, pwe repwe uwalong lon om lenien iseis.”
EST 3:10 Iwe, ewe king a üttawu nöün ringen impwang seni won pöün o ngeni Haman nöün Hametata ewe mwirimwirin Akak, ewe mi oput ekewe chon Juta.
EST 3:11 Iwe, ewe king a üreni Haman, “Kopwe amwöchü ewe moni, nge ekewe aramas üpwe müti ngonuk pwe kopwe föri mochenum ngeniir.”
EST 3:12 Mürin, Haman a körifengeni nöün ewe king soumak meinisin lon engol me ülüngatin ränin ewe aeuin maram, pwe repwe makei mine i a allük ngeniir. Iwe, ra makeela ren nöün ewe king kewe nöüwis mi tekia, ren kepinan ekewe sop pwal ren samolun aramas meinisin, nge ra makei lon en me maken fanüan me fosun fanüan. Iwe, ekewe toropwe ra sain iten ewe king Asuworos o impwang ren nöün we ringen impwang.
EST 3:13 Iwe, ekewe chon künö ra uweela ekewe toropwe ngeni ekewe sop meinisin mi nom fän nemenien ewe king. Nge masouen lon ekewe toropwe, pwe aramas repwe niela o arosala chon Juta meinisin lon eu chök rän, seni alüal tori chinlap, pwal fefin me semirit. Ei epwe fis lon engol me ülüngatin ränin ewe engol me ruuen maram a iteni Atar. Repwe pwal angei pisekir fän pöchökül.
EST 3:14 Iwe, masouen ekewe toropwe a wiliti allük, nge kapiin a tori ekewe sop meinisin. Ewe allük a rongofeil ngeni sokopaten aramas meinisin pwe repwe amol ngeni ewe rän.
EST 3:15 Fän än ewe king allük ekewe chon künö ra müttir uwala ewe allük ngeni ekewe sop, ra pwal arongafeili ewe allük lon Susa samolun telinimwen ewe fanü. Iwe, ewe king me Haman ra mottiu pwe repwe ün, nge chon ewe telinimw Susa ra fokun rükö.
EST 4:1 Iwe, lupwen Mortokai a rong meinisin mine a fis, a kamwei üfan fän an letipeta, a üföüf üf seni tuk o uwätä falangen ekkei won möküran. A pwal feila lukalapen ewe telinimw o kechü me puchör fän leüömong.
EST 4:2 Mürin a feila ren asamalapen imwen ewe king, nge esap tolong lon, pun esap wor eman a tongeni tolong lon asamalapen imwen ewe king fän üfan seni tuk.
EST 4:3 Iwe, lon iteiten sop meinisin ia än ewe king allük a tori ie, a fis letipeta lein ekewe chon Juta. Ra echikefel, ra kechü o ngüngüres, nge chomong leir ra üföüf üf seni tuk o mot lon falangen ekkei.
EST 4:4 Iwe, lupwen nöün Ester chon angang fefin me ekewe chon angang mwän ra feito ren o apworausa usun mine Mortokai a föri, kiwiin Ester a fokun weitifengeni. Iwe, a tinala üf ren Mortokai pwe epwe pwilitawu üfan seni tuk o üföüfolong. Nge Mortokai esap mochen angei.
EST 4:5 Mürin, Ester a körato Hatak, eman nöün ewe king kewe chon angang mi wisen tümwünü Ester. A tinala ren Mortokai pwe epwe aisini met popun a föri ei.
EST 4:6 Iwe, Hatak a feila ren Mortokai lon ewe lenien chulap lon ewe telinimw, a nom mwen asamalapen imwen ewe king.
EST 4:7 Nge Mortokai a apworausa ngeni Hatak meinisin mine a fis ngeni, pwal usun ükükün ewe moni Haman a pwon pwe epwe iseis lon än ewe king lenien iseis fän iten mälan chon Juta meinisin.
EST 4:8 Mortokai a pwal ngeni echö kapiin ewe allük a pwüngüla lon Susa usun ar repwe mäla. Epwe ngeni Ester o awewe ngeni masouan, epwe pwal pesei pwe epwe feila ren ewe king o tüngor an epwe ümöümöch ngeni, epwe pwal tüngor fän iten manauen aramasan.
EST 4:9 Iwe, Hatak a liwinla ren Ester o apworausa ngeni mine Mortokai a üreni.
EST 4:10 Mürin, Ester a kapas ngeni Hatak pwe epwe uwala ei pworaus ngeni Mortokai,
EST 4:11 “Nöün ewe king chon angang meinisin, pwal aramas meinisin mi nom fän nemenien ewe king ra silei pwe ika eman mwän ika eman fefin epwe tolong fän mesen ewe king, nge esap mwo köri, ewe aramas epwe chök mäla, pun epwe küüw pwüngün ewe allük. Nge are ewe king epwe eiti ngeni eman wokun wokun nemenem mi för seni kolt, ewe aramas epwe manau. Iwe, ewe king esap chüen köriei pwe üpwe feila ren lon ükükün ilik rän.”
EST 4:12 Iwe, Hatak a apworausa ngeni Mortokai usun mine Ester a apasa.
EST 4:13 Mürin, Mortokai a tinala ren Ester mine a eäni pälüen, “Kosap ekieki pwe kopwe towu seni ewe feiengau epwe tori chon Juta meinisin, pokiten ka nonom lon imwen king.
EST 4:14 Pun are ka fanafanala lon ei fansoun, alilisin me ngasalan chon Juta epwap fis seni pwal eu leni. Nge en me aramasom oupwe mäla. Eli fen iei popun ka wiseni ewe wisen kiwiin fän äsengesin ei sokun lapalap mi fis lon ei fansoun?”
EST 4:15 Mürin, Ester a tinala pälüan ngeni Mortokai,
EST 4:16 “Kopwe feila o achufengeni ekewe chon Juta mi nom lon Susa o echikefel fän itei. Ousap mongö ika ün lerän me lepwin lon ükükün ülüngat rän. Nge ngang me nei chon angang fefin aipwe pwal echikefel usun ämi. Mürin üpwe feila ren ewe king, inamwo ika üpwe purätiu ewe allük. Iwe, ika üpwe mäla, üpwe chök mäla.”
EST 4:17 Mürin, Mortokai a feila o föri meinisin mine Ester a üreni.
EST 5:1 Iwe, lon aülüngatin ränin än Ester echikefel a üföüfolong üfan üfen kiwiin, a tolong lon imwen ewe king o üla awenewenen rumwan. Iwe, ewe king a mot won an lenien motun king lon imwan awenewenen ewe asamen tolong.
EST 5:2 Nge lupwen ewe king a küna kiwiin Ester pwe a ütä awenewenen rumwan, a eiti ngeni wokun wokun nemenem mi för seni kolt a nom lepöün, pun Ester a küna ümöümöch me ren. Iwe, Ester a kaneto o atapa ülülen ewe wok.
EST 5:3 Mürin, ewe king a aisini, “Met om mochen, kiwiin Ester? Meinisin mine kopwe tüngor seniei epwe toruk, inamwo ika esopun mwüi.”
EST 5:4 Iwe, Ester a pälüeni, “Are a öch me reöm, en ai king kose mochen en me Haman oupwe feito ikenai ren ewe kametip üa amolätä fän itom.”
EST 5:5 Iwe, ewe king a apasa, “Oupwe müttir körato Haman pwe aipwe föri usun mine Ester a mochen.” Iei usun ewe king me Haman ra feito ren ewe kametip Ester a amolätä.
EST 5:6 Nge lupwen ra ünümi wain, ewe king a aisini Ester, “Met ka wesewesen mochen? Epwe chök mwümwü ngonuk. Ika met om tüngor? Epwe toruk, inamwo ika esopun mwüi.”
EST 5:7 Iwe, Ester a pälüeni, “Iei ai tüngor me ai mochen.
EST 5:8 Are üpwe küna ümöümöch me reöm, en ai king, nge are kopwe mwüt ngeniei ai tüngor o apwönüötä ei mochen, en ai king me Haman oupwe feito lesor ren ewe kametip üpwe amolätä fän itemi. Iwe, lesor üpwe pälüeni mine ka ais ngeniei.”
EST 5:9 Iwe, lupwen Haman a feil seni ewe kametip, a fokun pwapwa lelukan. Nge mürin a küna Mortokai lon asamalapen imwen ewe king pwe esap ütä me mwan ika chapetiu ngeni, Haman a fokun lingeringeriti.
EST 5:10 Nge Haman a engila o feila lon imwan. Mürin, a amwichafengeni chiechian kewe me Seres pwülüan we.
EST 5:11 Iwe, Haman a einga ngeniir lingen wöün me chomongun nöün mwän, pwal meinisin mine ewe king a seikätä won, pwe a lap seni ekewe samol me nöün ewe king kewe nöüwis.
EST 5:12 Iwe, Haman a pwal apasa, “Nge pwal och. Ewe kiwiin Ester esap mwüt ngeni eman pwe epwe fiti ewe king le feila ngeni ewe kametip a amolätä, pwe ngang chök. A pwal tüngor pwe lesor üpwe eti ewe king le feila ren.
EST 5:13 Nge ekei mettoch meinisin üsap menemenöch ren, are üa küna Mortokai ewe re Juta, pwe a mot lon asamalapen imwen ewe king.”
EST 5:14 Iwe, Seres pwülüan we me chiechian kewe meinisin ra üreni, “Kopwe amolätä efoch irä mi tam, ükükün langataman fik me limu fiit. Nge lesosorun lesor kopwe tüngorei ewe king pwe repwe forusi Mortokai won. Mürin kopwe pwapwa le fiti ewe king lon ewe kametip.” Ei pworaus Haman a sani. Iwe, a apasa pwe repwe aüetä ewe irä mi tam.
EST 6:1 Lon ei pwin ewe king esap tongeni möür. Iwe, a apasa pwe repwe uwato ewe puken uruwon mwün o aleani me fän mesan.
EST 6:2 Iwe, ra küna pwe a mak usun Mortokai a pwärätä pwe Piktan me Teres ra ekiekin niela king Asuworos. Ir me ruoman nöün ewe king chon angang ra wisen mamasa ewe lenien tolong ngeni imwen ewe king.
EST 6:3 Iwe, ewe king a ais, “Met sokun liwin Mortokai a angei fän iten ei föför?” Nge nöün ewe king kewe chon angang ra pälüeni, “Esap fokun wor och mine a angei.”
EST 6:4 Mürin, ewe king a ais, “Iö a nom lükün?” Lon ewe otun Haman a tolong lon ewe leni lükün imwen ewe king, pwe epwe churi ewe king o tüngor an epwe forusi Mortokai won ewe irä a amolätä fän itan.
EST 6:5 Nge nöün ewe king chon angang ra üreni, “Haman a ütä lükün.” Iwe, ewe king a apasa, “Epwe tolong.”
EST 6:6 Iwe, lupwen Haman a tolong, ewe king a aisini, “Met sipwe föri ngeni eman mwän ngang ewe king üa pwapwa le aitöchü?” Nge Haman a ekieki lon lulukan, “Iön ewe king a ekiekin aitöchü lap seniei?”
EST 6:7 Iei mine Haman a üreni ewe king, “Ren ewe mwän en ai king ka mochen aitöchü,
EST 6:8 repwe uwato sokun üf en ai king ka püsin üföüf, repwe emwenato eman noum oris ka püsin wawa, repwe pwal afouta ngeni möküren ewe oris sokun fout mi ling.
EST 6:9 Mürin, eman seni noum kewe samol mi tekia seni ekewe samol meinisin epwe feito o aüföüfa ngeni ewe mwän ekewe üf. Iwe, ewe mwän epwe wawa ewe oris, nge ewe samol epwe emwenala lon lenien chulap lon ewe telinimw o kökkö me mwan, ‘Iei usun mine a fis ngeni ewe mwän ewe king a pwapwa le aitöchü.’”
EST 6:10 Mürin, ewe king a üreni Haman, “Kopwe müttir angei ekewe üf me ewe oris o föri usun mine ka fen apasa, nge kopwe föri ngeni Mortokai ewe re Juta, ätewe mi mot lon asamalapen imwei. Kosap likiti och, pwe kopwe föri meinisin mine ka fen apasa.”
EST 6:11 Iwe, Haman a angei ekewe üf o aüföüfa ngeni Mortokai, a pwal amota won ewe oris. Mürin a emwenala lon ewe lenien chulap me lon ewe telinimw o kökkö, “Iei usun mine a fis ngeni eman mwän ewe king a pwapwa le aitöchü.”
EST 6:12 Mürin Mortokai a liwiniti asamalapen imwen ewe king. Nge Haman a müttir liwiniti imwan o pwölüela möküran fän an letipeta.
EST 6:13 Iwe, Haman a apworausa ngeni pwülüan Seres me chiechian kana meinisin mine a fis ngeni. Mürin, nöün souöüröür me pwülüan Seres ra üreni, “Iei ka popuetä le kuf ren Mortokai. I eman chon Juta, kosap fokun tongeni ü ngeni, pwe kopwe chök fokun kuf ren.”
EST 6:14 Iwe, lupwen ra chüen fos ngeni Haman, nöün ewe king kewe chon angang ra war o müttir emwenala Haman ren ewe kametip Ester a amolätä.
EST 7:1 Iwe, ewe king me Haman ra feila ngeni ewe kametip kiwiin Ester a föri.
EST 7:2 Nge lon ewe aruuen rän, lupwen ra ünümi wain, ewe king a aisinisefäli Ester, “Met ka wesewesen mochen, kiwiin Ester? Epwe chök mwümwü ngonuk. Ika met om tüngor? Epwe toruk, inamwo ika esopun mwüi.”
EST 7:3 Mürin, kiwiin Ester a pälüeni, “Are üa küna ümöümöch me reöm en ai king, are en ai king kopwe mwütätä ai tüngor, kose mochen kopwe amanauaei me aramasei meinisin.
EST 7:4 Pun äm me aramasei aia möla pwe aipwe mäla o rosola. Are aipwe chök möla usun amanau mwän me fefin, üpwe fanafanala. Pun are epwe ina usun, äm feiengau esap aweiresuk en ai king, pwe kopwe lus ren.”
EST 7:5 Iwe, ewe king Asuworos a aisini kiwiin Ester, “Iö ätewe a ekiekin föri ena sokun, ia a nom ie?”
EST 7:6 Nge Ester a apasa, “Iei i Haman ewe mwän mi ngau, i ätewe mi ü ngenikem o oputakem.” Mürin, Haman a chechech ren an niuokusiti ewe king me ewe kiwiin.
EST 7:7 Iwe, ewe king a ütä me lon ewe kametip fän an lingeringer o towu lükün lon ewe lenien irä mi amassawa. Nge Haman a nometiu pwe epwe tüngor manauan seni kiwiin Ester, pun a mefi pwe feiengau epwe tori me ren ewe king.
EST 7:8 Nge lupwen ewe king a liwin seni ewe lenien irä o tolong lon ewe rumw ia ra kametip ie me mwan, Haman a chapetiu won ewe lenien kon ia Ester a kon ie. Lupwen ewe king a küna ei, a leüömong le apasa, “Ifa usun, ätewe epwe achomanauei ewe kiwiin fän mesei lon püsin imwei?” Nge lupwen ewe king a eäni ekei kapas, nöün kewe chon angang ra pwölüela mesen Haman.
EST 7:9 Mürin, eman leir itan Arpona a üreni ewe king, “Mi wor efoch irä lükün imwen Haman ükükün langataman fik me limu fiit. Haman a amolätä ewe irä fän iten Mortokai, ätewe a fen tümwünü manauom en äm king.”
EST 7:10 Iwe, ewe king a apasa, “Oupwe forusi Haman won.” Iei mine ra forusi Haman won ewe irä i a fen amolätä fän iten Mortokai. Mürin, än ewe king song a kisikisitiu.
EST 8:1 Lon ewe chök rän king Asuworos a ngeni kiwiin Ester meinisin mine Haman ewe mi oputa chon Juta a eäni. Nge Mortokai a tolong fän mesen ewe king, pun Ester a pwäri lefiler me Mortokai.
EST 8:2 Iwe, ewe king a üttawu nöün ringen impwang, a fen angei seni Haman, o ngeni Mortokai. Nge Ester a anomu fän nemenien Mortokai meinisin mine Haman a eäni.
EST 8:3 Mürin, Ester a kapassefäl ngeni ewe king. A chapetiu arun pechen o tüngor fän kechü pwe epwe amoela ewe allük mi ngau, Haman ewe mwirimwirin Akak a apwüngala, pwe chon Juta meinisin repwe mäla.
EST 8:4 Iwe, ewe king a eiti ngeni Ester wokun wokun nemenem mi för seni kolt. Iei mine Ester a ütä o ü fän mesen ewe king.
EST 8:5 Iwe, a apasa, “Are en ai king ka mochen, ika üa küna ümöümöch me reöm, are ei mettoch epwe pwüng me reöm en ai king, ika ka tongeei, kopwe makei eu allük mi siwili pwüngün ewe allük Haman nöün Hametata ewe mwirimwirin Akak a apwüngala, pwe epwe arosala ekewe chon Juta mi nom lon ekewe sop meinisin ra nom fän nemeniom.
EST 8:6 Pun ifa usun, epwe tufich ngeniei pwe üpwe nengeni ewe feiengau epwe tori aramasei? Are ifa usun, üpwe tongeni nengeni mälan ai famili?”
EST 8:7 Mürin, ewe king Asuworos a üreni kiwiin Ester me Mortokai ewe re Juta, “Nengeni, üa ngeni Ester meinisin mine Haman a eäni, ra pwal forusi won ewe irä pokiten a ekiekin niela ekewe chon Juta.
EST 8:8 Nge eu allük mi sain iten ewe king won o impwang ren nöün ringen impwang esap tongeni siwil. Iei usun mine oupwe tongeni föri: Oupwe makei mine oua mochen pwe epwe öchiti ekewe chon Juta. Oupwe mak fän itei o impwangei ngeni nei we ringen impwang.”
EST 8:9 Iwe, lon rüe me ülüngatin ränin ewe aülüngatin maram a iteni Siwan ra körifengeni nöün ewe king soumak, pwe repwe makei meinisin mine Mortokai epwe allük ngeniir usun mine epwe öchiti ekewe chon Juta. Iwe, ra makei ewe allük ngeni ekewe nöüwis mi tekia me ekewe kepina, pwal samolun ekewe ipükü rüe me fisu sop seni Intia tori Itiopia. Ra makei lon en me maken fanüan me fosun fanüan, ra pwal mak ngeni ekewe chon Juta lon maken fanüer me fosun fanüer.
EST 8:10 Iwe, Mortokai a makei ekewe toropwe fän iten ewe king Asuworos o impwangei ren nöün ringen impwang. Nge ekewe chon künö mi uweela ekewe toropwe ra wawa oris mi fokun müttir seni än ewe king lenien oris.
EST 8:11 Iwe, ren masouen lon ekewe toropwe ewe king a mwüt ngeni ekewe chon Juta mi nom lon ekewe telinimw meinisin, pwe repwe tongeni chufengen o fiu ngeni chon oputeer pwe resap mäla. A mwüt ngeniir pwe repwe niela o arosala iteiten mwicheichen aramas lon ekewe sop mi fiu ngeniir, repwe pwal niela nöür me pwülüer o angei pisekir fän pöchökül.
EST 8:12 Ei repwe tongeni föri lon ekewe sop meinisin mi nom fän nemenien ewe king Asuworos lon engol me ülüngatin ränin ewe engol me ruuen maram a iteni Atar.
EST 8:13 Iwe, masouen ekewe toropwe epwe wiliti allük, nge kapiin epwe tori ekewe sop meinisin, pwe ewe allük epwe rongofeil ngeni aramas meinisin. Iwe, ekewe chon Juta repwe tongeni amol ngeni ewe rän, pwe repwe fiu ngeni chon oputeer.
EST 8:14 Iei mine ekewe chon künö ra tötä won nöün ewe king kewe oris mi fokun müttir o fokun müttirila fän än ewe king allük. Iwe, ewe allük a pwal rongofeil lon Susa samolun telinimwen ewe fanü.
EST 8:15 Iwe, Mortokai a towu seni fän mesen ewe king fän üfen king mi arauarau me pwech, a pwal üföüf echö owokot mi parachol o mwärini epa mwärämwär seni kolt. Iwe, chon ewe telinimw Susa ra mweireir fän pwapwa.
EST 8:16 Pun iei a fis ngeni ekewe chon Juta eu fansoun apilükülüköch me pwapwa, pwal mwänek me iteüöch.
EST 8:17 Iwe, lon iteiten sop me telinimw ia än ewe king allük a tori ie, ekewe chon Juta ra pwapwa o mwänek, ra pwal eäni ränin asösö o mongöfengen. Iwe, chomong aramas seni ewe fanü ra eti lamalamen chon Juta, pun ra niuokusiti ekewe chon Juta.
EST 9:1 Iwe, lon engol me ülüngatin ränin ewe engol me ruuen maram mi iteni Atar a tori fansoun pwe än ewe king allük epwe pwönüetä. Lon ewe rän ekewe chon oputen chon Juta ra ekiekin akufuur, nge ewe rän a wili ngeni eu rän chon Juta ra tongeni akufu chon oputeer.
EST 9:2 Iwe, lon ena rän ekewe chon Juta ra chufengen lon ar kewe telinimw lon ekewe sop meinisin mi nom fän nemenien ewe king Asuworos, pwe repwe niela chokewe mi ekiekin nirela. Nge esap wor eman a tongeni akufuur, pun aramas meinisin ra niuokusiti ekewe chon Juta.
EST 9:3 Iwe, samolun ekewe sop meinisin me nöün ewe king kewe nöüwis mi tekia, ekewe kepina pwal ekewe aramas mi angang ngeni ewe king ra alisi ekewe chon Juta, pun ra niuokusiti Mortokai.
EST 9:4 Pun Mortokai a tekia lon imwen ewe king, nge iteüöchün a chöfetal lon ekewe sop meinisin. Iwe, än Mortokai nemenem a chök fefeitä.
EST 9:5 Iei mine ekewe chon Juta ra niela chon oputeer meinisin ren ketilas, ra aroserela o föri ngeniir mine ra mochen.
EST 9:6 Iwe, lon Susa samolun telinimwen ewe fanü chon Juta ra niela limepükü mwän.
EST 9:7 Ra pwal niela Parsantata, Talfon me Aspatata,
EST 9:8 Porata, Atalia me Aritata,
EST 9:9 Parmasta, Arisai, Aritai me Faisata.
EST 9:10 Ekei engol mwän nöün Haman, nge Haman nöün Hametata ewe chon oputa chon Juta. Nge resap angei och seni pisekir.
EST 9:11 Lon ewe chök ränin ra asile ngeni ewe king iteiten aramas mi ninnila lon Susa.
EST 9:12 Iwe, ewe king a kapas ngeni kiwiin Ester, “Ekewe chon Juta ra niela limepükü mwän me nöün Haman kewe engol mwän lon Susa. Met ra pwal föri lon ekewe lusun sop mi nom fän nemeniei? Iwe, met ka chüen mochen? Epwe chök mwümwü ngonuk. Ika met om tüngor? Epwe chök pwönüetä.”
EST 9:13 Iwe, Ester a pälüeni, “Are a öch me reöm en ai king, kopwe mwüt ngeni ekewe chon Juta mi nom lon Susa, pwe repwe föri lesor usun mine ra piin föri ikenai. Kopwe pwal mwütätä pwe ekewe engol mwän nöün Haman repwe for won irä.”
EST 9:14 Iei mine ewe king a allük pwe repwe föri ina usun. Iwe, ewe allük a rongofeil lon Susa, nge ekewe engol mwän nöün Haman ra for won irä.
EST 9:15 Iwe, lon engol me rüanün ränin ewe maram Atar, ekewe chon Juta mi nom lon Susa ra chufengensefäl pwe repwe pwal niela ülüpükü mwän lon Susa. Nge resap angei och seni pisekir.
EST 9:16 Iwe, ekewe chon Juta, ra nom lon ekewe sop mi nom fän nemenien ewe king, ra pwal chufengen pwe repwe fiu ngeni chon oputeer, pwe repwe ngasala seniir, nge resap mäla. Ra niela fik me limu ngeröü mwän, nge resap angei och seni pisekir.
EST 9:17 Ei a fis lon engol me ülüngatin ränin ewe maram Atar, nge lon engol me rüanün rän ra asösö o eäni chulapen mongö fän pwapwa.
EST 9:18 Iwe, nge ekewe chon Juta mi nom lon Susa ra niela chon oputeer lon engol me ülüngatin me engol me rüanün rän, nge lon engol me limuen rän ra asösö o eäni chulapen mongö fän pwapwa.
EST 9:19 Iei mine ekewe chon Juta mi imweimw lon ekewe kükün telinimw ra achechema ewe engol me rüanün ränin ewe maram Atar, pwe eu ränin pwapwafengen me mongöfengen me asösö, pwal eu ränin lifangfengen mongö mi annö.
EST 9:20 Iwe, Mortokai a makeetiu ekei mettoch, a pwal tinala toropwe ngeni chon Juta meinisin ra nom lon ekewe sop mi nom fän nemenien king Asuworos, ngeni chokewe mi arap pwal ngeni chokewe mi toau.
EST 9:21 A allük ngeniir pwe repwe apini ewe engol me rüanün me ewe engol me limuen ränin ewe maram Atar o pinini iteiten ier,
EST 9:22 pun lon ekei rän chon Juta ra küna ngas seni chon oputeer. Lon ei maram ar riaföü a wili ngeni pwapwa, nge ar letipeta a wili ngeni mwänek. Iwe, Mortokai a pwal allük ngeniir pwe ekewe rän repwe ränin mongöfengen me pwapwafengen, pwal ränin lifangfengen mongö mi annö me lifang ngeni chon wöüngau.
EST 9:23 Iei usun chon Juta ra sopwela le föri ar ränin chulap usun mine ra fen popuetä, usun Mortokai a mak ngeniir.
EST 9:24 Pun Haman nöün Hametata ewe mwirimwirin Akak, ewe mi oputa chon Juta meinisin, a ekiekietä usun an epwe arosala chon Juta. Iwe, a föri Pur, wewen a asisil pwe epwe silei lon meni rän epwe nirela o aroserela.
EST 9:25 Nge lupwen Ester a uwato ewe pworaus fän mesen ewe king, ewe king a makei eu allük pwe än Haman ekiekingau ngeni chon Juta epwe tori püsin inisin, pun i me nöün mwän repwe for won irä.
EST 9:26 Iei mine ra aita ngeni Purim ekewe rän pokiten ewe it Pur. Iwe, pokiten meinisin mine Mortokai a makeetiu lon ei toropwe, pwal pokiten meinisin mine a fis ngeniir pwal mine ra küna,
EST 9:27 ekewe chon Juta ra pwon pwe ir me mwirimwirir kana pwal meinisin mi chu ngeniir repwe pinini ekewe ruu rän iteiten ier usun a fen mak, nge resap tümwününgau ngeni.
EST 9:28 Iwe, repwe chechemeni ekei rän seni eu täppin aramas tori eu täppin lon iteiten famili, pwal lon iteiten sop me telinimw. Iwe, ekei ränin Purim repwe pin me ren chon Juta meinisin, nge mwirimwirir resap ükütiu le chechemeniir.
EST 9:29 Mürin, kiwiin Ester nöün Apihail me Mortokai ewe re Juta ra makei eu allük lon aruachön toropwe usun ekewe ränin Purim o apwüngala fän pöchökül.
EST 9:30 Iwe, ra tinala ekewe toropwe ren ekewe chon Juta meinisin ra nom lon ekewe ipükü rüe me fisu sop mi nom fän nemenien Asuworos. Nge lon ekewe toropwe a mak kapasen kinamwe me allükülük.
EST 9:31 A pwal mak pwe repwe föri pwüngün ekei ränin Purim a afat me lon ar kewe räninipin, usun Mortokai ewe re Juta me kiwiin Ester ra allük ngeniir, pwal usun chon Juta ra püsin eäni allük fän iter me mwirimwirir. Repwe föri pwüngün ekei rän, usun ra föri pwüngün ekewe ränin echikefel me ngüngüres.
EST 9:32 Ina usun än kiwiin Ester allük a apöchöküla pinin ekewe ränin Purim, nge ewe allük a pwal mak lon puk.
EST 10:1 Iwe, king Asuworos a allük pwe aramasen lon unusen mwün pwal chon ekewe fanüen lematau repwe takises ngeni.
EST 10:2 Iwe, pworausen meinisin mine ewe king a föri fän an nemenem me an tufich, pwal pworausen än ewe king aitöchü Mortokai ra mak lon puken uruwon ekewe kingen Metia me Persia.
EST 10:3 Iwe, Mortokai ewe re Juta a kisin fän ewe king Asuworos, a pwal itetekia lein ekewe chon Juta o sil me rer, pun a kütta feiöchün nöün aramas, a pwal kütta kinamwen chon Juta meinisin.
JOB 1:1 Mi wor eman mwän lon ewe fanü Us itan Hiop. Ätei a pwüng o wenechar, a niuokusiti Kot o kul seni föför mi ngau.
JOB 1:2 Iwe, a wor füman nöün ät me ülüman nöün nengin.
JOB 1:3 A pwal wor füngeröü nöün sip, ülüngeröü kamel, engeröü ätemwänin kow, limepükü liafefinin aas me chomong, chomong chon angang. Iei mine ei mwän a iteföüla seni ekewe aramas meinisin mi nom lon ewe fanü ötiu.
JOB 1:4 Iwe, nöün kewe alüal ra soun föri eu kametip lon en me imwan, lupwen a tori en me an fansoun. Ra pwal titi fefiner kewe ülüman pwe repwe etiir le mongö me ün.
JOB 1:5 Nge lupwen ekewe ränin kametip ra wesila, Hiop a tiitiir pwe epwe apiniir. A pwätä lesosorusich o eäni eu asoren kek fän iten nöün kewe meinisin, pun a üra, “Eli a fis pwe nei kewe alüal ra tipis o amamäsini Kot lon leluker.” Iei usun Hiop a föri fansoun meinisin.
JOB 1:6 Iwe, a tori eu rän, lupwen ekewe chon läng ra feito o ütä fän mesen ewe Samol mi Lapalap, Satan a pwal nonom lefiler.
JOB 1:7 Iwe, ewe Samol mi Lapalap a aisini Satan, “Ia ka feito me ie?” Satan a pälüeni, “Üa feito seni fanüfan, ia üa saifeil ie seni epek tori epek.”
JOB 1:8 Iwe, ewe Samol mi Lapalap a üreni Satan, “Ifa usun, ka küna nei chon angang Hiop? Esap wor eman aramas won fanüfan mi wewe ngeni, a pwüng o wenechar, a niuokusitiei o kul seni föför mi ngau.”
JOB 1:9 Mürin, Satan a pälüeni ewe Samol mi Lapalap, “Ifa usun, Hiop epwe niuokusituk ika esap wor an feiöch?
JOB 1:10 Ifa usun, kosap tiela inisin me chon leimwan, pwal meinisin mine a eäni seni feiengau? Ka afeiöchü angangen pöün pwe nöün pwiin sip me kow ra chomongola won ewe fanü.
JOB 1:11 Nge kopwe aitiela poum o atapa meinisin mine a eäni, mürin epwe fokun amamäsinuk.”
JOB 1:12 Iwe, ewe Samol mi Lapalap a üreni Satan, “Ina, meinisin mine Hiop a eäni epwe nom fän nemenemom, chilon chök kosap atapa inisin.” Mürin Satan a feila seni fän mesen ewe Samol mi Lapalap.
JOB 1:13 Iwe, a tori eu rän, lupwen nöün Hiop kewe alüal me föpwül ra eäni eu kametip lon imwen ewe mwänichi,
JOB 1:14 eman chon angang a feito ren Hiop o üreni, “Lupwen ekewe ätemwänin kow ra tuw ewe pwül, nge ekewe aas ra mongöfetal ünükür,
JOB 1:15 ekewe chon Sapa ra mwu ngeniir o turufiir meinisin. Iwe, ra niela noum kewe chon angang ren ketilas, nge ngang echök üa süla pwe üpwe ürenuk.”
JOB 1:16 Lupwen ätei a chüen kapas, pwal eman chon angang a feito o üra, “Eu ekkei seni Kot a turutiu me läng o kenala ekewe sip me ekewe chon angang, nge ngang echök üa süla pwe üpwe ürenuk.”
JOB 1:17 Nge lupwen ätei a chüen kapas, pwal eman chon angang a feito o üra, “Ekewe chon Kaltea ra war lon ülüngat mwich, ra turufi ekewe kamel o angeerela. Ra niela noum kewe chon angang ren ketilas, nge ngang echök üa süla pwe üpwe ürenuk.”
JOB 1:18 Iwe, lupwen ätei a chüen kapas, pwal eman chon angang a feito o üra, “Noum kewe alüal me föpwül ra eäni eu kametip lon imwen ewe mwänichi.
JOB 1:19 Iwe, och asepwäl mi pöchökül a enito seni ewe fanüapö o eniti lepwokukun ewe imw me rüanü pwe a mök. Ewe imw a turutiu won noum kewe alüal me föpwül, iwe ra mäla, nge ngang echök üa süla pwe üpwe ürenuk.”
JOB 1:20 Mürin, Hiop a ütä, a kamwei üfan fän an letipeta o räisöü möküran, a chapala won pwül o fel ngeni Kot.
JOB 1:21 Iwe, a apasa, “Üa selela lupwen üa towu seni letipen inei, üpwe pwal selelasefäl lupwen ai üpwe towu seni fanüfan. Ewe Samol mi Lapalap a fangoto, ewe Samol mi Lapalap a angeesefäli, üpwe mwareiti ewe Samol mi Lapalap.”
JOB 1:22 Lon ekei feiengau meinisin mi tori Hiop, i esap tipis, esap pwal etipisi Kot ren an amwäli mine a föri.
JOB 2:1 Iwe, a pwal tori eu rän, lupwen ekewe chon läng ra feito o ütä fän mesen ewe Samol mi Lapalap, Satan a pwal nonom lefiler.
JOB 2:2 Ewe Samol mi Lapalap a aisini Satan, “Ia ka feito me ie?” Nge Satan a pälüeni, “Üa feito seni fanüfan, ia üa saifetal ie seni epek tori epek.”
JOB 2:3 Iwe, ewe Samol mi Lapalap a üreni Satan, “Ifa usun, ka küna nei chon angang Hiop? Esap wor eman aramas won fanüfan mi wewe ngeni, a pwüng o wenechar, a niuokusitiei o kul seni föför mi ngau. En ka peseei pwe üpwe afeiengaua, nge esap wor popun, nge Hiop a chüen likitü won mine a pwüng.”
JOB 2:4 Mürin, Satan a pälüeni ewe Samol mi Lapalap, “Eman aramas epwe fangala meinisin mine a eäni fän iten manauan.
JOB 2:5 Nge iei kopwe aitiela poum o atapa chün me fitukan, mürin epwe fokun amamäsinuk.”
JOB 2:6 Iwe, ewe Samol mi Lapalap a üreni Satan, “Ina, Hiop epwe nom fän nemenemom, chilon chök manauan.”
JOB 2:7 Mürin, Satan a feila seni fän mesen ewe Samol mi Lapalap o afeiengaua Hiop, pwe a kilingau o rup seni fän pechen tori won möküran.
JOB 2:8 Iwe, Hiop a mot lon falangen ekkei, a angei emök mökkün rume o apwerika ngeni.
JOB 2:9 Mürin, pwülüan a üreni, “Ifa usun, ka chüen likitü won mine a pwüng? Kopwe amamäsini Kot o mäla.”
JOB 2:10 Nge Hiop a üreni pwülüan we, “En ka aloni alon fineumwes. Ifa usun, sipwe chök akangei ach feiöch me ren Kot, nge sisap pwal angei ach feiengau?” Lon ekei feiengau meinisin Hiop esap tipis ren an apasa och mi mwäl.
JOB 2:11 Iwe, lupwen chiechien Hiop kewe ülüman ra rongorong usun ekewe feiengau meinisin mi tori Hiop, ra feito seni en me lon lenian. Ikkei iter: Elifas ewe re Teman, Piltat ewe re Shu me Sofar ewe re Nama. Ra tipeeufengen le feila ren Hiop pwe repwe aururu o achipa.
JOB 2:12 Nge lupwen ra küna Hiop me toau, resap chüen silleni. Iwe, ra alapatä mwelier o kechü. Ra kamwei üfer fän ar letipeta o amoromorätiu pwül won mökürer.
JOB 2:13 Mürin, ra mot lepwül ren Hiop lon ükükün fisu rän me fisu pwin, nge esap wor eman a apasa och kapas ngeni, pun ra küna pwe an cheuch a fokun watte.
JOB 3:1 Mürin, Hiop a popuetä le kapas o otteki ewe rän a uputiu lon.
JOB 3:2 Iwe, a apasa,
JOB 3:3 “Amwo ewe rän üa upulong lon epwe morola, pwal ewe pwin, lupwen eman a apasa, ‘Eman ät a uputiu.’
JOB 3:4 Amwo ei rän epwe rochopwak, amwo Kot mi nom läng esap ekieki usun, nge saram esap tinetiu won.
JOB 3:5 Amwo toputop me rochokichin rochopwak epwe nemeni ei rän, pwal kuchu repwe nonom won, nge rocholan akkar epwe pwal fis lon.
JOB 3:6 Amwo rochokichin rochopwak epwe turufi ei pwin. Amwo esap alealong lein ekewe ränin ier, esap pwal pachelong lein ekewe ränin maram.
JOB 3:7 Iwe, ei pwin epwe pön, esap wor eman epwe rong mweireiren pwapwa lon.
JOB 3:8 Ekewe sourong mi sile pöüt ngeni rän repwe pwal pöüt ngeni ei rän, ir chokewe mi sip le apwätäi ewe Lefiatan .
JOB 3:9 Amwo ekewe fün rän repwe rochopwak. Ei pwin epwe ösüküsükü saram, nge esap war, esap fokun küna saramen ünümweerän,
JOB 3:10 pun esap pineela letipen inei, esap pwal aopala riaföü seniei.
JOB 3:11 Pwota üsap mäla le uputiuei? Pwota üsap mäla, lupwen üa towu seni letipen inei?
JOB 3:12 Pwota inei a anomuei won afön, nge pwota a aoupuei?
JOB 3:13 Are üpwe mäla lon na fansoun, üpwe kinamwe ikenai. Üpwe annut o asösö
JOB 3:14 fiti ekewe king me souöüröüren fanüfan, ra aüetä imwer fän iter mi tala ikenai.
JOB 3:15 Üpwe pwal fiti ekewe samol mi amasoua imwer ren kolt me silifer.
JOB 3:16 Pwota üsap wewe ngeni eman mönükol aramas ra ireela, pun a uputiu nge esamwo tori fansoun, ika usun ekewe mönükol resap küna saram.
JOB 3:17 Ikenan lon ewe peias ekewe aramasangau ra ükütiu le föri mine a ngau, ikenan ekewe mi malülü ren ar angang ra asösö.
JOB 3:18 Ikenan ekewe chon fötek ra nomfengen fän kinamwe, resap chüen rongorong mwelien chokewe mi nemeniir fän pöchökül.
JOB 3:19 Ekewe aramas kis me aramas tekia ra nom ikenan, pwal ätewe aramas ra nöüni amanau a ngas seni an samol.
JOB 3:20 Pwota saram a tori ätekewe mi nom lon riaföü, nge pwota manau a nom ren ätekewe mi letipengau?
JOB 3:21 Ra ösüküsükü mäla, nge esap war. Ra kütta mäla lap seni ar kütta pisek aüchea mi monola.
JOB 3:22 Ra fokun meseik o pwapwa lupwen ra tolong lon peias.
JOB 3:23 Pwota manau a tori eman aramas esap küna alan, ätewe Kot a epeti pwelin ünükün?
JOB 3:24 Ai ngaselap ina enei mongö, ai ngüngü a towu seniei usun koluk a puwu seni lenian.
JOB 3:25 Pun ekewe mettoch üa niuokusiti ra feito woi, nge mine üa niueiti a toriei.
JOB 3:26 Esap wor ai kinamwe, esap pwal wor ai fansoun asösö, nge üa chök nom lon riaföü.”
JOB 4:1 Mürin, Elifas ewe re Teman a pälüeni Hiop,
JOB 4:2 “Are üpwe apasa och ngonuk, ifa usun, kopwe oput? Üsap chüen tongeni fanafanala?
JOB 4:3 Nengeni, ka asukuula chomong aramas, ka pwal apöchöküla pöün chon apwangapwang.
JOB 4:4 Om kewe kapas ra aütäi chokewe mi chepetek o apöchöküla ekewe mi apwangapwang.
JOB 4:5 Nge iei a sapeituk ewe riaföü, nge kosap mosonatam fan. A toruk ewe weires, nge ka rükö ren.
JOB 4:6 Ifa usun, sap om niuokusiti Kot ina om chip? Ifa usun, sap wenecharen om föför ina om apilükülüköch?
JOB 4:7 Iei kopwe ekieki usun. Ifa usun, eman aramas esap wor an tipis a tongeni küna feiengau? Ifa usun, eman aramas mi wenechar a kärila?
JOB 4:8 Iei usun mine üa küna: Chokewe mi fotuki tipis o amworafeili föför mi ngau repwe chök kini mine ra fotuki.
JOB 4:9 Repwe feiengau ren ngasangasen Kot, repwe moola ren pöchökülen an song.
JOB 4:10 Ekewe aramasangau ra wörüwör o ngüngü usun laion, nge Kot a afanafanalaar o kupi ngiir.
JOB 4:11 Usun eman laion mi pöchökül a mäla pokiten esap wor ochan, iei usun ra mäla, nge nöür kana ra toropasfeil.
JOB 4:12 Eu kapas a toriei lemonomon, nge selingei a rongorong och möngününgün.
JOB 4:13 Lupwen üa ekieki usun künaei kewe lepwin, lupwen möürüchou a püngütiu won aramas,
JOB 4:14 niuokus a feito woi, pwal chechech mi achechecha chüi meinisin.
JOB 4:15 Eman ngün a pwerela fän mesei, nge ülöülen inisi ra mwarangatä.
JOB 4:16 A üla, nge üsap tongeni nenengenifichi lapalapan. Och mettoch a nom mwei. Iwe, a lüa, mürin üa rongorong eu möngüngü:
JOB 4:17 Ifa usun, eman aramas mi feil ngeni mäla epwe tongeni pwüng fän mesen Kot? Ifa usun, eman aramas a tongeni limöch fän mesen ewe Chon Föri i?
JOB 4:18 Are Kot esap anomu an lükülük won nöün kewe chon angang, pwe a fen mwo nge atipisi nöün kewe chon läng pwe ra mwäl,
JOB 4:19 epwe pwal fokun föri iei usun ngeni chokewe mi nonom lon imw seni pwül, ir mi för seni pwül moromor, a mecheres ngeni än eman epwe apachacheer usun chök pwötür.
JOB 4:20 Ra feiengau lefilen lesosor me lekuniol, ra mäla, nge esap wor eman a ekieki usur.
JOB 4:21 Meinisin mine ra eäni, eman a angei seniir. Ra mäla, nge esap wor ar tipachem.
JOB 5:1 Hiop, kopwe kökkö iei. Ifa usun, epwe wor eman mi pälüenuk? Iö me lein ekewe chon pin kopwe kul ngeni?
JOB 5:2 Ellet, song a niela eman chon umwes, nge lolowo a niela eman chon wewemang.
JOB 5:3 Üa küna pwe eman chon umwes a fefeitä lon an feiöch, nge mürin a müttir fis ngeni anümamau pwe an feiöch a tala.
JOB 5:4 Nöün kana resap nonom fän kinamwe. Esap wor eman a peniir lon kapwüng.
JOB 5:5 Ekewe chon echik ra eni kinien ewe chon umwes ua, ra fen mwo nge angei mine a mär lein ekewe irafölüföl, nge ekewe chon kaka ra otumwala wöün.
JOB 5:6 Pun riaföü esap feito seni pwül moromor, nge weires esap pwükütä seni pwül.
JOB 5:7 Nge eman aramas a püsin atolonga lon weires, usun chök ngetengeten ekkei a püsin ngetetä.
JOB 5:8 Nge ika ngang en, üpwe kul ngeni Kot o pwärätä ngeni ai weires.
JOB 5:9 I ewe Kot mi föri föför mi tekia esap wor aükükün, pwal föför mi amwarar rese lea:
JOB 5:10 I a apüngätiu üt won fanüfan o apuala koluk lon ekewe mälämäl.
JOB 5:11 I a atekiatä chokewe mi tekison o ekietä ekewe chon letipeta ngeni pwapwa.
JOB 5:12 Nge a ataela än chokewe mi tipachemsolä ekiek, pwe angangen pöür esap fisitä.
JOB 5:13 A liapeni ekewe chon tipachem lon püsin ar tipachemsolä, nge än ekewe chon atuputup öüröür esap fis.
JOB 5:14 Ra tolong lon rochopwak lupwen fansoun lerän, ra atapfeil leoloas usun chök fansoun lepwin.
JOB 5:15 Nge a amanaua ekewe chon wöüngau seni mään ketilas, pwal ekewe chon mwelele seni ekewe chon ariaföüür.
JOB 5:16 Iei mine ekewe chon wöüngau ra apilükülüköch, nge ekewe chon pwüngingau ra fanafanala.
JOB 5:17 A feiöch eman aramas Kot a apwüngü. Iei mine kosap aücheangaua än Ewe mi Unusen Manaman amirit.
JOB 5:18 Pun a akinasa eman, nge a pwal filitisefäli. A awata eman, nge a pwal apöchöküla.
JOB 5:19 Kot epwe angasok seni wonu weires, nge lon fisu weires esap wor och feiengau epwe toruk.
JOB 5:20 Lupwen fansoun lengita i epwe amanauok seni mäla, nge lupwen fansoun maun i epwe amanauok seni mään ketilas.
JOB 5:21 Kot epwe aopok seni kapasen itengau, nge kosap niuokus, lupwen feiengau epwe war.
JOB 5:22 Kopwe takir ngeni feiengau me lengita, nge kosap niuokusiti ekewe manmwachon fanüfan.
JOB 5:23 Repwe märöch fotom kewe irä lon om tanipi, pun esap wor föüföü lon, nge ekewe manmwachon lemäl repwe kinamwe ngonuk.
JOB 5:24 Mürin kopwe nonnom lon imwomw imw mangaku fän kinamwe, nge lupwen kopwe ouwasacha om lenien sip, kopwe küna pwe esap wor eman a pöüt senuk.
JOB 5:25 Kopwe silei pwe noum kana repwe chomong, nge mwirimwirum kana repwe usun chök chomongun fetil won fanüfan.
JOB 5:26 Kopwe mäla o peias lupwen ka fokun chinlap, kopwe usun chök eu pilükün wiich a nom lon ewe lenien wichiwich umwun föün wiich lupwen fansoun kinikin.
JOB 5:27 Nengeni, aia küküttaöchü usun ekei lapalap o küna pwe ra pwüng. Kopwe aüselinga ekei kapas pwe kopwe feiöch.”
JOB 6:1 Mürin, Hiop a pälüeni,
JOB 6:2 “Ika ai kewe riaföü repwe kilo, nge ai kewe feiengau meinisin repwe aükük,
JOB 6:3 ellet repwe fokun chou seni pien aroset. Iei mine ai kewe kapas ra pöchökül.
JOB 6:4 Pun wokun Ewe mi Unusen Manaman föün esefich ra fotolong loi, nge poisonur a tolong leuti. Än Kot eniweniw ra tettelila mwei usun eu telin sounfiu, pwe repwe fiu ngeniei.
JOB 6:5 Ifa usun, eman aas mi mwacho a wörüwör lupwen a mongö fetil, ika eman ätemwänin kow a wörüwör lupwen a wor anan?
JOB 6:6 Nge ifa usun, aramas ra tongeni mongö mine a nepatapat, nge esap wor salt lon? Ifa usun, ewe pwechen lon eföü sokuul a anö?
JOB 6:7 Üsap fokun mochen mongö ena sokun mongö, pun a kuuto woi.
JOB 6:8 Amwo Kot epwe ngeniei mine üa tüngor, epwe mwütätä mine üa apilükülükü.
JOB 6:9 Amwo Kot epwe niei, amwo epwe aitiewu pöün o ärieila.
JOB 6:10 Ei epwe afisätä ai chip, üpwe pwal mwetemwet fän pwapwa, inamwo ika a watte ai cheuch, pun üsap amamäsini än Ewe mi Pin kewe kapas.
JOB 6:11 Met sokun pöchökül üa eäni pwe epwe wor ai apilükülük? Met sopolan manauei pwe üpwe mosonotam?
JOB 6:12 Ifa usun, ai pöchökül a usun chök pöchökülen ekewe fau, ika inisi a usun chök piras?
JOB 6:13 Ellet, esap fokun wor ai tufich, mine üa apilükülüküni a sü seniei.
JOB 6:14 Eman mi apilükingau chienan kewe repwe kirikiröch ngeni, inamwo ika a likitala an niueiti Ewe mi Unusen Manaman.
JOB 6:15 Nge chiechiei kewe ra alichipüngüei usun chök ekewe öüwö mi pumong, ra morola, lupwen esap püng üt,
JOB 6:16 usun chök ekewe öüwö mi urela ren ais me sno,
JOB 6:17 nge lupwen fansoun pwichikar ra pwasala o morola me lon lenier.
JOB 6:18 Ekewe chon sai ir chon amömö ra malechela seni aler, lupwen ra kütta ünümer koluk, ra pwerelong lon fanüapö o mäla.
JOB 6:19 Ekewe chon sai ir chon amömö seni Tema me Sepa ra kütta ekewe öüwö mi pumong,
JOB 6:20 nge lupwen ra tori ekewe öüwö, ra lichipüng o apilükingau. Ra apilüköch pwe repwe künökün koluk, nge esap wor.
JOB 6:21 Iei usumi ngeniei. Oua küna ai feiengau o niuokus ren.
JOB 6:22 Ifa usun, üa tüngor ngenikemi pwe oupwe ngeniei eu lifang, ika oupwe fangala ngeni eman och seni wöümi, pwe eu lifangen amichimich fän itei?
JOB 6:23 Ifa usun, üa pwal tüngor ngenikemi pwe oupwe angasaeila seni ekewe chon oputaei, ika mönisefäliei seni ekewe chon mwänewüs?
JOB 6:24 Oupwe asukuulaei, nge ngang üpwe fanafanala o aüseling, oupwe aiti ngeniei mine üa mwäl won.
JOB 6:25 Kapas wenechar a fokun manaman. Nge met ämi kapasen apwüng ra mochen alletä?
JOB 6:26 Ifa usun, oua ekiekin apwüngü mine üa apasa? Oua ekieki pwe alon eman mi apilükülükingau a usun chök asepwäl?
JOB 6:27 Ämi oua fen tongeni üttüt won eman mi mäsen, iö epwe nöüni amanau, o amömöla chiechiemi.
JOB 6:28 Nge iei ouse mochen oupwe nenengeniei, pun ngang üsap chofana ngenikemi.
JOB 6:29 Üa tüngor ngenikemi pwe oupwe ekieksefäl, ousap föri och mi pwüngingau. Oupwe ekieksefäl iei chök, pwe epwe pwä pwe ngang üa pwüng.
JOB 6:30 Ifa usun, üa eäni kapas esepwüng, ika üsap sile alefila lefilen pwüng me pwüngingau?”
JOB 7:1 “Ifa usun, eman aramas esap wisen angang weires won fanüfan? Ifa usun, ränin manauan resap wewe ngeni ränin manauen eman aramas mi saata?
JOB 7:2 Usun eman chon angang, aramas ra nöüni amanau, a älälei an mochen nonom fän nür, pwal usun eman aramas mi saata a witiwiti liwinin,
JOB 7:3 iei usun manauei lon chomong maram esap wor aüchean, nge chomong pwin mi ur ren riaföü ra toriei.
JOB 7:4 Lupwen üa konola, üa üra, ‘Inet üpwe pwätäsefäl?’ Nge ewe pwin a langatam, üa fokun lupelupekisiei tori a ränila.
JOB 7:5 Inisi a kula ren wuun me limengau, ünüchei a ponopon, chönü a pwal towu seni kilingauei.
JOB 7:6 Ränin manauei ra müttirila, lap seni müttirin än eman chon tür äsäp. A tori müchülar, nge esap wor ai apilükülüköch.
JOB 7:7 Ai Kot, kopwe chechemeni pwe manauei a usun chök eu ngasangas mi müchükai, nge mesei esap chüen künasefäli mine a mürina.
JOB 7:8 Iwe, chokewe mi künaei iei resap chüen künasefäliei. Lupwen mesom a neto rei, üsap chüen nom.
JOB 7:9 Usun ekewe kuchu ra ässila o morola, iei usun eman aramas mi feitiu lon lenien sotup esap chüen liwinsefäl,
JOB 7:10 esap chüen fokun liwiniti imwan, nge chon lenian resap chüen silei.
JOB 7:11 Iei mine üsap fanafanala, nge üpwe fos fän riaföün letipei, üa ösüngau fän weiresin lelukei.
JOB 7:12 Ifa usun, ngang ewe matau ika eman mönün lematau mi fokun watte, pwe ka awisa eman epwe mamasaei?
JOB 7:13 Lupwen üa ekieki pwe ai kon won kiei epwe achipaei, ai möür epwe akisikisala ai cheuch,
JOB 7:14 mürin ka eniuokusuei ren tan, ka eniwaei ren künaei
JOB 7:15 pwe üpwe filätä ai üpwe kak o mäla, lap seni ai üpwe chök riaföü ren samaun inisi.
JOB 7:16 Üa anioputa manauei, üsap chüen mochen manau. Kopwe likitiei, pun ränin manauei ra usun chök eu ngasangas mi müchükai.
JOB 7:17 Pwota ka kon aücheani eman aramas? Pwota ka nenengenifichi mine a föri?
JOB 7:18 Ka cheki i iteiten lesosor, ka sotuni iteiten fansoun.
JOB 7:19 Inet kopwe nenne seniei? Kopwe likitiei ekis chök tori üpwe oromalong chönün awei.
JOB 7:20 Nge are üa tipis, met kopwe osupwang ren, en chon mamasa aramas. Pwota üa eu lenien ännen me reöm? Pwota üa eu pisek mi chou me reöm?
JOB 7:21 Pwota kosap amusala ai pupungau o angei seniei ai föföringau? Pun arapakan chök üpwe kon lon peiasei. En kopwe küttaei, nge üsap chüen nom.”
JOB 8:1 Mürin, Piltat ewe re Su a pälüeni Hiop,
JOB 8:2 “Ifa ükükün fansoun om kopwe eäni ekei sokun kapas? Om kewe kapas ra wewe ngeni asepwäl watte.
JOB 8:3 Ifa usun, Kot a atoka pwüngün kapwüng? Ifa usun, Ewe mi Unusen Manaman a atoka pwüngüöch?
JOB 8:4 Are noum kana ra tipis ngeni Kot, i a asechirelong fän liwinin tipisin ar pupungau.
JOB 8:5 Nge are kopwe kütta Kot o tüngor chenum seni Ewe mi Unusen Manaman,
JOB 8:6 are ka limöch o wenechar lon manauom, ellet, i epwe tümwünüöchuk o ngenisefäliik wesewesen leniom pwe liwinum.
JOB 8:7 Inamwo ika om feiöch a kükün me lepoputan, nge lesopolan epwe fokun watte.
JOB 8:8 Üa tüngor ngonuk pwe kopwe ais me ren ekewe täppin aramasen lom o ekieki usun mine semelaper kewe ra kaiö,
JOB 8:9 pun kich sia aramasen näneu chök, sisap silei och, nge ränin manauach won fanüfan ra usun chök eu nür.
JOB 8:10 Ifa usun, resap öüröürok o pwäri ngonuk ar kewe kapasen tipachem seni lon leluker?
JOB 8:11 Ifa usun, ekewe chia ra tongeni mär anaie esap wor pwakak ie? Ifa usun, ekewe wowo ra tongeni mär anaie esap wor koluk ie?
JOB 8:12 Lupwen ra chüen fasar, nge resamwo pöküpök, ra müttir aiolol mwen ekewe fetil, are esap wor koluk.
JOB 8:13 Iei usun mine epwe fis ngeni chokewe meinisin mi manlükala Kot. Än eman chon pwüngingau apilükülük epwe morola.
JOB 8:14 An apilükülük epwe tala, nge mine a anomu an apilükülük won epwe wewe ngeni eu türün ninnä.
JOB 8:15 A ünnü ngeni an türün ninnä, nge esap nükünük, a kamwöchüla won, nge esap mwöch.
JOB 8:16 A wewe ngeni fetil mi märöch fän tinen akkar o pwüküfetal lon ewe tanipi.
JOB 8:17 Waran ra fittitä won eu ioien fau o amwöchü iteiten eföü me eföü fau.
JOB 8:18 Nge are a wiitä seni lenian, mürin esap wor eman epwe silei pwe a nom lon ewe leni.
JOB 8:19 Ellet, iei müchülan manauen eman chon pwüngingau. Nge ekoch aramas repwe feito o siwili lon lenian.
JOB 8:20 Ellet, Kot esap pöütala eman aramas mi pwüng, ika alisi eman chon föföringau.
JOB 8:21 Kot epwe apwapwook pwe kopwe mweireir fän pwapwa.
JOB 8:22 Nge chokewe mi oputok repwe fokun säw o imwen ekewe aramasangau resap chüen nom.”
JOB 9:1 Mürin, Hiop a apasa,
JOB 9:2 “Ellet, üa fen silei meinisin mine ka üreniei. Nge ifa usun än eman aramas epwe tongeni küna pwüng me fän mesen Kot?
JOB 9:3 Are eman aramas a mochen anini ngeni, esap tongeni pälüeni eu me lein engeröü kapas ais.
JOB 9:4 Kot a tipachem o fokun pöchökül. Iö a pwäk ngeni an epwe ü ngeni?
JOB 9:5 Kot a amwökütükütü ekewe chuk o atururetiu lon an song, nge aramas resap silei me mwan.
JOB 9:6 A achecha fanüfan o amwökütü seni lenian, a pwal achecha üran kana.
JOB 9:7 A allük ngeni akkar pwe esap tötä, a amwöchü ekewe fü pwe resap tin.
JOB 9:8 I chök a förätä ekewe läng o fetal won nonoon lematau.
JOB 9:9 Kot a förätä ekewe fü iter Uwölö me Öniön me Mweriker, pwal ekewe muchiechien fü mi nom ör.
JOB 9:10 A föri mettoch mi tekia esap wor eman a tongeni weweiti. A föri mettoch mi amwarar esap wor eman a tongeni aleani.
JOB 9:11 Lupwen a feila ünüki, üsap tongeni nengeni, lupwen a lu seniei, üsap tongeni küna.
JOB 9:12 A turufi mine a mochen, nge esap wor eman a tongeni pinei. Iö a tongeni aisini, ‘Met ka föri?’
JOB 9:13 Kot esap aükätiu an song. Ekewe chon alisi Rahap ra chapetiu arun pechen.
JOB 9:14 Ifa usun ai üpwe tongeni pälüeni Kot? Ifa usun, meni sokun kapas üpwe tongeni eäni ngeni?
JOB 9:15 Inamwo ika üa pwüng, nge üsap tongeni pälüeni. Üa chök tongeni tüngor ngeni Kot ai we soukapwüng, pwe epwe ümöümöch ngeniei.
JOB 9:16 Ika mwo ngang üpwe kökköri Kot, nge i epwe pälüeniei, üsap lükü pwe epwe rongorong ngeni ai kewe kapas.
JOB 9:17 Pun a atatakisiei ren eu mölümöl o achomonga kinasei, nge esap wor popun.
JOB 9:18 Kot esap mwüt ngeniei pwe üpwe ngasangas, nge a amasoua manauei ren riaföü.
JOB 9:19 Ika iei eu akufufengenin pöchökül, nengeni, i a kon pöchökül. Nge ika iei eu angangen kapwüng, iö a tongeni kökköri?
JOB 9:20 Inamwo ika üa pwüng, püsin kapasen awei epwe apwüngüei. Inamwo ika esap wor ai tipis, i epwe pwärala pwe üa tipis.
JOB 9:21 Ikamwo esap wor ai tipis, nge üsap püsin ekieki inisi. Üa anioputa manauei.
JOB 9:22 Aramas meinisin ra wewefengen. Iei mine üa apasa pwe Kot a niela ätewe esap wor an tipis usun chök ätewe mi tipis.
JOB 9:23 Lupwen feiengau a aworato mäkai, i a takirin ämängau ren än ewe chon pwüng feiengau.
JOB 9:24 Lupwen eu fanü a tolong lepöün ekewe aramasangau, Kot a pwölüela mesen ekewe soukapwüng. Are esap i, iö chök a föri?
JOB 9:25 Ränin manauei ra müttir sü seniei, lap seni müttirin eman chon sä. Ra süla, nge esap wor feiöch lor.
JOB 9:26 Ra säila seniei usun chök müttirin efoch waseres, ra müttirila usun chök müttirin eman ikel mi tur won liapan.
JOB 9:27 Are üa apasa, ‘Üpwe manlükala ai siö, üpwe likitala ai wowongau pwe üpwe wopwapwa,’
JOB 9:28 nge üa chök niuokus ren ai kewe riaföü meinisin, pun üa silei pwe Kot esap atolongaei lon tettelin chon pwüng.
JOB 9:29 Are üa nom lon tettelin chon tipis, pwota üpwe weiresmwäl, nge esap wor lomotan?
JOB 9:30 Ikamwo üpwe limetiei ren sop o limetöchü pei ren sarasko,
JOB 9:31 nge Kot epwe chök aturueilong lon eu pwang mi anou, pwe püsin üfei epwe anioputaei.
JOB 9:32 Pun Kot esap eman aramas usun ngang pwe üpwe tongeni pälüeni, ika aipwe tongeni kapwüngfengen.
JOB 9:33 Amwo epwe wor eman chon aför lefilem pwe epwe anomu pöün wom me ruoman,
JOB 9:34 pwe Kot epwe ükütiu le apwüngüei, nge an eniwaei esap chüen aniuokusuei.
JOB 9:35 Mürin üpwe kapas, nge üsap niuokusiti Kot. Nge usun nonomi iei üsap tongeni.”
JOB 10:1 “Üa anioputa püsin manauei. Iei mine üpwe fokun pwärawu ai siö, üpwe kapas fän riaföün letipei.
JOB 10:2 Üpwe üreni Kot: Kosap atipisiei. Kopwe asile ngeniei popun om apwüngüei.
JOB 10:3 Ifa usun, a mürina ngonuk pwe kopwe ariaföüüei? Ifa usun, a öch om kopwe aücheangaua förien poum, nge ka pwapwaiti mine ekewe aramasangau ra ekiekietä?
JOB 10:4 Ifa usun, mesom a usun mesen aramas? Ifa usun, ka küna usun eman aramas a küna?
JOB 10:5 Ifa usun, ränin manauom a mochomoch usun chök ränin manauen aramas? Ifa usun, ierum ra usun chök ierin aramas,
JOB 10:6 pwe kopwe kütta ai kewe föför mi ngau o chosani ai kewe tipis?
JOB 10:7 Ka silei pwe üsap tipis, esap pwal wor eman a tongeni angasaei senuk.
JOB 10:8 Poum kana ra auluuluei o föriei. Nge iei ka kunnula seniei o afeiengauaei.
JOB 10:9 Kopwe chechemeni pwe ka föriei seni pwül. Ifa usun, kopwe pwal aliwinisefäliei ngeni pwül?
JOB 10:10 Ka apöchöküla semei pwe epwe nöüniei, ka amärieitä lon letipen inei.
JOB 10:11 Ka achufengeni inisi ren chü me säl o pwölüei ren fituk me ünüch.
JOB 10:12 Ka fang ngeniei manau me om tong ellet, nge ren om tümwünüei üa manau.
JOB 10:13 Nge ei ekiek ka aopala lon lelukom, üa silei pwe a fen nom lon om ekiek:
JOB 10:14 Are üa tipis, en ka nenengeniei, nge kosap amusala ai föför mi ngau.
JOB 10:15 Feiengauei are üa föföringau. Nge are üa pwüng, üsap pwal tongeni chimwetä, pun üa uren itengau o mefi ai kewe riaföü.
JOB 10:16 Nge are üpwe chimwetä, en kopwe tapweriei usun eman laion a tapweri liapan, ka pwal pwärisefäli om kewe manaman pwe üpwe feiengau rer.
JOB 10:17 Ka awora chon pwärätä mi fö pwe repwe ü ngeniei, ka alapala om song ngeniei o awarasefälieto noum mwichen sounfiu pwe repwe fiufochofoch ngeniei.
JOB 10:18 Pwota ka atoeiwu seni letipen inei? Amwo üpwe mäla me mwen än aramas repwe künaei.
JOB 10:19 Mürin üpwe wewe ngeni eman esap manau, üpwe towu seni letipen inei o tolong lon peias.
JOB 10:20 Ifa usun, ränin manauei esap kan ngeni an epwe müchüla? Kopwe mwüt ngeniei pwe üpwe emanüla, pwe üpwe ekis pwapwa
JOB 10:21 mwen ai üpwe feila ngeni ewe leni üsap chüen liwinsefäl seni, ngeni ewe fanü mi rochopwak o fokun rochokich,
JOB 10:22 ewe fanü mi rochopwak o fitikoko, ia saram a usun chök rochopwak ie.”
JOB 11:1 Mürin, Sofar ewe re Nama a pälüeni Hiop,
JOB 11:2 “Ifa usun, esap wor eman mi mochen pälüeni ätewe mi kapas chomong? Ifa usun, eman mi kapaspat epwe pwä an pwüng ren an fos?
JOB 11:3 Ifa usun, om fospat epwe afanafanalai aramas? Nge lupwen ka eäni kapasen ämängau, ifa usun, esap wor eman epwe apwünguk?
JOB 11:4 Pun ka apasa, ‘Mine üa lükü a pwüng, üa pwal limöch me fän mesen Kot.’
JOB 11:5 Amwo Kot epwe suki awan o kapas ngonuk
JOB 11:6 pwe epwe pwäri ngonuk ekewe tipachem mi monomon, pun a amwarar lon an tipachem. Mürin kopwe mefi pwe Kot esap liwini ngonuk ükükün liwinin om tipis.
JOB 11:7 Ifa usun, ka tongeni silei usun alololun än Kot monomon? Ifa usun, ka tongeni weweiti aükükün tekian Ewe mi Unusen Manaman?
JOB 11:8 A tekia seni läng, met kopwe tongeni föri? A alolol seni ewe lenien sotup, met kopwe tongeni silei?
JOB 11:9 A watte seni watten fanüfan, a chölap seni mataulap.
JOB 11:10 Are Kot a feito o fötekinuk, are a köruketo ngeni kapwüng, iö a tongeni pinei?
JOB 11:11 Pun a silei ekewe aramas mi atuputup, nge lupwen a küna föför mi ngau, ifa usun, esap ekieki usun?
JOB 11:12 Are epwe tufich pwe eman aas mi mwacho epwe nöünöü, nge eman aramas nöün, ina fansoun epwe pwal tufich pwe eman aramas mi tiparoch epwe mirit.
JOB 11:13 Kopwe awenechara lelukom o aitietä poum ngeni Kot.
JOB 11:14 Are föför mi ngau a nom lepoum, kopwe atoaua senuk. Kosap mwüt ngeni föföringau epwe nom lon imwom.
JOB 11:15 Mürin kopwe anetai mesom, nge kosap säw, kopwe nüküchar, nge kosap niuokus.
JOB 11:16 Mürin kopwe manlükala om kewe riaföü, usun om kosap chüen chechemeni ekewe koluk mi pula.
JOB 11:17 Lon manauom epwe saram lap seni saramen leoloas, nge rochopwaken lon manauom epwe usun chök saramen lesosor.
JOB 11:18 Kopwe manau fän kinamwe, pun a wor om apilükülüköch. Kot epwe tümwünuk o asösöök fän kinamwe.
JOB 11:19 Kopwe konola, nge esap wor eman epwe aniuokusuk. Chomong aramas repwe kütta alilisir senuk.
JOB 11:20 Nge ekewe aramasangau repwe nenefetal fän apilükingau. Resap küna efoch al ra tongeni süla won, nge ra chök apilüküni pwe repwe mäla.”
JOB 12:1 Mürin, Hiop a pälüeni,
JOB 12:2 “Ewer, ämi oua aramas tipachem, nge lupwen oupwe mäla, tipachem epwe pwal mäla.
JOB 12:3 Nge a pwal wor ai mirit usun chök ämi, ngang üsap kis fami. Iö esap silei ekei mettoch oua kapas usun?
JOB 12:4 Ngang üa uretakir me ren chiechiei. Üa uretakir me rer, ngang eman mi wenechar o pwüng. Me lom üa kökköri Kot, nge i a pälüeniei.
JOB 12:5 Esap wor ämi weires, nge oua aitengauaei ai nom lon riaföü, oua wichi ätewe mi arap ngeni an epwe tur.
JOB 12:6 Lon imwen ekewe chon solä a wor kinamwe, nge chokewe mi asonga Kot ra nonomöch, ir chokewe mi eäni kot püsin ar pöchökül.
JOB 12:7 Iwe, kopwe aisini ekewe manfetal, ir repwe aiti ngonuk ekei mettoch, kopwe aisini ekewe mansüsü, ir repwe ürenuk usun.
JOB 12:8 Ika kopwe aisini fanüfan, epwe aiti ngonuk, nge ekewe ikenen leset repwe apworausa ngonuk ei pworaus mi let.
JOB 12:9 Iö me lein ekewe mönümanau meinisin esap silei pwe pöün ewe Samol mi Lapalap a föriir?
JOB 12:10 Manauen ekewe mönümanau meinisin a nom lepöün Kot, pwal ngasangasen aramas meinisin.
JOB 12:11 Ifa usun, sap än ewe seling angang pwe epwe alefila lefilen kapas mürina me kapas ingau, usun chök ewe chönaw a alefila lefilen nennen mongö mi anö me mongö mi ngau?
JOB 12:12 Tipachem a nom ren ekewe chinlap, nge mirit a nom ren eman mi manauatam.
JOB 12:13 Nge tipachem me manaman ra nom ren Kot, a wor an öüröür me mirit.
JOB 12:14 Are Kot a ataela och, iö epwe tongeni aüsefälietä? Are i a kalapusei eman, iö a tongeni amusa?
JOB 12:15 Are Kot a amwöchü ekewe koluk, ra pwasatä, nge are a apuela ekewe koluk, a fis noter.
JOB 12:16 Pöchökül me tipachem ra nom ren Kot. Ewe chon tup me ewe chon atuputup ra nom fän nemenian.
JOB 12:17 A angei seni ekewe chon öüröür ar tipachem o föri pwe ekewe soukapwüng ra föri föförün chon umwes.
JOB 12:18 A angei seni ekewe king ar nemenem o fötekiniir.
JOB 12:19 A atekisona ekewe souasor o asapwilätiu ekewe mi wor ar manaman.
JOB 12:20 A afanafanalai chokewe aramas ra lüküür o angei seni ekewe souakom ar mirit.
JOB 12:21 A aworato itengau won ekewe aramas tekia o awesi än ekewe chon pwora pöchökül.
JOB 12:22 A pwärawu mettoch mi alolol seni lon rochopwak o atolonga saram lon lenien rochopwaken mäla.
JOB 12:23 A atekiatä ekewe mwü, nge mürin a ataarela. A awattela ekewe mwü, nge mürin a föri pwe chor repwe oola.
JOB 12:24 A angei seni ekewe samol won fanüfan ar mirit o afetaleer won fanüapö ia esap wor efoch al ie.
JOB 12:25 Ra atapfeil lon rochopwak, pun esap wor ar saram, a ataroporopafetaleer pwe ra usun chök aramas mi pulas.”
JOB 13:1 “Nengeni, mesei a fen küna ekei mettoch meinisin, selingei a fen rongorong, nge üa weweöch ren.
JOB 13:2 Mine oua silei, ngang üa pwal silei, ngang üsap kis fami.
JOB 13:3 Nge ngang üpwe kapas ngeni Ewe mi Unusen Manaman, üa mochen pwüngüpwüngfengen me Kot won mine a fis ngeniei.
JOB 13:4 Nge me remi, ämi oua aöchü mettoch ren ämi kapas chofana, ämi meinisin oua usun sousäfei esap wor lomotemi.
JOB 13:5 Amwo ämi oupwe fanafanala. Ren ei oupwe tipachem.
JOB 13:6 Iei oupwe rongorong ai kewe kapasen eii, oupwe aüselinga ai kewe kapasen tüngor.
JOB 13:7 Ifa usun, oupwe kapas mwäl fän iten Kot o eäni kapas atuputup fän itan?
JOB 13:8 Ifa usun, oua mochen peni Kot ren ämi lifilifil ngeniei, ika oupwe chon alisi Kot lon kapwüng?
JOB 13:9 Are Kot epwe etittinakemi, ifa usun, epwe küna och mi mürina remi? Ika oua tongeni atupu i, usun oua atupu aramas?
JOB 13:10 Epwe fokun apwüngükemi, are oua lifilifil lemonomon.
JOB 13:11 Ifa usun, an manaman esap aniuokusukemi, nge an eniweniw esap feitiu womi?
JOB 13:12 Ämi kapasen mwiitun ra lomotongau usun chök falang, nge ämi chönükükemi a apwangapwang usun chök pwülüpar.
JOB 13:13 Oupwe fanafanala o mwüt ngeniei pwe üpwe kapas, inamwo ika met epwe fis ngeniei.
JOB 13:14 Ngang üa molotä pwe üpwe fangala manauei.
JOB 13:15 Inamwo ika Kot epwe nieila, üpwe chök anomu ai apilükülük won. Nge üpwe fokun alletätä ai kewe föför me fän mesan.
JOB 13:16 A tongeni fis pwe ai pwora epwe amanauaei, pun esap wor eman aramasangau epwe tongeni feito fän mesen Kot.
JOB 13:17 Oupwe fokun aüselinga ai kewe kapas, oupwe aü selingemi ngeni mine üpwe aiti ngenikemi.
JOB 13:18 Iei üa molotä pwe üpwe pwärätä usi, pun üa silei pwe üa pwüng.
JOB 13:19 Iö epwe tongeni atipisiei? Ika epwe wor eman, mürin üpwe fanafanala o mäla.
JOB 13:20 Ai Kot, kopwe chök mwüt ngeniei ruu mettoch, mürin üsap aopaei seni fän mesom:
JOB 13:21 Kopwe asü poum seniei o ükütiu le aniuokusuei ren om eniweniw.
JOB 13:22 Mürin kopwe kökköriei, nge ngang üpwe pälüeni. Ika kopwe mwüt ngeniei pwe üpwe kapas, nge en kopwe pälüeniei.
JOB 13:23 Ifa ükükün ai kewe föföringau me ai kewe tipis üa föri? Kopwe asile ngeniei ai kewe pupungau me ai kewe tipis.
JOB 13:24 Pwota ka aopala mesom seniei o atolongaei lon tettelin chon oputom?
JOB 13:25 Ifa usun, kopwe aniuokusuei? Ngang üa chök wewe ngeni echö chön irä mi äsfeil. Ika kopwe tapweri fetilipwas?
JOB 13:26 Pun ka awora kapasen tip ngeniei mi fokun weires, ka ngeniei liwinin ai kewe föföringau üa föri lealüali.
JOB 13:27 Ka anüküchara pechei lefilen irä o mamasafichi ai kewe föför meinisin, ka fen föri aükükün rasen ipwei.
JOB 13:28 Iei popun inisi a pweila usun mwüch mi kirou, pwal usun echö üf a tala ren pwötür.”
JOB 14:1 “Eman aramas mi uputiu me ren eman fefin a chök manau lon fansoun mochomoch, nge manauan a uren weires.
JOB 14:2 A märitä usun chök epö pön irä, nge a pwal pwasala. Manauan a süla usun eu nür, nge esap nonomola.
JOB 14:3 Ifa usun, kopwe nefotofotola won ena sokun aramas o emwenato lon kapwüng pwe kopwe apwüngü?
JOB 14:4 Iö a tongeni atowu och mettoch mi limöch seni och mettoch mi limengau? Esap wor eman.
JOB 14:5 Pokiten ränin manauen eman aramas ra aükük, nge en ka silei iteiten maramen manauan, ka pwal aükü müchülan ränin manauan pwe esap tongeni soposopola,
JOB 14:6 iei mine kopwe nenne seni o likiti pwe epwe tongeni awesala ränin manauan usun eman chon angang mi mö.
JOB 14:7 A chüen wor ach apilükülük ren efoch irä mi pöküpök pwe epwe fasarsefäl, pwe ilin kewe mi pwüküfö repwe fokun märitä.
JOB 14:8 Inamwo ika waran ra kirou me fän pwül o popun a pwasala,
JOB 14:9 nge lupwen koluk a tori, epwe fasar o apwükü palan usun efoch irä mi fö.
JOB 14:10 Nge lupwen eman aramas a mäla, a wes manauan. Lupwen a müchüla an ngasangas, ia a nom ie?
JOB 14:11 Usun koluk a pwasatä seni eu nomun koluk, nge eu chanpupu a kisikisila o morola,
JOB 14:12 iei usun eman aramas a mäla, nge esap chüen pwätäsefäl. Tori ekewe läng repwe morola, esap nennela ika pwök seni an möür.
JOB 14:13 Amwo kopwe aopaei lon ewe lenien sotup, amwo kopwe aopaei tori om lingeringer epwe wesila. Mürin, kopwe filätä eu fansoun fän itei o chechemeniei.
JOB 14:14 Are eman aramas a mäla, ifa usun, epwe pwal manausefäl? Lon unusen ränin ai angang üpwe witiwit tori fansoun ai ngasala epwe feito.
JOB 14:15 En kopwe köriei, nge ngang üpwe pälüenuk. En kopwe positiei, ngang ätewe poum a föri.
JOB 14:16 Mürin kopwe aleani iteiten ipweipwen pechei, nge kosap nengenifichi ai kewe tipis.
JOB 14:17 Kopwe amusala ai kewe tipis o atoauerela, kopwe pwölüela ai kewe föföringau.
JOB 14:18 Usun ekewe chuk ra sönüla o möküla, eu achau a mwöküt seni lenian,
JOB 14:19 usun ekewe koluk ra akükünala ekewe fau, nge püngümongun üt a apuela pwülün fanü, iei usun ka ataela än aramas apilükülüköch.
JOB 14:20 Ka akufu i tori feilfeilachök pwe esap chüen nom. Ka siwili wowon won mesan o tinala.
JOB 14:21 Nöün kewe mwän ra tolong lon iteüöch, nge i esap silei, ra sapwilitiu, nge i esap küna.
JOB 14:22 A chök mefi püsin metekin inisin, a chök ngüngüres fän iten püsin i.”
JOB 15:1 Mürin, Elifas ewe re Teman a pälüeni Hiop,
JOB 15:2 “Ifa usun, eman mwän mi tipachem epwe eäni kapasen pälüen mi pöön chök o püsin aura ren asepwälin ötiu?
JOB 15:3 Ifa usun, epwe anini won kapas esap wor lomotan, ika won fos resap alisi eman?
JOB 15:4 Nge en ka pinei än ekewe aramas repwe niuokusiti Kot o apeti ar iotek ngeni.
JOB 15:5 Pun om föföringau a pwä ren mine ka apasa, ka filätä kapasen atuputup.
JOB 15:6 Kapasen awom a atipisuk, sap ngang, püsin om kapas a pwärätä pwe ka tipis.
JOB 15:7 Ifa usun, en aemanün aramas mi uputiu? Ika ka fen nom, lupwen Kot a föri ekewe chuk?
JOB 15:8 Ifa usun, ka nom lon än Kot mwichen pwüngüwüng o aüselinga mine ra pwüngüpwüng won? Ifa usun, en echök ka eäni tipachem?
JOB 15:9 Ifa usun, met en ka silei, nge äm aisap silei? Ifa usun, met en ka weweiti, nge esap fat ngenikem?
JOB 15:10 Äm aia kaiö seni ekewe mwän mi pwech mökürer me ekewe chinlap, ir ra uputiu mwen semom.
JOB 15:11 Ifa usun, kosap menemen ren än Kot kewe kapasen achipachip, ika ren ekewe kapas pwetete äm aia ürenuk?
JOB 15:12 Met a kupeti lelukom? Nge pwota mesom a afochofoch ngenikem?
JOB 15:13 Ka song ngeni Kot o tipimwäl ngeni ren ena sokun kapas?
JOB 15:14 Ifa usun, eman aramas a tongeni limöch? Ika eman mi uputiu seni eman fefin a tongeni pwüng?
JOB 15:15 Ika Kot esap lükü nöün kewe mi pin, nge ekewe läng resap limöch me fän mesan,
JOB 15:16 epwe fen ifan eman aramas mi kon anioput o fokun ingau, a ünümi föföringau usun an ünümi koluk?
JOB 15:17 Hiop, kopwe aüseling mine üpwe ürenuk, üpwe pwäri ngonuk mine üa küna.
JOB 15:18 Üpwe ürenuk mine chon tipachem ra apworausa, nge resap aopala och mine semelaper kewe ra aiti ngeniir.
JOB 15:19 (Ir echök ra fanüeni ewe fanü, nge esap wor eman chon ekis a nom lefiler.)
JOB 15:20 Eman aramasangau mi ariaföüü aramas epwe chök riaföü fochofoch lon unusen ränin manauan.
JOB 15:21 A rongorong sokopaten ngingi mi fokun aniuokus, nge lon fansoun kinamwe ewe chon kata epwe feitiu won.
JOB 15:22 Esap wor an apilüköch pwe epwe tongeni sü seni rochopwak, a chök sousou ngeni an epwe mäla ren ketilas.
JOB 15:23 A fetalfeil pwe epwe kütta anan mongö o ais, ‘Ia a nom ie enei mongö?’ A silei pwe ewe ränin rochopwak a arapoto.
JOB 15:24 Riaföü me eniweniw ra aniuokusu ewe aramasangau, ra pworaiti usun eman king mi amol ngeni maun,
JOB 15:25 pun a aitietä pöün o pälüeni Kot, a ü ngeni Ewe mi Unusen Manaman
JOB 15:26 o säpuropur ngeni fän an tittin maun mi malül.
JOB 15:27 A kinupunup won mesan o kitinup won wänükün.
JOB 15:28 Nge epwe imweimw lon telinimw mi tala o nom lon imw esap wor eman epwe asoi, pun repwe wiliti ioien mettoch mi tala.
JOB 15:29 Ätei esap nonomotam lon an pisekisek, wöün esap nonomola, esap pwal mwo nge chüen wor ngünüwan won fanüfan.
JOB 15:30 Esap tongeni süla seni rochopwak. A wewe ngeni efoch irä ekkei a kenala palan, nge asepwäl a amorätiu sawitin.
JOB 15:31 Amwo esap püsin atupu i ren an anomu an lükülük won mine a lomotongau. Pun mine a lomotongau epwe ina liwinin.
JOB 15:32 Epwe angei unusen liwinin me mwen epwe tori an fansoun. Palan kewe resap manau.
JOB 15:33 Epwe wewe ngeni efoch irän wain mi amorätiu föün resamwo nup, pwal ngeni efoch irä olif mi amorätiu sawitin.
JOB 15:34 Esap wor mwirimwirin ewe mwichen chon resap aleasochisi Kot, imwer kewe ra aüetä ren lifangen amichimich repwe karala.
JOB 15:35 Ir ekewe aramas mi chök ekiekietä mine esepwüng o föri föför mi ngau, leluker a uren atuputup.”
JOB 16:1 Mürin Hiop a pälüeni,
JOB 16:2 “Üa rongorong fän chomong ekei sokun kapas. Ämi meinisin oua chon aururu mi lipwäkingau.
JOB 16:3 Ifa usun, ekewe kapas mi pöön chök resap müchüla? Ika met a achouukemi pwe oua eäni ei sokun kapas?
JOB 16:4 Ngang üpwe pwal tongeni eäni kapas usun chök ämi, are ämi oupwe nom lon ei sokun riaföü üa nom lon. Üpwe tongeni eäni chomong kapas ngenikemi o wichiki mökürei ngenikemi.
JOB 16:5 Üpwe tongeni apöchökülakemi ren kapasen awei o alisikemi ren kapasen achipachip.
JOB 16:6 Are üa fos, ai metek esap kisikisila, nge are üa fanafanala, ewe metek esap sü seniei.
JOB 16:7 Ellet, iei Kot a apwangapwangaeila, a amochala chon leimwei meinisin.
JOB 16:8 A föri pwe a pwach inisi. Ei a pwärätä an afeiengauaei. Üa kichüchü, nge aramas ra ekieki pwe ei liwinin ai tipis.
JOB 16:9 Kot a atatakisi inisi ren an lingeringer. A asüngürü ngin ngeniei o ettina mesan ngeniei ren an oputaei.
JOB 16:10 Aramas ra ämängauaei o pösapeei, ra achufengeniir o ü ngeniei.
JOB 16:11 Kot a asechieilong lepöün chokewe mi föri föför mi ngau, a aturueilong lepöün ekewe aramasangau.
JOB 16:12 Üa nom lon kinamwe. Nge Kot a turufi üei, a kupifeseniei o atatakisiei. A anomuei pwe an lenien ännen
JOB 16:13 o likapichi ngeniei wokun föün esefich seni ekis meinisin. A posu ekewe föün lepeki, a ninätiu marasei won pwül, nge esap tongeei.
JOB 16:14 A akinasafocheei. A sä ngeniei usun eman sounfiu mi afochongau.
JOB 16:15 Üa üföüf üf seni tuk o soretiu chamwei lon pwül moromor.
JOB 16:16 Won mesei a woparapar ren ai kechü, nge won apwölün mesei a cholokich.
JOB 16:17 Iei mwo met a fis, nge üsap föri och föförün mwäneson, ai iotek a limöch.
JOB 16:18 En fanüfan, kosap aopala ekewe föför mi mwäl ra fis ngeniei. Amwo ai tüngor pwe epwe fis pwüng esap ükütiu.
JOB 16:19 Nengeni, mi wor nei chon pwärätä a nom läng, ewe chon peniei a nom pekitä.
JOB 16:20 Chiechiei kewe ra turunufaseei, nge chönün mesei ra suputiu lon ai kechü ngeni Kot.
JOB 16:21 Üa mochen pwe eman epwe tüngormau ngeni Kot fän itei, usun eman aramas a tüngormau fän iten chiechian.
JOB 16:22 Pun mürin ekoch chök ier üpwe feila won ewe al, nge üsap chüen liwinsefäl seni.
JOB 17:1 A arap ngeni ai üpwe mäla, üa weires le ngasangas, ewe peias a molotä fän itei.
JOB 17:2 Ellet, mi wor chon turunufas ünüki, üa chök nenengeni ar ämängauaei.
JOB 17:3 Ai Kot, kopwe püsin awora ewe pisekin pwärätä ka mochen angei seniei. Pun io chök a tongeni pwon fän itei?
JOB 17:4 Ka pineela ar ekiek pwe resap wewe, iei mine kosap mwüt ngeniir pwe repwe pwapwa ren ar win.
JOB 17:5 Are eman a afangamä chiechian fän iten an epwe angei liwinin, nöün kana repwe män echik.
JOB 17:6 Kot a föri pwe aramas ra leaweniei lon ar kapasen turunufas, ra atufetä won mesei.
JOB 17:7 Mesei a toputopula pokiten ai lolilen, nge pei me pechei kewe ra kichüchü usun ngünüwen mettoch.
JOB 17:8 Aramas mi wenechar ra weitifengeniir ren ei, nge chokewe esap wor ar tipis ra palüeni chokewe resap aleasochisi Kot.
JOB 17:9 Iei mwo nge ekewe chon pwüng ra chök föföri mine a pwüng, nge chokewe mi limöch pöür ra chök pöpöchökülela.
JOB 17:10 Nge ämi meinisin, oupwe feito o kapassefäl, üsap küna mwo eman mi tipachem me leimi.
JOB 17:11 Ränin manauei ra feil seniei, ai akot me mochenin letipei ra tala.
JOB 17:12 Nge chiechiei ra apasa pwe a rän lupwen a pwin, ra pwal apasa pwe saram a arapoto, nge ngang üa silei pwe üpwe chök nom lon rochopwak.
JOB 17:13 Are üa apilükülükü pwe ewe lenien sotup imwei, are üa anomu kiei lon rochopwak,
JOB 17:14 are üa üreni ewe peias, ‘En semei,’ nge ngeni ewe moso, ‘En inei,’ ika ‘En fefinei,’
JOB 17:15 ia a nom ie ai apilükülük? Iö epwe tongeni küna och apilükülük fän itei?
JOB 17:16 Ai apilükülük epwe feitiu ren ewe lenien sotup. Sipwe feitiupök lon ewe pwül moromor.”
JOB 18:1 Mürin, Piltat ewe re Shu a pälüeni Hiop,
JOB 18:2 “Inet kopwe ükütiu le eäni ei sokun kapas? Kopwe akomwen ekiek, mürin sipwe fos.
JOB 18:3 Pwota aipwe wewe ngeni man? Pwota äm aia tiparoch me reöm?
JOB 18:4 Hiop, ka püsin atatakisiik lon om song. Ifa usun, fanüfan epwe pöla pokitom, ika ewe achau epwe mwökütüwu seni lenian?
JOB 18:5 Ewer, än ewe aramasangau saram a kunula, nge ngetengeten an ekkei esap ükütiu.
JOB 18:6 Ewe saram lon imwan imw mangaku a rochopwakala, nge an lamp mi nom asan a kunula.
JOB 18:7 Sääpöchökülen pechen a kisikisila, a turula ren püsin an rawangau.
JOB 18:8 A püsin fetalelong lon eu cheew, a ipwetä won eu lenien likatup mi wor pwang fan.
JOB 18:9 Eu foren likapich a forei apilipilin pechen, a fif lon eu lenien likatup.
JOB 18:10 Efoch säl a monola lepwül fän itan, pwal eu likapich a wor lon alan.
JOB 18:11 Eniweniw a aniuokusu ekis meinisin o tapweri ia a ipwela ie.
JOB 18:12 Feiengau a echik o moneiti ewe aramasangau, feiengau a molotä fän itan, lupwen epwe turutiu.
JOB 18:13 Samau a enala ünüchan, samaun mäla a enala kifetin kewe.
JOB 18:14 A angeawu ewe aramasangau seni imwan imw mangaku ia a nom ie fän kinamwe, o emwenala ren ewe king itan eniweniw.
JOB 18:15 Mine a eäni me lom esap chüen nom lon imwan, nge pirimiston a toropasfeil won lenian.
JOB 18:16 Waran kewe mi nom fan ra mäla, nge palan kewe ra pwasala.
JOB 18:17 Esap chüen wor eman a chechemeni i me won ewe fanü, esap chüen föü itan me won lenian.
JOB 18:18 Aramas ra cheela seni saram ngeni rochopwak o asüela seni won fanüfan.
JOB 18:19 Esap wor nöün ika mwirimwirin me lein aramasan, esap pwal wor eman mi chüen manau lon ewe leni ia a nom ie me lom.
JOB 18:20 Ekewe aramas mi nom lotou me ötiu ra mairü o chechech fän niuokus, lupwen ra rongorong usun an feiengau.
JOB 18:21 Ellet, iei usun mine a fis ngeni ekewe chon föföringau, iei feiengauen chokewe resap silei Kot.”
JOB 19:1 Mürin, Hiop a üreni chiechian kewe,
JOB 19:2 “Ifa ükükün fansoun ämi ariaföüüei o atatakisi lelukei ren ämi kapas?
JOB 19:3 Fän chomong oua esitaei. Ifa usun, ousap säw ren ämi föri ngeniei mine esepwüng?
JOB 19:4 Inamwo ika a let pwe üa mwäl, ai mwäl a chök nom woi.
JOB 19:5 Ika oua wesewesen atekiakemi mwei o apasa, pwe ai kewe riaföü iei allükülükün pwe üa tipis,
JOB 19:6 mürin oupwe silei pwe Kot a föri ngeniei mine esepwüng o apweli ngeniei an we cheew.
JOB 19:7 Nengeni, üa ü ngeni ei sokun föför mi mwäl ngeniei, nge esap wor eman a pälüeniei. Üa siö pwe eman epwe alisiei, nge esap wor ai pwüng.
JOB 19:8 Kot a pinei alei pwe üsap tongeni pwerela won, a anomu rochopwak won alei kewe.
JOB 19:9 A angei seniei iteüöchi, a pwal angei seniei ai ling.
JOB 19:10 A atatakisieitiu lepeki meinisin. A üttätä ai apilükülüköch usun eman a üttätä efoch irä, a likitieila pwe üpwe mäla.
JOB 19:11 A fokun lingeringeritiei o atolongaei lon tettelin chon oputan.
JOB 19:12 An mwichen sounfiu ra feitopök, ra senätä eu ororen maun ngeniei o pwelifeili imwei imw mangaku.
JOB 19:13 Kot a fokun atoauala pwii kewe seniei, pacheriei kewe resap fokun chüen sileei.
JOB 19:14 Märäri me chiechiei kewe ra likitieila,
JOB 19:15 chokewe mi wasöla rei ra manlükieila. Nei kewe chon angang fefin ra aleaeilong lon tettelin wasöla, ngang üa wiliti eman chon ekis me rer.
JOB 19:16 Üa kökköri nei chon angang, nge i esap pälüeniei. Üa fen mwo nge tütüngor ngeni pwe epwe alisiei, nge i esap mochen.
JOB 19:17 Pwülüei a oput ai ngasangas, üa anou me ren wesewesen pwii kewe.
JOB 19:18 Semirit mwo nge ra turunufaseei, ra ämängauaei, lupwen ra künaei.
JOB 19:19 Chiechiei kewe meinisin mi kan ngeniei ra fokun oputaei, nge chokewe meinisin üa tongeer ra kul o ü ngeniei.
JOB 19:20 Üa kichüchüla pwe ünüchei a pach ngeni chüi, ngii ra menenneniwu seni apwapwan.
JOB 19:21 Ämi chiechiei kana, oupwe tongeei, oupwe tongeei, pun pöün Kot a awataei.
JOB 19:22 Pwota oua tapweriei usun Kot? Ifa usun, esap naf ämi ariaföüüei?
JOB 19:23 Amwo eman epwe chechemeni ai kewe kapas o makeeretiu lon eu puk.
JOB 19:24 Amwo repwe rup ren efoch pen seni mächä won eu achau o ketelilong pilom lon, pwe repwe nom tori feilfeilachök.
JOB 19:25 Ngang üa silei pwe ailei a manau, nge lon eu rän i epwe ütä won fanüfan.
JOB 19:26 Inamwo are ünüchei a tala ren samau, nge lon inisi üpwe chök küna Kot.
JOB 19:27 Ngang won inisi üpwe küna Kot, mesei repwe püsin küna. Ngang, nge sap eman lüki. Letipei a ekilonei ei.
JOB 19:28 Ämi oua apasa, ‘Ousipwe tapweri. Pun i popun ewe osukosuk.’
JOB 19:29 Iei mine oupwe niuokusiti ewe ketilas. Pun än Kot lingeringer epwe awarato apwüng ngenikemi ren ewe ketilas. Ren ei oupwe mefi pwe mi wor eu kapwüng.”
JOB 20:1 Mürin, Sofar ewe re Nama a pälüeni Hiop,
JOB 20:2 “Ai osukosuk lon letipei a echimwaei pwe üpwe fos, pun üa fokun weires.
JOB 20:3 Üa rongorong om kapasen aitengauaei, nge seni lon ai weweöch, üa silei mine üpwe pälüenuk won.
JOB 20:4 Ka fokun silei mine a fis seni me lomlom, lon ewe fansoun, lupwen aramas ra kärän nom won fanüfan,
JOB 20:5 pwe än ekewe aramasangau mweireir a chök fis lon fansoun mochomoch, nge än chokewe resap aleasochisi Kot pwapwa a fis lon eu chök otun.
JOB 20:6 Inamwo are an eman lamalamtekia a tekiatä tori läng, nge möküran a tori ekewe kuchu,
JOB 20:7 epwe chök morola usun kiten anan tori feilfeilachök. Chokewe mi küna i me mwan repwe apasa, ‘Ia ätewe a nom ie?’
JOB 20:8 Epwe morukula usun chök eu tan, nge sisap chüen küna. Epwe süla usun chök künan eman lepwin.
JOB 20:9 Mesen ätewe mi küna i esap chüen künasefäli, nge chon lenian resap chüen nenengeni.
JOB 20:10 Nöün kewe repwe aliwinala mine a soläni seni ekewe chon wöüngau, ir repwe aliwinala wöün.
JOB 20:11 Inisin mi pöchökül me lom, nge iei epwe wiliti pwül moromor.
JOB 20:12 Föföringau a arar me lon awan pwe a aopala fän chönawan,
JOB 20:13 esap fokun mochen atowu seni lon awan, nge a chök amwöchü fän fongochun.
JOB 20:14 Nge ewe mongö lon lukan a siwil ngeni maras, a wiliti poisonun serepenit me lon inisin.
JOB 20:15 A oromala ekewe wöü o musäsinisefälirewu. Kot a atorowu seni lon lukan.
JOB 20:16 Epwe atumuw poisonun ekewe serepenit, nge epwe mäla ren küwen eman serepenit.
JOB 20:17 Esap manau ngeni an epwe küna ekewe chanpupu mi apuowu apüra seni föün olif, ika ekewe öüwö mi apuowu chönün chunen me milik.
JOB 20:18 Epwe fangatä uän an angang, nge esap tongeni püsin aea, esap pwal tongeni pwapwaiti winnen an amömö.
JOB 20:19 Pun a ariaföüü o tümwününgau ngeni ekewe chon wöüngau, a pwal angei fän pöchökül ekewe imw esap püsin aüetä.
JOB 20:20 Pokiten an mochenia esap ükütiu, esap tongeni amwöchü och seni mine a pwapwaiti.
JOB 20:21 Wesin an mongö esap wor och lusun, iei mine wöün esap nonomola.
JOB 20:22 Lupwen a fokun wöümong, osupwang epwe tori, nge riaföü mi fokun pöchökül epwe feitiu won.
JOB 20:23 Lupwen a wes le aura lukan, Kot epwe tinato ren an song mi fokun chou, o fokun wichi.
JOB 20:24 Inamwo ika epwe süla seni eu pisekin maun seni mächä pwe esap küw, efoch föün esefich seni piras epwe fotolong lon inisin.
JOB 20:25 Ewe föün esefich a pwerewu me lükisökürün, mesan mi misimis a tikiwu seni marasan. Eniweniw a feitiu won.
JOB 20:26 Meinisin mine a ionifengeni a tala. Eu ekkei esor eman aramas a angeta epwe kenala i, epwe pwal kenala mine a lusun lon imwan imw mangaku.
JOB 20:27 Läng epwe pwärätä an föföringau, nge fanüfan epwe ütä o atipisi.
JOB 20:28 Aramas repwe angeala pisekin lon imwan, repwe uweala lon ewe ränin än Kot lingeringer.
JOB 20:29 Iei usun mine Kot epwe föri ngeni ewe aramasangau, iei usun mine Kot epwe awisa ngeni.”
JOB 21:1 Mürin, Hiop a üreni chiechian kewe,
JOB 21:2 “Oupwe aüselingafichi ai kei kapas. Ren ei oupwe achipaei.
JOB 21:3 Oupwe mwüt ngeniei pwe üpwe kapas. Nge wesin ai kapas oua tongeni sopwela le turunufaseei.
JOB 21:4 Ifa usun, üa siö ngeni aramas? Pwota üpwe chök engila?
JOB 21:5 Oupwe nenengeniei o mairü, oupwe pwölüela awemi ren pöümi.
JOB 21:6 Lupwen üa ekieki usun mine a fis ngeniei, üa rükö, chechech a toriei.
JOB 21:7 Pwota ekewe aramasangau ra manau o tori chinlap, nge ar nemenem a wattela?
JOB 21:8 Nöür kewe me nöün nöür kewe ra nonomöch me fän meser.
JOB 21:9 A wor kinamwe lon imwer kewe, nge esap wor niuokus lor. Kot esap awarato wor feiengau.
JOB 21:10 Nöür ätemwänin kow ra tufichin apwopwofochofoch, nöür kewe kow ra nöünöütiu, nge esap mwetela nöür.
JOB 21:11 Ra tinawu nöür semirit pwe repwe urumwotfeil usun chök epwi pwin sip.
JOB 21:12 Ra köl fiti pisekin kaktai me ükülele, ra mweireir ren tikin aangün.
JOB 21:13 Ra pisekisek lon ränin manauer meinisin, ra mäla o feitiu lon ewe lenien sotup fän kinamwe.
JOB 21:14 Ra üreni Kot, ‘Kopwe feila senikem. Äm aisap mochen silei letipom fän iten manauem.
JOB 21:15 Iö Ewe mi Unusen Manaman pwe sipwe angang ngeni? Met feiöchüch are sia iotek ngeni?’
JOB 21:16 Nge ar feiöch esap nom lon püsin pöür. Iei mine ngang üpwe atoauala seniei än ekewe aramasangau öüröür.
JOB 21:17 Ifa usun, fän fitu a fis pwe än ekewe aramasangau lamp a kunula? Ifa usun, fän fitu a toriir feiengau? Ifa usun, Kot a apwüngüür lon an song?
JOB 21:18 Ifa usun, ra wewe ngeni fetilipwas mi ässila ren asepwäl, ika ngeni ekewe pön wiich mi ässila ren mölümöl?
JOB 21:19 Ämi oua apasa, ‘Kot a anomu liwinin tipisin eman aramas won nöün kana.’ Apwi, epwe ngeni püsin liwinin an föför, pwe epwe silei pwe iei liwinin an tipis.
JOB 21:20 Eman chon tipsis epwe püsin küna an feiengau, epwe püsin ün seni ewe kapen lingeringer än Ewe mi Unusen Manaman.
JOB 21:21 Ifa usun, epwe ekieki usun chon leimwan mi manau me mürin, lupwen manauan a wesila?
JOB 21:22 Ifa usun, mi wor eman epwe tongeni aiti ngeni Kot silelap, ngeni ewe Kot mi apwüngü chokewe mi nom pekitä lon läng?
JOB 21:23 Eman a mäla lon an fokun pöchökül, a fokun kinamwe o nonomöch.
JOB 21:24 Inisin a fokun kitinup, nge minen lon chün esap pwasapwas.
JOB 21:25 Nge pwal eman a mäla fän weiresin letipan, esap fokun küna feiöch.
JOB 21:26 Ir me ruoman repwe konopök fän pwül, nge moso repwe pwölürela.
JOB 21:27 Üa fokun silei ämi ekiekingau, pwe oua ekiekin föri ngeniei mine esepwüng.
JOB 21:28 Pun oua ais, ‘Ia a nom ie imwen ewe samol? Ia a nom ie imwen ekewe aramasangau?’
JOB 21:29 Ifa usun, ousap aisini mwo ekewe chon sai? Ifa usun, ousap aüseling ngeni mine ra apworausa,
JOB 21:30 pwe ewe aramasangau esap feiengau lon ewe ränin feiengau, pwe a ngasala lon ewe ränin än Kot song?
JOB 21:31 Iö a tongeni atipisi ewe aramasangau nge newenewen ngeni? Iö a tongeni liwini ngeni an föför?
JOB 21:32 Lupwen ra uwei ngeni ewe lenien peias, chon mas ra mamasa.
JOB 21:33 Chomong aramas ra tapwela mürin, nge chokewe mi akom mwan resap lea. Epwe peias lon eu lemol a sani lupwen a manau.
JOB 21:34 Pwota oua mochen achipaei ren kapas lomotongau? Esap chüen wor och lusun ämi kapas pälüen, nge kapas chofana chök.”
JOB 22:1 Mürin, Elifas ewe re Teman a pälüeni Hiop,
JOB 22:2 “Ifa usun, eman aramas a tongeni lomot ngeni Kot? Ellet, ätewe mi tipachem a chök lomot ngeni püsin i.
JOB 22:3 Ifa usun, epwe lomot ngeni Ewe mi Unusen Manaman are ka föri mine a pwüng? Ifa usun, epwe feiöch ren om föför mi unusöch?
JOB 22:4 Ifa usun, Kot a amirituk ika a atookolong lon kapwüng pokiten om niuokusiti i?
JOB 22:5 Apwi, a fokun watte om föföringau. Esap wor müchün om kewe tipis.
JOB 22:6 Pun ka echimwa pwiüm kewe pwe repwe ngonuk asisilen ar pwonen liwinimang, nge esap wor popun, ka pwal angei seniir üfer pwe ra selela.
JOB 22:7 Kosap ngeni ekewe chon malülü ünümer koluk, kosap pwal amongöü chokewe mi echik.
JOB 22:8 En ka aea manom pwe kopwe fanüeni ewe fanü, nge ren om iteföüla ka nonom lon.
JOB 22:9 Ka tinala ekewe fefin mi mä pwülüer fän ar asöülapö o angei seni ekewe mi mäsen mine a wor rer.
JOB 22:10 Iei mine ekewe sär ra nom pwelin ünükum, nge eniweniw a müttir aniuokusuk.
JOB 22:11 Om saram a rochopwakala pwe kosap tongeni küna mwom, nge koluk mi pumong a pwölükela.
JOB 22:12 Ifa usun, Kot esap nom lon ewe leni tekia lon läng? Nengeni usun tekian ekewe fü mi fokun toau.
JOB 22:13 Nge en ka apasa, ‘Met Kot a tongeni silei usi? Ifa usun an epwe tongeni föri kapwüng won mine a nom fän rochokichin rochopwak?
JOB 22:14 Ekewe kuchu mi kirochoroch ra pwölüela mesan pwe esap tongeni künakich, lupwen a fetalfeil lon läng.’
JOB 22:15 Ifa usun, kopwe chök fetal won ewe alen lom ekewe aramas mi föföringau ra fen fetal won?
JOB 22:16 Eman a müttir angerela me mwen ar fansoun, ar longolong a tala ren koluk.
JOB 22:17 Ra üreni Kot, ‘Kopwe feila senikem,’ ra pwal apasa, ‘Met Ewe mi Unusen Manaman epwe tongeni föri ngenikem?’
JOB 22:18 Iei mwo nge Kot a fen amasoua imwer ren mettoch mi mürina. Nge ngang üa atoauala seniei än ekewe aramasangau öüröür.
JOB 22:19 Ekewe chon pwüng ra pwapwa, nge chokewe esap wor ar tipis ra takirin ämängaua ekewe aramasangau, lupwen ra küna ar feiengau.
JOB 22:20 Ra apasa, ‘Ellet, ekewe chon oputakem ra kärila, nge mine ra likitala seni wöür, ekkei a kenala.’
JOB 22:21 Kopwe tipeeu ngeni Kot o kinamwe ngeni. Ren ei, feiöch epwe toruk.
JOB 22:22 Kopwe angei öüröürom seni o iseis an kewe kapas lon lelukom.
JOB 22:23 Are kopwe liwinsefäl ngeni Ewe mi Unusen Manaman o püsin atekisonok, are kopwe aükätiu pwüngingau mi fis lon imwom,
JOB 22:24 are kopwe pöütala om kolt lepwül, nge om kolt seni Ofair kopwe pöütala lein ekewe föün lon öüwö,
JOB 22:25 mürin Ewe mi Unusen Manaman epwe om kolt pwal om silifer mi aüchea.
JOB 22:26 Iwe, mürin kopwe pwapwa ren Ewe mi Unusen Manaman o anetäi mesom ngeni Kot.
JOB 22:27 Kopwe iotek ngeni, nge i epwe aüselingok, kopwe pwal föri pwüngün om kewe pwon.
JOB 22:28 Meinisin mine ka ekiekietä epwe fisitä, nge saram epwe tittin won alom kewe.
JOB 22:29 Pun Kot a atekisona ekewe chon lamalamtekia, Nge a amanaua chokewe mi tekison.
JOB 22:30 Epwe pwal amanauok inamwo ika ka tipis, epwe angasokola, are kopwe föri mine a pwüng.”
JOB 23:1 Mürin, Hiop a apasa,
JOB 23:2 “Lon ai siö üa chüen ü ngeni Kot ikenai. Pöün a chou woi lon ai ngüngü.
JOB 23:3 Amwo üpwe silei ia üpwe küna i me ie, pwe üpwe tongeni feila ren lon lenian.
JOB 23:4 Üpwe pwärätä ai weires me fän mesan o apasawu ai kapasen alellet.
JOB 23:5 Üa mochen silei mine epwe pälüeni ngeniei o weweiti mine epwe üreniei.
JOB 23:6 Ifa usun, epwe anini ngeniei fän watten an manaman? Apwi! Epwe aüselinga ai kapas.
JOB 23:7 Mürin, eman aramas mi wenechar epwe pwüngüpwüng ngeni, nge ngang üpwe ngasala seni ai soukapwüng tori feilfeilachök.
JOB 23:8 Nengeni, üa feila peliötiu, nge Kot esap nom ikenan, üa pwal feila pelilotou, nge üsap küna i.
JOB 23:9 Lupwen a föri an angang me peliefeng, ngang üsap küna, lupwen a kul ngeni peliör, ngang üsap nenengeni.
JOB 23:10 Nge Kot a silei ewe al üa fetal won. Lupwen a sotuniei, a pwä pwe üa usun kolt.
JOB 23:11 Pechei a ipwelong lon ipwan. Üa tümwünüfichi an al, nge üsap rik seni.
JOB 23:12 Üa apwönüetä än Kot kewe allük, üa iseis an kewe kapas lon letipei.
JOB 23:13 Nge Kot esap siwil. Iö a tongeni apälüa? Meinisin mine a mochen epwe chök föri.
JOB 23:14 Pun epwe awesala mine a akota ngeniei. Chomong akot usun ekei ra nom lon an ekiek.
JOB 23:15 Iei mine üa fokun chechech me fän mesan. Lupwen üa ekieki usun, üa niuokusiti i.
JOB 23:16 Kot a föri pwe üa apilükingau, Ewe mi Unusen Manaman a eniwaei.
JOB 23:17 Nge üsap fanafanala ren ewe rochopwak, pwal ren ewe rochokichin rochopwak mi pwölüela mesei.”
JOB 24:1 “Pwota Ewe mi Unusen Manaman esap awora eu fansoun kapwüng, pwota chokewe mi silei i resap fokun küna an kewe ränin apwüng?
JOB 24:2 Ekewe aramasangau ra amwökütü kiännin fanü. Ra soläni pwiin sip o folenifengeniir me nöür kewe sip.
JOB 24:3 Ra angei ewe aas nöün ewe mi mäsen, ra pwal amwöchü ewe ätemwänin kow nöün ewe fefin mi mä pwülüan tori a awesi an liwinimang.
JOB 24:4 Ra epeti seni ekewe chon wöüngau ar pwüüng, ra pöchökül ngeni ekewe chon mwelele pwe ra süla o püsin aopeer.
JOB 24:5 Ekewe chon wöüngau ra feila ngeni ar angangen kütta ener usun chök ekewe aas mi mwacho lon ewe fanü mi pwas, ra kütta liaper lon ewe fanüapö pwe enen nöür kewe.
JOB 24:6 Ra rusifengeni enen ekewe man fetil lon ekewe mälämäl o ionifengeni ekewe föün wain lon än ekewe aramasangau tanipin wain.
JOB 24:7 Lon unusen pwin ra kon fän selela, pun esap wor üfer, esap pwal wor pwölüpwölür lupwen fansoun patapat.
JOB 24:8 Ra chöchön ren püngün üt me won ekewe chuk, ra opolong fän ekewe achau, pun esap wor ia repwe op ie.
JOB 24:9 Mi wor ekoch aramasangau ra angei mönükol mi mä semer seni oupwun iner pwe repwe nöüniir amanau, ra pwal angei nöün ewe mi wöüngau semirit pwe liwinin an liwinimang.
JOB 24:10 Nge ekewe chon wöüngau ra fetalfeil fän üfer mi kamwakam. Ra angang lon tanipin wiich, nge ra chök echik.
JOB 24:11 Ra üchüch föün olif lon ekewe lenien üchüch än ekewe aramasangau, ra pwal puri ekewe föün wain, nge ra chök kaka.
JOB 24:12 Aramas ra rongorong ngüngün chokewe mi arap ngeni mäla seni lon ekewe telinimw, nge chokewe mi kinas ra kökkö pwe eman epwe alisiir. Nge Kot esap aüselinga ar iotek.
JOB 24:13 Mi wor chokewe mi ü ngeni ewe saram, ir chokewe resap silei än Kot kewe al, resap pwal fetal won.
JOB 24:14 Eman mi niela aramas a pwätä ünümweerän pwe epwe niela ekewe chon wöüngau me chon mwelele. Nge lepwin a föri föförün chon solä.
JOB 24:15 Ewe chon lisowu a witiwit tori an epwe pwinila. Iwe, a pwölüela mesan pwe esap wor eman epwe silleni.
JOB 24:16 Lon fansoun kiroch chon solä ra ataelong ekewe imw, nge lerän ra aoperela. Resap mochen pwärirela lon saram.
JOB 24:17 Iwe, rochokichin rochopwak a wewe ngeni lesosor me rer meinisin, pun ir ra chiechi ngeni ekewe eniweniwen rochokichin rochopwak.
JOB 24:18 Ekewe aramasangau ra müttir pula ren ekewe koluk. Fanüer kewe me lon ewe fanü ra anümamau, pwe esap wor eman a feila ngeni ar tanipin wain.
JOB 24:19 Usun pwasapwas me pwichikar ra amorätä ekewe koluk seni sno, iei usun mäla a angeala ekewe chon tipis.
JOB 24:20 Pwal ekewe inelap mi nöüniir ra manlükirela, ekewe moso chök ra pwapwaitiir le ocheer. Ekewe aramasangau resap chüen chem, pun ra feiengau usun efoch irä mi turula.
JOB 24:21 Ra manau seni fefin mi rit esap wor nöür, nge resap eäni kirikiröch ngeni fefin mi mä pwülüer.
JOB 24:22 Kot a angeala manauen ekewe chon pwora ren an manaman. Inamwo ika ra fefeitä, nge esap wor ar apilüköch lon manauer.
JOB 24:23 A fang ngeniir kinamwe, pwe ra ekieki pwe ra nonomöch, nge Kot a nenengeni ar kewe föför.
JOB 24:24 Ekewe aramasangau ra tekiatä lon fansoun mochomoch, nge mürin resap chüen nom. Ra küna tekison o kärila usun ekewe lusun aramas, ra pöküpök usun chök ekewe umwun wiich.
JOB 24:25 Ifa usun, esap iei usun? Iö a tongeni tip ngeniei pwe üa chofana, ika pwärätä pwe esap wor lomoten mine üa apasa?”
JOB 25:1 Mürin, Piltat ewe re Shu a apasa,
JOB 25:2 “Nemenem me niuokus ra nom ren Kot, i a awora kinamwe lon an we läng mi tekia.
JOB 25:3 Ifa usun, eman a tongeni aleani iteiten nöün kewe chon läng? Ifa usun, iön aramas än Kot saram esap tin won?
JOB 25:4 Ifa usun än eman aramas epwe tongeni küna pwüng fän mesen Kot? Ifa usun, eman mi uputiu seni eman fefin a tongeni limöch?
JOB 25:5 Nengeni, pwal ewe maram esap saram, nge ekewe fü resap limöch me fän mesan.
JOB 25:6 Nge eman aramas a kon kis seni, pun i eman möttö, nöün aramas a eman moso chök.”
JOB 26:1 Mürin, Hiop a pälüeni Piltat,
JOB 26:2 “Ka fokun alisi ätewe esap wor manan. Ka fokun apöchöküla ätewe esap wor an pöchökül.
JOB 26:3 Ka fokun öüröüraei ngang ätewe esap wor ai tipachem o achomongala ngeniei ekewe kapasen silelap.
JOB 26:4 Iö a alisuk pwe kopwe eäni ekei kapas, ngünün iö ka ngününi?
JOB 26:5 Ngünün ekewe mi mäla ra chechech me lon ekewe koluk mi nom fän pwül.
JOB 26:6 Ewe lenien sotup a pwäla me fän mesen Kot, ewe leni mi alolol esap wor pwölüpwölün.
JOB 26:7 Kot a ameresala ewe längin efeng ia esap wor och ie, o emeitiuätä fanüfan won eu leni mi pön.
JOB 26:8 A achufengeni ekewe koluk lon an kewe kuchuchol, nge ekewe kuchu resap sangfesen ren chour.
JOB 26:9 A pwölüela ewe maram, lupwen a unus, ren an ameresala an kewe kuchu won.
JOB 26:10 A föri eu kukumos won ekewe koluk, pun epwe wor eu kiä lefilen saram me rochopwak.
JOB 26:11 Ekewe üren läng ra chechech, ra mairü ren an kapasen apwüng.
JOB 26:12 A anonoi ewe matau ren an manaman o atatakisi Rahap ren an tipachem.
JOB 26:13 Ekewe läng ra kurufat ren an ngasangas, pöün a posuw ewe serepenit mi süla.
JOB 26:14 Nengeni, ekei lapalap ra chök eu kükün kinikinin an kewe föför. A chök eu kükün ngüngü mine sia rongorong seni Kot. Nge iö a tongeni weweiti pöchökülen an manaman?”
JOB 27:1 Iwe, Hiop a sopwela an pworaus o apasa,
JOB 27:2 “Mwo manauen Kot ewe mi Unusen Manaman mi angei seniei ai pwüng o atatakisi letipei,
JOB 27:3 ükükün fansoun ngasangasei epwe nom leuti o ngasangasen Kot a nom lon pwöti,
JOB 27:4 tinawei esap apasawu kapas chofana, nge chönawei esap atowu kapas atuputup.
JOB 27:5 Esap fokun tufich ai üpwe apasa pwe oua pwüng. Tori üpwe mäla, üsap ükütiu le apasa pwe üa wenechar.
JOB 27:6 Üpwe kamwöchünük won ai pwüng, nge üsap mwüt ngeni pwe epwe feil seniei. Esap wor mengiringirin lelukei pokiten och föförün lon manauei.
JOB 27:7 Amwo ewe chon oputaei epwe wewe ngeni eman aramasangau, nge ätewe mi ü ngeniei epwe wewe ngeni eman chon pwüngingau.
JOB 27:8 Pun ifan än ätewe esap aleasochisi Kot apilükülük, lupwen Kot a angei manauan?
JOB 27:9 Ifa usun, Kot epwe aüselinga an siö, lupwen osukosuk epwe tori?
JOB 27:10 Ifa usun, epwe pwawaiti Ewe mi Unusen Manaman o kökköri Kot fansoun meinisin?
JOB 27:11 Üpwe aiti ngenikemi usun manamanen Kot, üsap opala mine Ewe mi Unusen Manaman a akota.
JOB 27:12 Nge nengeni, ämi meinisin oua püsin küna ekei mettoch. Pwota chök oua eäni ena sokun fos esap wor lomotan?
JOB 27:13 Iei usun mine Kot epwe föri ngeni eman aramasangau, iei liwinin ätewe mi ariaföüü aramas me ren Ewe mi Unusen Manaman.
JOB 27:14 Ikamwo a wor chomong nöün, repwe chök mäla lon maun, nge mwirimwirin kana esap naf ener mongö.
JOB 27:15 Chokewe mi manau me mürin repwe mäla ren mätter, nge pwülüer kewe mi lipichsefäl esap wor ar kölün kechü fän iter.
JOB 27:16 Inamwo ika a achukuchukätä silifer usun chukuchukutän pwül moromor, ika a aioiätä üf usun ioien pwülüpar,
JOB 27:17 ewe chon pwüng epwe üfeni ekewe üf, nge ätewe mi wenechar epwe angei ewe silifer.
JOB 27:18 Ewe imw ewe aramasangau a aüetä a usun chök eu türün ninnä, usun eu likachoch eman chon mas a aüetä.
JOB 27:19 A kon won kian o annut lon an pisekisek, nge esap chüen tongeni föri iei usun. Lupwen a nennela, wöün esap chüen nom.
JOB 27:20 Eniweniw a feito won usun chök eu noter, eu mölümöl a uweala lepwin.
JOB 27:21 Ewe asepwälin ötiu a uweatä o pirumweela seni lon lenian pwe esap chüen nom.
JOB 27:22 Än Kot asepwäl a fokun eniti, nge esap wor tong lon, iei mine ätewe a müttir süla ren pöchökülan.
JOB 27:23 Aramas ra alopwa fän ämängau, ra ngääri pwe a towu seni lon lenian.”
JOB 28:1 “Ellet mi wor eu lenien silifer fän pwül, mi pwal wor eu leni ia aramas ra limeti kolt ie.
JOB 28:2 Aramas ra atowu mächä seni fän pwül, ra pwal eteli kapa mi nofitfengen me fau pwe repwe imwüfesen.
JOB 28:3 Aramas ra awesi rochopwak, lupwen ra tötiu epin fanüfan, pwe repwe tuw ekewe fau lon ewe lenien rochokichin rochopwak.
JOB 28:4 Ra tuw pwang mi alolol lon ekewe lemol. Ikkei ekewe leni aramas resap feila ngeni, pun ra toau seni ewe ia aramas ra nom ie. Ra fisenitiu won säl lon ekewe pwang o likamwaüchfeil.
JOB 28:5 Irän mongö ra märitä won pwül, nge fan a fis tatakis usun ekkei a atai mettoch.
JOB 28:6 Ekewe fau aüchea iter safaia ra nom lon ekewe fau, mi pwal wor moromoren kolt lon ewe pwül.
JOB 28:7 Esap wor eman machang mi mwacho a silei ewe al mi aletiu fan, pwal ewe machang itan falkon esap fen küna.
JOB 28:8 Ekewe manmwacho mi pwora resap fetal won, esap pwal wor eman laion epwe pwerela won.
JOB 28:9 Aramas ra amökkü ekewe achau mi fokun pöchökül o tuw ekewe chuk pwe epwe pwä lepopur.
JOB 28:10 Ra tuw al lon ekewe achau o küna mettoch mi fokun aüchea.
JOB 28:11 Ra pinei michchin ekewe koluk pwe resap mich, o pwärawu ekewe mettoch mi monomon lon saram.
JOB 28:12 Nge ia sipwe küna me ie tipachem? Ia sia tongeni kaiö weweöch me ie?
JOB 28:13 Aramas resap silei aüchean tipachem, esap wor eman a tongeni küna me lon fanüen ekewe mi manau.
JOB 28:14 Ewe leni mi alolol a apasa, ‘Tipachem esap nom loi,’ nge matau a apasa, ‘Esap nom rei.’
JOB 28:15 Sisap tongeni kamö ren kolt ika liwini ngeni silifer.
JOB 28:16 Tipachem a kon aüchea seni ewe kolt seni Ofair me ekewe fau aüchea iter oniks me safaia.
JOB 28:17 Kolt me kilas mi aüchea resap wewe ngeni aüchean tipachem, fout seni kolt mi mürina esap tongeni akasiwil ngeni.
JOB 28:18 Sisap tongeni awewe ngeni tipachem eengin leset ika kilas mi molupolup, liwinin a lap seni liwinin föün pwei.
JOB 28:19 Ewe fau aüchea itan topas seni Itiopia esap tongeni wewe ngeni, tipachem a kon aüchea seni kolt mi mürina.
JOB 28:20 Ian chök tipachem a feito me ie? Nge ifa lenien ach kaiö weweöch?
JOB 28:21 A opola seni mesen mönümanau meinisin o monola seni ekewe machangen failäng.
JOB 28:22 Ewe leni mi alolol me mäla ra apasa, ‘Äm aia chök rongorong püngöpüngan.’
JOB 28:23 Kot echök a silei ewe al ngeni tipachem, i a silei lenian.
JOB 28:24 Pun a nenengeni lesopun fanüfan o küna mettoch meinisin mi nom failäng.
JOB 28:25 Lupwen Kot a awora ngeni asepwäl an pöchökül o aükü ekewe matau ngeni ükükün,
JOB 28:26 lupwen a föri allük fän iten püngün üt o awora efoch al fän iten fifi me chopulap,
JOB 28:27 iei otun a küna tipachem o pwärätä usun, a anüküchara o aükü alololun.
JOB 28:28 Nge a üreni aramas, ‘Ämi niuokusiti ewe Samol iei tipachem, nge ämi sü seni mine a ngau iei weweöch.’”
JOB 29:1 Iwe, Hiop a sopwela an pworaus o apasa,
JOB 29:2 “Amwo manauei iei epwe usun chök manauei me lom, usun chök lon ekewe rän, lupwen Kot a tümwünüei,
JOB 29:3 lupwen a nom rei fansoun meinisin, nge üa fetal lon rochopwak fän an saram.
JOB 29:4 Amwo manauei epwe usun chök lon fansoun ai pöchökül, lupwen än Kot chiechi ngeniei a tümwünü chon leimwei,
JOB 29:5 lupwen Ewe mi Unusen Manaman a chüen rom rei, lupwen nei kewe ra nom ünüki,
JOB 29:6 lupwen a wor chomong ünümei milik, pun nei pwin kow me kuuch a fokun lölö oupwur, pwal ai irä olif mi mär lein föüföü ra fokun uamong.
JOB 29:7 Lupwen üa feila ren asamalapen ewe telinimw o mot won ai lenien mot lon ewe lenieichu,
JOB 29:8 ekewe alüal ra künaei o nimärämärsefäl, nge ekewe chinlap ra ütä me mwei.
JOB 29:9 Ekewe samol ra ükütiu le kapas o pwölü awer ngeni pöür,
JOB 29:10 ekewe chon itetekia mwo nge ra osokükünüela mwelier, chönawer a pachetä fän fongochur.
JOB 29:11 Chokewe mi rongorong usi ra apasa pwe üa feiöch, nge chokewe mi künaei ra kapas mürina usi,
JOB 29:12 pun üa angasala ekewe chon wöüngau mi siö, pwal ekewe mi mäsen esap wor eman a alisiir.
JOB 29:13 Chokewe mi arap ngeni ar repwe mäla ra afeiöchüei, üa pwal apwapwai leluken ekewe fefin mi mä pwülüer.
JOB 29:14 Üa aüföüfa ngeniei pwüng, ai pwüngüöch a usun chök echö owokot me eu akau.
JOB 29:15 Ewe chon chun a meseniei, pwal ewe chon pechemä a pecheniei.
JOB 29:16 Üa eman sam ngeni ekewe chon wöüngau, üa pwal peni ekewe chon ekis lon kapwüng.
JOB 29:17 Üa aükätiu pöchökülen ekewe chon pwüngingau o amanaua ekewe aramas ra ariaföüür.
JOB 29:18 Üa ekieki pwe ränin manauei repwe chomongola usun föün pien aroset, nge üpwe mäla lon püsin imwei.
JOB 29:19 Üa wewe ngeni efoch irä mi töla waran lon ekewe koluk, nge palan kewe ra chöchön ren amurenipwin.
JOB 29:20 Aramas meinisin ra mwareitiei fansoun meinisin, ai pöchökül esap sü seniei.
JOB 29:21 Aramas ra aüselingaei, ra fanafanala o witiwiti ai kewe kapasen öüröür.
JOB 29:22 Wesin ai kapas resap chüen fossefäl, pun ai kewe kapas ra tolong lon selinger.
JOB 29:23 Ra witiwitiei usun ar witiwiti püngün üt, ra etiwa ai kewe kapas usun fanüfan a ünümi ewe ütten leres.
JOB 29:24 Üa emelimen ngeniir, lupwen esap wor ar apilükülüköch, nge ai wopwapwa ngeniir a apöchöküleer.
JOB 29:25 Üa üreniir mine repwe föri o mot leir pwe üa ar samol, üa emweniir usun eman king a emweni nöün mwichen sounfiu. Üa usun eman mi achipa ekewe chon letipeta.”
JOB 30:1 “Nge iei, ekewe mwän mi ierkükün fai ra urumwoteei. Semelaper kewe ra aücheangau me rei pwe üsap mwo nge mwüt ngeniir ar repwe nom ren nei kewe kolak le tümwünü nei kewe pwiin sip.
JOB 30:2 Met lomoten pöchökülen pöür ngeniei? Pun ir mwän mi apwangapwang.
JOB 30:3 Ra asüngürü waren ekewe irä lon fanüapö, ra fokun kichüchü pokiten ar mwelele me echik.
JOB 30:4 Ra fichi chön ewe irä malow me chön ekewe sokopaten irä pwe ener mongö, ra pwal eni waren ewe irä pirum.
JOB 30:5 Aramas ra asürela me leir, ra puchörula müriir usun ar puchörula mürin eman chon solä.
JOB 30:6 Ra imweimw won palen ekewe lemol, lon pwangen pwül me pwangen achau.
JOB 30:7 Ra wörüwör me lein ekewe irän lemäl o achachachfengen fän ewe irä lantana.
JOB 30:8 Ir nöün chokewe esap wor lomoter, eu mwichen aramas esap wor iter. Aramas ra fen asürela seni lon ewe fanü.
JOB 30:9 Nge iei ir ra kölüei lon ar kölün turunufas o leaweniei lon ar kapasen ämängau.
JOB 30:10 Ra nioput ngang o nonom toau seniei, resap mwo nge säw le atufolong lon mesei.
JOB 30:11 Pokiten Kot a apwangapwangaei o atekisonaei, iei mine resap chüen meninitiei.
JOB 30:12 Eu mwichen aramas mi akürang a fiu ngeniei me pelifichi. Ra iseis eu sär fän iten pechei o senätä ar ororen maun pwe repwe afeiengauaei.
JOB 30:13 Ra pinei ai al, pwe üsap tongeni sü, o awattelai ai feiengau, nge esap wor eman a apetiir.
JOB 30:14 Ra tolong usun chök ar tolong lon eu pwang mi chölap, ra afawunoto woi me lein ekewe leni mi tala.
JOB 30:15 Eniweniw a pwölüeila, ai iteüöch a sü seniei usun asepwäl a ässala mettoch, wöüi a feil seniei usun eu kuchu.
JOB 30:16 Nge iei üa arap ngeni mäla, esap wor ai ngasala seni riaföü.
JOB 30:17 Lepwin chüi ra cheuch, ai metek mi weichin esap ükütiu.
JOB 30:18 Kot a turufi üfei fän pöchökül mi lapalap, a angütü pöün won üei usun kalan üfei sööch.
JOB 30:19 Kot a aturueilong lon ewe pwakak, üa wewe ngeni pwül moromor me falang.
JOB 30:20 Üa siö ngonuk, ai Kot, nge kosap pälüeniei, lupwen üa iotek ngonuk, kosap afäliei.
JOB 30:21 Ka kulitiei o fokun ariaföüüei, ka afeiengauaei ren pöchökülen poum.
JOB 30:22 Ka uweeitä lon asepwäl o föri pwe üpwe ässila, ka pönieila ren eu mölümöl.
JOB 30:23 Ewer, üa silei pwe kopwe emweniei ngeni mäla, ngeni ewe leni mi kefilitä fän iten chon manau meinisin.
JOB 30:24 Ifa usun, eman aramas mi kokotiu lon riaföü esap aitietä pöün o siö pwe eman epwe alisi lon an feiengau?
JOB 30:25 Ifa usun, üsap kechüeiti ätewe mi nom lon riaföü? Ifa usun, üsap letipeta fän iten ekewe chon wöüngau?
JOB 30:26 Nge lupwen ngang üa asüküsükü feiöch, feiengau a toriei. Lupwen üa witiwiti saram, rochopwak a toriei.
JOB 30:27 Lelukei a fitikoko, nge esap manasösö, iteiten rän ai riaföü a chök lapala.
JOB 30:28 Üa fetalfeil fän letipeta, nge esap wor ai chip. Üa ütä lein ewe mwichen aramas o siö pwe eman epwe alisiei.
JOB 30:29 Üa pwiini ekewe kolak mi mwacho, üa chiechi ngeni ekewe fukuro.
JOB 30:30 Ünüchei a cholola o säre seniei, inisi a fokun pwichikar.
JOB 30:31 Tikin nei ükülele a wiliti kölün letipeta, nge tikin nei aangün a wiliti ngingin kechü.”
JOB 31:1 “Üa föri eu pwon ngeni mesei pwe üsap nenengeni eman föpwül fän mocheisou.
JOB 31:2 Met wisei me ren Kot, nge met ineti me ren Ewe mi Unusen Manaman mi nom lon läng?
JOB 31:3 Ifa usun, feiengau esap feitiu won eman chon pwüngingau, nge riaföü esap tori chokewe mi föföringau?
JOB 31:4 Ifa usun, Kot esap silei meinisin mine üa föri o küna fefetalin pechei?
JOB 31:5 Üa pwärätä pwe üsap föri föför mi mwäl, ika föri föförün atuputup.
JOB 31:6 Kot epwe kiloniei won eu kilo mi pwüng, pwe epwe küna pwe üsap tipis.
JOB 31:7 Are pechei a tokola seni ewe al mi pwüng o lelukei a chei nennen mesei, are pei a limengau ren tipis,
JOB 31:8 mürin üpwe fofot, nge eman epwe eni, nge mine a märitä fän itei epwe üttütä.
JOB 31:9 Are üa mocheniaiti pwülüen chon ari, ika üa operi lükün asamen imwan,
JOB 31:10 mürin pwülüei epwe üsüs föün wiich fän iten pwal eman mwän usun eman amanau, pwal ekoch mwän repwe annut ren.
JOB 31:11 Pun ekiekekin fefin eu föför mi fokun ingau, eu tipis ekewe soukapwüng repwe apwüngü,
JOB 31:12 a usun chök eu ekkei a külong lon ewe leni mi alolol, epwe kenala meinisin mine ai.
JOB 31:13 Are üa amwöchü seni nei chon angang mwän ika chon angang fefin ar pwüng, lupwen ra pälüeniei ren och osukosuk,
JOB 31:14 mürin met üpwe föri, are Kot epwe ü ngeniei? Met üpwe pälüeni ngeni, are epwe apwüngüei?
JOB 31:15 Ifa usun, Kot mi föriei esap pwal föriir? Ifa usun, esap eman chök Kot a alapalapakem lon letipen inem?
JOB 31:16 Ifa usun, üa amwöchü seni ekewe chon wöüngau mine ra tüngor, ika popwi pwe ewe fefin mi mä pwülüan a tton mesan ren kechü?
JOB 31:17 Ifa usun, ngang echök üa eni enei, nge ekewe mi mäsen resap mongö seni?
JOB 31:18 Apwi! Seni lealüali üa foleniir usun eman sam, nge lon unusen manauei üa tümwünü fefin mi mä pwülüer.
JOB 31:19 Lupwen üa küna eman mi mwelele esap wor üfan, ika eman mi wöüngau esap wor pwölüpwölün,
JOB 31:20 üa fang ngeni üf mi för seni ülöülen nei sip pwe epwe üföüf. Mürin a mwareitiei ren unusen lelukan.
JOB 31:21 Are üa amola ai üpwe angeetä won ewe mi mäsen, pun üa silei pwe mi wor manei lon kapwüng,
JOB 31:22 mürin chün afarei epwe imwü seni afarei, nge pei epwe üttüwu seni lekamasan.
JOB 31:23 Pun üa niueiti än Kot apwüng, iei mine üsap tongeni föri ekei sokun föför.
JOB 31:24 Ifa usun, üa anomu ai apilükülüköch won kolt, ika apasa pwe kolt mi mürina ai apilükülük?
JOB 31:25 Ifa usun, üa sikesik pokiten watten wöüi, ika pokiten pei a aworato chomong mettoch?
JOB 31:26 Ifa usun, üa fel ngeni akkar lupwen a tin, ika ngeni maram lon lingan lupwen a tö,
JOB 31:27 pwe lelukei a tokola lemonomon, pwe üa asamoluur ren ai tinala ai kapongen menin ngeniir?
JOB 31:28 Pwal ei epwe eu föför mi ngau ekewe soukapwüng repwe apwüngü, pun üpwe amamäsini Kot lon läng.
JOB 31:29 Üsap fokun meseik ren feiengauen ekewe chon oputaei, ika mwänek, lupwen riaföü a toriir.
JOB 31:30 Ngang üsap tipis ren ai üpwe anümamaueer.
JOB 31:31 Nei kewe chon angang meinisin ra silei pwe üa amongöü ekewe chon ekis fansoun meinisin.
JOB 31:32 Ekewe chon saifetal resap nomofetal won al lepwin, pun üa etiweer lon imwei.
JOB 31:33 Üsap tukumala ai pupungau usun aramas ra föri, o opala ai tipis.
JOB 31:34 Üsap fokun niuokusiti mine ekewe aramas ra ngününgünüei won, ika niueiti ar turunufaseei, pwe üpwe fanafanala o nonom chök lon imwei.
JOB 31:35 Amwo a wor eman epwe aüselingaei. Iei sainin itei. Ewe mi Unusen Manaman epwe pälüeniei. Amwo epwe wor rei ewe toropwen atutur, ewe chon atipisiei a makei.
JOB 31:36 Ellet, üpwe mwärei won afarei o rietä won mökürei pwe mwäri.
JOB 31:37 Üpwe aiteitä ngeni Kot meinisin mine üa föri lon manauei. Üpwe feila ren fän wenecharen letipei.
JOB 31:38 Are üa tömwälilong lon eu fanü o angang won,
JOB 31:39 are üa mongö uan, nge üsap möni mwo ewe fanü, are popwi pwe mine fanüan ewe a mäla ren echik,
JOB 31:40 mürin iräfölüföl repwe märitä won, nge sap wiich, pwal fetilingau, nge sap parli.” Än Hiop kewe kapas ra müchüla.
JOB 32:1 Iwe, ekei ülüman mwän ra ükütiu le pälüeni Hiop, pun Hiop a lükü pwe a wor püsin an pwüng.
JOB 32:2 Mürin, Elihu nöün Parakel we mwän ewe re Pus seni ewe familien Ram a song. A song ngeni Hiop, pun a ekieki pwe i a pwüng, nge Kot a mwäl.
JOB 32:3 A pwal song ngeni chiechien Hiop kewe ülüman, pun esap chüen wor mine repwe pälüeni ngeni Hiop, inamwo ika ra fen pwärätä pwe i a mwäl.
JOB 32:4 Iwe, Elihu a witiwit le kapas ngeni Hiop, pun i a kis seniir meinisin.
JOB 32:5 Nge lupwen Elihu a küna pwe ekei ülüman mwän resap chüen tongeni pälüeni Hiop, a song.
JOB 32:6 Mürin, Elihu a popuetä le kapas, “Ngang üa ier kükün, nge ämi oua ier watte. Iei mine üa säw o niuokus ai üpwe pwärätä mefiei ngenikemi.
JOB 32:7 Üa ekieki, ‘Ir mi chinlap repwe kapas, nge chokewe mi ieritam repwe aiti ngeni aramas tipachem.’
JOB 32:8 Nge Ngünün Ewe mi Unusen Manaman mi nom lon aramas a atufichiir pwe repwe weweöch.
JOB 32:9 Sap ir mi chinlap ra tipachem, sap pwal ir mi ier watte ra wewe ren mine a pwüng.
JOB 32:10 Iei mine oupwe aüselingaei, oupwe mwüt ngeniei pwe üpwe pwal pwärätä mefiei.
JOB 32:11 Nengeni, üa witiwit lupwen oua kapas, üa aüseling ngeni ämi kapasen tipachem, lupwen oua fokun küttaöchü mine oupwe apasa.
JOB 32:12 Üa aü selingei ngenikemi, nge esap wor eman me leimi mi alletä pwe Hiop a mwäl ika pälüeni an kewe kapas.
JOB 32:13 Ousap apasa, ‘Äm aia küna tipachem. Kot echök epwe apälüa Hiop, nge sap aramas.’
JOB 32:14 Hiop esap awena an kapas ngeniei, nge ngang üsap mochen pälüeni lon ititin ämi kapas.
JOB 32:15 Iwe, esap chüen wor mine repwe pälüeni ngonuk, Hiop, esap chüen wor mine repwe tongeni apasa.
JOB 32:16 Ifa usun, üpwe chök witiwit pokiten ir resap fos, pun ra chök ü ikenan, nge resap chüen apasa och?
JOB 32:17 Apwi! Pwal ngang üpwe awora ai pälüen. Üpwe pwal pwärätä mefiei.
JOB 32:18 Pun üse chüen tongeni fanafanala. Üse chüen tongeni amwöchü ai kapas.
JOB 32:19 Mefien lelukei a usun chök wain lon rume esap tongeni purowu, a usun chök eu minefön rumen wain mi arap ngeni an epwe mök.
JOB 32:20 Üpwe fokun kapas pwe epwe manösösöla lelukei, üpwe amasaaw o kapas.
JOB 32:21 Üsap lifilifil ngeni eman aramas, üsap pwal eäni kapas motoutou ngeni eman.
JOB 32:22 Pun are üpwe sip lon kapas motoutou, ewe Chon Föriei epwe müttir angeeila.”
JOB 33:1 “Nge iei, Hiop, kopwe aüselingaei, kopwe rongorong ngeni ai kewe kapas meinisin.
JOB 33:2 Iei üa molotä pwe üpwe apasawu mine a nom lon lelukei.
JOB 33:3 Ai kei kapas ra towu seni wenecharen mefien letipei, üa apasa elletin mine üa silei.
JOB 33:4 Ngünün Kot a föriei, nge ngasangasen Ewe mi Unusen Manaman a fang ngeniei manau.
JOB 33:5 Kopwe pälüeniei are ka tongeni. Kopwe amolokotä o apälüaei.
JOB 33:6 Nengeni, ngang üa usun chök en me fän mesen Kot. Pwal ngang üa för seni pwül.
JOB 33:7 Esap wor och popun om kopwe niuokusitiei, üsap mochen pwe kopwe mefi weires rei.
JOB 33:8 Ewer, en ka fosolong lon selingei, üa rongorong ngingin om kapas.
JOB 33:9 Ka apasa, ‘Üa limöch, esap wor ai pupungau. Üa wesewesen limöch, esap wor ai tipis.
JOB 33:10 Nge Kot a chök kütta och popun mine epwe ü ngeniei ren, a atolongaei lon tettelin chon oputan.
JOB 33:11 A anüküchara pechei lefilen irä o mamasafichi mwökütüküti meinisin.’
JOB 33:12 Nge üpwe kapas ngonuk, Hiop, pwe lon ei ka mwäl. Kot a tekia seni aramas meinisin.
JOB 33:13 Pwota ka anini ngeni Kot o üra pwe esap fokun pälüeni än aramas kapasen lalangau?
JOB 33:14 Pun Kot a kapas lon sokopaten lapalap. Are aramas resap rongorong lon eu, a filätä pwal eu, nge aramas resap afäli.
JOB 33:15 Lepwin, lupwen aramas ra möürüchou, Kot a kapas ngeniir lon ar tan me künaer.
JOB 33:16 Mürin a suki selingen aramas o eniweer ren an kapasen amirit,
JOB 33:17 pwe epwe akulu aramas seni ar föför mi ngau o pinei ar resap lamalamtekia.
JOB 33:18 A amwöchü manauer seni peias o tümwünüür seni feiengauen ketilas.
JOB 33:19 Kot a pwal amiriti eman aramas ren an atolonga lon samau o aura inisin ren metek,
JOB 33:20 pwe a now anan, esap mwo nge mwon mongö mi fokun anö.
JOB 33:21 A üttüla fitukan pwe sise chüen küna, nge chün sise küna me mwan ra pwäwu.
JOB 33:22 Iwe, manauan a kan ngeni peias, pwal ngeni ekewe chon künö mi awarato mäla.
JOB 33:23 Nge are epwe wor eman chon afför ren seni lein nöün Kot kewe ngeröün chon läng, epwe pwäri ngeni ewe aramas mine a pwüng fän itan,
JOB 33:24 epwe ümöümöch ngeni o üreni, ‘Kopwe angasa ätei seni an tolong lon peias. Üa küna och penmanauan.
JOB 33:25 Mürin inisin epwe wiliti inisin eman alüal, epwe liwiniti pöchökülan lealüalün.’
JOB 33:26 Mürin, ewe aramas epwe iotek ngeni Kot, nge i epwe etiwa. Epwe feito fän mesen Kot fän pwapwa, nge Kot epwe ngenisefäli an pwüng.
JOB 33:27 Iwe, epwe feito fän mesen aramas o pwärätä, ‘Üa tipis o tok seni mine a pwüng, nge Kot esap liwini ngeniei.
JOB 33:28 A angasa manauei seni ai tolong lon peias, üa künasefäli saram.’
JOB 33:29 Nengeni, Kot a föri ekei föför ngeni eman aramas fän ruu ika fän ülüngat,
JOB 33:30 pwe epwe aliwinisefäli manauan seni peias o küna ewe saramen manau.
JOB 33:31 Hiop, kopwe fokun aüselingaei. Kopwe mosonoson, nge ngang üpwe kapas.
JOB 33:32 Are mi wor mine ka mochen apasa, kopwe pälüeniei. Kopwe kapas, pun üa fokun mochen pwe epwe pwä om pwüng.
JOB 33:33 Nge are esap wor och, kopwe aüselingaei. Kopwe mosonoson, nge ngang üpwe aiti ngonuk tipachem.”
JOB 34:1 Mürin, Elihu a apasa,
JOB 34:2 “Oupwe aüselinga ai kewe kapas, ämi mwän mi tipachem, oupwe aü selingemi ngeniei, ämi chon silelap.
JOB 34:3 Pun selingach a sotuni kapas usun chönawach a neni mongö.
JOB 34:4 Ousipwe filätä mine a pwüng. Ousipwe kaiöfengen mine a mürina.
JOB 34:5 Pun Hiop a apasa, ‘Esap wor ai tipis, nge Kot a angei seniei ai pwüng.
JOB 34:6 Ikamwo üa pwüng, nge üa nom lon tettelin chon chofana. Ikamwo üsap pupungau, nge kinasei esap chüen tongeni mo.’
JOB 34:7 Meni aramas a usun chök Hiop mi ünümätä kapasen ämängau usun chök koluk,
JOB 34:8 mi eti ewe mwichen chon föföringau o chiechi ngeni ekewe aramas mi ingau?
JOB 34:9 Pun Hiop a apasa, ‘Esap wor feiöchün eman aramas, are a föri letipen Kot.’
JOB 34:10 Iei mine ämi mwän mi weweöch, oupwe aüselingaei. Ese fokun tufich ngeni Kot pwe epwe föri föför mi ngau, ese fokun tufich ngeni Ewe mi Unusen Manaman pwe epwe föri mine a mwäl.
JOB 34:11 Pun Kot epwe ukun ngeni eman me eman aramas ükükün an föför, epwe liwini ngeni won ükükün lapalapen manauan.
JOB 34:12 Ellet, Kot esap föri och föför mi ngau, Ewe mi Unusen Manaman esap atoka mine a pwüng.
JOB 34:13 Iö a filätä Kot pwe epwe nemeni fanüfan? Iö a awisa pwe epwe tümwünü unusen fanüfan?
JOB 34:14 Are Kot epwe chök angeesefäli ngünün ika ngasangasan,
JOB 34:15 mönümanau meinisin repwe mäla o liwiniti pwül.
JOB 34:16 Are mi wor om mirit, Hiop, kopwe aüselingaei, kopwe rongorong ngeni mine üpwe apasa.
JOB 34:17 Ifa usun, eman mi oput pwüng epwe nemenem? Ifa usun, kopwe atipisi Kot ewe mi pwüng me manaman?
JOB 34:18 I ewe mi apasa ngeni eman king, ‘Ka lomotongau,’ ika ngeni ekewe aramas tekia, ‘Oua aramasangau.’
JOB 34:19 Esap lifilifil ngeni samol, esap pwal aücheani ekewe chon wöümong lap seni ekewe chon wöüngau, pun a föriir meinisin.
JOB 34:20 Lon eu chök otun aramas ra mäla lukenipwin. Ekewe aramas ra chechech o mäla. Pöün Kot a angeala ekewe chon pwora, nge sap pöün eman aramas.
JOB 34:21 Mesen Kot a afota alen ekewe aramas, a nengeni fefetalin pecher.
JOB 34:22 Esap wor eu leni mi kiroch ika rochokich ia ekewe aramasangau ra tongeni aopeer ie.
JOB 34:23 Kot esap afata eu fansoun inet aramas repwe feito fän mesan pwe epwe eäni kapwüng ngeniir.
JOB 34:24 A asapwilätiu ekewe mi nemenem, nge esap osun an epwe akomwen atikinöör, mürin a atolonga ekoch lon lenier.
JOB 34:25 Pokiten a silei ar föför, a atururetiu o atatakisiir lepwin.
JOB 34:26 A apwüngüür me fän mesen aramas meinisin pokiten ar föföringau,
JOB 34:27 pun ra kul seni ar tapwela mürin, nge resap afäli an kewe allük.
JOB 34:28 Ir popun pwe ekewe chon wöüngau ra kökköri Kot pwe epwe alisiir, nge i a rongorong ar siö.
JOB 34:29 Are Kot a fanafanala, iö epwe tongeni apwüngü? Are i a amona mesan, iö epwe tongeni küna? Nge Kot a nemeni eman aramas usun chök an nemeni chon eu mwü,
JOB 34:30 pwe esap mwüt ngeni ätewe esap aleasochis ngeni epwe nemenem o atupu ekewe aramas.
JOB 34:31 A mürina än eman aramas epwe pwäri ngeni Kot, ‘Üa tipis, üsap chüen föri och mi mwäl.
JOB 34:32 Kopwe aiti ngeniei mine üsap küna. Are üa föföringau, üsap chüen förisefäli.’
JOB 34:33 Are en Hiop kosap mochen ekieksefäl, pwota Kot epwe liwini ngonuk usun en ka mochen? En kopwe püsin pälüeni ei kapas ais, nge sap ngang. Iei mine kopwe pwärätä met mefiom.
JOB 34:34 Aramas mi mirit repwe tipeeu ngeniei, nge chokewe mi tipachem repwe üreniei, lupwen ra rongorong ai kapas,
JOB 34:35 ‘Än Hiop kapas esap wor silelap lon, mine a apasa esap wor mirit lon.’
JOB 34:36 Amwo Hiop epwe fokun küna sosot me ren aramas, pun an kapas a usun chök än ekewe aramasangau kapas.
JOB 34:37 A apacha an ü ngeni Kot ngeni an tipis. A alopolop fän ämängau me leich o achomonga an kapasen ü ngeni Kot.”
JOB 35:1 Mürin, Elihu a pwal apasa,
JOB 35:2 “Ifa usun, ka ekieki pwe mi pwüng om apasa, pwe esap wor om tipis fän mesen Kot?
JOB 35:3 Ka pwal aisini Kot, ‘Met feiöchi? Met ai win pwe üsap tipis?’
JOB 35:4 Ngang üpwe pälüenuk, pwal chiechiom kewe mi nom reöm.
JOB 35:5 Kopwe netä läng o nenengeni. Kopwe atola ekewe kuchu mi tekia ra nom asom.
JOB 35:6 Ifa usun, are ka tipis, met epwe fis ngeni Kot? Are om pupungau a chomongola, met ka föri ngeni i?
JOB 35:7 Nge are ka pwüng, met kopwe ngeni, ika met epwe angei seni lepoum?
JOB 35:8 Om föföringau a chök afeiengaua eman aramas usun chök en, nge om föri mine a pwüng a atoto feiöch won aramas.
JOB 35:9 Pokiten chomongun riaföü ekewe aramas ra siö, ra kökkö pwe eman epwe alisiir seni chokewe mi wor maner.
JOB 35:10 Nge esap wor eman me leir a ais, ‘Ifa i Kot ewe mi föriei, ewe mi atufichiei pwe üpwe kölün mwareiti lepwin,
JOB 35:11 ewe mi asilelapaei lap seni ekewe man won fanüfan o atipachemaei lap seni ekewe machang?’
JOB 35:12 Iei mine lupwen ra siö, Kot esap pälüeniir pokiten ra lamalamtekia o föri mine a ngau.
JOB 35:13 Ellet, Kot esap aüselinga eu siö esor lomotan, Ewe mi Unusen Manaman esap afäli.
JOB 35:14 Epwe fen ifan en, Hiop, lupwen ka apasa pwe kosap küna Kot, pwe om osukosuk a nom fän mesan, nge ka chök witiwiti.
JOB 35:15 Ka ekieki pwe Kot esap awora apwüng fän an song, esap pwal fokun afäli pupungau,
JOB 35:16 iei mine en Hiop ka eäni kapas mi lomotongau, ka achomonga om kapas, nge esap wor om silelap.”
JOB 36:1 Iwe, Elihu a sopwela le kapas,
JOB 36:2 “Kopwe mwo witiwit ekis, mi chüen wor mine üpwe aiti ngonuk, pun mi chüen wor mine üpwe apasa fän iten Kot.
JOB 36:3 Ai silelap a watte, üpwe aea le pwärätä pwe ewe Chon Föriei a pwüng.
JOB 36:4 Pun ellet, ai kewe kapas resap mwäl. Eman mi fokun silelap a nom reöm.
JOB 36:5 Nengeni, Kot a manaman, nge esap oput eman. Esap wor och i esap tongeni weweiti.
JOB 36:6 Esap amwöchü manauen eman aramasangau, nge a ngeni ekewe mi mwelele ar pwüüng.
JOB 36:7 A tümwünü ekewe chon pwüng seni feiengau, a mwüt ngeniir pwe repwe nemenem usun ekewe king o atekiaretä tori feilfeilachök.
JOB 36:8 Nge are aramas ra fötek ngeni selimächä o nom lon riaföü,
JOB 36:9 mürin, Kot a pwäri ngeniir ar föför me ar tipis pwe ra lamalamtekia.
JOB 36:10 A suki selinger ngeni kapasen amirit o allük ngeniir pwe repwe kul seni ar föföringau.
JOB 36:11 Are repwe aleasochisi Kot o angang ngeni, repwe aunusa ierin manauer fän pisekisek me feiöch.
JOB 36:12 Nge are resap mochen aüselinga, repwe feiengau ren ketilas o mäla lon ar miritimang.
JOB 36:13 Iwe, chokewe resap aleasochisi Kot ra chök sossong. Nge lupwen Kot a apwüngüür, resap siö ngeni pwe epwe alisiir.
JOB 36:14 Ra mäla lealüalür, manauer a müchüla ren ar föri föför mi äsäw.
JOB 36:15 Nge Kot a angasa chokewe mi riaföü seni ar riaföü o kapas ngeniir lon ar weires.
JOB 36:16 A pwal panukowu seni lon riaföü o anomuk lon eu leni mi chölap ia esap wor achachach ie. Om chepel a uren mongö mi anö.
JOB 36:17 Nge iei Kot a apwünguk usun an apwüngü eman chon föföringau, a küük met mi pwüng ngonuk.
JOB 36:18 Kopwe afäliik pwe esap wor eman epwe atupuk ren chomong wöü, kosap mwütätä eu watten lifangen amichimich epwe atokok.
JOB 36:19 Ifa usun, om siö ika unusen om pöchökül repwe alisuk seni riaföü?
JOB 36:20 Kosap asüküsükü pwin, lupwen chon ekewe mwü ra kärila seni lenier.
JOB 36:21 Kopwe afäliik pwe kosap kul ngeni föföringau, pun iei popun ka küna sosot ren riaföü.
JOB 36:22 Nengeni, Kot a tekia lon an manaman. Iö a eman chon kait usun i?
JOB 36:23 Iö a aiti ngeni mine epwe föri, ika iö a tongeni apasa ngeni, ‘Ka föri mine a mwäl?’
JOB 36:24 Kopwe chechemeni pwe kopwe ingeiti an angang aramas ra kölü lon ar köl.
JOB 36:25 Aramas meinisin ra küna mine a föri, ra chök tongeni nenengeni me toau.
JOB 36:26 Kot a fokun tekia, nge kich sisap tongeni weweiti. Esap wor eman a tongeni aleani ükükün ierin manauan.
JOB 36:27 A angeatä ekewe chiin koluk seni won pwül o siwili nüküchöchön ngeni üt.
JOB 36:28 Ewe üt a püngütiu seni läng o püngümongetiu won aramas.
JOB 36:29 Ifa usun, eman a tongeni weweiti usun an ameresala ekewe kuchu, pwal usun an apüngü chopulap seni lenian.
JOB 36:30 Nengeni usun an atoropasa ekewe inefi ünükün o pwölüela epin matau.
JOB 36:31 Ren ekei sokun lapalap a apwüngü chon ekewe mwü, a pwal fangoto chomong mongö.
JOB 36:32 A amasoua pöün ren inefi o allük ngeni pwe epwe küw ewe lenien ännen.
JOB 36:33 Ewe chopulap a asisilätä pwe eu mölümöl epwe waroto, pwal ekewe pwiin kow ra silei pwe epwe war.
JOB 37:1 Ren ei föün ngasangasei a chechech o mwöküt seni lenian.
JOB 37:2 Oupwe fokun aüseling ngeni osomongun mwelien Kot, pwal ngeni üngüngün mwelian mi towu seni lon awan.
JOB 37:3 Unusen fän läng a öpüngü ewe chopulap o tinala an inefi ngeni ekewe lesopun fanüfan.
JOB 37:4 Mürin ei, möngüngün a fokun osomong. A ngüngü ren mwelian mi osomong usun püngün chopulap. A atowu ekewe inefi, lupwen aramas ra rong mwelian.
JOB 37:5 Fän alon Kot mettoch mi echipwör ra fis. A föri föför mi amwarar kich sisap tongeni weweiti.
JOB 37:6 A kapas ngeni sno pwe epwe püngütiu won fanüfan, nge a apasa ngeni chimwo me üt, ‘Oupwe püngümong.’
JOB 37:7 A aükätiu än aramas angang, pwe ir meinisin repwe silei än Kot angang.
JOB 37:8 Mürin, ekewe manmwacho repwe feila lon pwanger o nonom lon.
JOB 37:9 Ewe mölümöl a feito seni ör, nge patapat a feito seni efeng.
JOB 37:10 Ais a fis seni ngasangasen Kot, nge ekewe koluk mi chölap ra föüla ren.
JOB 37:11 A amasoua ekewe kuchuchol ren koluk o atoropasa an kewe inefi rer.
JOB 37:12 Ekewe kuchu ra kukulufeil fän emwenien Kot, pwe repwe apwönüetä meinisin mine a allük ngeniir me won unusen fanüfan.
JOB 37:13 A tinato ekewe kuchu pwe repwe amiriti aramas, ika repwe achöchönü fanüfan o pwärätä an tong.
JOB 37:14 Hiop, kopwe aüselingaei, kopwe üla o ekieki usun än Kot angang mi amwarar.
JOB 37:15 Ifa usun, ka silei usun än Kot allük ngeni ekewe inefi me an afifirewu seni lon an kewe kuchu?
JOB 37:16 Ifa usun, ka silei usun än ekewe kuchu äs? Ei eu angang mi amwarar än Kot ewe mi unus lon an silelap.
JOB 37:17 En ka pwichikar lon ufom, lupwen ewe fanü a nom fän pwichikaren ewe asepwälin ör.
JOB 37:18 Ifa usun, ka tongeni ameresala läng usun i o föri pwe a pöchökül usun mächä mi misimis?
JOB 37:19 Kopwe aiti ngenikem mine aipwe üreni Kot. Esap wor och mine aipwe apasa, pun aia tiparoch.
JOB 37:20 Ifa usun, eman epwe üreni Kot pwe ngang üa mochen fos? Ifa usun, eman aramas epwe älälei an epwe feiengau?
JOB 37:21 Iei aramas resap tongeni küna tinen akkar mi pwölüla ren kuchu. Nge lupwen ewe asepwäl epwe pönala, epwe pwäla.
JOB 37:22 Seni efeng a tineto eu saram mi molupolup usun kolt. A wor ling mi aniuokus pwelin ünükün Kot.
JOB 37:23 Sisap tongeni küna Ewe mi Unusen Manaman. I a tekia lon an manaman me an pwüngüöch. Ewe mi unusen pwüng esap sorei pwüng.
JOB 37:24 Iei mine aramas ra meniniti i, nge i esap nenengeni aramas mi püsin ekieki pwe ra tipachem.”
JOB 38:1 Mürin, ewe Samol mi Lapalap a pälüeni Hiop seni lon ewe mölümöl o apasa,
JOB 38:2 “En iö pwe ka afatangaua ai kapasen öüröür ren kapas esap wor mirit lon?
JOB 38:3 Kopwe ütä o tipeni tipen mwän. Ngang üpwe aisinuk, nge en kopwe pälüeniei.
JOB 38:4 Ia ka nom ie, lupwen üa föri longolongun fanüfan? Kopwe üreniei ika ka weweiti.
JOB 38:5 Iö a filätä aükükün ika iö a selipichi? Ifa usun, ka silei?
JOB 38:6 Met ekewe üren fanüfan ra fot won? Ika iö a isetiu ewe föün lepwokuku,
JOB 38:7 lupwen ekewe fün lesosor ra kölfengen, nge nöün Kot kewe chon läng meinisin ra mweireir fän pwapwa?
JOB 38:8 Iö a apüngalong matau lon lenian, lupwen a puwu seni leutun fanüfan?
JOB 38:9 Ngang ewe mi pwölüela matau ren kuchu o filiti ngeni rochopwak.
JOB 38:10 Üa aükü kiännin matau o föri asaman me amwöchün.
JOB 38:11 Üa apasa, ‘Iei ükükün toauom, nge kosap lu seni. Om kewe no mi pöchökül repwe kaüla ikei.’
JOB 38:12 Ifa usun, Hiop, ka fen allük fän eu lon ränin manauom pwe epwe ränila o aiti ngeni mallen rän lenian,
JOB 38:13 pwe epwe amwöchü lesopun fanüfan o asupala ekewe aramasangau seni?
JOB 38:14 Saramen akkar a apwäöchü uluulun fanüfan usun pwäöchün maken impwang won pwülüpar, a pwä lapalapan usun a pwä lapalapen eu üf.
JOB 38:15 Saramen lerän a kon saram ngeni ekewe aramasangau, iei mine resap chüen tongeni föri ar föföringau.
JOB 38:16 Ifa usun, ka fen tori ekewe puächen matau ika ka fetal won epin matau?
JOB 38:17 Ifa usun, eman a fen aküna ngonuk ekewe asamalapen mäla, ika ka fen küna ekewe asamalapen rochokichin rochopwak?
JOB 38:18 Ifa usun, ka weweiti watten fanüfan? Kopwe üreniei are ka silei ekei mettoch meinisin.
JOB 38:19 Ia a nom ie ewe al mi alela ngeni ewe lenien saram? Nge ia a nom ie ewe lenien rochopwak?
JOB 38:20 Ifa usun, ka tongeni emweniir ngeni lenier, ika ka silei alen lenier?
JOB 38:21 Ewer, en ka silei pwe ierum ra fokun chomong, pun ka fen uputiu, lupwen fanüfan a fis.
JOB 38:22 Ifa usun, ka fen tolong lon ekewe imwen iseis sno, ika ka küna ekewe imwen iseis ütten fau?
JOB 38:23 Üa amoleretä fän iten ewe fansoun osukosuk, ewe fansoun fiu me maun.
JOB 38:24 Ifa alen ewe leni ia saram a tötä me ie pwe epwe tinfeil? Ika ia ewe asepwälin ötiu a enifeil won fanüfan me ie?
JOB 38:25 Iö a tuw eu warawar fän iten ewe üt mi püngümong o föri alen ewe inefi fiti chopulap?
JOB 38:26 Iö a apüngätiu üt won eu fanü ia esap wor aramas ie, won eu fanüapö esap so?
JOB 38:27 Iö a achöchönü ewe fanü mi pwasapwas o pön, pwe fetil epwe märitä?
JOB 38:28 Ifa usun, a wor semen ewe üt, ika iö a nöünätiu chiin amwurenipwin?
JOB 38:29 Iö inelapen ais, nge iö a nöünätiu sno seni läng?
JOB 38:30 Ekewe koluk ra pöchökülela usun fau, nge won ewe matau a föüla.
JOB 38:31 Ifa usun, ka tongeni rifengeni selin ewe mwuchiechien fü iter Mweriker, ika apichi selin ewe fü itan Öniön?
JOB 38:32 Ifa usun, ka tongeni alinga ekewe mwuchiechien fü lon ar fansoun, ika alinga ekewe fü iter Uwölö me Tämailapen efeng?
JOB 38:33 Ifa usun, ka silei akoten läng? Ifa usun, ka tongeni anüküchara än Kot nemenem won fanüfan?
JOB 38:34 Ifa usun, ka tongeni kökkötä ngeni ekewe kuchu pwe püngümongun üt epwe püngütiu womw?
JOB 38:35 Ifa usun, ka tongeni tinala ekewe inefi pwe repwe fiila, repwe feito reöm o apasa, ‘Äm ikei?’
JOB 38:36 Iö a atolonga tipachem lon letipen aramas, ika iö a atolonga weweöch lon ar ekiek?
JOB 38:37 Iö a tipachem le aleani ekewe kuchu? Iö a tongeni äpea ekewe lenien koluk mi nom läng pwe repwe niitiu won fanüfan,
JOB 38:38 pwe ewe pwül moromor epwe pwakakala, nge ekewe föün pwül repwe pachfengen?
JOB 38:39 Ifa usun, ka tongeni liapeni ochän ewe laion, ika amötü ekewe nienifön laion, lupwen ra echik,
JOB 38:40 lupwen ra op lon lenier ika asousoula lon pwanger?
JOB 38:41 Iö a amongöni ekewe ängä, lupwen ra äsfeil ren ar echik, lupwen apaner kana ra siö ngeniei, pun esap wor ener mongö.
JOB 39:1 Ifa usun, ka silei fansoun uputiuen ekewe kuuchen won chuk? Ifa usun, ka katol än ekewe chia nöünöütiu?
JOB 39:2 Ifa usun, ka tongeni aleani ükükün maramen ar pwopwo, ika ka silei fansoun ar repwe nöünöü?
JOB 39:3 Ifa usun, ka silei fansoun ar konola o nöünöüla, ika fansoun ar ngasala seni ar metekin nöünöü?
JOB 39:4 Apaner ra pöchökülela o mämäritä lemäl. Ra feila, nge resap chüen liwinsefäl ngeni inelaper.
JOB 39:5 Iö a apichi föfön ewe aas mi mwacho o mwüt ngeni pwe epwe fetalfeil?
JOB 39:6 Ngang üa ngeni ewe aas ewe fanüapö pwe fanüan, o mwüt ngeni pwe epwe nom lon ewe maasies ia a wor salt ie.
JOB 39:7 A oput akürangen lon ekewe telinimw, esap pwal rongorong ngeni än ewe chon wawa man apwas.
JOB 39:8 A atöpafetal won ekewe chuk o kütfeil anan fetil.
JOB 39:9 Ifa usun, ewe ätemwänin kow mi mwacho a mochen angang ngonuk? Ifa usun, a mochen annut lon om imwen man?
JOB 39:10 Ifa usun, ka tongeni ri ngeni säl pwe epwe tuw pwül, ika epwe tongeni nuki ewe minen kata pwül lon om mälämäl?
JOB 39:11 Ifa usun, kopwe anomu om apilükülük won pokiten watten an pöchökül o lükü ngeni pwe epwe föri om angang weires?
JOB 39:12 Ifa usun, ka apilükülükü pwe epwe uwato kiniom wiich o ionato ngeni om lenien wichiwich umwun wiich?
JOB 39:13 Pöükässin ewe machang itan ostrik ra müttir le asipupu, nge esap tongeni äs usun eman öröpwech.
JOB 39:14 Ewe ostrik a likiti sokulan won pwül pwe repwe pwichikar me won.
JOB 39:15 A manlükala pwe pechen eman aramas a tongeni puriir, nge eman manmwacho a tongeni amökküür.
JOB 39:16 A rochongau ngeni apanan kewe, usun chök nge itä sap nöün. Esap fokun ekieki ika an angang weires a lomotongau.
JOB 39:17 Ei a fis pokiten Ngang üsap fang ngeni tipachem, üsap pwal ngeni mirit.
JOB 39:18 Nge lupwen a popuetä le sä, a takiri ewe oris me ewe chon wawa.
JOB 39:19 Ifa usun, Hiop, en ka ngeni eman oris pöchökülan? Ifa usun, en ka awora ülöülen won üan?
JOB 39:20 Ifa usun, en ka amwetemweta pwe a mwetemwet usun lifichimas o aniuokusu aramas ren torotoran?
JOB 39:21 A föri rasen ipwan me lon ewe lemol, o säla ngeni maun fän unusen an pöchökül.
JOB 39:22 Esap sile niuokus, esap pwal rükö, esap timär seni ketilas.
JOB 39:23 Ewe lenien föün esefich a akürang me lepekin, nge ekewe siles me ekewe lifötüföt ra molupolup.
JOB 39:24 A chechech fiti mwasangasang o müttir säla, esap tongeni üla lupwen ewe rappwa a tik.
JOB 39:25 Nge lupwen ewe rappwa a tik, a apasa, ‘Aha!’ A tini pwonnen maun seni toau, a pwal rongorong än ekewe meilap akapwas me ewe mweireiren maun.
JOB 39:26 Ifa usun, ewe kawakaw a kaiö senuk usun an epwe äs o ameresala pöükässin ngeni ör.
JOB 39:27 Ifa usun, ewe ikel a ässitä fän om allük o föri fasan wilitekia?
JOB 39:28 A imweimw won ewe achau o föri lenian won pwangen achau mi uluulukenitä.
JOB 39:29 Seni ikenan a ouwasachafetalei mine epwe liapeni, mesan a küna me toau.
JOB 39:30 Ewe ikel a nom won ewe ia a wor mi mäla ie. Apanan kewe ra ün cha.”
JOB 40:1 Mürin, ewe Samol mi Lapalap a aisini Hiop,
JOB 40:2 “Ifa usun, eman mi kütta mwälin Ewe mi Unusen Manaman epwe tongeni apälüa? Ätewe mi anini ngeni Kot epwe pälüeni.”
JOB 40:3 Mürin, Hiop a pälüeni ewe Samol mi Lapalap,
JOB 40:4 “Nengeni, ngang eman aramas mi aücheangau. Met üpwe tongeni pälüeni ngonuk? Üa pineela awei ren pei.
JOB 40:5 Üa kapas fän eu, nge üsap tongeni pälüeni. Üa kapas fän aruuan, nge üsap chüen kapassefäl.”
JOB 40:6 Mürin, ewe Samol mi Lapalap a pälüeni Hiop seni lon ewe mölümöl o apasa,
JOB 40:7 “Kopwe ütä o tipeni tipen mwän. Ngang üpwe aisinuk, nge en kopwe pälüeniei.
JOB 40:8 Ifa usun, kopwe amwäliei? Ifa usun, kopwe atipisiei pwe en kopwe pwüng?
JOB 40:9 Ifa usun, ka pöchökül usun Ngang? Ifa usun, a osomong osom usun osei?
JOB 40:10 Mürin kopwe foute ngonuk itetekia me iteföüla o aüföüfa ngonuk ling mi amwarar.
JOB 40:11 Kopwe nenengeni chokewe meinisin mi lamalamtekia, kopwe ninätiu säsen om song wor o atekisoneretiu.
JOB 40:12 Ewer, kopwe nenengeni chokewe meinisin mi lamalamtekia o atekisoneretiu. Kopwe purätiu ekewe aramasangau me ewe ia ra ütä ie.
JOB 40:13 Kopwe irerela meinisin lon ewe pwül o fötekiniir lon ewe lenien sotup.
JOB 40:14 Mürin, ngang won inisi üpwe pwärätä pwe püsin poum a tongeni amanauok.
JOB 40:15 Kopwe nenengeni ewe man mi fokun watte itan hipopotamus. Üa föri i usun üa föruk. I a mongö fetil usun eman ätemwänin kow.
JOB 40:16 Kopwe nenengeni pöchökülen wänükün me pöchökülen fituken lukan.
JOB 40:17 A tongeni apöchöküla mechan pwe a pöchökül usun efoch irä setar, nge selin afön ra pachefengen.
JOB 40:18 Chün ra pöchökül usun piras, nge pechen kana ra usun chök fochun mächä.
JOB 40:19 I akaemanün me lein förien Kot kana mi pöchökül. Ewe Chon Föri chök a tongeni eniwa.
JOB 40:20 A mär anan won ekewe chuk ewe ia ekewe manmwacho meinisin ra kukulou ie.
JOB 40:21 A kon lein ekewe irä pwokus iter lotus o opola lein ekewe wowo lon ewe pwakak.
JOB 40:22 Nürün ekewe irä lotus ra pwölüela, nge ekewe silifö mi mär aropen ewe öüwö ra nom pwelin ünükün.
JOB 40:23 Are ewe chanpupu a öütöüt, esap niuokus. A wor an apilüköch, inamwo ika ewe chanpupu Jortan a pu ngeni mesen awan.
JOB 40:24 Ifa usun, eman epwe tongeni tikilong lon mesan, ika pwangeni pwötün o särei?
JOB 41:1 Ifa usun, ka tongeni efi eman alikitor won efoch ö, ika fötätiu chönawan ren efoch säl?
JOB 41:2 Ifa usun, ka tongeni atikalong efoch säl lon pwötün ika pwangeni ngächin ren efoch kakia?
JOB 41:3 Ifa usun, epwe tütüngor ngonuk pwe kopwe fäälimöch ngeni? Ifa usun, epwe eäni kapas pwetete ngonuk?
JOB 41:4 Ifa usun, epwe föri eu pwonen atipeeu ngonuk pwe epwe angang ngonuk tori feilfeilachök?
JOB 41:5 Ifa usun, kopwe tongeni efisira usun om efisira eman machang, ika föti ngeni efoch säl pwe noum kewe nengin repwe nöüni?
JOB 41:6 Ifa usun, ekewe chon attau repwe aninifengen won liwinin? Ifa usun, ekewe chon amömö repwe kinietiu fitukan o eäni amömö?
JOB 41:7 Ifa usun, ka tongeni posu silin ngeni chomong fisika ika posu möküran ngeni mächän likapich?
JOB 41:8 Are ka atapa i fän eu chök, kosap chüen atapasefäli, pun kopwe chechemeni usun an fiu ngonuk.
JOB 41:9 Eman aramas mi ekiekin akufu i epwe lichipüng. Lupwen a chök küna, epwe fokun rükö.
JOB 41:10 Esap wor eman a pwora pwe epwe tongeni apwökü. Nge iö chök a tongeni ü ngeni?
JOB 41:11 Iö a tongeni fiu ngeni, nge esap feiengau? Esap wor eman won unusen fanüfan a tongeni föri ei.
JOB 41:12 Iei üpwe chök fos usun pechen ewe alikitor, pwal usun an pöchökül me lapalapan.
JOB 41:13 Iö a tongeni asera seni silin ika posu pwochan?
JOB 41:14 Iö a tongeni ammasala awan mi kula ren ngin mi eniweniw?
JOB 41:15 Pwal won sökürün a wor telin ililin mi fokun kanefengen o pöchökül usun fau.
JOB 41:16 Ililin kewe ra fokun pachefengen pwe esor asepwäl a tongeni enilong lefiler.
JOB 41:17 Ra chufengen eu ngeni eu o akükfengen pwe resap tongeni imwüfesen.
JOB 41:18 Lupwen a mwesi, a fiwu saram, tinen mesan a usun chök tinen akkar lupwen a tötä.
JOB 41:19 A ngetewu ekkei me lon awan usun ngeten töl, pwal usun märäkükün ekkei.
JOB 41:20 Ötüöt a ötüwu seni lon pwötün usun ötüötün wowo mi kü me fän eu kama.
JOB 41:21 Ngasangasan a tongeni akü mwoli, nge ngeten ekkei a ngetewu seni lon awan.
JOB 41:22 Üan a fokun pöchökül, nge meinisin mi küna i ra niueiti.
JOB 41:23 Säsärin fitukan a fokun ngüt, a fokun pöchökül pwe esap tongeni mwökütüküt.
JOB 41:24 Leupwan a pöchökül usun eföü fau, a pöchökül usun eu nüföfau.
JOB 41:25 Lupwen a anangatä, ekewe chon pöchökül ra fokun niuokus, resap chüen silei mine repwe föri ren ächewechewen ükün.
JOB 41:26 Esap wor efoch ketilas a tongeni akinasa, esap pwal wor efoch fisika ika föün esefich ika siles a tongeni afeiengaua.
JOB 41:27 Mächä a usun chök apwangapwangen fetilipwas me ren, nge piras a usun chök irä mi kirou me ren.
JOB 41:28 Esap tongeni süla ren ekewe föün esefich, nge ekewe föün öülün ra usun chök pipin fetilipwas me ren.
JOB 41:29 Lifötüföt a usun chök fetilipwas me ren, a takiri tärekikin ekewe fisika.
JOB 41:30 Ililin lukan a usun chök tärupurupun mökkün sepi seni pwül, ra arasa ewe pwakak usun chök eu pisekin tuw warawar.
JOB 41:31 A kupeti ewe matau pwe a puropur usun koluk mi pwich lon eu kama o apurätä pwe a usun chök puren noppuk lon nape.
JOB 41:32 A wor puropuren mwurifion. Ren ei, eman a tongeni ekieki pwe ewe matau a nopwechepwech.
JOB 41:33 Esap wor och won fanüfan a wewe ngeni. I eman mönümanau esap wor an niuokus.
JOB 41:34 A otiwei mönümanau meinisin mi lamalamtekia, a king wor meinisin.”
JOB 42:1 Mürin, Hiop a üreni ewe Samol mi Lapalap,
JOB 42:2 “Üa silei pwe en ka tongeni föri mettoch meinisin, nge meinisin mine ka ekiekietä esap wor epetin.
JOB 42:3 En ka ais, ‘En iö pwe ka amonomona ai kapasen öüröür ren kapas esap wor mirit lon?’ Ellet, üa apasa mine üsap weweiti, üa kapas usun mettoch mi fokun amwarar ngeniei, üsap silei.
JOB 42:4 En ka apasa, ‘Kopwe aüseling, nge ngang üpwe kapas, ngang üpwe aisinuk, nge en kopwe pälüeniei.’
JOB 42:5 Me mwan üa rong usum ren selingei, nge iei üa nenengenuk ren mesei.
JOB 42:6 Iei mine üa püsin atipisiei o ekieksefäl lon pwül me falang.”
JOB 42:7 Mürin än ewe Samol mi Lapalap kapas ngeni Hiop, a pwal kapas ngeni Elifas ewe re Teman, “Üa song ngenikemi me chiechiom kewe ruoman, pun ousap eäni kapas mi pwüng usi, usun nei we chon angang Hiop a eäni.
JOB 42:8 Iei mine oupwe angei füman ätemwänin kow me füman ätemwänin sip, oupwe feila ren nei chon angang Hiop o eäni eu asoren kek fän itemi. Nge nei we chon angang Hiop epwe iotek fän itemi, pun üpwe etiwa an iotek, pwe üsap liwini ngenikemi liwinin ämi kapas esepwüng. Pun ousap eäni kapas mi pwüng usi, usun nei chon angang Hiop a eäni.”
JOB 42:9 Iwe, Elifas ewe re Teman, Piltat ewe re Shu me Sofar ewe re Nama ra feila o föri usun mine ewe Samol mi Lapalap a üreniir. Nge ewe Samol mi Lapalap a etiwa än Hiop iotek.
JOB 42:10 Nge mürin än Hiop iotek fän iten chiechian kewe, ewe Samol mi Lapalap a aliwinisefäli wöün. Iwe, a ngeni Hiop fän ruu mine a eäni me mwan.
JOB 42:11 Mürin, pwin Hiop kewe me fefinan, pwal aramas meinisin mi silei i me mwan ra feito ren pwe repwe mongö ren lon imwan. Ra aururu o achipa i ren ekewe feiengau meinisin ewe Samol mi Lapalap a atoto won me mwan. Iwe, eman me eman leir a fang ngeni eföü föün moni seni silifer me efoch ring seni kolt.
JOB 42:12 Iwe, ewe Samol mi Lapalap a afeiöchü lusun ränin manauen Hiop lap seni me mwan. A wor ükükün engol me rüanüngeröü nöün sip, wonongeröü kamel, ruungeröü ätemwänin kow me engeröü liafefinin aas.
JOB 42:13 A pwal nöüni füman ät me ülüman nengin.
JOB 42:14 Iwe, a aita ngeni ewe finichi Jemima, ewe aruomanün Kesia, nge ewe aülümanün Keren-hapuk.
JOB 42:15 Lon unusen ewe fanü esap wor eman föpwül mi liöch usun nöün Hiop kewe föpwül. Iwe, semer we a afanüeer lein fanüen mongeer kewe.
JOB 42:16 Mürin ei, Hiop a pwal manau lon ükükün ipükü faik ier o küna nöün me nöün nöün kewe tori arüanün tettel.
JOB 42:17 Iwe, Hiop a mäla lon an chinlap o ieritam.
PSA 1:1 Ra feiöch ekewe aramas resap fetal fän öüröüräen aramasangau, resap apirü föförün ekewe chon tipis, resap pwal nom ren ekewe chon turunufas,
PSA 1:2 nge ra pwapwaiti än ewe Samol mi Lapalap allük o ekieki usun lerän me lepwin.
PSA 1:3 Ätekewe ra wewe ngeni irä mi mär ünükün ekewe chanpupu, ra ua lon fansoun räs, nge chör resap aiolol. Meinisin mine ra föri a fisiöch.
PSA 1:4 Nge ekewe aramasangau resap iei usun. Pun ra wewe ngeni pipi asepwäl a ässala.
PSA 1:5 Iei mine ekewe aramasangau resap üöch lon ewe ränin kapwüng, nge ekewe chon tipis resap nom lon mwichen chon pwüng.
PSA 1:6 Pun ewe Samol mi Lapalap a emweni o tümwünü ekewe chon pwüng, nge ekewe aramasangau repwe fetal ngeni ewe lenien feiengau.
PSA 2:1 Pwota chon ekewe mwü ra rawangau, nge ekewe aramas ra ekingau won mine a lomotongau?
PSA 2:2 Ekewe king won fanüfan ra ütä, ekewe sounemenem ra pwüngüpwüngfengen usun ar repwe ü ngeni ewe Samol mi Lapalap, pwal ngeni nöün we mi kepit.
PSA 2:3 Iwe, ra apasa, “Ousipwe mwütala fööfööch me rer o pöütala senikich ar kei riri.”
PSA 2:4 Nge Kot ewe mi mot won an lenien motun king lon läng a takir, ewe Samol a ämängaueer.
PSA 2:5 Mürin epwe kapas ngeniir fän an song o fokun eniwokusuur fän an lingeringer.
PSA 2:6 Iwe, a apasa, “Üa seikätä ai king lon wisan me won Sion chuki we mi pin.”
PSA 2:7 Ngang üpwe pwärätä mine a pwüngüla me ren ewe Samol mi Lapalap. Iwe, a üreniei, “En nei mwän, ikenai üa nounuk.
PSA 2:8 Kopwe tüngorei, nge ngang üpwe ngonuk ekewe mwü pwe kopwe mwüni, üpwe pwal ngonuk unusen fanüfan pwe kopwe fanüeni.
PSA 2:9 Kopwe atarela ren efoch wokomächä, kopwe amökkükisiretiu usun eu sepi mi för seni pwül.”
PSA 2:10 Iei mine ämi kana king, oupwe tipachemela, ämi sounemenem won fanüfan, oupwe miritila.
PSA 2:11 Oupwe angang ngeni ewe Samol mi Lapalap fän niuokus, oupwe pwapwa fän chechech.
PSA 2:12 Oupwe mitiri ewe nau pwe esap song, nge ämi ousap mäfeiengau. Pun a müttir fis an song. Ra feiöch ir meinisin mi eäni i lenien op.
PSA 3:1 Echö än Tafit köl lupwen an sü seni Apsalom nöün we. Ai Samol mi Lapalap, ekewe mi oputaei ra kon chomong! Chomong ra ü ngeniei.
PSA 3:2 Chomong ra kapas usi, “Esap wor an alilis me ren Kot.”
PSA 3:3 Nge en, ai Samol mi Lapalap, ka epeti seniei feiengau, en ai ling, ka achimwäeitä.
PSA 3:4 Üa leüömong le siö ngeni ewe Samol mi Lapalap, nge i a pälüeniei seni chukun mi pin.
PSA 3:5 Üa konola o möür. Üa pwal nenela, pun ewe Samol mi Lapalap a tümwünüei.
PSA 3:6 Üsap niuokusiti engol ngeröün aramas mi pwelifeiliei o ü ngeniei.
PSA 3:7 Kopwe feito, ai Samol mi Lapalap. Kopwe angasaei, ai Kot. Pun ka apwüngü ekewe chon oputaei meinisin, ka angei seniir ar pöchökül pwe resap tongeni afeiengauaei.
PSA 3:8 Ewe Samol mi Lapalap a angasala aramas mi nom lon weires. Om feiöch epwe nom won noum aramas.
PSA 4:1 Ngeni ewe mi emweni chon köl: Won pisekin ettik mi wor saitenin. Echö än Tafit köl. Ai Kot, en mi pwüng, kopwe pälüeniei, lupwen üa kökö. Ka fen angasaeila, lupwen üa nom lon riaföü. Kopwe ümöümöch ngeniei o aüselinga ai iotek.
PSA 4:2 Ämi aramas, ifa ükükün fansoun ämi oupwe chüen aitengauaei? Ifa ükükün fansoun ämi oupwe aücheani mine a lomotongau o tipeni mine a mwäl?
PSA 4:3 Nge oupwe silei pwe ewe Samol mi Lapalap a aimwüela chokewe mi pwüng fän püsin itan. Ewe Samol mi Lapalap a rongorong, lupwen üa kökköri.
PSA 4:4 Are oua song, oupwe afälikemi pwe ousap tipis ren. Oupwe ekieki ei lon lelukemi, lupwen ämi konola lon kiemi fän mosonoson.
PSA 4:5 Oupwe eäni sokun asor mi pwüng ngeni ewe Samol mi Lapalap o anomu ämi apilükülük won.
PSA 4:6 Chomong aramas ra apasa, “Iö a tongeni fang ngenikich feiöch?” Ai Samol mi Lapalap, kopwe netiu wom o kirikiröch ngenikem.
PSA 4:7 Ka fen ngeniei pwapwa mi lap seni än chokewe pwapwa ren kinier wiich me ünümer wain mi somwola.
PSA 4:8 Üpwe konola o möür fän kinamwe, pun en echök, ai Samol mi Lapalap, ka tümwünüöchüei.
PSA 5:1 Ngeni ewe mi emweni chon köl: Won ekewe aangün. Echö än Tafit köl. Ai Samol mi Lapalap, kopwe aüselinga ai kei kapas, kopwe ekieki ai ngüngü fän weires.
PSA 5:2 Kopwe rongorong ai siö, ai king me ai Kot, pun üa iotek ngonuk.
PSA 5:3 Ai Samol mi Lapalap, ka rongorong mweliei lesosor, lesosorusich üa iotek ngonuk o witiwiti om kopwe pälüeniei.
PSA 5:4 Pun en sap eman Kot mi sani mine a ngau, eman chon föföringau esap tongeni nonom reöm.
PSA 5:5 Ekewe mi sikesik resap tongeni ü fän mesom, ka oput chokewe meinisin mi föföringau.
PSA 5:6 Ka arosala chokewe meinisin mi kapas chofana. Ka oput chon niela aramas me chon atupu aramas.
PSA 5:7 Nge ngang üpwe tolong lon imwom pokiten om we tong ellet mi lap o somwola. Üpwe fel ngonuk lon imwom we mi pin o chapetiu mwom fän menin.
PSA 5:8 Ai Samol mi Lapalap, kopwe atufichiei pwe üpwe föri letipom, pun mi wor chon oputaei mi nenengeniei, kopwe aiti ngeniei mine üpwe föri.
PSA 5:9 Chon oputaei ra apasa mine a chofana, leluker a chök ekiekin kata, ar kapas a motoutou, nge ra uren atuputup mi afeiengau.
PSA 5:10 Ai Kot, kopwe ngeniir liwinin ar tipis. Repwe feiengau ren püsin ar raw. Kopwe pöütirela pokiten a chomong ar pupungau, pun ra ü gonuk.
PSA 5:11 Nge chokewe meinisin mi anomu ar apilükülük womw repwe meseik, repwe köl fän pwapwa fansoun meinisin. Kopwe peni chokewe mi echenuk, pwe repwe ingemwareituk.
PSA 5:12 Pun en, ai Samol mi Lapalap, ka afeiöchü ekewe chon pwüng, ka pwölürela ren om ümöümöch usun chök eu tittin maun.
PSA 6:1 Ngeni ewe mi emweni chon köl: Won pisekin ettik mi wor walufoch saitenin. Echö än Tafit köl. Ai Samol mi Lapalap, kosap amiritiei lon om song, kosap pwal apwüngüei lon om lingeringer.
PSA 6:2 Kopwe ümöümöch ngeniei, ai Samol mi Lapalap, pun üa fokun pekus. Ai Samol mi Lapalap, kopwe apöchökülaei, pun üa fokun apwangapwang.
PSA 6:3 Ngüni a pwal fokun riaföü. Ai Samol mi Lapalap, ifa ükükün fansoun om kopwe akachopwa ngeniei?
PSA 6:4 Ai Samol mi Lapalap, kopwe feito o amanauaei, kopwe angasaei seni mäla ren om we tong ellet.
PSA 6:5 Pun chon mäla resap chechemenuk. Esap wor eman epwe mwareituk lon lenien sotup.
PSA 6:6 Üa malülü ren ai ngüngü, iteiten pwin kiei a nüküchöchön ren chönün mesei, ai peet a chöchön ren chönün mesei, lupwen üa kechü.
PSA 6:7 Mesei a tton ren ai letipeta, a toputopula ren ai kechü pokiten chon oputaei ra ariaföüüei.
PSA 6:8 Oupwe sü seniei, ämi meinisin mi föri föför mi ngau. Ewe Samol mi Lapalap a rongorong ai leüömong le kechü.
PSA 6:9 Ewe Samol mi Lapalap a rongorong ai tüngorün alilis, ewe Samol mi Lapalap a etiwa ai iotek.
PSA 6:10 Ekewe chon oputaei meinisin repwe säw o rükö. Repwe kulsefäl o müttir mefi ar itengau.
PSA 7:1 Echö än Tafit Sikaion, a köl ngeni ewe Samol mi Lapalap usun Kus ewe re Peniamin. Ai Samol mi Lapalap ai Kot, üa feito pwe üpwe op reöm, kopwe amanauaei seni chokewe meinisin mi tapweriei. Kopwe angasaeila,
PSA 7:2 pwe resap etekinieila o atatakisi fitukei usun chök mine eman laion a föri, nge esap wor eman a chimanüei.
PSA 7:3 Ai Samol mi Lapalap, ai Kot, are üa föri eu lein ekei föför, are üa föri och mi mwäl ngeni eman,
PSA 7:4 are üa liwini än chienei kirikiröch ngeni mi ngau, ika angei och fän pöchökül seni chon oputaei, nge esap wor popun,
PSA 7:5 mürin, ekewe chon oputaei repwe tapweriei o liapeniei, repwe atatakisiei, repwe nieila o likitieila lepwül.
PSA 7:6 Ai Samol mi Lapalap, kopwe ütä lon om song, kopwe awenokota o ü ngeni än ekewe chon oputaei lingeringeritiei. Kopwe pwätä o alisiei, ai Kot en mi allük pwe epwe fis pwüng.
PSA 7:7 Kopwe amwichato chon ekewe mwü ünükum, nge en kopwe nom aser o nemeniir.
PSA 7:8 En ka apwüngü chon ekewe mwü meinisin. Ai Samol mi Lapalap, lon om kapwüng kopwe pwärätä pwe üa pwüng, pun ka silei pwe esap wor ai tipis.
PSA 7:9 En ewe Kot mi pwüng, ka etittina ekiekin me tipen aramas. Kopwe aükätiu än ekewe aramasangau föför mi ngau, nge kopwe anüküchara ekewe chon pwüng.
PSA 7:10 Kot a tümwünüei, a amanaua chokewe mi aleasochisi i.
PSA 7:11 Kot eman soukapwüng mi pwüng, eman Kot mi apwüngü ekewe aramasangau fansoun meinisin.
PSA 7:12 Are eman aramas esap mochen ekieksefäl, Kot epwe seimi nöün ketilas, epwe emeia an likapich o änna ngeni.
PSA 7:13 A amolätä an pisekin maun mi afeiengau, pwal wokun föün esefich mi ngetenget.
PSA 7:14 Nengeni, ekewe aramasangau ra chök ekiekietä mine a ngau, ra chök föri föför esepwüng o eäni kapas chofana.
PSA 7:15 Iwe, ra tuw pwang pwe aramas repwe tup lon, nge ra püsin turulong lon.
PSA 7:16 Ar föför esepwüng epwe püsin ukur chök, nge liwinin ar föförün mwäneson epwe püsin küür.
PSA 7:17 Üpwe kilisou ngeni ewe Samol mi Lapalap pokiten an pwüng, üpwe pwal kölün mwareiti ewe Samol mi Lapalap, Ewe mi Unusen Tekia.
PSA 8:1 Ngeni ewe mi emweni chon köl: Won ewe pisekin ettik itan kitit. Echö än Tafit köl. Äm Samol mi Lapalap, äm Samol, a fokun pwäla iteüöchum won unusen fanüfan! Kölün mwareiti lingom a tori läng.
PSA 8:2 Ekewe semirit me ekewe mönükol ra kölün mwareituk. Ekewe chon oputom resap tongeni afeiengauok. Ka afanafanaloi chon oputom me chon ü ngonuk.
PSA 8:3 Lupwen üa netä läng förien poum o nengeni ewe maram me ekewe fü ka anomuur lon lenier,
PSA 8:4 met aüchean aramas pwe ka ekieki usun, nge met aüchean nöün aramas pwe ka tümwünü?
PSA 8:5 Nge ka föri i pwe epwe ekis kis fomw en ai Kot, ka ämwärämwära ngeni ling me iteüöch.
PSA 8:6 Ka awisa ngeni pwe epwe nemeni mettoch meinisin ka föri. Ka anomu fän nemenian föriom kewe meinisin,
PSA 8:7 ekewe sip me ekewe kow meinisin, pwal ekewe manmwachon lemäl,
PSA 8:8 ekewe mansüsü me ekewe ikenen leset me sokopaten mönün leset.
PSA 8:9 Äm Samol mi Lapalap, äm Samol, a fokun pwäla iteüöchum won unusen fanüfan!
PSA 9:1 Ngeni ewe mi emweni chon köl: Ei köl usun ngingin ewe köl itan ‘Mälan ewe Nau’. Echö än Tafit köl. Üpwe kilisou ngonuk, ai Samol mi Lapalap, ren unusen lelukei, üpwe apworausa usun om kewe föför meinisin mi amwarar.
PSA 9:2 Üpwe pwapwa o ingemwareituk, üpwe kölün mwareituk, En ewe mi Unusen Tekia.
PSA 9:3 Ekewe chon oputaei ra kulsefäl, lupwen ka waroto, ra turula o mäla.
PSA 9:4 Ka apwüngala pwe üa pwüng, en ka mot won om lenien mot o eäni kapwüng fän pwüng.
PSA 9:5 Ka apwüngü chon ekewe mwü, ka arosala ekewe aramasangau, esap wor eman epwe chüen chechemeniir tori feilfeilachök.
PSA 9:6 Ekewe chon oputem ra feiengau o rosola. Ka ataela ar kewe telinimw pwe esap wor eman epwe chüen chechemeniir.
PSA 9:7 Nge ewe Samol mi Lapalap a king tori feilfeilachök, a anüküchara an lenien motun king pwe epwe eäni kapwüng.
PSA 9:8 Iwe, a apwüngü chon fanüfan fän pwüng, a apwüngü chon ekewe mwü fän wenechar.
PSA 9:9 Ewe Samol mi Lapalap eu lenien op mi pöchökül fän iten ekewe mi riaföü, eu lenien manau lon fansoun riaföü.
PSA 9:10 Chokewe mi silei en ra anomu ar apilükülük womw, pun en, ai Samol mi Lapalap, kosap kul seni chokewe mi feito reöm.
PSA 9:11 Oupwe kölün mwareiti ewe Samol mi Lapalap mi imweimw lon Sion, oupwe apworausa an kewe föför ngeni chon ekewe mwü.
PSA 9:12 Kot a chechemeni chokewe mi riaföü, esap manlükala ar siö, nge epwe ngeni ekewe chon föföringau chappen ar föför.
PSA 9:13 Ai Samol mi Lapalap, kopwe ümöümöch ngeniei! Kopwe nenengeni ai riaföü ren chokewe mi oputaei. Ai Samol mi Lapalap, kopwe angasaeila seni mäla,
PSA 9:14 pwe üpwe tufichin pwärätä mwen ekewe aramasen Jerusalem ekewe metoch meinisin üa mwareituk ren. Üpwe pwal pwapwa pun ka angasaeei.
PSA 9:15 Iwe, chon ekewe mwü ra turulong lon ewe pwang ra püsin tuw, ra tup lon ewe sär ra püsin aopala.
PSA 9:16 Ewe Samol mi Lapalap a pwärala püsin i ren an eäni kapwüng fän pwüng. Ekewe aramasangau ra tup lon püsin ar föför.
PSA 9:17 Iwe, ekewe aramasangau repwe fokun feil ngeni mäla, pwal chon ekewe mwü meinisin mi pöütala Kot.
PSA 9:18 Kot esap manlükala ekewe chon mwelele tori feilfeilachök, pwal än chon wöüngau apilükülüköch esap tala tori feilfeilachök.
PSA 9:19 Ai Samol mi Lapalap, kopwe feito! Kosap mwütätä pwe aramas repwe ü ngonuk. Chon ekewe mwü repwe kapwüng fän mesom.
PSA 9:20 Ai Samol mi Lapalap, kopwe eniweer. Kopwe asile ngeniir pwe ir aramas echök repwe mäla.
PSA 10:1 Ai Samol mi Lapalap, pwota ka chök ütä me toau? Pwota ka okopola lupwen äm nom lon riaföü?
PSA 10:2 Ekewe aramasangau ra ariaföüü ekewe chon wöüngau fän lamalamtekia. Kopwe föri pwe repwe oo lon ekewe ekiekingau ra püsin ekiekitä.
PSA 10:3 Ewe aramasangau a sikäsini mochenin lelukan, nge ewe aramas mi mochenian win a otteki o pöütala ewe Samol mi Lapalap.
PSA 10:4 Ewe aramasangau esap kütta Kot. Lon an lamalamtekia a chök ekieki pwe esap wor Kot.
PSA 10:5 Än ewe aramasangau kewe föför meinisin ra chök fisiöch fansoun meinisin. Esap weweiti om kewe allük, nge a chök esita chon oputan.
PSA 10:6 Iwe, a ekieki lon lelukan, “Üsap tongeni mwökütütküt. Üpwe pwapwa fansoun meinisin, nge üsap tolong lon osupwang.”
PSA 10:7 An kapas a uren ottek, atuputup me eniweniw, a müttir le apasawu kapasen oput me kapas mi ngau.
PSA 10:8 A op lon ekewe sop o awiti ekewe aramas esap wor ar tipis pwe epwe nirela. Iwe, a aköürü ekewe chon mwelele,
PSA 10:9 a witiwit lon an lenien op usun eman laion. A öüröürela pwe epwe turufi ekewe chon wöüngau. A liapeniir me lon an we sär o etekinirela.
PSA 10:10 Iwe, ewe chon mwelele a kawet, a mwörürütiu o turula ren pöchökülen ewe aramasangau.
PSA 10:11 Nge ewe aramasangau a ekieki lon lelukan, “Kot esap ekieki usun, a aopala mesan pwe esap fokun künaei.”
PSA 10:12 Ai Samol mi Lapalap, kopwe apwüngü ekei aramasangau. Kosap manlükala chokewe mi nom lon riaföü.
PSA 10:13 Pwota ewe aramasangau a turunufasei Kot o ekieki lon lelukan, “Kot esap apwüngüei.”
PSA 10:14 Nge en ka küna, ewer, ka silei ewe osupwang me riaföü, ka pwal amolätä om kopwe alilis. Ewe chon mwelele a atolonga püsin i lepoum, en ewe ka alisi ekewe mi mäsen fansoun meinisin.
PSA 10:15 Kopwe kupi pöchökülen ewe aramasangau me ewe chon föföringau. Kopwe aunusa ngeniir liwinin ar föföringau tori resap chüen försefäli.
PSA 10:16 Ewe Samol mi Lapalap i king tori feilfeilachök. Chon ekewe mwü repwe rosola seni fanüan.
PSA 10:17 Ai Samol mi Lapalap, kopwe rong än ekewe mi riaföü tüngor, kopwe apöchöküla leluker o aü selingom ngeni ar siö.
PSA 10:18 Kopwe peni ekewe mi mäsen me ekewe mi riaföü, pwe aramas mi pop seni fanüfan resap chüen eniwokusu eman.
PSA 11:1 Ngeni ewe mi emweni chon köl: Echö än Tafit köl. Üa anomu ai apilükülük won ewe Samol mi Lapalap pwe epwe tümwünüei. Pwota oua üreniei, “Kopwe sü ngeni ekewe chuk usun eman machang?
PSA 11:2 Pun nengeni, ekewe aramasangau ra emeia ar likapich o pachetä wokur föün esefich ngeni selin, pwe repwe likapichi ekewe mi wenechar leluker seni ewe leni mi kiroch.
PSA 11:3 Are ekewe longolongun pwüng ra tala, met eman chon pwüng a chüen tongeni föri?”
PSA 11:4 Ewe Samol mi Lapalap a nom lon imwan mi pin, än ewe Samol mi Lapalap lenien motun king a nom lon läng. A netiu won fanüfan o ouwasacha aramas meinisin, a pwal silei mine ra föri.
PSA 11:5 Ewe Samol mi Lapalap a sotuni ekewe aramas mi pwüng me ekewe aramasangau, a oput ätewe mi föri föförün mwäneson.
PSA 11:6 A apüngätiu molien ekkei me primston won ekewe aramasangau. A apwüngüür ren asepwäl mi pwichikar.
PSA 11:7 Pun ewe Samol mi Lapalap a pwüng, a pwapwaäsini föför mi pwüng. Ekewe aramas mi wenechar repwe küna i.
PSA 12:1 Ngeni ewe mi emweni chon köl: Won pisekin ettik mi wor walufoch saitenin. Echö än Tafit köl. Äm Samol mi Lapalap, kopwe alisikem, pun esap chüen wor eman chon pin, nge ekewe chon allükülük ra rosola seni lein aramas.
PSA 12:2 Iteiten eman me eman a chofana ngeni chon arun. Ra chök eäni kapas atuputup lefiler.
PSA 12:3 Amwo ewe Samol mi Lapalap epwe aükätiu ar kapas atuputup o pineela awen ekewe aramas mi tunesikesikemong.
PSA 12:4 Ir chokewe mi apasa, “Sa win ren ach kapas, nge kapasen awach a alisikich. Iö epwe tongeni nemenikich?”
PSA 12:5 Nge ewe Samol mi Lapalap a üra, “Iei ngang üpwe feito, pokiten ekewe chon wöüngau ra osupwang, pwal ekewe chon mwelele ra ngüngü. Ngang üpwe alenier lon ewe lenien kinamwe ra älälei.”
PSA 12:6 Än ewe Samol mi Lapalap kewe pwon ra allükülük o fatafatöch, usun silifer a kurufat me lon ewe lenien um lepwül, lupwen a ketel fän fisu pwe epwe limöch.
PSA 12:7 Äm Samol mi Lapalap, kopwe amwöchükem, kopwe tümwünükem fansoun meinisin seni ei täppin aramas mi ngau.
PSA 12:8 Pun ekewe aramasangau ra nom ekis meinisin, nge aramas meinisin ra pwapwaiti mine a ngau.
PSA 13:1 Ngeni ewe mi emweni chon köl: Echö än Tafit köl. Ai Samol mi Lapalap, ifa ükükün fansoun om kopwe manlükieila? Ifa usun, kopwe manlükieila tori feilfeilachök? Ifa ükükün fansoun om kopwe aopala mesom seniei?
PSA 13:2 Ifa ükükün fansoun ai üpwe engila fän ai weires? Ifa ükükün fansoun lelukei epwe riaföü lerän me lepwin? Ifa ükükün fansoun än chon oputaei repwe nemenieila?
PSA 13:3 Ai Samol mi Lapalap, kopwe nenengeniei o pälüeniei. Kopwe apöchökülaei, kosap mwütätä ai üpwe mäla.
PSA 13:4 Kosap mwüt ngeni ekewe chon oputaei pwe repwe apasa, “Aia akufu ätewe.” Kosap mwüt ngeni ekewe chon pälüeniei repwe takiriei ren ai tumwula.
PSA 13:5 Nge üa anomu ai apilükülük won om tong ellet, üpwe pwapwa ren om amanauaei.
PSA 13:6 Ngang üpwe köl ngonuk, ai Samol mi Lapalap, pun ka fokun eäni kirikiröch ngeniei.
PSA 14:1 Ngeni ewe mi emweni chon köl: Echö än Tafit köl. Ekewe mi umwes ra ekieki lon leluker, “Esap wor Kot.” Ir ra fokun ngau, ra föri sokun föför mi anioput, esap wor eman a föri mine a pwüng.
PSA 14:2 Ewe Samol mi Lapalap a nenetiu seni läng won aramas meinisin, pwe epwe küna ika a wor eman mi mirit, ika eman mi kütta Kot.
PSA 14:3 Nge ir meinisin ra tokola, ir ra ingaueppök. Esap wor eman a föri mine a pwüng, esap fokun wor eman.
PSA 14:4 Ewe Samol mi Lapalap a ais, “Ifa usun, esap wor än ekewe chon föföringau mirit? Ir chokewe mi manau seni mine ra soläni seni nei aramas, nge resap iotek ngeniei.”
PSA 14:5 Nge mürin repwe nom lon niuokus watte, pun Kot a nom ren ekewe aramas mi pwüng.
PSA 14:6 Ekewe chon föföringau ra pinei än ewe chon wöüngau akot, nge ewe Samol mi Lapalap an lenien op.
PSA 14:7 Amwo eman epwe feito seni Sion o amanaua chon Israel. Ekewe chon Israel repwe fokun pwapwa, lupwen ewe Samol mi Lapalap epwe aliwini ngeniir wöür.
PSA 15:1 Echö än Tafit köl. Ai Samol mi Lapalap, iö epwe tongeni tolong lon imwom mi pin? Iö epwe tongeni nonom won chukum mi pin?
PSA 15:2 Ätewe mi aleasochisi Kot o föri mine a pwüng fansoun meinisin, a eäni kapas wenechar seni lon lelukan.
PSA 15:3 Esap aitengaua eman, esap föri mine a ngau ngeni chienan, esap pwal ngününgünüfetalei chon arun.
PSA 15:4 A oput eman mi manauangau, nge a asamolu chokewe mi meniniti ewe Samol mi Lapalap, a apwönüetä an pwon a eäni fän akapel, inamwo are a weires ren.
PSA 15:5 A mwütawu nöün moni, nge esap angei winnan, esap pwal angei lifangen amichimich pwe epwe aturu eman esap wor an tipis. Ätewe mi föri ekei mettoch epwe nomopos won chukum mi pin.
PSA 16:1 Echö än Tafit köl. Ai Kot, kopwe tümwünüei, pun üa anomu ai apilükülük womw pwe kopwe ti seniei feiengau.
PSA 16:2 Üa kapas ngeni ewe Samol mi Lapalap, “En chök ai Samol. Esap wor ai feiöch lükün en.”
PSA 16:3 Ekewe chon pin mi nom won fanüfan ra iteföüla. Üa fokun pwapwaäsini ai üpwe nom rer.
PSA 16:4 Ekewe aramas mi filätä pwal ekoch kot ra achomonga ar riaföü. Üsap fokun etiir, lupwen ra asor, üsap pwal fel ngeni ar kewe kot.
PSA 16:5 Ai Samol mi Lapalap, en ai, ka fokun aüchea ngeniei. En ewe mi fang ngeniei meinisin mine üpwe eäni.
PSA 16:6 Ineti we a nom lon eu fanü mi fokun öch. Ewer, ineti we a mürina.
PSA 16:7 Üa mwareiti ewe Samol mi Lapalap, pun a öüröüraei, nge lepwin lelukei a pwal fönöüei.
PSA 16:8 Iteiten fansoun üa mefi pwe ewe Samol mi Lapalap a nom rei. Pokiten i a arap ngeniei, üsap tongeni mwökütüküt.
PSA 16:9 Iei mine lelukei a pwapwa o mwänek, inisi a mefi kinamwe.
PSA 16:10 Pun en ka tümwünüei seni manamanen mäla, kosap pwal mwüt ngeni noum we mi pin pwe epwe mwöch lon peias.
PSA 16:11 En ka aiti ngeniei ewe alen manau. Om nom rei a afisätä ai pwapwa mi somwosom o awarato ai mwänek tori feilfeilachök.
PSA 17:1 Eu än Tafit iotek. Ai Samol mi Lapalap, kopwe aüselinga ai tüngor mi pwüng o afäli ai siö. Kopwe aü selingom ngeni ai iotek mi wenechar.
PSA 17:2 Alelletin ai pwüng epwe feito senuk. Pun en ka silei mine a pwüng.
PSA 17:3 En ka atittina lelukei, ka äämwaei lepwin, ka sotuniei, nge kosap küna och ekiek mi ngau rei. Üsap apasa och mi ngau.
PSA 17:4 Pokiten än ekewe aramas föför, üa afäliei seni föförün ekewe chon mwäneson ren ai aleasochisi alom.
PSA 17:5 Üa chök fetal lon om kewe al, nge üsap rik seni.
PSA 17:6 Ai Kot, üa kökköruk, pun en kopwe pälüeniei, kopwe aü selingom ngeniei o rongorong ai kapas.
PSA 17:7 Kopwe pwärala om tong ellet mi amwarar. Ren om manaman ka amanaua chokewe mi feito reöm pwe kopwe tümwünüür seni chon ü ngeniir.
PSA 17:8 Kopwe tümwünüei usun chök fituken lon mesom, kopwe aopaei fän nürün poum,
PSA 17:9 seni ekewe aramasangau mi fiu ngeniei, seni ekewe chon oputaei mi pwelifeiliei o mochen nieila.
PSA 17:10 Ra pineela leluker pwe resap eäni tong, ra eäni kapasen tunesikesik.
PSA 17:11 Ra eipwa ipwei, iei ra pwelifeiliei, ra chök änenaei pwe repwe aturueitiu lepwül.
PSA 17:12 Ra wewe ngeni eman laion mi achocho le kütta liapan, ika wewe ngeni eman nienifön laion mi öüröürela lon an lenien op.
PSA 17:13 Ai Samol mi Lapalap, kopwe feito. Kopwe ü ngeni chon oputaei o akufuur. Kopwe angasaei seni ekewe aramasangau ren noum ketilas.
PSA 17:14 Ai Samol mi Lapalap, kopwe angasaei seni ekewe aramas mi chök angei ar feiöch me lon ei fanüfan. Kopwe apwüngüür ren ekewe riaföü ka amolätä fän iter, amwo epwe naf ngeni nöür me nöün nöür.
PSA 17:15 Nge me rei, ngang üpwe nenengeni mesom, pun üsap föri och mi mwäl. Lupwen üpwe nenela, üpwe fokun pwapwa ren ai nenengonuk.
PSA 18:1 Ngeni ewe mi emweni chon köl: Echö köl än Tafit nöün ewe Samol mi Lapalap we chon angang. A apasa kapasen ei köl ngeni ewe Samol mi Lapalap lon ewe rän, lupwen ewe Samol mi Lapalap a angasa i seni lepöün ekewe chon oputa meinisin, pwal seni lepöün Saul. Iwe, a apasa: Ai Samol mi Lapalap, üa echenuk, en ai pöchökül.
PSA 18:2 Ewe Samol mi Lapalap ai achau, i imwei imwen maun, pwal i chon angasaei, ai Kot, ai achau ewe ia üa op ie. A epeti seniei feiengau usun eu tittin maun, a peniei o tümwünüei.
PSA 18:3 Üa kökköri ewe Samol mi Lapalap, ewe mi fich ngeni ach sipwe mwareiti. A amanauaei seni ekewe chon oputaei.
PSA 18:4 Ekewe feiengauen mäla ra pwelifeiliei, ekewe öütöüten feiengau ra puitiei.
PSA 18:5 Ekewe feiengauen lenien sotup ra pwelifeiliei, ekewe likatupun mäla ra mochen säreei.
PSA 18:6 Üa kökköri ewe Samol mi Lapalap lon ai riaföü, üa siö ngeni ai Kot pwe epwe alisiei. A rongorong mweliei seni lon imwan imwenfel, a aüselinga ai siö ngeni.
PSA 18:7 Iwe, fanüfan a chechech o mwöükük, nge longolongun ekewe chuk ra pwal chechech o chüngüchüng pokiten än Kot song.
PSA 18:8 Ötüöt a ötüwu seni lon pwötün, nge ekkei lapalap a ngetewu seni lon awan, pwal mooch mi sarara a küwu seni.
PSA 18:9 A tinenifeseni läng o feitiu. Kuchuchol ra nom fän pechen.
PSA 18:10 A wawa eman kerop o äs, a müttir feito won pöükässin asepwäl.
PSA 18:11 A pwölüela ngeni inisin rochopwak, kuchu mi malul o uren koluk ra pwelifeili.
PSA 18:12 Seni lon ewe saramaram mi nom mwan ütten fau me moochen ekkei ra towu o tinenifeseni ewe kuchuchol.
PSA 18:13 Ewe Samol mi Lapalap a pwal apüngü chopulap lon läng, Ewe mi Unusen Tekia a aronga mwelian.
PSA 18:14 A esefichala wokun kewe föün esefich o atoropasa chon oputan, a efifi ngeniir inefi o asürela.
PSA 18:15 Mürin, epin matau a pwä, longolongun fanüfan a lingetä, lupwen ka apwüngü chon oputom o leüömong ngeniir fän om song, ai Samol mi Lapalap.
PSA 18:16 Iwe, ewe Samol mi Lapalap a angetiu seni won ewe leni mi tekia o amwöchüei, a efieitä seni lon ekewe koluk mi alolol.
PSA 18:17 A angasaei seni ekewe chon pälüeniei mi pöchökül, seni chokewe mi oputaei, pun ra kon pöchökül ngeniei.
PSA 18:18 Iwe, ra münitiei lon ränin ai feiengau, nge ewe Samol mi Lapalap a tümwünüei.
PSA 18:19 A alisiei lon ai feiengau o angasaei, pun a pwapwa rei.
PSA 18:20 Ewe Samol mi Lapalap a liwiniöchüei, pun üa föri mine a pwüng, a afeiöchüei, pun esap wor ai tipis.
PSA 18:21 Üa aleasochisi än ewe Samol mi Lapalap kewe allük, nge üsap rik seni ai Kot ren och föför mi ngau.
PSA 18:22 Üa apwönüetä an kewe allük meinisin, nge üsap aleasolap ngeni an kewe pwüüng.
PSA 18:23 A silei pwe esap wor ai mwäl, pwe üa püsin tümwünüei seni tipis.
PSA 18:24 Iei mine ewe Samol mi Lapalap a liwiniöchüei, pun üa föri mine a pwüng, pun a silei pwe esap wor ai tipis.
PSA 18:25 Ai Samol mi Lapalap, ka allükülük ngeniir mi allükülük, ka pwal pwärätä om unusen pwüng ngeniir mi unusen pwüng.
PSA 18:26 Ka pwärätä om limelimöch ngeni ir mi limelimöch, nge ekewe mi pwor manauer ka pwärätä om pöchökül ngeniir.
PSA 18:27 Ka angasa aramas mi tipetekison, nge chokewe mi lamalamtekia ka atekisoneretiu.
PSA 18:28 Ai Samol mi Lapalap, ka asarama manauei, en ai Kot ka awili ai rochopwak ngeni saram.
PSA 18:29 Ewer, ren om alisiei üa tongeni fiu ngeni ekewe chon oputaei, ren en ai Kot üa tongeni mwet won eu tit.
PSA 18:30 Än Kot kewe föför ra unusen pwüng, än ewe Samol mi Lapalap kapasen pwon a let. I a usun chök tittin maun fän iten chokewe meinisin mi op ren.
PSA 18:31 Ewe Samol mi Lapalap i chök Kot. Kot echök ach achau.
PSA 18:32 I ewe Kot mi apöchökülaei o anükünüköchü ai al.
PSA 18:33 A amüttiriei usun müttirin chia, a pwal aleniöchüei won ekewe leni mi tekia.
PSA 18:34 A asipa pei ngeni maun pwe üa tongeni pworefengeni efoch esefich seni piras.
PSA 18:35 Ka epeti seniei feiengau o amanauaei, poum a amwöchüei, nge om alilis a atekiaeitä.
PSA 18:36 Ka achölapa ewe al üa fetal won, pwe pechei esap mit.
PSA 18:37 Üa tapweri chon oputaei o liapeniir. Üsap kulsefäl seniir tori ra rosola.
PSA 18:38 Üa atururela pwe resap chüen tongeni ütä. Ra turula arun pechei.
PSA 18:39 Ka ngeniei pöchökül pwe üa tongeni maun, ka pwal akufu me mwei ekewe chon ü ngeniei.
PSA 18:40 Ka föri pwe ekewe chon pälüeniei ra sü seniei, üa arosala chokewe mi oputaei.
PSA 18:41 Ra siö pwe eman epwe alisiir, nge esap wor eman a amanaueer. Ra siö ngeni ewe Samol mi Lapalap, nge esap pälüeniir.
PSA 18:42 Üa üsiir pwe ra usun chök pipisüsü asepwäl a ässala. Üa puriretiu usun pwakaken lon ekewe al.
PSA 18:43 En ka angasaei seni ekewe aramas mi ü ngeniei, ka seikieitä pwe üpwe samolun ekewe mwü. Ekewe aramas üsap sileer me mwan ra nom fän nemeniei.
PSA 18:44 Ra aleasochisiei lon ewe otun ra rong mweliei. Chon ekis ra feito o chapetiu mwei.
PSA 18:45 Iwe, ra apilükingau, ra towu seni ar kewe lenien maun mi pöchökül fän chechech.
PSA 18:46 Ewe Samol mi Lapalap a manau. Üa mwareiti ai achau, üa ingeiti ai Kot mi amanauaei.
PSA 18:47 Kot a atufichiei pwe üpwe ngeni chon oputaei chappen ar föför, a anomu fai aramasen ekewe mwü. A amanauaei seni ekewe chon pälüeniei.
PSA 18:48 En ai Samol mi Lapalap ka atekiaeitä asen chon ü ngeniei o angasaei seni ekewe aramas mi mwäneson.
PSA 18:49 Iei mine üpwe ingemwareituk me lein chon ekewe mwü. Ai Samol mi Lapalap, üpwe kölün mwareituk.
PSA 18:50 Kot a ngeni nöün we king win mi lapalap o pwäri an tong ellet ngeni nöün we mi kepit, ngeni Tafit me mwirimwirin kewe tori feilfeilachök.
PSA 19:1 Ngeni ewe mi emweni chon köl: Echö än Tafit köl. Ekewe läng ra pwärätä lingen Kot, nge fän läng a arongafeili usun angangen pöün.
PSA 19:2 Rän a kapas ngeni pwal eu rän usun, nge pwin a asile ngeni pwal eu pwin usun.
PSA 19:3 Esap wor ar fos, esap pwal wor ar kapas, esap wor eman a tongeni rong mwelier.
PSA 19:4 Nge mwelier a chöfetal lemenen unusen fanüfan, ar kapas a tori lesopun fanüfan. Kot a föri eu imw fän läng fän iten akkar.
PSA 19:5 Akkar a tötä usun eman mwän apwüpwülü söfö a towu seni lon rumwan, a pwal sä won alan usun eman mwän mi pöchökül a pwapwa lon an kitir.
PSA 19:6 Akkar a tötä seni epek läng o fetal ngeni ewe epek, nge esap wor och mettoch a tongeni op seni pwichikaran.
PSA 19:7 Än ewe Samol mi Lapalap allük a fokun mürina, a apöchökülasefäli letipach. Än ewe Samol mi Lapalap kait a let, a atipachema ir mi wewemang.
PSA 19:8 Än ewe Samol mi Lapalap öüröür ra pwüng, ra apwapwai lelukach. Än ewe Samol mi Lapalap kewe allük ra fat, ra awora mirit.
PSA 19:9 Ach niuokusiti ewe Samol mi Lapalap a mürina, epwe nonom tori feilfeilachök. Än ewe Samol mi Lapalap pwüüng ra let, ir meinisin ra pwüng.
PSA 19:10 Ra aüchea lap seni kolt, ewer, lap seni chomong kolt mi mürina. Ra pwal arar seni chönün chunen, pwal seni sürün ewe fasen chunen.
PSA 19:11 Ren ekei allük ngang noum chon angang üa angei ai fön seniir. Eman mi apwönüetä epwe angei liwinin mi lapalap.
PSA 19:12 Nge iö a tongeni mefi iteiten an föför mi mwäl? Kopwe amusa seniei ekewe tipis mi monomon.
PSA 19:13 Kopwe pwal tümwünüei pwe ngang noum chon angang üsap föri tipis ren mochenin letipei. Kosap mwüt ngeniir pwe repwe nemeniei. Mürin üpwe unusöch lon manauei o ngas seni pupungau mi watte.
PSA 19:14 Amwo kapasen awei me ekiekin lelukei epwe mürina me fän mesom, ai Samol mi Lapalap, ai achau me ai chon amanau.
PSA 20:1 Ngeni ewe mi emweni chon köl: Echö än Tafit köl. Amwo ewe Samol mi Lapalap epwe pälüeni om tüngor lon ränin om riaföü. Amwo än Jakop we Kot epwe tümwünuk.
PSA 20:2 Amwo epwe tinato reöm alilisum seni lon ewe leni mi pin o apöchökülok seni Sion.
PSA 20:3 Amwo epwe etiwa om kewe asor meinisin o pwapwaäsini om kewe asoren kek.
PSA 20:4 Amwo Kot epwe ngonuk mochenin letipom o apwönüetä om kewe ekiek meinisin.
PSA 20:5 Mürin sipwe mweir fän pwapwa ren om win, sipwe pwal aürätä ach filaik fän iten ach Kot. Amwo ewe Samol mi Lapalap epwe apwönüetä om kewe tüngor meinisin.
PSA 20:6 Iei üa silei pwe ewe Samol mi Lapalap a alisi nöün we king mi kepit, a pälüeni an tüngor seni an we läng mi pin o awinna ren win mi lapalap ren an manaman.
PSA 20:7 Ekoch aramas ra anomu ar apilükülük won war wokenin maun, ekoch ra anomu won nöür oris, nge kich sia anomu ach apilükülük won manamanen ewe Samol mi Lapalap ach we Kot.
PSA 20:8 Ir repwe mwaroro o turula, nge kich sipwe ütä o üwenewenetä.
PSA 20:9 Äm Samol mi Lapalap, kopwe awinna ewe king, kopwe pälüenikem, lupwen aia kökköruk.
PSA 21:1 Ngeni ewe mi emweni chon köl: Echö än Tafit köl. Äm Samol mi Lapalap, ewe king a pwapwa ren om manaman, a fokun ingeiti om alilis ngeni pwe a win.
PSA 21:2 Ka fang ngeni mochenin letipan, nge kosap amwöchü seni mine a tüngor.
PSA 21:3 Pun ka etiwa i ren feiöch mi chomong, ka pwal isetä won möküran epa mwärämwär seni kolt mi mürina.
PSA 21:4 A tüngor manau me reöm, nge en ka fang ngeni, ka alangatama ränin manauan tori feilfeilachök.
PSA 21:5 An ling a lapalap, pun ka alisi pwe a win. Ka awora ngeni iteüöch me iteföüla.
PSA 21:6 Ewer, ka fokun afeiöchü ren feiöch esemüch, ka apwapwai ren om nonom ren.
PSA 21:7 Pun ewe king a anomu an apilükülük won ewe Samol mi Lapalap, nge ren än Ewe mi Unusen Tekia tong ellet esap tongeni mwökütüküt.
PSA 21:8 Ewe king epwe liapeni chon pälüeni meinisin, epwe liapeni chokewe mi oput i.
PSA 21:9 Lupwen epwe wareto, epwe aroserela usun eu ekkei a kenala mettoch. Ewe Samol mi Lapalap epwe ärirela lon an lingeringer, nge ekkei epwe fisirela.
PSA 21:10 Epwe arosala mwirimwirir seni won fanüfan, pwe esap wor eman epwe chüen manau.
PSA 21:11 Ra ekiekietä ar repwe föri mi ngau ngeni o rawangauei, nge esap fokun tongeni pwönüetä.
PSA 21:12 Epwe emeia an likapich o änna ngeniir pwe repwe kul o süla.
PSA 21:13 Äm Samol mi Lapalap, aipwe ingemwareiti om pöchökül mi watte. Äm aipwe kölü o mwareiti om manaman.
PSA 22:1 Ngeni ewe mi emweni chon köl: Ei köl usun ngingin ewe köl itan ‘Ewe chian wünümweerän.’ Echö än Tafit köl. Ai Kot, ai Kot, pwota ka likitieila? Pwota ka fokun toau seniei fän om alilis, pwal seni ai siöngau?
PSA 22:2 Ai Kot, üa siö ngonuk lerän, nge kosap pälüeniei, üa siö ngonuk lepwin, nge üsap tongeni asösö.
PSA 22:3 Nge en ka pin. Ka mot won om lenien motun king, en ewe chon Israel ra kölün mwareiti.
PSA 22:4 Äm kewe lewo ra anomu ar apilükülük womw. Ra apilükülükuk, nge en ka angaserela.
PSA 22:5 Ra siö ngonuk, nge en ka amanaueer, ra apilükülukuk, nge resap lichipüng.
PSA 22:6 Nge ngang eman moso, sap eman aramas, üa küna esit me koput me ren aramas.
PSA 22:7 Meinisin mi künaei ra turunufaseei, ra akopea awer o alifechefechi mökürer ngeniei.
PSA 22:8 Ra apasa, “A anomu an apilükülük won ewe Samol mi Lapalap, i epwe angasa, i epwe amanaua, pun a pwapwa ren.”
PSA 22:9 Nge en ewe mi atoeiwu seni lon letipen inei, ka tümwünüöchüei, lupwen üa eman mönükol.
PSA 22:10 Seni leuputiuei üa apilükülükuk, seni ewe fansoun inei a nöünieitiu en ai Kot.
PSA 22:11 Kosap toau seniei, pun osukosuk a arap ngeniei, nge esap wor eman a alisiei.
PSA 22:12 Chomong chon oputaei ra pwelifeiliei usun epwi pwin ätemwänin kow, ra nom ünüki usun ätemwänin kow mi pöchökül seni Pasan.
PSA 22:13 Ra amassaw ngeniei usun eman laion mi mwacho a wörüwör o atatakisi liapan.
PSA 22:14 Üa usun chök koluk mi niitiu, lekeilen chüi meinisin ra ruwofesen, lelukei a usun kiris, a telila me leupwei.
PSA 22:15 Lon awei a pwasapwas usun pwül moromor, nge chönawei a pacheetä fän fongochi. Ka likitieila lon pwül moromor usun eman mi mäla.
PSA 22:16 Eu mwichen aramasangau a pwelifeiliei, ra rongeeila usun epwi pwiin kolak. Ra posu pei me pechei.
PSA 22:17 Üa tongeni aleani chüi meinisin. Chon oputaei ra änefotaei o takiriei.
PSA 22:18 Ra üttüt won üfei kewe o ineti lefiler.
PSA 22:19 Nge en, ai Samol mi Lapalap, kosap toau seniei! En ai chon alilis, kopwe müttir feito o alisiei.
PSA 22:20 Kopwe angasaei seni afeiengauen ketilas, kopwe angasa manauei seni ekei kolak mi pöchökül.
PSA 22:21 Kopwe amanauaei seni ekewe laion, kopwe amanaua inisi seni mächän ekewe ätemwänin kow mi mwacho.
PSA 22:22 Üpwe apworausa ngeni pwii kewe mine ka föri, üpwe mwareituk lein ewe mwichen aramas.
PSA 22:23 Ämi mi niuokusiti ewe Samol mi Lapalap, oupwe mwareiti i, ämi mwirimwirin Jakop meinisin oupwe alinga i, ämi chon Israel meinisin oupwe fokun meniniti i.
PSA 22:24 Pun Kot esap aliwini eman mi mwelele ika oput eman mi nom lon riaföü. Esap amona mesan seni, nge a pälüeni, lupwen a siö ngeni.
PSA 22:25 En popun ai mwareituk me lon ewe mwich mi lap. Üpwe eäni ekewe asor me fän mesen chokewe mi niuokusituk, ekewe asor üa pwon ngonuk.
PSA 22:26 Chokewe mi wöüngau repwe mongö o möt. Chokewe mi feito ren ewe Samol mi Lapalap repwe mwareiti i. Amwo repwe feiöch tori feilfeilachök.
PSA 22:27 Chon fanüfan meinisin repwe chechemeni ewe Samol mi Lapalap o kuliti i. Chon ekewe ainang seni ekewe mwü meinisin repwe fel ngeni.
PSA 22:28 Pun ewe Samol mi Lapalap i king, i a nemeni ekewe mwü.
PSA 22:29 Ewer, ekewe chon lamalamtekia meinisin me won fanüfan repwe chapetiu mwan, chokewe meinisin mi feil ngeni mäla repwe fotopwäsuk me mwan, pwal chokewe resap tongeni püsin amwöchü manauer.
PSA 22:30 Mwirimwirich repwe angang ngeni i. Aramas repwe apworausa ngeni ewe täppin aramas epwe feito usun ewe Samol,
PSA 22:31 repwe asilefeili ngeni ekewe aramas resamwo uputiu, “Ewe Samol mi Lapalap a amanaua nöün aramas.”
PSA 23:1 Echö än Tafit köl. Ewe Samol mi Lapalap ai chon mas, üsap osupwang ren och mettoch.
PSA 23:2 A mwüt ngeniei pwe üpwe konola lon eu maasies ia a mär fetil ie. A emwenieila ünükün ekewe koluk mi kurufat.
PSA 23:3 A apöchöküla lelukei, a emweniei won ekewe al mi pwüng usun a pwon.
PSA 23:4 Pwal are üa feila lemolun nürün mäla, üsap niueiti och feiengau, pun en ka etiei, öürom me wokum ra tümwünüei.
PSA 23:5 Ka amolätä eu chepelin mongö fän itei me fän mesen ekewe chon oputaei, ka epiti ngeni mökürei lö, ka alölöü ai kap tori a urela.
PSA 23:6 Ewer, kirikiröch chök me tong repwe nom rei lon ränin manauei meinisin, nge üpwe nonom lon imwen ewe Samol mi Lapalap tori feilfeilachök.
PSA 24:1 Echö än Tafit köl. Fanüfan me masouan meinisin än ewe Samol mi Lapalap, pwal meinisin mi nonom won ir nöün.
PSA 24:2 Pun i a anomu fanüfan won ekewe matau o anükücharätiu won ekewe koluk.
PSA 24:3 Iö epwe tongeni feitä won chukun ewe Samol mi Lapalap? Nge iö epwe tongeni nom lon lenian mi pin?
PSA 24:4 Chokewe mi limöch ar föför me ar ekiek, resap fel ngeni uluulun anümwäl, resap pwal chofana le akapel.
PSA 24:5 Ewe Samol mi Lapalap epwe afeiöchüür. Kot epwe pwärätä pwe ra pwüng o amanaueer.
PSA 24:6 Iei usun ekewe aramas mi kütta Kot, chokewe mi feito fän mesen än Jakop we Kot.
PSA 24:7 Oupwe sukala ekewe asam, oupwe sukchöchöla ekewe asamen lom, pwe ewe king mi ling epwe tolong lon.
PSA 24:8 Iö ewe king mi ling? Ewe Samol mi Lapalap mi pöchökül o pwora, ewe Samol mi Lapalap mi win lon maun.
PSA 24:9 Oupwe sukala ekewe asam, oupwe sukchöchöla ekewe asamen lom, pwe ewe king mi ling epwe tolong lon.
PSA 24:10 Iö ei king mi ling? Ewe Samol mi Unusen Manaman, i ewe king mi ling.
PSA 25:1 Echö än Tafit köl. Ai Samol mi Lapalap, üa suki ngonuk lelukei.
PSA 25:2 Ai Kot, üa anomu ai apilükülük womw. Kosap mwüt ngeniei pwe üpwe säw ren chon oputaei, kosap pwal mwüt ngeniir pwe repwe ätäiwetiei ren ai kuf.
PSA 25:3 Ewer, esap wor eman mi apilükülükuk epwe säw. Nge chokewe mi ü ngonuk repwe säw.
PSA 25:4 Ai Samol mi Lapalap, kopwe aiti ngeniei om kewe al o aitöchüür ngeniei.
PSA 25:5 Kopwe emweniei lon om let o aiöüei, pun en ewe Kot mi amanauaei, üa apilükülükuk fansoun meinisin.
PSA 25:6 Ai Samol mi Lapalap, kopwe chechemeni om ümöümöch me om tong ellet, ka pwärätä seni chök lomlom.
PSA 25:7 Kopwe amusala ai kewe tipis me ai kewe pupungau üa föri lesäräföi. Ai Samol mi Lapalap, kopwe chechemeniei lon om tong me om kirikiröch.
PSA 25:8 Ewe Samol mi Lapalap a pwüng o kirikiröch. Iei mine a aiti ngeni ekewe chon tipis ewe al repwe fetal won.
PSA 25:9 A emweni chon tipetekison lon mine a pwüng o aiti ngeniir letipan.
PSA 25:10 Ewe Samol mi Lapalap a eäni tong me allükülük ngeni chokewe mi apwönüetä an we pwon o aleasochisi an kewe allük.
PSA 25:11 Ai Samol mi Lapalap, kopwe amusala ai tipis usun ka pwon, pun ai tipis a kon chomong.
PSA 25:12 Iö ewe aramas a niuokusiti ewe Samol mi Lapalap? Kot epwe aiti ngeni ewe al epwe fetal won.
PSA 25:13 I püsin epwe wöümong, nge nöün kana repwe fanüeni ewe fanü.
PSA 25:14 Ewe Samol mi Lapalap a chiechifengen me chokewe mi niuokusiti i. A asile ngeniir an we pwon.
PSA 25:15 Üa sachetä ngeni ewe Samol mi Lapalap fansoun meinisin, pun i epwe angasaei seni feiengau.
PSA 25:16 Kopwe kul ngeniei o ümöümöch ngeniei, pun ngang üa metip o osupwang.
PSA 25:17 Kopwe akisikisala weiresin letipei o angasaeila seni ai kewe riaföü.
PSA 25:18 Kopwe ekieki usun ai riaföü me ai weires o amusala ai kewe tipis meinisin.
PSA 25:19 Kopwe nenengeni chomongun ekewe chon pälüeniei, pwal usun ar oputangauaei.
PSA 25:20 Kopwe tümwünü manauei o angasaei. Kosap mwüt ngeniei pwe üpwe säw, pun üa feito reöm pwe kopwe tümwünüei.
PSA 25:21 Let me wenechar repwe tümwünüei, pun üa apilükülükuk.
PSA 25:22 Ai Kot, kopwe angasa chon Israel seni ar kewe weires meinisin.
PSA 26:1 Echö än Tafit köl. Ai Samol mi Lapalap, kopwe aletätä ai pwüng, pun üa föri mine a pwüng, üa apilükülükuk, nge üsap mwökütüküt.
PSA 26:2 Kopwe atitinaei, ai Samol mi Lapalap, o sotuniei, kopwe sotuni mochenin lelukei me ai ekiek.
PSA 26:3 Pun om tong ellet a nom mwei, om allükülük a emweniei.
PSA 26:4 Üsap nom ren aramas mi chofana, üsap pwal chiechi ngeni chon likatuputup.
PSA 26:5 Üa oput ewe mwichen chon föföringau, nge üsap nom ren ekewe aramasangau.
PSA 26:6 Ai Samol mi Lapalap, üa talü pei pwe asisilen ai limelimöch o pwelifeili om rongen asor,
PSA 26:7 Üa eäni echö kölün kilisou fän leüömong o apworausa om kewe föför meinisin mi amwarar.
PSA 26:8 Ai Samol mi Lapalap, üa echeni imwom ewe ia ka nonom ie, ewe leni ia lingom a nonom ie.
PSA 26:9 Kosap nieila fitifengen me ekewe chon tipis, kosap angei manauei fitifengen me chon nimanauei aramas,
PSA 26:10 ätekewe mi föri föför mi ngau fansoun meinisin, ra pwal pwapwa le angei lifangen amichimich.
PSA 26:11 Nge ngang won inisi üa föri mine a pwüng, kopwe ümöümöch ngeniei o amanauaei.
PSA 26:12 Üa nom won sonomaw. Üpwe mwareiti ewe Samol mi Lapalap lon ewe mwich mi lap.
PSA 27:1 Echö än Tafit köl. Ewe Samol mi Lapalap i ai saram me ai Chon Amanau. Üsap niueiti eman. Ewe Samol mi Lapalap a tümwünüei seni feiengau, üsap fokun niuokus.
PSA 27:2 Lupwen aramasangau ra rangetiei pwe repwe nieila, lupwen chon ü ngeniei ra fiu ngeniei, repwe chök chepetek o turula.
PSA 27:3 Inamwo are eu mwichen sounfiu repwe pwelifeiliei, ngang üsap niuokus. Inamwo are ra maun ngeniei, nge ai lükü Kot epwe chök nüküchar.
PSA 27:4 Eu mettoch üa tüngorei ewe Samol mi Lapalap, eu mettoch chök üa mochen: Pwe üpwe nonom lon imwen ewe Samol mi Lapalap lon ränin manauei meinisin, pwe üpwe ingeiti an kirikiröch o kütta öüröürei me ren me lon imwan imwenfel.
PSA 27:5 Pun lon fansoun weires i epwe aopaei. I epwe tümwünüei me lon imwan imwenfel, epwe pwal atekiaeitä won eu achau.
PSA 27:6 Mürin üpwe chimwetä o nom asen ekewe chon oputaei mi pwelifeilei, üpwe asor lon imwan fän mweireiren pwapwa. Üpwe köl o ettiki pisekin ettik ngeni ewe Samol mi Lapalap.
PSA 27:7 Ai Samol mi Lapalap, kopwe aüselinga ai siö ngonuk. Kopwe ümöümöch ngeniei o pälüeniei.
PSA 27:8 En ka apasa, “Oupwe küttaei.” Nge ngang üa pälüeni, “Üa küttok, ai Samol mi Lapalap.”
PSA 27:9 Kosap aopa mesom seniei. Kosap aliwini noum ei chon angang lon om song, pun en ai chon alilis. Kosap pöütieila, kosap pwal likitieila, Ai Kot, ai Chon Amanau.
PSA 27:10 Inamwo ika semei me inei ra likitieila, nge ewe Samol mi Lapalap epwe tümwünüei.
PSA 27:11 Ai Samol mi Lapalap, kopwe aiti ngeniei mine üpwe föri o emweniei won efoch al mi wenechar pokiten chon oputaei.
PSA 27:12 Kosap asechieilong lepöün chon pälüeniei. Pun chon pwärätä chofana ra ü ngeniei, ra tiliken le föri föförün mwäneson ngeniei.
PSA 27:13 Nge ngang üa lükü pwe ewe Samol mi Lapalap epwe kirikiröch ngeniei lon fansoun ai manau won fanüfan.
PSA 27:14 Kopwe apilükülükü ewe Samol mi Lapalap, kopwe pöchökül o tipepwora. Ewer, kopwe apilükülükü ewe Samol mi Lapalap.
PSA 28:1 Echö än Tafit köl. Ai Samol mi Lapalap, en ai achau, üa kökköruk. Kopwe aüselinga ai siö ngonuk. Pun are kosap pälüeniei, üpwe wewe ngeni chokewe mi tolong lon peias.
PSA 28:2 Kopwe rongorong kapasen ai tüngor, lupwen üa siö ngonuk. Kopwe alisiei, lupwen üa aitietä pei ngeni imwom mi unusen pin.
PSA 28:3 Kosap apwüngüei fitifengen me ekewe aramasangau, pwal fiti chokewe mi föri föför mi ngau, ir mi eäni kapas pwetete ngeni chon arur, nge ra ekiekingau lon leluker.
PSA 28:4 Kopwe ngeniir chappen ar föför me ükükün liwinin ar föföringau. Kopwe ngeniir chappen angangen pöür o liwini ngeniir mine a fichitiir.
PSA 28:5 Pokiten ir resap afäli än ewe Samol mi Lapalap föför ika angangen pöün, iei mine i epwe apwüngüür o aroserela.
PSA 28:6 Üpwe mwareiti ewe Samol mi Lapalap, pun a rongorong ai tüngorun alilis.
PSA 28:7 Ewe Samol mi Lapalap a tümwünüei o epeti seniei feiengau, üa apilükülükü i, nge i a alisiei. Iei mine üa fokun pwapwa. Üpwe kilisou ngeni o kölün mwareiti.
PSA 28:8 Ewe Samol mi Lapalap i än nöün aramas pöchökül. I ewe lenien op mi allükülük fän iten nöün we mi kepit ewe king.
PSA 28:9 Kopwe amanaua noum kewe aramas o afeiöchü noum kana. Kopwe ar chon mas o tümwünüür tori feilfeilachök.
PSA 29:1 Echö än Tafit köl. Ämi chon läng kana, oupwe mwareiti ewe Samol mi Lapalap, oupwe mwareiti an ling me manaman.
PSA 29:2 Oupwe mwareiti lingen iten ewe Samol mi Lapalap. Oupwe fel ngeni i fän üf mi pin.
PSA 29:3 Aramas ra rongorong möngüngün ewe Samol mi Lapalap won ekewe matau. Ewe Kot mi ling a apüngü chopulap. Möngüngün ewe Samol mi Lapalap a tittiriis me won ekewe matau.
PSA 29:4 Möngüngün ewe Samol mi Lapalap a manaman. Möngüngün ewe Samol mi Lapalap a fokun amwarar.
PSA 29:5 Möngüngün ewe Samol mi Lapalap a kupi ekewe irä setar, a kupi ekewe irä setar mi nom won Lepanon.
PSA 29:6 A föri pwe ewe chuk Lepanon a mwetemwet usun eman nienifön kow, nge ewe chuk Hermon a mwetemwet usun eman nienifön ätemwänin kow.
PSA 29:7 Möngüngün ewe Samol mi Lapalap a afifi inefi.
PSA 29:8 Möngüngün ewe Samol mi Lapalap a achechecha ewe fanüapö, a achechecha ewe fanüapön Kates.
PSA 29:9 Möngüngün ewe Samol mi Lapalap a amäräkulu ekewe irä ook o wichikätiu chön irän ewe wöllap. Nge lon imwan imwenfel meinisin ra kökkö, “Kot a ling.”
PSA 29:10 Ewe Samol mi Lapalap a nemenem won ekewe lölö. A nemenem, pun i a king tori feilfeilachök.
PSA 29:11 Ewe Samol mi Lapalap a ngeni nöün kewe aramas pöchökül, a afeiöchü nöün kewe aramas ren kinamwe.
PSA 30:1 Echö än Tafit köl. Echö köl fän iten apinipinin ewe imwenfel. Ai Samol mi Lapalap, üpwe ingeituk, pun ka amanauaei, nge kosap mwüt ngeni ekewe chon pälüeniei pwe repwe ämängauaei.
PSA 30:2 Ai Samol mi Lapalap, ai Kot, üa siö ngonuk pwe kopwe alisiei. Iwe, ka apöchökülaei.
PSA 30:3 Ai Samol mi Lapalap, ka angeeitä seni peias. Üa fetal ngeni ewe lenien sotup, nge en ka amanauaei.
PSA 30:4 Oupwe kölün mwareiti ewe Samol mi Lapalap, ämi nöün kewe chon pin. Oupwe chechemeni Ewe mi Pin o kilisou ngeni.
PSA 30:5 Pun a mochomoch fansoun an song, nge an kirikiröch a wor lon unusen fansoun manauen eman aramas. Lepwin a fis kechü, nge lesosor a fis pwapwa.
PSA 30:6 Lupwen üa nom lon nükünüköch, üa apasa, “Üsap fokun mwökütüküt.”
PSA 30:7 Ren om kirikiröch, ai Samol mi Lapalap, ka anükücharaei usun eu chuk mi pöchökül. Nge lupwen ka amona mesom seniei, üa fokun niuokus.
PSA 30:8 Ai Samol mi Lapalap, üa siö ngonuk. Üa tüngor ngonuk pwe kopwe alisiei.
PSA 30:9 “Met sokun win kopwe angei, are üpwe mäla o tolong lon peias? Ifa usun, chon mäla repwe tongeni mwareituk? Ifa usun, repwe tongeni apworausa usun om allükülük?
PSA 30:10 Ai Samol mi Lapalap, kopwe aüselingaei o ümöümöch ngeniei. Ai Samol mi Lapalap, kopwe alisiei.”
PSA 30:11 Iwe, ka awili ai ngüngüres ngeni pwörük, ka pwiliti seniei üfei üföüfen letipeta o aüföüfa ngeniei pwapwa.
PSA 30:12 Üpwe fokun mwareituk, nge üsap fanafanala. Ai Samol mi Lapalap, ai Kot, üpwe kilisou ngonuk tori feilfeilachök.
PSA 31:1 Ngeni ewe mi emweni chon köl: Echö än Tafit köl. Ai Samol mi Lapalap, üa feito reöm pwe kopwe tümwünüei, kosap mwüt ngeniei pwe üpwe kuf. Kopwe angasaei, en ewe Kot mi pwüng.
PSA 31:2 Kopwe aü selingom ngeniei, kopwe müttir amanauaei. En kopwe ai lenien op usun eu föimw mi pöchökül, pwe kopwe amanauaei.
PSA 31:3 Ewer, en ai achau, pwal imwei imwen maun. Kopwe emweniei o aiti ngeniei ewe al usun ka pwon.
PSA 31:4 Kopwe tümwünüei seni ewe sär mi molotä fän itei, kopwe ti seniei feiengau.
PSA 31:5 Üa atolonga manauei lepoum, kopwe amanauaei, ai Samol mi Lapalap, ewe Kot mi allükülük.
PSA 31:6 Ka oput chokewe mi fel ngeni anümwäl mi lomotongau, nge ngang üa anomu ai apilükülük womw.
PSA 31:7 Üpwe mwänek o pwapwa ren om tong ellet, pun ka küna ai riaföü o silei ai kewe weires.
PSA 31:8 Kosap atolongaei lepöün chon oputaei, nge ka mwüt ngeniei pwe üpwe feila ia üa mochen feila ie.
PSA 31:9 Ai Samol mi Lapalap, kopwe ümöümöch ngeniei, pun ngang üa nom lon riaföü. Mesei ra toputopula ren ai kechü, nge inisi a apwangapwangala.
PSA 31:10 Manauei a mochomochola ren riaföün letipei, nge ierin manauei ren ai ngüngü. Ai pöchökül a kisikisila pokiten ai riaföü, pwal chüi mwo nge ra apwangapwangala.
PSA 31:11 Üa sachowun me ren ekewe chon oputaei meinisin o koput me ren chon ari. Üa och pisekin eniw me ren chon sileei, nge chokewe mi künaei me lon al ra sü seniei.
PSA 31:12 Üa manlüküla me ren aramas usun eman mi mäla, üa usun eu sepi mi mök.
PSA 31:13 Ewer, üa rongorong pwe chomong ra möngününgün. Lupwen ra raweei usun ar repwe angei manauei, niuokus watte a nom pwelin ünüki.
PSA 31:14 Nge ngang üa apilükuk, ai Samol mi Lapalap, üa apasa, “En ai Kot.”
PSA 31:15 Fansoun manauei a nom lepoum. Kopwe angasaeila seni ekewe chon oputaei me ekewe chon ariaföüüei.
PSA 31:16 Kopwe netiu won noum chon angang fän kirikiröch o amanauaei lon om tong ellet.
PSA 31:17 Kosap mwütätä pwe üpwe itengau, ai Samol mi Lapalap, pun üa kökköruk. Nge kopwe mwütätä pwe ekewe aramasangau repwe itengau, repwe fanafanala le feitiu lon lenien sotup.
PSA 31:18 Kopwe afanafanalai ekewe chon chofana ra fos sikesik usun chon pwüng lon ar lamalamtekia me oput.
PSA 31:19 Om kirikiröch a fokun somwola, ka eäni ngeni chokewe mi niuokusituk. Ka pwal kirikiröch ngeni chokewe mi eänuk lenien op me fän mesen aramas meinisin.
PSA 31:20 Ka nonom rer o aopeer seni än ekewe aramas rawangau. Ka tümwünüöchüür me lon leniom seni än ekewe chon oputeer kapasen efitikoko.
PSA 31:21 Üpwe mwareiti ewe Samol mi Lapalap, pun a eäni tong ellet mi amwarar ngeniei, lupwen üa osupwang usun chon eu telinimw ra osupwang, lupwen sounfiu ra pwelifeili fän pisekin maun.
PSA 31:22 Üa ekieki lon ai niuokus pwe a asüeila seni fän mesan. Nge i a rongorong ai tüngor, lupwen üa siö ngeni pwe epwe alisiei.
PSA 31:23 Ämi nöün ewe Samol mi Lapalap chon pin meinisin, oupwe echeni i. Ewe Samol mi Lapalap a tümwünü chokewe mi allükülük, nge a liwiningau ngeni ekewe chon lamalamtekia won en me ükükün liwinin an föför.
PSA 31:24 Oupwe pöchökül o tipepwora, ämi meinisin mi apilükülükü ewe Samol mi Lapalap.
PSA 32:1 Echö än Tafit köl. Echö kölün kait. Feiöchün ätewe an pupungau a musala, nge an tipis a möla.
PSA 32:2 Feiöchün ewe aramas ewe Samol mi Lapalap esap tip ngeni och pwüngingau, ewe aramas ese wor chofana lon lelukan.
PSA 32:3 Lupwen üsap pwärätä ai tipis, inisi a apwangapwangala ren ai kechü lon unusen rän me rän.
PSA 32:4 Pun lerän me lepwin ka apwüngüei. Pöchökülen inisi a morotä usun koluk a morotä lupwen fansoun pwichikar.
PSA 32:5 Mürin üa pwärätä ai tipis ngonuk, nge üsap aopala ai pwüngingau. Üa apasa, “Üpwe pwärätä ngeni ewe Samol mi Lapalap ai pupungau.” Iwe, ka amusala ai tipis meinisin.
PSA 32:6 Iei mine ekewe chon allükülük repwe iotek ngonuk lon fansoun riaföü. Lupwen feiengauen apwüng a war usun eu noter, esap toriir.
PSA 32:7 En eu lenien op fän itei, ka tümwünüei seni weires. Üa leüömong le köl usun om angasaeila.
PSA 32:8 Ewe Samol mi Lapalap a apasa, “Üpwe aiti ngonuk ewe al kopwe fetal won o emwenuk, üpwe öüröürok o mamasok.
PSA 32:9 Kosap wewe ngeni eman oris ika eman aas esap mirit, nge eman a chök tongeni nemeniir, are efoch mächä a nom lon awer fiti efoch säl, pwe repwe aleasochis ngeni.”
PSA 32:10 A wor chomong än ekewe aramasangau riaföü, nge ewe Samol mi Lapalap a tongei o tümwünü chokewe mi anomu ar apilükülük won.
PSA 32:11 Ämi chon pwüng, oupwe pwapwa o meseik ren mine ewe Samol mi Lapalap a föri. Oupwe mweireir fän pwapwa, ämi meinisin mi wenechar lelukemi.
PSA 33:1 Ämi chon pwüng, oupwe köl fän pwapwa ngeni ewe Samol mi Lapalap, A fich ngeni chon wenechar pwe repwe mwareiti i.
PSA 33:2 Oupwe mwareiti ewe Samol mi Lapalap ren ükülele, oupwe ettik ngeni won kitar mi wor engol saitenin.
PSA 33:3 Oupwe köl ngeni echö köl mi fö, oupwe ettikiöchü won ekewe pisekin ettik fiti mweireir mi leüömong.
PSA 33:4 Pun än ewe Samol mi Lapalap kapas a wenechar, an kewe föför ra fis fän allükülük.
PSA 33:5 Ewe Samol mi Lapalap a sani pwüng me let, fanüfan a ur ren an tong ellet.
PSA 33:6 Ewe Samol mi Lapalap a afisi ekewe läng ren an kapas, nge akkar, maram me fü kana ra fisitä ren mine a apasa.
PSA 33:7 A achufengeni ekewe setin lematau lon eu leni usun lon eu rume, a anomu ekewe matau mi alolol lon lenier usun lon eu imwen iseis.
PSA 33:8 Unusen fanüfan epwe niuokusiti ewe Samol mi Lapalap, nge chon fanüfan meinisin repwe meniniti.
PSA 33:9 Pun mine a apasa a fisitä, nge mine a allük a pwönüetä.
PSA 33:10 Ewe Samol mi Lapalap a ataela än chon ekewe mwü akot o pinei än ekewe aramas ekiek.
PSA 33:11 Nge än ewe Samol mi Lapalap akot a nonom tori feilfeilachök, ekiekin lelukan a nonom seni eu täppin aramas tori eu täppin.
PSA 33:12 Feiöchün ewe mwü mi eäni Kot ewe Samol mi Lapalap, feiöchün ekewe aramas i a filiretä pwe epwe nöüniir.
PSA 33:13 Ewe Samol mi Lapalap a nennetiu seni läng, a küna chon fanüfan meinisin.
PSA 33:14 A nennewu seni an we lenien nemenem o küna aramas meinisin mi nonom won fanüfan.
PSA 33:15 I ewe mi afisi ekiekin leluker o silei ar kewe föför meinisin.
PSA 33:16 Eman king esap manau ren watten an mwichen sounfiu, nge eman sounfiu esap ngasala ren an pöchökül mi lapalap.
PSA 33:17 A solap an eäni apilükülük orisin maun pwe epwe win, pun resap tongeni amanaua eman ren ar pöchökül.
PSA 33:18 Ewe Samol mi Lapalap a mamasa chokewe mi niuokusiti, pwal chokewe mi apilükülüküni an tong ellet,
PSA 33:19 pwe epwe angaseer seni mäla o tümwünüür, pwe repwe tongeni manau lupwen fansoun lengita.
PSA 33:20 Sa eäni apilükülük ewe Samol mi Lapalap, pun i ewe chon alisikich a epeti senikich feiengau.
PSA 33:21 Ewer, lelukach a pwapwa ren Kot, pun sa lükü itan mi pin.
PSA 33:22 Ai Samol mi Lapalap, om tong ellet epwe nonom wom, usun äm apilükülük a nom womw.
PSA 34:1 Echö än Tafit köl, lupwen a pomweni pomwen eman chon umwes me fän mesen Apimelek, pwe ätewe a asüela, nge Tafit a feila seni. Üpwe ingemwareiti ewe Samol mi Lapalap fansoun meinisin, üpwe chök mwamwareiti i.
PSA 34:2 Ngang üpwe aingaing won ewe Samol mi Lapalap. Chokewe mi nom lon riaföü repwe rongorong o pwapwa ren.
PSA 34:3 Oupwe etiei le asilefeili än ewe Samol mi Lapalap manaman, ousipwe mwareitifengeni itan.
PSA 34:4 Üa iotek ngeni ewe Samol mi Lapalap, nge i a pälüeniei o angasaei seni ai kewe niuokus meinisin.
PSA 34:5 Oupwe sachetä ngeni i pwe oupwe pwapwa, nge ousap säw.
PSA 34:6 Ewe chon mwelele a siö, nge ewe Samol mi Lapalap a aüselinga o amanaua i seni an weires meinisin.
PSA 34:7 Nöün ewe Samol mi Lapalap chon läng a nom pwelin ünükün chokewe mi niueiti i o angaseer seni feiengau.
PSA 34:8 Oupwe neni o nengeni pwe ewe Samol mi Lapalap a kirikiröch. Ra feiöch ätekewe mi eäni i lenien op.
PSA 34:9 Ämi nöün ewe Samol mi Lapalap kewe chon pin, oupwe meniniti i, pun chokewe mi meniniti i resap osupwang.
PSA 34:10 Ekewe laion ra echik, pun esap wor ener. Nge chokewe mi aleasochis ngeni ewe Samol mi Lapalap resap osun och mettoch mi mürina.
PSA 34:11 Oupwe feito, ämi nei mwän o aüselingaei, üpwe aiti ngenikemi usun ämi oupwe meniniti ewe Samol mi Lapalap.
PSA 34:12 Iö me leimi a pwapwaiti manau o mochen manauatam pwe epwe alomota ekewe feiöch meinisin?
PSA 34:13 Oupwe tümwünükemi pwe ousap eäni kapas mi ngau, ousap pwal kapas chofana.
PSA 34:14 Oupwe kul seni mine a ngau o föri mine a mürina, oupwe kütta kinamwe ren unusen lelukemi.
PSA 34:15 Ewe Samol mi Lapalap a mamasa ekewe chon pwüng, selingan a rongorong ngeni ar siö.
PSA 34:16 Nge a ü ngeni chokewe mi föri mine a ngau, a föri pwe mürin ar mäla aramas repwe müttir manlükirela.
PSA 34:17 Lupwen ekewe chon pwüng ra siön alilis, ewe Samol mi Lapalap a rongorong o angaserela seni ar weires meinisin.
PSA 34:18 Ewe Samol mi Lapalap a kan ngeni chokewe mi luketatakis, a amanaua chokewe mi apilükingau.
PSA 34:19 Chomong riaföü ra tori ewe chon pwüng, nge ewe Samol mi Lapalap a angasala i seniir meinisin.
PSA 34:20 A fokun tümwünü ewe chon pwüng, pwe esap mwo nge kup efoch chün.
PSA 34:21 Föför mi ngau epwe afeiengaua ekewe aramasangau, nge chokewe mi oput ekewe chon pwüng repwe küna liwiningau.
PSA 34:22 Ewe Samol mi Lapalap a amanaua nöün kewe chon angang. Esap wor eman lein chokewe mi eäni Kot lenien op epwe küna liwiningau.
PSA 35:1 Echö än Tafit köl. Ai Samol mi Lapalap, kopwe ü ngeni chokewe mi ü ngeniei, kopwe fiu ngeni chokewe mi fiu ngeniei.
PSA 35:2 Kopwe angei om kewe tittin maun, ewe mi watte me ewe mi kükün, kopwe feito pwe kopwe alisiei.
PSA 35:3 Kopwe öüröürela fän wokum siles me noum kouken maun o ü ngeni ekewe chon tapweriei. Kopwe üreniei, “Ngang om Chon Amanau.”
PSA 35:4 Amwo chokewe mi mochen nieila repwe kuf o itengau. Amwo chokewe mi rawangauaei repwe kulsefäl o rükö.
PSA 35:5 Amwo repwe usun chök pön wiich asepwäl a ässala, nge nöün ewe Samol mi Lapalap chon läng epwe asürela.
PSA 35:6 Amwo aler epwe rochopwak o amitimit, nge nöün ewe Samol mi Lapalap chon läng epwe tapweriir.
PSA 35:7 Pun ra aopala ar sär pwe repwe liapeniei, ra pwal tuw eu pwang pwe üpwe turulong lon, nge esap wor popun.
PSA 35:8 Amwo feiengau mi lapalap epwe toriir mwen ar silei. Amwo repwe püsin tup lon ewe sär ra aopala. Amwo repwe turulong lon ewe pwang o fokun feiengau.
PSA 35:9 Mürin ngang üpwe meseik ren ewe Samol mi Lapalap, üpwe ingemwareiti i pokiten an angasaei.
PSA 35:10 Ngang üpwe apasa ngeni ewe Samol mi Lapalap ren unusen lelukei, “Iö a wewe ngonuk? En ka angasala ewe mi apwangapwang seni ätekewe mi pöchökül seni, ka angasala ewe mi apwangapwang o mwelele seni ätekewe mi eliapa pisekin.”
PSA 35:11 Chon pwärätä chofana ra ü ngeniei, ra atipisiei won föför üsap silei.
PSA 35:12 Ra liwini ngeniei ingau fän iten ai föför mürina. Iwe, üa fokun apilükingau.
PSA 35:13 Nge lupwen ir ra samau, ngang üa üföüf üf seni tuk, üa ariaföüüei ren ai öchüün, üa pworetiu o iotek,
PSA 35:14 üa pwal letipeta usur usun üa letipeta fän iten chienei ika pwii. Üa pworetiu fän ai lolilen o fetalfeil usun eman mi kechüeiti inan.
PSA 35:15 Nge lupwen üa nom lon weires, ra mwicheto rei o takiriei, ra mwichefengen pwe repwe ü ngeniei. Chon ekis üsap sileer me mwan ra kapasingau usi, nge resap ükütiu.
PSA 35:16 Ra chök alapala ar kapasen turunufas, ra afochofoch ngeniei ren ar oputaei.
PSA 35:17 Ai Samol, ifa ükükün fansoun om kopwe chök nenengeni ei lapalap? Kopwe angasaei seni ar afeiengauaei, kopwe amanauaei seni ekei laion.
PSA 35:18 Mürin üpwe kilisou ngonuk lon ewe mwichelapen noum aramas, üpwe mwareituk me lein ewe mwicheichen aramas.
PSA 35:19 Kosap mwüt ngeni chon palüeniei, nge esap wor popun, pwe repwe takirin ämängauaei, kosap pwal mwüt ngeni chokewe mi oputafatei pwe repwe takiriei ren ai letipeta.
PSA 35:20 Iwe, resap eäni kapas pwetete, nge ra eäni kapasen tipitipmwäl ngeni chokewe mi mosonoson lon ewe fanü.
PSA 35:21 Ra atipisiei fän leüömong o apasa, “Aha, aha, mesem ra küna mine ka föri.”
PSA 35:22 Nge en, ai Samol mi Lapalap, ka küna ei lapalap, kosap fanafanala. Ai Samol, kosap toau seniei.
PSA 35:23 Ai Samol, kopwe amwökütuk o ütä pwe kopwe pwärawu ai pwüng. Kopwe peniei, ai Kot.
PSA 35:24 Ai Samol mi Lapalap ai Kot, en ka pwüng, kopwe aletätä ai pwüng, nge kosap mwüt ngeni ekewe chon oputaei pwe repwe takirin ämängauaei.
PSA 35:25 Kosap mwüt ngeniir pwe repwe apasa lefiler, “Aha, a torikich mochenin letipach. Sa awesi manauan.”
PSA 35:26 Amwo chokewe meinisin mi pwapwaäsini ai feiengau repwe säw o osukosuk. Amwo chokewe meinisin mi lamalamtekia ngeniei repwe küna säw me itengau.
PSA 35:27 Amwo chokewe mi mochen pwe epwe pwä ai pwüng repwe meseik o mweireiren pwapwa, repwe pwal apasafochei, “Ewe Samol mi Lapalap a tekia, a pwapwa ren feiöchün nöün chon angang.”
PSA 35:28 Mürin üpwe apworausafeili om pwüng o kölün mwareituk fansoun meinisin.
PSA 36:1 Ngeni ewe mi emweni chon köl: Echö köl än Tafit nöün ewe Samol mi Lapalap chon angang. Tipis a nom lon leluken eman aramasangau o kapas ngeni. Esap wor an meniniti Kot.
PSA 36:2 A lamalamtekia won inisin o ekieki pwe Kot esap tongeni küna o oput an tipis.
PSA 36:3 An kewe kapas ra mwäl me chofana. Esap chüen föri föför mi mirit me mürina.
PSA 36:4 Lupwen a kon won an peet, a ekiekietä mine a ngau. Esap mwo nge föri mine a mürina, esap pwal oput mine a ngau.
PSA 36:5 Ai Samol mi Lapalap, om tong ellet a tori ekewe läng, om allükülük a tori ekewe kuchu.
PSA 36:6 Om pwüng a tekia usun chök ekewe chuk, nge om kapwüng a usun chök matau mi alolol. Ai Samol mi Lapalap, ka tümwünü aramas me man.
PSA 36:7 Ai Kot, om tong ellet a fokun aüchea. Aramas meinisin ra op fän nürün poum.
PSA 36:8 Ra kametip won somwen mongö lon imwom. Ka aünüür koluk seni ewe chanpupun om pwapwa.
PSA 36:9 Pun en ewe lepopun manau meinisin, nge ren om saram äm aia küna saram.
PSA 36:10 Kose mochen kopwe sopwela om tong ellet ngeni chokewe mi sileek, kopwe pwal sopwela om amanaua chokewe mi wenechar leluker.
PSA 36:11 Kosap mwüt ngeni ekewe chon lamalamtekia pwe repwe afeiengauaei. Kosap pwal mwüt ngeni ekewe aramasangau pwe repwe asüeila.
PSA 36:12 Nengeni ia ekewe chon föföringau ra turutiu ie. Ikenan ra konola, nge resap chüen tongeni pwätäsefäl.
PSA 37:1 Echö än Tafit köl. Kosap achouuk pokiten ekewe aramasangau, nge kosap lolowo ngeni chokewe mi föri mine a ngau.
PSA 37:2 Pun repwe pwasekai usun fetil, repwe pwal mäla usun pötöwöl mi pwasala.
PSA 37:3 Kopwe apilükülükü ewe Samol mi Lapalap o föri mine a mürina, pwe kopwe nonom lon ewe fanü fän kinamwe.
PSA 37:4 Ewe Samol mi Lapalap i chök epwe om pwapwa, nge i epwe ngonuk mochenin lelukom.
PSA 37:5 Kopwe lükü ngeni ewe Samol mi Lapalap manauom o apilükülük ngeni, nge i epwe alisuk.
PSA 37:6 Epwe pwärawu om pwüngüöch pwe epwe usun saram, nge om pwüng pwe epwe usun tinen akkaren leoloas.
PSA 37:7 Kopwe fanafanala me fän mesen ewe Samol mi Lapalap o likitü le witiwiti i. Kosap achouuk ren ekewe aramas mi pisekisekila, pwal ren chokewe mi afisätä ar rawangau.
PSA 37:8 Kopwe ükütiu seni song o likitala lingeringer. Kosap achouuk, pun a chök emwenukelong lon mine a ngau.
PSA 37:9 Pun ekewe aramasangau repwe käriwu, nge chokewe mi apilükülükü ewe Samol mi Lapalap repwe fanüeni ewe fanü.
PSA 37:10 Lon fansoun mochomoch echök ekewe aramasangau resap chüen nom. Inamwo are kopwe küttafichiir lon lenier, nge resap nom ikenan.
PSA 37:11 Nge ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.
PSA 37:12 Ekewe aramasangau ra rawangauei ewe chon pwüng o afochofoch ngeni.
PSA 37:13 Nge ewe Samol a takiri ekewe aramasangau, pun a silei pwe a arap ränin ar mäla.
PSA 37:14 Ekewe aramasangau ra üttawu nöür ketilas o emeia nöür likapich, pwe repwe afeiengaua ekewe mi wöüngau me mwelele, repwe pwal niela chokewe mi föri mine a pwüng.
PSA 37:15 Nge repwe mäla ren püsin nöür ketilas, nge ar likapich epwe kup.
PSA 37:16 Än eman chon pwüng pisek mi chokükün a mürina seni wöün ekewe aramasangau meinisin.
PSA 37:17 Pun pöchökülen ekewe aramasangau epwe wesila, nge ewe Samol mi Lapalap epwe alisi ekewe chon pwüng.
PSA 37:18 Ewe Samol mi Lapalap a tümwünü ekewe aramas esap wor ar tipis, repwe chök fafanü fanüer tori feilfeilachök.
PSA 37:19 Lon fansoun feiengau resap küna säw, nge lon ränin lengita epwe somwola ener mongö.
PSA 37:20 Nge ekewe aramasangau repwe rosola. Ekewe chon oputa ewe Samol mi Lapalap ra usun chök lingen ekewe pön ira mi morola lon ekewe mälämäl, repwe moropöküla usun och ötüöt.
PSA 37:21 Ewe aramasangau a liwinimang, nge esap tongeni amusasefäli. Nge ewe chon pwüng a kirikiröch o fangafangöch.
PSA 37:22 Pun chokewe mi feiöch me ren ewe Samol mi Lapalap repwe fanüeni ewe fanü, nge chokewe mi anümamau me ren Kot repwe kärila.
PSA 37:23 Ewe Samol mi Lapalap a emweni eman aramas won ewe al epwe fetal won, a pwal anüküchara i, pun a pwapwa ren.
PSA 37:24 Are epwe tur, esap turuchapala, pun ewe Samol mi Lapalap a kamwöch pöün.
PSA 37:25 Seni me lom, lupwen ngang üa eman alüal, tori iei üa chinlap, üsap küna mwo eman chon pwüng epwe sachawun, ika nöün kana repwe tütüngorfetal ener mongö.
PSA 37:26 Ewe chon pwüng a fangafangöch o mwütätä pisekin ngeni aramas, nge nöün kana ra wään feiöch ngeni aramas.
PSA 37:27 Kopwe sü seni mine a ngau o föri mine a mürina, mürin kopwe nonomöch lon ewe fanü fän kinamwe.
PSA 37:28 Pun ewe Samol mi Lapalap a efich mine a pwüng, esap likitala nöün kewe mi allükülük. Ewe Samol mi Lapalap a tümwünü ekewe chon pwüng tori feilfeilachök, nge mwirimwirin ekewe aramasangau repwe kärila.
PSA 37:29 Ekewe chon pwüng repwe fanüeni ewe fanü o nonom won tori feilfeilachök.
PSA 37:30 Ewe chon pwüng a eäni fos mirit, a chök apasa mine a pwüng.
PSA 37:31 Än Kot kewe allük ra nom lon lelukan, nge esap tokola seniir.
PSA 37:32 Eman aramasangau a opoperi ewe chon pwüng o kütta an epwe niela.
PSA 37:33 Nge ewe Samol mi Lapalap esap asechala ewe chon pwüng fän nemenien ewe chon oputa, esap pwal mwüt ngeni pwe epwe etipisi lon kapwüng.
PSA 37:34 Kopwe anomu om apilükülük won ewe Samol mi Lapalap o aleasochisi an kewe allük. I epwe atekioketä pwe kopwe fanüeni ewe fanü, nge en kopwe nenengeni, lupwen ekewe aramasangau repwe kasüla.
PSA 37:35 Üa küna eman aramasangau a nemenem fän pöchökül, a fokun tekiatä won aramas meinisin usun efoch irä setar won Lepanon.
PSA 37:36 Mürin üa pwal pweresefälila ren, nge esap chüen nom. Üa kütta i, nge üsap chüen küna.
PSA 37:37 Kopwe afota ewe aramas esap wor an tipis o nenengeni ätewe mi wenechar. A wor mwirimwirin ätewe mi afisätä kinamwe,
PSA 37:38 nge ekewe chon tipis repwe rosola meinisin, pwal mwirimwirin ekewe aramasangau repwe kärila.
PSA 37:39 Ewe Samol mi Lapalap a amanaua ekewe chon pwüng, i ar lenien op lon fansoun riaföü.
PSA 37:40 Ewe Samol mi Lapalap a alisiir o angaseer. A angaserela seni ekewe aramasangau o amanaueer, pun ra eäni i lenien op.
PSA 38:1 Echö än Tafit köl fän iten asoren achechem. Ai Samol mi Lapalap, kosap apwüngüei lon om song, kosap pwal ninniei lon om lingeringer.
PSA 38:2 Pun ka akinasaei ren wokum kewe föün esefich, ka pwal amiritiei.
PSA 38:3 Esap wor pöchökülen inisi pokiten om song, esap pwal wor pöchökülen lechüi pokiten ai tipis.
PSA 38:4 Üa pwölüla fän ai kewe föför mi ngau, ra chou usun och mettoch mi kon chou ngeniei.
PSA 38:5 Kinasei kewe ra pwongau o not pokiten ai umwesila lon tipis.
PSA 38:6 Üa wesewesen pworetiu o chapala, fansoun meinisin üa lolilen.
PSA 38:7 Üa samaun pwichikar, esap fokun wor pöchökülen inisi.
PSA 38:8 Üa aiemalü o fokun apwangapwang, üa ngüngü pokiten riaföün lelukei.
PSA 38:9 Ai Samol, en ka silei mochenin letipei meinisin, ka rongorong ai ngüngü meinisin.
PSA 38:10 Lelukei a chechech, ai pöchökül a sü seniei, pwal mesei esap chüen neneöch.
PSA 38:11 Pwii kewe me chiechiei resap kaneto rei pokiten ai samau, pwal mwo nge aramasei ra ütä me toau.
PSA 38:12 Chokewe mi mochen nieila ra amolätä ar kewe sär, nge chokewe mi mochen ariaföüüei ra kapas usun ar repwe afeiengauaei, ra chök ekiekin rawangauaei fansoun meinisin.
PSA 38:13 Nge ngang üa usun eman aramas mi selingapwas esap tongeni rongorong. Üa usun eman aramas mi awemwöch esap tongeni fos.
PSA 38:14 Ewer, ngang üa usun eman aramas esap tongeni rongorong, esap pwal wor an kapasen pälüeni.
PSA 38:15 Nge ngang üa apilükülükuk, ai Samol mi Lapalap. Ai Samol me ai Kot, en ätewe mi pälüeniei.
PSA 38:16 Pun üa iotek, pwe kosap fokun mwüt ngeni ekewe chon oputaei pwe repwe takirin ämängauaei o esitaei, lupwen üa mit.
PSA 38:17 Pun üa arap ngeni ai üpwe turula, üa chök memetek fansoun meinisin.
PSA 38:18 Üa pwärätä ai kewe föför mi ngau, üa pwal lolilen ren ai tipis.
PSA 38:19 Chokewe mi oputaei ra fokun pöchökül, nge chokewe mi oputafateei ra chomong.
PSA 38:20 Chokewe mi liwini ngeniei ingau fän iten ai föför mürina, ir chon ü ngeniei, pun üa föri mine a pwüng.
PSA 38:21 Ai Samol mi Lapalap, kosap likitieila, ai Kot, kosap toau seniei.
PSA 38:22 Kopwe kaito pwe kopwe alisiei, ai Samol, ai Chon Amanau.
PSA 39:1 Ngeni ewe mi emweni chon köl: ngeni Jetutun. Echö än Tafit köl. Üa apasa, “Üpwe püsin tümwünüei ren mine üa föri, üsap pwal mwüt ngeni chönawei pwe epwe apasa och mine üa tipis ren. Üpwe pinei awei lon ükükün fansoun än ekewe aramasangau nom rei.”
PSA 39:2 Üa mosonoson o fanafanala, üsap mwo nge apasa och mi mürina. Nge ai riaföü a chök wattela.
PSA 39:3 Üa fokun lolilen. Iwe, lupwen üa ekinlon, ai riaföü a chök lapala. Mürin, üa kapas.
PSA 39:4 “Ai Samol mi Lapalap, kopwe asile ngeniei sopolan manauei, pwal ükükün langatamen ränin manauei. Kopwe asile ngeniei müttirin än manauei sü seniei.
PSA 39:5 Nengeni, ka föri pwe tamen ränin manauei ra chök usun tamen ekoch chöchön lon pau. Fansoun manauei a usun chök nge esor me fän mesom. Ellet, iteiten aramas mi nom won ei fanüfan ra usun chök eu enienin asepwäl.
PSA 39:6 Ellet, aramas ra usun chök ngünüen mettoch. Meinisin mine ra anganga esap wor lomotan. Aramas ra achukuchukätä wöür, nge resap silei iö epwe angei me mürin.
PSA 39:7 Ai Samol, met üpwe tongeni ösüküsükü iei? Ai apilükülük a nom womw.
PSA 39:8 Kopwe amanauaei seni ai tipis meinisin. Kosap mwüt ngeni ekewe chon umwes pwe repwe turunufaseei.
PSA 39:9 Üa fanafanala, üsap tongeni kapas, pun en ewe mi atolongaei lon ei riaföü.
PSA 39:10 Kose mochen kosap chüen ninniei. Üa arap ngeni mäla ren om wichiei.
PSA 39:11 Lupwen ka apwüngü eman aramas ren om fönöü pokiten an tipis, ka ataela mettochun meinisin mi aüchea ngeni, usun pwötür ra enala mettoch. Ellet, iteiten aramas ra usun chök eu enienin asepwäl.
PSA 39:12 Ai Samol mi Lapalap, kopwe aüselinga ai iotek, kopwe aü selingom ngeni ai siö. Kosap fanafanala, lupwen üa kechü. Pun ngang üa chök eman wasöla reöm, üa eman chon siamü usun ai kewe lewo meinisin.
PSA 39:13 Kopwe nenne seniei pwe üpwe tongeni pwapwa me mwen ai üpwe mäla, nge üsap chüen nom.”
PSA 40:1 Ngeni ewe mi emweni chon köl: Echö än Tafit köl. Üa likitü le witiwiti än ewe Samol mi Lapalap epwe alisiei. I a aüselingaei o rongorong ai siö.
PSA 40:2 A efieitä seni lon ewe pwang mi afeiengau, seni lon ewe pwakak, a anomuei won eu achau o anüküchara pechei pwe üsap mit.
PSA 40:3 A aiti ngeniei echö köl mi fö, echö kölün mwareiti ach Kot. Chomong repwe küna ei o niuokus, repwe anomu ar apilükülük won ewe Samol mi Lapalap.
PSA 40:4 A feiöch eman aramas a anomu an apilükülük won ewe Samol mi Lapalap, ätewe esap kul ngeni chon lamalamtekia, ika eti chokewe mi fel ngeni ekewe uluulun anümwäl.
PSA 40:5 Ai Samol mi Lapalap ai Kot, ka föri chomong föför mi amwarar me om akot ngenikem, esap wor eman a wewe ngonuk. Are üpwe asilefeiliir o apworausa usur, repwe chomong seni ai üpwe tongeni aleaniir.
PSA 40:6 Kosap mochen ekewe asor me lifang, nge ka ngeniei selingei pwe üpwe rongorong ngonuk. Kosap allük pwe üpwe eäni asoren kek me asoren tipis.
PSA 40:7 Mürin üa apasa, “Ngang iei, üa feito. Lon ewe puken allük a mak usi.
PSA 40:8 Üa pwapwa le föri letipom, ai Kot, om allük a nom lon lelukei.”
PSA 40:9 Üa apworausa ewe pworaus mi mürina usun om amanauakem me lon ewe mwichen noum aramas meinisin. Üsap fokun ükütiu le apworausa usun, ka fen silei, ai Samol mi Lapalap.
PSA 40:10 Üsap aopala ewe pworausen om amanauakem. Üa kapas usun om allükülük me om alisikem. Üsap tukumala seni ewe mwichen noum aramas meinisin om tong ellet me om allükülük.
PSA 40:11 Ai Samol mi Lapalap, kosap amwöchü seniei om ümöümöch. Om tong ellet me om allükülük repwe tümwünüei.
PSA 40:12 Chomong osukosuk ra pwelifeiliei, esap wor eman a tongeni aleaniir. Ai kewe tipis ra rongeeila pwe üsap chüen künaei, ra kon chomong lap seni meten mökürei, nge lelukei a kisikisila.
PSA 40:13 Ai Samol mi Lapalap, kose mochen kopwe amanauaei. Ai Samol mi Lapalap, kopwe kaito pwe kopwe alisiei.
PSA 40:14 Amwo meinisin mi mochen nieila repwe säw o tolong lon fitikoko. Amwo chokewe mi tipeni ai üpwe feiengau repwe kulsefäl o itengau.
PSA 40:15 Amwo chokewe mi ämängauaei repwe fokun rükö ren ar kuf.
PSA 40:16 Nge meinisin mi feito reöm repwe meseik o pwapwa. Chokewe mi aücheani om amanaueer repwe apasafochei, “Ewe Samol mi Lapalap a tekia.”
PSA 40:17 Nge ngang üa wöüngau o osupwang, nge en ai Samol, ka ekiekiei. En ai chon alilis me ai Chon Amanau. Ai Kot, kosap mang le alisiei.
PSA 41:1 Ngeni ewe mi emweni chon köl: Echö än Tafit köl. Ra feiöch chokewe mi ekieki ekewe mi apwangapwang o wöüngau. Ewe Samol mi Lapalap epwe angaserela lon ränin ar riaföü.
PSA 41:2 Ewe Samol mi Lapalap epwe tümwünüür o amwöchü manauer, nge ir repwe iteni chokewe mi feiöch me lon ewe fanü. Iwe, esap atolongeer lepöün ekewe chon oputeer.
PSA 41:3 Ewe Samol mi Lapalap epwe tümwünüür won ar kiekien samau, nge lupwen ra apwangapwang, epwe apöchöküleer seni ar samau meinisin.
PSA 41:4 Nge ngang üa apasa, “Ai Samol mi Lapalap, kopwe ümöümöch ngeniei o apöchökülaei, pun üa tipis ngonuk.”
PSA 41:5 Chon oputaei ra kapas usi lon ar ekingau, “Inet ätei epwe mäla pwe itan epwe mola?”
PSA 41:6 Lupwen eman a feito pwe epwe churiei, a chök eäni kapas pön. Nge lon lelukan a ioi ekiekingau usi. Mürin a towu lükün o apworausafetalei.
PSA 41:7 Meinisin mi oputaei ra mwöngününgünfengen usi, ra ekiekietä mine a fokun ngau ngeniei.
PSA 41:8 Iwe, ra apasa, “A üri och samaungau, esap chüen tongeni pwätä seni an kiekien samau.”
PSA 41:9 Pwal chiechiei mi fokun kan ngeniei, üa pwal fokun lükü, ätewe mi mongö rei, a ü ngeniei.
PSA 41:10 Nge en, ai Samol mi Lapalap, kopwe ümöümöch ngeniei o apöchökülaei, pwe üpwe tongeni liwini ngeni ekewe chon oputaei ükükün ar föför.
PSA 41:11 Üa silei pwe en ka pwapwaitiei, pun ekewe chon oputaei resap tongeni akufuei.
PSA 41:12 En ka alisiei, pun üa föri mine a pwüng, ka pwal anomuei fän mesom tori feilfeilachök.
PSA 41:13 Oupwe mwareiti ewe Samol mi Lapalap ewe Koten Israel seni lomlom tori feilfeilachök. Amen, Amen.
PSA 42:1 Ngeni ewe mi emweni chon köl: Echö än nöün Kora kewe mwän kölün kait. Usun eman chia a positi lölön chanpupu, iei usun ngang üa posituk, ai Kot.
PSA 42:2 Üa fokun posituk, en ai Kot mi manau. Inet üpwe tongeni feila o nenengeni mesom?
PSA 42:3 Chönün mesei a fisitiu pwe enei mongö lerän me lepwin, pun aramas ra aispat ngeniei, “Ifa i om we Kot?”
PSA 42:4 Lelukei a tatakis, lupwen üa chechemeni ekei mettoch: Usun üa eti ewe mwicheichen aramas o emweniir lon och tettel le feila ngeni ewe imwen Kot, eu mwichemongun aramas mi mweireiren pwapwa me kölün kilisou.
PSA 42:5 Ngüni, pwota ka letipengau, pwota ka ngüngü me loi? Üpwe apilükülükü Kot, pun üpwe mwareitisefäli i, ai Chon Amanau me ai Kot.
PSA 42:6 Ngüni a letipengau me loi. Iei mine üa chechemenuk seni ewe fanü pekilan ewe chanpupu Jortan, seni ewe chuk Hermon me ewe chuk Misar.
PSA 42:7 Eu lenien alolol a kökkörato pwal eu lenien alolol, lupwen om kewe koluk mi putiu ra püngümong. Om kewe no meinisin me om kewe nolapalap ra pwölüeila.
PSA 42:8 Lerän ewe Samol mi Lapalap a pwärawu an tong ellet, nge lepwin üa eäni echö an köl, üa iotek ngeni ewe Kot mi ngeniei manau.
PSA 42:9 Üa kapas ngeni Kot ai achau, “Pwota ka manlükieila? Pwota üa chök ngüngüres pokiten ai riaföü ren chon oputaei?”
PSA 42:10 Usun chök nge chüi ra kup, lupwen chon ü ngeniei ra ämängauaei ren ar aispat ngeniei, “Ifa i om we Kot?”
PSA 42:11 Ngüni, pwota ka letipengau, pwota ka ngüngü me loi? Üpwe apilükülükü Kot, pun üpwe mwareitisefäli i ai Chon Amanau me ai Kot.
PSA 43:1 Ai Kot, kopwe aletätä ai pwüng o peniei seni ekewe aramas resap aleasochis ngonuk. Kopwe angasaei seni ekewe aramas mi atuputup o pwüngingau.
PSA 43:2 Pun en ewe Kot üa eänuk lenien op. Pwota ka pöütieila? Pwota üa chök ngüngüres pokiten ai riaföü ren chon oputaei?
PSA 43:3 Kopwe tinato om saram me om let pwe repwe emweniei, repwe emwenieila ngeni chukum mi pin, pwal ngeni imwom ia ka nom ie.
PSA 43:4 Mürin üpwe feila ren om rongen asor, ai Kot en popun ai pwapwa mi fokun lapalap. üpwe kölün mwareituk won ükülele, en ai Kot.
PSA 43:5 Ngüni, pwota ka letipengau, pwota ka ngüngü me loi? Üpwe apilükülükü Kot, pun üpwe mwareitisefäli ai Chon Amanau me ai Kot.
PSA 44:1 Ngeni ewe mi emweni chon köl: Echö än nöün Kora kewe mwän kölün kait. Ai Kot, äm aia rongorong ren püsin selingem, pun äm kewe lewo ra apworausa ngenikem usun om kewe föför ka föriir lon ränin manauer, lon ekewe fansoun lom.
PSA 44:2 Ka püsin asüela chon ekewe mwü, nge ka fotukätiu äm kewe lewo lon ewe fanü. Ka ariaföüü ekewe aramas, nge ka angasa äm kewe lewo.
PSA 44:3 Pun resap liapeni ewe fanü ren püsin nöür ketilas, resap pwal win ren püsin ar pöchökül, ngei ren om pöchökül me manaman, pwal ren om nonom rer, pun ka tongeer.
PSA 44:4 En ai king me ai Kot, ka akota pwe noum kewe aramas repwe win.
PSA 44:5 Ren om manaman aia akufätiu ekewe chon oputakem. Pokiten itom aia purätiu ekewe chon fiu ngenikem.
PSA 44:6 Pun üsap lükü ai likapich, nei ketilas esap pwal tongeni amanauaei.
PSA 44:7 Nge en ka amanauakem seni ekewe chon ü ngenikem o akufu chokewe mi oputakem.
PSA 44:8 Äm aia chök aingaing womw en äm Kot fansoun meinisin o kilisou ngonuk tori feilfeilachök.
PSA 44:9 Nge iei ka pöütikeemila o föri pwe aipwe kuf, kosap pwal chüen eti äm mwichen sounfiu le feila ngeni maun.
PSA 44:10 En ka föri pwe äm aipwe timär me mwen ekewe chon ü ngenikem, nge ekewe chon oputakem ra angei liaper senikem fän pöchökül.
PSA 44:11 Ka asechikeemilong lepöür pwe repwe niikem usun sip mi amol ngeni ar repwe ninnila, ka pwal atoropasafeilikem lein chon ekewe mwü.
PSA 44:12 Ka amömöla noum kewe aramas ren liwin mi kisikis, nge kosap angei och win ren om amömörela.
PSA 44:13 Ka föri pwe äm aia uren takir me ren chon arüm, ir ra ämängauakem o esitakem.
PSA 44:14 Ka föri pwe chon ekewe mwü ra leawenikem lon ar kapasen turunufas, ra elifechefech ren ar ämängauakem.
PSA 44:15 Fansoun meinisin üa itengau, üa pwölüla ren ai säw
PSA 44:16 pokiten än ekewe chon ämängau me chon turunufas kapas, pwal pokiten än ekewe chon oputaei liwiningau ngeniei.
PSA 44:17 Ekei mettoch meinisin ra fis ngenikem, nge äm aisap manlükukala ika atai om we pwon.
PSA 44:18 Äm aisap kul senuk, äm aisap pwal aleasolap ngeni om kewe allük.
PSA 44:19 Nge en ka atatakisikem me lon lenien ekewe kolak mi mwacho o pwölükeemila ren rochokichin mäla.
PSA 44:20 Are äm aipwe manlükala iten äm we Kot ika iotek ngeni pwal eman koten ekis,
PSA 44:21 ifa usun, Kot esap küna ei föför? Ewer, pun Kot a silei mine a monomon me lon lelukem.
PSA 44:22 Nge fansoun meinisin aia küna ninni pokitom, äm aia wewe ngeni sip mi amol ngeni ar repwe ninnila.
PSA 44:23 Ai Samol, kopwe pwök! Pwota ka annut? Kopwe nennela! Kosap pöütifochekeemila.
PSA 44:24 Pwota ka amona mesom senikem? Kosap manlükala äm riaföü me weires.
PSA 44:25 Pun äm aia turula lon pwülümoromor, inisim ra pacheri pwül.
PSA 44:26 Kopwe ütä o feito pwe kopwe alisikem. Kopwe angasakem pokiten om tong ellet.
PSA 45:1 Ngeni ewe mi emweni chon köl: Ei köl usun ngingin ewe köl itan Kiop. Echö än nöün Kora kewe mwän kölün kait. Echö kölün tong. Lelukei a säsewu ren pworaus mi mürina. Üpwe apasa ekewe wokisin lon ai we köl fän iten ewe king. Chönawei a usun nöün eman soumak pen mi molotä.
PSA 45:2 En ka äteöch seni mwän meinisin, kapasen awom ra pwetete, iei mine Kot a afeiöchuk fansoun meinisin.
PSA 45:3 En ewe mi pwora, kopwe rietä noum ketilas won wänükum, ka ling o manaman.
PSA 45:4 Fän om manaman kopwe fetal ngeni win pwe kopwe peni let, tipefesir me pwüng. Ren om pöchökül kopwe föri föför mi amwarar.
PSA 45:5 Wokum kewe föün esefich ra ken, ra fotolong lon luken ekewe chon oputom. Chon ekewe mwü ra kuf fomw.
PSA 45:6 Om lenien motun king a usun chök än Kot lenien mot, a nom tori feilfeilachök. Ka nemeni noum kewe aramas fän pwüng.
PSA 45:7 Ka efich pwüng, nge ka oput mi ngau. Iei mine Kot, om we Kot a filuketä, a fang ngonuk pwapwa lap seni an fang ngeni chienom kewe.
PSA 45:8 Ufom kewe meinisin ra pwokus ren pwonnen lö seni ekewe irä mör, aloes me kasia. Chon ettiki pisekin ettik mi wor saitenir ra apwapwook me lon imwen king mi fout ngeni ngiin äläfant.
PSA 45:9 Nöün ekewe king föpwül ra nom lein ekewe fefin mi nom lon imwom, nge ewe kiwiin mi ütä lepelifichum a fout ngeni kolt seni Ofaia.
PSA 45:10 Nei föpwül, kopwe rongorong ai kapas o ekieki usur. Kopwe manlükala aramasom me chon leimwen semom,
PSA 45:11 mürin, ewe king epwe fokun sani liöchum. Kopwe tütiu me mwan, pun i om samol.
PSA 45:12 Ekewe aramasen Tirus repwe uwato ar lifang ngonuk, ekewe aramas mi fokun pisekisek repwe kütta chenir me reöm.
PSA 45:13 Nöün ewe king föpwül a unusen ling me lon rumwan, üfan kewe ra tür seni terech kolt.
PSA 45:14 Ra emwenala i ren ewe king fän üfan mi sokopat önüan, ra pwal emwenala chienan kewe föpwül mi tapwela mürin.
PSA 45:15 Ra feito o tolong lon imwen ewe king fän pwapwa o mweireir.
PSA 45:16 Noum kewe mwän repwe akasiwili om kewe lewo lon wisen king. Ka awiseer pwe repwe nemenem won unusen fanüfan.
PSA 45:17 Üpwe pwärala om iteföüla seni eu täppin aramas tori pwal eu täppin. Iei mine chon ekewe mwü repwe mwareituk tori feilfeilachök.
PSA 46:1 Ngeni ewe mi emweni chon köl: Echö köl än nöün Kora kewe mwän. Ei köl usun ngingin sopran. Kot ach lenien op me ach pöchökül, a sip le alilis lon fansoun riaföü.
PSA 46:2 Iei mine sisap niuokus are fanüfan epwe wilila, nge chuk kana repwe kokotiu lealololun matau,
PSA 46:3 are nonon lematau epwe püng o puropur, nge ekewe chuk repwe chechech ren püngüpüngün.
PSA 46:4 Mi wor eu chanpupu mi awarato pwapwa ngeni ewe telinimwen Kot, ewe leni mi pin än Ewe mi Unusen Tekia.
PSA 46:5 Kot a nonom lon ewe telinimw pwe esap fokun tala. Lesosorusich Kot epwe alisi ewe telinimw.
PSA 46:6 Chon ekewe mwü ra fokun niuokus, nge mwün ekewe king ra taroporop. Iwe, lupwen Kot a akkapwas, fanüfan a telila.
PSA 46:7 Ewe Samol mi Unusen Manaman a etikich, än Jakop we Kot i ach lenien op mi pöchökül.
PSA 46:8 Oupwe feito o nenengeni än ewe Samol mi Lapalap föför, usun an ataela fanüfan.
PSA 46:9 A aükätiu maun won unusen fanüfan, a kupi ekewe likapich o pwülü ekewe siles, a fisi ngeni ekkei ekewe wokenin maun.
PSA 46:10 A apasa, “Oupwe emwen le maun, oupwe silei pwe ngang echök Kot. Ngang üa tekia seni chon ekewe mwü, ngang üa tekia won fanüfan.”
PSA 46:11 Ewe Samol mi Unusen Manaman a etikich, än Jakop we Kot i ach lenien op mi pöchökül.
PSA 47:1 Ngeni ewe mi emweni chon köl: Echö köl än nöün Kora kewe mwän. Oupwe alopolop ämi chon ekewe mwü meinisin. Oupwe mweireir fän leüömong ren kölün pwapwa.
PSA 47:2 Sipwe niuokusiti ewe Samol mi Lapalap, Ewe mi Unusen Tekia, i eman king mi lap a nemeni unusen fanüfan.
PSA 47:3 A asapwilätiu chon ekewe mwü fach o atolonga ekewe mwü fän nemeniach.
PSA 47:4 A filätä fän itach ewe fanü sa fanüeni, ewe fanü nöün aramas ra aücheani, ir chokewe Kot a tongeer.
PSA 47:5 Kot a feitä ren an lenien motun king fän mweireiren pwapwa, ewe Samol mi Lapalap a feitä fän tikin rappwa.
PSA 47:6 Oupwe kölün mwareiti Kot, oupwe kölün mwareiti. Oupwe kölün mwareiti ach king, oupwe kölün mwareiti.
PSA 47:7 Pun Kot i kingen unusen fanüfan, oupwe mwareiti i ren echö köl mi pin.
PSA 47:8 Kot a nemeni ekewe mwü, Kot a mot won an lenien motun king mi pin.
PSA 47:9 Ekewe samolun ekewe mwü ra mwichefengen, ir ewe mwichen aramas nöün än Apraham we Kot. Pun ekewe kingen fanüfan nöün Kot, i a fokun tekia mwer meinisin.
PSA 48:1 Echö köl än nöün Kora kewe mwän. Ewe Samol mi Lapalap a tekia, nge aramas meinisin repwe fokun mwareiti i me lon ewe telinimwen ach Kot, me won chukun mi pin.
PSA 48:2 Ewe chuk Sion a tekia o fokun lingöch, chon fanüfan meinisin ra pwapwaiti. Lepekin ewe chuk kükü ngeni efeng a nom telinimwen ewe king mi lap.
PSA 48:3 Kot a nom lon ekewe imwen king. A pwärätä pwe i ewe lenien op mi pöchökül.
PSA 48:4 Ekewe king ra mwichefengen, ra mwinepöküto le feito pwe repwe maun ngeni ewe telinimw.
PSA 48:5 Nge lon ewe otun, lupwen ra küna ewe telinimw, ra weitifengeniir, ra niuokus o süla.
PSA 48:6 Ikenan niuokus a toriir, cheuch a cheriir usun eman fefin a tori an cheuchen famw.
PSA 48:7 Ka aroserela usun asepwälin ötiu a ataela ekewe sipen Tarsis.
PSA 48:8 Usun mine sa rongorong, iei usun sa pwal küna me lon ewe telinimwen ewe Samol mi Unusen Manaman, me lon ewe telinimwen ach Kot. I a anüküchara ewe telinimw tori feilfeilachök.
PSA 48:9 Ai Kot, äm aia ekieki usun om we tong ellet me lon ewe imwenfel.
PSA 48:10 Ai Kot, usun aramas won unusen fanüfan ra silei itom, iei usun ra pwal mwareituk. Ka nemenem fän pwüng.
PSA 48:11 Ekewe aramasen Sion repwe pwapwa. Ekewe telinimwen Juta repwe mweireir pokiten ka eäni kapwüng fän pwüng.
PSA 48:12 Ämi aramasen Kot, oupwe fetalfeil lon Sion o pwelifeili, oupwe aleani ekewe imw tekia lon.
PSA 48:13 Oupwe nenengenöchü tittin mi pöchökül o katolfeil ekewe imwen king, pwe oupwe tongeni apworausa ngeni ekewe pilon aramas repwe feito,
PSA 48:14 “Iei i Kot, ach Kot tori feilfeilachök. I epwe emwenikich tori feilfeilachök.”
PSA 49:1 Ngeni ewe mi emweni chon köl: Echö köl än nöün Kora kewe mwän. Ämi chon ekewe mwü meinisin, oupwe rongorong ekei kapas, oupwe aü selingemi, ämi meinisin mi nom won fanüfan,
PSA 49:2 ämi aramas tekia me aramas tekison, ämi aramas pisekisek me aramas wöüngau.
PSA 49:3 Üpwe apasätä kapas tipachem, nge ekiekin lelukei epwe awora weweöch.
PSA 49:4 Üpwe aü selingei ngeni eu kapasen amirit, üpwe awewei ai asisil, lupwen üa ettiki nei ükülele.
PSA 49:5 Pwota üpwe niuokus lupwen fansoun riaföü, lupwen chon ariaföüüei ra pwelifeiliei?
PSA 49:6 Ir ekewe aramas mi apilükülükü wöür o sikäsini pisekir mi somwola.
PSA 49:7 Ellet esap wor eman a tongeni isetiu penmanauen pwin ika ngeni Kot liwinin manauan.
PSA 49:8 Pun liwinin manauen eman aramas a men mömong. Esap fokun naf an epwe möni manauan,
PSA 49:9 pwe epwe tongeni manau tori feilfeilachök, nge esap tolong lon peias.
PSA 49:10 Ewer, aramas ra küna pwe pwal ekewe chon tipachem ra mäla usun chök ekewe mi umwes me tiparoch. Ra likiti wöür ngeni pwal ekoch.
PSA 49:11 Ar lenien peias iei imwer tori feilfeilachök, iei lenier repwe nom lon fansoun meinisin. Inamwo ika mi wor püsin fanüer me lom.
PSA 49:12 Aramas resap tongeni nonomotiu won fanüfan lon ar wöümong, nge repwe mäla usun chök man.
PSA 49:13 Iei usun mine epwe fis ngeni chokewe mi püsin lükü ir, iei sopolan chokewe mi pwapwaäsini wöür.
PSA 49:14 Ra fil pwe repwe ninnila usun chök ekewe sip. Mäla epwe nöür chon mas. Ekewe chon pwüng repwe pwapwa ren ar akufuur lesosor, nge ir repwe pwomachala lon ewe lenien sotup toau seni imwer mi ling.
PSA 49:15 Nge Kot epwe angasaeila seni ewe lenien sotup, pun i epwe etiwaei.
PSA 49:16 Kosap weitifengeniik are eman a pisekisekila, are wöün a chök lapalapala,
PSA 49:17 pun lupwen epwe mäla, esap uweela och, nge wöün esap tapwela mürin.
PSA 49:18 Inamwo are a ekieki pwe a feiöch lupwen an manau, pwal inamwo are aramas ra mwareiti i pokiten an pisekisekila,
PSA 49:19 epwe chök eti an kewe lewo le mäla, chokewe resap fokun chüen küna saram.
PSA 49:20 Aramas resap tongeni nonomotiu won fanüfan lon ar wöümong, nge repwe mäla usun chök man.
PSA 50:1 Echö än Asaf köl. Kot ewe Samol mi Lapalap, Ewe mi Unusen Manaman, a kapas o körifengeni chon fanüfan seni meserän tori apiläng.
PSA 50:2 Kot a saramawu seni Sion, ewe telinimw mi unusen ling.
PSA 50:3 Ach Kot a feito, nge esap fanafanala. Ekkei mi kümau a nom mwan, nge eu mölümöl mi watte a pwelifeili ünükün.
PSA 50:4 A kökkötä ngeni ekewe läng, a pwal kökkö ngeni fanüfan pwe repwe küna, lupwen epwe apwüngü nöün kewe aramas.
PSA 50:5 A apasa, “Oupwe amwichato rei nei kewe mi allükülük, chokewe mi eäni eu pwon ngeniei ren ar eäni eu asor.”
PSA 50:6 Ekewe läng ra pwärätä pwe Kot a pwüng, pwe püsin i ewe soukapwüng.
PSA 50:7 “Ämi nei aramas, oupwe rongorong, ngang üpwe kapas. Ämi chon Israel, üpwe ü ngenikemi ren ai pwärätä usumi. Ngang Kot, ämi we Kot.
PSA 50:8 Üsap fönökemi pokiten ämi asor me ämi asoren kek oua uwato rei fansoun meinisin.
PSA 50:9 Nge üsap osun eman ätemwänin kow seni ämi imwen man, ika eman kuuch seni ämi lenien man.
PSA 50:10 Pun iteiten man mi nom lein wöllap nei, pwal ekewe kow mi nom won ekewe engeröü chuk nei.
PSA 50:11 Üa silei ekewe machang won ekewe chuk meinisin, nge meinisin mine a mwökütüküt me lon ewe lemäl nei.
PSA 50:12 Ika üpwe echik, üsap ürenikemi, pun fanüfan me masouan meinisin ai.
PSA 50:13 Ifa usun, üa ochei fituken ekewe ätemwänin kow, ika ünümi chan ekewe kuuch?
PSA 50:14 Ämi kilisou epwe ina ämi asor ngeni Kot. Oupwe apwönüetä ämi kewe pwon oua eäni ngeni Ewe mi Unusen Manaman.
PSA 50:15 Oupwe köriei lon ränin ämi riaföü, pun ngang üpwe angasakemi, nge ämi oupwe mwareitiei.”
PSA 50:16 Nge Kot a apasa ngeni ewe aramasangau, “Pwota ka tongeni leaweni ai kewe allük ika kapasen ai we pwon?
PSA 50:17 Pun ka oput ai amirituk o pöütala ai kewe kapas.
PSA 50:18 Are ka küna eman chon solä, ka chiechi ngeni, ka pwal nom ren ekewe chon lisowu.
PSA 50:19 Ka chök akapasa kapasingau, nge kosap aposa awom seni kapasen atuputup.
PSA 50:20 Ka chök tipitipimwäl ngeni pwiüm o aitengaua püsin nöün inom.
PSA 50:21 Ekei mettoch en ka föri, nge ngang üa fanafanala. Ka ekieki pwe ngang usun chök en. Nge iei üpwe apwünguk o atipisuk.
PSA 50:22 Oupwe ekieki usun ei, ämi mi manlükieila. Nge are ousap, üpwe arosakemiila, nge esap wor eman epwe amanauakemi.
PSA 50:23 Eman mi kilisou ngeniei ina an asor ngeniei. Ren ei a asamoluei, nge eman mi aleasochisiei üpwe fokun amanaua.”
PSA 51:1 Ngeni ewe mi emweni chon köl: Echö än Tafit köl, lupwen ewe soufos Natan a feito ren mürin än Tafit kon ren Patsipa. Ai Kot, kopwe kirikiröch ngeniei lon om tong ellet, kopwe amoela ai pupungau lon om ümöümöch mi lapalap.
PSA 51:2 Kopwe fokun talü seniei ai föföringau o limetiei seni ai tipis.
PSA 51:3 Pun üa mefi ai pupungau, nge ai tipis a nonom fochofoch fän mesei.
PSA 51:4 Üa tipis ngonuk, fokun ngonuk echök, o föri mine a ngau me fän mesom. Iei mine a pwüng om kopwe apwüngüei, esap pwal wor om mwäl, lupwen ka eäni kapwüng.
PSA 51:5 Ellet ngang eman chon tipis seni ai uputiu. Ngang üa uren tipis seni ewe fansoun inei a nöünieitiu.
PSA 51:6 Ellet, ka pwapwaäsini letip wenechar. Kopwe aiti ngeniei ewe tipachem mi monomon.
PSA 51:7 Kopwe limetiei ren ülün ewe irä isop pwe üpwe limöch, kopwe talü seniei ai tipis pwe üpwe pwech seni snow.
PSA 51:8 Kopwe mwüt ngeniei pwe üpwe rongorong mweireiren pwapwa me meseik. Kopwe pwal mwüt ngeniei ai üpwe pwapwa, inamwo ika ka kupi chüi.
PSA 51:9 Kosap nenengeni ai kewe tipis, nge kopwe amoela ai föföringau meinisin.
PSA 51:10 Ai Kot, kopwe föri loi eu leluk mi limöch o fangelong loi eu ngün mi fö o pos.
PSA 51:11 Kosap asüeila seni fän mesom, kosap pwal angei seniei Ngünum mi pin.
PSA 51:12 Kopwe aliwinisefäli ngeniei ewe pwapwa mi nom rei, lupwen ka amanauaei, kopwe atufichiei pwe üpwe aleasochis ngonuk.
PSA 51:13 Mürin üpwe aiti ngeni ekewe chon tipis om kewe allük. Iwe, ir repwe kulituk.
PSA 51:14 Ai Kot, kopwe angasaeila seni mäla, en Kot ai Chon Amanau. Üpwe pwapwa le köl usun om pwüng.
PSA 51:15 Ai Samol, kopwe amwelieliaei pwe üpwe mwareituk.
PSA 51:16 Pun en kosap efich asor, ika ngang üpwe uwato reöm. En kosap pwapwa ren asoren kek.
PSA 51:17 Ai Kot, üa asor ngonuk eu letip mi tipetekison, eu leluk mi tipetekison o liamam, en kosap oput.
PSA 51:18 Ai Kot, kopwe kirikiröch ngeni Sion fän pwapwan letipom. Kopwe aüsefälietä tittin Jerusalem.
PSA 51:19 Mürin kopwe pwapwa ren ekewe asor mi fis fän pwüng, pwal ren äm kewe asoren kek. Mürin, ekewe ätemwänin kow repwe kekila won om rongen asor.
PSA 52:1 Ngeni ewe mi emweni chon köl: Echö än Tafit kölün kait, lupwen Toek ewe re Etom a feila ren Saul o üreni pwe Tafit a feila lon imwen Ahimelek. En mwän mi pwora, pwota ka sikäsini om föföringau? Än Kot tong a nom tori feilfeilachök.
PSA 52:2 Ka ekiekietä usun om kopwe afeiengaua aramas. Chönawom a usun chök echö räisö mi ken, en eman chon föri angangen atuputup.
PSA 52:3 Ka efich mine a ngau lap seni mine a mürina, ka pwal efich kapas chofana lap seni kapas mi let.
PSA 52:4 Ka efich om kopwe afeiengaua aramas ren om kapas, en chon atuputup.
PSA 52:5 Nge Kot epwe afeiengauok tori feilfeilachök, epwe turufuk o urusukowu seni imwom. Epwe üttukowu seni fanüen chon manau.
PSA 52:6 Ekewe chon pwüng repwe küna mine epwe fis ngonuk o niuokus, mürin repwe takiriik o üra,
PSA 52:7 “Nengeni, iei i ewe mwän esap mochen eäni Kot apilükülük, nge a apilükülükü wöün mi somwola o pöchökülela lon an föföringau.”
PSA 52:8 Nge ngang üa usun efoch irä olif mi märöch me lon imwen Kot. Üa lükü än Kot tong ellet tori feilfeilachök.
PSA 52:9 Ai Kot, üpwe kilisou ngonuk tori feilfeilachök ren mine ka föri. Üpwe asilefeili ngeni noum kewe aramas pwe en ka kirikiröch. Ei üpwe föri me fän meser.
PSA 53:1 Ngeni ewe mi emweni chon köl: Ei köl usun ngingin ewe sokun köl mi mang. Echö än Tafit kölün kait. Ekewe mi umwes ra ekieki lon leluker, “Esap wor Kot.” Ir ra fokun ngau, ra föri sokun föför mi anioput, esap wor eman a föri mine a pwüng.
PSA 53:2 Kot a nennetiu seni läng won aramas meinisin, pwe epwe küna ika a wor eman mi mirit, ika eman mi kütta Kot.
PSA 53:3 Nge ir meinisin ra tokola, ir meinisin ra ingauepök. Esap wor eman a föri mine a pwüng, esap fokun wor eman.
PSA 53:4 Ewe Samol mi Lapalap a ais, “Ifa usun, esap wor än ekewe chon föföringau mirit? Ir chokewe mi manau seni mine ra soläni seni nei aramas, nge resap iotek ngeniei.”
PSA 53:5 Mürin a toriir niuokus watte, eu niuokus watte esamwo toriir me mwan. Pun Kot epwe atoropasafeili chün chokewe mi oput nöün aramas. Chon Israel repwe fokun akufuur, pun Kot a fen pöütirela.
PSA 53:6 Amwo eman epwe feito seni Sion o amanaua chon Israel. Ekewe chon Israel repwe fokun pwapwa, lupwen Kot epwe aliwini ngeniir wöür.
PSA 54:1 Ngeni ewe mi emweni chon köl: Won pisekin ettik mi wor saitenin. Echö än Tafit kölün kait, lupwen ekewe chon Sif ra feila ren Saul o üreni pwe Tafit a op lefiler. Ai Kot, kopwe amanauaei ren manamanen itom, kopwe aletätä ai pwüng ren om pöchökül.
PSA 54:2 Ai Kot, kopwe aüselinga ai iotek, kopwe aü selingom ngeni ai kewe kapas.
PSA 54:3 Pun chon lamalamtekia ra ü ngeniei, ekewe chon mwäneson ra mochen nieila. Ir chokewe resap ekieki Kot.
PSA 54:4 Nge Kot ai chon alilis, ewe Samol i chon amwöchü manauei.
PSA 54:5 Kot epwe ukun ngeni chon oputaei ar föför mi ngau. Epwe aroserela fän an allükülük.
PSA 54:6 Ngang üpwe eäni eu asor ngonuk seni mochenin letipei. Üpwe kilisou ngonuk, ai Samol mi Lapalap, pun en ka kirikiröch.
PSA 54:7 En ka angasaei seni ai riaföü meinisin, nge üa pwapwa, lupwen üa küna pwe chon oputaei ra kuf.
PSA 55:1 Ngeni ewe mi emweni chon köl: Won pisekin ettik mi wor saitenin. Echö än Tafit kölün kait. Ai Kot, kopwe aüselinga ai iotek, kosap asorongorongola seni ai tüngor.
PSA 55:2 Kopwe rongorong ngeniei o palüeniei. Ai osukosuk a fokun aweiresiei.
PSA 55:3 Üa fokun niuokus ren än chon oputaei eniwaei, pwal ren än ekewe aramasangau ariaföüüei. Ra aweiresiei, nge lon ar song ra fokun oputaei.
PSA 55:4 Lelukei a fokun riaföü, niuokusun mäla a toriei.
PSA 55:5 Niuokus me chechech ra feitiu woi, nge niuokus watte a pwölüeila.
PSA 55:6 Iwe, üa apasa, “Amwo epwe wor pöükässi usun pöükässin eman lisom. Üpwe ässila o kütta ai lenien asösö.
PSA 55:7 Ewer, üpwe ässila toau o nonom lon ewe fanüapö.
PSA 55:8 Üpwe müttir le kütta ana ie üpwe op ie seni ewe asepwäl watte me ewe mölümöl.”
PSA 55:9 Ai Samol, kopwe afitikokoi än ekewe aramasangau kapas. Pun üa küna ar föförün mwäneson me ar aninifengen lon ewe telinimw.
PSA 55:10 Lerän me lepwin ra pwelifetalei me won tittin ewe telinimw. Pwüngingau me weires ra nonom lon,
PSA 55:11 feiengau a nom ekis meinisin, nge angangen ariaföü me atuputup ra chök fifis lon ekewe al.
PSA 55:12 Are eman chon oputaei epwe ämängauaei, üpwe tongeni engila fan. Are eman chon ü ngeniei epwe turunufaseei, üpwe tongeni op seni.
PSA 55:13 Nge en, chienei, pwal pwii mi achengicheng, en ätewe mi föri iei usun ngeniei.
PSA 55:14 Kich sa pwapwa le akapworausfengen, sa pwal fetalepök ngeni imwen Kot pwe sipwe fel ngeni.
PSA 55:15 Amwo mäla epwe müttir tori ekewe chon oputaei, amwo repwe feilmanauetiu lon lenien sotup. Pun ngau a nom lon lenier pwal lon leluker.
PSA 55:16 Nge ngang üa siö ngeni Kot. Iwe, ewe Samol mi Lapalap epwe amanauaei.
PSA 55:17 Lekuniol me lesosor pwal leoloas üa apasätä ai kewe weires o ngüngü. Iwe, Kot epwe rongorong mweliei.
PSA 55:18 Epwe angasa manauei, pwe üpwe tongeni liwiniti fän kinamwe seni ewe maun üa eäni, inamwo ika chomong aramas ra ü ngeniei.
PSA 55:19 Kot ewe mi mot won an lenien motun king seni me lomlom epwe aüselingaei o akufuur, pun resap mochen siwili ar föför, resap pwal niuokusiti Kot.
PSA 55:20 Chienei we me lom a fiu ngeni chiechian o ataela an we pwon.
PSA 55:21 An fos a mwotoutou seni pwötö, nge ekiekin maun a nom lon lelukan. An kewe kapas ra pwetete seni lö, nge ra ken usun chök kenin ekewe ketilas.
PSA 55:22 Kopwe monätä won ewe Samol mi Lapalap om weires, pwe i epwe tümwünuk. Esap fokun mwütätä pwe ewe chon pwüng epwe kuf.
PSA 55:23 Nge en, ai Kot, kopwe aturätiu lon ewe lenien sotup ekewe chon nimanauei aramas me ekewe chon atuputup mwen esamwo tori esopun manauer. Nge ngang üpwe anomu ai apilükülük womw.
PSA 56:1 Ngeni ewe mi emweni chon köl: Ei köl usun ngingin ewe köl itan “Ewe lisom won ekewe irä terepin mi toau”. Echö än Tafit köl, lupwen ekewe chon Filistia ra turufi me lon Kat. Ai Kot, kopwe ümöümöch ngeniei, pun aramas ra chök tatapweriei. Ekewe chon oputaei ra ariaföüüei fansoun meinisin.
PSA 56:2 Chon ü ngeniei ra tapweriei iteiten rän. Chomong ra fiu ngeniei fän ar lamalamtekia.
PSA 56:3 Lupwen üa niuokus, üa chök isetä ai apilükülük womw.
PSA 56:4 Üa mwareiti än Kot kapas, üa apilükülükü Kot, nge üsap niuokus. Met aramas repwe tongeni föri ngeniei?
PSA 56:5 Chon oputaei ra sorei mine üa apasa fansoun meinisin, ra chök ekiekietä met repwe afeiengauaei ren.
PSA 56:6 Ra amwichafengeniir, ra operiei o mamasafetaleei pwe repwe nieila.
PSA 56:7 Iei mine kopwe liwini ngeniir ar föföringau. Ai Kot, kopwe akufu ekei aramas fän om lingeringer.
PSA 56:8 En ka küna ai süsüfeil. Kopwe osupwalong chönün mesei lon om rume. Ifa usun, kosap aleaniir?
PSA 56:9 Lon ewe rän, lupwen üpwe köruk pwe kopwe alisiei, ekewe chon oputaei repwe kul seniei. Ren ei üa silei pwe Kot a peniei.
PSA 56:10 Üa mwareiti än Kot kapas, üa mwareiti än ewe Samol mi Lapalap kapas.
PSA 56:11 Üa apilükülükü Kot, nge üsap niuokus. Met aramas repwe tongeni föri ngeniei?
PSA 56:12 Ai Kot, üpwe apwönüetä ai kewe pwon ngonuk. Üpwe eäni asoren kilisou ngonuk,
PSA 56:13 pun ka angasa manauei seni mäla. Ewer, ka amwöchü pechei pwe üsap mit, pwe üpwe fetal fän mesen Kot lon ewe saram mi atoto manau.
PSA 57:1 Ngeni ewe mi emweni chon köl: Ei köl usun ngingin ewe köl itan “Kosap ataela”. Echö än Tafit köl, lupwen a sü seni Saul o sülong lon ewe föimw. Kopwe ümöümöch ngeniei, ai Kot, kopwe ümöümöch ngeniei, pun üa eänuk lenien op. Üa op fän nürün poum, tori ewe mölümölün feiengau a feil seniei.
PSA 57:2 Üa siö ngeni Kot, Ewe mi Unusen Tekia, ewe Kot mi alisiei lon mettoch meinisin.
PSA 57:3 I epwe tinato an alilis seni läng o amanauaei, i epwe akufu chokewe mi chök tatapweriei. Kot epwe tinato an we tong ellet me an allükülük ngeniei.
PSA 57:4 Chon oputaei mi wewe ngeni laion mi mwäräräiti le ochei aramas ra pwelifeiliei, ngir ra usun chök siles me föün esefich, nge chönawer ra usun chök ketilas mi ken.
PSA 57:5 Ai Kot, kopwe pwäri om tekia asen ekewe läng. Om ling epwe pwä won unusen fanüfan.
PSA 57:6 Chon oputaei ra anomu eu sär fän itei. Ai osukosuk a chouitiei. Ra tuw eu pwang lon alei, nge ra püsin turulong lon.
PSA 57:7 Üa apilükülükuk, ai Kot, üa apilükülükuk, üpwe köl o mwareituk.
PSA 57:8 Ngüni, kopwe pwök, ekewe kitar me ükülele repwe pwök. Üpwe apwökü mallen rän.
PSA 57:9 Ai Samol, üpwe kilisou ngonuk me lein ekewe mwichen aramas, üpwe kölün mwareituk me lein chon ekewe mwü.
PSA 57:10 Pun om tong ellet a tekia seni ekewe läng, om allükülük a tori ekewe kuchu.
PSA 57:11 Ai Kot, kopwe pwäri om tekia asen ekewe läng. Om ling epwe pwäla won unusen fanüfan.
PSA 58:1 Ngeni ewe mi emweni chon köl: Ei köl usun ngingin ewe köl itan “Kosap ataela”. Echö än Tafit köl. Ämi sounemenem, ifa usun, oua wesewesen apwüngala mine a pwüng? Ifa usun, oua apwüngü ekewe aramas fän wenechar?
PSA 58:2 Apwi, oua chök ekiekietä mine a ngau lon lelukemi, nge pöümi ra föri föförün mwäneson won fanüfan.
PSA 58:3 Ekewe aramasangau ra tokola lon unusen manauer, ra chök kapas chofana seni ewe fansoun ra uputiu.
PSA 58:4 Ra urela ren poison usun chök ekewe serepenit mi poison. Ra pineela selinger usun eman serepenit a pineela selingan,
PSA 58:5 pwe esap tongeni rongorong ngingin ätewe mi afesira serepenit, ika än eman sourong förüör.
PSA 58:6 Ai Kot, kopwe kupi ngir, kopwe tülü ngin ekewe laion mi langatam.
PSA 58:7 Amwo repwe morola usun koluk mi pula, repwe pachachala usun fetil aramas ra purätiu.
PSA 58:8 Amwo repwe wewe ngeni eföü pweechar, a telila o wiliti mongomong, repwe wewe ngeni eman mönükol esap küna saram, pun a uputiu, nge esap manau.
PSA 58:9 Mwen ämi kewe nape ra mefi pwichikaren ewe ekkei seni iräfölüföl, ese lifilifil ika ir irä mi manau ika mi pwas. Kot epwe ässala ekewe aramasangau ren eu ewiniär.
PSA 58:10 Ekewe chon pwüng repwe pwapwa, lupwen repwe küna pwe Kot a apwüngü ekewe chon tipis, repwe talü pecher lon chan ekewe aramasangau.
PSA 58:11 Iwe, aramas repwe apasa, “Ellet, ekewe chon pwüng ra angei liwinir. Ellet, mi wor eman Kot mi eäni kapwüng won fanüfan.”
PSA 59:1 Ngeni ewe mi emweni chon köl: Ei köl usun ngingin ewe köl itan “Kosap ataela”. Echö än Tafit köl, lupwen Saul a tinala ekoch mwän pwe repwe operi imwan, pwe repwe niela. Ai Kot, kopwe angasaeila seni ekewe chon oputaei, kopwe tümwünüei seni chokewe mi ü ngeniei,
PSA 59:2 kopwe angasaeila seni ekewe chon föföringau o amanauaei seni ekewe aramas mi chök mochen nimanauei aramas.
PSA 59:3 Nengeni, ra operiei pwe repwe nieila, aramas mi fokun ngau ra mwichfengen o ü ngeniei. Ei a fis ngeniei sap pokiten ai pupungau ika tipis, ai Samol mi Lapalap.
PSA 59:4 Üsap föri och mi mwäl, nge ra chök amoleretä pwe repwe fiu ngeniei. Kopwe ütä o alisiei, kopwe nenengeni ai osukosuk.
PSA 59:5 En Samol mi Unusen Manaman, en Koten Israel, kopwe pwätä pwe kopwe apwüngü chon ekewe mwü meinisin. Kosap eäni ümöümöch ngeni chokewe mi rawangauei aramas.
PSA 59:6 Iteiten lekuniol ra liwinito, ra wörüwör usun ekewe kolak, lupwen ra aniffetal lon ewe telinimw.
PSA 59:7 Kapasen turunufas me kapasen eniweniw ra towu seni awer, chönawer ra usun chök ketilas, nge ra ekieki pwe esap wor eman a rongorong ar kapas.
PSA 59:8 Nge en, ai Samol mi Lapalap, ka takiriir, ka ämängaua chon ekewe mwü meinisin.
PSA 59:9 En ai pöchökül, üa osukusukuk, pun en ai Kot imwei imwen maun.
PSA 59:10 Ai Kot epwe feito rei fän an tong ellet, ai Kot epwe föri pwe üpwe nenengeni än chon oputaei kuf.
PSA 59:11 Kosap nirela, pwe nei aramas resap manlükala mine ka föri ngeniir. Kopwe atoropaseer ren om manaman o akufuur. Ai Samol, en ka epeti senikem feiengau.
PSA 59:12 Pokiten kapasen awer ra chök tipis, repwe tup lon ar lamalamtekia. Pokiten ar ottek me chofana,
PSA 59:13 kopwe aroserela lon om lingeringer, kopwe aroserela tori resap chüen nom. Mürin, aramas meinisin repwe silei pwe Kot a nemenem lon Israel, pwal tori unusen fanüfan.
PSA 59:14 Iteiten lekuniol chon oputaei ra liwinto, ra wörüwör usun ekewe kolak, lupwen ra aniffetal lon ewe telinimw.
PSA 59:15 Ra küttafetal ener mongö o ngüngü, lupwen resap möt.
PSA 59:16 Nge ngang üpwe köl usun om manaman. Iteiten lesosor üpwe köl fän leüömong usun om tong ellet. Pun en ka wewe ngeni eu imwen maun me rei, pwal eu lenien op lon ränin ai riaföü.
PSA 59:17 En ai pöchökül, üpwe kölün mwareituk, pun en ai Kot imwei imwen maun. En ewe Kot mi tongeei.
PSA 60:1 Ngeni ewe mi emweni chon köl: Ei köl usun ngingin ewe köl itan “Kiopun pwärätä”. Echö än Tafit köl fän iten kait ngeni aramas, lupwen a maun ngeni chon Aram seni Naharaim me Sopa, pwal lupwen Joap a liwinsefäl o niela engol me ruungeröü chon Etom me lon ewe Lemolun Salt. Ai Kot, ka pöütikeemila o akufukem, ka pwal song ngenikem. Kose mochen kopwe apöchökülasefälikem.
PSA 60:2 Ka achecha ewe fanü, ka pwal asangafeseni. Kopwe aöchüsefäli mine a ta, pun ewe fanü a mökküfesen.
PSA 60:3 Ka ariaföüü noum aramas ren riaföü mi chou, ka aünü ngenikem wain pwe äm aia taroporopfetal ren.
PSA 60:4 Ka aürätä efoch filäik fän iten chokewe mi meninituk, pwe repwe chufengen fan o sü seni ekewe föün esefich.
PSA 60:5 Kopwe awinakem ren om manaman o pälüeni äm iotek, pwe noum kewe ka echeniir repwe ngasala.
PSA 60:6 Kot a kapas seni lon imwan mi pin, “Lon ai meseik üpwe ineti Sikem o aineti ewe lemolun Sukot ngeni nei aramas.
PSA 60:7 Kiliat fanüei, Manasa pwal fanüei, Efraim imwei akkaw, Juta woki wokun king.
PSA 60:8 Moap sepiei sepien tötöl, üpwe moneela ipwei sus won Etom, asisilan pwe fanüei, nge won ewe fanü Filistia üpwe arükak fän ai win.”
PSA 60:9 Iö epwe emwenieilong lon ewe telinimw mi pöchökül tittin? Iö epwe emweniei ngeni Etom?
PSA 60:10 Ai Kot, ifa usun, ka wesewesen pöütikeemila? Ifa usun, kosap chüen eti äm mwichen sounfiu le feila maun?
PSA 60:11 Kopwe alisikem pwe aipwe tongeni maun ngeni ekewe chon oputakem, pun än aramas alilis a lomotongau.
PSA 60:12 Are Kot a etikich, kich sipwe win, i epwe akufu chon oputakich.
PSA 61:1 Ngeni ewe mi emweni chon köl: Won pisekin ettik mi wor saitenin. Echö än Tafit köl. Ai Kot, kopwe rongorong ai siö, kopwe aüselinga ai iotek.
PSA 61:2 Üa kökköruk seni lesopun fanüfan, lupwen üa apilükingau. Kopwe emweniei ngeni ewe achau mi tekia seniei.
PSA 61:3 Pun en ai lenien op, ka tümwünüöchüei seni ekewe chon oputaei.
PSA 61:4 Kopwe mwüt ngeniei pwe üpwe nom lon imwom mi pin lon unusen manauei, pwe üpwe kinamwe le op fän poum.
PSA 61:5 Pun en ai Kot, ka rongorong ai kewe pwon, ka ngeniei wisen chokewe mi meninituk.
PSA 61:6 Kopwe alangatamala ränin manauen ewe king. Amwo ierin manauan repwe tori ekewe täppin aramas meinisin.
PSA 61:7 Amwo epwe nemenem fän mesom tori feilfeilachök. Ai Kot, kopwe tümwünü ewe king ren om tong ellet me om allükülük.
PSA 61:8 Mürin üpwe kölün mwareiti itom fansoun meinisin, lupwen üa apwönüetä ai kewe pwon iteiten rän.
PSA 62:1 Ngeni ewe mi emweni chon köl: Ei köl usun ngingin förien Jetutun köl. Echö än Tafit köl. Üa likitü le witiwiti Kot pwe epwe amanauaei, üa anomu ai apilükülük won i chök.
PSA 62:2 I chök a tümwünüei o amanauaei, i a peniei pwe üsap fokun kuf.
PSA 62:3 Ifa ükükün fansoun ämi meinisin oupwe fiu ngeni eman chök aramas, pwe oupwe aturala usun eu oror mi söön ika eu tit mi päpäifetal.
PSA 62:4 Oua chök ekiekin asapwilätiu i seni wisan mi tekia, oua pwapwaäsini kapas chofana. Oua eäni kapasen afeiöch, nge oua otteki me lon lelukemi.
PSA 62:5 Üa likitü le witiwiti Kot echök, pun üa anomu ai apilükülük won.
PSA 62:6 I chök a tümwünüei o amanauaei, i a peniei pwe üsap fokun kuf.
PSA 62:7 Ai küna manau me ai ling ra longolong won Kot. Kot ai achau mi pöchökül me ai lenien op.
PSA 62:8 Ämi aramas, oupwe lükü Kot fansoun meinisin. Oupwe pwäri ngeni ämi weires meinisin, pun i ach lenien op.
PSA 62:9 Aramas tekison ra usun chök enienin asepwäl, nge aramas tekia ra usun chök och minen chofana. Are ra kilo, esap wor chour, ra pän seni enienin asepwäl.
PSA 62:10 Ousap anomu ämi apilükülük won pisek oua angemwäli fän pöchökül, ousap pwal eäni apilükülük pisek oua soläni. Inamwo ika oua pisekisekila, ousap apilükülükü.
PSA 62:11 Eu mettoch Kot a kapas usun. Ruu mettoch üa rongorong usun, pwe en Kot echök ka manaman.
PSA 62:12 Pwal en chök, ai Samol, ka eäni tong ellet. Ellet ka liwini ngeni aramas ükükün ar föför.
PSA 63:1 Echö än Tafit köl, lupwen a nom lon ewe fanüapön Juta. Ai Kot, en ai Kot üa tiliken le küttok. Inisi a apwangapwangala ren ai posituk, nge ngüni a kakaituk usun eu fanü mi pwasapwas o pön, esap wor koluk lon.
PSA 63:2 Üa mochen künok lon imwom mi pin pwe üpwe nengeni om manaman me om ling.
PSA 63:3 Pun om tong ellet a mürina seni manau, ngang üpwe mwareituk.
PSA 63:4 Iwe, üpwe kilisou ngonuk lon ränin manauei meinisin. Üpwe aitietä pei lon ai iotek ngonuk.
PSA 63:5 Ngüni a mötüla usun üa mötüla ren mongö mi annö. Üpwe mwareituk fän pwapwa,
PSA 63:6 üa chechemenuk, lupwen üa kon won ai peet o ekieki usum lepwin.
PSA 63:7 Pun en ai soualilis, üa köl fän pwapwa me fän nürün poum.
PSA 63:8 Üa fitipacheituk, pöüifichum a amwöchüeitä.
PSA 63:9 Nge chokewe mi mochen nieila repwe feitiu epin fanüfan,
PSA 63:10 repwe mäla lon maun, nge kolak mi mwacho repwe ochei fituker.
PSA 63:11 Nge ewe king epwe meseik ren Kot. Meinisin mi eäni iten Kot le pwon fän akapel repwe mwänek, nge awen ekewe chon chofana repwe pinela.
PSA 64:1 Ngeni ewe mi emweni chon köl: Echö än Tafit köl. Ai Kot, kopwe aüselingaei, lupwen üa pwäri ngonuk ai osukosuk. Kopwe tümwünü manauei, pun üa niuokus ren chon oputaei,
PSA 64:2 kopwe aopaeila seni än ekewe aramasangau rawangauaei, seni ewe mwichen chon föföringau mi akürang.
PSA 64:3 Ra seimi chönawer pwe ra ken usun chök ketilas, ra awena ar kapas mi ngau usun chök föün esefich,
PSA 64:4 pwe repwe pekki ätewe esap wor an tipis seni ar lenien op, ra müttir pekki i, nge resap niuokus.
PSA 64:5 Ra apöchökülafengeniir lon ar ekiek mi ngau, ra kapas usun ar repwe föri ekewe sär lemonomon o apasa, “Esap wor eman a tongeni künakich?”
PSA 64:6 Ra rawangau won mine a pwüngingau o apasa, “Sa ekiekietä eu akot mi unusöch.” Ellet ekiek me leluken aramas ra men atuputup.
PSA 64:7 Nge Kot epwe esefichi ngeniir wokun föün esefich pwe repwe müttir kinas.
PSA 64:8 Epwe atoto wor feiengau pokiten kapasen awer, nge meinisin mi küneer repwe nünüti mökürer.
PSA 64:9 Mürin, aramas meinisin repwe niuokus. Repwe ekieki mine Kot a föri o apworausa usun.
PSA 64:10 Ekewe chon pwüng repwe pwapwa ren mine ewe Samol mi Lapalap a föri, repwe pwal op ren. Nge ekewe mi wenechar leluker repwe mwareiti.
PSA 65:1 Ngeni ewe mi emweni chon köl: Echö än Tafit köl. Ai Kot, a fich ngonuk pwe aramas repwe mwareituk lon Sion, repwe pwal apwönüetä ar pwon ngonuk,
PSA 65:2 pun en ka aüselinga iotek. Aramas meinisin repwe feito reöm
PSA 65:3 pokiten ar tipis. Lupwen äm pupungau ra chouitikem, en ka amuseer senikem.
PSA 65:4 Feiöchün chokewe ka filiretä o emwenireto pwe repwe nom lon leniom mi pin. Äm aipwe üren feiöch ren ekewe mettoch mi mürina me lon imwom we mi pin.
PSA 65:5 Ai Kot äm Chon Amanau, ka pälüenikem fän pwüng ren föför mi amwarar. En ewe chon fanüfan meinisin pwal chon ekewe fanü toau mi nom lematau ra eänuk apilükülük.
PSA 65:6 Ren om pöchökül ka anüküchara ekewe chuk, pun ka pwärala om manaman.
PSA 65:7 Ka aükätiu ötötün ekewe matau, pwal püngüpüngün ekewe no me akürangen chon ekewe mwü,
PSA 65:8 pwe chokewe mi nonom lesopun fanüfan repwe niuokus ren om kewe manaman. Ka föri pwe chon ekewe fanüen ötiu tori chon ekewe fanüen lotou ra mweireir fän pwapwa ren om kewe föför.
PSA 65:9 Ka tümwünü fanüfan o achöchönü, ka föri pwe a pwülüöch o fanüeräs. Ka aurala ekewe chanpupu ren koluk. Ka ngeni chon fanüfan ener mongö. Iei usun mine ka föri ngeni fanüfan:
PSA 65:10 Ka fokun achöchönü ekewe warawar lon ekewe tanipi, ka asosonöchü o apwetetei ewe pwül ren üt o afeiöchü mine a märitä.
PSA 65:11 Ka awora iteiten ier räs mi fokun somwola. Ekis meinisin ia ka fetal ie a wor räsimong.
PSA 65:12 Ekewe mälämäl lon fanüapö a märitä chomong fetil wor, nge ekewe chuk ra pwölüla ren pwapwa.
PSA 65:13 Ekewe maasies ra ur ren pwiin sip, nge ekewe lemol ra ur ren wiich. Aramas meinisin ra mweireir o kölfengen fän pwapwa.
PSA 66:1 Ngeni ewe mi emweni chon köl: Echö köl. Oupwe mweireir fän pwapwa ngeni Kot, ämi chon fanüfan meinisin,
PSA 66:2 oupwe kölü lingen itan o fokun mwareiti i.
PSA 66:3 Oupwe apasa ngeni Kot, “Om kewe föför ra fokun amwarar. Om kewe manaman ra kon lapalap, pwe chon oputok ra chapetiu me mwom fän niuokus.
PSA 66:4 Chon fanüfan meinisin ra fel ngonuk, ra kölün mwareituk, ra kölün mwareiti itom.”
PSA 66:5 Oupwe feito o nenengeni mine Kot a föri. An kewe föför me lein aramas ra fokun amwarar.
PSA 66:6 A awili matau ngeni fanüpwas. Äm kewe lewo ra fetal lon ewe chanpupu won pecher. Ikenan äm aia pwapwa ren mine Kot a föri.
PSA 66:7 A nemenem ren an manaman tori feilfeilachök, mesan ra mamasa ekewe mwü. Ekewe aramas mi ü ngeni Kot resap tongeni atekiaretä.
PSA 66:8 Ämi chon ekewe mwü, oupwe mwareiti ach we Kot. Aramas repwe rong ngingin ämi mwareiti i.
PSA 66:9 I a amwöchü manauach, nge esap mwüt ngenikich pwe sipwe turula.
PSA 66:10 Pun en äm Kot, ka sotunikem, ka limetikem usun aramas ra limeti silifer.
PSA 66:11 Ka atolongakem lon fötek. Ka anomu won sökürüm och wosochou,
PSA 66:12 ka mwüt ngeni aramas pwe repwe purikem. Äm aia pwerelong lon ekkei me koluk, nge en ka emwenikeemiwu o atolongakem lon eu leni mi mürina.
PSA 66:13 Üpwe feila lon imwom fän asoren kek o apwönüetä ai kewe pwon ngonuk.
PSA 66:14 Üpwe uwato reöm mine üa pwon ngonuk, lupwen üa nom lon weires.
PSA 66:15 Üpwe eäni asoren kek ngonuk seni man mi öümanau. Üpwe eäni asor ätemwänin sip, pwal ätemwänin kow me kuuch, pwe ötüötün ekewe asor epwe ötütä.
PSA 66:16 Oupwe feito o rongorong, ämi meinisin mi asamolu Kot, üpwe apworausa ngenikemi mine Kot a föri fän itei.
PSA 66:17 Üa siö ngeni fän leüömong, üa kölün mwareiti i.
PSA 66:18 Are üa ekiekietä och föför mi ngau lon lelukei, ewe Samol esap aüselingaei.
PSA 66:19 Nge Kot a fokun aüselingaei, a aü selingan ngeni ai iotek.
PSA 66:20 Üpwe mwareiti Kot, pun i esap oput ai iotek, esap pwal amwöchü seniei an we tong ellet.
PSA 67:1 Ngeni ewe mi emweni chon köl: Ren pisekin ettik mi wor saitenin. Echö köl. Ai Kot, kopwe ümöümöch ngenikem o afeiöchükem, kopwe netiu wom fän om kirikiröch,
PSA 67:2 pwe aramas won fanüfan repwe silei letipom, nge chon ekewe mwü meinisin repwe silei om we angangen amanaua aramas.
PSA 67:3 Chon ekewe mwü repwe mwareituk, ai Kot, chon ekewe mwü meinisin repwe mwareituk.
PSA 67:4 Chon ekewe mwü repwe pwapwa o köl fän ar pwapwa, pun en ka apwüngü chon fanüfan fän pwüng, ka pwal emweni chon ekewe mwü won fanüfan.
PSA 67:5 Chon ekewe mwü repwe mwareituk, ai Kot, chon ekewe mwü repwe mwareituk.
PSA 67:6 Fanüfan a awora räs, Kot ach Kot a afeiöchükich.
PSA 67:7 Kot a afeiöchükich. Chon fanüfan meinisin repwe asamolu i.
PSA 68:1 Ngeni ewe mi emweni chon köl: Echö än Tafit köl. Kot epwe ütä o atoropasafeili chon oputan, chokewe mi oputa i repwe sü me mwan.
PSA 68:2 Usun asepwäl a ässala ötüötün ekkei, iei usun epwe ässirela. Usun kiris a telila ren ekkei, iei usun ekewe aramasangau repwe rosola me fän mesen Kot.
PSA 68:3 Nge ekewe chon pwüng repwe uren pwapwa, repwe mwänek me fän mesen Kot, repwe mweireir fän pwapwa.
PSA 68:4 Oupwe köl ngeni Kot, oupwe kölün mwareiti itan. Oupwe chietä echö köl ngeni ewe mi wawa ekewe kuchu, itan ewe Samol mi Lapalap. Oupwe mwänek me fän mesan.
PSA 68:5 Kot ewe mi nom lon imwan mi pin, i semen ekewe mi mäsen me chon tümwünün ekewe fefin mi mä pwülüer.
PSA 68:6 Kot a ngeni ekewe mi akaleman ar famili, a emwenawu ekewe chon fötek pwe repwe ngasala fän pwapwa, nge ekewe chon ü ngeni Kot repwe nom lon eu fanü mi pwasapwas o pwichikar.
PSA 68:7 Ai Kot, lupwen ka akom mwen noum aramas, lupwen ka pwerela lon ewe fanüapö,
PSA 68:8 fanüfan a chechech, ekewe läng ra apüngätiu üt me fän mesen Kot. Ewe chuk Sinai a chechech me fän mesen Kot, ewe Koten Israel.
PSA 68:9 Ai Kot, ka apüngätiu ütomong ekis meinisin. Ka amürinala fanüom, lupwen a pwasala.
PSA 68:10 Noum kewe aramas ra küna lenier me lon. Lon om kirikiröch, ai Kot, ka tümwünü ekewe chon wöüngau.
PSA 68:11 Ewe Samol a atowu ewe kapas. A fokun lapalap ewe mwichen fefin mi arongafeili ewe pworausen win,
PSA 68:12 “Ekewe king me nöür kewe mwichen sounfiu ra süla.” Ekewe fefin mi nom leimw ra inetifengeni mine ekewe sounfiu ra liapeni lon maun.
PSA 68:13 Uluulun lisom, pöükässir ra pwölüpwöl ngeni silifer, nge ülöüler ra molupolup ren kolt mi mürina. Pwota ekoch me leimi ra chök nonom lefilen ekewe lenien sip?
PSA 68:14 Lupwen Ewe mi Unusen Manaman a atoropasafeili ekewe king won ewe fanü, snow a püngütiu won ewe chuk Salmon.
PSA 68:15 Ewe chuk Pasan eu chuk mi tekia. Eu chuk mi wor chomong chukun.
PSA 68:16 En chuk mi chukuchukutä, pwota ka nennetiu fän lolowo won ewe chuk Kot a filätä pwe epwe nonom won. Ewer, iei ewe leni ewe Samol mi Lapalap epwe nonom ie tori feilfeilachök.
PSA 68:17 Ewe Samol a feito seni ewe chuk Sinai ngeni ewe leni mi pin fiti ngeröün wan woken mi pöchökül.
PSA 68:18 A feitä won ewe chuk mi tekia o emwenätä chon oola lon an mwich mi tapwela mürin, a pwal angei lifang seni aramas, fokun seni chokewe mi ü ngeni, Kot ewe Samol mi Lapalap epwe nonom ikenan.
PSA 68:19 Sipwe mwareiti ewe Samol mi mwärei ach wosochou iteiten rän. Kot ach Chon Amanau.
PSA 68:20 Ach Kot eman Kot mi amanauakich, Kot ewe Samol a angasakich seni mäla.
PSA 68:21 Nge Kot epwe amökkü möküren chon oputan, epwe amökkü mongosaponen ätewe mi chök föföri tipis.
PSA 68:22 Iwe, ewe Samol a apasa, “Üpwe aliwinato chon oputom seni Pasan. Üpwe aliwinireto seni epin matau,
PSA 68:23 pwe pecheöm epwe fetal lon char, nge noum kewe kolak repwe asomwa inetir seniir.”
PSA 68:24 Ai Kot, aramas ra küna om fetal fän win, ra küna än ai Kot me ai king fetalelong lon imwan mi pin.
PSA 68:25 Ekewe chon köl ra akom, ekewe chon ettik pisekin ettik ra nom mürin, nge ekewe föpwül mi ettik pisekin kaktai ra nom lukalaper,
PSA 68:26 “Oupwe mwareiti Kot lon ewe mwich mi lap. Oupwe mwareiti ewe Samol mi Lapalap, ämi mwirimwirin Jakop.”
PSA 68:27 Peniamin ewe ainang mi kükün me leir a akom mwer, ekewe samolun Juta lon mwicheicher ra tapw müriir, nge ekewe samolun Sepulon me Naftali ra kükümwir.
PSA 68:28 Ai Kot, kopwe aworato om manaman. Ai Kot, kopwe pwärawu ngenikem om pöchökül usun ka fen föri me mwan.
PSA 68:29 Pokiten om we imwenfel lon Jerusalem ekewe king repwe uwato lifang ngonuk.
PSA 68:30 Kopwe apwüngü Isip, ewe manmwacho mi nom lein ekewe wowo. Kopwe apwüngü ekewe mwü, ewe pwiin ätemwänin kow me nöür kewe nienifön kow, tori repwe chapetiu me mwom o fang ngonuk ar silifer. Kopwe atoropasafeili chon ekewe mwü mi pwapwaiti maun.
PSA 68:31 Chon künö repwe feito seni Isip. Chon Itiopia repwe aitietä pöür lon ar iotek ngeni Kot.
PSA 68:32 Oupwe köl ngeni Kot, ämi chon ekewe mwü won fanüfan, oupwe kölün mwareiti ewe Samol,
PSA 68:33 ewe mi saifeil lon ekewe läng, ekewe längin lomlom. I ewe mi fos fän mwelian mi leüömong.
PSA 68:34 Oupwe asilefeili än Kot manaman, lingan a nom won Israel, nge an manaman a nom lon ekewe läng.
PSA 68:35 Kot a men eniwokus, lupwen a towu seni imwan mi pin. I ewe Koten Israel mi ngeni nöün kewe aramas manaman me pöchökül. Sipwe mwareiti Kot!
PSA 69:1 Ngeni ewe mi emweni chon köl: Ei köl usun ngingin ewe köl itan Kiop. Echö än Tafit köl. Ai Kot, kopwe amanauaei! Pun ekewe koluk ra feitä tori fän üei.
PSA 69:2 Üa kokotiu lon pwakak mi alolol, esap wor ana ie üpwe ipwetiu ie. Üa nonom lon koluk mi alolol, nge ekewe no ra pwölüeila.
PSA 69:3 Üa fokun malülü ren ai siö, chiorei a pinela, mesei ra toputopula ren ai witiwiti om kopwe alisiei.
PSA 69:4 Chokewe mi oputaei, nge esap wor popun, ra chomong seni iteiten meten mökürei. Chokewe mi mochen nieila ra pöchökül, ra kapas chofana usi. Ra pöchökül ngeniei pwe üpwe aliwinala mettoch üsap soläni.
PSA 69:5 Ai Kot, en ka silei ai kewe föför mi mwäl, nge ai kewe tipis üa föriir resap mon senuk.
PSA 69:6 Ai Kot, en ewe Samol mi Unusen Manaman, kosap mwütätä pwe chokewe mi eänuk apilükülük repwe säw pokitei. En ewe Koten Israel, kosap mwütätä pwe chokewe mi fel ngonuk repwe itengau pokitei.
PSA 69:7 Pun üa itengau fän itom, nge säw a pwölüeila.
PSA 69:8 Üa usun chök eman wasöla ngeni pwii kewe, üa usun chök eman chon ekis ngeni nöün inei kewe.
PSA 69:9 Pun ai ekipwichi imwom mi pin a küküri leüti usun ekkei, nge ekewe kapasen esit mi toruk ra pwal toriei.
PSA 69:10 Iwe, lupwen üa atekisonaeitiu ren ai echikefel, aramas ra asitaei.
PSA 69:11 Lupwen üa üföüf üf seni tuk, ra chök takiriei.
PSA 69:12 Ir mi mot lon asamalapen ewe telinimw ra kapasen ämängau usi, nge ekewe chon puch ra kölüei.
PSA 69:13 Nge ngang üa chök iotek ngonuk, ai Samol mi Lapalap. Kopwe pälüeniei, ai Kot, lon fansoun mi fich me reöm. Kopwe pälüeniei lon om tong ellet, pun ka apwönüetä om we pwon pwe kopwe amanauaei.
PSA 69:14 Kopwe amanauaei seni ai kokotiu lon ewe pwakak. Kopwe angasaei seni ekewe chon oputaei, pwal seni ekewe koluk mi alolol.
PSA 69:15 Kosap mwütätä pwe ekewe no repwe pwölüeila, kosap pwal mwüt ngeniei pwe üpwe kokotiu lon ewe lenien alolol, ika mwocholong lon peias.
PSA 69:16 Ai Samol mi Lapalap, kopwe pälüeniei lon om tong ellet mi mürina. Kopwe kul ngeniei lon om ümöümöch mi somwola.
PSA 69:17 Kosap amona mesom seni noum chon angang. Kopwe müttir pälüeniei, pun ngang üa nom lon riaföü.
PSA 69:18 Kopwe kaneto rei o amanauaei, kopwe angasaeila seni ekewe chon oputaei.
PSA 69:19 En ka silei usun ai küna turunufas, usun ai säw me ai itengau, ka pwal silei ekewe chon oputaei meinisin.
PSA 69:20 Ekewe kapasen turunufas ra atatakisi lelukei pwe üa nom lon apilükingau. Üa kütta ika eman epwe tongeei, nge esap wor eman, üa pwal kütta ika eman epwe achipaei, nge esap wor eman.
PSA 69:21 Ra uwalong poison lon enei mongö, nge lupwen üa kaka, ra aünüei finikar.
PSA 69:22 Amwo ar kewe kametip repwe wiliti eu likatup ngeniir, nge ar kewe chulapen mongö mi pin repwe wiliti eu sär mi awarato feiengau wor.
PSA 69:23 Amwo meser repwe toputop pwe resap tongeni küna mwer, kopwe pwal föri pwe sökürür epwe pwor fansoun meinisin.
PSA 69:24 Kopwe awarato om song wor, om lingeringer epwe toriir.
PSA 69:25 Amwo lenier epwe pönüla, amwo esap chüen wor eman epwe nonom lon imwer imw mangaku.
PSA 69:26 Pun ir ra ariaföüü ätewe en ka wichi, ra pwal alapala ar ariaföüü ätewe en ka akinasa.
PSA 69:27 Kopwe achuetä liwiningau won ar liwiningau, nge kosap mwüt ngeniir pwe repwe küna manau.
PSA 69:28 Kopwe amoela iter seni ewe puken manau, nge kosap makelong iter lein chon pwüng.
PSA 69:29 Nge ngang üa metek o nom lon apilükingau. Ai Kot, kopwe atekiaeitä o amanauaei.
PSA 69:30 Üpwe mwareiti Kot ren echö köl, üpwe ingeiti i ren ai kilisou.
PSA 69:31 Ei epwe apwapwai ewe Samol mi Lapalap lap seni ai üpwe eäni asor eman kow ika eman ätemwänin kow fiti mächän me pachapachan.
PSA 69:32 Ekewe mi nom lon riaföü repwe küna ei o pwapwa. Ämi mi fel ngeni Kot oupwe apilüköch.
PSA 69:33 Pun ewe Samol mi Lapalap a aüseling ngeni ekewe chon osupwang, nge esap manlükala nöün aramas mi nom lon fötek.
PSA 69:34 Läng me fanüfan repwe mwareiti i, pwal ekewe matau me meinisin mine a manau lon.
PSA 69:35 Pun Kot epwe amanaua Sion o aüsefälietä ekewe telinimwen Juta. Mürin, nöün chon angang repwe nonom ikenan o fanüeni ewe fanü.
PSA 69:36 Mwirimwirin nöün kewe chon angang repwe fanüeni ewe fanü, nge chokewe mi echeni i repwe nonom won.
PSA 70:1 Ngeni ewe mi emweni chon köl: Echö än Tafit köl fän iten ewe asoren achechem. Ai Kot, kose mochen kopwe angasaeila. Ai Samol mi Lapalap, kopwe kaito pwe kopwe alisiei.
PSA 70:2 Amwo meinisin mi mochen nieila repwe säw o tolong lon fitikoko. Amwo chokewe meinisin mi tipeni ai üpwe feiengau repwe kulsefäl o itengau.
PSA 70:3 Amwo chokewe mi ämängauaei repwe fokun rükö ren ar kuf.
PSA 70:4 Nge meinisin mi feito reöm repwe meseik o pwapwa. Chokewe mi aücheani om amanaueer repwe apasafochei, “Kot a tekia.”
PSA 70:5 Nge ngang üa wöüngau o osupwang. Ai Kot, kopwe kaito rei. En ai chon alilis me Chon Amanau. Ai Samol mi Lapalap, kosap mang le alisiei.
PSA 71:1 Ai Samol mi Lapalap, en ai lenien op, kosap fokun mwüt ngeniei pwe üpwe kuf.
PSA 71:2 Pokiten ka pwüng, kopwe angasaei o alisiei. Kopwe aü selingom ngeniei o amanauaei.
PSA 71:3 En kopwe ai lenien op usun eu föimw, ia üa tongeni op ie fansoun meinisin. En ewe mi pwon ngeniei pwe kopwe amanauaei, pun en ai achau me ai imwen maun.
PSA 71:4 Ai Kot, kopwe angasaei seni ekewe aramasangau, pwal seni ekewe mwän mi ngau o mwäneson.
PSA 71:5 Ai Samol mi Lapalap, en ai apilükülük, üa lükülükuk seni lesäräföi.
PSA 71:6 Lon unusen manauei üa unnenuk, en ewe mi tümwünüei seni ai uputiu. Üpwe chök mwareituk fansoun meinisin.
PSA 71:7 Üa usun chök eu asisil mi eniwokus ngeni chomong aramas, nge en ai lenien op mi pöchökül.
PSA 71:8 Üa mwareituk iteiten rän o pwärätä om ling.
PSA 71:9 Kosap pöütieila iei lon ai chinlap, nge kosap likitieila iei, lupwen üa apwangapwang.
PSA 71:10 Pun chon oputaei ra kapas usi, ra rawangauaei o mochen nieila.
PSA 71:11 Ra apasa, “Kot a likitala ätei. Ousipwe tapweri o turufi, pun esap wor eman epwe angasa i.”
PSA 71:12 Ai Kot, kosap toau seniei. Ai Kot, kopwe kaito pwe kopwe alisiei.
PSA 71:13 Amwo ekewe chon atipisiei repwe säw o rosola. Nge chokewe mi kütta ar repwe afeiengauaei repwe küna turunufas me itengau.
PSA 71:14 Nge ngang üpwe apilükülükuk fansoun meinisin o alapala ai mwareituk.
PSA 71:15 Iteiten rän üpwe apworausa usun om föför mi pwüng, pwal usun om amanauaei, inamwo ika üsap tongeni weweiti meinisin.
PSA 71:16 Ai Kot, Samol mi Lapalap, üpwe feito o apworausafeili om kewe föför mi manaman, üpwe mwareiti om pwüng echök.
PSA 71:17 Ai Kot, ka aiöüei seni lesäräföi, nge ngang üa chüen asilefeili om föför mi amwarar.
PSA 71:18 Ai Kot, kosap likitieila iei, lupwen üa chinlap o pwech mökürei. Kopwe etiei, lupwen üpwe asilefeili om manaman me om tufich ngeni ekewe täppin aramas repwe up me mürin.
PSA 71:19 Ai Kot, om pwüng a tori ekewe läng mi tekia. En ka föri mettoch mi amwarar. Ai Kot, iö a wewe ngonuk?
PSA 71:20 En ewe mi öküna ngeniei chomong weires me riaföü, kopwe pwal apöchökülasefäliei, kopwe uweesefälieitä seni epin fanüfan.
PSA 71:21 En kopwe alapala ai iteüöch o achipasefäliei.
PSA 71:22 Ai Kot, ngang üpwe fokun mwareituk ren kitar, pokiten om allükülük, üpwe kölün mwareituk ren ükülele, en Ewe mi Pin me lon Israel.
PSA 71:23 Üpwe mweir fän pwapwa, lupwen üpwe kölün mwareituk. Üpwe mwareituk, pun ka amanauaei.
PSA 71:24 Iteiten rän üpwe kapas usun om pwüng, pun chokewe mi kütta ar repwe afeiengauaei ra säw o itengau.
PSA 72:1 Echö köl fän iten Salomon. Ai Kot, kopwe fang ngeni ewe king om pwüngüöch, kopwe ngeni nöün ewe king we mwän om pwüng,
PSA 72:2 pwe epwe eäni kapwüng won noum kewe aramas fän pwüng, pwal won noum kewe mi riaföü fän pwüngüöch.
PSA 72:3 Amwo ewe fanü epwe awora feiöch me kinamwe ngeni ekewe aramas, amwo epwe fis pwüng lon.
PSA 72:4 Amwo ewe king epwe peni ekewe mi riaföü me lein ekewe aramas, amwo epwe alisi ekewe mi osupwang o akufu ekewe mi ariaföüür.
PSA 72:5 Amwo ewe king epwe manau ükükün fansoun akkar me maram ra nonom läng, seni eu täppin aramas tori pwal eu täppin.
PSA 72:6 Amwo epwe usun chök üt mi püngütiu won fetil mi pwüküfö, pwal usun chök üt mi achöchönü fanüfan.
PSA 72:7 Amwo pwüng epwe fefeitä lon ränin manauan, nge feiöch me kinamwe epwe lapala, tori ewe maram esap chüen nom.
PSA 72:8 Iwe, ewe king epwe nemenem seni eu matau tori pwal eu, pwal seni ewe chanpupu Oifrat tori lesopun fanüfan.
PSA 72:9 Ekewe aramas mi nonom lon ewe fanüapö repwe pworotiu me mwan, nge chon oputan repwe chapetiu lepwül fän mesan.
PSA 72:10 Ekewe kingen Tarsis pwal ekewe king seni ekewe fanü mi nom lematau repwe takises ngeni, nge ekewe kingen Shepa me Sepa repwe uwato ar lifang ngeni.
PSA 72:11 Ekewe king meinisin repwe chapetiu me mwan, nge chon ekewe mwü meinisin repwe angang ngeni.
PSA 72:12 Pun a angasa ekewe chon osupwang, lupwen ra kökköri, pwal ekewe mi mwelele me chokewe esap wor ar chon alilis.
PSA 72:13 Iwe, a tongei chokewe mi apwangapwang me wöüngau, a pwal amanaua ekewe mi osupwang.
PSA 72:14 A angaseer seni ar riaföü me ewe angangen mwäneson mi fis ngeniir, pun manauer a aüchea me ren.
PSA 72:15 Amwo ewe king epwe manauatam! Amwo aramas repwe uwato kolt ren seni Shepa. Amwo aramas repwe iotek fän itan fansoun meinisin, repwe tüngor an feiöch rän meinisin.
PSA 72:16 Amwo epwe wor chomong wiich lon ewe fanü. Amwo epwe wor uän irä won ekewe chuk. Resin ewe fanü epwe usun chök resin Lepanon. Nge ekewe telinimw repwe ur ren aramas usun chök ewe lemäl a ur ren fetil.
PSA 72:17 Amwo iten ewe king epwe nonom tori feilfeilachök, nge iteüöchün epwe nonom ükükün fansoun akkar a nonom. Chon ekewe mwü meinisin repwe angei ar feiöch me ren, nge ir repwe apasa pwe i a feiöch.
PSA 72:18 Sipwe mwareiti ewe Samol mi Lapalap, ewe Koten Israel, i chök a föri mettoch mi amwarar.
PSA 72:19 Sipwe mwareiti itan mi ling tori feilfeilachök. An ling epwe aurala unusen fanüfan. Amen, amen.
PSA 72:20 Iei müchülan ekewe iotek än Tafit nöün Jesi we mwän.
PSA 73:1 Ellet, Kot a kirikiröch ngeni chon Israel, ngeni chokewe mi limöch leluker.
PSA 73:2 Nge ngang a arapakan ngeni an epwe tur seniei ai apilükülük, a arapakan chök esap chüen wor ai lükülük.
PSA 73:3 Pun üa lolowo ngeni ekewe chon lamalamtekia, lupwen üa küna än ekewe aramasangau wöümong.
PSA 73:4 Esap wor ar metek, inisir a pöchökül o öümanau.
PSA 73:5 Ir resap weires usun pwal ekoch aramas, resap riaföü usun pwal ekoch.
PSA 73:6 Iei mine ra mwärini lamalamtekia fän üer usun chök epa mwärämwär, angangen mwäneson a pwölürela usun echö üf.
PSA 73:7 Seni lon leluker mi pöchökül a towu ekiek mi ngau, rawangau esap wor aükükün a chök nom lon ar ekiek.
PSA 73:8 Ra takirin ämängaua aramas o eäni kapasingau, ra eniwa aramas fän ar lamalamtekia pwe repwe ariaföüür.
PSA 73:9 Ra eäni kapasingau usun Kot lon läng o eäni fos sikesik ngeni chon fanüfan.
PSA 73:10 Iei mine nöür kewe aramas ra kul ngeniir o müttir lükü ar kewe kapas meinisin.
PSA 73:11 Iwe, ra apasa, “Kot esap sile. Ewe mi Unusen Tekia esap wor an silelap.”
PSA 73:12 Iei usun lapalapen ekewe aramasangau.
PSA 73:13 Ellet a solap pwe üa tümwünü lelukei pwe epwe limöch, a solap ai üsap tipis.
PSA 73:14 Iteiten rän üa küna riaföü, nge iteiten lesosor ka apwüngüei.
PSA 73:15 Iwe, are üa pwal apasätä usun mine ir ra apasa, wewen nge üpwe afangamäi noum kewe aramas.
PSA 73:16 Üa sotuni le ekieki usun ai üpwe weweiti ei, nge a kon weires ngeniei,
PSA 73:17 tori üa tolong lon imwom imwenfel. Ikenan a fateitiei usun sopolan ekewe aramasangau.
PSA 73:18 Ellet, ka anomuur won leni mi mitimit. Ka föri mine repwe turutiu ren lon feiengau.
PSA 73:19 Ra rosola lon eu chök otun, ra moropöküla ren niuokus.
PSA 73:20 Ra usun chök eu tan mi morokaila, lupwen eman a pwök. Ai Samol, lupwen ka ütä, ra morokaila.
PSA 73:21 Lupwen üa chou, lupwen lelukei a kinas,
PSA 73:22 üsap weweiti och, üa umwes o usun chök eman man me mwom.
PSA 73:23 Nge ngang üa chök nonom reöm fansoun meinisin, pun en ka amwöchü pöüifichi.
PSA 73:24 Ka emweniei fän om öüröür, nge mürin kopwe etiwaei lon ling.
PSA 73:25 Üsap eäni och me läng nge en chök. Üsap pwal pwapwaiti och mettoch me won fanüfan lükün en.
PSA 73:26 Inisi me lelukei ra tongeni apwangapwangala, nge Kot ai pöchökül pwal wisei tori feilfeilachök.
PSA 73:27 Nge chokewe mi likitukela repwe feiengau. Ka arosala chokewe resap allükülük ngonuk.
PSA 73:28 Nge me rei, a mürina pwe üpwe kan ngeni Kot. Üa filätä Kot ewe Samol mi Lapalap pwe epwe ai lenien op, pwe üpwe apworausa an kewe föför meinisin.
PSA 74:1 Echö än Asaf kölün kait. Ai Samol mi Lapalap, pwota ka pöütikeemila tori feilfeilachök? Pwota ka chök sosong ngeni noum kewe aramas?
PSA 74:2 Kopwe chechemeni noum we mwichen aramas, ka filiir me lomlom, chokewe ka angaseer pwe repwe chon om ainang. Kopwe pwal chechemeni ewe chuk Sion, ia ka nonom ie me lom.
PSA 74:3 Kopwe fetal ngeni ekewe lemol imw mi tala seni me lomlom. Ekewe chon oputom ra ataela meinisin mine a nom lon ewe imwenfel.
PSA 74:4 Chon palüenuk ra akürang lon leniom mi pin. Ra aürätä ar filäik pwe asisilen ar win.
PSA 74:5 Ra wewe ngeni chon pöküpök irä mi pökü irä lein wöllap ren ar kouk.
PSA 74:6 Ra äsätätiu ellingen won ekewe ettip mi rup meinisin ren kouk mi watte me kükün.
PSA 74:7 Ra ataela imwom imwenfel o kenala, ra apiningaua ewe leni ia aramas ra fel ngonuk ie.
PSA 74:8 Ra kapasfengen lefiler, “Sipwe aroserela meinisin.” Iwe, ra kenala ekewe leni meinisin ia aramas ra fel ngeni Kot ie me lon ewe fanü.
PSA 74:9 Ach kewe asisil mi pin meinisin rese chüen nom, ese chüen wor eman soufos, nge esap wor eman me leich a silei inet epwe ükütiu ei lapalap.
PSA 74:10 Ai Kot, ifa ükükün fansoun än ekewe chon oputakem repwe esitok? Ifa usun, repwe turunufasei itom tori feilfeilachök?
PSA 74:11 Pwota kosap mochen alisikem? Pwota ka uwala poum lükisökürum?
PSA 74:12 Nge ai Kot, en ai king seni me lomlom, ka amanaua aramas won unusen fanüfan.
PSA 74:13 En ka kinifeseni ewe matau ren om manaman, ka amökkü möküren ekewe trakon mi nom lematau.
PSA 74:14 Ka atatakisi ekewe möküren ewe man itan Lefiatan , ka pwal aochocha fitukan ngeni ekewe mönün lon fanüapö.
PSA 74:15 Ka amichätä puächen koluk me öüwö. Nge ka apwasatä ekewe chanpupu mi pufochofoch.
PSA 74:16 En ka föri rän me pwin. Ka anomu lon lenier maram me akkar.
PSA 74:17 Ka föri kiännin fanüfan, ka pwal föri fansoun pwichikar me fansoun patapat.
PSA 74:18 Ai Samol mi Lapalap, kopwe chechemeni usun ekewe chon oputom ra esitok, usun ekewe aramas mi umwes ra turunufasei itom.
PSA 74:19 Kosap likitala noum kewe aramas mi apwangapwang ngeni ekewe chon oputer mi fokun ingau, kosap pwal manlükala noum aramas mi nom lon riaföü tori feilfeilachök.
PSA 74:20 Kopwe chechemeni om we pwon ka eäni ngenikem. Pun föförün mwäneson a chök fifis lon ekewe leni mi kiroch me lon ewe fanü.
PSA 74:21 Kosap mwütätä pwe ekewe mi riaföü repwe säw. Nge ekewe mi wöüngau me osupwang repwe mwareituk.
PSA 74:22 Ai Kot, kopwe ütä, kopwe püsin kapas fän itom, kopwe chechemeni än ekewe aramas mi umwes esitok iteiten rän.
PSA 74:23 Kosap manlükala pupuchörün ekewe chon oputom me akürangen ekewe chon ü ngonuk mi chök fifis ngonuk.
PSA 75:1 Ngeni ewe mi emweni chon köl: Ei köl usun ngingin ewe köl itan ‘Kosap ataela’. Echö än Asaf köl. Äm aia kilisou ngonuk, äm Kot, äm aia kilisou ngonuk, lupwen aia köri itom. Aramas ra apworausa om kewe föför mi amwarar.
PSA 75:2 Iwe, Kot a apasa, “Üa filätä eu fansoun pwe üpwe eäni kapwüng fän wenechar.
PSA 75:3 Lupwen fanüfan a mwaroro fiti chon meinisin, ngang ewe mi anüküchara longolongun we.
PSA 75:4 Üa üreni chokewe mi aingaing, ‘Ousap aingaing.’ Nge üa üreni ekewe aramasangau, ‘Ousap üranang.’
PSA 75:5 Ousap üranang ika fos fän lamalamtekia.”
PSA 75:6 Pun esap wor eman seni ötiu ika lotou, ika seni ewe fanüapö a tongeni atekiatai eman aramas.
PSA 75:7 Nge i Kot ewe mi eäni kapwüng, a asapwilätiu eman, nge a pwal seikätä eman.
PSA 75:8 Ewe Samol mi Lapalap a amwöchü eu kap lepöün, a ur ren wain mi pwichikar, iei än Kot song. A ninätiu, nge ekewe aramasangau meinisin won fanüfan ra ünümi. Ra ünümala meinisin tori amüchülan sosoon.
PSA 75:9 Nge ngang üpwe asilefeili usun Kot tori feilfeilachök. Üpwe kölün mwareiti än Jakop we Kot.
PSA 75:10 I epwe ataela pöchökülen ekewe aramasangau, nge epwe awateela pöchökülen ekewe chon pwüng.
PSA 76:1 Ngeni ewe mi emweni chon köl: Won pisekin ettik mi wor saitenin. Echö än Asaf köl. Ekewe aramas ra silei Kot me lon Juta, itan a föüla me lon Israel.
PSA 76:2 A förätä lenian me lon Jerusalem, a nonom won ewe chuk Sion.
PSA 76:3 Ikenan a kupi än chon oputan kewe föün esefich mi meriweriw, ekewe tittin maun, ekewe ketilas me ekewe pisekin maun.
PSA 76:4 En ka fokun ling o tekia, lupwen ka liwinto seni ekewe chuk, ia ka akufu chon oputom me ie.
PSA 76:5 Ekewe sounfiu mi pwora a oo seniir liaper, ra turula o möürüfoch. Ekewe chon maun meinisin esap wor ar pöchökül.
PSA 76:6 Ai Kot än Jakop we Kot, ren om apwüngü ekewe chon wawa oris me ekewe oris ra turula o mäla.
PSA 76:7 Nge en echök, ai Samol mi Lapalap, aramas repwe niuokusituk. Iö a tongeni ü me mwom, lupwen ka song?
PSA 76:8 Ka eäni kapwüng seni won läng. Iwe, fanüfan a niuokus o fanafanala,
PSA 76:9 lupwen ka ütä pwe kopwe atowu pwüngün kapwüng o amanaua ekewe mi nom lon riaföü meinisin won fanüfan.
PSA 76:10 Ellet, än ekewe aramas lingeringer iei fen om ling. Nge lusun ewe lingeringer kopwe chök efitti ngonuk.
PSA 76:11 Kopwe eäni om kewe pwon ngeni ewe Samol mi Lapalap om we Kot o apwönüretä. Chon ekewe fanü mi nom ünükün repwe uwato lifang ngeni Kot, ewe Kot aramas ra niuokusiti.
PSA 76:12 I a atekisona ekewe samol mi lamalamtekia, ekewe kingen fanüfan ra niuokusiti.
PSA 77:1 Ngeni ewe mi emweni chon köl: Ei köl usun ngingin förien Jetutun köl. Echö än Asaf köl. Üa siö ngeni Kot fän leüömong, üa siö ngeni Kot fän leüömong pwe epwe aüselingaei.
PSA 77:2 Lon ränin ai riaföü üa kütta ewe Samol. Lepwin üa aitietä pei lupwen ai iotek, nge üsap chipwang. Nge letipei esap tongeni chip.
PSA 77:3 Lupwen üa ekieki usun Kot, üa ngüngü, nge lupwen üa ekinlon, üa tipemösök.
PSA 77:4 A föri pwe üsap tongeni möür lepwin, üa nom lon weires pwe üsap tongeni kapas.
PSA 77:5 Üa ekieki usun ekewe fansoun lom o chechemeni ekewe ier ra la.
PSA 77:6 Üa ekiek lon lelukei lepwin, üa ekinlon o akais ngeniei,
PSA 77:7 “Ifa usun, ewe Samol epwe pöütikichela tori feilfeilachök, nge esap ümöümöchsefäl ngenikich?
PSA 77:8 Ifa usun, an we tong ellet a wesewesen müchüla? Ifa usun, an kewe pwon ra ükütiu fansoun meinisin?
PSA 77:9 Ifa usun, Kot a manlükala an epwe kirikiröch? Ifa usun, an song a aükätiu an tong?”
PSA 77:10 Mürin üa üra, “Iei ai weires, pwe manamanen Ewe mi Unusen Tekia esap chüen usun me lom.”
PSA 77:11 Ai Samol mi Lapalap, üpwe achemato om kewe föför. Ewer, üpwe chechemeni om kewe manaman ka föri me lom.
PSA 77:12 Üpwe ekieki usun om kewe föför meinisin o ekiek won om kewe föför mi amwarar.
PSA 77:13 Ai Kot, meinisin mine ka föri a pin. Esap wor eman kot a tekia seni en.
PSA 77:14 En ewe Kot mi föri föför mi amwarar. Ka pwäri om manaman lein chon ekewe mwü.
PSA 77:15 Ren om manaman ka angasa noum aramas, ir ekewe mwirimwirin Jakop me Josef.
PSA 77:16 Ai Kot, lupwen ekewe koluk ra künok, ra niuokus, nge epin ewe matau a chechech.
PSA 77:17 Ekewe kuchu ra ninätiu koluk, ekewe chopulap ra püng me läng. Om kewe inefi ra fila ekis meinisin.
PSA 77:18 Püngün om chopulap a nom lon ewe ewiniär. Om kewe inefi ra asarama fanüfan. Fanüfan a chechech o mwöükük.
PSA 77:19 En ka pwerela won matau, ka fetal won ekewe koluk mi watte, nge esap wor eman a küna rasen ipwom.
PSA 77:20 Ka emweni noum aramas ren Moses me Aaron usun eman chon mas a emweni eu pwiin sip.
PSA 78:1 Echö än Asaf kölün kait. Ämi nei aramas, oupwe aüselinga mine üpwe aiti ngenikemi. Oupwe aüeto selingemi ngeni mine üpwe apasa.
PSA 78:2 Üpwe apasatä eu kapasen awewe. Üpwe apasawu kapas monomon mi fis me lom,
PSA 78:3 usun ekewe mettoch sa rongorong o silei, semalapach kewe ra apworausa ngenikich.
PSA 78:4 Sisap aopa ekewe kapas seni nöüch, nge sipwe apworausa ngeni ewe täppin aramas epwe feito me mürich usun än ewe Samol mi Lapalap föför mi amwarar, usun an kewe manaman me an kewe asisil a föriir.
PSA 78:5 A awora ekewe pwüüng fän iten ekewe mwirimwirin Jakop o föri ekewe allük fän iten chon Israel. A allük ngeni ach kewe lewo pwe repwe aiti ngeni nöür kewe an kewe allük,
PSA 78:6 pwe ekewe täppin aramas me müriir repwe silei ekewe allük, pwal ekewe mönükol resamwo uputiu, mürin, pwal ir repwe apworausa ngeni nöür.
PSA 78:7 Ren ei repwe anomu ar apilükülük won Kot, nge resap manlükala än Kot kewe föför. Repwe pwal aleasochisi an kewe allük,
PSA 78:8 pwe resap wewe ngeni ar kewe lewo, ewe täppin aramas mi ülöförea me lükümach, ewe täppin aramas leluker esap pos, resap pwal allükülük ngeni Kot.
PSA 78:9 Ekewe mwän seni ewe ainangen Efraim mi uwei nöür likapich ra kulsefäl o sü lon ewe rän a fis maun.
PSA 78:10 Resap tümwünü än Kot pwon, resap pwal mochen aleasochisi an kewe allük.
PSA 78:11 Ra manlükala mine a föri, ekewe manaman a pwäri ngeniir.
PSA 78:12 Kot a föri föför mi amwarar fän mesen ar kewe lewo lon ewe fanü Isip me lon ewe maasiesin Soan.
PSA 78:13 A kinifeseni ewe matau o emwenirela tori epek, a föri pwe ekewe koluk ra ütä usun chök eu tit.
PSA 78:14 Lerän a emweniir ren eu kuchu, nge lepwin a emweniir ren ekkei mi saramaram.
PSA 78:15 A asangafeseni achau lon ewe fanüapö o aünü ngeniir chomong koluk seni ekewe leni mi alolol.
PSA 78:16 A föri pwe öüwö a towu seni ewe achau, nge koluk a puputiu usun chanpupu.
PSA 78:17 Nge ra chök sopwela le tipis ngeni Kot, ra ü ngeni Ewe mi Unusen Tekia me lon ewe fanüapö.
PSA 78:18 Ra sotuni Kot seni mochenin letiper ren ar tüngormau ener mongö ra mwäräräiti.
PSA 78:19 Ra ü ngeni Kot ren ar kapas o apasa, “Ifa usun, Kot a tongeni ngenikich mongö lon ewe fanüapö?
PSA 78:20 A wichi ewe achau pwe koluk a towu, nge ekewe öüwö ra urourela. Nge ifa usun, a pwal tongeni fangeto pilawa ika amolätä fituk fän iten nöün aramas?”
PSA 78:21 Iei mine, lupwen ewe Samol mi Lapalap a rongorong ar kewe kapas, a fokun song. A tinala ekkei pwe a keni chon Israel, nge an song a wattela ngeniir,
PSA 78:22 pun esap wor ar lükülük won Kot, resap pwal lükü an manaman pwe a tongeni amanaueer.
PSA 78:23 Nge Kot a chök allük ngeni ekewe läng o sukala ekewe asamen läng.
PSA 78:24 A apüngätiu wor mana, ekewe föün wiichen läng, pwe repwe tongeni mongö,
PSA 78:25 Aramas ra mongö enen ekewe chon läng. A tinala rer chomong mongö.
PSA 78:26 A pwal föri pwe asepwälin ötiu a enien fän läng, nge ren an manaman a emwenawu ewe asepwälin ör.
PSA 78:27 A apüngätiu wor fituk usun chök pwül moromor, ekewe machang ra chomong usun chök chomongun föün pien aroset.
PSA 78:28 A apüngüretiu lukalapen lenier pwelin ünükün imwer.
PSA 78:29 Iwe, ekewe aramas ra mongö o fokun mötüla, pun Kot a ngeniir mine ra fokun mwäräräiti.
PSA 78:30 Nge mwen an esamwo wesöchüla ar mwärä, lupwen ra chüen mongö ewe mongö,
PSA 78:31 Kot a song ngeniir, pwe a niela ekewe mi fokun pöchökül me leir me ekewe alüal me lon Israel.
PSA 78:32 Iwe, ekei mettoch meinisin ra fis, nge ekewe aramas ra chök sopwela le tipis. Kot a föri an kewe manaman, nge resap fokun lükü.
PSA 78:33 Iei mine Kot a föri pwe ränin manauer a wesila usun chök enienin asepwäl, nge ierin manauer a chök sopolong lon niuokus watte.
PSA 78:34 Nge lupwen Kot a niela ekoch me leir, ekewe mi chüen manau ra kütta i. Ra ekieksefäl o tiliken le iotek ngeni.
PSA 78:35 Ra chechemeni pwe Kot ar achau, pwe ewe Kot mi Unusen Tekia ar Chon Amanau.
PSA 78:36 Nge ar kewe kapas resap pwüng, meinisin mine ra apasa a chök mwakel.
PSA 78:37 Leluker esap wenechar ngeni, resap pwal allükülük won an we pwon.
PSA 78:38 Nge Kot a tongeer, a amusala ar tipis, esap pwal aroserela, Fän chomong a amwöchü an song, nge esap amüchawu an lingeringer ngeniir.
PSA 78:39 A chechemeni pwe ir aramas echök, ra usun chök asepwäl mi enila, nge esap chüen enito.
PSA 78:40 Fän chomong ra ü ngeni i me lon ewe fanüapö o achouu me lon ewe fanüpwas.
PSA 78:41 Ra sotuni Kot fän chomong o asonga Ewe mi Pin me lon Israel.
PSA 78:42 Resap chechemeni an manaman ika ewe rän, lupwen a amanaueer seni chon oputeer,
PSA 78:43 resap pwal chechemeni an kewe föför mi amwarar me an kewe manaman a föri lon Isip me lon ewe maasiesin Soan.
PSA 78:44 Iwe, Kot a awili lölön ekewe chanpupu ngeni cha, pwe ekewe chon Isip resap tongeni ün seniir.
PSA 78:45 Kot a tinato pwiin nikken leir pwe repwe küür, pwal kairü mi ataela irän fanüer.
PSA 78:46 A amongöü ngeni ekewe müün fotar irä, nge ekewe lifichimas ra eni uän ar tanipi.
PSA 78:47 A ataela ar tanipin wain ren ütten fau me ar irä sikamor ren patapat.
PSA 78:48 A niela nöür pwiin kow ren ütten fau, pwal nöür pwiin sip ren inefi.
PSA 78:49 Ren an song mi fokun watte ngeniir, ren an lingeringer me an koput a esen ngeniir pwe repwe tolong lon riaföü. Ei a usun chök eu mwichen chon läng mi feito o afeiengaueer.
PSA 78:50 Esap chüen engila lon an song, esap pwal achika manauer seni mäla, nge a asechirela pwe repwe mäla ren mätter.
PSA 78:51 A niela ekewe mwänichi meinisin lon Isip, ir mwen pöchökülen mwirimwirin Ham me lon ewe fanü.
PSA 78:52 Mürin, Kot a emwenawu nöün aramas usun eman chon mas a emweni nöün pwiin sip, o emweniir lon ewe fanüapö.
PSA 78:53 A emwenirela fän kinamwe pwe resap niuokus, nge ewe matau a pwölüela ekewe chon oputeer.
PSA 78:54 Iwe, a emwenirela ngeni fanüan we mi pin, ngeni ewe chuk püsin i a liapeni.
PSA 78:55 A asüela chon ekewe mwü me mwer. A aineti ngeni ekewe ainangen Israel fanüer pwe repwe fanüeni o ngeniir imwer.
PSA 78:56 Nge ir ra sotuni ewe Kot mi Unusen Tekia o ü ngeni. Resap aleasochisi an kewe allük,
PSA 78:57 nge ra tokola seni Kot o kirikiringau usun chök semelaper kewe, ra lomotongau usun chök efoch esefich mi pwor.
PSA 78:58 Pun ra asonga Kot ren ar lenien fel won ekewe leni tekia, ra pwal föri pwe a lingeringeritiir ren ar kewe uluulun anü mi fal.
PSA 78:59 Iwe, lupwen Kot a küna ei, a fokun song o wesewesen pöütala chon Israel.
PSA 78:60 A likitala lenian me lon Silo, ewe imw mangaku ia Kot a nom ie me lein ekewe aramas.
PSA 78:61 A föri pwe ewe pworofel, asisilen an manaman me ling, epwe oolong lepöün chon oputeer.
PSA 78:62 A lingeringeriti nöün aramas o mwüt ngeni chon oputeer pwe repwe nirela ren ketilas.
PSA 78:63 Nöür alüal ra mäla lon maun. Esap chüen wor alüal repwe pwüpwülü ngeni nöür föpwül.
PSA 78:64 Nöür souasor ra mäla ren ketilas, nge nöür fefin mi mä pwülüer resap tongeni ngüngüres.
PSA 78:65 Mürin, ewe Samol a pwök usun eman a pwök me annut. A usun eman mwän mi pöchökül a akkapwas pokiten an ün wain.
PSA 78:66 Iwe, a akufu chon oputan pwe ra sü o asäweer ren säw esemüch.
PSA 78:67 Mürin, Kot a pöütala ekewe mwirimwirin Josef, esap filätä ewe ainangen Efraim.
PSA 78:68 Nge a filätä ewe ainangen Juta, pwal ewe chuk Sion a efich.
PSA 78:69 Ikenan a aüetä imwan mi pin o tekia usun tekian ekewe läng, a pwal anüküchara usun fanüfan pwe epwe nom tori feilfeilachök.
PSA 78:70 Kot a filätä nöün chon angang Tafit o angei i seni ekewe lenien sip.
PSA 78:71 A emwenato Tafit seni an tümwünü ekewe pwiin sip pwe epwe chon masen nöün aramas, ekewe chon Israel.
PSA 78:72 Iwe, Tafit a tümwünüür ren wenecharen lelukan, a fokun angangöch lon an emweniir.
PSA 79:1 Echö än Asaf köl. Ai Kot, chon ekewe mwü ra tolong lon fanüom. Ra apiningaua pinin imwom we mi pin o atatakisi Jerusalem.
PSA 79:2 Ra ngeni ekewe machang mi mwacho somän noum kewe chon angang pwe ochar, ra ngeni ekewe manmwacho fituken noum kewe chon pin.
PSA 79:3 Ra ninätiu char usun koluk pwelin ünükün Jerusalem, nge esap wor eman a peiaseni ekewe somä.
PSA 79:4 Äm aia uren takir me ren chon ekewe mwü mi nom ünüküm, ra turunufasekem o esitakem.
PSA 79:5 Ai Samol mi Lapalap, ifa ükükün fansoun om kopwe song ngenikem? Epwe tori feilfeilachök? Ifa usun, om lingeringeritikem epwe chök ngetenget usun ekkei?
PSA 79:6 Kopwe song ngeni chon ekewe mwü resap sileek, pwal ngeni chokewe resap iotek ngonuk.
PSA 79:7 Pun ra niela noum aramas o ataela fanüer.
PSA 79:8 Kosap ukun ngenikem tipisin äm kewe lewo. Kopwe amüttirato om ümöümöch ngenikem, pun äm aia apilükingau.
PSA 79:9 Kopwe alisikem, ai Kot äm Chon Amanau, pwe itom epwe ling. Kopwe angasakem o amusala äm tipis pokiten itom.
PSA 79:10 Pwota chon ekewe mwü repwe ais, “Ifa i chök ar we Kot?” Kopwe öküna ngenikem usun om kopwe ngeni chon ekewe mwü chappen ar nimanauei noum kewe chon angang.
PSA 79:11 Kopwe aüselinga ngüngün ekewe chon fötek. Fän om manaman mi lapalap kopwe angasala ir mi feil ngeni mäla.
PSA 79:12 Ai Samol, kopwe liwini ngeni chon ekewe mwü fän fisu ar kewe kapasen turunufas ra turunufaseek ren.
PSA 79:13 Mürin, äm noum aramas, ewe mwichen sipen om mälämäl, äm aipwe kilisou ngonuk tori feilfeilachök. Seni eu täppin aramas tori eu täppin äm aipwe mwareituk.
PSA 80:1 Ngeni ewe mi emweni chon köl: Ei köl usun ngingin ewe köl itan ‘Kiop’. Eu än Asaf kapasen pwärätä. Echö köl. Kopwe aüselingakem, en än Israel chon mas, en mi emweni ekewe mwirimwirin Josef usun eu pwiin sip. En mi mot won om lenien motun king asen ekewe kerop,
PSA 80:2 Kopwe pwärukela ngeni chon ekewe ainangen Efraim me Peniamin me Manasa. Kopwe pwäri ngenikem om manaman, kopwe feito o amanauakem.
PSA 80:3 Ai Kot, kopwe aliwinisefälikem, kopwe netiu wom fän om kirikiröch pwe aipwe küna manau.
PSA 80:4 Ai Samol mi Lapalap, en ewe Kot mi unusen manaman, ifa ükükün fansoun om kopwe song ren än noum kewe aramas iotek?
PSA 80:5 Ka amongöü ngenikem riaföü pwe enem mongö, ka pwal aünü ngenikem chönün mesem fän aükük watte.
PSA 80:6 Ka föri pwe chon ekewe mwü mi nom aruum ra aninifengen won fanüem, nge chon oputakem ra takirin ämängauakem.
PSA 80:7 Ai Kot mi Unusen Manaman, kopwe aliwinisefälikem, kopwe netiu wom fän om kirikiröch pwe aipwe küna manau.
PSA 80:8 En ka uwato efoch irän wain seni Isip, ka asüela chon ekewe mwü o fotukätiu ewe irä lon fanüer.
PSA 80:9 Ka limeti eu leni fän iten ewe irä pwe epwe tongeni märitä. A tötiu waran fän pwül lealolol, a pwal amasoua ewe fanü.
PSA 80:10 Ekewe chuk ra pwölüla ren nürün, nge palan kewe ra usun chök palen ekewe irä setar mi fokun watte.
PSA 80:11 Palen ewe irän wain ra meresiwu tori ewe matau watte, nge fasaran kewe ra tori ewe chanpupu Oifrat.
PSA 80:12 Pwota ka ataetiu tittin kewe, pwe meinisin mi pwerela won ewe al ra kini uan?
PSA 80:13 Pik mi mwacho seni ewe wöllap ra tipwei ewe irä, nge ekewe manmwacho ra mongö seni.
PSA 80:14 Ai Kot mi Unusen Manaman, kopwe kul ngenikem, kopwe netiu seni läng o nenengenikem. Kopwe ekieki ei irän wain.
PSA 80:15 Kopwe tümwünü, pun en ewe ka püsin fotukätiu. Kopwe tümwünü palan we ka ämärätä o apöchöküla fän itom.
PSA 80:16 Ra pöküetiu om we irän wain o kenala. Kopwe netiu wor fän om song o aroserela.
PSA 80:17 Nge kopwe fokun tümwünü noum aramas ka filätä, ewe mwü ka fokun apöchöküla fän itom.
PSA 80:18 Mürin, äm aisap fokun chüen kul senuk. Kopwe fang ngenikem manau, nge äm aipwe mwareituk.
PSA 80:19 Ai Samol mi Lapalap, en ewe Kot mi Unusen Manaman, kopwe aliwinisefälikem, kopwe netiu wom fän om kirikiröch pwe aipwe küna manau.
PSA 81:1 Ngeni ewe mi emweni chon köl: Won pisekin ettik itan Kitit. Echö än Asaf köl. Oupwe leüömong le köl ngeni Kot i ach pöchökül. Oupwe mweireir fän pwapwa ngeni än Jakop we Kot.
PSA 81:2 Oupwe chietä echö köl, oupwe ettiki pisekin kaktai, oupwe ettiki ükülele me kitar.
PSA 81:3 Oupwe ettiki rappwa lelingen maram me leunusen maram, pwal lupwen ach ränin chulap.
PSA 81:4 Pun iei eu allük lon Israel, eu pwüüng seni än Jakop we Kot.
PSA 81:5 Kot a anükücharala ei allük ngeni chon Israel, lupwen a feila pwe epwe maun ngeni Isip. Üa rongorong eu möngüngü üsamwo rong me mwan:
PSA 81:6 “Üa angei seni afaremi ewe mettoch mi chou, üa atowu me lepöümi ewe chüük mi chou ren pilak.
PSA 81:7 Oua köriei lon ämi riaföü, nge ngang üa angasakemi. Üa pälüenikemi seni ewe kuchuen chopulap, nge ousap künaei, üa sotunikemi arun ekewe kolukun Meripa.
PSA 81:8 Ämi nei aramas, oupwe rongorong ngeni ai kapasen fön. Ämi chon Israel, amwo oupwe aüselingaei.
PSA 81:9 Esap tufich pwe oupwe eäni eman kot än chon ekewe mwü, ousap fel ngeni eman koten ekis.
PSA 81:10 Ngang ewe Samol mi Lapalap ämi we Kot, üa emwenikemiiwu seni ewe fanü Isip. Oupwe fokun amassaw, nge ngang üpwe amongökemi.
PSA 81:11 Nge nei aramas resap mochen aüselinga aloi, chon Israel resap mochen aleasochisiei.
PSA 81:12 Iei mine üa asechirela lon ar tipeförea pwe repwe chök föri mine ra mochen.
PSA 81:13 Amwo nei aramas repwe aüselinga aloi, amwo chon Israel repwe aleasochisiei.
PSA 81:14 Are epwe iei usun, üpwe müttir akufu chon oputeer o fiu ngeni chokewe mi ü ngeniir.
PSA 81:15 Iwe, chokewe mi oputaei repwe chapetiu me mwei fän niuokus, nge ar feiengau esap müchüla tori feilfeilachök.
PSA 81:16 Nge üpwe amongöü ngenikemi wiich mi fokun mürina o aünü ngenikemi chönün chunen seni ewe achau, pwe oupwe mötüla.”
PSA 82:1 Echö än Asaf köl. Kot ewe meilapen ewe mwichen lon läng, a eäni kapwüng me lein ekewe kot:
PSA 82:2 “Ifa ükükün fansoun ämi oupwe eäni kapwüng fän pwüngingau o peni ekewe aramasangau?
PSA 82:3 Oupwe eäni kapwüng fän pwüng ngeni ekewe mi mwelele me ekewe mi mäsen. Oupwe eäni pwüng ngeni ekewe mi riaföü me wöüngau.
PSA 82:4 Oupwe amanaua ekewe mi mwelele me ekewe mi osupwang o angaserela seni lepöün ekewe aramasangau.”
PSA 82:5 Iwe, esap wor ar sile ika mirit, ra chök fetal lon rochopwak. Ra ataela ekewe pwüüng ekewe mwün fanüfan ra longolong won.
PSA 82:6 Üa apasa, “Ämi oua kot, ämi meinisin nöün Ewe mi Unusen Tekia.
PSA 82:7 Nge ämi oupwe chök mäla usun aramas, oupwe mäfeiengau usun chök ekewe samol.”
PSA 82:8 Ai Kot, kopwe feito o apwüngü fanüfan, pun noum chök chon ekewe mwü meinisin.
PSA 83:1 Echö än Asaf köl. Ai Kot, kosap fanafanala, ai Kot, kosap mosonoson ika asösö.
PSA 83:2 Pun nengeni, chon ü ngonuk ra akürang, nge chokewe mi oputok ra achimwätä mökürer.
PSA 83:3 Ra rawangauei noum aramas fän atuputup. Ra ekiekietä mine a ngau ngeni noum kewe ka tümwünüür.
PSA 83:4 Ra apasa, “Ou etto, ousipwe aroserela pwe resap chüen eu mwü, esap pwal wor eman epwe chüen chechemeni Israel.”
PSA 83:5 Ewer, ra tipeeufengen le rawangau. Ra föri eu pwonen atipeeufengen pwe repwe ü ngonuk.
PSA 83:6 Ekewe chon Etom me ekewe mwirimwirin Ismael, ekewe chon Moap me ekewe mwirimwirin Hakar,
PSA 83:7 ekewe chon Kepal, chon Amon me chon Amalek, ekewe chon Filistia me chokewe mi imweimw lon ewe telinimw Tirus,
PSA 83:8 pwal ekewe chon Asiria ra choniir. Ir meinisin ra alisi ekewe mwirimwirin Lot.
PSA 83:9 Kopwe föri ngeniir usun mine ka föri ngeni chon Mitian, usun mine ka föri ngeni Sisera me Japin arun ewe chanpupu Kison.
PSA 83:10 Ir ra ninnila me Entor, inisir a usun chök kiten mongö won pwül.
PSA 83:11 Kopwe föri ngeni ar kewe aramas tekia pwe repwe usun chök Orep me Seep, nge ar kewe samol meinisin repwe usun chök Sepa me Salmuna,
PSA 83:12 ir chokewe mi apasa, “Ousipwe angei fän itach ekewe fanüen Kot pwe sipwe fanüeni.”
PSA 83:13 Ai Kot, kopwe föri pwe repwe usun chök pipisüsü, pwal usun chök fetilipwas asepwäl a ässala.
PSA 83:14 Usun ekkei a kenala ewe wöllap, usun ngetengeten ekkei a akkara ekewe chuk,
PSA 83:15 iei usun kopwe tapweriir ren om asepwäl mi pöchökül o eniwokusuur ren om mölümöl.
PSA 83:16 Kopwe atoto wor säw, pwe repwe küttok, ai Samol mi Lapalap.
PSA 83:17 Amwo repwe säw o nom lon niuokus watte tori feilfeilachök. Amwo repwe mäla lon itengau.
PSA 83:18 Iwe, repwe silei pwe en ewe mi iteni Samol mi Lapalap, en chök Ewe mi Unusen Tekia won unusen fanüfan.
PSA 84:1 Ngeni ewe mi emweni chon köl: Won pisekin ettik itan Kitit. Echö köl än nöün Kora kewe mwän. Ai Samol mi Unusen Manaman, üa fokun efich imwom.
PSA 84:2 Üa fokun positi ai üpwe nom lon imwen ewe Samol mi Lapalap, ewer, üa aiengau ren. Lelukei me inisi ra kölün pwapwa ngeni ewe Kot mi manau.
PSA 84:3 Iwe, ewe nichok a küna lenian, nge ewe ekiek a wor fasan ia a tongeni anomu ie apanan, ina usun üa küna leniei ünükün om kewe rongen asor, ai Samol mi Unusen Manaman, ai king me ai Kot.
PSA 84:4 Ra feiöch ir mi nonom lon imwom, ir mi kölün mwareituk fansoun meinisin.
PSA 84:5 Ra feiöch ekewe aramas mi angei ar pöchökül senuk. Ra chök ekieki lon leluker ar repwe fetal won ekewe al ngeni Sion.
PSA 84:6 Lupwen ra pwerela lon ewe lemolun kechü mi pwasapwas, ra awili ngeni eu lenien puächen koluk. Pwal ewe ütten leefen a pwölüela ewe lemol ren feiöch.
PSA 84:7 Ra fetal o pöpöchökülela tori repwe küna ewe Kot mi lap seni ekewe kot meinisin me lon Sion.
PSA 84:8 Ai Samol mi Lapalap, en ewe Kot mi Unusen Manaman, kopwe aüselinga ai iotek, kopwe aü selingom, Maing än Jakop we Kot.
PSA 84:9 Ai Kot, kopwe afeiöchü äm king, kopwe netiu won noum we mi kepit.
PSA 84:10 Pun ai nonom lon imwom lon ükükün eu chök rän a mürina seni ai nonom ekis lon ükükün engeröü rän. Üa efich ai üpwe nom lon asamalapen imwen ai Kot, lap seni ai üpwe nonom lon imwen ekewe aramasangau.
PSA 84:11 Pun Kot ewe Samol mi Lapalap i ai saram, a apetiei seni ei feiengau. A fangela ngenikich ümöümöch me iteüöch. Ewe Samol mi Lapalap esap amwöchü och mi mürina seni chokewe mi föri mine a pwüng.
PSA 84:12 Ai Samol mi Unusen Manaman, a feiöch ewe aramas mi lükü en.
PSA 85:1 Ngeni ewe mi emweni chon köl: Echö köl än nöün Kora kewe mwän. Ai Samol mi Lapalap, ka fen efich fanüom me lom, ka aliwinisefäli ekewe chon Israel seni ar oola o awöüür.
PSA 85:2 Ka amusala pwüngingauen noum aramas, ka amusala ar tipis meinisin.
PSA 85:3 Ka aükätiu om lingeringer ngeniir o wes seni om song mi fokun lapalap.
PSA 85:4 Ai Kot, äm Chon Amanau, kopwe aliwinisefälikem o aükätiu om song ngenikem.
PSA 85:5 Ifa usun, kopwe song ngenikem tori feilfeilachök? Ifa usun, kopwe chök sopwela le song ngeni ekewe täppin aramas meinisin?
PSA 85:6 Kose mochen kopwe amanauasefälikem, pwe äm noum kewe aramas aipwe mwareituk.
PSA 85:7 Ai Samol mi Lapalap, kopwe pwäri ngenikem om we tong ellet o fang ngenikem om manau.
PSA 85:8 Üpwe rongorong ngeni mine Kot a apasa. A pwon pwe epwe awora kinamwe ngeni nöün kewe aramas, ngeni nöün kewe mi pin, are resap chüen liwinsefäl ngeni ar kewe föför mi mwäl.
PSA 85:9 Ellet, a kaneto pwe epwe amanaua chokewe mi niuokusiti i, pwe an ling epwe nonom lon fanüach.
PSA 85:10 Tong ellet me allükülük repwe chufengen, pwüng me kinamwe repwe mitirifengeniir.
PSA 85:11 Än aramas allükülük epwe feitä seni fanüfan, nge än Kot pwüng epwe netiu seni läng.
PSA 85:12 Ewer, ewe Samol mi Lapalap epwe fangeto mettoch mi mürina, nge fanüach epwe awora räsimong.
PSA 85:13 Pwüng epwe akomwola mwen ewe Samol mi Lapalap, pwe epwe föri efoch al fän itan.
PSA 86:1 Eu än Tafit iotek. Ai Samol mi Lapalap, kopwe aüselingaei o pälüeniei, pun ngang eman aramas mi wöüngau o osupwang.
PSA 86:2 Kopwe amwöchü manauei, pun ngang üa föri letipom. Kopwe amanauaei, ngang noum chon angang mi apilükülükuk, pun en ai Kot.
PSA 86:3 Ai Samol, kopwe ümöümöch ngeniei, pun ngang üa siö ngonuk iteiten rän.
PSA 86:4 Kopwe apwapwai leluken noum ei chon angang, ai Samol, pun üa suki ngonuk lelukei.
PSA 86:5 Pun en, ai Samol, ka kirikiröch o amusala tipis, om tong ellet a somwosom ngeni meinisin mi iotek ngonuk.
PSA 86:6 Ai Samol mi Lapalap kopwe aü selingom ngeni ai iotek, kopwe aüseling ngeni ai tüngor.
PSA 86:7 Lon ränin ai riaföü üpwe kökköruk, pun en kopwe pälüeniei.
PSA 86:8 Esap fokun wor eman me lein ekewe kot usun en, ai Samol, esap pwal wor och föför mi wewe ngeni om kewe föför.
PSA 86:9 Chon ekewe mwü meinisin ka föriir repwe feito o fel ngonuk, ai Samol mi Lapalap, repwe pwal alinga itom.
PSA 86:10 Pun en ka tekia, ka föri mettoch mi amwarar, en echök Kot.
PSA 86:11 Ai Samol mi Lapalap, kopwe aiti ngeniei mine ka mochen pwe üpwe föri. Iwe, üpwe aleasochis ngonuk fän allükülük. Kopwe fang ngeniei eu leluk esap tipekinikin, pwe üpwe niuokusiti itom.
PSA 86:12 Ai Samol me ai Kot, üpwe kilisou ngonuk ren unusen lelukei, üpwe alinga itom tori feilfeilachök.
PSA 86:13 Pun om we tong ellet a fokun lapalap ngeniei, ka amanauaei seni epin lenien sotup.
PSA 86:14 Ai Kot, aramas mi lamalamtekia ra ü ngeniei, eu mwichen mwänewüs ra mochen nieila, ir chokewe resap ekieki en.
PSA 86:15 Nge en, ai Samol, eman Kot mi ümöümöch o kirikiröch, ka songomang o wöün tong ellet me allükülük.
PSA 86:16 Kopwe sap ngeniei o tongeei, kopwe ngeni noum ei chon angang pöchökül o amanaua nöün noum we chon angang fefin mwän.
PSA 86:17 Kopwe pwäri ngeniei eu asisil pwe ka kirikiröch ngeniei, pwe chokewe mi oputaei repwe säw, lupwen repwe küna pwe en ai Samol mi Lapalap ka alisiei o achipaei.
PSA 87:1 Echö köl än nöün Kora kewe mwän. Kot a aüetä an we telinimw won ewe chuk mi pin.
PSA 87:2 Ewe Samol mi Lapalap a aücheani Sion lap seni ekewe leni meinisin lon Israel.
PSA 87:3 A eäni pworaus mi amwarar usum, en telinimwen Kot.
PSA 87:4 Üpwe makei iten Isip me Papilon lon tettelin ekewe mwü mi aleasochisiei, pwal ekewe chon Filistia me Tirus me Itiopia üpwe alearelong lein chokewe mi imweimw lon Jerusalem.
PSA 87:5 Nge usun Sion aramas repwe apasa pwe chon ekewe mwü meinisin repwe nonom lon. Iwe, Ewe mi Unusen Tekia epwe püsin anüküchara ewe telinimw.
PSA 87:6 Ewe Samol mi Lapalap epwe angei iteiten ekewe aramas, epwe alearelong meinisin lon iteiten chon ewe telinimw Jerusalem.
PSA 87:7 Iwe, ekewe chon köl me chon pworuk ra apasa, “Äm kewe puächen kolukun manau ra nonom lomw.”
PSA 88:1 Echö köl än nöün Kora kewe mwän. Ngeni ewe mi emweni chon köl Ei köl usun ngingin ewe sokun köl mi mang. Echö kölün kait än Heman eman mwirimwirin Esra. Ai Samol mi Lapalap, ai Kot mi amanauaei lerän me lepwin, üa siö ngonuk pwe kopwe alisiei.
PSA 88:2 Amwo kopwe etiwa ai iotek, kopwe aüselinga ngeni ai siö.
PSA 88:3 Pun chomong riaföü ra toriei, pwe üa arap ngeni ai üpwe mäla.
PSA 88:4 Üa alealong lein chokewe mi tolong lon peias. Ngang eman mwän esap wor ai pöchökül.
PSA 88:5 Üa usun eman mi pöütüla me lein ekewe somä, usun ekewe mi ninnila ra kon lon peias, pwal usun chokewe en kosap chüen chechemeniir, pun ka ärirewu seni om tütümwün.
PSA 88:6 Ka aturueilong epin ewe peias, lon ewe leni mi rochopwak o alolol.
PSA 88:7 Om lingeringer a chouitiei, üa pwölüla fan usun chök ai pwölüla fän no.
PSA 88:8 Ka föri pwe chiechiei kewe ra likitieila. Ka föri pwe ngang och mettoch mi anioput me rer, üa mwöchülong lon fötek pwe üsap tongeni süla.
PSA 88:9 Mesei ra toputopula ren ai riaföü. Iteiten rän üa kökköruk, ai Samol mi Lapalap, üa aitietä pei ngonuk lon ai iotek.
PSA 88:10 Ifa usun, en ka föri manaman fän iten sotup? Ifa usun, ir repwe tongeni ütä o mwareituk?
PSA 88:11 Ifa usun, repwe apworausa om we tong ellet me lon peias, ika om allükülük me lon ewe leni mi ta?
PSA 88:12 Ifa usun, ra silei usun om kewe manaman me lon lenien rochopwak, ika usun om kewe föförün pwüng me lon fanüen chokewe mi manlüküla?
PSA 88:13 Nge ngang, ai Samol mi Lapalap, üa siö ngonuk, iteiten lesosor üa iotek ngonuk.
PSA 88:14 Ai Samol mi Lapalap, pwota ka pöütieila, pwota ka aopa mesom seniei?
PSA 88:15 Üa apwangapwang o kan ngeni mäla seni lesäräföi, üa riaföü ren om kewe eniweniw o apilükingau.
PSA 88:16 Om lingeringer a pwölüeila, om kewe eniweniw ra afeiengauwaei.
PSA 88:17 Ra pwelifeiliei usun no iteiten rän, ra pweliei o rongeila.
PSA 88:18 Ka föri pwe atongeei me chienei ra likitieila, nge rochopwak chiechiei we mi fokun kan ngeniei.
PSA 89:1 Echö kölün kait än Etan eman mwirimwirin Esra. Ai Samol mi Lapalap, üpwe kölü om tong ellet tori feilfeilachök. Üpwe arongafeili om allükülük ngeni ekewe täppin aramas meinisin.
PSA 89:2 Üpwe pwärätä pwe om tong ellet a nomopos tori feilfeilachök, pwe om allükülük a nüküchar usun ekewe läng.
PSA 89:3 En ka apasa, “Üa eäni eu pwon ngeni ätewe üa filätä, üa pwon fän akapel ngeni Tafit nei we chon angang:
PSA 89:4 Üpwe föri pwe mwirimwirum kana repwe king tori feilfeilachök o anüküchara mwum tori ekewe täppin aramas meinisin.”
PSA 89:5 Ai Samol mi Lapalap, ekewe läng repwe mwareiti om kewe manaman, nge ewe mwichen chon pin kana repwe ingeiti om allükülük.
PSA 89:6 Pun esap wor eman lon läng mi wewe ngonuk en Samol mi Lapalap. Esap wor eman me lein ekewe chon läng a usun chök en.
PSA 89:7 En ewe Kot ewe mwichen chon pin a niwelapeituk. Ka kon eniwokus lap seni meinisin mi nom ünükumw.
PSA 89:8 Ai Samol mi Lapalap, en ewe Kot mi Unusen Manaman, iö a manaman usun en? Ai Samol mi Lapalap, ka allükülük lon mettoch meinisin.
PSA 89:9 En ka nemeni ewe matau mi nono. Lupwen ekewe no ra pwotä, en ka alüaar.
PSA 89:10 Ka atatakisi Rahap pwe a usun chök eman mi ninnila, ka atoropasa ekewe chon oputom ren poum mi manaman.
PSA 89:11 Ekewe läng om, ewe fanüfan pwal om. En ka föri fanüfan me masouan meinisin.
PSA 89:12 En ka förätä efeng me ör. Ekewe chuk Tapor me Hermon ra mwareituk fän pwapwa.
PSA 89:13 En ka fokun manaman. Poum a pöchökül, pöüifichum a ititä.
PSA 89:14 Pwüng me apwüng longolongun mumw, tong ellet me allükülük a pwä lon meinisin mine ka föri.
PSA 89:15 Ra feiöch ekewe aramas mi silei ewe kölün mwareituk, ir mi fetal lon saramen won mesom, ai Samol mi Lapalap.
PSA 89:16 Repwe mwareituk iteiten rän o ingeiti om pwüng.
PSA 89:17 En ar ling me ar pöchökül. Ren om kirikiröch mökürem a chimwetä.
PSA 89:18 Pun ewe mi tümwünükich nöün ewe Samol mi Lapalap, ach king nöün Ewe mi Pin lon Israel.
PSA 89:19 Me lom en ka kapas ngeni noum we chon angang mi allükülük lon künan o apasa, “Üa alisi eman sounfiu mi pwora. Üa seikätä eman alüal seni lein ekewe aramas.
PSA 89:20 Üa awisa nei we chon angang Tafit pwe epwe king. Üa epiti ren ai lö mi pin.
PSA 89:21 Üpwe alisi i fansoun meinisin, ai manaman epwe apöchöküla.
PSA 89:22 Ekewe chon oputan resap tongeni pwora ngeni, nge ekewe aramasangau resap tongeni akufu.
PSA 89:23 Üpwe atatakisi chokewe mi ü ngeni, üpwe pwal niela chokewe mi oputa.
PSA 89:24 Ai allükülük me tong ellet epwe nom ren, nge i epwe chimwätä möküran pokiten itei.
PSA 89:25 Ngang üpwe awisa pwe epwe nemeni ewe matau watte, epwe pwal fokun nemeni ekewe chanpupu.
PSA 89:26 Iwe, epwe apasa ngeniei, ‘En semei me ai Kot, en ewe chon tümwünüei me ai Chon Amanau.’
PSA 89:27 Üpwe filätä i pwe epwe nei mwänichi, epwe tekia me lein ekewe kingen fanüfan.
PSA 89:28 Üpwe chök eäni ai tong ellet ngeni tori feilfeilachök, nge ai pwon ngeni epwe nükünük.
PSA 89:29 Üpwe föri pwe mwirimwirin kana repwe king tori feilfeilachök, nge mwün epwe nonom ükükün fansoun än ekewe läng nonom.
PSA 89:30 Nge are nöün kana resap aleasochis ngeni ai kewe allük, resap pwal apwönüetä ai kewe pwüüng,
PSA 89:31 are repwe puri ai kewe allük pwe resap tümwünüür,
PSA 89:32 mürin üpwe apwüngüür pokiten ar pupungau, üpwe pwal ariaföüür pokiten ar tipis.
PSA 89:33 Nge üsap ükütiu le tongei Tafit, üsap pwal föri pwe ai allükülük ngeni epwe mwäl.
PSA 89:34 Üsap atai ai pwon ngeni ika siwili eu ai kewe kapas üa apasa ngeni.
PSA 89:35 Fän eu chök üa pwon fän akapel ren ai pin, nge üsap pwal apinisefäli. Üsap chofana ngeni Tafit.
PSA 89:36 Epwe wor mwirimwirin Tafit tori feilfeilachök, nge mwün epwe nonom mwei usun chök akkar a nom mwei.
PSA 89:37 Epwe chök nonom tori feilfeilachök usun ewe maram a nonom, iei ewe pisekin pwärätä mi allükülük fän läng.”
PSA 89:38 Nge iei ka fokun song ngeni noum we mi kepit, ka likitala o pöütala.
PSA 89:39 Ka atai om we pwon ngeni noum we chon angang, ka asapwilätiu seni wisan wisen king.
PSA 89:40 Ka ataetiu tittin an telinimw meinisin o atatakisi an kewe leni mi pöchökül.
PSA 89:41 Meinisin mi pwerela lükün ra soläni pisekin. A küna turunufas me ren chon arun.
PSA 89:42 Ka fokun awinna chon ü ngeni, ka föri pwe ekewe chon oputan meinisin ra pwapwa ren ar akufu.
PSA 89:43 Ewer, ka föri pwe nöün ketilas esap wor nian, kosap pwal alisi lon maun.
PSA 89:44 Ka angei seni lepöün wokun wokun king, ka pwal aturätiu lepwül an lenien motun king.
PSA 89:45 Ka föri pwe a chinlapala, lupwen a chüen alüal, o pwölüla ren säw.
PSA 89:46 Ai Samol mi Lapalap, ifa usun, kopwe aopok tori feilfeilachök? Ifa ükükün fansoun om lingeringer epwe kü usun ekkei?
PSA 89:47 Ai Samol mi Lapalap, kopwe chechemeni pwe ränin manauei a mochomoch, pun ka föri aramas meinisin pwe repwe chök mäla.
PSA 89:48 Ifa usun, meni aramas a tongeni manau, nge esap fokun mäla? Iö a tongeni angasa manauan seni manamanen ewe lenien sotup?
PSA 89:49 Ai Samol, ia a nom ie om tong ellet ka eäni me lom, ewe tong ka pwon fän akapel ngeni Tafit ren om allükülük?
PSA 89:50 Ai Samol, kopwe chechemeni usun ngang noum ei chon angang üa küna turunufas, usun üa weires lon lelukei ren än chon ekewe mwü kapasen esit.
PSA 89:51 Ai Samol mi Lapalap, ekewe chon oputok ra turunufasei noum we king mi kepit, ra turunufasei i ekis meinisin ia a fetal ie.
PSA 89:52 Ousipwe mwareiti ewe Samol mi Lapalap tori feilfeilachök! Amen, Amen.
PSA 90:1 Eu iotek än Moses ewe aramasen Kot. Ai Samol en äm lenien op seni eu täppin aramas tori eu täppin.
PSA 90:2 Mwen ekewe chuk resamwo fis, pwal mwen kosamwo föri unusen fanüfan en chök Kot seni fansoun esepop tori fansoun esemüch.
PSA 90:3 Ka awili aramas ngeni pwül o üra, “Ämi nöün aramas, oupwe liwinsefäliti pwül.”
PSA 90:4 Pun engeröü ier ra usun chök eu rän me reöm, ra usun chök ewe rän näneu a fen la, ika usun chök eu leülüngatin eu pwin.
PSA 90:5 En ka angekaiela manauen aramas usun müttirin puun eu chanpupu. Ra usun chök eu tan mi müttir manlüküla, ra pwal usun chök fetil mi märifötä lesosor.
PSA 90:6 Lesosor ewe fetil a aümanau o märifötä, nge lekuniol a aümämä o pwasala.
PSA 90:7 Pun äm aia rosola ren om song, äm aia fokun niuokus ren om lingeringer.
PSA 90:8 Ka anomu äm pwüngingau me mwom, äm tipis mi monola ka särifätä pwe ka tongeni küneer.
PSA 90:9 Pun ränin manauem meinisin ra la senikem ren om lingeringer, nge ierin manauem kewe ra müchüla usun eu ngasangas.
PSA 90:10 Iwe, ierin manauem ra tori fik, nge are eman a pöchökül, a tori walik ier. Nge lon ekewe ier a chök masou ren angang me weires. Ra müttir wesila usun chök aia ässila.
PSA 90:11 Nge iö a mefi manamanen om song, nge iö a silei an epwe niuokusiti om lingeringer?
PSA 90:12 Kopwe aiti ngenikem pwe aipwe eiteita ränin manauem mi mochomoch, pwe aipwe tipachemela.
PSA 90:13 Ai Samol mi Lapalap, kopwe kul ngenikem. Ifa ükükün fansoun kopwe song ngenikem? Kopwe tongei noum kewe chon angang.
PSA 90:14 Kopwe aurakem ren om tong ellet iteiten lesosor, pwe aipwe köl o pwapwa lon ränin manauem meinisin.
PSA 90:15 Kopwe apwapwakem lon aükükün ekewe rän ka ariaföüükem lon, pwal lon aükükün ekewe ier aia küna weires lon.
PSA 90:16 Kopwe pwäri ngeni noum kewe chon angang om kewe föför, pwal om manaman mi ling ngeni nöür kewe.
PSA 90:17 Äm Kot Samol mi Lapalap, om ümöümöch epwe nom wom. Kopwe afisätä angangen pöüm.
PSA 91:1 Eman mi nom ren Ewe mi Unusen Tekia pwe epwe op ren o nonom fän än Ewe mi Unusen Manaman tümwün,
PSA 91:2 epwe kapas ngeni ewe Samol mi Lapalap, “En ai lenien op me imwei imwen maun, en ai Kot üa apilükülükuk.”
PSA 91:3 Pun i epwe tümwünuk seni ekewe feiengau meinisin mi monola senuk o amanauok seni ewe mätter mi afeiengau,
PSA 91:4 epwe pwölü ngonuk pöün kewe pwe kopwe op fan. An allükülük epwe tümwünuk o epeti senuk feiengau.
PSA 91:5 Kosap niueiti eniweniwen lepwin ika ekewe föün esefich mi äkkäs lerän lupwen maun,
PSA 91:6 ika ewe mätter mi akanif lerochopwak, ika ewe samau mi akafeiengau leoloas.
PSA 91:7 Engeröü repwe turula lepekum, nge engol ngeröü lepelifichum, nge en kosap feiengau.
PSA 91:8 Kopwe chök nengeni ren mesom o küna usun än ekewe aramasangau angei liwiningau.
PSA 91:9 Pokiten ka eäni ewe Samol mi Lapalap lenien op, ka pwal fili Ewe mi Unusen Tekia pwe om chon tümwün,
PSA 91:10 iei mine esap wor och feiengau epwe toruk, esap pwal wor och riaföü epwe arap ngeni imwom.
PSA 91:11 Pun i epwe akünöü nöün chon läng kana pwe repwe tümwünuk, repwe emwenuk won ekewe al meinisin ia kopwe feila ie.
PSA 91:12 Repwe pwisuk lepöür kana pwe pecheöm esap chepeti fau.
PSA 91:13 Kopwe ipwetiu won laion me serepenit, kopwe purätiu fän pecheöm ekewe nienifön laion me ekewe serepenit mi poison.
PSA 91:14 Ewe Samol mi Lapalap a apasa, “Pokiten a echeniei, ngang üpwe amanaua, üpwe tümwünü i, pun a silei itei.
PSA 91:15 Are epwe köriei, üpwe pälüeni. Üpwe nom ren lon an riaföü, üpwe angasa o aitöchü.
PSA 91:16 Üpwe alangatama ränin manauan pwe epwe menemen ren, üpwe fokun amanaua.”
PSA 92:1 Echö köl fän iten ewe ränin sapat. A mürina äm aipwe kilisou ngonuk, äm Samol mi Lapalap, aipwe kölün mwareiti itom, en Ewe mi Unusen Tekia.
PSA 92:2 Iteiten lesosor aipwe arongafeili om tong ellet, nge iteiten lepwin om allükülük,
PSA 92:3 fiti tikin pisekin ettik mi wor engol saitenin, pwal fiti ngingin kitar.
PSA 92:4 Pun en, ai Samol mi Lapalap, ka apwapwaei ren om föför. Üa köl fän pwapwa ren mine en ka föri.
PSA 92:5 Ai Samol mi Lapalap, om kewe föför ra fokun tekia, om kewe ekiek ra fokun alolol.
PSA 92:6 Aramas mi tipate resap tongeni silei, nge ir mi tiparoch resap tongeni wewe ren:
PSA 92:7 Inamwo are ekewe aramasangau ra mämäritä usun fetil, nge ekewe chon föföringau meinisin ra aümanau, repwe chök fetal ngeni feiengau esemüch.
PSA 92:8 Nge en ai Samol mi Lapalap, ka tekia tori feilfeilachök.
PSA 92:9 Ai Samol mi Lapalap, ellet ekewe chon oputom repwe rosola, nge ekewe chon föföringau meinisin repwe toropasfeil.
PSA 92:10 En ka ngeniei pöchökül usun pöchökülen eman kow mi mwacho, ka epiti ngeniei lö mi fö.
PSA 92:11 Mesei ra küna usun än chon oputaei kuf, selingei ra rongorong usun feiengauen ekewe aramasangau mi ü ngeniei.
PSA 92:12 Ekewe chon pwüng repwe aümanau usun ewe irä palm, repwe mämäritä usun efoch irä setar won Lepanon.
PSA 92:13 Ra usun chök irä mi fotetiu lon imwen ewe Samol mi Lapalap, repwe aümanauatä me lon än ach we Kot we imwenfel.
PSA 92:14 Ra chüen ua lon ar chinlap, ra uren pöchökül o wowoöch fansoun meinisin,
PSA 92:15 pwe repwe arongafeili pwe ewe Samol mi Lapalap a wenechar. I ai achau, esap wor och pwüngingau a nom ren.
PSA 93:1 Ewe Samol mi Lapalap a nemenem, a üföüf ngeni ling me manaman. Ewer, fanüfan a nükünük, esap fokun tongeni mwöküt seni lenian.
PSA 93:2 Om lenien motun king a nüküchar seni me lomlom, en ka nom seni fansoun esepop.
PSA 93:3 Ai Samol mi Lapalap, ekewe noon lematau ra tekiatä, ekewe no ra atekiatä ngüngür, ekewe no ra atekiatä püngüpüngür.
PSA 93:4 Ewe Samol mi Lapalap mi nom pekitä a fokun manaman, a pöchökül seni püngümongun chomong koluk, a pöchökül seni nonon lematau.
PSA 93:5 Ai Samol mi Lapalap, om kewe allük ra fokun let, imwom a fokun pin tori feilfeilachök.
PSA 94:1 Ai Samol mi Lapalap, en ewe Kot mi ngeni aramas chappen ar föföringau, en ewe Kot mi ngeni aramas chappen ar föföringau, kopwe pwärukela.
PSA 94:2 En soukapwüngün fanüfan, kopwe ütä o liwini ngeni ekewe chon lamalamtekia ükükün ar föför.
PSA 94:3 Ai Samol mi Lapalap, ifa ükükün fansoun än ekewe aramasangau repwe tunosikesik?
PSA 94:4 Ekewe chon föföringau meinisin ra atowu kapasen lamalamtekia, ra aingaing won ar föför mi ngau.
PSA 94:5 Ai Samol mi Lapalap, ra atatakisi noum kewe aramas o ariaföüü noum kana.
PSA 94:6 Ra niela ekewe fefin mi mä pwülüer me ekewe chon ekis o nimanauei ekewe mi mäsen.
PSA 94:7 Iwe, ra apasa, “Ewe Samol mi Lapalap esap küna, ewe Koten Israel esap silei.”
PSA 94:8 Ämi mi fokun tipate me lein ekewe aramas, oupwe weweöch. Ämi mi tiparoch, inet oupwe tipachemela?
PSA 94:9 Ifa usun, ewe mi förätä seling, esap püsin rongorong? Ifa usun, ewe mi föri mas, esap püsin küna?
PSA 94:10 Ifa usun, ewe mi apwüngü chon ekewe mwü esap pwal apwüngüür? Ifa usun, ewe chon kait ngeni aramas esap silelap?
PSA 94:11 Ewe Samol mi Lapalap a silei ekiekin aramas, a silei pwe ra pön chök.
PSA 94:12 Ai Samol mi Lapalap, a feiöch ewe mwän en ka amiriti, ätewe ka aiti ngeni om allük.
PSA 94:13 Kopwe angasa seni an kewe riaföü, tori eu pwang a tu fän iten ekewe aramasangau.
PSA 94:14 Iwe, ewe Samol mi Lapalap esap likitala nöün aramas, esap pwal pöütala chokewe a nöüniir.
PSA 94:15 Angangen kapwüng epwe longolongsefäl won pwüng, nge meinisin mi wenechar lon leluker repwe tipeeu ngeni.
PSA 94:16 Iö epwe ütä fän itei o ü ngeni ekewe aramasangau? Iö epwe nom won peki o ü ngeni ekewe chon föföringau?
PSA 94:17 Are ewe Samol mi Lapalap esap alisiei, ngang üpwe müttir feila lon lenien sotup.
PSA 94:18 Lupwen üa apasa, “Üpwe turula,” om tong ellet a amwöchüei, ai Samol mi Lapalap.
PSA 94:19 Lupwen a wor chomong ai öürek, en ka achipaei o apwapwai lelukei.
PSA 94:20 En kosap fokun tipeeu ngeni ekewe soukapwüng mi ngau, chokewe mi föri mine a pwüngingau, nge ra aita ngeni pwe iei pwüngün allük.
PSA 94:21 Ra chufengen pwe repwe rawangauei ekewe chon pwüng o atipisi chokewe esap wor ar tipis, pwe repwe mäla.
PSA 94:22 Nge ewe Samol mi Lapalap i imwei imwen maun, i ai Kot, ewe achau üa op fan.
PSA 94:23 I epwe liwini ngeniir liwinin ar tipis o aroserela pokiten ar föföringau. Ewe Samol mi Lapalap ach Kot epwe aroserela.
PSA 95:1 Ou etto, ousipwe köl ngeni ewe Samol mi Lapalap. Ousipwe mweireir fän pwapwa ngeni Kot ewe mi tümwünükich.
PSA 95:2 Ousipwe feito fän mesan fän kilisou, ousipwe mweireir fän pwapwa ngeni Kot ren kölün mwareiti i.
PSA 95:3 Pun ewe Samol mi Lapalap eman Kot mi tekia, eman king mi tekia seni ekewe kot meinisin.
PSA 95:4 Ekewe leni mi alolol won fanüfan ra nom lepöün, pwal ungen ekewe chuk an.
PSA 95:5 An ewe matau, pun förian, pwal an ewe fanüpwas, pun afisian.
PSA 95:6 Ou etto, ousipwe chapetiu o fel ngeni, ousipwe fotopwäsuk fän mesen ewe Samol mi Lapalap ewe chon förikich.
PSA 95:7 Pun i ach Kot, nge kich nöün aramas i a tümwünü, kich nöün mwichen sip i a foleni. Ikenai, are oupwe aüselinga alon,
PSA 95:8 ousap apöchöküla lelukemi usun a fis me lon Meripa, usun a fis lon ewe rän me lon ewe fanüapö lon Masa,
PSA 95:9 lupwen ämi kewe lewo ra sotuniei, ra aleletaei, nge ra fen küna ai kewe föför üa föri fän iter.
PSA 95:10 Lon ükükün faik ier üa song ngeni ei täppin aramas o üra, “Ir eu mwichen aramas mi tokola leluker. Resap fokun mochen aleasochisi ai kewe allük.”
PSA 95:11 Iei mine üa pwon fän akapel lon ai song pwe resap tongeni tolong lon ewe fanü ia üpwe asösöör ie.
PSA 96:1 Oupwe eäni echö köl mi fö ngeni ewe Samol mi Lapalap, oupwe köl ngeni ewe Samol mi Lapalap, ämi chon fanüfan meinisin.
PSA 96:2 Oupwe köl ngeni ewe Samol mi Lapalap, oupwe mwareiti i. Oupwe arongafeili iteiten rän usun an amanaua aramas.
PSA 96:3 Oupwe asilefeili an ling me lein chon ekewe mwü, pwal an föför mi amwarar me lein ekewe aramas meinisin.
PSA 96:4 Pun ewe Samol mi Lapalap a tekia. Sipwe alapala ach mwareiti i, sipwe pwal niuokusiti i lap seni ekewe kot meinisin.
PSA 96:5 Pun än chon ekewe mwü kewe kot ra chök uluulun anümwäl. Nge ewe Samol mi Lapalap a föri ekewe läng.
PSA 96:6 Iteüöch me manaman ra nonom mwan, pöchökül me ling ra nonom lon imwan mi pin.
PSA 96:7 Oupwe mwareiti ewe Samol mi Lapalap, ämi chon ekewe mwü meinisin, oupwe mwareiti än ewe Samol mi Lapalap ling me manaman.
PSA 96:8 Oupwe mwareiti lingen iten ewe Samol mi Lapalap. Oupwe uwato eu asor o feito lon imwan.
PSA 96:9 Oupwe fel ngeni ewe Samol mi Lapalap fän üf mi pin. Ämi chon fanüfan meinisin, oupwe chechech me mwan.
PSA 96:10 Oupwe apasa me lein chon ekewe mwü, “Ewe Samol mi Lapalap a nemenem. Ewer, fanüfan a fokun nükünük, esap tongeni mwöküt seni lenian. Kot epwe apwüngü chon ekewe mwü fän wenechar.”
PSA 96:11 Ekewe läng repwe pwapwa, nge fanüfan epwe meseik. Matau epwe ngüngü, pwal meinisin mine a nonom lon.
PSA 96:12 Ekewe mälämäl repwe mweireir, pwal meinisin mine a nom lor. Mürin, ekewe irän lein wöllap meinisin repwe köl fän pwapwa
PSA 96:13 fän mesen ewe Samol mi Lapalap, pun i epwe feito, epwe feito pwe epwe apwüngü chon fanüfan. Epwe apwüngü fanüfan fän pwüng, pwal ekewe aramas fän let.
PSA 97:1 Ewe Samol mi Lapalap a nemenem, fanüfan epwe meseik, ekewe fanüen lematau meinisin repwe pwapwa.
PSA 97:2 Kuchu me rochokich ra pweli ünükün Kot, pwüng me apwüng longolongun an nemenem.
PSA 97:3 Ekkei a akomwola mwan o kenala chon oputan mi nom ünükün.
PSA 97:4 An kewe fifi ra asarama fanüfan, chon fanüfan ra küna o chechech.
PSA 97:5 Ekewe chuk ra telila usun kiris me fän mesen ewe Samol mi Lapalap, me fän mesen ewe Samol mi nemeni unusen fanüfan.
PSA 97:6 Ekewe läng ra asilefeili an pwüng, nge chon ekewe mwü meinisin ra küna an ling.
PSA 97:7 Aramas meinisin mi fel ngeni ekewe uluulun anümwäl repwe küna säw, pwal chokewe mi aingaing won ekewe anümwäl esap wor aüchear. Ekewe kot meinisin ra chapetiu me mwen ewe Samol mi Lapalap.
PSA 97:8 Sion a rongorong ei o pwapwa. Ekewe telinimwen Juta ra meseik pokiten om kewe apwüng, ai Kot.
PSA 97:9 Pun en, ai Samol mi Lapalap, ka fokun tekia won unusen fanüfan, ka fokun tekia lap seni ekewe kot meinisin.
PSA 97:10 Ewe Samol mi Lapalap a echeni chokewe mi oput mine a ngau. A tümwünü manauen nöün kewe chon pin o angaseer seni ekewe aramasangau.
PSA 97:11 Saram a tinetiu won ekewe chon pwüng, nge pwapwa a tori chokewe mi wenechar leluker.
PSA 97:12 Oupwe kilisou ngeni o mwareiti itan mi pin.
PSA 98:1 Echö köl. Oupwe eäni echö köl mi fö ngeni ewe Samol mi Lapalap, pun a föri mettoch mi amwarar. An manaman me an pöchökül mi pin ra afisätä an win.
PSA 98:2 Ewe Samol mi Lapalap a asile ngeni aramas an win, a pwärätä an pwüng me fän mesen chon ekewe mwü.
PSA 98:3 A chechemeni an tong ellet me an allükülük ngeni chon Israel. Aramasen fanüfan meinisin ra küna usun än Kot amanaua aramas.
PSA 98:4 Oupwe eäni eu mweireiren pwapwa ngeni ewe Samol mi Lapalap, ämi chon fanüfan meinisin. Oupwe chietä echö kölün pwapwa me kölün mwareiti Kot.
PSA 98:5 Oupwe kölün mwareiti ewe Samol mi Lapalap fän ükülele, pwal fän sokopaten pisekin ettik.
PSA 98:6 Oupwe eäni eu mweireiren pwapwa fän rappwa me puun sewi me fän mesen ewe King, ewe Samol mi Lapalap.
PSA 98:7 Ewe matau epwe ngüngü, pwal mönümanau meinisin mi nom lon. Fanüfan epwe köl, pwal aramas meinisin mi nom won.
PSA 98:8 Ekewe koluk repwe alopolop, ekewe chuk repwe kölfengen fän pwapwa.
PSA 98:9 Repwe köl me fän mesen ewe Samol mi Lapalap, pun epwe feito o apwüngü chon fanüfan. Epwe apwüngü chon ekewe mwü fän pwüng me wenechar.
PSA 99:1 Ewe Samol mi Lapalap a nemenem. Chon ekewe mwü ra chechech. A mot won an lenien motun king asen ekewe kerop. Fanüfan a chechech.
PSA 99:2 Ewe Samol mi Lapalap a tekia me lon Sion, a fokun tekia seni chon ekewe mwü meinisin.
PSA 99:3 Aramas meinisin repwe mwareiti itan mi tekia o eniwokus. Kot a pin.
PSA 99:4 En king mi manaman, ka efich pwüng. Ka anüküchara mine a wenechar, ka föri mine a pwüng me wenechar lon Israel.
PSA 99:5 Oupwe ingeiti ewe Samol mi Lapalap ach Kot, oupwe fel ngeni me mwen alongolongun pechen. I a pin.
PSA 99:6 Iwe, Moses me Aaron ra nom lein nöün kewe souasor, pwal Samuel a nom lein chokewe mi köri itan. Ra iotek ngeni ewe Samol mi Lapalap, nge i a pälüeniir.
PSA 99:7 A kapas ngeniir seni lon ewe ürekuchu. Ra aleasochisi an kewe kapasen pwärätä me ekewe allük i a ngeniir.
PSA 99:8 Ai Samol mi Lapalap äm we Kot, en ka pälüeni än noum aramas iotek. En eman Kot mi amusala ar tipis, inamwo ika ka apwüngüür ren ar föför mi mwäl.
PSA 99:9 Oupwe ingeiti ewe Samol mi Lapalap ach we Kot o fel ngeni me arun chukun we mi pin, pun ewe Samol mi Lapalap ach Kot a pin.
PSA 100:1 Echö köl fän iten asoren kilisou. Oupwe eäni eu mweireiren pwapwa ngeni ewe Samol mi Lapalap, ämi chon fanüfan meinisin.
PSA 100:2 Oupwe angang ngeni ewe Samol mi Lapalap fän pwapwa, oupwe feito fän mesan ren kölün pwapwa.
PSA 100:3 Oupwe silei pwe ewe Samol mi Lapalap i Kot. I ewe a förikich, nge kich sa nöün. Sa nöün aramas me nöün sip lon an we mälämäl.
PSA 100:4 Oupwe tolong lon asamen imwan fän kilisou, oupwe tolong lon rumwen imwan kewe fän kölün mwareiti i. Oupwe kilisou ngeni o mwareiti itan.
PSA 100:5 Pun ewe Samol mi Lapalap a kirikiröch, an tong ellet a nonom tori feilfeilachök, nge an allükülük a tori ekewe täppin aramas meinisin.
PSA 101:1 Echö än Tafit Köl. Üpwe köl usun allükülük me pwüng. Üpwe köl ngonuk, ai Samol mi Lapalap.
PSA 101:2 Üpwe afäliei pwe üsap föri tipis. Inet kopwe feito rei? Üpwe manaueni eu manau mi limöch me lein chon leimwei.
PSA 101:3 Üsap anomu ai ekiek won mettoch mi ngau. Üa oput föförün ekewe chon tipis. Ar föför esap fokun fitipacheitiei.
PSA 101:4 Eman mi ulöförea lelukan epwe toau seniei. Üsap fokun efich föför mi ngau.
PSA 101:5 Eman mi aitengaua chon arun lemonomon üpwe niela. Eman aramas mi wolamalamtekia o sikesik üsap etiwa.
PSA 101:6 Üpwe filätä chokewe mi allükülük lon ewe fanü pwe repwe nom rei. Chokewe mi fokun wenechar repwe angang ngeniei.
PSA 101:7 Esap wor eman mi föri föförün atuputup epwe nom lon imwei, nge eman mi kapas chofana esap tongeni nonom fän mesei.
PSA 101:8 Iteiten lesosor üpwe niela ekewe aramasangau lon ewe fanü, üpwe ärala meinisin mi föri mine a ngau me lon telinimwen ewe Samol mi Lapalap.
PSA 102:1 Eu iotek seni eman mi nom lon riaföü, lupwen a apwangapwang o apasätä an kewe riaföü me fän mesen ewe Samol mi Lapalap. Kopwe aüselinga ai iotek, ai Samol mi Lapalap, ai siö epwe toruk.
PSA 102:2 Kosap aopala mesom seniei, lupwen üa nom lon riaföü. Kopwe aü selingom ngeniei o müttir pälüeniei, lupwen üa köruk.
PSA 102:3 Pun ränin manauei ra feil seniei usun och ötüöt, inisi a kar usun efoch wes mi kü.
PSA 102:4 Lelukei a tatakis usun fetil mi pöküpök o pwasapwas. Üsap chüen mwon mongö.
PSA 102:5 Pokiten ai leüömong le ngüngü üa kichüchüla pwe chüi ra pwäwu.
PSA 102:6 Üa usun eman fukuron fanüapö, pwal usun eman fukuro mi nom lon ekewe leni mi tatakis.
PSA 102:7 Üa kon nge nennela, üa usun eman machang mi akaleman won ungen eu imw.
PSA 102:8 Iteiten fansoun chon oputaei ra takirin ämängauaei, chokewe mi kapasingau usi ra eäni itei le ottek.
PSA 102:9 Üa mongö falang usun üa mongö pilawa, ünümei koluk a nofit ngeni chönün mesei
PSA 102:10 pokiten watten om lingeringer. Pun en ka angeei o pöütieila.
PSA 102:11 Ränin manauei ra usun chök nürün och mettoch lekuniol, üa aiolol usun fetil.
PSA 102:12 Nge en, ai Samol mi Lapalap, ka nemenem tori feilfeilachök. Kopwe chem me ren ekewe täppin aramas meinisin.
PSA 102:13 En kopwe ütä o eäni tong ngeni Sion. A tori fansoun om kopwe ümöümöch ngeni, ewe fansoun ka pwoneela a war.
PSA 102:14 Pun noum kewe chon angang ra aücheani föün Sion o tongei pwülün mi moromor.
PSA 102:15 Chon ekewe mwü repwe meniniti ewe Samol mi Lapalap, nge ekewe kingen fanüfan meinisin repwe niuokusiti an ling.
PSA 102:16 Pun ewe Samol mi Lapalap epwe aüsefälietä Sion, i epwe pwä lon lingan.
PSA 102:17 Epwe aüselinga än ekewe chon riaföü iotek, nge esap turunufasei ar tüngor.
PSA 102:18 Ei pworaus epwe mak fän iten ewe täppin aramas epwe uputiu, pwe ekewe aramas resamwo uputiu repwe mwareiti ewe Samol mi Lapalap:
PSA 102:19 Ewe Samol mi Lapalap a nennetiu seni lenian mi pin o tekia, seni läng a nennetiu fanüfan,
PSA 102:20 pwe epwe rongorong ngüngün ekewe chon fötek o apichi ririn chokewe mi fen pwüngüla pwe repwe ninnila.
PSA 102:21 Iwe, aramas repwe pwärätä iten ewe Samol mi Lapalap me lon Sion, nge me lon Jerusalem repwe mwareiti i,
PSA 102:22 lupwen chon ekewe mwü repwe chufengen pwe repwe fel ngeni ewe Samol mi Lapalap.
PSA 102:23 Iwe, Kot a akisikisätiu ai pöchökül lupwen ai chüen alüal, a amochomochala ränin manauei.
PSA 102:24 Üa apasa, “Ai Kot, kosap angeeila me lukalapen ränin manauei, en ewe mi manau tori feilfeilachök.”
PSA 102:25 Me lomlom en ka föri longolongun fanüfan, nge ekewe läng förien poum kana.
PSA 102:26 Ir repwe tala, nge en kopwe nonom fochofoch. Ir repwe mesila usun echö üf. Ka siwiliir usun eman a siwili üfan, iwe, repwe morola.
PSA 102:27 Nge en ka ususum we chök, manauom esap müchüla.
PSA 102:28 Nöün noum kewe chon angang repwe nonom fän kinamwe, nge mwirimwirir repwe nonomöch me mwom.
PSA 103:1 Echö än Tafit köl. Ngüni, kopwe mwareiti ewe Samol mi Lapalap, leuti meinisin, kopwe mwareiti itan mi pin.
PSA 103:2 Ngüni, kopwe mwareiti ewe Samol mi Lapalap, kosap manlükala an kirikiröch ngonuk.
PSA 103:3 A amusala ai tipis meinisin o amoela ai apwangapwang meinisin,
PSA 103:4 a angasaei seni peias o ämwärämwära ngeniei tong ellet me ümöümöch,
PSA 103:5 a amasoua manauei ren mettoch mi mürina, pwe üpwe liwiniti pöchökülen le säräföi usun eman ikel.
PSA 103:6 Ewe Samol mi Lapalap a pwüng lon an föför, a eäni kapwüng fän pwüng ngeni chokewe meinisin mi küna riaföü.
PSA 103:7 A pwäri ngeni Moses an kewe akot o aküna ngeni ekewe aramasen Israel an kewe föför.
PSA 103:8 Ewe Samol mi Lapalap a lukpwetete o kirikiröch, a songomang o wöün tong ellet.
PSA 103:9 Esap apwüngü aramas fansoun meinisin, esap pwal amwöchü an song tori feilfeilachök.
PSA 103:10 Esap föri ngenikich ükükün ach tipis, esap pwal liwini ngenikich ükükün ach föföringau.
PSA 103:11 Pun usun ekewe läng ra tekia seni fanüfan, iei usun an we tong ellet a tekia ngeni chokewe mi niuokusiti i.
PSA 103:12 Pun usun meserän a toau seni epilen, iei usun a atoauala ach pupungau senikich.
PSA 103:13 Usun eman sam a tongei nöün kana, iei usun ewe Samol mi Lapalap a tongei chokewe mi niuokusiti i.
PSA 103:14 Pun a silei sokosokuch, a chemeni pwe kich pwül echök.
PSA 103:15 Iwe, ränin manauen aramas a wewe ngeni fetil, a sol usun epö pöön irän lemäl.
PSA 103:16 Are asepwäl a eniti, a ässala, nge esap chüen wor eman epwe künasefäli.
PSA 103:17 Nge än ewe Samol mi Lapalap tong ellet a nom seni me lomlom tori feilfeilachök won chokewe mi niuokusiti i, nge an pwüng a tori nöür me nöün nöür,
PSA 103:18 ir chokewe mi apwönüetä an we pwon o chechemeni ar repwe aleasochisi an kewe allük.
PSA 103:19 Iwe, ewe Samol mi Lapalap a anüküchara an lenien motun king me lon ekewe läng, mwün a nemeni unusen fanüfan.
PSA 103:20 Oupwe mwareiti ewe Samol mi Lapalap, ämi nöün chon läng kana, ämi mi pwora o aleasochisi an kapas, ämi mi aüselinga alon.
PSA 103:21 Oupwe mwareiti ewe Samol mi Lapalap, ämi chon an kewe mwich meinisin lon läng, ämi nöün kewe chon angang mi föri letipan.
PSA 103:22 Oupwe mwareiti ewe Samol mi Lapalap, ämi förian kana meinisin lon ekewe leni meinisin mi nom fän nemenian. Ngüni, kopwe mwareiti ewe Samol mi Lapalap.
PSA 104:1 Ngüni, kopwe mwareiti ewe Samol mi Lapalap. Ai Samol mi Lapalap ai Kot, en ka fokun tekia. Ka üföüf ngeni iteüöch me manaman
PSA 104:2 o pwölü ngonuk saram usun echö üf. Ka ameresala ekewe läng usun eu imw mangaku
PSA 104:3 o aüetä imwom won ekewe koluk. Ka föri ekewe kuchu pwe woom woken, o sai won pöükässin asepwäl.
PSA 104:4 Ka akünöü ekewe asepwäl pwe noum chon künö, o nöüni chon angang ngetengeten ekkei.
PSA 104:5 Ka anükätiu fanüfan won longolongun kewe, pwe esap fokun mwökütüküt tori feilfeilachök.
PSA 104:6 Ka pwölüela fanüfan ren matau mi alolol usun ren echö üf, ekewe koluk ra nom asen ekewe chuk,
PSA 104:7 lupwen ka apwüngü ekewe koluk, ra süla. Ra müttir sü ren püngün om chopulap.
PSA 104:8 Ra pula won ekewe chuk o putiu lon ekewe lemol ngeni ewe leni en ka amolätä fän iter.
PSA 104:9 Ka föri eu kiä pwe ekewe koluk resap tongeni kusula, resap pwal chüen pwölüela fanüfan.
PSA 104:10 Ka ammichätä puächen koluk me lon ekewe lemol. Chanpupu ra pula lefilen ekewe chuk,
PSA 104:11 pwe ekewe manmwacho meinisin lon ekewe lemäl ra ün seni, ekewe aas mi mwacho ra ün seni pwe a mola ar kaka.
PSA 104:12 Ekewe machang ra fas won ekewe irä mi mär ünükün ekewe koluk, ra tik me lein palen ekewe irä.
PSA 104:13 Seni won leniom mi tekia ka achöchönü ekewe chuk. Fanüfan a urela ren om kewe feiöch.
PSA 104:14 En ka amärätä fetil fän iten ekewe kow, pwal irä fän iten aramas pwe repwe fotukätiu, pwe epwe wor ener seni ewe fanü.
PSA 104:15 Iwe, epwe wor wain pwe aramas repwe ün o pwapwa, epwe wor lö pwe repwe emmisi ngeni won meser, pwal pilawa pwe repwe mongö o pöchökül ren.
PSA 104:16 Än ewe Samol mi Lapalap irä ra chöchön ren chomong üt, ekewe setar won Lepanon i a fotukätiu.
PSA 104:17 Ekewe machang ra senätä faser wor, ewe öröpwech a lenieni ewe irä itan pain.
PSA 104:18 Ekewe kuuch mi mwacho ra lenieni ekewe chuk tekia, ekewe man iter pächer ra op fän ekewe achau.
PSA 104:19 Ka föri ewe maram pwe epwe asisillätä ekewe fansoun, akkar a silei fansoun an epwe tuputiu.
PSA 104:20 Ka föri pwin pwe lon kirochan ekewe manmwacho lein wöllap meinisin ra towu seni lenier.
PSA 104:21 Ekewe nienifön laion ra wörüwör, lupwen ra kütta liaper, ra kütta ener me ren Kot.
PSA 104:22 Lupwen akkar a tötä, ra liwiniti lenier o konola lon pwanger.
PSA 104:23 Mürin, aramas ra feila ngeni ar angang, ra angang tori lekuniol.
PSA 104:24 Ai Samol mi Lapalap, ra fokun chomong ekewe mettoch ka föri. Ka föriir meinisin lon om tipachem. Fanüfan a ur ren föriom mönümanau meinisin.
PSA 104:25 Ikenan a wor ewe matau mi lapalap o chölap, a masou ren chomong mönümanau mi watte me kükün rese lea.
PSA 104:26 Ekewe sip ra saifetal won, pwal ewe man itan Lefiatan, en ka föri, a kukulou lon.
PSA 104:27 Ekei mönümanau meinisin ra lükülükuk pwe kopwe ngeniir ener mongö lon fansoun fich.
PSA 104:28 Lupwen ka ngeniir ener mongö, ra ionifengeni, lupwen ka suki poum, ra mongö o möt ren.
PSA 104:29 Nge lupwen ka aopa mesom seniir, ra niuokus, lupwen ka angei seniir ngasangaseer, ra mäla o liwiniti pwül moromor.
PSA 104:30 Lupwen ka tinato Ngünum, ra fisitä. En ka försefäli fanüfan.
PSA 104:31 Amwo lingen ewe Samol mi Lapalap epwe nom tori feilfeilachök, amwo ewe Samol mi Lapalap epwe meseikeiti an föför.
PSA 104:32 Lupwen a netiu won fanüfan, fanüfan a chechech. Lupwen a atapa ekewe chuk, ra ötüöt.
PSA 104:33 Üpwe köl ngeni ewe Samol mi Lapalap lon ränin manauei meinisin. Üpwe kölün mwareiti ai Kot lupwen ai manau.
PSA 104:34 Amwo ai ekinlon epwe apwapwai letipen ewe Samol mi Lapalap, pun üa meseikeiti i.
PSA 104:35 Ekewe chon tipis repwe rosola seni won fanüfan, nge ekewe aramasangau repwe mochola. Ngüni, kopwe mwareiti ewe Samol mi Lapalap. Ousipwe mwareiti ewe Samol mi Lapalap.
PSA 105:1 Oupwe kilisou ngeni ewe Samol mi Lapalap, oupwe köri itan. Oupwe asilefeili an kewe föför lein chon ekewe mwü.
PSA 105:2 Oupwe köl ngeni, oupwe kölün mwareiti i, oupwe apworausa an kewe föför meinisin mi amwarar.
PSA 105:3 Oupwe fokun ingemwareiti itan mi pin. Chokewe mi kütta ewe Samol mi Lapalap repwe meseik.
PSA 105:4 Oupwe kütta ämi alilis me ren ewe Samol mi Lapalap, oupwe kütta i fansoun meinisin.
PSA 105:5 Oupwe chechemeni ekewe föför mi amwarar a föriir. Oupwe chechemeni an kewe manaman me an kewe kapwüng a eäni,
PSA 105:6 ämi mwirimwirin Apraham nöün Kot we chon angang, ämi mwirimwirin Jakop kewe, ätewe mi fil me ren.
PSA 105:7 Ewe Samol mi Lapalap i ach we Kot, an kewe allük ra fän iten unusen fanüfan.
PSA 105:8 I a chechemeni an we pwon tori feilfeilachök, an we kapas a anüküchara ngeni engeröü täppin aramas.
PSA 105:9 A chechemeni ewe pwon a eäni ngeni Apraham, ewe pwon a eäni fän akapel ngeni Isaak.
PSA 105:10 A anüküchara ewe pwon ngeni Jakop pwe eu allük, pwal eu pwon esemüch.
PSA 105:11 Iwe, a apasa, “Üpwe ngonuk ewe fanü Kanaan pwe fanüom.”
PSA 105:12 Lupwen nöün Kot kewe aramas ra fokun chokükün, lupwen ra chon siamü lon ewe fanü Kanaan
PSA 105:13 o saifetal seni eu fanü tori pwal eu fanü, seni eu mwü tori pwal eu mwü,
PSA 105:14 Kot esap mwüt ngeni eman pwe epwe ariaföüür. A apwüngü ekewe king pokiter
PSA 105:15 o apasa, “Ousap atapa nei kewe mi fil, ousap afeiengaua nei kewe soufos.”
PSA 105:16 Lupwen ewe Samol mi Lapalap a awarato eu lengita won ewe fanü o angei seniir ener mongö meinisin,
PSA 105:17 a tinala eman mwän itan Josef epwe akom mwer, ätewe ra amömöla pwe epwe eman amanau.
PSA 105:18 Pechen ra föfö ren selimächä, nge üan a katolong lon efoch ring seni mächä,
PSA 105:19 tori a fis mine a fen apasa, nge än ewe Samol mi Lapalap we kapas a alletätä pwe a pwüng.
PSA 105:20 Mürin, ewe kingen Isip a tinala eman pwe epwe amusa Josef, ewe mi nemeni ekewe mwü a angasala i.
PSA 105:21 A seikätä i pwe epwe samol lon imwan o nemeni mettochun meinisin.
PSA 105:22 Epwe nemenem won nöün kewe samol o aiti ngeni nöün kewe souakom tipachem.
PSA 105:23 Mürin, Jakop a feila Isip o siamü lon ewe fanü.
PSA 105:24 Nge ewe Samol mi Lapalap a fokun achomonga nöün kewe aramas o apöchöküleer lap seni chon oputeer.
PSA 105:25 A akulu leluken chon Isip, pwe ra oput nöün kewe aramas o eäni rawangau ngeni nöün kewe chon angang.
PSA 105:26 Mürin, Kot a tinala Moses nöün we chon angang me Aaron ätewe i a filätä.
PSA 105:27 Ir ra föri an kewe asisil me manaman me lein ekewe aramas me lon ewe fanü Isip.
PSA 105:28 Kot a tinala rochopwak o arochokichi ewe fanü, nge ekewe chon Isip ra chök ü ngeni an kewe kapas.
PSA 105:29 Iwe, a awili ngeni cha ar kewe koluk, pwe ekewe ikenen lor ra mäla.
PSA 105:30 Fanüer a ur ren kairü, ra mwo nge tolong lon imwen ar we king.
PSA 105:31 Kot a kapas, nge ra war chomong pwiin loong, pwal nikken ra nom lemenen fanüer.
PSA 105:32 A apüngätiu wor ütten fau akasiwilin üt, pwal fifi a fi ekis meinisin won fanüer,
PSA 105:33 Kot a atai ar irän wain me ar irä fiik o atatakisi irän fanüer meinisin.
PSA 105:34 Iwe, a kapas, nge ekewe lifichimas ra war, pwal ekewe kükün lifichimas resap lea.
PSA 105:35 Ra eni meinisin mine a mär me won fanüer o eni uän fotar irä.
PSA 105:36 Iwe, a niela ekewe mwänichi meinisin me lon fanüer, chokewe ra nöüniir lupwen ar pöchökül.
PSA 105:37 Mürin, Kot a emwenawu chon Israel fän silifer me kolt. Esap wor eman me lein chon ar kewe ainang a apwangapwang.
PSA 105:38 Iwe, chon Isip ra pwapwa, lupwen chon Israel ra towu, pun ra fokun niuokusitiir.
PSA 105:39 Kot a anomu eu kuchu wor pwe pwölüpwölür, pwal eu ekkei, pwe epwe asarameer lepwin.
PSA 105:40 Ra tüngor, nge i a awarato ekewe machang iter kweil, a ngeniir mongö mi chomong seni läng.
PSA 105:41 A asangafeseni ewe achau pwe koluk a puwu seni, a pulong lon ewe fanüapö usun eu chapupu.
PSA 105:42 Pun Kot a chechemeni an we pwon mi pin a eäni ngeni nöün we chon angang Apraham.
PSA 105:43 Iei mine a emwenawu nöün kewe aramas mi fil fän pwapwa me mweireiren köl.
PSA 105:44 Iwe, a ngeniir fanüen chon ekewe mwü, nge ir ra fanüeni ewe fanü o feiöchüni än ekewe aramas angang.
PSA 105:45 Ei a fis pwe nöün kewe aramas repwe aleasochisi an kewe pwüüng o apwönüetä an kewe allük. Ousipwe mwareiti ewe Samol mi Lapalap.
PSA 106:1 Ousipwe mwareiti ewe Samol mi Lapalap. Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.
PSA 106:2 Iö a tongeni apworausa än ewe Samol mi Lapalap föför mi manaman? Iö a tongeni anafa an mwareiti i?
PSA 106:3 Ra feiöch chokewe mi aleasochisi an kewe allük o föri mine a pwüng fansoun meinisin.
PSA 106:4 Ai Samol mi Lapalap, kopwe chechemeniei, lupwen ka pwäri om kirikiröch ngeni noum aramas. Kopwe pwal ochueilong, lupwen ka amanaueer,
PSA 106:5 pwe üpwe tongeni küna feiöchün noum kewe mi fil o eti chon mwum lon ar pwapwa, üpwe pwal eti noum aramas kana le mwareituk.
PSA 106:6 Äm aia tipis usun chök äm kewe lewo. Äm aia föri föför mi ngau o apwönüetä föför esepwüng.
PSA 106:7 Lupwen äm kewe lewo ra nom lon Isip, resap ekieki än Kot kewe föför mi amwarar, resap pwal chechemeni an tong ellet mi lapalap, nge ra ü ngeni Ewe mi Unusen Tekia me arun ewe Setipar.
PSA 106:8 Nge Kot a amanaueer fän püsin itan pwe epwe pwärätä an manaman mi pöchökül.
PSA 106:9 A allük ngeni ewe Setipar pwe a pwasatä, a emwenirelong epin ewe matau usun lon eu fanüpwas.
PSA 106:10 A amanaueer seni chon pälüeniir o angaseer seni chon oputeer.
PSA 106:11 Ewe sät a pwölüela ekewe chon ü ngeniir, pwe esap wor eman mi chüen manau.
PSA 106:12 Mürin, ra lükü an kewe kapasen pwon o kölün mwareiti i.
PSA 106:13 Nge chon Israel ra müttir manlükala an kewe föför, resap awiti an öüröür.
PSA 106:14 Ra fokun mwäräkich me lon ewe fanüapö o sotuni Kot lon ewe fanüpwas.
PSA 106:15 Iei mine a ngeniir mine ra tüngor, nge a pwal tinato eu mätter mi afeiengau leir.
PSA 106:16 Ikenan lon ewe fanüapö ekoch me leir ra lolowo ngeni Moses me Aaron, ätewe ewe Samol mi Lapalap a apini.
PSA 106:17 Mürin, ewe pwül a sangfesen o oromala Tatan, a pwal pwölüela Apiram me an we mwich.
PSA 106:18 Ekkei a pwal ngetewu me lein chokewe mi etiir o kenala ekewe aramasangau.
PSA 106:19 Iwe, ra föri eu uluulun nienifön kow me lon Horep o fel ngeni ewe uluulun anümwäl seni mächä.
PSA 106:20 Ra akasiwili ewe lingen Kot ngeni uluulun eman kow mi mongö fetil.
PSA 106:21 Ra manlükala Kot ar Chon Amanau mi föri föför mi manaman me lon Isip.
PSA 106:22 A föri föför mi amwarar me ikenan, pwal mettoch mi eniwokus me arun ewe Setipar.
PSA 106:23 Iei mine Kot a apasa pwe epwe aroserela. Nge Moses nöün we chon angang mi fil a ütä lefiler me Kot, pwe epwe asepa an lingeringer, pwe esap aroserela.
PSA 106:24 Mürin, ra oput ewe fanü mi mürina, resap lükü an we pwon.
PSA 106:25 Ra ngününgün me lon imwer imw mangaku, nge resap aleasochis ngeni alon ewe Samol mi Lapalap.
PSA 106:26 Iei mine Kot a aitietä pöün o pwon fän akapel ngeniir pwe epwe nirela me lon ewe fanüapö,
PSA 106:27 epwe atoropasafeili mwirimwirir lein chon ekewe mwü pwe repwe mäla lon ewe fanüen chon ekis.
PSA 106:28 Mürin, ra fiti ekewe aramas mi fel ngeni Paal me lon Peor o mongö ekewe föten anü ra eäni asor ngeni ekewe kot ese wor manau lor.
PSA 106:29 Ra asonga ewe Samol mi Lapalap ren ar kewe föför, pwe eu mätter a terifetal leir.
PSA 106:30 Mürin, Pinehas a ütä o apwüngü ekewe mi tipis, pwe ewe mätter a ükütiu.
PSA 106:31 Iwe, ren ei föför Pinehas a küna pwüng me ren Kot seni eu täppin aramas tori eu täppin tori feilfeilachök.
PSA 106:32 Iwe, chon Israel ra asonga Kot me arun ekewe kolukun Meripa. Moses a küna riaföü watte pokiter,
PSA 106:33 pun ra achouu lelukan pwe a ssela an fos.
PSA 106:34 Iwe, chon Israel resap pwal arosala chon ekewe mwü usun ewe Samol mi Lapalap a allük ngeniir.
PSA 106:35 Nge ra pwüpwülüfengen me chon ekewe mwü o föri sokun föför usun mine ir ra föri.
PSA 106:36 Ra fel ngeni ar kewe uluulun anümwäl, nge ekewe uluulun anümwäl ra wiliti eu likatup ngeniir.
PSA 106:37 Ra eäni asor nöür kewe ät me nengin ngeni ekewe anün rochopwak.
PSA 106:38 Ra niela nöür kewe ät me nengin esap wor ar tipis, o eäniir asor ngeni ekewe uluulun anümwäl än chon Kanaan. Iwe, ewe fanü a limengau ren ei sokun föför.
PSA 106:39 Iei usun ra limengau ren ar föför o kirikiringau ngeni Kot ren ar lapalap usun lapalapen eman fin lisowu.
PSA 106:40 Iei mine ewe Samol mi Lapalap a fokun song ngeni nöün aramas, pwe a fokun anioputäsiniir.
PSA 106:41 A asechirela fän nemenien chon ekewe mwü, pwe chokewe mi oputeer ra nemeniir.
PSA 106:42 Iwe, chon oputeer ra ariaföüür o atolongeer fän ar nemenem.
PSA 106:43 Fän chomong Kot a angaserela, nge ra chök sopwela le ü ngeni. Iwe, ra sapwilitiu pokiten ar tipis.
PSA 106:44 Iei mwo nge Kot a chök ekieki ar riaföü, lupwen a rongorong ar siö.
PSA 106:45 A chechemeni an pwon fän äsengesiir, lon an tong ellet mi lapalap a liamamala ren mine a föri ngeniir.
PSA 106:46 A föri pwe chokewe meinisin mi liapeniir o uweerela lon ekewe fanü mi toau repwe tongeer.
PSA 106:47 Ai Samol mi Lapalap äm Kot, kopwe amanauakem o achufengenikem seni me lein chon ekewe mwü, pwe aipwe kilisou ngonuk o mwareiti itom mi pin.
PSA 106:48 Oupwe mwareiti ewe Samol mi Lapalap, ewe Koten Israel seni fansoun esepop tori fansoun esemüch. Iwe, ekewe aramas meinisin repwe apasa, “Amen.” Ousipwe mwareiti ewe Samol mi Lapalap.
PSA 107:1 Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.
PSA 107:2 Ekewe mi ngasala ren ewe Samol mi Lapalap repwe apasa iei usun, chokewe i a angaserela seni ekewe chon oputeer
PSA 107:3 o achufengeniir seni ekewe fanü, seni ötiu me lotou, seni ör me efeng.
PSA 107:4 Ekoch aramas ra fetalfeil lon fanüapö, nge resap küna efoch al ngeni eu telinimw pwe repwe imweimw lon.
PSA 107:5 Ra echik me kaka o apilükingau lon leluker.
PSA 107:6 Mürin, ra siö ngeni ewe Samol mi Lapalap lon ar weires, nge i a angaseer seni ar riaföü.
PSA 107:7 A emwenirela won efoch al mi wenechar tori ra tori eu telinimw pwe repwe imweimw lon.
PSA 107:8 Ir repwe kilisou ngeni ewe Samol mi Lapalap pokiten an tong ellet, pwal pokiten an kewe föför mi amwarar ngeni chon fanüfan.
PSA 107:9 Pun a amötü chokewe mi kaka o amongöü chokewe mi echik ngeni mongö mi annö.
PSA 107:10 Ekoch aramas ra nom lon rochopwak me nürün mäla, ra fötek ren selimächä o riaföü,
PSA 107:11 pun ra ü ngeni alon Kot o oput än Ewe mi Unusen Tekia öüröür.
PSA 107:12 A atolongeer fän angang weires, ra turula, nge esap wor eman mi alisiir.
PSA 107:13 Mürin ra siö ngeni ewe Samol mi Lapalap lon ar weires, nge i a angaseer seni ar riaföü.
PSA 107:14 Iwe, a emwenirewu seni lon rochopwak me nürün mäla o mwütifeseni föföör kewe selimächä.
PSA 107:15 Ir repwe kilisou ngeni ewe Samol mi Lapalap pokiten an tong ellet, pwal pokiten an kewe föför mi amwarar ngeni chon fanüfan.
PSA 107:16 Pun a atatakisi ekewe asam seni piras o pöküsopwei ekewe ömwöch seni mächä.
PSA 107:17 Ekoch aramas ra samau ren ar föförün tipis, ra pwal riaföü pokiten ar föför mi ngau.
PSA 107:18 Ra nou sokopaten mongö meinisin o kan ngeni mäla.
PSA 107:19 Mürin ra siö ngeni ewe Samol mi Lapalap lon ar weires, nge i a angaseer seni ar riaföü.
PSA 107:20 A tinala an kapas o apöchöküleer, a amanaueer seni mäla.
PSA 107:21 Ir repwe kilisou ngeni ewe Samol mi Lapalap pokiten an tong ellet, pwal pokiten an kewe föför mi amwarar ngeni chon fanüfan.
PSA 107:22 Repwe pwal eäni asoren kilisou ngeni o apworausa an kewe föför lon kölün pwapwa.
PSA 107:23 Ekoch aramas ra sai lematau won sip pwe repwe föri ar angangen amömö won ekewe mataulap.
PSA 107:24 Ra küna än ewe Samol mi Lapalap föför, an angang mi amwarar lon ekewe leni mi alolol.
PSA 107:25 Iwe, Kot a kapas o awarato eu mölümöl mi apwota noon ewe matau.
PSA 107:26 Ekewe sip ra kekitä fän läng, ra pwal feitiu tori lealololun matau, pwe chokewe mi nom won ra apilükingau pokiten ar feiengau.
PSA 107:27 Ra mwaroro o rikirikfetal usun ir mi pulas, resap chüen silei mine repwe föri.
PSA 107:28 Mürin ra siö ngeni ewe Samol mi Lapalap lon ar weires, nge i a angaseer seni ar riaföü.
PSA 107:29 A aükätiu ewe mölümöl, pwe nonon ewe matau a lüala.
PSA 107:30 Mürin ra pwapwa pwe a lüa, nge i a emweniir ngeni ewe leni ia ra mochen ilelong ie.
PSA 107:31 Iwe, ir repwe kilisou ngeni ewe Samol mi Lapalap pokiten an tong ellet, pwal pokiten an kewe föför mi amwarar ngeni chon fanüfan.
PSA 107:32 Repwe ingeiti Kot lon ewe mwichen aramas o mwareiti i lon ewe mwichen souakom.
PSA 107:33 Kot a awili ekewe chanpupu ngeni fanüpwas, a pwal awili ekewe fanüen puächen koluk ngeni pwül mi pwasapwas.
PSA 107:34 A awili eu fanü mi pwülüöch ngeni eu fanüapö mi uren salt, pun chon ewe fanü ra föföringau.
PSA 107:35 Kot a pwal awili eu fanüpwas ngeni eu fanüen koluk, a pwal awili eu fanü mi pwasapwas ngeni eu fanüen puächen koluk.
PSA 107:36 Iwe, a mwüt ngeni ekewe chon echik pwe repwe nonom ikenan, repwe aüetä eu telinimw pwe repwe nonom lon.
PSA 107:37 Iwe, ra amora pwükil lon ar kewe tanipi, ra fotuki irän wain o kini eu räs mi watte.
PSA 107:38 Kot a afeiöchü nöün aramas pwe ra chomongola. Esap pwal mwütätä pwe nöür pwiin kow repwe chokükünüla.
PSA 107:39 Mürin ra chokisikisila, ra küna tekison ren riaföü, weires me letipeta.
PSA 107:40 Iwe, Kot a anomu itengau won ekewe aramas tekia o föri pwe ra fetalfeil lon fanüapö, ia esap wor efoch al ie.
PSA 107:41 Nge a angasala ekewe chon osupwang seni ar riaföü o achomongala ar kewe famili pwe ra usun chomongun pwiin sip.
PSA 107:42 Ekewe chon pwüng ra küna ei o pwapwa, nge ekewe aramasangau meinisin ra fanafanala.
PSA 107:43 Iön mi tipachem epwe iseis ekei mettoch lon lelukan o ekieki usun än ewe Samol mi Lapalap tong ellet.
PSA 108:1 Echö än Tafit köl. Üa apilüköch, ai Kot, üa apilüköch. Üpwe köl o mwareituk. Ngüni, kopwe pwök.
PSA 108:2 Ekewe kitar me ükülele repwe pwök. Üpwe apwökü mallen rän.
PSA 108:3 Ai Samol mi Lapalap, üpwe kilisou ngonuk me lein ekewe mwichen aramas, üpwe kölün mwareituk me lein chon ekewe mwü.
PSA 108:4 Pun om tong ellet a tekia seni ekewe läng, om allükülük a tori ekewe kuchu.
PSA 108:5 Ai Kot, kopwe pwäri om tekia asen ekewe läng. Om ling epwe pwäla won unusen fanüfan.
PSA 108:6 Kopwe amanauakem ren om manaman o pälüeni ai iotek. pwe chokewe ka tongeer repwe ngasala.
PSA 108:7 Kot a kapas me lon imwan mi pin, “Lon ai meseik üpwe ineti Sikem o aineti ewe lemolun Sukot ngeni nei aramas.
PSA 108:8 Kiliat fanüei, Manasa pwal fanüei, Efraim imwei akkau, Juta woki wokun king.
PSA 108:9 Moap sepiei sepien töttöl, üpwe moneela ipwei sus won Etom asisilan pwe fanüei, nge won ewe fanü Filistia üpwe arükak fän ai win.”
PSA 108:10 Iö epwe emwenieilong lon ewe telinimw mi pöchökül tittin? Iö epwe emweniei ngeni Etom?
PSA 108:11 Ai Kot, ifa usun, ka wesewesen pöütikeemila? Ifa usun, kosap chüen eti äm mwichen sounfiu le feila maun?
PSA 108:12 Kopwe alisikem, pwe aipwe tongeni maun ngeni ekewe chon oputakem, pun än aramas alilis a lomotongau.
PSA 108:13 Are Kot a etikich, kich sipwe win, i echök epwe akufu chon oputakich.
PSA 109:1 Ngeni ewe mi emweni chon köl: Echö än Tafit köl. Ai Kot, en ewe üa mwareiti, kosap fanafanala.
PSA 109:2 Pun ekewe aramas mi ngau o atuputup ra apasawu kapasen ü ngeniei, ra aitengauaei ren ar kapas chofana.
PSA 109:3 Ra kapasingau usi o fiu ngeniei, nge esap wor popun.
PSA 109:4 Liwinin ai tongeer, ra atipisiei, nge ngang üa fen iotek fän iter.
PSA 109:5 Iei usun ra liwini ngeniei ngau fän iten ai föför mürina ngeniir, nge oput fän iten ai tongeer.
PSA 109:6 Kopwe filätä eman aramasangau epwe ü ngeni ewe chon oputaei, eman chon atipisi epwe atolonga i lon kapwüng.
PSA 109:7 Are a wes le kapwüng, epwe pwä pwe a tipis. Pwal an iotek epwe wiliti tipis.
PSA 109:8 Amwo ränin manauan epwe chökükün, nge eman epwe siwili lon wisan.
PSA 109:9 Amwo nöün kana repwe mäsen, nge pwülüan we epwe lipichsefäl.
PSA 109:10 Amwo nöün kana repwe nomofetal o tütüngor, eman epwe asürela seni imwer mi tala.
PSA 109:11 Amwo ewe chon angei liwinimang epwe angei meinisin mine an, nge chon ekis repwe angei fän pöchökül uän an angang.
PSA 109:12 Amwo esap wor eman epwe eäni kirikiröch ngeni, esap pwal wor eman epwe tongei nöün kewe mi mäsen.
PSA 109:13 Amwo mwirimwirin kana repwe mäla, nge iter epwe töttölüwu me lon aruuen täppin aramas.
PSA 109:14 Amwo än an kewe lewo föföringau repwe chem me ren ewe Samol mi Lapalap, nge än inan tipis esap musala.
PSA 109:15 Amwo ewe Samol mi Lapalap epwe chechemeni ar tipis fansoun meinisin, nge aramas repwe fokun manlükirela.
PSA 109:16 Pun ewe mwän esap ekiekin eäni kirikiröch, nge a tapweri ekewe mi wöüngau o mwelele, pwal ekewe mi tatakis leluker, pwe epwe nirela.
PSA 109:17 A sani anümamaua aramas. Amwo ekewe anümamau repwe feitiu won. Esap sani an epwe afeiöchü aramas. Amwo esap wor eman epwe afeiöchü.
PSA 109:18 A örüni kapasen anümamau usun an örüni üföüf üf. Amwo an kewe kapasen anümamau repwe tolong lon inisin usun chök koluk, repwe pwal tolong lon chün usun chök kiris.
PSA 109:19 Amwo repwe usun chök echö üf a pwölü ngeni, pwal usun efoch pelit a ri ngeni lukalapan fansoun meinisin.
PSA 109:20 Amwo epwe iei liwinin ekewe chon atipisiei me ren ewe Samol mi Lapalap, liwinin chokewe mi kapasingau usi.
PSA 109:21 Nge en, ai Kot, ai Samol mi Lapalap, kopwe peniei usun ka pwon ngeniei, kopwe angasaei pokiten om tong ellet mi mürina.
PSA 109:22 Pun ngang eman mi wöüngau o mwelele, lelukei a fokun tatakis.
PSA 109:23 Üpwe le morola usun nürün och mettoch a morola lekuniol. Aramas ra pönieila usun ra pöni eman lifichimas.
PSA 109:24 Pwäsuki ra apwangapwang ren ai öchüün, inisi a kichüchüla.
PSA 109:25 Ngang eman mi küna turunufas me ren chon atipisiei, lupwen ra künaei, ra elifechifechi mökürer.
PSA 109:26 Ai Samol mi Lapalap ai Kot, kopwe alisiei, kopwe amanauaei lon om tong ellet.
PSA 109:27 Kopwe amefi ngeniir pwe en, ai Samol mi Lapalap, ka amanauaei.
PSA 109:28 Ir ra tongeni eäni kapasen anümamau ngeniei, nge en kopwe afeiöchüei. Chokewe mi ü ngeniei repwe küna säw. Nge ngang noum chon angang üpwe pwapwa.
PSA 109:29 Amwo ekewe chon atipisiei repwe pwölüla ren itengau, repwe pwölüla ren püsin ar säw usun ra pwölüla fän echö üf.
PSA 109:30 Üpwe kilisou chapur ngeni ewe Samol mi Lapalap. Üpwe mwareiti i me lein ewe mwicheichen aramas.
PSA 109:31 Pun i a peni ewe chon mwelele, pwe epwe amanaua seni chokewe mi atipisi pwe epwe mäla.
PSA 110:1 Echö än Tafit köl. Ewe Samol mi Lapalap a kapas ngeni ai samol ewe king, “Kopwe mot lepelifichi tori üpwe anomu chon oputom pwe repwe lenien puun pecheöm.”
PSA 110:2 Ewe Samol mi Lapalap epwe alapala manen om nemenem lon wisom wisen king seni Sion. A apasa, “Kopwe nemenem won chon oputom.”
PSA 110:3 Lon ränin om kopwe maun ngeni chon oputom noum aramas repwe etuk fän püsin letiper o üföüf ekewe üf mi pin. Usun amurenipwin mi nom lesosorusich, iei usun noum kewe alüal repwe feito reöm.
PSA 110:4 Ewe Samol mi Lapalap a pwon fän akapel, nge esap siwili an ekiek, “En eman souasor tori feilfeilachök lon kotun Melkisetek.”
PSA 110:5 Ewe Samol a nom lepelifichum. I epwe akufu ekewe king lon ewe rän a lingeringer.
PSA 110:6 Epwe eäni kapwüng won chon ekewe mwü. Epwe aura ewe lenien maun ren somä o akufu ekewe king won unusen fanüfan.
PSA 110:7 Ewe king epwe ün seni ewe öüwö mi nom ünükün ewe al, epwe pöchökülela ren o sopwela le win.
PSA 111:1 Ousipwe mwareiti ewe Samol mi Lapalap. Üpwe kilisou ngeni ewe Samol mi Lapalap ren unusen lelukei lon ewe mwichen chon wenechar, pwal lein ewe mwichen aramas.
PSA 111:2 Än ewe Samol mi Lapalap föför ra fokun amwarar, chokewe meinisin mi pwapwaitiir ra ekinloneer.
PSA 111:3 An kewe föför ra fokun ling me manaman, an pwüng a nonom tori feilfeilachök.
PSA 111:4 Ewe Samol mi Lapalap a föri pwe aramas repwe chechemeni an kewe föför mi amwarar. A eäni kirikiröch o ümöümöch.
PSA 111:5 A ngeni chokewe mi niuokusiti i ener mongö. A chechemeni an we pwon fansoun meinisin.
PSA 111:6 A pwäri ngeni nöün kewe aramas manamanen an kewe föför, lupwen a ngeniir fanüen chon ekewe mwü.
PSA 111:7 A allükülük o pwüng lon mettoch meinisin a föri. An kewe allük meinisin ra nükünük.
PSA 111:8 Ra nonomopos tori feilfeilachök, Kot a föriir fän allükülük me wenechar.
PSA 111:9 A angasala nöün aramas o föri eu pwon esemüch. Itan a pin o eniweniu.
PSA 111:10 Niuokusiti ewe Samol mi Lapalap, iei poputän tipachem. Chokewe meinisin mi föri iei usun ra fefeitä lon ar silelap. Sipwe mwareiti Kot tori feilfeilachök.
PSA 112:1 Ousipwe mwareiti ewe Samol mi Lapalap. A feiöch ewe aramas mi niuokusiti ewe Samol mi Lapalap, mi pwapwaiti an epwe aleasochisi an kewe allük.
PSA 112:2 Nöün kana repwe nemenem lon ewe fanü. Mwirimwirin kana mi wenechar repwe feiöch.
PSA 112:3 Wöü me chomong pisek ra nom lon imwan, nge an pwüng a nonom tori feilfeilachök.
PSA 112:4 Saram a tin lon rochopwak fän iten ewe mi wenechar. Pun ewe Samol mi Lapalap a kirikiröch, a pwal ümöümöch o pwüng.
PSA 112:5 A feiöch eman mwän mi kichiöch o mwütätä mettoch, eman mi föri an angang fän pwüng.
PSA 112:6 Pun ewe chon pwüng epwe fokun tipepos. Aramas repwe chechemeni i tori feilfeilachök.
PSA 112:7 Esap niuokusiti pworaus mi ngau, lelukan a pos, a apilükülükü ewe Samol mi Lapalap.
PSA 112:8 Lelukan a kinamwe, esap niuokus. Lesopolan epwe pwapwa le küna än chon oputan kuf.
PSA 112:9 A fangafangöch ngeni ekewe chon wöüngau, an pwüng epwe nonom tori feilfeilachök. Epwe wor manan me meninin me ren aramas.
PSA 112:10 Ekewe aramasangau ra küna ei o song ren, ra attina meser, nge mürin resap chüen nom. Än ekewe aramasangau mochen esap pwönüetä.
PSA 113:1 Ousipwe mwareiti ewe Samol mi Lapalap. Ämi chon angang ngeni ewe Samol mi Lapalap oupwe mwareiti itan.
PSA 113:2 Oupwe mwareiti iten ewe Samol mi Lapalap seni ei fansoun tori feilfeilachök.
PSA 113:3 Seni tötän akkar tori a tuputiu aramas repwe mwareiti iten ewe Samol mi Lapalap.
PSA 113:4 Ewe Samol mi Lapalap a tekia seni chon ekewe mwü, an ling a nom asen ekewe läng.
PSA 113:5 Ese wor eman a wewe ngeni ewe Samol mi Lapalap ach we Kot. A mot won an lenien mot mi tekia,
PSA 113:6 nge a nennetiu won ekewe läng, pwal won fanüfan.
PSA 113:7 A apwätai ekewe chon wöüngau seni lepwül o atekiatäi ekewe chon mwelele seni ioien falang,
PSA 113:8 a amoteer ren ekewe samol, ren ekewe samolun nöün aramas.
PSA 113:9 A aleniöchü ewe fefin mi rit lon imwan o föri pwe epwe eman inelap mi pwapwa ren nöün kewe. Ousipwe mwareiti ewe Samol mi Lapalap.
PSA 114:1 Lupwen ekewe chon Israel ra towu seni Isip, ir ekewe mwirimwirin Jakop mi towu seni eu mwichen aramas mi sokola ar fos,
PSA 114:2 Juta a wiliti an leni mi pin, Israel a wiliti an lenien nemenem.
PSA 114:3 Ewe matau a küna mine a fis o süla, ewe chanpupu Jortan a üla.
PSA 114:4 Ekewe chukutekia ra mwetemwet usun ekewe ätemwänin sip, ekewe chukutekison ra mwetemwet usun ekewe nienifön sip.
PSA 114:5 Met o sät, pwota ka sü? Met o chanpupu Jortan, pwota ka üla?
PSA 114:6 Met o ämi kewe chukutekia, pwota oua mwetemwet usun ekewe ätemwänin sip? Nge ämi chukutekison, pwota oua mwetemwet usun ekewe nienifön sip?
PSA 114:7 En fanüfan, kopwe chechech me fän mesen ewe Samol, me fän mesen än Jakop we Kot,
PSA 114:8 i ewe mi awili ewe achau ngeni eu nomun koluk, nge ewe achau mi fokun pöchökül ngeni eu puächen koluk.
PSA 115:1 Ai Samol mi Lapalap, kopwe alingala itom, nge sap item, pokiten om tong ellet me om allükülük.
PSA 115:2 Pwota chon ekewe mwü repwe aisinikem, “Ifa i ämi Kot?”
PSA 115:3 Ach Kot a nom lon läng, i a chök föri mine a mochen.
PSA 115:4 Nge ar kewe uluulun anümwäl seni silifer me kolt aramas chök ra föri.
PSA 115:5 A wor awer, nge resap tongeni kapas, a wor meser, nge resap tongeni küneer.
PSA 115:6 A wor selinger, nge resap tongeni rongorong, a wor pwötür, nge resap tongeni titin.
PSA 115:7 A wor pöür, nge resap tongeni attap, a wor pecher, nge resap tongeni fetal, resap pwal tongeni möngüngü me lon chiorer.
PSA 115:8 Chokewe mi föri ekewe uluulun anümwäl o lüküür repwe pwal wewe ngeni ekewe uluulun anümwäl.
PSA 115:9 Ämi chon Israel, oupwe apilükülükü ewe Samol mi Lapalap. I epwe alisikemi o epeti senikemi feiengau.
PSA 115:10 Ämi mwirimwirin Aaron, oupwe apilükülükü ewe Samol mi Lapalap. I epwe alisikemi o epeti senikemi feiengau.
PSA 115:11 Ämi mi niuokusiti ewe Samol mi Lapalap, oupwe apilükülükü i. I epwe alisikemi o epeti senikemi feiengau.
PSA 115:12 Ewe Samol mi Lapalap a chechemenikich, i epwe afeiöchükich. I epwe afeiöchü ekewe chon Israel me ekewe mwirimwirin Aaron.
PSA 115:13 Ewe Samol mi Lapalap epwe afeiöchü chokewe mi niuokusiti i, ekewe aramas kis me ekewe aramas tekia.
PSA 115:14 Amwo ewe Samol mi Lapalap epwe achomongakemiila me mwirimwirimi kana.
PSA 115:15 Amwo oupwe feiöch me ren ewe Samol mi Lapalap, ewe mi föri läng me fanüfan.
PSA 115:16 Ekewe läng än ewe Samol mi Lapalap echök, nge fanüfan a ngeni aramas.
PSA 115:17 Ekewe somä resap mwareiti ewe Samol mi Lapalap, usun chök chokewe mi feitiu lon lenien sotup.
PSA 115:18 Nge kich mi manau sipwe mwareiti ewe Samol mi Lapalap seni ei fansoun tori feilfeilachök. Ousipwe mwareiti ewe Samol mi Lapalap.
PSA 116:1 Üa echeni ewe Samol mi Lapalap, pun a rongorong mweliei o aüselinga ai kewe tüngor pwe epwe ümöümöch ngeniei.
PSA 116:2 I a aü selingan ngeniei, iei mine üpwe kökköri i lon unusen ränin manauei.
PSA 116:3 Ekewe likatupun mäla ra pwelieila, ekewe feiengauen lenien sotup ra toriei, üa uren riaföü me niuokus.
PSA 116:4 Mürin üa köri iten ewe Samol mi Lapalap o apasa, “Ai Samol mi Lapalap, üa tüngor ngonuk, kopwe amanauaei.”
PSA 116:5 Ewe Samol mi Lapalap a kirikiröch o pwüng, ach Kot a fokun eäni tong.
PSA 116:6 Ewe Samol mi Lapalap a tümwünü ekewe chon lipwäkingau. Lupwen üa nom lon feiengau, a amanauaei.
PSA 116:7 Ngüni, kopwe apilükülüköch, pun ewe Samol mi Lapalap a kirikiröch ngeniei.
PSA 116:8 Ewe Samol mi Lapalap a amanauaei seni mäla. A aükätiu chönün mesei, a tümwünü pechei pwe üsap chepetek,
PSA 116:9 pwe üpwe fetal fän mesan lon fanüen chon manau.
PSA 116:10 Üa amwöchü ai lükülük pwal lupwen fansoun ai üra, “Üa nom lon riaföü lapalap.”
PSA 116:11 Üa apasa lon ai niuokus, “Aramas meinisin ra chofana.”
PSA 116:12 Met üpwe liwini ngeni ewe Samol mi Lapalap ren ekewe feiöch meinisin a ngeniei?
PSA 116:13 Üpwe uwato ewe kapen wain pwe ai asoren ün o kilisou ngeni ewe Samol mi Lapalap.
PSA 116:14 Üpwe apwönüetä ai kewe pwon ngeni ewe Samol mi Lapalap me fän mesen nöün kewe aramas meinisin.
PSA 116:15 A aüchea me fän mesen ewe Samol mi Lapalap mälan nöün kewe chon pin.
PSA 116:16 Ai Samol mi Lapalap, ngang noum chon angang. Ngang noum chon angang, nöün noum chon angang fefin. En ka apichala föföi kewe.
PSA 116:17 Üpwe eäni ngonuk ewe asoren kilisou o iotek ngonuk.
PSA 116:18 Üpwe apwönüetä ai kewe pwon ngeni en, ewe Samol mi Lapalap, me fän mesen noum kewe aramas meinisin
PSA 116:19 me lon imwom we imwenfel me lukalapen Jerusalem. Ousipwe mwareiti ewe Samol mi Lapalap.
PSA 117:1 Oupwe mwareiti ewe Samol mi Lapalap, ämi chon ekewe mwü meinisin. Oupwe ingeiti i, ämi aramas meinisin.
PSA 117:2 Pun an tong ellet ngenikich a fokun lapalap, än ewe Samol mi Lapalap allükülük a nonom tori feilfeilachök. Ousipwe mwareiti ewe Samol mi Lapalap.
PSA 118:1 Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.
PSA 118:2 Chon Israel repwe apasa, “An tong ellet a nonom tori feilfeilachök.”
PSA 118:3 Ekewe mwirimwirin Aaron repwe apasa, “An tong ellet a nonom tori feilfeilachök.”
PSA 118:4 Chokewe mi niuokusiti ewe Samol mi Lapalap repwe apasa, “An tong ellet a nonom tori feilfeilachök.”
PSA 118:5 Üa kökköri ewe Samol mi Lapalap seni lon ai riaföü, nge i a pälüeniei o angasaeila.
PSA 118:6 Üsap niuokus, pun ewe Samol mi Lapalap a nom rei. Met aramas repwe tongeni föri ngeniei?
PSA 118:7 Ewe Samol mi Lapalap peniei me chon alisiei. Üpwe küna pwe ekewe chon oputaei ra kuf.
PSA 118:8 A mürina ach sipwe anomu ach apilükülük won ewe Samol mi Lapalap, lap seni ach sipwe anomu ach apilükülük won aramas.
PSA 118:9 A mürina ach sipwe anomu ach apilükülük won ewe Samol mi Lapalap, lap seni ach sipwe anomu ach apilükülük won ekewe samol.
PSA 118:10 Chon ekewe mwü meinisin ra pwelieila, nge ngang üa ärirela fän iten ewe Samol mi Lapalap.
PSA 118:11 Ra pweliela lepeki meinisin, nge ngang üa ärirela fän iten ewe Samol mi Lapalap.
PSA 118:12 Ra rangeitiei usun achi, nge ra karakai usun ekkei a kenala iräfölüföl. Ngang üa ärirela fän iten ewe Samol mi Lapalap.
PSA 118:13 Ra tiiniei fän pöchökül pwe üpwe turula, nge ewe Samol mi Lapalap a alisiei.
PSA 118:14 Ewe Samol mi Lapalap ai pöchökül me ai köl. I ai Chon Amanau.
PSA 118:15 Oupwe aüseling ngeni ekewe kölün pwapwan win lon imwen ekewe chon pwüng, “Pöüifichin ewe Samol mi Lapalap a föri föförün pwora me win.
PSA 118:16 Pöüifichin ewe Samol mi Lapalap a aköüpöü, pöüifichin ewe Samol mi Lapalap a föri föförün pwora me win.”
PSA 118:17 Üsap mäla, nge üpwe manau o asilefeili än ewe Samol mi Lapalap kewe föför.
PSA 118:18 Ewe Samol mi Lapalap a fokun apwüngüei, nge esap atolongaei lon mäla.
PSA 118:19 Oupwe suki ngeniei ekewe asamen imwenfel pwe üpwe tolong lon o kilisou ngeni ewe Samol mi Lapalap.
PSA 118:20 Iei asamen ewe Samol mi Lapalap, ekewe chon pwüng echök repwe tolong lon.
PSA 118:21 Üa kilisou ngonuk, pun ka pälüeni ai iotek, ka pwal amanauaei.
PSA 118:22 Ewe fau ekewe chon kaü imw ra pöütala a wiliti ewe föün lepwokuku mi fokun aüchea.
PSA 118:23 Iei än ewe Samol mi Lapalap we föför, a fokun amwarar me fän mesach.
PSA 118:24 Iei ewe rän ewe Samol mi Lapalap a föri, ousipwe meseik o pwapwa lon.
PSA 118:25 Ai Samol mi Lapalap, äm aia tüngor ngonuk pwe kopwe amanauakem. Ai Samol mi Lapalap, äm aia tüngor ngonuk pwe kopwe atufichikem.
PSA 118:26 A feiöch ätewe mi feito fän iten ewe Samol mi Lapalap. Äm aia afeiöchükemi seni lon imwen ewe Samol mi Lapalap.
PSA 118:27 Ewe Samol mi Lapalap i Kot, a ngenikich saram. Oupwe fötätä ewe mönün asoren chulap ren säl ngeni ewe rongen asor tori mächän kewe.
PSA 118:28 En ai Kot, üpwe kilisou ngonuk. En ai Kot, üpwe ingemwareituk.
PSA 118:29 Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.
PSA 119:1 Ra feiöch chokewe resap tipis lon manauer, chokewe mi aleasochisi än ewe Samol mi Lapalap kewe allük.
PSA 119:2 Ra feiöch chokewe mi tümwünü an kewe allük. chokewe mi kütta i ren unusen leluker,
PSA 119:3 chokewe resap föri mine a ngau, nge ra chök föri letipen Kot.
PSA 119:4 Ai Kot, en ka asile ngenikem om öüröür, pwe aipwe tümwünüöchüür le apwönüetä.
PSA 119:5 Amwo üpwe likitü le apwönüetä om kewe allük.
PSA 119:6 Mürin üsap säw, lupwen üa ekiekifichi om kewe allük meinisin.
PSA 119:7 Üpwe mwareituk fän wenecharen lelukei, lupwen üa kaiö pwüngün om kewe pwüüng.
PSA 119:8 Üpwe aleasochisi om kewe allük. Kosap fokun likitieila.
PSA 119:9 Epwe ifa usun än eman alüal tümwünü manauan pwe epwe limöch? Ei a chök tongeni fis ren an aleasochisi om kapas.
PSA 119:10 Üa küttok ren unusen lelukei. Kosap mwüt ngeniei pwe üpwe aleasolap ngeni om kewe allük.
PSA 119:11 Üa iseis om kapas lon lelukei pwe üsap tipis ngonuk.
PSA 119:12 Ai Samol mi Lapalap, üpwe mwareituk. Kopwe aiti ngeniei om kewe allük.
PSA 119:13 Üpwe apasasefäli om kewe pwüüng meinisin ka ngenikem.
PSA 119:14 Üa pwapwaäsini le apwönüetä om kewe allük lap seni ai pwapwaäsini ekewe wöü meinisin.
PSA 119:15 Üpwe ekinlonei om kewe öüröür o ekiekifichi mine ka aiti ngeniei.
PSA 119:16 Üpwe pwapwaäsini om kewe allük, nge üsap manlükala om kewe kapas.
PSA 119:17 Kopwe kirikiröch ngeniei ngang noum chon angang, pwe üpwe manau o aleasochisi om kapas.
PSA 119:18 Kopwe suki mesei pwe üpwe küna ekewe mettoch mi amwarar seni lon om kewe allük.
PSA 119:19 Ngang eman chon siamü won fanüfan, kosap aopala om kewe allük seniei.
PSA 119:20 Lelukei a tatakis ren ai positi om kewe pwüüng fansoun meinisin.
PSA 119:21 Ka apwüngü ekewe mi lamalamtekia, ra anümamau, chokewe mi aleasolap ngeni om kewe allük.
PSA 119:22 Kopwe angei seniei säw me itengau, pun ngang üa tümwünü om kewe allük.
PSA 119:23 Inamwo are samol kana ra mwichfengen o rawangauaei, nge ngang noum ei chon angang üpwe chök ekinlonei om kewe allük.
PSA 119:24 Üa pwapwaäsini om kewe allük, ir chon öüröüraei.
PSA 119:25 Üa konola won pwül moromor, kopwe apöchökülaei usun ka pwon lon om kapas.
PSA 119:26 Üa pwärätä meinisin mine üa föri, nge en ka pälüeniei. Kopwe aiti ngeniei om kewe allük.
PSA 119:27 Kopwe awewe ngeniei usun ai üpwe fetal fän om kewe öüröür, nge ngang üpwe ekinlonei om kewe föför mi amwarar.
PSA 119:28 Üa fokun kechü ren ai letipeta. Kopwe apöchökülaei usun ka pwon lon om kapas.
PSA 119:29 Kopwe amwöchüei pwe üsap fetal won ekewe al rese pwüng. Lon om ümöümöch kopwe aiti ngeniei om we allük.
PSA 119:30 Üa filätä ai üpwe fetal won ewe al mi let, üa anomu mwei om kewe pwüüng.
PSA 119:31 Ai Samol mi Lapalap, üa kamwöchünük won om kewe allük, kosap mwüt ngeniei pwe üpwe säw.
PSA 119:32 Üpwe fokun aleasochisi om kewe allük, pun ka alapala ai sile.
PSA 119:33 Ai Samol mi Lapalap, kopwe aiti ngeniei wewen om kewe allük, nge ngang üpwe aleasochisiir fansoun meinisin.
PSA 119:34 Kopwe fang ngeniei silelap, pwe ngang üpwe aleasochisi om kewe allük o apwönüretä ren unusen lelukei.
PSA 119:35 Kopwe emweniei pwe üpwe tongeni aleasochisi om kewe allük, pun ngang üa pwapwaäsiniir.
PSA 119:36 Kopwe akulu lelukei ngeni om kewe allük, nge sap ngeni mochenian win.
PSA 119:37 Kopwe akulu mesei seni mettoch mi lomotongau, nge kopwe amanauaei ren om kapas.
PSA 119:38 Kopwe apwönüetä om pwon ngeniei ngang noum chon angang, ewe pwon ka eäni ngeni chokewe mi niuokusituk.
PSA 119:39 Kopwe angei seniei ewe itengau üa niuokusiti, pun om kewe pwüüng ra mürina.
PSA 119:40 Üa fokun positi om kewe kapasen öüröür. Kopwe amanauaei, pun en ka pwüng.
PSA 119:41 Ai Samol mi Lapalap, kopwe pwäri ngeniei om tong ellet, kopwe amanauaei usun ka fen pwon.
PSA 119:42 Mürin üpwe tongeni pälüeni chokewe mi ämängauaei, pun üa lükü om kapas.
PSA 119:43 Kopwe atufichiei pwe üpwe apasawu kapas mi let fansoun meinisin, pun ai apilükülük a nom won om kewe pwüüng.
PSA 119:44 Üpwe aleasochisi om kewe allük iteiten fansoun tori feilfeilachök.
PSA 119:45 Iwe, üpwe fetalchöchö fän ngasala, pun üa kütta om öüröür.
PSA 119:46 Üpwe pwal pwärätä om kewe allük me fän mesen ekewe king, nge üsap säw.
PSA 119:47 Üa fokun pwapwa le aleasochisi om kewe allük, pun üa aücheaniir.
PSA 119:48 Üa etiwa o aücheani om kewe allük, üpwe pwal ekinlonei om kewe pwüüng.
PSA 119:49 Kopwe chechemeni om kapas ngeniei ngang noum we chon angang, ewe kapas mi ngeniei apilükülüköch.
PSA 119:50 Iei ai chip lon ai riaföü, pwe om pwon a ngeniei manau.
PSA 119:51 Ekewe chon lamalamtekia ra fokun turunufaseei, nge ngang üsap kul seni om allük.
PSA 119:52 Ai Samol mi Lapalap, lupwen üa ekieki usun om kewe pwüüng, ra nonom seni me lomlom, üa chip.
PSA 119:53 Lingeringer watte a toriei, lupwen üa küna ekewe aramasangau mi purätiu om kewe allük.
PSA 119:54 Üa kökkölü om kewe allük ekis meinisin ia üa siamü ie.
PSA 119:55 Ai Samol mi Lapalap, üa chechemenuk lepwin o ekieki usun om kewe allük.
PSA 119:56 Iei usun mine üa chök föföri: Üa aleasochisi om kewe öüröür.
PSA 119:57 Ai Samol mi Lapalap, en chök ineti. Üpwe pwon pwe üpwe aleasochisi om kewe kapas.
PSA 119:58 Üa tüngor seni unusen lelukei om kopwe kirikiröch ngeniei. Kopwe ümöümöch ngeniei usun ka pwon.
PSA 119:59 Üa ekieki usun ai kewe föför, mürin üa kul ngeni om kewe allük.
PSA 119:60 Üa amüttiriei pwe üpwe aleasochisi om kewe allük, nge üsap mang.
PSA 119:61 Inamwo ika ekewe aramasangau ra anomu eu sär me mwei, nge üsap manlükala om kewe allük.
PSA 119:62 Üa pwätä lukenipwin pwe üpwe mwareituk pokiten om kewe allük mi pwüng.
PSA 119:63 Ngang eman chienen chokewe meinisin mi niuokusituk, chokewe mi aleasochisi om kewe öüröür.
PSA 119:64 Ai Samol mi Lapalap, fanüfan a ur ren om tong ellet. Kopwe aiti ngeniei om kewe allük.
PSA 119:65 Ai Samol mi Lapalap, ka eäni kirikiröch ngeniei ngang noum chon angang usun ka pwon.
PSA 119:66 Kopwe aiti ngeniei mirit me silelap, pun üa lükü om kewe allük.
PSA 119:67 Mwen om atolongaei lon riaföü üa mwälechfeil, nge iei üa aleasochisi om kapas.
PSA 119:68 En ka kirikiröch o föri mine a mürina. Kopwe aiti ngeniei om kewe allük.
PSA 119:69 Ekewe mi lamalamtekia ra aitengauaei ren ar chofana, nge üa aleasochisi om kewe öüröür ren unusen lelukei.
PSA 119:70 Leluker esap wor memmef lon, nge ngang üa pwapwaäsini om allük.
PSA 119:71 A mürina ngeniei pwe üa riaföü, pun ren ei üa tongeni kaiö om kewe allük.
PSA 119:72 Ewe allük ka ngenikem a mürina ngeniei lap seni ngeröün föün kolt me silifer.
PSA 119:73 En ka föriei o tümwünüei. Kopwe fang ngeniei mirit pwe üpwe tongeni kaiö om kewe allük.
PSA 119:74 Chokewe mi niuokusituk repwe pwapwa, lupwen repwe künaei, pun üa apilükülükü om kewe kapas.
PSA 119:75 Ai Samol mi Lapalap, üa silei pwe om kewe apwüng ra pwüng, fän om allükülük ka ariaföüüei.
PSA 119:76 Om tong ellet epwe achipaei, usun ka pwon ngeniei ngang noum we chon angang.
PSA 119:77 Om ümöümöch epwe toriei pwe üpwe tongeni manau, pun üa pwapwaäsini om allük.
PSA 119:78 Amwo ekewe chon lamalamtekia repwe säw, pun ra atipisiei, nge ese wor popun. Nge me rei, üpwe ekinlonei om kewe öüröür.
PSA 119:79 Amwo chokewe mi niuokusituk repwe feito rei, ir chokewe mi silei om kewe allük.
PSA 119:80 Amwo üpwe fokun aleasochisi om kewe allük, pwe üsap säw.
PSA 119:81 Üa fokun apwangapwangala ren ai positi om kopwe amanauaei, nge üa apilükülükü om kapas.
PSA 119:82 Mesei ra toputopula ren ai akköürü mine ka pwon. Üa ais, “Inet kopwe achipaei?”
PSA 119:83 Inamwo ika üa lomotongau usun chök eu rumen wain seni silin man mi nürüfengen ren ötüöt, nge üsap manlükala om kewe allük.
PSA 119:84 Ifa ükükün fansoun ngang noum ei chon angang üpwe engila? Inet kopwe apwüngü chokewe mi ariaföüüei?
PSA 119:85 Ekewe chon lamalamtekia ra tuw pwang pwe üpwe turulong lon, ir chokewe resap aleasochisi om allük.
PSA 119:86 Om kewe allük meinisin ra let. Nge aramas ra chök ariaföüüei ren ar kapas chofana. Kose mochen kopwe alisiei.
PSA 119:87 Arapakan ar repwe ärieila me won fanüfan. Nge ngang üsap likitala om kewe öüröür.
PSA 119:88 Lon om tong ellet kopwe amwöchü manauei, pwe üpwe tongeni aleasochisi om kewe allük.
PSA 119:89 Ai Samol mi Lapalap, om kapas a nüküchar me lon läng, a nom tori feilfeilachök.
PSA 119:90 Om allükülük a nonom tori ekewe täppin aramas meinisin. En ka anomu fanüfan lon lenian, nge a nonomopos.
PSA 119:91 Om kewe allük ra nonom tori ikenai, pun mettoch meinisin ra angang ngonuk.
PSA 119:92 Are üsap pwapwaiti om allük, üpwe mäla lon ai riaföü.
PSA 119:93 Üsap fokun manlükala om kewe öüröür, pun ka amanauaei pokiter.
PSA 119:94 Ngang noum, kopwe amanauaei, pun ngang üa kütta om öüröür.
PSA 119:95 Ekewe aramasangau ra okoperiei pwe repwe nieila, nge ngang üpwe ekinlonei om kewe allük.
PSA 119:96 Üa küna pwe mi wor öükükün mettoch meinisin, nge om allük esap wor öükükün.
PSA 119:97 Üa fokun aücheani om allük, üa ekinlonei fansoun meinisin.
PSA 119:98 Om allük a atipachemaei pwe üa tipachem lap seni chon oputaei, pun a nonom rei fansoun meinisin.
PSA 119:99 A wor ai sile lap seni än nei kewe sense sile, pun üa ekinlonei om kewe allük.
PSA 119:100 Üa mirit lap seni ekewe reikewe, pun üa aleasochisi om kewe öüröür.
PSA 119:101 Üsap föri sokun föför mi ngau, pun üa aleasochisi om kewe kapas.
PSA 119:102 Üsap tok seni om kewe pwüüng, pun püsin en ai chon kait.
PSA 119:103 Om kewe kapasen pwon ra fokun arar me rei, ra arar seni chönün chunen me lon awei.
PSA 119:104 Üa angei ai mirit seni om kewe öüröür, iei mine üa oput ekewe föför mi ngau meinisin.
PSA 119:105 Om kapas eu lamp a aiti ngeniei ia üpwe ipwela ie, a pwal asarama alei.
PSA 119:106 Üa pwon fän akapel o anükünükü pwe üpwe aleasochisi om kewe öüröür mi pwüng.
PSA 119:107 Üa fokun riaföü. Ai Samol mi Lapalap, kopwe amanauaei, usun ka pwon lon om kapas.
PSA 119:108 Ai Samol mi Lapalap, kopwe aüselinga ai iotekin kilisou o aiti ngeniei om kewe pwüüng.
PSA 119:109 Üa fangala manauei pwe üpwe tolong lon feiengauen mäla fansoun meinisin, nge üsap manlükala om kewe allük.
PSA 119:110 Ekewe aramasangau ra anomu eu sär fän itei, nge ngang üsap aleasolap ngeni om kewe öüröür.
PSA 119:111 Om kewe allük wöüi tori feilfeilachök. Ewer, ra apwapwai lelukei.
PSA 119:112 Üa filätä pwe üpwe apwönüetä om kewe allük fansoun meinisin tori sopolan manauei.
PSA 119:113 Üa oput ekewe aramas mi tiperuu, nge üa aücheani om allük.
PSA 119:114 En ai lenien op me ai chon tümwün. Üa anomu ai apilükülük won om kewe kapas.
PSA 119:115 Oupwe sü seniei, ämi chon föri mine a ngau, pwe üpwe aleasochisi än ai Kot kewe allük.
PSA 119:116 Kopwe alisiei pwe üpwe tongeni manau, usun ka fen pwon, nge kosap mwütätä pwe üpwe lichipüng lon ai apilükülük.
PSA 119:117 Kopwe amwöchüeitä pwe üpwe manau, üpwe meniniti om kewe allük fansoun meinisin.
PSA 119:118 Ka oput chokewe meinisin mi aleasolap ngeni om kewe allük. Ewer, ar tipachemsolä esap wor lomotan.
PSA 119:119 Ekewe aramasangau meinisin won fanüfan ra usun chök mettoch mi limengau me fän mesom, iei mine üa aücheani om kewe öüröür.
PSA 119:120 Inisi a chechech ren ai niueituk. Üa niuokus ren om kewe kapwüng.
PSA 119:121 Üa fen föri mine a wenechar o pwüng, kosap likitiei ngeni chon ariaföüüei.
PSA 119:122 Kopwe pwon pwe kopwe alisiei ngang noum chon angang, nge kosap mwüt ngeni ekewe chon lamalamtekia pwe repwe ariaföüüei.
PSA 119:123 Mesei ra toputopula ren ai aköürü om kopwe amanauaei, pwal ren ai aköürü om kopwe apwönüetä om kewe pwon mi pwüng.
PSA 119:124 Lon om föför ngeniei ngang noum chon angang kopwe pwäri om tong ellet o aiti ngeniei om kewe allük.
PSA 119:125 Ngang noum chon angang, kopwe ngeniei mirit pwe üpwe tongeni silei om kewe allük.
PSA 119:126 Ai Samol mi Lapalap, a tori fansoun pwe kopwe föri om angang, pun aramas ra puri om allük.
PSA 119:127 Ellet, üa aücheani om kewe allük lap seni kolt me kolt mi mürina.
PSA 119:128 Iei mine üa apwönüetä om kewe öüröür meinisin, nge üa oput ekewe föför mi mwäl.
PSA 119:129 Om kewe allük ra fokun amwarar, iei mine üa aleasochisiir ren unusen lelukei.
PSA 119:130 Lupwen a suk ngenikem masouen om kewe kapas, a wor saram, a ngeni ekewe chon wewemang tipachem.
PSA 119:131 Lon ai positi om kewe allük üa amassaw o ngasepwich.
PSA 119:132 Kopwe kuluto o ümöümöch ngeniei, usun ka föri ngeni chokewe mi echenuk.
PSA 119:133 Kopwe anükücharaei pwe üsap tur, usun ka pwon, nge kosap mwüt ngeni tipis epwe nemenieila.
PSA 119:134 Kopwe angasaei seni ekewe aramas mi ariaföüüei, pwe üpwe tongeni aleasochisi om kewe öüröür.
PSA 119:135 Kopwe netiu woi ngang noum chon angang fän om kirikiröch o aiti ngeniei om kewe allük.
PSA 119:136 Chönün mesei ra pupu usun chanpupu, pun aramas resap aleasochisi om kewe allük.
PSA 119:137 Ai Samol mi Lapalap, en ka pwüng, nge om kewe kapwüng ra pwüng.
PSA 119:138 Om kewe allük ka ngenikem ra pwüng, ra pwal unusen allükülük.
PSA 119:139 Ai tiliken a apwangapwangaeila, pun chon oputaei ra tümwününgauei om kewe kapas.
PSA 119:140 Om kewe pwon ra asosotöch, ngang noum chon angang üa aücheaniir.
PSA 119:141 Üa itengau o küna koput, nge üsap manlükala om kewe öüröür.
PSA 119:142 Om we pwüng a nom tori feilfeilachök, nge om allük a let.
PSA 119:143 Weires me eniweniw ra toriei, nge om kewe allük ra apwapwaei.
PSA 119:144 Om kewe allük ra pwüng tori feilfeilachök. Kopwe ngeniei mirit pwe üpwe manau.
PSA 119:145 Üa siö ngonuk ren unusen lelukei. Ai Samol mi Lapalap, kopwe pälüeniei. Ngang üpwe aleasochisi om kewe allük.
PSA 119:146 Üa siö ngonuk. Kopwe amanauaei pwe üpwe apwönüetä om kewe allük.
PSA 119:147 Üa pwätä wünümweerän o siö pwe kopwe alisiei. Üa apilükülükü om kewe kapas.
PSA 119:148 Üa nenela lon unusen pwin pwe üpwe ekinlonei om we pwon.
PSA 119:149 Kopwe aüselinga mweliei lon om tong ellet. Ai Samol mi Lapalap, kopwe amanauaei fän om pwüng.
PSA 119:150 Chokewe mi ariaföüüei ra kaneto fän ar ekingau, nge resap fokun apwönüetä om kewe allük.
PSA 119:151 Nge en ka arap ngeniei, ai Samol mi Lapalap, om kewe allük meinisin ra let.
PSA 119:152 Seni me lomlom üa silei seni om kewe allük, pwe ka anüküchareer tori feilfeilachök.
PSA 119:153 Kopwe nengeni ai riaföü o angasaei, pun üsap manlükala om allük.
PSA 119:154 Kopwe peniei o angasaei, kopwe amanauaei, usun ka pwon.
PSA 119:155 En kosap amanaua ekewe aramasangau, pun resap aleasochisi om kewe allük.
PSA 119:156 Ai Samol mi Lapalap, om ümöümöch a lapalap, kopwe amanauaei fän om pwüng.
PSA 119:157 Ra men chomong chon ariaföüüei me chon ü ngeniei, nge ngang üsap tok seni om kewe allük.
PSA 119:158 Fän koput üa nenengeni ekewe aramas resap allükülük, pun ir resap aleasochisi om kewe allük.
PSA 119:159 Kopwe ekieki usun ai aücheani om kewe öüröür. Kopwe tümwünü manauei fän om tong ellet.
PSA 119:160 Masouen om kewe kapas meinisin a let. Om kewe allük mi pwüng meinisin ra nonom tori feilfeilachök.
PSA 119:161 Ekewe samol ra ariaföüüei nge esor popun, nge ngang üa meniniti om kewe kapas.
PSA 119:162 Üa pwapwa ren om kewe pwon usun eman mi angei chomong liapan.
PSA 119:163 Üa oput o anioputa chofana, nge üa aücheani om allük.
PSA 119:164 Üa mwareituk fän fisu lon eu rän fän iten om kewe allük mi pwüng.
PSA 119:165 Chokewe mi aücheani om allük ra fokun kinamwe. Esap wor och ra tongeni chepetek ren.
PSA 119:166 Ai Samol mi Lapalap, üa apilükülükü om kopwe amanauaei, üa pwal apwönüetä om kewe allük.
PSA 119:167 Üa aleasochisi om kewe allük, üa wesewesen aücheaniir.
PSA 119:168 Üa aleasochisi om kewe öüröür me om kewe allük, pun en ka küna meinisin mine üa föri.
PSA 119:169 Ai Samol mi Lapalap, amwo ai siö epwe toruk. Kopwe ngeniei mirit usun ka apasa.
PSA 119:170 Ai iotekin tüngor epwe toruk. Kopwe angasaei usun ka pwon.
PSA 119:171 Üpwe fokun mwareituk pwe ka aiti ngeniei om kewe allük.
PSA 119:172 Üpwe kölü om kapas, pun om kewe allük meinisin ra pwüng.
PSA 119:173 Amwo kopwe molotä pwe kopwe alisiei, pun üa filätä om kewe öüröür pwe üpwe apwönüretä.
PSA 119:174 Ai Samol mi Lapalap, üa positi om kopwe amanauaei, üa fokun pwapwaiti om allük.
PSA 119:175 Kopwe mwüt ngeniei pwe üpwe manau, pwe üpwe tongeni mwareituk, nge om kewe pwüüng repwe alisiei.
PSA 119:176 Üa mwälechfeil usun eman sip mi mwälechela, kopwe küttaei ngang noum chon angang, pun üsap manlükala om kewe allük.
PSA 120:1 Echö kölün feitä . Üa siö ngeni ewe Samol mi Lapalap lon ai riaföü, nge i a pälüeniei,
PSA 120:2 “Ai Samol mi Lapalap, kopwe angasaei seni ekewe chon chofana me chon atuputup.”
PSA 120:3 Ämi chon atuputup, met Kot epwe liwini ngenikemi? Met epwe pwal föri ngenikemi?
PSA 120:4 Epwe apwüngükemi ren än eman sounfiu föün esefich mi ken, ren moochen chia mi sarara.
PSA 120:5 Feiengauei pwe üa siamüfetal lon Mesek o nonom lon imwen ekewe chon Ketar.
PSA 120:6 A fansoun langatam ai imweimw lein chokewe mi oput kinamwe.
PSA 120:7 Üa tipeni kinamwe. Nge lupwen üa kapas usun, ir ra tipeni maun.
PSA 121:1 Echö kölün feitä. Üa anetai mesei ngeni ekewe chuk. Ia alilisi epwe feito me ie?
PSA 121:2 Alilisi epwe war me ren ewe Samol mi Lapalap mi förätä läng me fanüfan.
PSA 121:3 I epwe amwöchuk pwe kosap mit, ewe mi tümwünuk esap aiesum.
PSA 121:4 Nengeni, ewe mi tümwünü Israel esap aiesum, esap pwal möür.
PSA 121:5 Ewe Samol mi Lapalap epwe tümwünuk, i epwe annüruk o nom pelifichum.
PSA 121:6 Akkar esap afeiengauok lerän, nge maram esap afeiengauok lepwin.
PSA 121:7 Ewe Samol mi Lapalap epwe tümwünuk seni feiengau meinisin, i epwe tümwünü manauom.
PSA 121:8 Ewe Samol mi Lapalap epwe tümwünü om towu me om tolong seni ikenai tori feilfeilachök.
PSA 122:1 Echö kölün feitä än Tafit. Üa pwapwa, lupwen ra üreniei, “Ousipwe feila ren imwen ewe Samol mi Lapalap.”
PSA 122:2 Iei äm aia tolong lon asamalapom kewe o ütä lon, en Jerusalem.
PSA 122:3 Jerusalem a kaüsefälitä usun eu telinimw mi nükünüköch.
PSA 122:4 Chon ekewe ainang ra feitä ie, ekewe ainangen Israel, pwe repwe kilisou ngeni ewe Samol mi Lapalap, usun a fen allük ngeniir.
PSA 122:5 Ikenan mi wor lenien mot fän iten chokewe mi eäni kapwüng, ekewe lenien motun king fän iten chon leimwen Tafit.
PSA 122:6 Oupwe tüngor pwe epwe wor kinamwe lon Jerusalem, “Amwo chokewe mi echenuk repwe feiöch.
PSA 122:7 Epwe wor kinamwe lon tittum, Jerusalem, o imwom kewe imwen king repwe nükünük.”
PSA 122:8 Pokiten pwi me chienei kewe üpwe apasa ngeni Jerusalem, “Kinamwe epwe nonom lomw.”
PSA 122:9 Pokiten imwen ewe Samol mi Lapalap ach we Kot üpwe kütta om feiöch.
PSA 123:1 Echö kölün feitä. Üa netä reöm, ai Samol mi Lapalap, en ewe mi mot won ewe lenien motun king lon läng.
PSA 123:2 Usun mesen ekewe chon angang mwän ra netä ren ar samol, pwal usun mesen eman chon angang fefin a netä ren an samol fefin, iei usun mesach ra netä ren ewe Samol mi Lapalap ach we Kot, tori epwe ümöümöch ngenikich.
PSA 123:3 Kopwe ümöümöch ngenikem, äm Samol mi Lapalap, kopwe ümöümöch ngenikem. Pun a kon watte än aramas aitengauakem.
PSA 123:4 A kon langatam fansoun äm riaföü ren än ekewe mi wöümong esitakem, pwal ren än ekewe mi lamalamtekia aitengauakem.
PSA 124:1 Echö kölün feitä än Tafit. Chon Israel repwe apasa, “Are ewe Samol mi Lapalap esap nom rech,
PSA 124:2 are ewe Samol mi Lapalap esap nom rech, lupwen aramas ra maun ngenikich,
PSA 124:3 repwe oromanauekichela lon ar song mi watte ngenikich.
PSA 124:4 Iwe, ewe lölö epwe pwölükichela, ewe öütöüt epwe purikichela,
PSA 124:5 nge nonoon ekewe koluk repwe pwölükichela.
PSA 124:6 Sipwe mwareiti ewe Samol mi Lapalap, pun esap mwüt ngeni chon oputakich pwe repwe arosakichela.
PSA 124:7 Sa tiwela usun eman machang a tiwela seni ewe sär, ewe chon sär a soni. Ewe sär a mwü, nge kich sa tiwela.
PSA 124:8 Alilisich a feito seni ewe Samol mi Lapalap, ewe mi föri läng me fanüfan.
PSA 125:1 Echö kölün feitä. Chokewe mi apilükülükü ewe Samol mi Lapalap ra usun chök ewe chuk Sion, esap tongeni mwökütüküt, nge epwe chök nonom tori feilfeilachök.
PSA 125:2 Usun ekewe chuk ra nom pwelin ünükün Jerusalem, iei usun ewe Samol mi Lapalap a nom pwelin ünükün nöün aramas seni ei fansoun tori feilfeilachök.
PSA 125:3 Än ekewe aramasangau nemenem esap nonomopos won ewe fanü mi inet ngeni ekewe chon pwüng, pun mürin, ekewe chon pwüng repwe pwal föri mine a ngau.
PSA 125:4 Ai Samol mi Lapalap, kopwe föri mine a mürina ngeni chokewe mi föri mine a mürina, pwal ngeni chokewe mi wenechar lon leluker.
PSA 125:5 Nge chokewe mi rikila ngeni ekewe al mi pwor kopwe asechirela fiti ekewe chon föföringau. Kinamwe epwe nom lon Israel.
PSA 126:1 Echö kölün feitä. Lupwen ewe Samol mi Lapalap a aliwinisefälikich ngeni Sion seni ach oola, sa usun chök chon tan.
PSA 126:2 Lon ena fansoun kich sa takirikir. Sa mweireir fän pwapwa. Mürin, chon ekewe mwü ra apasa lefiler, “Ewe Samol mi Lapalap a föri föför mi amwarar fän iter.”
PSA 126:3 Ellet, ewe Samol mi Lapalap a föri föför mi amwarar fän itach, iei popun sa pwapwa.
PSA 126:4 Ai Samol mi Lapalap, kopwe aliwinisefälieto ekewe chon oola meinisin, usun chök ekewe chanpupu lon Nekep ra lölösefäl ren üt.
PSA 126:5 Chokewe mi fofot fän kechü repwe kinikin fän mweireiren pwapwa.
PSA 126:6 Eman mi feila fän kechü o uwei föün irä pwe epwe fotuki, epwe liwinto fän mweireiren pwapwa o uwato kinian ua.
PSA 127:1 Echö kölün feitä än Salomon. Are ewe Samol mi Lapalap esap aüetä ewe imw, a solap än ekewe chon aüetä angang. Are ewe Samol mi Lapalap esap mamasa ewe telinimw, a solap än ekewe chon mas nenela le mamas.
PSA 127:2 A solap ämi pwätäkai pwal ämi annutumang, pwe oupwe angang weires fän iten enemi mongö. Pun Kot a fang ngeni nöün kewe a echeniir mettoch meinisin mine ra osupwang ren, lupwen ra annut.
PSA 127:3 Nau eu lifang seni ewe Samol mi Lapalap, ir eu liwin mi öch.
PSA 127:4 Ekewe ät eman a nöüni lupwen an alüal ra usun chök ekewe föün esefich lepöün eman sounfiu.
PSA 127:5 A feiöch ewe mwän mi ur an lenien föün esefich ren ei sokun föün. Ätewe esap säw, lupwen epwe kapas ngeni chon oputan lon lenien kapwüng.
PSA 128:1 Echö kölün feitä. Ra feiöch ir meinisin mi niuokusiti ewe Samol mi Lapalap, chokewe mi aleasochisi an kewe allük.
PSA 128:2 Kopwe mongö uän angangen poum, kopwe pwapwa o feiöch.
PSA 128:3 Pwülüom epwe wewe ngeni efoch irän wain mi fokun ua me lon imwom. Noum kana repwe wewe ngeni fasaren ewe irä olif ünükün om chepel.
PSA 128:4 Iei usun feiöchün ewe mwän mi niuokusiti ewe Samol mi Lapalap.
PSA 128:5 Ewe Samol mi Lapalap epwe afeiöchuk seni Sion. Amwo kopwe küna feiöchün Jerusalem lon ränin manauom meinisin.
PSA 128:6 Amwo kopwe küna nöün noum kana. Kinamwe epwe nom won Israel.
PSA 129:1 Echö kölün feitä. Israel epwe apasa, “Chon oputaei ra fokun ariaföüüei seni leküküni.
PSA 129:2 Ewer, ra fokun ariaföüüei seni leküküni, nge resap tongeni akufuei.
PSA 129:3 Ra akinasa söküri pwe a fokun watte kinasan, usun chök eman chon tuw pwül a tuw warawar mi langatam.
PSA 129:4 Nge ewe Samol mi Lapalap a pwüng. I a angasaei seni än ekewe aramasangau fötekiniei.
PSA 129:5 Amwo meinisin mi oput Sion repwe timär fän säw.
PSA 129:6 Amwo repwe wewe ngeni fetil won osun ekewe imw mi pwasala me mwen an märitä,
PSA 129:7 ewe chon kinikin esap tongeni amasoua pöün ren, nge ewe chon föri pilük esap tongeni pilükü o efiti.
PSA 129:8 Nge chokewe mi pwerela resap apasa ngeniir, “Än ewe Samol mi Lapalap feiöch epwe nom womi. Äm aia afeiöchükemi fän iten ewe Samol mi Lapalap.”
PSA 130:1 Echö kölün feitä. Ai Samol mi Lapalap, üa siö ngonuk seni lon ekewe leni mi alolol.
PSA 130:2 Ai Samol, kopwe rongorong mweliei. Kopwe aü selingom ngeni ai kewe tüngor pwe kopwe ümöümöch ngeniei.
PSA 130:3 Are en, äm Samol mi Lapalap, kopwe maketiu äm kewe tipis, iö epwe tongeni manau?
PSA 130:4 Nge en ka amusala äm tipis, pwe aipwe niuokusituk.
PSA 130:5 Üa fokun witiwiti ewe Samol mi Lapalap, üa apilükülükü an kapas.
PSA 130:6 Üa witiwiti ewe Samol, lap seni än ekewe chon mas witiwiti an epwe ränila, lap seni än ekewe chon mas witiwiti an epwe ränila.
PSA 130:7 Ämi chon Israel, oupwe apilükülükü ewe Samol mi Lapalap. Pun tong ellet a nom ren ewe Samol mi Lapalap, a pwal watte an angangen amanaua aramas.
PSA 130:8 I epwe amanaua chon Israel seni ar tipis meinisin.
PSA 131:1 Echö kölün feitä än Tafit. Ai Samol mi Lapalap, üsap tipetekia lon lelukei, mesei esap wolamalamtekia. Üsap aosukosukaei ren mettoch mi kon tekia me amwarar ngeniei.
PSA 131:2 Nge üa amosonosonaei o akinamweeila, usun eman semirit a mosonosonola lepöün inan, lupwen a wes seni oupun. Lelukei a mosonosonola usun eman semirit mi wes seni oupun inan.
PSA 131:3 Ämi chon Israel, oupwe apilükülükü ewe Samol mi Lapalap seni ei fansoun tori feilfeilachök.
PSA 132:1 Echö kölün feitä. Ai Samol mi Lapalap, kopwe chechemeni Tafit me an kewe riaföü meinisin a eäni.
PSA 132:2 Kopwe chechemeni usun an pwon fän akapel ngonuk me an pwon ngonuk, en Ewe mi Unusen Tekia, än Jakop we Kot.
PSA 132:3 “Üsap tolong lon imwei ika konola lon kiei.
PSA 132:4 Üsap mochen aiesum ika annut
PSA 132:5 tori ai üpwe küna eu leni fän iten ewe Samol mi Lapalap, eu imw fän iten Ewe mi Unusen Tekia, än Jakop we Kot.”
PSA 132:6 Sa rongorong usun ewe pworofel me lon Petleem, sa küna me lon ekewe mälämälen Jearim.
PSA 132:7 Sa apasa, “Ousipwe feila ren imwen ewe Samol mi Lapalap o fel ngeni me arun lenien puun pechen.”
PSA 132:8 Ai Samol mi Lapalap, kopwe feito o tolong lon ewe imwenfel, en me ewe pworofel asisilen om manaman.
PSA 132:9 Noum kewe souasor repwe föri mine a pwüng fansoun meinisin, nge noum kewe chon pin repwe mweireir fän pwapwa.
PSA 132:10 Pokiten Tafit noum we chon angang kosap aliwini noum we mi kepit.
PSA 132:11 Ewe Samol mi Lapalap a akapel ngeni Tafit eu pwon mi let, nge esap atai, “Üpwe awisa eman me lein noum kewe mwän epwe siwiliik lon wisom wisen king.
PSA 132:12 Are noum kewe mwän repwe tümwünü ai we pwon me ai kewe allük üa aiti ngeniir, nöür kewe mwän repwe pwal siwiliik lon wisom wisen king tori feilfeilachök.”
PSA 132:13 Pun ewe Samol mi Lapalap a fen filätä Sion. I a mochen pwe epwe lenien imwan,
PSA 132:14 “Iei ewe leni üpwe nonom lon tori feilfeilachök, iei ai we lenien nemenem, pun iei ai mochen.
PSA 132:15 Üpwe afeiöchü Sion ren chomong wöü, üpwe awora enen ekewe chon wöüngau.
PSA 132:16 Üpwe ngeni ekewe souasor seni Sion manau, nge nöün chon pin kana repwe mweireir fän pwapwa.
PSA 132:17 Ikenan üpwe awora eman mwirimwirin Tafit mi pöchökül epwe king, üpwe föri pwe nei we mi kepit epwe chök nemenem.
PSA 132:18 Iwe, üpwe awora säw ngeni chon oputan, nge won möküren ewe mi kepit epwe wor epa mwärämwär mi ling.”
PSA 133:1 Echö kölün feitä. Nengeni usun mürinan me apwapwan, lupwen pwipwi ra nonomfengen fän tipeeu.
PSA 133:2 Ei sokun a usun chök löön kepit mi aüchea a nitiu won möküren Aaron o suputiu won alüsan, a pwal suputiu won kalan üfan.
PSA 133:3 A pwal usun chök amurenipwinin ewe chuk Hermon, a püngütiu won ekewe chukun Sion. Pun ikenan ewe Samol mi Lapalap a anomu an feiöch, ewe manau esemüch.
PSA 134:1 Echö kölün feitä. Oupwe feito, oupwe mwareiti ewe Samol mi Lapalap, ämi nöün chon angang meinisin, ämi mi angang ngeni lon imwan lepwin.
PSA 134:2 Oupwe aitietä pöümi lon ämi iotek ngeni ewe leni mi pin o mwareiti ewe Samol mi Lapalap.
PSA 134:3 Ewe Samol mi Lapalap, ewe mi föri läng me fanüfan epwe afeiöchükemi seni Sion.
PSA 135:1 Ousipwe mwareiti ewe Samol mi Lapalap. Oupwe mwareiti iten ewe Samol mi Lapalap, ämi nöün kewe chon angang. Oupwe mwareiti i,
PSA 135:2 ämi mi angang lon imwen ewe Samol mi Lapalap, ämi mi nom lon ekewe leni ünükün imwen ach we Kot.
PSA 135:3 Oupwe mwareiti ewe Samol mi Lapalap, pun a kirikiröch. Oupwe kölün mwareiti itan, pun i a ümöümöch.
PSA 135:4 Ewe Samol mi Lapalap a filätä Jakop fän püsin itan, a filätä ekewe chon Israel pwe epwe nöüniir.
PSA 135:5 Üa silei pwe ewe Samol mi Lapalap a tekia, a nom asen ekewe kot meinisin.
PSA 135:6 Ewe Samol mi Lapalap a föri meinisin mine a efich lon läng pwal won fanüfan, lon ekewe matau pwal lon ekewe leni mi alolol meinisin.
PSA 135:7 I ewe mi atötäi ekewe kuchu me lesopun fanüfan, a förätä inefi fiti püngün üt, a pwal atowu asepwäl seni an lenien iseis.
PSA 135:8 I ewe mi niela ekewe mwänichi lon Isip, ekewe mwänichien aramas me ekewe mweinöün man,
PSA 135:9 a föri ekewe asisil me manaman lefilen ekewe chon Isip, pwe epwe apwüngü Farao me nöün kewe nöüwis meinisin.
PSA 135:10 I ewe mi ataela chomong mwü o niela ekewe king mi pwora.
PSA 135:11 A niela Sihon ewe kingen chon Amor, pwal Ok ewe kingen Pasan me ekewe kingen Kanaan meinisin,
PSA 135:12 nge fanüer a ngeni nöün kewe aramasen Israel pwe repwe fanüeni.
PSA 135:13 Ai Samol mi Lapalap, itom a nonom tori feilfeilachök. Ai Samol mi Lapalap, iteüöchum a nonom fansoun meinisin.
PSA 135:14 Pun ewe Samol mi Lapalap epwe alletätä pwüngün nöün kewe aramas o eäni tong ngeni nöün kewe chon angang.
PSA 135:15 Än chon ekewe mwü uluulun anümwäl seni silifer me kolt aramas chök ra föri.
PSA 135:16 A wor awer, nge resap tongeni kapas, a wor meser, nge resap tongeni küneer.
PSA 135:17 A wor selinger, nge resap tongeni rongorong, resap pwal tongeni ngasangas.
PSA 135:18 Ewer, chokewe mi föri ekewe uluulun anümwäl o lüküür repwe pwal wewe ngeni ekewe uluulun anümwäl.
PSA 135:19 Ämi chon Israel, oupwe mwareiti ewe Samol mi Lapalap. Ämi mwirimwirin Aaron, oupwe mwareiti ewe Samol mi Lapalap.
PSA 135:20 Ämi mwirimwirin Lefi, oupwe mwareiti ewe Samol mi Lapalap. Ämi meinisin mi niuokusiti ewe Samol mi Lapalap, oupwe mwareiti i.
PSA 135:21 Oupwe mwareiti ewe Samol mi Lapalap seni lon Sion, i ewe mi imweimw lon Jerusalem. Ousipwe mwareiti ewe Samol mi Lapalap.
PSA 136:1 Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.
PSA 136:2 Oupwe kilisou ngeni ewe Kot mi tekia seni ekewe kot meinisin, an tong ellet a nonom tori feilfeilachök.
PSA 136:3 Oupwe kilisou ngeni ewe Samol mi tekia seni ekewe samol meinisin, an tong ellet a nonom tori feilfeilachök.
PSA 136:4 Ewe Samol mi Lapalap i chök ewe mi föri ekewe manaman mi amwarar, an tong ellet a nonom tori feilfeilachök.
PSA 136:5 I ewe mi föri ekewe läng ren an silelap, an tong ellet a nonom tori feilfeilachök.
PSA 136:6 A anomu fanüfan won ekewe koluk, an tong ellet a nonom tori feilfeilachök.
PSA 136:7 A föri ekewe saram mi watte, an tong ellet a nonom tori feilfeilachök:
PSA 136:8 ewe akkar pwe epwe tin lerän, an tong ellet a nonom tori feilfeilachök,
PSA 136:9 ewe maram me ekewe fü pwe repwe tin lepwin, an tong ellet a nonom tori feilfeilachök.
PSA 136:10 Iwe, i a niela ekewe mwänichien Isip, an tong ellet a nonom tori feilfeilachök.
PSA 136:11 A emwenawu chon Israel seni Isip, an tong ellet a nonom tori feilfeilachök,
PSA 136:12 ren pöün mi manaman o aköüpöü, an tong ellet a nonom tori feilfeilachök.
PSA 136:13 A aimwüfeseni ewe Setipar lon ruu kinikin, an tong ellet a nonom tori feilfeilachök,
PSA 136:14 pwe chon Israel repwe pwerela lukalapan, an tong ellet a nonom tori feilfeilachök.
PSA 136:15 Nge a aturalong Farao me nöün mwichen sounfiu lon ewe Setipar, an tong ellet a nonom tori feilfeilachök.
PSA 136:16 A emweni nöün kewe aramas lon ewe fanüapö, an tong ellet a nonom tori feilfeilachök.
PSA 136:17 A niela ekewe king mi lap, an tong ellet a nonom tori feilfeilachök.
PSA 136:18 A pwal niela ekewe king mi iteföüla, an tong ellet a nonom tori feilfeilachök:
PSA 136:19 Sihon ewe kingen chon Amor, an tong ellet a nonom tori feilfeilachök,
PSA 136:20 me Ok ewe kingen Pasan, an tong ellet a nonom tori feilfeilachök.
PSA 136:21 A ngeni chon Israel fanüer pwe repwe fanüeni, an tong ellet a nonom tori feilfeilachök,
PSA 136:22 a ngeni Israel nöün we chon angang ekewe fanü pwe epwe fanüeni, an tong ellet a nonom tori feilfeilachök.
PSA 136:23 I ewe mi chechemenikich lon ach tekison, an tong ellet a nonom tori feilfeilachök,
PSA 136:24 o chimanükich seni chon oputach, an tong ellet a nonom tori feilfeilachök.
PSA 136:25 A amongöni mönümanau meinisin, an tong ellet a nonom tori feilfeilachök.
PSA 136:26 Oupwe kilisou ngeni ewe Koten läng, an tong ellet a nonom tori feilfeilachök.
PSA 137:1 Iwe, ünükün ekewe chanpupun Papilon aia mottiu o kechü, lupwen aia chechemeni Sion.
PSA 137:2 Ikenan aia asapätä nöüm kewe ükülele won ekewe silifö.
PSA 137:3 Ikenan ekewe chon liapenikem ra ürenikem pwe aipwe köl, ekewe chon ariaföüükem ra ariänikem pwe aipwe pwapwa, ra apasa, “Oupwe eäni ngenikem echö ekewe kölün Sion.”
PSA 137:4 Epwe ifa usun, äm aipwe tongeni eäni kölün ewe Samol mi Lapalap lon fanüen ekis?
PSA 137:5 Are üpwe manlükala en, Jerusalem, pöüifichi epwe pwasala.
PSA 137:6 Chönawei epwe pachätä fän fongochi, are üsap chechemenuk, are üsap ekieki pwe en, Jerusalem, kopwe ai pwapwa lap seni mettoch meinisin.
PSA 137:7 Ai Samol mi Lapalap, kopwe chechemeni mine ekewe chon Etom ra föri lon ewe ränin Jerusalem a tala. Kopwe chechemeni usun ar apasa, “Ataela, ataela, aturätiu tori longolongun fan.”
PSA 137:8 En Papilon kopwe tala. Epwe pwapwa ätewe mi ngonuk chappen om föför ngenikem.
PSA 137:9 Epwe pwapwa ätewe mi angei noum kewe semirit o monerela ngeni eu achau.
PSA 138:1 Echö än Tafit köl. Ai Samol mi Lapalap, üa kilisou ngonuk ren unusen lelukei. Üa kölün mwareituk me fän mesen ekewe kot.
PSA 138:2 Üa chapetiu ngeni imwom mi pin o kilisou ngeni itom, pokiten om tong ellet me om allükülük. Pun en ka atekiatä itom me om kapas asen ekewe mettoch meinisin.
PSA 138:3 Lupwen üa kökkö, ka pälüeniei, ka apworaei o apöchöküla lelukei.
PSA 138:4 Ai Samol mi Lapalap, ekewe king won fanüfan meinisin repwe mwareituk, pun ra rongorong om kapas.
PSA 138:5 Iwe, repwe kölü om kewe föför, pun a tekia lingom.
PSA 138:6 Inamwo ika ka fokun tekia, ka afäli ekewe chon tekison. Nge ka silleni ekewe chon lamalamtekia me toau.
PSA 138:7 Nge are üa nom lon riaföü, en ka tümwünü manauei. Ka ü ngeni ekewe chon oputaei mi song ngeniei o amanauaei ren om manaman.
PSA 138:8 Ai Samol mi Lapalap, kopwe apwönüetä ekiekin letipom ngeniei. Ai Samol mi Lapalap, om tong ellet a nonom tori feilfeilachök. Kosap likitala ewe angang ka popuetä.
PSA 139:1 Ngeni ewe mi emweni chon köl: Echö än Tafit köl. Ai Samol mi Lapalap, en ka atittinaei, ka pwal sileei.
PSA 139:2 Ka silei fansoun ai mottiu me ai ütä, ka silei ai ekiek kana me toau.
PSA 139:3 Ka nenengeniei, lupwen üa angang, pwal lupwen üa asösö, ka silei ai kewe föför meinisin.
PSA 139:4 Nengeni, mwen ai üsamwo kapas, en, ai Samol mi Lapalap, ka fen unusen silei mine üpwe apasa.
PSA 139:5 Ka pweliei me lükisöküri pwal fän mesei, ka pwal iseis poum woi.
PSA 139:6 Ei sokun silelap a fokun amwarar ngeniei, a pwal tekia ngeniei pwe üsap tongeni to won.
PSA 139:7 Ia üpwe feila ie seni Ngünum? Nge ia üpwe süla ie seni fän mesom?
PSA 139:8 Are üpwe feitä läng, en ka nom ikenan. Nge are üpwe kon lon lenien sotup, en ka pwal nom ikenan.
PSA 139:9 Are üpwe ässila ngeni ötiu ewe ia akkar a tötä me ie, ika nonom lesopolan matau me lotou,
PSA 139:10 en kopwe emweniei me ikenan, nge pöüifichum epwe amwöchüei.
PSA 139:11 Are üpwe apasa pwe rochopwak epwe pwölüeila, nge ewe saram ünüki epwe wiliti pwin,
PSA 139:12 inamwo nge ewe rochopwak esap roch me reöm, nge pwin a saram usun lerän, pun rochopwak a usun chök saram me reöm.
PSA 139:13 En ewe mi förätä masouen loi, en ka achufengeniei me lon letipen inei.
PSA 139:14 Üa mwareituk, pokiten a amairü o amwarar om föri ei. Om kewe föför ra amwarar. Üa fokun sileöchü ei.
PSA 139:15 Chün inisi resap mon senuk, lupwen üa för lemonomon o kachufengen lon ekewe leni mi alolol lon fanüfan.
PSA 139:16 En ka fen künaei, lupwen esamwo wor uluuli. Iteiten ränin manauei meinisin, ka awora fän itei, ra fen mak lon noum puk mwen ar resamwo fis.
PSA 139:17 Ai Samol mi Lapalap, om kewe ekiek ra fokun aüchea ngeniei. Ra kon fokun chomong.
PSA 139:18 Ika ngang üpwe aleaniir, repwe chomong seni föün pi. Lupwen üa pwök, üa chüen nom reöm.
PSA 139:19 Ai Kot, amwo kopwe niela ekewe aramasangau. Amwo ekewe mwän mi nimanauei aramas repwe sü seniei.
PSA 139:20 Ir ekewe mi kapasingau usum, ekewe chon oputom ra föünimwäli itom.
PSA 139:21 Ai Samol mi Lapalap, üa fokun oput chokewe mi oputok. Üa fokun nou chokewe mi ü ngonuk.
PSA 139:22 Üa fokun oput ir o aleanirelong lein chon oputaei.
PSA 139:23 Ai Kot, kopwe atittinaei o silei letipei. Kopwe sotuniei o silei ai ekiek.
PSA 139:24 Kopwe pi ika mi wor och mi ingau lon manauei, nge kopwe emweniei won ewe al esemüch.
PSA 140:1 Ngeni ewe mi emweni chon köl: Echö än Tafit köl. Ai Samol mi Lapalap, kopwe angasaei seni aramas mi ngau, kopwe tümwünüei seni aramas mi mwäneson,
PSA 140:2 chokewe mi ekiekietä föför mi ngau lon leluker o popuetä maun iteiten fansoun.
PSA 140:3 Ra akkeni chönawer pwe a ken usun chönawen eman serepenit, nge ar kapas a usun chök poisonun serepenit.
PSA 140:4 Ai Samol mi Lapalap, kopwe epeti seniei ekewe aramasangau. Kopwe tümwünüei seni aramas mi mwäneson, chokewe mi rawangauaei pwe üpwe chepetek.
PSA 140:5 Aramas mi lamalamtekia ra aopala eu sär fän itei, ra ameresala ar kewe chew o soni ar kewe likatup aropen ewe al pwe repwe liapeniei.
PSA 140:6 Üa kapas ngeni ewe Samol mi Lapalap, “En ai Kot.” Ai Samol mi Lapalap, kopwe aüselinga ai kewe tüngor pwe kopwe ümöümöch ngeniei.
PSA 140:7 Ai Samol mi Lapalap ai Kot, en chon angasaeila mi pöchökül, ka epeti seniei feiengau lon maun.
PSA 140:8 Ai Samol mi Lapalap, kosap mwütätä mochenin ekewe aramasangau, kopwe atai ar kewe rawangau.
PSA 140:9 Chokewe mi pwelifeiliei ra chimwetä mökürer. Amwo ar kapasen eniweniw ngeniei epwe püsin küür.
PSA 140:10 Amwo molien ekkei mi sarara epwe turutiu wor. Repwe katurulong lon ekewe pwang, nge resap chüen tosefäliwu.
PSA 140:11 Amwo ekewe chon etipisimwäli chon arur resap nonomotiu lon ewe fanü. Amwo feiengau epwe chekaiiti ewe aramas mi mwäneson.
PSA 140:12 Üa silei pwe en ai Samol mi Lapalap ka peni ekewe mi wöüngau o eäni pwüng ngeni ekewe chon mwelele.
PSA 140:13 Ellet, ekewe chon pwüng repwe mwareiti itom, ekewe mi wenechar repwe nonom fän mesom.
PSA 141:1 Echö än Tafit köl. Ai Samol mi Lapalap, üa kökköruk, kopwe kaito rei. Kopwe aü selingom ngeni mweliei, lupwen üa kökköruk.
PSA 141:2 Ai iotek epwe wewe ngeni eu asoren apach mi pwokus me mwom, ai aitietä pei epwe wewe ngeni eu asoren lekuniol.
PSA 141:3 Ai Samol mi Lapalap, kopwe awora eman chon masen awei, kopwe tümwünü asamen tinawei.
PSA 141:4 Kopwe tümwünüei pwe üsap föri mine a ngau, pwe üsap eti ekewe aramasangau lon ar föföringau, üsap pwal etiir le mongö ener mi annö.
PSA 141:5 Eman aramasöch epwe wichiei are apwüngüei fän kirikiröch, nge üsap mwüt ngeni ekewe aramasangau pwe repwe asamoluei. Pun lon ai iotek üa pälüeni ar kewe föför mi ngau fansoun meinisin.
PSA 141:6 Lupwen ekewe samol repwe koturutiu seni ekewe achau, ekewe aramas repwe mefi pwe ai kewe kapas ra let.
PSA 141:7 Usun eman a tuw pwül o atatakisi, iei usun chür repwe toropas mesen ewe lenien sotup.
PSA 141:8 Nge ngang üa chök anomu ai apilükülük womw, en ai Samol mi Lapalap ai Kot. En ai lenien op. Kosap asechieilong lon mäla.
PSA 141:9 Kopwe tümwünüei seni ewe sär ra anomu fän itei, pwal seni än ekewe chon föföringau likatuputup.
PSA 141:10 Ekewe aramasangau meinisin repwe turulong lon püsin ar kewe sär, nge ngang üpwe feila seniir, pun üsap tup lon.
PSA 142:1 Echö än Tafit kölün kait, lupwen a nom lon ewe föimw. Eu iotek. Üa siö ngeni ewe Samol mi Lapalap fän leüömong, üa alapätä mweliei o tüngor ngeni pwe epwe ümöümöch ngeniei.
PSA 142:2 Üa uwato ren ai letipengau meinisin o asile ngeni ai kewe riaföü.
PSA 142:3 Lupwen üa apilükingau, i a fen silei mine üpwe föri. Ekewe chon oputaei ra aopala eu sär fän itei lon ewe al ia üa fetal ie.
PSA 142:4 Lupwen üa nennela lepelifichi, üa küna pwe esap wor eman a alisiei, esap wor ai lenien op, esap wor eman a tümwünüei.
PSA 142:5 Ai Samol mi Lapalap, üa siö ngonuk. Üa üra: En ai lenien op me ineti me lon fanüen chon manau.
PSA 142:6 Kopwe afäli ai siö, pun üa fokun apilükingau. Kopwe angasaei seni ekewe chon ariaföüüei, pun ra kon pöchökül ngeniei.
PSA 142:7 Kopwe angasaeila seni lon ewe lenien fötek, pwe üpwe tongeni mwareiti itom. Mürin, ekewe chon pwüng repwe mwicheto rei, pokiten ka afeiöchüei.
PSA 143:1 Echö än Tafit köl. Kopwe aüselinga ai iotek, ai Samol mi Lapalap, kopwe aü selingom ngeni ai kewe tüngor o pälüeniei lon om allükülük me pwüng.
PSA 143:2 Kosap atolongaei lon om kapwüng, ngang noum chon angang, pun esap wor eman aramas mi manau a pwüng fän mesom.
PSA 143:3 Iwe, ewe chon oputaei a tapweriei o purieitiu lepwül. A anomuei lon rochopwak usun chokewe mi mäla me lom.
PSA 143:4 Iei mine üa apilükingau, nge lelukei a fokun niuokus.
PSA 143:5 Üa chechemeni ewe fansoun lom o ekieki usun mine ka fen föri. Üa ekieki usun om kewe föför.
PSA 143:6 Üa aitietä pei lon ai iotek ngonuk, ngüni a kakaituk usun eu fanü mi pwasapwas a kakaiti üt.
PSA 143:7 Ai Samol mi Lapalap, kopwe müttir le pälüeniei, pun üa fokun apilükingau. Kosap aopa mesom seniei, pwe üsap wewe ngeni chokewe mi tolong lon ewe lenien sotup.
PSA 143:8 Iteiten lesosor kopwe pwäri ngeniei om tong ellet, pun üa anomu ai apilükülük womw. Kopwe aiti ngeniei ewe al üpwe fetal won, pun üa suki ngonuk lelukei.
PSA 143:9 Ai Samol mi Lapalap, kopwe angasaei seni ekewe chon oputaei. Üa sü ngonuk pwe üpwe op reöm.
PSA 143:10 Kopwe aiti ngeniei usun ai üpwe föri letipom, pun en ai Kot. Ngünum mi mürina epwe emweniei won efoch al mi sosonöch.
PSA 143:11 Ai Samol mi Lapalap, kopwe tümwünü manauei pokiten itom. Lon om pwüng kopwe emwenieiwu seni ai riaföü.
PSA 143:12 Kopwe ärala ekewe chon oputaei pokiten ka tongeei o arosala meinisin mi ariaföüüei, pun ngang noum chon angang.
PSA 144:1 Echö än Tafit köl. Üpwe mwareiti ewe Samol mi Lapalap ai achau mi asipa pei ngeni maun, pwal kumuchi ngeni fiu.
PSA 144:2 I ai Kot mi tongeei me imwei imwen maun, ai lenien op mi pöchökül me ai Chon Amanau, i a epeti seniei feiengau. Üa anomu ai apilükülük won ewe mi akufätiu chon ekewe mwü fai.
PSA 144:3 Ai Samol mi Lapalap, met aüchean aramas pwe ka chüngüw, nge met aüchean nöün aramas pwe ka ekieki usun?
PSA 144:4 Pun eman aramas a wewe ngeni enienin ngasangas, nge ränin manauan a usun chök och nür mi morokai.
PSA 144:5 Ai Samol mi Lapalap, kopwe asanga om we läng o feitiu. Kopwe atapa ekewe chuk pwe repwe ötüöt.
PSA 144:6 Kopwe efifi ekewe inefi o atoropasa chon oputom, kopwe esefichala om kewe föün esefich o tinifeiliir.
PSA 144:7 Kopwe aitietiu poum seni pekitä, kopwe amanauaei seni ekewe koluk mi alolol o angasaei seni fän nemenien ekewe chon ekis,
PSA 144:8 seni chokewe mi chök kapas chofana, ra mwo nge aitietä pöüifichir lon ar akapelmwäl.
PSA 144:9 Ai Kot, üpwe eäni ngonuk echö köl mi fö, üpwe ettiki ngonuk kitar mi wor engol saitenin.
PSA 144:10 En ka awinna ekewe king, ka amanaua Tafit noum we chon angang.
PSA 144:11 Kopwe amanauaei seni ekewe chon oputaei mi mochen afeiengauaei, kopwe angasaei seni fän nemenien ekewe chon ekis, seni chokewe mi chök kapas chofana, ra mwo nge aitietä pöüifichir lon ar akapelmwäl.
PSA 144:12 Amwo nöüch kewe ät repwe wewe ngeni irä mi mär pöchökül lon ar alüal, nge nöüch kewe nengin repwe wewe ngeni üren lepwokuku mi rup pwe alingen lon imwen king.
PSA 144:13 Amwo ach kewe lenien iseis repwe ur ren sokopaten föün irä, nge nöüch kewe sip repwe oupwätiu ngeröü me engol ngeröü sip lon ach kewe mälämäl.
PSA 144:14 Amwo nöüch kewe pwiin kow repwe nöünöü chomong, nge esap mwet seniir nöür ika mä nöür. Amwo esap fis puchörün riaföü lon ach kewe al.
PSA 144:15 Feiöchün chon ekewe mwü a toriir ekei sokun feiöch. Feiöchün chon ekewe mwü mi eäni Kot ewe Samol mi Lapalap.
PSA 145:1 Echö än Tafit kölün mwareiti Kot. Üpwe ingemwareiti ai Kot me ai king, üpwe mwareiti itom tori feilfeilachök.
PSA 145:2 Iteiten rän üpwe mwareituk o alinga itom tori feilfeilachök.
PSA 145:3 Ewe Samol mi Lapalap a tekia, aramas meinisin repwe fokun mwareiti i. Esap wor eman a tongeni aükü an tekia.
PSA 145:4 Eu täppin aramas epwe ainga om kewe angang ngeni pwal eu, repwe arongafeili om kewe föför mi manaman.
PSA 145:5 Repwe kapas usun lingen om tekia, nge ngang üpwe ekinlonei usun amwararen om kewe föför.
PSA 145:6 Aramas repwe asilefeili manamanen om kewe föför mi eniwokus, nge ngang üpwe arongafeili om tekia.
PSA 145:7 Repwe apworausa usun om kirikiröch mi lapalap o osomong le kölü om pwüng.
PSA 145:8 Ewe Samol mi Lapalap a kirikiröch o lukpwetete, a songomang o wöün tong ellet.
PSA 145:9 Ewe Samol mi Lapalap a kirikiröch ngeni aramas meinisin, an tong a nom won förian meinisin.
PSA 145:10 Ai Samol mi Lapalap, meinisin mine ka föri repwe kilisou ngonuk, noum chon pin meinisin repwe mwareituk.
PSA 145:11 Repwe kapas usun lingen mwum o apworausa usun om manaman,
PSA 145:12 pwe aramas meinisin repwe silei om föför mi manaman me amwararen lingen mwum.
PSA 145:13 Mwum eu mwü mi nom tori feilfeilachök, nge om nemenem a nonom won ekewe täppin aramas meinisin. Ewe Samol mi Lapalap a allükülük lon an pwon meinisin, a eäni ümöümöch ngeni förian meinisin.
PSA 145:14 Ewe Samol mi Lapalap a aütäi ir meinisin mi turula, a awenätä sokürün ir mi pworotiu.
PSA 145:15 Mönümanau meinisin ra nennetä ngonuk fän ar apilükülük, pun en ka ngeniir ener mongö, lupwen a tori otun.
PSA 145:16 Ka suki poum o ngeni ekewe mönümanau meinisin mine repwe menemenöch ren.
PSA 145:17 Ewe Samol mi Lapalap a pwüng lon meinisin mine a föri o kirikiröch lon an kewe föför meinisin.
PSA 145:18 Ewe Samol mi Lapalap a arap ngeni ir meinisin mi köri, a arap ngeniir meinisin mi köri fän wenechar.
PSA 145:19 A föri mochenin ir meinisin mi niuokusiti i, a rong ar siö o amanaueer.
PSA 145:20 Ewe Samol mi Lapalap a tümwünü meinisin mi echeni i, nge a arosala ekewe aramasangau meinisin.
PSA 145:21 Üpwe mwareiti ewe Samol mi Lapalap, mönümanau meinisin repwe mwareiti itan mi pin tori feilfeilachök.
PSA 146:1 Ousipwe mwareiti ewe Samol mi Lapalap. Ngüni, kopwe mwareiti ewe Samol mi Lapalap.
PSA 146:2 Üpwe mwareiti ewe Samol mi Lapalap lon unusen manauei. Üpwe kölün mwareiti ai Kot lupwen fansoun ai manau.
PSA 146:3 Ousap anomu ämi apilükülük won ekewe samol ika won eman aramas, pun resap tongeni amanaua eman.
PSA 146:4 Lupwen ra mäla, ra liwiniti pwül. Lon ewe chök rän ar kewe akot meinisin ra tala.
PSA 146:5 A feiöch ewe aramas a eäni än Jakop we Kot soualilis, a anomu an apilükülük won ewe Samol mi Lapalap an we Kot,
PSA 146:6 ewe mi föri läng me fanüfan, pwal ewe matau me meinisin mine a nom lor. Ewe Samol mi Lapalap a allükülük tori feilfeilachök,
PSA 146:7 a eäni pwüng ngeni ekewe mi riaföü ren aramas o amongöni ekewe mi echik. Ewe Samol mi Lapalap a angasala ekewe chon fötek,
PSA 146:8 a aneloi mesen ekewe mi chun. Ewe Samol mi Lapalap a awenätä sökürün chokewe mi pworotiu o echeni ekewe chon pwüng.
PSA 146:9 Ewe Samol mi Lapalap a tümwünü ekewe chon ekis, a alisi ekewe fefin mi mä pwülüer me ekewe mi mäsen, nge a atai mine ekewe aramasangau ra akota.
PSA 146:10 Ewe Samol mi Lapalap epwe nemenem tori feilfeilachök. Chon Sion, ämi we Kot epwe nemenem won ekewe täppin aramas meinisin. Ousipwe mwareiti ewe Samol mi Lapalap.
PSA 147:1 Ousipwe mwareiti ewe Samol mi Lapalap. A fokun mürina ach sipwe kölün mwareiti ach we Kot. A fich ngeni ach sipwe kölün mwareiti i.
PSA 147:2 Ewe Samol mi Lapalap a aüsefälietä Jerusalem, a aliwinisefäli ekewe chon Israel mi oola.
PSA 147:3 A apöchöküla ir mi tatakis leluker o filiti kinaser.
PSA 147:4 A apwüngala iteiten ekewe fü o aita eföü me eföü ngeni itan.
PSA 147:5 Ach Samol a tekia o fokun manaman, an mirit esap wor aükükün.
PSA 147:6 Ewe Samol mi Lapalap a atekiatä chokewe mi tekison, nge a aturätiu ekewe aramasangau lepwül.
PSA 147:7 Oupwe köl ngeni ewe Samol mi Lapalap fän kilisou. Oupwe köl ngeni ach we Kot fiti ükülele.
PSA 147:8 I a pwölüela ekewe läng ren kuchu o apüngätiu üt won fanüfan, a ämärätä fetil won ekewe chukuchukutä.
PSA 147:9 A ngeni ekewe man ener mongö o amongöü ekewe apansüsün ängä mi tik.
PSA 147:10 Ewe Samol mi Lapalap esap sani pöchökülen oris, esap pwal pwapwa ren pöchökülen aramas,
PSA 147:11 nge a pwapwa ren chokewe mi niuokusiti i, ren chokewe mi eäni apilükülük an tong ellet.
PSA 147:12 Ämi chon Jerusalem, oupwe mwareiti ewe Samol mi Lapalap, en Sion, kopwe mwareiti om Kot.
PSA 147:13 Pun i a apöchöküla lokkun asamalapom kewe o afeiöchü noum kewe aramas mi nom reöm.
PSA 147:14 A awora kinamwe lon fanüom o amongöü ngeni noum aramas chomong wiich mi mürina.
PSA 147:15 A tinato an allük won fanüfan, an kapas a müttir säfetal.
PSA 147:16 A tinato sno mi pwech usun chök ülen sip o amorafeili sno usun falang.
PSA 147:17 A amorätiu föün ais usun chari. Iö a tongeni pwäk ngeni patapatan?
PSA 147:18 Kot a kapas, ewe ais a telila. A föri pwe an asepwäl a enien, iwe, ekewe koluk ra pupula.
PSA 147:19 A aronga ngeni nöün aramas an kapas, a ngeni chon Israel an kewe allük me pwüüng.
PSA 147:20 Ei sokun lapalap esap föri ngeni pwal eu mwü. Ir resap silei an kewe allük. Ousipwe mwareiti ewe Samol mi Lapalap.
PSA 148:1 Ousipwe mwareiti ewe Samol mi Lapalap. Oupwe mwareiti ewe Samol mi Lapalap seni won läng, oupwe mwareiti i me won ekewe leni tekia.
PSA 148:2 Oupwe mwareiti i, ämi nöün chon läng meinisin. Oupwe mwareiti i, ämi nöün mwichen sounfiun läng meinisin.
PSA 148:3 Oupwe mwareiti i, ämi akkar me maram, oupwe mwareiti i, ämi fü meinisin mi tin.
PSA 148:4 Oupwe mwareiti i, ämi kewe läng mi fokun tekia, pwal ämi kewe koluk asen ekewe läng.
PSA 148:5 Ir meinisin repwe mwareiti iten ewe Samol mi Lapalap. Pun i a allük, nge ir ra fisitä.
PSA 148:6 Kot a anüküchareer lon lenier pwe repwe nom tori feilfeilachök ren eu allük esap tongeni tala.
PSA 148:7 Oupwe mwareiti ewe Samol mi Lapalap seni won fanüfan, ämi kewe mönün lematau mi fokun watte me ämi kewe leni mi alolol,
PSA 148:8 ämi inefi me ütten fau, sno me kuchu, pwal mölümöl mi apwönüetä an allük.
PSA 148:9 Oupwe mwareiti i, ämi kewe chukutekia me chukutekison meinisin, ämi kewe irä mi ua me ämi irä setar meinisin,
PSA 148:10 ämi manmwacho me manfesir, ämi mantötö me mansüsü meinisin.
PSA 148:11 Oupwe mwareiti i, ämi kewe kingen fanüfan me chon ekewe mwü meinisin, ämi samol me chon nemenem meinisin won fanüfan,
PSA 148:12 ämi alüal me föpwül, pwal chinlap me semirit.
PSA 148:13 Ir meinisin repwe mwareiti iten ewe Samol mi Lapalap, pun itan a tekia seni it meinisin, an ling a nom asen fanüfan me läng.
PSA 148:14 A apöchöküla mwün nöün aramas. Iei mine nöün kewe chon pin meinisin ra mwareiti, ir ekewe aramasen Israel a echeniir. Ousipwe mwareiti ewe Samol mi Lapalap.
PSA 149:1 Ousipwe mwareiti ewe Samol mi Lapalap. Oupwe eäni ngeni ewe Samol mi Lapalap echö köl mi fö, oupwe kölün mwareiti i me lon ewe mwichen chon allükülük.
PSA 149:2 Chon Israel repwe pwapwa ren ewe chon föriir. Ekewe aramasen Sion repwe mwänek ren ar king.
PSA 149:3 Repwe mwareiti itan fän pworuk o köl ngeni fän pisekin kaktai me ükülele.
PSA 149:4 Pun ewe Samol mi Lapalap a pwapwaäsini nöün aramas, a alinga ekewe chon tipetekison ren win.
PSA 149:5 Ekewe chon pin repwe meseik lon ling, repwe köl fän pwapwa lon kier kewe.
PSA 149:6 Kapasen mwareiti Kot fän leüömong epwe nom lon awer, nge ekewe ketilas mi seisei me rüepek repwe nom lon pöür,
PSA 149:7 pwe repwe ngeni chon ekewe mwü chappen ar föför o apwüngü ekewe aramas.
PSA 149:8 Repwe föti ar kewe king ren sein, nge ar kewe aramas tekia ren selimächä,
PSA 149:9 pun repwe eäni apwüng wor usun Kot a fen allük. Ren ei nöün kewe mi pin meinisin ra ling ren. Ousipwe mwareiti ewe Samol mi Lapalap.
PSA 150:1 Ousipwe mwareiti ewe Samol mi Lapalap. Oupwe mwareiti Kot me lon lenian mi pin, oupwe mwareiti an manaman lon läng.
PSA 150:2 Oupwe mwareiti i ren an kewe föför mi manaman, oupwe mwareiti an tekia esap wor aükükün.
PSA 150:3 Oupwe mwareiti i ren tikin rappwa, oupwe mwareiti i ren ükülele me kitar.
PSA 150:4 Oupwe mwareiti i ren pisekin kaktai me pworuk, oupwe mwareiti i ren pisekin ettik mi wor saitenin, pwal ren aangün.
PSA 150:5 Oupwe mwareiti i ren sokopaten pisekin kaktai mi tikiken, oupwe mwareiti i ren sokopaten pisekin kaktai mi osomong.
PSA 150:6 Mönümanau meinisin repwe mwareiti ewe Samol mi Lapalap. Ousipwe mwareiti ewe Samol mi Lapalap.
PRO 1:1 Ikkei ekewe fos Salomon nöün Tafit we mwän ewe kingen Israel a eäni mwiitun:
PRO 1:2 Ren ekei mwiitun aramas repwe tipachem o silei öüröürer, repwe weweiti ekewe kapas mi alolol,
PRO 1:3 repwe angei öüröürer seniir pwe repwe mirititi mine repwe föri, repwe eäni pwüng, let o wenechar.
PRO 1:4 Iwe, mirit epwe tori chokewe mi wewemang, nge silelap me mirit epwe tori ekewe säräfö.
PRO 1:5 Ekewe chon tipachem repwe rongorong ngeniir pwe repwe fefeitä lon ar sile, nge ekewe chon silelap repwe weweöch,
PRO 1:6 pwe repwe weweiti ekewe mwiitun me ekewe pworausen awewe, repwe pwal weweiti än ekewe chon tipachem kapas me ar kewe fos monomon.
PRO 1:7 Ach niuokusiti ewe Samol mi Lapalap iei popun silelap. Nge ekewe chon tiparoch ra oput tipachem me ekewe kapasen öüröür.
PRO 1:8 Nei kopwe aüselinga än semom kewe kapasen öüröür, nge kosap aleasolap ngeni mine inom a aiti ngonuk.
PRO 1:9 Ekewe kapas repwe aöchü manauom usun chök epa mwärämwär won mökürom, ika epa mwärämwär fän üom epwe alingöchü inisum.
PRO 1:10 Nei, are ekewe chon tipis ra atupuk, kosap tipeeu ngeniir.
PRO 1:11 Are repwe apasa, “Kopwe etikem, ousipwe op lon eu lenien op pwe sipwe niela aramas. Ousipwe rawangauei chokewe esap wor ar mwäl.
PRO 1:12 Ousipwe oromanauerela usun ewe lenien sotup a oromala aramas pwe repwe usun chokewe mi feitiu lon peias.
PRO 1:13 Sipwe küna chomong sokopaten pisek mi aüchea, sipwe amasoua imwach ren liapach.
PRO 1:14 Kopwe etikem, nge sipwe inetöchfengen won mine sa soläni.”
PRO 1:15 Nei, kosap chiechi ngeni ei sokun aramas, kosap etiir lon ar föför.
PRO 1:16 Pun ra pwapwaiti le föri föför mi ngau, ra müttir ngeni nimanauei aramas.
PRO 1:17 A solap om kopwe oletala eu cheew pwe kopwe liapeni eman machang, ngei mi küna.
PRO 1:18 Nge ekei mwän ra chök op lon lenien op pwe repwe püsin atoto feiengau wor, ra rawangauei püsin manauer.
PRO 1:19 Ei epwe fis ngeni chokewe meinisin ra angei ar win ren angangen mwänewüs. Ei sokun win a angeala manauen ätewe mi föri ei sokun föför.
PRO 1:20 Tipachem a osomong le kökkö lon ewe al, a alapatä mwelian lon ekewe lenien amwicheich,
PRO 1:21 a köwu seni lepwokukun ekewe al, a kapas seni lon ekewe asamalapen ewe telinimw,
PRO 1:22 “Ämi chon wewemang, ifa ükükün fansoun ämi oupwe efich le nonom lon ämi wewemang? Ämi chon turunufas, ifa ükükün fansoun ämi oupwe pwapwaiti ämi turunufas? Ämi chon tiparoch, ifa ükükün fansoun ämi oupwe oput silelap?
PRO 1:23 Are oupwe aüselinga ai kewe kapasen fön, ngang üpwe pwärätä ngenikemi ai ekiek, üpwe asile ngenikemi ai kewe kapas.
PRO 1:24 Üa fen körikemi, nge ousap mochen aüseling, üa äkänipökemi, nge ousap afäli.
PRO 1:25 Oua asarongorong ngeni ai kewe kapasen öüröür meinisin, nge ousap ekieki ai kewe kapasen fön.
PRO 1:26 Iei mine üpwe takirikemi, lupwen oupwe tolong lon feiengau. Üpwe takirin ämängauakemi, lupwen niuokus watte epwe torikemi,
PRO 1:27 lupwen niuokus watte epwe torikemi usun eu mölümöl, nge ämi feiengau epwe torikemi usun eu ewiniär, lupwen oupwe tolong lon weires me riaföü.
PRO 1:28 Mürin, oupwe kökköriei, nge ngang üsap pälüenikemi, oupwe tiliken le küttaei, nge ousap künaei.
PRO 1:29 Pokiten oua oput silelap, nge ousap mochen aleasochisi ewe Samol mi Lapalap,
PRO 1:30 ousap pwal mochen angei ai kewe kapasen öüröür, nge oua oput ai kewe kapasen fön meinisin,
PRO 1:31 iei mine oupwe kini uän ämi föför, oupwe notä ren mine oua püsin ekiekietä.
PRO 1:32 Pun ekewe chon wewemang repwe mäla ren ar kul seniei, nge ekewe chon tiparoch repwe feiengau ren püsin ar tümwününgau.
PRO 1:33 Nge eman mi aüselingaei epwe manau fän kinamwe, esap öürek, esap pwal niueiti och feiengau.”
PRO 2:1 Nei, kopwe etiwa ai kewe kapas o iseis ekewe allük lon lelukom.
PRO 2:2 Kopwe aü selingom ngeni tipachem o suki lelukom pwe kopwe wewe ren.
PRO 2:3 Ewer, kopwe siö ngeni Kot pwe epwe fang ngonuk om silelap, kopwe alapatä mweliom o tüngor ngeni pwe kopwe weweöch ren.
PRO 2:4 Kopwe kütta tipachem usun om kütta silifer, ika usun om kütta pisek aüchea mi monomon.
PRO 2:5 Are kopwe föri iei usun, mürin kopwe weweiti aüchean om niuokusiti ewe Samol mi Lapalap o fefeitä lon om silei Kot.
PRO 2:6 Pun ewe Samol mi Lapalap a fangala tipachem, i a atowu silelap me weweöch.
PRO 2:7 A atufichi ekewe chon pwüng o tümwünü chokewe mi wenechar seni feiengau usun eu tit.
PRO 2:8 A mamasa ekewe chon pwüng o tümwünü nöün kewe mi allükülük.
PRO 2:9 Are kopwe aüselingaei, mürin kopwe weweiti mine a pwüng, let me wenechar, kopwe pwal silei mine kopwe föri.
PRO 2:10 Pun tipachem epwe tolong lon lelukom, nge silelap epwe apwapwai ngünum.
PRO 2:11 Iwe, mirit epwe mamasok, nge weweöch epwe tümwünuk,
PRO 2:12 repwe epetuk seni om kopwe föri mine a ngau, pwal seni ekewe aramas mi eäni kapasen likatuputup,
PRO 2:13 ir chokewe mi likitala ekewe al mi wenechar o fetal won ekewe alen rochopwak me tipis,
PRO 2:14 ra pwapwa le föri föför mi ngau o meseikeiti angangen likatuputup,
PRO 2:15 ir aramas resap allükülük, esap wor eman a tongeni lüküür.
PRO 2:16 Tipachem epwe atufichuk pwe kosap tup ren ewe fin lisowu, ren ewe fin ekis mi eäni kapas amichimich,
PRO 2:17 neminewe mi likitala pwülüan a pwülüeni lupwen an föpwül o manlükala ewe pwon a eäni ngeni Kot.
PRO 2:18 Are kopwe feila lon imwan, kopwe fetal ngeni ewe al mi ale ngeni mäla.
PRO 2:19 Esap wor eman mi feila ren neminewe epwe liwinsefäl, esap wor eman epwe liwiniti ewe alen manau.
PRO 2:20 Iei mine kopwe apirü ekewe aramasöch o föri föför mi pwüng.
PRO 2:21 Pun ekewe chon pwüng repwe fanüeni ewe fanü, pwal ekewe aramas mi wenechar repwe nonom lon.
PRO 2:22 Nge ekewe aramasangau repwe kärila seni ewe fanü, pwal chokewe resap allükülük repwe üttütä seni me lon, usun irä ra üttütä seni pwül.
PRO 3:1 Nei, kosap manlükala mine üa aiti ngonuk, nge kopwe iseis lon lelukom ai kewe allük.
PRO 3:2 Pun ren om föri ei, ierin manauom repwe langatamala, kopwe pwal uren feiöch.
PRO 3:3 Iwe, kosap mwüt ngeni kirikiröch me allükülük repwe sü senuk, kopwe riretä fän üom o makeretiu lon lelukom.
PRO 3:4 Are kopwe föri ei, kopwe küna ümöümöch me iteüöch me ren Kot me aramas.
PRO 3:5 Kopwe lükü ewe Samol mi Lapalap ren unusen lelukom, nge kosap lükülükü püsin om sile.
PRO 3:6 Kopwe chechemeni i won meinisin mine ka föri, nge i epwe aiti ngonuk ewe al mi pwüng.
PRO 3:7 Kosap püsin ekieki pwe ka tipachem. Kopwe niuokusiti ewe Samol mi Lapalap o kul seni mine a ngau.
PRO 3:8 Ren ei inisum epwe pöchökülela, nge lechuum esap apwangapwang.
PRO 3:9 Kopwe asamolu ewe Samol mi Lapalap ren om fang ngeni seni woum, pwal ren mwen kiniom uän irä meinisin.
PRO 3:10 Mürin om kewe lenien iseis repwe urela ren wiich, nge ekewe lenien iseis wain repwe urela ren wain o säsewu.
PRO 3:11 Nei, kosap oput än ewe Samol mi Lapalap emirit, kosap pwal chipwang ngeni an kapasen fön,
PRO 3:12 pun ewe Samol mi Lapalap a emiriti ätewe a echeni, usun eman sam a emiriti nöün we a pwapwaiti.
PRO 3:13 A feiöch ewe aramas mi küna tipachem, a feiöch ewe aramas mi wewekai,
PRO 3:14 pun ewe feiöch a angei seni tipachem a mürina seni ewe feiöch a angei seni silifer, nge ewe win tipachem a atoto a aüchea seni kolt.
PRO 3:15 Tipachem a aüchea seni fau aüchea, nge esap wor och ka fokun efich epwe tongeni nönnö ngeni.
PRO 3:16 Tipachem a tongeni fang ngonuk manauatam, pisekisek me iteüöch.
PRO 3:17 Tipachem a tongeni awora pwapwa lon manauom o emweni ngonuk kinamwe.
PRO 3:18 Tipachem epwe aworato manau ngeni chokewe mi kamwöch won, nge chokewe mi fitipacheiti ra pwapwa.
PRO 3:19 Ewe Samol mi Lapalap a föri fanüfan ren an tipachem, a anomu ekewe läng lon lenier ren an silelap.
PRO 3:20 Lon an tipachem a föri pwe ekewe lenien puächen koluk ra puächetä, nge ekewe kuchu ra apüngätiu üt.
PRO 3:21 Nei, kopwe kamwöch won tipachem me mirit, nge kosap mwüt ngeniir repwe sü senuk.
PRO 3:22 Repwe awora manau ngonuk, repwe usun chök epa mwärämwär me fän üom.
PRO 3:23 Mürin, kopwe fetal won om al fän kinamwe, nge pecheöm esap chepetek.
PRO 3:24 Ika kopwe konola, kosap niuokus, ika kopwe möür, kopwe möür fän kinamwe.
PRO 3:25 Kosap niueiti och riaföü mi amairü epwe müttirituk, ika och feiengau epwe tori ekewe aramasangau.
PRO 3:26 Pun ewe Samol mi Lapalap epwe om apilükülük, epwe tümwünü pecheöm pwe esap tup lon eu sär.
PRO 3:27 Kopwe eäni kirikiröch ngeni aramas mi osupwang, lupwen ka tufich ngeni.
PRO 3:28 Kosap üreni chon arum, “Kopwe feila o liwinsefälito lesor, mürin üpwe ngonuk mine ka tüngor,” nge a fen nom reöm ewe mettoch.
PRO 3:29 Kosap ekiekietä föför mi ngau ngeni chon arum mi nom ünükum, nge i a fokun lükülükuk.
PRO 3:30 Kosap anini ngeni eman aramas nge esap wor popun, are esap föri och mi ngau ngonuk.
PRO 3:31 Kosap lolowoiti eman aramas mi mwänewüs, kosap pwal föri usun mine i a föri.
PRO 3:32 Pun ewe Samol mi Lapalap a oput eman aramas mi chök föri mine a ngau, nge a lükülükü eman mi wenechar.
PRO 3:33 Ewe Samol mi Lapalap a anümamaua chon leimwen eman aramasangau, nge a afeiöchü chon leimwen eman chon pwüng.
PRO 3:34 A turunufasei ekewe chon turunufas, nge a ümöümöch ngeni ekewe chon tipetekison.
PRO 3:35 Eman chon tipachem epwe küna iteüöch, nge eman chon tiparoch epwe küna itengau.
PRO 4:1 Ämi nei kana, oupwe aüselinga än semelapemi kapasen öüröür, oupwe aü selingemi pwe oupwe weweöch.
PRO 4:2 Pun üa ngenikemi kapasen öüröür mi mürina: Iei mine ousap likitala mine üa aiti ngenikemi.
PRO 4:3 Lupwen üa chüen eman kükün ät, ngang nöün semei me inei aleman,
PRO 4:4 semei we a soun aiti ngeniei ekei kapas o üreniei, “Kopwe amwöchü ai kewe kapas lon lelukom, kopwe aleasochis ngeni ai kewe allük pwe kopwe manau.
PRO 4:5 Kopwe kütta tipachem me silelap. Kosap manlükala ai kewe kapas, kosap pwal tok seniir.
PRO 4:6 Kosap likitala tipachem, pun epwe tümwünuk. Kopwe echeni pwe epwe mamasok.
PRO 4:7 Kopwe tiliken le kütta tipachem, pun iei ewe aeuin ipw kopwe angei tipachem ren. Nge ren om tipachem kopwe alapala om mirit me weweöch.
PRO 4:8 Kopwe fokun aücheani tipachem, pwe i epwe atekiokotä, kopwe kamwöchünük won, pwe i epwe aitöchuk.
PRO 4:9 Tipachem epwe usun chök epa mwärämwär mi ling won mökürom, epwe föri pwe kopwe mwärini epa mwärin king mi fokun mürina.”
PRO 4:10 Nei, kopwe aüselingaei o etiwa ai kewe kapas, pwe ierin manauom repwe chomongola.
PRO 4:11 Üa aiti ngonuk ewe alen tipachem, üa emwenuk won ewe lenien fetal mi wenechar.
PRO 4:12 Lupwen kopwe fetal, esap wor epetin ipwom, nge are kopwe sä, kosap chepetek.
PRO 4:13 Kopwe kamwöchünük won ekewe kapasen öüröür, nge kosap mwüt ngeniir repwe feil senuk. Kopwe tümwünüür, pun ina manauom.
PRO 4:14 Kosap feila lon ewe leni ia ekewe aramasangau ra feila ie, kosap pwal apirü än ekewe chon föföringau föför.
PRO 4:15 Kosap föri mine a ngau, nge kopwe sü seni. Kopwe chök fetal won ewe al mi pwüng.
PRO 4:16 Pun ekewe aramasangau resap tongeni annut ika resap föri mine a ngau, ra chök nennela ika resap likatupu eman.
PRO 4:17 Pun föföringau a usun chök ener mongö, nge angangen mwänewüs a usun chök ünümer wain.
PRO 4:18 Ewe al ekewe chon pwüng ra fetal won a usun chök saramen ünümweerän mi chök sasaramala tori a unusen ränila.
PRO 4:19 Nge ewe al ekewe aramasangau ra fetal won a usun chök rochopwak mi rochokich, ra turula, nge resap silei met ra chepetek ren.
PRO 4:20 Nei, kopwe fokun aüselinga ai kewe kapas. Kopwe aü selingom ngeni mine üa ürenuk.
PRO 4:21 Kosap mwüt ngeni ekewe kapas repwe sü senuk, nge kopwe amwöchüür lon lelukom.
PRO 4:22 Pun ina mine chokewe mi angei ekewe kapas repwe manau rer, inisir epwe pöchökül rer.
PRO 4:23 Kopwe fokun tümwünü lelukom lap seni om tümwünü och pisek aüchea, pun manau a pop seni lon lelukom.
PRO 4:24 Kosap fokun eäni kapas rikirik, kosap pwal eäni kapas chofana me fos mi pwor.
PRO 4:25 Mesom epwe newenewenela, kopwe chök nefotofotola mwom.
PRO 4:26 Kopwe akotöchü mine kopwe föri, mürin epwe fisiöch meinisin mine kopwe föri.
PRO 4:27 Kopwe fetal wenewen won ewe al mi pwüng, nge kosap rik ngeni pelifich ika pelimöng, kosap pwal föri mine a ngau.
PRO 5:1 Nei, kopwe fokun aüselinga ai tipachem, kopwe aü selingom ngeni ai kapasen öüröür,
PRO 5:2 pwe kopwe eäni mirit, nge om kapas repwe pwärätä pwe a wor om silelap.
PRO 5:3 Pun än eman fin lisowu fos a arar usun chönün chunen, kapasen awan a pwal motoutou usun noppuk,
PRO 5:4 nge sopolan a kipwin usun chök kipwinin ewe irä maras, a pwal wor ekinasean usun chök ekinasaen efoch ketilas mi seisei me ruepek.
PRO 5:5 Ewe al neminewe a fetal won a ale ngeni mäla, epwe emwenukela ngeni ewe lenien sotup.
PRO 5:6 Esap fetal won ewe al mi ale ngeni manau, pwe a rik seni, nge esap mefi.
PRO 5:7 Nge iei nei, kopwe aüselingaei, kosap fokun manlükala mine üa ürenuk.
PRO 5:8 Kopwe sü seni ena sokun fefin, kosap pwal kan ngeni asamen imwan.
PRO 5:9 Are kosap aüselingaei, om iteüöch epwe pöüt senuk, nge epwe tori pwal ekoch aramas, pwal manauom epwe tolong lepöün chokewe resap eäni tong,
PRO 5:10 ekewe chon ekis repwe angei woum, nge uän om angang epwe pwal tori ekoch.
PRO 5:11 Iwe, lesopolan manauom kopwe ngüngü, lupwen fitukom me inisum ra telila.
PRO 5:12 Mürin kopwe apasa, “Pwota üa oput ekewe kapasen fön? Pwota üa tipeweires ngeni ekewe kapasen emirit?
PRO 5:13 Üsap aüselinga alon nei kewe sense, üsap pwal aü selingei ngeni chokewe mi öüröüraei.
PRO 5:14 Üa arapakan ngeni ai üpwe unusen feiengau me fän mesen ewe mwichen aramas.”
PRO 5:15 Kopwe allükülük won püsin pwülüom, kopwe chök echeni i.
PRO 5:16 Kosap angei om feiöch seni noum me won pwal ekoch fefin.
PRO 5:17 Püsin noum kewe repwe mämäritä o alisuk, nge sap chon ekis.
PRO 5:18 Kopwe pwapwaiti pwülüom o meseikeiti ewe föpwül ka pwülüeni lupwen om alüal,
PRO 5:19 neminewe mi liöch usun chök liöchün urupap, a mürina usun ewe machang itan witiwit. Kopwe mwüt ngeni pwe an tong ngonuk epwe fokun apwapwok fansoun meinisin, kopwe chengel ren an tong iteiten fansoun.
PRO 5:20 Nei, pwota kopwe aumwesukela won pwülüen pwal eman mwän? Pwota kopwe romi eman fin ekis?
PRO 5:21 Ewe Samol mi Lapalap a küna om föför meinisin, a nenengeni ia ka feila ie.
PRO 5:22 Än ewe aramasangau föföringau ra püsin likatupu i, a oo lon püsin an tipis.
PRO 5:23 Epwe mäla pokiten esap mochen aleasochisi kapasen emirit, epwe pöütmälila pokiten watten an umwes.
PRO 6:1 Ifa usun, nei, ka pwon pwe kopwe mönätiu än chon arum liwinimang, ika ka ngeni eman chon ekis asisilen om pwon?
PRO 6:2 Ifa usun, ka tup ren mine ka eäni pwon, ika oo ren om kapas?
PRO 6:3 Mürin kopwe föri ei, pwe kopwe püsin amanauok, pun ka tolong fän nemenien chon arum: Kopwe müttir feila ren chon arum o tüngormau ngeni pwe epwe angasok.
PRO 6:4 Kosap amöürü mesom, kosap pwal ächikichik.
PRO 6:5 Kopwe amanauok usun eman chia a amanaua, lupwen a sü seni ewe chon likapich, ika usun eman machang a ässila seni lepöün ewe chon sär.
PRO 6:6 Kopwe feila ren ekewe molus, en chon chipwang. Kopwe ekieki usun ar angang pwe kopwe tipachemela.
PRO 6:7 Esap wor ar samol, esap pwal wor ar meilap ika ar sounemenem,
PRO 6:8 nge ra amolätä ener lon fansoun pwichikar o ionifengeni ener mongö lon fansoun räs.
PRO 6:9 Ifa langatamen fansoun om kopwe chök konola won kiom, en chon chipwang? Inet kopwe pwätä seni om möür?
PRO 6:10 Ka apasa, “Üpwe chök ekis möür, üpwe ekis kamwöchüfengeni pei o ekis asösö.”
PRO 6:11 Ren ei wöüngau me osupwang repwe toruk usun eman chon solä a feito fän an pisekin afeiengau.
PRO 6:12 Eman aramasangau mi lomotongau a fetalfeil o eäni kapas rikirik,
PRO 6:13 a ächiki mesan o farikeri chienan ren pechen me pöün,
PRO 6:14 nge lon lelukan mi rikirik a chök ekiekietä föför mi ngau, iteiten fansoun a efisätä tipefesen.
PRO 6:15 Iei mine riaföü epwe müttir tori, lon eu chök otun epwe feiengau, nge esap chüen tongeni pöchökülsefäl.
PRO 6:16 Mir wor fisu föför ewe Samol mi Lapalap a oput, esap fokun tipeeu ngeni:
PRO 6:17 Wolamalamtekia, kapas chofana, pau mi niela aramas esap wor ar tipis,
PRO 6:18 eu leluk mi ekiekietä föför mi ngau, peche mi müttir sä ngeni föför esepwüng,
PRO 6:19 eman chon pwärätä mi chök apasätä kapas chofana me eman mwän mi afisätä fitikoko lefilen pwipwi.
PRO 6:20 Nei, kopwe aleasochisi mine semom a eäni allük ngonuk, nge kosap manlükala mine inom a aiti ngonuk.
PRO 6:21 Kopwe amwöchünükü ar kewe kapas iteiten fansoun, kopwe iseniir lon lelukom.
PRO 6:22 Repwe emwenuk, lupwen kopwe fetal, repwe tümwünüuk, lupwen kopwe konola, nge lupwen kopwe pwätä, repwe fos ngonuk.
PRO 6:23 Pun mine ra öüra ngonuk a usun chök eu lamp, ar kewe kapasen kait a usun chök eu saram, nge ar kewe kapasen fön fän iten emirit, iei ewe alen manau.
PRO 6:24 Ekei kapas repwe tümwünuk seni ewe fefin mi ngau, pwal seni meseniawen eman fefin mi lüangau.
PRO 6:25 Kosap ekieki liöchün neminewe lon lelukom, kosap pwal tup ren nennen mesan.
PRO 6:26 Eman mwän a tongeni möni eman fefin mi amömö inisin ren ükükün liwinin efoch pilawa, nge mön eman fin lisowu mi fen wor pwülüan epwe püsin manauen ewe mwän.
PRO 6:27 Ifa usun, eman mwän a tongeni uwei ekkei fän mwärin, nge üfan esap kar ren?
PRO 6:28 Ika ifa usun, eman a tongeni fetal won moochen ekkei mi sarara, nge pechen esap poi?
PRO 6:29 Ina usun ätewe mi kon ren pwülüen chon arun. Iteiten eman me eman mi atapa neminewe epwe küna liwiningau.
PRO 6:30 Aramas resap kon oput eman chon solä, ika a solä anan mongö, lupwen a echik.
PRO 6:31 Nge lupwen ra turufi, epwe aliwini fän fisu mine a soläni, inamwo ika epwe atowu pisekin meinisin seni lon imwan.
PRO 6:32 Nge eman mi lisowu a tiparoch. A chök püsin afeiengaua inisin.
PRO 6:33 Repwe akinasa o aitengaua, nge an itengau esap wesila.
PRO 6:34 Pun pwülüen ewe fefin epwe fokun lingeringeriti, nge lupwen epwe angei chappen ei föför, esap chä letipan.
PRO 6:35 Esap etiwa och liwin, nge chomongun an lifang esap tongeni awesi an song.
PRO 7:1 Nei, kopwe chechemeni ai kewe kapas o iseis ai kewe allük lon lelukom.
PRO 7:2 Kopwe aleasochisi ai kewe allük pwe kopwe manau. Kopwe pwal aücheani mine üa aiti ngonuk, usun om aücheani fituken lon mesom.
PRO 7:3 Kopwe amwöchüür lükün fansoun meinisin o iseniir lon lelukom.
PRO 7:4 Kopwe üreni tipachem, “En fefinei,” kopwe pwal apasa pwe sileöch chienom mi achengicheng.
PRO 7:5 Pun repwe tümwünuk seni ewe fin lisowu, pwal seni ewe fefin mi lüangau a eäni kapas amichimich.
PRO 7:6 Iwe, üa newu seni asammwachon imwei
PRO 7:7 o küna chomong alüal mi wewemang, nge üa mefi pwe eman me leir a fokun tiparoch.
PRO 7:8 A pwerela won ewe al arap ngeni lepwokukun imwen eman fefin mi lüangau, o fetal ngeni imwan
PRO 7:9 lefäf, lupwen a pwinila o popuetä rochokich.
PRO 7:10 Mürin, ewe fefin a towu pwe epwe churi ewe alüal, a üföüf üfen eman fefin mi amömö inisin o ekieki mine epwe eäni atuputup ngeni.
PRO 7:11 A fos leüömong, a pwal säwämang o nomofetal.
PRO 7:12 Fän ekoch a nom won al, fän ekoch a nom lon lenien amömö o sousou mwän lepwokukun ekewe al.
PRO 7:13 Iwe, a romi ewe mwän o mitiri, a kapas ngeni fän mesemau,
PRO 7:14 “Ikenai üa eäni eu asoren kinamwe, nge a chüen wor ochäi fituk seni ewe mönün asor.
PRO 7:15 Iei mine üa feito pwe üpwe churuk, üa achocho le kütok, nge iei üa künok.
PRO 7:16 Üa ameresala won ai peet ekewe pwölüpwöl seni Isip mi sokopat anüer.
PRO 7:17 Üa epiti ai peet ren ewe löpokus seni ekewe irä iter mör, aloes me sinamon.
PRO 7:18 Kopwe feito, sipwe pwärifengeni ach tong tori lesosor, sipwe pwapwafengen lon tong.
PRO 7:19 Pun pwülüei esap nom rei, a saila won eu fanü toau.
PRO 7:20 A feila fän chomong moni, nge epwe liwinsefälito le unusen maram.”
PRO 7:21 Ina usun neminei a pesei ätei ren chomong kapas atuputup pwe epwe eti, a pöchökül ngeni ren an kapas amichimich.
PRO 7:22 Iwe, ätei a müttir etala neminei pwe a usun chök eman ätemwänin kow mi feila ngeni ewe leni ia epwe ninnila ie, pwal usun eman chia epwe le fif lon ewe lenien likatup,
PRO 7:23 tori efoch esefich a pwerelong lon lukan. A wewe ngeni eman machang mi sälong lon eu sär. Iwe, esap silei pwe epwe mäfeiengau ren.
PRO 7:24 Nei, iei kopwe aüselingaei, kopwe aü selingom ngeni ai kewe kapas.
PRO 7:25 Kosap mwüt ngeni ei sokun fefin epwe liapeni lelukom, kosap pwal tipeeu ngeni an kewe föför.
PRO 7:26 Pun chomong ra feiengau pokiten neminei. Ewer, chokewe ra mäla ren ra kon chomong.
PRO 7:27 Iwe, imwan we efoch al mi ale ngeni ewe lenien sotup, a feitiu ngeni ekewe rumwen mäla.
PRO 8:1 Oupwe rongorong! Tipachem a kökkö, mirit a leüömongetä.
PRO 8:2 A ütä won ewe leni tekia lükün ewe al, a ütä ia ekewe al ra chufengen me ie.
PRO 8:3 A leüömong le kökkö me lükün asamalapen tittin ewe telinimw lon ewe lenien tolong,
PRO 8:4 “Üa kökkö ngeni ämi mwän, üa leüömongetä ngeni aramas meinisin won fanüfan.
PRO 8:5 Ämi chon miritimang, oupwe kaiö mirit, ämi chon tiparoch, oupwe kaiö tipachem.
PRO 8:6 Oupwe aüseling, pun üpwe fos won mettoch mi aüchea, üpwe aiti ngenikemi mine a pwüng.
PRO 8:7 Üpwe apasa mine a let, pun üa fokun oput kapas chofana.
PRO 8:8 Ai kewe kapas meinisin ra pwüng, esap wor rikirik ika pwor lor.
PRO 8:9 Ai kapas ra wenechar me ren chokewe mi wewe ren, ra pwal pwüng me ren chokewe mi silelap.
PRO 8:10 Oupwe angei ai kewe kapasen öüröür, nge ousap angei silifer, oupwe pwal aücheani silelap, lap seni kolt mi mürina.
PRO 8:11 Pun ngang tipachem üa mürina seni fau aüchea, nge meinisin mine oua efich esap nönnö ngeniei.
PRO 8:12 Ngang tipachem, mi wor rei mirit, üa silelap le eäni kapasen öüröür mi pwüng.
PRO 8:13 Eman mi niuokusiti ewe Samol mi Lapalap a oput mine a ngau. Üa oput lamalamtekia me sikesik, pwal föför mi ngau me kapasen atuputup.
PRO 8:14 Üa eäni ewe tufichin öüröür me alefila met mi pwüng, a wor ai sile, a pwal wor ai pöchökül.
PRO 8:15 Üa alisi ekewe king lon ar nemenem, üa pwal alisi ekewe sounemenem pwe ra föri allük fän pwüng.
PRO 8:16 Üa alisi ekewe samol lon ar nemenem, pwal ekewe aramas tekia lon ar nemeni fanüfan.
PRO 8:17 Üa echeni chokewe mi echeniei, nge chokewe mi achocho le küttaei repwe künaei.
PRO 8:18 Pisekisek me iteüöch ra nom rei, pwal wöü mi chök nonomola me feiöch.
PRO 8:19 Uai a mürina seni kolt, fokun seni kolt mi mürina, mine oua angei seniei a mürina seni silifer mi fokun mürina.
PRO 8:20 Üa fetal won ewe al mi pwüng, üa pwerela won ewe lenien fetal mi wenechar,
PRO 8:21 üa atoto wöü won chokewe mi echeniei o aurala ar lenien iseis.
PRO 8:22 Iwe, lepoputän an angang ewe Samol mi Lapalap a föriei, a akom le föriei me lomlom mwen mettoch meinisin.
PRO 8:23 A anomuei seni me lomlom, üa akom mwen fanüfan esamwo wor.
PRO 8:24 Üa uputiu lupwen esamwo wor matau, lupwen esamwo wor ekewe puächen koluk mi puächemong.
PRO 8:25 Üa uputiu mwen ekewe chukutekia me ekewe chutekison resamwo nom lon lenier,
PRO 8:26 mwen än Kot föri fanüfan me ekewe tanipin won, ika mwen an föri pwül moromor.
PRO 8:27 Üa fen nom, lupwen Kot a anomu ekewe läng lon lenier, lupwen a föri lefilen matau me aropen ilen,
PRO 8:28 lupwen a anomu ekewe kuchun fän läng, lupwen a anüküchara ekewe puächen koluk lon ekewe lenien alolol,
PRO 8:29 lupwen a föri kiännin matau, pwe ekewe sät resap tolong won fanü. Üa fen nom, lupwen a föri longolongun fanüfan.
PRO 8:30 Üa nom ren Kot usun eman sousile angang, ngang popun an pwapwa iteiten rän. Üa meseik me fän mesan fansoun meinisin,
PRO 8:31 üa meseikeiti unusen an we fanüfan, üa pwapwa ren ekewe aramasen fanüfan.
PRO 8:32 Nge iei ämi nei kana, oupwe aüselingaei: Oupwe apwönüetä mine üa ürenikemi, pwe oupwe feiöch.
PRO 8:33 Oupwe aüselinga ai kewe kapasen öüröür pwe oupwe tipachem, nge ousap aücheangaueer.
PRO 8:34 A feiöch ewe aramas mi aüselingaei, ätewe mi mamasa ai kewe asamalap iteiten rän o witiwit ünükün ai kewe asam.
PRO 8:35 Pun ätewe mi künaei a küna manau, nge ewe Samol mi Lapalap epwe pwapwa ren.
PRO 8:36 Nge ätewe esap künaei a püsin afeiengaua inisin. Meinisin mi oputaei ra efich mäla.”
PRO 9:1 Tipachem a aüetä imwan o aütäi füfoch üran.
PRO 9:2 A niela nöün man o nofiti ünüman wain ngeni nofitin mongö, a pwal fotuki an chepel.
PRO 9:3 A tinala nöün kewe chon angang fefin pwe repwe kökkö me won ewe leni tekia seni meinisin me lon ewe telinimw,
PRO 9:4 “Ämi mi wewemang, oupwe feito ikei.” Nge a apasa ngeni ewe mi tiparoch,
PRO 9:5 “Kopwe etto o mongö seni enei mongö, kopwe ün seni ewe wain üa nofiti.
PRO 9:6 Kopwe likiti ekewe chon wewemang pwe kopwe manau, kopwe pwal fefeitä lon om sile.”
PRO 9:7 Eman mi aiti ngeni eman chon turunufas mine a pwüng epwe püsin säw, nge eman mi apwüngü eman aramasangau epwe püsin feiengau.
PRO 9:8 Kosap apwüngü eman chon turunufas, pun epwe oputok. Nge kopwe apwüngü eman mwän mi tipachem, pun epwe echenuk.
PRO 9:9 Kopwe öüröüra eman chon tipachem, pun epwe lapala an tipachem. Kopwe aiti ngeni eman chon pwüng mine a mürina, pun epwe fefeitä lon an sile.
PRO 9:10 Ach niuokusiti ewe Samol mi Lapalap iei popun tipachem, nge ach silei Ewe mi Pin iei popun ach weweöch.
PRO 9:11 Pun tipachem epwe achomongala ränin manauom, pwe ierin manauom repwe wattela.
PRO 9:12 Are ka tipachem, en kopwe püsin feiöch ren. Nge are ka eman chon turunufas, kopwe püsin feiengau ren.
PRO 9:13 Tiparoch a usun chök eman fefin a akürang, a lüangau o säwemang.
PRO 9:14 A mot ünükün asamen imwan, ika won eu leni mi tekia seni meinisin me lon ewe telinimw.
PRO 9:15 A kökköla mürin chokewe mi feila seni, chokewe mi chök ekiekin föri ar angang,
PRO 9:16 “Iö kana mi wewemang repwe feito ikei.” A pwal apasa ngeni ewe mi tiparoch,
PRO 9:17 “Koluk eman a soläni a fokun arar, nge pilawa eman a eni le monomon a fokun annö.”
PRO 9:18 Nge ekewe aramas resap silei pwe chokewe mi tolong lon imwen neminewe repwe mäla, nge chokewe mi wasöla ren ra fen nom epin ewe lenien sotup.
PRO 10:1 Eman alüal mi tipachem a apwapwai saman, nge eman alüal mi tiparoch a atoto letipeta won inan.
PRO 10:2 Eman mi wöümong pokiten an angangen atuputup esap feiöch ren, nge pwüngüöch a amanaua eman aramas seni mäla.
PRO 10:3 Ewe Samol mi Lapalap esap mwüt ngeni ekewe chon pwüng pwe repwe echik, nge a alichipüngü ekewe aramasangau pwe resap angei mine ra mwäräkichiti.
PRO 10:4 Eman mi chipwang epwe wöüngau, nge eman mi achocho le angang epwe wöümong.
PRO 10:5 Eman mwän mi mirit a ionifengeni uän an tanipi lupwen fansoun räs, nge eman mwän mi annut lupwen fansoun kinikin epwe säw.
PRO 10:6 Feiöch a tori eman chon pwüng, nge än eman aramasangau kapas a pwärätä an mwänewüs.
PRO 10:7 Aramas ra chechemeni eman chon pwüng, pun i popun ar feiöch, nge repwe manlükala iten eman aramasangau.
PRO 10:8 Eman mi tipachem a etiwa kapasen öüröür, nge eman mi kapaspat lon an tiparoch epwe küna feiengau.
PRO 10:9 Eman aramas mi wenechar epwe manau fän kinamwe, nge eman mi rikirik epwe pwäpwäla an föför, epwe pwal angei chappan.
PRO 10:10 Eman mi ächiki mesan a afisätä osukosuk, nge eman mi pwora le apwüngü mine a ngau a afisätä kinamwe.
PRO 10:11 Än eman chon pwüng kapas eu puächen kolukun manau, nge än eman aramasangau kapas a pwärätä an mwänewüs.
PRO 10:12 Oput a afisätä anini, nge tong a pwölüela ekewe pupungau meinisin.
PRO 10:13 Eman mi silelap a apasawu kapasen tipachem, nge eman mi tiparoch epwe küna apwüng fän wichiwich.
PRO 10:14 Ekewe mwän mi tipachem ra akangei chök silelap, nge än eman chon tiparoch kapas a akanato feiengau.
PRO 10:15 Än ekewe chon pisekisek wöümong iei ar leni mi pöchökül, nge än ekewe chon mwelele wöüngau iei ar feiengau.
PRO 10:16 Liwinin än ekewe chon pwüng angang epwe atoto ngeniir manau, nge winnen ekewe aramasangau a atoto ngeniir apwüng.
PRO 10:17 Eman mi aleasochisi ekewe kapasen fön epwe manau, nge eman mi pöütala ekewe kapasen emirit epwe tolong lon feiengau.
PRO 10:18 Eman mi aopala an oput i eman chon chofana, nge eman mi luapas i eman chon tiparoch.
PRO 10:19 Anaie a wor chomong kapas ie, a pwal tongeni fis tipis, nge eman mi fanafanala a mirit.
PRO 10:20 Än eman chon pwüng kapas a usun silifer mi mürina, nge än eman aramasangau ekiek esap wor aüchean.
PRO 10:21 Än eman chon pwüng kapas a afeiöchü chomong, nge eman chon tiparoch a mäla, pun esap wor an mirit.
PRO 10:22 Feiöch seni ewe Samol mi Lapalap a awöüükich, nge i esap apacha och riaföü ngeni.
PRO 10:23 Eman chon tiparoch a pwapwa are a föri mine a mwäl, nge eman mwän mi weweöch a pwapwa ren an tipachem.
PRO 10:24 Mine eman aramasangau a niueiti epwe fis ngeni, nge mine eman chon pwüng a aläläei epwe tori.
PRO 10:25 Wesin än ewe mölümöl enito, ekewe aramasangau resap chüen nom, nge ekewe chon pwüng ra nüküchar tori feilfeilachök.
PRO 10:26 Usun finikar a amwona ngich, nge ötüöt a aweiresi mesach, iei usun eman chon chipwang a aweiresi ätewe mi akünöü.
PRO 10:27 Ach niokusiti ewe Samol mi Lapalap a alangatama manauach, nge ierin manauen ekewe aramasangau epwe mochomoch.
PRO 10:28 Än eman chon pwüng apilükülüköch a sopolong lon pwapwa, nge mine eman aramasangau a witiwiti esap fis.
PRO 10:29 Ewe Samol mi lapalap a tümwünüöchü chokewe mi wenechar, nge a afeiengaua ekewe chon föföringau.
PRO 10:30 Eman chon pwüng esap fokun mwöküt seni lenian, nge eman aramasangau esap nonometiu lon ewe fanü.
PRO 10:31 Kapasen tipachem ra towu seni awen eman chon pwüng, nge chönawen eman chon atuputup epwe üttüwu.
PRO 10:32 Eman chon pwüng a silei mine epwe eäni fos mürina, nge eman aramasangau a chök silei kapas mi aweiresi letipen aramas.
PRO 11:1 Ewe Samol mi Lapalap a oput aramas mi aea eu kilo esepwüng, nge a pwapwa ngeni eman mi aea eu kilo mi pwüng.
PRO 11:2 Aramas mi lamalamtekia repwe müttir küna itengau, nge ir mi tipetekison ra eäni tipachem.
PRO 11:3 Wenechar a emweni chokewe mi wenechar, nge chokewe resap allükülük ra feiengau ren ar tunorikirik.
PRO 11:4 Än eman aramas wöümong esap alisi lon ewe ränin apwüng, nge pwüng a angasala eman seni mäla.
PRO 11:5 Ekewe esap wor ar tipis ra fetal won efoch al mi sonosonöch pokiten ar pwüng, nge ekewe aramasangau ra feiengau ren püsin ar föför mi ngau.
PRO 11:6 Chokewe mi wenechar ra küna ngas pokiten ar pwüng, nge chokewe resap allükülük ra tup ren püsin ar mochenia.
PRO 11:7 Lupwen eman aramasangau a mäla, an apilükülüköch a pwal wesila, nge mine eman chon pwüngingau a witiwiti, esap fis.
PRO 11:8 Eman chon pwüng a küna ngas seni osukosuk, nge eman aramasangau a chök tolong lon osukosuk.
PRO 11:9 Eman chon pwüngingau a afeiengaua chon arun ren kapasen awan, nge ekewe chon pwüng ra ngasala ren ar silelap.
PRO 11:10 Chon eu telinimw ra pwapwa, lupwen ekewe chon pwüng ra feiöch, nge lupwen ekewe aramasangau ra mäla, mi wor mweireiren pwapwa.
PRO 11:11 Lupwen ekewe chon wenechar ra afeiöchü eu telinimw, a fefeitä, nge ren än ekewe aramasangau kapas ewe telinimw a tala.
PRO 11:12 Eman mi tiparoch a aitengaua chon arun, nge eman mi mirit a fanafanala.
PRO 11:13 Eman mi kukuloufeil o luapas a apworausa mine a monomon, nge ätewe mi allükülük a amonomona.
PRO 11:14 Eu mwü epwe tala ika esap wor souemwen lon, nge anaie a wor ie chomong chon öüröür, a wor kinamwe.
PRO 11:15 Eman mi pwon pwe epwe mönätiu än eman chon ekis liwinimang epwe fokun osupwang, nge ätewe mi oput ei sokun föför a feiöch.
PRO 11:16 Eman fefin mi eäni kirikiröch aramas ra meniniti, nge ekewe mwän mi pwora ra chök pisekisekila.
PRO 11:17 Eman mwän mi eäni kirikiröch a püsin feiöch ren, nge eman mi ariaföüü aramas a püsin feiengau ren.
PRO 11:18 Eman aramasangau a angei winnen an angang nge esor iammürin, nge eman mi föri föför mi pwüng epwe angei liwinin mi nonomola.
PRO 11:19 Eman mi chök föföri föför mi pwüng epwe manau, nge ätewe mi chök föri mine a ngau epwe mäla.
PRO 11:20 Ewe Samol mi Lapalap a oput aramas mi rikirik leluker, nge a pwapwa ren chokewe mi föri mine a pwüng.
PRO 11:21 A fokun let pwe eman aramasangau epwe wesewesen angei liwinin an föföringau, nge chokewe mi föri mine a pwüng repwe küna ngas.
PRO 11:22 Eman fefin mi liöch, nge esap mirit, a usun chök efoch ring seni kolt lon pwötün eman piik.
PRO 11:23 Än ekewe chon pwüng mochen a sopolong lon mine a mürina, nge mine ekewe aramasangau ra apilükülüküni a sopolong lon kapwüng.
PRO 11:24 Mi wor aramas ra fangafangöch, nge ra chök pisekisekila. Mi pwal wor aramas ra fangangau, nge ra chök wöüngauala.
PRO 11:25 Eman aramas mi kichiöch epwe pisekisekila, nge eman mi alisi aramas, aramas repwe pwal alisi.
PRO 11:26 Aramas ra otteki ätewe mi amwöchü seniir wiich pokiten an mochen awattela liwinin, nge ra afeiöchü ätewe mi amömöla ngeniir wiich.
PRO 11:27 Eman mi achocho le föri mine a mürina a kütta chenin me ren Kot, nge ätewe mi kütta mine a ngau epwe küna mine a ngau.
PRO 11:28 Aramas mi apilükülükü püsin wöür repwe turula usun chök chön irä ra turutiu mürin leres, nge ekewe chon pwüng repwe manauöch usun chök chön irä mi arauarau.
PRO 11:29 Eman mi tümwününgau ngeni chon leimwan esap wor mine epwe angei lesopolan, nge eman mi tiparoch epwe chon angang ngeni eman mi mirit.
PRO 11:30 Pwüng a aworato manau, nge pwüngingau a angeala manau.
PRO 11:31 Ekewe chon pwüng repwe angei liwinin ar föför won fanüfan, nge ekewe aramasangau me chon tipis repwe pwal fokun angei liwinin ar föför.
PRO 12:1 Eman mi efich kapasen emirit a efich silelap, nge ätewe mi oput kapasen apwüng a tiparoch.
PRO 12:2 Ewe Samol mi Lapalap a echeni eman mi aramasöch, nge a apwüngü eman aramas mi ekiekietä mine a ngau.
PRO 12:3 Esap wor eman a tongeni nüküchar ren an föföringau, nge eman chon pwüng esap fokun mwökütüküt.
PRO 12:4 Eman fefin mi mürina a usun chök epa mwärämwär fän iten pwülüan, nge neminewe a atoto säw won pwülüan a usun chök kanser lon chün ätewe.
PRO 12:5 Ekewe chon pwüng ra ekiekietä mine a pwüng, nge än ekewe aramasangau öüröür a atuputup.
PRO 12:6 Än ekewe aramasangau kapas ra ni aramas, nge än ekewe chon pwüng kapas ra angasa aramas.
PRO 12:7 Ekewe aramasangau ra kuf o rosola, nge chon leimwen ekewe chon pwüng repwe nonometiu.
PRO 12:8 Aramas repwe mwareiti eman mi mirit aükük ngeni an mirit, nge repwe oput eman mi tiparoch.
PRO 12:9 Eman aramas tekison mi angang pwe epwe wor anan a mürina seni eman mi pwomweni pwomwen eman aramas tekia, nge esap wor anan.
PRO 12:10 Eman chon pwüng a tümwünüöchü nöün man, nge ekewe aramasangau ra chök ariaföüü nöür man.
PRO 12:11 Eman mi angang won fanüan epwe wor chomong anan mongö, nge eman mi föri sokopaten angang mi lomotongau esap wor an mirit.
PRO 12:12 Ekewe aramasangau ra chök tipeni föför mi ngau, nge ekewe chon pwüng ra nüküchar.
PRO 12:13 Eman aramas mi ngau a tup ren püsin kapasen awan, nge eman chon pwüng esap tolong lon osukosuk.
PRO 12:14 Eman aramas epwe angei liwinin alongolong won mine a apasa ika föri, epwe chök angei mine a fichiti.
PRO 12:15 Eman mi tiparoch a ekieki pwe a pwüng lon an föför, nge eman mi tipachem a aüseling ngeni kapasen öüröür.
PRO 12:16 Eman mi tiparoch a müttir pwärätä an song, nge eman mi mirit a asarongorongala seni kapasen esit.
PRO 12:17 Eman chon pwärätä mi wenechar a pwärätä mine a let, nge eman chon pwärätä mi mwäl a eäni kapas chofana.
PRO 12:18 Mi wor aramas ra fos, nge resap ekieki och. Ekei sokun fos ra akinasa aramas, usun efoch ketilas a akinasa eman. Nge än ekewe chon tipachem kapas ra atoto pöchökül.
PRO 12:19 Kapas mi let repwe nonom tori feilfeilachök, nge kapas chofana repwe chök nonom lon fansoun mochomoch.
PRO 12:20 Ekiekin atuputup a nonom lon leluken chokewe mi ekiekietä mine a ngau, nge chokewe mi alapala kinamwe ra pwapwa.
PRO 12:21 Esor feiengau epwe tori ekewe chon pwüng, nge chomong osukosuk epwe tori ekewe aramasangau.
PRO 12:22 Ewe Samol mi Lapalap a oput ekewe aramas mi chofana, nge a pwapwa ren chokewe mi apasa mine a let.
PRO 12:23 Ekewe aramas mi mirit resap pwärala ar silelap, nge ekewe mi tiparoch ra asilefeili ar umwes.
PRO 12:24 Eman mi achocho le angang epwe nemenem, nge eman mi chipwang epwe wisen föri angangen kinroosi.
PRO 12:25 Än eman aramas öürek lon lelukan a afisätä lolilen, nge eu kapas pwetete a apwapwai i.
PRO 12:26 Eman chon pwüng a kul seni mine a ngau, nge ekewe aramasangau ra fetal won ewe alen mwälechela.
PRO 12:27 Eman aramas mi chipwang esap wor liapan man, nge eman mi achocho le angang epwe angei wöü mi aüchea.
PRO 12:28 Ewe alen pwüng a alelong lon manau, nge ewe alen föföringau a alelong lon mäla.
PRO 13:1 Eman alüal mi tipachem a aüselinga än saman kapasen fön, nge eman mi lamalamtekia esap aüseling ngeni kapasen emirit.
PRO 13:2 Eman aramasöch epwe angei liwinin met a apasa, nge chokewe resap allükülük ra pwapwaiti angangen mwänewüs.
PRO 13:3 Eman mi mamasa kapasen awan a tümwünü manauan, nge eman mi fos chomong a fetal ngeni feiengau.
PRO 13:4 Eman chon chipwang a mwäräkichiti mettoch, nge esap angei och. Nge eman mi achocho le angang epwe tori meinisin mine a mochen.
PRO 13:5 Eman chon pwüng a oput kapas chofana, nge eman aramasangau a föri föför mi äsäw o anioput.
PRO 13:6 Pwüng a tümwünü eman chon wenechar, nge pwüngingau a afeiengaua eman chon tipis.
PRO 13:7 Mi wor aramas ra pwomweni pwomwen chon pisekisek, nge ra wöüngau. Mi pwal wor aramas ra pwomweni pwomwen chon wöüngau, nge ra fokun pisekisek.
PRO 13:8 Eman aramas mi wöümong a tongeni penmanaueni manauan ren wöün, nge esap wor eman a ekiekin afeiengaua eman mi wöüngau.
PRO 13:9 Ekewe chon pwüng ra usun chök eu saram mi fokun tinöch, nge ekewe aramasangau ra usun chök eu lamp mi aiekunukun.
PRO 13:10 Lamalamtekia a afisätä anini, nge chokewe mi angei öüröürer ra tipachem.
PRO 13:11 Eman mi wöümongola fän mecheres wöün epwe müttir kisikisila, nge eman mi ioni ekis me ekis fän weires wöün epwe lapala.
PRO 13:12 Are än eman apilükülük a mang le pwönüetä, i epwe letipengau, nge are än eman mochen a pwönüetä, iei apöchökülen manauan.
PRO 13:13 Eman mi oput kapasen öüröür a püsin afeiengaua manauan, nge eman mi aleasochisi ekewe allük epwe angei liwinin.
PRO 13:14 Än ekewe chon tipachem kapasen kait iei eu puächen manau, pwe ra tongeni alisi aramas ar repwe sü seni feiengauen mäla.
PRO 13:15 Mirit a aworato menin, nge chokewe resap allükülük ra fetal won ewe al mi alelong lon feiengau.
PRO 13:16 Eman aramas mi mirit a föri an angang fän silelap, nge eman mi tiparoch a pwärifeili an umwes.
PRO 13:17 Eman chon künö esap allükülük a atoto osukosuk, nge eman mi allükülük a atoto kinamwe.
PRO 13:18 Eman esap mochen rongorong kapasen fön epwe tolong lon wöüngau me itengau, nge ätewe mi aüseling ngeni kapasen emirit epwe iteüöch.
PRO 13:19 Are än eman aramas mochen a pwönüetä, lelukan a pwapwa, nge ekewe chon tiparoch ra fokun oput ar repwe kul seni mine a ngau.
PRO 13:20 Eman mi chiechi ngeni aramas mi tipachem epwe tipachemela, nge eman mi chiechi ngeni ekewe chon tiparoch epwe feiengau.
PRO 13:21 Feiengau a tapweri ekewe chon tipis, nge feiöch iei liwinin ekewe chon pwüng.
PRO 13:22 Eman aramasöch a likiti wöün ngeni nöün nöün kana, nge wöün ewe chon tipis epwe tori ekewe chon pwüng.
PRO 13:23 Ewe fanü ekewe chon wöüngau rekärän fotuki a afisätä chomong ua, nge chon pwüngingau ra amwöchü seniir ekewe fanü, pwe resap tongeni angang won.
PRO 13:24 Eman esap apwüngü nöün a oput nöün, nge eman mi tongei nöün a achocho le emiriti.
PRO 13:25 Ekewe chon pwüng a wor ener mongö pwe ra tongeni möt, nge ekewe aramasangau ra echik.
PRO 14:1 Eman fefin mi tipachem a aüetä imwan, nge eman mi tiparoch a püsin ataetiu imwan.
PRO 14:2 Eman mi wenechar a niuokusiti ewe Samol mi Lapalap, nge eman mi rikirik a turunufasei i.
PRO 14:3 Än ekewe chon tiparoch kapas a usun chök efoch wokun wichiwich fän iten püsin ir, nge än ekewe chon tipachem kapas a tümwünüür.
PRO 14:4 Anaie esap wor ätemwänin kow ie mi tuw pwül, esap wor wiich, nge pöchökülen eman ätemwänin kow a aworato chomong föün wiich.
PRO 14:5 Eman chon pwärätä mi allükülük a apasa mine a let, nge eman chon pwärätä mi mwäl a apasawu kapas chofana.
PRO 14:6 Eman chon turunufas a kütta tipachem, nge esap küna. Nge eman aramas mi silelap a mecheres ngeni an epwe weweöch.
PRO 14:7 Kosap chiechi ngeni eman mi tiparoch, pun kosap tongeni kaiö kapasen mirit seni.
PRO 14:8 Eman aramas mi mirit a tipachem, pun a silei mine epwe föri, nge eman mi tiparoch a umwes, pun a püsin atupu i.
PRO 14:9 Ekewe chon tiparoch resap ekieki pwe a ngau ar föri tipis, nge ekewe chon wenechar ra weweöchiti usun ingauen tipis.
PRO 14:10 Eman aramas a püsin silei riaföün lelukan, nge eman chon ekis esap tongeni eti i lon an pwapwa.
PRO 14:11 Imwen ekewe aramasangau repwe tala, nge imwen ekewe chon wenechar repwe chök nonomola.
PRO 14:12 Eman aramas a tongeni ekieki pwe ewe al a fetal won a pwüng, nge lesopolan ewe al a ale ngeni mäla.
PRO 14:13 Inamwo ika eman a takir, a pwal tongeni wor lolilen lon lelukan, nge mürin än eman pwapwa a tongeni fis letipeta.
PRO 14:14 Eman aramas mi rikirik epwe kini uän an föför, nge eman aramasöch epwe kini uän an angang.
PRO 14:15 Eman mi wewemang a lükü mettoch meinisin, nge eman mi mirit a nenengeni ia epwe feila ie.
PRO 14:16 Eman mwän mi tipachem a föröchü o kul seni mine a ngau, nge eman mi tiparoch a tümwününgau o müttir föri mine a mochen.
PRO 14:17 Eman aramas mi songokai a föri föför mi umwes, nge eman mi mirit a mosonotam.
PRO 14:18 Ekewe chon wewemang repwe angei mine a fich ngeniir lon ar tiparoch, nge ekewe mi mirit repwe angei silelap pwe liwiniir.
PRO 14:19 Ekewe chon föföringau ra wisen rotiu me fän mesen ekewe aramasöch, nge ekewe aramasangau ra wisen rotiu me ünükün asamalapen imwen ekewe chon pwüng.
PRO 14:20 Eman chon wöüngau a koput me ren aramas, pwal mwo nge ren chon arun, nge eman chon wöümong a wor chomong chiechian.
PRO 14:21 Eman mi oput chon arun a tipis, nge eman mi kirikriöch ngeni ekewe chon wöüngau epwe feiöch.
PRO 14:22 Chokewe mi ekiekietä mine a ngau repwe tokola. Nge chokewe mi ekiekietä mine a mürina repwe angei ümöümöch me allükülük.
PRO 14:23 Eman mi weires le angang epwe angei winnan, nge eman mi kapas chök epwe tolong lon osupwang.
PRO 14:24 Än ekewe chon tipachem pisekisek iei ar lingöch, nge än ekewe chon tiparoch wewemang iei ar umwes.
PRO 14:25 Eman chon pwärätä mine a let a amanaua aramas, nge eman mi eäni kapas chofana eman chon afangamä aramas.
PRO 14:26 Än eman aramas meniniti ewe Samol mi Lapalap a atoto an apilükülüköch me nonomöchün me chon an famili.
PRO 14:27 Än eman aramas meniniti ewe Samol mi Lapalap iei eu puächen manau, pwe esap tolong lon ewe feiengauen mäla.
PRO 14:28 Eman king a iteüöch ren chomongun nöün aramas, nge eman samol esap wor nöün aramas esap wor manan.
PRO 14:29 Eman mi mang ngeni song a watte an weweöch, nge eman mi müttir ngeni song a pwärätä watten an tiparoch.
PRO 14:30 Eu letip mi kinamwe a awora pöchökülen inis, nge lolowo a usun chök kanser lon chü.
PRO 14:31 Eman mi ariaföüü ekewe chon wöüngau a esita ewe Chon Föriir, nge ätewe mi kirikiröch ngeni ekewe chon mwelele a asamolu Kot.
PRO 14:32 Ekewe aramasangau ra feiengau ren püsin ar föför mi ngau, nge ekewe chon pwüng a wor ar lenien op lupwen ar mäla.
PRO 14:33 Tipachem a nonom lon letipen ekewe aramas mi wewekai, nge esap tongeni nom lon letipen ekewe chon tiparoch.
PRO 14:34 Pwüng a afefeitäi eu mwü, nge tipis a afefeitiua o aitengaua.
PRO 14:35 Eman king a pwapwa ren eman chon angang mi tipachem, nge a song ngeni eman mi föri föför mi äsäw.
PRO 15:1 Eu kapasen pälüen mi pwetete a awesi lingeringer, nge eu kapas pöchökül a afisätä song.
PRO 15:2 Än ekewe chon tipachem kapas ra amwärärei aramas ngeni silelap, nge ekewe chon tiparoch ra eäni kapasen umwes.
PRO 15:3 Ewe Samol mi Lapalap a küna mine a fis ekis meinisin, a ouwasacha ekewe chon föföringau me chon pwüng.
PRO 15:4 Kapas pwetete ra atoto manau, nge kapas pöchökül ra atai letipen aramas.
PRO 15:5 Eman mi tiparoch a pöütala än saman kapasen öüröür, nge ätewe mi etiwa kapasen fön a mirit.
PRO 15:6 Lon imwen ekewe chon pwüng mi wor chomong wöü, nge liwinin än ekewe aramasangau angang a aworato osukosuk.
PRO 15:7 Ekewe chon tipachem ra achöfetalei silelap, nge ekewe chon tiparoch resap föri iei usun.
PRO 15:8 Ewe Samol mi Lapalap a oput än ekewe aramasangau asor, nge a pwapwa ren än ekewe chon wenechar iotek.
PRO 15:9 Ewe Samol mi Lapalap a oput än ekewe aramasangau föför, nge a echeni chokewe mi föri mine a pwüng.
PRO 15:10 Mi wor eu apwüng mi chou fän iten ätewe mi föri mine a ngau, nge ätewe mi oput kapasen fön epwe mäla.
PRO 15:11 Ewe lenien sotup me ewe leni mi alolol ra pwä me mwen ewe Samol mi Lapalap. Ifa usun, än eman aramas epwe tongeni aopala ekiekin letipan me fän mesen Kot?
PRO 15:12 Eman chon turunufas esap aücheani än eman epwe apwüngü, esap mochen angei öüröüran seni ekewe chon tipachem.
PRO 15:13 Eman mi pwapwa lon lelukan a pwal wopwapwa won mesan, nge eman mi letipeta a wololilen.
PRO 15:14 Eman mi mirit a kütta silelap, nge eman mi tiparoch a menemenöch ren an wewemang.
PRO 15:15 Ränin manauen eman mi nom lon riaföü a chök ingau, nge eman mi pwapwa lon lelukan a chök pwapwa fochofoch.
PRO 15:16 A mürina än eman epwe wöükükün, nge a niuokusiti ewe Samol mi Lapalap, lap seni än eman epwe wöümong, nge a nom lon weires.
PRO 15:17 A mürina ach mongöfengen iasai, nge mi wor tong lefilach, lap seni ach ochochfengen fituken kow mi kiris, nge mi wor koput lefilach.
PRO 15:18 Eman aramas mi songokai a afisätä anini, nge eman mi mosonotam a afisätä kinamwe.
PRO 15:19 Eman mi chipwang a tolong lon chomong weires, nge eman mi wenechar esap tolong lon osukosuk.
PRO 15:20 Eman alüal mi mirit a apwapwai saman, nge eman mi tiparoch a chök oput inan.
PRO 15:21 Eman esap wor an mirit a pwapwaiti umwes, nge eman mi mirit a föri mine a pwüng.
PRO 15:22 Are esap wor kapasen öüröür, esap fis mine aramas ra ekiekietä. Nge are a wor chomong chon öüröür, a fisiöch mine ra ekiekietä.
PRO 15:23 Eman aramas a pwapwa, lupwen a sileöchü mine epwe apasa, sokun kapas mi fichiti eu me eu fansoun.
PRO 15:24 Chon tipachem ra fetal won ewe al mi aletä ngeni manau, pwe resap fetal won ewe al mi aletiu ngeni mäla.
PRO 15:25 Ewe Samol mi Lapalap a ataetiu imwen chon lamalamtekia, nge a tümwünü kiännin fanüen eman fefin mi mä pwülüan.
PRO 15:26 Ewe Samol mi Lapalap a oput än ekewe aramasangau ekiek, nge a pwapwaiti än chokewe mi limöch leluker kapas.
PRO 15:27 Eman mi tipemong ngeni an epwe angei winnan fän pwüngingau a aworato osukosuk won chon leimwan, nge eman mi oput lifangen amichimich epwe manau.
PRO 15:28 Ekewe chon pwüng ra akomwen ekieköchü mine repwe pälüeni ngeni kapas, nge ekewe aramasangau ra müttir atowu kapas mi afisätä osukosuk.
PRO 15:29 Ewe Samol mi Lapalap a rongorong ngeni än ekewe chon pwüng iotek, nge esap afäli ekewe aramasangau.
PRO 15:30 Wopwapwan won mesen eman a apwapwai leluken aramas, nge pworaus mi mürina a akinamwei inisin aramas.
PRO 15:31 Eman mi aüselingafichi ekewe kapasen fön mi atoto manau epwe nonom lein ekewe chon tipachem.
PRO 15:32 Eman mi asorongorongola ngeni kapasen emirit a püsin oput i, nge eman mi afäli kapasen fön a fefeitä lon an weweöch.
PRO 15:33 Ach niuokusiti ewe Samol mi Lapalap iei alen ach kaiö tipachem, nge ach sipwe atipetekisonakich, a iei akomwen ach angei iteüöch.
PRO 16:1 Eman aramas a tongeni ekiekietä mettoch lon lelukan, nge mine epwe apasa a feito seni ewe Samol mi Lapalap.
PRO 16:2 Eman aramas a ekieki pwe meinisin mine a föri a pwüng, nge ewe Samol mi Lapalap a apwüngü ekiekin letipan.
PRO 16:3 Kopwe lükü ngeni ewe Samol mi Lapalap om angang, pwe mine ka ekiekietä epwe fisiöch.
PRO 16:4 Mettoch meinisin ewe Samol mi Lapalap a föri a wor sopolan, nge sopolan ekewe aramasangau repwe feiengau.
PRO 16:5 Ewe Samol mi Lapalap a oput chokewe meinisin mi lamalamtekia. A fokun let pwe repwe angei liwinir.
PRO 16:6 Kot epwe amusala tipisin eman aramas mi eäni kirikiröch me allükülük, nge ren än eman niuokusiti ewe Samol mi Lapalap a kul seni mine a ngau.
PRO 16:7 Are än eman aramas föför a apwapwai ewe Samol mi Lapalap, i epwe pwal föri pwe chon oputan repwe kinamwe ngeni.
PRO 16:8 A mürina ach sipwe wöükükün fän pwüng, lap seni watten ach moni tolong fän pwüngingau.
PRO 16:9 Eman aramas a ekiekietä lon letipan mine epwe föri, nge ewe Samol mi Lapalap a emweni lon an föför.
PRO 16:10 Eman king a kapas fän an manaman seni Kot, esap mwäl won mine a apwüngala.
PRO 16:11 Ewe Samol mi Lapalap a mochen pwe aramas repwe nöünöü kilo me aükük mi pwüng me föün kilo mi pwüngüöch.
PRO 16:12 Ekewe king ra oput föför mi ngau, pun mwür a longolong won pwüng.
PRO 16:13 Eman king a fokun pwapwa ren kapas wenechar, a echeni ätewe mi apasa mine a let.
PRO 16:14 Än eman king lingeringer a usun chök eman chon künö mi uwato pworausen mäla, nge eman mi mirit a tongeni amanasösötiu an lingeringer.
PRO 16:15 Wopwapwan won mesen eman king iei asisilan pwe mi wor manau, an ümöümöch a usun chök ekewe kuchu mi apüngätiu ütten mwen leres.
PRO 16:16 Ach sipwe eäni tipachem a mürina seni ach eäni kolt, nge ach eäni silelap a mürina seni ach eäni silifer.
PRO 16:17 Ewe alelap ekewe chon wenechar ra aleni a rik seni föför mi ngau, nge ätewe mi tümwünü alan a tümwünü manauan.
PRO 16:18 Lamalamtekia a akom mwen feiengau, nge tunosikesik a akom mwen än eman tur.
PRO 16:19 A mürina ach sipwe tipetekison o nom lein ekewe chon wöüngau lap seni ach sipwe nom lein chon lamalamtekia o angei liapach seniir.
PRO 16:20 Eman mi aüselinga än Kot kewe kapas epwe fefeitä, nge eman mi anomu an apilükülük won ewe Samol mi Lapalap epwe feiöch.
PRO 16:21 Eman mi tipachem lon letipan a iteni eman mi mirit, nge afalafal mürina a awatteela än eman silelap.
PRO 16:22 Tipachem eu puächen manau ngeni chokewe mi eäni tipachem, nge tiparoch a atoto apwüng ngeni ekewe mi umwes.
PRO 16:23 Ekiekin letipen eman mi tipachem a afisätä an afalafal mirit o awattela an kapasen kait.
PRO 16:24 Kapas pwetete ra usun chök chönün chunen, ra arar ngeni eman aramas o apöchöküla inisin.
PRO 16:25 Eman aramas a ekieki pwe ewe al a fetal won a pwüng, nge lesopolan ewe al a ale ngeni mäla.
PRO 16:26 Eman chon angang a achocho le angang pokiten an mochen mongö, an echik a pesei ngeni.
PRO 16:27 Eman aramas mi ngau a ekiekietä mine a ngau, an fos a usun chök ekkei mi ngeteri mettoch.
PRO 16:28 Eman aramas rikirik a afisätä fitikoko, nge eman mi uwokükü a aimwüfeseni chokewe mi fokun pwipwifengen.
PRO 16:29 Eman aramas mi mwänewüs a atupu chon arun o emweniir ngeni föför mi ngau.
PRO 16:30 Eman mi ächiki mesan a ekiekietä föför mi atuputup, nge eman mi emeni awan a föri mine a ngau.
PRO 16:31 Meten mökür mi üwan epa mwärämwär mi ling, a fis ngeni eman mi manau fän pwüng.
PRO 16:32 Eman mi mang ngeni song a mürina seni eman mi pöchökül, nge eman mi püsin nemeni letipan a mürina seni eman mi liapeni eu telinimw.
PRO 16:33 Aramas ra asisil won mettoch, nge ewe Samol mi Lapalap a wesewesen filätä pwüngün.
PRO 17:1 A mürina än eman aramas epwe mongö elülü mongö mi pwasapwas, nge mi wor kinamwe, lap seni an epwe eti eu mongön kametip lon eu imw mi wor fitikoko lon.
PRO 17:2 Eman amanau mi mirit epwe nemeni nöün an samol mwän mi föri föför mi äsäw o angei wisan usun chök eman lein ekewe nau.
PRO 17:3 Silifer me kolt ra limelim lon ewe lenien ketel, nge ewe Samol mi Lapalap a sotuni leluken aramas.
PRO 17:4 Eman aramasangau a rongorong ngeni kapas mi ngau, nge eman chon chofana a aüselingafichi kapas chofana.
PRO 17:5 Eman mi takirin ämängaua ekewe chon wöüngau a turunufasei Kot ewe Chon Föriir, nge eman mi pwapwa ren feiengauen eman epwe angei liwiningau.
PRO 17:6 Ekewe chinlap ra aingaing won nöün nöür, ina usun ekewe nau ra aingaing won en me saman.
PRO 17:7 Kapas pöchökül esap fichiti eman chon tiparoch, nge kapas chofana esap fokun fichiti eman samol.
PRO 17:8 Ekoch aramas ra ekieki pwe ar lifangen amichimich a usun chök roong, ra lükü pwe epwe alisiir lon mettoch meinisin.
PRO 17:9 Eman mi mochen pwe aramas repwe tongei epwe amusala ar tipis ngeni, nge eman mi achemasefäli tipisin eman a tongeni ataela chiechifengen.
PRO 17:10 Eu kapasen apwüng ngeni eman mi mirit a watte eselipäan, lap seni eselipäen ipükü wichiwich ngeni eman mi tiparoch.
PRO 17:11 Eman aramas mi ngau a chök mochen ükü ngeni aramas, iei mine eman chon künö mi uwei kapasen afeiengau a tiitiila ren.
PRO 17:12 A mürina ach sipwe churi eman liefefinin pear aramas ra angei seni apanan, lap seni ach churi eman chon tiparoch lon an umwes.
PRO 17:13 Are eman aramas a liwini ingau fän iten föför mürina, feiengau esap sü seni imwan.
PRO 17:14 Ach popuetä eu anini a usun chök ach pwangeni eu epetin koluk, iei mine kopwe ükütiu mwen ewe anini epwe lapala.
PRO 17:15 Ewe Samol mi Lapalap a oput ätewe mi aitöchü ekewe aramasangau me ätewe mi atipisi ekewe chon pwüng.
PRO 17:16 Met lomoten an epwe wor moni lepöün eman chon tiparoch? Ifa usun epwe tongeni möni tipachem, nge esap wor an mirit?
PRO 17:17 Eman chiechiach a tongeekich fansoun meinisin, nge pwiich a nom rech pwe epwe alisikich lon fansoun riaföü.
PRO 17:18 Eman aramas esap mirit a pwon pwe epwe mönätiu än chon arun liwinimang o ngeni asisilen an pwon.
PRO 17:19 Eman mi efich anini a pwal efich tipis, nge eman mi eäni kapas tunosikesik a kütta feiengau.
PRO 17:20 Eman aramas mi rikirik lelukan esap fefeitä, nge eman mi eäni kapas atuputup epwe tolong lon osukosuk.
PRO 17:21 Eman nau mi tiparoch a aworato lolilen ngeni saman, nge semen eman mi umwes esap pwapwa.
PRO 17:22 Eman mi pwapwa lon lelukan iei eu säfei mi mürina, nge eu leluk mi lolilen a asemweni eman.
PRO 17:23 Eman aramas mi ngau a angei lifangen amichimich fän monomon, pwe epwe arikala pwüngün kapwüng.
PRO 17:24 Eman aramas mi silelap a chök ekieki tipachem, nge eman mi tiparoch a chök tanechfeil lon an ekiek.
PRO 17:25 Eman nau mi tiparoch a aworato lolilen ngeni saman, a pwal aworato letipeta ngeni inelapan.
PRO 17:26 Esap pwüng pwe eman chon pwüng epwe mönätiu liwinin eu tipis esap tipisin, a pwal fokun mwäl are aramasöch repwe angei wichiwich fän iten ar wenechar.
PRO 17:27 Eman mi mang le fos a wor an silelap, nge eman mi mosonotam i eman mi weweöch.
PRO 17:28 Pwal eman chon tiparoch mi fanafanala, aramas ra ekieki pwe a mirit, pun are a apüngala awan, a wewe ngeni eman mi tipachem.
PRO 18:1 Eman mi püsin imwüla a chök kütta an mochen, a ü ngeni meinisin mine aramas ra ekieki pwe a pwüng.
PRO 18:2 Eman aramas mi tiparoch esap pwapwaiti weweöch, a chök pwapwa are a tongeni pwärätä mefian.
PRO 18:3 Lupwen a fis föföringau, a pwal fis sochowun, nge lupwen a fis itengau, a pwal fis säw.
PRO 18:4 Än eman aramasöch kapas ra usun chök eu lenien tipachem, ra alolol usun matau, ra fat usun kolukun eu chanpupu mi pumong.
PRO 18:5 Esap mürina ach sipwe echeni eman aramasangau ika ach sipwe arikala pwüngün kapwüng seni eman esap wor an tipis.
PRO 18:6 Än eman chon tiparoch kapas a afisätä anini, nge ren an kapas a atoto an epwe angei wichiwich.
PRO 18:7 Eman chon tiparoch a püsin feiengau ren kapasen awan, nge an kewe kapas eu sär fän äsengesin.
PRO 18:8 Än eman chon luapas kapas ra usun chök elülü mongö mi fokun annö, ra tolong leutun eman aramas.
PRO 18:9 Eman mi chipwang ngeni an angang a pwipwi ngeni eman mi atai mettoch.
PRO 18:10 Iten ewe Samol mi Lapalap a usun chök eu imw tekia mi pöchökül, ewe chon pwüng a sälong lon o küna manau.
PRO 18:11 Nge ekewe chon pisekisek ra ekieki pwe wöür a tümwünüür seni feiengau, usun chök eu tit mi tekia o pöchökül a epeti eu telinimw seni feiengau.
PRO 18:12 Eman aramas a lamalamtekia mwen feiengau epwe tori, nge tipetekison a akom mwen iteüöch.
PRO 18:13 Are eman aramas a pälüeni mwen esamwo rongorong, ina an tiparoch epwe pwal säw.
PRO 18:14 Eman aramas mi apilüköch lupwen an samau a tongeni manau. Nge are eman a apilükingau, ese tongeni pwäk.
PRO 18:15 Eman aramas mi mirit a fefeitä lon an silelap, nge eman mi tipachem a aü selingan ngeni kapasen silelap.
PRO 18:16 Än eman aramas lifang a wäsi alan pwe epwe tongeni churi ekewe aramas tekia.
PRO 18:17 Eman mi akomwen fos lon kapwüng, aramas ra ekieki pwe a pwüng tori ewe chon pälüeni a feito o pälüeni an kapas.
PRO 18:18 Pwüngün üttüt a aükätiu anini o awesi fitikoko lefilen ruoman mi pöchökül.
PRO 18:19 Eman pwipwi mi fön letipan a weires ach sipwe liapeni, lap seni ach liapeni eu telinimw mi pöchökül. Nge kapasen anini ra pöchökül usun chök pöchökülen lokkun asamen imwen king.
PRO 18:20 Eman aramas a wisen manau ren eselipäen kapasen awan.
PRO 18:21 Mine eman aramas a apasawu seni awan a eselipä ngeni, iei mine chokewe mi efich fofos repwe angei liwinin.
PRO 18:22 Eman mi küna eman pwülüan a küna eu mettoch mi mürina o angei ümöümöch me ren ewe Samol mi Lapalap.
PRO 18:23 Lupwen eman chon wöüngau a tüngor, a eäni kapas pwetete, nge eman chon wöümong a eäni kapas pälüen mi pöchökül.
PRO 18:24 Eman aramas mi chomong chiechian a tongeni fetal ngeni feiengau, nge mi wor eman chiechian a kan ngeni, lap seni wesewesen pwiin.
PRO 19:1 Eman aramas mi wöüngau, nge a wenechar, a mürina seni eman aramas mi tiparoch, nge a rikirik lon an kapas.
PRO 19:2 Esap öch pwe eman aramas epwe tiliken le föri och, nge esap wor an silelap, nge eman mi müttir le föri och epwe mwäl.
PRO 19:3 Püsin än eman aramas tiparoch a aworato an feiengau, nge mürin a tip ngeni ewe Samol mi Lapalap.
PRO 19:4 Eman aramas mi wöümong a wor chomong chiechian, nge chiechien eman mi wöüngau ra likitala.
PRO 19:5 Eman chon pwärätä mi apasatä mine a mwäl lon kapwüng epwe fokun angei liwinin an föför, nge eman mi kapas chofana esap tongeni sü seni liwinin an föför.
PRO 19:6 Chomong ra kütta cheniir me ren ekewe aramas tekia, nge meinisin ra chiechi ngeni eman mi fangafangöch.
PRO 19:7 Eman mi wöüngau a küna koput me ren pwin kana, nge epwe fen ifan me ren chiechian kewe? A kökköla mürir, nge ra chök sü seni.
PRO 19:8 Eman mi angei tipachem a echeni püsin i, nge eman mi eäni mirit epwe fefeitä.
PRO 19:9 Eman chon pwärätä mi apasatä mine a mwäl lon kapwüng epwe fokun angei liwinin an föför, nge eman mi kapas chofana epwe feiengau.
PRO 19:10 Esap öchiti eman mi tiparoch pwe epwe fokun pisekisek, nge esap fokun öchiti eman amanau pwe epwe nemeni samol.
PRO 19:11 Mirit a alisi eman aramas pwe epwe mang ngeni song, nge eman a iteüöch are esap ekieki mine eman a föri ngeni.
PRO 19:12 Än eman king lingeringer a usun chök wörüwörün eman laion, nge an ümöümöch a usun chök amurenipwin won ekewe fetil.
PRO 19:13 Eman nau mi tiparoch a atoto feiengau won saman, nge än pwülüen eman mwän souanini a usun chiin üt mi püng fochofoch.
PRO 19:14 Eman mwän a tongeni angei imwan me pisekin me won saman, nge ewe Samol mi Lapalap chök a tongeni awora eman pwülüan mi mirit.
PRO 19:15 Chipwang a eselipato möürüchou, nge eman aramas esap mochen angang epwe echik.
PRO 19:16 Eman aramas mi aleasochisi än Kot allük a tümwünü manauan, nge eman mi turunufasei an kapas epwe mäla.
PRO 19:17 Eman aramas mi kichiöch ngeni chon wöüngau a fangala ngeni ewe Samol mi Lapalap, nge i epwe liwini ngeni liwinin an föför.
PRO 19:18 Kopwe apwüngü noum ät, lupwen a chüen kükün, pwe a mecheres an epwe kaiö mirit, nge kopwe tümwünüfichi pwe kosap wichi tori an epwe mäla.
PRO 19:19 Eman aramas mi songokai epwe püsin angei liwinin. Nge are ka mochen akinamwela, epwe chök lapala an song.
PRO 19:20 Kopwe aüseling ngeni kapasen öüröür o etiwa kapasen fön, pwe kopwe tipachem lon kan fansoun repwe feito.
PRO 19:21 Eman aramas a ekiekietä chomong mettoch lon lelukan, nge mine ewe Samol mi Lapalap a apwüngala epwe fisitä.
PRO 19:22 Eman aramas a itengau ren an tipemong, nge eman mi wöüngau a mürina seni eman chon chofana.
PRO 19:23 Ach niuokusiti ewe Samol mi Lapalap a emwenikich ngeni manau. Eman mi eäni ei niuokus epwe asösö fän kinamwe, nge esap wor feiengau epwe tori.
PRO 19:24 Mi wor aramas ra kon chipwang, ra atolonga pöür lon ewe sepien mongö, ra mwo nge chipwang ar repwe uwalong ewe mongö lon awer.
PRO 19:25 Kopwe wichi eman chon turunufas, pwe ekewe chon wewemang repwe kaiö mirit. Kopwe apwüngü eman chon weweöch, pun epwe fefeitä lon an silelap.
PRO 19:26 Eman aramas mi angei wöün saman fän pöchökül o asüela inan, i eman nau mi atoto säw me itengau wor.
PRO 19:27 Nei, are kopwe ükütiu le aüselinga ekewe kapasen öüröür, mürin kopwe pwal müttir tümwününgau ngeni mine ka fen sile.
PRO 19:28 Eman chon pwarätä mi ngau a turunufasei pwüng, nge ekewe aramasangau ra efich pwüngingau.
PRO 19:29 Apwüng a molotä fän iten ekewe chon turunufas, nge wichiwich fän iten ekewe chon tiparoch.
PRO 20:1 Eman mi ünümong wain a eäni kapas turunufas, nge eman mi ün sakau mi pwichikar a arükak. Chokewe meinisin mi pulas ra tiparoch.
PRO 20:2 Än eman king lingeringer a usun chök wörüwörün eman laion, nge eman mi asonga a püsin afeiengaua manauan.
PRO 20:3 Eman aramas a iteüöch ren an esap atolonga lon fitikoko, nge ekewe chon tiparoch ra müttir anini.
PRO 20:4 Eman chon chipwang esap tuw pwül lon fansoun fich, epwe kütta anan mongö lon fansoun räs, nge esap künakün.
PRO 20:5 Ekiekin letipen eman aramas a usun chök koluk mi alolol, nge eman aramas mi weweöch a tongeni üfiretä.
PRO 20:6 Chomong aramas ra apasa usun püsin ir pwe ra eäni kirikiröch. Nge iö a tongeni küna eman mi wesewesen allükülük?
PRO 20:7 Eman mi wenechar o föri mine a pwüng, nöün kana ra feiöch.
PRO 20:8 Eman king mi mot won an lenien mot o eäni kapwüng a tongeni asila mine a ngau, lupwen a küna.
PRO 20:9 Iö a tongeni apasa, “Üa limeti lelukei, üa limöch seni ai tipis kana?”
PRO 20:10 Ewe Samol mi Lapalap a oput aramas mi eäni ruu sokun föün kilo me ruu sokun aükük.
PRO 20:11 Pwal lapalapen manauen eman semirit a pwä ren an föför, ika a limöch o pwüng lon mine a föri.
PRO 20:12 Ewe Samol mi Lapalap a föri selingach pwe sipwe tongeni rongorong, me mesach pwe sipwe tongeni künakün.
PRO 20:13 Kosap sani mömöür pwe kosap wöüngauala, kopwe nennela o angang pwe epwe wor anom mongö mi somwola.
PRO 20:14 Ewe chon kamö a lalapat fansoun meinisin pwe liwinin ewe mettoch a kon watte, nge lupwen a feila ekis, a sikesik won mine a möni pwe a kisikis liwinin.
PRO 20:15 Mi wor kolt me chomong fau aüchea, nge kapasen silelap eföü fau mi wesewesen aüchea.
PRO 20:16 Kopwe angei üfen ätewe mi pwon pwe epwe mönätiu än eman wasöla liwinimang, kopwe amwöchü pwe asisilen an pwon ngeni eman chon ekis.
PRO 20:17 Eman aramas a angei anan mongö fän atuputup a annö ngeni, nge mürin, ewe möngö epwe usun chök chari me lon awan.
PRO 20:18 Kopwe föri om akot wesin om angei öüröürom. Are kopwe feila maun, kopwe akomwen angei om öüröür.
PRO 20:19 Eman aramas mi luapas a pwärätä mine a monomon, iei mine kosap chiechi ngeni eman mi kapas chomong.
PRO 20:20 Eman aramas mi otteki saman ika inan epwe mäla usun eu lamp a kunula lupwen fansoun rochokich.
PRO 20:21 Eman aramas mi angakaii wöün me won saman esap feiöch sopolan.
PRO 20:22 Kosap apasa pwe kopwe liwini ngeni eman chappen an föför mi ngau. Kopwe witiwit ngeni ewe Samol mi Lapalap, i epwe alisuk.
PRO 20:23 Ewe Samol mi Lapalap a oput aramas mi eäni ruu sokun föün kilo, nge eu kilo mi mwäl a ngau me ren.
PRO 20:24 Ewe Samol mi Lapalap a akota än eman aramas fetal. Ifa usun än eman aramas epwe tongeni weweiti ewe al a fetal won?
PRO 20:25 Kopwe ekiekifichi me mwen om kopwe pwon ngeni Kot och asor. A tongeni fis pwe kopwe liamam me mürin.
PRO 20:26 Eman king mi tipachem a tongeni asila iö a föri mine a ngau. Epwe apwüngü ekewe aramasangau, nge esap eäni tong.
PRO 20:27 Ngünün eman aramas a usun chök eu lamp seni ewe Samol mi Lapalap, a atittina minen leutuch meinisin.
PRO 20:28 Eman king epwe nonom lon wisan lon ükükün fansoun a nemenem fän wenechar, pwüng me kirikiröch.
PRO 20:29 Aramas ra ingeiti pöchökülen alüal o meniniti ekewe mi pwechepwech mökürer.
PRO 20:30 Wichiwich me kinas ra limetawu mine a ngau, nge kawet a limeti minen leutuch.
PRO 21:1 Leluken eman king a nom lepöün ewe Samol mi Lapalap. A emwenifetalei usun chök an afetala eu chanpupu ia a mochen afetalala ie.
PRO 21:2 Eman aramas a ekieki pwe an föför a pwüng, nge ewe Samol mi Lapalap a atittina ekiekin lelukan.
PRO 21:3 Ewe Samol mi Lapalap a efich pwüng me pwüngüöch lap seni asor.
PRO 21:4 Meselamalamtekia me tipelamalamtekia ekei sokun föför ekewe aramasangau ra tipis ren.
PRO 21:5 Aramas mi akota ar angang o achocho le föri repwe pisekisek, nge chokewe mi chök müttir föri ar angang, nge resap akota me mwan, repwe wöüngau.
PRO 21:6 Pisek aüchea eman a angei ren an kapas chofana a usun chök ötüöt mi ässila, pwal usun chök eu särin mäla.
PRO 21:7 Än ekewe aramasangau angangen mwänewüs a püsin afeiengaueer, pun resap mochen föri mine a pwüng.
PRO 21:8 Ekewe chon tipis ra fetal won efoch al mi pwor, nge chokewe esap wor ar tipis ra föri mine a pwüng.
PRO 21:9 Än eman nonom lepwokukun ungen eu imw a mürina seni an epwe nom lon ei imw ren eman fefin mi lalapat.
PRO 21:10 Ekewe aramasangau ra chök mochen föri mine a ngau, resap eäni tong ngeni chon arur.
PRO 21:11 Lupwen eman chon turunufas a angei liwinin an föför, ekewe chon wewemang ra tipachemela. Nge lupwen eman chon tipachem a angei an öüröür, a fefeitä lon an silelap.
PRO 21:12 Kot ewe mi pwüng a silei mine a fis lon imwen ekewe aramasangau, epwe awarato feiengau wor.
PRO 21:13 Eman mi pinei selingan seni än ekewe chon wöüngau siö epwe püsin siö, nge esap wor eman epwe rongorong.
PRO 21:14 Eu lifang eman a fangala lemonomon a amasösöü song, nge eu lifangen amichimich mi fis lemonomon a amasösöü lingeringer.
PRO 21:15 Ekewe chon pwüng ra pwapwa lupwen pwüng a fisitä, nge chokewe mi föri mine a ngau ra rükö.
PRO 21:16 Eman aramas mi likitala mirit epwe nom lein chon mäla.
PRO 21:17 Eman mi sani ekewe pwapwan fanüfan epwe chök eman chon wöüngau, nge ätewe mi sani wain me löpokus esap pisekisek.
PRO 21:18 Mine ekewe aramasangau ra ekiekin ariaföüü ngeni ekewe chon pwüng epwe püsin küür.
PRO 21:19 Än eman aramas nonom lon fanüapö a mürina seni an epwe nom ren eman fefin mi lalapat me nisosong.
PRO 21:20 Lon imwen chon tipachem a wor pisek mi aüchea me löpokus, nge ekewe chon tiparoch ra fangesoroula pisekir.
PRO 21:21 Eman mi eäni pwüng me kirikiröch epwe manauatam, epwe küna pwüng me iteüöch.
PRO 21:22 Eman meilapen sounfiu mi tipachem a töpworalong lon telinimwen ekewe chon pwora o ataetiu ewe leni mi pöchökül ra anomu ar apilükülük won.
PRO 21:23 Eman mi tümwünü kapasen awan a tümwünü inisin seni osukosuk.
PRO 21:24 Eman aramas mi lamalamtekia me sikesik, itan chon turunufas, i ätewe mi föri an föför fän lamalamtekia.
PRO 21:25 Än eman aramas chipwang le angang a eselipa ngeni mäla.
PRO 21:26 Eman chon chipwang a chök ekieki fansoun meinisin met epwe wor ren, nge ewe chon pwüng a fangala, nge esap kichingau.
PRO 21:27 Ewe Samol mi Lapalap a oput än eman aramasangau asor, nge a lapala an oput, lupwen a uwato an asor fän iten och ekiek mi ngau.
PRO 21:28 Eman chon pwärätä mi chofana epwe feiengau. Nge eman aramas mi aüselingafichi epwe eäni kapas wenechar iteiten fansoun.
PRO 21:29 Eman aramasangau a wopwora, nge eman aramas mi wenechar a ekieköchü usun mine epwe föri.
PRO 21:30 Än aramas tipachem, mirit me kapasen öüröür resap tongeni üpalü ngeni ewe Samol mi Lapalap.
PRO 21:31 Aramas ra tongeni amolätä oris fän iten maun, nge win a feito seni ewe Samol mi Lapalap.
PRO 22:1 Kopwe filätä iteüöch lap seni wöümong, pun än aramas aücheanikich a mürina seni silifer ika kolt.
PRO 22:2 Ekewe chon pisekisek me ekewe chon wöüngau ra wewefengen lon ei lapalap, pwe ewe Samol mi Lapalap a föriir meinisin.
PRO 22:3 Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.
PRO 22:4 Wöü me iteüöch me manauatam, iei ewe liwin fän iten eman mi tipetekison o niuokusiti ewe Samol mi Lapalap.
PRO 22:5 Lon alen ekewe aramasangau a wor iräfölüföl me sär, nge eman mi tümwünü manauan epwe toau seniir.
PRO 22:6 Kopwe akaiti ngeni eman semirit usun mine epwe föri lon manauan, pun lupwen epwe chinlap, esap likitala mine a kaiö.
PRO 22:7 Ekewe chon pisekisek ra nemeni ekewe chon wöüngau, nge ewe chon paaro i nöün ewe chon mwütätä amanau.
PRO 22:8 Eman mi fotuki pwüngingau epwe kini feiengau, nge an ariaföüü aramas epwe müchüla.
PRO 22:9 Eman mi eäni kirikiröch epwe feiöch, pun a ineti anan mongö ngeni ekewe chon wöüngau.
PRO 22:10 Kopwe asüela eman chon turunufas, mürin esap chüen fis fitikoko, anini me kapasingau.
PRO 22:11 Eman mi eäni eu leluk mi limöch o eäni kapas pwetete, ewe king epwe chiechi ngeni.
PRO 22:12 Ewe Samol mi Lapalap a tümwünü chon silelap, nge a atai än chon chofana kapas.
PRO 22:13 Ewe chon chipwang a apasa, “A wor eman laion lükün imwei, a tongeni fis pwe üpwe mäla won ewe al.”
PRO 22:14 Än eman fin lisowu kapas ra usun chök eu pwang mi alolol, ätewe ewe Samol mi Lapalap a song ngeni epwe turulong lon.
PRO 22:15 Semirit ra chök föri föförün chon tiparoch, nge lupwen ra angei wichiwich, repwe kaiö mine a öch.
PRO 22:16 Eman mi ariaföüü ekewe chon wöüngau pwe epwe awatteloi wöün ika fangala lifang ngeni ekewe chon pisekisek, epwe chök wöüngauala.
PRO 22:17 Kopwe aü selingom o rongorong, pun üpwe aiti ngonuk än ekewe chon tipachem kapas. Kopwe kaiö ngeni ar kewe kapasen kait.
PRO 22:18 Pun kopwe pwapwa ren om kopwe amwöchüür lon lelukom o molotä ngeni om kopwe apaserewu.
PRO 22:19 Üa mochen pwe kopwe anomu om apilükülük won ewe Samol mi Lapalap, iei mine üa asile ngonuk ekei kapas ikenai.
PRO 22:20 Üa maketiu fän itom ilik mwiitun mi masou ren kapasen öüröür me silelap.
PRO 22:21 Repwe aiti ngonuk mine a pwüng o let, pwe kopwe tongeni atowu pälüöchün ekewe kapas ngeni chokewe mi tinukela.
PRO 22:22 Kosap angei pisek seni eman chon wöüngau, pokiten i a wöüngau, kosap pwal ariaföüü ewe chon mwelele lon kapwüng,
PRO 22:23 pun ewe Samol mi Lapalap epwe peniir o ariaföüü chokewe mi ariaföüür.
PRO 22:24 Kosap chiechi ngeni eman aramas mi songokai, kosap pwal eti eman mi lingeringerikai,
PRO 22:25 pwe kosap kaiö lapalapan o püsin afeiengauok.
PRO 22:26 Kosap pwon pwe kopwe mönätiu än eman liwinimang.
PRO 22:27 Pun are esap wor mine kopwe liwini ngeni, repwe mwo nge angei senuk kiom.
PRO 22:28 Kosap amwökütü kiännin eu fanü om kewe lewo ra fen förätiu me lomlom.
PRO 22:29 Ka silei eman aramas mi sipeöch lon an angang? Ätewe epwe angang ngeni ewe king, nge esap angang ngeni aramas kis.
PRO 23:1 Are ka mot ngeni mongö ren eman samol, kopwe ekiekifichi mine a nom me mwom.
PRO 23:2 Are en eman mi mongömong, kopwe fokun atitini mine kopwe eni.
PRO 23:3 Kosap mochenia ngeni anan mongö mi fokun annö, pun ena sokun mongö a tongeni atupuk ren.
PRO 23:4 Kosap angang weires fän iten om kopwe wöümongola, kopwe aea om tipachem o emwen seni.
PRO 23:5 Lupwen ka kärän nengeni woumw, ese chüen nom. Pun a müttir sü usun chök a angei pöükässin o ässitä läng usun eman ikel.
PRO 23:6 Kosap mongö enen eman aramas mi kichingau. Kosap mochenia ngeni anan mongö mi fokun annö.
PRO 23:7 Pun i ewe sokun aramas mi chök ekieki usun liwin. A ürenuk, “Kopwe chök mongö o ün,” nge lon lelukan esap wenechar ngonuk.
PRO 23:8 Kopwe musäsini ewe mongö ka fen eni, nge om kewe kapasen kilisou repwe lomotongau.
PRO 23:9 Kosap fos ngeni eman chon tiparoch, pun esap aücheani om kewe kapasen tipachem.
PRO 23:10 Kosap amwökütü ekewe kiä minen lomlom ika tolong lon fanüen ekewe mi mäsen.
PRO 23:11 Pun ewe Samol mi Lapalap ar chon alisi mi pöchökül epwe peniir o ü ngonuk.
PRO 23:12 Kopwe suki lelukom ngeni ekewe kapasen öüröür o aü selingom ngeni ekewe kapasen silelap.
PRO 23:13 Kosap tipemwaramwar le apwüngü noum. Are ka wichi ngeni efoch wok, esap mäla.
PRO 23:14 Are ka wichi ngeni efoch wok, ka tongeni amanaua manauan seni mäla.
PRO 23:15 Nei, are kopwe mirit, üpwe fokun pwapwa.
PRO 23:16 Lelukei epwe mwänek, are ka apasa kapas mi pwüng.
PRO 23:17 Kosap lolowoiti ekewe chon tipis, nge kopwe chök achocho lon om niuokusiti ewe Samol mi Lapalap fansoun meinisin.
PRO 23:18 Pun ellet epwe wor om apilükülük lon fansoun mwom, nge kosap lichipüng lon om apilükülüköch.
PRO 23:19 Nei, kopwe aüseling o miritila, kopwe ekieki usun om kopwe föri mine a pwüng.
PRO 23:20 Kosap chiechi ngeni ekewe mi ünümong wain ika ekewe mi ochomong fituk,
PRO 23:21 pun ekewe chon ünüpuch me ekewe chon mongömong repwe wöüngauala, nge eman a chök mongö o annut epwe üföüf üf mi kamwakam.
PRO 23:22 Nei, kopwe aüselinga alon semom, ätewe ka up seni, nge kosap aücheangaua inelapom, lupwen a chinlap.
PRO 23:23 Kopwe kamö let, nge kosap amömöla. Kopwe kamö tipachem, kapasen öüröür me weweöch.
PRO 23:24 Semen eman chon pwüng epwe fokun meseik, nge eman mi nöüni eman ät mi tipachem epwe pwapwa ren.
PRO 23:25 Kopwe föri mine semom me inom repwe pwapwa ren, amwo neminewe mi nöünuk epwe meseik reöm.
PRO 23:26 Nei, kopwe fokun aüselingaei o apirüei lon ai föför.
PRO 23:27 Pun eman fefin mi amömö inisin fän iten lisowu a wewe ngeni eu pwang mi alolol, nge eman fin lüangau a wewe ngeni eu chönüttu mi wäkükün lon.
PRO 23:28 Neminewe a operi mwän usun eman chon solä o alapala iteiten chokewe mi kirikiringau ngeni pwülüer.
PRO 23:29 Iö a osupwang? Iö a lolilen? Iö a afisätä fitikoko? Iö a lalapat? Iö a kinas, nge esap wor popun? Iö a parapar lon mesan?
PRO 23:30 Chokewe mi momototam le ün wain, chokewe mi chök kükütta ünümer wain mi nofit.
PRO 23:31 Kosap tup ren ewe wain mi parapar, lupwen a puropur lon ewe kap, a mecheres ngeni om kopwe ün.
PRO 23:32 Iwe, lesopolan om ün, epwe pwichipwich leutum usun pwichipwichin küwen eman serepenit mi poison.
PRO 23:33 Mesom epwe nenengeni mettoch mi mwäl, om ekiek me fos esap fat.
PRO 23:34 Kopwe usun chök eman mi nom lukalapen matau, a mailölö o chuwenewenfeil usun chök eman mi nom letonen efoch aü.
PRO 23:35 Kopwe apasa, “Ra wichiei, nge üsap kinas. Ra awataei, nge üsap mefi. Inet üpwe nennela? Mürin üpwe pwal ünsefäl.”
PRO 24:1 Kosap lolowoiti aramas mi ngau ika älälei om mochen chiechi ngeniir,
PRO 24:2 pun ra chök ekiekietä usun föförün mwänewüs, kapasen awer a afisätä osukosuk.
PRO 24:3 Eu imw a kaütä ren tipachem o nükünük ren mirit,
PRO 24:4 nge ia a wor silelap ie, ekewe rumwen lon ra ur ren sokopaten pisek mi aüchea me mürina.
PRO 24:5 Eman aramas mi tipachem a wor an manaman, nge eman aramas mi silelap a fokun wor an pöchökül.
PRO 24:6 Kopwe akomwen föri om akot me mwen om kopwe feila ngeni maun, nge ia a wor chomong chon öüröür ie, a wor win.
PRO 24:7 Kapasen tipachem ra kon tekia ngeni eman chon tiparoch, esap wor och mine a tongeni apasa lon mwichen pwüngüpwüng.
PRO 24:8 Eman mi ekiekietä mine a ngau epwe iteni chon afisätä rawangau.
PRO 24:9 Mine eman chon tiparoch a ekiekietä iei tipis, nge aramas ra oput eman mi turunufasei chon arun.
PRO 24:10 Are ka apilükingau lon fansoun riaföü, om pöchökül a kisikis.
PRO 24:11 Kopwe amanaua chokewe ra nukunuk ngeni mäla. Kopwe amwöchü chokewe mi äpäp ngeni ar repwe ninnila.
PRO 24:12 Are ka apasa pwe kosap silei usun ei lapalap, ifa usun, ewe mi atittina leluken aramas esap küna? Ifa usun, ewe mi mamasok esap silei? I epwe liwini ngeni eman me eman aramas ükükün liwinin an föför.
PRO 24:13 Nei, kopwe ün chönün chunen, pun a annö. Nge usun supun ewe fasen chunen a arar ngonuk,
PRO 24:14 iei usun kopwe silei pwe tipachem epwe mürina ngonuk. Are ka küna tipachem, epwe wor om apilüköch ngeni ewe fansoun mwom, nge kosap lichipüng lon om apilükülüköch.
PRO 24:15 Kosap operi imwen ewe chon pwüng usun eman aramasangau, kosap pwal tolong lon o angei pisekin fän pöchökül.
PRO 24:16 Pun inamwo ika eman chon pwüng a turula fän fisu, a chök pwätäsefäl. Nge feiengau epwe tori ekewe aramasangau.
PRO 24:17 Kosap meseik ren chon oputom, lupwen a tolong lon feiengau, kosap pwal pwapwa, lupwen a chepetek.
PRO 24:18 Pun ewe Samol mi Lapalap epwe küna o oput ei lapalap, epwe pwal asepa an song seni ätewe.
PRO 24:19 Kosap öürek pokiten ekewe chon föföringau, kosap pwal lolowo ngeni ekewe aramasangau.
PRO 24:20 Pun ekewe chon föföringau esap wor ar apilüköch ngeni ewe fansoun mwer, nge manauen ekewe aramasangau epwe müchüla.
PRO 24:21 Nei kopwe niuokusiti ewe Samol mi Lapalap o asamolu ewe king, nge kosap chiechi ngeni chokewe mi ü ngeniir.
PRO 24:22 Pun feiengau epwe müttir toriir. Nge iö a tongeni silei ewe mäfeiengau epwe feito seni Kot me ewe king?
PRO 24:23 Ikkei pwal ekoch mwiitun seni ekewe mi tipachem: A ngau ngeni eman soukapwüng an epwe lifilifil aramas lon kapwüng.
PRO 24:24 Are a apasa ngeni ewe chon tipis pwe esap wor an tipis, ekewe aramas meinisin repwe otteki o oputa.
PRO 24:25 Nge ekewe soukapwüng mi apwüngü ekewe chon tipis repwe fefeitä o iteüöch.
PRO 24:26 Eman mi pälüeni chienan fän wenechar, iei asisilen ar pwipwiöchfengen fän let.
PRO 24:27 Kopwe akomwen amolätä o fotuki om kewe tanipi, pwe epwe wor mine kopwe manau seni, mürin na kopwap aüetä imwom o popuetä eu famili.
PRO 24:28 Kosap pwärätä mettoch mi ngau usun chon arum nge esap wor popun, kosap pwal apasa kapas atuputup usun.
PRO 24:29 Kosap apasa, “Ngang üpwe föri ngeni ewe aramas usun mine a föri ngeniei. Üpwe liwini ngeni won ükükün mine a föri ngeniei.”
PRO 24:30 Üa fetal ünükün än eman chon chipwang tanipi, üa fetal ünükün eu tanipin wain än eman aramas esap wor an mirit.
PRO 24:31 Iwe, üa küna pwe ewe tanipi a kula ren iräfölüföl, ewe pwül a pwölüla ren pötöwölingau, nge tittin we tittin fau a sönüla.
PRO 24:32 Lupwen üa nenengeni ei, üa ekieki usun o kaiö eu lesen seni:
PRO 24:33 Ekis möür, ekis ächikichik, ekis kumwuchufengeni pau o asösö.
PRO 24:34 Nge lupwen ka möür, wöüngau me osupwang repwe toruk usun eman chon solä a feito fän an pisekin afeiengau.
PRO 25:1 Pwal ikkei ekoch mwiitun seni Salomon, ekewe chon angang nöün Hiskia ewe kingen Juta ra apirü.
PRO 25:2 Iei iteüöchün Kot pwe a amonala mettoch, nge iteüöchün ekewe king pwe ra küttaöchü ar repwe weweiti mettoch.
PRO 25:3 Sisap tongeni silei tekian ekewe läng me alololun fanüfan, iei usun sisap pwal tongeni silei ekiekin letipen ewe king.
PRO 25:4 Kopwe limeti ewe limengau seni ewe silifer, mürin epwe wor mine ewe chon föri pisek seni silifer epwe aea le föri eu sepi.
PRO 25:5 Kopwe asüela ekewe aramasangau seni fän mesen ewe king, mürin mwün epwe nüküchar fän pwüng.
PRO 25:6 Kosap püsin atekiokotä fän mesen ewe king ika tolong lon lenien ekewe mi lap.
PRO 25:7 Pun a mürina än eman epwe ürenuk, “Kopwe mot pekitä,” lap seni än eman epwe amotok fan me fän mesen eman aramas tekia.
PRO 25:8 Kosap müttir uwalong lon kapwüng mine mesom a küna. Pun met kopwe föri lesopolan, lupwen chon arum a pwärätä pwe ka mwäl.
PRO 25:9 Kopwe aför ngeni püsin chon arum won osukosuken lefilemi, nge kosap pwärawu mine a monomon ren eman.
PRO 25:10 Pun are ka pwärawu, om säw me itengau esap müchüla, lupwen aramas ra rongorong pwe ka pwärawu mine a monomon.
PRO 25:11 Eu kapas eman a apasa lon fansoun fich a usun chök ekewe föün ringo mi oleol usun kolt mi nom lon eu sepi seni silifer.
PRO 25:12 Eu kapasen fön seni eman mi mirit ngeni eman mi mochen aüselinga a usun chök efoch ring seni kolt ika usun eu fout seni kolt mi fokun mürina.
PRO 25:13 Eman chon künö mi allükülük a akinamwei ätewe mi tini, usun chök koluk mi patapat a akinamwei eman, lupwen a pwichikar lon fansoun kinikin.
PRO 25:14 Eman mwän mi pwon pwe epwe fangala och, nge esap föri, a usun chök kuchu me asepwäl, nge esap pwüng üt.
PRO 25:15 Eman samol a tongeni tup ren än eman mi tipepos kapas, nge kapas pwetete ra tongeni ataela än eman ü ngenikich.
PRO 25:16 Are ka küna chönün chunen, kopwe chök ün ükükün mine a tufich ngonuk, pun are ka kon mötüla ren, kopwe musäsinawu.
PRO 25:17 Kosap feila fän chomong lon imwen chon arum, pwe esap osukosuk reöm o oputok.
PRO 25:18 Eman aramas mi eäni kapas chofana usun chon arun a usun chök efoch nifötüföt, ika efoch ketilas, ika efoch föün esefich mi ken.
PRO 25:19 Ach apilükülükü eman aramas, esap allükülük lon fansoun osukosuk, a usun chök efoch ngi man ra eni, ika efoch peche mi ter.
PRO 25:20 Eman aramas mi köl ngeni eman mi weires letipan a usun chök eman mi angei seni üfan lon fansoun patapat, pwal usun eman mi uwalong salt lon eu kinas.
PRO 25:21 Are chon oputom a echik, kopwe amongöü, nge are a kaka, kopwe aünü,
PRO 25:22 pun are ka föri iei usun, säw epwe küri usun ekkei a kürikich, nge ewe Samol mi Lapalap epwe ngonuk liwinin.
PRO 25:23 Usun asepwälin efeng a atoto üt, ina usun luapas a atoto wowongau.
PRO 25:24 Än eman nom lepwokukun ungen eu imw a mürina seni an epwe nom lon eu imw ren eman fefin mi lalapat.
PRO 25:25 Eu pworaus mi mürina seni eu fanü toau a usun chök koluk mi patapat ngeni eman mi kaka.
PRO 25:26 Eman chon pwüng mi tipeeu ngeni eman aramasangau a usun chök eu chönüttu mi pwakak lon, ika eu puächen koluk mi limengau.
PRO 25:27 Esap öch om kopwe ünümi chomong chönün chunen, esap pwal öch om kopwe püsin kütta watten iteüöchum.
PRO 25:28 Eman aramas esap tongeni püsin nemeni letipan a usun chök eu telinimw mi tala esap wor tittin.
PRO 26:1 Sno esap öchiti lon fansoun pwichikar, ika püngün üt esap öchiti lon fansoun kinikin, iei usun iteüöch esap öchiti eman chon tiparoch.
PRO 26:2 Usun eman nichok ika eman ekiek ra äkkäs, iei usun ekewe kapasen anümamau repwe ässila senuk, are kosap tipis.
PRO 26:3 Epwe wor efoch wichiwich seni silin man mi ken fän iten eman oris, efoch mächä fän iten lon awen eman aas, pwal efoch wokun wichiwich fän iten lükisökürün ekewe chon tiparoch.
PRO 26:4 Kosap pälüeni eman chon tiparoch lon fosun umwes, pwe kosap wewe ngeni lon an tiparoch.
PRO 26:5 Nge kopwe pälüeni eman chon tiparoch lon ükükün an tiparoch, pwe esap ekieki pwe a tipachem.
PRO 26:6 Eman mi tinngeni eman chon tiparoch eu pworaus a usun chök pwe a püsin pökü pechen o atolonga lon feiengau.
PRO 26:7 Eu fosun mwiitun seni lon awen eman chon tiparoch a usun chök eman mi mä pechen, esap wor lomotan.
PRO 26:8 Eman mi asamolu eman chon tiparoch a wewe ngeni eman mi rietä eföü fau ngeni an aülün.
PRO 26:9 Eman chon tiparoch mi eäni eu fosun mwiitun a usun chök eman chon sakau a weires le üttawu efoch fölün irä lon pöün.
PRO 26:10 Eman aramas mi möni eman chon tiparoch ika eman chon sakau pwe epwe angang ngeni a usun chök eman chon likapich mi akinasa meinisin mi pwerela ünükün.
PRO 26:11 Eman chon tiparoch mi liwiniti an föförün tiparoch a usun chök eman kolak mi enisefäli musan.
PRO 26:12 Ka küna eman mwän mi ikeetä pwe a tipachem? A wor watten apilükülük fän iten eman chon tiparoch lap seni ätewe mi püsin ikeetä.
PRO 26:13 Eman chon chipwang a apasa, “Mi wor eman laion won ewe al, mi wor eman laion mi rochongau won ekewe alelap.”
PRO 26:14 Usun eu asam a kul won insesin, iei usun eman chon chipwang a kul won an peet.
PRO 26:15 Mi wor aramas ra kon chipwang, ra atolonga pöür lon eu sepien mongö, ra mwo nge chipwang ar repwe uwalong ewe mongö lon awer.
PRO 26:16 Eman chon chipwang a püsin ikeetä pwe a tipachem lap seni füman aramas mi tongeni pälüeni kapas ais fän mirit.
PRO 26:17 Eman mi fosolong lon eu anini, nge esap fän itan, a usun chök eman mi fetal won al o turufi selingen eman kolak.
PRO 26:18 Eman mi atupu chon arun, mürin a apasa pwe a chök urumot,
PRO 26:19 a usun chök eman mi fokun umwes, a urumot won pisekin afeiengau.
PRO 26:20 Are esap wor mwüchün eu ekkei, ewe ekkei a kunula. Nge are esap wor eman mi luapas, anini a ükütiu.
PRO 26:21 Usun mooch a sarara me amwüch a angetengeta ekkei, iei usun eman mwän mi souanini a afisätä fitikoko.
PRO 26:22 Än eman chon luapas kapas ra usun chök mongö mi annö, ra tolong leutun eman aramas.
PRO 26:23 Kapasen tinaw mi motoutou me eu leluk mi ngau ra usun chök motoutoun me misin lükün eu sepi mi för seni pwül.
PRO 26:24 Eman mi oput aramas a eäni kapasen amichimich o amwöchü ekiekin atuputup lon lelukan.
PRO 26:25 Lupwen a eäni kapasöch ngonuk, kosap lükü, pun lelukan a urela ren ekiek mi anioput.
PRO 26:26 Inamwo ika an oput aramas a pwölüla ren an kapas atuputup, nge an föför mi ngau epwe pwäla lein aramas meinisin.
PRO 26:27 Eman mi tuw eu pwang epwe püsin turutiu lon. Nge eman mi amwökütükütü eföü fau, ewe fau epwe püsin söküniti.
PRO 26:28 Eman mi eäni kapas chofana a oput chokewe a ariaföüür, nge kapas motoutou ra chök afisätä feiengau.
PRO 27:1 Kosap sikesik usun lesor, pun kosap silei mine ewe rän epwe atoto.
PRO 27:2 A öch eman epwe mwareituk, ika eman chon ekis, nge sap püsin en.
PRO 27:3 Eföü fau a chou, pwal pi, nge ach osukosuk ren eman chon tiparoch a chou seni ekewe ruu mettoch.
PRO 27:4 Song a fokun ngau, nge lingeringer a usun chök eu noter. Nge lolowo a fokun afeiengau seniir.
PRO 27:5 A mürina om kopwe apwüngü eman le pwäpwäla lap seni om kopwe tongei eman, nge kosap pwäri ngeni.
PRO 27:6 Atongeom a ekieki om feiöch, inamwo are a akinasok. Nge än chon oputom mitiruk esap let.
PRO 27:7 Eman mi fokun möt a oput chönün chunen, nge mongö mi kipwin a annö me ren eman mi echik.
PRO 27:8 Eman aramas mi towu seni lenian a usun eman machang mi sü seni fasan.
PRO 27:9 Noppuk me löpokus ra apwapwai leluken aramas, nge osukosuk a atai kinamwen aramas.
PRO 27:10 Kosap likitala chiechiom me chiechien semelapom, nge kosap feila lon imwen pwiüm lon ränin om feiengau. Eman chon arum mi kan ngonuk a tongeni alisuk, lap seni eman pwiüm mi toau senuk.
PRO 27:11 Nei, kopwe tipachem o apwapwai lelukei, pwe üpwe tongeni pälüeni ätewe mi aitengauaei.
PRO 27:12 Eman aramas mi mirit a küna ewe feiengau mi feito o opola, nge ekewe chon wewemang ra chök feilong lon o feiengau.
PRO 27:13 Kopwe angei üfen ätewe mi pwon pwe epwe mönätiu än eman wasöla liwinimang o amwöchü pwe asisilen an pwon ngeni eman chon ekis.
PRO 27:14 Eman mi älälei chon arun fän leüömong pwe epwe feiöch lupwen an pwätä lesosorusich a usun chök pwe a otteki.
PRO 27:15 Eman fefin mi lalapat a usun chök chiin üt mi püng fochofoch lupwen fansoun räningau.
PRO 27:16 Om kopwe aükätiu än neminewe lal a usun chök om kopwe aükätiu asepwäl, ika om kopwe kumwuchuw noppuk lon poum.
PRO 27:17 Mächä a akeni mächä, iei usun eman aramas a tongeni aöchüela pwal eman.
PRO 27:18 Eman mi tümwünü efoch irä fiik epwe mongö seni uan, nge eman chon angang mi tümwünü an samol epwe küna iteüöch.
PRO 27:19 Ngünüen won mesom me lon koluk a nönnöfengen me won mesom, iei usun leluken eman aramas a pwärala usun püsin i.
PRO 27:20 Ewe lenien sotup me ewe leni mi alolol resap fokun menemenöch, pwal ina usun aramas resap menemenöch.
PRO 27:21 Usun silifer me kolt a pwä öchün lon ewe lenien ketel, iei usun a pwä lapalapen eman aramas, lupwen eman a mwareiti.
PRO 27:22 Are kopwe wichi eman mi tiparoch tori a arap ngeni mäla, iei mwo nge an tiparoch esap towu seni.
PRO 27:23 Kopwe mamasaöchü o tümwünüöchü noum pwiin sip me kow,
PRO 27:24 pun wöü esap nonom tori feilfeilachök. Pwal ekewe mwü resap nonomola tori ekewe täppin aramas meinisin.
PRO 27:25 Are ewe fetil a itela, a pwal pwükütä fetil mi fö, are ekewe fetilipwas mi nom won ekewe chukuchukutä ra ioifengen,
PRO 27:26 mürin epwe wor ülöülen sip fän iten üfom, epwe pwal wor moni seni ekewe kuuch fän iten om kopwe möni eu fanü,
PRO 27:27 epwe pwal naf milik seni ekewe kuuch fän iten ünümemi me chon leimwom, pwal fän iten ünümen noum chon angang fefin.
PRO 28:1 Ekewe aramasangau ra sü, lupwen esap wor eman a tapweriir, nge ekewe chon pwüng ra pwora usun eman laion.
PRO 28:2 Are chon eu mwü ra tipis, epwe wor siwilikisin nöür sounemenem. Nge eu mwü epwe nüküchar o nonomotam, are mi wor aramas mi mirit o tipachem ra nemenem lon.
PRO 28:3 Eman aramas mi wor manan, a ariaföüü ekewe chon mwelele, a usun chök eu üt mi püngüchou, a atai uän irä.
PRO 28:4 Chokewe mi aleasolap ngeni ekewe allük ra mwareiti ekewe aramasangau, nge chokewe mi aleasochisi ekewe allük ra ü ngeniir.
PRO 28:5 Aramas mi ngau resap weweiti pwüng, nge chokewe mi niuokusiti ewe Samol mi Lapalap ra unusen weweiti.
PRO 28:6 Eman chon wöüngau mi wenechar a mürina seni eman chon wöümong mi manau rikirik.
PRO 28:7 Eman mi aleasochisi ekewe allük i eman nau mi tipachem, nge eman mi chiechi ngeni chon mongömong a aitengaua saman.
PRO 28:8 Eman mi awattela wöün ren an angei manauan me winnan, a ionifengeni wöün fän iten ätewe mi kirikiröch ngeni chon wöüngau.
PRO 28:9 Are eman esap aleasochisi ekewe allük, Kot epwe oput an iotek.
PRO 28:10 Eman mi emweningaua ekewe chon wenechar ngeni mine a ngau epwe turulong lon ewe pwang a püsin tuw, nge chokewe esap wor ar tipis repwe angei feiöch.
PRO 28:11 Eman aramas mi pisekisek a püsin ikeetä pwe a tipachem, nge eman chon wöüngau mi mirit a silei pwe ewe chon pisekisek esap iei usun.
PRO 28:12 Lupwen ekewe chon pwüng ra nemenem, a lapalap än ekewe aramas pwapwa, nge lupwen ekewe aramasangau ra nemenem, aramas ra opola.
PRO 28:13 Eman aramas mi aopala an tipis esap fefeitä lon manauan, nge eman mi pwärätä o likitala, Kot epwe ümöümöch ngeni.
PRO 28:14 Feiöchün eman aramas mi niuokusiti ewe Samol mi Lapalap fansoun meinisin, nge ätewe mi ülöförea lelukan epwe tolong lon feiengau.
PRO 28:15 Eman sounemenem mi ngau mi nemeni chon wöüngau a usun chök eman laion mi wörüwör, ika eman pear mi cheri liapan.
PRO 28:16 Eman sounemenem mi ngau esap wor an mirit a ariaföüü aramas, nge ätewe mi oput an epwe angei winnan fän pwüngingau epwe manauatam.
PRO 28:17 Eman aramas mi nimanauei eman, i epwe süsüfeil tori ränin an mäla. Esap wor eman epwe alisi.
PRO 28:18 Eman mi wenechar esap tolong lon feiengau, nge eman mi manau rikirik epwe tolong lon feiengau.
PRO 28:19 Eman mi angang won fanüan epwe wor chomong anan mongö, nge eman mi föri sokopaten angang mi lomotongau epwe watte an wöüngau.
PRO 28:20 Eman aramas mi allükülük epwe wor an feiöch mi somwola, nge eman mi amüttiri an epwe pisekisek epwe küna apwüng.
PRO 28:21 Esap mürina ach sipwe lifilifil aramas, nge fän iten essät pilawa eman aramas a tongeni föri mine esepwüng.
PRO 28:22 Eman aramas mi tipemong a mochen müttir küna pisekisek, nge esap silei pwe wöüngau epwe tori.
PRO 28:23 Eman aramas epwe kilisou ngeni ewe mi apwüngü, lap seni ewe mi eäni kapas amichimich ngeni.
PRO 28:24 Eman mi soläni mettoch seni saman ika inan o ekieki pwe esap tipis, i a wewe ngeni eman chon solä.
PRO 28:25 Eman aramas mi tipemong a afisätä fitikoko, nge eman mi apilükülükü ewe Samol mi Lapalap epwe wöümongola.
PRO 28:26 Eman mi püsin apilükülükü, i eman chon tiparoch, nge eman mi apwönüetä än ekewe chon tipachem öüröür epwe manau.
PRO 28:27 Eman mi fang ngeni ekewe chon wöüngau esap osupwang, nge eman mi amona mesan seniir, aramas repwe chök otteki.
PRO 28:28 Lupwen ekewe aramasangau ra nemenem, aramas ra opola, nge lupwen ra tur seni wiser, ekewe chon pwüng ra nemenem.
PRO 29:1 Eman mi angei apwüng fän chomong, nge a chök tipeförea, epwe müttir fisikai an feiengau, nge esap chüen chikarsefäl.
PRO 29:2 Lupwen ekewe chon pwüng ra nemenem, ekewe aramas ra mwänek, nge lupwen ekewe aramasangau ra nemenem, ekewe aramas ra ngüngü.
PRO 29:3 Eman mi aücheani tipachem a apwapwai saman, nge eman mi chiechi ngeni fefin mi amömö inisir fän iten lisowu a fangesoroula wöün.
PRO 29:4 Eman king a anüküchara mwün ren an eäni pwüng, nge ätewe mi angei lifangen amichimich epwe ataela.
PRO 29:5 Eman aramas mi eäni kapas amichimich ngeni chon arun a ameresala eu cheew fän iten püsin pechen.
PRO 29:6 Eman aramas mi ngau a fif lon püsin an tipis, nge eman aramas mi pwüng a köl o mwänek.
PRO 29:7 Eman chon pwüng a ekieki met ekewe chon mwelele repwe eäni pwüng ren, nge eman aramasangau esap ekieki usun ei.
PRO 29:8 Chon turunufas ra afitikokoi chon eu telinimw, nge aramas mi tipachem ra akinamwela song.
PRO 29:9 Are eman aramas mi tipachem a anini ngeni eman mi tiparoch, ewe mi tiparoch a chök song ika takir, nge esap wor kinamwe.
PRO 29:10 Aramas mi mochen niela aramas ra oput eman esap wor an tipis o kütta met repwe niela ekewe chon pwüng ren.
PRO 29:11 Eman aramas mi tiparoch a fokun songokai, nge eman aramas mi tipachem a engila fän mosonoson.
PRO 29:12 Are eman sounemenem a aüseling ngeni pworaus mi mwäl, nöün kewe nöüwis meinisin repwe aramasangau.
PRO 29:13 Eman aramas mi wöüngau me eman mi ariaföüü aramas ra wewefengen lon ei lapalap: Ewe Samol mi Lapalap a aneneloi meser me ruoman pwe repwe küna mwer.
PRO 29:14 Are eman king a eäni kapwüng ngeni ekewe chon wöüngau fän wenechar, an nemenem epwe nüküchar fansoun meinisin.
PRO 29:15 Efoch wok me kapasen fön ra atoto tipachem, nge eman semirit, esap wor eman a apwüngü, epwe atoto säw won inan.
PRO 29:16 Lupwen ekewe aramasangau ra nemenem, tipis a lapalapala, nge ekewe chon pwüng repwe nenengeni usun ar turutiu.
PRO 29:17 Kopwe apwüngü noum, pwe i epwe akinamweek, epwe pwal apwapwai lelukom.
PRO 29:18 Anaie esap wor kapasen osuni ie, ekewe aramas ra chök förfetalei mine ra mochen. Nge feiöchün eman aramas mi aleasochisi än Kot kewe allük.
PRO 29:19 Kosap tongeni apwüngü eman chon angang ren kapas chök, pun inamwo ika a weweiti om kapas, nge esap mochen aleasochisi.
PRO 29:20 Ka fen küna eman aramas mi müttir le fos? Ka tongeni apilükülükü eman chon tiparoch lap seni ena sokun aramas.
PRO 29:21 Eman mi nöüwechen ngeni nöün chon angang seni lekükünün, lon eu rän ewe chon angang epwe wöüni wöün.
PRO 29:22 Eman aramas mi nisosong a afisätä fitikoko, nge eman mi songokai a tolong lon chomong tipis.
PRO 29:23 Eman aramas mi lamalamtekia epwe küna tekison, nge eman aramas mi tekison epwe küna iteüöch.
PRO 29:24 Eman aramas mi chonäni eman chon solä a oput püsin manauan. Epwe küna liwiningau, are a pwärätä mine a let lon kapwüng. Nge are esap pwärätä, Kot epwe anümamaua.
PRO 29:25 Om niuokusiti aramas, iei eu sär fän itom, nge are ka apilükülükü ewe Samol mi Lapalap, kosap feiengau.
PRO 29:26 Chomong aramas ra kütta chenir me ren eman sounemenem, nge ewe Samol mi Lapalap echök a eäni pwüng ngeni aramas.
PRO 29:27 Ekewe chon pwüng ra oput ekewe aramasangau, nge ekewe aramasangau ra oput ekewe chon pwüng.
PRO 30:1 Ikkei ekewe kapas än Akur nöün Jake we mwän seni Masa: Üa aweiresiei, ai Kot, üa aweiresiei, nge iei üa aiengau.
PRO 30:2 Ellet, ngang eman mi fokun tiparoch lap seni aramas meinisin, esap wor rei än eman aramas mirit.
PRO 30:3 Üsap kaiö tipachem, esap pwal wor ai silei usun Ewe mi Unusen Pin.
PRO 30:4 Iö a feitä läng o liwinsefälitiu? Iö a tongeni kumwuchufengeni asepwäl? Iö a tongeni üfätä ekewe koluk lon echö üf? Iö a förätä kiännin fanüfan meinisin? Ifa itan? Nge ifa iten nöün we mwän? Kopwe üreniei are ka silei!
PRO 30:5 Än Kot kewe kapas meinisin ra let. I a usun chök eu tittin maun fän iten chokewe mi op ren.
PRO 30:6 Kosap apacha och ngeni an kewe kapas, pwe esap apwünguk, nge epwe pwä pwe en eman chon chofana.
PRO 30:7 Ai Kot, ruu mettoch üa tüngor senuk, kosap amwöchüür seniei mwen ai üpwe mäla:
PRO 30:8 Kopwe alisiei pwe üsap eäni kapas atuputup me kapas chofana. Kosap mwüt ngeniei ai üpwe wöüngau ika wöümong, nge kopwe chök ngeniei enei mongö iteiten rän.
PRO 30:9 Pun are üpwe fokun mötüla, üpwe tongeni amamäsinuk o apasa, “Iö na ewe Samol mi Lapalap?” Nge ika üpwe wöüngau, üpwe solä o atoto itengau won iten ai Kot.
PRO 30:10 Kosap aturumwäli eman chon angang ngeni an samol, pun epwe ottekiik, nge en kopwe angei liwinin om we föför.
PRO 30:11 Mi wor aramas ra otteki semer, resap pwal kilisou ngeni iner.
PRO 30:12 Mi wor aramas ra ekieki pwe ra püsin limöch, nge ra fokun limengau.
PRO 30:13 Mi wor aramas ra chök fetaläsengeseng, won meser a pwä pwe ra lamalamtekia.
PRO 30:14 Mi wor aramas ra chök ariaföüü ekewe chon wöüngau me chon mwelele lein ekewe aramas, pwe repwe pisekisekila ren. Ei lapalap ra föri pwe repwe manau seni.
PRO 30:15 Och sokun pweechar mi ünümi cha a wor ruoman nöün föpwül. Ir me ruoman ra kökkö, “Ngeniei, ngeniei.” Mi wor rüanü mettoch resap fokun tongeni menemenöch:
PRO 30:16 Ewe lenien sotup, eman fefin mi rit, fanü esap menemenöch ren püngün üt, pwal ekkei esap tongeni ükütiu le küri mettoch.
PRO 30:17 Eman mi urumwotei saman o aleasolap ngeni inan, ekewe ängä repwe alusawu föün mesan, nge ekewe machang iter wolcher repwe ochei fitukan.
PRO 30:18 Rüanü mettoch ra kon amwarar ngeniei, pwe üsap tongeni weweitiir:
PRO 30:19 Usun än eman ikel äkkäs fän läng, usun än eman serepenit tö won eu achau, usun än efoch sip sai won mataulap, pwal usun lapalapen än eman alüal tongei eman föpwül.
PRO 30:20 Iei usun föförün eman fefin mi kirikiringau ngeni pwülüan: A lisowu ngeni pwal eman, a tütü o apasa, “Üsap föri och mi ngau.”
PRO 30:21 Mi wor rüanü mettoch fanüfan esap pwäk ngeni:
PRO 30:22 Eman amanau mi tolong lon wisen king, eman chon tiparoch a wor anan mongö pwe a tongeni möt,
PRO 30:23 eman fefin esap wor eman a tongei, nge a pwüpwülü, pwal eman chon angang fefin mi siwili an samol fefin lon wisan.
PRO 30:24 Mi wor rüanü mwichen man won fanüfan ra men kükün, nge ra fokun tipachem:
PRO 30:25 Ekewe molus, ir eu mwich mi apwangapwang, nge ra amolätä ener mongö lon fansoun räs.
PRO 30:26 Ekewe man iter pächer, ir eu mwich esap pöchökül, nge ra föri lenier lon ekewe achau.
PRO 30:27 Ekewe lifichimas esap wor ar king, nge ir meinisin ra fetal lon tettelir.
PRO 30:28 Ekewe litopach, ka tongeni amwöchü eman lon poum, nge ra nom lon imwen ekewe king.
PRO 30:29 Mi wor föman mönümanau mi üwenewen lon ar fetal:
PRO 30:30 Eman laion mi pöchökül seni lein ekewe manmwacho meinisin, esap tongeni niuokusiti eman,
PRO 30:31 säsän eman ätemwänin chuko, eman ätemwänin kuuch, me eman king, lupwen a fetal mwen nöün mwichen sounfiu.
PRO 30:32 Are ka tiparoch ren om püsin atekiokotä, ika ka ekiekietä mine a ngau, kopwe fanafanala.
PRO 30:33 Pun are ka wichiki milik, epwe fisitä pwötö, are ka afönü pwötün eman, epwe cha, nge are ka afisätä song, epwe wor fitikoko.
PRO 31:1 Ikkei ekewe kapas än Lemuel ewe kingen Masa, inan a aiti ngeni:
PRO 31:2 En nei ät mi achengicheng, en pälüen ai iotek, met üpwe eäni kapas ngonuk?
PRO 31:3 Kosap fangala om pöchökül ngeni fefin, kosap pwal fangala om moni ngeni ekewe fefin mi afeiengaua ekewe king.
PRO 31:4 En Lemuel, kopwe rongorong: Esap öchiti ekewe king pwe repwe ün wain, esap öchiti ekewe sounemenem pwe repwe moneiti sakau.
PRO 31:5 Pun are ra ün, repwe manlükala mine a fen pwüngüla pwe allük o atokala än chokewe meinisin mi riaföü pwüng.
PRO 31:6 Wain me sakau a fän iten chokewe mi feil ngeni mäla, fän iten chokewe mi nom lon riaföü watte.
PRO 31:7 Repwe ün o manlükala ar wöüngau me ar riaföü.
PRO 31:8 Kopwe kapas fän iten chokewe resap tongeni kapas fän püsin iter, pwal fän iten än chokewe mi mwelele pwüng.
PRO 31:9 Kopwe kapas o eäni kapwüng fän pwüng, kopwe peni än ekewe chon wöüngau me chon mwelele pwüng.
PRO 31:10 A men weires än eman epwe küna eman fefin mi lipwäköch! Neminewe a kon aüchea seni fau aüchea.
PRO 31:11 Pwülüan we a anomu an apilükülük won, esap fokun wor an wöüngau.
PRO 31:12 Lon unusen ränin manauan neminewe a föri föför mi mürina ngeni pwülüan, nge esap ariaföüü.
PRO 31:13 A achocho le angang ren pöün o föri mangaku seni ülöülen sip, pwal seni ewe irä itan fläks.
PRO 31:14 A uwato mongö seni toau usun chök ekewe sip wän chon amömö ra föri.
PRO 31:15 A pwätä ünmweerän o amolätä mongö fän iten chon leimwan, a pwal aanganga nöün kewe chon angang fefin.
PRO 31:16 A küna eu mälämäl o möni. A fotuki eu tanipin wain ren mine a angei seni an angang.
PRO 31:17 A achocho le angang, a pöchökül o föri sokopaten angang.
PRO 31:18 A mefi pwe meinisin mine a föri a lomot. A föri an angang tori lepwin.
PRO 31:19 A püsin föri an terech o türüni üfan.
PRO 31:20 A kichiöch ngeni ekewe chon wöüngau o lifang ngeni ekewe chon mwelele.
PRO 31:21 Esap öürek fän iten chon leimwan, lupwen sno a püngütiu, pun ir meinisin ra üföüf üf mi malül.
PRO 31:22 A püsin föri an pilangket, a üföüf üf seni mangaku mi pwechepwech me parapar.
PRO 31:23 Pwülüan we a sil me ren aramasen ewe telinimw, i eman lein ekewe souakomwen ewe fanü.
PRO 31:24 Neminewe a tei üf seni mangaku mi pwechepwech, a pwal föri pelit o amömö ngeni ekewe chon amömö.
PRO 31:25 A pöchökül o iteföüla, esap niuokusiti ewe fansoun epwe feito.
PRO 31:26 A eäni kapasen tipachem, mine a aiti ngeni aramas a fis fän kirikiröch.
PRO 31:27 A tümwünüöchü angangen chon leimwan, esap mongö anan mongö fän chipwang.
PRO 31:28 Nöün kana ra pwärätä ar kilisou ngeni, pwal pwülüan a ingemwareiti,
PRO 31:29 “Chomong fefin ra föri mine a fokun mürina, nge en ka föri mine a mürina seniir meinisin.”
PRO 31:30 Liewokekei mwakel chök, pwal liöch pön chök. Nge eman fefin mi niuokusiti ewe Samol mi Lapalap, iei i sipwe mwareiti.
PRO 31:31 Oupwe ngeni neminewe liwinin an angang. A fich ngeni pwe aramas meinisin repwe meniniti.
ECC 1:1 Iei än ewe Chon Afalafal nöün Tafit we ewe kingen Jerusalem kapas.
ECC 1:2 Pön, fokun pön chök, ewe Chon Afalafal a apasa, fokun pön chök. Mettoch meinisin pön chök.
ECC 1:3 Met lomoten än eman aramas angang weires won fanüfan?
ECC 1:4 Eu täppin aramas ra morola, eu täppin ra fisitä, nge fanüfan a chök nonomfochofoch.
ECC 1:5 Iwe, akkar a tötä, a pwal tuputiu, nge a müttir liwiniti lenian me lom pwe epwe tösefälitä.
ECC 1:6 Asepwäl a eniti ör, a pwal kul o eniti efeng. Iwe, a pwelifetal o liwiniti lenian me lom.
ECC 1:7 Chanpupu meinisin ra puputiu leset, nge sät esap urela rer. Iwe, ra liwiniti lenier me lom pwe repwe pupusefälila.
ECC 1:8 Mettoch meinisin ra chök weires, nge esap wor eman a tongeni awewei. Mas esap menemen ren künaan, nge seling esap ur ren rongorong.
ECC 1:9 Mine a fen wor me lom, epwe pwal wor me mürin. Nge mine aramas ra fen föri, repwe pwal föri me mürin. Esap fokun wor minefön mettoch won fanüfan.
ECC 1:10 Ifa usun, a wor och mettoch eman a tongeni apasa usun, “Nengeni, iei och mettoch mi fö?” Apwi, a fen nom seni chök me lomlom mwen ach sisamwo uputiu.
ECC 1:11 Esap wor eman a chechemeni mine a fis me lomlom, usun chök ekewe pilon mürich resap pwal chechemeni mine epwe fis me mürich.
ECC 1:12 Ngang ewe Chon Afalafal, üa kingen Israel lon Jerusalem.
ECC 1:13 Iwe, ren sokopaten tipachem üa achocho le kütta o ekiekifichi meinisin mine aramas ra föri won fanüfan. Iwe, a men weires ewe angang Kot a ngeni chon fanüfan pwe repwe föri.
ECC 1:14 Üa küna meinisin mine aramas ra föri won fanüfan. Iwe, üa küna pwe mettoch meinisin ra pön, a usun chök turufi asepwäl.
ECC 1:15 Sisap tongeni awenecharela mine a pwor, sisap pwal tongeni aleani mine esap wor.
ECC 1:16 Üa ekieki lon letipei, “Üa eäni tipachem mi watte, lap seni ekewe sounemenemen Jerusalem meinisin mi akom mwei. Iwe, chomong tufichin mirit me silelap ra nom rei.”
ECC 1:17 Mürin üa achocho le kaiö, pwe üpwe weweiti sokofesenin mirit me umwes, pwal tipachem me tiparoch. Nge üa mefi pwe pwal ei a usun chök turufi asepwäl.
ECC 1:18 Pun lon watten tipachem a wor watten weires, nge iö a alapala an sile, a pwal alapala an riaföü.
ECC 2:1 Iwe, üa ekieki lon letipei, “Üpwe sotuni pwapwan fanüfan pwe üpwe chök pwapwa.” Nge a pwä pwe pwal ei pön chök.
ECC 2:2 Nge mürin üa mefi pwe takir umwes chök. Met echök lomoten pwapwa?
ECC 2:3 Üa sotuni le apwapwai inisi ren ai ün wain, nge ükükün chök ai üpwe chüen mirit. Üa pwal sotuni le föri föförün tiparoch, pwe üpwe silei met a öchiti aramas pwe repwe föri lon fansoun manauer mi mochomoch won fanüfan.
ECC 2:4 Üa föri angang mi amwarar. Iwe, üa aüetä chomong imwei, üa pwal fotuki irän wain lon tanipii.
ECC 2:5 Üa pwal föri tanipi me leni mi amassawa o fotukätiu chomong sokun irä mi ua lon.
ECC 2:6 Üa föri lenien koluk, pwe üpwe achöchönü ekewe irä pwe repwe märöch.
ECC 2:7 Üa pwal kamö mwän me fefin pwe üpwe nöüniir amanau, a pwal wor nei amanau mi uputiu lon imwei. Iwe, üa nöüni chomong sokun pwiin man lap seni ekewe aramas meinisin ra imweimw lon Jerusalem me mwei.
ECC 2:8 Iwe, üa achufengeni silifer me kolt fän itei, pwal chomong sokun wöün king me fanü. A pwal wor nei souköl mwän me fefin, pwal chomong sokun pwapwa mwän ra pwapwa ngeni.
ECC 2:9 Iei popun üa fokun tekia lap seni ekewe aramas meinisin ra imweimw lon Jerusalem me mwei. Iwe, ai mirit a chök nonom rei.
ECC 2:10 Meinisin mine mesei a mocheniaiti üa chök angei. Üsap pwal epeti seniei sokun pwapwa, pun letipei a pwapwa ren ai angang weires. Ei pwapwa iei liwinin ai angang weires.
ECC 2:11 Mürin üa nenengeni meinisin mine üa föri, pwal ewe angang weires üa föri. Iwe, üa mefi pwe meinisin a pön, a usun chök turufi asepwäl. Esap wor och feiöch lon mine chon fanüfan ra föri.
ECC 2:12 Iei mine üa ekiekisefäli usun wewen tipachem me tiparoch ika umwes. Iwe, met ewe eman mi siwili ewe king epwe tongeni föri? Epwe chök föri mine aramas ra fen föri seni me lom.
ECC 2:13 Iwe, üa küna pwe tipachem a mürina seni tiparoch, usun chök saram a mürina seni rochopwak.
ECC 2:14 Eman mi tipachem a küna mwan, nge eman mi tiparoch a fetal lon rochopwak. Nge üa mefi pwe eu chök sopolar.
ECC 2:15 Iwe, üa ekieki lon letipei, “Mine a fis ngeni ewe mi tiparoch epwe pwal fis ngeniei. Met chök lomoten ai tipachem meinisin?” Iei mine üa apasa pwe pwal ei pön chök.
ECC 2:16 Pun aramas resap chechemenitamei chon tipachem me chon tiparoch, nge lon fansoun epwe feito repwe fokun manlükirela meinisin. Solapan pwe eman mi tipachem a mäla usun chök eman mi tiparoch.
ECC 2:17 Iei mine esap wor aüchean manau me rei, pun meinisin mine a fis won fanüfan a ariföüüei. Iwe, meinisin a pön, a usun chök turufi asepwäl.
ECC 2:18 Iwe, esap wor lomotan ngeniei ai angang weires meinisin üa föri won fanüfan, pun üa silei pwe üpwe likiti ngeni ewe eman mi siwiliei.
ECC 2:19 Nge iö a silei ika ewe eman epwe tipachem ika epwe tiparoch? Inamwo, epwe chök nemeni meinisin mine üa förätä o anganga won fanüfan fän ai weires me ai tipachem. Pwal ei pön chök.
ECC 2:20 Iei mine apilükülüküngau a toriei pokiten weiresin ai angang won fanüfan.
ECC 2:21 Pun fän ekoch eman aramas a angang weires ren an tipachem me silelap, nge lesopolan manauan eman aramas esap angang weires a feiöchüni feiöchün meinisin. Pwal ei pön chök, pwal eu mettoch mi fokun ngau.
ECC 2:22 Met feiöchün eman aramas ren an angang weires meinisin won fanüfan?
ECC 2:23 Pun ränin manauan meinisin ra uren cheuch, nge an angang a chök weires. Iwe, letipan esap pwal tongeni kinamwe lepwin. Pwal ei pön chök.
ECC 2:24 Iwe, a mürina seni meinisin pwe eman aramas epwe mongö o ün, epwe pwal pwapwa lon an angang weires. Nge üa küna pwe pwal ei a chök feito seni lepöün Kot.
ECC 2:25 Pun iö a tongeni mongö ika pwapwa are Kot esap ngeni?
ECC 2:26 Iwe, mirit me silelap me pwapwa Kot a lifang ngeni eman a chen me ren. Nge Kot a ngeni chon tipis angangen ionifengeni o achukuchukätä wöü, nge mürin a ngeni chokewe ra chen me ren pwe repwe wöüni. Pwal ei pön chök, a usun chök turufi asepwäl.
ECC 3:1 Iwe, ren mettoch meinisin a wor ar fansoun. A pwal wor fansoun iteiten angang won fanüfan.
ECC 3:2 A wor fansoun uputiu pwal fansoun mäla, a wor fansoun fotukätiu pwal fansoun wietä.
ECC 3:3 A wor fansoun niela pwal fansoun apöchökülätä, a wor fansoun ataela pwal fansoun aüetä.
ECC 3:4 A wor fansoun kechü pwal fansoun takir, a wor fansoun lolilen pwal fansoun pwörük.
ECC 3:5 A wor fansoun atoropasafeili fau pwal fansoun ionifengeniir, a wor fansoun oneimw pwal fansoun onout.
ECC 3:6 A wor fansoun kütta mettoch pwal fansoun pöütüla, a wor fansoun amwöchü pwal fansoun äsechala.
ECC 3:7 A wor fansoun kamwei mettoch pwal fansoun teifengeniir, a wor fansoun fanafanala pwal fansoun kakapas.
ECC 3:8 A wor fansoun tong pwal fansoun oput, a wor fansoun maun pwal fansoun kinamwe.
ECC 3:9 Met sokun feiöch eman epwe angei seni an angang weires?
ECC 3:10 Iwe, üa küna ewe angang weires Kot a awisa ngeni aramas.
ECC 3:11 Meinisin mine Kot a föri a unusen mürina lon ar fansoun. Iwe, a pwal atolonga ekiekin fansoun esemwüch lon letipen aramas, nge resap tongeni weweiti mine Kot a föri seni lepopun tori lesopolan.
ECC 3:12 Iwe, üa silei pwe esap wor och a mürina lap seni än eman epwe pwapwa o föri mine a mürina lon fansoun manauan.
ECC 3:13 Nge üa pwal silei pwe aramas meinisin repwe mongö o ün, repwe pwal pwapwa lon ar angang weires. Pwal iei eu lifang me ren Kot.
ECC 3:14 Iwe, üa silei pwe meinisin mine Kot a föri epwe nonom tori feilfeilachök. Esap wor eman a tongeni apacha och ngeniir, esap pwal wor eman a tongeni aimwü och seniir. Iwe, Kot a föri iei usun pwe aramas repwe meniniti.
ECC 3:15 Mine a wor ikenai a fen wor me lom, nge mine epwe wor me mürin a fen pwal wor me lom. Iwe, mine Kot a föri me lom, a pwal förisefäli.
ECC 3:16 Iwe, üa pwal küna pwe won fanüfan a wor pwüngingau lon lenien apwüng, a pwal wor pwüngingau lon lenien pwüngüöch.
ECC 3:17 Iei mine üa ekieki lon letipei, “Kot epwe apwüngü chon pwüng me chon pwüngingau, pun epwe wor fansoun fisin mettoch meinisin me sokun föför meinisin.”
ECC 3:18 Iwe, üa pwal ekieki lon letipei, “Kot a sotuni aramas pwe epwe aiti ngeniir pwe ra chök wewe ngeni man.
ECC 3:19 Pun sopolan manauen aramas me sopolan manauen man a wewe chök. Usun aramas ra mäla, ina usun man ra pwal mäla. Ir meinisin ra eäni eu chök ngasangas, pun aramas resap feiöch seni man. Iwe, meinisin pön chök.
ECC 3:20 Iwe, ir meinisin ra feila lon eu chök leni. Ir meinisin ra för seni pwül, repwe pwal liwiniti pwül.
ECC 3:21 Iö a silei ika ngünün aramas ra feitä läng, nge ngünün man ra feitiu fän pwül?”
ECC 3:22 Iei mine üa küna pwe a fokun mürina pwe eman aramas epwe pwapwa lon an angang, pun iei wisan. Nge iö a tongeni aiti ngeni aramas mine epwe fis me mürin?
ECC 4:1 Iwe, üa nenengenisefäli o küna ekewe riaföü ra fis won fanüfan. Chokewe mi küna riaföü ra kechü, nge esap wor eman a alisiir. Iwe, ekewe chon ariaföüür a wor ar pöchökül, iei mine esap wor eman a alisi ekewe chon riaföü.
ECC 4:2 Iwe, üa ekieki pwe chokewe ra fen mäla ra feiöch seni chokewe mi chüen manau.
ECC 4:3 Nge chokewe resamwo uputiu o küna ekewe föföringau mi fis won fanüfan ra feiöch seniir meinisin.
ECC 4:4 Mürin üa pwal küna popun än aramas angang weires me ar kütta met repwe fefeitä ren, pun ra lolowo ngeni chon arur. Iwe, pwal ei pön chök, a usun chök turufi asepwäl.
ECC 4:5 Eman aramas esap mirit a afiti pöün o püsin afeiengaua.
ECC 4:6 A öch än eman epwe kisikis pisekin, nge a kinamwe, lap seni än eman epwe watte pisekin ren an angang weires fän ruofoch pöün, nge a turufi asepwäl chök.
ECC 4:7 Iwe, üa pwal küna och mi pön won fanüfan:
ECC 4:8 Eman aramas mi alemanüla, esap wor nöün ika pwiin, nge esap müchüla an angang weires. Iwe, esap menemenöch ren wöün. Esap ais, “Fän iten iö üa angang weires o epeti pwapwa seni manauei?” Pwal ei pön chök o angang solap.
ECC 4:9 Ruoman ra feiöch seni eman chök, pun ar angangfengen a fisiöch.
ECC 4:10 Pun lupwen eman a turula, chienan epwe apwätäi. Nge feiengauen eman mi alemanüla, pun esap wor eman epwe apwätäi, lupwen a turula.
ECC 4:11 Lupwen ruoman ra möürfengen, ra pwichikar. Nge met eman mi alemanüla epwe pwichikar ren?
ECC 4:12 Lupwen eman a fiu ngeni eman mi alemanüla, ewe eman mi alemanüla a tongeni kuf, nge ruoman repwe wesewesen akufu ewe mi fiu ngeniir. Iwe, ülüfoch lül mi olafengen resap müttir mwü.
ECC 4:13 Eman alüal mi wöüngau, nge a mirit, a mürina seni eman king mi chinlap, nge a umwes, esap chüen mochen rongorong kapasen fön.
ECC 4:14 A tongeni fis, pwe ewe alüal a towu seni imwen fötek pwe epwe king, ika a uputiu lon wöüngau lon ewe mwü a nemeni me mürin.
ECC 4:15 Üa küna ekewe aramas meinisin mi manau won fanüfan pwe ra päi ngeni ewe alüal mi siwili ewe king.
ECC 4:16 Esap wor eman a tongeni aleani ekewe aramas mi nonom fän an nemenem. Nge chokewe mi manau mürin resap chüen pwapwaiti. Ellet pwal ei pön chök, a usun chök turufi asepwäl.
ECC 5:1 Kopwe afäluk, lupwen ka feila lon imwenfelin Kot. A öch om kopwe feito o aüseling, lap seni om kopwe asor usun ekewe chon umwes, pun resap mefi ngauen ar föför.
ECC 5:2 Kosap awakai, kosap pwal mwökütükai lon lelukom pwe kopwe müttir le fos fän mesen Kot, pun Kot a nom won läng, nge en ka nom won fanüfan. Iei mine kosap achomonga om kapas.
ECC 5:3 Ia a wor chomong öürek ie, a pwal wor tan. Nge chomong kapas ra pop seni eman mi umwes.
ECC 5:4 Lupwen ka pwon ngeni Kot, kosap mang le apwönüetä, pun Kot esap pwapwaiti eman chon umwes. Kopwe apwönüetä mine ka pwon.
ECC 5:5 A mürina om kosap pwon, lap seni om kopwe pwon, nge kosap apwönüetä.
ECC 5:6 Kopwe afäluk pwe kosap tipis ren kapasen awom, nge kosap apasa ngeni nöün Kot chon angang pwe ka chök ruongau ren om pwon. Pwota Kot epwe song ren om kapas o ataela angangen poum?
ECC 5:7 Pun lupwen a chomong än eman tan, a pwal chomong än eman kapas. Meinisin a pön chök. Nge en kopwe niueiti Kot.
ECC 5:8 Kosap weitifengeniik, lupwen ka küna lon eu fanü pwe ra ariaföüü chon wöüngau, ra pwal amoela pwüng fän pöchökül. Pun eman nöüwis a nom fän nemenemen eman nöüwis mi tekia seni, nge a pwal wor nöüwis mi tekia seniir meinisin.
ECC 5:9 Iwe, a feiöch eu fanü, are ewe king mi nemeni a föri chomong tanipi lon fanüan.
ECC 5:10 Eman mi efich moni esap menemenöch ren an moni tolong, nge eman mi efich wöü esap pwal menei mine a tori. Pwal ei pön chök.
ECC 5:11 Lupwen wöün eman a chomongola, repwe pwal chomongola chokewe mi manau seni. Iei chök feiöchün ewe mi wöü pwe a chök küna wöün we ren mesan.
ECC 5:12 Eman mi angang weires a möür kinamwe, ika a wor ekis chök anan ika chomong. Nge eman mi fokun wöümong esap tongeni möür kinamwe ren an öüreki wöün.
ECC 5:13 Iwe, üa küna och mi ngau won fanüfan: A wor aramas ra achufengeni wöür, nge ra püsin feiengau ren.
ECC 5:14 Pun lupwen wöür kewe ra lus ren och angang mi afeiengau, esap chüen wor och mine repwe tongeni ngeni nöür kewe.
ECC 5:15 Iwe, usun eman a uputiu won fanüfan fän an selela, ina usun epwe pwal feila. Esap wor och seni mine a tori ren an angang weires epwe tongeni uweela lepöün.
ECC 5:16 Iwe, pwal ei och mi ngau: Eman aramas epwe feila usun chök an feito. Met feiöchün, are an angang weires a solap usun chök turufi asepwäl?
ECC 5:17 Lon ränin manauan meinisin a chök nom lon rochopwak me lolilen, pwal lon chomong sokun riaföü me samau me chou.
ECC 5:18 Mürin, üa küna pwe a mürina me fich ngeni eman pwe epwe mongö o ün, epwe pwal pwapwa lon an angang weires won fanüfan lupwen ränin manauan mi mochomoch Kot a ngeni, pun iei wisan.
ECC 5:19 Are Kot a ngeni eman wöü me pisekisek o atufichi pwe epwe manau seniir, are a angei wisan o pwapwa lon an angang weires, iei eu lifang me ren Kot.
ECC 5:20 Iwe, ena sokun aramas esap öüreki pwe a mochomoch ränin manauan, pun Kot a aura lelukan ren pwapwa.
ECC 6:1 Iwe, üa pwal küna och mi ngau won fanüfan a fokun aweiresi aramas:
ECC 6:2 Are Kot a ngeni eman aramas wöü me pisek me iteüöch pwe esap wor an osupwang ren mine a mochen, a tongeni fis pwe Kot esap mwüt ngeni pwe epwe alomota wöün we, nge eman chon ekis a alomota. Iwe, ei pön chök, ewer, iei eu riaföü mi watte.
ECC 6:3 Are eman mwän a wor ipükü nöün, are a pwal manauatam, inamwo ika fite ierin manauan, are esap tongeni alomota feiöchün manauan, esap pwal fisiöch angangen won peiasan, üa mefi pwe eman mönükol mi mwetela a feiöch seni.
ECC 6:4 Pun eman mönükol mi mwetela esap wor lomotan, epwe feilong lon rochopwak, nge rochopwak epwe pwölüöla itan.
ECC 6:5 Esap küna akkar, esap pwal silei och mettoch, nge a fen kinamwe seni ena mwän
ECC 6:6 esap tongeni alomota wöün, inamwo ika a manau lon ruongeröü ier. Ifa usun, ir me ruoman resap feila lon eu chök leni?
ECC 6:7 Aramas meinisin ra angang weires fän iten ener mongö chök, nge ar moneiti mongö esap fokun wes.
ECC 6:8 Iwe, ren met eman mi mirit a feiöch seni eman mi umwes? Ifa än eman chon wöüngau feiöch, are a silei mine epwe föri lon manauan?
ECC 6:9 A mürina än eman epwe menemenöch ren mine a nom ren lap seni an mocheniaiti pwal och. Pun ei pön chök, a usun chök turufi asepwäl.
ECC 6:10 Meinisin mine a fis a fen akot seni me lom, nge a pwal sil sokun lapalapen aramas. Iwe, esap wor eman aramas a tongeni pälüeni eman mi pöchökül seni.
ECC 6:11 Ia a wor chomong kapas ie, a pwal wor chomong kapas mi lomotongau o pön. Nge met lomotan ngeni eman aramas?
ECC 6:12 Iwe, iö a tongeni silei mine a mürina ngeni eman aramas lon ränin manauan mi mochomoch o pön usun chök ngünüan? Nge iö a tongeni aiti ngeni eman aramas mine epwe fis won fanüfan mürin an mäla?
ECC 7:1 Iteüöchün eman a mürina seni lö mi aüchea, nge ränin än eman mäla a aüchea seni ränin an uputiu.
ECC 7:2 A mürina pwe eman epwe eti eu mwichen letipeta lap seni an epwe eti eu kametip. Pun chokewe mi manau repwe chechemeni pwe mäla sopolan aramas meinisin.
ECC 7:3 Iwe, letipeta a mürina seni takir, pun än eman letipeta a tongeni awili letipan.
ECC 7:4 Ekiekin eman mi mirit a nom ren ekewe chon letipeta, nge ekiekin eman mi umwes a chök nom ren ekewe chon meseik.
ECC 7:5 A mürina ngeni eman mwän an epwe aüselinga kapasen fön me ren eman mi mirit, lap seni an epwe aüselinga än eman chon umwes köl.
ECC 7:6 Pun än chon umwes takir a wewe ngeni tärechopuchopun iräfölüföl lon ekkein fän kama. Pwal ei pön chök.
ECC 7:7 Are eman mi mirit a atupu eman, a föri föförün chon umwes, nge are eman a angei lifangen amichimich, a angauala lelukan.
ECC 7:8 A mürina lesopolan mettoch meinisin lap seni lepopun. Nge eman chon tipemosonoson a mürina seni eman chon tipetekia.
ECC 7:9 Kosap songokai, pun song a nom lon letipen chon umwes.
ECC 7:10 Kosap ais, “Pwota ewe fansoun lom a mürina seni fansoun ikenai?” Pun eman mi eäni ei sokun kapas ais esap mirit.
ECC 7:11 Mirit a mürina usun wöüch me ren samach, a pwal eu feiöch fän iten chokewe mi nom won fanüfan.
ECC 7:12 Iwe, mirit a alisi aramas usun chök moni a pwal alisi aramas. Nge iei feiöchün silelap pwe eman mi mirit a tümwünü püsin manauan.
ECC 7:13 Iwe, kopwe ekieki usun mine Kot a föri. Iö a tongeni awena mine Kot a apwora?
ECC 7:14 Lon fansoun om feiöch kopwe pwapwa, nge lon fansoun om osupwang kopwe ekieki: Kot a tinato feiöch me osupwang. Iei mine eman aramas esap tongeni silei mine epwe fis lon fansoun mwan.
ECC 7:15 Lon ränin manauei mi pön üa küna ekei ruu sokun lapalap: Eman aramas mi pwüng a chök mäfeiengau, nge a föri mine a pwüng. Nge eman aramas mi pwüngingau a manauatam, nge a föri mine a pwüngingau.
ECC 7:16 Üa mefi pwe ese nien lomot om kopwe achomonga om föförün pwüng ika alapala om tipachem. Pwota ka mochen püsin afeiengauok?
ECC 7:17 Üa pwal mefi pwe esap öchituk om kopwe achomonga om föföringau ika alapala om föförün umwes. Pwota kopwe mäla, nge esamwo tori om fansoun?
ECC 7:18 Iwe, a mürina pwe kopwe amwöchü ewe eu, nge kosap pöütala pwal ewe eu. Pun eman mi niueiti Kot esap achomonga an föför mi pwüng ika an föför mi ngau.
ECC 7:19 Tipachem ellet a fokun tümwünü eman mi mirit lap seni engol samol ra tümwünü eu telinimw.
ECC 7:20 Ellet, esap fokun wor eman chon pwüng won fanüfan a chök föri mine a pwüng fansoun meinisin, nge esap wor an tipis.
ECC 7:21 Kosap rongorong ngeni meinisin mine aramas ra apasa, pun a tongeni fis pwe kopwe rong än noum chon angang alalangauok.
ECC 7:22 Pun ka püsin silei pwe ka fen pwal alälängaua aramas fän chomong.
ECC 7:23 Ekei mettoch meinisin üa sotuni ren ai mirit. Üa fokun achocho ngeni ai üpwe tipachem, nge üsap tori.
ECC 7:24 Ifa usun än eman epwe tongeni küttafesifesi tipachem? A fokun, fokun alolol, pwe esap wor eman a tongeni tori.
ECC 7:25 Iwe, üa achocho ngeni ai üpwe silei o küttafichi mirit me masouen mettoch, üa pwal achocho ngeni ai üpwe silei ngauen umwes me feiengauan.
ECC 7:26 Iwe, üa küna pwe eman fefin mi atuputup a afeiengau seni mäla. Letipan a usun chök eu sär ika uk, nge pöün ra wewe ngeni selimächä mwän ra föfö ren. Eman mwän mi chen me ren Kot a tongeni sü seni neminewe, nge eman chon tipis epwe tup ren.
ECC 7:27 Iwe, ewe chon afalafal a apasa, “Nengeni, iei ükükün mine üa küna, lupwen üa achufengeni eu me eu kei mettoch, pwe üpwe silei unusan.
ECC 7:28 Üa chüen kükütta, nge üsamwo küna. Üa küna eman chök mwän mi mirit lein engeröü aramas, nge üsap küna eman fefin mi mirit leir.
ECC 7:29 Iei chök mine üa wesewesen küna: Kot a föri aramas pwe repwe wenechar, nge aramas ra püsin ekiekietä föför mi rikirik.”
ECC 8:1 Iö a wewe ngeni eman mwän mi mirit, nge iö a tongeni awewei mettoch? Mirit a asarama won mesen eman aramas o siwili wowongauen won mesan.
ECC 8:2 Kopwe apwönüetä än ewe king allük, pun iei usun ka pwon fän akapel fän mesen Kot.
ECC 8:3 Kosap müttir feila seni fän mesan, kosap pwal peni och föför mi ngau. Pun ewe king epwe chök föri mine a mochen.
ECC 8:4 Iwe, än ewe king kapas a man. Iö a tongeni apwüngü an föför?
ECC 8:5 Eman a aleasochisi an allük esap küna riaföü, nge eman mi mirit epwe silei inet fansoun an epwe föri och, a pwal silei mine epwe föri.
ECC 8:6 Iwe, a wor fansoun fän iten mettoch meinisin, a pwal wor lapalapen ar repwe fis, nge aramas ra chök silei ekis usun.
ECC 8:7 Pun aramas resap silei mine epwe fis me mürin. Nge iö a tongeni aiti ngeniir usun mine epwe fis?
ECC 8:8 Esap wor eman a tongeni amwöchü ngünün, esap pwal wor eman a tongeni nemeni ränin an mäla. Usun eman sounfiu esap sü lupwen fansoun maun, iei usun eman chon föföringau esap tongeni ngasala seni liwinin an föför.
ECC 8:9 Ekei mettoch meinisin üa küna, lupwen üa ekieki usun mine a fis won fanüfan. Iwe, a fis pwe eman aramas a nemeni aramas o ariaföüür.
ECC 8:10 Mürin üa pwal küna chon föföringau ra peias fän kinamwe, ir chokewe mi sou feila lon ewe leni mi pin. Iwe, aramas ra mwareitiir me lon ewe telinimw ia ra föri ar föföringau ie. Pwal ei pön chök.
ECC 8:11 Are liwinin tipisin eman esap müttir fis, aramas repwe chök mochen föri föför mi ngau.
ECC 8:12 Ika mwo eman chon tipis a föföringau fän ipükü, nge a pwal manauatam, üa chök silei pwe chokewe mi niueiti Kot o meniniti repwe feiöch.
ECC 8:13 Nge ekewe chon föföringau resap feiöch. Manauer a usun chök ngünüer, resap pwal tongeni manauatam, pun resap niueiti Kot.
ECC 8:14 Mi pwal wor mettoch mi pön ra fis won fanüfan. Fän ekoch chon pwüngüöch ra angei mine ekewe chon pwüngingau repwe angei, nge chon pwüngingau ra angei mine ekewe chon pwüngüöch repwe angei. Üa apasa pwe pwal ei pön chök.
ECC 8:15 Iei mine üa mochen pwe aramas repwe pwapwa lon manauer. Pun esap wor och mettoch mi mürina ngeni aramas lap seni ar repwe mongö o ün fän pwapwa. Mürin ra pwal tongeni pwapwa lon ar angang weires lupwen ränin manauer Kot a ngeniir won fanüfan.
ECC 8:16 Iwe, üa achocho ngeni ai üpwe sile mirit o nenengenifichi föförün chon fanüfan, pwe lerän me lepwin resap sile möür.
ECC 8:17 Iwe, lupwen üa küna ekewe angang meinisin Kot a föri, üa mefi pwe esap wor eman aramas a tongeni weweiti mine a fis won fanüfan. Nge ika aramas repwe weires le kütta wewen, resap tongeni küna. Nge ika eman mi mirit epwe apasa pwe a silei, esap pwal tongeni silei.
ECC 9:1 Iwe, üa ekieki usun ekei mettoch meinisin lon letipei o mefi pwe ekewe chon pwüng me chon mirit pwal ar föför meinisin ra nom lepöün Kot. Nge esap wor eman a silei meinisin mine a nom mwan, are epwe küna chen ika sochowun.
ECC 9:2 Eu chök lapalap a fis ngeni aramas meinisin, a fis ngeni chon pwüng me chon pwüngingau, chon mürina me chon ngau, chon limöch me chon limengau, chokewe mi asor me chokewe resap asor. Eman mi mürina a usun chök eman mi tipis, pwal eman mi pwon fän akapel a usun chök eman mi niuokus le pwon fän akapel.
ECC 9:3 Iei och mettoch mi ngau a fis won fanüfan, pwe eu chök lapalap a fis ngeni aramas meinisin. Letipen aramas ra uren mettoch mi ngau, ra pwal uren song lupwen ra manau, nge mürin ra chök mäla.
ECC 9:4 Eman aramas mi chüen nom lein chon manau a wor an apilüköch. Iwe, eman kolak mi manau a feiöch seni eman laion mi mä.
ECC 9:5 Pun ekewe chon manau ra silei pwe repwe mäla. Nge ekewe sotup resap silei och mettoch, resap pwal chüen angei liwinin ar angang, esap pwal wor eman a chechemeniir.
ECC 9:6 Ar tong me ar oput pwal ar lolowo esap chüen wor. Esap pwal wor wiser ngeni ekewe angang ra fis won fanüfan.
ECC 9:7 Iwe, kopwe chök mongö anom mongö, kopwe pwal ünümi unumom wain fän pwapwa, pun iei mine Kot a tipeeu ngeni.
ECC 9:8 Kopwe üföüf üf mi fokun öch fansoun meinisin, kopwe pwal ekepiti mökürom ngeni lö.
ECC 9:9 Oupwe manaufengen fän pwapwa me pwülüom ka tongei lon ränin manauom mi pön Kot a fang ngonuk won fanüfan. Pun iei wisom lon manauom pwal lon om angang weires won fanüfan.
ECC 9:10 Kopwe achocho le angang lon mettoch meinisin ka föri, pun esap wor och angang, ekiek, silelap ika tipachem lon lenien sotup ewe ia kopwe feila ie.
ECC 9:11 Iwe, üa pwal küna och lapalap won fanüfan: Eman mi müttir le kitir esap tongeni win fansoun meinisin, nge eman mi pwora esap pwal wiwin chök lon maun. Iwe, eman mi mirit a tongeni osupwang ren anan mongö, nge eman mi tipachem esap pwal pisekisek chök. Iwe, sap meinisin mi silelap repwe tolong lon wis tekia, nge a chök tongeni fis ngeniir lupwen a tori fansoun.
ECC 9:12 Iwe, eman aramas esap silei fansoun an epwe mäla. Pun usun chök ik ra tup lon eu uk mi afeiengau, pwal usun chök machang ra tup lon eu sär, ina usun chon fanüfan repwe tup lon feiengau lupwen a müttir toriir.
ECC 9:13 Iwe, üa pwal küna eu sokun mirit won fanüfan mi fokun lomot me rei.
ECC 9:14 A wor eu kükün telinimw aramasen lon ra chokükün. Iwe, eman king mi pöchökül a feito pwe epwe maun ngeni. A pwelifeili ewe telinimw fän pisekin maun o senätä eu ororen maun mi fokun watte ünükün.
ECC 9:15 Iwe, lon ewe telinimw a wor eman mwän mi wöüngau, nge a mirit. Ren an mirit a amanaua chon ewe telinimw. Nge esap wor eman a chechemeni ewe mwän mi wöüngau me mürin.
ECC 9:16 Iei mine üa apasa pwe mirit a mürina seni pwora. Nge esap wor eman a aücheani än ewe mwän mi wöüngau mirit ika afäli an kapas.
ECC 9:17 A mürina ach sipwe afäli än eman mi mirit kapas pwetete, lap seni än eman samol kapas leüömong lein chon umwes.
ECC 9:18 Mirit a mürina seni pisekin maun, nge eman chon tipis a ataela chomong mettoch mi öch.
ECC 10:1 Iwe, eu lö mi pwokus epwe pwongauala, lupwen kiliso mi mä ra nonom lon. Ina usun ekis chök föförün umwes a pwölüela mirit me iteüöch.
ECC 10:2 Eman mi mirit a chök föri mine a pwüng, nge eman mi umwes a chök föri mine a ngau.
ECC 10:3 Lupwen eman mi umwes a fetal won al, iei mwo nge a chök pwä pwe esap wor an mirit. Iwe, a pwärätä ngeni aramas meinisin pwe i eman mi umwes.
ECC 10:4 Are om samol a song ngonuk, kosap püsin towu seni wisom. Pun eman mi mosonoson a tongeni aükätiu och mwäl mi watte.
ECC 10:5 Iwe, üa pwal küna och lapalap mi ngau won fanüfan, a pop seni mwälin eman samol:
ECC 10:6 Chon umwes ra nom lon wis tekia, nge chon pisekisek ra nom lon lenien chon tekison.
ECC 10:7 Üa küna pwe ekewe amanau ra wawa oris, nge samol ra fetal usun chök ekewe amanau.
ECC 10:8 Iö a tuw eu pwang epwe püsin turulong lon, nge iö a ataela eu tittin fau, eman serepenit epwe küw.
ECC 10:9 Iö a amökü fau epwe tongeni kinas ren, nge iö a äsätta mwüch epwe tongeni feiengau ren.
ECC 10:10 Are efoch kouk a kop, nge sisap seimi, sipwe fokun weires ren lupwen ach nöünöü. Nge mirit a alipwäköchü eman.
ECC 10:11 A ser ach sipwe niela eman chöükö mürin an kükich.
ECC 10:12 Iwe, eman mi mirit a iteüöch ren an kapas, nge eman mi umwes a feiengau ren an kapas.
ECC 10:13 Lepoputän an kapas esap wor wewen, nge sopolan a unusen umwes.
ECC 10:14 Eman mi umwes a kapas chomong. Esap fokun wor eman a tongeni silei usun mine epwe fis. Iö a tongeni pwärätä ngeni aramas mine epwe fis mürin ar mäla?
ECC 10:15 Iwe, eman mi umwes a püsin apekusu ren an angang weires, pun esap fokun silei ewe al a ale ngeni ewe telinimw.
ECC 10:16 Eu fanü a feiengau, are eman semirit a king lon, are pwal nöüwisen lon ra fen kametip lesosor.
ECC 10:17 Nge eu fanü a feiöch, are eman nöün aramas tekia a king lon, are pwal nöüwisen lon ra mongöfengen lon fansoun fich pwe repwe pöchökül ren, nge resap ünüpuch.
ECC 10:18 Are eman a tümwününgauei osun imwan, epwe lich, nge are eman a chipwang, imwan epwe tala.
ECC 10:19 Ia a wor mongö ie, a pwal wor tatakir, nge wain a apwapwai aramas. Iwe, ren moni sia tongeni kamö meinisin.
ECC 10:20 Kosap älälängaua eman king lon om ekiek, nge kosap pwal älälängaua eman mi pisekisek le monomon. Pun eman machang a tongeni uweela om kapas o apworausa ngeniir mine ka apasa.
ECC 11:1 Kopwe fangafangöch ngeni aramas, pun mürin chomong rän kopwe angei liwinin.
ECC 11:2 Kopwe inetifeseni woum ngeni chomong, pun kosap silei met sokun feiengau epwe toruk won fanüfan.
ECC 11:3 Lupwen kuchu ra ur ren koluk, epwe püng rän won fanüfan. Iwe, lupwen efoch irä epwe turu ngeni ör are efeng, epwe chök nonom won ewe leni ia a turula ie.
ECC 11:4 Eman mi chök nenengeni asepwäl me kuchu, nge esap angang, esap fis an fofot me kinikin.
ECC 11:5 Kosap tongeni silei ia asepwäl a enito me ie, kosap pwal tongeni silei usun fisin eman mönükol lon luken eman fefin mi pwopwo. Ina usun kosap tongeni silei än Kot angang, ewe mi föri mettoch meinisin.
ECC 11:6 Lesosor kopwe amorafeili föün irä, kopwe pwal amorafeili lekuniol. Pun kosap silei meni leir epwe märöch, ika repwe märöch meinisin.
ECC 11:7 Saram a mürina, a pwal öch ngeni mesen aramas ar repwe küna tinen akkar.
ECC 11:8 Iwe, eman aramas epwe chök pwapwa lon ränin manauan meinisin. Nge ese lifilifil ükükün tamen manauan, fansoun an nom lon mäla epwe tam seni. Iwe, meinisin mine epwe fis pön chök.
ECC 11:9 En alüal, kopwe pwapwa le alüalum, letipom epwe meseik lon fansoun om alüal. Kopwe chök föri mine letipom a tipeni o mesom a küna. Nge kopwe chechemeni pwe Kot epwe apwünguk ren om kewe föför meinisin.
ECC 11:10 Iei mine kopwe atoauala öürek seni letipom, kopwe pwal ti seni inisum mine a ngau. Pun lealüalum me lepöchökülom a pön chök.
ECC 12:1 Iwe, lealüalum kopwe chechemeni ewe mi föruk, mwen ekewe rän mi ngau repwe feito. Pun epwe war ewe fansoun kopwe apasa usun, “Usap fokun efich ei fansoun üa nom lon.”
ECC 12:2 Kopwe chechemeni Kot, lupwen ka chüen tongeni küna akkar, saram, maram me fü kana, mwen ekewe kuchu repwe liwinto mürin üt.
ECC 12:3 Mürin epwe war eu fansoun, pwe poum mi tümwünuk repwe chechech, pecheöm mi pöchökül iei repwe pwor. Ngiim repwe chokükünüla, pwe kosap chüen tongeni lülü won, nge mesom repwe toputopula, pwe kosap tongeni künaöchuk.
ECC 12:4 Iwe, selingom repwe püngüla, pwe kosap chüen tongeni rongorong akürangen won al. Süngürüngürün föir pwal ngingin köl epwe miiniin ngonuk. Lupwen aramas ra pwök ren tikin machang, en kosap pwök ren.
ECC 12:5 Iwe, kopwe niuokus le feitä won chukuchukutä, kopwe pwal niuokus le fetal won al. Mökürom epwe üwan. Iwe, kopwe fokun weires le fetal, nge om mochen meinisin epwe ükütiu. Pun aramas repwe feila ngeni ar lenien asösö lon peiaser, nge chon ngüngüres repwe fetal won al.
ECC 12:6 Kopwe chechemeni ewe a föruk mwen ewe sein seni silifer epwe mwü, ika ewe sepi seni kolt epwe mök, ika ewe rume epwe mök arun ewe chönüttu, ika ewe lenien üfüf koluk epwe tala.
ECC 12:7 Iwe, kopwe chechemeni Kot mwen inisum epwe liwiniti pwül, pun a pop seni pwül, pwal mwen ngünum epwe liwinla ren Kot, ewe a ngonuk.
ECC 12:8 Pön, fokun pön chök, ewe Chon Afalafal a apasa, mettoch meinisin ra pön chök.
ECC 12:9 Iwe, ewe Chon Afalafal esap chök mirit, nge a pwal aiti ngeni aramas silelap. A ekiekifichi ekewe mwiitun o kütta wewer, a pwal achocho le akotöchüür.
ECC 12:10 Iwe, ewe Chon Afalafal a kütta kapas mi mürina, nge mine a makeetiu a let o pwüng.
ECC 12:11 Iwe, än eman chon mirit kapas ra usun chök wok mi föl, ekewe chon mas ra wokowok le emweni nöür kewe sip, nge ekewe mwiitun ra usun chök chüföl mi nükünük. Ra feito seni Kot, ewe chök eman chon mas.
ECC 12:12 Nei, üpwe fönöök pwe kopwe tümwünuk ren ei sokun lapalap: Föförün chomong puk esap fokun ükütiu, nge kaiö chomong a aweiresi inisum.
ECC 12:13 Iwe, oupwe rong ei kapasen lesopolan: Oupwe niueiti Kot o alesochisi an kewe allük, pun iei a fichiti aramas meinisin.
ECC 12:14 Nge Kot epwe apwüngü föför meinisin, pwal iteiten föför mi fis lemonomon, ika a mürina ika a ngau.
SOL 1:1 Iei ewe köl mi öch seni ekewe köl meinisin Salomon a föri.
SOL 1:2 Amwo kopwe mitiriei. Pun om tong a mürina seni wain.
SOL 1:3 Epitom lö a fokun pwokus. Itom a wewe ngeni lö mi niiniila. Iei mine ekewe föpwül ra tongeek.
SOL 1:4 Kopwe nukiei pwe sipwe müttir le sä. Ai king, kopwe emwenieila lon rumwom. Chienan fefin Sipwe pwapwaituk o mwäneketuk, sipwe pwal mwareiti om tong lap seni wain. A fokun pwüng ach tongeek.
SOL 1:5 Ämi föpwülün Jerusalem, üa liechochol, nge üa liöch. Üa chol usun chök ekewe imw mangaku lon Ketar, üa pwal öch usun chök ekewe cheech lon imwen Salomon.
SOL 1:6 Ousap nenengeniei, pun ngang üa liechochol pokiten akkar a acholaei. Iwe, nöün inei kewe mwän ra song ngeniei. Ra awisaei pwe üpwe tümwünü ekewe tanipin wain, nge püsin tanipii üsap tümwünü.
SOL 1:7 Kopwe aiti ngeniei, en ewe üa tongei seni lon letipei, ia kopwe foleni ie noum kewe sip? Ia kopwe asösöör ie leoloas? Pwota üpwe usun chök eman mi mwalechfeil lein nöün chienom kewe pwiin sip?
SOL 1:8 Are kosap silei ewe leni, en mi liöch mwen ekewe fefin, kopwe tapwala mürin ipwen ekewe pwiin sip. Kopwe foleni noum nienifön kuuch ünükün imwen ekewe chon mas imw mangaku.
SOL 1:9 En mi wor tongom me rei, üa awewe ngonuk eman liefefinin oris mi nuki wän Farao woken.
SOL 1:10 Sapom a ling ren foutan, nge üom a ling ren mwärämwär seni fau aüchea.
SOL 1:11 Sipwe föri fän itom fout seni kolt me silifer.
SOL 1:12 Lupwen ewe king a kon won an peet, ai lö a fokun pwopwonfeil.
SOL 1:13 Ätewe mi wor tongan me rei a usun chök eu tükütükün säfei mi aüchea itan mör, a nonom lefilen oupwi.
SOL 1:14 Ätewe mi wor tongan me rei a usun chök epilük pilükün pön irä mi pwokus, ra mär lon ekewe tanipin wain lon Enketi.
SOL 1:15 Nengeni, en ka fokun liöch, en mi wor tongom me rei. Ka fokun liöch, föün mesom ra wewe ngeni föün mesen lisom.
SOL 1:16 Nengeni, en ka fokun äteöch, en mi wor tongom me rei, ka wesewesen äteöch. Mwän Lenien ach kon a anüen fetil,
SOL 1:17 irän imwach ewe irä setar, nge etippen imwach ewe irä saipires.
SOL 2:1 Iwe, ngang epö pön rous seni Saron, pwal epö pön kiopun ekewe lemol.
SOL 2:2 Liewe a wor tongan me rei a nom lein ekewe föpwül usun chök epö pön kiop lein iräfölüföl.
SOL 2:3 Ätewe mi wor tongan me rei a nom lein ekewe alüal usun chök efoch apel lein wöllap. Üa fokun pwapwa le mot fän nürün, nge uan a arar, lupwen üa ochei.
SOL 2:4 Iwe, a emwenieila ngeni ewe lenien kametip, a aürätä an filäik woi pwe asisilen an tongeei.
SOL 2:5 Kopwe aochocha ngeniei uän irän wain mi pwas, pwe üpwe pöchökülsefäl, kopwe pwal apöchöküleitä ren uän apel, pun üa apwangapwang ren ai tongeek.
SOL 2:6 Pöüimöngün a nom fän mökürei, nge pöüifichin a romiei.
SOL 2:7 Oupwe pwon ngeniei, ämi föpwülün Jerusalem, oupwe öpölü ekewe chian lemäl, pwe ousap aosukosuka äm tongfengen.
SOL 2:8 Üa rong möngüngün ätewe mi wor tongan me rei. Nengeni, a feito, a mwetemwet o lusulus won ekewe chuk.
SOL 2:9 Ätewe mi wor tongan me rei a usun chök eman chia ika eman apanen chia. Nengeni, a ütä ünükün tittin imwach o nenelong me lon asamwachon, a pwal anäämwelong lefichen ewe tit mächä.
SOL 2:10 Ätewe mi wor tongan me rei a kapas ngeniei. Iwe, a apasa, “Kopwe pwätä, en mi wor tongom me rei, ka fokun liöch, sipwe feila ekis.
SOL 2:11 Pun nengeni, fansoun patapat a wes, nge püngün üt a ükütiu.
SOL 2:12 Ekewe pön irä ra sonola won ewe fanü, ewe fansoun köl a war, sia rongorong tikitikin lisom won fanüach.
SOL 2:13 Ewe irä fik a ua, nge sotun ekewe irän wain ra fokun pwokus. Kopwe ütä, en mi wor tongom me rei, ka fokun liöch, sipwe feila ekis.”
SOL 2:14 En ka wewe ngeni eman lisom me rei mi nom lon pwangen achau, ka op fän sässärin achau, kopwe aküna ngeniei won mesom mi fokun mesemesöch, kopwe mwüt ngeniei pwe üpwe rongorong mweliom mi mürina.
SOL 2:15 Oupwe turufi ekewe foks, ekewe apanen foks mi ataela ekewe tanipin wain, pun ach kewe tanipin wain ra sot.”
SOL 2:16 Aüküki me ren, ngang nöün, nge aükükün me rei, i nei. Iwe, a foleni nöün pwiin sip lein ekewe kiop.
SOL 2:17 Kopwe liwinto o nom rei, en mi wor tongom me rei, tori a tö mallen rän, o lerochen mettoch ra morola. Kopwe usun chök eman chia ika eman apanen chia won ekewe chukuchukutä.
SOL 3:1 Lupwen üa kon won kiei lepwin, üa tan pwe üa kütta ätewe üa tongei seni lon letipei. Üa kütta, nge üsap küna.
SOL 3:2 Iwe, iei üpwe pwätä o kukulou won alen ewe telinimw, pwal lon ekewe lenien amwicheich. Üpwe kütta ätewe üa tongei seni lon letipei. Üa fokun küttafetalei, nge üsap küna.
SOL 3:3 Ekewe chon mas ra künaei lupwen ar feilfetal lon ewe telinimw. Iwe, üa aisiniir, “Ifa usun, ousap küna ätewe üa tongei seni lon letipei?”
SOL 3:4 Üa kärän feil seniir, ngei üa fen küna ätewe üa tongei seni lon letipei. Üa amwöchü, nge üsap mwüt ngeni pwe epwe feila tori üa panalong lon imwen inei, lon rumwen neminewe a nöüniei.
SOL 3:5 Oupwe pwon ngeniei, ämi föpwülün Jerusalem, oupwe öpölü ekewe chian lemäl, pwe ousap aosukosuka äm tongfengen.
SOL 3:6 Met ewe a feitä seni lon fanüapö usun eu ötüöt mi ötütä, a pwokus ren säfei mi aüchea me apach mi pwokus, pwal ren sokun osiroi mi pwokus itan mör chon amömö ra amömöla?
SOL 3:7 Nengeni, ra uwei Salomon won an lenien mot, nge wone mwän mi pwora seni lein ekewe mwichen sounfiun Israel ra nom ünükün.
SOL 3:8 Ir meinisin ra ri ngeni lukalaper efoch ketilas, ra pwal silelap le maun. Iteiten eman me eman a wor nöün ketilas, pun ra molotä fän iten ar repwe maun lepwin.
SOL 3:9 King Salomon a föri eu lenien mot mi lingöch fän itan seni irän Lepanon.
SOL 3:10 Iwe, üren ewe lenien mot ra för seni silifer, lükisökürün a för seni kolt, nge ekewe pinu ra för seni mangaku mi parapar. Iwe, ekewe föpwülün Jerusalem ra fokun angangöch le chüri lon fän ar tong.
SOL 3:11 Oupwe towu, ämi föpwülün Sion, pwe oupwe nengeni ewe king Salomon mi mwärini ewe mwärämwär inan a amwärämwära ngeni lon ränin an apwüpwülü, lon ewe rän letipan a fokun pwapwa.
SOL 4:1 Nengeni, ka fokun liöch, en mi wor tongom me rei, nengeni, ka wesewesen liöch. Föün mesom fän pwölüpwölün won mesom ra usun chök ekewe lisom, nge meten mökürom a wewe ngeni epwi pwiin kuuch ra tötiu me won ekewe chukun Kiliat.
SOL 4:2 Ngiim ra pwech usun chök epwi pwiin sip ra wes me fich, ra feitä seni ar lenien tütü. Ir meinisin a wor nöür lippwe, esap wor eman me leir a aemanüla.
SOL 4:3 Tinawom a wewe ngeni efoch riri mi parapar, nge awom a fokun öch. Sapom ra woparapar fän pwölüpwölün won mesom, usun chök pekin apel.
SOL 4:4 Üom a wewe ngeni ewe imw tekia imwen Tafit, a kukumos o motoutou, fän üom a wor epa mwärämwär mi wewe ngeni engeröü tittin maun ra itiuetä won.
SOL 4:5 Oupwum kewe ra usun chök apanen chia lippwe mi mongö lein ekewe kiop.
SOL 4:6 Üpwe feitä won ewe chukun säfei mi aüchea itan mör, pwal won ewe chukun apach mi pwokus, o nonom ie tori epwe ränila o lerochen mettoch repwe morola.
SOL 4:7 En mi wor tongom me rei, ka wesewesen liöch, esap fokun wor och terum.
SOL 4:8 Kofoti, kopwe etiei le feitiu me won Lepanon, kopwe etiei le feitiu me won Lepanon. Kopwe feitiu me won ungen ewe chuk Amana, pwal me won ungen Senir me Hermon, seni ekewe lenien laion me lepart.
SOL 4:9 Kofoti, en mi wor tongom me rei, ka fokun liapeni lelukei. Ka fokun liapeni lelukei ren nennen mesom ngeniei, pwal ren mwärum fän üom.
SOL 4:10 Kofoti, en mi wor tongom me rei, om tong a arar ngeniei, a mürina seni wain, nge om lö a pwokus seni ekewe lö me nofitin mongö meinisin.
SOL 4:11 Kofoti, tinawom a sup ren chönün ächi, nge chönün chunen me milik ra nonom fän chönawom. Iwe, pwonnen üfom a wewe ngeni pwonnen Lepanon.
SOL 4:12 Kofoti, en mi wor tongom me rei, ka usun chök eu tanipi mi köpüng, ewer, eu tanipi mi köpüng pwal eu puächen koluk mi tittila.
SOL 4:13 Om kewe irä mi märitä lon ra wewe ngeni eu tanipin apel ra uäni sokun uän irä mi mürina. Ra pwal mär lon ekewe irä mi pwokus iter henna me nart,
SOL 4:14 ekewe irä äfän, säpük me sinamon, pwal sokun irän apach mi pwokus meinisin, ekewe irä mi pwokus iter mör me aloes me nofitin mongö mi anö.
SOL 4:15 En ka usun chök eu puächen koluk mi achöchönü ewe tanipi, pwal usun chök eu chönüttu mi ur ren koluk mi manau. Ka pwal wewe ngeni ekewe chanpupu mi puputiu seni ewe chuk Lepanon.
SOL 4:16 Kopwe pwätä asepwälin efeng, etto asepwälin ör. Oupwe eniti tanipii we pwe pwoöchün epwe pwopwonfeil. Amwo ätewe mi wor tongan me rei epwe feito ren tanipin we o mongö seni uän ekewe irä mi mürina.
SOL 5:1 Kofoti, en mi wor tongom me rei, üa feito ren tanipii we. Üa ionifengeni ai säfei mi aüchea itan mör me ai nofitin mongö, üa neni ai fasen chunen me chönün, üa pwal ünümi ünümei wain me ünümei milik. Oupwe mongö o ün, ämi chienei. Ämi chienei mi achengicheng, oupwe fokun ün.
SOL 5:2 Üa möür, nge letipei a nela. Iwe, üa tan pwe üa rongorong pwe ätewe mi wor tongan me rei a fichifich o apasa, “Kopwe suki ngeniei asamen imwom, acheniei mi achengicheng, nei lisom pwal nei mi fokun limelimöch. Mökürei a chöchön ren amurenipwin, nge meten mökürei a chöchön ren chichin amurenipwin.”
SOL 5:3 Üa fen pwilitawu üfei. Ifa usun ai üpwe pwilitisefälielong? Üa fen talü pechei. Ifa usun ai üpwe alimengauasefäli?
SOL 5:4 Iwe, ätewe mi wor tongan me rei a aitielong pöün lon pwangen asamen imwei, nge letipei a fokun mwökütüküt ren.
SOL 5:5 Üa pwätä pwe üpwe suki asamen imwei ngeni ätewe mi wor tongan me rei, nge pei me aüti ra sür ren säfei mi aüchea itan mör, lupwen üa atapa lokun ewe asam.
SOL 5:6 Iwe, üa suki asamen imwei ngeni ätewe mi wor tongan me rei, nge i a fen kul o feila. Ngüni a süla, pun ese chüen nom. Üa kütta ätewe mi wor tongan me rei, nge üsap küna. Üa köri, nge esap pälüeniei.
SOL 5:7 Ekewe chon mas ra künaei, lupwen ra feilfetal lon ewe telinimw. Iwe, ra wichiei o akinasaei. Ekewe chon mas won tittin ewe telinimw ra urusi seniei mine üa filiti ngeniei.
SOL 5:8 Üa tüngor ngenikemi, ämi föpwülün Jerusalem, are oua küna ätewe mi wor tongan me rei, oupwe üreni pwe üa riaföü ren ai tongei.
SOL 5:9 En mi liöch seni fefin meinisin, ren met ätewe mi wor tongan me reöm a aüchea seni ekewe lusun mwän? Ren met ätewe mi wor tongan me reöm a aüchea seni ekewe lusun mwän, pwe a iei usun om tüngor ngenikem?
SOL 5:10 Ätewe mi wor tongan me rei a unusen äteöch o mesemesöch, a sil me lein engol ngeröü aramas.
SOL 5:11 Möküran a usun chök kolt mi mürina, nge meten möküran ra rürü o chol usun ülen eman ängä.
SOL 5:12 Föün mesan ra mürina usun chök lisom mi nom ünükün chanpupu o tütü lon milik, ra masolong lon lenier usun fau aüchea.
SOL 5:13 Sapan ra wewe ngeni lenien irän nofitin mongö mi fokun pwokus. Tinawan a usun kiop ra sup ren säfei mi aüchea itan mör.
SOL 5:14 Iwe, pöün ra wewe ngeni fochun kolt ra fout ngeni ring a wor faü aüchea lor. Inisin a motoutou usun chök ngiin äläfan, a pwal fout ngeni fau aüchea itan safaia.
SOL 5:15 Pechen ra usun chök ür seni ewe fau itan alapaster, ra longolong won kolt. Iwe, lapalapan a wewe ngeni ewe chuk Lapanon, a pwal mürina usun ewe irä setar.
SOL 5:16 An kapas a fokun pwetete. Ellet, a fokun äteöch. Iei usun lapalapen ätewe mi wor tongan me rei, ämi föpwülün Jerusalem.
SOL 6:1 Ia ätewe mi wor tongan me reöm a feila ie, en mi liöch seni fefin meinisin? Ia a feila ie, pwe aipwe etuk le kütta?
SOL 6:2 Ätewe mi wor tongan me rei a feila ren tanipin we ia ekewe irän nofitin mongö ra mär ie. Ikenan epwe foleni nöün pwiin sip o fichifich kiop.
SOL 6:3 Aüküki me ren, ngang nöün, nge aükükün me rei, i nei. A foleni nöün pwiin sip lein ekewe kiop.
SOL 6:4 En mi wor tongom me rei, ka liöch usun ekewe telinimw Tirsa me Jerusalem, nge ka pwal eniwokus usun eu mwichen sounfiu fän ar filäik.
SOL 6:5 Kopwe akulu mesom seniei, pun üa tiperukoruk rer. Meten mökürom a usun chök epwi pwiin kuuch ra tötiu me won ekewe chukun Kiliat.
SOL 6:6 Ngiim ra pwech usun chök epwi pwiin sip ra liwinto seni ar lenien tütü. Ir meinisin a wor nöür lippwe, esap wor eman me leir a aemanüla.
SOL 6:7 Sapom ra woparapar fän pwölüpwölün won mesom usun chök pekin apel.
SOL 6:8 A wor wone kiwinnen ewe king me walik ülüpwülüan, pwal föpwül resap lea.
SOL 6:9 Nge ngang üa chök tongei eman, neminewe mi liöch usun eman lisom. I chök eman won inan, a pwal lieson me won. Lupwen ekewe föpwül ra küna, ra apasa pwe a feiöch, nge kiwinnen ewe king me ülüpwülüan meinisin ra mwareiti.
SOL 6:10 Iö we a ling usun chök mallen rän, a tinöch usun maram o saramaram usun akkar, nge a pwal eniwokus usun eu mwichen sounfiu fän ar filäik?
SOL 6:11 Üa feitiu ren ewe tanipin almont, pwe üpwe nengeni ekewe irä mi pwüküfö lon ewe lemol, pun üa mochen silei ika ekewe irän wain ra sawit, ika ekewe apel ra ua.
SOL 6:12 Iwe, üse mörüei mwo, nge ai mochen a nukieila won wän nei aramas woken, pwe üpwe ar samol.
SOL 6:13 Kopwe liwinto, kopwe liwinto, en föpwülün Sulam, kopwe liwinto, kopwe liwinto pwe aipwe tongeni atolok. Mwän Pwota oua mochen katol ewe föpwülün Sulam, lupwen a pwörük lefilen ruu telin chon katol?
SOL 7:1 En nöün king föpwül, a fokun öch pecheöm lon ipwom sus. Sengesengen wänükum a usun chök chipwechipwen fau aüchea, förien eman mi silelap.
SOL 7:2 Iwe, pwuom a wewe ngeni eu kap mi ur ren wain mi anö, nge lukom a wewe ngeni eu chukun föün wiich, kiop ra nom pwelin ünükün.
SOL 7:3 Oupwum kewe ra usun chök apanen chia lippwe.
SOL 7:4 Iwe, üom a usun chök eu imw tekia a för seni ngiin äläfan, nge mesom ra usun chök ekewe nomun Hespon arun ewe asamalapen Pat Rappim. Pwötum a wewe ngeni ewe imw tekia won Lepanon mi nom awenewenen Tamaskus.
SOL 7:5 Mökürom a wenetä usun chök ewe chuk Karmel, meten mökürom a sapwilitiu, nge anüan a usun chök parachol. Iwe, ewe king a fif ren meten mökürom.
SOL 7:6 En mi wor tongom me rei, en ka fokun liöch, a fokun mürina amwararen om tong.
SOL 7:7 Iwe, ka üwenewenetä usun chök efoch nü, nge oupwum ra wewe ngeni uan.
SOL 7:8 Iwe, üpwe tötä won ewe irä palm o kini uan. Oupwum a usun chök umwun föün wain me rei, nge pwonnen ngasangasom a usun chök pwonnen apel.
SOL 7:9 Awom a usun chök wain mi mürina a mitimit le oromala, lupwen a achöchönü tinawei me ngii.
SOL 7:10 Aüküki me ren ätewe mi wor tongan me rei ngang nöün, nge i a chök positiei.
SOL 7:11 Kopwe etto, en mi wor tongom me rei, pwe sipwe feila lemäl o pwinipwin lon ekewe sop.
SOL 7:12 Lesosorusich sipwe feila ren ekewe tanipin wain pwe sipwe nengeni ika ekewe irän wain ra sot, ika sotur ra sukula, ika ekewe apel ra ua. Ikenan üa mochen pwäri ngonuk ai tong.
SOL 7:13 Ekewe apelin omung ra pwokus, nge arun asamen imwach a wor chomong sokun uän irä mi mürina, ua mi fö pwal ua minen lom. Iwe, üa iseniir fän itom, en mi wor tongom me rei.
SOL 8:1 Amwo kopwe usun chök eman mongeei ngeniei inei a oupwu. Mürin, are üpwe churuk me lükün, üpwe mitiruk, nge esap wor eman epwe turunufaseei.
SOL 8:2 Iwe, üpwe panukolong lon imwen inei, lon rumwen ewe mi nöüniei. Üpwe aünuk wain mi anö, pwal chönün föün ai apel.
SOL 8:3 Pöüimongum epwe nom fän mökürei, nge pöüifichum epwe romiei.
SOL 8:4 Oupwe pwon ngeniei, ämi föpwülün Jerusalem, pwe ousap aosukosuka äm tongfengen.
SOL 8:5 Iö we a feitä seni lon fanüapö o üllü ngeni ätewe mi wor tongan me ren? Mwän Fän ewe apel üa apwökuk. Iei ewe leni inom we a nöünuk me ie.
SOL 8:6 Kopwe pwauni lelukom fän itei, kosap romi eman me lüki. Pun tong a pöchökül usun mäla, nge lukomong a afeiengau usun ewe lenien sotup. Tong a chök kükkü, nge ngetengetan a fokun sarara.
SOL 8:7 Chomong koluk resap tongeni kunuela tong, nge chomong lölö resap pwal tongeni amopu. Are eman mwän a mochen möni tong ren pisekin imwan meinisin, epwe chök uren takir me ren aramas.
SOL 8:8 A wor rech eman kükün pwiich esamwo tipwük. Iwe, met sipwe föri fän iten pwiich, ika eman alüal epwe tüngor pwe epwe pwülüeni?
SOL 8:9 Are pwiich a wewe ngeni eu tit, sipwe aüetä eu imw tekia seni silifer won. Nge are a wewe ngeni eu asamalap, sipwe ti ngeni pap seni setar.
SOL 8:10 Iwe, ngang üa wewe ngeni eu tit, nge oupwi ra usun chök ekewe imw tekia. Iei mine üa wiliti me ren ätewe mi wor tongan me rei usun eman mi küna kinamwe.
SOL 8:11 Iwe, Salomon a eäni eu tanipin wain lon Paal Hamon. Nge a mwüt ngeni nöün chon tümwün pwe repwe tanipini. Iwe, iteiten eman me eman a wisen mönätiu engeröü föün moni silifer fän iten uan.
SOL 8:12 Ai tanipin wain wesewesen püsin ai. Iwe, en Salomon kopwe nöüni ekewe engeröü föün moni silifer, nge ekewe chon tümwünü uän ewe tanipi repwe angei ruopükü.
SOL 8:13 O en mi wor tongom me rei, ka nonom lon ekewe tanipi, chiechiom kewe ra aüselinga mweliom. Kose mochen üpwe pwal aüselinga mweliom.
SOL 8:14 En mi wor tongom me rei, kopwe müttir feito rei usun chök eman chia, ika eman ätemwänin chia won ekewe chukun irän nofitin mongö.
ISA 1:1 Iei künään Aisea nöün Am we mwän usun Juta me Jerusalem, a küna lon mwün ekewe king iter Ussia, Jotam, Ahas me Hiskia.
ISA 1:2 Iei alon ewe Samol mi Lapalap, “Oupwe rongorong, läng me fanüfan, mine üa apasa: Üa foleni nau kana, nge ra ü ngeniei.
ISA 1:3 Eman kow a silei an samol, nge eman aas a silei ewe sepi an samol a amongöü lon. Nge ar sile a kon lap seni än chon Israel sile, nei aramas kana esap wor ar wewe.”
ISA 1:4 Ämi eu täppin aramas mi tipis, oua fokun föföringau, nau mi lükümach chök. Oua pöütala ewe Samol mi Lapalap, oua turunufasei Ewe mi Pin lon Israel o kul seni.
ISA 1:5 Pwota oua chök sopwela le ü ngeni Kot? Ifa usun, oua mochen pwe epwe sopwela le apwüngükemi? Unusen möküremi a fen kinas, nge unusen lelukemi a apwangapwang.
ISA 1:6 Seni fän pechemi tori möküremi esap wor pöchökül, nge inisimi a kula ren mwochol me ninipüüng me kinas mi cha. Nge kinasemi esap tüng, esap pwal finifin ika pwetete ren lö.
ISA 1:7 Fanüemi a tala, nge ämi telinimw ra karala. Chon ekis ra mongö uän fanüemi fän mesemi. Iwe, fanüemi a ta usun chök eu fanü chon ekis ra ataela.
ISA 1:8 Iwe, Jerusalem chök a chüen nonom usun chök eu telinimw sounfiu ra pwelifeili ren pisekin maun. A apwangapwang usun chök apwangapwangen eu likachoch lon tanipin wain ika eu likachoch won tö.
ISA 1:9 Are ewe Samol mi Unusen Manaman esap amanaua ekoch leich, sipwe usun chök chon Sotom me chon Komora.
ISA 1:10 Jerusalem, om kewe samol me aramasom kewe ra usun chök chon Sotom me chon Komora. Oupwe rongorong alon ewe Samol mi Lapalap. Oupwe aüselinga mine ach we Kot a mochen aiti ngenikemi.
ISA 1:11 Ewe Samol mi Lapalap a apasa, “Met lomoten ämi achomonga asoren man ngeniei? Üa ku ren ämi asor ngeniei ätemwänin sip me kirisin man mi öümanau. Üsap pwapwa ngeni chan ätemwänin kow me sip me ätemwänin kuuch.
ISA 1:12 Iö a pesei ngenikemi pwe oupwe uwato ekei asor, lupwen oua feito pwe oupwe fel ngeniei? Iö a pesei ngenikemi pwe oupwe pusüngüsüng lon imwei imwenfel?
ISA 1:13 A lomotongau ämi uwato rei ämi kewe asor. Ämi apach mi pwokus a fokun anioput me rei, nge ämi chulapen popun maram me ränin sapat me chulap mi pin üsap efich, pun meinisin ra ingau ren ämi tipis.
ISA 1:14 Üa oput ämi chulapen popun maram me ämi chulap mi kefilitä ren unusen letipei. Ra aweiresiei, üsap chüen mochen ar repwe fis.
ISA 1:15 Lupwen ämi oua aitietä pöümi le iotek, üsap nenengenikemi. Nge lupwen oua fen kapaspat lon ämi iotek, üsap fokun aüseling, pun oua lepöücha ren ämi niela aramas.
ISA 1:16 Oupwe limetikemi pwe oupwe limöch, oupwe pöütala ämi föföringau seni fän mesei o ükütiu le föri mine a ngau.
ISA 1:17 Iwe, oupwe kaiö föföröch o kütta pwüngüöch, nge oupwe epeti angangen chon mwänewüs. Oupwe peni chokewe mi mäsen, oupwe pwal alisi ekewe fefin mi mä pwülüer.”
ISA 1:18 Iei alon ewe Samol mi Lapalap, “Ou etto, ousipwe pwüngüpwüngfengen. Oua limengau ren tipis usun eman a limengau ren cha. Nge ngang üpwe limetikemi pwe oupwe limöch usun pwechepwechen sno. Inamwo are oua limengau usun mangaku mi fötöpwül, oupwe fokun limöch.
ISA 1:19 Are oupwe achocho le aleasochisiei, oupwe mongö seni öchün uän ewe fanü.
ISA 1:20 Nge are oua lükümach o ü ngeniei, oupwe mäla lon maun. Ngang ewe Samol mi Lapalap üa kapas.”
ISA 1:21 Ewe telinimw mi pwüng me lom a usun chök eman fefin mi föri föförün lisowu. Me lom aramas mi pwüng ra imweimw lon, nge ikenai chon niela aramas ra choni.
ISA 1:22 Jerusalem, me lom ka wewe ngeni silifer, nge iei ka ngününgauan chök. Ka wewe ngeni wain mi mürina, nge iei ka koluk echök.
ISA 1:23 Om kewe souemwen ra wiliti chon pälüeni mwü, ra pwal chiechi ngeni chon solä. Ir meinisin ra sani lifangen amichimich, ra pwal tipemong won lifang. Resap peni chokewe mi mäsen lon kapwüng, resap pwal alisi ekewe fefin mi mä pwülüer.
ISA 1:24 Iei oupwe rongorong mine ewe Samol mi Unusen Manaman, ewe Koten Israel a apasa, “Ngang üpwe atoto ai song womi, ämi chon pälüeniei, üpwe pwal ngenikemi chappen ämi föför, ämi chon oputaei.
ISA 1:25 Ngang üpwe apwüngükemi, üpwe limetikemi usun mächä a limelim ren ekkei, pwe meinisin mine a ngau lomi epwe imwüla senikemi, üpwe pwal angei senikemi ämi limengau.
ISA 1:26 Iwe, üpwe atosefälielong ämi souapwüng me souemwen lon wiser usun chök ätekewe me lom. Mürin, Jerusalem epwe iteni eu telinimw mi pwüngüöch me allükülük.”
ISA 1:27 Jerusalem epwe ngasala ren apwüng o aramasan mi ekieksefäl repwe ngasala ren pwüng.
ISA 1:28 Nge ekewe chon ü ngeni Kot me chon tipis repwe rosola meinisin, chokewe mi likitala ewe Samol mi Lapalap repwe mola.
ISA 1:29 Oupwe säw pokiten ekewe irä ook mi pin oua pwapwaiti le fel ngeni, oupwe pwal mitingau ren ekewe tanipi oua filätä pwe oupwe fel ngeni ämi uluulun anü lon.
ISA 1:30 Iwe, oupwe wewe ngeni efoch irä ook mi pwas chön, oupwe pwal wewe ngeni eu tanipi esap wor eman a achöchönü ren koluk.
ISA 1:31 Usun pan nü mi pwas a karala ren ngetengeten ekkei, iei usun chokewe mi pöchökül repwe feiengau ren püsin ar föför mi ngau, nge esap wor eman epwe tongeni aükätiu.
ISA 2:1 Iei ewe kapasen pwärätä Kot a asile ngeni Aisea nöün Amos we mwän usun Juta me Jerusalem:
ISA 2:2 Iwe, lon fansoun sopolan, ewe chuk ia a nom ie imwenfelin ewe Samol mi Lapalap epwe fefeitä o nükünük, epwe pwal tekia seni chuk meinisin. Chon ekewe mwü won fanüfan repwe mwicheto ren.
ISA 2:3 Iwe, chomong aramas repwe feito o apasa, “Ousipwe feitä won chukun ewe Samol mi Lapalap ren imwenfelin än Israel we Kot. I epwe aiti ngenikich mine a mochen sipwe föri, pwe sipwe tongeni apwönüetä an kewe kapas.” Pun seni won Sion epwe towu ewe allük, nge seni lon Jerusalem än ewe Samol mi Lapalap kapas.
ISA 2:4 Ewe Samol mi Lapalap epwe souapwüng lefilen ekewe mwü, epwe pwal aükätiu änini lefilen aramas. Iwe, repwe amani nöür ketilas o awili ngeni pisekin tuw pwül, nge wokur siles repwe awili ngeni naifen otot. Ekewe mwü resap chüen maunfengen, resap pwal chüen kaiö maun.
ISA 2:5 Ou etto, ämi mwirimwirin Jakop, ousipwe fetal lon ewe saram ewe Samol mi Lapalap a ngenikich.
ISA 2:6 Ai Kot, ka pöütala noum aramas, ekewe mwirimwirin Jakop. Pun ra chök föri angangen pwee, örunien ekewe fanüen ötiu, ra pwal föri angangen souasisil usun ekewe chon Filistia o chiechi ngeni ekewe chon lükün.
ISA 2:7 Fanüer a ur ren silifer me kolt, nge wöür kana resap tongeni it. Iwe, fanüer a masou ren oris kana, nge war woken ra fokun chomong.
ISA 2:8 Fanüer a pwal masou ren uluulun anümwäl kana, nge chon ewe fanü ra asamolu mine ra püsin föri ren pöür.
ISA 2:9 Iei mine aramas meinisin ra küna itengau me tekison. Kosap amusala ar tipis.
ISA 2:10 Oupwe sülong lon pwangen achau, oupwe aopakemi fän pwül me mwen än ewe Samol mi Lapalap song me lingen an manaman.
ISA 2:11 Lon ena rän chon tipetekia repwe küna tekison, än aramas lamalamtekia epwe kisikisitiu, nge ewe Samol mi Lapalap chök epwe tekia.
ISA 2:12 Pun ewe Samol mi Unusen Manaman epwe awara eu ränin an epwe apwüngü aramas meinisin mi lamalamtekia o tunosikesik, nge meinisin mi tekia repwe küna tekison.
ISA 2:13 Epwe ataela ekewe irä setar mi üwenewenetä won Lepanon, pwal ekewe irä ook meinisin lon Pasan.
ISA 2:14 Epwe asönü ekewe chukutekia me ekewe chukutekison meinisin,
ISA 2:15 epwe ataetiu ekewe imw tekia pwal ekewe tit mi pöchökül,
ISA 2:16 epwe ataela ekewe sipwen Tarsis meinisin, me ekewe wa mi lingöch.
ISA 2:17 Lon ena rän chon tipetekia repwe küna tekison, än aramas lamalamtekia epwe kisikisitiu, nge ewe Samol mi Lapalap chök epwe tekia.
ISA 2:18 Iwe, ekewe uluulun anümwäl repwe wesewesen morola.
ISA 2:19 Ekewe aramas repwe sülong lon pwangen achau pwal lon pwangen fän pwül me mwen än ewe Samol mi Lapalap song me lingen an manaman, lupwen a feito pwe epwe achecha fanüfan.
ISA 2:20 Lon ena rän aramas repwe pöütala ngeni nakich me pöüte ar kewe uluulun anümwäl ra föri seni silifer me kolt fän iten ar repwe fel ngeniir.
ISA 2:21 Lupwen ewe Samol mi Lapalap epwe feito pwe epwe achecha fanüfan, aramas repwe sülong lon pwangen achau pwal fän säpereperen achau me mwen än ewe Samol mi Lapalap song me lingen an manaman.
ISA 2:22 Oupwe ükütiu le apilükülükü aramas, pun a chök mochomoch fansoun manauer. Met aüchear?
ISA 3:1 Nengeni, ewe Samol, ewe Samol mi Unusen Manaman epwe angei seni Jerusalem me Juta aramas me mettoch meinisin ra eäniir longolong. Epwe angei seniir ener mongö me ünümer koluk.
ISA 3:2 Epwe angei seniir ekewe ätepwora me sounfiu, ekewe souapwüng me soufos, ekewe soupwe me souakom,
ISA 3:3 ekewe samolun sounfiu me souemwen mi iteüöch, ekewe souekiek pwal ekewe sourong me souawarawar.
ISA 3:4 Iwe, ewe Samol mi Lapalap epwe awisa ät pwe repwe ar samol, nge semirit repwe nemeniir.
ISA 3:5 Iwe, aramas repwe kirikiringaufengen lefiler eman ngeni eman. Säräfö resap suföliti chinlap, nge chokewe esap wor iter repwe pälüeni ekewe mi iteföüla.
ISA 3:6 Epwe war eu fansoun, lupwen chon eu eterekes repwe üreni eman me leir, “Kopwe ach samol, pun a chüen wor üfom owokot. Kopwe nemeni mwüch mi fitikoko.”
ISA 3:7 Mürin epwe pälüeni, “Üsap tongeni alisikemi, pun ese wor enei me üfei lon imwei. Ousap seikieitä pwe üpwe samolun aramas.”
ISA 3:8 Iwe, Jerusalem a fetal ngeni an epwe feiengau, nge Juta epwe turula, pun chor ra pälüeni ewe Samol mi Lapalap ren ar kapas me ar föför, ra pwal ü ngeni ewe Kot mi ling.
ISA 3:9 Wowon won meser a pwärätä ar lapalapangau, ra tipis usun chon Sotom, nge resap aopala. Feiengauer! Pun ra püsin atoto feiengau wor.
ISA 3:10 Oupwe asile ngeni chon pwüng pwe repwe feiöch, pun repwe feiöchüni feiöchün ar föför.
ISA 3:11 Feiengauen ekewe chon föföringau! Repwe püsin küna feiengauer, pun mine ra föri epwe püsin sapeitiir.
ISA 3:12 Ät ra ariaföüü nei aramas, nge fefin ra nemeniir. Ämi nei aramas, nöümi souemwen ra emweningauekemi o atokakemiila seni ämi al.
ISA 3:13 Ewe Samol mi Lapalap a mot won an lenien apwüng pwe epwe atipisi nöün kewe aramas, a ütä pwe epwe apwüngüür.
ISA 3:14 Ewe Samol mi Lapalap epwe apwüngü ekewe souakom me souemwenin nöün aramas. A atipisiir o apasa, “Ämi chokewe oua arosala ewe tanipin wain, imwemi ra ur ren pisek oua angei seni ekewe chon wöüngau.
ISA 3:15 Pwota chök oua puri nei aramas o angei ämi feiöch seni ekewe chon wöüngau? Ngang Kot ewe Samol mi Unusen Manaman üa kapas.”
ISA 3:16 Ewe Samol mi Lapalap a pwal apasa, “Ekewe fin Jerusalem ra lamalamtekia, ra sikesik le fetal, ra nerikirik ren ar mochenia, ra pwal lüölü lupwen ar fetal, pwe fouten pecher repwe tikitik.
ISA 3:17 Iei mine üpwe orupu mökürer pwe meten mökürer repwe mworola, pwe repwe mongopan.”
ISA 3:18 Lon ena fansoun ewe Samol epwe angei seni ekewe fin Jerusalem ar kewe fouten peche pwal fouten mökür me fän ü.
ISA 3:19 Epwe angei seniir niouter me ar lälä pwal pwölüpwölün won meser,
ISA 3:20 mwärämwärin won mökürer me lälän pecher, pwal chomong sokun rumen epit me omunger,
ISA 3:21 nöür kewe ringen won pau pwal ringen lon pwöt,
ISA 3:22 chomong sokun üfer üföüfen mwichelap pwal ar pwotou,
ISA 3:23 nöür kilasen ori me üfer simis mi menenen o lingöch, pwal imwer akkaw me ar nikotupwöl meinisin.
ISA 3:24 Iwe, epwe fis pwe ar pwokus ren lö epwe siwil ngeni pwongau, nge siwilin ar pelit repwe aea säl. Iwe, mökürer mi langatam epwe mwor pwe repwe mongopan, resap üföüf üf mi lingöch, nge repwe üföüf üf seni tuk, nge chokewe mi liöch repwe liengau.
ISA 3:25 Ekewe mwän seni ewe telinimw, pwal fokun ekewe chon pwora repwe mäla lon maun.
ISA 3:26 Iwe, epwe wor kechü me ngüngüres lon ekewe asamalapen Jerusalem, pun ewe telinimw a fokun tala, nge aramasen lon resap chüen nom.
ISA 4:1 Lon ena fansoun füman fefin repwe amwöchü eman chök mwän o apasa, “Äm aipwe püsin tümwünükem ren mongö me pisek. Aipwe chök pwüpwülü ngonuk pwe äm säw epwe wes.”
ISA 4:2 Lon ena fansoun, ewe irä ewe Samol mi Lapalap a ämärätä epwe fokun öch me ling, nge uän ewe fanü epwe fokun mürina me ling ngeni chokewe mi chüen manau mürin än Israel feiengau.
ISA 4:3 Iwe, ekewe aramas mi chüen manau lon Sion pwal lon Jerusalem repwe iteni chon pin, ir meinisin mi mak iter lon ewe puk pwe ra manau lon Jerusalem.
ISA 4:4 Ewe Samol epwe apwüngü o alimöchü chon ewe mwü ren an manaman, epwe talü än chon Jerusalem tipis me ewe cha mi ninitiu lon.
ISA 4:5 Mürin, ewe Samol mi Lapalap epwe awara eu kuchun ötüöt lerän won unusen ewe chuk Sion pwal won chokewe mi mwichefengen ikenan, nge lepwin epwe awara eu kuchun ekkei mi fokun saramaram. Iwe, an ling epwe pwölüela unusen ewe leni.
ISA 4:6 An ei ling epwe pwölüela chon ewe telinimw seni pwichikaren lerän, epwe pwal aopeer seni mölümöl me räningau.
ISA 5:1 Üa mochen eäni echö köl ngeni chienei mi achengicheng usun an tanipin wain. Chienei mi achengicheng a eäni eu tanipin wain won eu chuk mi pwülöch.
ISA 5:2 Iwe, a tuw ewe pwül o ionawu ekewe fau me lon, a pwal fotuki irän wain mi fokun mürina won. Nge lukalapan a aüetä eu imwen mamas o föri eu lenien puri föün wain lon. Iwe, a witiwiti an epwe afisätä ua mi öch, nge ewe tanipi a chök afisätä ua mi ngau.
ISA 5:3 Iei mine chienei a apasa: Ämi chon Jerusalem me chon Juta, üa tüngor ngenikemi pwe oupwe filätä iö leim a mwäl, ngang ika ai tanipi.
ISA 5:4 Ifa usun, a chüen wor och angang üsamwo föri fän iten ai tanipin wain? Pwota a chök afisätä ua mi ngau, lupwen üa witiwiti an epwe afisätä ua mi öch?
ISA 5:5 Iwe, iei üpwe asile ngenikemi mine üpwe föri ngeni ai tanipi. Üpwe ütti ekewe irä mi tii ünükün ewe tanipi o ataela ewe tit pwe ekewe manmwacho repwe tolong. Repwe eni ekewe irän wain o puriretiu.
ISA 5:6 Iwe, üpwe föri mine ewe tanipi epwe pön ren. Esap wor eman epwe fichitolei irän ika tuw pwülün lon, nge pötöwölingau me iräfölüföl repwe märitä lon. Iwe, üpwe allük ngeni ekewe kuchun üt pwe resap püngütiu won.
ISA 5:7 Iwe, än ewe Samol mi Unusen Manaman tanipin wain ekewe chon Israel, nge fotukian irä mi mürina ekewe chon Juta. A awiti pwe aramas repwe föri mine a mürina, nge ra chök nimanau. A awiti pwe repwe föri mine a pwüng, nge a chök rong kechüen riaföü pokiten pwüngingau.
ISA 5:8 Feiengauemi, ämi mi achomonga imwemi me fanüemi tori esap chüen wor lenien ekewe lusun aramas. Mürin, ämi chök oupwe nonom lon ewe fanü.
ISA 5:9 Iwe, üa rongorong än ewe Samol mi Unusen Manaman kapasen akapel, “Ellet, ekei imw watte pwal imweöch repwe tala, nge esap chüen wor aramas lor.
ISA 5:10 Eu tanipin wain ükükün langataman me chölapan walik ngaf epwe chök awora limu kalon wain. Nge ren engol tuk föün wiich ra fotuki, repwe chök kini ükükün eu tuk.”
ISA 5:11 Feiengauemi, ämi mi pwätä lesosorusich pwe oupwe popuetä le ün sakau, ämi mi motmwäl tori lepwin pwe oupwe puch ren wain.
ISA 5:12 A wor nöümi kitar me rappwa, ämi pisekin kaktai me nöümi aangün pwal ünümemi wain, lupwen oua mongöfengen. Nge ousap ekieki usun mine ewe Samol mi Lapalap a föri, ousap pwal ingeiti angangen pöün.
ISA 5:13 Iei mine oupwe oola won fanü toau mwen ämi oupwe mefi. Iwe, chokewe mi iteüöch me leimi repwe mäla ren ar echik, nge ekewe aramas repwe mäla ren ar kaka.
ISA 5:14 Iei mine ewe lenien sotup a fokun sukula pwe epwe oromala meinisin. Iwe, ekewe aramas tekia me lon Jerusalem me ewe mwicheichen aramas mi pwapwa o mwänek repwe turulong lon.
ISA 5:15 Lon ena fansoun aramas meinisin repwe küna tekison, nge ekewe chon lamalamtekia repwe tur,
ISA 5:16 nge ewe Samol mi Unusen Manaman epwe tekiatä ren an eäni apwüng, ewe Kot mi pin a püsin pwärätä an pin ren an föri mine a pwüng.
ISA 5:17 Iwe, nienifön sip repwe mongöfetal lein ekewe telinimw mi tala, nge kuuch me kow repwe kütta ener fetil ikenan.
ISA 5:18 Feiengauemi, ämi mi förätä pwüngingau ren mochenin letipemi, oua pwal föri fän pöchökül mine oupwe tipis ren,
ISA 5:19 ämi mi apasa, “Kot epwe müttir apwönüetä an angangen apwüng pwe sipwe küna. Ewe mi Pin lon Israel epwe awara mine a ekiekin föri pwe sipwe wesewesen silei.”
ISA 5:20 Feiengauemi, ämi mi aita ngeni mürina mine a ngau, nge ngeni ngau mine a mürina. Oua awili rochopwak ngeni saram, nge saram ngeni rochopwak, oua pwal awili ngeni arar mine a maras, nge ngeni maras mine a arar.
ISA 5:21 Feiengauemi, ämi mi lükü püsin ämi mirit, oua pwal ekieki pwe ämi chon tipachem.
ISA 5:22 Feiengauemi, ämi mi iteföüla le apuchakemi ren wain, oua pwal silelap le nofitifengeni ünümemi sakau mi pwichikar.
ISA 5:23 Oua amusa ekewe mi tipis fän iten lifangen amichimich, nge oua atipisimwäli chokewe esap wor ar tipis.
ISA 5:24 Iei mine warer repwe pwasala, nge sotur repwe mworotiu usun pipi. Iwe, repwe müükala usun chök pötöwöl mi pwas lon ngetengeten ekkei, pwal usun chök fetilipwas lon characharen um. Pun ra pöütala än ewe Samol mi Unusen Manaman allük o turunufasei än Ewe mi Pin lon Israel kapas.
ISA 5:25 Iei mine ewe Samol mi Lapalap a fokun song ngeni nöün aramas o aitiela pöün pwe epwe apwüngüür. Iwe, ekewe chuk repwe chechech, nge ekewe somä repwe nonom won ekewe al usun chök pipi. Iei mwo nge än Kot song esamwo kul seniir, pöün a chüen afeiengaueer.
ISA 5:26 Iwe, Kot epwe aürätä eu filaik, pwe chon eu mwü mi toau repwe küna, epwe okowäriir pwe repwe feito seni lesopun fanüfan meinisin. Nge nengeni, ra müttir etto.
ISA 5:27 Esap wor eman leir a malülü ika chepetek, esap pwal wor eman a aiesum ika möür. Iwe, ar pelit ra nükünük, nge ririn ipwer sus resap mwü.
ISA 5:28 Ar kewe likapich ra mei, nge wokur föün esefich ra ken. Iwe, kün nöür oris ra usun chök fau, nge willen war woken ra märäkul usun eu ewiniär.
ISA 5:29 Iwe, ra wörüwör usun chök laion ika usun apanen laion. Ra ngüngü, lupwen ra turufi liaper o uwala ekis, nge esap wor eman a tongeni amanaua liaper kewe.
ISA 5:30 Lon ewe rän repwe ngüngü won Israel usun ngüngün noon lematau. Nge are eman epwe nenengeni ewe fanü, epwe chök küna rochopwak me riaföü. Iwe, saram epwe rochola ren kuchu.
ISA 6:1 Lon ewe ier, lupwen ewe king Ussia a mäla, üa küna ewe Samol, a mot won eu lenien motun king mi fokun tekia, nge lepwülün üfan a aurala lon ewe imwenfel.
ISA 6:2 Serafim ra ütä pwelin ünükün, nge eman me eman leir a wor wonofoch pöükässin. Ruofoch ra pwölü ngeni won meser, ruofoch ngeni pecher, nge ruofoch ra äs won.
ISA 6:3 Iwe, ra kökköfengen lefiler, “A pin, a pin, a pin ewe Samol mi Unusen Manaman. Unusen fanüfan a ur ren lingan.”
ISA 6:4 Iwe, longolongun asamalapen ewe imwenfel a chechech ren osen ar kökkö, nge lon ewe imwenfel a ur ren ötüöt.
ISA 6:5 Iwe, üa apasa, “Feiengauei, üpwe mäla, pun ngang eman mwän mi tipis ren ekewe kapas üa apasa ren tinawei, üa pwal imweimw lein aramas mi tipis ren ar kewe kapas ra apasa ren tinawer. Nge mesei a küna ewe King, ewe Samol mi Unusen Manaman.”
ISA 6:6 Mürin, eman lein ekewe Serafim a ässito rei, nge a amwöchü lepöün eföü molien ekkei a angei won efoch achip seni won ewe rongen asor.
ISA 6:7 Iwe, a chüri ngeni awei o apasa, “Nengeni, ei moli a tori tinawom, iei om pupungau a la, nge om tipis ra musala.”
ISA 6:8 Mürin, üa rong mwelien ewe Samol mi Lapalap a apasa, “Iö üpwe tini, nge iö epwe ach chon künö? Nge üa pälüeni, “Ngang üa mochen, kopwe tiniei.”
ISA 6:9 Iwe, Kot a üreniei, “Kopwe feila o aronga ngeni ekei aramas, ‘Oupwe aü selingemi o rongorong, nge ousap wewe ren. Oupwe nenengeni, nge ousap küna och.’
ISA 6:10 Kopwe aföüala letipen ekei aramas, kopwe apüngala selinger o achunala meser, pwe resap tongeni künakün ren meser ika rongorong ren selinger ika wewe ren letiper, pwe resap kul o küna manau.”
ISA 6:11 Mürin üa aisini, “Ai Samol, ifa ükükün fansoun an epwe fis ei?” Iwe, Kot a pälüeni, “Tori ekewe telinimw repwe tala o pön, pwal tori esap chüen wor aramas lon ekewe imw, nge ewe fanü epwe unusen pön.
ISA 6:12 Ngang üpwe tinala ekewe aramas toau seni fanüer o föri pwe unusen ewe fanü epwe pön.
ISA 6:13 Iwe, are eu leengol seni ekewe aramas repwe nomotiu, pwal ir repwe küna feiengau. Chon Israel repwe usun chök efoch irä ook a pöküpök, nge popun chök a nom. Iwe, ekewe mwirimwirin chon Israel mi pin, ir ewe popun.
ISA 7:1 Lupwen Ahas nöün Jotam we mwän, nge Jotam nöün Ussia we, a kingen Juta, a fis pwe Resin ewe kingen Siria me Peka nöün Remalia we, ewe kingen Israel, ra feila Jerusalem o maun ngeni, nge resap tongeni liapeni.
ISA 7:2 Iwe, lupwen ewe pworaus a tori Ahas ewe kingen Juta pwe Siria a aileni Israel, i me nöün aramas ra fokun niuokus pwe ra chechech usun irä, lupwen asepwäl a pöniir.
ISA 7:3 Iwe, ewe Samol mi Lapalap a üreni Aisea, “Oupwe feila en me Sear-Jasup noum we, pwe oupwe churi ewe king Ahas mi nom lesopun ewe lenien koluk a feitiu seni lon ewe nomun koluk asan, ünükün ewe alalap mi ale ngeni ewe leni ia ra apwecha mangaku ie.
ISA 7:4 Iwe, kopwe apasa ngeni, ‘Kopwe afäluk o mosonoson, kosap niuokus are öürek lon letipom pokiten ekana ruoman king ra wewe ngeni ruofoch amüch resap mwaiken. Kosap niueiti än Resin me än ekewe chon Siria song mi fokun watte, pwal än nöün Remalia we song.
ISA 7:5 Iwe, Siria fiti Israel me nöün Remalia we ra amolätä ar repwe rawangaueek. Ra apasa,
ISA 7:6 “Ousipwe tolong lon Juta o eniwokusu ekewe aramas mi nom lon. Sipwe liapeni fän itach o seikätä nöün Tapeel we pwe epwe king lon.”
ISA 7:7 Nge ngang Kot ewe Samol mi Lapalap üa apasa pwe ei ekiek esap fokun fis.
ISA 7:8 Pun Tamaskus epwe chök samolun telinimwen Siria, Resin epwe chök samolun Tamaskus, nge Israel epwe tatakis mürin wone me limu ier, pwe esap chüen eu mwü.
ISA 7:9 Iwe, Samaria epwe chök samolun telinimwen Israel, nge nöün Remalia we epwe chök samolun Samaria. Are ousap nüküchar lon ämi lükülük, ousap tongeni nonom.’”
ISA 7:10 Iwe, ewe Samol mi Lapalap a tinisefäliela pworaus ngeni Ahas,
ISA 7:11 “Kopwe tüngor eu asisil seni ewe Samol mi Lapalap om we Kot, esap lifilifil ika eu asisil seni lon lenien sotup ika seni lon läng.”
ISA 7:12 Nge Ahas a üreni, “Üsap fokun tüngor eu asisil, üsap pwal sotuni ewe Samol mi Lapalap.”
ISA 7:13 Mürin, Aisea a apasa, “Oupwe rongorong, ämi mwirimwirin Tafit. Ifa usun, esap naf ngenikemi pwe oua epwisi aramas, nge oua pwal mochen epwisi ai we Kot?
ISA 7:14 Iei mine ewe Samol mi Lapalap epwe püsin ngenikemi eu asisil. Nengeni, eman föpwül epwe pwopwo o nöüni eman ät, nge epwe aita ngeni Emanuel .
ISA 7:15 Iwe, epwe ünümi milik me chönün chunen, lupwen a mämäritä o silei pälüeni mine a ngau o filätä mine a öch.
ISA 7:16 Nge mwen ewe ät epwe sile pälüeni mine a ngau o filätä mine a öch, fanüen ekewe ruoman king en ka niueitiir epwe tala.
ISA 7:17 Ewe Samol mi Lapalap epwe atoto womw pwal won noum aramas me chon leimwen semom eu fansoun riaföü ousamwo küna seni ewe fansoun Israel a imwü seni Juta, pun epwe awarato ewe kingen Asiria.
ISA 7:18 Lon ena fansoun ewe Samol mi Lapalap epwe okowäri chon Isip pwe repwe feito usun nikken seni lesopolan ewe chanpupu Nil. Epwe pwal okowäri ekewe chon Asiria pwe repwe feito usun achi.
ISA 7:19 Iwe, ir meinisin repwe feito o sotiu lon ekewe pwokur, lon pwangen achau, won ekewe iräfölüföl meinisin pwal won ekewe lenien fetil.
ISA 7:20 Lon ena fansoun ewe Samol mi Lapalap epwe satani eman chon räisö seni pekilan ewe chanpupu Oifrat, pwe epwe räisöw möküremi me pechemi pwal alusemi. Iwe, ewe räisö fokun ewe kingen Asiria.
ISA 7:21 Lon ena fansoun epwe fis pwe ika eman chon foleni man epwe nöüni eman chök apanen kow me ruoman kuuch,
ISA 7:22 iei mwo nge epwe chök naf ngeni ünüman milik, pun chönün oupun ekewe man ra fokun lölö. Iwe, chokewe mi chüen nonom lon ewe fanü repwe chök ünümi milik me chönün chunen.
ISA 7:23 Lon ena fansoun epwe fis pwe iteiten leni ia engeröü irän wain ra mär ie me lom, nge liwinir engeröü föün moni silifer, repwe mär pötöwölingau me iräfölüföl lor.
ISA 7:24 Aramas repwe feila ikenan fän ar kewe likapich chök, pun unusen ewe fanü epwe ur ren pötöwölingau me iräfölüföl.
ISA 7:25 Me lom aramas ra angang ngeni ekewe tanipi won ekewe chuk, nge iei resap chüen feila won pokiten ekewe pötöwölingau me ekewe iräfölüföl. Iwe, kow me sip kana repwe chök ipweipweri ekewe tanipi.”
ISA 8:1 Mürin, ewe Samol mi Lapalap a üreniei, “Kopwe angei epek fau mi chöpöp o makei won ren itechik aramas ra tongeni aleani ‘Maher-salal-haspas.’
ISA 8:2 Kopwe pwal körato ruoman mwän mi allükülük, ewe souasor Uria pwal Sakaria nöün Jeperekia we mwän, pwe repwe chon pwärätä.”
ISA 8:3 Mürin üa kon ren pwülüei we, nge a pwopwo o nöüni eman ät. Iwe, ewe Samol mi Lapalap a üreniei, “Kopwe aita ngeni ewe ät Maher-salal-haspas.
ISA 8:4 Pun mwen än ewe semirit epwe tongeni apasa ‘semei’ ika ‘inei’, ewe kingen Asiria epwe akom le uwala wöün Tamaskus me pisekin Samaria.”
ISA 8:5 Iwe, ewe Samol mi Lapalap a kapassefäl ngeniei,
ISA 8:6 “Ekei aramas ra aücheangaua ekewe kolukun Siloa mi pupuöch, nge ra pwapwa ren ar pwonen atipeeu ngeni Resin ewe kingen Siria me ewe king Peka nöün Remalia we.
ISA 8:7 Iei mine ngang ewe Samol üpwe awarato ewe kingen Asiria me nöün sounfiu meinisin pwe repwe maun ngeni Juta. Repwe feito usun pumongun ewe chanpupu Oifrat, lupwen a säsewu seni lenian o pwölüela ünükün.
ISA 8:8 Repwe tolong lon Juta usun eu noter a tolong lon ewe fanü o pwölüela. Nge lölön epwe feitä tori üen aramas. O Emanuel , ekewe chon Asiria repwe chonifetalei unusen fanüom.”
ISA 8:9 Oupwe achufengenikemi, ämi chon ekewe mwü, nge oupwe niuokus. Oupwe aüseling, ämi chon ekewe fanü mi toau. Oupwe amolakemiitä ngeni maun, nge oupwe niuokus. Ewer oupwe amolakemiitä, nge oupwe niuokus.
ISA 8:10 Oupwe pwüngüpwüngfengen, nge ousap fokun pwäk ngeni och. Oupwe pwal apwüngala och, nge esap fokun fis, pun Kot ailem.
ISA 8:11 Iwe, ewe Samol mi Lapalap a kapas ngeniei fän an manaman mi lapalap. A fönöüei pwe üsap föri föförün ekei aramas. Iwe, a üreniei,
ISA 8:12 “Ousap aita ngeni rawangau mine ekei aramas ra aita ngeni rawangau, ousap pwal niueiti mine ir ra niueiti.
ISA 8:13 Oupwe chechemeni pwe ngang ewe Samol mi Unusen Manaman üa pin, ngang chök ewe eman oupwe meniniti o niuelapeiti.
ISA 8:14 Iwe, üpwe wiliti eu leni mi pin fän iten chokewe ra niueitiei o lüküei. Nge üpwe wewe ngeni eföü föün chepetek me eu achauen opup fän iten ekewe mwün Israel me Juta, pwal eu sär chon Jerusalem repwe tup lon.
ISA 8:15 Iwe, chomong aramas repwe chepetek ren, repwe turula o tatakis, repwe pwal tup o fif lon.”
ISA 8:16 Kopwe rifengeni ei kapasen pwärätä o anükü ekei allük lon leluken nei chon kaiö.
ISA 8:17 Ewe Samol mi Lapalap a amonala mesan seni ekewe mwirimwirin Jakop, nge ngang üpwe chök lükü i o apilükülükü.
ISA 8:18 Ngang üa nom ikei me nei kana ewe Samol mi Lapalap a ngeniei. Äm aia eu asisilen mine epwe fis fän iten chon Israel me ren ewe Samol mi Unusen Manaman, ewe mi imweimw won ewe chuk Sion.
ISA 8:19 Iwe, aramas repwe ürenikemi pwe oupwe aisini ekewe watawa me ekewe sourong mi ngorongor me ngüngü. Nge ämi oupwe chök aisini ämi Kot. Pun pwota oupwe aisini ngünün ämi kewe somä fän iten chokewe mi manau?
ISA 8:20 Apwi, oupwe chök rongorong än Kot kewe allük me pwärian. Nge are ousap apwönüetä ekei kapas, esap wor remi saram.
ISA 8:21 Aramas repwe chök siamüfetal won ewe fanü fän riaföü me echik. Nge lupwen ar echik, repwe songeiti o otteki ar king me ar Kot. Iwe, repwe netä läng,
ISA 8:22 repwe pwal netiu lepwül, nge repwe chök küna riaföü me rochopwak me watten niuokus. Iwe, repwe kasülong lon rochopwak mi lapalap.
ISA 9:1 Nge ekewe aramas mi nom lon riaföü resap nonomfochofoch lon rochopwak. Me lom Kot a atekisonätiu ewe fanü Sepulon me Naftali, nge lon fansoun mwach epwe alinga ei fanü seni ewe al mi ale ngeni ewe matau watte tori ewe fanü pekilan ewe chanpupu Jortan, pwal tori ewe fanü Kaliläa, ia ekewe chon lükün Israel ra nom ie.
ISA 9:2 Iwe, ekewe aramas mi fetal lon rochopwak ra küna eu saram mi watte, nge eu saram a pwä ngeni chokewe mi nom lon fanüen rochopwak.
ISA 9:3 En ka achomonga pwapwan ekewe aramas o alapala ar mwänek. Ra pwapwa fän mesom usun chök ar pwapwa lupwen fansoun räs, pwal usun mwän ra pwapwa, lupwen ra ineti liaper lon maun.
ISA 9:4 Pun ka kupi ewe waas mi chou won afarer me ewe wok ra fokun weires ren, ka akufu chon ekewe mwü mi ariaföüür usun ka akufu ekewe sounfiun Mitian me lom.
ISA 9:5 Iwe, iteiten ipwen sounfiu sus pwal üfer mi cha lon maun repwe karala ren ekkei.
ISA 9:6 Pun eman mönükol a uputiu rech. Kot a lifang ngenikich eman ät, i epwe ach sounemenem. Iwe, epwe iteni “Souekiek mi amwarar, Kot mi manaman, Samach mi nom tori feilfeilachök, pwal Samolun kinamwe.”
ISA 9:7 Iwe, nemeneman epwe chök wattela, nge mwün epwe chök kinamwe fansoun meinisin. Epwe siwili Tafit lon wisan wisen king o nemeni mwün. Epwe aüetä o apöchöküla mwün ren apwüng me pwüngüöch seni ikenai tori feilfeilachök. Iwe, ewe Samol mi Unusen Manaman epwe tiliken le apwönüetä ei.
ISA 9:8 Iwe, ewe Samol a tinala kapasen apwüng ngeni ewe mwün Israel, ir ekewe mwirimwirin Jakop.
ISA 9:9 Iwe, ekewe aramasen Israel me chon Samaria meinisin repwe mefi pwe Kot a föri ei. Iei ra apasa fän ar sikesik me lamalamtekian letiper,
ISA 9:10 “Ekewe imwepwül ra turula, nge sipwe chök aüetä imwesimen. Ekewe irä sikamor ra tala, nge sipwe chök siwili ngeni irä setar.”
ISA 9:11 Nge ewe Samol mi Lapalap a amwökütü chon oputeer pwe repwe maun ngeni Israel.
ISA 9:12 Ekewe chon Siria mi nom ötiu me ekewe chon Filistia mi nom lotou ra amasala awer o oromala Israel. Iwe, lon ekei feiengau än Kot song esap kisikisila, nge pöün a chüen afeiengaueer.
ISA 9:13 Nge ekewe chon Israel resap ekieksefäl. Inamwo ika ewe Samol mi Unusen Manaman a feiengaueer, nge resap kul ngeni.
ISA 9:14 Iei mine ewe Samol mi Lapalap epwe apwüngü ekewe souemwenin Israel me aramasen lon, epwe pöküela möküran me wükün lon eu chök rän.
ISA 9:15 Iwe, ekewe souakom me ekewe aramas tekia ra wewe ngeni möküren Israel, nge ekewe soufos chofana ra wewe ngeni wükün.
ISA 9:16 Pun chokewe ra emweni ekei aramas ra atokerela, nge chokewe mi tapwela mürir repwe feiengau.
ISA 9:17 Iei popun ewe Samol esap echika nöür alüal, esap pwal tongei chokewe mi mäsen me ekewe fefin mi mä pwülüer. Pun ir meinisin resap niueiti Kot, ra pwal föföringau, nge kapasen awer a ngau. Iwe, lon ekei feiengau än Kot song esap kisikisila, nge pöün a chüen afeiengaueer.
ISA 9:18 Ellet, än ekewe aramas föföringau a ngetenget usun ekkei, a ngeteri pötöwölingau me iräfölüföl, a kenala ewe wöllap pwe eu kuchun ötüöt a ötütä seni.
ISA 9:19 Pokiten än ewe Samol mi Unusen Manaman song ewe fanü a karala, nge ekewe aramas ra usun chök amüch lon ekkei. Esap wor eman a tongei pwiin.
ISA 9:20 Ra anenefetal ener mongö ekis meinisin, nge ra chüen echik. Ra mongö ekewe äkäekis mongö ra küna, nge resap mötüla ren. Ra mwo nge ochei en me püsin nöün.
ISA 9:21 Ekewe aramasen Manasa me ekewe aramasen Efraim ra püsin nifengeniir. Nge ir meinisin ra ni ekewe aramasen Juta. Iwe, lon ekei feiengau än Kot song esap kisikisila, nge pöün a chüen afeiengaueer.
ISA 10:1 Feiengauemi ämi mi förätä allük mi pwüngingau, pwal ämi mi apwüngala mine aramas repwe riaföü ren.
ISA 10:2 Feiengauemi ämi mi epeti pwüng seni chon riaföü, mi ataela pwüngün chon wöüngau pwe oupwe angemwäli pisekin ekewe fefin mi mä pwülüer me wöün chon mäsen.
ISA 10:3 Iwe, met oupwe föri lon ränin apwüng, lupwen feiengau epwe torikemi seni toau? Iö oupwe süla ren pwe epwe alisikemi, nge ia oupwe aopa wöümi ie?
ISA 10:4 Esap wor och mine oupwe tongeni föri lükün chök ämi oupwe nom lein chon oola ika lein chokewe mi mäla lon maun. Iwe, lon ekei feiengau än Kot song esap kisikisila, nge pöün a chüen afeiengaueer.
ISA 10:5 Ewe Samol mi Lapalap a apasa, “Feiengauen Asiria, ewe mwü üa aea usun efoch wok, pwe üpwe apwüngü chokewe üa songeitiir.
ISA 10:6 Üa tinala chon Asiria ren chon eu mwü resap niueitiei, nge üa allük ngeniir pwe repwe maun ngeni ekewe aramas üa songeitiir. Repwe angei seniir wöür o soläni pisekir, repwe pwal puriir usun chök pwakaken won al.
ISA 10:7 Iwe, ewe kingen Asiria esap ekieki ina usun, esap pwal tipeni. Nge, a chök ekiekin ataela o arosala chomong mwü.
ISA 10:8 Pun a apasa lon an sikesik, “Ifa usun nei samolun sounfiu, ir resap king meinisin?
ISA 10:9 Ifa usun, üsap liapeni Kalno me Karkemis, Hamat me Arpat, pwal Samaria me Tamaskus?
ISA 10:10 Iwe, ai nemenem a tori ekana mwü mi angang ngeni anümwäl, nge ar uluulun anümwäl ra kon chomong seni ekewe uluulun anümwäl lon Jerusalem me Samaria.
ISA 10:11 Ifa usun, üsap tongeni ataela Jerusalem me an kewe uluulun anümwäl usun chök üa ataela Samaria me an kewe uluulun anümwäl?”
ISA 10:12 Nge ewe Samol a apasa, “Lupwen üa awesala ai angangen apwüng meinisin won ewe chuk Sion pwal won Jerusalem, üpwe pwal apwüngü ewe kingen Asiria pokiten an sikesik me lamalamtekia.”
ISA 10:13 Pun ewe kingen Asiria a apasa lon an sikesik, “Ngang üa föri ekei mettoch meinisin ren ai pöchökül me ai tipachem, pun mi wor ai silelap. Üa ataela kiännin mwü kana o uweela wöür. Ren ai pöchökül mi usun chök pöchökülen eman karopwow mi mwacho üa aturätiu chokewe ra mot won lenien motun king.
ISA 10:14 Iwe, üa angei ekewe mwü meinisin usun eman a angelong lon fasen machang, üa pwal ionifengeni wöür usun eman a ionifengeni sokul esap wor machang wor. Nge esap wor eman a amwökütü pöükässin ika amasala awan pwe epwe tikitik.”
ISA 10:15 Nge ewe Samol mi Lapalap a apasa, “Ifa usun, efoch kouk epwe aingaing ngeni ewe chon falafal, ika efoch ngerenger epwe püsin atekiatä won ewe chon ngerenger? Pun esap tufich pwe efoch wok epwe pöüätä ewe mi amwöchü, esap pwal tufich pwe efoch amwüch epwe äteri eman aramas.”
ISA 10:16 Iei mine ewe Samol, ewe Samol mi Unusen Manaman, epwe tinato samau mi afeiengau ren nöün ewe kingen Asiria sounfiu mi pöchökül, epwe pwal fisala lingan pwe epwe karala.
ISA 10:17 Iwe, Kot ewe saramen Israel epwe wiliti ekkei, Ewe mi Pin lon Israel epwe usun chök ngetenget. Epwe kenala o arosala pwal mwo nge pötöwölingauen Asiria me an iräfölüföl lon eu chök rän.
ISA 10:18 Ewe Samol mi Lapalap epwe wesewesen ataela än Asiria wöllap mi ling me an kewe tanipi mi mürina, usun chök ika eu samau mi afeiengau a niela eman aramas.
ISA 10:19 Nge ekewe irä mi chüen nom repwe fokun chokisikis, pwe eman semirit epwe tongeni aleaniir.
ISA 10:20 Iwe, epwe fis lon ewe rän, pwe ekewe lusun chon Israel, chokewe mi chüen manau seni mwirimwirin Jakop, resap chüen anomu ar apilükülük won ewe mwü mi afeiengaueer, nge repwe anomu ar apilükülük won ewe Samol mi Lapalap, Ewe mi Pin lon Israel.
ISA 10:21 Iwe, ekoch chon Israel mi chüen manau repwe liwinsefäliti ar we Kot mi manaman.
ISA 10:22 Pun inamwo ika ekewe chon Israel ra chomong usun chök pien aroset, ekoch chök leir repwe liwinsefäl. Iwe, Kot a apwüngala fän pwüng an epwe afeiengaua chon Israel.
ISA 10:23 Ewer, ewe Samol, ewe Samol mi Unusen Manaman, epwe apwönüetä an apwüng won unusen ewe fanü, pun ina mine a apwüngala.
ISA 10:24 Iwe, ewe Samol mi Lapalap, ewe Samol mi Unusen Manaman, a apasa, “Nei aramas kana mi imweimw lon Sion, ousap niuokusiti ekewe chon Asiria. Inamwo ika ra ariaföüükemi usun chök mine ekewe chon Isip ra föri me lom.
ISA 10:25 Pun mürin fansoun mochomoch chök ai song ngenikemi epwe wes, nge mürin üpwe song ngeni ekewe chon Asiria pwe repwe feiengau.
ISA 10:26 Iwe, ngang ewe Samol mi Unusen Manaman üpwe wichiir ren efoch säl usun üa wichi chon Mitian arun ewe achau Orep. Üpwe pwal aitetä woki wor usun üa aitiela woki won ewe matau, lupwen üa afeiengaua chon Isip.
ISA 10:27 Iwe, epwe fis lon ewe rän, pwe üpwe angei seni won afaremi ewe wosochou me ren chon Asiria, nge ar we waas esap chüen nom lükün üemi.”
ISA 10:28 Iwe, ekewe sounfiun Asiria ra arapoto seni Rimmon, ra tori Aiat, ra lu seni Mikron, nge ra iseni ar pisek lon Mikmas.
ISA 10:29 Ra feila pekilan ewe chuk, nge lon ewe pwinin ra annut Kepa. Iwe, chon Rama ra chechech fän niuokus, nge chon Kipea, ewe telinimwen ewe king Saul, ra süla.
ISA 10:30 Oupwe pupuchör, ämi chon Kallim! Oupwe rongorong ar puchör, ämi chon Laisa, oupwe palüeniir, ämi chon Anatot!
ISA 10:31 Iwe, chon Matmena ra sü, nge ekewe chon Kepim ra kütta ar lenien op.
ISA 10:32 Ikenai ekewe sounfiun Asiria repwe asösö lon Nop, ikenan repwe pwal aköü pöür ngeni ewe chuk Sion, ngeni ewe telinimw Jerusalem.
ISA 10:33 Nengeni, ewe Samol, ewe Samol mi Unusen Manaman, epwe atururetiu o pöküretiu usun eman a pökü palen irä ren an pöchökül mi fokun eniwokus. Iwe, ekewe mi tekia repwe pöküpök, nge ekewe mi lamalamtekia repwe küna tekison.
ISA 10:34 Iwe, ewe Samol mi Lapalap epwe ukufirela usun eman a ukufala irän lein wöllap ren efoch kouk, usun eman a pöküela ekewe irän won Lepanon mi fokun lingöch.
ISA 11:1 Iwe, ekewe mwirimwirin Tafit ra usun efoch irä mi pöküpökütiu. Nge usun ekoch fasar ra pwükütä seni ewe popun, iei usun eman king mi fö epwe ütä seni me lein ekewe mwirimwirin Tafit.
ISA 11:2 Iwe, Ngünün ewe Samol mi Lapalap epwe nonom won, ewe Ngün epwe ngeni tipachem me mirit, ekieköch me tufich. Epwe pwal silei letipen ewe Samol mi Lapalap o niueiti i.
ISA 11:3 Iwe, epwe pwapwa ngeni an epwe aleasochisi ewe Samol mi Lapalap fän niuokus. Iwe, esap eäni apwüng ren künan mesan, esap pwal apwüngala och ren rongeen selingan.
ISA 11:4 Nge epwe apwüngü chon wöüngau fän pwüng, epwe pwal peni chon tipetekison won fanüfan, nge esap lifilifil. Iwe, epwe afeiengaua fanüfan ren an kapas usun sa afeiengaua eman ren efoch wok, epwe pwal niela chon föföringau ren enienin ngasangasan.
ISA 11:5 Epwe nemeni nöün aramas fän pwüng me allükülük.
ISA 11:6 Eman wolif me eman apanen sip repwe chiechifengen, eman man itan lepart me eman apanen kuuch repwe nonomfengen, eman apanen kow me eman laion me eman man mi öümanau repwe kinamwefengen, nge eman semirit epwe emweniir.
ISA 11:7 Iwe, eman kow me eman pear repwe mongöfengen, apaner repwe nonomfengen, nge eman laion epwe mongö fetilipwas usun eman kow.
ISA 11:8 Eman mönükol epwe urumwot arun pwangen serepenit mi poison, nge eman semirit epwe sökalong pöün lon pwangen noput, nge resap feiengau rer.
ISA 11:9 Esap wor eman epwe afeiengaua eman ika ataela och won chukun Kot mi pin, pun än chon fanüfan silei ewe Samol mi Lapalap epwe alolol usun chök alololun matau.
ISA 11:10 Lon ena fansoun epwe fis pwe ewe king mi fö seni mwirimwirin Tafit epwe ütä usun chök efoch asisil fän iten chon ekewe mwü meinisin. Iwe, repwe chufengen lon telinimwan mi ling o asamolu.
ISA 11:11 Lon ena fansoun ewe Samol epwe aitiela pöün fän aruuan pwe epwe aliwinato nöün aramas mi chüen manau seni Asiria, Isip, Patros, Itiopia, Elam, Papilon me Hamat, pwal seni lon ekewe fanü mi nom aroset me ekewe fanü mi nom lematau, pwe repwe liwiniti lenier.
ISA 11:12 Iwe, epwe aüetä efoch asisil ngeni chon ekewe mwü o pwäri ngeniir pwe a achufengenisefäli ekewe chon Israel me chon Juta mi toropasfeil o aliwinisefäliir seni lepwokukun fanüfan me rüanü.
ISA 11:13 Iwe, än chon Israel lolowo epwe wesila, nge ir mi ariaföüü chon Juta repwe kärila. Esap chüen wor än chon Israel lolowo ngeni chon Juta, nge chon Juta resap chüen oput chon Israel.
ISA 11:14 Repwe chufengen le maun ngeni chon Filistia mi nom lotou, o angei fän pöchökül pisekin ekewe aramas mi nom ötiu. Repwe liapeni ekewe chon Etom me chon Moap, nge chon Amon repwe aleasochis ngeniir.
ISA 11:15 Iwe, ewe Samol mi Lapalap epwe apwasatä ewe Setin Isip ren enienin asepwäl mi pwichikar, epwe pwal aitiela pöün won ewe chanpupu Oifrat o kinifeseni lon fisu kinikin, pwe aramas repwe tongeni feila epek, nge pecher resap chöchön.
ISA 11:16 Iwe, epwe wor efoch alalap seni Asiria fän iten nöün Kot kewe aramas mi chüen manau, usun a wor efoch al me lom fän iten chon Israel, lupwen ra towu seni Isip.
ISA 12:1 Lon ena rän eman me eman epwe apasa, “Üa kilisou ngonuk, ai Samol mi Lapalap. Ewer, ka song ngeniei, nge om song a kul seniei, ka pwal achipaei.
ISA 12:2 Ellet, Kot ai Chon Amanau. Üa lükü, nge üsap niuokus. Kot ewe Samol mi Lapalap a ngeniei pöchökül me manaman. Ewer, i ai Chon Amanau.”
ISA 12:3 Iwe, oupwe üfi koluk fän pwapwa seni ewe chönüttun kolukun manau.
ISA 12:4 Lon ena rän oupwe apasa, “Ousipwe kilisou ngeni ewe Samol mi Lapalap o köri pwe epwe alisikich. Ousipwe asilefeili lein chon ekewe mwü meinisin mine a föri o aronga ngeniir pwe itan a tekia.
ISA 12:5 Ousipwe kölün mwareiti ewe Samol mi Lapalap, pun a föri föför mi amwarar, nge chon fanüfan meinisin repwe silei usun.
ISA 12:6 Oupwe akapwas o köl fän pwapwa, ämi chon Sion, pun Ewe mi Pin lon Israel a tekia me lefilemi.”
ISA 13:1 Iei ewe kapasen osuni usun Papilon, Kot a pwäri ngeni Aisea nöün Am we mwän lon künan:
ISA 13:2 Oupwe aürätä efoch filaik won eu chuk mi amassawa, oupwe kökköri ekewe sounfiu fän akapwas o äkänipöör pwe repwe tolong lon asamen telinimwen ekewe chon tekia.
ISA 13:3 Ewe Samol mi Lapalap a püsin akünöü nöün chon pin o körato nöün sounfiu mi pwora o mwänek, pwe repwe apwüngü chokewe a songeitiir.
ISA 13:4 Oupwe aüseling, a wor akürangen eu mwichen aramas mi chomong won ekewe chuk. Oupwe aüseling, a wor mwökütükütün chomong mwü ra chufengen. Ewe Samol mi Unusen Manaman a amolätä eu mwichen sounfiu fän iten maun.
ISA 13:5 Ra feito seni fanü toau, pwal seni apilen. Ewer, ewe Samol mi Lapalap a feito fän an song pwe epwe ataala unusen ewe fanü.
ISA 13:6 Oupwe pupuchör, pun a arap ränin ewe Samol mi Lapalap, ewe rän mi awarato feiengau me ren ewe Kot mi Unusen Manaman.
ISA 13:7 Iei mine pöün ekewe aramas repwe chök ititiu, letiper epwe kisikisila,
ISA 13:8 repwe pwal fokun apilükülükingau. Iwe, weires me metek epwe toriir, repwe cheuch usun eman fefin a tori an cheuchen fam. Repwe nenefengen lefiler fän niuokus, nge won meser epwe woparapar.
ISA 13:9 Iwe, ränin ewe Samol mi Lapalap a arapoto. Epwe eu rän mi fokun ngau pokiten an lingeringer me song mi fokun watte. Iwe, fanüfan epwe pö ren, nge chon tipis repwe rosola me won.
ISA 13:10 Iwe, fün läng me mwicheicher meinisin resap chüen tin, akkar epwe rochola lupwen a tötä, nge maram esap chüen saramaram.
ISA 13:11 Iwe, ewe Samol mi Lapalap a apasa, “Üpwe apwüngü chon fanüfan pokiten ar föföringau, pwal ekewe aramasangau pokiten ar tipis. Üpwe aükätiu lamalamtekian ekewe chon tipetekia o atekisonätiu lamalamtekian chon kirikiringau.
ISA 13:12 Iwe, üpwe achokükünüela aramas pwe repwe chokisikis seni kolt mi mürina, pwal seni kolt seni Ofaia.
ISA 13:13 Iei mine üpwe achecha läng, nge fanüfan epwe mwöküt seni lenian lon ewe rän, lupwen ngang ewe Samol mi Unusen Manaman üpwe pwärawu ai song mi fokun watte.
ISA 13:14 Ekewe chon ekis mi nom Papilon repwe en me liwiniti aramasan o sü ngeni en me poputän fanüan, usun chök eman chia a sü seni ewe chon tapweri, ika usun chök sip esap wor eman chon foleniir.
ISA 13:15 Iwe, sounfiu repwe posu iö repwe küna o niela ren ketilas chokewe meinisin ra turufiir.
ISA 13:16 Repwe atatakisi nöür semirit me fän meser, repwe angei fän pöchökül pisekin lon imwer o achomanauei pwülüer.
ISA 13:17 Nengeni, üpwe apwökü ekewe chon Metia pwe repwe maun ngeni Papilon, ir chokewe resap aücheani silifer ika tup ren än eman michi ngeniir kolt.
ISA 13:18 Repwe niela ekewe alüal ren ar likapich, resap tongei ekewe mönükol, resap pwal kirikiröch ngeni semirit.
ISA 13:19 Iwe, Papilon ewe mwü mi ling lein ekewe mwü o aüchea me ren chon Papilon epwe usun chök Sotom me Komora, lupwen üa atarela.
ISA 13:20 Esap wor aramas repwe chüen nom lon ewe fanü Papilon seni eu täppin aramas tori eu täppin. Iwe, esap wor eman chon Arapia epwe aüetä imwan imw mangaku ikenan, esap pwal wor eman chon fofol man epwe tümwünü nöün pwiin man won.
ISA 13:21 Iwe, manmwacho seni fanüapö repwe chök nonom ikenan. Ekewe imw mi tala repwe masou ren man mi wörüwör, fukuro repwe fas me lor, nge kuuch mi mwacho repwe ipweipweriir.
ISA 13:22 Iwe, kolak mi mwacho repwe wörüwör me won ekewe imw tekia, nge wolif repwe nonom lon ekewe imwen king. Iwe, a arapoto än Papilon fansoun, nge ränin an feiengau esap mang le waroto.”
ISA 14:1 Iwe, ewe Samol mi Lapalap epwe ümöümöch ngeni ekewe mwirimwirin Jakop, epwe filisefäli chon Israel o alenier lon poputän fanüer. Chon ekis repwe chiechi ngeniir o pach ngeniir.
ISA 14:2 Iwe, aramasen chomong mwü repwe aliwinala chon Israel ngeni poputän fanüer. Nge chon Israel repwe nöüniir chon angang mwän me chon angang fefin lon ewe fanü ewe Samol mi Lapalap a ngeniir. Repwe liapenala chokewe ra liapeniir me mwan, nge repwe nemeni chokewe ra nemeniir me lom fän pöchökül.
ISA 14:3 Lupwen ewe Samol mi Lapalap epwe angasakemi seni ämi riaföü me fitikoko me angang weires ra achouu ngenikemi,
ISA 14:4 ämi oupwe eäni ei kölün takir usun turun ewe kingen Papilon, “A mosonosonola ewe chon ariaföüükich, a pwal wesila an song mi fokun watte.
ISA 14:5 Ewe Samol mi Lapalap a aükätiu pöchökülen ekewe sounemenem mi ngau,
ISA 14:6 mi ariaföüü ekewe aramas fän ar song, nge resap ükütiu le afeiengaua chon ekewe mwü ra liapeni.
ISA 14:7 Iei unusen fanüfan a kinamwela, nge chon ra chietä köl fän pwapwa.
ISA 14:8 Ekewe irä saipires me setar won Lepanon ra pwapwa reöm, en kingen Papilon. Ra apasa, ‘Seni ewe fansoun, lupwen ka küna tekison, esap wor eman a feito o pökükich.’
ISA 14:9 Lenien sotup a mwökütüküt pwe epwe etiwok lupwen kopwe war, ngünün ekewe mi samol won fanüfan repwe pwätä pwe repwe kapong ngonuk, nge chokewe mi king repwe ütä seni ar lenien motun king.
ISA 14:10 Ir meinisin repwe apasa ngonuk, ‘En ka pwal apwangapwangala usun chök äm. Iei ka wewe ngenikem.’
ISA 14:11 Lingom a turutiu lon lenien sotup, nge tikitikin noum kitar a wes. Iwe, kiom epwe ur ren möttö, nge moso repwe pwölukala.
ISA 14:12 Ka fokun turutiu seni läng, en Fü Rän, Nöün Mallen Rän! Ka turutiu won fanüfan o tatakis lepwül, en ewe mi atekisonätiu mwü me lom.
ISA 14:13 Ka ekieki lon letipom, ‘Üpwe feitä läng o anomu ai lenien motun king asen ekewe fün Kot. Üpwe mottiu won ewe chukun mwich mi fokun toau, a nom peliefeng.
ISA 14:14 Iwe, üpwe feitä, feitä asen ekewe kuchu, pwe üpwe wewe ngeni Ewe mi Fokun Tekia.’
ISA 14:15 Nge iei ka chök turufochofochetiu epin lenien sotup.
ISA 14:16 Chokewe mi künok repwe nefochofoch ngonuk o mairü reöm. Iwe, repwe aisfengen lefiler, ‘Ifa usun, iei i ewe mwän a amwöükü fanüfan o föri pwe chon ekewe mwü ra chechech?
ISA 14:17 Iei i ätewe mi atai telinimw kana o awili fanüfan ngeni fanüapö, nge esap mwüt ngeni nöün chon fötek pwe repwe liwiniti lenier?’
ISA 14:18 Ekewe king meinisin ra peias fän ling lon en me püsin peiasan.
ISA 14:19 Nge en esap wor püsin peiasom. Ka pöütüla lükün usun chök efoch palen irä eman a moneela. Ka pwölüla ren somä, ren chokewe mi mäla lon maun, chokewe mi katurutiu lon ewe pwang mi wor fau lon. Iwe, ka usun chök eman somä aramas ra puri.
ISA 14:20 Kosap chufengen me rer le peias, pun ka ataela fanüom o niela aramasom. Esap wor eman mwirimwirin ewe chon föföringau epwe chüen manau.
ISA 14:21 Oupwe amolätä pisekin ninni fän iten nöün kewe mwän pokiten än ar kewe lewo tipis. Resap chüen ütä o nemeni fanüfan, resap pwal aüetä telinimw won.”
ISA 14:22 Ewe Samol mi Unusen Manaman a apasa, “Üpwe ütä o pälüeni Papilon, üpwe arosala seni lon chokewe mi chüen manau, nöür me mwirimwirir kana. Ngang ewe Samol mi Lapalap üa kapas.
ISA 14:23 Iwe, üpwe awili Papilon ngeni eu lenien pwakak fukuro ra chök lenieni, üpwe pwal pirumwei ren efoch pirum mi afeiengau. Ngang ewe Samol mi Unusen Manaman üa kapas.”
ISA 14:24 Iwe, ewe Samol mi Unusen Manaman a akapel, “Ellet, mine üa akota epwe fis, nge mine üa filätä epwe pwönüetä.
ISA 14:25 Üpwe arosala chon Asiria me lon fanüei, üpwe puriir fän pechei won chuki kana. Üpwe angei seni nei aramasen Israel ewe waas chon Asiria ra anomu wor, pwal woser mi chou.”
ISA 14:26 Iei ewe akot Kot a apwüngala pwe epwe fis won unusen fanüfan, epwe apwönüetä ren pöün mi itila won ekewe mwü meinisin, pwe epwe afeiengaueer.
ISA 14:27 Lupwen ewe Samol mi Unusen Manaman a amolätä och pwe epwe föri, iö epwe tongeni pinei? Nge lupwen a aitiela pöün, iö epwe tongeni numalong?
ISA 14:28 Lon ewe ier ewe king Ahas a mäla, ei kapasen osuni a feito seni Kot,
ISA 14:29 “Ousap pwapwa, ämi chon Filistia meinisin, pwe wokun ewe mi wichikemi a kup. Pun eman serepenit mi afeiengau epwe pop seni ewe aemanün serepenit, nge atelian epwe eman trakon mi äkäs.
ISA 14:30 Iwe, nei aramas mi fokun wöüngau repwe mongö, pwal ir mi osupwang repwe asösö fän kinamwe. Nge ämi chon Filistia, üpwe niela mwirimwirimi ren lengita o arosala chokewe mi chüen manau me leimi.
ISA 14:31 Ämi chon Filistia meinisin, oupwe kechü lon asamalapen tittin ämi telinimw, oupwe pupuchör lon telinimwemi fän niuokus. Pun eu mwichen sounfiu a feito seni efeng, nge esap wor eman me leir epwe nisin.”
ISA 14:32 Meni sokun pworaus sipwe apworausa ngeni ekewe chon künö seni Filistia? Sipwe apworausa ngeniir pwe ewe Samol mi Lapalap a anüküchara Sion, nge nöün aramas mi nom lon riaföü repwe op lon.
ISA 15:1 Iei än Kot kapas usun Moap: Lupwen ekewe telinimw Ar me Kir ra tatakis lon eu chök pwin, pwal unusen ewe fanü Moap a tala.
ISA 15:2 Ekewe aramasen Tipon ra feitä won ekewe lenien fel mi nom won ekewe chuk pwe repwe kechü. Chon Moap ra ngüngüres fän iten ar kewe telinimw Nepo me Metepa. Ra räisöüla mökürer me aluser pokiten ar letipeta.
ISA 15:3 Ra fetal won ekewe al fän üfer seni tuk. Won imw pwal lon lenien chulap aramas meinisin ra ngüngüres o kekechü.
ISA 15:4 Chon Hespon me chon Eleale ra pupuchör pwe chon Jahas ra tongeni rongorong. Iei mine ekewe sounfiun Moap ra puchör, ese chüen wor ar pwora.
ISA 15:5 Üa kechüeiti Moap. Chon ra sülong Soar me Eklat Selisia. Ra feitä nge kechü won ewe al mi pal a ale ngeni Lukit, nge won ewe al mi ale ngeni Horonaim ra leüömong le kökkö usun ewe feiengau.
ISA 15:6 Iwe, ekewe kolukun Nimrim ra pwasala, ewe fetil ünükür a ol, esap fokun chüen wor fetil mi pwüküfö.
ISA 15:7 Iei popun chon Moap ra uweela ar kewe pisek meinisin mi chüen nom rer pekilan ewe öüwö ia a mär ie ewe irä itan willow.
ISA 15:8 Ar puchör a tori kiännin ewe fanü Moap, ar kechü me ngüngüres a tori Eklaim me Peer Elim.
ISA 15:9 Iwe, ekewe kolukun Tipon ra cha. Nge ngang üpwe chök pwal awarato won Tipon och feiengau mi watte seni. Eman laion epwe niela chokewe mi süla seni Moap, pwal chokewe mi chüen manau lon ewe fanü.
ISA 16:1 Chon Moap ra tinala nöür nienifön sip seni Sela lon ewe fanüapö, pwe repwe fang ngeni ewe king won ewe chuk Sion.
ISA 16:2 Ekewe chon Moap mi nom lepetepeetin ewe chanpupu Arnon ra usun chök machang mi äsfeil, pwal usun chök apanen machang ra turuwu seni lon faser.
ISA 16:3 Ra üra, “Kopwe aiti ngenikem mine aipwe föri. Leoloken kopwe föri pwe ngünüom epwe usun chök kirochen pwin, epwe achunoikem chon süsüfeil, kosap afangamäkem.
ISA 16:4 Kopwe mwüt ngenikem chon Moap mi süsüfeil pwe aipwe wasöla reöm, kopwe pwal aopakem seni ewe chon afeiengau.” Iwe, lupwen ewe chon ariaföü esap chüen nom, ewe feiengau epwe ükütiu. Lupwen ewe mi atai ewe fanü esap pwal chüen nom,
ISA 16:5 mürin eman seni mwirimwirin Tafit epwe king. I epwe nemeni ekewe aramas fän allükülük me tong, epwe eäni pwüng fän pwüng o müttir ngeni föförün pwüng.
ISA 16:6 Chon Juta ra apasa, “Sa rong usun lamalamtekian ekewe chon Moap, usun ar sikesik me ar aingaing. Ar kapasen tunomong a chök mwakel.”
ISA 16:7 Iei mine chon Moap repwe kechü, nge aramas meinisin repwe kechüeiti Moap. Iwe, repwe lameni ekewe mongö mi anö seni Kir Heres.
ISA 16:8 Iwe, ekewe tanipin Hespon ra tala, pwal ekewe irän wain lon Sipma. Iwe, samolun ekewe mwü ra pökü palan kewe mi tori Jaser me lom o märelong lon ewe fanüapö, nge fasaran kewe ra chöüla tori ewe matau.
ISA 16:9 Iei mine üa kechüeiti ekewe irän wain lon Jaser usun üa kechüeiti Sipma. A watte chönün mesei a suputiu fän iten chon Hespon me Eleale, pun esap wor irä mi nup lon fansoun räs mi apwapwai ekewe aramas.
ISA 16:10 Iwe, esap chüen wor pwapwa me mwänek won ekewe fanü mi pwülüöch, esap pwal chüen wor kölün mweir lon ekewe tanipin wain. Esap wor eman a föri angangen üchüch föün wain, nge kökkön resin wain a kaüla.
ISA 16:11 Üa ngüngü ren ai lolilen fän iten Moap, üa fokun letipeta fän iten Kir Heres.
ISA 16:12 Iwe, lupwen chon Moap ra feitä won ekewe lenien fel mi nom won ekewe chuk, ra chök püsin aweiresiir. Ra feila pwe repwe iotek lon ar imwenfel, nge esap wor lomotan.
ISA 16:13 Iei ewe pworaus ewe Samol mi Lapalap a fos usun fän iten chon Moap me lom.
ISA 16:14 Nge ikenai ewe Samol mi Lapalap a apasa, “Mürin ülüngat ier, iei ükükün fansoun än eman chon angang pwon, lingen Moap me aramasen lon meinisin repwe küna turunufas. Iwe, chokewe mi chüen manau repwe chokükün me apwangapwang.”
ISA 17:1 Iei än Kot kapas usun Tamaskus: Tamaskus esap chüen eu telinimw, nge epwe wiliti eu ioien mettoch mi tala.
ISA 17:2 Aramas repwe likitala ekewe telinimwen Siria tori feilfeilachök, pwiin man chök repwe nonom lor fän kinamwe, nge esap wor eman epwe eniwokusuur.
ISA 17:3 Än Israel telinimw mi pöchökül tittin epwe tala, nge än Tamaskus nemenem epwe wesila. Iwe, chokewe mi chüen manau lon Siria repwe itengau usun chök chon Israel. Ngang ewe Samol mi Unusen Manaman üa kapas.
ISA 17:4 Iwe, ewe Samol mi Lapalap a apasa, “Epwe war eu fansoun pwe lingen Israel epwe ükütiu, nge an wöü epwe wili ngeni wöüngau.
ISA 17:5 Israel epwe usun chök eu tanipi eman chon kinikin a pilüküfengeni irän wiich won o pökü umwun, pwal usun chök eu tanipi lon lemolun Refaim, eman a fen rusala umwun wiich won.
ISA 17:6 Nge ekoch chök aramas repwe chüen manau. Iwe, Israel epwe usun chök efoch irä olif eman a fen wichiki. Ruoföü ika ülüföü chök repwe nonom leulun, are föföü ika limeföü chök won palan. Ngang ewe Samol mi Lapalap, ewe Koten Israel, üa kapas.”
ISA 17:7 Lon ena fansoun aramas repwe chechemeni Kot ewe a föriir, repwe kütta ar alilis seni Ewe mi Pin lon Israel.
ISA 17:8 Resap chüen aücheani ekewe rongen asor ra föri ren püsin pöür, resap pwal anomu ar apilükülük won ekewe uluulun ewe anüfefin Astarot ra föri me ekewe rongen asoren ötüöt ra senätä.
ISA 17:9 Lon ena fansoun ar kewe telinimw mi pöchökül tittir repwe pönüla o tala usun chök ekewe telinimwen chon Hiw me chon Amor, ra likitala lupwen ra sü seni ekewe chon Israel.
ISA 17:10 Israel, ka manlükala Kot om Chon Amanau, kosap chechemeni ewe Achau om lenien op. Nge ka fotuki eu tanipi pwe kopwe fel ngeni eman koten ekis lon.
ISA 17:11 Inamwo are kopwe apwükü ekewe irä lon ewe chök rän, are kopwe pwal ämäriretä pwe ra sot lesosorun ewe rän ka fotukiir, esap fokun wor mine kopwe kini seniir. Epwe chök wor samau me metek esap ükütiu.
ISA 17:12 A wor akürangen chomong mwichen aramas, ra akürang usun püngüpüngün no. A wor wörüwörün chomong mwü, ra wörüwör usun üngüngün chomong koluk.
ISA 17:13 Chon ekewe mwü ra wörüwör usun üngüngün chomong koluk, nge Kot a apwüngüür pwe ra süla toau. Ra usun chök pön wiich won ekewe chuk asepwäl a ässirela, pwal usun chök pipi ra ässitä ren mölümöl.
ISA 17:14 Lekuniol ra afisätä niuokus watte, nge mwen epwe ränila resap chüen nom. Iei usun epwe fis ngeni chokewe ra angei pisekich fän pöchökül o soläni mine ach.
ISA 18:1 A wor eu fanü ia a fis ie mwaataaten chomong pöükäs, a nom pekilan ekewe chanpupun Itiopia.
ISA 18:2 Iwe, ewe fanü a tinala chon künö won ewe chanpupu Nil, ra wawa ekewe waseres mi för seni ekewe irä papirus. Oupwe liwinla, ämi chon künö mi müttir, oupwe liwinla ngeni eu mwichen aramas mi watte o inisöch chon fanüfan ra niueitiir. Oupwe liwinla ngeni ewe mwü mi pöchökül o pwora, fanüan a kinikinfesen ren chanpupu.
ISA 18:3 Ämi aramas meinisin mi nonom won fanüfan, lupwen echö filäik epwe urutä won ekewe chuk, oupwe nengeni. Lupwen eu säwi epwe pu, oupwe rongorong.
ISA 18:4 Pun ewe Samol mi Lapalap a üreniei, “Fän mosonoson üpwe nenetiu seni won leniei, usun chök akkar a tinetiu won fanüfan lupwen a ränöch, pwal usun chök amurenipwin lupwen fansoun räs.”
ISA 18:5 Pun Kot epwe fichi ekewe fasaren irän wain ren efoch fich, epwe pwal pökü paler mi langatam mwen fansoun kinikin, lupwen ra wes me sot, nge sotur ra wiliti ua.
ISA 18:6 Iwe, somän ekewe sounfiu repwe nom won ekewe chuk fän iten machang mi mwacho, pwal fän iten ekewe manmwacho won fanüfan. Iwe, lupwen fansoun pwichikar ekewe machang mi mwacho repwe ocheer, nge lupwen fansoun patapat ekewe manmwacho repwe pwal ocheer.
ISA 18:7 Lon ena fansoun eu mwichen aramas mi watte o inisöch seni ewe fanü mi kinikinfesen ren chanpupu repwe uwato ar lifang ngeni ewe Samol mi Unusen Manaman. Ir aramasen ewe mwü mi pöchökül o pwora, chon fanüfan meinisin ra niueitiir. Repwe feito ren ewe chuk Sion, ia aramas ra fel ngeni ewe Samol mi Unusen Manaman ie.
ISA 19:1 Iei än Kot kapas usun Isip: Ewe Samol mi Lapalap a wawa eu kuchu mi müttir le äs, pwe epwe tori Isip. Iwe, ekewe anümwälin Isip repwe chechech me mwan, nge letipen chon Isip epwe kisikisila.
ISA 19:2 Iwe, ewe Samol mi Lapalap a üra, “Üpwe afiu chon Isip pwe eman epwe fiufengen me pwin, iteiten eman me eman epwe fiu ngeni chon arun. Eu telinimw epwe ü ngeni pwal eu telinimw, nge eman mi mochen king epwe ü ngeni ewe king.
ISA 19:3 Iwe, esap chüen wor än chon Isip pwora, nge ngang üpwe ataela mine ra ekiekin föri. Repwe tüngor ar alilis seni ar kewe uluulun anümwäl o angei öüröürer seni ar kewe sourong me souawarawar me soupwe.
ISA 19:4 Nge ngang üpwe atolonga ekewe chon Isip fän nemenien eman samol mi nemepöchökül, eman king mi rochongau epwe nemeniir. Ngang ewe Samol mi Unusen Manaman üa kapas.
ISA 19:5 Iwe, kolukun ewe chanpupu Nil epwe morotä, pwe lon epwe pwasapwas.
ISA 19:6 Warawaren ewe chanpupu repwe pwongauala, ekewe öüwön Isip repwe pwasatä, nge ekewe liwo mi mär lon repwe pwasala.
ISA 19:7 Iwe, ekewe lenien fetil ünükün ewe chanpupu Nil, pwal meinisin mine a fotetiu lon ekewe tanipi ünükün repwe pwas. Asepwäl epwe pönirela pwe resap chüen nom.
ISA 19:8 Ekewe chon attau repwe lolilen, chon efief repwe kechü, nge chon kotur epilo repwe letipeta.
ISA 19:9 Iwe, chon angang ngeni silifö pwal chon angangen türüni mangaku mi pwechepwech repwe fokun osupwang.
ISA 19:10 Ekewe chon tür repwe letipeta, nge chokewe mi angangen moni repwe riaföü.
ISA 19:11 Iwe, ekewe samolun Soan ra fokun umwesila, nöün Farao kewe chon öüröür mi tipachem ra eäni kapasen chon tiparoch. Fän meni sokun pwüng oua tongeni üreni Farao, pwe ämi nöün ekewe chon tipachem pwal mwirimwirin ekewe kingen lom?
ISA 19:12 En kingen Isip, ikafa ir noum kewe chon tipachem? Repwe aiti ngonuk o asile ngonuk mine ewe Samol mi Unusen Manaman a akota pwe epwe föri ngeni Isip.
ISA 19:13 Iwe, ekewe samolun Soan ra wiliti chon umwes, ekewe samolun Memfis ra ruongau, ekewe samolun Isip ra emweningaua chon Isip.
ISA 19:14 Ewe Samol mi Lapalap a föri mine ar öüröür ngeni aramas epwe fitikoko ren. Iwe, ra aruka chon Isip, pwe ra chepetek lon ar föför meinisin usun eman chon sakau a mit lon musan.
ISA 19:15 Esap wor eman lon Isip a tongeni alisiir, esap lifilifil ika eman chon wöümong, ika eman chon wöüngau, ika eman mi wor itan, ika eman esor itan.
ISA 19:16 Lon ena fansoun chon Isip repwe wewe ngeni fefin, repwe chechech fän niuokus, lupwen repwe küna pwe ewe Samol mi Unusen Manaman a ü ngeniir.
ISA 19:17 Ewe fanü Juta epwe eu pisekin eniweniw ngeni chon Isip. Meinisin mi rong usun chon Juta repwe fokun niuokus ren mine ewe Samol mi Unusen Manaman a akota pwe epwe föri ngeniir.
ISA 19:18 Lon ena fansoun epwe wor limu telinimw lon Isip aramasen lon repwe eäni fosun Ipru, repwe pwal pwon fän akapel pwe repwe lükü ewe Samol mi Unusen Manaman. Iwe, eu lein ekewe telinimw epwe iteni ‘Telinimwen Akkar’.
ISA 19:19 Lon ena fansoun epwe wor eu rongen asor fän iten ewe Samol mi Lapalap lukalapen ewe fanü Isip, epwe pwal wor eföü föün achem fän itan lekiännin.
ISA 19:20 Ei epwe eu asisil, pwal eu pisekin pwärätä, pwe ewe Samol mi Unusen Manaman a nom lon ewe fanü Isip. Nge lupwen ekewe aramas repwe siö ngeni ewe Samol mi Lapalap lon ar riaföü, epwe tinala rer eman chon amanau pwe epwe peniir o angaseer.
ISA 19:21 Iwe, ewe Samol mi Lapalap epwe püsin pwäri i ngeni chon Isip. Lon ena fansoun chon Isip repwe pwärätä pwe ewe Samol mi Lapalap ar Kot. Repwe fel ngeni ren asoren mongö me asoren kek, repwe pwon ngeni o apwönüetä mine ra pwon.
ISA 19:22 Iwe, ewe Samol mi Lapalap epwe fokun afeiengaua chon Isip ren eu mätter, nge mürin epwe pwal apöchöküeler. Repwe liwiniti ewe Samol mi Lapalap, nge i epwe aüselinga ar kewe tüngor o apöchöküleer.
ISA 19:23 Lon ena fansoun epwe wor efoch alalap seni Isip tori Asiria. Iwe, ekewe chon Asiria repwe feito Isip, chon Isip repwe feila Asiria, nge chon Isip me chon Asiria repwe chufengen le fel ngeni ewe Samol mi Lapalap.
ISA 19:24 Lon ena fansoun Israel epwe chiechi ngeni Isip me Asiria, nge fanüfan epwe feiöch ren ekei ülüngat mwü.
ISA 19:25 Iwe, ewe Samol mi Unusen Manaman epwe afeiöchüür o apasa, “Üpwe afeiöchuk Isip, en nei aramas, pwal en Asiria förien pei. Üpwe pwal afeiöchuk Israel, en ewe mwichen aramas üa nöüni.”
ISA 20:1 Iwe, Sarkon ewe kingen Asiria a tinala nöün meilapen sounfiu pwe epwe maun ngeni Astot. Iwe a liapeni.
ISA 20:2 Lon ena fansoun ewe Samol mi Lapalap a üreni Aisea nöün Amos we, “Kopwe pwilitawu ufom a för seni tuk, pwal ipwom sus.” Iwe, Aisea a föri mine Kot a üreni, a fetal lein aramas fän an selela pwe esap üföüf owokot, esap pwal ipweip sus.
ISA 20:3 Mürin, ewe Samol mi Lapalap a apasa, “Nei chon angang Aisea a fetal lein aramas fän an selela lon ükükün ülüngat ier, pwe eu asisil fän iten mine epwe fis ngeni Isip me Itiopia.
ISA 20:4 Ina usun ewe kingen Asiria epwe emwenala ekewe chon oola seni Isip me Itiopia lon eu fanü mi toau, seni semirit tori chinlap. Iwe, esap wor ipwer sus, repwe feila fän selela, pwe esap pwölüla kuwokuwer. Ei lapalap epwe atoto säw won chon Isip.
ISA 20:5 Iwe, chokewe mi anomu ar apilükülük won Itiopia o aingaing won Isip repwe lichipüng o apilükingau.
ISA 20:6 Lon ena fansoun chokewe mi nonom arosetin ewe fanü Filistia repwe apasa, ‘Nengeni mine a fis ngeni chokewe sa anomu ach apilükülük wor, sa pwal süla rer pwe repwe alisikich o angasakich seni ewe kingen Asiria. Ifa usun ach sipwe tongeni sü seni ei feiengau?’”
ISA 21:1 Iei än Kot kapas usun Papilon: Usun eu ewiniär a äs seni ewe fanü Nekep, iei usun feiengau epwe feito seni ewe fanüapö, eu fanü mi eniwokus.
ISA 21:2 A wor künaei mi fokun amairü. Ewe chon solä a solä, nge ewe chon kata a atai. Ämi sounfiun Elam, oupwe maun, ämi sounfiun Metia, oupwe pwelifeili ekewe telinimw fän pisekin maun. Pun Kot epwe aükätiu ekewe riaföü meinisin ra pop seni Papilon.
ISA 21:3 Ren ei inisi a fokun metek, och cheuch a cheriei usun cheuchen fam a cheri eman fefin. Üa fokun niuokus ren mine üa rongorong, üa rükö ren mine üa küna.
ISA 21:4 A püngüpüng fän mwäri, inisi a chechech ren watten ai niuokus. Üa ösüküsükü lekuniol, nge lupwen üa tori, üa chök niuokus.
ISA 21:5 Iwe, lon künaei we üa küna pwe eu chepel a molotä, ekewe kieki ra meresila pwe aramas repwe mot won. Ra mongö o ün. Ämi meilapen sounfiu, oupwe ütä o amisi ämi tittin maun.
ISA 21:6 Mürin, ewe Samol a üreniei, “Kopwe feila o awisa eman chon mas, pwe epwe mamasa ewe leni o asile ngonuk mine a küna.
ISA 21:7 Iwe, lupwen epwe küna ruu telin chon wawa oris ika chon wawa aas me kamel, epwe fokun nenengenifichi.”
ISA 21:8 Iwe, ewe chon mas a leüömong le kökkö, “Ai samol, üa chök ükütä won ai lenien mamas lerän me lepwin.”
ISA 21:9 Mürin chök ekewe chon wawa oris ra war. Iwe, ewe chon mas a apasa, “A tur, a tur Papilon, ar kewe uluulun anümwäl ra mökküla o parasala le pwül.”
ISA 21:10 Ämi nei aramasen Israel, chon oputakemi ra purikemi usun wiich. Iei üa asile ngenikemi mine üa rongorong seni ewe Samol mi Unusen Manaman, ewe Koten Israel.
ISA 21:11 Iei än Kot kapas usun Etom: Eman a kökkö ngeniei seni Etom, “Chon mas, ifa usun, a tori wilingäch? Ifa usun, esamwo ränila?”
ISA 21:12 Iwe, üa pälüeni, “A fen tori wilingäch, nge epwe pwal pwinsefäl. Are oua mochen ais, oupwe chök liwinsefäl o ais.”
ISA 21:13 Iei än Kot kapas usun Arapia: Ämi chon Tetan mi wawa kamel le sai o möür lein pötöwölün Arapia,
ISA 21:14 oupwe aünü ekewe chon kaka koluk. Ämi chon Tema, oupwe amongöü ekewe choisä.
ISA 21:15 Pun ir ra sü seni ekewe ketilas mi molotä ngeni ar repwe niela aramas, ra sü seni ekewe likapich mi mei, pwal seni feiengauen maun.
ISA 21:16 Iwe, ewe Samol a kapas ngeniei, “Mürin eu ier, iei ükükün fansoun än eman chon angang pwon, lingen chon ekewe ainangen Ketar meinisin epwe wesila.
ISA 21:17 Nge ekewe chon Ketar mi chüen manau, ir chon likapich me chon pwora, repwe chokükün. Ngang ewe Samol mi Lapalap, ewe Koten Israel, üa kapas.”
ISA 22:1 Iei än Kot kapas usun ewe lemolun pwärätä: Met popun ämi meinisin oua tötä won imwemi?
ISA 22:2 Pwota ämi chon ei telinimw oua uren akürang me mwökütüküt me mwänek? Ämi somä resap mäla ren ketilas ika lon maun.
ISA 22:3 Ämi samol meinisin ra sülappök, ra oola mwen resamwo nöünöü nöür likapich. Iwe, chon oputakemi ra liapenala meinisin, inamwo ika ra süla toau.
ISA 22:4 Iei mine üa apasa, “Ousap nenengeniei, nge oupwe chök mwüt ngeniei pwe üpwe kekechü. Ousap pwal sotuni le achipaei, pun üa kechüeiti nei aramas kana mi küna feiengau.”
ISA 22:5 Iwe, Kot ewe Samol mi Unusen Manaman a awarato eu ränin fitikoko me kuf me niuokus watte won ewe lemolun pwärätä. Lon ewe rän tittin ewe telinimw ra turutiu, nge aramas ra pupuchör ngeni ekewe chuk.
ISA 22:6 Iwe, ekewe sounfiu seni Elam ra feito won war oris fän nöür likapich me föün esefich, nge ekewe sounfiu seni Kir ra amolätä ar kewe tittin maun.
ISA 22:7 Ekewe lemol mi pwülüöch ra ur ren woken, nge chon wawa oris ra ütä ren ekewe asamalapen Jerusalem.
ISA 22:8 Än Juta kewe epetin maun ra mökküla. Lupwen a fis ei, ämi oua atowu ekewe pisekin maun mi nom lon ewe imwen wöllap.
ISA 22:9 Oua küna ekewe chomong pwang lon tittin ewe telinimw Jerusalem, oua pwal achufengeni ekewe koluk lon ewe lenien koluk fan.
ISA 22:10 Oua aleani ekewe imw lon Jerusalem o ataela ekoch pwe oupwe eäniir le apinasa o apöchöküla tittin ewe telinimw.
ISA 22:11 Oua pwal föri eu wän koluk lefilen ekewe ruu tit fän iten an epwe amwocho ewe koluk seni ewe lenien kolukun lom. Nge ousap ekieki usun Kot ewe mi afisätä ekei mettoch meinisin, ousap afäli ewe a fen amolätä ei seni me lom.
ISA 22:12 Lon ewe fansoun Kot ewe Samol mi Unusen Manaman a ürenikemi pwe oupwe kechü o ngüngüres, oupwe pwal fichi möküremi o üföüf üf seni tuk.
ISA 22:13 Nge oua chök pwapwa o mweireir, oua niela kow me sip kana pwe oupwe ochoch fituk o ünümi wain. Pun oua apasa, “Ousipwe momongö o ükün, pun lesor sipwe mäla.”
ISA 22:14 Iwe, ewe Samol mi Unusen Manaman a pwäri ngeniei lon an kapas, “Ellet, ei tipis esap musala senikemi tori oupwe mäla. Ngang Kot ewe Samol mi Unusen Manaman üa kapas.”
ISA 22:15 Iwe, Kot ewe Samol mi Unusen Manaman a üreniei, pwe üpwe feila ren ewe nöüwis Sepna, ewe meilapen chon tümwünü ewe imwen king, o üreni,
ISA 22:16 “Met ka föri ikei? Fän meni pwüng ka tuw peiasom lon ei leni? Ka tuw eu peias lon achau won ewe leni mi tekia, pwe kopwe nom lon mürin om mäla.
ISA 22:17 Nengeni, ewe Samol mi Lapalap epwe turufuk fän pöchökül o moneekela, inamwo ika en eman mwän mi wor manom.
ISA 22:18 Epwe amorokuluk o moneekela lon eu fanü mi watte usun eföü pwoor. Ikenan kopwe mäla lükün waom kewe woken mi ling, pun en eman mi aitengaua imwen om we king.
ISA 22:19 Ewe Samol mi Lapalap epwe asapwiluketiu seni wisom, pwe kopwe towu seni om angang.”
ISA 22:20 Iwe, ewe Samol mi Lapalap a üreni Sepna, “Lon ena rän üpwe köri nei chon angang Eliakim nöün Hilkia we mwän.
ISA 22:21 Üpwe aüföüfa ngeni üfom, üpwe pwal aea ngeni om pelit o seikätä i lon wisom. Iwe, i epwe usun eman sam ngeni chon Jerusalem, pwal ngeni chon Juta.
ISA 22:22 Üpwe ngeni an nemenem fän ewe king, ewe mwirimwirin Tafit. Üpwe ngeni ewe ki. Met epwe suki, esap wor eman epwe tongeni apüngala, met epwe apüngala, esap wor eman epwe tongeni suki.
ISA 22:23 Üpwe pwal fotukätiu i lon eu leni mi nükünük usun efoch chüfölün imw mangaku, nge epwe wiliti eu lenien iteüöch fän iten chon leimwen saman.
ISA 22:24 Iwe, repwe uwätä won weiresin tümwünün imwen saman. Aramasan seni watte tori kükün repwe itiwetä won usun chök kükün sepi, kap me rume ra itiwetä won efoch chüföl.
ISA 22:25 Lon ena rän epwe fis pwe ewe chüföl mi fotetiu lon eu leni mi nükünük epwe masassan, epwe üttütä o turula. Nge meinisin mine a nom won epwe mökküla. Ngang ewe Samol mi Unusen Manaman üa kapas.”
ISA 23:1 Iei än Kot kapas usun Tirus: Oupwe kekechü, ämi säla won ekewe sein amömö, pun Tirus a tala. Iwe, esap chüen wor imw won, esap pwal chüen wor lenien ilen sip. Ei pworaus a torikemi, lupwen oua sai seni ewe fanü Saipiros.
ISA 23:2 Oupwe ngüngüres, ämi chon amömö mi nom aroset. Nöümi chon angang ra sai won matau mi watte,
ISA 23:3 ra uwato remi wiich seni Sihor me resin ewe chanpupu Nil. Leniemi a eu lenien amömö fän iten chon fanüfan meinisin.
ISA 23:4 Kopwe itengau, Siton en telinimwen lematau mi pöchökül, pun ewe matau a apasa, “Üsap cheuchen fam, üsap pwal nöünöü. Üsap foleni alüal, üsap pwal foleni föpwül.”
ISA 23:5 Ekewe chon Isip mwo nge repwe fokun riaföü, lupwen repwe rongorong pworausen talan Tirus.
ISA 23:6 Oupwe saila Tarsis, oupwe kekechü ämi mi nonom aroset.
ISA 23:7 Ifa usun, iei ämi telinimw mi uren pwapwa, a nom seni ekewe fansoun lom? Iei ewe telinimw aramasan ra sai toau pwe repwe nonom ekis meinisin?
ISA 23:8 Iö a ekiekietä ei feiengau won Tirus, ewe telinimw mi ineti mwärin king? An chon amömö ra samol pwal aramas mi iteüöch me won unusen fanüfan.
ISA 23:9 Iwe, ewe Samol mi Unusen Manaman a ekiekietä ewe feiengau, pwe epwe awesi ar lamalamtekia ren mine ra föri, epwe pwal atekisona chokewe mi iteüöch won fanüfan.
ISA 23:10 Oupwe föri tanipi won fanüemi, ämi chon Tarsis, pun esap chüen wor lenien ilen sip.
ISA 23:11 Iwe, Kot a aitiela pöün won matau o achecha ekewe mwü. Ewe Samol mi Lapalap a allük pwe ekewe imw mi pöchökül lon Kanaan repwe tala.
ISA 23:12 Iwe, a apasa, “Esap chüen wor ämi mwänek, ämi chon Siton mi nom lon riaföü. Ikamwo oupwe sai won sip o saila Saipiros, ousap pwal tongeni kinamwe me ie.”
ISA 23:13 Nengeni ewe fanü Papilon. Sap chon Asiria, nge chon Papilon ra föri pwe Tirus epwe eu lenien manmwacho. Ra aüetä ar imwen maun mi tekia, ra ataela ekewe imwen maun mi pöchökül a atatakisi unusen ewe telinimw.
ISA 23:14 Oupwe kekechü, ämi säla won ekewe sein amömö, pun ämi telinimw mi pöchökül a tala.
ISA 23:15 Lon ena fansoun aramas repwe manlükala Tirus lon fik ier, iei ükükün ierin manauen eman king. Nge lesopolan ekewe fik ier epwe fis ngeni Tirus usun mine a mak lon ewe köl usun eman fefin mi amömö inisin fän iten lisowu,
ISA 23:16 “Kopwe angei noum kitar o fetalfeil lon ewe telinimw, en fefin mi amömö inisum fän iten lisowu, aramas ra malükükala. Kopwe ngiöch le köl o eäni chomong köl, pwe ekewe mwän repwe chechemenuk.”
ISA 23:17 Iwe, mürin ekewe fik ier ewe Samol mi Lapalap epwe föri pwe Tirus epwe kaüsefäl. Epwe liwinsefäliti an angangen amömö ngeni ekewe mwü won unusen fanüfan.
ISA 23:18 Iwe, chon ewe telinimw repwe eäni asor ngeni ewe Samol mi Lapalap winnen ar amömö, nge resap ionifengeni o iseis chök. Iwe, ren winner kewe repwe atufichi chokewe mi angang ngeni ewe Samol mi Lapalap, pwe repwe kamö ener mongö mi chomong me üfer mi ling.
ISA 24:1 Iwe, ewe Samol mi Lapalap epwe atatakisi fanüfan o apööla. Epwe ataela won o atoropasa chon.
ISA 24:2 Iwe, lon ewe feiengau epwe fis pwe aramas repwe wewefengen. Souasor repwe usun chök aramas kis, samol repwe usun chök nöür chon angang mwän me chon angang fefin, chon amömö repwe usun chök chon kamö, nge chon mwütawu repwe usun chök chon tüngor me chon liwinimang.
ISA 24:3 Iwe, fanüfan epwe wesewesen tatakis me pön, pun ewe Samol mi Lapalap a apasa.
ISA 24:4 Iwe, fanüfan a aiolol o pwasala, unusen fanüfan a apwangapwangala. Läng a eti fanüfan le kirou.
ISA 24:5 Fanüfan a limengau ren chon, pun ra puri än Kot kewe allük o aücheangaua an kewe pwüüng, ra pwal ataela an we pwon mi nom tori feilfeilachök.
ISA 24:6 Iei popun fanüfan a fokun anümamau, nge chon ra angei liwinin ar tipis. Pwal iei popun chon fanüfan ra chokisikisila, ekoch chök leir ra chüen manau.
ISA 24:7 Ewe irän wain a pwasala, ewe wain a rosola, nge chon letipepwapwa ra ngüngü.
ISA 24:8 Iwe, tikitikin pisekin ettik a köüla, pwal mweireiren chon mweireir, nge tikitikin kitar a ükütiu.
ISA 24:9 Aramas resap chüen köl lupwen ar ünümi wain, sakau a maras ngeni chon ün.
ISA 24:10 Iwe, lon ewe telinimw a chök fis fitikoko, iteiten imw ra kapüngüla pwe esap wor eman a tongeni tolong.
ISA 24:11 Aramas ra akürang won ekewe al, pun esap chüen wor ünümer wain. Iwe, pwapwa a wesila, esap chüen fis mwänek won ewe fanü.
ISA 24:12 Ewe telinimw a wesewesen tatakis, nge asamalapan ra tala.
ISA 24:13 Iei usun mine epwe fis won unusen fanüfan, pwal ngeni aramas meinisin. Epwe usun chök lesopolan fansoun kinikin, lupwen eman a fen wes le wichiki ekewe irän olif, pwal lupwen eman a fen kiniela uän ekewe irän wain.
ISA 24:14 Nge ir mi chüen manau repwe leüömong le köl fän pwapwa. Chokewe mi nom lotou repwe ingemwareiti lingen ewe Samol mi Lapalap,
ISA 24:15 nge chokewe mi nom ötiu repwe mwareiti i. Ekewe aramas mi nom aroset repwe mwareiti ewe Samol mi Lapalap, ewe Koten Israel.
ISA 24:16 Seni lesopun fanüfan sa rongorong ei köl, “Ewe mi Pwüng epwe ling.” Nge ngang üa apasa, “Feiengauei! Üa apwangapwangala, üa apwangapwangala. Ekewe chon afangamä ra afangamä fän ar rawangau, ra chök akafangamä.”
ISA 24:17 Niuokus watte, pwang mi alolol me sär repwe sounikemi, ämi chon fanüfan.
ISA 24:18 Iwe, chokewe mi sü seni ewe niuokus watte repwe turulong lon ewe pwang mi alolol, nge chokewe mi tötä seni ewe pwang repwe tup lon ewe sär. Pun üt epwe fokun püngümongetiu, nge longolongun fanüfan epwe chechech.
ISA 24:19 Iwe, fanüfan epwe fokun mökküla, epwe fokun chechech o sangfesen.
ISA 24:20 Iwe, fanüfan epwe tokorikirik usun eman chon sakau, epwe mwaroro usun eu likachoch, lupwen asepwäl a eniti. Fanüfan a choutiu ren an tipis, epwe turula, nge esap chüen üsefälitä.
ISA 24:21 Lon ena fansoun ewe Samol mi Lapalap epwe apwüngü ekewe mwichen chon läng, epwe pwal apwüngü ekewe king mi nom won fanüfan.
ISA 24:22 Iwe, epwe achufengeni ekewe king lon eu pwang usun chon fötek, epwe pwal lokerelong lon imwen fötek. Nge mürin chomong rän repwe küna apwüng.
ISA 24:23 Mürin, maram me akkar repwe tinengauala ren ar säw, pun ewe Samol mi Unusen Manaman epwe nemenem won ewe chuk Sion, pwal lon Jerusalem. Iwe, ekewe souakomwen lon ewe telinimw repwe küna an ling.
ISA 25:1 Ai Samol mi Lapalap, en ai Kot. Üpwe ingeituk, üpwe pwal mwareiti itom, pun ka föri mettoch mi amwarar. Ka apwönüetä mine ka akota me lomlom fän allükülük me wenechar.
ISA 25:2 Ka föri pwe ewe telinimw a wiliti eu ioien mettoch mi tatakis, ewe telinimw mi pöchökül tittin a tala. Ekewe imwen kingen chon ekis ra tala, esap wor eman epwe aüsefäliretä.
ISA 25:3 Iei mine aramasen ekewe mwü mi pöchökül repwe alingok, aramasen ekewe telinimw mi mwänewüs repwe niuokusituk.
ISA 25:4 Pun en eu lenien pöchökül fän iten chon osupwang me chon mwelele lon ar riaföü. En eu lenien op lupwen fansoun mölümöl, pwal eu lenien nür lupwen fansoun pwichikar. Iwe, än ekewe aramas mi mwänewüs angangen afeiengau a usun eu mölümöl a mölümöliti eu tit,
ISA 25:5 pwal usun chök pwichikaren akkar won eu leni mi pwasapwas. Ka aükätiu akürangen chon ekis, nge än ekewe aramas mi mwänewüs kölün win a ükütiu, usun nürün eu kuchu a epeti pwichikaren akkar.
ISA 25:6 Won ewe chuk Sion ewe Samol mi Unusen Manaman epwe amolätä eu kametip fän iten aramas meinisin won fanüfan, eu kametip ia epwe wor ie sokopaten mongö mi anö, pwal wain mi mürina.
ISA 25:7 Iwe, won ei chuk epwe angei seni aramas meinisin pwölüpwölün won meser, epwe angei seni chon ekewe mwü meinisin ewe pwölüpwölün letipeta a nonom wor.
ISA 25:8 Iwe, Kot ewe Samol mi Lapalap epwe aükätiu mäla, pwe esap chüen wor tori feilfeilachök. Epwe talü chönün mas seni won mesen aramas meinisin o angei seni nöün aramas kana ar itengau ekis meinisin won fanüfan. Iei alon ewe Samol mi Lapalap.
ISA 25:9 Iwe, lon ena rän aramas repwe apasa, “Ellet, iei i ach Kot sa anomu ach lükülük won pwe epwe amanauakich, iei i ewe Samol mi Lapalap sa anomu ach apilükülük won. Ousipwe pwapwa o mwänek ren an amanauakich.”
ISA 25:10 Iwe, pöün ewe Samol mi Lapalap epwe pwölü ei chuk Sion, nge epwe puri Moap usun eman a puri fetilipwas lon eu pwangen pi.
ISA 25:11 Iwe, Moap epwe aitiela pöün me lon ewe pwang, usun eman aramas a aitiela pöün lupwen a ä. Nge Kot epwe atekisonätiu än Moap lamalamtekia me tufichin angangen pöün.
ISA 25:12 Iwe, epwe ataela an kewe imwen maun me tittir mi tekia, epwe fokun atururela lepwül.
ISA 26:1 Lon ena fansoun aramas repwe chietä ei köl lon ewe fanü Juta: A wor rech eu telinimw mi pöchökül, nge ren tittin mi nükünük sa küna manau.
ISA 26:2 Oupwe suki asamalapen ewe telinimw, pwe ewe mwichen aramas mi pwüng o allükülük epwe tongeni tolong lon.
ISA 26:3 Ka ngeni chokewe mi kamwöchünük womw kinamwe, pun ra anomu ar apilükülük womw.
ISA 26:4 Iwe, oupwe lükü ewe Samol mi Lapalap fansoun meinisin, pun Kot ewe Samol mi Lapalap eu achau tori feilfeilachök.
ISA 26:5 A atekisonätiu chokewe mi lamalamtekia. A ataetiu ewe telinimw mi pöchökül ra imweimw lon, o aturätiu tittin lepwül.
ISA 26:6 Iwe, chokewe mi nom lon riaföü me wöüngau ra puri ewe telinimw.
ISA 26:7 Äm Samol mi Lapalap, ka asonosonöchü ewe al ekewe chon pwüng repwe fetal won, ka pwal awenöchü ar kewe al.
ISA 26:8 Äm aia apwönüetä om kewe allük o anomu äm apilükülük womw. Letipem a chök mochen chechemeni itom.
ISA 26:9 Iwe, üa posituk lepwin, üa küttok ren unusen letipei. Lupwen ka apwüngü fanüfan, chon fanüfan ra kaiö mine a pwüng.
ISA 26:10 Iei mwo nge ka eäni ümöümöch ngeni ekewe chon föföringau, nge resap kaiö föförün pwüng. Iwe, lon fanüen chon wenechar ra chök föri mine a ngau, resap ekieki om tekia me om ling, en äm Samol mi Lapalap.
ISA 26:11 Äm Samol mi Lapalap, ka aitietä poum pwe kopwe apwüngüür, nge resap mefi. Kopwe aiti ngeniir usun om echeni noum aramas pwe repwe säw ren. Nge ewe ekkei ka amolätä fän iten chon oputok epwe kenirela.
ISA 26:12 Äm Samol mi Lapalap, kopwe ngenikem kinamwe, pun äm angang meinisin aia föri en ka afisätä.
ISA 26:13 Äm Kot Samol mi Lapalap, chomong samol lukum ra nemenikem, nge äm aia chök asomoluk.
ISA 26:14 Iei ra mäla, nge resap chüen manausefäl. Ra wiliti sotup, nge resap chüen pwätäsefäl. Ka apwüngüür o afeiengaueer, ka föri pwe esap wor eman a chüen chechemeniir.
ISA 26:15 Nge en, äm Samol mi Lapalap, ka fokun achomongala aramasen ei mwü. Ka pwal awattela kiännin fanüem. Ren ei ka iteüöch.
ISA 26:16 Äm Samol mi Lapalap, aia küttok lon äm riaföü, aia pwal iotek ngonuk, lupwen ka apwüngükem.
ISA 26:17 Usun eman fefin mi pwopwo a tori an cheuchen fam o kechü, iei usun aia kechü fän mesom, äm Samol mi Lapalap.
ISA 26:18 Iwe, äm aia pwopwo, aia pwal cheuchen fam, nge mine aia nöüni esap wor, pwe asepwäl chök. Aisap atoto manau fän iten ewe fanü, nge esap wor chon fanüfan mi up senikem.
ISA 26:19 Nge ir mi mäla senikem repwe manau, inisir epwe manausefäl. Ämi sotup mi möür fän pwül, oupwe nela, oupwe köl fän pwapwa. Usun amurenipwin a amanaua irän fanüfan, iei usun ewe Samol mi Lapalap epwe amanaua chokewe mi mäla me lomlom.
ISA 26:20 Oupwe tolong lon imwemi, ämi nei aramas, o apüngala asamemi. Iwe, oupwe aopakemi eu fansoun mochomoch tori än Kot song epwe wesila.
ISA 26:21 Iwe, ewe Samol mi Lapalap epwe towu seni lon lenian, pwe epwe apwüngü chon fanüfan pokiten ar tipis. Ewe angangen nimanau mi fis won fanüfan le monomon epwe pwäpwäla, nge ewe pwül esap chüen aopala chokewe mi ninnila.
ISA 27:1 Lon ena fansoun ewe Samol mi Lapalap epwe apwüngü Lefiatan ewe serepenit mi süla, epwe apwüngü Lefiatan ewe serepenit mi tö rikirik ren nöün ketilas mi ken me pöchökül me manaman. Iwe, epwe pwal niela ewe trakon a nom leset.
ISA 27:2 Lon ena fansoun Kot epwe apasa, “Oupwe kölü ewe tanipin wain mi mürina.
ISA 27:3 Ngang ewe Samol mi Lapalap üa tümwünü, üa pwal achöchönü iteiten fansoun. Iwe, üa mamasa lepwin me lerän, pwe esap wor eman epwe atai.
ISA 27:4 Üsap chüen song ngeni ewe tanipin wain. Are iräfölüföl me pötöwölingau repwe mär, üpwe äteriir o kenirela meinisin.
ISA 27:5 Nge are chon oputa nei aramas ra mochen eäniei lenien op, repwe akomwen afisätä kinamwe ngeniei. Ewer, repwe fokun afisätä kinamwe ngeniei.
ISA 27:6 Lon fansoun epwe feito, ekewe chon Israel, ir ekewe mwirimwirin Jakop, repwe apwükü warer usun efoch irä, repwe fasar me sot, repwe pwal amasoua unusen fanüfan ren uar.
ISA 27:7 Ifa usun, ewe Samol mi Lapalap a afeiengaua chon Israel usun an afeiengaua chokewe mi afeiengaueer? Ika ifa usun, a niela chon Israel usun an niela chokewe mi nirela?
ISA 27:8 Ewe Samol mi Lapalap a apwüngü nöün aramas ren an mwüt ngeniir pwe repwe oola. A asürela ren an asepwäl mi pöchökül a enito seni ötiu.
ISA 27:9 Nge än chon Israel tipis epwe chök musala, are ra atai ekewe rongen uluulun anümwäl, pwe föür repwe wiliti pwül moromor, are ra pwal ataela ekewe uluulun ewe anüfefin Astarot, pwal ekewe rongen asoren ötüöt, pwe resap chüen nom.
ISA 27:10 Iwe, ewe telinimw mi pöchökül tittin a tala, a eu leni esap chüen so usun chök fanüapö. Ikenan kow ra kütta ener, ra kon o mongö fetilin ewe leni.
ISA 27:11 Ekewe aramas ra wewe ngeni palen ekewe irä mi pwas, ra kuputiu. Iwe, fefin repwe feito o rusifengeniir pwe repwe eäniir amüch. Pun ir eu mwichen aramas resap mirit. Iei mine Kot ewe mi föriir esap tongeäsiniir, esap pwal ümöümöch ngeniir.
ISA 27:12 Lon ena fansoun ewe Samol mi Lapalap epwe achufengeni nöün aramas eman ngeni eman seni ewe chanpupu Oifrat tori ewe öüwön Isip, usun eman a achufengeni föün wiich mürin an aimwüfeseni seni pön.
ISA 27:13 Iwe, lon ena fansoun efoch rappwa epwe pu pwe epwe köri chokewe mi oola lon ewe fanü Asiria me ewe fanü Isip, pwe repwe liwinsefäl. Repwe feito o fel ngeni ewe Samol mi Lapalap won ewe chuk mi pin lon Jerusalem.
ISA 28:1 Feiengauen Samaria, mwärin chokewe mi sikesik won o ünüpuch lon Israel. Lingan mi watte a chök wewe ngeni epö pön irä mi aiolol. Feiengauen ewe telinimw a nom lon ewe lemol mi fokun wöü, ia ra nom ie chokewe mi puch ren wain.
ISA 28:2 Nengeni, a fen wor eman mi manaman o pöchökül, ewe Samol epwe tinala, a usun chök eu ütten fau mi afeiengau me eu mölümöl, pwal usun chök üt mi püngümong me eu noter. Iwe, i epwe aturala Samaria won pwül fän pöchökül.
ISA 28:3 Epwe puri fän pechen ewe telinimw, mwärin chokewe mi sikesik won o ünüpuch lon Israel.
ISA 28:4 Lingan mi watte a wewe ngeni epö pön irä mi aiolol, ewe telinimw a nom won ewe lemol mi fokun wöü, epwe usun chök eföü mwen uän fiik. Are eman epwe küna, epwe ochei lon ewe chök otun a nom lepöün.
ISA 28:5 Lon ena fansoun ewe Samol mi Unusen Manaman epwe usun chök epa mwärämwärin fau aüchea mi fokun ling fän iten nöün aramas mi chüen manau.
ISA 28:6 Epwe afisätä ekiekin pwüngüöch ngeni ätewe mi wiseni ewe wisen soukapwüng, epwe pwal apworai chokewe mi wisen asüela chon maun lükün asamalapen tittin ewe telinimw.
ISA 28:7 Iwe, pwal ekewe souasor me soufos ra kukuul ren wain, ra mwaroro ren sakau. Ra ünümong wain me sakau pwe ra mwaroro o umwesila. Iwe, ekewe soufos ra mwäl lon künaer, ekewe souasor ra pwal mwäl lon ar apwüng.
ISA 28:8 Ar kewe chepel ra kula ren mus, nge esap chüen wor eu leni mi limöch me won.
ISA 28:9 Iwe, ra apasa usi, “Iö ätei a ekiekin aiti ngeni ei pworaus? Iö ätei a mochen afalafala? Ifa usun, a ekieki pwe kich sa wewe ngeni semirit mi mwü seni oup?
ISA 28:10 Pun a chök eliwini ngenikich eu itechikin kapas pwal eu itechikin kapas, eu ititin fos pwal eu ititin fos, eu lesen pwal eu lesen.”
ISA 28:11 Ewer, ewe Samol mi Lapalap epwe fos ngeni nöün aramas lon kapasen ekis mi küküngau.
ISA 28:12 Iwe, a apasa ngeniir me lom, “Iei ewe lenien kinamwe chon weiresikis repwe asösö lon. Ewer, iei ewe lenien asösö.” Nge resap mochen rongorong.
ISA 28:13 Iei mine ewe Samol mi Lapalap epwe aiti ngeniir eu itechikin kapas pwal eu itechikin kapas, eu ititin fos pwal eu ititin fos, eu lesen pwal eu lesen. Mürin repwe chepetek won ekewe al ra fetal won, repwe seletä o kinas, repwe oo o fötek.
ISA 28:14 Iei mine oupwe rongorong alon ewe Samol mi Lapalap, ämi chon turunufas, ämi mi nemeni ekei aramasen Jerusalem.
ISA 28:15 Iwe, oua tunosikesik o apasa, “Sa pwonfengen me mäla, sa pwal tipeeufengen me ewe lenien sotup. Lupwen ewe feiengau epwe war usun eu noter, esap tongeni torikich, pun sa aopakich ren kapas chofana, sa pwal eäni lenien op kapas atuputup.”
ISA 28:16 Iei mine Kot ewe Samol mi Lapalap a apasa, “Nengeni, üa anomu lon Sion eföü föün longolong mi nüküchar, eföü föün lepwokuku mi aüchea o pos. Iö a lükü i esap lichipüng.
ISA 28:17 Iwe, üpwe eäni apwüng usun eu selipich, nge pwüng usun selin awenewen.” Iwe, ütten fau epwe pwölüela ewe lenien op itan kapas chofana, nge koluk mi pumong epwe purala.
ISA 28:18 Mürin, ämi pwonfengen me mäla epwe wesila, nge ämi tipeeufengen me ewe lenien sotup esap fis. Iwe, lupwen ewe feiengau epwe war usun eu noter, epwe uweekemiila.
ISA 28:19 Epwe afeiengauakemi iteiten fansoun a torikemi. Iteiten lesosor epwe torikemi, epwe pwal torikemi lerän me lepwin. Nge ir mi wewe ren ei pworaus repwe chök fokun niuokus.
ISA 28:20 Ämi oupwe wewe ngeni eman mwän lon eu mwiitun, a mochen annut won echö kieki mi mochomoch, nge esap kuch lon. A pwal mochen pwölüela ren echö chenikam, nge a chökisikis.
ISA 28:21 Iwe, ewe Samol mi Lapalap epwe ütä usun a ütä won ewe chukun Perasim, epwe pwal song usun a song me lon ewe lemolun Kipeon. Epwe föri sokun föför esap wor eman a küküna me mwan, epwe afisi an angang, sokun angang aramas resap wewe ren.
ISA 28:22 Iei mine ousap eäni kapasen turunufas pwe fööföömi resap mwäinüküla. Pun üa rongorong me ren Kot ewe Samol mi Unusen Manaman, pwe a amolätä eu feiengau epwe tori unusen ei fanü.
ISA 28:23 Oupwe aüseling o rongorong mweliei, oupwe aüseling o rongorong ai kapas.
ISA 28:24 Ifa usun, eman chon tanipi a chök tuttuw pwül, lupwen a mochen fofot? Ifa usun, a chök akapwetetei ewe pwül?
ISA 28:25 Ifa usun, mürin an asosonöchü ewe pwül, esap amorafeili chomong sokun föün nofitin mongö, esap pwal fotuki telin föün wiich ika sokun föün irä lon en me lenian?
ISA 28:26 Iwe, ewe chon tanipi a sileöchü mine epwe föri, pun an Kot a aiti ngeni.
ISA 28:27 Ekewe sokun angangen wichiwich umwun irä resap wewefengen. Ewe chon tanipi esap wichi uän nofitin mongö ren efoch wok mi öümong ika ren pisekin wichiwich mi chou, nge a wichi uän nofitin mongö ren efoch wok mi pwas.
ISA 28:28 Ifa usun, eman a wichi umwun wiich tori föün ra tala? Apwi, esap fokun wichifochei. Nge lupwen a wichi ren pisekin wichiwich, a silei inet epwe ükütiu, pwe ekewe föün resap tala.
ISA 28:29 Ei sokun tipachem a feito seni ewe Samol mi Unusen Manaman. I eman souekiek mi amwarar, a fokun tufich lon an silelap.
ISA 29:1 Feiengauen Jerusalem, än Kot rongen asoren kek. Jerusalem, ewe telinimw ia Tafit a imweimw ie, epwe feiengau. Epwe wes eu ier pwal eu ier fengen me ekewe chulap mi fis lor.
ISA 29:2 Mürin ngang üpwe afeiengaua ewe telinimw mi wewe ngeni eu rongen asoren kek me rei. Epwe wor ngüngüres me kechü lon.
ISA 29:3 Iwe, üpwe pwelifeiliik, Jerusalem, üpwe aüetä imwen maun mi tekia ünükum o amolätä ai pisekin maun pwe üpwe maun ngonuk.
ISA 29:4 Lupwen ka turutiu fan, kopwe fos seni won pwül. Om kapas epwe fatangau seni fan. Iwe, mweliom epwe ngüngü seni fän pwül usun chök ngüngün eman anü, nge om kapas epwe osongin lein pwül moromor.
ISA 29:5 Nge ekewe mwichen chon oputok repwe wiliti pwül moromor, ekewe mwicheichen sounfiu mi eniwokus repwe wewe ngeni pön wiich mi ässila. Iwe, epwe müttir fis,
ISA 29:6 pwe ewe Samol mi Unusen Manaman epwe feito o afeiengaueer ren chopulap me chechechin fanü me akürang watte, ren ewiniär me mölümöl, pwal ren ekkei mi ngetenget.
ISA 29:7 Mürin, sounfiun ekewe mwü meinisin mi maun ngeni Jerusalem än Kot rongen asoren kek, pwal ir mi maun ngeni an kewe imwen maun o ariaföüü, repwe morukola usun chök eu tan, pwal usun chök künan eman lepwin.
ISA 29:8 Iwe, chon ekewe mwü meinisin mi maun ngeni Jerusalem repwe usun chök eman chon echik a tan pwe a mongö, nge lupwen a nela, a chüen echik. Repwe pwal usun chök eman chon kaka a tan pwe a ün, nge lupwen an nela, a fokun apwangapwang ren an kaka, pun esap wes.
ISA 29:9 Oupwe weitifengenikemi o nonom lon niuokus. Oupwe püsin achunakemi pwe oupwe chun. Oupwe puchala, nge sap ren wain, oupwe mwaroro, nge sap ren sakau.
ISA 29:10 Pun ewe Samol mi Lapalap a apüngätiu womi eu möürüchou. Iwe, a apüngala mesen ekewe chon mesenikemi, nöümi kewe soufos, a pwal pwölüela möküren ekewe chon mökürenikemi, nöümi kewe souürür.
ISA 29:11 Iwe, ekei kapasen osuni meinisin ra usun chök kapas monomon ngenikemi mi mak lon eu puk mi pwau. Lupwen ra ngeni eman mi sile alea o üreni pwe epwe aleani, epwe apasa, “Üsap tongeni, pun ei puk a pwau.”
ISA 29:12 Iwe, lupwen ra ngeni eman esap sile alea, pwe epwe aleani, epwe apasa, “Üsap sile alea.”
ISA 29:13 Iwe, ewe Samol a apasa, “Ekei aramas ra kan ngeniei ren kapasen awer chök, ra pwal asamoluei ren tinawer chök, nge leluker a fokun toau seniei. Ar fel ngeniei a chök fis ren allük me örünien aramas.
ISA 29:14 Iei mine üpwe förisefäli mettoch mi amwarar o amairü lein ekei aramas. Iwe, nöür kewe soutipachem repwe umwesila, nge ekiekin nöür kewe souekiek epwe lomotongau.”
ISA 29:15 Feiengauen chokewe ra aopala ar ekiek seni ewe Samol mi Lapalap. Ra föri ar föför lemonomon, ra pwal ais, “Iö a künakich? Iö a silei mine sia föri?”
ISA 29:16 Ra sorongauei mettoch. Ifa usun, ewe chon föri sepi esap aüchea seni ewe pwül a angang ngeni? Ifa usun, och mettoch a tongeni apasa usun ewe chon föri, “I esap föriei,” ika eu sepi epwe tongeni apasa, usun ewe chon föri, “Esap wor an sile?”
ISA 29:17 Ifa usun, esap fansoun mochomoch chök pwe ewe chuk Lepanon epwe wiliti eu tanipi mi pwülüöch, nge ewe tanipi mi pwülüöch epwe usun chök eu lenien wöllap?
ISA 29:18 Lon ena fansoun chon selingapwas repwe rongorong kapasen eu puk, nge chon mesechun mi nom lon toputop me rochokich repwe küna mwer.
ISA 29:19 Ekewe chon tipetekison repwe eäni pwapwa me ren ewe Samol mi Lapalap, nge chon wöüngau repwe mwänek ren Ewe mi Pin lon Israel.
ISA 29:20 Iwe, chon mwänewüs repwe mola, chon turunufas repwe mochola, nge chon ekiekin föri mine a ngau repwe rosola.
ISA 29:21 Kot epwe arosala chokewe mi atipisi aramas, chokewe mi sorei pwüngün kapwüng fän iten chon föföringau, pwal chokewe mi apasätä kapas chofana pwe repwe pinei än ekewe chon wenechar pwüng.
ISA 29:22 Iei mine ewe Samol mi Lapalap, ewe Koten Israel, ewe mi amanaua Apraham seni an weires, a apasa, “Nei aramas, ousap chüen itengau, ousap pwal chüen wowon säw.
ISA 29:23 Pun lupwen oupwe küna nöümi kewe üpwe ngenikemi, oupwe silei pwe ngang ewe Kot mi pin lon Israel. Ämi oupwe asamoluei o meninitiei.
ISA 29:24 Iwe, chokewe esap wor ar mirit repwe kaiö mirit, nge chon lalapat repwe aleasochisi kapasen fön.”
ISA 30:1 Iwe, ewe Samol mi Lapalap a apasa, “Feiengauen nei kana ra chök pälüeniei. Ra föri mochenin letiper, nge resap föri letipei. Ra pwal pwonfengen me chon ekis, nge resap mwir me woi. Ren ei ra chök alapala ar tipis.
ISA 30:2 Iwe, ra feila Isip, pwe repwe nom fän tümwünüen Farao o op fän nürün Isip, nge resap angei öüröürer me rei.
ISA 30:3 Iei mine repwe säw ren än Farao tümwün, repwe pwal küna itengau ren ar opolong fän nürün Isip.
ISA 30:4 Inamwo ika nöün chon Juta nöüwis ra nom Soan, nge nöür chon künö ra tori Hanes,
ISA 30:5 ir meinisin repwe säw ren Isip, pun i eu mwü mi lomotongau ngeniir, esap tongeni alisiir, pwe a chök äsäweer o aitengaueer.”
ISA 30:6 Iei kapasen osuni usun ekewe mönün ewe fanü Nekep: Ekewe chon künö ra pwerela lon eu fanüen osupwang me riaföü, eu lenien laion me serepenit mi afeiengau, pwal lenien ewe trakon mi äs. Ra uwei ar pisek mi aüchea won nöür kewe aas me kamel, pwe ar lifang ngeni ewe mwü mi lomotongau ngeniir.
ISA 30:7 Pun än chon Isip alilis a aücheangau o lomotongau. Iei mine üa aita ngeni Isip “Tunomong me chipwang.”
ISA 30:8 Iwe, Kot a üreniei, “Iei kopwe makeetiu lon eu puk ei pworaus usur, pwe epwe eu puken pwärätä lon kan fansoun repwe feito.
ISA 30:9 Pun ir eu täppin aramas mi ü ngeniei, nei kana mi chofana, resap mochen aüselinga kapasen amirit me rei ngang ewe Samol mi Lapalap.
ISA 30:10 Ra üreni ekewe souürür, ‘Ousap asile ngenikem künaemi,’ nge ngeni ekewe soufos ra apasa, ‘Ousap osuni ngenikem mine a pwüng, nge oupwe kapas motoutou ngenikem. Iwe, oupwe chök osuni mine a mwakel.
ISA 30:11 Iwe, oupwe märisi ewe al, ousap epetikem. Äm aisap mochen rongorong usun Ewe mi Pin lon Israel.’”
ISA 30:12 Iei mine Ewe mi Pin lon Israel a apasa, “Oua aücheangaua ai kapas, nge oua anomu ämi apilükülük won föförün kirikiringau me atuputup.
ISA 30:13 Iei mine ei tipis epwe usun chök chüngün eu tit mi tekia ngenikemi, a kopäi o arapakan ngeni an epwe turula. Nge an tur epwe usun chök müttirin morupun mas.
ISA 30:14 Iwe, epwe möküla usun chök eu sepi seni pwül, eman a amökkü fän pöchökül, pwe esap wor emök mökkün eman a tongeni aea le tukei molien ekkei seni eu lenien um, ika aea le üfi koluk seni lon eu chönüttu.”
ISA 30:15 Iei alon Kot ewe Samol mi Lapalap, Ewe mi Pin lon Israel, “Oupwe küna manau ren ämi liwinsefäl ngeniei me ämi asösö rei, oupwe pwal küna pöchökül ren ämi mosonotam me ämi lükülük. Nge ämi ousap mochen.
ISA 30:16 Oua apasa, ‘Apwi, äm aia mochen sü won oris.’ Iei mine oupwe süla. Oua pwal apasa, ‘Äm aipwe sü won oris mi fokun müttir.’ Iei mine chon tapwerikemi repwe pwal fokun müttir.
ISA 30:17 Iwe, engeröü leimi repwe sü ren eman chök mi eniwokusukemi, nge ämi meinisin oupwe sü ren liman chon eniwokusukemi tori oupwe usun chök efoch achen filäik won ungen chuk, pwal usun chök efoch filäik won chukuchukutä.”
ISA 30:18 Nge ewe Samol mi Lapalap a witiwiti chök an epwe kirikiröch ngenikemi, a pwal molotä pwe epwe ümöümöch ngenikemi. Pun ewe Samol mi Lapalap eman Kot mi unusen pwüng. Feiöchün chokewe meinisin ra anomu ar apilükülük won.
ISA 30:19 Ewer, ämi aramasen Sion mi imweimw lon Jerusalem, ousap chüen kechü. Kot epwe fokun ümöümöch ngenikemi, lupwen a rong ämi siö. Iwe, lupwen a rongorong, epwe pälüenikemi.
ISA 30:20 Inamwo are ewe Samol a fen ngenikemi ewe mongön riaföü me ewe kolukun letipeta, nge i ämi Soukait esap chüen op senikemi, pwe mesemi repwe küna.
ISA 30:21 Iwe, lupwen oua kul ngeni peliifich ika peliimöng, selingemi repwe rongorong me lükün sökürümi, “Iei ewe al oupwe aleni.”
ISA 30:22 Lon ena fansoun oupwe aücheangaua ämi uluulun anümwäl mi fal o pwölüpwöl ren silifer, pwal ämi uluulun anümwäl mi för seni mächä o pwölüpwöl ren kolt. Iwe, oupwe pöütirela usun chök mettoch mi limengau o apasa, “Aisap chüen mochen künakemi.”
ISA 30:23 Iwe, Kot epwe ngenikemi üt fän iten ekewe pwükil oua amorafeili won pwül, pwe repwe mär, epwe pwal ngenikemi föün wiich mi somola lon fansoun kinikin. Lon ena fansoun nöümi pwiin man repwe mongö lon lenien fetil mi watte.
ISA 30:24 Iwe, nöümi kewe kow me aas mi tuw ewe pwül repwe mongö fetil me föün irä mi neken aramas ra limetifichi ren söföl me fook mi watte.
ISA 30:25 Lon ena rän, lupwen ekewe imwen maun mi pöchökül repwe tala, nge ekewe chon oputakemi repwe ninnila, chanpupu repwe putiu seni ekewe chukutekia me chukutekison.
ISA 30:26 Iwe, tinen maram epwe wattela usun chök tinen akkar, nge tinen akkar epwe wattela fän fisu usun chök saramen fisu rän, lupwen ewe Samol mi Lapalap epwe filiti kinasen nöün aramas o amoola metekir a püsin ngeniir.
ISA 30:27 Nengeni, ewe Samol mi Lapalap a feito me toau fän an song mi fokun watte, pwal fän eu kuchun ötüöt mi ötümong. Iwe, awan a pwärätä an lingeringer, nge kapasen awan a usun chök ngetengeten ekkei.
ISA 30:28 Iwe, enienin ngasangasan a usun chök eu chanpupu a pupuwu lükün pwe a tori üen aramas. Iwe, Kot epwe achecha chon ekewe mwü ren feiengau, epwe pwal atokala ekewe mwichen aramas usun eman a atokala oris ren mächän lon awer.
ISA 30:29 Nge ämi nöün Kot aramas oupwe köl usun oua köl lon ewe pwin, lupwen a fis chulap mi pin, oupwe pwal pwapwa lon lelukemi usun oua pwapwa lon fansoun ämi sai ngeni chukun ewe Samol mi Lapalap, ewe Achauen Israel, fän tikitikin pisekin ettik.
ISA 30:30 Nge ewe Samol mi Lapalap epwe föri pwe aramas repwe rongorong mwelian mi osomong, epwe pwal aküna ngeniir pöün mi feitiu wor fän an song mi watte. Epwe wor ekkei mi ngetenget, pwal üttomong me mölümöl me ütten fau.
ISA 30:31 Iwe, ekewe chon Asiria repwe fokun niuokus ren mwelien ewe Samol mi Lapalap, lupwen a apwüngüür fän pöchökül.
ISA 30:32 Iteiten fansoun, lupwen ewe Samol mi Lapalap epwe apwüngü chon Asiria, nöün aramas repwe pwal ettiki pisekin ettik. Iwe, Kot epwe püsin maun ngeni chon Asiria.
ISA 30:33 Pun eu lenien ekkei a amol seni me lomlom. Ewer, a amol fän iten ewe kingen Asiria. Iwe, pwangen ewe lenien ekkei a alolol pwal chölap, a pwal ur ren chomong amüch me ekkei. Enienin ngasangasen ewe Samol mi Lapalap mi usun chök ütten primston epwe fisi.
ISA 31:1 Feiengauen chokewe ra kütta alilisir seni Isip. Ra lükülük won oris me woken pokiten chomongur, ra pwal lükülük won chon wawa oris pokiten ra fokun pöchökül, nge resap kütta alilisir me ren ewe Samol mi Lapalap, Ewe mi Pin lon Israel, resap pwal anomu ar apilükülük won.
ISA 31:2 Nge Kot a tipachem. Epwe awarato feiengau, nge esap siwili an kapas. I epwe ü ngeni chon föföringau, pwal ngeni chokewe mi alisi chon pwüngingau.
ISA 31:3 Iwe, chon Isip aramas chök, nge sap Kot. Nöür kewe oris fituk chök, nge sap ngün. Lupwen ewe Samol mi Lapalap epwe apwüngüür, ewe mwü mi pöchökül epwe tala, nge ewe mwü a angei alilisin seni epwe turula. Iwe, ir meinisin repwe feiengauöppök.
ISA 31:4 Iwe, ewe Samol mi Lapalap a kapas ngeniei, “Usun eman laion ika eman nienifön laion a ngüngü won liapan, nge esap niuokus ren mwelien eu mwichen chon mas ra feila ren, esap pwal süla ren aküranger, iei usun ngang ewe Samol mi Unusen Manaman üpwe feitiu pwe üpwe tümwünü ewe chuk Sion seni feiengau, nge esap wor eman epwe pineei.
ISA 31:5 Iwe, ngang ewe Samol mi Unusen Manaman üpwe tümwünü Jerusalem usun eman machang a chang won fasan, üpwe tümwünü o angasa, üpwe aopa o amanaua.”
ISA 31:6 Iei alon ewe Samol mi Lapalap, “Ämi aramasen Israel, oupwe kul ngeniei ngang ewe Kot oua fokun ü ngeni.
ISA 31:7 Iwe, lon ena fansoun ämi meinisin oupwe pöütala ämi kewe uluulun anümwäl mi för seni silifer me kolt oua püsin föriir, nge oua tipis ren.
ISA 31:8 Iwe, chon Asiria repwe mäla lon maun, nge sap ren pöchökülen aramas, ewe ketilas a nirela sap nöün aramas. Iwe, repwe sü seni ewe maun, nge nöür alüal aramas repwe nöüniir amanau.
ISA 31:9 Iwe, ar king epwe süla fän mösök, nge nöün kewe meilapen sounfiu repwe likitala ar filäik fän niuokus watte.” Iei alon ewe Samol mi Lapalap, ewe Kot a wor an lenien ekkei lon Sion, pwal an lenien um lon Jerusalem.
ISA 32:1 Nengeni, eman king epwe nemenem fän pwüng, nge ekewe samol repwe nemenem fän pwüngüöch.
ISA 32:2 Iwe, iteiten eman me eman leir epwe usun chök eu lenien chuno seni asepwäl, pwal usun chök eu lenien op lupwen fansoun mölümöl. Repwe usun chök chanpupu lon eu leni mi pwasapwas, pwal usun chök nürün eu achau mi watte lon fanüapö.
ISA 32:3 Mürin, chokewe mi küna resap chüen amöürala meser, nge selingen chokewe mi rongorong repwe aüseling.
ISA 32:4 Iwe, chokewe mi müttir le kapas o müttir le föri och, repwe mirit o weweöch, nge än chokewe mi awemwöch kapas epwe fateöch.
ISA 32:5 Iwe, chon miritimang resap chüen iteni aramas tekia, nge chon atuputup resap chüen iteüöch.
ISA 32:6 Pun eman chon miritimang a eäni kapasen umwes, letipan a chök ekiekin föföringau. Iwe, a föri föför esepwüng, a eäni kapas mi mwäl usun ewe Samol mi Lapalap, a pwal amwöchü seni chon echik mine repwe möt ren, nge esap ngeni chon kaka ünümer.
ISA 32:7 Iwe, föförün eman chon atuputup a ngau, a chök ekiekietä mine a pwüngingau, pwe epwe afeiengaua chon wöüngau ren kapas chofana, inamwo ika a pwä än ewe chon osupwang pwüng.
ISA 32:8 Nge eman aramas tekia a ekiekietä mine a let o sopwela le föri mine a pwüng.
ISA 32:9 Ou etto, ämi fefin mi kinamwe fän chipwang, oupwe rongorong ai kapas. Ämi föpwül mi ekieki pwe oua nonomöch, oupwe aüselinga ai afalafal.
ISA 32:10 Mürin eu fansoun mochomoch, ekis lap seni eu ier chök, oupwe chechech, ämi fefin mi ekieki pwe oua nonomöch, pun resin wain esap fis, esap pwal wor ua.
ISA 32:11 Oupwe chechech fän niuokus, ämi fefin mi kinamwe fän chipwang, oupwe chechech, ämi mi ekieki pwe oua nonomöch. Iwe, oupwe pwilitawu üfemi o aea uros mangaku seni tuk.
ISA 32:12 Oupwe fichi möküremi pwe asisilen ämi letipeta, pun ekewe tanipi mi mürina me ekewe irän wain mi uaöch ra tala,
ISA 32:13 nge iräfölüföl me pötöwölingau ra mär won fanüen nei aramas. Ewer, oupwe kechüeiti ekewe imwen apwapwa meinisin lon ewe telinimw mi pwapwa.
ISA 32:14 Pwal ewe imwen king esap chüen so, nge ewe telinimw mi chocho epwe pöla. Iwe, ewe chuk me ewe imwen mamas repwe wiliti eu leni mi tatakis feilfeilachök. Aas mi mwacho repwe pwapwa le nonom ie, nge ekewe pwiin sip repwe mongö fetil ie.
ISA 32:15 Iwe, ei epwe fis tori Kot epwe tinato Ngünün woch. Mürin, ewe fanüapö epwe wiliti eu tanipi mi pwülüöch, nge ewe tanipi mi pwülüöch epwe usun chök eu lenien wöllap.
ISA 32:16 Iwe, pwüngüöch me pwüng epwe fisitä lon unusen ewe fanü.
ISA 32:17 Iwe, uän pwüng kinamwe, nge esenipaen pwüng nonomöch me lükülük tori feilfeilachök.
ISA 32:18 Nei aramas repwe manau fän kinamwe, repwe pwal asösö lon imwer, nge esap wor och mine repwe weires ren.
ISA 32:19 Inamwo ika ütten fau epwe püngütiu won ewe wöllap, nge ewe telinimw epwe unusen tala,
ISA 32:20 ämi mi fofot ünükün ekewe koluk meinisin, oupwe feiöch, pwal ämi mi apichala kow me aas pwe repwe mongöfeil.
ISA 33:1 Feiengauom, en chon kata, en kosamwo püsin tala. Feiengauom, chon atuputup mi afeiengau, nge esamwo wor eman a atupuk. Wesin om kata kopwe püsin tala, nge wesin om angangen atuputup mi afeiengau kopwe püsin tup o feiengau.
ISA 33:2 Ai Samol mi Lapalap, kopwe ümöümöch ngenikem, äm aia anomu äm apilükülük womw. Kopwe tümwünükem iteiten rän, kopwe pwal amanauakem lon fansoun riaföü.
ISA 33:3 Ewe mwichen aramas ra süla ren mweliom mi wewe ngeni chopulap, nge lupwen ka maun fän item, chon ekewe mwü ra toropasfeil.
ISA 33:4 Iwe, aramas repwe ürüng won mine ekewe chon maun ra likitala pwe choon wokur, usun chök lifichimas ra ässiti mettoch, repwe pwal mweteri liaper usun chök lifichimas.
ISA 33:5 Ewe Samol mi Lapalap a tekia, pun a nonom won läng. Iwe, epwe afisätä apwüng me pwüng lon Jerusalem
ISA 33:6 o anüküchara ewe mwü. Iwe, i epwe amanaua nöün aramas o ngeniir tipachem me silelap mi somwola, nge ar niuokusiti ewe Samol mi Lapalap iei wöür.
ISA 33:7 Nengeni, ekewe chon pwora ra siö won ekewe al, nge ekewe chon künö mi mochen afisätä kinamwe ra kechüangau.
ISA 33:8 Esap wor eman a fetal won ekewe alalap, esap pwal chüen wor chon saifeil. Ekewe pwonen atipeeufengen ra tala, ekewe chon pwärätä ra küna turunufas, nge aramas ra aücheangau.
ISA 33:9 Ewe fanü a aiolol o pwasapwas, ewe wöllapen Lepanon a pwasala. Ewe lemolun Saron mi pwülüöch a usun chök eu fanüapö, nge ekewe irä won Pasan me Karmel ra amworala chör.
ISA 33:10 Iwe, ewe Samol mi Lapalap a apasa, “Iei üpwe ütä, üpwe fefeitä, iei üpwe pwal atekiaeitä.
ISA 33:11 Mine oua ekiekietä esap wor aüchean, nge meinisin mine oua föri esap wor lomotan. Iwe, enienin ngasangasemi eu ekkei mi püsin kenikemiila.
ISA 33:12 Ämi aramas oupwe usun pweech mi um, oupwe pwal usun chök iräfölüföl mi pöküpök ra kek lon ekkei.”
ISA 33:13 Oupwe rongorong mine üa föri, ämi mi toau, nge ämi mi arap, oupwe mefi ai manaman.
ISA 33:14 Ekewe chon tipis lon Sion ra niuokus, nge chokewe resap lükü Kot ra chechech. Ra ais, “Iö leich epwe tongeni manau ren än Kot apwüng mi wewe ngeni eu ekkei mi sarara tori feilfeilachök?”
ISA 33:15 Eman mi föri mine a pwüng o eäni kapas wenechar, i epwe manau, pwal eman mi oput an epwe angei winnan fän pöchökül, esap mochen angei lifangen amichimich, nge a pinei selingan pwe esap rongorong pworausen nimanau, a pwal apüngala mesan pwe esap küna mine a ngau.
ISA 33:16 Ei sokun aramas epwe nonom won ekewe lenien tekia, epwe nonom fän kinamwe usun eman mi nom lon imwen maun mi pöchökül. Epwe fokun wor anan mongö me ünüman koluk.
ISA 33:17 Iwe, mesom epwe küna lingöchün ewe king, epwe pwal nenengeni eu fanü mi fokun watte.
ISA 33:18 Kopwe ekieki lon lelukom usun ewe eniwokus mi fis me lom o ais, “Ia a nom ie ewe meilapen nöüwis? Ia a nom ie ewe chon angei takises? Nge ia a nom ie ewe chon aleani ekewe imw tekia?”
ISA 33:19 Iwe, kosap chüen küna ekana aramas mi lamalamtekia, ekana aramas mi eäni fosun ekis mi monomon, esap wor eman a tongeni wewe ren.
ISA 33:20 Kopwe awena mesom ngeni Sion, ewe telinimwen ach kewe chulap mi pin. Iwe, mesom epwe nenengeni Jerusalem, ewe lenien kinamwe. Epwe wewe ngeni eu imw mangaku mi nükünük, chüfölün resap üttütä, nge selin resap mwü.
ISA 33:21 Ikenan ewe Samol mi Lapalap epwe pwäri ngenikich an ling. Ewe telinimw epwe usun chök eu lenien chanpupu mi chölap fän itach, nge esap wor wän chon oputach wa fatül are sip watte, repwe tongeni sai won.
ISA 33:22 Iwe, ewe Samol mi Lapalap ach souapwüng, ewe Samol mi Lapalap ach sounemenem, ewe Samol mi Lapalap ach king, i epwe amanauakich.
ISA 33:23 Iwe, selin war resap mei, resap tongeni anüküöchü ewe öü lon lenian, resap pwal tongeni aürätä ewe amara. Äm aipwe ineti liapem mi chomong seni maun, pwal mwo nge chon pechemä repwe uweela liaper.
ISA 33:24 Iwe, esap wor eman chon ewe fanü epwe apasa pwe a samau. Nge än ekewe aramas tipis epwe musala.
ISA 34:1 Oupwe arapoto, ämi chon ekewe mwün fanüfan, pwe oupwe rongorong. Oupwe aüseling, ämi mwichen aramas. Fanüfan epwe aüseling, pwal aramasen won meinisin.
ISA 34:2 Iwe, ewe Samol mi Lapalap a song ngeni chon ekewe mwün fanüfan, a pwal lingeringeriti nöür kewe mwichen sounfiu meinisin. Iwe, a apwüngala pwe repwe ninnila.
ISA 34:3 Ar kewe somä resap peias, inisir epwe ponfeil, nge ekewe chuk repwe parapar ren char.
ISA 34:4 Iwe, akkar me maram me fü kana repwe telila, läng epwe numufengen usun echö toropwe, nge minen läng meinisin repwe turutiu usun chön irän wain ika chön irä fiik ra mworotiu.
ISA 34:5 Iwe, ewe Samol mi Lapalap a amolätä nöün ketilas lon läng. Nengeni, iei epwe feitiu won Etom pwe epwe apwüngü ekewe aramas, a fen apwüngala pwe epwe afeiengaueer.
ISA 34:6 Iwe, nöün ketilas a kuula ren cha me kiris, ren chan ekewe nienifön sip me kuuch, pwal ren kirisin föün lon ekewe ätemwänin sip. Pun ewe Samol mi Lapalap a eäni eu asor lon ewe telinimw Posra, a afisätä eu nimanau mi watte lon ewe fanü Etom.
ISA 34:7 Ekewe kow mi mwacho repwe etiir le turutiu, pwal ekewe nienifön kow me ekewe ätemwänin kow mi pöchökül repwe ninnippöküla. Iwe, fanüer epwe kuula ren cha, nge ewe pwül epwe mürina ren kiris.
ISA 34:8 Pun iei fansoun än ewe Samol mi Lapalap epwe amanaua Sion o ngeni chon oputan chappen ar föför.
ISA 34:9 Iwe, ekewe chanpupun Etom repwe wiliti asaruto, pwülün mi moromor epwe wiliti primston, nge unusen ewe fanü epwe wiliti asaruto mi kar.
ISA 34:10 Iwe, ewe ekkei esap kunula lepwin me lerän, nge ötüötün epwe ötütä feilfeilachök. Ewe fanü Etom epwe tala seni eu täppin aramas tori eu täppin, nge esap wor eman epwe saifetal won.
ISA 34:11 Iwe, fukuro me ängä repwe nonom lon ewe fanü. Iwe, Kot epwe föri pwe ewe fanü Etom epwe fokun pönüla, pwe epwe usun chök mwen än Kot föri fanüfan.
ISA 34:12 Ekewe aramas tekia seni Etom esap wor och rer pwe repwe eu mwü. Iwe, an kewe samol meinisin resap chüen nom.
ISA 34:13 Iwe, iräfölüföl repwe mämäritä won ekewe imwen king, pwal pötöwölingau lon ekewe imwen maun. Iwe, ewe fanü epwe wiliti eu lenien foks me fukuro.
ISA 34:14 Sokun mönün lon fanüapö repwe chufengen me wolif, nge anüngau repwe ngüngü ngeni chiener. Ewer, ekewe anün rochopwak repwe so o asösö won.
ISA 34:15 Iwe, fukuro repwe fas ikenan, repwe pwal amökkü sokuler o achufengeni apaner kana fän pöükässir. Ewer, ikenan ekewe machang iter wolcher repwe chufengen me chiener.
ISA 34:16 Oupwe küttafichi o aleani seni än ewe Samol mi Lapalap we puk: Meinisin ekei man repwe nom, iteiten eman me eman epwe wor pwülüan. Pun ewe Samol mi Lapalap a allük pwe epwe iei usun, püsin i epwe achufengeniir.
ISA 34:17 Iwe, epwe ineti ewe fanü o ngeni eman me eman kinikinin. Repwe lenieni ekewe leni tori feilfeilachök o nonom lon seni eu täppin aramas tori eu täppin.
ISA 35:1 Iwe, ewe fanüapö me ewe fanüpwas repwe pwapwa, ewe fanüapö epwe mwänek o afisätä pön irä usun chök ekewe rous.
ISA 35:2 Epwe fokun ämärätä irä, epwe mwänek fän pwapwa me köl. Iwe, epwe lingeni lingen Lepanon, epwe pwal pwülüöch usun pwülüöchün ekewe tanipi lon Karmel me Saron. Iwe, aramasan meinisin repwe küna lingen ewe Samol mi Lapalap, repwe pwal mefi tekian ach we Kot.
ISA 35:3 Oupwe apöchöküla pau kana mi apwangapwang o anüküchara pwäsuk kana mi chechech.
ISA 35:4 Oupwe apasa ngeni chokewe mi niuokus lon letiper, “Oupwe pworacho, nge ousap niuokus. Ämi Kot epwe feito pwe epwe apwüngü chon oputakemi. Epwe feito pwe epwe amanauakemi.”
ISA 35:5 Mürin, mesen chon mesechun repwe nela, nge selingen chon selingepüng repwe sukula,
ISA 35:6 chon pechemä repwe mwetemwet usun eman chia, nge ekewe chon awemwöch repwe köl fän mweireir. Pun lenien koluk repwe mökküla lon fanüpwas, nge chanpupu repwe pupu lon fanüapö.
ISA 35:7 Iwe, pi mi pwichikar ren akkar epwe wiliti eu nomun koluk, nge lon ewe fanü mi pwasapwas epwe wor chönüttu. Iwe, ekewe lenien wolif repwe wiliti eu leni mi pwülüöch, ia fetil me irä ra mär ie.
ISA 35:8 Iwe, ikenan epwe wor efoch alalap epwe iteni Al mi Pin. Ekewe chon tipis resap fetal won, nge ekewe chon silemang resap tongeni tok seni.
ISA 35:9 Iwe, esap wor laion won ewe al, esap pwal wor manmwacho repwe tolong lon. Nge chokewe chök mi küna manau repwe fetal won.
ISA 35:10 Iwe, chokewe ewe Samol mi Lapalap a angaseer repwe liwinsefäl o feiliti Jerusalem fän mweireir me köl. Pwapwa esemüch epwe nonom rer. Pwapwa me mwänek epwe toriir, nge lolilen me ngüngü epwe sü seniir.
ISA 36:1 Iwe, lon engol me rüanün ierin mwün Hiskia ewe kingen Juta, Sanherip ewe kingen Asiria a feito, a maun ngeni ekewe telinimwen Juta mi pöchökül tittir o liapeniir.
ISA 36:2 Mürin, ewe kingen Asiria a tinala nöün meilapen sounfiu seni Lakis me eu mwichen sounfiu mi chomong, pwe repwe feila Jerusalem ren ewe king Hiskia. Iwe, ewe meilapen sounfiu a üla arun ewe lenien puun koluk mi feitiu me lon ewe nomun koluk asan, ünükün ewe alalap a ale ngeni ewe leni, ia aramas ra apwecha mangaku ie.
ISA 36:3 Iwe, ülüman nöün ewe king nöüwis ra feila ren: Eliakim nöün Hilkia ewe meilapen chon tümwünü imwen ewe king, Sepna ewe seketeri, pwal Joa nöün Asaf we, ewe soumak.
ISA 36:4 Iwe, ewe meilapen sounfiun Asiria a üreniir, “Oupwe asile ngeni Hiskia pwe iei alon ewe king mi lapalap, ewe kingen Asiria, ‘Met ka anomu om apilükülük won?
ISA 36:5 Ka apasa pwe mi wor om silelap me pwora lon maun, nge om kapas ra pöön chök. Iö om apilükülük pwe ka ü ngeniei?
ISA 36:6 Ewer, ka apilükülükü Isip ewe liwo mi kupukai, epwe pwangeni pöün eman a itetä won. Iei usun lapalapen Farao ewe kingen Isip ngeni chokewe mi anomu ar apilükülük won.’
ISA 36:7 Nge are oupwe apasa ngeniei, ‘Aia anomu äm apilükülük won äm Kot ewe Samol mi Lapalap,’ ifa usun, Hiskia esap ataela än Kot kewe lenien fel won ekewe leni mi tekia me an kewe rongen asor o apasa ngeni chon Juta me chon Jerusalem, ‘Oupwe fel ngeni Kot mwen ei chök rongen asor?’
ISA 36:8 Iwe, iei kopwe akuf ngeni ai samol ewe kingen Asiria. Ngang üpwe ngonuk ruongeröü oris, nge sipwe pi are epwe wor reöm ruongeröü sounfiu repwe wawa ekewe oris.
ISA 36:9 Ren met sokun lapalap ka tongeni pälüeni eman chök me lein ekewe samolun sounfiu mi kis nöün ai king, inamwo ika ka apilükülük won Isip fän iten woken me chon wawa oris?
ISA 36:10 Nge ifa usun, ka ekieki pwe ngang üa feito pwe üpwe maun ngeni ei fanü o ataala lükün tipen ewe Samol mi Lapalap? Apwi! Ewe Samol mi lapalap a fen tinieito ikei pwe üpwe ataela ei fanü.”
ISA 36:11 Mürin, Eliakim me Sepna me Joa ra üreni ewe meilapen sounfiu, “Kose mochen kopwe kapas ngenikem äm noum kei chon angang lon fosun Aramaik, pun aia wewe ren, nge kosap kapas ngenikem lon fosun Juta mwen selingen ekewe aramas mi nom won tittin ewe telinimw.”
ISA 36:12 Nge ewe meilapen sounfiu a pälüeniir, “Ifa usun, ai samol a tinieito pwe üpwe eäni ei kapas ngeni ämi we samol pwal ngenikemi chök? Apwi, a pwal tinieito ren ekewe aramas mi mot won tittin ei telinimw, repwe püsin mongö ar kiten mongö o ünümi püsin chuchur usun chök ämi.”
ISA 36:13 Mürin, ewe meilapen sounfiu a kanoto o kökkö fän leüömong lon fosun Juta, “Oupwe aüselinga alon ewe king mi lapalap, ewe kingen Asiria.
ISA 36:14 Ousap mwüt ngeni Hiskia pwe epwe atupukemi, pun esap tongeni amanauakemi.
ISA 36:15 Ousap tup ren än Hiskia michikemi ren an apasa, ‘Oupwe anomu ämi apilükülüköch won ewe Samol mi Lapalap, pun i epwe amanauakich, nge ei telinimw esap tolong lepöün ewe kingen Asiria.’
ISA 36:16 Iwe, ousap aüselinga alon Hiskia. Pun ewe kingen Asiria a apasa pwe oupwe afisätä kinamwe ngeni o fangatä. Mürin, ämi meinisin oupwe ochoch seni püsin ämi irän wain me ämi irä fiik, oupwe pwal ünümi koluk seni püsin ämi chönüttu,
ISA 36:17 tori epwe feito o uweekemiila lon eu fanü usun chök fanüemi, eu fanü ia a wor ie wiich pwe epwe wor enemi, pwal tanipin wain pwe epwe wor ünümemi wain.
ISA 36:18 Iwe, oupwe afälikemi pwe Hiskia esap emweningauekemi ren an apasa pwe ewe Samol mi Lapalap epwe amanauakemi. Ifa usun, mi wor eman lein koten ekewe mwü a tufichin angasa fanüan seni ewe kingen Asiria?
ISA 36:19 Ikafair ekewe koten Hamat me Arpat? Ikafair ekewe koten Sefarwaim? Ifa usun, ra angasa Samaria seni lepöün?
ISA 36:20 Iö lein koten ekei fanü a tufichin angasa fanüan seni äm king? Ifa usun, oua chüen ekieki pwe ewe Samol mi Lapalap epwe tufichin angasa Jerusalem seni lepöün?”
ISA 36:21 Iwe, ekewe aramas ra chök fanafanala. Resap pälüeni eu an kewe kapas, pun ewe king a allük ngeniir pwe resap pälüeni och.
ISA 36:22 Mürin, Eliakim nöün Hilkia ewe meilapen chon tümwünü imwen ewe king, Sepna ewe seketeri, pwal Joa nöün Asaf, ewe soumak, ra kamwei üfer fän ar letipeta, ra feila ren Hiskia o apworausa ngeni alon ewe meilapen sounfiun Asiria.
ISA 37:1 Iwe, lupwen ewe king Hiskia a rong ei pworaus, a pwal kamwei üfan fän an letipeta o üföüfolong üf seni tuk. Mürin a feila lon imwen ewe Samol mi Lapalap.
ISA 37:2 A tinala Eliakim ewe meilapen chon tümwünü imwen ewe king, Sepna ewe seketeri, pwal ekewe souakom lein ekewe souasor, pwe repwe churi ewe soufos Aisea nöün Amos we, nge ra üföüf üf seni tuk.
ISA 37:3 Iwe, ra üreni, “Iei alon Hiskia: Ei rän eu ränin riaföü me apwüng me itengau. Iwe, aia usun chök eman fefin a tori fansoun an epwe nöünöü, nge esap wor an pöchökül an epwe nöünätiu nöün.
ISA 37:4 Eli ewe Samol mi Lapalap om we Kot a rong alon ewe meilapen sounfiu, ätewe an samol ewe kingen Asiria a tinato pwe epwe turunufasei ewe Kot mi manau. Iwe, ewe Samol mi Lapalap om we Kot epwe apwüngü ätewe ren an kewe kapas a apasa. Iei mine kopwe iotek fän iten chokewe ra chüen manau.”
ISA 37:5 Iwe, lupwen nöün ewe king Hiskia kewe nöüwis ra feito ren Aisea,
ISA 37:6 Aisea a üreniir, “Oupwe asile ngeni ämi samol pwe iei alon ewe Samol mi Lapalap, ‘Kosap niuokus ren ekewe kapas ka rongorong me ren nöün ewe kingen Asiria chon angang ra eäni le turunufaseei.
ISA 37:7 Üpwe föri pwe ewe king epwe rongorong och pworaus o liwiniti poputän fanüan. Iwe, üpwe afeiengaua ren ketilas pwe epwe mäla lon püsin fanüan.’”
ISA 37:8 Iwe, ewe meilapen sounfiu a rongorong pwe ewe kingen Asiria a feil seni Lakis o feila Lipna pwe epwe maun ngeni. Iei mine a feila ikenan pwe epwe churi.
ISA 37:9 Iwe, eu pworaus a tori ewe kingen Asiria, pwe Tirhaka eman re Itiopia ewe kingen Isip a amolätä an epwe maun ngeni. Nge lupwen a rong ei pworaus, a tinala chon künö ren Hiskia fän echö toropwe.
ISA 37:10 Iei masouan, “Kopwe afäluk pwe om we Kot, ewe ka anomu om apilükülük won, esap atupuk ren an pwon ngonuk pwe Jerusalem esap oolong lepei.
ISA 37:11 Ka rong mine ekewe kingen Asiria ra föri ngeni ekewe mwü meinisin, pwe ra fokun aroserela. Ifa usun, ka ekieki pwe en kopwe sü seni ewe feiengau?
ISA 37:12 Ai kewe lewo ra ataala ekewe telinimw Kosan, Haran, Resef o niela ekewe aramasen Eten mi nom Telassar. Iwe, esap wor eman lein ar kewe kot a tongeni amanaueer.
ISA 37:13 Ia ra nom ie kingen ekewe telinimw Hamat, Arpat, Sefarwaim, Hena me Iwa?”
ISA 37:14 Iwe, Hiskia a angei ewe toropwe seni lepöün ekewe chon künö o aleani. Mürin, a feila lon ewe imwenfel o oletala fän mesen ewe Samol mi Lapalap.
ISA 37:15 Hiskia a iotek ngeni ewe Samol mi Lapalap o üra,
ISA 37:16 “Ai Samol mi Unusen Manaman, en ewe Koten Israel, ka mot won eu lenien motun king asen ekewe Kerop. En chök Koten ekewe mwü meinisin won fanüfan, ka pwal föri läng me fanüfan.
ISA 37:17 Ai Samol mi Lapalap, kopwe aü selingom o rongorong, kopwe neto o nengeni mine a fis ngenikem. Iwe, kopwe rongorong ekewe kapas meinisin Sanherip a tinato pwe epwe turunufaseek ren, en ewe Kot mi manau.
ISA 37:18 Ai Samol mi Lapalap, a pwüng pwe ekewe kingen Asiria ra akufu chomong mwü o ataala fanüer,
ISA 37:19 ra pwal aturalong nöür kewe kot lon ekkei. Pun nöür kewe kot mi för seni müch me fau, sap ir wesewesen Kot, nge förien aramas chök. Iei mine ra tala.
ISA 37:20 Nge iei, ai Kot, Samol mi Lapalap, kopwe amanauakem seni Sanherip, pwe chon ekewe mwün fanüfan meinisin repwe silei pwe en chök Kot ewe Samol mi Lapalap.”
ISA 37:21 Mürin, Aisea nöün Amos we a tinala ei pworaus ren Hiskia, “Iei alon ewe Samol mi Lapalap ewe Koten Israel, ‘Pokiten om iotek ngeniei usun Sanherip ewe kingen Asiria,
ISA 37:22 ngang ewe Samol mi Lapalap üa aloni ekei kapas usun Sanherip: Ekewe chon Jerusalem ra takiriik o turunufaseek.
ISA 37:23 Iö ka urumwotei o turunufasei? Iö ka eäni kapas osomong ngeni? Nge iö ka newenewen ngeni fän lamalamtekia? Ka chök föri ei ngeniei ngang Ewe mi Pin lon Israel.
ISA 37:24 Ren noum kewe chon angang ka turunufaseei ngang ewe Samol mi Lapalap, ka pwal apasa fän om aingaing, “Üa feitä won ungen ekewe chuk tori wochikin ewe chuk Lepanon won wai woken mi chomong. Üa pöküela setaren won mi fokun langatam, pwal saipiresin won mi fokun mürina. Üa tori wochikin o tolong lein wöllapan mi fokun pachefengen.
ISA 37:25 Üa pwal tuw chönüttu lon fanüen chon ekis o ünümi kolukun. Ren fän pechei üa amorätä ekewe chanpupun Isip meinisin.”
ISA 37:26 Ifa usun, kosamwo rongorong pwe ngang üa ekiekietä ei me lomlom, üa pwal akota lon fansoun lom? Nge iei üa apwönüetä. Üa atufichuk pwe kopwe ataela telinimw mi pöchökül tittir, pwe repwe wewe ngeni ioien mettoch mi ta.
ISA 37:27 Iei mine esap chüen wor pöchökülen chon ekewe telinimw, ra niuokus me rükö. Iwe, ra wewe ngeni fetilin lemäl pwal fetil mi pwüküfö, ra pwal wewe ngeni fetilin won osun imw a pwasala mwen an epwe märitä.
ISA 37:28 Nge ngang üa silei ia ka nom ie, om feila me feito. Üa pwal silei om ü ngeniei fän om song mi watte.
ISA 37:29 Iwe, pokiten om ü ngeniei fän om song, pwal pokiten om sikesik a tori selingei, üpwe uwalong efoch ring lon pwötum pwal efoch mächä lon awom, nge üpwe aliwinukela won ewe al ka feito won.’”
ISA 37:30 Mürin, Aisea a üreni ewe king Hiskia, “Ei epwe eu asisil ngonuk. Lon ei ier oupwe mongö mine a püsin mär, lon aruuen ier oupwe mongö mine a pwük seni waran, nge lon aülüngatin ier oupwe püsin fofot o kinikin, oupwe pwal tanipini irän wain o mongö seni uan.
ISA 37:31 Nge chokewe mi chüen manau lon Juta repwe mämäritä usun irä mi wor warer mi tötiu fän pwül, epwe pwal wor uar.
ISA 37:32 Pun lon Jerusalem pwal won ewe chuk Sion repwe nom chokewe mi chüen manau. Iwe, ewe Samol mi Unusen Manaman epwe apwönüetä ei lon an tiliken.
ISA 37:33 Iei mine ewe Samol mi Lapalap a apasa usun ewe kingen Asiria, ‘Esap tolong lon ei telinimw, esap likapichielong eföü föün esefich lon ika kan ngeni ren eu tittin maun, esap pwal senätä ororen maun ünükün.
ISA 37:34 Iwe, epwe liwinla won ewe chök al a feito won, nge esap fokun tolong lon ei telinimw. Ngang ewe Samol mi Lapalap üa kapas.
ISA 37:35 Üpwe epeti ei telinimw seni feiengau, üpwe amanaua fän püsin itei, pwal pokiten ewe pwon üa eäni ngeni nei we chon angang Tafit.’”
ISA 37:36 Iwe, lon ewe chök pwinin, eman nöün ewe Samol mi Lapalap chon läng a feila o niela ipükü walik me limungeröü mwän lon ewe lenien sounfiun Asiria. Nge lupwen ekewe lusun ra pwätä lesosorusich, a chök wor somä ekis meinisin.
ISA 37:37 Mürin, Sanherip ewe kingen Asiria a sü, a liwiniti fanüan o imweimw lon Ninifa.
ISA 37:38 Lon eu rän, lupwen a fel lon imwen an we kot Nisrok, Atrammelek me Sareser nöün kewe mwän ra niela ren ketilas o süla lon ewe fanü Ararat. Iwe, Esarhatton pwal eman nöün mwän a siwili lon wisan wisen king.
ISA 38:1 Iwe, lon ewe fansoun Hiskia a samau o arap ngeni an epwe mäla. Ewe soufos Aisea nöün Amos we a feito ren o üreni, “Iei alon ewe Samol mi Lapalap, ‘Kopwe amola om amürinimä, pun kopwe mäla, nge kosap pöchökülsefäl.’”
ISA 38:2 Mürin, Hiskia a kul ngeni etipen rumwan o iotek ngeni ewe Samol mi Lapalap.
ISA 38:3 Iwe, a apasa, “Ai Samol mi Lapalap, üa tüngor ngonuk, kose mochen kopwe chechemeni pwe seni unusen letipei üa angang ngonuk fän allükülük, üa pwal föri mine a pwüng me reöm.” Iwe, Hiskia a fokun kechüangau.
ISA 38:4 Mürin, ewe Samol mi Lapalap a allük ngeni Aisea,
ISA 38:5 “Kopwe liwiniti Hiskia nei aramas o üreni pwe iei aloi ngang ewe Samol mi Lapalap än an we lewo Tafit we Kot: Üa rong om iotek, üa pwal küna om kechü. Iei üpwe apacha ngeni ränin manauom pwal engol me limu ier.
ISA 38:6 Iwe, üpwe angasok seni ewe kingen Asiria, üpwe pwal angasa ei telinimw o tümwünü.”
ISA 38:7 Iwe, Aisea a üreni, “Ewe Samol mi Lapalap epwe ngonuk eu asisil, pwe epwe apwönüetä mine a eäni pwon ngonuk.
ISA 38:8 Epwe aliwinisefäliela nürün ewe wok ngeni engol kinikin me won än Ahas we lenien aükük fansoun.” Iei mine akkar a liwinsefäl ngeni ekewe engol kinikin a fen palala me won ewe lenien aükük fansoun.
ISA 38:9 Iwe, mürin än Hiskia pöchökülsefäl seni an samau, a föri echö köl o maketiu:
ISA 38:10 Üa ekieki pwe leoloasen ränin manauei üpwe mäla, üpwe fokun tolong lon asamen lenien sotup, pwe ränin manauei esap chüen wor.
ISA 38:11 Iwe, üa apasa, lupwen üa samau, üsap chüen küna ewe Samol mi Lapalap lon fanüen chokewe mi manau, üsap pwal chüen küna eman aramas me lein chokewe mi nom won fanüfan.
ISA 38:12 Manauei a feil seniei usun eu imw mangaku a tomola. Ewer, a müchüla usun eman chon tür a awesala türünian. Kot a fichiela manauei usun eman a fichiela mätättärin ewe tür. Iwe, mwen an epwe pwinila a awesi manauei.
ISA 38:13 Üa siö tori a ränila pwe eman epwe alisiei. Kot a asüngürü chüi meinisin usun eman laion. Nge mwen an epwe pwinila a awesi manauei.
ISA 38:14 Iwe, üa tikitik usun eman ekiek ika eman kawakaw, üa pwal ngüngü usun eman lisom. Mesei a ächikichik ren ai netä läng. Ai Samol, üa nom lon riaföü, kose mochen kopwe alisiei.
ISA 38:15 Nge met ngang üpwe apasa? Kot a kapas ngeniei, nge i a pwal püsin föri ei. Üsap chüen tongeni möür kinamwe pokiten weiresin letipei.
ISA 38:16 Ai Samol, ngang üpwe manau reöm, kopwe akinamwei letipei. Kose mochen kopwe apöchökülasefäliei o amanauaei.
ISA 38:17 Ellet, ren watten ai riaföü üa küna feiöch, pun lon om chen ka efieitä seni lon ewe pwangen feiengau. Nge ai kewe tipis meinisin ka pöütala lükisökurum.
ISA 38:18 Iwe, lenien sotup esap tongeni kilisou ngonuk, nge mäla esap tongeni mwareituk. Chokewe mi nom lon peias resap tongeni apilükülük ngeni om allükülük.
ISA 38:19 Nge chokewe chök mi manau ra kilisou ngonuk usun ngang üa kilisou ngonuk ikenai. Ekewe sam ra aiti ngeni nöür usun om allükülük.
ISA 38:20 Ewe Samol mi Lapalap a amanauaei. Iwe, ousipwe kölün mwareiti Kot o ettiki kitar lon ränin manauach meinisin lon imwen ewe Samol mi Lapalap.
ISA 38:21 Iwe, Aisea a apasa, “Oupwe uwato eu tükütükün safei seni uän ewe irä fiik o isetä won machen Hiskia pwe epwe pöchökülsefäl.”
ISA 38:22 Mürin, Hiskia a ais, “Ifan ewe asisil pwe üpwe tufichin feila lon imwen ewe Samol mi Lapalap?”
ISA 39:1 Lon ena fansoun ewe kingen Papilon itan Merotak Palatan nöün Palatan we a rong pwe Hiskia a samau o pöchökülsefäl. Iwe, a tinala chon künö, pwe repwe uwala ren nöün toropwe me an lifang.
ISA 39:2 Iwe, Hiskia a etiweer fän pwapwa o aküna ngeniir an imwen iseis wöün, an silifer me kolt, an nofitin mongö me epit mi aüchea. A pwal aküna ngeniir unusen an imwen pisekin maun me meinisin mine a nom lon an kewe imwen iseis. Esap fokun wor och mettoch lon imwan ika lon mwün esap aküna ngeniir.
ISA 39:3 Mürin, ewe soufos Aisea a feito ren ewe king Hiskia o aisini, “Met ekewe mwän ra apasa? Ia ra feito me ie?” Nge Hiskia a pälüeni, “Ra feito seni Papilon ewe fanü mi toau.”
ISA 39:4 Iwe, Aisea a pwal aisini, “Met ra küna me lon imwom?” Hiskia a pälüeni, “Ra küna meinisin mine a nom lon imwei. Esap fokun wor och mettoch lon ai kewe imwen iseis üsap aküna ngeniir.”
ISA 39:5 Mürin, Aisea a üreni Hiskia, “Kopwe rongorong alon ewe Samol mi Unusen Manaman:
ISA 39:6 Lon kan fansoun repwe feito epwe fis pwe aramas repwe uwala lon ewe fanü Papilon meinisin mine a nom lon imwom, pwal mine om kewe lewo ra ionifengeni tori ikenai. Resap fokun likiti och.
ISA 39:7 Repwe pwal uwala ekoch lein noum kewe mwän mi upu ngonuk pwe repwe chon angang lon imwen ewe kingen Papilon.”
ISA 39:8 Iwe, Hiskia a üreni Aisea, “A öch alon ewe Samol mi Lapalap ka üreniei.” Pun Hesekia a ekieki pwe epwe chök wor kinamwe me mwüöch lon ränin manauan.
ISA 40:1 “Oupwe achipa, oupwe achipa nei aramas kana,” ämi Kot a apasa.
ISA 40:2 Oupwe fos pwetete ngeni Jerusalem o asile ngeni pwe an angangochou a wesila, nge an tipis a musala. Pun fän ruu a angei liwinin an tipis seni lepöün ewe Samol mi Lapalap.
ISA 40:3 A wor eu möngüngü mi leüömong, “Oupwe amolätä alen ewe Samol mi Lapalap lon fanüapö, oupwe awenala efoch alalap lon fanüpwas fän iten ach we Kot.
ISA 40:4 Lemolun chuk meinisin repwe irela, nge ekewe chuk meinisin repwe tekisonola. Iwe, mine a sonongau epwe sonosonöch, nge ekewe leni mi pukopuk repwe wiliti eu maasies.
ISA 40:5 Mürin, lingen ewe Samol mi Lapalap epwe pwäpwäla, nge aramas meinisin repwe küna, pun iei alon ewe Samol mi Lapalap.”
ISA 40:6 A wor eu möngüngü a apasa, “Kopwe kökkö!” Nge üa ais, “Met üpwe üra le kökkö?” Kopwe kökkö pwe aramas meinisin ra wewe ngeni fetil, nge linger meinisin a wewe ngeni pön irän lemäl.
ISA 40:7 Lupwen enienin ngasangasen ewe Samol mi Lapalap a enitiir, ewe fetil a pwasala, ewe pön irä a morotiu. Ellet, aramas meinisin ra chök wewe ngeni fetil.
ISA 40:8 Iwe, ewe fetil a pwasala, ewe pön irä a morotiu, nge alon ach we Kot epwe nonom tori feilfeilachök.
ISA 40:9 Kopwe feitä won eu chuk mi tekia, en mi uwato pworaus mürina ngeni Sion. Kopwe leüömong le kökkö, en mi uwato pworaus mürina ngeni Jerusalem. Kopwe leüömong le kökkö, nge kosap niuokus, kopwe aronga ngeni ekewe telinimwen Juta, “Ämi we Kot a war.”
ISA 40:10 Kot ewe Samol mi Lapalap a feito pwe epwe nemenem fän pöchökül. Nengeni, a uwato an liwin fän iten nöün aramas, nge liwiningau fän iten chon oputan.
ISA 40:11 Iwe, epwe tümwünü nöün mwichen sip usun eman chon mas, epwe pwal achufengeni ekewe apanen sip o ekiretä fän mwärin, nge ekewe inelapen sip epwe emwenirela fän kinamwe.
ISA 40:12 Iö a tongeni aükü lölön lematau lon pöün, ika aükü kiännin läng ren eangen pöün? Iö a tongeni achufengeni pwülün won fanüfan lon eu sepi ika kiloni ekewe chukutekia me ekewe chukutekison won eu kilo?
ISA 40:13 Iö a emweni Ngünün ewe Samol mi Lapalap, nge iö souöüröür a aiti ngeni mine epwe föri?
ISA 40:14 Iö Kot a kütta an öüröür seni pwe epwe saram letipan, iö a pwal aiti ngeni mine a pwüng? Nge iö a atipachema pwe epwe wor an silelap me weweöch?
ISA 40:15 Ellet, ekewe mwü ra usun chök eu chiin koluk lon eu pwekit, ra pwal wewe ngeni pwül moromor won eu kilo. Ekewe fanüen lematau ra pwas usun chök pipisüsü me ren ewe Samol mi Lapalap.
ISA 40:16 Irän won Lepanon resap naf ngeni amwüchün asor, nge ekewe mönün won resap pwal naf ngeni asoren kek ngeni Kot.
ISA 40:17 Iwe, ekewe mwü meinisin esap wor aüchear fän mesan, pwe ra lomotongau usun mettoch mi pön.
ISA 40:18 Met om ekiek usun lapalapen Kot, ika iö kopwe awewe ngeni?
ISA 40:19 Esap wewe ngeni eu uluulun anümwäl, eman chon ketel mächä a föri, nge eman chon angang ngeni kolt a pwölüela ren kolt, a pwal foutei ngeni sein seni silifer.
ISA 40:20 Nge eman chon wöüngau esap tongeni eäni ei sokun asor, a chök filätä irä esap kiroula. Iwe, a kütta eman mi silelap le falafal, pwe epwe falei uluulun eman anümwäl esap mwökütüküt.
ISA 40:21 Ifa usun, ousap silei, ousap pwal rongorong? Ifa usun, esap wor eman a asile ngenikemi seni me lomlom? Are ifa usun, ousap weweiti usun än fanüfan fisitä?
ISA 40:22 Kot ewe mi mot won an lenien motun king asen fanüfan a föri, nge chon fanüfan ra fokun kükün, usun chök lifichimas. I ewe a emeresala läng usun echö chenikam, a pwal oletala usun eu imw mangaku pwe lenien nonom.
ISA 40:23 I a arosala ekewe samol o awesi chon nemenem won fanüfan.
ISA 40:24 Ra usun chök irä mi pwukufö ra kärän fotetiu, esamwo tö warer. Nge lupwen Kot a tinato eu mölümöl, ra pwasala o ässila usun chöpwasapwas.
ISA 40:25 Iwe, Ewe mi Pin a ais, “Iö oupwe awewe ngeniei, nge iö a tongeni wewe ngeniei?”
ISA 40:26 Oupwe netä läng. Iö a förätä masouan meinisin? Iwe, Kot a emwenawu mwicheicher meinisin, a pwal aita ngeniir iter. Meinisin ra nom pokiten watten an tufich, pwal ren pöchökülen an manaman.
ISA 40:27 Pwota ämi chon Israel oua apasa, “Ewe Samol mi Lapalap esap silei äm riaföü, äm Kot esap ekieki äm pwüng?”
ISA 40:28 Ousap silei usun? Are ousap rong usun? Ewe Samol mi Lapalap eman Kot mi nonom tori feilfeilachök, a föri unusen fanüfan. Iwe, esap malülü, esap pwal achanü, nge an tipachem esap wor aükükün.
ISA 40:29 A ngeni ekewe chon malülü pöchökül, nge ekewe chon lipwäkingau a ngeniir tufich mi somwola.
ISA 40:30 Iwe, pwal mwo nge ekewe alüal ra malülü o achanü, pwal ekewe alümau ra chepetek o turula.
ISA 40:31 Nge chokewe mi anomu ar apilükülük won ewe Samol mi Lapalap repwe angei pöchökül mi fö. Repwe ässitä ren pöükässir usun chök ekewe asaf. Repwe fefeil, nge resap achanü. Repwe fetal, nge resap malülü.
ISA 41:1 Kot a apasa, “Oupwe aüselingaei fän mosonoson, ämi fanü mi nom lematau. Chon ekewe mwü repwe angei ar pöchökül mi fö. Repwe kaneto pwe repwe fos. Ousipwe chufengen pwe sipwe kapwüngfengen.
ISA 41:2 Iö a apwökü ewe aramas seni ötiu, ätewe mi win ekis meinisin? Iö a mwütätä pwe epwe akufu ekewe mwü o puri ekewe king fän pechen. Iwe, nöün ketilas epwe atatakisiir pwe repwe usun chök pwül moromor, nge an likapich epwe ässirela usun asepwäl a ässala chöpwasapwas.
ISA 41:3 Iwe, a tapweriir o fetal won ekewe al esamwo fetal won me mwan, nge esap wor eman a epeti.
ISA 41:4 Iö a föri ei föför? Iö a köri ekewe pilon aramas seni lepopun? Ngang, ewe Samol mi Lapalap, üa nom me lepoputan, üpwe pwal nom ren ekewe pilon lesopolan, ngang chök.
ISA 41:5 Iwe, chon ekewe fanü mi nom aroset ra küna mine üa föri o niuokus ren, nge chokewe mi nom lesopun fanüfan ra chechech. Ir meinisin ra feito o chufengen.
ISA 41:6 Iteiten eman me eman a alisi chon arun o üreni pwin, ‘Kopwe apöchökulok!’
ISA 41:7 Iwe, ewe chon falafal a pesei ngeni ewe mi angang ngeni kolt pwe epwe chök sopwela an angang, ätewe mi achöpöpü mächä a pesei ätewe mi amaani o apasa usun an angang, ‘A mürina.’ Iwe, a anüküchara förier uluulun anümwäl ren chüföl pwe esap mwökütüküt.
ISA 41:8 Nge en Israel nei chon angang, en mwirimwirin Apraham, chiechiei we üa filuketä,
ISA 41:9 üa uweeketo seni leamüchün fanüfan, üa pwal köruk seni lesopun fanüfan o ürenuk, ‘En nei chon angang, üa filuketä, nge üsap pöütukela.’
ISA 41:10 Iwe, kosap niuokus, pun ngang üa etuk, kosap pwal apilüküngau, pun ngang om Kot. Üpwe apöchökülok, üpwe pwal alisuk. Üpwe fokun tümwünuk o amanauok.
ISA 41:11 Chokewe ra songeituk repwe itengau me säw, nge chokewe mi fiu ngonuk repwe mäfeiengau o rosola.
ISA 41:12 Iwe, kopwe kütta chokewe mi oputok, nge kosap chüen küneer, pwal chokewe mi maun ngonuk repwe moela.
ISA 41:13 Pun ngang om Kot ewe Samol mi Lapalap üa amwöchü pöüifichum, pwal ngang ätewe mi ürenuk, ‘Kosap niuokus, ngang üpwe alisuk.’”
ISA 41:14 Ewe Samol mi Lapalap a apasa, “Kosap niuokus, en Israel mi kükün o apwangapwang usun chök eman moso, pun ngang üpwe alisuk. Ngang Ewe mi Pin lon Israel om Chon Amanau.
ISA 41:15 Nengeni, üpwe föri senuk eu pisekin wichiwich umwun wiich, epwe minefö o ken, epwe pwal wor fölün. Kopwe wichi ekewe chukutekia o atatakisiir, kopwe pwal awili ekewe chukutekison ngeni pön wiich.
ISA 41:16 Iwe, kopwe söfölüretä pwe asepwäl epwe ässirela, nge mölümöl epwe atoropaseer. Nge en kopwe pwapwa rei, pun ngang om Samol mi Lapalap, kopwe pwal mwareitiei ngang Ewe mi Pin lon Israel.
ISA 41:17 Iwe, lupwen chon wöüngau me osupwang ra kütta koluk, nge resap küna, lupwen ra kaka pwe chönawer a pwasapwas, ngang ewe Samol mi Lapalap üpwe pälüeni ar iotek o alisiir. Ngang ewe Koten Israel üsap likitirela.
ISA 41:18 Iwe, üpwe apupuetä chanpupu won ekewe chuk mi amassawa o emichätä puächen koluk lon ekewe lemol. Üpwe awili fanüapö ngeni nomun koluk, nge fanüpwas ngeni puächen koluk.
ISA 41:19 Üpwe ämärätä lon fanüapö ekewe irä setar me akasia, pwal ekewe mwoosor me irä olif. Üpwe pwal fotukätiu lon fanüpwas ekewe irä saipires me akürang me irä pain.
ISA 41:20 Iwe, aramas repwe küna ei o silei pwe ngang ewe Samol mi Lapalap üa föri ekei föför, repwe pwal ekieki usun o weweiti pwe ngang Ewe mi Pin lon Israel üa afisätä ei.”
ISA 41:21 Ewe Samol mi Lapalap ewe kingen Israel a apasa, “Ämi koten ekewe mwü, oupwe feito o fos, oupwe uwato ämi pisekin pwärätä.
ISA 41:22 Oupwe uwato meinisin, oupwe pwal pwärätä mine epwe fis lon kan fansoun mwach. Oupwe aiti ngenikem lapalapen ekewe mettochun lom, pwe aipwe ekieki usur o silei sopolar.
ISA 41:23 Iwe, oupwe pwäri ngenikem mine epwe fis lon kan fansoun repwe feito, pwe aipwe silei pwe ämi oua kot. Oupwe föri sokun föför mi öch ika mi ngau, pwe aipwe mairü o weitifengenikem.
ISA 41:24 Nge esap fokun wor aücheami, oua wesewesen lipwäkingau lon ämi angang. Chokewe meinisin mi fel ngenikemi ra anioput.
ISA 41:25 Üa amwökütü eman seni efeng, iwe, a feito. Üa kökköri seni ötiu, iwe, epwe köri itei. Epwe puri fän pechen ekewe samol usun eman a puri pwül, ika usun eman chon föri sepi a puri ewe pwül epwe föri sepi seni.
ISA 41:26 Iö leimi a pwärätä ei me lepopun pwe aipwe silei, nge iö a osuni usun me mwan, pwe aipwe tongeni apasa pwe a pwüng an kapas? Iwe, esap wor eman a pwärätä, esap wor eman a apworausa, esap pwal wor eman a rongorong och kapas senikemi.
ISA 41:27 Iwe, ngang aemanün mi asile ngeni Sion ewe pworaus mi mürina. Üa tinala ren Jerusalem eman chon künö mi üra, ‘Nengeni, noum aramas ra liwinsefäliti fanüer.’
ISA 41:28 Nge lupwen üa nenengeni koten ekewe mwü, üsap küna eman mi tongeni apasa och, esap pwal wor eman leir a tongeni pälüeni ai kapas ais.
ISA 41:29 Nengeni, ir meinisin anümwäl chök, esap wor och mine ra tongeni föri. Ekei uluulun anümwäl ra asepwäl chök.”
ISA 42:1 Iwe, ewe Samol mi Lapalap a apasa, “Iei i nei we chon angang üa apöchöküla, nei üa afili, üa unusen pwapwa ren. Üa anomu Ngüni won, nge i epwe awarato pwüng ngeni mwün fanüfan meinisin.
ISA 42:2 Iwe, esap osomong le fos ika alapatä mwelian, esap pwal leüömong le kapas won ekewe al.
ISA 42:3 Esap kupiela efoch äsät mi puopu, esap pwal kunuela efoch wiik mi kümochoch. Iwe, epwe awora pwüng fän allükülük.
ISA 42:4 Esap achanü are mwörürütiu tori epwe wes me anüküchara pwüng won fanüfan. Iwe, chon ekewe fanüen lematau ra witiwiti an kewe allük.”
ISA 42:5 Iwe, Kot a föri läng o ameresala, a alapala fanüfan me meinisin mine a mär won, a pwal ngeni chon fanüfan ar ngasangas me manau. Iwe, Kot ewe Samol mi Lapalap a üreni nöün chon angang,
ISA 42:6 “Ngang ewe Samol mi Lapalap, üa filukutä fän wenechar, üa pwal amwöchü poum o tümwünuk. Iwe, üpwe föri reöm eu pwon ngeni aramasen fanüfan meinisin, kopwe pwal uwato saram ngeni chon ekewe mwü won fanüfan.
ISA 42:7 Iwe, kopwe anelai mesen chon chun, kopwe angasa chon fötek seni lon imwen fötek, kopwe pwal apichala chokewe mi nom lon rochopwak.
ISA 42:8 Ngang ewe Samol mi Lapalap, iei chök itei. Iwe, üsap ngeni eman kot ai ling, üsap pwal ngeni ekewe uluulun anümwäl ai iteüöch.
ISA 42:9 Nengeni, ra fen pwönüetä ai kewe kapasen osuni seni me lom, nge iei üpwe pwärätä mettoch mi fö mwen ar repwe fis.”
ISA 42:10 Oupwe eäni echö köl mi fö ngeni ewe Samol mi Lapalap, oupwe mwareiti me lesopun fanüfan. Oupwe mwareiti i, ämi meinisin mi sai lematau, pwal mönün lon meinisin. Iwe, ekewe fanüen lematau me chokewe mi nonom wor repwe kölün mwareiti Kot.
ISA 42:11 Ewe fanüapö me telinimwen lon repwe chietä kölün mwareiti Kot, pwal ekewe sop ia chon ewe ainangen Ketar ra nonom ie. Chon Sela repwe mweireir fän pwapwa me won ungen ekewe chuk.
ISA 42:12 Iwe, repwe alinga ewe Samol mi Lapalap o arongafeili iteüöchün lon ekewe fanüen lematau.
ISA 42:13 Ewe Samol mi Lapalap a feito usun eman chon pwora, a fokun tiliken le ekiekin maun usun eman sounfiu. Iwe, a eäni ewe arukaken maun o pwärawu an pwora ngeni ekewe chon oputan.
ISA 42:14 Iwe, Kot a apasa, “Fansoun langatam üa mosonoson, üa fanafanala o engila. Nge iei üpwe puchör usun eman fefin mi cheuchen fam, üpwe ngasalap me mwiengas.
ISA 42:15 Üpwe ataela ekewe chuk meinisin o apwasa fetilin wor. Üpwe awili chanpupu ngeni fanüpwas o amorätä ekewe nomun koluk.
ISA 42:16 Iwe, üpwe emweni chon mesechun won efoch al resap silei, üpwe afetaleer won ekewe al resamwo fetal won. Üpwe awili ewe rochopwak mi nom mwer ngeni saram, nge ekewe leni mi pwüküpwük üpwe awili ngeni leni mi sosonöch. Ekei mettoch üpwe apwonüetä, nge üsap likiti och.
ISA 42:17 Nge chokewe mi lükü uluulun anümwäl mi fal, pwal chokewe mi apasa usun ekewe uluulun anümwäl seni mächä pwe ir ar kot repwe itengau o fokun säw.”
ISA 42:18 Iwe, ewe Samol mi Lapalap a apasa, “Oupwe aüseling, ämi chon selingepüng, oupwe nenengeni, ämi chon mesechun, pwe oupwe küna.
ISA 42:19 Iö a mesechun usun nei we chon angang, ika iö a selingepüng usun nei we chon künö ngang üa tini? Iö a mesechun usun ätewe mi fangala manauan ngeniei, ika usun nei we chon angang?
ISA 42:20 Israel, ka küna chomong mettoch, nge kosap tümwünü. Ka aü selingom, nge kosap rongorong.”
ISA 42:21 Iwe, ewe Samol mi Lapalap a pwapwa le atekiai an allük o alinga pokiten an pwüng.
ISA 42:22 Nge ekei aramas ra chök mwelele, pun aramas ra angei pisekir fän pöchökül. Ir meinisin ra mwöchülong lon pwang o monolong lon imwen fötek. Aramas ra liapeniir, nge esap wor eman a amanaueer. Iwe, chon solä ra uweerela, nge esap wor eman a apasa, “Oupwe aliwinirela.”
ISA 42:23 Iö leimi epwe aüseling ngeni ekei kapas, nge iö epwe aüselingafichi lon kan fansoun repwe feito?
ISA 42:24 Iö a asechala Israel lepöün chon solä? Ifa usun, sap ewe Samol mi Lapalap? I ewe Kot ra tipis ngeni, resap mochen föri letipan o aleasochisi an kewe allük!
ISA 42:25 Iei mine Kot a awarato an song won chon Israel o afeiengaueer lon maun. Iwe, an song mi usun ekkei a küriir, nge resap mirit ren, a keniir, nge resap ekieki usun.
ISA 43:1 Iei alon ewe Samol mi Lapalap mi föruk, Israel, “Kosap niuokus, pun ngang üa angasok. Üa köri ngonuk itom, en nei.
ISA 43:2 Are kopwe fetal lon koluk, üpwe etuk. Are kopwe fetal lon chanpupu, öütan esap amolumuk. Nge are kopwe fetal lon ekkei, kosap kar, nge pulopulan esap kuruk.
ISA 43:3 Pun ngang ewe Samol mi Lapalap om Kot, ngang Ewe mi Pin lon Israel om Chon Amanau. Iwe, üpwe eäni Isip penmanau fän itom, üpwe pwal fangala Itiopia me Sepa pwe siwilum, nge en kopwe ngas.
ISA 43:4 Pokiten om aüchea me om itetekia me rei, pwal pokiten ai echenuk, üpwe fangala aramas pwe siwilum, pwal ekewe mwü pwe akasiwilin manauaom.
ISA 43:5 Kosap niuokus, pun ngang üpwe etuk. Üpwe aliwinato mwirimwirum kewe seni ötiu me lotou o achufengenikemi.
ISA 43:6 Iwe, üpwe apasa ngeni efeng, ‘Kopwe aliwinireto,’ üpwe pwal apasa ngeni ör, ‘Kosap amwöchüür.’ Oupwe aliwinato nei kewe alüal seni ekewe fanü mi toau, pwal nei kewe föpwül seni lesopun fanüfan.
ISA 43:7 Oupwe aliwinireto meinisin mi iteni itei, chokewe üa föriir pwe repwe alingaei, chokewe üa alapalapeer o afisiir.”
ISA 43:8 Iwe, Kot a apasa, “Oupwe emwenawu ekewe aramas a wor meser, nge ra mesechun, a pwal wor selinger, nge ra selingepüng.
ISA 43:9 Iwe, chon ekewe mwü meinisin repwe mwichefengen. Iö lein ar kewe kot a tongeni osuni mine epwe fis? Iö leir a pwärätä ekei mettoch ra fis ikenai? Repwe uwato nöür kewe chon pwärätä, pwe epwe pwä pwe ra pwüng, epwe pwal pwä leten ar kapas.”
ISA 43:10 Iwe, ewe Samol mi Lapalap a apasa, “Ämi chon Israel, ämi nei chon pwärätä pwal nei chon angang. Üa afilikemi pwe oupwe sileei o lüküei, oupwe pwal weweiti pwe ngang chök Kot. Esap wor eman Kot mi fis mwei, esap pwal wor eman epwe fis me müri.
ISA 43:11 Ngang, ngang chök ewe Samol mi Lapalap, nge lüki esap wor eman chon amanau.
ISA 43:12 Iwe, üa osuni mine epwe fis, üa pwal amanauakemi o pwärätä ngenikemi pwe ngang Kot, nge sap eman koten ekis leimi. Iei mine ämi oua nei chon pwärätä. Ngang ewe Samol mi Lapalap üa kapas.
ISA 43:13 Ngang chök Kot tori feilfeilachök. Esap wor eman a tongeni amanaua eman seni lepei. Üa akangang, nge iö epwe pineei?”
ISA 43:14 Iei alon ewe Samol mi Lapalap ämi Chon Amanau, Ewe mi Pin lon Israel, “Üpwe tinala eu mwichen sounfiu Papilon fän itemi, üpwe atekisonätiu ekewe chon Papilon o asüsüfeiliir, pwe ar mweireir epwe wiliti ngüngüres.
ISA 43:15 Ngang ewe Samol mi Lapalap, Ewe mi Pin leimi, pwal ewe Chon Afisi ämi chon Israel, ngang ämi we king.”
ISA 43:16 Me lom ewe Samol mi Lapalap a föri efoch al lematau, efoch al lukalapen nonoon lematau.
ISA 43:17 A pwal emwenala woken me oris me mwicheichen sounfiu mi pwora ngeni feiengau. Iwe, ra turula, nge resap tongeni pwätäsefäl. Ra muuk o kunula usun efoch wik.
ISA 43:18 Nge ewe Samol mi Lapalap a apasa, “Ousap chüen achemato ekewe mettoch mi fis me lomlom. Ousap pwal ekieki usun mine a fis lon ekewe fansoun ra la.
ISA 43:19 Nengeni, üpwe förätä eu mettoch mi fö. Iei a fisitä. Ifa usun, ousap küna? Üpwe föri efoch al lon fanüapö, üpwe pwal föri chanpupu lon fanüpwas.
ISA 43:20 Iwe, ekewe manmwacho repwe asamoluei, ekewe wolif me kawakaw repwe mwareitiei, lupwen üa apupuolong koluk lon fanüapö, pwal chanpupu lon fanüpwas, pwe nei kewe aramas üa filiir repwe ün.
ISA 43:21 Ir ekewe aramas üa afisiir fän itei, pwe repwe pwärätä ai ling.
ISA 43:22 Nge en Israel kosap köriei, kosap pwal aweiresuk lon om angang ngeniei.
ISA 43:23 Kosap eäni asoren kek noum sip ngeniei, kosap pwal asamoluei ren om asor. Üsap aweiresuk ren ai tütüngor asor senuk ika arianuk pwe kopwe uwato rei apach mi pwokus.
ISA 43:24 Iwe, kosap kamö lö mi pwokus fän itei, kosap pwal amötüeila ren iwien om mönün asor. Nge ka achouuei ren om tipis, ka pwal aweiresiei ren om föföringau kana.
ISA 43:25 Ngang, ngang chök ewe Kot mi amoela om pupungau fän püsin itei, nge üsap chüen chechemeni om tipis kana.
ISA 43:26 Kopwe achema ngeniei om kewe föför mi öch. Sipwe kapwüngfengen. Kopwe feito o fos pwe epwe pwä om pwüng.
ISA 43:27 Iwe, aemanün om lewo a tipis, pwal om kewe souakom ra eäni pupungau ngeniei.
ISA 43:28 Iei mine üpwe föri met ekewe meilapen ämi imwenfel repwe küna turunufas ren, üpwe pwal föri met Israel epwe fokun tala ren o atolonga nei aramas lon itengau.”
ISA 44:1 Iwe, ewe Samol mi Lapalap a apasa, “Iei kopwe aüseling, Israel nei chon angang, en nei üa afiluk.
ISA 44:2 Ngang ewe Samol mi Lapalap üa föruk o afisuk me lon letipen inom, üa pwal alisuk. Kosap niuokus, Israel nei chon angang, Jesurun nei we üa filätä.
ISA 44:3 Üpwe ninätiu koluk won fanüen chon kaka, üpwe pwal apupu chanpupu lon leni mi pwasapwas. Iwe, üpwe anomu Ngüni won mwirimwirum kana, pwal ai feiöch won noum kana.
ISA 44:4 Repwe märitä usun chök fetil lon leni mi nüküchöchön, pwal usun chök wowo ünükün chanpupu.
ISA 44:5 Iwe, eman epwe apasa, ‘Ngang nöün ewe Samol mi Lapalap,’ eman epwe püsin aita ngeni pwe i mwirimwirin Jakop, nge pwal eman epwe makei won pöün ‘Ngang nöün ewe Samol mi Lapalap’ o püsin achuolong lon ewe mwichen chon Israel.”
ISA 44:6 Iei alon ewe Samol mi Lapalap, ewe Kingen Israel me an Chon Amanau, ewe Samol mi Unusen Manaman, “Ngang chök Kot ewe Aemanün me Amüchülan, esap wor eman Kot lüki.
ISA 44:7 Iö a wewe ngeniei? Epwe ütä o pwärätä fän mesei. Iö a apworausa me lom ekewe mettoch repwe fis me mürin? Epwe pwärätä ngenikich mine epwe fis.
ISA 44:8 Nei aramas, ousap fokun niuokus. Ifa usun, üsap aiti ngenikemi seni me lomlom tori ikenai o pwärätä ngenikemi meinisin mine epwe fis? Ämi nei chon pwärätä. Ifa usun, a wor eman Kot lüki? Apwi, esap fokun wor eu Achau lüki. Üsap silei eu.
ISA 44:9 Iwe, ir meinisin mi föri uluulun anümwäl esap wor aüchear, esap pwal wor lomoten ekewe mettoch ra aücheani. Iwe, chon fel ngeni ekewe uluulun anümwäl ra chun o wewengau. Iei mine repwe lichipüng o säw.
ISA 44:10 Eman mi falei eu uluulun kot ika föri eu uluulun anümwäl seni mächä pwe epwe fel ngeni, esap fokun wor lomotan.
ISA 44:11 Iwe, i me chiechian kewe meinisin repwe lichipüng o säw. Ekewe soufalafal ra aramas chök. Repwe mwichefengen meinisin o ütä lon kapwüng. Nge repwe fokun niuokus, repwe pwal lichipüng o säw.
ISA 44:12 Iwe, eman chon wüsi mächä a apwichi ewe mächä won ekkei o amaani. A angang won ren pöchökülen pöün pwe epwe fis eu uluulun anümwäl mi lapalapöch. Ren an achocho a echik o apwangapwangala, a pwal malülü ren an esap ün koluk.
ISA 44:13 Nge eman soufalafal a aükü ewe irä ren an selin aükük o akiänni ren efoch piin, a pwal siseli ren nöün sisel. Iwe, a alapalapa ewe irä ngeni uluulun eman aramas mi fokun äteöch o aütai lon eu imw.
ISA 44:14 Iwe, a pöküela irä setar ika afili efoch irä saipires ika ook ika efoch lein ekewe irän wöllap. A pwal fotuki efoch irä setar o witiwiti püngün üt pwe epwe märitä.
ISA 44:15 Mürin, eman aramas a eäni och amwüch seni ewe irä. Iwe, a angei och pwe epwe aküw o arara ngeni, a pwal eäni amwüch pwe epwe umuni pilawa. Nge och a angei pwe epwe falei eu uluulun anümwäl seni o fel ngeni.
ISA 44:16 Iwe, a keni eu kinikinin ewe irä, a amwota ochan fituk won, a ochoch o möt ren. A pwal püsin rar ren o apasa, “Oo, üa mefi kinamwe ren pwichikaren ei ekkei.”
ISA 44:17 Nge seni lusun ewe irä a falei eu uluulun anümwäl fän äsengesin, a chapetiu mwan o fel ngeni, a pwal iotek ngeni o apasa, “Kopwe amanauaei, pun en ai kot.”
ISA 44:18 Iwe, ekei aramas resap silei och, resap pwal wewe ren, pun Kot a achuna meser pwe resap tongeni küna, a pwal apüngü letiper pwe resap tongeni wewe.
ISA 44:19 Iwe, esap wor eman a ekieki usun, esap pwal wor än eman sile me mirit pwe epwe apasa, “Eu kinikinin ewe irä üa keni lon ekkei, üa umuni pilawa won, üa pwal amwota ochäi fituk won o ochei. Ifa usun, üpwe föri seni ewe lusun irä eu uluulun anümwäl mi fokun anioput? Ifa usun, üpwe chapetiu mwen esop sopun amwüch?”
ISA 44:20 Ei sokun aramas a wewe ngeni eman mi mongö falangen ekkei pwe epwe manau ren. Iwe, ren ekiekin letipan mi rikirik a tokola pwe esap tongeni püsin angasa, esap pwal aisini, “Ifa usun, esap och minen atuputup mine üa amwöchü lepei?”
ISA 44:21 Iwe, ewe Samol mi Lapalap a apasa, “Israel, kopwe chechemeni ekei mettoch, kopwe chechemeni pwe en nei chon angang. Ngang üa afisuk pwe kopwe nei chon angang, ngang üsap manlükukala.
ISA 44:22 Üa amorala om tokotokongau usun eu kuchu, pwal om tipis kana usun och ötüöt. Kopwe liwinitiei, pun ngang üa angasok.”
ISA 44:23 Oupwe köl fän pwapwa, ämi läng, pun ewe Samol mi Lapalap a föri ei. Oupwe leüömong le köl, ämi alololun fanüfan. Oupwe chietä köl, ämi chuk kana, pwal ämi kewe irä meinisin mi mär lein wöllap. Pun ewe Samol mi Lapalap a pwärätä an ling ren an angasa nöün aramasen Israel.
ISA 44:24 Iei alon ewe Samol mi Lapalap om Chon Amanau a föruk, “Ngang ewe Samol mi Lapalap, üa föri mettoch meinisin. Ngang chök üa ameresala läng, üa pwal oletala fanüfan, nge esap wor eman a alisiei.
ISA 44:25 Ngang ätewe mi apatala manen ekewe soufos chofana o aitengaua ekewe soupwe, üa pwal esita ekewe chon tipachem o siwili ar tipachem ngeni umwes.
ISA 44:26 Nge lupwen nei chon angang a osuni och, lupwen üa tinala nei chon künö pwe epwe pwärätä mine üa akota, üpwe pwal fokun apwönüetä mine üa eäni kapas. Üa apasa usun Jerusalem pwe epwe sosefäl, pwal usun ekewe telinimwen Juta pwe repwe kaüsefäl, nge mine a ta me wor üpwe aüsefälietä.
ISA 44:27 Iwe, üa üreni alololun matau, ‘Kopwe pwas, üpwe pwal amorätä om kewe chanpupu.’
ISA 44:28 Ngang üa apasa usun Sirus, ‘Ätei nei chon mas epwe apwönüetä unusen mochenin letipei.’ Iwe, epwe apasa pwe Jerusalem epwe kaüsefälitä, epwe pwal fis longolongun ewe imwenfel.”
ISA 45:1 Iei alon ewe Samol mi Lapalap ngeni Sirus nöün we mi kepit, a pwal awisa pwe epwe akufu ekewe mwü mi nonom mwan o akisikisätiu nemenemen ekewe king, epwe pwal suki asamen ekewe telinimw mi nom mwan pwe resap chüen kapüngüla,
ISA 45:2 “Üpwe akom mwom o atekisonätiu chuk kana. Üpwe ataetiu ekewe asam piras o atatakisi lokkur.
ISA 45:3 Üpwe fang ngonuk wöü mi iseis lon rochopwak, pwal pisek mi aüchea mi nom lon leni mi monomon, pwe kopwe silei pwe ngang ewe Samol mi Lapalap ewe Koten Israel, ewe a köri ngonuk itom.
ISA 45:4 Fän iten nei chon angang Israel, nei we üa afili, üa köri ngonuk itom, üa pwal aita ngonuk eu it mi iteüöch, inamwo are kosap sileei.
ISA 45:5 Ngang ewe Samol mi Lapalap, esap wor eman lüki, esap pwal wor eman Kot lüki. Üpwe atufichuk, inamwo are kosap sileei.
ISA 45:6 Üa föri ei pwe aramas seni ötiu tori lotou repwe mefi o silei pwe esap fokun wor eman Kot lüki. Ngang ewe Samol mi Lapalap, esap wor eman lüki.
ISA 45:7 Ngang üa förätä saram, üa pwal förätä rochopwak. Ngang üa awarato feiöch me feiengau. Ngang ewe Samol mi Lapalap, üa föri ekei mettoch meinisin.”
ISA 45:8 “Ämi läng me ämi kuchu kana, oupwe apüngätiu pwüng, nge fanüfan epwe sukula, pwe manau me pwüng repwe pwükütä o märfengen. Ngang ewe Samol mi Lapalap üa föri ei.
ISA 45:9 Feiengauen eman a anini ngeni ewe chon föri. Ifa usun, eu sepi seni pwül epwe anini ngeni ewe mi föri? Ifa usun, ewe pwül epwe aisini ewe mi angang won, ‘Met ka föri?’ Ifa usun, epwe apasa, ‘Föriom sepi esap lapalapöch?’
ISA 45:10 Feiengauen eman a aisini saman me inan, ‘Pwota oua afisiei lon ei sokun lapalap?’”
ISA 45:11 Iei alon ewe Samol mi Lapalap, Ewe mi Pin lon Israel, pwal ewe mi föri Israel, “Ifa usun, oua esitaei won mine epwe fis ngeni nei kewe lon kan fansoun repwe feito, ika oua allük ngeniei usun mine üpwe föri?
ISA 45:12 Ngang üa föri fanüfan, üa pwal föri aramasen won. Iwe, ren ai manaman üa ameresala läng, üa pwal nemeni akkar, maram me fü kana.
ISA 45:13 Ngang üa köri Sirus fän pwüng, üpwe pwal awenechara an al kana meinisin. Iwe, epwe aüetä ai telinimw Jerusalem o angasa nei chon oola, nge üsap ngeni och liwinin ika lifangen amichimich.” Iei alon ewe Samol mi Unusen Manaman.
ISA 45:14 Iei alon ewe Samol mi Lapalap ngeni Israel, “Wöün Isip me pisekin Itiopia repwe om, nge ekewe chon Sepa mi mwänöch repwe feito reöm pwe kopwe nöüniir amanau. Iwe, repwe tapwela murum fän fööföör selimächä o chapetiu mwom. Repwe tütüngor ngonuk o apasa, ‘Ellet Kot a etuk, esap fokun wor eman Kot lükün.’”
ISA 45:15 Ellet, en eman Kot mi monomon, en Koten Israel, ewe Chon Amanau.
ISA 45:16 Ir meinisin mi ü ngonuk repwe küna säw o itengau, nge chokewe mi falei uluulun anümwäl repwe lichipüng.
ISA 45:17 Nge chon Israel ra küna manau esemüch ren ewe Samol mi Lapalap. Resap küna säw are itengau tori feilfeilachök.
ISA 45:18 Iwe, ewe Samol mi Lapalap a föri läng, i ewe Kot a pwal föri fanüfan o anüküchara. Esap föri pwe epwe kotongau, nge a föri pwe lenien aramas. Iwe, a apasa, “Ngang ewe Samol mi Lapalap, esap wor eman Kot lüki.
ISA 45:19 Üsap fos lemonomon are lon eu leni mi rochopwak. Üsap apasa ngeni ekewe mwirimwirin Jakop pwe repwe resin küttaei, nge resap künaei. Ngang ewe Samol mi Lapalap, üa apasa mine a let, üa pwärätä mine a pwüng.”
ISA 45:20 Ewe Samol mi Lapalap a apasa, “Oupwe feito o mwichefengen, oupwe arapeto, ämi mi chüen manau me lein chon ekewe mwü. Esap wor miritin chokewe ra feilfetal fän ar uluulun anümwäl mi fal o ikiotek ngeni eman kot esap tongeni amanaueer.
ISA 45:21 Oupwe feito o fos. Aramas repwe pwüngüpwüng lefiler. Iö a apworausa ei lon ewe fansoun a la? Iö a pwärätä ei me lomlom? Ifa usun, sap ngang, ewe Samol mi Lapalap? Esap wor eman Kot lüki, esap wor eman Kot mi pwüng are eman Chon Amanau, esap fokun wor eman lüki.
ISA 45:22 Oupwe kulitiei, ämi aramasen fanüfan meinisin, pwe oupwe küna manau. Pun ngang Kot, esap pwal wor eman lüki.
ISA 45:23 Iwe, üa püsin akapelüei, nge kapasen awei a let, esap pwal siwil, ‘Aramas meinisin repwe feito o fotopwäsuk ngeniei, nge ir meinisin repwe pwon fän akapel, pwe repwe allükülük ngeniei.’
ISA 45:24 Iwe, repwe apasa usi, ‘Ren ewe Samol mi Lapalap chök a wor pwüng me pöchökül.’ Iwe, chokewe meinisin mi pälüeni Kot fän song repwe feito ren o küna säw.
ISA 45:25 Nge ren ewe Samol mi Lapalap ekewe mwirimwirin Israel meinisin repwe küna pwüng, repwe pwal mwänek.”
ISA 46:1 Ekewe koten Papilon, Pel me Nepo ra turula. Uluulur kewe oua uweefetalei me lom ra nom won ekewe mönün uwochou, ra fokun chou ngeni ekewe man mi aiengau.
ISA 46:2 Iwe, ra turuppöküla, resap tongeni amanaua uluulur kewe, nge ra chök püsin oola.
ISA 46:3 Iwe, ewe Samol mi Lapalap a apasa, “Oupwe rongorong, ämi mwirimwirin Jakop, ämi chon Israel meinisin mi chüen manau. Üa amwöchükemi o tümwünükemi seni ämi uputiu.
ISA 46:4 Ngang ämi Kot, üpwe tümwünükemi tori fansoun ämi chinlap, lupwen meten möküremi a pwechela. Iwe, üa förikemi o tümwünükemi, üpwe pwal alisikemi o amanauakemi.
ISA 46:5 Iö oupwe awewe ngeniei pwe üpwe wewe ngeni, nge iö a tongeni wewe ngeniei?
ISA 46:6 Chokewe mi atowu kolt seni ar lenien iseis o kiloni silifer won eu kilo, ra möni eman chon angang ngeni kolt, pwe epwe föri uluulun eman kot ren. Mürin ra chapetiu mwan o fel ngeni.
ISA 46:7 Ra mwärei, ra uweela o anomu won lenian. Ikenan a ütä, nge esap tongeni mwökütüküt seni lenian. Iwe, are eman a siö ngeni, esap tongeni pälüeni, esap pwal tongeni amanaua seni an riaföü.
ISA 46:8 Oupwe chechemeni mine üa föri o ekieki usun lon lelukemi, ämi chon tipis.
ISA 46:9 Oupwe chechemeni ekewe mettoch mi fis me lomlom. Ngang Kot, esap wor eman lüki. Ngang chök Kot, esap wor eman a wewe ngeniei.
ISA 46:10 Üa osuni me lepopun mine epwe fis le sopolan, üa pwal pwärätä seni ekewe fansoun lom mettoch resamwo fis. Iwe, üa apasa pwe epwe fis mine üa ekiekietä, üpwe pwal apwönüetä letipei.
ISA 46:11 Üa kökköri eman mwän seni ewe fanü ötiu, epwe feito usun eman machang mi mwacho o apwönüetä ai ekiek. Ngang üa apasätä, üpwe pwal afisätä. Üa ekiekietä, üpwe pwal apwönüetä.
ISA 46:12 Oupwe aüselingaei, ämi chon tipeförea, ämi mi ekieki pwe ämi küna ngasala a toau.
ISA 46:13 Ngang üpwe akanato ewe ränin ai üpwe angasakemi, esap chüen toau, nge üsap fokun mang le amanauakemi. Iwe, üpwe amanaua Sion o pwärätä ngeni Israel ai ling.”
ISA 47:1 Ewe Samol mi Lapalap a apasa, “Kopwe tötiu o mot won pwül, en Papilon. Kopwe mot won pwül, nge kosap chüen mot won lenien motun king. Me lom ka eu telinimw esap wor eman a tongeni liapenuk, ka usun chök eman föpwül esamwo tori mwän. Nge iei aramas resap chüen üra usum, pwe en eman mi sengesengöch o kitinup.
ISA 47:2 Kopwe angei ekewe fau o pwoni föün wiich. Iwe, kopwe angei ewe pwölüpwöl seni won mesom, kopwe pwal kümeetä ufom pwe epwe pwäla lewon pecheöm. Kopwe fetal lon chanpupu,
ISA 47:3 pwe aramas repwe küna om selela, nge kopwe fokun säw ren. Ngang üpwe ngonuk chappen om föföringau, nge esap wor eman a tongeni pineiei.”
ISA 47:4 Iwe, ach Chon Amanau itan Samol mi Unusen Manaman, i Ewe mi Pin lon Israel.
ISA 47:5 Ewe Samol mi Lapalap a apasa, “Kopwe mottiu o fanafanala, kopwe pwal feila lon rochopwak, en telinimw Papilon. Pun kosap chüen iteni samol fefin seni ekewe mwü.
ISA 47:6 Iwe, üa songeiti nei aramas o atolongeer lon itengau, üa pwal asechirelong lepoum, nge en kosap tongeer. Ka fen uwätä efoch waas mi fokun chou won afaren ekewe chinlap.
ISA 47:7 Iwe, ka apasa, ‘Ngang üpwe samol fefin tori feilfeilachök,’ nge kosap el ren ekei mettoch, kosap pwal ekieki usun sopolar.
ISA 47:8 Iei mine kopwe aüselinga ei kapas, en fefin mi efich pwapwamong, ka nom lon leni mi kinamwe o ekieki lon letipom, ‘Ngang chök, nge esap wor eman lüki. Üsap fokun wiliti eman fefin mi mä pwülüan, esap pwal wor eman nei epwe mäla.’
ISA 47:9 Nge ekei ruu mettoch repwe müttir toruk lon eu chök rän: Noum kewe repwe fokun mäla, nge en kopwe wiliti eman fefin mi mä pwülüan. Iwe, ei feiengau epwe toruk, inamwo are a chomong om kewe roong ika watte manamanen om kewe pöüt.
ISA 47:10 Iwe, ka lükülükü om föföringau o apasa, ‘Esap wor eman a künaei.’ Om tipachem me silelap ra atokokola pwe ka ekieki lon letipom, ‘Ngang chök, esap wor eman lüki.’
ISA 47:11 Iei mine feiengau watte epwe toruk, nge kosap tongeni epeti senuk ren om kewe roong. Iwe, mäfeiengau epwe toruk, nge kosap tongeni amoela ren om asor. Fanüom epwe müttir tala, nge kosap mefi me mwan.
ISA 47:12 Kopwe chök likitü le föri om pöüt, kopwe pwal föri chomong om kewe roong ka achocho ngeni fän weires seni lekukunum. Eli kopwe angei alilisum me rer, eli kopwe pwal eniwokusu eman rer.
ISA 47:13 Iwe, ka weires ren noum kewe souöüröür mi chomong. Repwe feito o amanauok, ir mi asisil won minen läng, ekewe soufü mi osuni iteiten maram mine epwe fis ngonuk.
ISA 47:14 Ellet, ir ra usun chök fetilipwas ekkei a kenirela. Resap tongeni püsin amanaueer seni ngetengeten me pwichikaren ewe ekkei. Iwe, ren ei ekkei resap tongeni arareer, resap pwal tongeni mot arun, pun a afeiengau.
ISA 47:15 Ina usun epwe fis ngonuk me ren chokewe oua angangfengen fän weires seni lekukunum. Ir meinisin repwe likituk o feila lon en me alan, nge esap wor eman leir epwe amanauok.”
ISA 48:1 Oupwe aüselinga ei kapas, ämi chon Israel, ämi mwirimwirin Juta. Oupwe aüseling, ämi mi akapelü iten ewe Samol mi Lapalap o köri iten ewe Koten Israel, nge sap fän let me pwüng.
ISA 48:2 Iwe, oua püsin aita ngenikemi chon ewe telinimw mi pin o apilükülükü ewe Koten Israel, itan ewe Samol mi Unusen Manaman.
ISA 48:3 Ewe Samol mi Lapalap a üreni Israel, “Me lomlom üa pwärätä ekewe mettoch repwe fis. Üa pwäriretä ren awei o arongafeiliir. Mürin üa müttir föriretä pwe ra fis.
ISA 48:4 Pokiten üa silei pwe en ka tipeförea, pwe lükün üom a pöchökül usun mächä, nge chamwom a usun chök piras,
ISA 48:5 üa pwärätä ngonuk ekei mettoch me lomlom. Iwe, mwen ar fisitä üa apworausa ngonuk pwe kosap tongeni apasa, ‘Ai anü a föriir, nge ai uluulun anümwäl mi fal pwal ai uluulun anümwäl mi för seni mächä ra afisiretä.’
ISA 48:6 Iwe, en ka fen rongorong usun ekei mettoch, nge iei ka küneer. Ifa usun, kosap mochen aleta pwe ra pwüng? Seni ikenai üpwe asile ngonuk mettoch mi fö, pwal mettoch mi monomon kosamwo sisilei.
ISA 48:7 Iwe, ra fisitä iei chök, sap me lom. Nge mwen ei fansoun ikenai kosamwo rongorong usur, pwe kosap tongeni apasa pwe ka fen sileer.
ISA 48:8 Iwe, kosamwo rongorong ika weweiti ei, seni me lomlom selingom esap sukula. Pun üa fokun silei pwe kosap allükülük ngeniei, ka pwal iteni chon ü ngeniei seni leuputiuom.
ISA 48:9 Iwe, fän püsin itei üa engila lon ai song, fän iten ai iteüöch üa amwöchü senuk ai song, pwe üsap afeiengauok.
ISA 48:10 Nengeni, üa limetuk, nge esap usun än eman limeti silifer won ekkei. Üa sotunuk ren riaföü mi watte, a wewe ngeni eu um mi fokun pwichikar.
ISA 48:11 Fän itei, fän püsin itei chök üa föri ei. Ifa usun, itei epwe küna turunufas? Üsap ngeni eman ai ling.”
ISA 48:12 Iwe, ewe Samol mi Lapalap a apasa, “Oupwe aüselingaei, ämi chon Israel, ämi ewe mwichen aramas üa körikemi. Ngang chök Kot, ngang Aemanün me Amüchülan.
ISA 48:13 Iwe, pei a förätä longolongun fanüfan, nge pöüifichi a ameresala läng. Lupwen üa köriir, ra feito o nom mwei.
ISA 48:14 Oupwe chufengen o rongorong ämi meinisin. Iö lein ekewe kot a tongeni osuni usun ekei mettoch? Ätewe a fil me rei ngang ewe Samol mi Lapalap, epwe apwönüetä letipei ngeni chon Papilon, nge pöün epwe fiu ngeniir.
ISA 48:15 Ngang, ngang chök üa pwärätä usun o köri, üa pwal emwenato o atufichi pwe epwe lipwäköch lon an angang meinisin.
ISA 48:16 Oupwe kaneto rei o aüselingaei. Seni me lepopun üsap fos lemonomon. Iwe, seni ewe fansoun ekei mettoch ra fis üa fen nom.” Nge iei Kot ewe Samol mi Lapalap a tinieito me Ngünün.
ISA 48:17 Iei alon ewe Samol mi Lapalap om Chon Amanau, Ewe mi Pin lon Israel, “Ngang ewe Samol mi Lapalap om we Kot. Üa aiti ngonuk mine kopwe feiöch ren, üa pwal emweni ngonuk ewe al kopwe fetal won.
ISA 48:18 Amwo kopwe aüselinga ai kewe allük! Mürin om kinamwe epwe wewe ngeni eu chanpupu, nge om pwüng epwe wewe ngeni nomongun lematau.
ISA 48:19 Iwe, noum kewe repwe wewe ngeni pien aroset, nge mwirimwirum kana repwe chomong usun chomongun föün pi. Iwe, iter esap fokun mola ika talüla seni fän mesei.”
ISA 48:20 Oupwe towu seni Papilon o sü seni aramasen lon. Oupwe asilefeili ei pworaus fän mweireiren pwapwa, oupwe pwal arongafeili tori lesopun fanüfan o apasa, “Ewe Samol mi Lapalap a amanaua nöün chon angang Israel.”
ISA 48:21 Lupwen a emwenala nöün aramas lon fanüapö, resap kaka, a apupuala koluk fän iter seni ewe achau. A amökkü ewe achau pwe ewe koluk a puwu seni.
ISA 48:22 Iwe, ewe Samol mi Lapalap a apasa, “Chon föföringau kana esap wor rer kinamwe.”
ISA 49:1 Oupwe aüselingaei, ämi kewe fanüen lematau, oupwe rongorong, ämi chon ekewe mwü mi nom toau. Ewe Samol mi Lapalap a filiei seni lon letipen inei o ngeniei itei, lupwen üa uputiu.
ISA 49:2 Iwe, Kot a akeni kapasen awei pwe ra ken usun efoch ketilas o aopaei fän nürün pöün. A amisiei usun efoch föün likapich, a iseniei o aopaei lon an lenien föün likapich.
ISA 49:3 Iwe, a üreniei, “Israel en nei chon angang, en ätewe üpwe küna ling ren.”
ISA 49:4 Nge ngang üa apasa, “Üa resin angang, nge üsap küna lomotan. Üa fangala ai pöchökül, nge a lusmwälila. Ellet, ai pwüng a nom ren ewe Samol mi Lapalap, nge liwini a nom ren ai we Kot.”
ISA 49:5 Iei alon ewe Samol mi Lapalap, a afisiei lon letipen inei pwe üpwe nöün chon angang, a awisaei pwe üpwe aliwinato nöün aramasen Israel o achufengeniir ren, pun üa iteüöch fän mesen ewe Samol mi Lapalap, nge ai Kot i popun ai pöchökül.
ISA 49:6 Iwe, a apasa, “Kosap nei chök chon angang mi wisen achufengeni chon ekewe ainangen Israel o aliwinato chokewe mi chüen manau me leir. Nge üpwe pwal föri pwe kopwe eu saram fän iten chon ekewe mwü, pwe chon fanüfan meinisin repwe küna manau.”
ISA 49:7 Iwe, ewe Samol mi Lapalap ewe Chon Amanau, Ewe mi Pin lon Israel, a üreni ätewe a fokun küna itengau o koput me ren chon ekewe mwün fanüfan, ätewe mi angang ngeni ekewe chon nemenem, “King kana repwe ütä o asamoluk, lupwen repwe künok, nge samol kana repwe chapetiu mwom.” Ei epwe fis pokiten ewe Samol mi Lapalap a afili nöün chon angang. Ewe mi Pin lon Israel a apwönüetä an kewe pwon.
ISA 49:8 Iei alon ewe Samol mi Lapalap ngeni nöün kewe aramas, “Lon fansoun öch üa aüselinga ämi siö, lon ränin küna manau üa pwal alisikemi. Üpwe tümwünükemi o föri remi eu pwon ngeni aramasen fanüfan meinisin. Ei üpwe föri pwe oupwe tongeni fanüenisefäli fanüemi mi tala iei.
ISA 49:9 Üpwe pwal üreni ekewe chon fötek, ‘Oupwe ngasala,’ nge ekewe mi nom lon rochopwak üpwe üreniir, ‘Oupwe tolong lon saram.’ Iwe, repwe mongö ünükün ekewe al usun sip, repwe pwal küna ener mongö me won ekewe chuk mi amassawa.
ISA 49:10 Resap echik are kaka, nge pwichikaren lon fanüapö me akkar resap pwichitiir, pun ätewe mi tongeer epwe emwenirela ngeni puächen koluk.
ISA 49:11 Iwe, üpwe föri efoch alalap won chuki kewe meinisin o amolätä efoch al fän iten nei aramas pwe repwe fetal won.
ISA 49:12 Nengeni, nei aramas repwe feito seni toau, ekoch seni efeng me lotou, nge ekoch seni ewe telinimw Aswan mi nom ör.”
ISA 49:13 Oupwe köl fän pwapwa, ämi läng, kopwe mwänek, en fanüfan, oupwe chietä köl, ämi chuk kana. Pun ewe Samol mi Lapalap epwe echipa nöün aramas o tongei nöün kewe mi riaföü.
ISA 49:14 Iwe, Sion a apasa, “Ewe Samol mi Lapalap a likitieila, ai Samol a manlükieila.”
ISA 49:15 Nge ewe Samol mi Lapalap a üreni, “Ifa usun, eman fefin epwe tongeni manlükala nöün mönükol, pwe esap tongeäsini nöün won inisin? Nge are epwe fen manlükala, ngang üsap manlukuk.
ISA 49:16 Nengeni, üa makei itom lon pei me ruofoch. Om kewe tit, Sion, ra nonom fochofoch fän mesei.
ISA 49:17 Ekewe chon aüsefäliik ra müttir le angang seni chokewe mi ataokola, nge ir mi atatakisiik ra feila senuk.
ISA 49:18 Kopwe nenefeil o küna mine a fis. Noum kewe aramas meinisin ra chufengen o feito reöm. Mwo manauei, ngang ewe Samol mi Lapalap üa kapas, ir afoutom, kopwe pwal ling rer usun eman fin apwüpwülü söfö a ling ren foutan.
ISA 49:19 Iwe, fanüom we mi tala o pön iei esap chüen naf ngeni ekewe aramas repwe choni. Nge chokewe mi atai fanüom repwe toau senuk.
ISA 49:20 Iwe, noum kewe mi uputiu lupwen fansoun om oola repwe kapas ngonuk, ‘Ei leni esap naf ngenikem. Kopwe awora leniem pwe aipwe nonom won.’
ISA 49:21 Mürin kopwe ekieki lon letipom, ‘Iö a oupwätiu chokana ngeniei? Üa mwelele o rit, üa pwal oola o pöütüla. Iö a foleniir? Nengeni, ngang chök üa lusun! Nge ia chokei ra feito me ie?’”
ISA 49:22 Iei alon Kot ewe Samol mi Lapalap, “Nengeni, üpwe äkänipöü chon ekewe mwün lükün Israel, üpwe pwal aüetä ai asisil fän iten ekewe aramasen fanüfan. Iwe, repwe ekieto noum mwän lemolur, pwal noum fefin won afarer.
ISA 49:23 King kana repwe tümwünuk usun eman sam, nge kiwiin repwe oupwu noum usun eman in. Repwe chapetiu fän mesom o chönmongöni pwülün pecheöm. Mürin kopwe silei pwe ngang ewe Samol mi Lapalap. Iwe, chokewe mi apilükülüküei resap lichipüng.
ISA 49:24 Ifa usun, eman a tongeni angei seni eman sounfiu mi pwora liapan, ika angasa chon fötek seni lepöün eman chon mwänewüs?
ISA 49:25 Nge iei mine ewe Samol mi Lapalap a apasa, “Ewer, ekewe chon fötek repwe ngasala seni lepöün eman sounfiu mi pwora, nge eman a tongeni angei seni eman chon mwänewüs mine a liapeni. Pun ngang üpwe fiu ngeni chokewe ra fiu ngonuk, üpwe pwal amanaua noum kana.
ISA 49:26 Üpwe föri pwe ekewe chon ariaföüuk repwe ochefengeni fituker, repwe pwal puch ren püsin char usun ar puch ren wain. Mürin aramas meinisin repwe silei pwe ngang ewe Samol mi Lapalap om Chon Amanau pwal om Chon Angasa. Ngang än chon Israel we Kot mi manaman.”
ISA 50:1 Iei alon ewe Samol mi Lapalap, “Ifan ewe toropwen mwüfesen üa pöütala inemi ren? Üa amömökemiila ngeni iö pokiten ai liwinimang ngeni? Nengeni, oua püsin amömökemiila pokiten ämi kewe tipis, nge pokiten ämi kewe pupungau inemi a mwü.
ISA 50:2 Pwota esap wor eman a nom, lupwen üa feito? Pwota esap wor eman a päpälü, lupwen üa kökkö? Ifa usun, pei a mochomoch pwe üsap tongeni amanauakemi? Ifa usun, esap wor ai tufich pwe üpwe tongeni angasakemi? Üa apwasatä matau ren ai kapasen fön, üa pwal awili chanpupu ngeni fanüapö, pwe ikenen lon ra mäla o pwongau pokiten esap wor koluk.
ISA 50:3 Ngang üa achunoi läng ren rochopwak pwe a usun chök pwölüla ren mangaku seni tuk, iei asisilen an letipeta.”
ISA 50:4 Iwe, Kot ewe Samol mi Lapalap a atufichiei le kapas pwe üpwe silei met sokun kapas üpwe achipa ngeni chon riaföü. Iteiten lesosor a föngüniei, a suki selingei pwe üpwe tufichin aüseling usun eman chon kaiö a aüseling.
ISA 50:5 Iwe, Kot ewe Samol mi Lapalap a suki selingei, nge üsap lükümach ngeni, üsap pwal sap seni.
ISA 50:6 Üa mwüt ngeni chokewe mi mochen awataei pwe repwe wichi söküri, üa pwal asele ngeni sapei chokewe mi pösapeei. Üsap aopa won mesei seni chokewe mi turunufaseei o atufaei.
ISA 50:7 Iwe, Kot ewe Samol mi Lapalap a alisiei, iei mine üsap itengau. Üa awowopöchökülei won mesei usun eföü fau, pun üa silei pwe üsap säw.
ISA 50:8 Iwe, Kot a arap ngeniei o peniei. Iö epwe anini ngeniei? Aipwe chök üpälüfengen. Iö a mochen kapwüng ngeniei? Epwe chök feito rei.
ISA 50:9 Nengeni, Kot ewe Samol mi Lapalap a alisiei. Iö epwe tongeni atipisiei? Iwe, ekewe chon atipisiei meinisin repwe rosola usun echö katup pwötür ra eni.
ISA 50:10 Iö leimi a niueiti ewe Samol mi Lapalap o aleasochisi alon nöün we chon angang? Ätewe mi fetal lon rochopwak, nge esap küna och saram, epwe chök lükü ewe Samol mi Unusen Manaman o apilükülükü an we Kot.
ISA 50:11 Nge ämi mi rawangauei chon arumi pwe repwe feiengau, oupwe püsin feiengau ren ämi rawangau. Iei usun mine ewe Samol mi Lapalap epwe föri ngenikemi. Epwe atolongakemi lon riaföü.
ISA 51:1 Ewe Samol mi Lapalap a apasa, “Oupwe aüselingaei, ämi mi mochen küna manau, ämi mi feito rei pwe üpwe alisikemi. Oupwe nenengeni ewe achau oua fal seni, pwal ewe lenien föüföü oua tu seni.
ISA 51:2 Oupwe nenengeni ämi we lewo Apraham, pwal Sara inelapemi we. Lupwen üa köri Apraham, esap wor nöün. Nge ngang üa afeiöchü pwe a wor nöün, üa pwal achomonga mwirimwirin kana.
ISA 51:3 Ngang ewe Samol mi Lapalap üpwe achipa Jerusalem o eäni tong ngeni meinisin mi imweimw lon ekewe imw mi tala. Üpwe föri pwe fanüan mi pön epwe wewe ngeni Eten, nge fanüan mi pwas epwe wewe ngeni ai tanipi. Pwapwa me mwänek epwe fis lon, pwal kilisou me kölün mwareitiei.
ISA 51:4 Oupwe aüselingaei, ämi nei aramas, oupwe rongorong ai kapas, ämi nei chon Israel. Eu allük epwe towu seniei, nge ai pwüng epwe eu saram ngeni chon ekewe mwü won fanüfan.
ISA 51:5 Iwe, ai pwüng epwe müttir kaneto, fansoun ai amanaueer a fefeito. Püsin ngang üpwe nemeni chon ekewe mwü won fanüfan. Iwe, ekewe fanüen lematau ra witiwitiei, ra apilükülükü ai üpwe amanaueer.
ISA 51:6 Oupwe netä läng, oupwe pwal nenela won fanüfan. Iwe, läng epwe morola usun ötüöt, fanüfan epwe mesingauala usun echö katup, nge chokewe mi manau won repwe mäla usun chök nikken. Nge ai angangen amanaua aramas epwe nonom fochofoch, ai pwüng esap fokun müchüla.
ISA 51:7 Oupwe aüselingaei, ämi mi silei mine a pwüng, ämi aramas mi amwöchü ai allük lon lelukemi. Ousap niueiti kapasen esit me ren aramas, ousap pwal apilükingau ren ar aitengauakemi.
ISA 51:8 Pun repwe rosola usun echö katup pwötür ra eni, repwe pwal wewe ngeni mangaku seni ülen man mi eniman. Nge ai pwüng epwe nonom fochofoch, ai manau epwe tori ekewe täppin aramas meinisin.”
ISA 51:9 Kopwe pwätä, kopwe pwätä, äm Samol mi Lapalap, kopwe aea om pöchökül o amanauakem. Kopwe pwätä o alisikem usun chök me lom lon ekewe fansoun ra la. Ifa usun, sap en ätewe a posu o atatakisi Rahap ewe trakon?
ISA 51:10 Ifa usun, sap en ka apwasa ewe matau mi alolol o föri efoch al epin, pwe chokewe ka angaseer repwe fetal won?
ISA 51:11 Iwe, chokewe mi manau me reöm repwe liwinsefäl ngeni Jerusalem fän köl. Pwapwa esemüch epwe nonom rer, chengel me mwänek repwe etiir, nge letipeta me ngüngüres repwe sü seniir.
ISA 51:12 Iwe, ewe Samol mi Lapalap a apasa, “Ngang ewe üa achipok. Pwota ka niueiti aramas mi mäkai, ir upun won aramas mi wewe ngeni fetil?
ISA 51:13 Pwota ka manlükala ewe Samol mi Lapalap ewe Chon Föruk, ewe a ameresala läng o föri longolongun fanüfan? Pwota ka niuokus fochofoch ren än ewe chon ariaföüuk song, lupwen a amolätä an epwe ataok? Ia a nom ie än ewe chon ariaföüuk song?
ISA 51:14 Iwe, ekewe chon fötek repwe müttir ngasala, resap mäla o feitiu lon lenien sotup, resap pwal osupwang ren mongö.
ISA 51:15 Pun ngang ewe Samol mi Lapalap om Kot, itei Samol mi Unusen Manaman. Üa amwökütü nonoon lematau pwe repwe ngüngü.
ISA 51:16 Ngang ewe üa ameresala läng o föri longolongun fanüfan, üa üreni ekewe aramasen Jerusalem, ‘Ämi nei aramas kana. Üa ngenikemi ai kapas o aopakemi fän nürün pei.’”
ISA 51:17 Kopwe nela o pwätä, en Jerusalem, en mi ün seni än ewe Samol mi Lapalap kapen apwüng, a aünü ngonuk fän an song. Ka pwal apöla lölön ewe kap, iwe, ka mwäliel ren.
ISA 51:18 Esap wor eman lein noum kewe mwän a emwenuk, esap pwal wor eman lein noum kewe ka foleni a amwöchü poum.
ISA 51:19 Ekei ruu feiengau ra feitiu womw: Fanüom a tatakis o pöla ren maun, a pwal toruk lengita. Iö epwe tongeek o achipok?
ISA 51:20 Noum kewe mwän ra aiemämä, ra konola lepwokukun ekewe al meinisin usun eman chia mi tup lon eu sär. Iwe, a fokun toriir pöchökülen än ewe Samol mi Lapalap song, pwal än om we Kot apwüng.
ISA 51:21 Iei mine kopwe rongorong ei kapas, en mi riaföü, ka puchala, nge sap ren wain.
ISA 51:22 Iei alon ewe Samol mi Lapalap om Kot, ewe mi peni nöün aramas, “Nengeni, üa angei seni lepoum ewe kap ka mwäliel ren. Kosap chüen ünümi seni ewe kapen ai song.
ISA 51:23 Üpwe isenalong ewe kap lepöün chon ariaföüuk, lepöün chokewe mi ürenuk, ‘Kopwe chapala pwe aipwe fetal womw.’ Ina usun ka awenala sökürum won pwül, pwe epwe usun chök efoch al ra tongeni fetal won.”
ISA 52:1 Kopwe pwätä, kopwe pwätä, Jerusalem, kopwe angei pöchökül pwe kopwe pöchökülsefäl. Kopwe pwilitalong womw ufom mi ling, en Jerusalem ewe telinimw mi pin. Iwe, chokewe resap sirkomsais pwal chokewe mi limengau resap chüen tolong lomw.
ISA 52:2 Kopwe wichikala senuk om pwül moromor, en Jerusalem. Kopwe ütä seni won pwül o mot won om lenien motun king. Oupwe apichala föfömi, ämi aramasen Sion mi oola.
ISA 52:3 Iei alon ewe Samol mi Lapalap ngeni nöün aramas, “Lupwen aramas ra nöünikemi amanau, resap püngütiu liwinimi, ina usun chök esap wor eman epwe püngütiu liwinimi, lupwen oupwe ngasala.”
ISA 52:4 Pun iei alon Kot ewe Samol mi Lapalap, “Me lom nei aramas ra püsin feila Isip pwe repwe wasöla lon. Mürin chon Asiria ra ariaföüür, nge esap wor popun.
ISA 52:5 Nge met üa küna iei? Nei aramas ra oola, nge esap wor liwinir. Chokewe mi nemeniir ra sikesik o aitengauaei fansoun meinisin.
ISA 52:6 Iei mine nei aramas repwe silei itei. Lon kan fansoun repwe feito, repwe pwal silei pwe ngang ewe mi fos ngeniir. Ellet, ngang üa kapas ngeniir.”
ISA 52:7 A mürina ewe chon künö mi fetal won ekewe chuk o uwato pworaus allim, ewe a arongafeili kinamwe o uwato kapasen feiöch. A asilefeili pwe aramas ra tongeni küna manau o üreni Sion, “Om Kot a nemenem.”
ISA 52:8 Kopwe rongorong. Noum kewe chon mas ra alapatä mwelier o kölfengen fän pwapwa, pun ra küna ren meser pwe ewe Samol mi Lapalap a liwinsefäliti Sion.
ISA 52:9 Oupwe leüömong le kölfengen, ämi leni mi tala lon Jerusalem, pun ewe Samol mi Lapalap a achipa nöün aramas, a pwal angasa chon Jerusalem.
ISA 52:10 Iwe, ewe Samol mi Lapalap a pwärawu an manaman mi pin ngeni chon ekewe mwü won fanüfan, nge lesopun fanüfan meinisin repwe küna pwe ach we Kot a amanaua nöün aramas.
ISA 52:11 Oupwe towu, oupwe towu seni lon Papilon, nge ousap atapa och mettoch mi limengau. Oupwe towu seni o alimöchükemi, ämi mi mwärei pisekin imwen ewe Samol mi Lapalap.
ISA 52:12 Nge ousap towu fän atapwalapwal, ousap pwal sü. Iwe, ewe Samol mi Lapalap epwe akom mwemi, ewe Koten Israel epwe kükümwir o tümwünükemi.
ISA 52:13 Ewe Samol mi Lapalap a apasa, “Nengeni, nei chon angang epwe lipwäköch, epwe seikitä o ling, epwe pwal fokun tekiatä.
ISA 52:14 Iwe, chomong aramas ra mairü ren, lupwen ra küna pwe esap wewe ngeni aramas, esap pwal chüen lapalapeni lapalapen nöün aramas.
ISA 52:15 Ina usun chomong mwü won fanüfan repwe pwal mairü ren, nge king kana repwe fanafanala fän mesan. Pun repwe küna mine eman esap asile ngeniir, nge mine resamwo rongorong repwe ekieki usun o wewe ren.”
ISA 53:1 Nge iö a lükü ewe pworaus sa aronga? Iö a tongeni küna angangen pöün ewe Samol mi Lapalap?
ISA 53:2 Pun a mämäritä fän mesen ewe Samol mi Lapalap usun efoch irä mi pwüküfö a pwük seni waran mi nom lon pwül mi pwas. Esap wor lapalapöchün, esap pwal wor lingöchün pwe sipwe pwapwa le katol, esap pwal wor meseöchün pwe sipwe tongeni efich.
ISA 53:3 A küna turunufas me koput me ren aramas kana, eman mwän mi örüni an nom lon cheuch me riaföü. A wewe ngeni eman chon anioput sa aopa mesach seni. A unusen itengau, pwe sa ekieki esap wor aüchean.
ISA 53:4 Ellet, a uwei ach samau o mwärei ach cheuch. Nge kich sa ekieki pwe Kot a ariaföüü o apwüngü.
ISA 53:5 Nge a kinas pokiten ach pupungau, a tatakis pokiten ach föföringau. Liwinin ach tipis a nonom won pwe sipwe küna kinamwe, nge ren an kinas kana a mola ach samau.
ISA 53:6 Kich meinisin sa mwalechfeil usun chök sip kana. Sa püsin fili en me alan, nge ach pwüngingau meinisin ewe Samol mi Lapalap a anomu won.
ISA 53:7 Iwe, a küna riaföü o weires, nge a chök fanafanala. Esap fokun fos, usun eman nienifön sip aramas ra emwenala pwe epwe ninnila, pwal usun eman sip a fanafanala fän mesen chokewe mi fichi ünan.
ISA 53:8 Ra fötekini o apwüngü, mürin ra emwenala pwe epwe mäla. Nge iö lein pilon kana a ekieki pwe manauan a üküpöküla me won fanüfan, a pwal mäla pokiten pupungauen nei aramas?
ISA 53:9 Ra amolätä peiasan lein chon föföringau o peiaseni lon peiasen eman chon pisekisek. Nge esap wor an föföringau, esap pwal atuputup kapasen awan.
ISA 53:10 Iwe, iei letipen ewe Samol mi Lapalap, pwe a kinas o cheuch. Are a fangala manauan pwe eu asor fän iten tipis, epwe wor mwirimwirin, epwe pwal alangatama ränin manauan. Iwe, letipen ewe Samol mi Lapalap epwe fisitä ren.
ISA 53:11 Iwe, wesin an riaföü lon manauan epwe eäni ewe saramen manau o pwapwa ren. Nge ren an silei Kot nei chon angang mi pwüng epwe afisätä än chomong aramas pwüng, epwe pwal uwei ar tipis.
ISA 53:12 Iei mine üpwe ngeni wisan me lein chokewe mi iteüöch, nge epwe ineti ngeni ekewe chon pwora liapan. Pun a fangala manauan o mäla, a pwal alealong lein chon pupungau. Iwe, a uwei tipisin chomong aramas o iotek fän iten chon pupungau.
ISA 54:1 Iei alon ewe Samol mi Lapalap, “Kopwe köl, Jerusalem en mi wewe ngeni eman fefin mi rit. Kopwe chietä kölün pwapwa o leüömong le kökkö, en esap toruk cheuchen fam. Pun en ewe mi aleman epwe chomong noum lap seni nöün ewe mi pwüpwülü.
ISA 54:2 Kopwe awattelai imwomw imw mangaku, kopwe pwal ameresala chechen lon rumwom, pwe kopwe awattelai. Iwe, kopwe alangatama selin imwom o anüküchara chüfölün.
ISA 54:3 Pun kopwe awattelai kiännin leniom me lepekin meinisin, nge mwirimwirum kana repwe fanüeni fanüen chon ekewe mwü, repwe pwal chonisefäli ekewe telinimw mi pöla.
ISA 54:4 Kosap niuokus, pun kosap säw. Kosap niueiti itengau, pun kosap küna turunufas. Iwe, kopwe manlükala om säw ka eäni lupwen fansoun om föpwül, nge kosap chüen chechemeni om itengau lupwen fansoun om lipichsefäl.
ISA 54:5 Pun Ewe mi Föruk epwe usun chök pwülüom reöm, itan Samol mi Unusen Manaman. Ewe mi Pin lon Israel om Chon Amanau, i ewe Kot mi nemeni unusen fanüfan.
ISA 54:6 Israel, ka wewe ngeni eman föpwül mi riaföü lon letipan, pun pwülüan a likitala. Nge ewe Samol mi Lapalap a körisefäliik, a etiwasefäliik o urenuk,
ISA 54:7 ‘Lon ekis chök fansoun üa lükisökuruk, nge ren tong mi lapalap üpwe etiwasefäliik.
ISA 54:8 Lon watten ai song üa aopa senuk won mesei fansoun mochomoch, nge ren ümöümöch esemüch üpwe tongeäsinuk.’ Iei alon ewe Samol mi Lapalap om Chon Amanau.
ISA 54:9 Ei fansoun a usun chök ewe fansoun Noa me rei: Usun üa pwon fän akapel ngeni Noa pwe ewe noter esap chüen pwölüela fanüfan, ina usun üa pwal pwon fän akapel ngonuk pwe üsap chüen songeituk, üsap pwal chüen apwünguk.
ISA 54:10 Pun chukutekia kana repwe märela, chukutekison kana repwe chechech, nge ai ümöümöch ngonuk esap mär senuk, ai pwonen kinamwe esap mänükünük. Iei alon ewe Samol mi Lapalap, ewe a tongeek.”
ISA 54:11 Iwe, ewe Samol mi Lapalap a apasa, “En telinimw mi riaföü, asepwäl mi watte a mölümölituk, nge esap wor eman a achipok. Üpwe senuketä ren fau mi molupolup, üpwe pwal föri longolongum ren ewe fau safaia.
ISA 54:12 Üpwe pwal föri ungom kewe seni ewe fau akit , asamalapom kewe seni fau mi meriweriw, nge tittum meinisin seni fau aüchea.
ISA 54:13 Iwe, noum kewe mwän meinisin repwe kaiö seniei, üpwe awöüür o fang ngeniir kinamwe.
ISA 54:14 Pwüng epwe anükücharok, chon ariaföüuk repwe toau senuk pwe kosap chüen niueitiir, nge niuokus mi afeiengau esap arap ngonuk.
ISA 54:15 Are eman epwe fiu ngonuk, kopwe silei pwe esap pop seniei. Nge iö a fiu ngonuk, epwe kuf reöm.
ISA 54:16 Nengeni, üa förätä ewe chon angang ngeni mächä, a säipöü ewe ekkei o wusi ewe mächä pwe epwe föri eu pisekin maun mi afeiengau. Ngang üa pwal förätä ewe chon kata pwe epwe atai.
ISA 54:17 Nge esap wor och pisekin maun epwe tongeni afeiengauok. Iwe, kopwe tongeni pälüeni chokewe meinisin mi atipisuk lon kapwüng. Iei feiöchün nei kewe chon angang me rei, iei usun üa awineer.” Ewe Samol mi Lapalap a kapas.
ISA 55:1 Ewe Samol mi Lapalap a apasa, “Ou etto, ämi meinisin mi kaka, oupwe feito o ün seni ewe koluk. Ämi mi wöüngauen moni, oupwe feito o angei enemi. Oupwe feito o angei ünümemi wain me milik, nge ousap möni.
ISA 55:2 Pwota oua mochen püngütiu moni fän iten mettoch ousap tongeni mongö? Pwota oua angang weires fän iten mine ousap möt ren? Oupwe fokun aüselingaei o föri mine üa ürenikemi. Iwe, epwe wor enemi mongö mi annö, oupwe pwal pwapwaiti uän ewe fanü mi fokun chomong.
ISA 55:3 Oupwe aü selingemi o feito rei. Oupwe rongorong pwe ngünümi epwe manau. Iwe, ngang üpwe föri eu pwon esemüch ngenikemi o apwönüetä ai ümöümöch me tong usun üa fen pwon ngeni Tafit.
ISA 55:4 Nengeni, üa awisa pwe epwe souemwen me samolun mwü kana, epwe pwärätä ngeni aramasen fanüfan ai manaman.
ISA 55:5 Iwe, kopwe köri chon ekewe mwü kosamwo sileer me mwan, nge chon ekewe mwü resamwo sileek repwe müttir feito reöm pokiten ngang ewe Samol mi Lapalap om we Kot, Ewe mi Pin lon Israel, pun ngang üa alingok.”
ISA 55:6 Oupwe kütta ewe Samol mi Lapalap lupwen fansoun oua tongeni küna, oupwe köri, lupwen a arap.
ISA 55:7 Chon föföringau repwe likitala ar föför, nge chon pwüngingau kana repwe siwili ar ekiek. Repwe liwiniti ewe Samol mi Lapalap pwe epwe tongeäsiniir. Repwe kuliti ach Kot, pun a müttir le amusala tipis.
ISA 55:8 Iwe, iei alon ewe Samol mi Lapalap, “Ai ekiek resap wewe ngeni ämi ekiek kana, nge ämi al resap wewe ngeni ai al kana.
ISA 55:9 Pun usun läng a tekia seni fanüfan, iei usun ai al ra tekia seni ämi al kana, nge ai ekiek seni ämi ekiek kana.
ISA 55:10 Iwe, usun rän me snow ra püngütiu me läng, nge resap liwintä, pwe repwe mwo achönü pwül o aräsi fanü o apwükü irä, epwe pwal wor fotän chon fofot me enen chon mongö,
ISA 55:11 iei usun ai kapas esap liwinto rei fän pön, pwe epwe afisätä mine üa tipeni o apwönüetä mine üa akünöü ngeni.
ISA 55:12 Iwe, oupwe towu seni Papilon fän pwapwa o feila fän kinamwe. Chukutekia me chukutekison repwe chietä köl me mwemi, nge irän lemäl meinisin repwe alopolop.
ISA 55:13 Iwe, irä saipires repwe märitä lon lenien iräfölüföl, nge mwoosor repwe mär lon lenien lantana. Ei epwe eu asisil esap mola tori feilfeilachök, nge ngang ewe Samol mi Lapalap üpwe iteföüla ren.”
ISA 56:1 Iei alon ewe Samol mi Lapalap, “Oupwe eäni pwüng o föri mine a let, pun üpwe müttir amanauakemi, nge ai angasakemi epwe pwä.
ISA 56:2 Üpwe afeiöchü ewe aramas a pinini ewe ränin sapat pwe esap angang lon, üpwe pwal afeiöchü ätewe esap föri mine a ngau.”
ISA 56:3 Iwe, eman chon ekis mi chiechi ngeni nöün ewe Samol mi Lapalap aramas esap apasa, “Ewe Samol mi Lapalap esap mwüt ngeniei ai üpwe choni nöün kewe aramas.” Nge eman mwän esap tongeni nöünöü esap pwal apasa, “Ngang üa chök wewe ngeni efoch irä pwas.”
ISA 56:4 Pun iei alon ewe Samol mi Lapalap, “Ekewe mwän resap tongeni nöünöü, nge ra pinini ai kewe ränin sapat, ra pwal föri mine üa efich o tümwünü ai we pwon,
ISA 56:5 ngang üpwe ngeniir eu lenien achem me eu it me lon imwei, pwal me lon telinimwei. Nge ewe it repwe iteni epwe mürina seni ewe it nei mwän me nei fefin ra iteni. Iwe, üpwe ngeniir eu it esap mola tori feilfeilachök.”
ISA 56:6 Nge iei alon ewe Samol mi Lapalap usun ekewe chon ekis mi chiechi ngeni nöün aramas, pwe repwe angang ngeni o acheni itan o fel ngeni, ir meinisin mi pinini ewe ränin sapat, pwe resap angang lon, ra pwal tümwünü an we pwon,
ISA 56:7 “Üpwe emwenireto ren chuki mi pin o apwapwaar lon imwei imwen iotek. Iwe, üpwe etiwa ar asoren kek me sokun asor ra uwato won ai rongen asor, pun imwei epwe iteni imwen iotek fän iten aramasen fanüfan meinisin.”
ISA 56:8 Iei alon Kot ewe Samol mi Lapalap, a achufengeni ekewe aramasen Israel mi oola, “Üpwe achu ngeni chon Israel pwal ekoch lükün chokewe ra fen chu ngeni.”
ISA 56:9 Ämi mönün lemäl pwal ämi mönün lein wöllap, oupwe feito o mongö.
ISA 56:10 Nöün Israel kewe chon mas ra chun, esap wor eman leir a mefi och. Ir meinisin ra usun chök kolak resap tongeni wörüwör, ra chök kon, ra tan o sani annut chök.
ISA 56:11 Iwe, ra usun chök kolak ra mochen mongömong, nge resap fokun möt. Ekei chon mas resap weweiti och, ra chök en me püsin föri letipan o kütta en me winnan.
ISA 56:12 Iwe, ra apasa, “Ou etto, sipwe kütta ünümach wain me sakau pwe sipwe puchula ren. Mine sa föri ikenai, sipwe pwal alapala le föri lesor.”
ISA 57:1 Iwe, ekewe chon pwüng ra mäfeiengau, nge esap wor eman a ekieki usur. Ekewe chon lükü Kot ra mäla, nge esap wor eman a silei popun. Iwe, ekewe chon pwüng ra mäla mwen ewe ränin feiengau a war,
ISA 57:2 pwe repwe tolong lon kinamwe, nge chokewe mi fetal fän pwüng ra kon o asösö lon peiaser.
ISA 57:3 Oupwe etto, ämi nöün eman sourong fefin, ämi nöün ekewe mwän mi lisowu me ekewe fefin mi amömö insir fän iten angangen lisowu.
ISA 57:4 Iö oua takiri? Iö oua ämängaua o achönaw ngeni? Ifa usun, sap ämi nöün chon tipis pwal mwirimwirin chon chofana?
ISA 57:5 Ämi oua mocheisoufengen lefilemi, lupwen oua fel ngeni ekewe uluulun anümwäl fän ekewe irä ook, pwal fän sokun irä mi mwuresires, oua pwal eäni asor nöümi semirit lon ekewe lemol, pwal fän ekewe säpereperen achau.
ISA 57:6 Oua angei fau mi motoutou seni lon öüwö o fel ngeniir pwe ämi Kot. Oua ninätiu wor asoren ün o uwato wor asoren mongö. Ifa usun, ngang üpwe pwapwaiti ei sokun föför?
ISA 57:7 Oupwe feitä won ekewe chuk mi tekia, pwe oupwe lisowu o föri ämi asor.
ISA 57:8 Iwe, aropen ämi kewe asamalap me lon oua iseni ämi uluulun anümwäl. Lupwen oua pöütieila, oua ameresala kiemi o konola won, oua tipeeufengen me nöümi kewe kamwet won liwinin ar repwe kon remi, oua pwal sani ar föför ngenikemi o nenengeni ar selela.
ISA 57:9 Iwe, oua sai pwe oupwe uwala noppuk ren Molok, oua pwal achomonga epitemi lö mi pwokus, oua tinala toau nöümi chon künö tori mwo nge lon lenien sotup, pwe repwe kütta ämi kot oupwe tongeni fel ngeniir.
ISA 57:10 Oua malülü pokiten ämi saitam, nge ousap apasa, “Esap wor lomotan.” Ousap achanü, pun oua pöchökülsefäl iteiten fansoun.
ISA 57:11 Iwe, ewe Samol mi Lapalap a apasa, “Iö oua niueiti pwe oua chofana ngeniei, ousap pwal chechemeniei ika ekieki usi? Ifa usun, sap ren ai fanafanala ngenikemi fansoun langatam, iei popun ousap niueitiei?
ISA 57:12 Ämi oua ekieki pwe mine oua föri a pwüng, nge ngang üpwe pwärawu ämi föför, nge ämi uluulun anümwäl resap tongeni alisikemi.
ISA 57:13 Ifa usun, ämi kewe uluulun anümwäl repwe angasakemi, lupwen oua siö ngeniir fän leüömong? Iwe, asepwäl epwe ässirela, nge enienin ngasangas epwe pönirela. Nge chokewe mi eäniei lenien op repwe fanüeni ewe fanü, repwe pwal chukuni chuki mi pin.”
ISA 57:14 Iwe, Kot epwe apasa, “Oupwe föri, oupwe föri efoch al o amolla. Oupwe angei föün lon pwe resap epeti ewe al nei aramas repwe fetal lon.”
ISA 57:15 Pun iei alon Ewe mi Unusen Tekia, ewe mi manau tori feilfeilachök, itan Ewe mi Pin, “Ngang üa imweimw lon eu leni mi pin o tekia, pwal ren eman mi luketatakis o tipetekison, pwe üpwe amanaua ngüngün chon tipetekison o apöchöküla leluken chon liamam.
ISA 57:16 Iwe, üsap pälüeniir feilfeilachök, üsap pwal songeitiir fansoun meinisin. Pun are üpwe föri iei usun, ekewe aramas üa föriir repwe mäla, enienin ngasangaser üa awora epwe müchüla.
ISA 57:17 Iwe, üa song ngeni nei aramas pokiten ar tipisin mochenia, iei mine üa apwüngüür o amona mesei seniir. Nge ir ra chök sopwela le föri letiper.
ISA 57:18 Iwe, üa küna föförür meinisin, nge üpwe chök amanaueer. Üpwe emweniir o fokun achipeer. Üpwe pwal aururu ir mi letipeta o föri pwe repwe mwareitiei.
ISA 57:19 Iwe, üpwe awora kinamwe, kinamwe ngeni chokewe mi toau pwal ngeni chokewe mi arap, üpwe fokun amanaueer,” iei alon ewe Samol mi Lapalap.
ISA 57:20 “Nge ekewe chon föföringau ra usun chök nonoon lematau esap tongeni pos, pwe a chök kuar ren nonoon lon, a kümetätä pwakak me limengau.
ISA 57:21 Iwe, ekewe chon föföringau esap wor ar kinamwe,” iei alon ai Kot.
ISA 58:1 Ewe Samol mi Laplap a apasa, “Kopwe kökkö fän leüömong, nge kosap säw. Kopwe alapätä mweliom usun eu rappwa o pwärätä än nei aramas ekewe mwirimwirin Jakop pupungau me tipis.
ISA 58:2 Ewer, ra küttaei iteiten rän o mochen silei letipei. Nge ra usun chök eu täppin aramas mi pwomweni pwomwen chon pwüng resap pöütala än ar we Kot allük. Iwe, ra tüngor ngeniei pwe üpwe eäni pwüng lon ai apwüng, ra pwal tüngormau ngeniei pwe üpwe kanoto rer.”
ISA 58:3 Iwe, ekewe aramas ra ais, “Pwota aipwe echikefel are kosap nenengenikem? Pwota aipwe püsin ariaföüükem are kosap memef ren?” Ewe Samol mi Lapalap a pälüeniir, “Lon ränin ämi echikefel oua chök püsin kütta winnemi o ariaföüü nöümi chon angang.
ISA 58:4 Oua echikefel, nge mürin oua anini o fiufengen me köfölfengen. Ifa usun, oua ekieki pwe ei sokun echikefel oua eäni lon ei fansoun epwe alisi ämi iotek pwe üpwe aüselinga?
ISA 58:5 Ifa usun, üpwe tipeni ei sokun echikefel, eu rän aramas ra püsin ariaföüüür lon? Ifa usun, repwe amwarorou mökürer usun efoch wowo o kon won mangaku seni tuk me falangen ekkei? Are ifa usun, oua aita ngeni echikefel ei sokun, ika oua ekieki pwe üa efich ei sokun lapalap?
ISA 58:6 Nge iei ei sokun echikefel üa tipeni: Kopwe apichala ririn chokewe mi fötek fän pwüngingau. Kopwe angasa chon riaföü me ren aramas o kupi iteiten waas mi chou won afarer.
ISA 58:7 Kopwe ineti ngeni chon echik anom mongö, nge chon mwelele kopwe panalong lon imwom. Are kopwe küna eman mi selela, kopwe aüföüfa, nge kosap kul seni püsin aramasom.
ISA 58:8 Mürin, ai tong epwe tinetiu womw usun chök mallen rän, kopwe müttir chikar seni om samau. Om pwüng epwe akomwola mwom, nge ai ling epwe tapwela mürum o tümwünuk.
ISA 58:9 Iwe, lupwen kopwe iotek, üpwe aüselingok, nge lupwen kopwe kökköriei, üpwe apasa, ‘Ngang iei.’ Are kopwe ükütiu le ariaföüü aramas are kopwe ükütiu le tipitipmwäl ngeniir ika ükütiu le kapasingau,
ISA 58:10 are kopwe pwal amongöü chon echik o alisi chon riaföü, mürin ewe rochopwak mi nom ünükum epwe wiliti saram, nge mine a toputop ngonuk epwe saram usun chök leoloas.
ISA 58:11 Iwe, ngang ewe Samol mi Lapalap üpwe emwenuk fansoun meinisin, üpwe pwal ngonuk amötum lon fanüpwas o apöchöküla inisum. Iwe, kopwe usun chök eu tanipi mi nüküchöchön, pwal usun eu puächen koluk esap mor.
ISA 58:12 Iwe, noum aramas repwe aüsefälietä om kewe telinimw mi tala me lomlom, repwe seniretä won ekewe longolong om kewe lewo ra föri. Iwe, oupwe iteni chon apinasa pwangen tit pwal chon aüsefälietä telinimw.”
ISA 58:13 “Are kopwe tümwünuk pwe kosap apiningaua ewe ränin sapat, kosap pwal föri om angang lon ai rän mi pin, are kopwe aita ngeni ewe ränin sapat ränin pwapwa me pin o tümwünüöchü, pwe kosap kukuloufetal o föri püsin om angang lon, kosap pwal eäni kapas mi lomotongau,
ISA 58:14 mürin kopwe küna om pwapwa rei. Iwe, üpwe atekiokotä won ekewe leni mi tekia won fanüfan, pwe kopwe feiöchüni feiöchün ewe fanü üa ngeni Jakop om we lewo. Ngang ewe Samol mi Lapalap üa kapas.”
ISA 59:1 Nengeni, pöün ewe Samol mi Lapalap esap mochomoch, a tongeni amanauakemi, selingan esap pinela, a tongeni rongorong ämi siö.
ISA 59:2 Nge ämi föföringau a aimwükemi seni ämi Kot, nge ämi tipis a pwölüela won mesan, iei popun esap rongorong.
ISA 59:3 Pun pöümi a limengau ren ämi niela aramas me ämi föföringau, awemi a chofana o kapasingau.
ISA 59:4 Esap wor eman a kapwüng ngeni aramas fän pwüng me wenechar. Iwe, ra lükülük won kapas mi lomotongau, ra chofana, ra pwal ekiekin fitikoko o föföringau.
ISA 59:5 Ar rawangau a afeiengau usun chök än eman alopa sokulen serepenit mi poison. Eman mi ochei ekewe sokul epwe mäla, nge seni eföü sokul mi mök eman serepenit mi poison epwe towu. Ra pwal türüni türün ninnä.
ISA 59:6 Iwe, türünier tür resap lomot ngeni üf, aramas resap tongeni üföüf. Ar angang angangen föföringau chök, nge pöür ra chök föri föförün chon mwänewüs.
ISA 59:7 Iwe, pecher ra fetalekai ngeni mine a ngau, ra müttir ngeni ni aramas esap wor ar tipis, ra chök ekiekingau lon letiper, nge ia ra feila ie a chök fis feiengau.
ISA 59:8 Iwe, resap silei ewe alen kinamwe. Meinisin mine ra föri esap pwüng. Ra püsin föri aler mi pwor, nge ir mi fetal won resap sile kinamwe.
ISA 59:9 Iwe, ekewe aramas ra apasa, “Pwüng a toau senikich, ach ngasala esap fokun torikich. Sa kütta saram, nge meinisin a kiroch, sa witiwiti mallen rän, nge sa chök fetal lon rochopwak.
ISA 59:10 Iwe, sa atapfetal won tit usun chök chon chun ika usun chokewe esap wor meser. Sa chepetek leoloas usun chök lefäf, sa pwal wewe ngeni somä lein chon pöchökül.
ISA 59:11 Kich meinisin sa wörüwör usun ekewe pear, sa pwal ngüngü usun ekewe lisom. Iwe, sa kütta pwüng, nge esap wor, sa pwal witiwiti ach sipwe ngasala, nge a toau senikich.
ISA 59:12 Äm Samol mi Lapalap, a kon watte äm pupungau fän mesom, nge äm tipis kana ra aturukem. Ewer, aia mefi äm pupungau o silei pwe aia föföringau.
ISA 59:13 Äm aia ü ngonuk o pöütukala, en äm Samol mi Lapalap, aia pwal kul senuk, en äm Kot. Iwe, aia ariaföüü aramas o pälüenuk, aia pwal ekieki mine a ngau o apasätä kapas chofana.
ISA 59:14 Iwe, pwüng a sü senikem o toauala, let esap fis lon lenien chulap, nge wenechar esap tongeni tolong lon.
ISA 59:15 Ewer, let esap chüen nom, nge eman mi ükütiu le föföringau epwe riaföü me ren chon föföringau.” Iwe, ewe Samol mi Lapalap a küna ei, nge a oput pwe esap wor pwüng.
ISA 59:16 A küna pwe esap wor eman mi alisi chokewe mi riaföü, a pwal weitifengeni pwe esap wor eman mi peniir. Iei mine a püsin aea an manaman pwe epwe angaseer, nge püsin an pwüng a atufichi.
ISA 59:17 A pwilitalong pwüng won pwe ina an sekit seni mächä, nge an amanaua aramas ina imwan akkaw. A pwilitalong won apwüng pwe ina üfan, pwal song pwe ina üfan owokot.
ISA 59:18 Iwe, epwe ngeni chon oputan liwinin ar föför, epwe song ngeni chon pälüeni, epwe pwal apwüngü chokewe mi nom won ekewe fanüen lematau.
ISA 59:19 Mürin, aramas meinisin seni lotou tori ötiu repwe niueiti ewe Samol mi Lapalap o meniniti an ling. Pun ewe Samol mi Lapalap epwe feito usun eu chanpupu mi pumong, pwal usun eu mölümöl.
ISA 59:20 Iwe, epwe feito ngeni Jerusalem pwe epwe amanaua chokewe lon Israel mi kul seni ar tipis. Iei usun mine ewe Samol mi Lapalap a apasa.
ISA 59:21 Iwe, iei alon ewe Samol mi Lapalap, “Iei ai pwon ngenikemi: Ngüni a nonom womi, üa pwal ngenikemi ai kapas pwe epwe nonom remi, epwe pwal nom ren nöümi me mwirimwirir kana seni ikenai tori feilfeilachök.”
ISA 60:1 Oupwe ütä, ämi aramasen Jerusalem, o saramala, pun ämi saram a war, nge lingen ewe Samol mi Lapalap a tineitikemi.
ISA 60:2 Pun nengeni, rochopwak epwe pwölüela fanüfan, nge kiroch epwe tori chon ekewe mwü. Nge ewe Samol mi Lapalap me lingan epwe pwäla o tittin womw, en telinimw Jerusalem.
ISA 60:3 Iwe, chon ekewe mwü repwe feito ren saramom, nge ekewe king repwe feito ren saramen tinom we mi usun saramen mallen rän.
ISA 60:4 Kopwe nenefeil o küna mine a fis: Noum aramas ra chufengen pwe repwe feito reöm. Noum mwän repwe feito seni toau, nge aramas repwe ekieto noum fefin.
ISA 60:5 Iwe, lupwen kopwe küna ei, kopwe wosaramaram, lelukom epwe pwapwa o mwänek. Pun feiöchün lematau epwe toruk, kopwe pwal wöüni wöün ekewe mwü.
ISA 60:6 Iwe, chomong pwiin kamel repwe nom won fanüom, apanen kamel seni Mitian me Efa. Chon Sepa meinisin repwe feito, repwe uwato kolt me apach mi pwokus o arongafeili iteüöchün ewe Samol mi Lapalap.
ISA 60:7 Aramas repwe emwenato reöm ekewe pwiin sip seni Ketar, pwal ekewe ätemwänin sip seni Napaiot fän iten asor. Iwe, ewe Samol mi Lapalap epwe etiwa ewe asor ra keni won an rongen asor. Epwe pwal alingöchü imwan mi ling.
ISA 60:8 Meni kana sip ra äs usun kuchu, pwal usun lisom mi liwin ngeni faser?
ISA 60:9 Iwe, ekewe fanüen lematau ra witiwitiei. Ekewe sip watte ra akom o uwato noum mwän seni toau, pwal ar silifer me kolt fän iten ewe Samol mi Lapalap om we Kot, Ewe mi Pin lon Israel, pun a alingok.
ISA 60:10 Iwe, ewe Samol mi Lapalap a üreni Jerusalem, “Chon ekis repwe aüetä tittin telinimwom, nge ar kewe king repwe angang ngonuk. Pun lon ai song üa afeiengauok, nge lon ai ümöümöch üa tongeek.
ISA 60:11 Iwe, asamalapom kewe repwe suk fochofoch, resap fokun kapüngüla lerän me lepwin, pwe aramas repwe uwato reöm wöün ekewe mwü, nge ekewe king repwe akom mwer.
ISA 60:12 Nge chon ekewe mwü resap mochen angang ngonuk repwe rosola, fanüer epwe fokun tala.
ISA 60:13 Iwe, repwe uwato ekewe irä saipires me asas me pain, ekewe irä mi mürina seni wöllapen Lepanon, pwe repwe eäniir le aüsefäliiketä, en Jerusalem. Repwe eäniir le alinga imwei mi pin, pwal ai telinimw.
ISA 60:14 Iwe, nöün chokewe mi ariaföüuk repwe feito o pworotiu mwom, nge meinisin mi turunufaseek repwe chapetiu arun pecheöm. Repwe aita ngonuk telinimwen ewe Samol mi Lapalap, pwal Sion telinimwen Ewe mi Pin lon Israel.
ISA 60:15 Iwe, kosap chüen pöütüla o küna koput, esap pwal chüen fis pwe kopwe sochowun me ren aramas. Pwe üpwe fokun atekiokotä feilfeilachök, kopwe pwal eu lenien apwapwa seni eu täppin aramas tori eu täppin.
ISA 60:16 Kopwe wöüni wöün ekewe mwü, nge ekewe king repwe amongök usun eman fefin a aoupu nöün. Mürin kopwe silei pwe ngang ewe Samol mi Lapalap om Chon Amanau pwal om Chon Angasa, Ewe mi Manaman lon Israel.
ISA 60:17 Iwe, ämi piras üpwe siwili ngeni kolt, nge ämi mächä ngeni silifer. Ämi mwüch üpwe siwili ngeni piras, nge ämi fau ngeni mächä. Üpwe seikätä kinamwe pwe epwe samolunikemi, nge pwüng epwe nemenikemi.
ISA 60:18 Esap chüen wor pworausen chon mwänewüs lon fanüom, esap pwal chüen fis maun me feiengau me lon kiännin fanüom. Iwe, tittin telinimwom kopwe aita ngeni “Manau”, nge asamalapan kopwe aita ngeni “Ingemwar”.
ISA 60:19 Iwe, kosap chüen eäni saramen akkar lerän ika tinen maram lepwin pwe repwe asaramok, pun ngang ewe Samol mi Lapalap üpwe om saram tori feilfeilachök. Ngang om Kot üpwe om ling.
ISA 60:20 Om akkar esap chüen tuputiu, nge om maram esap kirochola. Pun ngang ewe Samol mi Lapalap üpwe om saram tori feilfeilachök, nge ränin om letipeta repwe müchüla.
ISA 60:21 Mürin, noum aramas meinisin repwe föri mine a pwüng. Repwe fanüeni ewe fanü tori feilfeilachök, pun üpwe fotukiir ikenan ren püsin pei, pwe üpwe küna ling rer.
ISA 60:22 Ewe mi tekison leimi epwe wiliti eu cho, nge ewe mi kis epwe wiliti eu mwü mi pöchökül. Ngang ewe Samol mi Lapalap, üpwe müttir apwönüetä ai pwon lon fansoun üa filätä.”
ISA 61:1 Iwe, Ngünün Kot ewe Samol mi Lapalap a nonom woi, pun a awisaei pwe üpwe aronga ngeni chon mwelele pworausen manau. A tinieito pwe üpwe achipa chon luketatakis, üpwe asile ngeni chon oola ar repwe ngasala, pwal ngeni chon fötek pwe epwe suk lenien ar fötek.
ISA 61:2 A tinieito, pwe üpwe aronga ngeni nöün aramas pwe ewe ierin än ewe Samol mi Lapalap chen a war, pwal ewe ränin än Kot apwüngü chon oputer. Iwe üpwe achipa meinisin mi letipeta lon Sion.
ISA 61:3 Üpwe ngeni chokewe mi letipeta lon Sion epa mwärämwär siwilin falangen won mökürer, pwapwa siwilin kechü, pwal kölün mwareiti siwilin letipeta. Iwe, repwe wewe ngeni irä ewe Samol mi Lapalap a püsin fotuki, repwe föri mine a pwüng pwe Kot epwe küna ling ren.
ISA 61:4 Iwe, repwe aüsefälietä ekewe tit mi tala me lomlom, repwe försefäli ekewe leni mi tatakis fansoun langatam, pwal telinimwen ekewe täppin aramasen lom.
ISA 61:5 Iwe, chon ekis repwe foleni nöümi pwiin man, wasöla repwe pwal nöümi chon tuw pwül me chon angang ngeni ämi tanipin wain.
ISA 61:6 Nge ämi oupwe iteni nöün ewe Samol mi Lapalap souasor, pwal nöün ach we Kot chon angang. Iwe, oupwe manau seni wöün mwü kana, oupwe pwal pisekini pisekir o küna ling ren.
ISA 61:7 Pokiten ämi oua küna turunufas me itengau fän ruu, iei mine oupwe pwal angei fän ruu wisemi me lon püsin fanüemi, nge pwapwa esemüch epwe nom remi.
ISA 61:8 Iwe, ewe Samol mi Lapalap a apasa, “Ngang üa efich pwüng, nge üa oput solä me föföringau. Üpwe ngeni nei aramas liwinir fän allükülük, üpwe pwal föri ngeniir eu pwon esemüch.
ISA 61:9 Iwe, mwirimwirir repwe sil me lein chon ekewe mwü, nge nöür repwe iteüöch me lein ekewe ainang won fanüfan. Chokewe meinisin mi küneer repwe silei pwe ir eu mwichen aramas ngang üa afeiöchüür.”
ISA 61:10 Üpwe fokun pwapwa ren ewe Samol mi Lapalap, ngüni epwe mwänek ren ai Kot. Pun a aüföüfa ngeniei manau, a pwal pwilitalong woi pwüng pwe ina üfei. Üa wewe ngeni eman mwän apwüpwülü söfö, a foutei ngeni foutan, üa pwal wewe ngeni eman fin apwüpwülü söfö, a mwärämwär mwärin fau aüchea.
ISA 61:11 Pun usun irä ra pwükütä won fanüfan, pwal usun irä mi fot lon tanipi ra märitä, iei usun Kot ewe Samol mi Lapalap epwe apwükü pwüng me kapasen ingemwar fän mesen chon ekewe mwü meinisin.
ISA 62:1 Iwe, üsap tongeni fanafanala fän iten Sion, üsap pwal tongeni mosonoson fän iten Jerusalem tori an pwüng epwe tittin usun akkar, nge an küna manau epwe tin usun efoch töl mi pulopul.
ISA 62:2 Chon ekewe mwü repwe küna om pwüng, nge ekewe king meinisin repwe nenengeni lingom. Iwe, repwe aita ngonuk eu it mi fö, ewe Samol mi Lapalap a aita ngonuk.
ISA 62:3 Kopwe wewe ngeni epa mwärämwär mi ling lepöün ewe Samol mi Lapalap, kopwe pwal wewe ngeni epa mwärin king lepöün om we Kot.
ISA 62:4 Iwe, kosap chüen iteni “Pöütüla”, fanüom esap pwal chüen iteni “Fanüapö”. Nge kopwe iteni “Hefsipa” , fanüom epwe iteni “Piula” , pun ewe Samol mi Lapalap a pwapwaituk, epwe usun chök ngei pwülüen fanüom.
ISA 62:5 Iwe, usun eman alüal a pwülüeni eman föpwül, iei usun noum mwän repwe usun chök nge pwülüom, en Jerusalem. Nge usun eman mwän apwüpwülü söfö a pwapwa ngeni ewe fin apwüpwülü söfö, iei usun om Kot epwe pwapwaituk.
ISA 62:6 Iwe, ngang üa anomu chon mas won tittum, Jerusalem, resap fanafanala lerän me lepwin. Ämi mi achema ngeni ewe Samol mi Lapalap an kewe pwon, ousap asösö.
ISA 62:7 Ousap pwal mwüt ngeni Kot pwe epwe asösö, tori an epwe aüsefälietä Jerusalem o föri pwe chon fanüfan meinisin repwe mwareiti.
ISA 62:8 Ewe Samol mi Lapalap a pwon fän akapel, nge epwe apwönüetä ren an manaman, “Üsap chüen ngeni chon oputemi enemi mongö, nge chon ekis resap chüen ünümi ünümemi wain oua angang weires ngeni.
ISA 62:9 Nge chokewe chök mi fofot o kinikin repwe mongö üan ekewe irä o mwareiti ewe Samol mi Lapalap, pwal chokewe chök mi angang ngeni ekewe irän wain o ionifengeni uar repwe ün seni ewe wain me lon ekewe leni lükün imwei mi pin.”
ISA 62:10 Ämi chon Jerusalem, oupwe towu me lon ekewe asamalap, oupwe amolätä efoch al fän iten ekewe aramas mi liwinsefäl. Oupwe föri efoch alalap, oupwe pwal aturawu föün lon. Iwe, oupwe aürätä efoch asisil fän iten chon ekewe mwü.
ISA 62:11 Ewe Samol mi Lapalap a aronga ngeni aramas won unusen fanüfan, “Oupwe üreni ekewe aramasen Jerusalem: Nengeni, ämi Chon Amanau a war, a uwato an liwin fän iten nöün aramas, nge liwiningau fän iten chon oputan.”
ISA 62:12 Iwe, repwe iteni aramas mi pin, pwal chokewe ewe Samol mi Lapalap a amanaueer. Nge Jerusalem epwe eu leni aramas ra kütta pwe repwe nom ie, eu telinimw esap pönüla.
ISA 63:1 “Iö ätewe a feito me Etom seni ewe telinimw Posra fän üfan mi tiketikepar? Iö ätewe a fokun lingöch fän üfan o fetal lon an pwora me pöchökül mi lapalap?” “Ngang ewe Samol mi Lapalap üa kapas fän pwüng, üa tufichin amanaua aramas.”
ISA 63:2 “Pwota ufom ra parapar usun chök üfen eman mi puri föün irän wain?”
ISA 63:3 “Ngang chök üa puri chon ekewe mwü usun föün irän wain, nge esap wor eman a etiei. Üa puriretiu fän ai chou me song. Iwe, üfei meinisin ra tärässük ren char, pwe ra fokun limengau.
ISA 63:4 Pun üa ekieki lon letipei pwe ewe fansoun ai üpwe amanaua nei aramas a war, pwal ewe fansoun ai üpwe ngeni chon oputer chappen ar föför.
ISA 63:5 Iwe, üa nenefeil, nge esap wor eman a alisiei, üa pwal weitifengeniei pwe esap wor eman a atufichiei. Iei mine püsin pei a awinnaei, nge ai song a atufichiei.
ISA 63:6 Üa purätiu chon ekewe mwü fän ai song, üa pwal apucheer ren ai lingeringer o föri pwe char a suputiu lepwül.”
ISA 63:7 Iwe, üpwe apworausa usun än ewe Samol mi Lapalap tong me ümöümöch, üpwe mwareiti an föför ngenikich, üpwe pwal pworaus usun an kirikiröch mi lapalap a eäni ngeni chon Israel lon an tong me ümöümöch mi somwola.
ISA 63:8 Ewe Samol mi Lapalap a apasa, “Ellet ir wesewesen nei aramas, resap eäni föförün atuputup ngeniei.” Iwe, Kot a amanaueer seni ar riaföü meinisin.
ISA 63:9 Püsin i a amanaueer, sap eman chon läng. Ren an chen me tong ngeniir a angaseer, a ekiretä o mwäreer lon ekewe fansoun lom.
ISA 63:10 Nge ir ra chök ü ngeni Kot o achouala Ngünün mi pin. Iei mine a wiliti eman chon oputer, a pwal püsin fiu ngeniir.
ISA 63:11 Mürin nöün aramas ra chechemeni ewe fansoun lom, ekewe ränin manauen Moses nöün Kot we chon angang. Iwe, ra ais, “Ia a nom ie ewe Samol mi Lapalap, a emwenawu ekewe chon masen nöün mwichen aramas me lon ewe matau? Ia a nom ie ewe Kot a tinato Ngünün mi pin pwe epwe nonom lein nöün aramas,
ISA 63:12 ewe Kot mi atufichi Moses ren an manaman mi amwarar o kinifeseni ewe matau me mwer, pwe itan epwe ling ren tori feilfeilachök,
ISA 63:13 a pwal emwenirewu, lupwen ra fetal epin ewe matau? Resap chepetek usun eman oris esap chepetek lon fanüapö.
ISA 63:14 Iwe, Ngünün ewe Samol mi Lapalap a asösöör, usun eu pwiin kow a feitiu lon eu lemol pwe epwe asösö. Iei usun a emweni nöün aramas pwe itan epwe ling ren.”
ISA 63:15 Äm Samol mi Lapalap, kopwe netiu me läng seni leniom mi pin o ling. Ia a nom ie om tiliken me om manaman? Tipepweteten letipom me om tong resap chüen torikem.
ISA 63:16 Nge en Semelapem, inamwo are Apraham esap silekem, ika Jakop esap ekieki usum. Äm Samol mi Lapalap, en semelapem, en äm Chon Amanau, iei itom seni chök lomlom.
ISA 63:17 Äm Samol mi Lapalap, pwota ka mwüt ngenikem pwe aia tok seni om al kana, pwota ka atipeföreakem pwe aisap chüen niueituk? Kopwe liwinto fän iten noum kewe chon angang, ekewe ainang ka ainangeniir.
ISA 63:18 Äm noum aramas mi pin aia imweni imwom mi pin fansoun mochomoch chök, nge iei ekewe chon oputakem ra purätiu imwom.
ISA 63:19 Aia wiliti eu mwichen aramas ra usun chök chokana kosamwo nemeniir seni me lom, ika usun chök chokana resap iteni noum.
ISA 64:1 Amwo kopwe kamwefeseni läng o feitiu rem. Ekewe chuk repwe chechech me mwom,
ISA 64:2 usun chök koluk mi pur lon nape, lupwen a nom won ekkei. Kopwe feitiu o alinga itom ngeni ekewe chon oputok, nge chon ekewe mwü repwe chechech fän mesom.
ISA 64:3 Lupwen ka feitiu o föri mettoch mi eniwokus, aisap ekieki usun me mwan pwe kopwe föri, ekewe chuk ra chechech me mwom.
ISA 64:4 Seni me lomlom esap wor eman a rongorong ika küna eman Kot usun en mi föri sokun föför ngeni ir mi anomu ar apilükülük womw.
ISA 64:5 En ka etiwa chokana mi pwapwa le föri mine a pwüng, chokana mi chechemeni mine ka mochen pwe repwe föri. En ka songeitikem, nge aia chök sopwela le föri tipis. Iwe, fansoun langatam aia nonom lon tipis. Ifa usun, äm aipwe tongeni küna manau?
ISA 64:6 Äm meinisin aia usun chök eman aramas mi limengau, äm föförün pwüng meinisin ra usun chök mekipwülün sof mi fokun limengau. Äm meinisin aia aiolol usun chön irä, nge äm tipis a ässikeemila usun asepwäl a ässala mettoch.
ISA 64:7 Esap wor eman a köri itom, esap pwal wor eman a achocho le kammwöch womw. Iwe, ka aopa mesom senikem, ka pwal asechikeemila lon feiengau pokiten äm föföringau.
ISA 64:8 Äm Samol mi Lapalap, en Semelapem. Äm ai usun chök pwül, nge en ka usun chök ewe chon föri sepi. Äm meinisin förien poum.
ISA 64:9 Kosap fokun songomong ngenikem. Äm Samol mi Lapalap, kosap pwal chechemeni äm tipis tori feilfeilachök. Kose mochen kopwe nenengenikem, pun äm meinisin noum aramas.
ISA 64:10 Om kewe telinimw mi pin ra wiliti eu fanüapö. Iwe, Jerusalem a wiliti eu lenien tatakis o pön.
ISA 64:11 Iwe, äm imwenfel ewe leni mi pin o fokun ling, ia äm kewe lewo ra mwareituk ie, a kar ren ekkei. Leniem meinisin mi mürina ra tala.
ISA 64:12 Ifa usun, kopwe chüen sap senikem, lupwen ka küna äm kewe feiengau? Äm Samol mi Lapalap, ifa usun, kopwe chök sopwela le fanafanala o akafeiengauakem ren ei feiengau ese wor aükükün?
ISA 65:1 Iwe, ewe Samol mi Lapalap a apasa, “Üa pwäriei ngeni chokewe resap ais usi, nge chokewe resap küttaei ra künaei. Üa apasa ngeni chon eu mwü resap köri itei, ‘Ngang iei, ngang iei.’
ISA 65:2 Iteiten rän üa aitiela pei pwe üpwe etiwa eu mwichen aramas mi lükümach o ü ngeniei, nge ra chök föri mine a ngau o chei mochenin letiper.
ISA 65:3 Ir eu mwichen aramas ra afifi lemesei iteiten fansoun, ra föri ar asor ngeni ekewe anümwäl lon ekewe tanipi o keni apach mi pwokus won ekewe rongen asor seni fau mi fal.
ISA 65:4 Lepwin ra mot lein peias o feila ngeni leni mi monomon pwe repwe ais ngeni ngünün ekewe somä, ra pwal ochei fituken pik o ünümi setin man mi anioput me rei.
ISA 65:5 Iwe, ra apasa ngeni chon aruur, ‘Ousap kanoto rem o atapakem, pun aia kon pin senikemi.’ Ekei aramas ra usun chök eu ekkei mi ötüpwaro, a ötütä lon pwöti iteiten rän.
ISA 65:6 Ar föför meinisin a mak o nom fän mesei. Üsap fanafanala, nge üpwe liwini ngeniir. Ewer, üpwe liwini ngeni püsin inisir
ISA 65:7 ar föföringau, pwal än ar kewe lewo föföringau. Iwe, pokiten ar keni apach mi pwokus won ekewe chukutekia o turunufaseei won ekewe chukutekison, üpwe liwini ngeni püsin inisir ükükün ar föförün lom.” Iei alon ewe Samol mi Lapalap.
ISA 65:8 Iei alon ewe Samol mi Lapalap, “Usun a chüen wor chönün wain lon ekoch kewe föün lon ewe umwun wain mi mürina, nge aramas ra apasa, ‘Kosap pöütirela meinisin, pun a chüen wor feiöch lor’, iei usun üsap pwal arosala nei aramas meinisin pokiten nei kewe chon angang.
ISA 65:9 Iwe, üpwe awora mwirimwirin Jakop, nge mwirimwirin Juta repwe chukuni chuki kana. Iwe, nei aramas üa afiliir repwe fanüeni ewe fanü, nge nei chon angang repwe nonom won.
ISA 65:10 Saron epwe wiliti eu lenien fetil fän iten pwiin sip, nge ewe lemolun Akor epwe wiliti eu lenien asösö fän iten pwiin kow nöün nei aramas mi küttaei.
ISA 65:11 Nge ämi oua pöütieila, ousap pwal chüen ekieki chuki mi pin. Iei oua soun asor mongö ngeni ewe kot a iteni ‘Feiöch’, oua pwal alolöü ngeni wain ewe kapen asor än ewe kot itan ‘Akota mine epwap fis me mürin.’
ISA 65:12 Iei üpwe akota ngenikemi pwe oupwe mäla ren ketilas, nge ämi meinisin oupwe pworotiu pwe oupwe ninnila. Pun lupwen üa kökkö, ousap pälüeniei, nge lupwen üa kapas, ousap aüselingaei. Pwe oua chök föri mine a ngau fän mesei o filätä mine üsap efich.”
ISA 65:13 Iei mine ewe Samol mi Lapalap a apasa, “Nei chon angang repwe mongö o ün, nge ämi oupwe echik o kaka. Nei chon angang repwe pwapwa, nge ämi oupwe säw.
ISA 65:14 Nei chon angang repwe köl fän pwapwan letiper, nge ämi oupwe kechü fän weires o ngüngüres fän riaföün lelukemi.
ISA 65:15 Iwe, nei kewe aramas üa filiretä repwe föüni itemi lon ar kapasen ottek, nge ngang Kot ewe Samol mi Lapalap üpwe nikemiila. Iwe, üpwe aita ngeni nei kewe chon angang eu it mi fö.
ISA 65:16 Iö a mochen tüngor an feiöch me lon ewe fanü, epwe tüngor an feiöch me ren ewe Kot mi let, nge iö a pwon fän akapel me lon ewe fanü, epwe apelü ewe Kot mi let. Pun ekewe riaföün fansoun lom ra manlüküla, ra monola seniei.”
ISA 65:17 Iwe, ewe Samol mi Lapalap a apasa, “Nengeni, üpwe föri eu läng mi fö me eu fanüfan mi fö. Iwe, esap chüen wor eman epwe chechemeni ekewe mettochun lom o ekieki usun.
ISA 65:18 Nge oupwe chök pwapwa o mwänek fochofoch ren mine üpwe föri. Pun, üpwe föri Jerusalem pwe epwe eu leni mi apwapwa, nge aramasen lon repwe meseik.
ISA 65:19 Iwe, ngang üpwe pwapwaiti Jerusalem o mwänek ren nei aramas. Esap chüen wor eman epwe rongorong kechü me siön riaföü lon.
ISA 65:20 Iwe, esap chüen wor eman semirit lon ei fanü epwe manau ekoch chök rän, ika eman chinlap esap aunusa ierin manauan. Pun eman mi mäla, lupwen a ierini ipükü, epwe chüen iteni alüal, nge eman mi mäla mwen an ierini ipükü epwe alea lein chon tipis mi anümamau.
ISA 65:21 Iwe, repwe aüetä imwer o nonom lon, repwe pwal fotuki irän wain o ochei uan.
ISA 65:22 Esap fis pwe repwe aüetä imwer, nge eman lükür epwe nom lon. Esap pwal fis pwe repwe fotuki irä, nge eman lükür epwe mongö seni. Pun ierin manauen nei aramas epwe usun chök ierin manauen efoch irä, nge nei chon fil repwe pwapwaiti feiöchün angangen pöür fansoun langatam.
ISA 65:23 Esap chüen fis pwe ra resin angang weires o foleni nöür pwe repwe mäkai. Pun ngang ewe Samol mi Lapalap üpwe afeichüür me mwirimwirir kana.
ISA 65:24 Iwe, üpwe apwönüetä ar iotek mwen resamwo tüngor, nge lupwen ra chüen fos, üpwe aüselingeer.
ISA 65:25 Eman wolif me eman apanen sip repwe mongöfengen, eman laion epwe mongö fetilipwas usun eman kow, nge eman serepenit epwe mongö pwül moromor. Iwe, resap chüen afeiengaua eman ika atala och me won unusen chuki mi pin.” Iei alon ewe Samol mi Lapalap.
ISA 66:1 Pwal iei alon ewe Samol mi Lapalap, “Läng ai lenien mot, nge fanüfan lenien puun pechei. Met sokun imw oupwe aüetä fän itei are ifa lenien ai asösö?
ISA 66:2 Pun pei a föri ekei mettoch meinisin, iei mine ir meinisin nemeniei.” Pwal iei alon ewe Samol mi Lapalap, “Ngang üpwe chök aücheani eman aramas mi tipetekison o luketatakis, pwal eman mi niuokusiti ai kapas o aleasochis ngeni.
ISA 66:3 Nge eman mi niela eman kow fän iten asor, nge esap föri letipei, a usun chök eman mi niela eman aramas. Eman mi eäni asor eman sip a usun chök eman mi niela eman kolak. Iwe, eman mi uwato asoren mongö a usun chök eman mi eäni asor chan pik, nge eman mi keni apach mi pwokus a usun chök eman mi fel ngeni uluulun anümwäl. Iwe, ekana sokun aramas ra chök püsin filätä letiper, nge leluker a pwapwaiti ar föför mi anioput.
ISA 66:4 Iei mine ngang üa pwal filätä ai üpwe ariaföüür o atoto wor mine ra niuokusiti. Pun esap wor eman a pälüeniei, lupwen üa kökkö, esap pwal wor eman a aüselingaei, lupwen üa kapas. Nge ra chök föri mine a ngau fän mesei o filätä mine üsap pwapwaiti.”
ISA 66:5 Oupwe rongorong alon ewe Samol mi Lapalap, ämi mi niuokusiti o aleasochisi an kapas, “Pokiten ämi allükülük ngeniei, ekoch lein pwimi ra oputakemi o asükemiila. Ra esitakemi o apasa, ‘Ewe Samol mi Lapalap epwe fokun pwärawu an ling o amanauakemi pwe aipwe küna ämi pwapwa.’ Nge fokun ir repwe küna säw.”
ISA 66:6 Oupwe aüseling! Mi wor akürang me lon ewe telinimw, pwal miiniinin mwelien eman seni lon ewe imwenfel. Iei mwelien ewe Samol mi lapalap a ngeni chon oputa liwinin ar föföringau.
ISA 66:7 “Sion a wewe ngeni eman fefin a nöünöüla, nge esamwo tori an cheuchen fam. A nöüni eman ät mwen esamwo tori an metekin nöünöü.
ISA 66:8 Iö a rongorong ei sokun pworaus? Iö a küna ekei sokun mettoch? Ifa usun, eu fanü a tongeni masou ren aramas lon eu chök rän? Ika ifa usun, eu mwü epwe tongeni fis lon fansoun mochomoch? Pun lupwen a tori Sion an cheuchen fam, a fen nöüni nöün kana.
ISA 66:9 Ifa usun, üpwe föri pwe epwe tori fansoun än nei aramas repwe uputiu, nge üsap mwüt ngeniir ar repwe uputiu? Ifa usun, ngang ewe chon aupup üpwe pinei pwe esap fis nöünöü? Iei alon ewe Samol mi Lapalap ämi we Kot.
ISA 66:10 Oupwe eti Jerusalem le pwapwa o mwänek usun, ämi meinisin mi tongei ei telinimw. Oupwe eti le meseik, ämi meinisin mi letipeta usun.
ISA 66:11 Pun oupwe chip ren, usun eman semirit a chip ren oupun inan, oupwe pwal pwapwa o möt ren wöün mi ling o somwola.”
ISA 66:12 Iei alon ewe Samol mi Lapalap, “Üpwe apupuolong kinamwe lon Jerusalem usun chök eu chanpupu, pwal wöün ekewe mwün fanüfan usun chök öütöüten lon öüwö. Iwe, Jerusalem epwe aoupukemi, epwe ämmwakemi o apwapwakemi won afön.
ISA 66:13 Usun eman inelap a achipa nöün, iei usun ngang üpwe achipakemi. Iwe, oupwe küna chip lon Jerusalem.
ISA 66:14 Lupwen oupwe küna mine a fis lon Jerusalem, letipemi epwe meseik, nge inisimi epwe öümanau usun fetil mi pwüküfö. Mürin, epwe pwä pwe ngang ewe Samol mi Lapalap üa alisi nei chon angang, nge üa song ngeni chon oputaei.”
ISA 66:15 Nengeni, ewe Samol mi Lapalap epwe feito lon ekkei won wan woken mi usun chök mölümöl. Epwe apwönüetä an song mi fokun pöchökül me an apwüng mi usun chök pulopulen ekkei.
ISA 66:16 Iwe, ewe Samol mi Lapalap epwe apwüngü aramas meinisin ren nöün ketilas me ekkei, nge chokewe mi küna ninnila me ren repwe chomong.
ISA 66:17 Iwe, iei alon ewe Samol mi Lapalap, “Chokana mi apiniir o limetiir pwe repwe fel ngeni anümwäl lon ekewe tanipi o tapwela mürin ewe souasor mi angang ngeniir, pwal chokana mi ochei fituken pik me lakich me sokun man mi anioput repwe mäfeiengau ir meinisin.
ISA 66:18 Iwe, pokiten üa silei ar föför me ar ekiek, üpwe feito o achufengeni chon ekewe mwü meinisin. Repwe feito o nenengeni ai ling.
ISA 66:19 Iwe, üpwe aürätä eu asisil lefiler. Üpwe tinala ekoch mi chüen manau me leir ngeni ekewe mwün fanüfan, ngeni Tarsis me chon Lipia me chon Litia, ir ätekewe mi föükus le likapich, ngeni Tupal me Kriis, pwal ngeni ekewe fanüen lematau resamwo rongorong iteüöchi ika küna lingei. Iwe, repwe pwärätä ai ling lein chon ekewe mwün fanüfan.
ISA 66:20 Iwe, repwe uwato pwimi kewe seni mwün fanüfan meinisin, pwe eu lifang ngeniei. Repwe uweereto won chuki mi pin lon Jerusalem won oris me woken, won lenien keki, pwal won aas me kamel, usun chon Israel ra uwato ar asoren mongö lon sepi mi limöch lon imwei mi pin.
ISA 66:21 Nge üpwe filätä ekoch me leir, pwe repwe souasor me aramasen Lefi,” iei alon ewe Samol mi Lapalap.
ISA 66:22 “Pun usun föriei we läng mi fö me ewe fanüfan mi fö repwe nonom fochofoch fän mesei, iei usun mwirimwirimi kana me itemi repwe nonom fochofoch.
ISA 66:23 Iwe, iteiten popun maram me iteiten ränin sapat aramasen fanüfan meinisin repwe feito fän mesei o fel ngeniei lon Jerusalem,” iei alon ewe Samol mi Lapalap.
ISA 66:24 “Iwe, lupwen repwe towu, repwe nengeni somän ekewe aramas mi ü ngeniei. Ekewe möttö mi eniir resap mäla, nge ewe ekkei mi keniir esap kunula. Iwe, aramas meinisin repwe nioputäsiniir.”
JER 1:1 Iei apworausaen Jeremaia nöün Hilkia we mwän, i eman me lein ekewe souasor mi nom lon Anatot lon fanüen Peniamin.
JER 1:2 Iwe, ewe Samol mi Lapalap a kapas ngeni Jeremaia lon engol me ülüngatin ierin mwün Josia ewe kingen Juta nöün Amon we mwän.
JER 1:3 Ewe Samol mi Lapalap a pwal kapas ngeni Jeremaia lon mwün Joiakim ewe kingen Juta nöün Josia we mwän. Mürin a pwal kapas ngeni fän chomong tori sopolan ewe engol me euin ierin mwün Setekia ewe kingen Juta nöün Josia we mwän. Iwe, lon alimuen maramen ei ier ekewe chon Jerusalem ra oola.
JER 1:4 Iwe, ewe Samol mi Lapalap a kapas ngeniei,
JER 1:5 “Üa sileek me mwen kosamwo fis me lon letipen inom, nge me mwen om kosamwo uputiu üa filuk. Üa awisok pwe kopwe eman soufos ngeni chon ekewe mwü.”
JER 1:6 Mürin üa üra, “Ai Kot Samol mi Lapalap, nengeni, üsap sile fos, pun ngang eman mi chök ier kükün.”
JER 1:7 Nge ewe Samol mi Lapalap a üreniei, “Kosap apasa pwe en eman mi chök ier kükün. Pun kopwe feila ren chokana meinisin üpwe tinukela rer, nge kopwe apasa meinisin mine üa akünö ngonuk.
JER 1:8 Kosap niuokusitiir, pun ngang üpwe etuk o tümwünuk. Ngang ewe Samol mi Lapalap üa kapas.”
JER 1:9 Mürin, ewe Samol mi Lapalap a aitiewu pöün, a atapa awei o üreniei, “Nengeni, üa anöünöüuk fos.
JER 1:10 Lon ei rän üa awisok pwe kopwe nemenem won ekewe fanü me mwü, pwe kopwe üttiretä o kupiretiu, kopwe atarela o atururetiu, kopwe pwal aüretä o fotukiir.”
JER 1:11 Iwe, ewe Samol mi Lapalap a aisiniei, “Jeremaia, met ka küna?” Nge üa pälüeni, “Üa küna efoch palen ewe irä almont.”
JER 1:12 Mürin ewe Samol mi Lapalap a üreniei, “A pwüng mine ka küna, pun üa tümwünü ai kapas pwe üpwe apwönüetä.”
JER 1:13 Mürin ewe Samol mi Lapalap a pwal aisiniei, “Met ka küna?” Nge üa pälüeni, “Üa küna eu nape mi pur, nge a päito seni efeng.”
JER 1:14 Mürin, ewe Samol mi Lapalap a üreniei, “Feiengau epwe towu seni efeng o feito won chon ei fanü meinisin.
JER 1:15 Pun üpwe körato chon ekewe mwün efeng meinisin pwe repwe feito. Ar kewe king repwe anomu ar lenien motun king lon ekewe asamalapen Jerusalem me pwelin ünükün tittin pwal ünükün ekewe telinimwen Juta meinisin.
JER 1:16 Üpwe apwüngü nei aramas pokiten ar föföringau meinisin. Ra likitieila, ra asor ngeni pwal ekoch kot o fel ngeni mine ra püsin föri ren pöür.
JER 1:17 Nge en Jeremaia kopwe amolokotä. Kopwe feila o üreniir meinisin mine üa akünö ngonuk. Kosap rükö rer, pwe üsap arüköök me fän meser.
JER 1:18 Nengeni, ikenai üpwe apöchökülok pwe kopwe wewe ngeni eu telinimw mi pöchökül tittin, kopwe wewe ngeni efoch ür seni mächä me eu tit seni piras, pwe kopwe ü ngeni unusen ei fanü, ngeni ewe kingen Juta me ekewe nöüwisen Juta, ekewe souasor me aramasen ei fanü.
JER 1:19 Ir repwe maun ngonuk, nge resap tongeni akufuk, pun ngang üa etuk pwe üpwe tümwünuk. Ngang ewe Samol mi Lapalap üa kapas.”
JER 2:1 Iwe, ewe Samol mi Lapalap a üreniei,
JER 2:2 pwe üpwe feila o aronga ngeni chon Jerusalem alon, “Israel, üa chechemeni om angangöch ngeniei leföpwülum we, pwal om echeniei, lupwen sa kärän pwüpwülü. Üa chechemeni usun om etifeiliei lon ewe fanüapö, lon eu fanü esap wor eman a fofot ie.
JER 2:3 Israel, en ka pin fän itei, ngang echök üa nöünuk. Chokewe meinisin mi afeiengauok üa ariaföüür o afeiengaueer. Ngang ewe Samol mi Lapalap üa kapas.”
JER 2:4 Oupwe aüseling alon ewe Samol mi Lapalap, ämi mwirimwirin Jakop, ämi chon ekewe ainangen Israel meinisin.
JER 2:5 Iei alon ewe Samol mi Lapalap, “Met mwäli ämi kewe lewo ra küna, pwe ra feila toau seniei? Ra fel ngeni ekewe uluulun anümwäl mi lomotongau o wiliti aramas mi lomotongau.
JER 2:6 Resap ekiekiei, nge ngang üa fen amanaueer seni ewe fanü Isip o emwenirela lon ewe fanüapö. Ei fanüapö eu fanü mi pön o pwokurokur, eu fanü esap püngütiu üt won, a chök wor feiengau lon, eu fanü esap wor eman a nom ie, esap pwal wor eman a mochen pwerela won.
JER 2:7 Ngang üa emwenirelong lon eu fanü mi fokun res, pwe repwe pwapwa le mongö uan o pwapwaiti ekewe mettoch mi mürina lon. Nge lupwen ra tolong lon, ra alimengaua fanüei o föri pwe fanüei epwe anioput.
JER 2:8 Ekewe souasor resap ais, ‘Ifa i ewe Samol mi Lapalap?’ Chokewe mi silelap allük resap sileei, ekewe souemwen ra ü ngeniei, nge ekewe soufos ra osuni fän iten ewe anü Paal o fel ngeni ekewe uluulun anümwäl mi lomotongau.
JER 2:9 Iei mine ngang ewe Samol mi Lapalap üpwe atipisi nei kewe aramas, üpwe pwal atipisi mwirimwirir kewe.
JER 2:10 Oupwe feila ngeni ewe fanü Saipiros o katol, oupwe tinala eman lon ewe fanü Ketar o nenengenifichi. Oupwe pi ika mi wor ena sokun lapalap mi fis ikenan.
JER 2:11 Esap wor chon eu mwü mi ekesiwili ar kewe kot, nge ir resap wesewesen kot. Nge nei aramas ra ekesiwiliei ngang ar we Kot mi ling ngeni pwal ekoch kot mi lomotongau.
JER 2:12 Iei üpwe kapas ngeni läng usun ei, pwe epwe mairü o weitifengeni ren mine a fis.
JER 2:13 Pun nei aramas ra föri ruu tipis: Ra likitieila, ngang ewe puächen kolukun manau, nge ra tuw chönüttu fän iter, sokun chönüttu mi sangang, esap tongeni mwöch koluk lor.
JER 2:14 Ifa usun, Israel eman amanau? Ifa usun, a upulong lon eu familien chon angang? Pwota chök chon oputan ra liapeni?
JER 2:15 Ra leüömong le wörüwör ngeni usun laion ra wörüwör. Ra ataela fanüan, an kewe telinimw ra tatakis, nge resap chüen so.
JER 2:16 Pwal ekewe aramasen Memfis me Tapanes ra reipöpöla meten möküran.
JER 2:17 Ifa usun, sap püsin en Israel ka awarato womw ei feiengau ren om likitieila ngang ewe Samol mi Lapalap, lupwen üa emwenukela won ewe al?
JER 2:18 Met om feiöch ren om feila Isip pwe kopwe ün seni kolukun ewe chanpupu Nil? Ika met om feiöch ren om feila Asiria pwe kopwe ün seni kolukun ewe chanpupu Oifrat?
JER 2:19 Püsin om kewe föföringau repwe apwünguk, nge om kul seniei epwe atipisuk. Kopwe mefi pwe a ingau o weires ngonuk om kopwe likitieila, ngang ewe Samol mi Lapalap om we Kot. Esap wor menini me reöm. Ngang ewe Samol mi Lapalap, ewe Kot mi Unusen Manaman üa kapas.”
JER 2:20 Ewe Samol mi Lapalap a pwal apasa, “Chomong ier ra la, en Israel, kosap mochen anomuk fän ai nemenem. Kosap mochen aleasochisiei o fel ngeniei. Nge ka fel ngeni ekewe koten leres won iteiten chuk pwal fän iteiten irä mi mwuresires.
JER 2:21 Nge ngang üa fotukuk usun efoch irän wain mi mürina, a pwük seni föün mi unusen mürina. Pwota ka ingauala o wiliti efoch irän wain mi mwacho o lomotongau?
JER 2:22 Inamwo ika ka püsin limetuk ren sarasko o sopuluk ren chomong soop, limengauen om tipis a chüen nom fän mesei.
JER 2:23 Pwota ka tongeni apasa, ‘Ngang üsap limengau. Ngang üsap fel ngeni ekewe anü Paal.’ Kopwe nenengeni om kewe föför ka föriir me lon ewe lemol o chechemeni mine ka föri. Ka usun chök eman liefefinin kamel mi säfeil ekis meinisin, lupwen a mochen etieti.
JER 2:24 Ka pwal usun chök eman liafefinin aas mi mwacho mi nom lon ewe fanüapö a afongofonga ewe asepwäl lon fansoun an mochen etieti. Iö a tongeni pinei an mochen? Ekewe ätemwän mi tapweri resap resin kütta, pun repwe küna lon fansoun ar etieti.
JER 2:25 Kopwe tümwünü pwe pecheöm esap malülü ika chiorom esap pwasapwas ren om tap me mürin pwal ekoch kot. Nge en ka apasa, ‘Üsap chüen tongeni kulsefäl. Üa echeni ekewe koten ekis, üpwe chök tapwela mürir.’
JER 2:26 Usun eman chon solä a itengau lupwen a oo, iei usun ämi chon Israel oupwe itengau: Ämi me ämi kewe king, pwal nöümi kewe nöüwis, nöümi kewe souasor me soufos.
JER 2:27 Oupwe itengau ämi meinisin mi kapas ngeni efoch irä, ‘En semem,’ nge ngeni eföü fau, ‘En ka nöünikeemitiu.’ Pun oua kulu sökürümi ngeniei, nge ousap kulu mesemi ngeniei. Nge lupwen fansoun osukosuk oua apasa, ‘Kopwe feito o amanauakem.’
JER 2:28 Nge ikafa ir ämi kewe kot oua püsin föri fän itemi? Ir repwe feito o manauakemi lon fansoun ämi osukosuk are ra tongeni. Pun ükükün chomongun ämi kewe telinimw, iei ükükün chomongun ämi kewe kot, ämi chon Juta.”
JER 2:29 Iei alon ewe Samol mi Lapalap, “Pwota oua lal ngeniei? Ämi meinisin oua ü ngeniei.
JER 2:30 Esor lomoten ai apwüngükemi, pun ousap mirit ren. Usun eman laion mi kütta ochan, iei usun ämi oua niela nöümi kewe soufos.
JER 2:31 Ämi aramasen Israel, oupwe aüselinga aloi. Ifa usun, üa wewe ngeni eu fanüapö me remi, ika eu fanüen rochopwak me feiengau? Pwota ämi nei aramas oua apasa, ‘Äm aipwe chök föri letipem, aisap chüen liwinsefälito reöm.’
JER 2:32 Ifa usun, eman föpwül a tongeni manlükala foutan, ika eman fin apwüpwülü söfö üfan üföüfen apwüpwülü? Nge nei aramas ra manlükieila lon chomong rän resap lea.
JER 2:33 Israel, ka fokun silelap le kütta alen om kamwet. Pwal ekewe fefin mi fokun ingau ra tongeni kaiö senuk.
JER 2:34 A pwä me won ufom chan ekewe chon wöüngau esap wor ar tipis, nge ka küna pwe sap ir chon solä. Iei mwo an fis ekei föför meinisin,
JER 2:35 nge ka apasa, ‘Esap wor ai tipis. Ellet ewe Samol mi Lapalap ese chüen song ngeniei.’ Nge ngang üpwe apwünguk pokiten om apasa pwe esap wor om tipis.
JER 2:36 Pwota a fokun mecheres ngonuk om kopwe siwili alom? Kopwe lichipüng ren chon Isip, usun ka fen lichipüng ren chon Asiria.
JER 2:37 Kopwe pwal kul seni Isip o rotiu fän om säw, pun ngang ewe Samol mi Lapalap üa oput chokewe ka eäniir apilükülük. Kosap feiöch rer.”
JER 3:1 Iei alon ewe Samol mi Lapalap, “Are eman mwän a pöütala pwülüan, nge neminewe a feila o pwüpwülü ngeni pwal eman, ifa usun, ätewe epwe tongeni pwülüenisefäli neminewe? Ifa usun, ewe fanü esap fokun limengau ren? Nge en, Israel, a wor chomong noum kamwet. Ifa usun, kopwe chüen tongeni liwinitiei?
JER 3:2 Kopwe netä won ungen ekewe chuk o nenengeni. Ifa usun, epwe wor eu leni ia en kosap fangala inisum ie? Ka nissoal lepekin ekewe al o awiti ekewe kamwet ka akawit usun eman chon Arapia lon fanüapö. En ka alimengaua ewe fanü ren om föförün lisowu.
JER 3:3 Iei mine esap chüen püng üt, nge ütten leres esap fis. Ka fen mesemau usun eman fin lisowu, kosap sile säw.
JER 3:4 Nge iei ka üreniei, ‘En semei, ka tongeei seni leküküni.
JER 3:5 Ifa usun, kopwe song fochofoch ngeniei? Ifa usun, kopwe lingeringeritiei tori feilfeilachök?’ Iei usun om kapas, nge ka chök föri ekewe föför mi ngau meinisin ka tongeni föri.”
JER 3:6 Iwe, lon mwün ewe king Josia ewe Samol mi Lapalap a üreniei, “Ka küna mine chon Israel mi kirikiringau ra föri? Ra kul seniei o feitä won ekewe chuk meinisin pwal fän ekewe irä meinisin mi mwuresires o fel ngeni ekewe koten ekis. Ren ei ra kirikiringau ngeniei.
JER 3:7 Iwe, ngang üa ekieki pwe mürin ar föför meinisin repwe liwinitiei. Nge resap liwinitiei. Nge ekewe chon Juta mi pwal kirikiringau ra küna ei.
JER 3:8 Ra pwal küna pwe üa pöütala Israel, usun eman mwän a pöütala pwülüan. Üa tinirela pokiten ra kirikiringau ngeniei ren ar fel ngeni pwal ekoch kot. Nge ekewe chon Juta mi kirikiringau resap niuokus. Ra pwal föri ei sokun föför,
JER 3:9 nge resap fokun säw ren. Ra alimengaua ewe fanü ren ar fel ngeni fau me mwüch, iei ar angangen lisowu.
JER 3:10 Nge mine a ngau seni kei, pwe ekewe chon Juta mi kirikiringau ra chök pwomweni pwomwen ar liwinitiei, nge sap seni unusen letiper. Ngang ewe Samol mi Lapalap üa kapas.”
JER 3:11 Mürin, ewe Samol mi Lapalap a üreniei, “Iei mwo än chon Israel kul seniei, nge a pwä pwe ra pwüng lap seni chon Juta mi kirikiringau.
JER 3:12 Kopwe feila o aronga ekei kapas ngeni chon Israel, ‘Oupwe liwinto, ämi chon Israel mi kirikiringau. Üsap chüen wowoon song ngenikemi, pun üa eäni ümöümöch, nge üsap song ngenikemi tori feilfeilachök.
JER 3:13 Oupwe chök pwärätä ämi tipis, pwe oua ü ngeniei ngang ewe Samol mi Lapalap ämi we Kot. Oupwe pwärätä pwe oua chiechi ngeni ekewe koten ekis fän ekewe irä mi mwuresires, ousap pwal aleasochisi ai kapas. Ngang ewe Samol mi Lapalap üa kapas.
JER 3:14 Oupwe liwinto rei, ämi aramas mi kirikiringau, pun ngang echök üa nöünikemi. Üpwe angeikemi akaeman seni iteiten ekewe telinimw, nge akaruoman seni iteiten ekewe eterekes o emwenikemiilong lon Sion.
JER 3:15 Üpwe ngenikemi souemwen mi lelukeni lelukei, repwe emwenikemi fän silelap me weweöch.
JER 3:16 Lon ekana rän, lupwen oupwe chomongola me lon ewe fanü, aramas resap chüen kapas usun ai we pworun pwon. Esap chüen nom lon ekiekir, resap pwal chüen chechemeni ika mefi pwe esap chüen nom. Resap pwal chüen försefäli ewe pworofel.
JER 3:17 Are epwe tori ena fansoun, Jerusalem epwe iteni än ewe Samol mi Lapalap lenien mot, nge chon ekewe mwü meinisin repwe mwichefengen lon Jerusalem pwe repwe fel ngeniei. Resap chüen ülöförea le apwönüetä ekiekingauen leluker.
JER 3:18 Lon ekana rän chon Juta me chon Israel repwe chufengen, repwe feitopök seni ewe fanü efeng ia ra oola ie, o liwinla ngeni ewe fanü üa ngeni ämi kewe lewo, pwe repwe fanüeni.’”
JER 3:19 Mürin, ewe Samol mi Lapalap a apasa, “Üpwe fokun pwapwa le atolongakemi lon tettelin nei mwän o ngenikemi eu fanü mi mürina, eu fanü mi fokun mürina seni fanüen chon ekewe mwü. Üa mochen pwe oupwe kökköri ngeniei, ‘Semem,’ nge ousap fokun chüen kul seniei.
JER 3:20 Ellet, ämi chon Israel oua kirikiringau ngeniei, usun eman fefin a kirikiringau ngeni pwülüan o likitala. Ngang ewe Samol mi Lapalap üa kapas.”
JER 3:21 Aramas ra rongorong mwelien ekewe chon Israel won ungen ekewe chuk, ra kechü o tütüngormau, pun ra föri chomong tipis o manlükala ewe Samol mi Lapalap ar we Kot.
JER 3:22 Oupwe liwinto, ämi meinisin mi kul seni ewe Samol mi Lapalap, i epwe awesi ämi kirikiringau. Nge ämi oupwe apasa, “Ewer, äm aipwe liwinto ren ewe Samol mi Lapalap, pun i äm we Kot.
JER 3:23 Ellet, äm fel ngeni ekewe uluulun anümwäl won ungen ekewe chuk esap alisikem. Ellet, ewe Samol mi Lapalap äm we Kot i ewe Chon Amanau fän iten Israel.
JER 3:24 Nge ren äm fel ngeni ewe anü Paal mi ässäw, aia lus won meinisin mine äm kewe lewo ra angang ngeni seni me lom. Aia lus won nöüm pwiin sip me kow, pwal nöüm alüal me föpwül.
JER 3:25 Aipwe chapala lepwül fän säw, nge itengau epwe pwölükem. Pun aia tipis ngeni ewe Samol mi Lapalap äm we Kot, äm me äm kewe lewo seni lesäräföm tori ikenai. Äm aisap aleasochis ngeni ewe Samol mi Lapalap äm we Kot.”
JER 4:1 Iei alon ewe Samol mi Lapalap, “Are oupwe liwinto, ämi chon Israel, oupwe fokun liwinitiei. Are oupwe atoauala ekewe uluulun anümwäl mi anioput me fän mesei, nge ousap chüen tokola,
JER 4:2 are oupwe pwon fän akapel itei fän let, pwüng me wenechar, mürin chon ekewe mwü repwe kütta ar feiöch me rei, repwe pwal mwareitiei.”
JER 4:3 Pun iei alon ewe Samol mi Lapalap ngeni ekewe chon Juta me chon Jerusalem, “Oupwe tuw ewe pwül esamwo tu, nge ousap amworafeili ekewe pwükil lein iräfölüföl.
JER 4:4 Ämi chon Juta me chon Jerusalem, oupwe apwönüetä ämi pwon ngeniei, ngang ämi Samol mi Lapalap, o apinikemi fän itei. Are ousap föri ei, ai lingeringer epwe towu usun ngetengeten ekkei, pokiten ekewe föför mi ngau oua föriir. Epwe ngetenget, nge esap wor eman epwe kunuela.”
JER 4:5 Oupwe asilefeili lon Juta o arongafeili lon Jerusalem, “Oupwe ettiki ewe rappwa lemenen ewe fanü, oupwe kökkö fän leüömong o apasa, ‘Ousipwe chufengen o feilong lon ekewe telinimw mi pöchökül tittir.’
JER 4:6 Oupwe aüetä eu asisil won ewe al mi ale ngeni Sion, oupwe süla ngeni eu lenien kinamwe, nge ousap mang. Pun ewe Samol mi Lapalap epwe awarato feiengau me watten tatakis seni efeng.
JER 4:7 Usun eman laion a towu seni pwangan, iei usun ewe chon atai mwü a feiliwu. A likitala lenian pwe epwe ataela fanüemi, ämi kewe telinimw repwe tatakisitiu, pwe resap chüen so.
JER 4:8 Pokiten ei oupwe üföüf üf seni tuk, oupwe kechü o ngüngüres. Pun än ewe Samol mi Lapalap song mi fokun watte esap säp senikemi.”
JER 4:9 Iei alon ewe Samol mi Lapalap, “Lon ena rän leluken ewe king me ekewe nöüwis repwe kisikisila, ekewe souasor repwe rükö, nge ekewe soufos repwe mairü.”
JER 4:10 Mürin, üa apasa, “Ai Kot, Samol mi Lapalap, ka wesewesen atupu ekei aramasen Jerusalem ren om apasa pwe epwe wor kinamwe, nge efoch ketilas a fen arap ngeni chiorer.”
JER 4:11 Lon ena fansoun eman epwe üreni ekei aramasen Jerusalem, “Eu asepwäl mi pwichikar epwe enito seni won ungen ekewe chuk mi amassawa me lon ewe fanüapö o eniti ekewe aramas. Ei asepwäl esap fän iten an epwe limeti ekewe föün wiich o ässala pöör,
JER 4:12 nge epwe eu asepwäl mi fokun pöchökül, epwe enito fän än ewe Samol mi Lapalap allük. Püsin i epwe atowu pwüngün an kapwüng ngeniir.”
JER 4:13 Nengeni, ewe chon oput a feito usun kuchu, an kewe wokenin maun ra feito usun eu ewiniär, nge nöün kewe oris ra müttir seni ekewe ikel. Feiengauach, pun sipwe tatakis.
JER 4:14 En Jerusalem, kopwe limeti lelukom seni om föföringau, pwe kopwe manau. Ifa ükükün fansoun an epwe nom lomw om kewe ekiekingau.
JER 4:15 Chon künö seni Tan pwal seni ekewe chukun Efraim ra asilefeili ewe pworausen afeiengau.
JER 4:16 Repwe asile ngeni chon ekewe mwü o arongafeili ngeni chon Jerusalem pwe ekewe mwichen sounfiu ra feito seni eu fanü toau. Repwe akkapwas ngeni ekewe telinimwen Juta.
JER 4:17 Repwe pwelifeili Jerusalem usun chon tümwünü eu tanipi, pokiten an ü ngeniei, iei alon ewe Samol mi Lapalap.
JER 4:18 Om kewe lapalap me om kewe föför ra awarato ei feiengau womw. Iei popun ka küna apwüng ren, eu apwüng mi fokun aweires. A fokun küw lelukom.
JER 4:19 Üa fokun riaföü, üa fokun riaföü. Üa wilikilikiei fän ai cheuch. Riaföün letipei! Lelukei a fokun mwökütüküt. Üsap tongeni fanafanala. Üa rongorong tikin ewe rappwa mi tik fän iten maun.
JER 4:20 Feiengau a chök afaün, unusen ewe fanü a tala. Imwei kewe imw mangaku ra müttir tatiu, pwölüpwöli ra kamwetiu lon eu chök otun.
JER 4:21 Ifa ükükün fansoun ai üpwe chök küna ewe filäiken maun o rongorong tikin ewe rappwa?
JER 4:22 Ewe Samol mi Lapalap a apasa, “Nei aramas ra umwes, resap sileei. Ra usun chök semirit mi tiparoch, resap mirit. Ra sipeöch le föri mine a ngau, nge resap silei ar repwe föri föför mi öch.”
JER 4:23 Üa nengeni fanüfan pwe a tala o pöön. Üa netä läng o küna pwe esap wor an saram.
JER 4:24 Üa nengeni ekewe chuk o küna pwe ra chechech, ekewe chukutekison meinisin ra mwarorofeil.
JER 4:25 Üa küna pwe esap wor eman aramas, pwal ekewe machang meinisin ra süla.
JER 4:26 Üa küna pwe ewe fanü mi mürina a wiliti eu fanüapö, nge ekewe telinimwen lon ra tatakisila pokiten än ewe Samol mi Lapalap song mi fokun watte.
JER 4:27 Pun iei alon ewe Samol mi Lapalap, “Unusen ewe fanü epwe pönüla, nge üsap ataela unusan.
JER 4:28 Ren ei fanüfan epwe letipeta, nge läng epwe cholola. Pun ngang üa kapas, nge üsap siwili ai ekiek, üa apwüngala mine üpwe föri, nge üsap akasiwili.”
JER 4:29 Aramas meinisin lon ewe fanü ra süla, lupwen ra rong akürangen ekewe chon wawa oris me ekewe chon esefich. Ekoch ra sülong lon ekewe wöllap, ekoch ra töfetal won ekewe achau. Ekewe telinimw meinisin ra pöön, esap wor eman a imweimw lor.
JER 4:30 Nge en, Jerusalem mi feiengau, met ka föri? Pwota ka üföüf üf mi parochol? Pwota ka foutei ngonuk fout seni kolt o teikei won mesom? A solap om alinga inisum. Noum kewe kamwet ra oputok o mochen angei manauom.
JER 4:31 Üa rongorong eu puchör usun puchörun eman fefin mi tori an cheuchen fam, eu puchör fän riaföü usun puchörün eman fefin mi nöünätiu aemanün nöün. Üa rongorong puchörün Sion mi ngasalap, a aitiewu pöün o apasa, “Feiengauei, üa masaroch, nge chon niela aramas repwe angeala manauei.”
JER 5:1 Oupwe akaliwin won ekewe alen Jerusalem, oupwe nenefetal o katol. Oupwe ouwasacha ekewe lenien amwicheich, are oupwe tongeni küna eman chök aramas mi föri mine a pwüng o kütta mine a wenechar, pwe ewe Samol mi Lapalap epwe amusala än chon ei telinimw tipis.
JER 5:2 Inamwo ika ra apasa, “Mwo manauen ewe Samol mi Lapalap,” nge ir ra chök akapelmwäl.
JER 5:3 Ai Samol mi Lapalap, ifa usun, kosap kütta aramas mi wenechar? En ka niir, nge ir resap mefi riaföü. Ka afeiengaueer, nge ir resap mochen miritila ren. Ra tipepöchökül, nge resap fokun mochen ekieksefäl.
JER 5:4 Mürin üa ekieki, “Ir chök aramas mi kis, esap wor ar mirit, pun resap silei letipen ewe Samol mi Lapalap ika än ar we Kot allük.
JER 5:5 Üpwe feila ren ekewe aramas tekia o kapas ngeniir, pun ir repwe silei letipen ewe Samol mi Lapalap ika än ar we Kot allük.” Nge pwal ir resap mochen anomuur fän än ewe Samol mi Lapalap nemenem, resap pwal mochen aleasochis ngeni.
JER 5:6 Iei mine eman laion seni ewe wöllap epwe niirela, eman wolif seni ewe fanüapö epwe afeiengaueer. Eman manmwacho itan lepart a operi ar kewe telinimw, epwe atatakisi ekewe aramas mi towu me lor, pokiten chomongun ar tipis me watten ar tokola seni Kot.
JER 5:7 Iei alon ewe Samol mi Lapalap, “Pwota üpwe amusala ämi tipis? Nöümi kewe ra likitieila o fel ngeni pwal ekoch kot resap wesewesen Kot. Ngang üa amongöör tori ra fokun mötüla, nge ir ra föri föförün lisowu o feila ren imwen ekewe fin lisowu.
JER 5:8 Ir ra wewe ngeni oris mi amongööch o sarawarawfetal, eman me eman a mocheisou ngeni pwülüen chon arun.
JER 5:9 Ifa usun, üsap apwüngüür pokiten ekei föför? Ifa usun, üsap ngeni chon ei sokun mwü chappen ar föför?
JER 5:10 Üpwe tinala chon oputeer ren ar kewe tanipin wain pwe repwe ataela ar kewe irän wain, nge resap unusen atarela. Repwe pöküetiu palan kewe, pun resap ai.
JER 5:11 Ekewe chon Israel me chon Juta ra fokun kirikiringau ngeniei. Ngang ewe Samol mi Lapalap üa kapas.”
JER 5:12 Nöün ewe Samol mi Lapalap aramas ra kapas mwäl usun o üra, “Esap föri och. Esor feiengau epwe feitiu woch, esap pwal torikich maun me lengita.
JER 5:13 Ekewe soufos ra usun chök asepwäl, esap wor rer än Kot kapas. Iei mine epwe püsin fis ngeniir usun mine ra apasa.”
JER 5:14 Iei popun ewe Samol mi Lapalap ewe Kot mi Unusen Manaman a apasa, “Pokiten ekewe aramas ra apasa ekei kapas, ngang üpwe föri pwe ai kewe kapas repwe usun chök ekkei me lon awom, nge ir repwe usun chök mwüch. Iwe, ewe ekkei epwe kenirela.”
JER 5:15 Iei alon ewe Samol mi Lapalap, “Nengeni, üpwe awarato womi ämi chon Israel chon eu mwü mi feito seni toau. Ir chon eu mwü mi pöchökül o nom seni me lomlom, chon eu mwü ämi ousap weweiti ar kapas.
JER 5:16 Nöür chon esefich ir mwän mi pwora, ra niela aramas, nge resap eäni tong.
JER 5:17 Repwe enala enemi mongö pwal mine oua kini, o niela nöümi mwän me fefin. Repwe ochei nöümi pwiin sip me kow, pwal uän ämi irän wain me fik. Repwe pwal ataala ämi kewe telinimw mi pöchökül tittir oua eäniir apilükülük.”
JER 5:18 Iei alon ewe Samol mi Lapalap, “Nge lon ena fansoun üsap pwal unusen arosala nei aramas.
JER 5:19 Iwe, lupwen ekewe aramas repwe ais, ‘Pwota ewe Samol mi Lapalap ach we Kot a föri ngenikich ekei mettoch meinisin?’, mürin en Jeremaia kopwe üreniir, ‘Usun oua likitala Kot o angang ngeni pwal ekoch koten ekis me lon fanüemi, iei usun ämi oupwe angang ngeni chon ekis me lon eu fanü sap fanüemi.’
JER 5:20 Kopwe asile ngeni ekewe mwirimwirin Jakop ei pworaus o aronga ngeni chon Juta:
JER 5:21 Oupwe rongorong ekei kapas, ämi aramas mi umwes o miritingau. A wor mesemi, nge ousap küna. A wor selingemi, nge ousap rongorong.
JER 5:22 Ngang ewe Samol mi Lapalap, pwota ousap meninitiei? Pwota ousap chechech me fän mesei? Üa anomu pi pwe kiännin matau, eu epet mi nom fochofoch esap tongeni tö ren sät. Inamwo ika ekewe no ra watte, resap tongeni lu seni ewe kiä, inamwo ika a wor öütöüt, nge esap tongeni atai.
JER 5:23 Nge ämi oua lukeni eu leluk mi ülöförea o lükümach, oua kul o feila seniei.
JER 5:24 Ousap ekieki lon lelukemi, ‘Ousipwe meniniti ewe Samol mi Lapalap ach we Kot, mi fang ngenikich üt lon fansoun öch, mi fang ngenikich ewe ütten lefen me ütten leres o awarato ngenikich ewe fansoun kinikin iteiten ier.’
JER 5:25 Ämi kewe föför mi ngau ra atoka senikemi ekei fansoun öch, ämi tipis ra amwöchü senikemi ekei feiöch.
JER 5:26 Pun aramasangau ra nom lein nei aramas. Ra op usun aramas ra op lupwen ra eseichi machang. Ra föri eu sär pwe repwe liapeni aramas.
JER 5:27 Usun eu tittin machang a ur ren machang, iei usun imwer kewe ra ur ren pisekin solä. Iei popun a wor maner, ra pisekisekila,
JER 5:28 ra pwal kitinupula o lükümisimis. Ar föföringau esap wor aükükün. Resap alisi ekewe mi mäsen lon kapwüng pwe repwe win, resap pwal peni ekewe chon mwelele pwe epwe toriir ar pwüüng.
JER 5:29 Ifa usun, ngang ewe Samol mi Lapalap üsap apwüngüür pokiten ekei föför? Ifa usun, üsap ngeni chon ei sokun mwü chappen ar föför.
JER 5:30 Och föför mi amairü o aniuokus a fis lon ei fanü:
JER 5:31 Än ekewe soufos osuni a chofana, nge ekewe souasor ra nemenem fän püsin ar mochen. Nei aramas ra sani an epwe iei usun. Nge met repwe föri lon ewe fansoun sopolan?”
JER 6:1 Ämi chon ewe ainangen Peniamin, oupwe sü seni Jerusalem o sü ngeni anaie oupwe kinamwe me ie. Oupwe ettiki ewe rappwa me lon Tekoa, oupwe aüetä eu asisil won Pet-akerem, pun feiengau me tatakis mi watte epwe feito seni efeng.
JER 6:2 Ewe telinimw Sion a fokun mürina o limelimöch, nge ngang üpwe ataela.
JER 6:3 King kana repwe feito fiti nöür mwichen sounfiu pwe repwe maun ngeni Sion. Repwe aüetä imwer imw mangaku pwelin ünükün ia ra chök mochen aüetä ie.
JER 6:4 Repwe apasa, “Ousipwe amol ngeni ach sipwe maun ngeni Jerusalem. Leoloas ousipwe maun ngeni. Feiengauach, pun ewe rän a mochomochola, nge a pwinitikich.
JER 6:5 Ousipwe maun ngeni lon ei pwin o ataela an kewe imwen king.”
JER 6:6 Pun iei alon ewe Samol mi Unusen Manaman, “Oupwe pöküetiu ekewe irä, oupwe senätä eu ororen maun ünükün Jerusalem. Üpwe apwüngü ei telinimw, pun angangen ariaföüü aramas a chök fifis lon.
JER 6:7 Usun eu chönüttu a awora koluk mi fö, iei usun ewe telinimw a awora föföringau mi fö iteiten rän. Üa rongorong usun angangen mwäneson me kata a fis lon, üa chök küna chon samau me chon kinas.
JER 6:8 Oupwe miritila, ämi chon Jerusalem! Pun are ousap, üpwe kul senikemi o awili ämi telinimw ngeni eu fanüapö ia esap wor eman a nonom ie.”
JER 6:9 Iei alon ewe Samol mi Unusen Manaman ngeniei, “Kopwe elimelimala ekewe lusun mi chüen nom me lon Israel, usun eman a kiniela ekewe lusun föün irän wain, kopwe küttasefäli uän palan, usun eman mi kini föün irän wain.”
JER 6:10 Nge üa apasa, “Iö üpwe fos ngeni o eäni kapasen fön ngeni? Iö epwe rongorong? Nengeni, ra pineela selinger pwe resap mochen rongorong om kapas. Ra takiri mine ka akünö ngeniei pwe üpwe üreniir.
JER 6:11 Üa pwal eäni om lingeringer ngeniir, ai Samol mi Lapalap, nge üsap chüen tongeni amwöchü.” Mürin, ewe Samol mi Lapalap a üreniei, “Kopwe eäni ai lingeringer won ekewe semirit mi nom won al, pwal won ekewe mwichen alüal. Ekewe mwän fiti pwülüer repwe oola, pwal ekewe chinlap me chokewe mi ieritam.
JER 6:12 Chon ekis repwe imweni imwer kewe, repwe pwal fanüeni fanüer o pwülüeni pwülüer. Üpwe apwüngü chon ei fanü.
JER 6:13 Pun seni ekewe mi kis tori ekewe mi lap ir meinisin ra kütta ar win fän pwüngingau. Pwal seni ekewe soufos tori ekewe souasor ir meinisin ra atupu aramas.
JER 6:14 Ra atupun säfeni kinasen nei aramas ren ar apasa, ‘A wor kinamwe, a wor kinamwe,’ ngei ese wor kinamwe.
JER 6:15 Ifa usun, ra säw ren ar föri föför mi anioput? Apwi, resap fokun säw, esap pwal sokola wowor. Iei mine repwe pöütütiu lein chokewe mi pöütütiu, repwe feiengau lupwen üpwe apwüngüür. Ngang ewe Samol mi Lapalap üa kapas.”
JER 6:16 Iei alon ewe Samol mi Lapalap, “Oupwe ütä ünükün ekewe al o katol, oupwe ais usun ekewe alen lom ifan ewe al mi mürina. Oupwe fetal won o küna kinamwe.” Nge ir ra apasa, “Äm aisap mochen fetal won.”
JER 6:17 Mürin ewe Samol mi Lapalap a awisa chon mas womi o apasa, “Oupwe aüseling ngeni tikin ewe rappwan asilesil.” Nge ir ra apasa, “Äm aisap mochen aüseling.”
JER 6:18 Iei mine ewe Samol mi Lapalap a apasa, “Oupwe aüseling, ämi chon ekewe mwü, oupwe katol mine epwe fis ngeni nei aramas.
JER 6:19 Oupwe aüseling, ämi chon fanüfan. Nengeni, üpwe awarato feiengau won ekewe aramas pwe uän ar föför, pokiten resap mochen aüselinga ai kewe kapas, ra pwal aleasolap ngeni ai kewe allük.
JER 6:20 Met popun pwe ra uwato rei apach mi pwokus seni Sepa, ika ekewe nofitin mongö mi arar seni fanü toau? Üsap etiwa ar asoren kek, üsap pwal pwapwa ren ar kewe asor.
JER 6:21 Iei mine üpwe anomu me mwen ekei aramas eu lenien chepetek, pwe repwe chepetek won. Ekewe sam pwal nöür kewe mwän, chon arur me chiechier repwe mäfeiengauepök.”
JER 6:22 Iei alon ewe Samol mi Lapalap, “Nengeni, eu mwichen aramas a feito seni ewe fanü mi nom efeng, chon eu mwü mi fokun watte seni lesopun fanüfan, ra amolätä ngeni maun.
JER 6:23 Ra amwöchü nöür esefich me wokur siles, ra ariaföüü aramas nge resap eäni tong. Ngüngün ar feito a usun ngüngün noon lematau. Ra wawa oris o tettel pwe repwe mauneek en, Jerusalem.”
JER 6:24 Ekewe aramasen Jerusalem ra apasa, “Sa rongorong ei pworaus, pöüch ra chök ititiu. Niuokus watte a torikich, pwal cheuch a cherikich usun cheuchen fam a cheri eman fefin.
JER 6:25 Sisap tongeni feiliwu lon ekewe mälämäl ika fetal won ekewe al, pun ewe mi oputakich a wor nöün ketilas, nge eniweniw a pweli ünüküch.”
JER 6:26 Ewe Samol mi Lapalap a üreni nöün aramas, “Oupwe üföüf üf seni tuk o asokopelakemi lon falangen ekkei. Oupwe ngüngüres usun eman a ngüngüres won nöün aleman, oupwe fokun kechüangau, pun ewe chon kata epwe müttir wareitikemi.
JER 6:27 Üa awisok, Jeremaia, pwe kopwe sotuni nei aramas usun eman a sotuni mächä. Kopwe sotuniir o küna ar kewe föför.
JER 6:28 Ir meinisin ra ülöförea o ü ngeniei, ra usun chök piras me mächä. Ir meinisin ra chök föri föför mi ngau o luapasfetal.
JER 6:29 Ewe um a fokun kü pwe epwe etelala ewe pilom. A lomotongau än ewe chon ketel angang, pun ekewe aramasangau resap imwüla.
JER 6:30 Aramas ra aita ngeniir kiten silifer mi pöütüla, pun ngang ewe Samol mi Lapalap üa pöütirela.”
JER 7:1 Iwe, ewe Samol mi Lapalap a üreni Jeremaia,
JER 7:2 pwe epwe feila o ütä leasamalapen ewe imwenfel. Epwe aronga ekei kapas ngeni ekewe chon Juta meinisin mi feito pwe repwe fel ngeni ewe Samol mi Lapalap,
JER 7:3 “Iei alon ewe Samol mi Unusen Manaman, ewe Koten Israel: Oupwe siwili manauemi me ämi kewe föför, pwe üpwe mwüt ngenikemi pwe oupwe nonom lon ei leni.
JER 7:4 Ousap lükü ekei kapasen atuputup ra apasa, ‘Aisap feiengau. Iei än ewe Samol mi Lapalap imwenfel, än ewe Samol mi Lapalap imwenfel, än ewe Samol mi Lapalap imwenfel.’
JER 7:5 Oupwe wesewesen siwili manauemi me ämi kewe föför o wesewesen eäni pwüng lefilemi.
JER 7:6 Oupwe ükütiu le ariaföüü ekewe chon ekis, ekewe mi mäsen ika ekewe fefin mi mä pwülüer. Oupwe ükütiu le niela chokewe esap wor ar tipis me lon ei leni. Oupwe ükütiu le fel ngeni pwal ekoch kot, pun ren ei oupwe chök atoto feiengau womi.
JER 7:7 Are oupwe siwili manauemi, üpwe mwüt ngenikemi pwe oupwe nonom lon ei fanü üa ngeni ämi kewe lewo me lomlom, pwe repwe fanüeni tori feilfeilachök.
JER 7:8 Nengeni, oua lükü kapasen atuputup esap wor lomotan.
JER 7:9 Oua solä, niela aramas, föri föförün lisowu, akapelmwäl, keni apach mi pwokus ngeni ewe anü Paal o fel ngeni pwal ekoch kot ousap sileer me mwan.
JER 7:10 Mürin, oua feito o ütä fän mesei lon ei imw mi föü itei won o apasa, ‘Sisap feiengau,’ nge oua chök sopwela le föri ekei föför mi anioput meinisin.
JER 7:11 Ifa usun, ei imw a föü itei won a wiliti eu lenien open chon solä me remi? Püsin ngang üa küna mine oua föri.
JER 7:12 Oupwe feila ren leniei we mi nom Silo, ewe ia üa akom le filätä pwe oupwe fel ngeniei ie. Oupwe nenengeni mine üa föri ngeni pokiten än ekewe aramasen Israel kewe föföringau.
JER 7:13 Lupwen oua föri ekei föför meinisin, üa chök sopwela le fofos ngenikemi, nge ämi ousap mochen aüseling. Üa kökkörikemi, nge ousap mochen päpälüen.
JER 7:14 Iei mine met üa föri ngeni Silo üpwe pwal föri ngeni ei imw mi föü itei won, oua anomu ämi apilükülük won. Üpwe pwal föri iei usun ngeni ei leni üa ngenikemi me ämi kewe lewo.
JER 7:15 Iwe, üpwe asükemiila seni fän mesei usun üa asüela märärimi kewe ekewe chon Israel. Ngang ewe Samol mi Lapalap üa kapas.”
JER 7:16 Ewe Samol mi Lapalap a üreniei, “En Jeremaia, kosap iotek fän iten ekei aramas, kosap siö ika iotek fän iter. Kosap tütüngor ngeniei fän iter, pun ngang üsap aüselingok.
JER 7:17 Ifa usun, kosap küna mine ra föri me lon ekewe telinimwen Juta pwal lon ekewe alen Jerusalem?
JER 7:18 Ekewe semirit ra os mwüch, ekewe sam ra soni ewe ekkei, nge ekewe fefin ra öüwa pilawa pwe repwe föri nokop fän iten ewe anü fefin ra aita ngeni kiwinen läng. Ra pwal ninätiu asorun ün ngeni pwal ekoch kot, pwe repwe ariaföüüei.
JER 7:19 Ifa usun, ngang ewe ra ariaföüü? Apwi, püsin ir, ra pwal püsin atoto säw wor.
JER 7:20 Iei mine ngang Kot ewe Samol mi Lapalap üpwe awarato ai song me lingeringer won ei leni, won aramas me man, won ekewe irän lemäl, pwal won uän ekewe irän lepwül. Ai song epwe kü, nge esap tongeni kunula.”
JER 7:21 Iei alon ewe Samol mi Unusen Manaman, ewe Koten Israel, “Oupwe chök achu ämi mönün asoren kek ngeni ämi mönün ekewe sokopaten asor o ochei fituker meinisin.
JER 7:22 Pun lupwen üa emwenawu ämi kewe lewo seni Isip, üsap kapas ngeniir ika allük ngeniir usun asoren kek me sokopaten asor.
JER 7:23 Nge üa allük ngeniir pwe repwe aleasochisiei, mürin ngang üpwe ar Kot, nge ir repwe nei aramas. Repwe apwönüetä ai kewe allük pwe repwe feiöch ren.
JER 7:24 Iwe, resap aleasochis ika aü selinger, nge ra chei püsin ar öüröür me ülöförean leluker mi ngau. Ra fen ingauala, nge resap öchüla.
JER 7:25 Seni ewe rän ämi kewe lewo ra towu seni Isip tori ikenai üa chök titinala remi nei chon angang ekewe soufos meinisin.
JER 7:26 Nge esap wor eman a aüselingaei ika aü selingan. Oua chök tipepöchökül o föri mine a ngau lap seni ämi kewe lewo.
JER 7:27 Iei mine, Jeremaia, kopwe üreniir ekei kapas meinisin, nge ir resap aüseling ngonuk. Kopwe kökköriir, nge ir resap päpälüen.
JER 7:28 Kopwe üreniir, ‘Ämi chon eu mwü ousap aleasochisi ewe Samol mi Lapalap ämi we Kot, ousap etiwa an emirit. Kapas mi let ra morola, ra ükütiu seni lon awemi.
JER 7:29 Oupwe fichiela meten möküremi o pöütala. Oupwe ngüngüres me won ungen ekewe chuk, pun ewe Samol mi Lapalap a pöütala o asechala ei täppin aramas mi nom fän an lingeringer.’”
JER 7:30 Iei alon ewe Samol mi Lapalap, “Ekewe chon Juta ra föri mine a ngau me fän mesei. Ra anomu ar kewe uluulun anümwäl üa oput lon ewe imw a föü itei won, pwe repwe alimengaua.
JER 7:31 Ra aüetä eu lenien fel itan Tofet mi nom lon ewe lemolun Hinom, pwe repwe kenala nöür ät me nengin. Ei sokun föför üsap allük ngeniir, esap pwal nom lon ai ekiek.
JER 7:32 Iwe, epwe war ewe fansoun pwe ewe leni esap chüen iteni Tofet ika lemolun Hinom, nge epwe iteni lemolun ninni. Pun repwe peiaseni ekewe mi mäla lon Tofet, pokiten esap chüen wor lenien peias ekis meinisin.
JER 7:33 Iwe, ekewe machang me ekewe manmwacho repwe ochei fituken ekei somä, nge esap wor eman epwe eniweer.
JER 7:34 Iwe, üpwe aükätiu kölün mweireir me pwapwa pwal apwapwan mongön apwüpwülü me lon ekewe telinimwen Juta pwal won ekewe alen Jerusalem. Pun ewe fanü epwe wiliti eu fanü mi pöön.
JER 8:1 Lon ena fansoun chün ekewe king me nöüwisen Juta, chün ekewe souasor me soufos, pwal chün ekewe chon Jerusalem repwe katowu seni ekewe peias.
JER 8:2 Iwe, repwe toropas fän akkar me maram pwal fän ekewe fün läng meinisin. Pun ikei ekewe mettoch ekewe aramas ra echeniir o angang ngeniir, ra pwal angei ar öüröür me rer o fel ngeniir. Esap wor eman epwe ionifengeni ekewe chü o peiaseniir. Repwe usun chök kiten mongö me won pwül.
JER 8:3 Nge chokewe meinisin mi chüen manau me lein chon ei mwü mi ngau repwe efich mäla lap seni manau me lon ekewe leni ia üa asürela ie. Ngang ewe Samol mi Unusen Manaman üa kapas.”
JER 8:4 Ewe Samol mi Lapalap a akünöüei pwe üpwe üreni nöün aramas, “Ifa usun, lupwen aramas ra turula, resap pwal ütäsefäl? Ifa usun, are eman a tok seni ewe al, esap pwal liwinsefäl?
JER 8:5 Pwota chök ämi nei aramasen Jerusalem oua tokofochofochola, nge ousap fokun kulsefäl? Oua kamwöchünuk won ämi kewe uluulun anümwäl, nge ousap fokun mochen liwinsefäl.
JER 8:6 Ngang üa afäli ämi kewe kapas o aüselingeer, nge ousap eäni kapas wenechar. Esap wor eman aramas a ekieksefäl seni an föföringau o apasa, ‘Pwota üa föri ei sokun föför mi mwäl?’ Iteiten eman me eman a chök fetal won püsin alan, usun eman oris mi purefochofocholong lon maun.
JER 8:7 Ewe öröpwech mi äs fän läng a silei an fansoun liwinsefäl, pwal ewe lisom, ewe ekiek me ewe kawakaw ra silei fansoun ar repwe ässifeil. Nge ämi nei aramas ousap silei ai kewe allük.
JER 8:8 Pwota oua tongeni apasa, ‘Sia tipachem, pun än ewe Samol mi Lapalap allük a nom rech?’ Nengeni, ekewe allük ra siwil ren ekewe soumak mi chofana.
JER 8:9 Ekewe aramas mi tipachem repwe säw, repwe rükö o oo. Are ra pöütala ai kewe kapas, met sokun tipachem ra eäni?
JER 8:10 Iei mine üpwe fangala pwülüer ngeni chon ekis, pwal fanüer ngeni chokewe mi liapeniir. Pun seni ekewe mi kis tori ekewe mi lap, ir meinisin ra kütta ar win fän pwüngingau, pwal seni ekewe soufos tori ekewe souasor, ir meinisin ra atupu aramas.
JER 8:11 Ra atupun säfeni nei aramas ren ar apasa, ‘A wor kinamwe, a wor kinamwe,’ ngei esor kinamwe.
JER 8:12 Ifa usun, oua säw lupwen oua föri ekei föför mi anioput? Apwi, ousap fokun säw, esap pwal wilila wowomi. Iei mine oupwe pöütütiu lein chokewe mi pöütütiu, oupwe feiengau lupwen üpwe apwüngükemi. Ngang ewe Samol mi Lapalap üa kapas.
JER 8:13 Üa mochen achufengeni nei aramas usun eman aramas a achufengeni kinian ua. Nge ir ra usun chök efoch irän wain ika efoch irä fik esap wor uar, pwal chör ra pwasala. Iei mine üa mwüt ngeni ekewe chon ekis pwe repwe angei fanüer. Ngang ewe Samol mi Lapalap üa kapas.”
JER 8:14 Nge ekewe aramas ra apasa, “Pwota sa chök momot? Ousipwe chufengen o sülong lon ekewe telinimw mi pöchökül tittir, pwe sipwe mäla ikenan. Pun ewe Samol mi Lapalap ach Kot a anümamauakich pwe sipwe mäla. A ngenikich koluk mi poison pwe sipwe ün, pun sia tipis ngeni ewe Samol mi Lapalap.
JER 8:15 Sa apilükülükü kinamwe, nge feiengau a war. Sa apilükülükü eu fansoun pöchökülsefäl, nge niuokus watte a torikich.
JER 8:16 Ekewe chon oputakich ra fen feito ren ewe telinimw Tan. Sia rongorong tikin nöür oris. Unusen ewe fanü a chech ren tikin nöür kewe oris mi pöchökül. Ekewe chon oputakich ra feito pwe repwe ataela fanüach me masouan meinisin, repwe pwal ataela ach kewe telinimw o niela meinisin mi imweimw lor.”
JER 8:17 Iei alon ewe Samol mi Lapalap, “Nengeni, üpwe tinato leimi serepenit, sokun serepenit mi fokun poison, esap wor eman a tongeni förüörüür. Iwe, repwe kükemi.”
JER 8:18 Ai letipeta esap tongeni wes, pun a kon watte, lelukei a tatakis.
JER 8:19 Oupwe rongorong siön nei aramas mi nonom lon eu fanü toau. Ra apasa, “Ifa usun, ewe Samol mi Lapalap esap nom lon Sion? Ifa usun, ewe kingen Sion esap chüen nom lon?” Iwe, ewe Samol mi Lapalap a pälüeni, “Pwota chök oua asongaei ren ämi fel ngeni ämi kewe uluulun anümwäl me ämi kewe koten ekis?”
JER 8:20 Mürin ekewe aramas ra siö, “Fansoun pwichikar a wes, ewe fansoun kinikin a la, nge esap wor eman a amanauakem.”
JER 8:21 Lelukei a tatakis, pun nei aramas ra tatakis, üa ngüngüres o fokun rükö.
JER 8:22 Ifa usun, esap wor och säfei lon Kiliat? Ifa usun, esap wor eman sousäfei ikenan? Pwota nei aramas resap chikarsefäl?
JER 9:1 Amwo mökürei epwe eu lenien koluk, nge mesei epwe eu puächen chönün mas, pwe lerän me lepwin üpwe tongeni kechüeiti chokewe mi ninnila me lein nei aramas.
JER 9:2 Amwo epwe wor imwei likachoch lon ewe fanüapö, pwe üpwe likitala nei aramas o feila toau seniir. Pun ir meinisin ra chon lisowu, ra eu mwichen aramas resap allükülük.
JER 9:3 Iei alon ewe Samol mi Lapalap, “Iteiten fansoun nei aramas ra chök kapas chofana. Chofana a chöchöla lon ewe fanü, nge sap let. Nei aramas ra chök föri föför mi ngau, nge resap alletä pwe ngang ar Kot.”
JER 9:4 Iteiten eman me eman epwe afäli ren chiechian, esap pwal anomu an lükülük won pwin, pun iteiten eman me eman pwipwi a atupu pwin, nge iteiten eman me eman chiechi a aitengaua chiechian.
JER 9:5 Iteiten eman me eman a atupu chiechian, nge esap wor eman a apasa mine a let. Ra aörüni ngeni chönawer kapas chofana, resap fokun mochen ükütiu le föri tipis.
JER 9:6 Ra chök achukuchukätä ar ariaföüü aramas me ar föförün atuputup. Ewe Samol mi Lapalap a apasa pwe nöün aramas ra likitala i.
JER 9:7 Iei mine ewe Samol mi Unusen Manaman a apasa, “Nengeni, üpwe limeti nei aramas usun eman chon ketel a limeti mächä, üpwe sotuniir. Pun met echök üpwe tongeni föri ren nei aramas mi föri mine a ngau.
JER 9:8 Chönawer a usun chök efoch föün esefich mi poison, ra chök eäni kapasen atuputup. Iteiten eman me eman a eäni kapas pwetete ngeni chon arun, nge lon lelukan a ekiekietä usun an epwe sorongauei.
JER 9:9 Ifa usun, üsap apwüngüür pokiten ekei föför? Ifa usun, üsap ngeni chon ei sokun mwü chappen ar föför? Ngang ewe Samol mi Lapalap üa kapas.”
JER 9:10 Nge ngang üa apasa, “Üpwe ngüngüres fän iten ekewe chuk o kechüeiti ekewe lenien fetil me lon ewe fanüapö, pun ra pwasala. Iei mine esap wor eman a pwerela lor, esap pwal wor eman a rongorong wörüwörün kow me ie. Ekewe machang me ekewe manmwacho ra sü seniir.”
JER 9:11 Ewe Samol mi Lapalap a apasa, “Üpwe föri pwe Jerusalem epwe eu ioien mettoch mi tala, eu leni ia ekewe kolak mi mwacho ra nom ie. Üpwe pwal ataela ekewe telinimwen Juta pwe resap chüen so.”
JER 9:12 Iwe, üa ais, “Ai Samol mi Lapalap, pwota ewe fanü a tala o pönüla usun eu fanüapö, pwe esap wor eman a pwerela lon? Iö a tipachem pwe epwe tongeni weweiti ei? Nge iö ka awewe ngeni, pwe epwe tongeni awewe ngeni aramas?”
JER 9:13 Iwe, ewe Samol mi Lapalap a pälüeni, “Ei a fis pokiten nei aramas ra likitala ai allük üa ngeniir. Resap aleasochisiei ika föri mine üa üreniir.
JER 9:14 Nge ra ülöförea o chei mochenin leluker, ra fel ngeni ekewe anü Paal usun ar kewe lewo ra aiti ngeniir.
JER 9:15 Iei mine oupwe aüselinga met ngang ewe Samol mi Unusen Manaman ewe Koten Israel üa apasa: Üpwe amongöü ngeni nei aramas mongö mi maras o aünü ngeniir koluk mi poison.
JER 9:16 Üpwe atoropaseer lein chon ekewe mwü, ir me ar kewe lewo resap sileer me mwan. Üpwe pwal tinala mürir mwichen sounfiu, pwe repwe maun ngeniir tori üpwe aroserela.”
JER 9:17 Iei alon ewe Samol mi Unusen Manaman, “Kopwe ekieki mine epwe fis. Kopwe kökköri ekewe fefin mi ngüngüres pwe repwe feito. Kopwe titi ekewe fefin mi sipeöch le eäni kölün kechü.”
JER 9:18 Iwe, ekewe aramas ra üra, “Repwe müttir feito o ngüngüres woch, pwe epwe sürütiu chönün mesach, nge apwölün mesach repwe chöchön ren kechü.”
JER 9:19 Oupwe aüseling ngeni och ngüngüres seni Sion, “Sa fokun feiengau, sa unusen itengau, pun sa likiti fanüach, pokiten aramas ra ataetiu imwach kewe.”
JER 9:20 Iwe, üa üra, “Ämi kana fefin, oupwe rongorong alon ewe Samol mi Lapalap, oupwe aüselinga an kewe kapas. Oupwe aiti ngeni nöümi kewe föpwül usun ar repwe ngüngüres, nge iteiten eman me eman epwe aiti ngeni chon arun echö kölün kechü.
JER 9:21 Pun mäla a tötä me lon asamwachon imwach o tolong lon ekewe imwen king. A ärala ekewe semirit me won ekewe al me ekewe alüal lon ekewe lenien amwicheich.
JER 9:22 Somän ekewe aramas repwe toropasfeil ekis meinisin usun kiten mongö lon ekewe leni mi amassawa. Repwe usun chök pilükün wiich ekewe chon pöküpök ra likiti, nge esap wor eman a ionifengeniir. Iei met ewe Samol mi Lapalap a akünö ngeniei pwe üpwe apasa.”
JER 9:23 Iei alon ewe Samol mi Lapalap, “Eman aramas mi tipachem esap aingaing fän an silelap, eman mi pöchökül esap aingaing fän an pöchökül, nge eman mi pisekisek esap aingaing lon an wöü.
JER 9:24 Nge ewe mi aingaing epwe aingaing lon an eäni weweöch o sileei, pwe ngang ewe Samol mi Lapalap mi eäni tong ellet, pwüng me wenechar won fanüfan. Pun ikei ekei föför üa pwapwa ren. Ngang ewe Samol mi Lapalap üa kapas.”
JER 9:25 Iei alon ewe Samol mi Lapalap, “Epwe war ewe fansoun, lupwen üpwe apwüngü chokewe ra chök sirkomsais ren inisir:
JER 9:26 Ekewe chon Isip me Juta, chon Etom me Amon, chon Moap me chokewe mi nonom lon ewe fanüapö mi toau. Pun chon ekei mwü meinisin resap sirkomsais, pwal chon Israel resap sirkomsais lon leluker.”
JER 10:1 Oupwe rongorong mine ewe Samol mi Lapalap a ürenikemi ämi chon Israel.
JER 10:2 Iei alon ewe Samol mi Lapalap, “Ousap föri föförün chon ekewe mwü, ousap pwal rükö ren ekewe asisilen fän läng, inamwo are chon ekewe mwü ra rükö rer.
JER 10:3 Än chon ekewe mwü lamalam ra mwäl. Ra pökü efoch irä seni lein wöllap, nge eman soufalafal a angang ngeni ren efoch falafal.
JER 10:4 Iwe, aramas ra afouta ngeni silifer me kolt, ra pwal chüfölü ngeni chüföl, pwe esap tongeni turula.
JER 10:5 Ar kewe uluulun anümwäl ra usun chök ekewe anewenewen machang lon eu tanipin kiuri. Resap tongeni kapas. Aramas ra wisen uweer, pun resap tongeni fetal. Ousap niuokusitiir, pun resap tongeni afeiengauakemi, resap pwal tongeni afeiöchükemi.”
JER 10:6 Esap wor eman a wewe ngonuk, en Samol mi Lapalap, ka tekia, nge itom a lapalap o manaman.
JER 10:7 Ifa usun, iö esap meninituk, en ewe kingen ekewe mwü? A pwüng ngonuk pwe aramas repwe meninituk. Esap wor eman me lein ekewe mi tipachem meinisin me lon ekewe mwü ika me lein ar kewe king a wewe ngonuk.
JER 10:8 Ir meinisin ra tiparoch o umwes. Pun ifa usun, repwe tongeni angei öüröürer seni uluulun anümwäl mi för seni mwüch?
JER 10:9 Ra cheni ngeni ar kewe uluulun anümwäl ewe silifer mi nechenech a feito seni Tarsis, ika ewe kolt seni Ufas. Mine ekewe soufalafal me ekewe chon angang ngeni kolt ra föri, ra pwal öüföüfa ngeni üf mi forket me parochol. Meinisin förien aramas mi sipeöch.
JER 10:10 Nge en Samol mi Lapalap ewe Kot mi let. En ewe Kot mi manau me ewe king mi nom tori feilfeilachök. Lupwen ka song, fanüfan a chechech, nge chon ekewe mwü resap tongeni manau fän om song.
JER 10:11 Iei usun mine ämi aramas oupwe üreniir, “Ekewe kot resap föri läng me fanüfan repwe tala. Resap chüen nom won fanüfan.”
JER 10:12 Nge Kot a föri fanüfan ren an manaman, a anüküchara ren an tipachem. A ameresala ekewe läng ren an weweöch.
JER 10:13 Lupwen a kapas, ekewe kolukun fän läng ra ngüngü. A pwal föri ekewe kuchu pwe repwe ässitä seni ekewe lesopun fanüfan. A föri inefi fiti üt o awarato asepwäl seni an lenien iseis.
JER 10:14 Lupwen aramas ra küna ei, ra mefi pwe ra umwes, esap pwal wor ar mirit. Ekewe chon föri uluulun anümwäl seni kolt ra säw, pun ar kewe uluulun anümwäl ra minen atuputup, esap pwal wor ngasangas lor.
JER 10:15 Ra lomotongau o uretakir. Repwe tala, lupwen Kot epwe apwüngüür.
JER 10:16 Nge än Jakop we Kot esap usun ekei anümwäl, pun i ewe chon föri mettoch meinisin. A pwal filätä chon Israel pwe repwe wesewesen nöün aramas, itan ewe Samol mi Unusen Manaman.
JER 10:17 Ämi chon Jerusalem meinisin, oupwe ionifengeni pisekimi pwe oupwe towu seni ewe fanü, pun sounfiu ra pwelifeili ämi kewe telinimw fän pisekin maun.
JER 10:18 Pun iei alon ewe Samol mi Lapalap, “Üpwe asüela chon ei fanü lon ei fansoun, üpwe pwal atoto riaföü wor pwe repwe oola.”
JER 10:19 Nge ekewe aramasen Jerusalem repwe siö, “Feiengauach, pun sa fokun kinas. Nge kinasach esap mola. Sa ekieki pwe iei och mettoch sipwe tongeni öttures fan.
JER 10:20 Imwach kewe imw mangaku ra tala, nge selin kewe ra mwu. Nöüch kewe semirit ra feila senikich. Esap chüen wor eman a nom rech mi tongeni aüsefälietä imwach kewe imw mangaku o emeitiwätä chechen lor.”
JER 10:21 Ekewe souemwen ra umwes. Resap angei öüröürer me ren ewe Samol mi Lapalap. Iei mine esap fisiöch ar angang, nge nöür aramas ra toropasfeil.
JER 10:22 Oupwe aüseling pwe eu pworaus a war. A wor eu akürangen maun mi watte a feito seni ewe mwü mi nom efeng. An kewe sounfiu repwe ataela ekewe telinimwen Juta, pwe repwe wiliti eu leni ia ekewe kolak mi mwacho repwe nom ie.
JER 10:23 Ai Samol mi Lapalap, üa silei pwe aramas resap püsin nemeni manauer, resap pwal tongeni akota mine repwe föri.
JER 10:24 Ai Samol mi Lapalap, kopwe apwüngüei fän aüküköch, nge kosap apwüngüei fän om song, pwe ete much manauei.
JER 10:25 Nge kopwe atoto om song won chon ekewe mwü resap sileek, pwal won ekewe aramas resap köri itom. Pun ra niela noum aramas, ra wesewesen nirela o ataela fanüer.
JER 11:1 Iwe, ewe Samol mi Lapalap a kapas ngeni Jeremaia,
JER 11:2 “Kopwe aüselinga kapasen ei pwon o apworausa ngeni ekewe aramasen Juta me chon Jerusalem.
JER 11:3 Kopwe üreniir pwe ngang ewe Samol mi Lapalap ewe Koten Israel, üa anümamaua eman aramas esap aleasochisi kapasen ei pwon.
JER 11:4 Iei ewe pwon üa ngeni ämi kewe lewo, lupwen üa emwenirewu seni Isip, ewe fanü mi usun chök eu um mi fokun pwichikar ngeniir. Üa üreniir pwe repwe aleasochisiei o föri meinisin mine üa allük ngeniir. Iwe, repwe nei aramas, nge ngang üpwe ar Kot.
JER 11:5 Mürin üpwe afisi ai pwon üa eäni fän akapel ngeni ämi kewe lewo, pwe üpwe ngeniir ewe fanü mi pwülüöch me fanüeräs, usun mine a fis ikenai.” Mürin üa pälüeni, “Epwe ina, ai Samol mi Lapalap.”
JER 11:6 Iwe, ewe Samol mi Lapalap a üreniei, “Kopwe asilefeili ekei kapas me lon ekewe telinimwen Juta, pwal lon ekewe alen Jerusalem: Oupwe aüselinga kapasen ei pwon o apwönüetä.
JER 11:7 Seni ewe fansoun üa emwenawu ämi kewe lewo seni ewe fanü Isip tori ikenai üa fönökisiir o üreniir pwe repwe aleasochisiei.
JER 11:8 Nge ir resap aleasochis ika aüseling, pwe iteiten eman me eman a ülöförea lelukan o föföringau. Iei mine üa atoto wor ewe anümamau a mak lon ei pwon, pokiten resap mochen apwönüetä kapasan kewe üa allük ngeniir.”
JER 11:9 Mürin, ewe Samol mi Lapalap a üreniei, “A wor ekiekin ü ngeniei me lein ekewe chon Juta me chon Jerusalem.
JER 11:10 Ra kulusefäliti än ar kewe lewo tipis, ir chokewe resap mochen apwönüetä ai kewe kapas. Ra fel ngeni pwal ekoch kot o angang ngeniir. Chon Israel me chon Juta ra atai ai we pwon üa eäni ngeni ar kewe lewo.
JER 11:11 Iei mine ngang ewe Samol mi Lapalap üa üreniir pwe üpwe awarato feiengau wor, nge resap tongeni sü seni. Inamwo ika ra siö ngeniei, üsap aüselingeer.
JER 11:12 Mürin, ekewe chon Juta me chon Jerusalem repwe feila ren ekewe kot ra keni apach mi pwokus ngeniir o siö ngeniir. Nge ekewe kot resap tongeni amanaueer lon fansoun ar tolong lon feiengau.
JER 11:13 Ämi chon Juta, ämi kewe kot ra chomong usun chomongun ämi kewe telinimw, nge ämi kewe rongen asor oua senätä pwe oupwe keni apach mi pwokus wor ngeni ewe anü Paal mi anioput ra chomong usun chomongun ekewe alen Jerusalem.
JER 11:14 Iei mine, Jeremaia, kosap iotek fän iten ekei aramas, kosap siö ika tüngor fän iter. Pun ngang üsap aüseling, lupwen ra köriei lon fansoun ar riaföü.
JER 11:15 Ekewe aramas üa tongeer ra föri föför mi ngau. Fän meni pwüng ra nonom lon imwei mi pin? Ifa usun, ra ekieki pwe ar kapasen pwon me fituken ar kewe mönün asor repwe tongeni akulu seniir ar feiengau? Are epwe fis iei usun, repwe tongeni meseik.
JER 11:16 Me lom, ngang ewe Samol mi Lapalap üa aita ngeniir pwe ir efoch irä olif mi märöch a uani ua mi mürina. Nge ren ngüngün eu mölümöl mi watte ngang üpwe kenala chön o kupi palan kewe.
JER 11:17 Ngang ewe Samol mi Unusen Manaman, üa fotuki Israel me Juta. Nge iei üpwe awarato feiengau wor pokiten ekewe föför mi ngau ra föri. Ra asongaei ren ar asor ngeni ewe anü Paal.”
JER 11:18 Iwe, lon ei fansoun, ewe Samol mi Lapalap a pwäri ngeniei än chon oputaei ekiekin rawangauaei, pwe üpwe silei.
JER 11:19 Nge ngang üa usun chök eman apanen sip mi mosonoson, aramas ra emwenala ren ewe chon niela. Ngang üsap mefi pwe ra ekiekin rawangauaei, lupwen ra apasa, “Ousipwe ataala ewe irä fiti uan. Ousipwe ukufala i me lon fanüen chokewe mi manau, pwe esap chüen wor eman epwe chechemeni itan.”
JER 11:20 Mürin üa iotek, “Ai Samol mi Unusen Manaman, en ewe mi eäni kapwüng fän pwüng o sotuni leluk me ekiekin aramas. Kopwe mwüt ngeniei ai üpwe küna om kopwe ngeni ekei aramas chappen ar föför, pun üa likiti ngonuk pwe kopwe peniei.”
JER 11:21 Ekewe re Anatot ra mochen nieila. Ra üreniei pwe repwe nieila, are üpwe sopwela le asilefeili än ewe Samol mi Lapalap kewe kapas.
JER 11:22 Iei mine ewe Samol mi Unusen Manaman a apasa, “Üpwe apwüngüür. Nöür kewe alüal repwe mäla lon maun, nge nöür kewe ät me nengin repwe mäla ren echik,
JER 11:23 pwe esap chüen wor eman lusun me leir. Pun ngang üpwe awarato feiengau won ekewe re Anatot lon ewe ier üpwe apwüngüür.”
JER 12:1 Ai Samol mi Lapalap, lupwen üa uwato ai osukosuk fän mesom, a pwä pwe en ka pwüng. Nge iei üa mochen pwe sipwe kakapasfengen won pwüngün kapwüng. Pwota ekewe aramasangau ra pisekisekila? Pwota chokewe meinisin resap allükülük ra fefeitä?
JER 12:2 Ka fotukiretiu, iwe, a tö warer. Ra mämäritä o ua. Ra föüni itom lon awer, nge leluker a toau senuk.
JER 12:3 Nge en ai Samol mi Lapalap, ka sileei, ka künaei o sotuni ai ekiek ngonuk. Kopwe nukiela ekewe aramasangau usun sip ra nukunuk ngeni ar repwe ninnila, kopwe aimwürela fän iten ewe ränin ninnila.
JER 12:4 Ifa ükükün fansoun än ewe fanü epwe pwasapwas, nge fetilin lon iteiten mälämäl epwe pwasala? Ekewe man me mansüsü ra ärela pokiten ekewe aramas mi nom lon ewe fanü ra föföringau, ir ekewe aramas mi apasa, “Kot esap küna mine sa föri.”
JER 12:5 Iwe, ewe Samol mi Lapalap a pälüeni, “Are ka kitir ngeni aramas, nge ka malülü ren, ifa usun om kopwe kitir ngeni oris? Are ka chepetek me lon eu leni mi öch, met kopwe föri me lein ewe wöllap ünükün ewe chanpupu Jortan?
JER 12:6 Pun püsin pwiüm kewe me chon leimwen semom ra afangamääk, ra tapweruk nge puchör. Kosap lüküür, inamwo ika ra kapas pwetete ngonuk.”
JER 12:7 Iwe, ewe Samol mi Lapalap a üra, “Ngang üa likitala ekewe chon Israel o pöütala nei aramas. Üa asechala chokewe üa echeniir lepöün chon oputer.
JER 12:8 Püsin nei aramas ra ü ngeniei, ra wörüwör ngeniei usun eman laion lein wöllap, iei mine üa oput ir.
JER 12:9 Nei aramas ra wewe ngeni eman machang mi tiketik, nge ekewe machang mi mwacho ra feito seni ekis meinisin o fiu ngeni. Kopwe feila o achufengeni ekewe manmwacho meinisin pwe repwe feito o ochoch.
JER 12:10 Chomong chon mas ra atai ai tanipin wain, ra purätiu fanüei. Ra föri pwe fanüei mi mürina a wiliti eu fanüapö.
JER 12:11 Ra awili ngeni eu fanüapö, a pöön o pwasapwas me fän mesei. Unusen ewe fanü a pö, nge esap wor eman a ekieki usun.
JER 12:12 Ekewe chon kata ra feito won ungen ekewe chuk meinisin me lon ewe fanüapö. Üa awarato maun pwe unusen ewe fanü a tala ren. Esap wor eman aramas epwe kinamwe.
JER 12:13 Ra amwora föün wiich, nge ra kini iräfölüföl, ra olusumwäliir le angang, nge esap wor lomotan. Repwe säw ren mine ra kini pokiten ai song mi watte.”
JER 12:14 Iwe, ewe Samol mi Lapalap a apasa, “Mi wor mine üa mochen apasa fän äsengesin chon arun Israel mi atai ewe fanü üa ngeni nei aramasen Israel pwe fanüer. Ngang üpwe ütti ekei aramasangau seni fanüer, usun eman a üttätä efoch irä. Nge üpwe amanaua chon Juta seni lepöür.
JER 12:15 Nge mürin ai üttiretä, üpwe pwal tongeesefäliir o aliwiniir ngeni en me fanüan, pwal en me lenian.
JER 12:16 Iwe, are repwe etiwa än nei aramas lamalam ren unusen leluker o eäni akapel, ‘Mwo manauen ewe Samol mi Lapalap,’ usun ra aiti ngeni nei aramas pwe repwe eäni akapel iten Paal, mürin repwe fefeitä me lein nei aramas.
JER 12:17 Nge are chon eu mwü resap mochen aleasochis, mürin üpwe fokun üttiretä o aroserela. Ngang ewe Samol mi Lapalap üa kapas.”
JER 13:1 Iwe, ewe Samol mi Lapalap a üreniei, “Kopwe feila o kamö echö achök seni mangaku mi pwechepwech o rietä won wänukum, nge kosap otuwolong lon koluk.”
JER 13:2 Iei mine üa möni echö achök o rietä won wänüki, usun ewe Samol mi Lapalap a üreniei.
JER 13:3 Mürin, ewe Samol mi Lapalap a kapas ngeniei fän aruuan,
JER 13:4 “Kopwe feila ren ewe chanpupu Oifrat fän achökum we ka möni o aopala ikenan lon eu pwangen achau.”
JER 13:5 Iei mine üa feila o aopala ewe achök arun ewe chanpupu Oifrat, usun ewe Samol mi Lapalap a akünö ngeniei.
JER 13:6 Nge mürin chomong rän ewe Samol mi Lapalap a üreniei, “Kopwe feila ren ewe chanpupu Oifrat o angei ewe achök üa ürenuk pwe kopwe aopala.”
JER 13:7 Mürin, üa feila ren ewe chanpupu Oifrat o tuwetä ewe achök seni lon ewe leni ia üa aopala ie. Iwe, üa küna pwe ewe achök a ngauala, esap chüen wor lomotan.
JER 13:8 Mürin, ewe Samol mi Lapalap a kapassefäl ngeniei.
JER 13:9 A apasa, “Iei usun üpwe aükätiu än chon Juta me chon Jerusalem lamalamtekia mi fokun watte.
JER 13:10 Ekei aramas mi ngau, resap mochen aleasochisiei. Ra chök ülöförea le chei mochenin letiper. Ra fel ngeni pwal ekoch kot o angang ngeniir. Iei mine repwe wewe ngeni ei achök mi lomotongau.
JER 13:11 Pun usun echö achök a pacheri wänükün eman aramas, iei usun üa mochen pwe chon Israel me chon Juta meinisin repwe pacheriei. Üa föri ei pwe ir repwe nei aramas üpwe iteüöch rer, aramas repwe pwal mwareitiei o alingaei rer. Nge ir resap mochen aleasochisiei.”
JER 13:12 Iwe, ewe Samol mi Lapalap a üreniei, “Kopwe üreni ekewe aramas pwe iei alon ewe Samol mi Lapalap ewe Koten Israel, ‘Iteiten pör epwe ur ren wain.’ Iwe, repwe ürenuk, ‘Ifa usun, äm aisap silei pwe iteiten pör epwe ur ren wain?’
JER 13:13 Mürin kopwe üreniir pwe ngang ewe Samol mi Lapalap üpwe aünü chon ei fanü meinisin wain tori repwe pulas. Ekewe king ir mwirimwirin Tafit, ekewe souasor, ekewe soufos me chon Jerusalem meinisin repwe ün.
JER 13:14 Mürin üpwe atatakisifengeniir eman ngeni eman, ekewe sam ngeni nöür kewe, usun eman a amökkü eu pör ngeni pwal eu. Üsap tongeer ika achikeer, üsap eäni ümöümöch ngeniir, nge üpwe aroserela.”
JER 13:15 Oupwe rongorong o aü selingemi, ämi chon Juta. Ousap lamalamtekia, pun ewe Samol mi Lapalap a kapas.
JER 13:16 Oupwe asamolu ewe Samol mi Lapalap ämi we Kot me mwen an epwe awarato rochopwak, me mwen pechemi repwe chepetek me won ekewe chuk mi toputop. Oua witiwiti ewe saram, nge i epwe awili ewe saram ngeni toputop me rochokichin rochopwak.
JER 13:17 Nge are ousap mochen aüseling, üpwe chök kechü lemonomon pokiten ämi lamalamtekia. Üpwe kechüangau, nge chönün mesei repwe suputiu, pun nöün ewe Samol mi Lapalap aramas ra oola.
JER 13:18 Iwe, ewe Samol mi Lapalap a üreniei, “Kopwe üreni ewe king me inelapan we pwe repwe tötiu seni ar lenien motun king, pun mwärir mwärin king mi ling a turutiu seni won mökürer.
JER 13:19 Ekewe telinimwen Juta mi nom ör ra tala, nge esap wor eman a nom pwe epwe aüsefäliretä. Chon Juta meinisin ra oola, fokun meinisin ra oola.”
JER 13:20 Jerusalem, kopwe netä o küna chon oputom mi feito seni efeng. Ia ra nom ie ekewe aramas ka wisen tümwünüür, noum kewe aramas ka aingaing wor?
JER 13:21 Met kopwe apasa, are chokewe ka aita ngeniir pwe chiechiom ra liapenuk o nemenuk? Ifa usun, esap cheruk cheuch usun cheuchen fam a cheri eman fefin?
JER 13:22 Nge are ka ekieki lon lelukom, “Pwota ekei feiengau ra toriei?” Pokiten watten om tipis, a fis pwe aramas ra kamwei senuk ufom o achomanauok.
JER 13:23 Ifa usun, eman chon Itiopia a tongeni siwili anüanün ünüchan, ika ewe man itan lepart a tongeni siwili tiketikan? Ika ina, pwal en mi örüni föföringau, ka tongeni föri mine a mürina.
JER 13:24 Iei mine ewe Samol mi Lapalap epwe atoropasok usun asepwäl seni fanüapö a atoropasa pöön wiich.
JER 13:25 Iei usun mine epwe fis ngonuk, iei wisom a aükü ngonuk, pun ka manlükala Kot o lükü ekewe anümwäl. Iei alon ewe Samol mi Lapalap.
JER 13:26 Püsin i epwe särifätä ufom pwe asäwum epwe pwäpwäla.
JER 13:27 A küna om föför mi anioput ngeni. A küna om feila ren ekewe koten ekis won ekewe chukutekison, pwal lon ekewe mälämäl, usun eman mwän a mocheisou ngeni pwülüen chon arun, ika usun eman ätemwänin oris a mochenia ngeni eman liafefin. Feiengauom, en Jerusalem! Ifa ükükün fansoun om kopwe nom lon limengau?
JER 14:1 Iei alon ewe Samol mi Lapalap ngeni Jeremaia usun eu fansoun pwasapwas,
JER 14:2 “Juta a letipeta, an kewe telinimw ra mwatötö. Ekewe aramasen Juta ra kechü lepwül, nge chon Jerusalem ra siö.
JER 14:3 Ekewe aramas tekia ra akünööla nöür chon angang pwe repwe üfüf koluk. Ra feila ren ekewe chönüttu, nge resap künakün koluk. Ra liwinsefäl fän ar kewe pör mi pöön. Ra pwölüela mökürer ren ar apilükingau me rükö.
JER 14:4 Ewe pwül a sangang, pun esap püng üt won ewe fanü. Ekewe chon tanipi ra letipeta o pwölüela mökürer.
JER 14:5 Pwal ewe chian lemäl a likitala apanan, pun esap wor fetil.
JER 14:6 Ekewe aas mi mwacho ra ütä won ungen ekewe chuk, ra mwiengas usun ekewe kolak mi mwacho. Meser a ton, pun esap wor ener fetil.
JER 14:7 Nei aramas ra siö ngeniei o apasa, ‘Äm Samol mi Lapalap, kopwe alisikem usun ka pwon ngenikem, inamwo ika äm föföringau ra atipisikem. Ellet, äm aia tokola fän chomong o tipis ngonuk.
JER 14:8 En chök än chon Israel apilükülük, en chök chon amanauakem lon fansoun riaföü. Pwota ka usun chök eman chon ekis lon ei fanü, pwota ka usun chök eman chon siamü mi chök pwini epwin?
JER 14:9 Pwota ka usun chök eman aramas mi rükö, ika usun chök eman sounfiu esap wor an tufichin amanaua aramas. Nge en äm Samol mi Lapalap ka nom rem, itom a föü wom. Kosap likitikeemila.’”
JER 14:10 Iei alon ewe Samol mi Lapalap fänäsengesin ekei aramas, “Ra fokun sani ar repwe feil seniei, resap tongeni nemeni pecher. Iei mine ngang üsap etiweer. Üpwe chechemeni ar föföringau o apwüngüür pokiten ar kewe tipis.”
JER 14:11 Iwe, ewe Samol mi Lapalap a üreniei, “Kosap tüngorei pwe üpwe afeiöchü ekei aramas.
JER 14:12 Inamwo ika ra echikefel, nge üsap rongorong ar siö. Inamwo ika ra eäni asoren kek me asoren mongö, nge üsap etiweer. Nge üpwe nirela ren maun, ren lengita me mätter.”
JER 14:13 Mürin üa üra, “Ai Kot Samol mi Lapalap, ka silei pwe ekewe soufos ra üreni ekewe aramas pwe esap wor maun, esap pwal wor lengita, pun en kopwe ngeniir kinamwe esap müchüla me lon ei fanü.”
JER 14:14 Iwe, ewe Samol mi Lapalap a üreniei, “Ekewe soufos ra eäni itei lon ar osuni mine a chofana. Üsap akünöör, üsap allük ngeniir, üsap pwal kapas ngeniir. Ra kapas ngenikemi usun künaer mi chofana, ar pwee a lomotongau, pun ra püsin ekiekietä.
JER 14:15 Iei mine ngang ewe Samol mi Lapalap üa apasa fänäsengesin ekewe soufos mi eäni wowo itei lon ar osuni, nge üsap akünöör, ir chokewe mi apasa pwe esap wor maun me lengita epwe tori ei fanü: Üpwe niela ekei soufos ren maun me lengita.
JER 14:16 Nge ekewe aramas ir ra osuni ngeniir repwe ninnila usun chök ekewe soufos. Somär repwe koturulong lon ekewe alen Jerusalem, nge esap wor eman epwe peiaseniir. Ei epwe fis ngeniir meinisin fiti pwülüer me nöür mwän me fefin. Pun üpwe awarato wor liwinin püsin ar föföringau.
JER 14:17 Nge en, Jeremaia, kopwe üreni ekei aramas usun om lolilen o apasa, ‘Amwo chönün mesei epwe suputiu lepwin me lerän, nge esap ükütiu, pun nei aramas ra feiengau ren eu kinas mi alolol, ren eu kawet mi fokun watte.
JER 14:18 Are üa feila ren ekewe mälämäl, üa küna chokewe mi mäla lon maun. Nge are üa tolong lon ewe telinimw, üa küna ekewe mi arap ngeni mäla ren lengita. Ekewe soufos me souasor ra feila lon eu fanü resap silei.’”
JER 14:19 Äm Samol mi Lapalap, ifa usun, ka wesewesen likitala Juta? Ifa usun, ka oput ekewe aramasen Sion? Pwota ka awatakem pwe aisap chüen tongeni pöchökülsefäl? Äm aia ösüküsükü kinamwe, nge esor och mi mürina a torikem. Aia ösüküsükü eu fansoun aipwe pöchökülsefäl, nge a chök fis niuokus watte.
JER 14:20 Äm Samol mi Lapalap, äm aia tipis ngonuk. Aia pwärätä äm föföringau me än äm kewe lewo föföringau.
JER 14:21 Kosap oput äm pokiten itom. Kosap awarato itengau won Jerusalem, ewe leni ia om lenien mot mi fokun ling a nom ie. Kopwe chechemeni om pwon ngenikem, nge kosap atai.
JER 14:22 Ifa usun, a wor eman me lein än chon ekewe mwü kewe anümwäl a tongeni apüngätiu üt? Ifa usun, ekewe läng ra tongeni püsin apüngätiu üt? Äm Kot Samol mi Lapalap, äm aia anomu äm apilükülük womw, pun en ewe mi föri ekei mettoch meinisin.
JER 15:1 Mürin, ewe Samol mi Lapalap a üreniei, “Inamwo ika Moses me Samuel ra ütä mwei o tüngormau ngeniei fän iten ekei aramas, letipei esap kul ngeniir. Kopwe tinirela seni fän mesei o afeilaar.
JER 15:2 Nge are repwe aisinuk, ‘Ia aipwe feila ie?’ kopwe üreniir, ‘Iei alon ewe Samol mi Lapalap: Chokewe mi feil ngeni ar repwe mäla ren mätter repwe mäla ren mätter, chokewe mi feil ngeni ar repwe mäla lon maun repwe mäla lon maun, chokewe mi feil ngeni ar repwe mäla ren lengita repwe mäla ren lengita, nge chokewe mi feil ngeni ar repwe oola repwe oola.’
JER 15:3 Ngang ewe Samol mi Lapalap üpwe awisa rüanü sokun feiengau repwe toriir: Repwe mäla lon maun, ekewe kolak repwe ileela somär, ekewe machang me ekewe manmwacho repwe ocheer o aroserela.
JER 15:4 Üpwe föri pwe repwe och minen eniweniw ngeni chon ekewe mwü meinisin won fanüfan, pokiten mine Manasa nöün Hiskia we mwän a föri me lon Jerusalem, lupwen a kingen Juta.”
JER 15:5 Iei alon ewe Samol mi Lapalap, “Iö epwe tongeekemi, ämi chon Jerusalem, ika iö epwe lolilenäsinikemi? Iö epwe üla o ais usumi?
JER 15:6 Ämi oua likitieila, oua chök sopwela le tokola seniei. Iei mine üa aitiewu pei o afeiengauakemi. Üa chipwangela le pwetete ngenikemi.
JER 15:7 Üpwe söfölükemiila ren efoch söföl mi keang me lon asamalapen ekewe telinimwen ei fanü. Üpwe niela nöümi kewe o arosakemiila, pun ousap ükütiu seni ämi kewe föför mi ngau.
JER 15:8 Üpwe föri pwe ekewe fefin mi mä pwülüer repwe chomong seni ekewe föün pien aroset. Üpwe awarato eman chon kata leoloas, pwe epwe afeiengaua inen ekewe alüal. Üpwe müttir apüngätiu wor riaföü me niuokus watte.
JER 15:9 Neminewe mi nöüni füman mwän, nge ra mäla, a apwangapwangala o kükünüla an ngasangas. An saram a wiliti rochopwak, a säw o itengau. Nge ekewe ekoch mi chüen manau, üpwe föri pwe chon oputer repwe nirela. Ngang ewe Samol mi Lapalap üa kapas.”
JER 15:10 Inei, üa feiengau, pun ka nöünieitiu. Ngang eman aramas unusen chon ei fanü ra anini o afitikoko ngeni. Esap wor eman a tüngor och seniei, üsap pwal liwinimang ngeni eman, nge ir meinisin ra ottekiei.
JER 15:11 Iwe, ewe Samol mi Lapalap a üreniei, “Ellet, üpwe angasok ren eu popun mi mürina. Ellet, üpwe föri pwe chon oputom repwe tütüngor ngonuk lon fansoun feiengau me riaföü.
JER 15:12 Ifa usun, eman aramas a tongeni kupi mächä, ewe mächä ika piras seni efeng?”
JER 15:13 Ewe Samol mi Lapalap a pwal üra, “Üpwe tinato chon oputen nei aramas, repwe uwala wöür me pisekir pwe liaper. Ei epwe fis pokiten ar kewe tipis meinisin ra föri lemenen unusen ewe fanü.
JER 15:14 Üpwe föri pwe repwe angang ngeni chon oputer me lon eu fanü resap silei. Pun ai song a usun chök ekkei mi pulopul tori feilfeilachök.”
JER 15:15 Mürin Jeremaia a apasa, “Ai Samol mi Lapalap, en ka silei mettoch meinisin. Kopwe chechemeniei o alisiei. Fän itei kopwe ngeni chon ariaföüüei chappen ar föför. Lon om mosonotam kosap angei manauei. Kopwe chechemeni pwe üa itengau fän itom.
JER 15:16 Üa iseis lon lelukei om kewe kapas, lupwen ra toriei. Om kapas a fis pwe ai pwapwa, lelukei a meseik ren, pun itom a föü woi, ai Kot Samol mi Unusen Manaman.
JER 15:17 Üsap nom lon mwichen chon kütta ar pwapwa, üsap pwal etiir le meseik. Üa äkäleman won ai pokiten poum a nom woi, pun en ka auraei ren song.
JER 15:18 Pwota ai metek esap ükütiu? Pwota kinasei a fokun momang? Ifa usun, kopwe usun chök eu öüwö mi alichipüngüei, pun kolukun lon ra morotä?”
JER 15:19 Iei mine ewe Samol mi Lapalap a apasa, “Are kopwe liwinsefälitiei, üpwe awisasefäliik pwe kopwe angang ngeniei. Are kopwe apasa mine a aüchea, nge sap mine a lomotongau, kopwe aweniei. Ekewe aramas repwe kul ngonuk, nge en kosap kul ngeniir.
JER 15:20 Iwe, üpwe föri pwe kopwe wewe ngeni eu tit mi pöchökül seni piras ngeni ekei aramas. Ir repwe fiu ngonuk, nge resap tongeni akufuk, pun ngang üa etuk pwe üpwe amanauok o angasok.
JER 15:21 Ngang üpwe amanauok seni lepöün ekewe aramasangau o angasok seni fän nemenien ekewe mi mwänewüs ra kamwöchünuk womw. Ngang ewe Samol mi Lapalap üa kapas.”
JER 16:1 Iwe, ewe Samol mi Lapalap a üreniei,
JER 16:2 “Kosap pwüpwülü, esap pwal wor noum mwän ika noum fefin lon ena sokun leni.
JER 16:3 Üpwe ürenuk mine epwe fis ngeni ekewe mwän me fefin mi uputiu lon ei leni, pwal ngeni ekewe in me sam mi nöüniir me lon ei fanü:
JER 16:4 Repwe mäla ren samau mi afeiengau. Esap wor eman epwe kechü wor, resap pwal peias, nge repwe usun chök kiten mongö won pwül. Repwe mäla lon maun pwal ren lengita, nge ekewe machang me ekewe manmwacho repwe ochei somär.
JER 16:5 Kosap tolong lon imwen chon letipeta, kosap feila rer pwe kopwe kechü o achipeer, pun ngang üa angei seni ekei aramas ai kinamwe, ai tong ellet me ai ümöümöch.
JER 16:6 Iwe, aramas tekia me aramas tekison repwe mäla lon ei fanü. Resap peias, esap pwal wor eman epwe kechüeitiir ika akinasa inisin ika räisöla möküran fän iter.
JER 16:7 Esap wor eman epwe uwato mongö pwe epwe achipa chokewe mi letipeta fän iten ewe mi mäla, inamwo ika i eman sam ika in. Esap pwal wor eman epwe ngeniir ünümer pwe repwe chip.
JER 16:8 Kosap pwal feila lon eu imw ia a fis kametip ie, pwe kopwe mot rer o etiir le mongö o ün.
JER 16:9 Kopwe rongorong mine ngang ewe Samol mi Unusen Manaman, ewe Koten Israel, üa apasa: Üpwe aükätiu kölün mweireir me pwapwa, pwal apwapwan mongön apwüpwülü me lon ei leni me fän mesom lon ränin manauom.
JER 16:10 Iwe, lupwen kopwe üreni ekei aramas ekei kapas meinisin, repwe aisinuk, ‘Pwota ewe Samol mi Lapalap a apwüngala ei sokun feiengau mi watte ngenikem? Met äm föföringau? Met sokun tipis aia föri ngeni ewe Samol mi Lapalap äm we Kot?’,
JER 16:11 mürin kopwe üreniir, ‘Iei alon ewe Samol mi Lapalap: Ei a fis pokiten ämi kewe lewo ra likitieila, pwe repwe angang ngeni pwal ekoch kot o fel ngeniir. Ra likitieila, nge resap aleasochisi ai kewe allük.
JER 16:12 Nge ämi oua fen föri föför mi ngau lap seni ämi kewe lewo. Oua en me chei ülöförean letipan mi ngau, nge ousap fokun aleasochisiei.
JER 16:13 Iei mine üpwe aturukemiiwu seni ei fanü o aturukemiilong lon eu fanü ämi me ämi kewe lewo ousap silei me mwan. Ikenan oupwe angang ngeni pwal ekoch kot lerän me lepwin, pun ngang üsap kirikiröch ngenikemi.’”
JER 16:14 Iei alon ewe Samol mi Lapalap, “Epwe war eu fansoun aramas resap chüen apasa, ‘Mwo manauen ewe Samol mi Lapalap mi emwenawu ekewe aramasen Israel seni lon ewe fanü Isip.’
JER 16:15 Nge repwe apasa, ‘Mwo manauen ewe Samol mi Lapalap mi emwenawu ekewe aramasen Israel seni ewe fanü efeng, pwal seni lon ekewe fanü meinisin ia a asürela ie.’ Pun ngang üpwe aliwinisefälireto ngeni püsin fanüer üa ngeni ar kewe lewo.”
JER 16:16 Iei alon ewe Samol mi Lapalap, “Üpwe tinala chomong chon attau, repwe attaua ekei aramas. Mürin, üpwe tinala chomong chon tapweri man, repwe tapweriir won iteiten chukutekia me chukutekison, pwal me lon pwangen ekewe achau.
JER 16:17 Pun üa küna mettoch meinisin ra föri. Resap tongeni op seniei, ar föför mi ngau esap pwal mon seniei.
JER 16:18 Iwe, üpwe liwini ngeniir fän ruu liwinin ar föföringau me tipis, pokiten ra alimengaua fanüei ren ar kewe uluulun anümwäl esap wor manau lor usun ekewe somä, ra pwal amasoua fanüei ren ar kewe uluulun anümwäl mi anioput.”
JER 16:19 Ai Samol mi Lapalap, en ai pöchökül me imwei imwen maun, en ai lenien op lon fansoun riaföü. Chon ekewe mwü repwe feito reöm seni lesopun fanüfan o apasa, “Esap wor och äm kewe lewo ra fel ngeni, ngei kot mi mwäl, ekewe uluulun anümwäl mi lomotongau.
JER 16:20 Ifa usun, aramas ra tongeni föri püsin ar kot? Nge ika ina, iwe, sap ir kot.”
JER 16:21 Iwe, ewe Samol mi Lapalap a apasa, “Iei mine lon ei fansoun üpwe föri pwe repwe silei ai manaman me ai pöchökül. Mürin repwe silei pwe itei ewe Samol mi Lapalap.”
JER 17:1 Ewe Samol mi Lapalap a apasa, “Än chon Juta tipis a mak ren efoch pen seni mächä, a rup lon leluker ren mesen eföü fau aüchea itan taimont, pwal won mächän ar kewe rongen asor.
JER 17:2 Nöür kewe ra fel mwen ar kewe rongen asor, pwal ngeni ar kewe uluulun ewe anüfefin Asera ünükün iteiten irä mi mwuresires, won ekewe chukutekison,
JER 17:3 pwal won ekewe chuk lon ewe fanü. Iwe, üpwe föri pwe chon oputakemi repwe liapeni wöümi kana me ämi pisek mi aüchea meinisin, pun liwinin ämi tipis oua föriir lemenen unusen fanüemi.
JER 17:4 Oupwe fangatä fanüemi üa ngenikemi, nge ngang üpwe föri pwe oupwe angang ngeni chon oputakemi me lon eu fanü ämi ousap silei. Pun ai song a usun chök ekkei mi pulopul tori feilfeilachök.”
JER 17:5 Ewe Samol mi Lapalap a pwal apasa, “A anümamau eman aramas mi anomu an apilükülük won aramas o lükü pöchökülen aramas, nge lelukan a rik seniei.
JER 17:6 A wewe ngeni efoch iräkis lon fanüapö. Esap fokun tori och feiöch. Epwe nom lon ekewe leni mi pwasapwas me lon ewe fanüapö, lon eu fanü mi wor salt lon, eu fanü esap so.
JER 17:7 A feiöch eman aramas mi lükü ewe Samol mi Lapalap o anomu an apilükülük won.
JER 17:8 A wewe ngeni efoch irä mi fot unupen eu chanpupu a apwükawu waran ngeni ewe koluk, nge esap niuokus lupwen pwichikar a tori, pun chön kana ra chök arauarau. Esap öürek lon fansoun pwasapwas, pun esap ükütiu le ua.
JER 17:9 Letipen aramas a fokun atuputup lap seni mettoch meinisin, a unusen ingau. Iö a tongeni weweiti?
JER 17:10 Ngang ewe Samol mi Lapalap üa atittina ekiekin aramas o sotuni leluker, pwe üpwe ngeni iteiten eman me eman aükükün lapalapen manauan me uän an föför.”
JER 17:11 Usun ewe machang itan patrik a aloppa sokul, nge esap püsin sokulun, iei usun ätewe mi pisekisekila fän pwüngingau. Lukalapen fansoun manauan wöün epwe pöüt seni, nge lesopolan manauan epwe eman mi umwes.
JER 17:12 Ach imwenfel a wewe ngeni än king lenien mot mi fokun ling, a tekia seni lepoputan.
JER 17:13 Ai Samol mi Lapalap, en än chon Israel apilükülük. Meinisin mi likitukela repwe säw, nge chokewe mi kul senuk epwe mak iter lepwül, pokiten ra likitala ewe Samol mi Lapalap ewe puächen kolukun manau.
JER 17:14 Ai Samol mi Lapalap, kopwe apöchökülaei, pwe üpwe wesewesen pöchökül. Kopwe amanauaei pwe üpwe fokun manau, pun en ewe üa mwareiti.
JER 17:15 Nengeni, ra üreniei, “Ikafan alon ewe Samol mi Lapalap? Epwe föri usun mine a apasa.
JER 17:16 Üsap pesee ngonuk pwe kopwe awarato ingau, üsap pwal älälei ewe ränin feiengau, en ka silei usun. Mine üa apasawu a pwäla fän mesom.
JER 17:17 Kosap eu minen eniweniw ngeniei, en ai lenien op lon fansoun feiengau.
JER 17:18 Chokewe mi ariaföüüei repwe küna säw, nge kosap mwüt ngeniei pwe üpwe küna säw. Kopwe arüköör, nge kosap arüköei. Kopwe awarato feiengau wor o fokun atatakisiir.
JER 17:19 Iei alon ewe Samol mi Lapalap ngeniei, “Kopwe feila o ütä ünükün ewe Asamalapen Aramas, ewe ia ekewe kingen Juta ra tolong o towu me ie, o aronga ai kapas ngeniir. Mürin kopwe feila ren ekewe asamalapen Jerusalem meinisin.
JER 17:20 Iwe, kopwe üra, ‘Oupwe aüselinga alon ewe Samol mi Lapalap, ämi kewe kingen Juta me chon Juta meinisin, pwal ämi chon Jerusalem mi tolong lon ekewe asamalap.
JER 17:21 Iei alon ewe Samol mi Lapalap: Oupwe afäli manauemi. Ousap mwärei och mettoch lon ewe ränin sapat ika uwalong och lon ekewe asamalapen Jerusalem.
JER 17:22 Ousap mwäreewu och seni lon imwemi lon ewe ränin sapat, ousap pwal föri och angang, nge oupwe pinini pinin ewe ränin sapat, usun üa allük ngeni ämi kewe lewo.
JER 17:23 Nge ir resap rongorong ika aüseling. Ra ülöförea, pun resap rongorong o angei ai öüröür.’”
JER 17:24 Iei alon ewe Samol mi Lapalap, “Nge are ämi oupwe aüselingaei, are ousap uwalong och lon asamalapen ei telinimw lon ewe ränin sapat, are oupwe pinini pinin ewe ränin sapat pwe ousap föri och angang lon,
JER 17:25 mürin ämi kewe king repwe tolong lon asamalapen ei telinimw o mot won än Tafit lenien motun king. Repwe wawa woken fiti oris, ir me nöür kewe nöüwis, ekewe chon Juta me chon Jerusalem. Nge ei telinimw epwe so tori feilfeilachök.
JER 17:26 Iwe, ekewe aramas repwe feito seni ekewe telinimwen Juta me ekewe leni pwelin ünükün Jerusalem, seni ewe fanü Peniamin me ewe fanü Sefela, seni ewe fanü mi chukuchukutä me ewe fanü Nekep. Repwe uwato lon imwenfelin ewe Samol mi Lapalap asoren kek me sokun asor, asoren mongö me apach mi pwokus, pwal ekewe asoren kilisou.
JER 17:27 Nge are ousap mochen aüselingaei, are ousap pinini pinin ewe ränin sapat, nge oua mwärei och o tolong lon asamalapen Jerusalem lon ewe ränin sapat, mürin üpwe aküw eu ekkei pwe epwe kenala asamalapen ei telinimw, pwal ekewe imwen king, nge esap wor eman a tongeni kunuela.”
JER 18:1 Iwe, ewe Samol mi Lapalap a kapas ngeni Jeremaia,
JER 18:2 “Kopwe feila lon imwen ewe chon föri sepi seni pwül. Ikenan üpwe asile ngonuk ai kewe kapas.”
JER 18:3 Iei mine üa feila ngeni imwen ewe chon föri sepi seni pwül, ia a angang ie ren an we willen föri sepi.
JER 18:4 Nge ewe sepi a auluulu seni pwülüpar a ngauala me lepöün. Iei mine ewe chon föri sepi a förisefäli pwal eu sepi seni, usun mine a öch me ren.
JER 18:5 Mürin ewe Samol mi Lapalap a üreniei,
JER 18:6 “Ämi chon Israel, ifa usun, üsap tongeni föri ngenikemi usun mine ewe chon föri sepi a föri? Nengeni, usun ewe pwülüpar a nom lepöün ewe chon föri sepi, iei usun ämi chon Israel oua nom lepei.
JER 18:7 Fän ekoch üa apasa usun eu mwichen aramas ika chon eu mwü pwe üpwe üttiretä, kupiretiu o aroserela.
JER 18:8 Nge are chon ewe mwü üa kapas usun ra kul seni ar föför mi ngau, ngang üpwe siwili ai ekiekin afeiengaueer.
JER 18:9 Iwe, fän ekoch üa apasa usun eu mwichen aramas ika chon eu mwü, pwe üpwe aüretä o fotukiir.
JER 18:10 Nge are chon ewe mwü ra föri föför mi ngau me fän mesei, are resap aleasochis ngeniei, mürin üpwe siwili ai ekiekin afeiöchüür.
JER 18:11 Iei mine kopwe üreni ekewe re Juta me chon Jerusalem, ‘Iei alon ewe Samol mi Lapalap: Nengeni, üpwe awarato feiengau ngenikemi o ekiekin ü ngenikemi. Ämi meinisin oupwe kul seni ämi föför mi ngau o siwili alemi me ämi kewe föför.’
JER 18:12 Nge ir ra apasa, ‘Esap wor lomotan. Äm aipwe chök chei püsin äm ekiek me ülöförean lelukem mi ngau.’”
JER 18:13 Iei mine ewe Samol mi Lapalap a apasa, “Oupwe ais me lein chon ekewe mwü ika ra rongorong usun ei sokun föför me mwan. Ekewe chon Israel ra föri och föför mi fokun ngau.
JER 18:14 Ifa usun, ewe snow won ewe chuk Lepanon a morola? Ifa usun, ekewe öüwö mi patapat ra puwu seni ewe chuk repwe pwasatä?
JER 18:15 Nge nei aramas ra fen manlükieila. Ra keni apach mi pwokus ngeni ekewe uluulun anümwäl. Ra chepetek lon ar kewe al, pun resap chüen fetal won ekewe alen lom, nge ra rikila ngeni pwal ekoch al lükün ewe alelap.
JER 18:16 Ra ataela püsin fanüer, pwe aramas repwe turunufasei tori feilfeilachök. Meinisin mi pwerela ünükün ra fokun mairü ren mine ra küna o alefechefechi mökürer.
JER 18:17 Üpwe atoropaseer me fän mesen chon oputer usun ewe asepwälin ötiu a atoropasa mettoch. Lon ränin ar feiengau üpwe kulu söküri ngeniir, nge sap mesei.”
JER 18:18 Mürin, ekewe aramas ra apasa, “Ousipwe rawangauei Jeremaia. Pun a chüen wor ekewe souasor mi aiti ngenikich ekewe allük, ika ekewe soutipachem mi öüröürakich, ika ekewe soufos mi afalafalakich. Ousipwe atipisi, nge sisap afäli mine a apasa.”
JER 18:19 Iei mine üa iotek, “Ai Samol mi Lapalap, kose mochen kopwe aüselingaei o rongorong mine ekewe chon atipisiei ra apasa usi.
JER 18:20 Ifa usun, föför mürina epwe liwin ngeni ngau? Nge ir ra tuw eu pwang fän itei. Kopwe chechemeni ai ütä fän mesom, pwe üpwe kapas mürina fän iter o akulu seniir om lingeringer.
JER 18:21 Nge iei kopwe asechalong nöür kewe lon lengita, kopwe likitiir pwe repwe mäla lon maun. Ekewe fefin repwe lipichsefäl, esap pwal chüen wor nöür. Ekewe mwän repwe mäla ren mätter, ekewe alüal repwe mäla lon maun.
JER 18:22 Aramas repwe rongorong eu puchörün niuokus seni lon imwer kewe, lupwen kopwe müttir tinato wor eu mwichen chon angei pisek fän pöchökül. Pun ra tuw eu pwang pwe üpwe turulong lon, ra pwal soni eu likatup pwe pechei epwe fif lon.
JER 18:23 Nge en, ai Samol mi Lapalap, ka silei usun ar rawangauaei, pwe repwe niei. Kosap amusala ar föföringau, kosap pwal amoela ar tipis. Repwe tur o kuf, kopwe ukun ngeniir ar föför lon fansoun om song.”
JER 19:1 Iei alon ewe Samol mi Lapalap, “Kopwe feila o kamö eu pör mi för seni pwül. Mürin oupwe mwinela me ekoch lein ekewe souakomwen ekewe aramas, pwal ekoch souasor chinlap.
JER 19:2 Oupwe towu me lon ewe Asamalapen Mökkün Sepi o feila lon ewe lemolun Hinom. Ikenan kopwe asile ngeniir ekewe kapas üpwe ürenuk.
JER 19:3 Kopwe apasa, ‘Oupwe rongorong, ämi kingen Juta me ämi chon Jerusalem, usun mine ngang ewe Samol mi Unusen Manaman ewe Koten Israel üa apasa: Üpwe awarato eu sokun feiengau won ei leni, pwe iteiten eman me eman mi rongorong usun epwe mairü ren.
JER 19:4 Üpwe föri ei, pun ekewe aramas ra likitieila. Ra apiningaua pinin ei leni ren ar keni apach mi pwokus ngeni pwal ekoch kot, sokun kot ir me ar kewe lewo pwal ekewe kingen Juta resap sileer. Ra aura ei leni ren chan chokewe esap wor ar tipis.
JER 19:5 Ra pwal senätä rongen asor won ekewe leni tekia fän iten ewe anü Paal, pwe repwe keni nöür ät pwe ar asoren kek ngeni. Ei üsap allük ngeniir, esap pwal tolong lon ai ekiek.
JER 19:6 Iei mine ngang ewe Samol mi Lapalap üa apasa: Epwe war ewe fansoun, pwe ei leni esap chüen iteni Tofet ika lemolun Hinom, ngei epwe le iteni lemolun Ninni.
JER 19:7 Iwe, lon ei leni üpwe atai än chon Juta me chon Jerusalem akot. Üpwe föri pwe ekewe aramas repwe kuf ren chon oputer o mäla lon maun. Üpwe aochocha ngeni ekewe machang me ekewe manmwacho ekewe somä.
JER 19:8 Üpwe ataela ei telinimw pwe epwe eu mettoch aramas repwe turunufasei. Meinisin mi pwerela ünükün repwe mairü o turunufasei pokiten ekewe feiengau meinisin ra tori.
JER 19:9 Iwe, üpwe föri pwe repwe ochei fituken nöür kewe ät me nengin, repwe pwal en me ochei fituken chon arun. Ei epwe fis, lupwen chon oputer repwe pwelifeili ewe telinimw fän pisekin maun, nge ir repwe fokun riaföü pokiten ar ariaföüür o mochen nirela.’
JER 19:10 Mürin, kopwe amökkü ewe pör me fän mesen ekewe mwän mi etuk
JER 19:11 o üreniir, ‘Iei alon ewe Samol mi Unusen Manaman: Usun eman a amökkü eu pör mi för seni pwül, nge esap wor eman epwe tongeni achufengenisefäli, iei usun üpwe atai ei telinimw o afeiengaua ekei aramas. Iwe, aramas repwe peiaseni ekewe somä lon Tofet, pun esap chüen wor lenien peias ekis meinisin.
JER 19:12 Iei usun mine üpwe föri ngeni ei leni, pwal ngeni chokewe mi imweimw lon. Üpwe föri pwe ei telinimw epwe usun chök Tofet.
JER 19:13 Ekewe imw lon Jerusalem pwal imwen ekewe kingen Juta repwe limengau usun ewe leni Tofet, fokun ekewe imw meinisin aramas ra keni apach mi pwokus wor ngeni ekewe fün läng, ra pwal ninätiu asoren ün ngeni pwal ekoch kot.’”
JER 19:14 Mürin, Jeremaia a liwinto seni Tofet, ewe ia ewe Samol mi Lapalap a tinala ie pwe epwe osuni. Iwe, a ütä lon ewe leni lükün imwen ewe Samol mi Lapalap o üreni ekewe aramas meinisin,
JER 19:15 “Iei alon ewe Samol mi Unusen Manaman ewe Koten Israel: Üpwe awarato won ei telinimw, pwal won ekewe telinimw ünükün ekewe feiengau meinisin üa fen apwüngala fän iter, pun chon ekei telinimw ra ülöförea, resap mochen aüselinga ai kewe kapas.”
JER 20:1 Iwe, ewe souasor Pasur nöün Imer we mwän, i ewe meilapen imwen ewe Samol mi Lapalap, a rongorong än Jeremaia osuni usun ekei mettoch.
JER 20:2 Mürin, Pasur a akünöü eman pwe epwe wichi ewe soufos Jeremaia, epwe anükü pechen lefilen irä o anomu ünükün ewe Asamalapen Peniamin me asan me lon imwen ewe Samol mi Lapalap.
JER 20:3 Iwe, sorotan ewe rän, lupwen Pasur a amusawu Jeremaia seni lefilen ekewe irä, Jeremaia a üreni Pasur, “Ewe Samol mi Lapalap esap chüen aita ngonuk Pasur, ngei epwe aita ngonuk ‘Niuokus watte a nom pwelin ünükum’.
JER 20:4 Pun iei alon ewe Samol mi Lapalap: Üpwe föri pwe kopwe eu niuokus watte ngeni püsin en, pwal ngeni chiechiom meinisin. Ir repwe mäla ren nöün chon oputer ketilas, nge en kopwe nenengeniir. Üpwe asechalong chon Juta meinisin fän nemenien ewe kingen Papilon. I epwe emwenala ekoch Papilon, nge ekoch epwe nirela.
JER 20:5 Üpwe pwal ngeni chon oputer wöün ei telinimw meinisin, än chon ei telinimw win me pisekir meinisin ra aücheani, pwal än ekewe kingen Juta pisek mi aüchea meinisin. Ir repwe angei ekewe pisek meinisin fän pöchökül pwe liaper o uweerela Papilon.
JER 20:6 Nge en Pasur me chon leimwom meinisin, oupwe oola. Oupwe feila Papilon o mäla ikenan, oupwe pwal peias ikenan, ämi me chiechiom kewe meinisin, chokewe ka kapas chofana le osuni ngeniir.”
JER 20:7 Ai Samol mi Lapalap, ka echimwaei, nge ngang üa chimw reöm, en ka pöchökül seniei, en ka akufuei. Üa uretakir iteiten rän, aramas meinisin ra turunufaseei.
JER 20:8 Pun fansoun meinisin lupwen üa kapas, üa wisen leüömong le kapas o üra, “Angangen mwänewüs me kata!” Ai Samol mi Lapalap, aramas ra ämängauaei o turunufaseei iteiten rän, pun üa asilefeili om kapas.
JER 20:9 Nge are üa apasa, “Üsap chüen föüni iten ewe Samol mi Lapalap ika kapas fän itan,” mürin om kapas a usun chök ekkei mi kü me lon lelukei, a pwourur me lechüi. Üa resin apwosalong, nge üsap chüen tongeni.
JER 20:10 Üa rongorong möngününgünün chomong aramas, “Niuokus watte a nom ekis meinisin. Ousipwe aturu i, ousipwe aturu i.” Pwal chiechiei kewe meinisin ra witiwiti ai üpwe turula. Ra apasa, “Eli epwe tup, mürin sipwe liapeni o ngeni chappen an föför.”
JER 20:11 Nge en, ai Samol mi Lapalap, ka nom rei usun chök eman sounfiu mi pöchökül. Iei mine ekewe chon ariaföüüei repwe chepetek, resap tongeni akufuei. Repwe fokun säw, pun esap pwönüetä ar mochen. Ar itengau esap tongeni manlüküla tori feilfeilachök.
JER 20:12 Ai Samol mi Unusen Manaman, ka sotuni ekewe chon pwüng o küna leluker me ekiekir. Kopwe mwüt ngeniei ai üpwe küna om kopwe ngeni chon oputaei chappen ar föför, pun üa likiti ngonuk pwe kopwe peniei.
JER 20:13 Oupwe köl ngeni ewe Samol mi Lapalap, oupwe mwareiti i. Pun a angasa manauen ekewe chon mwelele seni ekewe chon föföringau.
JER 20:14 Epwe anümamau ewe rän üa uputiu lon. Esap feiöch ewe rän inei a nöünieitiu lon.
JER 20:15 Epwe anümamau ewe aramas mi apwapwai semei, lupwen a uwei ewe pworaus ngeni o apasa, “Eman noum ät a upu ngonuk.”
JER 20:16 Amwo ewe aramas epwe wewe ngeni ekewe telinimw ewe Samol mi Lapalap a ataarala, nge esap eäni tong. Amwo epwe rongorong puchörün metek lesosor me kökkön maun leoloas,
JER 20:17 pun esap nieila me lon letipen inei, pwe letipen inei epwe peiasei.
JER 20:18 Pwota üa towu seni letipen inei, pwe üpwe chök riaföü me letipeta o asopwala ränin manauei fän säw?
JER 21:1 Iwe, ewe king Setekia a tinala Pasur nöün Malkia we mwän me ewe souasor Sefania nöün Maseia we mwän ren Jeremaia, pwe repwe üreni,
JER 21:2 “Kose mochen kopwe kapas ngeni ewe Samol mi Lapalap fän item. Pun Nepukatnesar ewe kingen Papilon a maun ngenikem. Eli ewe Samol mi Lapalap epwe föri eu manaman fän item o föri pwe Nepukatnesar epwe kul senikem.”
JER 21:3 Mürin Jeremaia a üreniir,
JER 21:4 “Iei usun mine oupwe üreni Setekia, ‘Iei alon ewe Samol mi Lapalap ewe Koten Israel: Üpwe akufu noum kewe sounfiu mi maun ngeni ewe kingen Papilon me nöün kewe sounfiu. Üpwe ionifengeni än noum kewe sounfiu pisekin maun lukalapen ei telinimw.
JER 21:5 Püsin ngang üpwe maun ngenikemi lon ai song, lon ai chou me lon ai lingeringer mi fokun watte ren pei mi manaman o aköüpöü.
JER 21:6 Üpwe nifengeni aramasen ei telinimw me man. Repwe mäla ren eu mätter mi watte.
JER 21:7 Mürin, üpwe föri pwe en Setekia ewe kingen Juta fiti noum kewe nöüwis me aramasen ei telinimw, ir ekewe mi chüen manau seni mätter, seni maun me lengita, oupwe sechilong lepöün Nepukatnesar ewe kingen Papilon, pwal lepöün chon oputemi mi mochen angei manauemi. Nepukatnesar epwe nikemiila, nge esap tongeekemi ika achikakemi ika ümöümöch ngenikemi. Ngang ewe Samol mi Lapalap üa kapas.’”
JER 21:8 Mürin ewe Samol mi Lapalap a üreniei pwe üpwe kapas ngeni ekewe aramas, “Oupwe rongorong! Ngang ewe Samol mi Lapalap, üa mwüt ngenikemi pwe oupwe filätä lefilen ewe al mi ale ngeni manau me ewe al mi ale ngeni mäla.
JER 21:9 Chokewe mi nomotiu lon ei telinimw repwe mäla ren maun, ren lengita pwal ren mätter. Nge chokewe mi towu seni ei telinimw o fangatä ngeni ekewe chon Papilon mi pwelifeili ei telinimw fän pisekin maun repwe manau, repwe chök kütta en me püsin manauan.
JER 21:10 Üa fen apwüngala pwe üpwe ataala ei telinimw, nge üsap achika. Epwe oolong lepöün ewe kingen Papilon, iwe, epwe kenala. Ngang ewe Samol mi Lapalap üa kapas.”
JER 21:11 Iwe, ewe Samol mi Lapalap a akünöüei pwe üpwe üreni chon leimwen ewe kingen Juta, “Oupwe aüselinga alon ewe Samol mi Lapalap,
JER 21:12 ämi ekewe mwirimwirin Tafit: Oupwe eäni kapwüng fän wenechar iteiten rän, oupwe angasa ekewe mi riaföü seni ekewe chon ariaföüür. Pun are ousap föri ei, ai lingeringer epwe kü usun ekkei esap tongeni kunula, pokiten ämi föföringau.
JER 21:13 Ngang üpwe ü ngenikemi, ämi chon Jerusalem mi imweimw lon ewe lemol won ewe achau mi sonosonöch, ämi chokewe mi apasa, ‘Iö epwe tongeni feito o mauneekich, ika iö epwe tongeni tolong lon leniach?’
JER 21:14 Üpwe apwüngükemi fänäsengesin ämi föför. Üpwe aküw eu ekkei lon ämi kewe wöllap, epwe kenala meinisin mine a nom ünükün. Ngang ewe Samol mi Lapalap üa kapas.”
JER 22:1 Iei alon ewe Samol mi Lapalap ngeniei, “Kopwe feitiu lon imwen ewe kingen Juta o apasa ikenan ekei kapas,
JER 22:2 ‘Oupwe rongorong alon ewe Samol mi Lapalap, en kingen Juta mi mot won än Tafit lenien motun king, pwal noum kewe nöüwis me ekewe aramasen Jerusalem.
JER 22:3 Iei alon ewe Samol mi Lapalap: Oupwe föri mine a wenechar me pwüng o angasa ewe mi riaföü seni ewe chon ariaföüü. Ousap föri mine a ngau ika ariaföüü ewe chon ekis, ewe mi mäsen me ewe fefin mi mä pwülüan, ousap pwal niela eman esap wor an tipis lon ei leni.
JER 22:4 Pun are oupwe fokun aleasochisi ai kei kapas, mürin ekewe mwirimwirin Tafit repwe sopwela le wiseni ewe wisen king. Repwe tolong me lon asamalapen ei imw, ir me nöür kewe nöüwis me nöür aramas fän war woken me oris.
JER 22:5 Nge are ousap aleasochisi ekei kapas, üa püsin akapelüei pwe ei imwen king epwe wiliti eu imw mi tala. Ngang ewe Samol mi Lapalap üa kapas.’
JER 22:6 Pun iei alon ewe Samol mi Lapalap fänäsengesin imwen ewe kingen Juta, ‘En ka mürina usun ewe fanü Kiliat me rei, ika usun ungen ewe chuk Lepanon, nge üpwe fokun föri pwe kopwe wiliti eu fanüapö, ika eu telinimw esap so.
JER 22:7 Üpwe tinala chon kata, repwe ataok iteiten eman me eman fän an pisekin kata. Repwe pöküela om kewe irä setar mi fokun mürina o atururolong lon ekkei.
JER 22:8 Mürin aramas seni chomong mwü repwe pwerela lükün ei telinimw o aisfengen lefiler: Pwota ewe Samol mi Lapalap a föri ei sokun föför ngeni ei telinimw mi lapalap?
JER 22:9 Iwe, repwe pälüeni: Pun ra likitala ewe pwon än ewe Samol mi Lapalap ar we Kot o fel ngeni pwal ekoch kot o angang ngeniir.’”
JER 22:10 Ämi aramasen Juta, ousap kechüeiti ika letipeta usun ewe king Josia, ätewe mi mäla. Nge oupwe kechüangaueiti Joahas nöün we, ätewe mi oola, pun esap chüen liwinsefäl o küna poputän fanüan.
JER 22:11 Pun iei alon ewe Samol mi Lapalap fänäsengesin Joahas ewe kingen Juta nöün Josia we mwän, ätewe mi siwili saman we le nemenem, “A feila seni ei leni, nge esap fokun chüen liwinsefäl.
JER 22:12 Epwe mäla lon ewe leni ia a oola ie, nge esap fokun chüen künasefäli ei fanü.”
JER 22:13 Feiengauen ätewe mi aüetä imwan fän pwüngingau o föri an kewe rumwen won fän rikirik, a angangamwäli chon arun, nge esap ngeniir liwinir.
JER 22:14 Feiengauen ätewe mi apasa, “Üpwe aüetä eu püsin imwei mi watte fiti rumwen won mi wämong.” Iwe, a föri asammwachon imwan, a etippa ngeni pappen ewe irä setar o peiniti ngeni peinit mi par.
JER 22:15 Ifa usun, ka ekieki pwe ka king pokiten chomongun om kewe irä setar? Semom we a mongö o ün, a pwal föri mine a wenechar o pwüng. Iei mine a fefeitä lon manauan.
JER 22:16 A peni ekewe mi wöüngau me mwelele lon kapwüng, iei mine a fefeitä. Ifa usun, esap pwärätä pwe a sileei ren ei sokun föför?
JER 22:17 Nge en ka chök ekieki usun om kütta win fän rikirik. Ka niela chokewe esap wor ar tipis o föri angangen ariaföü me mwänewüs ngeni noum aramas. Ewe Samol mi Lapalap a kapas.
JER 22:18 Iei mine ewe Samol mi Lapalap a apasa fän äsengesin Jehoiakim ewe kingen Juta nöün Josia we mwän, “Aramas resap kechüeiti, lupwen epwe mäla, o üra, ‘Woko pwi’ ika ‘Wole mongeei.’ Resap kechüeiti o apasa, ‘Woko äm samol’ ika ‘Woko äm king.’
JER 22:19 Aramas repwe peiaseni usun ar peiaseni eman aas, repwe etekenawu o aturawu lükün asamalapen ewe telinimw Jerusalem.”
JER 22:20 Ämi aramasen Jerusalem, oupwe feitä won ewe chuk Lepanon o puchör, oupwe alapatä mweliemi lon Pasan o siö me won ekewe chukun Moap, pun peliemi meinisin ra kuf.
JER 22:21 Üa kapas ngenikemi, lupwen oua chüen pisekisek, nge oua üra, “Aisap mochen aüseling.” Iei lapalapemi seni me lom, pwe ousap aleasochis ngeni ai kewe kapas.
JER 22:22 Asepwäl epwe pönala nöümi kewe chon emwen meinisin, nge peliemi kewe repwe oola. Mürin oupwe säw o itengau pokiten ämi kewe föföringau meinisin.
JER 22:23 Ämi mi nom won ewe chuk Lepanon o imweimw imwesetar, oupwe fokun ngüngü, lupwen cheuch a cherikemi, eu cheuch usun cheuchen fam a cheri eman fefin.
JER 22:24 Iei alon ewe Samol mi Lapalap ngeni Jehoiachin ewe kingen Juta nöün Jehoiakim we mwän, “Mwo manauei, inamwo ika kopwe wewe ngeni efoch ringen pwau mi nom won pöüifichi, üpwe chök üttukowu
JER 22:25 o asechukolong lepöün chokewe mi mochen angei manauom, lepöün chokewe ka niuokusitiir, fokun lepöün Nepukatnesar ewe kingen Papilon me nöün kewe sounfiu.
JER 22:26 Üpwe säsikemiila me inom mi nöünuk lon eu fanü ewe ia ousap uputiu me ie, iwe, oupwe mäla ikenan.
JER 22:27 Nge ewe fanü oua positi, ousap fokun liwiniti.”
JER 22:28 Ifa usun, ei mwän Jehoiachin esap wewe ngeni eu pör mi mök o pöütüla, esap wor eman a mochen eäni? Pwota i me nöün kana ra oola lon eu fanü resap sisilei?
JER 22:29 Ämi chon ei fanü, ämi chon ei fanü, ämi chon ei fanü, oupwe rongorong än ewe Samol mi Lapalap kapas,
JER 22:30 “Oupwe makeetiu pwe ei mwän esap wor nöün, i eman mwän esap fefeitä lon ränin manauan. Pun esap wor eman mwirimwirin epwe king o siwili Tafit le nemenem lon Juta. Ngang ewe Samol mi Lapalap üa kapas.”
JER 23:1 Iei alon ewe Samol mi Lapalap, “Feiengauen ekewe chon nemenem mi niela o atoropasa nei aramas.”
JER 23:2 Iei usun mine ewe Samol mi Lapalap ewe Koten Israel a apasa fän äsengesin ekewe chon nemenem mi wisen tümwünü nöün aramas, “Oua atoropasa nei aramas o asürela, nge ousap tümwünüür. Nengeni, üpwe apwüngükemi fän iten ämi föföringau.
JER 23:3 Nge üpwe achufengeni chokewe mi chüen manau me lein nei aramas seni ekewe fanü meinisin ia üa asürela ie. Üpwe emwenisefälireto ngeni lenier, repwe nöünöütiu o chomongola.
JER 23:4 Üpwe awisa chon nemenem repwe tümwünüür. Resap chüen niuokus ika rükö, esap pwal wor eman epwe malechela. Ngang ewe Samol mi Lapalap üa kapas.”
JER 23:5 Iei alon ewe Samol mi Lapalap, “Nengeni, epwe war ewe fansoun üpwe seikätä seni mwirimwirin Tafit efoch ‘Palan mi pwüng’, epwe king o nemenem fän tipachem, epwe föri mine a wenechar o pwüng me lon ewe fanü.
JER 23:6 Lon ränin manauan, chon Juta repwe küna manau, nge chon Israel repwe nom fän kinamwe. Iwe, iei ewe it epwe iteni, ‘Ewe Samol mi Lapalap ach pwüng.’”
JER 23:7 Iei alon ewe Samol mi Lapalap, “Nengeni, epwe war ewe fansoun pwe aramas resap chüen eäni ei akapel, ‘Mwo manauen ewe Samol mi Lapalap mi emwenawu ekewe aramasen Israel seni ewe fanü Isip,’
JER 23:8 nge repwe eäni ei akapel, ‘Mwo manauen ewe Samol mi Lapalap mi emwenawu ekewe mwirimwirin Israel seni ewe fanü efeng me ekewe fanü meinisin ia a asürela ie.’ Mürin repwe nom lon poputän fanüer.”
JER 23:9 Iei än Jeremaia kapas fänäsengesin ekewe soufos: Letipei a tatakis, unusen inisi a chechech. Ngang üa usun chök eman mwän mi pulas, usun eman mi puchala ren wain pokiten ewe Samol mi Lapalap me an kewe kapas mi pin.
JER 23:10 Ewe fanü a ur ren chon lisowu. Ekewe soufos ra chök föri föför mi ngau o aeangauei ar manaman. Pokiten ewe anümamau ewe fanü a sangang, nge än ekewe man lenien mongö fetil ra pwasala.
JER 23:11 Iei alon ewe Samol mi Lapalap, “Ekewe soufos me souasor resap aleasochis ngeniei. Üa fen küna ar föföringau lon imwei imwenfel.
JER 23:12 Iei mine ar kewe al ra fetal won repwe mitimit o rochopwak. Ngang üpwe föri pwe repwe chepetek o turula. Üpwe awarato wor feiengau lupwen fansoun üpwe apwüngüür. Ngang ewe Samol mi Lapalap üa kapas.
JER 23:13 Üa küna än ekewe soufosun Samaria tipis: Ra osuni fän iten ewe anü Paal o atokala nei aramasen Israel.
JER 23:14 Nge üa küna ekewe soufosun Jerusalem, pwe ra fen ngau seniir. Ra föri föförün lisowu o eäni kapas chofana. Ra alisätä ekewe aramas lon ar föföringau, iei mine esap wor eman a kul seni an föför mi ngau. Ir meinisin ra ngau ngeniei usun chök ekewe aramasen Sotom me Komora.
JER 23:15 Iei mine ngang ewe Samol mi Unusen Manaman üa apasa fänäsengesin ekewe soufosun Jerusalem: Üpwe amongö ngeniir mongö mi maras o aünü ngeniir koluk mi poison, pun ra achöfetalei ar föförün tipis lemenen unusen ewe fanü.”
JER 23:16 Iei alon ewe Samol mi Unusen Manaman ngeni ekewe aramasen Jerusalem, “Ousap aüselinga än ekewe soufos kapas, ir ätekewe mi osuni ngenikemi pwe oupwe apilükülük mwäl. Ra fos usun künaer seni püsin ar ekiek, nge sap fän aloi.
JER 23:17 Ra kapasfochofoch ngeni chokewe resap mochen aüselinga aloi, ‘Oupwe feiöch.’ Nge ngeni chokewe mi ülöförea lon leluker ra apasa, ‘Esap wor och feiengau epwe torikemi.’”
JER 23:18 Nge iö me lein ekewe soufos a nom lon än ewe Samol mi Lapalap mwichen pwüngüpwüng, pwe epwe küna o rongorong än Kot kapas? Ika iö a afäli an kapas o aüselinga?
JER 23:19 Nengeni, än ewe Samol mi Lapalap lingeringer a usun chök eu mölümöl, usun eu ewiniär mi märäkukulfetal won möküren ekewe aramasangau.
JER 23:20 Än ewe Samol mi Lapalap song esap kul tori epwe afisi o apwönüetä mine a ekiekin föri. Lon ekewe fansoun repwe feito oupwap weweöchiti.
JER 23:21 Iei alon ewe Samol mi Lapalap, “Üsap tini ekewe soufos, nge ra fen feila. Üsap kapas ngeniir, nge ra fen osuni.
JER 23:22 Nge are repwe nom lon ai mwichen pwüngüpwüng, mürin repwe tongeni asilefeili ai kewe kapas ngeni nei kewe aramas, repwe pwal tongeni akuluur seni ar kewe lapalap mi ngau, pwal seni ar kewe föför mi ngau.
JER 23:23 Ifa usun, ngang eman Kot mi arap chök, nge üsap pwal eman Kot mi nom toau?
JER 23:24 Ifa usun, eman aramas a tongeni op lon leni mi monomon, pwe üsap tongeni küna? Ifa usun, üsap aura läng me fanüfan?
JER 23:25 Üa rongorong mine ekewe soufos mi osuni mine a chofana fän itei ra apasa, ir mi üra pwe üa fos ngeniir lon ar tan.
JER 23:26 Ifa ükükün fansoun än ekewe soufos atoka nei aramas ren ar osuni chofana won mine ra püsin ekiekietä.
JER 23:27 Ra ekieki pwe nei aramas repwe manlükieila ren ar apworausafeili leir ar kewe tan, usun ar kewe lewo ra manlükieila o kul ngeni ewe anü Paal.
JER 23:28 Eman soufos mi eäni eu tan epwe apworausa ewe tan, nge ätewe mi rongorong ai kapas epwe pwärätä ai kapas fän allükülük. Met wewefengenin fetilipwas me wiich?
JER 23:29 Ifa usun, ai kapas esap wewe ngeni ekkei, ika esap usun efoch ama mi amökkükisi achau?
JER 23:30 Iei mine ngang ewe Samol mi Lapalap üa ü ngeni ekewe soufos mi angei än eman soufos kapas o apasa pwe iei ai kapas.
JER 23:31 Üa pwal ü ngeni ekewe soufos mi eäni püsin ar kapas o üra, ‘Iei alon ewe Samol mi Lapalap.’
JER 23:32 Oupwe aüselinga mine ngang ewe Samol mi Lapalap üa apasa: Nengeni, üa ü ngeni chokewe mi osuni ar tan mi chofana, chokewe mi apworausa ekewe tan o atoka nei kewe aramas ren ar kapas chofana me ar tunosikesik. Ngang üsap tinirela ika akünöör, iei mine resap fokun alisi ekei aramas. Ngang ewe Samol mi Lapalap üa kapas.”
JER 23:33 Iwe, ewe Samol mi Lapalap a üreniei, “Are eman me lein ekei aramas ika eman soufos ika eman souasor epwe aisinuk, ‘Met ewe weires ewe Samol mi Lapalap a kapas usun?’, kopwe üreni, ‘En ewe a weires reöm, nge i epwe ärukola. Iei alon ewe Samol mi Lapalap.’
JER 23:34 Nge are eman soufos ika souasor, ika eman lein ekewe aramas epwe apasa, ‘Iei ewe weires ewe Samol mi Lapalap a kapas usun,’ ngang üpwe apwüngü ewe aramas me chon leimwan.
JER 23:35 Iwe, iei usun mine oupwe apasa ngeni en me chon arun ika pwin, ‘Met ewe Samol mi Lapalap a eäni pälüen?’ ika ‘Met ewe Samol mi Lapalap a apasa?’
JER 23:36 Nge ousap chüen apasa, ‘Ewe weires ewe Samol mi Lapalap a kapas usun’, pun püsin än eman me eman kapas epwe wiliti an weires. Nge ämi oua sorei ewe kapas än ewe Kot mi manau, ewe Samol mi Unusen Manaman ämi we Kot.
JER 23:37 Iei usun mine oupwe aisini ewe soufos, ‘Met ewe Samol mi Lapalap a eäni pälüen ngonuk?’ ika ‘Met ewe Samol mi Lapalap a apasa?’
JER 23:38 Nge are oua apasa, ‘Iei ewe weires ewe Samol mi Lapalap a kapas usun,’ mürin ngang ewe Samol mi Lapalap üpwe ürenikemi, ‘Pokiten oua apasa iei usun, nge üa fen allük ngenikemi pwe ousap apasa ekei kapas,
JER 23:39 üpwe fokun särisikemiitä o pöütikemiila toau seniei, ämi me ämi kewe telinimw üa ngenikemi me ämi kewe lewo.
JER 23:40 Üpwe uwato womi itengau ese ük me säwfochofoch esap manlüküla.’”
JER 24:1 Iwe, mürin än Nepukatnesar ewe kingen Papilon a uweela seni Jerusalem Jehoiachin ewe kingen Juta nöün Jehoiakim we mwän fiti ekewe nöüwisen Juta, ekewe soufalafal me ekewe chon angang ngeni mächä, o uweerela Papilon, ewe Samol mi Lapalap a pwäri ngeniei künaei. Üa küna ruu chükün föün fiik ra nom mwen ewe imwenfelin ewe Samol mi Lapalap.
JER 24:2 Eu chük a wor föün fiik mi mürina lon, usun mwen uän fiik mi nup. Nge ewe pwal eu chük a wor föün fiik mi fokun ngau lon, ra fokun ngau pwe esap wor eman a tongeni ocheer.
JER 24:3 Iwe, ewe Samol mi Lapalap a aisiniei, “Jeremaia, met ka küna?” Nge üa üreni, “Üa küna föün fiik. Ekewe föün fiik mi mürina ra fokun mürina, nge ekewe föün fiik mi ngau ra fokun ngau pwe esap wor eman a tongeni ocheer.”
JER 24:4 Mürin, ewe Samol mi Lapalap a üreniei,
JER 24:5 “Ngang ewe Samol mi Lapalap ewe Koten Israel üa mefi, pwe ekewe chon oola seni Juta, ngang üa tinirela seni ei leni ngeni fanüen chon Papilon, ra mürina usun ekewe föün fiik mi mürina.
JER 24:6 Üpwe mamaseer o ümöümöch ngeniir, üpwe pwal aliwinisefäliir ngeni ei fanü. Üpwe afefeitäär, nge üsap ataretiu, üpwe fotukiir, nge üsap üttiretä.
JER 24:7 Üpwe ngeniir eu leluk mi silei pwe ngang ewe Samol mi Lapalap. Ir repwe nei aramas, nge ngang üpwe ar Kot, pun repwe liwinsefälitiei ren unusen leluker.
JER 24:8 Nge ngang ewe Samol mi Lapalap üpwe föri ngeni Setekia ewe kingen Juta me ekewe nöüwis, ngeni ekewe lusun chon Jerusalem mi chüen nom lon ei fanü me chokewe mi feila Isip, pwe repwe usun ekewe föün fiik mi fokun ngau esap wor eman a tongeni ocheer.
JER 24:9 Üpwe föri pwe repwe och minen eniweniw ngeni chon ekewe mwü won unusen fanüfan, repwe itengau, aramas repwe leaweniir lon ar kapasen turunufas me ämängau, pwal lon ar ottek me lon ekewe leni meinisin ia üpwe asürela ie.
JER 24:10 Üpwe tinato rer maun, lengita me mätter tori repwe fokun rosola seni lon ewe fanü üa ngeniir me ar kewe lewo.”
JER 25:1 Iwe, lon arüanün ierin mwün Jehoiakim ewe kingen Juta nöün Josia we mwän eu pworaus a tori Jeremaia fän äsengesin ekewe aramasen Juta meinisin. Iei aeuin ierin mwün Nepukatnesar ewe kingen Papilon.
JER 25:2 Iei ekewe kapas ewe soufos Jeremaia a üreni ekewe aramasen Juta me chon Jerusalem meinisin,
JER 25:3 “Lon ükükün rüe me ülüngat ier, seni ewe engol me ülüngatin ierin mwün Josia ewe kingen Juta nöün Amon we mwän tori ikenai ewe Samol mi Lapalap a kapas ngeniei. Iwe, üa asile ngenikemi ekei kapas iteiten fansoun, nge ämi ousap aüseling.
JER 25:4 Ämi ousap mochen aüseling ika aü selingemi pwe oupwe rongorong, inamwo ika ewe Samol mi Lapalap a tinikisiela remi nöün kewe chon angang ekewe soufos.
JER 25:5 Ir ra ürenikemi, ‘Oupwe kul seni ämi kewe lapalap mi ngau me ämi kewe föför mi ngau, pwe oupwe sopwela le nonom lon ewe fanü ewe Samol mi Lapalap a ngenikemi me ämi kewe lewo pwe oupwe fanüeni tori feilfeilachök.
JER 25:6 Ousap fel ngeni pwal ekoch kot ika angang ngeniir, ousap pwal asonga Kot ren ämi fel ngeni ekewe uluulun anümwäl oua föri. Mürin esap afeiengauakemi.’
JER 25:7 Nge ewe Samol mi Lapalap a püsin apasa pwe ousap aüselinga i, nge oua fen asonga ren ämi kewe uluulun anümwäl oua föri o atoto womi feiengau.”
JER 25:8 Iei mine ewe Samol mi Unusen Manaman a apasa, “Pokiten ämi ousap aleasochis ngeni ai kewe kapas,
JER 25:9 üpwe titila ren chon ekewe mwü meinisin mi nom efeng, pwal ren nei chon angang Nepukatnesar ewe kingen Papilon. Üpwe emwenireto pwe repwe maun ngeni ei fanü Juta me aramasan, pwal ngeni chon ekewe mwü meinisin mi nom pwelin ünükün. Üpwe fokun aroserela o föri pwe repwe och minen eniweniw, och minen turunufas me itengau tori feilfeilachök. Ngang ewe Samol mi Lapalap üa kapas.
JER 25:10 Üpwe aükätiu kölün mweireir me pwapwa, pwal pwapwan mongön apwüpwülü. Üpwe aükätiu püngüpüngün ewe lenien wüsüs o kunuela ewe lamp.
JER 25:11 Unusen ei fanü epwe tala o pönüla, nge chon ekei mwü repwe angang ngeni ewe kingen Papilon lon ükükün fik ier.
JER 25:12 Iwe, wesin ekewe fik ier, üpwe apwüngü ewe kingen Papilon me chon mwün fän iten ar tipis. Üpwe ataela fanüer pwe fanüer epwe pönüla tori feilfeilachök. Ngang ewe Samol mi Lapalap üa kapas.
JER 25:13 Üpwe atoto won Papilon ekewe feiengau meinisin üa fen apasa fän itan, meinisin mine a mak lon ei puk, ekewe kapasen feiengau Jeremaia a osuni fän iten ekewe mwü meinisin.
JER 25:14 Üpwe liwini ngeni ekewe chon Papilon liwinin ar föför me angangen pöür. Iwe, chomong mwü me king mi lap repwe nöüniir amanau.”
JER 25:15 Iei usun mine ewe Samol mi Lapalap ewe Koten Israel a üreniei, “Kopwe angei seni lepei ei kap mi ur ren wainin lingeringer. Kopwe aünü ngeni chon ekewe mwü meinisin üa tinukela rer.
JER 25:16 Repwe ün o taroporop, repwe puchala ren pokiten ewe maun üpwe tinala leir.”
JER 25:17 Mürin, üa angei ewe kap seni lepöün ewe Samol mi Lapalap o ngeni chon ekewe mwü meinisin, chokewe ewe Samol mi Lapalap a tinieila rer, pwe repwe ün seni.
JER 25:18 Üa aünü ngeni Jerusalem me ekewe telinimwen Juta, ngeni ar kewe king me nöür kewe nöüwis, pwe ekewe leni repwe wiliti eu leni mi ta o pöön, aramas repwe rükö rer, repwe turunufaseer o eäniir kapasen ottek, usun a chüen fis tori ei fansoun.
JER 25:19 Üa pwal aünü ngeni Farao ewe kingen Isip, ngeni nöün kewe nöüwis, nöün kewe souemwen me nöün aramas meinisin,
JER 25:20 pwal ngeni ekewe chon ekis mi nom leir. Üa aünü ngeni ekewe kingen ewe fanü Us meinisin me kingen ekewe telinimwen Filistia: Askelon, Kasa, Ekron me ekewe mi chüen manau lon Astot.
JER 25:21 Üa aünü ngeni chon Etom, Moap me Amon,
JER 25:22 ngeni ekewe kingen Tirus me Siton meinisin, pwal ngeni ekewe kingen ewe fanü mi nom aroset pekilan ewe matau,
JER 25:23 ngeni ekewe telinimw Tetan, Tema me Pus, pwal ngeni chokewe meinisin mi fichi mökürer.
JER 25:24 Üa pwal aünü ngeni ekewe kingen Arapia me kingen ekewe sokopaten ainang mi nonom lon unusen ewe fanüapö,
JER 25:25 ngeni ekewe kingen Simri, kingen Elam me kingen Metia meinisin,
JER 25:26 ngeni ekewe kingen efeng meinisin, chokewe mi nom toau ika arap, eman mürin eman. Ekewe mwü meinisin mi nom fanüfan ra ün seni. Nge mürir meinisin ewe kingen Papilon epwe ün.
JER 25:27 Mürin, ewe Samol mi Lapalap a üreniei, “Kopwe kapas ngeni ekewe aramas pwe iei alon ewe Samol mi Unusen Manaman, ewe Koten Israel, ‘Oupwe ün tori oupwe pulas o mus. Oupwe turula, nge ousap chüen ütäsefäl pokiten ewe maun üpwe tinala remi.’
JER 25:28 Nge are resap mochen angei ewe kap seni lepoum pwe repwe ün, mürin kopwe üreniir, ‘Iei alon ewe Samol mi Unusen Manaman: Oupwe fokun ün.
JER 25:29 Pun nengeni, üpwe popuetä ewe angangen kata me lon ei telinimw mi föü itei won. Nge ifa usun, üsap pwal apwüngükemi? Üpwe fokun apwüngükemi, pun üpwe awarato maun ngeni chon fanüfan meinisin. Ngang ewe Samol mi Unusen Manaman üa kapas.’
JER 25:30 Iei mine kopwe osuni ngeniir ekei kapas meinisin o üreniir, ‘Ewe Samol mi Lapalap epwe kökkö fän leüömong seni läng, epwe alapatä mwelian seni lenian mi pin. Epwe fokun kökkö fän leüömong ngeni nöün aramas o mweir usun chokewe mi puri föün wain. Epwe apwas ngeni chon fanüfan meinisin.
JER 25:31 Ewe apwas epwe tori lesopun fanüfan. Pun ewe Samol mi Lapalap a atipisi chon ekewe mwü meinisin. Epwe eäni kapwüng ngeni aramas meinisin, nge epwe niela ekewe aramasangau.’ Iei alon ewe Samol mi Lapalap.”
JER 25:32 Iwe, ewe Samol mi Unusen Manaman a apasa pwe feiengau epwe tori mwü me mwü, nge eu mölümöl mi watte epwe eiätä seni ekewe kinikinin lesopun fanüfan.
JER 25:33 Iwe, chokewe mi ninnila me ren ewe Samol mi Lapalap lon ewe ränin repwe toropasfeil seni epek fanüfan tori epek. Esap wor eman epwe kechüeitiir, ika ionifengeniir, ika peiaseniir. Repwe usun chök kiten mongö me won pwül.
JER 25:34 Ämi chon mas, oupwe kechü o ngüngüres, ämi souemwenin nei aramas, oupwe asokopälakemi lon pwül. Pun fansoun ämi ninni a war. Oupwe turutiu o tatakis usun eu pör mi mürina.
JER 25:35 Esap chüen wor eu lenien op fän itemi chon mas, ämi souemwenin nei aramas ousap tongeni süla.
JER 25:36 Oupwe rongorong än ekewe chon mas siö me än ekewe souemwenin nei aramas ngüngüres. Pun ewe Samol mi Lapalap a ataala mwür,
JER 25:37 nge fanüer mi kinamwe a tatakis pokiten an song mi watte.
JER 25:38 Ewe Samol mi Lapalap a likitala lenian usun eman laion a likitala pwangan. Ewer, fanüer a wiliti eu fanüapö, pokiten ataien maun me än ewe Samol mi Lapalap song mi watte.
JER 26:1 Iwe, lepoputän mwün Joiakim ewe kingen Juta nöün Josia we mwän, ewe Samol mi Lapalap a üreniei,
JER 26:2 “Kopwe ütä lon ewe leni lükün ewe imwenfel o kapas ngeni chon ekewe telinimwen Juta meinisin mi feito pwe repwe fel lon ewe imwenfel. Kopwe üreniir meinisin mine üa allük ngonuk, nge kosap likiti eu kapas.
JER 26:3 Eli repwe rongorong o kul seni ar kewe lapalap mi ngau, pwe ngang üpwe siwili ai ekiekin afeiengaueer üa ekiekin föri ngeniir pokiten ar kewe föför mi ngau.
JER 26:4 Iwe, kopwe üreniir, pwe iei aloi ngang ewe Samol mi Lapalap, ‘Are ousap mochen aüselingaei o aleasochis ngeni ai kewe allük üa ngenikemi,
JER 26:5 are ousap afäli alon nei kewe chon angang ekewe soufos, chokewe üa soun tinirela remi, nge ämi ousap aüselingeer,
JER 26:6 mürin üpwe föri pwe ei imwenfel epwe wewe ngeni ewe lon Silo, nge chon ekewe mwü meinisin won fanüfan repwe eäni ottek iten ei telinimw.’”
JER 26:7 Iwe, ekewe souasor me ekewe soufos, pwal ekewe aramas meinisin ra rongorong ekei kapas Jeremaia a apasa me lon imwen ewe Samol mi Lapalap.
JER 26:8 Nge lupwen Jeremaia a wes le apasatä meinisin mine ewe Samol mi Lapalap a allük ngeni pwe epwe üreni ekewe aramas, mürin ekewe souasor me ekewe soufos pwal ekewe aramas meinisin ra turufi o apasa, “Kopwe fokun mäla.
JER 26:9 Pwota ka osuni fän iten ewe Samol mi Lapalap o üra pwe ei imwenfel epwe wewe ngeni ewe lon Silo, nge ei telinimw epwe tala pwe esap so?” Iwe, ekewe aramas meinisin ra pweliela Jeremaia me lon imwen ewe Samol mi Lapalap.
JER 26:10 Nge lupwen ekewe nöüwisen Juta ra rongorong ekei pworaus, ra feila seni imwen ewe king o feila ren imwen ewe Samol mi Lapalap. Iwe, ra mot won ar lenien mot lon ewe Asamalap mi Fö me lon imwen ewe Samol mi Lapalap.
JER 26:11 Mürin, ekewe souasor me ekewe soufos ra üreni ekewe nöüwis me ekewe aramas meinisin, “A pwüng ngeni ei mwän an epwe mäla, pun a osuni talan ei telinimw, usun oua fen püsin rongorong.”
JER 26:12 Mürin, Jeremaia a kapas ngeni ekewe nöüwis me ekewe aramas meinisin, “Ewe Samol mi Lapalap a tinieito pwe üpwe osuni talan ei imwenfel me ei telinimw, usun oua fen rongorong.
JER 26:13 Iei mine oupwe siwili ämi kewe lapalap me ämi kewe föför o aleasochis ngeni alon ewe Samol mi Lapalap ämi we Kot, mürin ewe Samol mi Lapalap epwe siwili an ekiekin afeiengauakemi usun a fen apasa.
JER 26:14 Nge ngang üa nom fän nemeniemi. Oupwe föri ngeniei mine a mürina o pwüng me remi.
JER 26:15 Nge oupwe chök silei pwe ika oua nieila, oupwe atoto womi pwal won ei telinimw me aramasen lon liwinin chan eman esap wor an tipis. Pun a let pwe ewe Samol mi Lapalap a tinieito remi pwe üpwe asile ngenikemi ekei kapas meinisin.”
JER 26:16 Mürin, ekewe nöüwis me ekewe aramas meinisin ra üreni ekewe souasor me ekewe soufos, “Ese pwüng ngeni ei mwän an epwe mäla, pun a kapas ngenikem fän alon ewe Samol mi Lapalap ach we Kot.”
JER 26:17 Iwe, ekoch me lein ekewe souakomwen ewe fanü ra ütä o kapas ngeni ekewe aramas meinisin mi mwichefengen,
JER 26:18 “Mika seni Moroset a osuni lon fansoun Hiskia ewe kingen Juta o üreni ekewe aramasen Juta meinisin, ‘Iei alon ewe Samol mi Unusen Manaman: Sion epwe tutä usun eu mälämäl. Jerusalem epwe wiliti eu ioien pipi, nge ewe chuk ia ewe imwenfel a nom ie epwe wiliti eu wöllap.’
JER 26:19 Ifa usun, ewe king Hiskia me chon Juta meinisin ra niela Mik? Ifa usun, Hiskia esap niuokusiti ewe Samol mi Lapalap o kütta an ümöümöch me ren? Ifa usun, ewe Samol mi Lapalap esap siwili an ekiekin afeiengaueer a fen kapas usun? Nge iei kich sipwele awarato feiengau watte woch.”
JER 26:20 (Iwe, mi pwal wor eman mwän mi osuni fän iten ewe Samol mi Lapalap, itan Uria nöün Semaia we mwän seni Kiriat-jearim. Ätei a osuni usun feiengauen ei telinimw me ei fanü lon ititin chök ekewe kapas Jeremaia a eäni.
JER 26:21 Nge lupwen ewe king Jehoiakim me nöün sounfiu pwal ekewe nöüwis meinisin ra rongorong an kewe kapas, ewe king a kütta Uria pwe epwe niela. Nge lupwen Uria a rong usun, a niuokus o süla Isip.
JER 26:22 Mürin ewe king Jehoiakim a tinala Isip Elnatan nöün Akpor we mwän me pwal ekoch mwän, pwe repwe turufi.
JER 26:23 Iwe, ra turufi Uria me lon Isip o emwenala ren ewe king Jehoiakim. Ätei a niela Uria o moneela somän lon lenien peiasen ekewe aramas kis.)
JER 26:24 Nge Ahikam nöün Safan we mwän a tümwünü Jeremaia seni ekewe aramas, pwe resap niela.
JER 27:1 Iwe, lepoputän mwün Setekia ewe kingen Juta nöün Josia we mwän, ewe Samol mi Lapalap a kapas ngeni Jeremaia,
JER 27:2 “Kopwe föri efoch om waas fiti selin o ämwäralong won üom.
JER 27:3 Mürin kopwe tinala pworaus ngeni ewe kingen Etom, ewe kingen Moap, ewe kingen Amon, ewe kingen Tirus me ewe kingen Siton ren nöür kewe chon künö mi feito Jerusalem ren Setekia ewe kingen Juta.
JER 27:4 Kopwe ngeniir ei pworaus fän iten ar kewe king, ‘Iei alon ewe Samol mi Unusen Manaman ewe Koten Israel ngeniir:
JER 27:5 Ngang ewe mi föri fanüfan pwal aramas me man mi nom won ren ai manaman me ai pöchökül. Iwe, ngang üa filätä iö kana üpwe ngeni ekei mettoch.
JER 27:6 Iei üa uwalong fän nemenien nei chon angang Nepukatnesar ewe kingen Papilon ekei fanü meinisin. Üa föri pwe ekewe manmwacho mwo nge repwe pwal angang ngeni.
JER 27:7 Chon ekewe mwü meinisin repwe angang ngeni, pwal ngeni nöün me nöün nöün, tori epwe war püsin feiengauen mwün. Mürin ir repwe angang ngeni chomong mwü me king mi lap.
JER 27:8 Nge are eu mwichen aramas ika chon eu mwü resap mochen angang ngeni Nepukatnesar ewe kingen Papilon o ämwäralong üwer fän ewe waas än ewe kingen Papilon, üpwe apwüngü chon ei mwü ren maun, ren lengita me mätter tori üpwe aroserela ren pöün. Ngang ewe Samol mi Lapalap üa kapas.
JER 27:9 Iei mine ousap aüselinga alon nöümi kewe soufos, nöümi kewe soupwe, nöümi kewe soutan, nöümi kewe souawarawar ika nöümi kewe sourong mi ürenikemi pwe ousap wisen angang ngeni ewe kingen Papilon.
JER 27:10 Pun mine ra osuni ngenikemi a chofana, epwe aselipato ämi oupwe toau seni fanüemi. Ngang üpwe asükemiila pwe oupwe rosola.
JER 27:11 Nge are chon eu mwü repwe ämwäralong üwer fän ewe waas än ewe kingen Papilon o angang ngeni, üpwe mwüt ngeniir pwe repwe nom won püsin fanüer, repwe angang won o imweimw ie. Ngang ewe Samol mi Lapalap üa kapas.’”
JER 27:12 Iwe, üa pwal kapas ngeni Setekia ewe kingen Juta lon ei chök ititin, “Oupwe ämwäralong üemi fän ewe waas än ewe kingen Papilon. Oupwe angang ngeni me nöün aramas pwe oupwe manau.
JER 27:13 Pwota ämi me noum aramas oupwe mäla ren maun, ren lengita me mätter, usun ewe Samol mi Lapalap a fen apasa epwe fis ngeni chon ekewe mwü meinisin resap mochen angang ngeni ewe kingen Papilon?
JER 27:14 Ousap aüselinga än ekewe soufos kapas, lupwen ra ürenikemi pwe ousap angang ngeni ewe kingen Papilon, pun mine ra osuni ngenikemi a chofana.
JER 27:15 Pun ewe Samol mi Lapalap a apasa pwe esap tiniir, nge ir ra chök osuni mine a chofana fän itan. Iei popun epwe asükemiila, nge ämi oupwe mäla, ämi me ekewe soufos mi osuni ngenikemi.”
JER 27:16 Mürin üa kapas ngeni ekewe souasor me ekewe aramas meinisin, pwe iei alon ewe Samol mi Lapalap, “Ousap aüseling ngeni än nöümi kewe soufos kapasen osuni ngenikemi, pwe pisekin imwen ewe Samol mi Lapalap repwe müttir liwinto seni Papilon. Pun ra chofana ngenikemi.
JER 27:17 Ousap fokun aüseling ngeniir. Oupwe angang ngeni ewe kingen Papilon pwe oupwe manau. Pwota ei telinimw epwe wiliti eu leni mi ta?
JER 27:18 Ika wesewesen ir soufos, nge ika pwüngün pwe ai kapas a nom rer, repwe iotekin tüngor ngeniei ngang ewe Samol mi Unusen Manaman, pwe ekewe pisek mi chüen nom lon ewe imwenfel, lon imwen ewe kingen Juta pwal lon Jerusalem resap oola Papilon.”
JER 27:19 Iwe, Nepukatnesar ewe kingen Papilon a likitala ekewe ür, ewe sepien koluk mi fokun watte, ekewe kürüma me pwal ekoch pisekin ewe imwenfel,
JER 27:20 lupwen a uwala Papilon Jehoiachin ewe kingen Juta nöün Jehoiakim we mwän pwal ekewe aramas tekia seni Juta me Jerusalem.
JER 27:21 Iei alon ewe Samol mi Unusen Manaman, ewe Koten Israel, fän äsengesin ekewe pisek mi chüen nom lon ewe imwenfel, lon imwen ewe kingen Juta pwal lon Jerusalem,
JER 27:22 “Ekei pisek repwe oola Papilon o nonom ikenan tori ewe rän üpwe pisefäliir. Mürin ngang üpwe aliwinireto o anomusefäliir lon ei leni. Ngang ewe Samol mi Lapalap üa kapas.”
JER 28:1 Lon ewe chök ier, lepoputän mwün Setekia ewe kingen Juta, lon alimuen maramen ewe arüanün ierin an nemenem, eman soufos seni Kipeon itan Hanania nöün Asur we mwän a kapas ngeniei me lon imwen ewe Samol mi Lapalap me fän mesen ekewe souasor me ekewe aramas meinisin. A apasa,
JER 28:2 “Iei alon ewe Samol mi Unusen Manaman, ewe Koten Israel: Üa kupi ewe waas än ewe kingen Papilon.
JER 28:3 Mürin ükükün ruu ier üpwe aliwinato lon ei leni pisekin imwen ewe Samol mi Lapalap meinisin Nepukatnesar ewe kingen Papilon a angei o uweerela Papilon.
JER 28:4 Üpwe pwal aliwinato ngeni ei leni Jehoiachin ewe kingen Juta nöün Jehoiakim we mwän me ekewe chon oola meinisin seni Juta mi feila Papilon, pun üpwe kupi ewe waas än ewe kingen Papilon. Ngang ewe Samol mi Lapalap üa kapas.”
JER 28:5 Mürin üa kapas ngeni ewe soufos Hanania me fän mesen ekewe souasor me ekewe aramas meinisin mi nom lon imwen ewe Samol mi Lapalap.
JER 28:6 Iwe, üa üra, “Amen. Amwo ewe Samol mi Lapalap epwe föri iei usun. Amwo ewe Samol mi Lapalap epwe apwönüetä ekewe kapas ka osuni o aliwinato seni Papilon pisekin imwen ewe Samol mi Lapalap me ekewe chon oola meinisin.
JER 28:7 Nge kopwe rongorong ei kapas üpwe ürenuk me ekei aramas meinisin.
JER 28:8 Ekewe soufos mi akom mwom me mwei ra osuni seni me lomlom usun maun, lengita me mätter fän äsengesin chomong fanü me mwü mi lap.
JER 28:9 Nge eman soufos mi osuni usun kinamwe a chök sil pwe i eman soufos ewe Samol mi Lapalap a wesewesen tinato, lupwen an kapasen osuni a pwönüetä.”
JER 28:10 Mürin ewe soufos Hanania a angei ewe waas seni won üei o kupi.
JER 28:11 Iwe, Hanania a apasa me fän mesen ekewe aramas meinisin, “Iei alon ewe Samol mi Lapalap: Iei usun üpwe angei ewe waas Nepukatnesar ewe kingen Papilon a ämwäralong won üen chon ekewe mwü meinisin o kupi mürin ruu ier.” Mürin üa feila.
JER 28:12 Iwe, ekoch fansoun mürin än ewe soufos Hanania angei ewe waas seni won üei o kupi, ewe Samol mi Lapalap a üreniei,
JER 28:13 “Kopwe feila o üreni Hanania pwe iei alon ewe Samol mi Lapalap, ‘En ka kupi ewe waas seni mwüch, nge ngang üpwe akasiwili ngeni efoch waas seni mächä.’
JER 28:14 Pun iei alon ewe Samol mi Unusen Manaman, ewe Koten Israel, ‘Ngang üpwe ämwärätä won üen chon ekei mwü meinisin efoch waasen angangochou seni mächä, pwe repwe angang ngeni Nepukatnesar ewe kingen Papilon. Üpwe pwal föri pwe ekewe manmwacho mwo nge repwe angang ngeni.’”
JER 28:15 Mürin üa üreni ewe soufos Hanania, “Kopwe rongorong Hanania, ewe Samol mi Lapalap esap tinuk, nge en ka föri pwe ekei aramas ra lükü mine a chofana.
JER 28:16 Iei mine ewe Samol mi Lapalap a apasa pwe epwe angeek seni won fanüfan. Lon ei chök ier kopwe mäla, pun ka üreni ekewe aramas pwe repwe ü ngeni ewe Samol mi Lapalap.”
JER 28:17 Iwe, lon ewe chök ier lon ewe afisuen maram, ewe soufos Hanania a mäla.
JER 29:1 Iwe, ewe soufos Jeremaia a makei echö toropwe o tinala seni Jerusalem ngeni ekewe souakom lein ekewe chon oola, ngeni ekewe souasor me soufos, pwal ngeni ekewe aramas meinisin Nepukatnesar a fen angeer seni Jerusalem o uweerela Papilon.
JER 29:2 A makei ei toropwe mürin än ewe king Jehoiachin me inelapan, ekewe nöüwisen lon imwen king me ekewe souemwenin Juta me Jerusalem, ekewe soufalafal me ekewe chon angang ngeni mächä ra oola.
JER 29:3 Iwe, Elasa nöün Safan we mwän me Kemaria nöün Hilkia we ra uwei ewe toropwe. Ir ätekewe Setekia ewe kingen Juta a tinirela Papilon ren ewe king Nepukatnesar. Iwe, iei masouen ewe toropwe:
JER 29:4 “Iei alon ewe Samol mi Unusen Manaman, ewe Koten Israel, ngeni ekewe chon oola meinisin, chokewe a tinirela seni Jerusalem ngeni Papilon,
JER 29:5 ‘Oupwe aüetä imwemi o nonom lor, oupwe fotuki ämi tanipi o mongö uar.
JER 29:6 Oupwe pwüpwülü o nöünöü ät me nengin. Oupwe apwüpwülüa nöümi mwän me nöümi fefin, pwe ir repwe nöünöü ät me nengin. Oupwe achomongakemiila me ikenan, nge ousap chokükünüla.
JER 29:7 Oupwe kütta feiöchün ekewe telinimw ia üa tinikemiila ie pwe oupwe oola lon. Oupwe iotek ngeniei fän iter, pun are epwe wor feiöchür, ämi oupwe pwal feiöch.
JER 29:8 Ngang ewe Samol mi Unusen Manaman, ewe Koten Israel üa ürenikemi pwe ousap tup ren nöümi kewe soufos me nöümi kewe soupwe mi nom leimi. Ousap aüseling ngeni ekewe tan ra eäni.
JER 29:9 Pun a chofana mine ra osuni ngenikemi fän itei. Ngang üsap tinirela. Ngang ewe Samol mi Lapalap üa kapas.’
JER 29:10 Pun iei alon ewe Samol mi Lapalap, ‘Are a wes ekewe fik ier fän iten Papilon, ngang üpwe ämwakemi. Üpwe apwönüetä ai pwon ngenikemi o aliwinikemi ngeni ei leni.
JER 29:11 Pun ngang üa silei mine üa ekieki ngenikemi. Üa ekieki feiöchümi, nge sap feiengauemi, pwe üpwe ngenikemi eu fansounöch me apilükülük.
JER 29:12 Mürin oupwe köriei, oupwe feito o iotek ngeniei, nge ngang üpwe aüselingakemi.
JER 29:13 Ämi oupwe küttaei o künaei, pun oua küttaei ren unusen lelukemi.
JER 29:14 Ewer, üa apasa pwe oupwe künaei, nge ngang üpwe aliwinisefälikemi ngeni fanüemi. Üpwe achufengenikemi seni ekewe mwü me ekewe leni meinisin ia üa atoropasakemiila ie o aliwinisefälikemi seni ewe leni ia üa tinikemiila ie pwe oupwe oola. Ngang ewe Samol mi Lapalap üa kapas.’
JER 29:15 Iwe, ämi oua apasa pwe ewe Samol mi Lapalap a ngenikemi soufos me lon Papilon.
JER 29:16 Oupwe rongorong ngeni mine ewe Samol mi Lapalap a apasa fän äsengesin ewe king mi nemeni ewe mwü Tafit a nemeni me lom, pwal fän äsengesin ekewe aramas meinisin mi nom lon ei telinimw, ir aramasemi resap etikemi le oola,
JER 29:17 ‘Iei alon ewe Samol mi Unusen Manaman: Üpwe awarato maun wor, pwal lengita me mätter, üpwe pwal föri pwe repwe usun chök ekewe föün fiik mi fokun ngau pwe esap wor eman a tongeni ocheer.
JER 29:18 Üpwe tapweriir fän maun, fän lengita me mätter. Üpwe föri pwe repwe och minen eniweniw ngeni chon ekewe mwü meinisin won fanüfan. Aramas repwe leaweniir lon ar ottek, repwe enniw o küna turunufas me itengau me lein chon ekewe mwü meinisin ia üa asürela ie.
JER 29:19 Ei epwe fis ngeniir pokiten resap aleasochisi ai kewe kapas üa tinikisiela rer ren nei chon angang ekewe soufos. Nge resap mochen aüselinga. Ngang ewe Samol mi Lapalap üa kapas.’
JER 29:20 Oupwe aüselinga alon ewe Samol mi Lapalap, ämi chon oola meinisin, ämi kewe a tinikemiila seni Jerusalem ngeni Papilon.
JER 29:21 Ewe Samol mi Unusen Manaman, ewe Koten Israel a apasa fänäsengesin Ahap nöün Kolaia we mwän me Setekia nöün Maseia we mi chofana osunier ngenikemi fän itan. A apasa pwe epwe atolongeer fän nemenien Nepukatnesar ewe kingen Papilon, nge i epwe nirela me fän mesemi.
JER 29:22 Iwe, ekewe chon oola seni Juta mi nom Papilon repwe eänifengeni lefiler ei kapasen ottek fän iter, ‘Amwo ewe Samol mi Lapalap epwe föri ngonuk usun mine a föri ngeni Setekia me Ahap, ir ätekewe ewe kingen Papilon a arapeer won ekkei.’
JER 29:23 Ei epwe fis ngeniir, pokiten ra föri eu tipis watte me lon Israel. Ra lisowu ngeni pwülüen chon arur, ra pwal eäni kapas chofana fän itan, nge esap üreniir pwe repwe kapas. Ewe Samol mi Lapalap a silei mine ra föri, i ewe chon pwärätä. Iei alon ewe Samol mi Lapalap.”
JER 29:24 Iwe, Jeremaia, kopwe üreni Semaia seni Neelam,
JER 29:25 pwe iei alon ewe Samol mi Unusen Manaman, ewe Koten Israel, “Ka tinala toropwe fän püsin itom ngeni ekewe aramas meinisin mi nom lon Jerusalem, ngeni ewe souasor Sefania nöün Maseia we mwän pwal ngeni ekewe souasor meinisin. Ka mak ngeni Sefania,
JER 29:26 ‘Ewe Samol mi Lapalap a filuk pwe kopwe souasor siwilin ewe souasor Joiata o tümwünü imwen ewe Samol mi Lapalap. Iei wisom pwe kopwe annükü lefilen irä pöün me pechen ekewe chon umwes mi osuni usun eman soufos, kopwe pwal atolonga üer lon efoch ring seni mächä.
JER 29:27 Pwota kosap apwüngü Jeremaia seni Anatot mi osuni ngenikemi?
JER 29:28 Pun a tinala toropwe rem lon Papilon o üra: Ämi chon oola, ämi oupwe nonomotam lon Papilon. Iei mine oupwe aüetä imwemi o nonom lor. Oupwe pwal fotuki ämi tanipi o mongö uar.’”
JER 29:29 Iwe, ewe souasor Sefania a aleani ei toropwe me fän mesen ewe soufos Jeremaia.
JER 29:30 Mürin ewe Samol mi Lapalap a üreni Jeremaia,
JER 29:31 “Kopwe tinala ei pworaus ngeni ekewe chon oola meinisin, ‘Iei alon ewe Samol mi Lapalap fänäsengesin Semaia seni Neelam: Pokiten Semaia a osuni ngenikemi, nge üsap tini, a pwal emwenikemi pwe oupwe lükü kapas chofana,
JER 29:32 iei mine üpwe apwüngü Semaia seni Neelam me mwirimwirin kana. Esap wor eman me lein aramasan epwe manau o küna ewe feiöch üpwe ngeni nei aramas, pun a üreni ekewe aramas pwe repwe ü ngeniei. Ngang ewe Samol mi Lapalap üa kapas.’”
JER 30:1 Iwe, ewe Samol mi Lapalap, ewe Koten Israel a üreni Jeremaia,
JER 30:2 “Kopwe makei lon eu puk ekewe kapas meinisin üa ürenuk.
JER 30:3 Pun epwe war ewe fansoun pwe ngang üpwe aliwinisefäli nei aramasen Israel me Juta o aliwinireto ngeni ewe fanü üa ngeni ar kewe lewo pwe repwe fanüeni. Ngang ewe Samol mi Lapalap üa kapas.”
JER 30:4 Ikkei ekewe kapas ewe Samol mi Lapalap a apasa fän äsengesin Israel me Juta,
JER 30:5 “Üa rongorong eu puchörün rükö me niuokus, nge sap mweireiren kinamwe.
JER 30:6 Iei oupwe ais o ekieki. Ifa usun, a tufich än eman mwän epwe nöünätiu eman semirit? Pwota üa küna pwe ekewe mwän meinisin ra anomu pöür won wilar usun eman fefin mi cheri an cheuchen fam? Pwota won meser a wopwechepwechela?
JER 30:7 Eu rän mi fokun eniuokus epwe war, esap wor eu rän usun chök ei. Epwe eu fansoun riaföü fän iten ekewe mwirimwirin Jakop, nge ir repwe ngasewu seni.”
JER 30:8 Iei alon ewe Samol mi Unusen Manaman, “Lupwen epwe war ewe fansoun, üpwe kupi ewe waas seni won üwer, üpwe mwüti fööföör, nge ekewe chon ekis resap chüen nöüniir amanau.
JER 30:9 Nge repwe angang ngeniei ngang ewe Samol mi Lapalap ar we Kot, pwal ngeni eman mwirimwirin Tafit, ätewe üpwe seikätä pwe epwe ar king.
JER 30:10 Nge ämi mwirimwirin Jakop nei chon angang, ousap niuokus, ousap rükö, ämi chon Israel. Pun üpwe fokun amanauakemi seni ewe fanü mi toau, pwal mwirimwirimi seni ewe fanü ia ra oola ie. Ämi mwirimwirin Jakop, oupwe liwinsefälito o nonom fän kinamwe, nge esap wor eman epwe eniuokusukemi.
JER 30:11 Iwe, ngang üpwe etikemi o amanauakemi. Üpwe fokun arosala chon ekewe mwü ia üa atoropasakemi ie, nge ämi üsap fokun arosakemiila. Üsap likiti ai üpwe apwüngükemi, nge lupwen üpwe apwüngükemi, üpwe apwüngükemi fän aüküköch. Ngang ewe Samol mi Lapalap üa kapas.”
JER 30:12 Iwe, iei alon ewe Samol mi Lapalap ngeni nöün aramas, “Feiengauemi esap tongeni wes, nge kinasemi kewe resap moela.
JER 30:13 Esap wor eman mi tümwünükemi, esap wor säfeen kinasemi, esap pwal wor ämi apilüköch pwe oupwe pöchökülsefäl.
JER 30:14 Peliemi kewe meinisin ra manlükikemiila, resap chüen ekiekikemi. Üa wichikemi usun üa wichi chon oputaei. Ai apwüngükemi a fokun pöchökül pokiten chomongun ämi kewe föföringau me watten ämi kewe tipis.
JER 30:15 Pwota oua siö ren ämi feiengau? Ämi metek esap tongeni moela. Üa föri ngenikemi ekei föför, pokiten chomungun ämi kewe föföringau me watten ämi kewe tipis.
JER 30:16 Nge iei chokewe meinisin mi arosakemiila repwe pwal rosola, ekewe chon ü ngenikemi meinisin repwe oola, chokewe mi ariaföüükemi repwe riaföü, nge chokewe mi angei pisekimi fän pöchökül, aramas repwe pwal angei pisekir fän pöchökül.
JER 30:17 Iwe, ngang üpwe apöchökülakemi o amoela kinasemi, inamwo ika chon oputakemi ra aita ngenikemi chon pöütüla o apasa, ‘Esap wor eman a chüngü Sion.’ Ngang ewe Samol mi Lapalap üa kapas.”
JER 30:18 Iei alon ewe Samol mi Lapalap, “Nengeni, üpwe aliwinisefäli nei aramas ngeni fanüer o tongei lenier. Jerusalem epwe kaüsefäl won lerasan me lom, nge ewe imwen king epwe kaütä won wesewesen lenian.
JER 30:19 Seni lon ekewe imw aramas repwe chietä kölün kilisou o mweireiren pwapwa. Üpwe achomongerela, pwe resap chokükün. Üpwe aitöchüür, pwe resap chüen itengau.
JER 30:20 Nöür kana repwe usun chök lon ekewe fansoun lom, ar mwich epwe nüküchar me fän mesei, nge üpwe apwüngü meinisin mi ariaföüür.
JER 30:21 Nöür souemwen epwe eman seni püsin leir, nge ar samol epwe ütä me leir. Epwe kaneto rei lupwen üpwe köri, pun iö a tongeni püsin kaneto rei, nge üsap köri? Ngang ewe Samol mi Lapalap üa kapas.
JER 30:22 Ir repwe nei aramas, nge ngang üpwe ar Kot.”
JER 30:23 Än ewe Samol mi Lapalap lingeringer a usun chök eu mölümöl, a usun eu ewiniär, epwe chopwiti won möküren ekewe aramasangau.
JER 30:24 Än ewe Samol mi Lapalap song mi watte esap kul tori epwe afisätä o awesala mine a ekieki lon lelukan. Lon ekewe fansoun mürin oupwap weweiti usun ekei mettoch.
JER 31:1 Iei alon ewe Samol mi Lapalap, “Lon ena fansoun ngang üpwe än ekewe ainangen Israel meinisin Kot, nge ir repwe nei aramas.
JER 31:2 Ekewe aramas resap ninnila ren ketilas ra küna ümöümöch me lon ewe fanüapö, lupwen chon Israel ra kütta ar lenien asösö.
JER 31:3 Üa pwä ngeniir me toau o apasa: Üa echenikemi ren ewe chen esemüch, iei mine üpwe sopwela le pwäri ngenikemi ai tong ellet.
JER 31:4 Ämi chon Israel, üpwe aüsefälikemiitä pwe oupwe ütä. Oupwe angesefäli ämi pisekin kaktai o pwörük fän pwapwa.
JER 31:5 Oupwe fotukisefäli ekewe tanipin wain won ekewe chukun Samaria. Ekewe chon tanipi repwe fotuki ekewe irän wain o ochei uar fän pwapwa.
JER 31:6 Pun epwe war eu fansoun, lupwen ekewe chon mas repwe kökkö me won chukuchukutän ewe fanü Efraim, ‘Oupwe etto, ousipwe feila ngeni Sion ren ewe Samol mi Lapalap ach we Kot.’”
JER 31:7 Iei alon ewe Samol mi Lapalap, “Oupwe leüömong le köl fän pwapwa fän iten Israel, oupwe akapwas fän iten ewe mwü mi lap me lein ekewe mwü. Oupwe ingemwar, oupwe asilefeili ekei kapas o apasa, ‘Ewe Samol mi Lapalap a amanaua nöün aramas, a angasa chokewe mi chüen manau me lon Israel.’
JER 31:8 Nengeni, üpwe emwenireto seni ewe fanü efeng o achufengeniir seni lesopun fanüfan. Chon chun me chon pechemä repwe etiir, pwal fefin mi pwopwo me chokewe mi toriir ar cheuchen fam. Repwe liwiniti ei fanü fän eu mwich mi watte.
JER 31:9 Repwe feito fän kechü, repwe iotek lupwen üpwe aliwinireto. Üpwe emwenirela ünükün chanpupu, repwe fetal won efoch al mi wenechar, ia resap chepetek me ie. Pun üa eman sam ngeni Israel, nge Efraim nei mwänichi.”
JER 31:10 Iei alon ewe Samol mi Lapalap, “Oupwe aüseling, ämi chon ekewe mwü o asilefeili ai kei kapas lon ekewe fanü aroset mi toau. Oupwe apasa, ‘Ätewe mi atoropasa chon Israel epwe pwal achufengeniir o tümwünüür usun eman chon mas a tümwünü nöün pwiin sip.’
JER 31:11 Pun ngang ewe Samol mi Lapalap üa möni ekewe aramasen Israel o angaserela seni chokewe mi kon pöchökül seniir.
JER 31:12 Iwe, repwe feito o köl fän pwapwa me won ewe chuk Sion, repwe meseik ren ai lifang ngeniir, ren ekewe föün wiich me wain me apüra, pwal ren ekewe nienifön sip me kow. Iwe, repwe usun chök eu tanipi mi atütü ngeni koluk, nge resap chüen aiengau.
JER 31:13 Mürin, ekewe föpwül repwe meseik lon ar pwörük, nge ekewe alüal me chinlap repwe pwapwa. Üpwe awili ar letipeta ngeni pwapwa. Üpwe achipeer o fang ngeniir pwapwa akasiwilin ar lolilen.
JER 31:14 Üpwe amötü ekewe souasor ren mongö mi annö, nge nei aramas repwe mötüla ren ai kewe lifang mi somwola. Ngang ewe Samol mi Lapalap üa kapas.”
JER 31:15 Iei alon ewe Samol mi Lapalap, “Aramas ra rongorong akürangen ngüngüres me kechüangau me lon Rama. Rahel a kechüeiti nöün kana. Esap mochen chipila, pun resap chüen nom.
JER 31:16 Kopwe ükütiu le kechü o tölüpwasei mesom, pun om angang fän iten noum kewe epwe wor lomotan, repwe liwinto seni fanüen chon oputer.
JER 31:17 Epwe wor om apilüköch lon kan fansoun mwom, pun noum repwe liwinsefäl ngeni poputän fanüer. Ngang ewe Samol mi Lapalap üa kapas.
JER 31:18 Üa rongorong mine Israel a eäni ngüngü, ‘En ka amiritiei, nge ngang üa küna amirit usun eman nienifön kow esamwo mirit. Kopwe aliwiniei pwe ngang üpwe liwin, pun en ewe Samol mi Lapalap ai we Kot.
JER 31:19 Mürin ai tokola senuk üa ekieksefäl. Mürin ai miritila üa rorotiu fän letipeta. Üa säw o itengau pokiten ai tipis lealüali.’
JER 31:20 Ifa usun, Israel esap nei mwän mi achengicheng? Ifa usun, sap i nei üa pwapwa ren? Inamwo ika üa kulu söküri ngeni, nge üa chüen chechemeni. Iei mine lelukei a positi i, üpwe fokun eäni ümöümöch ngeni. Ngang ewe Samol mi Lapalap üa kapas.
JER 31:21 Kopwe fotuki asisil o asisila ewe al fän itom, kopwe ekieköchü ewe alelap ka fetal won. Kopwe liwinto, en Israel, kopwe liwiniti om kewe telinimw.
JER 31:22 Ifa ükükün fansoun om kopwe rikirikfetal, en Israel kosap allükülük? Ngang ewe Samol mi Lapalap üa afisätä och mettoch mi fö o sokola won fanüfan: Israel epwe fitipacheiti Kot.”
JER 31:23 Iei alon ewe Samol mi Unusen Manaman ewe Koten Israel, “Lupwen üpwe aliwinisefäli ekewe aramas ngeni fanüer, repwe apasasefäli ekei kapas me lon ewe fanü Juta me telinimwan kewe, ‘Ewe Samol mi Lapalap epwe afeiöchuk, en leni ia pwüng a nom ie, en chuk mi pin.’
JER 31:24 Iwe, aramas repwe nonomfengen lon Juta me telinimwan kewe meinisin, epwe pwal wor chon tanipi me chon mas fiti nöür pwiin sip.
JER 31:25 Üpwe apöchökülasefäli chokewe mi malülü o amongöni chokewe mi apwangapwangen echik.”
JER 31:26 Ren ei üa nela o nennefetal, üa kinamwe lon ai annut.
JER 31:27 Iei alon ewe Samol mi Lapalap, “Epwe war ewe fansoun, lupwen üpwe amasoua ewe fanü Israel me Juta ren aramas me man.
JER 31:28 Iwe, usun üa mamasa ai üpwe üttiretä o kupiretiu, pwe üpwe atururetiu, ataretiu o afeiengaueer, iei usun üpwe pwal mamasa ai üpwe aüretä o fotukiir.
JER 31:29 Lon ekana rän resap chüen apasa, ‘Ekewe sam ra ochoch föün wain mi mwoon, nge nöür kewe ra niimwoon.’
JER 31:30 Pun ätewe mi ochoch föün wain mi mwoon epwe püsin niimwoon. Iwe, eman me eman epwe püsin mäla fän iten an tipis.”
JER 31:31 Iei alon ewe Samol mi Lapalap, “Epwe war ewe fansoun üpwe föri eu pwon mi fö ngeni chon Israel me chon Juta.
JER 31:32 Ei pwon esap usun ewe pwon üa föri ngeni ar kewe lewo, lupwen üa amwöchü pöür o emwenirewu seni ewe fanü Isip. Ir ra atai ai pwon, inamwo pwe üa usun eman rereimw ngeniir.
JER 31:33 Nge iei ewe pwon mi fö üpwe föri ngeni chon Israel lon ekana rän: Üpwe atolonga ai kewe allük lor o makeretiu lon leluker. Iwe, üpwe ar Kot, nge ir repwe nei aramas kana.
JER 31:34 Esap wor eman epwe chüen aiti ngeni chon arun ika pwiin an epwe sileei, pun ir meinisin repwe sileei seni ewe mi kis tori ewe mi lap. Iwe, üpwe amusala ar föföringau, nge üsap chüen chechemeni ar tipis. Ngang ewe Samol mi Lapalap üa kapas.”
JER 31:35 Iei alon ewe Samol mi Lapalap, ewe mi awisa akkar pwe epwe tin lerän o allük ngeni maram me fü kana pwe repwe tin lepwin, mi amwökütükütü ewe matau, pwe nonoon ra ngüngü, itan ewe Samol mi Unusen Manaman,
JER 31:36 “Are ekei akoten fän läng repwe ükütiu me fän mesei, mürin ekewe chon Israel repwe pwal ükütiu le iteni eu mwü me fän mesei. Ngang ewe Samol mi Lapalap üa kapas.
JER 31:37 Are eman epwe tongeni aükü ekewe läng o ouwasacha longolongun fanüfan, mürin üpwe tongeni pöütala ekewe chon Israel pokiten ar föför meinisin ra föriir. Ngang ewe Samol mi Lapalap üa kapas.”
JER 31:38 Iei alon ewe Samol mi Lapalap, “Epwe war ewe fansoun pwe ewe telinimw Jerusalem epwe kaüsefäl fän itei seni ewe imw tekia än Hananel me pelilotou tori ewe Asamalapen Pwokuku.
JER 31:39 Iwe, seni ikenan ewe selin aükük epwe feil wenewenewu tori ewe chuk Karep, mürin epwe kul ngeni Koa.
JER 31:40 Unusen ewe lemol ia ekewe somä me ewe falangen ekkei ra nom ie, pwal ekewe lemäl meinisin achöüala ngeni ewe oüwö Kitron tori lepwokukun ewe Asamalapen Oris awenewenen ötiu, ekei kinikin meinisin repwe pin fän itei. Ewe telinimw esap fokun chüen katatiu ika tala.”
JER 32:1 Iwe, lon ewe engolun ierin mwün Setekia ewe kingen Juta, iei engol me waluen ierin mwün Nepukatnesar, ewe Samol mi Lapalap a kapas ngeni Jeremaia.
JER 32:2 Lon ewe fansoun nöün ewe kingen Papilon mwichen sounfiu a pwelifeili Jerusalem fän pisekin maun. Nge ewe soufos Jeremaia a kalapusolong lon ewe lenien chon mas mi nom lon imwen ewe kingen Juta.
JER 32:3 Pun Setekia ewe kingen Juta a kalapusei Jeremaia o atipisi pokiten an osuni o üra pwe iei alon ewe Samol mi Lapalap, “Üpwe atolonga ei telinimw lepöün ewe kingen Papilon pwe epwe liapeni.
JER 32:4 Nge Setekia esap tongeni sü seni ekewe chon Papilon. Iwe, epwe fokun tolong lepöün ewe kingen Papilon, epwe küna ren mesan o püsin kapas newenewen ngeni.
JER 32:5 Iwe, Nepukatnesar epwe uweela Setekia Papilon. Epwe nonom ikenan tori ngang üpwe ämwa. Inamwo ika a maun ngeni ekewe chon Papilon, nge esap win.”
JER 32:6 Iwe, Jeremaia a apasa, “Ewe Samol mi Lapalap a üreniei,
JER 32:7 ‘Hanamel nöün Salum we mwän pwin semom epwe feito reöm o ürenuk pwe kopwe möni fanüan mi nom Anatot, pun a wor om pwüüng pwe kopwe möni pokiten en märärin.’
JER 32:8 Mürin, Hanamel pwii we a feito rei lon ewe lenien chon mas, usun mine ewe Samol mi Lapalap a fen kapas ngeniei won. Iwe, a üreniei, ‘Kopwe möni fanüei we mi nom Anatot lon ewe fanü Peniamin pwe kopwe fanüeni, pun a wor om pwüüng won.’ Mürin üa silei pwe iei wesewesen alon ewe Samol mi Lapalap ngeniei.
JER 32:9 Iwe, üa möni ewe fanü lon Anatot seni Hanamel pwii we o aükü ngeni ewe moni ükükün engol me füföü föün silifer.
JER 32:10 Üa saini ewe toropwen atipeeu, üa appachala o impwangei, üa kütta chon pwärätä o aükü ngeni ewe moni won kilo.
JER 32:11 Mürin, üa angei ekewe ruachö toropwen atipeeuin kamö, ewe mi appach o impwang a makelong lon pwüngün me lapalapen ai kamö, pwal ewe echö mi suk,
JER 32:12 o ngeni Paruk nöün Neria we mwän, nge Neria nöün Maseia. Üa ngeni me fän mesen Hanamel pwii we, fän mesen ekewe chon pwärätä mi saini ewe toropwen atipeeuin kamö, pwal fän mesen ekewe re Juta meinisin mi mot lon ewe lenien chon mas.
JER 32:13 Üa üreni Paruk me fän meser meinisin,
JER 32:14 ‘Ewe Samol mi Unusen Manaman ewe Koten Israel a allük pwe üpwe angei ekewe toropwen atipeeuin kamö, ewe mi appach o impwang me ewe mi suk, o atolongeer lon eu pör mi för seni pwül, pwe repwe tongeni nonom fansoun langatam.
JER 32:15 Pun ewe Samol mi Unusen Manaman ewe Koten Israel a apasa pwe aramas repwe kamösefäl imw me fanü me tanipin wain lon ei fanü.’
JER 32:16 Mürin ai ngeni Paruk nöün Neria we mwän ewe toropwen atipeeuin kamö, üa iotek ngeni ewe Samol mi Lapalap o üra,
JER 32:17 ‘Ai Kot Samol mi Lapalap! En ewe mi föri läng me fanüfan ren om manaman mi watte pwal ren poum mi pöchökül. Esap wor och mine a weires ngonuk.
JER 32:18 Ka eäni om tong ellet ngeni ngeröü, nge ka liwini än samasam tipis won nöür kana me mwirir. En ewe Kot mi tekia o manaman, itom ewe Samol mi Unusen Manaman.
JER 32:19 Om öüröür a tekia, om föför ra manaman. Ka küna meinisin mine aramas ra föri, ka liwini ngeni eman me eman ükükün an föför.
JER 32:20 Me lom ka föri asisil me manaman me lon ewe fanü Isip. Nge tori ikenai ka chüen föriir me lon Israel pwal me lein chon ekewe mwü meinisin. Iei mine ikenai itom a iteföüla ekis meinisin.
JER 32:21 Ka emwenawu noum aramasen Israel seni Isip fän asisil me manaman, fän poum mi pöchökül o aköüpöü mi fokun eniuokusu chon oputer.
JER 32:22 Ka ngeniir ei fanü ka fen pwon fän akapel, pwe kopwe ngeni ar kewe lewo, eu fanü mi pwülüöch o fanüeres.
JER 32:23 Nge lupwen ra tolong lon ei fanü o fanüeni, resap aleasochis ngonuk ika föri pwüngün om allük. Resap fokun föri och usun mine ka allük ngeniir pwe repwe föri. Iei mine ka awarato wor ekei feiengau meinisin.
JER 32:24 Ekewe chon Papilon ra senätä ewe ororen maun pwelin ünükün ewe telinimw. Iwe, ra maun ngeni pwe repwe liapeni. Pokiten ewe maun, ewe lengita me ewe mätter, ewe telinimw epwe oolong lepöür. Ka püsin küna pwe a fisitä mine ka kapas usun.
JER 32:25 Nge en ai Kot, Samol mi Lapalap, ka üreniei pwe üpwe möni eu fanü ren moni fän mesen chon pwärätä, inamwo ika ewe telinimw a kan ngeni an epwe oolong lepöün ekewe chon Papilon.’”
JER 32:26 Mürin, ewe Samol mi Lapalap a üreni Jeremaia,
JER 32:27 “Nengeni, ngang ewe Samol mi Lapalap än ekewe mönümanau meinisin Kot. Esap fokun wor och mine a weires ngeniei.
JER 32:28 Iei mine ngang ewe Samol mi Lapalap üa apasa: Üpwe atolonga ei telinimw lepöün Nepukatnesar ewe kingen Papilon me nöün sounfiu pwe repwe liapeni.
JER 32:29 Ekewe chon Papilon mi maun ngeni ei telinimw repwe tolong lon o kenala. Repwe kenifengeni me ekewe imw chon Juta ra keni apach mi pwokus wor ngeni ewe anü Paal, ia ra pwal ninätiu ie asoren ün ngeni pwal ekoch kot pwe repwe asongaei.
JER 32:30 Pun ekewe chon Israel me chon Juta resap föri och, nge ra chök föri mine a ngau me fän mesei o asongaei ren angangen pöür, seni ewe fansoun a popuetä mwür.
JER 32:31 Chon ei telinimw ra äpwächa ai song me lingeringer seni ewe fansoun ei telinimw a kaütä tori ikenai. Iei mine üpwe ataela ei telinimw
JER 32:32 pokiten ekewe föföringau meinisin chon Israel me chon Juta ra föri pwe repwe asongaei, ir me ar kewe king, nöür kewe nöüwis, nöür kewe souasor me soufos, ekewe re Juta me ekewe chon Jerusalem.
JER 32:33 Ra kulu sökürür ngeniei, nge resap kul ngeniei. Inamwo ika üa ököüröüreer, nge resap mochen aüseling ngeniei.
JER 32:34 Ra fen anomu ar kewe uluulun anümwäl mi anioput lon ewe imwenfel a föü itei won, pwe repwe alimengaua.
JER 32:35 Ra senätä rongen asor fän iten ewe anü Paal lon ewe lemolun Hinom, pwe repwe eäni asor nöür ät me nengin ngeni ewe anü Molok. Üsap allük ngeniir, esap pwal tolong lon ai ekiek, pwe repwe föri ei sokun föför mi anioput o emweni chon Juta ngeni tipis.”
JER 32:36 Ewe Samol mi Lapalap, ewe Koten Israel a üreni Jeremaia, “Ekewe aramas ra apasa pwe ei telinimw epwe tolong lepöün ewe kingen Papilon ren maun, ren lengita me mätter. Nge iei kopwe rongorong mine ngang üa apasa:
JER 32:37 Üpwe achufengeni ekewe aramas seni ekewe fanü meinisin ia üa asürela ie fän ai song me lingeringer watte. Üpwe aliwinireto ngeni ei leni o föri pwe repwe nom fän kinamwe.
JER 32:38 Iwe, ir repwe nei aramas, nge ngang üpwe ar Kot.
JER 32:39 Üpwe ngeniir eu chök letip me eu chök ekiek, pwe repwe meninitiei fansoun meinisin fän iten püsin feiöchür me feiöchün nöür me mwirir.
JER 32:40 Üpwe eäni ngeniir eu pwon epwe nom tori feilfeilachök, pwe üsap ükütiu le afeiöchüür. Iwe, üpwe atolonga lon leluker ar repwe niuokusitiei, pwe resap chüen kul seniei.
JER 32:41 Üpwe pwapwaiti ai üpwe afeiöchüür, üpwe pwal fotukiretiu lon ei fanü fän allükülük ren unusen letipei me lelukei.
JER 32:42 Usun üa awarato ei feiengau watte won ekei aramas, iei usun üpwe pwal awarato wor ekei feiöch meinisin üa pwon ngeniir.
JER 32:43 Aramas repwe möni tanipin ei fanü, ei fanü ra kapas usun pwe eu fanüpö ia esap wor aramas ika man ra nom ie, pwal eu fanü mi oolong lepöün chon Papilon.
JER 32:44 Aramas repwe möni ekewe tanipi ren moni, repwe saini ekewe toropwen atipeeuin kamö, repwe impwangei o appacha me fän mesen chon pwärätä. Ei epwe fis lon ewe fanü Peniamin, lon ekewe sop ünükün Jerusalem, lon ekewe telinimwen Juta, lon telinimwen ewe fanü mi chukuchukutä, pwal lon telinimwen ewe fanü mi chukutekison me ewe fanü Nekep. Üpwe aliwinisefäli ekewe aramas ngeni fanüer. Ngang ewe Samol mi Lapalap üa kapas.”
JER 33:1 Iwe, ewe Samol mi Lapalap a kapas ngeni Jeremaia fän aruuan, lupwen a chüen kalapus lon ewe lenien chon mas.
JER 33:2 Iei alon ewe Samol mi Lapalap mi föri fanüfan, mi alapalapa o anüküchara lon lenian, itan ewe Samol mi Lapalap,
JER 33:3 “Kopwe kökköriei, nge ngang üpwe pälüenuk, üpwe pwäri ngonuk mettoch mi aüchea o amwarar kosap silei me mwan.
JER 33:4 Pun iei aloi ngang ewe Samol mi Lapalap, ewe Koten Israel, fänäsengesin ekewe imw lon ei telinimw, pwal fänäsengesin imwen ekewe kingen Juta mi katatiu, pwe ekewe aramas repwe aea le epetiir seni ekewe ororen maun me ewe ketilas:
JER 33:5 Lon ewe maun ngeni ekewe chon Papilon, ekewe imw repwe ur ren somän chokewe ngang üpwe nirela lon ai song me lingeringer. Pun üa kul seni ei telinimw pokiten än ekewe aramas föföringau meinisin.
JER 33:6 Inamwo ai föri ei, nge üpwe apöchökülasefäli ei telinimw, üpwe pwal achikara ekewe aramas o ngeniir unusen kinamwe me nonomöch.
JER 33:7 Üpwe aliwinisefäli ekewe chon Juta me chon Israel mi oola o aüsefäliretä, pwe repwe usun me mwan.
JER 33:8 Üpwe limetiir seni ar kewe tipis meinisin ra föri ngeniei, üpwe pwal amusala ar tipis me ar ü ngeniei.
JER 33:9 Iwe, ei telinimw epwe afisätä ai pwapwa, ai iteüöch me än aramas mwareitiei. Chon ekewe mwü meinisin won fanüfan repwe niuokus o chechech, lupwen repwe rongorong usun ekewe feiöch meinisin üpwe awarato won ekewe chon Jerusalem, pwal usun ekewe wöü meinisin üpwe atoto won ei telinimw.”
JER 33:10 Iei alon ewe Samol mi Lapalap, “Ämi oua apasa usun ei leni pwe eu fanü mi pön, esap wor aramas ika man ra nom ie. Mi pwüng pwe ekei telinimwen Juta, pwal ekewe alen Jerualem ra pönüla, esap wor aramas ika man ra nom ie. Nge lon ekei leni oupwe rongorongsefäl
JER 33:11 kölün mweireir me kölün pwapwa, apwapwan mongön apwüpwülü, pwal mwelien chokewe mi köl, lupwen ra uwato ar asoren kilisou lon imwei. Iwe, repwe apasa, ‘Ousipwe kilisou ngeni ewe Samol mi Unusen Manaman, pun i a kirikiröch, an tong ellet a nom tori feilfeilachök.’ Pun ngang üpwe aliwini wöün ewe fanü usun me mwan. Ngang ewe Samol mi Lapalap üa kapas.”
JER 33:12 Iwe, iei alon ewe Samol mi Unusen Manaman, “Lon ei fanü mi usun chök fanüapö, esap wor aramas ika man ra nom ie, epwe worsefäl lenien enen man, ia chon mas repwe asösöü nöür pwiin sip ie.
JER 33:13 Lon ekewe telinimwen ewe fanü mi chukuchukutä, lon telinimwen ewe fanü mi chukutekison me ewe fanü Nekep, lon ewe fanü Peniamin me ekewe sop ünükün Jerusalem, pwal lon ekewe telinimwen Juta chon mas repwe aleanisefäli nöür pwiin sip. Ngang ewe Samol mi Lapalap üa kapas.”
JER 33:14 Iei alon ewe Samol mi Lapalap, “Epwe war ewe fansoun, üpwe apwönüetä ewe pwon üa föri ngeni ekewe chon Israel me chon Juta.
JER 33:15 Lon ena fansoun üpwe apwükätä efoch Palan mi pwüng epwe fasar seni mwirimwirin Tafit. I epwe föri mine a wenechar o pwüng me lon ewe fanü.
JER 33:16 Lon ena fansoun chon Juta me chon Jerusalem repwe küna manau o nonom fän kinamwe. Iwe, ewe telinimw epwe iteni ‘Ewe Samol mi Lapalap ach pwüng.’
JER 33:17 Pun ngang ewe Samol mi Lapalap üa pwon pwe epwe fokun wor eman mwirimwirin Tafit epwe king lon Israel.
JER 33:18 Epwe pwal fokun wor souasor seni ewe ainangen Lefi repwe eäni asoren kek ngeniei, repwe keni asoren mongö o eäni sokopaten asor fansoun meinisin.”
JER 33:19 Iwe, ewe Samol mi Lapalap a kapas ngeni Jeremaia,
JER 33:20 “Are oupwe tongeni atai ai pwon fän iten rän me pwin, pwe rän me pwin resap chüen fis lon ar fansoun mi kefilitä,
JER 33:21 mürin ai pwon ngeni nei chon angang Tafit epwe pwal tongeni ta, pwe esap wor eman nöün epwe king. Epwe pwal tongeni ta ai pwon ngeni ekewe souasor seni ewe ainangen Lefi mi angang ngeniei.
JER 33:22 Usun ekewe fün läng resap tongeni lea, pwal usun ekewe föün pien aroset resap tongeni aükük, iei usun üpwe achomonga ekewe mwirimwirin Tafit nei chon angang me ekewe souasor seni ewe ainangen Lefi mi angang ngeniei.”
JER 33:23 Iwe, ewe Samol mi Lapalap a kapas ngeni Jeremaia,
JER 33:24 “Ifa usun, kosap rongorong än ekei aramas apasa pwe ngang ewe Samol mi Lapalap üa pöütala Israel me Juta, ekewe ruu mwü üa fen filiretä? Iei usun ra turunufasei nei aramas, pwe resap chüen ekieki pwe ir eu mwü.
JER 33:25 Nge ngang ewe Samol mi Lapalap üa apasa: Are ai pwon fän iten rän me pwin me ai allük fän iten läng me fanüfan resap chüen pwönüetä,
JER 33:26 mürin üpwe tongeni pöütala ekewe mwirimwirin Jakop me Tafit nei chon angang. Üsap pwal filätä eman me lein mwirimwirin Tafit epwe nemeni ekewe mwirimwirin Apraham, Isaak me Jakop. Nge ngang üpwe aliwini ekewe chon oola o eäni ümöümöch ngeniir.”
JER 34:1 Iwe, ewe Samol mi Lapalap a kapas ngeni Jeremaia, lupwen Nepukatnesar ewe kingen Papilon me nöün mwichen sounfiu meinisin, pwal chon ekewe mwü me ainang meinisin won fanüfan mi nom fän nemenian ra maun ngeni Jerusalem me ekewe telinimw ünükün.
JER 34:2 Ewe Samol mi Lapalap, ewe Koten Israel a üreni Jeremaia, “Kopwe feila o asile ngeni Setekia ewe kingen Juta, pwe iei aloi, ‘Üpwe atolonga ei telinimw lepöün ewe kingen Papilon, nge i epwe kenala.
JER 34:3 Kosap fokun tongeni sü seni, nge kopwe oolong o sechilong lepöün. Kopwe küna ewe kingen Papilon ren mesom o püsin kapas newenewen ngeni. Kopwe fokun feila Papilon.’
JER 34:4 Nge en Setekia kingen Juta, kopwe rong aloi fänäsengesum, ‘Kosap mäla ren ketilas,
JER 34:5 nge kopwe mäla fän kinamwe. Usun aramas ra keni irä pwokus fän iten semelapom kewe mi king ra akom mwomw, iei usun aramas repwe pwal keni irä pwokus fän itom, repwe kechüeituk o apasa: Woko äm samol.’ Ngang ewe Samol mi Lapalap üa kapas.”
JER 34:6 Mürin, ewe soufos Jeremaia a apworausa ekei kapas meinisin ngeni Setekia ewe kingen Juta me lon Jerusalem,
JER 34:7 lupwen nöün ewe kingen Papilon mwichen sounfiu a maun ngeni Jerusalem me ekewe lusun telinimwen Juta iter Lakis me Aseka. Pun ikkei chök ekewe telinimwen Juta mi pöchökül tittir ra chüen nom.
JER 34:8 Iwe, ewe king Setekia a föri eu pwon me ekewe aramasen Jerusalem meinisin, pwe repwe asilefeili ngasalan chokewe ra nöüniir amanau.
JER 34:9 Iteiten eman me eman epwe angasala nöün amanau chon Ipru mwän me fefin, pwe esap wor eman epwe nöüni amanau pwin, are i eman chon Juta.
JER 34:10 Iwe, ekewe nöüwis me ekewe aramas meinisin mi föri ewe pwon ra tipeeufengen pwe repwe angasala nöür amanau mwän me fefin, nge resap chüen nöünisefäliir amanau. Iwe, ra aleasochis o angaserela.
JER 34:11 Nge mürin ra siwili ar ekiek, ra angeesefäli ekewe mwän me fefin ra piin angaserela o nöünisefäliir amanau.
JER 34:12 Mürin ewe Samol mi Lapalap a kapas ngeni Jeremaia pwe epwe üreni ekewe aramas,
JER 34:13 “Iei alon ewe Samol mi Lapalap ewe Koten Israel: Üa föri eu pwon ngeni ämi kewe lewo, lupwen üa emwenirewu seni ewe fanü Isip, ewe leni ia aramas ra nöüniir amanau ie. Iwe, üa üreniir,
JER 34:14 ‘Lesopolan iteiten wonu ier ämi meinisin oupwe angasa pwimi chon Ipru oua möniir, ra angang ngenikemi lon ükükün wonu ier. Ämi oupwe fokun angaserela seni ar angang ngenikemi.’ Nge ämi kewe lewo resap aleasochisi aloi ika aüselingaei.
JER 34:15 Oua chök kärän ekieksefäl o föri mine a pwüng me fän mesei ren ämi angasala chon fanüemi, oua pwal föri eu pwon me fän mesei me lon ewe imwenfel ia aramas ra fel ngeniei ie.
JER 34:16 Nge mürin oua kul o aitengaua itei, lupwen oua angeesefäli en me nöün amanau mwän me fefin, chokewe oua fen angaserela usun ar mochen. Ämi oua arianiir o nöünisefäliir amanau.
JER 34:17 Iei mine ngang ewe Samol mi Lapalap üa apasa: Ämi ousap aleasochisiei, pun ousap asilefeili ngasalan pwimi me chon fanüemi. Nengeni, üpwe asilefeili pwe oupwe ngaselong lon ämi oupwe mäla lon maun, ren mätter me lengita. Üpwe föri pwe oupwe och minen eniweniw ngeni chon ekewe mwü meinisin won fanüfan.
JER 34:18 Iwe, ekewe aramas mi purätiu ai pwon, nge resap apwönüetä pwüngün ewe pwon ra föri me fän mesei, üpwe föri ngeniir usun mine ra föri ngeni ewe nienifön kow ra kinifeseni lon ruu kinikin o pwerela lefiler.
JER 34:19 Ekewe nöüwisen Juta me Jerusalem, ekewe nöüwisen lon imwen king, ekewe souasor me aramasen ewe fanü meinisin, ir ekewe mi pwerela lefilen ekewe ruu kinikinin ewe nienifön kow.
JER 34:20 Üpwe asechirelong lepöün chon oputer, chokewe mi mochen nirela. Ekewe machang me ekewe manmwacho repwe ochei somär.
JER 34:21 Üpwe pwal atolonga Setekia ewe kingen Juta me nöün kewe nöüwis lepöün chon oputer, chokewe mi mochen nirela. Üpwe asechirelong lepöün nöün ewe kingen Papilon mwichen sounfiu mi ükütiu le maun ngenikemi.
JER 34:22 Üpwe allük ngeniir pwe repwe liwiniti ei telinimw, repwe maun ngeni, repwe liapeni o kenala. Üpwe föri pwe ekewe telinimwen Juta repwe pönüla, nge resap chüen so. Ngang ewe Samol mi Lapalap üa kapas.”
JER 35:1 Iwe, lon mwün Jehoiakim ewe kingen Juta nöün Josia we mwän, ewe Samol mi Lapalap a kapas ngeni Jeremaia,
JER 35:2 “Kopwe feila ren ekewe chon leimwen Rekap, kopwe kapas ngeniir o emwenirela lon eu lein ekewe rumwen lon ewe imwenfel. Mürin kopwe aünü ngeniir wain.”
JER 35:3 Iei mine üa angei Jasania nöün Jeremaia we mwän, nge Jeremaia nöün Hapasinia, i me pwin kewe me nöün kewe mwän meinisin, iei unusen chon leimwen Rekap.
JER 35:4 Iwe, üa emwenirela ngeni imwen ewe Samol mi Lapalap lon rumwen nöün Hanan kewe mwän ewe aramasen Kot, nge Hanan nöün Iktalia. Ei rum a kan ngeni rumwen ekewe nöüwis o nom asen rumwen Maseia nöün Salum we mwän, ewe mi wisen mamasa ewe asamalap.
JER 35:5 Mürin üa iseis fän mesen ekewe chon leimwen Rekap rume mi ur ren wain me kap o üreniir, “Oupwe ün ei wain.”
JER 35:6 Nge ir ra pälüeni, “Äm aisap fokun ün wain, pun Jonatap semelapem we nöün Rekap we mwän a allük ngenikem, ‘Ousap fokun ün wain, ämi me mwirimwirimi kewe.
JER 35:7 Ousap aüetä imwemi, ousap amwora pwükil ika fotuki irän wain. Nge oupwe nonom lon imw mangaku lon unusen ränin manauemi, mürin oupwe manauatam me lon ewe fanü ia oua siamü ie.’
JER 35:8 Äm aia aleasochisi alon Jonatap semelapem we lon meinisin mine a allük ngenikem. Äm aisap ün wain lon ränin manauem meinisin, äm me pwülüem kewe, pwal nöüm mwän ika fefin.
JER 35:9 Äm aisap pwal aüetä imwem pwe aipwe nonom lon. Esap wor äm tanipin wain, esap pwal wor fanüem ika fotäm pwükil.
JER 35:10 Nge äm aia nom lon imw mangaku, aia pwal aleasochis o föri meinisin mine Jonatap semelapem we a allük ngenikem.
JER 35:11 Nge lupwen Nepukatnesar ewe kingen Papilon a feito pwe epwe maun ngeni ewe fanü, äm aia tipeeufengen pwe aipwe feila Jerusalem, pun aia niuokusiti ekewe sounfiun Papilon me ekewe sounfiun Siria. Iei popun äm aia nom lon Jerusalem.”
JER 35:12 Mürin ewe Samol mi Lapalap a kapas ngeni Jeremaia, pwe epwe feila o üreni ekewe chon Juta me chon Jerusalem,
JER 35:13 “Iei alon ewe Samol mi Unusen Manaman, ewe Koten Israel: Pwota ousap mochen angei ai öüröür o aleasochis ngeni ai kewe kapas?
JER 35:14 Iwe, Jonatap nöün Rekap we mwän a allük ngeni nöün kewe mwän pwe resap ün wain. Ir ra tümwünü ei allük, pun resap ün wain tori ikenai pokiten ar aleasochisi än semelaper we allük. Ngang üa kapas ngenikemi fän chomong, nge ämi ousap aleasochisiei.
JER 35:15 Üa soun tinala remi nei chon angang meinisin ekewe soufos pwe repwe ürenikemi, pwe oupwe en me kul seni an lapalap mi ngau o siwili an föför, ousap pwal fel ngeni pwal ekoch kot o angang ngeniir. Mürin, oupwe imweimw lon ewe fanü üa ngenikemi me ämi kewe lewo. Nge ämi ousap aleasochis ika aüselingaei.
JER 35:16 Mwirimwirin Jonatap kewe ra aleasochisi ewe allük semelaper we a ngeniir. Nge ämi nei aramas ousap aleasochisiei.
JER 35:17 Iei mine ngang ewe Samol mi Unusen Manaman, ewe Koten Israel üa apasa: Üpwe awarato womi, ämi chon Juta me chon Jerusalem, ekewe feiengau meinisin üa fen apwüngawu ngenikemi. Üpwe föri ei, pokiten üa fen kapas ngenikemi, nge ousap aüseling, üa fen kökkörikemi, nge ousap päpälüen.”
JER 35:18 Mürin Jeremaia a kapas ngeni ekewe chon leimwen Rekap, “Iei alon ewe Samol mi Unusen Manaman, ewe Koten Israel: Pokiten oua aleasochis ngeni än Jonatap semelapemi we allük, oua pwal tümwünü an kewe öüröür meinisin o föri meinisin mine a allük ngenikemi,
JER 35:19 iei mine ngang ewe Samol mi Unusen Manaman, ewe Koten Israel üa pwon pwe epwe wor fochofoch eman mwirimwirin Jonatap nöün Rekap we mwän epwe angang ngeniei.”
JER 36:1 Iwe, lon arüanün ierin mwün Jehoiakim ewe kingen Juta nöün Josia we mwän, ewe Samol mi Lapalap a kapas ngeni Jeremaia,
JER 36:2 “Kopwe angei echö toropwe o makei won ekewe kapas meinisin üa fen kapas ngonuk won fänäsengesin Israel, Juta me ekewe mwü meinisin. Kopwe makei meinisin mine üa kapas ngonuk won seni ewe fansoun Josia a king tori ikenai.
JER 36:3 Eli ika chon Juta repwe rongorong usun ekewe feiengau meinisin üa ekiekin föri ngeniir, repwe kul seni ar föför mi ngau. Mürin, ngang üpwe amusala ar föföringau me tipis.”
JER 36:4 Mürin, Jeremaia a köri Paruk nöün Neria we mwän. Nge lupwen Jeremaia a niwowomönü ngeni ekewe kapas meinisin ewe Samol mi Lapalap a üreni, Paruk a wisen makeretiu lon ewe toropwe.
JER 36:5 Iwe, Jeremaia a akünöü Paruk o üreni, “Esap mwümwü ngeniei ai üpwe chüen feila lon imwen ewe Samol mi Lapalap.
JER 36:6 Iei mine en kopwe wisen feila lon eu ränin echikefel. Kopwe aleani ewe toropwe ngeni ekewe aramas meinisin me lon ewe imwenfel, pwe repwe rongorong mine ewe Samol mi Lapalap a üreniei, nge üa niwowomönüür ngonuk. Kopwe pwal aleani ngeni ekewe aramasen Juta meinisin mi feito seni ar kewe telinimw, pwe repwe rongorong.
JER 36:7 Eli repwe iotekin tüngor ngeni ewe Samol mi Lapalap o kul seni ar föför mi ngau. Pun a fokun watte än ewe Samol mi Lapalap song me lingeringer a apwüngü ngeni ekei aramas.”
JER 36:8 Iwe, Paruk a föri meinisin mine ewe soufos Jeremaia a akünöü ngeni. A aleani än ewe Samol mi Lapalap kapas seni ewe toropwe me lon ewe imwenfel.
JER 36:9 Iwe, lon alimuen ierin mwün Jehoiakim ewe kingen Juta nöün Josia we mwän, lon ewe atiuen maram, ekewe chon Jerusalem me ekewe aramas meinisin mi feito Jerusalem seni ekewe telinimwen Juta ra föri ar ränin echikefel me fän mesen ewe Samol mi Lapalap.
JER 36:10 Mürin, Paruk a aleani än Jeremaia kewe kapas seni lon ewe toropwe, nge ekewe aramas meinisin ra rongorong. A aleani me lon imwen ewe Samol mi Lapalap lon rumwen Kemaria nöün Safan we mwän ewe seketeri. Ei rum a nom lon ewe leni asan ünükün ewe Asamalap mi Fö, asamen ewe imwenfel.
JER 36:11 Iwe, Mikaia nöün Kemaria we mwän, nge Kemaria nöün Safan a rong än ewe Samol mi Lapalap kapas meinisin seni ewe toropwe.
JER 36:12 Mürin a feila ngeni imwen ewe king lon rumwen ewe seketeri, ia ekewe nöüwis meinisin ra mwich ie. Elisama ewe seketeri, Telaia nöün Semaia, Elnatan nöün Akpor, Kemaria nöün Safan, Setekia nöün Hanania me ekewe nöüwis meinisin ra nom.
JER 36:13 Iwe, Mikaia a apworausa ngeniir ekewe kapas meinisin a rongorong, lupwen Paruk a aleani ewe toropwe me fän mesen ekewe aramas.
JER 36:14 Mürin ekewe nöüwis meinisin ra titi Jehuti nöün Netania we mwän, nge Netania nöün Selemia, nge Selemia nöün Kusi, pwe epwe üreni Paruk, “Kopwe angei ewe toropwe ka aleani me fän mesen ekewe aramas o feito.” Iei mine Paruk a angei ewe toropwe o feila rer.
JER 36:15 Iwe, ra üreni, “Kopwe mottiu o aleani ngenikem ewe toropwe.” Iei mine Paruk a aleani ngeniir.
JER 36:16 Iwe, lupwen ra rongorong masouen ewe toropwe, ra sapefengen lon ar niuokus o üreni Paruk, “Äm aipwe asile ngeni ewe king ekei kapas.”
JER 36:17 Mürin ra aisini Paruk “Kopwe ürenikem, ifa usun om makei ekei kapas meinisin? Ifa usun, Jeremaia a niwowomönü ngonuk?”
JER 36:18 Nge Paruk a pälüeniir, “Jeremaia a niwowomönü ekei kapas meinisin ngeniei, nge ngang üa makeretiu ren ink lon ei toropwe.”
JER 36:19 Mürin, ekewe nöüwis ra üreni Paruk, “Oupwe feila o op, ämi me Jeremaia, nge ousap asile ngeni eman ia oua op ie.”
JER 36:20 Iwe, mürin ar iseis ewe toropwe lon rumwen Elisama ewe seketeri, ra feila lon imwen ewe king o apworausa ekewe kapas meinisin ngeni ewe king.
JER 36:21 Mürin, ewe king a tinala Jehuti pwe epwe angei ewe toropwe. Iwe, Jehuti a angei ewe toropwe seni rumwen Elisama we o aleani ngeni ewe king me ekewe nöüwis mi nom ren.
JER 36:22 Ei a fis lon atiuen maram, nge ewe king a mot lon imwan imweimwen lon fansoun patapat, ia a wor ie eu ekkei mi kü lon lenian me fän mesan.
JER 36:23 Iwe, lupwen Jehuti a aleani ülüngat ika rüanü kinikinin ewe toropwe, ewe king a pöküela ren efoch sar o monerelong lon ewe ekkei. A föri ei ngeni ewe toropwe tori a unusen karala.
JER 36:24 Nge ewe king me nöün kewe chon angang mi rongorong ekei kapas meinisin resap niuokus ren, resap pwal kamwei üfer ren ar lolilen.
JER 36:25 Inamwo än Elnatan me Telaia me Kemaria tüngormau ngeni ewe king pwe esap kenala ewe toropwe, nge ewe king esap fokun aüselingeer.
JER 36:26 Nge a fen allük ngeni Jeramel nöün we mwän, pwal ngeni Seraia nöün Asriel me Selemia nöün Aptel, pwe repwe feila o turufi ewe soumak Paruk me ewe soufos Jeremaia. Nge ewe Samol mi Lapalap a aopeer.
JER 36:27 Iwe, mürin än ewe king kenala ewe toropwe, ia a mak ie ekewe kapas Jeremaia a niwowomönü ngeni Paruk, ewe Samol mi Lapalap a kapas ngeni Jeremaia,
JER 36:28 “Kopwe angei pwal echö toropwe o makei lon ekewe kapas meinisin mi fen mak lon ewe aeuin toropwe, Jehoiakim ewe kingen Juta a kenala.
JER 36:29 Nge kopwe üreni Jehoiakim ewe kingen Juta, ‘Iei alon ewe Samol mi Lapalap: Ka kenala ewe toropwe o üra, “Pwota ka makei lon pwe ewe kingen Papilon epwe fokun feito o ataela ei fanü, epwe pwal ärala aramas me man seni?”
JER 36:30 Iei mine ngang ewe Samol mi Lapalap üa apasa fänäsengesin Jehoiakim ewe kingen Juta: Esap wor eman mwirimwirin epwe king o nemeni ewe mwü Tafit a nemeni me lom. Nge somän epwe koturula lükün pwe epwe nom fän pwichikar lerän me patapat lepwin.
JER 36:31 Üpwe apwüngü i me nöün kewe pwal nöün kewe nöüwis pokiten ar föföringau. Üpwe awarato wor pwal won chon Jerusalem me ekewe re Juta ekewe feiengau meinisin üa apwüngala ngeniir pokiten resap aüseling.’”
JER 36:32 Mürin, Jeremaia a angei pwal echö toropwe o ngeni Paruk ewe soumak. Iwe, Jeremaia a niwowomönü ngeni Paruk ekewe kapas meinisin mi fen mak lon ewe toropwe Jehoiakim ewe kingen Juta a kenala, a pwal apacha chomong kapas mi wewe ngeniir.
JER 37:1 Iwe, Setekia nöün Josia we mwän, ätewe Nepukatnesar ewe kingen Papilon a awisa pwe epwe king lon ewe fanü Juta, a siwili Jehoiachin nöün Jehoiakim we mwän lon wisan wisen king.
JER 37:2 Nge Setekia me nöün kewe nöüwis pwal aramasen ewe fanü resap aüselinga mine ewe soufos Jeremaia a üreniir fän alon ewe Samol mi Lapalap.
JER 37:3 Iwe, ewe king Setekia a tinala Jehukal nöün Selemia we mwän me ewe souasor Sefania nöün Maseia we mwän ren ewe soufos Jeremaia o üreni, “Kopwe iotek fän item ngeni ewe Samol mi Lapalap äm we Kot.”
JER 37:4 Lon ewe fansoun Jeremaia a chüen fetalfeil lein ekewe aramas, pun esamwo koturulong lon imwen fötek.
JER 37:5 Iwe, nöün Farao mwichen sounfiu ra feiliwu seni Isip. Nge lupwen ekewe sounfiun Papilon mi pwelifeili Jerusalem fän pisekin maun ra rong usun, ra sü seni Jerusalem.
JER 37:6 Mürin, ewe Samol mi Lapalap a kapas ngeni ewe soufos Jeremaia,
JER 37:7 “Kopwe üreni ewe kingen Juta mi tinukoto rei, pwe iei alon ewe Samol mi Lapalap, ewe Koten Israel, ‘Nöün Farao mwichen sounfiu mi feito pwe repwe alisikemi repwele liwinsefäliti Isip lon poputän fanüer.
JER 37:8 Nge ekewe sounfiun Papilon repwe liwinto o maun ngeni ei telinimw, repwe liapeni o kenala.
JER 37:9 Ngang ewe Samol mi Lapalap üa üra: Ousap püsin atupukemi ren ämi apasa pwe ekewe sounfiun Papilon resap chüen liwinto, pun repwe chök liwinto.
JER 37:10 Are oupwe fen akufu unusen ewe mwichen sounfiun Papilon mi maun ngenikemi, nge epwe chök wor ekoch me leir mi kinas mi nom lon imwer imw mangaku, ir repwe ütä o kenala ei telinimw.’”
JER 37:11 Iwe, mürin än ewe mwichen sounfiun Papilon sü seni Jerusalem pokiten nöün Farao mwichen sounfiu ra waroto,
JER 37:12 Jeremaia ekärän towu seni Jerusalem pwe epwe feila ngeni ewe fanü Peniamin, pwe epwe angei inetin me won saman me ikenan.
JER 37:13 Lupwen a tori ewe Asamalapen Peniamin, ewe meilapen mwichen chon mas itan Iria nöün Selemia we mwän, nge Selemia nöün Hanania, a turufi Jeremaia o üra, “En ka mochen sü ngeni ekewe chon Papilon.”
JER 37:14 Nge Jeremaia a üra, “Ese pwüng. Ngang üsap mochen sü ngeni ekewe chon Papilon.” Nge Iria esap mochen aüseling ngeni. A turufi Jeremaia o emwenala ren ekewe nöüwis.
JER 37:15 Iwe, ekewe nöüwis ra fokun song ngeni Jeremaia, ra wichi o kalapusei lon imwen Jonatan ewe seketeri, pun imwan a siwil ngeni eu imwen fötek.
JER 37:16 Iwe, ra atolonga Jeremaia lon eu rumwen fötek mi nom fän pwül, iwe a nonom ikenan fansoun langatam.
JER 37:17 Mürin, ewe king Setekia a titi Jeremaia o etiwa i. Iwe, a kapas ais ngeni lemonomon me lon imwan o üra, “Ifa usun, mi wor eu kapas seni ewe Samol mi Lapalap?” Nge Jeremaia a pälüeni, “Mi wor. Kopwe tolong lepöün ewe kingen Papilon.”
JER 37:18 Mürin, Jeremaia a aisini ewe king Setekia, “Met ai tipis ngonuk me noum kewe nöüwis ika ngeni ekei aramas, pwe oua aturueilong lon ewe imwen fötek?
JER 37:19 Ikafair nöümi kewe soufos ra osuni ngenikemi o üra, ‘Ewe kingen Papilon esap feito pwe epwe maun ngenikemi me ei fanü?’
JER 37:20 Iei mine üa tüngor ngonuk, en ai samol ewe king, kopwe aüselingaei. Kopwe etiwa ai tüngor pwetete ngonuk, pwe kosap chüen tinisefälieila lon ewe imwen fötek mi nom lon imwen Jonatan ewe seketeri, pwe üsap mäla ikenan.”
JER 37:21 Mürin, ewe king Setekia a awora eu allük pwe Jeremaia epwe lokkolong lon ewe lenien chon mas. Ra pwal ngeni efoch pilawa seni ewe lenien um pilawa iteiten rän tori pilawa meinisin me lon ewe telinimw a itela. Iei usun Jeremaia a nonom lon ewe lenien chon mas.
JER 38:1 Iwe, Sefatia nöün Matan we mwän, Ketalia nöün Pashur, Jehukal nöün Selemia me Pashur nöün Malkia ra rongorong mine Jeremaia a üreni ekewe aramas meinisin. Iei usun mine a apasa,
JER 38:2 “Iei alon ewe Samol mi Lapalap: Iteiten eman me eman mi nomotiu lon ei telinimw epwe mäla ren maun, ren lengita me mätter. Nge iteiten eman me eman mi fangatä ngeni ekewe chon Papilon esap mäla. Repwe en me püsin kütta manauan.
JER 38:3 Ewe Samol mi Lapalap a pwal apasa: Ei telinimw epwe fokun oolong lepöün ekewe sounfiu nöün ewe kingen Papilon, pun repwe liapeni.”
JER 38:4 Mürin, ekewe nöüwis ra üreni ewe king, “Kopwe mwütätä pwe ei mwän epwe ninnila. Pun a akisikisala leluken ekewe sounfiu mi chüen nom lon ei telinimw me leluken ekewe aramas meinisin ren an apasa ekei sokun kapas ngeniir. Ei mwän esap kütta feiöchün ekei aramas, ngei feiengauer.”
JER 38:5 Iwe, ewe king Setekia a üra, “Nengeni, a nom lepöümi. Pun ngang ewe king üsap tongeni föri och mine epwe ü ngenikemi.”
JER 38:6 Iei mine ra angei Jeremaia pwe repwe aturalong lon ewe chönüttu än Malkia nöün ewe king we mwän mi nom lon ewe lenien chon mas. Iwe, ra aürätiu Jeremaia won säl, nge esap wor koluk lon ewe chönüttu, pwe pwakak echök. Iwe, Jeremaia a kokotiu lon ewe pwakak.
JER 38:7 Iwe, Epet-melek ewe re Itiopia, eman ätelipich mi angang lon imwen king, a rongorong pwe ra aturalong Jeremaia lon ewe chönüttu. Lon ewe otun ewe king a eäni kapwüng lon ewe Asamalapen Peniamin.
JER 38:8 Iwe, Epet-melek a feila seni ewe imwen king, a feila ren ewe king o üreni,
JER 38:9 “Ai samol ewe king, a ngau än ekewe mwän föför ra föri ngeni ewe soufos Jeremaia. Ra aturätiu lon ewe chönüttu. Epwe mäla ikenan ren echik, pun ese chüen wor mongö lon ewe telinimw.”
JER 38:10 Mürin ewe king a allük ngeni Epet-melek ewe re Itiopia, “Kopwe angei ülüman mwän repwe etuk, pwe oupwe efietä ewe soufos Jeremaia seni lon ewe chönüttu me mwen an epwe mäla.”
JER 38:11 Iei mine Epet-melek a nuki ekewe mwän, a feila ren imwen ewe king lon ewe rumwen iseis üf o angei ekoch mangaku mi kamwakam me üf mi mes. A aürätiu ekei mangaku lon ewe chönüttu ren säl.
JER 38:12 Mürin Epet-melek a üreni Jeremaia, “Kopwe uwalong fän poum ekewe mangaku mi kamwakam o mes, pwe ekewe säl resap akinasok.” Iwe, Jeremaia a föri iei usun.
JER 38:13 Mürin ra efietä Jeremaia seni lon ewe chönüttu ren säl. Iwe, Jeremaia a chök nom lon lenien chon mas.
JER 38:14 Mürin, ewe king Setekia a titi ewe soufos Jeremaia o etiwa lon aülüngatin lenien tolong me lon imwen ewe Samol mi Lapalap. Iwe, ewe king a üreni Jeremaia, “Üpwe aisinuk eu kapas ais, nge kosap tükümi seniei pälüan.”
JER 38:15 Nge Jeremaia a üreni Setekia, “Are üpwe ürenuk pälüen om kapas ais, ifa usun, kosap fokun nieila? Nge are üpwe öüröürok, en kosap aüselingaei.”
JER 38:16 Mürin, ewe king Setekia a akapel ngeni Jeremaia le monomon, “Mwo manauen ewe Samol mi Lapalap, ewe mi fang ngenikich manau, üsap niikala ika asechikolong lepöün ätekewe mi mochen angei manauom.”
JER 38:17 Mürin, Jeremaia a üreni Setekia, “Iei alon Kot ewe Samol mi Unusen Manaman, ewe Koten Israel: Are kopwe fangatä ngeni nöün ewe kingen Papilon kewe meilap, mürin kosap mäla, nge ei telinimw esap karala. Iwe, ämi me chon leimwom oupwe manau.
JER 38:18 Nge are kosap fangatä ngeniir, mürin ei telinimw epwe oolong lepöün ekewe chon Papilon. Iwe, repwe kenala, nge en kosap tongeni sü seni lepöür.”
JER 38:19 Mürin, ewe king Setekia a üreni Jeremaia, “Üa niuokusiti ekewe chon Juta mi fen feila ngeni ekewe chon Papilon. Üa pwal niuokus pwe ekewe chon Papilon repwe asechieilong lepöür, nge ir repwe turunufaseei.”
JER 38:20 Nge Jeremaia a üra, “Resap asechikolong lepöür. Kopwe aleasochisi mine üa ürenuk fän alon ewe Samol mi Lapalap, mürin kopwe feiöch, nge kosap mäla.
JER 38:21 Nge ewe Samol mi Lapalap a pwäri ngeniei lon künaei mine epwe fis are kosap fangatä.
JER 38:22 Üa küna pwe ra emwenawu ekewe fefin meinisin mi chüen nom lon imwen ewe kingen Juta ren nöün ewe kingen Papilon kewe nöüwis. Ekewe fefin repwe apasa ngonuk, ‘Chiechiom kewe ka lüküür ra atupuk, en king, ra pwal pworaituk. Iei pecheöm ra kokotiu lon pwakak, nge ir ra kul senuk.’
JER 38:23 Repwe emwenawu pwülüom kewe me noum kewe ren ekewe chon Papilon, nge püsin en kosap tongeni sü seniir. Ewe kingen Papilon epwe turufuk, nge ei telinimw epwe karala.”
JER 38:24 Mürin, Setekia a üreni Jeremaia, “Kosap asile ngeni eman ekei kapas, pwe kete mäla.
JER 38:25 Are ekewe nöüwis repwe rong pwe üa kapas ngonuk, repwe feito reöm o ürenuk, ‘Kopwe ürenikem mine ka üreni ewe king, pwal mine ewe king a ürenuk. Are kosap tükümi och senikem, aisap niikela,’
JER 38:26 mürin kopwe üreniir, ‘Üa tüngor pwetete ngeni ewe king, pwe esap aliwinisefälieila ngeni ewe imwen fötek mi nom lon imwen Jonatan, pwe üsap mäla ikenan.’”
JER 38:27 Mürin, ekewe nöüwis meinisin ra feito ren Jeremaia o kapas ais ngeni, nge i a chök pälüeni won mine ewe king a öüra ngeni. Iei mine resap chüen kapas ngeni, pun esap wor eman a rongorong ar kapasfengen me ewe king.
JER 38:28 Nge Jeremaia a nonomotiu lon ewe lenien chon mas tori ewe rän Jerusalem a oola lon.
JER 39:1 Iwe, lon engolun maramen ewe atiuen ierin mwün Setekia ewe kingen Juta, Nepukatnesar ewe kingen Papilon me an mwichen sounfiu meinisin ra feito Jerusalem, ra pwelifeili fän pisekin maun o maun ngeni.
JER 39:2 Nge lon engol me aeuin ierin mwün Setekia, lon atiuen ränin ewe arüanün maram a pwang tittin ewe telinimw.
JER 39:3 Iwe, lupwen ra liapeni Jerusalem, nöün ewe kingen Papilon kewe meilapen nöüwis meinisin ra feito o mot lon ewe Asamalapen Lukalap. Ikkei iter: Nerkal-sareser, Samkar-nepo, Sarsekim, pwal eman Nerkal-sareser fiti ekoch nöüwis nöün ewe kingen Papilon.
JER 39:4 Nge lupwen Setekia ewe kingen Juta me nöün kewe sounfiu meinisin ra küneer, ra süla lepwin seni lon ewe telinimw won ewe al mi pwere ngeni tanipin ewe king ren ewe asamalap lefilen ekewe ruu tit. Iwe, ra süla akawenewenen ewe lemolun Jortan.
JER 39:5 Nge ekewe sounfiun Papilon ra tapweriir o tori Setekia me lon ewe maasiesin Jeriko. Ra liapeni o emwenala ren Nepukatnesar ewe kingen Papilon mi nom Ripla lon ewe fanü Hamat. Iwe, ewe kingen Papilon a apwüngala mine epwe fis ngeni.
JER 39:6 Iwe, a niela nöün Setekia kewe mwän me fän mesan lon Ripla. Ewe kingen Papilon a pwal niela ekewe aramas tekia meinisin seni Juta.
JER 39:7 Mürin a alusawu föün mesen Setekia o föti ngeni selimächä, pwe epwe uweela Papilon.
JER 39:8 Iwe, ekewe chon Papilon ra kenala ewe imwen king me imwen ekewe aramas, ra pwal ataetiu tittin Jerusalem.
JER 39:9 Mürin, Nepusaratan ewe meilapen chon tümwünü ewe king a uweela Papilon ekewe lusun aramas mi chüen nom lon ewe telinimw fiti chokewe mi sü ngeni me mwan.
JER 39:10 Nge Nepusaratan a likiti lon ewe fanü Juta ekoch aramas mi wöüngau resap eäni och. Lon ena fansoun a ngeniir tanipin wain me mälämäl.
JER 39:11 Iwe, Nepukatnesar ewe kingen Papilon a allük ngeni Nepusaratan ewe meilapen chon tümwünü ewe king fän äsengesin Jeremaia o apasa,
JER 39:12 “Kopwe angei Jeremaia o tümwünüöchü. Kosap afeiengaua, nge kopwe chök föri ngeni usun mine a ürenuk.”
JER 39:13 Iei mine Nepusaratan fiti ekewe meilapen nöüwis Nepusaspan me Nerkal-sareser pwal ekewe ekoch nöüwis nöün ewe kingen Papilon
JER 39:14 ra titi Jeremaia o emwenato seni ewe lenien chon mas. Ra lükü ngeni Ketalia nöün Aikam we mwän, nge Aikam nöün Safan, pwe epwe aliwinala lon imwan. Iei mine Jeremaia a nom lein ekewe aramas.
JER 39:15 Iwe, ewe Samol mi Lapalap a kapas ngeni Jeremaia, lupwen a chüen lokkolong lon ewe lenien chon mas,
JER 39:16 pwe epwe üreni Epet-melek ewe re Itiopia, “Iei alon ewe Samol mi Unusen Manaman, ewe Koten Israel: Iei üpwele apwönüetä ai kei kapas üa üra fän äsengesin ei telinimw, pwe üpwe afeiengaua, nge üsap afeiöchü. Nge lupwen epwe pwönüetä, en kopwe küna ren mesom.
JER 39:17 Nge ngang ewe Samol mi Lapalap üpwe amanauok lon ena rän, pwe kosap tolong lepöün chokewe ka niuokusitiir.
JER 39:18 Üpwe fokun amanauok pwe kosap mäla. En kopwe küna manau, pun ka anomu om lükülük woi. Ngang ewe Samol mi Lapalap üa kapas.”
JER 40:1 Iwe, ewe Samol mi Lapalap a kapas ngeni Jeremaia mürin än Nepusaratan ewe meilapen chon tümwünü ewe king a angasala i me lon Rama. Nepusaratan a küna Jeremaia me ikenan, pwe a föfö ngeni sein o nom lein ekewe chon oola seni Jerusalem me Juta, ir chokewe repwe feila Papilon.
JER 40:2 Iwe, ewe meilapen chon tümwünü ewe king a angei Jeremaia o üreni, “Ewe Samol mi Lapalap om we Kot a apwüngala ei feiengau mi fis ngeni ei leni.
JER 40:3 Iei a apwönüetä o föri usun mine a apasa. Pun ämi oua tipis ngeni ewe Samol mi Lapalap, pwe ousap aleasochisi, iei mine ekei feiengau ra torikemi.
JER 40:4 Nengeni, üpwe angasok ikenai seni föfön poum. Are ka mochen etiei le feila Papilon, kopwe etiei, nge ngang üpwe tümwünüöchuk. Nge are kosap mochen etiei le feila Papilon, kosap etiei. Nengeni, unusen ei fanü a nom mwom, kopwe püsin filätä ia ka mochen feila ie.
JER 40:5 Nge are kopwe nonomotiu, kopwe liwinla ren Ketalia nöün Aikam we mwän, nge Aikam nöün Safan. Ketalia i ätewe ewe kingen Papilon a awisa pwe epwe kepinan ekewe telinimwen Juta. Kopwe nom ren lein ekewe aramas, ika kopwe feila ia ka mochen feila ie.” Mürin, ewe meilapen chon tümwünü ewe king a ngeni Jeremaia mongö me lifang o afeiloi.
JER 40:6 Iwe, Jeremaia a feila ren Ketalia nöün Aikam we lon Mispa o nom ren ekewe aramas mi chüen nom lon ewe fanü.
JER 40:7 Nge ekewe meilapen ekewe sounfiun Juta mi nom lemäl fiti nöür sounfiu ra rong, pwe ewe kingen Papilon a awisa Ketalia nöün Aikam we pwe epwe kepinan ewe fanü, a pwal awisa pwe epwe nemeni ekewe mwän, fefin me semirit, chokewe mi fokun wöüngau me lon ewe fanü resap oola Papilon.
JER 40:8 Ikkei iten ekewe meilap: Ismael nöün Netania we mwän, Johanan nöün Karea we, Seraia nöün Tanumet, nöün Efai kewe ewe re Netofa me Jesania nöün eman re Maka. Irfengen me nöür kewe sounfiu ra feila ren Ketalia mi nom Mispa.
JER 40:9 Iwe, Ketalia a pwon fän akapel ngeniir me nöür kewe sounfiu o üreniir, “Ousap niuokus, oupwe fangatä ngeni ekewe chon Papilon. Oupwe nonom lon ei fanü o angang ngeni ewe kingen Papilon, mürin meinisin epwe öch fän itemi.
JER 40:10 Nge ngang üpwe nonom Mispa, pwe üpwe tupunikemi ren ekewe chon Papilon repwe feito rech. Nge ämi oupwe kini föün irän wain, föün irän leres me föün olif o iseniir lon ämi kewe pör. Oupwe pwal imweimw lon ekewe telinimw oua angeesefäliir.”
JER 40:11 Pwal ekewe chon Juta meinisin mi nom Moap, Amon, Etom me pwal ekoch fanü ra rongorong pwe ewe kingen Papilon a likitala ekoch aramas lon Juta o awisa Ketalia, pwe epwe nöür kepina.
JER 40:12 Mürin, ekewe chon Juta meinisin ra liwin seni ekewe leni meinisin ia ra toropas ie, o feila lon ewe fanü Juta ren Ketalia lon Mispa. Iwe, ra ionifengeni chomong, chomong föün irän wain me föün irän leres.
JER 40:13 Iwe, Johanan nöün Karea we mwän me ekewe souemwenin ekewe mwichen sounfiu meinisin mi nom lemäl ra feito ren Ketalia lon Mispa.
JER 40:14 Iwe, ra üreni, “Ka silei pwe Paalis ewe kingen chon Amon a tinato Ismael nöün Netania we mwän, pwe epwe niikela?” Nge Ketalia nöün Aikam we esap lüküür.
JER 40:15 Mürin, Johanan a kapas ngeni Ketalia le monomon me lon Mispa, “Kopwe mwüt ngeniei pwe üpwe feila o niela Ismael nöün Netania we, nge esap wor eman epwe silei. Pwota epwe niikela, pwe ekewe chon Juta meinisin mi chufengen reöm repwe toropas, nge ekewe lusun aramas mi chüen nom lon Juta repwe rosola?”
JER 40:16 Nge Ketalia a üreni Johanan, “Kosap föri ei föför, pun esap pwüng om kapas fän iten Ismael.”
JER 41:1 Iwe, lon ewe afisuen maram Ismael nöün Netania we, nge Netania nöün Elisama seni ewe familien king, i eman lein nöün ewe king kewe meilap, a feito me engol mwän ren Ketalia nöün Aikam we lon Mispa. Nge lupwen ra mongöfengen ikenan lon Mispa,
JER 41:2 Ismael me ekewe engol mwän mi nom ren ra ütä o niela Ketalia ren ketilas, i ätewe ewe kingen Papilon a awisa pwe epwe kepinan ewe fanü.
JER 41:3 Ismael a pwal niela ekewe chon Juta meinisin mi nom ren Ketalia lon Mispa, pwal ekewe sounfiun Papilon a sereniir me ikenan.
JER 41:4 Iwe, lon ewe rän mürin än Ketalia ninnila, mwen esamwo wor eman a silei usun,
JER 41:5 walik mwän ra feito seni Sikem, Silo me Samaria, nge ra räisöüla alüser, ra kamwei üfer o akinasa inisir. Ra uwato asoren mongö me apach mi pwokus, pwe repwe asor lon ewe imwenfel.
JER 41:6 Nge Ismael a feiliwu seni Mispa pwe epwe churiir, a fetal nge kechü. Iwe, lupwen a churiir, a üreniir, “Ouse mochen oupwe feito ren Ketalia.”
JER 41:7 Nge lupwen ra tolong lon ewe telinimw, Ismael me ekewe mwän mi nom ren ra nirela o atururolong lon eu chönüttu.
JER 41:8 Nge mi wor engol mwän me leir ra üreni Ismael, “Kosap niikem, pun a wor äm föün wiich me parli, äm noppuk me chönün chunen aia aopala lemäl.” Iei mine Ismael esap chüen nirela.
JER 41:9 Iwe, ewe chönüttu ia Ismael a aturalong ie somän ekewe mwän a nirela eu chönüttu mi fokun watte, ewe king Asa a tuw, lupwen Paasa ewe kingen Israel a maun ngeni. Iwe, Ismael a amasoua ei chönüttu ren ekewe somä.
JER 41:10 Mürin, Ismael a liapeni ekewe lusun aramas meinisin mi chüen nom Mispa me nöün ewe king kewe föpwül, ir chokewe Nepusaratan ewe meilapen chon tümwünü ewe king a awisa Ketalia pwe epwe nemeniir. Iwe, Ismael a liapeniir o emweniir, pwe repwe feila ngeni fanüen chon Amon.
JER 41:11 Nge lupwen Johanan nöün Karea we me ekewe souemwenin ewe mwichen sounfiu mi eti ra rong usun ewe föföringau Ismael a föri,
JER 41:12 ra angei nöür aramas meinisin o tapweri Ismael pwe repwe maun ngeni. Iwe, ra tori Ismael me arun ewe nomun koluk mi watte a nom Kipeon.
JER 41:13 Nge lupwen ekewe aramas meinisin mi nom ren Ismael ra küna Johanan me ekewe souemwenin ewe mwichen sounfiu, ra fokun pwapwa.
JER 41:14 Mürin, ekewe aramas meinisin ra kul o sä ngeni Johanan.
JER 41:15 Nge Ismael fiti waluman mwän ra sü seni Johanan o feila ren ekewe chon Amon.
JER 41:16 Mürin, Johanan me ekewe souemwenin ewe mwichen sounfiu mi eti ra angei ekewe sounfiu, ekewe fefin me semirit me ekewe nöüwis lon imwen king, o aliwinireto seni Kipeon. Ikkei ir ekewe aramas Ismael a uweerela seni Mispa mürin an niela Ketalia.
JER 41:17 Iwe, ra feila o ekis kaüla lon Kerut Kiman arun Petleem, pun ra ekiekin feila Isip,
JER 41:18 pokiten ekewe chon Papilon. Pun ra fokun niuokusitiir pokiten än Ismael niela Ketalia, ätewe ewe kingen Papilon a awisa pwe epwe kepinan ewe fanü.
JER 42:1 Mürin ekewe meilapen ewe mwichen sounfiu meinisin me Johanan nöün Karea we, pwal Asaria nöün Hosaia we mwän me ekewe aramas meinisin seni ekewe mi kis tori ekewe mi lap ra feito
JER 42:2 ren ewe soufos Jeremaia o üreni, “Kose mochen kopwe etiwa äm tüngor o iotek ngeni ewe Samol mi Lapalap ach we Kot fän item meinisin äm kewe mi chüen manau. Pun me lom aia chomong, nge ikenai äm kewe mi chüen manau aia chokükün usun ka püsin küna.
JER 42:3 Kopwe iotek pwe ewe Samol mi Lapalap ach we Kot epwe pwäri ngenikem ewe al aipwe feila won pwal mine aipwe föri.”
JER 42:4 Iwe, ewe soufos Jeremaia a üreniir, “Üa rongorong mine oua apasa. Üpwe fokun iotek ngeni ewe Samol mi Lapalap ach we Kot fän äsengesin mine oua tüngor, nge meinisin mine ewe Samol mi Lapalap epwe eäni pälüen üpwe ürenikemi. Üsap tükümala och senikemi.”
JER 42:5 Mürin, ra üreni Jeremaia, “Amwo ewe Samol mi Lapalap epwe eman chon pwärätä mi let o allükülük. Amwo epwe ü ngenikem, are aisap föri pwüngün ekewe kapas meinisin mine ewe Samol mi Lapalap ach we Kot epwe asile ngenikem me reöm.
JER 42:6 Inamwo ika epwe öchitikem ika esap, äm aipwe fokun aleasochisi ewe Samol mi Lapalap ach we Kot, i ewe aia tinukela ren. Pun äm aipwe feiöch are aia aleasochisi ewe Samol mi Lapalap ach we Kot.”
JER 42:7 Iwe, mürin engol rän ewe Samol mi Lapalap a kapas ngeni Jeremaia.
JER 42:8 Mürin, Jeremaia a kökkörato Johanan nöün Karea we me ekewe meilapen ewe mwichen sounfiu mi nom ren, pwal ekewe aramas meinisin seni ekewe mi kis tori ekewe mi lap
JER 42:9 o üreniir, “Iei alon ewe Samol mi Lapalap ewe Koten Israel, ewe oua tinieila ren pwe üpwe uwei ämi we tüngor ngeni,
JER 42:10 ‘Are oupwe nomotiu lon ei fanü, mürin ngang üpwe aükemiitä, nge üsap ataakemiitiu. Üpwe fotukikemi, nge üsap üttikemiitä. Pun üa lolilenäsini ai üpwe afeiengauakemi.
JER 42:11 Oupwe ükütiu le niuokusiti ewe kingen Papilon. Ousap niuokusiti, pun ngang üa etikemi pwe üpwe amanauakemi o angasakemi seni fän nemenian.
JER 42:12 Üpwe ümöümöch ngenikemi, pwe i epwe pwal ümöümöch ngenikemi o mwüt ngenikemi pwe oupwe nonom lon püsin fanüemi. Ngang ewe Samol mi Lapalap üa kapas.’
JER 42:13 Nge are oupwe apasa, ‘Aisap nomotiu lon ei fanü,’ are oua lükümach ngeni ewe Samol mi Lapalap ämi we Kot
JER 42:14 o apasa, ‘Ap, äm aipwe feila lon ewe fanü Isip o nonom ikenan ia esap torikem maun me ie, ia aisap rong tikin rappwan maun, aisap pwal echik ie,’
JER 42:15 mürin oupwe rongorong mine ewe Samol mi Lapalap a apasa, ämi chokewe mi chüen manau me lon Juta. Iei alon ewe Samol mi Unusen Manaman ewe Koten Israel, ‘Are oua fokun ekiekin feila Isip pwe oupwe nonom ikenan,
JER 42:16 mürin ewe maun oua niuokusiti epwe kükemi me lon ewe fanü Isip, nge ewe lengita oua niuokusiti epwe fokun tapwerikemiila Isip. Iwe, oupwe mäla ikenan.
JER 42:17 Ekewe aramas meinisin mi fokun ekiekin feila Isip pwe repwe nonom ikenan repwe fokun mäla lon maun, ren lengita me mätter. Esap wor eman epwe manau seni ewe feiengau üpwe awarato wor.’
JER 42:18 Pun iei alon ewe Samol mi Unusen Manaman, ewe Koten Israel, ‘Usun üa song me lingeringer ngeni ekewe chon Jerusalem, iei usun üpwe song me lingeringer ngenikemi, lupwen oupwe feila Isip. Aramas repwe leawenikemi lon ar ottek, oupwe wiliti och minen eniweniw o küna turunufas me itengau, nge ousap chüen künasefäli ei leni.’
JER 42:19 Iwe, ewe Samol mi Lapalap a ürenikemi, ämi chokewe mi chüen manau me lon Juta, pwe ousap feila Isip. Oupwe fokun silei pwe ngang üa fönöökemi ikenai,
JER 42:20 pun oua föri och mi mwäl a afeiengau ngeni manauemi. Ämi oua tinieila ngeni ewe Samol mi Lapalap ach we Kot o üra, ‘Kopwe iotek fän item ngeni ewe Samol mi Lapalap ach we Kot, nge meinisin mine i epwe apasa ngonuk, äm aipwe föri.’
JER 42:21 Iwe, ikenai üa pwäri ngenikemi alon ewe Samol mi Lapalap ach we Kot, nge ämi oua aleasolapa ekewe kapas meinisin a tini ngeniei pwe üpwe ürenikemi.
JER 42:22 Iei mine oupwe fokun silei pwe oupwe mäla lon maun, ren lengita me mätter me lon ewe leni ia oua mochen feila o nonom ie.”
JER 43:1 Iwe, lupwen Jeremaia a wes le apworausa ngeni ekewe aramas meinisin alon ewe Samol mi Lapalap ar we Kot a tini ngeni pwe epwe üreniir,
JER 43:2 Asaria nöün Hosaia we mwän me Johanan nöün Karea we me ekewe aramas mi sikesik meinisin ra üreni Jeremaia, “En ka eäni kapas chofana. Ewe Samol mi Lapalap ach we Kot esap tinukoto, pwe kopwe apasa pwe aisap feila Isip o nonom ikenan.
JER 43:3 Nge Paruk nöün Neria we mwän a peseek, pwe kopwe ü ngenikem o atolongakem fän nemenien ekewe chon Papilon, pwe repwe niikem ika uweekeemila Papilon.”
JER 43:4 Iei mine Johanan me ekewe meilapen mwichen sounfiu meinisin, pwal ekewe aramas meinisin resap aleasochis ngeni ewe Samol mi Lapalap, ar repwe nomotiu lon ewe fanü Juta.
JER 43:5 Mürin, Johanan me ekewe meilapen ewe mwichen sounfiu meinisin ra angei chokewe mi chüen manau me lon Juta o uweerela Isip fitifengen me ekewe aramas meinisin mi liwinto seni ekewe mwü ia ra toropasfeil ie.
JER 43:6 Ra uweala ekewe mwän me fefin, ekewe semirit me nöün ewe king kewe föpwül, pwal ekewe aramas meinisin Nepusaratan ewe meilapen chon tümwünü ewe king a likiti ngeni Ketalia. Ra pwal uweala ewe soufos Jeremaia me Paruk nöün Neria we.
JER 43:7 Iwe, ra feila ngeni ewe fanü Isip, pun resap aleasochisi alon ewe Samol mi Lapalap. Iwe, ra tori Tapanes.
JER 43:8 Mürin, ewe Samol mi Lapalap a kapas ngeni Jeremaia me lon Tapanes,
JER 43:9 “Kopwe angei ekoch fau mi föümong o irerela fän föün ewe al mesen asamalapen imwen Farao we mi nom lon Tapanes, lupwen ekewe chon Juta repwe atolok.
JER 43:10 Mürin kopwe üreniir, ‘Iei alon ewe Samol mi Unusen Manaman, ewe Koten Israel: Üpwe titi nei chon angang Nepukatnesar ewe kingen Papilon. I epwe anomu an lenien motun king won ekei fau üa irela, epwe pwal aüetä imwan imwen king wor.
JER 43:11 Iwe, Nepukatnesar epwe feito o maun ngeni ewe fanü Isip. Epwe niela chokewe mi feil ngeni ar repwe mäla o aoloi chokewe mi feil ngeni ar repwe oola, epwe pwal niela lon maun chokewe ra feil ngeni ar repwe mäla lon maun.
JER 43:12 Iwe, epwe keni än ekewe koten Isip kewe imwenfel o uweela ar kewe uluulun anümwäl. Epwe limeti ewe fanü Isip usun eman chon masen sip a ettala mösün üfan. Iwe, epwe feila seni Isip fän wesöchün an angang.
JER 43:13 Iwe, epwe amökkü ekewe ürefau mi pin mi nom Heliopolis lon Isip, epwe pwal kenala än ekewe koten Isip kewe imwenfel.’”
JER 44:1 Iwe, ewe Samol mi Lapalap a kapas ngeni Jeremaia fän äsengesin ekewe chon Juta meinisin mi nonom lon ewe fanü Isip, lon Miktol, Tapanes me Memfis, pwal lon ewe fanü Patros.
JER 44:2 Iei alon ewe Samol mi Unusen Manaman, ewe Koten Israel, “Ämi oua küna ekewe feiengau meinisin üa atoto won Jerusalem, pwal won ekewe telinimwen Juta meinisin. Nengeni, tori ikenai ra eu leni mi pönüla esap wor eman a asoor,
JER 44:3 pokiten ekewe föför mi ngau ekewe aramas ra föriir. Ra asongaei ren ar keni apach mi pwokus, pwal ren ar fel ngeni pwal ekoch kot, ir me ämi pwal ämi kewe lewo ousap fel ngeniir me mwan.
JER 44:4 Üa soun tinala remi nei kewe chon angang ekewe soufos meinisin mi ürenikemi, pwe ousap föri ekei föför mi fokun ngau üa oput.
JER 44:5 Nge ämi ousap mochen aüselinga ika afäli ai kapas. Ousap kul seni ämi föföringau, ousap pwal ükütiu le keni apach mi pwokus ngeni pwal ekoch kot.
JER 44:6 Iei mine üa asasawu ai lingeringer me ai song won ekewe telinimwen Juta me ekewe alen Jerusalem o kenirela, pwe ra tatakis o pönüla usun a fis tori ikenai.”
JER 44:7 Nge iei usun mine Kot ewe Samol mi Unusen Manaman, ewe Koten Israel a apasa, “Pwota oua awarato ei sokun feiengau ngenikemi ren ämi ärala seni Juta mwän me fefin, mönükol me semirit, nge ousap likiti eman lusun mi chüen manau?
JER 44:8 Pwota oua asongaei ren ämi fel ngeni ekewe uluulun anümwäl oua föriir, pwal ren ämi keni apach mi pwokus ngeni pwal ekoch kot me lon ewe fanü Isip, ewe ia oua feila ie pwe oupwe nonom? Ren ei oupwe püsin ärikemiila, nge chon ekewe mwü meinisin won fanüfan repwe turunufasekemi o leawenikemi lon ar ottek.
JER 44:9 Ifa usun, oua manlükala ekewe föför mi ngau ämi kewe lewo me ekewe kingen Juta me pwülüer kewe, pwal ämi me pwülüemi kewe oua föriir me lon ewe fanü Juta pwal lon ekewe alen Jerusalem?
JER 44:10 Ousap püsin atekisonakemi tori ikenai, ousap meninitiei, ousap pwal föri pwüngün ekewe allük me pwüüng üa ngenikemi me ämi kewe lewo.”
JER 44:11 Iei mine ewe Samol mi Unusen Manaman, ewe Koten Israel a apasa, “Üpwe ü ngenikemi pwe üpwe afeiengauakemi o ärala chon Juta meinisin.
JER 44:12 Üpwe niela ekewe chon Juta mi chüen manau, ir chokewe mi fokun ekiekin feila Isip pwe repwe nonom ikenan. Repwe rosola meinisin me lon Isip ren maun ika lengita seni ekewe mi kis tori ekewe mi lap. Repwe wiliti och minen eniweniw o küna turunufas me itengau, aramas repwe leaweniir lon ar ottek.
JER 44:13 Üpwe apwüngü chokewe mi nonom lon ewe fanü Isip ren maun, ren lengita me mätter, usun üa apwüngü chon Jerusalem.
JER 44:14 Esap wor eman chon Juta mi chüen manau mi fen feila Isip, pwe epwe nonom ie, epwe sechiwu ika manau. Esap wor eman epwe liwiniti Juta, ewe fanü a positi an mochen liwinla ngeni o nonom ie. Pun chon Juta resap fokun liwin, chilon chök ekoch choisä.”
JER 44:15 Mürin, ekewe mwän meinisin mi silei pwe pwülüer kewe ra keni apach mi pwokus ngeni pwal ekoch kot me ekewe fefin meinisin mi ü ünükün, pwal ekewe aramas seni Patros lon ewe fanü Isip, irfengen eu mwichemongun aramas ra üreni Jeremaia,
JER 44:16 “Äm aisap mochen aüselinga ewe pworaus ka apworausa ngenikem fän alon ewe Samol mi Lapalap.
JER 44:17 Nge äm aipwe fokun föri meinisin mine aia fen pwon pwe aipwe föri. Äm aipwe keni apach mi pwokus ngeni ewe kiwinen läng o ninätiu ngeni asoren ün usun äm me äm kewe lewo, äm kewe king me nöüm kewe nöüwis aia fen föri me lon ekewe telinimwen Juta, pwal lon ekewe alen Jerusalem. Pun lon ena fansoun a wor chomong enem mongö, aia fefeitä, nge aisap feiengau.
JER 44:18 Nge seni ewe fansoun aia ükütiu le keni apach mi pwokus ngeni ewe kiwinen läng o kaüla le ninätiu ngeni asoren ün, aia osupwangen mettoch meinisin, aramas ra mäla lon maun pwal ren lengita.”
JER 44:19 Iwe, ekewe fefin ra pwal üra, “Lupwen äm aia föri nokop lon uluulun ewe kiwinen läng, lupwen aia keni apach mi pwokus ngeni o ninätiu ngeni asoren ün, pwülüem kewe ra fokun tipeeu ngeni meinisin mine aia föri.”
JER 44:20 Mürin, Jeremaia a üreni ekewe mwän me fefin mi eäni ei sokun pälüen ngeni,
JER 44:21 “Ifa usun, ewe Samol mi Lapalap esap chechemeni ewe apach mi pwokus oua keni, ämi me ämi kewe lewo, ämi kewe king me nöümi kewe nöüwis, pwal aramasen ewe fanü, me lon ekewe telinimwen Juta, pwal lon ekewe alen Jerusalem? Ifa usun, esap ekieki usun?
JER 44:22 Ewe Samol mi Lapalap esap chüen tongeni engila fän ämi kewe föför mi ngau me anioput. Iei mine fanüemi a wiliti eu fanü mi ta o pön, a anümamau, nge esap chüen so, usun a fis ikenai.
JER 44:23 Pokiten oua keni apach mi pwokus o tipis ngeni ewe Samol mi Lapalap, ousap pwal aleasochis ngeni ika föri pwüngün an kewe allük me pwüüng, ei feiengau a torikemi, usun a fis ikenai.”
JER 44:24 Iwe, Jeremaia a üreni ekewe aramas me ekewe fefin meinisin, “Oupwe rongorong alon ewe Samol mi Lapalap, ämi chon Juta meinisin mi nom lon ei fanü Isip.
JER 44:25 Iei alon ewe Samol mi Unusen Manaman, ewe Koten Israel: Ämi me pwülüemi kewe oua pwärätä ren ämi föför mine oua pwon, lupwen oua apasa, ‘Äm aipwe fokun apwönüetä äm we pwon pwe aipwe keni apach mi pwokus ngeni ewe kiwinen läng o ninätiu ngeni asoren ün.’ Iei oupwe föri o apwönüetä mine oua pwon.
JER 44:26 Nge oupwe rongorong, ämi chon Juta meinisin mi nonom lon ei fanü Isip, mine ngang ewe Samol mi Lapalap üa apasa: Üa pwon fän akapel itei mi lapalap, pwe esap wor eman chon Juta mi nom lon unusen ei fanü Isip epwe föüni itei o eäni ei akapel, ‘Mwo manauen Kot ewe Samol mi Lapalap.’
JER 44:27 Üa mamasa pwe üpwe atoto womi feiengau, nge sap feiöch. Ämi aramasen Juta meinisin mi nom lon ei fanü Isip oupwe rosola lon maun pwal ren lengita tori esap chüen wor eman lusun.
JER 44:28 Nge chokewe mi chüen manau o liwin seni ewe fanü Isip ngeni ewe fanü Juta repwe chokisikis. Mürin, chokewe mi chüen manau repwe silei än iö kapas a pwönüetä, ai ika ar.
JER 44:29 Ngang ewe Samol mi Lapalap üpwe alletä ngenikemi pwe üpwe apwüngükemi lon ei leni, pwe oupwe silei pwe ai kewe kapasen afeiengauakemi repwe fokun pwönüetä.
JER 44:30 Üpwe asechalong Farao Ofra ewe kingen Isip lepöün ekewe chon oputan mi mochen niela, usun üa asechalong Setekia ewe kingen Juta lepöün Nepukatnesar ewe kingen Papilon, ewe chon oputan mi mochen niela. Ngang ewe Samol mi Lapalap üa kapas.”
JER 45:1 Iwe, lon arüanün ierin mwün Jehoiakim ewe kingen Juta nöün Josia we mwän, Paruk a makeetiu mine Jeremaia a niwowomönü ngeni. Mürin Jeremaia a üreni Paruk,
JER 45:2 “Iei alon ewe Samol mi Lapalap ewe Koten Israel ngonuk, en Paruk:
JER 45:3 En ka apasa, ‘Feiengauei, pun ewe Samol mi Lapalap a achu riaföü ngeni ai weires. Üa malülü ren ai ngüngü, nge esap wor ai kinamwe.’
JER 45:4 Nge ngang ewe Samol mi Lapalap üa apasa: Üpwe ataetiu mine üa aüetä o üttätä mine üa fotukätiu. Iei usun mine üpwe föri ngeni unusen ewe fanü.
JER 45:5 Ifa usun, ka kütta mettoch mi watte fän itom? Kosap kütteer. Pun üpwe awarato feiengau won aramas meinisin. Nge ngang üpwe amwöchü manauom lon ekewe leni meinisin ia kopwe feila ie. Ngang ewe Samol mi Lapalap üa kapas.”
JER 46:1 Iwe, ewe Samol mi Lapalap a kapas ngeni ewe soufos Jeremaia fänäsengesin chon ekewe mwü,
JER 46:2 poputä me won Isip. Iei usun mine a apasa fän äsengesin nöün Farao Neko ewe kingen Isip mwichen sounfiu, Nepukatnesar ewe kingen Papilon a akufu me lon Karkemis arun ewe chanpupu Oifrat lon arüanün ierin mwün Jehoiakim ewe kingen Juta nöün Josia we mwän,
JER 46:3 “Oupwe amolätä ämi tittin maun mi watte me kükün o feila ngeni maun.
JER 46:4 Oupwe amolätä nöümi kewe oris o tötä wor, ämi chon wawa oris. Oupwe atettelikemi fän imwemi akau, oupwe amisi wokumi o üföüf üfemi sekitin maun.
JER 46:5 Nge met üa küna? Ra rükö o kulsefäl. Ekewe sounfiu ra kuf o müttir le sü. Resap nenesökür, niuokus watte a nom ünükür meinisin.” Iei alon ewe Samol mi Lapalap.
JER 46:6 “Chokewe mi müttir resap tongeni sü, nge ekewe sounfiu resap tongeni süla. Ra chepetek o turula lon ewe fanü efeng arun ewe chanpupu Oifrat.
JER 46:7 Iö ei mi wattela usun ewe chanpupu Nil, usun ekewe chanpupu mi säsewu.
JER 46:8 Isip a wattela usun ewe chanpupu Nil, pwal usun ekewe chanpupu mi säsewu. A apasa, ‘Üpwe wattela o pwölüela fanüfan. Üpwe ataela telinimw o niela ekewe aramas mi imweimw lor.’
JER 46:9 Oupwe allük ngeni ekewe oris pwe repwe sä, oupwe säpuropur, ämi chon wawa woken. Oupwe karisila, ämi sounfiu, ämi re Itiopia me Put mi uwei tittin maun, pwal ämi re Lut mi föüen le esefich.
JER 46:10 Ei rän iei ewe ränin Kot ewe Samol mi Unusen Manaman, eu ränin an epwe ngeni chon oputan chappen ar föför, eu ränin an epwe apwüngüür. Ewe ketilas epwe mongö tori an epwe möt, epwe ün cha tori an epwe ku. Pun Kot ewe Samol mi Unusen Manaman a föri eu asor me lon ewe fanü efeng arun ewe chanpupu Oifrat.
JER 46:11 Ämi aramasen Isip, oupwe feila Kiliat o angei säfei. Esap wor lomoten ämi oupwe eäni chomong säfei, pun ousap pöchökül ren.
JER 46:12 Chon ekewe mwü ra rongorong usun ämi itengau, aramas meinisin ra rongorong ämi siö. Eman sounfiu a chepetek won eman, ra turupöküla.”
JER 46:13 Iei ewe kapas ewe Samol mi Lapalap a apworausa ngeni ewe soufos Jeremaia fänäsengesin waren Nepukatnesar ewe kingen Papilon, pwe epwe atai ewe fanü Isip,
JER 46:14 “Oupwe asilefeili lon Isip o arongafeili lon Miktol, Memfis me Tapanes ekei kapas, ‘Oupwe ütä o amolakemiitä, pun pisekimi meinisin epwe tala lon maun.’
JER 46:15 Pwota ämi kot mi pöchökül itan Apis a turula? Esap tongeni ütä, pun ewe Samol mi Lapalap a aturätiu.
JER 46:16 Nöümi kewe sounfiu ra chepetek o turula. Ra ürafengen lefiler, ‘Ousipwe ütä o liwiniti aramasach me poputän fanüach. Sipwe sü seni nöün ewe chon ariaföüükich ketilas.’
JER 46:17 Oupwe aita ngeni Farao ewe kingen Isip eu it mi fö, ‘Akürang watte. A mwüt ngeni an fansoun fich pwe epwe feil seni.’
JER 46:18 Ngang ewe King itei ewe Samol mi Unusen Manaman üa apasa, ‘Mwo manauei, eman epwe fokun feito, epwe tekia usun ewe chuk Tapor me lein ekewe chuk, pwal usun ewe chuk Karmel mi nom aroset.
JER 46:19 Ämi chon Isip, oupwe amolätä pisekimi, pun oupwe oola. Memfis epwe wiliti eu fanüapö, eu leni mi tatakis esap so.’
JER 46:20 Isip a wewe ngeni eman kow mi fokun mürina, nge eman sokun kilisoon kow mi kükkük a feito won seni efeng.
JER 46:21 Iwe, nöün kewe sounfiu a möniir ra usun chök nienifön kow mi öümanau. Nge pwal ir ra kul o süpöküla, resap üppos. Pun ränin ar feiengau a feitiu wor, ewe fansoun ar küna apwüng a war.
JER 46:22 Isip epwe sü, nge isiis usun isiisin eman serepenit mi sü, lupwen chon oputan kewe ra karisito fän pöchökül. Repwe maun ngeni fän nöür kouk usun chon pöküpök irä.
JER 46:23 Repwe pöküela an we wöllap, inamwo ika a fokun malül. Ra fokun chomong seni lifichimas, rese tongeni lea.
JER 46:24 Ekewe chon Isip repwe säw, repwe oolong lepöün ekewe aramas seni efeng. Ngang ewe Samol mi Lapalap üa kapas.”
JER 46:25 Iwe, ewe Samol mi Unusen Manaman, ewe Koten Israel a üra, “Üpwe awarato apwüng won Amon ewe koten Tepes, won Isip me an kewe kot me nöün kewe king, pwal won Farao me chokewe meinisin mi anomu ar apilükülük won.
JER 46:26 Üpwe asechirelong lepöün chokewe mi mochen nirela, lepöün Nepukatnesar ewe kingen Papilon me nöün kewe meilapen sounfiu. Nge ekoch fansoun mürin, Isip epwe sosefäl usun lon ekewe fansoun lom. Ngang ewe Samol mi Lapalap üa kapas.
JER 46:27 Nge ämi mwirimwirin Jakop nei we chon angang, ousap niuokus, ämi chon Israel, ousap rükö. Üpwe amanauakemi seni lon ewe fanü toau. Üpwe amanaua mwirimwirimi kana seni ewe ia ra oola ie. Än Jakop cho epwe liwinto o nonomöch fän kinamwe, nge esap wor eman epwe aniuokusuur.
JER 46:28 Ämi mwirimwirin Jakop nei we chon angang, ousap niuokus, pun ngang üpwe etikemi. Üpwe arosala chon ekewe mwü ia üa asükemiila ie, nge ämi üsap arosakemiila. Üsap tongeni likiti ai üpwe etikemi. Üpwe apwüngükemi fän aüküköch. Ngang ewe Samol mi Lapalap üa kapas.”
JER 47:1 Iwe, ewe Samol mi Lapalap a kapas ngeni ewe soufos Jeremaia fänäsengesin chon Filistia mwen än Farao liapeni Kasa.
JER 47:2 Iei alon ewe Samol mi Lapalap, “Nengeni, ekewe koluk ra fokun pumong seni efeng, repwe wiliti eu öüt mi fokun pufetal. Repwe pwölüela ewe fanü me meinisin mine a nom lon, pwal ekewe telinimw me chokewe mi imweimw lor. Ekewe aramas repwe puchör, nge chokewe mi nonom lon ewe fanü repwe ngüngüres.
JER 47:3 Ekewe semelap resap nenesökür pwe repwe alisi nöür, pöür ra chök ititiu, lupwen ra rongorong chopuchopun pechen ekewe oris, akürangen ekewe wokenin maun me üngüngün willer kewe.
JER 47:4 A war ewe fansoun, pwe ekewe chon Filistia meinisin repwe rosola, nge chokewe mi chüen manau o tongeni alisi Tirus me Siton repwe kärila. Pun ngang ewe Samol mi Lapalap üpwe arosala ekewe chon Filistia, chokewe mi chüen manau me lon ewe fanü arosetin Kaftor.
JER 47:5 Chon Kasa repwe räisöüla mökürer lon ar letipeta, chon Askelon ra mäfeiengau. Ämi chokewe mi chüen manau me lon ewe maasies, ifa ükükün fansoun ämi oupwe akinasakemi pokiten ämi lolilen?
JER 47:6 Ämi oua puchör o kökkö, ‘En nöün ewe Samol mi Lapalap ketilas, ifa ükükün fansoun om kopwe sopwela le ninni? Kopwe liwinlong lon tükütükum, kopwe asösö o fanafanala.’
JER 47:7 Ifa usun an epwe tongeni asösö, ika ngang ewe Samol mi Lapalap üa awisa pwe epwe ninni? Üa awisa pwe epwe maun ngeni Askelon me ekewe fanü mi nom aroset.”
JER 48:1 Iei usun mine ewe Samol mi unusen Manaman, ewe Koten Israel a apasa fänäsengesin Moap, “Feiengauen ekewe aramasen Nepo, pun ar telinimw a tala. Kiriataim a itengau o oola. Ewe imwen maun mi pöchökül a itengau o tatiu.
JER 48:2 Esap chüen wor iteüöchün Moap. Lon Hespon ra rawei usun ar repwe ataela Moap o apasa, ‘Ou etto, ousipwe ärala Moap, pwe esap chüen eu mwü.’ Pwal en ewe telinimw Matmen, kopwe fanafanala, pun sounfiu repwe maun ngonuk.
JER 48:3 Oupwe rongorong eu puchör seni Horonaim, pokiten a fis angangen kata me afeiengau watte.
JER 48:4 Moap a tala. Aramas ra rong puchörün ekewe semirit.
JER 48:5 Ra feitä nge kechü lon ewe aletä ngeni Luhit, lon ewe aletiu ngeni Horonaim aramas ra rong eu puchörün feiengau.
JER 48:6 Oupwe sü. Oupwe kütta manauemi. Oupwe sä usun eman aas mi mwacho lon fanüapö.
JER 48:7 Pokiten oua anomu ämi apilükülük won ämi imwen maun mi pöchökül me won wöümi, ämi oupwe pwal kuf. Iwe, Kemos epwe oola fiti nöün kewe souasor me nöüwis.
JER 48:8 Ewe chon kata epwe feito won iteiten telinimw, nge esap wor eu epwe tiwewu. Ewe lemol epwe tatakis, nge ewe maasies epwe tala usun ngang ewe Samol mi Lapalap üa fen kapas.
JER 48:9 Oupwe awora pöükässin Moap pwe epwe tongeni ässila. An kewe telinimw repwe tala, nge esap wor eman epwe nom lor.”
JER 48:10 A anümamau ätewe mi föri än ewe Samol mi Lapalap angang fän tümwününgau. A anümamau ätewe mi amwöchü an ketilas seni an epwe ni aramas.
JER 48:11 Iwe, ewe Samol mi Lapalap a üra, “Moap a nom fän kinamwe fansoun meinisin, esap oola mwo fän eu. Moap a usun chök wain mi nonomopos lon lenian, esap niiniwu me lon eu pör o niinilong lon pwal eu. Nennan esap ngauala, nge pwonnan ususun we chök.
JER 48:12 Iei mine epwe war ewe fansoun, lupwen üpwe tinala aramas repwe niinawu Moap usun ach niinawu wain. Repwe apöwu seni lon lenian o amökkü ekewe pör. Ngang ewe Samol mi Lapalap üa kapas.
JER 48:13 Mürin Moap epwe lichipüng ren Kemos, usun ekewe chon Israel ra lichipüng, lupwen ra anomu ar apilükülük won Petel.
JER 48:14 Ämi re Moap, pwota oua apasa pwe ämi sounfiu me mwän mi pwora lon maun?
JER 48:15 Moap epwe tala, pwal an kewe telinimw repwe oola. Nöün kewe alüal mi sipeöch lon maun repwe ninnila. Ngang ewe King itei ewe Samol mi Unusen Manaman üa kapas.
JER 48:16 Feiengauen Moap a arapoto, an riaföü epwe warakai.
JER 48:17 Oupwe kechüeiti Moap, ämi chokewe mi nom pwelin ünükün, pwal ämi meinisin mi silei iteüöchün, oupwe üra, ‘A fokun wes an nemenem pöchökül, esap chüen wor an ling me manaman.’
JER 48:18 Ämi chon Tipon, oupwe sapwilitiu seni leniemi mi iteföüla o mot won pwül mi sangang. Pun ewe chon atai Moap a feito o ataela ämi kewe imwen maun mi pöchökül.
JER 48:19 Ämi chon Aroer, oupwe ütä ünükün ewe al o katol. Oupwe aisini ekewe mwän me ekewe fefin mi sü, ‘Met a fis?’
JER 48:20 Repwe pälüeni, ‘Moap a itengau, pun a tatakis. Oupwe kechü o püchör. Oupwe asilefeili aroppen ewe chanpupu Arnon pwe Moap a tala.’
JER 48:21 Kapwüng a feito won ekewe telinimw lon ewe maasies, won Holon, Jasa me Mefat,
JER 48:22 won Tipon, Nepo me Pet-tiplataim,
JER 48:23 won Kiriat-aim, Petkamul me Petmeon,
JER 48:24 won Keriot, Posra me ekewe telinimw meinisin mi arap me toau lon ewe fanü Moap.
JER 48:25 Än Moap pöchökül a wesila, nge an pwora a ükütiu. Ngang ewe Samol mi Lapalap üa kapas.
JER 48:26 Oupwe apucha Moap, pun a ü ngeniei ngang ewe Samol mi Lapalap. Moap epwe sööki lon musan, nge aramas repwe ämängaua.
JER 48:27 Ifa usun, ämi chon Moap ousap ämängaua Israel? Ifa usun, Israel a pwä me lein chon solä pwe iteiten fansoun, lupwen oua kapas usun, oua elifechifechi möküremi ngeni fän ämängau?
JER 48:28 Ämi chon Moap, oupwe likiti ämi kewe telinimw o nom lon pwangen ekewe achau. Oupwe usun eman lisom mi fas mesen eu föimw.
JER 48:29 Chon Moap ra fokun lamalamtekia. Üa rongorong usun ar ürannang, ar lamalamtekia me ar tunosikesik, pwal usun tipetekian leluker.
JER 48:30 Ngang ewe Samol mi Lapalap üa silei ar sikesik. Ar aingaing a pön, ar föför a lomotongau.
JER 48:31 Iei mine üpwe ngüngüres fän iten chon Moap meinisin, üpwe letipeta fän iten ekewe aramasen Kir-eres.
JER 48:32 Üpwe kechüeituk, en Sipma, lap seni ai kechüeiti Jaser. En telinimw Sipma ka wewe ngeni efoch irän wain, palom kewe ra itila pekilan ewe Setin Mäla, pwal tori Jaser. Ewe chon kata a atai uom kewe mi nup me om kewe föün irän wain.
JER 48:33 Pwapwa me meseik ra katowu seni ewe fanü Moap mi pwülüöch. Üa aükätiu puupuun wain seni ewe lenien wüchüch. Esap wor eman epwe puri ekewe föün irän wain fän mweireiren pwapwa. Ika mwo epwe wor mweir, nge esap mweireiren pwapwa.
JER 48:34 Ekewe aramasen Hespon me Eleale ra puchör. Ekewe aramasen Jahas ra rong ar puchör, pwal chon Soar tori chon Horonaim me chon Eklat-selisia. Pwal ekewe kolukun Nimrim ra pwasatä.
JER 48:35 Üpwe aükätiu me lon Moap än ekewe aramas asor won ekewe leni tekia me ar keni apach mi pwokus ngeni ar kewe kot. Ngang ewe Samol mi Lapalap üa kapas.
JER 48:36 Iei mine lelukei a letipeta o ngüngü usun tikin eu aangün fän iten Moap pwal fän iten ekewe aramasen Kir-eres, pun wöür meinisin ra ionifengeni a rosola.
JER 48:37 Iwe, ir meinisin ra räisöüla mökürer o fichiela alüser. Ra akinasa pöür o pwölü ngeni wänükür üf seni tuk.
JER 48:38 Won imwen chon Moap meinisin pwal lon ekewe lenien amwicheich, aramas ra chök kechü. Pun üa amökkü Moap usun eman a amökkü eu pör esap aücheani.
JER 48:39 Moap a fokun tatakis. Ekewe aramas ra fokun ngüngüres. Moap a kulu sökürün fän säw. A wiliti och minen turunufas me och minen eniweniw ngeni meinisin mi nom pwelin ünükün. Ngang ewe Samol mi Lapalap üa kapas.”
JER 48:40 Iei alon ewe Samol mi Lapalap, “Nengeni, eu mwü epwe müttir ässitiu won Moap usun eman ikel o ameresala pöükässin won.
JER 48:41 Epwe liapeni ekewe telinimw me ekewe imwen maun mi pöchökül. Lon ena rän, ekewe sounfiun Moap repwe niuokus usun chök eman fefin, lupwen a tori an cheuchen fam.
JER 48:42 Moap epwe tala pwe esap chüen eu mwü, pun a püsin atekiatai o ü ngeniei.
JER 48:43 Niuokus watte, pwang me likatup ra sounikemi, ämi chon Moap. Ngang ewe Samol mi Lapalap üa kapas.
JER 48:44 Ätewe mi mochen sü seni ewe niuokus epwe turulong lon ewe pwang. Nge ätewe mi towu seni ewe pwang epwe tup lon ewe likatup. Pun ngang ewe Samol mi Lapalap üpwe awarato won Moap ewe fansoun an küna apwüng.
JER 48:45 Ekewe choisä ra üla fän nürün Hespon lon ar apwangapwang. Iwe, eu ekkei a küwu seni Hespon, eu ngetenget a ngetewu seni imwen Sihon. A kenala kiännin ewe fanü Moap me chukun ewe mwichen aramas mi sani maun.
JER 48:46 Feiengauom, en Moap. Ekewe aramas mi fel ngeni Kemos ra rosola, nge nöür kewe mwän me fefin ra oola.
JER 48:47 Nge lon kan fansoun mwach, üpwe aliwinisefäli ekewe chon Moap mi oola. Ngang ewe Samol mi Lapalap üa kapas.” Iei ükütiuen ewe apwüng won Moap.
JER 49:1 Iei usun mine ewe Samol mi Lapalap a apasa fänäsengesin ekewe chon Amon, “Ifa usun, esap wor nöün Israel mwän? Ifa usun, esap wor eman älemwirin? Pwota chök ekewe aramas mi fel ngeni Milkom ra angei fanüen chon ewe ainangen Kat o imweimw lon ar kewe telinimw?
JER 49:2 Nge epwe war ewe fansoun üpwe föri pwe ekewe chon Amon mi nom lon ewe telinimw Rapa repwe rongorong akürangen maun. Ewe telinimw epwe wiliti eu ioien mettoch mi tala, nge wisoposopun kewe repwe karala. Mürin chon Israel repwe angeesefäli fanüer seni chokewe mi angei seniir me mwan. Ngang ewe Samol mi Lapalap üa kapas.
JER 49:3 Oupwe puchör, ämi chon Hespon, pun Ai a tala. Oupwe ngüngüres, ämi föpwülün Rapa. Oupwe üföüf üf seni tuk o kechü. Oupwe säfeil me lon tittin ewe telinimw. Pun ämi we kot Milkom epwe oola fiti nöün kewe souasor me nöüwis.
JER 49:4 Pwota oua aingaing won ämi kewe lemol, ämi aramas ousap allükülük? Oua anomu ämi apilükülük won wöümi o apasa, ‘Iö epwe tongeni maun ngenikich?’
JER 49:5 Nengeni, üpwe awarato niuokus watte womi seni ekis meinisin. Repwe asükemiila ämi meinisin, nge esap wor eman epwe achufengeni ekewe choisä. Ngang Kot ewe Samol mi Unusen Manaman üa kapas.
JER 49:6 Nge mürin ekoch fansoun üpwe aliwinisefäli ekewe chon Amon mi oola. Ngang ewe Samol mi Lapalap üa kapas.”
JER 49:7 Iei usun mine ewe Samol mi Unusen Manaman a apasa fänäsengesin Etom, “Ifa usun, esap chüen wor tipachem me lon Teman? Ifa usun, än ekewe chon mirit öüröür a wesila? Ifa usun, esap chüen wor ar tipachem?
JER 49:8 Ämi chon Tetan, oupwe kul o sü, oupwe op lon ekewe föimw mi alolol. Pun üpwe awarato feiengau won ekewe mwirimwirin Esau lupwen fansoun üpwe apwüngüür.
JER 49:9 Lupwen chon kini föün irän wain ra feito remi, ifa usun, resap likiti ekoch föün? Nge lupwen chon solä ra feito lepwin, ifa usun, resap chök angei ükükün mine ra mochen?
JER 49:10 Nge ngang üa angei meinisin seni ekewe mwirimwirin Esau. Üa pwärala ar lenien op, pwe resap chüen tongeni op. Nöür kewe semirit ra mäla, pwal pwiir me chon arur. Esap chüen wor eman lusun.
JER 49:11 Oupwe likiti ngeniei nöümi semirit mi mäsen pwe üpwe tümwünüür. Nöümi kewe fefin mi mä pwülüer repwe apilükülüküei.
JER 49:12 Are chokewe esap öchitiir ar repwe ün seni ewe kapen apwüng, nge ra fen wisen ün seni, ifa usun, oua ekieki pwe ämi ousap pwal küna apwüng? Apwi, oupwe fokun ün seni ewe kapen apwüng.
JER 49:13 Üa pwon fän akapel itei pwe ewe telinimw Posra epwe wiliti och minen eniweniw me eu leni mi pön, aramas repwe turunufasei o leaweni lon ar kapasen ottek. Nge ekewe telinimw ünükün repwe pönüla tori feilfeilachök. Ngang ewe Samol mi Lapalap üa kapas.”
JER 49:14 Üa rongorong eu pworaus seni ewe Samol mi Lapalap, nge eman chon künö a titila ren chon ekewe mwü pwe epwe apasa, “Oupwe amwichafengenikemi, oupwe feito, pwe oupwe maun ngeni Etom.”
JER 49:15 Nengeni, ewe Samol mi Lapalap epwe akisuketiu me lein ekewe mwü, kopwe küna koput me lein ekewe aramas.
JER 49:16 Än aramas niuokusituk me lamalamtekian lelukom ra atupuk, en ewe mi nom lon ekewe pwangen achau o nonom won ungen ewe chuk. Inamwo ika ka föri leniom wilitekia usun lenien ekewe ikel, epwe chök aturuketiu seni ikenan. Ewe Samol mi Lapalap a kapas.
JER 49:17 Ewe Samol mi Lapalap a apasa, “Etom epwe wiliti och minen eniweniw. Meinisin mi pwerela ünükün repwe fokun niuokus o turunufasei pokiten an feiengau meinisin.
JER 49:18 Etom epwe usun chök Sotom me Komora me ekewe telinimw ünükür, lupwen ra tala. Esap wor eman aramas epwe imweimw lon, esap pwal wor eman epwe saifeil lon. Ngang ewe Samol mi Lapalap üa kapas.
JER 49:19 Usun eman laion a towu seni ewe wöllap arun ewe chanpupu Jortan o feila ngeni eu lenien enen sip, iei usun üpwe müttir feito o asüela chon Etom seni fanüer. Mürin üpwe awisa ätewe üa filätä pwe epwe nemeni Etom. Iö epwe wewe ngeniei? Iö epwe pälüeniei? Meni souemwen a tongeni ü ngeniei?
JER 49:20 Iei mine oupwe rongorong usun mine ngang ewe Samol mi Lapalap üa akota ngeni chon Etom, pwal mine üa ekiekietä ngeni ekewe chon Teman: Ellet repwe nukiela pwal ekewe semirit, nge aramas meinisin repwe rükö ren.
JER 49:21 Fanüfan epwe chechech ren akürangen än Etom turutiu. Aramas repwe rongorong ar puchör me arun ewe Setipar.
JER 49:22 Nengeni, ewe chon oputa epwe ässfeil o müttir ässitiu won Posra usun eman ikel a ässitiu o ameresala pöükässin won. Lon ena fansoun ekewe sounfiun Etom repwe niuokus usun chök eman fefin, lupwen a tori an cheuchen fam.”
JER 49:23 Iei usun mine ewe Samol mi Lapalap a apasa fänäsengesin Tamaskus. Chon ekewe telinimw Hamat me Arpat ra rükö, pun ra rongorong pworausen afeiengau. Ra niuokus o mwökütüküt lon leluker ren ar osukosuk usun matau esap tongeni lüala.
JER 49:24 Ekewe chon Tamaskus ra apwangapwangala, ra kul o sü fän niuokus watte. Riaföü me cheuch a cheriir usun eman fefin a cheri an cheuchen fam.
JER 49:25 Ewe telinimw mi iteföüla o pwapwa a koturula.
JER 49:26 Lon ewe rän alüalün ewe telinimw repwe mäla lon alan kewe, nge nöün kewe sounfiu meinisin repwe rosola.
JER 49:27 Iwe, ngang üpwe aküw eu ekkei won tittin ewe telinimw Tamaskus, epwe kenala än Penhatat kewe imwen maun mi pöchökül. Ngang ewe Samol mi Unusen Manaman üa kapas.”
JER 49:28 Iei usun mine ewe Samol mi Lapalap a apasa fänäsengesin Ketar me ekewe mwü Hasor a nemeniir, ir ekewe mwü Nepukatnesar ewe kingen Papilon a liapeni, “Oupwe ütä o maun ngeni Ketar. Oupwe arosala ekewe aramas mi nom ötiu.
JER 49:29 Imwer imw mangaku me nöür pwiin sip repwe oola, pwal ar chechen lon imw me pisekir meinisin. Aramas repwe angei seniir nöür kamel o kökkö ngeniir, ‘Niuokus watte a nom pwelin ünükümi.’
JER 49:30 Ngang ewe Samol mi Lapalap üa fönöökemi, ämi mi nonom lon Hasor, pwe oupwe sü. Oupwe feila toau o op lon föimw mi alolol. Pun Nepukatnesar ewe kingen Papilon a rawangauakemi o ekiekietä eu akot ngenikemi.
JER 49:31 Oupwe ütä o maun ngeni chon eu mwü mi nonomöch o kinamwe. Ar telinimw esap wor asamalapen tittin ika amwöchün, ir echök ra imwüla. Ngang ewe Samol mi Lapalap üa kapas.
JER 49:32 Oupwe liapeni nöür kamel, nöür pwiin sip epwe choon wokumi. Üpwe atoropasafeili chokewe mi fichi mökürer, üpwe awarato feiengau wor seni ekis meinisin.
JER 49:33 Hasor epwe wiliti eu leni ia kolak mi mwacho ra nom ie, epwe pönüla tori feilfeilachök. Esap wor eman epwe imweimw ie, esap pwal wor eman epwe fetal lon. Ngang ewe Samol mi Lapalap üa kapas.”
JER 49:34 Iwe, ewe Samol mi Lapalap a kapas ngeni ewe soufos Jeremaia fänäsengesin Elam lepoputän mwün Setekia ewe kingen Juta.
JER 49:35 Iei alon ewe Samol mi Unusen Manaman, “Nengeni, üpwe niela nöün Elam kewe chon esefich, populapen ar pöchökül.
JER 49:36 Üpwe awarato won Elam ekewe rüanü asepwäl seni ekewe rüanü pelien läng. Üpwe atoropaseer ngeni ekei rüanü asepwäl. Iwe, esap wor eu mwü ia chokewe mi sü seni Elam resap feila ie.
JER 49:37 Üpwe föri pwe chon Elam repwe niueiti chon oputer, chokewe mi mochen nirela. Üpwe afeiengaua ekewe chon Elam lon ai song mi fokun watte o tinala mwichen sounfiu mürir tori üpwe aroserela.
JER 49:38 Üpwe niela ar we king me nöür kewe nöüwis o anomu ai lenien motun king lon Elam. Ngang ewe Samol mi Lapalap üa kapas.
JER 49:39 Nge lon kan fansoun mwach üpwe aliwinisefäli ekewe chon Elam mi oola. Ngang ewe Samol mi Lapalap üa kapas.”
JER 50:1 Ikkei ekewe kapas ewe soufos Jeremaia a apasa fän alon ewe Samol mi Lapalap fänäsengesin Papilon me aramasen lon,
JER 50:2 “Oupwe asilefeili ekei kapas me lein chon ekewe mwü o arongafeiliir, oupwe aürätä eu asisil o arongafeili ei pworaus. Ousap tükümala, nge oupwe apasa, ‘Papilon a oo. Ewe anü Pel a itengau, ewe anü Merotak a rükö. An kewe uluulun anümwäl ra itengau, an kewe uluulun anümwäl mi anioput ra tatakis.’
JER 50:3 Pun chon eu mwü ra feito seni efeng pwe repwe maun ngeni Papilon. Repwe ataala ewe fanü pwe esap wor eman epwe nonom lon. Aramas me man repwe sü seni ewe fanü.”
JER 50:4 Iei alon ewe Samol mi Lapalap, “Lon ena fansoun ekewe aramasen Israel me Juta repwe feitopök nge kechü, repwe küttaei ngang ewe Samol mi Lapalap ar we Kot.
JER 50:5 Repwe ais ewe al mi ale ngeni Sion o feila ngeni. Iwe, repwe apasa, ‘Ousipwe achufengenikich me ewe Samol mi Lapalap fän eu pwon mi nom tori feilfeilachök, eu pwon esap manlüküla.’
JER 50:6 Nei aramas ra usun chök sip mi malechela. Nöür kewe chon mas ra atokeer o emwenirela won ekewe chuk. Ra feila seni eu chuk tori pwal eu, resap chüen chechemeni ar lenien asösö.
JER 50:7 Meinisin mi küneer ra ocheer. Chon oputer ra apasa, ‘Esap wor ach tipis ren mine sia föri, pun ir ra tipis ngeni ewe Samol mi Lapalap. Ar kewe lewo ra apilükülükü ewe Samol mi Lapalap, nge itä pwal ir repwe allükülük ngeni.’
JER 50:8 Ämi chon Israel, oupwe sü seni Papilon, oupwe towu seni ewe fanü. Oupwe wewe ngeni ekewe ätemwänin kuch mi akom mwen ewe pwiin man.
JER 50:9 Pun nengeni, üpwe äpwächa o awarato eu mwichen aramas seni ekewe mwü watte mi nom efeng, pwe repwe maun ngeni Papilon. Repwe atetteliir pwe repwe maun ngeni ewe fanü o liapeni. Nöür kewe sounfiu mi sipeöch le esefich ra fokun föüen.
JER 50:10 Aramas repwe angei pisekin chon Papilon fän pöchökül, nge repwe fokun angei ükükün ar mochen. Ngang ewe Samol mi Lapalap üa kapas.”
JER 50:11 Iei alon ewe Samol mi Lapalap, “Ämi chon Papilon, oua angei pisekin lon fanüei fän pöchökül. Oua meseik o pwapwa, oua pwal mwetemwet usun eman nienifön kow mi wichiwich umwun wiich o tikitik usun oris mi pöchökül.
JER 50:12 Nge püsin ämi we telinimw mi watte epwe küna tekison o itengau. Papilon epwe wiliti eu mwü mi kis seni ekewe mwü meinisin, epwe eu fanüapö, eu fanü mi pwasapwas o pön.
JER 50:13 Pokiten ai lingeringer, Papilon esap so, nge epwe eu fanü mi fokun pönüla. Aramas meinisin mi pwerela ünükün repwe rükö, repwe turunufasei pokiten an tatakis.
JER 50:14 Oupwe atettelikemi pwelin ünükün Papilon pwe oupwe maun ngeni, ämi meinisin mi emeia nöümi esefich. Oupwe änna Papilon, nge ousap achika nöümi föün esefich, pun i a tipis ngeniei ngang ewe Samol mi Lapalap.
JER 50:15 Oupwe alapätä ewe akürangen maun pwelin ünükün ewe telinimw. Papilon a fangatä, an kewe imw tekia ra turutiu, nge tittin kewe ra tatiu. Pun iei ngang ewe Samol mi Lapalap üa ngeni chon Papilon chappen ar föför. Oupwe ngeniir chappen ar föför, oupwe föri ngeniir usun mine ra fen föri ngeni aramas.
JER 50:16 Oupwe ärala seni Papilon ätewe mi amwora pwükil, pwal ätewe mi kinikin uän irä lon fansoun kinikin. Ekewe chon siamü repwe en me liwiniti püsin aramasan o süla ngeni poputän fanüan, pokiten ra niuokusiti ekewe chon maun.”
JER 50:17 Iei alon ewe Samol mi Lapalap, “Chon Israel ra usun chök sip mi toropas, ekewe laion ra cherela. Ewe kingen Asiria a akomwen ocheer, mürin Nepukatnesar ewe kingen Papilon a ineei chüür.
JER 50:18 Iei mine ngang ewe Samol mi Unusen Manaman ewe Koten Israel üa apasa, ‘Üpwe apwüngü ewe kingen Papilon pwal fanüan, usun üa apwüngü ewe kingen Asiria.
JER 50:19 Üpwe aliwinisefäli chon Israel ngeni fanüer. Repwe mongö seni ewe chuk Karmel me ewe fanü Pasan. Repwe fokun mötüla ren ar mongö seni ewe chukun Efraimw me ewe fanü Kiliat.
JER 50:20 Lon ena fansoun repwe kütta än Israel föföringau, nge esap wor. Repwe kütta än Juta tipis, nge resap küna. Pun ngang üpwe amusala än ekewe aramas tipis, ir chokewe üa amanaueer. Ngang ewe Samol mi Lapalap üa kapas.’”
JER 50:21 Iei alon ewe Samol mi Lapalap, “Oupwe feila o maun ngeni ewe fanü Merataimw, pwal ngeni chon Pekot. Oupwe nirela o fokun aroserela, oupwe föri meinisin mine üa allük ngenikemi.
JER 50:22 Akürangen maun epwe fis lon ewe fanü, pwal watten feiengau.
JER 50:23 Papilon ewe ama mi pöchökül ngeni unusen fanüfan a fokun tala o mökküla. Chon ekewe mwü meinisin ra rükö ren mine a fis ngeni ewe fanü.
JER 50:24 Ngang üa anomu eu sär fän itom, en Papilon, ka tup lon mwen kosamwo mefi. Ka oo, pun ka ü ngeniei.
JER 50:25 Ngang ewe Samol mi Lapalap üa suki ai lenien iseis pisekin maun o atowu ekewe pisekin afeiengau fän ai lingeringer. Pun ngang Kot ewe Samol mi Unusen Manaman a wor ai angang üpwe föri lon fanüen chon Papilon.
JER 50:26 Ou etto seni ekewe pelien fanüfan o maun ngeni Papilon. Oupwe suki an lenien iseis föün wiich. Oupwe ionifengeni liapemi usun ioien föün wiich o fokun ataela Papilon. Ousap likiti och seni.
JER 50:27 Oupwe niela nöür kewe sounfiu meinisin. Repwe feitiu lon ewe lenien ninnila. Feiengauen chon Papilon, pun ränir a war, ewe fansoun repwe küna kapwüng lon.”
JER 50:28 Oupwe rongorong pworausen ekewe choisä me chokewe mi süla seni Papilon. Ra feito Sion o asilefeili usun ewe Samol mi Lapalap ach we Kot a ngeni chon Papilon chappen ar föför ngeni imwan imwenfel
JER 50:29 “Oupwe körifengeni ekewe chon esefich, chokewe meinisin mi emeia nöür esefich pwe repwe maun ngeni Papilon. Oupwe nom pwelin ünükün ewe telinimw pwe esap wor eman epwe tongeni sü seni. Oupwe liwini ngeni won ükükün an föför, oupwe föri ngeni usun mine i a föri ngeni aramas, pun a ü ngeniei fän lamalamtekia, ngang ewe Samol mi Lapalap ewe mi Pin lon Israel.
JER 50:30 Iei mine nöün kewe alüal repwe mäla lon ekewe alen ewe telinimw, nge nöün kewe sounfiu meinisin repwe rosola lon ena ränin. Ngang ewe Samol mi Lapalap üa kapas.”
JER 50:31 Iei alon Kot ewe Samol mi Unusen Manaman, “Üa ü ngonuk, Papilon, en mi lamalamtekia. A war ränum, ewe fansoun om kopwe küna apwüng lon.
JER 50:32 En mi lamalamtekia kopwe chepetek o turula, nge esap wor eman epwe aütäsefälik. Ngang üpwe aküw eu ekkei lon om we telinimw, epwe kenala meinisin mi nom pwelin ünükün.”
JER 50:33 Iei alon ewe Samol mi Unusen Manaman, “Ekewe aramasen Israel me Juta ra küna riaföü. Meinisin mi uweerela pwe repwe oola ra fokun amwöchüür. Resap fokun mwüt ngeniir pwe repwe liwinla ngeni fanüer.
JER 50:34 Nge ar Chon Amanau a pöchökül, itan ewe Samol mi Unusen Manaman. Epwe fokun peniir, pwe epwe awora kinamwe ngeni fanüfan, nge ngeni ekewe chon Papilon epwe awora osukosuk.”
JER 50:35 Iei alon ewe Samol mi Lapalap, “Mäla epwe tori ekewe chon Papilon, epwe pwal tori chokewe mi imweimw lon Papilon. Epwe tori nöür kewe nöüwis me nöür kewe mwän mi tipachem.
JER 50:36 Mäla epwe tori ekewe soupwe, pwe repwe wiliti chon umwes. Mäla epwe tori nöür kewe sounfiu, pwe repwe rükö.
JER 50:37 Mäla epwe tori nöür kewe oris me war kewe woken, epwe pwal tori nöür kewe sounfiu chon ekis mi nom leir, pwe repwe tipeni tipen fefin. Oupwe atatakisi wöür o angei pisekir fän pöchökül.
JER 50:38 Akkaren lefen epwe tumwuri ar kewe koluk pwe repwe pwasatä. Pun ei fanü fanüen uluulun anümwäl mi eniweniw, nge ekewe aramas ra umwesila ren.
JER 50:39 Iei mine ekewe manmwacho repwe nomopök me ekewe wolif lon Papilon, pwal ekewe machang iter fukuro repwe nonom ie. Ewe fanü esap chüen so tori feilfeilachök, esap fokun wor eman epwe nonom lon seni eu täppin aramas tori eu täppin.
JER 50:40 Usun ngang üa ataela Sotom me Komora me ekewe telinimw ünükür, iei usun üpwe pwal ataela Papilon pwe esap wor eman epwe chüen nonom lon ika siamüfetal ie. Ngang ewe Samol mi Lapalap üa kapas.
JER 50:41 Nengeni, eu mwichen sounfiu a feito seni efeng. Chon eu mwü mi watte me chomong king ra mwöküt seni lesopun fanüfan.
JER 50:42 Ra uwou esefich me siles, ra fokun ariaföüü aramas, nge resap sile tong. Ngüngür a usun chök ngüngün lematau, lupwen ra sä won nöür kewe oris. Ra wewe ngeni sounfiu mi tettel pwe repwe maun ngeni Papilon.
JER 50:43 Ewe kingen Papilon a rong pworauser. Mürin, pöün ra chök ititiu. Niuokus watte a feitiu won, a pwal cheri cheuch usun cheuchen fam a cheri eman fefin.
JER 50:44 Usun eman laion a towu seni ewe wöllap arun ewe chanpupu Jortan o feila ngeni eu lenien enen sip, iei usun üpwe müttir feito o asüela chon Papilon seni fanüer. Mürin üpwe awisa ätewe üa filätä pwe epwe nemeni Papilon. Iö epwe wewe ngeniei? Iö epwe pälüeniei? Meni souemwen a tongeni ü ngeniei?
JER 50:45 Iei mine oupwe rongorong usun mine ngang ewe Samol mi Lapalap üa akota ngeni Papilon, pwal mine üa ekiekietä ngeni chon ewe fanü: Ellet, repwe nukiela pwal ekewe semirit, nge aramas meinisin repwe fokun rükö ren.
JER 50:46 Fanüfan epwe chechech ren akürangen än Papilon turutiu. Chon ekewe mwü repwe rongorong ar puchör.”
JER 51:1 Iei alon ewe Samol mi Lapalap, “Nengeni, üpwe apwäi ngünün eman chon kata pwe epwe maun ngeni Papilon me aramasen lon.
JER 51:2 Üpwe tinala chon ekis pwe repwe asüela chon Papilon usun asepwäl a ässala fetilipwas. Repwe apöla ewe fanü, repwe feito o maun ngeni seni lepekin meinisin lon ränin ar feiengau.
JER 51:3 Ousap mwüt ngeni ewe chon esefich epwe emeia nöün esefich, ousap pwal mwüt ngeni pwe epwe üföüf üfan üfen maun. Ousap achika ekewe alüal, nge oupwe fokun arosala ewe mwichen sounfiu meinisin.
JER 51:4 Repwe turula o mäla lon ewe fanü Papilon, repwe mäfeiengau me lon alan kewe.
JER 51:5 Ngang Kot ewe Samol mi Unusen Manaman, üsap pöütala chon Israel me chon Juta, inamwo ika ra tipis ngeniei, ngang ewe mi Pin me lon Israel.”
JER 51:6 Oupwe sü seni Papilon o kütta en me manauan. Ousap eti Papilon le mäla lon an apwüng, pun lon ei otun ewe Samol mi Lapalap epwe ngeni chappen an föför. Epwe liwini ngeni mine a pwüng ngeni an föför.
JER 51:7 Papilon a wewe ngeni eu kap kolt lon pöün ewe Samol mi Lapalap, a föri pwe chon fanüfan meinisin repwe sakawala ren. Chon ekewe mwü ra ün wain seni o umwesila ren.
JER 51:8 Lon eu chök otun Papilon a turutiu o tala. Oupwe kechüeiti, oupwe küt säfeen an metek, eli epwe tongeni pöchökülsefäl.
JER 51:9 Sia mochen apöchökülasefäli Papilon, nge esap pöchökülsefäl. Ousipwe feil seni o liwinla ngeni en me poputän fanüan. Pun watten an apwüng a tori läng, a tekia usun tekian ekewe kuchu.
JER 51:10 Ewe Samol mi Lapalap a aletätä ach pwüng. Ou etto, ousipwe asilefeili me lon Sion mine ewe Samol mi Lapalap ach we Kot a föri.
JER 51:11 Ewe Samol mi Lapalap a äpwächa ekewe kingen Metia, pun a ekiekietä pwe epwe ataela Papilon. Iei usun ewe Samol mi Lapalap epwe ngeniir chappen ar ataela imwan imwenfel. Oupwe seimi nöümi föün esefich o amolätä ämi kewe tittin maun.
JER 51:12 Oupwe aarü pwe oupwe maun ngeni ekewe tittin Papilon. Oupwe achomonga ekewe chon mas o anomuur lon en me lenian, oupwe amolakemiitä pwe oupwe operiir. Ewe Samol mi Lapalap epwe föri usun mine a fen akota o apasa fänäsengesin chon Papilon.
JER 51:13 Ämi chokewe mi imweimw ünükün chomong koluk o wöü ren pisek aüchea, sopolomi a war, nge manauemi epwe müchüla.
JER 51:14 Ewe Samol mi Unusen Manaman a eäni akapel püsin itan o apasa, “Ellet, üpwe tinala aramas mi chomong usun chomongun lifichimas, pwe repwe maun ngeni Papilon. Repwe iöfotäsini ar win won chon Papilon.
JER 51:15 Kot ewe mi föri fanüfan ren an manaman, a anüküchara ren an tipachem o ameresala ekewe läng ren an weweöch.
JER 51:16 Lupwen a apasawu mwelian, ekewe koluk fän läng ra ngüngü. A pwal föri ekewe kuchu pwe repwe ässitä seni ekewe lesopun fanüfan. A föri inefi fiti üt o awarato asepwäl seni an kewe lenien iseis.
JER 51:17 Aramas meinisin ra umwes, esap wor ar mirit. Ekewe chon angang ngeni kolt ra säw ren förier uluulun anümwäl, pun mine ra föri a mwäl, esap wor ngasangas lor.
JER 51:18 Ra lomotongau o uretakir, repwe tala, lupwen Kot epwe apwüngüür.
JER 51:19 Nge än Jakop we Kot esap usun ekei uluulun anümwäl, pun i ewe chon föri mettoch meinisin. A pwal filätä chon Israel pwe repwe wesewesen nöün aramas, itan ewe Samol mi Unusen Manaman.
JER 51:20 Ewe Samol mi Lapalap a apasa, “En Papilon ai ama me ai pisekin maun. Üa aea en le atatakisi ekewe mwü o ataela ekewe fanü.
JER 51:21 Üa aea en le atatakisi oris me chon wawa, üa pwal aea en le atatakisi woken me chon wawa.
JER 51:22 Üa aea en le niela mwän me fefin, chinlap mwän me säräfö, üa pwal aea en le niela ät me nengin.
JER 51:23 Üa aea en le niela chon mas me nöür pwiin sip. Üa aea en le niela chon tanipi me nöür kewe mönün tuw pwül. Üa pwal aea en le niela kepina me nöüwis.”
JER 51:24 Iei alon ewe Samol mi Lapalap, “Üpwe ngeni chon Papilon chappen ar föför mi ngau ra föri me lon Sion me mwen mesemi.”
JER 51:25 Iei alon ewe Samol mi Lapalap, “Papilon, en ka wewe ngeni eu chuk mi ataala unusen fanüfan. Nge ngang üpwe ü ngonuk. Üpwe turufuk pwe üpwe asokopeluketiu lepökün ewe achau o föri pwe kopwe wiliti eu chuk mi karala.
JER 51:26 Esap wor eman epwe angei eföü fau senuk, pwe epwe eäni föün lepokuku ika föün longolong. Nge kopwe eu leni mi tala tori feilfeilachök. Ngang ewe Samol mi Lapalap üa kapas.
JER 51:27 Oupwe aarü pwe repwe maun o ettiki ewe rappwa me lein chon ekewe mwü. Oupwe eteri chon ekewe mwü pwe repwe maun ngeni Papilon, o kökkörifengeni chon ekewe mwün Ararat, Mini me Askenas, pwe repwe maun ngeni. Oupwe awisa eman meilapen sounfiu pwe epwe emweni ewe mwichen maun, oupwe pwal emwenätä ekewe oris usun chök chomongun pwiin lifichimas.
JER 51:28 Oupwe eteri chon ekewe mwü pwe repwe maun ngeni Papilon. Oupwe titi ekewe kingen chon Metia fiti nöür kewe kepina me nöür kewe nöüwis, pwal sounfiun ekewe fanü meinisin mi nom fän nemenier.
JER 51:29 Iwe, fanüfan a chechech o mwaroro, pokiten a fisitä mine ewe Samol mi Lapalap a akota fän iten Papilon. Epwe ataala ewe fanü Papilon pwe esap chüen so.
JER 51:30 Ekewe sounfiun Papilon ra ükütiu le maun, ra chök nonom lon ar kewe imwen maun mi pöchökül. A kisikisila letiper, ra wewe ngeni fefin. Asamalapen ewe telinimw Papilon ra tala, nge ekkei a kenala ekewe imw lon.
JER 51:31 Eman chon sä a tapwela mürin pwal eman, nge eman chon künö a tapwela mürin pwal eman, pwe repwe asile ngeni ewe kingen Papilon pwe unusen an we telinimw a oola.
JER 51:32 Ekewe chon oputer ra liapeni ekewe petepeeten ewe chanpupu o kenala ekewe imw mi pöchökül. Ekewe sounfiun Papilon ra fokun niuokus.
JER 51:33 Papilon a wewe ngeni eu lenien wichiwich umwun wiich, lupwen fansoun aramas ra puri ewe wiich. Ekis echök fansoun, mürin ewe wiich mi kinikin epwe nom lon ewe leni. Ngang ewe Samol mi Unusen Manaman ewe Koten Israel üa kapas.”
JER 51:34 Ekewe chon Sion repwe apasa, “Nepukatnesar ewe kingen Papilon a atatakisikichetiu o oromikichela. A apökichela pwe sia usun epö pör mi pön. A oromikichela usun eman serepenit o amasoua lukan ren anach mongö mi anö. Mürin a kusufikichewu.
JER 51:35 Ekewe angangen mwänewüs a föri ngenikich pwal ngeni aramasach epwe ukun chon Papilon.” Ekewe chon Jerusalem repwe apasa, “Chaach epwe ukun chon Papilon.”
JER 51:36 Iei usun mine ewe Samol mi Lapalap a apasa ngeni chon Jerusalem, “Üpwe penikemi o angei eliemi. Üpwe apwasatä ar we chanpupu o amorätä ar puächen koluk.
JER 51:37 Papilon epwe wiliti eu ioien mettoch mi tala, eu leni ia kolak mi mwacho ra nom ie. Epwe och minen eniweniw me och minen turunufas, eu leni esap so.
JER 51:38 Ekewe chon Papilon meinisin repwe wörüwörfengen usun ekewe laion, repwe ngüngü usun ekewe apanen laion.
JER 51:39 Nge lupwen ra mochenia, üpwe amolätä eu kametip fän iter, üpwe apucheer pwe repwe mwälek. Repwe möürüfochola, nge resap chüen pwök.
JER 51:40 Üpwe emwenirela ren ewe chon ninni usun eman a emwenala ekewe apanen sip, ekewe nienifön sip me ätemwänin kuuch. Ngang ewe Samol mi Lapalap üa kapas.”
JER 51:41 Ewe Samol mi Lapalap a apasa usun Papilon, “A oola ewe telinimw unusen fanüfan a mwareiti. Papilon a wiliti och minen eniweniw me lein ekewe mwü.
JER 51:42 Sät a tötä won Papilon, ekewe nopuropur ra pwölüela.
JER 51:43 Ekewe telinimw ra wiliti och minen eniweniw, ra wiliti eu leni mi pwas o pön, eu leni ia esap wor eman aramas a nom ie, esap pwal wor eman a pwerela lon.
JER 51:44 Üpwe apwüngü Pel ewe koten Papilon o föri pwe epwe atowu mine a soläni. Chon ekewe mwü resap chüen fel ngeni. Tittin ewe telinimw Papilon a turula.
JER 51:45 Nei aramasen Israel, oupwe towu me lon Papilon. Oupwe en me kütta manauan o sü seni ai song mi fokun watte.
JER 51:46 Ousap akisala letipemi, ousap pwal niuokus, lupwen oupwe rong pworaus me lon ewe fanü. Eu pworaus a war lon eu ier, eu pworaus a pwal war lon eu ier mürin, pworausen angangen mwänewüs mi fis lon ewe fanü me pworausen än ekewe sounemenem maunfengen.
JER 51:47 Iei mine epwe war ewe fansoun ai üpwe apwüngü ekewe uluulun anümwälin Papilon. Unusen ewe fanü epwe itengau, nge ekewe mi ninnila repwe chök toropasfeil lon.
JER 51:48 Mürin ekewe läng me fanüfan pwal meinisin mi nom lor repwe köl fän pwapwa fänäsengesin Papilon. Pun ekewe chon kata repwe feito seni efeng pwe repwe maun ngeni.
JER 51:49 Papilon i popun pwe chomong aramas won fanüfan ra mäla. Nge iei Papilon epwe fokun tala pokiten i popun pwe chomong chon Israel ra mäla. Ngang ewe Samol mi Lapalap üa kapas.”
JER 51:50 Ewe Samol mi Lapalap a üreni nöün aramas me lon Papilon, “Ämi mi sü seni ewe mäfeiengau, oupwe feila, nge ousap üla. Oupwe chechemeniei ngang ewe Samol mi Lapalap me lon ewe fanü toau, nge Jerusalem epwe chem ngenikemi.
JER 51:51 Nge ämi oua apasa, ‘Äm aia säw ren ekewe kapasen turunufas aia rongorong. Itengau a pwölüela mesem, pun chon ekis ra tolong lon ekewe leni mi pin lon ewe imwenfel.’
JER 51:52 Iei mine üa apasa pwe epwe war ewe fansoun lupwen üpwe kapwüng ngeni än Papilon kewe uluulun anümwäl. Ekewe mi kinas repwe ngüngü lemenen unusen ewe fanü.
JER 51:53 Inamwo ika Papilon epwe fefeitä tori läng, inamwo ika epwe apöchöküla an we imwen maun mi nom wilitekia, üpwe chök tinala ekewe chon kata pwe repwe atai. Ngang ewe Samol mi Lapalap üa kapas.
JER 51:54 Oupwe aüselinga ewe puchör seni Papilon, ewe akürangen feiengau mi fokun watte seni fanüen chon Papilon.
JER 51:55 Pun ngang ewe Samol mi Lapalap üa ataela Papilon o aükätiu mwelian mi pöchökül. Chon oputeer repwe purolong lon usun chomong koluk, repwe maun ngeni fän akürangen mwelier mi leüömong.
JER 51:56 Iwe, ewe chon kata a feito won Papilon. Nöün Papilon sounfiu ra oola, nge nöür kewe esefich ra kupukupukisitiu. Pun ngang ewe Samol mi Lapalap eman Kot mi ngeni aramas chappen ar föför, üpwe fokun aunusa ngeniir liwinin ar föför.
JER 51:57 Üpwe apucha ekewe nöüwisen Papilon me nöün kewe soutipachem, nöün kewe kepina, nöün kewe meilap me nöün kewe sounfiu. Repwe möürüfochola, nge resap chüen pwök. Ngang ewe King itei ewe Samol mi Unusen Manaman üa kapas.
JER 51:58 Tittin ewe telinimw Papilon mi chölap epwe tatiu tori pwül, nge asamalapan kewe mi tekia repwe karala. Än ekewe aramas angang a lomotmwäl, än chon ekewe mwü angang a chök mwüchün ekkei. Ngang ewe Samol mi Unusen Manaman üa kapas.”
JER 51:59 Iwe, ewe soufos Jeremaia a öüröüra Seraia nöün Neria we mwän, nge Neria nöün Maseia we, lupwen a eti Setekia ewe kingen Juta le feila Papilon lon arüanün ierin mwün Setekia. Iwe, Seraia i meilapen chon tümwünü ewe sai.
JER 51:60 Iwe, Jeremaia a makei lon echö toropwe usun ekei feiengau meinisin repwe tori Papilon, ekewe kapas meinisin mi fen maketiu fänäsengesin Papilon.
JER 51:61 Iwe, Jeremaia a üreni Seraia, “Lupwen kopwe tori Papilon, kopwe pi pwe kopwe aleani ngeni ekewe aramas ekei kapas meinisin mi mak lon ei toropwe.
JER 51:62 Mürin kopwe üra, ‘Ai Samol mi Lapalap, en ka üra pwe kopwe ataela ei leni pwe esap wor eman aramas ika man epwe nom lon. Epwe chök pönüla tori feilfeilachök.’
JER 51:63 Nge lupwen ka wes le aleani ei toropwe ngeni ekewe aramas, kopwe föti ngeni eföü fau o aturalong lukalapen ewe chanpupu Oifrat,
JER 51:64 iwe, kopwe üra, ‘Iei usun än Papilon epwe kokotiu, nge esap chüen pisefälitä, pokiten ewe feiengau ewe Samol mi Lapalap epwe awarato won.’” Iei ükükün än Jeremaia kewe kapas.
JER 52:1 Iwe, Setekia a rüe me eu lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Iten inan Hamutal nöün Jeremaia we fefin seni Lipna.
JER 52:2 Nge Setekia a föri mine a ngau me fän mesen ewe Samol mi Lapalap usun chök mine Jehoiakim a föri.
JER 52:3 Iwe, ewe Samol mi Lapalap a song ngeni ekewe chon Jerusalem me chon Juta, iei popun a asürela seni fän mesan. Nge Setekia a ü ngeni ewe kingen Papilon.
JER 52:4 Iwe, lon atiuen ierin mwün Setekia lon aengolun ränin ewe aengolun maram, Nepukatnesar ewe kingen Papilon a feito me an mwichen sounfiu meinisin, pwe epwe maun ngeni Jerusalem. Iwe, ra pwelifeili Jerusalem fän pisekin maun o senätä eu ororen maun ngeni pwelin ünükün.
JER 52:5 Iwe, ra pwelifeili ewe telinimw fän pisekin maun tori engol me euin ierin mwün ewe king Setekia.
JER 52:6 Iwe, lon atiuen ränin ewe arüanün maram ewe lengita lon ewe telinimw a fokun watte, pwe esap chüen wor mongö fän iten aramasen lon.
JER 52:7 Mürin, ekewe sounfiu ra pwangenalong tittin ewe telinimw. Iwe mwo än ekewe chon Papilon nom pwelin ünükün ewe telinimw, ekewe sounfiu meinisin ra süwu seni ewe telinimw lepwin won ewe al ngeni ewe asamalap lefilen ekewe ruu tit ren tanipin ewe king. Iwe, ra süla ngeni akawenewenen ewe lemolun Jortan.
JER 52:8 Nge ekewe sounfiun Papilon ra tapweri ewe king Setekia o tori me lon ewe maasiesin Jeriko. Iwe, nöün Setekia sounfiu meinisin ra sü seni.
JER 52:9 Mürin ar liapeni Setekia ra emwenala ren ewe kingen Papilon mi nom Ripla lon ewe fanü Hamat. Iwe, ewe kingen Papilon a apwüngala mine epwe fis ngeni.
JER 52:10 Iwe, a niela nöün Setekia kewe mwän me fän mesan, a pwal niela ekewe nöüwisen Juta meinisin me lon Ripla.
JER 52:11 Mürin, ewe kingen Papilon a alusawu föün mesen Setekia o föti ngeni sein. A uwala Papilon o anomu lon imwen fötek tori ränin an mäla.
JER 52:12 Iwe, lon ewe aengolun ränin ewe alimuen maram, iei ewe engol me tiuen ierin mwün Nepukatnesar ewe kingen Papilon, Nepusaratan ewe meilapen chon tümwünü ewe king, i eman nöün ewe kingen Papilon nöüwis, a tolong Jerusalem.
JER 52:13 Iwe, a kenala imwen ewe Samol mi Lapalap me imwen ewe king, pwal ekewe imw meinisin lon Jerusalem. Iteiten imw mi aüchea a kenala.
JER 52:14 Nge an mwichen sounfiu meinisin seni Papilon ra ataela ewe tit mi pwelifeili Jerusalem.
JER 52:15 Mürin, Nepusaratan ewe meilapen chon tümwünü ewe king a uweela Papilon ekoch lein ekewe aramas mi mwelele, pwal chokewe mi chüen manau me lon ewe telinimw, me chokewe mi süla ren ewe kingen Papilon me mwan, fitifengen me ekewe lusun aramas mi sipeöch le angang.
JER 52:16 Nge Nepusaratan a likiti lon ewe fanü ekoch aramas mi fokun mwelele, pwe repwe chon angang lon tanipin wain me chon tuw pwül.
JER 52:17 Iwe, ekewe chon Papilon ra atatakisi ekewe ür seni piras, ekewe kürüma me ewe sepien koluk mi watte seni piras mi nom lon imwen ewe Samol mi Lapalap. Nge ekewe piras meinisin ra uweela Papilon.
JER 52:18 Iwe, ra angeala ekewe nape, söföl, fich, sepi fän iten apach mi pwokus me sokopaten sepi seni piras ekewe souasor ra aea le angang lon ewe imwenfel.
JER 52:19 Iwe, ewe meilapen chon tümwünü ewe king a uweela meinisin mine a för seni kolt me silifer: ekewe kükün sepi, ekewe sepi fän iten mwolien ekkei, ekewe sepi me nape, ekewe lenien etittin, ekewe sepi fän iten apach mi pwokus me ekewe sepi fän iten asoren ün.
JER 52:20 Nge pirasen ekewe ruwofoch ür, ewe sepien koluk mi watte, ekewe engol me ruoman uluulun ätemwänin kow mi nom fän ewe sepi me ekewe kürüma Salomon a föriir fän iten imwen ewe Samol mi Lapalap a kon senukula chour.
JER 52:21 Iwe, ükükün tekian efoch me efoch kewe ür rüe me fisu fiit, nge ükükün öün engol me walu fiit. Iwe, malülün ükükün ülüngat inis, nge lon a pwang.
JER 52:22 Nge mi pwal wor letonan seni piras ükükün tekian fisu esop fiit. A pwal wor sein mi nut me uluulun apel won pwelin ünükün ewe leton, nge meinisin seni piras. Iwe, ewe aruofochun ür a wewe ngeni ewe aefochun fiti ekewe uluulun apel.
JER 52:23 Iwe, mi wor tiue me wonoföü uluulun apel mi pwä, nge iteiten uluulun apel meinisin ükükün ipükü, ra nom won pwelin ewe sein mi nut.
JER 52:24 Iwe, Nepusaratan ewe meilapen chon tümwünü ewe king a angei Seraia ewe souasor mi lap me Sefania ewe aruomanün souasor, pwal ekewe ülüman chon mamasa ewe asamalap.
JER 52:25 A pwal angei seni lon ewe telinimw ewe meilap mi nemeni ekewe sounfiu, füman nöün ewe king chon öüröür mi chüen nom lon ewe telinimw, ewe seketerin ewe meilapen sounfiu mi wisen makei iteiten ekewe aramas me wone mwän mi iteföüla ra nom lon ewe telinimw.
JER 52:26 Iwe, Nepusaratan a angeer o uweerela ren ewe kingen Papilon mi nom Ripla.
JER 52:27 Iwe, ewe kingen Papilon a awateer o nirela me lon Ripla lon ewe fanü Hamat. Iei usun chon Juta ra oola seni fanüer.
JER 52:28 Iwe, iei iteiten ekewe aramas Nepukatnesar a uweerela: Lon afisuen ierin mwün Nepukatnesar a uweela ükükün ülüngeröü rüe me ülüman chon Juta.
JER 52:29 Nge lon ewe engol me waluen ierin mwün, a uweela seni Jerusalem ükükün walüpükü ilik me ruoman aramas.
JER 52:30 Iwe, lon rüe me ülüngatin ierin mwün Nepukatnesar, Nepusaratan a uweela ükükün füpükü faik me limman chon Juta. Iwe, iteiter meinisin rüanüngeröü wonopükü.
JER 52:31 Iwe, lon ewe ier, lupwen Ewil-merotak ewe kingen Papilon a popuetä le nemeni Papilon, a kirikiröch ngeni Jehoiachin ewe kingen Juta o atowu seni imwen fötek. Ei a fis lon rüe me limuen ränin ewe engol me ruuen maram lon ilik me fisuen ierin än Jehoiachin oola.
JER 52:32 Iwe, Ewil-merotak a kirikiröch ngeni o seikätä asen ekewe king mi pwal oola o nom ren lon Papilon.
JER 52:33 Iwe, Jehoiachin a pwilitawu üfan üföüfen fötek o üföüf och sokun üf. Nge lon ränin manauan meinisin a chök mongö seni än ewe king chepel.
JER 52:34 Jehoiachin a pwal angei alilisin seni ewe king pwe atufichin an osupwang iteiten rän lon unusen manauan tori an mäla.
LAM 1:1 Iei esap chüen masou ewe telinimw Jerusalem mi ur ren aramas me lom. A fokun iteföüla me lein ekewe mwü, nge iei a usun chök eman fefin mi mä pwülüan. I eman finesamol me lein ekewe telinimw, nge iei aramas ra nöüni amanau.
LAM 1:2 A selingüngü lepwin, chönün mesan ra suputiu won sapan. Esap wor eman me lein chokewe mi tongei me lom a achipa. Chiechian kewe meinisin ra kirikiringau ngeni, ra wiliti chon oputan.
LAM 1:3 Chon Juta ra oola o nom lon riaföü me angang weires. Ra nonom lein chon ekewe mwü, nge resap küna eu lenien asösö. Chokewe meinisin mi tapweriir ra tokumweer, nge esap wor efoch al repwe tongeni süla won.
LAM 1:4 Ekewe al mi ale ngeni Sion ra pönüla, pun esap chüen wor eman mi fetal wor ngeni ekewe chulap mi kefil. Ekewe asamalapen Sion meinisin ra pöla. Nöün kewe souasor ra ngüngü, nöün kewe föpwül ra nom lon riaföü, nge ewe telinimw a fokun weires lon an riaföü.
LAM 1:5 Chon oputen Sion ra fefeitä, ra aposu fän ar nemenem. Ewe Samol mi Lapalap a atolonga lon riaföü pokiten chomongun an kewe tipis. Nöün kewe ra feila ekis, ra oola ren chon oputan.
LAM 1:6 Ekewe ling meinisin ra sü seni Sion. Nöün kewe samol ra usun chök chia resap küna anaia repwe mongö ie. Ra sü me mwen ekewe chon tapweriir, nge esap wor ar pöchökül.
LAM 1:7 Lupwen Jerusalem a riaföü, a chechemeni an kewe pisek mi aüchea a eäni me lomlom. Lupwen nöün kewe aramas ra sechilong lepöün chon oputan, esap wor eman mi alisi. Ekewe chon oputan ra esita o takirin ämängaua pokiten an turula.
LAM 1:8 Jerusalem a fokun tipis, iei mine a wesewesen limengau. Meinisin mi asamolu me lom ra turunufasei, pun ra küna lon an selela. Ewer, püsin i a ngüngü o akulu mesan seniir.
LAM 1:9 An limengau a nom lon üfan, nge i esap ekieki an feiengau. Iei mine an turula a fokun afeiengau, esap wor eman a achipa. “Ai Samol mi Lapalap, kopwe nenengeni ai riaföü, pun ewe chon oputaei a win.”
LAM 1:10 Ekewe chon oputan ra angeala än Jerusalem pisek mi aüchea meinisin. Ewer, a küna pwe chon ekewe mwü ra ipwelong lon ewe Imwenfel, ir chokewe ewe Samol mi Lapalap esap mwüt ngeniir pwe repwe nonom lon an mwich.
LAM 1:11 Nöün kewe aramas meinisin ra ngüngü, lupwen ra kütta ener mongö. Ra akasiwili ar kewe pisek mi aüchea ngeni mongö, pwe repwe tongeni manau. Ewe telinimw a siö, “Ai Samol mi Lapalap, kopwe nengeni o küna pwe üa nom lon turunufas.”
LAM 1:12 “Ifa usun, ämi meinisin mi pwerela ünüki ousap ekieki usun ei feiengau? Oupwe nenengeni o küna, ika mi wor och riaföü usun ei riaföü ewe Samol mi Lapalap a atoto woi lon ewe ränin a fokun song ngeniei.
LAM 1:13 A tinato ekkei seni läng, a kü me leuti. A anomu eu sär fän itei, pwe pechei epwe fif, a aturueitiu lepwül. A likitieila, üa uren metek fansoun meinisin.
LAM 1:14 Ewe Samol mi Lapalap a küna ai kewe tipis meinisin, a rifengeniir o anomuur won afarei. Iwe, üa apwangapwangala ren chöür. A asechieilong lepöün chon oputaei, nge üsap tongeni ü ngeniir.
LAM 1:15 Ewe Samol mi Lapalap a esita nei kewe sounfiu mi pwora meinisin mi nom rei. A tinato eu mwichen sounfiu pwe repwe afeiengaua nei kewe alüal Ewe Samol mi Lapalap a puri nei aramas, usun eman a puri föün irän wain.
LAM 1:16 Üa kechü pokiten ekei mettoch, chönün mesei a fokun watte supun. Esap wor eman a nom pwe epwe achipaei, esap wor eman a apöchöküla lelukei. Nei kewe ra fokun riaföü, pun ewe chon oputaei a akufuei.
LAM 1:17 Üa aitiewu pei, nge esap wor eman a alisiei. Ewe Samol mi Lapalap a allük pwe chon oputaei repwe ü ngeniei. Üa wiliti eu mettoch mi limengau me rer.
LAM 1:18 Ewe Samol mi Lapalap a pwüng, nge ngang üa aleasolap ngeni an kapas. Oupwe aüseling, ämi chon ekewe mwü meinisin, oupwe nenengeni ai riaföü. Nei kewe föpwül me nei kewe alüal ra oola.
LAM 1:19 Üa kökköri peliei, nge resap mochen alisiei. Nei kewe souasor me souakom ra mäfeiengau lon ewe telinimw, lupwen ra kütta ener mongö pwe repwe tongeni manau.
LAM 1:20 Ai Samol mi Lapalap, kopwe nenengeni ai riaföü. Leuti a fokun weires. Lelukei a tatakis, pun üa fokun tipis ngonuk. A wor ninni won ekewe al, nge lon ekewe imw a wor mäla.
LAM 1:21 Aramas ra rongorong ai ngüngü, nge esap wor eman a achipaei. Chon oputaei meinisin ra rongorong usun ai kewe feiengau. Ra pwapwa pwe ka föri iei usun ngeniei. Kopwe awarato ewe rän ka fen pwonei, pwe chon oputaei repwe wewe ngeniei lon ai riaföü.
LAM 1:22 Ar kewe föför mi ngau repwe nom fän mesom. Kopwe apwüngüür usun ka apwüngüei pokiten ai kewe tipis meinisin. Üa ngüngü fän chomong, lelukei a apwangapwang.”
LAM 2:1 Ewe Samol a uwato rochopwak won Sion lon an song. A aturätiu seni läng lingen Israel we won pwül, Lon ränin an song esap ekieki mwo nge imwan imwenfel.
LAM 2:2 Ewe Samol a ataela imwen ekewe mwirimwirin Jakop meinisin, nge esap eäni tong. A ataetiu ekewe imwen maun mi pöchökül me lon Juta lon an lingeringer. A awarato itengau won ewe mwü me nöün kewe sounemenem.
LAM 2:3 A atatakisi pöchökülen Israel meinisin lon an song mi fokun watte. Esap mochen alisikich, lupwen chon oputach kewe ra feito. An lingeringeritikich a usun chök eu ekkei lon Israel mi kenala mettoch meinisin mi nom ünükün.
LAM 2:4 A äpera an likepich ngenikich usun eman chon oputach, pöüifichin a molotä. A niela chokewe meinisin sa pwapwaitiir. A ninätiu an lingeringer usun ekkei won ekewe imwen Sion.
LAM 2:5 Ewe Samol a ataela Israel usun chök eman chon oputach. A ataela an Israel kewe imwen king meinisin o atatakisi an kewe imwen maun mi pöchökül. A pwal achomonga letipeta me kechü ngeni ekewe aramasen Juta.
LAM 2:6 A ataetiu imwan we imwenfel, pwe a usun chök eu tanipi, o atatakisi ewe lenien chulap. Ewe Samol mi Lapalap a awesi me lon Sion ekewe chulap mi kefilitä me ekewe ränin sapat. Lon an song mi fokun watte a pöütala ekewe king me ekewe souasor.
LAM 2:7 Ewe Samol esap chüen aücheani an we rongen asor, a likitala imwan we mi pin. A mwüt ngeni chon oputach pwe repwe ataela etippan. Ra mweireiren win lon imwen ewe Samol mi Lapalap usun ewe mweireir a fis lon ekewe ränin chulap.
LAM 2:8 Ewe Samol mi Lapalap a apwüngala pwe epwe atatakisi tittin Sion. A aükü ewe leni ren eu selin aükük o pii pwe epwe unusen tala. A föri pwe ekewe imw tekia me ekewe tit ra tapök.
LAM 2:9 Ekewe asamalapen Sion ra irela fän ekewe ioien mettoch mi ta. Kot a kupi o atatakisi amwöchür kewe. Än Sion kewe king me ekewe samol ra oola lein chon ekewe mwü. Esap chüen wor eman a aiöü ngeni aramas ewe allük, esap chüen wor künan ekewe soufos me ren ewe Samol mi Lapalap.
LAM 2:10 Ekewe souakomwen Sion ra mot won pwül fän mosonoson. Ra tukotukotä pwül won mökürer o üföüf üf seni tuk, pwe asisilen ar letipeta. Ekewe föpwülün Jerusalem ra rotiu lepwül.
LAM 2:11 Mesei a tton ren kechü, leuti a fokun weires. Letipeta a sasewu me lon lelukei pokiten feiengauen nei aramas, pwal pokiten än ekewe semirit me mönükol aiengau won alen ewe telinimw.
LAM 2:12 Ra kechü ngeni inelaper kewe, pun ra echik o kaka. Ra turula won alen ewe telinimw usun chök aramas mi echinimä ren kinaser, o mäla fän mwärin inelaper kewe.
LAM 2:13 En Jerusalem, met üpwe tongeni apasa usum? Ren met üpwe tongeni achipok? Esap wor eman a riaföü usum, en liewe Sion. Pun om tatakis a watte usun watten ewe matau. Iö a tongeni apöchökülasefäliik?
LAM 2:14 Künan noum kewe soufos fän itom ra mwäl o chofana. Resap pwäri ngonuk om kewe tipis, pwe repwe epeti senuk om kopwe oola. Nge osunier fän itom ra mwäl o atuputup.
LAM 2:15 Meinisin mi pwerela ünükum ra ämängauok. Ra elifechifech o atakiri talan Jerusalem. Ra apasa, “Ifa usun, iei ewe telinimw ra aita ngeni pwe a unusen mürina, chon fanüfan ra pwapwaiti?”
LAM 2:16 Chon oputom meinisin ra eäni kapas turunufas ngonuk, ra achuangauek o ngäruk, ra apasa, “Sa ataela Jerusalem. Aha, iei ewe rän sa witiwiti. Iei sa tori, sa küna.”
LAM 2:17 Ewe Samol mi Lapalap a föri mine a ekiekietä, a afisätä an kapasen apwüng a piin apasa me lomlom. A kata, nge esap eäni tong. A awinna chon oputom o apwapwaar ren om feiengau.
LAM 2:18 En Jerusalem, kopwe leüömong le siö ngeni ewe Samol. Chönün mesom repwe suputiu lerän me lepwin usun chök eu chanpupu. Kosap asösö, kosap ükütiu le kechü.
LAM 2:19 Kopwe pwätäkis lepwin o leüömong le siö. Kopwe ninawu masouen lelukom me fän mesen ewe Samol usun eman a ninawu koluk, kopwe iotek ngeni fän iten manauen noum kana mi arap ngeni mäla ren echik lepwokukun iteiten ekewe al.
LAM 2:20 Ai Samol mi Lapalap, kopwe nenengeni o ekieki! Ka föri ngeni iö ei sokun? Ifa usun, fefin repwe ochei nöür semirit ra tümwünüöchüür o tongeer? Ifa usun, ekewe souasor me soufos repwe ninnila lon ewe imwenfel?
LAM 2:21 Ekewe ät me ekewe chinlap ra mätiu won ekewe al. Ekewe föpwül me ekewe alüal ra mäla ren ketilas. Ka nirela lon ränin om song, ka nirela, nge kosap ümöümöch ngeniir.
LAM 2:22 Ka körifengeni chon aniuokusuei seni ekis meinisin, usun aramas ra kökköto ngeni eu ränin chulap. Esap wor eman aramas a tongeni sü ika manau lon ränin om song. Ewe chon oputaei a niela chokewe üa oupuur o foleniir.
LAM 3:1 Ngang eman aramas mi küna riaföü ren än Kot apwüngüei.
LAM 3:2 A asüeila o föri pwe üpwe fetal lon rochopwak, ia esap wor saram ie.
LAM 3:3 Ellet, a wichikisiei iteiten rän, nge esap tongeei.
LAM 3:4 A föri pwe inisi a kichüchüla o ünüchei a pwachela. A kupi chüi.
LAM 3:5 A senätä o apwelifeili ünüki weires me riaföü.
LAM 3:6 A föri pwe üpwe nonom lon rochopwak, usun chök ekewe sotup mi mäla me lomlom.
LAM 3:7 A tiela ünüki pwe üsap tongeni süla. A föti ngeniei sein mi chou.
LAM 3:8 Üa resin leüömong le siö ngeni Kot pwe epwe alisiei, nge esap aüselinga ai iotek.
LAM 3:9 A pineela ai kewe al ren fau mi watte o apora ai kewe lenien fetal.
LAM 3:10 A operiei usun chök eman pear, a mweteriei usun chök eman laion.
LAM 3:11 A etekinieila seni alei o atatakisiei, mürin a likitiei.
LAM 3:12 A emmeia an likapich o föri pwe ngang üpwe eu lenien ännen fän iten an föün esefich.
LAM 3:13 A atowu an kewe föün esefich seni lenier o posurelong leuti.
LAM 3:14 Ngang üa uretakir me ren aramas meinisin, ra atolongaei lon ar kölün turunufas fansoun meinisin.
LAM 3:15 A auraei ren riaföü watte o aünü ngeniei koluk mi maras.
LAM 3:16 A foira mesei lon pwül o kupi ngii ren fau.
LAM 3:17 Esap chüen wor kinamwe lon manauei, üsap chüen sile pwapwa.
LAM 3:18 Iei mine üa üra, “Esap chüen wor ai pöchökül, esap pwal chüen wor ai apilükülük won ewe Samol mi Lapalap.”
LAM 3:19 Üa chechemeni ai riaföü me ai siamü, iei och mi maras o kipwin ngeniei.
LAM 3:20 Üa fokun chechemeniir fansoun meinisin, ngüni a letipengau me loi.
LAM 3:21 Nge apilükülüköch a toriei, lupwen üa chechemeni ei:
LAM 3:22 Än ewe Samol mi Lapalap tong ellet esap fokun ükütiu, an ümöümöch esap fokun wesila.
LAM 3:23 Ra fö iteiten lesosor, an allükülük a fokun lapalap.
LAM 3:24 Üa apasa, “Ewe Samol mi Lapalap i wisei, iei mine üpwe eäni apilükülük.”
LAM 3:25 Ewe Samol mi Lapalap a öch ngeni chokewe mi eäni i apilükülük, ngeni chokewe mi kütta i.
LAM 3:26 A mürina pwe aramas repwe witiwit fän mosonoson, pwe ewe Samol mi Lapalap epwe amanaueer.
LAM 3:27 A mürina ngeni eman mwän pwe epwe mwärelong fän weires lealüalün.
LAM 3:28 Epwe akaleman le mot fän mosonoson, lupwen Kot a anomu ei weires won.
LAM 3:29 Epwe chapetiu lepwül, pun eli epwe chüen wor apilükülüköch fän itan.
LAM 3:30 Epwe aselei sapan ngeni ewe chon pösapei o mwärelong fän chomong turunufas.
LAM 3:31 Pun ewe Samol esap pöütala eman tori feilfeilachök.
LAM 3:32 Inamwo are a atoto riaföü, nge epwe eäni ümöümöch lon an tong ellet mi fokun lapalap.
LAM 3:33 Pun esap turun tipen Kot an epwe ariaföüü ika aweiresi aramas won fanüfan.
LAM 3:34 Ewe Samol a silei, lupwen aramas ra puri fän pecher ekewe chon fötek meinisin lon ewe fanü,
LAM 3:35 a silei, lupwen ra amwöchü seni eman aramas an pwüng püsin i a ngeni,
LAM 3:36 a silei, lupwen ra sorei mine a pwüng lon kapwüng.
LAM 3:37 Iö a tongeni kapas, nge a fisitä ika ewe Samol esap tipeeu ngeni?
LAM 3:38 Ifa usun, feiöch me feiengau resap fis fän alon Ewe mi Unusen Tekia?
LAM 3:39 Pwota eman aramas epwe lal, lupwen a küna apwüng fän iten an tipis?
LAM 3:40 Ousipwe sotuni o atittina ach kewe föför o kulsefäliti ewe Samol mi Lapalap.
LAM 3:41 Ousipwe suki lelukach ngeni Kot lon läng o iotek ngeni,
LAM 3:42 “Äm aia tipis o ü ngonuk, nge en kosap amusala äm tipis.
LAM 3:43 Ka tapwerikem o nikem. Om ümöümöch a pwölüla ren om song.
LAM 3:44 Om lingeringer a usun chök eu kuchu mi malül pwe äm iotek esap toruk.
LAM 3:45 Ka föri pwe äm aia limengau me anioput me ren chon ekewe mwü.
LAM 3:46 Chon oputem meinisin ra kapasen turunufas me ämängau ngenikem.
LAM 3:47 Kata me tatakis a torikem, aia nom lon feiengau me niuokus watte.
LAM 3:48 Chönün mesei a pupu usun pupun eu chanpupu pokiten feiengauen nei aramas.
LAM 3:49 Chönün mesei epwe pupu, nge esap ükütiu, esap pwal mola,
LAM 3:50 tori ewe Samol mi Lapalap epwe netiu seni läng o künakem.
LAM 3:51 Lelukei a letipeta, lupwen üa küna mine a fis ngeni fin ai telinimw meinisin.
LAM 3:52 Chokewe mi oputaei, nge esap wor popun, ra eseichiei usun aramas ra eseichi machang.
LAM 3:53 Ra aturumanaueeitiu lon eu pwang o pineela ewe pwang ren eföü fau.
LAM 3:54 Üa kokotiu lon koluk pwe üa ekieki pwe üpwe le mäla.
LAM 3:55 Ai Samol mi Lapalap, üa kökköri itom seni epin ewe pwang.
LAM 3:56 Lupwen üa tüngor ngonuk pwe kopwe aüselinga ai siö, en ka rongorong.
LAM 3:57 En ka arap ngeniei, lupwen üa kökköruk, ka apasa, ‘Kosap niuokus.’
LAM 3:58 Ai Samol, en ka angasaei o amanauaei.
LAM 3:59 Ai Samol mi Lapalap, en ka küna ekewe föför mi mwäl ra föri ngeniei. Kopwe eäni kapwüng o afata ai pwüng.
LAM 3:60 Ka küna usun ar oputaei pwal usun ar rawangauaei.
LAM 3:61 Ai Samol mi Lapalap, ka rongorong ar kewe tunoämängau, ka pwal silei usun ar rawangauaei.
LAM 3:62 Ekewe chon ü ngeniei ra ngününgünüei o tunopweliei fansoun meinisin.
LAM 3:63 Kopwe nenengeni pwe lupwen ar mot me ar ütä ra chök atolonga itei lon ar kewe kölün ämängau.
LAM 3:64 Ai Samol mi Lapalap, kopwe ukun ngeniir won ükükün mine ra föri.
LAM 3:65 Kopwe anümamaueer o aura leluker ren apilükingau.
LAM 3:66 Ai Samol mi Lapalap, kopwe tapweriir fän song o aroserela seni won fanüfan.”
LAM 4:1 Ewe kolt a toputopula, ewe kolt mi mürina esap chüen molupolup. Föün ewe imwenfel ra toropasala lon ekewe al.
LAM 4:2 Ekewe alüalün Jerusalem mi aüchea ra wewe ngeni kolt mi mürina me lom, nge iei ra wewe ngeni sepi seni pwül, förien eman chon för sepi seni pwül.
LAM 4:3 Eman liafefinin wolif a fen oupwu apanan, nge nei aramas ra chök nöünöün pwäpwä ngeni nöür.
LAM 4:4 Chönawen ekewe mönükol ra pachetä fän fongochur pokiten ar kaka, ekewe semirit ra tütüngor ener mongö, nge esap wor eman a ngeniir.
LAM 4:5 Chokewe mi örüni mongö mi anö me lom ra mään echik won ekewe al, nge chokewe mi chök üföüf üf mi ling ra kon lon ioien falang.
LAM 4:6 Än Kot apwüngü nei aramas a kon watte seni an apwüngü Sotom, ewe telinimw mi tala lon eu chök otun ren pöün Kot.
LAM 4:7 Ekewe samolun Jerusalem ra men limöch seni sno o pwechepwech seni milik. Inisir a pöchökül, ra womisimis o aümanau.
LAM 4:8 Nge iei won meser a chol seni moochen ekkei, esor eman a sileniir won ekewe al. Ünücher a pwach o pacheri chür, a sissinüng usun amwüch mi pwas.
LAM 4:9 Chokewe mi mäla lon maun ra feiöch seni chokewe mi mäla ren echik, ir chokewe mi kichüchüla o mäla, pun esap wor ener mongö seni ekewe mälämäl.
LAM 4:10 Ekewe fefin mi fokun tongei nöür ra püsin kukuw nöür semirit. A fis pwe ina ener mongö lupwen fansoun feiengauen nei aramas.
LAM 4:11 Ewe Samol mi Lapalap a aunusawu an lingeringer, a ninätiu an song mi chou. A aküüw eu ekkei lon Sion mi kenala longolongun.
LAM 4:12 Kingen ekewe mwü me ekewe chon fanüfan resap lükü, pwe ekewe chon pälüeni ika chon oputa Juta repwe tongeni tolong lon ekewe asamalapen Jerusalem.
LAM 4:13 Ei a fis pokiten än nöün Jerusalem kewe soufos tipis, pwal pokiten än nöün kewe souasor föföringau. Ir chokewe mi niela ekewe chon pwüng.
LAM 4:14 Ra fetal won ekewe al usun chon mesechun, a fokun limengau üfer ren cha, iei popun esap wor eman a mochen atapeer.
LAM 4:15 Aramas ra kökkö ngeniir, “Oupwe süla, ämi mi limengau! Oupwe süla, oupwe süla! Ousap atapakem.” Iei mine ra wiliti choisä me chon süsüfeil, nge chon ekewe mwü ra apasa lefiler, “Resap chüen tongeni nom rech.”
LAM 4:16 Ewe Samol mi Lapalap a püsin atoropaseer, esap chüen ekieki usur. Aramas resap chüen meniniti ekewe souasor, resap pwal aücheani ekewe souakom.
LAM 4:17 Sa weires le nenefetalei ika eman epwe alisikich, nge esap wor lomotan. Sa akawitiwiti ach alilis seni eu mwü esap tongeni amanauakich.
LAM 4:18 Ekewe chon oputakich ra operikich pwe sisap tongeni fetal won ach kewe al. Sopolan manauach a arapoto. Ränin manauach ra lea, pun fansoun ach mäla a torikich.
LAM 4:19 Ekewe chon tapwerikich ra müttir seni ekewe ikel mi äs fän läng. Ra tapwerikich won ekewe chukuchukutä o operikich lon ewe fanüapö.
LAM 4:20 Popun manauach ach we king mi kepit me ren ewe Samol mi Lapalap, a oolong lon ar kewe likatup. I ätewe sa apasa usun pwe sipwe manau fän an tümwün me lein chon ekewe mwü.
LAM 4:21 Oupwe enen le meseik o pwapwa, ämi chon Etom mi nom lon ewe fanü Us, pun epwe pwal torikemi ewe kapen feiengau. Oupwe puch ren o püsin aselelakemi.
LAM 4:22 Ämi chon Sion, liwinin ämi tipis a wesila. Ewe Samol mi Lapalap esap chüen mochen oupwe nonomotam lon ämi oola. Nge ämi chon Etom, ewe Samol mi Lapalap epwe apwüngükemi pokiten ämi föföringau o särifala ämi tipis.
LAM 5:1 Äm Samol mi Lapalap, kopwe chechemeni mine a fis ngenikem. Kopwe nenengeni o küna äm itengau.
LAM 5:2 Fanüem a nonom fän nemenien wasöla, nge ekewe chon ekis ra nom lon leniem.
LAM 5:3 Äm aia wiliti chon mäsen, esap wor semem. Inem kewe ra usun chök fefin mi mä pwülüer.
LAM 5:4 Äm aia wisen möni ünümem koluk o mönätiu liwinin äm amwüch.
LAM 5:5 Ra achouu ngenikem och wosochou o appakem fän wok. Aia malülü, nge resap mwüt ngenikem pwe aipwe asösö.
LAM 5:6 Äm aia feila Isip me Asiria o tüngor enem mongö pwe aipwe tongeni manau.
LAM 5:7 Äm kewe lewo ra tipis, nge iei resap chüen manau. Nge äm aia mwärelong fän liwinin ar kewe föföringau.
LAM 5:8 Chokewe aramas ra nöüniir amanau me lom ra nemenikem. Esap wor eman a angasakem seni fän nemenier.
LAM 5:9 Äm aia fangala manauem, lupwen aia kütta enem mongö, pun mi wor chon ni aramas me lon ewe fanüapö.
LAM 5:10 Pokiten choun ewe echik ünüchem a pwichikar usun pwichin eu um.
LAM 5:11 Ra achomanauei ekewe fefin lon Sion, pwal ekewe föpwül lon ekewe telinimwen Juta.
LAM 5:12 Ra forusi ekewe samol, resap meniniti ekewe souakom.
LAM 5:13 Ra ariani ekewe alüal pwe repwe föira föün wiich lon ewe lenien föir usun ekewe amanau, nge ekewe ät ra taroporop fän woser mwüch mi chou.
LAM 5:14 Ekewe mwän mi chinlap resap chüen mot lon asamalapen ewe telinimw, ekewe alüal resap chüen ettiki ar pisekin ettik.
LAM 5:15 Esap chüen wor äm pwapwa lon lelukem. Äm pworuk a wiliti letipeta.
LAM 5:16 Esap chüen wor och mine aipwe eingeing won. Feiengauem, pun äm aia tipis.
LAM 5:17 Iei popun pwe lelukem a riaföü, nge mesem ra toputopula ren äm kechü,
LAM 5:18 pun ewe chuk Sion a tala, ekewe foks ra töfetal won.
LAM 5:19 Nge en, äm Samol mi Lapalap, ka King tori feilfeilachök. En kopwe nemenem tori fansoun esemüch.
LAM 5:20 Pwota ka manlükikeemila fansoun meinisin? Pwota ka likitikeemila fansoun langatam?
LAM 5:21 Äm Samol mi Lapalap, kopwe aliwinikem ngonuk pwe äm aipwe tongeni liwinituk. Kopwe aliwinisefäli lingem usun me lom.
LAM 5:22 Ifa usun, ka wesewesen pöütikeemila? Ifa usun, esap wor aükükün om song ngenikem?
EZE 1:1 Iwe, lupwen üa ierini ilik lon alimuen ränin ewe arüanün maram, ngang ewe souasor Isikiel nöün Pusi we mwän üa nom lein ekewe chon oola arun ewe chanpupu Kepar lon Papilon. Iwe, a fis pwe läng a sukula, nge a wor künaei seni Kot.
EZE 1:2 Lon alimuen ränin ewe maram, iei alimuen ierin än ewe king Jehoiachin oola,
EZE 1:3 ewe Samol mi Lapalap a kapas ngeniei me lon ewe fanü Papilon arun ewe chanpupu Kepar. Iwe, ikenan üa mefi pwe än ewe Samol mi Lapalap manaman a feitiu woi.
EZE 1:4 Iwe, lupwen üa nenela, üa küna eu mölümöl a feito me efeng, pwal eu kuchu mi watte o fokun saramaram ünükün. Iwe, ekkei a fifiwu fochofoch seni, nge lukalapen ewe ekkei a usun chök piras mi molupolup.
EZE 1:5 Iwe, a pwä me lon ewe ekkei lapalapen föman mönümanau, ra lapalapeni lapalapen aramas,
EZE 1:6 nge iteiten eman me eman leir a wor rüanü won mesan, pwal fofoch pöükässin.
EZE 1:7 Iwe, pecher ra wenewenetiu, nge apachapacher ra usun chök apachapachen nienifön kow o molupolup usun piras mi misimis.
EZE 1:8 Fän pöükässir me lepekir me rüanü a wor pöür mi wewe ngeni pöün aramas. Iwe, ir me föman a wor won meser me pöükässir.
EZE 1:9 Efoch me efoch pöükässir ra aküfengen me pöükässin chiener, eman me eman leir a fetal wenewen, nge resap kul lupwen ar fetal.
EZE 1:10 Iwe, iei usun lapalapen won meser: Won mesen eman me eman me fän meser a usun chök won mesen eman aramas, nge won meser me lepelifichir a usun chök won mesen eman laion. Iwe, won meser me lepelimöngür a usun chök won mesen eman ätemwänin kow, nge won meser me epinikür a usun chök won mesen eman ikel.
EZE 1:11 Iei lapalapen won meser. Iwe, ruofoch pöükässir ra itiwu pwe ra aküfengen me pöükässin chiener, nge ren ruofoch ra pwölüela inisir.
EZE 1:12 Eman me eman leir a chök fetal wenewen ia ewe ngün a emwenirela ie, nge resap kul lupwen ar fetal.
EZE 1:13 Iwe, lukalapen ekewe mönümanau a wor och mi usun chök molien ekkei mi sarara, pwal usun chök töl mi mwökütükütfetal lein ekewe mönümanau. Iwe, ewe ekkei a saramaram, nge fifi a fifiwu seni me lon.
EZE 1:14 Iwe, ekewe mönümanau ra säfetal usun chök müttirin fifi.
EZE 1:15 Iwe, lupwen üa nenengeni ekewe mönümanau, üa küna rüanü wiil me won fanü, eu wiil lepekin eman me eman ekewe föman mönümanau.
EZE 1:16 Nge iei usun lapalapen ekewe rüanü wiil: ra meriweriw usun chök ewe fau aüchea itan kirisolait, nge lapalaper a wewefengen. Iwe, lapalaper a usun chök eu wiil mi nom lon eu,
EZE 1:17 pwe lupwen ra fetal, ra tongeni fetal ngeni ekewe rüanü pekin, nge resap kul lupwen ar fetal.
EZE 1:18 Iwe, ekewe rüanü wiil a wor ünükür pwal mwüchün lor, nge ünükür a kula ren föün mas.
EZE 1:19 Lupwen ekewe mönümanau ra fetal, ekewe wiil ra pwal fetal lepekir, nge lupwen ekewe mönümanau ra feitä seni won fanü, ekewe wiil ra pwal feitä.
EZE 1:20 Iwe, ia ewe ngün a feila ie, ir ra pwal feila, nge ekewe wiil ra etiir le feila, pun ngünün ekewe mönümanau ra nom lon ekewe wiil.
EZE 1:21 Lupwen ekewe mönümanau ra fetal, ekewe wiil ra pwal fetal. Lupwen ir ra üla, ekewe wiil ra pwal üla. Nge lupwen ir ra feitä seni won fanü, ekewe wiil ra pwal etiir le feitä, pun ngünün ekewe mönümanau ra nonom lon ekewe wiil.
EZE 1:22 Iwe, asen ekewe mönümanau a wor och mi wewe ngeni eu läng mi meresila me won mökürer, a molupolup o kurufat usun ewe fau itan kristal.
EZE 1:23 Nge fän ewe läng ekewe mönümanau ra aitiewu ruofoch pöükässir pwe ra aküfengen me pöükässin chiener kewe. Nge ren ruofoch pöükässir ra pwölüela inisir.
EZE 1:24 Lupwen ra fetal, üa rong üngüngün pöükässir mi wewe ngeni ngüngün watten no, a pwal wewe ngeni mwelien ewe Kot mi Manaman me akürangen eu mwichemongun sounfiu mi mwökütüküt. Iwe, lupwen ra üla, ra aitietiu pöükässir.
EZE 1:25 Mürin a towu eu möngüngü seni asen ewe läng me won mökürer, lupwen ra üla fän pöükässir mi ititiu.
EZE 1:26 Iwe, asen ewe läng me won mökürer a wor och mi wewe ngeni eu lenien motun king mi för seni ewe fau aüchea itan safaia. Nge ewe mi mot won a lapalapeni lapalapen eman aramas.
EZE 1:27 Iwe, feitä seni mine a usun chök won wilan üa küna och a wewe ngeni piras mi misimis, pwal och usun ekkei a pwelifeili ünükün. Nge feitiu seni mine a usun chök won wilan üa küna och mi wewe ngeni ekkei, a pwal wor och saram ünükün.
EZE 1:28 Iwe, usun lapalapen ewe resim a pwä lon kuchu lupwen püngün üt, iei usun lapalapen ewe saram ünükün ewe mi mot. Iei usun lapalapen lingen ewe Samol mi Lapalap. Iwe, lupwen üa küna ei, üa chapetiu lepwül o rongorong mwelien eman mi kapas.
EZE 2:1 Iwe, Kot a üreniei, “Nöün aramas, kopwe ütä pwe üpwe fos ngonuk.”
EZE 2:2 Nge lupwen a fos ngeniei, Ngünün Kot a feitiu woi o aütäei. Iwe, üa rongorong an fos ngeniei.
EZE 2:3 A apasa ngeniei, “Nöün aramas, üpwe tinukela ren ekewe aramasen Israel, ren chon ewe mwü mi lükümach o ü ngeniei. Ir me ar kewe lewo ra tipis ngeniei tori ikenai,
EZE 2:4 ra pwal lamalamtekia me tipepöchökül. Iwe, üpwe tinukela rer pwe kopwe asile ngeniir, pwe mine kopwe üreniir iei alon Kot ewe Samol mi Lapalap.
EZE 2:5 Inamwo ika repwe rongorong ika resap rongorong, pun ir eu täppin aramas mi lükümach o ü ngeniei, nge repwe chök fokun mefi pwe mi wor eman soufos lefiler.
EZE 2:6 Nge en nöün aramas, kosap niueitiir, kosap pwal niuokusiti ar kapas, kosap niuokus, inamwo ika om nonom lefiler a usun chök om nom lefilen iräfölüföl, ika om nom lein chöükö. Kosap fokun niuokusiti ar kapas ika niueitiir, inamwo ika ir eu täppin aramas mi lükümach o ü ngeniei.
EZE 2:7 Iwe, en kopwe chök asile ngeniir ai kewe kapas, inamwo ika repwe rongorong ika resap rongorong, pun ir eu täppin aramas mi lükümach o ü ngeniei.
EZE 2:8 Nge en nöün aramas, kopwe rongorong mine üpwe ürenuk, nge kosap lükümach o ü ngeniei usun ei täppin aramas. Kopwe amasala awom o mongö mine üpwe ngonuk.”
EZE 2:9 Iwe, lupwen üa nenela, üa küna efoch pau a itito rei, nge a amwöchü echö toropwe mi mak lon.
EZE 2:10 Mürin, Kot a ameresala ewe toropwe fän mesei. A wor mesen mak lon me lükün, nge mine a mak won pworausen ngüngüres me kechü me feiengau.
EZE 3:1 Iwe, Kot a üreniei, “Nöün aramas, kopwe eni mine üpwe ngonuk. Kopwe oromala ei toropwe, mürin kopwe feila o fos ngeni ekewe chon Israel.”
EZE 3:2 Iei mine üa amasala awei, nge i a ngeniei ewe toropwe pwe üpwe eni.
EZE 3:3 Iwe, a pwal üreniei, “Nöün aramas, kopwe eni ei toropwe üpwe ngonuk, pwe lukom epwe masou ren.” Mürin üa eni, nge nennen ewe toropwe me lon awei a arar usun chönün chunen.
EZE 3:4 Mürin, Kot a üreniei, “Nöün aramas, kopwe fokun feila ren chon Israel o üreniir ai kewe kapas.
EZE 3:5 Üsap tinukela ren eu mwichen aramas mi eäni fosun ekis me kapas weires, nge üa tinukela ren chon Israel.
EZE 3:6 Are üpwe tinukela ren ekewe mwü mi watte ra eäni fosun ekis me kapas weires kosap wewe ren, ellet, ir repwe aüselingok.
EZE 3:7 Nge chon Israel resap mochen aüselingok, pun resap pwal mochen aüselingaei. Ir meinisin ra tipepöchökül o tipeweires.
EZE 3:8 Nge iei üpwe föri pwe pwal en kopwe tipepöchökül o tipeweires ngeniir usun chök ir.
EZE 3:9 Üa föri pwe kopwe pöchökül usun chök ewe fau aüchea itan taiamon mi pöchökül seni föüchol. Kosap niuokusitiir, kosap pwal fokun niueitiir, inamwo ika ir eu täppin aramas mi lükümach o ü ngeniei.”
EZE 3:10 Iwe, a pwal apasa ngeniei, “Nöün aramas, kopwe fokun aüselinga ai kewe kapas meinisin üpwe ürenuk pwe kopwe iseis lon letipom.
EZE 3:11 Mürin kopwe feila ren aramasom kewe mi oola o asile ngeniir, pwe mine kopwe üreniir iei aloi ngang ewe Samol mi Lapalap, inamwo ika repwe rongorong ika resap rongorong.”
EZE 3:12 Mürin Ngünün Kot a ekieitä, nge üa rongorong eu möngüngü mi watte me lükisöküri, a apasa, “Oupwe mwareiti lingen ewe Samol mi Lapalap lon läng.”
EZE 3:13 Iwe, üa rongorong akürangen pöükässin ekewe mönümanau, lupwen ra afeikesifengeniir, pwal akürangen ekewe wiil lepekir a usun chök akürangen eu chechechin fanü mi lapalap.
EZE 3:14 Mürin, Ngünün Kot a ekieitä o uweeila. Üa feila fän ai weires me letipechou, nge än ewe Samol mi Lapalap manaman mi pöchökül a toriei.
EZE 3:15 Iwe, üa tori ekewe chon oola lon Telapip mi nonom arun ewe chanpupu Kepar o mot leir lon ükükün fisu rän fän mairü ren mine üa küna o rongorong.
EZE 3:16 Iwe, wesin ekewe fisu rän ewe Samol mi Lapalap a kapas ngeniei,
EZE 3:17 “Nöün aramas, üa awisa ngonuk ewe wisen chon mas fän iten chon Israel. Iteiten fansoun, lupwen kopwe rongorong eu kapas seniei, kopwe fönöör ren.
EZE 3:18 Ika ngang üpwe apasa pwe eman chon föföringau epwe fokun mäla, nge en kosap asile ngeni o fönöü pwe epwe kul seni an föföringau o küna manau, ewe chon föföringau epwe mäla pokiten an tipis, nge en kopwe angei chappen om tümwününgau.
EZE 3:19 Nge are kopwe fönöü eman chon föföringau, nge esap kul seni an föföringau, ätewe epwe mäla pokiten an tipis, nge en kopwe manau.
EZE 3:20 Iwe, ika eman chon pwüng a kul seni an föförün pwüng o föföringau, ngang üpwe atolonga lon feiengau, iwe, epwe mäla. Pokiten om kosap fönöü, ätewe epwe mäla pokiten an tipis, üsap pwal chüen chechemeni an föför mi pwüng, nge en kopwe angei chappen om tümwününgau.
EZE 3:21 Nge ika ka fönöü eman chon pwüng pwe esap tipis, nge a aleasochis, ätewe epwe fokun manau, pun a aüselinga om fönöü. Iwe, en kopwe pwal manau.”
EZE 3:22 Iwe, me ikenan üa mefi pwe ewe Samol mi Lapalap a nom rei ren an manaman. A üreniei, “Kopwe ütä o feila lon ewe lemol pwe üpwe fos ngonuk me ikenan.”
EZE 3:23 Mürin üa ütä o feila lon ewe lemol. Ikenan üa küna lingen ewe Samol mi Lapalap, a usun ewe ling üa fen küna me arun ewe chanpupu Kepar. Iwe, üa chapetiu lepwül.
EZE 3:24 Nge Ngünün Kot a feitiu woi o aütäei. Iwe, a üreniei, “Kopwe feila o lokeekelong lon imwom.
EZE 3:25 Nöün aramas, nengeni, repwe föti ngonuk säl, pwe kosap tongeni nonom lein aramas.
EZE 3:26 Iwe, üpwe föri pwe awom epwe mwöch, pwe kosap chüen tongeni fos ngeniir o fönöü ei täppin aramas mi lükümach o ü ngeniei.
EZE 3:27 Nge lupwen ai fos ngonuk, üpwe suki awom pwe kopwe üreniir, ‘Iei alon Kot ewe Samol mi Lapalap.’ Iö a mochen rongorong, epwe rongorong, nge iö esap mochen, epwe chök lükümach. Pun ir eu täppin aramas mi lükümach o ü ngeniei.”
EZE 4:1 Iwe, Kot a üreniei, “Nöün aramas, kopwe angei eu pilak seni pwül, kopwe anomu fän mesom o aliosu ewe telinimw Jerusalem won.
EZE 4:2 Mürin kopwe pwomweni usun om kopwe maun ngeni: Kopwe amolätä pisekin maun o aüetä eu tittin maun ngeni, kopwe pwal senätä eu oror ngeni, kopwe anomu mwichen sounfiu o iseis mwesinnen amökü tit ünükün.
EZE 4:3 Iwe, kopwe angei echö mächä o anomu mwom pwe epwe tiela lefilom me ewe telinimw. Kopwe newenewen ngeni o pwomweni usun an epwe küna osukosuken maun, nge en ewe chon maun ngeni. Iei eu asisil fän iten chon Israel.
EZE 4:4 Mürin kopwe konola won pelimöngum, nge ngang üpwe anomu womw liwinin tipisin chon Israel, pwe kopwe uwei ar tipis lon ükükün ränin om kopwe konola won pelimöngum.
EZE 4:5 Pun ngang üpwe awisa ngonuk pwe kopwe uwei ar tipis lon ükükün ülüpükü tiue rän, nge eu rän a wewe ngeni eu ierin ar tipis. Iei usun kopwe uwei tipisin chon Israel.
EZE 4:6 Nge lupwen ka awesi ekei rän meinisin, kopwe konsefälila won pelifichum, pwe kopwe uwei liwinin tipisin chon Juta. Üpwe awisa ngonuk faik rän, nge eu rän a wewe ngeni eu ierin ar tipis.
EZE 4:7 Iwe, kopwe newenewen ngeni Jerusalem mi küna osukosuken maun, kopwe aü poum ngeni o osuni usun an feiengau.
EZE 4:8 Ngang üpwe föti ngonuk säl pwe kosap tongeni kuluk, tori kopwe awesi ränin om pwomwen maun ngeni Jerusalem.
EZE 4:9 Iwe, kopwe angei föün wiich me parli, föün mame pwal sokun föün irä, kopwe iseniir lon eu sepi o föri pilawa seniir. Ei pilawa kopwe mongö, lupwen ekewe ülüpükü tiue ränin om konola.
EZE 4:10 Iwe, ükükün anom mongö lon eu rän epwe esop paun, nge kopwe chök aükü pwe epwe naf ngeni ekewe fansoun mongö.
EZE 4:11 Iwe, ükükün ünümom koluk lon eu rän epwe chök ruu kap, nge kopwe chök aükü pwe epwe naf ngeni eu rän.
EZE 4:12 Kopwe nokopuni anom mongö usun nokopun parli, nge kopwe nokopuni me fän mesen aramas won ekkei seni kiten mongön aramas mi pwasapwas.”
EZE 4:13 Iwe, ewe Samol mi Lapalap a pwal apasa, “Iei usun chon Israel repwe mongö sokun mongö mi limengau ngeniir lein chon ekewe mwü ia ngang üpwe asürela ie.”
EZE 4:14 Mürin üa apasa, “Apwi, ai Kot Samol mi Lapalap, üsap fokun mwo alimengauaei fän eu. Seni ai kükün tori ikenai üsap fokun ochoch man mi püsin mäla ika mäla ren manmwacho, üsap pwal uwalong lon awei fituk mi limengau ngeniei.”
EZE 4:15 Iwe, Kot a üreniei, “Nengeni, üpwe mwüt ngonuk pwe kopwe nokopuni anom mongö won kiten mongön kow siwilin kiten mongön aramas.”
EZE 4:16 A pwal apasa, “Nöün aramas, üpwe angei seni Jerusalem ewe mongö aramas ra manau seni. Repwe aükü ener o mongö fän niuokus, repwe pwal aükü ünümer koluk o ünümi fän apilükülükingau.
EZE 4:17 Iwe, ener mongö me ünümer koluk repwe itela. Repwe nenefengeniir lon ar apilükülükingau o mäla pokiten ar tipis.”
EZE 5:1 Iwe, Kot a üreniei, “Nöün aramas, kopwe angei efoch ketilas mi seisei o nöünöü le räisöü mökürom me alüsom. Mürin kopwe angei eu kilo o kiloni, pwe kopwe ineti meten mökürom me ülöülen alüsom lon ülüngat kinikin.
EZE 5:2 Wesin om pwomwen maun ngeni ewe telinimw kopwe keni eu kinikinin meten mökürom lukalapen liosuom we telinimw. Aruuen kinikin kopwe pökü ngeni noum ketilas ünükün ewe telinimw, nge aülüngatin kinikin kopwe atoropasafeili, pwe asepwäl epwe ässala. Iwe, üpwe tapweriir fän nei ketilas.
EZE 5:3 Kopwe pwal angei ekoch seni meten mökürom o tükümi lepwülün üfom.
EZE 5:4 Nge seni ekewe meten mökür ka tükümi kopwe pwal angei ekoch o atururolong lon ekkei, pwe repwe karala. Iwe, seni ikenan ekkei epwe ngetewu ngeni chon Israel meinisin.”
EZE 5:5 Iei alon Kot ewe Samol mi Lapalap, “Iei Jerusalem, ewe telinimw üa anomu lukalapen fanüfan, nge ekewe mwün fanüfan ra nom ünükün.
EZE 5:6 Nge Jerusalem a ü ngeni ai kewe allük me pwüüng lap seni ekewe mwü mi nom ünükün. A pöütala ai kewe allük o aleasolap ngeni ai kewe pwüüng.
EZE 5:7 Iei mine ngang Kot ewe Samol mi Lapalap üa apasa: Oua lükümach lap seni chon ekewe mwü mi nom ünükümi. Ousap aleasochis ngeni ai kewe pwüüng ika apwönüetä ai kewe allük, nge oua fen apwönüetä örünien ekewe mwü mi nom ünükümi.
EZE 5:8 Iei mine ngang Kot ewe Samol mi Lapalap üa apasa: Ngang won inisi üpwe fokun ü ngenikemi, üpwe awarato ai apwüng womi me mwen ekewe mwü.
EZE 5:9 Pokiten ämi föför mi anioput ngeniei üpwe apwüngükemi, usun üsamwo apwüngükemi seni me lom, üsap pwal apwüngükemi me mürin.
EZE 5:10 Iwe, epwe fis ngenikemi pwe sam repwe ochei nöür, nge nau repwe ochei semer. Üpwe fokun apwüngükemi, nge chokewe mi chüen manau leimi üpwe atoropasafeiliir ekis meinisin.
EZE 5:11 Iei mine ngang Kot ewe Samol mi Lapalap üa apasa: Mwo manauei, üpwe nikemiila pokiten ämi atai pinin imwei mi pin ren ämi uluulun anümwäl mi ngau me ämi föför mi anioput. Ngang üsap achikakemi, üsap pwal tongeekemi.
EZE 5:12 Iwe, eu leülüngat me leimi repwe mäla ren mätter me lengita me lon telinimwemi, eu leülüngat repwe mäla ren ketilas lükün telinimwemi, nge eu leülüngat üpwe atoropasafeiliir ekis meinisin o tapweriir fän nei ketilas.
EZE 5:13 Iei usun üpwe anafa ai song o amüchü ai lingeringer ngenikemi. Nge lupwen epwe wes ai lingeringer, oupwe silei pwe ngang ewe Samol mi Lapalap üa kapas lon ai lukomong.
EZE 5:14 Iwe, üpwe pwal ataokela, Jerusalem, o föri pwe kopwe eu minen turunufas me lein chon ekewe mwün lükün, pwal me ren chokewe meinisin mi pwerela ünükum.
EZE 5:15 Iwe, kopwe wiliti eu lenien turunufas me eniwokus me amairü ngeni chon ekewe mwü mi nom ünükum, repwe pwal ämängauok, lupwen üpwe afeiengauok ren ai apwüng fän ai song me lingeringer. Ngang ewe Samol mi Lapalap üa fen kapas.
EZE 5:16 Ei epwe fis, lupwen üpwe awora ngonuk lengita, pwe epwe afeiengauok usun om kopwe feiengau ren föün esefich. Üpwe alapala ewe lengita o angei senuk mine ka manau seni.
EZE 5:17 Üpwe tinato reöm lengita me manmwacho pwe repwe niela noum kana. Mätter me ninni me maun repwe toruk pwe repwe niik. Ngang ewe Samol mi Lapalap üa kapas.”
EZE 6:1 Iwe, ewe Samol mi Lapalap a kapas ngeniei,
EZE 6:2 “Nöün aramas, kopwe newenewen ngeni ekewe chukun Israel, pwe kopwe osuni usun ar repwe feiengau.
EZE 6:3 Iwe, kopwe apasa: Ämi chukun Israel, oupwe rongorong alon Kot ewe Samol mi Lapalap. Pun iei mine Kot ewe Samol mi Lapalap a apasa ngeni ekewe chukutekia me chukutekison, ngeni ekewe pwokur me ekewe lemol: Ngang üpwe fokun awarato womi efoch ketilas, pwe üpwe ataela ekewe leni ia aramas ra fel ngeni ekewe uluulun anümwäl ie.
EZE 6:4 Ekewe rongen asor repwe tatakisitiu, nge ekewe rongen asoren ötüöt repwe mökküla. Iwe, üpwe niela ekewe aramas fän mesen ar kewe uluulun anümwäl.
EZE 6:5 Üpwe anomu somän ekewe chon Israel fän mesen ar kewe uluulun anümwäl, üpwe pwal atoropasafeili chür ünükün ekewe rongen asor.
EZE 6:6 Ekis meinisin ia oua nom ie telinimwemi me ämi kewe lenien fel won ekewe leni tekia repwe tala, pwe ämi kewe rongen asor me ämi kewe uluulun anümwäl repwe mökküla o tatakisitiu, ämi rongen asoren ötüöt repwe sönüla, nge föriemi angang repwe mola.
EZE 6:7 Iwe, aramas repwe ninnila me leimi, pwe oupwe silei pwe ngang ewe Samol mi Lapalap.
EZE 6:8 Nge üpwe amanaua ekoch leimi. Ir repwe sü seni ewe män feiengau o toropasfeil lein chon ekewe mwün fanüfan.
EZE 6:9 Mürin, chokewe me leimi mi chüen manau repwe chechemeniei me lein ekewe mwü ia ra oola ie, lupwen üpwe atai letiper mi kirikiringau ngeniei o kul seniei, o achuna meser mi mocheisou ngeni ekewe uluulun anümwäl. Mürin repwe püsin oputeer pokiten ekewe föför mi ngau o anioput ra föriir.
EZE 6:10 Iwe, repwe silei pwe ngang ewe Samol mi Lapalap. Ewer, epwe fokun fis mine üa apasa usun ewe feiengau üpwe afeiengaueer ren.”
EZE 6:11 Iei alon Kot ewe Samol mi Lapalap, “Isikiel, kopwe aitietä poum o pupures ren om letipeta, kopwe pwal apasa, ‘Feiengauen chon Israel pokiten ar kewe föför mi ngau o anioput meinisin.’ Pun repwe mäla lon maun, ren lengita me mätter.
EZE 6:12 Iwe, ir mi nom won fanü toau repwe mäla ren mätter, nge ir mi nom won fanü mi arap repwe mäla lon maun, nge ir mi chüen manau me mürin repwe mäla ren lengita. Iei usun üpwe fokun song ngeniir.
EZE 6:13 Iwe, repwe silei pwe ngang ewe Samol mi Lapalap, lupwen ar kewe somä ra itifengen lein ar kewe uluulun anümwäl ünükün ar kewe rong, won ekewe chukutekison meinisin pwal won ungen ekewe chukutekia, fän iteiten irä mi mwuresires me iteiten ook mi palapal, pwal ekis meinisin ia ra eäni asor ie mettoch mi pwokus ngeni ar kewe uluulun anümwäl.
EZE 6:14 Iwe, üpwe aitiela pei ngeniir, pwe üpwe atai ewe fanü ekis meinisin ia ra nonom ie, pwe epwe tala o pön seni ewe fanüapö mi nom ör tori Ripla mi nom efeng. Mürin repwe silei pwe ngang ewe Samol mi Lapalap.”
EZE 7:1 Iwe, ewe Samol mi Lapalap a kapas ngeniei,
EZE 7:2 “Nöün aramas, iei aloi ngang Kot ewe Samol mi Lapalap ngeni ewe fanü Israel: A tori sopolan. A tori sopolan unusen ewe fanü.
EZE 7:3 Israel, iei a tori sopolom. Iei üpwe fokun song ngonuk, pun üpwe apwünguk won ükükün om föför, üpwe pwal liwini ngonuk liwinin om föför mi anioput.
EZE 7:4 Iwe, üsap chüen achikok, üsap pwal chüen tongeek. Üpwe liwini ngonuk liwinin om föför mi anioput ka chök sopwela le föri. Ren ei kopwe silei pwe ngang ewe Samol mi Lapalap.”
EZE 7:5 Iei alon Kot ewe Samol mi Lapalap, “Feiengau epwe war, feiengau epwe chök afawun.
EZE 7:6 A tori sopolan, a tori sopolan. Nengeni, a wareituk sopolom.
EZE 7:7 Feiengau epwe torikemi aramasen ei fanü. A tori ewe fansoun, a pwal arap ewe rän, eu ränin osukosuk, nge sap eu ränin mweireir me won ekewe chuk.
EZE 7:8 Iei a arap ai üpwe awarato ai lingeringer womw o amüchü ai song ngonuk. Üpwe apwünguk won ükükün om föför o liwini ngonuk liwinin om föför mi anioput.
EZE 7:9 Iwe, üsap chüen achikok, üsap pwal chüen tongeek. Üpwe liwini ngonuk liwinin om föför mi anioput ka chök sopwela le föri. Ren ei kopwe silei pwe ngang ewe Samol mi Lapalap, ewe mi afeiengauok.”
EZE 7:10 Ewe rän a war. Feiengau a feito womw. Pwüngingau a pwükütä, nge lamalamtekia a fokun wattela.
EZE 7:11 Föförün mwänewüs a mämäritä o afisätä föföringau. Ekewe aramas meinisin repwe rosola, esap pwal chüen wor wöür mi somwola me ar ling.
EZE 7:12 Iwe, a tori fansoun, a pwal arap ewe rän. Esap wor popun än ewe chon kamö epwe pwapwa ika ewe chon amömö epwe lolilen, pun Kot a song ngeniir meinisin.
EZE 7:13 Iwe, ewe chon amömö fanü esap chüen tongeni liwin ngeni mine a amömöla. Inamwo ika a chüen manau, pun än Kot song a nonom wor meinisin, nge esap sü seniir. Iwe, pokiten ar tipis esap wor eman a tongeni amanaua manauan.
EZE 7:14 Iwe, ra ettiki rappwa o amolätä meinisin. Nge esap wor eman a feila maun, pun Kot a song ngeniir meinisin.
EZE 7:15 Maun a fis won ekewe al, nge mätter me lengita ra fis lon ekewe imw. Ir mi nom lemäl repwe mäla lon maun, nge ir mi nom lon ewe telinimw repwe mäla ren lengita me mätter.
EZE 7:16 Iwe, chokewe meinisin mi chüen manau repwe süla won ekewe chuk usun chök lisom mi ässitä seni ekewe lemol pokiten ar niuokus. Repwe ngüngüres pokiten ar tipis.
EZE 7:17 Pöür meinisin repwe chök ititiu, nge lepwäsukur meinisin repwe chechech.
EZE 7:18 Iwe, repwe üföüf üf seni tuk, nge niuokus watte epwe nom rer. Won meser epwe wowon säw, mökürer epwe pwal reipöpöla.
EZE 7:19 Repwe moneela ar silifer me kolt won ekewe al, usun mettoch mi limengau. Pun ar silifer me kolt resap tongeni amanaueer lon ränin än ewe Samol mi Lapalap song, resap pwal tongeni aura luker o amötüür lon ar echik. Pun ar echeni silifer me kolt iei popun ar tipis.
EZE 7:20 Me lom ra sikesik ren fouter seni kolt mi aüchea. Ra pwal aea ekewe kolt o föri ar kewe uluulun anümwäl mi anioput. Iei mine ewe Samol mi Lapalap a anioputa ekewe mettoch me rer.
EZE 7:21 Iwe, ewe Samol mi Lapalap a apasa, “Üpwe mwüt ngeni chon ekis pwe repwe liapenala ekewe mettoch, nge chon föföringau won fanüfan repwe angei wöür meinisin o turunufaseer.
EZE 7:22 Üpwe kul seniir, nge chon ekis repwe atai pinin imwei mi pin o aüchea. Chon solä repwe tolong lon o turunufasei.
EZE 7:23 Kopwe amolätä selimächä, pun ewe fanü a uren föförün nimanau, nge ewe telinimw a uren föförün mwänewüs.
EZE 7:24 Üpwe awarato chon ekewe mwü mi ngau seni meinisin, pwe repwe imweni imwer kana. Üpwe awesi än ekewe chon pwora lamalamtekia, nge ar kewe leni mi pin repwe küna turunufas.
EZE 7:25 Lupwen niuokus watte epwe toriir, repwe kütta kinamwe, nge resap fokun küna.
EZE 7:26 Feiengau epwe war, feiengau epwe chök afawun, nge epwe chök wor pworausen afeiengau. Iwe, repwe tüngor ngeni soufos pwe repwe osuni ngeniir. Ekewe souasor resap chüen aiti ngeniir ekewe allük, ekewe souakom esap chüen wor ar öüröür.
EZE 7:27 Ewe king epwe letipeta, ewe samol epwe apilükülükingau, nge aramasen ewe fanü repwe chechech ren ar niuokus. Üpwe liwini ngeniir ükükün liwinin ar föför, üpwe pwal apwüngüür won ewe aükük ir ra püsin eäni apwüng won. Ren ei repwe silei pwe ngang ewe Samol mi Lapalap.”
EZE 8:1 Iwe, lon awonuen ierin ach oola, lon alimuen ränin ewe awonuen maram, üa mot lon imwei, nge ekewe souakomwen chon Juta mi oola ra mot rei. Ikenan än Kot ewe Samol mi Lapalap manaman a toriei.
EZE 8:2 Üa netä o küna eman a lapalapeni lapalapen eman aramas. Iwe, feitiu seni mine a usun chök won wilan a wor ekkei, nge feitä seni won wilan a usun chök lapalapen och saramaramen piras mi misimis.
EZE 8:3 A aitiewu och usun lapalapen efoch pau o amwöchü meten mökürei. Lon künaei we Ngünün Kot a ekieitä lefilen fanüfan me läng o emwenieila Jerusalem. A anomuei lükün ewe asamalap mi nom efengin ewe leni mwen ewe imwenfel. Ikenan a wor eu uluulun anümwäl Kot a fokun chou ren.
EZE 8:4 Üa pwal küna lingen ewe Koten Israel ikenan, usun üa küna lon künaei we me lon ewe lemol.
EZE 8:5 Iwe, Kot a üreniei, “Nöün aramas, kopwe nela efeng.” Iei mine üa nenela efeng o küna ewe uluulun anümwäl Kot a fokun chou ren, a nom arun ewe rongen asor ren ewe asamalapen tolong.
EZE 8:6 Kot a pwal üreniei, “Nöün aramas, ifa usun, ka küna mine ra föri? Ka küna ekewe föför mi anioput, chon Israel ra föri ikei, pwe repwe asüeila toau seni leniei mi pin? Nge kopwe pwal küna sokun föför mi fokun anioput seni ekei.”
EZE 8:7 Mürin a emwenieila ren asamalapen ewe leni lükün imwenfel. Nge lupwen üa nenefeil, üa küna eu pwang lon ewe tit.
EZE 8:8 Iwe, a üreniei, “Nöün aramas, kopwe pwangeni ewe tit.” Nge lupwen üa pwangeni, üa küna eu asamalap.
EZE 8:9 Kot a üreniei, “Kopwe tolong lon ewe rum o nengeni ekewe föför mi ngau o anioput ra föri lon.”
EZE 8:10 Iwe, üa tolong lon o küna me won ekewe etip meinisin liosun sokun mantötö me man mi anioput, pwal liosun än chon Israel kewe uluulun anümwäl meinisin.
EZE 8:11 Iwe, me fän mesen ekewe lios fik mwän seni ekewe souakomwen chon Israel ra ütä, nge Jaasania nöün Safan we a nom lefiler. Iteiten eman me eman a amwöchü an sepien asoren ötüöt, nge ötüötür a ötütä seni lor.
EZE 8:12 Mürin a üreniei, “Nöün aramas, ifa usun, ka küna mine ekewe souakomwen chon Israel ra föri lemonomon? Iteiten eman me eman a fel mwen an lenien uluulun anümwäl, pun ra apasa, ‘Ewe Samol mi Lapalap esap künakich. A likitala ewe fanü.’”
EZE 8:13 Nge a pwal üreniei, “Kopwe pwal küna ar föri föför mi fokun anioput seni ekei.”
EZE 8:14 Mürin, Kot a emwenieila ren asamalapen imwenfelin ewe Samol mi Lapalap mi sape ngeni efeng. Ikenan üa küna fefin ra kechüeiti ewe kot Tamus , a mäla.
EZE 8:15 Iwe, a üreniei, “Nöün aramas, ifa usun, ka küna ei? Nge kopwe pwal küna sokun föför mi fokun anioput seni ekei.”
EZE 8:16 Mürin, Kot a emwenieila ren ewe leni mwen imwenfelin ewe Samol mi Lapalap. Me ikenan üa küna rüe me liman mwän lükün asamalapen ewe imwenfel lefilen kengkangan me ewe rongen asor. Iwe, ra kul seni ewe imwenfel, ra newenewen ngeni ötiu o fel ngeni akkar.
EZE 8:17 Iwe, a üreniei, “Nöün aramas, ifa usun, ka küna ei? Ifa usun, esap ku ngeni chon Juta ar föri ekei föför mi anioput ikei, pwe ra pwal aurala ewe fanü ren föförün mwänewüs o sopwela le asongaei? Nengeni, ra pwal pwölü pwötür ngeni palen irä.
EZE 8:18 Iei mine üpwe apwüngüür fän ai song. Üsap achikeer, üsap pwal eäni tong ngeniir. Inamwo are repwe kechü ngeniei fän leüömong lon ar iotek, üsap fokun aüselingeer.”
EZE 9:1 Mürin üa rongorong pwe Kot a kapas fän leüömong, “Oupwe kaneto, ämi mi wisen afeiengaua ewe telinimw. Eman me eman epwe uwato an pisekin ninni.”
EZE 9:2 Iwe, üa küna wonoman mwän ra feito seni ewe asamalapen won mi sape ngeni efeng. Eman me eman leir a uwato an pisekin ninni, nge eman a etiir, a üföüf echö üf mi pwechepwech o uwei eu pisekin mak lepekin. Ra tolong o üla lükün ewe rongen asor seni piras.
EZE 9:3 Iwe, lingen ewe Koten Israel a feitä seni ekewe kerop, ia a nom ie me mwan, o feila ngeni asamalapen ewe imwenfel. Iwe, ewe Samol mi Lapalap a kökkö ngeni ewe mwän mi üföüf echö üf mi pwechepwech o uwei eu pisekin mak lepekin,
EZE 9:4 “Kopwe fetalfeil lon unusen ewe telinimw Jerusalem o asisila won chamwen chokewe mi letipeta o kechü ren ekewe föför mi anioput ra fis lon.
EZE 9:5 Iwe, üa rongorong pwe Kot a apasa ngeni pwal ekewe ekoch mwän, “Oupwe tapwela mürin ätei lon ei telinimw o niela ekewe aramas. Ousap achikeer, ousap pwal tongeer.
EZE 9:6 Oupwe fokun niela chinlap mwän me alüal me föpwül, pwal semirit me fefin, nge ousap atapa chokewe mi eäni ewe asisil. Iwe, oupwe popuetä me lon leniei mi pin.” Iei mine ra popuetä le niela ekewe souakom ra nom lükün ewe imwenfel.
EZE 9:7 Mürin a pwal üreniir, “Oupwe atai pinin ewe imwenfel, oupwe pwal aura ekewe leni lükün imwenfel ren ekewe somä. Oupwe feila o föri mine üa allük ngenikemi.” Iei mine ra feila o niela ekewe aramas lon ewe telinimw.
EZE 9:8 Nge lupwen ra nirela, ngang chök üa lusun. Iwe, üa chapetiu lepwül o kökkö, “Ai Kot, Samol mi Lapalap. Ifa usun, kopwe arosala meinisin mi chüen manau lon Israel ren om awarato om song won Jerusalem?”
EZE 9:9 Iwe, Kot a pälüeniei, “Än chon Israel me chon Juta tipis a fokun wattela. Ra nimanauei aramas lon unusen ewe fanü o föri mine a pwüngingau lon Jerusalem. Ra apasa, ‘Ewe Samol mi Lapalap a likitala ei fanü, esap pwal küna mine sa föri.’
EZE 9:10 Iei mine üsap achikeer, üsap pwal tongeer, nge üpwe liwini ngeniir ükükün liwinin ar kewe föför meinisin.”
EZE 9:11 Mürin, ewe mwän mi üföüf echö üf mi pwechepwech o uwei eu pisekin mak lepekin a liwinto o apasa, “Üa wes le föri mine ka awisa ngeniei.”
EZE 10:1 Iwe, lupwen üa nenela, üa küna och mi wewe ngeni eu lenien motun king mi för seni ewe fau aüchea itan safaia, a pwä me won läng asen möküren ekewe kerop.
EZE 10:2 Kot a üreni ewe mwän mi üföüf echö üf mi pwechepwech, “Kopwe tolong lefilen ekewe wiil mi kul fän ekewe kerop. Kopwe tukei lon poum molien ekkei mi sarara seni lefilen ekewe kerop o atoropasafeiliir won ewe telinimw.” Iwe, lupwen üa katol, a tolong lon.
EZE 10:3 Lupwen ewe mwän a tolong, ekewe kerop ra ütä lepeliörün ewe imwenfel, nge eu kuchu a aurala ewe leni mwen ewe imwenfel.
EZE 10:4 Iwe, lingen ewe Samol mi Lapalap a feitä seni ekewe kerop o feila ngeni asamalapen ewe imwenfel. Mürin, ewe kuchu a aurala ewe imwenfel, nge ewe leni mwen ewe imwenfel a ur ren saramaramen lingen ewe Samol mi Lapalap.
EZE 10:5 Iwe, mwaataaten pöükässin ekewe kerop a tori ewe leni lükün ewe imwenfel, a usun chök mwelien ewe Kot mi Unusen Manaman, lupwen a kapas.
EZE 10:6 Lupwen ewe Samol mi Lapalap a kapas ngeni ewe mwän mi üföüf echö üf mi pwechepwech, pwe epwe angei molien ekkei seni lefilen ekewe wiil mi kul, pwal seni lefilen ekewe kerop, a tolong o ütä lükün eu kewe wiil.
EZE 10:7 Mürin, eman seni lein ekewe kerop a aitiela pöün ngeni ewe ekkei a nom lefilen ekewe kerop, a angei ekoch molian o uwalong lepöün ewe mwän mi üföüf echö üf mi pwechepwech. Iwe, ewe mwän a angei ewe molien ekkei o towu lükün.
EZE 10:8 Fän efoch me efoch pöükässin ekewe kerop a pwä och mi wewe ngeni efoch pöün aramas.
EZE 10:9 Iwe, lupwen üa nenela, üa küna rüanü wiil lepekin ekewe kerop, eu wiil lepekin eman me eman. Nge lapalapen ekewe wiil a usun chök meriweriwen ewe faü aüchea itan kirisolait.
EZE 10:10 Iwe, lapalapen ekewe rüanü wiil a wewefengen, a usun chök eu wiil mi nom lon eu.
EZE 10:11 Lupwen ekewe kerop ra fetal, ra tongeni fetal ngeni ekewe rüanü pekin, nge resap kul lupwen ar fetal. Iwe, ra fetalepök lon en me wenewenan ia meser a sape ngeni ie, nge resap kul lupwen ar fetal.
EZE 10:12 Iwe, unusen inisin ekewe kerop, sökürür, pöür me pöükässir ra kula ren föün mas. Ina usun pwal ekewe wiil mi nom lepekir.
EZE 10:13 Üa püsin rongorong pwe ekewe wiil ra iteni wiil mi märäkul.
EZE 10:14 Iwe, iteiten eman me eman ekewe kerop a wor rüanü won mesan. Aeuin won mesan a usun chök won mesen eman kerop, aruuen won mesan a usun chök won mesen eman aramas, aülüngatin won mesan a usun chök won mesen eman laion, nge arüanün won mesan a usun chök won mesen eman ikel.
EZE 10:15 Ikkei ir ekewe mönümanau üa fen küna me ünükün ewe chanpupu Kepar. Iwe, ekewe kerop ra ässitä.
EZE 10:16 Iwe, lupwen ekewe kerop ra fetal, ekewe wiil ra fetal lepekir, nge lupwen ra awenawu pöükässir pwe repwe ässitä seni won fanü, ekewe wiil resap feil seni lepekir.
EZE 10:17 Lupwen ekewe kerop ra üla, ekewe wiil ra pwal üla, nge lupwen ekewe kerop ra feitä, ir ra pwal feitä, pun ngünün ekewe mönümanau ra nonom lon ekewe wiil.
EZE 10:18 Mürin, lingen ewe Samol mi Lapalap a feil seni asamalapen ewe imwenfel o üla me won ekewe kerop.
EZE 10:19 Nge lupwen üa nenengeni ekewe kerop, ra awenawu pöükässir o feitä seni won fanü, nge ekewe wiil ra etiir. Ra feila ren asamalapen imwen ewe Samol mi Lapalap mi sape ngeni ötiu o üla ikenan, nge lingen ewe Koten Israel a nonom wor.
EZE 10:20 Ikkei ir ekewe mönümanau üa fen küneer pwe ra nom fän ewe Koten Israel ünükün ewe chanpupu Kepar. Iwe, üa sileniir pwe ir kerop.
EZE 10:21 Iwe iteiten eman me eman leir a wor rüanü won mesan, pwal fofoch pöükässin, nge fän pöükässir a wor och mi wewe ngeni pöün aramas.
EZE 10:22 Iwe, lapalapen won meser a fokun usun chök won mesen ekewe mönümanau üa fen küneer ünükün ewe chanpupu Kepar. Iteiten eman me eman leir a fetal wenewen.
EZE 11:1 Iwe, Ngünün Kot a ekieitä o uweeila ren asamalapen imwen ewe Samol mi Lapalap mi sape ngeni ötiu. Ikenan, lükün ewe asamalap a wor rüe me liman mwän, nge lefiler üa küna ruoman samolun chon Israel Jaasania nöün Assur, pwal Pelatia nöün Penaia.
EZE 11:2 Iwe, Kot a üreniei, “Nöün aramas, ikkei ir ekewe mwän ra ekiekietä sokun rawangau o öüröüra ngeni chon ei telinimw mine a ngau.
EZE 11:3 Iwe, ra apasa, ‘A arap ewe fansoun ach sipwe aüetä imw. Ei telinimw a wewe ngeni eu kama, nge kich ewe fituk mi nom lon.’
EZE 11:4 Iei mine, nöün aramas, kopwe osuni usun ar repwe feiengau, kopwe fokun osuni.”
EZE 11:5 Mürin, Ngünün ewe Samol mi Lapalap a feitiu woi o aiti ngeniei mine üpwe üreni ekewe aramas, “Iei alon ewe Samol mi Lapalap: Ämi chon Israel, üa silei mine oua apasa. Üa pwal silei ekiekin lelukemi.
EZE 11:6 Oua niela chomong aramas lon ei telinimw, pwe ekewe al ra urela ren somä.
EZE 11:7 Iei mine ngang Kot ewe Samol mi Lapalap üa apasa: Ekewe somä oua niela lon ei telinimw ir ewe fituk, nge ei telinimw ewe kama. Iwe, nge ämi, ngang üpwe asükemiila seni ei telinimw.
EZE 11:8 Oua niuokusiti ewe ketilas. Nge ngang üpwe tinato remi aramas mi maun ngenikemi fän ketilas.
EZE 11:9 Iwe, üpwe emwenikemiiwu seni lon ei telinimw o atolongakemi lepöün chon ekis, üpwe pwal awarato apwüng womi.
EZE 11:10 Oupwe mäla lon maun lon kiännin ewe fanü Israel. Mürin oupwe silei pwe ngang ewe Samol mi Lapalap.
EZE 11:11 Ei telinimw esap wewe ngeni eu kama fän itemi, nge ämi ousap pwal wewe ngeni ewe fituk mi nom lon. Nge üpwe apwüngükemi lon kiännin ewe fanü Israel.
EZE 11:12 Mürin ämi oupwe silei pwe ngang ewe Samol mi Lapalap. Pun ousap apwönüetä ai kewe allük, ousap pwal aleasochisi ai kewe pwüüng, nge oua tümwünü allükün ekewe mwü mi nom ünükümi.”
EZE 11:13 Iwe, lupwen üa osuni, a fis pwe Pelatia nöün Penaia we a mäla. Iwe, üa chapetiu lepwül o kökkö fän leüömong, “Ai Kot Samol mi Lapalap. Ifa usun, ka ekiekin arosala ekewe lusun mi chüen manau lon Israel?”
EZE 11:14 Iwe, ewe Samol mi Lapalap a kapas ngeniei,
EZE 11:15 “Nöün aramas, ekewe chon Jerusalem ra apasa usum me pwiüm kewe mi etuk le oola, ir chon Israel meinisin, ‘Ra nom toau seni ewe Samol mi Lapalap, iei mine a ngenikich ei fanü pwe sipwe fanüeni.’
EZE 11:16 Iei mine kopwe üreni ekewe mi oola, ‘Iei alon Kot ewe Samol mi Lapalap: Ewer, üa tinirela lein ekewe mwü o atoropasafeiliir won ekewe fanü. Nge üa fen nonom rer lon ei fansoun lon ekewe fanü ia ra oola ie.’
EZE 11:17 Iei mine kopwe üreniir, ‘Iei alon Kot ewe Samol mi Lapalap: Üpwe aliwinikemiito seni ekewe mwü o achufengenikemi seni ekewe fanü ia oua toropasfeil ie, üpwe pwal ngenisefälikemi ewe fanü Israel.’
EZE 11:18 Iwe, lupwen repwe liwinsefälito ikei, repwe pöütala seni lon ei fanü ekewe uluulun anümwäl mi ngau o anioput.
EZE 11:19 Üpwe ngeniir eu leluk mi fö, üpwe pwal fangelong lor eman ngün mi fö. Üpwe angei me leutur ewe leluk mi pöchökül usun fau o ngeniir eu leluk mi pwetete.
EZE 11:20 Mürin repwe apwönüetä ai kewe allük o aleasochisi ai kewe pwüüng. Iwe, ir repwe nei aramas kana, nge ngang üpwe ar Kot.
EZE 11:21 Nge chokana mi tipeni ar repwe angang ngeni ekewe uluulun anümwäl mi ngau o anioput, üpwe liwini ngeniir ükükün liwinin ar föför.” Iei alon Kot ewe Samol mi Lapalap.
EZE 11:22 Mürin, ekewe kerop ra awenawu pöükässir o ässitä, pwal ekewe wiil mi nom lepekir ra etiir, nge lingen ewe Koten Israel a nonom aser.
EZE 11:23 Iwe, lingen ewe Samol mi Lapalap a feitä seni lukalapen ewe telinimw, a feila o üla won ewe chuk a nom ötiuen ewe telinimw.
EZE 11:24 Iwe, lon künaei we Ngünün Kot a ekieitä o uweeila lon ewe fanü Papilon ren ekewe chon oola. Mürin, künaei we a morola seniei.
EZE 11:25 Iwe, üa apworausa ngeni ekewe chon oola ekewe mettoch meinisin ewe Samol mi Lapalap a aiti ngeniei.
EZE 12:1 Iwe, ewe Samol mi Lapalap a kapas ngeniei,
EZE 12:2 “Nöün aramas, ka nonom lein eu täppin aramas mi lükümach o ü ngeniei. A wor meser pwe repwe küna, nge resap künökün, a pwal wor selinger pwe repwe rongorong, nge resap rongorong, pun ir eu täppin aramas mi lükümach o ü ngeniei.
EZE 12:3 Iei mine, nöün aramas, kopwe amolätä om pwotou usun eman chon oola a föri. Lerän, lupwen ekewe aramas ra nenengenuk, kopwe feila seni leniom o feila ngeni pwal eu leni. Eli repwe wewe ren, inamwo ika ir eu täppin aramas mi lükümach o ü ngeniei.
EZE 12:4 Lerän, lupwen ra nenengenuk, kopwe uwawu om pwotou ka amolätä usun än eman chon oola. Nge lekuniol, lupwen ra nenengenuk, kopwe feila seniir usun eman aramas mi oola.
EZE 12:5 Lupwen ra nenengenuk, kopwe pwangeni etippen imwom o towu me lon fän om pwotou.
EZE 12:6 Kopwe mwärei om pwotou, lupwen ra nenengenuk, o uweela, lupwen a pwinila. Kopwe pwal pwölüela won mesom pwe kosap küna mwom, pun üa awisok, pwe kopwe eu asisil fän iten ekewe chon Israel.”
EZE 12:7 Iwe, üa föri usun Kot a allük ngeniei. Lerän üa amolätä ai pwotou usun än eman chon oola, nge lekuniol üa pwangeni etippen imwei ren püsin pei. Iwe, lupwen a pwinila, üa feil seniir o mwärei ai pwotou, lupwen ra nenengeniei.
EZE 12:8 Nge sorotän ewe rän, ewe Samol mi Lapalap a kapas ngeniei,
EZE 12:9 “Nöün aramas, ifa usun, sap chon Israel ewe täppin aramas mi lükümach o ü ngeniei ra aisinuk, ‘Met ka föri?’
EZE 12:10 Kopwe pälüeniir, ‘Iei alon Kot ewe Samol mi Lapalap: Ei kapasen osuni fän iten ewe samolun Jerusalem, pwal fän iten chon Israel meinisin mi nom lon ewe fanü.’
EZE 12:11 Kopwe üreniir, pwe en eu asisil fän iter. Iwe, usun mine ka föri, ina usun epwe fis ngeniir. Repwe feila toau pwe repwe oola.
EZE 12:12 Iwe, ewe samol mi nemeniir epwe mwärei an pwotou, lupwen a pwinila, o feila. Repwe pwangeni ewe tit fän itan pwe epwe towu me lon, epwe pwal pwölüela won mesan pwe esap tongeni küna mwan.
EZE 12:13 Nge ngang ewe Samol mi Lapalap üpwe aturala ai toloia won, pwe epwe tup lon. Mürin üpwe emwenala Papilon lon fanüen chon Kaltea, nge i esap küna. Iwe, epwe mäla ikenan.
EZE 12:14 Üpwe atoropasafeili chon leimwan ekis meinisin, pwal nöün kewe nöüwis me nöün kewe sounfiu meinisin, üpwe pwal tapweriir fän ketilas.
EZE 12:15 Iwe, lupwen üpwe tinirela lein chon ekewe mwü o atoropasafeiliir won ekewe fanü, mürin repwe silei pwe ngang ewe Samol mi Lapalap.
EZE 12:16 Nge ekoch chök me leir üpwe amanaueer seni maun me lengita me mätter, pwe repwe mefi me lein chon ekewe mwü ia ra oola ie, pwe ar kewe föför ra anioput. Mürin repwe silei pwe ngang ewe Samol mi Lapalap.”
EZE 12:17 Iwe, ewe Samol mi Lapalap a kapas ngeniei,
EZE 12:18 “Nöün aramas, kopwe mongö anom o ünümi ünümom fän chechech me niuokus watte.
EZE 12:19 Kopwe üreni aramasen ei fanü, ‘Iei alon Kot ewe Samol mi Lapalap usun ekewe chon Jerusalem mi nom lon ewe fanü Israel: Repwe mongö ener fän niuokus watte o ünümi ünümer fän apilükingau, pun fanüer epwe unusen pöla, pokiten chon ewe fanü ra chök föri föförün mwänewüs.
EZE 12:20 Iwe, ekewe telinimw mi so me lom repwe tala, nge ewe fanü epwe wiliti eu fanüapö. Mürin repwe silei pwe ngang ewe Samol mi Lapalap.’”
EZE 12:21 Iwe, ewe Samol mi Lapalap a kapas ngeniei,
EZE 12:22 “Nöün aramas, pwota ekewe chon Israel ra eäni ei sokun mwiitun? Ra apasa, ‘Ekewe rän ra la, nge künään soufos esap fis.’
EZE 12:23 Iei mine kopwe üreniir, ‘Iei alon Kot ewe Samol mi Lapalap: Üpwe awesi ei mwiitun, pwe aramas resap chüen eänisefäli lon Israel.’ Nge kopwe pwal üreniir, ‘A fokun tori fansoun pwe künään soufos meinisin repwe fisitä.’
EZE 12:24 Pun esap chüen wor künään soufos mi mwäl ika kapasen osuni mi mwotoutou lein chon Israel.
EZE 12:25 Pwe ngang ewe Samol mi Lapalap üpwe kapas, nge epwe fokun pwönüetä, pun esap chüen mang. Ewer, lupwen fansoun manauemi, ämi chon lükümach o ü ngeniei, üpwe apwönüetä ai kewe kapas meinisin.” Iei alon Kot ewe Samol mi Lapalap.
EZE 12:26 Iwe, ewe Samol mi Lapalap a kapassefäl ngeniei,
EZE 12:27 “Nöün aramas, ekewe chon Israel ra apasa pwe mine ka küna epwap fis mürin chomong rän, nge mine ka osuni a fokun toau, toau.
EZE 12:28 Iei mine kopwe üreniir, ‘Iei alon Kot ewe Samol mi Lapalap: Esap wor eu lein ai kewe kapas epwe mang le pwönüetä, nge mine üa apasa epwe fokun fis.’ Ngang Kot ewe Samol mi Lapalap üa kapas.”
EZE 13:1 Iwe, ewe Samol mi Lapalap a kapas ngeniei,
EZE 13:2 “Nöün aramas, kopwe osuni feiengauen ekewe soufosun Israel, ir chokewe mi osuni seni püsin ar ekiek. Kopwe üreniir pwe repwe rongorong alon ewe Samol mi Lapalap.
EZE 13:3 Iei alon Kot ewe Samol mi Lapalap: Feiengauen ekewe soufos mi tiparoch ra osuni seni püsin letiper, nge esap wor künaer.
EZE 13:4 Ämi chon Israel, nöümi kewe soufos ra wewe ngeni ekewe foks mi nom lon ekewe leni mi tala.
EZE 13:5 Resap nom ren pwangen ekewe tit pwe repwe tümwünüür, resap pwal senisefälietä ekewe tit fän iten ekewe chon Israel pwe repwe üwenewenetä lon maun lon ränin ewe Samol mi Lapalap.
EZE 13:6 Mine ra osuni a mwakel, nge mine ra pweei a chofana. Ra apasa, ‘Iei alon ewe Samol mi Lapalap,’ nge ngang üsap tinirela. Iwe, ra chök ekieki pwe mine ra apasa epwe pwönüetä.
EZE 13:7 Nge ngang üa üreniir, “Künaemi a chök atuputup, a pwal mwakel chök mine oua pweei, lupwen oua apasa, ‘Iei alon ewe Samol mi Lapalap,’ nge ngang üsap kapas.
EZE 13:8 Iei mine ngang Kot ewe Samol mi Lapalap üa apasa: Pokiten a atuputup mine oua osuni, a pwal mwakel mine oua küna, üpwe ü ngenikemi.
EZE 13:9 Üpwe palüeni ekewe soufos a wor künaer mi atuputup, pwal chokana ra pweei mine a mwakel. Iwe, resap nom lon mwichen nei aramas, lupwen ra pwüngüpwüngfengen, iter esap makelong lon puken tettelin chon Israel, resap pwal tolong lon ewe fanü Israel. Mürin repwe silei pwe ngang Kot ewe Samol mi Lapalap.
EZE 13:10 Ei epwe fis pokiten ar atokala nei kewe aramas ren ar apasa, ‘Epwe chök fis kinamwe,’ nge esap fokun fis. Iwe, ren ei a usun chök pwe nei aramas ra senätä eu tit mi apwangapwang, nge ekei soufos ra chök aopala apwangapwangan ren pweech.
EZE 13:11 Iei mine kopwe üreni chokewe ra chök apwecha ewe tit, pwe epwe turula. Epwe püngütiu ütomong won. Üpwe pwal tinato ütten fau me eu mölümöl won.
EZE 13:12 Nge lupwen ewe tit epwe turula, aramas repwe aisinikemi, ‘Met lomoten ewe pweech oua apwecha ngeni ei tit?’
EZE 13:13 Iei mine ngang Kot ewe Samol mi Lapalap üa apasa: Lon ai song üpwe awarato eu mölümöl, lon ai lingeringer üpwe apüngätiu üt me ütten fau mi ataela ewe tit.
EZE 13:14 Iwe, üpwe atai ewe tit oua apwecha, üpwe pwal aturala won pwül pwe epwe pwä longolongun. Iwe, lupwen epwe turula, oupwe mäla fan. Mürin oupwe silei pwe ngang ewe Samol mi Lapalap.
EZE 13:15 Iei usun üpwe amüchü ai lingeringer won ewe tit, pwal won chokewe ra apwecha. Iwe, üpwe ürenikemi pwe ewe tit esap chüen wor, nge chokewe ra apwecha resap pwal chüen nom,
EZE 13:16 ir ekewe soufosun Israel ra osuni usun Jerusalem, a pwal wor künaer pwe epwe fis kinamwe lon, nge esap fokun fis.” Iei alon Kot ewe Samol mi Lapalap.
EZE 13:17 Iwe, ewe Samol mi Lapalap a apasa, “Nöün aramas, iei kopwe sape ngeni ekewe fefin lein noum aramas mi osuni seni püsin ar ekiek. Iwe, kopwe osuni usun ar repwe feiengau o apasa,
EZE 13:18 ‘Iei alon Kot ewe Samol mi Lapalap: Feiengauemi, ämi fefin mi föri sokun pisekin roong pwe ririn kumwuch, oua pwal tei pwölüpwölün won mesen aramas meinisin, pun oua mochen nemeni manauen aramas. Ifa usun, oua mochen pwe epwe wor ämi nemenem won manauen me mälan nei aramas fän iten püsin feiöchümi?
EZE 13:19 Oua aitengauaei lein nei aramas fän iten fite kumwuch parli pwal fän iten ekoch sättin pilawa. Oua niela aramas esap ürürün repwe mäla, nge oua amanaua aramas ürürün resap manau, ren ämi chofana ngeni nei aramas mi rongokai ngeni kapas chofana.’
EZE 13:20 Iei mine ngang Kot ewe Samol mi Lapalap üa apasa: Üa oput föriemi pisekin roong oua aea lon ämi mochen nemeni manau me mäla. Iwe, üpwe üttirewu seni won pöümi, üpwe pwal angasa ekewe aramas oua nemeniir.
EZE 13:21 Üpwe pwal kamwei pwölüpwölün won mesemi o angasa nei aramas seni lepöümi, pwe resap chüen nom fän nemeniemi. Mürin oupwe silei pwe ngang ewe Samol mi Lapalap.
EZE 13:22 Iwe, oua apwangapwangala leluken chon pwüng ren ämi kapas chofana, chokewe ngang üsap mochen pwe repwe lolilen. Oua pwal pesei ngeni ekewe aramasangau, pwe resap kul seni ar föför mi ngau o amanaua manauer.
EZE 13:23 Iei mine esap chüen wor künaemi mi atuputup, esap pwal chüen fis ämi pwee. Iwe, üpwe angasa nei aramas seni fän nemeniemi. Mürin oupwe silei pwe ngang ewe Samol mi Lapalap.”
EZE 14:1 Iwe, ekoch seni lein ekewe souakomwen chon Israel ra feito rei o mot mwei.
EZE 14:2 Mürin, ewe Samol mi Lapalap a kapas ngeniei,
EZE 14:3 “Nöün aramas, ekei mwän ra asamolu ar kewe uluulun anümwäl lon letiper o mwüt ngeniir pwe repwe emwenirelong lon tipis. Ifa usun, üpwe mwüt ngeniir pwe repwe angei ar öüröür seniei?
EZE 14:4 Iei mine kopwe kapas ngeniir o asile ngeniir pwe iei aloi ngang Kot ewe Samol mi Lapalap, ‘Are eman chon Israel a asamolu an uluulun anümwäl lon letipan o mwüt ngeni pwe epwe emwenalong lon tipis, mürin a pwal churi eman soufos pwe epwe angei an öüröür seni, püsin ngang üpwe pälüeni won aükükün chomongun an uluulun anümwäl.
EZE 14:5 Üpwe föri ei, pwe üpwe elliapasefäli letipen ekewe chon Israel mi likitieila pokiten ar uluulun anümwäl.’
EZE 14:6 Iei mine kopwe üreni ekewe chon Israel pwe iei aloi ngang Kot ewe Samol mi Lapalap, ‘Oupwe ekieksefäl. Oupwe kul seni ämi kewe uluulun anümwäl o sape seni ämi föför mi anioput meinisin.
EZE 14:7 Are eman chon Israel ika eman chon ekis mi nom leir a kul seniei o asamolu an uluulun anümwäl lon letipan, a pwal mwüt ngeni pwe epwe emwenalong lon tipis, nge mürin a pwal churi eman soufos, pwe epwe angei an öüröür seniei, püsin ngang ewe Samol mi Lapalap üpwe pälüeni.
EZE 14:8 Üpwe ü ngeni ei sokun aramas, üpwe föri pwe epwe eu asisil ngeni aramas, repwe leaweni lon ar kapasen ämängau, üpwe pwal ärala me lein nei aramas. Mürin oupwe silei pwe ngang ewe Samol mi Lapalap.
EZE 14:9 Nge are eman soufos epwe tup, pwe epwe osuni ngeni ewe chon ais öüröüran, püsin ngang ewe Samol mi Lapalap üpwe atupu ewe soufos. Ngang üpwe ü ngeni o ärala me lein ekewe aramasen Israel.
EZE 14:10 Ina usun ir me ruoman repwe angei liwinin ar tipis. Liwinin tipisin ewe soufos me ewe chon ais öüröüran epwe wewefengen.
EZE 14:11 Mürin, ekewe chon Israel resap chüen tok seniei, resap pwal chüen alimengaueer ren ar tipis. Iwe, ir repwe nei aramas kana, nge ngang üpwe ar Kot,’ iei alon Kot ewe Samol mi Lapalap.”
EZE 14:12 Iwe, ewe Samol mi Lapalap a kapas ngeniei,
EZE 14:13 “Nöün aramas, are chon eu fanü repwe tipis ngeniei ren ar resap allükülük, üpwe ü ngeniir o angei seniir ener mongö ra manau seni, üpwe tinala lengita rer o arosala aramas me man.
EZE 14:14 Nge are ekewe ülüman mwän Noa, Taniel me Hiop repwe nom lon ewe fanü, repwe chök püsin amanaueer ren ar pwüng,” iei alon Kot ewe Samol mi Lapalap.
EZE 14:15 “Are üpwe awora manmwacho pwe repwe nom won ewe fanü o niela chon, pwe ewe fanü epwe wiliti eu fanü mi pön ia esap wor eman aramas a tongeni fetal ie pokiten ekewe man,
EZE 14:16 mwo manauei, ngang Kot ewe Samol mi Lapalap üa apasa, are ekewe ülüman mwän repwe nonom lon ewe fanü, resap tongeni amanaua nöür mwän ika fefin, pwe ir chök repwe manau, nge ewe fanü epwe wiliti eu fanü mi pön.
EZE 14:17 Are üpwe awarato maun won ewe fanü o tinala efoch ketilas lemenen ewe fanü, pwe üpwe arosala aramas me man,
EZE 14:18 mwo manauei, ngang Kot ewe Samol mi Lapalap üa apasa, are ekewe ülüman mwän repwe nonom lon, resap tongeni amanaua nöür mwän ika fefin, pwe ir chök repwe manau.
EZE 14:19 Are üpwe tinala mätter lon ewe fanü o niela chomong lon ai lingeringer, pwe aramas me man repwe ärela,
EZE 14:20 mwo manauei, ngang Kot ewe Samol mi Lapalap üa apasa, are Noa, Taniel me Hiop repwe nonom lon, resap tongeni amanaua nöür mwän ika fefin, pwe repwe chök püsin amanaueer ren ar pwüng.”
EZE 14:21 Ewer, iei alon Kot ewe Samol mi Lapalap, “Epwe fen ifan feiengauen chon Jerusalem, lupwen üpwe tinala rer ai kewe rüanü feiengau mi watte, maun, lengita, manmwacho me mätter, pwe üpwe arosala aramas me man?
EZE 14:22 Nge epwe wor ekoch leir mi chüen manau, nöür mwän me fefin, repwe towu seni ekewe feiengau. Iwe, oupwe nenengeniir, lupwen repwe torikemi, oupwe küna manauer me ar föföringau. Mürin oupwe chipila ren ekewe feiengau meinisin üa awarato won Jerusalem.
EZE 14:23 Iwe, oupwe chipela, lupwen oupwe küna manauer me ar föföringau, pun oupwe mefi pwe ekewe feiengau meinisin üa föri ngeni Jerusalem mi wor popun,” iei alon Kot ewe Samol mi Lapalap.
EZE 15:1 Iwe, ewe Samol mi Lapalap a kapas ngeniei,
EZE 15:2 “Nöün aramas, ren met ewe irän wain a aüchea seni ekewe lusun irän lein wöllap?
EZE 15:3 Ifa usun, aramas ra angei popun o falei och pisek seni? Ika ra föri efoch chüföl seni o isetä pisek won?
EZE 15:4 A chök öch an epwe koturulong lon ekkei pwe epwe karala. Ifa usun, are lesopun me ruosop ra karala, nge lukalapan a wiliti mooch, a chüen lomot ngeni och mettoch?
EZE 15:5 Ika esap lomot ngeni och mettoch, lupwen esamwo kar, ifa usun, esap watte lomotongauan, lupwen ekkei a kenala, pwe a wiliti mooch? Ewer, esap fokun lomot ngeni och mettoch.
EZE 15:6 Iei mine ngang Kot ewe Samol mi Lapalap üa apasa: Usun üa angei ewe irän wain seni ekewe irän lein wöllap o atolonga lon ekkei pwe epwe karala, iei usun üpwe föri ngeni ekewe chon Jerusalem meinisin.
EZE 15:7 Iwe, üpwe ü ngeniir. Inamwo ika ra sü seni lon ekkei, ekkei epwe chök kenirela. Nge lupwen üpwe ü ngeniir, oupwe silei pwe ngang ewe Samol mi Lapalap.
EZE 15:8 Iwe, üpwe awili ei fanü ngeni fanüapö, pun chon resap allükük,” iei alon Kot ewe Samol mi Lapalap.
EZE 16:1 Iwe, ewe Samol mi Lapalap a kapas ngeniei,
EZE 16:2 “Nöün aramas, kopwe amefi ngeni Jerusalem an kewe föför mi anioput.
EZE 16:3 Iwe, kopwe üreni Jerusalem, pwe iei alon Kot ewe Samol mi Lapalap ngeni: Poputän fanüom Kanaan, pun ka uputiu ikenan. Semom eman re Amor, nge inom eman fin Hit.
EZE 16:4 Lon ewe rän ka uputiu lon esap wor eman a pökü tarom, esap wor eman a atütuk pwe kopwe limöch, esap pwal wor eman a toofi ngonuk salt ika filiti ngonuk ro.
EZE 16:5 Esap wor eman a eäni tong ngonuk, pwe epwe föri eu lein ekei sokun föför ngonuk. Nge ra pöütukela lemal lon ränin om uputiu, pun ra oputok.
EZE 16:6 Mürin üa pwereto o küna pwe ka fares lon chaom. Nge lupwen üa küna pwe ka kula ren chaom, üa ürenuk, ‘Kopwe manau
EZE 16:7 o märitä usun chök efoch irän lemäl.’ Iwe, ka mämäritä o wattela tori ka eman föpwül mi fokun liöch. Oupwum a fis, mökürom a pwal langatamala, nge ka fokun selela.
EZE 16:8 Lupwen üa pwal pwereto, üa küna pwe a tori fansoun om kopwe tongeni pwüpwülü. Iwe, üa ameresala üfei womw o pwölüela om selela, üa pwal pwon ngonuk pwe üpwe tongeek. Ewer, üa eäni eu pwon fän akapel ngonuk pwe sipwe pwüpwülü. Iwe, ka wiliti pwülüei,” iei alon Kot ewe Samol mi Lapalap.
EZE 16:9 “Mürin üa atütuk ren koluk, üa talü senuk chaom o epiti ngonuk noppuk.
EZE 16:10 Iwe, üa aüföüfa ngonuk üf mi chü o eipweipwa ngonuk sus seni silin man mi aüchea, üa filiti ngeni inisum mangaku mi pwechepwech o pwölü ngonuk silik.
EZE 16:11 Iwe, üa foute ngonuk chomong sokun fout: lälän won poum me mwärämwärin fän üom,
EZE 16:12 ringen won pwötum me niouten won selingom, üa pwal ämwärämwära ngeni mökürom epa mwärämwär mi fokun ling.
EZE 16:13 Iei usun a wor foutom seni kolt me silifer, ka üföüf üf seni mangaku mi pwechepwech me silik me mangaku mi chü. Anom mongö pilawa mi mürina, ünümom chönün chunen, üa pwal ngonuk apüra seni föün olif. Iwe, ka fokun liöchüla o tolong lon wisen kiwin.
EZE 16:14 Iteüöchum a tori mwün fanüfan pokiten liöchum, pun ka fokun ling ren mine üa foute ngonuk,” iei alon Kot ewe Samol mi Lapalap.
EZE 16:15 “Nge ka chök lükü püsin liöchum, ka pwal alomotongaua iteüöchum ren om wiliti eman fin lisowu. Ka lisowu ngeni iteiten eman me eman mi feito reöm.
EZE 16:16 Iwe, ka angei ekoch üfom, pwe kopwe eäniir le alinga ekewe lenien fel won ekewe leni tekia fän itom, ka pwal amömö inisum ngeni meinisin mi feito reöm usun eman fin lisowu. Ena sokun esap öch pwe a fis, esap pwal öch an epwe fis lon kan fansoun repwe feito.
EZE 16:17 Ka pwal angei foutom mi ling seni kolt me silifer üa foute ngonuk me mwan, nge ka föri seniir uluulun mwän fän itom pwe kopwe lisowu ngeniir.
EZE 16:18 Iwe, ka angei üfom mi chü o pwölü ngeni ekewe uluulun mwän, ka pwal eäni asor ngeniir ai apüra me ai apach mi pwokus.
EZE 16:19 Üa amongöü ngonuk pilawa mi mürina, üa pwal ngonuk apüra seni föün olif o aünü ngonuk chönün chunen, nge en ka chök angei mine üa ngonuk o eäniir asor ngeni ekewe uluulun anümwäl, pwe repwe öch ngonuk. Ina usun mine ka föri,” iei alon Kot ewe Samol mi Lapalap.
EZE 16:20 “Iwe, noum kewe mwän me fefin, ka nöüniir fän itei, ka eäniir asor ngeni ekewe uluulun anümwäl pwe repwe kek. Ifa usun, esap fen naf pwe ka kirikiringau ngeniei?
EZE 16:21 Nge iei ka pwal niela nei kana o eäniir asoren kek ngeni ekewe uluulun anümwäl.
EZE 16:22 Nge lon om kewe föför mi anioput me om lisowu meinisin kosap chechemeni lekükünum, lupwen ka fokun selela o fares lon chaom.”
EZE 16:23 Iwe, iei alon Kot ewe Samol mi Lapalap, “Feiengauom, feiengauom, pun iei soposopun om kewe föföringau,
EZE 16:24 pwe ka pwal senätä leni mi ekis tekia fän itom o föri om kewe lenien fel ngeni uluulun anümwäl lon ekewe lenien amwicheich meinisin.
EZE 16:25 Ka aüetä om kewe lenien fel ngeni uluulun anümwäl lepopun ekewe al meinisin o alimengaua liöchum. Ka pwal amömö inisum ngeni iteiten eman me eman mi feito reöm o alapala om angangen lisowu.
EZE 16:26 Iwe, ka amömö inisum ngeni chon Isip, chon arum mi mocheisou, ka pwal alapala om angangen lisowu, pwe üa song ren.
EZE 16:27 Iei mine üa ü ngonuk o apwünguk. Üa akisikisala fanüom me rei o äsechukula ngeni chon oputok, ngeni ekewe chon Filistia mi notä ren om angangen mocheisou.
EZE 16:28 Iwe, pokiten kosap menemenöch, ka pwal amömö inisum ngeni chon Asiria. Ewer, ka lisowu ngeniir, iei mwo nge kosap pwal menemenöch ren.
EZE 16:29 Mürin ka alapala om angangen lisowu ngeni ekewe chon Papilon, ir seni ewe fanüen chon amömö, nge ren ei kosap pwal menemenöch.”
EZE 16:30 Iwe, Kot ewe Samol mi Lapalap a apasa, “A wiliwilikis lelukom, pwe ka chök föri ekei sokun föför usun eman mi amömö inisin o fokun säwemang.
EZE 16:31 Ka senätä om kewe leni mi ekis tekia lepekin ekewe al meinisin o föri om kewe lenien fel ngeni uluulun anümwäl lon ekewe lenien amwicheich meinisin. Nge kosap angei moni usun chokewe mi amömö inisir.
EZE 16:32 Ka eman fin lisowu mi etiwa chon ekis, nge kosap etiwa püsin pwülüom.
EZE 16:33 Mwän ra möni ekewe fin lisowu, nge en ka lifang ngeni chokewe ka lisowu ngeniir. Ka ngeniir om kewe lifangen amichimich, pwe repwe feito reöm seni ekis meinisin o kon reöm.
EZE 16:34 Iwe, ka fokun sokofesen seni ekewe lusun fefin mi amömö inisir, pun esap wor eman a püsin küttok, pwe en ka kütteer o möniir, nge kosap angei liwinum. Ren ei ka fokun sokola seniir.”
EZE 16:35 Iei mine Jerusalem, en eman fin lisowu, kopwe rongorong mine ewe Samol mi Lapalap a apasa.
EZE 16:36 Iei alon Kot ewe Samol mi Lapalap, “Ka pwilitawu üfom usun eman fefin mi amömö inisin. Ka fangala inisum ngeni noum kewe kamwet, pwal ngeni om kewe uluulun anümwäl mi anioput. Iwe, ka pwal niela noum kana o eäniir asor ngeniir.
EZE 16:37 Iei mine üpwe achufengeni noum kewe kamwet meinisin, chokewe ka efich, pwal chokewe ka oput. Üpwe achufengeniir seni ekis meinisin pwe repwe ü ngonuk, üpwe pwal aselelok fän meser pwe repwe küna om selela.
EZE 16:38 Iwe, üpwe apwünguk fän iten om lisowu me nimanau. Üpwe apwünguk fän ai song me lingeringer, pwe kopwe ninnila.
EZE 16:39 Iwe, üpwe atolongok fän nemenien noum kewe kamwet. Ir repwe atai ekewe leni ia ka amömö inisum ie o aturala om kewe lenien fel ngeni uluulun anümwäl. Repwe kamwei senuk üfom, repwe pwal angei senuk foutom mi ling o likitukela lon om selela.
EZE 16:40 Iwe, repwe amwichafengeni chomong aramas, pwe repwe monei ngonuk fau o atatakisiik ren nöür ketilas.
EZE 16:41 Repwe keni imwom kana, repwe pwal apwünguk fän mesen chomong fefin. Üpwe aükätiu om amömö inisum, kosap pwal chüen möni noum kewe kamwet.
EZE 16:42 Mürin üsap chüen song ngonuk ika niköökö womw. Üpwe awesi ai song o kinamwela.
EZE 16:43 Iwe, pokiten kosap chechemeni mine üa föri ngonuk lekükünum, nge ka asongaei ren ekei sokun föföringau meinisin, iei mine üpwe püsin liwini ngonuk liwinin om kewe föför. Pwota ka föri ekewe angangen mocheisou o achu ngeni om kewe angangen anioput?”, iei alon Kot ewe Samol mi Lapalap.
EZE 16:44 Ewe Samol mi Lapalap a apasa, “Meinisin mi silei mwiitun repwe eäni ei mwiitun usum, Jerusalem, ‘Usun lapalapen eman inelap, ina usun lapalapen nöün fefin.’
EZE 16:45 En wesewesen nöün inom mi pöütala pwülüan me nöün kewe. En ka wesewesen usun chök pwiüm kewe mi pöütala pwülüer me nöür kewe. Inemi eman fin Hit, nge sememi eman re Amor.
EZE 16:46 Pwiüm we watte a iteni Samaria, a nom efeng me wisoposopun kewe. Nge pwiüm we kükün a iteni Sotom, a nom ör me wisoposopun kewe.
EZE 16:47 Nge en kosap chök fetal lon ipwer, kosap pwal chök apirü ar kewe föför mi anioput. Pwe mürin ekis chök fansoun ka alapala om föföringau lap seniir.
EZE 16:48 Mwo manauei, ngang Kot ewe Samol mi Lapalap üa apasa: Pwiüm Sotom me wisoposopun kewe resap föföringau usun en me wisoposopum kewe.
EZE 16:49 Iei tipisin pwiüm we Sotom: I me wisoposopun kewe ra lamalamtekia, ra mongömong, ra pwal nonomöch fän kinamwe, nge resap alisi chon wöüngau me mwelele.
EZE 16:50 Iwe, ra lamalamtekia o föri föför mi anioput me mwei. Iei mine üa aroserela, lupwen üa küna ar kewe föför.
EZE 16:51 Samaria esap föri esopun om tipis. En ka föri chomong föför mi anioput lap seni. Iei popun pwiüm kewe ra usun chök chon pwüng pokiten chomongun om föför mi anioput.
EZE 16:52 Iei kopwe püsin uwei om itengau, en mi apwüngü pwiüm kewe me lom. Pun om tipis a anioput seni ar tipis, iei mine ra usun chök pwe ra pwüng me lükum. Ewer, kopwe säw o uwei om itengau, pun ren om föför ka föri pwe pwiüm kewe ra usun chök chon pwüng.
EZE 16:53 Iwe, üpwe aüsefälietä Sotom me wisoposopun kewe, üpwe pwal aüsefälietä Samaria me wisoposopun kewe. Lon ena chök fansoun üpwe pwal aüsefäliiketä,
EZE 16:54 pwe kopwe säw o uwei om itengau pokiten meinisin mine ka föri. Ren ei pwiüm kewe repwe küna chip.
EZE 16:55 Iwe, repwe usun chök me lom, Sotom me wisoposopun kewe, pwal Samaria me wisoposopun kewe. Pwal en me wisoposopum kewe oupwe usun chök me lom.
EZE 16:56 Ifa usun, kosap eäni kapasen lamalamtekia ngeni pwiüm Sotom lon fansoun om lamalamtekia,
EZE 16:57 mwen esamwo pwä om kewe föföringau? Nge iei ka usun chök Sotom, pun ka küna turunufas me ren ekewe chon Etom me chon arur, pwal me ren ekewe chon Filistia. Iwe, chon arum meinisin ra turunufaseek.
EZE 16:58 Kopwe angei liwinin om mocheisou me om kewe föför mi anioput,” iei alon Kot ewe Samol mi Lapalap.
EZE 16:59 Ewer, iei alon Kot ewe Samol mi Lapalap, “Üpwe liwini ngonuk liwinin om föför, pun en ka aücheangaua ai we pwon fän akapel ngonuk ren om atai ewe pwon.
EZE 16:60 Nge ngang üpwe chechemeni ai we pwon ngonuk lupwen lekükünum, üpwe pwal afisätä eu pwon esemüch lefilach.
EZE 16:61 Mürin kopwe chechemeni om kewe föför meinisin o säw rer, lupwen üpwe aliwini ngonuk pwiüm kewe watte me kükün, pwe repwe noum fefin, inamwo ika esap alongolong won ai pwon ngonuk.
EZE 16:62 Iei usun üpwe försefälietä ai we pwon ngonuk, nge kopwe silei pwe ngang ewe Samol mi Lapalap.
EZE 16:63 Iwe, lupwen üpwe amusala om kewe föför mi ngau meinisin, en kopwe chechemeniir o säw rer, pwe kosap chüen apasa och,” iei alon Kot ewe Samol mi Lapalap.
EZE 17:1 Iwe, ewe Samol mi Lapalap a kapas ngeniei,
EZE 17:2 “Nöün aramas, kopwe eäni eu kapas monomon ngeni ekewe chon Israel o apworausa ngeniir eu pworausen awewe.
EZE 17:3 Iwe, kopwe üreniir pwe iei aloi ngang Kot ewe Samol mi Lapalap, ‘A wor eman ikel mi watte, pöükässin ra fokun langatam o wenewu, pwal ülöülan ra langatam o sokopat anüanür. Iwe, a ässitä won Lepanon o felei ülülen efoch irä setar.
EZE 17:4 Iwe, a uweela ngeni eu fanüen chon amömö o isetiu lon eu telinimwen chon amömö.
EZE 17:5 Mürin a angei efoch fasar seni ewe fanü Israel o fotukätiu lon eu pwül mi pwülüöch. Iwe, a fotukätiu usun efoch silifö arun eu koluk mi watte.
EZE 17:6 Fasaran we a pwükütä pwe a wiliti efoch irän wain mi mochomoch, nge a fokun palapal. Iwe, palan ra pwükütä o wene ngeni ewe ikel, nge waran ra tötiu fan. Iei usun a wiliti efoch irän wain mi apwükawu palan me chön.
EZE 17:7 Nge a pwal wor eman ikel mi watte, pöükässin ra fokun langatam, a pwal fökün ülöül. Iwe, iei ewe irän wain a atowu waran seni lenian wene ngeni ewe ikel, a pwal apwükawu palan ngeni, pwe epwe achöchönü.
EZE 17:8 Nge a fen fot lon eu pwül mi pwülüöch arun eu koluk mi watte, pwe epwe tongeni apwükü palan o ua, epwe pwal wiliti efoch irän wain mi mürina.’
EZE 17:9 Iwe, kopwe üreniir, ‘Iei alon Kot ewe Samol mi Lapalap: Ifa usun, ewe irän wain epwe märöch? Ifa usun, ewe aemanün ikel esap üttawu waran kewe o fichi uan, pwe chön meinisin mi pwüküfö repwe pwasala? A mecheres ngeni eman mi apwangapwang pöün ika ngeni ekoch aramas chök ar repwe üttawu waran.
EZE 17:10 Ewer, a fen fotetiu. Nge ifa usun, epwe märöch? Esap fokun pwasala, lupwen asepwälin ötiu epwe eniti me lon ewe leni ia a pwükütä ie?’”
EZE 17:11 Iwe, ewe Samol mi Lapalap a kapas ngeniei,
EZE 17:12 “Kopwe aisini ei täppin aramas mi lükümach o ü ngeniei, ika ra silei wewen ei pworausen awewe. Kopwe üreniir, pwe ewe kingen Papilon a feila Jerusalem, a liapenala ewe king me nöün kewe nöüwis o uweerela ngeni lenian we Papilon.
EZE 17:13 Mürin a afili eman seni familien ewe king, a föri eu pwonen atipeeu ngeni o pesei pwe epwe pwon ngeni fän akapel. Iwe, a uweela souemwen seni ewe fanü,
EZE 17:14 pwe mwün Juta epwe fefeitiu, nge esap chüen tongeni pöchökülsefäl. Ewe mwü epwe chök fis ren än ewe kingen Juta tümwünüöchü an we pwonen atipeeu ngeni ewe kingen Papilon.
EZE 17:15 Nge ewe kingen Juta a ütä ngeni ewe kingen Papilon o tinala nöün chon künö Isip, pwe epwe tüngor seni oris me sounfiu mi chomong. Ifa usun, epwe pwäk ngeni? Ifa usun, eman aramas mi föri ei sokun esap angei liwinin an föför? Ifa usun, a tongeni atai eu pwonen atipeeu, nge esap angei liwinin?
EZE 17:16 Mwo manauei, ngang Kot ewe Samol mi Lapalap üa apasa, ei king epwe fokun mäla lon Papilon, lon lenien ewe chök king a seikätä lon wisan wisen king, pun a aücheangaua o atai an we pwonen atipeeu a eäni fän akapel ngeni.
EZE 17:17 Pwal Farao me nöün mwichen sounfiu mi pwora resap tongeni alisi lon maun, lupwen ekewe chon Papilon repwe senätä oror o aüetä imwen maun, pwe repwe niela chomong.
EZE 17:18 Iwe, a aücheangaua o atai ewe pwonen atipeeu a eäni fän akapel me mwan. A föri ekana sokun föför meinisin, iei popun epwe fokun angei liwinin.”
EZE 17:19 Iei mine Kot ewe Samol mi Lapalap a apasa, “Mwo manauei, üpwe liwini ngeni ükükün an tipis, pun a aücheangaua o atai ewe pwonen atipeeu a eäni fän akapel itei won.
EZE 17:20 Iwe, üpwe aturala ai toloia won, pwe epwe tup lon. Üpwe pwal emwenala Papilon o kapwüng ngeni ikenan, pokiten a atai an pwon fän akapel ngeniei.
EZE 17:21 Iwe, nöün kewe sounfiu meinisin mi sipeöch repwe mäla lon maun, nge chokewe mi chüen manau repwe toropasfeil ekis meinisin. Mürin oupwe silei, pwe ngang ewe Samol mi Lapalap üa kapas.”
EZE 17:22 Iei alon Kot ewe Samol mi Lapalap, “Püsin ngang üpwe fichi ülülen efoch irä setar, üpwe fichi efoch fasaran mi pwüküfö o fotuki won ungen eu chuk mi tekia.
EZE 17:23 Üpwe püsin fotuki won eu chukun Israel mi fokun tekia, pwe epwe apwükü palan o ua, epwe pwal wiliti efoch irä setar mi fokun mürina. Iwe, chomong sokun machang repwe so won palan o fas fän nürün.
EZE 17:24 Mürin, ekewe irän lemäl meinisin repwe silei, pwe ngang ewe Samol mi Lapalap üa amochomocha ewe irä mi langatam o alangatama ewe irä mi moch. Üpwe apwasala ewe irä mi manau o amanaua ewe irä mi pwas. Ngang ewe Samol mi Lapalap üa kapas, nge üpwe pwal apwönüetä.”
EZE 18:1 Iwe, ewe Samol mi Lapalap a pwal kapas ngeniei,
EZE 18:2 “Pwota oua äkeäni ei sokun mwiitun lon ewe fanü Israel, ‘Samasam kana ra ochoch uän irän wain mi mmwäl, nge ngin nöür kana ra kop ren?’
EZE 18:3 Mwo manauei, ngang Kot ewe Samol mi Lapalap üa apasa, ei sokun mwiitun ousap chüen äkeäni lon Israel.
EZE 18:4 Ngang üa nemeni manauen aramas meinisin, manauen samasam pwal manauen nöünöü kana. Iwe, ewe aramas mi tipis i chök epwe mäla.
EZE 18:5 A tongeni fis pwe eman aramas a föföröch, a pwal eäni pwüng me wenechar.
EZE 18:6 Esap mongö föten anü lon ekewe lenien fel won ekewe chuk o fel ngeni än chon Israel kewe uluulun anümwäl. Esap lisowu ngeni pwülüen chon arun ika kon ren eman fefin mi samaun maram.
EZE 18:7 Esap ariaföüü eman, nge a aliwini ngeni ewe chon liwinimang asisilen an pwon, esap pwal solä, nge a fangala anan mongö ngeni chon echik o aüföüfa chon mwelele.
EZE 18:8 Esap awattela winnen nöün moni ika angei manauan. Esap föri mine a pwüngingau, nge a wenechar lon an apwüngü osukosuken lefilen aramas.
EZE 18:9 A apwönüetä ai kewe allük o aleasochisiir fän allükülük. Ei sokun aramas a pwüng, epwe fokun manau,” iei alon Kot ewe Samol mi Lapalap.
EZE 18:10 “A tongeni fis pwe ei aramas a wor eman nöün mwän mi solä o nimanau.
EZE 18:11 Esap apirü än saman föför, pwe a chök mongö föten anü won ekewe chuk o lisowu ngeni pwülüen chon arun.
EZE 18:12 A ariaföüü chon wöüngau me chon mwelele, a solä, esap aliwini ngeni ewe chon liwinimang asisilen an pwon. A fel ngeni ekewe uluulun anümwäl o föri sokun föför mi anioput.
EZE 18:13 A awattela winnen nöün moni o angei manauan. Ifa usun, ätei epwe manau? Apwi, esap fokun manau. Epwe fokun mäla, pun a föri ekei sokun föför mi anioput meinisin. Iwe, epwe chök angei chappen an föför.
EZE 18:14 A pwal tongeni fis pwe ei chon föföringau a wor eman nöün a küna än saman tipis meinisin, nge esap apirü an kewe föför.
EZE 18:15 Esap mongö föten anü won ekewe chuk o fel ngeni än chon Israel kewe uluulun anümwäl. Esap lisowu ngeni pwülüen chon arun,
EZE 18:16 esap ariaföüü eman, nge a aliwini ngeni ewe chon liwinimang asisilen an pwon. Esap solä, pwe a fangala anan mongö ngeni chon echik o aüföüfa chon mwelele.
EZE 18:17 Esap tipeni mine a pwüngingau, esap awattela winnen nöün moni ika angei manauan, nge a apwönüetä ai kewe allük o aleasochisiir. Ätewe esap mäla pokiten än saman tipis, nge epwe fokun manau.
EZE 18:18 Nge semen ätei epwe fokun mäla pokiten an föföringau, pun a ariaföüü aramas, a soläni pisekin pwin o föri mine a ngau lein aramasan.
EZE 18:19 Nge ämi oua ais, ‘Pwota nöün ewe mwän esap angei liwinin än saman tipis?’ Pokiten nöün a eäni pwüng me wenechar o apwönüetä ai kewe allük meinisin fän allükülük, epwe fokun manau.
EZE 18:20 Ewe aramas mi tipis i chök epwe mäla. Nöün eman sam esap angei liwinin än saman tipis, nge ewe sam esap pwal angei liwinin än nöün tipis. Iwe, ewe chon pwüng epwe angei liwinin an pwüng, nge ewe aramasangau epwe angei liwinin an föföringau.”
EZE 18:21 “Nge are eman aramasangau a ükütiu le föri tipis, are a apwönüetä ai kewe allük meinisin o eäni pwüng me wenechar, epwe fokun manau, nge esap mäla.
EZE 18:22 Ekewe pupungau meinisin a föriir me mwan üpwe amusala. Epwe manau pokiten an kewe föför mi pwüng.”
EZE 18:23 Iwe, Kot ewe Samol mi Lapalap a ais, “Ifa usun, üpwe pwapwaiti än ewe aramasangau mäla? Ifa usun, üsap tipeni an epwe ükütiu seni an kewe föför mi ngau pwe epwe manau?
EZE 18:24 Nge are eman aramas mi pwüng a kul seni an föför mi pwüng o föri mine a pwüngingau, are a apirü än eman aramasangau föför mi anioput, ifa usun, epwe manau? Apwi! An kewe föför mi pwüng meinisin üsap chüen chechemeniir. Pokiten an pupungau me tipis epwe mäla.
EZE 18:25 Nge oua apasa, ‘Än ewe Samol föför esap pwüng.’ Iwe, oupwe rongorong, ämi chon Israel. Ifa usun, ngang ewe eman esap föri mine a pwüng, nge sap fen ämi?
EZE 18:26 Are eman aramas mi pwüng a kul seni an kewe föför mi pwüng o föri tipis, ätewe epwe mäla. Pokiten an kewe tipis a föri, epwe mäla ren.
EZE 18:27 Nge are eman aramasangau a ükütiu le föföringau o eäni pwüng me wenechar, epwe püsin amanaua manauan.
EZE 18:28 Are a mefi an pupungau o ükütiu le föri tipis, epwe fokun manau, nge esap mäla.
EZE 18:29 Nge ämi chon Israel oua apasa, ‘Än ewe Samol föför esap pwüng.’ Ifa usun, ämi chon Israel, ngang ewe eman esap föri mine a pwüng, nge sap fen ämi?
EZE 18:30 Iei mine ngang Kot ewe Samol mi Lapalap üa apasa: Üpwe apwüngükemi chon Israel, iteiten eman me eman won ükükün an föför. Oupwe ekieksefäl o ükütiu seni ämi föför mi ngau, pwe ämi kewe tipis resap afeiengauakemi.
EZE 18:31 Oupwe pöütala ämi pupungau meinisin oua föriir. Oupwe angei seniei eu leluk mi fö me eman ngün mi fö. Pwota oua mochen mäla, ämi chon Israel?
EZE 18:32 Pun üsap pwapwaiti än eman epwe mäla. Iei mine oupwe ekieksefäl, pwe oupwe manau,” iei alon Kot ewe Samol mi Lapalap.
EZE 19:1 Kot a üreniei, “Kopwe eäni ei kölün kechü fän iten ekewe samolun Israel. Kopwe apasa:
EZE 19:2 A ifan me öchün inemi? A usun chök eman liafefinin laion lein ekewe ätemwänin laion. A konola lein ekewe nienifön laion o oupwu nöün kewe.
EZE 19:3 Iwe, a foleni eman lein nöün kewe, tori a wattela o nönnö ngeni eman nienifön laion. A kaiö usun an epwe liapeni liapan o ochei aramas.
EZE 19:4 Iwe, lupwen ekewe mwü ünükün ra rongorong usun, ra atupwalong lon tuwer pwang. Ra riri ngeni selimächä o emwenala Isip.
EZE 19:5 Nge lupwen ewe liafefinin laion a küna pwe mine a apilüküni esap fis, pwal mine a witiwiti esap tori, a foleni pwal eman lein nöün kewe, tori a wattela o nönnö ngeni eman nienifön laion.
EZE 19:6 Iwe, lupwen a watte, a aniffetal lein ekewe laion, a kaiö usun an epwe liapeni liapan o ochei aramas.
EZE 19:7 A atai ekewe imwen maun mi pöchökül me ar kewe telinimw. Iwe, chon ewe fanü meinisin ra fokun niuokus ren osomongun an wörüwör.
EZE 19:8 Mürin, chon ekewe mwün ünükün ra feito seni ekis meinisin, pwe repwe maun ngeni. Ra aturala ar toloia won o atupwalong lon tuwer pwang.
EZE 19:9 Iwe, ra riri ngeni efoch selimächä o isenalong lon eu tittin man. Ra pwal uweela ren ewe kingen Papilon o aturalong lon imwen fötek, pwe esap chüen wor eman epwe rongorong wörüwörün me won ekewe chukun Israel.
EZE 19:10 Inom a usun chök efoch irän wain lon eu tanipin wain, a fot ünükün eu koluk, a pwal uaöch o palapal pokiten chomongun ewe koluk.
EZE 19:11 Iwe, palan kewe ra fokun pöchökül o fich ngeni wokun king. Ewe irän wain a märitä pwe a langatamatä tori ekewe kuchu. Aramas meinisin ra küna tekian me chomongun palan.
EZE 19:12 Nge eman a üttätä ewe irän wain fän an song o aturala won pwül. Iwe, asepwälin ötiu a eniti pwe a pwasala, uan ra mworomworotiu, nge palan kewe mi pöchökül ra pwasala o kekila ren ekkei.
EZE 19:13 Nge iei ewe irän wain a fotetiu lon fanüapö lon eu pwül mi pwas.
EZE 19:14 Iwe, ekkei a ngetewu me lon palan o kenala uan, pwe esap chüen wor efoch palan mi pöchökül a fich ngeni wokun king.” Iei echö kölün kechü aramas repwe eäni kölün kechü.
EZE 20:1 Iwe, lon afisuen ierin ach oola, lon aengolun ränin ewe alimuen maram, ekoch me lein ekewe souakomwen chon Israel ra feito o mot mwei, pwe repwe angei öüröürer me ren ewe Samol mi Lapalap.
EZE 20:2 Mürin, ewe Samol mi Lapalap a kapas ngeniei,
EZE 20:3 “Nöün aramas, kopwe kapas ngeni ekewe souakomwen chon Israel o üreniir pwe iei aloi ngang Kot ewe Samol mi Lapalap, ‘Ifa usun, oua feito rei pwe oupwe angei ämi öüröür seniei? Mwo manauei, üsap mwüt ngenikemi pwe oupwe aisiniei och. Ngang Kot ewe Samol mi Lapalap üa kapas.’
EZE 20:4 Nöün aramas, ifa usun, kopwe apwüngüür? Ifa usun, kopwe eäni apwüng ngeniir? Kopwe achema ngeniir än semelaper kewe föför mi anioput
EZE 20:5 o üreniir, ‘Iei alon Kot ewe Samol mi Lapalap: Lon ewe rän, lupwen üa fili Israel, üa pwon fän akapel ngeni ekewe mwirimwirin Jakop, üa pwal pwärätä ngeniir usi me lon ewe fanü Isip. Iwe, üa pwon fän akapel ngeniir o apasa: Ngang ewe Samol mi Lapalap ämi we Kot.
EZE 20:6 Lon ewe rän üa pwon fän akapel ngeniir, pwe üpwe emwenirewu seni ewe fanü Isip o emwenirelong lon eu fanü üa fili fän iter, eu fanü mi mürina seni meinisin, eu fanü mi pwülüöch o fanüeräs.
EZE 20:7 Iwe, üa üreniir, pwe ir meinisin repwe pöütala ekewe uluulun anümwäl mi anioput ra pwapwaiti, resap pwal alimengaueer ren ekewe uluulun anümwäl seni Isip. Ngang ewe Samol mi Lapalap ar we Kot.
EZE 20:8 Nge ir ra lükümach o ü ngeniei, resap mochen aüselingaei. Resap pöütala ekewe uluulun anümwäl mi anioput ra pwapwaiti, resap pwal likitala ekewe uluulun anümwäl seni Isip. Iei popun üa ekiekin awarato ai lingeringer wor o amüchü ai song ngeniir lon Isip.
EZE 20:9 Nge üsap föri, pun üa ekiekin tümwünü iteüöchi, pwe itei esap küna turunufas me lein chon ekewe mwü ia ra wasöla ie. Pun üa fen asile ngeni chon Israel me fän mesen ekewe mwü, pwe üpwe emwenirewu seni ewe fanü Isip.
EZE 20:10 Iwe, üa emwenirewu seni ewe fanü Isip o emwenirelong lon ewe fanüapö.
EZE 20:11 Üa ngeniir ai kewe allük o aiti ngeniir ai kewe pwüüng, pwe chokewe mi aleasochisiir repwe manau.
EZE 20:12 Üa pwal ngeniir ai kewe ränin sapat pwe eu asisil lefilei me ir, pwe repwe silei pwe ngang ewe Samol mi Lapalap üa apiniir.
EZE 20:13 Nge ekewe chon Israel ra lükümach o ü ngeniei lon ewe fanüapö. Ra fokun purätiu ai kewe allük o aleasolapa ai kewe pwüüng aramas ra wisen aleasochisiir, pwe repwe manau ren. Iwe, ra pwal fokun apiningaua pinin ai kewe ränin sapat. Iei popun üa ekiekin awarato ai lingeringer wor lon ewe fanüapö, pwe repwe rosola meinisin.
EZE 20:14 Nge üsap föri, pun üa ekiekin tümwünü iteüöchi, pwe itei esap küna turunufas me lein chon ekewe mwü mi küna usun ai emwenawu chon Israel seni Isip.
EZE 20:15 Nge lon ewe fanüapö üa pwon fän akapel ngeniir pwe üsap emwenirelong lon ewe fanü üa fen ngeniir, eu fanü mi mürina seni meinisin, eu fanü mi pwülüöch o fanüeräs,
EZE 20:16 pun ra purätiu ai kewe allük, ra aleasolapa ai kewe pwüüng o apiningaua pinin ai kewe ränin sapat. Iwe, ra chök fel ngeni ar kewe uluulun anümwäl seni lon letiper.
EZE 20:17 Nge üa fokun eäni tong ngeniir, pwe üsap afeiengaueer o aroserela meinisin me lon ewe fanüapö.
EZE 20:18 Iwe, üa apasa ngeni nöür kewe lon ewe fanüapö: Ousap aleasochisi ekewe allük ämi kewe lewo ra föri, ousap tümwünü örünier kewe, ousap pwal alimengauakemi ren ar kewe uluulun anümwäl.
EZE 20:19 Ngang ewe Samol mi Lapalap ämi we Kot. Oupwe aleasochisi ai kewe allük o apwönüetä ai kewe pwüüng,
EZE 20:20 oupwe pwal apiniöchü pinin ai kewe ränin sapat, pwe repwe eu asisil lefilach. Mürin, oupwe silei pwe ngang ewe Samol mi Lapalap ämi we Kot.
EZE 20:21 Nge nöür kewe ra pwal lükümach o ü ngeniei. Resap fokun alesochisi ai kewe allük, resap pwal apwönüetä ai kewe pwüüng aramas ra wisen aleasochisiir pwe repwe manau ren. Iwe, ra pwal apiningaua pinin ai kewe ränin sapat. Iei popun üa ekiekin awarato ai lingeringer wor o amüchü ai song ngeniir lon ewe fanüapö.
EZE 20:22 Nge üsap föri, pun üa ekiekin tümwünü iteüöchi, pwe itei esap küna turunufas me lein chon ekewe mwü mi küna usun ai emwenawu chon Israel seni Isip.
EZE 20:23 Iwe, lon ewe fanüapö üa pwal pwon fän akapel ngeniir, pwe üpwe atoropaseer lein chon ekewe mwü won fanüfan,
EZE 20:24 pun ra aleasolapa ai kewe allük o purätiu ai kewe pwüüng, ra pwal apiningaua pinin ai kewe ränin sapat o fel ngeni än ar kewe lewo uluulun anümwäl.
EZE 20:25 Iei mine üa asechirela pwe repwe apwönüetä allük mi lomotongau, repwe pwal tümwünü ekewe pwüüng resap manau ren.
EZE 20:26 Üa pwal asechirela, pwe repwe alimengaueer ren püsin ar asor, lupwen ra eäni asoren kek nöür mwänichi. Ren ei üa apwüngüür, pwe repwe silei pwe ngang ewe Samol mi Lapalap.’
EZE 20:27 Iei mine, nöün aramas, kopwe kapas ngeni chon Israel, ‘Iei alon Kot ewe Samol mi Lapalap: Mi pwal wor och mine semelapemi kewe ra turunufaseei ren, pwe ra likitieila.
EZE 20:28 Iwe, üa emwenirelong lon ewe fanü, üa pwon fän akapel ngeniir me mwan pwe üpwe ngeniir. Nge lupwen ra küna ekewe chukutekia, ra föri ar asor won, pwal fän ekewe irä mi mwuresires. Ikenan ra asongaei ren ar kewe asor ra keni, pwal ren ar ninala ar kewe lö mi pwokus me ar asoren ün.
EZE 20:29 Iwe, üa aisiniir: Met sokun lenien fel ei leni mi tekia oua feila ngeni? Iei mine a iteni Pama tori ikenai.’
EZE 20:30 Iwe, kopwe üreni ekewe chon Israel, ‘Iei alon Kot ewe Samol mi Lapalap: Pwota oua chök föri ekewe tipis semelapemi kewe ra föri o mocheisou ngeni ar kewe uluulun anümwäl mi anioput?
EZE 20:31 Lupwen oua uwato ämi kewe lifang o eäni asoren kek nöümi kana ngeni ekewe uluulun anümwäl, oua püsin alimengauakemi tori ikenai. Ifa usun, üpwe mwüt ngenikemi chon Israel, pwe oupwe angei ämi öüröür seniei? Mwo manauei, ngang Kot ewe Samol mi Lapalap üa apasa, üsap fokun mwüt ngenikemi pwe oupwe aisiniei.
EZE 20:32 Iwe, ämi oua ekieki lon letipemi, pwe oupwe apirü ekewe mwün lükün o wewe ngeni aramasen ekewe ekoch fanü ren ämi fel ngeni irä me fau. Nge ei sokun ekiek esap fokun fis.
EZE 20:33 Mwo manauei, ngang Kot ewe Samol mi Lapalap üa apasa: Üpwe nemenikemi ren pei mi pöchökül o manaman, üpwe pwal awarato ai lingeringer womi.
EZE 20:34 Üpwe emwenikemiiwu seni lon ekewe mwü ren pei mi pöchökül o manaman, üpwe achufengenikemi seni lon ekewe fanü ia oua toropasfeil ie o awarato ai lingeringer womi.
EZE 20:35 Üpwe emwenikemiilong lon fanüapön ekewe mwü. Ikenan üpwe eäni apwüng ngeni eman me eman leimi.
EZE 20:36 Usun üa apwüngü semelapemi kewe lon ewe fanüapön Sinai, iei usun üpwe pwal apwüngükemi,’” iei alon Kot ewe Samol mi Lapalap.
EZE 20:37 “Üpwe fokun tümwünükemi fän woki wokun chon fofol man o föri pwe oupwe aleasochisi ai we pwon ngenikemi.
EZE 20:38 Üpwe aimwü senikemi chokewe mi lükümach o ü ngeniei, pwal chokewe mi tipis ngeniei. Iwe, üpwe emwenirewu seni lon ekewe fanü ia ra nonom ie, nge resap tolong lon ewe fanü Israel. Mürin oupwe silei pwe ngang ewe Samol mi Lapalap.”
EZE 20:39 Iei usun Kot ewe Samol mi Lapalap a apasa, “Ämi chon Israel oupwe feila meinisin o angang ngeni ämi kewe uluulun anümwäl. Nge mürin eu fansoun oupwap fokun aüselingaei, nge ousap chüen apiningaua itei mi pin ren ämi asor me ämi kewe uluulun anümwäl.”
EZE 20:40 Iei alon Kot ewe Samol mi Lapalap, “Won chuki mi pin, ewe chukun Israel mi fokun tekia, chon Israel meinisin mi nom lon ewe fanü repwe angang ngeniei. Ikenan üpwe etiwakemi, üpwe angei senikemi ämi asor, ämi lifang mi fokun mürina, pwal meinisin mine oua apini fän itei.
EZE 20:41 Mürin ai emwenikemiiwu seni lon ekewe mwü o achufengenikemi seni ekewe fanü ia oua toropasfeil ie, üpwe etiwakemi usun ai etiwa eu asor mi pwokus. Iwe, üpwe pwärätä lefilemi me mwen chon ekewe mwü pwe üa pin.
EZE 20:42 Iwe, lupwen üpwe aliwinikemiila lon ewe fanü Israel, ewe fanü üa pwon fän akapel ngeni ämi kewe lewo pwe üpwe ngeniir, mürin oupwe silei pwe ngang ewe Samol mi Lapalap.
EZE 20:43 Ikenan oupwe chechemeni ämi kewe föför meinisin oua alimengauakemi ren. Oupwe püsin anioputakemi ren ekewe föföringau meinisin oua föriir.
EZE 20:44 Iwe, oupwe silei pwe ngang ewe Samol mi Lapalap, lupwen üpwe apwüngükemi sap won ükükün ämi kewe föföringau meinisin, pwe ren ai tümwünü iteüöchi me remi chon Israel,” iei alon Kot ewe Samol mi Lapalap.
EZE 20:45 Iwe, ewe Samol mi Lapalap a kapas ngeniei,
EZE 20:46 “Nöün aramas, kopwe newenewen ngeni ör o eäni kapasen üpälü ngeni. Kopwe osuni usun feiengauen wöllapen ewe fanü mi nom ör.
EZE 20:47 Kopwe üreni wöllapen ewe fanü mi nom ör, pwe epwe aüselinga aloi ngang Kot ewe Samol mi Lapalap: Nengeni, üpwe keni eu ekkei me lukalapom. Iwe, epwe kenala om kewe irä meinisin, ekewe irä manau pwal ekewe irä pwas. Ngetengetan esap kunula. Nge ekewe aramas meinisin seni ör tori efeng repwe mefi pwichikaren ewe ekkei.
EZE 20:48 Iwe, aramas meinisin repwe küna pwe ngang ewe Samol mi Lapalap üa keni, nge esap wor eman a tongeni kunuela.”
EZE 20:49 Nge üa apasa, “Ai Kot Samol mi Lapalap, kosap awisa ngeniei ei angang. Aramas ra fen apasa usi, pwe üa chök fos ngeniir lon pworausen awewe.”
EZE 21:1 Iwe, ewe Samol mi Lapalap a kapas ngeniei,
EZE 21:2 “Nöün aramas, kopwe newenewen ngeni Jerusalem o eäni kapasen apwüng ngeni ekewe leni mi pin, kopwe pwal osuni usun feiengauen ewe fanü Israel.
EZE 21:3 Kopwe üreni ewe fanü Israel, ‘Iei alon ewe Samol mi Lapalap: Nengeni, üpwe pälüenuk, üpwe üttawu nei ketilas seni lon tükütükün o niela me lomw ekewe chon pwüng me chon pwüngingau meinisin.
EZE 21:4 Iwe, nei ketilas epwe üttüwu seni lon tükütükün, pwe epwe niela aramas meinisin seni ör tori efeng, pun üpwe arosala me lomw ekewe chon pwüng me chon pwüngingau meinisin.
EZE 21:5 Iwe, aramas meinisin repwe silei pwe ngang ewe Samol mi Lapalap, üa üttawu nei ketilas seni lon tükütükün, nge üsap chüen aliwinsefälielong lon.’
EZE 21:6 Iei mine kopwe ngüngü, nöün aramas. Kopwe ngüngü fän om letipeta ren weiresin letipom me fän meser meinisin.
EZE 21:7 Iwe, lupwen repwe aisinuk, ‘Pwota ka ngüngü?’ kopwe pälüeniir, ‘Pokiten a wor pworaus amairü. Iwe, are epwe fis, leluken aramas meinisin epwe uren niuokus, pöür repwe chök ititiu, pworan letiper epwe kisikisitiu, nge lepwäsukur meinisin repwe chechech.’ Nengeni, a war, epwe fokun pwönüetä,” iei alon Kot ewe Samol mi Lapalap.
EZE 21:8 Iwe, ewe Samol mi Lapalap a pwal kapas ngeniei,
EZE 21:9 “Nöün aramas, kopwe osuni o apasa, pwe iei aloi ngang ewe Samol mi Lapalap: Efoch ketilas, efoch ketilas a seisei o misimis,
EZE 21:10 a seisei pwe epwe niela aramas, a pwal misimis o molupolup usun chök fifi. Ifa usun, sipwe pwapwa ren? Ämi nei aramsen Juta, oua turunufasei ai apwüngükemi me ai öüröür ngenikemi.
EZE 21:11 Iei mine ewe ketilas a ken o molotä. Iei a seim o ken, pwe epwe nom lepöün ewe chon ninni.
EZE 21:12 Kopwe kechü o ngüngüres, nöün aramas, pun ewe ketilas epwe fiu ngeni nei aramas, epwe pwal fiu ngeni ekewe samolun Israel meinisin. Iwe, irfengen me nei aramas repwe mäla ren. Iei mine kopwe üwepworotiu fän om letipeta.
EZE 21:13 Üa sotuni nei aramas. Nge are resap mochen ekieksefäl, ekei mettoch meinisin repwe fis ngeniir,” iei alon Kot ewe Samol mi Lapalap.
EZE 21:14 “Iei mine, nöün aramas, kopwe osuni. Kopwe alopolop. Ewe ketilas epwe äkätteri ekewe aramas. Iei ewe ketilas mi amol ngeni ninni watte, ewe ketilas mi nom pwelin ünüküür.
EZE 21:15 Iwe, leluken aramas epwe tur, nge chomong repwe mäla ren ewe ketilas. Üpwe eniwokusuur ren lon asamalapen telinimwer meinisin. Ewer, a molupolup usun chök fifi, a pwal ken pwe epwe ninni.
EZE 21:16 En ketilas, kopwe ätter pelifich me pelimöng, pwal ekis meinisin ia ka kunula ie.
EZE 21:17 Pwal ngang üpwe alopolop o awesi ai lingeringer. Ngang ewe Samol mi Lapalap üa kapas.”
EZE 21:18 Iwe, ewe Samol mi Lapalap a pwal kapas ngeniei,
EZE 21:19 “Nöün aramas, kopwe liosu ruofoch al fän iten ewe ketilas nöün ewe kingen Papilon. Ir me ruofoch repwe pop seni eu chök fanü. Kopwe aüetä efoch asisil lepopun ewe al a ale ngeni eu telinimw.
EZE 21:20 Iwe, kopwe liosu efoch ekewe al pwe ewe ketilas epwe tongeni tori Rapa ewe telinimwen chon Amon. Kopwe pwal liosu efoch, pwe epwe tongeni tori Jerusalem lon ewe fanü Juta, ewe telinimw mi pöchökül tittin.
EZE 21:21 Pun ewe kingen Papilon a üla lekeangen ekewe ruofoch al pwe epwe pwee. Iwe, a wichiki ewe lenien föün likapich, a aisini an kewe uluulun anümwäl o nengeni ammünün an mönün asor.
EZE 21:22 Nge pwüngün ewe pwee mi nom pöüifichin a fän iten Jerusalem. Ikenan epwe eäni kökkön maun fän leüömong, epwe anomu an mwesinnen kata mi weneiti ekewe asamalap, epwe pwal senätä oror o aüetä imwen maun.
EZE 21:23 Iwe, ekewe aramas mi pwon fän akapel ngeni ewe king pwe repwe allükülük, repwe chök ekieki pwe ei pwee a mwäl. Nge i epwe achema ngeniir ar tipis o uweerela pwe repwe oola.
EZE 21:24 Iei mine ngang Kot ewe Samol mi Lapalap üa apasa: Oua föri pwe ämi tipis epwe cheme ngeniei, pun ämi pupungau a pwäpwäla, ämi tipis a pwal pwäla lon ämi föför meinisin. Pokiten oua föri ei, oupwe oola ren ewe king.
EZE 21:25 Nge en samolun Israel mi fokun föföringau, epwe war ränum, ewe ränin om kopwe küna apwüngün lesopolan.
EZE 21:26 Iei aloi ngang Kot ewe Samol mi Lapalap: Repwe angei senuk filifilin mökürom, pwal ewe mwärin king. Mettoch meinisin repwe siwil. Chokewe mi tekison repwe tekia, nge chokewe mi tekia repwe tekison.
EZE 21:27 Üpwe atai, üpwe atai, üpwe atai ewe telinimw. Esap chüen kaüsefäl tori epwe war ätewe mine wesewesen an. Iwe, ngang üpwe awisa ngeni meinisin.”
EZE 21:28 “Iwe, en nöün aramas, kopwe osuni o apasa pwe iei aloi ngang Kot ewe Samol mi Lapalap usun ekewe chon Amon me ar kapasen turunufasei chon Israel: Efoch ketilas, efoch ketilas a molotä pwe epwe ninni, a mis pwe epwe molupolup usun fifi o niela aramas.
EZE 21:29 Nöümi soufos ra küna mine a mwakel, nge nöümi soupwe ra chofana ngenikemi. Ewe ketilas epwe pökü üen ekewe chon föföringau, a tori ränir, ewe ränin apwüngün lesopolan.
EZE 21:30 Oupwe aliwinalong nöümi ketilas lon tükütükün. Üpwe apwüngükemi lon poputän fanüemi, lon ewe leni ia oua uputiu ie.
EZE 21:31 Üpwe awarato ai song womi, üpwe wusi ngenikemi choun ai lingeringer o asechikemiilong lepöün aramas mi mwänewüs o silelap le kata.
EZE 21:32 Iwe, oupwe karala ren ekkei. Chami epwe suputiu won fanüemi, nge esap wor eman epwe chüen chechemenikemi, pun ngang ewe Samol mi Lapalap üa kapas.”
EZE 22:1 Iwe, ewe Samol mi Lapalap a pwal kapas ngeniei,
EZE 22:2 “Nöün aramas, ifa usun, kopwe apwüngü ewe telinimw chon ra nimanauei aramas? Ifa usun, kopwe eäni apwüng won? Mürin, kopwe pwäri ngeni an kewe föför mi anioput meinisin.
EZE 22:3 Kopwe apasa pwe iei aloi ngang Kot ewe Samol mi Lapalap: En telinimw mi fis angangen nimanau lomw, ka pwal püsin alimengauok ren om fel ngeni uluulun anümwäl, fansoun om feiengau a war.
EZE 22:4 Ka tipis ren om nimanauei aramas, ka pwal alimengauok ren ekewe uluulun anümwäl ka föri. Iwe, ka amüttiri ränum, ka pwal tori ewe fansoun sopolom. Iei mine üa mwüt ngeni chon ekewe mwü me fanü pwe repwe aitengauok o aturunufaseek.
EZE 22:5 Chokewe mi kan ngonuk, pwal chokewe mi toau senuk repwe turunufaseek, en telinimw mi itengau o uren fitikoko.
EZE 22:6 Nengeni, ekewe samolun Israel meinisin mi nom lon ei telinimw ra chök ekiekin aea ar nemenem pwe repwe nimanauei aramas.
EZE 22:7 Iwe, ämi chon ei telinimw ousap meniniti sememi me inemi, oua kirikiringau ngeni ekewe chon ekis o ariaföüü chon mäsen me fefin mi mä pwülüer.
EZE 22:8 Iwe, oua aücheangaua ai kewe mettoch mi pin o apiningaua pinin ai kewe ränin sapat.
EZE 22:9 Iwe, a wor ekoch aramas me lon ei telinimw mi chofonätä usun ekoch pwe repwe ninnila, a pwal wor chon mongö föten anü me won ekewe chukutekia, a pwal fis angangen mocheisou lon.
EZE 22:10 Ekoch ra kon ren pwülüen semer, ra pwal achomanauei fefin mi samaun maram.
EZE 22:11 Ekoch ra lisowu ngeni pwülüen chon arur, ekoch ra föföringau ngeni pwülüen nöür mwän, pwal ekoch ra föföringau ngeni fefiner.
EZE 22:12 Oua pwal angei lifangen amichimich pwe oupwe nimanauei aramas. Iwe, oua awattela winnen nöümi moni ika angei manauan seni chon arumi fän pöchökül, nge oua manlükieila,” iei alon Kot ewe Samol mi Lapalap.
EZE 22:13 “Iei mine üpwe aü pei ngenikemi fän song, pokiten oua angei winnen nöümi moni fän pwüngingau o eäni angangen nimanau lefilemi.
EZE 22:14 Ifa usun, epwe chüen wor ämi tipepwora, ika pöümi repwe chüen tongeni pöchökül, lupwen fansoun ai üpwe apwüngükemi? Ngang ewe Samol mi Lapalap üa kapas, üpwe pwal apwönüetä.
EZE 22:15 Iwe, üpwe atoropasafeilikemi lein chon ekewe mwü me fanü, üpwe pwal awesi senikemi ämi limengauen tipis.
EZE 22:16 Iwe, lupwen oupwe küna itengau me ren chon ekewe mwü, mürin oupwe silei pwe ngang ewe Samol mi Lapalap.”
EZE 22:17 Iwe, ewe Samol mi Lapalap a kapas ngeniei,
EZE 22:18 “Nöün aramas, ekewe chon Israel ra usun ngününgauen mächä mi ketel me rei. Ir meinisin ra usun chök sokun mächä, piras me pilom mi ketel lon lenien ketel, pwal usun chök ngününgauen silifer.
EZE 22:19 Iei mine ngang Kot ewe Samol mi Lapalap üa apasa: Pokiten ämi meinisin oua usun chök ngününgauen mächä, üpwe achufengenikemi lon Jerusalem.
EZE 22:20 Usun aramas ra achufengeni sokun mächä, silifer, piras me pilom lon eu lenien ketel o soni ekkei fan, pwe repwe tel, ina usun üpwe achufengenikemi fän ai song me ai lingeringer, pwe üpwe etelikemi me lon.
EZE 22:21 Ewer, üpwe achufengenikemi lon Jerusalem o kenikemi fän choun ai lingeringer, pwe oupwe telila lon.
EZE 22:22 Usun silifer a tel me lon lenien ketel, iei usun ämi oupwe tel me lon Jerusalem. Ren ei oupwe mefi pwe ngang ewe Samol mi Lapalap üa awarato ai lingeringer womi.”
EZE 22:23 Iwe, ewe Samol mi Lapalap a kapassefäl ngeniei,
EZE 22:24 “Nöün aramas, kopwe üreni ekewe aramasen Israel, pwe fanüer esap limöch, iei mine esap püngütiu üt won lon ewe ränin ai lingeringer.
EZE 22:25 Ekewe samol mi nom lon ra föri ar rawangau. Usun eman laion mi wörüwör a ochei liapan, ina usun ra ochei aramas. Ra angei wöür me pisekir mi aüchea fän pöchökül, ra pwal achomonga ekewe fefin mi mä pwülüer me lon.
EZE 22:26 Iwe, ekewe souasor ra purätiu ai kewe allük o turunufasei piseki mi pin. Resap alefila lefilen mine a pin me mine esap pin, resap pwal afata lefilen mettoch mi limengau me mettoch mi limöch. Iwe, ra apiningaua pinin ai kewe ränin sapat pwe üa itengau leir.
EZE 22:27 Ekewe nöüwis mi nom lon ra usun chök wolif mi ochei liaper. Iwe, ra nimanauei aramas, pwe repwe pisekisekila ren.
EZE 22:28 Iwe, ekewe soufos ra aitöchü föförür, usun sa apwecha och mettoch mi limengau. A wor künaer mi mwakel, ra pwal osuni mine a chofana fän iter. Iwe, ra apasa, ‘Iei alon Kot ewe Samol mi Lapalap,’ nge ngang ewe Samol mi Lapalap üsap fos ngeniir.
EZE 22:29 Iwe, aramasen ewe fanü ra föri föförün mwänewüs o solä, ra ariaföüü chon wöüngau me chon mwelele, ra pwal aweiresi chon ekis fän pwüngingau.
EZE 22:30 Iwe, üa kütta ika epwe wor eman aramas leir mi tongeni senätä ewe tit o ütä ngeni pwangan me fän mesei fän iten ewe fanü, pwe üsap ataela. Nge üsap fokun küna eman.
EZE 22:31 Iei mine üa awarato ai song wor, üa aroserela ren choun ai lingeringer o liwini ngeniir liwinin ar föför,” iei alon Kot ewe Samol mi Lapalap.
EZE 23:1 Iwe, ewe Samol mi Lapalap a kapas ngeniei,
EZE 23:2 “Nöün aramas, mi wor ruoman fefin nöün eman chök in.
EZE 23:3 Ra amömö inisir fän iten lisowu lon Isip, lupwen ra chüen föpwül. Ikenan mwän ra atapa oupwur o urumwotiti.
EZE 23:4 Iten ewe mi watte Ohola, nge iten pwin we Oholipa. Iwe, üa pwülüeniir, nge ra nöünöü mwän me fefin. Ohola wewen Samaria, Oholipa wewen Jerusalem.
EZE 23:5 Lupwen üa mwo pwülüeni Ohola, a chök amömö inisin fän iten lisowu ngeni nöün kewe kamwet ekewe chon Asiria,
EZE 23:6 ngeni ekewe sounfiu mi üföüf üf mi arauarau, pwal ngeni ekewe kepina me ekewe meilapen sounfiu. Ir meinisin ra alüalöch, ra pwal wawa oris.
EZE 23:7 Iwe, a amömö inisin fän iten lisowu ngeni ekewe re Asiria meinisin mi fokun äteöch. A püsin alimengaua ren ekewe uluulun anümwäl än chokewe a nöüniir kamwet.
EZE 23:8 Esap likitala an amömö inisin fän iten lisowu, a fen föri lon Isip, lupwen mwän ra kon ren lon fansoun an föpwül, lupwen ra urumwotiti oupwun o awesi ar mocheisou ngeni.
EZE 23:9 Iei mine üa asechala ngeni nöün kewe kamwet, ir ekewe chon Asiria neminewe a mocheisou ngeniir.
EZE 23:10 Iwe, ir ra aselelai, ra turufi nöün kewe mwän me fefin, mürin ra niela ren ketilas. Iwe, fefin ra leaweni lon ar fos, lupwen a küna apwüng.
EZE 23:11 Iwe, Oholipa pwin we a küna ei, nge a fen alapala an mocheisou me an amömö inisin fän iten lisowu, lap seni pwin we.
EZE 23:12 A mocheisou ngeni chon Asiria, ekewe kepina me ekewe meilapen sounfiu, ekewe sounfiu mi üföüf üf mi mürina, pwal ekewe chon wawa oris, ir meinisin mi alüalöch.
EZE 23:13 Iwe, üa küna pwe a püsin alimengaua. Ra chök föföringaupök ir me ruoman.
EZE 23:14 Nge Oholipa a chök alapala an amömö inisin fän iten lisowu. Iwe, a küna liosun mwän won ekewe tit mi mak ngeni mi par, liosun chon Papilon
EZE 23:15 ra riri ngeni lukalaper pelit, ra pwal filiti ngeni mökürer mangaku mi sokopat anüan. Ir meinisin ra usun chök samolun sounfiun Papilon, ra pop seni ewe fanü Papilon.
EZE 23:16 Iwe, lupwen a küneer, a mocheisou ngeniir o tinala chon künö rer Papilon.
EZE 23:17 Mürin, ekewe chon Papilon ra tolong ren pwe repwe lisowu ngeni, ra pwal mocheisou ngeni o alimengaua. Nge wesin ar alimengaua, neminei a kul seniir o oputeer.
EZE 23:18 Iwe, lupwen a sopwela an amömö inisin fän iten lisowu fän mesen aramas o pwärala an selela ngeniir, üa kul seni o oputa, usun üa fen kul seni pwin we.
EZE 23:19 Nge a chök alapala an amömö inisin fän iten lisowu, pun a chechemeni fansoun an föpwül, lupwen a amömö inisin lon ewe fanü Isip.
EZE 23:20 Iwe, a mocheisou ngeni mwän mi usun chök kolak, ir mi fokun mocheisou usun chök aas me oris.”
EZE 23:21 Ewer, Oholipa, ka positi om angangen lisowu ka föri lupwen om föpwül, lupwen chon Isip ra atapa oupwum o urumwotiti.
EZE 23:22 Iei mine ngang ewe Samol mi Lapalap üa apasa ngonuk, Oholipa, “Ka kul seni noum kewe kamwet o oputeer, nge üpwe asongeer pwe repwe song ngonuk, üpwe pwal emwenireto seni ekis meinisin pwe repwe maun ngonuk.
EZE 23:23 Üpwe emwenato ekewe chon Papilon me chon Kaltea meinisin, ekewe chon Pekot, chon Soa me Koa, pwal ekewe chon Asiria meinisin mi alüalöch, ekewe kepina me ekewe meilapen sounfiu meinisin, pwal ekewe aramas tekia me sounfiu mi wawa oris.
EZE 23:24 Ir meinisin repwe feito seni efeng fän oris me woken, pwal fän eu mwichemongun aramas. Repwe pwelifeiliik fän ar tittin maun mi watte me kükün, pwal fän imwer akkaw. Iwe, üpwe asechukolong lepöür pwe repwe apwünguk. Repwe eäni kapwüng womw won ükükün mine ra mochen apwünguk ren.
EZE 23:25 Iwe, ngang üpwe song ngonuk, nge ir repwe amüchü ar lingeringerituk. Repwe pökü pwötum me selingom, nge chokewe mi chüen manau repwe mäla ren ketilas. Repwe angei senuk noum kewe mwän me fefin, nge chokewe mi chüen manau repwe karala ren ekkei.
EZE 23:26 Iwe, ekewe chon oputok repwe kamwei senuk üfom o angei senuk foutom mi ling.
EZE 23:27 Iei usun üpwe aükätiu om mocheisou me om angangen lisowu, ka popuetä le föri me lon Isip. Kosap chüen nenengeni ekewe uluulun anümwäl ika chechemeni Isip.
EZE 23:28 Pun iei aloi ngang Kot ewe Samol mi Lapalap: Üpwe atolongok lepöün chokewe ka kul seniir o oputeer.
EZE 23:29 Iwe, repwe afeiengauok pokiten ar oputok, repwe pwal angei senuk mine ka eäni o likitukela lon om selela. Iwe, äsäwin om amömö inisum fän iten lisowu epwe pwäpwäla. Om mocheisou me om amömö inisum fän iten lisowu
EZE 23:30 ra atoto womw ei feiengau. Ka amömö inisum fän iten lisowu ngeni ekewe mwü, ka pwal püsin alimengauok ren ar kewe uluulun anümwäl.
EZE 23:31 Ka apirü än pwiüm föföringau, iei mine üpwe ngonuk än pwiüm we kapen feiengau.
EZE 23:32 Iei aloi ngang Kot ewe Samol mi Lapalap: Kopwe ün seni än pwiüm we kap mi watte o alolol. Iwe, lupwen ka ün seni, aramas repwe takiriik o turunufaseek, pun feiengauom a fokun watte.
EZE 23:33 Kopwe fokun pulas o riaföü ren. Iei ewe kap än pwiüm we Samaria, eu kapen mösök me tatakis.
EZE 23:34 Kopwe ün seni o apöla, mürin kopwe amökkükisi o ekinasa oupwum ren mökkün, pun ngang Kot ewe Samol mi Lapalap üa kapas.
EZE 23:35 Iei mine ngang Kot ewe Samol mi Lapalap üa apasa: Pokiten ka manlükieila o pöütieila lükün sökürum, iei mine kopwe angei liwinin om mocheisou me om amömö inisum fän iten lisowu.”
EZE 23:36 Iwe, ewe Samol mi Lapalap a üreniei, “Nöün aramas, ifa usun, kopwe eäni apwüng ngeni Ohola me Oholipa? Iwe, kopwe pwäri ngeniir ar kewe föför mi anioput.
EZE 23:37 Ra föri angangen lisowu o nimanauei aramas. Ra föri angangen lisowu ren ar kewe uluulun anümwäl, ra pwal eäni asoren kek ngeniir nöür kewe, ra nöüniir fän itei.
EZE 23:38 Pwal iei och mine ra föri ngeniei: Ra alimengaua imwei mi pin o apiningaua pinin ai kewe ränin sapat.
EZE 23:39 Pun lon ewe chök ränin, lupwen ra niela nei kana o eäniir asoren kek ngeni ar kewe uluulun anümwäl, ra pwal tolong lon imwei mi pin o apiningaua. Ewer, iei usun mine ra föri lon imwei.
EZE 23:40 Ra pwal mwo nge tinala chon künö pwe repwe körato mwän seni toau. Iwe, lupwen ra feito, ekewe ruoman pwipwi ra tütü o teikei won meser, ra pwal foutei ngeniir chomong fout.
EZE 23:41 Ra mot won eu peet mi fokun ling, ra pwal iseni eu chepel mwer o uwätä won ai apach mi pwokus me ai lö.
EZE 23:42 A wor akürangen eu mwichen pwapwa, nge chon pulas seni fanüpö ra mwicheto ren. Ra isetä lälä won pöün ekewe ruoman fefin, ra pwal ämwärämwäreer ngeni mwärämwär mi ling.
EZE 23:43 Mürin üa apasa usun neminewe mi apwangapwang ren an lisowu, ‘Repwe chök pwal lisowu ngeni, usun ra föri ngeni eman fefin mi amömö inisin fän iten lisowu, pun ina usun lapalapan.’
EZE 23:44 Iwe, ekei mwän ra chök tolong ren usun ar tolong ren eman fefin mi amömö inisin fän iten lisowu. Iei usun ra tolong ren Ohola me Oholipa, ekewe fefin mi mocheisou.
EZE 23:45 Nge mwän mi pwüng repwe eäni apwüng wor. Repwe apwüngüür usun ar apwüngü fin lisowu me fefin mi nimanauei aramas, pun ir wesewesen fin lisowu, nge pöür ra limengau ren ar nimanau.”
EZE 23:46 Iei usun Kot ewe Samol mi Lapalap a apasa, “Üpwe amwichafengeni chomong aramas pwe repwe ü ngeniir, üpwe pwal awarato niuokus watte wor o amweleleer.
EZE 23:47 Iwe, ekewe aramas repwe monei ngeniir fau o atatakisiir ren nöür ketilas. Repwe niela nöür kewe mwän me fefin o kenala imwer.
EZE 23:48 Iei usun üpwe awesi mocheisou lon ewe fanü, pwe fefin meinisin repwe miritila, nge resap apirü ar mocheisou.
EZE 23:49 Iwe, ämi ruoman pwipwi oupwe angei liwinin ämi mocheisou me liwinin tipisin ämi angang ngeni uluulun anümwäl. Mürin oupwe silei pwe ngang Kot ewe Samol mi Lapalap.”
EZE 24:1 Lon atiuen ierin ach oola, lon engolun ränin ewe engolun maram, ewe Samol mi Lapalap a kapas ngeniei,
EZE 24:2 “Nöün aramas, kopwe makei ei rän, pun ikenai ewe kingen Papilon a tori Jerusalem, pwe epwe maun ngeni.
EZE 24:3 Iwe, kopwe asile ngeni ekewe chon lükümach o ü ngeniei eu kapas awewe. Kopwe üreniir, ‘Iei alon Kot ewe Samol mi Lapalap: Kopwe isetä ewe kama won ekkei, kopwe fokun isetä o alölöü ngeni koluk.
EZE 24:4 Kopwe uwalong lon ekewe kinikinin fituk meinisin mi mürina, fituken won peche me fituken won pau, kopwe pwal amasoua ren chü mi fokun mürina.
EZE 24:5 Kopwe angei fituken ekewe man mi mürina, kopwe aloppa sättin mwüch fän ewe kama o kuku ewe fituk me ekewe chü.”
EZE 24:6 Iwe, iei alon Kot ewe Samol mi Lapalap, “Feiengauen ewe telinimw, chon ra nimanauei aramas. Ewe telinimw a wewe ngeni eu kama mi parang lon, nge parangan esap chü. Kopwe angei seni me lon eu me eu kewe kinikinin fituk, nge kosap lifilifil.
EZE 24:7 Pun a fis nimanau lon ewe telinimw. Nge chon ewe telinimw resap ninätiu ewe cha won pwül pwe epwe irela, nge ra ninätiu won achau.
EZE 24:8 Üa likitala ewe cha won achau, ewe ia esap tongeni irela me ie. Ei üa föri pwe üpwe aüfarafarätä ai lingeringer o ngeniir chappen ar föför.”
EZE 24:9 Iei mine Kot ewe Samol mi Lapalap a apasa, “Feiengauen ewe telinimw, chon ra nimanauei aramas. Ngang üpwe püsin aloppa ewe mwüchen ekkei pwe epwe tekiatä.
EZE 24:10 Kopwe achukuchukätä mwüch fan, kopwe keni o kukuöchü ewe fituk tori setin epwe morola, nge chün repwe karala.
EZE 24:11 Iei kopwe isetä ewe kama mi pön won ekkei pwe epwe sarara. Mürin, limengauen lon me parangan repwe morola.
EZE 24:12 Nge a solap ai angang weires ngeni, pun ewe parang mi malül esap chü ren ewe ekkei.
EZE 24:13 Jerusalem, om mocheisou iei om limengau. Iwe, üa sotuni ai üpwe limetuk, nge kosap limöchüla. Iei mine kosap fokun limöch, tori üpwe amüchü ai lingeringerituk.
EZE 24:14 Ngang ewe Samol mi Lapalap üa kapas. A war ewe fansoun fän itei pwe üpwe apwönüetä mine üa apasa. Üsap piit, üsap pwal eäni tong ika lamalamala. Üpwe apwünguk won om kewe föför meinisin,” Iei alon Kot ewe Samol mi Lapalap.
EZE 24:15 Iwe, ewe Samol mi Lapalap a kapas ngeniei,
EZE 24:16 “Nöün aramas, nengeni, iei chök üpwe angei senuk ewe aramas ka fokun echeni. Nge en, kopwe tümwünü pwe kosap ngüngüres, kosap pwal kechü pwe chönün mesom esap suputiu.
EZE 24:17 Kopwe ngüngü, nge kosap leüömong. Kosap pwärätä om letipeta ren ewe mi mäla. Kopwe filiti mökürom, kopwe pwal ipweip sus, nge kosap pwölüela alüsom, kosap pwal mongö seni mine aramas ra uwato reöm.”
EZE 24:18 Iwe, lesosor üa kapas ngeni ekewe chon Israel, nge lekuniol pwülüei a mäla. Lesosorun ewe rän mürin üa föri mine Kot a allük ngeniei.
EZE 24:19 Iwe, ekewe aramas ra aisiniei, “Pwota ka föri ei sokun föför?”
EZE 24:20 Iwe, üa pälüeniir, “Ewe Samol mi Lapalap a kapas ngeniei,
EZE 24:21 pwe üpwe üreni ämi chon Israel, ‘Iei alon Kot ewe Samol mi Lapalap: Üpwe apiningaua pinin ai we leni mi pin oua aücheani o sikesik won, mesemi ra pwapwaiti, letipemi ra pwal ekimongei. Nöümi mwän me fefin, oua likitiir lon ewe fanü Israel, repwe mäla lon maun.
EZE 24:22 Mürin oupwe föri usun mine Isikiel a föri. Ousap pwölüela alüsemi, ousap pwal mongö mine aramas repwe uwato remi.
EZE 24:23 Oupwe filiti möküremi, oupwe pwal ipweip sus. Ousap ngüngüres ika kechü, nge oupwe apwangapwangala pokiten ämi tipis, oupwe pwal ngüngü lefilemi.
EZE 24:24 Iei usun Isikiel epwe eu asisil ngenikemi. Iwe, ämi oupwe föri meinisin mine i a fen föri. Nge lupwen epwe fis ekei mettoch, oupwe silei pwe ngang Kot ewe Samol mi Lapalap.’” Iwe, ewe Samol mi Lapalap a üreniei,
EZE 24:25 “Iei usun mine epwe fis ngonuk, nöün aramas. Lon ewe rän, lupwen üpwe angei seniir ar imwenfel mi pöchökül ra aücheani o sikesik won, meser ra pwapwaiti, letiper a pwal ekimongei, lupwen üpwe pwal angei seniir nöür mwän me fefin,
EZE 24:26 lon ewe chök rän eman chon sü seni ewe feiengau epwe feito o uwato reöm ei pworaus.
EZE 24:27 Lon ewe chök rän kopwe silesefäl kapas, pwe kopwe tongeni kapas ngeni ewe chon sü. Ren ei kopwe eu asisil ngeni ekewe aramas, pwe repwe silei pwe ngang ewe Samol mi Lapalap.”
EZE 25:1 Iwe, ewe Samol mi Lapalap a kapas ngeniei,
EZE 25:2 “Nöün aramas, kopwe newenewen ngeni chon Amon o osuni usun feiengaueer.
EZE 25:3 Kopwe üreni ekewe chon Amon, pwe repwe aüselinga mine ngang Kot ewe Samol mi Lapalap üa apasa: Oua takirin ämängau usun imwei mi pin, lupwen aramas ra apiningaua pinin, oua takiri ewe fanü Israel, lupwen a tatakis, pwal ekewe chon Juta, lupwen ra oola.
EZE 25:4 Iei mine üpwe asechikemiilong lepöün ekewe aramasen ötiu pwe repwe nemenikemi. Repwe aüetä imwer imw mangaku o imweimw leimi. Iwe, repwe ochei uän ämi kewe irä o ünümi ünümemi milik.
EZE 25:5 Iwe, üpwe awili Rapa samolun telinimwen chon Amon ngeni lenien fol kamel, nge fanüer üpwe awili ngeni lenien pwiin sip. Mürin oupwe silei pwe ngang ewe Samol mi Lapalap.
EZE 25:6 Pun iei aloi ngang Kot ewe Samol mi Lapalap: Oua alopolop o pupures fän pwapwa, oua pwal takirin ämängau seni letipemi usun feiengauen Israel.
EZE 25:7 Iei mine üa ü ngenikemi o asechikemiilong lepöün chon ekewe mwü pwe repwe liapenikemi. Üpwe ärikemiila me lein ekewe mwü o arosakemiila lon ekewe fanü. Iwe, üpwe afeiengauakemi, pwe oupwe silei pwe ngang ewe Samol mi Lapalap.”
EZE 25:8 Iei alon Kot ewe Samol mi Lapalap, “Ekewe chon Moap ra apasa, ‘Nengeni, ekewe chon Juta ra feiengau usun chök chon ekewe fanü meinisin.’
EZE 25:9 Iei mine üpwe asöönü ewe fanü Moap, pwe epwe tala an kewe telinimw mi nom lekiännin meinisin mi epeti sounfiu ar repwe tolong, pwal ekewe telinimw mi ling lon iter Petesimot, Paalmeon me Kiriataim.
EZE 25:10 Iwe, üpwe ngeni ekewe aramasen ötiu fanüen chon Moap me chon Amon pwe repwe nemeniir, pwe esap wor eman epwe chüen chechemeni ekewe chon Amon me lein ekewe mwü.
EZE 25:11 Iwe, üpwe apwüngü Moap. Mürin repwe silei pwe ngang ewe Samol mi Lapalap.”
EZE 25:12 Iei alon Kot ewe Samol mi Lapalap, “Ekewe chon Etom ra fokun apwüngüchouwu chon Juta. Ei sokun föför ra fokun tipis ren.
EZE 25:13 Iei mine ngang Kot ewe Samol mi Lapalap üa apasa: Üpwe ü ngeni Etom o arosala aramasan me mönün lon. Üpwe pwal awili ewe fanü ngeni fanüapö. Iwe, ekewe chon Etom repwe mäla lon maun seni Teman tori Tetan.
EZE 25:14 Nei kewe aramasen Israel repwe ngeni chon Etom chappen ar föför fän itei. Ir repwe eäni ai song me lingeringer ngeni chon Etom. Ren ei repwe silei pwe ngang üa ngeniir chappen ar föför,” iei alon Kot ewe Samol mi Lapalap.
EZE 25:15 Iei alon Kot ewe Samol mi Lapalap, “Ekewe chon Filistia ra fokun apwüngüchouwu chon Juta fän kirikiringauen letiper o kütta usun ar repwe ataela Juta, pokiten ra oputeer seni me lomlom.
EZE 25:16 Iei mine ngang Kot ewe Samol mi Lapalap üa apasa: Üpwe ü ngeni ekewe chon Filistia. Üpwe ärala ekewe chon Keret o niela chokewe mi chüen manau me lon ekewe fanüen aroset.
EZE 25:17 Üpwe awattela ai üpwe ngeni chon Filistia chappen ar föför o apwüngüür fän ai lingeringer. Lupwen üpwe föri ei, repwe silei pwe ngang ewe Samol mi Lapalap.”
EZE 26:1 Lon engol me euin ierin ach oola lon aeuin ränin ewe maram, ewe Samol mi Lapalap a kapas ngeniei,
EZE 26:2 “Nöün aramas, chon Tirus ra apasa usun Jerusalem, ‘Ää, a tala Jerusalem. An nemeni angangen sopai ngeni chon ekewe mwü a wes. Iei aipwe wöümongola, pun i a tala.’
EZE 26:3 Iei mine ngang Kot ewe Samol mi Lapalap üa apasa: Üpwe pälüenuk, Tirus. Üpwe emwenato chomong mwü pwe repwe maun ngonuk, repwe feito usun nonoon lematau mi watte.
EZE 26:4 Repwe atai titum o atomwala imwom kewe imw tekia. Mürin üpwe kümetala pwülün womw, pwe kopwe usun chök eu achau mi lingetä.
EZE 26:5 Iwe, Tirus epwe wiliti eu lenien apwas epilo, pun ngang Kot ewe Samol mi Lapalap üa kapas. Ekewe mwün fanüfan repwe fokun liapenala mettochun lon.
EZE 26:6 Nge chon telinimwan kewe mi nom fän nemenian won ewe fanü watte repwe mäla ren ketilas. Mürin repwe silei pwe ngang ewe Samol mi Lapalap.”
EZE 26:7 Pun iei usun Kot ewe Samol mi Lapalap a apasa, “Üpwe emwenato Nepukatnesar ewe kingen Papilon, ewe king mi lap seni king meinisin. Epwe feito seni efeng o maun ngeni Tirus fän oris me woken, fän sounfiu mi wawa oris, pwal fän eu mwichemongun sounfiu.
EZE 26:8 Iwe, Nepukatnesar epwe niela chon telinimwom kewe mi nom won ewe fanü watte ren ketilas. Nöün kewe sounfiu repwe aüetä eu tittin maun, repwe senätä eu oror o amolätä ar pisekin epet.
EZE 26:9 Repwe achüngü om kewe tit ren ar kewe mwesinnen kata o aturätiu om kewe imw tekia ren ar kewe pisekin maun.
EZE 26:10 Süsün pwül mi feitä, lupwen ekewe mwicheichen nöür oris ra sä, epwe pwölukela, nge om kewe tit repwe chechech ren akürangen chon wawa oris, pwal ren akürangen chomong sokun woken. Ina usun epwe fis, lupwen Nepukatnesar epwe tolong lon asamalapom usun aramas ra tolong lon eu telinimw mi tala tittin lon maun.
EZE 26:11 Pechen nöün kewe oris repwe puri om kewe al meinisin. Epwe niela noum aramas ren ketilas, nge om kewe ürepin mi pöchökül repwe turula won pwül.
EZE 26:12 Chon Papilon repwe liapenala woum me om pisekin amömö, repwe amökkätiu om kewe tit o ataetiu imwom kewe mi mürina. Nge föün leniom me irän kewe, pwal ekewe mettoch mi ta repwe pöütala leset.
EZE 26:13 Iwe, ngang üpwe aükätiu om köl, nge tikitikin om kitar esap chüen wor.
EZE 26:14 Üpwe awili ngonuk eu fanüen achau pwe kopwe eu lenien apwas epilo, nge kosap chüen kaüsefäl, pun ngang ewe Samol mi Lapalap üa kapas.”
EZE 26:15 Iei alon Kot ewe Samol mi Lapalap ngeni Tirus, “Ekewe fanüen aroset repwe chechech ren püngün om turula, lupwen chon kinas ra ngüngü, nge ninni a fis me lukalapom.
EZE 26:16 Mürin, samolun ekewe fanüen aroset meinisin repwe tötiu seni ar lenien motun samol, repwe pwilitawu üfer owokot me üfer mi chü. Iwe, repwe mot won pwül fän chechech, repwe pwal fokun rükö ren mine a fis ngonuk, nge resap fokun ükütiu le chechech.
EZE 26:17 Repwe eäni echö kölün kechü o apasa usum: Ka tala, en telinimw mi fokun iteüöch, aramas mi reepi ra nonom lomw. Me lom en me aramasen leniom oua nemeni matau o eniwokusu chon ekewe fanüen aroset meinisin.
EZE 26:18 Nge iei ekewe fanüen aroset ra chechech lon ewe rän ka turula, ekewe fanüen lematau ra apilükingau, lupwen ka tala.”
EZE 26:19 Pun iei usun Kot ewe Samol mi Lapalap a apasa, “Üpwe apöököla usun eu telinimw mi tala esap chüen wor aramas lon, üpwe pwal önütai womw nonoon lematau, pwe sät epwe pwölukela.
EZE 26:20 Üpwe pöütukela lon lenien sotup ren ekewe armasen lom, üpwe pwal anomuk leutun fanüfan lon ekewe leni mi tala seni me lom, pwe kopwe nonom ren chokewe ra fen feitiu lon lenien sotup. Ina usun kosap chüen so, esap pwal chüen wor leniom lon fanüen chon manau.
EZE 26:21 Üpwe fokun afeiengauok, pwe kosap chüen nom. Aramas repwe küttok, nge resap chüen künasefäliik feilfeilachök,” iei alon Kot ewe Samol mi Lapalap.
EZE 27:1 Iwe, ewe Samol mi Lapalap a kapas ngeniei,
EZE 27:2 “Nge en, nöün aramas, kopwe chietä echö kölün kechü usun Tirus.
EZE 27:3 Kopwe apasa ngeni Tirus ewe telinimw mi nom aroset, lenien chon sopai ngeni aramasen chomong fanüen lematau me fanüen aroset, pwe iei aloi ngang Kot ewe Samol mi Lapalap: Tirus, ka apasa, ‘Ngang eu telinimw mi wesewesen ling.’
EZE 27:4 Fanüom a nom lematau, chokewe mi aüketä ra föruk pwe ka wesewesen ling.
EZE 27:5 Ka usun chök efoch sip. Chon falook ra angei papom seni ewe irä saipires me won ewe chuk Hermon, owum ra pwal angei seni efoch irä setar me won Lepanon.
EZE 27:6 Fatülom ra föri seni ekewe irä ook lon Pasan, nge tekkum ra föri seni irä pain seni ewe fanü Saipiros, ra pwal alinga ngeni ngiin äläfan.
EZE 27:7 Amarom me filäikom ra för seni mangaku mi pwechepwech o chü seni Isip, nge imweimwen womw a pwölüpwöl ngeni mangaku mi arauarau me parochol seni ewe fanü Saipiros.
EZE 27:8 Noum chon fatül ekewe aramasen Siton me Arwat, noum kewe mwän mi fokun reepi ir pölü.
EZE 27:9 Ekewe mwän mi silelap angangen won wa seni Kepal ra nonom reöm, pwe repwe pwiniongei womw. Ekewe sein lematau meinisin me sälan wor ra feito reöm, pwe repwe amömö ngonuk ar kewe pisek.
EZE 27:10 Chon Persia, chon Lut me chon Put ra choni om mwichen sounfiu. Ra aitiuätä won tittum ar kewe tittin maun me imwer akkaw pwe ka ling ren.
EZE 27:11 Chon Arwat me noum kewe sounfiu ra ütä won tittum, nge chon Kamat ra nom won om kewe imw tekia. Iwe, ra aitiuätä ar kewe tittin maun won om kewe tit meinisin, pwe ka wesewesen ling ren.
EZE 27:12 Chon Tarsis ra kamö senuk, pun ka wöü ren chomong sokun pisek. Ra akasiwili om pisek ngeni silifer, mächä, kapa me pilom.
EZE 27:13 Chon Kris, chon Tupal me chon Mesek ra amömö ngonuk. Ra akasiwili om pisek ngeni ekewe amanau me sepi seni piras.
EZE 27:14 Chon Tokarma ra akasiwili om pisek ngeni orisin angang, orisin maun me aas.
EZE 27:15 Chon Tetan ra amömö ngonuk ar pisek. Aramasen chomong fanüen aroset ra uwato reöm ngiin äläfan me irä mi aüchea akasiwilin om pisek.
EZE 27:16 Chon Etom ra kamö senuk pokiten chomongun om pisek. Ra akasiwili om pisek ngeni fau aüchea iter emeralt, ngeni mangaku mi parochol pwal mangaku mi chü me pwechepwech, ngeni föüpar me fau aüchea iter rupi.
EZE 27:17 Chon Juta me chon Israel ra amömö ngonuk. Ra akasiwili om pisek ngeni wiich, föün olif me föün fiik, chönün chunen, apüra me sokun lö mi pwokus.
EZE 27:18 Chon Tamaskus ra kamö senuk, pun ka wöün pisek mi chomong o sokopat. Ra akasiliwi om pisek ngeni wain seni Helpon me ülen sip seni Sahar.
EZE 27:19 Chon Wetan me Jawan ra akasiwili om pisek ngeni sokun mächä fän iten fout seni Usal, pwal ngeni kasia me nofitin mongö.
EZE 27:20 Chon Tetan ra akasiwili om pisek ngeni mangaku fän iten lenien mot won man.
EZE 27:21 Chon Arapia me ekewe samolun Ketar meinisin ra akasiwili om pisek ngeni nöür apanen sip, ätemwänin sip me kuuch.
EZE 27:22 Ekewe chon amömö seni Sepa me Raama ra amömö ngonuk. Ra akasiwili om pisek ngeni chomong sokun nofitin mongö mi mürina, pwal fau aüchea me kolt.
EZE 27:23 Chon Haran, chon Kanne, chon Eten, ekewe chon amömö seni Sepa, pwal chon Asur me chon Kilmat ra amömö ngonuk.
EZE 27:24 Ir ra amömö ngonuk lon om lenien amömö üf mi ling, mangaku mi arauarau me chü, pwal kieki mi sokopat anüan, ra riri o anükü ngeni lül mi aüchea.
EZE 27:25 Ekewe sipen kamö me me amömö ra uwei om pisek. Ka usun chök efoch sip won matau mi ur ren pisek.
EZE 27:26 Nge lupwen noum kewe chon fatül ra fatüleekela lukalapen matau, eu asepwälin ötiu a ataokela toau seni fanü.
EZE 27:27 Woum me pisekum meinisin, noum kewe säla me chon reepi lematau, noum chon pwiniong me noum chon amömö, noum kewe sounfiu, pwal chiechiom meinisin mi etuk, ir meinisin ra kokotiu lukalapen matau lon ewe rän ka tala.
EZE 27:28 Iwe, ekewe fanüen aroset ra chechech ren pupuchörün noum kewe säla, lupwen ra kokotiu.
EZE 27:29 Ekewe chon fatül ra likitala war kewe sip, ekewe säla me ekewe chon reepi lematau ra ütä wilifanü,
EZE 27:30 ra leüömong le ngüngüres usum o kechüangau. Iwe, ra uwätä pwül won mökürer o fares lon falangen ekkei.
EZE 27:31 Ra püsin reipöpöla mökürer fän äsengesum o üföüfolong üf seni tuk, ra pwal kechüeituk fän riaföün letiper.
EZE 27:32 Lon ar letipeta repwe chietä echö kölün kechü usum o ngüngüres womw, ‘Iö a wewe ngonuk, Tirus, en telinimw mi fokun tala me lukalapen matau?
EZE 27:33 Lupwen ekewe sip ra uwei om kewe pisekin amömö lematau, ka alisi aramasen chomong mwü. Ka pwal apisekiseki ekewe kingen fanüfan ren woum me pisekum mi somwola.
EZE 27:34 Nge iei ka tala ren nonoon lematau, ka kokotiu epin matau, nge om kewe pisekin amömö me noum kewe aramas ra etuk le kokotiu.’
EZE 27:35 Aramasen ekewe fanüen aroset ra rükö ren mine a fis ngonuk, pwal ar kewe king ra nupufengeniir o wowongau fän niuokus.
EZE 27:36 Ekewe chon amömö seni ekewe mwün fanüfan ra ngäruk ren om feiengau, pun ka tori sopolomw mi afeiengau, nge kosap chüen nom tori feilfeilachök.”
EZE 28:1 Iwe, ewe Samol mi Lapalap a kapas ngeniei,
EZE 28:2 “Nöün aramas, kopwe üreni ewe samolun Tirus, pwe iei aloi ngang Kot ewe Samol mi Lapalap: Ka lamalamtekia lon lelukom, ka pwal ikeeketä ren om apasa, ‘Ngang eman kot. Üa mot won lenien motun eman kot lukalapen matau.’ Nge ka chök eman aramas, sap eman kot, inamwo ika ka ekieki pwe ka tipachem usun eman kot.
EZE 28:3 Mwa met, ka tipachem seni Taniel. Ifa usun, esap wor och mi monomon a monola senuk?
EZE 28:4 Ren om tipachem me silelap woum a chomongola, ka pwal achufengeni kolt me silifer lon om lenien iseis.
EZE 28:5 Ka fokun eäni tipachem lon om angangen sopai o achomonga woum. Iwe, ka lamalamtekia lon lelukom ren.
EZE 28:6 Iei mine ngang Kot ewe Samol mi Lapalap üa apasa: Pokiten ka ekieki pwe ka tipachem usun eman kot,
EZE 28:7 üpwe awarato womw chon ekis mi pwora seni aramas meinisin, pwe repwe afeiengauok. Iwe, repwe üttawu nöür ketilas o ataela mettoch meinisin mi mürina a toruk pokiten om tipachem, repwe pwal alimengaua lingom.
EZE 28:8 Iwe, repwe niik o aturukolong lon eu peias mi lölö.
EZE 28:9 Ifa usun, kopwe chüen apasa fän mesen chokewe mi niik, pwe en eman kot? Iwe, ka chök eman aramas, sap eman kot me ren chokewe mi niik.
EZE 28:10 Kopwe mäla usun chokewe resap sirkomsais ren ekewe chon ekis. Ngang Kot ewe Samol mi Lapalap üa kapas.”
EZE 28:11 Iwe, ewe Samol mi Lapalap a kapas ngeniei,
EZE 28:12 “Nöün aramas, kopwe chietä echö kölün kechü usun feiengauen ewe kingen Tirus. Iwe, kopwe üreni, pwe iei aloi ngang Kot ewe Samol mi Lapalap: Me lom en eman aramas mi wesewesen mürina, ka pwal uren tipachem o wesewesen mwänöch.
EZE 28:13 Ka nom lon Eten ewe tanipin Kot. Ka fout ngeni sokopaten fau aüchea iter karnelian, topas, jaspis, kirisolait, peril, oniks, safaia, karpungkel me emeralt. Mi wor om fout seni kolt, ra för fän itom lon ewe rän Kot a föruk.
EZE 28:14 Ka kepit pwe kopwe eman kerop chon tümwün, pun üa awisok ngeni. Ka nom won ewe chukun Kot mi pin o fetal lein fau mi meriweriw.
EZE 28:15 Ka wesewesen pwüng lon om föför seni ewe rän Kot a föruk tori ewe rän ka föföringau lon.
EZE 28:16 Ren watten om angangen amömö ka uren föförün mwänewüs o turulong lon tipis. Iei popun üa aturuketiu seni won ewe chukun Kot usun eman chon tipis, üa pwal asüükela seni lein ekewe fau mi meriweriw, en kerop chon tümwün.
EZE 28:17 Ka lamalamtekia lon lelukom pokiten om mwänöch, ka pwal alomotongaua om tipachem pokiten wattelan lingom. Iei mine üa aturukela won pwül o pwärala om feiengau ngeni ekewe king, pwe repwe nenengenuk.
EZE 28:18 Ren chomongun om tipis, pwal ren om atuputup le amömö ka turunufasei om kewe imw mi pin. Iei mine üa aküw eu ekkei lon telinimwom o kenukela. Üa awiluk ngeni falangen ekkei won pwül fän mesen chokewe meinisin mi nenengenuk.
EZE 28:19 Chon ekewe mwü meinisin mi sileek ra mairü reöm pokiten eniwokusun sopolomw, pun kosap chüen nom tori feilfeilachök.”
EZE 28:20 Iwe, ewe Samol mi Lapalap a kapas ngeniei,
EZE 28:21 “Nöün aramas, kopwe newenewen ngeni Siton o osuni usun feiengauan.
EZE 28:22 Iwe, kopwe apasa pwe iei aloi ngang Kot ewe Samol mi Lapalap: Nengeni, iei üpwe ü ngonuk, Siton. Üpwe pwärala ai ling lein ekewe chon Siton. Iwe, aramas repwe silei pwe ngang ewe Samol mi Lapalap, lupwen üpwe apwüngü chokewe mi imweimw lomw o pwärala lefiler pwe üa pin.
EZE 28:23 Pun üpwe awarato mätter womw, nge cha epwe pupula won alom. Iwe, noum aramas repwe ninnila me lukalapom ren chokewe mi maun ngonuk seni ekis meinisin. Mürin kopwe silei pwe ngang ewe Samol mi Lapalap.
EZE 28:24 Iwe, chon ekewe mwü mi nom ünükün Israel resap chüen wewe ngeni iräfölüföl mi ekinasa chon Israel ren ar kapasen turunufas. Ren ei repwe silei pwe ngang Kot ewe Samol mi Lapalap.”
EZE 28:25 Iei alon Kot ewe Samol mi Lapalap, “Lupwen üpwe achufengeni ekewe chon Israel seni me lein ekewe mwü ia ra toropasfeil ie, üpwe pwärala lein ekewe chon Israel, pwal mwen mesen chon ekewe mwü pwe üa pin. Iwe, repwe nonom lon püsin fanüer, ewe fanü üa ngeni nei we chon angang Jakop.
EZE 28:26 Iwe, repwe nonom lon ewe fanü fän kinamwe, repwe pwal aüetä imwer o föri ar tanipin wain. Üpwe apwüngü chon ekewe mwü ünükür mi ariaföüür ren ar kapasen turunufas, nge ir repwe chök nonom lon fän kinamwe. Mürin repwe silei pwe ngang ar Kot ewe Samol mi Lapalap.”
EZE 29:1 Lon aengolun ierin ach oola, lon engol me ruuen ränin ewe aengolun maram, ewe Samol mi Lapalap a kapas ngeniei,
EZE 29:2 “Nöün aramas, kopwe newenewen ngeni Farao ewe kingen Isip. Kopwe osuni usun feiengauan me feiengauen unusen ewe fanü.
EZE 29:3 Iwe, kopwe üreni, pwe iei aloi ngang Kot ewe Samol mi Lapalap: Üpwe ü ngonuk, Farao kingen Isip. En ewe alikitor mi watte, ka kon lon om chanpupu o apasa, ‘Iei ai we chanpupu Nil, ngang üa püsin föri.’
EZE 29:4 Üpwe akköü ngächum o föri pwe ikenen lon om chanpupu repwe pach ngonuk. Iwe, üpwe nukiikewu seni lon ewe chanpupu Nil fiti ikenen lon meinisin ra pach ngonuk.
EZE 29:5 Iwe, üpwe aturukela lon fanüapö, en me ikenen om we chanpupu. Kopwe turula won eu leni mi amassawa, nge esap wor eman epwe angeek o peiasenuk. Iwe, üpwe pöütukela ngeni ekewe manmwacho me mansüsü pwe repwe ocheek.
EZE 29:6 Mürin, ekewe chon Isip meinisin repwe silei pwe ngang ewe Samol mi Lapalap. Iwe, ka apwangapwang usun chök efoch liwo me ren chon Israel.
EZE 29:7 Lupwen ra amwöchuk, ka sätekis o ekinasa lon pöür, nge lupwen ra üllenuk, ka kupula pwe sökürür a fingau.
EZE 29:8 Iei mine ngang Kot ewe Samol mi Lapalap üa apasa: Üpwe emwenato aramas pwe repwe niela noum aramas me man ren ketilas.
EZE 29:9 Iwe, ewe fanü Isip epwe wesewesen wiliti eu fanüapö. Mürin oupwe silei pwe ngang ewe Samol mi Lapalap. Iwe, ka apasa, ‘Ai we chanpupu Nil, ngang üa föri.’
EZE 29:10 Iei mine üpwe ü ngonuk me om we chanpupu Nil, üpwe pwal awili ewe fanü Isip ngeni wesewesen fanüapö seni Miktol mi nom efeng tori Aswan mi nom ör, pwal tori kiännin Itiopia.
EZE 29:11 Esap wor eman aramas ika man epwe fetal won, esap pwal so lon ükükün faik ier.
EZE 29:12 Iwe, üpwe awili ewe fanü Isip ngeni eu fanüapö mi pön lap seni ekewe fanüapö meinisin. Iwe, telinimwan kewe repwe pwal tatakis lon ükükün faik ier lap seni ekoch telinimw mi tatakis. Üpwe atoropasafeili ekewe chon Isip lein chon ekewe mwü me ekewe fanü.”
EZE 29:13 Pun iei alon Kot ewe Samol mi Lapalap, “Lesopolan ekewe faik ier üpwe achufengeni ekewe chon Isip seni me lein ekewe mwü ia ra toropasfeil ie.
EZE 29:14 Üpwe aliwinala ekewe chon Isip mi oola ngeni ewe fanü Patros, iei fanüen ar kewe lewo. Iwe, ikenan repwe mwüni eu mwü mi apwangapwang.
EZE 29:15 Ei mwü epwe eu mwü mi apwangapwang seni mwü meinisin, pwe esap chüen püsin atekiatä asen ekewe mwü meinisin. Üpwe fokun achokisikisiir, pwe resap chüen tongeni nemenisefäli ekewe mwü.
EZE 29:16 Iwe, ekewe chon Israel resap chüen apilükülükü Isip, nge mine a fis ngeni Isip epwe achema ngeniir tipisin ar kütta alilisir seni. Mürin, chon Israel repwe silei pwe ngang Kot ewe Samol mi Lapalap.”
EZE 29:17 Iwe, lon rüe me fisuen ierin ach oola, lon ewe aeuin ränin ewe aeuin maram, ewe Samol mi Lapalap a kapas ngeniei,
EZE 29:18 “Nöün aramas, Nepukatnesar ewe kingen Papilon a awisa ngeni nöün mwichen sounfiu och angang mi weires, repwe föri lon ar maun ngeni Tirus. Iwe, iteiten möküren sounfiu a paan, iteiten afar a kinas, nge Nepukatnesar esap fokun angei och liwinin ei angang seni Tirus fän itan ika fän iten nöün kewe sounfiu.
EZE 29:19 Iei mine ngang Kot ewe Samol mi Lapalap üa apasa: Üpwe ngeni Nepukatnesar ewe kingen Papilon ewe fanü Isip. Iwe, Nepukatnesar epwe angei fän pöchökül pisekin Isip, epwe pwal uweela wöün meinisin pwe liwinin nöün kewe sounfiu.
EZE 29:20 Üpwe ngeni Nepukatnesar ewe fanü Isip pwe liwinin an angang weires, pun nöün kewe sounfiu ra angang ngeniei. Ngang Kot ewe Samol mi Lapalap üa kapas.
EZE 29:21 Iwe, lupwen epwe fis ei, mürin üpwe aüsefälietä mwün Israel o atufichisefäliik, Isikiel, pwe kopwe tufichin kapas lefiler. Mürin repwe silei pwe ngang ewe Samol mi Lapalap.”
EZE 30:1 Iwe, ewe Samol mi Lapalap a kapas ngeniei,
EZE 30:2 “Nöün aramas, kopwe osuni o apasa pwe iei aloi ngang Kot ewe Samol mi Lapalap: Oupwe ngüngüres usun ewe ränin feiengau.
EZE 30:3 Pun a arap ewe rän, a arap ränin än ewe Samol mi Lapalap apwüng. Epwe eu ränin rochokich, eu fansoun apwüng fän iten ekewe mwün fanüfan.
EZE 30:4 Epwe fis maun lon Isip, riaföü watte epwe tori Itiopia. Chomong aramas repwe ninnila lon Isip, wöün Isip epwe oola, nge longolongun epwe tatiu.
EZE 30:5 Ekewe sounfiu seni Itiopia me Put me Lut, pwal ekewe chon Arapia me Lipia me aramasen ewe fanüen pwon repwe eti chon Isip le mäla lon ei maun.”
EZE 30:6 Iei alon ewe Samol mi Lapalap, “Chokewe mi alisi Isip repwe mäla lon maun seni Miktol tori Aswan. Nöün Isip mwichen sounfiu mi lamalamtekia repwe rosola. Ngang Kot ewe Samol mi Lapalap üa kapas.
EZE 30:7 Iwe, fanüer epwe tala lap seni ekewe fanü meinisin, nge telinimwer kewe repwe fokun tatakis lap seni ekoch telinimw mi tatakis.
EZE 30:8 Lupwen üpwe keni Isip o arosala chokewe meinisin mi alisi, mürin repwe silei pwe ngang ewe Samol mi Lapalap.
EZE 30:9 Lon ena rän üpwe tinala chon künö won wa, pwe repwe eniwokusu ekewe chon Itopia lon ar kinamwe. Iwe, rükö epwe toriir lon ewe rän Isip a feiengau. Ei epwe fokun fis.”
EZE 30:10 Iei alon Kot ewe Samol mi Lapalap, “Üpwe arosala ewe mwichemongun chon Isip o awesi wöür ren Nepukatnesar ewe kingen Papilon.
EZE 30:11 Üpwe awisa i me nöün mwichen sounfiu mi mwänewüs seni aramas meinisin, pwe repwe ataela ewe fanü. Repwe üttawu nöür ketilas o maun ngeni Isip, pwe unusen ewe fanü epwe ur ren somä.
EZE 30:12 Iwe, üpwe apwasa ewe chanpupu Nil o atolonga ewe fanü fän nemenien chon föföringau. Üpwe ataela ewe fanü me meinisin mine a wor lon ren chon ekis. Ngang ewe Samol mi Lapalap üa kapas.”
EZE 30:13 Iei alon Kot ewe Samol mi Lapalap, “Üpwe ataela ekewe uluulun anümwäl o atowu ekewe uluulun anümwäl me lon Memfis. Iwe, esap chüen wor eman samol lon ewe fanü Isip. Üpwe eniwokusu aramasen unusen ewe fanü.
EZE 30:14 Üpwe ataela Patros mi nom efeng, üpwe keni Soan mi nom ör o apwüngü Thebes.
EZE 30:15 Iwe, üpwe awarato ai lingeringer won Pelusium ewe telinimw mi fokun pöchökül lon Isip, üpwe pwal arosala ewe mwicheichen aramasen Thebes.
EZE 30:16 Ewer, üpwe keni Isip. Chon Pelusium repwe chechech fän niuokus, tittin ewe telinimw Thebes epwe pwangapwang, nge chon maun repwe akariaföüü chon Memfis iteiten rän.
EZE 30:17 Ekewe alüal seni On me Pipeset repwe mäla lon maun, nge chokewe mi chüen nom lon ekei telinimw repwe oola.
EZE 30:18 Saramen rän epwe rochola me lon Tapanes, lupwen üpwe ataela nemenemen Isip o awesi an pöchökül a aingaing won. Iwe, eu kuchu epwe pwölüela Isip, nge chon wisoposopun meinisin repwe oola.
EZE 30:19 Iei usun üpwe apwüngü Isip. Ren ei repwe silei pwe ngang ewe Samol mi Lapalap.”
EZE 30:20 Lon engol me aeuin ierin ach oola lon afisuen ränin ewe aeuin maram ewe Samol mi Lapalap a kapas ngeniei,
EZE 30:21 “Nöün aramas, üa kupi pöün Farao ewe kingen Isip. Nengeni, esap wor eman a säfeeni o filiti pöün, pwe epwe tongeni pöchökülsefäl o tufichin amwöchü efoch ketilas.
EZE 30:22 Iei mine ngang Kot ewe Samol mi Lapalap üa apasa: Üpwe ü ngeni Farao ewe kingen Isip o kupi pöün kewe, ewe efoch mi pöchökül, pwal ewe efoch mi fen kup, pwe nöün ketilas epwe turutiu seni lepöün.
EZE 30:23 Üpwe atoropasafeili ekewe chon Isip lein chon ekewe mwü me fanü.
EZE 30:24 Mürin üpwe apöchöküla pöün ewe kingen Papilon o isenalong nei ketilas lepöün. Nge üpwe kupi pöün Farao, pwe epwe ngüngü me mwen chon oputan, usun eman aramas mi arap ngeni mäla ren kinasan.
EZE 30:25 Ewer, üpwe apöchöküla pöün ewe kingen Papilon, nge pöün Farao epwe sumutiu. Lupwen üpwe isenalong nei ketilas lepöün ewe kingen Papilon, pwe epwe ächewechewa ngeni ewe fanü Isip o afeiengaua, mürin repwe silei pwe ngang ewe Samol mi Lapalap.
EZE 30:26 Iwe, üpwe atoropasafeili ekewe chon Isip lein chon ekewe mwü me fanü. Mürin repwe silei pwe ngang ewe Samol mi Lapalap.”
EZE 31:1 Lon engol me aeuin ierin ach oola, lon aeuin ränin ewe aülüngatin maram, ewe Samol mi Lapalap a kapas ngeniei,
EZE 31:2 “Nöün aramas, kopwe üreni Farao kingen Isip me nöün mwicheichen aramas: Iö ka wewe ngeni lon om ling me itetekia?
EZE 31:3 Üpwe awewe ngonuk Asiria. Me lom a usun efoch irä setar won Lepanon. Iwe, palen ewe setar ra fokun mwuresires, a pwal fokun tekia pwe ülülan a tori lein kuchu.
EZE 31:4 Ekewe koluk ra achöchönü, nge kolukun fän pwül a amärätä pwe a tekiatä. Chanpupu ra pupu ünükün, nge an kewe öüwö ra pula ngeni ekewe lusun irän lemäl meinisin.
EZE 31:5 Iwe, a tekia seni ekewe irän lemäl meinisin, nge palan ra fokun öümong o mwuresires pokiten chomongun ewe koluk.
EZE 31:6 Ekewe machang meinisin ra fas won palan, ekewe mönün lemäl ra nöünöü fan, nge chomong mwü mi tekia ra nonom fän nürün.
EZE 31:7 Ewe setar a fokun mürina ren tekian me langatamen palan, pun waran ra feitiu tori ekewe kolukun fan.
EZE 31:8 Ekewe setar lon tanipin Kot resap mürina seni, ekewe palen saipires resap wewe ngeni palan, fasaren ekewe irä plein resap pwal wewe ngeni fasaran. Ewer, esap wor efoch irä lon ewe tanipin Kot a wewe ngeni lingan.
EZE 31:9 Üa alinga pwe a mwuresires, nge ekewe irän Eten meinisin lon tanipin Kot ra lolowoiti.
EZE 31:10 Iei ngang Kot ewe Samol mi Lapalap üa apasa: Pokiten ewe setar a fokun tekia, pwe ülülan a tori lein kuchu, pwal pokiten a lamalamtekia ren tekian,
EZE 31:11 üa asechala ngeni eman sounemenemen ekewe mwü. I a wesewesen liwini ngeni ükükün liwinin an föföringau. Ngang üa pöütala,
EZE 31:12 nge chon ekis seni ekewe mwü mi fokun eniwokus ra pöküela o likitala. Palan kewe ra turutiu won ekewe chuk, pwal lon ekewe lemol, nge ülün kewe ra kup o turutiu lepekin chanpupun ewe fanü meinisin. Iwe, aramas meinisin won fanüfan ra towu seni fän nürün o likitala.
EZE 31:13 Ekewe machang meinisin ra so won ewe irä mi turula, nge mönün lemäl meinisin ra nom lein palan kewe.
EZE 31:14 Iei mine esap chüen wor efoch irä mi mär ünükün ekewe koluk epwe tekiatä, pwe ülün epwe tori lein ekewe kuchu. Esap pwal chüen wor irä mi pöchökül ünükün ekewe koluk repwe üwenewenetä o tekia. Pun ir meinisin repwe mäla, repwe feitiu leutun fanüfan ren ekewe somä ren chokewe mi fen feitiu lon lenien sotup.”
EZE 31:15 Iei alon Kot ewe Samol mi Lapalap, “Lon ewe rän, lupwen a feitiu lon lenien sotup, üa pwölüela ekewe kolukun fän pwül ren letipeta, üa pwal pinei ekewe chanpupu, pwe resap chüen pula. Iwe, üa pwölüela Lepanon fän rochopwak, nge ekewe irän lemäl meinisin ra pwasala pokitan.
EZE 31:16 Üa achecha ekewe mwün fanüfan ren akürangen an tur, lupwen üa aturätiu lon lenien sotup ren chokewe mi fen nom lon. Lon ewe fansoun ekewe irän Eten, pwal ekewe irä mi fokun mürina o chöchön ren üt me won Lepanon mi fen nom leutun fanüfan ra chipila ren an tur.
EZE 31:17 Iwe, chokewe mi nom fän nürün me chon pelieni me lein ekewe mwü ra eti le feitiu lon lenien sotup ren chokewe mi mäla lon maun.
EZE 31:18 Meni lein ekewe irän Eten ka wewe ngeni lon lingom me om itetekia? Nge pwal en kopwe eti ekewe irän Eten le turutiu leutun fanüfan, kopwe kon lein chokewe resap sirkomsais, pwal lein chokewe ra mäla lon maun. Iei usun mine epwe fis ngeni Farao me nöün mwicheichen aramas,” iei alon Kot ewe Samol mi Lapalap.
EZE 32:1 Lon engol me ruuen ierin ach oola, lon aeuin ränin ewe engol me ruuen maram, ewe Samol mi Lapalap a kapas ngeniei,
EZE 32:2 “Nöün aramas, kopwe chietä echö kölün kechü usun Farao ewe kingen Isip. Iwe, kopwe üreni: Ka ekieki pwe en ka usun chök eman laion lein ekewe mwü, ngei ka usun chök eman alikitor mi nom leset. Ka mwetelong lon om kewe chanpupu o kümetätä pwülün lon ren pecheöm, pwe kolukun lon a pölök.
EZE 32:3 Iei aloi ngang Kot ewe Samol mi Lapalap. Üpwe aturala ai toloia womw ren eu mwichemongun aramasen chomong mwü. Ir repwe nukiiketä me lon ai toloia.
EZE 32:4 Iwe, üpwe aturukela won pwül, üpwe pwal pöütukela won eu leni mi amassawa o körato machangen fanüfan meinisin pwe repwe sotiu womw, nge mönün won unusen fanüfan repwe som le ocheek.
EZE 32:5 Iwe, üpwe atoropasafeili fitukom won ekewe chuk o amasoua ekewe lemol ren chum.
EZE 32:6 Üpwe achöchönü ewe fanü pwal tori ekewe chuk ren chaom, nge ekewe chanpupu repwe urela ren.
EZE 32:7 Lupwen üpwe niikela, üpwe pwölüela läng o akirocha ekewe fü, üpwe pwal achunoi akkar ren eu kuchu, nge maram esap chüen tin.
EZE 32:8 Üpwe atopu ekewe saramen won läng o pwölüela fanüom ren rochopwak, ngang Kot ewe Samol mi Lapalap üa kapas.
EZE 32:9 Iwe, üpwe ariaföüü leluken aramasen chomong mwü, lupwen pworausen om feiengau epwe tori ekewe fanü kosamwo sileer me mwan.
EZE 32:10 Üpwe amairü aramasen chomong fanü pokitom, nge ar kewe king repwe rükö reöm, lupwen üpwe amwara ngeni meser nei ketilas. Iwe, lon ränin om feiengau repwe chechech fansoun meinisin eman me eman fän iten püsin manauan.
EZE 32:11 Pun iei aloi ngang Kot ewe Samol mi Lapalap ngeni ewe kingen Isip: Ewe ketilas nöün ewe kingen Papilon epwe feitiu womw.
EZE 32:12 Üpwe tinala sounfiu mi fokun pwora me mwänewüs lap seni sounfiun ekewe mwü, pwe repwe niela chomong noum aramas ren ketilas. Iwe, repwe awesi mine ka lamalamtekia won o arosala noum aramas meinisin.
EZE 32:13 Üpwe arosala noumw pwiin kow mi nom ünükün ekewe chanpupu. Iwe, esap chüen wor eman aramas ika man epwe fetal lon o apölökü.
EZE 32:14 Mürin üpwe alüai ekewe chanpupu pwe repwe pula usun lö. Ngang Kot ewe Samol mi Lapalap üa kapas.
EZE 32:15 Iwe, lupwen üpwe awili ewe fanü Isip ngeni fanüapö, lupwen üpwe angei meinisin mine a nom lon o arosala chon meinisin, mürin repwe silei pwe ngang ewe Samol mi Lapalap.
EZE 32:16 Iei ewe kölün kechü aramas repwe eäni lon ar letipeta fän iten Isip. Föpwülün ekewe mwü repwe eäni lupwen ar letipeta fän iten Isip me mwicheichen aramasan meinisin. Ngang Kot ewe Samol mi Lapalap üa kapas.”
EZE 32:17 Lon engol me ruuen ierin ach oola, lon engol me limuen ränin ewe aeuin maram ewe Samol mi Lapalap a kapas ngeniei,
EZE 32:18 “Nöün aramas, kopwe ngüngüres fän iten ekewe mwicheichen chon Isip. Kopwe atururetiu epin fanüfan fiti chon ekewe mwü mi pöchökül ren chokewe mi fen nom lon lenien sotup:
EZE 32:19 Kopwe üreniir, ‘Ifa usun, oua ekieki pwe oua ling seni ekewe lusun aramas? Oupwe chök tur lon lenien sotup o kon ren chokewe resap sirkomsais.’
EZE 32:20 Iwe, ekewe chon Isip repwe mäla lein chokewe ra fen mäla lon maun. Ewe ketilas a fen molotä. Oupwe nukieto Isip me mwicheichen aramasan meinisin.
EZE 32:21 Iwe, ekewe meilapen sounfiu mi pwora repwe apasa me lon ewe lenien sotup usun chon Isip me pelian kewe, ‘Ekewe aramas resap sirkomsais ra mäla lon maun, ra feitiu ikei o konola.’
EZE 32:22 Asiria a pwal nom lon ei leni fiti nöün mwicheichen sounfiu meinisin ra nom ünükün lon peiaser. Iwe, ir meinisin ra mäla lon maun.
EZE 32:23 Peiaser kewe ra nom epin ewe lenien sotup, nge nöün mwicheichen sounfiu ra kon ünükün peiasan. Iwe, ir meinisin ra mäla lon maun, nge me lom ra afisätä niuokus won fanüen chon manau.
EZE 32:24 Elam a pwal nom, nge nöün mwicheichen sounfiu ra kon ünükün peiasan. Ir meinisin ra mäla lon maun. Iwe, me lom ra afisätä niuokus won fanüen chon manau, nge iei ra feitiu leutun fanüfan, ir chokewe resap sirkomsais, ra pwal uwei ar itengau fiti chokewe ra fen nom lon ewe lenien sotup.
EZE 32:25 Ra ngeni Elam an lenien kon lein chokewe mi mäla lon maun, nge nöün mwicheichen sounfiu ra peias ünükün. Ir meinisin resap sirkomsais ra mäla lon maun. Me lom ra afisätä niuokus won fanüen chon manau, nge iei ra kon lein chokewe mi mäla, ra uwei ar itengau fiti chokewe ra fen nom lon ewe lenien sotup.
EZE 32:26 Mesek me Tupal ra pwal nom lon ei leni, nge peiasen nöür mwicheichen sounfiu meinisin ra nom ünükür. Ir meinisin resap sirkomsais, ra mäla lon maun. Nge me lom ra afisätä niuokus won fanüen chon manau.
EZE 32:27 Iwe, resap peias usun ekewe chon pwora mi mäla me lomlom, chokewe mi feitiu lon ewe lenien sotup fän ar pisekin maun, fän nöür ketilas mi nom fän mökürer me ar tittin maun mi nom wor. Ekei chon pwora ra afisätä niuokus won fanüen chon manau me lom.
EZE 32:28 Pwal en, Farao, kopwe mäla o kon lein chokewe resap sirkomsais, lein chokewe mi mäla lon maun.
EZE 32:29 Etom a pwal nom fiti an kewe king me samol. Ikamwo ir sounfiu mi pwora, nge ra chök peiasfengen me chokewe mi mäla lon maun. Ra kon ren chokewe resap sirkomsais, ra fen feitiu lon lenien sotup.
EZE 32:30 Iwe, ekewe samol meinisin seni efeng, pwal ekewe chon Siton meinisin ra nom. Ra feitiu fän ar säw ren chokewe mi ninnila, inamwo ika ar pwora a eniwokusu aramas me lom. Ir chokewe resap sirkomsais, ra kon ren chokewe mi mäla lon maun, ra pwal uwei ar itengau fiti chokewe mi feitiu lon ewe lenien sotup.
EZE 32:31 Iwe, Farao me nöün mwichen sounfiu repwe chipila lon ar feiengau, lupwen repwe küna chokewe meinisin mi mäla lon maun, iei aloi ngang Kot ewe Samol mi Lapalap.
EZE 32:32 Pun me lom üa föri pwe Farao a afisätä niuokus won fanüen chon manau. Nge iei i me nöün mwicheichen sounfiu repwe mäla o peiasfengen me chokewe resap sirkomsais, ra fen mäla lon maun,” iei alon Kot ewe Samol mi Lapalap.
EZE 33:1 Iwe, ewe Samol mi Lapalap a kapas ngeniei,
EZE 33:2 “Nöün aramas, kopwe fos ngeni aramasom o üreniir: Lupwen üa awarato maun won eu fanü, nge aramasen ewe fanü ra fili eman mwän me leir o awisa ngeni wisen chon mas,
EZE 33:3 ätewe a apu ewe säwiin asilesil, lupwen a küna pwe chon oputer ra war, pwe aramas repwe silei.
EZE 33:4 Iwe, are eman a rongorong puun ewe säwi, nge esap aleasochisi, a püsin tipis ngeni manauan, are chon oputan ra feito o niela.
EZE 33:5 Iwe, a rongorong puun säwi, nge esap aleasochisi, iei mine a püsin tipis ngeni manauan. Nge are epwe aleasochisi, epwe amanaua manauan.
EZE 33:6 Nge are ewe chon mas a küna pwe chon oputer ra war, nge esap apu ewe säwiin asilesil pwe aramas resap silei usun, ätewe a tipis ngeni manauen eman me eman aramas mi mäla ren. Iwe, ir repwe mäla lon ar tipis, nge ewe chon mas epwe angei chappen an tümwününgau.
EZE 33:7 Nge en, nöün aramas, üa awisa ngonuk wisen eman chon mas fän iten chon Israel. Iteiten fansoun, lupwen kopwe rongorong eu kapasen fön seniei, kopwe fönöör ren.
EZE 33:8 Ika ngang üpwe üreni eman chon föföringau, ‘Kopwe fokun mäla, en chon föföringau,’ nge kosap fönöü pwe epwe kul seni an föföringau, ätewe epwe mäla lon an tipis, nge en kopwe angei chappen om tümwününgau.
EZE 33:9 Iwe, are kopwe fönöü eman chon föföringau pwe epwe kul seni an föföringau, nge esap kul seni, ätewe epwe mäla pokiten an tipis, nge en kopwe amanaua manauom.”
EZE 33:10 Iwe, ewe Samol mi Lapalap a kapas ngeniei, “Nöün aramas, kopwe üreni ekewe chon Israel, pwe iei usun mine ra apasa, ‘Ach pupungau me ach tipis ra nonom woch, nge ir popun ach feiengau. Ifa usun ach sipwe tongeni manau?’
EZE 33:11 Iwe, kopwe üreniir: Mwo manauei, aloi ngang Kot ewe Samol mi Lapalap, üsap pwapwaiti mälan eman chon föföringau, nge üa mochen pwe ewe chon föföringau epwe kul seni an tipis o manau. Ämi chon Israel, oupwe ükütiu seni ämi föföringau. Pun pwota oua mochen mäla?
EZE 33:12 Iwe, en nöün aramas, kopwe üreni aramasom: Are eman chon pwüng a tipis, an kewe föförün pwüng resap tongeni amanaua. Nge are eman chon föföringau a ükütiu le föföringau, an kewe föföringau resap afeiengaua. Iwe, are eman chon pwüng a föri tipis, esap tongeni küna manau ren an kewe föförün pwüng a föri me lom.
EZE 33:13 Are üa pwon ngeni eman chon pwüng pwe epwe fokun manau, nge i a chök apilükülükü püsin an pwüng o föri tipis, an kewe föförün pwüng meinisin üpwe manlükala, nge epwe chök mäla pokiten förian kewe tipis.
EZE 33:14 Iwe, are üa apasa ngeni eman chon föföringau, ‘Kopwe fokun mäla,’ nge i a ükütiu le tipis o föri mine a pwüng me wenechar,
EZE 33:15 are a aliwini ngeni ewe chon liwinimang asisilen an pwon, are a pwal aliwini mine a soläni o tümwünü ekewe allük aramas ra küna manau ren, nge esap föri tipis, ätewe epwe fokun manau, nge esap mäla.
EZE 33:16 Üpwe amusala an kewe tipis meinisin a föri. Iwe, pokiten a föri mine a pwüng me wenechar, epwe fokun manau.
EZE 33:17 Iwe, aramasom ra chök apasa, ‘Än ewe Samol föför esap pwüng.’ Nge püsin ar föför esap fokun pwüng.
EZE 33:18 Are eman aramas mi pwüng a ükütiu seni an föförün pwüng o föri mine a pwüngingau, epwe mäla ren.
EZE 33:19 Nge are eman aramas mi pwüngingau a ükütiu le föföringau o föri mine a pwüng me wenechar, epwe püsin amanaua manauan.
EZE 33:20 Iwe, oua chök apasa, ‘Än ewe Samol föför esap pwüng.’ Ngang üpwe apwüngükemi chon Israel lon ükükün ämi föför.”
EZE 33:21 Lon engol me ruuen ierin ach oola, lon alimuen ränin ewe aengolun maram, eman mwän mi sü seni Jerusalem a feito rei o apasa, “Ewe telinimw a tala.”
EZE 33:22 Lon ewe pwinin mwen ewe chon sü a war, üa mefi pwe ewe Samol mi Lapalap a nom rei ren an manaman. Iwe, Kot a atufichiei pwe üa silesefäl kapas mwen ewe mwän a feito rei lon ewe sosoran. Ina usun üa tufichsefäl le kapas.
EZE 33:23 Iwe, ewe Samol mi Lapalap a kapas ngeniei,
EZE 33:24 “Nöün aramas, chokewe mi imweimw lon ekewe telinimw mi tala lon ewe fanü Israel ra chök eäni ei kapas, ‘Apraham a chök aleman, nge a fanüeni ei fanü. Nge äm aia chomong, iei mine ei fanü fanüach.’
EZE 33:25 Iei mine kopwe üreniir mine ngang Kot ewe Samol mi Lapalap üa apasa: Oua ochoch ochämi fituk mi cha, oua fel ngeni ämi kewe uluulun anümwäl o nimanauei aramas. Ifa usun, ämi oupwe fanüeni ei fanü?
EZE 33:26 Oua apilükülükü nöümi ketilas, oua pwal föri föför mi anioput. Iteiten eman me eman leimi a lisowu ngeni pwülüen chon arun. Ifa usun, ämi oupwe tongeni fanüeni ei fanü?
EZE 33:27 Iwe, kopwe üreniir pwe iei aloi ngang Kot ewe Samol mi Lapalap: Mwo manauei, chokewe mi imweimw lon ekewe telinimw mi tala repwe mäla ren ketilas, chokewe mi nom lemäl üpwe ngeni ekewe manmwacho pwe repwe ocheer, nge ekewe mi op lon imwen maun me föimw repwe mäla ren mätter.
EZE 33:28 Üpwe awili ei fanü ngeni wesewesen fanüapö. Iwe, ar pöchökül ra aingaing won epwe wesila, nge ekewe chukun Israel repwe sön, pwe esap wor eman epwe tongeni fetal wor.
EZE 33:29 Iwe, lupwen üa awili ewe fanü ngeni wesewesen fanüapö pokiten ar kewe föför mi anioput meinisin ra föri, mürin repwe silei pwe ngang ewe Samol mi Lapalap.
EZE 33:30 Nöün aramas, aramasom ra fosfengen lefiler usum, lupwen ra chufengen arun tittin ewe telinimw ika leasamalapen imwer kewe. Iwe, ra kapasfengen lefiler, ‘Ousipwe feila o rongorong ewe kapas seni ewe Samol mi Lapalap.’
EZE 33:31 Iwe, nei aramas repwe mwicheto reöm o mot me mwom pwe repwe aüselinga om kapas, nge resap aleasochis ngeni. Pun awer a pwärätä ar echeniei, nge letiper a chök mocheniaiti moni fän pwüngingau.
EZE 33:32 Nengeni, ka chök usun eman souköl me rer mi ngiöch le köl kölün amümü, ika usun eman mi silelap le ettiki pisekin ettik, pun ra aüselinga om kapas, nge resap fokun aleasochis ngeni.
EZE 33:33 Nge lupwen om kewe kapas repwe fis, pun repwe fokun fis, mürin chon Israel repwe silei pwe eman soufos a nom lefiler.”
EZE 34:1 Iwe, ewe Samol mi Lapalap a kapas ngeniei,
EZE 34:2 “Nöün aramas, kopwe osuni usun feiengauen ekewe sounemenem, ir ekewe chon masen Israel, kopwe osuni usur o üreniir, pwe iei aloi ngang Kot ewe Samol mi Lapalap: Feiengauemi, ämi chon masen Israel, pun oua püsin tümwünükemi. Ifa usun, sap wisen chon mas pwe repwe tümwünü sip?
EZE 34:3 Ämi oua ünümi ewe milik, oua üföüf üf seni ülen sip, oua pwal niela o ochei fituken ekewe man mi öümanau, nge ousap fokun tümwünü ekewe sip.
EZE 34:4 Iwe, ämi ousap tümwünü ekewe chon apwangapwang o apöchöküla ekewe chon samau, ousap filiti kinasen chokewe mi kinas, ousap aliwini ekewe chon malechela, ousap pwal kütta ekewe chon pöütüla, nge oua nemeniir fän echimw me pöchökül.
EZE 34:5 Iei mine ekewe sip ra toropasfeil, pun esap wor ar chon mas. Iwe, ekewe manmwacho ra ocheer.
EZE 34:6 Nei sip kana ra malechfeil won ekewe chukutekison me ekewe chukutekia. Iwe, ra toropasfeil won unusen fanüfan, nge esap wor eman a kütteer ika tümwünüür.
EZE 34:7 Iei mine ämi kewe chon mas oupwe rongorong aloi ngang ewe Samol mi Lapalap.
EZE 34:8 Mwo manauei, ngang Kot ewe Samol mi Lapalap üa apasa: Nei sip kana ra oola pwe ekewe manmwacho ra ocheer, pun esap wor ar chon mas. Iwe, nei kewe chon mas resap kütta nei sip kana, pwe ra püsin tümwünüür, nge resap tümwünü nei sip kana.
EZE 34:9 Iei mine ämi kewe chon mas oupwe rongorong aloi:
EZE 34:10 Ngang Kot ewe Samol mi Lapalap üa apasa: Üa ü ngenikemi, ämi chon mas. Üpwe angei senikemi nei kewe sip o awesikemi seni wisen chon mas, pwe ousap chüen tongeni püsin tümwünükemi. Iwe, üpwe amanaua nei kewe sip senikemi, pwe ousap chüen tongeni ocheer.
EZE 34:11 Pun iei aloi ngang Kot ewe Samol mi Lapalap: Püsin ngang üpwe kütta nei sip kana o tümwünüür.
EZE 34:12 Usun eman chon mas a kütta nöün pwiin sip mi toropasfeil o achufengeniir, ina usun üpwe achufengeni nei sip kana o tümwünüür. Iwe, üpwe amanaueer seni ekis meinisin ia ra toropasfeil ie lon fansoun räningau me rochokich.
EZE 34:13 Üpwe emwenirewu seni lein ekewe mwü, üpwe pwal achufengeniir seni lon ekewe fanü o emwenirelong lon poputän fanüer. Üpwe amongöör won ekewe chukun Israel, ünükün ekewe chanpupu, pwal lon ekewe leni meinisin mi so lon ewe fanü.
EZE 34:14 Üpwe amongöü ngeniir fetil mi mürina, repwe kütta ener mongö me won ekewe chukun Israel. Ikenan repwe kon won leni mi mürina fän kinamwe o kütta ener mongö mi annö won ekewe chukun Israel.
EZE 34:15 Iwe, püsin ngang üpwe chon masen nei sip kana, üpwe kütta eu leni ia ra tongeni asösö ie. Ngang Kot ewe Samol mi Lapalap üa kapas.
EZE 34:16 Üpwe kütta chokewe mi pöütüla o aliwini chokewe mi malechela, üpwe filiti kinasen chokewe mi kinas o apöchöküla chokewe mi apwangapwang, nge üpwe arosala chokewe mi öümanau o pöchökül, pun ngang eman chon mas mi föri mine a pwüng.
EZE 34:17 Iwe, iei aloi ngang Kot ewe Samol mi Lapalap ngeni ämi nei sip kana: Üpwe apwüngükemi o aimwüfeseni ekewe sip mi mürina seni ekewe mi ngau, ekewe ätemwänin sip seni ekewe ätemwänin kuuch.
EZE 34:18 Ifa usun, esap ku ngenikemi ämi mongö ekewe fetil mi mürina, pwe oua pwal purätiu mine a lusun? Ifa usun, esap ku ngenikemi ämi ün seni ewe koluk mi fat, pwe oua pwal apölökü ren pechemi mine a lusun?
EZE 34:19 Ifa usun, nei sip kana repwe mongö mine oua purätiu fän pechemi, repwe pwal ün mine oua apölökü ren pechemi?
EZE 34:20 Iei mine ngang Kot ewe Samol mi Lapalap üa ürenikemi: Ngang üpwe püsin apwüngükemi o aimwüfeseni ekewe sip mi kitinup seni ekewe sip mi kichüchü.
EZE 34:21 Ämi oua etia ren möküremi me lepekimi ekewe mi apwangapwang, oua pwal pureer ren mächämi tori ra toropasfeil ekis meinisin.
EZE 34:22 Iei mine üpwe amanaua nei sip kana, pwe esap chüen wor eman epwe ariaföüür, üpwe pwal apwüngüür meinisin o aimwüfeseni ekewe sip mi mürina seni ekewe mi ngau.
EZE 34:23 Iwe, üpwe awisa eman chök chon mas pwe epwe tümwünüür. I epwe usun chök nei chon angang Tafit, epwe foleniir, epwe pwal ar chon mas.
EZE 34:24 Iwe, ngang ewe Samol mi Lapalap üpwe ar Kot, nge eman king usun nei chon angang Tafit epwe nemeniir. Ngang ewe Samol mi Lapalap üa kapas.
EZE 34:25 Iwe, üpwe föri eu pwonen kinamwe lefiler me ngang o arosala manmwachon ewe fanü, pwe nei sip kana repwe nonom lon fanüapö fän kinamwe o möür lein ekewe wöllap.
EZE 34:26 Üpwe uwato feiöch wor, pwal won ewe fanü ünükün chuki mi pin, üpwe apüngätiu üt lon fansoun fich, nge ewe üt epwe eu ütten feiöch.
EZE 34:27 Ekewe irän lemäl repwe ukua, nge pwülün fanü epwe ämärätä irä mi mürina. Iwe, ekewe aramas repwe nom lon fanüer fän kinamwe. Lupwen üpwe mwüti fööför kewe selimächä o angaseer seni chokewe mi nöüniir amanau, mürin repwe silei pwe ngang ewe Samol mi Lapalap.
EZE 34:28 Iwe, chon ekewe mwü resap chüen liapeniir, manmwachon ewe fanü resap chüen ocheer, pwe repwe nonom fän kinamwe, nge esap wor eman epwe chüen eniwokusuur.
EZE 34:29 Iwe, üpwe awora tanipi mi mürina fän iter, pwe resap chüen mäla ren echik lon ewe fanü, resap pwal chüen itengau me ren chon ekewe mwü.
EZE 34:30 Mürin repwe silei pwe ngang ar Kot ewe Samol mi Lapalap üa nonom rer, repwe pwal silei pwe ir chon Israel nei aramas. Ngang Kot ewe Samol mi Lapalap üa kapas.
EZE 34:31 Pun ämi nei sip kana, üa folenikemi ämi nei aramas, nge ngang ämi Kot,” iei alon Kot ewe Samol mi Lapalap.
EZE 35:1 Iwe, ewe Samol mi Lapalap a kapas ngeniei,
EZE 35:2 “Nöün aramas, kopwe newenewen ngeni ewe fanü Etom o osuni usun feiengauan.
EZE 35:3 Iwe, kopwe üreni ekewe aramas pwe iei aloi ngang Kot ewe Samol mi Lapalap: Üa ü ngonuk, en chukun Etom. Üpwe föri pwe kopwe wiliti eu fanüapö.
EZE 35:4 Üpwe ataela om kewe telinimw, pwe kopwe wiliti eu fanüapö. Mürin kopwe silei pwe ngang ewe Samol mi Lapalap.
EZE 35:5 Iwe, fansoun langatam ka chou ngeni chon Israel o oputeer, ka pwal asechirela pwe repwe mäla ren ketilas lon fansoun ar feiengau, lupwen ra tolong lon apwüngün lesopolan.
EZE 35:6 Mwo manauei, ngang Kot ewe Samol mi Lapalap üa apasa: Pokiten ka föri ei, üpwe föri pwe aramas repwe nimanaueek, nge kosap tongeni sü seniir. Pokiten ka tipisin nimanau, kopwe püsin küna nimanau.
EZE 35:7 Ewer, üpwe awili ewe chukuchukutän Etom ngeni fanüapö o ärala chokewe meinisin mi saifetal won.
EZE 35:8 Iwe, üpwe pwölüela chukum kewe mi tekia ren somä, nge aramas mi mäla lon maun repwe turula won chukum mi tekison, pwal lon om kewe lemol me pwokur.
EZE 35:9 Iwe, üpwe awili ngonuk eu fanüapö feilfeilachök, pwe om kewe telinimw resap chüen so. Mürin kopwe silei pwe ngang ewe Samol mi Lapalap.
EZE 35:10 Iwe, ka apasa, ‘Üpwe nemeni ekei ruu mwü Juta me Israel, üpwe fanüeni fanüer, inamwo ika ewe Samol mi Lapalap a nonom lon.’
EZE 35:11 Iei mine ngang Kot ewe Samol mi Lapalap üa apasa: Mwo manauei, üpwe liwini ngonuk ükükün ewe song me lolowo ka eäni ngeniir, lupwen ka pwäri ngeniir om oputeer. Iwe, repwe silei pwe ngang üa apwünguk pokiten mine ka föri ngeniir.
EZE 35:12 Mürin ämi aramasen Etom oupwe silei, pwe ngang ewe Samol mi Lapalap üa rongorong iteiten kapasen turunufas oua eäni ngeni ekewe chukun Israel, lupwen oua apasa usur, ‘Ra tala o pön, ra oolong lepöüch pwe sipwe fanüeniir.’
EZE 35:13 Ngang üa püsin rongorong chomongun ämi kapasen tunosikesik oua ü ngeniei ren.
EZE 35:14 Iei aloi ngang Kot ewe Samol mi Lapalap: Chon fanüfan meinisin repwe pwapwa, lupwen üpwe awiluk ngeni eu fanüapö.
EZE 35:15 Pokiten ka pwapwa pwe ewe fanüen chon Israel a tala, üpwe pwal föri ngonuk mine a fis ngeniir. Iwe, kopwe pwal tala, en chuk Seir me unusen ewe fanü Etom. Mürin aramas meinisin repwe silei pwe ngang ewe Samol mi Lapalap.”
EZE 36:1 Iwe, ewe Samol mi Lapalap a apasa, “Nöün aramas, kopwe osuni usun ekewe chukun Israel o üreniir: Ämi chukun Israel, oupwe rongorong aloi
EZE 36:2 ngang Kot ewe Samol mi Lapalap: Chon oputakemi ra apasa usumi, ‘Ää, ekewe leni tekia mi nom seni me lomlom ra wiliti leniach.’
EZE 36:3 Iei mine kopwe osuni o asile ngeniir mine ngang Kot ewe Samol mi Lapalap üa apasa: Lupwen ekewe mwü ünükümi ra liapenikemi o atakemi, ekewe lusun mwü ra lenienikemi, ra pwal ngününgünükemi o turunufaseekemi.
EZE 36:4 Iei mine oupwe rongorong aloi ngang Kot ewe Samol mi Lapalap, ämi kewe chukutekia me chukutekison, ämi kewe öüwö me lemol, pwal ämi kewe leni mi tatakis me ämi kewe telinimw ousap chüen so, mi oola o küna turunufas me ren chon ekewe mwü mi nom ünükümi.
EZE 36:5 Iei usun mine ngang Kot ewe Samol mi Lapalap üa apasa: Fän puropuren ai song üa pälüeni ekewe mwü mi nom ünükümi, pwal unusen ewe fanü Etom, pun ra angei fanüei pwe repwe fanüeni fän pwapwamongun letiper me ar turunufas, ra pwal liapeni ekewe leni a mär fetil lon fän iten enen man.
EZE 36:6 Iei mine kopwe osuni usun ewe fanü Israel o üreni ekewe chukutekia me chukutekison, pwal ekewe öüwö me ekewe lemol, pwe iei aloi ngang Kot ewe Samol mi Lapalap: Nengeni, fän puropuren ai lingeringer üa kapas, pun oua riaföü ren än chon ekewe mwü turunufaseekemi.
EZE 36:7 Iei mine ngang Kot ewe Samol mi Lapalap üa pwon fän akapel pwe ekewe mwü mi nom ünükümi repwe pwal püsin riaföü ren ar küna turunufas.
EZE 36:8 Nge ekewe chukun Israel repwe apwükü irä o afisätä ua fän itemi nei kewe aramasen Israel, pun oupwe müttir liwiniti fanüemi.
EZE 36:9 Iwe, üpwe pelienikemi o kul ngenikemi, üpwe pwal föri pwe epwe wor tanipi won fanüemi.
EZE 36:10 Üpwe achomongakemi ämi chon Israel. Ekewe telinimw repwe sosefäl, nge ekewe imw mi tala repwe kaüsefälitä.
EZE 36:11 Iwe, üpwe achomonga aramas me man won ewe fanü, oupwe oupwukemiitiu o chomongola. Üpwe asoi leniemi ren aramas usun lon ekewe fansoun lom, nge üpwe alapala feiöchümi seni me mwan. Mürin oupwe silei pwe ngang ewe Samol mi Lapalap.
EZE 36:12 Iwe, üpwe aliwinisefälikemi ämi nei aramasen Israel, pwe oupwe asosefäli ewe fanü o fanüeni, nge nöümi kewe resap chüen mäla ren echik me won.
EZE 36:13 Iei aloi ngang Kot ewe Samol mi Lapalap: Pokiten aramas ra apasa usun ewe fanü Israel, pwe a ochoch aramas o niela püsin nöün,
EZE 36:14 iei mine seni lon ei fansoun esap chüen ochoch aramas, esap pwal chüen niela püsin nöün. Ngang Kot ewe Samol mi Lapalap üa kapas.
EZE 36:15 Üpwe pinei än ekewe mwü kapasen turunufasei ewe fanü o aükätiu ar ämängaua. Üpwe pwal föri pwe ewe fanü esap chüen angei seni mwün Israel nöün kana. Ngang Kot ewe Samol mi Lapalap üa kapas.”
EZE 36:16 Iwe, ewe Samol mi Lapalap a kapas ngeniei,
EZE 36:17 “Nöün aramas, lupwen chon Israel ra nom lon püsin fanüer, ra alimengaua ren lapalapen ar föför. Iwe, ar föför a usun chök limengauen eman fefin, lupwen a tori an samaun maram.
EZE 36:18 Iei mine üa awarato ai lingeringer wor, pokiten ra nimanauei aramas lon ei fanü, pwal pokiten ekewe uluulun anümwäl ra alimengaua fanüer ren.
EZE 36:19 Iwe, üa apwüngüür won ükükün ar föför o atoropasafeiliir lein chon ekewe mwü, pwe ra toropasfetal lon ekewe fanü.
EZE 36:20 Nge lupwen ra tori chon ekewe mwü, ra aitengaua itei mi pin ekis meinisin, pun aramas ra apasa usur, ‘Inamwo ika ir nöün ewe Samol mi Lapalap aramas, nge ra chök towu seni fanüan.’
EZE 36:21 Iwe, ngang üa ekiekin tümwünü iteüöchün itei mi pin, nge chon Israel ra chök aitengaua lein chon ekewe mwü ia ra feila ie.
EZE 36:22 Iei mine kopwe üreni ekewe chon Israel pwe iei aloi ngang Kot ewe Samol mi Lapalap: Mine üpwe föri, üsap föri fän itemi chon Israel, nge üpwe föri fän iten iteüöchün itei mi pin, oua aitengaua lein chon ekewe mwü ia oua feila ie.
EZE 36:23 Üpwe aüöchüsefäli pinin itei mi tekia, ämi oua aitengaua me lein chon ekewe mwü. Mürin chon ekewe mwü repwe silei pwe ngang ewe Samol mi Lapalap, lupwen üpwe pwäri ngeniir pwe üa pin me remi. Ngang Kot ewe Samol mi Lapalap üa kapas.
EZE 36:24 Iwe, üpwe angeekemi seni lein ekewe mwü o achufengenikemi seni lon ekewe fanü meinisin, üpwe pwal aliwinikemiilong lon püsin fanüemi.
EZE 36:25 Üpwe äsupu ngenikemi koluk mi fat pwe oupwe limöch. Üpwe alimöchükemi seni ämi limengauen tipis meinisin, pwal seni ämi kewe uluulun anümwäl meinisin.
EZE 36:26 Iwe, üpwe ngenikemi eu leluk mi fö, üpwe pwal fangelong lomi eman ngün mi fö. Üpwe angei me leutumi ewe leluk mi pöchökül usun fau o ngenikemi eu leluk mi pwetete.
EZE 36:27 Üpwe fangelong lomi Ngüni, pwe oupwe tümwünüöchü ai kewe pwüüng o aleasochisi ai kewe allük.
EZE 36:28 Oupwe nonom lon ewe fanü üa ngeni ämi kewe lewo. Iwe, oupwe nei aramas, nge ngang üpwe ämi Kot.
EZE 36:29 Üpwe angasakemi o limetikemi seni ämi limengauen tipis meinisin. Iwe, üpwe achomongato wiich, nge üsap chüen tinato lengita remi.
EZE 36:30 Üpwe achomongato uän ekewe irä o asomwala resin ekewe tanipi, pwe esap chüen wor lengita oupwe itengau ren me lein chon ekewe mwü.
EZE 36:31 Mürin oupwe chechemeni ämi lapalapangau me ämi föföringau, nge oupwe püsin anioputakemi pokiten ämi tipis me ämi föför mi anioput.
EZE 36:32 Üa mochen pwe oupwe fokun silei, pwe mine üpwe föri, üsap föri fän itemi, ämi chon Israel. Oupwe säw o itengau ren ämi föföringau. Ngang Kot ewe Samol mi Lapalap üa kapas.”
EZE 36:33 Iei alon Kot ewe Samol mi Lapalap, “Lon ena fansoun, lupwen üpwe limeti senikemi ämi tipis, üpwe asosefäli ekewe telinimw, nge ekewe imw mi tala repwe kaüsefälitä.
EZE 36:34 Iwe, aramas repwe tanipinisefäli ewe fanü mi tala, inamwo ika a fanüapö me mwan me ren chokewe mi pwerela lon.
EZE 36:35 Iwe, repwe apasa, ‘Ei fanü mi tala me lom a usun chök ewe tanipi Eten. Ekewe telinimw mi turula o tatakis, resap pwal chüen so, iei ra kaüsefälitä o so, a pwal pöchökül tittir.’
EZE 36:36 Mürin, chon ekewe mwü mi chüen nom ünükümi repwe silei pwe ngang ewe Samol mi Lapalap, üa aüsefälietä ekewe telinimw mi tatakis, üa pwal tanipinisefäli mine a tala. Ngang ewe Samol mi Lapalap üa kapas, üpwe pwal apwönüetä.”
EZE 36:37 Iei alon Kot ewe Samol mi Lapalap, “Üpwe awirisefäli än chon Israel tüngor o achomongeer usun epwi pwiin sip.
EZE 36:38 Ekewe telinimw mi tatakis iei repwe masou ren mwicheichen aramas, usun Jerusalem a masou ren chomongun mönün asor lupwen fansoun ar kewe chulap mi pin. Mürin repwe silei pwe ngang ewe Samol mi Lapalap.”
EZE 37:1 Iwe, üa mefi pwe ewe Samol mi Lapalap a nom rei ren an manaman, nge Ngünün a panieila lukalapen eu lemol mi ur ren chün aramas.
EZE 37:2 Mürin a emwenifetaleei lon ewe lemol, nge üa küna pwe ekewe chü ra fokun chomong lon, ra pwal fokun pwasapwas meinisin.
EZE 37:3 Iwe, a aisiniei, “Ifa usun, nöün aramas, epwe tufich pwe ekei chü repwe manausefäl?” Nge üa pälüeni, “Ai Kot Samol mi Lapalap, en chök ka silei.”
EZE 37:4 Mürin a pwal kapassefäl ngeniei, “Kopwe osuni usun ekei chü. Kopwe üreni ekei chü mi pwasapwas, pwe repwe rongorong alon ewe Samol mi Lapalap.
EZE 37:5 Iei aloi ngang Kot ewe Samol mi Lapalap ngeni ekei chü: Nengeni, üpwe wusalong lomi enienin ngasangasen manau pwe oupwe manausefäl.
EZE 37:6 Üpwe afisi föüicho womi o ämäri fitukemi, üpwe pwölü ngenikemi ünüch o wusalong lomi enienin ngasangasen manau pwe oupwe manau. Mürin oupwe silei pwe ngang ewe Samol mi Lapalap.”
EZE 37:7 Iwe, üa osuni usun mine Kot a allük ngeniei. Nge lupwen üa osuni, a fis och akürang, usun chök och chopuchop. Iwe, ekewe chü ra chufengen efoch ngeni efoch.
EZE 37:8 Nge lupwen üa nenengeni, a fis föüicho wor, fituk a mär wor, ra pwal pwölüpwölüla ren ünüch, nge esamwo wor enienin ngasangasen manau lor.
EZE 37:9 Mürin, Kot a üreniei, “Nöün aramas, kopwe osuni ngeni ewe enienin ngasangas , kopwe osuni ngeni o üreni pwe iei aloi ngang Kot ewe Samol mi Lapalap: En enienin ngasangas, kopwe enito seni lepelien fanüfan me rüanü o eniti ekei somä, pwe repwe manausefäl.”
EZE 37:10 Iei mine üa osuni usun mine Kot a allük ngeniei. Iwe, enienin ngasangas a tori ekewe somä pwe ra manausefäl o ütä. Iwe, a fokun lapalap ar we mwich.
EZE 37:11 Mürin, Kot a üreniei, “Nöün aramas, wewen ekei chü ekewe aramasen Israel meinisin. Nengeni, ra apasa, ‘Chüch kewe ra pwasapwas, ach apilükülük a morola, sa fokun ärela.’
EZE 37:12 Iei mine kopwe osuni o üreniir pwe iei aloi ngang Kot ewe Samol mi Lapalap: Üpwe suki peiasemi o amanauasefälikemiitä seni me lon, ämi nei aramas, üpwe pwal aliwinikemiila lon ewe fanü Israel.
EZE 37:13 Iwe, lupwen üpwe suki peiasemi o amanauasefälikemiitä seni me lon, ämi nei aramas, mürin oupwe silei pwe ngang ewe Samol mi Lapalap.
EZE 37:14 Üpwe fangelong lomi Ngüni pwe oupwe manau, üpwe pwal aleniakemi lon poputän fanüemi. Mürin oupwe silei pwe ngang ewe Samol mi Lapalap üa kapas, üpwe pwal apwönüetä,” iei alon ewe Samol mi Lapalap.
EZE 37:15 Iwe, ewe Samol mi Lapalap a kapas ngeniei,
EZE 37:16 “Nöün aramas, kopwe angei efoch wok o makei ekei kapas won, ‘Mwün Juta.’ Mürin kopwe angei pwal efoch wok o makei ekei kapas won, ‘Mwün Israel.’
EZE 37:17 Mürin, kopwe aföüfengeniir pwe repwe wiliti efoch chök wok me lepoum.
EZE 37:18 Nge are chon fanüom repwe ürenuk, ‘Kose mochen kopwe awewe ngenikem wewen ekana wok,’
EZE 37:19 kopwe pälüeniir pwe iei aloi ngang Kot ewe Samol mi Lapalap: Üpwe angei ewe wok mi mak Israel won o aföüfengeni me ewe wok mi mak Juta won, pwe repwe wiliti efoch chök wok me lepei.
EZE 37:20 Iwe, lupwen ekewe wok ka fen makei wor ra nom lepoum, kopwe aküneer ngeni ekewe aramas.
EZE 37:21 Kopwe üreniir pwe iei aloi ngang Kot ewe Samol mi Lapalap: Üpwe angei ekewe aramasen Israel seni me lein ekewe mwü ia ra oola ie, üpwe pwal achufengeniir seni ekis meinisin o emwenirela lon poputän fanüer.
EZE 37:22 Üpwe föri pwe repwe eu chök mwichen aramas me lon ewe fanü, pwal won ekewe chukun Israel. Nge eman chök king epwe nemeniir meinisin. Iwe, resap chüen imwüfesen lon ruu mwichen aramas ika ruu mwü.
EZE 37:23 Resap chüen alimengaueer ren ar kewe uluulun anümwäl me ar föför mi anioput ika sokun ar pupungau. Pwe ngang üpwe amanaueer seni tipisin ar tok seniei, üpwe pwal limeti seniir ar tipis. Iwe, ir repwe nei aramas, nge ngang üpwe ar Kot.
EZE 37:24 Eman king usun chök nei chon angang Tafit epwe nemeniir, epwe wor eman chök ar chon mas, nge repwe tümwünüöchü le apwönüetä ai kewe allük o aleasochis ngeni ai kewe pwüüng.
EZE 37:25 Iwe, repwe nonom lon ewe fanü ia ar kewe lewo ra fen nonom ie, ewe fanü üa ngeni nei we chon angang Jakop. Repwe nonom lon me nöür pwal mwirimwirir kewe tori feilfeilachök. Nge eman king usun chök nei chon angang Tafit epwe nemeniir tori feilfeilachök.
EZE 37:26 Üpwe föri eu pwonen kinamwe ngeniir, eu pwon epwe nonom tori feilfeilachök. Üpwe afeiöchüür o achomongeer, üpwe pwal anomu imwei mi pin lefiler, pwe epwe nom tori feilfeilachök.
EZE 37:27 Iwe, üpwe imweimw lefiler, ngang üpwe ar Kot, nge ir repwe nei aramas kana.
EZE 37:28 Iwe, lupwen imwei mi pin epwe nonom lefiler tori feilfeilachök, mürin chon ekewe mwü repwe silei pwe ngang ewe Samol mi Lapalap üa apini Israel.”
EZE 38:1 Iwe, ewe Samol mi Lapalap a kapas ngeniei,
EZE 38:2 “Nöün aramas, kopwe newenewen ngeni Kok ewe samollapen Ros, Mesek me Tupal lon ewe fanü Makok, kopwe pwal osuni usun an epwe feiengau.
EZE 38:3 Iwe, kopwe üreni pwe iei aloi ngang Kot ewe Samol mi Lapalap: Üpwe ü ngonuk, Kok, en samollapen Ros, Mesek me Tupal.
EZE 38:4 Üpwe akunukoto o aköü ngächum, üpwe emwenukowu me noum mwichen sounfiu meinisin, noum oris me chon wäniir fän üfer mi ling meinisin, eu mwichemongun sounfiu fän ar tittin maun mi watte me kükün, pwal fän nöür ketilas.
EZE 38:5 Chon Persia, Kus me Put ra etiir fän ar tittin maun me imwer akkaw,
EZE 38:6 pwal ekewe mwichen sounfiu seni ewe fanü Komer me Pet Tokarma mi nom efengin fanüfan. Iwe, aramasen chomong mwü ra etuk.
EZE 38:7 Kopwe tümwünüöch o amolokotä, en me ewe mwicheichen sounfiu mi chufengen reöm, kopwe pwal ar souemwen.
EZE 38:8 Iwe, mürin chomong rän kopwe antere fän om pisekin maun. Nge lon ekewe ier repwe feito kopwe feila o maun ngeni eu fanü a ngas seni maun o ütäsefäl. Iwe, chon ei fanü ra chufengen seni chomong mwü o liwinto won ekewe chukun Israel, ra tala o pön fansoun langatam. Ekei aramas meinisin ra liwinto seni ekewe mwü o nonom fän kinamwe.
EZE 38:9 Iwe, en me noum kewe mwichen sounfiu meinisin, pwal ekewe mwicheichen aramasen chomong mwü oupwe töpworalong lon ewe fanü usun eu mölümöl. Oupwe usun chök eu kuchu mi pwölüela ewe fanü.”
EZE 38:10 Iei alon Kot ewe Samol mi Lapalap ngeni Kok, “Lon ena rän kopwe aüfarafarätä ekiekin lelukom usun angangen rawangau.
EZE 38:11 Iwe, kopwe apasa, ‘Üpwe töpworalong lon eu fanü esap tit, üpwe pwal maun ngeni aramas mi imweimw fän kinamwe lon ekewe telinimw esap wor tittir me asamalaper me lokkur.
EZE 38:12 Üpwe liapenala pisek o uwala, üpwe pwal maun ngeni ekewe leni mi tala me lom o sosefäl, pwal ngeni ekewe aramas mi chufengen seni ekewe mwü a wor nöür pwiin man me pisekir, ra pwal fanüeni ewe fanü mi nom lukalapen fanüfan.’
EZE 38:13 Chon Sepa me Tetan, pwal ekewe chon amömö seni Tarsis me chon telinimwan meinisin repwe aisinuk, ‘Ifa usun, ka feito pwe kopwe liapenala pisek? Ka achufengeni noum kewe mwichen sounfiu pwe repwe soläni pisek o uwala silifer me kolt, repwe pwal liapenala pwiin man me pisek o feila fän liaper mi chomong?’
EZE 38:14 Iei mine, nöün aramas, kopwe osuni o üreni Kok pwe iei aloi ngang Kot ewe Samol mi Lapalap: Lon ena fansoun, lupwen nei aramasen Israel ra nonom fän kinamwe, kopwe ütä
EZE 38:15 o towu seni lon fanüom mi nom efengin fanüfan, en me aramasen chomong mwü, ir meinisin repwe wawa oris, eu mwichemongun sounfiu mi pwora.
EZE 38:16 Iwe, kopwe maun ngeni nei aramasen Israel o feitiu wor usun eu mölümöl mi tori ewe fanü. Lon kan fansoun repwe feito üpwe tinukela, Kok, pwe kopwe maun ngeni fanüei, pwe chon ekewe mwü repwe sileei, lupwen üpwe pwärala womw me fän meser pwe üa pin.
EZE 38:17 Iei alon Kot ewe Samol mi Lapalap: Ifa usun, sap en ätewe üa kapas usun me lom ren nei kewe chon angang ekewe soufosun Israel? Lon ena fansoun ra osuni lon chomong ier usun ai üpwe emwenuketo pwe kopwe maun ngeni Israel.”
EZE 38:18 Iei alon Kot ewe Samol mi Lapalap, “Lon ewe rän, lupwen Kok epwe feito o maun ngeni ewe fanü Israel, ai song epwe säsewu.
EZE 38:19 Pun lon ekimongun letipei, pwal lon watten ai lingeringer üa pwärätä, pwe lon ewe rän epwe fis eu chech mi fokun lapalap lon ewe fanü Israel.
EZE 38:20 Ekewe ikenen leset, ekewe machang, ekewe man mi watte me kükün meinisin, pwal aramasen won fanüfan meinisin repwe chechech me mwei. Chuk kana repwe turula, achau repwe mökküla, nge tit kana meinisin repwe turutiu won pwül.
EZE 38:21 Üpwe awarato niuokus watte won Kok ren sokopaten feiengau mi fis ngeni. Ngang Kot ewe Samol mi Lapalap üa kapas. Iteiten eman me eman epwe fiu ngeni chiechian fän nöün ketilas.
EZE 38:22 Iwe, üpwe apwüngü Kok ren mätter me nimanau, pwal ren üttomong me ütten fau. Üpwe apwüngätiu ekkei me primston won Kok me nöün mwichen sounfiu meinisin, pwal won ekewe mwicheichen aramasen chomong mwü mi eti.
EZE 38:23 Iei usun üpwe pwärala pwe üa itetekia o pin, üpwe pwal föri pwe itei epwe föüla fän mesen aramasen chomong mwü. Mürin repwe silei pwe ngang ewe Samol mi Lapalap.”
EZE 39:1 “Iwe, nöün aramas, kopwe pwal osuni usun än Kok epwe feiengau. Kopwe apasa pwe iei aloi ngang Kot ewe Samol mi Lapalap: Üpwe ü ngonuk Kok, en samollapen Ros, Mesek me Tupal.
EZE 39:2 Üpwe akünok o panukoto seni efengin fanüfan, üpwe emwenuketo ngeni ekewe chukun Israel, pwe kopwe maun ngeniir.
EZE 39:3 Ikenan üpwe pöni poum pwe om likapich epwe turutiu seni pöüimöngum, nge om föün likapich epwe turutiu seni pöüifichum.
EZE 39:4 Iwe, kopwe mäla won ekewe chukun Israel, en me noum mwichen sounfiu meinisin, pwal ekewe mwicheichen aramasen chomong mwü mi etuk. Inisum üpwe ngeni ekewe machang mi mwacho me ekewe manmwachon lemäl, pwe repwe ocheek.
EZE 39:5 Kopwe mäla won ekewe leni mi amassawa, pun ngang Kot ewe Samol mi Lapalap üa kapas.
EZE 39:6 Üpwe tinala ekkei won ewe fanü Makok, pwal won chokewe mi nonom fän kinamwe lon ekewe fanüen aroset. Mürin, aramas meinisin repwe silei pwe ngang ewe Samol mi Lapalap.
EZE 39:7 Iwe, üpwe pwärala itei mi pin lein nei aramasen Israel, nge üpwe tümwünü pwe itei mi pin esap chüen küna turunufas. Mürin, chon ekewe mwü repwe silei pwe ngang ewe Samol mi Lapalap, Ewe mi Pin lon Israel.
EZE 39:8 Nengeni, iei ewe rän üa kapas usun, epwe fokun fis o pwönüetä,” iei alon Kot ewe Samol mi Lapalap.
EZE 39:9 “Mürin, chon ekewe telinimwen Israel repwe towu o ionifengeni ekewe pisekin maun pwe repwe eäniir amwüch. Ekewe tittin maun mi watte me kükün, ekewe likapich me föür kewe, ekewe nifötüföt me siles repwe eäniir amwüch lon ükükün fisu ier.
EZE 39:10 Iwe, resap chüen kütta amwüch lemal ika pöküpök irä lein ekewe wöllap, pun repwe chök eäni amwüch ekewe pisekin maun. Repwe angei fän pöchökül pisekin chokewe ra angei ar pisek fän pöchökül me lom,” iei alon Kot ewe Samol mi Lapalap.
EZE 39:11 “Lon ena rän üpwe ngeni Kok eu lenien peias lon Israel lon ewe lemol itan Lemolun chon Sai mi nom ötiuen ewe Setin Mäla. Iwe, chon sai resap chüen tongeni fetal lon, pun Kok me nöün mwicheichen sounfiu repwe peias ikenan. Iei mine ewe lemol epwe iteni ‘Lemolun nöün Kok mwicheichen sounfiu.’
EZE 39:12 Lon ükükün fisu maram ekewe chon Israel repwe peiaseni ekewe somä, pwe ewe fanü epwe limöchsefäl.
EZE 39:13 Aramasen ewe fanü meinisin repwe alilisfengen le peiaseniir. Iwe, repwe iteüöch ren ar föri ei lon ewe rän üpwe pwärala ai ling. Ngang Kot ewe Samol mi Lapalap üa kapas.
EZE 39:14 Iwe, wesin ekewe fisu maram repwe filätä mwän, pwe repwe fetalfeil lon ewe fanü o kütta ekewe somä mi chüen nom won. Repwe ireerela, pwe ewe fanü epwe limöch.
EZE 39:15 Iwe, lupwen ekewe mwän mi fetalfeil won ewe fanü repwe küna chün eman aramas, repwe asisila ewe leni tori ekewe chon tuw peias repwe feito o ireerela lon ewe Lemolun nöün Kok mwicheichen sounfiu.
EZE 39:16 (Iwe, epwe pwal wor eu telinimw itan Hamona ikenan.) Iei usun repwe limeti ewe fanü.”
EZE 39:17 Iei alon Kot ewe Samol mi Lapalap, “Nöün aramas, kopwe köri sokopaten machang me manmwacho meinisin, ‘Oupwe feito seni ekis meinisin o mwich, pun üpwe amolätä fän itemi eu asor mi watte won ekewe chukun Israel. Ikenan oupwe ochoch fituk o ün cha.
EZE 39:18 Oupwe ochei fituken ekewe chon pwora o ünümi chan ekewe samolun fanüfan. Ir meinisin ra ninnila usun chök ätemwänin sip, nienifön sip, kuuch me ätemwänin kow mi öümanau seni Pasan.
EZE 39:19 Iwe, lon ewe chulapen asor üpwe amolätä fän itemi oupwe ochoch kiris tori oupwe möt, oupwe pwal ün cha tori oupwe pulas.
EZE 39:20 Üpwe amötükemi me won ai chepel ren oris me chon wäniir, pwal ren chon pwora me sounfiu mi chomong.’ Ngang Kot ewe Samol mi Lapalap üa kapas.
EZE 39:21 Iwe, üpwe pwärala ai ling lein ekewe mwü, nge aramasen ekewe mwü meinisin repwe küna ai üpwe apwüngüür, pwal ai üpwe afeiengaueer ren ai manaman.
EZE 39:22 Iwe, seni ewe rän tori feilfeilachök ekewe aramasen Israel repwe silei pwe ngang ewe Samol mi Lapalap ar we Kot.
EZE 39:23 Nge aramasen ekewe mwü repwe silei pwe ekewe chon Israel ra oola pokiten ar tipis, pun ra kirikiringau ngeniei fän ekisolä. Iei mine üa amona mesei seniir o asechirelong lepöün chon oputeer, pwe repwe mäla lon maun.
EZE 39:24 Iwe, üa liwini ngeniir ükükün ar limengau me ar pupungau o amona mesei seniir.”
EZE 39:25 Iwe, Kot ewe Samol mi Lapalap a apasa: “Iei üpwe aliwinala ekewe mwirimwirin Jakop mi oola, üpwe pwal eäni tong ngeni ekewe chon Israel meinisin o tümwünü pwe itei mi pin epwe iteüöch.
EZE 39:26 Iwe, lupwen repwe nonom lon fanüer fän kinamwe, pun esap chüen wor eman epwe eniwokusuur, repwe manlükala ar itengau pokiten ar kirikiringau ngeniei.
EZE 39:27 Iwe, lupwen üpwe aliwinato nei aramas seni fanüen chon oputeer meinisin, itei mi pin epwe iteüöchsefäl rer me mwen chomong mwü.
EZE 39:28 Mürin repwe silei pwe ngang ewe Samol mi Lapalap ar we Kot. Inamwo ika üa tinirela pwe repwe oola lein chon ekewe mwü, üpwe pwal aliwinireto pwe repwe chufengen lon poputän fanüer, nge üsap likitala eman leir lon ekewe mwü.
EZE 39:29 Üsap pwal chüen amona mesei seniir, pun üpwe tinato Ngüni won ekewe chon Israel. Ngang Kot ewe Samol mi Lapalap üa kapas.”
EZE 40:1 Iwe, lon rüe me limuen ierin ach oola, lepoputän ewe ier, lon aengolun ränin ewe aeuin maram, pwal iei ewe engol me rüanün ier mürin än Jerusalem tala, lon ewe chök ränin, üa mefi pwe ewe Samol mi Lapalap a nom rei ren an manaman.
EZE 40:2 Iwe, lon künaei we, Kot a uweeila lon ewe fanü Israel o anomuei won eu chuk mi fokun tekia. Ikenan üa küna me mwei och mi wewe ngeni eu telinimw.
EZE 40:3 Lupwen a uweeila ikenan, üa küna eman mwän, inisin a usun chök molupolupen piras. Iwe, a ütä lükün ewe asamalap o amwöchü lepöün eu selippich mi pwech, pwal efoch wokun aükük.
EZE 40:4 Iwe, ewe mwän a üreniei, “Nöün aramas, kopwe nengeni ren mesom, kopwe pwal aüseling ren selingom o iseis lon letipom meinisin mine üpwe aiti ngonuk, pun iei popun Kot a emwenuketo ikei. Kopwe asile ngeni chon Israel meinisin mine kopwe küna.”
EZE 40:5 Iwe, üa küna ewe Imwenfel me eu tit a nom pwelin ünükün. Iwe, ewe mwän a angei an wokun aükük, ükükün langataman engol fiit, o aükü ewe tit ren. Iwe, chööchön won ewe tit ükükün engol fiit, nge tekian pwal engol fiit.
EZE 40:6 Mürin, ewe mwän a feila ren ewe asamalap mi sape ngeni ötiu, a feito won ekewe fosso o aükü fän ewe asamalap, iwe, chööchön ükükün engol fiit.
EZE 40:7 A pwal aükü rumwen ekewe chon masen asamalap, langatamer me chölaper ükükün engol fiit, malülün etippen ekewe rum ükükün walu fiit, nge fän ewe asamalap lesopun kangkangan mi sape ngeni ewe Imwenfel ükükün engol fiit.
EZE 40:8 Mürin a aükü lon kengkangen ewe asamalap ükükün engol me rüanü fiit,
EZE 40:9 nge malulun etippen ewe kengkang ükükün rüanü fiit. Iwe, kengkangen ewe asamalap a sape ngeni ewe Imwenfel.
EZE 40:10 Lepekin ewe asamalap mi sape ngeni ötiu a wor wonu rumwen chon mas, ülüngat won epek, ülüngat won epek, nge ükükür a chök wewefengen. Iwe, ekewe etip mi nom lepekin me ruu ra pwal wewefengen.
EZE 40:11 Mürin, ewe mwän a aükü chölapen lon ewe asamalap ükükün rüe me ruu fiit, nge wäwän lefilen ekewe asamalap ükükün engol me wonu fiit.
EZE 40:12 Iwe, mwen ekewe rumwen chon mas me ruu pekin a wor eu tit tekian me malülün rüe inis, nge ekewe rumwen chon mas me rüanü pekin ükükün engol fiit.
EZE 40:13 Mürin a aükü chölapen kengkangen ewe asamalap seni etippen eu ekewe rumwen chon mas me lükisökürün tori etippen pwal eu mi nom awenewenan me epek. Iwe, chölapan ükükün faik me ruu fiit, eu asam a wene ngeni eu asam.
EZE 40:14 A pwal aükü langatamen ewe kengkang ükükün ilik me rüanü fiit, nge a itilong lon ewe leni lükün Imwenfel.
EZE 40:15 Iwe, seni fän mesen ewe kengkang tori lükisökürün ükükün walik me ruanü fiit.
EZE 40:16 A wor asammwacho mi tit ngeni mächä won etippen ekewe rumw me lükün, pwal won etippen lon. Nge won etippen lon a rup liosun ewe irä palm.
EZE 40:17 Mürin, ewe mwän a emwenieilong lon ewe leni lükün Imwenfel. Ikenan üa küna rum me lenien fetal seni fau ünükün ewe leni lükün Imwenfel, nge ükükün ekewe rum mi sape ngeni ewe lenien fetal ilik.
EZE 40:18 Ei lenien fetal a pwer ünükün ekewe asamalap, nge chölapan a usun chök langatamen ekewe asamalap. Iei ewe lenien fetal me fan.
EZE 40:19 Mürin a aükü ewe leni lükün Imwenfel seni lon ewe asamalap fan tori fän mesen asamalapen ewe leni mwen Imwenfel ükükün ipükü wone me walu fiit. Mürin, ewe mwän a akomwola mwei ngeni efeng.
EZE 40:20 Ikenan üa küna eu asamalapen ewe leni lükün Imwenfel mi sape ngeni efeng. Iwe, a aükü langataman me chölapan.
EZE 40:21 Lon ei asamalap a wor ülüngat rumwen chon mas me rüepek, pwal etip mi nom lefiler me kengkangan, ükükür meinisin ra usun chök ükükün ewe aeuin asamalap. Iwe, ükükün langataman walik me rüanü fiit, nge ükükün chölapan faik me ruu fiit.
EZE 40:22 Iwe, asammwachon me kengkangan pwal liosun ewe irä palm mi rup ra usun chök ekewe mi nom won ewe asamalap mi sape ngeni ötiu. Iwe, a wor fisu fosso mi feitä ren ewe asamalap, nge kengkangan a sape ngeni lon.
EZE 40:23 Awenewenen ewe asamalap mi sape ngeni efeng a wor eu asamalap mi wenelong lon ewe leni mwen Imwenfel, a usun chök ewe asamalap mi sape ngeni ötiu. Iwe, ewe mwän a aükü lefilen ekei ruu asamalap ükükün ipükü wone me walu fiit.
EZE 40:24 Mürin, ewe mwän a emwenieila ngeni ör. Ikenan üa küna eu asamalap mi sape ngeni ör. Iwe, a aükü ewe asamalap, nge ükükün a usun chök ükükün ekewe lusun asamalap.
EZE 40:25 Iwe, won rumwen lepekin ewe asamalap me kengkangan a wor asammwacho usun chök asammwachon ekewe lusun asamalap. Iwe, langatamen kengkangan ükükün walik me rüanü fiit, nge chölapan ükükün faik me ruu fiit.
EZE 40:26 Iwe, a wor fisu fosso ra feitä ren ewe asamalap, nge kengkangan a sape ngeni lon. Won ekewe etip me rüepek a rup liosun ewe irä palm.
EZE 40:27 Mi pwal wor eu asamalapen ewe leni mwen Imwenfel mi sape ngeni ör. Iwe, ewe mwän a aükü seni ei asamalap tori pwal ewe eu asamalapen ewe leni lükün mi sape ngeni ör ükükün ipükü wone me walu fiit.
EZE 40:28 Mürin, ewe mwän a emwenieila ren ewe asamalap mi sape ngeni ör o emwenieilong lon ewe leni mwen Imwenfel. Iwe, a aükü ei asamalap, nge ükükün a usun chök ekewe lusun.
EZE 40:29 Iwe, ükükün ekewe rumwen chon mas, pwal ükükün etippan me kengkangan ra usun chök ükükün ekewe lusun. Nge a wor asammwacho pwelin ünükün ewe kengkang me ewe lenien tolong. Iwe, langatamen kengkangan ükükün walik me rüanü fiit, nge chölapan ükükün faik me ruu fiit.
EZE 40:30 (Mi wor kengkang ünükün ewe leni mwen Imwenfel ükükün langatamer faik me ruu fiit, nge ükükün chölaper walu fiit.)
EZE 40:31 Iwe, kengkangen ewe asamalap a sape ngeni ewe leni lükün Imwenfel. Ekewe etip a rup liosun ewe irä palm wor, nge a wor walu fosso mi feitä ren ewe asamalap.
EZE 40:32 Mürin, ewe mwän a emwenieila ren ewe asamalap mi sape ngeni ötiu o emwenieilong lon ewe leni mwen Imwenfel. Iwe, a aükü ewe asamalap, nge ükükün a usun chök ekewe lusun.
EZE 40:33 Iwe, ükükün ekewe rumwen chon mas, pwal ükükün etippan me kengkangan ra usun chök ekewe lusun. Nge a wor asammwacho pwelin ünükün ewe kengkang me ewe lenien tolong. Langatamen kengkangan ükükün walik me rüanü fiit, nge chölapan ükükün faik me ruu fiit.
EZE 40:34 Iwe, kengkangen ewe asamalap a sape ngeni ewe leni lükün Imwenfel. Won ekewe etip me rüepek a rup liosun ewe irä palm, nge a wor walu fosso mi feitä ren ewe asamalap.
EZE 40:35 Mürin, ewe mwän a emwenieila ren ewe asamalap mi sape ngeni efeng. Iwe, a aükü ewe asamalap, nge ükükün a usun chök ekewe lusun.
EZE 40:36 Iwe, ekewe rumwen chon mas, pwal etippan me kengkangan ra usun chök ekewe lusun. Nge a wor asammwacho pwelin ünükün ewe kengkang me ewe lenien tolong. Langatamen kengkangan walik me rüanü fiit, nge chölapan faik me ruu fiit.
EZE 40:37 Iwe, kengkangen ewe asamalap a sape ngeni ewe leni lükün Imwenfel. Won ekewe etip me rüepek a rup liosun ewe irä palm, nge a wor walu fosso, ra feitä ren ewe asamalap.
EZE 40:38 A wor eu rum fiti eu asamalap ren ewe kengkang lon iteiten eu me eu kewe asamalapen lon. Ikenan ra talü ekewe mönün asoren kek.
EZE 40:39 Nge lon kengkangen ewe asamalap a wor akaruu chepel me rüepek, ia ra niela ie ekewe mönün asoren kek me mönün asoren amusamusen tipis, pwal mönün asoren amusamusen pupungau.
EZE 40:40 Iwe, lükün etippen kengkangen ewe asamalap mi sape ngeni efeng arun ewe latö a wor rüanü chepel, ruu won epek, pwal ruu won epek.
EZE 40:41 Iei usun a wor rüanü chepel lon ewe kengkang, pwal rüanü lükün, pwe ükükün ekewe chepel meinisin walu, ia ekewe mönün asor ra ninnila ie.
EZE 40:42 Iwe, a pwal wor rüanü chepel ra för seni fau mi fal fän iten mönün asoren kek. Iwe, ükükün langatamer me chölaper ilik inis, nge tekiar rüe inis. Won ekewe chepel iei lenien iseis pisekin niela ekewe mönün asoren kek me ekewe lusun sokun asor.
EZE 40:43 Won aamen ekewe chepel a wor eu tit mi päilong won, tekian ükükün ülüngat inis. Nge won ekewe chepel ra iseis ewe fituk fän iten asor.
EZE 40:44 Mürin, ewe mwän a emwenieilong lon ewe leni mwen Imwenfel. Ikenan a wor ruu rum. Eu a nom lükün ewe asamalap mi nom peliefeng o sape ngeni ör, nge eu a nom lükün ewe asamalap mi nom peliör o sape ngeni efeng.
EZE 40:45 Iwe, ewe mwän a üreniei, “Ei rum mi sape ngeni ör rumwen ekewe souasor mi wisen föri angangen lon Imwenfel,
EZE 40:46 nge ewe rum mi sape ngeni efeng rumwen ekewe souasor mi wisen föri angangen ewe rongen asor. Ätekei ir nöün Satok, pun ir chök me lein ekewe mwirimwirin Lefi ra tongeni feito fän mesen ewe Samol mi Lapalap, pwe repwe angang ngeni.”
EZE 40:47 Iwe, ewe mwän a aükü ewe leni mwen Imwenfel ükükün langataman me chölapan ipükü wone me walu fiit. Nge fän mesen ewe Imwenfel a wor ewe rongen asor.
EZE 40:48 Mürin, ewe mwän a emwenieila ren kengkangen ewe Imwenfel. A aükü ewe lenien tolong ükükün walu fiit. Iwe, chölapen lon ewe asamalap ükükün rüe me rüanü fiit, nge etippen lepekin me ruu ükükün limu fiit malulun.
EZE 40:49 Iwe, langatamen ewe kengkang ükükün ilik me rüanü fiit, chölapan rüe fiit, nge a wor engol fosso ra feitä ren. Lon ewe asamalap a pwal wor ürelap, efoch won epek, pwal efoch won epek.
EZE 41:1 Mürin, ewe mwän a emwenieilong lon ewe Imwenfel o aükü üran. Iwe, ükükün öün ekewe ür me rüepek engol fiit.
EZE 41:2 Iwe, chölapen ewe asamalap ükükün engol me walu fiit, nge malulun etippen lepekin me ruu ükükün walu fiit. Mürin a aükü langatamen lon ewe Imwenfel ükükün wone me walu fiit, nge chölapan ilik me rüanü fiit.
EZE 41:3 Mürin a tolong lon ewe rum mi nom lesopun ewe Imwenfel o aükü öün üren asamalapan ükükün ülüngat fiit, a pwal aükü chölapen lon ewe asamalap ükükün engol fiit, nge malulun etippen lepekin me ruu ükükün engol me ruu fiit.
EZE 41:4 Iwe, a aükü ewe rum mi nom lesopun ewe Imwenfel ükükün langatamen me chölapen epek ilik me rüanü fiit. Iwe, a üreniei, “Iei ewe leni mi unusen pin.”
EZE 41:5 Mürin, ewe mwän a aükü chööchön won etippen ewe Imwenfel ükükün engol fiit. A pwal aükü ekewe rum mi nom lon ewe pwalang mi nom pwelin ünükün ewe Imwenfel, iwe, chölapen ekewe rum ükükün fisu fiit.
EZE 41:6 A pwal wor ülüngat sässärin pwalangen ewe Imwenfel, nge lon iteiten sässär a wor ilik rum mi pachefengen. Iwe, mi wor along mi iti seni etippen lepekin ewe Imwenfel, pwe irälapen ekewe rum ra nom won ekewe along, nge resap tolong lon etippen ewe Imwenfel.
EZE 41:7 Iwe, chölapen ekewe rumwen won a watte seni chölapen ekewe rumwen fan, pun malulun etippen ewe Imwenfel a kisikisila me asan. Iwe, lepekin ewe Imwenfel eu latö a feitä seni sässärin ekewe rumwen fan tori sässärin lukalapan, pwal tori sässarin won.
EZE 41:8 Üa pwal küna eu lenien fetal mi ekis tekia, a för seni fau o nom pwelin ewe Imwenfel, nge a fiti longolongun ekewe rum, tekian ükükün langatamen ewe wokun aükük ika engol fiit.
EZE 41:9 Iwe, chööchön won etippen ekewe rum me lükün ükükün walu fiit, nge chölapen ewe lenien fetal ünükün ekewe rum ükükün walu fiit.
EZE 41:10 Iwe, chölapen ewe leni lefilen longolongun Imwenfel me ekewe rumwen souasor ükükün ilik me rüanü fiit ekis meinisin.
EZE 41:11 Nge asamalapen ekewe rumwen pwalangen ewe Imwenfel ra sape ngeni ewe lenien fetal, eu ngeni efeng, eu ngeni ör, nge chölapen ewe lenien fetal lükün ekewe rum ükükün walu fiit ekis meinisin.
EZE 41:12 Iwe, a wor eu imw mi nom lotoun ewe lenien Imwenfel, chölapan ükükün ipükü engol me wonu fiit, langataman ükükün ipükü lime fiit, nge chööchön etippan ükükün tiu fiit pwelin ünükün.
EZE 41:13 Mürin, ewe mwän a aükü ewe Imwenfel me lükün ükükün ipükü wone me walu fiit. Iwe, langatamen ewe leni me ewe imw mi nom lotou fiti etippan ükükün ipükü wone me walu fiit.
EZE 41:14 Nge chölapen fän mesen ewe Imwenfel me ewe leni ünükün mi sape ngeni ötiu ükükün ipükü wone me walu fiit.
EZE 41:15 Iwe, a pwal aükü langatamen ewe imw mi nom lotoun ewe leni lükün Imwenfel fiti pwalangan me rüepek ükükün ipükü wone me walu fiit. Iwe, etippen lon ewe Imwenfel me kengkangan, pwal etippen lon ewe rum mi unusen pin
EZE 41:16 ra cheech ngeni pap mi mürina, a pwal wor asammwachor mi tit ngeni mächä. Ekewe etippen lon ewe Imwenfel meinisin ra cheech ngeni pap seni fan tori ekewe asammwacho mi tit ngeni mächä.
EZE 41:17 Iwe, etippen lon ewe Imwenfel tori asen asamalapan, pwal etippen ewe rum mi unusen pin me ewe kengkang ra kula ren lios mi rup,
EZE 41:18 nge ekewe lios ra liosun kerop me ewe irä palm. Iwe, lefilen liosun akaruoman kerop a wor liosun efoch irä palm, nge iteiten kerop a wor ruu won mesan.
EZE 41:19 Eu won mesan mi sape ngeni ewe irä palm me epek a liosun won mesen eman aramas, nge eu won mesan mi sape ngeni ewe irä palm me pwal epek a liosun won mesen eman laion. Iwe etippen lon ewe Imwenfel meinisin a kula ren lios mi rup,
EZE 41:20 pwe a wor liosun kerop me irä palm seni fän etippan tori asen asamalapan.
EZE 41:21 Iwe, chölapen me langatamen penkasamen lon ewe Imwenfel ra wewefengen. Iwe, fän mesen ewe rum mi unusen pin a wor och mettoch mi wewe ngeni
EZE 41:22 eu rongen asor seni mwüch ükükün tekian limu fiit, nge langataman me chölapan ruanü fiit. Lepwokukun pwal longolongun me lepekin ra för seni mwüch. Iwe, ewe mwän a üreniei, “Iei ewe chepel a nom fän mesen ewe Samol mi Lapalap.”
EZE 41:23 Iwe, a wor eu asamalapen ewe Imwenfel me eu asamalapen ewe rum mi unusen pin,
EZE 41:24 nge iteiten ekewe asamalap a wor akaruu asaman mi tufichin suk me kapüng.
EZE 41:25 Iwe, me won asamalapen lon Imwenfel a rup liosun kerop me irä palm usun chök me won ekewe etip. Nge fän mesen kengkangen Imwenfel a wor eu siis seni mwüch.
EZE 41:26 Iwe, won etippen ewe kengkang me rüepek a wor asammwacho, a pwal rup liosun ewe irä palm lepekir me ruu.
EZE 42:1 Mürin, ewe mwän a emwenieiwu lon ewe leni mwen Imwenfel o emwenieila ren eu imw mi nom peliefengin ewe Imwenfel, nge esap toau seni ewe imw mi nom pelilotoun ewe Imwenfel.
EZE 42:2 Iwe, langatamen ewe imw mi nom efeng ükükün ipükü wone me walü fiit, nge chölapan walik me rüanü fiit.
EZE 42:3 Iwe, a wor pwalangen ewe imw me rüepek, nge iteiten pwalang a wor ülüngat sässärin. Eu pwalangan a wene ngeni ewe leni ünükün Imwenfel, chölapan ükükün ilik me rüanü fiit, nge eu pwalangan a wene ngeni eu lenien fetal mi nom lon ewe leni lükün Imwenfel.
EZE 42:4 Mwen ekewe rum a wor eu lenien fetal chölapan ükükün engol me wonu fiit, nge langataman ipükü wone me walu fiit. Iwe asamalapen ekewe rum ra sape ngeni efeng.
EZE 42:5 Iwe, chölapen ewe rumwen asan a chökisikis seni chölapen ekewe rumwen fan, pun ekewe pwalang ra chöwatte me asan lap seni me lukalapan pwal me fan.
EZE 42:6 Iwe, ekewe rum won ekewe ülüngat sässär esap wor ürer usun ekewe ür mi nom lon ewe leni lükün Imwenfel. Iei popun ekewe rumwen asan ra chökisikis seni ekewe rumwen lukalapan me rumwen fan.
EZE 42:7 Iwe, mwen ekewe rum mi sapewu ngeni ewe leni lükün Imwenfel a wor tit mi ouwärer ngeni ekewe rum langataman ükükün walik me rüanü fiit.
EZE 42:8 Pun langatamen tettelin ekewe rum mi sapewu ngeni ewe leni lükün Imwenfel ükükün walik me rüanü fiit, nge langatamen tettelin ekewe rum mi sape ngeni ewe Imwenfel ükükün ipükü wone me walu fiit.
EZE 42:9 Iwe, ekewe rumwen fan mi wor eu lenien tolong, a wene ngeni ötiuen ewe leni lükün Imwenfel lepopun ewe tit.
EZE 42:10 A pwal wor eu imw mi nom peliörün ewe Imwenfel, nge esap toau seni ewe imw mi nom pelilotoun ewe Imwenfel. Iwe, lon ei imw a wor rum,
EZE 42:11 nge mwen ekewe rum a wor eu lenien fetal. Iwe, ekewe rum ra usun chök ekewe mi nom efeng, pun langatamer me chölaper ra wewefengen, pwal ar lenien towu me tolong, pwal lapalaper.
EZE 42:12 Iwe, ekewe rumwen fan mi nom peliörün ewe imw a wor eu lenien tolong, a wene ngeni ötiuen ewe leni lükün Imwenfel.
EZE 42:13 Mürin, ewe mwän a üreniei, “Ekei rum mi nom efeng, pwal ekewe mi nom ör ra wene ngeni ewe leni lükün Imwenfel ra pin. Iei ekewe rum ia ekewe souasor mi angang ngeni ewe Samol mi Lapalap repwe mongö me ie ekewe asor mi unusen pin. Ikenan repwe iseis ekewe asor mi unusen pin, asoren mongö, asoren amusamusen tipis me asoren amusamusen pupungau, pun ei leni a pin.
EZE 42:14 Iwe, lupwen ekewe souasor ra tolong lon ewe leni mi pin, resap tongeni towu lon ewe leni lükün Imwenfel ika resap akomwen pwilitawu üfer mi pin ra üföüf, lupwen ra angang ngeni Kot. Iwe, repwe üföüf pwal och sokun üf mwen ar repwe feila lon ewe leni ia aramas ra mwich ie.”
EZE 42:15 Iwe, lupwen ewe mwän a wes me aükü unusen lon ewe lenien Imwenfel, a emwenieila ren ewe asamalap mi sape ngeni ötiu o emwenieiwu, pwe epwe aükü unusen ewe leni lükün Imwenfel.
EZE 42:16 Iwe, a aükü peliötiuan ren ewe wokun aükük ükükün walüpükü faik fiit.
EZE 42:17 A aükü peliefengin ren ewe wokun aükük ükükün walüpükü faik fiit.
EZE 42:18 A pwal aükü peliörün ren ewe wokun aükük ükükün walüpükü faik fiit.
EZE 42:19 Mürin a feila ngeni pelilotoun o aükü ren ewe wokun aükük ükükün pwal walüpükü faik fiit.
EZE 42:20 Ina usun a aükü ewe leni lepelian me rüanü. Iwe, a wor eu tit pwelin ünükün, langatamen lepekin me rüanü ükükün walüpükü faik fiit. Iwe, ewe tit a refiela lefilen ewe leni mi pin me ewe leni esap pin.
EZE 43:1 Mürin, ewe mwän a emwenieila ren ewe asamalap mi sape ngeni ötiu.
EZE 43:2 Ikenan üa küna lingen ewe Koten Israel, a feito seni ötiu. Iwe, üngüngün an feito a usun chök üngüngün nonoon lematau, nge won fanü a saramaram ren lingan.
EZE 43:3 Iwe, künaei ei me ren Kot a usun chök künaei we üa küna, lupwen Kot a feito pwe epwe ataela ewe telinimw Jerusalem, pwal usun chök künaei we üa küna me arun ewe chanpupu Kepar. Iwe, üa chapetiu lepwül.
EZE 43:4 Nge lingen ewe Samol mi Lapalap a tolong lon ewe asamalap mi sape ngeni ötiu o tolong lon ewe Imwenfel.
EZE 43:5 Mürin, Ngünün Kot a ekieitä o uweeila lon ewe leni mwen Imwenfel, nge lingen ewe Samol mi Lapalap a aurala lon ewe Imwenfel.
EZE 43:6 Iwe, üa rongorong mwelien eman a fos ngeniei seni lon ewe Imwenfel, nge ewe mwän mi eäni ewe angangen aükük a chüen ütä ünüki.
EZE 43:7 Iwe, a üreniei, “Nöün aramas, ei leni ai lenien motun king me lenien puun pechei. Ikei ie üpwe imweimw lein aramasen Israel tori feilfeilachök, nge chon Israel me ar king resap chüen aitengaua itei mi pin ren ar angang ngeni anümwäl, pwal ren somän ar king, lupwen ra peiaseniir.
EZE 43:8 Iwe, ekewe king ra aüetä imwer lükün imwei, pwe asamalapen imwer me penkasamer ra arap ngeni asamalapen imwei me penkasaman, pwe eu chök tit a refi lefilei me ir. Iwe, ra aitengaua itei mi pin ren ar föför mi anioput. Iei mine üa aroserela fän ai song.
EZE 43:9 Iei repwe ükütiu seni ar angang ngeni anümwäl o atoauala seniei somän ar king. Mürin, ngang üpwe imweimw lefiler tori feilfeilachök.”
EZE 43:10 Iwe, ewe Samol mi Lapalap a üreniei, “Nöün aramas, kopwe aiti ngeni chon Israel lapalapen ei Imwenfel me liosun, pwe repwe säw ren ar tipis.
EZE 43:11 Mürin, are ra säw ren ar föför meinisin, kopwe aiti ngeniir lapalapen ei Imwenfel me liosun, pwal an lenien tolong me towu me akotan meinisin, kopwe pwal asile ngeniir pwüngün me allükün. Iwe, kopwe makei ekei mettoch me mwer, pwe repwe küna ei lios o apwönüetä ekewe allük meinisin.
EZE 43:12 Nge iei allükün ei Imwenfel: Unusen lenian me won ungen ewe chuk epwe unusen pin. Iei allükün ei Imwenfel.
EZE 43:13 Iwe, iei ükükün ewe rongen asor, lupwen ewe mwän a aükü ren ewe wokun aükük a fen aea le aükü ewe Imwenfel: Tekian longolongun ewe rongen asor ükükün rüe inis, chööchön won ililin pwal rüe inis, nge tekian repenin mi nom pwelin ünükün ükükün engol inis.
EZE 43:14 Tekian ewe aruuen kinikin fan seni won longolongun mi nom won pwül tori ililin ükükün rüanü fiit, nge chööchön won ililin ükükün rüe inis. Iwe, tekian ewe aülüngatin kinikin mürin seni won ililin fan tori ililin won ükükün fisu fiit, nge chööchön won ililin ükükün rüe inis.
EZE 43:15 Iwe, tekian ewe kinikin ia a nom ie ewe lenien ekkei ükükün fisu fiit, nge tekian mächän lepwokukun me rüanü ükükün rüe inis.
EZE 43:16 Iwe, langatamen ewe lenien ekkei me chölapan ra wewefengen ükükün rüe fiit.
EZE 43:17 Iwe, langatamen ililin ewe kinikin lukalapan me rüanü pekin ra pwal wewefengen ükükün rüe me rüanü fiit, tekian ewe repen mi nom pwelin ünükün engol inis, nge chööchön won ililin ewe longolong rüe inis. Iwe, latön ewe rongen asor a sape ngeni ötiu.”
EZE 43:18 Mürin, Kot a üreniei, “Nöün aramas, iei aloi ngang Kot ewe Samol mi Lapalap, ‘Iei pwüngün angangen ewe rongen asor: Lupwen ei rongen asor a wes me kaü, epwe fis asoren kek won me äsupu ngeni chan ekewe mönün asor.
EZE 43:19 Lon ewe rän kopwe angei eman nienifön ätemwänin kow o ngeni ekewe souasor seni ewe ainangen Lefi, ir mwirimwirin Satok mi feito rei pwe repwe angang ngeniei. Ngang Kot ewe Samol mi Lapalap üa kapas. Iwe, repwe eäni asor ei ätemwänin kow fän iten asoren amusamusen tipis.
EZE 43:20 Nge en kopwe angei ekis seni chan o toofi ngeni ekewe rüanü mächän lepwokukun ewe rongen asor, kopwe pwal toofi ngeni lepwokukun ililin me rüanü, pwal won repenin mi nom pwelin ünükün. Iei usun kopwe limeti ewe rongen asor ren ewe asoren limelim.
EZE 43:21 Mürin kopwe angei ewe ätemwänin kow fän iten asoren amusamusen tipis o kenala lon ewe leni mi fil fän iten ei angang, a nom lükün ewe Imwenfel.
EZE 43:22 Iwe, lon aruuen rän kopwe eäni asoren limelim eman ätemwänin kuuch esap wor terin, pwe ewe rongen asor epwe limöch ren, usun a pwal limöch ren ewe ätemwänin kow.
EZE 43:23 Lupwen kopwe wes me limeti ewe rongen asor, kopwe angei eman nienifön ätemwänin kow me eman ätemwänin sip esap wor terir, pwe kopwe eäniir asor.
EZE 43:24 Kopwe uweereto rei, nge ekewe souasor repwe amwora salt wor o eäniir asoren kek ngeniei.
EZE 43:25 Lon eu me eu rän lon ükükün fisu rän kopwe eäni asoren amusamusen tipis eman ätemwänin kuuch, eman ätemwänin kow me eman ätemwänin sip esap wor terir.
EZE 43:26 Iwe, lon ükükün fisu rän ekewe souasor repwe limeti ewe rongen asor ren asoren limelim, pwe epwe pin ren.
EZE 43:27 Nge wesin ekewe rän, lon ewe awaluen rän, ekewe souasor repwe popuetä le eäni ämi asoren kek me ämi asoren kilisou won ewe rongen asor. Mürin ngang üpwe etiwakemi fän ümöümöch. Ngang Kot ewe Samol mi Lapalap üa kapas.”
EZE 44:1 Iwe, ewe mwän a aliwinieila ren asamalapen ewe leni lükün Imwenfel a sape ngeni ötiu, nge a kapüng.
EZE 44:2 Iwe, ewe Samol mi Lapalap a üreniei, “Ei asamalap epwe chök kapüng, esap fokun suk, nge esap wor eman epwe tolong lon, pun ngang ewe Samol mi Lapalap, ewe Koten Israel, üa tolong me lon. Iei popun epwe kapüng.
EZE 44:3 Iwe, ewe samol chök epwe tongeni mot lon kengkangan, pwe epwe mongö me mwei ngang ewe Samol mi Lapalap. Epwe tolong lon asamalapen kengkangan, epwe pwal chök towu me lon.”
EZE 44:4 Mürin, ewe mwän a emwenieila ren ewe asamalap mi sape ngeni efeng fän mesen ewe Imwenfel. Nge lupwen üa nengeni, üa küna lingen ewe Samol mi Lapalap a aurala ewe Imwenfelin Kot. Iwe, üa chapetiu lepwül.
EZE 44:5 Iwe, ewe Samol mi Lapalap a üreniei, “Nöün aramas, kopwe nengenifichi ren mesom o aüselingöchü ren selingom meinisin mine üpwe aiti ngonuk usun pwüngün angangen ewe Imwenfel me allükün meinisin. Nge kopwe tümwünüfichi, pwe kopwe sileöchü iön epwe tufichin tolong lon ewe Imwenfel, ika iön esap tufichin tolong.
EZE 44:6 Iwe, kopwe apasa ngeni ekewe chon Israel mi lükümach o ü ngeniei, pwe iei aloi ngang Kot ewe Samol mi Lapalap: Ämi chon Israel, iei oupwe ükütiu le föri ämi föför mi anioput.
EZE 44:7 Pun oua mwüt ngeni chon ekis pwe repwe tolong lon ai leni mi pin o apiningaua, ir resap sirkomsais, resap pwal aleasochisiei. Iwe, lupwen ra nom, oua pwal eäni asoren mongö ngeniei, asoren kiris me cha. Ren ei oua awateela ämi föför mi anioput o ataela ämi pwon ngeniei.
EZE 44:8 Iwe, ousap püsin föri angangen lon ai leni mi pin, pun oua awisa chon ekis pwe repwe föri.
EZE 44:9 Iei mine ngang Kot ewe Samol mi Lapalap üa apasa: Esap wor eman chon ekis epwe tolong lon ai leni mi pin, pun ir resap sirkomsais, resap pwal aleasochisiei. Iwe, esap fokun wor mwo nge eman chon ekis mi nom lein chon Israel epwe tolong.
EZE 44:10 Nge ekewe mwän seni ewe ainangen Lefi mi kul seniei, lupwen ekewe chon Israel ra tok seniei o angang ngeni ar kewe uluulun anümwäl, repwe angei liwinin ar tipis.
EZE 44:11 Pun pwüngün pwe repwe chök angang lon ai leni mi pin, repwe mamasa asamalapen Imwenfel o tümwünü ekewe lusun angang. Repwe niela ekewe mönün asoren kek me sokun mönün asor aramas ra uwato, repwe pwal alisi aramas o angang ngeniir.
EZE 44:12 Nge pokiten ra föri fel fän iten ekewe aramas me mwen ar kewe uluulun anümwäl o emwenalong ekewe chon Israel lon tipis, iei mine üa pwon fän akapel pwe repwe fokun angei liwinin ar tipis. Ngang Kot ewe Samol mi Lapalap üa kapas.
EZE 44:13 Resap fokun tongeni feito rei pwe rewe föri angangen eman souasor ngeniei, resap pwal tongeni arap ngeni ai kewe mettoch mi pin me ai kewe asor mi unusen pin. Iwe, repwe mwärelong fän itengau pokiten ekewe föför mi anioput ra föri.
EZE 44:14 Nge üpwe awiseer pwe repwe föri ekewe angangekis meinisin lon ewe Imwenfel.
EZE 44:15 Nge ekewe souasor seni ewe ainangen Lefi, ir mwirimwirin Satok mi allükülük le föri angangen leniei mi pin, lupwen chon Israel ra tok seniei, repwe feito rei o angang ngeniei. Iwe, repwe ütä fän mesei o asor ngeniei kirisin me chan ekewe mönün asor. Ngang Kot ewe Samol mi Lapalap üa kapas.
EZE 44:16 Ir chök repwe tolong lon leniei mi pin o kan ngeni ai rongen asor, pwe repwe föri ar angang ngeniei.
EZE 44:17 Iwe, lupwen ra tolong lon asamalapen ewe leni mwen Imwenfel, repwe üföüf üf mi pwechepwech, nge resap üföüf och üf seni ülen sip, lupwen ra angang lon ewe leni mwen Imwenfel ika lon Imwenfel.
EZE 44:18 Repwe filiti mökürer ngeni mangaku mi pwechepwech, repwe pwal aea rauses seni mangaku mi pwechepwech, nge resap üföüf üf ra pwichikar o molon ren.
EZE 44:19 Iwe, mwen ar towu lon ewe leni lükün Imwenfel ren aramas, repwe pwilitawu ekewe üf ra üföüf, lupwen ra angang ngeniei, o iseniir lon ar kewe rum mi pin. Iwe, repwe üföüf och sokun üf, pun ekewe üf ra pin ngeni aramas.
EZE 44:20 Ekewe souasor resap räisöü mökürer, resap pwal alangatama, pwe repwe chök fichiöchü.
EZE 44:21 Esap wor eman souasor epwe ünümi wain mwen an tolong lon ewe leni mwen Imwenfel.
EZE 44:22 Esap wor eman epwe pwülüeni eman fefin mi mä pwülüan ika eman fefin mi mwü seni pwülüan, pwe epwe chök pwülüeni eman föpwül seni ekewe ainangen Israel esamwo pwüpwülü me mwan, ika eman fefin mi mä pwülüan, pwülüen eman souasor.
EZE 44:23 Iwe, ekewe souasor repwe aiti ngeni nei aramas kana lefilen mine a pin me mine esap pin, repwe pwal aiti ngeniir usun ar repwe alefila mine a limengau me mine a limöch.
EZE 44:24 Repwe eäni kapwüng lon eu fitikoko, nge repwe apwüngala pwüngün kapwüng ren pwüngün ai allük. Repwe tümwünüöchü ai kewe allük usun pwüngün ekewe ränin chulap, repwe pwal pinini pinin ai ränin sapat.
EZE 44:25 Iwe, esap wor eman souasor epwe kan ngeni eman somä, pwe esap püsin alimengaua, chilon chök ren somän saman me inan, nöün mwän me fefin, pwiin pwal fefinan resamwo pwüpwülü.
EZE 44:26 Nge lupwen eman souasor epwe limöchsefäl seni an limengau ren eman somä, epwe pwal witiwit fisu rän mwen an epwe tolongsefäl lon Imwenfel.
EZE 44:27 Iwe, lon ränin an tolong lon ewe leni mwen Imwenfel pwe epwe föri an angang lon, epwe föri asoren amusamusen an tipis, ngang Kot ewe Samol mi Lapalap üa kapas.
EZE 44:28 Iwe, ekewe souasor esap wor wiser fanü, pun ngang chök wiser. Ousap ngeniir och wöür lon Israel, pun ngang wöür.
EZE 44:29 Nge repwe mongö seni ekewe asoren mongö, asoren amusamusen tipis, pwal seni asoren amusamusen pupungau. Iwe, meinisin mine ekewe chon Israel ra fangala ngeniei, epwe än ekewe souasor.
EZE 44:30 Iwe, mwen uän fotar irä meinisin, pwal sokun asor meinisin ra uwato repwe än ekewe souasor. Repwe pwal ngeni ekewe souasor mwen öüwäer pilawa seni mwen uän fotar wiich, pwe feiöch epwe nonom won imwer.
EZE 44:31 Nge ekewe souasor resap fokun ochoch och fituken machang ika man mi püsin mäla ika mäla ren manmwacho.”
EZE 45:1 “Iwe, lupwen oupwe aineti ewe fanü ngeni ekewe ainangen Israel, oupwe aimwüela eu kinikin fän iten ewe Samol mi Lapalap, pwe epwe eu leni mi pin. Iwe, ükükün langataman engol mail, nge chölapan ükükün walu mail. Unusen ei fanü epwe pin.
EZE 45:2 Nge lon ei kinikin mi pin oupwe pwal aimwüela eu leni fän iten ewe Imwenfel langataman me chölapan ükükün walüpükü faik fiit. Iwe, epwe pwal wor eu leni mi amassawa ünükün, chölapan ükükün walik me rüanü fiit.
EZE 45:3 Seni lon ewe kinikin mi pin oupwe pwal aükü eu leni langataman ükükün engol mail, nge chölapan ükükün rüanü mail. Ei leni epwe fän iten ewe Imwenfel, epwe eu leni mi unusen pin.
EZE 45:4 Ei kinikinin fanü epwe pin me lon fanüemi. Iwe, epwe fanüen ekewe souasor mi föri angangen ewe leni mi pin o feito ren ewe Samol mi Lapalap, pwe repwe angang ngeni. Iwe, ei fanü epwe lenien imwer, pwal eu leni mi pin fän iten ewe Imwenfel.
EZE 45:5 Pwal eu kinikinin ewe leni epwe fanüen chon ewe ainangen Lefi mi föri angangen lon Imwenfel, langataman ükükün engol mail, nge chölapan ükükün rüanü mail. Iwe, chon ewe ainangen Lefi repwe nonom lon ei fanü.
EZE 45:6 Iwe, lepekin ewe leni mi pin oupwe pwal aimwüela eu kinikin fän iten ewe telinimw, chölapan ükükün ruu mail, nge langataman ükükün engol mail. Ei kinikin epwe fän iten chon Israel meinisin.
EZE 45:7 Iwe, fän iten ewe samol oupwe aimwüela ruu fanü lesopun ewe leni mi pin me rüepek, pwal lepekin ewe fanü ia ewe telinimw a nom ie. Eu epwe seni kiännin ewe leni me pelilotou tori ewe matau watte. Nge eu epwe seni kiännin ewe leni mi pin me peliötiu tori kiännin ewe fanü me peliötiu. Iwe, langatamen ekewe fanü epwe wewefengen me kiännin fanüen ekewe ainangen Israel.
EZE 45:8 Iei ükükün fanüen ewe samol me lon Israel. Iwe, nei kewe samol resap chüen ariaföüü nei aramas, nge repwe mwüt ngeni ekewe ainangen Israel fanüer pwe repwe püsin fanüeni.
EZE 45:9 Iei alon Kot ewe Samol mi Lapalap, “Oupwe ükütiu, ämi samolun Israel, oupwe ükütiu le föri föför mi mwänewüs me ariaföüü aramas, nge oupwe eäni pwüng me föföröch. Ousap chüen asüela nei aramas seni fanüer. Ngang Kot ewe Samol mi Lapalap üa kapas.
EZE 45:10 Ämi kilo epwe pwüngüöch, pwal ämi efa me ämi paat .
EZE 45:11 Iwe, ükükün eu efa me eu paat epwe wewefengen. Eu paat epwe ükükün eu leengolun eu homer , nge eu efa epwe pwal ükükün eu leengolun eu homer. Iwe, eu homer longolongun ämi aükük.
EZE 45:12 Iwe, eu sekel epwe ükükün rüe kera. Nge rüe sekel kapach rüe me limu sekel pwal kapach engol me limu sekel epwe eu mina.”
EZE 45:13 “Iwe, iei ükükün ekewe asor oupwe eäni: Oupwe asor eu lewone seni kiniemi wiich, pwal eu lewone seni kiniemi parli.
EZE 45:14 Nge ewe apüra oupwe eäni asor epwe ükükün eu leipükü seni kiniemi föün olif. Ewe aükük epwe longolong won paat: Engol paat eu koor ika eu homer.
EZE 45:15 Iteiten familien chon Israel epwe eäni asor eman sip seni iteiten akaruopükü sip. Iei ewe asoren mongö, asoren kek me asoren kilisou fän iten amusamusen ämi tipis. Ngang Kot ewe Samol mi Lapalap üa kapas.
EZE 45:16 Iwe, aramasen ei fanü meinisin repwe uwato ekei asor ren ewe samolun Israel.
EZE 45:17 Nge ewe samol epwe wisen awora ekewe asoren kek, asoren mongö me asoren ün mi fis lupwen ekewe chulap, lupwen chulapen popun maram me ekewe ränin sapat, pwal sokun chulap meinisin chon Israel ra eäni. I epwe awora ewe mönün asoren amusamusen tipis, ewe asoren mongö me asoren kek, pwal asoren kilisou fän iten amusamusen än chon Israel tipis.”
EZE 45:18 Iei alon Kot ewe Samol mi Lapalap, “Lon aeuin ränin ewe aeuin maram oupwe eäni asor eman nienifön ätemwänin kow esap wor terin, pwe oupwe limeti ewe Imwenfel ren.
EZE 45:19 Ewe souasor epwe angei ekis chan ewe mönün asoren amusamusen tipis o toofi ngeni penkasamen ewe Imwenfel, ngeni won ililin ewe rongen asor lepwokukun me rüanü, pwal ngeni penkasamen ewe asamalap mi wene ngeni ewe leni mwen Imwenfel.
EZE 45:20 Iei usun oupwe pwal föri lon afisuen ränin ewe maram fän iten ekewe aramas mi tipis ren ar chechengau. Ina usun oupwe limeti ewe Imwenfel.
EZE 45:21 Lon engol me rüanün ränin ewe aeuin maram oupwe eäni ewe Pasofer. Iwe, lon ükükün fisu rän oupwe mongö pilawa esap wor iis lon.
EZE 45:22 Lon aeuin rän ewe samol epwe eäni asoren amusamusen tipis eman nienifön ätemwänin kow fän püsin itan, pwal fän iten aramasen ewe fanü meinisin.
EZE 45:23 Nge lon eu me eu ekewe fisu ränin chulap, ewe samol epwe eäni asoren kek ngeni ewe Samol mi Lapalap füman ätemwänin kow me füman ätemwänin sip esap wor terir. Iwe, epwe eäniir asoren kek iteiten rän lon ükükün fisu rän, epwe pwal eäni asoren amusamusen tipis eman ätemwänin kuuch iteiten rän.
EZE 45:24 Epwe pwal apacha ngeni iteiten eman kow me kuuch pilawa mi amas ükükün ilik paun me ülüngat kuoch apüra seni föün olif fän iten asoren mongö.
EZE 45:25 Iwe, lupwen ewe chulapen likachoch mi poputä lon engol me limuen ränin ewe afisuen maram, ewe samol epwe uwato ewe chök asoren amusamusen tipis, asoren kek, pwal asoren mongö fiti ewe apüra lon ükükün fisu rän.”
EZE 46:1 Iei alon Kot ewe Samol mi Lapalap, “Asamalapen ewe leni mwen Imwenfel mi sape ngeni ötiu epwe kapüngüla lupwen ekewe wonu ränin angang, nge epwe sukula lon ränin sapat, pwal lon ränin chulapen popun maram.
EZE 46:2 Iwe, ewe samol epwe tolong me lon kengkangen ewe asamalap mi sape ngeni ewe leni lükün Imwenfel o ütä ren üran, nge ekewe souasor repwe eäni än ewe samol asoren kek, pwal an kewe asoren kilisou. Iwe ewe samol epwe fel ngeni Kot me lon ewe asamalap. Mürin epwe towu, nge ewe asamalap esap kapüngüla tori lekuniol.
EZE 46:3 Iwe, lon iteiten ekewe ränin sapat, pwal lon iteiten ekewe ränin chulapen popun maram, aramasen ewe fanü repwe fel ngeni ewe Samol mi Lapalap mwen ewe asamalap.
EZE 46:4 Nge lon ränin sapat än ewe samol asoren kek ngeni ewe Samol mi Lapalap epwe wonoman apanen sip, pwal eman ätemwänin sip esap wor terir.
EZE 46:5 Iwe, epwe apacha ngeni ewe ätemwänin sip pilawa mi amas ükükün ilik paun, nge ngeni iteiten ekewe apanen sip epwe apacha ükükün an mochen fiti ülüngat kuoch apüra seni föün olif fän iten iteiten ilik paun pilawa mi amas, pwe asoren mongö.
EZE 46:6 Nge lon ränin chulapen popun maram ewe samol epwe eäni asor eman nienifön ätemwänin kow, pwal wonoman apanen sip me eman ätemwänin sip esap wor terir.
EZE 46:7 Iwe, epwe apacha ngeni iteiten ätemwänin kow me ätemwänin sip pilawa mi amas ükükün ilik paun, nge ngeni iteiten ekewe apanen sip epwe apacha ükükün an mochen fiti ülüngat kuoch apüra seni föün olif fän iten iteiten ilik paun pilawa mi amas pwe asoren mongö.
EZE 46:8 Lupwen ewe samol epwe tolong, epwe chök tolong me lon kengkangen ewe asamalap, epwe pwal towu chök me lon.
EZE 46:9 Iwe, aramasen ewe fanü repwe feito ren ewe Samol mi Lapalap lon fansoun ar kewe chulap mi kefilitä, pwe repwe fel ngeni. Nge wesin ar fel, chokewe ra tolong me lon ewe asamalap mi sape ngeni efeng repwe towu me lon ewe asamalap mi sape ngeni ör, nge chokewe ra tolong me lon ewe asamalap mi sape ngeni ör repwe towu me lon ewe asamalap mi sape ngeni efeng. Iwe, esap wor eman epwe liwiniti ewe asamalap a tolong me lon, nge iteiten eman me eman epwe chök fetal wenewen.
EZE 46:10 Lupwen ekewe aramas repwe tolong, ewe samol epwe pwal etiir le tolong, nge lupwen repwe towu, epwe pwal etiir le towu.
EZE 46:11 Iwe, lon ekewe rän mi pin me ekewe ränin chulap mi kefilitä, aramas repwe apacha ngeni iteiten ätemwänin kow me ätemwänin sip ilik paun pilawa mi amas fän iten ar asoren mongö, nge ngeni ekewe apanen sip repwe apacha ükükün ar mochen fiti ülüngat kuoch apüra seni föün olif fän iten iteiten ilik paun pilawa mi amas.
EZE 46:12 Are ewe samol epwe eäni asor ngeni ewe Samol mi Lapalap eu asoren kek ika asoren kilisou seni püsin letipan, ewe asamalap mi sape ngeni ötiu epwe suk ngeni. Iwe, epwe eäni an we asoren kek ika asoren kilisou usun a föri lon ekewe ränin sapat. Nge wesin an towu, ewe asamalap epwe kapüngüla me mürin.
EZE 46:13 Iwe, iteiten lesosor oupwe eäni asoren kek ngeni ewe Samol mi Lapalap eman nienifön sip eu ierin, esap wor terin.
EZE 46:14 Iteiten lesosor oupwe pwal eäni asoren mongö ngeni ewe Samol mi Lapalap limu paun pilawa mi amas me eu kuoch apüra seni föün olif, pwe epwe nofitfengen me ewe pilawa. Iei usun pwüngün ewe asor epwe fis iteiten rän, epwe chök pwönüetä tori feilfeilachök.
EZE 46:15 Iei usun oupwe eäni asoren kek eman nienifön sip fiti ewe pilawa mi amas me ewe apüra iteiten lesosor. Ei asoren kek epwe fis fansoun meinisin.”
EZE 46:16 Iei alon Kot ewe Samol mi Lapalap, “Are ewe samol epwe fang ngeni eman nöün mwän eu fanü seni wisan, ätewe epwe fanüeni ewe fanü.
EZE 46:17 Nge are ewe samol epwe fangala eu fanü ngeni eman nöün chon angang, i epwe chök fanüeni tori ewe Ierin Ngasala. Mürin, ewe fanü epwe liwiniti ewe samol, pwe püsin nöün mwän chök repwe fanüeni, pun fanüer me won semer.
EZE 46:18 Iwe, ewe samol esap tongeni angei fanüen aramas o asürela seni fanüer. Iwe, mine epwe afanüa ngeni nöün mwän, epwe chök ngeniir seni püsin fanüan, pwe esap wor eman lein nei aramas kana epwe towu seni fanüan.”
EZE 46:19 Mürin, ewe mwän a emwenieilong lon ewe asamalap mi nom lepekin ewe kengkang o emwenieila ren ekewe rum mi pin rumwen ekewe souasor mi sap ngeni efeng. Ikenan üa küna eu leni mi nom lesopun ekewe rum mi sap ngeni lotou.
EZE 46:20 Iwe, a üreniei, “Iei ewe leni ia ekewe souasor repwe kuku fituken ekewe mönün asoren amusamusen pupungau me amusamusen tipis ie. Ikei repwe pwal umuni ewe asoren mongö, nge resap uwala och lon ewe leni lükün Imwenfel, pun a pin ngeni aramas.”
EZE 46:21 Mürin, ewe mwän a emwenieila lon ewe leni lükün Imwenfel, pwal ngeni lepwokukun me rüanü. Iwe, lon iteiten pwokuku üa küna eu kükün leni.
EZE 46:22 Iwe, lepwokukun ewe leni lükün Imwenfel me rüanü a wor leni mi tit langatamer ükükün wone me walu fiit, nge chölaper faik me walu fiit. Nge ekewe rüanü leni ra wewefengen.
EZE 46:23 Iwe, lon iteiten ekewe rüanü leni a wor eu tit seni fau pwelin ünükün, nge ünükün me fän ewe tit a wor lenien kuk.
EZE 46:24 Mürin, ewe mwän a üreniei, “Ikei ekewe lenien kuk ia ekewe chon angangen lon Imwenfel repwe kuku ekewe mönün asor ie, aramas ra uwato pwe ar asor.”
EZE 47:1 Mürin, ewe mwän a aliwinisefälieila ren asamalapen ewe Imwenfel. Ikenan üa küna eu koluk a puwu seni fän asamalapen ewe Imwenfel o pula ngeni ötiu, pun ewe Imwenfel a sape ngeni ötiu. Iwe, ewe koluk a putiu me peliörün ewe Imwenfel, pwal me peliörün ewe rongen asor.
EZE 47:2 Mürin, ewe mwän a emwenieiwu me lon ewe asamalap mi sape ngeni efeng o emwenieila lükün ren asamalapen ewe leni lükün Imwenfel mi sape ngeni ötiu. Iwe, ewe koluk a puwu me peliörün ewe asamalap.
EZE 47:3 Lupwen ewe mwän a feila ötiu, a amwöchü efoch selin aükük o aükü ükükün limepükü wone iach. Mürin a emwenieilong lon ewe koluk, nge ewe koluk a tori kirupun pechei.
EZE 47:4 Iwe, a aüküsefäli ükükün limepükü wone iach o emwenieila lon ewe koluk, nge a tori pwäsuki. Mürin a pwal aüküsefäli ükükün limepükü wone iach o emwenieila lon ewe koluk, nge a tori won wilai.
EZE 47:5 Iwe, a pwal aüküsefäli ükükün limepükü wone iach, nge iei ewe koluk a wiliti eu chanpupu üsap chüen tongeni fetal lon. Pun ewe chanpupu a fefeitä, a pwal alolol pwe üa chök tongeni ää, nge üsap tongeni fetalla epek.
EZE 47:6 Iwe, ewe mwän a aisiniei, “Nöün aramas, ifa usun, ka küna ei?” Mürin a aliwinieila lepekin ewe chanpupu.
EZE 47:7 Nge lupwen üa tori, üa küna chomong irä lepekin me rüepek.
EZE 47:8 Iwe, a üreniei, “Ei koluk a pula ngeni ewe fanü mi nom ötiu, a putiu lemolun Jortan o pulong lon ewe Setin Mäla. Nge lupwen a pulong lon, ewe sät epwe wiliti koluk mi mürina.
EZE 47:9 Iwe, ia ewe chanpupu a pula ie, epwe wor sokopaten man me chomong ik. Pun ia ewe chanpupu a tori ie, ekewe sät repwe wiliti koluk mi mürina. Iei usun epwe wor manau ia ewe chanpupu a pula ie.
EZE 47:10 Iwe, chon attau repwe ütä ünükün, nge seni Enketi tori Eneklaim epwe eu lenien ar apwas epilo. Iwe, ikenen lon repwe sokopat usun chök ikenen ewe matau watte.
EZE 47:11 Nge ekewe warawar me pwakak esap fis manau lon, pwe salt epwe chök nom lon.
EZE 47:12 Iwe, lepekin ewe chanpupu me rüepek epwe märitä chomong sokun irän mongö. Chör resap pwasala, uar resap itela, pwe epwe wor uar mi nup iteiten maram, pun ewe koluk ra manau ren a puwu seni ewe leni mi pin. Iwe, aramas repwe mongö uar, repwe pwal pöchökül seni ar samau ren chör.”
EZE 47:13 Iei alon Kot ewe Samol mi Lapalap, “Iei usun ekewe kiä oupwe aea le aineti ewe fanü ngeni ekewe engol me ruu ainangen Israel. Chon ewe ainangen Josef repwe fanüeni ruu kinikin.
EZE 47:14 Iwe, oupwe kinikinöchfengen won ei fanü. Pun üa pwon fän akapel ngeni ämi kewe lewo pwe üpwe ngeniir ei fanü, iei mine ämi oupwe faffanü seni.
EZE 47:15 Iei usun kiännin ewe fanü: Lepelian me efeng epwe popuetä seni ewe matau watte wenewenen Hetlon tori Hamat, pwal tori Setat,
EZE 47:16 Perota, Sipraim mi nom lekiännin lefilen Tamaskus me Hamat, epwe pwal tori Haserhatikon mi nom lekiännin Hauran.
EZE 47:17 Ina usun kiännin ewe fanü epwe fetal seni ewe matau watte tori Hasarenon, pwe fanüen Tamaskus me fanüen Hamat repwe nom efeng. Iei usun kiännin ewe fanü me efeng.
EZE 47:18 Iwe, ewe chanpupu Jortan epwe kiännin ewe fanü me ötiu seni Hasarenon lefilen Hauran me Tamaskus, pwal lefilen ewe fanü Kiliat me ewe fanü Israel tori ewe Setin Mäla, pwal tori Tamar. Iei usun kiännin ewe fanü me ötiu.
EZE 47:19 Iwe, lepelien ewe fanü me ör kiännin epwe fetal seni Tamar tori ewe kolukun Meripa-Kates, tori ewe öüwön Isip, pwal tori ewe matau watte. Iei usun kiännin ewe fanü me ör.
EZE 47:20 Nge kiännin ewe fanü me lotou ewe matau watte tori awenewenen Hamat. Iei usun kiännin ewe fanü me lotou.
EZE 47:21 Oupwe aineti ewe fanü lefilemi won eu me eu ainangen Israel.
EZE 47:22 Oupwe aineti ewe fanü ren üttüt, pwe oupwe fanüeni, ämi me ekewe chon ekis mi nom leimi, pwal nöür kewe mi uputiu ngeniir. Iwe, ir repwe usun chök chon Israel me remi, pwe repwe etikemi le faffanü ewe fanü me lein chon ekewe ainangen Israel.
EZE 47:23 Oupwe awisa ngeni iteiten chon ekis wisan me lon ewe ainang ia a nonom ie. Ngang Kot ewe Samol mi Lapalap üa kapas.”
EZE 48:1 “Iei iten ekewe ainang: Tan epwe fanüeni ewe kinikin mi nom lekiännin ewe fanü me efeng, a popuetä seni ewe matau watte wenewenen Hetlon tori Hamat, pwal tori Hasarenon, pwe ewe fanü Tamaskus me ewe fanü Hamat repwe nom efeng. Iei ewe fanü Tan me lon ewe fanü Israel seni lepelian me ötiu tori lepelian me lotou.
EZE 48:2 Ünükün ewe fanü Tan, seni lepelian me ötiu tori lepelian me lotou, Aser epwe fanüeni eu kinikin.
EZE 48:3 Iwe, ünükün ewe fanü Aser, seni lepelian me ötiu tori lepelian me lotou, Naftali epwe fanüeni eu kinikin.
EZE 48:4 Ünükün ewe fanü Naftali, seni lepelian me ötiu tori lepelian me lotou, Manasa epwe fanüeni eu kinikin.
EZE 48:5 Iwe, ünükün ewe fanü Manasa, seni lepelian me ötiu tori lepelian me lotou, Efraim epwe fanüeni eu kinikin.
EZE 48:6 Ünükün ewe fanü Efraim, seni lepelian me ötiu tori lepelian me lotou, Rupen epwe fanüeni eu kinikin.
EZE 48:7 Nge ünükün ewe fanü Rupen, seni lepelian me ötiu tori lepelian me lotou, Juta epwe fanüeni eu kinikin.
EZE 48:8 Iwe, ünükün ewe fanü Juta, seni lepelian me ötiu tori lepelian me lotou, epwe nom ewe kinikin oupwe aimwüela. Iwe, chölapan epwe ükükün engol mail seni lepelian me efeng tori lepelian me ör, nge langataman epwe usun chök langatamen kinikinin fanüen ekewe ainang seni lepelian me ötiu tori lepelian me lotou. Iwe, ewe Imwenfel epwe nom lukalapan.
EZE 48:9 Nge langatamen ewe kinikin oupwe aimwüela fän iten ewe Samol mi Lapalap epwe ükükün engol mail, nge chölapan walu mail.
EZE 48:10 Iwe, ewe kinkinin fanü mi pin fän iten ekewe souasor epwe iei usun: Langatamen lepelian me efeng, pwal lepelian me ör epwe ükükün engol mail, nge chölapen lepelian me lotou pwal lepelian me ötiu epwe ükükün rüanü mail. Iwe, ewe Imwenfel fän iten ewe Samol mi Lapalap epwe nom lukalapan.
EZE 48:11 Iwe, ei kinikin epwe lenien ekewe souasor ir mwirimwirin Satok, chokewe mi likitü le angang ngeniei, nge resap eti chon Israel le tok seniei, usun chon ewe ainangen Lefi ra föri.
EZE 48:12 Iei usun ekewe souasor repwe angei ei kinikin mi imwüla seni ewe fanü mi pin, a nom ünükün fanüen chon ewe ainangen Lefi. Ei fanü epwe eu fanü mi unusen pin.
EZE 48:13 Ünükün ei kinikinin fanüen ekewe souasor epwe nom ewe kinikin fän iten chon ewe ainangen Lefi, langataman epwe ükükün engol mail, nge chölapan rüanü mail. Iei langatamen unusen ewe leni mi pin ükükün engol mail, nge chölapan walu mail.
EZE 48:14 Ei fanü a mürina seni meinisin. Esap wor eman a tongeni amömöla och seni ika akasiwili ngeni eu fanü, esap pwal wor eman a tongeni fang ngeni eman eu kinikinin, pun a pin fän iten ewe Samol mi Lapalap.
EZE 48:15 Iwe, ewe lusun fanü chölapan ükükün ruu mail, langataman engol mail, epwe lenien ewe telinimw fän iten aramas, pwe repwe imweimw lon o foleni nöür man won. Iwe, ewe telinimw epwe nom lukalapan.
EZE 48:16 Iei usun ükükün ewe telinimw: Langatamen lepelian me efeng, lepelian me ör, lepelian me ötiu pwal me lotou repwe wewefengen ükükün ruungeröü limepükü rüe iach.
EZE 48:17 Ünükün ewe telinimw epwe wor eu leni mi amassawa, chölapen lepelian me efeng, lepelian me ör, lepelian me ötiu pwal me lotou repwe wewefengen ükükün ipükü faik iach.
EZE 48:18 Iwe, ekewe lusun fanü ünükün ewe leni mi pin, eu a nom lepekin ewe telinimw me ötiu, langataman ükükün rüanü mail, nge pwal eu a nom lepekin me lotou, langataman ükükün rüanü mail. Iwe, chon angangen ewe telinimw repwe manau seni mongön ei leni.
EZE 48:19 Chon ekewe ainangen Israel meinisin mi angang lon ewe telinimw repwe tanipini ewe fanü.
EZE 48:20 Iwe, unusen ewe kinikinin fanü oupwe aimwüela langataman me chölapan repwe wewefengen ükükün engol mail. Iei ewe kinikin, ewe leni mi pin me ewe telinimw repwe nom ie.
EZE 48:21 Iwe, ekewe lusun fanü, ekewe mi nom lesopun me ruu pekin ewe leni mi pin, pwal lepekin lenien ewe telinimw, repwe fanüen ewe samol. Iwe, eu kinikin langataman ükükün engol mail, seni kiännin ewe leni mi pin tori kiännin fanüen ekewe ainangen Israel me ötiu. Nge pwal eu kinikin langataman ükükün engol mail, seni kiännin ewe leni mi pin tori kiännin fanüen ekewe ainangen Israel me lotou. Iei ükükün fanüen ewe samol, nge ewe leni mi pin me ewe Imwenfel repwe nom lukalaper.
EZE 48:22 Iwe, fanüen chon ewe ainangen Lefi pwal ewe telinimw repwe nom lukalapen ekewe kinikinin fanüen ewe samol. Nge fanüen ewe samol epwe pwal nom lefilen fanüen chon ewe ainangen Juta me fanüen chon ewe ainangen Peniamin.
EZE 48:23 Iei fanüen ekewe lusun ainangen Israel: Peniamin epwe fanüeni eu kinikin me lon ewe fanü Israel seni lepelian me ötiu tori lepelian me lotou.
EZE 48:24 Iwe, ünükün ewe fanü Peniamin seni lepelian me ötiu tori lepelian me lotou, Simeon epwe fanüeni eu kinikin.
EZE 48:25 Ünükün ewe fanü Simeon seni lepelian me ötiu tori lepelian me lotou, Isakar epwe fanüeni eu kinikin.
EZE 48:26 Iwe, ünükün ewe fanü Isakar seni lepelian me ötiu tori lepelian me lotou, Sepulon epwe fanüeni eu kinikin.
EZE 48:27 Nge ünükün ewe fanü Sepulon seni lepelian me ötiu tori lepelian me lotou, Kat epwe fanüeni eu kinikin.
EZE 48:28 Iwe lepeliörün ewe fanü Kat kiännin ewe fanü Israel epwe fetal seni Tamar tori ewe kolukun Meripa-Kates, tori ewe öüwön Isip, pwal tori ewe matau watte.
EZE 48:29 Iei usun oupwe aineti ewe fanü ngeni ekewe ainangen Israel pwe repwe fanüeni, pwal iei usun kinikinir,” iei alon Kot ewe Samol mi Lapalap.
EZE 48:30 “Iwe, ikei ekewe lenien towu me lon ewe telinimw: Ewe tit mi nom peliefeng langataman ükükün rüengeröü limepükü rüe iach,
EZE 48:31 epwe wor ülüngat asamalap iter Rupen, Juta me Lefi. Pun ekewe asamalap ra iteni iten ekewe ainangen Israel.
EZE 48:32 Ewe tit mi nom peliötiu langataman ükükün rüengeröü limepükü rüe iach, epwe wor ülüngat asamalap iter Josef, Peniamin me Tan.
EZE 48:33 Ewe tit mi nom peliör langataman ükükün rüengeröü limepükü rüe iach epwe wor ülüngat asamalap iter Simeon, Isakar me Sepulon.
EZE 48:34 Ewe tit mi nom pelilotou langataman ükükün rüengeröü limepükü rüe iach epwe pwal wor ülüngat asamalap iter Kat, Aser me Naftali.
EZE 48:35 Iwe, langatamen unusen tittin ewe telinimw ükükün engol ngeröü walik iach. Nge seni ei otun ewe telinimw epwe iteni: Ewe Samol mi Lapalap a nom ikenan.”
DAN 1:1 Lon aülüngatin ierin mwün Joiakim ewe kingen Juta, Nepukatnesar ewe kingen Papilon a feito Jerusalem o maun ngeni.
DAN 1:2 Iwe, ewe Samol a asechalong Joiakim ewe kingen Juta lepöün Nepukatnesar. Nepukatnesar a pwal angei ekoch pisek seni Imwenfelin Kot o uweerela lon ewe fanü Papilon lon imwen an we kot, pwe epwe iseis lon an lenien pisek mi aüchea.
DAN 1:3 Mürin, ewe king a allük ngeni Aspenas ewe meilapen chon tümwünü imwen ewe king, pwe epwe emwenato ekoch aramasen Israel seni familien ewe king, pwal seni familien aramas mi tekia,
DAN 1:4 alüal esap ter inisir, ra äteöch me mirit, ra tipachem o wewekai, ra pwal tufich ngeni ar repwe angang lon imwen king. Iwe, ekewe alüal repwe wisen kaiö maken Papilon me fosun ie.
DAN 1:5 Iwe, ewe king a ngeniir wiser mongö seni püsin anan mongö mi anö me ünüman wain iteiten rän. Repwe kaiö lon ükükün ülüngat ier, mürin repwe angang ngeni ewe king.
DAN 1:6 Iwe, ekoch me lein ekewe alüal seni ewe ainangen Juta iter Taniel, Hanania, Misael me Asaria.
DAN 1:7 Nge ewe meilapen chon tümwünü imwen ewe king a siwili iter: Taniel a aita ngeni Peltesasar, Hanania a aita ngeni Satrak, Misael a aita ngeni Mesak, nge Asaria a aita ngeni Apetneko.
DAN 1:8 Nge Taniel a amolätä letipan pwe esap alimengaua ren enen ewe king mongö mi anö me ünüman wain. Iei mine a tüngor ngeni Aspenas, epwe mwüt ngeni pwe esap alimengaua ren ekewe mongö.
DAN 1:9 Iwe, Kot a angang lon leluken Aspenas pwe a eäni ümöümöch me tong ngeni Taniel.
DAN 1:10 Iwe, Aspenas a üreni Taniel, “Üa niueiti ewe king ai we samol, pun a allük usun mine oupwe eni ika ünümi. Are epwe küna pwe oua kichüchü seni pilomi alüal, epwe tongeni nieila.”
DAN 1:11 Mürin, Taniel a churi ewe chon souwan, ätewe a fil me ren Aspenas pwe epwe tümwünü Taniel, Hanania, Misael me Asaria.
DAN 1:12 Iwe, Taniel a üreni, “Kopwe sotuni noum chon angang lon ükükün engol rän. Kopwe chök amongöökem iäsäi o aünükem koluk.
DAN 1:13 Wesin ekewe rän kopwe anönöfengeni inisim me inisin ekewe alüal ra mongö seni enen ewe king mongö mi anö. Mürin, kopwe föri ngenikem ükükün mefiom.”
DAN 1:14 Iwe, ewe chon souwan a mwüt ngeniir ar we tüngor o sotuniir lon ükükün engol rän.
DAN 1:15 Nge wesin ekewe engol rän a pwä pwe inisir a pöchökül o aümanau seni inisin ekewe alüal mi mongö seni enen ewe king mongö mi anö.
DAN 1:16 Iei mine ewe chon souwan esap chüen ngeniir ener mongö mi anö me ünümer wain, nge a chök amongöör iäsäi.
DAN 1:17 Iwe, Kot a fang ngeni ekewe föman alüal mirit me tipachem me sokun silelap lon pekin puk me weweiti tipachemen aramas. Nge Taniel a wor an tufichin awewei sokun tan me künään aramas.
DAN 1:18 Iwe, lupwen a tori fansoun ar repwe feito fän mesen ewe king, usun a fen allük me mwan, Aspenas a emwenato ekewe alüal meinisin mwen Nepukatnesar.
DAN 1:19 Iwe, ewe king a kapas ngeniir, nge esap küna eman leir a wewe ngeni Taniel, Hanania, Misael me Asaria. Iei mine ra fil pwe repwe angang ngeni ewe king.
DAN 1:20 Lon sokopaten tipachem me silelap meinisin ewe king a ais ngeniir won, a küna pwe ekewe föman alüal ra silelap fän engol lap seni ekewe soutipachem me ekewe sourong mi angang lon unusen mwün.
DAN 1:21 Nge Taniel a nonom lon imwen ewe king tori aeuin ierin mwün Sirus ewe kingen Persia.
DAN 2:1 Lon aruuen ierin mwün Nepukatnesar, Nepukatnesar a eäni ekoch tan. Iwe, letipan esap kinamwe ren, esap pwal tongeni maür.
DAN 2:2 Iei mine ewe king a titi ekewe soutipachem me sourong, pwal ekewe soupwe me souürür, pwe repwe feito o awewe ngeni an kewe tan. Iwe, ra tolong o ütä fän mesen ewe king.
DAN 2:3 Iwe, a üreniir, “Üa eäni eu tan, nge letipei esap kinamwe ren ai mochen silei wewen.”
DAN 2:4 Mürin, ekewe souürür ra üreni ewe king lon fosun Aramaik, “Amwo ewe king epwe manau tori feilfeilachök. Kose mochen kopwe apworausa ngenikem om we tan, nge äm aipwe awewe ngonuk wewen.”
DAN 2:5 Iwe, ewe king a pälüeni ekewe souürür, “Iei chök ekiekin letipei, nge üsap fokun siwili, pwe oupwe pwäri ngeniei ai we tan o awewe ngeniei wewen. Nge are ousap tongeni, üpwe üttawu pöümi me pechemi seni inisimi o ataela imwemi.
DAN 2:6 Nge are oua pwäri ngeniei ai we tan o awewe ngeniei wewen, üpwe ngenikemi chomong lifang mi aüchea o aitöchükemi. Iei mine oupwe pwäri ngeniei ai we tan o awewe ngeniei wewen.”
DAN 2:7 Iwe, ekewe souürür ra üreni fän aruuan, “Äm king, kopwe apworausa ngenikem om we tan, nge äm aipwe awewe ngonuk wewen.”
DAN 2:8 Nge ewe king a pälüeniir, “Üa fokun mefi pwe oua chök mochen atümwününgauaei, pokiten oua silei pwe üsap fokun siwili ekiekin letipei.
DAN 2:9 Are ousap pwäri ngeniei ai we tan, epwe chök fis ngenikemi mine üa apasa. Iwe, oua pwüngüpwüngfengen me mwan pwe oupwe atupuei ren ämi kapas chofana ngeniei, pun oua apilükülükü pwe epwe siwil masouen fansoun. Iei mine oupwe pwäri ngeniei ai we tan, mürin üpwe silei pwe oua tongeni awewe ngeniei wewen.”
DAN 2:10 Nge ekewe souürür ra üreni ewe king, “Esap fokun wor eman aramas won fanüfan a tongeni föri mine en king ka mochen, esap pwal wor eman king mi lap ika sounemenem a achimwa eman soutipachem ika sourong ika souürür, pwe epwe pwäri ngeni usun och mi wewe ngeni ei.
DAN 2:11 A men weires mine en king ka mochen, pun esap wor eman epwe tongeni pwäri ngonuk, chilon chök ekewe kot, nge ir resap nonom lein aramas.”
DAN 2:12 Iei popun ewe king a fokun song o lingeringer, a pwal allük pwe ekewe soutipachem meinisin lon Papilon repwe ninnila.
DAN 2:13 Iwe, lupwen a pwüngüla ewe allük pwe ekewe soutipachem repwe ninnila, ra pwal kütta Taniel me chienan kana pwe repwe ninnila.
DAN 2:14 Nge lupwen Ariok ewe samolun sounfiu mi wisen tümwünü ewe king a feila pwe epwe niela ekewe soutipachemen Papilon, Taniel a kapas ngeni fän mirit me lukpwetete.
DAN 2:15 Iwe, a aisini Ariok, “Pwota a kon pöchökül än ewe king allük?” Nge Ariok a awewefichi ngeni Taniel usun popun me wewen.
DAN 2:16 Iwe, Taniel a tolong ren ewe king o tüngor ngeni, pwe epwe mwüt ngeni eu fansoun an epwe witiwit fän iten an epwe awewe ngeni ewe king wewen an we tan.
DAN 2:17 Mürin, Taniel a feila lon imwan o apworausa ngeni Hanania, Misael me Asaria chienan kewe ei pworaus.
DAN 2:18 A pwal pese ngeniir pwe repwe tüngor ngeni ewe Koten läng an ümöümöch, pwe epwe pwäri ngeniir ewe monomon o amanaueer, pwe resap ninnila fiti ekewe soutipachemen Papilon.
DAN 2:19 Iwe, lon ewe chök pwinin, ewe monomon a pwä ngeni Taniel lon künaan. Mürin, Taniel a mwareiti ewe Koten läng.
DAN 2:20 Iwe, a apasa, “Üpwe mwareiti Kot tori feilfeilachök, pun i a eäni tipachem me manaman.
DAN 2:21 A siwili fansoun me kinikinin, a asapwilätiu king kana o seikiretä lon wiser, a pwal fang ngeni chon tipachem ar tipachem o ngeni chon silelap ar silelap.
DAN 2:22 Iwe, a pwäri mine a alolol o monomon, a silei mine a op lon rochopwak, pun saram a nom ren.
DAN 2:23 Üa kilisou ngonuk, en ewe Kot än ai kewe lewo, üa pwal ingemwareituk ren om fang ngeniei tipachem me tufich. Ka pälüeni äm iotek o pwäri ngenikem monomonen än ewe king we tan.”
DAN 2:24 Iei mine Taniel a feila ren Ariok, ätewe ewe king a awisa pwe epwe niela ekewe soutipachemen Papilon. Iwe, a üreni, “Kosap niela ekewe soutipachemen Papilon. Kopwe emwenieila fän mesen ewe king pwe üpwe awewe ngeni wewen an we tan.”
DAN 2:25 Mürin, Ariok a müttir emwenala Taniel fän mesen ewe king o üreni, “Üa küna eman mwän lein ekewe chon oola seni Juta, epwe tongeni awewe ngonuk, en king, wewen om we tan.”
DAN 2:26 Iwe, ewe king a aisini Taniel mi pwal iteni Peltesasar, “Ifa usun, ka tongeni pwäri ngeniei ai we tan o awewe ngeniei wewen?”
DAN 2:27 Nge Taniel a pälüeni ewe king, “Esap wor eman soutipachem me sourong ika soupwe me souürür epwe tongeni pwäri ngonuk en king ewe monomon ka mochen silei.
DAN 2:28 Nge mi wor eman Kot won läng a pwäri mine a monomon, a pwal pwäri ngonuk, en king Nepukatnesar, mine epwe fis me mürin. Iei usun om we tan me künaom, lupwen ka annut.
DAN 2:29 Ai king, lupwen ka kon won om peet, ka kon ekimongei lon letipom usun mine epwe fis me mürin. Nge ewe mi pwäri monomon a pwäri ngonuk mine epwe fis.
DAN 2:30 Nge ngang üsap silei usun ei monomon pokiten ai tipachem, pun ai tipachem esap lap seni än aramas tipachem. A chök pwä ngeniei fän iten ai üpwe awewe ngonuk en king wewen, pwe kopwe silei usun ekiekin letipom.
DAN 2:31 Ai king, ka küna eu uluulun aramas mi fokun watte o tekia, a ütä mwom, a fokun meriweriw o wesewesen eniweniw.
DAN 2:32 Iwe, möküren ei uluulun aramas a för seni kolt mi mürina, leaüngan me pöün ra för seni silifer, nge upwan me aföön ra för seni piras.
DAN 2:33 Iwe, pechen ra för seni mächä, nge eu kinikinin pachapachan a för seni mächä, pwal eu a för seni pwül.
DAN 2:34 Nge lupwen ka nenengeni, eföü fau watte a turuwu seni lenian, nge esap wor eman aramas a pünüüw. Iwe, ewe fau a tori ewe uluulun aramas o küw pachapachan mi för seni mächä me pwül pwe ra mökküla.
DAN 2:35 Mürin, ewe mächä, ewe pwül, ewe piras, ewe silifer me ewe kolt ra mökküla meinisin, pwe ra wewe ngeni pön wiich lon lenien wichiwich umwun wiich lupwen fansoun leres. Iwe, asepwäl a ässirela pwe resap chüen nom. Nge ewe fau mi amökkü ewe uluulun aramas a wiliti eu chukutekia o amasoua unusen fanüfan.
DAN 2:36 Iei om we tan, nge iei üpwele awewe ngonuk en king wewen.
DAN 2:37 Ai king, en ewe king mi lap seni king meinisin, pun ewe Koten läng a ngonuk mwum, nemenem, manaman me ling.
DAN 2:38 Kot a pwal fangolong lepoum aramas, mönün lemäl me machangen faileng seni ekis meinisin, pwe kopwe nemeniir meinisin. Iei mine en ewe mökür a för seni kolt.
DAN 2:39 Iwe, mürum epwe feito eu mwü mi kisitiu fän mwum. Nge mürin epwe pwal wor aülüngatin mwü a wewe ngeni ewe piras, epwe nemeni unusen fanüfan.
DAN 2:40 Iwe, epwe pwal feito arüanün mwü a pöchökül usun mächä. Pun usun mächä a amökkü o atatakisi mettoch meinisin, iei usun ei mwü epwe atai ekewe mwü mi akom mwan.
DAN 2:41 Iwe, usun ka küna pachapachen ewe uluulun aramas me aütün pechen, pwe eu kinikin a för seni pwül, nge eu kinikin a för seni mächä, iei usun ewe mwü epwe kinikinfesen. Nge ekis seni pöchökülen ewe mächä epwe chüen nom lon ewe mwü, usun ka küna pwe ewe mächä a nofitfengen me ewe pwül.
DAN 2:42 Pwal usun eu kinikinin aütün pechen a för seni mächä, nge eu a för seni pwül, iei usun eu kinikinin ewe mwü epwe pöchökül, nge eu epwe apwangapwang.
DAN 2:43 Iwe, usun ka küna ewe mächä mi nofitfengen me ewe pwül, iei usun ekewe chon nemeni ewe mwü repwe ririfengen le pwüpwülü, nge resap tongeni pachefengen, usun chök mächä esap pachefengen me pwül.
DAN 2:44 Iwe, lon fansoun mwün ekewe king, ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.
DAN 2:45 Iei wewen ewe fau ka küna pwe a turuwu seni lenian, nge esap wor eman a pünüüw ewe fau, a amökkü ewe mächä, ewe piras, ewe pwül, ewe silifer me ewe kolt. Iwe, ewe Kot mi lapalap a aiti ngonuk en king mine epwe fis me mürin. Masouen ewe tan a let, nge wewen a pwüng.”
DAN 2:46 Mürin, ewe king Nepukatnesar a chapetiu lepwül o asamolu Taniel. A pwal apasa pwe repwe asor ngeni mongö me apach mi pwokus.
DAN 2:47 Iwe, ewe king a üreni Taniel, “Ellet, om we Kot a fokun tekia seni ekewe kot meinisin, a pwal lap seni ekewe king meinisin, a tufichin pwäri mine a monomon, pun en ka tufichin pwäri ei monomon.”
DAN 2:48 Mürin, ewe king a alapätä Taniel, a pwal lifang ngeni chomong pisek mi aüchea. Iwe, a seikätä Taniel pwe epwe wisen nemenem lon unusen ewe sop itan Papilon, epwe pwal sounemenemen soutipachemen Papilon meinisin.
DAN 2:49 Iwe, pokiten Taniel a tüngor, ewe king a seikätä Satrak, Mesak me Apetneko pwe repwe kisin fän Taniel le nemenem lon ewe sop itan Papilon. Nge Taniel a chök nom lon imwen ewe king.
DAN 3:1 Iwe, ewe king Nepukatnesar a föri eu uluulun aramas seni kolt, tekian ükükün tiwe fiit, nge öün tiwu fiit. Iwe, a anomu lon ewe maasiesin Tura lon ewe sop itan Papilon.
DAN 3:2 Mürin, ewe king a körifengeni ekewe kepina me sounemenem, ekewe nöüwis tekia me souemwen, ekewe chon tümwünü moni me souapwüng, ekewe samol me nöüwisen ekewe sop meinisin. Iwe, a titiir pwe repwe eti mwichen afinünen ewe uluulun aramas i ewe king Nepukatnesar a aüetä.
DAN 3:3 Iwe, ekei nöüwis meinisin ra chufengen fän iten efinünen ewe uluulun aramas ewe king Nepukatnesar a föri. Iwe, ra ütä me mwan.
DAN 3:4 Iwe, ewe chon arong a kökkö fän leüömong, “Ämi aramasen fanü me mwü meinisin, pwal aramas mi eäni sokopaten fos, iei än ewe king allük ngenikemi.
DAN 3:5 Lupwen oupwe rong tikin rappwa, aangün, kitar, keseng, faiolin me sokun pisekin ettik, oupwe chapetiu o fel ngeni ewe uluulun aramas mi för seni kolt ewe king Nepukatnesar a aüetä.
DAN 3:6 Nge iö esap chapetiu o fel ngeni, epwe koturulong lon ewe lenien ekkei mi fokun sarara lon ewe chök otun.”
DAN 3:7 Iwe, lupwen ekewe aramasen fanü me mwü pwal aramas mi eäni sokopaten fos ra rong tikin ekewe sokopaten pisekin ettik, ra chapetiu o fel ngeni ewe uluulun aramas mi för seni kolt, ewe king Nepukatnesar a aüetä.
DAN 3:8 Iwe, lon ewe fansoun ekoch chon Papilon ra etto o aturu ekewe chon Juta.
DAN 3:9 Ra üreni ewe king Nepukatnesar, “Amwo ewe king epwe manau tori feilfeilachök.
DAN 3:10 Äm king, ka föri ewe allük pwe aramas meinisin mi rong tikin ekewe sokopaten pisekin ettik repwe chapetiu o fel ngeni ewe uluulun aramas mi för seni kolt.
DAN 3:11 Ka pwal allük pwe iö esap chapetiu o fel ngeni, epwe koturulong lon ewe lenien ekkei mi fokun sarara.
DAN 3:12 Iwe, mi wor ekoch chon Juta iter Satrak, Mesak me Apetneko, ka seikiretä pwe repwe nöüwisen ewe sop itan Papilon. Ätekei ra aleasolapa alom pwe resap angang ngeni om kewe kot, resap pwal fel ngeni om we uluulun aramas ka aüetä.”
DAN 3:13 Mürin, Nepukatnesar a fokun lingeringer o allük pwe repwe emwenato Satrak, Mesak me Apetneko. Iwe, ra emwenireto fän mesen ewe king.
DAN 3:14 Nge Nepukatnesar a kapas ngeniir, “Ifa usumi Satrak, Mesak me Apetneko, a pwüng pwe ousap mochen fel ngeni ai kewe kot ika chapetiu ngeni ai we uluulun aramas mi för seni kolt üa aüetä.
DAN 3:15 Iwe, are oupwe rong tikin rappwa, aangün, kitar, keseng, faiolin me sokun pisekin ettik o chapetiu pwe oupwe fel ngeni ai we uluulun aramas mi för seni kolt, meinisin epwe mürina ngenikemi. Nge are ousap fel ngeni, oupwe koturulong lon ewe lenien ekkei mi fokun sarara lon ewe chök otun. Ifa usun, epwe wor eman kot mi tongeni amanauakemi seni lepei?”
DAN 3:16 Iwe, Satrak, Mesak me Apetneko ra üreni ewe king, “Äm king Nepukatnesar, esap wor och mine aipwe pälüeni ngonuk pwe epwe penikem won ei mettoch.
DAN 3:17 Nge are epwe fis ngenikem pwe aipwe koturulong lon ewe lenien ekkei mi fokun sarara, äm we Kot aia angang ngeni epwe tongeni amanauakem seni. Ewer, i epwe angasakem seni lepoum en äm king.
DAN 3:18 Nge are esap amanauakem, en äm king kopwe silei pwe äm aisap fel ngeni om kewe kot, aisap pwal chapetiu ngeni om we uluulun aramas mi för seni kolt ka aüetä.”
DAN 3:19 Mürin, Nepukatnesar a fokun lingeringeriti Satrak, Mesak me Apetneko, pwe a wowongau ngeniir. Iwe, a allük pwe repwe sonisefäli ewe ekkei, pwe pwichikaran epwe tori fän fisu seni me mwan.
DAN 3:20 Iwe, a körato ekoch sounfiu mi pöchökül seni an mwichen sounfiu pwe repwe föti Satrak, Mesak me Apetneko o atururolong lon ewe lenien ekkei mi fokun sarara.
DAN 3:21 Iwe, ra föti ätekei fän üfer owokot me imwer akau pwal sokun üf ra üföüf, o atururolong lon ewe lenien ekkei mi fokun sarara.
DAN 3:22 Iwe, ewe lenien ekkei a fokun sarara pokiten ar achocho le apwönüetä än ewe king allük mi fokun pöchökül. Iei mine pulopulen ewe ekkei a ngetewu o niela ätekewe mi aturalong Satrak, Mesak me Apetneko.
DAN 3:23 Iwe, ekei ülüman mwän Satrak, Mesak me Apetneko ra turulong lukalapen ewe lenien ekkei fän fööföör.
DAN 3:24 Nge lupwen ewe king Nepukatnesar a nenela lon ewe ekkei, a weitifengeni o müttir ütä. Iwe, a aisini nöün kewe souemwen, “Ifa usun, sisap föti ülüman mwän o atururolong lon ei ekkei?” Nge ra pälüeni, “Ewer, äm king.”
DAN 3:25 Iwe, ewe king a apasa, “Nge pwota üa küna föman mwän resap fööfö, ra fetal lukalapen ewe ekkei, nge resap feiengau. Iwe, lapalapen ewe afömanün a usun chök eman nöün ekewe kot?”
DAN 3:26 Mürin, Nepukatnesar a feila ren asamen ewe lenien ekkei mi fokun sarara o kökkö, “Satrak, Mesak me Apetneko, ämi chon angang ngeni ewe Kot mi Fokun Tekia, oupwe towu o feito rei.” Iwe, ra towu seni lon ewe ekkei.
DAN 3:27 Iwe, ekewe kepina me sounemenem, ekewe nöüwis tekia me nöün ewe king souemwen ra mwicheto ren ekewe ülüman mwän o küna pwe inisir esap kar ren ewe ekkei, meten mökürer esap pwoiwi, üfer owokot resap kar, nge esap pwal wor pwoaraarütten ekkei wor.
DAN 3:28 Iwe, Nepukatnesar a apasa, “Üpwe mwareiti än Satrak, Mesak me Apetneko we Kot. A tinato nöün chon läng pwe epwe angasa nöün chon angang mi lükü i. Iwe, ra purätiu ai kewe allük o fangela inisir, pun resap mochen chapetiu o fel ngeni eman kot lükün ar we Kot.
DAN 3:29 Iei mine ngang üa föri eu allük, pwe ika eman aramasen eu fanü me mwü, ika eman aramas mi eäni sokopaten fos epwe eäni kapasen turunufas ngeni än Satrak, Mesak me Apetneko we Kot, pöün me pechen repwe üttüwu seni inisin, nge imwan epwe tala. Pun esap wor eman kot a tongeni amanaua aramas usun ar we Kot.”
DAN 3:30 Mürin, ewe king a seikätä Satrak Mesak me Apetneko o awiseer ngeni wis tekia lon ewe sop itan Papilon.
DAN 4:1 Iei ewe pworaus king Nepukatnesar a asile ngeni aramasen fanü me mwü meinisin, pwal ngeni aramas mi eäni sokopaten fos me won unusen fanüfan: Kinamwe mi somwola epwe torikemi meinisin.
DAN 4:2 Seni pwapwan letipei üpwe asile ngenikemi usun ekewe asisil me ekewe manaman ewe Kot mi Unusen Tekia a föri ngeniei.
DAN 4:3 Ekewe asisil Kot a föri ra fokun amwarar, an kewe manaman ra fokun ling. Mwün epwe nom tori feilfeilachök, nge an nemenem epwe fis seni eu täppin aramas tori pwal eu täppin.
DAN 4:4 Ngang Nepukatnesar üa nom lon imwei imwen king fän kinamwe o nonomöch.
DAN 4:5 Nge üa eäni eu tan mi fokun aniuokusuei. Lupwen üa annut, a wor künaei mi fokun amwökütükütü letipei.
DAN 4:6 Iei mine üa körato soutipachemen Papilon meinisin, pwe repwe feito rei o awewe ngeniei wewen ai we tan.
DAN 4:7 Iwe, ekewe soutipachem me sourong, ekewe souürür me soupwe ra feito. Iwe, üa apworausa ngeniir ai we tan, nge resap tongeni awewe ngeniei wewen.
DAN 4:8 Mürin, Taniel a feito rei, ätewe mi pwal iteni iten ai we kot Peltesasar, Ngünün ewe Kot mi Pin a nom won. Iwe, üa apworausa ngeni ai we tan,
DAN 4:9 “Peltesasar, samolun ekewe soutipachem, üa silei pwe Ngünün ewe Kot mi Pin a nom womw, kosap pwal weires le pwäri mine a monomon. Iei ai we tan. Kose mochen kopwe awewe ngeniei wewen.
DAN 4:10 Lupwen üa annut won ai peet, üa küna efoch irä mi fokun tekia lukalapen fanüfan.
DAN 4:11 Iwe, ewe irä a mämäritä o pöchökülela tori ülülan a tori läng, nge aramasen fanüfan meinisin ra tongeni küna.
DAN 4:12 Iwe, chön ra mürina, a pwal fokun uamong, pwe a ku ngeni aramas meinisin pwe repwe mongö. Iwe, mönün lemäl ra nom fän nürün, ekewe machang ra fas won palan kewe, nge mönümanau meinisin ra mongö seni.
DAN 4:13 Lupwen üa ekieki usun masouen ai we tan, üa pwal tan pwe eman chon künö mi pin a feitiu seni läng.
DAN 4:14 Iwe, a kökkö fän leüömong, ‘Oupwe ukufi ewe irä o pöküela palan, oupwe pwal amätärala chön o atoropasafeili uan. Iwe, ekewe mönün lemäl repwe sü seni fan, ekewe machang repwe pwal ässila seni won palan kewe.
DAN 4:15 Nge oupwe likitala popun me waran lon pwül, oupwe pwal föti ren selimächä me piras lein ekewe fetilin lemäl. Iwe, ei mwän epwe chöchön ren amurenipwin o eti mönün lemäl le mongö fetil.
DAN 4:16 Iwe, tipan epwe soko seni tipen aramas, pwe epwe tipeni tipen man. Ina usun epwe fis ngeni lon ükükün fisu ier.
DAN 4:17 Ei allük a pwüngüla me ren ekewe chon künö mi pin, a pwal rongofeil me rer, pwe aramas repwe silei pwe Ewe mi Fokun Tekia a nemeni mwün aramas, repwe pwal silei pwe a fangala nemenem ngeni iö a mochen fang ngeni o seikätä chon tekison pwe repwe nemenem.’
DAN 4:18 Iei usun ewe tan ngang king Nepukatnesar üa eäni. Nge en Peltesasar kopwe awewe ngeniei wewen, pun ekewe soutipachem meinisin mi nom lon mwüi resap tongeni. Iwe, nge en ka tongeni, pun Ngünün ewe Kot mi Pin a nom womw.”
DAN 4:19 Mürin än Taniel mi pwal iteni Peltesasar rongorong ei pworaus, a fanfanala fän mairü, pun letipan a fokun mwökütüküt ren wewen ewe tan. Nge ewe king a apasa, “Peltesasar, kosap niuokus le awewe ngeniei wewen ai we tan.” Iwe, Peltesasar a üreni, “Ai samol, amwo pekingauen wewen om we tan epwe fän iten chon oputok me chon pälüenuk.
DAN 4:20 Ka küna efoch irä mi mämäritä o pöchökülela tori ülülan a tori läng, nge aramasen fanüfan meinisin ra tongeni küna.
DAN 4:21 Iwe, chön ra mürina, a pwal fokun uamong, pwe a ku ngeni aramas meinisin pwe repwe mongö. Iwe, mönün lemäl ra nom fän nürün, machang ra pwal fas won palan kewe.
DAN 4:22 Ai king, en ka wewe ngeni ewe irä, pun ka mämäritä o pöchökülela. Om iteüöch a fefeitä pwe a tori läng, nge om nemenem a tori unusen fanüfan meinisin.
DAN 4:23 Iwe, en king ka küna eman chon künö mi pin a feitiu me läng o apasa, ‘Oupwe ukufi ewe irä o ataela, nge oupwe likitala popun me waran lon pwül, oupwe pwal föti ren selimächä me piras lein ekewe fetilin lemäl. Iwe, ei mwän epwe chöchön ren amurenipwin o eti mönün lemäl le mongö fetil lon ükükün fisu ier.’
DAN 4:24 Iei usun wewen om we tan, ai king, pwal iei pwüngün mine Ewe mi Fokun Tekia a apwüngala pwe epwe fis ngonuk ai king.
DAN 4:25 Iwe, aramas repwe asuukela seni me leir, pwe kopwe nonom lein ekewe mönün lemäl. Lon ükükün fisu ier kopwe mongö fetil usun chök kow, kopwe pwal chöchön ren amurenipwin. Mürin kopwe mefi pwe Ewe mi Fokun Tekia a nemeni mwün aramas, nge a fangala nemenem ngeni iö a mochen fang ngeni.
DAN 4:26 Iwe, a pwal wor wewen alon ewe chon künö pwe popun me waren ewe irä repwe nonom. Kopwe nemenisefäli mwum, lupwen kopwe mefi pwe Kot a nemeni unusen fanüfan.
DAN 4:27 Iei mine ai king, kose mochen kopwe tipeeu ngeni ai kapas. Kopwe aier seni om tipis o eäni föförün pwüng, kopwe pwal ekieksefäl seni om föföringau o eäni tong ngeni chon riaföü. Ren ei, om nonomöch epwe soposopola.”
DAN 4:28 Ekana mettoch meinisin ra fis ngeni ewe king Nepukatnesar.
DAN 4:29 Iwe, engol me ruu maram mürin, ewe king a fetal won imwan lon Papilon
DAN 4:30 o apasa, “Sap iei Papilon ewe telinimw mi lapalap üa aüetä fän ai tufich me pöchökül pwe ai lenien king, epwe pwal alinga lingen ai nemenem?”
DAN 4:31 Iwe, lupwen a chüen kapas, mwelien eman a feitiu seni läng o apasa, “Asile ngonuk king Nepukatnesar, pwe iei kosap chüen nemeni mwum.
DAN 4:32 Aramas repwe asuukela seni me leir pwe kopwe nonom lein ekewe mönün lemäl. Kopwe mongö fetil usun chök kow lon ükükün fisu ier, tori kopwe mefi pwe Ewe mi Fokun Tekia a nemeni mwün aramas, nge a ngeni iö a mochen fang ngeni.”
DAN 4:33 Lon ewe chök otun pwüngün ewe kapas a fis ngeni Nepukatnesar. Aramas ra asüela seni me leir, a pwal mongö fetil usun kow, nge inisin a chöchön ren amurenipwin. Iwe, feilfeil möküran a langatam usun chök ülöülen ikel, nge kün ra usun chök kün machang.
DAN 4:34 Iwe, ewe king a üra, “Wesin ekewe fisu ier, ngang Nepukatnesar üa netä läng o miritsefäl. Iwe, üa mwareiti Ewe mi Fokun Tekia o manau tori feilfeilachök, üa pwal alinga o asamolu i. Pun an nemenem esap müchüla, nge mwün a nonom seni eu täppin aramas tori pwal eu täppin.
DAN 4:35 Iwe, esap wor aüchean chon fanüfan meinisin me ren Kot. A föri mochenin letipan ngeni mwicheichen chon läng, pwal ngeni chon fanüfan meinisin. Iwe, esap wor eman a tongeni pinei mine a föri ika aisini, ‘Met ka föri?’
DAN 4:36 Lon ewe otun lupwen üa miritsefäl, a pwal torisefäliei iteüöchi me itetekiai me lingen mwüi. Iwe, nei kewe souemwen me samol ra tipenisefäliei, üa pwal tosefälilong lon wisei wisen king, nge ai nemenem a chök lapala.
DAN 4:37 Iei mine ngang Nepukatnesar üpwe mwareiti o asamolu ewe Kingen Läng, üpwe pwal alinga i. An föför ra let o pwüng, nge a atekisona chokewe mi eäni lamalamtekia.”
DAN 5:1 Lon eu pwin ewe king Pelsasar a föri eu kametip mi lapalap fän iten nöün kewe engeröü samol. Iwe ra fokun ünüfengen wain.
DAN 5:2 Nge lupwen Pelsasar a ekis puch ren ünüman wain, a apasa pwe repwe uwato ekewe kap kolt me silifer Nepukatnesar saman we a angei seni ewe Imwenfel lon Jerusalem. Pun Pelsasar a mochen pwe i me nöün kewe samol, pwal pwülüan me ülüpwülüan kana repwe aea le ün.
DAN 5:3 Iwe, ra uwato ekewe kap kolt me silifer mi nom lon ewe Imwenfelin Kot lon Jerusalem me lom, nge ewe king me nöün kewe samol, pwal pwülüan me ülüpwülüan kana ra ün wain lor.
DAN 5:4 Ra pwal mwareiti ar kewe uluulun kot ra för seni kolt, silifer, piras, mächä, irä me fau.
DAN 5:5 Lon ewe chök otun a pwä aütün pöün eman aramas a makei won ewe etip mi pwech lon imwen ewe king awenewenen ewe lenien atittin. Iwe, lupwen ewe pau a makei ewe mak, ewe king a küna.
DAN 5:6 Mürin, won mesen ewe king a wopwechepwechela, nge pwäsukun ra nechefengen, pun a fokun niuokus.
DAN 5:7 Iwe, ewe king a kökkö fän leüömong pwe repwe emwenato ekewe sourong, ekewe souürür me ekewe soupwe. Nge lupwen ra feito, ewe king a üreniir, “Iö leimi epwe tongeni aleani ei mak o awewe ngeniei wewen, üpwe fang ngeni üfen king mi parochol, epwe pwal mwärini epa mwärämwär seni kolt fän üan. Iwe, epwe nampa ülüngat le nemenem lon mwüi.”
DAN 5:8 Mürin, nöün ewe king soutipachem meinisin ra kanoto ren, nge esap wor eman a tongeni aleani ewe mak ika awewe ngeni ewe king wewen.
DAN 5:9 Ren ei a lapala än ewe king Pelsasar niuokus, nge wowon a siwil, pwal nöün kewe samol ra rükö.
DAN 5:10 Iwe, lupwen ewe kiwin inen ewe king a rongorong mwökütükütün ewe king me nöün kewe samol, a tolong lon ewe lenien kametip o apasa, “Amwo ewe king epwe manau tori feilfeilachök. Esap wor popun pwe kopwe niuokus ika epwe siwil wowomw.
DAN 5:11 Pun mi wor eman mwän lon mwum, ngünün ekewe kot mi pin ra nom won. Iwe, lon mwün semom a fen pwä pwe an ekiek a saram, a pwal tipachem o silelap usun chök ekewe kot. King Nepukatnesar semom we a seikätä pwe epwe samolun ekewe soutipachem me sourong, souürür me soupwe.
DAN 5:12 Pun a pwä pwe a eäni tipachem me silelap mi fokun amwarar, a tufich le awewei tan, a pwal asilla wewen asisil o pwäri mine a monomon. Iei mine kopwe körato Taniel mi pwal iteni Peltesasar me ren ewe king, pwe epwe awewe ngonuk wewen ei mak.”
DAN 5:13 Mürin, ra emwenato Taniel fän mesen ewe king. Nge ewe king a kapas ngeni, “Ifa usun, en Taniel eman lein ekewe chon Juta mi oola, semei we ewe king a emwenato seni Juta?
DAN 5:14 Iwe, üa rongorong pwe ngünün ekewe kot mi pin ra nonom womw, om ekiek a saram, om tipachem me silelap a pwal fokun alolol.
DAN 5:15 Iwe, ekewe soutipachem me sourong ra feito rei pwe repwe aleani ei mak o awewe ngeniei wewen, nge resap tongeni.
DAN 5:16 Nge üa rong pwe en ka tongeni awewei mettoch o pwäri mine a monomon. Iwe, are kopwe tongeni aleani ei mak o awewe ngeniei wewen, üpwe fang ngonuk üfen king mi parochol o amwärämwäralong fän uom epa mwärämwär seni kolt, üpwe pwal seikuketä pwe kopwe nampa ülüngat le nemenem lon mwüi.”
DAN 5:17 Mürin, Taniel a üreni ewe king, “Kose mochen kopwe püsin eäni om kewe lifang, nge liwini we kopwe ngeni eman. Nge inamwo, üpwe chök aleani ngonuk en king ei mak o awewe ngonuk wewen.
DAN 5:18 Ai king, ewe Kot mi Fokun Tekia a ngeni Nepukatnesar semom we mwün me nemenem, pwal iteüöch me ling.
DAN 5:19 Iwe, aramasen mwü me fanü meinisin, pwal aramas mi eäni sokopaten fos ra niuokusiti Nepukatnesar o chechech fän mesan pokiten ewe nemenem mi watte Kot a ngeni. Iwe, a niela iö a mochen niela, a pwal amanaua iö a mochen amanaua. A seikätä iö a mochen seikätä, nge a asapwilätiu iö a mochen asapwilätiu.
DAN 5:20 Nge lupwen a lamalamtekia o ülöförea, ewe king a tur seni wisan wisen king, nge lingan a pöüt seni.
DAN 5:21 Iwe, aramas ra asüela seni me leir, nge tipan a wiliti tipen man, pwe a chök nonom lein ekewe aas mi mwacho. Iwe, a mongö fetil usun chök kow, nge inisin a chöchön ren amurenipwin tori a mefi pwe ewe Kot mi Fokun Tekia a nemeni mwün aramas, nge a ngeni iö a mochen fang ngeni.
DAN 5:22 Iwe, en Pelsasar nöün Nepukatnesar we ka fen silei ekei mettoch meinisin, nge kosap atekisonok.
DAN 5:23 Ka ü ngeni ewe Samolun läng ren om apasa pwe repwe uwato reöm ekewe kapen lon an Imwenfel. Iwe, en me noum kewe samol, pwülüom me ülüpwülüom kana oua pwal aea le ün wain. Iwe, ka mwareiti ekewe uluulun kot mi för seni silifer me kolt, pwal seni piras, mächä, irä me fau, ekewe uluulun kot resap tongeni küna och ika rongorong ika memef. Nge kosap asamolu ewe Kot mi amwöchü manauom o silei om föför meinisin.
DAN 5:24 Iei popun Kot a tinato ewe pau pwe epwe makei ei mak.
DAN 5:25 Iwe iei kapasen ei mak: Mene, Mene, Tekel, Parsin.
DAN 5:26 Nge iei wewen eu me eu ekei kapas: Mene wewen Kot a aleani ränin om nemenem o aükätiu.
DAN 5:27 Tekel wewen Kot a kilonuk, nge a pwä pwe ka fokun päl.
DAN 5:28 Peres wewen mwum epwe kinikinfesen, nge chon Metia me chon Persia repwe mwüni.”
DAN 5:29 Mürin, Pelsasar a apasa pwe repwe aüföüfa ngeni Taniel echö üfen king mi parochol o amwärämwäralong fän üan epa mwärämwär seni kolt. Iwe, pworausen Taniel a rongofeil pwe epwe nampa ülüngat le nemenem lon mwün Pelsasar.
DAN 5:30 Nge lon ewe chök pwinin, Pelsasar ewe kingen Papilon a ninnila.
DAN 5:31 Iwe, Tarius ewe re Metia a popuetä le nemeni ewe mwü, lupwen a ierini wone me ruu.
DAN 6:1 Iwe, Tarius a ekieki pwe epwe öch an epwe awisa ipükü rüe kepina, pwe repwe nemenem lon unusen mwün.
DAN 6:2 Iwe, a pwal awisa ülüman nöüwis tekia pwe repwe nom asen ekewe kepina meinisin, nge Taniel eman lein ekewe ülüman. Iwe, ekewe kepina ra wisen repoot ngeni ekewe ülüman, pwe resap tongeni aosupwanga ewe king ren ar tümwününgauei ar angang.
DAN 6:3 Iwe, a pwä pwe Taniel a angangöch seni ekewe nöüwis tekia me ekewe kepina meinisin, pun a fokun tipesaram, a pwal tipachem me silelap. Iei mine ewe king a ekiekin seikätä, pwe epwe nemenem lon unusen mwün.
DAN 6:4 Mürin, ekewe nöüwis tekia me ekewe kepina ra kütta och mwälin lon än Taniel angang pwe repwe tongeni tip ngeni, nge resap tongeni küna och popun, pun Taniel a allükülük, nge esap wor mwälin ika tümwününgauan.
DAN 6:5 Iwe, ekewe mwän ra kapasfengen lefiler, “Sisap tongeni küna och mwälin lon än ei mwän Taniel angang. Eli sipwe chök küna och lon an aleasochisi än an we Kot allük.”
DAN 6:6 Iei mine ekewe nöüwis tekia me ekewe kepina ra kiito ren ewe king o üreni, “Amwo äm king Tarius epwe manau tori feilfeilachök.
DAN 6:7 Äm meinisin mi angang lon mwum, äm ekewe nöüwis tekia me sounemenem, pwal ekewe kepina me souemwen aia tipeeufengen pwe en king kopwe föri eu allük o apwüngala, pwe esap wor eman epwe tüngor och seni eman kot ika aramas lon ükükün ilik rän, pwe repwe chök tüngor senuk en king. Nge iö esap aleasochis ngeni, epwe koturulong lon pwangen laion.
DAN 6:8 Iei mine äm king, kopwe föri eu allük o saini itom won, pwe esap tongeni siwil usun chök allükün Metia me Persia resap siwil.”
DAN 6:9 Iei mine ewe king Tarius a saini itan won ewe allük o apwüngala.
DAN 6:10 Iwe, lupwen Taniel a silei pwe ei allük a sain, a feila lon imwan o tötä lon eu rumwen asan, ia a wor ie eu asammwacho mi sap ngeni Jerusalem. Ikenan Taniel a fotopwäsuk, a iotek o kilisou ngeni an we Kot fän ülüngat lon ewe rän, usun mine a piin föföri me mwan.
DAN 6:11 Iwe, lupwen ekewe mwän ra kiito ren imwen Taniel we, ra küna pwe a iotekin tüngor ngeni an we Kot.
DAN 6:12 Mürin ra feila ren ewe king o kapas ngeni usun an we allük. Iwe, ra ais, “Äm king, ifa usun, kosap saini ewe allük, pwe esap wor eman epwe tüngor och seni eman kot ika aramas lon ükükün ilik rän, pwe repwe chök tüngor senuk äm king? Sap iei usun, pwe iö epwe aleasolap ngeni, epwe koturulong lon pwangen laion?” Iwe, ewe king a pälüeni, “Ewer, ei allük a pwüngüla, pwe a usun chök allükün Metia me Persia resap tongeni siwil.”
DAN 6:13 Mürin, ekewe mwän ra pwal kapas ngeni ewe king, “Ewe mwän Taniel, eman lein ekewe chon Juta mi oola, esap aleasochis ngonuk äm king, pwal ngeni ewe allük ka saini, pwe a chüen iotekin tüngor fän ülüngat lon eu rän.”
DAN 6:14 Iwe, lupwen ewe king a rong ekei kapas, a fokun lolilen o ekiekin amanaua Taniel. Iwe, seni ei otun tori lekuniol a achocho le kütta met epwe tongeni amanaua Taniel ren.
DAN 6:15 Mürin, ekewe mwän ra pwal kiito ren ewe king o üreni, “Äm king, ka silei pwe ei allük, ka apwüngala, eu allükün Metia me Persia esap fokun tongeni siwil.”
DAN 6:16 Iwe, ewe king a apasa pwe repwe emwenato Taniel o aturalong lon ewe pwangen laion. Nge ewe king a üreni Taniel, “Amwo om we Kot ka likitü le angang ngeni epwe amanauok.”
DAN 6:17 Mürin ra uwato eföü fau o pine ngeni ewe pwangen laion, nge ewe king a impwangei ren nöün ringen impwang pwal ren än nöün kewe samollap ringen impwang, pwe esap wor och mine a pwüngüla usun Taniel epwe siwil.
DAN 6:18 Mürin, ewe king a liwinla lon imwan, nge esap mongö och lon ewe pwin, esap wor och pwapwa a fis lon imwan, esap pwal sile maür.
DAN 6:19 Iwe, lesosorusich ewe king a pwätä o müttirila ren ewe pwangen laion.
DAN 6:20 Nge lupwen a tori ewe pwang, a kökkö fän lolilen o apasa, “Taniel, chon angang ngeni ewe Kot mi Manau. Ifa usun, om we Kot ka likitü le angang ngeni a tongeni amanauok seni ekana laion?”
DAN 6:21 Nge Taniel a pälüeni, “Amwo ewe king epwe manau tori feilfeilachök.
DAN 6:22 Ai Kot a tinato eman chon läng pwe epwe pinei awen ekei laion. Iwe, resap tongeni afeiengauaei, pokiten esap wor ai tipis ngeni Kot pwal ngonuk ai king.”
DAN 6:23 Iwe, ewe king a fokun pwapwa o apasa pwe repwe angeawu Taniel seni lon ewe pwangen laion. Nge lupwen Taniel a towu, resap küna och kinas won inisin, pun a lükü an Kot.
DAN 6:24 Mürin, ewe king a pwal apasa pwe repwe emwenato ekewe mwän mi aturu Taniel o atururolong lon ewe pwangen laion, pwal nöür me pwülüer. Iwe, lupwen resamwo tori epin ewe pwang, ekewe laion ra fen turufiir o ocheer meinisin.
DAN 6:25 Mürin, king Tarius a mak ngeni aramasen fanü me mwü meinisin, pwal ngeni aramas mi eäni sokopaten fos won unusen fanüfan, “Kinamwe mi somwola epwe torikemi.
DAN 6:26 Üa apwüngala eu allük, pwe aramas meinisin mi nom fän nemeniei repwe niueiti o meniniti än Taniel we Kot. Pun i ewe Kot mi Manau a nom tori feilfeilachök, mwün esap tala, an nemenem esap pwal müchüla.
DAN 6:27 I chök a tufichin angasa o amanaua aramas, a pwal föri asisil me manaman won läng pwal won fanüfan. I a amanaua Taniel seni ekewe laion.”
DAN 6:28 Iwe, Taniel a iteföüla lon mwün Tarius tori lon mwün Sirus ewe re Persia.
DAN 7:1 Lon aeuin ierin mwün Pelsasar ewe kingen Papilon, ngang Taniel a wor künaei lon ai tan, lupwen üa annut won ai peet. Nge wesin ai tan üa makeetiu masouan. Iei pworausen
DAN 7:2 mine üa küna lon ewe pwinin. Üa küna pwe rüanü mölümöl ra mölümöliti ewe matau watte.
DAN 7:3 Iwe, föman mönümanau mi watte ra feitä me lon ewe matau, nge eman me eman leir a sokola.
DAN 7:4 Ewe aemanün a wewe ngeni eman laion, nge pöükässin ra usun chök pöükässin eman ikel. Iwe, lupwen üa nenengeni, pöükässin ra üttüwu seni, nge eman a aütäi seni won fanü, pwe a üwenewenetä won ruofoch pechen usun eman aramas. Iwe, eman a siwili tipan ngeni tipen aramas.
DAN 7:5 Iwe, ewe aruomanün mönümanau a usun chök eman pear, nge epekin inisin chök a ütä. Iwe, ülüfoch chürärä ra nom lon awan lefilen ngiin, nge eman a üreni, “Kopwe ütä o ochei chomong fituk.”
DAN 7:6 Mürin üa küna pwal eman mönümanau a usun chök eman lepart, a wor fofoch pöükässin won sökürün usun pöükässin machang, a pwal wor rüanü möküran, nge eman a ngeni an nemenem.
DAN 7:7 Mürin, üa küna ewe afömanün mönümanau, a fokun eniweniw o eniuokus, a pwal fokun pöchökül. Ngiin mi langatam ra usun chök mächä, a ochei o atatakisi liapan, a pwal purätiu meinisin mine a lusun. Iwe, sokun ei mönümanau a sokola seni ekewe mi akom mwan, a pwal wor engol mächän.
DAN 7:8 Lupwen üa nenengenifichi mächän kewe, üa küna pwal efoch mächän mi kükün a pwükütä me leir. Nge lupwen ewe efoch a pwükütä, ülüfoch seni ekewe engol ra üttütä me lepopur. Nge nengeni, ei mächä a wor mesan usun chök mesen eman aramas, a pwal wor awan mi eäni kapas tunomong.
DAN 7:9 Iwe, üa nengeni o küna pwe ra amolätä lenien motun king, nge Kot ewe mi nom seni me lomlom a mottiu won eu. Iwe, üfan a pwechepwech usun snow, möküran a üwan usun chök ülen sip mi pwechepwech, nge an lenien mot me willan kewe ra usun chök pulopulen ekkei.
DAN 7:10 Iwe, eu ekkei mi watte a ngetewu seni, ngeröün chon angang ra angang ngeni, nge eu mwichen millionun aramas ra ütä mwan. Iwe, ekewe souapwüng ra mottiu o suki puk kana pwe repwe eäni kapwüng.
DAN 7:11 Iwe, üa sopwela le kakatol pokiten än ewe mächä eäni kapas tunomong. Nge lupwen üa nenengeni, üa küna pwe ewe afömanün mönümanau a ninnila, a pwal tatakis inisin o koturulong lon ekkei pwe epwe karala.
DAN 7:12 Esap chüen wor än ekewe lusun mönümanau nemenem. Ra chüen manau, nge manauer a chök aükük.
DAN 7:13 Mürin üa küna me lon künaei lepwin eman a feito me lon kuchun läng, a usun chök lapalapen eman nöün aramas. Iwe, ra emwenato ren Kot ewe mi nom seni me lomlom, pwe epwe nom fän mesan.
DAN 7:14 Iwe, a angei an nemenem me lingan me mwün, pwe aramasen fanü me mwü, pwal aramas mi eäni sokopaten fos repwe angang ngeni. An nemenem epwe nom tori feilfeilachök, esap tongeni wesila, nge mwün esap tongeni tala.
DAN 7:15 Ngang Taniel üa lolilen lon letipei, pun künaei lepwin a eniuokusuei.
DAN 7:16 Iei popun üa churi eman lein chokewe mi ütä arun ewe lenien motun king o aisini usun pwüngün ekewe mettoch meinisin. Iwe, a awewe ngeniei wewen,
DAN 7:17 “Ekewe föman mönümanau mi watte ra wewe ngeni föman king repwe ütä o nemenem won fanüfan.
DAN 7:18 Nge chon pin kana nöün Ewe mi Fokun Tekia repwe angei ewe mwü o mwüni tori feilfeilachök.”
DAN 7:19 Mürin üa mochen silei usun pwüngün me wewen ewe afömanün mönümanau a sokola seni ekewe lusun. A fokun eniweniw, ngiin ra usun chök mächä, ükkün ra usun piras, a ochei o atatakisi liapan, a pwal purätiu meinisin mine a lusun.
DAN 7:20 Üa pwal mochen silei usun pwüngün me wewen mächän kewe engol won möküran, pwal usun ewe efoch mi pwükütä me leir, nge ülüfoch seni ekewe engol ra üttütä. Üa pwal mochen silei pwota a wor mesen ewe mächä me awan mi eäni kapas tunomong, pwal popun an pöchökül lap seni ekewe lusun.
DAN 7:21 Iwe, lupwen üa nenengeni, üa küna pwe ei mächä a maun ngeni ekewe chon pin o akufuur,
DAN 7:22 tori Kot ewe mi nom seni me lomlom a war o peni ekewe chon pin nöün Ewe mi Fokun Tekia lon kapwüng. A war ewe fansoun pwe ekewe chon pin ra angei mwür.
DAN 7:23 Iwe, iei ewe kapasen awewe a aiti ngeniei, “Wewen ewe afömanün mönümanau, epwe wor arüanün mwü won fanüfan mi sokola seni ekewe mwü meinisin. Ei mwü epwe oromala unusen fanüfan, epwe pwal purätiu o atatakisi.
DAN 7:24 Nge wewen ekewe engol mächä, engol king repwe ütä seni lon ei mwü. Mürin, eman epwe ütä mürir, nge epwe sokola seni ekewe mi akom o asapwilätiu ülüman king.
DAN 7:25 Iwe, epwe eäni kapasen üpälü ngeni Ewe mi Fokun Tekia, epwe pwal ariaföüü ekewe chon pin nöün Ewe mi Fokun Tekia o ekiekin siwili fansoun me allük. Iwe, ekewe chon pin repwe tolong fän nemenian lon ükükün ülüngat esop ier.
DAN 7:26 Mürin, ekewe soukapwüng repwe mot lon kapwüng, repwe angei seni ätewe an nemenem pwe esap chüen fis tori feilfeilachök.
DAN 7:27 Nge ewe mwichen chon pin nöün Ewe mi Fokun Tekia repwe angei nemenem me ling, pwe repwe nemeni mwü kana meinisin mi nom won fanüfan. Iwe, mwür epwe nonom tori feilfeilachök, nge sounemenem meinisin repwe angang ngeniir o aleasochisiir.”
DAN 7:28 Iei ükükün ai pworaus. Nge ngang Taniel üa fokun niuokus ren ai kewe ekiek, pwe wowoi a siwil. Nge üa iseis ei pworaus lon letipei.
DAN 8:1 Lon aülüngatin ierin mwün ewe king Pelsasar, ngang Taniel üa pwal küna och mürin künaei we me mwan.
DAN 8:2 Iwe, lon künaei we a fis pwe itä üa nom lon Susa samolun ewe telinimwen ewe sop Elam ünükün ewe chanpupu Ulai.
DAN 8:3 Nge lupwen üa nenetä, üa küna pwe eman ätemwänin sip a ütä ünükün ewe chanpupu. Iwe, a wor ruofoch mächän mi langatam, efoch a langatam seni efoch, nge ewe efoch mi langatam a pwükütä me mürin.
DAN 8:4 Iwe, üa küna pwe ewe ätemwänin sip a opwuropwur ngeni lotou me efeng, pwal ngeni ör. Nge esap wor eman man a tongeni apälüa, esap pwal wor eman a tongeni sü seni fän an nemenem. Iwe, a chök föri mochenin letipan o püsin atekiatäi.
DAN 8:5 Iwe, lupwen üa chüen ekieki usun ewe ätemwänin sip, eman ätemwänin kuuch a feito seni lotoun fanüfan, nge pokiten müttirin an sä pechen resap tori pwül. Iwe, ei kuuch a wor efoch mächän mi fokun langatam lefilen mesan.
DAN 8:6 Iwe, ewe ätemwänin kuuch a feila ngeni ewe ätemwänin sip mi wor ruofoch mächän üa küna me ünükün ewe chanpupu, a sä ngeni fän an song mi fokun watte.
DAN 8:7 Üa pwal küna pwe ewe kuuch a fiu ngeni ewe sip. A opwura o kupi mächän kewe ruofoch fän an song, nge esap wor pöchökülen ewe sip pwe epwe tongeni apälüa. Iwe, ewe kuuch a aturala ewe sip lepwül o ipweri, nge esap wor eman a tongeni amanaua.
DAN 8:8 Mürin, ewe ätemwänin kuuch a püsin fokun atekiatäi. Nge lupwen an nemenem a senüküla, mächän mi langatam a kup. Iwe, lerasen ewe efoch ra pwükütä fofoch mächän mi langatam, nge iteiten efoch me efoch a iti ngeni lepelien läng me rüanü.
DAN 8:9 Nge a pwal pwükütä efoch mächä mi kükün me won efoch lein ekewe fofoch, a fokun mämäritä pwe an nemenem a achöüala ngeni ör me ötiu, pwal ngeni ewe fanü mi mürina seni meinisin.
DAN 8:10 Iwe, ewe mächä a fokun pöchökülela pwe a fiu ngeni ewe mwich seni läng. A aturätiu won fanüfan ekoch me leir, pwal ekoch fü, o ipweriretiu.
DAN 8:11 Iwe, a püsin atekiai pwe epwe wewe ngeni Samolun ewe mwich, a aükätiu ewe asoren kek mi fis iteiten rän fän iten ewe Samol, a pwal atai imwan mi pin.
DAN 8:12 Iwe, ewe mwich a tolong fän nemenien ewe mächä, nge ewe mächä a puri pinin ewe asoren kek mi fis iteiten rän, a pwal turunufasei ewe lamalam mi let. Iwe, meinisin mine a föri a chök fisitä.
DAN 8:13 Mürin üa rongorong pwe eman chon pin a aisini pwal eman chon pin, “Ifa ükükün fansoun än ekewe mettoch mi pwä repwe fis? Ifa ükükün fansoun an epwe ouwongaua pinin ewe asoren kek mi fis iteiten rän? Nge ifa ükükün fansoun än ewe mächä purätiu ewe imw mi pin me ewe mwich?”
DAN 8:14 Iwe, a pälüeni, “Epwe ükükün engeröü ipükü lime rän pwe esap fis asor lekuniol me lesosor. Mürin, ewe imw mi pin epwe kaüsefäl o pinsefäl.”
DAN 8:15 Iwe, lupwen ngang Taniel üa sotuni ai üpwe weweiti wewen künaei we, nengeni, eman mi lapalapeni lapalapen mwän a ütä mwei.
DAN 8:16 Iwe, üa rong mwelien eman aramas a kö seni epekin ewe chanpupu Ulai o apasa, “Kapriel, kopwe awewe ngeni ätei wewen künan we.”
DAN 8:17 Mürin Kapriel a feito o ütä ünüki. Nge ngang üa fokun niuokus pwe üa chapetiu lepwül. Iwe, a üreniei, “Nöün aramas, kopwe weweiti pwe künaom we a pwärätä usun mine epwe fis lesopolan.”
DAN 8:18 Lupwen a kapas ngeniei, och masaroch a toriei, pwe üa chapala lepwül. Nge ewe mwän a amwöchüei o aütäei.
DAN 8:19 Iwe, a üreniei, “Üpwe asile ngonuk mine epwe fis lesopolan fansoun än Kot song, pun künaom a pwärätä usun fansoun sopolan.
DAN 8:20 Wewen ewe ätemwänin sip ka küna fän ruofoch mächän ekewe kingen mwün Metia me Persia.
DAN 8:21 Iwe, wewen ewe ätemwänin kuuch mwün Kriis, nge wewen mächän we mi langatam lefilen mesan aemanün kingen ewe mwü.
DAN 8:22 Ekewe fofoch mächä mi pwükütä lerasen ewe efoch mi kup wewen rüanü mwü repwe ütä seni ewe mwü, nge pöchöküler esap wewe ngeni pöchökülen ewe aeuin mwü.
DAN 8:23 Iwe, sopolan ar nemenem, lupwen ar tipis a fokun watte pwe repwe küna apwüng, eman king epwe seikitä, epwe fokun pwora o sile raaw.
DAN 8:24 An nemenem epwe fokun wattela, nge sap seni püsin an tufich. Ataian me afeiengauean epwe fokun amairü, nge meinisin mine epwe föri epwe chök fisitä. Epwe afeiengaua ekewe chon nemenem me ewe mwichen chon pin.
DAN 8:25 Pokiten an tipachemsolä an angangen atuputup epwe fisiöch, epwe pwal lamalamtekia lon lelukan. Iwe, epwe arosala chomong aramas mwen resamwo mefi, epwe pwal fiu ngeni ewe Samol mi lap seni samol meinisin. Mürin epwe ninnila, nge sap ren pöün eman aramas.
DAN 8:26 Iwe, künaom we usun ekewe asor mi fis lekuniol me lesosor, eman a fen awewe ngonuk, epwe fokun fisitä. Nge kopwe amonomonala künaom ei, pun pworausen eu fansoun epwe feito.”
DAN 8:27 Iwe, ngang Taniel üa apwangapwangala o samau lon ekoch rän. Mürin üa pwätä o föri ai angang ngeni ewe king. Nge üa chök rükö ren künaei we, pun üsap wewe ren.
DAN 9:1 Iwe, Tarius nöün Asuworos ewe re Metia a kingen mwün Papilon.
DAN 9:2 Lon aeuin ierin mwün ngang Taniel üa aleani me lon puk usun mine ewe Samol mi Lapalap a aiti ngeni ewe soufos Jeremaia, pwe Jerusalem epwe tala lon ükükün fik ier.
DAN 9:3 Iwe, üa sachetä ngeni Kot ewe Samol lon ai iotek o tüngormau fän ai echikefel, üa pwal üföüf üf seni tuk o mot lon falangen ekkei.
DAN 9:4 Mürin üa iotekin amusamus ngeni ewe Samol mi Lapalap ai we Kot, “Ai Samol me ai Kot, en eman Kot mi tekia me eniuokus, ka tümwünüöchü om pwon, ka pwal tongei chokewe mi echenuk o föri pwüngün om kewe allük.
DAN 9:5 Äm aia tipis, äm aia föri mine a mwäl o ngau fän mesom, äm aia pwal ü ngonuk o lükümmach ngeni om kewe allük.
DAN 9:6 Äm aisap aüselinga alon ekewe soufos noum kewe chon angang, ra kapas fän itom ngeni äm kewe king me samol, pwal ngeni äm kewe lewo me aramasen ewe fanü meinisin.
DAN 9:7 En chök äm Samol ka unusen pwüng, nge äm aia chök atoto wom säw usun a pwä ikenai, äm me chon Juta, chon Jerusalem me chon Israel meinisin mi nom toau me arap, ia ka atoropasafeilikem ie pokiten tipisin äm likitukela.
DAN 9:8 Ewer, äm Samol, äm me äm kewe king, äm samol me äm kewe lewo äm aia föri föförün äsäw o tipis ngonuk.
DAN 9:9 En chök äm Samol me äm Kot ka eäni tong, ka pwal amusala tipis. Nge äm aia ü ngonuk,
DAN 9:10 äm aisap aleasochisi alom, pun aisap föri pwüngün om kewe allük ka ngenikem ren ekewe soufos noum chon angang.
DAN 9:11 Chon Israel meinisin ra puri om allük o kul senuk, pun resap aleasochisi alom. Äm aia tipis ngonuk, iei mine ka atoto wom ekewe anümamau mi fis fän akapel, ekewe mi mak lon ewe puken allük än Moses noum we chon angang.
DAN 9:12 Ka apwönüetä om kapasen pälüenikem me äm kewe sounemenem ren om awarato wom feiengau watte. Iwe, ükükün ewe feiengau mi tori Jerusalem esamwo fis me mwan won unusen fanüfan.
DAN 9:13 Ei feiengau a torikem a mak lon ewe puken allük än Moses. Nge äm aisap föri och mine en Kot äm Samol mi Lapalap kopwe chä ngenikem ren, pun aisap kul seni äm tipis, aisap pwal föri mine a let.
DAN 9:14 Iei mine en Kot äm Samol mi Lapalap ka amolätä ei feiengau o awarato wom. Pun ka eäni pwüng lon om föför meinisin, nge äm aisap aleasochisi alom.
DAN 9:15 Äm Samol me äm Kot, ka emwenawu noum aramas seni lon ewe fanü Isip ren om manaman, ka pwal iteföüla ren tori ikenai. Iei äm aia pwärätä pwe aia tipis ngonuk o föri mine a ngau.
DAN 9:16 Äm Samol, pokiten om föförün pwüng me om ümöümöch kose mochen kopwe siwili om ekiekin song me lingeringeriti om we telinimw Jerusalem me chukum we mi pin. Pun Jerusalem me noum aramas meinisin ra küna itengau me ren chokewe mi nom ünüküm pokiten äm tipis me tipisin äm kewe lewo.
DAN 9:17 Nge iei ai Kot, kose mochen kopwe aüselinga ai iotekin tüngor, ngang noum chon angang, nge pokiten itom kopwe pwal wopwapwasefäl ngeni imwom Imwenfel mi tala ikenai.
DAN 9:18 Äm Kot, kose mochen kopwe aüselingakem, kopwe anelai mesom o nenengeni leniem mi tatakis me ewe telinimw a iteni itom. Pun äm aisap eäni äm iotekin tüngor pokiten äm pwüng, nge pokiten watten om ümöümöch me om tong ngenikem.
DAN 9:19 Äm Samol, kose mochen kopwe aüselingakem o amusala äm tipis. Äm Samol, kose mochen kopwe aüselinga kem o amüttirato om alilis ngenikem pokiten itom, pwe aramas meinisin repwe silei pwe en Kot. Pun ei telinimw om, nge ekei aramas noum.”
DAN 9:20 Iwe, üa chök sopwela le iotek o pwärätä ai tipis me tipisin aramasei chon Israel, üa pwal tüngormau ngeni ai Kot ewe Samol mi Lapalap fän iten imwan mi pin epwe kaüsefäl.
DAN 9:21 Iwe, lupwen üa chüen iotek, ewe mwän Kapriel, üa fen küna lon künaei me mwan, a müttir ässito rei lupwen fansoun a fis asoren lekuniol.
DAN 9:22 A üreniei, “Taniel, iei üa feito, pun üpwe alisuk pwe kopwe weweiti ekei mettoch.
DAN 9:23 Lupwen ka popuetä le iotekin tüngor, Kot a pälüeni om iotek. Iei üa feito pwe üpwe asile ngonuk pälüan, pun ka fokun chen me ren. Iei mine kopwe ekieki ekewe kapas pwe kopwe weweiti künaom we.
DAN 9:24 Iwe, a pwüngüla pwe ükükün fisu fän fik ier a kaüküla fän iten aramasom me om we telinimw mi pin. Mürin, pupungau epwe ükütiu, tipis epwe müchüla, epwe fis amusamusen tipis, nge pwüng esemüch epwe pwönüetä pwe alon soufos me künaer epwe fisitä, epwe pwal fis apinipinin ewe Leni mi Unusen Pin.
DAN 9:25 Kopwe silei o weweiti ei: Seni fansoun ewe kapas a towu pwe Jerusalem epwe kaüsefäl tori waren ewe sounemenem, ätewe mi kepit, ükükün fisu fän fisu ier repwe la. Iwe, Jerusalem epwe kaüsefäl, epwe pwal wor alan me an lenien chulap. Epwe nom lon ükükün fisu fän wone me ruu ier, nge epwe eu fansoun osupwang.
DAN 9:26 Iwe, mürin ekewe fisu fän wone me ruu ier ewe mi kepit epwe ninnila, nge esap wor popun. Iwe, nöün eman samol sounfiu repwe war o ataela ewe telinimw me ewe Leni mi Pin. Nge sopolan ewe telinimw epwe war usun chök eu noter, epwe pwal fis maun me tatakis tori lesopolan, usun Kot a fen apwüngala.
DAN 9:27 Lon ükükün fisu ier ewe samol epwe föri eu pwon mi nüküchar ngeni chomong aramas, nge lukalapen ekewe fisu ier epwe aükätiu ewe asoren kek me ewe asoren mongö. Iwe, ewe mi afisätä tatakis epwe anomu eu mettoch mi fokun anioput lon ewe Leni mi Fokun Tekia lon ewe Imwenfel, tori Kot epwe atolonga ätewe lon ewe feiengau a fen apwüngala won.”
DAN 10:1 Lon aülüngatin ierin mwün Sirus ewe kingen Persia, eu kapas a pwä ngeni Taniel mi pwal iteni Peltesasar. Ei kapas a let, a pwal pwärätä usun eu fansoun riaföü watte. Iwe, an weweiti ewe kapas a tori me lon künan.
DAN 10:2 Lon ewe fansoun, ngang Taniel üa letipeta lon ükükün ülüngat wik.
DAN 10:3 Üsap mongö mongö mi anö, üsap fokun ochoch fituk ika ün wain, üsap pwal epitiei tori wesin ekewe ülüngat wik.
DAN 10:4 Iwe, lon rüe me rüanün ränin ewe aeuin maram lon ewe chök ier, üa ütä ünükün ewe chanpupu watte itan Tikris.
DAN 10:5 Nge lupwen üa nenela, üa küna eman mwän a üföüf üf mi pwechepwech, nge ririn lukalapan a för seni kolt mi mürina.
DAN 10:6 Inisin a usun chök ewe fau aüchea itan kirisolait, won mesan a usun chök fifi, lon mesan a usun chök pulopulen töl, pöün me pechen ra usun chök piras mi meriweriw, nge mwelian a usun chök leüömongun eu mwicheichen aramas.
DAN 10:7 Iwe, ngang chök üa küna künaei we, nge ekewe mwän mi etiei resap küna. A toriir eu niuokus watte, pwe ra süla o op.
DAN 10:8 Iwe, ngang chök üa nom o küna künaei we mi lapalap. Esap chüen wor pöchökülei, won mesei a fokun wopwechepwechela pwe esap wor eman a sileniei, üa pwal fokun apwangapwangala.
DAN 10:9 Nge lupwen üa rongorong an kapas, och masaroch a toriei, pwe üa chapala lepwül.
DAN 10:10 Mürin, pöün eman a atapaei o alisiei pwe üa tongeni aitenges o aüpwäsuk, nge üa fokun chechech.
DAN 10:11 Iwe, ewe chon läng a üreniei, “Taniel, en eman mwän mi watte chenum me ren Kot. Kopwe ütä o aüselingöchü mine üpwe ürenuk, pun iei Kot a tinieito reöm.” Nge lupwen a kapas ngeniei, üa ütä fän chechech.
DAN 10:12 Iwe, a pwal üreniei, “Taniel, kosap niuokus, pun Kot a aüselinga om tüngor seni lon ewe aeuin rän lupwen ka atekisonok fän mesen om we Kot, pun ka fokun mochen weweiti künaom we. Iei üa feito pwe pälüen om iotek.
DAN 10:13 Iwe, ewe anüsorun ewe mwün Persia a apetiei lon ükükün rüe me eu rän. Nge Mikael, eman lein ekewe samolun chon läng, a feito o alisiei, pun üa aleeman ikenan ren ewe anüsorun mwün Persia.
DAN 10:14 Iei üa feito pwe üpwe aiti ngonuk mine epwe fis ngeni aramasom lon kan fansoun repwe feito, pun künaom a pwärätä usun.”
DAN 10:15 Iwe, lupwen a üreni ei, üa nenetiu lepwül o fanafanala.
DAN 10:16 Mürin, ewe chon läng mi lapalapeni lapalapen eman aramas a atapa tinawei pwe üa tufichin fos. Iwe, üa üreni ätewe mi ütä mwei, “Ai samol, künaei we a fokun ariaföüüei, üa pwal fokun apwangapwang ren.
DAN 10:17 Ifa usun, ngang noum ei chon angang üpwe tongeni kapas ngonuk ai samol? Pun esap chüen wor pöchökülei, a pwal weires ai ngasangas.”
DAN 10:18 Mürin, ewe chon läng a atapasefäliei, iwe, üa pöchökülsefäl.
DAN 10:19 Iwe, a apasa, “En eman mwän mi watte chenum me ren Kot. Kosap niuokus. Kinamwe epwe toruk. Kopwe apöchökülok o apworai letipom.” Nge lupwen a kapas ngeniei, üa pöchökülsefäl o apasa, “Ai samol, kose mochen kopwe kapas ngeniei, pun ka apöchökülaei.”
DAN 10:20 Mürin a üreniei, “Ifa usun, ka silei popun ai feito reöm? Üa feito pwe üpwe aiti ngonuk mine a mak lon ewe puken let. Nge üpwe pwal müttir liwinla pwe üpwe fiu ngeni ewe anüsorun Persia. Iwe, lupwen üpwe wes me fiu ngeni, ewe anüsorun Kris epwe feito.
DAN 10:21 Esap wor eman epwe alisiei le fiu ngeniir pwe Mikael chök, ewe samolun chon läng mi wisen tümwünü chon Israel.
DAN 11:1 Iwe, lon aeuin ierin mwün Tarius ewe re Metia, ngang üa pwal nom ren Mikael pwe üpwe alisi o apöchöküla.”
DAN 11:2 Iwe, ewe chon läng a üra, “Iei üpwe aiti ngonuk mine a let. Nengeni, pwal ülüman king repwe nemenem lon Persia. Nge ewe afömanün epwe fokun pisekisek seniir meinisin. Iwe, lupwen epwe watte an pöchökül ren an pisekisek, epwe amwökütü mwü meinisin, pwe repwe maun ngeni ewe mwün Kris.
DAN 11:3 Mürin, eman king mi fokun pwora epwe ütä o nemeni eu mwü mi fokun watte, epwe pwal föri mochenin letipan.
DAN 11:4 Nge lupwen a tori watten an nemenem, mwün epwe tala o kinikinfesen lon rüanü kinikin. Iwe, sap mwirimwirin repwe nemeni ewe mwü, pwe ekoch repwe nemeni, nge pöchökülen ekewe chon nemeni esap pwal wewe ngeni pöchökülen ewe mi nemeni me lom.
DAN 11:5 Mürin, ewe kingen Isip epwe pöchökül. Nge eman me lein nöün kewe samolun sounfiu epwe pöchökül seni, pwe ewe mwü a nemeni epwe fokun watte.
DAN 11:6 Iwe, mürin ekoch ier ewe kingen Isip epwe eäni eu pwonen atipeeu ngeni ewe kingen Siria o apwüpwülüa nöün fefin ngeni, pwe epwe fis kinamwe. Nge ewe pwonen atipeeu esap nonomotam. Iwe, ewe fefin me nöün chon angang mi eti pwal nöün we repwe mälapök me ätewe a pwülüeni.
DAN 11:7 Lon ewe fansoun eman seni familien ewe fefin epwe king. Iwe, i epwe feito o maun ngeni ewe mwichen sounfiu nöün ewe kingen Siria, epwe tolong lon an we leni mi pöchökül o akufuur.
DAN 11:8 Iwe, epwe uweela Isip ar kewe uluulun anümwäl mi för seni mächä, pwal ar pisek mi aüchea ra för seni silifer me kolt. Iwe, mürin esap chüen maunsefäl ngeni ewe kingen Siria lon ükükün ekoch ier.
DAN 11:9 Mürin, ewe kingen Siria epwe feila o maun ngeni ewe kingen Isip, nge epwe süsefäl ngeni poputän fanüan.
DAN 11:10 Iwe, nöün ewe kingen Siria kewe mwän repwe amol ngeni maun o achufengeni eu mwicheichen sounfiu mi fokun watte. Eman me leir epwe feila me nöün sounfiu o pwölüela ewe fanü usun eu chanpupu a puwu seni lon lenian. Iwe, lupwen ar maun, repwe fokun tori ewe leni mi tit än ewe kingen Isip.
DAN 11:11 Mürin, ewe kingen Isip epwe song, epwe feila o fiu ngeni ewe kingen Siria. Nge ewe mwicheichen sounfiun Siria epwe oolong lepöün ewe kingen Isip.
DAN 11:12 Iwe, ewe kingen Isip epwe lamalamtekia, pun a niela chomong ngeröün aramas, nge epwe chök win lon fansoun mochomoch.
DAN 11:13 Mürin ewe kingen Siria epwe liwiniti fanüan o amwichafengenisefäli eu mwicheichen sounfiu mi chowatte seni me mwan. Iwe, epwe liwinsefäl mürin ekoch ier fän an mwicheichen sounfiu mi chowatte, pwal fän pisekin maun mi chomong.
DAN 11:14 Lon ewe fansoun chomong aramas repwe ütä o ü ngeni ewe kingen Isip. Epwe pwal wor chon mwänewüs lein aramasom en Taniel, repwe ü ngeni, pwe repwe apwönüetä eu kapasen osuni, nge repwe chök feiengau.
DAN 11:15 Mürin, ewe kingen Siria epwe feito, epwe pwelifeili eu telinimw mi fokun pöchökül tittin fän pisekin maun o winneni. Nge ekewe sounfiun Isip resap tongeni pworaiti, ir mwo ekewe mi fokun sipeöch le maun, nge resap tongeni ü ngeni.
DAN 11:16 Iwe, ewe kingen Siria epwe föri ngeniir mine a mochen, nge esap wor eman epwe tongeni pälüeni. Epwe nonom lon ewe fanüen pwon o nemeni meinisin.
DAN 11:17 Epwe fokun ekiekin feito fän an mwichen sounfiu meinisin, epwe pwal afisätä eu pwonen kinamwe ngeni ewe kingen Isip o apwüpwülüa ngeni nöün fefin, pun a ekiekin ataela mwün. Nge an akot esap fis.
DAN 11:18 Mürin epwe maun ngeni ekewe fanüen aroset o liapeni chomong. Nge eman samolun sounfiu epwe akufu o aükätiu an lamalamtekia, epwe pwal liwini ngeni liwinin an föför.
DAN 11:19 Ewe kingen Siria epwe liwinsefäl ngeni ekewe leni mi tit lon püsin fanüan, epwe turulong lon feiengau, iwe, iei sopolan manauan.
DAN 11:20 Iwe, ewe king mi siwili epwe tinala eman chon ioni takises lon ewe fanü, pwe epwe ioni takises fän pöchökül o awattela wöün mwün. Nge mürin ekoch chök ier ei king epwe pwal ninnila, nge esap fis fän song ika lon maun.
DAN 11:21 Mürin, eman aramas mi fokun ngau epwe siwili lon wisan, nge sap wenewenan pwe epwe wiseni. Epwe war, nge esap wor eman epwe mefi me mwan, epwe pwal nemenem ren an tipachemsolä me kapas amichimich.
DAN 11:22 Epwe ärala mwicheichen sounfiu mi ü ngeni, epwe mwo nge pwal awesi eman mi lap me lein ekewe souasoren ewe pwon lon Israel.
DAN 11:23 Epwe eäni eu pwonen atipeeu ngeni ekoch mwü, nge epwe chök atupuur. Iwe, epwe fefeitä o pöchökülela, inamwo ika mwün a chök kükün.
DAN 11:24 Epwe war o maun ngeni ekewe kinikinin ewe fanü mi fokun pisekisek, nge esap wor eman epwe silei me mwan. Epwe pwal föri mine an kewe lewo resap fokun mwo föri. Iwe, epwe ineti ngeni chiechian wöün a liapeni lon maun, epwe pwal ekiekin maun ngeni leni mi tit o pöchökül, nge lon fansoun mochomoch chök.
DAN 11:25 Iwe, epwe emwenala eu mwicheichen sounfiu pwe epwe maun ngeni ewe kingen Isip fän pöchökül me pwora. Iwe, ewe kingen Isip epwe pwal maun ngeni fän mwichemongun nöün sounfiu mi fokun pöchökül, nge esap tongeni ü ngeni, pun aramas repwe chüangauei.
DAN 11:26 Fokun pwal chokewe mi eti le mongö anan mi anö repwe afisätä an feiengau. Iwe, nöün sounfiu repwe süla, nge chomong repwe ninnila.
DAN 11:27 Mürin, ekewe ruoman king repwe chök ekiekietä sokun föför mi ngau. Repwe mot ngeni chepel o kapas chofanafengen. Nge ar ekiek esap fis, pun esamwo tori ewe fansoun Kot a filätä.
DAN 11:28 Iwe, ewe kingen Siria epwe liwinsefäliti poputän fanüan fän wöün mi chomong, nge lon lelukan epwe chök ekiekin atai ewe lamalam än nöün Kot aramas. Iwe, epwe chök föri mine a mochen o liwinsefäliti poputän fanüan.
DAN 11:29 Lon eu fansoun Kot a fen filätä, ewe kingen Siria epwe feila o maunsefäl ngeni Isip, nge esap fisiöch usun me mwan.
DAN 11:30 Pun sein Saipiros repwe war o maun ngeni, iei mine epwe feila seniir fän niuokus. Iwe, epwe liwinla fän song o atai ewe lamalam än nöün Kot aramas, epwe pwal eäni kirikiröch ngeni chokewe ra pöütala ewe lamalam.
DAN 11:31 Iwe, nöün sounfiu repwe war o alimengaua ewe Imwenfel, repwe pwal aükätiu ewe asoren kek mi fis iteiten rän. Iwe, repwe anomu lon eu mettoch mi fokun anioput epwe afisätä feiengau.
DAN 11:32 Ewe king epwe michi chokewe mi pöütala ar lamalam pwe repwe eti, nge chokewe mi silei ar Kot repwe tipepos o ü ngeni.
DAN 11:33 Mürin, chokewe mi tipachem lein ekewe aramas repwe öüröüra chomong. Nge epwe fis lon eu fansoun pwe repwe mäla lon maun ika kekila, repwe pwal oola o mwelele.
DAN 11:34 Lupwen a fis ewe ninni, nöün Kot kewe aramas repwe angei ekis alilisir. Iwe, chomong repwe chiechi ngeniir, nge sap seni wenecharen letiper.
DAN 11:35 Iwe, ekoch lein ekewe chon mirit repwe feiengau pwe epwe fis än ekewe aramas sosot, ar limelim me ar ling tori ewe fansoun sopolan a pwüngüla me ren Kot, nge esamwo tori.
DAN 11:36 Iwe, ewe kingen Siria epwe föri mine a mochen, epwe püsin seikätä o alinga pokiten a ekieki pwe a tekia seni ekewe kot meinisin, epwe pwal eäni kapasen turunufas ngeni ewe Kot mi tekia seni ekewe kot meinisin. Iwe, epwe fefeitä tori än Kot song epwe fis ngeni. Pun mine Kot a apwüngala epwe fis.
DAN 11:37 Iwe, ewe king esap aleasochis ngeni än an kewe lewo kewe kot ika meniniti ewe kot fefin ra asamolu. Esap fokun aleasochis ngeni eman lein ekewe kot, pun epwe chök ekieki pwe a tekia mwer meinisin.
DAN 11:38 Nge epwe asamolu ewe kot mi tümwünü imwen maun, eman kot an kewe lewo resap silei. Iwe, epwe asamolu o asor ngeni kolt me silifer, fau aüchea me pisek mi aüchea.
DAN 11:39 Iwe, epwe anomu chon ekis pwe repwe mamasa ekewe leni mi tit o pöchökül, aramas mi asamolu eman koten ekis. Iwe, ewe king epwe fokun aiteüöchü chokewe mi aleasochis ngeni, epwe seikiretä pwe repwe nemeni chomong aramas o ineti ngeniir fanü pwe liwinir.
DAN 11:40 Lon ewe fansoun sopolan ewe kingen Isip epwe maun ngeni ewe kingen Siria. Nge ewe kingen Siria epwe müttirito usun eu mölümöl fän wan woken me chon wawa oris, pwal fän wan sip mi chomong. Epwe tolong lon ekewe fanüen ör o pwölürela usun eu chanpupu mi säsewu seni lon lenian.
DAN 11:41 Iwe, epwe pwal tolong lon ewe fanüen pwon o niela chomong ngeröün aramas. Nge chon Etom me Moap, pwal chokewe mi chüen manau lein chon Amon repwe sü seni ewe feiengau.
DAN 11:42 Epwe maun ngeni ekewe fanü, epwe pwal liapeni Isip.
DAN 11:43 Iwe, epwe nemeni ekewe lenien iseis kolt me silifer, pwal ekewe pisek aüchea lon Isip. Ekewe chon Lipia me chon Itiopia repwe nom fän nemenian.
DAN 11:44 Mürin, pworaus seni fanüen ötiu me efeng epwe amairüw. Iwe, epwe feila fän an lingeringer mi watte, pwe epwe niela o arosala chomong aramas.
DAN 11:45 Iwe, epwe aüetä imwan imw mangaku mi fokun lingöch lefilen ewe matau me ewe chuk ia ewe Imwenfel a nom ie. Mürin epwe tori sopolan, nge esap wor eman epwe alisi.”
DAN 12:1 Iwe, ewe chon läng a pwal üra, “Lon ewe fansoun Mikael ewe samolun chon läng kana, ewe chon peni aramasom, epwe war. Epwe wor eu fansoun riaföü esamwo fis seni me lom, lupwen mwü rekärän poputä tori ei fansoun. Nge lupwen epwe tori ei fansoun, aramasom meinisin mi mak iter lon nöün Kot we puk repwe küna manau.
DAN 12:2 Iwe, chomong lein chokewe mi mäla repwe manausefäl. Ekoch repwe eäni manau esemüch, nge ekoch repwe eäni itengau me säw esemüch.
DAN 12:3 Iwe, ekewe chon mirit repwe meriweriw usun meriweriwen läng, nge chokewe mi aiti ngeni chomong aramas usun ar repwe föri mine a pwüng repwe titin usun fü kana tori feilfeilachök.
DAN 12:4 Nge en Taniel, kopwe tukumala ekei kapas, kopwe numala ewe puk o fötala tori fansoun sopolan fanüfan. Iwe, chomong aramas repwe sotun kütta wewen, nge ar weweiti epwe lapala.”
DAN 12:5 Mürin, ngang Taniel üa küna pwal ruoman chon läng, eman a ütä epek ewe chanpupu, nge eman epek.
DAN 12:6 Iwe, eman leir a aisini ewe mwän mi üföüf üf mi pwechepwech o ütä asen ewe chanpupu, “Ifa ükükün fansoun tori ekei mettoch mi amwarar repwe wes.”
DAN 12:7 Iwe, ewe mwän mi üföüf üf mi pwechepwech o ütä asen ewe chanpupu a aitietä läng pöüifichin me pöüimöngün. Üa rong pwe a akapelü Ewe mi Manau tori feilfeilachök o apasa, “Epwe la ülüngat esop ier, nge lupwen manamanen ewe mi ariaföüü ekewe aramas mi pin epwe wes, ekei mettoch meinisin repwap pwönüetä.”
DAN 12:8 Iwe, üa rong mine a apasa, nge üsap weweiti. Mürin üa ais, “Ai samol, epwe met sopolan ekei mettoch?”
DAN 12:9 Nge ewe mwän a pälüeni, “Taniel, kopwe feila, pun wewen ekei kapas epwe monomon o kaopola tori fansoun sopolan.
DAN 12:10 Chomong aramas repwe limelim pwe repwe unusen limöch o mürina. Nge ekewe chon föföringau repwe föri mine a ngau. Esap wor eman leir epwe wewe, pwe chokewe chök mi mirit.
DAN 12:11 Nge seni ewe fansoun ewe asor mi fis iteiten rän epwe ükütiu, pwal ewe mettoch mi anioput a afeiengau epwe nom ükükün engeröü rüöpükü tiwe rän repwe la.
DAN 12:12 Feiöchün ewe aramas epwe witiwit o awesi ükükün engeröü ülüpükü ilik me limu rän.
DAN 12:13 Nge en Taniel kopwe likitü tori sopolan. Mürin kopwe mäla o manausefälitä, pwe kopwe angei wisom lesopolan fansoun.”
HOS 1:1 Iei ewe pworaus ewe Samol mi Lapalap a asile ngeni Osea nöün Peri we mwän lon mwün ekewe kingen Juta iter Usia, Jotam, Ahas me Hiskia, pwal lon mwün Jeropoam nöün Joas we mwän ewe kingen Israel.
HOS 1:2 Iwe, lupwen ewe Samol mi Lapalap a popuetä le fos ngeni Osea fän iten chon Israel, a üreni, “Kopwe feila o angei eman fin lisowu pwe pwülüom, epwe pwal nöünöü me womw, nge nöün kana repwe kirikiringau usun chök i. Pun iei usun aramasen ei fanü ra föri angangen lisowu ren ar likitieila ngang ewe Samol mi Lapalap.”
HOS 1:3 Iei mine Osea a feila o angei Komer nöün Tiplaim we föpwül, pwe pwülüan. Nge neminewe a pwopwo me won o nöüni eman ät.
HOS 1:4 Iwe, ewe Samol mi Lapalap a üreni Osea, “Kopwe aita ngeni ewe ät ‘Jesrel’, pun ekis chök fansoun mürin üpwe apwüngü chon leimwen Jehu fän iten än Jehu ni ekewe aramas me lon Jesrel, üpwe pwal awesi ewe mwün Israel.
HOS 1:5 Lon ena fansoun üpwe akufu än Israel mwichen sounfiu me lon ewe lemolun Jesrel.”
HOS 1:6 Iwe, Komer a pwopwosefäl o nöüni eman nengin. Mürin, ewe Samol mi Lapalap a üreni Osea, “Kopwe aita ngeni ewe nengin ‘Esechen’. Pun ngang üsap chüen echeni ekewe chon Israel ika amusala ar kewe tipis.
HOS 1:7 Nge üpwe echeni ekewe chon Juta. Ngang ewe Samol mi Lapalap ar we Kot üpwe amanaueer, nge sap ren pisekin maun, ren föün esefich ika ketilas, ren oris ika chon wawa oris.”
HOS 1:8 Iwe, lupwen ewe nengin itan Esechen a mwü seni oup, Komer a pwal pwopwo o nöüni eman ät.
HOS 1:9 Mürin, ewe Samol mi Lapalap a üreni Osea, “Kopwe aita ngeni ewe ät ‘Sap Nei Aramas’. Pun ämi chon Israel ousap nei aramas, nge ngang üsap ämi Kot.”
HOS 1:10 Nge iteiten ekewe chon Israel repwe wewe ngeni ekewe föün pien aroset esap tongeni aükük ika lea. Iwe, iei Kot a üreniir, “Ämi ousap nei aramas.” Nge epwe war ewe fansoun epwe üreniir, “Ämi nöün Kot ewe mi Manau.”
HOS 1:11 Nge ekewe aramasen Juta me ekewe aramasen Israel repwe chufengensefäl o filätä fän iter eman chök chon emweniir. Repwe fefeitä me lon ewe fanü, pun ewe ränin Jesrel epwe eu rän mi fokun aüchea.
HOS 2:1 Iwe, ämi aramas, oupwe aita ngeni pwimi kewe, “Ämi nöün Kot aramas,” nge oupwe aita ngeni fefinemi kewe, “Ämi oua küna chenimi me ren Kot.”
HOS 2:2 Nei, oupwe tüngormau ngeni inemi, inamwo ika i esap chüen pwülüeniei, nge ngang üsap chüen pwülüan. Oupwe tüngormau ngeni, pwe epwe ükütiu le föri föförün eman fin lisowu o emwen seni an kirikiringau.
HOS 2:3 Nge ika esap ükütiu, üpwe aseleloi o föri pwe epwe usun chök an selela lon ränin an uputiu. Üpwe föri pwe neminewe epwe wewe ngeni eu fanüapö me eu fanü mi pwas, iwe, epwe mäla ren an kaka.
HOS 2:4 Üsap pwal tongei nöün kana, pun ir nöün eman fin lisowu.
HOS 2:5 Iner we a kirikiringau, a nöüniir fän an föri föför mi ässäw, pun a apasa, “Üpwe tapwela mürin nei kewe kamwet mi ngeniei enei mongö me ünümei koluk, ai ülen man me mangaku mi pwechepwech, ai apüra seni föün olif me wain.”
HOS 2:6 Iei mine üpwe pineela alan ren iräfölüföl, üpwe epeti ngeni eu tit pwe esap tongeni küna alan.
HOS 2:7 Epwe tapwela mürin nöün kewe kamwet, nge esap toriir. Epwe kütteer, nge esap küneer. Mürin epwe apasa, “Üpwe liwiniti pwülüei akom, pun üa feiöch me mwan lap seni iei.”
HOS 2:8 Iwe, esap mochen mefi pwe ngang ätewe mi ngeni ewe wiich, ewe wain me ewe apüra seni föün olif, üa pwal ngeni chomong silifer me kolt. Nge i a aea ekei mettoch le fel ngeni ewe anü Paal.
HOS 2:9 Iei mine üpwe angeesefäli ai föün wiich me ai wain lupwen fansoun kinikin, üpwe pwal angei seni neminewe ai ülen man me mangaku mi pwechepwech üa fen ngeni pwe epwe pwölü ngeni an selela.
HOS 2:10 Iei üpwe aseleloi me fän mesen nöün kewe kamwet, nge esap wor eman me leir epwe tongeni amanaua seni lepei.
HOS 2:11 Üpwe aükätiu an kewe fansoun pwapwa meinisin, an kewe chulap mi watte me an kewe chulapen popun maram, an kewe ränin sapat me an kewe chulap meinisin mi kefilitä.
HOS 2:12 Üpwe ataela än neminewe kewe irän wain me an kewe irä fiik, a apasa usun pwe liwinin me ren nöün kewe kamwet. Üpwe awili an kewe tanipi ngeni eu wöllap, nge ekewe manmwacho repwe atarala.
HOS 2:13 Üpwe apwüngü neminewe fän iten ekewe rän a keni apach mi pwokus lon ngeni ekewe anü Paal, pwal fän iten an foutei ngeni ring me sokopaten fout o tapwela mürin nöün kewe kamwet, nge a manlükieila. Ngang ewe Samol mi Lapalap üa kapas.
HOS 2:14 Iei mine üpwe panala neminewe, üpwe emwenala lon ewe fanüapö o kapas pwetete ngeni.
HOS 2:15 Me ikenan üpwe aliwinisefäli ngeni an kewe tanipin wain o föri pwe ewe lemolun Akor epwe wiliti eu asamen Apilüköch. Ikenan epwe kul letipan ngeniei usun chök leföpwülün, usun chök lon ewe fansoun lupwen a towu seni ewe fanü Isip.
HOS 2:16 Lon ena rän epwe aita ngeniei pwe ngang pwülüan, nge esap chüen aita ngeniei pwe ngang an anü Paal. Ngang ewe Samol mi Lapalap üa kapas.
HOS 2:17 Üpwe aükätiu me lon awan iten ekewe anü Paal, pwe esap chüen föüni iter.
HOS 2:18 Lon ena fansoun üpwe eäni eu pwon ngeni ekewe manmwachon lemäl, ekewe machang me ekewe mantötö, pwe resap afeiengaua nei aramas. Üpwe kupi ewe esefich me ewe ketilas o aükätiu maun me lon ewe fanü. Üpwe föri pwe nei aramas repwe nom fän kinamwe.
HOS 2:19 Israel, üpwe angeek pwe pwülüei tori feilfeilachök. Üpwe pwülüenuk lon pwüng me let, lon tong ellet me ümöümöch.
HOS 2:20 Üpwe pwülüenuk fän allükülük, nge en kopwe silei pwe ngang ewe Samol mi Lapalap.”
HOS 2:21 Iei alon ewe Samol mi Lapalap, “Lon ena fansoun üpwe pälüeni än nei aramasen Jesrel iotek. Seni läng üpwe apüngätiu üt won fanüfan.
HOS 2:22 Ewe fanü epwe awora wiich me wain me apüra seni föün olif, pwe pälüen än chon Jesrel iotek.
HOS 2:23 Üpwe fotukätiu nei aramas lon ewe fanü o efefeitäär. Üpwe pwäri ai chen ngeni chokewe mi iteni ‘Esechen’ o üreni chokewe mi iteni ‘Sap nei aramas’ pwe ir ‘Nei aramas’, nge ir repwe üra, ‘En äm we Kot!’”
HOS 3:1 Iwe, ewe Samol mi Lapalap a üreniei, “Kopwe feila o tongesefäli pwülüom we, inamwo ika a lisowu ngeni eman nöün kamwet. Kopwe tongei usun chök ngang üa tongei ekewe aramasen Israel, inamwo ika ir ra kul ngeni pwal ekoch kot o efich ar eäni asor ngeniir föün wain mi apwas.”
HOS 3:2 Iei mine üa möni neminewe won engol me limeföü föün moni silifer me ina epwe ükükün ülüpükü ilik paun parli.
HOS 3:3 Iwe, üa üreni neminewe, “Kopwe fokun nom rei fansoun langatam. Kosap eäni föförün lisowu, kosap pwülüeni eman mwän, nge ngang üsap pwal kon reöm.”
HOS 3:4 Iei usun chon Israel repwe nonom fansoun langatam, nge esap wor ar king ika nöür samol, resap asor, esap pwal wor ar ür mi pin, ar uluulun anümwäl me ar uluulun anün leimw.
HOS 3:5 Mürin, ekewe chon Israel repwe kul o kütta ewe Samol mi Lapalap ar we Kot, pwal eman mwirimwirin Tafit ar we king. Repwe feito ren ewe Samol mi Lapalap fän chechech o angei an feiöch lon fansoun epwe feito.
HOS 4:1 Ämi chon Israel, oupwe rongorong än ewe Samol mi Lapalap kapas. Pun iei an kapasen atipisi chon ewe fanü: Esap wor allükülük ika tong me lon ewe fanü, esap pwal wor ar silei pwe ngang ar Kot.
HOS 4:2 Ra chök ottek, chofana, ninni, solä o föri angangen lisowu. Angangen mwänewüs a wattela, nimanawei aramas a chök likatatap mürin eu.
HOS 4:3 Iei mine ewe fanü a pwasapwas, nge meinisin mi nonom won ra mäla fiti ekewe mönün lemäl me ekewe machang. Pwal ekewe ikenen leset ra mäla.
HOS 4:4 Esap wor eman epwe chüen anini ngeni eman ika apwüngü eman. Pun ren ämi föri ekei föför oua usun chök chokewe mi anini ngeni eman souasor.
HOS 4:5 Iwe, ämi me ekewe soufos oua chepetek lerän me lepwin. Iei mine üpwe niela inemi we, wewen üpwe ataela mwümi mwün Israel.
HOS 4:6 Nei aramas ra feiengau, pun resap wesewesen sileei. Pokiten oua oput ämi oupwe sileei, ngang üpwe pwal oput ämi oupwe nei souasor. Pokiten oua manlükala ewe allük än ämi we Kot, ngang üpwe pwal manlükala nöümi kewe.
HOS 4:7 Lupwen ekewe souasor ra chomongola, ar tipis ngeniei a pwal chomongola. Ngang üpwe awili ar iteüöch ngeni itengau.
HOS 4:8 Ra pisekisekila ren ekewe tipis nei aramas ra föri, iei mine ra mochen pwe repwe alapala ar föföringau.
HOS 4:9 Iwe, mine epwe fis ngeni ekewe aramas epwe pwal fis ngeni ekewe souasor. Üpwe apwüngüpöküür o ngenipöküür liwinin ar föför mi ngau.
HOS 4:10 Repwe mongö, nge resap möt. Repwe föri angangen lisowu, nge resap chomongola, pokiten ra likitieila ngang ewe Samol mi Lapalap, pwe repwe fangala inisir ngeni angangen lisowu.
HOS 4:11 Wainin lom me wain mi fö ra angeala mirit.
HOS 4:12 Nei aramas ra angei öüröürer seni esop mwüch, nge wokur a üreniir mine ra mochen silei. Ra likitieila, pun ra fangala inisir ngeni pwal ekoch kot, usun eman fefin a fangala inisin fän iten lisowu.
HOS 4:13 Ra asor won ungen ekewe chuk o keni apach mi pwokus won ekewe chukutekison, pwal fän ekewe irä mi tekia o mwuresires, pun nürür a mürina. Iei mine nöümi kewe föpwül ra fangala inisir fän iten lisowu, nge pwülüen nöümi kewe mwän ra lisowu.
HOS 4:14 Nge ngang üsap apwüngü nöümi kewe föpwül ika pwülüen nöümi kewe mwän, lupwen ra föri ekei föför. Pun püsin ämi mwän oua rik ngeni ekewe fin lisowu o asorpök me chokewe mi fangala inisir fän iten lisowu lon imwenfel. Iwe, ekewe aramas esap wor ar mirit repwe feiengau.
HOS 4:15 Inamwo are ämi chon Israel oua föri angangen lisowu, nge amwo chon Juta resap pwal föri ei sokun tipis. Ousap feila pwe oupwe fel lon Kilkal ika lon Pet-awen , ousap pwal eäni ei akapel, “Mwo manauen ewe Samol mi Lapalap.”
HOS 4:16 Chon Israel ra ülöförea usun eman nienifön kow mi ülöförea. Ifa usun, ngang ewe Samol mi Lapalap üpwe tongeni amongöör usun ai amongöü apanen sip lon eu maasies?
HOS 4:17 Chon Israel ra oo ren ekewe uluulun anümwäl. Oupwe chök likitirela.
HOS 4:18 Ir eu mwichen chon pulas, ra fangala inisir fän iten lisowu, ra efich itengau lap seni iteüöch.
HOS 4:19 Eu ewiniär epwe ässirela, nge repwe säw pokiten ar asor ngeni ekewe uluulun anümwäl.
HOS 5:1 “Ämi souasor, oupwe aüseling, ämi chon Israel, oupwe aü selingemi, nge ämi chon leimwen king, oupwe rongorong. Pun ewe apwüng epwe weneitikemi pokiten oua wewe ngeni eu likatup lon Mispa me eu cheew mi meresila won ewe chuk Tapor,
HOS 5:2 pwal eu pwang mi alolol lon Sitim. Nge ngang üpwe apwüngükemi meinisin.
HOS 5:3 Üa silei usun Israel, an föför esap monola seniei. Israel a kirikiringau ngeniei, chon ra püsin alimengaueer.”
HOS 5:4 Ar kewe föför mi ngau a epeti ar repwe liwiniti ar we Kot. Pun ekiekin angangen fel ngeni anümwäl a nom lor, nge resap silei ewe Samol mi Lapalap.
HOS 5:5 Än Israel lamalamtekia a püsin sapeiti. Chon Israel repwe chepetek ren ar tipis, pwal chon Juta repwe etiir le chepetek.
HOS 5:6 Ra uwato nöür sip me kow pwe ar asor ngeni ewe Samol mi Lapalap, nge resap feiöch ren. Ra kütta i, nge resap küna, pun a feil seniir.
HOS 5:7 Iwe, ra kirikiringau ngeni ewe Samol mi Lapalap, a wor nöür, nge sap nöün Kot ir. Iei eman chon kata epwe afeiengaueer o ataela fanüer.
HOS 5:8 Ewe Samol mi Lapalap a üra, “Oupwe apu ewe säwi me lon Kipea o ettiki ewe rappwa me lon Rama. Oupwe arükak me lon Pet-awen. Ämi chon Peniamin, oupwe feila maun.
HOS 5:9 Lon ewe ränin apwüng Israel epwe tala. Üa asilefeili lein ekewe ainangen Israel usun ewe feiengau epwe fokun fis ngeniir.
HOS 5:10 Ekewe souemwenin Juta ra usun chök ekewe aramas mi amwökütü kiän fanü. Iei mine ngang üpwe ninätiu wor ai lingeringer usun chök koluk.
HOS 5:11 Israel a riaföü o tatakis lon apwüng, pun a fokun pöchökül le ekiekin angang ngeni uluulun anümwäl.
HOS 5:12 Iei mine ngang üa usun pwötür ngeni Israel, üa pwal usun ech ngeni chon Juta.
HOS 5:13 Iwe, lupwen Israel a küna an samau o Juta a küna kinasan, mürin Israel a feila Asiria o tüngor än ewe king mi lap alilis. Nge i esap tongeni alisiir ika amoela kinaser.
HOS 5:14 Pun ngang üpwe usun eman laion ngeni chon Israel, pwal usun eman nienifön laion ngeni chon Juta. Ngang, fokun ngang üpwe atatakisiir o likitirela. Nge lupwen üpwe etekinirela, esap wor eman epwe tongeni amanaueer.
HOS 5:15 Mürin üpwe feila seniir o likitirela tori repwe mefi ar tipis o küttaei. Lon ar riaföü repwe fokun küttaei.”
HOS 6:1 Iwe, ekewe aramas ra apasa, “Ou etto, ousipwe liwiniti ewe Samol mi Lapalap. I a atatakisikich, epwe pwal apöchökülakich. I a akinasakich, epwe pwal filiti kinasach.
HOS 6:2 Mürin ruu ika ülüngat rän epwe amanauakich o aliwinisefälikich pwe sipwe nom fän mesan.
HOS 6:3 Ousipwe achocho ngeni ach sipwe silei ewe Samol mi Lapalap. Usun mal a tö iteiten lesosor, iei usun epwe fokun waroto. Epwe wareitikich usun püngün üt, usun ekewe ütten leres mi achöchönü fanüfan.”
HOS 6:4 Nge ewe Samol mi Lapalap a apasa, “Met üpwe föri ngenikemi, Israel me Juta? Ämi tong a usun chök eu kuchun lesosor, usun chök ewe amurenipwin a müttir morola lesosorusich.
HOS 6:5 Iei mine üa atatakisikemi o niikemi ren ai kewe kapas üa tini ngeni ekewe soufos, ai apwüng a fiitikemi usun inefi.
HOS 6:6 Pun üa mochen ämi oupwe eäni tong ellet, nge sap ämi mönün asor. Üa mochen ämi nei aramas oupwe sileei, nge sap ämi asoren kek.
HOS 6:7 Lon ewe otun, lupwen ra tolong lon ewe fanü me lon ewe telinimw Atam, ra atai ai we pwon ngeniir.
HOS 6:8 Kiliat eu telinimwen aramas mi föföringau, ra pwal ni aramas.
HOS 6:9 Ekewe souasor ra usun chök eu mwichen chon solä mi operi eman aramas. Won mwo ewe al mi ale ngeni ewe leni mi pin lon Sikem, nge ra ni aramas, ewer, ra chök föri föförün mwänewüs.
HOS 6:10 Üa küna eu mettoch mi anioput me lon Israel. Nei aramasen Israel ra püsin alimengaueer ren ar fel ngeni uluulun anümwäl.
HOS 6:11 Nge ämi chon Juta, üa pwal filätä eu fansoun apwüng fän itemi pokiten ämi kewe föför.”
HOS 7:1 Iwe, ewe Samol mi Lapalap a apasa, “Iteiten fansoun, lupwen üa mochen apöchöküla nei kewe aramasen Israel o afefeitäsefäliir, üa chök küna ar föföringau me tipis. Pun ra föri föförün atuputup lefileer, ra ataelong imw o solä, ra pwal angei pisekin aramas fän pöchökül me won ekewe al.
HOS 7:2 Nge resap ekieki pwe üa chechemeni ar kewe föföringau meinisin. Iei ar kewe tipis ra pweli ünükür, ra nom fän mesei iteiten fansoun.
HOS 7:3 Ra apwapwai ewe king ren ar föför mi ngau, ra pwal apwapwai ekewe samol ren ar kapas chofana.
HOS 7:4 Ir meinisin ra kirikiringau ngeniei usun eman mwän a kirikiringau ngeni pwülüan. Ra pwichikar lon ar mocheisou usun pwichin eu um ewe chon um esap chüen soni seni ewe fansoun a aüwa ewe pilawa tori a pwotä.
HOS 7:5 Lon ränin än ewe king kametip ekewe samol ra puchula ren pwichin ewe wain. Iwe, ewe king a tipeeu ngeni ekewe chon turunufas.
HOS 7:6 Leluker a pwichikar usun eu um, lupwen ra ekiekietä ar rawangau. Ar song ra chök poureilong lepwin, nge lesosor a ngetewu usun ngeten eu ekkei.
HOS 7:7 Fän pwichikaren ar song ra niela ar kewe sounemenem. Ar kewe king meinisin ra ninni, nge esap wor eman me leir a köriei pwe üpwe alisiir.
HOS 7:8 Chon Israel ra nofit lein chon ekewe mwü. Ra wewe ngeni echö nokop esap wilik.
HOS 7:9 Chon ekis ra angei seniir ar pöchökül, nge resap mefi. A arap ränin ar repwe mäla, nge resap silei.
HOS 7:10 Än chon Israel lamalamtekia a püsin sape ngeniir. Iei mwo pwe a fis ngeniir ekei mettoch, nge resap liwinitiei ika küttaei ngang ewe Samol mi Lapalap ar we Kot.
HOS 7:11 Chon Israel ra wewe ngeni eman lisom, ra tupukai, esap pwal wor ar mirit. Ra siö ngeni Isip, mürin ra pwal feila Asiria.
HOS 7:12 Nge lupwen ra feila, üpwe ameresala ai cheew wor o likapichiir usun eman a likapichi machang. Üpwe apwüngüür pokiten ar föför mi ngau.
HOS 7:13 Feiengauer, pun ra rik seniei. Repwe mäfeiengau, pun ra ü ngeniei. Üa mochen angaserela, nge ra chök eäni kapas chofana usi.
HOS 7:14 Iwe, resap siö ngeniei seni lon leluker, nge ra chök ngüngüres won kier. Lupwen ra iotek pwe epwe wor ar föün wiich me wain, ra akinaseer usun chon lükün. Ir ra chök ü ngeniei.
HOS 7:15 Üa alisiir o apöchöküleer, nge ir ra chök rawangawaei.
HOS 7:16 Ra kul ngeni ewe anü Paal. Ra wewe ngeni efoch esefich mi pwach selin. Nöür souemwen repwe mäla ren ketilas pokiten ar kapasen lamalamtekia. Ren ei repwe küna turunufas me lon ewe fanü Isip.”
HOS 8:1 Iwe, ewe Samol mi Lapalap a üra, “Kopwe ettiki ewe rappwa. Ekewe chon oputen Israel repwe feito usun eman ikel o maun ngeni nei aramas, pun nei aramas ra atai ai we pwon ngeniir o purätiu ai we allük.
HOS 8:2 Mürin chon Israel repwe siö ngeniei, “En äm we Kot, äm noum aia sileek.”
HOS 8:3 Nge chon Israel ra pöütala mine a mürina. Iei mine ekewe chon oputeer repwe tapweriir.
HOS 8:4 Ra seikätä ar kewe king, nge esap tipei, ra filätä nöür kewe samol, nge esap pwüng seniei. Ra föri uluulun anümwäl seni ar silifer me kolt. Ren ei ra püsin afeiengaueer.
HOS 8:5 Üa oput ewe uluulun nienifön kow ekewe chon Samaria ra fel ngeni. Ai song a pulopul ngeniir. Inet repwe ükütiu le fel ngeni ekewe uluulun anümwäl?
HOS 8:6 Ewe uluulun anümwäl, eman souangang re Israel a föri, esap fokun i Kot. Ewe uluulun nienifön kow lon Samaria epwe tatakis.
HOS 8:7 Iwe, ra amorafeili asepwäl, nge repwe kini eu ewiniär. Esap wor föün ekewe irä wiich, iei mine esap wor pilawa mi amas. Nge are epwe fen wor, chon ekis repwe eni.
HOS 8:8 Ewe mwün Israel a morola. Iei chon ra nom lein chon ekewe mwü usun eu pör mi mök esap wor lomotan.
HOS 8:9 Chon Israel ra ülöförea usun eman aas mi mwacho. Ra feila Asiria pwe repwe kütta alilisiir, ra möni pwal ekoch mwü pwe repwe tümwünüür.
HOS 8:10 Nge iei ngang üpwe achufengeniir pwe üpwe apwüngüür. Iwe, repwe popuetä le chokükünüla pokiten ewe kingen Asiria a ariaföüür.
HOS 8:11 Chon Israel ra senätä chomong rongen asor pwe repwe eäni asoren tipis wor, nge ekei rongen asor ra wiliti lenien tipis ngeniir.
HOS 8:12 Iwe, üa makei ngeniir chomong pwüngün ai allük, nge ir ra oputeer usun och mettoch resamwo küküna ika sisilei.
HOS 8:13 Ra uwato ar asor ngeniei o ochoch fituken ewe mönün asor. Nge ngang ewe Samol mi Lapalap üsap pwapwaitiir. Iei üpwe chechemeni ar kewe föföringau o apwüngüür fän iten ar tipis. Repwe liwinsefäliti Isip.
HOS 8:14 Chon Israel ra aüetä imwen king, nge ra manlükala Ewe mi Föriir. Ekewe chon Juta ra achomonga ar kewe telinimw mi pöchökül tittir. Nge ngang üpwe tinala ekkei wor, epwe kenala ar kewe imwen king me ar kewe telinimw.”
HOS 9:1 Ämi chon Israel, ousap meseik, ousap ingemwar usun chon ekewe mwü. Pun oua kirikiringau ngeni ämi we Kot o kul seni. Won unusen ewe fanü oua amömöla inisimi ngeni ewe anü Paal usun mine eman fin lisowu a föri, oua efich ewe wiich oua ekieki pwe ewe anü a liwini ngenikemi.
HOS 9:2 Nge epwe müttir war ewe fansoun pwe esap chüen naf ämi wiich me ämi apüra seni föün olif, esap pwal wor ünümemi wain.
HOS 9:3 Iwe, chon Israel resap nonometiu lon fanüen ewe Samol mi Lapalap, nge repwe liwiniti Isip, repwe pwal eni mongö mi limengau ngeniir lon Asiria.
HOS 9:4 Ikenan resap tongeni ninätiu wain pwe ar asoren ün ngeni ewe Samol mi Lapalap, resap pwal tongeni apwapwai i ren ar kewe asor. Ener mongö epwe usun chök enen chon letipeta. Meinisin mi mongö seni repwe limengau. Pun ener mongö fän iten chök ar echik, resap uwala och pwe ar asor lon imwen ewe Samol mi Lapalap.
HOS 9:5 Met repwe föri lon ekewe ränin chulap mi kefilitä, lon än ewe Samol mi Lapalap kewe ränin chulap?
HOS 9:6 Inamwo are ra fen sü seni feiengau, chon Isip repwe achufengeniir, nge repwe peias lon Memfis. Pötöwölingau epwe mär lon ar kewe lenien iseis pisek aüchea seni silifer, nge iräfölüföl epwe mär lon imwer.
HOS 9:7 Ekewe ränin apwüng ra war, ekewe ränin angei liwinin föför ra war. Lupwen epwe fis ei, chon Israel repwe silei. Pokiten watten ämi tipis me watten ämi oput oua ekieki pwe ewe soufos a tiparoch, nge ewe mi mwökütüküt ren Ngünün Kot a fokun umwesila.
HOS 9:8 Ewe soufos i ewe mi mamasa chon Israel, ekewe aramasen ai we Kot. Nge eseichin machang ra nom won an kewe al meinisin, a pwal küna koput me lon imwen an we Kot.
HOS 9:9 Än ekewe aramas föför ra fokun ngauala usun chök ngauen ewe föför a fis me lon Kipea. Kot epwe chechemeni ar föföringau o ngeniir liwinin ar tipis.
HOS 9:10 Iwe, ewe Samol mi Lapalap a üra, “Lupwen üa küna Israel me lom, a usun chök ai küna föün irän wain lon fanüapö. Lupwen üa küna ämi kewe lewo, a usun chök ai küna mwen uän ewe irä fik. Nge lupwen ra tori Paal-peor, ra popuetä le fel ngeni ewe anü Paal o wiliti och minen anioput usun chök ekewe anümwäl ra echeni.
HOS 9:11 Än Israel iteüöch epwe ässila usun eman machang a ässila. Esap chüen wor eman semirit epwe uputiu, esap wor eman fefin epwe pwopwo ika kolu.
HOS 9:12 Nge are epwe fen wor nöür semirit, üpwe angei seniir, tori esap chüen wor eman lusun. Feiengau watte epwe toriir, lupwen üpwe likitirela.”
HOS 9:13 Üa küna pwe chon Israel ra fot lon eu mälämäl mi mürina usun Tirus, nge repwe fokun emwenawu nöür kana pwe repwe ninnila.
HOS 9:14 Ai Samol mi Lapalap, kopwe föri ngeniir och. Nge met kopwe föri ngeniir? Kopwe föri ngeni ekewe fefin mine repwe rit ren o apwasa oupwur.
HOS 9:15 Iwe, ewe Samol mi Lapalap a üra, “Pokiten ar föföringau meinisin mi fis me lon Kilkal, üa popuetä le oput ir me ikenan. Üpwe asürela me lon fanüei pokiten ar kei föför mi ngau. Üsap chüen tongeer. Nöür kewe souemwen meinisin ra ü ngeniei.
HOS 9:16 Chon Israel ra wewe ngeni efoch irä waran a pwasala, esap fokun ua. Esap wor nöür. Inamwo ika ra nöünöü, nge üpwe chök niela nöür kewe ra echeniir.”
HOS 9:17 Ai Kot, ewe üa angang ngeni, epwe pöütirela, pokiten resap aleasochis ngeni, repwe choisäfeil lemenen ekewe mwü.
HOS 10:1 Chon Israel ra wewe ngeni efoch irän wain mi mwuresires o ua. Lupwen a chomongola uar, ra pwal senätä chomong rongen asor. Lupwen fanüer a öchüla, ra pwal aöchüla ar kewe ür mi pin ra fel ngeni.
HOS 10:2 Leluker a atuputup. Iei repwe angei liwinin ar tipis. Ewe Samol mi Lapalap epwe ataetiu ar kewe rongen asor o ataela ar kewe ür mi pin.
HOS 10:3 Mürin ekewe aramas repwe apasa, “Esap wor ach king, pun sisap niuokusiti ewe Samol mi Lapalap. Nge met eman king epwe tongeni föri fän itach?”
HOS 10:4 Ra chök fos pön o föri pwonen atipeeu fän akapelmwäl. Iei mine pwüng a wiliti pwüngingau, a märitä usun fetil mi poison lon eu mälämäl mi tu.
HOS 10:5 Ekewe chon Samaria repwe niuokus fän äsengesin ewe uluulun nienifön kow mi nom Pet-awen. Repwe letipeta pokitan, nge ekewe souasor mi angang ngeni ewe uluulun anümwäl repwe kechüeiti lingan, pun a oola seniir.
HOS 10:6 Ewer, repwe uweela ewe uluulun anümwäl ngeni Asiria pwe eu lifang ngeni ewe king mi lap. Chon Israel repwe itengau me säw ren ar we uluulun anümwäl.
HOS 10:7 Ewe kingen Samaria epwe maanüla usun taronumo a maanüla won matau.
HOS 10:8 Ekewe lenien fel won ekewe leni tekia mi nom Awen, ewe ia chon Israel ra tipis me ie, repwe tala. Iräfölüföl me pötöwölingau repwe märitä won ar kewe rongen asor. Mürin ekewe aramas repwe üreni ekewe chukutekia, “Oupwe pwölükeemila,” repwe pwal üreni ekewe chukutekison, “Oupwe turutiu wom.”
HOS 10:9 Iwe, ewe Samol mi Lapalap a apasa, “Chon Israel ra chök sopwela le tipis ngeniei seni ewe fansoun ra tipis me lon Kipea. Iei mine maun epwe tori ekewe chon föföringau me lon Kipea.
HOS 10:10 Lupwen üa mochen apwüngüür, üpwe chök apwüngüür. Chon ekewe mwü repwe chufengen o maun ngeniir, pwe repwe apwüngüür fän iten ar tipis mi chomong.
HOS 10:11 Israel a wewe ngeni eman nienifön kow mi sile angang, a fokun efich ewe angangen wichiwich umwun wiich. Nge iei üpwe uwätä efoch waas won üan mi mürina pwe epwe molotä ngeni angang weires. Juta epwe tuw pwül, nge Israel epwe asosonöchü ewe pwül.
HOS 10:12 Oupwe tuw ämi pwül esamwo tu me mwan. Oupwe amora pwüng fän itemi pwe oupwe kini ewe ua tong ellet. Pun a tori fansoun ämi oupwe kütta ewe Samol mi Lapalap tori epwe war o awarato manau womi.
HOS 10:13 Nge ämi oua fotuki föföringau o kini föföringau. Oua mongö uän ämi chofana. Pokiten oua eäni apilükülük wämi woken me chomongun nöümi sounfiu,
HOS 10:14 iei mine maun epwe tori nöümi aramas, nge ämi kewe imwen maun mi pöchökül meinisin repwe tala. Epwe usun ewe fansoun Salman a ataela Pet-arpel, lupwen a maun ngeni o atatakisi ekewe inelap fengen me nöür.
HOS 10:15 Iei usun epwe fis ngenikemi, ämi chon Petel, pokiten ämi föföringau mi fokun watte. Lupwen ewe maun epwe popuetä, ewe kingen Israel epwe mäla.”
HOS 11:1 Ewe Samol mi Lapalap a apasa, “Lupwen Israel a eman semirit, ngang üa tongei. I nei mwän üa körawu seni Isip.
HOS 11:2 Nge lupwen üa alapala ai kökköriir, ir ra chök alapala ar feila seniei. Nei aramas ra asor ngeni ekewe anü Paal o keni apach mi pwokus ngeni ekewe uluulun anümwäl.
HOS 11:3 Nge ngang ätewe mi aiti chon Israel fetal. Üa ekiir o amwöchüür lepei. Nge ir resap mefi pwe ngang üa tümwünüür.
HOS 11:4 Üa emweniir fän kirikiröch me tong. Üa usun chök eman mi ekiretä o efitiir, üa rotiu o amongöör.
HOS 11:5 Iwe, resap fokun mochen liwinitiei, iei mine repwe liwiniti ewe fanü Isip, nge Asiria epwe nemeniir.
HOS 11:6 Maun epwe tori ar kewe telinimw o ataela amwöchün asamalapen tittir kewe, epwe pwal niela ekewe aramas, pun ra chök föri mine ra püsin ekiekietä.
HOS 11:7 Nei aramas ra oucho le kul seniei. Inamwo ika ra siö ngeniei, üsap fokun angaseer.
HOS 11:8 Ifa usun ai üpwe tongeni fangatä, en Israel? Ifa usun ai üpwe tongeni likitukela? Ifa usun ai üpwe ataakela usun ai ataela Atma? Ifa usun ai üpwe tongeni föri ngonuk usun mine üa föri ngeni Sepoim? Letipei a siwil, ai tong a pwichikar o nüküchar.
HOS 11:9 Üsap apwüngükemi ren ai song mi fokun watte, üsap ataasefäli Israel. Pun ngang Kot, nge sap eman aramas. Ngang Ewe mi Pin mi nom leimi. Üsap feito pwe üpwe kata.
HOS 11:10 Iwe, nei aramas repwe tapweto müri, lupwen üpwe wörüwör ngeni chon oputeer usun eman laion. Iwe, repwe müttir feito rei seni lotou.
HOS 11:11 Repwe müttir feito seni Isip usun machang, pwal seni ewe fanü Asiria usun chök lisom, nge ngang üpwe aliwinireto ngeni lenier. Ngang ewe Samol mi Lapalap üa kapas.”
HOS 11:12 Iwe, ewe Samol mi Lapalap a apasa, “Chon Israel ra pwelifeiliei fän chofana me atuputup, nge chon Juta ra ü ngeniei, ngang ewe Kot mi Pin o allükülük.
HOS 12:1 Chon Israel ra chök föri mine a lomotongau o afeiengau iteiten rän. Ra achomonga ar chofana me ar angangen mwänewüs. Ra föri eu pwonen atipeeu ngeni Asiria o tinala apüra seni föün olif ngeni Isip.
HOS 12:2 A wor än ewe Samol mi Lapalap kapasen atipisi chon Juta, epwe pwal apwüngü chon Israel pokiten lapalaper o ngeniir liwinin ar kewe föför.
HOS 12:3 Lupwen Jakop ar we lewo a nonom lon letipen inan, a amwöchü apilipilin pechen pwin we, nge lupwen a mwän, a aülap ngeni Kot.
HOS 12:4 A aülap ngeni ewe chon läng o akufu, a kechü o tüngor ngeni pwe epwe afeiöchü. Kot a churi Jakop me lon Petel o kapas ngeni me ikenan,
HOS 12:5 i ewe Kot, ewe Samol mi Unusen Manaman itan ewe Samol mi Lapalap.
HOS 12:6 Iei mine ämi mwirimwirin Jakop oupwe liwiniti ämi we Kot, oupwe eäni tong me wenechar o anomu ämi apilükülük won Kot iteiten fansoun.
HOS 12:7 Iwe, ewe Samol mi Lapalap a üra, “Ekewe chon amömö ra nöünöü kilo mi mwäl, ra chök efich ar repwe atupu aramas.
HOS 12:8 Iwe, ra apasa, ‘Sa fokun wöü, sa pisekisekila. Nge esap wor eman a tongeni atipisikich pwe sa pisekisekila fän atuputup.’
HOS 12:9 Ngang ewe Samol mi Lapalap ämi we Kot mi emwenikemiiwu seni ewe fanü Isip. Üpwe föri pwe oupwe nonomsefäl lon imw mangaku, usun chök oua föri lon ekewe ränin chulapen likachoch.
HOS 12:10 Üa kapas ngeni ekewe soufos o awora ngeniir chomong künaer, üa pwäri me rer ekewe kapas monomon.
HOS 12:11 Nge ekewe aramas ra fel ngeni uluulun anümwäl me lon Kiliat, iei mine repwe fokun mäla. Ra eäni asor ätemwänin kow lon Kilkal, iei mine ar kewe rongen asor repwe wiliti ioien fau lon eu mälämäl mi tu.”
HOS 12:12 Jakop ach we lewo a süla ngeni ewe fanü Aram, ikenan a angang fän iten eman fefin o tümwünü sip pwe mön pwülüan.
HOS 12:13 Ewe Samol mi Lapalap a tinala eman soufos pwe epwe emwenawu chon Israel seni Isip, epwe pwal tümwünüür lon ar sai.
HOS 12:14 Nge chon Israel ra fokun asongongauei ar we Samol mi Lapalap. Iei mine epwe ukun ngeniir liwinin ar nimanau o aliwini ngeniir ar aitengaua.
HOS 13:1 Me lom, lupwen chon ewe ainangen Efraim ra kapas, chon ekewe lusun ainang ra niuokus, pun chon ewe ainangen Efraim ra fokun tekia me lon Israel. Nge ra tipis ren ar fel ngeni ewe anü Paal, iei mine repwe mäla.
HOS 13:2 Iwe, iei ra chök alapala ar tipis o föri fän iter uluulun anümwäl seni mächä, uluulun anümwäl seni ar silifer, meinisin förien ekewe souangang mi sipeöch. Mürin ra apasa, “Oupwe asor ngeni ekei uluulun anümwäl.” Pwota aramas ra tongeni mitiri ekewe uluulun nienifön kow?
HOS 13:3 Iei mine repwe müttir morola usun toputopun lesosor ika amurenipwin. Repwe pwal wewe ngeni pön wiich asepwäl a ässala seni ewe lenien wichiwich umwun wiich, ika usun ötüöt mi ötüwu seni eu asammwacho.
HOS 13:4 Iwe, ewe Samol mi Lapalap a apasa, “Ngang ewe Samol mi Lapalap ämi we Kot mi emwenikemiiwu seni ewe fanü Isip. Ousap silei eman Kot lüki, ngang echök ämi Chon Amanau.
HOS 13:5 Ngang ewe mi tümwünükemi lon ewe fanüapö, lon ewe fanü mi pwasapwas.
HOS 13:6 Nge lupwen oua tolong lon ewe fanü mi mürina, oua momongö o mötüla. Nge lupwen oua mötüla, oua lamalamtekia o manlükieila.
HOS 13:7 Iei mine üpwe mweterikemi usun eman laion, üpwe operikemi ünükün alemi kewe usun ewe man itan lepart.
HOS 13:8 Üpwe fiu ngenikemi o atatakisikemi usun mine eman pear a föri, lupwen aramas ra angei seni apanan kana. Ikenan üpwe oromikemiila usun eman laion a oromala liapan, üpwe atatakisikemi usun eman manmwacho a atatakisi liapan.
HOS 13:9 Üpwe afeiengauakemi, ämi chon Israel, pun oua ü ngeniei ngang ewe chon alisikemi.
HOS 13:10 Ifa i ämi we king epwe amanauakemi? Ikafa ir nöümi kewe souemwen lon ämi kewe telinimw, chokewe oua tüngor pwe repwe nöümi king me samol?
HOS 13:11 Ngang üa ngenikemi eman king fän ai song, nge üa angeesefäli fän ai lingeringer.
HOS 13:12 Än Israel föföringau me tipis a makeetiu lon toropwe o iseisela.
HOS 13:13 Israel a tongeni manau, nge a fokun tiparoch, pun esap mochen angei ewe manau. A wewe ngeni eman mönükol mi tori fansoun an epwe towu seni letipen inan, nge esap mochen.
HOS 13:14 Üpwe fokun amanaueer seni ewe lenien sotup. Üpwe angaseer seni ewe manamanen mäla. En mäla, ifa om kewe mätter? En lenien sotup, ifa om afeiengau? Usap chüen tongei ekei aramas.
HOS 13:15 Inamwo ika Israel epwe mämäritä usun ekewe wowo, üpwe tinato eu asepwälin ötiu, epwe enito seni ewe fanüapö. Epwe amorätä an kewe puächen koluk me an kewe chönüttu. Aramas repwe angei fän pöchökül an kewe pisek aüchea meinisin seni an we lenien iseis.
HOS 13:16 Ekewe aramasen Samaria repwe angei liwinin ar kewe tipis, pun ra ü ngeniei. Repwe mäla lon maun, nöür kewe semirit repwe tatakis, nge ekewe fefin mi pwopwo epwe tiletil luker.”
HOS 14:1 Ämi chon Israel, oupwe liwiniti ewe Samol mi Lapalap ämi we Kot. Oua chepetek o turula pokiten ämi kewe tipis.
HOS 14:2 Oupwe liwiniti ewe Samol mi Lapalap o eäni ei iotek ngeni, “Kopwe amusala äm kewe tipis meinisin o etiwakem fän om ümöümöch, pwe aipwe mwareituk usun äm aia fen pwon.
HOS 14:3 Asiria esap tongeni amanauakem, ekewe orisin maun resap tongeni alisikem. Aisap chüen apasa ngeni äm kewe uluulun anümwäl pwe ir äm Kot. Ekewe mi mäsen ra küna ümöümöch me reöm.”
HOS 14:4 Iwe, ewe Samol mi Lapalap a üra, “Üpwe aliwinato nei aramas o tongeer seni unusen letipei, pun üsap chüen song ngeniir.
HOS 14:5 Üpwe usun chök amurenipwin ngeni chon Israel. Repwe sonula usun pön kiop, repwe fokun warar usun ekewe irän Lepanon.
HOS 14:6 Fasarer repwe mämäritä, repwe ling usun ekewe irä olif, repwe pwoöch usun ekewe setaren Lepanon.
HOS 14:7 Repwe liwinsefäl o nom fän ai tümwün. Repwe mämäritä usun wiich o ua usun ekewe irän wain. Repwe iteföüla usun ewe wainin Lepanon.
HOS 14:8 Ekewe chon Israel resap chüen fel ngeni ekewe uluulun anümwäl. Ngang ewe mi pälüeni ar iotek o tümwünüür. Ngang üa wewe ngeni ewe irä saipires mi arauarau fochofoch, ar feiöch a feito seniei.”
HOS 14:9 Iö mi tipachem epwe weweiti mine a mak ikei, iö mi mirit epwe ekieki usun lon lelukan. Pun än ewe Samol mi Lapalap kewe al ra wenechar, ekewe chon pwüng ra fetal wor, nge ekewe chon tipis ra chepetek wor o turula.
JOE 1:1 Iei alon ewe Samol mi Lapalap ngeni Sowel nöün Petuel we mwän:
JOE 1:2 Oupwe rongorong, ämi ätemirit, oupwe aü selingemi, ämi meinisin mi nonom lon ei fanü Juta. Ifa usun, ei sokun mettoch a fen fis lon fansoun manauemi ika lon fansoun manauen semelapemi kewe?
JOE 1:3 Oupwe asile ngeni nöümi usun, nge ir repwe asile ngeni nöür seni eu täppin aramas tori eu täppin.
JOE 1:4 Mine ekewe muunen lifichimas ra likitala seni uän ämi ira, ekewe lifichimas mi äsfeil ra eni. Nge mine ekewe lifichimas mi äsfeil ra likitala, ekewe lifichimas mi mwetemwet ra eni. Nge mine ekewe lifichimas mi mwetemwet ra likitala, ekewe lifichimas mi atai meinisin ra eni.
JOE 1:5 Oupwe nenela o kechü, ämi chon pulas, oupwe ngüngüres, ämi meinisin mi ünümi wain, pun esap chüen wor ünümemi wain mi arar.
JOE 1:6 Iwe, epwi pwiin lifichimas a feito o ataela fanüach. Ra pöchökül o chocho pwe esap wor eman a tongeni aleaniir. Ngir ra ken usun chök ngin eman laion.
JOE 1:7 Ra ataela ach tanipin wain, ra pwal enala ach irä fiik o atikala silir, pwe paler ra pwechepwech.
JOE 1:8 Oupwe kechü usun eman föpwül mi kechüeiti kofotun mi mäla.
JOE 1:9 Esap chüen fis asoren mongö me asoren ün lon ewe imwenfel. Iei mine ekewe souasor mi angang ngeni ewe Samol mi Lapalap ra letipeta.
JOE 1:10 Iwe, ekewe tanipi ra tala, nge ewe pwül a masua. Ekewe irän wiich ra tala, ewe wain me ewe apüra seni föün olif ra morola.
JOE 1:11 Oupwe rükö, ämi chon tu pwül, oupwe pwal kechü, ämi chon tanipini irän wain. Oupwe kechüeiti ekewe irän wiich me parli, pun esap chüen wor resin fanüemi.
JOE 1:12 Iwe, ewe irän wain a pwasala, ewe irä fiik a mäla. Ekewe irä palm, ekewe irä apel me ringo, pwal ekewe lusun irän lemäl meinisin ra pwasala. Iwe, esap chüen wor än aramas pwapwa.
JOE 1:13 Oupwe üföüf üf seni tuk o kechü, ämi souasor mi angang ngeni ewe rongen asor. Oupwe feito o ngüngüres lon üfemi seni tuk lon unusen pwin, ämi nöün ai we Kot chon angang. Pun asoren mongö me asoren ün esap chüen fis lon imwenfelin ämi we Kot.
JOE 1:14 Oupwe apini eu rän pwe oupwe echikefel lon, oupwe pwal körato aramas pwe epwe wor eu mwich mi pin. Oupwe achufengeni ekewe ätemirit me chon Juta meinisin, pwe repwe feito lon imwenfelin ewe Samol mi Lapalap ämi we Kot o siö ngeni.
JOE 1:15 Eniwokusun lon ewe rän. Pun ränin ewe Samol mi Lapalap a arap. Ewe rän a war, eu ränin afeiengau me ren ewe Kot mi Unusen Manaman.
JOE 1:16 Ifa usun, ousap küna pwe a rosola enemi mongö? Esap pwal chüen wor pwapwa me mweireir lon imwenfelin ach we Kot.
JOE 1:17 Iwe, ekewe föün irä mi fot lon pwül ra pwasala. Esap wor föün wiich lon ekewe lenien iseis, iei mine ekewe imwen iseis föün wiich ra pöla o tala.
JOE 1:18 Iwe, ekewe kow ra wörüwör ren ar echik, pun esap chüen wor ener fetil, ekewe pwiin sip ra pwal riaföü.
JOE 1:19 Ai Samol mi Lapalap, üa siö ngonuk, pun ekewe lenien fetil me ekewe irän lemäl meinisin ra pwasala, ra usun chök nge ekkei a kenirela.
JOE 1:20 Pwal ekewe manmwacho ra siö ngonuk, pun esap chüen wor kolukun lon ekewe chanpupu.
JOE 2:1 Oupwe ettiki rappwa lon Sion, oupwe asilesil me won ewe chukun Kot mi Pin usun ewe feiengau epwe war. Oupwe chechech, ämi aramasen Juta meinisin, pun ränin ewe Samol mi Lapalap a war.
JOE 2:2 Ei rän epwe eu ränin rochopwak me toputop, pwal eu ränin kuchuchu me rochokich. Iwe, eu mwicheichen pwiin lifichimas mi fokun pöchökül epwe pwölüela ekewe chuk usun chök rochokichin pwin. Ei esap fis seni me lomlom, esap pwal fis ren ekewe täppin aramas repwap up lon kan fansoun mwach.
JOE 2:3 Ekkei epwe akom mwer, nge ngetengeten ekkei epwe ngetetä me mürir. Iwe, ewe fanü a usun chök ewe tanipin Eten, lupwen resamwo tori, nge lupwen ra towu seni, a usun chök eu fanüapö. Iwe, mettoch meinisin ra tala rer.
JOE 2:4 Iwe, lapalaper a usun chök lapalapen oris, ra pwal müttir usun chök orisin maun.
JOE 2:5 Ar mwetemwet won ungen ekewe chuk a usun chök chopuchopun woken me ngetengeten ekkei, lupwen a ngeteri fetilipwas. Ra tettel usun telin sounfiu mi pwora, lupwen ra feila ngeni maun.
JOE 2:6 Iwe, lupwen aramas ra küneer, ra fokun rükö, nge won meser a wopwechepwechela ren ar niuokus.
JOE 2:7 Ra fiu usun chök sounfiu, ra pwal töta won tit usun chök chon sile maun. Ra fetal wenewen lon tettelir, nge resap riki seni.
JOE 2:8 Iwe, resap etietifengen, pun eman me eman a chök fetal lon alan. Esap wor och pisekin maun a tongeni apetiir.
JOE 2:9 Ra mweteta won ewe telinimw, ra sä won ekewe tit o tötä won ekewe imw, ra pwal tolong lon ekewe asammwacho usun chök chon solä.
JOE 2:10 Iwe, fanüfan me läng ra chechech, lupwen ra feito. Akkar me maram ra rochola, nge fü kana resap chüen tin.
JOE 2:11 Iwe, ewe Samol mi Lapalap a kökkö fän leüömong me mwen an mwichen sounfiu. Ewer, an mwich a fokun watte, nge iteiter mi aleasochisi an kapas ra pwora. Iwe, ränin ewe Samol mi Lapalap a fokun eniwokus. Iö a tongeni pwäk le nonom lon?
JOE 2:12 Iwe, ewe Samol mi Lapalap a apasa, “Iei otun oupwe kul ngeniei seni unusen letipemi fän echikefel, fän kechü me ngüngüres.
JOE 2:13 Ousap chök kamwei üfemi, nge oupwe letipeta lon lelukemi.” Oupwe kul ngeni ewe Samol mi Lapalap ämi we Kot, pun a eäni kirikiröch me chen. A songomang o tongotam, a pwal siwili an ekiekin afeiengaua aramas.
JOE 2:14 Eli ewe Samol mi Lapalap ämi we Kot epwe siwili an ekiek o afeiöchükemi ren chomong uän ämi irä. Mürin, oua tongeni eäni asoren mongö me asoren ün ngeni.
JOE 2:15 Oupwe ettiki rappwa lon Sion. Oupwe apini eu rän pwe oupwe echikefel lon, oupwe pwal körifengeni ekewe aramas pwe epwe wor eu mwich mi pin.
JOE 2:16 Oupwe achufengeni ekewe aramas o apiniir. Oupwe amwichafengeni ekewe ätemirit o achufengeni ekewe semirit me ekewe mönükol. Iwe, pwal ekewe mi apwüpwülüfö repwe towu seni rumwer o feito.
JOE 2:17 Iwe, ekewe souasor mi angang ngeni ewe Samol mi Lapalap repwe ütä lefilen kengkangen ewe imwenfel me ewe rongen asor o kechü. Iwe, repwe apasa, “Äm Samol mi Lapalap, kopwe achika noum aramas, nge kosap mwüt ngeniir pwe repwe tolong lon itengau me esit me ren chon ekewe mwü. Pwota chon ekewe mwü repwe apasa, ‘Ifa i chök ar we Kot?’”
JOE 2:18 Mürin, ewe Samol mi Lapalap epwe ekimongei fanüan o tongei nöün aramas.
JOE 2:19 Iwe, epwe üreniir, “Iei üpwe ngenikemi wiich, wain me apüra seni föün olif tori epwe ku ngenikemi. Ousap chüen küna itengau me lein chon ekewe mwü.
JOE 2:20 Iwe, üpwe atowu me leimi ekewe pwiin lifichimas seni efeng o asürela toau lon fanüapö, pwe ekewe mi akom repwe mäla lon ewe Setin Mäla mi nom ötiu, nge ekewe mi kukumwir repwe mäla lon ewe matau watte mi nom lotou. Iwe, pwongauen inisir epwe pwonotä. Üpwe aroserela pokiten ar kewe föför ra föriir.”
JOE 2:21 Ewe fanü epwe öchsefäl o ämärätä sokopaten irä mi ua, pun ewe Samol mi Lapalap a föri mettoch mi amwarar.
JOE 2:22 Ousap niuokus, ämi mönün ewe fanü, pun fetilin lon ewe fanü epwe arauarau, ekewe irä repwe ua, ewe irä fiik me irän wain repwe pwal uamong.
JOE 2:23 Oupwe mwänek, ämi aramasen Sion, oupwe pwapwa ren mine ewe Samol mi Lapalap ämi we Kot a föri. A fang ngenikemi üttomong o apüngätiu womi ütten lefen me ütten leres usun chök me mwan.
JOE 2:24 Iwe, ekewe lenien wichiwich umwun wiich repwe ur ren föün wiich, nge ekewe lenien üchüch repwe ur ren wain me apüra seni föün olif.
JOE 2:25 “Iwe, üpwe aliwini ngenikemi mine ekewe lifichimas mi äsfeil, ekewe mi mwetemwet o kata, pwal mine ekewe muunen lifichimas ra eni lon ekewe ier. Ir nei mwichen sounfiu mi chomong üa tinato remi.
JOE 2:26 Iwe, oupwe mongö mongö mi chomong pwe oupwe möt. Oupwe pwal mwareiti iten ewe Samol mi Lapalap ämi we Kot, a föri mettoch mi amwarar ngenikemi. Nge nei aramas resap chüen tosefälilong lon itengau me säw.
JOE 2:27 Iwe, ämi chon Israel, oupwe silei pwe ngang üa nom leimi, oupwe pwal silei pwe ngang ewe Samol mi Lapalap ämi we Kot, nge esap wor eman lüki. Iwe, nei aramas resap chüen tosefälilong lon itengau me säw.”
JOE 2:28 “Mürin, epwe war ewe fansoun pwe üpwe tinato Ngüni won aramas meinisin. Nöümi mwän me fefin repwe osuni, ekewe chinlap mwän me leimi repwe eäni tan, nge nöümi alüal epwe wor künaer.
JOE 2:29 Lon ena fansoun üpwe pwal tinato Ngüni won chon angang mwän me chon angang fefin.
JOE 2:30 Iwe, üpwe awarato manaman won läng pwal won fanüfan, cha me ekkei, pwal kuchun ötüöt.
JOE 2:31 Akkar epwe rochola, nge maram epwe wiliti cha mwen epwe war ränin ewe Samol mi Lapalap, ewe rän mi lap o eniwokus.
JOE 2:32 Iwe, epwe fis pwe iö epwe köri iten ewe Samol mi Lapalap epwe manau. Pun won ewe chuk Sion pwal lon Jerusalem repwe nom chokewe mi sü seni feiengau, usun ewe Samol mi Lapalap a apasa. Nge me lein ekewe mi chüen manau epwe wor chokewe ewe Samol mi Lapalap a afiliir.”
JOE 3:1 Iwe, ewe Samol mi Lapalap a üra, “Lon ena fansoun, lupwen ngang üpwe aliwinisefäli chon Juta me chon Jerusalem,
JOE 3:2 üpwe achufengeni chon ekewe mwü meinisin o emweniretiu lon ewe lemol ia epwe fis kapwüng ie. Ikenan üpwe apwüngüür pokiten ar föför mi ngau ngeni nei aramasen Israel. Pun ra atoropasafeiliir lein ekewe mwü o aineti fanüei lefiler.
JOE 3:3 Ra pwal asisil won nei aramas iö epwe nöüniir amanau. Iwe, ra amömöla eman ät pwe epwe wor mön ar lisowu, ra pwal amömöla eman nengin pwe epwe wor mön ünümer wain.
JOE 3:4 Ämi chon Tirus me chon Siton, pwäl ämi chon Filistia meinisin, met oua ekiekin föri ngeniei? Ifa usun, oua mochen liwini ngeniei mine üa föri ngenikemi? Are oua ekiekin föri ei, üpwe fokun müttir liwini ngenikemi liwinin ämi föför.
JOE 3:5 Pun oua angei ai silifer me kolt o uweela wöüi mi chomong lon ämi kewe imwenfel.
JOE 3:6 Oua amömöla ekewe chon Juta me chon Jerusalem ngeni ekewe chon Kris, pwe repwe toau seni fanüer.
JOE 3:7 Iei üpwe aliwinireto seni ekewe leni ia oua amömörela ie, nge üpwe liwini ngenikemi usun mine oua föri ngeniir.
JOE 3:8 Iwe, üpwe amömöla nöümi kewe mwän me fefin ngeni chon Juta, nge chon Juta repwe amömörela ngeni chon Sepa mi nom lon fanü toau. Ngang ewe Samol mi Lapalap üa kapas.
JOE 3:9 Oupwe arongafeili ei pworaus lein chon ekewe mwü: Oupwe amolakemiitä ngeni maun, oupwe köri ekewe sounfiu mi pöchökül. Sounfiu meinisin repwe feito o chufengen.
JOE 3:10 Oupwe awili ämi pisekin tu pwül ngeni ketilas, nge ämi woot oupwe awili ngeni siles. Pwal ekewe mi apwangapwang repwe apasa, ‘Ngang eman sounfiu.’
JOE 3:11 Oupwe müttir feito, ämi chon ekewe mwün ünükün Israel, oupwe chufengen lon ewe lemol.” Ai Samol mi Lapalap, kopwe tinato noum sounfiu pwe repwe maun ngeniir.
JOE 3:12 “Chon ekewe mwün fanüfan repwe achufengeniir o feila lon ewe lemol ia epwe fis kapwüng ie. Pun ikenan Ngang ewe Samol mi Lapalap üpwe mot won lenien apwüng, pwe üpwe apwüngü chon ekewe mwü mi nom ünükün Israel.
JOE 3:13 A fokun watte än chon ekewe mwü föföringau. Iei mine oupwe pöküretiu usun irän wiich lon fansoun räs. Oupwe puriretiu usun eman a puri föün wain, tori ewe lenien pupu a urela o niwu.”
JOE 3:14 Chomong, chomong mwicheichen aramas ra chufengen lon ewe lemol ia epwe fis kapwüng ie. Iwe, a pwä me ikenan pwe ränin ewe Samol mi Lapalap a arapoto.
JOE 3:15 Iwe, akkar me maram repwe rochola, nge ekewe fü resap chüen tin.
JOE 3:16 Iwe, ewe Samol mi Lapalap a leüömong le kökkö seni Sion, mwelian a towu seni Jerusalem, iwe, läng me fanüfan ra chechech ren. Nge ewe Samol mi Lapalap epwe eu lenien op fän iten nöün aramas, pwal eu imwen maun mi pöchökül fän iten chon Israel.
JOE 3:17 “Mürin, ämi chon Israel, oupwe silei pwe Ngang ewe Samol mi Lapalap ämi we Kot. Üa imweimw lon Sion won chuki mi pin. Iwe, Jerusalem epwe eu leni mi pin, nge chon ekis resap chüen maun ngeni o liapeni.
JOE 3:18 Lon ena fansoun ekewe chuk repwe kula ren tanipin wain, nge chomong kow repwe nom won ekewe chukutekison. Iwe, ekewe öüwön Juta repwe ur ren koluk, nge eu puächen koluk epwe puwu seni imwen ewe Samol mi Lapalap, pwe epwe achöchönü ewe lemolun Akasia.
JOE 3:19 Iwe, Isip epwe tala, nge Etom epwe wiliti eu fanüapö pokiten ar föförün mwänewüs ngeni chon Juta, pun ra niela aramas esap wor ar tipis me lon ewe fanü.
JOE 3:20 Iwe, üpwe ngeniir chappen ar niela nei aramas, nge üsap amusala ar tipis. Nge Juta me Jerusalem repwe so feilfeilachök seni eu täppin aramas tori eu täppin. Nge Ngang ewe Samol mi Lapalap üpwe imweimw lon Sion.”
AMO 1:1 Ikkei ekewe kapas än Am, eman chon masen sip seni Tekoa. Ruu ier mwen ewe chechechin fanü, lupwen Usia a king lon Juta, nge Jeropoam nöün Jehoas we a king lon Israel, Kot a pwäri ngeni Am ekei mettoch fänäsengesin Israel.
AMO 1:2 Iwe, Am a üra, “Ewe Samol mi Lapalap a leüömong le kökkö seni ewe chuk Sion o aronga mwelian seni Jerusalem. Ekewe lenien enen sip ra pwasala, ewe fetil won ewe chuk Karmel a aiolol.”
AMO 1:3 Iei alon ewe Samol mi Lapalap, “Chon Tamaskus ra chök sopwela le föri tipis, iei mine üpwe fokun apwüngüür. Ra wichi chon Kiliat ren pisekin wichiwich seni mächä, usun eman a wichi umwun wiich.
AMO 1:4 Iei mine üpwe tinala ekkei pwe epwe kenala imwen ewe king Hasael me ekewe imwen maun mi pöchökül än Penhatat.
AMO 1:5 Üpwe ataetiu asamalapen ewe telinimw Tamaskus o ärala chokewe mi imweimw lon ewe lemolun Awen, pwal ätewe mi nemenem lon Peteten. Iwe, ekewe chon Siria repwe oola Kir.” Iei usun mine ewe Samol mi Lapalap a apasa.
AMO 1:6 Iei alon ewe Samol mi Lapalap, “Chon Kasa ra chök sopwela le föri tipis, iei mine üpwe fokun apwüngüür. Ra liapeni chon eu mwü meinisin o amömörela ngeni chon Etom.
AMO 1:7 Iei mine üpwe tinala ekkei pwe epwe kenala tittin ewe telinimw Kasa me an kewe imwen maun mi pöchökül.
AMO 1:8 Üpwe ärala ekewe mi nemenem lon Astot me Askalon. Üpwe maun ngeni chon Ekron, tori ekewe chon Filistia mi chüen manau repwe rosola.” Iei usun mine Kot ewe Samol mi Lapalap a apasa.
AMO 1:9 Iei alon ewe Samol mi Lapalap, “Chon Tirus ra chök sopwela le föri tipis, iei mine üpwe fokun apwüngüür. Ra liapeni o amömöla chon eu mwü meinisin ngeni Etom, nge resap chechemeni ewe pwonen pwipwi.
AMO 1:10 Iei mine üpwe tinala ekkei pwe epwe kenala tittin ewe telinimw Tirus me an kewe imwen maun mi pöchökül.”
AMO 1:11 Iei alon ewe Samol mi Lapalap, “Chon Etom ra chök sopwela le föri tipis, iei mine üpwe fokun apwüngüür. Ra tapweri pwiir kewe chon Israel fän ketilas, nge resap eäni tong ngeniir. Esap wor aükükün ar song, nge ra chök amwöchüfochei.
AMO 1:12 Iei mine üpwe tinala ekkei pwe epwe kenala ewe telinimw Teman me ekewe imwen maun mi pöchökül lon Posra.”
AMO 1:13 Iei alon ewe Samol mi Lapalap, “Chon Amon ra chök sopwela le föri tipis, iei mine üpwe fokun apwüngüür. Ra tileni luken fefin mi pwopwo me lon Kiliat, lupwen ar maun fän iten ar repwe awatteela kiännin fanüer.
AMO 1:14 Iei mine üpwe aküw eu ekkei pwe epwe kenala tittin ewe telinimw Rapa me an kewe imwen maun mi pöchökül. Epwe wor arükak lon ewe ränin maun, nge ewe maun epwe usun chök eu mölümöl.
AMO 1:15 Ar we king me nöün kewe nöüwis repwe oola.” Iei usun mine ewe Samol mi Lapalap a apasa.
AMO 2:1 Iei alon ewe Samol mi Lapalap, “Chon Moap ra chök sopwela le föri tipis, iei mine üpwe fokun apwüngüür. Ra kenala chün ewe kingen Etom tori ra wiliti falang.
AMO 2:2 Iei mine üpwe tinala ekkei pwe epwe kenala Moap me ekewe imwen maun mi pöchökül lon Keriot. Ekewe chon Moap repwe mäla, lupwen epwe fis akürangen maun, lupwen ekewe sounfiu repwe arükak o ettiki rappwa.
AMO 2:3 Üpwe niela ewe chon nemenem me lon Moap me nöüwisen ewe fanü meinisin.” Iei usun mine ewe Samol mi Lapalap a apasa.
AMO 2:4 Iei alon ewe Samol mi Lapalap, “Chon Juta ra chök sopwela le föri tipis, iei mine üpwe fokun apwüngüür. Ra pöütala ai kewe allük, nge resap tümwünü ai kewe pwüüng. Ra tokola ren anümwäl, mine ar kewe lewo ra fen angang ngeni.
AMO 2:5 Iei mine üpwe tinala ekkei pwe epwe kenala Juta me ekewe imwen maun mi pöchökül me lon Jerusalem.”
AMO 2:6 Iei alon ewe Samol mi Lapalap, “Chon Israel ra chök sopwela le föri tipis, iei mine üpwe fokun apwüngüür. Ra amömöla ekewe chon pwüng ngeni moni pwe repwe amanau, ra pwal amömöla ekewe chon mwelele resap tongeni mwo nge mönätiu liwinimangen eu pea chori.
AMO 2:7 Ra chök ipweri ekewe chon wöüngau usun eman a ipwetiu won pwül o atoka seni ekewe chon riaföü pwüngün ar kapwüng. Eman mwän me saman ra konopök ren eman chök chon angang fefin. Iei usun ra apiningaua pinin itei.
AMO 2:8 Ra konola ünükün iteiten rongen asor lon mangaku ra angei seni chon wöüngau pwe asisilen ar liwinimang. Ra ünümi wain lon imwen ar we kot, ekewe wain ra angei seni chokewe mi liwinimang ngeniir.
AMO 2:9 Nge pokitemi, ämi nei aramas, üa wesewesen arosala ekewe chon Amor, chokewe mi langatam usun ekewe irä setar o pöchökül usun ekewe irä ook.
AMO 2:10 Üa emwenikemiiwu seni ewe fanü Isip o emwenikemi lon ewe fanüapö lon ükükün faik ier. Üa ngenikemi fanüen ekewe chon Amor pwe oupwe fanüeni.
AMO 2:11 Üa filätä ekoch me lein nöümi kewe mwän pwe repwe soufos, pwal ekoch me lein ekewe alüal pwe repwe Nasir. Ifa usun, esap iei usun, ämi chon Israel? Ngang ewe Samol mi Lapalap üa kapas.
AMO 2:12 Nge ämi oua aünü ngeni ekewe Nasir wain o allük ngeni ekewe soufos pwe resap osuni.
AMO 2:13 Iei mine üpwe chounikemiitiu pwe oupwe tikitik usun efoch woken a tikitik ren choun wosan wiich.
AMO 2:14 Ätekewe mi müttir le sä resap tongeni sü, ekewe chon pöchökül epwe kisila ar pöchökül, nge ekewe sounfiu resap tongeni püsin amanaueer.
AMO 2:15 Ekewe chon esefich repwe kuf, ekewe sounfiu mi müttir le sä resap tongeni sü, nge ekewe chon wawa oris resap pwal tongeni püsin amanaueer.
AMO 2:16 Pwal ekewe mi fokun pwora me lein ekewe sounfiu repwe likitala pisekir o sü lon ena rän.” Iei usun mine ewe Samol mi Lapalap a apasa.
AMO 3:1 Ämi chon Israel, oupwe rongorong ekei kapas ewe Samol mi Lapalap a apasa usumi, ämi chon ewe mwü meinisin i a emwenawu seni ewe fanü Isip.
AMO 3:2 “Ämi chök üa filikemiitä seni lein chon ekewe mwü meinisin won fanüfan. Nge pokiten ämi kewe tipis ra kon fokun ngau, iei mine üpwe fokun apwüngükemi.”
AMO 3:3 Ifa usun, ruoman aramas ra tongeni mwinemwin ika resap mwo tipeeufengen me mwan?
AMO 3:4 Ifa usun, eman laion epwe wörüwör me lein wöllap are esap wor liapan? Ifa usun, eman nienifön laion epwe ngüngü me lon pwangan are esap wor mine a liapeni?
AMO 3:5 Ifa usun, eman machang epwe tup lon eu likatup are esap wor paa lon? Ifa usun, eu likapich epwe pich are esap wor och a tup lon?
AMO 3:6 Ifa usun, aramas resap niuokus lupwen ra rongorong tikin rappwan maun me lon eu telinimw? Ifa usun, epwe fis feiengau lon eu telinimw, are ewe Samol mi Lapalap esap awarato?
AMO 3:7 Ellet, Kot ewe Samol mi Lapalap esap föri och ika esap pwäri mwo mine a ekiekietä ngeni nöün chon angang ekewe soufos.
AMO 3:8 Are eman laion a wörüwör, iö esap niuokus? Are Kot ewe Samol mi Lapalap a kapas, iö esap asilefeili an kapas?”
AMO 3:9 Oupwe asile ngeni chokewe mi nom lon ekewe imwen king me lon Astot pwal me lon Isip o üra, “Oupwe amwichafengenikemi won ekewe chukun Samaria pwe oupwe küna ewe fitikoko mi watte a fis lon, pwal ar ariaföüü aramas.”
AMO 3:10 Iei alon ewe Samol mi Lapalap, “Ekei aramas resap silei ar repwe föri mine a pwüng, ir chokewe mi amasoua imwer kewe imwen king ren pisek ra angei fän mwänewüs me solä.
AMO 3:11 Iei mine chon oputeer repwe tolong lon fanüer, repwe ataetiu ar kewe imwen maun mi pöchökül o soläni pisekir mi nom lon imwer kewe imwen king.”
AMO 3:12 Iei alon ewe Samol mi Lapalap, “Usun eman chon mas a angei seni awen eman laion ruofoch pechen eman sip ika eu seling chök, iei usun ekoch chök chon Israel mi nom lon Samaria repwe küna manau me lein chokewe mi mot won ar kewe lenien mot mi pwetete lon ei fansoun.”
AMO 3:13 Iei alon Kot ewe Samol mi Lapalap, ewe Samol mi Unusen Manaman, “Oupwe aüselinga aloi o fönöü ekewe mwirimwirin Jakop.
AMO 3:14 Lon ena fansoun, lupwen üpwe apwüngü chon Israel pokiten ar tipis, üpwe atai ekewe rongen asor lon Petel. Iwe, mächän ekewe rongen asor repwe kup o turutiu lepwül.
AMO 3:15 Üpwe atai imwer kewe imweimwen lon fansoun patapat me imwer kewe imweimwen lon fansoun pwichikar. Ekewe imw mi fout ngeni ngiin äläfant repwe tatiu, nge ekewe imw watte repwe tala.” Iei usun mine ewe Samol mi Lapalap a apasa.
AMO 4:1 Oupwe rongorong ekei kapas, ämi fin Samaria mi kitinupula usun ekewe kow lon Pasan mi amongööch. Oua ariaföüü ekewe chon wöüngau o purätiu ekewe chon mwelele, oua pwal üreni pwülüemi kewe pwe repwe uwato ünümemi sakau.
AMO 4:2 Kot ewe Samol mi Lapalap mi pin a eäni eu akapel o üra, “Epwe fokun war ewe fansoun, lupwen repwe efikemiila ren ö, repwe efikemiila meinisin usun ik.
AMO 4:3 Repwe atokemiiwu me lon pwangen tittin ewe telinimw eman me eman seni awenewenen en me lenian o aturukemiiwu ngeni ewe chuk Hermon.” Iei usun mine ewe Samol mi Lapalap a apasa.
AMO 4:4 Iei alon Kot ewe Samol mi Lapalap, “Ämi chon Israel, oupwe feila Petel o föri tipis, oupwe feila Kilkal o achomongala ämi tipis. Oupwe uwato ämi kewe asor iteiten lesosor pwal ämi kewe leengol iteiten ülüngat rän.
AMO 4:5 Oupwe keni pilawa mi wor iis lon pwe ämi kewe asoren kilisou o sikesik usun ämi kewe asor oua uwato seni püsin letipemi. Oupwe aingaing wor, pun iei usun oua efich.”
AMO 4:6 Iei alon ewe Samol mi Lapalap, “Ngang ewe mi awarato lengita lon ämi kewe telinimw meinisin, pwe esap wor enemi lon leniemi kewe. Iei mwo nge ämi ousap liwinto rei.
AMO 4:7 Üa pwal amwöchü senikemi üt lon fansoun epwe fokun wor üt fän iten fotämi irä. Üa apüngätiu üt won eu telinimw, nge üsap apüngätiu won pwal eu. Üt a püngütiu won eu mälämäl, nge pwal ewe eu mälämäl esap püng üt won.
AMO 4:8 Iei mine aramasen ekoch telinimw ra feila ngeni pwal eu telinimw fän ar moror pwe repwe ün koluk, nge esap naf ngeniir. Iei mwo nge ämi ousap liwinto rei.
AMO 4:9 Üa awarato moi me mesenipik won tanipimi me ämi tanipin wain pwe repwe atarala. Ekewe lifichimas ra enala ämi kewe irä fiik me irä olif. Iei mwo nge ämi ousap liwinto rei.
AMO 4:10 Üa tinato mätter leimi usun üa föri me lon Isip. Üa niela nöümi kewe alüal lon maun o angeala nöümi kewe oris. Üa aura pwötümi ren pwomachen ekewe somä me lon leniemi. Iei mwo nge ämi ousap liwinto rei.
AMO 4:11 Üa niela ekoch me leimi usun üa niela ekewe chon Sotom me Komora. Nge chokewe mi chüen manau me leimi ra usun esop mwüch a katowu seni ekkei. Iei mwo nge ämi ousap liwinto rei.” Iei usun mine ewe Samol mi Lapalap a apasa.
AMO 4:12 “Iei mine üpwe apwüngükemi, ämi chon Israel. Pokiten üpwe föri ei, ämi chon Israel oupwe amolakemiitä pwe oupwe churiei, ngang ämi we Kot.”
AMO 4:13 Kot ewe mi alapalapa ekewe chuk o föri asepwäl. A pwäri an ekiek ngeni aramas. A föri mallen rän me rochopwak o nemeni unusen fanüfan, itan Kot ewe Samol mi Unusen Manaman.
AMO 5:1 Ämi chon Israel, oupwe rongorong kapasen ei kölün kechü üpwe eäni fän äsengesimi,
AMO 5:2 “Ewe föpwül Israel a turula, nge esap fokun chüen üsefälitä. A katurula won püsin fanüan, nge esap wor eman a aütäi.”
AMO 5:3 Iei usun mine Kot ewe Samol mi Lapalap a apasa, “Are engeröü sounfiu repwe towu seni eu telinimw me lon Israel, ipükü chök repwe liwinsefäl. Nge are ipükü sounfiu repwe towu seni pwal eu, engol chök repwe liwinsefäl.”
AMO 5:4 Iei usun mine ewe Samol mi Lapalap a üreni chon Israel, “Oupwe küttaei pwe oupwe manau.
AMO 5:5 Ousap küttaei lon Petel, ousap feila Kilkal ika Persepa. Pun chon Kilkal repwe oola, nge Petel epwe tala.”
AMO 5:6 Oupwe kütta ewe Samol mi Lapalap pwe oupwe manau. Are ousap kütta i, epwe feito won chon Israel usun eu ekkei. Ewe ekkei epwe kenala ekewe aramasen Petel, nge esap wor eman epwe tongeni kunuela.
AMO 5:7 Feiengauen chokewe mi sorei mine a pwüngüöch o purätiu mine a pwüng.
AMO 5:8 Ewe Samol mi Lapalap a föri ekewe fü iter mweriker me öniön. A siwili rochokichin rochopwak ngeni saram o awili rän ngeni pwin. A angei kolukun lematau o ninätiu won fanüfan. Itan ewe Samol mi Lapalap.
AMO 5:9 A awarato feiengau won ekewe mi pwora, pwe ar kewe imwen maun mi pöchökül ra tala.
AMO 5:10 Ämi oua oput ätewe mi pälüeni mine a pwüngingau lon kapwüng, oua pwal oput ätewe mi eäni kapas mi let.
AMO 5:11 Oua ariaföüü ekewe chon wöüngau o eriani seniir ar kewe wiich. Iei mine, inamwo ika oua aüetä imw seni fau mi fal, nge ousap nonom lor. Inamwo ika oua fotuki tanipin wain mi fokun mürina, nge ousap ün wain seni.
AMO 5:12 Pun üa silei pwe ämi kewe föföringau ra chomong, nge ämi kewe tipis ra watte. Ämi oua ariaföüü ekewe chon pwüng o angei lifangen amichimich, oua pwal epeti ekewe chon mwelele pwe resap angei ar pwüng me lon kapwüng.
AMO 5:13 Iei mine ekewe mi mirit repwe fanafanala lon ena fansoun, pun ena fansoun a ngau.
AMO 5:14 Oupwe föri mine a pwüng nge sap mine a ngau, pwe oupwe manau. Mürin, Kot ewe Samol mi Unusen Manaman epwe etikemi, usun oua apasa.
AMO 5:15 Oupwe oput mine a ngau o efich mine a pwüng. Oupwe eäni wenechar me lon kapwüng. Eli Kot ewe Samol mi Unusen Manaman epwe ümöümöch ngeni chokewe mi chüen manau me lein chon Israel.
AMO 5:16 Nge pokiten ämi tipis, Kot ewe Samol mi Unusen Manaman a apasa, “Epwe wor ngüngüres lon ekewe lenien chulap me lon ewe telinimw me puchörün riaföü me lon ekewe al meinisin. Repwe köri ekewe chon angang lon tanipi pwe repwe feila o ngüngüres, fiti chokewe mi angei liwinir le eäni ekewe kölün kechü.
AMO 5:17 Epwe wor ngüngüres lon ekewe tanipin wain meinisin, pun ngang üpwe feito pwe üpwe apwüngükemi.” Iei usun mine ewe Samol mi Lapalap a apasa.
AMO 5:18 Feiengauemi ämi mi ösüküsükü ränin ewe Samol mi Lapalap. Pwota oua mochen pwe epwe war ei rän? Pun ei rän epwe eu ränin rochopwak, nge sap eu ränin saram.
AMO 5:19 Epwe usun chök are eman aramas epwe sü seni eman laion, nge a churi eman pear. Ika usun chök are eman epwe sülong lon imwan o itetä won etippan, nge eman serepenit a küw.
AMO 5:20 Ränin ewe Samol mi Lapalap epwe eu ränin rochopwak nge sap saram, epwe eu ränin toputop nge sap saramaram.
AMO 5:21 Ewe Samol mi Lapalap a üra, “Üa oput ämi kewe chulap mi pin. Üsap fokun pwapwaitiir.
AMO 5:22 Inamwo ika oua eäni asoren kek ngeniei me asoren mongö, ngang üsap etiweer. Üsap pwal nenengeni ämi eäni asoren kinamwe nöümi mönün asor mi kitinup.
AMO 5:23 Oupwe atoaua seniei akürangen ämi köl, üsap mochen rongorong ngingin nöümi kitar.
AMO 5:24 Nge oupwe eänifochei pwüngüöch ngeni ekewe chon wöüngau, usun eu chanpupu a pupufochofoch. Oupwe chök föri mine a pwüng, usun koluk a chök putiu.
AMO 5:25 Ämi chon Israel, ifa usun, oua uwato rei asor me lifang lon ekewe faik ier me lon ewe fanüapö?
AMO 5:26 Apwi! Nge oua eki ekewe uluulun anümwäl, ewe uluulun Sakut ämi we king me ewe uluulun Kaiwan ämi we koten fü oua püsin föriir.
AMO 5:27 Pokiten oua chüen fel ngeni uluulun anümwäl, üpwe tinikemiila pekilan Tamaskus pwe oupwe oola.” Iei alon ewe Samol mi Lapalap, itan ewe Samol mi Unusen Manaman.
AMO 6:1 Feiengauemi ämi mi nonomöch lon Sion, ämi mi mefi kinamwe lon Samaria, pwal ämi mwän mi iteföüla mi nom lon eu mwü mi iteföüla, ämi chokewe chon Israel ra feito remi pwe repwe kütta alilisir senikemi.
AMO 6:2 Oupwe feila o katol ewe telinimw Kalne. Seni ikenan oupwe feila Hamat ewe telinimw mi watte, mürin oupwe feitiu Kat ewe telinimwen chon Filistia. Ifa usun, ekei mwü ra öch seni mwün Juta me Israel? Ifa usun, fanüer a watte seni fanüemi?
AMO 6:3 Ämi ousap mochen lükü pwe ewe ränin feiengau a arap, nge ren ämi föför oua chök amüttirato ewe rän.
AMO 6:4 Feiengauemi ämi mi kon won peet mi fout ngeni ngiin äläfant o asösö won lenien mot mi pwetete, ämi mi ochei fituken nienifön sip me fituken nienifön kow mi kitinup.
AMO 6:5 Oua köl fän kitar usun Tafit o föri pisekin likettik.
AMO 6:6 Oua ün wain lon sepi o epitikemi lö mi fokun pwokus, nge ousap letipeta pwe Israel a tala.
AMO 6:7 Iei mine ämi oupwe akom lein chokewe repwe oola. Ämi kewe kametip me fansoun pwapwa repwe ükütiu.
AMO 6:8 Iwe, Kot ewe Samol mi Lapalap a eäni akapel püsin itan, Kot ewe Samol mi Unusen Manaman a apasa, “Üa oput än ekewe chon Israel lamalamtekia o anioputa imwer kewe mi watte o ling. Üpwe asechalong ar we telinimw me meinisin mine a nom lon lepöün chon oputeer.”
AMO 6:9 Iwe, are a chüen wor engol aramas lon eu imw, ir meinisin repwe mäla.
AMO 6:10 Mürin, märärin ewe aramas mi mäla, ätewe mi wisen föri angangen peias, epwe uwawu ewe somä seni lon ewe imw. Iwe, epwe kökkölong ren ewe mi chüen manau lon ewe imw, “Ifa usun, mi chüen wor eman a nom reöm?” Nge ätewe epwe pälüeni, “Apwi.” Mürin epwe üralong ren, “Kopwe fanafanala. Pun sisap fokun föüni iten ewe Samol mi Lapalap.”
AMO 6:11 Iwe, lupwen ewe Samol mi Lapalap epwe atowu an allük, ekewe imw watte me ekewe imw kükün repwe tatakisitiu.
AMO 6:12 Ifa usun, oris ra sä won achau? Ifa usun, eman a tuw won achau ren ätemwänin kow? Nge ämi oua sorei pwüngüöch ngeni poison, nge pwüng oua sorei ngeni pwüngingau.
AMO 6:13 Oua aingaing pokiten oua liapeni ewe telinimw Lotepar , oua sikesik o apasa, “Aia liapeni Karnaim ren püsin äm pöchökül.”
AMO 6:14 Nge iei alon Kot ewe Samol mi Unusen Manaman, “Üpwe awarato chon eu mwü pwe repwe maun ngenikemi, ämi chon Israel. Repwe ariaföüükemi seni ewe al mi ale ngeni Hamat mi nom efeng tori ewe öüwön Arapa mi nom ör.”
AMO 7:1 Iwe, a wor künaei seni Kot ewe Samol mi Lapalap. Üa küna pwe a föri epwi pwiin lifichimas mürin chök än ewe king fetil a pöküpök, nge ewe fetil mi fö ekärän pwükütä.
AMO 7:2 Üa küna pwe ekewe lifichimas ra eni fetilin ewe fanü meinisin. Mürin üa apasa, “Ai Kot, Samol mi Lapalap, üa tüngor ngonuk pwe kopwe amusala än noum aramas tipis. Ifa usun ar repwe tongeni manau? Ra fokun chokükün o apwangapwang.”
AMO 7:3 Mürin, ewe Samol mi Lapalap a siwili an ekiek o üra, “Mine ka küna esap fis.”
AMO 7:4 Iwe, a pwal wor künaei seni Kot ewe Samol mi Lapalap. Üa küna pwe Kot ewe Samol mi Lapalap a amolätä an epwe apwüngü nöün aramas ren ekkei. Iwe, ewe ekkei a apwasätä ewe matau mi alolol o popuetä le kenala ewe fanü.
AMO 7:5 Mürin üa apasa, “Ai Kot, Samol mi Lapalap, üa tüngor ngonuk pwe kopwe ükütiu le föri ei. Ifa usun än noum aramas repwe tongeni manau? Ra fokun chokükün o apwangapwang.
AMO 7:6 Iwe, ewe Samol mi Lapalap a siwili an ekiek o üra, “Mine ka küna esap pwal fis.”
AMO 7:7 Iwe, a pwal wor künaei seni ewe Samol. Üa küna pwe i a ütä ünükün eu tit eman a senätä ren efoch selin awenewen. Iwe, efoch selin awenewen a nom lepöün.
AMO 7:8 Iwe, ewe Samol mi Lapalap a aisiniei, “Amos, met ka küna?” Nge üa pälüeni, “Üa küna efoch selin awenewen.” Mürin, ewe Samol a apasa, “Üa aea ei selin awenewen pwe üpwe aiti ngeni nei aramasen Israel, pwe ra wewe ngeni eu tit mi pwor. Iwe, üsap chüen siwili ai ekiekin apwüngüür.
AMO 7:9 Ekewe leni mi tekia ia mwirimwirin Isaak ra fel ie repwe tala, ekewe leni mi pin lon Israel repwe tatakisitiu. Nge ngang üpwe ü ngeni chon leimwen Jeropoam o aükätiu mwün.”
AMO 7:10 Mürin, Amasia ewe souasor mi nom lon Petel a titila ren Jeropoam ewe kingen Israel o apasa, “Amos a rawangaueek lein chon Israel. An kapas a angauala chon ei fanü.
AMO 7:11 Pun iei usun alon Amos, ‘Jeropoam epwe fokun mäla lon maun, nge chon Israel repwe oola seni fanüer.’”
AMO 7:12 Iwe, Amasia a üreni Amos, “En soufos, kopwe feila me ikei o liwinla ngeni ewe fanü Juta, pwe kopwe küna anom ren om afalafal me ikenan.
AMO 7:13 Nge kosap chüen osunisefäli me lon Petel, pun ikei a nom än ewe king lenien fel me än ewe mwü imwenfel.”
AMO 7:14 Mürin, Amos a pälüeni Amasia, “Sap ngang eman soufos, sap pwal ngang eman nöün soufos. Ngei ngang chök eman chon masen sip me chon tümwünü ekewe irä sikamor.
AMO 7:15 Nge ewe Samol mi Lapalap a angeei seni ai wisen tümwünü pwiin sip o üreniei, ‘Kopwe feila o osuni ngeni nei aramasen Israel.’
AMO 7:16 Iei kopwe rongorong mine ewe Samol mi Lapalap a üra. En ka apasa pwe üpwe ükütiu le osuni mine a ngau fän iten chon Israel, üsap pwal afalafala mine a ngau ngeniir.
AMO 7:17 Iei mine ewe Samol mi Lapalap a ürenuk, ‘Pwülüom we epwe wiliti eman fefin mi amömö inisin fän iten lisowu me lon ei telinimw, nge noum kewe mwän me fefin repwe mäla lon maun. Fanüom epwe aükük o ainet, nge en kopwe mäla lon eu fanü mi toau. Iwe, chon Israel repwe fokun oola seni fanüer.’”
AMO 8:1 Iwe, a wor künaei seni Kot ewe Samol mi Lapalap. Üa küna eu chükün föün irän leres.
AMO 8:2 Iwe, ewe Samol mi Lapalap a aisiniei, “Amos, met ka küna?” Nge üa pälüeni, “Üa küna eu chükün föün irän leres.” Mürin, ewe Samol mi Lapalap a üreniei, “A tori sopolan fän iten nei aramasen Israel. Üsap chüen siwili ai ekiekin apwüngüür.
AMO 8:3 Lon ena fansoun kölün lon ewe imwen king epwe wiliti ngüngüres. Epwe wor somä ekis meinisin. Repwe atururowu lükün, nge esap wor eman epwe fos.” Iei usun mine Kot ewe Samol mi Lapalap a apasa.
AMO 8:4 Mürin, Amos a üra: Oupwe rongorong ämi mi purätiu ekewe chon mwelele o niela ekewe chon wöüngau me lon ei fanü.
AMO 8:5 Oua apasa, “Inet ewe chulapen popun maram epwe wes, pwe sipwe tongeni amömö föün wiich? Inet ewe ränin sapat epwe wes, pwe sipwe tongeni popuetä le amömö? Mürin sia tongeni akükünätiu ewe aükük o alapätä ewe liwin, pwe sipwe föri angangen atuputup ren eu kilo mi mwäl.
AMO 8:6 Sia tongeni amömöla ekewe wiich mi aücheangau ren eu liwin mi watte. Sipwe möni ewe chon wöüngau pokiten esap tongeni mönätiu an liwinimang me ewe chon mwelele ren ükükün liwinin eu pea chori.”
AMO 8:7 Iwe, ewe Samol mi Lapalap än chon Israel we Kot a akapel, “Ellet, üsap fokun manlükala eu lein ar kewe föför mi ngau.
AMO 8:8 Ifa usun, ewe fanü esap chechech pokiten ei föför, nge chokewe meinisin mi nom lon resap letipeta? Ewer, unusen ewe fanü epwe chechech, epwe pwotä o morotiu usun kolukun ewe chanpupu Nil lon Isip.”
AMO 8:9 Iwe, Kot ewe Samol mi Lapalap a apasa, “Lon ena fansoun üpwe föri pwe akkar epwe tuputiu leoloas, nge fanüfan epwe rochola lerän.
AMO 8:10 Üpwe awili ämi kewe fansoun chulap ngeni fansoun letipeta me ämi kölün pwapwa ngeni kölün kechü. Üpwe föri pwe ämi meinisin oupwe üföüf üf seni tuk o räisöüla möküremi. Lon ena fansoun üpwe föri pwe oupwe letipeta usun eman a letipeta ren nöün aleman mi mäla. Meinisin mine a fis epwe sopolong lon riaföü.
AMO 8:11 Epwe war ewe fansoun lupwen üpwe tinato lengita won ewe fanü. Esap eu echiken mongö ika kakan koluk, nge i eu mwonen än aramas repwe mochen rong än ewe Samol mi Lapalap kapas. Ngang Kot ewe Samol mi Lapalap üa kapas.
AMO 8:12 Aramas repwe saifetal seni ötiu tori lotou, pwal seni efeng tori ör. Repwe saifeil o kütta än ewe Samol mi Lapalap kapas, nge resap fokun küna.
AMO 8:13 Lon ena fansoun ekewe föpwül mi liöch me ekewe alüal mi pöchökül repwe turula ren ar kaka.
AMO 8:14 Chokewe mi akapelü Asima ewe anün Samaria o apasa, ‘Mwo manauen ewe koten Tan,’ ika ‘Mwo manauen ewe koten Persepa,’ ir repwe turula, nge resap fokun üsefälitä.”
AMO 9:1 Iwe, üa küna ewe Samol a ütä arun ewe rongen asor, nge a üra, “Kopwe wichi letonen üren ewe imwenfel fän pöchökül, pwe longolongun we epwe chechech. Kopwe atatakisiretiu o atururetiu won möküren ekewe aramas meinisin. Nge ekewe mi chüen manau üpwe nirela lon maun. Esap fokun wor eman leir epwe tongeni süla, esap fokun wor eman epwe tongeni tiwewu.
AMO 9:2 Inamwo are ra püsin tuetiu aler ngeni ewe lenien sotup, pei epwe turufiir me ikenan. Inamwo are ra feitä läng, üpwe uweeretiu seni ikenan.
AMO 9:3 Inamwo are ra püsin op won ungen ewe chuk Karmel, üpwe kütteer ikenan o turufiir. Inamwo are ra opola seniei fänilolun matau, üpwe allük ngeni eman mönün leset mi fokun watte pwe epwe küür me ikenan.
AMO 9:4 Inamwo are ra oola ren chon oputeer, üpwe allük pwe repwe ninniila. Üa fen apwüngala pwe üpwe aroserela, nge üsap achikeer.”
AMO 9:5 Lupwen Kot ewe Samol mi Unusen Manaman a atapa fanüfan, a chech, nge meinisin mi nonom won ra letipeta. Unusen fanüfan a pwotä o morotiu usun kolukun ewe chanpupu Nil lon Isip.
AMO 9:6 Ewe Samol mi Lapalap a aüetä imwan won ekewe läng o föri pwe läng pwölüpwölün fanüfan. A angei kolukun lematau o ninätiu won fanüfan. Itan ewe Samol mi Lapalap.
AMO 9:7 Iwe, ewe Samol mi Lapalap a apasa, “Ämi chon Israel, oua wewefengen me ekewe chon Itiopia me rei. Üa emwenawu ekewe chon Filistia seni Kaftor me ekewe chon Siria seni Kir usun chök üa emwenikemiiwu seni ewe fanü Isip.
AMO 9:8 Nengeni, ngang Kot ewe Samol mi Lapalap üa nenengeni ewe mwün Israel mi uren tipis. Iwe, üpwe ataala seni won fanüfan, nge üsap chök unusen arosala mwirimwirin Jakop.
AMO 9:9 Ngang üpwe allük ngeni chon oputen Israel, pwe repwe morei ekewe chon Israel. Ngang üpwe moreer me lein chon ekewe mwü meinisin usun eman a morei föün wiich lon eu moromor, nge esap wor eföü kükün föün epwe morotiu lepwül.
AMO 9:10 Nge ekewe chon tipis meinisin me lein nei aramas repwe mäla lon maun, ir chokewe mi apasa, ‘Esap wor och feiengau epwe torikich.’”
AMO 9:11 Iwe, ewe Samol mi Lapalap a apasa, “Epwe war ewe fansoun lupwen üpwe aüsefälietä ewe mwün Tafit mi wewe ngeni eu imw mi turula. Üpwe apinasa pwangan o försefäli mine a ta me won. Üpwe försefäli pwe epwe usun chök lon fansoun lom.
AMO 9:12 Iwe, ekewe aramasen Israel repwe nemenisefäli ekewe lusun fanü me lon Etom, pwal ekewe mwü meinisin mi föü itei wor me lom.” Iei usun alon ewe Samol mi Lapalap, ewe epwe föri ekei föför.
AMO 9:13 Iwe, ewe Samol mi Lapalap a apasa, “Epwe war ewe fansoun pwe ewe chon tu pwül ekärän wes le tu, nge ewe chon kinikin a popuetä le kinikin. Nge ewe chon puri föün irän wain ekärän wes le pupu, nge ewe chon fofot a popuetä le fofot. Wain mi arar epwe suputiu seni ekewe chuk o pu seni ekewe chukutekison meinisin.
AMO 9:14 Üpwe aliwinisefäli nei aramasen Israel ngeni fanüer, nge ir repwe aüsefälietä ekewe telinimw mi tala o nonom lor. Repwe fotuki tanipin wain o ün wain seniir, repwe tanipi o mongö uan.
AMO 9:15 Üpwe fotuki nei aramas lon fanüer, nge esap wor eman epwe üttisefäliretä seni ewe fanü üa ngeniir.” Iei usun ewe Samol mi Lapalap ämi we Kot a apasa.
OBA 1:1 Iei osunien Opataia ren met Kot ewe Samol mi Lapalap a apasa usun Etom. Sa rong ekewe pworaus seni ewe Samol mi Lapalap. Eman chon künö a fen titila lemenen ekewe mwü o apasa, “Oupwe amolakemiitä. Ousipwe maun ngeni Etom.”
OBA 1:2 Ewe Samol mi Lapalap a üreni Etom, “Üpwe akisuketiu me lein ekewe mwü. Kopwe fokun küna koput.
OBA 1:3 Lamalamtekian lelukom a atupuketä, en ewe mi nom lon ekewe föimw, ka nom won ekewe leni mi tekia o ekieki lon lelukom, ‘Iö epwe tongeni aturueitiu lepwül?’
OBA 1:4 Ika mwo ka föri imwom wilitekia usun eman ikel a fas won leni tekia, pwe ka usun chök nge ka nom lein ekewe fü, nge üpwe chök aturuketiu me ikenan. Ngang ewe Samol mi Lapalap üa kapas.
OBA 1:5 Iwe, are chon solä me chon angei pisek fän pöchökül repwe tori imwom lepwin, repwe chök angei ükükün mine ra mochen. Pwal ika chon ionifengeni föün irän wain repwe toruk, repwe pwal likiti ekoch föün. Nge chon oputom ra fokun apöpökowu.
OBA 1:6 Ra silini än mwirimwirin Esau lenien iseis o soläni ar pisek mi aüchea.
OBA 1:7 Iwe, peliom meinisin ra atupuketä o asuukela seni fanüom. Ekewe chon pwipwi ngonuk ra maun ngonuk, nge chienom kewe ka lükuur ra anomu eu sär fomw. Ra apasa usum, ‘Ifa chök an tipachem?’
OBA 1:8 Lon ewe ränin, lupwen üpwe apwüngü chon Etom, üpwe arosala nöür kewe soutipachem o awesi ar mirit.
OBA 1:9 Iwe, ekewe sounfiu mi pwora seni Teman repwe rükö, nge aramas meinisin lon Etom repwe kärila.
OBA 1:10 Pokiten ewe angangen mwänewüs ka föri ngeni pwiüm kewe mwirimwirin Jakop, kopwe kärila o itengau tori feilfeilachök.
OBA 1:11 Lon ewe ränin, lupwen chon ekis ra tolong lon asamalapen Jerusalem, en ka chök ütä. Lupwen ra uwala wöün pwe repwe üttüt won o ineti lefiler, en ka chök usun eman leir.
OBA 1:12 Nge en, esap öch om tuneämängau won pwiüm kewe chon Juta lon ränin ar weires, esap öch om meseik wor lon ränin ar feiengau, esap pwal öch om tunesikesik lon ränin ar riaföü.
OBA 1:13 Esap öch om tolong lon än nei kewe aramas we telinimw, pwe kopwe tuneämängau won ar riaföü o soläni pisekir lon ränin ar feiengau.
OBA 1:14 Esap öch om ütä lepukopuken ekewe al, pwe kopwe turufi ekewe chon Juta mi süla, esap pwal öch om afangamäi ekewe mi chüen manau lon ränin ar riaföü.
OBA 1:15 Iwe, ewe ränin kapwüng a arapoto, lupwen ngang ewe Samol mi Lapalap üpwe apwüngü chon ekewe mwü meinisin. Usun mine en Etom ka föri, iei usun epwe pwal fis ngonuk. Kopwe chök angei chappen om föför.
OBA 1:16 Iwe, usun nei aramas ra ün seni ewe kapen feiengau me won chuki mi pin, iei usun chon ekewe mwü meinisin mi nom ünüküür repwe ün. Repwe ükün o tokorikirik, repwe pwal mochola.”
OBA 1:17 “Nge chokewe mi chüen manau me lein chon Israel repwe nom won ewe chuk Sion. Iwe, ewe chuk epwe eu leni mi pin, nge ekewe mwirimwirin Jakop repwe fanüeni püsin fanüer.
OBA 1:18 Iwe, ekewe mwirimwirin Jakop repwe wewe ngeni eu ekkei, ekewe mwirimwirin Josef repwe wewe ngeni pulopulen ekkei, nge ekewe mwirimwirin Esau repwe wewe ngeni fetilipwas. Repwe arosala ekewe mwirimwirin Esau, pwe esap chüen wor eman epwe manau. Ngang ewe Samol mi Lapalap üa kapas.
OBA 1:19 Iwe, ekewe aramas seni ewe fanü Nekep mi nom ör repwe fanüeni ewe fanü Etom, nge chokewe seni ewe fanü Sefela mi nom lotou repwe fanüeni fanüen chon Filistia. Chon Israel repwe fanüeni ewe fanü Efraim me Samaria, nge aramasen Peniamin repwe fanüeni Kiliat.
OBA 1:20 Ekewe sounfiu seni Israel mi oola repwe liwinto o fanüeni Kanaan tori Sarefat, nge ekewe chon oola seni Jerusalem mi nom Sefarat repwe telinimweni ekewe telinimw lon ewe fanü Nekep.
OBA 1:21 Iwe, ekewe chon pwora seni Jerusalem repwe maun ngeni Etom o nemeni. Nge püsin ewe Samol mi Lapalap epwe king.”
JON 1:1 Iwe, lon eu rän ewe Samol mi Lapalap a kapas ngeni Sona nöün Amittai we mwän o üreni,
JON 1:2 “Kopwe ütä o feila Ninifa ewe telinimw mi lapalap, pwe kopwe apwüngü aramasan, pun üa küna ar föför mi fokun ngau.”
JON 1:3 Iwe, Sona a ütä, nge esap feila Ninifa, pwe a sü seni fän mesen ewe Samol mi Lapalap. A feila Joppa, nge ikenan a küna efoch sip epwe sai ngeni Tarsis . Iwe, a mönätiu liwinin an sai won ewe sip pwe epwe fiti tori Tarsis, pun a mochen sü seni fän mesen ewe Samol mi Lapalap.
JON 1:4 Nge ewe Samol mi Lapalap a tinato eu asepwäl mi pöchökül won matau. Iwe, ewe sip a arap ngeni an epwe ta ren watten ewe mölümöl.
JON 1:5 Mürin ekewe säla ra fokun niuokus o köri koten en me fanüan pwe repwe alisiir. Iwe, ra pwal aturala leset üttenen war we sip, pwe epwe pänätä. Nge Sona a tötiu leföön ewe sip, a konola o anutochou.
JON 1:6 Iwe, ewe pölü a tötiu ren, a föngüni o apasa, “Pwota ka anutochou? Kopwe pwätä o köri koten fanüom pwe epwe alisikich. Eli epwe tongeekich pwe sisap feiengau.”
JON 1:7 Mürin, ekewe säla ra kapasfengen lefiler, “Ou etto, sipwe asisil pwe sipwe silei iö leich a atoto woch ei feiengau.” Nge lupwen ra asisil, a pwä pwe Sona.
JON 1:8 Iwe, ra aisini, “Kopwe pwäri ngenikem met popun a torikich ei feiengau? Met wisom? Ia ka feito me ie? Ifa fanüom? En re ia?”
JON 1:9 Sona a pälüeniir, “Ngang eman re Ipru. Üa fel ngeni ewe Samol mi Lapalap, ewe Koten läng mi föri matau me fanü.”
JON 1:10 Iwe, Sona a pwal üreniir pwe a sü seni fän mesen ewe Samol mi Lapalap. Iwe, ekewe säla ra fokun niuokus o aisini, “Pwota ka föri ei sokun?”
JON 1:11 Mürin ra pwal aisini, “Met aipwe föri ngonuk pwe epwe lüala won matau?” Pun nonoon won matau a fokun wattela seni me mwan.
JON 1:12 Iwe, Sona a üreniir, “Oupwe aturueitiu leset, mürin epwe lüala won matau. Pun üa silei pwe ei mölümöl mi watte a chök feito womi pokitei.”
JON 1:13 Nge ekewe säla ra chök achocho le fatülei war we sip pwe epwe tori fanü. Iwe, nge resap fokun pwäk ngeni, pun ewe mölümöl mi watte a chök aliwiniir.
JON 1:14 Iei mine ra siö ngeni ewe Samol mi Lapalap, “Äm Samol mi Lapalap, aia tüngor ngonuk, kose mochen kosap afeiengaua manauem are aipwe angei manauen ätei, nge kosap pwal liwini ngenikem tipisin äm aipwe afeiengaua eman are esap tipis. Pun en, Samol mi Lapalap, ka föri mine ka efich.”
JON 1:15 Mürin ra angei Sona o aturätiu lematau. Iwe a lüala won matau.
JON 1:16 Ren ei ekewe säla ra fokun niuokusiti ewe Samol mi Lapalap, pwe ra asor ngeni o pwon pwe repwe angang ngeni.
JON 1:17 Iwe, ewe Samol mi Lapalap a akünöü eman ik mi watte pwe epwe oromala Sona. Iwe, Sona a nonom lon upwen ewe ik lon ükükün ülüngat rän me ülüngat pwin.
JON 2:1 Iwe, Sona a iotek ngeni ewe Samol mi Lapalap an we Kot me lon upwen ewe ik. A apasa,
JON 2:2 “Üa köruk, ai Samol mi Lapalap, lon ai riaföü, iwe, ka aüselingaei. Üa siö ngonuk seni lon lenien sotup, nge ka rongorong mweliei.
JON 2:3 Ka aturueitiu fänilolun lukalapen matau, sät a pwelifeiliei, nge no kana ra tekiatä o pwölüeila.
JON 2:4 Iwe, üa ekieki pwe üa pöüt seni fän mesom. Ifa usun, üpwe chüen tongeni künasefäli imwom imwenfel?
JON 2:5 No kana ra pwölüeila pwe üa ächetä ren, üa nonom fänilolun matau, nge irän lematau ra fitti mökürei.
JON 2:6 Üa kokotiu tori lepopun chuk kana, üa tori eu fanü asaman ra lokola tori feilfeilachök. Iwe, nge en, Samol mi Lapalap ai Kot, ka efieita seni epin fanüfan o amanauaei.
JON 2:7 Lupwen üa mefi pwe üpwe le mäla, üa chechemenuk ai Samol mi Lapalap. Iwe, ai iotek a toruk lon imwom mi pin.
JON 2:8 Iwe, chokewe mi fel ngeni uluulun anümwäl mi lomotongau ra likitukela, en echök mi tongeni ümöümöch ngeniir.
JON 2:9 Nge ngang üpwe kölün kilisou ngonuk, üpwe asor ngonuk o föri mine üa eäni pwon ngonuk. Pun en chök, ai Samol mi Lapalap, ka tufichin angasaei.”
JON 2:10 Mürin, ewe Samol mi Lapalap a kapas ngeni ewe ik. Iwe, ewe ik a musäsinätä Sona wilifanü.
JON 3:1 Iwe, ewe Samol mi Lapalap a kapas ngeni Sona fän aruuan o üreni,
JON 3:2 “Kopwe ütä o feila Ninifa ewe telinimw mi lapalap, pwe kopwe aronga ngeni aramasen lon ewe pworaus üa aiti ngonuk.”
JON 3:3 Iei mine Sona a aleasochis ngeni ewe Samol mi Lapalap o feila Ninifa. Iwe, Ninifa eu telinimw mi fokun watte, pun ükükün toauen ach fetal seni epek tori epek ülüngat rän.
JON 3:4 Iwe, Sona a tolong lon ewe telinimw ükükün fetalin eu rän. Iwe, a kökö, “Mürin faik rän Ninifa epwe tala.”
JON 3:5 Iwe, ekewe chon Ninifa ra lükü än Kot we kapas. Ra arongafeili pwe aramas meinisin seni ekewe aramas tekia tori ekewe aramas kis repwe echikefel o üföüf üf seni tuk, pwe asisilen ar ekieksefäl.
JON 3:6 Nge lupwen ewe pworaus a tori ewe kingen Ninifa, a ütä seni an lenien motun king, a pwilitawu üfan üfen king o üföüf üf seni tuk, a pwal mot lon falangen ekkei.
JON 3:7 Iwe, ewe king a aronga eu kapasen asilesil ngeni chon Ninifa, “Iei än ewe king me nöün kewe nöüwis allük: Esap wor eman aramas are man epwe tongeni mongö are ünümi och.
JON 3:8 Nge aramas tori man meinisin repwe üföüf üf seni tuk. Aramas meinisin repwe kechü ngeni Kot fän leüömong. Ewer, eman me eman epwe likitala an lapalap mi ngau me an föför esepwüng.
JON 3:9 Eli Kot epwe siwili an ekiek o likitala an song mi fokun watte, pwe sisap mäfeiengau?”
JON 3:10 Iwe, lupwen Kot a küna ar ekieksefäl me ar kul seni föförür mi ngau, a siwili an ekiek. Esap chüen ngeniir liwinin ar tipis usun a apasa epwe föri.
JON 4:1 Iwe, lupwen Sona a küna ei, a oput o song ren.
JON 4:2 Mürin a iotek ngeni ewe Samol mi Lapalap o apasa, “Ai Samol mi Lapalap, ifa usun, sap iei usun mine üa apasa pwe kopwe föri, lupwen üa chüen nonom won fanüei? Iei popun ai süla Tarsis, pun üa silei pwe en eman Kot mi ümöümöch o lukpwetete, ka pwal songomang o tongotam. Iwe, üa pwal silei pwe ka tipemecheres le siwili om ekiekin afeiengaua aramas kana.
JON 4:3 Iei mine, ai Samol mi Lapalap, üa fokun tüngor ngonuk pwe kopwe angei seniei manauei, pun üa efich ai üpwe mäla mwen ai üpwe manau.”
JON 4:4 Iwe, ewe Samol mi Lapalap a aisini Sona, “Ifa usun, mi pwüng om song?”
JON 4:5 Iwe, Sona a towu seni ewe telinimw o feila ötiuan. A aüetä eu likachoch o mot fän nürün, a witiwit pwe epwe küna mine epwe fis ngeni ewe telinimw.
JON 4:6 Mürin, Kot ewe Samol mi Lapalap a amärätä efoch irä, pwe epwe anürü möküren Sona o angasa seni an weires. Iwe, Sona a fokun pwapwa ren ewe irä.
JON 4:7 Iwe, lupwen a tötä mallen rän, Kot a tinato eman man pwe epwe eni uapwalen ewe irä, pwe a pwasala o mäla.
JON 4:8 Nge lupwen akkar a tötä, Kot a tinato och asepwäl mi pwichikar seni ötiu. Iwe, akkar a pwichiti möküren Sona pwe a fokun aiengau. Iwe, a tüngor pwe epwe mäla. A pwal apasa, “A mürina ai üpwe mäla mwen ai üpwe manau.”
JON 4:9 Iwe, Kot a aisini Sona, “Ifa usun, a pwüng om song ren ewe irä?” Nge Sona a pälüeni, “Mi pwüng ai song, inamwo are üpwe mäla lon ai song.”
JON 4:10 Iwe, ewe Samol mi Lapalap a üreni, “Ka achika ewe irä, nge kosap angang ngeni, kosap pwal amärätä. Pun a püsin märitä lon eu pwin, nge a pwal pwasala lon eu pwin.
JON 4:11 Nge ifa usun, ngang üsap achika Ninifa ewe telinimw mi lapalap, ia a wor ie lap seni ipükü rüengeröü aramas resamwo silei lefilen öch me ngau, a pwal wor chomong man lon?”
MIC 1:1 Iwe, lon mwün Jotam, Ahas me Hiskia ekewe kingen Juta, ewe Samol mi Lapalap a kapas ngeni Mik ewe re Moreset. Iei usun mine a pwäri ngeni Mik fänäsengesin Samaria me Jerusalem:
MIC 1:2 Oupwe aüseling, ämi chon ekewe mwü meinisin. Oupwe aüseling, ämi meinisin mi nom won fanüfan. Kot ewe Samol mi Lapalap epwe eman chon pwärätä mi ü ngenikemi, epwe kapas seni imwan we mi pin.
MIC 1:3 Nengeni, ewe Samol mi Lapalap a towu seni lenian we, epwe feitiu o fetal won ekewe leni mi tekia won fanüfan.
MIC 1:4 Iwe, ekewe chuk repwe telila me fän pechen usun kiris a telila ren ekkei. Ekewe lemol repwe sangfesen usun ekewe pal ra sangfesen ren puun koluk.
MIC 1:5 Ekei mettoch meinisin repwe fis pokiten än mwirimwirin Jakop kewe pupungau me än chon Israel kewe tipis. Iö popun än mwirimwirin Jakop pupungau? Sap ekewe chon Samaria? Iö a fel ngeni ekewe uluulun anümwäl me lon Juta? Sap ekewe chon Jerusalem?
MIC 1:6 Iei mine ewe Samol mi Lapalap a apasa, “Üpwe föri pwe Samaria epwe wiliti eu ioien pipi me lon eu maasies, pwal eu lenien fot irän wain. Üpwe asonätiu föün ewe telinimw lon ewe lemol o pwärawu longolongun.
MIC 1:7 An kewe uluulun anümwäl meinisin repwe tatakis, an kewe lifang ngeni ewe imwenfel meinisin repwe karala. Nge Ngang üpwe fokun ataela an kewe uluulun anümwäl meinisin. Pokiten Samaria a achufengeni ekewe lifang seni liwinin chon amömö inisir fän iten angangen lisowu, iei mine chon oputer repwe pwal aeasefäl ngeni liwinin chon amömö inisir fän iten angangen lisowu.”
MIC 1:8 Mürin, Mika a üra, “Ren ei üpwe kechü o ngüngüres, üpwe pwilitawu ipwei sus me üfei pwe asisilen ai letipeta. Üpwe wörüwör usun ekewe kolak mi mwacho o ngüngüres usun ekewe machang iter niwanök.
MIC 1:9 Pun kinasen Samaria we esap tongeni mola. Ewe feiengau a fen tori Juta, a pwal tori ekewe asamalapen Jerusalem, ia nei aramas ra imweimw ie.”
MIC 1:10 Ousap apworausa ngeni chon oputach lon Kat usun ach kuf, ousap pwal kechü. Ämi chon Petleafra, oupwe asokopelakemi lon pwül, pwe asisilen ämi riaföü.
MIC 1:11 Ämi chon Sefaia, oupwe oola fän selela me säw, ekewe chon Sanan resap towu seni ar we telinimw. Lupwen oupwe rong än ekewe chon Pet-esel ngüngüres, oupwe silei pwe esap wor eu lenien op ikenan.
MIC 1:12 Ekewe chon Marot ra niuokus o witiwiti än eman epwe alisiir, pun ewe Samol mi Lapalap a awarato feiengau, a tori ekewe asamalapen Jerusalem.
MIC 1:13 Ämi chon Lakis, oupwe ri ekewe oris ngeni ekewe woken. Ämi popun pwe ekewe chon Jerusalem ra tipis, pun än chon Israel kewe pupungau ra pwä me leimi.
MIC 1:14 Iei mine oupwe ngeni Moreset-kat ekewe lifangen aimwüfesen. Ewe telinimw Aksip epwe wiliti eu lenien atuputup ngeni ekewe kingen Israel.
MIC 1:15 Ämi chon Maresa, ewe Samol mi Lapalap epwe atolongakemi lepöün chon liapenikemi. Ekewe souemwen mi iteföüla repwe opolong lon ewe föimw Atulam.
MIC 1:16 Oupwe fichi möküremi fän ämi letipeta pokiten ekewe semirit oua echeniir. Oupwe reipöpöla möküremi, pwe oupwe wewe ngeni ekewe ikel mi paan, pun nöümi kewe repwe oola senikemi.
MIC 2:1 Feiengauen chokewe mi ekiekietä mine a ngau o pwüngü rawangau me won kier. Lupwen a ränila, ra afisi mine ra ekieki, pun a nom rer ewe pöchökül ar repwe föri.
MIC 2:2 Lupwen ra mocheniaiti ekewe mälämäl, ra angeir fän pöchökül. Lupwen ra mochen imweni eu imw, ra chök angei. Iei usun ra ariaföüü eman aramas fänäsengesin imwan me fanüan me won saman.
MIC 2:3 Iei mine ewe Samol mi Lapalap a apasa, “Üa ekiekietä pwe üpwe afeiengauakemi, nge ousap tongeni püsin amanauakemi. Ousap chüen tongeni fetal fan lamalamtekia, pun epwe torikemi eu fansoun feiengau.
MIC 2:4 Lon ena fansoun aramas repwe eäni affa pworausen ämi feiengau o eäni echö kölün riaföü usun mine a fis ngenikemi. Repwe apasa: Aia wesewesen feiengau. Kot a angei senikem fanüem kewe o ngeni chokewe mi liapenikem.”
MIC 2:5 Iei mine lupwen epwe tori ewe fansoun pwe ewe fanü epwe liwinsefäl ngeni nöün Kot kewe aramas, esap fokun wor inetimi.
MIC 2:6 Ekewe aramas ra afalafal ngeniei o üra, “Kosap afalafalakem. Kosap eäni ei sokun afalafal. Kot esap aitengauakem.
MIC 2:7 Ifa usun, ekewe chon Israel ra anümamau? Ifa usun, ewe Samol mi Lapalap a müttir le song? Ifa usun, epwe wesewesen föri ei sokun föför? Ifa usun, esap eäni kapas pwetete ngeni chokewe mi wenechar?”
MIC 2:8 Ewe Samol mi Lapalap a apasa, “Ekis chök fansoun a la, ämi nei aramas oua ütä usun chök chon oputaei. Oua angeala üfen chokewe mi pwerela, nge resap ekieki och, ir chokewe mi liwinto seni maun.
MIC 2:9 Oua asüela ekewe fefin me lein nei aramas seni imwer kewe mi mürina, oua pwal angefochei ai feiöch seni nöür kewe semirit.
MIC 2:10 Oupwe ütä o feila, pun ei leni esap chüen eu lenien asösö. Ämi kewe tipis ra afeiengaua ei leni, pwe epwe fokun tala.
MIC 2:11 Are eman chon chofana me eman chon atuputup epwe feito o üreni ekewe aramas, pwe epwe wor chomong ünümer wain me sakau mi pwichikar, ätewe epwe fokun nöür soufos.
MIC 2:12 Ngang üpwe fokun achufengenikemi, ämi chon Israel meinisin mi chüen manau. Üpwe achufengenikemi usun sip ra chufengen lon lenier, usun epwi pwiin sip mi nom lon ar lenien mongö. Ewe leni epwe ti ren aramas.”
MIC 2:13 Kot epwe suki ewe al fän iten chon Israel o emwenirewu seni ar oola. Ir repwe pwerewu me lon asamalapen ewe telinimw o feila. Ar we king, ewe Samol mi Lapalap, epwe emweniir o akom mwer.
MIC 3:1 Mürin, üa apasa, “Oupwe rongorong, ämi souemwen seni mwirimwirin Jakop, pwal ämi kewe samolun Israel. Ifa usun, sap ämi chon silei mine a pwüng?
MIC 3:2 Nge ämi oua oput mine a mürina o efich mine a ngau. Ämi oua äsera ünüchen nei aramas o etti fituker seni chür.
MIC 3:3 Ämi oua ochei fituken nei aramas, oua äsera ünücher o kupikisi chür, oua pökükisiretiu usun fituk lon nape.”
MIC 3:4 Mürin ekewe souemwen repwe siö ngeni ewe Samol mi Lapalap, nge i esap palüeniir. Lon ena fansoun epwe amona mesan seniir, pun ra föri föför mi ngau.
MIC 3:5 Iei alon ewe Samol mi Lapalap fänäsengesin ekewe soufos mi atoka nöün kewe aramas o eäni kökö ngeni chokewe mi amongöniir pwe epwe wor kinamwe, nge ra eäni eniweniw maun ngeni chokewe resap amongöniir,
MIC 3:6 “Epwe wor pwin ngenikemi, nge esap wor künaemi, epwe pwal wor rochopwak ngenikemi, nge esap fis angangen ämi pwee.” Akkar epwe tuputiu won ekewe soufos, nge rän epwe rochopwak wor.
MIC 3:7 Ekewe souwo repwe itengau, nge ekewe soupwe repwe küna säw, repwe fokun mitingau, pun Kot esap pälüeniir.
MIC 3:8 Nge ngang, ewe Samol mi Lapalap a aüraei ren Ngünün me an manaman, a atufichiei, pwe üpwe weweiti mine a pwüng o apworaei, pwe üpwe pwäri ngeni ekewe chon Israel ar kewe tipis.
MIC 3:9 Oupwe rongorong, ämi kewe mi emweni ekewe mwirimwirin Jakop pwal ämi mi nemeni ekewe chon Israel, ämi chokewe mi oput pwüng o atoka meinisin mine a wenechar,
MIC 3:10 ämi mi aüetä Sion fän ämi nimanauei aramas, pwal Jerusalem fän föföringau.
MIC 3:11 Ekewe souemwenin Jerusalem ra angei lifangen amichimich, lupwen ra eäni kapwüng, ekewe souasor ra awewei än Kot kewe allük fän iten ar repwe angei liwin, nge ekewe soufos ra föri pwee fän iten ar repwe angei moni. Nge ra pwal anomu ar apilükülük won ewe Samol mi Lapalap o üra, “Ewe Samol mi Lapalap a nom lefilach. Esor feiengau epwe torikich.”
MIC 3:12 Iei mine Sion epwe wiliti eu leni mi tu usun eu mälämäl pokitemi, Jerusalem epwe wiliti eu ioien mettoch mi tala, nge ewe chuk ia ewe imwenfel a nom ie epwe wiliti eu wöllap.
MIC 4:1 Iwe, lon ewe fansoun epwe feito, ewe chuk ia a nom ie imwen ewe Samol mi Lapalap epwe fefeitä o nükünük, epwe pwal tekia seni chuk meinisin, nge chon ekewe mwü won fanüfan repwe mwicheto ren.
MIC 4:2 Iwe, chomong aramas seni ekewe mwü repwe feito o apasa, “Ousipwe feitä won chukun ewe Samol mi Lapalap ren imwen än Jakop we Kot. I epwe aiti ngenikich mine sipwe föri, pwe sipwe tongeni föri letipan. Pun ewe allük epwe towu seni Sion, nge än ewe Samol mi Lapalap kapas epwe towu seni Jerusalem.”
MIC 4:3 Ewe Samol mi Lapalap epwe eäni apwüng lefilen chomong aramas o aükätiu fitikoko lefilen mwü mi pöchökül, ekewe mi arapoto me toau. Iwe, repwe amani nöür ketilas o awiliir ngeni pisekin tu pwül, nge wokur siles repwe awiliir ngeni näifen otot. Mwü kana resap chüen maunfengen, resap pwal chüen kaiö maun.
MIC 4:4 Iwe, eman me eman epwe nom lon an tanipin wain me fän an irä fiik fän kinamwe, nge esap wor eman epwe eniuokusu, pun ewe Samol mi Unusen Manaman a pwonei.
MIC 4:5 Iwe, chon ekewe mwü meinisin ra fel o aleasochis ngeni ar kewe kot, nge kich sipwe fel o aleasochis ngeni ewe Samol mi Lapalap ach we Kot tori feilfeilachök.
MIC 4:6 Iei alon ewe Samol mi Lapalap, “Epwe war ewe fansoun, pwe üpwe amwichafengeni chokewe mi pechemä o achufengeni chokewe mi oola, pwal chokewe üa ariaföüür.
MIC 4:7 Ra pechemä o toau seni lenier, nge ngang üpwe föri seni chokewe mi chüen manau eu mwichen aramas, repwe wiliti eu mwü mi pöchökül. Iwe, üpwe nemeniir seni won ewe chuk Sion seni ena fansoun tori feilfeilachök.”
MIC 4:8 Nge en, Jerusalem, epwe liwinsefälituk ewe nemenem ka piin eäni me lom, en ewe leni ia Kot a mamasa nöün aramas ie usun eman chon masen sip.
MIC 4:9 Pwota ka leüömong le puchör? Ifa usun, esap wor eman king a nom reöm? Ifa usun, ra mäla noum kewe chon öüröür, iei popun cheuch a cheruk usun cheuchen fam a cheri eman fefin?
MIC 4:10 Ämi chon Jerusalem, oupwe asokopelakemi o ngüngü usun eman fefin mi cheri an cheuchen fam. Pun iei oupwe towu seni ewe telinimw o imweimw lon eu fanü mi amassawa. Oupwe oola Papilon, nge ewe Samol mi Lapalap epwe amanauakemi o angasakemi seni lepöün chon oputakemi me ikenan.
MIC 4:11 Nge iei chomong mwü ra mwichefengen pwe repwe maun ngenikemi. Ra apasa, “Jerusalem epwe fokun tala. Mesach epwe pwapwa le katol tatakisin Sion.”
MIC 4:12 Nge resap silei än ewe Samol mi Lapalap ekiek, resap pwal wewe ren an akot. Resap mefi pwe a achufengeniir pwe epwe apwüngüür usun eman a achufengeni pilükün wiich ngeni ewe lenien wichiwich umwun wiich pwe epwe wichiir.
MIC 4:13 Ewe Samol mi Lapalap a apasa, “Ämi chon Jerusalem, oupwe feila o apwüngü chon oputemi. Üpwe apöchökülakemi pwe oupwe pöchökül usun eman ätemwänin kow mi wor mächän seni mächä, a pwal wor pachapachan seni piras. Oupwe atatakisi chomong mwü, nge wöür kewe ir ra angei fän pöchökül oupwe fangala ngeniei, Ngang ewe Samolun unusen fanüfan.”
MIC 5:1 Ämi chon Jerusalem, oupwe amwichafengeni nöümi kewe sounfiu. Ekewe chon oputakich ra pwelifeilikich fän pisekin maun. Repwe pösapei ewe chon nemeni Israel ren efoch wok.
MIC 5:2 En Petlehem Efrata, inamwo ika ka kisikis me lein ekewe telinimwen Juta, nge ewe mi towu senuk epwe samolun Israel, a nonom seni lomlom, seni fansoun esepop.
MIC 5:3 Iei mine Israel epwe sechila tori ewe fansoun neminewe mi cheuchen fam a nöünöüla. Mürin pwin kewe lusun mi oola repwe liwinsefälito o chu ngeni ekewe chon Israel.
MIC 5:4 Iwe, lupwen ätewe epwe war, epwe nemeni nöün aramas fän pöchökülen ewe Samol mi Lapalap, pwal fän lingen iten ewe Samol mi Lapalap an we Kot. Iwe, ekewe aramas repwe nonom fän kinamwe, pun lon ena fansoun an tekia epwe föüla won unusen fanüfan.
MIC 5:5 Iwe, i epwe atoto kinamwe. Lupwen ekewe chon Asiria repwe tolong lon fanüem o ataelong äm kewe imwen maun mi pöchökül, äm aipwe tinala nöüm kewe souemwen mi fokun pöchökül pwe repwe maun ngeniir.
MIC 5:6 Repwe liapeni ewe fanü Asiria, ewe fanüen Nimrot fän kenin ketilas. Repwe angasakem seni ekewe chon Asiria, lupwen repwe tolong lon fanüem.
MIC 5:7 Mürin ekewe mi chüen manau seni mwirimwirin Jakop repwe wewe ngeni amurenipwin seni ewe Samol mi Lapalap me lein chomong mwü, repwe pwal wewe ngeni üt won fetil. Resap eäni apilükülük aramas ika älälei och seni chon fanüfan.
MIC 5:8 Iwe, chokewe mi chüen manau seni mwirimwirin Jakop repwe nonom lein chon ekewe mwü usun eman laion lein ekewe manmwachon lein wöllap, usun eman nienifön laion mi nom lein epwi pwiin sip, epwe puriretiu o atatakisiir, nge esap wor eman a tongeni amanaueer.
MIC 5:9 Chon Israel repwe akufu chon oputeer meinisin o aroserela.
MIC 5:10 Iei alon ewe Samol mi Lapalap, “Lon ena fansoun üpwe angei senikemi nöümi kewe oris o ataela wämi kewe woken.
MIC 5:11 Üpwe ataela ekewe telinimw lon fanüemi o atatakisietiu ämi kewe leni mi pöchökül meinisin.
MIC 5:12 Üpwe aükätiu ämi angangen rong, nge esap chüen wor nöümi souasisil.
MIC 5:13 Üpwe ataela ämi kewe uluulun anümwäl o pöküetiu ämi kewe ür mi pin pwe ousap chüen fel ngeni angangen pöümi kewe.
MIC 5:14 Üpwe üttätä uluulun ewe anüfefin Asera seni lon fanüemi o ataela ämi kewe telinimw.
MIC 5:15 Fän ai song me lingeringer üpwe ngeni chon ekewe mwü resap aleasochis chappen ar föför.”
MIC 6:1 Oupwe aüseling ngeni mine ewe Samol mi Lapalap a apasa. Oupwe ütä o pwärätä ämi osukosuk me mwen ekewe chuk, nge ekewe chukutekison repwe rongorong mweliemi.
MIC 6:2 Ämi ekewe chuk me en longolongun fanüfan mi nükünük, oupwe rongorong än ewe Samol mi Lapalap kapasen änini, pun a änini ngeni nöün kewe aramas, epwe atipisi chon Israel.
MIC 6:3 A apasa, “Ämi nei aramas, met üa föri ngenikemi? Ren met üa aweiresikemi? Oupwe pälüeniei.
MIC 6:4 Üa emwenikemiiwu seni ewe fanü Isip o angasakemi seni ewe fanü ia ra nöünikemi amanau ie. Üa tinala Moses, Aaron me Miriam pwe repwe akom mwemi.
MIC 6:5 Ämi nei aramas, oupwe pwal chechemeni mine Palak ewe kingen Moap a eäni rawangau ngenikemi, pwal mine Palam nöün Peor we mwän a eäni pälüen ngeni. Oupwe pwal chechemeni mine a fis, lupwen oua sai seni Sitim tori Kilkal, pwe oupwe silei mine Ngang ewe Samol mi Lapalap üa föri pwe üpwe amanauakemi.”
MIC 6:6 Met üpwe uwato ren ewe Samol mi Lapalap, lupwen üa feito o fel ngeni ewe Koten läng? Ifa usun, üpwe feito ren fän asoren kek me nienifön kow eu ierir?
MIC 6:7 Ifa usun, ewe Samol mi Lapalap epwe pwapwa ren ngeröün ätemwänin sip me pumongun apüra seni olif? Ifa usun, üpwe eäni asor nei mwänichi fän iten ai pupungau ika nei kana fän iten ai tipis?
MIC 6:8 En aramas, ewe Samol mi Lapalap a aiti ngonuk mine a mürina. Met a mochen pwe kopwe föri? A mochen pwe kopwe föri mine a pwüng o eäni kirikiröch, kopwe pwal tipetekison fän mesen om we Kot.
MIC 6:9 Mwelien ewe Samol mi Lapalap a kökkö ngeni ewe telinimw, nge iö a niuokusiti i a tipachem, “Oupwe rongorong, ämi aramas mi mwichefengen lon ewe telinimw.
MIC 6:10 Lon imwen ekewe aramasangau a wor pisek aüchea ra angei fän rikirik. Ra aea kilo mi solä, eu föför üa oput.
MIC 6:11 Ifa usun, üpwe amusafatei eman aramas mi nöünöü eu kilo mi solä, eman mi eäni föün kilo mi atuputup?
MIC 6:12 Ekewe aramas mi pisekisek lon ewe telinimw ra föri chomong angangen mwänewüs, ekewe aramasen lon ra eäni kapas chofana me atuputup.
MIC 6:13 Iei mine üa popuetä le nikemi o ataela fanüemi pokiten ämi kewe tipis.
MIC 6:14 Oupwe mongö, nge ousap möt, oupwe chök mefi fion. Oupwe iseis mettoch, nge resap mwöch, nge mine a nom remi üpwe ataala ren maun.
MIC 6:15 Oupwe fofot, nge ousap kinikin. Oupwe üchüch föün olif, nge ousap epitikemi noppukun. Oupwe puri föün irän wain, nge ousap ün wain seni.
MIC 6:16 Ei epwe fis, pokiten oua apirü än Omri me chon leimwen Ahap föför mi ngau. Oua pwal sopwela le eäni örünier kewe. Iei mine üpwe ataala fanüemi, nge ekewe aramasen lon repwe och minen turunufas. Oupwe mwärelong fän itengau me ren chon ekewe mwü.”
MIC 7:1 Feiengauei, pun üa usun eman chon kinikin föün irä mürin fansoun räs, ika usun eman mi kütta uän irän wain mürin fansoun räs. Esap fokun wor eum föün wain pwe üpwe ochoch, esap wor eföü fiik mi anö üa mwoneiti.
MIC 7:2 Esap chüen wor eman aramas mi pwüng lon ewe fanü, esap pwal chüen wor eman mi wenechar me lein ekewe aramas. Meinisin ra op pwe repwe ni aramas, ra en me chei pwin pwe repwe likatupur.
MIC 7:3 Ra fokun sipeöch le föri mine a ngau. Ekewe nöüwis me soukapwüng ra angei lifangen amichimich. Ekewe aramas tekia ra apasawu mochenin letiper, ir meinisin ra rawangaufengen.
MIC 7:4 Ewe mi fokun mürina me leir a usun chök pötöwölingau, nge ewe mi fokun wenechar me leir a usun chök eu tit seni irafölüföl. A war ewe ränin än Kot apwüngü ekewe aramas, usun a fen asile ngeniir me ren ekewe soufos. Iei ra nom lon fitikoko.
MIC 7:5 Kosap anomu om lükülük won chon arum, kosap pwal lükü chiechiom. Kopwe pwal tümwünü mine ka apasa me fän mesen pwülüom.
MIC 7:6 Pun eman ät epwe aitengaua saman, eman nengin epwe ü ngeni inan, eman föpwül epwe ü ngeni inen pwülüan, nge püsin chon leimwen eman epwe chon oputan.
MIC 7:7 Nge ngang üpwe neta ngeni ewe Samol mi Lapalap. Üpwe ösüküsükü Kot ai we Chon Amanau. Ai Kot epwe aüselingaei.
MIC 7:8 Ämi chon oputaei, ousap meseik woi. Inamwo ika üa turula, üpwe pwal üsefälitä. Inamwo ika üa nom lon rochopwak, ewe Samol mi Lapalap epwe ai saram.
MIC 7:9 Pokiten üa tipis ngeni ewe Samol mi Lapalap, üpwe mwärelong fän an song tori epwe peniei o pwärawu ai pwüng. Epwe emwenieiwu ngeni saram pwe üpwe küna an angasaei.
MIC 7:10 Mürin chon oputaei repwe küna mine a fis o fokun säw, ir chokewe mi aisiniei, “Ifa i ewe Samol mi Lapalap om we Kot?” Üpwe küna ar kuf me än aramas puriir usun ar puri pwakaken won ekewe al.
MIC 7:11 Ämi aramasen Jerusalem, epwe war ewe fansoun ämi oupwe senisefälietä tittin ewe telinimw. Lon ena fansoun kiännin fanüemi epwe fokun wattela.
MIC 7:12 Aramasemi repwe liwinto remi seni Asiria me Isip pwal seni ewe leni arun ewe chanpupu Oifrat, seni arosetin ekewe matau, pwal seni ekewe chuk mi fokun toau.
MIC 7:13 Nge fanüfan epwe wiliti eu fanüapö pokiten föföringauen chokewe mi nonom won.
MIC 7:14 Äm Samol mi Lapalap, kopwe mamasa noum aramas fän wokum usun eman chon mas, kopwe tümwünü ewe mwichen aramas ka filätä. Ra imwüla o nonom lon eu wöllap lukalapen eu fanü mi pwülüöch. Kopwe mwüt ngeniir pwe repwe mongö lon Pasan me Kiliat usun chök lon ekewe fansoun lom.
MIC 7:15 Kopwe pwäri ngenikem om kewe manaman, usun ka föri lon ewe fansoun lupwen ka emwenikeemiwu seni Isip.
MIC 7:16 Chon ekewe mwü repwe küna ei o säw, pokiten ar pöchökül meinisin a sü seniir. Repwe pwölüela awer o pinela selinger fän ar mitingau.
MIC 7:17 Repwe chönawei pwül moromor usun serepenit, repwe tö usun mantötö won pwül. Repwe towu seni ar kewe imwen maun mi pöchökül fän chechech. Repwe kul ngeni ewe Samol mi Lapalap ach we Kot fän niuokus.
MIC 7:18 Esap wor eman Kot usun en. Ka amusala tipis o apichala pupungauen chokewe mi chüen manau me lein noum kewe aramas. Kosap amwöchü om song tori feilfeilachök, nge ka pwapwa le pwärätä om tong ellet ngenikem.
MIC 7:19 Kopwe pwal tongeesefälikem. Kopwe purätiu äm kewe föföringau fän pecheöm o aturätiu äm kewe tipis lealololun matau.
MIC 7:20 Kopwe pwäri om allükülük me tong ellet ngeni äm noum kei aramas, äm mwirimwirin Apraham me Jakop usun ka pwon fän akapel ngeni äm kewe lewo lon ekewe fansoun lom.
NAH 1:1 Iei än Kot kapas usun ewe telinimw Ninifa. Lon ei puk a mak künaen Nahum ewe re Elkos.
NAH 1:2 Ewe Samol mi Lapalap i eman Kot mi lukomong. A apwüngü chokewe mi ü ngeni. Lon an song a ngeni chon oputan chappen ar föför.
NAH 1:3 Ewe Samol mi Lapalap a mang le song, nge a fokun manaman, esap likitala an epwe apwüngü ewe chon tipis. Ia ewe Samol mi Lapalap a fetal ie, a fis mölümöl, nge ekewe kuchu pipisüsün fän pechen.
NAH 1:4 A apwüngü ewe matau o apwasapwasatä, a akotätä ekewe chanpupu meinisin. Ekewe tanipi lon Pasan ra aiolol, irän won ewe chuk Karmel ra oleol lechör, nge ekewe pön irän Lepanon ra aiemämä.
NAH 1:5 Ekewe chuk ra chechech me mwen ewe Samol mi Lapalap, nge ekewe chukutekison ra sönüla, fanüfan me meinisin mine a nom won ra chechech me fän mesan.
NAH 1:6 Iö a tongeni ütä me mwen an song? Iö a tongeni nom fän watten an song? An lingeringer a kü usun ekkei, nge ekewe achau ra mökküfesen me mwan.
NAH 1:7 Ewe Samol mi Lapalap a kirikiröch, a tümwünü nöün aramas lon fansoun riaföü, a silei chokewe mi anomu ar apilükülük won.
NAH 1:8 Nge epwe arosala chokewe mi ü ngeni ren eu lölö mi pumong, epwe asüelong chon oputan lon rochopwak.
NAH 1:9 Met oua eäni rawangau ngeni ewe Samol mi Lapalap? I epwe arosakemiila. Esap wor eman a tongeni pälüeni Kot fän ruu.
NAH 1:10 Oupwe karala usun irafölüföl mi likäräfit, pwal usun fetilipwas.
NAH 1:11 A wor eman a feito senuk, Ninifa, a rawangauei ewe Samol mi Lapalap o eäni kapasen öüröür mi ngau.
NAH 1:12 Iei alon ewe Samol mi Lapalap ngeni chon Israel, “Inamwo ika chon Asiria ra pöchökül o chomong, repwe chök kärila o rosola. Nei aramas, üa ariaföüükemi, nge üsap chüen ariaföüüsefälikemi.
NAH 1:13 Iei üpwe awesi än Asiria nemenem womi o mwüti föfömi.”
NAH 1:14 Ewe Samol mi Lapalap a föri eu allük fän itom, Ninifa, o apasa, “Esap chüen wor mwirimwirum repwe sopwela itom. Üpwe ataela ekewe uluulun anümwäl mi fal, pwal ekewe seni mächä me lon imwen om kewe kot. Üpwe tuw peiasom, pun ka fokun manauangau.”
NAH 1:15 Nengeni, eman chon künö a feito won ekewe chuk, a uwato pworausen asilesil mi mürina o asilefeili kinamwe. Ämi chon Juta, oupwe föri ämi kewe chulap o apwönüetä ämi kewe pwon. Pun ekewe aramasangau resap chüen liwinitikemi o maun ngenikemi. Ra fokun rosola.
NAH 2:1 Ewe chon kata a feito pwe epwe maun ngonuk, Ninifa. Kopwe tümwünü ekewe leni mi pöchökül o mamasa ewe al. Kopwe amolokotä o fokun apöchökülok.
NAH 2:2 Pun ewe Samol mi Lapalap epwe aworasefäli lingen Israel, pwe epwe usun chök me mwen än chon oputan feito o soläni pisekin.
NAH 2:3 Ekewe chon pwora mi maun ngonuk ra uwei tittin maun mi parapar, ekewe sounfiu ra üföüf üf mi parachol. Ekewe wokenin maun ra molupolup usun ekkei, lupwen ra molotä ngeni maun,
NAH 2:4 Ekewe wokenin maun ra säpuropurolong lon ekewe al, ra akaliwin lukalapen ewe telinimw, ra molupolup usun töl o müttir usun inefi.
NAH 2:5 Ewe meilap a körifengeni nöün kewe sounfiu mi pwora. Ra chepetek ren ar niuokus. Ra müttir le säiti ewe tit, ra aüetä ar epetin feiengau.
NAH 2:6 Mürin, ekewe asamalap arun ewe chanpupu ra sukula, chon leimwen ewe king ra rükö.
NAH 2:7 Ewe kiwiin a oola. Nöün kewe chon angang fefin ra ngüngüres usun lisom o pisipisiri leupwer fän ar letipeta.
NAH 2:8 Ekewe aramasen Ninifa ra sü seni ewe telinimw usun chök koluk a puwu seni eu nomun koluk mi tala epetin. Ra kökkö, “Oupwe üla, oupwe üla!” Nge esap wor eman a kulsefäl.
NAH 2:9 Oupwe angei ewe silifer me ewe kolt fän pöchökül. A fokun wor chomong pisek mi aüchea lon ewe telinimw.
NAH 2:10 Ewe telinimw a tala o pön, esap chüen so. Leluken aramas a kisikisila, pwäsukur a chechech, esap chüen wor ar pöchökül, won meser a pwechela.
NAH 2:11 Ifa chök ewe telinimw mi wewe ngeni eu pwangen laion, ewe leni ia ekewe nienifön laion ra mongö ie, ewe ia ewe ätemwänin laion me ewe liafefinin laion ra feila ie, nge apaner kewe ra kinamwe lon?
NAH 2:12 Ewe laion a niela liapan o atatakisi fitukan, pwe ochän ewe liafefin me apanan kewe. A amasoua pwangan ren fituk mi tatakis.
NAH 2:13 Iei alon ewe Samol mi Unusen Manaman, “Ngang üa ü ngonuk, Ninifa. Ngang üpwe kenala waom kewe wokenin maun. Noum kewe sounfiu repwe mäla lon maun. Üpwe angei senuk liapom kewe ka angei seni chon fanüfan, nge esap chüen wor eman epwe rong mwelien noum kewe chon künö.”
NAH 3:1 Feiengauen ewe telinimw mi chofana o niela aramas, ewe telinimw mi ur ren wöü, pokiten chon ra chök solä o angei pisekin aramas fän pöchökül.
NAH 3:2 Oupwe rongorong chöröüngüün ewe selin wichiwich, ngüngün willen ekewe woken, chopuchopun pechen ekewe oris me akürangen ekewe wokenin maun.
NAH 3:3 Ekewe chon wawa oris ra che fän ketilas mi molupolup me siles mi meriweriw. Chomong ra ninnila, ekewe somä ra chukuchukutä. Chokewe mi mäla resap lea, aramas ra chepetek wor.
NAH 3:4 Ei a fis ngeni Ninifa pokiten chomongun an föförün lisowu. A liemung o föri angangen roong mi afeiengau, a atupu chon ekewe mwü ren an föförün lisowu me an angangen roong.
NAH 3:5 Iei alon ewe Samol mi Unusen Manaman, “Ngang üa ü ngonuk, Ninifa. Üpwe pwiliti senuk üfom o mwüt ngeni chon ekewe mwü pwe repwe küna om selela me äsäwum.
NAH 3:6 Üpwe pwölü ngonuk limengau, üpwe aitengauok o äsäwok fän mesen aramas.
NAH 3:7 Meinisin mi künok repwe kul senuk o apasa: Ninifa a tala. Iö epwe kechüeiti? Iö epwe mochen achipa?”
NAH 3:8 Ifa usun en, Ninifa, ka mürina seni ewe telinimw Tepes lon Isip mi nom arun ewe chanpupu Nil? Koluk a pwelifeili Tepes, ewe chanpupu epetin seni feiengau, nge ekewe koluk ina tittin.
NAH 3:9 A nemeni Itiopia me Isip, esap wor aükükün an pöchökül, chon Put me chon Lipia ir pelian.
NAH 3:10 Nge ekewe chon Tepes ra oola, ra feila lon fanüen chon liapeniir. Chon maun ngeniir ra atatakisi ekewe semiritin Tepes lepwokukun ekewe al meinisin, ra föti ekewe aramas tekia ngeni sein o uwerela, ra aineti lefiler ekewe mwän mi iteföüla.
NAH 3:11 Nge en Ninifa, kopwe pwal ün seni ewe kapen feiengau o mwäliel ren. Kopwe kütta eu lenien op pwe kopwe op seni chon oputom.
NAH 3:12 Om kewe leni mi pöchökül meinisin ra wewe ngeni ekewe irä fiik mi wor uar mi nup. Are eman a wichikiir, uar repwe morotiu lon awen ewe chon ochoch.
NAH 3:13 Noum kewe sounfiu ra usun chök fefin. Fanüom a suk ngeni chon oputom, nge ekkei epwe kenala amwöchün asamen telinimwom.
NAH 3:14 Kopwe üfüf koluk o amolokotä, pun chon oputom repwe pwelifeiliik, kopwe apöchöküla om kewe leni mi pöchökül. Kopwe alölü ewe pwülüpar pwe kopwe föri pilak, kopwe amolätä sekiitaan.
NAH 3:15 Inamwo ika ka amolokotä, nge ewe ekkei epwe chök kenukula ika kopwe mäla lon maun, kopwe kärila usun lifichimas ra ärala ekewe irä. Ka achomongokola usun lifichimas, ka achomongokola usun lifichimas mi mwetemwet.
NAH 3:16 En ka achomongala noum kewe chon amömö, pwe ra chomong seni ekewe fün läng. Nge iei ra ässila usun ekewe lifichimas mi ameresala pöür o ässila.
NAH 3:17 Noum kewe samol ra usun lifichimas mi mwetemwet, noum kewe aramas tekia ra usun chök pwiin lifichimas mi sotiu won ekewe tit lon fansoun patapat. Nge lupwen akkar a tötä, ra ässila, esap wor eman a silei ia ra ässila ie.
NAH 3:18 En kingen Asiria, noum kewe samol ra mäla, noum kewe aramas tekia ra anutufoch. Noum kewe aramas ra toropasfeil won ekewe chuk, nge esap wor eman a achufengeniir.
NAH 3:19 Esap wor och epwe tongeni aükala om feiengau, kinasom esap tongeni mola. Meinisin mi rongorong pworausen om feiengau ra alopolop fän pwapwa. Pun iö esap nom fän om angangen ariaföü lon fansoun langatam?
HAB 1:1 Iei ewe pworaus Kot a pwäri ngeni ewe soufos Apakuk.
HAB 1:2 Ai Samol mi Lapalap, ifa ükükün fansoun ai üpwe siö ngonuk pwe kopwe awora om alilis, nge kopwap aüselinga? Ifa ükükün fansoun ai üpwe siö ngonuk fän iten ewe angangen mwänewüs, nge kopwap amanauakem?
HAB 1:3 Pwota ka föri pwe üa küna ei sokun weires? Pwota ka tongeni nenengeni ei sokun föför mi ngau? Feiengau me angangen mwänewüs ra nonom mwei, fiu me änini ra fis ekis meinisin.
HAB 1:4 Iei mine allük a apwangapwangala, nge pwüngüöch esap pwönüetä. Pun ekewe chon pwüng ra oo ren ekewe aramasangau, iei mine pwüngüöch a sosor.
HAB 1:5 Iwe, ewe Samol mi Lapalap a üreni nöün aramas, “Oupwe nenengeni chon ekewe mwü mi nom ünükümi, oupwe mairü o weitifengenikemi ren mine oua küna. Pun üpwe föri och föför lon ränin manauemi, ousap mochen lükü ika eman epwe ürenikemi.
HAB 1:6 Ngang üpwe äpwächa ekewe chon Papilon, ewe mwü mi rochongau o mwökütükai. Ra feila lemenen unusen fanüfan o liapeni lenien aramas sap lenier.
HAB 1:7 Ra eniweniw o fokun aniuokus. Ra püsin förätä ar allük o püsin atekiaretä.
HAB 1:8 Nöür oris ra müttir seni ewe man itan lepart, ra rochongau seni ekewe wolif mi echik. Nöür kewe chon wawa oris ra feito me toau o säpuropur, ra müttir le sä usun müttirin eman ikel a tur won liapan.
HAB 1:9 Ir meinisin ra feito pwe repwe föri angangen mwänewüs, eniweniw a akom mwer. Ra achufengeni chon oola usun föün pi.
HAB 1:10 Ra ämängaua ekewe king o urumwotei ekewe samol. Ra takiri ekewe telinimw mi pöchökül tittir, pun ra achukuchukätä pwül ünükür o liapeniir.
HAB 1:11 Mürin ra sä seniir usun asepwäl o feila. Ir aramas mi tipis, pun ra eäni kot ar pöchökül.”
HAB 1:12 Ai Samol mi Lapalap, en ai Kot Ewe mi Pin, en ka nom seni fansoun esepop tori fansoun esemüch. Iei mine äm aisap fokun mäla. Nge en, ai Samol mi Lapalap, en ka filätä ekewe chon Papilon pwe repwe ärikeemila, en äm Achau ka awiseer pwe repwe apwüngükem.
HAB 1:13 Mesom ra men limöch pwe kosap tongeni nenengeni föför mi ngau, kosap tongeni tipeeu ngeni föför mi mwäl. Nge pwota ka tipeeu ngeni ekei aramas mi eäni rawangau? Pwota ka fanafanala, lupwen ekewe aramasangau ra arosala chokewe mi pwüng seniir?
HAB 1:14 En ka föri pwe aramas ra usun chök ikenen leset, ika usun chök ekewe mönün leset esap wor ar sounemenem.
HAB 1:15 Ekewe chon Papilon ra efiretä meinisin ren eo, ra liapeniir lon ar kewe cheew o achufengeniir lon ar kewe uuk. Mürin, ra mwänek o mweireir ren liaper.
HAB 1:16 Ra mwo nge fel ngeni ar kewe cheew o asor ngeni ar kewe uuk, pun ra manau rer, nge ener mongö a fokun chomong o anö.
HAB 1:17 Ifa usun, repwe chök nöünöü nöür kewe ketilas tori feilfeilachök o sopwela le niela chon ekewe mwü, nge esap wor ar tong?
HAB 2:1 Ngang üpwe feitä won ai lenien mamas o ütä won imwei imw tekia. Üpwe asüküsükü met Kot epwe üreniei pwe üpwe apasa, pwal mine epwe pälüeni ngeni ai siö.
HAB 2:2 Mürin ewe Samol mi Lapalap a pälüeniei o apasa, “Kopwe makeetiu mine üpwe pwäri ngonuk won och lenien mak, nge epwe fokun fat, pwe chokewe mi sä repwe mecheres le aleani.
HAB 2:3 Pun mine üpwe pwäri ngonuk epwap pwönüetä lon eu fansoun mi kefilitä. Nge fansoun an epwe pwönüetä epwe fokun müttir, nge esap chofana. Are epwe mang le pwönüetä, kopwe chök witiwit. Epwe fokun pwönüetä, nge esap mang.
HAB 2:4 Nengeni, ätewe a lamalamtekia, esap wenechar lelukan. Nge ekewe chon pwüng repwe manau ren ar lükü Kot.
HAB 2:5 Ellet, wöümong och mi atuputup. Ätekewe mi mochenia ra lamalamtekia o sarawaraw, resap fokun menemen usun mäla. Iei mine ra maun ngeni chomong mwü o liapeniir fän püsin iter.”
HAB 2:6 Iwe, ekewe chon kuf repwe chietä echö kölün ämängau, repwe turunufasei ewe chon akufuur o apasa, “Feiengauom, en mi achukuchukätä mine esap om o pisekisekila ren om eriani seni chon liwinimang mine ra liwinimang ngonuk. Ifa ükükün fansoun än ei lapalap epwe fis?”
HAB 2:7 Ifa usun, ekewe chon liwinimang ngonuk resap müttir ütä, resap pwök o föri mine kopwe chechech ren? Mürin en kopwe wiliti liaper.
HAB 2:8 En ka soläni pisekin chomong mwü. Nge iei chokewe mi chüen manau seni ekewe mwü meinisin repwe soläni pisekum, pun ka nimanauei ekewe aramas o föri angangen mwänewüs ngeni chon fanüfan, ngeni ekewe telinimw me chokewe mi imweimw lor.
HAB 2:9 Feiengauom, en mi angei om win fän pwüngingau fän iten chon leimwom o aüetä imwom won eu leni mi tekia pwe esap tori och feiengau.
HAB 2:10 Nge om raw a chök awarato säw won chon leimwom. Ren om arosala chomong mwü, ka chök püsin awarato feiengau womw.
HAB 2:11 Pwal föün etippen ewe imw repwe kökkö o üpälü ngonuk, nge irälapan kewe repwe elliwini ewe kökkö.
HAB 2:12 Feiengauom, en mi aüetä eu telinimw fän nimanau o anüküchara fän föföringau.
HAB 2:13 Iei fän letipen ewe Samol mi Unusen Manaman, pwe än ekewe aramas angang epwe karala, nge än chon ekewe mwü angang weires epwe solapmwäl.
HAB 2:14 Nge än chon fanüfan silei lingen ewe Samol mi Lapalap epwe alolol usun matau a alolol.
HAB 2:15 Feiengauom, en mi aünü ngeni chon arum wain mi nofitfengen me om lingeringer tori repwe pulas ren, pwe kopwe äsäweer o aitengaueer.
HAB 2:16 Iei kopwe pwölüla ren säw, nge sap ren ling. Kopwe püsin ün o taroporopfetal. Ewe Samol mi Lapalap epwe aünü ngonuk püsin om kapen feiengau, nge om ling epwe wiliti säw.
HAB 2:17 Ka pöküetiu ewe wöllapen Lepanon, iei aramas repwe pwal pökuketiu. Ka niela ekewe mönün ie, iei ekewe man repwe fokun aniuokusuk. Ei epwe fis pokiten ka nimanauei ekewe aramas o föri angangen mwänewüs ngeni chon fanüfan, ngeni ekewe telinimw me chokewe mi imweim lor.
HAB 2:18 Met lomoten eu uluulun anümwäl? A chök och mettoch eman aramas a püsin auluulu. Esap tongeni pwäri ngonuk och ngei chofana echök. Met feiöchün ngeni ewe chon föri pwe a lükü eu uluulun anümwäl esap tongeni kapas?
HAB 2:19 Feiengauom, en mi apasa ngeni efoch mwüch: Kopwe nennela! ika ngeni eföü fau esap tongeni mwökütüküt: Kopwe pwätä! Ifa usun, eu uluulun anümwäl a tongeni pwäri ngonuk och? A tongeni pwölüpwöl ngeni kolt me silifer, nge esap fokun wor ngasangasen manau lon.
HAB 2:20 Ewe Samol mi Lapalap a nom lon imwan mi pin, nge chon fanüfan meinisin repwe mosonosonola me fän mesan.
HAB 3:1 Iei än ewe soufos Apakuk iotek:
HAB 3:2 Ai Samol mi Lapalap, üa rongorong pworausen mine ka föri, iwe, üa niuokus ren. Ai Samol mi Lapalap, kopwe försefäli om kewe föför mi amwarar lon äm ei fansoun, usun ka föri me lom. Lon om lingeringer kopwe pwal eäni ümöümöch.
HAB 3:3 Kot a feito seni Etom, Ewe mi Unusen Pin a feito seni ewe chukun Paran. An ling a pwölüela ekewe läng, nge fanüfan a ur ren än aramas mwareiti.
HAB 3:4 Lingan a usun chök saram, nge nikaütütün saram ra saramawu seni lepöün, ikenan an manaman a monola.
HAB 3:5 Mätter a akom mwan, nge mäfeiengau a tapwela mürin.
HAB 3:6 Lupwen Kot a ütä, fanüfan a chechech, lupwen a nenefetal, chon ekewe mwü ra chechech. Ekewe chuk mi nom seni chök lom ra tatakis, ekewe chukutekison minen lomlom ra kokotiu. An kewe al ra nom seni fansoun esepop.
HAB 3:7 Üa küna ekewe aramasen Kusan lon ar riaföü me ekewe aramasen Mitian fän ar chechech.
HAB 3:8 Ai Samol mi Lapalap, ifa usun, ka song ngeni ekewe chanpupu, ika ka lingeringeriti ewe matau? Ka sä won ekewe kuchu, ekewe kuchun asepwäl womw woken, lupwen ka atoto win ngeni noum aramas.
HAB 3:9 Ka uwawu noum esefich seni tükütükün o pachetä ekewe föün esefich ngeni selin. Ka asanga fanüfan ren ekewe chanpupu.
HAB 3:10 Ekewe chuk ra künok o chechech, üt a püngümongetiu seni läng. Ewe matau mi alolol a pwotä, nge nonoon kewe ra püngümong.
HAB 3:11 Akkar me maram ra üla lon lenier ren tinen noum föün esefich, lupwen ra pis, pwal ren wokum siles mi meriweriw.
HAB 3:12 Ka ipwechoutiu won fanüfan fän om lingeringer, ka purätiu chon ekewe mwü fän om song.
HAB 3:13 Ka feito pwe kopwe amanaua noum aramas, pwe kopwe amanaua noum we king mi kepit. Nge ka atatakisi ewe souemwenin ewe mwichen aramasangau o arosala chokewe meinisin mi tapwela mürin.
HAB 3:14 Ka posu ewe meilapen nöün kewe sounfiu ren wokum kewe, chokewe mi feito usun chök eu mölümöl pwe repwe atoropasakem, ra sikesik usun chokewe mi ariaföüü ekewe chon mwelele lemonomon.
HAB 3:15 Ka purätiu ewe matau fän noum kewe oris, iei mine ewe sät a puropur.
HAB 3:16 Üa rongorong usun ekei mettoch, inisi a chechech o awei a sälepwelep ren ai niuokus. Chüi ra kiroula, nge pechei ra täpäp. Üpwe witiwit fän mosonoson fän iten ewe ränin riaföü epwe feito won ekewe aramas mi mauneekem.
HAB 3:17 Inamwo ika ewe irä fiik esap sot, esap pwal wor ua won ekewe irän wain, inamwo ika ewe irä olif esap ua, esap pwal wor mongö seni ekewe tanipi, inamwo ika ekewe sip repwe ärela seni ewe lenien sip, esap pwal wor kow lon lenier,
HAB 3:18 nge ngang üpwe chök meseik ren ewe Samol mi Lapalap, üpwe pwapwa ren Kot ai Chon Amanau.
HAB 3:19 Kot ewe Samol mi Lapalap i ai pöchökül. A anüküchara pechei pwe ra usun chök pechen ekewe chia, a föri pwe üpwe fetal won ai kewe leni mi tekia. (Eli iei echö köl aramas ra eäni fiti pisekin ettik)
ZEP 1:1 Iei alon ewe Samol mi Lapalap ngeni Sefanaia nöün Kusi we mwän. Kusi nöün Ketalia, Ketalia nöün Amaria, nge Amaria nöün Hiskia. Ei a fis lon mwün Josia ewe kingen Juta nöün Amon we mwän.
ZEP 1:2 Iei alon ewe Samol mi Lapalap, “Ngang üpwe wesewesen ataela mettoch meinisin won fanüfan.
ZEP 1:3 Üpwe niela aramas me man, ekewe mansüsü me ekewe ikenen leset. Üpwe asapwilätiu ekewe aramasangau o ärala aramas meinisin seni won fanüfan. Ngang ewe Samol mi Lapalap üa kapas.
ZEP 1:4 Üpwe apwüngü chon Juta me chon Jerusalem meinisin. Üpwe ärala seni ei leni mine a chüen fis ren angangen fel ngeni Paal, üpwe pwal arosala ekewe souasor mi angang ngeni anümwäl.
ZEP 1:5 Üpwe ärala chokewe mi fel ngeni akkar me maram me ekewe fü me won ekewe imw. Üpwe pwal ärala chokewe mi fel ngeniei o eäni itei lon ar pwon fän akapel, nge ra pwal eäni iten ewe kot Milkom lon ar pwon fän akapel.
ZEP 1:6 Üpwe ärala chokewe mi kul seni ar tapwela müri, chokewe resap küttaei ika resap angei öüröürer me rei.”
ZEP 1:7 Oupwe mosonosonola fän mesen Kot ewe Samol mi Lapalap. Pun ränin ewe Samol mi Lapalap a arapoto. A amolätä eu asor o apini chokewe a körireto.
ZEP 1:8 Iei alon ewe Samol mi Lapalap, “Lon ewe ränin asor üpwe apwüngü ekewe meilap me nöün ewe king kewe mwän, pwal meinisin mi föri örünien chon ekis.
ZEP 1:9 Üpwe pwal apwüngü ir meinisin mi eäni fel lon lapalapen chon lükün, pwal chokewe mi solä o nimanauei aramas pwe repwe aura imwen ar kot ren mine ra angei seniir.”
ZEP 1:10 Iei alon ewe Samol mi Lapalap, “Lon ewe rän aramas repwe rongorong eu puchör seni ewe Asamalapen Ik me lon Jerusalem, eu ngüngüres seni ewe kinikin söfö me lon ewe telinimw me eu ngüngün ta mi leüömong seni ekewe chukutekison.
ZEP 1:11 Oupwe ngüngüres ämi mi imweimw lon kinikinin ewe telinimw me fan, pun ekewe chon amömö meinisin repwe rosola, nge ekewe chon kiloni silifer repwe ärela.
ZEP 1:12 Lon ewe fansoun üpwe chosani Jerusalem fän eu lamp. Üpwe apwüngü ekewe mwän mi menemen ren püsin ar tufich o lükü püsin ir, ir chokewe mi ekieki lon leluker, ‘Ewe Samol mi Lapalap esap föri och mi mürina, esap pwal föri och mi ngau.’
ZEP 1:13 Aramas repwe soläni ar kewe pisek, nge imwer kewe repwe tala. Inamwo ika ra aüetä imwer, resap fokun nonom lor. Inamwo ika ra fotuki tanipin wain, resap fokun ün wain seniir.”
ZEP 1:14 Ewe rän mi lap, ränin ewe Samol mi Lapalap a arapoto, a arapoto o müttirito. Oupwe rong! Ränin ewe Samol mi Lapalap epwe eu rän mi weires. Pwal ekewe mwän mi pwora repwe leüömong le puchörüngau.
ZEP 1:15 Ewe rän epwe eu ränin lingeringer, eu ränin riaföü me niuokus, eu ränin tatakis me feiengau, eu ränin rochopwak me toputop, eu ränin kuchuchu me rochokichin rochopwak,
ZEP 1:16 epwe pwal eu ränin tikin rappwa me puchörün maun, lupwen ekewe sounfiu repwe maun ngeni ekewe telinimw mi pöchökül tittir me ekewe imw tekia mi nom lon ekewe pwokuku.
ZEP 1:17 Iei alon ewe Samol mi Lapalap, “Üpwe atoto riaföü won aramas pwe repwe fetal usun chon chun pokiten ar tipis ngeniei. Char epwe ninitiu usun chök koluk, nge fituker epwe toropas usun chök kiten mongö.”
ZEP 1:18 Sap ar silifer ika ar kolt epwe tongeni angaseer lon ewe ränin än ewe Samol mi Lapalap lingeringer. Unusen fanüfan epwe karala ren ekkeiin an lingeringer, pun epwe müttir le awesi manauen chon fanüfan meinisin.
ZEP 2:1 Oupwe chufengen o amwichafengenikemi, ämi chon ewe mwü esap sile säw,
ZEP 2:2 me mwen eman epwe asükemiila usun asepwäl a ässala pön wiich, me mwen epwe wareitikemi än ewe Samol mi Lapalap song mi fokun watte, pwal mwen epwe torikemi ränin än ewe Samol mi Lapalap lingeringer.
ZEP 2:3 Oupwe kütta ewe Samol mi Lapalap, ämi meinisin mi tipetekison me lon ewe fanü, ämi mi aleasochis ngeni an kewe allük. Oupwe föri mine a pwüng o atekisonakemi. Eli oua tongeni sü seni ewe apwüng lon ränin än ewe Samol mi Lapalap lingeringer.
ZEP 2:4 Pun Kasa epwe pönüla, nge Askalon epwe wiliti eu fanüapö. Ekewe aramasen Astot repwe kasüla leoloas, nge ekewe chon Ekron repwe sä seni telinimwer.
ZEP 2:5 Feiengau epwe torikemi, ämi mi imweimw aroset, ämi chon Keret. Ewe Samol mi Lapalap a apwüngala pwe epwe ataela Kanaan, ewe fanüen chon Filistia. Epwe arosakemiila tori esap chüen wor eman lusun.
ZEP 2:6 Nge fanüemi mi nom aroset epwe wiliti eu mälämäl, ia chon masen sip ra nom ie me ar lenien sip.
ZEP 2:7 Ekewe chon Juta mi chüen manau repwe fanüeni ewe fanü mi nom aroset. Repwe foleni nöür sip won, nge lefäf repwe anut lon imwen chon Askalon. Ewe Samol mi Lapalap ar we Kot epwe kirikiröch ngeniir o aliwini ngeniir wöür.
ZEP 2:8 Iei alon ewe Samol mi Unusen Manaman, ewe Koten Israel, “Üa rongorong än chon Moap kapasen turunufas me än chon Amon kapasen ämängau usun nei aramas. Ra tunosikesik pwe repwe liapeni fanüer.
ZEP 2:9 Mwo manauei, ekewe fanü Moap me Amon repwe tala usun Sotom me Komora, repwe wiliti eu fanüen pötöwölingau me pwangen salt, repwe eu fanüapö tori feilfeilachök. Nei aramas mi chüen manau repwe angei pisekir fän pöchökül o fanüeni fanüer.”
ZEP 2:10 Iei usun mine epwe fis ngeni chon Moap me chon Amon pwe liwinin ar lamalamtekia, pun ra turunufas o tunosikesik ngeni nöün ewe Samol mi Unusen Manaman aramas.
ZEP 2:11 Ewe Samol mi Lapalap epwe eniweer, lupwen epwe ataela ekewe koten fanüfan meinisin. Mürin, chon ekewe mwü meinisin repwe fel ngeni Kot lon en me püsin fanüan.
ZEP 2:12 Pwal ämi chon Itiopia, oupwe ninnila ren nöün ketilas.
ZEP 2:13 Iwe, Kot epwe aitiela pöün ngeni efeng o ataela Asiria. Epwe föri pwe Ninifa epwe pönüla, epwe eu leni mi pwasapwas usun eu fanüapö.
ZEP 2:14 Epwe eu leni ia pwin sip me kow me sokopaten man repwe nom ie. Ekewe fukuro repwe nom letonen ekewe ür, nge tirisin ngüngür epwe towu seni ekewe asammwacho. Ioien pipi repwe nom lon ekewe asamalap, etippen ekewe imw seni setar repwe ripiwu.
ZEP 2:15 Iei usun mine epwe fis ngeni ewe telinimw mi tekia o nükünük. Aramasen lon ra ekieki pwe ar telinimw a iteföüla seni ekewe telinimwen fanüfan meinisin. Iei epwe wiliti eu leni mi fokun pönüla, eu leni ia manmwacho ra nom ie. Iteiten eman me eman mi pwere seni epwe ngäri o itiitini.
ZEP 3:1 Feiengauen Jerusalem, ewe telinimw mi ngau o ü ngeni Kot, a ariaföüü püsin nöün aramas.
ZEP 3:2 Esap mochen rongorong mwelien Kot, esap etiwa an kapasen emirit. Esap lükü ewe Samol mi Lapalap, esap pwal kanoto ren.
ZEP 3:3 Nöün kewe nöüwis ra usun chök laion mi wörüwör, nöün kewe soukapwüng ra usun chök wolif mi echik, resap likiti och tori lesosor.
ZEP 3:4 Nöün kewe soufos ra tunosikesik o uren atuputup, nöün kewe souasor ra apiningaua mine a pin o fokun sorei än Kot allük.
ZEP 3:5 Nge ewe Samol mi Lapalap mi nom lon ewe telinimw a fokun pwüng, esap föri och mi mwäl. Iteiten lesosor a pwärawu an pwüng, esap etiwala eu rän. Nge ekewe chon pwüngingau ra chök föri mine a ngau, nge resap sile säw.
ZEP 3:6 Iei alon ewe Samol mi Lapalap, “Ngang üa ärala chon ekewe mwü. Ar kewe imw tekia o pöchökül ra tala. Üa föri pwe ekewe al ra pön, pwe esap wor eman a fetal wor, pwal ar kewe telinimw ra tala, pwe esap wor eman aramas a nonom lor.
ZEP 3:7 Üa apasa, ‘Amwo itä nei aramas repwe meninitiei, repwe etiwa ai kapasen emirit, pwe imwer esap tala, esap pwal toriir ewe apwüng üa amolätä fän iter.’ Nge ir ra chök achocho le alapala ar föför mi ngau.”
ZEP 3:8 Iei alon ewe Samol mi Lapalap, “Oupwe chök witiwitiei, oupwe witiwiti ewe rän, lupwen üpwe ütä o atipisi chon ekewe mwü. Pun üa fen apwüngala pwe üpwe achufengeni chon ekewe fanü me mwü, pwe üpwe awarato wor ai chou me ai song mi fokun watte. Pun unusen fanüfan epwe tala ren ekkeiin ai lingeringer.
ZEP 3:9 Mürin, üpwe awili letipen chon ekewe mwü, pwe resap chüen fel ngeni ekewe uluulun anümwäl, nge repwe chök iotek ngeniei, Ngang ewe Samol mi Lapalap, o angang ngeniei fän tipeeu.
ZEP 3:10 Nei kewe aramas mi fel ngeniei, ir mi toropasfeil, repwe uwato ar asor ngeniei seni pekilan ekewe chanpupun Itiopia.
ZEP 3:11 Lon ena fansoun ousap chüen säw pokiten oua ü ngeniei. Pun üpwe atowu seni me leimi chokewe mi lamalamtekia o tunosikesik, pwe ousap chüen ü ngeniei me won chuki mi pin.
ZEP 3:12 Nge üpwe likiti me leimi eu mwichen aramas mi tipetekison o tipefesir, repwe anomu ar apilükülük woi.
ZEP 3:13 Iwe, chokewe mi chüen manau me lon Israel resap chüen föri föför mi mwäl, resap pwal chüen eäni kapas chofana me kapasen atuputup. Repwe fefeitä o nom fän kinamwe, nge esap wor eman epwe eniwokusuur.”
ZEP 3:14 Oupwe leüomong le köl fän pwapwa, ämi chon Israel! Oupwe meseik o mwänek ren unusen lelukemi, ämi chon Jerusalem!
ZEP 3:15 Ewe Samol mi Lapalap a aükätiu ämi kewe apwüng o asüela chon oputemi. Ewe Samol mi Lapalap ewe Kingen Israel a nom remi, pwe ousap chüen niuokusiti och feiengau.
ZEP 3:16 Lon ena fansoun repwe apasa ngeni Jerusalem, “Kosap niuokus, en Sion, kosap aitietiu poum.
ZEP 3:17 Ewe Samol mi Lapalap om we Kot a nom reöm, a wor an manamanen amanaua aramas. Epwe meseik reöm fän pwapwa, epwe asöföök ren an tong. Epwe ingemwareituk fän köl mi leüömong,
ZEP 3:18 usun aramas ra pwapwa lon ar ränin chulap.” Iei alon ewe Samol mi Lapalap, “Üa aükätiu ewe niuokusun feiengau o angei senuk om itengau.
ZEP 3:19 Lon ena fansoun üpwe apwüngü chokewe meinisin mi ariaföüük. Üpwe angasa ekewe mi pechemä o aliwinisefäli ekewe chon oola. Üpwe akasiwili ar säw ngeni iteüöch, nge chon fanüfan meinisin repwe mwareitiir.
ZEP 3:20 Lon ena fansoun, lupwen üpwe achufengenikemi, üpwe aliwinisefälikemi ngeni leniemi. Üpwe aiteüöchükemi me lein chon fanüfan meinisin pwe repwe mwareitikemi, lupwen üpwe aliwinisefäli ekewe chon oola.” Iei alon ewe Samol mi Lapalap.
HAG 1:1 Lon aruuen ierin mwün Tarius ewe kingen Persia, lon aeuin ränin ewe awonuen maram, ewe Samol mi Lapalap a kapas ngeni ewe soufos Akai fän iten Serupapel nöün Sealtiel we mwän ewe kepinan Juta, pwal fän iten Josua nöün Jehosatak we mwän ewe souasor mi lap.
HAG 1:2 Ewe Samol mi Unusen Manaman a üreni Akai, “Ekei aramas ra apasa pwe esamwo tori fansoun ar repwe aüsefälieta Imwenfelin ewe Samol mi Lapalap.”
HAG 1:3 Mürin, alon ewe Samol mi Lapalap a tori ekewe aramas ren ewe soufos Akai,
HAG 1:4 “Ifa usun, a iei fansoun ämi oupwe imweimw lon imwemi mi lingöch, nge ei Imwenfel a tala?
HAG 1:5 Iei mine oupwe ekieki usun mine a fis ngenikemi.
HAG 1:6 Oua fotuki chomong, nge oua kini chokükün. Oua mongö o ün, nge ousap fokun möt ren. Oua aüföüfakemi, nge ousap mefi kinamwe ren, nge ir mi angei liwinin ar angang ra usun chök nge ra iseni liwinir lon eu lenien iseis mi wor pwang lon.”
HAG 1:7 Iei alon ewe Samol mi Unusen Manaman, “Oupwe ekieki usun mine a fis ngenikemi.
HAG 1:8 Iei oupwe feita won ekewe chukuchukuta o angang irä, pun oupwe aüsefälieta ewe Imwenfel pwe üpwe pwapwa o küna ling ren.
HAG 1:9 Oua apilükülükü eu räs mi watte, nge oua chök angei chokükün. Lupwen oua iseis resin fanüemi lon ämi imwen iseis, üa ataela. Met popun? Pokiten imwei Imwenfel a tala, nge oua chök ekieki usun en me imwan.
HAG 1:10 Iei mine läng a amwöchü amurenipwin, nge fanüfan esap amärätä irä mi ua.
HAG 1:11 Iwe, üa awarato eu fansoun pwasapwas won ewe fanü, won ekewe chukuchukutä me ekewe tanipin wiich, won ekewe tanipin wain me ekewe irä olif, pwal won meinisin mine a märitä won ewe fanü. Üa pwal awarato eu fansoun pwasapwas won aramas me man kana, pwal won ar angang meinisin.”
HAG 1:12 Mürin, Serupapel nöün Sealtiel we me Josua nöün Jehosatak ewe souasor mi lap, pwal ekewe lusun aramas mi chüen manau ra aleasochisi alon ewe Samal mi Lapalap ar we Kot, pwal alon ewe soufos Akai, pun ewe Samol mi Lapalap ar we Kot a tinala rer. Iwe, ekewe aramas meinisin ra meniniti ewe Samol mi Lapalap.
HAG 1:13 Mürin, Akai nöün ewe Samol mi Lapalap we chon künö a asile ngeni ekewe aramas alon ewe Samol mi Lapalap, “Ngang üpwe etikemi.”
HAG 1:14 Iwe, ewe Samol mi Lapalap a apöchökülätä letipen Serupapel ewe kepinan Juta me letipen Josua ewe souasor mi lap, pwal letipen ekewe lusun aramas mi chüen manau, pwe ra feito o angang ngeni Imwenfelin ewe Samol mi Unusen Manaman ar we Kot.
HAG 1:15 Ei a fis lon rüe me rüanün ränin ewe awonuen maram lon aruuen ierin mwün ewe king Tarius.
HAG 2:1 Iwe, lon rüe me aeuin ränin ewe afisuen maram lon ewe chök ier alon ewe Samol mi Lapalap a torisefäli ekewe aramas ren ewe soufos Akai.
HAG 2:2 A kapas ngeni Akai pwe epwe üreni Serupapel ewe kepinan Juta me Josua ewe souasor mi lap, pwal ekewe lusun aramas meinisin mi chüen manau,
HAG 2:3 “Iö me leimi a küna lingen ewe Imwenfel me lom? Met oua küna ikenai? Ifa usun, esap lapalapangau lon ämi nengeni?
HAG 2:4 Nge iei oupwe apworachokemi, ämi Serupapel me Josua, pwal ämi aramasen ei fanü meinisin. Oupwe angang, pun ngang üpwe etikemi.
HAG 2:5 Lupwen oua towu seni lon Isip, üa fen pwon ngenikemi pwe üpwe etikemi. Ngüni a nonom lefilemi, iei mine ousap niuokus.”
HAG 2:6 Pun iei alon ewe Samol mi Unusen Manaman, “Mürin fansoun mochomoch üpwe achechasefäli läng me fanüfan, pwal matau me fanüpwas.
HAG 2:7 Üpwe amwökütükütü mwün fanüfan meinisin, wöür meinisin epwe tori ei leni, üpwe pwal aurala ei Imwenfel ren ling.
HAG 2:8 Silifer me kolt meinisin ai.
HAG 2:9 Iwe, lingen ei Imwenfel epwe lapalap seni lingen ewe Imwenfel me lom. Ngang üpwe fangeto lon ei leni wöü me kinamwe.” Iei alon ewe Samol mi Unusen Manaman.
HAG 2:10 Lon aruuen ierin mwün Tarius, lon rüe me rüanün ränin ewe atiuen maram ewe Samol mi Lapalap a kapas ngeni ewe soufos Akai.
HAG 2:11 Iwe, a üreni, “Kopwe tüngor ngeni ekewe souasor pwe repwe palüeni ei kapas ais,
HAG 2:12 ‘Ifa usun, ika eman a uwei lon üfan asoren fituk mi pin, nge üfan a tääri pilawa ika mongö mi ipwöt ika wain ika apüra seni föün olif ika sokun mongö, ifa usun, ekei mongö repwe pwal pin?’” Iwe, ekewe souasor ra palüeni, “Apwi.”
HAG 2:13 Mürin, Akai a aisiniir, “Nge ifa usun, ika eman a limengau pokiten an atapa eman somä, nge a pwal atapa ekei sokun mongö, ifa usun, epwe limengau ewe mongö?” Iwe, ekewe souasor ra palüeni, “Ewer, epwe limengau.”
HAG 2:14 Iwe, Akai a üreniir, “Iei alon ewe Samol mi Lapalap: Ina usun lapalapen aramasen ei mwü me fän mesei. Meinisin mine ra föri, pwal meinisin mine ra eäni asor a limengau.”
HAG 2:15 Iei alon ewe Samol mi Lapalap, “Ouse mochen oupwe ekieki mine epwe fis seni ikenai. Mwen oua popueta le aüsefälieta ewe Imwenfel,
HAG 2:16 ifa usun, met a fis ngenikemi? Lupwen eman a ekieki pwe a wor ren ükükün föpükü paun kinian föün wiich, a chök wor ruupükü, nge lupwen eman a feito lon lenien wüchüch föün iran wain o ekiekin üfi lime kalon, a chök üfi rüe.
HAG 2:17 Iwe, üa afeiengaua meinisin mine oua fotuki ren mwoi me mesenipik me üten fau. Nge ämi ousap kul ngeniei.
HAG 2:18 Iwe, ikenai rüe me rüanün ränin ewe atiuen maram, ewe rän longolongun ewe Imwenfel a wes. Oupwe ekieki usun mine epwe fis seni ikenai.
HAG 2:19 Inamwo ika esap chüen wor föün wiich lon ämi lenien iseis, nge ekewe irän wain me fik me apel me olif resap mwo ua. Nge seni ikenai üpwe afeiöchükemi.”
HAG 2:20 Iwe, lon rüe me rüanün ränin ewe maram ewe Samol mi Lapalap a kapas ngeni Akai fän aruuan,
HAG 2:21 “Kopwe kapas ngeni Serupapel ewe kepinan Juta, pwe iei üpwe le achecha läng me fanüfan
HAG 2:22 o aturätiu ekewe mwü. Üpwe awesi nemenemen ekewe king mi nemeni ekewe mwü, üpwe pwal alupala ekewe woken fiti ekewe chon wawa. Ekewe oris me chon wäniir repwe mäla, pun iteiten eman me eman leir epwe niela en me chienan.
HAG 2:23 Lon ewe rän üpwe angeek, en Serupapel nei chon angang, üpwe pwal nounuk usun efoch ringen impwang . Pun en ätewe üa afiluk.” Iei alon ewe Samol mi Unusen Manaman.
ZEC 1:1 Iwe, lon aruuen ierin mwün Tarius, lon ewe awaluen maram, ewe Samol mi Lapalap a kapas ngeni ewe soufos Sekaraia nöün Perekia we mwän, nge Perekia nöün Ito.
ZEC 1:2 Iwe, ewe Samol mi Unusen Manaman a tini Sekaraia pwe epwe üreni ekewe aramas, “Ngang ewe Samol mi Lapalap üa fokun song ngeni ämi kewe lewo.
ZEC 1:3 Nge iei üpwe ürenikemi: Oupwe liwin ngeniei, nge ngang üpwe liwin ngenikemi.
ZEC 1:4 Ousap apirü ämi kewe lewo. Ekewe soufos me lom ra üreniir fän aloi pwe repwe ükütiu seni ar kewe lapalapangau me föför mi ngau. Nge ir resap aüselinga ika aleasochisiei. Ngang ewe Samol mi Lapalap üa kapas.
ZEC 1:5 Ikafa ir ämi kewe lewo? Ifa usun, ekewe soufos ra manau tori feilfeilachök?
ZEC 1:6 Ifa usun, ai kewe kapas me ai kewe allük üa allük ngeni nei kewe chon angang ekewe soufos resap küw ämi kewe lewo? Iei mine ra ekieksefäl o üra: Usun mine ewe Samol mi Unusen Manaman a ekiekietä pwe epwe föri ngenikem fän iten äm kewe lapalap me föför, iei usun a föri ngenikem.”
ZEC 1:7 Iwe, lon aruuen ierin mwün Tarius, lon rüe me rüanün ränin ewe engol me aeuin maram, iei ewe maram Sepat, ewe Samol mi Lapalap a kapas ngeni ewe soufos Sekaraia. Iwe, Sekaraia a üra,
ZEC 1:8 “Lepwin ewe a wor künaei. Üa küna eman mwän mi wawa eman oris mi par. A nom lein ekewe mwoosor lon ewe lemol mi chökis. Nge lükisökürün a wor pwal ekoch oris mi par, tiketikepar me pwech.
ZEC 1:9 Mürin üa ais, ‘Met wewen ekei oris, ai samol?’ Nge ewe chon läng mi kapas ngeniei a üreniei, ‘Üpwe aiti ngonuk met wewen.’
ZEC 1:10 Mürin ewe mwän mi nom lein ekewe mwoosor a pälüeni, ‘Ikkeiir ekewe ewe Samol mi Lapalap a tinireto pwe repwe raunei fanüfan.’
ZEC 1:11 Iwe, ra üreni nöün ewe Samol mi Lapalap we chon läng mi nom lein ekewe mwoosor, ‘Äm aia raunei fanüfan o küna pwe unusen fanüfan a mosonoson o kinamwe.’
ZEC 1:12 Mürin, nöün ewe Samol mi Lapalap we chon läng a üra, ‘Ai Samol mi Unusen Manaman, inet kopwe eäni ümöümöch ngeni Jerusalem me ekewe telinimwen Juta, pun ka song ngeniir lon ekei fik ier?’
ZEC 1:13 Iwe, ewe Samol mi Lapalap a kapas pwetete me aururu ewe chon läng mi piin kapas ngeniei.
ZEC 1:14 Mürin, ewe chon läng a üreniei pwe üpwe asilefeili alon ewe Samol mi Unusen Manaman, ‘Ngang üa fokun echeni o ekimongei Jerusalem me Sion.
ZEC 1:15 Nge üa fokun song ngeni chon ekewe mwü mi nom fän kinamwe. Pun lupwen üa ekis song ngeni nei aramas, ir ra alapala ar afeiengaueer.
ZEC 1:16 Iei mine üa liwinla Jerusalem pwe üpwe pwäri ai tong ngeni. Imwei epwe kaüsefäl lon, pwal Jerusalem epwe kaüksefäl,’ iei alon ewe Samol mi Unusen Manaman.
ZEC 1:17 Kopwe pwal asilefeili alon ewe Samol mi Unusen Manaman, ‘Ai kewe telinimw repwe ursefäl ren wöü, nge ngang ewe Samol mi Lapalap üpwe aururusefäli Sion o filisefälietä Jerusalem.’”
ZEC 1:18 Mürin a pwal wor künaei. Üa küna fofoch mächän kow.
ZEC 1:19 Iwe, üa aisini ewe chon läng mi piin kapas ngeniei, “Met wewen ekei mächä?” Nge i a pälüeniei, “Ikkei ekewe mwün fanüfan ra atoropasafeili chon Juta, chon Israel me chon Jerusalem.”
ZEC 1:20 Mürin, ewe Samol mi Lapalap a aküna ngeniei föman chon angang ngeni mächä.
ZEC 1:21 Iwe, üa ais, “Met ir repwe föri?” Nge a pälüeniei, “Ekewe mwü ra atoropasafeili chon Juta, pwe esap wor eman aramas a tongeni chimwetä. Nge ekei chon angang ngeni mächä ra feito pwe repwe eniwa o ataela ekewe mwü mi ü ngeni ewe fanü Juta o atoropasa aramasan.”
ZEC 2:1 Iwe, a pwal wor künaei. Üa küna eman mwän mi amwöchü efoch selin aükük lepöün.
ZEC 2:2 Mürin üa aisini, “Ia kopwe feila ie?” Nge i a pälüeniei, “Üpwe feila Jerusalem pwe üpwe aükü ükükün chölapan me langataman.”
ZEC 2:3 Mürin, ewe chon läng mi piin kapas ngeniei a kaneto, nge pwal eman chon läng a kaneto pwe epwe churi.
ZEC 2:4 Iwe, a üreni, “Kopwe säla ren ewe alüal mi kamwöch ewe selin aükük o üreni, ‘Jerusalem epwe eu telinimw esap wor tittin pokiten chomongun ekewe aramas me man mi nom lon.’
ZEC 2:5 Nge iei alon ewe Samol mi Lapalap, ‘Ngang üpwe eu tit seni ekkei mi pwelifeili Jerusalem, üpwe pwal eu ling fän itan me lon.’”
ZEC 2:6 Iei alon ewe Samol mi Lapalap ngeni nöün aramas, “Üa atoropasakemi ngeni lesopun fanüfan me rüanü. Nge iei oupwe etto, oupwe etto! Oupwe sü seni ewe fanü efeng.
ZEC 2:7 Oupwe etto, oupwe sü ngeni Sion, ämi mi nom lon Papilon.”
ZEC 2:8 Iwe, iei alon ewe Samol mi Unusen Manaman, a tiniei ren an ling ngeni chon ekewe mwü mi angei pisekimi fän pöchökül, pun chokewe mi atapakemi ra atapa fituken lon mesan,
ZEC 2:9 “Ngang üpwe aü pei o fiu ngeniir, nge chokewe mi angang ngeniir me lom repwe angei pisekir fän pöchökül.” Lupwen epwe fis ei, oupwe silei pwe ewe Samol mi Unusen Manaman a tiniei.
ZEC 2:10 Iei alon ewe Samol mi Lapalap, “Oupwe köl o meseik, ämi chon Sion, pun ngang üpwe feito o imweimw lefilemi.”
ZEC 2:11 Iwe, lon ewe rän, chomong chon ekewe mwü repwe feito ren ewe Samol mi Lapalap o wiliti nöün aramas. Iwe, i epwe imweimw lefilemi, nge ämi oupwe silei pwe ewe Samol mi Unusen Manaman a tinieito remi.
ZEC 2:12 Iwe, ewe Samol mi Lapalap epwe fanüeni Juta pwe lenian lon ewe fanü mi pin, epwe pwal filisefäli Jerusalem.
ZEC 2:13 Oupwe mosonosonola fän mesen ewe Samol mi Lapalap, ämi aramas meinisin, pun i a feito seni lenian mi pin.
ZEC 3:1 Mürin, Kot a aküna ngeniei Josua ewe souasor mi lap mi ütä fän mesen nöün ewe Samol mi Lapalap chon läng, nge Satan a ütä lepelifichin Josua pwe epwe atipisi.
ZEC 3:2 Iwe, nöün ewe Samol mi Lapalap we chon läng a üreni Satan, “Ewe Samol mi Lapalap epwe apwünguk, Satan. Ewe Samol mi Lapalap mi filätä Jerusalem epwe apwünguk. Ifa usun, ätei esap wewe ngeni efoch wes eman a atowu seni ekkei?”
ZEC 3:3 Iwe, Josua a ütä fän mesen ewe chon läng, nge a üföüf üf mi limengau.
ZEC 3:4 Iwe, ewe chon läng a üreni ekewe chon künö mi ütä me mwan, “Oupwe pwiliti seni ei mwän ekewe üf mi limengau.” Nge a apasa ngeni Josua, “Nengeni, üa angei senuk om tipis, nge üpwe aüföüfa ngonuk üf mi mürina.”
ZEC 3:5 A pwal üreniir, “Oupwe aimweimwa ngeni eu akkau mi limöch.” Iei mine ra aimweimwa ngeni eu akkau mi limöch o aüföüfa ngeni ekewe üf mi limöch. Nge nöün ewe Samol mi Lapalap chon läng a ütä ünükün.
ZEC 3:6 Iwe, nöün ewe Samol mi Lapalap we chon läng a üreni Josua,
ZEC 3:7 “Iei alon ewe Samol mi Unusen Manaman: Are kopwe aleasochisi ai kewe allük o föri ai kewe angang üa awisa ngonuk, mürin kopwe nemenem me lon imwei o tümwünü ai kewe leni ünükün. Üpwe pwal mwüt ngonuk pwe kopwe nom lon eu leni me lein ekewe chon läng mi ütä ikei.
ZEC 3:8 Kopwe aüseling, en Josua ewe souasor mi lap, en me chiechiom kewe mi nom reöm, ämi eu asisilen feiöch epwe war: Üpwe emwenato nei we chon angang itan Ewe Palan.
ZEC 3:9 Üa isetiu fän mesen Josua eföü chök fau mi wor fisu lepekin. Üpwe ruputi och kapas won, nge lon eu chök rän üpwe amoela än chon ewe fanü tipis.
ZEC 3:10 Lon ewe fansoun iteiten eman me eman me leimi epwe kökkörato chon arun pwe epwe mot ren fän an irän wain me an irä fik fän kinamwe, iei alon ewe Samol mi Unusen Manaman.”
ZEC 4:1 Iwe, ewe chon läng mi piin kapas ngeniei a feitosefäl o apwöküei, usun eman a apwökü eman seni an möür.
ZEC 4:2 Iwe, a aisiniei, “Met ka küna?” Nge üa pälüeni, “Üa küna eu lenien atittin seni kolt, nge mi wor eu sepi fän iten noppuk a nom won. Mi pwal wor fisu lamp won ewe lenien atittin, nge fisu paip ra feila ngeni ekewe lamp.
ZEC 4:3 Iwe, a wor ruofoch irä olif ünükün ewe lenien atittin, efoch a nom pelifichin, nge efoch a nom pelimöngün.”
ZEC 4:4 Mürin üa aisini ewe chon läng mi piin kapas ngeniei, “Met wewen ekei mettoch, ai samol?”
ZEC 4:5 Nge ewe chon läng a aisiniei, “Kosap silei wewen ekei mettoch?” Iwe, ngang üa pälüeni, “Apwi, ai samol.”
ZEC 4:6 Mürin, ewe chon läng a üreniei, “Iei alon ewe Samol mi Lapalap ngeni Serupapel: Esap fis om angang ren pöchökül, esap pwal fis ren manaman, nge epwe fis ren Ngüni. Ngang ewe Samol mi Unusen Manaman üa kapas.
ZEC 4:7 Are ekewe osukosuk repwe tekia usun chuk, repwe wiliti maasies me mwom. En Serupapel kopwe försefäli ewe Imwenfel, nge lupwen kopwe amasalong ewe föün amüchülan lon lenian, ekewe aramas repwe kökkö fän leüömong, ‘Feiöch, feiöch epwe nonom won.’”
ZEC 4:8 Iwe, ewe Samol mi Lapalap a pwal kapas ngeniei,
ZEC 4:9 “Serupapel a föri longolongun ei Imwenfel, i epwe pwal awesala. Are epwe fis ei, nei aramas repwe silei pwe ngang ewe Samol mi Unusen Manaman üa tinuketo rer.
ZEC 4:10 Iö kana mi esita ewe rän, lupwen ewe angang a popuetä, pun a kükün, repwe meseik, lupwen repwe küna pwe Serupapel a sopwela le aüetä ewe Imwenfel.” Iwe, ewe chon läng a üreniei, “Ekei fisu lamp mesen ewe Samol mi Lapalap mi nenefetal won unusen fanüfan.”
ZEC 4:11 Mürin üa aisini ewe chon läng, “Met wewen ekewe ruofoch irä olif mi nom pelifichin me pelimöngün ewe lenien etittin?”
ZEC 4:12 Üa pwal aissefäl, “Met wewen ekewe ruofoch palen irä olif mi nom ünükün ekewe ruofoch paip seni kolt, ewe ia ewe noppuk a niniwu me ie?”
ZEC 4:13 Iwe, a aisiniei, “Kosap silei wewen ekei mettoch?” Nge üa pälüeni, “Apwi, ai samol.”
ZEC 4:14 Mürin a üreniei, “Ikkeiir ekewe ruoman mwän mi kepit ra angang ngeni ewe Samolun unusen fanüfan.”
ZEC 5:1 Üa netäsefäl o küna echö toropwe mi äs.
ZEC 5:2 Iwe, ewe chon läng a aisiniei, “Met ka küna?” Nge ngang üa pälüeni, “Üa küna echö toropwe mi äs, langataman a ükükün ilik fiit, nge chölapan ükükün engol me limu fiit.”
ZEC 5:3 Mürin, a üreniei, “Iei ewe anümamau epwe feitiu won unusen ewe fanü a mak lon ei toropwe. A mak won ewe epek pwe meinisin mi solä repwe kärila, nge pwal won ewe epek a mak pwe meinisin mi akapelmwäl repwe kärila.
ZEC 5:4 Ewe Samol mi Unusen Manaman a apasa pwe epwe tinato ewe anümamau. Epwe tolong lon imwen ewe chon solä, pwal lon imwen ätewe mi akapelmwäl fän itan. Iwe, epwe nonom lon imwer o ataretiu, epwe ataela ekewe irä me fau.”
ZEC 5:5 Mürin, ewe chon läng mi piin kapas ngeniei a feito o üreniei, “Kopwe netä o nengeni ei mettoch mi feito.”
ZEC 5:6 Nge üa aisini, “Met ei?” Iwe, a pälüeniei, “Iei eu pasikit a aliosunätä än aramasen ewe fanü tipis.”
ZEC 5:7 Iwe, ewe pasikit a wor öppüngün seni pilom. Nge lupwen üa nengeni, ewe öppüng a suk, nge mi wor eman fefin a mot lon ewe pasikit.
ZEC 5:8 Iwe, ewe chon läng a apasa, “Ei fefin a aliosunätä föföringau.” Iwe, a tinalong ewe fefin lon ewe pasikit o apüngätiu won ewe öppüng seni pilom.
ZEC 5:9 Mürin üa netä o küna ruoman fefin ra ässito fän pöükässir ren pöpön asepwäl. Nge pöükässir ra wewe ngeni pöükässin öröpwech. Iwe, ra ekietä ewe pasikit o ässila fan.
ZEC 5:10 Mürin üa aisini ewe chon läng mi piin kapas ngeniei, “Ia ra uweela ie ewe pasikit?”
ZEC 5:11 Iwe, a üreniei, “Ra uweela ngeni ewe fanü Papilon pwe repwe aüetä eu imwenfel fän itan ikenan. Nge lupwen ewe imw epwe wes, repwe anomu ewe pasikit lon lenian.”
ZEC 6:1 Iwe, üa netäsefäl o küna fofoch woken ra feito me lefilen ruu chuk, nge ekewe chuk ra seni piras.
ZEC 6:2 Iwe, orisin ewe aefochun woken ra parapar, orisin ewe aruofochun woken ra chol,
ZEC 6:3 orisin ewe aülüfochun ra pwech, nge orisin ewe afofochun woken ra tiketik. Ir meinisin ra fokun pöchökül.
ZEC 6:4 Mürin üa aisini ewe chon läng mi piin kapas ngeniei, “Met wewen ekei woken, ai samol?”
ZEC 6:5 Nge ewe chon läng a pälüeniei, “Ikkeiir ekewe föman ngün seni läng mi towu seni fän mesen ewe Samolun unusen fanüfan.
ZEC 6:6 Ewe woken mi chol orisin a feila ngeni ewe fanü efeng, ewe mi pwech orisin a feila ngeni ewe fanü lotou, nge ewe mi tiketik orisin a feila ngeni ewe fanü ör.”
ZEC 6:7 Lupwen ekewe oris mi fokun pöchökül ra towu, ra fokun pacheu ar repwe feila raunei fanüfan. Iwe, ewe chon läng a üreniir, “Oupwe feila raunei fanüfan.” Iei mine ra feila raunei fanüfan.
ZEC 6:8 Mürin, ewe chon läng a kapas leüömong ngeniei, “Ekewe oris mi feila ngeni ewe fanü efeng ra amanasösöütiu än ewe Samol mi Lapalap song.”
ZEC 6:9 Iwe, ewe Samol mi lapalap a üreniei,
ZEC 6:10 “Kopwe angei silifer me kolt seni ekewe chon oola iter Heltai, Topia me Jetaia, ir ätekewe mi liwinto seni Papilon. Lon ewe chök ränin kopwe feila lon imwen Josia nöün Sefania we mwän.
ZEC 6:11 Kopwe föri epa mwärämwär seni ewe silifer me kolt ra ngonuk o amwärämwärätä won möküren Josua ewe souasor mi lap nöün Jehosatak we mwän.
ZEC 6:12 Iwe, kopwe üreni, ‘Iei alon ewe Samol mi Unusen Manaman: Nengeni, iei i ewe mwän mi iteni Ewe Palan. Epwe märitä seni lon lenian, epwe pwal aüsefälietä Imwenfelin ewe Samol mi Lapalap.
ZEC 6:13 I ätewe epwe aüetä ewe Imwenfelin ewe Samol mi Lapalap o küna meninin me ren aramas usun eman king, epwe mot won an lenien motun king o nemeni nöün aramas. Epwe wor eman souasor ünükün. Iwe, repwe angangfengen lefiler fän kinamwe.’
ZEC 6:14 Nge ewe mwärämwär epwe nom lon Imwenfelin ewe Samol mi Lapalap pwe eu pisekin achem fän iten Heltai, Topia, Jetaia me Josia nöün Sefania we mwän.”
ZEC 6:15 Iwe, chokewe mi nom lon fanü toau repwe feito o alilis le aüetä Imwenfelin ewe Samol mi Lapalap, nge ämi oupwe silei pwe ewe Samol mi Unusen Manaman a tinieito remi. Ei epwe fis, are oupwe wesewesen aleasochis ngeni alon ewe Samol mi Lapalap ämi we Kot.
ZEC 7:1 Lon aruanün ierin mwün ewe king Tarius, lon arüanün ränin ewe atiuen maram, iei ewe maram Kislef, ewe Samol mi Lapalap a kapas ngeni Sekaraia.
ZEC 7:2 Lon ewe fansoun ekewe aramasen Petel ra tinala Sareser me Rekem-melek fiti aramaser ren imwenfelin ewe Samol mi Unusen Manaman, pwe repwe tüngor ngeni ewe Samol mi Lapalap pwe epwe ümöümöch ngeniir.
ZEC 7:3 Repwe pwal aisini ekewe souasor me ekewe soufos, “Ifa usun, äm aipwe sopwela le ngüngüres me echikefel fän iten talan ewe Imwenfel lon ewe alimuen maram, usun äm aia piin föföri lon chomong ier?”
ZEC 7:4 Mürin, ewe Samol mi Unusen Manaman a kapas ngeniei,
ZEC 7:5 “Kopwe üreni aramasen ewe fanü meinisin, pwal ekewe souasor: Lupwen oua echikefel me ngüngüres lon alimuen me afisuen maram lon ekei fik ier, ifa usun, oua wesewesen echikefel fän itei?
ZEC 7:6 Nge lupwen oua mongö o ün, ifa usun, ousap mongö o ün fän püsin itemi chök?”
ZEC 7:7 Ifa usun, sap ikkei alon ewe Samol mi Lapalap ekewe soufosun lom ra asilefeili, lupwen Jerusalem a so o wöümong fiti ekewe telinimw pwelin ünükün, pwal lupwen ewe fanü ör me ewe fanü lotou mi maasies a so?
ZEC 7:8 Iwe, ewe Samol mi Lapalap a kapas ngeni Sekaraia pwe epwe üreni ekewe aramas,
ZEC 7:9 “Me lom üa allük ngeni nei aramas, ‘Oupwe eäni kapwüng fän let, oupwe kirikiröch o ümöümöch ngeni en me pwin.
ZEC 7:10 Ousap ariaföüü ekewe fefin mi mä pwülüer, ekewe mi mäsen, ekewe chon ekis ika ekewe chon wöüngau. Esap wor eman epwe ekiekietä lon letipan och mi ngau ngeni pwin.’
ZEC 7:11 Nge ir resap mochen rongorong, ra kulu sökürür o pinei selinger pwe resap tongeni rongorong.
ZEC 7:12 Ra apöchöküla leluker pwe a pöchökül usun fau, pwe resap rongorong ekewe allük me ekewe kapas, ngang üa tini ngeni Ngüni, nge ekewe soufosun lom ra asile ngeni ekewe aramas. Iei popun ngang ewe Samol mi Unusen Manaman üa fokun lingeringeritiir.
ZEC 7:13 Lupwen üa kapas, ir resap mochen rongorong, iei mine lupwen ir repwe iotek, ngang üsap mochen rongorong.
ZEC 7:14 Iwe, üa atoropaserela lein chon ekewe mwün lükün meinisin, usun eu mölümöl a atoropasa mettoch, nge ewe fanü ra likitala a pönüla, pwe esap wor eman a tongeni nonom lon. Iei usun ewe fanü mi mürina a pönüla.”
ZEC 8:1 Iwe, ewe Samol mi Unusen Manaman a kapas ngeniei,
ZEC 8:2 “Üa ekipwichi ai üpwe alisi Jerusalem, pun üa fokun echeni aramasan. Lon ai echeniir üa song ngeni chon oputeer.”
ZEC 8:3 Iei alon ewe Samol mi Lapalap, “Üpwe liwinsefäliti Sion o imweimw lon Jerusalem. Iwe, Jerusalem epwe iteni ewe telinimw mi let, nge chuki epwe iteni ewe chuk mi pin.”
ZEC 8:4 Iei alon ewe Samol mi Unusen Manaman, “Chinlap mwän me chinlap fefin repwe motsefäl lon ekewe lenien mwicheich lon Jerusalem, eman me eman epwe wokukuni pokiten an chinlap.
ZEC 8:5 Nge ekewe alen ewe telinimw repwe ur ren ät me nengin mi urumot lor.”
ZEC 8:6 Iei alon ewe Samol mi Unusen Manaman, “Are ei epwe amwarar ngeni ekewe aramas mi chüen manau lon ei fansoun, ifa usun, epwe pwal amwarar ngeniei?”
ZEC 8:7 Iei alon ewe Samol mi Unusen Manaman, “Üpwe amanaua nei aramas seni ewe fanü ötiu, pwal seni ewe fanü lotou.
ZEC 8:8 Üpwe emwenireto pwe repwe imweimw lon Jerusalem. Iwe, ir repwe nei aramas, nge ngang üpwe ar Kot o nemeniir fän allükülük me pwüng.”
ZEC 8:9 Iei alon ewe Samol mi Unusen Manaman, “Ämi mi rongorong ekei kapas lon ekei rän seni ekewe soufos mi nom lon ewe rän, lupwen longolongun ewe Imwenfel a för, oupwe apöchökülakemi pwe ewe Imwenfel epwe kaüsefälitä.
ZEC 8:10 Pun mwen ekana rän esap wor mön än eman aramas angang ika än eman man angang, esap pwal wor eman a tongeni föri an angang fän kinamwe pokiten chon oputan. Pun üa föri pwe aramas repwe fitikokofengen.
ZEC 8:11 Nge iei üsap chüen föri ngeni ekei aramas mi chüen manau, usun mine üa piin föri me lom.
ZEC 8:12 Aramas repwe amwora pwükil fän kinamwe. Epwe wor uän ewe irän wain, masouen lon pwül epwe märöch, nge läng epwe apüngätiu amurenipwin. Üpwe awora ekei feiöch meinisin ngeni ekei aramas mi chüen manau, pwe repwe eäniir.
ZEC 8:13 Ämi chon Juta me chon Israel, chon ekewe mwü ra piin eänikemi apööpö lon ar kapasen ottek. Nge iei üpwe amanauakemi pwe aramas repwe eänikemi apööpö lon ar kapasen feiöch. Ousap niuokus, nge oupwe apöchökülakemi.”
ZEC 8:14 Iei alon ewe Samol mi Unusen Manaman, “Lupwen ämi kewe lewo ra asongaei, üa ekiekietä pwe üpwe afeiengaueer, nge üsap piitela.
ZEC 8:15 Nge iei üa pwal ekiekietä pwe üpwe afeiöchü Jerusalem me ekewe chon Juta lon ekei rän. Iei mine ousap niuokus.
ZEC 8:16 Ikei ekewe föför oupwe föriir: Oupwe kapas wenechar lefilemi, oupwe eäni kapwüng fän pwüng pwe epwe fis kinamwe.
ZEC 8:17 Ousap ekiekin sorongau lon lelukemi eman ngeni eman, ousap pwal sani akapelmwäl. Pun ekei föför meinisin üa oput,” iei alon ewe Samol mi Lapalap.
ZEC 8:18 Iwe, ewe Samol mi Unusen Manaman a pwal kapas ngeniei pwe üpwe üreni ekewe aramas,
ZEC 8:19 “Ekewe ränin echikefel oua eäni lon arüanün maram, alimuen maram, afisuen maram me aengolun maram repwe wiliti fansoun pwapwa me mwänek me ränin kametip mi apwapwa ngeni chon Juta. Iei mine oupwe sani let me kinamwe.”
ZEC 8:20 Iei alon ewe Samol mi Unusen Manaman, “Epwe war eu fansoun pwe chon ekewe mwü me chokewe mi imweimw lon chomong telinimw repwe feito Jerusalem.
ZEC 8:21 Chon eu telinimw repwe feila ren pwal chon eu o üra, ‘Ousipwe feila pwe sipwe fel ngeni ewe Samol mi Unusen Manaman o tüngor ngeni pwe epwe ümöümöch ngenikich. Iei sipwe le feila.’
ZEC 8:22 Chomong aramas me mwü mi pöchökül repwe feito Jerusalem pwe repwe fel ngeni ewe Samol mi Unusen Manaman, repwe pwal tüngor ngeni pwe epwe ümöümöch ngeniir.
ZEC 8:23 Lon ekana rän engol mwän seni ekewe mwü mi sokola ar kapas repwe amwöchü lepwülün üfen eman chon Juta o üra, ‘Kose mochen kopwe mwüt ngenikem pwe aipwe etikemi, pun äm aia rong pwe Kot a etikemi.’”
ZEC 9:1 Iei än ewe Samol mi Lapalap kapasen apwüng ngeni ewe fanü Hatrak, a pwal nonom won ewe telinimw Tamaskus. Iwe, mesen ekewe aramas meinisin pwal mesen chon ekewe ainangen Israel meinisin ra netä ngeni ewe Samol mi Lapalap.
ZEC 9:2 Kot a pwal eäni kapasen apwüng ngeni Hamat mi nom won kiännin Hatrak, pwal ngeni ekewe telinimw Tirus me Siton, inamwo ika ir ra fokun tipachem.
ZEC 9:3 Tirus a senätä tit mi pöchökül, a aioiätä silifer usun chök pwül moromor me kolt usun chök pwakaken lon ekewe al.
ZEC 9:4 Nge ewe Samol epwe angei seni Tirus pisekin o aturätiu wöün lon ewe matau, nge ewe telinimw epwe karala.
ZEC 9:5 Lupwen ewe telinimw Askelon epwe küna ei, epwe niuokus. Kasa epwe pwal küna o eriköös ren an riaföü mi lapalap, pwal Ekron, pun an apilükülüköch epwe tala. Esap chüen wor eman king lon Kasa, nge Askelon esap chüen so.
ZEC 9:6 Chon ekis repwe imweimw lon Astot. Iei alon ewe Samol mi Lapalap, “Ngang üpwe aükätiu än chon Filistia lamalamtekia.
ZEC 9:7 Resap chüen ochoch fituk mi cha ika mongö sokopaten mongö mi anioput ngeniei. Meinisin mi chüen manau repwe pachelong lon tettelin nei aramas pwe repwe usun chök eu eterekes me lon Juta. Pwal chon Ekron repwe pachelong lon tettelin nei aramas usun chök ekewe chon Jepus.
ZEC 9:8 Mürin, üpwe püsin mamasa fanüei o apeti sounfiu pwe resap pwerelong lon. Üsap chüen mwüt ngeni ekewe chon nemenem pöchökül pwe repwe ariaföüü nei aramas, pun üa püsin küna ren mesei usun ar riaföü.”
ZEC 9:9 Oupwe fokun meseik, ämi aramasen Sion. Oupwe akapwas fän pwapwa, ämi aramasen Jerusalem. Nengeni, ämi King a feito remi. A pwüng o pwora, nge a tipetekison o wawa eman aas, eman nienifön aas.
ZEC 9:10 Ewe Samol mi Lapalap a apasa, “Ngang üpwe ärala ekewe wokenin maun seni Israel me ekewe orisin maun seni Jerusalem, nge ekewe esefichin maun repwe ärela. Ämi King epwe awora kinamwe ngeni chon ekewe mwü, nge an nemenem epwe seni eu matau tori pwal eu, pwal seni ewe chanpupu Oifrat tori lesopun fanüfan.”
ZEC 9:11 Iwe, ewe Samol mi Lapalap a apasa, “En Sion, pokiten ai we pwon ngonuk mi fis fän cha, üpwe angasala noum kewe chon fötek seni ar oola mi wewe ngeni eu pwang esap wor koluk lon.
ZEC 9:12 Oupwe liwiniti leniemi mi pöchökül, ämi chon fötek mi witiwit fän apilükülüköch. Iei üpwe asile ngenikemi pwe üpwe liwini ngenikemi feiöch fän ruu fän iten mine oua riaföü ren.
ZEC 9:13 Üpwe nöünöü chon Juta usun efoch esefich, pwal chon Israel usun ekewe föün esefich. Üpwe nöünöü ekewe re Sion usun efoch ketilas, pwe üpwe maun ngeni ekewe re Kriis.”
ZEC 9:14 Mürin, ewe Samol mi Lapalap epwe pwäto won nöün aramas, epwe esefichala nöün föün esefich usun chök inefi. Kot ewe Samol mi Lapalap epwe ettiki ewe rappwa o fetaleto lon ekewe mölümöl seni ör.
ZEC 9:15 Ewe Samol mi Unusen Manaman epwe tümwünü nöün aramas. Nge ir repwe niela chon oputeer, repwe ün o akürang usun chokewe mi ün wain, repwe ur usun eu sepi souasor ra aea, lupwen ra äsupu chan ewe mönün asor ngeni lepwokukun ewe rongen asor.
ZEC 9:16 Lon ena fansoun ewe Samol mi Lapalap ar we Kot epwe amanaua nöün aramas, usun eman chon mas a amanaua nöün pwiin sip seni feiengau. Repwe molupolup lon fanüan usun fau aüchea ra molupolup won epa mwärämwär.
ZEC 9:17 Ewe fanü epwe fokun mürina o ling. Alüal me föpwül repwe märitä me lon fän pöchökül ren wiich me wain.
ZEC 10:1 Oupwe tüngorei ewe Samol mi Lapalap pwe epwe apüngatiu ewe ütten leres lon fansoun. Ewe Samol mi Lapalap mi föri ekewe kuchun üt epwe fangeto ngeni aramas püngün üt pwe irä repwe mär lon ekewe tanipi.
ZEC 10:2 Ekewe aramas ra kütta ar alilis seni ekewe uluulun anün leimw me ekewe soupwe, nge palüan me rer a chofana o lomotongau. Ekewe soutan ra apworausa tan mi mwäl, nge ar kapasen achipachip ra pön. Iei mine ekewe aramas ra malechfeil usun sip, ra riaföü pokiten esap wor ar chon mas.
ZEC 10:3 Ewe Samol mi Lapalap a apasa, “Üa fokun song ngeni ekewe chon mas, üpwe apwüngü ekewe souemwen. Pun ngang ewe Samol mi Unusen Manaman, üpwe tümwünü nei sip ekewe chon Juta o föri pwe repwe wewe ngeni nei orisin maun mi pöchökül.
ZEC 10:4 Seni me leir epwe feito ewe föün lepwokuku me ewe chüfölün imw mangaku, seni me leir epwe feito ewe föün esefichin maun me ekewe sounemenem meinisin.
ZEC 10:5 Ir meinisin repwe usun chök mwän mi pöchökül lon maun, repwe purätiu chon ü ngeniir lon pwakaken ekewe al. Repwe maun, pun ewe Samol mi Lapalap a etiir, repwe pwal akufu ekewe chon oputer mi wawa oris.
ZEC 10:6 Üpwe apöchöküla chon Juta, üpwe amanaua chon Israel. Üpwe aliwinisefäliir, pun ngang üa tongeer. Ir repwe usun chök nge ngang üsap pöütirela, pun ngang ewe Samol mi Lapalap ar we Kot üpwe pälüeni ar iotek.
ZEC 10:7 Mürin, chon Israel repwe usun chök sounfiu mi pöchökül, repwe pwapwa usun aramas mi ün wain. Nöür kewe repwe küna ei o meseik, repwe ingemwareitiei ngang ewe Samol mi Lapalap.
ZEC 10:8 Üpwe äkkänipöü nei aramas o amwichafengeniir. Ngang üpwe amanaueer, nge ir repwe chomong usun me mwan.
ZEC 10:9 Inamwo ika üa atoropaseer lein chon ekewe mwü, nge ir repwe chechemeniei me lon ekewe fanü toau. Ir me nöür kewe repwe manau o liwinsefäliti fanüer.
ZEC 10:10 Ngang üpwe emwenireto seni ewe fanü Isip me ewe fanü Asiria o achufengeniir lon poputän fanüer. Üpwe emwenirela ngeni ewe fanü Kiliat me Lepanon tori unusen ewe fanü a ti rer.
ZEC 10:11 Iwe, repwe pwerela lon ewe matauen riaföü, nge ngang ewe Samol mi Lapalap üpwe aluai ewe matau o apwasatä epilolun ewe chanpupu Nil. Chon Asiria mi lamalamtekia repwe küna tekison, nge än Isip nemenem epwe wesila.
ZEC 10:12 Ngang üpwe apöchöküla nei aramas, nge ir repwe fel ngeniei o aleasochisiei.” Ewe Samol mi Lapalap a kapas.
ZEC 11:1 Kopwe suki asamalapom kewe, en Lepanon, pwe ewe ekkei epwe kenala om kewe setar.
ZEC 11:2 Oupwe ngüngüres, ämi kewe irä saipires, pun ekewe setar ra turula, nge ekewe irä mi pöchökül ra tala. Oupwe ngüngüres, ämi kewe irä ook lon Pasan, pun ewe wöllap a pöküpöküla.
ZEC 11:3 Oupwe aüseling ngeni än ekewe chon mas ngüngüres, pun fanüer mi mürina, ia a wor ie enen man, a tala. Oupwe aüseling ngeni wörüwörün ekewe laion, pun ewe wöllapen Jortan a tala.
ZEC 11:4 Iei alon ewe Samol mi Lapalap ai we Kot, “Kopwe chon masen ekewe pwiin sip mi amol ngeni ar repwe ninnila.
ZEC 11:5 Chokewe mi möniir repwe chök nirela, nge esap wor eman a apwüngüür. Nge chokewe mi amömörela ra apasa, ‘Ousipwe mwareiti ewe Samol mi Lapalap, pun sa pisekisekila.’ Iwe, püsin ar kewe chon mas resap tongeer.
ZEC 11:6 Iei alon ewe Samol mi Lapalap, “Üsap chüen tongei chon ei fanü. Üpwe föri pwe eman me eman aramas epwe tolong fän nemenien chon arun, pwal fän nemenien an king. Iwe, ir repwe ataela ewe fanü, nge ngang üsap angaseer seni lepöür.”
ZEC 11:7 Iwe, ngang eman mi wisen masa ewe pwiin sip mi amol ngeni ar repwe ninnila fän iten chokewe mi kamö o amömöla sip. Iwe, üa angei ruofoch wok, efoch üa aita ngeni Ümöümöch, nge ewe efoch üa aita ngeni Tipeeufengen. Iwe, üa foleni ekewe sip.
ZEC 11:8 Mürin, üa niela ülüman chon mas lon eu chök maram, pun üsap chüen tongeni engila ngeniir, nge pwal ir ra oputaei.
ZEC 11:9 Mürin üa üreni ekewe pwiin sip, “Üsap chüen ämi chon mas. Mine a kan ngeni mäla, epwe mäla. Mine epwe ninnila, epwe ninnila. Nge chokewe mi chüen manau repwe nifengeniir.”
ZEC 11:10 Iwe, üa angei woki we itan Ümöümöch o kupi. Ren ei üa ataela ewe pwon ewe Samol mi Lapalap a eäni ngeni chon ekewe mwü meinisin.
ZEC 11:11 Iei usun ewe pwon a tala lon ewe rän. Nge ekewe chon kamö me amömö sip mi nenengeniei ra silei pwe iei alon ewe Samol mi Lapalap.
ZEC 11:12 Mürin üa üreniir, “Are a pwüng me remi, oupwe ngeniei liwini, nge are esap, oupwe chök amwöchü.” Iwe, ra ngeniei ükükün ilik föün moni silifer pwe liwini.
ZEC 11:13 Iwe, ewe Samol mi Lapalap a üreniei, “Kopwe uwalong ewe silifer ren ewe chon för sepi seni pwül, ewe liwin mi fokun mürina ra aükü ngeni pwe ina ükükün aücheai.” Iei mine üa angei ekewe ilik föün moni silifer o moneelong lon imwen ewe Samol mi Lapalap ren ewe chon för sepi seni pwül.
ZEC 11:14 Mürin üa kupi aruofochun woki we itan Tipeeufengen. Ren ei üa ataela ewe pwipwifengen lefilen Juta me Israel.
ZEC 11:15 Iwe, ewe Samol mi Lapalap a üreniei, “Kopwe wisenisefäli wisen eman chon mas, nge lon ei fansoun kopwe eman chon mas mi lomotongau.
ZEC 11:16 Pun nengeni, üpwe seikätä eman chon mas won nei pwiin sip, eman esap ekieki chokewe mi pöütüla, ika kütta chokewe mi malechela, esap apöchöküla chokewe mi feiengau, ika amongöü chokewe mi chüen manau. Nge epwe ochei fituken chokewe mi kitinup o aserala küün pachapacher.
ZEC 11:17 Feiengauen ei chon mas mi lomotongau a likitala ewe pwiin sip. Amwo ewe ketilas epwe pökü pöün me pelifichin mesan. Pöün epwe fokun pwasala, nge pelifichin mesan epwe wesewesen chunela.”
ZEC 12:1 Iei ewe pworaus ewe Samol mi Lapalap a apasa fän äsengesin Israel. Iei alon ewe Samol mi Lapalap mi ameresala ekewe läng, ewe mi föri fanüfan o atolonga ewe ngasangasen manau lon aramas,
ZEC 12:2 “Nengeni, üpwe föri pwe Jerusalem epwe usun chök eu kapen wain. Chon ekewe mwü mi nom ünükün repwe ün seni o taroporop. Lupwen repwe pwelifeili Jerusalem fän pisekin maun, repwe pwal pwelifeili ekewe telinimwen Juta.
ZEC 12:3 Lon ena fansoun, lupwen chon ekewe mwü meinisin won fanüfan repwe mufengen o maun ngeni Jerusalem, üpwe föri pwe Jerusalem epwe wewe ngeni eföü fau mi fokun chou fän iter. Chokewe meinisin mi ekietä ewe fau repwe püsin feiengau ren.”
ZEC 12:4 Iei alon ewe Samol mi Lapalap, “Lon ena fansoun üpwe eniwokusu nöür kewe oris meinisin o aumwesi chokewe mi wawa ekewe oris. Üpwe mamasaöchü ekewe chon Juta, nge üpwe ochuna nöün chon ekewe mwü kewe oris.
ZEC 12:5 Mürin, chon ekewe eterekesin Juta repwe kapasfengen lefiler, ‘Ekewe chon Jerusalem ra pöchökül pokiten ewe Samol mi Unusen Manaman i ar we Kot.’
ZEC 12:6 Lon ena fansoun üpwe föri pwe ekewe eterekesin Juta repwe usun chök eu ekkei lon eu wöllap, ika usun chök efoch töl mi nget me lein pilükün wiich. Repwe arosala chon ekewe mwü meinisin mi nom pwelin ünükür, nge chon Jerusalem repwe chök imweimw lon ar telinimw fän kinamwe.
ZEC 12:7 Iwe, ngang ewe Samol mi Lapalap üpwe akomwen awinna ekewe chon Juta, pwe iteüöchün ekewe mwirimwirin Tafit me chon Jerusalem esap tekia seni iteüöchün chon Juta.
ZEC 12:8 Lon ena fansoun ewe Samol mi Lapalap epwe tümwünü ekewe chon Jerusalem, pwe chokewe mi fokun apwangapwang repwe pöchökül usun chök Tafit, nge ekewe mwirimwirin Tafit repwe emweniir usun chök Kot, usun chök nöün ewe Samol mi Lapalap chon läng.
ZEC 12:9 Lon ena fansoun üpwe arosala chon ekewe mwü meinisin mi maun ngeni Jerusalem.
ZEC 12:10 Üpwe tinato won ekewe mwirimwirin Tafit me chon Jerusalem eman ngün mi amefi ngeni aramas usun ewe ümöümöchün Kot me eman ngün mi atufichiir lon ar iotek. Iwe, repwe nenengeni ätewe ra posu o ngüngüres won, usun eman a ngüngüres won nöün aleman, repwe kechüengau won, usun eman a kechüengau won nöün mwänichi.
ZEC 12:11 Lon ena fansoun ewe ngüngüres lon Jerusalem epwe watte usun ewe ngüngüres fän iten Hatat-rimon me lon ewe maasiesin Mekito.
ZEC 12:12 Iwe, chon ewe fanü repwe ngüngüres lon en me an famili. Ekewe famili ir mwirimwirin Tafit, ekewe mwän won ar, nge pwülüer won ar. Ekewe famili ir mwirimwirin Natan, ekewe mwän won ar, nge pwülüer won ar.
ZEC 12:13 Ekewe famili ir mwirimwirin Lefi repwe ngüngüres, ekewe mwän won ar, nge pwülüer won ar. Ekewe famili ir mwirimwirin Simei, ekewe mwän won ar, nge pwülüer won ar.
ZEC 12:14 Pwal ekewe lusun famili meinisin repwe ngüngüres, ekewe mwän won ar, nge pwülüer won ar.
ZEC 13:1 Lon ena fansoun eu puächen koluk epwe puächetä fän iten ekewe mwirimwirin Tafit me chon Jerusalem, pwe epwe limetiir seni ar tipis me limengau.”
ZEC 13:2 Iei alon ewe Samol mi Unusen Manaman, “Lon ena fansoun üpwe ärala iten ekewe uluulun anümwäl seni ewe fanü, pwe esap chüen wor eman epwe chechemeniir. Üpwe pwal asüela ekewe soufos me ekewe ngün mi limengau seni ewe fanü.
ZEC 13:3 Nge ika eman a chüen osuni, püsin saman me inan repwe üreni, ‘Kopwe fokun ninnila, pun ka apasa pwe om kapasen osuni a pop seni ewe Samol mi Lapalap, nge ka chofana.’ Püsin saman me inan repwe posu, lupwen a osuni.
ZEC 13:4 Lon ena fansoun eman me eman soufos epwe säw ren püsin künan, lupwen a osuni, esap pwal chüen üföüf üfen soufos mi ülöül pwe epwe atupu aramas.
ZEC 13:5 Nge epwe apasa, ‘Sap ngang eman soufos, nge üa eman soutanipi. Üa angang won ei fanü seni lealüali.’
ZEC 13:6 Nge ika eman epwe aisini, ‘Met popun a kinas won sökürum?’, iwe, epwe pälüeni, ‘Eman a akinasaei me lon imwen chiechiei.’”
ZEC 13:7 Iei alon ewe Samol mi Unusen Manaman, “Kopwe pwök, en ketilas, o fiu ngeni nei chon mas, ngeni ewe aramas mi fokun kan ngeniei. Kopwe niela ewe chon mas, pwe ekewe sip repwe toropasfeil. Üpwe ü ngeni ekewe aramas mi kis.
ZEC 13:8 Lon unusen ewe fanü ruu leülüngatin aramas repwe mäla, nge eu leülüngatin repwe manau.
ZEC 13:9 Nge ewe eu leulüngatin mi chüen manau üpwe atolongeer lon ewe ekkeiin riaföü, pwe üpwe limetiir usun eman a limeti silifer lon ekkei, üpwe sotuniir usun eman a sotuni kolt won ekkei. Mürin repwe kökköri itei, nge ngang üpwe pälüeniir. Üpwe apasa, ‘Ämi nei aramas,’ nge ir repwe apasa, ‘Ewe Samol mi Lapalap i ach we Kot.’”
ZEC 14:1 Iwe, ränin än ewe Samol mi Lapalap apwüng a arapoto. Mürin, aramas repwe angei pisekimi chon Jerusalem fän pöchökül o aineti fän mesemi.
ZEC 14:2 Pun ewe Samol mi Lapalap epwe achufengeni chon ekewe mwü meinisin, pwe repwe feila Jerusalem o maun ngeni. Iwe, ewe telinimw epwe oola, repwe soläni pisekin lon ekewe imw o achomanauei ekewe fefin. Esopun chon ewe telinimw repwe oola, nge ekewe lusun aramas resap kärila seni lon ewe telinimw.
ZEC 14:3 Mürin, ewe Samol mi Lapalap epwe feito o maun ngeni chon ekewe mwü, usun a fen föri lon fansoun maun.
ZEC 14:4 Lon ena fansoun i epwe ütä won ewe Chukun Olif mi nom mwen Jerusalem me peliötiu. Iwe, ewe Chukun Olif epwe mökfesen lon ruu kinikin seni ötiu tori lotou, pwe epwe fis eu lemol mi fokun chölap. Iei usun epek ewe chuk epwe sönüla ngeni peliefeng, nge epek ngeni peliör.
ZEC 14:5 Nge ämi oupwe aleni ewe lemol le sü, pun ewe lemol mi fis lefilen ekewe chuk a tori Asel. Ewer, ämi oupwe sü usun ämi kewe lewo ra sü ren ewe chechechin fanü mi fis lon mwün Usia ewe kingen Juta. Mürin, ewe Samol mi Lapalap ai we Kot epwe feito, nge ekewe chon pin meinisin repwe eti.
ZEC 14:6 Lon ena fansoun esap wor saram, esap fis patapat ika ais.
ZEC 14:7 Epwe eu rän mi sokola, eu rän ewe Samol mi Lapalap echök a silei. Esap fis rän ika pwin, nge lupwen fansoun lekuniol epwe wor saram.
ZEC 14:8 Lon ena fansoun kolukun manau epwe puwu seni lon Jerusalem, esop ewe koluk epwe pula ngeni ewe Setin Mäla mi nom ötiu, nge esop epwe pula ngeni ewe mataulap mi nom lotou. Ei epwe fifis lon fansoun pwichikar usun chök lon fansoun patapat.
ZEC 14:9 Mürin, ewe Samol mi Lapalap epwe king won unusen fanüfan. Lon ena fansoun ewe Samol mi Lapalap epwe i chök Kot, itan chök epwe pwal föüla.
ZEC 14:10 Iwe, unusen ewe fanü epwe siwil ngeni eu maasies seni Kepa mi nom efeng tori Rimon mi nom ör. Nge Jerusalem epwe tekia o nonom chök lon lenian seni ewe Asamalapen Peniamin tori lenien ewe aeuin asamalap, pwal tori ewe Asamalapen Pwokuku, pwal seni ewe imw tekia än Hananel tori än ewe king kewe lenien üchüch föün wain.
ZEC 14:11 Ewe telinimw epwe so, pun esap chüen wor anümamau won. Iwe, chon Jerusalem repwe imweimw lon fän kinamwe.
ZEC 14:12 Iwe, ewe Samol mi Lapalap epwe awarato och mäfeiengau ngeni chon ekewe mwü meinisin mi maun ngeni Jerusalem. Epwe iei usun: Fituker epwe chök machela, lupwen ra chüen manau, föün meser epwe mach me lon pwanger, nge chönawer epwe pwal machela me lon awer.
ZEC 14:13 Lon ena fansoun ewe Samol mi Lapalap epwe awarato wor fitikoko me niuokus watte, pwe eman me eman epwe turufi chienan o fiu ngeni.
ZEC 14:14 Pwal chon Juta repwe maun ngeni chon ekewe mwü me lon Jerusalem. Repwe angei wöün chon ekewe mwü mi nom ünükür pwe choon wokur: kolt, silifer me chomong üf.
ZEC 14:15 Iwe, eu mäfeiengau usun mesemwan epwe pwal tori ekewe oris, ekewe sokopaten aas, ekewe kamel, ekewe aas me sokopaten man mi nom lon ekewe lenien sounfiu.
ZEC 14:16 Mürin, meinisin mi chüen manau me lein chon ekewe mwü mi maun ngeni Jerusalem repwe feila Jerusalem iteiten ier pwe repwe fel ngeni ewe King, ewe Samol mi Unusen Manaman, o eti ewe chulapen likachoch.
ZEC 14:17 Nge ika chon eu mwü me won fanüfan resap mochen feila Jerusalem pwe repwe fel ngeni ewe King, ewe Samol mi Unusen Manaman, esap püngütiu üt wor.
ZEC 14:18 Are ekewe chon Isip resap mochen feila o eti ewe chulapen likachoch, esap püngütiu üt wor. Ewe Samol mi Lapalap epwe awarato wor ewe feiengau a awarato won chon ekewe mwü resap mochen feila Jerusalem pwe repwe eti ewe chulapen likachoch.
ZEC 14:19 Epwe iei ewe apwüng ngeni Isip, pwal ngeni chon ekewe mwü meinisin resap feila Jerusalem, pwe repwe eti ewe chulapen likachoch.
ZEC 14:20 Lon ena fansoun epwe rup won ekewe pel fän üen ekewe oris ekei kapas, “A pin fän iten ewe Samol mi Lapalap.” Iwe, ekewe nape lon imwen ewe Samol mi Lapalap repwe pin usun chök ekewe sepi mi nom mwen ewe rongen asor.
ZEC 14:21 Iwe, iteiten nape me lon Jerusalem me Juta repwe pin fän iten ewe Samol mi Unusen Manaman, pwe meinisin mi asor repwe feito o aea ekewe nape le kuku fituken ekewe mönün asor lor. Lon ena fansoun esap chüen wor eman chon amömö lon imwen ewe Samol mi Unusen Manaman.
MAL 1:1 Iei pwärien Malakai we, a asile ngeni chon Israel fän alon ewe Samol mi Lapalap.
MAL 1:2 Iei alon ewe Samol mi Lapalap ngeni nöün aramas, “Üa echenikemi.” Nge ämi oua ais, “Ifa usun om echenikem?” Iwe, ewe Samol mi Lapalap a pälüeni, “Ifa usun, Esau sap pwin Jakop? Üa echeni Jakop,
MAL 1:3 nge üa oput Esau. Üa ataela fanüan mi chukuchukutä o likitala fanüan seni saman ngeni ekewe manmwachon lon fanüapö.”
MAL 1:4 Are chon Etom repwe apasa, “Äm kewe telinimw ra tatakis, nge äm aipwe aüsefäliretä,” mürin ewe Samol mi Unusen Manaman epwe apasa, “Repwe tongeni aüretä, nge ngang üpwe ataretiu, tori aramas repwe aita ngeni: Ewe fanü mi ngau, pwal eu mwichen aramas ewe Samol mi Lapalap a song ngeniir tori feilfeilachök.”
MAL 1:5 Püsin mesemi repwe küna ei, nge oupwe apasa, “Ewe Samol mi Lapalap a tekia, an iteüöch a tori lükün kiännin Israel.”
MAL 1:6 Iei alon ewe Samol mi Unusen Manaman ngeni ekewe souasor, “Eman nau a asamolu saman, nge eman chon angang a asamolu an samol. Are ngang sememi, pwota ousap asamoluei? Nge are ngang nöümi samol, pwota ousap meninitiei? Ämi souasor oua turunufaseei. Nge oua ais, ‘Met aia turunufaseek ren?’
MAL 1:7 Ren ämi eäni asor mongö mi limengau won ai rongen asor. Nge ämi oua ais, ‘Met aia alimengaua ren?’ Ren ämi apasa pwe ai rongen asor a aücheangau.
MAL 1:8 Ifa usun, lupwen oua eäni asor ekewe man mi chun, esap ngau? Nge ifa usun, lupwen oua eäni asor ekewe man mi ter ika samau, esap ngau? Are oupwe fang ngeni nöümi kepina ei sokun man, ifa usun, epwe pwapwa ngenikemi ika kirikiröch ngenikemi?
MAL 1:9 Nge iei oua tüngor ngeni Kot pwe epwe kirikiröch ngenikemi. Ifa usun, epwe kirikiröch ngenikemi ren ena sokun lifang mi nom lepöümi?”
MAL 1:10 Iei alon ewe Samol mi Unusen Manaman, “Amwo epwe wor eman me leimi epwe apüngala ekewe asamalap, pwe ousap akümwäli ekkei me won ai rongen asor. Üsap pwapwaitikemi, üsap etiwa eu asor seni lepöümi.
MAL 1:11 Pun seni ewe ia akkar a töta me ie tori ewe ia a tuputiu me ie chon ekewe mwü ra asamolu itei. Ekis meinisin ra eäni asor apach mi pwokus ngeniei, eu asor mi limöch. Pun chon ekewe mwü ra asamoluei.
MAL 1:12 Nge oua apiningaua pinin ewe rongen asor, lupwen oua apasa pwe ai rongen asor a limengau, nge ewe mongö mi nom won a anioput.
MAL 1:13 Oua apasa, ‘Aia chipwang ren ei lapalap,’ oua pwal oputaei. Ämi oua uwato pwe ämi asor mine oua fen soläni ika mine a ter ika mine a samau. Ifa usun, oua ekieki pwe ngang üpwe etiwa ei sokun asor seni lepöümi?
MAL 1:14 A anümamau eman chon atuputup mi pwon pwe epwe eäni ngeniei asor eman ätemwänin sip seni nöün pwiin man, nge mürin a eäni asor eman mi wor terin. Pun ngang eman king mi lap, nge chon ekewe mwü ra meninitiei.”
MAL 2:1 Iei alon ewe Samol mi Unusen Manaman, “Ämi souasor kana, iei ai allük ngenikemi:
MAL 2:2 Oupwe asamoluei. Nge are ousap mochen aüselinga mine üa ürenikemi, mürin üpwe awarato anümamau womi o anümamaua feiöchümi kewe. Ellet, üa fen anümamaueer pokiten ousap ekieki ai kewe kapas lon lelukemi.
MAL 2:3 Nengeni, üpwe apwüngü mwirimwirimi kewe, üpwe tofi ngeni won mesemi kiten enen ämi kewe mönün asor o atowukemi seni fän mesei.
MAL 2:4 Ren ei oupwe silei pwe üa tinala ei allük ngenikemi, pwe ai we pwon ngeni ekewe mwirimwirin Lefi epwe nüküchar.
MAL 2:5 Ai we pwon ngeniir eu pwonen manau me kinamwe. Üa ngeniir manau me kinamwe pwe repwe eäni menin. Iwe, ra meninitiei o niuokusitiei.
MAL 2:6 Ra aiti ngeni aramas mine a let, nge resap apasa och mi mwäl. Ra etiei le fetal fän kinamwe me wenechar, nge ra akulu letipen chomong aramas pwe resap föri tipis.
MAL 2:7 Pun wisen eman souasor, epwe aiti ngeni aramas mine repwe silei Kot ren. Repwe feito ren pwe repwe kaiö seni, pun i eman chon künö nöün ewe Samol mi Unusen Manaman.
MAL 2:8 Nge ämi oua kul seni ewe al mi pwüng. Chomong aramas ra chepetek ren lapalapen ämi aiti ngeniir ekewe allük. Oua pwal atai ewe pwon üa eäni ngenikemi.
MAL 2:9 Iei mine üpwe föri pwe ekewe aramas meinisin repwe turunufaseekemi o aücheangauakemi, pokiten ousap föri letipei, nge oua pwal lifilifil lon ämi aiti ngeni aramas ekewe allük.”
MAL 2:10 Ifa usun, kich meinisin sisap semeni eman chök Sam? Ifa usun, sap eman chök Kot a förikich? Pwota chök sisap allükülük, eman ngeni eman, nge sia aücheangauei ewe pwon Kot a föri ngeni semelapach kewe?
MAL 2:11 Ekewe chon Juta ra atai ar pwon ngeni Kot o föri föför mi anioput lon Israel me Jerusalem. Ra apiningaua pinin än ewe Samol mi Lapalap leni mi pin a aücheani. Ra pwüpwülü ngeni föpwül mi fel ngeni ekewe koten ekis.
MAL 2:12 Amwo ewe Samol mi Lapalap epwe ärala seni chon Israel iteiten mwän mi föri ei sokun föför fiti aramasan meinisin, inamwo ika epwe uwato asor ngeni ewe Samol mi Unusen Manaman.
MAL 2:13 Iwe, mi pwal wor och oua föri: Oua achöchönü än ewe Samol mi Lapalap rongen asor ren chönün mesemi, ren kechü me ngüngüres, pun i esap chüen ekieki ekewe asor ika etiweer seni lepöümi.
MAL 2:14 Eman a ais, “Pwota esap chüen etiwa ekewe asor?” Pun ewe Samol mi Lapalap a silei pwe ka atai ewe pwon mi fis lefilemi me pwülüom we, lupwen ka alüal. Iwe, en ka kirikiringau ngeni, nge i fen chiechiom me pwülüom fän ewe pwon.
MAL 2:15 Ifa usun, Kot esap förifengenikemi me pwülüom we, pwe oupwe iniseu me ngüneu? Met popun pwe a föri iei usun? Popun pwe epwe wor nöümi mi wesewesen nöün Kot aramas. Iei mine oupwe föröchü pwe esap wor eman leimi epwe atai an pwon ngeni pwülüan.
MAL 2:16 Iei alon ewe Samol mi Lapalap ewe Koten Israel, “Üa oput mwüfesen. Üa oput, are oua föri ei sokun föför mi ngau ngeni pwülüemi. Iei mine oupwe föröchü pwe ousap atai ämi pwon ngeni pwülüemi, nge oupwe allükülük.”
MAL 2:17 Oua aweiresi ewe Samol mi Lapalap ren ämi kapas. Nge oua ais, “Ifa usun äm aweiresi?” Ren ämi apasa, “Aramas meinisin mi föri mine a ngau ra mürina me fän mesen ewe Samol mi Lapalap, i a pwapwaitiir.” Ika ren ämi ais, “Ia a nom ie ewe Kot mi eäni kapwüng fän pwüng?”
MAL 3:1 Iwe, ewe Samol mi Unusen Manaman a pälüeni, “Nengeni, üpwe tinala nei chon künö pwe epwe amolätä efoch al fän itei. Mürin, ewe Samol mi Lapalap, ewe oua kütta, epwe müttir feito lon imwan imwenfel. Nengeni, epwe feito ewe chon künön ewe pwon, ätewe oua pwapwaiti.”
MAL 3:2 Nge iö epwe tongeni pwäk lon ewe ränin an feito? Iö epwe tongeni ütä, lupwen epwe pwä? Pun i a wewe ngeni soop mi müttir limetawu limengau, a pwal wewe ngeni än eman ekkein ketel mächä.
MAL 3:3 I epwe mot usun eman chon ketel mächä me eman chon limelim silifer. Epwe limeti chon ewe ainangen Lefi o alimöchüür usun eman a limeti kolt me silifer, tori repwe uwato ekewe asor mi fich ngeni ewe Samol mi Lapalap.
MAL 3:4 Mürin, än chon Juta me Jerusalem asor epwe apwapwai ewe Samol mi Lapalap usun me lom lon ekewe ier ra la.
MAL 3:5 Iei alon ewe Samol mi Unusen Manaman, “Mürin, üpwe feito remi pwe üpwe apwüngükemi. Ngang üpwe eman chon pwärätä mi atipisi ekewe sourong, ekewe chon lisowu, ekewe mi akapelmwäl me ekewe mi angaua liwinin nöür chon angang, pwal chokewe mi ariaföüü ekewe fefin mi mä pwülüer, ekewe mi mäsen me ekewe chon siamü. Üpwe atipisi chokewe meinisin resap niuokusitiei.”
MAL 3:6 “Ngang ewe Samol mi Lapalap, üsap tongeni siwil, iei mine ämi mwirimwirin Jakop ousap mochola.
MAL 3:7 Usun ämi kewe lewo ra tok seni ai kewe allük, ina usun ämi oua tok seni ai kewe allük, nge ousap aleasochisiir. Oupwe liwinto rei, pwe ngang üpwe liwin ngenikemi. Nge ämi oua ais, ‘Ifa usun lapalapen äm liwinsefäl?’
MAL 3:8 Ifa usun, aramas repwe tongeni soläni och seni Kot? Nge ämi oua soläni och seniei. Nge oua ais, ‘Met aia soläni senuk?’ Ämi oua soläni och seni mine oua uwato pwe ämi leengol me ämi asor.
MAL 3:9 Eu anümamau a nom womi. A nom womi chon Israel meinisin, pun oua soläni och seniei.
MAL 3:10 Oupwe uwato unusen ämi leengol lon ewe imwenfel, pwe epwe wor mongö lon imwei we. Ren ei oupwe sotuniei ika üsap suki ekewe asammwachon läng fän itemi o ninätiu womi chomong sokun feiöch mi somwola.
MAL 3:11 Ngang üsap mwüt ngeni ekewe lifichimas pwe repwe atai uän ämi pwül, nge ämi kewe irän wain mi nom lemäl repwe ukua.
MAL 3:12 Mürin chon ekewe mwü meinisin repwe aita ngenikemi chokewe mi feiöch, pun fanüemi epwe eu fanü mi wor pwapwa lon.” Iei alon ewe Samol mi Unusen Manaman.
MAL 3:13 Iei alon ewe Samol mi Lapalap, “Oua eäni kapas pöchökül ngeniei. Nge ämi oua ais, ‘Met aia eäni kapasen üpälü ngonuk?’
MAL 3:14 Ren ämi apasa, ‘A lomotongau ach angang ngeni Kot. Met lomoten ach apwönüetä an kewe allük ika ach pwärätä ach letipeta ren mine sa föri me mwen ewe Samol mi Unusen Manaman?
MAL 3:15 Iei mine sa apasa pwe ekewe chon lamalamtekia ra feiöch. Ekewe chon föföringau resap chök pisekisekila, pwe ra pwal sotuni Kot, nge resap angei liwiningauer.’”
MAL 3:16 Mürin, chokewe mi niuokusiti ewe Samol mi Lapalap ra kapasfengen lefiler, nge ewe Samol mi Lapalap a afäliir o aüselinga ar kapas. A wor eu puken achechem me fän mesan, a makelong iten chokewe mi niuokusiti i, ewe Samol mi Lapalap, o chechemeni itan.
MAL 3:17 Iei alon ewe Samol mi Unusen Manaman, “Ir repwe nei, repwe fokun nei aramas lon ewe rän üpwe awora. Ngang üpwe eäni ümöümöch ngeniir, usun eman sam a ümöümöch ngeni nöün mwän mi angang ngeni.
MAL 3:18 Mürin, oupwe tongeni alefilasefäli lefilen eman chon pwüng me eman aramasangau, lefilen ätewe mi angang ngeni Kot me ätewe esap angang ngeni.”
MAL 4:1 Iei alon ewe Samol mi Unusen Manaman, “Nengeni, epwe war eu rän, epwe pulopul usun eu um. Iwe, ekewe chon lamalamtekia me ekewe chon föföringau repwe wewe ngeni fetilipwas. Lon ewe rän ekkei epwe kenirela pwe esap chüen wor eman lusun.
MAL 4:2 Nge usun akkar a asarama fanü, iei usun pwüng epwe uwato manau ngenikemi mi aleasochisiei. Ämi oupwe towu o mwetemwet usun chök ekewe nienifön kow ra mwetemwet lupwen ra towu seni lenier.
MAL 4:3 Lon ewe rän üpwe afisi ekei föför, ämi oupwe purätiu ekewe aramasangau, nge ir repwe usun chök falang me fän pechemi.
MAL 4:4 Oupwe chechemeni mine üa aiti ngenikemi ren nei we chon angang Moses, ekewe allük me pwüüng üa ngenikemi me won ewe chuk Horep fän iten chon Israel meinisin.
MAL 4:5 Nengeni, ngang üpwe tinala remi ewe soufos Elias me mwen ränin ewe Samol mi Lapalap epwe war, ewe rän mi lap o eniweniu.
MAL 4:6 Epwe akulu leluken ekewe sam ngeni nöür kewe, nge leluken ekewe nau ngeni semer kewe. Nge ika esap fis ei, üpwe feito o ataela ewe fanü ren eu anümamau.”
MAT 1:1 Iei tettelin uruwon än Jesus Kraist kewe lewo, i eman mwirimwirin Tafit, nge Tafit eman mwirimwirin Apraham.
MAT 1:2 Apraham semen Isaak, Isaak semen Jakop, nge Jakop semen Juta me pwiin kewe.
MAT 1:3 Juta semen Peres me Sera, iten iner Tamar, Peres semen Hesron, nge Hesron semen Ram.
MAT 1:4 Ram semen Aminatap, Aminatap semen Nason, nge Nason semen Salmon.
MAT 1:5 Salmon semen Poas, iten inan Rahap, Poas semen Opet, iten inan Rut, Opet semen Jesi,
MAT 1:6 nge Jesi semen Tafit ewe king. Tafit semen Salomon, a nöüni me won pwülüen Uria we,
MAT 1:7 Salomon semen Rehopoam, Rehopoam semen Apia, nge Apia semen Asa.
MAT 1:8 Asa semen Jehosafat, Jehosafat semen Jehoram, nge Jehoram semen Usia.
MAT 1:9 Usia semen Jotam, Jotam semen Ahas, nge Ahas semen Hiskia.
MAT 1:10 Hiskia semen Manasa, Manasa semen Amon, nge Amon semen Josia.
MAT 1:11 Josia semen Jehoiachin me pwiin kewe lon fansoun ar oola lon Papilon.
MAT 1:12 Mürin ar oola Papilon: Jehoiachin semen Sealtiel, nge Sealtiel semen Serupapel.
MAT 1:13 Serupapel semen Apiut, Apiut semen Eliakim, nge Eliakim semen Asor.
MAT 1:14 Asor semen Satok, Satok semen Akim, nge Akim semen Eliut.
MAT 1:15 Eliut semen Eleasar, Eleasar semen Matan, nge Matan semen Jakop.
MAT 1:16 Jakop semen Josef pwülüen Maria we, neminewe a nöünätiu Jesus mi pwal iteni Kraist.
MAT 1:17 Iei usun a wor engol me rüanü tettelin aramas seni Apraham tori Tafit, pwal engol me rüanü tettelin aramas seni Tafit tori fansoun ar oola Papilon, pwal engol me rüanü tettelin aramas seni ar oola tori Kraist.
MAT 1:18 Iwe, iei usun än Jesus Kraist uputiu. Maria inan a kofot ngeni Josef, nge me mwen ar resamwo pwüpwülü a pwä pwe neminewe a pwopwo ren manamanen Ngünmifel.
MAT 1:19 Nge Josef eman mwän mi föföri mine a pwüng, esap mochen asäwa Maria mwen mesen aramas, iei mine a ekiekin likitala, nge le monomon chök.
MAT 1:20 Iwe, lupwen a chüen ekieki usun, eman nöün ewe Samol chon läng a pwä ngeni lon an tan o üreni, “Josef, mwirimwirin Tafit, kosap niuokus om kopwe pwülüeni Maria, pun mine a pwopwo ren a pop seni ewe Ngünmifel.
MAT 1:21 Epwe nöünöü eman ät, iwe, kopwe aita ngeni Jesus, pun i epwe amanaua aramasan seni ar tipis kana.”
MAT 1:22 Ekei mettoch meinisin ra fis pwe epwe pwönüetä met ewe Samol a kapas me ren ewe soufos:
MAT 1:23 “Nengeni, eman föpwül epwe pwopwo o nöüni eman ät, repwe aita ngeni Imanuel, wewen ‘Kot a nonom rech.’”
MAT 1:24 Iwe, lupwen Josef a pwätä seni an möür, a föri usun mine ewe chon läng a allük ngeni. A angei Maria pwe pwülüan.
MAT 1:25 Nge Josef esap kon ren Maria tori a nöünätiu nöün we ät. Iwe, Josef a aita ngeni ewe ät Jesus.
MAT 2:1 Iwe, Jesus a uputiu lon Petleem lon ewe fanü Jutea lon mwün ewe king Herotes. Mürin ekis fansoun, ekoch mwän mi silelapei pekin kaiö ngeni fü seni fanüen ötiu ra feito Jerusalem.
MAT 2:2 Ra ais, “Ia a uputiu ie än chon Juta we king? Äm aia küna füün lupwen a tötä seni ötiu. Iwe, aia feito pwe aipwe asamolu.”
MAT 2:3 Lupwen ewe king Herotes a rong ei pworaus, a fokun osukosuk, pwal chon Jerusalem meinisin.
MAT 2:4 Mürin a körifengeni ekewe souasor mi lap meinisin, pwal ekewe Sensen Allük o aisiniir, ia ewe Kraist epwe uputiu ie.
MAT 2:5 Iwe, ra pölüeni, “Lon ewe telinimw Petleem lon ewe fanü Jutea. Pun iei usun mine ewe soufos a makkei:
MAT 2:6 ‘En Petleem lon ewe fanü Jutea, kosap fokun kisikis me lein ekewe telinimwen Jutea, pun eman samol epwe towu senuk, epwe emweni nei aramasen Israel.’”
MAT 2:7 Iei mine Herotes a körato ekewe souürür ar repwe mwichfengen le monomon o küttafichi seniir fansoun pwään ewe fü.
MAT 2:8 Mürin a tiniirela Petleem o ngeniir ei kapasen öüröür, “Oupwe feila o küttafichi ewe mönükol. Nge lupwen oua küna, oupwe asile ngeniei, pwe pwal ngang üpwe feila o asamolu.”
MAT 2:9 Wesin än ewe king kapas ngeniir ra feila. Iwe, lupwen ra fefetal, ewe fü ra fen küna me lon fanüen ötiu a akom mwer tori a üla me won ewe leni ia ewe mönükol a nom ie.
MAT 2:10 Lupwen ar küna ewe fü a fokun lapalap ar pwapwa.
MAT 2:11 Iwe, ra tolong lon ewe imw o ra küna ewe mönükol me Maria inan we, iwe, ra chapetiu mwan o asamolu. Mürin ra wätiu ar kewe lifang: kolt, apach mi pwokus me säfei mi aüchea o fang ngeni.
MAT 2:12 Iwe, Kot a öüröüra ngeniir lon ar tan, pwe resap chüen liwiniti Herotes, iei mine ra liwinsefäliti fanüer won pwal efoch al.
MAT 2:13 Mürin än ekewe souürür feila, eman nöün ewe Samol chon läng a pwä ngeni Josef lon an tan o üreni, “Herotes epwe kütta ewe mönükol pwe epwe niela. Iei mine kopwe pwätä, kopwe angei ewe mönükol me inan we o süla Isip. Oupwe nonom ikenan tori inet üpwe ürenuk pwe oupwe liwin.”
MAT 2:14 Iwe, Josef a pwätä, a angei ewe mönükol me inan we o ra süla Isip lon ewe chök pwinin.
MAT 2:15 Ra nonom ikenan tori Herotes a mäla. Ei a fis pwe epwe pwönüetä mine ewe Samol a fen apasa me ren ewe soufos, “Üa körawu nei ät seni Isip.”
MAT 2:16 Lupwen Herotes a mefi, pwe ekewe souürür ra atupu, a fokun lingeringer. Iwe, a tinala nöün sounfiu pwe repwe niela ekewe ät meinisin lon Petleem me lükün Petleem mi ierini ruu are kis seni. A föri iei usun, pun a aükü ngeni ewe fansoun pwään ewe fü a silei seni ekewe souürür ngeni ei otun.
MAT 2:17 Ren ei a pwönüetä mine ewe soufos Jeremaia a fen apasa:
MAT 2:18 “Aramas ra rongorong akürangen ngüngüres me kechüengau lon Rama. Rahel a kechüeiti nöün kana. Esap mochen chipila, pun nöün ra mäla.”
MAT 2:19 Mürin än Herotes mäla, eman nöün ewe Samol chon läng a pwä ngeni Josef lon an tan me Isip
MAT 2:20 o üreni, “Kopwe pwätä o angei ewe ät me inan we, iwe, kopwe liwinsefäliti ewe fanü Israel, pun ätekewe mi ekiekin niela ewe ät ra mäla.”
MAT 2:21 Iei mine Josef a pwätä, a angei ewe ät me inan we o ra liwinsefäliti Israel.
MAT 2:22 Nge lupwen Josef a rong pwe Arkelaus a siwili saman Herotes lon wisan wisen king lon Jutea, a niuokus an epwe feila ikenan. Iwe, Kot a pwal öüröürasefäli, iei mine a feila lon ewe fanü Kalilea
MAT 2:23 o chonlefanüla lon eu telinimw itan Nasaret. Iei usun a pwönüetä mine ekewe soufos ra fen apasa, “Epwe iteni re Nasaret.”
MAT 3:1 Lon ewe fansoun Johannes Soupapatais a feila ngeni ewe fanüapön Jutea o popuetä le afalafal.
MAT 3:2 Iwe, a apasa, “Oupwe aier seni ämi tipis, pun a arap Mwün Läng.”
MAT 3:3 Johannes ätewe ewe soufos Aisea a kapas usun lupwen a apasa, “Eman a kökkö fän leüömong lon ewe fanüapö: ‘Oupwe amolätä alen ewe Samol. Oupwe awenecharala ewe al epwe fetal won.’”
MAT 3:4 Johannes a üföüf üf mi för seni ülen kamel, ririn lukalapan a för seni silin man, nge anan mongö lifichimas me chönün chunen seni lein pötöwöl.
MAT 3:5 Iwe, aramas ra feito ren seni Jerusalem me unusen ewe fanü Jutea, pwal seni ekewe fanü meinisin ünükün ewe chanpupu Jortan.
MAT 3:6 Ra pwärätä ar tipis, nge Johannes a papataisiir lon ewe chanpupu Jortan.
MAT 3:7 Nge lupwen Johannes a küna chomongun ekewe Farisi me Satusi mi feito ren pwe repwe papatais, a üreniir, “Ämi serepenit! Iö a ürenikemi pwe oupwe sü seni än Kot song epwe awarato womi?
MAT 3:8 Oupwe föri sokun föför epwe pwärätä pwe oua aier seni ämi tipis.
MAT 3:9 Ousap ekieki pwe oua tongeni sü seni än Kot song ren ämi apasa, ‘Äm mwirimwirin Apraham’. Pun ngang üpwe ürenikemi, pwe Kot a tongeni angei ekei fau o föri mwirimwirin Apraham seniir!
MAT 3:10 Ewe kouk a fen molotä pwe epwe pöküela ekewe irä tori warer. Irä meinisin resap uani ua mi mürina repwe pöküpök o koturulong lon ekkei.
MAT 3:11 Ngang üa papataisikemi ren koluk pwe asisilen ämi aier. Nge ewe eman epwe war me müri epwe papataisikemi ren Ngünmifel me ekkei. I a lap seniei, pwe ngang üsap fich ngeni ai üpwe mwo nge uwou ipwan sus.
MAT 3:12 A kamwöch an söföl usun fook pwe epwe aimwüfeseni ekewe föün wiich seni pöön me won ewe lenien wichiwich umwun wiich. Iwe, epwe ionifengeni ekewe föün wiich o uwalong lon an lenien iseis, nge ekewe pöön epwe keniirela lon ekkei esap kunula.”
MAT 3:13 Lon ena fansoun Jesus a feito seni Kalilea o a feila ren Johannes arun ewe chanpupu Jortan, pwe Johannes epwe papataisi.
MAT 3:14 Nge Johannes a sotuni pwe epwe siwili an we ekiek. Iwe, a üreni, “Ürürün pwe üpwe fen papatais reöm, nge iei en ka feito rei?”
MAT 3:15 Iwe, Jesus a pölüeni, “Kopwe chök föri met wisom. Pun ren ei sipwe föri meinisin mine letipen Kot.” Iei mine Johannes a tipeeu ngeni.
MAT 3:16 Iwe, lupwen Jesus a wes me papatais, a müttir ütä me lon ewe koluk. Nge nengeni, läng a sukula ngeni o a küna ewe Ngünün Kot a feitiu won usun lapalapen eman lisom.
MAT 3:17 Mürin eu möngüngü a möngüngüwu seni läng a apasa, “Iei i nei mi achengicheng, üa unusen pwapwa ren.”
MAT 4:1 Iwe, mürin Ngünmifel a emwenala Jesus lon ewe fanüapö pwe epwe küna sosot me ren Tefil.
MAT 4:2 Nge pokiten Jesus esap mongö och lon ükükün faik rän me faik pwin, a mefi echik.
MAT 4:3 Iwe, ewe Tefil a feito ren o üreni, “Are en Nöün Kot, kopwe üreni ekei fau pwe repwe wiliti mongö.”
MAT 4:4 Nge Jesus a pölüeni, “A mak lon ekewe Toropwe mi Pin, ‘Aramas resap manau ren mongö chök, pwe ra manau ren iteiten kapas Kot a apasa.’”
MAT 4:5 Mürin ewe Tefil a panala Jesus Jerusalem, ewe telinimw mi pin o aütai won ungen ewe imwenfel.
MAT 4:6 Iwe, a üreni, “Are en Nöün Kot, kopwe aturuketiu me ikei, pun a mak lon ekewe Toropwe mi Pin, ‘Epwe allük ngeni nöün kewe chon läng, pwe repwe tümwünuk. Repwe pwisuk le pöür kana pwe pecheöm esap chepeti eföü fau.’”
MAT 4:7 Jesus a pölüeni, “A pwal mak lon ekewe Toropwe mi Pin, ‘Kosap sotuni ewe Samol om we Kot.’”
MAT 4:8 Mürin ewe Tefil a pwal panatä Jesus won eu chuk mi fokun tekia o aküna ngeni mwün fanüfan meinisin me linger.
MAT 4:9 Iwe, a üreni, “Ekei mettoch meinisin üpwe ngonuk, are kopwe chapetiu mwei o fel ngeniei.”
MAT 4:10 Jesus a üreni, “Kopwe sü seniei Satan! Pun a mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’”
MAT 4:11 Mürin ewe Tefil a likitala Jesus, nge nengeni, ekewe chon läng ra feito ren o tümwünü.
MAT 4:12 Iwe, lupwen Jesus a rong pwe Johannes a nom lon fötek, a feila Kalilea.
MAT 4:13 Nge esap nonometiu lon Nasaret, nge a feila o nonom lon Kapernaum, eu telinimw mi nom arun ewe nomun Kalilea lon fanüen Sepulon me Naftali.
MAT 4:14 Ei a fis pwe epwe pwönüetä mine ewe soufos Aisea a apasa,
MAT 4:15 “Ewe fanü Sepulon me ewe fanü Naftali won ewe al mi ale ngeni ewe matau, pekilan ewe chanpupu Jortan me epek, Kalilea, fanüen ekewe chon lükün Israel!
MAT 4:16 Ekewe aramas mi nom lon rochopwak ra küna eu saram mi watte, nge fän iten chokewe mi nom lon kirochen fanüen mäla eu saram a tinetiu wor.”
MAT 4:17 Seni ena fansoun Jesus a popuetä le eäni ei afalafal, “Oupwe aier seni ämi tipis, pun a arap Mwün Läng!”
MAT 4:18 Iwe, lupwen Jesus a fetal arun ewe nomun Kalilea, a küna ruoman pwipwi, ir chon attau, Simon, a pwal iteni Petrus me pwiin we Andru, ra aturätiu nöür chew lon ewe noom.
MAT 4:19 Jesus a üreniir, “Oupwe tapweto müri pwe üpwe aiti ngenikemi usun ämi oupwe attaua aramas.”
MAT 4:20 Lon ewe chök otun ra likitala nöür kewe chew o tapwela mürin Jesus.
MAT 4:21 Jesus a pwal feila lon eu leni o a küna pwal ruoman pwipwi, James me Johannes nöün Sepeti kewe. Ra nom won waar we fiti semer we Sepeti le wonefi nöür kewe chew. Jesus a köriir,
MAT 4:22 nge lon ewe chök otun ra likitala waar we me semer we o tapwela mürin.
MAT 4:23 Iwe, Jesus a fetalfeil lon unusen Kalilea, a aiti ngeni aramas kapasen Kot me lon ekewe imwen felikis, a afalafala ewe Pworaus Allim usun ewe Mwün Kot, a pwal apöchöküla aramas mi eäni sokopaten samau me apwangapwang.
MAT 4:24 Iwe, pworausen Jesus a chöfetal lon unusen ewe fanü Siria, pwe ekewe aramas ra uwato ren ekewe chon samau meinisin, chokewe mi üriir sokopaten samau o metek, aramas mi waan anü, mään kawakau me aramas mi mwök. Iwe, Jesus a apöchöküleretä meinisin.
MAT 4:25 Eu mwichen aramas mi chomong ra tapwela mürin Jesus seni Kalilea me ewe fanü itan Engol Telinimw, seni Jerusalem me Jutea me ewe fanü ünükün ewe chanpupu Jortan me ewe epek.
MAT 5:1 Iwe, lupwen Jesus a küna ewe mwichen aramas mi chomong, a feitä won eu chuk o mottiu ikenan, nge nöün kewe chon kaiö ra feito ren.
MAT 5:2 Iwe, Jesus a popuetä le afalafaleer:
MAT 5:3 “Ra feiöch chon silei pwe ra wöüngau lon pekin ngünür, pun ir repwe mwüni Mwün Läng.
MAT 5:4 Ra feiöch chon kechü leluker, pun Kot epwe echipeer.
MAT 5:5 Ra feiöch chon tipetekison, pun ir repwe fanüeni fanüfan.
MAT 5:6 Ra feiöch chon mochen föri mine a pwüng me mwen mesen Kot, pun Kot epwe amenemenöchür.
MAT 5:7 Ra feiöch chon eäni tong, pun Kot epwe pwal eäni tong ngeniir.
MAT 5:8 Ra feiöch chon limöch leluker, pun ir repwe küna Kot.
MAT 5:9 Ra feiöch chon afisätä kinamwe, pun ir repwe iteni nöün Kot.
MAT 5:10 Ra feiöch chon küna riaföü pokiten ar föri mine a pwüng me mwen mesen Kot, pun ir repwe mwüni Mwün Läng.
MAT 5:11 Oua feiöch lupwen aramas ra aitengauakemi o ariaföüükemi o apasa sokopaten kapas chofona mi ngau usumi pokiten oua tapweto müri.
MAT 5:12 Oupwe pwapwa o mwanek, pun liwinimi epwe watte lon läng. Iei usun ra pwal ariaföüü ekewe soufos mi akom mwemi.
MAT 5:13 “Ämi oua usun chök salt fän iten aramas meinisin. Nge are ewe salt a nepatapatala, esap wor och mine sipwe enekeniken ngeni. Esap chüen lomot ngeni och, sipwe chök pöütala nge aramas repwe puri.
MAT 5:14 Ämi saramen fanüfan. Eu telinimw a nom won eu chuk esap tongeni monola.
MAT 5:15 Esap wor eman aramas a keni eu lamp o a anomu fän eu sepi, nge epwe isetä won lenian, pwe epwe asarama chon ewe imw meinisin.
MAT 5:16 Iei usun ämi saram epwe tittin mwen ekewe aramas, pwe repwe küna ämi föför mürina o mwareiti Sememi lon läng.
MAT 5:17 “Ousap ekieki pwe üa feito pwe üpwe amoola än Moses kewe Allük me än ekewe soufos kapasen kait. Ngang üsap feito pwe üpwe amorerela, nge üa feito pwe üpwe unusen apwönüretä.
MAT 5:18 Enlet, ngang üpwe ürenikemi, pwe tori än läng me fanüfan repwe morola, esap wor och kükün mesen mak are och tik won eföü mesen mak epwe morola tori an epwe pwönüetä ekei mettoch meinisin.
MAT 5:19 Iwe, are eman a purätiu eu me lein ekei allük mi fokun kisikis o aiti ngeni aramas pwe repwe föri iei usun, ätewe epwe fokun kisikis lon Mwün Läng. Nge eman mi apwönüetä kapasen ekei Allük o aiti ngeni aramas pwe repwe föri iei usun, ätewe epwe tekia lon Mwün Läng.
MAT 5:20 Pun üpwe ürenikemi, pwe ämi oupwe chök tongeni tolong lon Mwün Läng are ämi oua föri mine a pwüng me mwen mesen Kot lap seni ekewe Sensen Allük me ekewe Farisi.
MAT 5:21 “Oua fen rongorong usun än ekewe sensen lamalam aiti ngeni ach kewe lewo, ‘Kosap niela aramas. Iö a niela aramas epwe tolong lon kapwüng.’
MAT 5:22 Nge ngang üpwe ürenikemi: Iö a songeiti pwiin epwe tolong lon kapwüng, o iö a kapasen turunufas ngeni pwiin epwe tolong lon kapwüng mi lap, nge iö a apasa ngeni pwiin, ‘En mi umwes,’ epwe fich ngeni an epwe tolong lon ewe ekkeiin hell.
MAT 5:23 Iei mine are kopwe wätä om asor ngeni Kot won ewe rongen asor, o ikenan ka chechemeni pwe pwiüm a chou ngonuk,
MAT 5:24 kopwe likiti om we asor mwen ewe rongen asor o liwinla, pwe kopwe achä ngonuk pwiüm. Mürin kopwe liwinto o wätä om we asor won ewe rongen asor.
MAT 5:25 Are eman a mochen kapwüng ngonuk pwe a föri nöün toropwen kapwüng, kopwe müttir chächäri lupwen mi chüen wor fansoun, pwe ete aturuk ren soukapwüng, o i epwe atolongok lepöün polis, nge ir repwe aturukolong lon imwen fötek.
MAT 5:26 Enlet, üpwe ürenuk, pwe kosap fokun towu me ikenan tori om kopwe mönätiu unusen liwinin om we tipis.
MAT 5:27 “Oua fen rongorong pwe ekewe sensen lamalam ra apasa, ‘Kosap lisowu.’
MAT 5:28 Nge ngang üpwe ürenikemi: Are eman mwän a nenengeni eman fefin o a mochenia ngeni, ätewe a fen tipisin lisowu ngeni ren an ekieki neminewe lon lelukan.
MAT 5:29 Iwe, are pelifichin mesom epwe emwenukolong lon tipis, kopwe alusawu o pöütala. Pun a fen öch ngonuk pwe eu kükün kifetin inisum epwe pöütüla, lap seni unusen inisum epwe koturulong lon hell.
MAT 5:30 Nge are pöüifichum epwe emwenukolong lon tipis, kopwe pöküela o pöütala. Pun a fen öch ngonuk pwe eu kükün kifetin inisum epwe pöütüla, lap seni unusen inisum epwe koturulong lon hell.
MAT 5:31 “Oua fen pwal rong pwe ekewe sensen lamalam ra apasa, ‘Eman mwän mi pöütala pwülüan, epwe ngeni echö toropwen mwüfesen.’
MAT 5:32 Nge ngang üpwe ürenikemi: Are eman mwän epwe pöütala pwülüan, nge neminewe esap kirikiringau ngeni, ätewe a föri pwe neminewe a tipisin lisowu are a pwüpwülüsefäl, nge pwal ewe mwän mi pwülüeni ei fefin a tipisin lisowu.
MAT 5:33 “Oua fen pwal rong usun än ekewe sesen lamalam aiti ngeni ach kewe lewo, ‘Kosap atai om pwon ngeni ewe Samol, nge kopwe apwönüetä mine ka pwon ngeni fän akapel.’
MAT 5:34 Nge ngang üpwe ürenikemi: Kosap fokun akapel lupwen ka eäni eu pwon. Kosap öpölü läng, pun iei än Kot lenien mot,
MAT 5:35 kosap öpölü fanüfan, pun iei än Kot lenien puun pechen, kosap pwal öpölü Jerusalem, pun iei telinimwen ewe king mi lapalap.
MAT 5:36 Kosap pwal öpölü mökürom, pun kosap tongeni apwecha are acholu emet metan.
MAT 5:37 Kopwe chök apasa, ‘Ewer, ewer,’ ika ‘Apw, apw,’ pun mine a som seni a pop seni ewe mi Ngau.
MAT 5:38 “Oua fen rongorong pwe ekewe sensen lamalam ra apasa, ‘Are eman a afeiengaua mesen eman, mesan epwe pwal feiengau, nge are eman a tülü ngiin eman, ngiin epwe pwal tütül.’
MAT 5:39 Nge ngang üpwe ürenikemi: Ousap liwini än aramas ngau ngenikemi. Are eman epwe pösapei pelifichum, kopwe akulu ngeni pwal epek.
MAT 5:40 Are eman a atolongok lon kapwüng, pwe epwe angei üfom söch, kopwe pwal likiti ngeni üfom sekit.
MAT 5:41 Are eman sounfiu epwe arianuk pwe kopwe uwei pisekin lon ükükün eu mail, kopwe fen etala ruu mail.
MAT 5:42 Are eman a tüngor och senuk, kopwe chök ngeni, nge are eman a mochen paro och pisekum, kopwe mwüt ngeni.
MAT 5:43 “Oua fen rongorong pwe ekewe sensen lamalam ra apasa, ‘Kopwe echeni chon arum, nge kopwe oput chon oputom.’
MAT 5:44 Nge ngang üpwe ürenikemi: Oupwe echeni chon oputakemi o iotek fän iten chokewe mi ariaföüükemi,
MAT 5:45 pwe oupwe wiliti nöün Sememi mi nom läng. Pun i a atötai förian akkar won ekewe aramasangau me aramasöch, nge a apüngatiu üt won chon pwüng me chon pwüngingau.
MAT 5:46 Are oua chök echeni chokewe mi echenikemi, esap wor och liwin oupwe angei. Pwal mwo nge ekewe chon ioni takises ra föri ei sokun.
MAT 5:47 Are oua chök kapong ngeni chiechiemi kana, oua ekieki pwe oua föri och mi lap seni än pwal ekewe ekoch aramas föför? Pwal mwo nge ekewe resap silei Kot ra föri ei sokun.
MAT 5:48 Iei mine ämi oupwe unusöch usun Sememi mi nom läng a unusöch!
MAT 6:1 “Oupwe tümwünüfichi, pwe ousap föri ämi föförün pwüng mwen mesen aramas pwe repwe küna mine oua föri. Pun are oupwe föri iei usun, ousap angei och liwin seni Sememi mi nom läng.
MAT 6:2 Iei mine are oupwe fang ngeni ekewe chon wöüngau och mettoch, ousap asilefetalei mine oua föri, usun ekewe chon likatuputup ra föri lon ar kewe imwen felikis pwal won ekewe al, pwe aramas repwe ingeitiir. Enlet, üpwe ürenikemi, pwe ra fen wes le angei liwiniir.
MAT 6:3 Nge lupwen oupwe fang ngeni ekewe chon wöüngau, oupwe föri lon ei lapalap, pwe fen mwo nge chiechiemi kewe mi fokun kan ngenikemi resap silei usun.
MAT 6:4 Iei usun ämi fang ngeni chon wöüngau epwe fis le monomon. Mürin Sememi we a küna mine oua föri le monomon epwe liwini ngenikemi.
MAT 6:5 “Iwe, lupwen oupwe iotek, ousap föri usun ekewe chon likatuputup. Ra efich ar repwe ütä o iotek lon ar kewe imwen felikis pwal lepwokukun ekewe al, pwe aramas repwe küneer. Enlet, üpwe ürenikemi, pwe ra fen wes le angei liwiniir.
MAT 6:6 Nge lupwen ämi oupwe iotek, oupwe tolong lon rumwemi, oupwe apüngala asaman o iotek ngeni Sememi ousap küna. Iwe, Sememi mi küna mine oua föri le monomon epwe liwini ngenikemi.
MAT 6:7 Iwe, lupwen oupwe iotek, ousap kapaspat usun chokewe resap silei Kot, pun ra ekieki pwe Kot epwe aüselinger pokiten ar iotekitam.
MAT 6:8 Ousap apirüür, pun Sememi a fen silei met oua osupwang ren, mwen ousamwo tüngor ngeni.
MAT 6:9 Iwe, iei usun ämi oupwe iotek: ‘Semem lon läng. Itom epwe pin,
MAT 6:10 Mwum epwe war, letipom epwe fis won fanüfan usun chök lon läng.
MAT 6:11 Kopwe ngenikem anem mongö ikenai.
MAT 6:12 Kopwe amusala äm tipis, usun pwal äm aia amusala chokana mi tipis ngenikem.
MAT 6:13 Iwe, kosap atolongakem lon sosot, nge kopwe angasakem seni ewe mi ngau. [Pun om chök mwü me manaman me ling feilfeilachök. Amen’]
MAT 6:14 Pun are oupwe amusala än aramas tipis, Sememi mi nom läng epwe pwal amusala ämi tipis.
MAT 6:15 Nge are ousap amusala än ekewe aramas tipis, Sememi mi nom läng esap pwal amusala ämi tipis.
MAT 6:16 “Iwe, lupwen oupwe echikefel, ousap wowongau usun ekewe chon likatuputup ra föri. Ra awowongaueer, pwe aramas meinisin repwe küna pwe ra echikefel. Enlet, üpwe ürenikemi, pwe ra fen wes le angei liwiniir.
MAT 6:17 Nge lupwen ämi oupwe echikefel, oupwe epiti möküremi o oresi wonmesemi,
MAT 6:18 pwe ekewe aramas resap silei pwe oua echikefel. Nge Sememi we ousap küna, i epwe silei. Iwe, Sememi mi küna mine oua föri le monomon epwe liwini ngenikemi.
MAT 6:19 “Ousap iseis wöümi fän püsin itemi won fanüfan, ia ekewe pwötür me parang ra atarela, nge chon solä ra atai o soläni.
MAT 6:20 Nge oupwe iseis wöümi lon läng ia ekewe pwötür me parang resap tongeni atarela, nge chon solä resap tongeni atai o soläni.
MAT 6:21 Pun ia wöümi a nom ie, ikenan lelukemi epwe pwal nom ie.
MAT 6:22 “Mas saramen ewe inis, usun chök eu lamp. Are mesom a fat, unusen inisum a saram.
MAT 6:23 Nge are mesom a fatangau, unusen inisum epwe rochopwak. Iei mine are ewe saram mi nom lomw a wiliti rochopwak, epwe ifan me watten rochokichin rochopwakum!
MAT 6:24 “Esap wor eman a tongeni angang ngeni ruoman samol. Pun epwe oput eman, nge epwe echeni ewe eman, ika epwe tipeni eman, nge epwe turunufasei ewe eman. Ousap tongeni angangepök ngeni Kot me wöün fanüfan.
MAT 6:25 Iei mine üpwe ürenikemi, pwe ousap öüreki manauemi usun mine oupwe äni are ünümi, ousap öüreki mine oupwe üföüf. Ifa usun, manau esap aüchea seni mongö, ika ewe inis esap aüchea seni üf?
MAT 6:26 Oupwe nenengeni ekewe mansüsü: Resap fofot, resap pwal kinikin, esap wor ar lenien iseis, nge Sememi lon läng a fen amongöniir. Ifa usun, ämi ousap kon aüchea seniir?
MAT 6:27 Ifa usun, iö leimi epwe tongeni atama manauan ren an öürek?
MAT 6:28 Pwota oua öüreki üfemi? Oupwe nenengeni ekewe kiopun lemäl usun ra märitä: Resap angang, resap pwal föri üfer.
MAT 6:29 Nge ngang üpwe ürenikemi, pwe fen mwo ewe king Salomon lon wöün meinisin esap üföüf üf mi ling usun lingen ekei pön kiop.
MAT 6:30 Are iei usun än Kot aüfa ekewe fetilin lemäl, fetil mi wor ikenai, nge lesor epwe koturulong lon um, ifa usun, Kot esap fokun aüföüfakemi lap seniir? Ämi oua lükülük kisikis!
MAT 6:31 Iei mine ousap öürek o apasa, ‘Meta sipwe mongö?’ ika ‘Meta sipwe ünümi?’ ika ‘Meta sipwe üföüf?’
MAT 6:32 Pun chokewe resap silei Kot ra chök ekieki usun ekei mettoch. Iwe, Sememi lon läng a silei pwe oua osupwang ren ekei mettoch.
MAT 6:33 Nge oupwe chök ekieki lon letipemi ewe Mwün Kot me pwüngün, iwe, i epwe ngenikemi ekei mettoch meinisin.
MAT 6:34 Iei mine ousap öürek usun ewe rän lesor, pun lesor epwe püsin anafa öürekin lon. Eu me eu rän epwe püsin wor osukosuken lon.
MAT 7:1 “Ousap apwüngü aramas, pwe Kot esap apwüngükemi.
MAT 7:2 Pun Kot epwe apwüngükemi won ewe chök lapalap oua apwüngü aramas won. Epwe eäni ngenikemi ewe chök aükük oua eäni ngeni aramas.
MAT 7:3 Pwota ka küna ewe kükün pipi mi nom lon mesen pwiüm, nge kosap mefi ewe irä lon püsin mesom?
MAT 7:4 Epwe ifa usun om kopwe tongeni üreni pwiüm, ‘Kopwe mwüt ngeniei ai üpwe uwawu ewe kükün pipi mi nom lon mesom,’ lupwen a wor ewe irä lon püsin mesom?
MAT 7:5 En eman chon likatuputup! Kopwe akomwen uwawu ewe irä seni lon mesom, iwe, mürin kopwapw tongeni künafichi om kopwe uwawu ewe kükün pipi seni lon mesen pwiüm.
MAT 7:6 Ousap ngeni ekewe kolak mine a pin, pun repwe chök kul o kükemi. Ousap mone ngeni ekewe pik ämi kewe föün pwei mi aüchea, pun repwe chök puriretiu fän pecher.
MAT 7:7 “Oupwe tütüngor o epwe wor lifangemi. Oupwe küküt o epwe wor künaemi. Oupwe fichifich o epwe wor asam mi suk ngenikemi.
MAT 7:8 Pun iö a tütüngor epwe angei och. Iö a küküt epwe künakün, nge iö a fichifich, epwe wor asam mi suk ngeni.
MAT 7:9 Iö leimi ämi kana sam nöün epwe tüngorei eföü pilawa, nge epwe ngeni eföü fau?
MAT 7:10 Nge are epwe tüngor eman ik, epwe ngeni eman serepenit?
MAT 7:11 Iwe, are mwo ämi aramas mi ngau, nge oua silei ämi oupwe fang ngeni nöümi lifang mi mürina, epwe fen ifan me watten än Sememi lon läng fangala mettoch mi mürina ngeni chokewe mi tüngorei!
MAT 7:12 Oupwe föri ngeni aramas usun mine oua mochen repwe föri ngenikemi. Pun iei masouen än Moses kewe allük me än ekewe soufos kapasen kait.
MAT 7:13 “Oupwe tolong lon ewe asam mi pwangekükün! Pun a pwangemong ewe asam o chömong ewe al mi ale ngeni feiengau esemüch, nge chokewe mi fetal won ra chomong.
MAT 7:14 Nge a pwangekükün ewe asam o chökükün ewe al mi ale ngeni manau esemuch. Mi wor ekoch chök aramas mi fetal won ei al ngeni manau.
MAT 7:15 “Oupwe afälikemi ren ekewe soufos chofona, ra feito remi lon lapalapen sip me lükün, nge me lon letiper a wewe ngeni tipen ekewe wolif mi mwacho.
MAT 7:16 Ämi oupwe silleniir ren mine ra föri. Ekewe iräfölüföl resap uani uän kurukur, nge ekewe lantana resap uani uän apel.
MAT 7:17 Efoch irä mi öch a uani ua mi mürina, nge efoch irä mi ngau a uani ua mi ngau.
MAT 7:18 Efoch irä mi öch esap tongeni uani ua mi ngau, nge efoch irä mi ngau esap tongeni uani ua mi mürina.
MAT 7:19 Iwe, ekewe irä resap uani ua mi mürina repwe pöküpök o koturulong lon ekkei.
MAT 7:20 Iei usun ämi oupwe silleni ekewe soufos chofona ren mine ra föri.
MAT 7:21 “Esap aramas meinisin mi aita ngeniei ‘Samol, Samol’ repwe tolong lon Mwün Läng, nge chokewe chök mi föri letipen Semei lon läng.
MAT 7:22 Chomong repwe apasa ngeniei lon ewe ränin kapwüng, ‘Samol, Samol, ifa usun, äm aisap afalafal fän itom? Aisap asüela anün rochopwak fän itom? Aisap pwal föri chomong manaman fän itom?’
MAT 7:23 Mürin ngang üpwe üreniir, ‘Ngang üsap fokun silekemi. Oupwe sü seniei, ämi chon föri föför mi ngau!’
MAT 7:24 “Iei mine are eman a rongorong ai kei kapas o aleasochis ngeniir a wewe ngeni eman mwän mi tipachem, a aüetä imwan won achau.
MAT 7:25 Iwe, a püng ütemong, chanpupu ra pwotä o pufetal o asepwäl a pöchökül le eniti ewe imw. Nge ewe imw esap turula, pun a kaütä won achau.
MAT 7:26 Nge iö a rongorong ai kei kapas o aleasolap ngeniir a wewe ngeni eman mwän mi tiparoch, a aüetä imwan won pi.
MAT 7:27 Mürin a püng ütemong, chanpupu ra pwotä o pufetal o asepwäl a pöchökül le eniti ewe imw. Iwe, a turula, nge ewe imw a unusen tatakis.”
MAT 7:28 Iwe, lupwen Jesus a wes le kapas won ekei mettoch, ewe mwichen aramas a fokun weitifengeni usun an afalafal,
MAT 7:29 pun a afalafal usun eman mi wor an manaman, nge esap afalafal usun nöür kewe Sensen Allük.
MAT 8:1 Iwe, lupwen Jesus a feitiu me won ewe chuk, eu mwichen aramas mi chomong a tapwela mürin.
MAT 8:2 Iwe, eman mwän mi üri rupun pwötür a feito ren Jesus, a fotopwäsuk me mwan o üreni, “Ai samol, are ka mochen, ka tongeni alimöchüei.”
MAT 8:3 Jesus a aitiela pöün, a atapa ewe mwän o apasa, “Ngang üa mochen, kopwe limöch.” Lon ewe chök otun ewe rupun pwötür won ewe mwän a wesila.
MAT 8:4 Mürin Jesus a üreni ewe mwän, “Kopwe pii, pwe kosap üreni eman usun mine a fis. Nge kopwe feila ren ewe souasor pwe epwe nenengenuk. Iwe, kopwe eäni ewe asor Moses a allük fän iten limelim, pwe epwe alletätä ngeni aramas pwe ka limöch.”
MAT 8:5 Lupwen Jesus a tolong lon ewe telinimw Kapernaum, eman meilapen sounfiun Rom a churi o tüngormau ngeni pwe epwe alisi.
MAT 8:6 Iwe, a üreni, “Ai samol, nei chon angang a mwenilong leimw, esap tongeni mwökütüküt, a pwal fokun watte an metek.”
MAT 8:7 Jesus a üreni, “Üpwe feila o apöchöküla.”
MAT 8:8 Nge ewe meilapen sounfiu a üreni, “Ai samol, ngang üsap eman aramas mi aüchea ngeni om kopwe feito lon imwei. Nge kopwe chök apasa och kapas, iwe, nei we chon angang epwe pöchökületä.
MAT 8:9 Pun pwal ngang eman mi nom fän nemenien ekewe meilap seniei, nge mi pwal wor sounfiu ra nom fän nemeniei. Üa üreni eman, ‘Kopwe feila,’ iwe, a feila. Üa pwal üreni eman, ‘Kopwe feito,’ iwe, a feito. Üa üreni nei amanau, ‘Kopwe föri ien me ien,’ iwe, a föri.”
MAT 8:10 Iwe, lupwen Jesus a rongorong ekei kapas, a mairü ren o üreni ekewe aramas mi tapwela mürin, “Enlet, üa ürenikemi, üsap fokun küna eman lon Israel a eäni ei sokun lükülük.
MAT 8:11 Üpwe ürenikemi, pwe chomong aramas repwe feito seni ötiu me lotou o mot arun chepel ren Apraham, Isaak me Jakop lon ewe kametip lon Mwün Läng.
MAT 8:12 Nge chokewe itä ürürün repwe nom lon ewe Mwün Kot repwe koturuwu lon ewe lenien rochopwak ia repwe pupuchör o akarüngi ie.”
MAT 8:13 Mürin Jesus a üreni ewe meilapen sounfiu, “Kopwe liwinla le imwom, epwe fis ngonuk usun ka lükü.” Iwe, nöün ewe meilapen sounfiu we chon angang a pöchökületä lon ewe chök otun.
MAT 8:14 Iwe, Jesus a feila lon imwen Petrus. Ikenan a küna inen pwülüen Petrus, a eäni eu samaun pwichikar.
MAT 8:15 Jesus a atapa pöün, iwe, ewe pwichikar a towu seni. Mürin neminewe a pwätä o angang ngeni.
MAT 8:16 Iwe, lekuniolun ewe rän, lupwen akkar a tuputiu, aramas ra uwato ren Jesus chomong aramas mi waan anü. Jesus a atowu ekewe ngününgau ren an kapas o apöchöküla chokewe meinisin mi samau.
MAT 8:17 A föri ei an epwe pwönüetä mine ewe soufos Aisea a apasa, “A uwei ach samau o mwärei ach cheuch.”
MAT 8:18 Lupwen Jesus a küna ewe mwichen aramas mi chomong a nom ünükün, a üreni nöün kewe chon kaiö, “Ousipwe feila epek ewe noom.”
MAT 8:19 Iwe, eman Sensen Allük a feito ren o üreni, “Sense, ngang üa molotä ai üpwe etuk ekis meinisin ia kopwe feila ie.”
MAT 8:20 Jesus a üreni, “Ekewe foks a wor pwanger fän pwül, ekewe mansüsü a wor faser, nge Nöün Aramas esap wor lenian ia epwe konola ie.”
MAT 8:21 Nge pwal eman nöün kewe chon kaiö a üreni, “Ai samol, kopwe akomwen mwüt ngeniei ai üpwe liwinla mwo o peiaseni semei.”
MAT 8:22 Jesus a pölüeni, “Kopwe tapweto müri. Kopwe likiti ngeni ekewe mi mäla repwe püsin peiaseni ar somä.”
MAT 8:23 Iwe, lupwen Jesus a tötä won efoch wa, nöün kewe chon kaiö ra eti.
MAT 8:24 A müttir fis eu mölümöl mi pöchökül lon ewe noom o ekewe no ra nulong leföön ewe wa, pwe a arapakan ngeni an epwe kokola. Nge Jesus a chök möür.
MAT 8:25 Iwe, ekewe chon kaiö ra feila ren, ra föngünätä o üreni, “Äm Samol, kopwe amanauakich! Sia arapakan ngeni ach sipwe le mäla!”
MAT 8:26 Jesus a üreniir, “Pwota oua niuokus? Pwota iei me lükükisikisimi.” Mürin a ütä o fos ngeni asepwäl me no pwe repwe ükütiu. Iwe, ewe asepwäl a söötiu o a fokun lüala won matau.
MAT 8:27 Iwe, ir meinisin ra weitifengeniir o apasa, “Met sokun aramas ätei, pwe asepwäl me no ra mwo nge aleasochisi?”
MAT 8:28 Lupwen Jesus a tori ewe fanüen Katara mi nom epek ewe noom, ruoman mwän mi feito seni ewe lenien peias ra churi. Ekei mwän anün rochopwak ra wäniir, ra fokun rochongau pwe esap wor eman a tongeni fetal won ewe al.
MAT 8:29 Lon ewe chök otun ra puchörütä, “En Nöün Kot, met ka mochen föri ngenikem? Ifa usun, ka feito pwe kopwe ariaföüükem mwen ewe fansoun apwüng?”
MAT 8:30 A wor epwi pwiin pik mi chomong, ra mongöfeil ekis toauala seni ewe leni.
MAT 8:31 Iwe, ekewe anün rochopwak ra tüngormau ngeni Jesus, “Are kopwe asükeemila, kopwe tinikeemila, pwe aipwe tolong lon ekewe pik.”
MAT 8:32 Jesus a üreniir, “Oupwe feila!” Iei mine ekewe anün rochopwak ra towu seni ekewe mwän o tolong lon ekewe pik. Iwe, unusen ewe pwiin pik ra sätiu lepokun ewe achau o turulong lon ewe noom, iwe, ra mop meinisin.
MAT 8:33 Mürin ekewe chon foleni ekewe pik ra süla o tolong lon ewe telinimw, iwe, ra apworausa unusen met a fis ngeni ekewe mwän ekewe anün rochopwak ra wäniir.
MAT 8:34 Iei mine chon ewe telinimw meinisin ra feila pwe repwe churi Jesus. Iwe, lupwen ra küna, ra tüngormau ngeni an epwe feila seni fanüer we.
MAT 9:1 Iwe, Jesus a tötä won efoch wa o liwinsefäliti pekilan ewe noom ngeni püsin an telinimw.
MAT 9:2 Ekoch aramas ra ekieto ren eman mwän mi mwök won an peet. Lupwen Jesus a küna ar lükülük, a üreni ewe mwän mi mwök, “Nei, kopwe apilükülük! Om tipis kana ra musala.”
MAT 9:3 Mürin ekoch ekewe Sensen Allük ra ekieki lon leluker, “Ei mwän a eäni kapasen turunufas!”
MAT 9:4 Nge Jesus a silei ar ekiek o üreniir, “Pwota oua ekieki ei sokun ekiek mi ngau lon lelukemi?
MAT 9:5 Meta a mecheres, ai apasa, ‘Om tipis kana ra musala,’ are ai apasa, ‘Kopwe ütä o fetal?’
MAT 9:6 Iwe, ngang üpwe alükülükü ngenikemi, pwe Nöün Aramas a wor an pwüüng won fanüfan an epwe amusala tipis.” Iei mine a üreni ewe mwän mi mwök, “Kopwe ütä, angei kiom o feila lon imwom.”
MAT 9:7 Mürin ewe mwän a ütä o feila lon imwan.
MAT 9:8 Iwe, lupwen ewe mwichen aramas a küna mine a fis, ra niuokus o mwareiti Kot ren an ngeni aramas ei sokun manaman.
MAT 9:9 Iwe, lupwen Jesus a sopwela an sai seni ikenan, a küna eman chon ioni takises itan Mateus, a mot lon an ofes. Iwe, a üreni, “Kopwe tapweto müri.” Mateus a ütä o tapwela mürin Jesus.
MAT 9:10 Iwe, a fis pwe Jesus a mot ngeni mongö lon imwen Mateus, nge chomong chon ioni takises me chon tipis ra feito o eti Jesus me nöün kewe chon kaiö le mongö.
MAT 9:11 Lupwen ekewe Farisi ra küna ei, ra üreni nöün kewe chon kaiö, “Pwota nöümi we sense a mongöfengen me ekewe chon ioni takises me chon tipis?”
MAT 9:12 Jesus a rongorong ar kei kapas o üreniir, “Eman sousafei esap lomot ngeni aramas mi pöchökül, pwe a lomot ngeni chök ekewe chon samau.
MAT 9:13 Oupwe feila o kütta wewen ei kapas lon ewe Toropwe mi Pin, ‘Üa mochen pwe aramas repwe eäni tong enlet, nge sap ar repwe asor man ngeniei.’ Ngang üsap feito pwe üpwe kökköri ekewe chon pwüng, pwe fen ekewe chon tipis.”
MAT 9:14 Mürin nöün Johannes Soupapatais kewe chon kaiö ra feito ren Jesus o aisini, “Pwota äm chök me ekewe Farisi aia echikefel fän chomong, nge noumw kewe chon kaiö resap fokun echikefel?”
MAT 9:15 Jesus a pölüeniir, “Ifa usun, oua ekieki pwe ekewe chon kökkö ngeni fetallapen apwüpwülü ra letipeta lupwen ewe mwän apwüpwülü söfö a nom rer? Apw! Nge epwe war ewe rän lupwen aramas repwe angei seniir ewe mwän apwüpwülü söfö fän pöchökül, lon ena otun repwapw echikefel.
MAT 9:16 Esap wor eman aramas epwe teiätä ekam mangaku mi fö won echö üf mi mes, pun ewe ekam mangaku mi fö epwe nürfengen o afisätä pwe kamwen ewe üf epwe wattela.
MAT 9:17 Esap pwal wor eman a alölöülong wain mi fö lon pör mi mes seni silin man, pun ekewe pör repwe mökküla o ewe wain epwe nitiu, nge ekewe pör repwe fokun tala. Pun a öch pwe wain mi fö epwe nom lon pör mi fö, pwe ir me ruu repwe nükünüköch.”
MAT 9:18 Iwe, lupwen Jesus a chüen kapas ngeniir, eman nöüwis a feito ren, a fotopwäsuk mwan o üreni, “Nei we nengin a chök mäla iei, nge kopwe feito o iseis poumw won, pwe epwe manau.”
MAT 9:19 Iwe, Jesus a ütä o etala, nge nöün kewe chon kaiö ra pwal eti.
MAT 9:20 Iwe, eman fefin mi riaföü ren an samaun fefin lon ükükün engol me ruu ier a feito me lükisökürün Jesus o atapa lepwülün üfan.
MAT 9:21 Pun a ekieki lon lelukan, “Are üpwe chök atapa üfan nan, üpwe pöchökületä.”
MAT 9:22 Iwe, Jesus a kul, a küna neminewe o üreni, “Nei, kopwe apilükülük, om lükülük a apöchökülok.” Lon ewe chök otun ewe fefin a pöchökületä.
MAT 9:23 Mürin Jesus a feila lon imwen ewe nöüwis. Nge lupwen a küna ekewe chon ettiki pisekin ettik won ewe mi mäla, pwal ekewe aramas mi ngüngüres o kechü,
MAT 9:24 a üreniir, “Ämi meinisin oupwe towu me ikei! Ewe nengin esap mäla, pwe a chök möür!” Mürin ir meinisin ra takiri.
MAT 9:25 Nge lupwen ekewe aramas ra towu lükün, Jesus a tolong lon rumwen ewe nengin, a amwöchü pöün, iwe, ewe nengin a pwätä.
MAT 9:26 Iwe, ei pworaus a chöfetal won unusen ewe fanü.
MAT 9:27 Lupwen Jesus a feila seni ewe leni, ruoman mwän mi mesechun ra tapwela mürin. Ra kökkö ngeni fän leüömong, “Nöün Tafit, kopwe tongekem!”
MAT 9:28 Iwe, lupwen Jesus a tolong lon ewe imw, ekewe ruoman chon chun ra tolong ren. Jesus a aisiniir, “Oua lükü pwe ngang üa tongeni aneneloi mesemi?” Ir ra pölüeni, “Ewer, äm samol.”
MAT 9:29 Mürin Jesus a atapa meser o apasa, “Epwe fis ngenikemi mine oua lükü.”
MAT 9:30 Iwe, a nenela meser. Nge Jesus a fokun pese ngeniir, pwe resap üreni eman mine a fis.
MAT 9:31 Nge ir ra feila o asilefeili ewe pworaus usun Jesus lon unusen ewe fanü.
MAT 9:32 Iwe, lupwen ekewe ruoman mwän ra feila, ekoch aramas ra uwato ren Jesus eman mwän mi awemwöch, pokiten eman anün rochopwak a wäni.
MAT 9:33 Lon ewe chök otun Jesus a atowu ewe anün rochopwak seni ewe mwän, ei mwän a popuetä le kapas. Iwe, ekewe aramas meinisin ra mairü o apasa, “Ousisamwo küna och usun ei lon Israel.”
MAT 9:34 Nge ekewe Farisi ra apasa, “Ewe samolun anün rochopwak a ngeni ätei an manaman pwe epwe asüela ekewe anün rochopwak.”
MAT 9:35 Iwe, Jesus a fetalfeil lon ekewe telinimw me sopw meinisin. A aiti ngeni aramas kapasen Kot lon ekewe imwen felikis, a afalafala ewe Pworaus Allim usun ewe Mwün Kot o apöchöküla aramas mi eäni sokopaten samau me apwangapwang.
MAT 9:36 Nge lupwen a küna ewe mwichen aramas, a fokun tongeer, pun ra nom lon watten osukosuk me weires usun sip kana esap wor nöür chon mas.
MAT 9:37 Mürin Jesus a üreni nöün kewe chon kaiö, “Ewe räs a fokun watte, nge ekewe chon angangen räs ra chokükün.
MAT 9:38 Iei mine oupwe tüngorei ewe Samolun räs pwe epwe tinala chon angang pwe repwe angang ngeni ewe räs.”
MAT 10:1 Iwe, Jesus a körifengeni nöün kewe engol me ruoman chon kaiö o ngeniir manaman pwe repwe asüela ekewe ngününgau o apöchöküla aramas mi eäni sokopaten samau me apwangapwang.
MAT 10:2 Ikkei iten ekewe engol me ruoman soukünö: Aemanün Simon, a pwal iteni Petrus me pwiin we Andru, James me pwiin we Johannes, ir nöün Sepeti,
MAT 10:3 Filip, Partolomeus, Tomas me Mateus ewe chon ioni takises, James nöün Alfäus me Tatäus,
MAT 10:4 Simon, i eman Selot me Jutas Iskariot, ätewe mi afangamä Jesus.
MAT 10:5 Iwe, Jesus a tinala ekei engol me ruoman mwän o ngeniir ekei öüröür, “Ousap feila lon fanüen chon lükün Israel ika lon telinimwen ekewe chon Samaria,
MAT 10:6 nge oupwe chök feila ren ekewe aramasen Israel ra usun chök sip mi mwalechela.
MAT 10:7 Oupwe feila o afalafala ei kapas, ‘Ewe Mwün Läng a arapoto.’
MAT 10:8 Oupwe apöchöküla ekewe chon samau, oupwe amanauasefäli ekewe mi mäla, oupwe amoola rupun chokewe mi üriir rupun pwötür o asüela ekewe anün rochopwak. Oua angafatei ewe manaman, oupwe pwal fangafat.
MAT 10:9 Ousap uwou lon ämi pwotou föün moni kolt, silifer ika kapa,
MAT 10:10 ousap pwal uwou pwotou lon ämi sai ika aruachön üfemi söch ika sus ika efoch wok. Pun eman chon angang a aüchea ngeni an epwe angei mine a osupwang ren.
MAT 10:11 Lupwen oupwe tolong lon eu telinimw ika sopw, oupwe pii iön aramas mi pwapwaiti an epwe etiwakemi. Iwe, oupwe nonom lon imwan tori ämi oupwe feil seni ewe leni.
MAT 10:12 Lupwen oupwe tolong lon eu imw, oupwe apasa ei kapong ngeni ekewe aramas, ‘Kinamwe epwe torikemi.’
MAT 10:13 Are aramasen ewe imw ra etiwakemi, ämi kapongen kinamwe epwe nonom rer. Nge are resap etiwakemi, ämi kapongen kinamwe epwe liwinitikemi.
MAT 10:14 Iwe, are chon eu imw ika telinimw resap etiwakemi ika aüselingakemi, mürin oupwe towu seni ewe leni o wichikala pwülün fän pechemi.
MAT 10:15 Enlet üpwe ürenikemi, pwe än Kot apwüngü ekewe aramasen Sotom me Komora lon ewe ränin apwüng epwe kisikis seni an apwüngü aramasen ei telinimw.
MAT 10:16 “Nengeni, üpwe tinikemiila usun chök sip lein wolif kana. Iei mine oupwe eäni tipachem usun serepenit o oupwe tipepwetete usun tipepweteten ekewe lisom.
MAT 10:17 Oupwe mamasa, pun epwe wor aramas repwe fötekinikemi o emwenikemi lon kapwüng, repwe pwal wichikemi me lon ar kewe imwen felikis.
MAT 10:18 Repwe emwenikemiila mwen ekewe kepina me king pokiten itei, pwe oupwe apworausa ewe Pworaus Allim ngeniir, pwal ngeni ekewe chon lükün Israel.
MAT 10:19 Iwe, lupwen repwe emwenikemiila ngeni kapwüng, ousap öüreki ämi kapas are mine oupwe apasa, pun ekewe kapas oupwe apasa repwe torikemi lupwen a tori ena otun.
MAT 10:20 Pun sap ämi oupwe kapas, nge ewe Ngünün Sememi epwe ngenikemi mine oupwe apasa.
MAT 10:21 Iwe, pwipwi repwe afangamä pwiir ngeni mäla, eman sam epwe afangamä nöün. Nge ekewe nau repwe ü ngeni semer me iner o aturuur pwe repwe ninnila.
MAT 10:22 Aramas meinisin repwe oputakemi pokitei. Nge iö epwe likitü tori lesopolan epwe küna manau.
MAT 10:23 Iwe, lupwen repwe ariaföüükemi lon eu telinimw, oupwe süla lon pwal eu. Üpwe fokun ürenikemi, pwe ousamwo wes le föri ämi angang lon ekewe telinimwen Israel meinisin mwen ewe Nöün Aramas epwe liwinsefäl.
MAT 10:24 Eman chon sukul esap lap seni nöün sense, nge eman chon angang esap lap seni an masta.
MAT 10:25 Iei mine eman chon kaiö epwe menemenöch an epwe wewe ngeni nöün sense, nge eman chon angang epwe menemenöch an epwe wewe ngeni an masta. Are ra aita ngeni möküren ewe famili Peelsepul, epwe ifan me ngauen ewe it repwe aita ngeni chon an famili meinisin.
MAT 10:26 “Iwe, ousap niuokusiti aramas! Pun mettoch meinisin mi pwölüla epwe pwäla, nge mettoch meinisin mi monomonola aramas repwe silei.
MAT 10:27 Met ngang üa ürenikemi lon kiroch, oupwe apasatä lon saram. Nge met üa möngününgünülong lon selingemi oupwe asilefeili me won ungen ekewe imw.
MAT 10:28 Ousap niuokusiti ätekewe mi niela inis, nge resap tongeni niela ngün. Nge oupwe fokun niuokusiti Kot, ewe a tongeni niela inis me ngün lon hell.
MAT 10:29 Ifa usun, aramas resap amömöla ruoman nichok ren eföü chök kapa? Sap mwo nge eman nichok epwe turutiu lepwül lükün tipen Sememi.
MAT 10:30 Nge meten möküremi kewe mwo nge ra lea meinisin.
MAT 10:31 Iei mine ousap niuokus, ämi oua aüchea seni chomong nichok!
MAT 10:32 “Iwe, iö a pwäriei mwen mesen aramas, pwal ngang üpwe pwäri mwen mesen Semei lon läng.
MAT 10:33 Nge iö a amam ngang mwen mesen aramas, pwal ngang üpwe amam i mwen mesen Semei lon läng.
MAT 10:34 “Ousap ekieki pwe üa feito pwe üpwe uwato kinamwe won fanüfan. Apwi, üsap feito pwe üpwe uwato kinamwe, pwe ketilas.
MAT 10:35 Pun ngang üa feito ai üpwe atipefeseni aramas: Ekewe alüal repwe ü ngeni semer kewe, ekewe föpwül repwe ü ngeni iner kewe, pwülüen nöür alüal repwe ü ngeni inen pwülüer kewe,
MAT 10:36 nge ekewe chon oputok repwe seni püsin chon om famili.
MAT 10:37 Iö a tongei saman are inan lap seniei, esap fich ngeni an epwe nei chon kaiö. Nge iö a tongei nöün ät are nengin lap seniei, esap fich ngeni an epwe nei chon kaiö.
MAT 10:38 Iwe, iö esap mwärei an iräpenges o tapweto müri, esap fich ngeni an epwe nei chon kaiö.
MAT 10:39 Iö a ekiekin püsin tümwünü manauan, epwe pöüt seni, nge iö a pölükü manauan fän itei, epwe amanaua manauan.
MAT 10:40 “Iö a etiwakemi, a etiwaei, nge iö a etiwaei, a etiwa ewe mi tiniei.
MAT 10:41 Iö a etiwa eman nöün Kot chon künö pokiten i nöün Kot chon künö, epwe angei liwinin eman chon künö. Nge iö a etiwa eman chon pwüng pokiten i eman chon pwüng, epwe pwal angei liwinin eman chon pwüng.
MAT 10:42 Are eman a aünü ngeni eman ekei kükün eu mwo chök kapen koluk mi patapat pokiten an tapweto müri, enlet, üpwe ürenikemi, epwe fokun angei liwinin.”
MAT 11:1 Iwe, lupwen Jesus a wes le öüröüra nöün kewe chon kaiö, a feila seni ikenan pwe epwe aiti ngeni aramas kapasen Kot o afalafaleer lon ekewe telinimw mi arap.
MAT 11:2 Nge lupwen Johannes Soupapatais a rong me lon imwen fötek usun ekewe föför Kraist a föriir, a tinala ekoch nöün kewe chon kaiö ren.
MAT 11:3 Iwe, ra aisini Jesus, “En ewe eman epwe wareto, are sipwe witiwiti pwal eman.”
MAT 11:4 Jesus a pölüeni, “Oupwe liwinla o asile ngeni Johannes mine oua rongorong o küna:
MAT 11:5 Ekewe mi mesechun ra küna mwer, ekewe mi pechemä ra fetal, ekewe mi üriir rupun pwötür ra chikarsefäl, ekewe mi selingepin ra rongorong, ekewe mi mäla ra manauatä, ekewe mi wöüngau ra rongorong afalafalen ewe Pworaus Allim.
MAT 11:6 Ra feiöch chokewe resap tipemwaramwar rei.”
MAT 11:7 Lupwen än nöün Johannes kewe chon kaiö feila, Jesus a popuetä le kapas ngeni ewe mwichen aramas usun Johannes, “Lupwen oua feila ren Johannes lon ewe fanüapö, met oua ekieki oupwe nengeni? Efoch äsät mi mwaroro ren asepwäl?
MAT 11:8 Met chök oua feila ren pwe oupwe nengeni? Eman mwän mi üföüf üf mi pwetete o mürina? Ekewe aramas mi üföüf ei sokun üf ra nom lon imwen king.
MAT 11:9 Oupwe üreniei, met chök oua feila ren pwe oupwe nengeni? Eman soufos? Ewer, üa ürenikemi, oua fen küna eman mi lap seni eman soufos.
MAT 11:10 Pun Johannes i ätewe ekewe Toropwe mi Pin ra kapas usun: ‘Nengeni, üpwe tinala nei chon künö, epwe akomwola mwomw, epwe amolätä efoch al fän itom.’
MAT 11:11 Enlet, üa ürenikemi, pwe Johannes Soupapatais a lap seni aramas meinisin mi uputiu won fanüfan. Nge iön mi kisikis lon Mwün Läng a fen lap seni Johannes.
MAT 11:12 Seni ewe fansoun Johannes Soupapatais a popuetä an afalafal tori iei Mwün Läng a fokun riaföü, nge aramas mi ngau ra sotuni pwe repwe angei o nemeni.
MAT 11:13 Pun ekewe soufos meinisin me ekewe Allükün Moses ra kapas usun ewe Mwün Kot tori fansoun Johannes.
MAT 11:14 Nge are oua mochen lükü ar kapas, Johannes i ätewe ewe soufos a kapas usun, lupwen a apasa pwe Elias epwe war.
MAT 11:15 Iö a wor selingan epwe rongorong.
MAT 11:16 “Iwe, met üpwe tongeni awewe ngeni ei pilon aramasen ikenai? Ra wewe ngeni ekewe semirit mi mot lon ekewe lenien amömö. Eu mwich a kökkö ngeni pwal eu mwich:
MAT 11:17 ‘Äm aia ettiki aangün ngenikemi, nge ämi ousap pworuk! Äm aia köl kölün lolilen, nge ämi ousap kechü!’
MAT 11:18 Lupwen Johannes a feito, a echikefel, esap pwal ün wain, nge aramas ra apasa, ‘A wor eman anün rochopwak won!’
MAT 11:19 Nge lupwen Nöün Aramas a feito, a mongö o ün, nge aramas ra apasa, ‘Ou nengeni ei mwän! I eman mi mongömong me ünümong, eman mi chiechi ngeni ekewe chon ioni takises me chon tipis.’ Än Kot tipachem a pwäla pwe a let ren an kewe föför.”
MAT 11:20 Iwe, aramasen ekewe telinimw ia Jesus a föri ie chomong an kewe manaman resap kul seni ar tipis. Iei mine Jesus a apwüngüür:
MAT 11:21 “Feiengauom Korasim! Feiengauom Petsaita! Are ekewe manaman mi fen fis me lomi repwe fen fis lon Tirus me Siton, ekewe aramas lon ekei telinimw repwe üföüf üf seni tuk me lomlom o amoratiu falang won mökürer, pwe asisilen ar kul seni tipis!
MAT 11:22 Iwe, ngang üpwe fokun ürenikemi, pwe lon ewe ränin apwüng epwe kisikis feiengauen Tirus me Siton seni ämi feiengau.
MAT 11:23 Nge en Kapernaum! Ka ekieki om kopwe püsin atekiokotä tori läng? Apwi, kopwe turutiu lon hell! Are ekewe manaman ra fen fis lomw, repwe fen fis lon Sotom, ei telinimw epwe chüen nonom tori ikenai.
MAT 11:24 Iwe, ngang üpwe fokun ürenikemi, pwe lon ränin apwüng epwe kisikis feiengauen Sotom seni ämi feiengau.”
MAT 11:25 Iwe, lon ena fansoun Jesus a apasa, “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate.
MAT 11:26 Ewer, Semei, pun iei usun ka pwapwaiti an epwe fis.”
MAT 11:27 “Semei a ngeniei mettoch meinisin. Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a afiliir an epwe pwäri i ngeniir.
MAT 11:28 Oupwe feito rei ämi meinisin mi weiresikis o uwochou, ngang üpwe asösökemi.
MAT 11:29 Oupwe ämwäralong womi ai we waas o kaiö seniei, pun ngang üa lukpwetete o tipetekison, iwe, oupwe küna söön ngünümi.
MAT 11:30 Pun ai we waas üpwe anomu womi a mecheres, nge wosemi we üpwe ngenikemi a pän.”
MAT 12:1 Lon eu fansoun Jesus a fetalelong lon eu tanipin wiich lon ränin sapat. Iwe, nöün kewe chon kaiö ra echik, iei mine ra popuetä le fichi ekoch umwun wiich o mongö föün.
MAT 12:2 Nge lupwen ekewe Farisi ra küna ei, ra üreni Jesus, “Nengeni, noumw kewe chon kaiö ra föri mine esap pwüng lon allükün ach lamalam lon ränin sapat!”
MAT 12:3 Jesus a pölüeniir, “Ousap aleani mwo mine Tafit a föri lon ewe fansoun, lupwen i me chienan kewe ra echik?
MAT 12:4 A tolong lon imwen Kot, nge i me chienan kewe ra mongö ekewe pilawa ra eäni asor ngeni Kot, inamwo ika a ü ngeni allükün lamalam ar repwe mongö, pwe ekewe chök souasor a mwümwü ngeniir ar repwe mongö ekei pilawa.
MAT 12:5 Ika ousap aleani mwo mine a mak lon än Moses kewe allük, pwe iteiten ränin sapat ekewe souasor lon ewe imwenfel ra atai ewe allükün sapat, nge resap tipis?
MAT 12:6 Ngang üpwe ürenikemi, pwe och mi lap seni ewe imwenfel a nom ikei.
MAT 12:7 Lon ekewe Toropwe mi Pin a mak, ‘Üa mochen pwe aramas repwe eäni tong enlet, nge sap ar repwe eäni asor man ngeniei.’ Are ämi oua wesewesen silei wewen ei kapas, ousap atipisi ekewe aramas esap wor ar tipis.
MAT 12:8 Pun ewe Nöün Aramas i Sounemenemen ewe ränin sapat.”
MAT 12:9 Iwe, Jesus a feila seni ewe leni o tolong lon eu imwen felikis.
MAT 12:10 Ikenan a wor eman mwän mi mä pöün. Ekoch aramas ra pwal nom ikenan, ra kütta och popun mine repwe aturu Jesus won. Iei mine ra aisini, “Ifa usun, a ngau ngeni allükün ach lamalam an eman epwe apöchöküla eman aramas lon ränin sapat?”
MAT 12:11 Jesus a pölüeniir, “Epwe ifa ika eman leimi a wor eman nöün sip a turulong lon eu pwang mi alolol lon ränin sapat? Ifa usun, esap ekiekin angeawu o efietä me lon ewe pwang?
MAT 12:12 Iwe, eman aramas a kon aüchea seni eman sip! Iei mine allükün ach lamalam a mwütätä ngenikich ach sipwe alisi eman aramas lon ränin sapat.”
MAT 12:13 Mürin Jesus a üreni ewe mwän mi mä pöün, “Kopwe aitiewu poumw.” Iwe, a aitiewu pöün we o a pöchökülsefäl usun chök pwal ewe efoch.
MAT 12:14 Iwe, ekewe Farisi ra towu seni ewe imwen felikis o pwüngüpwüngfengen usun ar repwe niela Jesus.
MAT 12:15 Lupwen Jesus a rong usun ar ekiekin rawangauei, a feila seni ewe leni, nge eu mwichen aramas mi chomong a tapwela mürin. Iwe, a apöchöküla ekewe chon samau meinisin
MAT 12:16 o üreniir, pwe resap apworausa ngeni aramas usun i.
MAT 12:17 A föri ei, pwe epwe pwönüetä mine Kot a apasa ren ewe soufos Aisea:
MAT 12:18 “Iei i nei we chon angang üa filätä, ätewe üa echeni, üa unusen pwapwa ren. Ngang üpwe anomu Ngüni won, nge i epwe asilefeili pwüngün ai apwüng ngeni chon ekewe mwü meinisin.
MAT 12:19 Esap anini ika osomong le fos, esap pwal leüömong le kapas won ekewe al.
MAT 12:20 Esap kupiela efoch äsät mi puopu, esap pwal kunuela efoch wiik mi kümochoch. Epwe achocho tori an epwe pwärala pwe pwüng a win.
MAT 12:21 Iwe, chon ekewe mwü meinisin repwe apilükülükü i.”
MAT 12:22 Mürin ekoch aramas ra uwato ren Jesus eman mwän mi chun o awemwöch, pun eman anün rochopwak a wäni. Iwe, Jesus a apöchöküla ewe mwän, pwe a tongeni kapas o küna mwan.
MAT 12:23 Iwe, ekewe aramas meinisin ra mairü ren mine Jesus a föri o ais, “Ifa usun, epwe ätei ewe nöün Tafit?”
MAT 12:24 Nge lupwen ekewe Farisi ra rong ekei kapas, ra apasa, “Ätei a chök asüela ekewe anün rochopwak pokiten ewe samolun anün rochopwak a ngeni an manaman.”
MAT 12:25 Jesus a silei ar ekiek o üreniir, “Are eu mwü a kinikinfesen o fiufengen, ei mwü esap tongeni nonomola. Are chon eu telinimw ika eu famili repwe kinikinfesen o fiufengen lefiler, repwe parasfesen.
MAT 12:26 Iei mine are mwün Satan a kinikinfesen o fiufengen, mwün epwe müttir tala!
MAT 12:27 Ämi oua apasa, pwe üa asüela ekewe anün rochopwak ren manamanen Pelsepul. Iwe, ika epwe iei usun, iö chök a ngeni chiechiemi kewe ar manaman ar repwe asürela? Met chiechiemi kewe ra föri a alletätä pwe oua mwäl.
MAT 12:28 Apwi, esap Pelsepul, nge Ngünün Kot a ngeniei ewe manaman ai üpwe asüela ekewe anün rochopwak. Ei a pwärätä pwe Mwün Kot a fen torikemi.
MAT 12:29 Esap wor eman a tongeni atalong imwen eman mwän mi pöchökül o angeala pisekin, are esap akomwen föti ewe mwän mi pöchökül. Mürin a tongeni angeala pisekin lon imwan.
MAT 12:30 Iwe, are eman esap etiei, i eman chon ü ngeniei, nge are eman esap alisiei le ikioi, i eman chon kütifeseni.
MAT 12:31 Iei mine üpwe ürenikemi: Än aramas tipis meinisin repwe musala, pwal ar kewe kapasen turunufas ra apasa, nge are eman a eäni kapasen turunufas ngeni Ngünmifel esap fokun musala.
MAT 12:32 Iö a apasa och kapasen ü ngeni Nöün Aramas a tongeni musala. Nge iö a apasa och kapasen ü ngeni Ngünmifel esap fokun musala lon ei fansoun ikenai tori feilfeilachök.
MAT 12:33 “Are a wor om irä mi mürina, uan ra pwal mürina, nge are a wor om irä mi ngau, uan ra pwal ngau. Efoch irä a sil ren uan.
MAT 12:34 Ämi serepenit! Ifa usun, oua tongeni apasa mine a mürina ika ämi aramas mi ngau? Pun ekewe kapas ra towu seni awemi iei somwen lelukemi.
MAT 12:35 Eman aramas mi mürina a atowu mettoch mi mürina seni lon an lenien iseis mi mürina, nge eman aramas mi ngau a atowu mettoch mi ngau seni an lenien iseis mi ngau.
MAT 12:36 Nge üpwe ürenikemi, pwe lon ewe ränin apwüng aramas meinisin repwe küna apwüng ren iteiten kapas lomotongau ra apasatä.
MAT 12:37 Pun ren om kewe kapas kopwe küna apwüng ren, repwe pwärätä ika en mi pwüng ika en mi tipis.”
MAT 12:38 Mürin ekoch ekewe Sensen Allük me ekewe Farisi ra üreni Jesus, “Sense, äm aia mochen küna usun om kopwe föri eu manaman.”
MAT 12:39 Nge Jesus a üreniir, “A ifan me ingauen me kirikiringauen ei täppin aramasen ikenai! Oua tüngor ngeniei pwe üpwe föri eu manaman, nge esap wor eu manaman epwe pwä ngenikemi, pwe ewe chök manaman mi fis ngeni ewe soufos Sona.
MAT 12:40 Pun usun Sona a nom lon luken ewe ik mi watte lon ükükün ülüngat rän me ülüngat pwin, iei usun Nöün Aramas epwe nom leutun fanüfan lon ükükün ülüngat rän me ülüngat pwin.
MAT 12:41 Lon ewe ränin kapwüng ekewe chon Ninifa repwe ütä o atipisi ei täppin aramas, pun ra aier ren än Sona afalafal. Nge üpwe ürenikemi, pwe eman mi lap seni Sona a nom ikei!
MAT 12:42 Lon ewe ränin kapwüng ewe kiwinen Sepa epwe ütä o atipisi ei täppin aramas. Pun neminei a saito seni fanüan mi toau, pwe epwe rongorong än ewe king Salomon kapasen tipachem. Iwe, üpwe ürenikemi, pwe eman mi lap seni Salomon a nom ikei!
MAT 12:43 “Are eman ngününgau a towu seni eman aramas, a saifeil won fanü mi pwasapwas o kütta eu leni pwe epwe asösö lon. Are esap küna eu leni,
MAT 12:44 epwe apasa, ‘Üpwe liwinsefäliti imwei we üa towu seni.’ Iwe, lupwen a tori ewe imw, a küna pwe a pön, a limöch o kotöch.
MAT 12:45 Mürin epwe feila o panato pwal füman ngün mi ngau seni i. Iwe, repwe feito o nonom lon. Iwe, manauen ewe aramas epwe fokun ngau seni me mwan. Iei usun mine epwe fis ngeni ei täppin aramas mi ngau.”
MAT 12:46 Iwe, lupwen Jesus a chüen kapas ngeni ekewe aramas, inan me pwiin kana ra war. Ra ütä lükün ewe imw o tüngor pwe repwe kapas ngeni.
MAT 12:47 Iei mine eman ekewe aramas a üreni Jesus, “Nengeni, inom me pwiüm kana ra ütä lükün o mochen kapas ngonuk.”
MAT 12:48 Jesus a pölüeni, “Iö inei me iö kana pwii?”
MAT 12:49 Mürin a itini nöün kewe chon kaiö o apasa, “Nengeni! Ikkei ir inei me pwii kana!
MAT 12:50 Pun iö kana ra föri letipen Semei lon läng, ir pwii me fefinei me inei.”
MAT 13:1 Iwe, lon ewe chök ränin Jesus a towu seni ewe imw o feila ngeni arun ewe noom. Ikenan a mottiu pwe epwe aiti ngeni aramas kapasen Kot.
MAT 13:2 Nge eu mwichen aramas mi chomong a mwicheto ren, iei mine a tötä won efoch wa o mot won. Nge ekewe aramas meinisin ra ütä lepi.
MAT 13:3 Iwe, Jesus a kapas ngeniir usun chomong mettoch lon pworausen awewe o apasa, “Eman aramas a feila pwe epwe amworafeili pwükil.
MAT 13:4 Nge lupwen a amworafeili ekewe pwükil, ekoch föün ra mworotiu lepekin al. Iwe, ekewe mansüsü ra feito o eniir.
MAT 13:5 Ekoch föün ra mworotiu won lenien föüföü ia esap watte pwül ie. Ekewe föün ra pwükükai, pun resap pwük lon pwül mi malül.
MAT 13:6 Iwe, lupwen akkar a tötä, pwichikaran a pwichiti ekewe kükün irä. Nge pokiten esap wor warer, ra müttir pwasala.
MAT 13:7 Pwal ekoch föün ra mworotiu lein iräfölüföl. Iwe, ekewe iräfölüföl ra mämäritä o amopu ekewe irä.
MAT 13:8 Nge pwal ekoch föün ra mworotiu lon pwül mi mürina. Iwe, ekewe irä ra märitä o ua, ekoch leir ra uani ipükü, ekoch wone, nge ekoch ilik.”
MAT 13:9 Mürin Jesus a sopwela le üreniir, “Iö a wor selingan epwe rongorong!”
MAT 13:10 Mürin ekewe chon kaiö ra feito ren Jesus o aisini, “Pwota ka eäni pworausen awewe lupwen ka kapas ngeni ekei aramas?”
MAT 13:11 Jesus a pölüeniir, “Kot a fen ngenikemi ewe tufich pwe oupwe silei usun monomonen Mwün Läng, nge ei tufich esap pwal ngeni ekoch aramas.
MAT 13:12 Pun iön a wor an, Kot epwe apacha och ngeni an we pwe epwe somwola. Nge iön esap wor an, Kot epwe angei seni mwo nge ewe ekis a wor ren.
MAT 13:13 Iei popun üa kapas ngeniir lon pworausen awewe, pwe repwe nenengeni, nge resap küna och, repwe aüseling, nge resap rongorong, resap pwal wewe ren.
MAT 13:14 Iei usun osunien ewe soufos Aisea a fis lon manauer: ‘Ekei aramas repwe rongorong me rongorong, nge resap wewe ren, repwe nenengeni me nenengeni, nge resap küna och.
MAT 13:15 Pun leluken ekei aramas a pöchökül, ra ükütiu le rongorong, ra amöürü meser. Pun are resap föri iei usun, repwe tongeni küna ren meser o rongorong ren selinger, letiper epwe wewe, repwe pwal kul ngeniei, pwe üpwe apöchöküleer. Iei alon Kot.’
MAT 13:16 Nge ämi oua fokun feiöch! Pun mesemi ra küna o selingemi ra rong.
MAT 13:17 Enlet, üpwe ürenikemi, pwe chomong soufos me aramas mi pwüng ra fokun mochen küna met ämi oua küna, nge resap tongeni küna. Ra pwal mochen rongorong met ämi oua rongorong, nge resap tongeni rongorong.
MAT 13:18 “Iwe, oupwe aüseling o kaiö usun wewen ewe pworausen awewe usun ewe chon amworafeili pwükil.
MAT 13:19 Chokewe mi rongorong ewe kapas usun Mwün Kot, nge resap weweiti, ra usun chök ekewe pwükil mi mworotiu lepekin al. Ewe Eman mi Ngau a feito o angei seniir mine a mworotiu lon leluker.
MAT 13:20 Ekewe pwükil mi mworotiu lon lenien föüföü ra wewe ngeni chokewe mi etiwa ewe kapasen Kot fän pwapwa lon ewe chök otun ra rongorong.
MAT 13:21 Pokiten ewe kapas esap warar lon manauer, esap tongeni nomotam. Pun lupwen a fis osukosuk me riaföü pokiten ewe kapasen Kot, ra müttir fangatä.
MAT 13:22 Ekewe pwükil mi mworotiu lein ekewe iräfölüföl ra wewe ngeni chokewe mi rongorong kapasen Kot, nge öürek usun manauen ikenai me pwapwan wöün fanüfan ra amopu ewe kapasen Kot, pwe esap tongeni ua.
MAT 13:23 Nge ekewe pwükil ra mworotiu won pwül mi mürina ra wewe ngeni chokewe mi rongorong ewe kapasen Kot o weweiti. Iwe, ra ua, ekoch ra uani ipükü, ekoch wone, nge pwal ekoch ilik.”
MAT 13:24 Iwe, Jesus a apworausa ngeniir pwal eu pworausen awewe: “Mwün Läng a wewe ngeni eman mwän a amworafeili pwükil mi mürina lon an tanipi.
MAT 13:25 Lon eu pwin, lupwen aramas meinisin ra möür, ewe chon oputan a war o amworafeili ekewe pwükil mi ngau lein ekewe pwükilin wiich, iwe, a feila.
MAT 13:26 Lupwen ekewe irä ra märitä o ekewe umwun wiich ra popuetä le sikiwu, ekewe pötöwölingau ra pwal pwä.
MAT 13:27 Mürin nöün ewe mwän kewe chon angang ra feito ren o üreni, ‘Äm samol, ka amworafeili pwükil mi mürina lon om tanipi. Nge ia chök ekewe pötöwölingau ra feito me ie?’
MAT 13:28 A pölüeniir, ‘Eman chon oputaei a föri ei.’ Iwe, ekewe chon angang ra aisini, ‘Ifa usun, ka mochen aipwe feila o üttätä ekewe pötöwölingau?’
MAT 13:29 Iwe, a üreniir, ‘Apwi, pun lupwen oupwe üttätä ekewe pötöwölingau a tongeni fis pwe ekewe wiich repwe pwal etiir le üttütä.
MAT 13:30 Oupwe likitiir pwe repwe mämäritäfengen tori fansoun kinikin. Mürin ngang üpwe üreni ekewe chon angangen räs pwe repwe akomwen üttätä ekewe pötöwölingau, repwe pilüküfengeniir o keniirela. Mürin repwe achufengeni ekewe wiich o iseniir lon ai lenien iseis.’”
MAT 13:31 Iwe, Jesus a apworausa ngeniir pwal eu pworausen awewe: “Mwün Läng a wewe ngeni eföü pwükilin irä mi fokun kükün, eman aramas a angei o fotukätiu lon an tanipi.
MAT 13:32 Ei pwükilin irä a kükün seni pwükil meinisin, nge lupwen a märitä a watte seni ekewe irä kükün meinisin. A wiliti efoch irä watte, pwe ekewe mansüsü ra ässito o föri faser won palan kana.”
MAT 13:33 Iwe, Jesus a apworausa ngeniir pwal eu pworausen awewe: “Mwün Läng a wewe ngeni iis eman fefin a angei o nofitifengeni me lime paun pilawa mi amas tori unusen ewe pilawa a pwotä.”
MAT 13:34 Iwe, Jesus a aea pworausen awewe an epwe aiti ngeni ewe mwichen aramas ekei mettoch meinisin. Esap apasa och mettoch ngeniir lükün an epwe aea eu pworausen awewe.
MAT 13:35 A föri ei an epwe pwönüetä mine ewe soufos a apasa, “Ngang üpwe aea pworausen awewe lupwen üpwe kapas ngeniir. Ngang üpwe aiti ngeniir ekewe mettoch mi monomon seni lepoputän fanüfan.”
MAT 13:36 Iwe, lupwen Jesus a feila seni ewe mwichen aramas o tolong lon eu imw, nöün kewe chon kaiö ra feito ren o üreni, “Kopwe awewe ngenikem met wewen ewe pworausen awewe usun ekewe pötöwölingau lon ewe tanipi.”
MAT 13:37 Jesus a pölüeniir, “Ewe mwän mi amworafeili ekewe pwükil mi mürina, iei i ewe Nöün Aramas.
MAT 13:38 Ewe tanipi, iei fanüfan, ekewe pwükil mi mürina, ekewe aramas ir chon ewe Mwün Kot, ekewe pötöwölingau, ir ekewe aramas nöün ewe mi Ngau,
MAT 13:39 nge ewe chon oput mi amworafeili ewe pötöwölingau, iei i Tefil. Ewe fansoun kinikinin räs, iei ewe fansoun lesopolan, nge ekewe chon angangen räs, ir ekewe chon läng.
MAT 13:40 Usun ekewe pötöwölingau ra ioifengen o kekkila lon ekkei, iei usun mine epwe fis lesopolan fansoun fanüfan.
MAT 13:41 Ewe Nöün Aramas epwe tinala nöün kewe chon läng pwe repwe amwichafengeni seni lon Mwün chokewe meinisin mi emweni aramas ngeni tipis, pwal chokewe meinisin mi föri ekewe föför mi ngau.
MAT 13:42 Repwe atururelong lon ewe lenien ekkei ia repwe pupuchör o akarüngi ie.
MAT 13:43 Mürin ekewe chon pwüng repwe tittin usun akkar lon Mwün Semer. Iö a wor selingan epwe rongorong!
MAT 13:44 “Ewe Mwün Läng a pwal wewe ngeni eu pisek aüchea mi ireirela. A fis pwe eman aramas a küna o iresefäliela. Iwe, seni watten an pwapwa a feila o amömöla meinisin mine a eäni, mürin a liwinsefälila o möni ewe leni.
MAT 13:45 “Mwün Läng a pwal wewe ngeni eman aramas mi kükütta föün pwei mi fokun aüchea pwe epwe möni.
MAT 13:46 Lupwen a küna eföü mi fokun unusen mürina, a feila o amömöla meinisin mine a eäni o möni ewe föün pwei.
MAT 13:47 “Mwün Läng a pwal wewe ngeni eu chew ekewe chon attau ra aturätiu leset pwe repwe liapeni sokopaten ik.
MAT 13:48 Lupwen ewe chew a ur ren ik, ra etekinatä lepi, mürin ra mottiu pwe repwe aimwüfeseni ekewe ik: Ekewe ik mi mürina ra uwalong lon säwä, nge ekewe ik mi ngau ra pöütala.
MAT 13:49 Iei usun mine epwe fis lesopolan fansoun fanüfan. Ekewe chon läng repwe feila o aimwüfeseni ekewe aramasangau seni ekewe aramas mi pwüng.
MAT 13:50 Repwe aturalong ekewe aramasangau lon ewe lenien ekkei ia repwe pupuchör o akarüngi ie.”
MAT 13:51 Iwe, Jesus a aisiniir, “Oua weweiti ekei mettoch?” Ra pölüeni, “Ewer.”
MAT 13:52 Mürin a üreniir, “Iei mine iteiten ekewe Sensen Allük meinisin mi fen kaiö usun Mwün Läng ra usun chök eman souimw a atowu seni an lenien iseis mettoch mi fö me mettoch mi mes.”
MAT 13:53 Iwe, lupwen Jesus a wes le apworausa ekei pworausen awewe, a feila seni ewe leni
MAT 13:54 o liwinsefäliti poputän telinimwan. A afalafal lon ewe imwen felikis, nge chokewe mi rongorong ngeni ra mairü ren. Ra ais, “Ia ätei a angei me ie an tipachem? Ia a angei me ie an kei tufich pwe epwe tongeni föri ekei manaman?
MAT 13:55 Ifa usun, sap ätei nöün ewe chon kaü imw? Ifa usun, inan esap iteni Maria? Nge sap pwiin kewe James, Josef, Simon me Jutas?
MAT 13:56 Ifa usun, fefinan kewe meinisin resap nom rech? Ia ätei a angei me ie ekei sokun tufich meinisin?”
MAT 13:57 Iei mine resap etiwa. Iwe, Jesus a üreniir, “Eman soufos a wor meninin ekis meinisin, nge esap wor meninin lon poputän telinimwan pwal lon püsin an famili.”
MAT 13:58 Pokiten esap wor ar lükülük, Jesus esap föri chomong manaman ikenan.
MAT 14:1 Lon ena fansoun Herotes ewe samolun Kalilea a rong usun Jesus.
MAT 14:2 Iwe, a üreni nöün kewe nöüwis, “Iei i wesewesen Johannes Soupapatais, a manauatä seni mäla. Iei popun a tongeni föri ekewe manaman.”
MAT 14:3 Pun me mwan Herotes a allük pwe repwe turufi Johannes o atolonga lon imwen fötek. Herotes a föri ei pokiten Herotias pwülüen pwiin we Filip.
MAT 14:4 Pun Johannes Soupapatais a fen üreni Herotes, “Ese pwüng ngonuk om kopwe pwülüeni Herotias.”
MAT 14:5 Herotes a ekiekin niela Johannes, nge a niuokusiti ekewe chon Juta, pun ra ekieki pwe Johannes eman soufos.
MAT 14:6 Nge lupwen a tori ränin uputiuen Herotes, nöün Herotias föpwül a pworuk me mwen ewe mwich mi eti an we kametip. Iwe, Herotes a fokun pwapwaiti,
MAT 14:7 pwe a pwon ngeni ewe föpwül, “Üa pwon fän akapel, pwe ngang üpwe ngonuk meinisin mine ka tüngor.”
MAT 14:8 Fän än ewe in kapasen öüröür ngeni nöün we föpwül, a tüngor ngeni Herotes, “Kopwe ngeniei iei chök möküren Johannes Soupapatais lon eu sepi!”
MAT 14:9 Iwe, ewe king a lolilen, nge pokiten ewe pwon fän akapel a föri mwen mesen nöün kewe chon kökköto meinisin mi eti le mongö, a allük pwe än ewe föpwül tüngor epwe pwönüetä.
MAT 14:10 Iei mine a tinala eman pwe epwe pöküela üen Johannes me lon imwen fötek.
MAT 14:11 Iwe, ra uwato möküren Johannes we lon eu sepi o ngeni ewe föpwül, nge neminewe a uwala ren inan.
MAT 14:12 Mürin nöün Johannes kewe chon kaiö ra feito o angei somän Johannes o peiaseni. Iwe, mürin ra feila o asile ngeni Jesus ewe pworaus.
MAT 14:13 Iwe, lupwen Jesus a rong ewe pworaus usun Johannes, a fiti efoch wa seni ikenan o feila ngeni eu leni ia esap wor aramas ie. Nge lupwen ekewe aramas ra rong usun, ra feila seni telinimwer kewe o tapwela mürin, nge ra chök fetal wilifanü.
MAT 14:14 Lupwen Jesus a tötiu me won ewe wa, a küna eu mwichen aramas mi chomong. A fokun tongeer o a apöchökülätä ekewe chon samau me leir.
MAT 14:15 Iwe, lupwen a tori lekuniol, nöün kewe chon kaiö ra feito ren o apasa, “Ei leni a toau seni lenien aramas, nge a fen tori lekuniol. Kopwe tinala ei mwichen aramas pwe repwe feila lon ekewe sopw o kamö püsin aner mongö.”
MAT 14:16 Nge Jesus a üreniir, “Ir resap feila, ämi oupwe ngeniir met repwe mongö!”
MAT 14:17 Nge ir ra pölüeni, “Mi wor rem limeföü pilawa chök me ruoman ik.”
MAT 14:18 Iwe, Jesus a üreniir, “Oupwe uwato rei ekewe mongö.”
MAT 14:19 Mürin a allük ngeni ekewe aramas pwe repwe mottiu won ewe fetil. Iwe, a angei ekewe limeföü pilawa me ruoman ik, a sachetä läng o iotekin kilisou ngeni Kot wor. A kinikisietiu ekewe pilawa o ngeni nöün kewe chon kaiö, nge ir ra inetiir ngeni ekewe aramas.
MAT 14:20 Iwe, ir meinisin ra mongö o mötüla. Mürin ekewe chon kaiö ra amasoua engol me ruu chüük ren lusun ekewe mongö.
MAT 14:21 Iwe, iteiten ekewe mwän mi mongö ei mongö ina epwe ükükün limungeröü, nge esap alealong fefin me semirit.
MAT 14:22 Lon ewe chök otun Jesus a pesei nöün kewe chon kaiö pwe repwe tötä won ewe wa o akomwola mwan epek ewe noom, nge i epwe tinala ekewe aramas.
MAT 14:23 Mürin an tinala ekewe aramas, Jesus a feitä won eu chuk, pwe epwe iotek. Lupwen a arapakan pwinila, Jesus a emanüla ikenan.
MAT 14:24 Nge lon ena otun ewe wa a fokun toau seni fanü, a nuponup ren watten nono, pun ewe asepwäl a pöchökül le eniti.
MAT 14:25 Ina epwe lefilen kulok ülüngat me kulok wonu lesosor Jesus a feito ren ekewe chon kaiö, nge a fetal won matau.
MAT 14:26 Lupwen ra küna an fetal won ewe matau, ra fokun rükö o puchörütä ren ar niuokus. Ra apasa, “Eman anü!”
MAT 14:27 Lon ewe chök otun Jesus a kapas ngeniir o üreniir, “Oupwe apilükülük! Ngang ei, ousap niuokus!”
MAT 14:28 Mürin Petrus a apasa, “Ai Samol, ika pwe en wesewesen na, kopwe üreniei pwe üpwe asaila reöm won ei matau.”
MAT 14:29 Jesus a pölüeni, “Kopwe feito!” Iei mine Petrus a tötiu seni won ewe wa o popuetä asaila ren Jesus won ewe matau.
MAT 14:30 Nge lupwen a nengeni pöchökülen ewe asepwäl, a niuokus o popuetä le kokotiu. Iwe, a puchörütä, “Ai Samol, kopwe amanauaei!”
MAT 14:31 Lon ewe chök otun Jesus a aitiela pöün, a amwöchü pöün Petrus o üreni, “Ka lükükisikis! Pwota ka tipemwaramwar?”
MAT 14:32 Iwe, lupwen ar tötä won ewe wa, ewe asepwäl a manasösötiu.
MAT 14:33 Mürin ekewe chon kaiö mi nom won ewe wa ra fel ngeni Jesus o apasa, “Enlet, en Nöün Kot!”
MAT 14:34 Iwe, ra saila pekilan ewe noom o tori ewe fanü Kenesaret.
MAT 14:35 Lupwen ekewe aramas lon ewe leni ra asilla Jesus, ra tinala pworaus ngeni unusen ekewe fanü mi nom ünükün, pwe Jesus a nom. Mürin aramas ra uwato ren Jesus ekewe chon samau meinisin.
MAT 14:36 Ra tüngormau ngeni pwe epwe mwüt ngeni ekewe chon samau ar repwe chök atapa lepwülün üfan. Iwe, ir meinisin mi atapa ra pöchökületä seni ar samau.
MAT 15:1 Mürin ekoch Farisi me Sensen Allük ra feito ren Jesus seni Jerusalem. Iwe, ra aisini,
MAT 15:2 “Pwota noumw kewe chon kaiö ra aleasolap ngeni ekewe kapasen kait seni ach kewe lewo? Pun resap talü pöür lon pwüngün allük mwen ar mongö.”
MAT 15:3 Jesus a pölüeniir, “Nge pwota ämi oua aleasolap ngeni än Kot kewe allük o aleasochis ngeni mine ämi kewe lewo ra aiti ngenikemi?
MAT 15:4 Pun Kot a apasa, ‘Kopwe asamolu semom me inom’, a pwal apasa, ‘Iö a otteki saman me inan epwe fokun ninnila.’
MAT 15:5 Nge ämi oua aiti ngeni aramas, pwe are eman nau a wor ren och mettoch epwe tongeni alisi ngeni saman are inan, nge a üra, ‘Ei mettoch än Kot,’
MAT 15:6 esap chüen wor lomoten än ewe nau epwe asamolu saman are inan ren ewe mettoch. Iei usun oua aücheangauei än Kot allük, pwe oupwe föri mine ämi kewe lewo ra aiti ngenikemi.
MAT 15:7 Ämi chon likatuputup! A fokun pwüng mine Aisea a fen osuni usumi!
MAT 15:8 ‘Kot a apasa: Ekei aramas ra asamoluei ren ar kapas, nge leluker a wesewesen toau seniei.
MAT 15:9 A lomotmwäl ar fel ngeniei, pun ra aiti ngeni aramas förien aramas allük usun itä nge ai kewe allük!’”
MAT 15:10 Mürin Jesus a körato ewe mwichen aramas o üreniir, “Oupwe aüselingaei, pwe oupwe wewela!
MAT 15:11 Esap wor och mine a tolong lon awen eman aramas a tongeni alimengaua, nge met mi towu seni lon awen eman aramas, ina mine a alimengaua.”
MAT 15:12 Mürin ekewe chon kaiö ra feito ren Jesus o üreni, “Ka silei pwe ekewe Farisi ra chou ren mine ka apasa?”
MAT 15:13 Jesus a pölüeniir, “Iteiten irä Semei lon läng esap fotuki epwe üttütä.
MAT 15:14 Ousap ekieki usur! Ir chon chun mi emweni ekewe chon chun. Nge lupwen eman chon chun a emweni eman chon chun, ir me ruoman repwe turulong lon pwang.”
MAT 15:15 Petrus a üreni, “Kopwe awewe ngenikem wewen ei pworausen awewe.”
MAT 15:16 Jesus a üreniir, “Ifa usun, oua chüen pwal wewemang usun ekewe lusun?
MAT 15:17 Ousap weweiti pwe meinisin mine a tolong lon awen eman aramas a tolong lon chükükanan, mürin a towu seni lon inisin.
MAT 15:18 Nge ekewe mettoch mi towu seni lon awan ra pop seni lelukan, ina mine a alimengaua eman aramas.
MAT 15:19 Pun seni lon lelukan a towu ekiek mi ngau, ekiekin ninni, lisowu, mocheisou, solä, chofona me aitengaua aramas.
MAT 15:20 Ikkei ekewe mettoch ra alimengaua eman aramas. Nge än eman epwe mongö, nge esap mwo talü pöün, esap limengau ren.”
MAT 15:21 Mürin Jesus a feila seni ewe leni o feila lon eu fanü arap ngeni ekewe telinimw Tirus me Siton.
MAT 15:22 Iwe, eman fin Kanaan mi nom lon ena leni a feito ren o kökkö ngeni, “Ai samol, Nöün Tafit, kopwe tongeei. Nei nengin a fokun riaföü, pun eman anün rochopwak a wäni.”
MAT 15:23 Nge Jesus esap pölüeni an kapas. Iei mine nöün kewe chon kaiö ra feito ren o tüngormau ngeni, “Kopwe tinala neminei, pun a chök kökköto me mürich.”
MAT 15:24 Mürin Jesus a pölüeniir, “Kot a chök tinieila ren ekewe sip mi mwalechela, ir ekewe aramasen Israel.”
MAT 15:25 Nge ewe fefin a feito, a fotopwäsuketiu o tüngorei, “Ai samol, kopwe alisiei!”
MAT 15:26 Jesus a pölüeni, “Esap pwüng pwe sipwe angei anen ekewe semirit mongö o monei ngeni ekewe kolak.”
MAT 15:27 Iwe, ewe fefin a pölüeni, “Ewer, ai samol, nge ekewe mwo kolak ra mongö ekewe mworomworen mongö mi mworotiu seni än ar masta chepel.”
MAT 15:28 Mürin Jesus a üreni neminewe, “En eman fefin mi watte om lükülük! Epwe fis ngonuk mine ka mochen.” Iwe, lon ewe chök otun nöün we nengin a pöchökületä.
MAT 15:29 Iwe, Jesus a feila seni ewe leni o a fetalela ünükün ewe nomun Kalilea. Mürin a feitä won eu chukuchukutä o mottiu ikenan.
MAT 15:30 Eu mwichen aramas mi chomong a feito ren, ra uweato ekewe mi pechemä, ekewe mi chun, ekewe mi ter, ekewe mi awemwöch, pwal chomong sokun aramas mi samau o anomuur arun pechen Jesus. Iwe, a apöchöküleeretä meinisin.
MAT 15:31 Iwe, ekewe aramas ra fokun mairü lupwen ra küna pwe ekewe mi awemwöch ra fos, ekewe mi ter ra pöchökülela, ekewe mi pechemä ra fetal, pwal ekewe mi chun ra küna mwer. Iwe, ra mwareiti ewe Koten Israel.
MAT 15:32 Mürin Jesus a körato nöün kewe chon kaiö o üreniir, “Ngang üa fokun tongei ekewe aramas, pun ra fen nonom rei lon ükükün ülüngat rän, nge iei esap wor och mine repwe äni. Ngang üsap mochen tiniirela lon ar echik, pun repwe tongeni mamasaroch lupwen repwe fetal ngeni lenier.”
MAT 15:33 Ekewe chon kaiö ra aisini Jesus, “Ia sipwe tongeni künakün me ie mongö pwe epwe naf ngeni ach sipwe amongööni ei mwichen aramas mi chomong?”
MAT 15:34 Jesus a aisiniir, “Fiteföü pilawa a wor remi?” Ra pölüeni, “Füföü me ekoch kükün ik.”
MAT 15:35 Iei mine Jesus a allük ngeni ewe mwichen aramas pwe repwe mottiu lepwül.
MAT 15:36 Mürin a angei ekewe füföü pilawa me ekewe ik o iotekin kilisou ngeni Kot wor. A kiniretiu o ngeni ekewe chon kaiö, nge ekewe chon kaiö ra aineti ngeni ekewe aramas.
MAT 15:37 Iwe, ir meinisin ra mongö o mötüla. Mürin ekewe chon kaiö ra amasoua fisu chüük ren lusun ekewe mongö.
MAT 15:38 Iwe, iteiten ekewe mwän mi mongö ei mongö ükükün rüanüngeröü, nge esap alealong fefin me semirit.
MAT 15:39 Mürin Jesus a tinala ekewe aramas, nge i a tötä won efoch wa o sai ngeni ewe fanü Makatan.
MAT 16:1 Iwe, ekoch ekewe Farisi me Satusi ra feito ren Jesus, pun ra mochen särei i, iei mine ra tüngor ngeni pwe epwe föri eu manaman, pwe asisilan pwe Kot a tipeeu ngeni.
MAT 16:2 Nge Jesus a pölüeniir, “Lupwen ewe akkar a tuputiu oua apasa, ‘Epwe ränöch lesor, pun a parapar fän läng.’
MAT 16:3 Nge lesosorusich oua apasa, ‘Epwe räningau, pun a par o roch fän läng.’ Oua tongeni osuni usun ränöch me räningau ren ämi nenengeni fän läng, nge ousap tongeni awewei ekewe asisilen fansoun ikenai!
MAT 16:4 A ifan me ngauen me kirikiringauen ei täppin aramasen ikenai! Oua tüngor ngeniei, pwe üpwe föri eu manaman. Nge esap wor eu manaman epwe pwä ngenikemi me lükün ewe chök manaman mi fis ngeni Sona.” Mürin Jesus a likitiir o feila seniir.
MAT 16:5 Iwe, lupwen ekewe chon kaiö ra feila pekilan epek ewe noom, ra manlükala ar repwe uwou amötür pilawa.
MAT 16:6 Jesus a üreniir, “Oupwe tümwünüfichi o afälikemi ren ewe iis än ekewe Farisi me Satusi.”
MAT 16:7 Iwe, ekewe chon kaiö ra popuetä le kapasfengen lefiler, “A apasatä ei ititin fos, pun sisap uwou pilawa.”
MAT 16:8 Nge Jesus a silei met ra kapasfengen won lefiler, iei mine a aisiniir, “Pwota oua kapasfengen usun an esap wor remi pilawa? Mwa met me kisikisin ämi lükülük!
MAT 16:9 Ifa usun, ousamwo wewela? Ousap chechemeni lupwen üa kinikisietiu ekewe limeföü pilawa fän iten ekewe limengeröü mwän? Fitu chüük oua amasoua ren ekewe lusun mongö?
MAT 16:10 Nge ifa usun, ekewe füföü pilawa fän iten ekewe rüanüngeröü mwän? Fitu chüük oua amasoua ren ekewe lusun mongö?
MAT 16:11 Pwota ousap wewela, pwe üsap kapas ngenikemi usun pilawa? Oupwe afälikemi ren ewe iis än ekewe Farisi me Satusi!”
MAT 16:12 Mürin ekewe chon kaiö ra weweiti, pwe Jesus esap üreniir pwe repwe afäliir ren ewe iis mi nom lon pilawa, nge repwe afäliir ren än ekewe Farisi me Satusi afalafal.
MAT 16:13 Iwe, Jesus a feila ngeni ewe fanü arap ngeni ewe telinimw Seserea Filipi. Ikenan a aisini nöün kewe chon kaiö, “Met aramas ra apasa usun Nöün Aramas iö i?”
MAT 16:14 Ra pölüeni, “Ekoch aramas ra apasa pwe Johannes Soupapatais, pwal ekoch ra apasa pwe Elias, nge pwal ekoch ra apasa pwe Jeremaia ika eman ekewe soufos.”
MAT 16:15 Mürin Jesus a aisiniir, “Nge ämi, met oua apasa usi?”
MAT 16:16 Simon Petrus a pölüeni, “En Kraist ewe Nöün Kot mi manau.”
MAT 16:17 Jesus a pölüeni, “Ka feiöch, Simon nöün Sona. Pun ei kapas mi let esap aitien eman aramas ngonuk, nge Semei lon läng a amefi ngonuk.
MAT 16:18 Iei mine üpwe ürenuk Petrus: En eu achau. Iwe, ei achau iei ewe longolong üpwe aüetä ai mwichefel won, nge mäla esap mwo nge tongeni akufu.
MAT 16:19 Ngang üpwe ngonuk ekewe kien Mwün Läng. Mine en kopwe pinei won fanüfan epwe pinepin lon läng, nge mine en kopwe mwütätä won fanüfan epwe pwal mwümwütä lon läng.”
MAT 16:20 Mürin Jesus a allük ngeni ekewe chon kaiö pwe resap üreni eman pwe i ewe Kraist.
MAT 16:21 Seni lon ena fansoun Jesus a popuetä le pwäri ngeni nöün kewe chon kaiö, pwe i epwe fokun feila Jerusalem, iwe, epwe küna riaföü me ren ekewe souakom, ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä.
MAT 16:22 Iwe, Petrus a emwenala Jesus ekis o popuetä le apwüngü, “Ai Samol, Kot epwe ümöümöch ngonuk! Ei esap fokun fis ngonuk!”
MAT 16:23 Nge Jesus a kul ngeni Petrus o üreni, “Kopwe sü seniei Satan, en eu lenien chepetek ngeniei. Pun om ekiek esap pop seni Kot, nge a pop seni aramas.”
MAT 16:24 Mürin Jesus a üreni nöün kewe chon kaiö, “Are eman a mochen etiei, epwe pölükü manauan, epwe mwärei an iräpenges o tapweto müri.
MAT 16:25 Pun iö a mochen amanaua manauan, epwe pöüt seni. Nge iö a pölükü manauan fän itei, epwe küna manau.
MAT 16:26 Epwe met lomoten än eman aramas epwe feiöchüni feiöchün unusen fanüfan, nge manauan epwe pöüt seni? Esap wor och eman aramas a tongeni fangala pwe epwe angesefäli manauan.
MAT 16:27 Pun Nöün Aramas epwe war lon lingen Saman fiti nöün kewe chon läng. Mürin epwe liwini ngeni iteiten eman me eman aramas usun ar föför.
MAT 16:28 Enlet, üpwe ürenikemi pwe mi wor ekoch aramas ikei resap mäla, pwe repwe mwo küna Nöün Aramas epwe war lon wisan wisen king o nemenem.”
MAT 17:1 Iwe, mürin wonu rän, Jesus a emwenala Petrus me ekewe ruoman pwipwi James me Johannes, pwe repwe feitä won eu chuk mi tekia o imwüla ikenan.
MAT 17:2 Lupwen ar nenengeni Jesus, a wilila inisin: won mesan a saramaram usun akkar, nge üfan kana ra fokun pwechela o molupolup.
MAT 17:3 Mürin ekewe ülüman chon kaiö ra küna Moses me Elias pwe ra kakapasfengen me Jesus.
MAT 17:4 Iwe, Petrus a üreni Jesus, “Ai Samol, a fokun öch ach sipwe nonom ikei. Are ka mochen üpwe aüetä ülüngat imw mangaku ikei, eu fän itom, eu fän iten Moses, pwal eu fän iten Elias.”
MAT 17:5 Lupwen Petrus a chüen kakapas, eu kuchu mi saramaram a anürürela o eu mangüngü seni lon ewe kuchu a apasa, “Iei i nei mi achengicheng üa fokun pwapwa ren, oupwe aüselinga!”
MAT 17:6 Lupwen ekewe chon kaiö ra rong ekei kapas, ra chapetiu won pwül fän ar rükö.
MAT 17:7 Nge Jesus a feito rer, a atapeer o üreniir, “Oupwe pwätä, ousap niuokus!”
MAT 17:8 Iwe, lupwen ar netä, resap chüen küna eman, pwe Jesus chök.
MAT 17:9 Lupwen ra feitiu me won ewe chuk, Jesus a allük ngeniir, “Ousap asile ngeni eman usun met oua küna, tori Nöün Aramas epwe manausefälitä seni mäla.”
MAT 17:10 Mürin ekewe chon kaiö ra aisini Jesus, “Pwota ekewe Sensen Allük ra apasa, pwe Elias epwe akomwen feito?”
MAT 17:11 Jesus a pölüeniir, “Mi pwüng pwe Elias epwe akomwen feito, pwe epwe amolätä ekewe mettoch meinisin.
MAT 17:12 Nge ngang üpwe ürenikemi, pwe Elias a fen feito, nge aramas resap asilla, pwe ra fen föri ngeni mine ra mochen. Iei usun repwe pwal ariaföüü Nöün Aramas.”
MAT 17:13 Mürin ekewe chon kaiö ra weweiti pwe Jesus a fos ngeniir usun Johannes Soupapatais.
MAT 17:14 Iwe, lupwen ra liwiniti ewe mwichen aramas, eman mwän a feito ren Jesus, a fotopwäsuk me mwan
MAT 17:15 o üreni, “Ai samol, kose mochen kopwe ümöümöch ngeni nei ät! I a eäni mään kawakau o a fokun riaföü ren, pun fan chomong a turulong lon ekkei ika lon koluk.
MAT 17:16 Üa uwato nei ät ren noumw kewe chon kaiö, nge ir resap tongeni apöchökülätä.”
MAT 17:17 Iwe, Jesus a pölüeni, “Ämi eu täppin aramas mi lükülükümang o tipesosor. Ifa langatamen fansoun ai üpwe nom remi. Ifa ükükün fansoun ai üpwe engila ngenikemi? Oupwe uwato ewe ät rei!”
MAT 17:18 Jesus a apwüngü ewe anün rochopwak, iwe, a towu seni ewe ät. Lon ewe chök otun ewe ät a pöchökületä.
MAT 17:19 Mürin ekewe chon kaiö ra feito ren Jesus lupwen a alemanüla o aisini, “Pwota äm aisap tongeni atowu ewe anün rochopwak seni ewe ät?”
MAT 17:20 Jesus a pölüeni, “Pokiten a kisikis ämi lükülük. Enlet üpwe ürenikemi, are epwe wor ämi lükülük mi nönnö ngeni eföü pwükilin irä mi fokun kükün, oupwe tongeni üreni ei chuk, ‘Kopwe mwöküt seni ikei o mwökütüla ikenan,’ iwe, epwe mwöküt. Esap wor och mine ousap tufich ngeni.”
MAT 17:21 [Nge esap wor och mettoch ei sokun ngününgau epwe tongeni süla ren, pwe ren iotek me echikefel chök.]
MAT 17:22 Lupwen ekewe chon kaiö meinisin ra chufengen lon Kalilea, Jesus a üreniir, “Nöün Aramas epwe tolong lepöün aramas.
MAT 17:23 Ir repwe niela, nge mürin ülüngat rän epwe manausefälitä.” Iwe, ekewe chon kaiö ra fokun letipeta lupwen ar rong ekei kapas.
MAT 17:24 Mürin än Jesus me nöün kewe chon kaiö tori Kapernaum, ekewe chon angei takisesin imwenfel ra feito ren Petrus o aisini, “Ifa usun, nöümi sense esap mönätiu takisesin ewe imwenfel?”
MAT 17:25 Petrus a pölüeni, “Ewer.” Lupwen Petrus a tolong lon ewe imw, Jesus a akomwen kapas ngeni o aisini, “Simon, met mefiom? Iö a mönätiu ekewe takisesin laisen are ekewe takises ngeni ekewe kingen fanüfan? Nöür aramas are ekewe chon ekis?”
MAT 17:26 Petrus a pölüeni, “Ekewe chon ekis.” Mürin Jesus a üreni, “Are ina, wewen pwe nöür kewe aramas resap mönätiu ar takises.
MAT 17:27 Nge sisap mochen ochou ekei aramas, iei mine kopwe feila efief lon ewe noom. Iwe, ewe aemanün ik kopwe liapeni, kopwe suki awan o angei ena föün moni mi naf fän iten ach takises ngeni ewe imwenfel. Kopwe ngeniir pwe takisesi me takisesum.”
MAT 18:1 Lon ena fansoun ekewe chon kaiö ra feito ren Jesus o aisini, “Iö epwe lap seni meinisin lon Mwün Läng?”
MAT 18:2 Iwe, Jesus a körato eman semirit o aütai lefiler.
MAT 18:3 A apasa, “Enlet üpwe ürenikemi, are ousap kulsefäl o wewe ngeni eman semirit, ousap fokun tongeni tolong lon Mwün Läng.
MAT 18:4 Iei mine iö a püsin atekisona pwe epwe wewe ngeni ei semirit, i ewe mi lap seni meinisin lon Mwün Läng.
MAT 18:5 Nge iö a etiwa ei sokun semirit fän itei, i a etiwaei.
MAT 18:6 “Are eman aramas epwe föri pwe eman lein ekei kükün mi lüküei epwe föri tipis, epwe fen öch ngeni ewe aramas pwe epwe riritä fän üan eföü fau mi föümong o kokotiu le alololun matau.
MAT 18:7 Feiengauen fanüfan pokiten ekewe mettoch ra aselipato ngeni aramas ar repwe tipis! Ekei sokun mettoch repwe fokun fis fansoun meinisin, nge feiengauen ewe aramas a afisätä ekei mettoch.
MAT 18:8 Are poumw ika pecheöm ra atupukelong lon tipis, kopwe pöküür o moneerela! Epwe fen öch ngonuk om kopwe tolong lon manau esemuch fän om pöüefoch me pecheefoch, lap seni om kopwe pöüruofoch ika pecheruofoch le koturelong lon ewe ekkei esekun.
MAT 18:9 Nge are mesom a atupukolong lon tipis, kopwe alusawu o monela! Epwe fen öch ngonuk om kopwe tolong lon manau esemuch fän om meseeföü, lap seni om kopwe meseruoföü le koturelong lon ewe ekkeiin hell.
MAT 18:10 “Oupwe tümwünüfichi pwe ousap aücheangauei eman ekei kükün. Pun üpwe ürenikemi, pwe nöür chon läng ra nom mwen Semei lon läng fansoun meinisin.
MAT 18:11 [Pun Nöün Aramas a feito, pwe epwe amanaua mine a mwalechela.]
MAT 18:12 Met oua ekieki? Are eman aramas a nöüni ipükü sip, nge eman leir a mwalechela, ifa usun, esap likiti ekewe tiwe me tiweman won ekewe chuk pwe epwe feila o kütta ewe eman mi mwalechela?
MAT 18:13 Nge are epwe küna ewe eman, enlet, üpwe ürenikemi, ätewe epwe fokun pwapwaäsini ewe eman sip mi mwalechela lap seni an pwapwaäsini ekewe tiwe me tiweman resap mwalechela.
MAT 18:14 Iei usun Semei lon läng esap mochen pwe eman lein ekei kükün epwe mwalechela.
MAT 18:15 “Are pwiüm a tipis ngonuk, kopwe feila ren o kapas ngeni usun an mwäl, nge lemonomon chök. Iwe, are epwe aüseling ngonuk, kopwe pwinisefäli.
MAT 18:16 Nge are esap aüseling ngonuk, kopwe nuki eman ika ruoman chienom pwe repwe etuk, pun ‘ren pwärien ruoman ika ülüman chon pwärätä a tongeni fat pwüngün och föför’, usun a mak lon ekewe Toropwe mi Pin.
MAT 18:17 Iwe, are esap mochen aüseling ngeniir, kopwe asile ngeni chon mwichefel. Nge are esap mochen aüseling ngeni chon mwichefel, kopwe föri ngeni usun om kopwe föri ngeni eman esap lükü Kot ika eman chon ioni takises.
MAT 18:18 “Enlet, üpwe ürenikemi: Mine oua pinei won fanüfan epwe pinepin lon läng, nge mine oua mwütätä won fanüfan epwe mwümwütä me lon läng.
MAT 18:19 Iwe, üpwe pwal ürenikemi och: Are ruoman leimi won fanüfan ra tipeeufengen won och mine repwe iotek won, epwe torikemi me ren Semei lon läng.
MAT 18:20 Pun ia ruoman ika ülüman ra chufengen ie fän itei, ngang üpwe nonom lefiler.”
MAT 18:21 Mürin Petrus a feito ren Jesus o aisini, “Ai Samol, are pwii a chök titipis ngeniei, fän fitu ngang üpwe amusala an tipis? A naf fän fisu?”
MAT 18:22 Nge Jesus a pölüeni, “Apwi, sap fän fisu chök, nge fän fik alea ngeni fisu.
MAT 18:23 Iei mine Mwün Läng a wewe ngeni eman king a ekiekin cheki än nöün kewe chon angang liwinimang ngeni.
MAT 18:24 Lupwen ekärän chök popueta le föri iei usun, ra emwenato ren eman chon angang mi liwinimang ngeni engol ngeröü talent.
MAT 18:25 Iwe, ewe chon angang esap tongeni mönätiu an liwinimang. Iei mine ewe king a allük pwe repwe amömöla i me pwülüan me nöün kana pwal meinisin mine a eäni, pwe epwe tongeni awesi an we liwinimang.
MAT 18:26 Ewe chon angang a fotopwäsuketiu me mwen ewe king o tüngormau ngeni, ‘Kose mochen kopwe mosonotam ngeniei, ngang üpwapw awesi ngonuk unusen ai we liwinimang.’
MAT 18:27 Iwe, ewe king a fokun tongei ewe chon angang, iei mine a amusala an we liwinimang o a mwüt ngeni pwe epwe feila.
MAT 18:28 Mürin ewe chon angang a feila o a küna eman chiechian chon angang mi liwinimang ngeni fitu chök chala. Iwe, a turufi ätewe, a fiei chioran o üreni, ‘Kopwe mönisefäli om we liwinimang ngeniei.’
MAT 18:29 Iwe, chiechian we chon angang a chapetiu o tüngormau ngeni, ‘Kose mochen kopwe mosonotam ngeniei, ngang üpwapw awesi ngonuk ai we liwinimang!’
MAT 18:30 Nge ätewe esap fokun mochen. A allük pwe repwe aturalong lon imwen fötek tori an epwe awesi an we liwinimang.
MAT 18:31 Lupwen chiechian kewe chon angang ra küna met a fis, ra fokun weires ren. Ra feila ren ewe king o apworausa ngeni meinisin.
MAT 18:32 Mürin ewe king a körato ewe chon angang o üreni, ‘En eman chon angang mi ngau! Ngang üa amusala unusen om liwinimang ngeniei pokiten ka tüngormau ngeniei.
MAT 18:33 Pwota kosap eäni ümöümöch ngeni chiechiom we chon angang, usun chök ngang üa eäni ümöümöch ngonuk?’
MAT 18:34 Iwe, ewe king a fokun song, a tinala ewe chon angang lon imwen fötek pwe epwe riaföü, tori an epwe mönätiu unusen an we liwinimang.
MAT 18:35 Iei usun mine Semei lon läng epwe föri ngeni eman me eman leimi, are ousap amusala tipisin pwimi seni lon letipemi.”
MAT 19:1 Iwe, lupwen Jesus a wes me pworaus usun ekei mettoch, a feila seni Kalilea o feila ngeni ewe fanü Jutea epekin ewe chanpupu Jortan me epek.
MAT 19:2 Eu mwichen aramas mi chomong a tapwela mürin, iwe, a apöchöküleer me lon ewe leni.
MAT 19:3 Iwe, ekoch Farisi ra feito ren o sotuni ar repwe särei ren ar ais ngeni, “Ifa usun, a pwüng ngeni allükün ach lamalam pwe eman mwän epwe mwü seni pwülüan fän iten ekoch popun esap lifilifil?”
MAT 19:4 Jesus a pölüeniir, “Ousap aleani mine a mak lon ekewe Toropwe mi Pin, pwe seni lepoputän ewe mi föri aramas a föri mwän me fefin?
MAT 19:5 Iwe, Kot a apasa, ‘Iei mine eman aramas epwe likitala saman me inan o pach ngeni pwülüan, iwe, ekewe ruoman repwe wiliti eu chök inis.’
MAT 19:6 Iei mine resap chüen ruoman, pwe eman chök. Mine Kot a rifengeni esap wor eman aramas epwe mwütifeseni.”
MAT 19:7 Iwe, ekewe Farisi ra aisini, “Pwota chök Moses a föri ewe allük, pwe eman mwän a tongeni ngeni pwülüan echö toropwen mwüfesen o tinala?”
MAT 19:8 Jesus a pölüeni, “Moses a mwütätä pwe ämi mwän oupwe mwü seni pwülüemi pokiten ämi tipeförea. Nge esap ina usun seni lepoputän, lupwen Kot a föri fanüfan.
MAT 19:9 Nge ngang üpwe ürenikemi, ‘Are eman mwän a mwü seni pwülüan fän iten och popun, nge esap fän iten an kirikiringau ngeni, ätewe a lisowu are a pwülüenisefäli pwal eman fefin.’”
MAT 19:10 Iwe, nöün kewe chon kaiö ra üreni, “Are epwe iei usun lefilen eman mwän me pwülüan, epwe fen öch ach sisap pwüpwülü.”
MAT 19:11 Jesus a üreniir, “Sap aramas meinisin ra tongeni etiwa ei sokun afalafal, pwe chokewe chök Kot a ngeniir tufichir.
MAT 19:12 Pun mi wor ekoch popun pwe mwän resap tongeni pwüpwülü: Ekoch pokiten ra ter seni leuputiuer, ekoch pokiten aramas ra föri ngeniir pwe resap tongeni pwüpwülü, nge pwal ekoch pokiten ra püsin pölükü pwüpwülü fän iten Mwün Läng. Iö a tongeni etiwa ei afalafal epwe etiwa.”
MAT 19:13 Iwe, mürin ekoch aramas ra uwato semirit ren Jesus, pwe epwe iseis pöün wor o iotek fän iter, nge ekewe chon kaiö ra apwüngü ekewe aramas mi uweiireto.
MAT 19:14 Nge Jesus a üra, “Oupwe mwüt ngeni ekewe semirit pwe repwe feito rei, nge ousap epetiir, pun iö a wewe ngeni ekei semirit epwe mwüni Mwün Läng.”
MAT 19:15 Iwe, a iseis pöün won ekewe semirit o afeiöchüür, mürin a feila seniir.
MAT 19:16 Iwe, lon eu rän eman mwän a feito ren Jesus o aisini, “Sense, met sokun föför mürina üpwe föri pwe üpwe eäni ewe manau esemüch?”
MAT 19:17 Jesus a pölüeni, “Pwota ka aisiniei usun mine a mürina? A chök wor Eman mi mürina. Are ka mochen angei manau esemüch, kopwe apwönüetä ekewe allük.”
MAT 19:18 Ewe alüal a aisini, “Meni allük?” Jesus a pölüeni, “Kosap niela aramas, kosap lisowu, kosap solä, kosap atipisimwäli eman.
MAT 19:19 Kopwe asamolu semom me inom, kopwe echeni chon arum usun püsin om echenuk.”
MAT 19:20 Ewe alüal a üreni, “Ngang üa aleasochisi ekei allük meinisin. Mi chüen pwal wor met üsamwo föri?”
MAT 19:21 Jesus a pölüeni, “Are ka mochen unusen föföröch, kopwe feila o amömöla meinisin mine ka eäni, nge ewe moni kopwe fang ngeni ekewe chon wöüngau pwe epwe wor woumw lon läng. Mürin kopwe feito o tapweto müri.”
MAT 19:22 Lupwen ewe alüal a rong ekei kapas, a feila fän letipeta, pun wöün a fokun chomong.
MAT 19:23 Mürin Jesus a üreni nöün kewe chon kaiö, “Enlet, üpwe ürenikemi: Epwe fokun weires ngeni aramas mi pisekisek ar repwe tolong lon Mwün Läng.
MAT 19:24 Üpwe apasasefäli, a men fokun weires ngeni eman aramas mi pisekisek an epwe tolong lon Mwün Kot lap seni än eman kamel epwe tolong lon pwangen efoch tikek.”
MAT 19:25 Iwe, lupwen ekewe chon kaiö ra rongorong ei pworaus, ra fokun mairü ren o ra aisini, “Iö chök epwe tongeni küna manau?”
MAT 19:26 Nge Jesus a newenewen ngeniir o üreniir, “Ei esap tufich ngeni aramas, nge mettoch meinisin ra tufich ngeni Kot.”
MAT 19:27 Mürin Petrus a üra, “Nengeni, äm aia likitala meinisin o tapwela mürum. Iwe, met liwin aipwe angei?”
MAT 19:28 Jesus a üreniir, “Enlet, üpwe ürenikemi, pwe lupwen Nöün Aramas epwe mot lon an lenien motun king mi ling lon fansoun mettoch meinisin repwe försefäl, mürin ämi mi tapwela müri oupwe pwal mot won engol me ruu lenien motun king, pwe oupwe nemeni ekewe engol me ruu ainangen Israel.
MAT 19:29 Iwe, iteiten eman me eman mi likitala imwan, ika pwiin, ika fefinan, ika saman, ika inan, ika nöün, ika fanüan fän itei epwe angei liwinin fän ipükü lap seni, epwe pwal angei manau esemüch.
MAT 19:30 Nge chomong mi akom repwe kükümwir, nge chomong mi kükümwir repwe akom.”
MAT 20:1 “Iwe, iei usun ewe Mwün Läng a wewe ngeni: A wor eman mwän a ukkosorola an epwe kütta nöün chon angang pwe repwe angang lon an tanipin wain.
MAT 20:2 A tipeeu ngeni pwe epwe möniir won ükükün eföü moni silifer, iei liwinin eman chon angang lon eu rän. Mürin a tiniirela pwe repwe angang lon an tanipin wain.
MAT 20:3 Iwe, kulok tiu a feilasefäl ngeni ewe lenien amömö o küna pwal ekoch mwän ra ütämwäl, nge esap wor met ra föri.
MAT 20:4 Iei mine a üreniir, ‘Oupwe pwal feila o angang lon ai tanipin wain. Iwe, ngang üpwe ngenikemi ükükün pwüngün liwinimi.’
MAT 20:5 Iei mine ekewe chon angang ra feila. Iwe, kulok engol me ruu me kulok ülüngat a pwal föri usun chök mine a föri me mwan.
MAT 20:6 Iwe, ina epwe arapakan kulok limu lekuniol, lupwen a pwal feila lon ewe lenien amömö, a küna ekoch mwän ra chök ükütä ikenan. Iwe, a aisiniir, ‘Pwota oua chök asolapa unusen ei rän ren ämi ükütä chök ikei, nge ousap föri och?’
MAT 20:7 Ra pölüeni, ‘Esap wor eman a mönikem.’ Iwe, a üreniir, ‘Oupwe pwal feila o angang lon ewe tanipin wain.’
MAT 20:8 Nge lupwen a tori lekuniol, ewe mine an ewe tanipin wain a üreni nöün we chon souwan, ‘Kopwe köri ekewe chon angang o ngeniir liwinin ar angang. Kopwe popuetä ren ekewe amüchülan chon angang mi kükümwir le tolong tori chokewe mi akom le tolong.’
MAT 20:9 Iwe, lupwen ekewe mwän mi kükümwir le popuetä ar angang kulok limu ra feito, ra angei eföü moni silifer pwe liwiniir.
MAT 20:10 Iei mine lupwen ekewe mwän mi akom le tolong lon ewe angang ra war pwe repwe angei liwiniir, ra ekieki pwe repwe angei lap seni. Nge pwal eman me eman leir a chök angei eföü moni silifer.
MAT 20:11 Iwe, ra angei liwiniir kewe o popuetä le lal ngeni ewe mine an ewe tanipi.
MAT 20:12 Ra apasa, ‘Ekei mwän mi tolong le sopolan ra chök angang lon ükükün eu awa, nge äm aia angang weires fän akkar lon unusen eu rän, nge ka chök anönnöü liwiniir me liwinim.’
MAT 20:13 Iwe, ewe mine an ewe tanipin wain a üreni eman leir, ‘Pwii, kopwe rongorong. Ngang üsap föri och mi mwäl ngonuk. En ka tipeeu ngeniei pwe kopwe angang lon unusen eu rän fän iten eföü moni silifer.
MAT 20:14 Iei kopwe angei liwinum o feila le imwom. Ngang üa mochen ngeni ei mwän mi tolong lesopolan liwinin won ükükün met üa liwini ngonuk.
MAT 20:15 Ifa usun, esap wor ai pwüüng ai üpwe föri ngeni nei moni mine üa mochen? Ika ka lolowo pokiten üa kirikiröch?’”
MAT 20:16 Iwe, Jesus a pwal apasa, “Iei mine chokewe mi kükümwir repwe akom, nge chokewe mi akom repwe kükümwir.”
MAT 20:17 Iwe, lupwen Jesus a feitä Jerusalem, a emwenala ekewe engol me ruoman chon kaiö, pwe epwe kapas ngeniir lupwen ar fetal.
MAT 20:18 Iwe, a üreniir, “Oupwe rongorong. Ousipwe feitä Jerusalem. Nge ikenan Nöün Aramas epwe tolong lepöün ekewe souasor mi lap me ekewe Sensen Allük. Repwe apwüngü pwe epwe mäla,
MAT 20:19 mürin repwe atolonga lepöün ekewe chon lükün Israel. Ir repwe urumwotei, repwe wichi o iräpengesi. Nge mürin ülüngat rän epwe manausefälitä.”
MAT 20:20 Mürin pwülüen Sepeti a feito ren Jesus fiti nöün kewe ruoman alüal, a fotopwäsuk me mwan o uwei an tüngor ngeni.
MAT 20:21 Iwe, Jesus a aisini, “Met ka mochen?” Neminei a üra, “Kopwe pwon ngeniei, pwe nei kei ruoman alüal repwe mot ünükum, eman lepelifichum, nge eman lepelimöngum, lupwen ka nom lon wisom wisen king.”
MAT 20:22 Nge Jesus a üreni ekewe ruoman alüal, “Ämi ousap silei mine oua tüngor. Ifa usun, oupwe tongeni ün seni ewe kapen riaföü ngang üpwe ünümi?” Ra pölüeni, “Ewer, äm aia tongeni.”
MAT 20:23 Jesus a üreniir, “Ewer, oupwe fokun ün seni ai we kap. Nge esap wor ai pwüüng ai üpwe filätä iö epwe mot lepelifichi me lepelimöngi. Ekei leni Semei a amolätä fän iten chokewe i a filiiretä.”
MAT 20:24 Iwe, lupwen ekewe engol chon kaiö ra rongorong ei pworaus, ra chou ngeni ekewe ruoman pwipwi.
MAT 20:25 Iei mine Jesus a körifengeniir meinisin o üreniir, “Ämi oua silei, pwe ätekewe mi nemeni chon lükün Israel ra samoluniir fän pwora, nge ekewe nöüwis mi lap ra nemeniir fän pöchökül.
MAT 20:26 Nge esap iei usun lefilemi. Pun iö a mochen lap leimi epwe chon angang ngenikemi.
MAT 20:27 Nge iö a mochen epwe chon akom mwemi, epwe nöümi chon angang,
MAT 20:28 usun chök Nöün Aramas esap feito pwe aramas repwe angang ngeni, nge a feito an epwe angang ngeniir o fangala manauan fänäsengesin chomong aramas pwe möön manauer.”
MAT 20:29 Lupwen Jesus me nöün kewe chon kaiö ra towu seni Jeriko, eu mwichen aramas mi chomong a tapwela mürir.
MAT 20:30 Iwe, ruoman mwän mi chun ra mot lepekin ewe al o rongorong pwe Jesus a fetal won ewe al. Iei mine ra popuetä le kökkö fän leüömong, “Äm samol, nöün Tafit, kopwe tongekem!”
MAT 20:31 Nge chomong aramas ra song ngeniir o üreniir pwe repwe fanafanala. Nge ir ra chök alapala ar kökkö, “Äm samol, nöün Tafit, kopwe tongekem!”
MAT 20:32 Iwe, Jesus a üla o kökköriireto. A aisiniir, “Met oua mochen pwe üpwe föri ngenikemi?”
MAT 20:33 Ra pölüeni, “Äm samol, äm aia mochen pwe aipwe küna mwem.”
MAT 20:34 Jesus a fokun tongeer o atapa meser. Lon ewe chök otun ra tongeni küna mwer o tapwela mürin Jesus.
MAT 21:1 Lupwen Jesus me nöün kewe chon kaiö ra tori Petfake arun ewe Chukun Olif, arap ngeni Jerusalem, Jesus a tinala ruoman ekewe chon kaiö pwe repwe akomwola mwer.
MAT 21:2 Iwe, a üreniir, “Oupwe feila lon ewe sopw mi nom mwemi. Lupwen oupwe tolong lon, oupwe müttir küna eman aas a riri ikenan, nge nöün a nom ren. Oupwe apichiir o emweniireto rei.
MAT 21:3 Nge are eman epwe apasa och ngenikemi, oupwe üreni, ‘Äm samol a mochen wawa.’ Mürin ätewe epwe mwütiritä lon ewe chök otun.”
MAT 21:4 Ei a fis, pwe epwe pwönüetä mine ewe soufos a apasa:
MAT 21:5 “Oupwe üreni chon ewe telinimw Sion: Nengeni ämi king a feito remi! A tipetekison o wawa eman aas, me eman nienifön aas.”
MAT 21:6 Iei mine ekewe chon kaiö ra feila o föri usun mine Jesus a üreniir.
MAT 21:7 Ra emwenato ewe aas me ewe nienifön aas, ra isetä üfer kewe wor, nge Jesus a mot wor.
MAT 21:8 Iwe, eu mwichen aramas mi chomong ra oletala üfer kewe won ewe al, nge ekoch ra pwal pöküetiu palen irä o enenala won al.
MAT 21:9 Iwe, ekewe chomongun aramas mi akom mwen Jesus, pwal chokewe mi tapweto mürin ra popuetä le kökkö, “Sipwe mwareiti Nöün Tafit! Kot epwe afeiöchü ätewe mi feito fän iten ewe Samol! Ousipwe mwareiti Kot!”
MAT 21:10 Iwe, lupwen Jesus a tolong lon Jerusalem, unusen chon ewe telinimw ra mwökütüküt ren. Ra ais, “Iö ätewe?”
MAT 21:11 Ekewe aramas ra pölüeni, “Iei i ewe soufos Jesus seni Nasaret lon Kalilea.”
MAT 21:12 Iwe, Jesus a tolong lon ewe imwenfel o asüowu ätekewe meinisin mi kamö o amömöla pisek ikenan. A akulätä ekewe chepel än ekewe chon akasiwili moni me ekewe lenien mot än ekewe chon amömö lisom.
MAT 21:13 A üreniir, “A mak lon ekewe Toropwe mi Pin pwe Kot a apasa, ‘Ai imwenfel epwe iteni imwen iotek,’ nge ämi oua awili ngeni eu lenien open chon solä.’”
MAT 21:14 Iwe, chomong mi mesechun me chon pechemä ra feito ren Jesus lon ewe imwenfel, nge i a apöchöküleeretä meinisin.
MAT 21:15 Nge lupwen ekewe souasor mi lap me ekewe Sensen Allük ra küna ekewe manaman mi amwarar Jesus a föriir, ra pwal küna ekewe semirit mi kökkö lon ewe imwenfel, “Sipwe mwareiti Nöün Tafit,” ra song.
MAT 21:16 Iei mine ra aisini Jesus, “Ka rongorong mine ekei semirit ra apasa?” Jesus a pölüeniir, “Ewer, üa rongorong. Ousamwo aleani mine a mak lon ekewe Toropwe mi Pin? ‘En ka föri pwe än ekewe semirit me mönükol kölün mwareituk epwe unusöch.’”
MAT 21:17 Mürin Jesus a likitiirela, a towu seni ewe telinimw o feila Petania. Ikenan a pwinipwin ie.
MAT 21:18 Iwe, lesosorusichin sorotän ewe rän, lupwen Jesus a liwinsefäliti ewe telinimw Jerusalem, a mefi an echik.
MAT 21:19 Nge lupwen an fetal a küna efoch irä fiik lepekin ewe al. Iwe, a asai ngeni, nge esap küna uan, pwe chöön chök. Iei mine a fos ngeni ewe irä fiik, “Esap fokun chüen wor uomw!” Lon ewe chök otun ewe irä fiik a pwasala.
MAT 21:20 Lupwen ekewe chon kaiö ra küna pwe ewe irä a pwasala, ra weitifengeniir o üra, “Ifa usun än ei irä fiik pwasakaila?”
MAT 21:21 Jesus a pölüeniir, “Enlet, üpwe ürenikemi, pwe are oua lükü, nge ousap fokun tipemwaramwar, oupwe tongeni föri met ngang üa föri ngeni ei irä fiik. Nge sap chök ei, nge oupwe fen mwo nge tongeni apasa ngeni ei chuk, ‘Kopwe mwöküt seni ei leni o turulong le matau,’ iwe, epwe fis.
MAT 21:22 Are oua lükülük, oupwe angei mettoch meinisin mine oua tüngor lon ämi iotek.”
MAT 21:23 Iwe, Jesus a liwinsefälilong lon ewe imwenfel, nge lupwen a afalafal, ekewe souasor mi lap me ekewe souakomwen chon Juta ra feito ren o aisini, “Ka angei me ia om pwüüng pwe ka föri ekei mettoch? Iö a ngonuk om pwüüng?”
MAT 21:24 Jesus a pölüeniir, “Pwal ngang üpwe aisinikemi eu kapas ais. Are oupwe ngeniei pölüan, üpwe pwal ürenikemi ia üa angei me ie ai pwüüng pwe üpwe föri ekei mettoch.
MAT 21:25 Ia Johannes a angei me ie an pwüüng pwe epwe papatais? A feito seni Kot ika seni aramas?” Iwe, ra popuetä le kapasfengen lefiler, “Met sipwe apasa? Are sipwe üra, ‘A feito seni Kot,’ epwe aisinikich, ‘Pwota chök ousap lükü Johannes?’
MAT 21:26 Nge are sipwe üra, ‘A feito seni aramas,’ sia niuokusiti ekewe aramas, pun ir meinisin ra lükü pwe Johannes eman soufos.”
MAT 21:27 Iei mine ra pölüeni Jesus, “Äm aisap silei.” Iwe, Jesus a üreniir, “Ika ina, ngang üsap pwal ürenikemi ia üa angei me ie ai pwüüng pwe üpwe föri ekei mettoch.”
MAT 21:28 “Met oua ekieki? A wor eman mwän a nöüni ruoman alüal. A feila ren ewe mi watte o üreni, ‘Nei, kopwe feila o angang lon ewe tanipin wain ikenai.’
MAT 21:29 Iwe, a pölüeni, ‘Ngang üsap feila.’ Nge me mürin a siwili an ekiek o feila.
MAT 21:30 Mürin ewe sam a feila ren ewe aruomanün nau o üreni usun met a üreni ewe mi watte. Ewe nau a pölüeni, ‘Ewer, ai samol, üpwe feila,’ nge esap feila.
MAT 21:31 Iwe, iö lein ekewe ruoman nau a föri letipen saman?” Iwe, ra pölüeni, “Ewe mi watte.” Iei mine Jesus a üreniir, “Enlet, üpwe ürenikemi, pwe ekewe chon ioni takises me ekewe fin lisowu repwe tolong lon Mwün Kot mwemi.
MAT 21:32 Pun Johannes Soupapatais a feito remi o aiti ngenikemi ewe al mi pwüng oupwe fetal won, nge ämi ousap lükü an afalafal. Nge ekewe chon ioni takises me ekewe fin lisowu ra lükü an afalafal. Inamwo lupwen oua küna ar lükü, ämi ousap siwili ämi ekiek o lükü an afalafal.”
MAT 21:33 Iwe, Jesus a üra, “Oupwe rongorong ngeni pwal eu pworausen awewe: A wor eman soufanü mi fotuki eu tanipin wain, a föri eu tit ünükün, a tuw eu pwang fän iten ewe lenien üchüch föün wain o aüetä eu imwen mamas mi tekia lon. Mürin a awisa ekoch chon mälämäl pwe repwe tümwünü an tanipin wain. Iwe, a saila lon eu fanü toau.
MAT 21:34 Nge lupwen a tori fansoun kinikin, a tinala nöün kewe chon angang ren ekewe chon mälämäl, pwe repwe angei seniir wisan me lon ekewe föün wain.
MAT 21:35 Iwe, ekewe chon mälämäl ra turufi nöün kewe chon angang. Ra wichi eman, ra niela pwal eman o monei fau ngeni pwal eman.
MAT 21:36 Mürin ewe mwän a pwal tinala ekoch chon angang mi chomong seni ekewe me mwan. Iwe, ekewe chon mälämäl ra pwal föri ngeniir usun met ra föri ngeni ekewe mi akom.
MAT 21:37 Amüchülan a tinala nöün we ren ekewe chon mälämäl, pun a üra, ‘Enlet, repwe meniniti nei we.’
MAT 21:38 Nge lupwen ekewe chon mälämäl ra küna ewe nau, ra kapasfengen lefiler, ‘Iei i alemürin ätewe mine an ei tanipi. Ou etto, ousipwe niela, pwe sipwe angei mine an me ren saman!’
MAT 21:39 Iei mine ra turufi ewe nau, ra aturawu lükün ewe tanipin wain o niela.”
MAT 21:40 Mürin Jesus a aisiniir, “Lupwen mine an ewe tanipin wain epwe war, met epwe föri ngeni ekana chon mälämäl?”
MAT 21:41 Ra pölüeni, “Epwe fokun niela ekana mwän mi ngau o awisa ewe tanipin wain ngeni pwal ekoch chon mälämäl mi awora wisan föün wain lon fansoun kinikin.”
MAT 21:42 Iwe, Jesus a üreniir, “Ousamwo fen aleani lon ekewe Toropwe mi Pin? ‘Ewe fau ekewe chon kaü imw ra pöütala pun resap aücheani a wiliti ewe föün lepwokuku mi fokun aüchea. Iei än ewe Samol föför a fokun amwarar mwen mesach!’
MAT 21:43 Iei mine üpwe ürenikemi, pwe Kot epwe angei senikemi Mwün we o ngeni eu mwichen aramas mi awora ua ren ar föri föför mi pwüng.
MAT 21:44 [Iö a turutiu won ei fau epwe tatakis, nge are ewe fau epwe turutiu won eman, epwe fokun pachach.]”
MAT 21:45 Lupwen ekewe souasor mi lap me ekewe Farisi ra rong än Jesus kewe pworausen awewe, ra mefi pwe a kapas usur.
MAT 21:46 Iei mine ra sotuni ar repwe turufi Jesus, nge ra niuokusiti ewe mwichen aramas, pun ra ekieki ngeni Jesus pwe i eman soufos.
MAT 22:1 Iwe, Jesus a pwal kapas ngeni ekewe aramas lon pworausen awewe o üreniir,
MAT 22:2 “Mwün Läng a wewe ngeni eman king mi amolätä eu kametipen apwüpwülü fän iten nöün mwän.
MAT 22:3 A tinala nöün kewe chon angang ar repwe asile ngeni ekewe chon kökköto, pwe repwe feito fiti ewe kametip. Nge ir resap mochen feito.
MAT 22:4 Mürin a tinala pwal ekoch chon angang o üreniir, ‘Oupwe asile ngeni ekewe chon kökköto, pwe ngang üa amolätä ai we kametip. Nei kewe ätemwänin kow me ekewe nienifön kow mi aümanau ra fen wes me kuk o mettoch meinisin a molotä. Oupwe feito fiti ewe kametipen apwüpwülü.’
MAT 22:5 Nge ekewe chon kökköto resap afäli, ra feila ngeni en me an angang: Eman a feila ngeni an tanipi, nge eman a feila ngeni an lenien amömö,
MAT 22:6 nge pwal ekoch ra turufi ekewe chon angang, ra wichiir o niirela.
MAT 22:7 Iwe, ewe king a fokun song. Iei mine a tinala nöün kewe sounfiu pwe repwe niela ekewe chon nimanau o kenala ar kewe telinimw.
MAT 22:8 Mürin a körato nöün kewe chon angang o üreniir, ‘Ai kametipen apwüpwülü a fen molotä, nge chokewe mi kökköto resap fich ngeni.
MAT 22:9 Iei oupwe feila ren ekewe alelap o körato iö kana oua küna ngeni ewe kametip.’
MAT 22:10 Iei mine ekewe chon angang ra feiliwu lon ekewe alelap o achufengeni ekewe aramas meinisin ra küneer, ekewe aramasöch me ekewe aramasangau. Iwe, ewe imwen kametip a urela ren ekewe aramas.
MAT 22:11 Nge lupwen ewe king a tolong lon ewe imw pwe epwe nengeni ekewe aramas ra feito, a küna eman mwän esap üföüf üföüfen ewe apwüpwülü.
MAT 22:12 Iwe, ewe king a aisini, ‘Pwii, ifa usun om tolong ikei, nge kosap üföüf üföüfen ewe apwüpwülü?’ Iwe, ewe mwän esap pölüeni och.
MAT 22:13 Mürin ewe king a üreni ekewe chon angang, ‘Oupwe föti pöün me pechen ei mwän o aturawu lon rochopwaken lükün. Ikenan epwe pupuchör o akarüngi.’”
MAT 22:14 Iwe, Jesus a sopwela lon an kapas, “Ekewe chon kö ra chomong, nge ekewe chon fil ra chokükün.”
MAT 22:15 Mürin ekewe Farisi ra feila o pwüngüpwüngfengen usun ar repwe särei Jesus ren ar kapas ais.
MAT 22:16 Ra tinala ren Jesus ekoch nöür kewe chon kaiö me ekoch chiechien Herotes pwe repwe üreni, “Sense, äm aia silei pwe en ka kapas wenechar. Ka afalafala mine a let usun letipen Kot fän iten aramas, nge kosap ekieki mine aramas ra eäni ekiek, pun kosap nenengeni wisen eman.
MAT 22:17 Kopwe ürenikem met om ekiek. A pwüng ach sipwe mönätiu ach takises ngeni Sisar ika ese pwüng?”
MAT 22:18 Nge Jesus a silei usun ar ekiek mi ngau, iei mine a üreniir, “Ämi chon likatuputup! Pwota oua sotuniei?
MAT 22:19 Oupwe pwäri ngeniei ewe föün moni fän iten takises!” Iwe, ra uwato ren ewe föün moni.
MAT 22:20 Nge Jesus a aisiniir, “Liosun iö me iten iö ei won ei moni?”
MAT 22:21 Ra pölüeni, “Liosun Sisar me itan.” Iei mine Jesus a üreniir, “Mi pwüng! Oupwe ngeni Sisar mine än Sisar, nge oupwe ngeni Kot mine än Kot.”
MAT 22:22 Lupwen ar rong ekei kapas, ra weitifengeniir. Mürin ra likitala i o feila.
MAT 22:23 Lon ewe chök rän ekoch Satusi ra feito ren Jesus, ir ätekewe mi lükü pwe aramas resap manausefäl seni mäla.
MAT 22:24 Iwe, ra apasa, “Sense, Moses a üra pwe are eman mwän a mäla, nge esap wor nöün me won pwülüan, pwiin ei mwän epwe fokun pwülüeni ei fefin, pwe epwe wor nöün fän iten mwirimwirin pwiin we mi mäla.
MAT 22:25 A wor füman pwipwi mi nom lefilach. Ewe mwänichi a pwülüeni eman fefin, nge lupwen a mäla esap wor nöün. Iei usun a likiti pwülüan ngeni pwiin we.
MAT 22:26 Iei usun chök a pwal fis ngeni ewe aruomanün me ewe aülümanün tori ewe afümanün.
MAT 22:27 Nge lesopolan ewe fefin a pwal mäla.
MAT 22:28 Iwe, lon ewe ränin, lupwen ekewe sotup repwe manausefälitä, iö me leir epwe pwülüeni ewe fefin, pun ir me füman ra pwüpwülü ngeni?”
MAT 22:29 Nge Jesus a pölüeniir, “Ämi oua fokun mwäl, pun ousap silei makkeen ekewe Toropwe mi Pin me än Kot manaman.
MAT 22:30 Pun lupwen ekewe sotup repwe manausefäl, repwe wewe ngeni ekewe chon läng resap pwüpwülü.
MAT 22:31 Nge usun manausefälin sotup: Ousap mwo aleani mine Kot a fen ürenikemi? A apasa,
MAT 22:32 ‘Ngang än Apraham, Isaak me Jakop we Kot!’ Ei Kot än ekewe mi manau Kot, nge sap än ekewe mi mäla.”
MAT 22:33 Iwe, lupwen ekewe aramas lon ewe mwich ra rong ekei kapas, ra weitifengeniir ren an afalafal.
MAT 22:34 Lupwen ekewe Farisi ra rongorong pwe ekewe Satusi ra pinela ren mine Jesus a eäni pölüen ngeniir, ra chufengen.
MAT 22:35 Iwe, eman me leir, i eman Sensen Allük, a sotun le särei Jesus ren an kapas ais ngeni.
MAT 22:36 A aisini, “Sense, meni allük a kon aüchea seni meinisin?”
MAT 22:37 Jesus a pölüeni, “Kopwe echeni ewe Samol om Kot ren unusen lelukom, ren unusen ngünum pwal ren unusen ekiekum.
MAT 22:38 Iei ewe allük mi lap me aüchea seni meinisin.
MAT 22:39 Nge ewe aruuen allük mi fokun aüchea a usun chök ewe aeuin: ‘Kopwe echeni chon arum usun chök püsin om echenuk.’
MAT 22:40 Unusen än Moses kewe allük me än ekewe soufos kapas ra longolong won ekei ruu allük.”
MAT 22:41 Iwe, lupwen ekoch Farisi ra chufengen, Jesus a aisiniir,
MAT 22:42 “Met oua ekieki usun ewe Kraist? I mwirimwirin iö?” Ra pölüeni, “I mwirimwirin Tafit.”
MAT 22:43 Mürin Jesus a aisiniir, “Pwota chök ewe Ngünün Kot a amefi ngeni Tafit an epwe aita ngeni i ‘Samol’? Tafit a apasa,
MAT 22:44 ‘Ewe Samol a kapas ngeni ai Samol: Kopwe mot lepelifichi tori üpwe anomu chon oputom fän pecheöm.’
MAT 22:45 Are a ina usun pwe Tafit a püsin aita ngeni i ‘Samol’, ifa usun än Kraist epwe tongeni eman mwirimwirin Tafit?”
MAT 22:46 Esap wor eman a tongeni pölüeni än Jesus kapas. Seni ena rän esap chüen wor eman a tongeni aisini och kapas ais.
MAT 23:1 Mürin Jesus a kapas ngeni ewe mwichen aramas me nöün kewe chon kaiö,
MAT 23:2 “Ekewe Sensen Allük me ekewe Farisi a wor ar pwüüng pwe repwe awewei än Moses kewe allük.
MAT 23:3 Iei mine oupwe aleasochis o föri meinisin mine ra ürenikemi, nge ousap apirü ar föför, pun resap manaueni mine ra eäni afalafal.
MAT 23:4 Ra rifengeni mettoch mi fokun chou o isetä won afaren aramas, nge püsin ir resap pomwe ngeni mwo efoch aütür ar repwe alisiir le keki ekewe mettoch mi chou.
MAT 23:5 Ra föri mettoch meinisin pwe aramas repwe küneer. Oupwe nengeni watten ekewe pwor ra rietä won chamwer me pöür, ekewe wokisin seni ekewe Toropwe mi Pin ra nom lon! Nengeni, langatamen ekewe fout lepwülün üfer!
MAT 23:6 Ra sani ar repwe mot won ekewe leni fän iten aramas mi iteföüla lon lenien kametip, pwal won ekewe lenien mot mi keimwüela lon ekewe imwen felikis.
MAT 23:7 Ra pwal sani än aramas repwe kapong ngeniir me sufölitiir lon ekewe lenien amömö, pwal än aramas repwe kökköri ngeniir ‘Sense’.
MAT 23:8 Nge ämi ousap mwüt ngeni aramas pwe repwe kökköri ngenikemi ‘Sense’, pun a chök wor eman nöümi Sense, nge ämi meinisin oua pwipwi.
MAT 23:9 Ousap kökköri ngeni eman ikei won fanüfan ‘Sam’, pun a chök wor eman Sememi lon läng.
MAT 23:10 Ousap pwal kökköri ngeni eman ‘Souemwen’, pun a chök wor eman ämi souemwen, iei i ewe Kraist.
MAT 23:11 Ewe mi lap leimi epwe nöümi chon angang.
MAT 23:12 Pun iö a püsin atekiatä epwe tekisonotiu, nge iö a püsin atekisonatiu epwe tekiatä.
MAT 23:13 “Feiengauemi, ämi Sensen Allük me Farisi! Ämi chon likatuputup! Oua öpüngala ewe asam ngeni Mwün Läng seni aramas. Nge püsin ämi ousap tolong lon, ousap pwal mwüt ngeni chokewe mi mochen tolong ar repwe tolong.
MAT 23:14 [Feiengauemi, ämi Sensen Allük me Farisi! Ämi chon likatuputup! Oua angemwäli imwen ekewe fefin mi mä pwülüer, mürin oua einga ngeni aramas ämi iotek mi langatam. Iei mine oupwe küna apwüng mi fokun chou.]
MAT 23:15 Feiengauemi, ämi Sensen Allük me Farisi! Ämi chon likatuputup! Ämi oua saifeil le matau pwal won fanü fän iten ämi oupwe liapeni eman aramas ngeni ämi lamalam. Nge lupwen eman a etiwa ämi lamalam, oua föri pwe ewe aramas epwe kon ngau senikemi le tolong lon hell.
MAT 23:16 Feiengauemi, ämi souakom mi mesechun! Oua apasa, ‘Are eman a akapelü ewe imwenfel, esap wisen föri pwüngün mine a eäni pwon. Nge are a akapelü ekewe mettoch seni kolt lon imwenfel, epwe fokun föri pwüngün.’
MAT 23:17 Umwesimi me mesechunemi! Met a fokun aüchea, ekewe mettoch seni kolt ika ewe imwenfel ewe kolt a pin ren?
MAT 23:18 Ämi oua pwal apasa, ‘Are eman a akapelü ewe rongen asor esap wisen föri pwüngün mine a eäni pwon. Nge are a akapelü ewe asor mi nom won ewe rongen asor, epwe föri pwüngün.’
MAT 23:19 Mesechunemi! Met a fokun aüchea, ewe asor ika ewe rongen asor ewe asor a pin ren?
MAT 23:20 Iei mine lupwen eman a akapelü ewe rongen asor, a akapelü ewe rongen asor pwal ekewe asor meinisin mi nom won.
MAT 23:21 Nge lupwen eman a akapelü ewe imwenfel, a akapelü ewe imwenfel me Kot mi nom lon.
MAT 23:22 Nge iö a akapelü läng, a akapelü ewe lenien mot än Kot pwal ewe mi mot won.
MAT 23:23 Feiengauemi, ämi Sensen Allük me Farisi! Ämi chon likatuputup! Oua ngeni Kot eu leengolun seni ämi irän nofitin mongö mi annö iter mint, dill me kumin. Nge ousap aleasochis ngeni ekewe allük mi fokun aüchea usun pwüng, kirikiröch me allükülük. Ekei allük oupwe fokun apwönüretä, nge ousap pwal tümwününgau ngeni ekewe ekoch.
MAT 23:24 Mesechunemi, ämi souakom! Oua churawu eman long seni lon ünümemi minen ün, nge oua oromala eman kamel!
MAT 23:25 Feiengauemi, ämi Sensen Allük me Farisi! Ämi chon likatuputup! Oua limeti lükün ämi kap me sepi, nge lon a ur ren mine a torikemi ren angangen mwäneson me kirikiringau.
MAT 23:26 Mesechunemi, ämi Farisi! Oupwe akomwen limeti lon ewe kap me ewe sepi, mürin epwe pwal limöchüla ewe lükün.
MAT 23:27 Feiengauemi, ämi Sensen Allük me Farisi! Ämi chon likatuputup! Oua usun chök ekewe peias mi peinitipwech ra lingöch me lükün, nge lon ra ur ren chün aramas me machen somä.
MAT 23:28 Iei usun pwal ämi: Oua pwä ngeni aramas lon lapalapen aramas mi pwüng, nge lon letipemi oua ur ren likatuputup me tipis.
MAT 23:29 Feiengauemi, ämi Sensen Allük me Farisi! Ämi chon likatuputup! Oua föri peias mi fokun mürina fän iten ekewe soufos o alinga ekewe föün achem fän iten ekewe chon pwüng.
MAT 23:30 Oua apasa, ‘Are äm aia manau lon fansoun äm kewe lewo, äm aisap etiir le niela ekewe soufos.’
MAT 23:31 Ren ei oua püsin pwärätä pwe oua mwirimwirin chokewe mi niela ekewe soufos!
MAT 23:32 Oupwe chök sopwela le awesala mine ämi kewe lewo ra popuetä!
MAT 23:33 Ämi serepenit me etelien serepenit! Ifa usun, ämi oupwe tongeni sü seni liwiningauen ämi tipis lon hell?
MAT 23:34 Iei mine üpwe tinala remi soufos me soutipachem me sense. Ämi oupwe niela ekoch leir, oupwe iräpengesi ekoch, oupwe pwal wichi ekoch me lon ämi imwen felikis o cheerela seni eu telinimw tori pwal eu telinimw.
MAT 23:35 Iei mine epwe feitiu womi ewe apwüng fän iten ninnilan ekewe aramas mi pwüng meinisin, seni ninnilan ewe chon pwüng Epel tori ninnilan Sekaraia nöün Perekia, ätewe oua niela lefilen ewe imwenfel me ewe rongen asor.
MAT 23:36 Enlet, üpwe ürenikemi: Ewe apwüng fän iten mälan ekei mi nimanau epwe tori ei pilon aramasen ikenai.
MAT 23:37 “Jerusalem, Jerusalem! Ka niela ekewe soufos o mone fau ngeni ekewe chon künö Kot a tinato reöm! A fän fite ai mochen achufengeni noumw kewe aramas usun eman inelapen chuko a amwichafengeni nöün kana fän pöükässin, nge ämi ousap mochen.
MAT 23:38 Nengeni ämi we imwenfel epwe pöla, pun aramas repwe likitala.
MAT 23:39 Pun üpwe ürenikemi, pwe seni lon ei fansoun ousap chüen künasefäliei tori oupwe apasa, ‘A feiöch ätewe a feito fän iten ewe Samol.’”
MAT 24:1 Mürin än Jesus feila seni ewe imwenfel, nöün kewe chon kaiö ra feito ren o aiti ngeni lingöchün ekewe imw lon ewe lenien fel.
MAT 24:2 Nge Jesus a üreniir, “Ewer, oua nenengeni ekei mettoch meinisin. Enlet, üpwe ürenikemi: Esap fokun wor eföü fau epwe chüen nom lon lenian. Meinisin ekewe fau repwe toropasetiu.”
MAT 24:3 Iwe, lupwen Jesus a mot won ewe Chukun Olif, ekewe chon kaiö ra feito ren, nge ir chök. Ra tüngor ngeni, “Kose mochen ürenikem inet epwe fis ekei mettoch meinisin? Kopwe pwäri ngenikem asisilen fansoun om wareto me ewe fansoun sopolan.”
MAT 24:4 Jesus a pölüeniir, “Oupwe mamasa, pwe esap wor eman epwe atupukemi.
MAT 24:5 Pun chomong aramas repwe feito fän itei o apasa, ‘Ngang Kraist!’ Iwe, repwe atupala chomong aramas.
MAT 24:6 Oupwe rongorong akürangen maun me pworausen maun, nge ousap niuokus. Ekei mettoch repwe fokun fis, nge esap tori mwo fansoun sopolan.
MAT 24:7 Fanü me fanü repwe fiufengen o mwü me mwü repwe maunfengen. Epwe wor lengita me chechechin fanü ekis meinisin.
MAT 24:8 Ekei riaföü meinisin ra usun chök ekewe metek eman fefin a eäni me mwen an epwe nöünöüla.
MAT 24:9 Mürin repwe fötekinikemi, repwe atolongakemi lepöün chokewe mi ariaföüükemi o nikemiila. Aramas meinisin repwe oputakemi pokiten itei.
MAT 24:10 Iwe, chomong repwe fangatä ar lükülük lon ena fansoun, repwe afangamäfengeniir lefiler o oputafengeniir.
MAT 24:11 Mürin chomong soufos chofona repwe feito o atupala chomong aramas.
MAT 24:12 Pokiten a wattela föföringau, epwe patapatala ewe chen lefilen aramas.
MAT 24:13 Nge iö epwe likitü tori lesopolan epwe küna manau.
MAT 24:14 Iwe, aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.
MAT 24:15 “Iwe, ämi oupwe küna ewe ‘Mettoch mi Eniweniw’, ewe soufos Taniel a kapas usun. Epwe nom lon ewe leni mi pin. (Ewe chon aleani epwe weweiti met wewen ei.)
MAT 24:16 Mürin chokewe mi nom Jutea repwe sütä won ekewe chuk.
MAT 24:17 Eman aramas mi nom won imwan esap wor an fansoun an epwe tötiu o tolong lon imwan pwe epwe angei och.
MAT 24:18 Nge eman mi nom lemäl esap liwiniti imwan an epwe angei üfan sekit.
MAT 24:19 Riaföün ekewe fefin mi pwopwo me ekewe inelap mi oupwu nöür lon ekana rän.
MAT 24:20 Oupwe iotek ngeni Kot pwe ei sokun riaföü esap fis lon fansoun patapat ika lon ränin sapat!
MAT 24:21 Pun riaföün lon ekana rän epwe fen lap seni ekewe riaföü mi fen fis seni lepoputän fanüfan tori ei fansoun, esap pwal fissefäl ena sokun lon ekewe fansoun repwe feito.
MAT 24:22 Are Kot esap amochomochala ekewe rän, esap wor eman aramas epwe manau. Nge pokiten chokewe a filiiretä a amochomochala ekewe fansoun riaföü.
MAT 24:23 Lon ena fansoun, are eman epwe apasa ngenikemi, ‘Nengeni, iei i Kraist!’ ika ‘Nengeni, a nom ikenan!’ ousap lükü ätewe.
MAT 24:24 Pun kraist chofona me soufos chofona repwe war o föri asisil me manaman mi lapalap, pwe repwe mwo nge atupu ekewe chon fil are repwe tongeni.
MAT 24:25 Oupwe rongorong! Ngang üpwe pwäri ngenikemi ekei mettoch mwen ar repwe fis.
MAT 24:26 Iei mine are eman epwe ürenikemi, ‘Nengeni, a nom lon ewe fanüapö!’ ousap feila ikenan. Ika ra apasa, ‘Nengeni, a opola ikei!’ ousap lükü ekei kapas.
MAT 24:27 Pun Nöün Aramas epwe feito usun fifi mi fila lon unusen läng seni ötiu tori lotou.
MAT 24:28 Ia a wor ie eman somä, ikenan ekewe machang iter wolcher ra mwichfengen ie.
MAT 24:29 “Lon ewe chök otun mürin ewe fansoun riaföü, akkar epwe rochola, maram esap chüen tittin, ekewe fü repwe turutiu me läng, nge ekewe manamanen läng repwe mwöküt seni lenier.
MAT 24:30 Mürin asisilen Nöün Aramas epwe pwäla fän läng, nge aramas meinisin won fanüfan repwe kechü, lupwen repwe küna Nöün Aramas epwe feito won kuchu fän manaman me ling mi lapalap.
MAT 24:31 Iwe, epwe tinala nöün kewe chon läng fän tikin rappwa mi leüömong, pwe repwe amwichafengeni afilian kana seni lepelien fanüfan me rüanü, seni esopun läng tori esopun.
MAT 24:32 “Oupwe kaiö eu lessen seni ewe irä fiik. Lupwen palan kana ra anüen fetil o popuetä le pwüküwu chön, oua silei pwe a arap fansoun räs.
MAT 24:33 Iei usun, lupwen oua küna pwe ekei mettoch ra fis, oupwe silei pwe i a arapoto, a molotä an epwe le war.
MAT 24:34 Enlet, üpwe ürenikemi, pwe ei pilon aramas resap mäla tori epwe fisitä ekei mettoch meinisin.
MAT 24:35 Läng me fanüfan repwe morola, nge ai kapas kana resap fokun morola.
MAT 24:36 “Esap wor eman a silei ewe rän are ewe kulok ekei mettoch repwe fis lon, sap mwo nge ekewe chon läng are ewe Nau, nge ewe Sam echök a silei.
MAT 24:37 Ewe fansoun waren Nöün Aramas epwe usun chök met a fis lon fansoun Noa.
MAT 24:38 Lon ekewe rän mwen ewe noter, ekewe aramas ra momongö o ükün, ra pwüpwülü o akapwüpwülüür tori ewe rän lupwen Noa a tolong lon ewe waimw.
MAT 24:39 Resap silei mine epwe fis tori ewe noter a war o niirela meinisin. Ina usun mine epwe fis lupwen Nöün Aramas epwe war.
MAT 24:40 Lon ena fansoun ruoman mwän repwe angangfengen lemäl, Nöün Aramas epwe angeala eman, nge ewe eman epwe likitätiu.
MAT 24:41 Ruoman fefin repwe üsüsfengen, epwe angeala eman, nge ewe eman epwe likitätiu.
MAT 24:42 Iei mine oupwe mamasa, pun ousap silei lon meni rän ämi Samol epwe wareto.
MAT 24:43 Are ewe souimw epwe silei inet ewe chon solä epwe war, oupwe fokun silei, pwe ätewe epwe nenela, nge esap mwüt ngeni ewe chon solä an epwe atalong imwan we.
MAT 24:44 Iei mine pwal ämi, oupwe molotä fansoun meinisin, pun Nöün Aramas epwe war lon eu otun ousap ekieki ngeni.
MAT 24:45 “Iwe, iö chök ewe chon angang mi allükülük o tipachem? Ätewe an masta epwe seikätä pwe epwe nemeni nöün kewe chon angang o ngeniir wiser mongö lon fansoun fich.
MAT 24:46 Feiöchün ewe chon angang, are an we masta a küna pwe a föri iei usun lupwen a war.
MAT 24:47 Enlet, üpwe ürenikemi, an we masta epwe seikätä, pwe epwe nemeni mettochun meinisin.
MAT 24:48 Nge are ei chon angang a ngau, epwe ekieki lon lelukan, ‘Ai we masta epwe fokun mang an epwe liwinto’,
MAT 24:49 epwe popuetä le wichi chiechian kewe chon angang, epwe pwal momongö me ükün fiti chon sakau.
MAT 24:50 Mürin än ei chon angang we masta epwe liwinto lon eu rän ewe chon angang esap ekieki ngeni, pwal lon eu fansoun esap silei.
MAT 24:51 Iwe, ewe masta epwe apwüngü ngeni mäla o alenia lon lenien ekewe chon likatuputup. Ikewe epwe kechü o akarüngi ie.
MAT 25:1 “Lon ewe fansoun Mwün Läng epwe wewe ngeni engol föpwül mi angei nöür kewe lamp o feila souni ewe mwän apwüpwülü söfö.
MAT 25:2 Limman me leir ra tiparoch, nge limman ra tipachem.
MAT 25:3 Ekewe mi tiparoch ra uwei nöür lamp, nge resap uwei alölön nöür kewe lamp.
MAT 25:4 Nge ekewe mi tipachem ra uwei nöür kewe lamp, ra pwal uwei alölöör.
MAT 25:5 Iwe, ewe mwän apwüpwülü söfö a mang le feito, iei mine ir meinisin ra aiesum o möür.
MAT 25:6 Nge lelukenipwin a wor eu kökkö, ‘A war ewe mwän apwüpwülü söfö. Oupwe feila o souni!’
MAT 25:7 Mürin ekewe föpwül meinisin ra pwätä o atinöchü nöür kewe lamp.
MAT 25:8 Iwe, ekewe mi tiparoch ra üreni ekewe mi tipachem, ‘Ouse mochen oupwe ngenikem ekis seni ämi kewe alölö, pun nöüm kei lamp repwe le kunula.’
MAT 25:9 Nge ekewe mi tipachem ra pölüeniir, ‘Amusala, esap fokun naf ngenikemi me äm. Oupwe feila kamö ämi alölö lon sitowa.’
MAT 25:10 Iei mine ekewe föpwül mi tiparoch ra feila pwe repwe kamö ar alölö. Nge lupwen ra feila, ewe mwän apwüpwülü söfö a war. Iwe, ekewe limman föpwül mi molotä ra eti le tolong lon ewe imwen kametipen apwüpwülü, mürin ewe asam a kapüngüla.
MAT 25:11 Nge mürin ekewe limman föpwül ra war. Iwe, ra kökkö, ‘Samol, samol, kose mochen suki ngenikem asam.’
MAT 25:12 Ewe mwän apwüpwülü söfö a pölüeniir, ‘Enlet, üpwe ürenikemi, üsap fokun silekemi.’
MAT 25:13 Iei mine oupwe mamasa, pun ousap silei lon meni rän ika kulok Nöün Aramas epwe war lon.
MAT 25:14 “Lon ewe fansoun Mwün Läng epwe wewe ngeni eman mwän mi ekiekin sai ngeni eu fanü toau. A körifengeni nöün kewe chon angang o awisa ngeniir pwe repwe tümwünü pisekin meinisin.
MAT 25:15 A ngeni eman me eman ükükün mine a tufich ngeni: A ngeni eman limungeröü föün moni silifer, a ngeni pwal ewe eman ruungeröü, nge a pwal ngeni ewe eman engeröü. Mürin a sai.
MAT 25:16 Iwe, ewe chon angang mi angei limungeröü föün moni silifer a müttir feila o anganga ewe moni, pwe manauan a tori pwal limungeröü.
MAT 25:17 Ina chök usun ewe mi angei ruungeröü, a pwal anganga ewe moni, pwe manauan a tori pwal ruungeröü.
MAT 25:18 Nge ewe eman chon angang mi angei engeröü föün moni a feila, a tuw eu pwang lepwül o irela än an we masta we moni.
MAT 25:19 Mürin fansoun langatam än ekewe chon angang we masta a liwinsefäl o kütta pworausen nöün kewe moni ra anganga.
MAT 25:20 Ewe chon angang mi angei limungeröü föün moni a feito o isetiu fengen me pwal limungeröü. A apasa, ‘Ai samol, en ka ngeniei limungeröü föün moni. Iei a pwal wor limungeröü föün moni üa apacha ngeni pwe manauan.’
MAT 25:21 An we masta a üreni, ‘Om angang a fokun mürina. En eman chon angang mi mürina o allükülük. Ka fen allükülük won mine a chokükün, iei mine üpwe seikuketä won mine a chomong. Kopwe tolong o etiei lon ai pwapwa.’
MAT 25:22 Mürin ewe chon angang mi angei ruungeröü föün moni a tolong o apasa, ‘Ai samol, en ka ngeniei ruungeröü föün moni. Nge iei a pwal wor ruungeröü föün moni üa apacha ngeni pwe manauan.’
MAT 25:23 An we masta a üreni, ‘Om angang a fokun mürina. En eman chon angang mi mürina o allükülük. Ka fen allükülük won mine a chokükün, iei mine üpwe seikuketä won mine a chomong. Kopwe tolong o etiei lon ai pwapwa.’
MAT 25:24 Mürin ewe chon angang mi angei engeröü föün moni a tolong o apasa, ‘Ai samol, üa silei pwe en eman mwän mi tipepöchökül. Ka kinikin ia kosap fofot ie, ka ionifengeni uän irä ia kosap amworafeili pwükil ie.
MAT 25:25 Üa niuokus, iei mine üa irela nouwm we moni fän pwül. Nengeni, iei noumw we moni.’
MAT 25:26 Iwe, an we masta a pölüeni, ‘En eman chon angang mi ngau o chipwang! Ka fen silei pwe ngang üa kinikin ia üsap fofot ie, üa pwal ionifengeni uän irä ia üsap amworafeili pwükil ie?
MAT 25:27 Epwe fen öch om kopwe iseis nei we moni lon bank, pwe lupwen üpwe liwinsefäl üpwe angesefäli nei we moni fiti manauan.
MAT 25:28 Iei oupwe angei nei we moni seni ätei o ngeni ätenan a eäni engol ngeröü föün moni.
MAT 25:29 Pun iön a wor an, Kot epwe apacha och ngeni an we, pwe epwe somwola. Nge iön esap wor an, Kot epwe fen mwo nge angei seni ewe ekis a wor ren.
MAT 25:30 Nge ren ei chon angang mi lomotongau, oupwe aturawu lükün lon ewe lenien rochopwak. Ikenan epwe pupuchör o akarüngi ie.’
MAT 25:31 “Iwe, lupwen Nöün Aramas epwe war lon lingan o chon läng meinisin repwe eti, epwe mot won an lenien motun king mi ling.
MAT 25:32 Iwe, chon ekewe mwü meinisin repwe mwichfengen me mwan. Mürin epwe aimwüfeseniir lon ruu mwich, usun eman chon fol man a aimwüfeseni ekewe sip seni ekewe kuuch.
MAT 25:33 Epwe anomu ekewe sip lepelifichin, nge ekewe kuuch epwe anomur lepelimöngun.
MAT 25:34 Mürin ewe king epwe üreni ekewe aramas mi nom lepelifichin, ‘Oupwe feito ämi mi feiöch me ren Semei! Oupwe mwüni ewe mwü mi molotä fän itemi seni lepoputän fanüfan.
MAT 25:35 Pun ngang üa echik, nge ämi oua amongöüei, üa kaka, nge ämi oua aünüei, üa wasöla, nge ämi oua etiwaei lon imwemi.
MAT 25:36 Üa selela, nge ämi oua aüföüfaei, üa apwangapwang, nge ämi oua tümwünüei, üa nom lon fötek, nge ämi oua feito churiei.’
MAT 25:37 Mürin ekewe chon pwüng repwe pölüeni, ‘Äm Samol, inet aia küna pwe ka echik, nge aia amongöök, inet ka kaka, nge aia aünuk?
MAT 25:38 Inet aia küna pwe ka wasöla, nge aia etiwok lon imwem, are inet aia küna pwe ka selela, nge aia aüföüfok?
MAT 25:39 Inet aia küna pwe ka apwangapwang are nom lon fötek, nge aia feila churuk?’
MAT 25:40 Iwe, ewe king epwe pölüeni, ‘Enlet, üpwe ürenikemi: Mine oua föri ngeni eman lein ekewe pwii mi fokun kisikis, iei oua föri ngeniei.’
MAT 25:41 Mürin epwe üreni chokewe mi nom lepelimöngun, ‘Oupwe feil seniei, ämi chon anümamau, oupwe feila lon ewe ekkei esekun a fen amol fän iten Tefil me nöün chon läng kana!
MAT 25:42 Pun üa echik, nge ämi ousap amongöüei, üa kaka, nge ämi ousap aünüei.
MAT 25:43 Üa wasöla, nge ämi ousap etiwaei lon imwemi, üa selela, nge ämi ousap aüföüfaei, üa apwangapwang o nom lon fötek, nge ämi ousap tümwünüei.’
MAT 25:44 Mürin repwe pölüeni, ‘Äm Samol, inet äm aia küna pwe ka echik ika kaka, ika wasöla, ika selela, ika apwangapwang, ika nom lon fötek, nge aisap tümwünuk?’
MAT 25:45 Mürin ewe king epwe pölüeni, ‘Enlet, üpwe ürenikemi: Mine ousap föri ngeni eman lein ekewe mi fokun kisikis, iei ousap pwal föri ngeniei.’
MAT 25:46 Iwe, chokei repwe feila ngeni ewe apwüng esemüch, nge ekewe chon pwüng repwe feila ngeni manau esemüch.”
MAT 26:1 Lupwen Jesus a awes le kapas won ekei mettoch meinisin, a üreni nöün kewe chon kaiö,
MAT 26:2 “Ämi oua silei pwe mürin ruu rän epwe fis ewe chulapen Pasofer. Iwe, Nöün Aramas epwe tolong lepöün aramas ar repwe iräpengesi.”
MAT 26:3 Iwe, ekewe souasor mi lap me ekewe souakom ra mwichfengen lon imwen ewe Souasor mi Lap Kaifas.
MAT 26:4 Ra pwüngüpwüngfengen usun ar repwe turufi Jesus le monomon o niela.
MAT 26:5 Nge ra apasa, “Sisap föri ei ekiek lupwen fansoun ewe chulap, pun a tongeni fis pwe epwe wor fitikoko seni ekewe aramas.”
MAT 26:6 Iwe, Jesus a nom lon Petania lon imwen Simon, eman mwän mi üri rupun pwötür me mwan.
MAT 26:7 Nge lupwen Jesus a mongö, eman fefin a feito ren fän eu lö pwokus mi fokun mömong, a nom lon eu rume mi för seni ewe fau itan alapaster. Neminei a ninätiu ei lö won möküren Jesus.
MAT 26:8 Iwe, lupwen ekewe chon kaiö ra küna ei föför, ra fokun song. Ra apasa, “Pwota a asolapa ei lö pwokus?
MAT 26:9 Pun ei lö eman a tongeni amömöla ren watten moni. Mürin ei moni epwe la ngeni ekewe chon wöüngau!”
MAT 26:10 Nge Jesus a silei met ra apasa, iei mine a üreniir, “Pwota oua aweiresi neminei? Met a föri ngeniei a fokun mürina.
MAT 26:11 Ekewe chon wöüngau repwe nonom remi fansoun meinisin, nge ngang üsap nonom remi fansoun meinisin.
MAT 26:12 Lupwen a ninätiu ei lö pwokus woi, a fen amolätä inisi ngeni peias.
MAT 26:13 Enlet, üpwe ürenikemi: Ekis meinisin won unusen fanüfan ia aramas repwe afalafala ei Pworausen Manau ie, ikenan aramas repwe pwal apworausa mine neminei a föri pwe achechemenien itan.”
MAT 26:14 Mürin eman me lein ekewe engol me ruoman chon kaiö, itan Jutas Iskariot, a feila ren ekewe souasor mi lap
MAT 26:15 o aisiniir, “Met oupwe ngeniei are üpwe afangamä Jesus ngenikemi?” Iwe, ra ngeni ilik föün moni silifer.
MAT 26:16 Seni ena otun Jutas a kütta eu fansoun mi fich an epwe tongeni atolonga Jesus lepöür.
MAT 26:17 Iwe, lon aeuin ränin ewe chulapen mongö pilawa esap wor iis lon, ekewe chon kaiö ra feito ren Jesus o aisini, “Ia ka mochen sipwe amolätä ie ewe mongön Pasofer fän itom?”
MAT 26:18 Jesus a pölüeniir, “Oupwe feila lon ewe telinimw ren eman mwän o oupwe üreni, ‘Nöüm sense a üra: A tori ai fansoun. Ngang me nei kewe chon kaiö aipwe mongö ewe mongön Pasofer lon imwom.’”
MAT 26:19 Iwe, ekewe chon kaiö ra föri usun met Jesus a üreniir o amolätä ewe mongön Pasofer.
MAT 26:20 Lupwen a lekuniol, Jesus me ekewe engol me ruoman chon kaiö ra mot ngeni chepel ar repwe mongö.
MAT 26:21 Iwe, lupwen ar mongö, Jesus a üreniir, “Enlet, üpwe ürenikemi, pwe eman me leimi epwe afangamäei.”
MAT 26:22 Nge ekewe chon kaiö ra lolilen ren ekei kapas o popuetä le kapas ais ngeni Jesus eman mürin eman, “Ifa usun, sap fen ngang ena?”
MAT 26:23 Iwe, Jesus a pölüeniir, “Eman mi etiei le otukalong anan we pilawa lon ewe sepi ina i ätewe epwe afangamäei.
MAT 26:24 Nöün Aramas epwe mäla usun a fen mak lon ekewe Toropwe mi Pin, nge feiengauen ätewe mi afangamä Nöün Aramas! Epwe fen öch ngeni ei mwän are esap fen mwo nge uputiu!”
MAT 26:25 Iwe, Jutas ätewe mi afangamä Jesus a üra, “Sense, ifa usun, sap fen ngang ätewe?” Jesus a pölüeni, “Ewer, usun om apasa.”
MAT 26:26 Iwe, lupwen ra mongöfengen, Jesus a angei ewe pilawa, a iotekin kilisou won, iwe, a kinikisietiu. A ineti ngeni nöün kewe chon kaiö o apasa, “Oupwe angei o mongö, iei inisi.”
MAT 26:27 Mürin a angei eu kap, a iotekin kilisou won, iwe, a ngeniir o apasa, “Ämi meinisin oupwe ün seni.
MAT 26:28 Pun iei chai a allükülükü än Kot we pwon mi fö ngenikemi, a ninnila fänäsengesin chomong aramas, pwe amusamusen ar tipis kana.
MAT 26:29 Üpwe ürenikemi, pwe üsap chüen ün seni ei wain, tori ewe rän lupwen üpwe ünümi ewe wain mi fö me ämi lon Mwün Semei.”
MAT 26:30 Mürin ra eäni echö kölün kilisou, ra towu seni ewe imw o feila won ewe Chukun Olif.
MAT 26:31 Mürin Jesus a üreni nöün kewe chon kaiö, “Lepwinei ämi meinisin oupwe sü seniei o likitieila, pun iei usun mine a mak lon ekewe Toropwe mi Pin, ‘Kot epwe niela ewe chon mas, nge ekewe sip repwe toropasfeil.’
MAT 26:32 Nge mürin ai manausefälitä üpwe akomwola Kalilea mwemi.”
MAT 26:33 Iwe, Petrus a üreni Jesus, “Ikamwo ir meinisin repwe likitukela, ngang üsap fokun likituk.”
MAT 26:34 Jesus a üreni Petrus, “Enlet, üpwe ürenuk pwe lon ei chök pwinin mwen ewe chuko epwe kökkö, en kopwe amamäsiniei fän ülüngat.”
MAT 26:35 Nge Petrus a pölüeni, “Are mwo üpwe fen etuk le mäla, üsap fokun amamäsinuk.” Pwal ekewe chon kaiö meinisin ra apasa ei ititin fos.
MAT 26:36 Mürin Jesus me nöün kewe chon kaiö ra feila lon eu leni itan Ketsemane. Iwe, a üreniir, “Oupwe nom ikei, nge ngang üpwe feila ikenan o iotek.”
MAT 26:37 A pwal aweinala Petrus me nöün Sepeti kewe ruoman mwän. Mürin a popuetä le letipeta o riaföü.
MAT 26:38 Iwe, a üreniir, “Riaföün letipei a fokun wattela, pwe üa arap ngeni ai üpwe mäla. Oupwe nom ikei o etiei le mamasa.”
MAT 26:39 Iwe, Jesus a feila ekis, a chapetiu lepwül o iotek, “Semei, are epwe tufich, kopwe angei seniei ei kapen riaföü, nge are ese tufich, letipom epwe fis, nge sap letipei.”
MAT 26:40 Mürin a liwinsefäliti ekewe ülüman chon kaiö, nge a küneer pwe ra möür. Iwe, a üreni Petrus, “Ifa usun, pwota ämi ousap tongeni mwo nge etiei le mamasa lon eu chök kulok?
MAT 26:41 Oupwe mamasa o iotek pwe ousap turutiu lon sosot. Ewe ngün a mochen pwora, nge ewe fituk a apwangapwang.”
MAT 26:42 Jesus a pwal liwinsefälila o iotek, “Semei, are ei kapen riaföü esap tongeni feil seniei, üpwe fokun ünümi, pun letipom epwe chök fis.”
MAT 26:43 Jesus a pwal liwinsefälila ren ekewe chon kaiö o küneer pwe ra möür, pun ra fokun chouchou.
MAT 26:44 Iwe, Jesus a pwal feil seniir, a liwinla o iotek fän aülüngatin lon chök ekewe ititin kapas a eäni me mwan.
MAT 26:45 Mürin a liwinsefäliti nöün kewe chon kaiö o üreniir, “Ifa usun, oua chüen annut o asösö? Nengeni, a war ewe fansoun pwe Nöün Aramas epwe oolong lepöün ekewe chon tipis.
MAT 26:46 Oupwe pwätä, ousipwe feila. Nengeni iei i ewe mwän mi afangamäei!”
MAT 26:47 Iwe, lupwen Jesus a chüen kakapas, Jutas, eman me lein ekewe engol me ruoman chon kaiö, a war. Eu mwichen aramas mi chomong ra eti fän nöür ketilas me wokur wok, ir chokewe ekewe souasor mi lap me ekewe souakom ra akünöör.
MAT 26:48 Ätewe mi afangamä a ngeniir eu asisil o üreniir, “Ätewe ngang üpwe mitiri, ina i ewe mwän, oupwe turufi!”
MAT 26:49 Iwe, Jutas a fetal wenewen ngeni Jesus o üreni, “Sense, kinamwe epwe nonom reöm.” Mürin a mitiri.
MAT 26:50 Jesus a pölüeni, “Pwii, kopwe chök föri mine ka ekiekin föri.” Mürin ra sä ngeni, ra turufi Jesus o amwöchü.
MAT 26:51 Nge eman me lein chokewe mi nom ren Jesus a üttawu nöün ketilas o pöküela selingen nöün ewe Souasor mi Lap we chon angang.
MAT 26:52 Iwe, Jesus a üreni, “Kopwe aliwinalong noumw ketilas lon sittan. Pun chokana mi nöünöü ketilas repwe mäla ren ketilas.
MAT 26:53 Ousap silei, pwe ngang üa tongeni tüngor ngeni Semei pwe epwe alisiei ren an epwe müttir tinato rei lap seni engol me ruu mwicheichen chon läng?
MAT 26:54 Nge are epwe fis ei, epwe ifa usun an epwe pwönüetä makkeen ekewe Toropwe mi Pin mi apasa, pwe iei met epwe fokun fis?”
MAT 26:55 Mürin Jesus a üreni ewe mwichen aramas, “Pwota oua feito fän ketilas me wok ämi oupwe turufiei usun itä oupwe turufi eman chon föföringau? Iteiten rän üa nom remi o afalafal lon imwenfel, nge ämi ousap turufiei.
MAT 26:56 Nge ekei mettoch meinisin ra fis pwe epwe pwönüetä mine ekewe soufos ra makkei lon ekewe Toropwe mi Pin.” Mürin ekewe chon kaiö meinisin ra likitala Jesus o süla.
MAT 26:57 Mürin chokewe mi turufi Jesus ra etekinala ren ewe Souasor mi Lap Kaifas ia ekewe Sensen Allük me ekewe souakom ra mwichfengen ie.
MAT 26:58 Nge Petrus a tapwela mürin Jesus me toau tori ewe leni lükün imwen ewe Souasor mi Lap. A tolong lon ewe leni lükün o mottiu ren ekewe chon mas an epwe küna met epwe fis.
MAT 26:59 Iwe, ekewe souasor mi lap me unusen ewe mwichen soupwüng ra kütta och popun mi mwäl ar repwe tip ngeni Jesus won pwe epwe mäla,
MAT 26:60 nge resap küna och tipis ren. Pwal chomong aramas ra mwo nge ütä o pwärätä ar tipitipmwäl usun. Mürin ruoman ra ütä
MAT 26:61 o apasa, “Ei mwän a apasa, ‘Ngang üa tufichin ataetiu än Kot we imwenfel, nge lon ükükün ülüngat rän üpwe aüsefälietä.’”
MAT 26:62 Mürin ewe Souasor mi Lap a ütä o aisini Jesus, “Ifa usun, esap wor om kapasen pölüen ngeni ekei kapasen atutur ekei mwän ra aturuk won?”
MAT 26:63 Nge Jesus a chök fanafanala. Iwe, ewe Souasor mi Lap a pwal apasa ngeni Jesus, “Kopwe pwon fän akapel iten ewe Kot mi manau o ürenikem ika en ewe Kraist, Nöün Kot.”
MAT 26:64 Jesus a pölüeni, “Ewer, usun om apasa. Nge üpwe ürenikemi meinisin: Seni ei fansoun oupwe küna Nöün Aramas a mot lepelifichin Ewe mi unusen Manaman, epwe war won kuchun läng.”
MAT 26:65 Mürin ewe Souasor mi Lap a kamwei üfan o apasa, “A eäni kapasen turunufas! Pwota sia chüen mochen angei kapasen atutur? Nengeni, iei oua püsin rongorong an kapasen turunufas.
MAT 26:66 Met ämi ekiek usun i?” Ra pölüeni, “A tipisin mäla.”
MAT 26:67 Mürin ra atufa mesan o wichi. Ekoch ra pösapei
MAT 26:68 o apasa, “Kraist, kopwe pwäri ngenikem iö a wichiik.”
MAT 26:69 Iwe, lupwen Petrus a nom lon ewe leni lükün imwen ewe Souasor mi Lap, eman föpwül nöün ewe Souasor mi Lap chon angang a feito ren o üreni, “En pwal eman mi eti Jesus seni Kalilea.”
MAT 26:70 Nge Petrus a amam me mwer meinisin o üreni, “Ngang üsap silei mine ka kapas usun.”
MAT 26:71 Mürin a feiliwu lon ewe al ngeni ewe asamalap. Iwe, pwal eman chon angang fefin a küna Petrus o üreni ekewe mwän mi nom ikenan, “Ei mwän a eti Jesus seni Nasaret.”
MAT 26:72 Iwe, Petrus a amamsefäl o apasa, “Üa akapel, üsap silei ena mwän!”
MAT 26:73 Ekis chök fansoun mürin chokewe mi ü ikenan ra feito ren Petrus o üreni, “Enlet, en pwal eman lein ätekewe mi eti enan mwän, pun aia sillenuk ren ngingiimw le kapas.”
MAT 26:74 Mürin Petrus a üra, “Üa fokun akapel pwe üa pwärätä mine a let! Amwo Kot epwe apwüngüei are üsap apasa mine a let! Ngang üsap fokun silei ena mwän.” Lon ewe chök otun ewe chuko a kökkö.
MAT 26:75 Iwe, Petrus a chechemeni mine Jesus a üreni, “Me mwen ewe chuko epwe kökkö, en kopwe amamäsiniei fän ülüngat.” Iwe, a towu lükün o fokun kechüengau.
MAT 27:1 Iwe, lupwen a ränila, ekewe souasor mi lap meinisin me ekewe souakom ra pwüngüpwüngfengen usun ar repwe niela Jesus.
MAT 27:2 Ra föti ngeni sein o etekinala pwe repwe atolonga lepöün ewe kepina Pilatus.
MAT 27:3 Lupwen Jutas ewe chon afangamä a silei pwe ra atowu pwüngün pwe Jesus epwe mäla, a liamam o a aliwinala ekewe ilik föün moni silifer ren ekewe souasor mi lap me ekewe souakom.
MAT 27:4 A apasa ngeniir, “Ngang üa tipis ren ai afangamä eman mwän esap wor an tipis ngeni mäla.” Iwe, ra pölüeni, “Met wewen ngenikem, kopwe püsin ekiekik.”
MAT 27:5 Iwe, Jutas a moneelong ewe moni lon ewe imwenfel o feila. Mürin a feila o püsin forusi.
MAT 27:6 Nge ekewe souasor mi lap ra angei ekewe föün moni o apasa, “Ei moni liwinin cha, a ngau ngeni allükün ach lamalam pwe sipwe atolonga lon monien imwenfel.”
MAT 27:7 Mürin ar tipeeufengen usun, ra nöüni ewe moni le möni fanüen eman chon föri sepi seni pwül, pwe epwe eu lenien peias fän iten chon ekis.
MAT 27:8 Iei mine ewe fanü a iteni “Fanüen Cha” tori ikenai.
MAT 27:9 Iei usun met ewe soufos Jeremaia a osuni a pwönüetä: “Ra angei ekewe ilik föün moni silifer, iei ükükün ewe moni ekewe chon Israel ra tipeeufengen won pwe repwe isetiu fän itan,
MAT 27:10 o ra nöünöü ei moni le möni ngeni fanüen eman chon föri sepi seni pwül, usun ewe Samol a allük ngeniei.”
MAT 27:11 Iwe, lupwen Jesus a ütä me mwen ewe kepina Pilatus, Pilatus a aisini, “Ifa usun, en nöün chon Juta we king?” Jesus a pölüeni, “Ewer, usun om apasa.”
MAT 27:12 Nge lupwen ekewe souasor mi lap me ekewe souakom ra aturu Jesus, i a chök fanafanala.
MAT 27:13 Iei mine Pilatus a üreni Jesus, “Kosap rongorong ngeni ekei kapasen atutur meinisin ra aturuk won?”
MAT 27:14 Nge Jesus esap fokun pölüeni och me lein ar kewe kapas, sap fen mwo nge eu ar kapasen atutur. Iei mine ewe kepina a fokun weitifengeni.
MAT 27:15 Iteiten fansoun lupwen a tori ewe mongön Pasofer, ewe kepina a soun amusala eman chon fötek ekewe aramas ra tüngor.
MAT 27:16 Lon ena fansoun a wor eman chon fötek mi sil me ren aramas pokiten an föföringau, itan Parapas.
MAT 27:17 Iwe, lupwen än ekewe aramas chufengen, Pilatus a aisiniir, “Iö lein ekewe ruoman oua mochen ai üpwe amusa ngenikemi, Parapas ika Jesus mi iteni Kraist?”
MAT 27:18 Pilatus a fokun silei pwe ekewe nöüwisen chon Juta ra atolonga Jesus lepöün pokiten ar lolowo.
MAT 27:19 Iwe, lupwen Pilatus a mot won an lenien motun apwüng, pwülüan a tinala ren ei pworaus: “Kosap föri och ngeni ewe aramas mi pwüng, pun lon ai tan lepwinewe üa fokun riaföü fänäsengesin.”
MAT 27:20 Iwe, ekewe souasor mi lap me ekewe souakom ra pese ngeni ewe mwichen aramas pwe repwe tüngor ngeni Pilatus pwe epwe amusala Parapas, nge epwe niela Jesus.
MAT 27:21 Nge Pilatus a aisini ewe mwichen aramas, “Iö me lein ekewe ruoman oua mochen ai üpwe amusa ngenikemi?” Iwe, ra pölüeni, “Parapas.”
MAT 27:22 Pilatus a aisiniir, “Nge met üpwe föri ngeni Jesus, ewe a iteni Kraist?” Ir meinisin ra köpökütä, “Kopwe iräpengesi!”
MAT 27:23 Nge Pilatus a aisiniir, “Met sokun föför mi ngau a föri?” Mürin ra köpökütä fän leüömong, “Kopwe iräpengesi!”
MAT 27:24 Iwe, lupwen Pilatus a küna pwe esap wor lomoten an epwe sopwela le kapas ngeniir, a pwal mefi pwe eu fitikoko epwe popuetä, a angei koluk o talü pöün me mwen ewe mwichen aramas o apasa, “Esap nom woi tipisin än ei aramas epwe ninnila. Epwe püsin nonom womi.”
MAT 27:25 Mürin ekewe aramas meinisin ra pölüeni, “Liwinin chaan epwe nonom wom me won nöüm kana!”
MAT 27:26 Iwe, mürin Pilatus a amusawu Parapas ngeniir, nge a wichi Jesus o atolonga lepöün ekewe sounfiu pwe repwe iräpengesi.
MAT 27:27 Mürin nöün Pilatus kewe sounfiu ra angei Jesus o etekinalong lon imwen ewe kepina, nge unusen ewe mwichen sounfiu ra pweliela ünükün.
MAT 27:28 Ra pwiliti seni üfan o aüföüfa ngeni echö üf mi parachol.
MAT 27:29 Mürin ra fittiifengeni palen iräfölüföl o ämwärämwäratä won möküren Jesus pwe mwärin, ra pwal uwalong efoch wok lon pöüifichin. Mürin ra fotopwäsuketiu mwan o turunufasei. Ra apasa, “Ewe kingen chon Juta epwe manauatam.”
MAT 27:30 Ra atufa, ra angei ewe wok seni o wichi ngeni möküran.
MAT 27:31 Lupwen ra wes me turunufasei, ra pwiliti seni ewe üf o aüföüfa ngeni püsin üfan. Mürin ra etekinala pwe repwe iräpengesi.
MAT 27:32 Iwe, lupwen ar towu seni ewe telinimw, ra churi eman mwän itan Simon seni Kirene. Ekewe sounfiu ra echimwa ngeni pwe epwe mwärei ngeni Jesus an we iräpenges.
MAT 27:33 Iwe, ra tori ewe leni itan Kolkota, wewen “Lenien Pösökün Mökür”.
MAT 27:34 Ikenan ra aünü ngeni Jesus wain mi nofitfengen me och mettoch mi maras. Nge mürin an neni, esap mochen ünümi.
MAT 27:35 Iwe, ra iräpengesi Jesus. Mürin ra üttüt won üfan kewe o ngeni eman me eman leir met üttian.
MAT 27:36 Mürin ra mottiu ikenan o mamasa Jesus.
MAT 27:37 Asen möküran ra apachatä ekoch mak mi pwärätä mine ra tip ngeni, “Iei i Jesus, ewe kingen chon Juta.”
MAT 27:38 Mürin ra pwal iräpengesi ruoman chon solä fiti Jesus, eman a nom lepelifichin, nge eman lepelimöngun.
MAT 27:39 Iwe, ekewe aramas mi pwere seni Jesus ra turunufasei, ra elifechifechi mökürer
MAT 27:40 o apasa, “En ewe ka ekiekin ataetiu ewe imwenfel o aüsefälietä lon ükükün ülüngat rän, kopwe püsin amanauok! Are en Nöün Kot, kopwe tötiu seni ewe iräpenges!”
MAT 27:41 Pwal ina chök usun ekewe souasor mi lap, ekewe Sensen Allük me ekewe souakom ra takirin ämängaua Jesus o üra,
MAT 27:42 “A amanaua ekoch, nge esap tongeni püsin amanaua! Sap i ewe kingen Israel? Are epwe tötiu seni ewe iräpenges iei, iwe, sipwe lükü i.
MAT 27:43 A lükü Kot o püsin aita ngeni pwe i Nöün Kot. Iwe, sipwe pii are Kot a mochen amanaua i lon ei otun!”
MAT 27:44 Pwal mwo nge ekewe chon solä mi eti Jesus le iräpenges ra turunufasei i ren ekewe chök ititin kapas.
MAT 27:45 Lupwen a tori leoloasen ewe rän, unusen ewe fanü a rochopwak lon ükükün ülüngat awa.
MAT 27:46 Ina epwe kulok ülüngat Jesus a kökkö fän leüömong, “Eli, Eli, lama sapaktani? wewen: Ai Kot, ai Kot, pwota ka likitieila?”
MAT 27:47 Iwe, ekoch aramas mi ü ikenan ra rongorong an kökkö o üra, “A köri Elias!”
MAT 27:48 Eman me leir a müttir säto ren, a angei eu farawa o otukalong lon ewe wain mi mwäl, a pachetä lesopun efoch iich o sotuni an epwe aünü ngeni Jesus.
MAT 27:49 Nge ekewe ekoch aramas ra üra, “Witi mwo ekis, sipwe pii ika Elias epwe feito o amanaua.”
MAT 27:50 Jesus a kökkösefäl fän leüömong, iwe, a mäla.
MAT 27:51 Lon ewe chök otun ewe chechen mangaku lon imwenfel a kam seni won tori fan, pwe a wor ruu kinikin. A fis chechen fanü, ekewe achau ra sangfesen
MAT 27:52 o ekewe peias ra sukula o chomong chon pin mi mäla ra manausefäl.
MAT 27:53 Ra towu seni ekewe peias mürin än Jesus manausefäl seni mäla o feila lon ewe Telinimw mi Pin ia chomong aramas ra küneer me ie.
MAT 27:54 Iwe, lupwen ewe meilapen sounfiu me ekewe sounfiu mi mamasa Jesus ra küna ewe chechen fanü me meinisin mine a fis, ra fokun rükö o apasa, “Enlet, ätei wesewesen Nöün Kot!”
MAT 27:55 A pwal wor chomong fefin ikenan mi aköürü me ekis toau, ir chokewe mi tapwela mürin Jesus seni Kalilea pwe repwe tümwünü ngeni mine a eäni osupwang.
MAT 27:56 Me lein ekei fefin Maria Maktalene, Maria inen James me Josef, pwal pwülüen Sepeti.
MAT 27:57 Iwe, lupwen a tori lekuniol, eman mwän mi pisekisek seni Arimatea itan Josef a war, ätei pwal eman nöün Jesus kewe chon kaiö.
MAT 27:58 A feila ren Pilatus o tüngor somän Jesus. Iwe, Pilatus a allük pwe repwe ngeni Josef somän Jesus.
MAT 27:59 Iei mine Josef a angei ewe somä, a finiti ngeni echö mangaku mi fö o pwechepwech,
MAT 27:60 o a isenalong lon püsin peiasan mi kärän chök wes me tu lon achau. Mürin a asokopanato eföü fau mi watte o pwölü ngeni mesen ewe peias, iwe, a feila.
MAT 27:61 Iwe, Maria Maktalene me pwal ewe eman Maria ra mot ikenan awenewenen ewe peias.
MAT 27:62 Iwe, sorotän ewe rän, iei ewe ränin sapat, ekewe souasor mi lap me ekewe Farisi ra churi Pilatus
MAT 27:63 o üreni, “Äm samol, äm aia chechemeni pwe enan chon chofona a apasa lupwen a chüen manau, ‘Üpwe manausefäl mürin ülüngat rän.’
MAT 27:64 Iei mine kopwe allük pwe sounfiu repwe mamasafichi peiasan tori ewe aülüngatin rän, pwe nöün kewe chon kaiö resap tongeni feila ren ewe peias o soläni somän o üreni ekewe aramas, ‘A manausefäl seni mäla.’ Ei kapas chofona lesopolan epwe ngau seni ewe kapas chofona lepoputän.”
MAT 27:65 Pilatus a pölüeni, “Oupwe angei ekoch sounfiu, oupwe feila o mamasaöchü ewe peias ükükün ämi tufich ngeni.”
MAT 27:66 Iei mine ra feila o pwauni won ewe fau, ra pwal likitätiu ekewe sounfiu pwe repwe mamasa.
MAT 28:1 Iwe, mürin ewe ränin sapat lesosorusichin ewe aeuin ränin wiik, Maria Maktalene me pwal ewe eman Maria ra feila pwe repwe nenengeni ewe peias.
MAT 28:2 Nge lon eu chök otun a fis och chechechin fanü mi watte, pun eman nöün ewe Samol chon läng a feitiu seni läng, a pünüela ewe fau seni mesen ewe peias o mottiu won.
MAT 28:3 Lapalapan a usun chök fifi, nge üfan a pwechepwech usun sno.
MAT 28:4 Iwe, ekewe chon mas ra fokun niuokus, pwe ra chechech o ra wewe ngeni aramas mi mäla.
MAT 28:5 Nge ewe chon läng a üreni ekewe fefin, “Ousap niuokus. Üa silei pwe oua kütta Jesus ewe mi iräpenges.
MAT 28:6 Esap nom ikei, a manausefälitä usun a fen apasa. Oupwe feito ikei o nenengeni ewe leni ia a kon ie.
MAT 28:7 Mürin oupwe müttir feila o asile ngeni nöün kewe chon kaiö, pwe Jesus a manausefäl seni mäla. Iwe, epwe akomwola mwemi Kalilea, ikenan oupwe küna i. Oupwe chechemeni mine üa ürenikemi.”
MAT 28:8 Iei mine ra feila seni ewe peias fän pacheu, ra niuokus, nge ra pwal fokun pwapwa. Ra säla pwe repwe asile ngeni nöün kewe chon kaiö ewe pworaus.
MAT 28:9 Lon ewe chök otun Jesus a churiir o üreniir, “Kinamwe epwe torikemi.” Iwe, ra feila ren, ra amwöchü pechen o fel ngeni.
MAT 28:10 Jesus a üreniir, “Ousap niuokus! Oupwe feila o üreni pwii kewe pwe repwe feila Kalilea, ikenan repwe künaei.”
MAT 28:11 Lupwen ekewe fefin ra feila, ekoch me lein ekewe sounfiu mi mamasa ewe peias ra liwinsefäliti ewe telinimw o apworausa ngeni ekewe souasor mi lap meinisin mine a fis.
MAT 28:12 Iwe, ekewe souasor mi lap ra chufengen me ekewe souakom o pwüngüpwüngfengen usun ar repwe föri eu ekiek. Mürin ra ngeni ekewe sounfiu chomong moni
MAT 28:13 o üreniir, “Oupwe üreni ekewe aramas, pwe nöün kewe chon kaiö ra feito lepwin o soläni somän Jesus lupwen oua möür.
MAT 28:14 Nge are ei pworaus epwe tori ewe kepina, äm aipwe afata ngeni pwe esap tipisimi, o ämi ousap tolong lon osukosuk.”
MAT 28:15 Iei mine ekewe sounfiu ra angei ewe moni o föri mine ra öüröüra ngeniir. Iwe, ei pworaus a chöfetal lein ekewe chon Juta tori ikenai.
MAT 28:16 Mürin ekewe engol me eman chon kaiö ra feila Kalilea won ewe chuk, ewe ia Jesus a üreniir pwe repwe feila ie.
MAT 28:17 Iwe, lupwen ar küna Jesus, ra fel ngeni, nge ekoch me leir ra tipemwaramwar.
MAT 28:18 Nge Jesus a kan ngeniir o üreniir, “Nemenem meinisin won läng me fanüfan a toriei.
MAT 28:19 Oupwe feila o asoulängala chon ekewe mwü meinisin, oupwe papataisiir ngeni iten ewe Sam, ewe Nau me ewe Ngünmifel.
MAT 28:20 Oupwe afalafaleer pwe repwe aleasochisi meinisin mine üa allük ngenikemi. Nge ngang üpwe etikemi fansoun meinisin tori lesopolan fanüfan.”
MAR 1:1 Iei poputän ewe Pworausen Manau usun Jesus Kraist ewe Nöün Kot.
MAR 1:2 Usun ewe soufos Aisea a fen makkeetiu, “Kot a apasa, ‘Üpwe tinala nei chon künö epwe akom mwomw, pwe epwe wäsi alom.’
MAR 1:3 Eman a kökkö fän leüömong lon fanüapö, ‘Oupwe amolätä ewe al fän iten ewe Samol, oupwe awenechara ewe al epwe fetal won.’”
MAR 1:4 Johannes a nom lon ewe fanüapö, a papatais o afalafal. A üreni ekewe aramas, “Oupwe aier seni ämi tipis o papatais. Iwe, Kot epwe amusala ämi tipis.”
MAR 1:5 Chomong aramas seni Jutea me ewe telinimw Jerusalem ra feila ren Johannes. Ra pwärätä ar tipis, nge Johannes a papataisiir lon ewe chanpupu Jortan.
MAR 1:6 Iwe, Johannes a üföüf üf seni ülen kamel, ririn lukalapan a för seni silin man, nge anan mongö lifichimas me chönün chunen seni lein pötöwöl.
MAR 1:7 Iwe, a üreni ekewe aramas, “Ewe eman epwe war me müri a lap seniei, ngang üsap fich ngeni ai üpwe mwo nge pworotiu mwan o apichi ririn ipwan sus.
MAR 1:8 Ngang üa papataisikemi ren koluk, nge i epwe papataisikemi ren Ngünmifel.”
MAR 1:9 Iwe, ekis chök fansoun mürin Jesus a feito seni Nasaret lon Kalilea pwe epwe papatais ren Johannes lon ewe chanpupu Jortan.
MAR 1:10 Iwe, lon ewe chök otun a tütä o ütä lon ewe koluk, a küna pwe läng a sukula, iwe, Ngünmifel a feitiu won usun lapalapen eman lisom.
MAR 1:11 Iwe, eu möngüngü a feitiu seni läng o a apasa, “En nei mi fokun achengicheng, üa unusen pwapwa reöm.”
MAR 1:12 Iwe, lon ewe chök otun Ngünmifel a tinala Jesus lon fanüapö.
MAR 1:13 A nonom ikenan lon ükükün faik rän o a küna sosot ren Satan. Iwe, a nom ren ekewe manmwacho, nge chon läng ra feito o tümwünü.
MAR 1:14 Iwe, mürin an Johannes tolong lon imwen fötek, Jesus a feila Kalilea o arongafeili ewe Pworausen Manau seni Kot.
MAR 1:15 A apasa, “A tori ewe fansoun, Mwün Kot a arapoto. Oupwe aier seni ämi tipis o lükü ewe Pworausen Manau.”
MAR 1:16 Iwe, lupwen Jesus a fetal arun ewe nomun Kalilea a küna ruoman pwipwi, Simon me Andru, ir chon attau, ra aturätiu nöür chew lon ewe noom.
MAR 1:17 Iwe, Jesus a üreniir, “Oupwe tapweto müri, iwe, üpwe aiti ngenikemi ifa usun ämi oupwe attaua aramas.”
MAR 1:18 Lon ewe chök otun ra likitala nöür kewe chew o tapwela mürin Jesus.
MAR 1:19 Iwe, lupwen Jesus a pwal feila ekis, a küna pwal ruoman pwipwi James me Johannes nöün Sepeti kewe. Ra nom won war we o wonefi nöür kewe chew.
MAR 1:20 Nge lon ewe chök otun Jesus a küneer, a köriir. Ra likitala semer we Sepeti won waar we me nöün kewe chon angang o ra tapwela mürin Jesus.
MAR 1:21 Iwe, Jesus me nöün kewe chon kaiö ra tori ewe telinimw Kapernaum. Nge lupwen a tori ewe ränin sapat, a tolong lon ewe imwen felikis o popuetä le afalafal.
MAR 1:22 Iwe, ekewe aramas mi rongorong ra mairü ren an afalafal, pun a afalafal usun eman mi wor an pwüüng, nge esap usun nöür kewe Sensen Allük.
MAR 1:23 Lon ewe chök otun eman mwän a wor eman ngününgau won a tolong lon ewe imwen felikis o popuetä pupuchör,
MAR 1:24 “Met ka mochen föri ngenikem, Jesus seni Nasaret? Ka feito pwe kopwe afeiengauakem? Ngang üa silei pwe en Ewe mi Pin, Kot a tinato.”
MAR 1:25 Iwe, Jesus a allük ngeni ewe ngününgau, “Kopwe fanafanala o towu seni ei mwän.”
MAR 1:26 Iwe, ewe ngününgau a aturufeili ewe mwän o a towu seni.
MAR 1:27 Iwe, ekewe aramas meinisin ra mairü o ra popuetä kapasfengen lefiler, “Mwa met ei? Ifa usun, och minefön afalafal ei? Ei mwän a wor an pwüüng pwe lupwen a allük ngeni ekewe ngününgau ra aleasochis ngeni.”
MAR 1:28 Iwe, ewe pworaus usun Jesus a müttir chöfetal ekis meinisin lon unusen ewe fanü Kalilea.
MAR 1:29 Mürin, Jesus me James me Johannes pwal ekoch nöün kewe chon kaiö ra feila seni ewe imwen felikis o feila lon imwen Simon me Andru.
MAR 1:30 Iwe, inen pwülüen Simon we a eäni samaun pwichikar o a kon won an peet. Lon ewe chök otun ra asile ngeni Jesus usun neminewe.
MAR 1:31 Iwe, Jesus a tolong ren, a amwöchü pöün o apwätai. Iwe, ewe pwichikar a müttir wes, mürin neminei a angang ngeniir.
MAR 1:32 Lupwen akkar a tuputiu, aramas ra uwato ren Jesus ekewe chon samau meinisin, pwal chokewe mi wor anün rochopwak wor.
MAR 1:33 Iwe, aramas meinisin seni ewe telinimw ra chufengen mwen asamen ewe imw.
MAR 1:34 Iwe, Jesus a apöchöküla chomong chon samau seni sokopaten ar samau, a pwal asüela chomong anün rochopwak, nge esap mwüt ngeni ekewe anün rochopwak pwe repwe apasa och, pun ra silei iö i.
MAR 1:35 Wünümweeränin sorotän ewe rän, lupwen akkar esamwo tötä, Jesus a pwätä o towu seni ewe imw. A feila lükün ewe telinimw lon eu leni ia esap wor aramas ie o a iotek.
MAR 1:36 Nge Simon me chiechian kewe ra towu seni ewe telinimw pwe repwe kütta.
MAR 1:37 Lupwen ar küna, ra üreni, “Aramas meinisin ra resin küttok.”
MAR 1:38 Nge Jesus a üreniir, “Ousipwe feila ngeni pwal ekoch sopw mi arap, pwe üpwe afalafaleer, pun iei popun ai feito.”
MAR 1:39 Iwe, a saifeil lon unusen Kalilea, a afalafal lon ar kewe imwen felikis o asüela ekewe anün rochopwak.
MAR 1:40 Iwe, a wor eman mwän mi rupun pwötür a feito ren Jesus, a fotopwäsuk o tüngormau ngeni pwe epwe alisi. A apasa, “Are ka mochen, ka tongeni alimöchüei.”
MAR 1:41 Iwe, Jesus a fokun tongei, a aitiela pöün o atapa. A üreni, “Üa mochen, kopwe limöch.”
MAR 1:42 Lon ewe chök otun ewe rupun pwötür a müttir wes seni ewe mwän, iwe, a limöchüla.
MAR 1:43 Mürin, Jesus a fokun fönöü ewe mwän o a müttir tinala
MAR 1:44 wesin an üreni, “Nengeni, kosap üreni eman och usun mine a fis ngonuk. Nge kopwe feila ren ewe souasor o pwäri inisum ngeni. Mürin kopwe eäni ewe asor Moses a allük fan iten om ka limöch, pwe epwe alletä ngeni aramas pwe ka limöch.”
MAR 1:45 Nge ewe mwän a feila o apworausafeili ei pworaus ekis meinisin. Iei mine Jesus esap chüen tongeni feila lon ekewe telinimw le pwäpwäla. Nge a feila lon ekewe leni ia esap wor aramas ie. Iwe, ekewe aramas seni ekis meinisin ra feito ren.
MAR 2:1 Ekoch rän mürin Jesus a liwinsefäliti Kapernaum. Iwe, ewe pworaus a chöfetal pwe a nom le imw.
MAR 2:2 Iwe, chomong aramas ra mwichfengen ren, pwe esap chüen wäwä leni, pwal mwo nge ewe leni mwen asamen ewe imw. Iwe, lupwen Jesus a afalafal ngeniir ewe Kapasen Kot
MAR 2:3 föman mwän ra war o mwäreeto eman mwän mi mwök ren.
MAR 2:4 Nge pokiten chomongun aramas resap tongeni mwäreeto ewe mwän ren Jesus. Iei mine ra tötä won osun ewe imw o säresi awenewenen ewe ia Jesus a nom ie. Iwe, wesin ar säresi ra aürätiu ewe lenien kekki ewe mwän mi mwök a kon won.
MAR 2:5 Iwe, lupwen Jesus a küna ar lükülük, a üreni ewe mwän mi mwök, “Nei, om tipis kana ra musala.”
MAR 2:6 Nge mi wor ekoch Sensen Allük ra mot ikenan o ra ekieki lon leluker,
MAR 2:7 “Pwota ätei a iei usun an kapas? A eäni kapasen turunufas. Iö a tongeni amusala tipis, sap Kot echök?”
MAR 2:8 Lon ewe chök otun Jesus a silei mine ra ekieki lon leluker, iei mine a üreniir, “Pwota oua ekieki iei usun lon lelukemi?
MAR 2:9 Meta a mecheres, ai apasa ngeni ei mwän mi mwök, ‘Om tipis kana ra musala,’ are ai apasa, ‘Kopwe ütä, angei kiom o fetal?’
MAR 2:10 Ngang üpwe alükülükü ngenikemi, pwe Nöün Aramas a wor an pwüüng won fanüfan an epwe amusala tipis.” Iei mine a üreni ewe mwän mi mwök,
MAR 2:11 “Üa ürenuk, kopwe angei kiom o feila lon imwom.”
MAR 2:12 Lupwen ir meinisin ra nengeni, ewe mwän a ütä, a angei kian o feila. Iwe, ir meinisin ra wesewesen mairü, ra mwareiti Kot o apasa, “Sisap küna mwo och mi wewe ngeni ei.”
MAR 2:13 Iwe, Jesus a liwinsefäliti arun ewe nomun Kalilea. Mürin ekewe aramas meinisin ra mwicheto ren, iwe, a popuetä le afalafaleer.
MAR 2:14 Lupwen a feila ekis, a küna Lefi nöün Alfäus, eman chon ioni takises, a mot lon an ofes. Jesus a üreni, “Kopwe tapweto müri.” Iwe, Lefi a ütä o tapwela mürin.
MAR 2:15 Mürin Jesus a eti eu mongö lon imwen Lefi. Chomong chon ioni takises me chon tipis ra eti Jesus me nöün kewe chon kaiö le mongö, pun a wor chomong mi tapwela mürin Jesus.
MAR 2:16 Iwe, ekoch Sensen Allük, ir Farisi, ra küna pwe Jesus me ekewe chon tipis me chon ioni takises ra mongöfengen. Iei mine ra aisini nöün kewe chon kaiö, “Pwota ätei a mongöfengen me ekei sokun aramas?”
MAR 2:17 Lupwen Jesus a rongorong ngeni ekei kapas a üreniir, “Esap lomot eman sousafei ngeni aramas mi pöchökül, nge a lomot ngeni chök chon samau. Ngang üsap feito pwe üpwe köri ekewe chon pwüng, pwe ekewe chon tipis.”
MAR 2:18 Lon eu fansoun nöün Johannes Soupapatais kewe chon kaiö me ekewe Farisi ra echikefel. Iwe, ekoch aramas ra feito ren Jesus o aisini, “Pwota nöün Johannes kewe chon kaiö me nöün ekewe Farisi chon kaiö ra echikefel, nge noumw kewe chon kaiö resap echikefel?”
MAR 2:19 Jesus a pölüeniir, “Oua ekieki pwe ekewe chon kökkö ngeni eu kametipen apwüpwülü ra echikefel lupwen ewe mwän apwüpwülü söfö a nom rer? Resap fokun echikefel lon fansoun an nonom rer.
MAR 2:20 Nge epwe war ewe rän lupwen aramas repwe angei seniir ewe mwän apwüpwülü söfö fän pöchökül, seni ena rän repwapw echikefel.
MAR 2:21 Esap wor eman epwe teiätä ekam mangaku mi fö won echö üf mi mes, pun are epwe föri iei usun, ewe ekam mangaku mi fö epwe kamwei ewe üf mi mes, pwe ewe kam epwe wattela.
MAR 2:22 Esap pwal wor eman epwe alölöülong wain mi fö lon pör seni silin man mi mes, pun ewe wain mi fö epwe chök amökkü ewe pör, iwe, ewe wain epwe nitiu le pwül, nge ewe pör epwe mök. Pun wain mi fö sipwe chök alölöülong lon pör mi fö.”
MAR 2:23 Iwe, a fis pwe Jesus me nöün kewe chon kaiö ra fetal lon tanipin wiich lon ewe ränin sapat. Iwe, nöün chon kaiö ra popuetä fichi umwun uän wiich.
MAR 2:24 Iwe, ekewe Farisi ra üreni Jesus, “Pwota noumw kewe chon kaiö ra föri mine esap pwüng lon allükün ach lamalam lon ewe ränin sapat?”
MAR 2:25 Jesus a pölüeniir, “Ousap mwo aleani mine Tafit me chienan kewe ra föri lupwen ra echik?
MAR 2:26 Lon fansoun ewe Souasor mi Lap Apiatar, Tafit a tolong lon imwen Kot o mongö ewe pilawa mi pin, esap wor eman a tongeni mongö, chilon chök ekewe souasor. Iwe, a pwal ngeni chienan kewe pwe repwe mongö.”
MAR 2:27 A pwal üreniir, “Ewe ränin sapat a fis fänäsengesin aramas, nge sap aramas fänäsengesin ewe ränin sapat.
MAR 2:28 Iei mine Nöün Aramas fen i Sounemenemen ewe ränin sapat.”
MAR 3:1 Mürin Jesus a liwinsefäliti ewe imwen felikis. Ikenan a wor eman mwän mi mä efoch pöün.
MAR 3:2 Iwe, ekoch aramas ra pwal nom ikenan, pun ra kütta och popun mine repwe aturu Jesus won. Iei mine ra mamasa Jesus are epwe apöchöküla ewe mwän lon ewe ränin sapat.
MAR 3:3 Iwe, Jesus a üreni ewe mwän mi mä efoch pöün, “Kopwe feito ikei mwen ekewe aramas.”
MAR 3:4 Mürin a aisini ekewe aramas, “Met allükün ach we lamalam a mwüt ngenikich sipwe tongeni föri lon ewe ränin sapat? Sipwe föri mine a öch ngeni aramas, are sipwe föri mine a ngau? Sipwe amanaueer, are sipwe amälaar?” Nge ir ra chök fanafanala.
MAR 3:5 Jesus a nenengeniir fän an song, nge a pwal letipeta, pun ra üleförea lon letiper. Mürin a üreni ewe mwän, “Kopwe aitiewu poumw.” Iwe, a aitiewu pöün, iwe, a pöchökülsefäl.
MAR 3:6 Mürin ekewe Farisi ra towu o müttir popuetä le pwüngüpwüngfengen me ekoch chiechien Herotes usun ar repwe rawangauei Jesus.
MAR 3:7 Iwe, Jesus me nöün kewe chon kaiö ra feila ngeni ewe nomun Kalilea, nge eu mwichen aramas mi chomong ra tapwela mürin. Ra feito seni Kalilea me Jutea,
MAR 3:8 pwal seni Jerusalem me Itumea, seni ewe fanü ötiuen ewe chanpupu Jortan me ekewe fanü arun ekewe telinimw Tirus me Siton. Ekei aramas meinisin ra feito ren Jesus, pun ra rongorong meinisin mine Jesus a föri.
MAR 3:9 Pokiten ewe mwichen aramas mi chomong, Jesus a üreni nöün kewe chon kaiö pwe repwe amolätä efoch wa fän itan, pwe ekewe aramas resap achachach ngeni.
MAR 3:10 Pun Jesus a fen apöchöküla chomong aramas, iei mine chokewe mi samau ra chök etietifengen pwe repwe tongeni atapa Jesus.
MAR 3:11 Iteiten fansoun lupwen ekewe aramas mi wor ngününgau wor ra küna Jesus, ra chapetiu mwan o kökkö fän leüömong, “En Nöün Kot!”
MAR 3:12 Nge Jesus a allük ngeniir, pwe resap pwäri ngeni eman usun i.
MAR 3:13 Iwe, Jesus a feita won eu chuk o a kökkörato ätekewe i a mochen pwe repwe feito ren. Iwe, ra feito ren.
MAR 3:14 Iwe, a filätä engol me ruoman pwe repwe eti, ir ätekewe a pwal aita ngeniir chon künö, pun i epwe tiniirela pwe repwe afalafal,
MAR 3:15 epwe pwal wor ar manaman, pwe repwe asüela ekewe anün rochopwak.
MAR 3:16 Ikkei iten ekewe engol me ruoman a filiiretä: Simon, ätewe Jesus a aita ngeni Petrus,
MAR 3:17 James me Johannes pwiin we, ir nöün Sepeti, Jesus a aita ngeniir “Poanerkes” a wewe ngeni “Nöün Chopulap”,
MAR 3:18 Andru, Filip, Partolomeus, Mateus, Tomas, James nöün Alfäus, Tatäus, Simon seni Kana,
MAR 3:19 pwal Jutas Iskariot, ätewe mi afangamä Jesus.
MAR 3:20 Mürin Jesus a liwiniti imwan. Iwe, eu mwichen aramas mi chomong a pwal mwicheto ren, iei mine esap wor än Jesus me nöün kewe chon kaiö fansoun ar repwe mongö.
MAR 3:21 Iwe, lupwen aramasan kewe ra rong usun, ra feila pwe repwe turufi, pun ra apasa, “A umwes.”
MAR 3:22 Iwe, ekoch Sensen Allük mi feito seni Jerusalem ra apasa, “Ewe anü Pelsepul a wäni. I ewe samolun anün rochopwak a ngeni enan mwän an manaman, pwe epwe asüela ekewe anün rochopwak.”
MAR 3:23 Iei mine Jesus a körato ekewe aramas o a kapas ngeniir lon pworausen awewe, “Ifa usun, Satan epwe tongeni asüela Satan?
MAR 3:24 Are eu mwü a kinikinfesen o fiufengen, ei mwü epwe chök tala.
MAR 3:25 Are eu famili a kinikinfesen o fiufengen, ei famili esap nonomola.
MAR 3:26 Iei usun are mwün Satan a kinikinfesen, esap tongeni nonomola, nge epwe tala o wesila.
MAR 3:27 Esap wor eman a tongeni töpöchökülelong lon imwen eman mwän mi pöchökül o angei pisekin, are esap akom föti ewe mwän mi pöchökül. Mürin epwapw tongeni angei pisekin lon imwan.
MAR 3:28 Enlet, üpwe ürenikemi, pwe än aramas tipis meinisin repwe musala, pwal ar kewe kapasen turunufas ra apasa,
MAR 3:29 nge are eman a eäni kapasen turunufas usun Ngünmifel, esap fokun tongeni musala, pun a föri och tipis esap wor komusalan lon fansoun esemüch.”
MAR 3:30 Jesus a apasa ei ititin kapas, pun ekoch aramas ra apasa, “Eman ngününgau a nom won.”
MAR 3:31 Mürin inen Jesus me pwiin kewe ra war. Ra ütä lükün ewe imw o ra tinala pworaus ren, pwe epwe feito rer.
MAR 3:32 Iwe, chomong aramas ra mot ünükün Jesus o ra üreni, “Nengeni, inom we me pwiüm kewe me fefinom kewe ra nom lükün, ra mochen churuk.”
MAR 3:33 Jesus a pölüeniir, “Iö inei me iö kana pwii?”
MAR 3:34 Iwe, Jesus a nenengeni ekewe aramas mi mot ünükün o apasa, “Nengeni, ikkei ir inei me pwii kana.
MAR 3:35 Pun iö kana ra föri letipen Kot, ir pwii me fefinei me inei.”
MAR 4:1 Iwe, Jesus a popuetasefäli an afalafal arun ewe nomun Kalilea. Iwe, eu mwichen aramas mi chomong ra mwicheto ren, pwe i a tötä won efoch wa o mot won. Ewe wa a ekis kinewu lon ewe noom, nge ekewe aramas meinisin ra nom le pi.
MAR 4:2 Iwe, a aiti ngeniir chomong mettoch lon pworausen awewe o üreniir,
MAR 4:3 “Oupwe rongorong! Eman aramas a feila pwe epwe amworafeili pwükil.
MAR 4:4 Iwe, lupwen a amworafeili ekewe pwükil, ekoch föün ra mworotiu lepekin al, nge ekewe machang ra feito o äniir.
MAR 4:5 Ekoch föün ra mworotiu won lenien föüföü ia esap watte pwül ie. Ra pwükükai, pun resap nom lon pwül mi malül.
MAR 4:6 Nge lupwen akkar a tötä, pwichikaran a apwichi ekewe kükün irä. Pokiten esap wor warer, ra müttir pwasala.
MAR 4:7 Pwal ekoch föün ra mworotiu lein iräfölüföl. Iwe, ekewe iräfölüföl ra mämäritä o amopu ekewe irä, pwe resap tongeni ua.
MAR 4:8 Iwe, nge pwal ekoch föün ra mworotiu lon pwül mi mürina. Ekewe irä ra pwukuta, ra märitä o ua. Ekoch leir ra uani ilik, ekoch wone, nge ekoch ipükü.”
MAR 4:9 Iwe, Jesus a apasa, “Iö a wor selingan epwe rongorong!”
MAR 4:10 Iwe, lupwen Jesus a emanüla, ekewe mi eti me ekewe engol me ruoman ra feito ren o tüngor ngeni, pwe epwe awewe ngeniir wewen ekewe pworausen awewe.
MAR 4:11 Iwe, Jesus a üreniir, “Kot a fen ngenikemi ewe tufich ämi oupwe silei usun monomonen ewe Mwün Kot. Nge chokewe mi nom lükün repwe rong meinisin lon pworausen awewe.
MAR 4:12 ‘Iei usun repwe nenengeni me nenengeni, nge resap küna och, repwe rongorong me rongorong, nge resap wewe ren. Pun are repwe wewe ren, repwe kul ngeni Kot, nge i epwe amuserela.’”
MAR 4:13 Mürin Jesus a aisiniir, “Ifa usun, ousap weweiti ei pworausen awewe? Ifa usun, ämi oupwe tongeni weweiti och pworausen awewe me mürin?
MAR 4:14 Ewe chon fofot a amworafeili kapasen Kot.
MAR 4:15 Ekoch aramas ra wewe ngeni ekewe pwükil ra mworotiu lepekin al. Lupwen ra rongorong kapasen Kot, Satan a müttir feito o angei seni lon leluker ewe kapas.
MAR 4:16 Ekoch aramas ra wewe ngeni ekewe pwükil ra mworotiu won lenien föüföü. Pun lupwen ra rongorong ewe kapasen Kot, ra müttir etiwa fan pwapwa.
MAR 4:17 Pokiten ewe kapas esap tongeni warar lor, esap tongeni nomotam. Pun lupwen a fis osukosuk me riaföü pokiten ewe kapasen Kot, ra müttir fangatä.
MAR 4:18 Pwal ekoch aramas ra wewe ngeni ekewe pwükil ra mworotiu lein ekewe iräfölüföl. Ir chokewe ra rongorong ewe kapasen Kot,
MAR 4:19 nge öürek usun manauen ikenai me atuputupun wöün fanüfan me mochenian ekewe sokopaten mettoch ra tolong lon leluker o amopu ewe kapasen Kot pwe esap tongeni ua.
MAR 4:20 Nge ekoch aramas ra wewe ngeni ekewe pwükil ra mworotiu won pwül mi mürina. Iwe, ra rong ewe kapasen Kot, ra etiwa o ua. Ekoch ra uani ilik, ekoch wone, pwal ekoch ipükü.”
MAR 4:21 Iwe, Jesus a sopwela an afalafal, “Ifa usun, eman epwe uwato eu lamp mi tin o anomu fän eu sepi are fän eu peet? Ifa usun, esap anomu ewe lamp won lenian?
MAR 4:22 Mettoch meinisin mi opola epwe chök pwäpwäla, pwal mettoch meinisin mi pwölüla epwe chök pwäla lon saram.
MAR 4:23 Iö a wor selingan epwe rongorong.”
MAR 4:24 Jesus a pwal üreniir, “Oupwe aü selingemi ngeni mine oua rongorong! Ewe chök aükük oua aea le aükük, iei ewe aükük Kot epwe aea ngenikemi, nge epwe fen lap seni.
MAR 4:25 Pun iö a wor an, Kot epwe achomongala, nge iö esap wor an, Kot epwe pwal mwo nge angei seni ewe ekis a wor ren.”
MAR 4:26 Iwe, Jesus a sopwela le pworaus ngeniir, “Mwün Kot a wewe ngeni eman aramas a amworafeili pwükil won an tanipi.
MAR 4:27 A möür lepwin o pwäta lerän. Ewe pwükil a kinoputä o mämäritä, nge püsin i esap weweiti ifa usun an mämäritä.
MAR 4:28 Ewe pwül a püsin föri met ekewe irä repwe mämäritä o ua ren. Akomwan a kinoputä o mämäritä, mürin a fis etin, nge lesopolan a wor uan.
MAR 4:29 Nge lupwen ekewe föün wiich ra mau, ewe aramas a kini, pun a tori fansoun kinikinin räs.”
MAR 4:30 Jesus a pwal apasa, “Met sipwe tongeni awewe ngeni ewe Mwün Kot? Are meni sokun pworausen awewe sipwe aea pwe sipwe tongeni awewe ngeni?
MAR 4:31 A wewe ngeni eföü pwükilin irä, ewe mi fokun kükün seni pwükilin irä meinisin. Eman aramas a angei ei sokun föün pwükil o fotukätiu le pwül.
MAR 4:32 Mürin ekis chök fansoun a märitä o wiliti efoch irä mi watte seni irä meinisin lon an tanipi. A wor palan mi watte, pwe ekewe machang ra ässito wor o föri faser won ia a nür ie.”
MAR 4:33 Iwe, Jesus a afalafala ewe kapasen Kot ngeni ekewe aramas o eäni chomong sokun pworausen awewe usun ekei. A pworaus ngeniir lon ükükün met ra tongeni weweiti.
MAR 4:34 Esap tongeni pworaus ngeniir won och are esap eäni pworausen awewe. Nge lupwen a emanüla ren nöün kewe chon kaiö, a awewe ngeniir wewen ekewe pworaus.
MAR 4:35 Iwe, lekuniolun ewe chök rän Jesus a üreni nöün kewe chon kaiö, “Ousipwe feila epek ewe noom.”
MAR 4:36 Iwe, ra feila seni ewe mwichen aramas mi chomong o tötä won efoch wa, Jesus a fen nom won. Iwe, ra uweela Jesus won ewe wa, a pwal wor ekoch wa ra fitiirela.
MAR 4:37 Iwe, a müttir fis pwe eu asepwäl mi pöchökül a enito o ekewe no ra nulong lon waar we, pwe a arap ngeni an epwe kokola.
MAR 4:38 Jesus a nom mürin ewe wa, a möür o ülüta won eu pilu. Iwe, ekewe chon kaiö ra föngünätä o aisini, “Sense, kosap lolilenäsini ach sipwe le feiengau?”
MAR 4:39 Iwe, Jesus a ütä o kapas ngeni ewe asepwäl, “Kopwe manasösötiu!” A pwal üreni ekewe no, “Oupwe lüala.” Iwe, ewe asepwäl a söötiu, a pwal fokun lüala won matau.
MAR 4:40 Mürin Jesus a üreni nöün kewe chon kaiö, “Pwota oua niuokus? Ifa usun, ousap lüküei?”
MAR 4:41 Iwe, ra fokun niuokus o kapasfengen lefiler, “Iö chök ätei pwe asepwäl me no ra mwo nge aleasochisi?”
MAR 5:1 Iwe, Jesus me nöün kewe chon kaiö ra tori epek ewe nomun Kalilea lon ewe fanü Kerasa.
MAR 5:2 Lon ewe otun Jesus a tötiu me won ewe wa, eman mwän mi wor eman ngününgau won a feito seni ekewe lenien peias, pwe epwe churi.
MAR 5:3 Ei mwän a nonom lein ekewe peias, nge esap chüen wor eman a tongeni föti, sap pwal mwo nge ngeni sein.
MAR 5:4 Fan chomong pöün me pechen ra föfö ngeni selimächä, nge iteitan a chök mwütifeseni ekewe sein o kupi ewe selimächä won pechen. Ei mwän a fokun pöchökül, pwe esap wor eman a tongeni amwöchü.
MAR 5:5 Lerän me lepwin a fetalfeil lein ekewe peias pwal won ekewe chukutekison, a pupuchör o akinasa inisin ngeni fau.
MAR 5:6 Iwe, lupwen a küna Jesus me toau, a sä ngeni o fotopwasuketiu me mwan.
MAR 5:7 Iwe, a puchörütä o apasa, “Jesus, Nöün Kot ewe mi Unusen Tekia, met ka mochen föri ngeniei? Üa tüngor ngonuk mwen mesen Kot pwe kosap ariaföüüei.”
MAR 5:8 A nöünöü ei ititin fos, pun Jesus a fen kapas ngeni, “Kopwe towu seni ei mwän, en ngün mi ngau!”
MAR 5:9 Iwe, Jesus a aisini, “Ifa itom?” Ewe mwän a pölüeni, “Itei mwichemong, pun äm aia chomong.”
MAR 5:10 Iwe, a fokun tüngormau ngeni Jesus pwe esap asüela ekewe ngününgau seni ewe fanü.
MAR 5:11 Iwe, a wor eu pwiin pik ra mongöfeil won ekewe chukutekison mi arap ngeni ewe leni.
MAR 5:12 Iei mine ekewe ngününgau ra tüngor ngeni Jesus, “Kopwe tinikeemila ren ekewe pik o kopwe mwüt ngenikem pwe aipwe tolong lor.”
MAR 5:13 Iwe, Jesus a mwüt ngeniir. Ekewe ngününgau ra towu seni ewe mwän o tolong lon ekewe pik. Ekewe pik meinisin arapakan ruungeröü ra sätiu me won palen ewe chuk o turulong lon ewe noom. Iwe, ra mop meinisin.
MAR 5:14 Mürin ätekewe mi foleni ekewe pik ra süla o apworausafeili ewe pworaus lon ekewe telinimw me ekewe sopw. Iwe, ekewe aramas ra feila ngeni ewe leni, pwe repwe nengeni mine a fis.
MAR 5:15 Lupwen ra feito ren Jesus, ra küna ewe mwän a wor eu mwichemongun ngününgau won me mwan. A mot ikenan a üföüf o miritila. Iwe, ra niuokus.
MAR 5:16 Iwe, chokewe mi küna ei manaman ra apworausa ngeni ekewe aramas mine a fis ngeni ewe mwän mi wor ngününgau won, pwal mine a fis ngeni ekewe pik.
MAR 5:17 Iei mine chon ewe fanü ra tüngor ngeni Jesus epwe towu seni fanüer.
MAR 5:18 Iwe, lupwen Jesus a tötä won ewe wa, ewe mwän mi wor ngününgau won me lom, a fokun tüngor ngeni Jesus pwe epwe eti.
MAR 5:19 Nge Jesus esap mwüt ngeni, pwe a üreni, “Kopwe feila lon leniom ren om famili o apworausa ngeniir meinisin mine ewe Samol a föri ngonuk, pwal usun an eäni ümöümöch ngonuk.”
MAR 5:20 Iei mine ewe mwän a feila seni, a tori ewe fanü itan Engol Telinimw o apworausafeili mine Jesus a föri fän itan. Iwe, ekewe aramas meinisin mi rongorong ei pworaus ra mairü ren.
MAR 5:21 Iwe, Jesus a liwinsefäliti epek ewe noom. Ikenan eu mwichen aramas mi chomong ra mwicheto ren.
MAR 5:22 Mürin Jairus eman meilapen imwen felikis a feito. Iwe, lupwen a küna Jesus, a chapetiu arun pechen
MAR 5:23 o a fokun tüngormau ngeni, “Nei nengin a arap ngeni mäla. Kose mochen kopwe feito o iseis poumw won, pwe epwe pöchökülela o chikarsefäl.”
MAR 5:24 Mürin Jesus a etala Jairus. Nge chomong aramas ra tapwela mürin o etiepach ngeni.
MAR 5:25 Iwe, a wor eman fefin a eäni samaun fefin mi fokun watte lon ükükün engol me ruu ier.
MAR 5:26 A fokun riaföü ren chomong sousafei ra säfeeni. A pwal fangala meinisin mine a wor ren fän iten an epwe küna pöchökül, nge an samau a chök wattela.
MAR 5:27 Lupwen ei fefin a rong usun pworausen Jesus, a feito me lükisökürün lein ewe mwichen aramas o atapa üfan,
MAR 5:28 pun a ekieki lon lelukan, “Are üpwe chök atapa üfan, üpwe pöchökülsefäl.”
MAR 5:29 Lon ewe chök otun a atapa üfen Jesus we, an we samau a köüla. Iwe, a mefi lon inisin pwe a chikar seni an we samau.
MAR 5:30 Lon ewe chök otun Jesus a mefi pwe och manaman a towu seni, iei mine a sap ngeni ewe mwichen aramas o a aisiniir, “Iö we a atapa üfei?”
MAR 5:31 Nöün kewe chon kaiö ra pölüeni, “Ka fen küna ekewe aramas mi etiepach ngonuk, nge pwota ka ais, ‘Iö we a atapaei?’”
MAR 5:32 Iwe, Jesus a nenefeil pwe epwe küna iö we a föri ei.
MAR 5:33 Nge ewe fefin a silei mine a fis ngeni. A feito o fotopwäsuk arun pechen Jesus fän chechech me niuokus. Iwe, a pwäri ngeni Jesus meinisin mine a fis ngeni.
MAR 5:34 Iwe, Jesus a üreni, “Nei fefin, om lükülük a apöchökülokotä. Kopwe feila fän kinamwe pwe ka chikar seni om samau.”
MAR 5:35 Nge lupwen Jesus a chüen kakapas, ekoch nöün Jairus chon künö ra war o üreni, “Noumw nengin a mäla. Pwota ka chüen aweiresi ewe sense?”
MAR 5:36 Iwe, Jesus esap afäli mine ra apasa, nge a üreni Jairus, “Kosap niuokus, kopwe chök lükü.”
MAR 5:37 Mürin Jesus esap chüen mwüt ngeni eman epwe fiti, pwe Petrus chök me James me pwiin we Johannes.
MAR 5:38 Iwe, lupwen ra tori imwen Jairus, Jesus a küna ar akürang o rongorong ar kechü fan leüömong me ar ngüngüres.
MAR 5:39 Iwe, a tolong lon ewe imw o a üreniir, “Pwota oua akürang o kechü? Ewe nengin esap mäla, pwe a chök möür.”
MAR 5:40 Iwe, ra takiri, iei mine a atorowu me lon ewe imw. Nge a angei semen ewe nengin me inan pwal nöün ülüman chon kaiö o emweniirelong lon ewe ruum ia ewe nengin a kon ie.
MAR 5:41 Iwe, Jesus a amwöchü pöün ewe nengin o üreni, “Talita koum!” wewen “Kükün nengin, üa ürenuk, kopwe pwätä!”
MAR 5:42 Lon ewe chök otun ewe nengin a pwätä o fetal. Lon ei fansoun ei nengin a ierini engol me ruu. Lupwen a fis ei manaman ekewe aramas ra fokun mairü.
MAR 5:43 Nge Jesus a allük ngeniir, pwe resap üreni eman mine a fis, a pwal üreniir pwe repwe amongöü.
MAR 6:1 Iwe, Jesus a feila seni ewe leni o liwinsefäliti poputän telinimwan, nge nöün kewe chon kaiö ra etala.
MAR 6:2 Iwe, lon ewe ränin sapat Jesus a popuetä le afalafal lon ewe imwen felikis. Chomong mi rongorong an afalafal ra mairü ren. Ra aisini, “Ia ei aramas a angei me ie ekei ekiek? Met sokun tipachem a tori? Ifa usun, ren met a tongeni föri ekei manaman?
MAR 6:3 Ifa usun, sap ätei ewe chon kaü imw nöün Maria, pwiin James, Josef, Jutas me Simeon? Ifa usun fefinan kewe resap nom rech?” Iei mine resap etiwa.
MAR 6:4 Iwe, Jesus a üreniir, “Eman soufos a wor meninin ekis meinisin, nge esap wor meninin lon poputän telinimwan, me ren aramasan me an famili.”
MAR 6:5 Iwe, Jesus esap tongeni föri manaman ikenan, pwe a chök iseis pöün won ekoch aramas mi samau o apöchöküleereta.
MAR 6:6 A fokun neneiruk pokiten ekewe aramas resap lükü. 6.6-13 Mürin Jesus a feila ngeni ekewe sopw ünükün o a afalafala ekewe aramas.
MAR 6:7 A körifengeni nöün kewe engol me ruoman chon kaiö o tiniirela akaruoman. Iwe, a ngeniir manaman won ekewe ngününgau,
MAR 6:8 a pwal allük ngeniir, “Ousap uwei och lon ämi sai. Ousap uwou amötümi, ämi pwotou, ousap pwal uwou moni lon pokitemi, pwe oupwe chök uwei efoch wok.
MAR 6:9 Oupwe ipweipw sus, nge ousap uwou aruachön üfemi.”
MAR 6:10 A pwal üreniir, “Lon meni leni ra etiwakemi, oupwe nonom lon ewe imw tori ämi oupwe towu seni ewe telinimw.
MAR 6:11 Nge are oupwe tori eu telinimw, nge resap etiwakemi ika aüselingakemi, oupwe towu seni ei telinimw o wichikala pwülün fän pechemi, pwe epwe eu minen pwärätä ngeniir, pwe ra mwäl.”
MAR 6:12 Iwe, ra feila o afalafala ekewe aramas pwe repwe aier seni ar tipis.
MAR 6:13 Ra asüela chomong anün rochopwak, ra pwal epiti chomong chon samau ren lö seni föün olif o apöchöküleer.
MAR 6:14 Iwe, ewe king Herotes a rong usun pworausen Jesus, pwe itan a föüla ekis meinisin. Ekoch aramas ra apasa, “Johannes Soupapatais a manausefäl seni mäla. Iei popun a wor an tufich le föri ekewe manaman.”
MAR 6:15 Nge ekoch ra apasa, “Ätei Elias,” nge pwal ekoch ra apasa, “Ätei eman soufos usun eman ekewe soufosun lom.”
MAR 6:16 Lupwen Herotes a rong ekei kapas a apasa, “Johannes, ätewe üa pöküela üan a manausefäl.”
MAR 6:17 Pun Herotes a allük, pwe repwe turufi Johannes, repwe föti o atolonga lon imwen fötek. Herotes a föri ei föför pokiten Herotias pwülüen pwiin we Filip, i a pwülüeni seni.
MAR 6:18 Pun Johannes Soupapatais a apasa, “Esap pwüng ngonuk om kopwe pwülüeni pwülüen pwiüm we.”
MAR 6:19 Iei mine Herotias a fokun song ngeni Johannes o a ekieki an epwe niela. Nge esap tongeni pokiten Herotes.
MAR 6:20 Iwe, Herotes a meniniti Johannes, pun a silei pwe i eman mwän mi pwüng o pin, iei mine a tümwünü, pwe esap tori feiengau. Herotes a sani an epwe rongorong ngeni än Johannes afalafal, inamwo ika a tolong lon watten osukosuk, lupwen a rongorong ngeni.
MAR 6:21 Nge feilfeil a tori eu fansoun mi fich pwe än Herotias ekiek epwele pwönüetä. Ei a fis lon ränin uputiuen Herotes, lupwen a föri eu kametip fän iten nöün kewe nöüwis, nöün kewe meilapen sounfiu me ekewe aramas tekia lon Kalilea.
MAR 6:22 Iwe, nöün Herotias we föpwül a tolong lon ewe leni o a pworuk, pwe Herotes me chokewe mi eti le mongö ra pwapwaiti. Iei mine a üreni ewe föpwül, “Met ka mochen üpwe ngonuk? Ngang üpwe ngonuk meinisin.”
MAR 6:23 A pwal allükülükü an pwon fän akapel, “Meinisin mine ka tüngor üpwe ngonuk, inamwo ika esopun mwüi.”
MAR 6:24 Iei mine ewe föpwül a feila ren inan we o aisini, “Met ngang üpwe tüngor?” Nge inan we a pölüeni, “Kopwe tüngor möküren Johannes Soupapatais.”
MAR 6:25 Iwe, ewe föpwül a müttir liwinla ren ewe king o tüngor ngeni, “Üa mochen pwe iei chök kopwe ngeniei möküren Johannes Soupapatais lon eu sepi.”
MAR 6:26 Iwe, ewe king a fokun letipeta ren ei tüngor. Nge pokiten an pwon fän akapel pwal pokiten chokewe mi eti le mongö a tipeeu ngeni an we tüngor.
MAR 6:27 Iei mine lon ewe chök otun Herotes a tinala eman sounfiu seni ewe mwichen chon tümwünü ewe king o a allük ngeni, pwe epwe uwato möküren Johannes. Iwe, ewe sounfiu a feila lon ewe imwen fötek o pöküela üen Johannes.
MAR 6:28 Mürin a uwala ewe mökür lon eu sepi o ngeni ewe föpwül, nge i a ngeni inan we.
MAR 6:29 Iwe, lupwen nöün Johannes kewe chon kaiö ra rong ei pworaus, ra feila o angei somän Johannes o peiaseni.
MAR 6:30 Iwe, nöün Jesus kewe chon kaiö ra liwinto ren Jesus o apworausa ngeni meinisin mine ra föri, pwal mine ra eäni afalafal.
MAR 6:31 A fokun wor chomong aramas mi feito o feila, pwe Jesus me nöün kewe chon kaiö esap chüen mwo nge wor fansoun ar repwe mongö. Iei mine Jesus a üreniir, “Ousipwe feila oukich chök lon eu leni mi toau seni lenien aramas, pwe oupwe tongeni ekis asösö.”
MAR 6:32 Iei mine ra tötä won efoch wa o saila ngeni eu leni mi toau seni lenien aramas.
MAR 6:33 Nge chomong aramas ra küneer lupwen ra saila o ra müttir silleniir. Iei mine ra feila seni ekewe telinimw meinisin o säla mwer, pwe ra tori ewe leni mwen Jesus me nöün kewe chon kaiö resamwo tori.
MAR 6:34 Iwe, lupwen Jesus a tötiu seni ewe wa, a küna eu mwichen aramas mi chomong. Iwe, a fokun tongeer, pun ra wewe ngeni sip esap wor nöür chon mas. Iei mine a popuetä le afalafala ngeniir chomong mettoch.
MAR 6:35 Iwe, lupwen a lekuniol, nöün kewe chon kaiö ra feito ren o üreni, “A fen lekuniol, nge ei leni a toau seni lenien aramas.
MAR 6:36 Kopwe tinala ekewe aramas, pwe repwe feila lon ekewe leni me sopw mi arap pwe repwe kamö aner mongö.”
MAR 6:37 Nge Jesus a üreniir, “Ämi oupwe ngeniir met repwe mongö.” Iwe, ra aisini, “Ka mochen aipwe feila kamö pilawa won ükükün ruopükü föün moni silifer, pwe repwe mongö?”
MAR 6:38 Iwe, Jesus a aisiniir, “Fiteföü pilawa mi wor remi? Oupwe feila o pii.” Nge lupwen ra küna, ra üreni Jesus, “A wor limeföü pilawa me ruoman ik.”
MAR 6:39 Mürin Jesus allük ngeni nöün kewe chon kaiö, “Oupwe üreni ekewe aramas, pwe repwe mottiu lein ekewe fetil lon eu mwich me eu mwich.”
MAR 6:40 Iei mine ekewe aramas ra mottiu lon en me an mwich, ipükü lon ekoch mwich, nge lime pwal lon ekoch mwich.
MAR 6:41 Mürin Jesus a angei ekewe limeföü pilawa me ekewe ruoman ik, a sachetä läng o iotekin kilisou ngeni Kot won. A kinikisiretiu o a ngeni nöün kewe chon kaiö, pwe repwe ineti ngeni ekewe aramas. A pwal ineti ekewe ruoman ik, pwe epwe tori ekewe aramas meinisin.
MAR 6:42 Iwe, ir meinisin ra mongö o ra mötüla.
MAR 6:43 Mürin ekewe chon kaiö ra ionifengeni o amasoua engol me ruu chüük ren lusun ekewe pilawa me ekewe ik.
MAR 6:44 Iwe, iteiten ekewe mwän mi mongö ükükün limungeröü.
MAR 6:45 Iwe, lon ewe chök otun Jesus a apacheua nöün kewe chon kaiö, pwe repwe tötä won ewe wa o akomwola mwan Petsaita epek ewe noom. Nge i epwe üreni ekewe aramas pwe repwe liwinla ngeni lenier.
MAR 6:46 Mürin an kapong ngeni ekewe aramas, Jesus a feita won eu chuk pwe epwe iotek.
MAR 6:47 Lupwen a pwinila, ewe wa a tori lukalapen ewe noom, nge Jesus a emanüla winifanü.
MAR 6:48 Iwe, a küna pwe nöün kewe chon kaiö ra pekus le fötül, pun ewe asepwäl a enito me mwer. Iwe, wünümweerän ina epwe lefilen kulok ülüngat me kulok wonu, Jesus a feito rer, nge a fetal won matau. Jesus a fetaleto o sänger seniir.
MAR 6:49 Nge lupwen ra küna pwe a fetal won ewe matau, ra ekieki pwe i eman anü. Iei mine ra puchörütä,
MAR 6:50 pun ir meinisin ra küna i o ra fokun rükö ren. Lon ei chök otun Jesus a kapas ngeniir o üreniir, “Oupwe tipepwora! Ngang ei. Ousap niuokus.”
MAR 6:51 Mürin Jesus a tötä won waar we, nge ewe asepwäl a manasösötiu. Iwe, ir meinisin ra fokun weitifengeniir,
MAR 6:52 pun resap mwo weweiti met wewen än Jesus ineti ekewe föün pilawa, resap fokun miritila ren.
MAR 6:53 Iwe, ra saila pekilan ewe noom o tori ewe fanü lon Kenesaret. Ikenan ra emisini waar we.
MAR 6:54 Nge lupwen ra tiwelong me won ewe wa, ekewe aramas ra müttir silleni Jesus.
MAR 6:55 Iei mine ra säfeil lon unusen ewe fanü o uwato ekewe chon samau mi kon won kier lon ekewe leni ia ra rong pwe Jesus a nom ie.
MAR 6:56 Iwe, ekis meinisin ia Jesus a feila ie lon ekewe sopw, telinimw me leni, ekewe aramas ra uwato ekewe chon samau lon ekewe lenien amömö o ra tüngor ngeni Jesus pwe epwe mwüt ngeni ekewe chon samau repwe atapa lepwülün üfan. Iwe, ir meinisin mi atapa ra pöchökületä seni ar samau.
MAR 7:1 Iwe, ekoch Farisi me Sensen Allük mi feito seni Jerusalem ra mwicheto ren Jesus.
MAR 7:2 Ra küna pwe ekoch me lein nöün Jesus kewe chon kaiö ra mongö aner won pöür mi limengau, wewen pwe resamwo talü pöür lon ewe lapalap ekewe Farisi ra aiti ngeniir.
MAR 7:3 (Pun ekewe Farisi me ekewe chon Juta meinisin ra apwönüetä mine ar kewe lewo ra eäni kait ngeniir. Resap tongeni mongö are resap mwo talü pöür lon ei sokun lapalap.
MAR 7:4 Lupwen ra feito seni ekewe lenien amömö, resap mongö och tori ra wes me tütü. Iwe, ra fokun apwönüetä chomong sokun allük ra angei seni ar kewe lewo, usun ar talü kap, nape me sepi seni piras.)
MAR 7:5 Iei mine ekewe Farisi me ekewe Sensen Allük ra aisini Jesus, “Pwota noumw kewe chon kaiö resap apwönüetä pwüngün ekewe allük seni ach kewe lewo, nge ra mongö aner won pöür mi limengau?”
MAR 7:6 Iwe, Jesus a pölüeniir, “A fokun pwüng mine Aisea a fen osuni usumi. Ämi oua chon likatuputup usun a fen mak: ‘Kot a apasa: Ekei aramas ra asamoluei ren kapas chök, nge leluker a fokun toau seniei.
MAR 7:7 A lomotongau ar fel ngeniei, pun ra aiti ngeni aramas förien aramas allük, usun itä nge ai kewe allük.’
MAR 7:8 Ämi oua likitala an Kot kewe allük, nge oua aleasochis ngeni aitien aramas.”
MAR 7:9 Iwe, Jesus a pwal üreniir, “Oua fokun tipachem le öüöngaua än Kot allük fän iten ämi oupwe öüöchü aitien ämi kewe lewo.
MAR 7:10 Pun Moses a allük, ‘Kopwe asamolu semom me inom,’ a pwal apasa, ‘Iö a oteki saman are inan epwe fokun ninnila.’
MAR 7:11 Nge ämi oua aiti ngeni aramas pwe are eman aramas a wor ren och mettoch epwe aea le alisi ngeni saman are inan, nge a apasa, ‘Iei Korpan,’ (wewen: Ei metoch an Kot)
MAR 7:12 ei aramas esap chüen wisen alisi saman are inan.
MAR 7:13 Ren ei sokun kait oua aiti ngeni aramas oua aücheangauei än Kot kapas. A pwal wor chomong mettoch oua föri usun ei.”
MAR 7:14 Mürin Jesus a körsefäli eu mwichen aramas o a üreniir, “Oupwe aüselingaei ämi meinisin, pwe oupwe wewela.
MAR 7:15 Esap wor och mine a tolong lon awen eman aramas seni me lükün a tongeni alimengaua. Nge met mi towu seni lon awen eman aramas, ina mine a alimengaua.
MAR 7:16 [Iö a wor selingan epwe rongorong.]”
MAR 7:17 Iwe, lupwen Jesus a feila seni ewe mwichen aramas, a tolong lon ewe imw, iwe, nöün kewe chon kaiö ra tüngor ngeni, pwe epwe awewe ngeniir wewen ewe pworausen awewe.
MAR 7:18 Iwe, Jesus a üreniir, “Ifa usun, oua pwal wewemang usun ekewe lusun? Ousap weweiti, pwe meinisin mine a tolong lon awen eman aramas seni lükün esap alimengaua,
MAR 7:19 pun esap tolong lon lelukan, pwe lon chükükanan, mürin a towu seni lon inisin.” (Ren ei pworausen awewe Jesus a pwärätä pwe mongö meinisin a öch an aramas repwe mongö.)
MAR 7:20 Iwe, Jesus a pwal apasa, “Met a towu seni lon awen eman aramas, ina mine a alimengaua.
MAR 7:21 Pun seni me lon leluken eman aramas a towu ekiek mi ngau: ekiekin mocheisou, solä, ninni, lisowu,
MAR 7:22 maicha, föföringau, atuputup, mochenia, lolowo, kapasingau, lamalamtekia me miritingau.
MAR 7:23 Ekei mettoch meinisin ra towu seni lon leluken eman aramas o ra alimengaua i.”
MAR 7:24 Mürin Jesus a feila seni ikenan o feila lon eu fanü arap ngeni ewe telinimw Tirus. Iwe, a tolong lon eu imw, nge esap mochen an eman epwe silei pwe a nom lon. Nge esap tufich an epwe opola.
MAR 7:25 Iwe, eman fefin a wor eman nöün nengin a wor eman ngününgau won, a rong usun pworausen Jesus. A müttir feito ren o fotopwäsuk arun pechen.
MAR 7:26 Ei fefin eman fin lükün Israel, a uputiu lon ewe fanü Fonisia lon Siria. Neminei a tüngormau ngeni Jesus pwe epwe atowu ewe ngününgau seni nöün we nengin.
MAR 7:27 Nge Jesus a pölüeni, “Sipwe akomwen amongöü ekewe semirit, pun esap pwüng ach sipwe angei anen ekewe semirit o mone ngeni ekewe kolak.”
MAR 7:28 Nge ewe fefin a pölüeni, “Ewer, ai samol. Inamwo, nge ekewe kolak fän chepel ra pwal mongö ekewe mworomworen mongö mi mworotiu seni än ekewe semirit chepel.”
MAR 7:29 Iwe, Jesus a üreni ewe fefin, “Pokiten ka pölüeni lon ei ititin fos, kopwe liwinla le imwom. Ikenan kopwe küna pwe ewe ngününgau a towu seni noumw we nengin.”
MAR 7:30 Iwe, lupwen ewe fefin a tori imwan, a küna nöün we pwe a kon won peet, nge ewe ngününgau a towu seni.
MAR 7:31 Mürin, Jesus a feila seni ewe fanü Tirus o feila ngeni Siton tori ewe nomun Kalilea, nge a pwerelong lon ewe fanü itan Engol Telinimw.
MAR 7:32 Iwe, ekoch aramas ra uwato ren Jesus eman mwän mi selingepüng o awemwöch. Ra tüngormau ngeni Jesus, pwe epwe iseis pöün won.
MAR 7:33 Iei mine Jesus a emwenala ewe mwän seni ewe mwichen aramas, pwe epwe emanüla. A tikilong lon selingen ewe mwän, a atuf o atapa chönawan.
MAR 7:34 Mürin Jesus a sachetä läng, a ngasalap o üreni ewe mwän, “Effata!” wewen “Sukula!”
MAR 7:35 Iwe, lon ewe chök otun selingen ewe mwän a sukula, a newenewöchüla le kapas.
MAR 7:36 Mürin Jesus a allük ngeni ekewe aramas pwe resap apworausa ngeni eman mine a fis. Lon an allüküchou ngeniir, nge ra chök alapala ar apworausafeili ewe pworaus.
MAR 7:37 Iwe, aramas meinisin mi rongorong ei pworaus ra fokun ing o apasa, “A fokun mürina meinisin mine a föri. A mwo nge föri pwe chon selingepüng repwe tongeni rong, nge chon awemwöch repwe tongeni kapas.”
MAR 8:1 Mürin ekoch chök fansoun pwal eu mwichen aramas mi chomong ra chufengen. Lupwen a itela aner mongö, Jesus a körato nöün kewe chon kaiö o üreniir,
MAR 8:2 “Üa fokun tongei ekei aramas, pun ra nom rei lon ükükün ülüngat rän, nge iei a itela aner mongö.
MAR 8:3 Are üpwe tiniirela lon lenier, nge üsap akom amongöniir, repwe mesarochola o turula won al, pun ekoch me leir ra feito seni toau.”
MAR 8:4 Iwe, nöün kewe chon kaiö ra aisini, “Ia me lon ei leni mi pön sipwe tongeni künakün mongö me ie pwe epwe naf ach sipwe amongöni ekei aramas?”
MAR 8:5 Jesus a aisiniir, “Fiteföü pilawa a wor remi?” Ra pölüeni, “Füföü.”
MAR 8:6 Iwe, a allük ngeni ekewe aramas, pwe repwe mottiu le pwül. Mürin a angei ekewe füföü pilawa o iotekin kilisou ngeni Kot won. A kiniretiu o ngeni nöün kewe chon kaiö pwe repwe ineti ngeni ewe mwichen aramas. Iwe, ra föri usun mine Jesus a apasa.
MAR 8:7 Mi pwal wor rer ekoch kükün ik. Jesus a iotekin kilisou wor, iwe, a üreni nöün kewe chon kaiö pwe repwe pwal ineti ngeni ekewe aramas.
MAR 8:8 Iwe, ir meinisin ra mongö o mötüla. Mürin nöün kewe chon kaiö ra amasoua fisu chüük ren lusun ekewe mongö.
MAR 8:9 Iwe, iteiten ekewe aramas mi nom lon ei otun ina epwe ükükün rüanüngeröü. Mürin, Jesus a tiniirela lon lenier.
MAR 8:10 Lon ewe chök otun Jesus me nöün kewe chon kaiö ra tötä won efoch wa o ra sai ngeni ewe fanü Talmanuta.
MAR 8:11 Iwe, ekoch me lein ekewe Farisi ra feito ren Jesus o ra popuetä le anini ngeni. Ra mochen särei Jesus, iei mine ra tüngor ngeni pwe epwe föri eu manaman, pwe epwe pwä are Kot a tipeeu ngeni.
MAR 8:12 Nge Jesus a ngasalap o apasa, “Pwota ei pilon aramasen ikenai ra tüngor eu manaman? Enlet, üpwe ürenikemi pwe esap wor eu manaman epwe pwä ngeni ei pilon aramas.”
MAR 8:13 Iwe, Jesus a likitiirela, a tötä won efoch wa o saila pekilan ewe noom me epek.
MAR 8:14 Iwe, nöün Jesus kewe chon kaiö ra manlükala ar repwe anafa woser pilawa, pun a chök wor rer eföü pilawa won ewe wa.
MAR 8:15 Iwe, Jesus a üreniir, “Oupwe tümwünüfichi o afälikemi ren ewe iis än ekewe Farisi me Herotes.”
MAR 8:16 Iwe, ekewe chon kaiö ra popuetä kapasfengen lefiler, “A apasa ei ititin fos, pun esap wor rech pilawa.”
MAR 8:17 Nge Jesus a silei mine ra kapasfengen lefiler, iei mine a aisiniir, “Pwota oua kapasfengen usun an esap wor remi pilawa? Ifa usun, ousap mwo silei are weweöch ren? Ifa usun, lelukemi a chüen üleförea?
MAR 8:18 A wor mesemi, pwota ousap küna och? A wor selingemi, pwota ousap rongorong? Ousap chechemeni
MAR 8:19 lupwen üa kinikisietiu ekewe limeföü pilawa fän iten ekewe limungeröü aramas? Fitu chüük oua amasoua ren ekewe lusun mongö?” Iwe, ra pölüeni, “Engol me ruu chüük.”
MAR 8:20 “Nge lupwen üa kinikisietiu ekewe füföü pilawa fän iten ekewe rüanüngeröü aramas, fitu chüük oua amasoua ren ekewe lusun mongö?” Ra pölüeni, “Fisu chüük.”
MAR 8:21 Iwe, Jesus a aisiniir, “Ifa usun, oua chüen wewemang?”
MAR 8:22 Iwe, ra tori Petsaita. Ikenan ekoch aramas ra uwato ren Jesus eman mwän mi chun. Iwe, ra tüngormau ngeni pwe epwe atapa.
MAR 8:23 Iwe, Jesus a amwöchü pöün ewe mwän mi chun o emwenala lükün ewe sopw. A atufa mesen ewe mwän o iseis pöün won, mürin Jesus a aisini, “Ifa usun, ka tongeni künok?”
MAR 8:24 Iwe, ewe mwän a nenela o apasa, “Ewer, üa küna aramas, nge ra lapalapeni lapalapen irä mi fetalfeil.”
MAR 8:25 Mürin Jesus a iseissefäl pöün won mesen ewe mwän. Iwe, mesan kana ra newenewenela o öchsefäl, pwe a tongeni künaöchu mettoch meinisin.
MAR 8:26 Mürin Jesus a tinala ewe mwän lon lenian o üreni, “Kosap chüen liwinsefälilong lon ei sopw.”
MAR 8:27 Mürin Jesus me nöün kewe chon kaiö ra feila lon ekewe sopw arap ngeni Seserea Filipi. Iwe, lupwen ar fetal, Jesus a aisiniir, “Met aramas ra apasa usi?”
MAR 8:28 Iwe, ra üreni, “Ekoch aramas ra apasa, pwe en Johannes Soupapatais, ekoch ra apasa, pwe en Elias, nge pwal ekoch ra apasa, pwe en eman ekewe soufos.”
MAR 8:29 Mürin Jesus a aisiniir, “Nge ämi, met oua apasa usi?” Petrus a pölüeni, “En Kraist!”
MAR 8:30 Iwe, Jesus a allük ngeniir, “Ousap fokun üreni eman och usi!”
MAR 8:31 Mürin Jesus a afalafala nöün kewe chon kaiö, “Nöün Aramas epwe fokun tolong lon riaföü watte, epwe küna koput me ren ekewe souakom, ren ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä.”
MAR 8:32 Iwe, Jesus a fokun afata ngeniir usun ei. Iei mine Petrus a emwenala ekis o a popuetä le apwüngü.
MAR 8:33 Nge Jesus a kul ngeni nöün kewe chon kaiö o a apwüngü Petrus me mwer. Iwe, a üreni, “Kopwe sü seniei, Satan! Pun om ekiek esap pop seni Kot, nge a pop seni aramas.”
MAR 8:34 Mürin Jesus a körato ewe mwichen aramas me nöün kewe chon kaiö, iwe, a üreniir, “Are eman a mochen etiei, epwe pölükü manauan, epwe mwärei an iräpenges o tapweto müri.
MAR 8:35 Pun iö a mochen amanaua manauan epwe pöüt seni. Nge iö a pölükü manauan fän itei pwal fän iten ewe Pworausen Manau epwe amanaua manauan.
MAR 8:36 Epwe met lomoten än eman aramas epwe feiöchüni feiöchün unusen fanüfan, nge manauan epwe pöüt seni?
MAR 8:37 Esap wor och eman aramas a tongeni fangala pwe epwe angesefäli manauan.
MAR 8:38 Are eman a säwäsiniei me ai kewe kapas me lein ei täppin aramas mi kirikiringau me tipis ngeni Kot, Nöün Aramas epwe pwal säwäsini lupwen epwe war me ekewe chon läng mi pin lon lingen Saman.”
MAR 9:1 Iwe, Jesus a pwal apasa, “Üpwe ürenikemi, pwe mi wor ekoch aramas ikkei resap mäla, pwe repwe mwo küna Mwün Kot epwe war fän manaman.”
MAR 9:2 Mürin wonu rän Jesus a emwenala Petrus, James me Johannes won eu chuk mi tekia, pwe repwe imwüla ikenan. Iwe, lupwen ar nengeni Jesus, a wilila won inisin.
MAR 9:3 Üfan kana ra molupolup o fokun pwechepwech, esap wor eman chon apwecha üf won fanüfan a tongeni apwecha üf an epwe iei usun.
MAR 9:4 Iwe, ekewe ülüman chon kaiö ra küna Elias me Moses lupwen ar kapasfengen me Jesus.
MAR 9:5 Iwe, Petrus a üreni Jesus, “Sense, a fokun öch ach sipwe nonom ikkei. Aipwe aüetä ülüngat imw mangaku, eu fän itom, eu fän iten Moses pwal eu fän iten Elias.”
MAR 9:6 Petrus me chienan kewe ra fokun niuokus, pwe Petrus esap chüen silei mine epwe apasa.
MAR 9:7 Mürin eu kuchu a feito o anürürela. Iwe, ra rong eu möngüngü a towu me lon ewe kuchu, “Iei i nei mi achengicheng, oupwe aüselinga.”
MAR 9:8 Iwe, ra müttir nenefeil, nge resap chüen küna eman a nom rer, pwe Jesus chök.
MAR 9:9 Iwe, lupwen ra feitiu me won ewe chuk, Jesus a allük ngeniir, “Ousap üreni eman met oua küna, tori Nöün Aramas epwe manausefäl seni mäla.”
MAR 9:10 Ekewe chon kaiö ra aleasochisi mine Jesus a allük ngeniir, nge püsin irfengen lefiler ra kapasfengen won ekei kapas o ais, “Met wewen manausefäl seni mäla?”
MAR 9:11 Iwe, ra aisini Jesus, “Pwota ekewe Sensen Allük ra apasa, pwe Elias epwe akomwen feito?”
MAR 9:12 Nge Jesus a pölüeniir, “Mi pwüng pwe Elias epwe akomwen feito, pwe epwe amolätä mettoch meinisin. Nge pwota chök a mak lon ekewe Toropwe mi Pin, pwe Nöün Aramas epwe tolong lon riaföü watte o küna koput?
MAR 9:13 Nge üpwe ürenikemi pwe Elias a fen feito, nge aramas ra föri ngeni mine ra mochen, usun a fen mak lon ekewe Toropwe mi Pin.”
MAR 9:14 Iwe, lupwen ar liwinto ren ekewe ekoch chon kaiö, ra küna eu mwichen aramas mi chomong ra pwelifeiliir, pwal ekoch Sensen Allük ra anini ngeniir.
MAR 9:15 Lon ewe chök otun, lupwen ewe mwichen aramas mi chomong ra küna Jesus, ra fokun mairü, ra säla ren o kapong ngeni.
MAR 9:16 Iwe, Jesus a aisini nöün kewe chon kaiö, “Met oua aninifengen won me ekewe Sensen Allük?”
MAR 9:17 Iwe, eman mwän me lon ewe mwich a pölüeni, “Sense, üa uwato nei ät reöm, pun a wor eman ngününgau won, pwe esap tongeni kapas.
MAR 9:18 Lupwen ewe ngün a pöchökül me won, a aturala le pwül, iwe, a puropurowu seni lon awan, a asürüngü ngiin o chewararela unusen inisin. Üa tüngor ngeni noumw kewe chon kaiö pwe repwe atowu ewe ngün me won, nge resap tongeni.”
MAR 9:19 Iwe, Jesus a üreniir, “Ämi eu täppin aramas mi lükülükümang. Ifa langatamen fansoun ai üpwe nom remi? Ifa langatamen fansoun ai üpwe engila ngenikemi? Oupwe uwato rei ewe ät.”
MAR 9:20 Iwe, ra uwato ewe ät ren Jesus. Nge lupwen ewe ngününgau a küna Jesus, lon ewe chök otun a achecha ewe ät, iwe, a turula le pwül o asokopölafetalei, nge puropur a puropurowu seni lon awan.
MAR 9:21 Iwe, Jesus a aisini semen ewe ät, “Ifa langatamen fansoun än noumw ei samau?” Ewe sam a pölüeni, “A chök popuetä seni an kükün.
MAR 9:22 Fan chomong ewe ngününgau a sotuni an epwe niela ren an aturalong lon ekkei pwal lon koluk. Kose mochen kopwe tongekem o alisikem, are ka tongeni.”
MAR 9:23 Nge Jesus a pölüeni, “Are en ka tongeni lükülük! Eman mi lükülük a tongeni mettoch meinisin.”
MAR 9:24 Lon ewe chök otun semen ewe ät a kökkö fan leüömong, “Üa lükülük! Kopwe alisiei, pwe üsap chüen lükülükümang.”
MAR 9:25 Iwe, lupwen Jesus a küna, pwe chomong aramas ra säto rer, a apwüngü ewe ngününgau, “En ngün mi afisätä awemwöch me selingepüng üa allük ngonuk pwe kopwe towu seni ewe ät, nge kosap fokun liwinsefäliti.”
MAR 9:26 Iwe, ewe ngününgau a puchörütä, a achechecha ewe ät o a towu seni. Iwe, ewe ät a konola won pwül usun chök eman mi mäla. Iei mine chomong me lein ekewe aramas ra apasa, “A mäla.”
MAR 9:27 Nge Jesus a amwöchü pöün ewe ät o a apwätai.
MAR 9:28 Mürin än Jesus tolong lon ewe imw, nöün kewe chon kaiö ra aisini Jesus lupwen a emanüla, “Pwota äm aisap tongeni atowu ewe ngününgau?”
MAR 9:29 Nge Jesus a pölüeniir, “Esap wor och mettoch ei sokun ngün epwe tongeni süla ren, pwe ren iotek chök.”
MAR 9:30 Iwe, Jesus me nöün kewe chon kaiö ra feila seni ewe leni o ra pwerelong lon Kalilea. Nge Jesus esap mochen pwe aramas repwe silei ia a nom ie,
MAR 9:31 pun a afalafala nöün kewe chon kaiö o a üreniir, “Nöün Aramas epwe tolong le pöün aramas, iwe, repwe niela. Nge mürin ülüngat rän epwe manausefäl.”
MAR 9:32 Nge nöün kewe chon kaiö resap weweiti mine a eäni afalafal, nge ra pwal niuokus ar repwe kapas ais ngeni.
MAR 9:33 Iwe, ra tori Kapernaum. Nge lupwen Jesus a nom le imw, a aisini nöün kewe chon kaiö, “Met oua aninifengen won lupwen sia fetal won al?”
MAR 9:34 Nge ir ra chök fanafanala, pun ra aninifengen won al ika iö a lap seniir meinisin.
MAR 9:35 Iwe, Jesus a mottiu, a körifengeni nöün kewe engol me ruoman chon kaiö o a üreniir, “Are eman a mochen pwe epwe akom seni meinisin, i epwe kükümwir seniir meinisin, epwe pwal chon angang ngeniir meinisin.”
MAR 9:36 Mürin a angei eman semirit o a anomu me mwer, a romi o üreni nöün kewe chon kaiö,
MAR 9:37 “Are eman a etiwa eman ekei semirit fän itei, wewen chök nge a pwal etiwaei, nge are eman a etiwaei, esap chök etiwaei, nge a pwal etiwa ewe mi tiniei.”
MAR 9:38 Iwe, Johannes a üreni Jesus, “Sense, äm aia küna eman mwän a atowu anün rochopwak fän itom, nge aia üreni pwe epwe ükütiu, pun esap chiechiach.”
MAR 9:39 Nge Jesus a üreniir, “Ousap aükätiu an angang. Pun eman mi föri eu manaman fän itei, esap tongeni kapasingau usi me mürin.
MAR 9:40 Pun iö esap ü ngenikich, i a fitikich.
MAR 9:41 Enlet, üpwe ürenikemi, are eman epwe aünü ngenikemi eu kapen koluk, pokiten oua chon tapwela mürin Kraist, i epwe fokun angei liwinin.”
MAR 9:42 “Are eman aramas epwe föri pwe eman ekewe kükün mi lüküei epwe föri tipis, epwe fen öch ngeni ewe aramas, pwe epwe riritä fän üan eföü fau mi föümong o epwe koturutiu le matau.
MAR 9:43 Are poumw a atupukelong lon tipis, kopwe pökü. Epwe fen öch ngonuk om kopwe pöüefoch le tolong lon manau esemüch, lap seni om kopwe pöüruofoch le tolong lon hell,
MAR 9:44 [ia ekewe möttö mi äniir resap mäla, nge ewe ekkei mi keniir esap kunula.]
MAR 9:45 Are pecheöm a atupukelong lon tipis, kopwe pökü. Epwe fen öch ngonuk om kopwe pecheefoch le tolong lon manau esemüch, lap seni om kopwe pecheruofoch le tolong lon hell,
MAR 9:46 [ia ekewe möttö mi äniir resap mäla, nge ewe ekkei mi keniir esap kunula.]
MAR 9:47 Are mesom a atupukelong lon tipis, kopwe alusawu. Epwe fen öch ngonuk om kopwe meseeföü le tolong lon manau esemüch, lap seni om kopwe meseruoföü le tolong lon hell,
MAR 9:48 ia ekewe möttö mi äniir resap mäla, nge ewe ekkei mi keniir esap kunula.
MAR 9:49 Aramas meinisin repwe limelimöch ren ekkei, usun eu asoren mongö a limelimöch ren salt.
MAR 9:50 Salt a mürina. Nge are salt a nepatapatala, met oupwe föri ngeni pwe epwe nekenikensefäl? Epwe wor ewe salten chiechifengen lefilemi, oupwe pwal afisätä kinamwe lefilemi.”
MAR 10:1 Mürin Jesus a feila seni ewe leni o a feila lon ewe fanü Jutea me pekilan ewe chanpupu Jortan. Iwe, chomong aramas ra mwicheto ren, nge i a afalafaleer usun a piin föri.
MAR 10:2 Iwe, ekoch Farisi ra feito ren pwe ra mochen särei. Ra aisini, “Ifa usun, a pwüng me lon allükün ach lamalam pwe eman epwe tongeni mwü seni pwülüan?”
MAR 10:3 Jesus a pölüeniir, “Met sokun allük Moses a ngenikemi?”
MAR 10:4 Nge ir ra pölüeni, “Moses a mwüt ngeni eman mwän pwe epwe makkei echö toropwen mwüfesen, mürin epwe tinala pwülüan.”
MAR 10:5 Nge Jesus a üreniir, “Moses a makkei ei allük pokiten ämi tipeförea.
MAR 10:6 Nge seni lepoputän, lupwen Kot a föri fanüfan, a föri mwän me fefin.
MAR 10:7 Iei mine eman aramas epwe likitala saman me inan o pache ngeni pwülüan.
MAR 10:8 Iwe, ekewe ruoman repwe wiliti eu chök inis. Iei mine resap chüen ruoman, pwe eman chök.
MAR 10:9 Iwe, mine Kot a rifengeni, esap wor eman aramas epwe mwütifeseni.”
MAR 10:10 Lupwen ra tosefälilong lon ewe imw, ekewe chon kaiö ra aisini Jesus usun ekei kapas.
MAR 10:11 Iwe, a üreniir, “Eman mwän mi tinala pwülüan, nge a pwülüeni pwal eman fefin, ätewe a tipisin lisowu ngeni pwülüan we.
MAR 10:12 Nge are eman fefin a tinala pwülüan o a pwülüeni pwal eman mwän, neminewe a tipisin lisowu.”
MAR 10:13 Iwe, ekoch aramas ra uwato nöür semirit ren Jesus, pwe epwe iseis pöün wor, nge ekewe chon kaiö ra apwüngüür.
MAR 10:14 Nge lupwen Jesus a küna mine ra föri, a letipechou o a üreni nöün kewe chon kaiö, “Oupwe mwüt ngeni ekewe semirit pwe repwe feito rei, nge ousap epetiir, pun iö a wewe ngeni ekei semirit epwe mwüni mwün Kot.
MAR 10:15 Enlet, üpwe ürenikemi, ‘Are eman esap etiwa Mwün Kot usun eman semirit, esap tongeni tolong lon.’”
MAR 10:16 Mürin Jesus a romi ekewe semirit, a iseis pöün won eman me eman leir o a afeiöchüür.
MAR 10:17 Iwe, lupwen a popuetasefäli an sai, eman mwän a säto ren, a fotopwäsuk mwan o tüngor ngeni, “Sense mi mürina, met ngang üpwe föri pwe üpwe manaueni manau esemüch?”
MAR 10:18 Jesus a üreni, “Pwota ka aita ngeniei mürina? Esap wor eman a mürina pwe Kot echök.
MAR 10:19 Ka silei ekewe allük: ‘Kosap niela aramas, kosap lisowu, kosap solä, kosap eäni kapas chofona usun eman, kosap eäni föförün atuputup, kopwe asamolu semom me inom.’”
MAR 10:20 Iwe, ewe mwän a üreni Jesus, “Sense, ekei allük meinisin üa apwönüretä seni lealüali.”
MAR 10:21 Iwe, Jesus a newenewen ngeni pokiten an tongei o a üreni, “Eu chök ka mang ngeni. Kopwe feila o amömöla meinisin mine ka eäni. Nge ewe moni kopwe fang ngeni chon wöüngau, pwe epwe wor woumw lon läng. Mürin kopwe feito o tapweto müri.”
MAR 10:22 Lupwen ewe mwän a rongorong ekei kapas, a wowongau, iwe, a feila fän letipeta, pun wöün a fokun chomong.
MAR 10:23 Iwe, Jesus a kulu ngeni nöün kewe chon kaiö o a üreniir, “A men fokun weires ngeni ekewe aramas mi pisekisek ar repwe tolong lon Mwün Kot.”
MAR 10:24 Iwe, ekewe chon kaiö ra mairü ren ekei kapas. Nge Jesus a kapassefäl ngeniir, “Ämi nei kana, a men fokun weires an eman epwe tolong lon Mwün Kot.
MAR 10:25 A men fokun weires ngeni eman aramas mi pisekisek an epwe tolong lon Mwün Kot, lap seni än eman kamel epwe tolong lon pwangen efoch tikek.”
MAR 10:26 Iwe, ekewe chon kaiö ra fokun mairü ren ekei kapas o ra aisfengen lefiler, “Iö chök a tongeni küna manau?”
MAR 10:27 Nge Jesus a newenewen ngeniir o a üreniir, “Ei sokun esap tufich ngeni aramas, nge sap ina usun me ren Kot. Pun mettoch meinisin ra tufich ngeni Kot.”
MAR 10:28 Mürin Petrus a üreni Jesus, “Nengeni, äm aia likitala meinisin o tapwela mürum.”
MAR 10:29 Nge Jesus a üreniir, “Enlet, üpwe ürenikemi, pwe iö a likitala imwan, ika pwiin, ika fefinan, ika inan, ika saman, ika nöün kana, ika fanüan fän itei pwal fän iten ewe Pworausen Manau,
MAR 10:30 ewe aramas epwe angei liwinin mi fokun watte lon ei fansoun. Epwe angei fan ipükü imwan, pwiin, fefinan, inan, nöün me fanüan, pwal riaföü pokiten ewe kapasen Kot. Iwe, lon ewe fansoun epwe feito epwe pwal angei ewe manau esemüch.
MAR 10:31 Iwe, chomong mi akom repwe kükümwir, nge chomong mi kükümwir repwe akom.”
MAR 10:32 Lon ei fansoun Jesus me nöün kewe chon kaiö ra fetal won ewe al ngeni Jerusalem. Iwe, Jesus a akomwola mwen ekewe chon kaiö, nge ir ra fokun rükö, nge ekewe aramas mi tapwela mürin ra niuokus. Mürin Jesus a aimwüela nöün kewe chon kaiö o a kapassefäl ngeniir usun mine epwe fis ngeni.
MAR 10:33 Iwe, a üreniir, “Oupwe rongorong. Sipwele feita Jerusalem. Ikenan Nöün Aramas epwe tolong le pöün ekewe souasor mi lap me ekewe Sensen Allük. Repwe atipisi pwe epwe mäla, nge repwe atolonga lepöün ekewe chon lükün Israel.
MAR 10:34 Ir repwe urumwotei o atufa, repwe wichi o niela. Nge mürin ülüngat rän epwe manausefälitä.”
MAR 10:35 Mürin nöün Sepeti kewe James me Johannes ra feito ren Jesus o ra üreni, “Sense, mi wor och aia mochen kopwe föri fän item.”
MAR 10:36 Jesus a aisiniir, “Met oua mochen ai üpwe föri fän itemi?”
MAR 10:37 Iwe, ra pölüeni, “Lupwen kopwe mot lon om lenien motun king lon mwum mi ling, kopwe mwüt ngenikem pwe aipwe mot ünükum, eman lepelifichum, nge eman lepelimöngum.”
MAR 10:38 Nge Jesus a üreniir, “Ämi ousap silei mine oua tüngor. Ifa usun, oua tongeni ün seni ewe kapen riaföü ngang üpwe ünümi? Ifa usun, oua tongeni papatais ngeni ewe papatais ngang üpwe papatais ngeni?”
MAR 10:39 Iwe, ra pölüeni, “Ewer, aia tongeni.” Nge Jesus a üreniir, “Mi pwüng, oupwe fokun ünümi seni ewe kap ngang üpwe ünümi, oupwe pwal fokun papatais ngeni ewe papatais ngang üpwe papatais ngeni.
MAR 10:40 Nge esap wor ai pwüüng ai üpwe filätä iö epwe mot pelifichi ika pelimöngi. Nge Kot epwe ngeni chokewe a filiiretä, pwe repwe mot lon ekei leni.”
MAR 10:41 Iwe, lupwen ekewe engol chon kaiö ra rong usun ei kapas, ra song ngeni James me Johannes.
MAR 10:42 Iei mine Jesus a körifengeniir o üreniir, “Oua silei, pwe ätekewe ra nemeni chon lükün Israel ra nemeniir fän pwora, nge ekewe mi lap ra nemeniir fän pöchökül.
MAR 10:43 Nge esap iei usun lefilemi. Pun iö a mochen lap leimi, epwe chon angang ngenikemi,
MAR 10:44 nge iö a mochen pwe epwe chon akom leimi, epwe nöümi amanau fän itemi meinisin.
MAR 10:45 Pun ewe mwo nge Nöün Aramas esap feito pwe aramas repwe angang ngeni, nge a feito pwe epwe angang ngeniir o fangala manauan fänäsengesiir pwe möön manauer.”
MAR 10:46 Mürin Jesus me nöün kewe chon kaiö ra tori Jeriko. Nge lupwen ar towu seni fiti eu mwichen aramas mi chomong, Partimeus nöün Timäus, eman chon chun mi tütüngor lifangan, a momot lepekin al.
MAR 10:47 Iwe, lupwen a rongorong pwe Jesus ewe re Nasaret a feito, a popuetä le kökkö, “Jesus, Nöün Tafit, kopwe tongeei!”
MAR 10:48 Iwe, chomong aramas ra song ngeni o üreni pwe epwe fanafanala. Nge i a chök alapala an kökkö, “Nöün Tafit, kopwe tongeei!”
MAR 10:49 Nge Jesus a üla o apasa, “Oupwe körato.” Iwe, ra köri ewe mwän mi chun o üreni, “Kopwe chipila, kopwe ütä, Jesus a köruk.”
MAR 10:50 Iwe, Partimeus a pwilitatiu üfan sekit, a mwetetä o feila ren Jesus.
MAR 10:51 Iwe, Jesus a üreni, “Met ka mochen üpwe föri ngonuk?” Ewe mwän mi chun a pölüeni, “Sense, ngang üa mochen pwe üpwe küna mwei.”
MAR 10:52 Jesus a üreni, “Kopwe feila, om lükülük a alisuk.” Lon ewe chök otun ewe mwän a küna mwan o tapwela mürin Jesus won ewe al.
MAR 11:1 Iwe, lupwen ar fetal ngeni Jerusalem o ra arap ngeni Petfake me Petania, ra tori ewe chukun Olif. Iwe, Jesus a tinala ruoman nöün kewe chon kaiö, pwe repwe akomwola mwer.
MAR 11:2 A üreniir, “Oupwe feila lon ewe sopw mi nom mwemi. Nge lupwen oua tori, oupwe küna eman nienifön aas esap mwo wor eman a wawa. Oupwe apichi o emwenato.
MAR 11:3 Nge are eman epwe ürenikemi, ‘Pwota oua föri ei sokun?’ oupwe üreni, ‘Äm samol a mochen wawa, nge epwe müttir aliwinato ikei.’”
MAR 11:4 Iwe, ra feila o ra küna eman nienifön aas a riri ngeni üren penkasamen eu imw, nge a ütä won al.
MAR 11:5 Iwe, ekoch aramas mi ütä ikenan ra aisiniir, “Met oua föri? Pwota oua apichi ei nienifön aas?”
MAR 11:6 Nge ir ra pölüeni lon ewe chök ititin kapas Jesus a aiti ngeniir. Mürin ekewe mwän ra mwütätä ngeniir.
MAR 11:7 Iwe, ra emwenato ewe nienifön aas ren Jesus o isetä üfer kewe won. Mürin Jesus a mot won.
MAR 11:8 Nge chomong aramas ra ameresala üfer won al, nge pwal ekoch ra pöküetiu palen irä mi muresires o enenala won al.
MAR 11:9 Iwe, ekewe aramas mi akomwola mwan, pwal chokewe mi tapweto mürin ra kökkö, “Mwareiti Kot! Feiöchün ätewe a feito fän iten ewe Samol.
MAR 11:10 Kot epwe afeiöchü wareton mwün semelapach Tafit. Oupwe mwareiti Kot, ämi mi nom lon ekewe leni tekia lon läng.”
MAR 11:11 Iwe, Jesus a tori Jerusalem o tolong lon ewe imwenfel. A nenengeni ekewe mettoch meinisin mi fis lon, nge pokiten a fen lekuniolula, a feila Petania me nöün kewe engol me ruoman chon kaiö.
MAR 11:12 Sorotän ewe rän, lupwen ra liwinsefäl seni Petania, Jesus a echik.
MAR 11:13 Iwe, a küna me toau efoch irä fiik mi kula ren chöön. Iei mine a feil ngeni ewe irä, pwe epwe nengeni are mi wor uan won. Nge lupwen a tori ewe irä fiik, a chök küna chöön, pun esamwo tori fansoun an epwe wor uan.
MAR 11:14 Mürin Jesus a fos ngeni ewe irä, “Esap fokun wor eman epwe mongösefäl uomw.” Iwe, nöün kewe chon kaiö ra rong ekei kapas.
MAR 11:15 Iwe, lupwen ra tori Jerusalem, Jesus a tolong lon ewe imwenfel o a popuetä asüowu ätekewe mi kamö o amömöla. A akulätä ekewe chepel än ekewe chon akasiwili moni me ekewe lenien mot än ekewe chon amömö lisom.
MAR 11:16 Esap mwüt ngeni eman epwe kekifetal och lon ewe imwenfel.
MAR 11:17 Mürin a afalafala ekewe aramas o üreniir, “A mak lon ekewe Toropwe mi Pin pwe Kot a apasa, ‘Ai imwenfel epwe iteni imwen iotek fän iten chon ekewe mwü meinisin.’ Nge ämi oua awili ngeni eu lenien open chon solä.”
MAR 11:18 Iwe, lupwen ekewe souasor mi lap me ekewe Sensen Allük ra rong ekei kapas, ra popuetä le kütta efoch alen ar repwe niela Jesus. Nge ra niuokusiti i, pokiten ewe mwichen aramas ra ingeiti an afalafal.
MAR 11:19 Iwe, lupwen a tori lekuniol, Jesus me nöün kewe chon kaiö ra towu seni ewe telinimw.
MAR 11:20 Lesosorun sorotän ewe rän, lupwen ar fetal won ewe al, ra küna ewe irä fiik, a pwasala meinisin tori waran.
MAR 11:21 Iwe, Petrus a chechemeni mine a fis, iei mine a üreni Jesus, “Sense, nengeni ewe irä fiik ka anümamaua a pwasala.”
MAR 11:22 Jesus a pölüeniir, “Oupwe lükü Kot.
MAR 11:23 Enlet, üpwe ürenikemi, are eman epwe kapas ngeni eu chuk, ‘Kopwe mwöküt seni ei leni o turulong le matau,’ nge esap tipemwaramwar lelukan, pwe a lükü pwe mine a apasa epwe fokun pwönüetä, epwe fokun fis ngeni.
MAR 11:24 Iei mine üpwe ürenikemi: Meinisin mine oua tüngor lon ämi iotek, oupwe lükü pwe oupwe angei, iwe, epwe torikemi.
MAR 11:25 Iwe, lupwen oua ütä le iotek, nge oua chou ngeni eman, oupwe amusala an tipis, pwe Sememi lon läng epwe pwal amusala ämi tipis.
MAR 11:26 [Nge are ousap amusala an tipis, Sememi lon läng esap pwal amusala ämi kewe tipis.]”
MAR 11:27 Iwe, ra pwal liwinsefäliti Jerusalem. Nge lupwen Jesus a fetal lon ewe imwenfel, ekewe souasor mi lap, ekewe Sensen Allük me ekewe souakomwen re Juta ra feito ren
MAR 11:28 o aisini, “Met om pwüüng pwe ka föri ekei mettoch? Iö a ngonuk om pwüüng?”
MAR 11:29 Jesus a üreniir, “Ngang üpwe aisinikemi eu kapas ais. Are oupwe ngeniei pölüan, üpwe pwal ürenikemi fän meni pwüüng üa föri ekei mettoch.
MAR 11:30 Oupwe üreniei ia Johannes a angei me ie an pwüüng pwe epwe papatais, a feito seni Kot ika seni aramas?”
MAR 11:31 Iwe, ra popuetä kapasfengen lefiler, “Met sipwe apasa? Are sipwe üra, ‘A feito seni Kot,’ epwe aisinikich, ‘Pwota chök ousap lükü i.’
MAR 11:32 Nge are sipwe apasa, ‘A feito seni aramas...’” (Ra niuokusiti ekewe aramas, pun meinisin ra lükü pwe Johannes wesewesen eman soufos.)
MAR 11:33 Iei mine ra pölüeni Jesus, “Äm aisap silei.” Iwe, Jesus a üreniir, “Ika ina, pwal ngang üsap ürenikemi fän meni pwüüng üa föri ekei mettoch.”
MAR 12:1 Mürin Jesus a kapas ngeniir lon pworausen awewe: “A wor eman mwän a fotuki eu tanipin wain. A föri eu tit ünükün, a tuw eu pwang fän iten ewe lenien üchüch föün wain o aüetä eu imwen mamas mi tekia lon. Mürin a awisa ekoch chon mälämäl, pwe repwe tümwünü an tanipin wain. Iwe, a saila toau.
MAR 12:2 Nge lupwen a tori fansoun kinikin, a tinala eman nöün chon angang ren ekewe chon mälämäl, pwe epwe ange seniir wisan me lon ekewe föün wain.
MAR 12:3 Iwe, ekewe chon mälämäl ra turufi ewe chon angang, ra wichi o tinala fän an asoulapö.
MAR 12:4 Mürin ewe mine an ewe tanipin wain a tinala pwal eman nöün chon angang. Iwe, ekewe chon mälämäl ra akinasa möküran o föri ngeni sokun föför, pwe epwe säw ren.
MAR 12:5 Iwe, ewe mine an ewe tanipin wain a tinala pwal eman nöün chon angang, nge ir ra niela. Iei usun ra föri ngeni chomong chon angang, ekoch ra wichi, ekoch ra niela.
MAR 12:6 Iwe, a chüen wor eman lusun, iei püsin nöün we a fokun echeni. Amüchülan a tinala nöün we ren ekewe chon mälämäl, pun a üra, ‘Üa lükü, pwe repwe meniniti nei we mwän.’
MAR 12:7 Nge ekewe chon mälämäl ra kapasfengen lefiler, ‘Iei i alemürin, ätei mine an ei tanipi. Oule feito, sipwe niela, pwe sipwe eäni mine an me ren saman.’
MAR 12:8 Iei mine ra turufi nöün we mwän, ra niela o aturawu lükün ewe tanipin wain.”
MAR 12:9 Mürin Jesus a ais, “Met ewe mine an ewe tanipin wain epwe föri? Epwe feito o niela ekei chon mälämäl, nge epwe ngeni pwal ekoch chon mälämäl an we tanipin wain.
MAR 12:10 Oua fen aleani ekei kapas lon ewe Toropwe mi Pin, ‘Ewe fau ekewe chon kaü imw ra pöütala, pun resap aücheani a wiliti ewe föün lepwokuku mi fokun aüchea.
MAR 12:11 Iei än ewe Samol we föför, a fokun amwarar me fän mesach.’”
MAR 12:12 Iwe, ekewe souemwenin Juta ra sotuni ar repwe fötekini Jesus, pun ra silei pwe a afalafala ei pworausen awewe usur. Nge ra niuokusiti ewe mwicheichen aramas, iei mine ra likitala o feila seni.
MAR 12:13 Iwe, ra tinala ekoch Farisi me ekoch chiechien Herotes, pwe repwe rawei Jesus lon an kapas.
MAR 12:14 Iwe, ra feito ren Jesus o üreni, “Sense, äm aia silei pwe ka kapas wenechar, nge kosap ekieki mine aramas ra eäni ekiek. Kosap nenengeni wisen eman, nge ka afalafala usun letipen Kot fän iten aramas. Kopwe ürenikem ika a pwüng ach sipwe mönätiu ach takises ngeni Sisar ika ese pwüng.
MAR 12:15 Ifa usun, sipwe takises ika sisap?” Nge Jesus a silei usun ar likatuputup. Iwe, a üreniir, “Pwota oua sotuni le säreei? Oupwe uwato rei eföü moni silifer, pwe üpwe katol.”
MAR 12:16 Iwe, ra uwato eföü moni ren. Mürin Jesus a aisiniir, “Liosun iö me iten iö ei won ei moni?” Ir ra pölüeni, “Liosun Sisar me itan.”
MAR 12:17 Mürin Jesus a üreniir, “Mi pwüng! Oupwe ngeni Sisar mine än Sisar, nge oupwe ngeni Kot mine än Kot.” Iwe, ra fokun mwar ren mine a pölüeniir won.
MAR 12:18 Mürin ekoch Satusi ra feito ren Jesus, ir chokewe mi apasa pwe aramas resap manausefäl seni mäla. Iwe, ra üreni Jesus,
MAR 12:19 “Sense, Moses a makei ei allük fän itach: ‘Are eman mwän a mäla, nge esap wor nöün me won pwülüan, pwiin ei mwän epwe fokun pwülüeni ei fefin, pwe epwe wor nöün fänäsengesin mwirimwirin pwiin we mi mäla.’
MAR 12:20 Mi wor füman pwiin. Ewe mwänichi a pwülüeni eman fefin, nge lupwen a mäla, esap wor nöün.
MAR 12:21 Mürin ewe aruomanün a pwülüeni ewe fefin, o ätewe a pwal mäla, nge esap wor nöün. Iei usun a pwal fis ngeni ewe aülümanün,
MAR 12:22 pwal ngeni afömanün tori afümanün. Ekewe füman pwipwi ra pwülüeni ewe fefin, ir meinisin ra mäla, nge esap wor nöür. Lesopolan ewe fefin a pwal mäla.
MAR 12:23 Iwe, lon ewe ränin, lupwen ekewe sotup meinisin repwe manausefäl, iö me leir epwe pwülüeni ewe fefin? Pun ir me füman ra pwülüeni.”
MAR 12:24 Mürin Jesus a pölüeniir, “Ämi oua fokun mwäl! Oua silei pwota? Pun ousap silei makkeen ekewe Toropwe mi Pin ika än Kot manaman.
MAR 12:25 Pun lupwen ekewe sotup repwe manausefäl, resap pwüpwülü, pun repwe wewe ngeni ekewe chon läng.
MAR 12:26 Nge usun manausefälin sotup: Ousamwo aleani lon ewe puken Moses usun ewe iräfölüföl mi pulopulen ekkei? Seni lon ewe irä Kot a kapas ngeni Moses, ‘Ngang än Apraham, Isaak me Jakop we Kot.’
MAR 12:27 Kot än ekewe mi manau Kot, nge sap än ekewe mi mäla. Ämi oua fokun mwäl.”
MAR 12:28 Nge a wor eman Sensen Allük ikenan, a rongorong mine ra kapasfengen won. A rongorong pwe Jesus a ngeni ekewe Satusi pölüenöchun ar kapas ais. Iwe, a feito ren Jesus o aisini, “Meni allük a kon aüchea seni meinisin?”
MAR 12:29 Jesus a pölüeni, “Iei ewe allük a kon aüchea, ‘Kopwe aüseling Israel: Ewe Samol ach Kot i chök ewe Samol mi Lapalap.
MAR 12:30 Kopwe echeni ewe Samol om Kot ren unusen lelukom, ren unusen ngünum, ren unusen ekiekum pwal ren unusen tufichum.’
MAR 12:31 Nge iei ewe aruuen allük mi pwal aüchea, ‘Kopwe echeni chon arum usun püsin om echenuk.’ Esap wor eu allük mi aüchea seni ekei ruu allük.”
MAR 12:32 Iwe, ewe Sensen Allük a üreni Jesus, “Mi pwüng, sense, a let mine ka apasa. Ewe Samol, i chök Kot, esap wor eman kot lükün i.
MAR 12:33 Iwe, eman aramas epwe echeni Kot ren unusen lelukan, ren unusen ekiekin me unusen tufichin, epwe pwal echeni chon arun usun chök püsin an echeni. A men fokun aüchea än eman epwe aleasochisi ekei ruu allük, lap seni än epwe eäni asor man me sokopaten asor ngeni Kot.”
MAR 12:34 Iwe, lupwen Jesus a mefi usun an tipachem le pölüeni, a üreni, “Kosap toau seni ewe Mwün Kot.” Mürin chök ei esap chüen wor eman a tongeni ais ngeni Jesus och kapas ais.
MAR 12:35 Lupwen Jesus a afalafal lon ewe imwenfel, a aisini ekewe aramas eu kapas ais, “Ifa usun än ekewe Sensen Allük apasa, pwe Kraist epwe eman mwirimwirin Tafit?
MAR 12:36 Nge Ngünmifel a amefi ngeni Tafit pwe epwe apasa: ‘Ewe Samol a kapas ngeni ai Samol: Kopwe mot lepelifichi tori üpwe anomu chon oputom fän pecheöm.’
MAR 12:37 Ika Tafit a püsin aita ngeni Samol, epwe ifa usun än Kraist epwe tongeni eman mwirimwirin Tafit?” Iwe, ekewe aramas mi chomong ra efich an afalafal.
MAR 12:38 Iwe, Jesus a afalafaleer o üreniir, “Oupwe afälikemi ren ekewe Sensen Allük ra sani ar fetalfeil fän üfer mi langatam, ra pwal sani än aramas repwe kapong ngeniir fän menin lon ekewe lenien amömö,
MAR 12:39 ra aea ekewe lenien mot än ekewe meilap lon ekewe lenien felikis, pwal ekewe leni fän iten aramas mi iteföüla lon ekewe lenien kametip.
MAR 12:40 Ra angemwäli imwen ekewe fefin mi mä pwülüer, mürin ra einga ngeni aramas ar iotek mi langatam. Ätekewe repwe küna apwüng mi fokun chou.”
MAR 12:41 Lupwen Jesus a mot arun ewe lenien asor me lon ewe imwenfel, a nenengeni ekewe aramas mi uwalong ar asor lon ewe lenien asor. Chomong aramas mi pisekisek ra uwalong chomong moni.
MAR 12:42 Mürin eman fefin mi wöüngau a mä pwülüan a feito o uwalong ruoföü kükün kapa, aüchean ina epwe ükükün senis eu.
MAR 12:43 Iwe, Jesus a körifengeni nöün kewe chon kaiö o apasa, “Üpwe ürenikemi pwe ei fefin mi wöüngau a mä pwülüan a uwalong chomong asor lon ewe lenien asor lap seni ekewe aramas meinisin.
MAR 12:44 Pun ir meinisin ra uwalong somwen wöür, nge neminei seni an wöüngau a uwalong meinisin mine a wor ren, a fangala meinisin mine a manau seni.”
MAR 13:1 Iwe, lupwen Jesus a towu seni ewe imwenfel, eman lein nöün kewe chon kaiö a üreni, “Sense, nengeni lingöchün ekewe fau me ekewe imw!”
MAR 13:2 Nge Jesus a üreni, “Ka küna ekewe imw mi watte? Esap fokun wor eföü fau epwe chüen nom lon lenian. Ekewe fau meinisin repwe toropasetiu.”
MAR 13:3 Lupwen Jesus a mot won ewe chukun Olif pekilan ewe imwenfel, Petrus, James, Johannes me Andru chök ra feila ren.
MAR 13:4 Ra kapas ngeni, “Kose mochen ürenikem inet ekei mettoch ka fos usun repwe fis. Kopwe pwäri ngenikem asisilen fisin ekei mettoch meinisin.”
MAR 13:5 Iwe, Jesus a üreniir, “Oupwe mamasa, pwe esap wor eman epwe atupukemi.
MAR 13:6 Chomong aramas repwe feito fän itei o apasa, ‘Ngang Kraist.’ Iwe, repwe atupu chomong aramas.
MAR 13:7 Nge lupwen oupwe rongorong akürangen maun me pworausen maun, ousap niuokus. Ekei mettoch repwe fokun fis, nge esap tori mwo fansoun sopolan.
MAR 13:8 Ekewe fanü repwe fiufengen o ekewe mwü repwe maunfengen. Epwe wor chechen fanü me lengita ekis meinisin. Ekei riaföü ra usun chök ekewe metek eman fefin a eäni mwen an epwe nöünöüla.
MAR 13:9 Oupwe püsin mamasakemi. Pun repwe fötekinikemi o emwenikemiilong lon kapwüng. Repwe wichikemi lon ar kewe imwen felikis. Oupwe ütä mwen ekewe kepina me king pokitei, pwe oupwe pwärätä ngeniir mine a let.
MAR 13:10 Nge ewe Pworausen Manau epwe akom tori aramasen fanüfan meinisin.
MAR 13:11 Iwe, lupwen repwe fötekinikemi o emwenikemiilong lon kapwüng, ousap öüreki me mwan mine oupwe apasa. Lon ewe chök otun epwe torikemi mine oupwe apasa, pun sap ämi oupwe kapas, nge ewe Ngünmifel.
MAR 13:12 Iwe, pwipwi repwe afangamä pwiir ngeni mäla, eman sam epwe afangamä nöün, nge ekewe nau repwe ü ngeni semer me iner o aturuur, pwe repwe ninnila.
MAR 13:13 Aramas meinisin repwe oputakemi pokitei. Nge iö epwe likitü tori lesopolan epwe küna manau.
MAR 13:14 “Ämi oupwe küna ewe ‘Mettoch mi Eniweniw’ a nom lon ewe leni ia esap ürürün epwe nom ie. (Ewe chon aleani epwe fokun weweiti met wewen ei!) Mürin chokewe mi nom lon Jutea repwe sütä won ekewe chuk.
MAR 13:15 Eman aramas mi nom won imwan, esap wor an fansoun an epwe tötiu o tolong lon imwan pwe epwe angei och.
MAR 13:16 Nge eman mi nom lemäl, esap liwiniti imwan an epwe angei üfan sekit.
MAR 13:17 Riaföün ekewe fefin mi pwopwo me ekewe inelap mi oupwu nöür lon ekana rän.
MAR 13:18 Oupwe iotek pwe ei sokun riaföü esap fis lon fansoun patapat.
MAR 13:19 Pun riaföün lon ekana rän epwe fen lap seni ekewe riaföü mi fen fis seni lepoputän, lupwen Kot a föri fanüfan tori ikenai, esap pwal fissefäl ena sokun lon ekewe fansoun repwe feito.
MAR 13:20 Nge are ach Samol esap amochomocha ekewe rän, esap wor eman aramas epwe manau. Nge pokiten chokewe a filiiretä a amochomochala ekewe fansoun riaföü.
MAR 13:21 Lon ena fansoun are eman epwe apasa ngenikemi, ‘Nengeni, iei i Kraist,’ ika ‘Nengeni, a nom ikenan,’ ousap lükü i.
MAR 13:22 Pun kraist chofona me soufos chofona repwe war o föri asisil me manaman, pwe repwe atupu ekewe chon fil are repwe tongeni.
MAR 13:23 Iei mine oupwe mamasa. Ngang üa pwäri ngenikemi ekei mettoch meinisin mwen ar repwe fis.
MAR 13:24 “Lon ekana rän, mürin ewe fansoun riaföü, akkar epwe rochola, maram esap chüen tittin,
MAR 13:25 ekewe fü repwe turutiu me läng, nge ekewe manamanen läng repwe mwöküt seni lenier.
MAR 13:26 Lon ena fansoun aramas repwe küna Nöün Aramas epwe feito won kuchu ren manaman me ling mi lapalap.
MAR 13:27 Mürin epwe tinala ekewe chon läng lepelien fanüfan me rüanü, pwe repwe achufengeni nöün kewe chon fil seni lesopun fanüfan tori lesopun.
MAR 13:28 Oupwe kaiö eu lessen seni ewe irä fiik. Lupwen palan kana ra anüen fetil o popuetä le pwüküwu chöön, oupwe silei pwe a arap fansoun räs.
MAR 13:29 Iei usun lupwen oupwe küna pwe ekei mettoch repwe fis, oupwe silei pwe ewe fansoun a arapoto o molotä ngeni ar repwe pwönüetä.
MAR 13:30 Enlet, üpwe ürenikemi, pwe ei pilon aramas resap mäla, tori an epwe fisitä ekei mettoch meinisin.
MAR 13:31 Läng me fanüfan repwe morola, nge ai kapas kana resap fokun morola.
MAR 13:32 “Esap wor eman a silei ewe rän are ewe kulok ekei mettoch repwe fis lon, ekewe mwo chon läng, ika ewe Nöün Kot resap pwal silei, pwe ewe Sam chök.
MAR 13:33 Oupwe mamasa o afälikemi, pun ousap silei inet ewe fansoun epwe war lon.
MAR 13:34 Epwe usun chök eman mwän a saila toau, nge a likitala nöün chon angang pwe repwe tümwünü meinisin mine a eäni. A awisa ngeni eman me eman an angang o allük ngeni ewe chon mamasa ewe asamalap, pwe epwe mamas.
MAR 13:35 Iei mine oupwe mamasa, pun ousap silei inet samolun ewe imw epwe war, are epwe war lekuniol, are lukenipwin, are wünümweerän, are lesosor.
MAR 13:36 Are epwe müttir feito, esap öch an epwe künok lon om möür.
MAR 13:37 Mine üa ürenikemi, üa üreni aramas meinisin: Oupwe mamasa.”
MAR 14:1 Iei a chök ruu rän mwen ewe ränin Pasofer me ewe chulapen mongö pilawa esap wor iis lon. Iwe, ekewe souasor mi lap me ekewe Sensen Allük ra ekieki usun eu alen ar repwe turufi Jesus le monomon, pwe repwe niela.
MAR 14:2 Ra apasa, “Esap tufich ach sipwe föri ei raw fansoun ei chulap, pwe ekewe aramas resap afitikoko.”
MAR 14:3 Iwe, Jesus a nom lon Petania lon imwen Simon, eman mwän mi üri rupun pwötür me mwan. Lupwen Jesus a mongö ren, eman fefin a tolong ren fän eu lö mi fokun pwokus o mömong mi för seni ewe irä nart, a nom lon eu rume seni ewe fau itan alapaster. Neminei a amökkü ei rume o ninätiu ewe lö won möküren Jesus.
MAR 14:4 Iwe, ekoch me lein ekewe aramas mi nom rer ra wowongau o kapasfengen lefiler, “Pwota a asolapala ei lö?
MAR 14:5 Pun eman a tongeni amömöla won lap seni ükükün ülüpükü föün moni silifer o fangala ewe moni ngeni ekewe chon wöüngau.” Iwe, ra fokun apwüngü ei fefin.
MAR 14:6 Nge Jesus a üreniir, “Oupwe likitala neminei. Pwota oua osukosuka? A föri ngeniei eu föför mi fokun mürina.
MAR 14:7 Pun ekewe chon wöüngau repwe nom remi fansoun meinisin, oua tongeni alisiir iteiten fansoun oua mochen. Nge ngang üsap nonomfochofoch remi.
MAR 14:8 Neminei a föri ükükün met a tongeni. A ninätä ewe lö woi pwe epwe amolaei ngeni ai üpwe tolong lon peias.
MAR 14:9 Enlet, üpwe ürenikemi: Ekis meinisin won unusen fanüfan ia aramas repwe afalafalafeil ie ewe Pworausen Manau, ikenan aramas repwe pwal apworausa mine neminei a föri pwe achechemen itan.”
MAR 14:10 Mürin Jutas Iskariot, eman me lein ekewe engol me ruoman chon kaiö, a feila ren ekewe souasor mi lap fän iten an epwe afangamä ngeniir Jesus.
MAR 14:11 Iwe, lupwen ar rongorong mine a üreniir, ra pwapwa o pwon ngeni pwe repwe ngeni moni. Iei mine Jutas a kütta eu fansoun mi fich pwe epwe tongeni atolonga Jesus lepöür.
MAR 14:12 Iwe, lon aeuin ränin ewe chulapen mongö pilawa esap wor iis lon, ewe rän ra niela ekewe lam fän iten ewe mongön Pasofer, nöün Jesus kewe chon kaiö ra aisini, “Ia ka mochen sipwe feila ie o amolätä fän itom ewe mongön Pasofer?”
MAR 14:13 Mürin Jesus a tinala ruoman me lein nöün kewe chon kaiö o öüröürer, “Oupwe feila lon ewe telinimw. Ikenan oupwe churi eman mwän mi mwärei eu rume a wor koluk lon. Oupwe tapwela mürin
MAR 14:14 tori ewe imw a tolong lon. Iwe, oupwe üreni mine imwan ewe, ‘Nöüm sense a apasa: Ia a nom ie ewe ruum äm me nei kewe chon kaiö aipwe mongö ewe mongön Pasofer?’
MAR 14:15 Mürin epwe aiti ngenikemi eu ruum mi watte a nom asan, a molotä pisekin lon. Iwe, ikenan oupwe amolätä ewe mongö fän itach.”
MAR 14:16 Iwe, ekewe chon kaiö ra feila, ra tolong lon ewe telinimw o küna meinisin usun mine Jesus a fen üreniir. Iwe, ra amolätä ewe mongön Pasofer.
MAR 14:17 Iwe, lupwen a tori lekuniol, Jesus me nöün kewe engol me ruoman chon kaiö ra wareiti ewe leni.
MAR 14:18 Lupwen ar mot ngeni chepel o mongö, Jesus a apasa, “Enlet, üpwe ürenikemi, eman me leimi epwe afangamäei, eman mi etiei le mongö.”
MAR 14:19 Iwe, ekewe chon kaiö ra lolilen ren ekei kapas o popuetä le ais ngeni Jesus eman mürin eman, “Ifa usun, esap fen ngang ena.”
MAR 14:20 Jesus a pölüeni, “Epwe eman me leimi ekei engol me ruoman, ätewe mi etiei le otukalong anen we pilawa lon ewe sepi.
MAR 14:21 Nöün Aramas epwe mäla usun a fen mak lon ekewe Toropwe mi Pin. Nge feiengauen ätewe mi afangamä Nöün Aramas. Epwe fen öch ngeni ei mwän are esap uputiu.”
MAR 14:22 Iwe, lupwen ar mongöfengen, Jesus a angei pilawa, a iotekin kilisou won o a kinikisietiu. A ineti ngeni nöün kewe chon kaiö o apasa, “Oupwe angei, iei inisi.”
MAR 14:23 Mürin a angei eu kap, a iotekin kilisou ngeni Kot won o ngeni eman me eman leir. Iwe, ir meinisin ra ün seni.
MAR 14:24 Jesus a apasa, “Iei chai mi ninnila fänäsengesin chomong aramas, ei cha a anükünükü än Kot pwon ngenikich.
MAR 14:25 Enlet üpwe ürenikemi, pwe üsap chüen ünümi seni ei wain tori ewe rän lupwen üpwe ünümi ewe wain mi fö lon Mwün Kot.”
MAR 14:26 Mürin ar eäni echö kölün kilisou ra towu seni ewe imw o feila ngeni ewe Chukun Olif.
MAR 14:27 Iwe, Jesus a üreni nöün kewe chon kaiö, “Ämi meinisin oupwe sü seniei o likitieila, pun a mak lon ekewe Toropwe mi Pin, ‘Kot epwe niela ewe chon mas, nge ekewe sip repwe toropasfeil.’
MAR 14:28 Nge mürin ai manausefälitä, üpwe akomwola mwemi Kalilea.”
MAR 14:29 Iwe, Petrus a üreni Jesus, “Ikamwo ir meinisin repwe likitukela, ngang üsap fokun likituk.”
MAR 14:30 Jesus a üreni Petrus, “Enlet, üpwe ürenuk, lepwin ei mwen ewe chuko epwe kö fan ruu, en kopwe amamäsiniei fän ülüngat.”
MAR 14:31 Nge Petrus a pölüeni fän pöchökül, “Are üpwe fen etuk le mäla, üsap fokun amamäsinuk.” Pwal ekewe chon kaiö meinisin ra apasa ei ititin fos.
MAR 14:32 Iwe, ra feila ngeni ewe leni itan Ketsemane. Iwe, Jesus a üreni nöün kewe chon kaiö, “Oupwe nom ikei, nge ngang üpwe feila ekis o iotek.”
MAR 14:33 Iwe, a aweinala Petrus, James me Johannes, pwe repwe fiti. Mürin a popuetä le letipeta o riaföü.
MAR 14:34 Iwe, a üreniir, “Riaföün letipei a fokun wattela, pwe üa arap ngeni ai üpwe mäla. Oupwe nonom ikei o mamasa.”
MAR 14:35 Mürin Jesus a feila ekis, a chapetiu le pwül o iotek, pwe ika epwe tufich ei fansoun riaföü epwe feil seni.
MAR 14:36 Iwe, a iotek, “Semei, semei! Mettoch meinisin ra tufich ngonuk. Kose mochen kopwe angei seniei ei kapen riaföü. Nge esap letipei epwe fis, pwe letipom.”
MAR 14:37 Mürin Jesus a liwiniti ekewe ülüman chon kaiö, nge a küneer, pwe ra möür. Iwe, a üreni Petrus, “Simon, ka annut. Kosap tongeni mamasa lon eu chök kulok?
MAR 14:38 Oupwe mamasa o iotek, pwe ousap turutiu lon sosot. Ewe ngün a mochen pwora, nge ewe fituk a apwangapwang.”
MAR 14:39 Iwe, Jesus a pwal liwinsefälila o iotek lon ewe chök ititin fos a eäni me mwan.
MAR 14:40 Mürin a liwinsefäliti ekewe chon kaiö, nge a pwal küneer, pwe ra möür, pun ra fokun chouchou. Iwe, resap silei mine repwe üreni Jesus.
MAR 14:41 Iwe, lupwen Jesus a liwinsefälitiir fan aülüngatin, a üreniir, “Ifa usun, oua chüen annut o asösö? A naf! A tori ewe otun. Nengeni Nöün Aramas epwe oolong lepöün chon tipis.
MAR 14:42 Ou pwätä, ousipwe feila. Nengeni, iei i ewe mwän epwe afangamäei.”
MAR 14:43 Iwe, lupwen Jesus a chüen kapas, Jutas, eman ekewe engol me ruoman chon kaiö, a war. Eu mwichen aramas mi chomong ra eti fän nöür ketilas me wokur wok. Ir ätekewe ekewe souasor mi lap, ekewe Sensen Allük me ekewe souakom ra ökünöör.
MAR 14:44 Ätewe mi afangamä a ngeniir eu asisil o a üreniir, “Ätewe ngang üpwe mitiri, ina i ewe mwän. Oupwe turufi o etekinala, nge oupwe mamasaöchü.”
MAR 14:45 Lupwen Jutas a war, a müttir feiliti Jesus o üreni, “Sense”, a pwal mitiri.
MAR 14:46 Iei mine ekewe aramas ra turufi Jesus o fötekini.
MAR 14:47 Nge eman me lein ätekewe mi ü arun a weitawu nöün ketilas o pöküela eu selingen nöün ewe Souasor mi Lap chon angang.
MAR 14:48 Mürin Jesus a üreniir, “Ifa usun, ngang eman chon afitikoko, pwe oua feito fän nöümi ketilas me wokumi wok, pwe oupwe turufiei?
MAR 14:49 Iteiten rän üa nom remi o afalafal lon imwenfel, nge ämi ousap fötekiniei. Nge iei kapasen ekewe Toropwe mi Pin epwe pwönüetä.”
MAR 14:50 Iwe, ekewe chon kaiö meinisin ra likitala Jesus o süla.
MAR 14:51 Eman alüal a tapwela mürin Jesus, esap üföüf och, nge a chök finiti ngeni echö chenikam. Iwe, lupwen ar turufi,
MAR 14:52 a süla fan an selela, nge a likitala ngeniir chenikaman.
MAR 14:53 Mürin ra etekinala Jesus lon imwen ewe Souasor mi Lap. Ikenan ekewe souasor mi lap meinisin, ekewe souakom me ekewe Sensen Allük ra mwichfengen ie.
MAR 14:54 Iwe, Petrus a tapwela mürin Jesus me toau o tolong lon ewe leni lükün imwen ewe Souasor mi Lap. Ikenan a mot ren ekewe chon mas o apwichikara ren ewe ekkei.
MAR 14:55 Iwe, ekewe souasor mi lap me unusen ewe mwichen soupwüng ra kütta mine repwe tip ngeni Jesus, pwe repwe atipisi ngeni mäla. Nge resap küna och tipis ren.
MAR 14:56 Chomong chon pwärätä ra chofonatä mine ra tip ngeni, nge ar kapasen tipetipmwäl ngeni esap wewefengen.
MAR 14:57 Ekoch ra ütä o apasätä ar kapasen tipitipmwäl ngeni, o ra apasa,
MAR 14:58 “Äm aia rongorong an apasa, ‘Ngang üpwe atai ei imwenfel mi för ren pöün aramas, nge lon ükükün ülüngat rän üpwe aüsefälietä pwal eu esap förien pöün aramas.’”
MAR 14:59 Iei mwo met ra apasa, nge ar kapasen pwärätä esap wewefengen.
MAR 14:60 Mürin ewe Souasor mi Lap a ütä me mwer meinisin o aisini Jesus, “Ifa usun, esap wor om kapasen pölüeni ngeni ekei kapasen atutur ekei mwän ra aturuk won?”
MAR 14:61 Iwe, Jesus a chök fanafanala, nge esap pölüeni och. Ewe Souasor mi Lap a pwal aissefäl ngeni, “Ifa usun, en ewe Kraist, Nöün ewe Kot aramas ra mwareiti?”
MAR 14:62 Jesus a pölüeni, “Ewer, ngang ätewe. Ämi oupwe küna Nöün Aramas epwe mot lepelifichin ewe mi Unusen Manaman, epwe feito won ekewe kuchun läng.”
MAR 14:63 Iwe, ewe Souasor mi Lap a kamwei üfan o apasa, “Pwota sipwe chüen mochen angei kapasen atutur?
MAR 14:64 Oua püsin rongorong an kapasen turunufas. Met oua ekieki usun?” Iwe, ir meinisin ra apwüngala fän itan pwe a tipisin mäla.
MAR 14:65 Mürin ekoch me leir ra popuetä le atufa, ra pwölüela won mesan o öfönü. Iwe, ra üra, “Kopwe pwäri ngenikem iö a öfönuk.” Nge ekewe chon mas ra etekinala o wichi.
MAR 14:66 Iwe, lupwen Petrus a nom lon ewe leni lükün imwen ewe Souasor mi Lap, eman föpwül, nöün ewe Souasor mi Lap chon angang, a feito ren.
MAR 14:67 Iwe, a küna Petrus pwe a apwichikara inisin, iwe, a newenewen ngeni o apasa, “En pwal eman mi eti Jesus seni Nasaret.”
MAR 14:68 Nge Petrus a amam o apasa, “Üsap silei are weweiti mine ka kapas usun.” Mürin a feiliwu lon ewe al ngeni ewe asamalap.
MAR 14:69 Iwe, ewe föpwül a künasefäli Petrus me ikenan o apasasefäli ngeni chokewe mi ü arun, “Ei mwän eman nöün Jesus kewe chon kaiö.”
MAR 14:70 Nge Petrus a amamsefäl. Ekis chök fansoun mürin, chokewe mi üfeil arun ra pwal üreni Petrus, “Enlet, en eman ekewe chon kaiö, pun en pwal eman re Kalilea.”
MAR 14:71 Nge Petrus a popuetä le püsin otteki inisin o akapel ngeniir, “Üsap silei ei mwän oua kapas usun.”
MAR 14:72 Lon ewe chök otun ewe chuko a kökkö fan aruan. Mürin Petrus a chechemeni ekewe kapas Jesus a apasa ngeni, “Mwen än ewe chuko epwe kökkö fan aruan, en kopwe amamäsiniei fan ülüngat.” Iwe, a ekilolilen o kechü.
MAR 15:1 Iwe, lupwen a ränila, ekewe souasor mi lap ra mwichfengen me ekewe souakom, ekewe Sensen Allük me unusen ewe mwichen soupwüng, pwe repwe pwüngüpwüngfengen won met repwe föri. Ra föti Jesus o etekinala ren Pilatus, pwe epwe apwüngü.
MAR 15:2 Iwe, Pilatus a aisini Jesus, “Ifa usun, en nöün chon Juta we king?” Jesus a pölüeni, “Ewer, usun om apasa.”
MAR 15:3 Iwe, ekewe souasor mi lap ra atipisi Jesus won chomong mettoch.
MAR 15:4 Iei mine Pilatus a pwal kapas ais ngeni Jesus, “Ifa usun, esap wor om kapasen pölüen? Nengeni, chomongun ekewe mettoch ra atipisuk won.”
MAR 15:5 Nge Jesus esap chüen pölüeni och. Iei mine Pilatus a mairü.
MAR 15:6 Iteiten ier, lupwen a tori ewe mongön Pasofer, Pilatus a soun amusala eman chon fötek, iö ekewe aramas ra tüngor.
MAR 15:7 Iwe, a wor eman mwän lon imwen fötek itan Parapas, i eman me lein ekewe chon afitikoko mi niela aramas.
MAR 15:8 Iwe, lupwen ewe mwichen aramas ra chufengen, ra tüngor ngeni Pilatus pwe epwe föri usun mine a piin föföri fän iter.
MAR 15:9 Nge Pilatus a aisiniir, “Ifa usun, oua mochen pwe üpwe amusa ngenikemi ewe kingen chon Juta?”
MAR 15:10 Pun Pilatus a mefi, pwe ekewe souasor mi lap ra etekinala Jesus pwe epwe kapwüng pokiten ar lolowo.
MAR 15:11 Nge ekewe souasor mi lap ra pese ngeni ewe mwichen aramas pwe repwe tüngor Pilatus, pwe epwe amusa ngeniir Parapas, nge sap Jesus.
MAR 15:12 Iwe, Pilatus a aissefäl ngeniir, “Nge met üpwe föri ngeni ätewe oua aita ngeni kingen chon Juta?”
MAR 15:13 Ra kökkö fän leüömong, “Kopwe iräpengesi!”
MAR 15:14 Pilatus a pwal aisiniir, “Pwota? Met sokun föför mi ngau a föri?” Nge ir ra chök alapala ar kökkö, “Kopwe iräpengesi!”
MAR 15:15 Iei mine Pilatus a apwönüetä mochenin ewe mwichen aramas o amusa ngeniir Parapas. Iwe, a üreniir, pwe repwe wichi Jesus o etekinala, pwe epwe iräpenges.
MAR 15:16 Iwe, ekewe sounfiu ra etekinalong Jesus lon ewe leni lükün ewe imwen kepina o körifengeni unusen ar we mwichen sounfiu.
MAR 15:17 Ra aüfa ngeni echö üf mi parachol, mürin ra fittiifengeni palen iräfölüföl o isetä won möküren Jesus pwe mwärin.
MAR 15:18 Mürin ra popuetä le kapong ngeni, “Kopwe manauatam, en Kingen chon Juta!”
MAR 15:19 Ra wichi möküran ngeni efoch wok o atufa, ra fotopwäsuk mwan o pomwen fel ngeni.
MAR 15:20 Lupwen ra wes le turunufasei, ra pwiliti seni ewe üf mi parachol o aüfa ngeni püsin üfan kewe. Mürin ra etekinala pwe epwe iräpenges.
MAR 15:21 Iwe, lupwen ar feila won ewe al, ra churi eman mwän itan Simon seni Kirene, a feito seni lemäl pwe epwe tolong lon ewe telinimw. Ekewe sounfiu ra echimwa ngeni an epwe mwärei än Jesus iräpenges. Simon semen Aleksanter me Rufus.
MAR 15:22 Iwe, ra emwenala Jesus lon ewe leni itan Kolkota, wewen “Lenien Pösökün Mökür.”
MAR 15:23 Ikenan ra sotuni le aünü ngeni Jesus wain mi nofitfengen me och säfei itan mör, nge esap mochen ünümi.
MAR 15:24 Mürin ra iräpengesi Jesus. Ra üttüt won üfan kewe o ngeni eman me eman leir met üttian.
MAR 15:25 Iwe, kulok tiu lesosor ra iräpengesi Jesus.
MAR 15:26 Iwe, iei makkeen mine ra tip ngeni: “Ewe Kingen chon Juta.”
MAR 15:27 Ra pwal iräpengesi ruoman chon solä arun Jesus, eman a nom lepelifichin, nge eman lepelimöngun.
MAR 15:28 [Iwe, a pwönüetä mine a mak lon ekewe Toropwe mi Pin, “A alealong lein ekewe chon pupungau.”]
MAR 15:29 Iwe, ekewe aramas mi pwere seni ra turunufasei Jesus, ra alifechifech ngeni o apasa, “Aa! En ewe ka ekiekin atai ewe imwenfel o aüsefälietä lon ükükün ülüngat rän.
MAR 15:30 Kopwe tötiu seni ewe iräpenges o püsin amanauok.”
MAR 15:31 Pwal ekewe souasor mi lap me ekewe Sensen Allük ra takirin ämängaua Jesus o kapasfengen lefiler, “A amanaua ekoch, nge esap tongeni püsin amanaua.
MAR 15:32 Iei i ewe a apasa pwe i Kraist, ewe Kingen Israel, epwe tötiu seni ewe iräpenges iei chök, pwe aipwe küna o lükü.” Pwal ätekewe mi eti Jesus le iräpenges ra eäni kapasen turunufas ngeni.
MAR 15:33 Lupwen a tori leoloasen ewe rän, unusen ewe fanü a rochopwak lon ükükün ülüngat kulok.
MAR 15:34 Iwe, kulok ülüngat Jesus a kökkö fän mwelian mi leüömong, “Eloi, Eloi, lama sapaktani!” wewen “Ai Kot, ai Kot, pwota ka likitieila?”
MAR 15:35 Lupwen ekoch kewe aramas mi ü arun ra rong ekei kapas, ra apasa, “Ou rongorong, a köri Elias.”
MAR 15:36 Eman me leir a säto ren fän eu farawa, a otukalong lon wain mi mwäl o pachetä lesopun efoch iich. Mürin a pöüetä ewe iich ngeni awen Jesus o üra, “Sipwe witiwit, sipwe pii ika Elias epwe feito o uwätiu me won ewe iräpenges.”
MAR 15:37 Iwe, Jesus a leüömong le puchör, mürin a mäla.
MAR 15:38 Iwe, ewe chechen mangaku lon imwenfel a kam seni won tori fan, pwe a wor ruu kinikin.
MAR 15:39 Lupwen ewe meilapen sounfiu mi ü mwen ewe iräpenges a rong o küna usun än Jesus mäla, a apasa, “Enlet, ei mwän wesewesen Nöün Kot.”
MAR 15:40 Iwe, mi pwal wor fefin ikenan mi aköürü me toau, me lein ekei fefin Maria Maktalene, Maria inen James ewe kükün me Josef pwal Salome.
MAR 15:41 Ekei fefin ra tapwela mürin Jesus lupwen a nom lon Kalilea o ra tümwünü ngeni met a eäni osupwang. Pwal chomong fefin mi etätä Jesus Jerusalem ra nom ikenan.
MAR 15:42 Iei ewe räninamol, wewen, ewe rän mwen ewe ränin sapat. Iwe, lekuniolun ei rän
MAR 15:43 Josef seni Arimatea, i eman me lein ewe mwichen soupwüng mi iteföüla, a pwal ösüküsükü waren ewe Mwün Kot, a feito ren Pilatus fän pöchökülen letipan o tüngor somän Jesus.
MAR 15:44 Nge Pilatus a weitifengeni lupwen an rong pwe Jesus a fen mäla. A titi ewe meilapen sounfiu o aisini are Jesus a fen mäla.
MAR 15:45 Iwe, lupwen a rong seni ewe meilapen sounfiu pwe Jesus a fen mäla, a mwütätä somän ngeni Josef.
MAR 15:46 Iwe, Josef a fen möni echö mangaku mi pwechepwech o mürina. A angeatiu ewe somä seni won ewe iräpenges, a finiti ngeni ewe mangaku mi pwechepwech o peiaseni lon eu peias mi för lon achau. Mürin a asokopanato eföü fau mi watte o pine ngeni mesen ewe peias.
MAR 15:47 Iwe, Maria Maktalene me Maria inen Josef ra küna ia ra peiaseni ie somän Jesus we.
MAR 16:1 Wesin ewe ränin sapat Maria Maktalene, Maria inen James me Salome ra kamö lö pwokus, pwe repwe feila o epiti somän Jesus we.
MAR 16:2 Iwe, lesosorusichin ewe aeuin ränin wiik, lupwen akkar a tötä, ra feila ren ewe peias.
MAR 16:3 Iwe, ra kapasfengen lefiler, “Iö epwe pünüüw ngeni kich ewe fau seni mesen ewe peias?”
MAR 16:4 Nge lupwen ar neneloi ewe peias, ra küna pwe ewe fau mi fokun watte a fen mwöküt seni mesen ewe peias.
MAR 16:5 Iwe, lupwen ar tolong lon ewe peias, ra küna eman alüal mi üföüf echö üf mi pwechepwech, a mot lepelifichin ewe peias me epek. Iwe, ra fokun rükö.
MAR 16:6 Ewe alüal a üreniir, “Ousap rükö, üa silei pwe oua kütta Jesus ewe re Nasaret, ewe mi iräpenges. Esap nom ikei, pwe a manausefälitä. Oupwe katol ewe leni ia ra peiaseni ie.
MAR 16:7 Iei oupwele feila o üreni nöün kewe chon kaiö pwal Petrus, pwe epwe akomwola mwer Kalilea. Ikenan repwe küna i, usun a fen üreniir.”
MAR 16:8 Iwe, ekewe fefin ra towu seni ewe peias o süla fän ar chechech me rükö. Nge resap apasa och ngeni eman, pun ra niuokus.
MAR 16:9 [Mürin än Jesus manausefäl, lesosorusichin aeuin ränin wiik, a akomwen pwä ngeni Maria Maktalene, i neminewe Jesus a atowu ekewe füman anün rochopwak seni.
MAR 16:10 Iei mine a feila o asile ngeni chiechian kewe mi letipeta o kechü usun mine a küna.
MAR 16:11 Nge lupwen ar rongorong pwe Jesus a manau o neminewe a küna, resap lükü i.
MAR 16:12 Mürin ei, Jesus a pwä lon pwal eu sokun lapalap ngeni ruoman me lein ekewe chon kaiö, lupwen ra fetal lemälen ewe fanü.
MAR 16:13 Ekei ruoman ra liwiniti ekewe ekoch chon kaiö o apworausa ngeniir usun mine ra küna. Nge ir resap lüküür.
MAR 16:14 Mürilan meinisin Jesus a pwä ngeni ekewe engol me eman chon kaiö lupwen ra mongöfengen. Iwe, a fönöör pokiten esap wor ar lükülük, ra pwal tipeförea, pun resap lükü alon chokewe ra küna pwe Jesus a manausefäl.
MAR 16:15 Iwe, a üreniir, “Oupwe feila lon unusen fanüfan o afalafala ewe Pworausen Manau ngeni aramas meinisin.
MAR 16:16 Iö a lükülük o papatais epwe küna manau, nge iö esap lükülük epwe angei liwinin an tipis.
MAR 16:17 Iwe, chokewe mi lükülük repwe angei tufich pwe repwe föri ekei manaman: Repwe asüela anün rochopwak fän itei, repwe fos lon kapasen ekis.
MAR 16:18 Are repwe amwöchü serepenit ika ünümi poison, resap feiengau ren. Repwe pwal iseis pöün won chon samau, iwe, repwe pöchökületä.”
MAR 16:19 Mürin än Jesus fos ngeni nöün kewe chon kaiö a feitä läng o mottiu lepelifichin Kot.
MAR 16:20 Iwe, ekewe chon kaiö ra feila o afalafal ekis meinisin. Nge ewe Samol a etiir lon ar angang o anüküchara ar afalafal pwe a let ren ekewe manaman ra föri.]
LUK 1:1 Achengicheng en olowe Teofilus: Chomong aramas ra achocho le makkei pworausen ekewe mettoch mi fisitä lefilach.
LUK 1:2 Ra makkeetiu usun met sia rongorong seni chokewe mi wesewesen küna ekei mettoch seni lepoputän o usun ar arongafeili ewe Pworausen Manau.
LUK 1:3 Pokiten ngang won inisi üa küttafichi mettoch meinisin seni lepoputän, iei mine a mürina ngeniei ai üpwe makkei pworauser lon kokotöchün fänäsengesum, en ämäfen Teofilus.
LUK 1:4 Üa föri ei, pwe kopwe silei allükülükün leten ekei mettoch ra fen aiti ngonuk.
LUK 1:5 Lon ewe fansoun, lupwen Herotes a king lon Jutea mi wor eman souasor itan Sakarias seni lon tettelin än Apia mwich. Iten pwülüan Elisapet, neminei eman mwirimwirin Aaron.
LUK 1:6 Ir me ruoman ra föri mine a pwüng mwen mesen Kot o aleasochisi än ewe Samol kewe allük me pwüüng meinisin.
LUK 1:7 Nge esap wor nöür, pun Elisapet a rit, nge ir me ruoman ra fen pwal chinlapala.
LUK 1:8 Lon eu rän, lupwen a tori än Sakarias mwich pwe epwe angang, Sakarias a föri an angangen souasor mwen mesen Kot.
LUK 1:9 Sakarias a fil lon pwüngün üttüt lon örünien pwüngün angangen ekewe souasor, pwe epwe keni apach mi pwokus won ewe rongen asoren ötüöt. Iei mine a tolong lon än ewe Samol imwenfel,
LUK 1:10 nge ewe mwichen aramas mi nom lükün ra iotek lupwen fansoun ewe apach mi pwokus a kek.
LUK 1:11 Iwe, eman nöün ewe Samol chon läng a pwä ngeni Sakarias, a ütä lepelifichin ewe rongen asoren ötüöt.
LUK 1:12 Lupwen Sakarias a küna ewe chon läng, a rükö o niuokus.
LUK 1:13 Nge ewe chon läng a üreni, “Kosap niuokus, Sakarias! Pun Kot a aüseling om iotek. Elisapet pwülüom we epwe pwopwo o nöüni eman ät, iwe, kopwe aita ngeni Johannes.
LUK 1:14 Iwe, kopwe pwapwa o mwanek ren, nge chomong repwe pwapwa lupwen epwe uputiu.
LUK 1:15 Epwe eman mwän mi lap mwen mesen ewe Samol. Esap tongeni ün wain are sakau, nge epwe ur ren Ngünmifel seni fansoun an uputiu.
LUK 1:16 Iwe, epwe aliwinisefäli chomong aramasen Israel ngeni ewe Samol ar we Kot.
LUK 1:17 I epwe akom mwen ewe Samol lon tufichin ewe Ngün me ewe manaman mi nom ren Elias. Epwe akulu leluken ekewe sam ngeni nöür o akulusefäli letipen ekewe aramas mi lükümach, pwe repwe eäni ekiekin ekewe chon pwüng. Pun epwe amolätä fän iten ewe Samol eu mwichen aramas mi amolöch.”
LUK 1:18 Iwe, Sakarias a aisini ewe chon läng, “Ifa usun ai üpwe silei pwe met ka apasa epwe fis? Pun ngang eman mwän mi chinlap, nge ierin pwülüei ra chomong.”
LUK 1:19 Iwe, ewe chon läng a pölüeni, “Ngang Kapriel, ewe mi ü mwen mesen Kot. Kot a tinieito pwe üpwe kapas ngonuk o asile ngonuk ei pworaus allim.
LUK 1:20 Iei kopwe awemwöch, nge kosap chüen tongeni fos tori ewe rän ekei mettoch repwe fisitä, pun kosap lükü ai kewe kapas pwe repwe pwönüetä lon fansour.”
LUK 1:21 Iwe, ekewe aramas ra witiwiti än Sakarias epwe towu rer o ra weitifengeniir ren än Sakarias nomotam lon ewe imwenfel.
LUK 1:22 Lupwen Sakarias a towu ren ekewe aramas, esap chüen tongeni fos ngeniir. Iwe, ra mefi, pwe a wor künaan me lon ewe imwenfel, pun a chök pomwo ngeniir, nge esap chüen tongeni fos.
LUK 1:23 Lupwen fansoun an angang lon ewe imwenfel a wes, a liwiniti lenian.
LUK 1:24 Ekoch fansoun mürin Elisapet pwülüan we a pwopwo. Nge lon ükükün limu maram a opolong lon imwan, pun a apasa,
LUK 1:25 “Ewe Samol a föri ei ngeniei. Lon ekei rän a pwärala an ümöümöch ngeniei o ange seniei ai itengau lein aramas.”
LUK 1:26 Iwe, lon awonuen maramen än Elisapet pwopwo, Kot a tinala ewe chon läng Kapriel lon ewe telinimwen Kalilea itan Nasaret
LUK 1:27 ren eman föpwül mi kofot ngeni eman mwän itan Josef, eman mwirimwirin Tafit. Iwe, iten ei föpwül Maria.
LUK 1:28 Ewe chon läng a feito ren Maria o üreni, “Kinamwe epwe toruk! Ewe Samol a nom reöm, a pwal fokun afeiöchuk.”
LUK 1:29 Iwe, Maria a fokun rükö ren mine ewe chon läng a üreni o a ekieki lon lelukan usun wewen an kewe kapas.
LUK 1:30 Ewe chon läng a üreni, “Kosap niuokus, Maria, Kot a fokun ümöümöch ngonuk.
LUK 1:31 Nengeni, kopwe pwopwo o nöüni eman ät, iwe, kopwe aita ngeni Jesus.
LUK 1:32 Ätei epwe lap, epwe iteni Nöün Kot ewe mi Unusen Tekia. Nge Kot, ewe Samol epwe amota won lenien motun king usun an we lewo Tafit.
LUK 1:33 I epwe nemeni ekewe mwirimwirin Jakop feilfeilachök, nge mwün esap fokun müchüla.”
LUK 1:34 Iwe, Maria a üreni ewe chon läng, “Ngang eman föpwül, esap wor pwülüei. Epwe ifa usun an epwe tongeni fis ei sokun ngeniei?”
LUK 1:35 Ewe chon läng a pölüeni, “Ngünmifel epwe feitiu womw, nge manamanen ewe mi Unusen Tekia epwe nom womw. Iei mine ewe mi pin epwe uputiu ngonuk, epwe iteni Nöün Kot.
LUK 1:36 Nengeni, märärum we Elisapet! Aramas ra apasa, pwe esap tongeni nöünöü, nge iei a tori awonuen maramen an pwopwo, nge inamwo ika a fokun chinlapala.
LUK 1:37 Pun esap wor och Kot esap tongeni.”
LUK 1:38 Maria a apasa, “Nengeni, ngang nöün ewe Samol chon angang. Epwe fis ngeniei usun om apasa.” Iwe, ewe chon läng a feila seni Maria.
LUK 1:39 Mürin ekoch rän Maria a anükünük o feila fän pacheu ngeni eu telinimw won chukuchukutan ewe fanü Jutea.
LUK 1:40 Iwe, lupwen a tori ikenan, a tolong lon imwen Sakarias o a kapong ngeni Elisapet.
LUK 1:41 Nge lupwen Elisapet a rong ewe kapong seni Maria, ewe mönükol a mwökütüküt me lon lukan. Iwe, Elisapet a ur ren Ngünmifel
LUK 1:42 o a apasa fän leüömong, “Ka fokun feiöch me lein fefin meinisin, a pwal feiöch ewe mönükol kopwe nöünätiu.
LUK 1:43 Pwota a fis ngeniei ei mettoch mi amwarar, pwe inen ai Samol a feito rei?
LUK 1:44 Pun lon ewe chök otun üa rong om we kapong, ewe mönükol lon lukei a mwetemwet fän pwapwa.
LUK 1:45 Ka fokun feiöch, pun ka lükü pwe alon ewe Samol ngonuk epwe fis.”
LUK 1:46 Iwe, Maria a apasa, “Letipei a mwareiti ewe Samol,
LUK 1:47 Ngüni a pwapwa pokiten Kot ai Chon Amanau,
LUK 1:48 pun a chechemeniei, ngang nöün chon angang mi tekisoson. Seni ei fansoun aramas meinisin repwe aita ngeniei pwe ngang eman mi feiöch.
LUK 1:49 Pun Kot, ewe mi Unusen Manaman a föri ekewe mettoch mi amwarar fän itei, itan a pin.
LUK 1:50 A pwärala an ümöümöch ngeni chokewe mi niuokusiti seni eu pilon aramas tori eu pilon.
LUK 1:51 A aitiewu pöün mi manaman o atoropasa chokewe mi lamalamtekia lon ar ekiek kana.
LUK 1:52 A asapwilatiu ekewe king mi wor maner seni ar lenien motun king o atekiatai ekewe chon tekison.
LUK 1:53 A amenemenöchü chokewe mi echik ren chomong mettoch mi mürina, o tinala ekewe chon pisekisek fän ar asöülapö.
LUK 1:54 A apwönüetä an pwon ngeni ach kewe lewo o alisi nöün we chon angang Israel.
LUK 1:55 A chechemeni an epwe pwärala an ümöümöch ngeni Apraham, pwal ngeni mwirimwirin kana meinisin tori feilfeilachök.”
LUK 1:56 Iwe, Maria a nonom ren Elisapet lon ükükün ülüngat maram, mürin a pwal liwiniti lenian.
LUK 1:57 A tori fansoun än Elisapet epwe nöünöü, iwe, a nöünätiu eman ät.
LUK 1:58 Iwe, lupwen chon arun me aramasan kana ra rongorong pwe ewe Samol a fokun pwärala an ümöümöch ngeni Elisapet, ir meinisin ra fiti lon an pwapwa.
LUK 1:59 Nge lupwen a tori awaluen ränin ewe mönükol, ra feito pwe repwe eti ewe angangen sirkomsais. Iwe, ra mochen aita ngeni ewe mönükol iten saman we Sakarias.
LUK 1:60 Nge inan we a apasa, “Apw, esap ina, epwe iteni Johannes.”
LUK 1:61 Iwe, ra üreni Elisapet, “Nge esap wor eman lein aramasom a iteni ei it.”
LUK 1:62 Mürin ra pomwo ngeni Sakarias semen ewe ät o aisini meni it i a mochen aita ngeni ewe ät.
LUK 1:63 Iwe, Sakarias a tüngor ngeniir pwe repwe uwato eu lenien mak, pwe epwe makkei ewe it won. Iwe, a makkei, “Epwe iteni Johannes.” Ir meinisin ra fokun mairü.
LUK 1:64 Lon ewe chök otun Sakarias a tongeni kapassefäl o a popuetä le mwareiti Kot.
LUK 1:65 Iwe, chon arun kewe ra uren niuokus, nge pworausen ekei mettoch a chöfetal lon unusen ewe fanü Jutea.
LUK 1:66 Iwe, aramas meinisin mi rongorong ei pworaus ra ekieki usun o aisfengen lefiler, “Met chök epwe le fis ngeni ei mönükol me mürin?” Pun a pwä pwe än ewe Samol manaman a nom won.
LUK 1:67 Iwe, Sakarias semen Johannes a ur ren Ngünmifel o a apasatä an kei kapasen osuni:
LUK 1:68 “Ousipwe mwareiti ewe Samol, ewe Koten Israel! Pun a feito pwe epwe alisi nöün aramas o angaseer.
LUK 1:69 A awora fän itach eman Chon Amanau mi manaman, i eman mwirimwirin nöün chon angang Tafit.
LUK 1:70 A fen pwon me lomlom ren nöün kewe soufos mi pin
LUK 1:71 pwe epwe amanaua kich seni chon oputach, seni pöchökülen chokewe meinisin mi oputa kich.
LUK 1:72 A apasa pwe epwe pwäri an ümöümöch ngeni ach kewe lewo o chechemeni an we pwon mi pin.
LUK 1:73 A pwon fän akapel ngeni semelapach Apraham
LUK 1:74 pwe epwe amanauakich seni chon oputach o mwüt ngenikich pwe sipwe angang ngeni, nge sisap niuokus,
LUK 1:75 sipwe pwal angang ngeni lon pin me pwüng me mwen mesan lon ränin manauach meinisin.
LUK 1:76 Nge en, nei, kopwe iteni nöün Kot ewe mi Unusen Tekia soufos. Kopwe akom mwen ewe Samol, pwe kopwe amolätä alan,
LUK 1:77 kopwe pwal asile ngeni nöün aramas pwe repwe küna manau ren ar küna amusamusen ar tipis kana.
LUK 1:78 Ach Kot a ümöümöch o lukpwetete. Epwe awora ngenikich ewe Saramen Manau seni läng,
LUK 1:79 pwe epwe tinetiu won chokewe mi nom lon rochopwak me nürün mäla, epwe pwal emweni pechech ngeni ewe alen kinamwe.”
LUK 1:80 Iwe, ewe semirit a mämäritä o miritila lon an ekiek. A nonom lon fanüapö tori ewe rän a püsin pwärala ngeni ekewe aramasen Israel.
LUK 2:1 Iwe, lon ewe fansoun ewe Sisar Aukustus a atowu eu allük pwe epwe wor eu makken it lon ekewe fanü meinisin mi nom fän nemenien Rom.
LUK 2:2 Iei aeuin makken it lupwen Kirenius a kepinan Siria.
LUK 2:3 Iwe, aramas meinisin ra feila lon en me an telinimw pwe repwe makkei iter.
LUK 2:4 Iwe, Josef a pwal feila seni ewe telinimw Nasaret lon Kalilea, nge a feitä Jutea lon ewe telinimwen Tafit itan Petleem, pun i eman mwirimwirin Tafit.
LUK 2:5 A feila ikenan pwe epwe mak itan fiti Maria kofotun we mi pwopwo.
LUK 2:6 Nge lupwen ar nonom ikenan, a tori fansoun än neminewe epwe nöünöü.
LUK 2:7 Iwe, a nöünätiu nöün we mwänichi, a finitala lon roron o akonala lon eu lenien amongöü man, pun esap wor eu leni fän iter lon ewe imwen wasöla.
LUK 2:8 Iwe, mi wor ekoch chon mas sip ra nonom lemälen ewe fanü, ra tümwünü folenier pwiin sip lepwin.
LUK 2:9 Iwe, nöün ewe Samol we chon läng a pwä ngeniir o lingen ewe Samol a tinetiu wor, iwe, ra fokun niuokus.
LUK 2:10 Nge ewe chon läng a üreniir, “Ousap niuokus. Pun nengeni, üa arongato remi ewe Pworaus Allim mi aworato pwapwa chapur, epwe tori aramas meinisin.
LUK 2:11 Lon ei rän ikenai eman Chon Amanau a uputiu ngenikemi lon ewe telinimwen Tafit, i Kraist ewe Samol.
LUK 2:12 Nge ei epwe eu asisil ngenikemi: Oupwe küna eman mönükol a finifinila lon roron o konola lon eu lenien amongöü man.”
LUK 2:13 Lon ewe chök otun eu mwichen chomong chon läng ra nom ren ewe chon läng, ra mwareiti Kot o apasa,
LUK 2:14 “Kot epwe ling lon läng, epwe wor kinamwe won fanüfan ngeni aramas, chokewe Kot a pwapwa rer.”
LUK 2:15 Nge lupwen ekewe chon läng ra feila seniir o feitä läng, ekewe chon mas ra kapasfengen lefiler, “Ousipwe feila Petleem o nengeni ei mettoch a fisitä, ewe Samol a asile ngenikich usun.”
LUK 2:16 Iei mine ra feila fän pacheu, nge ra küna Maria me Josef, pwal ewe mönükol mi kon lon ewe lenien amongöü man.
LUK 2:17 Wesin ar küna ewe mönükol, ra asilefeili ewe pworaus ra rong usun ewe mönükol.
LUK 2:18 Iwe, aramas meinisin mi rong ei pworaus ra mairü ren met ekewe chon mas ra üreniir.
LUK 2:19 Nge Maria a amwöchü ekei mettoch meinisin o ekieki usur lon letipan.
LUK 2:20 Iwe, lupwen ekewe chon mas ra liwiniti lenier, ra alinga o mwareiti Kot fän iten ekewe mettoch ra rong o küna, pun a usun chök met ewe chon läng a asile ngeniir.
LUK 2:21 Lupwen a tori awaluen ränin ewe mönükol, wesin an sirkomsais, ra aita ngeni Jesus. Iei ewe it ewe chon läng a aita ngeni mwen Maria esamwo pwopwo.
LUK 2:22 Iwe, lupwen a tori ewe fansoun ar repwe föri ewe angangen alimelim fän iter usun met a fen mak lon Allükün Moses, Josef me Maria ra uwala ewe mönükol Jerusalem pwe repwe anomu mwen mesen ewe Samol.
LUK 2:23 Pun iei usun a fen mak lon än ewe Samol Allük, “Iteiten mwänichi meinisin repwe pin fän iten ewe Samol.”
LUK 2:24 Ra pwal uwato ar asor usun a mak lon än ewe Samol Allük: Ruoman lisom are ruoman apansüsün lisom.
LUK 2:25 Lon ena fansoun mi wor eman mwän lon Jerusalem itan Simeon. Ätei a pwüng o aleasochisi än Kot kewe Allük meinisin, a pwal witiwiti ätewe epwe echipa Israel. Iwe, Ngünmifel a nonom won.
LUK 2:26 Ngünmifel a pwäri ngeni, pwe esap mäla mwen an epwe küna Kraist, ätewe Kot epwe tinato.
LUK 2:27 Simeon a feila lon ewe imwenfel fän emwenien Ngünmifel. Iwe, lupwen Josef me Maria ra uwala ewe mönükol Jesus lon ewe imwenfel pwe repwe föri fän itan met örünier lon pwüngün ekewe Allük,
LUK 2:28 Simeon a ekietä ewe mönükol fän mwärin, a mwareiti Kot o apasa,
LUK 2:29 “Ai Samol, iei ka apwönüetä om pwon, iei mine kopwe mwüt ngeni noumw chon angang pwe epwe feila fän kinamwe.
LUK 2:30 Pun üa küna ren mesei om angangen amanau,
LUK 2:31 ewe ka amolätä mwen mesen aramas meinisin.
LUK 2:32 Epwe eu saram mi pwärala letipom ngeni chon lükün Israel, nge epwe awarato ling ngeni noumw aramasen Israel.”
LUK 2:33 Iwe, semen me inen ewe mönükol ra weitifengeniir ren ekewe kapas Simeon a apasa usun ewe ät.
LUK 2:34 Mürin Simeon a afeiöchüür o üreni Maria, “Nengeni, ei mönükol a fil me ren Kot pwe epwe eu lenien pöütüla me eu lenien küna manau fän iten chomong lon Israel. Ätei epwe pwal eu asisil me ren Kot chomong aramas repwe ü ngeni lon ar kapas,
LUK 2:35 pwe ekiekin chomong aramas epwe pwäla ren. Iwe, lolilen watte epwe akinasa lelukom, usun efoch ketilas a akinasa aramas.”
LUK 2:36 Iwe, mi pwal wor eman soufos fefin itan Anna nöün Fanuel seni ewe ainangen Aser. Ei fefin a fokun chinlap, ra manaufengen me pwülüan lon ükükün fisu ier chök mürin ar apwüpwülü.
LUK 2:37 Iwe, lupwen pwülüan a mäla, a lipichsefäl tori iei a ierini walik me rüanü. Neminei esap feila seni ewe imwenfel, pwe a chök fel ngeni Kot lerän me lepwin fän echikefel me ikiotek.
LUK 2:38 Lon ewe chök otun a wareitiir, a kilisou ngeni Kot o kapas usun ewe mönükol ngeni chokewe meinisin mi witiwiti än Kot epwe angasala Jerusalem.
LUK 2:39 Iwe, lupwen Josef me Maria ra wes le föri meinisin usun met mi mak lon än ewe Samol Allük, ra liwiniti Nasaret lon Kalilea, iei poputän telinimwer.
LUK 2:40 Iwe, ewe ät a mämäritä o pöchökülela. A uren tipachem o än Kot feiöch a nonom won.
LUK 2:41 Iteiten ier semen me inen Jesus ra soun feila Jerusalem fän iten ewe chulapen Pasofer.
LUK 2:42 Iwe, lupwen Jesus a ierini engol me ruu, a etiir le feila fiti ewe chulap lon pwüngün örünier.
LUK 2:43 Nge wesin ewe chulap ra liwiniti lenier, nge ewe ät Jesus a nomotiu Jerusalem. Iwe, saman me inan resap silei,
LUK 2:44 pun ra ekieki pwe a fiti ekewe mwichen aramas ra akom mwer. Iei mine ra fetal lon unusen ewe rän, mürin ra popuetä le kütta lein aramaser me chiechier kewe.
LUK 2:45 Nge lupwen resap küna, ra liwinsefäliti Jerusalem o kütta Jesus ikenan.
LUK 2:46 Mürin ülüngat rän ra küna me lon ewe imwenfel, pwe a mot lein ekewe sense, a aüseling ngeniir o kapas ais ngeniir.
LUK 2:47 Iwe, ir meinisin mi rongorong ngeni ewe ät ra mwar ren an weweöch me an silelap le pölüeni ekewe kapas ais.
LUK 2:48 Lupwen saman me inan ra küna, ra weitifengeniir. Iwe, inan we a üreni, “Nei, pwota ka föri iei usun ngenikem? Nengeni, semom me ngang aia lolilen me weires le küttok.”
LUK 2:49 Iwe, Jesus a pölüeni, “Pwota oua küttaei? Ousap silei pwe ngang üpwe fokun nonom lon imwen Semei?”
LUK 2:50 Nge ir resap weweiti mine a eäni kapas ngeniir.
LUK 2:51 Mürin Jesus a etiir le liwinsefäliti Nasaret, iwe, a aleasochis ngeniir. Nge inan a iseis ekei mettoch meinisin lon lelukan.
LUK 2:52 Iwe, Jesus a mämäritä lon an tipachem, lon inisin pwal lon an küna chenin me ren Kot o pwal me ren aramas kana.
LUK 3:1 Iwe, lon engol me limuen ierin mwün Sisar Tiperius, lupwen Pontius Pilatus a kepinan Juta, Herotes a samolun Kalilea, pwiin we Filip a samolun Iturea me Trakonitis me Lisanias a samolun Apilene,
LUK 3:2 nge Anas me Kaifas ir ekewe Souasor mi Lap lon ena fansoun, alon Kot a tori Johannes nöün Sakarias we mwän me lon fanüapö.
LUK 3:3 Iei mine Johannes a feila lemenen unusen ewe fanü ünükün ewe chanpupu Jortan o afalafal, “Oupwe kul seni ämi tipis o papatais, iwe, Kot epwe amusala ämi tipis.”
LUK 3:4 Pun iei usun mine a mak lon ewe puk makkeen ewe soufos Aisea, “Eman a kökkö fän leüömong lon fanüapö: ‘Oupwe amolätä efoch al fän iten ewe Samol, oupwe awenecharala ewe al epwe fetal won.
LUK 3:5 Lemolun chuk meinisin repwe irela, ekewe chuk meinisin repwe tekisonola. Ekewe al mi pwor repwe awenewen, ekewe al mi pukopuk repwe sonosonöchüla.
LUK 3:6 Iwe, aramas meinisin repwe küna än Kot angangen amanau.’”
LUK 3:7 Iwe, eu mwichen aramas mi chomong ra feila pwe repwe papatais ren Johannes. Nge a üreniir, “Ämi nöün serepenit. Iö a ürenikemi pwe oupwe sü seni än Kot we song epwe awarato womi?
LUK 3:8 Oupwe föri sokun föför epwe pwärätä pwe oua aier seni ämi tipis, nge ousap popuetä le apasa lefilemi, ‘Äm mwirimwirin Apraham.’ Pun ngang üpwe ürenikemi, pwe Kot a tongeni angei ekei fau o föri seniir pwe repwe mwirimwirin Apraham.
LUK 3:9 Ewe kouk a fen molotä pwe epwe pöküela ekewe irä seni warer. Iteiten irä esap uani ua mi öch epwe pöküpök o koturolong lon ekkei.”
LUK 3:10 Iwe, ekewe aramas ra aisini Johannes, “Nge äm, met äm aipwe föri?”
LUK 3:11 Johannes a pölüeniir, “Iö a eäni ruu söch epwe angei echö o ngeni ewe eman esap wor an, nge eman mi wor anan mongö epwe pwal föri iei usun.”
LUK 3:12 Iwe, ekoch chon ioni takises ra feito pwe repwe papatais. Ra aisini, “Sense, met äm aipwe föri?”
LUK 3:13 Johannes a pölüeniir, “Oupwe chök ioni takises lon ükükün met mi afat lon allük.”
LUK 3:14 Ekoch sounfiu ra pwal aisini, “Nge äm, met äm aipwe föri?” Johannes a pölüeniir, “Ousap achomau lon ämi angei moni seni aramas, ousap atipisimwäli eman, nge oupwe menemenöch ren liwinin ämi angang.”
LUK 3:15 Iwe, ekewe aramas ra witiwit fän apilükülüköch o ra popuetä le ekieki lon leluker pwe Johannes eli epwe fen ewe Kraist.
LUK 3:16 Iei mine Johannes a üreniir, “Ngang üa papataisikemi ren koluk, nge eman mi lap seniei epwe feito, ngang üsap fich ngeni ai üpwe mwo nge apichi ririn ipwan sus, ätewe epwe papataisikemi ren Ngünmifel me ekkei.
LUK 3:17 A kamwöch an söföl mi keang pwe epwe aea le aimwüfeseni ekewe föün wiich seni pöön me won an lenien wichiwich umwun wiich. Iwe, epwe ionifengeni ekewe föün wiich o uwalong lon an lenien iseis, nge ekewe pöön epwe keniirela lon ekkei esap kunula.”
LUK 3:18 Iwe, lon chomong sokopaten kapas Johannes a aea le afalafala ewe Pworaus Allim ngeni ekewe aramas o fönöör, pwe repwe siwili manauer.
LUK 3:19 Nge Johannes a apwüngü ewe samol Herotes pokiten an pwülüeni Herotias pwülüen pwiin we, pwal pokiten an kewe föför mi ngau meinisin a föri.
LUK 3:20 Mürin Herotes a föri och föför mi fokun ngau ren an aturalong Johannes lon imwen fötek.
LUK 3:21 Iwe, lupwen ekewe aramas meinisin ra papatais, Jesus a pwal papatais. Nge lupwen Jesus a iotek, läng a sukula
LUK 3:22 o ewe Ngünmifel a feitiu won usun lapalapen eman lisom. Iwe, eu möngüngü a feitiu seni läng a apasa, “En nei mi fokun achengicheng, üa unusen pwapwa reöm.”
LUK 3:23 Iwe, lupwen Jesus a popuetä an angang a ierini ina epwe ilik ier. Iei usun än aramas ekiek pwe Jesus nöün Josef, nge Josef nöün Eli,
LUK 3:24 Eli nöün Matat, Matat nöün Lefi, Lefi nöün Melki, Melki nöün Jannai, nge Jannai nöün Josef,
LUK 3:25 Josef nöün Matitia, Matitia nöün Amos, Amos nöün Nahum, Nahum nöün Esli, nge Esli nöün Nakkai,
LUK 3:26 Nakkai nöün Mahat, Mahat nöün Matatias, Matatias nöün Simei, Simei nöün Josek, nge Josek nöün Jota,
LUK 3:27 Jota nöün Johanan, Johanan nöün Resa, Resa nöün Serupapel, Serupapel nöün Sealtiel, nge Sealtiel nöün Neri,
LUK 3:28 Neri nöün Melki, Melki nöün Atti, Atti nöün Kosam, Kosam nöün Elmatam, nge Elmatam nöün Er,
LUK 3:29 Er nöün Josua, Josua nöün Elieser, Elieser nöün Jorim, Jorim nöün Matat, nge Matat nöün Lefi,
LUK 3:30 Lefi nöün Simeon, Simeon nöün Juta, Juta nöün Josef, Josef nöün Jonam, nge Jonam nöün Eliakim,
LUK 3:31 Eliakim nöün Melea, Melea nöün Menna, Menna nöün Matata, Matata nöün Natan, nge Natan nöün Tafit,
LUK 3:32 Tafit nöün Jesi, Jesi nöün Opet, Opet nöün Poas, Poas nöün Salmon, nge Salmon nöün Nason,
LUK 3:33 Nason nöün Aminatap, Aminatap nöün Atmin, Atmin nöün Arni, Arni nöün Hesron, Hesron nöün Peres, nge Peres nöün Juta,
LUK 3:34 Juta nöün Isaak, Isaak nöün Apraham, Apraham nöün Tara, nge Tara nöün Nahor,
LUK 3:35 Nahor nöün Seruk, Seruk nöün Reu, Reu nöün Pelek, Pelek nöün Eper, nge Eper nöün Shela,
LUK 3:36 Shela nöün Kainan, Kainan nöün Arpaksat, Arpaksat nöün Säm, Säm nöün Noa, nge Noa nöün Lamek,
LUK 3:37 Lamek nöün Metusala, Metusala nöün Enok, Enok nöün Jaret, Jaret nöün Mahalalel, nge Mahalalel nöün Kenan,
LUK 3:38 Kenan nöün Enos, Enos nöün Set, Set nöün Atam, nge Atam nöün Kot.
LUK 4:1 Iwe, Jesus a ur ren Ngünmifel lupwen a liwinsefäl seni ewe chanpupu Jortan, iwe, Ngünmifel a emwenala lon fanüapö.
LUK 4:2 Ikenan Satan a sotuni lon ükükün faik rän. Lon ekana rän esap mongö och. Nge wesilan ekei rän a echik.
LUK 4:3 Iwe, Tefil a üreni, “Are en Nöün Kot, kopwe üreni ei fau pwe epwe wiliti pilawa.”
LUK 4:4 Nge Jesus a pölüeni, “A mak lon ekewe Toropwe mi Pin, ‘Aramas resap manau ren mongö chök.’”
LUK 4:5 Mürin Tefil a emwenatä Jesus won eu leni mi tekia o aküna ngeni mwün fanüfan meinisin lon ekis chök mochomochen fansoun.
LUK 4:6 Iwe, a üreni, “Ngang üpwe ngonuk ar kewe nemenem meinisin pwal wöür kewe, pun ra nom fän nemeniei, nge ngang üa tongeni ngeni iö üa mochen ngeni.
LUK 4:7 Iei mine are kopwe fel ngeniei, üpwe mwüt ngonuk pwe kopwe eäniir meinisin.”
LUK 4:8 Jesus a pölüeni, “A mak lon ekewe Toropwe mi Pin, ‘Kopwe fel ngeni ewe Samol om Kot o angang ngeni i chök.’”
LUK 4:9 Mürin Tefil a emwenala Jesus Jerusalem o aütai won ungen ewe imwenfel. Iwe, a üreni, “Are en Nöün Kot, kopwe aturuketiu me ikei.
LUK 4:10 Pun a mak lon ekewe Toropwe mi Pin, ‘Epwe allük ngeni nöün kewe chon läng pwe repwe tümwünuk.’
LUK 4:11 A pwal mak, ‘Repwe pwisuk lepöür, pwe pecheöm esap chepeti fau.’”
LUK 4:12 Iwe, Jesus a pölüeni, “A mak lon ekewe Toropwe mi Pin, ‘Kosap sotuni ewe Samol om Kot.’”
LUK 4:13 Iwe, lupwen Tefil a wes me sotuni Jesus ren ekewe sosot meinisin a feila seni lon ekis chök fansoun.
LUK 4:14 Mürin Jesus a liwinsefäliti Kalilea, nge manamanen Ngünmifel a nom ren. Iwe, pworausan a chöfetal lon unusen ewe fanü meinisin.
LUK 4:15 A afalafal lon ekewe imwen felikis o aramas meinisin ra mwareiti i.
LUK 4:16 Mürin Jesus a feila Nasaret, ewe ia a mämäritä me ie. Iwe, lon ewe ränin sapat Jesus a feila lon ewe imwen felikis usun an örüni. Iwe, a ütä pwe epwe aleani ekewe Toropwe mi Pin,
LUK 4:17 nge ra ngeni puken ewe soufos Aisea. Iwe, a sukala ewe puk o a küna ewe ia a mak ie ekei kapas,
LUK 4:18 “Ngünün ewe Samol a nonom woi, pun a afiliei pwe üpwe afalafala ewe Pworausen Manau ngeni ekewe chon mwelele. A tiniei, pwe üpwe aronga ngeni ekewe chon fötek pwe repwe ngasala, ekewe chon chun pwe repwe küna mwer, üpwe pwal angasala chokewe aramas ra ariaföüür.
LUK 4:19 Üpwe pwal arongafeili pwe a war ewe fansoun, lupwen ewe Samol epwe amanaua nöün aramas.”
LUK 4:20 Mürin Jesus a öppüngala ewe puk, a aliwini ngeni ewe chon angang o mottiu. Iwe, ekewe aramas meinisin mi nom lon ewe imwen felikis ra afota meser won.
LUK 4:21 Iwe, a popuetä le kapas ngeniir, “Ikenai ekei kapas oua rongorong me lon ei Toropwe mi Pin ra fen pwönüetä.”
LUK 4:22 Aramas meinisin ra kapas öch usun o mwar ren an kapas mi manaman a apasatä. Ra ais, “Ifa usun, sap i nöün Josef?”
LUK 4:23 Nge a üreniir, “Ewer, üa silei pwe oupwe apasa ngeniei ei mwiitun, ‘Sousafei, kopwe püsin apöchökülok!’ Kopwe föri ikei lon püsin telinimwomw met aia rongorong pwe ka föri me lon Kapernaum.”
LUK 4:24 Iwe, a sopwela le kapas ngeniir, “Enlet eman soufos esap wor meninin me lon poputän telinimwan.
LUK 4:25 Oupwe aüselingaei: A wor chomong fefin mi mä pwülüer lon Israel lon fansoun Elias, lupwen a wor mailengita lon unusen ewe fanü pokiten esap püng üt lon ükükün ülüngat esop ier.
LUK 4:26 Iwe, Kot esap tinala Elias ren eman lein ekewe fefin mi mä pwülüer lon Israel, nge a tinala ren eman fefin mi mä pwülüan lon Sarapat lon ewe fanü Siton.
LUK 4:27 A pwal wor chomong aramas mi samaun rupun pwötür lon Israel lon fansoun ewe soufos Elisa. Nge esamwo wor eman a limöch seni rupun pwe Naeman chök ewe re Siria.”
LUK 4:28 Iwe, lupwen ekewe aramas meinisin lon ewe imwen felikis ra rongorong ekei kapas, ra fokun song.
LUK 4:29 Ra ütä o etekinawu Jesus lükün ewe telinimw, ra etekinatä won ewe chukuchukutä ia ar telinimw a köütä ie, pwe repwe aturätiu me lepokun ewe achau.
LUK 4:30 Nge Jesus a fetalelong lein ewe mwichen aramas o feila seniir.
LUK 4:31 Mürin Jesus a feila Kapernaum, eu telinimw lon Kalilea. Ikenan a afalafala ekewe aramas lon ewe ränin sapat.
LUK 4:32 Iwe, ekewe aramas ra mairü ren an afalafal, pun a afalafal usun eman mi wor an manaman.
LUK 4:33 Iwe, me lon ewe imwen felikis a wor eman mwän a wor eman ngününgau won. A leüömong le puchör,
LUK 4:34 “Aha! Met ka mochen föri ngenikem, Jesus seni Nasaret? Ka feito pwe kopwe afeiengauakem? Ngang üa silei en, en Nöün Kot we mi Pin.”
LUK 4:35 Iwe, Jesus a allük ngeni ewe ngününgau, “Kopwe fanafanala o towu seni ei mwän.” Iwe, ewe ngününgau a aturätiu ewe mwän me mwen ekewe aramas, a towu seni, nge esap afeiengaua.
LUK 4:36 Iwe, ekewe aramas meinisin ra mairü o kapasfengen lefiler, “Met sokun kapas kei a eäni? Ren manaman me pöchökül ei mwän a allük ngeni ekewe ngününgau, iwe, ra towu.”
LUK 4:37 Iwe, ewe pworaus usun Jesus a chöfetal lon unusen ewe fanü.
LUK 4:38 Mürin Jesus a towu seni ewe imwen felikis o feila lon imwen Simon. Iwe, inen pwülüen Simon a eäni eu samaun pwichikar, iei mine ra tüngor ngeni Jesus pwe epwe apöchöküla.
LUK 4:39 Iwe, Jesus a feila ren, a ütä arun än neminewe we peet o üreni ewe pwichikar pwe epwe towu seni. Iwe, ewe pwichikar a towu seni. Lon ewe chök otun neminewe a pwätä o a tümwünüür.
LUK 4:40 Iwe, lupwen akkar a tuputiu, aramas ra uwato ren Jesus aramas meinisin mi eäni sokopaten samau. Jesus a iseis pöün wor o apöchöküleer meinisin.
LUK 4:41 Pwal anün rochopwak ra towu seni chomong aramas, ra puchörütä, “En Nöün Kot!” Nge Jesus a apwüngüür o esap mwüt ngeniir pwe repwe kapas, pun ra silei pwe i ewe Kraist.
LUK 4:42 Iwe, lupwen a ränila, Jesus a feila lükün ewe telinimw lon eu leni ia esap wor aramas ie. Ekewe aramas ra küttafeili, nge lupwen ra küna, ra sotuni ar repwe amwöchü, pwe esap feila seniir.
LUK 4:43 Nge Jesus a üreniir, “Üpwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.”
LUK 4:44 Iwe, Jesus a sopwela le afalafal lon ekewe imwen felikis lon Jutea.
LUK 5:1 Lon eu rän, lupwen Jesus a ütä arun ewe nomun Kalilea, ekewe aramas ra mwicheto o etieti ngeni, pwe repwe rongorong än Kot kapas.
LUK 5:2 Iwe, a küna ruofoch wa ra ürütä le pi, nge ekewe chon attau ra tötiu me won ekewe wa o talü nöür kewe chew.
LUK 5:3 Iwe, Jesus a tötä won efoch kewe wa, wään Simon o tüngor ngeni pwe epwe ekis sikawu seni le pi. Nge Jesus a mottiu won o afalafala ewe mwichen aramas.
LUK 5:4 Lupwen Jesus a wes le afalafal, a üreni Simon, “Kopwe fötünewu ewe ia a alolol ie, en me chiechiom kewe, oupwe aturätiu nöümi kewe chew, pwe oupwe liap.”
LUK 5:5 Simon a pölüeni, “Ai samol, äm aia weires le attau lon unusen ewe pwin, nge aisap liap. Nge fän alom üpwe aturätiu ekewe chew.”
LUK 5:6 Iwe, lupwen ra aturätiu nöür kewe chew, ra liapeni chomong, chomong ik, pwe nöür kewe chew ra popuetä le kam.
LUK 5:7 Iei mine ra äkänipöü chiechier kewe mi nom won pwal ewe efoch wa, pwe repwe feito o alisiir. Iwe, ra feito o amasoua waar kewe ruofoch tori ra ur o arapakan ngeni ar repwe kokola.
LUK 5:8 Lupwen Simon Petrus a küna mine a fis, a fotopwäsuketiu mwen Jesus o üreni, “Kopwe feila seniei ai Samol, pun ngang eman chon tipis.”
LUK 5:9 Pun i me chokewe mi eti ra mairü ren chomongun liaper ik ra liapeni.
LUK 5:10 Pwal ina chök usun mine a fis ngeni chiechien Petrus kewe James me Johannes nöün Sepeti kewe. Mürin Jesus a üreni Simon, “Kosap niuokus, seni ikenai kopwe eman chon attaua aramas.”
LUK 5:11 Iwe, ra ürätä waar kewe le pi, ra likitala meinisin o tapwela mürin Jesus.
LUK 5:12 Iwe, lupwen Jesus a nom lon eu kewe telinimw, a feito eman mwän mi kula inisin ren rupun pwötür. Lupwen a küna Jesus, a chapetiu le pwül o tüngormau ngeni, “Ai Samol, are ka mochen ka tongeni limetiei.”
LUK 5:13 Iwe, Jesus a aitiela pöün, a atapa inisin ewe mwän o apasa, “Ngang üa mochen, kopwe limöch.” Lon ewe chök otun ewe rupun pwötür a mola me won inisin ewe mwän.
LUK 5:14 Mürin Jesus a allük ngeni ewe mwän, “Kosap apworausa ngeni eman mine a fis ngonuk. Nge kopwe feila ren ewe souasor pwe epwe nenengenuk. Mürin kopwe eäni ewe asor Moses a allük fän iten om limelim, pwe epwe alletätä ngeni aramas pwe ka limöch.”
LUK 5:15 Iei mwo ei, nge ewe pworaus usun Jesus a chök chöfetal ekis meinisin. Iwe, eu mwichen aramas mi chomong ra feito pwe repwe rongorong an afalafal, repwe pwal küna pöchökül seni ar samau.
LUK 5:16 Nge Jesus a feila seniir, a emanüla lon eu leni ia esap wor aramas ie o iotek.
LUK 5:17 Lon eu rän, lupwen Jesus a afalafal, ekoch ekewe Farisi me Sensen Allük ra mot ren, ra feito seni ekewe telinimwen Kalilea me Jutea meinisin, pwal seni Jerusalem. Iwe, manamanen ewe Samol a nom ren Jesus, pwe a tufichin apöchöküla ekewe chon samau.
LUK 5:18 Iwe, ekoch mwän ra ekieto eman mwän mi mwök won eu peet. Ra sotuni ar repwe ekielong lon ewe imw o anomu mwen Jesus,
LUK 5:19 nge resap tongeni pokiten ewe mwichen aramas mi chomong. Iei mine ra tötä won osun ewe imw o säresi awenewenen ewe ia Jesus a nom ie. Iwe, wesin ar säresi ra aürätiu ewe mwän me mwen Jesus lein ewe mwichen aramas.
LUK 5:20 Lupwen Jesus a küna ar lükülük, a üreni ewe mwän, “Pwii, om tipis kana ra musola.”
LUK 5:21 Iwe, ekewe Sensen Allük me ekewe Farisi ra popuetä le ekieki lon leluker, “Iö ei mwän a apasa ekei kapasen turunufas? Iö a tongeni amusala tipis, sap Kot echök?”
LUK 5:22 Iwe, Jesus a silei ar ekiek o üreniir, “Pwota oua ekieki ei sokun?
LUK 5:23 Meta a mecheres ai üpwe apasa, ‘Om tipis kana ra musola,’ are ai apasa, ‘Kopwe ütä o fetal?’
LUK 5:24 Ngang üpwe allükülükü ngenikemi, pwe Nöün Aramas a wor an pwüüng won fanüfan pwe epwe amusala tipis.” Iei mine a üreni ewe mwän mi mwök, “Üpwe ürenuk: Kopwe ütä, angei kiom o feila lon imwom.”
LUK 5:25 Lon ewe chök otun ewe mwän a ütä me mwer meinisin, a angei kian o liwinla lon lenian fän an mwareiti Kot.
LUK 5:26 Iwe, ir meinisin ra fokun mairü, ra uren niuokus, ra mwareiti Kot o apasa, “Mwa met, amwararen ekei mettoch sa küna ikenai!”
LUK 5:27 Mürin ekei mettoch, Jesus a towu seni ewe telinimw o küna eman chon ioni takises itan Lefi, a mot lon an ofes. Iwe, Jesus a üreni, “Kopwe tapweto müri.”
LUK 5:28 Iwe, Lefi a ütä, a likitala meinisin o tapwela mürin.
LUK 5:29 Mürin Lefi a föri eu watten kametip lon imwan fän iten Jesus. Iwe, chomong chon ioni takises me pwal ekoch aramas ra nom lein ekewe chon kökköto.
LUK 5:30 Iwe, ekoch ekewe Farisi me ekoch Sensen Allük mi choni ar kewe mwich, ra ngününgün ngeni nöün Jesus kewe chon kaiö o aisiniir, “Pwota oua mongö o ün me ekewe chon ioni takises me ekewe chon tipis?”
LUK 5:31 Jesus a pölüeniir, “Aramas mi pöchökül esap lomot ngeniir eman sousafei, nge a lomot ngeni ekewe chon samau.
LUK 5:32 Ngang üsap feito, pwe üpwe köri ekewe chon pwüng ar repwe ekieksefäl, pwe ekewe chon tipis.”
LUK 5:33 Iwe, ekoch aramas ra üreni Jesus, “Nöün Johannes kewe chon kaiö ra echikefel fän chomong o iotek, pwal usun chök nöün ekewe Farisi kewe chon kaiö. Nge noumw kewe chon kaiö ra chök momongö o ükün.”
LUK 5:34 Jesus a pölüeniir, “Ifa usun, oua ekieki pwe ekewe chon kökkö ngeni fetallapen apwüpwülü ra echik lupwen ewe mwän apwüpwülü söfö a nom rer? Resap fokun echik lupwen fansoun a nom rer.
LUK 5:35 Nge epwe war ewe rän lupwen aramas repwe angei seniir ewe mwän apwüpwülü söfö fän pöchökül, iwe, lon ekana rän repwapw echik.”
LUK 5:36 Iwe, Jesus a pwal apworausa ngeniir eu pworausen awewe: “Esap wor eman a angei ekam mangaku seni echö üf mi fö o teiätä won echö üf mi mes. Pun are epwe föri iei usun, a föri met ewe üf mi fö epwe kam ren, nge ewe ekam mangaku mi fö esap pwal öch ngeni echö üf mi mes.
LUK 5:37 Esap pwal wor eman epwe alölöülong wain mi fö lon eu pör seni silin man mi mes, pun ewe wain mi fö epwe amökkü ewe pör, iwe, ewe wain epwe nitiu le pwül, nge ewe pör epwe mökküla.
LUK 5:38 Nge wain mi fö sipwe alölöülong lon pör mi fö.
LUK 5:39 Esap wor eman epwe mochen ünümi wain mi fö mürin an ünümi ewe wain mi mes, pun a apasa, ‘Ewe wain mi mes a annö seni ewe wain mi fö.’”
LUK 6:1 Iwe, a fis, pwe Jesus a fetal lon eu tanipin wiich lon eu ränin sapat. Iwe, nöün kewe chon kaiö ra popuetä fichi umwun uän wiich, ra märätula lon pöür o mongö.
LUK 6:2 Ekoch Farisi ra aisini, “Pwota oua föri mine esap pwüng lon allükün ach lamalam lon ränin sapat?”
LUK 6:3 Iwe, Jesus a pölüeniir, “Ousap mwo aleani mine Tafit a föri lupwen i me chiechian kewe ra echik?
LUK 6:4 A tolong lon imwen Kot o angei ewe pilawa ra eäni asor ngeni Kot, a mongö, a pwal ngeni chiechian kewe. Nge ei a ü ngeni allükün lamalam, pun esap wor eman a tongeni mongö ekei pilawa pwe ekewe chök souasor.”
LUK 6:5 Jesus a pwal apasa, “Nöün Aramas i Sounemenemen ewe ränin sapat.”
LUK 6:6 Lon pwal eu ränin sapat Jesus a feila lon eu imwen felikis o afalafal. Ikenan a wor eman mwän mi mä pöüifichin.
LUK 6:7 Iwe, ekoch Sensen Allük me Farisi ra kütta eu popun pwe repwe tongeni atipisi Jesus, iei mine ra mamasafichi are epwe apöchöküla ewe mwän lon ewe ränin sapat.
LUK 6:8 Nge Jesus a silei ar ekiek o üreni ewe mwän, “Kopwe ütä o feito ikei mwen ekewe aramas.” Iwe, ewe mwän a ütä mwer meinisin.
LUK 6:9 Mürin Jesus a üreniir, “Ngang üpwe aisinikemi: Met allükün ach we lamalam a mwüt ngenikich sipwe tongeni föri lon ewe ränin sapat? Sipwe föri mine a öch ngeni aramas, are sipwe föri mine a ngau? Sipwe amanaueer, are sipwe amälaar?”
LUK 6:10 Iwe, Jesus a nenengeniir meinisin, mürin a üreni ewe mwän, “Kopwe aitiewu poumw!” Iwe, a aitiewu pöün, iwe, a pöchökülsefäl.
LUK 6:11 Nge ekewe Farisi me Sensen Allük ra fokun song o ra popuetä le pwüngüpwüngfengen lefiler usun mine repwe föri ngeni Jesus.
LUK 6:12 Lon ena fansoun Jesus a feitä won eu chuk pwe epwe iotek. Iwe, a nonom ikenan o iotek ngeni Kot lon unusen ewe pwin.
LUK 6:13 Lupwen a ränila, a körato nöün kewe chon kaiö o a filätä engol me ruoman me leir, ätekewe a pwal aita ngeniir soukünö:
LUK 6:14 Simon (ätewe Jesus a aita ngeni Petrus) me Andru pwiin we, James me Johannes, Filip me Partolomeus,
LUK 6:15 Mateus me Tomas, James nöün Alfäus me Simon i eman Selot,
LUK 6:16 Jut nöün James me Jut Iskariot, ätewe mi afangamä Jesus.
LUK 6:17 Lupwen Jesus a feitiu seni won ewe chuk me nöün kewe chon kaiö, a ütä lon eu leni mi sosonöch. Iwe, chomong nöün kewe chon kaiö ra mwicheto ren, pwal eu mwichen aramas mi chomong seni unusen ewe fanü Jutea, seni Jerusalem pwal seni ekewe telinimw Tirus me Siton mi nom aroset.
LUK 6:18 Ra feito pwe repwe rong ngeni än Jesus afalafal, epwe pwal apöchöküleretä seni ar kewe samau. Pwal chokewe mi riaföü ren ngününgau ra feito ren o küna pöchökül.
LUK 6:19 Ekewe aramas meinisin ra sotuni ar repwe atapa Jesus, pun och manaman a towu seni o apöchöküleer meinisin.
LUK 6:20 Iwe, Jesus a nenengeni nöün kewe chon kaiö o apasa, “Oua feiöch ämi mi wöüngau, pun oupwe mwüni ewe Mwün Kot.
LUK 6:21 Oua feiöch ämi mi echik lon ei fansoun, pun oupwe mötüla. Oua feiöch ämi mi kechü lon ei fansoun, pun oupwe fokun pwapwa.
LUK 6:22 “Oua feiöch are aramas ra oputakemi o likitikemi, are ra aitengauakemi o kapasingau usumi pokiten oua lükü Nöün Aramas.
LUK 6:23 Oupwe pwapwa are a fis ei sokun lapalap ngenikemi, oupwe mwetemwet fän pwapwa, pun liwinimi mi watte epwe iseis lon läng fän itemi. Pun ar kewe lewo ra fen föri ekei sokun föför ngeni ekewe soufos.
LUK 6:24 Nge feiengauemi ämi mi pisekisek lon ei fansoun, pun oua fen nom lon manau mi mecheres.
LUK 6:25 Feiengauemi ämi mi mötüla lon ei fansoun, pun oupwe echik. Feiengauemi ämi mi pwapwa lon ei fansoun, pun oupwe letipeta o kechü.
LUK 6:26 Feiengauemi are aramas meinisin ra kapasöch usumi, pun ar kewe lewo ra fen eäni ei sokun kapas ren ekewe soufos chofona.
LUK 6:27 “Nge üpwe ürenikemi ämi mi aüselingaei: Oupwe echeni chon pölüenikemi, oupwe föföröch ngeni chokewe mi oputakemi.
LUK 6:28 Oupwe afeiöchü chokewe mi ottekikemi o iotek fän iten chokewe mi föföringau ngenikemi.
LUK 6:29 Are eman a pösapek, kopwe pwal akulu ngeni ewe epek. Are eman a angei üfom sekit, kopwe pwal mwüt ngeni üfom söch.
LUK 6:30 Are eman a tüngorek och mettoch, kopwe chök ngeni, nge are eman a angei och pisekum, kosap aissefäl fan pöchökül.
LUK 6:31 Oupwe föri ngeni aramas usun chök mine oua mochen repwe föri ngenikemi.
LUK 6:32 Are oua chök tongei ekewe aramas mi tongekemi, met popun ämi oupwe angei och feiöch? Ekewe mwo chon tipis ra pwal tongei chokewe mi tongeer.
LUK 6:33 Nge are oua chök föföröch ngeni chokewe mi föföröch ngenikemi, met popun ämi oupwe angei och feiöch? Ekewe mwo chon tipis ra föri iei usun.
LUK 6:34 Are oua chök mwütätä pisekimi ngeni chokewe oua apilükülükü pwe repwe aliwinisefäli ngenikemi, met popun ämi oupwe angei och feiöch? Ekewe mwo chon tipis ra mwütätä pisekir ngeni chon tipis pwe repwe angesefäli won ükükün met ra fangala.
LUK 6:35 Nge ämi oupwe echeni chon oputakemi o föföröch ngeniir. Oupwe mwütätä pisekimi ngeniir, nge ousap ekiekin angesefäli. Mürin oupwe angei liwinimi mi watte o wiliti Nöün Kot ewe mi Unusen Tekia. Pun Kot a kirikiröch ngeni chokewe resap sile kilisou, pwal ngeni ekewe aramasangau.
LUK 6:36 Oupwe eäni ümöümöch usun chök Sememi a eäni ümöümöch.
LUK 6:37 “Ousap apwüngü aramas, pwe Kot esap apwüngükemi. Ousap atipisi aramas, pwe Kot esap atipisikemi. Oupwe amusala än eman aramas tipis, pun Kot epwe pwal amusala ämi tipis.
LUK 6:38 Oupwe fangafangöch ngeni aramas, pun Kot epwe fangafangöch ngenikemi. Ewer, oupwe angei eu aükük mi unusöch, mi itelong o chachelong o säsewu, epwe urourela me le pöümi. Pun ewe chök aükük oua aea le aükük ngeni aramas, Kot epwe pwal aea ngenikemi.”
LUK 6:39 Iwe, Jesus a pwal apworausa ngeniir eu pworausen awewe: “Epwe tufich än eman chon chun epwe emweni eman mi chun? Ifa usun, resap turulong me ruoman lon eu pwang?
LUK 6:40 Eman chon sukul esap lap seni nöün sense, nge eman mi awesöchüela an sukul epwe wewe ngeni nöün sense.
LUK 6:41 Pwota ka küna ewe kükün pipi mi nom lon mesen pwiüm, nge kosap püsin mefi ewe irä lon mesom?
LUK 6:42 Epwe ifa usun om kopwe tongeni üreni pwiüm, ‘Pwii kopwe mwüt ngeniei ai üpwe uwawu ewe kükün pipi lon mesom’, nge püsin en kosap küna ewe irä mi nom lon mesom? En eman chon likatuputup! Kopwe akomwen uwawu ewe irä mi nom lon mesom, iwe, mürin kopwe tongeni künafichi om kopwe uwawu ewe kükün pipi seni lon mesen pwiüm.
LUK 6:43 “Efoch irä mi mürina esap uani ua mi ngau, nge efoch irä mi ngau esap uani ua mi mürina.
LUK 6:44 Pun irä meinisin ra sil ren uar. Kosap tongeni kini föün apel seni ewe irä lantana, kosap pwal kini föün kurukur seni ewe irä acharong.
LUK 6:45 Eman aramas mürina epwe chök atowu mettoch mi mürina seni letipan, nge eman aramasangau epwe chök atowu mettoch mi ngau. Pun eman aramas epwe chök apasawu met mi nom lon letipan.
LUK 6:46 “Pwota oua aita ngeniei, ‘Samol, samol,’ nge ousap föri mine üa apasa ngenikemi?
LUK 6:47 Ika eman epwe feito rei o rongorong ai kewe kapas o apwönüretä, üpwe pwäri ngenikemi met i a wewe ngeni:
LUK 6:48 A wewe ngeni eman mwän a aüetä imwan, a tuw alololetiu o föri ewe longolong won achau. Iwe, lupwen ewe chanpupu a puwu o puiti ewe imw, ewe imw esap tongeni mächüngüchüng, pun a pöchökül.
LUK 6:49 Iwe, ika eman epwe rongorong ai kewe kapas nge esap apwönüretä, a wewe ngeni eman mwän mi aüetä imwan won pwül, nge esap wor longolongun. Iwe, lupwen ewe chanpupu a puiti ewe imw, a müttir turula, nge talan ewe imw a fokun watte.”
LUK 7:1 Iwe, lupwen Jesus a wes le kapas ngeni ekewe aramas usun ekei mettoch meinisin, a feila Kapernaum.
LUK 7:2 Mi wor eman meilapen sounfiu ikenan, a wor eman nöün chon angang a fokun aücheani. Ei chon angang a samau o arapakan ngeni an epwe mäla.
LUK 7:3 Lupwen ewe meilapen sounfiu a rong usun Jesus, a tinala ekoch souakomwen ekewe chon Juta, pwe repwe tüngor ngeni Jesus pwe epwe feito o apöchökülätä nöün we chon angang.
LUK 7:4 Iwe, lupwen ra feito ren Jesus, ra tüngormau ngeni o üreni, “A fokun fich ngeni ei mwän om kopwe alisi.
LUK 7:5 Ei mwän a tongei aramasach o aüetä ngeni kich ach imwen felikis.”
LUK 7:6 Iei mine Jesus a etiirela. Nge lupwen a arap ngeni ewe imw, ewe meilapen sounfiu a tinala chienan kewe ren Jesus pwe repwe üreni, “Ai samol, kosap osukosukok. Pun ngang üsap eman aramas mi aüchea ngeni om kopwe feito lon imwei,
LUK 7:7 ina mine ngang üse fen mwo ekiekin püsin feila reöm. Nge kopwe chök apasa och kapas, iwe, nei chon angang epwe pöchökületä.
LUK 7:8 Pun ngang eman mi pwal nom fan nemenien ekewe meilap seniei, nge mi pwal wor sounfiu ra nom fän nemeniei. Üa üreni eman, ‘Kopwe feila,’ iwe, a feila. Üa pwal üreni eman, ‘Kopwe feito,’ iwe, a feito. Üa üreni nei amanau, ‘Kopwe föri ien me ien,’ iwe, a föri.”
LUK 7:9 Iwe, lupwen Jesus a rongorong ekei kapas, a mairü ren. A sap ngeni ewe mwichen aramas mi tapweto mürin o üreniir, “Üa ürenikemi, üsamwo fen küna ei sokun lükülük lon Israel.”
LUK 7:10 Iwe, lupwen ekewe chon künö ra liwinsefälila lon imwen ewe meilapen sounfiu, ra küna pwe ewe chon angang a fen pöchökületä.
LUK 7:11 Iwe, ekis fansoun mürin, Jesus a feila lon eu telinimw itan Nain, nge nöün kewe chon kaiö me eu mwichen aramas mi chomong ra pwal eti.
LUK 7:12 Lon ewe chök otun, lupwen a tori asamen tittin ewe telinimw, aramas ra ekiewu eman somä, ina i chök nöün eman fefin mi fen mä pwülülan. Iwe, eu mwichen aramas mi chomong ra eti.
LUK 7:13 Lupwen ewe Samol a küna ewe fefin, a fokun tongei. Iwe, a üreni, “Kosap kechü.”
LUK 7:14 Iwe, Jesus a feiliti ewe pwor ewe somä a nom lon o atapa, nge ekewe aramas mi eki ewe pwor ra köüla. Iwe, Jesus a apasa, “Nei alüal, üa ürenuk, kopwe pwätä.”
LUK 7:15 Iwe, ewe mi mäla a pwätä o popuetä le kapas. Mürin Jesus a ngenisefäli inan.
LUK 7:16 Iwe, aramas meinisin ra uren niuokus, ra mwareiti Kot o apasa, “Eman soufos mi lap a pwä lefilach. Kot a feito pwe epwe amanaua nöün aramas.”
LUK 7:17 Ei pworaus usun Jesus a chöfetal lon unusen ewe fanü Jutea me ekewe fanü mi nom ünükün.
LUK 7:18 Iwe, lupwen nöün Johannes kewe chon kaiö ra apworausa ngeni usun ekei mettoch meinisin, a köri ruoman me leir
LUK 7:19 o tiniirela ren ewe Samol, pwe repwe aisini, “En ewe eman epwe wareto, are sipwe witiwiti pwal eman?”
LUK 7:20 Iwe, lupwen ar tori Jesus, ra üreni, “Johannes Soupapatais a tinikeemito reöm, pwe aipwe aisinuk ika en ätewe a kapas usun pwe epwe wareto, ika sipwe witiwiti pwal eman?”
LUK 7:21 Lon ena otun Jesus a apöchökülätä chomong aramas seni sokopaten ar samau me apwangapwang o alisi chokewe mi wor ngününgau wor, a pwal aneloi mesen chomong mi mesechun.
LUK 7:22 Iwe, Jesus a pölüeni nöün Johannes kewe chon kaiö, “Oupwe liwinsefälila o üreni Johannes mine oua küna o rongorong: Ekewe mi mesechun ra küna mwer, ekewe mi pechemä ra fetal, ekewe mi üriir rupun pwötür ra chikarsefäl, ekewe mi selingepüng ra rongorong, ekewe mi mäla ra manauetä, nge ekewe mi wöüngau ra rongorong afalafalen ewe Pworausen Manau.
LUK 7:23 Ra feiöch chokewe resap tipemwaramwar rei.”
LUK 7:24 Mürin än nöün Johannes chon kaiö feila, Jesus a popuetä le kapas ngeni ewe mwichen aramas usun Johannes, “Lupwen oua feila ren Johannes lon ewe fanüapö, met oua ekieki oupwe nengeni? Efoch äsät mi mwaroro ren asepwäl?
LUK 7:25 Met chök oua feila ren pwe oupwe nengeni? Eman mwän mi üföüf üf mi pwetete o mürina? Ekewe aramas mi üföüf ei sokun üf o manau fän mecheres ra nonom lon imwen king.
LUK 7:26 Oupwe üreniei, met echök oua feila ren pwe oupwe nengeni? Eman soufos? Ewer, nge oua fen küna eman mi lap seni eman soufos.
LUK 7:27 Pun Johannes ätewe ekewe Toropwe mi Pin ra kapas usun: ‘Nengeni, üpwe tinala nei chon künö epwe akomwola mwomw, epwe amolätä efoch al fän itom.’
LUK 7:28 Üpwe ürenikemi, Johannes a lap seni aramas meinisin mi uputiu won fanüfan. Nge iön mi kisikis seni meinisin lon Mwün Kot a fen lap seni Johannes.”
LUK 7:29 Iwe, ekewe aramas meinisin, pwal mwo nge ekewe chon ioni takises ra rongorong än Jesus kapas, ra aleasochisi än Kot kewe allük, pun ra papatais ren Johannes.
LUK 7:30 Nge ekewe Farisi me ekewe Sensen Allük resap etiwa än Kot akot fän iter, pun resap mochen ar repwe papatais ren Johannes.
LUK 7:31 Iwe, Jesus a pwal apasa, “Met üpwe tongeni awewe ngeni ei pilon aramasen ikenai? Met repwe wewe ngeni?
LUK 7:32 Ra wewe ngeni ekewe semirit mi mot lon ekewe lenien amömö. Eu mwich a kökkö ngeni pwal eu mwich, ‘Äm aia ettiki aangün ngenikemi, nge ämi ousap pworuk. Äm aia köl kölün lolilen, nge ämi ousap kechü!’
LUK 7:33 Johannes Soupapatais a feito, a echikefel, esap pwal ün wain, nge ämi oua apasa, ‘Mi wor eman anün rochopwak won.’
LUK 7:34 Nöün Aramas a feito, a mongö o ün, nge ämi oua apasa, ‘Ou nengeni ei mwän! I eman mi mongömong o ünümong, eman mi chiechi ngeni ekewe chon ioni takises me chon tipis.’
LUK 7:35 Än Kot tipachem a pwäla pwe a let ren chokewe mi etiwa.”
LUK 7:36 Iwe, eman lein ekewe Farisi a tüngor ngeni Jesus pwe epwe eti le mongö. Iwe, Jesus a feila lon imwan o a mottiu pwe epwe mongö.
LUK 7:37 Lon ei telinimw a wor eman fefin mi tipis, a rong pwe Jesus a mongö lon imwen ewe Farisi. Neminei a uwei eu lö lon eu rume seni ewe fau itan alapaster.
LUK 7:38 Iwe, a feito lükisökürün Jesus o fotopwäsuketiu arun pechen, a kechü o asupwätiu chönün mesan won pechen Jesus. Mürin a talüpwasei pechen Jesus ren meten möküran, a mitiri pechen o ninätiu ewe lö won.
LUK 7:39 Lupwen ewe Farisi mi köri Jesus pwe epwe mongö ren a küna ei, a ekieki lon lelukan, “Are ei mwän wesewesen eman soufos, epwe silei iön ewe fefin a atapa. Epwe silei pwe i eman fefin mi tipis.”
LUK 7:40 Iwe, Jesus a üra, “Simon, üa mochen kapas ngonuk won och mettoch.” Simon a pölüeni, “Ewer sense, kopwe üreniei.”
LUK 7:41 Iwe, Jesus a popuetä le kapas, “Mi wor ruoman mwän mi liwinimang moni seni eman mwän mi wor nöün monien paro. Eman a liwinimang limepükü föün moni silifer, nge pwal ewe eman a liwinimang lime.
LUK 7:42 Ir me ruoman resap tongeni mönätiu ar kewe liwinimang, iei mine ätewe a chök amusala ar kewe liwinimang. Iö leir epwe kon echeni ätewe?”
LUK 7:43 Simon a pölüeni, “Üa ekieki pwe ewe eman a kon watte an liwinimang a musola.” Iwe, Jesus a üreni, “Mi pwüng mine ka apasa.”
LUK 7:44 Mürin Jesus a kulu ngeni ewe fefin o üreni Simon, “Ka küna ei fefin? Ngang üa tolong lon imwom, nge kosap ngeniei koluk pwe tötölün pechei. Nge neminei a talü pechei ngeni chönün mesan o talüpwasei ngeni meten möküran.
LUK 7:45 Iwe, en kosap etiwaei ren eu mitimit, nge neminei esap ükütiu le mitiri pechei seni chök otun ai tolong lon imwom tori iei.
LUK 7:46 En kosap epiti mökürei ngeni löpwokus, nge neminei a epiti pechei ngeni löpwokus.
LUK 7:47 Iei mine üa ürenuk, pokiten an kewe tipis mi chomong ra musola, iei popun an echeniei a fokun watte. Nge are än eman amusamusen tipis a kisikis, an eäni chen a pwal kisikis.”
LUK 7:48 Mürin Jesus a üreni ewe fefin, “Om tipis kana ra musola.”
LUK 7:49 Iwe, ätekewe mi eti Jesus le mot ngeni chepel ra kapasfengen lefiler, “Iö ätei pwe a mwo nge amusala tipis?”
LUK 7:50 Nge Jesus a üreni ewe fefin, “Om lükülük a amanauok. Kopwe feila fän kinamwe.”
LUK 8:1 Eu fansoun mürin Jesus a saifeil lon ekewe telinimw me sopw o afalafala ewe Pworausen Manau usun Mwün Kot. Iwe, ekewe engol me ruoman chon kaiö ra eti,
LUK 8:2 pwal ekoch fefin mi ngasala seni ekewe ngününgau mi nom wor o ra pöchökül seni ar kewe samau. Ikkei iter: Maria mi pwal iteni Maktalene, iei i neminewe füman ngününgau ra towu seni,
LUK 8:3 Joanna pwülüen Kusa, i eman mi wisen tümwünü imwen Herotes me Susana, pwal chomong fefin mi alisi Jesus me nöün kewe chon kaiö ren mine a wor rer.
LUK 8:4 Iwe, chomong aramas ra feito seni eu me eu kewe telinimw, nge lupwen eu mwichen aramas mi chomong ra mwichfengen, Jesus a apworausa ngeniir ei pworausen awewe:
LUK 8:5 “Eman mwän a feila pwe epwe amworafeili fotan pwükil. Iwe, lupwen a amworafeili ekewe pwükil, ekoch föün ra mworotiu lepekin al, ia aramas ra puriretiu ie, nge ekewe machang ra äni.
LUK 8:6 Ekoch föün ra mworotiu lon lenien föüföü. Iwe, lupwen ekewe irä ra pwükütä, ra pwasala, pun ewe pwül ese nüküchöchön.
LUK 8:7 Pwal ekoch kewe föün ra mworotiu lein iräfölüföl. Iwe, ekewe iräfölüföl ra märipökütä me ekewe irä o ra amopu ekewe irä.
LUK 8:8 Nge ekoch föün ra mworotiu lon pwül mi mürina. Ekewe irä ra märitä o fokun ua, efoch me efoch a uani ipükü.” Mürin Jesus a sopwela le apasa, “Iö a wor selingan epwe rongorong.”
LUK 8:9 Iwe, nöün Jesus kewe chon kaiö ra aisini Jesus met wewen ei pworausen awewe.
LUK 8:10 Jesus a pölüeni, “Kot a fen mwüt ngenikemi pwe oupwe silei ewe pworaus usun ekewe monomonen Mwün Kot, nge ren ekewe ekoch aramas a toriir lon pworausen awewe, pun repwe nenengeni, nge resap küna och, repwe pwal rongorong, nge resap wewe ren.
LUK 8:11 “Iei wewen ewe pworausen awewe: Ewe pwükil ina ewe kapasen Kot.
LUK 8:12 Ekewe pwükil mi mworotiu lepekin al ra wewe ngeni chokewe mi rong kapasen Kot, nge Satan a feito o angei ewe kapas seni lon leluker, pwe resap lükü o eäni manau.
LUK 8:13 Ekewe pwükil mi mworotiu lon lenien föüföü ra wewe ngeni chokewe mi rongorong kapasen Kot o etiwa fän pwapwa. Nge pokiten ewe kapas esap tongeni warar lor, ra chök lükü lon fansoun mochomoch. Nge lupwen fansoun sosot a toriir, ra müttir kuf.
LUK 8:14 Ekewe pwükil mi mworotiu lein ekewe iräfölüföl ra wewe ngeni chokewe mi rong kapasen Kot, nge öürek me wöün fanüfan, pwal pwapwan ei manau ra tolong lon leluker o amopu ewe kapas, pwe uar esap tongeni mau.
LUK 8:15 Nge ekewe pwükil mi mworotiu lon pwül mi mürina ra wewe ngeni chokewe mi rongorong kapasen Kot o amwöchü lon eu leluk mi mürina o aleasochis, ra likitü tori ra ua.
LUK 8:16 “Esap wor eman a keni eu lamp o anomu fän eu sepi are fän eu peet. Nge epwe isetä won lenian, pwe aramas repwe küna ewe saram lupwen repwe tolong leimw.
LUK 8:17 Mettoch meinisin mi opola epwe chök pwäpwäla, nge mettoch meinisin mi pwölüla epwe fatala o tolong lon saram.
LUK 8:18 Iei mine oupwe föröchü usun ämi aüseling. Pun iö a wor an, Kot epwe achomongala, nge iö esap wor an, Kot epwe mwo nge angei seni ewe ekis a ekieki a nom ren.”
LUK 8:19 Iwe, inen Jesus me pwiin kewe ra feito ren Jesus, nge resap tongeni tolong ren pokiten chomongun ekewe aramas.
LUK 8:20 Eman a üreni Jesus, “Inom me pwiüm kewe ra nom lükün o mochen churuk.”
LUK 8:21 Nge Jesus a üreniir, “Inei me pwii ir chokewe mi rongorong kapasen Kot o aleasochis ngeni.”
LUK 8:22 Lon eu rän Jesus me nöün kewe chon kaiö ra tötä won efoch wa. Iwe, a üreniir, “Ousipwe saila epek ewe noom.” Iei mine ra sai.
LUK 8:23 Lupwen ra seres lon ewe noom, Jesus a möürüla. Eu asepwäl mi pöchökül a müttir eniti lon ewe noom o ekewe no ra nulong leföön ewe wa pwe a arapakan ngeni an epwe kokola.
LUK 8:24 Iwe, ra feila ren Jesus, ra föngünätä o üreni, “Sounemenem, sounemenem, arapakan chök sipwele mäla.” Iwe, Jesus a pwätä o a allük ngeni asepwäl me no, iwe, ewe asepwäl a sötiu, a pwal lüala won matau.
LUK 8:25 Mürin Jesus a üreni ekewe chon kaiö, “Ifan ämi lükülük?” Iwe, ra niuokus o weitifengeniir o kapasfengen lefiler, “Iö chök ätei? A chök allük ngeni ewe asepwäl me ekewe no, iwe, ra aleasochisi.”
LUK 8:26 Iwe, Jesus me nöün kewe chon kaiö ra seresila tori ewe fanü Kerasa mi nom epek ewe nomun Kalilea.
LUK 8:27 Lupwen Jesus a tiwelong wilifanü, eman mwän seni ewe telinimw mi wor anün rochopwak won a churi. Fansoun langatam ei mwän esap üföüf och, esap pwal nonom lon imw, nge a chök nonom lein ekewe peias.
LUK 8:28 Iwe, lupwen a küna Jesus, a puchörütä, a aturala le pwül arun pechen Jesus o a leüömong le apasa, “Jesus Nöün Kot, ewe mi Unusen Tekia, met ka mochen föri ngeniei? Üa tüngor ngonuk, pwe kosap ariaföüüei.”
LUK 8:29 A nöünöü ei ititin fos, pun Jesus a fen allük ngeni ewe anün rochopwak, pwe epwe towu seni. Fan chomong ewe anün rochopwak a tötä won. Inamwo ika ra kalapusei o föti pöün me pechen ngeni selimächä, nge a chök mwütifeseni ewe selimächä. Iwe, ewe anün rochopwak a cheela lon ewe fanüapö.
LUK 8:30 Jesus a aisini, “Ifa itom?” Ewe mwän a pölüeni, “Itei mwichemong,” pun chomong anün rochopwak ra nom won.
LUK 8:31 Iwe, ekewe anün rochopwak ra tüngor ngeni Jesus, pwe esap asürela lon ewe leni mi fokun alolol.
LUK 8:32 Iwe, a wor epwi pwiin pik ra mongöfeil won ekewe chukutekison mi arap ngeni ewe leni. Iei mine ekewe anün rochopwak ra tüngor ngeni Jesus pwe epwe mwüt ngeniir pwe repwe tolong lon ekewe pik. Iwe, Jesus a mwüt ngeniir.
LUK 8:33 Mürin ekewe anün rochopwak ra towu seni ewe mwän o tolong lon ekewe pik. Iwe, ekewe pwiin pik ra sätiu lepokun ewe achau o turulong lon ewe noom, pwe ra mop meinisin.
LUK 8:34 Iwe, lupwen ekewe chon foleni ekewe pik ra küna met a fis, ra säfeil o apworausa ewe pworaus lon ekewe telinimw me ekewe sopw.
LUK 8:35 Mürin ekewe aramas ra feila, pwe repwe küna mine a fis. Nge lupwen ar feito ren Jesus, ra küna ewe mwän ekewe anün rochopwak ra towu seni, a mot arun pechen Jesus, a üföüf o miritila. Iwe, ir meinisin ra niuokus.
LUK 8:36 Iwe, chokewe mi küna ei manaman ra apworausa ngeni ekewe aramas usun än Jesus angasa ewe mwän.
LUK 8:37 Mürin aramasen ewe fanü meinisin ra tüngor ngeni Jesus pwe epwe feila seniir, pun ra fokun niuokus. Iei mine Jesus a tötä won ewe wa o feila.
LUK 8:38 Iwe, ewe mwän ekewe anün rochopwak ra towu seni a tüngor ngeni Jesus, “Kose mochen üpwe etuk.” Nge Jesus a tinala o üreni,
LUK 8:39 “Kopwe liwinla lon imwom o apworausa met Kot a föri ngonuk.” Iwe, ewe mwän a feila lon ewe telinimw o apworausa met Jesus a föri ngeni.
LUK 8:40 Iwe, lupwen Jesus a liwinsefäliti epek ewe noom, ekewe aramas ra etiwa i, pun ra fen witiwiti an epwe feito.
LUK 8:41 Mürin eman mwän itan Jairus a feito, ätei i eman nöüwis lon imwen felikis lon ewe leni. A chapetiu arun pechen Jesus o tüngormau ngeni an epwe eti le feila lon imwan,
LUK 8:42 pun nöün we eman chök nengin engol me ruu ierin a arap ngeni mäla. Lupwen Jesus a etala Jairus, chomong aramas ra chök etiepach ngeni.
LUK 8:43 Iwe, a wor eman fefin a nom leir, a fokun riaföü ren an samaun fefin lon ükükün engol me ruu ier. Neminei a fangala meinisin mine a wor ren ngeni ekewe sousafei, nge esap wor eman a tongeni apöchöküla.
LUK 8:44 Ei fefin a tap mürin Jesus lein ewe mwichen aramas, a atapa lepwülün üfan, iwe, an we samau a müttir köüla.
LUK 8:45 Jesus a ais, “Iö a atapaei?” Ir meinisin ra apasa pwe sap ir. Iwe, Petrus a üra, “Sounemenem, ekewe aramas meinisin ra nom ünükum o etiepach ngonuk.”
LUK 8:46 Nge Jesus a üra, “Eman a atapaei, pun üa mefi pwe och manaman a towu seniei.”
LUK 8:47 Iwe, lupwen ewe fefin a mefi pwe esap tongeni opola, a feito fän chechech o chapetiu arun pechen Jesus. Lon ewe leni me mwen ekewe aramas meinisin neminei a apworausa ngeni Jesus pwota a atapa i, pwal usun an pöchökületä lon ewe chök otun.
LUK 8:48 Iwe, Jesus a üreni neminei, “Nei, om lükülük a apöchökülokotä. Kopwe feila fan kinamwe.”
LUK 8:49 Lupwen Jesus a chüen kakapas, eman chon künö a feito seni imwen Jairus o üreni Jairus, “Noumw nengin a fen mäla. Kosap chüen aweiresi ewe sense.”
LUK 8:50 Nge lupwen Jesus a rong ekei kapas, a üreni Jairus, “Kosap niuokus. Kopwe chök lükülük, noumw we nengin epwe manau.”
LUK 8:51 Lupwen Jesus a tori ewe imw, esap mwüt ngeni eman epwe eti le tolong, pwe Petrus chök me Johannes me James, pwal semen me inen ewe nengin.
LUK 8:52 Aramas meinisin mi nom lon ewe imw ra kechü o ngüngüres won ewe nengin, nge Jesus a üra, “Ousap kechü. Ewe nengin esap mäla, pwe a chök möür.”
LUK 8:53 Iwe, ir meinisin ra takiri, pun ra silei pwe ewe nengin a mäla.
LUK 8:54 Nge Jesus a amwöchü pöün ewe nengin o apasa fan leüömong, “Nengin, kopwe pwätä!”
LUK 8:55 Iwe, a manauatä o pwätä lon ewe chök otun, nge Jesus a üreniir pwe repwe amongöni ewe nengin.
LUK 8:56 Iwe, semen me inen ewe nengin ra mairü, nge Jesus a allük ngeniir, pwe resap üreni eman mine a fis.
LUK 9:1 Iwe, Jesus a körifengeni nöün kewe engol me ruoman chon kaiö o ngeniir tufich me manaman, pwe repwe asüela anün rochopwak o apöchökülatä ekewe mi samau.
LUK 9:2 Mürin a tiniirela pwe repwe afalafala usun ewe Mwün Kot o apöchökülätä ekewe mi samau.
LUK 9:3 Iwe, a üreniir, “Ousap uwei och lon ämi sai. Ousap uwou wok, pwotou, mongö, moni ika pwal aruachön üfemi.
LUK 9:4 Lon meni imw ra etiwakemi lon, oupwe nonom lon ewe imw tori oupwe towu seni ewe telinimw.
LUK 9:5 Nge lon meni telinimw resap etiwakemi lon, oupwe towu seni o wichikala pwülün fän pechemi, pwe epwe eu minen pwärätä ngeniir pwe ra mwäl.”
LUK 9:6 Iwe, ekewe chon kaiö ra feila o saifeil lon ekewe sopw, ra afalafala ewe Pworausen Manau o apöchökülätä ekewe chon samau lon ekewe leni meinisin.
LUK 9:7 Iwe, lupwen Herotes ewe samolun Kalilea a rong usun ekewe mettoch meinisin mi fisitä, a fokun osukosuk, pun ekoch aramas ra apasa pwe Johannes Soupapatais a manausefälitä.
LUK 9:8 Nge ekoch ra apasa pwe Elias a pwä, nge pwal ekoch ra apasa pwe eman me lein ekewe soufosun lom a manauatä.
LUK 9:9 Nge Herotes a ais, “Ngang üa pöküela üen Johannes, nge iö ei mwän üa rongorong usun an föri ekei mettoch?” Iwe, Herotes a sotuni an epwe küna Jesus.
LUK 9:10 Iwe, ekewe soukünö ra liwinsefäl o apworausa ngeni Jesus meinisin mine ra föri. Iwe, Jesus a emweniirela ngeni ewe telinimw Petsaita.
LUK 9:11 Lupwen ewe mwichen aramas ra rong usun, ra tapwela mürin. Iwe, Jesus a etiweer o afalafaleer usun Mwün Kot, a pwal apöchöküla chokewe mi samau.
LUK 9:12 Nge lupwen a arapakan tuputiuen akkar, ekewe engol me ruoman chon kaiö ra feito ren Jesus o üreni, “Kopwe tinala ekewe aramas, pwe repwe feila lon ekewe sopw me leni mi arap, pwe repwe küt aner mongö me ar lenien möür, pun ei leni a toau seni lenien aramas.”
LUK 9:13 Nge Jesus a üreniir, “Ämi oupwe ngeniir met repwe mongö!” Iwe, ra pölüeni, “Iei chök ükükün mine a wor rem, limeföü pilawa me ruoman ik. Ka mochen aipwe feila o kamö mongö fän iten ei mwichen aramas?”
LUK 9:14 (A wor ina epwe ükükün limungeröü mwän mi nom ikenan.) Iwe, Jesus a üreni nöün kewe chon kaiö, “Oupwe üreni ekewe aramas pwe repwe mottiu akalime lon eu me eu mwich.”
LUK 9:15 Iwe, mürin än ekewe chon kaiö föri iei usun,
LUK 9:16 Jesus a angei ekewe limeföü pilawa me ekewe ruoman ik, a sachetä läng o iotekin kilisou ngeni Kot wor. A kinikisiretiu o ngeni ekewe chon kaiö, pwe repwe ineti ngeni ekewe aramas.
LUK 9:17 Iwe, ir meinisin ra mongö o mötüla. Mürin ekewe chon kaiö ra amasoua engol me ruu chüük ren lusun ekewe mongö.
LUK 9:18 Lon eu rän, lupwen Jesus a chök emanüla le iotek, nöün kewe chon kaiö ra feito ren. Iwe, Jesus a aisiniir, “Met ewe mwichen aramas ra apasa usi?”
LUK 9:19 Ra pölüeni, “Ekoch ra apasa pwe en Johannes Soupapatais, ekoch ra apasa pwe en Elias, nge pwal ekoch ra apasa pwe en eman lein ekewe soufosun lom a manauatä.”
LUK 9:20 Iwe, Jesus a aisiniir, “Nge ämi, iö oua üra pwe ngang?” Petrus a pölüeni, “En Kraist nöün Kot.”
LUK 9:21 Mürin Jesus a fokun allük ngeni nöün kewe chon kaiö, pwe resap fokun üreni eman ei pworaus.
LUK 9:22 A pwal üreniir, “Nöün Aramas epwe fokun tolong lon riaföü watte, epwe küna koput me ren ekewe souakom, ekewe souasor mi lap me ekewe Sensen Allük. Repwe niela, nge mürin ülüngat rän epwe manausefälitä.”
LUK 9:23 Mürin a üreni ekewe aramas meinisin, “Are eman a mochen etiei, epwe pölükü manauan, epwe mwärei an iräpenges rän me rän o tapweto müri.
LUK 9:24 Pun iö a mochen amanaua püsin manauan epwe pöüt seni, nge iö a likitala manauan fän itei epwe amanaua manauan.
LUK 9:25 Epwe met lomoten än eman aramas epwe feiöchüni feiöchün unusen fanüfan, nge püsin manauan epwe pöüt seni, epwe pwal angei liwinin an tipis.
LUK 9:26 Are eman a säwäsiniei me ai kewe kapas, Nöün Aramas epwe pwal säwäsini lupwen epwe war lon an ling me än Saman ling me än ekewe chon läng mi pin ling.
LUK 9:27 Üpwe allükülükü ngenikemi, pwe mi wor ekoch aramas mi nom ikkei resap mäla tori repwe küna ewe Mwün Kot.”
LUK 9:28 Eu wiik mürin än Jesus apasa ekei mettoch, a emwenala Petrus, Johannes me James o emweniiretä won eu chuk pwe epwe iotek.
LUK 9:29 Iwe, lupwen a iotek, wowoon won mesan a wilila, üfan kana ra molupolup o pwechela.
LUK 9:30 Lon ewe chök otun ruoman mwän ra nom ren Jesus o kapas ngeni, ir Moses me Elias.
LUK 9:31 Ätekei ra pwä lon ling seni läng o kapas ngeni Jesus usun an epwe apwönüetä än Kot we akot ren an mäla lon Jerusalem.
LUK 9:32 Petrus me chienan kewe ra fokun möür, nge ra nenela o küna än Jesus ling me ekewe ruoman mwän mi nom ren.
LUK 9:33 Lupwen ekewe ruoman mwän ra feil seni Jesus, Petrus a üreni, “Sounemenem, a fokun öch ach nonom ikei. Aipwe aüetä ülüngat imw mangaku, eu fän itom, eu fän iten Moses nge pwal eu fän iten Elias.” (Petrus esap wesewesen weweiti met i a kapas usun.)
LUK 9:34 Lupwen a chüen kakapas, eu kuchu a pwä o nürün a pwölürela. Iwe, ekewe chon kaiö ra niuokus, lupwen ewe kuchu a feitiu wor.
LUK 9:35 Iwe, eu möngüngü a möngüngüwu me lon ewe kuchu, “Iei i nei üa filätä, oupwe aüselinga.”
LUK 9:36 Iwe, lupwen ewe möngüngü a köüla, ra küna pwe Jesus chök a nom. Nge ekewe chon kaiö ra amwöchü ekei mettoch, nge resap üreni eman met ra küna lon ena rän.
LUK 9:37 Iwe, sorotän ewe rän, lupwen Jesus me ekewe ülüman chon kaiö ra feitiu seni won ewe chuk, eu mwichen aramas mi chomong ra souni.
LUK 9:38 Iwe, eman mwän me lon ewe mwich a kötä, “Sense, üa tüngor ngonuk, kose mochen kopwe alisi nei we ät, pun ina i chök nei.
LUK 9:39 Eman ngün a tötä won, pwe a müttir puchörütä, a achecha tori a puropurowu me lon awan. A chök akafeiengaua, nge esap mochen likitala.
LUK 9:40 Üa tüngor ngeni noumw kewe chon kaiö pwe repwe asüela, nge resap tongeni.”
LUK 9:41 Iwe, Jesus a pölüeni, “Ämi eu täppin aramas mi lükümang o tipesosor. Ifa langatamen fansoun ai üpwe nonom remi o engila ngenikemi?” Mürin a üreni ewe mwän, “Kopwe uwato noumw we ikei.”
LUK 9:42 Lupwen ewe ät a feito, ewe ngününgau a aturätiu lepwül o achecha. Nge Jesus a allük ngeni ewe ngününgau pwe epwe towu seni. Iwe, ewe ät a pöchökületä. Mürin Jesus a aliwini ewe ät ngeni saman.
LUK 9:43 Iwe, ekewe aramas meinisin ra mairü ren än Kot manaman mi pöchökül. 9.43b-45 Iwe, lupwen ekewe aramas ra chüen mwar ren ekewe mettoch meinisin Jesus a föri, a üreni nöün kewe chon kaiö,
LUK 9:44 “Ousap manlükala met ei üpwe le ürenikemi. Nöün Aramas epwe tolong lepöün aramas.”
LUK 9:45 Nge ekewe chon kaiö resap weweiti ekei kapas. A monomon seniir, pwe resap tongeni weweiti, nge ra niuokus ar repwe kapas ais ngeni usun.
LUK 9:46 Iwe, a fis eu aninifengen lefilen ekewe chon kaiö won iö epwe lap me leir meinisin.
LUK 9:47 Nge Jesus a silei met ra eäni ekiek, iei mine a angei eman semirit o aütai lepekin.
LUK 9:48 Iwe, a üreniir, “Iö a etiwa ei semirit fän itei, a etiwaei. Nge iö a etiwaei a pwal etiwa ewe eman a tiniei. Pun iö a kis me leimi meinisin, ina i ätewe a lap mwemi meinisin.”
LUK 9:49 Iwe, Johannes a üreni Jesus, “Sounemenem, äm aia küna eman mwän a asüela anün rochopwak fän itom, nge äm aia üreni pwe epwe ükütiu, pun i esap chiechiach.”
LUK 9:50 Iwe, Jesus a üreni Johannes me nöün kewe chon kaiö, “Ousap pinei an angang. Pun eman esap ü ngenikemi, a fitikemi.”
LUK 9:51 Iwe, lupwen a arap ewe fansoun än Jesus epwe le feitä läng, a nom lon letipan an epwe feila Jerusalem.
LUK 9:52 Iwe, a tinala chon kaiö pwe repwe akomwola mwan. Ra feila o tolong lon eu sopw lon Samaria, pwe repwe amolätä mettoch meinisin fän itan.
LUK 9:53 Nge ekewe aramas lon ewe leni resap mochen etiwa, pun ra silei pwe a nom won an sai ngeni Jerusalem.
LUK 9:54 Iwe, lupwen ekewe chon kaiö James me Johannes ra küna ei, ra üra, “Ka mochen pwe äm aipwe köratiu ekkei seni läng, pwe epwe kenala ekei aramas?”
LUK 9:55 Nge Jesus a sap ngeniir o apwüngüür.
LUK 9:56 Mürin Jesus me nöün kewe chon kaiö ra feila lon pwal eu sopw.
LUK 9:57 Iwe, lupwen ra fefetal won al, eman a üreni Jesus, “Ngang üpwe etuk ekis meinisin ia kopwe feila ie.”
LUK 9:58 Jesus a üreni, “Ekewe foks a wor pwanger, ekewe machang a wor faser, nge Nöün Aramas esap wor eu leni ia epwe konola ie o asösö.”
LUK 9:59 Iwe, Jesus a üreni pwal eman mwän, “Kopwe etiei.” Ewe mwän a üreni, “Ai samol, kose mochen kopwe akom mwüt ngeniei ai üpwe feila lon leniei o peiaseni semei.”
LUK 9:60 Nge Jesus a pölüeni, “Kopwe likiti ngeni ekewe mi mäla repwe püsin peiaseni ar kewe somä. Nge en kopwe feila o arongafeili ewe Mwün Kot.”
LUK 9:61 Pwal eman mwän a üra, “Ai samol, üpwe etuk. Nge kopwe akom mwüt ngeniei pwe üpwe feila o kapongen amwirimwir ngeni chon ai famili.”
LUK 9:62 Jesus a pölüeni, “Eman mi popuetä le tuw pwül nge a nenesefäl, esap fich ngeni ewe angangen Mwün Kot.”
LUK 10:1 Mürin ekei pworaus, ewe Samol a pwal filätä fik me ruoman mwän o a tiniirela akaruoman pwe repwe akomwola mwan lon ekewe telinimw me leni meinisin püsin i epwe feila ie me mürin.
LUK 10:2 Iwe, a üreniir, “Ewe räs a fokun watte, nge ekewe chon angang lon ra chokükün. Iei mine oupwe tüngor ngeni samolun ewe räs, pwe epwe tinala chon angang lon ewe räs.
LUK 10:3 Oupwe feila! Üpwe tinikemiila usun chök nienifön sip lein wolif.
LUK 10:4 Ousap uwou lenien iseis moni are pwotou are eu pean sus. Ousap üla pwe oupwe kapong me won al.
LUK 10:5 Lupwen oupwe tolong lon eu imw, oupwe akomwen apasa, ‘Kinamwe epwe tori chon ei imw.’
LUK 10:6 Iwe, are eman aramas mi efich kinamwe a nom ikenan, ämi kinamwe epwe nonom won. Nge are eman esap efich kinamwe, ämi tüngorun kinamwe epwe liwinsefälitikemi.
LUK 10:7 Oupwe chök nonom lon ewe imw, oupwe mongö o ün mine ra etiwa ngenikemi, pun eman chon angang epwe angei liwinin. Ousap feila seni ewe imw oua nom lon o feila ngeni pwal eu.
LUK 10:8 Are oua tolong lon eu telinimw o ra etiwakemi, oupwe chök mongö mine ra ngenikemi.
LUK 10:9 Oupwe apöchöküla ekewe chon samau lon ena telinimw o üreni ekewe aramas mi nom lon, ‘Mwün Kot a arapoto remi.’
LUK 10:10 Nge are oupwe tolong lon eu telinimw, nge resap etiwakemi, oupwe feila won ekewe al o apasa,
LUK 10:11 ‘Ewe mwo pwülün lon ämi telinimw mi pachetä fän pechem aipwe wichiki ngenikemi, pwe eu minen pwärätä ngenikemi. Nge oupwe silei pwe Mwün Kot a arapoto remi.’
LUK 10:12 Üpwe ürenikemi, pwe lon ewe ränin kapwüng epwe kisikis feiengauen Sotom seni feiengauen ei telinimw.
LUK 10:13 “Feiengauom Korasim, feiengauom Petsaita! Pun are ekewe manaman mi fen fis lomi ra fis lon Tirus me Siton, ekewe aramas lon ekei telinimw repwe mottiu me lomlom fän üfer seni tuk o amworatiu falang won mökürer pwe asisilen ar aier seni tipis.
LUK 10:14 Lon ewe ränin kapwüng epwe kisikis feiengauen Tirus me Siton seni ämi feiengau.
LUK 10:15 Nge en Kapernaum, ka ekieki pwe kopwe püsin atekiokotä tori läng? Apwi, sap ina, kopwe turutiu lon hell!”
LUK 10:16 Iwe, Jesus a üreni nöün kewe chon kaiö, “Iö a aüselingakemi a aüselingaei, nge iö a aliwinikemi, a aliwiniei, nge iö a aliwiniei a aliwini ewe mi tiniei.”
LUK 10:17 Iwe, ekewe fik me ruoman ra liwinto fän pwapwa chapur. Ra üreni Jesus, “Äm Samol, ekewe anün rochopwak mwo nge ra aleasochisikem, lupwen aia allük ngeniir fän itom.”
LUK 10:18 Nge Jesus a pölüeniir, “Üa küna Satan pwe a turutiu seni läng usun chök fifi.
LUK 10:19 Oupwe rongorong! Ngang üa ngenikemi manaman, pwe oua tongeni puri ekewe serepenit me mönükam, oupwe pwal pworaiti manamanen ewe Chon Oput. Iwe, esap wor och epwe tongeni afeiengauakemi.
LUK 10:20 Nge ousap pwapwa pwe ekewe ngününgau ra aleasochisikemi, nge oupwe pwapwa pwe itemi a mak lon läng.”
LUK 10:21 Iwe, lon ewe fansoun Jesus a uren pwapwa ren Ngünmifel o a apasa, “Semei, en Samolun läng me fanüfan, üa kilisou ngonuk, pun ka amonomona ekei mettoch seni ekewe mi tipachem me silelap, nge ka pwärala ngeni ekewe tipate. Ewer, Semei, pun iei usun letipom.”
LUK 10:22 “Semei a anomu mettoch meinisin fän nemeniei. Esap wor eman a silei ewe Nau, pwe ewe Sam chök, esap pwal wor eman a silei ewe Sam, pwe ewe Nau chök me chokewe ewe Nau a filiiretä pwe epwe pwäri i ngeniir.”
LUK 10:23 Mürin Jesus a kul ngeni nöün kewe chon kaiö o üreniir lupwen ra imwüela, “Feiöchün chokewe mi küna mine ämi oua küna.
LUK 10:24 Pun üpwe ürenikemi, pwe chomong soufos me king ra mochen küna met ämi oua küna, nge resap tongeni. Ra pwal mochen rongorong met ämi oua rongorong, nge resap tongeni.”
LUK 10:25 Iwe, eman Sensen Allük a feito ren Jesus pwe epwe sotuni. A aisini, “Sense, met ngang üpwe föri pwe üpwe manaueni manau esemuch?”
LUK 10:26 Jesus a pölüeni, “Met a mak lon ewe Allük? Met ka aleani?”
LUK 10:27 Iwe, ewe mwän a pölüeni, “Kopwe echeni ewe Samol om Kot ren unusen lelukom, ren unusen ngünum, ren unusen tufichum me unusen ekiekum. Kopwe pwal echeni chon arum usun püsin om echenuk.”
LUK 10:28 Iwe, Jesus a pölüeni, “Mi pwüng mine ka apasa. Iei usun mine kopwe föri, iwe, kopwe manau.”
LUK 10:29 Nge ewe Sensen Allük a mochen pwärala pwe i mi pwüng, iei mine a üreni Jesus, “Iö chon ori?”
LUK 10:30 Iwe, Jesus a pölüeni, “A wor eman mwän a feil seni Jerusalem pwe epwe feitiu Jeriko. Lupwen a fetal won al, ekoch chon solä ra säwu o turufi, ra angei pisekin meinisin, ra awata o likitala pwe a arap ngeni mäla.
LUK 10:31 Iwe, a fis pwe eman souasor a fetaleto won ewe al. Nge lupwen a küna ewe mwän mi feiengau, a rik seni o fetal won ewe al me epek.
LUK 10:32 Pwal ina chök usun eman mwän seni ewe ainangen Lefi. Lupwen an pwerela ewe ie, a pwal küna ewe mwän, nge a rik seni o fetal won ewe al me epek.
LUK 10:33 Nge eman chon Samaria a pwal fetal won ewe al o a tori ewe leni ia ewe mwän mi feiengau a kon ie. Iwe, lupwen a küna, a fokun tongei.
LUK 10:34 Iwe, a feito ren, a epiti kinasan kewe ngeni lö me wain o finiti ngeni wotai. Mürin a ekietä ewe mwän won nöün we man, a uwala ngeni eu imwen wasöla o a tümwünü.
LUK 10:35 Sorotän ewe rän a angei ruoföü föün moni silifer o ngeni mine än ewe imwen wasöla. Iwe, a üreni, ‘Kopwe tümwünü ätei, nge lupwen üpwe liwinsefäliti ikei, üpwe mönätiu meinisin mine esap naf won liwinin.’”
LUK 10:36 Mürin Jesus a aisini ewe Sensen Allük, “Met ka ekieki, iö lein ekei ülüman mwän a föri föförün eman chon arun ngeni ätewe mi feiengau ren chon solä?”
LUK 10:37 Iwe, ewe Sensen Allük a pölüeni, “Ewe eman mi eäni kirikiröch ngeni.” Jesus a üreni, “Kopwe feila o föri usun chök met i a föri.”
LUK 10:38 Iwe, lupwen Jesus me nöün kewe chon kaiö ra sopwela ar sai, a tori eu sopw ia eman fefin itan Marta a etiwa i lon imwan ie.
LUK 10:39 Marta a wor eman pwiin itan Maria, neminei a mottiu arun pechen Jesus o aüseling an afalafal.
LUK 10:40 Nge Marta a fokun osukosuk ren chomong angang a föri. Iei mine a feito ren Jesus o üreni, “Ai Samol, kosap ekieki pwe pwii a atamepichiei ren an likiti ngeniei ekei angang meinisin. Kopwe üreni, pwe epwe alisiei.”
LUK 10:41 Nge ewe Samol a pölüeni, “Marta, Marta, ka öürek o osukosuk ren chomong mettoch,
LUK 10:42 nge eu chök a lomot. Maria a filätä ewe mettoch mi aüchea, esap wor eman epwe angei seni.”
LUK 11:1 Lon eu rän Jesus a iotek lon eu leni. Lupwen a wes le iotek, eman lein nöün kewe chon kaiö a üreni, “Äm Samol, kopwe aiti ngenikem iotek usun Johannes a aiti ngeni nöün kewe chon kaiö.”
LUK 11:2 Iwe, Jesus a üreniir, “Lupwen oupwe iotek, iei usun mine oupwe apasa, ‘Semem, itom epwe pin, Mwum epwe war.
LUK 11:3 Kopwe ngenikem anem mongö iteiten rän,
LUK 11:4 Kopwe amusala äm kewe tipis pun äm aia amusala chokewe meinisin mi tipis ngenikem. Kosap atolongakem lon sosot.’”
LUK 11:5 Iwe, Jesus a üreni nöün kewe chon kaiö, “Epwe ifa are eman leimi epwe feila lon imwen chiechian lukenipwin o üreni, ‘Pwii, kose mochen üpwe liwinimang reöm ülüföü föün pilawa.
LUK 11:6 Eman chienei e war me sai ekärän chök tori imwei, nge esap wor anei mongö üpwe etiwa ngeni.’
LUK 11:7 Iwe, epwe ifa ika chienom we a pölüenawu me lon ewe imw, ‘Kosap osukosukaei. Asamen imwei a fen kapüng, nge ngang me nei kei aia möür. Ngang üsap tongeni pwätä pwe üpwe ngonuk och.’
LUK 11:8 Iwe, üpwe ürenikemi, pwe ikamwo ätewe esap pwätä pwe epwe ngonuk ewe pilawa pokiten en chiechian, nge epwe fen pwätä o ngonuk meinisin mine ka osupwang ren, pun kosap säw le tütüngormau ngeni.
LUK 11:9 “Iei mine üpwe ürenikemi: Oupwe tütüngor, iwe, oupwe angei, oupwe küküt, iwe, oupwe künakün, oupwe fichifich, iwe, epwe wor asam mi suk ngenikemi.
LUK 11:10 Pun iö a tütüngor epwe angei och, iö a küküt epwe wor künaan, nge iö a fichifich epwe wor asam mi suk ngeni.
LUK 11:11 Iö leimi kana sam nöün epwe tüngorei eman ik, nge epwe ngeni eman serepenit?
LUK 11:12 Nge are epwe tüngor eföü sokul, epwe ngeni eman mönükam?
LUK 11:13 Iwe, are mwo ämi aramas mi ngau oua silei ämi oupwe fang ngeni nöümi lifang mi mürina, epwe fen ifa me watten än Sememi lon läng fangela Ngünmifel ngeni chokewe mi tüngorei!”
LUK 11:14 Iwe, Jesus a asüela eman anün rochopwak mi nom won eman mwän esap tongeni kapas pokiten ewe anü. Lupwen ewe anün rochopwak a towu seni, ewe mwän a tongeni kapas. Iwe, ekewe aramas ra mwar ren.
LUK 11:15 Nge ekoch me leir ra apasa, “Ewe anü Pelsepul, ewe samolun anün rochopwak a ngeni ewe manaman pwe epwe asüela ekewe anün rochopwak.”
LUK 11:16 Pwal ekoch ra ekiekin ar repwe sotuni Jesus, iei mine ra tüngor ngeni pwe epwe föri eu manaman, pwe epwe pwä pwe Kot a tipeeu ngeni.
LUK 11:17 Nge Jesus a silei monomonen ar ekiek, iei mine a üreniir, “Are eu mwü a kinikinfesen o fiufengen, ei mwü esap tongeni nonomola. Are eu famili a kinikinfesen o fiufengen, ei famili epwe parasfesen.
LUK 11:18 Nge are mwün Satan a kinikinfesen o fiufengen, ifa usun, mwün epwe tongeni nonomola? Pun ämi oua apasa, pwe üa asüela ekewe anün rochopwak ren Pelsepul.
LUK 11:19 Iwe, are iei usun pwe üa asüela ekewe anün rochopwak ren Pelsepul, met chiechiemi kewe ra asürela ren? Iei mine ir repwe alletätä pwe oua mwäl.
LUK 11:20 Nge are üa asüela ekewe anün rochopwak ren än Kot manaman, mürin Mwün Kot a fen torikemi.
LUK 11:21 “Iwe, are eman mwän mi pöchökül a mamasa püsin imwan fän an pisekin fiu, pisekin meinisin repwe tümwünöch.
LUK 11:22 Nge are eman mi pöchökül seni epwe fiu ngeni o akufu, epwe angei seni an kewe pisekin fiu meinisin a anomu an apilükülük won, epwe pwal ineti mine a soläni.
LUK 11:23 Iwe, are eman esap etiei, i eman chon ü ngeniei, nge are eman esap alisiei le ikioi, i eman chon kütifeseni.
LUK 11:24 “Are eman ngününgau a towu seni eman aramas, a saifetal won fanü mi pwasapwas o kütta eu leni pwe epwe asösö lon. Are esap küna eu leni, epwe apasa, ‘Üpwe liwinsefäliti imwei we üa towu seni.’
LUK 11:25 Iwe, lupwen epwe tori ewe imw, epwe küna pwe a limöch o kotöch.
LUK 11:26 Mürin epwe feila o panato pwal füman ngün mi ngau seni i. Iwe, repwe feito o nonom lon. Iwe, manauen ewe aramas epwe fokun ngau seni me mwan.”
LUK 11:27 Iwe, lupwen Jesus a apasa ekei kapas, eman fefin me lon ewe mwich a kötä o üreni, “Feiöchün ewe fefin mi nöünuk o oupwuk!”
LUK 11:28 Nge Jesus a pölüeni, “Ewer, nge ra feiöch chokewe mi rong kapasen Kot o aleasochis ngeni.”
LUK 11:29 Lupwen ekewe aramas ra mwichfengen ren Jesus, a sopwela le kapas ngeniir, “A ifa me ngauen ei täppin aramas ikenai. Ra tüngor eu asisil, nge esor asisil epwe toriir, pwe ewe chök asisil mi fis ngeni Sona.
LUK 11:30 Pun usun Sona a eu asisil ngeni ekewe aramasen Ninifa, iei usun Nöün Aramas epwe pwal eu asisil ngeni ei täppin aramas.
LUK 11:31 Lon ewe ränin kapwüng ewe kiwinen Sepa epwe ütä o atipisi ei täppin aramas. Pun neminei a saito seni fanüan mi toau, pwe epwe rongorong än king Salomon kapasen tipachem. Iwe, üpwe ürenikemi, pwe eman mi lap seni Salomon a nom ikei.
LUK 11:32 Lon ewe ränin kapwüng ekewe chon Ninifa repwe ütä o atipisi ei täppin aramas, pun ra aier ren än Sona afalafal. Nge üpwe ürenikemi, pwe eman mi lap seni Sona a nom ikei.
LUK 11:33 “Iwe, esap wor eman a keni eu lamp, nge mürin a aopala ika anomu fän eu sepi. Nge epwe fen isetä ewe lamp won lenian, pwe aramas mi tolong lon ewe imw repwe küna ewe saram.
LUK 11:34 Mesom ra usun chök eu lamp fän iten inisum. Are mesom ra fat, unusen inisum a saram. Nge are mesom a fatangau, unusen inisum epwe rochopwak.
LUK 11:35 Iei mine kopwe tümwünüöchuk, pwe ewe saram mi nom lomw esap rochopwak.
LUK 11:36 Are unusen inisum a saram, nge esap wor eu kinikin a rochopwak, unusen inisum epwe saram usun chök eu lamp mi tinöch a asaramok.”
LUK 11:37 Iwe, lupwen Jesus a wes le kapas, eman Farisi a köri pwe epwe mongö ren. Iei mine Jesus a feila lon imwan o a mot ngeni mongö.
LUK 11:38 Iwe, ewe Farisi a weitifengeni lupwen a küna, pwe Jesus esap talü pöün mwen an epwe mongö.
LUK 11:39 Iei mine ewe Samol a kapas ngeni, “Ämi kana Farisi, oua limeti lükün ämi kewe kap me sepi, nge lon letipemi a uren mochenia me föföringau.
LUK 11:40 Ämi mi umwes! Ifa usun, Kot ewe mi föri lükün esap pwal föri lon?
LUK 11:41 Nge oupwe fang ngeni ekewe mi wöüngau mine a nom lon ämi kewe kap me sepi, mürin mettoch meinisin repwe limöch me remi.
LUK 11:42 “Feiengauemi, ämi Farisi! Oua ngeni Kot leengolun ämi nofitin mongö usun chök mint me warung me sokopaten chön irä, nge oua tümwününgau ngeni pwüngüöch me ämi echeni Kot. Oupwe föri ekewe, nge oupwe pwal tümwünüöchü ekei.
LUK 11:43 Feiengauemi, ämi Farisi! Pun oua sani le mot won ekewe lenien mot än ekewe mi lap lon ekewe imwen felikis, pwal än ekewe aramas kapong ngenikemi fän suföl me lon ekewe lenien amömö.
LUK 11:44 Feiengauemi! Pun oua usun chök ekewe peias esap wor eman a küna, aramas ra fetal won, nge resap silei.”
LUK 11:45 Iwe, eman lein ekewe Sensen Allük a üreni Jesus, “Sense, lupwen ka kapas usun ekei mettoch, ka pwal aitengauakem.”
LUK 11:46 Jesus a pölüeni, “Feiengauemi, pwal ämi kewe Sensen Allük! Pun oua isetä mettoch mi chou won ekewe aramas, a fokun weires ar repwe mwärei, nge ämi ousap mwo nge pwisi ngeni efoch aütumi ekewe mettoch mi chou.
LUK 11:47 Feiengauemi! Ämi oua alinga peiasen ekewe soufos ämi kewe lewo ra niela.
LUK 11:48 Ren ei oua pwärätä pwe oua tipeeu ngeni mine ämi kewe lewo ra föri. Ir ra niela ekewe soufos, nge ämi oua alinga peiaser kewe.
LUK 11:49 Iei popun Tipachemen Kot a apasa, ‘Üpwe tinala rer soufos me soukünö. Repwe niela ekoch me leir, nge ekoch repwe ariaföüür.’
LUK 11:50 Iei mine ei täppin aramas repwe küna kapwüng fän iten ninnilan ekewe soufos meinisin seni lepopun fanüfan tori iei,
LUK 11:51 seni ewe fansoun ninnilan Epel tori ninnilan Sekaraia mi mäla lefilen ewe rongen asor me ewe Imw mi Pin. Ewer, üpwe ürenikemi, ei täppin aramas repwe küna kapwüng fänäsengesiir meinisin.
LUK 11:52 Feiengauemi, ämi Sensen Allük! Pun oua amwöchü kien asamen silei (mettochun mwün läng). Püsin ämi ousap tolong lon, nge oua epeti chokewe mi mochen tolong lon.”
LUK 11:53 Iwe, lupwen Jesus a towu seni ewe imw, ekewe Sensen Allük me ekewe Farisi ra popuetä le fokun esita o ais ngeni chomong kapas ais usun chomong mettoch.
LUK 11:54 Ra opoperi, pun ra mochen aöi ika epwe apasa och kapas mi mwäl.
LUK 12:1 Lon ena fansoun, lupwen chomong ngeröün aramas ra chufengen pwe ra chök ipwerifengeniir, Jesus a akomwen kapas ngeni nöün kewe chon kaiö, “Oupwe afälikemi ren ewe iis än ekewe Farisi, wewen ar likatuputup.
LUK 12:2 Mettoch meinisin mi pwölüla epwe pwäla, pwal mettoch meinisin mi monomonola aramas repwe silei.
LUK 12:3 Iei mine meinisin mine oua apasa le roch, aramas repwe rong lon saramen rän. Pwal meinisin mine oua möngününgün ngeni eman lon eu ruum mi kesip, aramas repwe leüömong le apasatä me won osun ekewe imw.
LUK 12:4 “Chiechiei kana, üpwe ürenikemi, ousap niuokusiti chokewe mi niela inis, nge mürin resap chüen tongeni föri och.
LUK 12:5 Nge üpwe aiti ngenikemi iö oupwe niuokusiti: Oupwe niuokusiti Kot, i ewe eman a wor an pwüüng pwe epwe tongeni aturalong eman lon hell mürin an niela. Ewer, üpwe ürenikemi pwe iei i ewe oupwe niuokusiti.
LUK 12:6 “Ifa usun, aramas resap amömöla limman nichok ren ruoföü kapa? Iei mwo nge sap eman ekewe nichok Kot a manlükala.
LUK 12:7 Nge meten möküremi kewe mwo nge ra lea meinisin. Iei mine ousap niuokus, oua aüchea seni chomong nichok.
LUK 12:8 “Iwe, üpwe ürenikemi, pwe iö a pwäriei mwen mesen aramas, Nöün Aramas epwe pwal pwäri mwen mesen nöün Kot kewe chon läng.
LUK 12:9 Nge iö a amam ngang mwen mesen aramas, Nöün Aramas epwe pwal amam i mwen mesen nöün Kot kewe chon läng.
LUK 12:10 Iwe, eman mi apasa eu kapasen ü ngeni Nöün Aramas epwe musola. Nge iö a apasa kapasen turunufas ngeni Ngünmifel esap musola.
LUK 12:11 Lupwen repwe etekinikemiila pwe oupwe kapwüng lon ekewe imwen felikis, ika mwen ekewe kepina me samol, ousap öüreki mine oupwe pwärätä fän itemi are mine oupwe apasa.
LUK 12:12 Pun Ngünmifel epwe aiti ngenikemi lon ewe chök otun mine oupwe apasa.”
LUK 12:13 Iwe, a wor eman mwän me lon ewe mwichen aramas a üreni Jesus, “Sense, kose mochen kopwe üreni pwii pwe epwe ineti mettochum me won semem.”
LUK 12:14 Jesus a pölüeni, “Ätenan, iö a ngeniei ewe pwüüng pwe üpwe apwüngükemi are ineti mettochumi?”
LUK 12:15 Mürin a sopwela le kapas ngeniir meinisin, “Oupwe mamasa o tümwünüöchükemi seni sokopaten mochenia meinisin. Pun manauen eman aramas esap longolong won met mi nom ren, inamwo are a fokun pisekisek.”
LUK 12:16 Mürin Jesus a üreni ei pworausen awewe: “A wor eman mwän mi pisekisek, fanüan a fokun ukua.
LUK 12:17 Iwe, a ekieki lon lelukan, ‘Met üpwe tongeni föri? Esap wor eu leni ia üpwe tongeni iseis ie uän fanüei meinisin.’
LUK 12:18 Mürin a apasa, ‘Iei mine üpwe föri. Üpwe atomwala ai kewe lenien iseis o aüetä ekoch mi watte seni. Ikenan üpwe iseis ai kewe föün wiich me piseki meinisin.
LUK 12:19 Mürin üpwe üreni ngüni: Ngüni, a wor chomong mettochumw, a naf ngonuk lon chomong ier. Kopwe manau fän kinamwe. Kopwe momongö o ükün o pwapwa.’
LUK 12:20 Nge Kot a üreni, ‘Umwesum, lon chök ei pwinin kopwe le mäla. Iwe, iö epwe eäni ekei mettoch meinisin ka amolätä fän itom?’
LUK 12:21 Iei usun mine epwe fis ngeni chokewe ra iseis mettochur fän püsin iter, nge resap wöü me ren Kot.”
LUK 12:22 Mürin Jesus a üreni nöün kewe chon kaiö, “Iei mine üpwe ürenikemi, pwe ousap öüreki anemi mine oupwe manau ren, ousap pwal öüreki mine oupwe üföüf.
LUK 12:23 Pun manau a aüchea seni mongö, nge ewe inis a aüchea seni üf.
LUK 12:24 Oupwe nenengeni ekewe ängä: Resap fofot, resap pwal kinikin, esap wor ar imwen iseis, nge Kot a fen amongöniir. Ämi oua kon aüchea seni ekewe machang.
LUK 12:25 Ifa usun, iö leimi epwe tongeni atama manauan ren an öürek?
LUK 12:26 Are ousap tongeni föri ei sokun mettoch mi kisikis, pwota chök oupwe öüreki ekewe ekoch mettoch?
LUK 12:27 Oupwe nenengeni ekewe kiopun lemäl usun ar märitä: Resap angang are föri üfer. Nge üpwe ürenikemi, pwe ewe mwo king Salomon lon wöün meinisin esap üföüf üf mi ling usun lingen ekei pön kiop.
LUK 12:28 Are iei usun än Kot aüfa ekewe fetilin lemäl, fetil mi wor ikenai, nge lesor a koturulong lon um, ifa usun esap fokun achocho le aüföüfakemi lap seniir? Ämi oua lükülükkisikis!
LUK 12:29 Iei mine ousap chök ekieki lon letipemi mine oupwe mongö pwal mine oupwe ün, ousap öürek usun.
LUK 12:30 Pun chon ekewe mwü won fanüfan ra chök öüreki ekei mettoch meinisin. Sememi we a silei pwe oua osupwangen ekei mettoch.
LUK 12:31 Nge oupwe chök ekieki lon letipemi ewe Mwün Kot, iwe, i epwe ngenikemi ekei mettoch meinisin.
LUK 12:32 “Ousap niuokus, ämi mwich mi kisikis, pun Sememi a pwapwa ren an epwe ngenikemi ewe mwü.
LUK 12:33 Oupwe amömöla pisekimi, nge liwinin oupwe ngeni ekewe chon wöüngau. Oupwe awora ämi kewe sokun pwotou resap tongeni tala, oupwe iseis wöümi lon läng, ewe ia esap tongeni kisikisila me ie, pun chon solä resap tongeni angeer, nge pwötür resap tongeni atarela.
LUK 12:34 Pun ia wöümi a nom ie, ikenan lelukemi epwe pwal nom ie.
LUK 12:35 “Oupwe anükü üfemi o molotä ngeni mine epwe fis, oupwe atina nöümi lamp pwe epwe tin,
LUK 12:36 pwe oupwe usun chök ekewe chon angang mi witiwiti nöür we masta an epwe liwinto seni eu fetalapen apwüpwülü. Lupwen epwe war o fichifich, repwe müttir suki ngeni asam.
LUK 12:37 A ifa me feiöchün ekewe chon angang nöür we masta a küneer pwe ra nennela o molotä lupwen a liwinsefäl. Enlet, üpwe ürenikemi, pwe ewe masta epwe üföüfolong üfen chon angang, epwe amoteer ngeni chepel o ngeniir aner mongö.
LUK 12:38 Epwe ifa me feiöchün ekewe chon angang are nöür we masta a küna pwe ra molotä, inamwo ika epwe war lukenipwin ika wilingäch!
LUK 12:39 Nge oupwe chök silei, pwe are mine imwan we epwe silei otun än ewe chon solä epwe war, esap mwüt ngeni ewe chon solä pwe epwe atalong imwan.
LUK 12:40 Ina usun pwal ämi oupwe molotä, pun Nöün Aramas epwe war lon eu otun ousap ekieki ngeni.”
LUK 12:41 Iwe, Petrus a aisini, “Ai Samol, ei pworausen awewe ka apworausa fän item ika fän iten aramas meinisin?”
LUK 12:42 Iwe, ewe Samol a pölüeni, “Iö chök ewe chon angang mi allükülük o tipachem? Ätewe nöün masta epwe seikätä pwe epwe nemeni nöün kewe chon angang o ngeniir wiser mongö lon fansoun fich.
LUK 12:43 Feiöchün ewe chon angang ika nöün we masta a küna pwe a föri iei usun lupwen a war.
LUK 12:44 Enlet, üpwe ürenikemi, nöün we masta epwe seikätä, pwe epwe nemeni mettochun meinisin.
LUK 12:45 Nge are ei chon angang a ekieki lon lelukan, ‘Nei we masta epwe fokun mang an liwinto,’ are epwe popuetä le wichi chienan kewe chon angang mwän me fefin o popuetä le momongö o ükün pwe a puchola,
LUK 12:46 mürin ewe masta epwe liwinsefäl lon eu rän ewe chon angang esap molotä lon, pwal lon eu fansoun esap silei. Iwe, ewe masta epwe apwüngü ngeni mäla o atolonga lon lenien chokewe resap allükülük.
LUK 12:47 Ewe chon angang mi silei letipen nöün we masta, nge esap molotä ika föri mine a mochen, epwe angei wichiwich mi chomong.
LUK 12:48 Nge ewe chon angang esap silei letipen nöün we masta, nge a föri sokun föför epwe küna apwüng ren, epwe angei wichiwich mi chokükün. Eman aramas mi angei chomong, repwe pwal mochen angei chomong me ren, nge are aramas ra lükü ngeni eman chomong, repwe pwal mochen angei met mi lap seni.
LUK 12:49 “Ngang üa feito pwe üpwe soni ekkei won fanüfan o üa äneän pwe epwe fen nget.
LUK 12:50 Mi wor eu papatais üpwe papatais ngeni, nge üa chök fokun riaföü tori epwe wesila.
LUK 12:51 Oua ekieki pwe üa feito pwe üpwe uwato kinamwe won fanüfan? Apwi, üsap uwato kinamwe pwe aimwüfesen.
LUK 12:52 Seni ei fansoun, eu famili a wor limman lon repwe aimwüfesen, ülüman repwe ü ngeni ruoman, nge ruoman repwe ü ngeni ülüman.
LUK 12:53 Samasam repwe ü ngeni nöür mwän, nge ekewe mwän repwe ü ngeni semer. Inein repwe ü ngeni nöür fefin, nge ekewe fefin repwe ü ngeni iner. Iwe, inen pwülüen ekewe fefin repwe ü ngeni pwülüen nöür kewe mwän, nge ekewe fefin repwe ü ngeni inen pwülüer kewe.”
LUK 12:54 Iwe, Jesus a pwal üreni ekewe aramas, “Lupwen oua küna ietän eu kuchu me lotou, oua müttir apasa pwe epwe püng üt, iwe, a püng üt.
LUK 12:55 Nge lupwen oua mefi enienin asepwälin ör, oua apasa pwe epwe pwichikar, iwe, a pwichikar.
LUK 12:56 Ämi chon atuputup! Oua tongeni osuni usun ränöch me räningau ren ämi nengeni lapalapen fanüfan me läng, nge pwota ousap silei usun ämi awewe lapalapen fansoun ikenai?
LUK 12:57 “Pwota ousap püsin apwüngükemi won mine a pwüng?
LUK 12:58 Lupwen oua feilapök me ewe chon atipisuk ngeni imwen kapwüng, kopwe fokun achocho le akinamwela lefilom me ätewe, me mwen ämi oupwe tori ewe imwen kapwüng. Ika kosap föri iei usun, ewe chon atipisuk epwe etekinukela mwen ewe soukapwüng, nge ewe soukapwüng epwe atolongok le pöün polis, iwe, kopwe tolong lon imwen fötek.
LUK 12:59 Üpwe ürenuk, kopwe nonom ikenan tori om kopwe wes le mönätiu unusen om we liwinimang.”
LUK 13:1 Lon ena fansoun ekoch aramas ra nom ikenan, ra apworausa ngeni Jesus usun ekewe chon Kalilea Pilatus a niirela, pwe chaar a nofit ngeni chaan ar kewe mönün asor ra eäni asor ngeni Kot.
LUK 13:2 Iwe, Jesus a aisiniir, “Oua ekieki, pwe ekei chon Kalilea ra kon tipis lap seni ekewe ekoch chon Kalilea, pokiten ra ninnila lon ei sokun lapalap?
LUK 13:3 Apwi, sap ina! Üpwe ürenikemi, pwe are ämi ousap aier seni ämi tipis, oupwe pwal mäla ämi meinisin usun chök ir.
LUK 13:4 Are ifa usun, ekewe engol me waluman aramas mi mäla, lupwen ewe imw tekia lon Siloam a turutiu wor? Oua ekieki, pwe ir ra kon tipis lap seni ekewe aramas meinisin mi nom lon Jerusalem?
LUK 13:5 Apwi, sap ina! Nge üpwe ürenikemi, pwe are ämi ousap aier seni ämi tipis, oupwe pwal mäla ämi meinisin usun chök ir.”
LUK 13:6 Mürin Jesus a üreniir ei pworausen awewe: “A wor eman mwän mi wor efoch an irä fiik, a märitä lon an tanipin wain. Iwe, a feila pwe epwe nengeni are a ua, nge esap küna och.
LUK 13:7 Iwe, a üreni ewe chon tümwünü an we tanipi, ‘Nengeni, lon ükükün ülüngat ier üa feito ikei, pwe üpwe nengeni ika ei irä fiik a wor uan, nge üsap fokun küna och. Kopwe üküfala! Pwota epwe angemwäli feiöchün ei pwül?’
LUK 13:8 Nge ewe chon tümwünü ewe tanipi a pölüeni, ‘Ai samol, kose mochen kopwe mwo likiti pwal eu ier, pwe üpwe tuw ünükün o koiasini.
LUK 13:9 Iwe, are ewe irä a ua mürin eu ier, epwe öch, nge are esap ua, kopwe tongeni üküfala.’”
LUK 13:10 Iwe, lon ränin sapat Jesus a afalafal lon eu imwen felikis.
LUK 13:11 A wor eman fefin ikenan a wor eman ngününgau won, pwe a sasamau lon ükükün engol me walu ier. Neminei a pworofengen inisin, pwe esap tongeni wenecharatä.
LUK 13:12 Iwe, lupwen Jesus a küna neminewe, a kökköri o apasa, “Nemin, kopwe ngas seni om samau!”
LUK 13:13 Iwe, Jesus a iseis pöün won, lon ewe chök otun ewe fefin a wenecharatä o mwareiti Kot.
LUK 13:14 Nge ewe nöüwisen ewe imwen felikis a chou, pwe Jesus a apöchökülätä ewe fefin lon ewe ränin sapat. Iei mine a üreni ekewe aramas, “A wor wonu ränin ach sipwe föri ach angang lon. Oupwe feito lon ekei rän pwe oupwe küna pöchökül, nge sap lon ränin sapat.”
LUK 13:15 Mürin ewe Samol a üreni, “Ämi chon likatuputup! Ifa usun ousap apichi ririn nöümi kow ika aas seni ewe ia a riri ie o etekinala, pwe oupwe aünü ngeni koluk lon ewe ränin sapat?
LUK 13:16 Nge ikei a nom eman fefin, i mwirimwirin Apraham, Satan a föti lon ükükün engol me walu ier. Ifa usun, esap pwüng ngeni an epwe küna ngas lon ränin sapat?”
LUK 13:17 Iwe, lupwen Jesus a apasatä ekei kapas, ekewe chon ü ngeni meinisin ra säw. Nge ekewe aramas ra fokun pwapwa ren ekewe mettoch mi amwarar Jesus a föri.
LUK 13:18 Mürin Jesus a ais, “Met ewe Mwün Kot a wewe ngeni? Met üpwe tongeni awewe ngeni?
LUK 13:19 A wewe ngeni eföü föün pwükilin irä mi fokun kükün, eman aramas a angei o fotukätiu lon an tanipi. Iwe, ewe föün irä a märitä o wiliti efoch irä, nge machang ra föri faser won palan kana.”
LUK 13:20 Iwe, Jesus a pwal ais, “Met üpwe tongeni awewe ngeni ewe Mwün Kot?
LUK 13:21 A wewe ngeni iis eman fefin a angei o nofitifengeni me eu watten sepien pilawa mi amas tori unusen ewe pilawa a pwotä.”
LUK 13:22 Iwe, Jesus a feilfetal lon ekewe telinimw me sopw o afalafala ekewe aramas, nge a fefetal ngeni Jerusalem.
LUK 13:23 Iwe, eman a aisini, “Ai Samol, ifa usun, repwe chokükün chök ir mi küna manau?” Jesus a pölüeniir,
LUK 13:24 “Oupwe achocho ämi oupwe tolong lon ewe asam mi pwangekükün. Pun chomong aramas ra sotuni ar repwe tolong lon, nge resap tongeni.
LUK 13:25 Iwe, are samolun ewe imw epwe pwätä o öppüngala ewe asam, mürin oupwe ütä lükün o popuetä le fichifich ngeni ewe asam o apasa, ‘Äm samol, kose mochen suki ngenikem ewe asam.’ Nge i epwe pölüenikemi, ‘Ngang üsap silekemi ia oua feito me ie.’
LUK 13:26 Mürin oupwe pölüeni, ‘Äm aia etuk le mongö o ün, nge en ka afalafal lon ach telinimw.’
LUK 13:27 Nge i epwe ürenisefälikemi, ‘Üsap silekemi ia oua feito me ie. Oupwe feil seniei ämi chon föföringau!’
LUK 13:28 Iwe, oupwe fokun puchör o akarüngi ikenan, lupwen oupwe küna Apraham me Isaak me Jakop me ekewe soufos meinisin lon Mwün Kot, nge püsin ämi oupwe kösüla lükün.
LUK 13:29 Aramas repwe feito seni ötiu me lotou, pwal seni efeng me ör o mot ngeni ewe kametip lon Mwün Kot.
LUK 13:30 Ewer, chokewe mi kükümwir lon ei fansoun repwe akom, nge chokewe mi akom lon ei fansoun repwe kükümwir.”
LUK 13:31 Iwe, lon ewe chök fansoun ekoch ekewe Farisi ra feito ren Jesus o üreni, “Kopwe sü seni ikei o feila ekis, pun Herotes a ekiekin niikela.”
LUK 13:32 Jesus a pölüeniir, “Oupwe feila o üreni ena foks, ‘Ngang üa asüela anün rochopwak o apöchöküla aramas ikenai me lesor, nge lon ewe aülüngatin rän üpwe awesala ai we angang.’
LUK 13:33 Inamwo ei, nge üpwe chök sopwela ai sai ikenai, lesor pwal sorotän lesor. Pun esap pwüng ngeni eman soufos an epwe ninnila ekis, pwe lon Jerusalem chök.
LUK 13:34 “Ämi chon Jerusalem, ämi chon Jerusalem, oua niela ekewe soufos o monei fau ngeni ekewe chon künö Kot a tiniireto remi. Fän chomong üa mochen achufengeni nöümi aramas, usun eman chuko a achufengeni nöün fan pöükässin, nge ämi ousap mochen.
LUK 13:35 Nengeni, ämi we imwenfel epwe pönüla. Nge ngang üpwe ürenikemi, pwe ousap chüen künaei, tori oupwe apasa, ‘A feiöch ätewe a feito fäniten ewe Samol.’”
LUK 14:1 Iwe, lon eu ränin sapat Jesus a feila pwe epwe mongö lon imwen eman souemwenin ekewe Farisi. Iwe, ekewe aramas ra chök opoperi.
LUK 14:2 Ikenan a wor eman mwän a feito ren Jesus mi pwo unusen inisin.
LUK 14:3 Iwe, Jesus a aisini ekewe Sensen Allük me ekewe Farisi, “Ifa usun, allükün ach lamalam a mwütätä ach sipwe apöchöküla aramas lon ränin sapat ika sisap?”
LUK 14:4 Nge ir resap apasa och. Iei mine Jesus a amwochatä ewe mwän, a apöchöküla o tinala.
LUK 14:5 Mürin Jesus a üreniir, “Are eman leimi a wor eman nöün ät ika eman nöün kow, a fis ngeni pwe a turulong lon eu chönüttu lon eu ränin sapat, ifa usun, ousap müttir le efietä seni lon ewe chönüttu, inamwo ika a sereni ewe ränin sapat?”
LUK 14:6 Nge ir resap tongeni pölüeni och usun kei kapas.
LUK 14:7 Iwe, Jesus a küna pwe ekoch wasöla mi fiti ewe mongö ra chök fili ekewe lenien mot än ekewe aramas tekia, iei mine a üreniir meinisin ei pworausen awewe:
LUK 14:8 “Lupwen eman a köruk om kopwe fiti eu kametipen apwüpwülü, kosap mottiu won ewe lenien mot än ekewe aramas tekia. Pun a tongeni fis, pwe eman aramas mi tekia senuk a pwal kö ngeni ewe kametip.
LUK 14:9 Iwe, mürin ewe mi kökkörikemi me ruoman epwe feito o apasa ngonuk, ‘Kopwe tötiu seni ei lenien mot, pwe ätei epwe mot won.’ Mürin kopwe säw o mottiu won eu leni mi tekison.
LUK 14:10 Ina mine, lupwen om kopwe kö, kopwe feila o mottiu won eu lenien mot mi tekison, pwe ewe mi köruk epwe feito o ürenuk, ‘Pwii, kopwe tötä won eu kei lenien mot mi tekia.’ Ren ei epwe wor iteüöchum fän mesen ekewe chon kökköto meinisin.
LUK 14:11 Pun eman aramas mi püsin atekiatä, epwe tekisonotiu, nge eman mi püsin atekisonatiu, epwe tekiatä.”
LUK 14:12 Mürin Jesus a üreni ewe mwän mi köri, “Lupwen ka föri eu mongön leoloas are lekuniol, kosap köri chiechiom kewe ika pwiüm kewe ika aramasom kewe ika chon arum kewe mi pisekisek, pun mürin repwe pwal kökköruk o aliwini ngonuk mine ka fen föri ngeniir.
LUK 14:13 Nge lupwen ka föri eu kametip, kopwe köri ekewe chon mwelele, ekewe chon ter, ekewe chon pechemä me ekewe chon chun.
LUK 14:14 Iwe, ren ei kopwe feiöch, pun resap tongeni aliwini ngonuk mine ka föri ngeniir. Kot epwe liwini ngonuk lon ewe ränin manausefälin ekewe chon pwüng.”
LUK 14:15 Iwe, lupwen eman lein ekewe mwän mi mot ngeni chepel a rong ekei kapas, a üreni Jesus, “Ra feiöch chokewe mi mot ngeni ewe kametip lon Mwün Kot!”
LUK 14:16 Nge Jesus a üreni, “A wor eman mwän a föri eu kametip mi watte o köri chomong aramas pwe repwe eti.
LUK 14:17 Lupwen a tori fansoun ewe kametip, a tinala nöün kewe chon angang pwe repwe asile ngeni ekewe chon kökköto, ‘Oupwe etto, a molotä meinisin.’
LUK 14:18 Nge ir meinisin ra popuetä le künetipingen, eman mürin eman. Ewe aemanün a üreni ewe chon angang, ‘Üa fen möni eu fanü, nge iei üpwe feila o nenengeni. Kose mochen kopwe amusaeila.’
LUK 14:19 Pwal eman a apasa, ‘Üa fen möni engol kow, nge iei üpwe feila o sotuniir. Kose mochen kopwe amusaeila.’
LUK 14:20 Nge pwal eman a apasa, ‘Üa kärän angei eman pwülüei, iei mine üsap tongeni feila.’
LUK 14:21 “Iwe, ewe chon angang a liwinsefäliti an we masta o apworausa ngeni meinisin mine a fis. Mürin ewe masta a fokun lingeringer o üreni nöün we chon angang, ‘Kopwe müttir le feila ngeni ekewe alelap me ekewe alekis lon ewe telinimw o emwenato ekewe chon mwelele, ekewe chon ter, ekewe chon chun me ekewe chon pechemä.’
LUK 14:22 Mürin ewe chon angang a üreni, ‘Ai samol, mine ka allük ngeniei a pwönüetä. Nge a chüen wor leni.’
LUK 14:23 Iei mine ewe masta a üreni ewe chon angang, ‘Kopwe feila lükün ewe telinimw won ekewe al me ünükün ekewe tit o pese ngeni ekewe aramas pwe repwe feito, pwe imwei epwe ur.
LUK 14:24 Pun üa ürenikemi, pwe esap eman ätekewe mi kö repwe neni mongön ai kametip.’”
LUK 14:25 Lon eu rän, lupwen eu mwichen aramas mi chomong ra eti Jesus le fetal, a sap ngeniir o üreniir,
LUK 14:26 “Iö a feito rei esap tongeni nei chon kaiö, are esap echeniei lap seni an echeni saman me inan, pwülüan me nöün kana, pwiin me fefinan kana, pwal mwo nge püsin manauan.
LUK 14:27 Iö esap mwärei püsin an iräpenges o tapweto müri, esap tongeni nei chon kaiö.
LUK 14:28 “Are eman leimi a ekieki an epwe aüetä eu imw tekia, epwe akomwen mottiu o kütta fite ükükün liwinin pisekin, pwe epwe silei are a naf nöün moni an epwe tongeni awesala ewe angang.
LUK 14:29 Are esap föri iei usun, esap tongeni awesala ewe imw tekia mürin an föri longolongun. Iwe, aramas meinisin mi küna met a fis repwe popuetä le takiri ewe aramas
LUK 14:30 o apasa, ‘Ei mwän a popuetä le aüetä eu imw tekia, nge esap tongeni awesala.’
LUK 14:31 “Are eman king me engol ngeröü nöün sounfiu ra feila pwe repwe maun ngeni pwal eman king me rüwe ngeröü nöün sounfiu, ewe king epwe akomwen mottiu o ekieki are epwe naf an pöchökül an epwe tongeni maun ngeni pwal ewe eman king.
LUK 14:32 Nge are a mefi pwe esap tongeni maun ngeni, epwe tinala nöün chon künö ren pwal ewe eman king o tüngor ngeni won met epwe wor ren kinamwe lefiler me mwen an epwe feito.
LUK 14:33 Ina chök usun, esap wor eman a tongeni nei chon kaiö are esap pölükü meinisin mine a eäni.
LUK 14:34 “Salt a mürina. Nge are salt a nepatapatala, esap wor och mine sipwe anekenikensefäli ngeni.
LUK 14:35 Esap wor lomotan ngeni ewe pwül ika ngeni an epwe koiasi, epwe chök koturula. Iö a wor selingan epwe rongorong.”
LUK 15:1 Lon eu rän, lupwen chomong chon ioni takises me chon tipis ra mwicheto ren Jesus pwe repwe rongorong an afalafal,
LUK 15:2 ekewe Farisi me Sensen Allük ra popuetä le ngününgünü o üra, “Ei mwän a etiwa chon tipis, a pwal mwo nge etiir le mongö.”
LUK 15:3 Iei mine Jesus a üreniir ei pworausen awewe:
LUK 15:4 “Are eman leimi a nöüni ipükü sip, nge eman me leir a mwalechela, met ätei epwe föri? Epwe likiti ekewe tiwe me tiweman sip lon ewe leni mi amassawa, epwe feila o kütta ewe eman mi mwalechela tori an epwe küna.
LUK 15:5 Nge lupwen a küna, a fokun pwapwa. Iwe, a ekietä won afaran
LUK 15:6 o uweesefäliela lon lenian. Mürin epwe körifengeni chiechian kana me chon arun kana o üreniir, ‘Ousipwe fokun pwapwa, pun üa küna nei we sip mi mwalechela.’
LUK 15:7 Ngang üpwe ürenikemi, ina chök usun epwe wor watten pwapwa lon läng fän iten eman chon tipis mi aier, lap seni ekewe tiwe me tiweman aramas mi pwüng, ra ekieki pwe esap wor lomoten ar repwe aier.
LUK 15:8 “Ika a wor eman fefin mi eäni engol föün moni silifer, nge eföü a pöüt seni. Met neminei epwe föri? Epwe atina eu lamp, epwe pirumwei lon imwan o achocho ngeni le kütta tori epwe küna.
LUK 15:9 Iwe, lupwen a küna, epwe körifengeni chiechian kana me chon arun kana o üreniir, ‘Ousipwe pwapwa, pun üa küna ewe eföü föün moni mi pöüt seniei.’
LUK 15:10 Ngang üpwe ürenikemi, ina chök usun nöün Kot kewe chon läng repwe fokun pwapwa fän iten eman chon tipis mi aier.”
LUK 15:11 Iwe, Jesus a sopwela le üra, “A wor eman mwän a nöüni ruoman alüal.
LUK 15:12 Iwe, ewe mi kükün a üreni saman we, ‘Semei, kopwe ngeniei wisei me lon woumw.’ Iei mine ewe sam a ineti mettochun ngeni nöün kewe ruoman alüal.
LUK 15:13 Ekoch rän mürin ewe nau mi kükün a amömöla mettochun kewe o feila seni lenian fän ewe moni. Iwe, a feila lon eu fanü mi toau, nge ikenan a fangesoroula nöün we moni ren an föföringau.
LUK 15:14 Iwe, lupwen a itela nöün we moni meinisin, a fis eu lengita mi watte won unusen ewe fanü. Mürin esap chüen wor mine ei alüal epwe manau seni.
LUK 15:15 Iei mine a feila o küt an angang ren eman chon ewe fanü. Iwe, ätewe a tinala ewe alüal lon fanüan pwe epwe tümwünü nöün kewe pik.
LUK 15:16 Iwe, tipen ewe alüal epwe mongö anen ekewe pik kewe mongö, nge esap wor eman a ngeni och.
LUK 15:17 Mürin a nela lelukan. Iwe, a apasa, ‘Nöün semei kewe chon angang mi liwin meinisin a watte aner, lap seni ar tongeni mongö, nge iei üa nom ikei lon ai mään echik.
LUK 15:18 Üpwe ütä o liwinla ren semei o üreni: Semei, üa tipis ngeni Kot pwal ngonuk.
LUK 15:19 Üsap chüen fich ngeni ai üpwe eman noumw, kopwe chök anomuei lon tettelin eman chon angang.’
LUK 15:20 Iwe, ewe alüal a ütä o liwinsefäliti saman. Nge lupwen a chüen toau seni lenian, seman we a küna o a fokun tongei. A sä ngeni, a romi o mitiri.
LUK 15:21 Iwe, ewe alüal a apasa, ‘Semei, ngang üa tipis ngeni Kot pwal ngonuk. Üsap chüen fich ngeni ai üpwe iteni noumw.’
LUK 15:22 Nge ewe sam a köri nöün kewe chon angang o üreniir, ‘Oupwe kaila, uwato echö üf mi fokun mürina o aüföüfa ngeni. Oupwe uwalong won aütün pöün efoch ring o aipweipwa sus.
LUK 15:23 Mürin oupwe feila o uwato ewe nienifön kow mi oumanau o niela. Ousipwe mongöfengen o pwapwa!
LUK 15:24 Pun nei ei alüal a mäla, nge iei a manausefäl, a mwalechela, nge iei a liwinsefälito.’ Iwe, ra popuetä ewe kametip.
LUK 15:25 “Nge lon ena fansoun ewe mwänichi a nom lemäl. Iwe, lupwen a liwiniti lenian o kan ngeni imwan we, a rong tikin pisekin ettik me pworuk.
LUK 15:26 Iwe, a köri eman ekewe chon angang o aisini, ‘Met ei a fis?’
LUK 15:27 Ewe chon angang a pölüeni, ‘Pwiüm we a liwinsefälito, nge semom a niela ewe nienifön kow mi oumanau, pun nöün we a liwinsefälito ren lon an manau me pöchökül.’
LUK 15:28 Iwe, ewe mwänichi a fokun song, pwe esap mochen tolong lon ewe imw. Iei mine saman we a towu ren o tüngormau ngeni pwe epwe tolong.
LUK 15:29 Nge ewe mwänichi a üreni saman we, ‘Nengeni, lon chomong ier, ngang üa angang ngonuk usun eman amanau. Üsap fokun aleasolap ngeni met ka allük ngeniei. Nge en, esap wor met ka ngeniei, esap mwo nge eman nienifön kuuch pwe üpwe föri eu kametip ngeni chiechiei kewe.
LUK 15:30 Nge lupwen noumw ei alüal mi olusmwäliela woumw ngeni fin lisowu a liwinto, en ka niela ewe nienifön kow mi oumanau fän itan.’
LUK 15:31 Iwe, ewe sam a pölüeni, ‘Nei, en ka nom rei fansoun meinisin, nge mettoch meinisin mine üa eäni iei om.
LUK 15:32 A fokun öch ach sipwe kametip o pwapwa, pun pwiüm we a mäla, nge iei a manausefäl, a mwalechela, nge iei a liwinsefälito.’”
LUK 16:1 Iwe, Jesus a üreni nöün kewe chon kaiö, “A wor eman mwän mi pisekisek, mi wor eman nöün chon angang mi souwani mettochun meinisin. Ewe mwän mi pisekisek a rong pwe ewe chon souwa a asolapala mettochun.
LUK 16:2 Iei mine a köri ewe chon souwa o üreni, ‘Met ei üa rongorong usumw? Kopwe pwäri ngeniei puken ekewe mettoch ka souwani, pun kosap chüen tongeni wiseni wisom we.’
LUK 16:3 Iwe, ewe chon souwa a ekieki lon letipan, ‘Ai we masta epwe atowuei seni wisei we. Met üpwe föri? Esap naf ai pöchökül ai üpwe tuw warawar, üa pwal säw ai üpwe tüngorfeil.
LUK 16:4 Iei üa silei met üpwe föri, pwe lupwen üpwe towu seni wisei we aramas repwe etiwaei lon imwer.’
LUK 16:5 Iei mine a körato ekewe aramas meinisin mi wor ar liwinimang ngeni an we masta. Iwe, a aisini ewe aemanün, ‘Fite ükükün om liwinimang ngeni ai we masta?’
LUK 16:6 A pölüeni, ‘Walupükü kalon apüra seni föün olif.’ Iwe, ewe chon souwa a üreni, ‘Kopwe angei om we toropwen liwinimang, kopwe müttir mottiu o makkeetiu föpükü kalon.’
LUK 16:7 Mürin a aisini ewe aruomanün, ‘Fite ükükün om liwinimang?’ Ätewe a pölüeni, ‘Engeröü tuk pilawa.’ Iwe, ewe chon souwa a üreni, ‘Kopwe angei om toropwen liwinimang o makkeetiu walupükü tuk.’
LUK 16:8 Iei mine ewe samol a ingeiti ewe chon souwa mi atuputup, pun a eäni tipachem lon an föför. Pun aramasen ei fanüfan ra kon tipachem lon ar angang ngeni pilor kana, lap seni ekewe aramas mi nonom lon saram.”
LUK 16:9 Iwe, Jesus a sopwela le kapas, “Üpwe ürenikemi: Oupwe aea wöün fanüfan an epwe wor chiechiemi, pun lupwen epwe itela, repwe etiwakemi lon ewe leni ia aramas repwe nom ie tori feilfeilachök.
LUK 16:10 Eman mi allükülük le tümwünü mettoch mi kisikis, epwe pwal allükülük le tümwünü mettoch mi watte. Nge eman esap allükülük le tümwünü mettoch mi kisikis, esap pwal allükülük le tümwünü mettoch mi watte.
LUK 16:11 Iei mine are ousap allükülük lon ämi angang ngeni wöün fanüfan, ifa usun än eman epwe lükü ngenikemi ewe wöü mi wesewesen aüchea?
LUK 16:12 Iwe, are ousap allükülük le tümwünü mine än eman, iö epwe ngenikemi mine wesewesen wöümi?
LUK 16:13 “Esap wor eman chon angang a tongeni angang ngeni ruoman samol. Pun epwe oput eman, nge epwe echeni pwal ewe eman, ika epwe tipeni eman, nge epwe turunufasei pwal ewe eman. Ousap tongeni angangepök ngeni Kot me wöün fanüfan.”
LUK 16:14 Iwe, lupwen ekewe Farisi ra rongorong ekei kapas, ra esita Jesus, pun ir ra echeni moni.
LUK 16:15 Nge Jesus a üreniir, “Ämi oua alapalapöchükemi fän mesen aramas, nge Kot a silei lelukemi. Pun ekewe mettoch aramas ra ekieki pwe ra kon aüchea ra anioput me ren Kot.
LUK 16:16 “Än Moses kewe Allük me mine a mak lon ekewe puken soufos ra rongofeil tori fansoun Johannes Soupapatais. Seni ena fansoun ewe Pworausen Manau usun Mwün Kot a chöfeil, nge aramas meinisin ra pöchökülelong le tolong lon.
LUK 16:17 Nge epwe fen mecheres pwe läng me fanüfan repwe morola mwen eföü mesen makken ekewe allük epwe talüla.
LUK 16:18 Are eman mwän a mwü seni pwülüan o pwülüeni pwal eman fefin, i a tipisin lisowu, nge eman mwän mi pwülüeni eman fefin mi mwü seni pwülüan a pwal tipisin lisowu.
LUK 16:19 “A wor eman mwän mi pisekisek, a üföüf üf mi parachol me pwechepwech mi fokun mömong o a chök kakametip iteiten rän.
LUK 16:20 A pwal wor eman mwän mi wöüngau itan Lasarus, a kula inisin ren rup, aramas ra uweela lükün asamen imwen ewe mwän mi pisekisek.
LUK 16:21 Ätei a mochen an epwe mongö ekewe mworomworen mongö mi mworotiu seni än ewe mwän mi pisekisek chepel. Nge ekewe mwo kolak ra feito o chönawei rupun kewe.
LUK 16:22 Iwe, a fis pwe ewe mi wöüngau a mäla, nge ekewe chon läng ra uweatä o amota lewon pechen Apraham. Iwe, ewe mwän mi pisekisek a pwal mäla o peias.
LUK 16:23 Lupwen a nom lon hell, a fokun riaföü watte, a anetai mesan o küna Apraham me toau, nge Lasarus a nom arun.
LUK 16:24 Iwe, a kökkötä, ‘Semei Apraham, kopwe tongeei o tinala Lasarus pwe epwe tikilong aütün lon koluk o apatapata chönawei, pun üa fokun riaföü lon ei ekkei.’
LUK 16:25 Nge Apraham a üreni, ‘Nei, kopwe chechemeni pwe lon ränin manauom ka fen angei ekewe mettoch mi mürina meinisin, nge Lasarus a angei ekewe mettoch mi ngau. Nge iei a nom ikei lon an kinamwe, nge en ka nom ikenan lon om riaföü.
LUK 16:26 Nge lükün ekei mettoch meinisin a wor eu pwang mi fokun alolol lefilach, pwe chokewe mi mochen feila reöm seni ikei resap tongeni, nge chokewe mi mochen feito rem seni ikenan resap pwal tongeni.’
LUK 16:27 Iwe, ewe mwän mi pisekisek a üreni, ‘Semei Apraham, üa tüngormau ngonuk, kose mochen kopwe tinala Lasarus lon imwen semei,
LUK 16:28 ren pwii kewe limman. Epwe feila rer o fönöör, pwe resap pwal feito ikei lon ei lenien riaföü.’
LUK 16:29 Nge Apraham a üreni, ‘Mi wor rer ekewe puken Moses me ekewe puken soufos, repwe aüseling ngeniir.’
LUK 16:30 Ewe mwän mi pisekisek a pölüeni, ‘Apwi, semei Apraham, are eman epwe manausefäl seni mäla o feila rer, repwe fokun aier seni ar tipis kana.’
LUK 16:31 Nge Apraham a üreni, ‘Are resap mochen rongorong ngeni ekewe puken Moses me soufos, resap pwal tongeni lükü, inamwo ika eman epwe manausefäl seni mäla.’”
LUK 17:1 Iwe, Jesus a üreni nöün kewe chon kaiö, “Sosot epwe fokun tori aramas pwe repwe tolong lon tipis, nge feiengauen ätewe mi afisätä ekewe sosot.
LUK 17:2 Epwe fen öch ngeni ewe aramas pwe epwe riritä fän üan eföü fau mi föümong o epwe koturutiu le matau, lap seni an epwe afisätä sosot ngeni eman me lein ekewe kükün pwe epwe tipis.
LUK 17:3 Iei mine oupwe tümwünüöchü mine oupwe föri! Are pwiüm a tipis, kopwe apwüngü, nge are a ekieksefäl, kopwe amusala.
LUK 17:4 Are a tipis ngonuk fän fisu lon eu rän, nge iteiten fansoun a feito reöm o ürenuk, ‘Üa ekieksefäl,’ kopwe fokun amusala an tipis.”
LUK 17:5 Iwe, ekewe chon künö ra üreni ewe Samol, “Kopwe alisikem pwe äm lükü en epwe wattela.”
LUK 17:6 Ewe Samol a üreniir, “Are epwe wor ämi lükülük mi wewe ngeni eföü pwükilin irä mi fokun kükün, oupwe tongeni üreni ei irämong, ‘Kopwe üttuketä fiti warom o fotukuketiu le matau,’ iwe, epwe aleasochisikemi.
LUK 17:7 “Are eman leimi mi wor eman nöün chon angang mi tuw pwül are tümwünü sip, ifa usun, lupwen epwe liwinto seni lemäl, epwe üreni pwe epwe kaito pwe epwe mongö?
LUK 17:8 Apwi! Nge epwe üreni, ‘Kopwe amolätä anei mongö, anükü üfom o angang ngeniei tori üpwe wes le mongö o ün. Mürin en kopwapw mongö o ün.’
LUK 17:9 Ifa usun, ewe samol epwe kilisou ngeni nöün chon angang pokiten a aleasochisi mine a akünö ngeni?
LUK 17:10 Ina usun pwal ämi. Lupwen oua wes le föri wisemi meinisin, oupwe apasa, ‘Äm aia chon angang mi lomotongau, aia chök föri mine wisem.’”
LUK 17:11 Iwe, lupwen Jesus a fetal ngeni Jerusalem, a pwerela le kiänin Samaria me Kalilea.
LUK 17:12 Nge lupwen Jesus a tori eu sopw, a churi engol mwän mi üriir rupun pwötür. Ra ütä me toau
LUK 17:13 o kökkö fän leüömong, “Jesus äm samol, kopwe tongeekem!”
LUK 17:14 Iwe, lupwen Jesus a küneer a üreniir, “Oupwe feila ren ekewe souasor, pwe repwe nenengenikemi.” Iwe, lupwen ra feila, ra limöchüla seni rupur kewe.
LUK 17:15 Iwe, lupwen eman me leir a küna pwe a pöchökülsefäl, a liwinsefäl o mwareiti Kot fän mwelian mi leüömong.
LUK 17:16 A chapela won pwül arun pechen Jesus o kilisou ngeni. Ätei eman re Samaria.
LUK 17:17 Mürin Jesus a apasa, “A wor engol mwän mi pöchökülsefäl. Ikafa ir ekewe tiweman?
LUK 17:18 Pwota ei chök eman re ekis a liwinsefälito o pwärätä an kilisou ngeni Kot?”
LUK 17:19 Iwe, Jesus a üreni, “Kopwe ütä o feila, om lükülük a apöchökülokotä.”
LUK 17:20 Iwe, ekoch ekewe Farisi ra aisini Jesus ika inet ewe Mwün Kot epwe war. Jesus a pölüeniir, “Ewe Mwün Kot esap feito lon och sokun lapalap ach sipwe tongeni küna.
LUK 17:21 Esap wor eman epwe tongeni apasa, ‘Nengeni a nom ikei,’ are ‘Nengeni, a nom ikenan,’ pun ewe Mwün Kot a nom lon lelukemi.”
LUK 17:22 Mürin Jesus a üreni nöün kewe chon kaiö, “Epwe war ewe fansoun, lupwen oupwe fokun mochen küna eu ekewe ränin Nöün Aramas, nge ousap fokun küna.
LUK 17:23 Iwe, repwe ürenikemi, ‘Nengeni, a nom ikenan!’ are ‘Nengeni, a nom ikei!’ Ousap feila rer, ousap pwal tapwela mürir.
LUK 17:24 Pun usun fifi a fila seni läng o asarama fanüfan seni epek tori epek, iei usun Nöün Aramas lon ränin.
LUK 17:25 Nge akomwan epwe tolong lon riaföü watte o küna koput me ren ei täppin aramasen ikenai.
LUK 17:26 Usun mine a fis lon fansoun Noa, iei usun epwe pwal fis lon ränin Nöün Aramas.
LUK 17:27 Ra momongö o ükün, ra pwüpwülü o akapwüpwülüür tori ewe rän lupwen Noa a tolong lon ewe waimw o ewe noter a war o niirela meinisin.
LUK 17:28 Pwal inachök usun ewe fansoun Lot. Aramas ra momongö o ükün, ra kakamö o akamömö, ra fofot o aköüetä imw.
LUK 17:29 Nge lon ewe rän lupwen Lot a towu seni Sotom, ekkei me primston a püngütiu seni läng o niirela meinisin.
LUK 17:30 Epwe chök pwal ina usun lon ewe rän Nöün Aramas epwe wareto lon.
LUK 17:31 “Lon ewe rän, eman aramas mi nom won imwan, esap wor an fansoun an epwe tolong lon imwan pwe epwe angei pisekin. Pwal ina chök usun ewe mi nom lemäl, esap wor an fansoun an epwe liwinsefäliti imwan.
LUK 17:32 Oupwe chechemeni pwülüen Lot!
LUK 17:33 Iö a mochen amanaua püsin manauan, epwe pöüt seni, nge iö a pölükü manauan, epwe amanaua manauan.
LUK 17:34 Üpwe ürenikemi, lon ewe pwinin ruoman aramas repwe möür lon echö chök kieki. Repwe angeala eman, nge ewe eman repwe likitätiu.
LUK 17:35 Ruoman fefin repwe üsüsfengen, repwe angeala eman, nge ewe eman repwe likitätiu.
LUK 17:36 [Ruoman mwän repwe nonomfengen lemäl, repwe angeala eman, nge ewe eman repwe likitätiu.]”
LUK 17:37 Iwe, ekewe chon kaiö ra aisini Jesus, “Äm Samol, ia epwe fis ie ei?” Jesus a pölüeniir, “Ia a wor ie eman somä, ikenan ekewe machang iter wolcher ra mwichfengen ie.”
LUK 18:1 Mürin Jesus a apworausa ngeni nöün kewe chon kaiö eu pworausen awewe, pwe a mochen aiti ngeniir usun ar repwe iotek fansoun meinisin, nge resap achanü.
LUK 18:2 Iwe, a apasa, “Lon eu telinimw a wor eman soukapwüng esap niuokusiti Kot ika ekieki aramas.
LUK 18:3 Mi pwal wor eman fefin mi mä pwülüan lon ewe telinimw, a chök soun feito ren ewe soukapwüng o tüngormau ngeni, ‘Kopwe pwärala ai pwüng o alisiei ren ewe chon ü ngeniei.’
LUK 18:4 Fansoun langatam ewe soukapwüng esap mochen alisi. Nge feilfeil a ekieki lon lelukan, ‘Inamwo ika üsap niuokusiti Kot ika ekieki aramas,
LUK 18:5 nge pokiten ei fefin mi mä pwülüan a chök osukosukaei, iei üpwe le alisi, pwe epwe pwäla an pwüng. Are üsap alisi, epwe chök sopwela le feito rei tori üpwe osukosuk ren.’”
LUK 18:6 Iwe, ewe Samol a apasa, “Oupwe rongorong mine ewe soukapwüng mi ngau a üra.
LUK 18:7 Ifa usun, Kot esap fokun pwärala än nöün kewe mi fil pwüng, ir chokewe mi kökköri le rän me le pwin? Ifa usun, epwe mang le alisiir?
LUK 18:8 Ngang üpwe ürenikemi, epwe müttir le pwärala ar pwüng. Nge lupwen Nöün Aramas epwe war, ifa usun, epwe küna aramas mi lükülük won fanüfan?”
LUK 18:9 Iwe, Jesus a pwal apworausa ei pworausen awewe ngeni ekewe aramas mi lükü püsin ar pwüng o aücheangaua aramas.
LUK 18:10 “A wor ruoman mwän mi feitä lon ewe imwenfel pwe repwe iotek, eman, eman Farisi, nge ewe eman, eman chon ioni takises.
LUK 18:11 Iwe, ewe Farisi a ütä, a iotek lon lelukan o üra, ‘Ai Kot, üa kilisou ngonuk, pwe üsap usun ekewe ekoch aramas, ir chon solä, chon pwüngingau, chon lisowu, ika fen pwal usun ei chon ioni takises.
LUK 18:12 Ngang üa echikefel fän ruu lon eu wiik, üa pwal fangala leengolun meinisin mine üa eäni.’
LUK 18:13 Nge ewe chon ioni takises a ütä me toau, esap fen mwo nge netä läng, nge a pisiri fän mwärin o apasa, ‘Ai Kot, kopwe ümöümöch ngeniei, ngang eman chon tipis.’”
LUK 18:14 Jesus a apasa, “Üpwe ürenikemi, ei chon ioni takises a küna pwüng fän mesen Kot lupwen a liwinla lon imwan, nge sap ewe Farisi. Pun iö a püsin atekiatä epwe küna tekison, nge iö a püsin atekisonatiu epwe küna tekia.”
LUK 18:15 Iwe, ekoch aramas ra uwato nöür kükün semirit ren Jesus, pwe epwe afeiöchüür. Nge lupwen ekewe chon kaiö ra küneer, ra apwüngü ekewe aramas.
LUK 18:16 Nge Jesus a körato ekewe semirit ren o a apasa, “Oupwe mwüt ngeni ekewe semirit pwe repwe feito rei, nge ousap epetiir, pun iö a wewe ngeni ekei semirit epwe mwüni Mwün Kot.
LUK 18:17 Enlet, üpwe ürenikemi, are eman esap etiwa Mwün Kot usun eman semirit, esap tongeni tolong lon.”
LUK 18:18 Iwe, eman sounemenem a aisini Jesus, “Sense mi mürina, met ngang üpwe föri ai üpwe eäni manau esemüch?”
LUK 18:19 Jesus a üreni, “Pwota ka aita ngeniei mürina? Esap wor eman a mürina pwe Kot echök.
LUK 18:20 Ka silei ekewe allük: ‘Kosap lisowu, kosap niela aramas, kosap solä, kosap eäni kapas chofona usun eman, kopwe asamolu semom me inom.’”
LUK 18:21 Iwe, ewe mwän a pölüeni, “Ekei allük meinisin üa fen apwönüretä seni leküküni.”
LUK 18:22 Lupwen Jesus a rong ekei kapas, a üreni, “Mi chüen wor eu mettoch ka mang ngeni. Kopwe amömöla meinisin mine ka eäni, nge ewe moni kopwe fangala ngeni ekewe chon wöüngau, pwe epwe wor woumw lon läng. Mürin kopwe feito o tapweto müri.”
LUK 18:23 Nge lupwen ewe mwän a rong ekei kapas, a fokun letipeta, pun a fokun pisekisek.
LUK 18:24 Iwe, lupwen Jesus a küna pwe a letipeta, a apasa, “A men fokun weires ngeni ekewe aramas mi pisekisek ar repwe tolong lon Mwün Kot.
LUK 18:25 Enlet, a mecheres än eman kamel epwe tolong lon pwangen efoch tikek, lap seni än eman chon pisekisek epwe tolong lon Mwün Kot.”
LUK 18:26 Iwe, ekewe aramas mi rong ekei kapas ra aisini, “Nge iö chök epwe tongeni küna manau?”
LUK 18:27 Jesus a pölüeni, “Mine esap tufich ngeni aramas a tufich ngeni Kot.”
LUK 18:28 Mürin Petrus a üreni Jesus, “Nengeni, äm aia likitala meinisin mine aia eäni o tapwela mürum.”
LUK 18:29 Jesus a pölüeniir, “Enlet, üpwe ürenikemi, are eman a likitala imwan are pwülüan, are pwiin, are saman me inan, are nöün kana fän iten ewe Mwün Kot,
LUK 18:30 ewe aramas epwe angei liwinin mi fokun watte lon ei fansoun, epwe pwal angei manau esemuch lon ewe fansoun epwe feito.”
LUK 18:31 Mürin Jesus a aimwüela ekewe engol me ruoman chon kaiö o üreniir, “Oupwe rongorong! Oukich sipwe feitä Jerusalem. Ikenan mettoch meinisin mi makketiu me ren ekewe soufos usun Nöün Aramas epwe pwönüetä.
LUK 18:32 Epwe tolong lepöün ekewe chon lükün Israel, repwe urumwotei, repwe turunufasei o atufa.
LUK 18:33 Repwe pwal wichi o niela, nge mürin ülüngat rän epwe manausefälitä.”
LUK 18:34 Nge ekewe chon kaiö resap weweiti ekewe mettoch, pun ekewe kapas a monomon seniir, resap pwal silei wewen met Jesus a kapas usun.
LUK 18:35 Iwe, lupwen Jesus a arap ngeni Jeriko, eman mwän mi chun a mot lepekin al o tütüngor lifangan.
LUK 18:36 Lupwen a rongorong pwe chomong aramas ra fetalela won ewe al, a aisiniir, “Met a fis?”
LUK 18:37 Iwe, ra üreni, “Jesus seni Nasaret a feito.”
LUK 18:38 Mürin ewe mi mesechun a kökkö fän leüömong, “Jesus, Nöün Tafit, kopwe tongeei!”
LUK 18:39 Iwe, ekewe aramas mi nom mwan ra apwüngü o üreni pwe epwe fanafanala. Nge i a chök alapata leüan o kökkö, “Nöün Tafit, kopwe tongeei.”
LUK 18:40 Iei mine Jesus a üla o apasa pwe repwe emwenato ren ewe mi mesechun. Iwe, lupwen a kaneto, Jesus a aisini,
LUK 18:41 “Met ka mochen üpwe föri ngonuk?” A pölüeni, “Ai samol, üa mochen küna mwei.”
LUK 18:42 Iwe, Jesus a üreni, “Kopwe küna mwomw, om lükülük a apöchökülok.”
LUK 18:43 Lon ewe chök otun ewe mwän a küna mwan, a tapwela mürin Jesus o kilisou ngeni Kot. Lupwen ewe mwichen aramas ra küna ei, ir meinisin ra mwareiti Kot.
LUK 19:1 Iwe, Jesus a tolong lon Jeriko o fetalela epek.
LUK 19:2 Ikenan a wor eman meilapen chon ioni takises itan Sakios, i eman mi pisekisek.
LUK 19:3 Iwe, ätewe a sotuni an epwe nengeni ika iö Jesus. Nge pokiten i eman mwän mi mochomoch, esap tongeni küna Jesus ren ewe mwichen aramas.
LUK 19:4 Iei mine a säla mwen ewe mwichen aramas o tötä won efoch irä sikamor pwe epwe tongeni nengeni Jesus, lupwen epwe pwerela won ewe al.
LUK 19:5 Iwe, lupwen Jesus a tori ewe leni, a nenetä o üreni Sakios, “Kopwe müttir tötiu, pun ngang üpwe nonom lon imwom ikenai.”
LUK 19:6 Sakios a müttir tötiu o etiwa Jesus fän pwapwa.
LUK 19:7 Lupwen ekewe aramas meinisin ra küna mine a fis, ra ngününgünfengen lefiler, “Ei mwän a wasöla ren eman chon tipis.”
LUK 19:8 Nge Sakios a ütä o üreni ewe Samol, “Ai Samol, nengeni, ngang üpwe ngeni ekewe chon wöüngau esopun ai kewe pisek. Nge are üa atupu eman won moni, üpwe aliwinisefäli ngeni fän rüanü.”
LUK 19:9 Jesus a üreni Sakios, “Manau a tori ei imw ikenai, pun en pwal eman mwirimwirin Apraham.
LUK 19:10 Pun nöün aramas a feito pwe epwe kütta o amanaua ekewe chon mwalechela.”
LUK 19:11 Iwe, lupwen ekewe aramas ra aüseling ngeni Jesus, i a sopwela le apworausa ngeniir eu pworausen awewe. Jesus a arapakan ngeni Jerusalem, nge ekewe aramas ra ekieki pwe Mwün Kot epwe chök müttir pwäto.
LUK 19:12 Iei mine Jesus a üreniir, “A wor eman mwän mi uputekia, a feila won eu fanü mi toau, pwe epwe seikitä lon wisen king, mürin epwapw liwinsefäl.
LUK 19:13 Mwen an epwe sai a körato engol me lein nöün kewe chon angang o ngeni eman me eman eföü moni kolt. Iwe, a üreniir, ‘Oupwe anganga ekewe föün moni kolt tori üpwe liwinsefälito.’
LUK 19:14 Nge aramasen fanüan we ra oputa o tinala ekoch chon künö me mürin pwe repwe üreni, ‘Äm aisap mochen pwe ätei epwe nöüm king.’
LUK 19:15 Iwe, wesin än ewe mwän seikitä lon wisen king, a liwinsefäl. Mürin a titi nöün kewe chon angang pwe repwe feito mwan, pwe epwe pii ika ifa ükükün manauen ekewe moni ra anganga.
LUK 19:16 Ewe aemanün a feito o apasa, ‘Ai samol, noumw we eföü moni ka ngeniei, üa anganga pwe manauan a tori engol.’
LUK 19:17 Iwe, a üreni ewe chon angang, ‘A fokun mürina om angang. En eman chon angang mi mürina. Pokiten ka allükülük lon mettoch mi kisikis, ngang üpwe awisok pwe kopwe nemeni engol telinimw.’
LUK 19:18 Ewe aruomanün a feito o apasa, ‘Ai samol, noumw we eföü moni ka ngeniei, üa anganga pwe manauan a tori limu.’
LUK 19:19 Iwe, a üreni ei chon angang, ‘Kopwe nemeni limu telinimw.’
LUK 19:20 Mürin pwal eman chon angang a feito o apasa, ‘Ai samol, iei noumw we eföü moni, üa tükümala lon ekam mangaku o iseis.
LUK 19:21 Üa niuokusituk, pun en eman mwän mi tipepöchökül. Ka angei mine esap om o kini mine kosap fotuki.’
LUK 19:22 Iwe, ewe samol a üreni, ‘En eman chon angang mi ngau! Üpwe apwünguk won mine ka püsin apasatä. Ka fen silei pwe ngang eman mwän mi tipepöchökül, üa angei mine esap ai o kini mine üsap fotuki.
LUK 19:23 Pwota chök kosap iseis nei we moni lon bank? Mürin, lupwen üpwe liwinsefäl, üpwe angei nei we moni fiti manauan?’
LUK 19:24 Mürin a üreni chokewe mi ü arun, ‘Oupwe angei ewe eföü moni seni ätei o ngeni ätenan mi wor ren ekewe engol föün moni.’
LUK 19:25 Nge ir ra üreni, ‘Äm samol, a fen wor ren ätenan engol föün moni!’
LUK 19:26 A pölüeniir, ‘Üpwe ürenikemi, pwe iö a eäni an, Kot epwe achomongala, nge iö esap eäni an, Kot epwe fen mwo nge angei seni ewe ekis a wor ren.
LUK 19:27 Nge chokewe mi oputaei resap mochen ai üpwe nöür king, oupwe emweniireto ikei o niirela me mwei.’”
LUK 19:28 Iwe, mürin än Jesus apasatä ekei kapas, a akomwola mwer Jerusalem.
LUK 19:29 Lupwen a arap ngeni Petfake me Petania ren ewe Chukun Olif, a tinala ruoman nöün chon kaiö
LUK 19:30 o üreniir, “Oupwe feila lon ewe sopw a nom mwemi. Nge lupwen oupwe tori, oupwe küna eman nienifön aas mi föfö ikenan, esap mwo wor eman a wawa. Iwe, oupwe apichi o emwenato ikei.
LUK 19:31 Are eman epwe aisinikemi, ‘Pwota oua apichi ei aas?’ oupwe pölüeni, ‘Äm samol a mochen wawa.’”
LUK 19:32 Iwe, ekewe ruoman chon kaiö ra feila o ra küna ekewe mettoch meinisin Jesus a fen kapas ngeniir usun.
LUK 19:33 Iwe, lupwen ar apichi ewe nienifön aas, ätekewe mine nöür ewe aas ra aisiniir, “Pwota oua apichi ei aas?”
LUK 19:34 Ra pölüeni, “Äm samol a mochen wawa.”
LUK 19:35 Iwe, ra emwenala ewe aas ren Jesus, ra oletala üfer won ewe aas o amota Jesus won.
LUK 19:36 Lupwen Jesus a wawa ewe aas le feila, aramas ra ameresala üfer kewe won ewe al.
LUK 19:37 Nge lupwen a arap ngeni ewe leni ia ewe al a feitiu seni ewe Chukun Olif, unusen ewe mwichen chon kaiö ra popuetä le mweireiren pwapwa o mwareiti Kot fän mwelier mi leüömong pokiten ekewe manaman meinisin ra fen küna.
LUK 19:38 Iwe, ra apasa, “Feiöchün ewe king a feito fän iten ewe Samol! Kinamwe lon läng o Kot epwe ling.”
LUK 19:39 Mürin ekoch ekewe Farisi mi nom lein ewe mwichen aramas ra üreni Jesus, “Sense, kopwe allük ngeni noumw kewe chon kaiö pwe repwe fanafanala.”
LUK 19:40 Nge Jesus a pölüeniir, “Üpwe ürenikemi, are ätekei repwe fanafanala, ekewe fau repwe popuetä le pupuchör.”
LUK 19:41 Iwe, Jesus a feila o arap ngeni ewe telinimw Jerusalem. Nge lupwen an küna, a kechüeiti.
LUK 19:42 A apasa, “Amwo kopwe chök silei ikenai mine kopwe kinamwe ren. Nge iei a monola senuk.
LUK 19:43 Pun epwe war ewe fansoun pwe chon oputom repwe pwelifeiliik, repwe aüetä ar ororen maun ünükum o rongeekela.
LUK 19:44 Repwe unusen ataakola o niela ekewe aramas mi nonom lon tittum kewe. Esap wor eföü fau epwe chüen nom lon lenian, pun kosap mefi ewe fansoun lupwen Kot a feito pwe epwe amanauok.”
LUK 19:45 Mürin Jesus a tolong lon ewe imwenfel o a popuetä le asüowu ekewe chon amömö pisek.
LUK 19:46 A üreniir, “A mak lon ekewe Toropwe mi Pin pwe Kot a apasa, ‘Imwei imwenfel epwe iteni eu imwen iotek,’ nge ämi oua awili ngeni eu lenien open chon solä.”
LUK 19:47 Iwe, Jesus a afalafal lon ewe imwenfel iteiten rän. Ekewe souasor mi lap, ekewe Sensen Allük me souemwenin ekewe aramas ra mochen pwe repwe niela Jesus,
LUK 19:48 nge resap tongeni küna efoch alen ar repwe föri ar we ekiek, pun ekewe aramas ra chök akaüseling ngeni an afalafal, nge resap tümwününgau ngeni an kewe kapas meinisin.
LUK 20:1 Lon eu rän, lupwen Jesus a nom lon ewe imwenfel o afalafala ekewe aramas ewe Pworausen Manau, ekewe souasor mi lap, ekewe Sensen Allük me ekewe souakom ra feito ren
LUK 20:2 o aisini, “Kopwe ürenikem ika fän meni pwüüng ka föri ekei mettoch? Iö a ngonuk om pwüüng?”
LUK 20:3 Jesus a pölüeniir, “Iei ngang üpwe aisinikemi eu kapas ais, nge oupwe pwal ngeniei pölüan.
LUK 20:4 Ifa usun än Johannes pwüüng pwe epwe papataisi aramas a pop seni Kot ika seni aramas?”
LUK 20:5 Iwe, ra popuetä kapasfengen lefiler, “Met sipwe apasa? Are sipwe üra, ‘A pop seni Kot,’ epwe aisinikich, ‘Pwota chök ousap lükü Johannes?’
LUK 20:6 Nge are sipwe üra, ‘A pop seni aramas,’ unusen ei mwichen aramas repwe mone ngeni kich fau, pun ra lükü pwe Johannes eman soufos.”
LUK 20:7 Iei mine ra pölüeni Jesus, “Äm aisap silei ia a pop seni ie.”
LUK 20:8 Iwe, Jesus a üreniir, “Ika ina, üsap pwal ürenikemi fän meni pwüüng üa föri ekei mettoch.”
LUK 20:9 Mürin Jesus a apworausa ngeni ekewe aramas ei pworausen awewe, “A wor eman mwän a fotuki eu tanipin wain. Iwe, a awisa ekoch chon mälämäl pwe repwe tümwünü, mürin a saila lon eu fanü toau.
LUK 20:10 Lupwen a tori fansoun kinikin, a tinala eman nöün chon angang ren ekewe chon mälämäl, pwe epwe angei seniir wisan me lon ekewe föün wain. Nge ekewe chon mälämäl ra wichi ewe chon angang o tinala fän an asöülapö.
LUK 20:11 Iei mine a tinala pwal eman nöün chon angang, nge ekewe chon mälämäl ra pwal wichi, ra föri ngeni sokun föför pwe epwe säw ren o tinala fän an asöülapö.
LUK 20:12 Mürin a tinala aülümanün nöün chon angang. Iwe, ekewe chon mälämäl ra akinasa o asüela.
LUK 20:13 Mürin ewe mine an ewe tanipin wain a apasa, ‘Met üpwe föri? Iei üpwe le tinala püsin nei we üa fokun echeni. Eli repwe meniniti i.’
LUK 20:14 Nge lupwen ekewe chon mälämäl ra küna i, ra kapasfengen lefiler, ‘Iei i alemürin ätei mine an ei tanipi. Ousipwe niela, pwe sipwe eäni an ei tanipi me ren saman.’
LUK 20:15 Iei mine ra etekinawu seni ewe tanipin wain o niela.” Iwe, Jesus a üra, “Met mine an ewe tanipin wain epwe föri ngeniir?
LUK 20:16 Epwe feito o niela ekei chon mälämäl, nge epwe ngeni pwal ekoch chon mälämäl an we tanipin wain.” Lupwen ekewe aramas ra rongorong ei pworaus, ra apasa, “Apw, sap ina!”
LUK 20:17 Nge Jesus a nenengeniir o apasa, “Ifa chök wewen ekei kapas me lon ewe Toropwe mi Pin? ‘Ei fau ekewe chon kaü imw ra pöütala, pun resap aücheani, a wiliti ewe föün lepwokuku mi fokun aüchea.’
LUK 20:18 Are eman epwe turutiu won ei fau, epwe tatakis, nge are ewe fau epwe turutiu won eman, epwe fokun pachach.”
LUK 20:19 Iwe, ekewe Sensen Allük me ekewe souasor mi lap ra silei pwe a afalafala ei pworausen awewe usur, iei mine ra sotuni ar repwe fötekini Jesus lon ewe otun, nge ra niuokusiti ekewe aramas.
LUK 20:20 Iei mine ra mamasa Jesus o tinala chon operi i mi pomweni pomwen aramas mi öch, pwe repwe särei Jesus ren ar kapas ais, pun repwe tongeni atolonga fän nemenemen me pöchökülen ewe kepina.
LUK 20:21 Ekei chon op ra üreni Jesus, “Sense, äm aia silei pwe ka kapas o afalafal fän wenechar. Aia pwal silei pwe kosap nenengeni nonomun aramas, nge ka afalafala mine a let usun letipen Kot ngeni aramas.
LUK 20:22 Kopwe ürenikem ika a pwüng ach sipwe mönatiu ach takises ngeni Sisar ika ese pwüng?”
LUK 20:23 Nge Jesus a silei usun ar likatuputup o üreniir,
LUK 20:24 “Oupwe pwäri ngeniei eföü föün moni silifer. Liosun iö me iten iö ei won ei moni?” Ra pölüeni, “Liosun Sisar me itan.”
LUK 20:25 Iei mine Jesus a üreniir, “Mi pwüng. Oupwe ngeni Sisar mine än Sisar, nge oupwe ngeni Kot mine än Kot.”
LUK 20:26 Iwe, resap tongeni särei Jesus won met a apasa me mwen ekewe aramas, iei mine ra fanafanala, nge ra ing ren mine a pölüeniir won.
LUK 20:27 Mürin, ekoch Satusi ra feito ren Jesus, ir chokewe mi apasa pwe aramas resap manausefäl seni mäla. Iwe, ra üreni Jesus,
LUK 20:28 “Sense, Moses a makkei ei allük fän itach: ‘Are eman mwän a mäla, nge esap wor nöün me won pwülüan, pwiin ei mwän epwe fokun pwülüeni ei fefin, pwe epwe wor nöün fänäsengesin mwirimwirin pwiin we mi mäla.’
LUK 20:29 Mi wor füman pwipwi. Ewe mwänichi a pwülüeni eman fefin, nge lupwen a mäla, esap wor nöün.
LUK 20:30 Mürin ewe aruomanün a pwülüeni ewe fefin,
LUK 20:31 pwal mürin ewe aülümanün. Pwal ina chök usun mine a fis ngeni ekewe lusun tori ewe afümanün. Ra mäla, nge esap wor nöür.
LUK 20:32 Lesopolan ewe fefin a mäla.
LUK 20:33 Iwe, lon ewe ränin, lupwen ekewe sotup repwe manausefäl, iö me leir epwe pwülüeni ewe fefin? Pun ir me füman ra pwüpwülü ngeni.”
LUK 20:34 Jesus a üreniir, “Lon ei fansoun mwän me fefin ra pwüpwülü,
LUK 20:35 nge ekewe mwän me fefin mi fich ngeni ar repwe manausefäl seni mäla o manau lon ewe fansoun epwe feito resap pwüpwülü.
LUK 20:36 Repwe wewe ngeni ekewe chon läng, nge resap chüen tongeni mäla. Ir nöün Kot, pun ra manausefäl seni mäla.
LUK 20:37 Pwal mwo nge Moses a pwärätä lon ewe pworaus usun ewe iräfölüföl mi pulopulen ekkei, pwe ekewe sotup repwe manausefäl. Pun ikenan a aita ngeni ewe Samol än Apraham Kot, än Isaak Kot me än Jakop Kot.
LUK 20:38 Kot än ekewe mi manau Kot, nge sap än ekewe mi mäla, pun ren i aramas meinisin ra tongeni eäni manau.”
LUK 20:39 Iwe, ekoch me lein ekewe Sensen Allük ra apasa, “Sense, a fokun mürina om kapasen pölüen.”
LUK 20:40 Pun ra niuokus le sopwela ar repwe kapas ngeni won och.
LUK 20:41 Iwe, Jesus a aisiniir, “Ifa usun, pwota repwe tongeni apasa, pwe ewe Kraist epwe eman mwirimwirin Tafit?
LUK 20:42 Pun Tafit a püsin apasa lon ewe puken Kölfel, ‘Ewe Samol a kapas ngeni ai Samol: Kopwe mot lepelifichi,
LUK 20:43 tori üpwe anomu chon oputom fän pecheöm.’
LUK 20:44 Tafit a püsin aita ngeni ‘Samol’, ifa usun chök än Kraist epwe tongeni pwal eman mwirimwirin Tafit?”
LUK 20:45 Iwe, lupwen ekewe aramas meinisin ra aüseling ngeni Jesus, a üreni nöün kewe chon kaiö,
LUK 20:46 “Oupwe afälikemi ren ekewe Sensen Allük, ra sani ar repwe fetalfeil fän üfer mi langatam, ra pwal sani än aramas repwe kapong ngeniir fän suföl lon ekewe lenien amömö. Ra aea ekewe lenien mot än ekewe meilap lon ekewe imwen felikis, pwal ekewe leni fän iten aramas mi iteföüla lon ekewe lenien kametip.
LUK 20:47 Ra angemwäli imwen ekewe fefin mi mä pwülüer, mürin ra einga ngeni aramas ar iotek mi langatam. Ätekewe repwe küna apwüng mi fokun chou.”
LUK 21:1 Iwe, Jesus a nenefeil o küna ekewe chon pisekisek ra püngülong ar asor lon ewe lenien asor me lon ewe imwenfel.
LUK 21:2 A pwal küna eman fefin mi wöüngau a mä pwülüan, a püngülong ruoföü kükün moni seni kapa.
LUK 21:3 Iwe, Jesus a üra, “Üpwe ürenikemi pwe än ei fefin mi wöüngau a mä pwülüan asor a watte seni än ekewe aramas meinisin.
LUK 21:4 Pun ir meinisin ra püngülong somwen wöür, nge neminei, seni an wöüngau a püngülong meinisin mine a wor ren, a fangala meinisin mine a manau seni.”
LUK 21:5 Iwe, ekoch me lein ekewe chon kaiö ra kapas usun ewe imwenfel, usun lingöchün ren ekewe fau mi mürina, pwal ren ekewe lifang aramas ra eäni asor ngeni Kot. Nge Jesus a apasa,
LUK 21:6 “Iei oua küna ekei mettoch meinisin. Nge epwe war ewe fansoun, lupwen esap fokun wor eföü fau epwe chüen nom lon lenian. Meinisin ekei fau repwe toropasetiu.”
LUK 21:7 Iwe, ekewe chon kaiö ra aisini Jesus, “Sense, inet ekei mettoch ka fos usun repwe fis? Meni asisil epwe pwärätä pwe a tori ewe fansoun an epwe fis ekei mettoch?”
LUK 21:8 Jesus a üreniir, “Oupwe mamasa, pwe esap wor eman epwe atupukemi. Chomong aramas repwe feito fän itei o apasa, ‘Ngang ewe Kraist,’ pwal ‘Ewe fansoun an epwe war a arap.’ Ousap tapwela mürir.
LUK 21:9 Ousap fokun niuokus lupwen oupwe rongorong pworausen maun me fitikoko. Ekei mettoch repwe akomwen fis, nge esap tori mwo fansoun sopolan.”
LUK 21:10 Mürin a pwal üreniir, “Ekewe fanü repwe fiufengen, ekewe mwü repwe maunfengen.
LUK 21:11 Epwe wor watten chechen fanü, pwal lengita me mätter ekis meinisin. Epwe pwal wor asisil mi watte o eniweniw seni fän läng.
LUK 21:12 Nge me mwen ekewe mettoch meinisin repwe fisitä, repwe turufikemi o ariaföüükemi, repwe etekinikemiila pwe oupwe kapwüng lon ekewe imwen felikis o atolongakemi lon imwen fötek. Repwe pwal emwenikemiila mwen ekewe king me kepina pokiten itei.
LUK 21:13 Ei fansoun epwe eu fansoun mi fich ngenikemi ämi oupwe apworausa ewe Pworaus Allim.
LUK 21:14 Iei mine oupwe anomu lon lelukemi pwe ousap öüreki me mwan mine oupwe apasa,
LUK 21:15 pun üpwe fang ngenikemi ekewe kapas me tipachem, pwe esap wor eman chon oputakemi epwe tongeni ü ngenikemi ika öpölüakemi.
LUK 21:16 Sememi mwo me inemi, pwimi, aramasemi me chiechiemi nge repwe afangamäkemi, nge ekoch leimi repwe ninnila.
LUK 21:17 Aramas meinisin repwe oputakemi pokitei.
LUK 21:18 Nge esap wor emet meten möküremi epwe turula.
LUK 21:19 Ren ämi likitü oupwe püsin amanauakemi.
LUK 21:20 “Iwe, lupwen oupwe küna pwe sounfiu ra pwelifeili Jerusalem, mürin oupwe silei pwe a arapoto fansoun an epwe tala.
LUK 21:21 Mürin chokewe mi nom lon Jutea repwe sütä won ekewe chuk. Chokewe mi nom lon ewe telinimw repwe towu seni, nge chokewe mi nom lemäl resap tolong lon ewe telinimw.
LUK 21:22 Pun iei ekewe ränin apwüng, nge epwe popuetä meinisin mine a mak lon ekewe Toropwe mi Pin.
LUK 21:23 Riaföün ekewe fefin mi pwopwo me ekewe inelap mi oupwu nöür lon ekewe rän, pun epwe wor riaföü mi lapalap lon ei fanü o än Kot song epwe tori ekei aramas.
LUK 21:24 Ekoch repwe ninnila ren ketilas, nge pwal ekoch repwe oola lon ekewe fanü meinisin. Iwe, ekewe chon lükün Israel repwe purätiu Jerusalem tori fansoun än chon lükün Israel nemenem a wes.
LUK 21:25 “Iwe, epwe wor ekoch lapalap epwe fis ngeni akkar, maram me fü kana. Nge won fanüfan chomong fanü repwe nom lon watten riaföü, repwe niuokus ren ngüngün matau me püngüpüngün no.
LUK 21:26 Aramas repwe masarochola ren ar niuokus, lupwen ra witiwiti mine epwe fis won fanüfan, pun ekewe manamanen läng repwe mwöküt seni lenier.
LUK 21:27 Lon ena fansoun repwe küna Nöün Aramas, epwe feito won kuchu fän manaman me ling mi lapalap.
LUK 21:28 Lupwen ekei mettoch repwe popuetä le fis, ämi oupwe ütä o awenatä möküremi, pun ämi küna manau a arapoto.”
LUK 21:29 Iwe, mürin Jesus a apworausa ngeniir eu pworausen awewe: “Oupwe nenengeni ewe irä fiik me ekewe irä meinisin.
LUK 21:30 Lupwen oua küna pwe chör ra pwüküwu, oua silei pwe a arap fansoun räs.
LUK 21:31 Iei usun, lupwen oupwe küna pwe ekei mettoch repwe le fis, oupwe silei pwe Mwün Kot a arapoto.
LUK 21:32 Enlet, üpwe ürenikemi, pwe ei pilon aramas resap mäla tori an epwe fisitä ekei mettoch meinisin.
LUK 21:33 Läng me fanüfan repwe morola, nge ai kapas kana resap fokun morola.
LUK 21:34 “Oupwe afälikemi, pwe lelukemi esap chouchou ren mongömong me ünüpuch, pwal ren öürekin manauen ikenai, pwe ewe rän esap müttiritikemi usun eu sär.
LUK 21:35 Pun ewe rän Nöün Aramas epwe war lon, epwe tori aramas meinisin won unusen fanüfan.
LUK 21:36 Oupwe mamasa o iotek fansoun meinisin, pwe epwe wor ämi pöchökül pwe oupwe tongeni sü seni ekei mettoch meinisin lupwen repwe fisitä o oupwe tongeni ütä me mwen Nöün Aramas.”
LUK 21:37 Iwe, iteiten rän Jesus a afalafal lon imwenfel, nge lupwen a pwinila, a feila lükün ewe telinimw o pwinipwin won ewe Chukun Olif.
LUK 21:38 Iwe, lesosorusich ekewe aramas meinisin ra feito lon imwenfel, pwe repwe aüseling ngeni an afalafal.
LUK 22:1 Iwe, a arapakan an epwe tori ewe chulapen mongö pilawa esap wor iis lon, a iteni Pasofer.
LUK 22:2 Ekewe souasor mi lap me ekewe Sensen Allük ra niuokusiti ekewe aramas, iei mine ra sotuni ar repwe rawei Jesus pwe repwe niela le monomon.
LUK 22:3 Mürin Satan a tolong lon Jutas a iteni Iskariot, i eman lein ekewe engol me ruoman chon kaiö.
LUK 22:4 Iei mine Jutas a feila o kapas ngeni ekewe souasor mi lap me ekewe meilapen chon tümwünü ewe imwenfel usun an epwe tongeni afangamä Jesus ngeniir.
LUK 22:5 Iwe, ir ra fokun pwapwa ren mine a apasa ngeniir o ra pwon ngeni pwe repwe ngeni moni.
LUK 22:6 Iwe, Jutas a tipeeu ngeni ewe ekiek, iei mine a popuetä le kütta eu fansoun fich pwe epwe afangamä ngeniir Jesus, lupwen ewe mwichen aramas resap nom.
LUK 22:7 Iwe, a tori ewe chulapen mongö pilawa esap wor iis lon, ewe rän lupwen ra niela ekewe nienifön sip fän iten ewe mongön Pasofer.
LUK 22:8 Jesus a üreni Petrus me Johannes, “Oupwe feila o amolätä ewe mongön Pasofer pwe sipwe mongöfengen.”
LUK 22:9 Iwe, ra aisini, “Ia ka mochen pwe aipwe amolätä ie?”
LUK 22:10 Jesus a pölüeniir, “Lupwen oupwe tolong lon ewe telinimw, eman mwän mi uwei eu rume a wor koluk lon epwe churikemi. Oupwe chök tapwela mürin o tolong lon ewe imw i a tolong lon.
LUK 22:11 Iwe, oupwe üreni mine imwan ewe, ‘Nöüm sense a apasa: Ia a nom ie ewe ruum äm me nei kewe chon kaiö aipwe mongö ewe mongön Pasofer?’
LUK 22:12 Iwe, epwe aiti ngenikemi eu ruum mi watte a nom asan, a fen wes le molotä pisekin lon. Ikenan oupwe amolätä meinisin.”
LUK 22:13 Nge lupwen ar feila ra küna meinisin usun mine Jesus a fen üreniir. Iwe, ra amolätä ewe mongön Pasofer lon ewe leni.
LUK 22:14 Iwe, lupwen a tori ewe fansoun, Jesus me ekewe chon kaiö ra mot ngeni chepel.
LUK 22:15 Iwe, a üreniir, “Ngang üa fokun mochen ach sipwe mongöfengen ei mongön Pasofer mwen ai üpwe tolong lon riaföü.
LUK 22:16 Pun üpwe ürenikemi, pwe seni ikenai üsap chüen mongö ei mongö tori epwe unusen pwönüetä wewen lon Mwün Kot.”
LUK 22:17 Mürin Jesus a angei ewe kap, a iotekin kilisou ngeni Kot won o a apasa, “Oupwe angei ei kap o ünfengen ämi meinisin.
LUK 22:18 Üpwe ürenikemi, pwe seni ikenai üsap chüen ünümi seni ei wain tori wareton ewe Mwün Kot.”
LUK 22:19 Mürin a angei eföü pilawa o a iotekin kilisou ngeni Kot won, a kini o ineti ngeniir o apasa, “Iei inisi üa fangela fän itemi. Oupwe föri ei pwe oupwe chechemeniei.”
LUK 22:20 Pwal ina chök usun, a ngeniir ewe kap mürin ar mongö o apasa, “Ei kap än Kot we pwon mi fö mi fis ren chai a ninnila fän itemi.
LUK 22:21 Nge nengeni, ätewe epwe afangamäei a nom rei arun ei chepel.
LUK 22:22 Pun Nöün Aramas epwe mäla usun Kot a fen apwüngala, nge feiengauen ätewe epwe afangamä i.”
LUK 22:23 Mürin ra popuetä le aisfengen lefiler iö me leir epwe tongeni föri ei sokun föför.
LUK 22:24 Iwe, a fis eu aninifengen lefilen ekewe chon kaiö won iö leir aramas repwe ekieki pwe a lap seniir meinisin.
LUK 22:25 Jesus a üreniir, “Ekewe kingen chon lükün Israel a wor ar nemenem won aramas, nge chokewe mi wor maner won aramas ra püsin aita ngeniir ‘Chon Alisi Aramas.’
LUK 22:26 Nge esap iei usun lefilemi. Pun ewe mi lap leimi epwe usun chök ewe mi kis, nge ewe eman mi nemenem epwe usun chök eman chon angang.
LUK 22:27 Iö a lap, ätewe mi mot ngeni chepel are ätewe mi angang ngeni mongö? Ifa usun, esap ätewe mi mot ngeni chepel a lap? Nge ngang üa usun eman chon angang leimi.
LUK 22:28 “Ämi oua etiei lon ai kewe riaföü meinisin.
LUK 22:29 Usun Semei a ngeniei ai üpwe nemenem, iei usun üpwe pwal ngenikemi ewe nemenem.
LUK 22:30 Oupwe mongö o ün won ai chepel lon mwüi, oupwe pwal mot won ekewe lenien motun king o nemeni ekewe engol me ruu ainangen Israel.
LUK 22:31 “Simon, Simon, nengeni, Satan a angei an mwümwütä pwe epwe sotunikemi, epwe mworeikemi usun aramas ra mworei föün wiich, pwe pöör epwe imwü seni föün.
LUK 22:32 Nge ngang üa iotek fän itom Simon, pwe om lükülük esap ükütiu. Iwe, lupwen om kopwe liwinsefäl, kopwe apöchöküla pwiüm kewe.”
LUK 22:33 Petrus a pölüeni, “Ai Samol, üa molotä ai üpwe etukelong lon imwen fötek pwal lon mäla.”
LUK 22:34 Nge Jesus a pölüeni, “Petrus, ngang üpwe ürenuk, pwe lon chök ei pwin mwen ewe chuko epwe kökkö, en kopwe amamäsiniei fän ülüngat.”
LUK 22:35 Mürin Jesus a aisini nöün kewe chon kaiö, “Lupwen üa tinikemiila, nge ousap uwou pwotou, chota me sus, ifa usun, oua osupwangen och mettoch?” Iwe, ra pölüeni, “Ap, aisap osupwangen och mettoch.”
LUK 22:36 Iwe, a üreniir, “Nge iei, are a wor an eman pwotou are chota, epwe fokun angei. Nge are esap wor nöün eman ketilas, epwe amömöla üfan sekit o möni efoch.
LUK 22:37 Pun üpwe ürenikemi, pwe ekei kapas mi mak lon ekewe Toropwe mi Pin repwe pwönüetä fän itei, ‘I a alealong lein ekewe chon pupungau.’ Pun meinisin mine a mak fän itei epwe pwönüetä.”
LUK 22:38 Iwe, ekewe chon kaiö ra üreni, “Äm Samol, nengeni, a wor ruofoch ketilas ikei.” Nge Jesus a pölüeniir, “A naf.”
LUK 22:39 Iwe, Jesus a towu seni ewe telinimw o feitä won ewe Chukun Olif usun a piin föföri, nge ekewe chon kaiö ra eti.
LUK 22:40 Iwe, lupwen a tori ewe leni, a üreniir, “Oupwe iotek, pwe ousap turulong lon sosot.”
LUK 22:41 Mürin a feila seniir ina epwe ükükün toauen än eman monei eföü fau. Iwe, a fotopwäsuketiu o iotek.
LUK 22:42 A apasa, “Semei, are ka mochen, kopwe angei seniei ei kapen riaföü, nge esap fis letipei pwe letipom.”
LUK 22:43 Iwe, eman chon läng a pwä ngeni o apöchöküla.
LUK 22:44 Lon an nom lon riaföü watte a achocho le iotek, nge mononan a usun chök supun cha a suputiu le pwül.
LUK 22:45 Iwe, lupwen a ütä seni an iotek, a liwinsefäliti ekewe chon kaiö o a küneer pwe ra möür, pun ra fokun chouchou ren ar lolilen.
LUK 22:46 Mürin a aisiniir, “Pwota oua chök mömöür, oupwe pwätä o iotek, pwe ousap turulong lon sosot.”
LUK 22:47 Iwe, lupwen Jesus a chüen kakapas, a war eu mwichen aramas fän emwenien Jutas, eman lein ekewe engol me ruoman chon kaiö. Jutas a feiliti Jesus pwe epwe mitiri.
LUK 22:48 Nge Jesus a üreni, “Jutas, ifa usun, kopwe afangamä Nöün Aramas ren och mitimit?”
LUK 22:49 Iwe, lupwen ekewe chon kaiö mi eti Jesus ra küna mine a fis, ra ais, “Äm Samol, aipwe nöünöü nöüm ketilas?”
LUK 22:50 Eman me leir a pöküela pelifichin selingen nöün ewe Souasor mi Lap we chon angang.
LUK 22:51 Nge Jesus a üra, “Oupwe ükütiu! Ousap chüen föri ei sokun.” Iwe, a atapa selingen ewe mwän o a öchusefäl.
LUK 22:52 Mürin Jesus a üreni ekewe souasor mi lap, ekewe meilapen chon tümwünü ewe imwenfel me ekewe souakomwen lamalam mi feito pwe repwe turufi, “Oua feito fän ketilas me wok pwe oupwe turufiei, usun ämi oupwe turufi eman chon föföringau?
LUK 22:53 Üa nonom remi iteiten rän lon ewe imwenfel, nge ousap sotuni pwe oupwe turufiei. Nge iei a tori ämi fansoun, lupwen rochopwak a nemenem.”
LUK 22:54 Iwe, ra turufi Jesus o etekinala lon imwen ewe Souasor mi Lap. Nge Petrus a tapwela mürin me toau.
LUK 22:55 Lupwen ra akküw eu ekkei lukalapen ewe leni mwen imwen ewe Souasor mi Lap o motfengen ünükün, Petrus a pwal mot rer.
LUK 22:56 Mürin eman chon angang fefin a küna Petrus pwe a momot ikenan ünükün ewe ekkei, a newenewen ngeni o üra, “Ei mwän a pwal eti Jesus.”
LUK 22:57 Nge Petrus a amamäsini o üreni, “Fefin, ngang üsap silei ätewe.”
LUK 22:58 Ekis chök fansoun mürin eman mwän a pwal esilla Petrus o üreni, “Pwal en eman leir.” Nge Petrus a pölüeni, “Mwän, ngang sap eman me leir.”
LUK 22:59 Ina epwe eu awa mürin, eman mwän a pöchökül le üra, “Enlet, ei mwän a pwal eti Jesus, pun pwal i eman re Kalilea.”
LUK 22:60 Nge Petrus a pölüeni, “Mwän, ngang üsap silei mine ka kapas usun!” Iwe, lon ewe chök otun, lupwen Petrus a chüen kakapas, eman chuko a kökkö.
LUK 22:61 Iwe, ewe Samol a kul o newenewen ngeni Petrus. Iwe, Petrus a chechemeni pwe ewe Samol a fen üreni, “Mwen än ewe chuko epwe kökkö lepwinei, en kopwe amamäsiniei fän ülüngat.”
LUK 22:62 Iwe, Petrus a feila lükün o a fokun kechü.
LUK 22:63 Iwe, ekewe mwän mi mamasa Jesus ra turunufasei o wichi.
LUK 22:64 Ra finitala won mesan o aisini, “Iö a wichiik? Kopwe esilla.”
LUK 22:65 Ra pwal apasa ngeni chomong kapasen turunufas.
LUK 22:66 Iwe, lupwen a ränila, ekewe souakomwen lamalam, ekewe souasor mi lap me ekewe Sensen Allük ra mwichfengen. Mürin ra etekinala Jesus mwen ewe mwichen souapwüng.
LUK 22:67 Iwe, ra aisini Jesus, “Kopwe ürenikem are en wesewesen ewe Kraist.” Jesus a pölüeniir, “Are üpwe ürenikemi, ousap lüküei.
LUK 22:68 Nge are üpwe aisinikemi eu kapas ais, ousap mochen pölüeni.
LUK 22:69 Nge seni iei Nöün Aramas epwe mot lepelifichin Kot ewe mi Manau.”
LUK 22:70 Iwe, ir meinisin ra aisini, “Ifa usun, en ewe Nöün Kot?” Jesus a pölüeniir, “A pwüng mine oua apasa, pwe ngang nöün.”
LUK 22:71 Mürin ra üra, “Esap chüen wor lomoten ach sipwe kütta och kapasen pwärätä. Ousia püsin rongorong met a apasa.”
LUK 23:1 Mürin unusen ewe mwichen aramas a ütä o ra etekinala Jesus mwen Pilatus.
LUK 23:2 Ikenan ra popuetä le atipisi Jesus o üra, “Äm aia küna ei mwän pwe a emweningaua aramasen fanüach. A üreniir pwe resap takises ngeni Sisar, a pwal apasa pwe püsin i Kraist ewe king.”
LUK 23:3 Pilatus a aisini Jesus, “Ifa usun, en nöün chon Juta we king?” Jesus a pölüeni, “Ewer, usun om apasa.”
LUK 23:4 Mürin Pilatus a üreni ekewe souasor mi lap me ewe mwicheichen aramas, “Üsap küna och tipis ren ei mwän.”
LUK 23:5 Nge ir ra chök alapala ar kapasen tipitipmwäl ngeni, “A afitikokoi ekewe aramas ren an afalafal lon unusen Jutea, a popuetä seni lon Kalilea o otourato ikei.”
LUK 23:6 Iwe, lupwen Pilatus a rong ekei kapas, a ais, “Ifa usun, ei mwän eman re Kalilea?”
LUK 23:7 Nge lupwen a rongorong, pwe Jesus seni ewe fanü Herotes a nemeni, a tinala Jesus ren Herotes, pun Herotes a pwal nom lon Jerusalem lon ei fansoun.
LUK 23:8 Iwe, lupwen Herotes a küna Jesus a fokun pwapwa, pun a fen mochen küna lon fansoun langatam. Pokiten mine a fen rong usun, a apilükülük ngeni an epwe küna och asisil Jesus epwe föri.
LUK 23:9 Iei mine Herotes a aisini Jesus chomong kapas ais, nge Jesus esap pölüeni och.
LUK 23:10 Iwe, ekewe souasor mi lap me ekewe Sensen Allük ra ü ikenan o ra fokun achocho le atipisi.
LUK 23:11 Nge Herotes me nöün kewe sounfiu ra urumwotei o turunufasei Jesus. Mürin ar aüföüfa ngeni echö üf mi fokun ling, Herotes a tinsefäliela ren Pilatus.
LUK 23:12 Lon chök ewe ränin Herotes me Pilatus ra pwipwifengen, nge me mwan ra oputafengeniir.
LUK 23:13 Mürin Pilatus a körifengeni ekewe souasor mi lap, ekewe sounemenem me ekewe aramas
LUK 23:14 o a üreniir, “Ämi oua apasa lupwen oua emwenato ei mwän rei pwe a emweningauei ekewe aramas. Iei üa atittina me mwemi, nge üsap küna och tipisin ei mwän ren mine oua atipisi won.
LUK 23:15 Pwal Herotes esap küna och tipis ren, iei mine a tinsefälieto rech. Me rei, esap wor och mine ei mwän a föri an epwe tipisin mäla.
LUK 23:16 Iei mine üpwe wichi o amusala.”
LUK 23:17 [Iteiten ier, lupwen a tori ewe mongön Pasofer, Pilatus a soun amusa eman chon fötek.]
LUK 23:18 Iwe, ewe mwichen aramas a köpökütä, “Kopwe amäloi ewe aramas, nge kopwe amusa ngenikem Parapas.”
LUK 23:19 (Parapas a fen nom lon imwen fötek pokiten an afisätä eu fitikoko lon ewe telinimw, pwal fän iten an niela aramas.)
LUK 23:20 Pilatus a fokun mochen angasala Jesus, iei mine a kapassefäl ngeni ewe mwichen aramas.
LUK 23:21 Nge ir ra chök kökkö ngeni, “Kopwe iräpengesi, kopwe iräpengesi!”
LUK 23:22 Iwe, Pilatus a kapas ngeniir fän aülüngatin, “Pwota? Meni sokun tipis a föri? Üsap küna ren ei aramas och tipis an epwe ina popun pwe epwe mäla. Iei mine üpwe chök wichi o amusala.”
LUK 23:23 Nge ekewe aramas ra chök sopwela le kökkö fän leüömong o tüngormau pwe epwe iräpenges. Feilfeil a pwönüetä mine ra eäni kökkö.
LUK 23:24 Iei mine Pilatus a apwüngala, pwe epwe fis ngeni Jesus mine ra tüngor.
LUK 23:25 A amusala ewe mwän mi nom lon imwen fötek pokiten an afisätä fitikoko me niela aramas, i ätewe ra tüngor an epwe musala. Nge a mwüt ngeniir Jesus pwe repwe föri ngeni mine ra mochen.
LUK 23:26 Iwe, lupwen än ekewe sounfiu etekinala Jesus won ewe al, ra churi eman mwän seni Kirene, itan Simon, a feito seni lemäl, pwe epwe tolong lon ewe telinimw. Ekewe sounfiu ra turufi Simon o ekietä ewe iräpenges won afaran pwe epwe mwärela mürin Jesus.
LUK 23:27 Eu mwichen aramas mi chomong ra tapwela mürin. Iwe, a wor ekoch fefin me leir mi ngüngüres o kechüeiti Jesus.
LUK 23:28 Nge Jesus a sap ngeniir o üreniir, “Ämi fin Jerusalem! Ousap kechüeitiei, nge oupwe püsin kechüeitikemi me nöümi kana.
LUK 23:29 Pun repwe war ekewe rän, lupwen aramas repwe apasa, ‘Feiöchün ekewe fefin mi rit, ekewe fefin resap nöünöü, pwal ekewe resap oupwu semirit.’
LUK 23:30 Mürin repwe kapas ngeni ekewe chuk, ‘Oupwe turutiu wom,’ repwe pwal kapas ngeni ekewe chukutekison, ‘Oupwe pwölükeemila.’
LUK 23:31 Pun are ekei sokun mettoch repwe fis lupwen ewe irä a manau, met epwe fis lupwen a pwasala?”
LUK 23:32 Ra pwal etekinala ruoman mwän mi föföringau pwe repwe ninnila fiti Jesus.
LUK 23:33 Iwe, lupwen ar tori ewe leni a iteni Poisökün Mökür, ra iräpengesi Jesus ikenan fiti ekewe ruoman chon föföringau, eman a nom lepelifichin, nge eman a nom lepelimöngun.
LUK 23:34 Iwe, Jesus a apasa, “Semei, kopwe amuserela, pun resap silei mine ra föri.” Ra üttüt won üfan kana o ra ngeni eman me eman met üttian.
LUK 23:35 Iwe, ekewe aramas ra ütä ikenan o kakatol, nge ekewe sounemenemen chon Juta ra turunufasei Jesus o apasa, “A amanaua ekoch, epwe püsin amanaua are i Kraist, ewe Kot a filätä.”
LUK 23:36 Ekewe sounfiu ra pwal turunufasei Jesus. Ra feito ren o ekiekin aünü ngeni wain mi mwäl.
LUK 23:37 Ra apasa, “Are en nöün ekewe chon Juta king, kopwe püsin amanauok!”
LUK 23:38 Asen möküren Jesus a mak ekei kapas, “Iei i ewe kingen chon Juta.”
LUK 23:39 Iwe, eman lein ekewe chon föföringau mi iräpenges ikenan a turunufasei Jesus o üreni, “Ifa usun, sap en Kraist? Kopwe püsin amanauok o pwal amanauakem!”
LUK 23:40 Nge pwal ewe eman chon föföringau a apwüngü o üreni, “Ifa usun, kosap niuokusiti Kot? A pwüngüla om kopwe mäli ei sokun mäla usun chök i.
LUK 23:41 A fokun pwüng mine ra apwüngükich ren, pun kich sia angei liwinin ach kewe föför. Nge ei mwän esap föri och föför mi mwäl.”
LUK 23:42 Mürin a üra, “Jesus, kose mochen chechemeniei lupwen om kopwe tolong lon mwumw.”
LUK 23:43 Iwe, Jesus a pölüeni, “Enlet, üpwe ürenuk, ikenai kopwe etiei lon Paratis.”
LUK 23:44 Ina epwe kulok engol me ruu akkar esap chüen tin nge a rochopwak unusen ewe fanü tori kulok ülüngat.
LUK 23:45 Iwe, ewe chechen mangaku lon imwenfel a kam seni won tori fan pwe a wor ruu kinikin.
LUK 23:46 Mürin Jesus a kökkö fan mwelian mi leüömong, “Semei, üa atolonga ngüni lepoumw.” Wesin an apasa ei a mäla.
LUK 23:47 Iwe, lupwen ewe meilapen sounfiu a küna mine a fis, a mwareiti Kot o apasa, “Enlet, ei mwän i eman mwän mi pwüng.”
LUK 23:48 Lupwen ewe mwichen aramas mi chufengen ikenan pwe repwe katol mwökütükütün met a fis ra küna ei, ra pisiri fän mwäriir lon ar letipeta o liwiniti lenier.
LUK 23:49 Nge chokewe meinisin mi sisile Jesus me ekewe fefin mi tapwela mürin Jesus seni Kalilea ra ütä ekis toau ar repwe küna mine a fis.
LUK 23:50 Iwe, a wor eman mwän itan Josef seni Arimatea eu telinimw lon Jutea. Ätei eman seni ewe mwichen souapwüng, eman mwän mi pwüng o wenechar.
LUK 23:51 Esap tipeeu ngeni mine ra pwüngüpwüng won pwal ar föför. Iwe, a ösüküsükü ewe Mwün Kot.
LUK 23:52 Iwe, Josef a feila ren Pilatus o tüngor somän Jesus.
LUK 23:53 Mürin a angeatiu somän Jesus me won ewe iräpenges, a finiti ngeni eu mangaku mi pwechepwech o peiaseni lon eu peias mi tuw lon achau, esap wor mwo eman somä a nom lon me mwan.
LUK 23:54 Iwe, iei än ekewe chon Juta räninamol o a arapakan ngeni an epwe le popuetä ewe ränin sapat.
LUK 23:55 Iwe, ekewe fefin mi tapwela mürin Jesus seni Kalilea ra eti Josef le feila o nengeni ewe peias, ra pwal nengeni usun ar akona somän Jesus me lon.
LUK 23:56 Mürin ra liwiniti lenier o amolätä löpwokus fän iten ewe somä. Nge lon ewe ränin sapat ra asösö usun mine a mak lon ekewe allük.
LUK 24:1 Iwe, lesosorusichin ewe aeuin ränin wiik ekewe fefin ra feila ren ewe peias, nge ra uwala ekewe löpwokus ra amolätä.
LUK 24:2 Iwe, ra küna pwe ewe fau a fen mwöküt seni mesen ewe peias.
LUK 24:3 Nge lupwen ar tolong lon, resap küna somän ar we Samol Jesus.
LUK 24:4 Nge lupwen ar chüen ükütä o osukosuk ren mine ra küna, ruoman mwän mi üföüf üf mi saramaram ra ütä ünükür.
LUK 24:5 Iwe, ekewe fefin ra fokun niuokus o chapetiu le pwül, nge ekewe mwän ra üreniir, “Pwota oua kütta ewe mi manau lein ekewe mi mäla?
LUK 24:6 Esap nom ikei, pwe a manausefälitä. Oupwe chechemeni met a ürenikemi, lupwen a chüen nom lon Kalilea:
LUK 24:7 ‘Nöün Aramas epwe tolong lepöün chon tipis, epwe iräpenges, nge mürin ülüngat rän epwe manausefäl.’”
LUK 24:8 Mürin ra chechemeni än Jesus kewe kapas.
LUK 24:9 Iwe, ra liwinsefäl seni ewe peias o apworausa ngeni ekewe engol me eman chon kaiö, pwal ngeni ekewe ekoch aramas ekewe mettoch meinisin ra rong o küna.
LUK 24:10 Ikei iten ekewe fefin: Maria Maktalene, Joanna me Maria inen James. Ir me pwal ekoch fefin mi etiir ra apworausa ekei mettoch ngeni ekewe soukünö.
LUK 24:11 Nge ekewe soukünö ra ekieki, pwe met ekewe fefin ra apworausa ngeniir esap wor allükülükün, iei mine resap lüküür.
LUK 24:12 Nge Petrus a ütä o sä ngeni ewe peias. A pworotiu o nenelong lon ewe peias, nge a chök küna finifinin somän Jesus kewe. Mürin a weitifengen ren mine a fis o a liwinsefäliti imwan.
LUK 24:13 Iwe, pwal lon ewe chök ränin ruoman me lein ekewe chon tapwela mürin Jesus ra feila ngeni eu sopw itan Emaus, ina epwe ükükün fisu mail toauan seni Jerusalem.
LUK 24:14 Ra kakapasfengen lefiler usun ekewe mettoch meinisin ra fisitä.
LUK 24:15 Lupwen ra kakapas o ekiekifengeni usun ekei mettoch, Jesus a kaneto rer o etiir le fetal.
LUK 24:16 Iwe, ra küna i, nge resap esilla.
LUK 24:17 Jesus a aisiniir, “Met ei oua pwopworausfengen usun, lupwen oua fefetal?” Iwe, ra üla o wololilen.
LUK 24:18 Mürin eman me leir itan Kleopas a pölüeni, “Ifa usun, en chök eman me lein ekewe wasöla lon Jerusalem kosap silei ekewe mettoch a fen fis lon ekewe rän?”
LUK 24:19 Jesus a aisiniir, “Ikafan ekewe mettoch?” Iwe, ra pölüeni, “Ekewe mettoch mi fis ngeni Jesus, ewe re Nasaret. Ei mwän eman soufos a wor manamanen an kapas me an föför mwen mesen Kot me aramas meinisin.
LUK 24:20 Nöüm kewe souasor mi lap me sounemenem ra atoow ngeni Pilatus an epwe apwüng ngeni mäla, nge mürin ra iräpengesi.
LUK 24:21 Nge äm aia apilükülükü, pwe i ewe eman Kot a tinato pwe epwe angasa Israel. Nge lükün ekei, iei ewe aülüngatin rän mürin a fis ekei mettoch.
LUK 24:22 Nge pwal ekoch fefin seni äm mwich ra amairükem. Ra feila ren ewe peias lesosorusich,
LUK 24:23 nge resap küna somän Jesus we. Nge lupwen ra liwinto rem, ra apworausa pwe a wor künaer chon läng mi üreniir pwe a manau.
LUK 24:24 Mürin ekoch me lon äm we mwich ra feila ren ewe peias o alletä pwe ekewe mettoch ekewe fefin ra kapas usun, ra pwüng. Nge resap küna Jesus.”
LUK 24:25 Iwe, Jesus a üreniir, “Pwota iei me miritimangemi me mangen letipemi! Inet ämi oupwe lükü meinisin mine ekewe soufos ra apasa?
LUK 24:26 Ifa usun, esap wisen Kraist pwe epwe küna ekei riaföü meinisin me mwen an epwe tolong lon an ling?”
LUK 24:27 Mürin Jesus a awewe ngeniir met a mak lon ekewe Puk mi Pin usun püsin i. A popuetä seni ekewe puken Moses tori ekewe puken soufos meinisin.
LUK 24:28 Nge lupwen ra arap ngeni ewe sopw ra mochen feila lon, Jesus a tipin föri usun itä nge epwe sopwela an sai.
LUK 24:29 Nge ir ra fokun pesei o tüngor ngeni, “Kose mochen kopwe nonom rem, pun a lekuniolula, nge epwe le pwinituk.” Iei mine a tolong lon imwer pwe epwe nonom rer.
LUK 24:30 Lupwen an mottiu ngeni chepel pwe epwe mongö rer, a angei ewe pilawa o iotekin afeiöchü. Mürin a kini o ineti ngeniir.
LUK 24:31 Mürin meser ra usun itä ra kärän nennela pwe ra esilla Jesus, nge i a mörukela seniir.
LUK 24:32 Iwe, ra kapasfengen lefiler, “Ifa usun, esap usun eu ekkei mi ngetenget lon lelukach, lupwen a kapas ngenikich won al o afata ngenikich wewen ekewe Toropwe mi Pin?”
LUK 24:33 Mürin ra müttir ütä o liwinsefäliti Jerusalem o ra churi ekewe engol me eman chon kaiö, pwal ekewe ekoch ra mwichfengen.
LUK 24:34 Iwe, ekewe chon kaiö ra üreni ekewe ruoman, “Enlet, ewe Samol a manausefäl pwe a pwä ngeni Simon!”
LUK 24:35 Mürin ekewe ruoman ra apworausa ngeniir met a fis lupwen ar fetal won ewe al, pwal usun ar esilla ewe Samol lupwen a kinifeseni ewe pilawa.
LUK 24:36 Iwe, lupwen än ekewe ruoman ra apworausa ngeniir ei pworaus, Jesus a püsin ütä lefiler o üreniir, “Kinamwe epwe torikemi.”
LUK 24:37 Nge ir ra fokun rükö o niuokus, pun ra ekieki pwe ra küna eman anü.
LUK 24:38 Jesus a üreniir, “Pwota oua niuokus? Pwota oua tipemwaramwar lon letipemi?
LUK 24:39 Oupwe nengeni pei me pechei, pwe oupwe silei pwe ngang ei. Oupwe atapaei o mefi, pun eman anü esap wor ren fituk me chü usun oua küna pwe a wor rei.”
LUK 24:40 Iwe, a apasa ekei kapas, lupwen a pwäri ngeniir pöün me pechen.
LUK 24:41 Pokiten ra fokun pwapwa o weitifengeniir, resap fen mwo lükü. Iei mine a aisiniir, “Ifa usun, esap wor och mongö ikei pwe üpwe mongö?”
LUK 24:42 Iwe, ra ngeni ekis fituken ik mi kapwich.
LUK 24:43 Jesus a angei ewe ik o mongö me mwer.
LUK 24:44 Mürin a üreniir, “Iei met üa fen ürenikemi pwe epwe fis, lupwen üa chüen nonom remi: Meinisin mine a mak usi lon än Moses we Allük, pwal lon ekewe puken soufos me Kölfel epwe fokun pwönüetä.”
LUK 24:45 Mürin a suki letiper, pwe repwe tongeni weweiti masouen ekewe Toropwe mi Pin.
LUK 24:46 Iwe, a üreniir, “Iei usun a fen mak, pwe Kraist epwe fokun riaföü o manausefäl seni mäla lon aülüngatin rän.
LUK 24:47 Ren itan oupwe afalafala chon ekewe mwü meinisin, pwe repwe ekieksefäl, pwe Kot epwe amusala ar tipis, nge oupwe popuetä lon Jerusalem.
LUK 24:48 Ämi oua chon pwärätä ekei mettoch.
LUK 24:49 Nengeni, üpwe tinatiu womi mine Semei a fen eäni pwon. Nge ämi oupwe nonom lon ei telinimw tori ewe manaman seni läng epwe feitiu womi.”
LUK 24:50 Mürin Jesus a emweniirewu seni Jerusalem o feila arap ngeni Petania. Ikenan a aitiela pöün wor o afeiöchüür.
LUK 24:51 Lupwen an afeiöchüür a feitä seniir o feitä läng.
LUK 24:52 Iwe, mürin ra fel ngeni o liwinsefäliti Jerusalem fän watten pwapwa,
LUK 24:53 o ra chök nonom lon ewe imwenfel o mwareiti Kot.
JOH 1:1 Mwen än Kot föri fanüfan ewe Kapas a fen nom. Ewe Kapas a nom ren Kot, a pwal eäni sokun Kot.
JOH 1:2 Ewe Kapas a nom ren Kot seni me lepoputän.
JOH 1:3 Kot a föri mettoch meinisin ren ewe Kapas, esap wor och lein förian kewe a för lükün i.
JOH 1:4 Ewe Kapas i ewe popun manau, nge ei manau a uwato saram ngeni aramas meinisin.
JOH 1:5 Ewe saram a tittin lon rochopwak, nge rochopwak esap tongeni akufu.
JOH 1:6 Kot a tinala nöün chon künö, eman mwän itan Johannes.
JOH 1:7 A feito pwe epwe asile ngeni aramas usun ewe saram, pwe meinisin repwe rong ewe pworaus o lükü.
JOH 1:8 Püsin i esap ewe saram, nge a feito pwe epwe asile ngeni aramas usun ewe saram.
JOH 1:9 Iei ewe saram mi let, a feito fanüfan o asarama aramas meinisin.
JOH 1:10 A nom lon fanüfan o fanüfan a för ren, nge fanüfan esap silei i.
JOH 1:11 A tori fanüan, nge aramasan resap etiwa.
JOH 1:12 Nge iö kana ra etiwa o lükü i a ngeniir manaman pwe repwe wiliti nöün Kot.
JOH 1:13 Resap wiliti nöün Kot usun än eman uputiu ngeni saman, pun resap uputiu won tipen fituk are tipen mwän, nge püsin Kot a föri pwe ir nöün.
JOH 1:14 Ewe Kapas a wiliti aramas o nonom lefilach. Sia nengeni an we ling, ewe ling Saman a ngeni, pun i Nöün Aleman, a uren ümöümöch me let.
JOH 1:15 Iwe, Johannes a kapas usun i, a kökkö fän leüömong o apasa, “Iei i ätewe üa kapas usun lupwen üa üra, ‘I epwe feito müri, nge a lap seniei, pun a nom mwen ai üsamwo uputiu.’”
JOH 1:16 Seni an ümöümöch mi somosomola sia angei feiöch esap ükütiu.
JOH 1:17 Kot a ngenikich ekewe allük ren Moses, nge ümöümöch me let a torikich ren Jesus Kraist.
JOH 1:18 Esap wor eman aramas a küna Kot fän eu. Nge Nöün Kot Aleman mi nom ren ewe Sam a fen pwäri ngeni aramas usun Kot.
JOH 1:19 Iei usun mine Johannes a pwärätä lupwen ekewe nöüwisen chon Juta mi nom lon Jerusalem ra tinala ekoch souasor me ekoch chon ewe ainangen Lefi ren Johannes ar repwe aisini, “En iö?”
JOH 1:20 A pwärätä fän wenechar, nge esap tukumala, “Ngang sap Kraist.”
JOH 1:21 Iwe, ir ra aisini, “Nge iö chök en? En Elias?” Johannes a pölüeni, “Apw, sap ngang Elias” Ra pwal aisini, “En ewe Soufos?” Johannes a pölüeni, “Apw.”
JOH 1:22 Mürin ra üreni, “Kopwe asile ngenikem ika en iö, pwe aipwe asile ngeni chokewe mi tinikeemito mine ka pölüeni ngenikem. Met ka apasa usun püsin en?”
JOH 1:23 Iwe, Johannes a pölüeniir lon mine ewe soufos Aisea a apasa, “Ngang möngüngün ewe eman mi kökkö fän leüömong lon ewe fanüapö: Oupwe awenechara alen ewe Samol.”
JOH 1:24 Mürin ekewe chon künö ekewe Farisi ra tiniirela
JOH 1:25 ra aisini Johannes, “Ika sap en Kraist ika Elias ika ewe Soufos, pwota chök ka föri angangen papatais?”
JOH 1:26 Johannes a pölüeni, “Ngang üa papataisi aramas ren koluk, nge eman a nom leimi, ämi ousap silei.
JOH 1:27 I ätewe mi feito müri, nge ngang üsap fen mwo nge fich ngeni ai üpwe apichi ririn ipwan sus.”
JOH 1:28 Ekei mettoch meinisin ra fis lon Petania ötiuen ewe chanpupu Jortan ia Johannes a föri ewe angangen papatais ie.
JOH 1:29 Iwe, sorotän ewe rän Johannes a küna pwe Jesus a feito ren, iwe, a apasa, “Iei i ewe Lamen Kot a uweela tipisin chon fanüfan.
JOH 1:30 Iei i ätewe üa fen kapas usun, lupwen üa apasa, ‘Eman mwän epwe feito müri, nge i a lap seniei, pun a nom mwen üsamwo uputiu.’
JOH 1:31 Üsap mwo silei ika iö i, nge üa feito o papataisi aramas ren koluk pwe üpwe pwäri i ngeni chon Israel.”
JOH 1:32 Iwe, Johannes a pwärätä, “Ngang üa küna Ngünün Kot a feitiu seni läng lon lapalapen eman lisom o nonom won.
JOH 1:33 Püsin ngang üsap silei i, nge Kot ewe mi tiniei pwe üpwe papataisi aramas ren koluk, a üreniei, ‘Kopwe küna ewe Ngünün Kot epwe feito o nonom won eman mwän, i ätewe epwe papataisi aramas ren Ngünmifel.’
JOH 1:34 Ngang üa küna ei, üa pwal pwärätä pwe ätei Nöün Kot.”
JOH 1:35 Sorotän ewe rän Johannes me ruoman nöün kewe chon kaiö ra pwal ütä ikenan.
JOH 1:36 Nge lupwen Johannnes a küna Jesus pwe a fetaleto, a apasa, “Iei i ewe Lamen Kot!”
JOH 1:37 Iwe, lupwen ekewe ruoman chon kaiö ra rongorong mine a apasa, ra tapwela mürin Jesus.
JOH 1:38 Nge Jesus a sapsefäl o küna pwe ra tapwela mürin, iwe, a aisiniir, “Met oua kütta?” Ra pölüeni, “Ia ka nom ie, Rabbi?” (Wewen ei kapas Rabbi ‘Sense’)
JOH 1:39 Jesus a pölüeniir, “Oupwe feito o püsin nenengeni.” (Lon ena otun ina epwe kulok rüanü leolopal.) Iwe, ra eti Jesus o küna ia a nonom ie o ra nonom ren lon ewe ränin.
JOH 1:40 Eman me lein ekewe ruoman Andru pwin Simon Petrus.
JOH 1:41 Andru a müttir küna pwiin we Simon o üreni, “Äm aia küna ewe Messaia.” (Wewen ei kapas Messaia ‘Kraist’.)
JOH 1:42 Mürin a emwenala Simon ren Jesus. Iwe, Jesus a newenewen ngeni o üreni, “Itom Simon nöün Sona, nge iei kopwe iteni Kefas.” (Ei it Kefas a wewe ngeni ewe it Petrus, wewen ‘Eu achau’.)
JOH 1:43 Iwe, sorotän ewe rän Jesus a filätä pwe epwe feila Kalilea. A küna Filip o üreni, “Kopwe tapweto müri.”
JOH 1:44 (Filip i seni Petsaita ewe telinimw ia Andru me Petrus ra nom ie.)
JOH 1:45 Filip a küna Nataniel o üreni, “Äm aia küna ätewe Moses a mak usun lon ewe puken Allük, pwal ekewe soufos ra mak usun. I Jesus nöün Josef seni Nasaret.”
JOH 1:46 Nataniel a aisini, “Ifa usun, och mi mürina a tongeni feito seni Nasaret?” Filip a pölüeni, “Kopwe feito o nengeni.”
JOH 1:47 Lupwen Jesus a küna pwe Nataniel a feito ren, iwe, a apasa usun, “Iei i eman wesewesen re Israel, esap wor och mine a mwäl won.”
JOH 1:48 Nataniel a aisini, “Pwota ka tongeni sileei?” Jesus a pölüeni, “Ngang üa künok lupwen ka nom fän ewe irä fiik, me mwen än Filip köruk.”
JOH 1:49 Iwe, Nataniel a üreni, “Sense, en Nöün Kot! En ewe kingen Israel!”
JOH 1:50 Jesus a üreni, “Ifa usun, ka lükü pokiten üa ürenuk pwe üa künok lupwen ka nom fän ewe irä fiik? Kopwe küna chomong mettoch mi lap seni ei.”
JOH 1:51 Mürin a üreniir, “Enlet, üpwe wesewesen ürenikemi: Ämi oupwe küna pwe läng epwe sukula o nöün Kot kewe chon läng repwe feitä me feitiu won Nöün Aramas.”
JOH 2:1 Iwe, mürin ruu rän a fis eu apwüpwülü lon ewe telinimw Kana lon Kalilea. Inen Jesus we a nom ikenan.
JOH 2:2 Pwal Jesus me nöün kewe chon kaiö ra kö pwe repwe eti ewe apwüpwülü.
JOH 2:3 Iwe, lupwen a it ünümer wain, inen Jesus a üreni, “Esap chüen wor ünümer wain.”
JOH 2:4 Nge Jesus a pölüeni, “Nemin, kosap üreniei mine üpwe föri. Esamwo tori ai fansoun.”
JOH 2:5 Mürin inen Jesus a üreni ekewe chon angang, “Oupwe chök föri mine a ürenikemi.”
JOH 2:6 Iwe, a wor än ekewe chon Juta allükün ar lamalam usun ar repwe limeti inisiir me mettochur lupwen repwe fel ngeni Kot. Iei mine a wor wonu lenien koluk lon ewe imw, masouen eu me eu ina epwe ükükün rüe ika ilik kalon.
JOH 2:7 Iwe, Jesus a üreni ekewe chon angang, “Oupwe alölöü ekei lenien koluk ren koluk.” Iwe, ra alölöör tori ra urela.
JOH 2:8 Mürin Jesus a üreniir, “Iei oupwe üfi och ena koluk o uweela ren ewe chon nemeni ewe kametip.” Iwe, lupwen ra uwala ren ewe koluk
JOH 2:9 mi wiliti wain, ätewe a neni. I esap silei ia ei wain a feito me ie. (Nge ekewe chon angang mi üfi ewe koluk ra silei.) Iei mine ewe chon nemeni ewe kametip a köri ewe mwän apwüpwülü söfö
JOH 2:10 o üreni, “Aramas meinisin ra akomwen uwawu ewe wain mi fokun mürina. Mürin än ekewe chon kökköto ünümi chomong, epwe uwawu ewe wain mi mökükün. Nge en ka amwöchü ewe wain mi fokun mürina tori iei.”
JOH 2:11 Iei aeuin manaman Jesus a föri lon Kana lon Kalilea, iwe, nöün kewe chon kaiö ra lükü i.
JOH 2:12 Mürin ei, Jesus me inan we me pwiin kewe pwal nöün kewe chon kaiö ra feila Kapernaum. Ikenan ra nonom lon ekoch rän.
JOH 2:13 Iwe, lupwen a arap fansoun än ekewe chon Juta chulapen Pasofer, Jesus a feila Jerusalem.
JOH 2:14 A tolong lon ewe imwenfel o a küna ekewe mwän mi amömö kow, sip me lisom, pwal ätekewe mi mot ngeni chepel o akasiwili moni.
JOH 2:15 Iei mine a piti efoch säl o aea le cheela ekewe sip me ekewe kow meinisin seni lon ewe imwenfel. A atoropasa ekewe föün moni o akulätä ekewe chepel än ekewe chon akasiwili moni.
JOH 2:16 Iwe, a kapas pöchökül ngeni ekewe mwän mi amömö ekewe lisom, “Oupwe uwawu ekei mettoch seni ikei. Oupwe ükütiu le föri pwe imwen Semei epwe eu imwen amömö.”
JOH 2:17 Iwe, nöün kewe chon kaiö ra chechemeni pwe a mak lon ekewe Toropwe mi Pin, “Ai Kot, ai ekipwichi imwom mi pin a küküri le üti usun eu ekkei.”
JOH 2:18 Mürin ekewe nöüwisen chon Juta ra üreni, “Meni sokun manaman ka tongeni föri om kopwe pwäri ngenikem pwe mi wor om pwüüng pwe kopwe föri ekei föför?”
JOH 2:19 Jesus a pölüeniir, “Oupwe ataela ei imwenfel, nge ngang üpwe aüsefälietä lon ükükün ülüngat rän.”
JOH 2:20 Iwe, ra aisini, “Ifa usun, en ka tongeni aüsefälietä ei imwenfel lon ükükün ülüngat rän? Nge ekewe chon aüetä ei imwenfel ra angang ngeni lon ükükün faik me wonu ier!”
JOH 2:21 Nge ewe imwenfel Jesus a kapas usun, iei inisin.
JOH 2:22 Iei mine lupwen Jesus a manausefäl, nöün kewe chon kaiö ra chechemeni pwe a fen apasa ei. Ra lükü mine a mak lon ekewe Toropwe mi Pin, pwal mine Jesus a apasa.
JOH 2:23 Iwe, lupwen Jesus a nom lon Jerusalem fansoun chulapen ewe Pasofer, chomong aramas ra lükü i, pun ra küna ekewe manaman a föri.
JOH 2:24 Nge Jesus esap lükü ngeniir inisin, pun a silei ekiekin letiper.
JOH 2:25 Esap wor lomoten än eman epwe pwäri ngeni usun eman, pun a püsin silei mine a nom lon leluker.
JOH 3:1 Iwe, a wor eman mwän seni ewe mwichen Farisi itan Nikotemus, i eman me lein ekewe souemwenin ekewe chon Juta.
JOH 3:2 Lon eu pwin ätei a feila ren Jesus o üreni, “Rabbi, äm aia silei pwe en eman sense Kot a tinato. Pun esap wor eman a tongeni föri ekei sokun manaman en ka föri are Kot esap eti.”
JOH 3:3 Jesus a üreni, “Enlet, üpwe wesewesen ürenuk: Esap wor eman a tongeni küna Mwün Kot are esap upsefäl.”
JOH 3:4 Nikotemus a aisini, “Epwe ifa usun än eman aramas epwe tongeni upsefäl lupwen a chinlap? Enlet, esap tongeni tolongsefäl lon upwen inan o uputiu fän aruuan.”
JOH 3:5 Iwe, Jesus a üreni, “Enlet, üpwe wesewesen ürenuk: Esap wor eman a tongeni tolong lon Mwün Kot are esap up ren koluk me Ngün.
JOH 3:6 Eman aramas a upu seni saman me inan, nge manauen ngün a up ren Ngünün Kot.
JOH 3:7 Kosap weitifengeniik ren mine üa ürenuk: Oupwe fokun upsefäl.
JOH 3:8 Asepwäl a enien ia a mochen enila ie. Ka fen rong ngüngün, nge kosap silei ia a enito me ie, ika ia a enila ie. Ina usun chök ren chokewe mi up seni Ngünmifel.”
JOH 3:9 Iwe, Nikotemus a aisini, “Epwe ifa usun an epwe tongeni fis ei?”
JOH 3:10 Jesus a pölüeni, “En eman sense mi lap lon Israel, nge kosap weweiti usun ei?
JOH 3:11 Enlet, üpwe wesewesen ürenuk: Äm aia kapas usun mine aia silei o pwärätä mine aia küna, nge esap wor eman leimi a mochen etiwa mine aia eäni afalafal.
JOH 3:12 Ämi ousap lüküei lupwen üa kapas ngenikemi usun mettochun ei fanüfan. Ifa usun ämi oupwe lüküei lupwen üa kapas ngenikemi usun mettochun läng?
JOH 3:13 Esap wor eman a feitä läng pwe Nöün Aramas chök, ewe mi feitiu seni läng.
JOH 3:14 “Usun Moses a atekiatä ewe serepenit seni piras lon ewe fanüapö, iei usun Nöün Aramas epwe tekiatä,
JOH 3:15 pwe meinisin mi lükü i repwe eäni manau esemüch.
JOH 3:16 Pun iei usun Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.
JOH 3:17 Pun Kot esap tinato Nöün won fanüfan pwe epwe apwüngü fanüfan, nge a tinato pwe epwe amanaua chon fanüfan.
JOH 3:18 Iö a lükü ewe Nau esap küna feiengauen apwüng, nge iö esap lükü i a fen küna feiengauen apwüng, pun esap lükü Nöün Kot Aleman.
JOH 3:19 Iei usun pwüngün ewe apwüng: Ewe saram a tolong lon fanüfan, nge aramas ra efich rochopwak lap seni saram, pun ar föför a ngau.
JOH 3:20 Iö a föri mine a ngau a oput saram, esap mochen tolong lon saram, pun a niuokus pwe an kewe föför repwe pwäla.
JOH 3:21 Nge iö a föri mine a let a tolong lon saram, pwe ewe saram epwe pwärätä pwe mine a föri a föri lon an aleasochisi Kot.”
JOH 3:22 Mürin ei pworaus, Jesus me nöün kewe chon kaiö ra feila lon ewe fanü Jutea. Ikenan a nonom rer eu fansoun o papataisi aramas.
JOH 3:23 Nge Johannes a pwal papataisi aramas lon Änon arap ngeni Salim, pun a wor chomong koluk ikenan. Iwe, aramas ra feito ren o a papataisiir.
JOH 3:24 (Ei a fis me mwen än Johannes tolong lon fötek.)
JOH 3:25 Iwe, ekoch nöün Johannes kewe chon kaiö ra popuetä le anini ngeni eman re Juta usun ar limeti inisiir me mettochur lon pwüngün ar lamalam.
JOH 3:26 Iwe, ra feila ren Johannes o üreni, “Sense, ka chechemeni ewe mwän a nom reöm ötiuen ewe chanpupu Jortan, ätewe ka kapas ngenikem usun? Iei a papataisi aramas o aramas meinisin ra feila ren.”
JOH 3:27 Johannes a pölüeni, “Esap wor eman a tongeni angei och are Kot esap ngeni.
JOH 3:28 Püsin ämi oua tongeni pwärätä pwe ngang üa apasa, ‘Sap ngang ewe Kraist, nge Kot a tinieito me mwan.’
JOH 3:29 Ewe mwän apwüpwülü söfö i pwülüen ewe fin apwüpwülü söfö. Nge chiechien ewe mwän apwüpwülü söfö mi ü ünükün o aüseling a pwapwa lupwen a rongorong mwelien ewe mwän apwüpwülü söfö. Iei usun ai pwapwa a unusöchüla.
JOH 3:30 I epwe fokun tekiatä, nge ngang üpwe fefeitiu.”
JOH 3:31 Iwe, ätewe mi feito seni läng, i a lap seni meinisin. Ätewe mi pop seni fanüfan, i chon fanüfan, a pwal kapas usun mettochun fanüfan. Nge ätewe mi feito seni läng a tekia seni meinisin.
JOH 3:32 Iwe, a pwärätä usun mine a fen küna o rongorong, nge esap wor eman a etiwa an kapas.
JOH 3:33 Nge are eman epwe etiwa an kapas, a aletätä pwe Kot a let.
JOH 3:34 Iwe, ewe eman Kot a tinato a apasatä än Kot kewe kapas, pun Kot a aunusa ngeni Ngünün.
JOH 3:35 Ewe Sam a echeni Nöün o atolonga mettoch meinisin fän nemeneman.
JOH 3:36 Iö a lükü ewe Nau a eäni manau esemüch. Iö a lükümach ngeni ewe Nau esap eäni ewe manau, pwe än Kot song a nonom won.
JOH 4:1 Iwe, ekewe Farisi ra rongorong pwe Jesus a asoulängala o papataisi chomong aramas lap seni Johannes.
JOH 4:2 (Jesus ese püsin papataisi aramas, nge nöün kewe chök chon kaiö.)
JOH 4:3 Iei mine lupwen a rongorong met ra apasa, a feila seni Jutea o liwinsefäliti Kalilea.
JOH 4:4 Lon an we sai a fetalelong lon Samaria.
JOH 4:5 Iei usun a tori eu telinimw lon Samaria itan Sikar, a arap ngeni ewe fanü Jakop a ngeni nöün we mwän itan Josef.
JOH 4:6 Ikenan a wor eu chönüttu än Jakop, nge Jesus a mottiu ünükün ei chönüttu, pun a pekus ren an fetal. Ei otun ina epwe leoloas.
JOH 4:7 Iwe, eman fin Samaria a feito pwe epwe üfüf koluk. Nge Jesus a tüngor ngeni, “Kose kan mochen üpwe ünümi ekis koluk reöm.”
JOH 4:8 (Nöün kewe chon kaiö ra feila lon ewe telinimw pwe repwe kamö aner mongö.)
JOH 4:9 Ewe fefin a üreni, “En eman re Juta, nge ngang eman fin Samaria, ifa usun om kopwe tongeni tüngor seniei ünümom koluk?” (Ekewe chon Juta resap aeafengen kap me sepi me ekewe chon Samaria.)
JOH 4:10 Iwe, Jesus a pölüeni, “Are kopwe chök silei än Kot lifang, pwal ätewe mi tüngor ngonuk ünüman koluk, kopwe fen tüngor ngeni, nge i epwe ngonuk ewe kolukun manau.”
JOH 4:11 Ewe fefin a pölüeni, “Ai samol, esap wor om pokit pwe kopwe aea le üfüf, nge ei chönüttu a alolol. Ia kopwe angei me ie ewe kolukun manau?
JOH 4:12 Äm we lewo Jakop a ngenikem ei chönüttu. I me nöün kewe me nöün kewe mwichen man meinisin ra ün seni. Ifa usun, en ka lap seni Jakop?”
JOH 4:13 Jesus a pölüeni, “Iö a ün seni ei koluk epwe kakasefäl,
JOH 4:14 nge iö a ün seni ewe koluk ngang üpwe ngeni, esap chüen kakasefäl. Ewe koluk üpwe ngeni epwe wiliti eu lenien puächen kolukun manau leutun mi atoto manau esemüch.”
JOH 4:15 Ewe fefin a üreni, “Ai samol, kose mochen kopwe ngeniei ei koluk! Mürin üsap chüen liwinto ikei pwe üpwe üfüf koluk.”
JOH 4:16 Jesus a üreni ewe fefin, “Kopwe feila o köri pwülüom, iwe, epwe etuk lupwen kopwe liwinto.”
JOH 4:17 Ewe fefin a pölüeni, “Esap wor pwülüei.” Nge Jesus a üreni, “Mi pwüng om apasa pwe esap wor pwülüom.
JOH 4:18 Ka fen pwülüeni limman mwän, nge ewe eman ka pwülüeni iei esap wesewesen pwülüom. Ka kapas wenechar ngeniei.”
JOH 4:19 Mürin ewe fefin a üreni, “Ai samol, iei üa silei pwe en eman soufos.
JOH 4:20 Äm kewe lewo ra fel ngeni Kot won ei chuk, nge ämi chon Juta oua apasa pwe Jerusalem ina chök ewe leni ia aramas repwe fel ngeni Kot ie.”
JOH 4:21 Jesus a üreni, “Nemin, kopwe lüküei, epwe war ewe fansoun lupwen aramas resap chüen fel ngeni ewe Sam won ei chuk ika lon Jerusalem.
JOH 4:22 Ämi chon Samaria oua fel ngeni iö ousap silei, nge äm chon Juta aia fel ngeni iö aia silei, pun manau a pop seni chon Juta.
JOH 4:23 Nge epwe war eu fansoun, nge iei a fen nom, lupwen aramas repwe fel ngeni ewe Sam lon manamanen ewe Ngünün Kot me ewe let, pun ewe Sam a kütta chokewe mi fel ngeni lon let.
JOH 4:24 Kot Ngün, nge ren manamanen Ngünün we aramas ra chök tongeni fel ngeni lon let.”
JOH 4:25 Iwe, ewe fefin a üreni Jesus, “Üa silei pwe ewe Messaia epwe wareto, ewe mi iteni Kraist. Lupwen epwe war, epwe asile ngenikich mettoch meinisin.”
JOH 4:26 Jesus a pölüeni, “Ngang ätewe mi kapas ngonuk.”
JOH 4:27 Lon ewe chök otun nöün Jesus kewe chon kaiö ra liwinto. Ra weitifengeni pwe Jesus a kapas ngeni eman fefin, nge esap wor eman leir a aisini ewe fefin, “Met ka mochen?” are aisini Jesus, “Pwota ka kapas ngeni ei fefin?”
JOH 4:28 Mürin ewe fefin a likitala an we lenien koluk, a liwiniti ewe telinimw o üreni ekewe aramas mi nom ikenan,
JOH 4:29 “Oupwe feito o nengeni ewe mwän mi pwäri ngeniei mettoch meinisin üa fen föri. Ifa usun, esap fen iei i ewe Kraist?”
JOH 4:30 Iei mine ra towu seni ewe telinimw o feito ren Jesus.
JOH 4:31 Lon chök ei fansoun ekewe chon kaiö ra tütüngor ngeni Jesus, “Sense, kopwele mongö.”
JOH 4:32 Nge Jesus a pölüeniir, “Mi wor anei mongö ämi ousap silei usun.”
JOH 4:33 Iei mine ekewe chon kaiö ra popuetä le kapasfengen lefiler, “Ifa usun, mi wor eman a uwato ren anan mongö?”
JOH 4:34 Jesus a üreniir, “Anei mongö ai üpwe aleasochisi letipen ewe mi tiniei o awesala ewe angang a awisa ngeniei pwe üpwe föri.
JOH 4:35 Ämi oua apasa, ‘Mi chüen wor rüanü maram, mürin epwe tori fansoun kinikin.’ Nge üpwe ürenikemi, ‘Oupwe nenengeniöchü ekewe tanipi, pun üän irän lon ra nupula, pwe ra öchün ar repwe kinikin.’
JOH 4:36 Ewe aramas mi kini ewe räs epwe angei liwinin, epwe ionifengeni ekewe ua fän iten manau esemüch. Iei usun ewe aramas mi fofot pwal ewe mi kinikin repwe pwapwafengen.
JOH 4:37 Pun a let ewe kapas, ‘Eman aramas a fofot, nge pwal ewe eman a kinikin.’
JOH 4:38 Ngang üa tinikemiila pwe oupwe kini üän eu tanipi ämi ousap angang ngeni. Pwal ekoch ra angang ikenan, nge ämi oua angei feiöchün ar angang.”
JOH 4:39 Iwe, chomong me lein ekewe chon Samaria lon ewe telinimw ra lükü Jesus, pun ewe fefin a üra, “A pwäri ngeniei mettoch meinisin üa fen föri.”
JOH 4:40 Iei mine lupwen ekewe chon Samaria ra feito ren Jesus, ra fokun tüngor ngeni, pwe epwe nonom rer. Iwe, Jesus a nonom ikenan lon ükükün ruu rän.
JOH 4:41 Pwal chomong chon Samaria ra lükü Jesus pokiten ar rongorong an afalafal.
JOH 4:42 Iwe, ra üreni ewe fefin, “Iei aia lükülük, sap pokiten chök mine ka apasa, nge pokiten äm aia püsin rongorong an kapas. Iwe, äm aia silei pwe i wesewesen ewe Chon Amanauen chon fanüfan.”
JOH 4:43 Mürin än Jesus nonom ikenan lon ükükün ruu rän, a towu seniir o feila Kalilea.
JOH 4:44 Pun püsin Jesus a apasa, “Eman soufos esap wor meninin me lon püsin fanüan.”
JOH 4:45 Iwe, lupwen a tori Kalilea, ekewe aramas mi nom ikenan ra etiwa, pun ra fen feila ngeni ewe chulapen Pasofer lon Jerusalem o küna meinisin mine a föri lon ewe chulap.
JOH 4:46 Mürin Jesus a liwinsefäliti Kana lon Kalilea, ia a awili ewe koluk ngeni wain me ie. Iwe, a wor eman nöüwisen mwü lon Kapernaum, nöün ät a samau.
JOH 4:47 Lupwen a rong pwe Jesus a feito seni Jutea tori Kalilea, a feila ren o tüngormau ngeni pwe epwe feila Kapernaum o apöchöküla nöün we ät mi arap ngeni mäla.
JOH 4:48 Iwe, Jesus a üra, “Esap wor eman me leimi epwe lükü are esap küna asisil me manaman.”
JOH 4:49 Ewe nöüwis a pölüeni, “Ai samol, kose mochen etiei me mwen än nei we epwe mäla.”
JOH 4:50 Jesus a üreni, “Kopwe feila, noumw we ät epwe manau!” Iwe, ewe mwän a lükü mine Jesus a üreni o feila.
JOH 4:51 Nge lupwen a chüen fetal ngeni lenian we, nöün kewe chon angang ra churi o apworausa ngeni pwe nöün we ät a manau.
JOH 4:52 Iwe, a aisiniir inet fansoun a pöchökületä. Ra pölüeni, “Kulok eu leoloasen nänew ewe pwichikar a towu seni.”
JOH 4:53 Mürin ewe sam a chechemeni pwe ina chök ewe otun Jesus a kapas ngeni lon, “Noumw we ät epwe manau.” Iei mine i me chon an famili meinisin ra lükü Jesus.
JOH 4:54 Iei ewe aruuen manaman Jesus a föri mürin an feito seni Jutea o tori Kalilea.
JOH 5:1 Mürin ei pworaus, Jesus a feila Jerusalem pwe epwe fiti eu chulapen chon Juta.
JOH 5:2 Ünükün ewe Asamalapen Sip lon Jerusalem a wor eu koluk, a iteni Petesta lon kapasen Ipru. Ikenan a wor eu ut mi wor limu refirefin lon.
JOH 5:3 A wor eu mwichen aramas mi chomong, ra samau o kon lon ekewe ruum mi refiref: chon mesechun, chon pechemä me ekewe mi mwök. [Ra witiwiti ewe koluk an epwe nono.
JOH 5:4 Pun fän ekoch eman chon läng nöün ewe Samol a feitiu o anonoi ewe koluk. Iwe, ewe aramas mi akomwolong lon ewe koluk mürin chök an nono a tongeni pöchökületä seni met sokun samau a eäni.]
JOH 5:5 Eman mwän a nom ikenan, a sasamau lon ükükün ilik me walu ier.
JOH 5:6 Lupwen Jesus a küna ätewe lon an kokon o a rong pwe a sasamau lon fansoun langatam, a aisini, “Ka mochen küna pöchökül?”
JOH 5:7 Ewe chon samau a pölüeni, “Ai samol, esap wor rei eman aramas epwe uweieila lon ewe koluk lupwen a nono. Nge lupwen üa sotuni ai üpwe tolong lon, eman a fen akom mwei.”
JOH 5:8 Iwe, Jesus a üreni ewe mwän, “Kopwe ütä, angei kiom o fetal.”
JOH 5:9 Lon ewe chök otun ewe mwän a pöchökületä, a angei kian o a popuetä le fetal. Ei a fis lon eu ränin sapat.
JOH 5:10 Iei mine ekewe nöüwisen chon Juta ra üreni ewe mwän mi pöchökületä, “Ikenai ewe ränin sapat, esap pwüng ngeni allükün ach lamalam pwe kopwe uwei kiom.”
JOH 5:11 Iwe, a pölüeni, “Ewe mwän mi apöchökülaeitä a üreniei pwe üpwe angei kiei o fetal.”
JOH 5:12 Iwe, ra aisini, “Iö we a ürenuk pwe kopwe angei kiom o fetal?”
JOH 5:13 Nge ewe mwän mi pöchökületä esap silei Jesus, pun a wor chomong aramas lon ewe leni o Jesus a chök anifila seniir.
JOH 5:14 Mürin chök ekis fansoun Jesus a küna ewe mwän lon imwenfel o a üreni, “Kopwe rongorong, iei ka pöchökületä, kosap chüen föri tipis, pwe esap fis ngonuk och mi ngau seni ei.”
JOH 5:15 Mürin ewe mwän a feila o üreni ekewe nöüwisen chon Juta pwe Jesus ewe a apöchökülätä.
JOH 5:16 Iwe, pokiten Jesus a apöchöküla ewe mwän lon ewe ränin sapat, ekewe nöüwisen chon Juta ra popuetä le ariaföüü Jesus.
JOH 5:17 Nge Jesus a pölüeniir, “Semei a chök akangang tori ikenai, pwal ina usun ngang üpwe chök akangang.”
JOH 5:18 Ren ekei kapas ekewe nöüwisen chon Juta ra fokun alapala ar ekiekin mochen niela Jesus, pun esap chök atai allükün ewe ränin sapat, nge a pwal apasa pwe Kot Saman. Ren ei a püsin anönnöi ngeni Kot.
JOH 5:19 Iwe, Jesus a pölüeniir, “Enlet, üpwe wesewesen ürenikemi: Ewe Nau esap tongeni föri och ren püsin i, a chök föri met a küna pwe Saman a föri. Pun mine ewe Sam a föri, pwal ina chök mine ewe Nau a föri.
JOH 5:20 Pun ewe Sam a echeni ewe Nau o pwäri ngeni meinisin mine i a föri. Ewer, epwe fen mwo nge pwäri ngeni mettoch mi lap seni ekei, pwe oupwe mairü ren.
JOH 5:21 Usun ewe Sam a amanaua ekewe mi mäla o ngeniir manau, ina usun ewe Nau a fang manau ngeni chokewe i a filiiretä.
JOH 5:22 Ewe Sam esap pwal apwüngü eman, nge a ngeni ewe Nau ewe wisen souapwüng,
JOH 5:23 pwe aramas meinisin repwe asamolu ewe Nau usun chök ar asamolu ewe Sam. Iö esap asamolu ewe Nau, esap pwal asamolu ewe Sam a tinato i.
JOH 5:24 Enlet, üpwe wesewesen ürenikemi: Iö a rongorong ai kewe kapas o lükü ewe mi tinieito a eäni manau esemüch. Esap tolong lon kapwüng, pwe a towu seni mäla o tolong lon manau.
JOH 5:25 Enlet üpwe wesewesen ürenikemi: Epwe war ewe fansoun, nge a fen war, lupwen ekewe mi mäla repwe rongorong mwelien Nöün Kot, nge chokewe mi rongorong repwe küna manau.
JOH 5:26 Usun chök ewe Sam i popun manau, iei usun a föri pwe Nöün we pwal i popun manau.
JOH 5:27 Iwe, a ngeni ewe Nau ewe wis pwe epwe souapwüng, pun i ewe Nöün Aramas.
JOH 5:28 Ousap weitifengenikemi ren ekei kapas. Pun epwe war ewe fansoun lupwen ekewe sotup meinisin repwe rong mwelian
JOH 5:29 o towu seni peiaser: Chokewe mi föri föför mürina repwe manausefäl o küna manau, nge chokewe mi föri föför mi ngau repwe manausefäl o küna apwüng.
JOH 5:30 “Iwe, üsap tongeni föri och ren püsin inisi. Üa apwüngü aramas won met Kot a üreniei. Iei mine ai apwüng a let, pun üsap föri letipei, pwe letipen ewe mi tiniei.
JOH 5:31 Are üpwe pwärätä usun püsin ngang, pwäriei esap let, esap pwal wor aüchean.
JOH 5:32 Nge mi wor pwal eman a pwärätä usi, nge üa silei pwe mine a pwärätä usi a let.
JOH 5:33 Ämi oua tinala nöümi soukünö ren Johannes, iwe, mine i a pwärätä a let.
JOH 5:34 Esap ren ai üpwe etiwa pwärien eman, nge üa chök apasa ei pwe oupwe küna manau.
JOH 5:35 Johannes a usun chök eu lamp, a tin o saram, nge ämi oua chök mochen apwapwakemi lon saraman ekis chök fansoun.
JOH 5:36 Nge a wor och ai minen pwärätä a lap seni än Johannes kapasen pwärätä: Ekewe föför ewe Sam a awisa ngeniei pwe üpwe föri ra pwärätä, pwe ewe Sam a tiniei.
JOH 5:37 Iwe, ewe Sam mi tiniei a pwal pwärätä usi. Ämi ousap fokun rongorong mwelian ika küna won mesan,
JOH 5:38 ousap pwal amwöchü an kewe kapas lon letipemi, pun ämi ousap lükü ätewe i a tinato.
JOH 5:39 Ämi oua achocho le kaiö masouen ekewe Toropwe mi Pin, pun oua ekieki pwe oupwe küna manau esemüch lor. Ekei Toropwe mi Pin ra pwärätä usi.
JOH 5:40 Nge ämi ousap mochen feito rei pwe oupwe eäni ewe manau.
JOH 5:41 Üsap mochen ai üpwe iteföüla me ren aramas.
JOH 5:42 Nge ngang üa silei usumi. Üa silei pwe ämi ousap echeni Kot lon lelukemi.
JOH 5:43 Ngang üa feito fän iten Semei, nge ämi ousap etiwaei. Nge are pwal eman epwe feito fän püsin itan, ämi oupwe etiwa i.
JOH 5:44 Ämi oua sani ämi oupwe iteföüla me ren eman me eman leimi, nge ousap kütta ämi iteföüla me ren Kot. Epwe ifa usun ämi oupwe tongeni lüküei?
JOH 5:45 Ousap ekieki pwe üpwe atipisikemi me mwen Semei. Moses ätewe oua anomu ämi apilükülük won epwe atipisikemi.
JOH 5:46 Are ämi oua wesewesen lükü Moses, ämi oupwe pwal lüküei, pun i a makkei usi.
JOH 5:47 Nge pokiten ämi ousap lükü mine Moses a makkei, epwe ifa usun ämi oupwe tongeni lükü mine üa apasa?”
JOH 6:1 Iwe, mürin ei pworaus Jesus a feila epek ewe nomun Kalilea. (Ei noom a pwal iteni nomun Tiperias.)
JOH 6:2 Chomong aramas ra tapwela mürin, pun ra küna ekewe manaman Jesus a föriir lupwen a apöchökülätä ekewe chon samau.
JOH 6:3 Mürin Jesus me nöün kewe chon kaiö ra feitä won eu chuk o mottiu ikenan.
JOH 6:4 Ei otun a arap fansoun ewe chulapen Pasofer än chon Juta.
JOH 6:5 Iwe, Jesus a nenefetal o a küna pwe chomong aramas ra feito ren, iei mine a aisini Filip, “Ia sipwe tongeni kamö mongö me ie, pwe epwe naf ach sipwe amongöni ekei aramas meinisin?”
JOH 6:6 Jesus a eäni ei kapas ais an epwe sotuni Filip, pun i a fen silei met epwe föri.
JOH 6:7 Filip a pölüeni, “Ruopükü föün moni silifer esap naf ach sipwe kamö pilawa, pwe ina epwe chök ekis met eman me eman ekei aramas epwe angei.”
JOH 6:8 Pwal eman nöün chon kaiö itan Andru, pwiin Simon Petrus, a üra,
JOH 6:9 “A wor eman ät ikei mi wor ren limeföü pilawa seni föün parli me ruoman ik. Nge ifa usun, epwe naf ngeni ekei aramas meinisin?”
JOH 6:10 Jesus a üra, “Oupwe üreni ekewe aramas pwe repwe mottiu.” A wor chomong fetil lon ewe leni, iei mine ekewe aramas meinisin ra mottiu. A wor ina epwe ükükün limungeröü mwän.
JOH 6:11 Mürin Jesus a angei ekewe pilawa, a iotekin kilisou ngeni Kot wor o a ineti ngeni ekewe aramas mi mot ikenan. Pwal ina chök usun mine a föri ngeni ekewe ik. Ir meinisin ra angei ükükün mine ra mochen.
JOH 6:12 Iwe, lupwen ekewe aramas meinisin ra mötüla, Jesus a üreni nöün kewe chon kaiö, “Oupwe ionifengeni lusun ekewe mongö, pwe esap wor och epwe solapala.”
JOH 6:13 Iei mine ra ionifengeni meinisin o amasoua engol me ruu chüük ren lusun ewe mongö seni ekewe limeföü pilawa seni föün parli ekewe aramas ra mongö.
JOH 6:14 Iwe, lupwen ekewe aramas ra küna ewe manaman Jesus a föri, ra apasa, “Enlet, iei i ewe Soufos epwe feito won fanüfan.”
JOH 6:15 Jesus a silei pwe ra ekiekin feito o seikätä fän pöchökül pwe epwe ar king, iei mine a sü seniir o liwinsefälitä won ewe chuk.
JOH 6:16 Iwe, lupwen a tori lekuniol, nöün Jesus kewe chon kaiö ra feitiu ren ewe noom,
JOH 6:17 ra tötä won efoch wa o seresila epek ewe noom pwe repwe sai ngeni Kapernaum. Iwe, a pwinila, nge Jesus esamwo feito rer.
JOH 6:18 Nge mürin eu asepwäl mi pöchökül a enito, pwe nonoon ewe noom a wattela.
JOH 6:19 Lupwen ekewe chon kaiö ra fen fötülei waar we ina epwe ükükün ülüngat ika rüanü mail, ra küna Jesus a fetalela won ewe matau o fetaleto arap ngeni waar we. Iwe, ra fokun rükö.
JOH 6:20 Nge Jesus a üreniir, “Ousap niuokus! Ngang ei!”
JOH 6:21 Iwe, ra pwapwa pwe ra uwei Jesus won ewe wa, nge lon ewe chök otun ewe wa a tori ewe leni ia ra mochen sai ngeni ie.
JOH 6:22 Sorotän ewe rän ewe mwichen aramas mi nometiu epek ewe noom ra küna pwe a chök wor efoch wa a nom ikenan. Ra silei pwe Jesus esap tötä won ewe wa fiti nöün kewe chon kaiö, pwe ir chök ra sai.
JOH 6:23 Nge mi wor ekoch wa seni Tiperias ra il arap ngeni ewe leni ia ra mongö ewe pilawa ie mürin än ewe Samol iotekin kilisou won.
JOH 6:24 Iwe, lupwen ewe mwichen aramas ra küna pwe Jesus me nöün kewe chon kaiö resap nom ikenan, ra tötä won ekewe wa o saila Kapernaum, pwe repwe kütta Jesus.
JOH 6:25 Iwe, lupwen ekewe aramas ra küna Jesus me epek ewe noom, ra aisini, “Sense, inet ka feito ikei?”
JOH 6:26 Jesus a pölüeniir, “Enlet, üpwe wesewesen ürenikemi: Oua küttaei pokiten oua mongö ewe pilawa tori oua mötüla, nge ousap küttaei pokiten oua weweiti ai kewe manaman.
JOH 6:27 Ousap angang fän iten mongö mi tongeni ngauala, nge oupwe angang fän iten mongö mi nonomola tori manau esemüch. Iei ewe mongö Nöün Aramas epwe ngenikemi, pun Kot ewe Sam a fen anomu won asisilen an tipeeu ngeni.”
JOH 6:28 Mürin ra aisini Jesus, “Met äm aipwe föri, pwe aipwe tongeni apwönüetä met Kot a mochen aipwe föri?”
JOH 6:29 Jesus a pölüeniir, “Kot a mochen pwe oupwe lükü ätewe i a tinato.”
JOH 6:30 Iei mine ra aisini, “Met sokun manaman kopwe föri pwe äm aipwe küna o lükuk? Met sokun föför kopwe föri?
JOH 6:31 Äm kewe lewo ra mongö ewe mana lon ewe fanüapö, usun a mak lon ekewe Toropwe mi Pin, ‘A ngeniir ewe mongö seni läng pwe repwe mongö.’”
JOH 6:32 Mürin Jesus a üreniir, “Enlet, üpwe wesewesen ürenikemi: Esap Moses ewe mi ngenikemi ewe mongö seni läng, nge Semei i ewe mi ngenikemi ewe enletin mongö seni läng.
JOH 6:33 Pun ewe mongö Kot a ngenikemi ina i ätewe a feitiu seni läng o a fang manau ngeni chon fanüfan.”
JOH 6:34 Iwe, ra üreni, “Äm samol, kopwe ngenikem ei mongö fansoun meinisin.”
JOH 6:35 Mürin Jesus a üreniir, “Ngang ewe mongön manau. Iö a feito rei esap fokun chüen echik, nge iö a lüküei esap fokun chüen kaka.
JOH 6:36 Nge ngang üa ürenikemi pwe oua fen künaei, nge ousap mochen lüküei.
JOH 6:37 Chokewe meinisin Semei a ngeniei, repwe feito rei. Nge iö a feito rei, üsap fokun asüela.
JOH 6:38 Pun üa feitiu seni läng pwe üpwe föri letipen ewe mi tiniei, nge sap püsin letipei.
JOH 6:39 Iwe, iei letipen ewe mi tiniei, pwe esap pöüt seniei eman lein chokewe i a ngeniei, nge üpwe amanaueer lon ewe ränin sopolan.
JOH 6:40 Pun iei letipen Semei, pwe meinisin mi nenengeni ewe Nau o lükü i repwe eäni manau esemüch. Ngang üpwe amanaueer lon ewe ränin sopolan.”
JOH 6:41 Pokiten ekei kapas ekewe chon Juta ra popuetä le ngününgünü Jesus, pun a apasa, “Ngang ewe mongön manau mi feitiu seni läng.”
JOH 6:42 Iwe, ra apasa, “Ifa usun, sap ätei Jesus nöün Josef we mwän? Sia silei saman me inan. Pwota a tongeni apasa pwe i a feitiu seni läng?”
JOH 6:43 Jesus a pölüeni, “Oupwe ükütiu le ngününgün lefilemi!
JOH 6:44 Esap wor eman a tongeni feito rei are ewe Sam mi tinieito esap panato rei. Iwe, üpwe amanaua lon ewe ränin sopolan.
JOH 6:45 A fen mak lon puken ekewe soufos, ‘Aramas meinisin repwe kaiö me ren Kot.’ Chokewe meinisin mi aüseling ngeni alon ewe Sam o kaiö seni repwe feito rei.
JOH 6:46 Üsap apasa pwe a wor eman a fen küna ewe Sam. Ätewe mi feito seni Kot, i chök ewe eman a küna ewe Sam.
JOH 6:47 Enlet, üpwe wesewesen ürenikemi: Iö a lüküei a eäni manau esemüch.
JOH 6:48 Ngang ewe mongön manau.
JOH 6:49 Ämi kewe lewo ra mongö ewe mana lon ewe fanüapö, nge ra mäla.
JOH 6:50 Nge iei ewe mongö mi feitiu seni läng, are eman a mongö seni esap mäla.
JOH 6:51 Ngang ewe mongön manau mi feitiu seni läng. Are eman a mongö ei mongö epwe manau tori feilfeilachök. Iwe, ei mongö iei fitukei ngang üpwe fangala, pwe chon fanüfan repwe manau ren.”
JOH 6:52 Mürin ekewe chon Juta ra popuetä le aninifengen lefiler. Ra ais, “Epwe ifa usun än ei mwän epwe amongöü ngenikich fitukan?”
JOH 6:53 Iei mine Jesus a üreniir, “Enlet, üpwe wesewesen ürenikemi: Are ousap mongö fituken Nöün Aramas o ünümi chaan, esap wor manau lomi.
JOH 6:54 Iö a mongö fitukei o ünümi chai a eäni manau esemüch, nge ngang üpwe amanauasefäli lon ewe ränin sopolan.
JOH 6:55 Pun fitukei iei wesewesen ewe mongö, nge chai iei wesewesen ewe minen ün.
JOH 6:56 Iö a mongö fitukei o ünümi chai a nonom loi, nge ngang üa nonom lon.
JOH 6:57 Ewe Sam mi manau a tinieito, o pokiten ewe Sam ngang üa pwal manau. Iei usun iö mi mongö fitukei epwe manau pokiten ngang.
JOH 6:58 Iei ewe mongö mi feitiu seni läng. Esap wewe ngeni ewe mongö ämi kewe lewo ra mongö, nge mürin ra mäla. Ätewe mi mongö ei mongö epwe manau tori feilfeilachök.”
JOH 6:59 Jesus a apasa ekei kapas lupwen a afalafal lon ewe imwen felikis lon Kapernaum.
JOH 6:60 Iwe, chomong lein nöün kewe chon kaiö ra rongorong ekei kapas o ra üra, “Ei afalafal a kon pöchökül. Iö a tongeni aüselinga?”
JOH 6:61 Jesus esap rong seni eman mine ra kakapas won, nge a püsin silei pwe ra ngününgün usun an kewe kapas. Iei mine a üreniir, “Ifa usun, oua mochen likitala ämi lükülük ren ekei kapas?
JOH 6:62 Epwe ifa usun are oupwe küna Nöün Aramas lon an liwinsefälitä ngeni ewe leni ia a nom ie me mwan?
JOH 6:63 Ngünün Kot a afisätä manau, nge pöchökülen aramas esap fokun wor aüchean. Ekewe kapas üa fen ürenikemi ra eäni Ngün me manau.
JOH 6:64 Nge ekoch leimi resap lükü.” Pun Jesus a fen silei chök seni lepoputän iö kana resap lükü i, pwal ätewe epwe afangamä i.
JOH 6:65 Iwe, Jesus a sopwela le apasa, “Iei mine üpwe ürenikemi, pwe esap wor eman a tongeni feito rei, are ewe Sam esap atufichi.”
JOH 6:66 Iwe, seni ei fansoun chomong me lein nöün Jesus kewe chon kaiö ra kul seni o resap chüen mochen tapwela mürin.
JOH 6:67 Iei mine Jesus a aisini ekewe engol me ruoman chon kaiö, “Ifa usun, ämi ousap pwal mochen feila?”
JOH 6:68 Simon Petrus a üreni, “Äm Samol, iö aipwe feila ren? En ka eäni kapasen manau esemüch.
JOH 6:69 Äm aia lükü o silei pwe en Ewe mi Pin ka feito seni Kot.”
JOH 6:70 Iwe, Jesus a pölüeni, “Ifa usun, üsap filikemiitä engol me ruoman, nge fen eman leimi eman Tefil?”
JOH 6:71 Jesus a kapas usun Jutas nöün Simon Iskariot, pun i eman seni ekewe engol me ruoman epwe afangamä i.
JOH 7:1 Mürin ei pworaus, Jesus a chök saifetal lon Kalilea, pun esap mochen saifetal lon Jutea, pokiten ekewe nöüwisen chon Juta ra mochen niela i.
JOH 7:2 Nge a arap fansoun ewe chulapen likachoch än ekewe chon Juta.
JOH 7:3 Iei mine pwiin Jesus kewe ra üreni, “Kopwe feila seni ikei o feila Jutea, pwe noumw kewe chon kaiö repwe küna ekewe mettoch ka föri.
JOH 7:4 Esap wor eman mi mochen epwe sil me lein aramas a föri an kewe föför le monomon. Iwe, pokiten ka föri ekei föför, kopwe pwärukela ngeni chon fanüfan meinisin, pwe repwe silei usumw.”
JOH 7:5 Pun püsin pwiin kewe mwo nge resap lükü i.
JOH 7:6 Jesus a pölüeniir, “Esamwo tori ewe fansoun mi fich ngeniei, nge ämi fansoun esap lifilifil.
JOH 7:7 Chon fanüfan resap tongeni oputakemi, nge ra oputaei, pun üa pwäri ngeniir pwe ar föför a ngau.
JOH 7:8 Ämi oupwe feila ngeni ewe chulap. Ngang üsap mwo feila, pun esamwo tori ewe fansoun mi fich fän itei.”
JOH 7:9 Jesus a apasatä ekei kapas o nomola lon Kalilea.
JOH 7:10 Mürin än pwiin kewe feila ren ewe chulap, Jesus a pwal feila. Nge esap feila le pwäpwäla, pwe le monomon chök.
JOH 7:11 Iwe, ekewe nöüwisen chon Juta ra kütta Jesus lon ewe chulap. Ra ais, “Ifa i ätewe?”
JOH 7:12 Ekewe aramas lon ewe chulap ra möngününgünfengen usun i. Ekoch ra apasa, “I eman aramasöch,” nge pwal ekoch ra apasa, “Apw, a chök atupu ekewe aramas.”
JOH 7:13 Nge esap wor eman a kapas usun Jesus le pwäpwäla, pun ra niuokusiti ekewe nöüwisen chon Juta.
JOH 7:14 Lupwen a tori esopun ekewe ränin chulapen likachoch, Jesus a feitä lon ewe imwenfel o popuetä le afalafal.
JOH 7:15 Iwe, ekewe nöüwisen chon Juta ra mairü ren an kapas o ra apasa, “Pwota iei me silelapen ei mwän, nge esap fiti sukul?”
JOH 7:16 Mürin Jesus a pölüeniir, “Mine üa eäni afalafal esap püsin ai, nge a pop seni Kot ewe mi tinieito.
JOH 7:17 Iö a mochen föri letipen Kot epwe silei ika mine üa eäni afalafal a feito seni Kot, are üa chök kapas fän püsin itei.
JOH 7:18 Eman mi kapas fän püsin itan, a chök püsin kütta iteüöchün. Nge eman mi kütta iteüöchün ewe eman a tinato, i eman aramas mi let, nge esap wor och mine a mwäl won.
JOH 7:19 Ifa usun, Moses esap ngenikemi ekewe Allük? Nge esap wor eman leimi a aleasochisi ekewe Allük. Pwota oua ekiekin nieila?”
JOH 7:20 Ekewe aramas ra pölüeni, “Eman anün rochopwak a wänuk. Iö a ekiekin niikela?”
JOH 7:21 Jesus a pölüeniir, “Üa föri eu chök manaman, nge ämi meinisin oua mairü ren.
JOH 7:22 Iwe, Moses a allük pwe oupwe sirkomsaisi nöümi ät. (Nge ei esap pop seni Moses, nge ämi kewe lewo ra popuetä.) Iei usun oua sirkomsaisi eman ät lon ewe ränin sapat.
JOH 7:23 Are än Moses kewe Allük resap ta ren ämi sirkomsaisi eman ät lon ewe ränin sapat, pwota oua song ngeniei pokiten üa apöchökülätä unusen inisin eman mwän lon ewe ränin sapat?
JOH 7:24 Ousap apwüngü eman ren mine oua küna me lükün, nge oupwe eäni apwüng fän pwüng.”
JOH 7:25 Iwe, lon ewe chök otun ekoch aramasen Jerusalem ra popuetä le ais, “Ifa usun, sap iei i ewe mwän ekewe nöüwis ra ekiekin ar repwe niela?
JOH 7:26 Nengeni, a kapas le pwäpwäla, nge esap wor eman a pölüeni! Ifa usun, ir mi silei pwe i Kraist?
JOH 7:27 Nge lupwen Kraist epwe war, esap wor eman epwe silei ia a feito seni ie.”
JOH 7:28 Iwe, lupwen Jesus a afalafal lon ewe imwenfel, a leüömong le apasa, “Ifa usun, oua wesewesen sileei? Oua silei ia üa feito me ie? Ngang üsap feito fän püsin itei, nge ewe mi tinieito a let. Ämi ousap silei i.
JOH 7:29 Nge ngang üa silei i, pun ngang üa feito seni, i a tinieito.”
JOH 7:30 Mürin ra sotuni ar repwe turufi, nge esap wor eman a atapa, pun esamwo tori an fansoun.
JOH 7:31 Nge chomong aramas lon ewe mwich ra lükü i o ra apasa, “Lupwen Kraist epwe war, ifa usun, epwe föri chomong manaman lap seni ekewe manaman ei mwän a föri?”
JOH 7:32 Iwe, ekewe Farisi ra rongorong än ekewe aramas möngününgün won ekei mettoch usun Jesus, iei mine ir me ekewe souasor mi lap ra tinala ekoch chon tümwünü imwenfel pwe repwe turufi Jesus.
JOH 7:33 Mürin Jesus a apasa, “Ekis chök fansoun üpwe chüen nom remi, mürin üpwe feila ren ewe mi tinieito.
JOH 7:34 Ämi oupwe küttaei, nge ousap künaei, pun ousap tongeni feila ewe ia üpwe nom ie.”
JOH 7:35 Iwe, ekewe nöüwisen chon Juta ra kapasfengen lefiler, “Ia i epwe feila ie, pwe äm aisap tongeni küna? Ifa usun, epwe feila lon ekewe telinimwen chon Krik, ia nöüch aramas ra toropasfeil ie o afalafala ekewe chon Krik?
JOH 7:36 Met wewen an apasa, ‘Oupwe küttaei, nge ousap künaei, ousap pwal tongeni feila ia üpwe nom ie?’”
JOH 7:37 Lesopolan ränin ewe chulap, iei ewe rän mi fokun aüchea, Jesus a ütä o apasa fän leüömong, “Iö a kaka epwe feito rei o ün!
JOH 7:38 Iö a lüküei usun ekewe Toropwe mi Pin ra apasa, chanpupun kolukun manau repwe puwu seni lelukan.”
JOH 7:39 Jesus a kapas won ei usun ewe Ngünmifel, chokewe mi lükü i repwe angei. Lon ena fansoun Kot esamwo tinato Ngünmifel, pun Jesus esamwo tolong lon lingan.
JOH 7:40 Iwe, ekoch ekewe aramas me lon ewe mwich ra rongorong än Jesus kapas o ra apasa, “Ei mwän i wesewesen ewe Soufos.”
JOH 7:41 Nge ekoch ra apasa, “I ewe Kraist.” Nge pwal ekoch ra apasa, “Kraist esap feito seni Kalilea.
JOH 7:42 Ekewe Toropwe mi Pin ra apasa, pwe Kraist epwe eman mwirimwirin Tafit, epwe uputiu lon Petleem ewe telinimwen Tafit.”
JOH 7:43 Iei usun a fis tipefesen lon ewe mwich pokiten Jesus.
JOH 7:44 Ekoch ra mochen turufi i, nge esap wor eman a atapa.
JOH 7:45 Iwe, lupwen ekewe chon tümwünü imwenfel ra liwinsefäl, ekewe souasor mi lap me ekewe Farisi ra aisiniir, “Pwota ousap etekinato?”
JOH 7:46 Ra pölüeni, “Esap wor eman aramas a afalafal usun än ei mwän afalafal.”
JOH 7:47 Ekewe Farisi ra aisiniir, “Ifa usun, ei mwän a pwal atupukemi?
JOH 7:48 Ifa usun, a wor eman lein ekewe nöüwis ika ekewe Farisi a lükü i?
JOH 7:49 Ei mwichen aramas esap silei än Moses kewe Allük, iei mine ra nom fän än Kot anümamau.”
JOH 7:50 Eman me lein ekewe Farisi Nikotemus, ätewe a fen feila churi Jesus me mwan, a üreni chiechian kewe,
JOH 7:51 “Lon pwüngün ach kewe Allük sisap tongeni apwüngü eman aramas me mwen ach sipwe rongorong ngeni an pworaus o küttaöchü met a föri.”
JOH 7:52 Ra pölüeni, “Ifa usun, pwal en eman re Kalilea? Kopwe kütta lon ekewe Toropwe mi Pin o küna, pwe esap wor eman soufos epwe feito seni Kalilea.”
JOH 8:1 [Mürin ekewe aramas ra feila lon en me lenian, nge Jesus a feitä won ewe Chukun Olif.
JOH 8:2 Lesosorusichin sorotän ewe rän a liwinsefäliti ewe imwenfel. Iwe, ekewe aramas meinisin ra mwicheto ren, nge Jesus a mottiu o popuetä le afalafaleer.
JOH 8:3 Iwe, ekewe Sensen Allük me ekewe Farisi ra etekinato eman fefin ra sereni lon an lisowu. Ra aütai ewe fefin me mwen meser meinisin
JOH 8:4 o üreni Jesus, “Äm aia sereni ei fefin lon an lisowu.
JOH 8:5 Lon Allükün ach lamalam, Moses a allük pwe ei sokun fefin aramas repwe mone ngeni fau tori an epwe mäla. Nge met en kopwe apasa usun ei fefin?”
JOH 8:6 Ra apasa ei fän iten ar repwe särei Jesus, pwe epwe wor och mine repwe tongeni aturu won. Nge Jesus a pworotiu o makkei won ewe pwül ren aütün pöün.
JOH 8:7 Iwe, lupwen ra ükütä ikenan o kapas ais ngeni, Jesus a wenetä o üreniir, “Iön leimi esap wor an tipis epwe akom le monei ei fefin ngeni aeföün fau.”
JOH 8:8 Mürin a pworesefälitiu o makkei won ewe pwül.
JOH 8:9 Iwe, lupwen ar rong ekei kapas, ra chök feila eman mürin eman, nge ekewe chinlap ra akom. Iwe, Jesus chök a nom ikenan, pwal ewe fefin mi ükütä ren.
JOH 8:10 Jesus a wenetä o üreni ewe fefin, “Ikafa ir ekewe mwän? Esap chüen wor eman a nom an epwe apwünguk ngeni mäla?”
JOH 8:11 Ewe fefin a pölüeni, “Ai samol, esap chüen wor eman leir a nom.” Mürin Jesus a üra, “Üsap pwal fokun apwünguk. Kopwe feila, nge kosap chüen föri tipis.”]
JOH 8:12 Iwe, Jesus a kapassefäl ngeni ekewe aramas o üreniir, “Ngang ewe saramen fanüfan. Iö a tapweto müri epwe eäni ewe saramen manau, nge esap fetal lon rochopwak.”
JOH 8:13 Iei mine ekewe Farisi ra üreni, “Ka eäni kapasen pwärätä usun püsin en, nge om pwärätä esap pwüng.”
JOH 8:14 Jesus a pölüeniir, “Inamwo are üa pwärätä usun püsin ngang, nge ai pwärätä a pwüng, pun üa silei ia üa feito me ie o ia üpwe feila ie. Nge ämi ousap silei ia üa feito me ie are ia üpwe feila ie.
JOH 8:15 Ämi oua eäni apwüng lon örünien aramas. Ngang üsap apwüngü eman.
JOH 8:16 Nge are üpwe apwüngü eman, ai apwüng epwe let, pun ngang üsap aleman chök lon, pwe ewe Sam mi tinieito a etiei.
JOH 8:17 A fen mak lon ämi kewe Allük, pwe are ruoman aramas a wewefengen pwärier, mine ra pwärätä a pwüng.
JOH 8:18 Ngang üa pwärätä usun püsin ngang, nge ewe Sam mi tinieito a pwal pwärätä usi.”
JOH 8:19 Mürin ra aisini, “Ia semom a nom ie?” Jesus a pölüeniir, “Ämi ousap sileei are silei Semei. Are oupwe sileei, oupwe pwal silei Semei.”
JOH 8:20 Ekei kapas Jesus a aea lupwen a afalafal lon ewe imwenfel, lon ewe leni ia ekewe lenien asor ra nom ie. Iwe, esap wor eman a turufi, pun esap tori mwo an fansoun.
JOH 8:21 Iwe, Jesus a kapassefäl ngeniir, “Ngang üpwe feila. Ämi oupwe küttaei, nge oupwe mäla lon ämi tipis. Ousap tongeni feila ia üpwe feila ie.”
JOH 8:22 Iei mine ekewe nöüwisen chon Juta ra apasa, “A üra pwe sisap tongeni feila ia i epwe feila ie. Ifa usun, wewen ei pwe epwe püsin niela?”
JOH 8:23 Jesus a pölüeniir, “Ämi oua pop seni ei fanüfan, nge ngang üa feito seni läng. Ämi oua seni ei fanüfan, nge ngang üsap seni ei fanüfan.
JOH 8:24 Iei popun ai ürenikemi pwe oupwe mäla lon ämi tipis. Pun are ousap lüküei pwe ‘Ngang chök ewe Eman’, oupwe fokun mäla lon ämi tipis.”
JOH 8:25 Iwe, ra aisini, “Iö en?” Jesus a pölüeniir, “Üa fen ürenikemi seni lepoputän iö Ngang.
JOH 8:26 Mi wor chomong mettoch üpwe apasa usumi, pwal chomong kapasen atipisi fän itemi. Nge ätewe mi tinieito a wenechar. Iwe, ngang üa chök asile ngeni fanüfan mine üa rong seni i.”
JOH 8:27 Iwe, resap weweiti pwe Jesus a kapas ngeniir usun Saman.
JOH 8:28 Iei mine a üreniir, “Lupwen oupwe atekiatä ewe Nöün Aramas, mürin oupwe silei iö Ngang. Oupwe pwal silei pwe üsap föri och ren püsin ngang, nge üa chök apasa mine Semei a aiti ngeniei.
JOH 8:29 Iwe, ewe mi tinieito a etiei. Esap likitiei ai üpwe aleman, pun üa föri mine a pwapwa ren fansoun meinisin.”
JOH 8:30 Chomong aramas mi rongorong än Jesus kapas usun ekei mettoch ra lükü i.
JOH 8:31 Mürin Jesus a üreni ekewe chon Juta mi lükü i, “Are oupwe aleasochisi ai kewe kapas, oupwe wesewesen nei chon kaiö.
JOH 8:32 Oupwe silei ewe let, nge ewe let epwe angasakemi.”
JOH 8:33 Iwe, ra pölüeni, “Äm aia mwirimwirin Apraham, esap fokun wor eman a nöünikem amanau. Met wewen om apasa, ‘Ämi oupwe ngasala?’”
JOH 8:34 Nge Jesus a üreniir, “Enlet, üpwe wesewesen ürenikemi: Aramas meinisin mi föri tipis ra nonom fän nemenien tipis usun eman amanau.
JOH 8:35 Eman amanau esap chon ewe famili a angang ngeni fansoun meinisin, nge eman nau i chon ewe famili tori feilfeilachök.
JOH 8:36 Iwe, are ewe Nau a angasakemi, oupwe wesewesen ngasala.
JOH 8:37 Ngang mi silei pwe ämi mwirimwirin Apraham. Nge ämi oua sotuni ämi oupwe nieila, pun ousap mochen etiwa ai kewe kapas.
JOH 8:38 Üa kapas usun mine Semei a aiti ngeniei, nge ämi oua föri mine sememi a ürenikemi.”
JOH 8:39 Iwe, ra üreni, “Apraham semelapem.” Jesus a pölüeniir, “Are ämi wesewesen nöün Apraham, oupwe pwal föri sokun föför Apraham a föri.
JOH 8:40 Met üa föri, üa chök mochen aiti ngenikemi ewe let üa rong me ren Kot, nge ämi oua sotuni ämi oupwe nieila. Apraham esap föri ei sokun föför.
JOH 8:41 Ämi oua föri mine sememi a föri.” Iwe, ra pölüeni, “Äm aisap upun leroch, äm aia semeni eman chök Sam, iei i Kot.”
JOH 8:42 Jesus a üreniir, “Are Kot sememi, ämi oupwe echeniei. Pun ngang üa feito seni Kot, nge iei üa nom ikei. Ngang üsap feito fän püsin itei, nge i a tinieito.
JOH 8:43 Pwota ousap weweiti mine üa ürenikemi? Ina popun ämi ousap mochen rongorong ai kewe kapas.
JOH 8:44 Ämi nöün sememi, ewe Tefil, ämi oua chök mochen apwönüetä mochenin sememi. I eman chon niela aramas seni lepoputän, esap fokun nom won pekin let, pun esap wor let ren. Lupwen a kapas chofona, a chök fos lon örünian, pun i eman chon chofona me semen chon chofona.
JOH 8:45 Nge pokiten üa eäni kapas mi let, iei popun ousap lüküei.
JOH 8:46 Iö leimi a tongeni alletätä pwe ngang üa tipis? Are üa apasatä mine a let, pwota ousap lüküei?
JOH 8:47 Eman mi feito seni Kot a aüseling ngeni kapasen Kot. Nge ämi ousap feito seni Kot, iei mine ousap mochen aüselingaei.”
JOH 8:48 Iwe, ekewe chon Juta ra üreni Jesus, “Ifa usun, esap pwüng äm apasa pwe en eman re Samaria, nge eman anün rochopwak a wänuk?”
JOH 8:49 Jesus a pölüeniir, “Esap wor eman anün rochopwak a wäniei. Ngang üa asamolu Semei, nge ämi ousap asamoluei.
JOH 8:50 Ngang üsap püsin kütta ai ling. Nge mi wor eman a kütta ling fän itei, i pwal ewe souapwüng.
JOH 8:51 Enlet ngang üpwe wesewesen ürenikemi: Iö a aleasochisi ai kewe kapas esap fokun mäla.”
JOH 8:52 Iwe, ekewe chon Juta ra üreni, “Iei äm aia silei pwe eman anün rochopwak a wänuk. Apraham a mäla, pwal ekewe soufos ra mäla, nge en ka apasa pwe iö a aleasochisi om kewe kapas esap fokun mäla.
JOH 8:53 Ifa usun, ka ekieki pwe ka lap seni semelapach Apraham? I a mäla, pwal ekewe soufos ra mäla. Ka ekieki pwe en iö?”
JOH 8:54 Iwe, Jesus a pölüeniir, “Are üa püsin kütta ai ling, ei ling esap wor lomotan. Ewe eman mi alingaei, i Semei, ewe eman oua apasa pwe i ämi we Kot.
JOH 8:55 Ämi ousap fokun silei Kot, nge ngang üa silei i. Are üpwe apasa pwe üsap silei i, üpwe eman chon chofona usun chök ämi. Nge ngang üa silei i o aleasochisi an kapas.
JOH 8:56 Apraham sememi we a fokun pwapwa pwe epwe le küna fansoun ai feito. A küna ewe fansoun o pwapwaäsini.”
JOH 8:57 Ekewe chon Juta ra üreni, “En kosamwo ierini lime, nge ka fen küna Apraham?”
JOH 8:58 Jesus a pölüeniir, “Enlet üpwe wesewesen ürenikemi: Me mwen än Apraham esamwo uputiu, ngang üa fen nom.”
JOH 8:59 Lupwen ekewe aramas ra rong ekei kapas, ra angei fau pwe repwe mone ngeni. Nge Jesus a opola o towu seni ewe imwenfel.
JOH 9:1 Iwe, lupwen Jesus a fetalela, a küna eman mwän mi upuchun.
JOH 9:2 Nöün kewe chon kaiö ra aisini, “Sense, tipisin iö pwe ei mwän a upuchun? Püsin tipisin ika tipisin saman me inan?”
JOH 9:3 Jesus a pölüeniir, “Esap tipisin ei mwän, esap pwal tipisin saman me inan, nge ei a fis pwe manamanen Kot epwe pwä lon manauan.
JOH 9:4 Lupwen a chüen rän, üpwe fokun föri angangen ewe mi tinieito. Pwin epwe war lupwen esap wor eman a tongeni angang lon.
JOH 9:5 Lupwen üa nom won fanüfan, ngang saramen fanüfan.”
JOH 9:6 Mürin än Jesus apasa ei, a atufetiu lepwül, a ölölü ewe pwül ren atufan o tofätä ewe pwakak won mesen ewe mwän.
JOH 9:7 Iwe, a üreni, “Kopwe feila ores lon ewe koluk Siloam.” (Wewen Siloam ‘tinala’) Iei mine ewe mwän a feila o oresi mesan, iwe, a liwinto o küna mwan.
JOH 9:8 Mürin chon arun me chokewe mi küküna ei mwän me mwan lon an tütüngor lifangan, ra ais, “Ifa usun, sap iei i ewe mwän mi momot o tütüngor lifangan?”
JOH 9:9 Ekoch ra apasa, “Ewer, iei i,” nge pwal ekoch ra apasa, “Apwi, sap i, a chök wewe ngeni.” Iei mine ewe mwän a püsin üra, “Ngang ätewe.”
JOH 9:10 Iwe, ra aisini, “Met a fis pwe ka tongeni küna mwomw?”
JOH 9:11 A pölüeniir, “Ewe mwän itan Jesus a ölölü och pwül, iwe, a tofätä ewe pwakak won mesei o üreniei pwe üpwe feila Siloam o oresi mesei ie. Iei mine üa feila, nge lon ewe chök otun üa ores, üa küna mwei.”
JOH 9:12 Iwe, ra aisini, “Ia a nom ie ätewe?” Ewe mwän a pölüeni, “Üse silei.”
JOH 9:13 Mürin ra emwenala ewe mi mesechun me mwan ren ekewe Farisi.
JOH 9:14 Lon ewe rän Jesus a ölölü och pwül o tofätä ewe pwakak won mesen ewe mwän pwe a nenela, iei eu ränin sapat.
JOH 9:15 Iwe, ekewe Farisi ra aisinisefäli ewe mwän usun an küna mwan. A üreniir, “A tofätä och pwakak won mesei, iwe, üa oresiei, nge iei üa tongeni küna mwei.”
JOH 9:16 Ekoch lein ekewe Farisi ra apasa, “Ewe mwän mi föri ei esap tongeni feito seni Kot, pun esap aleasochisi ewe allükün sapat.” Nge pwal ekoch ra apasa, “Epwe ifa usun än eman chon tipis epwe tongeni föri ei sokun manaman?” A wor kinikinfesen lefiler.
JOH 9:17 Iei mine ekewe Farisi ra aisinisefäli ewe mwän, “Met en ka apasa usun i, pun i a aneneloi mesom?” Iwe, ewe mwän a pölüeni, “I eman soufos.”
JOH 9:18 Nge ekewe nöüwisen chon Juta resap mochen lükü, pwe ewe mwän a chun me mwan o künasefäli, tori ra titi saman me inan.
JOH 9:19 Iwe, ra aisiniir, “Nöümi ei mwän oua apasa pwe a upuchun? Ifa usun an fis pwe a tongeni küna mwan iei?”
JOH 9:20 Saman me inan ra pölüeni, “Äm aia silei pwe ätena nöüm, aia pwal silei pwe a upuchun.
JOH 9:21 Nge äm aisap silei ifa usun an a tongeni küna mwan, aisap pwal silei ika iö a aneneloi mesan. Oupwe püsin aisini, a tongeni püsin pölüeni, pun a watte ierin.”
JOH 9:22 Saman me inan ra apasa ei ititin kapas, pun ra niuokusiti ekewe nöüwisen chon Juta. Pun ekewe nöüwis ra fen tipeeufengen, pwe iö mi pwärätä pwe Jesus ewe Kraist epwe katowu seni ar we mwich lon ewe imwen felikis.
JOH 9:23 Iei popun saman me inan ra apasa, “A watte ierin, oupwe püsin aisini.”
JOH 9:24 Iwe, ra kökkörato ewe mwän mi mesechun me mwan fän aruuan o üreni, “Kopwe pwon fän mesen Kot pwe kopwe pwärätä mine a let! Äm aia silei pwe ei mwän mi anenelok i eman chon tipis.”
JOH 9:25 Ewe mwän a pölüeni, “Üsap silei ika i eman chon tipis ika esap. Nge eu chök üa silei, pwe üa mesechun, nge iei üa küna mwei.”
JOH 9:26 Mürin ra aisini, “Met a föri ngonuk? Ifa usun an aneneloi mesom?”
JOH 9:27 Iwe, a pölüeniir, “Üa fen ürenikemi, nge ämi ousap aüselinga. Pwota oua mochen rongorongsefäl? Ifa usun, ämi oua pwal mochen nöün chon kaiö?”
JOH 9:28 Iwe, ra eäni kapas turunufas ngeni o üreni, “En nöün enan mwän chon kaiö, nge äm nöün Moses chon kaiö.
JOH 9:29 Äm aia silei pwe Kot a kapas ngeni Moses me lom, nge enan mwän äm aise fen mwo nge silei ia a feito me ie.”
JOH 9:30 Ewe mwän a pölüeniir, “Mwa met me amairün ei mettoch! Ämi ousap silei ia a feito me ie, nge i a aneneloi mesei.
JOH 9:31 Kich sia silei pwe Kot esap aüseling ngeni än ekewe chon tipis tüngor, nge a aüseling ngeni eman mi meniniti i o föri letipan.
JOH 9:32 Seni lepoputän fanüfan, esap wor eman a aneneloi mesen eman aramas mi upuchun.
JOH 9:33 Ika pwe ei mwän mi aneneloi mesei esap feito seni Kot, esap tongeni föri och mettoch.”
JOH 9:34 Iwe, ra üreni, “En ka uputiu lon tipis o märitä lon tipis, pwota ka ekiekin afalafalakem?” Iwe, ra atowu ewe mwän seni ewe imwen felikis.
JOH 9:35 Iwe, Jesus a rong pwe ra atowu ewe mwän seni ar we imwen felikis. Lupwen a küna i, a aisini, “Ifa usun, ka lükü ewe Nöün Kot?”
JOH 9:36 Ewe mwän a pölüeni, “Ai samol, iö ätewe, kopwe aiti ngeniei, pwe ngang üpwe tongeni lükü i.”
JOH 9:37 Jesus a üreni, “Ka fen küna i, ina i ätewe mi kapas ngonuk.”
JOH 9:38 Mürin ewe mwän a apasa, “Ai Samol, üa lükü!” Iwe, a fotopwäsuketiu mwan o fel ngeni.
JOH 9:39 Iwe, Jesus a üreni, “Üa feito lon fanüfan pwe üpwe eäni apwüng, pwe chokewe mi chun repwe küna mwer, nge chokewe mi küna mwer repwe chun.”
JOH 9:40 Iwe, ekoch Farisi mi nom ren ra rongorong met a apasa o ra aisini, “Met, äm aia pwal chun?”
JOH 9:41 Jesus a pölüeniir, “Are ämi oupwe chun, esap wor ämi tipis. Nge iei ämi oua apasa pwe oua tongeni küna mwemi, iei popun ämi tipis a chök nonom womi.”
JOH 10:1 Iwe, Jesus a üra, “Enlet, üpwe wesewesen ürenikemi: Iö esap tolong lon asamen lenien sip, nge a tötä me ekis o tolong, i eman chon solä me eman chon achomau.
JOH 10:2 Nge iö mi tolong lon ewe asam, ina i ewe chon masen sip.
JOH 10:3 Ewe chon masen ewe asamen lenien sip epwe suki ngeni ewe asam. Ekewe sip repwe rong mwelian lupwen epwe köri iten eman me eman nöün kewe sip, iwe, epwe emweniirewu lükün.
JOH 10:4 Lupwen epwe emweniirewu lükün, epwe akom mwer. Iwe, ekewe sip repwe tapwela mürin, pun ra silei mwelian.
JOH 10:5 Resap tapwela mürin pwal eman me lükün, nge repwe sü seni, pun resap silleni mwelian.”
JOH 10:6 Jesus a apworausa ngeniir ei pworausen awewe, nge ir resap wewe ren.
JOH 10:7 Iei mine Jesus a apasasefäli, “Enlet üpwe wesewesen ürenikemi: Ngang ewe asam fän iten ekewe sip.
JOH 10:8 Chokewe meinisin ra akomwoto mwei ir chon solä me chon achomau, nge ekewe sip resap aüseling ngeniir.
JOH 10:9 Ngang ewe asam. Iö a tolong lon ei asam epwe küna manau. Epwe tolong o towu o küna anan.
JOH 10:10 Eman chon solä a chök feito pwe epwe sosolä me ninni me akkatai. Ngang üa feito pwe oupwe eäni manau, iei ewe manau mi somwola.
JOH 10:11 “Ngang ewe chon mas mi öch. Ewe chon mas mi öch a fangala manauan fänäsengesin ekewe sip.
JOH 10:12 Nge ewe aramas mi mö, i esap ewe chon mas mine nöün kewe sip, lupwen a küna pwe eman wolif a feito, a likitala ekewe sip o süla. Mürin ewe wolif a turufi ekewe sip o atoropaseer.
JOH 10:13 Ewe aramas a süla, pun i eman mi mö, esap ekieki manauen ekewe sip.
JOH 10:14 Ngang ewe chon mas mi öch. Ngang üa silei nei sip kana o ir ra sileei,
JOH 10:15 usun chök Semei a sileei o ngang üa silei Semei. Iwe, ngang üa fangala manauei fänäsengesin ekewe sip.
JOH 10:16 A pwal wor ekoch nei sip resap nonom lon ei lenien sip. Ngang üpwe pwal fokun emweniireto. Repwe aüseling ngeni mweliei. Mürin epwe wor eu chök mwichen sip me eman chon mas.
JOH 10:17 “Iwe, Semei a echeniei, pun üa fangala manauei pwe üpwe angeesefäli.
JOH 10:18 Esap wor eman epwe angei seniei manauei, nge üa fangala seni püsin letipei. Mi wor ai pwüüng ai üpwe fangala, a pwal wor ai pwüüng ai üpwe angeesefäli. Iei usun mine Semei a allük ngeniei, pwe üpwe föri.”
JOH 10:19 Iwe, pokiten ekei kapas ekewe chon Juta ra pwal kinikinfesen lefiler.
JOH 10:20 Chomong me leir ra apasa, “Eman anün rochopwak a wäni! A umwesila! Pwota oua aüseling ngeni?”
JOH 10:21 Nge pwal ekoch ra apasa, “Ekei kapas esap alon eman aramas eman anün rochopwak a wäni! Ifa usun, eman anün rochopwak epwe tongeni aneneloi mesen chon chun?”
JOH 10:22 Iwe, a fis ewe chulapen Efinunen ewe imwenfel lon Jerusalem.
JOH 10:23 Lon ena otun a tori fansoun patapat. Lupwen Jesus a fetal lon ewe Pwalangen Salomon me lon ewe lenien imwenfel,
JOH 10:24 ekewe chon Juta ra rongeela o aisini, “Ifa langatamen fansoun om kopwe chök likitikem lon äm tipemwaramwar? Are en Kraist, kopwe afataöchü ngenikem.”
JOH 10:25 Jesus a pölüeniir, “Üa fen ürenikemi, nge ousap lüküei. Ekewe föför üa föri fän iten Semei ra pwärätä usi.
JOH 10:26 Nge ämi ousap lükü, pun ousap nei kewe sip.
JOH 10:27 Nei kewe sip ra aüselinga mweliei, üa pwal sileer, nge ir ra tapweto müri.
JOH 10:28 Üa fang ngeniir manau esemüch, nge ir resap fokun pöütmwälila. Esap wor eman a tongeni ettiir me lepei.
JOH 10:29 Semei a ngeniei ekei sip, o i a lap seni meinisin, iwe, esap wor eman a tongeni ettiir seni lepöün Semei.
JOH 10:30 Ngang me Semei eman chök.”
JOH 10:31 Mürin ekewe chon Juta ra pwal angei fau pwe repwe mone ngeni.
JOH 10:32 Jesus a üreniir, “Üa föri chomong föför mi öch mwen mesemi, Semei a ngeniei pwe üpwe föriir. Meni lein ekewe föför oua mochen mone ngeniei fau ren?”
JOH 10:33 Iwe, ra pölüeni, “Äm aisap mochen mone ngonuk fau fän iten och föför mi öch, nge pokiten om kapasen turunufas ka apasa. Pun en eman aramas chök, nge ka püsin ekieki pwe en Kot.”
JOH 10:34 Jesus a pölüeniir, “A mak lon ämi puken Allük pwe Kot a apasa, ‘Ämi oua kot.’
JOH 10:35 Kich sia silei pwe kapasen ekewe Toropwe mi Pin ra let tori feilfeilachök. Iwe, Kot a aita ngeni ekei aramas kot, ir chokewe ra angei an Kot kapas.
JOH 10:36 Nge me rei, Semei a apiniei o tinieito won fanüfan. Epwe ifa usun ämi oupwe tongeni apasa pwe üa eäni kapasen turunufas, pokiten üa apasa pwe ngang Nöün Kot?
JOH 10:37 Ousap lüküei are üsap föri ekewe föför Semei a mochen ai üpwe föriir.
JOH 10:38 Nge are üa fen föri ekewe föför, inamwo are ousap lüküei, oupwe fokun lükü ai kewe föför, pwe oupwe silei o weweiti pwe Semei a nom loi, nge ngang üa nom lon Semei.”
JOH 10:39 Iwe, ra sotunisefäli ar repwe turufi Jesus, nge i a müttir sü seniir.
JOH 10:40 Mürin Jesus a liwinsefälila pekilan ewe chanpupu Jortan lon ewe leni ia Johannes a fen papataisi aramas ie me mwan. Iwe, a nonom ikenan.
JOH 10:41 Chomong aramas ra feito ren. Iwe, ra apasa, “Johannes esap föri och manaman, nge meinisin mine a pwärätä usun ei mwän a let.”
JOH 10:42 Iwe, chomong aramas ra lükü Jesus me ikenan.
JOH 11:1 A wor eman mwän a samau itan Lasarus seni Petania. Petania ewe telinimw ia Maria me pwiin we Marta ra nom ie.
JOH 11:2 Ei fefin Maria fefinen Lasarus, ätewe mi samau. Iei i neminewe a epiti pechen Jesus ren löpwokus o talüpwasei ren meten möküran.
JOH 11:3 Iwe, ekewe ruoman pwipwi ra tinala pworaus ren Jesus, “Äm Samol, ätewe ka fokun echeni a samau.”
JOH 11:4 Lupwen Jesus a rong ei pworaus, a apasa, “Ei samau, esap sopolan mäla. Nge popun an fis ei samau, pwe Kot epwe küna ling ren, pwal Nöün Kot epwe küna ling ren.”
JOH 11:5 Iwe, Jesus a echeni Marta me pwiin we me Lasarus.
JOH 11:6 Nge lupwen a rongorong pwe Lasarus a samau, a chök nonometiu lon ewe leni ia a nom ie pwal lon ükükün ruu rän.
JOH 11:7 Mürin a üreni nöün kewe chon kaiö, “Ousipwe liwinsefäliti Jutea.”
JOH 11:8 Nge ekewe chon kaiö ra üreni, “Sense, pollon kewe chök ekewe aramas ikenan ra mochen mone ngonuk fau. Nge iei ka pwal mochen liwinsefäliti ikenan?”
JOH 11:9 Jesus a pölüeniir, “Ifa usun, esap wor engol me ruu awa lon eu rän? Eman aramas mi fetal lerän esap chepetek, pun a küna saramen ei fanüfan.
JOH 11:10 Nge eman mi fetal lepwin a chepetek, pun esap wor saram ren.”
JOH 11:11 Mürin än Jesus apasatä ekei kapas, a pwal üreniir, “Chiechiach we Lasarus a möürüla, nge ngang üpwe feila pwe üpwe föngünätä.”
JOH 11:12 Ekewe chon kaiö ra pölüeni, “Äm Samol, are a möürüla, iwe, epwe pöchökületä.”
JOH 11:13 Jesus a fen kapas usun än Lasarus mäla, nge ekewe chon kaiö ra ekieki pwe a chök kapas usun an möür.
JOH 11:14 Iei mine Jesus a afata ngeniir, “Lasarus a mäla,
JOH 11:15 nge fänäsengesimi üa pwapwa pwe üsap nom ren, pwe ämi oupwe kaiö ngeni ämi oupwe lüküei. Ousipwe feila ren.”
JOH 11:16 Tomas, a pwal iteni Lippwe, a üreni chiechian kewe chon kaiö, “Ousipwe feila meinisin fiti ewe Sense, pwe sipwe eti i le mäla!”
JOH 11:17 Iwe, lupwen Jesus a tori ewe leni, a rongorong pwe Lasarus a fen nom lon peias lon ükükün rüanü rän.
JOH 11:18 Toauen lefilen Petania me Jerusalem ina epwe kis seni ruu mail,
JOH 11:19 nge chomong chon Juta ra feila ren Marta me Maria pwe repwe aururur ren mongeer we a mäla.
JOH 11:20 Lupwen Marta a rong pwe Jesus a feito, a feila lükün ewe sopw pwe epwe souni, nge Maria a chök nom leimw.
JOH 11:21 Iwe, Marta a üreni Jesus, “Ai Samol, are en kopwe nom ikei, mongeei we esap mäla.
JOH 11:22 Nge üa pwal silei pwe iei mwo nge Kot epwe ngonuk meinisin mine ka tüngor.”
JOH 11:23 Jesus a üreni neminewe, “Mongeom we epwe manausefälitä.”
JOH 11:24 Marta a pölüeni, “Ngang üa silei pwe epwe manausefälitä lon ewe ränin manausefäl lesopolan fanüfan.”
JOH 11:25 Iwe, Jesus a üreni, “Ngang ewe manausefäl me ewe manau. Iö a lüküei epwe manau inamwo are epwe fen mäla.
JOH 11:26 Nge iö a manau o lüküei esap fokun mäla feilfeilachök. Ifa usun, ka lükü ei?”
JOH 11:27 Marta a pölüeni, “Ewer, ai Samol, üa lükü pwe en ewe Kraist, Nöün Kot, ätewe Kot a pwon pwe epwe feito fanüfan.”
JOH 11:28 Mürin än Marta apasa ekei kapas, a liwinsefälila le imwan o köri Maria pwiin we o möngününgün ngeni, “Ewe Sense a war, nge a mochen churuk.”
JOH 11:29 Nge lupwen Maria a rongorong ekei kapas, a müttir ütä o feila ren Jesus.
JOH 11:30 Iwe, Jesus esamwo tolong lon ewe sopw, nge a chök nom lon ewe leni ia Marta a churi ie.
JOH 11:31 Ekewe aramas mi nom lon ewe imw ren Maria ar repwe aururu ra küna, pwe a müttir ütä o towu lükün. Iwe, ra tapwela mürin, pun ra ekieki pwe Maria a feila ren ewe peias pwe epwe kechü ikenan.
JOH 11:32 Maria a tori ewe leni ia Jesus a nom ie. Lon ewe chök otun a tori Jesus, a chapetiu arun pechen o üreni, “Ai Samol, are en kopwe nom ikei, mongeei we esap mäla.”
JOH 11:33 Iwe, Jesus a küna Maria pwe a kechü, pwal ekewe aramas mi tapwela mürin, letipan a fokun mwökütüküt o weires.
JOH 11:34 Iwe, a aisiniir, “Ia oua peiaseni Lasarus ie?” Ra pölüeni, “Äm Samol, kopwe feito o nenengeni.”
JOH 11:35 Iwe, Jesus a kechü.
JOH 11:36 Mürin ekewe aramas ra apasa, “Nengeni usun an tongei!”
JOH 11:37 Nge pwal ekoch ra apasa, “Esap ätei ätewe mi aneneloi mesen ewe mwän mi chun? Pwota esap tongeni amwöchü manauen Lasarus pwe esap mäla?”
JOH 11:38 Iwe, lupwen Jesus a feiliti ewe peias, a pwal mwökütükütsefäl letipan lon an weires. Ewe peias a nom lon eu achau, nge eföü fau mi watte a öpwönütiu me won.
JOH 11:39 Jesus a üra, “Oupwe ekiela ewe fau seni won ewe peias!” Nge Marta, fefinen ewe mi mäla a üreni, “Ai Samol, ei otun ewe somä epwe le fen pomach, pun a fen nom lon peias lon ükükün rüanü rän.”
JOH 11:40 Mürin Jesus a pölüeni, “Ifa usun, üsap ürenuk pwe are kopwe lükü kopwe küna lingen Kot?”
JOH 11:41 Iei mine ra ekiela ewe fau seni won ewe peias. Iwe, Jesus a netä läng o apasa, “Semei, üa kilisou ngonuk pwe ka aüselingaei.
JOH 11:42 Ngang üa silei pwe ka aüselingaei fansoun meinisin. Nge iei üa apasa ei fänäsengesin ekewe aramas mi ü ikei, pwe repwe lükü pwe en ka tinieito.”
JOH 11:43 Mürin an apasa ekei kapas, a kökkö fän mwelian mi leüömong, “Lasarus, kopwe towu!”
JOH 11:44 Iwe, Lasarus a towu, nge pöün me pechen ra finifin ngeni mangaku, won mesan a pwal finifin ngeni echö mangaku. Iwe, Jesus a üreniir, “Oupwe apichala ekewe finifin pwe epwe tongeni fetal.”
JOH 11:45 Iwe, chomong aramas mi feito pwe repwe churi Maria, ra küna mine Jesus a föri, iwe, ra lükü i.
JOH 11:46 Nge ekoch me leir ra feila ren ekewe Farisi o üreniir mine Jesus a föri.
JOH 11:47 Iei mine ekewe souasor mi lap me ekewe Farisi ra chufengen me ewe mwichen souapwüng o ra üreniir, “Met sipwe föri. Nengeni ekei manaman meinisin ei mwän a föri!
JOH 11:48 Are sipwe mwüt ngeni an epwe sopwela lon ei sokun lapalap, aramas meinisin repwe lükü i. Mürin repwe feito o atai ach imwenfel o angeala aramasach.”
JOH 11:49 Iwe, eman me leir itan Kaifas, i ewe Souasor mi Lap lon ena ier, a apasa, “Ämi ousap silei och.
JOH 11:50 Ousap mefi pwe a mürina än eman aramas epwe mäla fänäsengesin ekewe aramas meinisin, lap seni unusen aramasen fanüach repwe rosola.”
JOH 11:51 Nge Kaifas esap apasa ei ititin kapas won püsin mefian, nge pokiten i ewe Souasor mi Lap lon ena ier, a osuni pwe Jesus epwe mäla fän iten chon Juta meinisin.
JOH 11:52 Nge sap fän iter chök, pwe pwal fän iten ekewe aramasen Kot mi toropasfeil ar repwe chufengen lon eu chök mwich.
JOH 11:53 Seni ena ränin ekewe nöüwisen chon Juta ra rawei Jesus pwe repwe niela.
JOH 11:54 Iei mine Jesus esap chüen saifetal lon Jutea le pwäpwäla lein ekewe chon Juta, nge a feila ngeni eu leni arap ngeni ewe fanüapö lon eu telinimw itan Efraim. A nonom ikenan fiti nöün kewe chon kaiö.
JOH 11:55 Iwe, lupwen a arap fansoun än ekewe chon Juta we chulapen Pasofer, chomong aramas ra feitä Jerusalem seni ekewe fanü pwe repwe föri ewe angangen limelim me mwen ewe chulap.
JOH 11:56 Iwe, ra küttafetalei Jesus, nge lupwen ar chufengen lon ewe imwenfel ra aisfengen lefiler, “Met oua ekieki? Epwe feito ngeni ach ei chulap, are esap feito?”
JOH 11:57 Ekewe souasor mi lap me ekewe Farisi ra atowu eu allük ngeni aramas, pwe are eman epwe silei ia Jesus a nom ie, epwe asile ngeniir, pwe repwe turufi o fötekini.
JOH 12:1 Iwe, wonu rän me mwen ewe ränin Pasofer Jesus a tori Petania ia Lasarus, a nom ie, ätewe Jesus a amanauasefäli seni mäla.
JOH 12:2 Iwe, ra amolätä eu mongön lekuniol fän itan Jesus ikenan, nge Marta a alilis le amolätä. Lasarus pwal eman me lein ätekewe mi mot ngeni chepel fiti Jesus.
JOH 12:3 Mürin Maria a angei eu rume mi wor lö lon mi fokun pwokus o mömong mi för seni ewe irä nart, a ninätiu won pechen Jesus o talüpwasei ngeni meten möküran. Iwe, pwokusun ewe lö a ponofeil lon unusen ewe imw.
JOH 12:4 Nge Jut Iskariot, eman me lein nöün Jesus kewe chon kaiö, ätewe epwe afangamä Jesus, a apasa,
JOH 12:5 “Pwota resap amömöla ei lö pwokus won ükükün ülüpükü föün moni silifer o fangala ewe moni ngeni ekewe chon wöüngau?”
JOH 12:6 Jut a apasa ei ititin kapas, sap pokiten an ekieki ekewe chon wöüngau, nge pokiten i eman chon solä. I a tümwünü ewe moni, nge fän ekoch a pwal angei och seni fän püsin itan.
JOH 12:7 Nge Jesus a apasa, “Ousap osukosuka neminei! Oupwe mwüt ngeni pwe epwe iseis met a wor ren fän iten ewe ränin ai üpwe peias.
JOH 12:8 Ekewe chon wöüngau repwe nonom remi fansoun meinisin, nge ngang üsap nonom remi fansoun meinisin.”
JOH 12:9 Iwe, chomong aramas ra rong pwe Jesus a nom lon Petania. Iei mine ra feila ikenan, sap pokiten Jesus chök, nge pwal pokiten ar mochen küna Lasarus, ätewe Jesus a amanauasefäli seni mäla.
JOH 12:10 Iei mine ekewe souasor mi lap ra pwal ekiekin rawangauei Lasarus,
JOH 12:11 pun i popun pwe chomong chon Juta ra sü seniir o lükü Jesus.
JOH 12:12 Iwe, sorotän ewe rän eu mwichen aramas mi chomong ra feito ngeni ewe chulap o ra rongorong pwe Jesus a nom won an sai ngeni Jerusalem.
JOH 12:13 Iei mine ra angei palen ewe irä palm o feila pwe repwe churi. Iwe, ra osomong le kökkö, “Mwareiti Kot! Feiöchün ätewe a feito fän iten ewe Samol! Feiöchün ewe kingen Israel.”
JOH 12:14 Iwe, Jesus a küna eman nienifön aas o a wawa, usun a fen mak lon ekewe Toropwe mi Pin,
JOH 12:15 “Ousap niuokus, ämi aramasen Sion. Nengeni, ämi we king a feito, a wawa eman nienifön aas.”
JOH 12:16 Lon ena fansoun nöün kewe chon kaiö resap weweiti ekei mettoch. Nge lupwen Jesus a tolong lon lingan, ra chechemeni pwe a fen mak lon ekewe Toropwe mi Pin usun i, pwal usun ar föri ekei mettoch ngeni.
JOH 12:17 Iwe, ekewe aramas mi nom ren Jesus lupwen a körawu Lasarus seni lon ewe peias o amanauasefäli seni mäla ra apworausa mine a fis.
JOH 12:18 Ina popun ewe mwichen aramas mi chomong ra churi, pokiten ra rong pwe a föri ei manaman.
JOH 12:19 Mürin ekewe Farisi ra kapasfengen lefiler, “Oua küna, sisap chüen tongeni föri och! Nengeni, unusen chon fanüfan ra tapwela mürin.”
JOH 12:20 Iwe, ekoch chon Krik ra nom lein chokewe mi feitä Jerusalem pwe repwe fel ngeni Kot lupwen ewe chulap.
JOH 12:21 Ra feila ren Filip, ätei i seni Petsaita lon Kalilea. Iwe, ra üreni, “Äm samol, äm aia mochen churi Jesus.”
JOH 12:22 Filip a feila o apworausa ngeni Andru ei pworaus. Mürin ir me ruoman ra feila o asile ngeni Jesus.
JOH 12:23 Iwe, Jesus a üreniir, “Iei a war ewe fansoun pwe Nöün Aramas epwe angei lingan.
JOH 12:24 Enlet, üpwe wesewesen ürenikemi: Eföü föün wiich epwe chök nonom lon ususun are esap mworotiu lepwül o mäla. Nge are epwe mäla, mürin epwe awora chomong föün wiich.
JOH 12:25 Iö a echeni püsin manauan epwe pöüt seni, nge iö a oput püsin manauan lon ei fanüfan, manauan epwe chök nonom ngeni manau esemüch.
JOH 12:26 Iö a mochen angang ngeniei epwe tapweto müri, pun ia ngang üpwe nom ie, ikenan nei chon angang epwe pwal nom ie. Iwe, Semei epwe asamolu chokewe mi angang ngeniei.
JOH 12:27 “Iei letipei a weires. Met ngang üpwe apasa? Ifa usun, üpwe apasa, ‘Semei, kosap mwüt ngeniei pwe üpwe tolong lon ei fansoun riaföü?’ Nge ina popun üa feito fanüfan, pwe üpwe tolong lon ei fansoun riaföü.
JOH 12:28 Semei, kopwe alinga itom!” Mürin a wor eu möngüngü seni läng, “Üa fen alinga itei, nge üpwe pwal alingasefäli.”
JOH 12:29 Iwe, ewe mwichen aramas mi ütä ikenan ra rong ewe möngüngü. Ekoch me leir ra apasa pwe och chopulap, nge pwal ekoch ra apasa, “Eman chon läng a kapas ngeni.”
JOH 12:30 Nge Jesus a üreniir, “Ei möngüngü a fis esap fän itei, pwe fän itemi.
JOH 12:31 Iei ewe fansoun pwe fanüfan epwe küna kapwüng, iei ewe fansoun ewe samolun ei fanüfan epwe koturula.
JOH 12:32 Lupwen ngang üpwe tekiatä seni ei fanüfan, üpwe ofato aramas meinisin rei.”
JOH 12:33 Jesus a apasatä ei sokun kapas pwe epwe pwärätä meni sokun mäla epwe mälani.
JOH 12:34 Ewe mwichen aramas ra pölüeni, “Äm aia silei seni ekewe Allükün lamalam pwe ewe Kraist epwe manau tori feilfeilachök. Pwota ka apasa, pwe Nöün Aramas epwe tekiatä? Iön ei, ewe Nöün Aramas?”
JOH 12:35 Mürin Jesus a pölüeniir, “Ewe saram epwe nonom remi ekis chök fansoun mochomoch. Oupwe fetal lon ewe saram me mwen ewe rochopwak epwe torikemi. Pun eman aramas mi fetal lon rochopwak esap silei ia epwe feila ie.
JOH 12:36 Oupwe anomu ämi lükülük won ewe saram lupwen a nom remi, pwe oupwe wiliti aramas mi nom lon saram.” Lupwen Jesus a wes me apasa ekei kapas, a feila o op seniir.
JOH 12:37 Iei mwo än Jesus föri ekewe manaman meinisin mwen mesen ekewe aramas, nge ir resap lükü i.
JOH 12:38 Iei usun met a pwönüetä lon mine ewe soufos Aisea a kapas usun, “Äm Samol, iö a lükü ewe pworaus aia aronga? Iö ewe Samol a pwäri an manaman ngeni?”
JOH 12:39 Iei popun pwe resap tongeni lükü, pun Aisea a pwal apasa,
JOH 12:40 “Kot a achunala meser o aföüala letiper, pwe resap tongeni künakün ren meser ika wewe ren letiper, ika kul ngeniei, pwe üpwe apöchöküleretä.”
JOH 12:41 Aisea a apasa ekei kapas, pun a küna än Jesus ling o kapas usun i.
JOH 12:42 Iei mwo nge chomong ekewe nöüwisen chon Juta ra lükü Jesus. Nge pokiten ekewe Farisi, ir resap pwärätä ar lükülük, pun ra niuokus ar repwe katowu seni ar we mwich lon ewe imwen felikis.
JOH 12:43 Pun ra aücheani än aramas repwe mwareitiir, lap seni än Kot epwe mwareitiir.
JOH 12:44 Iwe, Jesus a apasa fän leüömong, “Iö a lüküei, esap chök lüküei, nge a pwal lükü ewe mi tinieito.
JOH 12:45 Iö a künaei, a pwal küna ewe mi tinieito.
JOH 12:46 Ngang üa feito fanüfan pwe üpwe eu saram, pwe meinisin mi lüküei resap nom lon rochopwak.
JOH 12:47 Are eman a rongorong ai kewe kapas, nge esap aleasochis ngeni, ngang üsap apwüngü. Ngang üsap feito fanüfan pwe üpwe apwüngü chon fanüfan, nge üa feito pwe üpwe amanaueer.
JOH 12:48 Iö a aliwiniei o esap etiwa ai kewe kapas, a wor met epwe kapwüng ren. Ewe kapas üa apasatä epwe apwüngü lon ewe sopolan rän.
JOH 12:49 Pun ngang üsap kapas fän itei, nge Semei mi tinieito a allük ngeniei met üpwe apasatä, pwal met ititin fos üpwe nöünöü.
JOH 12:50 Ngang üa silei pwe an allük a awarato manau esemüch. Iei mine met ngang üa apasa, iei chök met Semei a üreniei pwe üpwe apasatä.”
JOH 13:1 Iei ewe rän me mwen ewe chulapen Pasofer. Jesus a silei pwe a tori ewe fansoun an epwe towu seni ei fanüfan o feila ren Saman. A echeni nöün kewe mi nom won fanüfan fansoun meinisin, iwe, a echeniir tori sopolan manauan.
JOH 13:2 Iwe, Jesus me nöün kewe chon kaiö ra mongön lekuniol. Ewe Tefil a fen atolonga ewe ekiekin afangamä Jesus lon letipen Jutas nöün Simon Iskariot.
JOH 13:3 Jesus a silei pwe Saman a fen atolonga mettoch meinisin fän nemenian. A silei pwe a feito seni Kot, nge epwe pwal liwinsefäl ngeni Kot.
JOH 13:4 Iei mine a ütä seni ewe chepel, a pwilitawu üfan sekit o ri ngeni lukalapan echö taul.
JOH 13:5 Mürin a ninalong och koluk lon eu waspesen o a popuetä le talü pechen nöün kewe chon kaiö, a pwal talüpwasei pecher ngeni ewe taul a ri ngeni lukalapan.
JOH 13:6 Lupwen a tori Simon Petrus, Petrus a üreni, “Ai Samol, en kopwe talü pechei?”
JOH 13:7 Jesus a pölüeni, “En kosap weweiti mine ngang üa föri iei, nge kopwapw weweiti me mürin.”
JOH 13:8 Petrus a üreni, “Kosap fokun talü pechei!” Jesus a pölüeni, “Are üsap talü pecheöm, kosap chüen nei chon kaiö.”
JOH 13:9 Simon Petrus a üreni, “Ai Samol, kosap talü pechei chök, nge kopwe pwal talü pei me mökürei!”
JOH 13:10 Iwe, Jesus a üreni, “Eman aramas a wes me tütü a unusen limöch, esap pwal chüen tütüsefäl, nge pechen chök. Ämi meinisin oua limöch, nge eman chök leimi esap limöch.”
JOH 13:11 Jesus a fen silei iö we epwe afangamä i. Iei popun a apasa, “Ämi meinisin oua limöch, eman chök esap limöch.”
JOH 13:12 Lupwen Jesus a wes me talü pecher, a pwilitisefälielong üfan sekit o liwinsefäliti lenian arun ewe chepel. Iwe, a aisiniir, “Ifa usun, oua weweiti met ngang üa föri ngenikemi?
JOH 13:13 Ämi oua aita ngeniei Sense me Samol. A pwüng mine oua apasa usi, pun iei wisei.
JOH 13:14 Ngang ämi Samol me Sense üa talü pechemi, iei usun pwal ämi oupwe talü pechemi eman ngeni eman.
JOH 13:15 Ngang üa anomu eu lenien apirü fän itemi, pwe ämi oupwe föri usun chök met ngang üa föri ngenikemi.
JOH 13:16 Enlet, üa wesewesen ürenikemi: Eman chon angang esap lap seni an masta, nge eman chon künö esap lap seni ätewe mi tini.
JOH 13:17 Iei oua silei ekei mettoch, oupwe feiöch are oupwe apwönüretä.
JOH 13:18 “Ngang üsap kapas usumi meinisin. Üa silei chokewe üa filiiretä, nge makken lon ekewe Toropwe mi Pin epwe pwönüetä, ‘Ätewe mi mongö rei a ü ngeniei.’
JOH 13:19 Ngang üa ürenikemi ekei mettoch iei me mwen ar repwe fis, pwe lupwen repwe fis, oupwe lükü pwe Ngang ewe mi nonom tori feilfeilachök.
JOH 13:20 Enlet, üpwe wesewesen ürenikemi: Iö a etiwa ewe ngang üa tinala, a etiwaei, nge iö a etiwaei a etiwa ewe mi tinieito.”
JOH 13:21 Mürin än Jesus apasa ngeniir ekei kapas, a fokun weires lon letipan o a pwärätä ngeniir, “Enlet, üpwe wesewesen ürenikemi: Eman me leimi epwe afangamäei.”
JOH 13:22 Ekewe chon kaiö ra nenefengen lefiler, pun resap silei iö a kapas usun.
JOH 13:23 Eman me lein ekewe chon kaiö, ätewe Jesus a echeni, a mot ünükün Jesus.
JOH 13:24 Iwe, Simon Petrus a chimwe ngeni o üreni, “Kopwe aisini iö a fos usun.”
JOH 13:25 Iei mine ewe chon kaiö a roongeni Jesus o aisini, “Ai Samol, iö we?”
JOH 13:26 Jesus a pölüeni, “Ätewe ngang üpwe ngeni ewe ekis pilawa üa fen achöchönü, ina i ewe aramas.” Iei mine Jesus a angei ekis pilawa, a achöchönü o ngeni Jutas nöün Simon Iskariot.
JOH 13:27 Lon ewe chök otun Jutas a angei ewe ekis pilawa, Satan a tolong lon lelukan. Iwe, Jesus a üreni Jutas, “Kopwe chök müttir föri mine ka mochen föri.”
JOH 13:28 Nge esap wor eman mi mot ngeni chepel a weweiti pwota Jesus a fos lon ei ititin kapas ngeni Jutas.
JOH 13:29 Pokiten Jutas a wisen tümwünü ewe moni, ekoch me lein ekewe chon kaiö ra ekieki pwe Jesus a üreni pwe epwe feila o kamö met ra osupwang ren fän iten ewe chulap, ika epwe fangala och ngeni ekewe chon wöüngau.
JOH 13:30 Iwe, lon ewe chök otun Jutas a angei ewe ekis pilawa, a towu lükün, nge a pwin.
JOH 13:31 Mürin än Jutas feila, Jesus a üra, “Iei lingen Nöün Aramas a pwäla. Iei lingen Kot a pwäla ren i.
JOH 13:32 Are lingen Kot a pwäla ren i, mürin Kot epwe pwal pwäri lingen Nöün Aramas lon püsin i, nge epwe müttir alingala.
JOH 13:33 Ämi nei kana, esap chüen tam fansoun ai nonom remi. Ämi oupwe küttaei. Nge iei üpwe ürenikemi mine üa fen üreni ekewe nöüwisen chon Juta, ‘Ousap tongeni feila ewe ia ngang üpwe feila ie.’
JOH 13:34 Iei üpwe ngenikemi eu allük mi fö: Oupwe echenifengenikemi lefilemi. Usun ngang üa echenikemi, iei usun pwal ämi oupwe echenifengenikemi.
JOH 13:35 Are oupwe echenifengenikemi, aramas meinisin repwe silei, pwe ämi nei chon kaiö.”
JOH 13:36 Iwe, Simon Petrus a aisini Jesus, “Ai Samol, ia kopwe feila ie?” Jesus a pölüeni, “Kosap tongeni etiei iei ia ngang üpwe feila ie. Nge me mürin kopwe tapweto müri.”
JOH 13:37 Petrus a aisini, “Ai Samol, pwota üsap tongeni etuk iei? Ngang üa fen molotä ai üpwe mäla fän itom!”
JOH 13:38 Jesus a pölüeni, “Ifa usun, ka wesewesen molotä om kopwe mäla fän itei? Enlet, üpwe wesewesen ürenuk: Mwen än ewe chuko epwe kökkö en kopwe amamäsiniei fän ülüngat.”
JOH 14:1 Iwe, Jesus a üreni nöün kewe chon kaiö, “Ousap lolilen lon lelukemi. Oupwe lükü Kot, nge oupwe pwal lüküei.
JOH 14:2 Mi wor chomong ruum lon imwen Semei. Üpwe feila o amolätä leniemi. Üsap ürenikemi ei are esap let.
JOH 14:3 Mürin ai üpwe feila o amolätä leniemi, üpwe pwal liwinsefälito o angeekemi, pwe oupwe nonom rei, pwe ia ngang üpwe nom ie, iei ämi oupwe pwal nom ie.
JOH 14:4 Ämi oua silei ewe al a ale ngeni ewe leni ia üpwe feila ie.”
JOH 14:5 Iwe, Tomas a üreni, “Ai Samol, äm aisap silei ia kopwe feila ie. Epwe ifa usun äm aipwe silei ewe al?”
JOH 14:6 Jesus a üreni, “Ngang ewe al me ewe let me ewe manau. Esap wor eman epwe tongeni feila ren Semei me lüki.”
JOH 14:7 Iwe, a pwal üreniir, “Are oupwe sileei, oupwe pwal silei Semei. Iwe, seni ei fansoun oua silei i, oua pwal küna i.”
JOH 14:8 Filip a üreni, “Ai Samol, kopwe pwäri ngenikem Semom, ina chök mine äm aia tüngor.”
JOH 14:9 Jesus a üreni, “A fansoun langatam ai üa nonom remi, nge en Filip kosap mwo sileei? Iö a künaei, a küna Semei. Pwota ka tongeni apasa, pwe üpwe pwäri ngenikemi Semei?
JOH 14:10 Filip, ifa usun, kosap lükü, pwe ngang üa nom lon Semei, nge Semei a nom loi?” Mürin Jesus a üreni nöün kewe chon kaiö, “Ekewe kapas üa fen ürenikemi resap pop seniei, nge Semei mi nonom loi a föri an angang.
JOH 14:11 Oupwe chök lüküei lupwen üa apasa pwe ngang üa nom lon Semei, nge Semei a nonom loi. Are ousap lükü mine üa apasa, oupwe lükü pokiten ekewe föför üa föriir.
JOH 14:12 Enlet, üpwe wesewesen ürenikemi: Iö a lüküei epwe föri ekewe föför ngang üa föriir, ewer, epwe pwal mwo nge föri föför mi lap seni ekei, pun ngang üpwe feila ren Semei.
JOH 14:13 Iwe, meinisin mine oupwe tüngor fän itei üpwe apwönüetä, pwe Semei epwe küna ling rei.
JOH 14:14 Are oupwe tüngor och fän itei, üpwe apwönüetä.
JOH 14:15 “Iwe, are oua echeniei, oupwe aleasochisi ai kewe allük.
JOH 14:16 Üpwe tüngor ngeni Semei, iwe i epwe ngenikemi pwal eman Soualilis, epwe nonom remi tori feilfeilachök.
JOH 14:17 I ewe Ngünmifel, a pwärätä mine a let usun Kot. Chon fanüfan resap tongeni angei, pun resap tongeni küna are silei i. Nge ämi oua silei i, pokiten a nonom remi, epwe pwal nonom lomi.
JOH 14:18 Üsap likitikemi usun ekewe mi mäsen. Üpwe liwinsefälito remi.
JOH 14:19 Mürin ekis chök fansoun, chon fanüfan resap chüen künaei. Nge ämi oupwe künaei. Iwe, pokiten ngang üa manau, ämi oupwe pwal manau.
JOH 14:20 Lon ena rän ämi oupwe silei pwe ngang üa nonom lon Semei, nge ämi oua nonom loi, usun chök ngang üa nonom lomi.
JOH 14:21 Iö a etiwa ai kewe allük o aleasochisiir, i ätewe mi echeniei. Nge iö a echeniei Semei epwe echeni. Pwal ngang üpwe echeni o pwäri ngeni ususi.”
JOH 14:22 Mürin Jutas, (sap Jutas Iskariot) a üreni, “Ai Samol, ifa usun an epwe tongeni fis pwe kopwe pwäri ngenikem ususum, nge kosap pwäri ngeni chon fanüfan?”
JOH 14:23 Jesus a pölüeni, “Are eman a echeniei, epwe aleasochisi ai kewe kapas. Iwe, Semei epwe echeni, o Semei me ngang aipwe feito ren o imweimw lon.
JOH 14:24 Iö esap echeniei, esap aleasochisi ai kewe kapas. Iwe, ekewe kapas oua rongorong resap ai, nge än Semei we mi tinieito.
JOH 14:25 Ekei mettoch meinisin üa fen ürenikemi lupwen üa chüen nom remi.
JOH 14:26 Nge ewe Soualilis, ewe Ngünmifel, Semei epwe tinato fän itei, epwe aiti ngenikemi ekei mettoch meinisin o achema ngenikemi meinisin mine üa fen ürenikemi.
JOH 14:27 Kinamwe üa likiti ngenikemi, ai kinamwe üa fang ngenikemi. Ai lifang esap wewe ngeni än fanüfan lifang. Ousap lolilen lon lelukemi, ousap pwal niuokus.
JOH 14:28 Ämi oua rongorong pwe üa ürenikemi, ‘Ngang üpwe feila, nge üpwe liwinsefälito remi.’ Are oupwe echeniei, ämi oupwe pwapwa ren, pwe üpwe feila ren Semei, pun Semei a tekia seniei.
JOH 14:29 Iwe, üa fen ürenikemi ekei mettoch me mwen ar repwe fis, pwe lupwen ar repwe fis, ämi oupwe lükü.
JOH 14:30 Üsap chüen kapas chomong ngenikemi, pun ewe samolun ei fanüfan epwele war. Esap wor an nemenem woi.
JOH 14:31 Nge chon fanüfan repwe fokun silei pwe ngang üa echeni Semei. Ina popun ngang üa föri meinisin mine i a allük ngeniei. Ousipwe feila seni ikei.”
JOH 15:1 “Ngang wesewesen ewe irän wain, nge Semei ewe chon tümwünü ewe tanipin wain.
JOH 15:2 Epwe pöküela ekewe palan meinisin mi nonom loi resap ua, nge ekewe palan meinisin mi ua, epwe limetiir, pwe epwe chomongola uar.
JOH 15:3 Ämi oua fen limöch pokiten ekewe kapas üa ürenikemi.
JOH 15:4 Oupwe nonom loi, nge ngang üpwe nonom lomi. Usun efoch palen irän wain esap tongeni püsin ua, are esap nonom lon ewe irän wain, iei usun pwal ämi ousap tongeni püsin ua are ousap nonom loi.
JOH 15:5 “Ngang ewe irän wain, ämi palan kana. Iö a nonom loi, nge ngang lon, epwe uani ua mi chomong, pun lüki ousap tongeni föri och.
JOH 15:6 Iö esap nonom loi, epwe koturula usun efoch palen irän wain o epwe pwasala. Ekei sokun palan repwe ioifengen o koturulong lon ekkei pwe repwe karala.
JOH 15:7 Are ämi oupwe nonom loi, nge ai kewe kapas repwe nonom lomi, oupwe tüngor meinisin mine oua mochen, iwe, epwe torikemi.
JOH 15:8 Iei chök mine Semei epwe küna ling ren, are oupwe uani ua mi chomong o pwärala pwe ämi nei chon kaiö.
JOH 15:9 Usun Semei a echeniei, iei usun üa echenikemi, oupwe nonom lon ai chen.
JOH 15:10 Are oua aleasochisi ai kewe allük, oupwe nonom lon ai chen, usun ngang üa aleasochisi än Semei kewe allük o nonom lon an chen.
JOH 15:11 “Ngang üa fen ürenikemi usun ekei mettoch, pwe ai pwapwa epwe nom lomi o ämi pwapwa epwe unusöch.
JOH 15:12 Iei ai allük: Oupwe echenifengenikemi lefilemi usun ngang üa echenikemi.
JOH 15:13 Esap wor eman a eäni chen mi lapalap seni ei chen, are eman a pölükü manauan fän iten chiechian kana.
JOH 15:14 Iwe, ämi chiechiei kana, are oupwe apwönüetä mine üa allük ngenikemi.
JOH 15:15 Üsap chüen aita ngenikemi nei chon angang, pun eman chon angang esap silei mine an samol a föri. Nge üa aita ngenikemi chiechiei, pun üa asile ngenikemi meinisin mine üa rongorong me ren Semei.
JOH 15:16 Ämi ousap afiliei, nge ngang üa afilikemi o awisakemi, pwe oupwe feila o uani ua mi chomong, ewe sokun ua mi nonomola. Iei usun Semei epwe ngenikemi meinisin mine oua tüngor fän itei.
JOH 15:17 Iei ai allük ngenikemi: Oupwe echenifengenikemi lefilemi!
JOH 15:18 “Are fanüfan a oput ämi, oupwe chök chechemeni pwe a fen akomwen oputaei.
JOH 15:19 Are oupwe pop seni ei fanüfan, ei fanüfan epwe echenikemi usun nöün kana. Nge ämi ousap pop seni ei fanüfan, pun ngang üa afilikemi seni fanüfan, ina popun fanüfan a oput ämi.
JOH 15:20 Oupwe chechemeni pwe üa ürenikemi, ‘Esap wor eman chon angang a lap seni an masta.’ Are ra ariaföüüei, repwe pwal ariaföüükemi. Are ra aleasochisi ai kewe kapas, repwe pwal aleasochisi ämi kewe kapas.
JOH 15:21 Repwe föri ngenikemi ekei mettoch meinisin, pokiten ämi nei. Pun resap silei ewe mi tinieito.
JOH 15:22 Are üsap feito o kapas ngeniir, esap wor ar tipis. Nge iei esap chüen wor ar künetipingen ren ar tipis.
JOH 15:23 Iö a oputaei a pwal oputa Semei.
JOH 15:24 Are ngang üsap föri leir ekewe föför esap mwo wor eman a föriir, esap wor ar tipis. Iwe, iei ra küna ekewe manaman üa föriir, nge ra fen oputaei me Semei.
JOH 15:25 Nge ei a fis pwe epwe pwönüetä mine a mak lon pwüngün ar lamalam, ‘Ra oputaei, nge esap wor popun.’
JOH 15:26 Iwe, lupwen ewe Soualilis epwe war, ngang üpwe tinato remi seni Semei, i ewe Ngünmifel mi pwärätä mine a let usun Kot, a feito seni Semei, i epwe pwärätä usi.
JOH 15:27 Pwal ämi oupwe pwärätä usi, pun ämi oua nonom rei seni lepopun.
JOH 16:1 “Ngang üa fen ürenikemi ekei kapas, pwe ämi ousap tok seni ämi lükülük.
JOH 16:2 Repwe atowukemi seni ar mwich lon ar kewe imwen felikis. Nge epwe war ewe fansoun lupwen chokewe mi nikemi repwe ekieki, pwe ar föför eu angang ngeni Kot.
JOH 16:3 Aramas repwe föri ekei sokun föför ngenikemi, pun resap mwo silei Semei, resap pwal sileei.
JOH 16:4 Nge üa fen ürenikemi ekei kapas, pwe lupwen epwe war ewe fansoun ar repwe föri ngenikemi ekei mettoch, ämi oupwe chemeni mine üa fen ürenikemi. Üsap ürenikemi ekei mettoch seni lepoputän, pun ngang üa nom remi.
JOH 16:5 “Iwe, iei üpwe feila ren ewe mi tiniei, nge esap wor eman leimi a aisiniei ia üpwe feila ie.
JOH 16:6 Nge pokiten üa ürenikemi ekei kapas, oua uren lolilen.
JOH 16:7 Nge üpwe ürenikemi mine a let: Oupwe feiöch ren ai üpwe feila. Pun are ngang üsap feila, ewe Soualilis esap feito remi. Nge are üpwe feila, üpwe tinato remi ewe Soualilis.
JOH 16:8 Iwe, lupwen epwe war, epwe amefi ngeni chon fanüfan usun ar tipis, usun pwüng pwal usun än Kot apwüng.
JOH 16:9 Epwe amefi ngeniir usun ar tipis, pun resap lüküei.
JOH 16:10 Epwe amefi ngeniir usun pwüng, pun ngang üpwe feila ren Semei o ämi ousap chüen künaei.
JOH 16:11 Epwe pwal amefi ngeniir usun apwüng, pun ewe samolun ei fanüfan a fen küna apwüng.
JOH 16:12 Mi chüen wor chomong mettoch üpwe ürenikemi, nge epwe fokun weires ngenikemi iei.
JOH 16:13 Nge lupwen epwe war ewe Ngünmifel mi pwärätä mine a let usun Kot, i epwe emwenikemiilong lon ewe let mi unusöch. Esap kapas fän püsin itan, nge epwe kapas usun met a rongorong o ürenikemi usun ekewe mettoch repwe feito.
JOH 16:14 Epwe alingaei, pun epwe angei seni mine ai o aronga ngenikemi.
JOH 16:15 Mettoch meinisin mine än Semei, iei pwal ai. Iei popun üpwe ürenikemi pwe ewe Ngünmifel epwe angei seni mine ai o aronga ngenikemi.
JOH 16:16 “Lon ekis chök fansoun ämi ousap chüen künaei, nge pwal ekis chök fansoun mürin oupwe künaei.”
JOH 16:17 Iwe, ekoch me lein nöün kewe chon kaiö ra aisfengen lefiler, “Met wewen ekei kapas a ürenikich, ‘Lon ekis chök fansoun ämi ousap chüen künaei, nge pwal ekis chök fansoun mürin oupwe künaei?’ A pwal apasa, ‘Ei epwe fis, pun üa feila ren Semei.’
JOH 16:18 Met chök wewen ‘ekis chök fansoun?’ Kich sisap silei mine a kapas usun!”
JOH 16:19 Jesus a silei pwe ra mochen kapas ais ngeni usun ei mettoch, iei mine a üreniir, “Ifa usun, oua aisfengen lefilemi met wewen ai apasa, ‘Ekis chök fansoun ämi ousap chüen künaei, nge pwal ekis chök fansoun mürin oupwe künaei’?
JOH 16:20 Enlet, üpwe wesewesen ürenikemi: Ämi oupwe kechü o ngüngüres, nge fanüfan epwe fokun pwapwa. Ämi oupwe lolilen, nge ämi lolilen epwe wiliti pwapwa.
JOH 16:21 Lupwen eman fefin a arap ngeni fansoun an epwe nöünöü, a metek. Nge lupwen a wes me nöünätiu nöün we, a manlükala an we metek mi weires, pun a pwapwa pwe eman mönükol a uputiu won fanüfan.
JOH 16:22 Ina usun pwal ämi: Iei oua lolilen, nge üpwe pwal künasefälikemi, mürin lelukemi epwe ur ren pwapwa, nge ei pwapwa esap wor eman epwe tongeni angei senikemi.
JOH 16:23 Lon ena rän ämi ousap chüen aisiniei och. Enlet, üpwe wesewesen ürenikemi: Semei epwe ngenikemi meinisin mine oua tüngor fän itei.
JOH 16:24 Tori iei ousap tüngor mwo och fän itei. Oupwe tütüngor, iwe, oupwe angei pwe ämi pwapwa epwe unusöch.
JOH 16:25 “Iwe, üa fen kapas ngenikemi usun ekei mettoch lon kapas monomon. Nge epwe war ewe fansoun lupwen üsap chüen kapas ngenikemi lon kapas monomon, nge üpwe kapas ngenikemi usun Semei lon kapas mi fat.
JOH 16:26 Lupwen epwe tori ena rän, ämi oupwe tüngor ngeni Semei fän itei. Üsap apasa, pwe ngang üpwe tüngor och fän itemi,
JOH 16:27 pun Semei a püsin echenikemi. A echenikemi, pun ämi oua echeniei o lükü pwe üa feito seni Kot.
JOH 16:28 Üa feito seni Semei o feitiu fanüfan. Nge iei üpwe towu seni fanüfan o liwinsefälila ren Semei.”
JOH 16:29 Mürin nöün kewe chon kaiö ra üreni, “Iei a fat om kapas ngenikem, nge kosap chüen aea kapas monomon.
JOH 16:30 Iei äm aia silei, pwe en ka silei mettoch meinisin. Kosap osun än eman epwe kapas ais ngonuk, iei popun äm aia lükü, pwe en ka feito seni Kot.”
JOH 16:31 Jesus a üreniir, “Oua wesewesen lüküei?
JOH 16:32 Nengeni, epwe war ewe fansoun, nge a fen tori, lupwen ämi meinisin oupwe toropasfeil lon en me lenian o ngang üpwe chök emanüla. Nge ngang üsap wesewesen emanüla, pun Semei a nom rei fansoun meinisin.
JOH 16:33 Ngang üa fen ürenikemi usun ekei mettoch, pwe oupwe eäni kinamwe loi. Lon fanüfan ämi oupwe riaföü, nge oupwe apilükülük, pun ngang üa akufu fanüfan.”
JOH 17:1 Mürin än Jesus apasa ekei kapas, a anetai mesan ngeni läng o a apasa, “Semei, a tori ewe otun. Kopwe alingala Noumw, pwe Noumw epwe pwal alingala en.
JOH 17:2 Pun ka ngeni nemenem won aramas meinisin, pwe epwe ngeni chokewe en ka ngeni manau esemüch.
JOH 17:3 Iwe, iei manau esemüch: Ar repwe silei en, ewe eman chök Kot mi let, repwe pwal silei Jesus Kraist, ewe ka tinato.
JOH 17:4 Üa fen alingok won fanüfan o awesala ewe angang ka ngeniei pwe üpwe föri.
JOH 17:5 Semei, iei kopwe alingaei me mwen mesom, ren ewe chök ling üa eäni lupwen üa nom reöm mwen fanüfan esamwo wor.
JOH 17:6 Üa pwärala itom ngeni chokewe ka ngeniei seni won fanüfan. Ir noumw kewe, nge ka fang ir ngeniei o ra aleasochisi om kewe kapas.
JOH 17:7 Iwe, iei ra silei pwe mettoch meinisin ka ngeniei ra feito senuk.
JOH 17:8 Pun üa ngeniir ekewe kapas en ka fen ngeniei o ir ra etiweer. Iwe, ra silei pwe a let pwe üa feito senuk o ir ra lükü, pwe ka tinieito.
JOH 17:9 Ngang üa iotek fänäsengesiir. Üsap iotek fänäsengesin chon fanüfan, nge fänäsengesin chokewe ka ngeniei, pun ir noumw.
JOH 17:10 Chokewe meinisin ir nei pwal noumw, nge chokewe meinisin ir noumw pwal nei, iwe, ai ling a pwäpwäla me rer.
JOH 17:11 Iwe, iei üpwe feila reöm. Üsap chüen nom lon ei fanüfan, nge ir ra nom lon ei fanüfan. Semei mi pin, kose mochen kopwe tümwünüür ren manamanen itom we, ewe it ka ngeniei, pwe ir repwe eu usun chök en me ngang sia eu.
JOH 17:12 Lupwen ngang üa nom rer, üa tümwünüür ren manamanen itom we, ewe it ka ngeniei. Üa tiirela, pwe esap wor eman me leir a pöütüla, chilon chök ewe eman mi feil ngeni an epwe pöütüla, pwe epwe pwönüetä mine a mak lon ekewe Toropwe mi Pin.
JOH 17:13 Iwe, iei üpwe feila reöm. Üa kapas usun ekei mettoch lupwen üa chüen nom lon fanüfan, pwe repwe eäni unusen ai we pwapwa lon leluker.
JOH 17:14 Üa ngeniir om kapas, nge fanüfan a oputeer, pun ir resap pop seni ei fanüfan, usun chök ngang üsap pop seni ei fanüfan.
JOH 17:15 Üsap tüngor pwe kopwe angeer seni lon ei fanüfan, nge üa tüngor pwe kopwe tümwünüür seni ewe Eman mi Ngau.
JOH 17:16 Usun ngang üsap pop seni ei fanüfan, iei usun ir resap pop seni ei fanüfan.
JOH 17:17 Kopwe apiniir lon ewe let. Om kapas a let.
JOH 17:18 Usun en ka tinieilong lon fanüfan, iei usun pwal ngang üa tiniirela won fanüfan.
JOH 17:19 Iwe, üa püsin apiniei fänäsengesiir, pwe pwal ir repwe pin lon let.
JOH 17:20 Nge üsap chök iotek fän iter, pwe üa pwal iotek fän iten chokewe mi lüküei ren ar afalafal.
JOH 17:21 Semei, üa iotek pwe ir meinisin repwe eu chök. Usun chök en ka nonom loi, nge ngang üa nonom lomw, iei usun ir repwe nonom loch, pwe fanüfan epwe lükü pwe en ka tinieito.
JOH 17:22 Ngang üa ngeniir ewe ling en ka ngeniei, pwe repwe eu chök usun kich sa eu:
JOH 17:23 Ngang üa nonom lor o en ka nonom loi, pwe ar eufengen epwe unus, pwe fanüfan epwe silei pwe en ka tinieito, epwe pwal silei pwe en ka echeniir usun ka echeniei.
JOH 17:24 Semei, üa mochen pwe chokewe ka ngeniei repwe nonom rei ia ngang üpwe nom ie, pwe repwe nenengeni ai we ling ka fen ngeniei, pun ka echeniei mwen fanüfan esamwo wor.
JOH 17:25 Semei mi pwüng! Fanüfan esap silei en, nge ngang üa sileek, nge chokei ra silei pwe en ka tinieito.
JOH 17:26 Ngang üa asile ngeniir itom, nge üpwe sopwela ai föri iei usun, pwe ewe chen ka eäni ngeniei epwe nonom lor, pwal ngang üpwe nonom lor.”
JOH 18:1 Mürin än Jesus wes le iotek, a feila fiti nöün kewe chon kaiö pekilan ewe öüwö Kitron. Ikenan mi wor eu tanipi, i me nöün kewe chon kaiö ra tolong lon.
JOH 18:2 Iwe, Jutas, ewe chon afangamä, a silei ewe leni, pun Jesus me nöün kewe chon kaiö ra soun chufengen ikenan.
JOH 18:3 Iei mine Jutas a feila ren ewe tanipi, o a emwenala eu mwichen sounfiu seni Rom me ekoch chon tümwünü imwenfel, ekewe souasor mi lap me ekewe Farisi ra tiniirela. Ra uwou pisekin maun, lamp me töl.
JOH 18:4 Jesus a silei meinisin mine epwe fis ngeni, iei mine a feila rer o aisiniir, “Iö oua kütta?”
JOH 18:5 Ra pölüeni, “Jesus seni Nasaret.” Jesus a üreniir, “Ngang ätewe.” Iwe, Jutas, ewe chon afangamä a pwal ütä rer.
JOH 18:6 Lupwen Jesus a üreniir, pwe i ätewe, ra nimärämärsefäl o turula lepwül.
JOH 18:7 Jesus a aissefäl ngeniir, “Iö oua kütta?” Ra pölüeni, “Jesus seni Nasaret.”
JOH 18:8 Jesus a üreniir, “Üa fen ürenikemi pwe ngang ätewe. Iei mine are oua küttaei, oupwe mwüt ngeni ätekei pwe repwe feila.”
JOH 18:9 Jesus a apasa ei ititin kapas pwe epwe pwönüetä mine a fen apasa, “Semei, esap wor eman me lein ätekewe ka ngeniei a pöüt seniei.”
JOH 18:10 Mürin Simon Petrus, ätewe a wor nöün ketilas, a üttawu nöün ketilas o pöküela selingefichin nöün ewe Souasor mi Lap we chon angang. Iten ewe chon angang Malkus.
JOH 18:11 Iwe, Jesus a üreni Petrus, “Kopwe aliwinsefälielong noumw ketilas lon tükütükün. Ifa usun, ka ekieki pwe üsap ün seni ewe kapen riaföü Semei a ngeniei?”
JOH 18:12 Mürin ewe mwichen sounfiu fiti nöür we meilap, pwal ekewe chon Juta mi tümwünü ewe imwenfel ra turufi Jesus o fötekini.
JOH 18:13 Ra akomwen emwenala ren Anas, pun i semen pwülüen Kaifas mi Souasor mi Lap lon ewe ier.
JOH 18:14 Kaifas ätewe mi öüröüra ekewe nöüwisen chon Juta, pwe a mürina än eman aramas epwe mäla fänäsengesin aramas meinisin.
JOH 18:15 Iwe, Simon Petrus me pwal eman seni ekewe chon kaiö ra tapwela mürin Jesus. Ewe eman chon kaiö a sil me ren ewe Souasor mi Lap, iei mine a eti Jesus le tolong lon ewe leni lükün imwen ewe Souasor mi Lap,
JOH 18:16 nge Petrus a chök ütä lükün ewe asamen tolong. Mürin ewe eman chon kaiö a liwinsefäliwu lükün o kapas ngeni ewe föpwül mi wisen mamasa ewe asamen tolong o a emwenalong Petrus lon ewe leni.
JOH 18:17 Iwe, ewe föpwül mi nom ünükün ewe asam a üreni Petrus, “Ifa usun, sap pwal en eman nöün enan mwän kewe chon kaiö?” Petrus a pölüeni, “Apw, sap pwal ngang.”
JOH 18:18 Lon ena fansoun a patekich, iei mine ekewe chon angang me ekewe chon tümwünü ewe imwenfel ra aküw eu ekkei o ütä ünükün pwe ra apwichipwichiir. Petrus a pwal ütä rer o etiir le apwichipwichi.
JOH 18:19 Iwe, ewe Souasor mi Lap a aisini Jesus usun nöün kewe chon kaiö pwal usun an afalafal.
JOH 18:20 Jesus a pölüeni, “Fansoun meinisin üa kapas le pwäpwäla ngeni aramas meinisin. Üa afalafal lon ekewe imwen felikis pwal lon ewe imwenfel ia ekewe aramas meinisin ra mwichfengen ie. Üsap apasa och le monomon.
JOH 18:21 Pwota ka kapas ais ngeniei won ei. Kopwe aisini ekewe aramas mi rong ai kewe afalafal. Kopwe aisiniir met üa kapas won, ir ra silei mine üa eäni afalafal.”
JOH 18:22 Lupwen Jesus a apasatä ekei kapas, eman me lein ekewe chon tümwünü imwenfel mi ü ünükün a pösapei o apasa, “Pwota ka nöünöü ei ititin kapas ngeni ewe Souasor mi Lap?”
JOH 18:23 Jesus a pölüeni, “Are üa apasatä och kapas mi mwäl, kopwe alletätä met a mwäl. Nge are ngang üa pwüng lon met üa apasa, pwota ka pösapeei?”
JOH 18:24 Mürin Anas a tinala Jesus ren Kaifas ewe Souasor mi Lap, nge a chüen fötek.
JOH 18:25 Lupwen Petrus a chüen ütä o apwichipwichi, eman a aisini, “Ifa usun, sap pwal en eman me lein nöün ätenan kewe chon kaiö?” Nge Petrus a amam o apasa, “Apw, sap pwal ngang.”
JOH 18:26 Iwe, eman me lein nöün ewe Souasor mi Lap kewe chon angang, i eman märärin ewe mwän Petrus a pöküela selingan a aisini, “Ifan usun, üsap künok me lon ewe tanipi pwe ka eti ätenan?”
JOH 18:27 Nge Petrus a amamsefäl. Lon ewe chök otun eman chuko a kökkö.
JOH 18:28 Lesosorusich chök nge ra emwenala Jesus seni imwen Kaifas ngeni imwen ewe kepina. Nge ekewe nöüwisen chon Juta resap tolong lon ewe imw, pun ra mochen ar repwe limöch o apwönüetä pwüngün ar lamalam, lupwen repwe mongö ewe mongön Pasofer.
JOH 18:29 Iei mine Pilatus a towu rer o aisiniir, “Met oua atipisi ei mwän ren?”
JOH 18:30 Ra pölüeni, “Äm aisap tongeni emwenato ei mwän, are esap wor an föföringau.”
JOH 18:31 Pilatus a üreniir, “Ämi oupwe püsin apwüngü won pwüngün ämi allük.” Nge ir ra pölüeni, “Esap mwümwütä ngenikem pwe aipwe apwüngala än eman epwe mäla.”
JOH 18:32 Ei a fis an epwe pwönüetä met Jesus a apasa usun meni sokun mäla epwe mäli.
JOH 18:33 Iwe, Pilatus a liwinsefälilong lon imwan o a allük pwe repwe emwenato Jesus ren. A aisini, “Ifa usun, en nöün chon Juta we king?”
JOH 18:34 Jesus a pölüeni, “Ifa usun, ei kapas ais a feito senuk, ika ekoch ra ürenuk och usi?”
JOH 18:35 Pilatus a pölüeni, “Ifa usun, ka ekieki pwe ngang eman re Juta? Püsin aramasen fanüom me ekewe souasor mi lap ra aturuk rei. Met ka föri?”
JOH 18:36 Jesus a üreni, “Mwüi esap pop seni ei fanüfan. Are mwüi epwe pop seni ei fanüfan, nei kewe chon angang repwe fiu pwe repwe tümwünüei, pwe üsap oolong lepöün ekewe nöüwisen chon Juta. Nge mwüi esap pop seni ikei.”
JOH 18:37 Iei mine Pilatus a aisini, “Iwe, met, en eman king?” Jesus a pölüeni, “En ka fen apasa pwe ngang eman king. Popun ai uputiu o tolong lon ei fanüfan, pwe üpwe pwärätä mine a let. Iö a pop seni let epwe aüselingaei.”
JOH 18:38 Iwe, Pilatus a aisini, “Met ewe a let?” Mürin Pilatus a liwinsefäliwu lükün ren ekewe aramas o a üreniir, “Üsap küna och tipis ren ei mwän an epwe ninnila.
JOH 18:39 Nge lon pwüngün örüniemi üpwe amusawu eman chon fötek ngenikemi lupwen fansoun chulapen Pasofer. Ifa usun, oua mochen ai üpwe amusawu ngenikemi nöümi we king?”
JOH 18:40 Iwe, ra kökkö fän leüömong, “Apwi, sap i. Kopwe amusa ngenikem Parapas.” (Parapas i eman chon achomau.)
JOH 19:1 Mürin Pilatus a üreni ekewe sounfiu, “Oupwe etekinala Jesus o wichi.”
JOH 19:2 Iwe, ekewe sounfiu ra fittiifengeni palen iräfölüföl o isetä won möküran pwe mwärin, ra pwal aüfa ngeni echö üf mi parachol.
JOH 19:3 Ra feito ren o apasa, “Ränallim ngonuk, en kingen chon Juta!” Iwe, ra pwal pösapei.
JOH 19:4 Iwe, Pilatus a pwal liwinsefäliwu rer o üreni ewe mwichen aramas, “Nengeni, üpwe emwenawu ätei remi, pwe oupwe silei pwe ngang üsap küna och tipis ren an epwe ninnila.”
JOH 19:5 Iei mine Jesus a towu lükün, a mwärämwär epa mwäramwär seni palen iräfölüföl o üföüf echö üf mi parachol. Iwe, Pilatus a üreniir, “Nengeni, iei i ewe aramas!”
JOH 19:6 Lupwen ekewe souasor mi lap me ekewe chon tümwünü imwenfel ra küna Jesus, ra kökkö fän leüömong, “Kopwe iräpengesi! Kopwe iräpengesi!” Pilatus a üreniir, “Oupwe angei ätei o iräpengesi. Ngang üsap küna och tipis ren an epwe ninnila.”
JOH 19:7 Nge ewe mwichen aramas a pölüeni, “A wor rem eu allük a apasa pwe ätei epwe mäla, pun a apasa pwe i Nöün Kot.”
JOH 19:8 Lupwen Pilatus a rong ekei kapas, a fokun niuokus.
JOH 19:9 A liwinsefälilong lon ewe imw o aisini Jesus, “Ia ka feito me ie?” Nge Jesus esap pölüeni och.
JOH 19:10 Iei mine Pilatus a üreni, “Ifa usun, kosap mochen kapas ngeniei? Kosap silei pwe a wor ai pwüüng ai üpwe angasookala, pwal ai pwüüng ai üpwe apasa pwe kopwe iräpenges?”
JOH 19:11 Jesus a pölüeni, “A chök wor om pwüüng woi pokiten Kot a ngonuk. Iei mine ätewe mi atolongaei lepoumw a kon watte an tipis lap seni om.”
JOH 19:12 Iei mine Pilatus a sotuni le kütta efoch al an epwe angasa Jesus. Nge ewe mwichen aramas a kökkö ngeni fän leüömong, “Are en kopwe angasala ätei, kosap chiechien Sisar! Pun eman mi püsin apasa pwe i king, a ü ngeni Sisar!”
JOH 19:13 Lupwen Pilatus a rongorong ekei kapas, a emwenawu Jesus lükün o a mottiu won an lenien motun souapwüng, lon ewe leni itan “Chech fau.” (Lon kapasen Ipru: Kapata.)
JOH 19:14 Ei otun ina epwe le arapakan leoloasen ewe rän mwen ewe chulapen Pasofer. Pilatus a üreni ekewe aramas, “Nengeni, iei i nöümi we king!”
JOH 19:15 Nge ir ra kökkö ngeni fän leüömong, “Kopwe niela, kopwe niela, kopwe iräpengesi!” Pilatus a aisiniir, “Ifa usun, oua mochen pwe üpwe iräpengesi nöümi king?” Ekewe souasor mi lap ra pölüeni, “Esap wor eman nöüm king pwe Sisar chök.”
JOH 19:16 Mürin Pilatus a mwüt ngeniir Jesus pwe epwe iräpenges. Iwe, ekewe sounfiu ra angei Jesus.
JOH 19:17 Iwe, Jesus a mwärei an iräpenges, a towu lükün ewe telinimw o feila lon ewe leni itan “Lenien Pösökün Mökür” lon kapasen Ipru “Kolkota”.
JOH 19:18 Ikenan ra iräpengesi Jesus. Ra pwal iräpengesi ruoman mwän, eman a nom epek nge pwal eman epek, nge Jesus a nom lukalaper.
JOH 19:19 Pilatus a makkei ekei kapas o pachetä won ewe iräpenges: “Jesus seni Nasaret, ewe Kingen chon Juta.”
JOH 19:20 Chomong aramas ra aleani ekei kapas, pun ewe leni ia Jesus a iräpenges ie a arap ngeni ewe telinimw. Ekewe kapas ra mak lon fosun Ipru, Latin me Krik.
JOH 19:21 Iwe, ekewe souasor mi lap ra üreni Pilatus, “Kosap makkei ‘Kingen chon Juta’, nge kopwe makkei ‘Ei mwän a apasa: Ngang ewe kingen chon Juta’.”
JOH 19:22 Nge Pilatus a pölüeni, “Met üa makkei, ina chök met epwe nom.”
JOH 19:23 Iwe, lupwen ekewe sounfiu ra iräpengesi Jesus, ra angei seni üfan kewe o inetiir lon rüanü kinikin, eman sounfiu nge echö. Ra pwal angei üfan we mi tam esor lekochun, pun a türunus seni won tori fan.
JOH 19:24 Iwe, ra kapasfengen lefiler, “Ousisap kamwei ei üf, nge ousipwe üttüt won, pwe epwe fat iö epwe angei.” Ei a fis pwe epwe pwönüetä mine a mak lon ekewe Toropwe mi Pin: “Ra ineti üfei kewe lefiler o üttüt won üfei we mi tam.” Iei usun mine ekewe sounfiu ra föri.
JOH 19:25 Nge ünükün ewe iräpengesin Jesus ra ütä inan we, pwiin inan we, Maria pwülüen Klopas me Maria Maktalene.
JOH 19:26 Lupwen Jesus a küna inan we me ewe chon kaiö i a echeni mi ütä ikenan, a üreni inan we, “Nengeni, ätenan noumw.”
JOH 19:27 Mürin a üreni ewe chon kaiö, “Nengeni, iei i inom.” Iwe, seni lon ena otun ewe chon kaiö a angei Maria pwe epwe nom ren lon imwan.
JOH 19:28 Mürin Jesus a silei, pwe iei an angang meinisin a wesöchüla. Iwe, fän iten an epwe pwönüetä mine a mak lon ekewe Toropwe mi Pin, Jesus a apasa, “Üa kaka.”
JOH 19:29 Mi wor eu rume mi ur ren wain mi mwal ikenan. Ra atukalong eu farawa lon o pachetä lesopun efoch mwüch seni ewe irä isop o pöüätä ngeni awen Jesus.
JOH 19:30 Lupwen Jesus a wes me ün ewe wain, a apasa, “A wesila!” Mürin a rotiu o mäla.
JOH 19:31 Mürin ekewe nöüwisen chon Juta ra tüngorei Pilatus pwe epwe mwütätä, pwe repwe kupi pechen ekewe mwän mi iräpenges, repwe pwal angeatiu inisiir seni won ekewe iräpenges. Ra tüngor won ei, pun ei rän eu ränin amol, nge ir resap mochen pwe inisin ekewe aramas repwe nom won ekewe iräpenges lon ewe ränin sapat, pun ei ränin sapat eu rän mi fokun pin.
JOH 19:32 Iei mine ekewe sounfiu ra feila o kupi pechen ewe aemanün me aruomanün mwän ra iräpenges me Jesus.
JOH 19:33 Nge lupwen ar feiliti Jesus, ra küna pwe a fen mäla, iei mine resap chüen kupi pechen.
JOH 19:34 Nge eman ekewe sounfiu a angei wokun siles o posu ngeni lepekin Jesus. Iwe, lon chök ewe otun cha me koluk ra puwu seni.
JOH 19:35 Ewe eman mi küna fisitän ei mettoch a pwärätä usun, pwe ämi oupwe pwal lükü. An kapasen pwärätä a let, a silei pwe mine a apasa a let.
JOH 19:36 Ekei mettoch ra fis pwe epwe pwönüetä mine a mak lon ekewe Toropwe mi Pin: “Esap wor efoch chün epwe kup.”
JOH 19:37 Mi pwal wor eu fos a mak lon ekewe Toropwe mi Pin, “Aramas repwe nenengeni ätewe ra posu.”
JOH 19:38 Mürin ei, Josef seni ewe telinimw Arimatea a tüngorei Pilatus pwe epwe angeatiu somän Jesus me won ewe iräpenges. Josef, eman nöün Jesus kewe chon kaiö, nge le monomon chök, pun a niuokusiti ekewe nöüwisen chon Juta. Iwe, Pilatus a mwütätä, iei mine Josef a feila o angei ewe somä.
JOH 19:39 Pwal Nikotemus a eti Josef, i ätewe a churi Jesus lepwin me mwan. Ätei a uwato löpwokus mi nofit ngeni mör me aloes ina epwe ükükün ipükü paun.
JOH 19:40 Ekei ruoman mwän ra angeatiu somän Jesus o finiti ngeni mangaku mi pwechepwech fiti ekewe löpwokus, pun iei usun örünien chon Juta, lupwen ra amolätä eman somä an epwe peias.
JOH 19:41 A wor eu tanipi lon ewe leni ia Jesus a iräpenges ie. Ikenan a wor eu minefön peias, esap mwo wor eman a peias lon.
JOH 19:42 Pokiten ei rän ewe ränin amol mwen ewe ränin sapat, pwal pokiten ewe peias a chök arap, iei mine ra uwalong somän Jesus lon.
JOH 20:1 Iwe, lesosorusichin ewe aeuin ränin wiik, lupwen esamwo ränila, Maria Maktalene a feila ren ewe peias o a küna pwe ewe fau mi pwölüela mesen ewe peias ese chüen nom.
JOH 20:2 Iei mine a säla ren Simon Petrus me ewe eman chon kaiö Jesus a echeni o a üreniir, “Ra angeala somän ach Samol seni ewe peias, nge sisap silei ia ra anomu ie!”
JOH 20:3 Mürin Petrus me ewe eman chon kaiö ra feila ren ewe peias.
JOH 20:4 Ir me ruoman ra sä, nge ewe eman chon kaiö a müttir seni Petrus, pwe a akomwen tori ewe peias.
JOH 20:5 A pworotiu o nelong lon o küna ekewe mangaku mi pwechepwech lon ewe peias, nge esap tolong lon.
JOH 20:6 Iwe, Simon Petrus a säto mürin o tolong lon ewe peias. A küna ekewe mangaku mi pwechepwech ikenan,
JOH 20:7 pwal ewe mangaku mi finifin ngeni möküren Jesus. Nge ei mangaku ese nomofengen me ekewe mangaku mi pwechepwech, pwe a numufengen won an.
JOH 20:8 Mürin ewe eman chon kaiö mi akomwen tori ewe peias a pwal tolong lon. Iwe, a küna ekewe mangaku o lükü, pwe Jesus a manausefäl.
JOH 20:9 (Resap mwo weweiti mine a mak lon ekewe Toropwe mi Pin, pwe Jesus epwe fokun manausefäl seni mäla.)
JOH 20:10 Mürin ekewe chon kaiö ra liwinsefäliti lenier.
JOH 20:11 Nge Maria a ükütä ünükün ewe peias o a kekechü. Lupwen a chüen kekechü a pworotiu o nenelong lon ewe peias.
JOH 20:12 Iwe, a küna ruoman chon läng mi üföüf üf mi pwechepwech, ra mot ewe ia somän Jesus a nom ie me mwan, eman a mot ünümöküran, nge eman a mot ünüpechen.
JOH 20:13 Iwe, ra aisini Maria, “Nemin, pwota ka kechü.” A pölüeni, “Pun ra angeala somän ai Samol, nge üsap silei ia ra anomu ie!”
JOH 20:14 Mürin a kul o küna Jesus pwe a ütä ikenan. Nge esap silei pwe i Jesus.
JOH 20:15 Iwe, Jesus a aisini, “Nemin, pwota ka kechü? Iö na ka kükütta?” Nge Maria a ekieki pwe i eman chon tanipi, iei mine a üreni, “Ai samol, are en ka angeala somän Jesus, kose mochen üreniei ia ka anomu ie, pwe üpwe feila o angei.”
JOH 20:16 Iwe, Jesus a föüni iten neminewe o apasa, “Maria!” Mürin Maria a kul ngeni o apasa lon kapasen Ipru, “Rapponi!” (Wewen “Sense”)
JOH 20:17 Jesus a üreni, “Kosap atapaei, pun üsamwo feitä ren Semei. Nge kopwe feila ren pwii kewe o üreniir, pwe üpwe feitä ren Semei pwal Semer, ren ai Kot pwal ar Kot.”
JOH 20:18 Iei mine Maria Maktalene a feila o üreni ekewe chon kaiö, “Üa küna ewe Samol!” A pwal apworausa ngeniir usun mine a eäni kapas ngeni.
JOH 20:19 Iwe, lekuniolun ewe chök ränin, lon ewe aeuin ränin wiik, ekewe chon kaiö ra mwichfengen lon eu imw, nge ra lokeela asaman kewe, pun ra niuokusiti ekewe nöüwisen chon Juta. Mürin Jesus a feito, a ütä lefiler o üreniir, “Kinamwe epwe torikemi.”
JOH 20:20 Mürin an apasatä ekei kapas, a pwäri ngeniir pöün kewe me lepekin. Iwe, ekewe chon kaiö ra fokun pwapwa, pun ra küna ar we Samol.
JOH 20:21 Iwe, Jesus a kapassefäl ngeniir, “Kinamwe epwe torikemi! Usun Semei a tiniei, iei usun ngang üa tinikemi.”
JOH 20:22 Mürin än Jesus apasa ei, a ngasetiu wor o üreniir, “Oupwe angei ewe Ngünmifel.
JOH 20:23 Are ämi oua amusala än eman tipis, epwe musala. Nge are ämi ousap amusala än eman tipis, esap musala.”
JOH 20:24 Iwe, Tomas a pwal iteni Lippwe, eman lein ekewe engol me ruoman chon kaiö, esap nom rer lupwen Jesus a wareitiir.
JOH 20:25 Iei mine chiechian kewe chon kaiö ra asile ngeni, “Äm aia küna ach Samol!” Nge Tomas a pölüeniir, “Are üsap küna ekewe lemon chüföl lon pöün o tikilong lon, are üsap pwal iseis pei won kinasen lepekin, üsap fokun lükülük.”
JOH 20:26 Eu wiik mürin ekewe chon kaiö ra pwal mwichfengen lon ewe imw, nge Tomas a nom rer. Iwe, ekewe asam ra lokola, nge Jesus a feito, a ütä lefiler o üreniir, “Kinamwe epwe torikemi!”
JOH 20:27 Mürin a üreni Tomas, “Kopwe atapa kinasen pei o nenengeniöchü, mürin kopwe aitiewu poumw o iseis won kinasen lepeki. Kosap chüen lükümwaramwar, nge kopwe chök lükü!”
JOH 20:28 Iwe, Tomas a pölüeni, “Ai Samol me ai Kot!”
JOH 20:29 Jesus a üreni, “Pokiten om ka künaei, ka lükü. Ra feiöch chokewe resap künakün, nge ra fen lükülük.”
JOH 20:30 Iwe, Jesus a pwal föri chomong manaman me mwen mesen ekewe chon kaiö, nge resap makketiu lon ei puk.
JOH 20:31 Nge ekei manaman ra makketiu, pwe ämi oupwe lükü pwe Jesus ewe Kraist, ewe Nöün Kot, nge ren ämi lükü i oupwe eäni manau.
JOH 21:1 Mürin ei pworaus, Jesus a pwal pwä ngeni nöün kewe chon kaiö arun ewe nomun Tiperias. Iei usun mine a fis:
JOH 21:2 Simon Petrus, Tomas a pwal iteni Lippwe, Nataniel seni Kana lon Kalilea, nöün Sepeti kewe ruoman mwän pwal ruoman nöün Jesus kewe chon kaiö ra chufengen.
JOH 21:3 Iwe, Simon Petrus a üreni chiechian kewe, “Ngang üpwe feila attau.” Ra üreni, “Äm aipwe etuk.” Iei mine ra feila o tötä won efoch wa. Nge lon unusen ewe pwin resap liapeni eman.
JOH 21:4 Iwe, lupwen akkar a tötä, Jesus a ütä lepi, nge ekewe chon kaiö resap silleni pwe i Jesus.
JOH 21:5 Mürin Jesus a kökköla rer, “Chiechiei kanan, ifa usun, ousap liap?” Ra pölüeni, “Apw.”
JOH 21:6 Jesus a üreniir, “Oupwe aturätiu nöümi we chew lepelifichin wami na, iwe, oupwe liap.” Iei mine ra aturätiu nöür we chew, nge resap chüen tongeni atekinatä won waar we, pun a chomong ik ra tup lon.
JOH 21:7 Mürin ewe chon kaiö Jesus a echeni a üreni Petrus, “Inan i ach Samol.” Lupwen Simon Petrus a rong pwe iwe i ar we Samol, a üföüfolong üfan sekit (pun a fen pwilitawu üfan we lupwen a attau) o aturatiu lon ewe koluk.
JOH 21:8 Nge chiechian kewe chon kaiö ra fötül ngeni lepi o nukielong ewe chew mi ur ren ik. Resap toau seni wilifanü, pwe ina epwe ükükün ipükü iach chök.
JOH 21:9 Lupwen ra tiwelong wilifanü, ra küna eu ekkei mi kü, a wor ik won, pwal ekoch pilawa.
JOH 21:10 Jesus a üreniir, “Oupwe uwato ekoch liapemi kewe ik.”
JOH 21:11 Simon Petrus a tötä won ewe wa, a atekinalong ewe chew mi ur ren ik mi watte o a ürätä lepi. Ükükün liaper ipükü lime me ülüman. Iei mwo ükükün chomongun ekewe ik, nge ewe chew esap kam.
JOH 21:12 Iwe, Jesus a üreniir, “Ou etto, oupwe le mongön lesosor.” Esap wor eman me lein ekewe chon kaiö a tongeni ais, “En iö?” pun ra silei pwe i ewe Samol.
JOH 21:13 Mürin Jesus a kaneto, a angei ewe pilawa o ineti ngeniir, pwal ina chök usun mine a föri ngeni ekewe ik.
JOH 21:14 Iei aülüngatin fansoun än Jesus pwä ngeni ekewe chon kaiö mürin an manausefäl seni mäla.
JOH 21:15 Wesin ar mongön lesosor, Jesus a üreni Simon Petrus, “Simon, nöün Sona, ka echeniei lap seni ätekei?” Petrus a pölüeni, “Ewer, ai Samol, en ka silei pwe üa echenuk.” Jesus a üreni, “Kopwe amongöni nei kewe apanen sip.”
JOH 21:16 Jesus a aisini fän aruuan, “Simon, nöün Sona, ka echeniei?” Petrus a pölüeni, “Ewer, ai Samol, en ka silei pwe üa echenuk.” Jesus a üreni, “Kopwe tümwünü nei kewe sip.”
JOH 21:17 Jesus a aisini fän aülüngatin, “Simon, nöün Sona, ka echeniei?” Petrus a letipeta, pun Jesus a aisini fän aülüngatin, “Ka echeniei?” Iei mine a üreni, “Ai Samol, en ka silei mettoch meinisin, ka silei pwe ngang üa echenuk.” Jesus a üreni, “Kopwe amongöü nei kewe sip.
JOH 21:18 Enlet, üpwe wesewesen ürenuk: Lupwen om alüal ka soun ri lukalapom o feila ia ka mochen feila ie. Nge lupwen kopwe chinlap, kopwe aitiela poumw, nge eman epwe ri lukalapom o emwenukela ia kosap mochen feila ie.”
JOH 21:19 Jesus a apasatä ekei kapas pwe epwe pwärätä met sokun mäla Petrus epwe mäli o alingala Kot ren. Mürin Jesus a üreni, “Kopwe tapweto müri.”
JOH 21:20 Iwe, Petrus a kul o küna ewe eman chon kaiö Jesus a echeni, pwe a tapwela mürir. Iei i ätewe mi roongeni Jesus lupwen ra mongön lekuniol o aisini, “Ai Samol, iö ewe epwe afangamä en?”
JOH 21:21 Lupwen Petrus a küna ätewe, a aisini Jesus, “Ai Samol, met epwe fis ngeni ätena?”
JOH 21:22 Jesus a pölüeni, “Are ngang üa mochen pwe epwe nonom tori ai üpwe liwinto, pwal met wewen ngonuk? Kopwe chök tapweto müri!”
JOH 21:23 Iei mine a chöfeil ewe kapas lein ekewe chon kaiö, pwe ei eman chon kaiö esap mäla. Nge Jesus esap apasa pwe ätewe esap mäla, pwe a chök apasa, “Are üa mochen an epwe nonom tori ai üpwe liwinto, met pwal wewen ngonuk?”
JOH 21:24 Iei i ewe chon kaiö mi pwärätä ekei mettoch, a pwal makkeetiu ekei mettoch. Iwe, kich sia silei pwe mine a pwärätä a let.
JOH 21:25 Iwe, Jesus a pwal föri chomong föför lükün ekei. Are iteiten eu me eu kewe föför repwe mak lon puk, üa ekieki pwe ekewe puk resap mwo nge fen kuch won unusen fanüfan.
ACT 1:1 Ngeni en Achengicheng olowe Teofilus: Lon aeuin nei we toropwe üa makkeetiu usun ekewe mettoch meinisin Jesus a föri me an kewe afalafal, seni ewe fansoun a popuetäni an angang
ACT 1:2 tori ewe rän a feilunusetä läng. Nge mwen an feilunusetä a atowu kapasen öüröür fän manamanen Ngünmifel ngeni ekewe mwän a filiiretä pwe repwe nöün soukünö.
ACT 1:3 Lon ükükün faik rän mürin an mäla a pwä ngeniir fan chomong lon chomong sokun lapalap mi alletätä ngeniir pwe a wesewesen manau. Ra küna i, nge i a kapas ngeniir usun ewe Mwün Kot.
ACT 1:4 Iwe, lupwen a nonom rer, a allük ngeniir, “Ousap feil seni Jerusalem, nge oupwe witiwiti ewe lifang Semei a fen pwon ngenikemi, usun üa fen ürenikemi.
ACT 1:5 Pun Johannes a papataisi aramas ren koluk, nge mürin ekoch rän ämi oupwe papatais ren Ngünmifel.”
ACT 1:6 Iwe, lupwen ekewe soukünö ra chufengen me Jesus, ra aisini, “Äm Samol, ifa usun, kopwe aliwinisefäli ngeni Israel Mwün we lon ei fansoun?”
ACT 1:7 Jesus a pölüeniir, “Esap wisemi pwe oupwe silei fansoun me ränin, pwe wisen chök Semei an epwe akota.
ACT 1:8 Nge ämi oupwe angei ewe manaman lupwen Ngünmifel epwe feitiu womi, iwe, oupwe pwäriei lon Jerusalem, lon unusen Jutea me Samaria tori lon unusen fanüfan.”
ACT 1:9 Iwe, lupwen Jesus a wes le apasatä ekei kapas, a feilunusetä läng lupwen ar nenengeni. Iwe, eu kuchu a amonala seniir.
ACT 1:10 Nge ra chök nenetä läng lupwen a feil seniir. Iwe, lon ewe chök otun ruoman mwän mi üföüf üf mi pwechepwech ra ütä ünüküür
ACT 1:11 o ra üreniir, “Ämi re Kalilea, pwota oua ü ikei o nenetä chök läng? Ewe Jesus mi feil senikemi o feitä läng epwe liwinsefälito lon ewe chök lapalap oua küna lon lupwen a feitä läng.”
ACT 1:12 Mürin ekewe soukünö ra feitiu me won ewe Chukun Olif o liwinsefäliti Jerusalem, toauen ewe Chukun Olif seni ewe telinimw ina epwe ükükün esop mwail.
ACT 1:13 Iwe, lupwen ra tolong lon Jerusalem, ra feitä lon ewe ruum ia ra nonom ie. Ätekewe mi nom lon ei ruum: Petrus, Johannes, James me Andru, Filip me Tomas, Partolomeus me Mateus, James nöün Alfäus, Simon i eman Selot me Jut nöün James.
ACT 1:14 Ir meinisin ra tipeeu le chufengen o ikiotek fiti ekoch fefin me Maria inen Jesus me pwiin kewe.
ACT 1:15 Ekoch rän mürin a fis eu mwichen chon lükülük, ina epwe ükükün ipükü rüwe. Iwe, Petrus a ütä lefiler
ACT 1:16 o apasa, “Ämi pwii kana, mine a mak lon ekewe Toropwe mi Pin a pwönüetä usun mine Ngünmifel a apasa ren Tafit, lupwen a osuni usun Jutas, ätewe mi emweni chokewe mi fötekini Jesus.
ACT 1:17 Jutas eman me lon ach mwich, a filitä an epwe wor wisan lon ach angang.”
ACT 1:18 (Ewe moni Jutas a angei fän iten an föför mi ngau ra möni ngeni eu fanü. Ikenan a turutiu o mäla, a mökküfesen lukan pwe afan ra seliseliwu.
ACT 1:19 Ekewe aramas meinisin lon Jerusalem ra rong usun, iei mine ra aita ngeni ewe fanü Akeltama, lon püsin ar kapas, wewen “Fanüen Cha”.)
ACT 1:20 “Pun a mak lon ewe puken Kölfel, ‘Amwo imwan epwe pönüla, esap fokun wor eman epwe asoi.’ A pwal mak, ‘Amwo eman epwe siwili lon wisan.’
ACT 1:21 Iei mine a öch ach sipwe filätä eman me lein ekei mwän mi etikich lon unusen fansoun ach Samol Jesus a nom rech.
ACT 1:22 Eman a fokun nom rech seni ewe fansoun Johannes a popuetä le föri an angangen papatais tori ewe rän Jesus a feil senikich o feitä läng. Pun eman me lein ätekei epwe fokun etikich le pwärätä pwe Jesus a manausefäl.”
ACT 1:23 Iwe, ra atolonga iten ruoman mwän: Josef mi pwal iteni Parsapas (pwal itan Justus) me Matias.
ACT 1:24 Mürin ra iotek, “Äm Samol, en ka silei mine a nom lon leluken aramas meinisin. Kopwe pwäri ngenikem iö lein ekei ruoman en ka filätä
ACT 1:25 pwe epwe tolong lon ewe wisen Soukünö siwilin Jutas, ätewe mi feila ngeni ewe leni ia epwe wesewesen nom ie.”
ACT 1:26 Mürin ra föri ewe angangen üttüt won ekewe ruoman mwän. Iwe, ra ütti Matias. Ätei a pach ngeni ewe mwichen ekewe engol me ruoman soukünö.
ACT 2:1 Iwe, lupwen a tori ewe ränin Pentikost, ekewe chon lükü Jesus meinisin ra chufengen lon eu leni.
ACT 2:2 Iwe, a müttir fis eu ngüngü seni läng mi wewe ngeni ngüngün asepwäl mi pöchökül, a aurala unusen ewe imw ia we ra motfengen ie.
ACT 2:3 Mürin ra küna chön mongö usun ekkei mi parasfeil, a feitiu won eman me eman ekewe aramas mi nom ikenan.
ACT 2:4 Iwe, ir meinisin ra urela ren Ngünmifel o ra popuetä le kapas lon kapasen ekis usun Ngünmifel a amwelielier.
ACT 2:5 A wor chon Juta mi niuokusiti Kot, ra nom lon Jerusalem, ra feito seni ekewe fanü meinisin won fanüfan.
ACT 2:6 Lupwen ra rong ei ngüngü, eu mwichen aramas mi chomong ra chufengen. Ir meinisin ra rükö, pun eman me eman leir a rong än ekewe chon lükü kapas lon en me kapasen fanüan.
ACT 2:7 Ra fokun mairü o weitifengeniir o ra apasa, “Ifa usun, ekei mwän meinisin mi kapas lon ekei sokun kapas, esap ir re Kalilea?
ACT 2:8 Nge pwota chök pwe oukich meinisin sia rongorong ar kapas lon en me kapasen fanüach kewe sia uputiu lon?
ACT 2:9 Sia feito seni Partia, Metia me Elam, seni Mesopotamia, Jutea me Kapatosia, seni Pontus me Asia,
ACT 2:10 seni Frikia me Pamfilia, seni Isip me ekewe fanü lon Lipia arap ngeni Kirene. Ekoch me leich sia feito seni Rom,
ACT 2:11 kich chon Juta me chon lükün Israel mi etiwa ewe lamalamen chon Juta. Ekoch me leich sia pwal feito seni Kreta me Arapia, nge oukich meinisin sia rongorong ar kapas lon kapasen fanüach kewe usun ekewe mettoch mi amwarar Kot a föri.”
ACT 2:12 Pokiten ar mairü me osukosuk ra aisfengen lefiler, “Epwe met wewen ei sokun lapalap?”
ACT 2:13 Nge ekoch aramas ra takiri ekewe chon lükü Jesus o apasa, “Ekei aramas ra pulas.”
ACT 2:14 Mürin Petrus a ütä fiti ekewe engol me eman soukünö o a popuetä le kapas leüömong ngeni ewe mwichen aramas, “Ämi pwii kana chon Juta me ämi meinisin mi imweimw lon Jerusalem, oupwe aüselingaei o mwüt ngeniei ai üpwe awewe ngenikemi wewen ei lapalap.
ACT 2:15 Ekei aramas resap pulas usun oua ekieki. Ekärän chök kulok tiu lesosor.
ACT 2:16 Nge iei usun met ewe soufos Sowel a kapas usun:
ACT 2:17 ‘Kot a apasa: Iei usun met üpwe föri lon ekewe ränin sopolan. Ngang üpwe tinato Ngüni won aramas meinisin. Nöümi mwän me fefin repwe osuni, nöümi alüal epwe wor künaer, ekewe chinlap mwän me leimi repwe soutatan.
ACT 2:18 Pwal mwo nge nei chon angang mwän me fefin üpwe tinatiu Ngüni wor lon ekana rän, pwe repwe arongafeili ai kewe kapas.
ACT 2:19 Üpwe awarato manaman seni läng o föri asisil won fanüfan. Epwe wor cha me ekkei me kuchu mi ötüöt usun ötüötün ekkei.
ACT 2:20 Akkar epwe rochola, nge maram epwe wiliti cha, mwen epwe war ränin ewe Samol, ewe rän mi lap o ling.
ACT 2:21 Nge iö epwe köri iten ewe Samol epwe manau.’
ACT 2:22 “Ämi aramasen Israel, oupwe rong ekei kapas: Jesus seni Nasaret, eman aramas mi wor an pwüüng me ren Kot, usun a pwä ngenikemi ren ekewe tufich me manaman me asisil Kot a föri ren Jesus. Oua püsin silei usun ei, pun ra fis ikei lefilemi.
ACT 2:23 Püsin än Kot akot ei a fen apwüngala, pwe Jesus epwe oolong lepöümi, nge ämi oua niela ren ämi mwüt ngeni ekewe aramas mi tipis pwe repwe iräpengesi.
ACT 2:24 Nge Kot a amanauasefäli seni mäla. A angasala i seni manamanen mäla, pun esap tufich pwe mäla epwe amwöchü i.
ACT 2:25 Pun Tafit a kapas usun, ‘Üa küna ewe Samol, a nom mwen mesei fansoun meinisin. A arap ngeniei, pwe üsap osukosuk.
ACT 2:26 Iei mine letipei a fokun mwanek, ai kewe kapas ra uren pwapwa. Inamwo ika ngang eman aramas epwe mäla, üpwe chök kinamwe lon ai apilükülüköch.
ACT 2:27 Pun en kosap likitieila lon lenien ekewe mi mäla, kosap pwal mwüt ngeni Noumw we mi Pin epwe mach inisin lon peiasan.
ACT 2:28 En ka aiti ngeniei ewe alen manau. Om nonom rei a afisätä ai pwapwa mi lapalap.’
ACT 2:29 “Ämi pwii kana, üpwe kapas ngenikemi o afataöchü usun ach we lewo mi iteföüla King Tafit. A mäla o peias, nge peiasan a chüen nonom rech ikei tori ikenai.
ACT 2:30 I eman soufos a silei met Kot a eäni pwon ngeni: Kot a pwon fän akapel pwe epwe awora eman mwirimwirin Tafit pwe epwe king, usun chök Tafit.
ACT 2:31 Tafit a küna met Kot epwe föri lon ekewe fansoun repwe feito, iei mine a kapas usun manausefälin ewe Kraist lupwen a apasa, ‘Esap likilik lon lenien ekewe mi mäla, inisin esap mach lon peiasan.’
ACT 2:32 Iwe, Kot a amanauasefäli ätei Jesus seni mäla, nge äm meinisin aia chon pwärätä pwe a wesewesen fis ei.
ACT 2:33 Jesus a tekiatä o nom lepelifichin Kot Saman we, a angei seni Kot ewe Ngünmifel, usun a fen pwon ngeni. Iwe, met oua küna iei o rongorong, iei an we lifang a tinatiu woch.
ACT 2:34 Pun Tafit esap püsin feitä läng, nge a apasa, ‘Ewe Samol a kapas ngeni ai Samol: Kopwe mottiu lepelifichi,
ACT 2:35 tori üpwe anomu chon oputom pwe repwe lenien puun pecheöm.’
ACT 2:36 Iei mine ekewe chon Israel meinisin repwe fokun silei, pwe ätei Jesus ämi oua iräpengesi, i ätewe Kot a seikätä pwe epwe Samol me Kraist!”
ACT 2:37 Lupwen ekewe aramas ra rongorong ekei kapas, a el letiper o ra aisini Petrus me ekewe ekoch soukünö, “Ämi pwiich kana, met äm aipwe föri.”
ACT 2:38 Petrus a pölüeniir, “Ämi meinisin oupwe aier seni ämi tipis kana o papatais ngeni iten Jesus Kraist, pwe ämi tipis kana repwe musala. Iwe, oupwe angei an Kot we lifang, ewe Ngünmifel.
ACT 2:39 Pun iei met Kot a fen pwon ngenikemi me nöümi kana pwal ngeni chokewe meinisin mi toau, ir meinisin ewe Samol ach we Kot a püsin körireto ren.”
ACT 2:40 Petrus a fönöü ir ren chomong kapas, a pese ngeniir o apasa, “Oupwe amanauakemi seni ewe feiengau epwe tori ei täppin aramas mi ngau!”
ACT 2:41 Iwe, chomong me leir ra lükü an afalafal o ra papatais. Lon ewe rän ina epwe ükükün ülüngat ngeröü aramas ra pach ngeni ewe mwichen chon lükü Jesus.
ACT 2:42 Ra likitü le kaiö seni mine ekewe soukünö ra aiti ngeniir, ra likitü lon ar chiechifengen o mongöfengen ewe mongön ach Samol me ikiotekfengen.
ACT 2:43 Iwe, chomong asisil me manaman ra fis ren ekewe soukünö, o ekewe aramas ra fokun mairü ren.
ACT 2:44 Ekewe chon lükülük meinisin ra chök sopwela lon ar chiechifengen o alilisfengen lefiler won pisekir.
ACT 2:45 Ra amömöla fanüer me pisekir o ra ineti lefiler ewe moni ra angei won ükükün met eman me eman a osupwang ren.
ACT 2:46 Iteiten rän ra tipeeufengen le mwichfengen lon ewe imwenfel, ra mongöfengen lon imwer fän pwapwa me tipetekison.
ACT 2:47 Ra mwareiti Kot, ra pwal küna chen me ren ekewe aramas meinisin. Iwe, iteiten rän ewe Samol a apacha ngeni ar we mwich aramas mi küna manau.
ACT 3:1 Lon eu rän Petrus me Johannes ra feila ren ewe imwenfel lon fansoun iotek kulok ülüngat leolopal.
ACT 3:2 Iwe, eman mwän mi pechemä seni leuputiuan a mot ünükün ewe asamen imwenfel mi iteni “Asamalap mi echipwör”. Iteiten rän aramas ra uweeto i ünükün ei asamalap pwe epwe tütüngor moni seni ekewe aramas mi tolong lon ewe imwenfel.
ACT 3:3 Lupwen ätei a küna pwe Petrus me Johannes repwe le tolong lon ewe imwenfel, a tüngor rer pwe repwe ngeni och.
ACT 3:4 Iwe, ra newenewen ngeni, nge Petrus a üra, “Kopwe nenengenikem!”
ACT 3:5 Iei mine ei mwän a nenengeniir, pun a ekieki pwe epwe angei och seniir.
ACT 3:6 Nge Petrus a üreni, “Esap wor moni rei, nge mine a wor rei üpwe ngonuk: Fän iten Jesus Kraist seni Nasaret üpwe ürenuk kopwe ütä o fetal!”
ACT 3:7 Mürin Petrus a amwöchü pöüifichin ewe mwän o aütai. Iwe, lon ewe chök otun pechen me lekupukupun pechen ra pöchökületä.
ACT 3:8 Iwe, a mwetetä, a ütä won pechen o popuetä le fetal. Mürin a eti Petrus me Johannes le tolong lon ewe imwenfel, a fetal, a mwetemwet o mwareiti Kot.
ACT 3:9 Iwe, unusen ewe mwichen aramas ra küna an fetal o mwareiti Kot.
ACT 3:10 Nge lupwen ra asilla pwe i ewe chon tütüngor mi momot ünükün ewe imwenfel ren ewe Asamalap mi echipwör, ir meinisin ra mairü o weitifengeniir ren mine a fis ngeni.
ACT 3:11 Lupwen ewe mwän a chök fitipacheiti Petrus me Johannes lon ewe leni itan “Pwalangen Salomon”, ekewe aramas meinisin ra mairü o ra säto rer.
ACT 3:12 Iwe, lupwen Petrus a küna ekewe aramas, a üreniir, “Ämi aramasen Israel, pwota oua fokun mairü ren mine a fis, pwota oua nefotofot ngenikem? Oua ekieki pwe ren äm manaman me äm soulängöch aia tongeni apöchökülätä ei mwän pwe a tongeni fetal?
ACT 3:13 Än Apraham, Isaak me Jakop we Kot, än ach kewe lewo we Kot a alingala nöün Chon Angang Jesus. Nge ämi oua atolonga lepöün ekewe souemwenin chon Juta o amamäsini i me mwen Pilatus, oua fen mwo nge föri ei, lupwen Pilatus a ekiekin angasala i.
ACT 3:14 Jesus a pin o pwüng, nge ämi oua amamäsini i o tüngor ngeni Pilatus pwe epwe angasa ngenikemi ewe chon niela aramas.
ACT 3:15 Ämi oua niela ätewe mi emweni aramas ngeni manau. Nge Kot a amanauasefäli seni mäla o äm aia chon pwärätä pwe a fis ei.
ACT 3:16 Ren manamanen iten Jesus ei mwän mi pechemä a pöchökületä. Met oua küna o silei a fis pokiten äm aia lükü itan. Ren äm lükü Jesus a fis pwe ei mwän a wesewesen pöchökületä usun ämi meinisin oua küna.
ACT 3:17 “Ämi pwii kana, iei üa silei pwe met ämi me nöümi souemwen oua föri ngeni Jesus, oua föri pokiten ämi silemang.
ACT 3:18 Nge iei usun Kot a apwönüetä met a fen apasa me lomlom ren ekewe soufos meinisin, lupwen a apasa pwe nöün we Kraist epwe küna riaföü.
ACT 3:19 Oupwe ekieksefäl o kul ngeni Kot, pwe ämi tipis epwe mola,
ACT 3:20 pwe Kot epwe awora ngenikemi eu fansoun ngünümi epwe küna pöchökül. Epwe tinato Jesus, i ewe Kraist, Kot a fen filätä fän itemi.
ACT 3:21 Jesus epwe chök nom lon läng tori epwe war ewe fansoun pwe ekewe mettoch meinisin repwe försefäl, usun Kot a fen apasa me lomlom ren nöün kewe soufos mi pin.
ACT 3:22 Pun Moses a apasa, ‘Ewe Samol ämi we Kot epwe tinato eman soufos usun chök ngang, i eman seni püsin aramasemi. Oupwe fokun aleasochisi meinisin mine a ürenikemi pwe oupwe föri.
ACT 3:23 Nge eman esap aleasochis ngeni ena soufos epwe käriwu seni aramasan.’
ACT 3:24 Iwe, ekewe soufos, pwal Samuel me chokewe mi tapw me mürin, ir meinisin mi afalafal, ra fen kapas usun met epwe fis lon ekei rän.
ACT 3:25 Än Kot kewe pwon nöün kewe soufos ra aronga ra fän itemi, nge ämi oua pachelong lon ewe pwon, Kot a föri ngeni ämi kewe lewo, usun Kot a kapas ngeni Apraham, ‘Üpwe afeiöchü aramasen fanüfan meinisin ren mwirimwirum.’
ACT 3:26 Iei usun Kot a filätä nöün Chon Angang o tinato akom remi, pwe epwe afeiöchükemi ren an alisikemi pwe ämi meinisin oupwe kul seni ämi föför mi ngau.”
ACT 4:1 Iwe, lupwen Petrus me Johannes ra chüen kakapas, ekewe souasor, ewe meilapen chon tümwünü imwenfel me ekoch Satusi ra war.
ACT 4:2 Ra song pokiten ekewe ruoman soukünö ra afalafala ngeni ekewe aramas pwe Jesus a manausefäl seni mäla, ei a alletätä pwe ekewe mi mäla repwe manausefäl.
ACT 4:3 Iei mine ra turufiir o atururelong lon imwen fötek tori sorotän ewe rän, pun a fen lekuniolula.
ACT 4:4 Nge chomong aramas mi rongorong ngeni ar afalafal ra lükü. Iwe, iteiter fengen meinisin ina epwe ükükün limungeröü mwän.
ACT 4:5 Iwe, sorotän ewe rän ekewe souemwenin chon Juta, ekewe souakom me ekewe Sensen Allük ra chufengen lon Jerusalem.
ACT 4:6 Anas, ewe Souasor mi Lap, Kaifas, Johannes, Aleksanter me pwal ekoch mwän seni familien ewe Souasor mi Lap ra pwal nom lon ewe mwich.
ACT 4:7 Iwe, ra emwenato Petrus me Johannes me mwer o popuetä le kapas ais ngeniir, “Fän meni manaman ika fän meni it ämi oua föri ei?”
ACT 4:8 Mürin Petrus mi ur ren Ngünmifel a pölüeniir, “Ämi souemwenin ekewe aramas me souakom:
ACT 4:9 Are ämi oua atittinakem usun ewe föför mi mürina aia föri ngeni ewe mwän mi pechemä o ifa usun an küna pöchökül,
ACT 4:10 mürin ämi meinisin oupwe silei, pwal ekewe chon Israel meinisin repwe silei, pwe ei mwän mi ütä mwemi ikei a wesewesen pöchökül ren manamanen iten Jesus Kraist seni Nasaret, ätewe oua iräpengesi, nge Kot a amanauasefäli seni mäla.
ACT 4:11 Iwe, Jesus i ätewe ekewe Toropwe mi Pin ra kapas usun, ‘Ewe fau ekewe chon kaü imw ra pöütala a wiliti eföü fau mi fokun aüchea seni meinisin.’
ACT 4:12 Aramas repwe küna manau ren Jesus chök. Pun esap fokun wor pwal eu it won fanüfan Kot a ngeni aramas, pwe sipwe küna manau ren.”
ACT 4:13 Iwe, chon ewe mwichen soupwüng ra mairü lupwen ra küna än Petrus me Johannes pworacho, ra pwal silei pwe ir aramas resap fiti sukul. Iwe, ra mefi pwe ir fen chiechien Jesus.
ACT 4:14 Nge esap wor och mine repwe tongeni apasa, pun ra küna ewe mwän mi pöchökületä o ü ikenan ren Petrus me Johannes.
ACT 4:15 Iei mine ra üreniir, pwe repwe towu seni ewe ruum ia chon ewe mwichen soupwüng ra mwich ie. Mürin ra pwüngüpwüngfengen lefiler.
ACT 4:16 Iwe, ra ais, “Met sipwe föri ngeni ekei mwän? Aramas meinisin lon Jerusalem ra silei pwe ei manaman mi fokun amwarar a fis rer, nge sisap tongeni aopala.
ACT 4:17 Nge iei met sipwe föri, pwe ei pworaus esap chöfetal lein aramas. Sipwe fönöü ngeni ekei aramas, pwe resap fokun chüen kapas ngeni eman aramas usun ewe it Jesus.”
ACT 4:18 Mürin ra körisefäliirelong o allük ngeniir, pwe resap fokun kapas ika afalafal usun ewe it Jesus.
ACT 4:19 Nge Petrus me Johannes ra pölüeniir, “Oupwe püsin apwüngü are a pwüng mwen mesen Kot ach sipwe aleasochis ngenikemi mwen ach aleasochisi Kot.
ACT 4:20 Pun äm aisap tongeni ükütiu le kapas won met aia püsin küna o rongorong.”
ACT 4:21 Iwe, chon ewe mwichen soupwüng ra fokun pöchökül le eniwer, pwe resap chüen afalafal, mürin ra amuserela. Resap küna och popun mine repwe ariaföüür ren, pun ekewe aramas ra mwareiti Kot ren mine a fis.
ACT 4:22 Pun ierin ewe mwän mi pöchökületä ren ewe manaman a fen lap seni faik ier.
ACT 4:23 Lon ewe chök otun Petrus me Johannes ra ngasala, ra liwiniti ar we mwich o apworausa ngeniir meinisin mine ekewe souasor mi lap me ekewe souakom ra üreniir.
ACT 4:24 Iwe, lupwen ekewe chon lükü ra rong ei pworaus, ir meinisin ra tipeeufengen le iotek ngeni Kot: “Äm Samol, en ka föri läng me fanüfan me matau o meinisin mine a nom lor!
ACT 4:25 Fän emwenien Ngünmifel en ka kapas ren äm we lewo Tafit, noumw chon angang lupwen a apasa, ‘Pwota ekewe chon lükün Israel ra fokun lingeringer? Pwota chon ekewe mwü ra föri ar raw mi lomotongau?
ACT 4:26 Ekewe kingen fanüfan ra amoleeretä, nge ekewe samol ra chufengen pwe repwe ü ngeni ewe Samol me nöün we Kraist.’
ACT 4:27 Pun iei usun mine a fis: Herotes me Pontius Pilatus ra mwichfengen me ekewe chon lükün Israel me ekewe aramasen Israel lon ei telinimw ar repwe ü ngeni Jesus noumw Chon Angang mi pin, ätewe en ka epiti.
ACT 4:28 Ra chufengen ar repwe föri meinisin mine en ka fen akota fän om manaman me letipom an epwe pwönüetä.
ACT 4:29 Äm Samol, iei kopwe ekieki ar kapasen eniweniw o atufichi noumw kei chon angang pwe repwe afalafala om kapas fän pwora.
ACT 4:30 Kopwe pwärala om pöchökül pwe chon samau repwe pöchökületä, kopwe mwütätä pwe asisil me manaman repwe fis ren iten Jesus noumw we Chon Angang mi pin.”
ACT 4:31 Iwe, lupwen ra wes le iotek ewe leni ia ra mwichfengen ie a mwökütüküt. Ir meinisin ra urela ren Ngünmifel o ra popuetä le asilefeili än Kot kapas fän pwora.
ACT 4:32 Iwe, ewe mwichen chon lükü Jesus ra ekiekeu me tipeeu. Esap fokun wor eman leir epwe apasa, pwe mine a wor ren epwe an chök, nge ra alilisfengen lefiler won meinisin mine ra eäni.
ACT 4:33 Fän manaman mi lapalap ekewe soukünö ra pwärätä pwe ewe Samol Jesus a manausefäl seni mäla, o Kot a fokun afeiöchüür meinisin.
ACT 4:34 Esap fokun wor eman me lon ewe mwich a osupwang. Chokewe mi wor fanüer ika imwer ra amömörela, nge ewe moni ra angei fän iten fanüer are imwer ra uwato
ACT 4:35 o ngeni ekewe soukünö. Iwe, ei moni ra aineti ngeni eman me eman leir won ükükün mine a osupwang ren.
ACT 4:36 Iwe, a wor eman mwän itan Josef seni ewe ainangen Lefi, a uputiu lon ewe fanü Saipros, ekewe soukünö ra pwal aita ngeni Parnapas (wewen ei it: Eman mi apöchöküla letipen aramas).
ACT 4:37 Ätei a amömöla fanüan, nge liwinin ei fanü a uwato o ngeni ekewe soukünö.
ACT 5:1 Nge a wor eman mwän itan Ananias, i me pwülüan itan Safira ra amömöla eu kinikin seni fanüer.
ACT 5:2 Iwe, pwülüan ei a tipeeu ngeni an epwe aopala och seni ewe moni fän itan, nge ewe lusun a ngeni ekewe soukünö.
ACT 5:3 Mürin Petrus a üreni, “Ananias, pwota ka mwüt ngeni Satan pwe epwe nemeni letipom, pwe ka chofona ngeni Ngünmifel ren om aopala och seni ewe moni ka angei fän iten fanüom we?
ACT 5:4 Ifa usun, esap fanüom mwen om ka amömöla? Nge mürin om amömöla ewe moni esap noumw? Pwota ka ekiekin föri ei sokun lapalap? Kosap chofona ngeni aramas, pwe ka chofona ngeni Kot.”
ACT 5:5 Lon ewe chök otun Ananias a rong ekei kapas, a turula o mäla. Iwe, ir meinisin mi rongorong usun mine a fis ngeni, ra fokun rükö.
ACT 5:6 Mürin ekoch alüal ra ütä o tükümala somän we, ra ekiewu lükün o peiaseni.
ACT 5:7 Ina epwe ülüngat awa mürin pwülüan we a feito, nge esap silei mine a fis.
ACT 5:8 Iwe, Petrus a aisini, “Kopwe üreniei ika iei unusen ewe moni en me pwülüom oua angei fän iten fanüemi we?” Neminewe a pölüeni, “Ewer, ina chök ükükün.”
ACT 5:9 Iei mine Petrus a üreni, “Pwota en me pwülüom oua tipeeufengen le sotuni Ngünün ewe Samol? Nengeni, ekewe alüal mi peiaseni pwülüom we ra nom lükün ewe asam iei, repwe pwal ekiikewu!”
ACT 5:10 Lon ewe chök otun neminei a turula arun pechen Petrus o mäla. Iwe, ekewe alüal ra tolong o küna pwe Safira a mäla. Iei mine ra pwal ekiewu o peiaseni ünükün pwülüan we.
ACT 5:11 Iwe, unusen chon ewe mwichefel me meinisin mi rongorong usun ei pworaus ra fokun rükö.
ACT 5:12 Iwe, ekewe soukünö ra föri chomong manaman me asisil me lein ekewe aramas. Ekewe chon lükü meinisin ra mwichfengen lon ewe leni itan “Pwalangen Salomon.”
ACT 5:13 Esap wor eman me lükün ar we mwich a pwora le chu ngeniir, inamwo ika ekewe aramas ra meninitiir o kapasöch usur.
ACT 5:14 Nge a chomongola mwän me fefin ra lükü ewe Samol o pach ngeni ewe mwich.
ACT 5:15 Pokiten mine ekewe soukünö ra föri, aramas ra ekieto chon samau won ekewe al o alenier won peet me kieki, pwe are Petrus epwe pwereto o pwere seniir, nürün epwe tori ekoch me leir.
ACT 5:16 Iwe, chomong aramas ra feito seni ekewe telinimw mi nom ünükün Jerusalem, ra ekieto ekewe mi samau ika chokewe mi wor ngününgau wor. Iwe, ir meinisin ra pöchökületä.
ACT 5:17 Mürin ewe Souasor mi Lap me chiechian kewe meinisin, ir chon ewe mwichen Satusi, ra fokun lolowoiti ekewe soukünö.
ACT 5:18 Iwe, ra turufiir o atururelong lon imwen fötek.
ACT 5:19 Nge lepwin eman nöün ewe Samol chon läng a suki asamen ewe imwen fötek o emwenawu ekewe soukünö me lon. Iwe, a üreniir,
ACT 5:20 “Oupwe feila o ütä lon ewe imwenfel o afalafala ngeni ekewe aramas meinisin usun ei manau mi fö.”
ACT 5:21 Iwe, ekewe soukünö ra aleasochisi alon ewe chon läng. Lupwen a ränila ra tolong lon ewe imwenfel o popuetä le afalafal. Lupwen ewe Souasor mi Lap me chiechian kewe ra war, ra körifengeni ekewe souakomwen chon Israel meinisin pwe epwe le fis eu mwichen soupwüng. Mürin ra tinala ekoch chon mas lon ewe imwen fötek, pwe repwe emwenato ekewe soukünö me mwer.
ACT 5:22 Nge lupwen ra tori ewe imwen fötek, resap küna ekewe soukünö. Iei mine ra liwinsefäliti ewe mwichen soupwüng o apworausa ngeniir mine a fis,
ACT 5:23 “Lupwen sia tori ewe imwen fötek, sia küna pwe ekewe asam ra lokola o ekewe chon mas ra masafichi ekewe asamalap. Nge lupwen sia suki ekewe asam, esap wor eman a nom lon.”
ACT 5:24 Iwe, lupwen ekewe souasor mi lap me ewe meilapen chon tümwünü imwenfel ra rongorong ei pworaus, ra mairü ren met a fis ngeni ekewe soukünö.
ACT 5:25 Mürin eman mwän a war o üreniir, “Nengeni, ekewe mwän oua atururelong lon imwen fötek ra nom lon imwenfel o afalafala ekewe aramas.”
ACT 5:26 Iei mine ewe meilap fiti ekewe chon tümwünü imwenfel ra feila o emwenisefälieto ekewe soukünö. Nge resap pöchökül ngeniir, pun ra niuokus ika ekewe aramas repwe mone ngeniir fau.
ACT 5:27 Ra emweniirelong lon ewe imw o aütaar mwen ewe mwichen soupwüng, nge ewe Souasor mi Lap a kapas ais ngeniir.
ACT 5:28 A üreniir, “Äm aia allük pöchökül ngenikemi pwe ousap chüen afalafal mine ei mwän a aiti ngenikemi. Oupwe nengeni met oua föri! Oua achöfetalei ämi afalafal lon unusen Jerusalem, oua pwal ekiekin atipisikem ren än ei mwän mäla.”
ACT 5:29 Iwe, Petrus me ekewe ekoch soukünö ra pölüeni, “Äm aipwe chök aleasochisi Kot lap seni äm aleasochisi aramas.
ACT 5:30 Än ach kewe lewo we Kot a amanauasefäli Jesus seni mäla, ätewe oua niela ren ämi chüfölüetä won efoch iräpenges.
ACT 5:31 Nge Kot a atekiatai o anomu lepelifichin pwe epwe Samol me Chon Amanau, pwe epwe awora ekieksefäl me amusamusen tipis ngeni chon Israel.
ACT 5:32 Äm chon pwärätä ekei mettoch pwal Ngünmifel, i ewe Kot a ngeni chokewe mi aleasochis ngeni.”
ACT 5:33 Iwe, lupwen chon ewe mwichen soupwüng ra rong ekei kapas, ra fokun lingeringer, pwe ra ekiekin niela ekewe soukünö.
ACT 5:34 Nge eman Farisi itan Kamaliel, eman Sensen Allük mi wor sufölün me ren ekewe aramas meinisin, a ütä me lon ewe mwichen soupwüng. A allük pwe ekewe soukünö repwe towu lükün lon ekis fansoun mochomoch.
ACT 5:35 Mürin a üreni ewe mwichen soupwüng, “Ämi re Israel, oupwe ekiekifichi mine oupwe föri ngeni ekei mwän.
ACT 5:36 Ekoch ier a la a pwä eman mwän iten Teutas, a apasa pwe i eman souemwen mi lap, iwe, ina epwe ükükün föpükü mwän ra eti. Nge i a ninnila o chokewe meinisin mi chiechi ngeni ra toropasfeil o mine a ekiekin föri a ükütiu.
ACT 5:37 Mürin ei, Jutas eman re Kalilea a pwal pwä lupwen ewe fansoun makkeen it. A atupu eu mwichen aramas pwe repwe tapwela mürin. Pwal i a ninnila, nge chokewe mi eti ra toropasfeil.
ACT 5:38 Iei met üpwe ürenikemi won ei lapalap. Ousap föri och mine epwe ü ngeni ekei mwän. Oupwe likitiirela! Are ar ekiek me ar föför a pop seni aramas, epwe ükütiu,
ACT 5:39 nge are a pop seni Kot, ousap tongeni aüküretiu. Oupwe chök silei pwe oua fiu ngeni Kot.” Iwe, ewe mwichen soupwüng a tipeeu ngeni än Kamaliel we öüröür ngeniir.
ACT 5:40 Iwe, ra köralong ekewe soukünö. Mürin ra allük ngeni ekewe chon mas pwe repwe wichiir, ra pwal pöchökül le fönöü ngeniir, pwe resap fokun chüen afalafal usun iten Jesus. Mürin ra amuseerela.
ACT 5:41 Iwe, ekewe soukünö ra towu seni ewe mwichen soupwüng, ra fokun pwapwa, pun ra tongeni tolong lon riaföü me itengau fän iten Jesus.
ACT 5:42 Iwe, iteiten rän ra sopwela le afalafal lon ewe imwenfel pwal lon imwen aramas o aiti ngeni aramas ewe Pworausen Manau pwe Jesus ewe Kraist.
ACT 6:1 Ekoch fansoun mürin, lupwen ekewe chon lükü Jesus ra chomongola, a fis eu anini lefilen ekewe chon Juta mi fos lon kapasen Krik me ekewe chon Juta mi chök fos lon kapasen Ipru. Ekewe chon Juta mi fos lon kapasen Krik ra apasa, pwe ekewe fefin mi mä pwülüer seni lon ar we mwich resap angei inetiir mongö iteiten rän.
ACT 6:2 Iwe, ekewe engol me ruoman soukünö ra amwichafengeni unusen ewe mwichen chon lükülük o üreniir, “Esap pwüng ngenikem äm aipwe tümwününgau ngeni äm afalafala kapasen Kot fän iten äm tümwünü ewe angangen inetin mongö.
ACT 6:3 Iei mine ämi pwii kana, oupwe filätä füman mwän me leimi mi uren Ngünmifel o fokun tipachem, pwe sipwe awisa ngeniir ei angang.
ACT 6:4 Nge äm aipwe tupwöl le iotek o afalafala ewe kapasen Kot.”
ACT 6:5 Iwe, unusen ewe mwich a tipeeu ngeni mine ekewe soukünö ra eäni akot. Iei mine ra filätä Stefanus, eman mwän mi fokun lükülük o uren Ngünmifel, me Filip, Prokorus, Nikanor, Timon, Parmenas me Nikolaus seni Antiokia, eman chon lükün Israel mi etiwa lamalamen chon Juta me mwan.
ACT 6:6 Iwe, ra emwenala ekei mwän ren ekewe soukünö, nge ir ra iseis pöür won möküren eman me eman leir o iotek wor.
ACT 6:7 Iei usun ewe kapasen Kot a chöfetal. Nge ewe mwichen chon lükü Jesus lon Jerusalem ra fokun chochomongola, iwe, chomong lein ekewe souasor ra pwal lükü.
ACT 6:8 Iwe, Stefanus eman mwän mi uren feiöch me ren Kot, a fokun wor an tufich, pwe a föri manaman me asisil mi lapalap me lein ekewe aramas.
ACT 6:9 Nge ekoch mwän ra ü ngeni Stefanus, ir chon ewe imwen felikis mi iteni “Chon Ngas”, ekoch chon Juta seni Kirene me Aleksantria ra choni ei mwich. Ir me pwal ekoch chon Juta seni ekewe fanü Silisia me Asia ra popuetä le anini ngeni Stefanus.
ACT 6:10 Nge Ngünmifel a ngeni Stefanus tipachem, pwe lupwen a kapas, ir resap tongeni pölüeni.
ACT 6:11 Iei mine ra möni ekoch mwän pwe repwe apasa, “Äm aia rongorong pwe Stefanus a eäni kapasen turunufas usun Moses me Kot!”
ACT 6:12 Ren ei sokun lapalap ra amwökütükütü letipen aramas me ekewe souakom me ekewe Sensen Allük. Iwe, ra turufi Stefanus o etekinala mwen ewe mwichen soupwüng.
ACT 6:13 Mürin ra emwenato ekoch mwän ar repwe apasa kapas chofona usun i. Ra üra, “Ei mwän esap ükütiu le kapasingau usun ach ei mwichefel me än Moses kewe allük.
ACT 6:14 Äm aia rongorong an apasa, pwe ei Jesus seni Nasaret epwe ataetiu ewe imwenfel o akasiwili ekewe örünien lamalam Moses a aiti ngenikich!”
ACT 6:15 Iwe, chon ewe mwichen soupwüng meinisin ra newenewen ngeni Stefanus o küna pwe wowoon wonmesan a usun chök wowoon wonmesen eman chon läng.
ACT 7:1 Iwe, ewe Souasor mi Lap a aisini Stefanus, “Ifa usun, a let mine ra aturuk won?”
ACT 7:2 Nge Stefanus a pölüeni, “Ämi pwii me semei kana, oupwe aüseling ngeniei! Me mwen än ach we lewo Apraham feila pwe epwe nonom lon Haran, ewe Kot mi ling a pwä ngeni me lon Mesopotamia
ACT 7:3 o üreni, ‘Kopwe towu seni om famili me fanüom, pwe kopwe feila lon ewe fanü ngang üpwe aiti ngonuk.’
ACT 7:4 Iei mine Apraham a towu seni fanüan o feila pwe epwe nonom lon Haran. Mürin än seman we mäla, Kot a tinala seni ikenan o emwenato lon ei fanü oua nonom lon ikenai.
ACT 7:5 Kot esap ngeni Apraham och kinikin me lon ei fanü pwe epwe fanüeni, sap mwo nge ükükün chöchön eu chök ipw. Nge Kot a pwon ngeni, pwe i me mwirimwirin kana repwe fanüeni ewe fanü. Lon ewe fansoun Kot a eäni ei pwon, esamwo wor nöün Apraham.
ACT 7:6 Iei usun met Kot a üreni, ‘Mwirimwirum kana repwe wasöla lon eu fanü esap fanüer, ia aramas repwe nöüniir amanau me ie. Ikenan repwe küna riaföü lon ükükün föpükü ier.
ACT 7:7 Nge ngang üpwe apwüngü chon ewe fanü repwe angang ngeni. Iwe, mürin repwe towu seni ewe fanü o fel ngeniei me lon ei leni.’
ACT 7:8 Mürin Kot a ngeni Apraham ewe angangen sirkomsais, pwe epwe eu asisilen ewe pwon lefilen Kot me ekewe aramas. Iei mine Apraham a sirkomsaisi Isaak lon awaluen ränin mürin an uputiu, Isaak a sirkomsaisi Jakop, nge Jakop a sirkomsaisi nöün kewe engol me ruoman mwän, ir ach kewe lewo mi fokun iteföüla.
ACT 7:9 Iwe, nöün Jakop kewe mwän ra lolowo ngeni pwiir we Josef, pwe ra amömöla an epwe eman amanau lon Isip. Nge Kot a eti i
ACT 7:10 o amanaua seni an kewe riaföü meinisin. Iwe, Kot a ngeni Josef mirit o atufichi i pwe epwe küna chen me ren ewe kingen Isip. Iei mine Farao a seikätä i pwe epwe wiseni ewe wisen kepina lon unusen Isip o nemeni imwan kewe meinisin.
ACT 7:11 Mürin a fis eu lengita lon unusen Isip me Kanaan mi afisätä riaföü watte. Ach kewe lewo resap tongeni künökün aner mongö.
ACT 7:12 Iwe, lupwen Jakop a rong pwe mi wor mongö lon Isip, a tinala ikenan nöün kewe mwän, ir ach kewe lewo, lon aeuin ar sai.
ACT 7:13 Lon aruuen ar sai ngeni Isip, Josef a pwäri i ngeni pwiin kewe o ewe kingen Isip a rongorong usun än Josef we famili.
ACT 7:14 Iei mine Josef a tinala pworaus ngeni saman we Jakop o üreni pwe i me unusen an famili, irfengen meinisin ükükün fik me limman repwe feito Isip.
ACT 7:15 Mürin Jakop a saila Isip. Ikenan i me nöün kewe mwän ra mäla.
ACT 7:16 Iwe, somäär kewe ra uwato Sikem o peiaseniir lon ewe peias Apraham a möni seni nöün Hamor kewe mwän.
ACT 7:17 “Lupwen a arap ewe fansoun pwe Kot epwe apwönüetä an we pwon a eäni ngeni Apraham, iteiten ach kewe aramas mi nom lon Isip ra fokun chomongola.
ACT 7:18 Mürin eman king mi fö esap silei usun Josef a seikitä, pwe epwe nemeni Isip.
ACT 7:19 Ätewe a rawangauei ach kewe lewo o ariaföüür, a pöchökül ngeniir ar repwe pöütala nöür mönükol, pwe repwe mäla.
ACT 7:20 Lon ena fansoun Moses a uputiu, i eman mönükol mi fokun äteöch. Inan a tümwünü lon imwan lon ükükün ülüngat maram.
ACT 7:21 Nge lupwen a uwala lükün, nöün Farao fefin a mwüti o foleni pwe epwe wesewesen nöün.
ACT 7:22 Iwe, Moses a kaiö tipachemen chon Isip meinisin, a fefeitä lon an lipwäköch le kapas pwal lon an föför.
ACT 7:23 “Lupwen Moses a ierini faik, a filätä pwe epwe pii pwiin kewe chon Israel lon met a fis ngeniir.
ACT 7:24 Iwe, a küna eman re Isip mi wichi eman re Israel, iei mine a feila rer pwe epwe peni ewe re Israel, iwe, a niela ewe re Isip.
ACT 7:25 Moses a ekieki pwe püsin aramasan repwe weweiti pwe Kot a mochen nöüni i pwe epwe angaseerela, nge ir resap wewe ren.
ACT 7:26 Sorotän ewe rän a küna pwe ruoman re Israel ra fiufengen. Iwe, a sotuni an epwe awora kinamwe lefiler o a üreniir, ‘Ätekanan, ämi pwipwi, pwota oua fiufengen lefilemi?’
ACT 7:27 Nge ewe eman mi wor an mwäl ngeni ewe eman a ofochokuw Moses o a aisini, ‘Iö a seikuketä pwe kopwe samol me soukapwüng wom?
ACT 7:28 Ifa usun, ka pwal mochen nieila usun om ka niela ewe re Isip nanew?’
ACT 7:29 Lupwen Moses a rong ekei kapas, a sü seni Isip o a feila nonom lon ewe fanü Mitian. Ikenan pwülüan a nöüni ngeni ruoman ät.
ACT 7:30 “Iwe, mürin faik ier eman chon läng a pwä ngeni Moses lon pulopulen ekkei seni lon efoch iräfölüföl me lon ewe fanüapö arap ngeni ewe Chuk Sinai.
ACT 7:31 Moses a mairü ren met a küna. Lupwen a feila arap ngeni ewe iräfölüföl pwe epwe nenengeniöchü, a rongorong mwelien ewe Samol:
ACT 7:32 ‘Ngang än om kewe lewo we Kot, ngang än Apraham, Isaak me Jakop we Kot.’ Iwe, Moses a chechech ren an niuokus, pwe esap tongeni nenengeni ewe mettoch.
ACT 7:33 Mürin ewe Samol a üreni Moses, ‘Kopwe pwilitawu ipwom sus, pun ei leni ka ütä won a pin.
ACT 7:34 Üa küna ewe riaföü mi watte a fis ngeni nei kewe aramas lon Isip. Üa rongorong ar ngüngü o üa feila pwe üpwe angaseer. Kopwe etto iei, ngang üpwe tinukela Isip.’
ACT 7:35 Moses ätewe mi fen koput me ren ekewe aramasen Israel, ätewe ra aisini, ‘Iö a seikuketä pwe kopwe samol me soukapwüng wom?’ Iei i ewe eman Kot a tinala pwe epwe nemeni ekewe aramas o angaseer ren än ewe chon läng alilis, ewe mi pwä ngeni lon ewe iräfölüföl mi ngetenget.
ACT 7:36 Moses a emwenawu ekewe aramas seni Isip, a föri manaman me asisil lon Isip, arun ewe Setipar, pwal lon ewe fanüapö lon ükükün faik ier.
ACT 7:37 Moses ätewe mi üreni ekewe aramasen Israel, ‘Kot epwe tinala remi eman soufos usun chök ngang, i epwe eman me lein püsin aramasemi.’
ACT 7:38 I ätewe mi eti ekewe aramasen Israel le mwichfengen me lon ewe fanüapö. A nom ikenan ren ach kewe lewo, pwal ren ewe chon läng mi kapas ngeni me won ewe Chuk Sinai. Iwe, a angei än Kot kapas mi manau pwe epwe asile ngenikich.
ACT 7:39 Nge ach kewe lewo resap fokun mochen aleasochisi. Ra oputa i o lon letiper ra mochen liwinsefäliti Isip.
ACT 7:40 Iei mine ra üreni Aaron, ‘Kopwe föri ngenikem eman uluulun kot epwe emwenikem. Pun äm aisap silei met a fis ngeni Moses, ätewe mi emwenikeemiwu seni Isip.’
ACT 7:41 Iwe, lon ena fansoun ra föri eu uluulun anümwäl lon lapalapen eman ätemwänin kow, ra uwato ar asor ngeni, ra föri eu kametip o asamolu mine ra föri ren pöür.
ACT 7:42 Iei mine Kot a kul seniir o asechiirela pwe repwe fel ngeni ekewe füün läng, usun a fen mak lon ekewe puken soufos: ‘Ämi chon Israel! Ifa usun, ämi oua uwato rei asor me lifang lon ekewe faik ier me lon ewe fanüapö?
ACT 7:43 Apwi! Ämi oua ekifetalei ewe imwenfel seni mangaku än ewe kot Molok, pwal ewe uluulun Refan, ämi we koten fü. Iei ekewe uluulun anümwäl ämi oua föriir pwe oupwe fel ngeniir. Iei mine üpwe tinikemiila pekilan Papilon pwe oupwe oola.’
ACT 7:44 “A wor ren ach kewe lewo me lon ewe fanüapö ewe imwenfel seni mangaku. A för usun chök met Kot a aiti ngeni Moses lon liosun we a fen pwäri ngeni me mwan.
ACT 7:45 Iwe, mürin ach kewe lewo mi angei ewe imwenfel seni mangaku seni semelaper kewe ra eki ei imwenfel lupwen ra eti Josua le feila o liapeni ewe fanü seni chon ekewe mwü Kot a fen asürela me mwer. Iwe, a nonom lon ewe fanü tori fansoun Tafit.
ACT 7:46 Tafit a küna chen me ren Kot o a tüngor ngeni an epwe mwüt ngeni, pwe epwe aüetä eu imwenfel fän iten än Jakop we Kot.
ACT 7:47 Nge Salomon ätewe mi aüetä ewe imwenfel fän itan.
ACT 7:48 Nge ewe Kot mi Unusen Tekia esap nom lon imw mi för ren pöün aramas. Usun ewe soufos a apasa,
ACT 7:49 ‘Ewe Samol a apasa: Läng ai lenien motun samol, nge fanüfan lenien puun pechei. Met sokun imw oupwe aüetä fän itei? Ia a nom ie ewe leni üpwe nom lon?
ACT 7:50 Ifa usun, sap püsin ngang üa föri ekei mettoch meinisin?’”
ACT 7:51 Iwe, Stefanus a sopwela le kapas ngeniir, “Ämi aramas mi tipeförea! Letipemi ra usun chök chokewe resap lükü Kot, oua rongomang ngeni kapasen Kot! Ämi oua usun chök ämi kewe lewo: Pwal ämi oua ü ngeni Ngünmifel fansoun meinisin.
ACT 7:52 Ifa usun, mi wor eman soufos ämi kewe lewo resap ariaföüü? Ra niela nöün Kot kewe chon künö, chokewe ra arongato me lom usun waren nöün Kot we Chon Angang mi pwüng. Iwe, iei ämi oua afangamä i o niela.
ACT 7:53 Ämi chokewe mi angei än Kot kewe Allük mi feito me ren ekewe chon läng, nge ämi ousap aleasochis ngeni!”
ACT 7:54 Iwe, lupwen chon ewe mwichen soupwüng ra rongorong ngeni än Stefanus afalafal, ra fokun lingeringer o asüngürü ngiir lon ar song.
ACT 7:55 Nge Stefanus a uren Ngünmifel, a anetai mesan ngeni läng o a küna lingen Kot me Jesus mi ütä lepelifichin Kot.
ACT 7:56 Iwe, a üra, “Nengeni, üa küna pwe läng a suk o Nöün Aramas a ütä lepelifichin Kot!”
ACT 7:57 Lupwen ra rong ekei kapas, ra pinela selinger ngeni pöür o pupuchör fän leüömong. Iwe, ir meinisin ra rangeiti Stefanus,
ACT 7:58 ra etekinawu lükün ewe telinimw o popuetä le monei ngeni fau. Nge ekewe chon atutur ra isenatiu üfer kewe ren eman alüal itan Saul.
ACT 7:59 Iwe, lupwen ar momonei Stefanus ngeni fau, i a kökkö lon an iotek ngeni ewe Samol, “Ai Samol Jesus, kopwe etiwa ngüni!”
ACT 7:60 Mürin a fotopwäsuketiu o kökkö fän leüömong, “Ai Samol, kopwe amusala ei tipis ra föri ngeniei.” Mürin an apasa ei a mäla.
ACT 8:1 Iwe, Saul a fokun tipeeu ngeni ar niela Stefanus. Lon ena chök rän chon ewe mwichefel lon Jerusalem ra tolong lon watten riaföü. Ekewe souläng meinisin ra toropasfeil lon unusen ewe fanü Jutea me Samaria, chilon chök ekewe soukünö.
ACT 8:2 Ekoch mwän mi tupwöl lon ar lükülük ra peiaseni Stefanus o ra ngüngüres won lon ar kechü fän leüömong.
ACT 8:3 Nge Saul a popuetä le atala mwichefel. A feila ngeni imw me imw o etekinawu ekewe chon lükü, mwän me fefin, o atolongeer lon imwen fötek.
ACT 8:4 Iwe, ekewe chon lükü mi toropasfeil ra fetalfeil ekis meinisin o afalafala ewe kapasen Kot.
ACT 8:5 Nge Filip a feila lon eu telinimw lon Samaria o afalafala usun Kraist ngeni ekewe aramas ikenan.
ACT 8:6 Lupwen ekewe aramas ra rongorong ngeni än Filip afalafal o küna ekewe manaman a föri, ir meinisin ra fokun aüseling ngeni mine a apasa.
ACT 8:7 Ekewe ngününgau ra towu seni chomong aramas fän ar pupuchör mi leüömong, pwal chomong aramas mi mwök me aramas mi pechemä ra pöchökületä.
ACT 8:8 Iei mine a fis eu watten pwapwa lon ewe telinimw.
ACT 8:9 Iwe, a wor eman mwän itan Simon lon ewe telinimw. Ätei a amairü ekewe chon Samaria ren an föri angangen roong. A apasa pwe i eman aramas mi tekia
ACT 8:10 o aramas meinisin lon ewe telinimw, seni ekewe aramas mi iteföüla tori aramas mi kis, ra fokun aüseling ngeni. Ra apasa, “Ätei ewe manamanen Kot, a pwä pwe i ewe Manaman mi Lap!”
ACT 8:11 Aramas ra fokun aüselinga, pun fansoun langatam a amairüür ren an föri angangen roong.
ACT 8:12 Nge lupwen ra lükü än Filip afalafala ewe Pworaus Allim usun ewe Mwün Kot pwal usun Jesus Kraist, iwe, mwän me fefin ra papatais.
ACT 8:13 Pwal Simon a lükü, nge mürin an papatais a chök nonom ren Filip. Nge lupwen a küna ekewe asisil mi lapalap me ekewe manaman Filip a föri, a fokun mairü ren.
ACT 8:14 Iwe, lupwen ekewe soukünö lon Jerusalem ra rongorong pwe ekewe chon Samaria ra etiwa ewe kapasen Kot, ra tinala Petrus me Johannes rer.
ACT 8:15 Lupwen ar toriir, ra iotek fän iten ekewe chon lükü Jesus, pwe pwal ir repwe angei ewe Ngünmifel,
ACT 8:16 pun ewe Ngünmifel esamwo feitiu won eman me leir. Ra chök papatais ngeni iten ewe Samol Jesus.
ACT 8:17 Mürin Petrus me Johannes ra iseis pöür wor, iwe, ra angei ewe Ngünmifel.
ACT 8:18 Iwe, lupwen Simon a küna pwe Ngünmifel a tori chokewe ekewe soukünö ra iseis pöür wor, a mochen ngeni Petrus me Johannes moni
ACT 8:19 o üra, “Oupwe pwal ngeniei ei manaman, pwe are ngang üpwe iseis pei won eman, epwe angei Ngünmifel.”
ACT 8:20 Nge Petrus a pölüeni, “Amwo en me noumw moni oupwe tolong lon hell, pun ka ekieki pwe ka tongeni möni än Kot lifang ren moni!
ACT 8:21 Esap wor wisom are kinikinum lon ei angang, pun lelukom esap pwüng mwen mesen Kot.
ACT 8:22 Kopwe ekieksefäl seni om ei ekiek mi ngau o iotek ngeni ach Samol, pwe i epwe amusala ei sokun ekiek mi nom lon lelukom.
ACT 8:23 Pun üa küna pwe en ka fokun uren lolowo, ka pwal fötek ngeni tipis.”
ACT 8:24 Mürin Simon a üreni Petrus me Johannes, “Ouse mochen oupwe iotek ngeni ewe Samol fän itei, pwe esap wor och lein ekei mettoch oua kapas usun epwe fis ngeniei.”
ACT 8:25 Iwe, wesin än Petrus me Johannes pwärätä Jesus o apworausa än ewe Samol kapas, ra liwinsefäliti Jerusalem. Lupwen ar sai ra afalafala ewe Pworausen Manau lon chomong sopw me lon Samaria.
ACT 8:26 Iwe, eman nöün ewe Samol chon läng a üreni Filip, “Kopwe amolokotä o feila peliör won ewe al mi feila seni Jerusalem tori Kasa, ei al esap wor eman aramas a fetal won.”
ACT 8:27 Iei mine Filip a feila, nge won ewe al a churi eman re Itiopia, i eman ätelipich mi reirei, eman nöüwis mi tekia nöün ewe kiwin Kantake seni Itiopia, a tümwünü pisekin mi aüchea me nöün moni meinisin. Ei mwän a feila Jerusalem pwe epwe fel ngeni Kot,
ACT 8:28 nge iei a liwiniti lenian, a mot won waan woken o aleani puken ewe soufos Aisea.
ACT 8:29 Iwe, Ngünmifel a üreni Filip, “Kopwe feiliti ewe woken o ouwärer ngeni le fetal.”
ACT 8:30 Mürin Filip a sä ngeni o a rong pwe ewe nöüwis a aleani seni puken ewe soufos Aisea. Iwe, a aisini, “Ka weweiti mine ka aleani?”
ACT 8:31 Ewe nöüwis a pölüeni, “Epwe ifa usun ai üpwe tongeni weweiti nge esap wor eman a awewe ngeniei?” Iwe, a tüngor ngeni Filip pwe epwe tötä o mot ren won ewe woken.
ACT 8:32 Ikei ekewe wokisin ewe nöüwis a aleani, “I a usun eman sip aramas ra emwenala pwe epwe ninnila, a usun eman nienifön sip a fanafanala lupwen ar fichi ünan. Esap apasa eu kapas.
ACT 8:33 Lon an küna asäw, resap föri ngeni mine a pwüng. Iö a tongeni kapas usun mwirimwirin kana? Pun manauan won fanüfan a üküpöküla.”
ACT 8:34 Iwe, ewe mwän a aisini Filip, “Kose mochen üreniei, iö ewe soufos a kapas usun? A kapas usun i ika usun eman?”
ACT 8:35 Mürin Filip a popuetä le kapas won ekei wokisin o apworausa ngeni ewe Pworausen Manau usun Jesus.
ACT 8:36 Lupwen ar sasai won ewe al, ra tori eu leni ia a wor koluk ie. Iwe, ewe nöüwis a üra, “Nengeni, a wor koluk ikei! Met a epeti ai üpwe papatais?”
ACT 8:37 [Filip a pölüeni, “Are ka lükü ren unusen lelukom ka tongeni papatais.” Ewe nöüwis a pölüeni, “Ngang üa lükü pwe Jesus Kraist Nöün Kot.”]
ACT 8:38 Iwe, ewe nöüwis a allük pwe ewe woken epwe köüla o ir me ruoman, Filip me ewe nöüwis, ra feitiu o tolong lon ewe koluk. Nge Filip a papataisi ätei.
ACT 8:39 Lupwen ar towu me lon ewe koluk, Ngünün ach Samol a angeala Filip. Iwe, ewe nöüwis esap chüen küna, nge a sopwela lon an sai fän pwapwa mi watte.
ACT 8:40 Iwe, Filip a pwä me lon Astot. A saifeil lon ekewe telinimw meinisin o afalafala ewe Pworausen Manau tori a tori Seserea.
ACT 9:1 Lon ena fansoun Saul a chök sopwela le eniweniwa ekewe chon lükü ach Samol pwe epwe niirela. Iwe, a feila ren ewe Souasor mi Lap
ACT 9:2 o tüngor ngeni an epwe makkei toropwen mwümwütä ngeni ekewe souemwen lon ekewe imwen felikis lon Tamaskus, pwe are epwe küna chokewe mi fetal won ewe Alen ach Samol, epwe tongeni fötekini mwän me fefin, o aliwiniir ngeni Jerusalem.
ACT 9:3 Iwe, lupwen Saul a sai o arap ngeni ewe telinimw Tamaskus, lon ena chök otun eu saram me läng a feitiu won.
ACT 9:4 Iwe, a turutiu le pwül, nge a rongorong eu möngüngü mi üreni, “Saul, Saul, pwota ka ariaföüüei?”
ACT 9:5 Nge Saul a aisini, “En iö Samol?” Ewe möngüngü a pölüeni, “Ngang Jesus, ewe ka ariaföüü.
ACT 9:6 Iei kopwe ütä o feila lon ewe telinimw. Ikenan repwe ürenuk mine kopwe föri.”
ACT 9:7 Iwe, ekewe mwän mi eti Saul lon an sai ra chök ükütä o fanafanala. Ra rongorong ewe möngüngü, nge resap tongeni küna eman.
ACT 9:8 Saul a ütä seni le pwül o nenela, nge esap küna och. Iei mine ra amwöchü pöün o emwenala Tamaskus.
ACT 9:9 Lon ükükün ülüngat rän Saul esap tongeni küna mwan, esap pwal mongö ika ünümi och lon ena fansoun.
ACT 9:10 Iwe, a wor eman souläng lon Tamaskus itan Ananias. Ach Samol a kapas ngeni lon künaan o üreni, “Ananias!” Ätei a pölüeni, “Ngang iei, ai Samol.”
ACT 9:11 Ach Samol a üreni, “Kopwe amolokotä o feila lon imwen Jutas mi nom won ewe al itan Wenechar o ais usun eman mwän itan Saul seni Tarsus, pun i a iotek.
ACT 9:12 Iwe, lon künaan a pwä ngeni eman mwän itan Ananias a feito o iseis pöün won pwe epwe tongeni küna mwan.”
ACT 9:13 Ananias a üreni, “Ai Samol, üa rongorong chomong pworaus usun ei mwän me ekewe föför mi ngau meinisin a föri ngeni noumw kewe chon pin lon Jerusalem.
ACT 9:14 A feito ikei fän ewe pwüüng a angei seni ekewe souasor mi lap pwe epwe fötekiniir meinisin mi fel ngonuk.”
ACT 9:15 Nge ach Samol a üreni Ananias, “Kopwe feila, pun ei mwän üa filätä pwe epwe angang ngeniei, epwe asilefeili itei ngeni chon lükün Israel, ngeni ekewe king pwal ngeni chon Israel.
ACT 9:16 Nge ngang üpwe pwäri ngeni meinisin ükükün ewe riaföü epwe küna fän itei.”
ACT 9:17 Iei mine Ananias a feila o tolong lon ewe imw ia Saul a nom ie. A iseis pöün won o apasa, “Pwipwi Saul, ach Samol Jesus a tinieito, ewe mi pwä ngonuk won ewe al lupwen ka saito ikei. A tinieito pwe kopwe tongeni künasefäli mwomw, kopwe pwal uren Ngünmifel.”
ACT 9:18 Lon ewe chök otun och mettoch usun ülen ik a turuwu seni lon mesen Saul pwe a tongeni künasefäli mwan. Iwe, a ütä o papatais.
ACT 9:19 Iwe, mürin an mongö a pöchökülsefäl. 9.19-25 Saul a nonom lon Tamaskus ren ekewe chon lükü Jesus ekoch rän.
ACT 9:20 A müttir feila lon ekewe imwen felikis o a popuetä le afalafal pwe Jesus i ewe Nöün Kot.
ACT 9:21 Iwe, meinisin mi rongorong an afalafal ra mairü o ais, “Ifa usun, sap iei i ätewe mi niela chokewe mi fel ngeni Jesus lon Jerusalem? Esap iei i ätewe mi feito ikei ren ewe chök popun an epwe fötekini ekewe chon lükü o aliwiniir ngeni ekewe souasor mi lap?”
ACT 9:22 Nge Saul a pöchökülela lon an afalafal o a fokun alletä pwe Jesus i ewe Kraist, pwe ekewe chon Juta mi nom lon Tamaskus resap tongeni pölüeni.
ACT 9:23 Iwe, mürin chomong rän ekewe chon Juta ra chufengen o ekiekifengeni usun ar repwe niela Saul.
ACT 9:24 Nge eman a pwäri ngeni Saul ar ekiek. Lerän me lepwin ra mamasa ekewe asamalapen ewe telinimw fän iten ar repwe niela.
ACT 9:25 Nge lon eu pwin nöün kewe chon kaiö ra atolonga lon eu chüük o aürätiu me won tittin ewe telinimw.
ACT 9:26 Iwe, Saul a feila Jerusalem o a sotuni an epwe chiechi ngeni ekewe chon kaiö. Nge ir meinisin ra niuokusiti, pun resap lükü pwe i wesewesen eman chon kaiö.
ACT 9:27 Mürin Parnapas a alisi o emwenala ren ekewe soukünö. A awewe ngeniir usun än Saul küna ach Samol won ewe al, pwal usun än ach Samol kapas ngeni. A pwal apworausa ngeniir usun än Saul pworacho le afalafal usun iten Jesus lon Tamaskus.
ACT 9:28 Iei usun Saul a nonom rer. A feilfetal lon unusen Jerusalem, nge a pworacho le afalafal usun iten ach Samol.
ACT 9:29 A pwal kapas o anini ngeni ekewe chon Juta mi fos lon kapasen Krik. Nge ir ra ekieki usun ar repwe niela.
ACT 9:30 Lupwen ekewe chon lükü Jesus ra rongorong usun ei ekiek, ra emwenala Saul ngeni Seserea o tinala Tarsus.
ACT 9:31 Iwe, lon ena fansoun a fis pwe a kinamwela ekewe mwichefel lon unusen Jutea, Kalilea me Samaria. Ra pöchökülela o chochomongola ren än ewe Ngünmifel alilis o ra manau ren ar asamolu ach Samol.
ACT 9:32 Iwe, Petrus a saifeil lon ekewe fanü meinisin. A pwal feila pwe epwe churi ekewe chon pin lon Litta.
ACT 9:33 Ikenan a küna eman mwän itan Äneas mi mwök inisin, esap tongeni pwätä seni kian lon ükükün walu ier.
ACT 9:34 Iwe, Petrus a üreni, “Äneas, Jesus Kraist epwe apöchökülok iei. Kopwe pwätä o önü kiom.” Lon ewe chök otun Äneas a pwätä.
ACT 9:35 Iwe, ekewe aramas meinisin mi nonom lon Litta me ewe fanü Saron ra küna Äneas o ra kul ngeni ach Samol.
ACT 9:36 A wor eman fefin itan Tapita lon Joppa, a lükü Jesus. (Itan lon kapasen Krik Torkas, wewen: eman chia.) Neminei a fang an fansoun meinisin le föri föför mürina o alisi chon wöüngau.
ACT 9:37 Lon ena fansoun neminei a samau o mäla. Iwe, ra anükünükü somän o anomu lon eu ruum asan.
ACT 9:38 Joppa esap toau seni Litta. Iei mine lupwen ekewe chon lükü Jesus lon Joppa ra rong, pwe Petrus a nom lon Litta, ra tinala ruoman mwän ren, pwe repwe uwei ngeni ei pworaus, “Kose mochen kopwe müttir feito rech.”
ACT 9:39 Iei mine Petrus a ütä o etiir. Iwe, lupwen a tori ewe imw, ra emwenätä lon ewe ruum asan. Ikenan ekewe fefin mi mä pwülüer ra mwicheto ünükün, ra kechü o aiti ngeni Petrus ekewe söch me sokopaten üf Torkas a tei fän iter lupwen a chüen manau.
ACT 9:40 Iwe, Petrus a atowu ekewe aramas meinisin me lon ewe ruum, a fotopwäsuketiu o iotek. Mürin a kul ngeni ewe somä o apasa, “Tapita, kopwe pwätä!” Iwe, neminewe a nenela, nge lupwen a küna Petrus a pwätä.
ACT 9:41 Petrus a amwöchü pöün o alisätä pwe epwe ütä. Mürin a kökköri ekewe chon lükü meinisin fiti ekewe fefin mi mä pwülüer o api ngeniir neminewe pwe a manau.
ACT 9:42 Iwe, ei pworaus a chöfetal lon unusen Joppa, nge chomong aramas ra lükü ach we Samol.
ACT 9:43 Mürin Petrus a nonom lon Joppa lon chomong rän, a nom ren eman mwän itan Simon, i eman chon angang ngeni silin man.
ACT 10:1 Iwe, a wor eman mwän lon Seserea itan Kornelius, i eman meilapen ewe mwichen sounfiu seni Rom a iteni “Mwichen Itali”.
ACT 10:2 A tupwöl lon an niuokusiti Kot, i me chon an famili meinisin. A pwal watte an alilis ngeni ekewe chon Juta mi wöüngau o a ikiotek ngeni Kot.
ACT 10:3 Ina epwe kulok ülüngat leolopalen eu rän a wor künaan. A künaöchü eman nöün Kot chon läng a feito ren o üreni, “Kornelius!”
ACT 10:4 Kornelius a newenewen ngeni lon an niuokus o aisini, “Ai samol, met ka mochen?” Ewe chon läng a pölüeni, “Kot a etiwa om iotek me om alisi ekewe chon wöüngau o a chechemenuk.
ACT 10:5 Iei kopwe tinala ekoch mwän Joppa pwe repwe emwenato reöm eman mwän itan Simon Petrus.
ACT 10:6 I a wasöla lon imwen eman chon angang ngeni silin man itan Simon, a nom imwan aroset.”
ACT 10:7 Iwe, lupwen ewe chon läng a feila seni, Kornelius a köri ruoman me lein nöün kewe chon angang me eman sounfiu mi niuokusiti Kot, eman me lein ekewe mi angang ngeni.
ACT 10:8 Iwe, a apworausa ngeniir meinisin mine a fis o a tiniirela Joppa.
ACT 10:9 Iwe, sorotän ewe rän lupwen ar sai o ra arap ngeni Joppa, Petrus a tötä won ewe imw leoloas pwe epwe iotek.
ACT 10:10 Mürin a popuetä an echik o a mochen mongö. Nge lupwen ra amolätä anan, a wor künaan.
ACT 10:11 A küna pwe läng a sukula, nge och mettoch mi wewe ngeni echö chenikam mi watte a ürütiu me läng, nge a föfö pwokukun me rüanü.
ACT 10:12 Masouen lon ei mettoch sokopaten man mi wor fofoch pecher, sokun man mi tö won upwer, pwal machang mi mwacho.
ACT 10:13 Mürin eu möngüngü a üra, “Petrus kopwe ütä! Kopwe niela ekei man o kopwe ochoch fituker!”
ACT 10:14 Nge Petrus a üra, “Ai Samol, esap fokun öch ngeniei. Üsap fokun mwo nge mongö och mine a pin ngeniei o nom lon tettelin limengau.”
ACT 10:15 Iwe, ewe möngüngü a kapassefäl fan aruuan, “Kosap apasa pwe a limengau och mettoch are Kot a apasa pwe a limöch.”
ACT 10:16 Ei lapalap a fis fän ülüngat. Mürin ewe mettoch a ürüsefälitä läng.
ACT 10:17 Iwe, lupwen Petrus a ekieki usun wewen künaan we, ekewe mwän Kornelius a tiniirela ra küna ia imwen Simon we a nom ie, iwe, ra ütä ünükün asamalapan.
ACT 10:18 Ra kökkö o ais are Simon mi pwal iteni Petrus a nom ikenan.
ACT 10:19 Nge lupwen Petrus a chüen chök ekieki usun wewen künaan we, Ngünmifel a kapas ngeni, “Simon, ülüman mwän ra küttok.
ACT 10:20 Iei mine kopwe ütä o feitiu rer. Kosap tipemwaramwar om kopwe etiir, pun ngang üa tiniireto ikei.”
ACT 10:21 Iwe, Petrus a tötiu o üreni ekewe mwän, “Ngang ätewe oua kütta. Pwota oua feito?”
ACT 10:22 Ekewe mwän ra pölüeni, “Kornelius ewe meilapen sounfiu a tinikeemito. I eman mwän mi pwüng o niuokusiti Kot, a wor meninin me ren ekewe aramasen Juta meinisin. Eman chon läng mi pin a üreni pwe epwe titi en, pwe kopwe feila lon imwan, pun a mochen rongorong met kopwe üreni.”
ACT 10:23 Mürin Petrus a köralong ekewe mwän lon ewe imw, pwe repwe wasöla ren. Iwe, sorotän ewe rän Petrus a etiirela, nge pwal ekoch pwipwi seni Joppa ra etala.
ACT 10:24 Sorotän ewe rän ra tori Seserea. Iwe, Kornelius a awitiir, a pwal körifengeni aramasan me chiechian kana mi kan ngeni.
ACT 10:25 Lupwen Petrus a tolong lon ewe imw, Kornelius a churi o chapetiu mwan lon an meniniti.
ACT 10:26 Nge Petrus a apwätai o üreni, “Kopwe ütä, pun ngang pwal eman chök aramas.”
ACT 10:27 Lupwen ar kakapasfengen, Petrus a etalong Kornelius lon ewe imw, ikenan a küna chomong aramas mi mwichfengen.
ACT 10:28 Iwe, a üreniir, “Ämi oua fokun silei, pwe a ü ngeni ach lamalam pwe eman chon Juta epwe chiechi ngeni eman chon lükün Israel are tolong lon imwan. Nge Kot a aiti ngeniei pwe üsap anomu eman aramas lon tettelin aramas mi limengau ika ngau.
ACT 10:29 Iei mine lupwen oua titi ngang, üa feito, nge üsap eäni och kapasen pölüeni. Iei üpwe aisinikemi pwota oua titi ngang?”
ACT 10:30 Iwe, Kornelius a pölüeni, “Rüanü rän a la ngang üa nom lon imwei lon ei chök otun kulok ülüngat leolopan. A müttir fis pwe eman mwän mi üföüf üf mi saramaram a ütä mwei
ACT 10:31 o a apasa, ‘Kornelius! Kot a aüselinga om iotek o chechemeni om alilis ngeni ekewe chon wöüngau.
ACT 10:32 Kopwe tinala ekoch aramas Joppa ren Simon a pwal iteni Petrus pwe epwe feito. I a wasöla lon imwen Simon eman chon angang ngeni silin man, a nom imwan aroset.’
ACT 10:33 Iei mine üa müttir titi en, nge a mürina pwe ka feito. Iei äm meinisin aia nonom mwen mesen Kot, pwe aipwe aüseling ngeni meinisin mine ewe Samol a allük ngonuk pwe kopwe aiti ngenikem.”
ACT 10:34 Mürin Petrus a popuetä le kapas, “Iei üa fokun mefi pwe a let pwe Kot esap lifilifil aramas,
ACT 10:35 nge a etiwa aramas mi niuokusiti i o föri mine a pwüng seni ekewe mwü meinisin.
ACT 10:36 Oua silei ewe kapas Kot a tinala ngeni ekewe aramasen Israel, a arongafeili ewe Pworausen Manau pwe sipwe kinamwefengen me Kot ren Jesus Kraist, i ewe Samol mi nemeni aramas meinisin.
ACT 10:37 Oua silei met a fis lon unusen Jutea, a popuetä me lon Kalilea mürin ewe papatais Johannes a afalafal usun.
ACT 10:38 Oua silei usun Jesus Kraist seni Nasaret, pwal usun än Kot tinatiu won ewe Ngünmifel o ngeni an manaman. A fetalfeil ekis meinisin, a föri föför mürina o apöchöküla meinisin mi nom fän nemenien ewe Tefil, pun Kot a eti.
ACT 10:39 Äm aia chon pwärätä usun ekewe mettoch meinisin a föri lon fanüen chon Juta pwal lon Jerusalem. Mürin ra niela i ren ar chüfölüetä won efoch iräpenges.
ACT 10:40 Nge Kot a amanauasefäli seni mäla lon aülüngatin rän o a föri pwe a pwä ngeni aramas.
ACT 10:41 Esap pwä ngeni aramas meinisin, nge a chök pwä ngenikem, äm kewe Kot a fen filikeemitä pwe aipwe chon pwärätä. Äm aia mongöfengen o ünfengen me i mürin an manausefäl seni mäla.
ACT 10:42 A allük ngenikem pwe aipwe afalafala ewe Pworausen Manau ngeni ekewe aramas o pwärätä pwe i ätewe Kot a filätä an epwe soukapwüng won aramas mi manau me aramas mi mäla.
ACT 10:43 Ekewe soufos meinisin ra pwärätä usun i o apasa, pwe meinisin mi lükü i repwe küna amusamusen ar tipis kana pokiten itan.”
ACT 10:44 Lupwen Petrus a chüen kapas, ewe Ngünmifel a feitiu won chokewe meinisin mi rongorong ngeni an afalafal.
ACT 10:45 Ekewe chon lükü Jesus mi etato Petrus seni Joppa, ir chon Juta, ra mairü pwe Kot a pwal fangeto an lifang, ewe Ngünmifel ngeni chon lükün Israel.
ACT 10:46 Pun ra rongorong pwe ir ra kapas lon kapasen ekis o fokun mwareiti Kot. Mürin Petrus a apasatä,
ACT 10:47 “Ekei aramas ra angei ewe Ngünmifel usun chök äm aia angei. Ifa usun, eman a tongeni epetiir ar repwe papatais ren koluk?”
ACT 10:48 Iei mine a allük ngeniir pwe repwe papatais lon iten Jesus Kraist. Mürin ra tüngor ngeni Petrus pwe epwe nonom rer ekoch rän.
ACT 11:1 Iwe, ekewe soukünö me ekewe chon lükü Jesus lon unusen Jutea ra rongorong pwe ekewe chon lükün Israel ra pwal etiwa kapasen Kot.
ACT 11:2 Iei mine lupwen Petrus a feila Jerusalem, chokewe mi tipeni än ekewe chon lükün Israel repwe sirkomsais, ra esita i o apasa,
ACT 11:3 “En ka wasöla lon imwen ekewe chon lükün Israel resap sirkomsais, ka pwal mwo nge etiir le mongö!”
ACT 11:4 Mürin Petrus a popuetä le apworausa ngeniir tichikin meinisin mine a fis seni lepoputän,
ACT 11:5 “Lupwen üa iotek me lon ewe telinimw Joppa, a wor künaei. Üa küna och mettoch mi wewe ngeni echö chenikam mi watte, a föfö pwokukun me rüanü, a ürütiu me läng. Iwe, a köüla mwei.
ACT 11:6 Üa nenelong lon o üa küna sokopaten man mi wor fofoch pecher, manmwacho, sokopaten mantötö me machang mi mwacho.
ACT 11:7 Mürin üa rongorong eu möngüngü a üreniei, ‘Petrus, kopwe ütä, kopwe niela ekei man o kopwe ochoch fituker!’
ACT 11:8 Nge üa pölüeni, ‘Ai Samol, esap fokun öch ngeniei! Üsap fokun mwo nge mongö och mine a pin ngeniei o nom lon tettelin limengau.’
ACT 11:9 Ewe möngüngü a kapassefäl seni läng, ‘Kosap apasa pwe a limengau och mettoch are Kot a apasa pwe a limöch.’
ACT 11:10 Ei lapalap a fis fän ülüngat, mürin ewe mettoch a ürüsefälitä läng.
ACT 11:11 Lon ena chök otun ekewe ülüman mwän Kornelius a tiniireto rei seni Seserea ra tori ewe imw ia üa nom ie.
ACT 11:12 Iwe, ewe Ngünmifel a üreniei pwe üpwe etiir, nge üsap tipemwaramwar. Ekei wonoman chon lükü Jesus seni Joppa ra pwal etiei le feila Seserea, äm meinisin aia tolong lon imwen Kornelius.
ACT 11:13 Iwe, Kornelius a apworausa ngenikem usun an küna eman chon läng a ütä lon imwan o üreni, ‘Kopwe tinala ekoch mwän Joppa ren Simon mi pwal iteni Petrus, pwe epwe feito reöm.
ACT 11:14 I epwe afalafala ewe kapasen Kot ngenikemi, pwe en me chon leimwom meinisin oupwe küna manau.’
ACT 11:15 Iwe, lupwen üa popuetä le kapas, ewe Ngünmifel a feitiu wor usun chök a feitiu woch me mwan.
ACT 11:16 Mürin üa chechemeni mine ewe Samol a fen apasa, ‘Johannes a papataisikemi ren koluk, nge ämi oupwe papatais ren Ngünmifel.’
ACT 11:17 A fokun fat pwe Kot a fang ngeni ekei chon lükün Israel ewe chök lifang a ngenikich lupwen sia lükü ach Samol Jesus Kraist. Iö ngang pwe üpwe tongeni pinei mine Kot a mochen föri?”
ACT 11:18 Lupwen ra rongorong ei pworaus, ra ükütiu le esita Petrus, ra mwareiti Kot o apasa, “Kot a pwal mwüt ngeni ekewe chon lükün Israel pwe repwe ekieksefäl o küna manau.”
ACT 11:19 Iwe, ekewe chon lükü Jesus ra toropasfeil pokiten ewe riaföü watte a toriir lupwen Stefanus a ninnila. Ekoch leir ra feila tori Fönisia, Saipros me Antiokia o afalafala kapasen Kot ngeni ekewe chök chon Juta.
ACT 11:20 Nge ekoch me lein ekewe chon lükü Jesus, ir mwän seni Saipros me Kirene, ra feila Antiokia o arongafeili kapasen Kot ngeni pwal ekewe chon lükün Israel, ra afalafala ngeniir ewe Pworausen Manau usun ach Samol Jesus.
ACT 11:21 Iwe, manamanen ach Samol a etiir, pwe chomong aramas ra lükü o kul ngeni ewe Samol.
ACT 11:22 Ewe pworaus usun mine a fis a tori ewe mwichefel lon Jerusalem, iei mine ra tinala Parnapas Antiokia.
ACT 11:23 Iwe, lupwen a tori Antiokia, a küna usun än Kot afeiöchü ekewe aramas, a pwapwa o pese ngeniir, pwe repwe allükülük o let ngeni ewe Samol ren unusen leluker.
ACT 11:24 Parnapas eman mwän mi aramasöch, a uren Ngünmifel me lükülük o chomong aramas ra lükü ewe Samol ren.
ACT 11:25 Mürin Parnapas a feila Tarsus pwe epwe kütta Saul.
ACT 11:26 Iwe, lupwen an küna, a emwenato Antiokia. Lon ükükün eu ier Parnapas me Saul ra chufengen me chon ei mwichefel o asukula eu mwichen aramas mi watte. A fis me lon Antiokia, pwe aramas ra popuetä le aita ngeni ekewe chon lükü “souläng” (Chon tapwela mürin Kraist).
ACT 11:27 Lon ena fansoun ekoch soufos ra feito Antiokia seni Jerusalem.
ACT 11:28 Eman leir itan Akapus a ütä o osuni fän manamanen ewe Ngünmifel, pwe eu mailengita epwe tori unusen fanüfan. (Ei a fis lon mwün Sisar Klautius.)
ACT 11:29 Iwe, ekewe chon lükü Jesus ra tipeeufengen, pwe än eman me eman leir alilis won ükükün an tongeni epwe titila ngeni pwiir kewe chon lükü mi nom lon Jutea.
ACT 11:30 Ra föri ei o tinala Parnapas me Saul, pwe repwe uwei ar we alilis ngeni ekewe souakomwen mwichefel lon Jerusalem.
ACT 12:1 Lon ewe fansoun ewe king Herotes a popuetä le ariaföüü ekoch chon ewe mwichefel.
ACT 12:2 A niela James pwiin Johannes ren ketilas.
ACT 12:3 Lupwen a mefi pwe ekewe chon Juta ra pwapwa ren, a sopwela an föför o a pwal turufi Petrus. Ei a fis lupwen fansoun chulapen mongö pilawa esap wor iis lon.
ACT 12:4 Mürin an turufi Petrus, a aturalong lon imwen fötek. Ikenan a atolonga lepöün rüanü mwichen sounfiu, akaföman lon eu mwich. Herotes a ekiekin föri kapwüng ngeni Petrus me mwen ekewe aramas mürin ewe chulapen Pasofer.
ACT 12:5 Iei usun Petrus a mwöchülong lon fötek, nge ekewe aramas lon ewe mwichefel ra likitü le ikiotek ngeni Kot fän itan.
ACT 12:6 Lon ewe pwinin me mwen än Herotes epwe apwüngü Petrus me mwen ekewe aramas, Petrus a möür lefilen ruoman sounfiu, a riri ngeniir ren ruofoch sein seni mächä, nge a wor chon mamas ra mamasa asamalapen ewe imwen fötek.
ACT 12:7 Lon ei chök otun eman nöün ewe Samol chon läng a ü ikenan o eu saram a asarama lon ewe ruum. Iwe, ewe chon läng a pisiri won afaren Petrus, a apwökätä o üreni, “Kopwe müttir pwätä!” Lon ei chök otun ekewe sein seni mächä ra turutiu seni won pöün Petrus.
ACT 12:8 Mürin ewe chon läng a üreni, “Kopwe anükü om pelit o ipweipwelong ipwom sus.” Iwe, Petrus a föri iei usun. Mürin ewe chon läng a üreni, “Kopwe üföüfolong üfom we o tapweto müri.”
ACT 12:9 Iwe, Petrus a tapwela mürin o towu seni ewe imwen fötek. Nge Petrus esap silei, pwe mine ewe chon läng a föri a wesewesen fis. A ekieki pwe a wor künaan.
ACT 12:10 Ra pwere seni ewe aeuin mwichen chon mas me ewe aruuen mwichen chon mas o ra tori ewe amüchülan asamalap seni mächä mi wene ngeni ewe telinimw. Iwe, ewe asamalap a püsin sukula ngeniir o ir me ruoman ra towu. Ra mwinemwinela won ewe al, nge lon ei chök otun ewe chon läng a feil seni Petrus.
ACT 12:11 Mürin Petrus a mefi mine a fis ngeni o a apasa, “Iei üa silei pwe mine a fis ngeniei a wesewesen let. Ewe Samol a tinato nöün we chon läng pwe epwe angasaei seni fän nemenemen Herotes, pwal seni ekewe mettoch meinisin ekewe aramasen Juta ra ekiekin föri ngeniei, pwe üpwe tolong lon riaföü.”
ACT 12:12 Lupwen a wewela ren mine a fis ngeni, a feila ngeni imwen Maria, inen Johannes mi pwal iteni Markus. Ikenan chomong aramas ra chufengen o iotekfengen.
ACT 12:13 Iwe, Petrus a fichifich won ewe asamalapen lükün o eman chon angang föpwül itan Rota a feiliti ewe asam pwe epwe pii iö we a fichifich.
ACT 12:14 Nge lupwen a silleni mwelien Petrus, a fokun pwapwa, pwe a liwiniti ewe mwichen aramas, nge esap mwo suki ewe asam. Iwe, a üreniir, pwe Petrus a nom lükün ewe asam.
ACT 12:15 Nge ir ra üreni, “Ka umwes!” Iwe, neminewe a chök änimau pwe a pwüng an kapas. Iei mine ra üra, “Iei i an chon läng.”
ACT 12:16 Nge Petrus a chök sopwela le fichifich. Iwe, lupwen ra suki ewe asam, ra küna i o ra fokun mairü.
ACT 12:17 Petrus a älipö ngeniir pwe repwe mosonoson o a apworausa ngeniir usun än ewe Samol emwenawu seni lon ewe imwen fötek. Mürin a üra, “Oupwe asile ngeni James me ekewe chon lükü ei pworaus.” Iwe, a feil seniir o feila lon pwal eu leni.
ACT 12:18 Iwe, lesosorun ewe rän a fis eu watten osukosuk lefilen ekewe chon mas, pun ra aisfengen lefiler met a fis ngeni Petrus.
ACT 12:19 Mürin än Herotes küttafichi Petrus, nge esap küna, a atittinafichi ekewe chon mas o a allük pwe repwe ninnila. Mürin ei, Herotes a feila seni Jutea o feila Seserea o a nonom ikenan eu fansoun.
ACT 12:20 Iwe, Herotes a fokun song ngeni ekewe chon Tirus me Siton. Iei mine ekoch me leir ra tipeeufengen o feila pwe repwe churi Herotes. Ra akomwen aliapa Plastus, eman nöün ewe king nöüwis mi wisen nemelapei imwan, pwe epwe nom lon pekiir. Mürin ra feila ren Herotes o tüngor an epwe kinamwe ngeniir, pun ir me aramasen fanüer ra angei aner mongö seni fanüen ewe king.
ACT 12:21 Lon eu rän mi kefilitä, Herotes a üföüfolong üfan üfen king, a mot won an lenien motun king o afalafal ngeni ekewe aramas.
ACT 12:22 Iwe, ekewe aramas ra kökkö fän leüömong, “Sap mwelien eman aramas, nge i mwelien eman kot!”
ACT 12:23 Lon ewe chök otun nöün ewe Samol chon läng a ni Herotes, pun esap ngeni Kot lingan. Iwe, moso ra äni fitukan pwe a mäla.
ACT 12:24 Nge ewe kapasen Kot a chök chöfetal ekis meinisin o lalapala.
ACT 12:25 Iwe, lupwen Parnapas me Saul ra wes le föri ar angang, ra liwinsefäl seni Jerusalem, nge ra uwei Johannes mi pwal iteni Markus.
ACT 13:1 Iwe, a wor soufos me sense lon ewe mwichefel lon Antiokia iter Parnapas, Simeon a pwal iteni Niker, Lusius seni Kirene me Manaen, (ätei a folfengen me ewe samol Herotes) pwal Saul.
ACT 13:2 Lupwen ar fel ngeni ewe Samol me echikefel, Ngünmifel a üreniir, “Oupwe aimwüela fän itei Parnapas me Saul pwe repwe föri ewe angang üa köriir ngeni.”
ACT 13:3 Mürin ar echikefel o iotek, ra afeiöchüür o tiniirela.
ACT 13:4 Iwe, Parnapas me Saul, ätekewe ewe Ngünmifel a tiniirela, ra feitiu Selusia, ra sai seni ikenan o sai ngeni ewe fanü Saipros.
ACT 13:5 Lupwen ar tori ewe telinimw Salamis, ra afalafala ewe kapasen Kot lon än ekewe chon Juta kewe imwen felikis. Iwe, Johannes Markus a pwal fitiir ren an epwe alisiir lon ewe angang.
ACT 13:6 Iwe, ra saifeil lon unusen ewe fanü tori ra tori ewe telinimw Pafos. Ikenan ra churi eman chon Juta sourong me soufos chofona a iteni Par-Jesus.
ACT 13:7 Ätei a angang ngeni kepinan ewe fanü itan Serkius Paulus, i eman mwän mi tipachem. Ei kepina a körato Parnapas me Saul pwe repwe feito ren, pun a mochen aüseling ngeni kapasen Kot.
ACT 13:8 Nge ewe sourong Elimas a pölüeniir. (Elimas iei itan lon kapasen Krik.) A sotuni an epwe akulu letipen ewe kepina an esap lükü Jesus.
ACT 13:9 Mürin Saul mi pwal iteni Paulus a uren Ngünmifel, a newenewen ngeni Elimas
ACT 13:10 o a apasa, “En nöün ewe Tefil! En ewe chon oput meinisin mine a mürina! Ka uren sokopaten atuputup me ekisolä. Ka chök soreifochei än ach Samol kapas mi let ngeni kapas chofona!
ACT 13:11 Pöün ach Samol epwe feitiu womw iei chök. Kopwe mesechun, pwe kosap chüen tongeni küna saramen akkar lon eu fansoun.” Lon ewe chök otun och toputop me rochopwak a feitiu won Elimas o atoputopala lon mesan. Iwe, a atapfeil o kütta eman epwe wisen amwöchü pöün o emweni.
ACT 13:12 Lupwen ewe kepina a küna mine a fis, a lükü, pun a fokun mairü ren ewe afalafal usun ach Samol.
ACT 13:13 Iwe, Paulus me chienan kana ra sai seni Pafos o sai ngeni Perka lon Pamfilia. Ikenan Johannes Markus a imwü seniir o liwinsefäliti Jerusalem.
ACT 13:14 Mürin ra sai seni Perka o tori Antiokia lon Pisitia. Nge lon ewe ränin sapat ra tolong lon ewe imwen felikis o mottiu.
ACT 13:15 Mürin ar aleani seni än Moses kewe Allük me ekewe puken soufos, ekewe meilapen ewe imwen felikis ra tini eman an epwe üreniir, “Ämi pwiim kana, are a wor ämi afalafalen apöchöküla ekei aramas, oupwe kapas.”
ACT 13:16 Iwe, Paulus a ütä, a aitiela pöün o apasa, “Ämi pwii kana re Israel me ämi chon lükün Israel meinisin mi fel ngeni Kot, oupwe aüseling ngeniei!
ACT 13:17 Än chon Israel we Kot a filätä ach kewe lewo o föri pwe repwe eu mwichen aramas mi chomong lupwen fansoun ar nonom lon Isip. Fän watten an manaman a emweniirewu seni ewe fanü.
ACT 13:18 Lon ükükün faik ier Kot a alisiir me lon fanüapö, inamwo ika ra lükümach ngeni.
ACT 13:19 A akufu fisu mwü lon ewe fanü Kanaan o öffönüa nöün kewe aramas ngeni ewe fanü.
ACT 13:20 Ei a fis lon ükükün föpükü lime ier. “Mürin ei, Kot a ngeniir soukapwüng pwe repwe emweniir tori lon fansoun ewe soufos Samuel.
ACT 13:21 Iwe, lupwen ra tüngor eman king, Kot a seikätä Saul nöün Kis seni ewe ainangen Peniamin, pwe epwe nöür king lon ükükün faik ier.
ACT 13:22 Mürin an asapwilatiu Saul, a seikätä Tafit pwe epwe nöür king. Iei usun mine Kot a pwärätä usun i, ‘Üa küna pwe Tafit nöün Jesi we a lelukeni lelukei. Epwe föri meinisin mine ngang üa mochen pwe epwe föri.’
ACT 13:23 Iwe, me lein mwirimwirin Tafit kewe, Kot a filätä Jesus pwe epwe Chon Amanau fän iten chon Israel, usun a fen pwon.
ACT 13:24 Me mwen än Jesus epwe war, Johannes a afalafal ngeni ekewe aramasen Israel meinisin, pwe repwe kul seni ar tipis o papatais.
ACT 13:25 Nge lupwen Johannes a arapakan ngeni an epwe awesala an angang, a üreni ekewe aramas, ‘Iö oua ekieki pwe ngang? Sap ngang ätewe oua witiwiti. Nge ewe eman epwe feito me müri, ngang üsap fich ngeni ai üpwe apichi ririn ipwan sus.’
ACT 13:26 Ämi pwii kana re Israel, ämi mwirimwirin Apraham me ämi chon lükün Israel meinisin mi fel ngeni Kot: Ei kapasen manau Kot a fen tinato ngenikich!
ACT 13:27 Pun ekewe aramas mi nom lon Jerusalem me nöür kewe souemwen resap silei pwe i ewe Chon Amanau, resap pwal weweiti kapasen ekewe soufos ra aleani iteiten ekewe ränin sapat. Nge lupwen ra atipisi Jesus, ra apwönüetä alon ekewe soufos.
ACT 13:28 Inamwo ika resap tongeni küna och popun ar repwe atipisi pwe epwe mäla, ra tüngor ngeni Pilatus an epwe ninnila.
ACT 13:29 Iwe, mürin ar föri meinisin mine ekewe Toropwe mi Pin ra kapas usun i, ra angeatiu inisin seni won ewe iräpenges o anomu lon eu peias.
ACT 13:30 Nge Kot a amanaua i seni mäla.
ACT 13:31 Iwe, lon chomong rän a pwä ngeni chokewe mi eti i lon an saifetal seni Kalilea tori Jerusalem. Iei ir ra chon pwärätä i ngeni ekewe aramasen Israel.
ACT 13:32 Äm aia feito ikei o aronga ngenikemi ewe Pworausen Manau. Mine Kot a fen pwon ngeni ach kewe lewo
ACT 13:33 a apwönüetä fän itach, kich mwirimwirir, ren an amanauasefäli Jesus, usun a fen mak lon Kölfel sopun ruu: ‘En nei mwän, ikenai üa wiliti semom.’
ACT 13:34 Iei usun mine Kot a apasa usun an epwe amanauasefäli seni mäla, pwe esap fokun küna machen somä: ‘Üpwe fokun afeiöchükemi ren ekewe feiöch mi pin usun üa fen pwon ngeni Tafit.’
ACT 13:35 Iei mine a pwal mak lon eu wokisin: ‘En kosap mwüt ngeni Noumw we mi Pin an epwe küna machen somä.’
ACT 13:36 Pun Tafit a föri mine Kot a akota ngeni lon fansoun manauan, mürin a mäla, a peias ren an kewe lewo, nge inisin a pomach.
ACT 13:37 Nge ätewe Kot a amanauasefäli seni mäla esap pomach inisin.
ACT 13:38 Iei mine ämi pwii kana, üa mochen ämi oupwe silei pwe ewe pworaus usun ach küna amusamusen tipis a torikemi ren Jesus.
ACT 13:39 Ämi meinisin mi lükü i oua ngas seni ämi tipis kana, iei met ewe Allükün Moses esap tongeni föri, pun esap tongeni angasakemiila.
ACT 13:40 Iei mine oupwe afälikemi, pwe esap fis ngenikemi mine ekewe soufos ra apasa,
ACT 13:41 ‘Oupwe nengeni ämi chon turunufasei alon Kot! Oupwe weitifengenikemi o mäla! Pun ngang üpwe föri ngenikemi och föför lon ränin manauemi, ämi ousap fokun mochen lükü, inamwo are eman epwe awewe ngenikemi.’”
ACT 13:42 Iwe, lupwen Paulus me Parnapas ra towu seni ewe imwen felikis, ekewe aramas ra tüngor ngeniir, pwe repwe liwinsefäl lon ewe ränin sapat me mürin o sopwela le kapas ngeniir usun ekei mettoch.
ACT 13:43 Wesin än ekewe aramas mwichfengen, chomong chon Juta me chon lükün Israel mi etiwa ewe lamalamen chon Juta ra tapwela mürin Paulus me Parnapas. Ekewe soukünö ra kapas ngeniir o pese ngeniir pwe repwe sopwela le anomu ar lükülük won ewe ümöümöchün Kot.
ACT 13:44 Lon ewe ränin sapat me mürin arapakan unusen chon ewe telinimw ra chufengen pwe repwe rongorong än ach we Samol kapas.
ACT 13:45 Nge lupwen ekewe chon Juta ra küna ewe mwicheichen aramas, ra fokun lolowo. Ra esita mine Paulus a apasa o kapasingau usun.
ACT 13:46 Mürin Paulus me Parnapas ra pölüeniir fän pwora, “A pwüng ngenikem äm aipwe akomwen afalafala ngenikemi ewe kapasen Kot. Nge pokiten ousap etiwa, ousap pwal ekieki pwe oua fich ngeni ewe manau esemüch, aipwe likitikemi o feila ngeni ekewe chon lükün Israel.
ACT 13:47 Pun iei usun mine ewe Samol a allük ngenikem, ‘Üa föri pwe kopwe eu saram fän iten chon lükün Israel, pwe kopwe uwato manau ngeni chon fanüfan meinisin.’”
ACT 13:48 Lupwen ekewe chon lükün Israel ra rong ei pworaus, ra pwapwa o mwareiti än ach Samol kapas. Iwe, chokewe mi fil ngeni manau esemüch ra lükü.
ACT 13:49 Iwe, än ach Samol kapas a chöfetal lon unusen ewe fanü.
ACT 13:50 Nge ekewe chon Juta ra etipetipa ekewe finesamol seni chon lükün Israel mi fel ngeni Kot, pwal ekewe souemwenin ewe telinimw pwe repwe ü ngeniir. Ra popuetä le ariaföüü Paulus me Parnapas o asürela seni fanüer.
ACT 13:51 Iwe, ekewe soukünö ra wichiki pwülün fän pecher pwe eu asisilen ar ü ngeni aramasen ewe telinimw o feila Ikonium.
ACT 13:52 Nge ekewe chon lükü Jesus lon Antiokia ra fokun pwapwa o uren Ngünmifel.
ACT 14:1 Iwe, lon Ikonium a pwal fis pwe Paulus me Parnapas ra tolong lon än chon Juta imwen felikis. Ikenan ra afalafal pwe eu mwichen chon Juta me chon lükün Israel mi chomong ra lükü Jesus.
ACT 14:2 Nge ekewe chon Juta resap lükü ra etipetipa ekewe chon lükün Israel pwe repwe ü ngeni ekewe chon lükülük.
ACT 14:3 Iei mine Paulus me Parnapas ra nonometiu ikenan fansoun langatam. Ra pwora le afalafal usun ewe Samol, i ewe mi alletä pwe ar afalafal usun an ümöümöch a let, pun a atufichiir pwe repwe föri asisil me manaman.
ACT 14:4 Iwe, ekewe aramas lon ekewe telinimw ra tipefesen: Ekoch ra nom won pekin ekewe chon Juta, nge ekoch ra nom won pekin ekewe soukünö.
ACT 14:5 Mürin ekoch chon lükün Israel me chon Juta ra chufengen me nöür kewe souemwen pwe repwe ekiekifengeni usun ar repwe afeiengaua ekewe soukünö o mone ngeniir fau pwe repwe mäla.
ACT 14:6 Nge lupwen än ekewe soukünö silei ei pworaus, ra sü ngeni ekewe telinimw Listra me Terpe lon ewe fanü Likaonia pwal ngeni ekewe fanü ünükün.
ACT 14:7 Lon ekana leni ra sopwela le afalafala ewe Pworausen Manau.
ACT 14:8 A wor eman mwän lon Listra a ter inisin. A mä pechen seni leuputiuan, pwe esap tongeni tufichin fetal.
ACT 14:9 Ätei a rong än Paulus afalafal. Paulus a küna pwe a wor an lükü pwe a tongeni pöchökületä. Iei mine a newenewen ngeni
ACT 14:10 o apasa fän leüömong, “Kopwe üwenewenetä won pecheöm!” Iwe, ewe mwän a mwetetä o popuetä le fetalfeil.
ACT 14:11 Lupwen ewe mwichen aramas a küna mine Paulus a föri, ra kökkö fän leüömong lon fosun Likaonia, “Ekewe kot ra feitiu rech lon lapalapen aramas!”
ACT 14:12 Ra aita ngeni Parnapas iten ar we kot Seus, nge Paulus ra aita ngeni Hermes iten pwal eman ar kewe kot, pun i ätewe mi silelap kapas.
ACT 14:13 Iwe, nöün ewe kot Seus souasor, an imwenfel a chök nom ünükün ewe telinimw, a uwato ätemwänin kow me mwärämwär ren asamalapen ewe telinimw, pun i me ewe mwichen aramas ra mochen eäniir asor ngeni ekewe soukünö.
ACT 14:14 Nge lupwen Parnapas me Paulus ra rong mine ra ekiekin föri, ra kamwei üfer, ra sälong lukalapen ewe mwichen aramas o kökkö fän leüömong,
ACT 14:15 “Pwota oua föri ei sokun lapalap? Äm aramas chök usun chök ämi! Äm aia nom ikei, pwe aipwe aronga ngenikemi ewe Pworausen Manau, pwe oupwe kul seni ämi fel ngeni ekei kot mi lomotongau o fel ngeni ewe Kot mi manau, ewe mi föri läng me fanüfan me matau me meinisin mine a nom lor.
ACT 14:16 Lon fansoun lom Kot a mwüt ngeni aramas meinisin pwe repwe püsin filätä mine ra mochen föri.
ACT 14:17 Nge Kot a chök pwärätä usun lapalapan ren an föri ekewe mettoch mi mürina: A fang ngenikemi üt seni läng, pwal kiniemi ua lon fansoun räs, a ngenikemi enemi o aura lelukemi ren pwapwa.”
ACT 14:18 Iei mwo ekei kapas ra eäni ngeniir, nge a weires ngeni ekewe soukünö pwe repwe pinei ewe mwichen aramas seni ar repwe asor ngeniir.
ACT 14:19 Mürin ra war ekoch chon Juta seni Antiokia lon Pisitia pwal seni Ikonium. Ra aliapa ewe mwichen aramas ngeni ar pekin, ra monei fau ngeni Paulus o ürawu seni lon ewe telinimw, pun ra ekieki pwe a mäla.
ACT 14:20 Nge lupwen än ekewe chon lükü Jesus ütä pwelin ünükün, Paulus a ütä o liwinsefälilong lon ewe telinimw. Iwe, sorotän ewe rän Paulus me Parnapas ra feila Terpe.
ACT 14:21 Iwe, Paulus me Parnapas ra afalafala ewe Pworausen Manau lon Terpe o asoulängala chomong aramas. Mürin ra liwinsefäliti Listra me Ikonium o sai ngeni Antiokia lon Pisitia.
ACT 14:22 Ra apöchöküla ekewe chon lükü o anüküchareer pwe repwe tupwöl lon ar lükülük. Ra pwal üreniir, “Sipwe tolong lon Mwün Kot ren riaföü mi chomong.”
ACT 14:23 Iwe, Paulus me Parnapas ra filätä souakom fän iten ekewe souläng lon eu me eu kewe mwichefel. Mürin ar iotek fan echikefel ra likitiir ngeni ach Samol, ewe ir ra anomu ar apilükülük won.
ACT 14:24 Mürin ar saifetal lon ewe fanü Pisitia, ra tori Pamfilia.
ACT 14:25 Nge lupwen ar wes le afalafala ewe kapasen Kot lon Perka, ra feitiu lon ewe telinimw Attalia.
ACT 14:26 Seni ikenan ra liwinsefäliti Antiokia, ewe leni ia ra anomuur ie me mwan fän tümwünün ewe ümöümöchün Kot fän iten ewe angang ra awesöchüela iei.
ACT 14:27 Iwe, lupwen ar tori Antiokia, ra achufengeni aramasen ewe mwichefel o apworausa ngeniir meinisin mine Kot a föri ngeniir, pwal usun an suki eu asam ngeni ekewe chon lükün Israel pwe repwe lükü Jesus.
ACT 14:28 Iwe, ra nonom ikenan ren ekewe chon lükü Jesus fansoun langatam.
ACT 15:1 Iwe, ekoch mwän ra feito seni Jutea o feila Antiokia, ra popuetä le asukula ekewe chon lükülük, “Ämi ousap tongeni küna manau, are ousap sirkomsais usun met a mak lon än Moses kewe Allük.”
ACT 15:2 Iei popun Paulus me Parnapas ra fokun anini o pölüeniir. Iwe, ra filätä Paulus me Parnapas fiti ekoch chon lükü Jesus seni Antiokia pwe repwe feila Jerusalem o churi ekewe soukünö me souakom usun ei osukosuk.
ACT 15:3 Iwe, chon ewe mwichefel ra tiniirela, nge lupwen ar saifetal lon Fönisia me Samaria, ra apworausa ngeni ekewe chon lükü Jesus usun än ekewe chon lükün Israel kul ngeni Kot. Ei pworaus a afisätä watten pwapwa lon leluken ekewe chon lükülük meinisin.
ACT 15:4 Lupwen ra tori Jerusalem, chon ewe mwichefel, ekewe soukünö me ekewe souakom ra etiweer. Iwe, ra apworausa ngeniir meinisin mine Kot a föri rer.
ACT 15:5 Mürin ekoch me lein ekewe chon lükü Jesus, ir chon ewe mwichen Farisi, ra ütä o apasa, “Ekewe chon lükün Israel repwe fokun sirkomsais. Oupwe pwal üreniir, pwe repwe fokun aleasochisi än Moses kewe Allük.”
ACT 15:6 Iwe, ekewe soukünö me ekewe souakom ra chufengen, pwe repwe pwüngüpwüngfengen usun ei osukosuk.
ACT 15:7 Mürin chomongun ar akaninifengen Petrus a ütä o üreniir, “Ämi pwii kana, oua silei pwe ekoch ier ra la Kot a filiei me leimi pwe üpwe afalafala ewe Pworausen Manau ngeni ekewe chon lükün Israel, pwe repwe tongeni rongorong o lükü Jesus.
ACT 15:8 Iwe, Kot a silei ekiekin aramas meinisin, a pwärala an etiweer ren an fang ngeniir ewe Ngünmifel usun chök an fang ngenikich.
ACT 15:9 Esap wor aimwümwü lefilach me ir. A amusala ar tipis, pokiten ra lükü Jesus.
ACT 15:10 Iwe, pwota oua sotuni Kot iei ren ämi anomu won afaren ekewe chon lükü Jesus och chou ach kewe lewo pwal püsin kich mwo nge sisap tongeni uwei?
ACT 15:11 Apwi! Kich sia lükü, pwe sia küna manau ren ümöümöchün ach Samol Jesus usun chök ir.”
ACT 15:12 Iwe, unusen ewe mwich a fanafanala, lupwen ra rongorong usun än Parnapas me Paulus apworausa ekewe asisil me manaman Kot a föri rer lein ekewe chon lükün Israel.
ACT 15:13 Nge lupwen ar wes le kapas, James a apasa, “Ämi pwii kana, oupwe aüseling ngeniei.
ACT 15:14 Simon a awewe ngenikich usun än Kot popuetä le pwäräta an ekiek ren an angei me lein ekewe chon lükün Israel eu mwichen aramas fän itan.
ACT 15:15 Än ekewe soufos kapas ra fokun tipeeufengen won ei, pun a mak,
ACT 15:16 ‘Iei alon ewe Samol: Lon kan fansoun mwach üpwe liwinsefäl o aüsefälietä ewe mwün Tafit. Üpwe försefäli mine a tala o apöchökülasefäli.
ACT 15:17 Pwe ekewe ekoch aramas meinisin repwe feito rei, ekewe chon lükün Israel meinisin, üa köri ngeniir nei.
ACT 15:18 Iei alon ewe Samol mi asile ngeni aramas ekei mettoch me lomlom.’”
ACT 15:19 Iwe, James a sopwela lon an kapas, “Iei ai ekiek, pwe sisap aweiresi ekewe chon lükün Israel mi kul ngeni Kot.
ACT 15:20 Nge sipwe makkei echö toropwe o asile ngeniir, pwe resap mongö och mongö mi limengau a piin asor ngeni ekewe uluulun anümwäl, resap föri sokun lisowu, resap pwal ochoch fituken man mi ffor me ün cha.
ACT 15:21 Pun än Moses kewe Allük a fen alea fän chomong lon ekewe imwen felikis iteiten ränin sapat, nge an kewe kapas ra afalafala lon ekewe telinimw meinisin.”
ACT 15:22 Mürin ekewe soukünö me ekewe souakom fiti unusen chon ewe mwichefel ra apwüngala pwe repwe filätä ekoch mwän me leir, pwe repwe tiniirela Antiokia fiti Paulus me Parnapas. Iwe, ra filätä Silas me Jutas mi pwal iteni Parsapas, ir ruoman souemwen me lein ekewe chon lükü Jesus.
ACT 15:23 Iei masouen ewe toropwe ra tini ngeniir: “Äm pwimi kewe soukünö me souakom, aia tinala äm kapong ngeni ämi pwiim kana meinisin chon lükün Israel mi nom lon Antiokia, Siria me Silisia.
ACT 15:24 Äm aia rongorong pwe ekoch mwän seni leim ra torikemi, ra osukosukakemi me orukorukakemi ren mine ra apasa, nge äm aisap tiniirela remi.
ACT 15:25 Iei mine äm aia chufengen meinisin o tipeeufengen, pwe aipwe filätä ekoch mwän pwe aipwe tiniirela remi. Repwe fiti pwiich kewe mi achengicheng Parnapas me Paulus,
ACT 15:26 ir ätekewe ra fangela manauer fän iten ewe angangen ach Samol Jesus Kraist, inamwo ika ra tolong lon riaföü.
ACT 15:27 Iei mine aipwe tinala Jutas me Silas, repwe wisen apworausa ngenikemi met kewe chök kapas aia makkei lon ei toropwe.
ACT 15:28 Ewe Ngünmifel me äm aia tipeeufengen pwe aisap anomu womi och chou, pwe ekei chök allük oupwe apwönüretä:
ACT 15:29 Ousap mongö ekewe mongö ra piin asor ngeni ekewe uluulun anümwäl, ousap ün cha, ousap ochoch fituken man mi ffor, ousap föri sokun lisowu. Are oua tümwünükemi seni ekei mettoch, oupwe feiöch. Äm aia kapong ngenikemi meinisin.”
ACT 15:30 Mürin ra tinala ekewe mwän. Iwe, ra feila Antiokia. Ikenan ra amwichafengeni unusen ewe mwichen chon lükülük o ra ngeniir ewe toropwe.
ACT 15:31 Nge lupwen ekewe aramas ra aleani ewe toropwe, ra uren pwapwa ren ekewe kapas mi apöchöküla leluker.
ACT 15:32 Jutas me Silas, ir pwal soufos, ra achomonga ar kapasen apöchöküla o anüküchara ekewe chon lükülük.
ACT 15:33 Mürin ar nonom ikenan ekoch fansoun, ekewe chon lükülük ra osürela fän kinamwe pwe repwe liwinla ren chokewe mi tiniireto.
ACT 15:34 [Nge Silas a filätä pwe epwe nonometiu ikenan.]
ACT 15:35 Iwe, Paulus me Parnapas ra nonometiu Antiokia. Ikenan ir me pwal ekoch chiechier ra awewei o afalafala kapasen ach Samol.
ACT 15:36 Iwe, ekoch fansoun mürin Paulus a üreni Parnapas, “Ousipwe liwinsefäl pwe sipwe churi pwiich kewe lon ekewe telinimw meinisin ia sia afalafala ie kapasen ach Samol, sipwe pwal piir ika ifa usur.”
ACT 15:37 Iwe, Parnapas a mochen pwe Johannes mi pwal iteni Markus epwe pwal etiir,
ACT 15:38 nge Paulus esap ekieki pwe epwe öch ar repwe uwei, pun esap likitü le etiir tori sopolan ar we angang, nge a likitiirela lon Pamfilia o liwinsefäliti Jerusalem.
ACT 15:39 Iwe, a fis eu watten aninifengen lefiler, pwe ra imwüfesen. Parnapas a uwei Markus o saila Saipros,
ACT 15:40 nge Paulus a filätä Silas pwe epwe eti i. A feila, nge ekewe chon lükülük ra anomu i fän tümwünün ümöümöchün ewe Samol.
ACT 15:41 A saifeil lon Siria me Silisia o apöchöküla chon ekewe mwichefel.
ACT 16:1 Iwe, Paulus a sopwela an sai ngeni Terpe me Listra. Ikenan a nom eman souläng itan Timoty. Inan eman fin Juta mi souläng, nge saman eman re Krik.
ACT 16:2 Timoty a iteüöch me ren ekewe chon lükü Jesus meinisin lon Listra me Ikonium.
ACT 16:3 Iwe, Paulus a mochen pwe Timoty epwe eti, iei mine a sirkomsaisi. A föri ei, pokiten ekewe chon Juta meinisin mi nom lon ekewe leni ra silei pwe semen Timoty eman re Krik.
ACT 16:4 Iwe, lupwen ar saifeil lon ekewe telinimw, ra aronga ngeni ekewe chon lükü Jesus ekewe allük ekewe soukünö me ekewe souakom lon Jerusalem ra apwüngala, ra pwal üreniir pwe repwe aleasochisi ekei allük.
ACT 16:5 Iei usun chon ekewe mwichefel ra pöchökülela lon ar lükülük o chochomongola iteiten rän.
ACT 16:6 Iwe, Paulus me chiechian kana ra sai lemenen ekewe fanü Frikia me Kalatia, pun ewe Ngünmifel esap mwüt ngeniir pwe repwe afalafala ewe Kapasen Kot lon ewe fanü Asia.
ACT 16:7 Lupwen ar tori kiänin Misia, ra sotuni ar repwe tolong lon ewe fanü Pitinia, nge ewe Ngünün Jesus esap mwüt ngeniir.
ACT 16:8 Iei mine ra sai lemenen Misia o feitiu lon ewe telinimw Troas.
ACT 16:9 Lon ewe pwinin a wor künaan Paulus. A küna eman mwän seni Masetonia, a üta o tüngormau ngeni, “Kose mochen feito Masetonia o alisikem!”
ACT 16:10 Mürin künaan Paulus ei, äm aia müttir amolätä pwe aipwe feila Masetonia, pun aia mefi pwe Kot a körikem pwe aipwe afalafala ewe Pworausen Manau ngeni ekewe aramas ikenan.
ACT 16:11 Iwe, äm aia sai won sip seni Troas o saila wenewen ngeni Samotrasia. Nge sorotän ewe rän aia tori Neapolis.
ACT 16:12 Seni ikenan aia sai won fanü tori Filipi, iei ewe akaeuin telinimw lon ewe kinikinin fanü lon Masetonia, pwal eu telinimw ia ekewe chon Rom ra nonom ie. Iwe, äm aia nonom ikenan ekoch rän.
ACT 16:13 Lon ewe ränin Sapat aia feila ngeni eu leni ünükün eu chanpupu lükün ewe telinimw, ewe ia aia ekieki pwe chon Juta ra mwichfengen ie pwe repwe iotek. Iwe, aia mottiu o kapas ngeni ekewe fefin mi mwichfengen ikenan.
ACT 16:14 Iwe, eman me lein ekewe fefin mi aüselingakem Litia seni ewe telinimw Tiatira. Neminei eman chon amömö mangaku mi parachol, nge ra fokun mömong. Ei fefin a fel ngeni Kot, nge ewe Samol a suki lelukan pwe epwe rongosochis ngeni än Paulus afalafal.
ACT 16:15 Mürin än neminei me chon leimwan papatais a tüngor ngenikem, “Oupwe feito o nonom lon imwei are oua ekieki pwe ngang eman chon enletin lükü ach Samol.” Iwe, a pesekem pwe aipwe feila lon imwan.
ACT 16:16 Lon eu rän, lupwen aia feila ngeni ewe lenien iotek, eman amanau föpwül a churikem, eman ngününgau a wäni pwe a tufichin osuni mine epwe fis lon fansoun epwe feito. Neminei a awora chomong moni tolong ngeni nöün kewe masta ren an osuni mine epwe fis ngeni aramas.
ACT 16:17 Ei föpwül a tapwela mürin Paulus me äm chienan kewe o kökkö fän leüömong, “Ekei mwän ir nöün Kot ewe mi Unusen Tekia chon angang! Ra aronga ngenikemi usun ämi oua tongeni küna manau!”
ACT 16:18 Iei usun mine a föri lon chomong kewe rän, tori Paulus a fokun weires ren, pwe a kul ngeni ewe föpwül o üreni ewe ngün mi nom won, “Fän iten Jesus Kraist üa allük ngonuk pwe kopwe towu seni neminei!” Iwe, lon ewe chök otun ewe ngün a towu seni.
ACT 16:19 Lupwen nöün ewe föpwül kewe masta ra mefi pwe ar alen moni tolong a ükütiu, ra turufi Paulus me Silas o etekiniirela lon ewe lenien chulap ren ekewe sounemenem.
ACT 16:20 Ra emweniirela mwen ekewe samollap o ra üreniir, “Ekei mwän ir chon Juta, ra afisätä fitikoko lon ach ei telinimw.
ACT 16:21 Ra afalafal won ekoch örüni mi ü ngeni ach kewe allük. Kich chon Rom, sisap tongeni etiwa ika apwönüetä ekei örüni.”
ACT 16:22 Iwe, pwal ewe mwichen aramas a pöchökül le ü ngeni Paulus me Silas. Mürin ekewe samollap ra kamwei seniir üfer kewe o allük ngeni ekewe sounfiu pwe repwe wichiir.
ACT 16:23 Wesin ar wichiir fän chomong, ra atururelong lon ewe imwen fötek, nge ra allük ngeni ewe chon masen imwen fötek pwe epwe mamasafichiir.
ACT 16:24 Fän iten ei allük ewe chon masen fötek a atururelong lon ewe ruum lukalapen ewe imwen fötek o anükü pecher lefilen irä mi chou.
ACT 16:25 Iwe, ina epwe lukenipwin Paulus me Silas ra iotek o köl kölün mwareiti Kot, nge ekewe chon fötek ra aüseling ngeniir.
ACT 16:26 Iwe, a müttir fis eu chechen fanü mi fokun watte, pwe ewe imwen fötek tori longolongun a mwökütüküt. Lon ewe chök otun ekewe asamalap meinisin ra sukula, nge ekewe selimächä mi föfö ngeni ekewe chon fötek ra pichila.
ACT 16:27 Iwe, ewe chon masen imwen fötek a nenela. Nge lupwen a küna pwe ekewe asamalapen imwen fötek ra sukula, a ekieki pwe ekewe chon fötek ra süla. Iei mine a üttawu nöün ketilas o ekiekin an epwe püsin niela.
ACT 16:28 Nge Paulus a kökkö fän mwelian mi leüömong, “Kosap püsin afeiengauok! Äm meinisin aia nom ikei!”
ACT 16:29 Iwe, ewe chon masen imwen fötek a kökkö pwe eman epwe uwato eu lamp, iwe, a sälong lon ewe ruum o chapetiu mwen Paulus me Silas fän chechech.
ACT 16:30 Mürin a emweniirewu lükün o aisiniir, “Ai samol kana, met ngang üpwe föri pwe üpwe küna manau?”
ACT 16:31 Ra pölüeni, “Kopwe lükü ach Samol Jesus, iwe, ämi me chon leimwom oupwe küna manau.”
ACT 16:32 Mürin ra afalafala kapasen ach Samol ngeni pwal ekewe aramas meinisin mi nom lon imwan.
ACT 16:33 Lon ewe chök kulok lon ewe pwinin ewe chon masen imwen fötek a emweniirela lon pwal eu ruum o a limeti kinaser kewe. Lon ewe chök otun i me chon leimwan meinisin ra papatais.
ACT 16:34 Mürin a emwenala Paulus me Silas lon püsin imwan o amongöniir. Iwe, i me chon an famili meinisin ra fokun pwapwa, pun iei ra lükü Kot.
ACT 16:35 Iwe, lesosorun sorotän ewe rän ekewe samollap ra tinala ekoch meilapen polis fän ei allük, “Oupwe amusala ekei mwän!”
ACT 16:36 Iei mine ewe chon masen imwen fötek a üreni Paulus, “Ekewe samollap ra tinato ei allük pwe ämi me Silas oupwe musala. Iei oupwe le towu o feila fän kinamwe.”
ACT 16:37 Nge Paulus a üreni ekewe meilapen polis, “Ra wichikem mwen mesen ekewe aramas, nge esap wor äm tipis, nge fen äm chon Rom! Mürin ra aturukeemilong lon imwen fötek, nge iei ra mochen tinikeemila le monomon? Apwi, esap fokun ina! Ekewe samollap repwe püsin feito ikei o atowukeemiwu.”
ACT 16:38 Iwe, ekewe meilapen polis ra apworausa ekei kapas ngeni ekewe samollap. Nge lupwen ra rongorong pwe Paulus me Silas ir chon Rom, ra fokun niuokus.
ACT 16:39 Iei mine ekewe samollap ra feila o amusamus ngeni Paulus me Silas. Mürin ra emweniirewu seni ewe imwen fötek o tüngor ngeniir pwe repwe feila seni ewe telinimw.
ACT 16:40 Iwe, lupwen ar towu seni ewe imwen fötek, ra feila lon imwen Litia. Ikenan ra churi chiechier kewe chon lükü Jesus o apöchöküla letiper ren ar kapas, mürin ra feila seniir.
ACT 17:1 Iwe, Paulus me Silas ra sai tori ekewe telinimw Amfipolis me Apolonia, ra pwal tori Tesalonika, ia a wor ie eu imwen felikis än chon Juta.
ACT 17:2 Iwe, Paulus a tolong lon ewe imwen felikis usun an örüni. Lon ülüngat ränin sapat a kakapas ngeni ekewe aramas seni lon ekewe Toropwe mi Pin,
ACT 17:3 a awewe ngeniir o alletätä seni lon ekewe wokisin pwe ewe Kraist epwe fokun tolong lon riaföü o manausefäl seni mäla. Iwe, Paulus a üra, “Ätei Jesus, ngang üa afalafala ngenikemi usun, iei i ewe Kraist.”
ACT 17:4 Iwe, ekoch me lein ekewe aramas ra lükü o tipeeu ngeni Paulus me Silas, pwal chomong chon Krik mi fel ngeni Kot me chomong fefin mi iteföüla.
ACT 17:5 Nge ekewe chon Juta ra lolowo. Iei mine ra achufengeni ekoch aramasangau seni won ekewe al o förätä eu mwichen afitikoko mi popuetä eu osukosuk lon ewe telinimw. Ra atalong imwen eman mwän itan Jason fän iten ar repwe kütta Paulus me Silas pwe repwe emweniirewu mwen ewe mwichen aramas.
ACT 17:6 Nge pokiten resap küneer, ra etekinawu Jason me ekewe ekoch chon lükü Jesus mwen nöüwisen ewe telinimw o ra kökkö fän leüömong, “Ekei mwän ra afisätä fitikoko ekis meinisin! Nge iei ra feito lon ach ei telinimw.
ACT 17:7 Iwe, Jason a etiweer lon imwan. Ir meinisin ra atai än Sisar allük, pun ra apasa pwe mi pwal wor eman king itan Jesus.”
ACT 17:8 Iwe, lupwen ar rongorong ekei kapas, ewe mwichen aramas me ekewe nöüwisen ewe telinimw ra tolong lon watten fitikoko.
ACT 17:9 Mürin ekewe nöüwis ra echimwa Jason me ekewe ekoch aramas pwe repwe püngütiu moni fän iten ar repwe musala. Mürin ra amuseerewu.
ACT 17:10 Iwe, lupwen a pwinila, ekewe chon lükü Jesus ra tinala Paulus me Silas Perea. Lupwen ra tori ikenan, ra feila lon ewe imwen felikis än chon Juta.
ACT 17:11 Iwe, ekewe aramasen Perea ra tipemecheres seni ekewe aramasen Tesalonika, pun ra etiwa ewe afalafal fän mochenin letiper. Iteiten rän ra kaiö lon ekewe Toropwe mi Pin o kütta are met Paulus a apasa a wesewesen pwüng.
ACT 17:12 Iwe, chomong chon Juta me leir ra lükü Jesus. Pwal chomong fin Krik mi itetekia me chomong re Krik ra pwal lükü.
ACT 17:13 Nge lupwen ekewe chon Juta mi nom lon Tesalonika ra silei pwe Paulus a pwal afalafala ewe kapasen Kot lon Perea, ra feila ikenan o etipetipa ekewe aramas pwe repwe förätä eu mwichen afitikoko.
ACT 17:14 Lon ewe chök otun ekewe chon lükü Jesus ra tinala Paulus lon ewe lenien suun sip, pwe epwe sai, nge Silas me Timoty ra nonometiu lon Perea.
ACT 17:15 Iwe, ätekewe mi emwenala Paulus ra etala tori Aten. Mürin ra liwinsefäliti Perea fän än Paulus öüröür ngeniir, pwe Silas me Timoty repwe chök müttir saila ren.
ACT 17:16 Iwe, lupwen Paulus a witiwiti Silas me Timoty lon Aten, a fokun weires lupwen a küna pwe ewe telinimw a ur ren uluulun anümwäl.
ACT 17:17 Iei mine a kakapas ngeni ekewe chon Juta me ekewe chon Krik mi fel ngeni Kot me lon ar we imwen felikis. A pwal kapas ngeni ekewe aramas mi feito lon ewe lenien chulap iteiten rän.
ACT 17:18 Iwe, pwal ekoch soutipachem seni ekewe mwichen Epikurean me Stoik ra aninifengen me Paulus. Ekoch me leir ra ais, “Met ätei mi tiparoch a mochen apasa lon an aingaing?” Nge pwal ekoch ra apasa, “Usun itä a kakapas usun ekoch koten ekis.” Ra apasa ei, pokiten Paulus a afalafal usun Jesus me ewe manausefäl. Iei mine ra angei Paulus o emwenala ren ewe mwichen soupwüng mi mwichfengen won ewe Areopakus.
ACT 17:19 Iwe, ra üreni, “Äm aia mochen silei ei afalafal mi fö ka kakapas usun.
ACT 17:20 Ka uwato och pworaus äm aisap fokun rongorong mwo me mwan. Äm aia mochen silei met wewen.”
ACT 17:21 (Pun ekewe chon Aten meinisin me ekewe chon ekis mi nom ikenan ra sani ar repwe awora fansoun le apworausa pworaus mi fö o aüseling ngeni pworaus mi fö.)
ACT 17:22 Mürin Paulus a üta me lon ewe mwich me won ewe Areopakus o apasa, “Ämi re Aten! Üa küna pwe oua fokun angang ngeni chomong kot.
ACT 17:23 Pun lupwen üa fetalfeil lon ämi ei telinimw üa küna ekewe leni ia oua fel ngeni ekewe kot ie, üa pwal küna eu rongen asor a mak ekei kapas won, ‘Fän iten ewe Kot esap wor eman a silei.’ Ewe oua fel ngeni nge ouse fen mwo silei, iei i ewe üa aronga ngenikemi.
ACT 17:24 Ewe Kot mi föri fanüfan me meinisin mine a wor lon, i Samolun läng me fanüfan, esap nonom lon imwenfel mi för ren pöün aramas.
ACT 17:25 Esap wor och mine a osupwang ren, pwe aramas repwe tongeni awora fän itan, pun püsin i a ngeni aramas manau me ngasangas pwal mettoch meinisin.
ACT 17:26 Seni eman aramas i a föri sokun aramas meinisin, pwe repwe nonom won unusen fanüfan. Mwen an föriir, a akota fansoun manauer o alenier lon en me lenian.
ACT 17:27 Kot a föri ei, pwe aramas repwe kütta i, iwe, eli repwe küna i are repwe küküttafeili. Nge Kot esap wesewesen toau seni eman me eman leich,
ACT 17:28 usun eman a fen apasa, ‘Sia manau me mwökütüküt me nonom lon i.’ A usun chök ekoch me lein nöümi chon makkei köl ra apasa, ‘Pwal kich sia nöün.’
ACT 17:29 Iei mine pokiten sia nöün Kot kana, sisap fokun ekieki pwe lapalapen Kot a wewe ngeni eu uluulun anümwäl seni kolt ika silifer ika fau, förien sousilelap.
ACT 17:30 Iwe, Kot a manlükala ekewe fansoun lupwen aramas resap silei i. Nge iei a allük ngeni aramas meinisin lon ekewe leni meinisin pwe repwe kul seni ar föför mi ngau.
ACT 17:31 Pun a filätä eu rän epwe apwüngü unusen chon fanüfan meinisin fän pwüng ren eman mwän i a awisa ngeni. A fen alletätä ei ngeni aramas meinisin ren an amanauasefäli ei mwän seni mäla.”
ACT 17:32 Iwe, lupwen ekewe aramas ra rongorong pwe Paulus a afalafal usun manausefäl seni mäla, ekoch me leir ra takiri, nge pwal ekoch ra apasa, “Äm aia mochen rongorong om kopwe pwal kapassefäl usun ei mettoch.”
ACT 17:33 Mürin ei, Paulus a feila seni ewe mwich.
ACT 17:34 Iwe, ekoch mwän ra eti Paulus, pun ra lükü mine a eäni afalafal, eman me leir itan Tionisius, i eman chon ewe mwichen soupwüng. A pwal wor eman fefin itan Tamaris, pwal ekoch aramas mi lükü Jesus.
ACT 18:1 Mürin ei, Paulus a feila seni Aten o feila Korint.
ACT 18:2 Ikenan a churi eman re Juta itan Akwila, ätei a uputiu lon Pontus, nge ekärän chök feito seni Itali me pwülüan we Prisila, pun ewe Sisar Klautius a allük pwe ekewe chon Juta meinisin repwe towu seni Rom. Iwe, Paulus a feila rer,
ACT 18:3 nge pokiten a sile angangen föri imw mangaku usun chök ir, a nonometiu o a angangfengen me ir, pwe epwe wor mine epwe manau seni.
ACT 18:4 Iwe, iteiten ränin sapat Paulus me ekewe aramas ra kakapasfengen lon ewe imwen felikis, o a achocho le elliapa ekewe chon Juta me chon Krik.
ACT 18:5 Iwe, lupwen Silas me Timoty ra feito seni Masetonia, Paulus a awora unusen an fansoun le afalafala ewe kapas, a pwärätä ngeni ekewe chon Juta pwe Jesus i ewe Kraist.
ACT 18:6 Nge lupwen ekewe chon Juta ra ü ngeni Paulus o apasatä kapas mi ngau usun i, Paulus a pölüeniir ren an wichikala pwülün üfan o üreniir, “Are ämi oua pöütmwälila, püsin tipisimi, nge sap tipisi! Seni ikenai üpwe feila ren ekewe chon lükün Israel.”
ACT 18:7 Mürin Paulus a towu seniir o feila, pwe epwe nonom lon imwen eman chon lükün Israel itan Titius Justus, i eman mi fel ngeni Kot. Iwe, imwan a arap ngeni ewe imwen felikis.
ACT 18:8 Iwe, Krispus samolun ewe imwen felikis a lükü ewe Samol, i me chon an famili meinisin. Pwal chomong chon Korint mi rongorong än Paulus afalafal ra lükü Jesus o papatais.
ACT 18:9 Lon eu pwin ach Samol a kapas ngeni Paulus lon künaan, “Kosap niuokus, nge kopwe chök sopwela le afalafal. Kosap fangata,
ACT 18:10 pun ngang üpwe etuk. Esap wor eman epwe tongeni afeiengauok, pun a wor chomong nei aramas lon ei telinimw.”
ACT 18:11 Iei mine Paulus a nonom ikenan lon ükükün eu esop ier o asukula ewe Kapasen Kot ngeni ekewe aramas.
ACT 18:12 Iwe, lupwen Kallio a fil pwe epwe kepinan ewe fanü Akaia, ekewe chon Juta ra chufengen, ra turufi Paulus o etekinala lon ewe lenien kapwüng.
ACT 18:13 Ra apasa, “Ei mwän a sotuni an epwe pese ngeni aramas, pwe repwe fel ngeni Kot lon eu lapalap mi ü ngeni äm kewe allük.”
ACT 18:14 Iwe, lon ewe otun Paulus a mochen popuetä le kapas, Kallio a üreni ekewe chon Juta, “Are ämi oupwe uwato och kapasen tipi ngeni usun eu föför esepwüng ika eu föför mi fokun ngau, epwe öch ngeniei ai üpwe aüselingakemi.
ACT 18:15 Nge pokiten iei och anini usun kapas me it me ämi allük, püsin ämi oupwe apwüngala. Ngang üsap mochen soukapwüng won ekei sokun mettoch.”
ACT 18:16 Iwe, a asürewu seni lon ewe lenien kapwüng.
ACT 18:17 Mürin ir meinisin ra turufi Sostenes, ewe samolun imwen felikis, o wichi mwen ewe lenien kapwüng. Nge Kallio esap ekieki usun mine ra föri.
ACT 18:18 Iwe, Paulus a nonom ren ekewe chon lükü Jesus lon Korint lon chomong rän. Mürin a feila seniir o a sai ngeni Siria, nge Prisila me Akwila ra eti. Me mwen än Paulus epwe sai seni Kenkrea, a reipöpöla möküran pokiten eu pwon a eäni.
ACT 18:19 Iwe, ra tori Efisos, ikenan Paulus a likiti Prisila me Akwila. Nge i a feila lon ewe imwen felikis o kakapasfengen me ekewe chon Juta.
ACT 18:20 Ir ra tüngor ngeni, pwe epwe nonom rer ekoch fansoun, nge i esap tipeeu ngeni.
ACT 18:21 Nge lupwen a feila seniir, a pwon ngeniir, “Are epwe letipen Kot, üpwe liwinsefälito remi.” Mürin a sai seni Efisos.
ACT 18:22 Iwe, lupwen a tori Seserea, a pwal feila ngeni Jerusalem o kapong ngeni chon ewe mwichefel. Mürin a feila Antiokia.
ACT 18:23 Mürin an nonom ekoch fansoun ikenan, a feila seni Antiokia o fetalfeil lemenen ewe fanü Kalatia me Frikia. Iwe, a apöchöküla ekewe chon lükü Jesus meinisin.
ACT 18:24 Lon ewe fansoun eman chon Juta itan Apollos, i a uputiu lon Aleksantria, a tori Efisos. Ätei eman mi silelap le afalafal, a pwal silefichi kapasen lon ekewe Toropwe mi Pin.
ACT 18:25 A fen kaiö usun Alen ach Samol o seni pöchökülen pwapwan letipan a afalafal o aiti ngeni aramas ekewe mettoch mi enlet usun Jesus, nge a chök silei usun än Johannes angangen papatais.
ACT 18:26 Ätei a popuetä le afalafal fän pwora lon ewe imwen felikis. Nge lupwen Prisila me Akwila ra aüseling ngeni, ra uweela lon imwer o awewefichi ngeni ewe Alen ach Samol.
ACT 18:27 Iwe, Apollos a ekiekin sai ngeni Akaia, iei mine ekewe chon lükü Jesus lon Efisos ra alisi ren ar mak toropwe ngeni ekewe chon lükü Jesus mi nom ikenan o tüngor ngeniir pwe repwe etiwa Apollos. Iwe, lupwen Apollos a tori Akaia, a fokun alisi chokewe mi lükü Jesus ren ümöümöchün Kot.
ACT 18:28 Pun fän pwüngün mine a anini won, a akufu ekewe chon Juta lon ar üpölüfengen mwen ekewe aramas ren an alletätä seni lon ekewe Toropwe mi Pin pwe Jesus ewe Kraist.
ACT 19:1 Iwe, lupwen Apollos a nom lon Korint, Paulus a saifetal lemenen ewe fanü o a tori Efisos. Ikenan a küna ekoch souläng
ACT 19:2 o a aisiniir, “Ifa usun, oua angei Ngünmifel lupwen oua lükü?” Ir ra pölüeni, “Äm aisap rongorong mwo pwe a wor eman Ngünmifel.”
ACT 19:3 Iei mine Paulus a aisiniir, “Ika ina, iwe, met sokun papatais oua angei?” Ra pölüeni, “Ewe papatais Johannes a kapas usun.”
ACT 19:4 Mürin Paulus a üreniir, “Ewe papatais Johannes a eäni, a föri ngeni chokewe mi aier seni ar tipis. A pwal üreni ekewe aramasen Israel ar repwe lükü ewe eman epwe feito me mürin, iei i Jesus.”
ACT 19:5 Iwe, mürin ar rong ekei kapas, ra papatais ngeni iten ewe Samol Jesus.
ACT 19:6 Lupwen Paulus a iseis pöün wor, ewe Ngünmifel a feitiu wor. Iwe, ra kapas lon kapasen ekis o arongafeili ewe Kapasen Kot.
ACT 19:7 Ina epwe iteiter meinisin engol me ruoman mwän.
ACT 19:8 Iwe, Paulus a feila lon ewe imwen felikis, nge a pwora le afalafal ngeni ekewe aramas lon ükükün ülüngat maram. A kakapas ngeniir o pese ngeniir ar repwe lükü, pwe met i a apasa usun ewe Mwün Kot a let.
ACT 19:9 Nge ekoch me leir ra tipeförea. Resap fokun lükü, nge ra fen kapasingau mwen ewe mwichen aramas usun ewe Alen ach Samol. Iei mine Paulus a feila seniir o uweela ekewe chon lükü. Iwe, iteiten rän a afalafal lon utten Tiranus ia aramas ra akafalafal ie.
ACT 19:10 Ei a fis lon ükükün ruu ier, pwe ekewe aramas meinisin mi nom lon ewe fanü Asia, ir ekewe chon Juta me ekewe chon lükün Israel, ra rongorong kapasen ach Samol.
ACT 19:11 Iwe, Kot a föri manaman mi amwarar ren Paulus.
ACT 19:12 Ika mwo ekewe angkachi me mangaku Paulus a aea, aramas ra angei o iseis won ekewe chon samau, ar samau a wesila, nge ekewe ngününgau ra towu seniir.
ACT 19:13 Ekoch chon Juta mi saifetal o asüela ngününgau seni aramas ra pwal sotuni le aea iten ewe Samol Jesus lupwen ar föri ei angang. Ra kapas ngeni ekewe ngününgau, “Üa allük ngenikemi fän iten Jesus, ätewe Paulus a afalafal usun.”
ACT 19:14 A wor füman mwän nöün ewe souasor mi lap re Juta itan Skefa ra föri ei sokun föför.
ACT 19:15 Nge ewe ngününgau a kapas ngeniir, “Ngang üa silei Jesus, üa pwal silei usun Paulus, nge ämi iö?”
ACT 19:16 Iwe, ewe mwän ewe ngününgau a nom won a fokun pwora le fiu ngeniir, pwe ra kuf meinisin. Ra sü seni imwen ewe mwän, ra kinas, nge üfer ra kamwekamwekis seniir.
ACT 19:17 Iwe, ekewe chon Juta me ekewe chon lükün Israel meinisin mi nom lon Efisos ra rong usun ei pworaus. Ir meinisin ra fokun niuokus, nge iten ach Samol Jesus a fokun iteföüla.
ACT 19:18 Iwe, chomong lein ekewe chon lükü Jesus ra feito o pwärätä ar kewe föför mi ngau mwen mesen ekewe aramas.
ACT 19:19 Pwal chomong me lein chokewe mi föri angangen roong ra uwato nöür kewe puken roong o keniirela mwen mesen ekewe aramas meinisin. Nge lupwen ra apachafengeni liwinin ekewe puk, iwe, a pwä pwe ükükün liwinir lime ngeröü chala.
ACT 19:20 Iwe, pokiten ekei mettoch mi amwarar ra fisitä, kapasen ach Samol a chöfetal o chomong aramas ra lükü Jesus.
ACT 19:21 Mürin an fis ekei mettoch, Paulus a filätä fän emwenien ewe Ngünmifel pwe epwe sai lemenen Masetonia me Akaia o feila Jerusalem. A apasa, “Mürin ai feila ikenan, üpwe pwal fokun tori Rom.”
ACT 19:22 Iei mine a tinala Timoty me Erastus, ruoman me lein ekewe chon alisi lon ewe angang pwe repwe feila Masetonia, nge i epwe nonom lon Asia ekoch fansoun.
ACT 19:23 Lon ena fansoun a fis eu osukosuk watte lon Efisos pokiten ewe Alen ach Samol.
ACT 19:24 Iwe, eman mwän mi föri pisek seni silifer itan Temetrius a föri liosun imwenfelin ewe anüfefin Artemis. Iwe, an we angang a aworato watten win ngeni nöün kewe chon angang.
ACT 19:25 Iei mine a körifengeniir meinisin fiti chokewe mi föri ewe sokun angang usun ir o a üreniir, “Ämi mwän kana, oua silei pwe ach pisekisek a feito seni ei angang.
ACT 19:26 Nge iei oua tongeni püsin küna o rongorong met ätenan Paulus a föri. A apasa pwe ekewe uluulun kot mi för ren pöün aramas resap wesewesen kot. Nge a fen liapenala chomong aramas ikei lon Efisos pwal lon arapakan unusen ei fanü Asia.
ACT 19:27 A wor och afeiengau ngenikich, pwe ach angang epwe itengau. Nge a pwal wor och afeiengau, pwe imwenfelin ewe anülap fefin Artemis epwe aücheangauala o an itetekia epwe wesila. Iei i ewe anüfefin aramasen Asia meinisin, pwal chon fanüfan meinisin ra fel ngeni!”
ACT 19:28 Iwe, lupwen ekewe aramas lon ewe mwich ra rong ekei kapas, ra fokun lingeringer o ra popuetä le pupuchör, “A lapalap ewe anüfefin Artemis seni Efisos!”
ACT 19:29 Ewe akürang a chöfetal lon unusen ewe telinimw. Ekewe aramas mi afitikoko ra turufi Kaius me Aristarkus o müttir etekiniirela lon ewe lenien urumwot. Ätekei me ruoman re Masetonia mi eti Paulus lon an sai.
ACT 19:30 Iwe, Paulus a mochen püsin feila mwen ewe mwich, nge ekewe chon lükü Jesus resap mwüt ngeni.
ACT 19:31 Pwal ekoch nöüwisen ewe fanü, ir chiechien Paulus, ra tinala pworaus ren Paulus o tüngormau ngeni, pwe esap feito lon ewe lenien urumwot.
ACT 19:32 Nge lon ewe otun unusen ewe mwichen aramas a fokun akürang. Ekoch aramas ra pupuchör won och, pwal ekoch ra pupuchör won och, nge chomong me leir resap fen mwo nge silei ika met popun ar chufengen.
ACT 19:33 Ekoch me lein ekewe aramas ra ekieki pwe Aleksanter i popun ei osukosuk, pun ekewe chon Juta ra pese ngeni pwe epwe ütä mwen ewe mwichen aramas. Mürin Aleksanter a änipö ngeni ekewe aramas pwe repwe fanafanala. Iwe, a sotuni le kapas ngeni ekewe aramas pwe esap tipisin me chiechian kewe, pwe a fis ei osukosuk.
ACT 19:34 Nge lupwen ra silleni pwe i eman re Juta, ir meinisin ra köpökütä won ewe chök kapas lon ükükün ruu awa, “A lapalap ewe anüfefin Artemis seni Efisos.”
ACT 19:35 Iwe, ewe seketerin ei telinimw a tongeni aükala akürangen ekewe aramas. A üreniir, “Ämi chon Efisos! Aramas meinisin ra silei pwe ei telinimw Efisos a tümwünü imwenfelin ewe anülap Artemis, a pwal tümwünü ewe fau mi pin a turutiu seni läng.
ACT 19:36 Esap wor eman a tongeni amam won ekei mettoch. Iei mine oupwe fokun mosonosonola, nge ousap föri och mettoch mi ngau.
ACT 19:37 Ämi oua emwenato ekei mwän ikei, rese fen mwo nge soläni och seni ekewe imwenfel ika apasatä och kapas mi ngau usun ach we anüfefin.
ACT 19:38 Are a wor än Temetrius me nöün kewe chon angang kapasen atutur fän iten eman, a wor ekewe rän mi kefilitä fän iten kapwüng, a pwal wor ekewe sounemenem repwe tongeni apwüngü lon lenien kapwüng.
ACT 19:39 Nge are mi pwal wor och lükün met ei oua mochen, ei epwe kapwüngüla me lon ewe mwich än chon ei telinimw mi akökkö me ren ekewe nöüwis.
ACT 19:40 Pun mürin mine a fis ikenai, repwe tongeni atipisikich pokiten ewe mwichen afitikoko. Esap wor och popun fän iten ei akürang, sisap pwal tongeni pwärätä och popun mi mürina fän iten ei lapalap.”
ACT 19:41 Iwe, mürin an apasatä ekei kapas, a aserala ewe mwichen aramas.
ACT 20:1 Iwe, wesin ewe fitikoko, Paulus a körifengeni ekewe chon lükü Jesus, a kapong ngeniir o eäni kapasen amwirimwir ngeniir mi apöchöküla letiper. Mürin a feil seniir o feila Masetonia.
ACT 20:2 A saifeil lemenen ewe fanü o apöchöküla letipen ekewe aramas ren chomong an afalafal. Mürin a tori Akaia
ACT 20:3 o a nonom ikenan lon ükükün ülüngat maram. Lupwen Paulus a amolätä an epwe sai ngeni Siria, a rongorong pwe ekewe chon Juta ra rawangauei. Iei mine a filätä an epwe liwinsefäliti lemenen ewe fanü Masetonia.
ACT 20:4 Sopater nöün Pirrus seni Perea a eti, pwal Aristarkus me Sekuntus seni Tesalonika, Kaius seni Terpe, Tikikus me Trofimus seni ewe fanü Asia me Timoty.
ACT 20:5 Ra akomwola mwem o witiwitikem lon Troas.
ACT 20:6 Iwe, äm aia sai seni Filipi mürin ewe Chulapen mongö pilawa esap wor iis lon, nge limu rän mürin aia chufengen me ir lon Troas. Iwe, aia nonom ikenan lon ükükün eu wiik.
ACT 20:7 Iwe, lekuniolun räninamol äm aia chufengen o mongöfengen ewe mongön ach Samol. Iwe, Paulus a afalafala ekewe aramas, nge a chök sopwela le afalafaleer tori lukenipwin, pun a ekiekin feil seniir sorotän ewe rän.
ACT 20:8 Mi wor chomong lamp lon ewe ruum asan ia ra chufengen ie.
ACT 20:9 Eman alüal itan Oitikus a mot lon eu asammwacho. Nge lupwen Paulus a sopwela chök le afalafal, Oitikus a echikichikila o möürüla tori a möürüchoula. Iwe, a turutiu lepwül me won aülüngatin sässärin ewe imw. Nge lupwen ra ekietä, a fen mäla.
ACT 20:10 Nge Paulus a feitiu rer, a chapela won ewe alüal o romi. Iwe, a apasa, “Ousap lolilen, a chüen manau!”
ACT 20:11 Mürin a liwinsefälitä won ewe sässärin asan, a utu pilawa o ra mongöfengen me ekewe chon lükü Jesus. Iwe, Paulus a kapas ngeniir tori akkar a tötä, mürin a feil seniir.
ACT 20:12 Iwe, ra emwenala ewe alüal ngeni lenian, nge a manau. Iwe, ekewe aramas ra fokun chipila.
ACT 20:13 Iwe, äm aia akomwola won sip o saila tori Assos, ikenan äm aia angei Paulus me ie. Pun Paulus a ürenikem pwe aipwe föri iei usun, pokiten i a mochen fetal won fanü tori Assos.
ACT 20:14 Lupwen a churikem me lon Assos, a tötä rem won ewe wa, o äm aia sai ngeni Mitilene.
ACT 20:15 Äm aia sai seni ikenan o sorotän ewe rän äm aia tori wenewenen Kios. Eu rän mürin aia tori Samos, nge sorotän ewe rän aia tori Miletus.
ACT 20:16 Iwe, Paulus a filätä pwe esap tori Efisos, pwe esap mochen alusala an fansoun lon ewe fanü Asia. Pun a atapwal ngeni an epwe tori Jerusalem lon ewe ränin Pentikost are epwe tufich.
ACT 20:17 Iwe, seni Miletus Paulus a tinala echö toropwe Efisos o tüngor ngeni ekewe souakomwen mwichefel pwe repwe feito o chufengen.
ACT 20:18 Lupwen ra feito ren, Paulus a üreniir, “Ämi oua silei usun manauei me ewe angang üa föri lon unusen ewe fansoun üa nonom remi, seni ewe aeuin rän üa tori ewe fanü Asia.
ACT 20:19 Fän unusen tipetekison pwal fän watten chönün mesei üa föri ai angang usun eman nöün ewe Samol chon angang lon ekewe fansoun weires mi toriei pokiten än ekewe chon Juta rawangauaei.
ACT 20:20 Oua silei pwe üsap amwöchü och mine epwe alisikemi lupwen üa afalafalakemi o aiti ngenikemi ewe pworaus usun ewe Samol Jesus lon mwichen aramas pwal lon en me imwan.
ACT 20:21 Üa apöchöküla ai fön ngeni ekewe chon Juta me ekewe chon lükün Israel, pwe repwe kul seni ar tipis kana o kul ngeni Kot, repwe pwal lükü ach Samol Jesus.
ACT 20:22 Nge iei, pokiten ai aleasochisi ewe Ngünmifel, ngang üpwe feila Jerusalem. Nge üsap silei mine epwe fis ngeniei me ikenan.
ACT 20:23 Üa chök silei pwe lon ekewe telinimw meinisin Ngünmifel a amefi ngeniei pwe üpwe tolong lon fötek me riaföü.
ACT 20:24 Nge manauei esap aüchea ngeniei. Üa chök mochen awesala ai kitir o awesöchüela ewe angang ach Samol Jesus a ngeniei pwe üpwe föri. Iei ewe angang ai üpwe pwärätä ewe Pworausen Manau usun ewe ümöümöchün Kot.
ACT 20:25 Ngang üa nomfeil leimi o afalafal usun ewe Mwün Kot. Nge iei üa silei, pwe üsap chüen künasefälikemi.
ACT 20:26 Iei mine üpwe fokun pwäri ngenikemi ikenai: Are eman leimi epwe pöütmwälila, esap tipisi.
ACT 20:27 Pun ngang üa apworausa ngenikemi unusen ekiekin Kot, nge üsap amwöchü och senikemi.
ACT 20:28 Iei mine oupwe mamasakemi me unusen chon ewe mwichefel ewe Ngünmifel a atolongeer fän ämi tümwün. Oupwe chon masen ewe mwichefelin Kot, i a möni ren chaan püsin Nöün we.
ACT 20:29 Ngang üa silei pwe mürin ai üpwe feila senikemi, aramas mi wewe ngeni wolif mwacho repwe feito leimi o repwe fokun afeiengaua ämi we mwich.
ACT 20:30 Epwe war ewe fansoun, lupwen ekoch me lon ämi we mwich repwe eäni kapas chofona ar repwe atokala ekewe chon lükü Jesus pwe repwe etiir.
ACT 20:31 Iei mine oupwe mamasa. Oupwe chechemeni pwe lon ükükün ülüngat ier, üsap ükütiu le fönöü eman me eman leimi lerän me lepwin fän chönün mesei.
ACT 20:32 Nge iei üa anomukemi fän tümwünüen Kot me an kapasen ümöümöch. I a tongeni apöchökülakemiitä o ngenikemi ekewe feiöch a iseis fän iten nöün aramas meinisin.
ACT 20:33 Ngang üsap mocheniaiti än eman silifer ika kolt ika mangaku.
ACT 20:34 Ämi oua püsin silei, pwe ngang üa püsin angang ren pei pwe epwe wor ekewe mettoch meinisin ngang me chiechiei kewe aia osupwang ren.
ACT 20:35 Ngang üa aiti ngenikemi lon ai föför meinisin, pwe ren ach angang weires lon ei sokun lapalap sipwe fokun alisi ekewe chon apwangapwang o chechemeni ekewe kapas ach Samol Jesus a püsin apasa, ‘Sia feiöch ren ach fang lap seni ach angei mettoch.’”
ACT 20:36 Lupwen än Paulus wes le apasatä ekei kapas, a fotopwäsuketiu fiti ir meinisin o iotek.
ACT 20:37 Iwe, ir meinisin ra kechü lupwen ra kapong ngeni fän ar tong.
ACT 20:38 Ra fokun lolilen ren an apasa, pwe resap chüen künasefäli. Mürin ra etala tori ewe sip epwe eti.
ACT 21:1 Iwe, äm aia kapong ngeniir o feil seniir. Mürin äm seseres wenewenela aia tori Kos. Sorotän ewe rän aia tori Rotes, nge seni ikenan aia sai ngeni Patara.
ACT 21:2 Ikenan aia küna efoch sip mi saila Fönisia, iei mine aia tötä won o fitala.
ACT 21:3 Iwe, aia tori eu leni ia aia tongeni küna Saipros me ie. Mürin aia saila örün ewe fanü o sai ngeni Siria. Aia tiwelong Tirus ia ra atötiu wosen ewe sip me ie.
ACT 21:4 Ikenan aia küna ekoch chon lükü Jesus o aia nonom rer lon ükükün eu wiik. Iwe, fän aitien Ngünmifel ngeniir ra üreni Paulus, pwe esap feila Jerusalem.
ACT 21:5 Nge lupwen äm fansoun nonom rer a wes, aia likitiir o sopwela äm sai. Nge ir meinisin fiti pwülüer me nöür kana ra etikeemiwu seni ewe telinimw tori ewe pi. Ikenan äm meinisin aia fotopwäsuk o iotek.
ACT 21:6 Mürin aia kapong ngeniir o tötä won ewe sip, nge ir ra liwiniti lenier.
ACT 21:7 Iwe, aia sopwela äm we sai, aia seres seni Tirus tori Ptolemais. Ikenan aia kapong ngeni ekewe chon lükü Jesus o nonom rer eu rän.
ACT 21:8 Sorotän ewe rän aia sai seni ikenan o tori Seserea. Ikenan aia nonom lon imwen Filip, i eman chon arongafeili ewe Pworausen Manau, pwal i eman lein ekewe füman mwän mi kefilitä me lon Jerusalem.
ACT 21:9 Ätei a wor föman nöün föpwül resap pwüpwülü, ra tongeni pwäri mine a monomon.
ACT 21:10 Mürin äm nonom ikenan ekoch rän, eman soufos itan Akapus a feito seni Jutea.
ACT 21:11 A feito rem, a angei än Paulus pelit o föti ngeni pöün me pechen, iwe, a üra, “Iei met ewe Ngünmifel a apasa: ‘Ekewe chon Juta mi nom lon Jerusalem repwe föti ätewe mine an ei pelit lon ei lapalap, repwe pwal atolonga lepöün ekewe chon lükün Israel.’”
ACT 21:12 Lupwen aia rong ekei kapas, äm me ekewe aramas mi nom rem, aia tüngormau ngeni Paulus, pwe esap feila Jerusalem.
ACT 21:13 Mürin Paulus a pölüeni, “Pwota oua kechü o atai letipei? Ngang üa molotä sap ngeni chök ai üpwe föfö, nge pwal ngeni ai üpwe mäla lon Jerusalem fän iten ach Samol Jesus.”
ACT 21:14 Iwe, esap pitela rem, iei mine aia fanafanala. Iwe, aia üra, “Epwe fis letipen ach Samol.”
ACT 21:15 Mürin äm nonom ikenan ekoch fansoun, aia amolätä äm pisek o feila Jerusalem.
ACT 21:16 Nge ekoch me lein ekewe chon lükü Jesus me lon Seserea ra pwal etikem o emwenikeemila lon imwen eman mwän itan Mnason ia aia wasöla ie. Ätei i seni Saipros, eman chon lükü Jesus seni chök lom.
ACT 21:17 Iwe, lupwen aia tori Jerusalem, ekewe chon lükü Jesus ra pwapwa le etiwakem.
ACT 21:18 Sorotän ewe rän, Paulus a etikem le feila churi James. Iwe, ekewe souakomwen mwichefel meinisin ra pwal nom.
ACT 21:19 Iwe, Paulus a kapong ngeniir o apworausa ngeniir tichikin meinisin mine Kot a föri me lein ekewe chon lükün Israel ren an angang.
ACT 21:20 Mürin ar rongorong ngeni, ir meinisin ra mwareiti Kot. Mürin ra üreni Paulus, “Pwiim Paulus, ka küna pwe mi wor chomong ngeröün chon Juta ra lükü Jesus, nge ir meinisin ra fokun achocho le apwönüetä ekewe Allük.
ACT 21:21 Ir ra rong usumw, pwe ka afalafala ekewe chon Juta meinisin mi nonom lon ekewe fanüen chon lükün Israel, pwe repwe pöütala än Moses kewe allük, ka pwal üreniir pwe resap sirkomsaisi nöür semirit ika aleasochisi örünien ekewe chon Juta.
ACT 21:22 Met sipwe föri? Ir repwe fokun rongorong pwe ka war.
ACT 21:23 Iei met aia mochen pwe kopwe föri. Mi wor föman mwän mi nom ikei, ra fen föri eu pwon mwen mesen Kot.
ACT 21:24 Kopwe etiir o pach ngeniir lon ar angangen limelim, kopwe pwal mönätiu ewe ükükün liwin fän iten ekewe asoren limelim. Mürin repwe tongeni reipöpöla mökürer. Ren ei lapalap aramas meinisin repwe mefi pwe püsin en ka apwönüetä än Moses kewe Allük.
ACT 21:25 Nge ren ekewe chon lükün Israel mi lükü Jesus, aia tinala toropwe ngeniir o asile ngeniir mine sia apwüngala, pwe resap mongö ekewe mongö ra piin asor ngeni ekewe uluulun anümwäl, resap ün cha, resap ochoch fituken man mi ffor, resap pwal föri sokun lisowu.”
ACT 21:26 Iei mine Paulus a eti ekewe mwän, nge sorotän ewe rän a fitiir le föri ewe angangen limelim. Mürin a tolong lon ewe imwenfel o asile ngeniir inet ekewe ränin limelim repwe wesila o ekewe asor repwe tongeni fis fän iten eman me eman leir.
ACT 21:27 Nge lupwen a arapakan ngeni pwe ekewe fisu rän repwele sopola, ekoch re Juta seni ewe fanü Asia ra küna Paulus me lon ewe imwenfel. Ra etipetipa unusen chon ewe mwich o ra turufi Paulus.
ACT 21:28 Ra kökkö fän leüömong, “Ämi re Israel! Oupwe alisikem! Iei i ewe mwän mi saifeil ekis meinisin o a eäni och sokun afalafal ngeni aramas meinisin mi ü ngeni ekewe aramasen Israel, än Moses kewe Allük me ei imwenfel. Nge iei a fen mwo nge uwato ekoch chon lükün Israel lon ei imwenfel o apiningaua ei leni mi pin!”
ACT 21:29 (Ra apasa ei pokiten ra küna Trofimus seni Efisos mi eti Paulus lon ewe telinimw, nge ra ekieki pwe Paulus a uweela lon ewe imwenfel.)
ACT 21:30 Iwe, eu fitikoko a chöfetal lon unusen ewe telinimw o ekewe aramas ra säto seni ekis meinisin. Ra turufi Paulus o atekinawu seni lon ewe imwenfel. Mürin ra müttir öpüngala ekewe asamalapen ewe imwenfel.
ACT 21:31 Lupwen ra sotuni ar repwe niela Paulus, ewe pworaus a tori ewe sounemenemen sounfiun Rom, pwe unusen ewe telinimw Jerusalem a nom lon watten fitikoko.
ACT 21:32 Lon ewe chök otun ewe sounemenemen sounfiu a angei ekoch meilap me ekoch sounfiu o ra sätiu ren ewe mwichen aramas. Lupwen än ekewe aramas küna i fiti ekewe sounfiu, ra ükütiu le wichi Paulus.
ACT 21:33 Iwe, ewe sounemenem a fetal wenewen ngeni Paulus, a turufi o allük pwe repwe föti ngeni ruofoch sein. Mürin a ais, “Iö ei mwän? Nge met a föri?”
ACT 21:34 Iwe, ekoch me lon ewe mwich ra kökkötä won och, nge pwal ekoch won och. A fis eu watten fitikoko, pwe ewe sounemenem esap tongeni fateiti met a fis. Iei mine a allük ngeni nöün kewe sounfiu pwe repwe angei Paulus o uweetä won lenier we.
ACT 21:35 Ra emwenala Paulus tori ewe latö, mürin ekewe sounfiu ra eki pokiten ekewe aramas lon ewe mwichen afitikoko ra fokun song.
ACT 21:36 Ir meinisin ra tapweri o pupuchör, “Oupwe niela ätenan.”
ACT 21:37 Iwe, lupwen än ekewe sounfiu repwe le emwenala Paulus lon ewe lenien sounfiu, Paulus a kapas ngeni ewe sounemenemen sounfiu, “Kose mochen üpwe apasa och ngonuk?” Ewe sounemenem a aisini, “Ifa usun, ka silei fosun Krik?
ACT 21:38 Sap en ewe re Isip mi popuetä eu mwichen ü ngeni mwü o emwenawu rüanüngeröü chon ni aramas lon ewe fanüapö lon ekewe fansoun ra la?”
ACT 21:39 Iwe, Paulus a pölüeni, “Ngang eman re Juta, üa uputiu lon ewe telinimw Tarsus lon Silisia, ngang eman chon eu telinimw mi iteföüla. Kose mochen mwüt ngeniei ai üpwe kapas ngeni ekei aramas.”
ACT 21:40 Mürin ewe sounemenem a mwüt ngeni. Iei mine Paulus a ütä won ewe latö o a änipö ngeni ekewe aramas, pwe repwe fanafanala. Iwe, lupwen ra fanafanala, Paulus a popuetä le kapas ngeniir lon fosun Ipru:
ACT 22:1 “Ämi pwii me semei kana, oupwe aüseling ngeniei, pun üpwe püsin peniei mwemi.”
ACT 22:2 Lupwen ar rongorong an kapas ngeniir lon fosun Ipru, ra fokun mosonosonola. Mürin Paulus a sopwela le kapas ngeniir,
ACT 22:3 “Ngang eman re Juta, üa uputiu lon ewe telinimw Tarsus lon Silisia, nge üa mämäritä ikei lon Jerusalem. Üa sukul ren ewe sense Kamaliel, a aiti ngeniei tichikin ekewe allük seni ach kewe lewo pwe üpwe apwönüretä. Üa fangala manauei ngeni Kot usun chök ämi oua föri ikenai.
ACT 22:4 Üa ariaföüü ekewe aramas tori ar mäla, ir chokewe mi fetal won Alen ewe Samol. Üa turufi mwän me fefin o atururelong lon imwen fötek.
ACT 22:5 Ewe Souasor mi Lap me unusen ewe mwichen soupwüng ra tongeni alletätä pwe mine üa apasatä a let. Üa angei seniir ekewe toropwe ra mak ngeni pwiir kewe chon Juta mi nom lon Tamaskus. Iei mine üa feila ikenan pwe üpwe turufi ekei aramas o aliwinisefäliireto ngeni Jerusalem fän föföör, pwe repwe angei liwinin ar föför.
ACT 22:6 “Iwe, lupwen ai sai o üa arap ngeni Tamaskus, leoloas a fis pwe a pwäkai ngeniei och saram mi fokun saramaram me läng a feitiu woi.
ACT 22:7 Üa turutiu lepwül o üa rong eu möngüngü a üreniei, ‘Saul, Saul, pwota ka ariaföüüei?’
ACT 22:8 Nge ngang üa aisini, ‘Samol, en iö?’ Iwe, a pölüeniei, ‘Ngang Jesus seni Nasaret ewe ka ariaföüü.’
ACT 22:9 Iwe, ekewe mwän mi etiei ra chök küna ewe saram, nge resap rongorong möngüngün ewe eman mi kapas ngeniei.
ACT 22:10 Iwe, üa aisini, ‘Ai Samol, met ka mochen üpwe föri?’ Ewe Samol a üreniei, ‘Kopwe pwätä o feila lon ewe telinimw Tamaskus, ikenan repwe ürenuk meinisin mine Kot a akota pwe kopwe föri.’
ACT 22:11 Mesei ra chunula pokiten ewe saram, iei mine chiechiei kewe ra amwöchü pei o ra emwenieilong lon Tamaskus.
ACT 22:12 “Lon ena telinimw a wor eman mwän itan Ananias. I eman mwän mi achocho le fel ngeni Kot o aleasochisi ach kewe allük, a pwal watte sufölün me ren ekewe chon Juta meinisin mi nom lon Tamaskus.
ACT 22:13 Ätewe a feito rei, a ütä ünüki o üreniei, ‘Pwii Saul, kopwe künasefäli mwomw!’ Lon ewe chök otun üa künasefäli mwei o newenewen ngeni.
ACT 22:14 Iwe, Ananias a üra, ‘Än ach kewe lewo we Kot a filuketä pwe kopwe silei letipan, kopwe pwal küna nöün we Chon Angang mi pwüng o kopwe rongorong mwelian lupwen a kapas ngonuk.
ACT 22:15 Pun en kopwe eman chon pwärätä fän itan ngeni aramas meinisin ren met ka küna o rong.
ACT 22:16 Nge met ka witiwiti iei? Kopwe ütä o papatais, nge ren om iotek ngeni i om tipis kana repwe musala.’
ACT 22:17 “Iwe, üa liwinsefäliti Jerusalem, nge lupwen ai iotek lon ewe imwenfel a wor künaei.
ACT 22:18 Üa küna ach Samol a kapas ngeniei, ‘Kopwe müttir towu seni Jerusalem iei chök, pun ekewe aramas resap etiwa om pwärätä usi.’
ACT 22:19 Iwe, üa pölüeni, ‘Ai Samol, ir ra fokun silei pwe ngang üa feila lon ekewe imwen felikis ai üpwe turufi o wichi chokewe mi lükü en.
ACT 22:20 Nge lupwen ar niela noumw chon pwärätä Stefanus, ngang üa nom ikenan o tipeeu ngeni ar niela, üa pwal tümwünü üfen ätekewe mi niela i.’
ACT 22:21 Iwe, ach Samol a üreniei, ‘Kopwe feila, pun ngang üpwe tinukela won ekewe fanü toau ren ekewe chon lükün Israel.’”
ACT 22:22 Iwe, ekewe aramas ra aüseling ngeni Paulus tori a apasatä ekei kapas. Nge mürin ra popuetä le pupuchör fän mwelier mi leüömong, “Oupwe fokun niela ätei! Esap fokun öch an epwe manau!”
ACT 22:23 Ra pupuchör, ra änipüfetalei üfer kewe o aparasatä pwül läng.
ACT 22:24 Mürin ewe sounemenemen sounfiu a allük ngeni nöün kewe sounfiu pwe repwe etekinalong Paulus lon ewe lenien sounfiu. Iwe, a üreniir pwe repwe wichi o kütta popun än ekewe chon Juta pupuchör ngeni lon ei lapalap.
ACT 22:25 Nge lupwen ar chüen föti an epwe wichiwich, Paulus a üreni eman me lein ekewe meilapen sounfiu mi ü ikenan, “Ifa usun, a pwüng ngenikemi ämi oupwe wichi eman chon Rom, nge esamwo fat lon kapwüng pwe a tipis?”
ACT 22:26 Lupwen ewe meilapen sounfiu a rong ekei kapas, a feila ren ewe sounemenem o aisini, “Met ka föri? Enan mwän i eman chon Rom.”
ACT 22:27 Iei mine ewe sounemenem a feila ren Paulus o a aisini, “Kopwe pwäri ngeniei, ifa usun, en eman chon Rom?” Paulus a pölüeni, “Ewer!”
ACT 22:28 Ewe sounemenem a üra, “Ngang üa wiliti eman chon Rom ren ai mönätiu chomong moni.” Paulus a pölüeni, “Nge ngang eman chon Rom seni chök ai uputiu.”
ACT 22:29 Lon ewe chök otun ekewe mwän repwe atittina Paulus ra timärämär seni. Nge ewe sounemenem a niuokus lupwen a silei pwe Paulus eman chon Rom, nge a fen föti ngeni sein.
ACT 22:30 Iwe, ewe sounemenemen sounfiu a wesewesen mochen küttaöchü met ekewe chon Juta ra atipisi Paulus won. Iei mine sorotän ewe rän a apichi ekewe sein Paulus a föfö ngeni, a pwal allük ngeni ekewe souasor mi lap me unusen ewe mwichen soupwüng pwe repwe mwichfengen. Mürin a angei Paulus o aütai me mwer.
ACT 23:1 Iwe, Paulus a newenewen ngeni ewe mwichen soupwüng o apasa, “Ämi pwii kana re Israel! Üa manaueni manauei mwen mesen Kot, nge esap wor och mengiringirin letipei tori ikenai.”
ACT 23:2 Ren ei ewe Souasor mi Lap Ananias a allük ngeni ätekewe mi ütä ünükün Paulus pwe repwe pösapei awan.
ACT 23:3 Mürin Paulus a üreni, “Kot epwe fokun pösapeek, en tit mi peinitipwech! Ka mot ikenan ren om kopwe apwüngüei fän pwüngün ekewe Allük, nge en ka purätiu ekewe Allük ren om allük ngeniir, pwe repwe pösapeei!”
ACT 23:4 Iwe, ätekewe mi kan ngeni Paulus ra üreni, “En ka kapasingau usun nöün Kot we Souasor mi Lap!”
ACT 23:5 Paulus a pölüeni, “Ämi pwii kana, üsap silei pwe ätenan i ewe Souasor mi Lap, pun ekewe Toropwe mi Pin ra apasa, ‘Kosap kapasingau usun samolun noumw aramas!’”
ACT 23:6 Iwe, lupwen Paulus a küna pwe ekoch chon ewe mwich ir Satusi, nge pwal ekoch ir Farisi, a leüömong le kapasowu ren ewe mwichen soupwüng, “Ämi pwii kana re Israel! Ngang eman Farisi, nöün eman Farisi. Üa kapwüng ikei pokiten ai apilükülük pwe ekewe mi mäla repwe manausefäl!”
ACT 23:7 Lon ewe chök otun a apasatä ekei kapas, ekewe Farisi me Satusi ra popuetä le aninifengen o ewe mwich a kinikinfesen.
ACT 23:8 (Pun ekewe Satusi ra apasa pwe esap wor manausefäl seni mäla, ra pwal apasa pwe esap wor chon läng me ngün. Nge ekewe Farisi ra lükü lon ir me ülüngat.)
ACT 23:9 Iwe, ar kapas a leüömongola o ekoch seni ekewe Sensen Allük, ir seni lon ewe mwichen Farisi, ra ütä o ra pöchökül le anini, “Äm aisap tongeni küna och mwälin ei mwän! Eli eman ngün ika eman chon läng a wesewesen kapas ngeni!”
ACT 23:10 Iwe, ewe anini a chök fokun wattela, pwe ewe sounemenemen sounfiu a niuokus, ika ekewe aramas repwe atatakisi inisin Paulus. Iei mine a allük ngeni nöün kewe sounfiu pwe repwe feitiu lon ewe mwich, repwe angeawu Paulus seniir o aliwinala lon ewe lenien sounfiu.
ACT 23:11 Lon ewe pwinin, ewe Samol a ütä ren Paulus o a üreni, “Kosap niuokus! Ka pwäriei ikei lon Jerusalem, iei usun kopwe pwal fokun pwäriei lon Rom.”
ACT 23:12 Lesosorun sorotän ewe rän ekoch chon Juta ra chufengen o föri eu raw. Ra atolongeer lon eu pwon mi fis fän akapel, pwe resap mongö ika ün och tori ar repwe niela Paulus.
ACT 23:13 Mi wor lap seni faik mwän mi akotafengeni ei raw.
ACT 23:14 Mürin ra feila ren ekewe souasor mi lap me ekewe souakom o ra üreniir, “Äm aia atolongakem lon eu pwon, pwe aisap mongö och tori äm aipwe niela Paulus.
ACT 23:15 Iei mine ämi me ewe mwichen soupwüng oupwe tinala ämi kapasen tüngor ngeni ewe sounemenemen sounfiu pwe epwe emwenatiu Paulus remi. Oupwe tipin föri pwe oua mochen kütta tichikin pworausen an föför. Nge äm aipwe molotä pwe aipwe niela i me mwen an esap mwo tori ikei.”
ACT 23:16 Nge nöün fefinen Paulus a rongorong usun ei raw. Iei mine a feila lon ewe lenien sounfiu o apworausa ngeni Paulus mine a fis.
ACT 23:17 Mürin Paulus a körato eman me lein ekewe meilapen sounfiu o a üreni, “Kose mochen emwenala ei alüal ngeni ewe sounemenemen sounfiu. A wor och mine epwe asile ngeni.”
ACT 23:18 Iwe, ewe meilapen sounfiu a angei ewe alüal o emwenala ren ewe sounemenem o üreni, “Ewe chon fötek Paulus a köriei o tüngor ngeniei pwe üpwe emwenato ei alüal reöm, pun a wor och mine epwe asile ngonuk.”
ACT 23:19 Ewe sounemenem a kamwöch pöün ewe alüal, a emwenala ekis o aisini, “Met ka mochen asile ngeniei?”
ACT 23:20 Ewe alüal a üra, “Ekewe chon Juta ra tipeeufengen pwe repwe tüngor ngonuk lesor om kopwe emwenatiu Paulus lon ar we mwichen soupwüng, nge repwe tipin föri ei pwe ra mochen kütta tichikin pworausan.
ACT 23:21 Nge üa tüngor ngonuk pwe kosap aüseling ngeniir, pun a wor lap seni faik mwän ra op o witiwit. Ra atolongeer lon eu pwon mi fis fän akapel, pwe resap mongö ika ün tori ra niela Paulus. Iei ra molotä pwe repwe föri ei o witiwiti om kopwe apwüngala ar tüngor.”
ACT 23:22 Iwe, ewe sounemenem a üreni, “Kosap üreni eman, pwe en ka apworausa ngeniei ei pworaus.” Mürin a tinala ewe alüal.
ACT 23:23 Mürin ewe sounemenemen sounfiu a körato ruoman nöün kewe meilapen sounfiu o üreniir, “Oupwe amolätä ruopükü sounfiu pwe repwe feila Seserea me fik chon wawa oris, pwal ruopükü chon uwou siles. Iwe, oupwe molotä ämi oupwe sü seni ikei kulok tiu lepwinei.
ACT 23:24 Oupwe pwal awora ekoch oris fän iten Paulus pwe epwe wawa o tümwünüöchü i lupwen oupwe uweela ren ewe kepina Feliks.”
ACT 23:25 Mürin ewe sounemenemen sounfiu a makkei echö toropwe. Iei masouan:
ACT 23:26 “Ngang Klautius Lisias üa kapong ngeni en ämäfen kepina Feliks:
ACT 23:27 Ekewe chon Juta ra turufi ei mwän o ra sotun niela. Iwe, üa rong pwe i eman chon Rom, iei mine üa fiti nei kewe sounfiu o amanaua.
ACT 23:28 Üa mochen silei met popun ar atipisi, iei mine üa emwenatiu lon ar we mwichen soupwüng.
ACT 23:29 Iwe, üa küna pwe esap föri och mine epwe tipisin mäla ren ika tolong lon imwen fötek. Ar kewe kapasen tipi ngeni ra pop seni ekewe kapasen anini usun püsin ar kewe allük.
ACT 23:30 Nge lupwen ar asile ngeniei, pwe ekoch chon Juta ra rawangauei ei mwän, üa müttir tinala reöm. Iwe, üa üreni ekewe chon atipisi, pwe repwe feila reöm o pwäri ngonuk me mwomw ar kewe kapasen tipi ngeni.”
ACT 23:31 Iwe, ekewe sounfiu ra apwönüetä mine ewe sounemenem a fen allük ngeniir. Ra angei Paulus o uweela lon ewe pwinin tori Antipatris.
ACT 23:32 Sorotän ewe rän ekewe sounfiu mi fetal ra liwinsefäliti ewe lenien sounfiu o likiti ngeni ekewe chon wawa oris pwe repwe sopwela le emweni Paulus.
ACT 23:33 Iwe, ra emwenala tori Seserea, ra ngeni ewe kepina ewe toropwe o ra atolonga Paulus fän nemenian.
ACT 23:34 Ewe kepina a aleani ewe toropwe o aisini Paulus meni fanü a feito seni. Iwe, lupwen a silei pwe Paulus a feito seni ewe fanü Silisia,
ACT 23:35 a üra, “Ngang üpwe rongorong ngonuk lon ewe kapwüng lupwen ekewe chon atipisuk repwe war.” Mürin a allük pwe sounfiu repwe mamasa Paulus lon ewe imw Herotes a aüetä.
ACT 24:1 Iwe, limu rän mürin ewe Souasor mi Lap Ananias a feila Seserea fiti ekoch souakom me eman souallük itan Tertullus. Ra feito mwen mesen ewe kepina Feliks o pwärätä ekewe tipis ra tipi ngeni Paulus.
ACT 24:2 Mürin ar körato Paulus, Tertullus a popuetä le pwärätä an kapasen atutur. Iei usun mine a apasa: “En ämäfen kepina! Om tipachem le emwenikich a aworato kinamwe ngenikich lon fansoun langatam, pwal chomong minefön mettoch ra fisitä fän iten feiöchün fanüach.
ACT 24:3 Ekis meinisin pwal fansoun meinisin äm aia etiwa ei sokun feiöch, nge äm aia fokun kilisou chapur ngonuk.
ACT 24:4 Ngang üsap mochen atai om fansoun, nge üa tüngor ngonuk pwe kopwe kirikiröch ngenikem o aüseling ngeni äm kewe kapas mi mochomoch.
ACT 24:5 Äm aia mefi pwe ei mwän eman aramas mi fokun afeiengau. A popuetä fitikoko lein ekewe chon Juta won unusen fanüfan, i eman souemwenin ewe mwichen Nasaret.
ACT 24:6 A pwal sotuni an epwe apiningaua ewe Imwenfel, nge äm aia turufi. [Äm aia ekiekin apwüngü fän pwüngün püsin äm kewe allük,
ACT 24:7 nge ewe sounemenemen sounfiu Lisias a war o angei senikem fän pöchökül.
ACT 24:8 Mürin Lisias a üreni, pwe ekewe chon atipisi ei mwän repwe feito me mwomw.] Are en kopwe kapas ais ngeni ei mwän, kopwe tongeni silei seni i usun ekewe mettoch meinisin aia atipisi won.”
ACT 24:9 Iwe, ekewe chon Juta ra tipeeu ngeni ekewe kapasen atipisi o üra pwe meinisin a let.
ACT 24:10 Iwe, ewe kepina a pwome ngeni Paulus an epwe kapas. Iwe, Paulus a üra, “Ngang üa silei pwe en ka fen soukapwüngün ei mwü lon chomong ier. Iei mine üa pwapwa ai üpwe püsin peniei me mwomw.
ACT 24:11 Usun ka tongeni püsin silei pwe esap mwo lap seni engol me ruu rän ra la, pwe ngang üa feila Jerusalem ai üpwe fel ngeni Kot.
ACT 24:12 Ekewe chon Juta resap küna pwe üa anini ngeni eman me lon ewe Imwenfel, resap pwal künaei pwe üa föri och mine aramas repwe fitikoko ren, sap lon ekewe imwen felikis ika ekis meinisin lon ewe telinimw.
ACT 24:13 Resap pwal tongeni alletätä pwe a let ekewe kapasen atipisi ra aturuei won iei.
ACT 24:14 Nge ngang üpwe pwärätä ei ngonuk: Üa fel ngeni än ach kewe lewo we Kot ren ai fetal won ewe Al ir ra apasa pwe mi mwäl. Nge üa pwal lükü meinisin mine a mak lon än Moses kewe Allük pwal lon ekewe puken soufos.
ACT 24:15 Üa pwal apilükülük lon ewe Kot ir ra pwal apilükülük ngeni, pwe aramas meinisin, ekewe chon pwüng me ekewe aramas mi ngau, repwe manausefäl seni mäla.
ACT 24:16 Iei mine üa achocho ngeni fansoun meinisin, pwe esap wor mengiringirin letipei me mwen Kot me aramas.
ACT 24:17 “Mürin ai toau seni Jerusalem ekoch ier, üa liwinto ikei ai üpwe uwato moni fän iten alilisin aramasei kewe chon Juta mi osupwang, üpwe pwal uwato ai asor.
ACT 24:18 Lupwen üa föri iei usun, ra künaei lon ewe Imwenfel, mürin ai awesi ai we angangen alimelim. Esap wor eu mwichen aramas a nom rei, esap pwal wor och fitikoko.
ACT 24:19 Nge ekoch chon Juta seni ewe fanü Asia ra nom ikenan. Püsin ir repwe feito mwomw o pwärätä ar kapasen atutur are mi wor mine ra tongeni atipisiei won.
ACT 24:20 Ika ekei mwän mi nom ikei repwe pwärätä met sokun föföringau ra küna rei lupwen üa ütä me mwen ewe mwichen soupwüng,
ACT 24:21 chilon chök ewe eu mettoch üa kökkö lupwen üa ütä me mwer, ‘Ngang üa küna kapwüng me remi ikenai fän iten üa lükü pwe ekewe sotup repwe manausefäl.’”
ACT 24:22 Mürin Feliks mi sileöchü usun ewe Al a aükätiu ewe kapwüng o üreniir, “Lupwen ewe sounemenemen sounfiu Lisias epwe war, üpwe atowu pwüngün ei kapwüng.”
ACT 24:23 Iwe, a allük ngeni ewe meilapen sounfiu mi tümwünü Paulus, pwe epwe mamasaöchü Paulus, nge epwe ekis angasa o mwüt ngeni chiechian kana ar repwe alisi ngeni met a osupwang ren.
ACT 24:24 Mürin ekoch rän Feliks a feito fiti pwülüan we itan Trusilla, i eman fin Juta. A titi Paulus o aüseling ngeni lupwen a afalafal usun ach lükülük lon Kraist Jesus.
ACT 24:25 Nge lupwen Paulus a sopwela le kakapas usun pwüng, usun ach sipwe tongeni nemeni püsin inisich, pwal usun ewe ränin kapwüng lon ewe fansoun lesopolan, Feliks a niuokus o apasa, “Kopwe feila iei, ngang üpwe kökkörisefäluk lupwen epwe wor ai fansoun mi fich.”
ACT 24:26 Lon ena fansoun Feliks a pwal apilükülükü pwe Paulus epwe ngeni moni, iei popun a soun titi i pwe repwe pworausfengen.
ACT 24:27 Iwe, ruu ier mürin, Porkius Festus a siwili Feliks lon wisen kepina. Nge Feliks a mochen kütta an chen me ren ekewe chon Juta, iei mine a likiti Paulus lon imwen fötek.
ACT 25:1 Iwe, ülüngat rän mürin än Festus tori ewe fanü, a feila seni Seserea tori Jerusalem.
ACT 25:2 Ikenan ekewe souasor mi lap me ekewe souemwenin chon Juta ra aturu Paulus. Ra tüngor ngeni Festus,
ACT 25:3 pwe epwe alisiir pwe Paulus epwe feito Jerusalem, pun ra föri eu raw pwe repwe niela won ewe al.
ACT 25:4 Festus a pölüeniir, “Paulus epwe chök nom lon imwen fötek lon Seserea, nge püsin ngang üpwe feila ikenan mürin ekis fansoun mochomoch.
ACT 25:5 Nöümi kewe souemwen repwe etieila Seserea o aturu ei mwän are a föri och föför mi ngau.”
ACT 25:6 Iwe, Festus a pwal nonom rer walu ika engol rän, mürin a feila Seserea. Sorotän ewe rän a mot won ewe lenien kapwüng o allük pwe repwe emwenato Paulus.
ACT 25:7 Nge lupwen Paulus a war, ekewe chon Juta mi feito seni Jerusalem ra ütä pwelin ünükün o popuetä le aturu won chomong föför mi ngau ra atipisi won. Nge resap tongeni alletätä pwe a pwüng.
ACT 25:8 Nge Paulus a püsin peni i o apasa, “Üsap föri och mwäl ngeni än chon Juta kewe allük ika apiningaua ewe Imwenfel ika ü ngeni Sisar lon Rom.”
ACT 25:9 Nge Festus a mochen kütta an chen me ren ekewe chon Juta, iei mine a aisini Paulus, “Ifa usun, ka tipeeu ngeni om kopwe feila Jerusalem, pwe üpwe apwünguk ikenan won ekei kapasen atutur ra atipisuk won?”
ACT 25:10 Iwe, Paulus a üra, “Ngang üa ütä me mwen än Sisar lenien kapwüng, ewe ia üpwe kapwüng ie. Ngang üsap föri och föför mi mwäl ngeni ekewe chon Juta usun ka fen silei.
ACT 25:11 Are ngang üa purätiu eu kewe allük o föri och pwe üpwe tolong lon tipisin mäla, ngang üsap tüngor pwe üpwe ngasala seni. Nge are esap pwüng ekewe kapasen atutur ra atipisiei won, esap wor eman a tongeni atolongaei lepöür. Iwe, ngang üa tüngor pwe ei kapwüng epwe amwet ngeni Sisar.”
ACT 25:12 Mürin än Festus pworaus ngeni nöün kewe souöüröür a pölüeni, “Ka tüngor pwe om ei kapwüng epwe amwet ngeni ewe Sisar, iei popun kopwe fokun feila ren Sisar.”
ACT 25:13 Mürin ekoch fansoun ewe king Akripa me Pernike ra feito Seserea ar repwe churi o kapongen etiwetiw ngeni Festus.
ACT 25:14 Mürin ar nonom ikenan ekoch rän, Festus a apworausa ngeni ewe king usun pworausen Paulus: A wor eman mwän ikei lon imwen fötek Feliks a likitätiu.
ACT 25:15 Nge lupwen üa feila Jerusalem, nöün ekewe chon Juta kewe souasor mi lap me ekewe souakom ra uwato ar kapasen atutur ra atipisi won o tüngor ngeniei, pwe üpwe apwüngala pwe a tipis.
ACT 25:16 Nge ngang üa üreniir, pwe oukich chon Rom lon örüniach sisap atipisi eman aramas ren och tipis me mwen an epwe churi ekewe chon atipisi, pwe epwe tongeni püsin peni i won ekewe kapasen atutur ra atipisi won.
ACT 25:17 Iwe, lupwen ra feito ikei, üsap olusala ai fansoun, nge sorotän ewe rän üa mot lon ewe lenien kapwüng o allük pwe repwe emwenato ewe mwän rei.
ACT 25:18 Iwe, ekewe chon ü ngeni ra ütä, nge resap aturu won och föför mi fokun ngau usun üa ekieki pwe repwe föri.
ACT 25:19 A chök wor ekoch kapasen anini ngeni usun pwüngün ar lamalam, pwal usun eman mwän itan Jesus mi mäla, nge Paulus a apasa pwe a manausefäl.
ACT 25:20 Iwe, üsap chüen silei epwe ifa usun ai üpwe tongeni angei ai wewe won ekei mettoch. Iei mine üa tüngor ngeni Paulus are epwe tipeeu ngeni an epwe feila Jerusalem, pwe epwe kapwüng ikenan won ekei kapasen atutur.
ACT 25:21 Nge Paulus a tüngor, pwe an kapwüng epwe amwet ngeni ewe Sisar an epwe filätä pwüngün, nge i epwe chök nom lon imwen fötek. Iei mine üa allük ngeni ekewe sounfiu, pwe repwe mamasa tori üpwe tongeni tinala i ren Sisar.”
ACT 25:22 Iwe, Akripa a üreni Festus, “Ngang üa mochen püsin rongorong ngeni ei mwän.” Festus a pölüeni, “Lesor kopwe rongorong ngeni.”
ACT 25:23 Sorotän ewe rän Akripa me Pernika ra feito fän sokopaten fouter mi ling, pwal fän etiwetiw seni ekewe aramas. Ra tolong lon ewe utten mwich fiti ekewe meilapen sounfiu me ekewe souemwenin ewe telinimw. Fän än Festus allük ra emwenato Paulus lon ar we mwich.
ACT 25:24 Iwe, Festus a üra, “King Akripa pwal meinisin mi etikich le nom ikei: Ämi oua küna ei mwän ekewe chon Juta meinisin mi nom ikei me ekewe mi nom lon Jerusalem ra ü ngeni. Ra uwato ar kapasen atutur rei o ra pupuchör, pwe esap pwüng ngeni an epwe chüen manau.
ACT 25:25 Ngang üsap küna och föför a föri fän iten an epwe tipisin mäla. Iwe, pokiten püsin i a tüngor pwe an kapwüng epwe amwet ngeni ewe Sisar, üa ekieki ai üpwe tinala ren.
ACT 25:26 Nge esap wor och mine üpwe tongeni makkeela ren ewe Sisar usun föförün ätei. Iei mine üa emwenato i me mwemi meinisin, fokun me mwomw king Akripa, pun wesin ei angangen chosa fän itan, epwe wor mine üpwe tongeni makkeetiu usun.
ACT 25:27 Pun esap pwüng ngeniei ai üpwe tinala eman chon fötek, nge esap fatöch ekewe kapasen atutur ra atipisi won.”
ACT 26:1 Iwe, Akripa a üreni Paulus, “Äm aia mwütätä ngonuk pwe kopwe pwärätä fän itom.” Iei mine Paulus a aitiewu pöün, a popuetä le püsin peni i o üra,
ACT 26:2 “King Akripa! Üa fokun kilisou, pun üa tongeni püsin peniei me mwomw usun ekewe mettoch meinisin ekewe chon Juta ra atipisiei won.
ACT 26:3 Nge a fokun öch, pun ka fokun silefichi örünien ekewe chon Juta me mine ra anini won. Iei mine üa tüngor om kopwe aüselingaei fän mosonotam.
ACT 26:4 “Ekewe chon Juta meinisin ra silei usun nonomi seni leküküni. Ra silei usun uruwon manauei seni lepoputän lupwen üa nom lon fanüei pwal lon Jerusalem.
ACT 26:5 Ra fen silei seni me lom, nge ika ra mochen ra tongeni pwärätä usi, pwe ngang eman Farisi, chon ewe mwich mi fokun tichik me lon ach lamalam.
ACT 26:6 Nge iei üa ütä ikei pwe üpwe kapwüng pokiten ai apilükülükü ewe pwon Kot a ngeni ach kewe lewo,
ACT 26:7 ewe chök pwon aramasach kewe seni ekewe engol me ruu ainang ra apilükülükü pwe repwe angei lupwen ra fel ngeni Kot lerän me lepwin. Iwe, ämäfen king, pokiten ei apilükülük ekewe chon Juta ra atipisiei ren.
ACT 26:8 Pwota ämi chon Juta oua ekieki pwe esap tufich ach sipwe lükü pwe Kot epwe amanauatä ekewe mi mäla?
ACT 26:9 Püsin ngang üa ekieki, pwe üpwe fokun föri meinisin mine üa tongeni ai üpwe ü ngeni ewe Jesus seni Nasaret.
ACT 26:10 Iwe, iei met üa föri lon Jerusalem. Üa angei ai mwümwütä seni ekewe souasor mi lap pwe üpwe aturalong lon imwen fötek chomong nöün Kot kewe aramas, nge lupwen a towu pwüngün pwe repwe ninnila, üa pwal tipeeu ngeni.
ACT 26:11 Fän chomong üa ariaföüür lon ar kewe imwen felikis, üa pwal achocho le föri mine repwe fangata ar lükülük ren. Lon ai lingeringeritiir üa fen mwo nge feila ngeni ekewe telinimwen chon ekis pwe üpwe ariaföüür.
ACT 26:12 “Iwe, fän iten ei popun üa feila Tamaskus fän pwüngün me akünöüen ekewe souasor mi lap.
ACT 26:13 Ämäfen king, lupwen üa fetal won ewe al leoloas, üa küna eu saram seni läng mi saramaram seni akkar a sarametiu ünüki me chiechiei kewe mi etiei.
ACT 26:14 Iwe, äm meinisin aia turutiu lepwül, nge ngang üa rong eu möngüngü mi kapas ngeniei lon fosun Ipru, ‘Saul, Saul, pwota ka ariaföüüei? Ka püsin afeiengauok ren om ü ngeniei, usun eman kow a chepeti ewe wok mi nom lepöün ewe chon tümwünü.’
ACT 26:15 Iwe, ngang üa ais, ‘En iö Samol?’ Ach Samol a pölüeni, ‘Ngang Jesus ewe ka ariaföüü.
ACT 26:16 Kopwe pwätä o ütä. Ngang üa pwä ngonuk ai üpwe awisok pwe kopwe nei chon angang. Kopwe pwärätä mine ka küna usi ikenai, pwal mine üpwe pwäri ngonuk lon ekewe fansoun repwe feito.
ACT 26:17 Üpwe amanauok seni ekewe aramasen Israel, pwal seni ekewe chon lükün Israel, chokewe ngang üpwe tinukela rer.
ACT 26:18 Kopwe aneloi meser, pwe repwe kul seni rochopwak o kul ngeni saram, repwe towu seni fän nemenien Satan o tolong fän nemenien Kot, nge ren ar lüküei repwe küna amusamusen ar tipis kana o angei lenier ren chokewe mi pin.’
ACT 26:19 “Iei mine ämäfen king Akripa, üsap aleasolap ngeni künaei we seni läng.
ACT 26:20 Üa afalafal akom lon Tamaskus me Jerusalem, mürin lon unusen fanüen ekewe chon Juta, pwal lein ekewe chon lükün Israel, pwe repwe aier seni ar tipis o kul ngeni Kot, pwe repwe föri sokun föför mi pwärätä pwe ra ekieksefäl.
ACT 26:21 Iei popun pwe ekewe chon Juta ra turufiei o sotuni ar repwe nieila.
ACT 26:22 Nge tori ikenai Kot a alisiei, iei mine üa ütä ikei o pwärätä mine a let ngeni aramas meinisin, seni ekewe mi kis tori ekewe mi lap. Iwe, mine üa eäni afalafal a wewefengen me mine ekewe soufos me Moses ra afalafala pwe epwe fis,
ACT 26:23 pwe ewe Kraist epwe fokun riaföü o epwe aemanün mi manausefäl seni mäla an epwe arongafeili ewe saramen manau ngeni ekewe chon Juta me ekewe chon lükün Israel.”
ACT 26:24 Iwe, lupwen Paulus a püsin peni i lon ei ititin kapas, Festus a kökkö fän leüömong, “Paulus, ka umwes! Om silelap a aumwesuk!”
ACT 26:25 Paulus a pölüeni, “En ämäfen Festus, ngang üsap umwes. Mine üa apasatä lon ai mirit a let.
ACT 26:26 King Akripa, en ka silei usun ekei mettoch meinisin, iei mine üa pwora le kapas ngonuk. Üa lükü pwe ka sileiöchü ekei mettoch meinisin, pun resap fis le monomon chök.
ACT 26:27 King Akripa, ka lükü kapasen ekewe soufos? Ngang üa silei pwe ka lükü!”
ACT 26:28 Mürin Akripa a üreni Paulus, “Ka ekieki pwe ka tongeni peseei lon ei fansoun mochomoch, pwe üpwe soulängila?”
ACT 26:29 Paulus a pölüeni, “Ese lifilifil ika fansoun mochomoch ika fansoun langatam, nge üa chök iotek ngeni Kot pwe en me ir meinisin mi rongorong ngeniei ikenai oupwe wewe ngeniei lon ai souläng, nge sap lon ai föfö!”
ACT 26:30 Mürin ewe king, ewe kepina me Pernike, pwal chokewe meinisin mi nom ra ütä o towu seni ewe leni.
ACT 26:31 Mürin ar towu ra kapasfengen lefiler, “Ei aramas esap föri och mine epwe tipisin mäla ren ika nom lon imwen fötek.”
ACT 26:32 Iwe, Akripa a üreni Festus, “Ei mwän a tongeni musala, nge pokiten a tüngor pwe an we kapwüng epwe amwet ngeni Sisar esap musala.”
ACT 27:1 Iwe, lupwen a pwüngüla pwe aipwe saila Itali, ra atolonga Paulus me ekoch chon fötek fän nemenien Julius, eman meilapen ewe mwichen sounfiun Rom itan “Än Sisar Mwichen Sounfiu”.
ACT 27:2 Äm aia tötä won efoch sip seni Atramitium mi molotä an epwe sai ngeni ekewe lenien ilen sip lon ewe fanü Asia. Iwe, aia saila, nge Aristarkus eman re Masetonia seni Tesalonika a etikem.
ACT 27:3 Iwe, sorotän ewe rän aia ileiti Siton. Julius a kirikiröch ngeni Paulus o mwüt ngeni an epwe feila o churi chiechian kewe pwe repwe ngeni mine a osupwang ren.
ACT 27:4 Aia saila seni ikenan, nge pokiten pöchökülen ewe asepwäl mi torikem, aia saila lepekin ewe fanü Saipros ewe ia a ekis lüa ie.
ACT 27:5 Iwe, aia saila pekilan ewe matauen Silisia me Pamfilia o tori Mira lon ewe fanü Lisia.
ACT 27:6 Ikenan ewe meilapen sounfiu a küna efoch sip seni Aleksantria epwe saila Itali, iei mine a atökeemitä won.
ACT 27:7 Iwe, äm aia mang le sai lon chomong rän, nge fän watten weires aia arap ngeni ewe telinimw Knitus. Pokiten ewe asepwäl a pöto me mwem, aisap tongeni sopwela äm sai, iei mine aia saila lepekin ewe fanü Kreta, ewe ia a ekis lüa ie awenewenen Salmone.
ACT 27:8 Aia saila arapakan ngeni ewe fanü, nge fän watten weires aia tori eu leni itan “Safe Harbors” arap ngeni ewe telinimw Lasea.
ACT 27:9 Iwe, aia nonom ikenan fansoun langatam tori a fokun weiresila pwe aipwe sopwela äm sai, pun a fen sängerela ewe Ränin Echikefel än ekewe chon Juta. Iei mine Paulus a ngeniir ekei kapasen öüröür,
ACT 27:10 “Ämi mwän kana, üa küna pwe ach ei sai seni ikei epwe afeiengau, sap chök ren talan waach ei sip me uttenan, nge epwe pwal wor mi mäla.”
ACT 27:11 Nge ewe meilapen sounfiu a lükü alon ewe pölü me alon ewe souwa, nge esap lükü alon Paulus.
ACT 27:12 Ewe lenien ilen sip esap öch ar repwe mamaram ikenan tori lesopolan lefen. Iei mine chomong me lein ekewe mwän ra tipeeu ngeni ar repwe sai seni ikenan o ra sotuni ika repwe tori Föniks pwe repwe mamaram ikenan. Föniks eu lenien ilen sip lon Kreta mi sape ngeni lotou-ör me lotou-äfeng.
ACT 27:13 Iwe, lupwen och kükün asepwäl seni ör a popuetä le enito, ekewe mwän ra ekieki pwe ra tongeni afisi mine ra akota. Iei mine ra efietä ewe angkö o seresila fokun kan ngeni chök ewe fanü Kreta.
ACT 27:14 Nge a müttir fis, pwe eu asepwäl mi fokun pöchökül itan “Ötiu-äfeng” a enito seni ewe fanü.
ACT 27:15 A weneiti ewe sip, nge pokiten ewe sip esap tongeni sai ngeni ewe mölümöl, aia chök likiti ngeni ewe mölümöl pwe aipwe maanula ren.
ACT 27:16 Iwe, aia ekis chuno lupwen aia saila örün ewe kükün fanü Kauta. Ikenan aia anükünükü timan ewe sip, nge fän weires chök.
ACT 27:17 Ra efietä ewe tima won ewe sip, mürin ra pweli ünükün ewe sip ngeni säl. Iwe, ra niuokus pwe repwe fanatä won petepeten arosetin Lipia, iei mine ra aürätiu ewe amara o mamaanula ren ewe asepwäl.
ACT 27:18 Iwe, ewe mölümöl a chök soposopola, iei mine sorotän ewe rän ra popuetä le aturätiu uttenen ewe wa leset,
ACT 27:19 nge pwal eu rän mürin ra aturätiu pisekin ewe sip.
ACT 27:20 Lon chomong rän aisap tongeni küna akkar ika fü kana, nge ewe mölümöl a chök pöchökül le enitikem. Iwe, esap chüen wor äm apilükülük pwe aipwe manau.
ACT 27:21 Iwe, fansoun langatam ekewe aramas resap mongö och, mürin Paulus a ütä me mwer o apasa, “Ämi mwän kana, epwe fen öch ika oupwe aüseling ngeniei pwe sisap sai seni Kreta. Pun ika itä oupwe aüseling ngeniei sisap tolong lon ei watten osukosuk me feiengau.
ACT 27:22 Nge iei üa tüngor ngenikemi, pwe oupwe apilükülüköch, pun esap wor eman me leich epwe mäla, nge ei chök sip epwe tala.
ACT 27:23 Pun lepwin ewe eman nöün Kot chon läng, ewe Kot üa nonom fän nemenian o üa angang ngeni, a feito rei
ACT 27:24 o üreniei, ‘Kosap niuokus Paulus! Kopwe fokun ütä me mwen ewe Sisar. Nge Kot, lon an kirikiröch epwe pwal amanaua chokewe meinisin mi etuk lon ei sai.’
ACT 27:25 Iei mine ämi mwän, oupwe apilükülüköch! Pun üa lükü Kot, pwe epwe fis usun mine a üreniei.
ACT 27:26 Nge sipwe fokun pasetä won wochen eu fanü.”
ACT 27:27 Iwe, a iei engol me rüanü pwin aia mamaanfeil lon ewe matau watte itan Mediteranean ren ewe mölümöl. Ina epwe lukenipwin ekewe säla ra mefi pwe aia arap ngeni fanü.
ACT 27:28 Iei mine ra esenätiu efoch säl mi wor ochou won, iwe, ra küna alololun ewe ie ükükün ipükü rüe fit. Ekis fansoun mürin ra pwal aüküsefäli o küna pwe a chök tiwe fit alololun.
ACT 27:29 Iwe, ra niuokus pwe ewe sip epwe fanatä won woch. Iei mine ra aturatiu fofoch angkö me mürin, iwe, ra iotek pwe epwe ränila.
ACT 27:30 Mürin ekewe säla ra sotuni ar repwe sü seni ewe sip. Ra aturätiu ewe tima lon ewe sät, nge ra tipin esenätiu ekoch angkö seni me mwen ewe sip.
ACT 27:31 Nge Paulus a üreni ewe meilapen sounfiu me ekewe sounfiu, “Are ekei säla resap nonom won ei wa, esap wor ämi apilükülüköch pwe oupwe manau.”
ACT 27:32 Iei mine ekewe sounfiu ra pökü ekewe säl mi riri ngeni ewe tima pwe a maanula.
ACT 27:33 Me mwen an epwe ränila, Paulus a tüngor ngeniir meinisin pwe repwe mongö och. A üra, “A ükükün engol me rüanü pwinich iei ach sia witiwiti lon, nge ei ükükün fansoun ousap fokun mongö och.
ACT 27:34 Üa tüngor ngenikemi pwe oupwe mongö. A lomot ngenikemi, pwe oupwe tongeni manau. Pun esap fokun mwo nge emet meten möküremi epwe turula.”
ACT 27:35 Iwe, wesin an apasatä ekei kapas, Paulus a angei ekis pilawa o iotekin kilisou ngeni Kot won mwer meinisin. A kinikisietiu o a popuetä le mongö.
ACT 27:36 Mürin ir meinisin ra popuetä eäni apilükülüköch o ra pwal püsin mongö.
ACT 27:37 Iwe, ükükün chochon wam we ruopükü fik me wonoman.
ACT 27:38 Mürin äm meinisin aia mötüla, ra aturätiu ekewe wiich meinisin le matau, pwe wam we a pwasetä.
ACT 27:39 Iwe, lupwen a ränila, ekewe säla resap tongeni asilla ewe fanü. Nge ra küna eu nomolong mi wor pian, iei mine ra ekiekietä pwe ika epwe tufich repwe afanatä ewe wa won.
ACT 27:40 Iei mine ra pöküela ekewe angkö, pwe ra kokotiu lon ewe matau. Lon ewe chök otun ra pwal apichi ewe säl mi riri ngeni ewe mwirimwir. Mürin ra üratä ekewe amara mi nom mwen ewe sip, pwe ewe asepwäl epwe pönala mwan o weneiti ewe pi.
ACT 27:41 Nge ewe sip a fanatä mesen woch o mwöchüla, pwe lesopun me mwan a mwöch pwe esap chüen tongeni mwökütüküt, nge lesopun me mürin a tatakis ren watten ekewe no.
ACT 27:42 Iwe, ekewe sounfiu ra akota ar repwe niela ekewe chon fötek meinisin, pwe esap wor eman me leir epwe tongeni äälong wilifanü o süla.
ACT 27:43 Nge ewe meilapen sounfiu a mochen amanaua Paulus, iei mine a aüküretiu pwe resap föri ei. Nge a chök allük ngeni ekewe mwän meinisin mi sile ää ar repwe akomwen atururetiu leset o äälong wilifanü.
ACT 27:44 Iwe, ekewe ekoch aramas resap sile ää repwe kamwöch ekewe pap ika irän ewe sip. Iei usun äm meinisin aia manau ngeni fanü.
ACT 28:1 Iwe, lupwen aia tiwelong wilifanü, aia silei pwe ewe fanü itan Malta.
ACT 28:2 Chon ei fanü ra fokun kirikiröch ngenikem. Ra aküetä eu ekkei o etiwakem meinisin, pun a püng üt o patekich.
ACT 28:3 Paulus a pwal ionifengeni amwüch. Nge lupwen a uwoutä won ewe ekkei, eman serepenit a towu me lon ekewe amwüch pokiten pwichikaren ewe ekkei, a küüw pöün o nikemeitiu won.
ACT 28:4 Iwe, lupwen chon ewe fanü ra küna ewe serepenit mi nikemeitiu won pöün Paulus, ra kapasfengen lefiler, “Ei mwän i eman chon niela aramas. Pun inamwo ika a fen manaueto seni le matau, nge ewe anün pwüng esap mwüt ngeni an epwe manau.”
ACT 28:5 Nge Paulus a wichikalong ewe serepenit lon ewe ekkei, nge esap feiengau ren.
ACT 28:6 Iwe, ekewe aramas ra witiwiti pwe pöün Paulus epwe pwootä ika epwe fen turula o mäla. Ra witiwit fansoun langatam, nge lupwen resap küna och feiengau a fis ngeni, ra siwili ar ekiek o apasa, “Ätei eman kot!”
ACT 28:7 A wor ekoch fanü ikenan mi arap ngeni ei leni, fanüen Puplius, i samolun ewe fanü. Ätei a etiwakem lon lenian o lon ükükün ülüngat rän a awasölakem pokiten an kirikiröch.
ACT 28:8 Iwe, semen Puplius a mwelilong leimw ren an pwichikar me feiseni. Paulus a tolong lon rumwan o mürin an iotek fän itan a iseis pöün won o apöchökülätä.
ACT 28:9 Lupwen a fis ei, ekewe lusun chon samau meinisin me won ewe fanü ra feito, nge Paulus a apöchöküleeretä.
ACT 28:10 Iwe, chon ewe fanü ra ngenikem chomong lifang, nge lupwen aipwele sai, ra uwätä won ewe sip met a lomot fän iten äm we sai.
ACT 28:11 Iwe, mürin äm nonom ikenan ülüngat maram, aia sü won efoch sip seni Aleksantria mi wor liosun ekewe “Kot Lipwe” won lesopun me mwan iter Kastor me Polluk. Ei sip a mamaram ikenan fansoun lefen.
ACT 28:12 Mürin äm aia tori ewe telinimw Sirakus o nonom ikenan lon ükükün ülüngat rän.
ACT 28:13 Seni ikenan aia sai o tori ewe telinimw Rekium. Sorotän ewe rän eu asepwäl a popuetä le enito seni ör o mürin ruu rän aia tori ewe telinimw Puteoli.
ACT 28:14 Ikenan aia churi ekoch chon lükü Jesus mi tüngor ngenikem pwe aipwe nonom rer lon ükükün eu wiik. Iei usun aia sai ngeni Rom.
ACT 28:15 Iwe, ekewe chon lükü Jesus mi nom lon Rom ra rong usum, ra feila tori ekewe kükün telinimw iter Appius Forum me Ülüngat Imwen Wasöla, pwe repwe sounikem. Iwe, lupwen Paulus a küneer, a kilisou ngeni Kot o letipan a fokun pöchökülela.
ACT 28:16 Iwe, lupwen äm tori Rom, ra mwüt ngeni Paulus pwe epwe tongeni aemanüla le nonom, nge eman sounfiu epwe nom ren o mamasa.
ACT 28:17 Mürin ülüngat rän, Paulus a körato ekewe souemwenin ekewe chon Juta mi chon lefanüla lon Rom pwe repwe mwichfengen. Iwe, lupwen ar chufengen, Paulus a üreniir, “Ämi pwii kana chon Israel! Inamwo ika ngang üsap föri och mi ü ngeni aramasach ika örüniach kewe sia angei seni ach kewe lewo, nge ra fötekiniei lon Jerusalem o atolongaei fän nemenien chon Rom.
ACT 28:18 Mürin än ekewe chon Rom atittinaei, ra mochen amusaei, pun üsap föri och föför üpwe tipisin mäla ren.
ACT 28:19 Nge lupwen ekewe chon Juta resap tipeeu ngeni, esap wor och mine üpwe tongeni föri. Üa chök tüngor pwe ai kapwüng epwe amwet ngeni Sisar, nge esap wor och ai kapasen tipi ngeni aramasei kewe.
ACT 28:20 Ina popun üa tüngor pwe üpwe churikemi o kapas ngenikemi. Pun ngang üa fötek pokiten än ekewe chon Israel apilükülük.”
ACT 28:21 Iwe, ekewe chon Juta ra üreni Paulus, “Äm aisap angei echö toropwe seni Jutea usumw, esap pwal wor eman me lein aramasach a feito seni ikenan fän och pworaus, ika fän och kapas mi ngau usumw.
ACT 28:22 Nge aia mochen rongorong mefiom, pun aia silei pwe ekis meinisin aramas ra kapasen ü ngeni ei mwich ka choni.”
ACT 28:23 Iei mine ra filätä eu rän pwe repwe churi Paulus lon. Iwe, chomong me leir ra feito lon ewe rän lon ewe leni ia Paulus a nonom ie. Seni lesosor tori lepwin a afalafaleer o awewe ngeniir usun ewe Mwün Kot. A sotuni le pese ngeniir usun ar repwe lükü Jesus ren an pwärätä ngeniir ekewe kapas seni än Moses kewe allük me seni mine ekewe soufos ra makkeetiu.
ACT 28:24 Iwe, ekoch me leir ra lükü, pwe mine a apasa a let, nge ekoch resap lükü.
ACT 28:25 Iei mine ra feila lon ar tipefesen lefiler mürin än Paulus apasatä ei eu mettoch: “A pwüng mine ewe Ngünmifel a kapas ren ewe soufos Aisea ngeni ach kewe lewo!
ACT 28:26 Pun a apasa, ‘Kopwe feila o aronga ngeni ekei aramas: Oupwe aü selingemi o rongorong, nge ousap wewe ren. Oupwe nenengeni, nge ousap küna och.
ACT 28:27 Pun letipen ekei aramas a pöchökül. Ra ükütiu le rongorong o ra amöürü meser. Pun are resap föri iei usun, repwe tongeni küna ren meser o rongorong ren selinger, nge letiper repwe wewela, repwe pwal kul ngeniei, pwe üpwe apöchöküleer. Iei alon Kot.’
ACT 28:28 Iei mine ngang üa mochen pwe ämi oupwe silei, pwe än Kot kapasen manau a tori ekewe chon lükün Israel o ir repwe aüselinga.”
ACT 28:29 [Mürin än Paulus apasa ei, ekewe chon Juta ra feila, nge ra fokun aninifengen lefiler.]
ACT 28:30 Iwe, lon ükükün ruu ier Paulus a nonom lon eu leni i a püsin möni o etiwa aramas meinisin mi feito ren, pwe repwe churi.
ACT 28:31 A afalafal usun Mwün Kot o aiti ngeniir usun ach Samol Jesus Kraist. A pwora le kapas, nge esap wor eman a pinei.
ROM 1:1 Ngang Paulus, eman chon angangen Kraist Jesus, üa kö pwe üpwe eman soukünö mi imwüla fän iten ai üpwe arongafeili än Kot we Pworausen Manau.
ROM 1:2 Ei Pworausen Manau Kot a fen pwon me lomlom ren nöün kewe soufos usun a fen mak lon ekewe Toropwe mi Pin.
ROM 1:3 A kapas usun Nöün we, ach Samol Jesus Kraist: Lon an wiliti aramas, a uputiu lon tettelin eman mwirimwirin Tafit.
ROM 1:4 Nge lon pekin ngünün mi fel a pwä fän manaman mi lapalap pwe i Nöün Kot, ren an manausefäl seni mäla, i Jesus Kraist ach Samol.
ROM 1:5 Ren Jesus Kraist, Kot a ngeniei ewe ümöümöch, pwe üpwe wiseni ewe wisen soukünö fän itan, pwe üpwe emweni aramasen ekewe mwü meinisin pwe repwe lükü i o aleasochis ngeni.
ROM 1:6 Pwal ämi mi nonom lon Rom, oua pachelong lein chokewe Kot a köriir pwe oupwe nöün Jesus Kraist.
ROM 1:7 Iei mine üa mak ngenikemi meinisin mi nom lon Rom, ämi chokewe Kot a echenikemi o körikemi pwe oupwe chon pin: Kot Samach me ach Samol Jesus Kraist epwe ngenikemi ümöümöch me kinamwe.
ROM 1:8 Ngang üpwe akomwen kilisou ngeni ai Kot ren Jesus Kraist fänäsengesimi meinisin, pun aramasen unusen fanüfan ra rongorong usun ämi lükülük.
ROM 1:9 Kot, ewe eman üa angang ngeni ren unusen letipei ren ai afalafala ewe Pworausen Manau usun Nöün we, i nei chon pwärätä pwe üa fokun chechemenikemi
ROM 1:10 lon ai iotek fansoun meinisin. Üa tüngor ngeni Kot, pwe are fän letipan, epwe mwüt ngeniei pwe üpwe feila remi lon ei fansoun.
ROM 1:11 Pun üa fokun mochen churikemi pwe üpwe ngenikemi och feiöchün ngün pwe oupwe pöchökülela,
ROM 1:12 wewen, pwe ämi me ngang sipwe apöchökülafengenikich ren ach lükülük.
ROM 1:13 Ämi pwii kana, oupwe fokun chechemeni pwe fän chomong üa akota ai üpwe churikemi, nge a chök wor sokun epet a pineei fansoun meinisin ai üpwe feila remi. Ngang üa mochen asoulängala ekoch leimi, usun üa pwal föri me lein ekewe ekoch chon lükün Israel.
ROM 1:14 Pun mi wor wisei ngeni aramas meinisin, ngeni ekewe mi mirit me ekewe resap mirit, ngeni ekewe mi tipachem pwal ekewe mi tiparoch.
ROM 1:15 Iei mine üa fokun mochen afalafala ewe Pworausen Manau ngenikemi mi nonom lon Rom.
ROM 1:16 Üsap säwäsini ewe Pworausen Manau, pun iei ewe manamanen Kot mi tongeni amanaua chokewe meinisin mi lükü, a akom ngeni ekewe chon Juta, nge mürin pwal ngeni ekewe chon lükün Israel.
ROM 1:17 Pun ewe Pworausen Manau a pwärätä usun än Kot akot fän iten än aramas repwe küna pwüng me mwan. Ei a fis ren lükülük seni lepoputän tori lesopolan. Usun ewe toropwe mi pin a apasa, “Ewe aramas mi küna pwüng mwen mesen Kot epwe manau ren an lükülük.”
ROM 1:18 Än Kot song a pwä seni läng won tipis meinisin me föföringauen aramas, ra pinei ewe let ren ar föför esepwüng, pwe aramas resap silei.
ROM 1:19 Pun mine aramas ra tongeni silei usun Kot a fat ngeniir. Püsin Kot a fen afata ngeniir.
ROM 1:20 Esap wor eman aramas a tongeni küna Kot. Nge aramas ra tongeni silei usun Kot ren ekewe mettoch i a föri. Pun seni ewe fansoun Kot a föri fanüfan ra fokun tongeni weweiti pwe an manaman a nom tori feilfeilachök, pwe i wesewesen Kot. Iei mine esap wor än aramas künetipingen.
ROM 1:21 Ikamwo ra silei usun Kot, nge resap asamolu i usun Kot, resap pwal kilisou ngeni. Ar ekiek esap fokun wor lomotan, nge letiper mi wewemang a uren rochopwak.
ROM 1:22 Ra apasa pwe ra tipachem, nge ra tiparoch.
ROM 1:23 Akasiwilin ar fel ngeni ewe Kot mi manau feilfeilachök ra fel ngeni uluulun anümwäl mi för lon liosun aramas mi mä, ika liosun mansüsü, manfetal me mantötö.
ROM 1:24 Iei mine Kot a asechala ekei aramas pwe repwe föri föför mi limengau ren mochenian letiper. Ra föri mettoch mi asäw lefiler eman ngeni eman.
ROM 1:25 Ra akasiwili mine a let usun Kot ngeni mine a chofona. Ra fel ngeni mine Kot a föri o angang ngeni, nge resap fel ngeni Kot ewe Chon Föri mettoch meinisin, i ewe sipwe mwareiti tori feilfeilachök! Amen.
ROM 1:26 Pokiten ar föri iei usun, Kot a asechiirelong lon sokun mocheniangau mi fokun asäw. Ekewe mwo fefin, nge ra sorei pwükütän ekewe föför mi öch ngeni inisiir ngeni sokun föför esap öch ngeniir.
ROM 1:27 Pwal ina chök usun ren ekewe mwän, ra likitala föför mi öch lefilen mwän me fefin o ra opucherela ren sokun mocheniangau fengen lefiler. Mwän ra föri sokun föför mi fokun asäw lefiler eman ngeni eman, nge lesopolan ra püsin aworato liwiningau wor ren ar föför mi ngau.
ROM 1:28 Pokiten ekei aramas resap fokun mochen amwöchü lon letiper mine ra silei usun Kot, i a asechiirela lon ngauen letiper, pwe ra föri sokun föför esap pwüng.
ROM 1:29 Ra ur ren sokopaten föför mi ngau, föför esepwüng, tipemong, kirikiringau. Ra uren lolowo, niela aramas, fiu, likatuputup, ekingau. Ra ngününgün,
ROM 1:30 ra kapasingau usun pwal eman, ra oput Kot, ra turunufas, ra lamalamtekia o sikesik. Ra chök ekieki sokun föför mi ngau. Ra lükümach ngeni semer me iner.
ROM 1:31 Esap wor mengiringirin letiper, resap apwönüetä ar pwon, resap eäni kirikiröch ngeni aramas ika eäni tong ngeniir.
ROM 1:32 Ra silei pwe Kot a apwüngala, pwe ekewe aramas mi föri ekei sokun föför repwe mäla. Iwe, resap chök sopwela le föri ekei sokun föför, nge ra pwal tipeeu ngeni ekewe aramas ra föri iei usun.
ROM 2:1 En pwii, ifa usun, ka apwüngü pwal ekoch? Esap fokun wor om künetipingen, ese lifilifil ika en iö. Pun lupwen ka apwüngü ekewe ekoch, nge mürin ka föri ekewe sokun föför usun chök ir, ka püsin atipisuk.
ROM 2:2 Nge kich sia silei pwe Kot a wenechar lupwen a apwüngü ekewe aramas mi föri ekei sokun föför.
ROM 2:3 Nge en pwii, ka püsin föri ekei sokun föför ka apwüngü ekoch won! Ifa usun, ka ekieki pwe ka tongeni sü seni än Kot apwüng?
ROM 2:4 Eli ka turunufasei an kirikiröch mi fokun lapalap, an songomang me tongotam! Kosap mefi pwe än Kot kirikiröch a mochen emwenuk ngeni ekieksefäl?
ROM 2:5 Nge lelukom a tipepöchökül o ülöförea. Iei mine ka püsin alapala om liwiningau lon ewe rän lupwen Kot epwe pwärala an song me an apwüngüwen.
ROM 2:6 Pun Kot epwe liwini ngeni aramas meinisin liwinin ar föför.
ROM 2:7 Ekoch aramas ra likitü lon ar föför mürina, ra kütta ling me iteüöch me ewe manau esap müchüla. Iwe, Kot epwe ngeniir manau esemüch.
ROM 2:8 Nge pwal ekoch ra chök kütta püsin feiöchür, ra oput mine a let o ra föri mine ese pwüng. Iwe, Kot epwe tinatiu an song me lingeringer wor.
ROM 2:9 Epwe wor osukosuk me riaföü epwe tori aramas meinisin mi föri mine a ngau, akomwan epwe tori ekewe chon Juta, nge mürin epwe pwal tori ekewe chon lükün Israel.
ROM 2:10 Nge Kot epwe ngeni chokewe mi föri mine a mürina ling me iteüöch me kinamwe, akomwan ngeni ekewe chon Juta, nge mürin ngeni ekewe chon lükün Israel.
ROM 2:11 Pun Kot esap lifilifil aramas lon an apwüngüür.
ROM 2:12 Iwe, ekewe chon lükün Israel esap wor rer än Moses kewe Allük, ra tipis o pöütmwälila, inamwo ika esap wor rer ekewe Allük. Ekewe chon Juta a wor rer ekewe Allük. Ra tipis o küna apwüng ren mine a mak lon ekewe Allük.
ROM 2:13 Pun ekewe aramas resap küna pwüng mwen mesen Kot ren ar rongorong ngeni ekewe Allük, nge ren ar apwönüetä pwüngün ekewe Allük.
ROM 2:14 Ekewe chon lükün Israel esap wor rer ekewe Allük. Nge iteiten fansoun ra föri pwüngün ekewe Allük ren mefien letiper, ra pwärätä pwe ra silei met repwe föri ika resap föri, inamwo ika esap wor rer ekewe Allük.
ROM 2:15 Ar föför a pwärätä pwe pwüngün ekewe Allük a mak lon letiper. Mwelien letiper a pwal pwärätä pwe ei a let, pun fän ekoch ar ekiek a atipisiir, nge pwal fän ekoch a peniir.
ROM 2:16 Ren pwüngün ewe Pworausen Manau üa afalafala epwe iei usun mine epwe fis lon ewe Rän lupwen Kot epwe apwüngü ekewe ekiekin aramas mi monomon ren Jesus Kraist.
ROM 2:17 Nge ifa usun en? Ka püsin aita ngonuk eman chon Juta. Ka lükülükü ekewe Allük o sikäsini usun om chiechi ngeni Kot.
ROM 2:18 Ka silei mine Kot a mochen pwe kopwe föri, ka pwal kaiö seni ekewe Allük pwe kopwe filätä met a pwüng.
ROM 2:19 Ka lükü pwe en eman chon emwen fän iten ekewe mi mesechun, pwal eu saram fän iten chokewe mi nom lon rochopwak,
ROM 2:20 pwal eman chon öüröür fän iten ekewe mi tiparoch me eman sense fän iten chokewe resap mirit. Ka lükü, pwe pokiten a wor reöm ekewe Allük ka silei unusen mettoch meinisin o mine ka apasa a fokun let.
ROM 2:21 En ka aiti ngeni aramas ekewe Allük, pwota kosap püsin aiti ngonuk? Ka afalafala aramas pwe resap solä, nge ifa usumw, kosap püsin solä?
ROM 2:22 Ka apasa ngeni aramas pwe resap lisowu, nge ifa usumw, kosap lisowu? En ka fokun oput ekewe uluulun anümwäl, nge ifa usumw, kosap soläni mettoch seni lon ar kewe imwenfel?
ROM 2:23 Ka sikäsini usun än Kot kewe Allük mi nom reöm, nge ifa usumw, kosap atoto säw won Kot ren om purätiu an kewe allük?
ROM 2:24 Ekewe Toropwe mi Pin ra apasa, “Pokiten ämi chon Juta, ekewe chon lükün Israel ra aitengaua iten Kot.”
ROM 2:25 Are ka aleasochisi ekewe Allük, om sirkomsais a lomot, nge are ka aleasolap ngeni ekewe Allük a usun chök pwe kosap fokun sirkomsais.
ROM 2:26 Are eman chon lükün Israel esap sirkomsais a aleasochisi pwüngün ekewe Allük, ifa usun, Kot esap alealong i lon tettelin ekewe mi sirkomsais?
ROM 2:27 Iei usun ekewe chon lükün Israel repwe atipisikemi ämi chon Juta, pun ämi oua purätiu ekewe Allük, inamwo ika a makketiu fän itemi o ämi oua sirkomsais. Nge ir ra aleasochisi ekewe Allük, inamwo ika resap sirkomsais ren inisiir.
ROM 2:28 Iwe, iö wesewesen eman re Juta mi enletin sirkomsais? Sap eman re Juta mi chök sirkomsais ren inisin me lükün.
ROM 2:29 Esap ina! Nge eman mi enletin re Juta i eman re Juta lon letipan, wewen a sirkomsais lon letipan. Iei angangen ewe Ngünün Kot, sap angangen ekewe Allük mi makketiu. Ei sokun aramas epwe angei iteüöchün seni Kot, sap seni aramas.
ROM 3:1 Ifa usun, ekewe chon Juta ra feiöch lap seni ekewe chon lükün Israel? Ika a wor lomoten ar sirkomsais?
ROM 3:2 Ewer, a chomong ar feiöch lon chomong sokun pekin! Aeuin, Kot a lükü ngeniir an Kapas.
ROM 3:3 Nge ifa usun, are ekoch me leir resap allükülük? Iwe, wewen pwe Kot esap pwal allükülük?
ROM 3:4 Apwi, esap fokun ina usun! Kot epwe fokun let, inamwo ika aramas meinisin ra chon chofona. Usun ewe Toropwe mi Pin a apasa, “Epwe fokun pwäla pwe en mi pwüng lupwen ka kapas. Kopwe fokun win lon kapwüng lupwen ra apwünguk.”
ROM 3:5 Nge ifa usun, are ach föför esepwüng a pwärätä än Kot föför mi pwüng? Met sipwe tongeni apasa? Sipwe tongeni apasa pwe Kot a mwäl lupwen a liwini ngenikich liwinin ach föföringau? (Üa chök apasatä ekei kapas lon ekiekin aramas.)
ROM 3:6 Apwi, esap fokun ina usun! Are Kot esap pwüng, ifa usun an epwe tongeni apwüngü chon fanüfan?
ROM 3:7 Nge ifa usun, are ai likatuputup epwe afatöchü än Kot let o awattela an ling, pwota chök üpwe chüen kapwüng usun eman chon tipis?
ROM 3:8 Pwota chök ekoch aramas ra apasa, “Ousipwe föri mine a ngau, pwe epwe fisitä mine a mürina”? Ewer, ekoch aramas ra fen kapasingau usi ren ar atipisiei, pwe üa apasa ei sokun fos. Ir repwe küna kapwüng usun a fich ngeniir.
ROM 3:9 Iwe, ifa usun kich chon Juta, sia mürina seni ekewe chon lükün Israel? Apwi! Esap fokun ina! Üa fen pwärätä pwe chon Juta me chon lükün Israel ra wewefengen, ir meinisin ra nonom fän nemenien tipis.
ROM 3:10 Usun ekewe Toropwe mi Pin ra apasa: “Esap fokun wor eman chon pwüng.
ROM 3:11 Esap wor eman mi mirit, esap wor eman mi kütta Kot.
ROM 3:12 Ir meinisin ra kul seni Kot, ir meinisin ra tokola. Esap fokun wor eman a föri mine a pwüng, esap fokun wor eman.
ROM 3:13 Ar kewe kapas ra uren atuputup mi afeiengau. Kapas chofona a towu seni chönawer, pwal kapasen eniweniw mi usun chök poisonun serepenit ra towu seni tinawer.
ROM 3:14 Ar kapas a ur ren ottek.
ROM 3:15 Ra müttir ngeni ar afeiengaua o niela aramas.
ROM 3:16 Ra afisätä tatakis me feiengau ekis meinisin ia ra feila ie.
ROM 3:17 Resap silei met repwe föri, pwe repwe eäni kinamwe ngeni aramas,
ROM 3:18 resap pwal silei ar repwe niuokusiti Kot.”
ROM 3:19 Iei sia silei pwe meinisin mine a mak lon ekewe Allük a fän iten chokewe mi nom fän ekewe Allük pwe epwe aükätiu än aramas meinisin künetipingen o atolonga unusen fanüfan fän än Kot kapwüng.
ROM 3:20 Pun esap wor eman aramas epwe küna pwüng ren an apwönüetä pwüngün ekewe Allük. Nge mine ekewe Allük ra föri, ra aiti ngeni aramas pwe ra tipis.
ROM 3:21 Nge iei a pwäla mine Kot a föri pwe aramas repwe küna pwüng me ren. Ei esap fis ren ekewe allük, inamwo ika än Moses kewe Allük me än ekewe soufos kapas ra pwäräta usun.
ROM 3:22 Kot a föri pwe aramas ra küna pwüng ren ar lükü Jesus Kraist. Kot a föri ei ngeni chokewe meinisin mi lükü Kraist, pun esap wor sokofesenin lefiler meinisin:
ROM 3:23 Pun aramas meinisin ra tipis, ra pwal osun lingen Kot.
ROM 3:24 Nge ren än Kot we lifangen ümöümöch esap kamö, aramas meinisin ra küna pwüng ren Kraist, ewe mi angaseerela.
ROM 3:25 Kot a fangala Kraist, pwe ren an mäla a fis amusamusen än aramas tipis ren chaan pokiten ar lükü i. Kot a föri ei an epwe pwärätä pwe i a pwüng, pun lon an mosonotam esap apwüngü än ekewe aramas tipis ra föri me mwan.
ROM 3:26 Nge ikenai Kot a föri och fän iten än aramas tipis, pwe epwe pwärala an pwüng. Ren ei Kot a pwäräta pwe püsin i a pwüng, a pwal föri pwe ir mi lükü Jesus repwe küna pwüng.
ROM 3:27 Iwe, met sia tongeni aingaing won? Esor! Met popun pwe a iei usun? Pokiten sia aleasochisi ekewe Allük? Apwi, nge sia lükü.
ROM 3:28 Pun sia silei pwe eman a küna pwüng me ren Kot ren an chök lükü, sap ren an apwönüetä pwüngün ekewe Allük.
ROM 3:29 Are ifa usun, Kot än chök ekewe chon Juta Kot? Esap pwal i än ekewe chon lükün Israel Kot? Ewer, pwal i ar Kot.
ROM 3:30 Kot eman chök, i epwe föri pwe ekewe chon Juta repwe küna pwüng pokiten ar lükülük, i epwe pwal föri pwe ekewe chon lükün Israel repwe küna pwüng ren ar lükülük.
ROM 3:31 Ifa usun, wewen pwe ren ei lükülük sipwele pöütala ekewe Allük? Apwi, esap fokun ina, nge sia fen anüküchara ekewe Allük.
ROM 4:1 Iwe, met sipwe apasa usun Apraham, än äm chon Juta we lewo? Met a fis ngeni?
ROM 4:2 Are i a küna pwüng me ren Kot ren ekewe föför a föri, epwe wor met epwe tongeni aingaing won. Nge esap tongeni aingaing mwen mesen Kot.
ROM 4:3 Ekewe Toropwe mi Pin ra apasa, “Apraham a lükü Kot, nge pokiten an lükülük a küna pwüng me ren Kot.”
ROM 4:4 Eman aramas mi angang a angei liwinin an angang. Ewe aramas esap ekieki ngeni pwe eu lifang, nge liwinin an angang.
ROM 4:5 Nge eman aramas mi longolong won an lükülük, nge esap wor an föför, i a lükü Kot ewe mi tongeni pwärätä pwe eman chon tipis a pwüng. Kot a föri iei usun ngeni, pwe a küna pwüng me ren pokiten an lükülük.
ROM 4:6 Iei usun wewen met Tafit a apasa usun feiöchün ewe aramas mi küna pwüng me ren Kot, nge esap longolong won met ewe aramas a föri:
ROM 4:7 “Feiöchün ätekewe ar pupungau a musala, nge ar tipis a mola.
ROM 4:8 Feiöchün ewe aramas, ewe Samol esap chechemeni an tipis!”
ROM 4:9 Ifa usun, ei feiöch Tafit a kapas usun a chök fän iten chokewe mi sirkomsais? Apwi! A pwal fän iten chokewe resap sirkomsais. Pun sia fen apasa mine a mak lon ekewe Toropwe mi Pin: “Apraham a lükü Kot, nge pokiten an lükülük a küna pwüng me ren Kot.”
ROM 4:10 Inet a fis ei? A fis mwen än Apraham sirkomsais ika me mürin? A fis me mwan, nge sap mürin.
ROM 4:11 An sirkomsais a fis me mürin. Nge an sirkomsais eu asisil mi pwärätä pwe pokiten an lükülük a küna pwüng me ren Kot me mwen an esamwo sirkomsais. Iei usun Apraham a semelapen chokewe meinisin mi lükü Kot o küna pwüng me ren, inamwo ika resap sirkomsais.
ROM 4:12 I pwal semelapen chokewe ra sirkomsais, nge sap pokiten ar sirkomsais, nge pokiten ra manaueni ewe chök manauen lükülük semelapach Apraham a eäni me mwen an sirkomsais.
ROM 4:13 Lupwen Kot a pwon ngeni Apraham me mwirimwirin kana pwe repwe fanüeni fanüfan, a föri ei sap pokiten än Apraham aleasochisi ekewe Allük, nge pokiten an küna pwüng me ren Kot ren an lükülük.
ROM 4:14 Pun are än Kot pwon a fän iten chök chokewe mi aleasochisi ekewe Allük, mürin än aramas lükülük esap wor aüchean, nge än Kot pwon esap wor lomotan.
ROM 4:15 Pun ekewe allük ra atoto än Kot song, nge ia esap wor allük ie, esap pwal wor aleasolap ngeni allük.
ROM 4:16 Iei usun ewe pwon a longolong won lükülük, pwe epwe allükülükü än Kot we ümöümöch epwe tori ekewe mwirimwirin Apraham meinisin, esap chök tori chokewe mi aleasochisi ekewe Allük, nge epwe pwal tori chokewe mi lükü usun Apraham. Pun Apraham semelapach meinisin lon pekin ngün,
ROM 4:17 pun a mak lon ekewe Toropwe mi Pin, “Üa föri pwe kopwe semelapen aramasen chomong mwü.” Iwe, ei pwon a mürina mwen mesen Kot, i ewe Apraham a lükü, ewe Kot mi amanaua ekewe mi mäla, i ewe a pwal allük pwe mine esap wor epwe wor.
ROM 4:18 Iwe, Apraham a lükü Kot o apilükülük ngeni, inamwo ika esap wor popun an epwe apilükülük. Iei mine a wiliti “semelapen aramasen chomong mwü.” Usun chök ekewe Toropwe mi Pin ra apasa, “Mwirimwirum kana repwe chomong usun chök chomongun ekewe fü.”
ROM 4:19 Apraham a arapakan ipükü ier, nge an lükülük esap apwangapwangala lupwen a ekieki usun inisin pwe a arap ngeni mäla, nge pwal Sara pwülüan we esap chüen tongeni nöünöü.
ROM 4:20 Iwe, Apraham a sopwela lon an lükülük, nge esap tipemwaramwar ngeni än Kot pwon. An lükülük a pöchökülela o a mwareiti Kot.
ROM 4:21 A fokun lükü pwe Kot a tongeni apwönüetä mine a eäni pwon.
ROM 4:22 Ina popun Apraham a küna pwüng me ren Kot ren an lükülük.
ROM 4:23 Ekei kapas “a küna pwüng” resap makketiu fän iten Apraham chök.
ROM 4:24 Ra pwal makketiu fän itach mi küna pwüng, kich mi lükü Kot ewe mi amanauasefäli Jesus ach Samol seni mäla.
ROM 4:25 Jesus a mäla pokiten ach tipis, nge a manausefälitä seni mäla pwe sipwe küna pwüng me ren Kot.
ROM 5:1 Iwe, pokiten sia küna pwüng me ren Kot ren ach lükülük, sia kinamwefengen me Kot ren ach Samol Jesus Kraist.
ROM 5:2 Ren ach lükülük, Kraist a emwenikichelong lon än Kot ümöümöch, iei sia manau lon. Iei mine sia pwapwaäsini ach apilükülüköch ngeni ewe ling Kot epwe ngenikich.
ROM 5:3 Nge sap iei chök, sia pwal pwapwaäsini ach kewe riaföü, pun sia silei pwe riaföü a afisätä ach tipeppos,
ROM 5:4 nge ach tipeppos a atoto manauöch mwen mesen Kot, nge ach manauöch a afisätä apilükülüköch.
ROM 5:5 Ei apilükülüköch esap alichipwüngükich, pun Kot a iselong lon letipach an we chen ren ewe Ngünmifel, ewe i a lifang ngenikich.
ROM 5:6 Pun lupwen sia chüen nom lon ach apwangapwang, lon ena fansoun Kraist a fen mäla fän iten chon föföringau.
ROM 5:7 A men weires än eman epwe mäla fänäsengesin eman aramas mi pwüng. Eli epwe wor eman epwe tongeni mäla fänäsengesin eman aramas mi aramasöch.
ROM 5:8 Nge Kot a pwäri ngenikich ükükün an echenikich, pwe lupwen sia chüen nonom lon tipis, Kraist a mäla fänäsengesich.
ROM 5:9 Iwe, ren chaan sia küna pwüng me ren Kot. Nge epwe le fen ifan me watten an amanauakich seni än Kot song!
ROM 5:10 Me lom kich chon oputa Kot, nge sia chäfengen me Kot ren mälan Nöün we. Iwe, iei sia chäfengen me Kot, nge epwe le fen ifan me watten än Kraist amanauakich pokiten a manausefäl!
ROM 5:11 Nge sap iei chök, pwe sia pwal pwapwa lon Kot pokiten ach Samol Jesus Kraist a achäfengenikich me Kot.
ROM 5:12 Iwe, ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.
ROM 5:13 A wor tipis lon fanüfan mwen än ekewe Allük resamwo fen wor. Nge ia esap wor allük ie, esap tongeni fis angangen atipisi eman ren allük.
ROM 5:14 Nge seni ewe fansoun Atam tori fansoun Moses, mäla a nemeni aramas meinisin, pwal mwo nge chokewe resap tipis usun Atam lupwen a aleasolap ngeni än Kot we allük. Atam a aliosunätä ewe eman epwe war me mürin.
ROM 5:15 Nge ekewe ruoman ra sokofesen, pun än Kot lifang a sokola seni än Atam tipis. A pwüng pwe chomong aramas ra mäla pokiten tipisin ewe eman aramas. Nge än Kot ümöümöch a fokun watte seni, pwal an we lifang ese kamö a tori chomong aramas ren ümöümöchün ewe eman aramas Jesus Kraist.
ROM 5:16 Iwe, a wor sokofesenin lefilen än Kot we lifang me tipisin ewe eman aramas. Mürin än ewe eman föri ewe eu tipis, Kot a apwüngala pwe “a tipis”. Nge mürin chomong ra tipis, Kot a pwärätä an ümöümöch ngeniir ren an apasa, “Ämi ousap tipis.”
ROM 5:17 A pwüng pwe ren tipisin ewe eman mwän mäla a popuetä le nemenem, pokiten ewe chök eman mwän. Nge epwe ifan me watten ewe feiöch mi fis ren ewe chök eman mwän Jesus Kraist! Iwe, chokewe meinisin mi etiwa än Kot ümöümöch mi somwola me an we lifangen pwüng repwe nemenem lon manauer ren Kraist.
ROM 5:18 Iei mine pokiten ewe eu chök tipis aramas meinisin ra nom fän liwiningauen tipis, ina chök usun ewe eu föförün pwüng a angasala aramas meinisin, a pwal amanaueer.
ROM 5:19 Pun usun aramas meinisin ra tipis pokiten än ewe eman mwän aleasolap, ina chök usun chomong aramas repwe pwal küna pwüng me ren Kot pokiten än ewe eman mwän aleasochis.
ROM 5:20 Allük ra fisitä pwe ekewe föför mi mwäl repwe lapala. Nge ia tipis a lapala ie, än Kot ümöümöch a fokun lapalapala seni.
ROM 5:21 Iwe, usun tipis a nemenem, pun aramas meinisin ra mäla, iei usun än Kot ümöümöch a nemenem, pun aramas ra küna pwüng me ren o i a emwenikich ngeni manau esemüch ren Jesus Kraist ach Samol.
ROM 6:1 Iwe, met sipwe üra? Sipwe sopwela le föföri tipis, pwe än Kot ümöümöch epwe lapalapala?
ROM 6:2 Apwi, esap fokun ina! Kich sa mäla ngeni tipis, ifa usun ach sipwe tongeni sopwela le föföri tipis?
ROM 6:3 Ika ousap silei pwe kich meinisin mi fen papatais lon Kraist Jesus, sia papatais lon an we mäla?
ROM 6:4 Iwe, ren ach papatais sia peiasepök me i o eti i lon an mäla, pwe usun chök Kraist a manausefäl seni mäla ren amwararen manamanen ewe Sam, ina usun pwal kich sipwe manaueni eu manau mi fö.
ROM 6:5 Pun are sia eti Kraist lon an we mäla, sipwe pwal fokun eti i lon an we manausefäl.
ROM 6:6 Iwe, sia silei pwe ewe aramas mi mes a eti Kraist le mäla won an we iräpenges, pwe pöchökülen mochenian ach föri tipis epwe wesila, pun sisap chüen nonom fän nemenien tipis.
ROM 6:7 Pun lupwen eman aramas a mäla, a ngasala seni fän nemenien tipis.
ROM 6:8 Are sia eti Kraist le mäla, sia lükü pwe sipwe pwal eti i le manau.
ROM 6:9 Pun sia silei pwe Kraist a manausefäl seni mäla, o esap chüen tongeni mälasefäl. Iwe, mäla esap chüen nemeni i.
ROM 6:10 Iwe, pokiten a mäli ei sokun mäla, esap chüen wor nemenemen tipis won. Nge mine a manaueni a manaueni fänäsengesin Kot.
ROM 6:11 Iei usun pwal ämi oupwe chechemeni pwe ämi oua fen mäla ngeni tipis, nge iei oua manau lon ämi chiechifengen me Kot lon Kraist Jesus.
ROM 6:12 Tipis esap fokun chüen nemeni inisimi inisin mäla, pun ousap chüen aleasochisi ekewe mochenian fitukemi.
ROM 6:13 Ousap pwal fokun fangatä och kifetin inisimi ngeni tipis fänäsengesin föför mi ngau, nge oupwe fangala inisimi ngeni Kot usun chokewe mi towu seni mäla o tolong lon manau. Oupwe fokun fangatä unusen inisimi ngeni Kot fänäsengesin föför mi pwüng.
ROM 6:14 Ousap chüen nonom fän nemenien tipis, pun ousap chüen nonom fän nemenien allük, nge oua nonom fän nemenien ümöümöchün Kot.
ROM 6:15 Iwe, nge met chök sipwe apasa? Sipwe föri tipis pokiten sisap chüen nonom fän nemenien allük, nge sia nonom fän nemenien ümöümöchün Kot? Apwi, esap fokun ina!
ROM 6:16 Oua püsin silei, pwe lupwen oua fangatä inisimi ngeni eman pwe epwe nöünikemi chon angang o aleasochis ngeni, oua chon angang ngeni ätewe oua aleasochisi. Ika oupwe aleasochis ngeni tipis, sopolan oupwe mäla, ika oupwe aleasochis ngeni Kot, sopolan oupwe küna pwüng mwen mesan.
ROM 6:17 Nge kilisou ngeni Kot, pwe inamwo ika oua chon angang ngeni tipis me lom, nge iei ren unusen letipemi oua aleasochis ngeni mine a let seni lon ewe afalafal oua rongorong.
ROM 6:18 Oua ngas seni tipis o oua wiliti chon angang ngeni pwüng.
ROM 6:19 Üa aea kapasen awewe seni nonomun manauen aramas pokiten apwangapwangen fitukemi. Me lom oua fangatä unusen inisimi pwe oupwe chon angang ngeni föför mi limengau me föför mi ngau fänäsengesin mine a ngau. Ina usun oupwe fokun fangatä unusen inisimi pwe oupwe chon angang ngeni pwüng fänäsengesin mine a pin.
ROM 6:20 Lupwen oua chon angang ngeni tipis, ousap nonom fän nemenien pwüng.
ROM 6:21 Met sokun feiöch oua angei seni ekei föför oua föriir me lom? Iei oua säw ren, pun sopolor mäla.
ROM 6:22 Nge iei oua ngas seni fän nemenien tipis o oua chon angang ngeni Kot. Feiöchümi pwe oua angei eu manau mi pin, nge sopolan ewe manau esemüch.
ROM 6:23 Pun liwinin tipis mäla, nge än Kot lifang manau esemüch lon Kraist Jesus ach Samol.
ROM 7:1 Pwii kana, oupwe fokun weweiti mine üa mochen kapas ngenikemi usun, pun ämi meinisin oua silei usun allük. Ewe allük a chök nemenem won eman aramas lupwen a chüen manau.
ROM 7:2 Eu chök awewe: Eman fefin mi pwüpwülü a riri ngeni pwülüan lon ükükün ränin manauan ren ewe allükün pwüpwülü. Nge lupwen ewe mwän a mäla, ei fefin esap chüen nonom fän ewe allükün pwüpwülü a riri ngeni pwülüan ren.
ROM 7:3 Iei mine, are neminei a pwüpwülü ngeni pwal eman mwän lupwen pwülüan we a chüen manau, epwe iteni eman fin lisowu. Nge are pwülüan we a mäla, neminei a ngas seni fän nemenien ewe allükün pwüpwülü, nge esap iteni eman fin lisowu, inamwo are a pwülüeni pwal eman mwän.
ROM 7:4 Ämi pwii kana, ina chök pwal usun ämi, oua mäla ngeni ewe Allük pokiten ämi oua eu kinikinin inisin Kraist. Iei ämi oua nöün ätewe Kot a amanauasefäli seni mäla, pwe epwe wor uän ach angang ngeni Kot.
ROM 7:5 Pun lupwen sia manau lon fitukach, ewe Allük a aselipato ekewe mochenian tipis lon inisich. Iwe, sia chon angang ngeni mäla.
ROM 7:6 Nge iei sia ngas seni fän nemenien ewe Allük pokiten sia fen mäla ngeni mine a fötekinikich. Iwe, sisap chüen angang ngeni Kot lon ewe lapalapen lom ren ewe allük mi makketiu, nge sia angang ngeni lon ewe lapalap mi fö ren Ngünmifel.
ROM 7:7 Iwe, met sipwe üra? Sipwe apasa pwe ewe Allük mi tipis? Apwi, esap fokun ina usun! Nge ewe Allük a amefi ngeniei met wewen tipis. Pun üsap weweiti usun mochenia are ewe allük esap apasa, “Kosap mochenia ngeni pisekin eman.”
ROM 7:8 Nge tipis a küna eu fansoun mi fich pwe epwe afisätä sokopaten mochenia lon ngang ren ewe allük. Pun are esap wor allük, tipis esap wor an manaman.
ROM 7:9 Me lom üa manau lupwen esamwo wor allük mi aiti ngeniei pwe a tipis ai föri föför mi ngau. Nge lupwen üa silei ewe allük, tipis a popuetä le nemenem.
ROM 7:10 Iwe, üa mäla. Itä ewe allük epwe aworato manau, nge a chök aworato mäla ngeniei.
ROM 7:11 Tipis a küna eu fansoun mi fich, o ren ewe allük tipis a atupuei o nieila.
ROM 7:12 Iei usun än Moses kewe Allük ra pin o mine ewe allük a apasa a pwüng o mürina.
ROM 7:13 Met wewen ei? Epwe wewen pwe mine a mürina a aworato ai mäla? Apwi, esap fokun ina! Tipis a föri ei. Ren an aea mine a mürina, tipis a aworato mäla ngeniei, pwe epwe pwäpwäla wesewesen lapalapen tipis. Iei usun ren ewe allük a pwäla pwe tipis a fokun ngau.
ROM 7:14 Kich mi silei pwe ewe Allük sokun ngün, nge ngang sokun fituk, pwe üa nom fän nemenien tipis.
ROM 7:15 Üsap weweiti mine üa föri. Pun üsap föri mine üa mochen föri, nge üa föri mine üa oput.
ROM 7:16 Iwe, lupwen üa föri mine üsap mochen föri, a pwä pwe üa tipeeu ngeni pwe ewe Allük a pwüng.
ROM 7:17 Iei usun sap ngang wesewesen ewe mi föri ei, nge ewe tipis mi nonom loi.
ROM 7:18 Ngang üa silei pwe mine a mürina esap nom loi, wewen esap nom lon fitukei. Pun inamwo ika a nom rei ewe mochenin föri mine a mürina, nge üsap tongeni föri.
ROM 7:19 Ngang üsap föri mine a mürina usun üa mochen, nge üa föri mine a ngau, ewe sokun föför ngang üsap mochen pwe üpwe föri.
ROM 7:20 Are ngang üa föri mine üsap mochen föri, wewen pwe sap ngang üa föri ei, pwe ewe tipis mi nonom loi.
ROM 7:21 Iwe, üa küna pwe ei allük a angang lon manauei: Lupwen üa mochen föri mine a mürina, üa chök filätä ai üpwe föri mine a ngau.
ROM 7:22 Pun seni lon letipei üa pwapwaiti än Kot allük.
ROM 7:23 Nge üa küna pwal eu allük a angang lon inisi, eu allük mi fiu ngeni ewe allük letipei a tipeeu ngeni, o a fötekiniei fän ewe allükün tipis, ewe a angang lon inisi.
ROM 7:24 Ngang eman aramas mi attong o weiresikis! Iö epwe angasaei seni ei inis inisin mäla?
ROM 7:25 Kilisou ngeni Kot a angasaei ren ach Samol Jesus Kraist! Iwe, iei usi: Ngang won inisi üa angang ngeni än Kot allük ren letipei, nge lon fitukei üa angang ngeni ewe allükün tipis.
ROM 8:1 Iwe, iei esap wor liwinin tipisin chokewe mi nonom lon Kraist Jesus.
ROM 8:2 Pun ewe allükün Ngün mi ngenikich manau lon Kraist Jesus a angasaei seni ewe allük mi afisätä tipis me mäla.
ROM 8:3 Iwe, mine ewe Allük esap tongeni föri pokiten fitukach a apwangapwang, Kot a föri: A ngeni tipis liwinin lon fituken Nöün we, ren an tinato püsin Nöün lon lapalapen aramas usun eman aramas tipis, pwe epwe eu asoren tipis.
ROM 8:4 Kot a föri ei, pwe pwüngün ewe allük epwe pwönüetä rech, kich mi manau fän nemenien Ngünmifel, nge sap fän nemenien fituk.
ROM 8:5 Chokewe mi manau lon pekin fituk ra nonom fän nemenien fituk. Nge chokewe mi manau lon pekin Ngün ra nonom fän nemenien Ngünmifel.
ROM 8:6 Are sia nonom fän nemenien fituk, sopolan mäla, nge are sia nonom fän nemenien Ngünmifel, sopolan manau me kinamwe.
ROM 8:7 Iei mine eman aramas a ü ngeni Kot lupwen a nonom fän nemenien tipis, pun esap aleasochisi än Kot allük, pwüngün esap tongeni aleasochis ngeni.
ROM 8:8 Chokewe mi aleasochis ngeni mochenin fituker resap tongeni apwapwai Kot.
ROM 8:9 Nge ämi ousap nonom fän nemenien fituk, pwe oua nonom fän nemenien Ngünmifel are Ngünün Kot a nom lomi. Nge iö esap eäni Ngünün Kraist, esap i nöün Kraist.
ROM 8:10 Nge are Kraist a nonom lomi, ewe Ngünmifel a ngenikemi manau pokiten oua pwüng me ren Kot, inamwo ika inisimi repwe mäla pokiten tipis.
ROM 8:11 Are ewe Ngünün Kot mi amanauasefäli Jesus seni mäla a nom lomi, mürin ewe mi amanauasefäli Kraist seni mäla, epwe uwalong manau lon inisimi inisin mäla ren Ngünün we mi nom lomi.
ROM 8:12 Iwe, ämi pwii kana a wor wisach, nge esap lon ach sipwe nonom fän nemenien fituk.
ROM 8:13 Pun are oua nonom fän nemenien fituk, oupwe mäla. Nge are oupwe amäloi ekewe föförün tipis ren Ngünmifel, iwe, oupwe manau.
ROM 8:14 Iwe, chokewe mi nonom fän emwenien ewe Ngünün Kot, ir nöün Kot.
ROM 8:15 Pun ewe Ngün Kot a ngenikemi esap nöünikemi chon angang pwe oupwe niuokus, nge ewe Ngün a atolongakemi lon tettelin nöün Kot. Iwe, ren atufichien ewe Ngün sia kökkö ngeni Kot, “Sam! Semei!”
ROM 8:16 Iwe, ewe Ngünün Kot a pwäri ngeni ngünüch pwe kich sia nöün Kot kana.
ROM 8:17 Nge pokiten sia nöün Kot, sipwe feiöchüni ekewe feiöch i a amolätä fän iten nöün kana, sipwe pwal eti Kraist le wöüni ekewe wöün Kot a amolätä fän itan. Pun are sia eti Kraist lon an riaföü, sipwe pwal eti i lon an ling.
ROM 8:18 Ngang üa lükü, pwe ekewe riaföü mi torikich lon fansoun ikenai resap löllö ngeni ewe ling epwe pwä ngenikich.
ROM 8:19 Förien Kot kewe meinisin ra fokun ösüküsükü pwe Kot epwe pwärala nöün kana.
ROM 8:20 Pun Kot a föri pwe förian kana repwe lomotongauala, sap ren püsin letiper, nge pokiten letipen Kot pwe epwe iei usun. Nge mi wor ei apilükülüköch,
ROM 8:21 pwe lon eu rän förien Kot kana repwe ngasala seni ar ngauala me tala o eti nöün Kot kewe lon ar ngasala me ling.
ROM 8:22 Pun sia silei pwe tori ikenai förien Kot kewe meinisin ra ngüngü fän cheuch usun cheuchen fam.
ROM 8:23 Nge sap chök förien Kot kana ra ngüngü, pwe pwal kich mi eäni Ngünmifel, iei aeuin än Kot lifang, sia pwal ngüngü loch lupwen sia witiwiti pwe Kot epwe angeekich pwe sipwe nöün o epwe angasala unusen inisich.
ROM 8:24 Pun ren ei apilükülük sia küna manau. Nge are sia küna mine sia eäni apilükülük, ei esap wesewesen apilükülüköch. Pun iö epwe apilükülükü mine a fen küna?
ROM 8:25 Nge are sia apilükülükü mine sisap küna mwo, sia witiwit ngeni fän likitü.
ROM 8:26 Ina chök usun ewe Ngünmifel epwe alisikich lon ach apwangapwang. Pun sisap silei mine sipwe eäni iotek, nge püsin Ngünmifel a tüngor ngeni Kot fän itach ren sokun ngüngü esap wor eman a tongeni apasatä lon kapas.
ROM 8:27 Nge Kot, ewe mi küna lon letipach, a silei ekiekin ewe Ngünmifel. Pun ewe Ngünmifel a tüngor ngeni Kot fän iten ekewe chon pin lon met mi fich ngeni letipan.
ROM 8:28 Sia silei pwe lon mettoch meinisin Kot a afisätä feiöchün chokewe mi echeni i, chokewe i a köriir pwe repwe föri letipan.
ROM 8:29 Iwe, chokewe Kot a fen filiiretä me lom a pwal aimwürela pwe repwe wewe ngeni Nöün we lon lapalapan, pwe i ewe epwe mwänichi lein pwiin kewe mi chomong.
ROM 8:30 Iwe, chokewe Kot a aimwürela a pwal köriir, nge chokewe a köriir a föri pwe repwe küna pwüng me ren, nge chokewe mi küna pwüng me ren a pwal ngeniir lingan.
ROM 8:31 Iwe, met sipwe tongeni apasa ren ekei mettoch? Are Kot a penikich, iö epwe tongeni pölüenikich?
ROM 8:32 Ewer, esap Kot, pun i esap mwo nge amwöchü püsin Nöün, pwe a fangala fänäsengesich meinisin. Ifa usun, esap pwal fang ngenikich mettoch meinisin me Nöün we?
ROM 8:33 Iö epwe atipisi afilien Kot kewe? Püsin Kot a pwärätä pwe resap tipis!
ROM 8:34 Iö epwe ngeniir liwinin ar tipis? Kraist Jesus ewe mi mäla, nge a pwal fokun manausefälitä, i a nonom lepelifichin Kot, a iotek fänäsengesich o penikich.
ROM 8:35 Meta epwe tongeni aimwükich seni än Kraist we chen? Ifa usun osukosuk, are weires, are riaföü, are echik, are mwelele, are feiengau, are mäla ra tongeni aimwükich?
ROM 8:36 Pun iei usun a mak lon ewe Toropwe mi Pin, “Fansoun meinisin aia nonom lon feiengauen mäla fänäsengesum. Ra ekieki pwe äm aia wewe ngeni sip mi amol ngeni ar repwe ninnila.”
ROM 8:37 Apwi, nge lon ekei mettoch meinisin sia fokun pwora ren ewe mi echenikich!
ROM 8:38 Pun üa fokun lükü pwe esap fokun wor och mi tongeni aimwükich seni an we chen: sap mäla are manau, sap chon läng are ekewe anün rochopwak, sap mettochun ikenai are mettochun mürin are och manaman,
ROM 8:39 esap pwal ekewe mettochun pekitä are ekewe mettochun pekitiu, esap fokun wor och lein förian kewe meinisin epwe tongeni aimwüfesenikich seni än Kot we chen mi torikich lon Kraist Jesus ach Samol.
ROM 9:1 Ngang üpwe apasatä mine a let. Üsap chofona, pun ngang eman nöün Kraist. Mwelien letipei mi nom fän nemenien Ngünmifel a pwal anüküchara ngeniei, pwe üsap chofona,
ROM 9:2 lupwen üa kapas usun watten ai lolilen, pwal usun riaföün letipei esap ükütiu
ROM 9:3 fän iten aramasei lon fitukei! Ai äneän pwe amwo püsin ngang üpwe nom fän än Kot anümamau o imwüla seni Kraist fänäsengesiir.
ROM 9:4 Ir nöün Kot kewe aramas a filiiretä. I a atolongeer lon tettelin nöün o a pwäri ngeniir an ling. I a föri an we pwon ngeniir o ngeniir ekewe Allük. Ra fel ngeni Kot fän pwüng o angei än Kot kewe pwon.
ROM 9:5 Ir mwirimwirin ar kewe lewo re Ipru mi iteföüla, pwal Kraist eman me leir lon an nom lon fituk. Sipwe mwareiti Kot tori feilfeilachök, ewe mi nemeni mettoch meinisin. Amen.
ROM 9:6 Ngang üsap apasa pwe än Kot we pwon esap pwönüetä. Pun sap chon Israel meinisin ra nöün Kot aramas.
ROM 9:7 Sap pwal ekewe mwirimwirin Apraham meinisin ir nöün Kot. Kot a üreni Apraham, “Ekewe mwirimwirin Isaak chök, ikkei ir mwirimwirum kewe üa pwon ngonuk.”
ROM 9:8 Wewen ei, pwe ekewe nau mi upun won Apraham sap ir meinisin nöün Kot. Nge ekewe nau mi uputiu pokiten än Kot we pwon, ir wesewesen mwirimwirin.
ROM 9:9 Pun iei masouen än Kot we pwon, “Lon ewe fansoun mi fich üpwe liwinsefälito, iwe, Sara epwe nöüni eman ät.”
ROM 9:10 Nge sap iei chök. Pun nöün Repeka kewe ruoman ät ra semeni eman chök sam, iei i ach we lewo Isaak.
ROM 9:11 Nge me mwen än ekewe lippwe resamwo uputiu, ika me mwen ar resamwo föri och föför mi mürina ika mi ngau, (pwe än Kot ekiek lon an fil epwe pwönüetä,
ROM 9:12 ewe fil esap longolong won föför, nge a longolong won an kö) Kot a fen üreni Repeka, “Ewe mwänichi epwe angang ngeni ewe mi kis.”
ROM 9:13 Pun iei usun a mak lon ewe Toropwe mi Pin, “Üa echeni Jakop, nge üa oput Esau.”
ROM 9:14 Iwe, ifa usun, sipwe apasa pwe Kot a föri mine esap pwüng? Apwi, esap ina!
ROM 9:15 Pun a apasa ngeni Moses, “Üpwe ümöümöch ngeni iö üa mochen ümöümöch ngeni. Üpwe pwal eäni tong ngeni iö üa mochen eäni tong ngeni.”
ROM 9:16 Iei mine än Kot fil esap longolong won än eman aramas mochen ika an föför, nge a longolong won än Kot ümöümöch.
ROM 9:17 Pun iei usun mine a mak lon ewe Toropwe mi Pin fän iten ewe kingen Isip, “Üa awisa ngonuk ewe wisen king pwe üpwe nöünöü en le pwärala ai manaman, pwe itei epwe föüla won unusen fanüfan.”
ROM 9:18 Iei usun Kot a ümöümöch ngeni iö a mochen ümöümöch ngeni, nge a pwal aülöföreai eman i a mochen aülöföreai.
ROM 9:19 Iwe, eman me leimi epwe üreniei, “Are a iei usun, epwe ifa usun än Kot epwe tongeni atipisi eman? Iö epwe tongeni ü ngeni letipen Kot?”
ROM 9:20 Pwii, nge pwota ka tongeni wippin ngeni Kot? Ifa usun, eu sepi seni pwül a tongeni aisini ewe chon föri, “Pwota ka föriei pwe üpwe iei usun?”
ROM 9:21 Ifa usun, ewe chon för sepi esap wor an pwüng an epwe föri met a mochen seni ewe eu chök pwül? Esap tongeni föri eu sepi fän iten rän mi aüchea, pwal eu sepi fän iten iteiten rän?
ROM 9:22 Iei usun mine Kot a föri. A mochen pwärala an song o aiti ngeni aramas an manaman. Nge a fokun mosonotam lon an engila ngeni chokewe a song ngeniir, ir mi molotä ngeni feiengau.
ROM 9:23 A pwal mochen pwärala an ling mi lapalap, a torikich, kich chokewe a ümöümöch ngeni, o a amolakich pwe sipwe angei an we ling.
ROM 9:24 Pun kich chokewe i a köriir, sap chök seni me lein ekewe chon Juta, nge pwal seni me lein ekewe chon lükün Israel.
ROM 9:25 Iei usun mine a mak lon puken Osea, “Ekewe aramas esap ir nei, üpwe aita ngeniir ‘Nei aramas’! Chon ewe mwü üsap echeniir, üpwe aita ngeniir ‘Nei mi achengicheng’!
ROM 9:26 Lon ewe chök leni ia ra rongorong ewe kapas, ‘Ämi ousap nei aramas’, ikenan repwe iteni nöün Kot ewe mi Manau.”
ROM 9:27 Iwe, Aisea a kökkö fän leüömong usun Israel, “Inamwo ika ekewe chon Israel ra chomong usun pien aroset, ekoch chök me leir repwe küna manau,
ROM 9:28 pun ewe Samol epwe müttir apwüngü chon fanüfan meinisin.”
ROM 9:29 Iei usun a fis mine Aisea a fen apasa me mwan, “Are ewe Samol mi Unusen Manaman esap amanaua ekoch mwirimwirich, kich sipwe usun chök chon Sotom me chon Komora.”
ROM 9:30 Iwe, met sipwe tongeni apasa? Ekewe chon lükün Israel resap kütta usun ar repwe eäni pwüng me ren Kot, ra küna pwüng ren ar lükülük.
ROM 9:31 Nge ekewe chon Israel mi kütta eu allük epwe alisiir pwe repwe küna pwüng me ren Kot, nge resap küna.
ROM 9:32 Pwota resap küna? Pokiten mine ra föri esap longolong won lükülük, nge a longolong won met ra föri. Iei usun ra chepetek won ewe “föün chepetek”,
ROM 9:33 usun ewe Toropwe mi Pin a kapas usun, “Nengeni, üa anomu lon Sion eföü fau aramas repwe chepetek ren, eu achau aramas repwe opuri. Nge iö a lükü i esap küna lichipüng.”
ROM 10:1 Ämi pwii kana, üa fokun mochen seni lon unusen letipei pwe püsin aramasei kewe repwe küna manau. Üa pwal iotek ngeni Kot fänäsengesiir.
ROM 10:2 Üa tongeni pwärätä usur, pwe ra fokun tiliken le angang ngeni Kot, nge ar tiliken le angang esap longolong won ar silei usun mine a let.
ROM 10:3 Resap silei usun mine Kot a föri, pwe aramas repwe küna pwüng me ren, nge ra fen sotuni usun ar repwe küna püsin ar pwüng. Iei usun resap atolongeer fän mine Kot a föri pwe aramas repwe küna pwüng me ren.
ROM 10:4 Pun Kraist a fen aükätiu manamanen ekewe Allük, pwe iteiten aramas mi lükü repwe küna pwüng me ren Kot.
ROM 10:5 Iei usun mine Moses a makkei usun än aramas repwe küna pwüng me ren Kot ren ar aleasochisi ekewe Allük, “Iö epwe aleasochisi ekewe Allük epwe manau.”
ROM 10:6 Nge iei usun mine a mak lon ekewe Toropwe mi Pin usun än aramas repwe küna pwüng me ren Kot ren ar lükülük, “Kosap püsin ais ngonuk: Iö epwe feitä läng?” (wewen, iö epwe uwätiu Kraist).
ROM 10:7 “Kosap pwal ais: Iö epwe feitiu lon lenien mäla?” (wewen, iö epwe uweatä Kraist seni mäla).
ROM 10:8 Iei usun mine a mak lon ekewe Toropwe mi Pin, “Än Kot kapas a fokun kan ngonuk, a nom lon awom pwal lon lelukom”, iei ewe kapas usun ach lükülük sia afalafala.
ROM 10:9 Are kopwe pwärätä ren awom pwe Jesus i ewe Samol o lükü lon lelukom pwe Kot a amanauasefäli seni mäla, kopwe küna manau.
ROM 10:10 Pun sia lükü Jesus lon lelukach o küna pwüng me ren Kot, sia pwal pwärätä Jesus ren awach o küna manau ren.
ROM 10:11 A mak lon ekewe Toropwe mi Pin, “Iö a lükü i esap lichipüng.”
ROM 10:12 Pun esap wor sokofesenin chon Juta me chon lükün Israel. Kot ewe eman chök Samolun aramas meinisin, a fokun afeiöchü chokewe meinisin mi köri i.
ROM 10:13 Usun a mak lon ekewe Toropwe mi Pin, “Iteiten aramas mi köri iten ewe Samol epwe küna manau.”
ROM 10:14 Nge ifa usun ar repwe tongeni köri i, are resap lükü? Ifa usun ar repwe tongeni lükü, are resap rongorong an kapas? Nge ifa usun ar repwe tongeni rongorong ewe kapas, are esap wor eman a asile ngeniir?
ROM 10:15 Ifa usun an we kapas epwe asilesil, are Kot esap tinala chon künö? Usun a mak lon ekewe Toropwe mi Pin, “A mürina wareton ekewe chon künö mi uwato ewe Pworausen Manau!”
ROM 10:16 Nge sap aramas meinisin ra etiwa ewe Pworausen Manau. Aisea a püsin apasa, “Ai Samol, iö a lükü ewe kapas sia aronga?”
ROM 10:17 Iei mine än eman lükülük a pop seni an rongorong ewe kapas, nge ewe kapas a pop seni än eman afalafala Kraist.
ROM 10:18 Nge üa ais: Mi enlet pwe resap rongorong ewe kapas? Ewer, ra rongorong! Pun iei usun mine a mak lon ekewe Toropwe mi Pin, “Mwelier a chöfetal won unusen fanüfan, ar kapas a tori lesopun fanüfan.”
ROM 10:19 Üa aissefäl: Ifa usun, ekewe aramasen Israel resap weweiti? Moses ewe aemanün a pölüeni, “Üpwe föri pwe ämi nei aramas oupwe lolowo ngeni eu mwichen aramas sap ir wesewesen eu mwü, üpwe föri pwe ämi oupwe song ngeni chon eu mwü mi umwes.”
ROM 10:20 Aisea a fokun pwora lupwen a apasa, “Chokewe resap küttaei ra künaei. Üa pwäriei ngeni chokewe resap ais usi.”
ROM 10:21 Nge fänäsengesin Israel a apasa, “Iteiten rän üa aitiela pei, pwe üpwe etiwa eu mwichen aramas mi lükümach o ü ngeniei.”
ROM 11:1 Iwe, üa ais: Ifa usun, Kot a pöütala nöün kewe aramas? Apwi, esap fokun ina! Püsin ngang eman chon Israel, eman mwirimwirin Apraham, eman chon ewe ainangen Peniamin.
ROM 11:2 Kot esap pöütala nöün aramas i a fen filiiretä seni lepopun. Oua silei mine a mak lon ekewe Toropwe mi Pin usun pworausen än Elias tüngormau ngeni Kot o tip ngeni chon Israel,
ROM 11:3 “Ai Samol, ra niela noumw kewe soufos o ataetiu om kewe rongen asor. Ngang chök üa chüen manau. Nge ra pwal ekiekin nieila.”
ROM 11:4 Met Kot a eäni pölüen ngeni Elias? “Üa aimwüela fän itei fisungeröü aramas me lon Israel, ir chokewe resap fel ngeni ewe anü Paal.”
ROM 11:5 Iei usun mine a pwal fis ikenai. Mi wor eu kükün mwichen aramas, ir chokewe Kot a filiiretä pokiten an ümöümöch.
ROM 11:6 An afiliiretä a longolong won an ümöümöch, nge sap won mine ra föri. Pun are an fil a longolong won met aramas ra föri, mürin an ümöümöch esap chüen enletin ümöümöch.
ROM 11:7 Iwe, met? Ekewe aramasen Israel resap küna mine ra kütta. Eu chök kükün mwich Kot a filiiretä ra küna. Nge ekewe ekoch Kot a föri pwe resap tongeni rongorong ngeni an kö.
ROM 11:8 Usun a mak lon ekewe Toropwe mi Pin, “Kot a föri pwe resap tongeni mefi ika weweiti och. Tori ikenai resap tongeni küna ika rongorong.”
ROM 11:9 Tafit a pwal apasa, “Amwo ar kewe kametip repwe wiliti eu sär me eu likatuputup fän iter.
ROM 11:10 Amwo meser kewe repwe chunula, pwe resap tongeni küna mwer. Kopwe pwal föri pwe sökürür epwe pwor ren ar riaföü fansoun meinisin.”
ROM 11:11 Üa pwal ais: Lupwen ekewe chon Juta ra chepetek, ra turula o unusen feiengau? Apwi, esap ina! Pokiten ra tipis, manau esemüch a tori ekewe chon lükün Israel, pwe ekewe chon Juta repwe lolloletä rer.
ROM 11:12 Än ekewe chon Juta tipis a atoto watten feiöch ngeni chon fanüfan, nge ar wöüngau lon ngünür a atoto watten feiöch ngeni ekewe chon lükün Israel. Epwe ifan me watten ewe feiöch lupwen unusen chon Juta meinisin repwe kapachelong!
ROM 11:13 Iwe, iei üpwe kapas ngenikemi chon lükün Israel: Lupwen fansoun üa eman soukünö ngeni ekewe chon lükün Israel, ngang üpwe alapala ai angang.
ROM 11:14 Eli üpwe tongeni föri, pwe püsin aramasei repwe lolloletä, pwe lupwen üpwe angang ngeniir, Kot epwe amanaua ekoch me leir.
ROM 11:15 Pun lupwen Kot a pöütiirela, chon fanüfan ra chä ngeni Kot. Iwe, met epwe fis lupwen Kot epwe etiweer? Epwe fis manau seni mäla.
ROM 11:16 Are a pin och kinikinin pilawa eman a eäni asor ngeni Kot, unusen ewe pilawa a pwal pin. Nge are eman a eäni asor waren efoch irä ngeni Kot, palan kana ra pwal pin.
ROM 11:17 Ekoch palen ewe irä olif eman a tümwünü ra kuputiu, nge palen ewe irä olif mi chök püsin pwükütä lein pötöwöl a kapachelong lepökün. Ämi chon lükün Israel, oua wewe ngeni ewe irä olif mi pwükütä me lein pötöwöl, nge iei oua angei watten feiöch seni ekewe chon Juta, usun chök ewe palen irä olif mi pwükütä lein pötöwöl a angei feiöch seni chönün ewe irä olif eman a tümwünü.
ROM 11:18 Iei mine ousap turunufasei chokewe mi usun chök ekewe palen irä mi kuputiu. Pwota oupwe lamalamtekia? Ämi oua usun chök efoch palen irä. Ämi oua manau seni waren ewe irä, nge waren ewe irä resap manau senikemi.
ROM 11:19 Nge eli oupwe apasa, “Ewer, nge ekewe palan ra kuputiu, pwe epwe wor leniem.”
ROM 11:20 Mi pwüng. Ra kuputiu pokiten resap lükü, nge ämi oua nomotiu lon lenier pokiten oua lükü. Iwe, ousap lamalamtekia usun ei, nge oupwe niuokus.
ROM 11:21 Pun Kot esap achika ekewe chon Juta, ir wesewesen palen ewe irä, ifa usun, oua ekieki pwe epwe achikakemi?
ROM 11:22 Iei mine oupwe ekieki usun än Kot kirikiröch me an pöchökül. A fokun pöchökül ngeni chokewe mi turutiu, nge a kirikiröch ngeni ämi. Are oua sopwela le föri mine a mürina, epwe sopwela le kirikiröch ngenikemi, nge are ousap föri iei usun, pwal ämi oupwe kuputiu.
ROM 11:23 Iwe, are ekewe chon Juta repwe likitala ar lükümang, repwe liwinsefälilong lon lenier me mwan, pun Kot a tongeni aliwinisefäliir.
ROM 11:24 Ämi chon lükün Israel, oua wewe ngeni efoch palen ewe irä olif mi püsin pwükütä lein pötöwöl a kuputiu o kapach ngeni efoch irä olif eman a tümwünü, nge esap iei pwüngün ei sokun angang. Ekewe chon Juta ra usun chök ewe irä olif eman a tümwünü. Iwe, epwe fokun mecheres ngeni Kot an epwe apachasefälielong ekewe palen irä mi kuputiu lon lenier me mwan.
ROM 11:25 Ämi pwii kana, mi wor eu monomon mi enlet üa mochen pwe ämi oupwe silei, pwe ousap ekieki püsin ämi tipachem. Iei ewe monomon: Än chon Israel ülöförea lon letiper esap soposopola, nge epwe chök müchüla lupwen epwe unus iteiten chon lükün Israel repwe feito ren Kot.
ROM 11:26 Iwe, iei usun chon Israel meinisin repwe küna manau, usun a mak lon ekewe Toropwe mi Pin, “Ewe chon Amanau epwe feito seni Sion o angei seni ekewe mwirimwirin Jakop ar föföringau meinisin.
ROM 11:27 Üpwe föri ei pwon ngeniir, lupwen üpwe angei seniir ar kewe tipis.”
ROM 11:28 Iwe, pokiten ekewe chon Juta resap etiwa ewe Pworausen Manau, ir chon oput Kot fänäsengesin ämi chon lükün Israel. Nge pokiten Kot a filiiretä, ir ra chen me ren fänäsengesin ar kewe lewo.
ROM 11:29 Pun Kot esap akasiwili ekiekin letipan ren iö a filätä o afeiöchü.
ROM 11:30 Iwe, ämi chon lükün Israel oua aleasolap ngeni Kot me lom. Nge iei oua angei än Kot ümöümöch pokiten än ekewe chon Juta aleasolap.
ROM 11:31 Pwal ina chök usun, ekewe chon Juta ra aleasolap ngeni Kot iei, pwal ir repwe angei än Kot ümöümöch iei, pun Kot a pwal ümöümöch ngenikemi.
ROM 11:32 Pun Kot a föri pwe aramas meinisin repwe fötek fän nemenien aleasolap, pwe epwe pwärala an ümöümöch ngeniir meinisin.
ROM 11:33 A ifan me watten wöün Kot! A ifan me alololun an tipachem me silelap! Iö a tongeni awewei an apwüng? Iö a tongeni weweiti an kewe föför?
ROM 11:34 Usun a mak lon ekewe Toropwe mi Pin, “Iö a silei ekiekin ewe Samol? Iö a tongeni öüröüra?
ROM 11:35 Iö a ngeni och mettoch, pwe epwe wisen aliwinisefäli?”
ROM 11:36 Pun Kot a föri mettoch meinisin, mettoch meinisin ra manau ren o nom fänäsengesin. Kot epwe ling tori feilfeilachök! Amen.
ROM 12:1 Iei mine üa pese ngenikemi, ämi pwii kana, pokiten watten än Kot ümöümöch ngenikich, pwe oupwe fangala inisimi pwe eu asor mi manau o pin fän iten än Kot angang o i epwe pwapwa ren. Iei usun pwüngün ämi fel ngeni Kot.
ROM 12:2 Ousap apirü pomwen fanüfan, nge oupwe mwüt ngeni Kot pwe epwe awilikemi o asöföla unusen letipemi. Mürin oupwe tongeni silei letipen Kot, ren met mi mürina me unusöch, pwal met mi apwapwai i.
ROM 12:3 Iwe, pokiten än Kot lifangen ümöümöch ngeniei, üpwe ürenikemi meinisin: Ousap ekiekin tipetekia seni mine a fichitikemi, nge oupwe tipetekison lon ämi ekiek o püsin apwüngükemi ngeni ewe aükükün lükülük Kot a ngenikemi.
ROM 12:4 A wor chomong kifetin inisich, nge ekei kifet meinisin ra sokofesen lon en me an angang.
ROM 12:5 Inamwo ika kich chomong sokun aramas, nge sia eu chök inis lon Kraist. Iwe, eman me eman leich sia chufengen usun ekewe sokopaten kifet lon eu chök inis.
ROM 12:6 Iei mine sipwe anganga ekewe sokopaten tufich Kot a lifang ngenikich lon aükükün an ümöümöch. Are eman a tufichin afalafala än Kot we kapas, epwe föri won aükükün ewe lükülük a eäni.
ROM 12:7 Are eman a tufichin angang lon mwichefel, epwe angang, are eman a tufichin asukul, epwe asukul.
ROM 12:8 Are eman a tufichin apöchöküla letipen aramas, epwe föri iei usun. Iö a eäni ewe tufichin alisi aramas, epwe föri seni unusen letipan, iö a eäni ewe tufichin nemenem, epwe achocho le angang, iö a wor ren ewe tufichin eäni kirikiröch ngeni aramas, epwe föri fän pwapwan letipan.
ROM 12:9 Ämi chen epwe fokun wenechar. Oupwe oput mine a ngau o kamwöchünük won mine a mürina.
ROM 12:10 Tongen pwipwi lon Kraist epwe pwichikar lefilemi. Oupwe fokun asamolufengenikemi lefilemi.
ROM 12:11 Oupwe achocho le angang, nge ousap chipwang. Oupwe angang ngeni ewe Samol ren unusen letipemi.
ROM 12:12 Oupwe pwapwa lon ämi apilükülüköch, oupwe mosonotam lon ämi riaföü, oupwe iotek fansoun meinisin.
ROM 12:13 Oupwe alisi pwimi kewe souläng mi osupwang, oupwe etiwaöchü ekewe wasöla.
ROM 12:14 Oupwe tüngor ngeni Kot pwe epwe afeiöchü chokewe mi ariaföüükemi. Ewer, oupwe tüngor ngeni pwe epwe afeiöchüür, nge esap afeiengauer.
ROM 12:15 Oupwe eti chokewe mi pwapwa le pwapwa, nge oupwe eti chokewe mi kechü le kechü.
ROM 12:16 Oupwe tipeeufengen lefilemi. Ousap lamalamtekia, nge oupwe tipeni le föri angang mi tekisoson. Ousap ekieki pwe oua tipachem.
ROM 12:17 Are eman a föri mi ngau ngenikemi, ousap liwini ngeni lon föför mi ngau. Oupwe achocho le föri mine a öch ngeni aramas meinisin.
ROM 12:18 Oupwe föri mine oupwe kinamwefengen me aramas meinisin ren ükükün ämi tongeni.
ROM 12:19 Ämi pwii kana, ousap liwini ngeni eman chappen an föför, nge oupwe mwüt ngeni Kot epwe föri. Pun a mak lon ewe Toropwe mi Pin, “Ngang üpwe ngeniir chappen ar föför, üpwe liwini ngeniir ükükün liwinin ar föför mi ngau, iei alon ewe Samol.”
ROM 12:20 Nge iei oupwe föri usun mine a mak lon ekewe Toropwe mi Pin, “Are chon oputom a echik, kopwe amongöü, nge are a kaka, kopwe aünü, pun are kopwe föri iei usun, säw epwe küri usun ekkei a kürikich.”
ROM 12:21 Kosap mwüt ngeni ngau epwe akufuk, nge kopwe akufu met mi ngau ren om föföröch.
ROM 13:1 Aramas meinisin repwe aleasochisi nöüwisen ewe mwü mi nemeniir. Pun esap wor ar nemenem are Kot esap mwütätä ngeniir, nge Kot a ngeni ekewe nöüwis wiser pwe repwe nemenem.
ROM 13:2 Are eman a ü ngeni ekewe nöüwis, a ü ngeni met Kot a akota. Nge ika eman epwe föri iei usun, epwe küna kapwüng.
ROM 13:3 Pun chokewe mi föri mine a mürina resap niuokusiti ekewe nöüwis, pwe chokewe chök ra föri mine a ngau. Ifa usun, oua mochen ämi ousap niuokusiti chokewe mi nemenem? Mürin oupwe föri mine a mürina, iwe, repwe mwareitikemi.
ROM 13:4 Pun ir nöün Kot chon angang, ra angang fänäsengesimi pwe oupwe feiöch. Nge are oua föri mine a ngau, oupwe niuokusitiir, pun a wor ar pöchökül le apwüngü aramas. Ir nöün Kot kewe chon angang, ra wisen apwönüetä pwüngün än Kot we apwüng ngeni chokewe mi föri mine a ngau.
ROM 13:5 Iei popun ämi oupwe aleasochisi ekewe nöüwis, esap pokiten chök än Kot we apwüng, nge pwal pokiten iei mefien letipemi.
ROM 13:6 Iei pwal popun pwe ämi oupwe mönätiu ämi takises, pun ekewe nöüwis ra angang fän iten Kot lupwen ra apwönüetä wiser.
ROM 13:7 Oupwe ngeni ekei aramas mine oupwe wisen ngeniir. Oupwe mönätiu ämi takises me ekewe sokopaten takises ngeni chokewe ra wisen angei takises senikemi, oupwe meniniti ekewe aramas a wor meniniir, oupwe asamolu ekewe aramas a wor sufölüür.
ROM 13:8 Ousap liwinimang ngeni eman och mettoch, nge iei chök ewe liwinimang oupwe eäni: oupwe echenifengenikemi lefilemi. Iö a föri iei usun a aleasochisi ekewe Allük.
ROM 13:9 Ekewe allük, “Kosap lisowu, kosap solä, kosap mocheniaiti pisekin eman”, ekei allük meinisin me pwal ekewe ekoch ra nom fän ewe eu chök allük, “Kopwe echeni chon arum usun püsin om echenuk.”
ROM 13:10 Are oua echeni eman, ousap fokun föri och föför mi ngau ngeni. Ren ämi echeni aramas oua apwönüetä ekewe Allük meinisin.
ROM 13:11 Oupwe fokun föri iei usun, pun oua silei pwe ewe fansoun a arapoto, pwe ämi oupwe pwätä seni möür. Pun ewe ränin än Kot amanauakich a kaneto iei lap seni ewe fansoun sia popuetä le lükü Jesus Kraist.
ROM 13:12 Pwin a arap ngeni chök epwe le la, nge rän epwe le war. Iei mine ousipwe ükütiu le föri föförün rochopwak, nge sipwe angei ekewe pisekin maun pwe sipwe maun lon saram.
ROM 13:13 Ousipwe föri föförün pwüng usun aramas mi nom lon saram. Sisap mongömong ika ünüpuch, sisap lisowu ika föföringau, sisap anini ika lolowo.
ROM 13:14 Nge oupwe angei än ach Samol Jesus Kraist kewe pisekin maun, oupwe ükütiu le ekieki usun ämi oupwe apwönüetä mochenian fitukemi.
ROM 14:1 Oupwe etiwa ewe aramas mi apwangapwang lon an lükülük, nge ousap anini ngeni won met mefian.
ROM 14:2 Eman aramas a lükü pwe a tongeni mongö sokun mongö meinisin, nge eman aramas mi apwangapwang lon an lükülük a chök mongö mongön atake.
ROM 14:3 Ewe aramas mi mongö ekewe sokopaten mongö esap esita ewe eman esap mongö ekewe mongö. Nge ätewe mi mongö chök mongön atake esap apwüngü ewe eman mi mongö ekewe mongö meinisin. Pun Kot a pwal etiwa i.
ROM 14:4 En iö pwe kopwe apwüngü nöün eman chon angang? Wisen nöün we masta pwe epwe apwüngala ika an angang a öch ika a ngau. Iwe, an angang epwe fokun öch, pun ach Samol a tufichin alisi pwe epwe öch an angang.
ROM 14:5 Eman aramas a ekieki pwe eu rän a aüchea seni ekewe ekoch rän. Nge pwal eman a ekieki pwe ekewe rän meinisin ra nönnöpök. Eman me eman epwe fokun lükü pwe mefian a pwüng.
ROM 14:6 Ätewe mi ekieki pwe a fokun aüchea ewe eu rän, a föri iei usun fän iten an epwe pwärala pwe a alinga ach Samol. Ätewe mi mongö ekewe mongö meinisin, a föri iei usun pwe epwe alingala ach Samol, pokiten a kilisou ngeni Kot fän iten ewe mongö. Nge ätewe esap mochen mongö ekoch sokun mongö, a föri iei usun pwe epwe alinga ach Samol o kilisou ngeni Kot.
ROM 14:7 Esap wor eman me leich a manau fän püsin itan, esap pwal wor eman a mäla fän püsin itan.
ROM 14:8 Are sia manau, sia manau fän iten ach Samol, nge are sia mäla, sia mäla fän iten ach Samol. Iei mine are sia manau ika mäla, sia nöün ach Samol.
ROM 14:9 Pun Kraist a mäla o manausefäl pwe epwe samoluni ekewe chon manau me ekewe chon mäla.
ROM 14:10 Iwe, pwota en ka apwüngü pwiüm we? Nge pwal en, pwota ka esita pwiüm we? Kich meinisin sipwe ütä mwen mesen Kot pwe sipwe kapwüng me ren.
ROM 14:11 Pun a mak lon ekewe Toropwe mi Pin, “Ewe Samol a apasa: Üa akapelüei, pwe aramas meinisin repwe fotopwäsuk mwen mesei, nge aramas meinisin repwe pwärätä pwe ngang Kot.”
ROM 14:12 Iei mine kich meinisin sipwe en me püsin pwärätä föförün lon manauan ngeni Kot.
ROM 14:13 Iei mine sipwe ükütiu le apwüngüfengenikich eman ngeni eman. Nge iei mine oupwe ekiekietä lon letipemi, pwe ousap föri och met pwimi epwe chepetek ren ika turutiu lon tipis.
ROM 14:14 Pokiten ai nonom lon ach Samol Jesus üa wesewesen lükü pwe esap wor och mongö mi pin ngeniei. Nge are eman aramas a lükü pwe ekoch mongö ra pin ngeni, mürin ewe mongö a pin ngeni.
ROM 14:15 Are pwiüm a weires reöm pokiten ka mongö och sokun mongö, ka föri och föför esap chüen fis fän tong. Kosap mwütätä pwe om mongö och sokun mongö epwe afeiengaua ewe aramas Kraist a mäla fänäsengesin.
ROM 14:16 Kosap föri och met aramas repwe esita mine en ka ekieki pwe a mürina.
ROM 14:17 Pun Mwün Kot esap longolong won anach me ünümach, nge a longolong won pwüng, kinamwe me pwapwa mi feito seni ewe Ngünmifel.
ROM 14:18 Iwe, eman me eman mi angang ngeni Kraist lon ei sokun lapalap a apwapwai Kot o aramas repwe pwal tipeeu ngeni.
ROM 14:19 Iei mine sipwe fokun achocho ngeni mine epwe afisätä kinamwe o alilisfengen le apöchökülafengenikich lefilach.
ROM 14:20 Ousap atala än Kot we angang pokiten mongö. Ekewe mongö meinisin oua tongeni mongö, nge esap pwüng än eman epwe mongö och mine epwe afisätä än eman epwe turutiu lon tipis ren.
ROM 14:21 Esap mürina om kopwe ochoch fituk ika ün wain ika föri och sokun föför mine epwe afisätä än pwiüm we epwe chepetek ren.
ROM 14:22 Met ka lükü won ekei mettoch lefilom chök me Kot. A feiöch ewe aramas esap mengiringir lupwen a föri och a ekieki pwe mi pwüng.
ROM 14:23 Nge are eman a tipemwaramwar ren mine a mongö, Kot epwe apwüngü pwe a tipis lupwen a mongö, pun an föför esap longolong won lükülük. Mettoch meinisin sia föri nge resap longolong won lükülük, iei tipis.
ROM 15:1 Oukich kewe mi pöchökül lon ach lükülük sipwe alisi ekewe mi apwangapwang lon ar lükülük, pwe repwe tipeppos lon ar lükülük, nge sisap föri chök mine sipwe pwapwa ren.
ROM 15:2 Kich meinisin sipwe föri mine pwiich kewe souläng repwe pwapwa o feiöch ren, pwe repwe fefeitä lon ar lükülük.
ROM 15:3 Pun Kraist esap chök kütta mine epwe püsin pwapwa ren. Nge iei usun a mak lon ekewe Toropwe mi Pin, “Ekewe kapasen esit mi toruk ra pwal toriei.”
ROM 15:4 Pun meinisin mine a mak lon ekewe Toropwe mi Pin a mak fän iten ach sipwe kaiö seni, pwe epwe wor ach apilükülüköch ren ach likitü pwal ren ach küna pöchökülen letipach mi torikich seni ekewe Toropwe mi Pin.
ROM 15:5 Nge Kot, i popun ach likitü me ach küna pöchökülen letipach, epwe atufichikemi pwe oupwe tipeeufengen lefilemi ren ämi apirü föförün Kraist Jesus,
ROM 15:6 pwe ämi meinisin oupwe tipeeufengen le mwareiti Kot, i Semen ach Samol Jesus Kraist.
ROM 15:7 Iwe, oupwe etiwafengenikemi lefilemi, usun chök Kraist a etiwakemi, pwe lingen Kot epwe fis.
ROM 15:8 Pun üa ürenikemi pwe Kraist a wiliti eman chon angang fän iten ekewe chon Juta an epwe pwärätä pwe Kot a allükülük, o epwe apwönüetä än Kot kewe pwon ngeni ar kewe lewo,
ROM 15:9 epwe pwal atufichi ekewe chon lükün Israel pwe repwe mwareiti Kot ren an we tong, usun a mak lon ekewe Toropwe mi Pin, “Iei mine üpwe kilisou ngonuk me lein ekewe chon lükün Israel, üpwe kölün mwareiti itom.”
ROM 15:10 A pwal mak, “Ämi chon lükün Israel oupwe fiti nöün Kot kewe aramas le pwapwa!”
ROM 15:11 A pwal mak, “Oupwe mwareiti ewe Samol ämi chon lükün Israel meinisin, oupwe fokun mwareiti i ämi aramas meinisin!”
ROM 15:12 Aisea a pwal apasa, “Eman mwirimwirin Jesi epwe war. Epwe feito pwe epwe nemeni ekewe chon lükün Israel, nge ir repwe anomu ar apilükülük won.”
ROM 15:13 Nge ewe Kot, i popun ämi apilükülük, epwe aurakemi ren watten pwapwa me kinamwe ren ämi lükü i, pwe ämi apilükülüköch epwe säsewu ren manamanen Ngünmifel.
ROM 15:14 Ämi pwii kana, ngang won inisi üa lükü pwe oua urela ren föför mi mürina pwal ren sokopaten silelap, nge oua pwal tongeni püsin öüröürafengenikemi.
ROM 15:15 Nge lon ei toropwe üa fokun pwora le makkei ngenikemi usun ekoch itelap üa mochen achema ngenikemi. Üa föri ei pokiten ewe wis mi aüchea Kot a ngeniei,
ROM 15:16 pwe üpwe eman chon angangen Kraist Jesus ai üpwe angang ngeni ekewe chon lükün Israel. Üa angang usun eman souasor lon ai afalafala ewe Pworausen Manau seni Kot, pwe ekewe chon lükün Israel repwe wiliti eu asor mi tiw me ren Kot, a pin ren Ngünmifel.
ROM 15:17 Iei mine lon ai eufengen me Kraist üa tongeni aingaing lon ai angang ngeni Kot.
ROM 15:18 Pun üsap mochen kapas usun och mettoch, nge üpwe chök kapas usun met Kraist a föri rei lon ai emweni ekewe chon lükün Israel pwe repwe aleasochisi Kot. A föri ei ren ai kewe kapas me föför,
ROM 15:19 ren pöchökülen ekewe asisil me manaman pwal ren manamanen ewe Ngünün Kot. Iei usun üa sai seni Jerusalem tori Illirikum o arongafeili unusen ewe Pworausen Manau usun Kraist.
ROM 15:20 Iei ai mochen fansoun meinisin, pwe üpwe arongafeili ewe Pworausen Manau lon ekewe leni ia aramas resamwo rongorong usun Kraist, pwe üsap aüetä won eu longolong eman a fen föri.
ROM 15:21 Usun a mak lon ekewe Toropwe mi Pin, “Chokewe esap wor eman a aronga ngeniir usun i repwe küna, nge chokewe mi rongorong repwe wewe ren.”
ROM 15:22 Iwe, iei popun a wor met a epetiei fän chomong, pwe üsap tongeni feila remi.
ROM 15:23 Nge iei üa awesala ai angang lon ekei leni. Pokiten chomong ier üa fen mochen feila remi pwe üpwe churikemi,
ROM 15:24 üa apilükülükü ai üpwe tongeni feila remi iei. Ngang üa mochen pwe üpwe churikemi lon ai sai ngeni Spain. Üa mochen oupwe alisiei lon ai sai ngeni ikenan me mürin ai pwapwa le nonom remi ekoch fansoun.
ROM 15:25 Nge iei üpwe feila Jerusalem o uweela alilisin ekewe chon pin mi nom ikenan.
ROM 15:26 Pun ekewe mwichefel lon Masetonia me Krik ra ekiekifengeni ar repwe fangala ar asor fän iten alilisin ekewe chon wöüngau me lein ekewe chon pin lon Jerusalem.
ROM 15:27 Ei ekiek püsin ir ra filätä ar repwe föri. Nge wesewesen pwüngün mi wor wiser pwe repwe alisi ekewe chon wöüngau. Ekewe chon Juta ra fangala ar kewe feiöchün ngün ngeni ekewe chon lükün Israel, iei mine ekewe chon lükün Israel repwe alisi ekewe chon Juta ren ar kewe feiöchün inis.
ROM 15:28 Lupwen üpwe awesala ai angang o ngeniir unusen ewe moni aramas ra fesini fän iter, üpwe churikemi lon ai sai ngeni Spain.
ROM 15:29 Iwe, üa silei pwe lupwen üpwe torikemi, üpwe uwato remi unusen än Kraist we feiöch.
ROM 15:30 Ämi pwii kana, üa pese ngenikemi fän iten ach Samol Jesus Kraist pwal fän iten ewe tong ewe Ngünmifel a fangeto, pwe oupwe etiei lon ämi tiliken le iotek ngeni Kot fänäsengesi.
ROM 15:31 Oupwe iotek pwe üsap feiengau ren ekewe chon Juta resap lükü Jesus, oupwe pwal iotek pwe ai angang lon Jerusalem epwe ketiw me ren ekewe chon pin mi nom ikenan.
ROM 15:32 Mürin ngang üpwe feila remi fän watten pwapwa, are iei letipen Kot, pwe üpwe pwapwa le asösö lon fansoun ai nonom remi.
ROM 15:33 Kot, i popun ach kinamwe, epwe etikemi meinisin. Amen.
ROM 16:1 Üa mochen asile ngenikemi pworausen fefinach we Föpe mi angang lon ewe mwichefel lon Kenkrea.
ROM 16:2 Oupwe etiwa neminei fän iten ewe Samol usun mine oua föri ngeni ekewe chon pin o oupwe alisi i lon mine a osupwang ren, pun i a pwal alisi chomong aramas, a pwal alisiei.
ROM 16:3 Ai kapong ngeni Prisila me Akwila, chienei kewe chon angang lon ewe angangen Kraist.
ROM 16:4 Ra amoleeretä pwe repwe ninnila fän itei. Üa fokun kilisou ngeniir, nge sap ngang chök, pwe pwal chon ekewe mwichefelin chon lükün Israel meinisin.
ROM 16:5 Pwal ai kapong ngeni ewe mwichefel mi chufengen lon imwer. Ai kapong ngeni chienei mi achengicheng Epänetus, i ätewe mi akomwen lükü Kraist lon ewe fanü Asia.
ROM 16:6 Ai kapong ngeni Maria, neminewe mi angang weires fän itemi.
ROM 16:7 Pwal ai kapong ngeni Antronikus me Junias chienei kewe chon Juta mi etiei le nom lon imwen fötek. Ra fokun iteföüla me lein ekewe soukünö o ra pwal akom le souläng mwei.
ROM 16:8 Ai kapong ngeni Ampliatus chienei we mi achengicheng lon ach Samol.
ROM 16:9 Ai kapong ngeni Urpanus chienach we chon angang lon än Kraist angang, pwal ngeni Stakis chienei we mi achengicheng.
ROM 16:10 Ai kapong ngeni Apeles, an allükülük ngeni Kraist a pwäpwäla. Pwal ai kapong ngeni chon leimwen Aristopulus.
ROM 16:11 Ai kapong ngeni Herotian, eman chienei chon Juta, pwal ngeni ekewe souläng ir chon leimwen Narsisus.
ROM 16:12 Ai kapong ngeni Trifana me Trifosa, ir mi angang ngeni ach Samol, pwal ai kapong ngeni fefinei mi achengicheng Persis, neminewe mi fokun angang weires fän iten ach Samol.
ROM 16:13 Ai kapong ngeni Rufus, i ewe chon angang mi iteföüla lon än ewe Samol angang, pwal ngeni inan we mi tümwünüei usun eman nöün.
ROM 16:14 Ai kapong ngeni Asinkritus, Flekon, Hermes, Patropas, Hermas, pwal ngeni ekewe souläng mi nom rer.
ROM 16:15 Ai kapong ngeni Filolokus me Julia, ngeni Nereus me fefinan we, ngeni Olimpas, pwal ngeni ekewe chon pin meinisin mi nom rer.
ROM 16:16 Oupwe kapongfengen lefilemi ren ewe kapongen souläng. Chon ewe mwichefelin Kraist meinisin ra kapong ngenikemi.
ROM 16:17 Ämi pwii kana, üa pese ngenikemi pwe oupwe afälikemi ren chokewe mi afisätä kinikinfesen lefilen aramas o atoka än aramas lükülük, ir ra ü ngeni ekewe kapas sia aiti ngenikemi. Ousap chiechi ngeniir.
ROM 16:18 Pun chokewe mi föri ei sokun föför resap angang ngeni Kraist ach Samol, nge ra angang ngeni püsin inisir. Ren ar kapas motoutou me kapas amichimich ra atupu ekewe aramas mi miritimang.
ROM 16:19 Aramas meinisin ra rongorong usun ämi aleasochis ngeni ewe Pworausen Manau, iei popun üa pwapwa usumi. Üa mochen ämi oupwe miritikai ngeni met a mürina, nge oupwe miritimang ngeni mine a ngau.
ROM 16:20 Iwe, Kot, i popun ach kinamwe, epwe müttir apachacha Satan fän pechemi. Ümöümöchün ach Samol Jesus epwe nonom remi.
ROM 16:21 Timoty, chienei we chon angang, a kapong ngenikemi, pwal Lusius, Jason me Sosipater, ir chienei kewe chon Juta, ra pwal kapong ngenikemi.
ROM 16:22 Ngang Tertius, ewe mi makkei ei toropwe, üa eäni ewe kapongen souläng ngenikemi.
ROM 16:23 Kaius, ätewe üa nonom ren, pwal chon ewe mwichefel a mwichfengen lon imwan ra kapong ngenikemi. Erastus, ewe chon tümwünü moni fän iten ewe telinimw, me pwiich Kwartus ra kapong ngenikemi.
ROM 16:24 [Ümöümöchün ach Samol Jesus Kraist epwe nonom remi meinisin. Amen.]
ROM 16:25 Ousipwe mwareiti Kot! I a tongeni anükücharakemi lon ämi lükülük ren ewe Pworausen Manau üa afalafala, ewe pworaus usun Jesus Kraist, pwal ren pwälan ewe monomon mi let a monomonola me lom lon chomong, chomong fansoun.
ROM 16:26 Nge iei ena monomon a pwäpwäla ren makkeen ekewe soufos, o ren än Kot, ewe mi manau tori feilfeilachök we allük a pwäla ngeni chon ekewe mwü meinisin ar repwe silei usun, pwe meinisin repwe lükü o aleasochis ngeni.
ROM 16:27 Ewe eman chök Kot, i chök ewe eman mi unusen tipachem, epwe ling ren Jesus Kraist tori feilfeilachök! Amen.
1CO 1:1 Ngang Paulus, ewe mi kö me ren letipen Kot an epwe nöün Kraist Jesus soukünö, pwal pwiich ei Sostenes,
1CO 1:2 aia kapong ngeni än Kot we mwichefel mi nom lon Korint, ngeni chokewe mi küna pin lon Kraist Jesus, ir mi kö pwe repwe pin fitifengen me chokewe ekis meinisin mi köri iten ach Samol Jesus Kraist, i ouach Samol:
1CO 1:3 Iwe, Samach Kot me ach Samol Jesus Kraist epwe ngenikemi ümöümöch me kinamwe.
1CO 1:4 Üa kilisou ngeni Kot fänäsengesimi fansoun meinisin pokiten ewe ümöümöch i a ngenikemi ren Kraist Jesus.
1CO 1:5 Pun lon Kraist oua wöü lon mettoch meinisin, pwal lon ämi kapas me ämi silelap meinisin.
1CO 1:6 Ach kapasen pwärätä usun Kraist a fokun nüküchar lomi,
1CO 1:7 iei mine ousap osupwang ren och ekewe feiöchün Ngün lupwen oua witiwiti ach Samol Jesus Kraist an epwe pwä.
1CO 1:8 I epwe pwal anükücharakemi tori lesopolan, pwe esap wor eman epwe tip ngenikemi och mi mwäl lon ewe Ränin ach Samol Jesus Kraist.
1CO 1:9 Kot a allükülük, i ewe a körikemi pwe oupwe chiechi ngeni Nöün we Jesus Kraist ach Samol.
1CO 1:10 Üa tüngormau ngenikemi, ämi pwii kana, fän iten ach Samol Jesus Kraist, pwe oupwe tipeeufengen lefilemi, pwe esap wor kinikinfesen leimi. Oupwe fokun tip-eu me ekiek eu.
1CO 1:11 Ämi pwii kana, ekoch aramas seni än Kloe famili ra asile ngeniei pwe mi wor aninifengen lefilemi.
1CO 1:12 Iei met üa kapas usun: Eman a apasa, “Ngang nöün Paulus souläng,” eman a pwal apasa, “Ngang nöün Apolos souläng,” pwal eman a apasa, “Ngang nöün Petrus souläng,” nge pwal eman a apasa, “Ngang nöün Kraist souläng.”
1CO 1:13 Ifa usun, Kraist a kinikinfesen? Ifa usun, Paulus a mäla won iräpenges fän itemi? Ifa usun, oua papatais ngeni iten Paulus?
1CO 1:14 Ngang üa kilisou ngeni Kot pwe üsap papataisi eman leimi, chilon chök Krispus me Kaius,
1CO 1:15 iei mine esap wor eman a tongeni apasa pwe üa papataisi eman ngeni itei.
1CO 1:16 (Ewer, üa pwal papataisi Stefanas me chon leimwan, nge üsap tongeni chechemeni ika üa papataisi eman me lükün.)
1CO 1:17 Kraist esap akünöüei pwe üpwe papataisi aramas, nge a akünöüei pwe üpwe arongafeili ewe Pworausen Manau, nge sap lon kapasen tipachemen aramas, pwe än Kraist mäla won iräpenges esap lomotongau.
1CO 1:18 Pun ewe kapas usun än Kraist mäla won iräpenges och kapas mi umwes ngeni chokewe mi pöütmwälila, nge ngenikich mi küna manau och manamanen Kot.
1CO 1:19 Pun a mak lon ekewe Toropwe mi Pin, “Ngang üpwe atala tipachemen ekewe soutipachem o awesi ekiekin ekewe souekiek.”
1CO 1:20 Iwe, ifa i ewe soutipachem? Ifa i ewe souekiek? Ifa i ewe mi silelap le anini lon kapasen ei fanüfan? Ifa usun, Kot esap pwärätä pwe tipachemen ei fanüfan mi chök umwes?
1CO 1:21 Pun lon än Kot tipachem, a föri pwe aramas resap tongeni silei i ren püsin ar tipachem. Nge Kot a akota pwe epwe amanaua chokewe mi lükü ewe kapas aia afalafala, iei ewe kapas ekoch aramas ra aita ngeni pwe och kapasen umwes.
1CO 1:22 Ekewe chon Juta ra mochen küna asisil mi alletätä pwe ewe kapas a pop seni Kot, nge ekewe chon Krik ra kütta tipachem.
1CO 1:23 Nge kich sia arongafeili ewe Kraist mi iräpenges, iei ewe kapas chon Juta ra chepetek ren, nge ekewe chon lükün Israel ra apasa pwe och kapas mi umwes.
1CO 1:24 Nge ren chokewe Kot a köriir me lein chon Juta me chon lükün Israel, Kraist ewe manamanen Kot me ewe tipachemen Kot.
1CO 1:25 Pun inamwo ika aramas ra apasa pwe Kot a umwes, nge än Kot umwes a tipachem seni än aramas tipachem. Inamwo ika aramas ra apasa pwe Kot a apwangapwang, nge an apwangapwang a pöchökül seni än aramas pöchökül.
1CO 1:26 Ämi pwii kana, oupwe chechemeni usun nonomumi me lom lupwen Kot a körikemi. Lon ekiekin aramas sap chomong me leimi ra tipachem, sap chomong leimi a wor maner, sap chomong ra uputekia.
1CO 1:27 Nge Kot a filätä ekewe mi umwes me ren fanüfan, pwe epwe asäwa ekewe chon tipachem. Kot a pwal filätä ekewe mi apwangapwang me ren fanüfan, pwe epwe asäwa ekewe chon pöchökül.
1CO 1:28 A filätä ekewe mi uputekison me ren fanüfan, pwal ekewe mi küna koput me ekewe esap wor aüchear, pwe epwe awesi ekewe mi wor aüchear me ren fanüfan.
1CO 1:29 Iei popun esap wor eman aramas epwe tongeni aingaing mwen mesen Kot.
1CO 1:30 Nge Kot chök popun ämi nonom lon Kraist Jesus. Kot a föri pwe Kraist ach tipachem, ach pwüng, ach pin me ach ngas seni ach tipis.
1CO 1:31 Pun iei usun a mak lon ekewe Toropwe mi Pin, “Iö a mochen aingaing epwe aingaing won ach Samol.”
1CO 2:1 Iwe, ämi pwii kana, lupwen üa feila remi pwe üpwe afalafala ewe kapas mi let usun Kot a monomonola me lom, üsap aea kapas mi tekia ika kapasen tipachem.
1CO 2:2 Pun lupwen üa nonom remi, üa filätä pwe üsap silei och pwe Jesus Kraist chök, nge enletin an we mäla won iräpenges.
1CO 2:3 Lupwen üa nonom remi, üa apwangapwang o chechech fän watten ai niuokus.
1CO 2:4 Iwe, ai afalafal me ai asukul ngenikemi esap fis ren kapasen tipachemen aramas ra aea le elliapa aramas, nge a fis ren sokun afalafal mi alletätä manamanen Kot me Ngünün,
1CO 2:5 pwe ämi lükü esap longolong won tipachemen aramas, nge won manamanen Kot.
1CO 2:6 Nge sia aronga eu kapasen tipachem ngeni chokewe mi mirit lon ar souläng. Esap ewe sokun tipachem mi pop seni ei fanüfan ika seni ekewe chon nemenem lon ei fanüfan, ar nemenem epwe wesila.
1CO 2:7 Ewe tipachem sia arongafeili, iei än Kot we tipachem mi monomon, a monola seni aramas, nge Kot a fen amolätä me mwen än fanüfan esamwo wor, pwe sipwe küna ling ren.
1CO 2:8 Esap wor eman sounemenemen ei fanüfan a silei ei tipachem, pun ika repwe silei, resap iräpengesi ewe Samol mi ling.
1CO 2:9 Nge iei usun a mak lon ekewe Toropwe mi Pin, “Met aramas resap mwo küna ika rongorong, met aramas resap mwo ekieki lon letiper pwe epwe fis, iei ewe mettoch Kot a amolätä fän iten chokewe mi echeni.”
1CO 2:10 Nge Kot a pwäri ngenikich ei monomon ren Ngünün we. Pun Ngünün we a atittina mettoch meinisin, pwal mwo nge ekewe ekiekin Kot mi alolol.
1CO 2:11 Pun ren eman aramas püsin ngünün chök a silei usun an ekiek. Ina chök usun Ngünün Kot a püsin silei usun ekiekin Kot.
1CO 2:12 Kich sisap angei ewe ngünün fanüfan, nge sia angei ewe Ngün Kot a tinato, pwe sipwe silei meinisin mine Kot a fang ngenikich.
1CO 2:13 Iei mine äm aisap afalafala ekewe kapas aitien aramas seni lon ar tipachem, nge aia afalafala ekewe kapas aitien ewe Ngünmifel lupwen aia awewei ekewe kapas mi let ngeni chokewe mi eäni Ngünmifel.
1CO 2:14 Iö esap eäni Ngünmifel esap tongeni etiwa ekewe lifang mi feito seni ewe Ngünün Kot, pun epwe ekieki ngeniir pwe ekoch mettochun umwes. Esap tongeni weweitiir, pun aramas ra chök tongeni mefi aüchear ren ewe Ngünmifel.
1CO 2:15 Nge iö a eäni Ngünmifel a tongeni weweiti aüchean mettoch meinisin, nge esap wor eman a tongeni apwüngü püsin i.
1CO 2:16 Pun iei usun met a mak lon ekewe Toropwe mi Pin, “Iö a silei ekiekin ewe Samol? Iö a tongeni öüröüra?” Nge kich sia eäni ekiekin Kraist.
1CO 3:1 Ämi pwii kana, üsap tongeni kapas ngenikemi usun ai üpwe kapas ngeni ekewe aramas mi eäni Ngünmifel. Nge üa kapas ngenikemi usun itä nge ämi soulängin fituk, usun semirit lon Kraist.
1CO 3:2 Ngang üa aünükemi milik, nge üsap amongöü ngenikemi mongö mi pöchökül, pun ousap mwo tufich ngeni. Nge pwal iei ousap mwo tufich ngeni,
1CO 3:3 pokiten oua chüen manaueni manauen soulängin fituk. Pun lupwen a wor lolowo me aninifengen lefilemi, ifa usun ei esap alletätä pwe ämi oua pop seni ei fanüfan? Ifa usun, ousap föri föförün chon ei fanüfan?
1CO 3:4 Pun are eman leimi a üra, “Ngang nöün Paulus souläng,” pwal eman a apasa, “Ngang nöün Apolos souläng,” ifa usun, ousap föri föförün chon ei fanüfan?
1CO 3:5 Iwe, iö Apolos? Pwal iö Paulus? Äm aia chök nöün Kot chon angang mi alisikemi pwe oupwe lükü Kraist. Eman me eman äm aia föri ewe angang ach Samol a awisa ngenikem.
1CO 3:6 Ngang üa fotuki ekewe pwükil, Apolos a atütüür, nge Kot a amäriiretä.
1CO 3:7 Iei mine ewe chon fotuki me ewe chon atütü esap wor aüchear, nge Kot echök ewe mi aüchea, pun a amärätä ekewe irä.
1CO 3:8 Esap wor sokofesenin ewe chon fofot me ewe chon atütü, Kot epwe liwini ngeni eman me eman liwinin aükükün an angang a föri.
1CO 3:9 Pun äm aia angangfengen lon ewe angang fän iten Kot, nge ämi än Kot tanipi. Ämi pwal imwen Kot.
1CO 3:10 Ren ewe ümöümöch Kot a fang ngeniei, ngang üa föri ewe longolong usun eman mi silelap le aüetä imw, nge eman aramas a köütä won. Iwe, eman me eman epwe tümwünüöchü met epwe aüetä won.
1CO 3:11 Pun Kot a fen anomu Jesus Kraist pwe i chök ewe longolong, nge esap pwal wor eu longolong me lükün.
1CO 3:12 Ekoch repwe aea kolt, silifer ika fau aüchea pisekin köütä won ewe longolong, nge pwal ekoch repwe aea mwüch, fetilipwas ika äsät.
1CO 3:13 Iwe, aüchean än eman me eman angang epwe pwä me fatala lon ewe Ränin Kraist. Pun lon ena rän ekkei epwe afata angangen eman me eman. Ekkei epwe asosota än eman me eman angang, pwe epwe pwä aüchean.
1CO 3:14 Are ewe ekkei esap kenala mine eman a aüetä won ewe longolong, ewe chon aüetä epwe angei liwinin.
1CO 3:15 Nge are än eman angang a karala, esap angei liwinin. Iwe, püsin i epwe küna manau usun chök nge itä a sü seni lon ewe ekkei.
1CO 3:16 Ifa usun, ousap silei pwe ämi än Kot imwenfel, nge Ngünün Kot a nom lomi.
1CO 3:17 Iei mine are eman a atai än Kot imwenfel, ätewe Kot epwe atai. Pun än Kot imwenfel a pin, iwe, ämi än Kot imwenfel.
1CO 3:18 Ousap püsin atupukemi. Are eman leimi a ekieki pwe a tipachem ren tipachemen ei fanüfan, i epwe wiliti eman aramas mi umwes fän iten an epwe wesewesen eman aramas mi tipachem.
1CO 3:19 Pun met ei fanüfan a ekieki pwe ina tipachem, a umwes me ren Kot. Iei usun a mak lon ekewe Toropwe mi Pin, “Kot a liapeni ekewe chon tipachem lon ar tipachemsolä.”
1CO 3:20 A pwal mak lon ekoch Toropwe mi Pin, “Ewe Samol a silei pwe ekiekin ekewe chon tipachem a lomotongau.”
1CO 3:21 Iei mine esap wor eman epwe aingaing won met aramas ra föri. Pun mettoch meinisin ra nom fän nemeniemi:
1CO 3:22 Paulus, Apolos me Petrus, ei fanüfan, manau me mäla, ikenai me ewe fansoun mürin, ekei mettoch meinisin ämi,
1CO 3:23 iwe, ämi nöün Kraist, nge Kraist nöün Kot.
1CO 4:1 Iwe, ämi oupwe ekieki ngenikem pwe äm nöün Kraist chon angang, wisem pwe aipwe tümwünü än Kot we monomon mi let.
1CO 4:2 Eu chök mettoch epwe fokun aüchea ren eman chon angang, pwe epwe allükülük ngeni an samol.
1CO 4:3 Üsap fokun ekieki ika üpwe küna kapwüng me remi, ika me ren eu mwichen aramas ir soukapwüng. Üsap pwal mwo nge püsin apwüngüei.
1CO 4:4 Letipei a limöch, nge ei esap alletätä pwe esap wor ai tipis. Ach Samol chök i ewe epwe apwüngüei.
1CO 4:5 Iei mine ousap apwüngü eman me mwen an epwe war ewe fansoun mi fich. Ewe amüchülan kapwüng epwe witiwit tori ach Samol epwe war. I epwe asarama mine a monomonola lon rochopwak o pwärawu mine a monomon lon ekiekin aramas. Mürin aramas meinisin repwe angei me ren Kot iteüöchür lon met a fich ngeni eman me eman.
1CO 4:6 Ämi pwii kana, ekei mettoch meinisin üa kapas usun iei, üa eänikem me Apolos kapasen awewe, pwe oupwe tongeni kaiö me rem met wewen ekei kapas, “Oupwe chök apwönüetä mine a mak.” Esap wor eman epwe ingeiti eman are oputa eman.
1CO 4:7 Pun iö a seikuketä pwe kopwe lap seni ekewe ekoch? Ifa usun, Kot esap fang ngonuk mettoch meinisin mine ka eäni? Pwota ka aingaing won met mi wor reöm usun itä nge esap minen lifang?
1CO 4:8 Ifa usun, a fen wor remi mettoch meinisin oua osupwang ren? Oua fen pisekisekila? Ifa usun, oua sounemenem, nge äm aisap etikemi? Üa fokun äneän pwe amwo oupwe nemenem, pwe äm aipwe etikemi le nemenem.
1CO 4:9 Pun üa ekieki pwe Kot a aleniakem äm soukünö, pwe aipwe nom fälapalapen aramas meinisin, pwe aia wewe ngeni aramas a fen kapwüngüla pwe repwe ninnila me mwen mesen aramas, pwe aipwe och minen atakirikir me ren ekewe chon läng meinisin me chon fanüfan meinisin.
1CO 4:10 Äm chon umwes fänäsengesin Kraist, nge ämi chon tipachem lon Kraist! Äm chon apwangapwang, nge ämi chon pöchökül. Äm chon küna turunufas, nge ämi chon iteüöch.
1CO 4:11 Tori ei fansoun äm aia echik me kaka, aia üföüf üf mi kamwakam, ra wichikem, aia süsüfeil ngeni leni me leni.
1CO 4:12 Aia angang weires ren püsin pöüm. Lupwen ra ottekikem, aia afeiöchüür, lupwen ra ariaföüükem, aia engila ngeniir.
1CO 4:13 Lupwen ra aitengauakem, aia pölüeniir lon kapas pwetete. Aia wewe ngeni mettoch lon lenien koturula, aia wewe ngeni limengauen ei fanüfan tori ikenai.
1CO 4:14 Üa makei ekei kapas ngenikemi, sap pokiten üa mochen asäwakemi, nge fän iten ai mochen öüröürakemi usun püsin nei mi achengicheng.
1CO 4:15 Pun inamwo ika a wor engol ngeröü nöümi souemwen lon manauen ämi souläng, nge oua chök semeni eman. Pun lon Kraist Jesus üa wiliti eman sememi ren ai afalafala ewe Pworausen Manau ngenikemi.
1CO 4:16 Iei mine üa tüngormau ngenikemi pwe oupwe apirüei.
1CO 4:17 Iei popun üa tinala remi Timoty, i nei we mi achengicheng o allükülük lon ach Samol. I epwe achema ngenikemi usun ei manau mi fö üa manaueni lon Kraist Jesus usun üa afalafala lon ekewe mwichefel ekis meinisin.
1CO 4:18 Ekoch me leimi oua lamalamtekia, pun oua ekieki pwe üsap feito pwe üpwe churikemi.
1CO 4:19 Nge are epwe fen letipen Kot, ngang üpwe müttir feila remi. Mürin üpwe püsin küna ewe tufich ekei aramas mi lamalamtekia ra eäni, nge sap chök lon met ra apasa.
1CO 4:20 Pun Mwün Kot esap pwä lon kapas chök, nge lon manaman.
1CO 4:21 Met ämi oua mochen? Oua mochen ai üpwe feila remi fän efoch wok, ika üpwe feila remi fän tong me lukpwetete?
1CO 5:1 Iwe, aramas ra apworausa pwe mi wor föförün lisowu lefilemi, eu sokun föför mi fokun ngau, pwe esap mwo nge fis ren ekewe chon lükün lamalam. Eman a asile ngeniei, pwe mi wor eman mwän a kon ren pwülüen saman.
1CO 5:2 Iwe, epwe ifa usun ämi oupwe tongeni lamalamtekia? Nge pwüngün pwe oupwe fokun letipeta, oupwe pwal atowu seni lefilemi ätewe mi föri ei sokun föför.
1CO 5:3 Inamwo ika ngang üsap nom remi ren inisi, nge üa nom remi lon ngüni. Üa fen apwüngala liwinin tipisin ätewe mi föri ei sokun föför mi fokun ngau usun itä nge üa nom remi.
1CO 5:4 Lupwen oua mwichfengen fän iten ach Samol Jesus, ngang üa nom remi lon ngüni. Ren manamanen ach Samol Jesus mi nom remi,
1CO 5:5 oupwe esechala ätei ngeni Satan pwe inisin epwe mäfeiengau, nge ngünün epwe küna manau lon ewe Ränin ach Samol.
1CO 5:6 Esap öch ngenikemi pwe oupwe lamalamtekia. Ousap silei pwe ekis chök iis a apwola unusen eu pilawa?
1CO 5:7 Oupwe atowu ewe issin lom, a aliosunätä tipis, pwe oupwe wesewesen limöch. Mürin oupwe wewe ngeni pilawa mi fö a öüwöü, esap wor iis lon. Ngang üa silei pwe ina usumi. Pun Kraist ach we Lamen Pasofer a fen ninnila.
1CO 5:8 Iei mine ousipwe föri ewe mongön Pasofer, sap ren ewe pilawa mi wor ewe issin lom lon, a aliosunätä tipis me föföringau, nge ren ewe pilawa esap wor iis lon, a aliosunätä limöch me let.
1CO 5:9 Lon ewe toropwe üa fen makkei ngenikemi, üa ürenikemi pwe ousap chiechi ngeni ekewe aramas mi föri sokun föför mi fokun ngau.
1CO 5:10 Nge esap iei wewen ai kapas, pwe ousap chufengen me ekewe chon lükün mi föri sokun föför mi fokun ngau, ika chon tipemong, ika chon solä, ika chon angang ngeni anümwäl, pun are epwe iei usun, oupwe fokun towu seni ei fanüfan.
1CO 5:11 Iwe, iei wewen ai kei kapas, pwe ousap chiechi ngeni eman aramas mi püsin aita ngeni pwe i eman souläng, nge fen i eman mi föri sokun föför mi fokun ngau, ika eman chon tipemong, ika eman chon angang ngeni anümwäl, ika eman chon aitengaua aramas, ika eman chon ünüpuch, ika eman chon solä. Ousap mwo nge mongöfengen me ena sokun aramas.
1CO 5:12 Esap wor ai pwüng pwe üpwe apwüngü chokewe mi nom lükün mwichefel. Ifa usun, esap wisemi pwe oupwe apwüngü chokewe mi nom lon mwichefel?
1CO 5:13 Kot epwe apwüngü chokewe mi nonom lükün. Pun iei usun a mak lon ekewe Toropwe mi Pin, “Oupwe atowu ewe aramas mi föföringau seni lon ämi we mwich.”
1CO 6:1 Are eman leimi a wor an fitikoko ngeni eman chiechian souläng, pwota a tongeni uwala ren soukapwüng resap souläng, nge esap uwala ren ekewe chon pin?
1CO 6:2 Ousap silei pwe ekewe chon pin repwe apwüngü fanüfan? Nge are oupwe apwüngü fanüfan, ifa usun ousap tufich ngeni ämi oupwe apwüngü ekewe mettoch mi kisikis?
1CO 6:3 Ousap silei pwe kich sipwe apwüngü ekewe chon läng? Iwe, sipwe fokun apwüngü ekewe mettochun lon ei manau.
1CO 6:4 Are ekei sokun osukosuk a fis, pwota oupwe uweerela ren ekewe aramas esap wor wiser lon mwichefel?
1CO 6:5 Asäwemi! Ifa usun, esap wor eman mi tipachem me leimi epwe tongeni apwüngü fitikokon lefilen souläng?
1CO 6:6 Nge eman souläng a uwala lon kapwüng an fitikoko ngeni pwal eman chiechian souläng, pwe eman soukapwüng esap souläng epwe apwüngü.
1CO 6:7 Ämi uwala lon kapwüng fitikokon lefilemi a pwärätä pwe oua kuf lon ämi souläng. Ifa usun, esap fen öch än eman epwe föri mine a mwäl ngenikemi? Esap fen öch än eman epwe soläni pisekimi?
1CO 6:8 Nge fen püsin ämi oua föri mine a mwäl o soläni pisekin eman, ei mwo nge oua fen föri ngeni chiechiemi souläng.
1CO 6:9 Enlet, oua silei pwe ekewe chon föföringau resap mwüni Mwün Kot. Ousap püsin atupukemi! Chon föri föförün lisowu, ika chon angang ngeni anümwäl, ika chon lisowu ngeni mi pwüpwülü, ika chon amömö inisir, ika chon lisowufengen lefilen mwän me mwän ika fefin me fefin,
1CO 6:10 ika chon solä, ika chon tipemong, ika chon ünüpuch, ika chon aitengaua aramas, ika chon achomau resap mwüni mwün Kot.
1CO 6:11 Iwe, ekoch me leimi ra föri ekei sokun föför me lom. Nge oua fen küna limöch seni ämi tipis, oua küna pin, oua küna pwüng fän iten ach Samol Jesus Kraist, pwal ren ewe Ngünün ach Kot.
1CO 6:12 Ekoch repwe apasa, “A mwümwütä ngeniei ai üpwe föri mettoch meinisin.” Ewer, nge esap mettoch meinisin ra mürina ngonuk. Üa tongeni apasa, pwe a mwümwütä ngeniei ai üpwe föri mettoch meinisin, nge üsap mwütätä pwe och mettoch epwe nemeniei.
1CO 6:13 Ekoch repwe apasa, “Mongö a wor fänäsengesin lukach, nge lukach a wor fänäsengesin mongö.” Ewer, nge lon eu rän Kot epwe atala ir me ruu. Sisap aea inisich fänäsengesin föförün lisowu mi ngau, nge sipwe aea fänäsengesin ach angang ngeni ach Samol, iwe, ach Samol epwe tümwünü inisich.
1CO 6:14 Ren än Kot manaman a amanauasefäli ach Samol seni mäla, epwe pwal amanauasefälikich.
1CO 6:15 Ousap silei pwe inisimi eu kinikinin ewe inisin Kraist? Ifa usun, üpwe angei eu kinikinin inisin Kraist o föri pwe epwe eu kinikinin inisin eman fin lisowu? Apwi, esap fokun ina!
1CO 6:16 Ousap silei pwe eman mwän mi chufengen me eman fin lisowu a iniseu ren? Pun iei usun a mak lon ekewe Toropwe mi Pin, “Ekewe ruoman repwe wiliti eu chök inis.”
1CO 6:17 Nge iö a chufengen me ach Samol a eufengen me i lon ngün.
1CO 6:18 Ousap fokun föri sokun föförün lisowu! Ekewe sokun tipis meinisin eman aramas a föri esap küü inisin, nge are eman aramas a föri föförün lisowu a tipis ngeni püsin inisin.
1CO 6:19 Ousap silei pwe inisimi eu imwenfelin Ngünmifel a nom lomi, ewe Ngün Kot a ngenikemi? Ousap püsin nemenikemi, pwe ämi nöün Kot,
1CO 6:20 i a mönikemi ren eu liwin, iei mine oupwe alinga Kot ren inisimi.
1CO 7:1 Iwe, iei üpwe pworaus usun ekewe mettoch oua makketo rei: A mürina ngeni eman mwän an esap pwüpwülü.
1CO 7:2 Nge pokiten a wattela föförün lisowu, eman mwän epwe wor püsin pwülüan, pwal eman fefin epwe wor püsin pwülüan.
1CO 7:3 Eman mwän epwe föri wisan ngeni pwülüan, pwal eman fefin epwe föri wisan ngeni pwülüan. Eman me eman leir epwe föri pwüngün lefilan ngeni pwülüan.
1CO 7:4 Pun eman fefin esap wor an nemenem won püsin inisin, pwe pwülüan a nemeni. Pwal ina chök usun, eman mwän esap wor an nemenem won püsin inisin, pwe pwülüan a nemeni.
1CO 7:5 Ämi mi pwüpwülü ousap amwöchü inisimi seni pwülüemi are ousap akomwen tipeeufengen won pwe oupwe föri lon eu fansoun, pwe epwe wor fansoun ämi iotek. Mürin oupwe pwal konsefälfengen, pwe Satan esap sotunikemi pokiten ousap tongeni püsin nemeni inisimi.
1CO 7:6 Ekei kapas üa ürenikemi esap eu allük, pun mi fen mwütätä ngenikemi.
1CO 7:7 Üa wesewesen mochen pwe ämi meinisin oupwe wewe ngeniei. Nge eman me eman a wor en me lifangan me ren Kot, eman a angei och sokun lifang, nge pwal eman och sokun lifang.
1CO 7:8 Iwe, üa ürenikemi, ämi chokewe esap wor pwülüemi, pwal ämi mi mä pwülüemi, pwe epwe mürina ngenikemi ämi ousap pwüpwülü usun pwal ngang.
1CO 7:9 Nge are ousap tongeni nemeni mochenin fitukemi, oupwe pwüpwülü. Pun a mürina ämi oupwe pwüpwülü lap seni ämi oupwe nom lon pwichikaren ämi mochenia.
1CO 7:10 Ngeni ämi kewe mi pwüpwülü a wor eu allük, sap ai, nge än ach Samol: Eman fefin esap mwü seni pwülüan,
1CO 7:11 nge are epwe mwü seni, epwe chök nonom lon an lipich, ika epwe chäsefäl ngeni pwülüan. Iwe, eman mwän esap fokun mwü seni pwülüan.
1CO 7:12 Ngeni pwal ekewe ekoch ngang üa üreniir, nge sap ach Samol: Are eman mwän mi souläng a pwüpwülü ngeni eman fefin esap souläng, nge neminewe a tipeeu ngeni an epwe nonom ren, ätewe esap fokun mwü seni.
1CO 7:13 Iwe, are eman fefin mi souläng a pwüpwülü ngeni eman mwän esap souläng, nge ätewe a tipeeu ngeni an epwe nonom ren, neminewe esap fokun mwü seni.
1CO 7:14 Pun ewe mwän esap souläng a küna pin ren pwülüan we mi souläng, nge ewe fefin esap souläng a küna pin ren pwülüan we mi souläng. Pun are esap iei usun, nöür kewe repwe usun nöün chon lükün, nge iei ra pin.
1CO 7:15 Nge are eman esap souläng a mochen mwü seni pwülüan mi souläng, epwe mwüla. Lon ei sokun lapalap ewe mwän mi souläng ika ewe fefin mi souläng a ngasala. Pun Kot a körikemi ämi oupwe nonom lon kinamwe.
1CO 7:16 En fefin mi souläng, ifa usun om kopwe silei pwe kopwe tongeni amanaua pwülüom we? Ika en mwän mi souläng, ifa usun om kopwe silei pwe kopwe tongeni amanaua pwülüom we?
1CO 7:17 Iwe, eman me eman epwe chök nonom lon nonomun lon manauan usun ach Samol a akota ngeni lupwen Kot a köri. Iei ewe allük üa afalafala lon ekewe mwichefel meinisin.
1CO 7:18 Are eman mwän a fen sirkomsais lupwen Kot a köri, esap fokun sotuni an epwe amola asisilen an sirkomsais. Nge are eman mwän esap sirkomsais lupwen Kot a köri, esap kütta an epwe sirkomsais.
1CO 7:19 Pun esap wor lomoten än eman mwän sirkomsais ika esap sirkomsais, pwe a chök wor aüchean än eman epwe aleasochisi än Kot allük.
1CO 7:20 Eman me eman aramas epwe chök nonom lon nonomun a nom lon lupwen Kot a köri.
1CO 7:21 Ifa usun, en eman amanau lupwen Kot a köruk? Kosap lolilen usun. Nge are kopwe tufichin ngasala, kopwe achocho le alomota ewe tufich.
1CO 7:22 Pun eman amanau mi kö me ren ach Samol, i eman nöün ach Samol mi ngas. Ina chök usun ätewe mi ngas lupwen a kö me ren Kraist, i eman nöün Kraist amanau.
1CO 7:23 Kot a mönikemi ren eu liwin, iei mine ousap wiliti nöün aramas amanau.
1CO 7:24 Ämi pwii kana, eman me eman leimi epwe chök chiechi ngeni Kot o nonom lon nonomun lon manauan lupwen Kot a köri.
1CO 7:25 Iwe, usun ekewe föpwül esap wor pwülüer üa fen mak ngenikemi: Esap wor eu allük seni ach Samol, nge üa atowu mefiei usun eman mi allükülük pokiten tongen ach Samol.
1CO 7:26 Pokiten ekei riaföü mi fis lon ei fansoun, üa ekieki pwe a öch än eman aramas epwe chök nonom lon mine nonomun.
1CO 7:27 Ifa usun, a wor pwülüom? Iwe, kosap mwü seni. Ifa usun, esap wor pwülüom? Iwe, kosap kütta eman pwülüom.
1CO 7:28 Nge are kopwe pwüpwülü, kosap tipis ren. Are eman föpwül epwe pwüpwülü, esap tipis ren. Nge chokewe mi pwüpwülü a wor chomong ar osukosuk lon manauer, iwe, üa mochen pwe ousap tolong lon ekei sokun osukosuk.
1CO 7:29 Ämi pwii kana, iei wewen mine üa apasa: Esap chüen langatam ach fansoun. Seni ikenai, ekewe mwän mi pwüpwülü repwe nonom usun itä nge resap pwüpwülü,
1CO 7:30 chokewe mi kechü repwe usun itä nge resap kechü, chokewe mi pwapwa repwe usun itä nge resap pwapwa, chokewe mi kamö och repwe usun itä nge resap eäni och,
1CO 7:31 nge chokewe mi aea mettochun fanüfan repwe usun itä nge resap aea. Pun lapalapen ei fanüfanen ikenai epwe morola.
1CO 7:32 Iwe, üa mochen pwe ousap öürek. Eman mwän esap pwüpwülü a chök ekieki usun än ach Samol angang, pun a chök mochen apwapwai ach Samol.
1CO 7:33 Nge eman mwän mi pwüpwülü a ekieki usun mettochun fanüfan, pun a mochen apwapwai pwülüan,
1CO 7:34 iei mine a kinikinfesen letipan. Eman fefin esap pwüpwülü, ika eman föpwül esap mwo pwüpwülü a chök ekieki usun än ach Samol angang, pun a mochen pwe inisin me ngünün repwe pin fän iten ach Samol. Nge eman fefin mi pwüpwülü a ekieki mettochun ei fanüfan, pun a mochen apwapwai pwülüan.
1CO 7:35 Iwe, üa apasa ekei kapas, pun üa mochen alisikemi. Üsap mochen allük ngenikemi och, nge üa fen mochen pwe oupwe föri mine a pwüng o mürina, pwe oupwe fangala unusen manauemi ngeni än ach Samol angang, nge ousap rik seni.
1CO 7:36 Are eman mwän a kofot ngeni eman föpwül o a ekieki pwe esap pwülüeni, mürin a mefi pwe a föri och mine a mwäl ngeni ewe föpwül, are mochenin letipan a fokun pwichikar ngeni pwe a mefi pwe epwe pwüpwülü ngeni, ätewe epwe pwülüeni neminewe usun an mochen, nge esap tipis ren.
1CO 7:37 Are eman mwän a fokun ekiekietä lon letipan pwe esap pwüpwülü, nge esap wor eman a echimwa ngeni, are i a wesewesen nemeni mochenin letipan o a fen filätä lon püsin letipan mine epwe föri, ätei a föri mine a mürina are esap pwülüeni ewe föpwül.
1CO 7:38 Iei usun eman mwän mi pwüpwülü a föri mine a mürina, nge eman mwän esap pwüpwülü a föri mine a mürina seni.
1CO 7:39 Eman fefin mi pwüpwülü a riri ngeni pwülüan lon ükükün fansoun pwülüan we a manau. Nge lupwen pwülüan we a mäla, neminewe a tongeni pwülüeni iö a mochen, nge a chök tongeni pwülüeni eman mi souläng.
1CO 7:40 Nge neminewe epwe fokun pwapwa are epwe nonom lon an lipich. Iei mefiei o üa ekieki pwe pwal ngang üa eäni ewe Ngünün Kot.
1CO 8:1 Iwe, iei usun pwüngün met oua makketo rei fän iten ekewe mongö aramas ra asor ngeni ekewe uluulun anümwäl. Ewer, a fokun let pwe “oukich meinisin a wor ach silelap”, usun ra apasa. Nge ei sokun silelap a afisätä lamalamtekia, nge chen a afisätä fisiöchün ach souläng.
1CO 8:2 Iö aramas a ekieki pwe a wor an silei lon ekoch mettoch, ätei esap mwo wor wesewesen ürürün met epwe silei.
1CO 8:3 Nge ewe aramas mi echeni Kot a sil me ren Kot.
1CO 8:4 Iwe, usun ach mongö ekewe mongö ra asor ngeni ekewe uluulun anümwäl: Kich sia silei pwe eu uluulun anümwäl a aliosunätä och mettoch esap fokun wor. Kich sia silei pwe mi wor eman chök Kot.
1CO 8:5 Pun inamwo ika ekoch ra apasa pwe mi wor “kot” lon läng ika won fanüfan, pwal inamwo ika a wor chomong ekei sokun “kot” me “samol”,
1CO 8:6 nge fän itach mi wor eman chök Kot, i ewe Sam mi föri mettoch meinisin, nge kich sia manau fänäsengesin. Sia pwal eäni eman chök Samol, Jesus Kraist, mettoch meinisin ra för ren o kich sia manau ren.
1CO 8:7 Nge sap aramas meinisin ra silei ei let. Ekoch aramas ra chüen örüni angang ngeni anümwäl tori ikenai, pwe lupwen ar mongö ewe mongö ra chüen ekieki, pwe ewe mongö aramas ra wesewesen asomä ngeni ekewe uluulun anümwäl. Mwelien letiper a apwangapwang, iei mine ra mefi pwe ra limengau ren ewe mongö.
1CO 8:8 Iwe, mongö esap alisikich lon ach chiechi ngeni Kot. Sisap lus och are sisap mongö och, sisap pwal feiöch ren are sia mongö och.
1CO 8:9 Nge oupwe chök föröchü, pwe mine oua föri lon ämi ngasala esap wiliti eu lenien chepetek ngeni ekewe mi apwangapwang lon ar lükü.
1CO 8:10 Pun are eman aramas mi apwangapwang mwelien letipan epwe künok, en mi silelap, pwe ka mongö lon imwenfelin eman uluulun anümwäl, ifa usun, ei esap apöchöküla letipan an epwe pwal mongö ekewe mongö ra asor ngeni ekewe uluulun anümwäl?
1CO 8:11 Iei usun pwiüm mi apwangapwang, ätewe Kraist a mäla fän itan, epwe pöütmwälila pokiten om silelap.
1CO 8:12 Lupwen ka tipis ngeni pwiüm lon ei sokun lapalap o afeiengaua mwelien letipan mi apwangapwang, ka tipis ngeni Kraist.
1CO 8:13 Iei mine are pwii a tolong lon tipis pokiten mine üa mongö, üsap fokun chüen ochochsefäl fituk, pun üsap mochen pwe pwii we epwe tolong lon tipis.
1CO 9:1 Ifa usun, sap ngang eman aramas mi ngas? Ifa usun, sap ngang eman soukünö? Üsap fen küna ren mesei ach Samol Jesus? Ifa usun, sap ämi uän ai angang fän iten ach Samol?
1CO 9:2 Inamwo ika ekoch aramas resap etiwaei usun eman soukünö, nge fen iei mine oua föri! Pokiten ämi oua souläng, iei met a alletätä pwe ngang eman soukünö.
1CO 9:3 Lupwen aramas ra esitaei, iei met üa püsin peniei won:
1CO 9:4 Ifa usun, esap wor ai pwüüng ai üpwe angei anei me ünümei fän iten ai angang?
1CO 9:5 Ifa usun, esap wor ai pwüüng ai üpwe uwei eman pwülüei souläng lon ai sai, usun chök ekewe ekoch soukünö me ekewe pwiin ach Samol pwal Petrus ra föri?
1CO 9:6 Ika äm chök me Parnapas aipwe wisen angang fän iten met aipwe manau ren?
1CO 9:7 Iö sounfiu a püsin mönätiu liwinin mettochun lupwen a nom lon an mwichen sounfiu? Ifa usun, eman chon tanipi esap ochoch uän fotan wain seni lon an tanipi? Ifa usun, eman chon masen sip esap ünümi milik seni püsin nöün sip?
1CO 9:8 Ifa usun, üa chök kapas usun pwüngün lefilen aramas? Ifa usun, ekewe Allük resap wewefengen le kapas usun ei mettoch?
1CO 9:9 Pun a mak lon än Moses kewe Allük, “Kosap föti awen eman ätemwänin kow lupwen a puri ekewe umwun wiich, pwe föün repwe towu seni pöör.” Ifa usun, Kot a chök ekieki ekewe ätemwänin kow?
1CO 9:10 Ifa usun, esap fokun ekieki kich lupwen a apasa ekei kapas? Ewer, ekei kapas ra mak fän itach. Ewe mwän mi tuw pwül, pwal ätewe mi kini ekewe föün irä lon fansoun räs repwe föri ar angang fän apilükülük, pwe repwe angei wiser seni ewe räs.
1CO 9:11 Äm aia amworafeili ewe sokun pwükil lefilemi mi afisätä ämi feiöch lon pekin ngün, ifa usun, epwe ngau are aipwe angei senikemi ekewe feiöchün fanüfan?
1CO 9:12 Are ekewe ekoch a wor ar pwüüng pwe repwe angei alilisiir senikemi, ifa usun, esap fen wor watten äm pwüüng won met aipwe angei senikemi? Nge äm aisap aea ei sokun pwüüng, pwe aia fen tupwöl fän sokopaten osukosuk, pwe aisap epeti ewe Pworausen Manau usun Kraist pwe epwe rongofeil.
1CO 9:13 Ämi oua fokun silei, pwe ekewe mwän mi angang lon ewe imwenfel ra angei aner mongö seni ewe imwenfel, nge chokewe mi föri ewe angangen asor won ewe rongen asor ra angei wiser seni ewe asor.
1CO 9:14 Iei usun ach Samol a allük, pwe chokewe mi arongafeili ewe Pworausen Manau repwe manau seni ewe angang ra föri.
1CO 9:15 Nge üsap aea och me lein ekei pwüüng. Üsap pwal makkei ekei kapas, pun üa apilükülükü pwe oupwe föri ekei mettoch fän itei. Epwe fen öch ai üpwe mäla akom, pwe esap wor eman epwe akasiwili ai aingaing mi pwüng ngeni kapas mi pön.
1CO 9:16 Nge esap wor ai pwüüng pwe üpwe aingaing pokiten üa afalafala ewe Pworausen Manau, pun iei wesewesen wisei Kraist a allük ngeniei pwe üpwe föri. Feiengauei are üsap afalafala ewe Pworausen Manau!
1CO 9:17 Pun are üa föri ai angang seni püsin mochenin letipei, epwe wor liwinin ai angang. Nge üa föri ei angang fän asopwisek, pun Kot a awisa ngeniei pwe üpwe föri.
1CO 9:18 Iwe, met sokun liwin üpwe angei? Iei chök liwini, pwe üpwe afalafala ewe Pworausen Manau nge üsap angei och liwin seni, üsap aea ai pwüüng lon ai angang fän iten ewe Pworausen Manau.
1CO 9:19 Ngang eman aramas mi ngas, esap wor eman a nöüniei amanau, nge püsin ngang üa atolongaei ai üpwe eman amanau fän iten aramas meinisin, pwe üpwe asoulängala chomong me leir.
1CO 9:20 Lupwen üa afalafala ewe Pworausen Manau ngeni ekewe chon Juta, üa manau usun chök eman chon Juta, pwe üpwe asoulängirela. Lupwen üa afalafala ewe Pworausen Manau ngeni ekewe mi nom fän än Moses kewe Allük, üa manau usun chök eman mi nom fän ekewe Allük, inamwo ika üsap nom fän ekewe Allük. Nge üa föri ei, pwe üpwe asoulängirela.
1CO 9:21 Pwal ina chök usun, lupwen üa afalafala ewe Pworausen Manau ngeni ekewe chon lükün Israel, üa manau usun chök eman chon lükün Israel esap nom fän än ekewe chon Juta Allük, pwe üpwe asoulängirela. Ei esap wewen pwe üsap aleasochisi än Kot kewe allük, pun üa fokun nom fän än Kraist allük.
1CO 9:22 Lupwen üa nom lein ekewe mi apwangapwang lon ar lükülük, üa usun chök eman mi apwangapwang me leir, pwe üpwe asoulängirela. Iei usun üa manaueni sokun manau meinisin lein sokun aramas ese lifilifil, pwe üpwe tongeni amanaua ekoch me leir ren met epwe tufich ngeniei.
1CO 9:23 Ekei mettoch meinisin üa föri fänäsengesin ewe Pworausen Manau, pwe üpwe angei wisei lon ekewe feiöch.
1CO 9:24 Ousap silei pwe ekewe chon kitir meinisin ra sä lon lenien kitir, nge eman chök leir a angei winnan? Iei mine oupwe kitir, pwe oupwe angei winnemi.
1CO 9:25 Iteiten sensü meinisin ra achocho ngeni ar repwe fiti pwüngün allükün ar rensü, pwe repwe angei epa mwärämwär mi morokai. Nge kich sipwe achocho ngeni manauen ach souläng, pwe sipwe angei epa mwärämwär epwe nonom tori feilfeilachök.
1CO 9:26 Iei popun üa sä wenechar ngeni ewe tepkiri, pwal iei popun üa wewe ngeni eman chon köfön esap chök köfön chöü.
1CO 9:27 Üa fokun pöchökül ngeni inisi o anomu fän nemeniei, pwe üsap afalafala ekoch, nge püsin ngang üa lipwäkingau.
1CO 10:1 Ämi pwii kana, üa mochen ämi oupwe chechemeni mine a fis ngeni ach kewe lewo lupwen Moses a emweniir. Ir meinisin ra nom fän tümwünün ewe kuchu o pwerela pekilan ewe Setipar.
1CO 10:2 Ir meinisin ra papatais ngeni Moses lon ewe kuchu pwal lon ewe Setipar.
1CO 10:3 Ir meinisin ra mongö eu chök mongön ngün
1CO 10:4 o ünümi eu chök kolukun ngün. Ra ün seni ewe achauen ngün mi etiir, nge ei achau iei i Kraist.
1CO 10:5 Nge iei mwo nge Kot esap pwapwa ren chomong me leir, iei mine somäär a toropasfeil lon ewe fanüapö.
1CO 10:6 Iwe, ekei mettoch mi fis eu lenien awewe fän itach an epwe fönöökich, pwe sisap mochenia ngeni mettoch mi ngau usun ir ra föri,
1CO 10:7 sisap pwal fel ngeni uluulun anümwäl usun ekoch me leir ra föri. Pun iei usun a mak lon ekewe Toropwe mi Pin, “Ekewe aramas ra mottiu pwe repwe momongö o ükün, mürin ra ütä o urumwotongau.”
1CO 10:8 Sisap fokun föri föförün lisowu mi fokun ngau usun ekoch me leir ra föri, iwe, lon eu chök rän rüe me ülüngatngeröü ra mäla.
1CO 10:9 Sisap fokun sotuni Kraist usun ekoch me leir ra föri, iwe, ra feiengau o mäla ren ekewe serepenit.
1CO 10:10 Sisap pwal lalangau usun ekoch me leir ra föri, iei mine ra ninnila o rosola ren ewe Chon Läng.
1CO 10:11 Ekei mettoch meinisin ra fis ngeniir pwe eu lenien awewe fän iten ekewe pwal ekoch, eman a makkeretiu pwe repwe eu kapasen fön fän itach. Pun sia manau lon eu fansoun a arapoto fansoun sopolan.
1CO 10:12 Iei mine iö a ekieki pwe a nüküchar, epwe fokun tümwünüfichi pwe esap turula.
1CO 10:13 Ekewe sosot ra torikemi sosotun aramas chök. Nge Kot a apwönüetä an pwon o esap mwütätä ngenikemi pwe oupwe tolong lon sokun sosot mi lap seni ämi tufich. Nge lupwen oupwe tolong lon sosot, i epwe föri efoch alen towu, pwe oupwe tongeni pwora ngeni.
1CO 10:14 Iei mine ämi chiechiei mi achengicheng, oupwe ükütiu seni ämi angang ngeni uluulun anümwäl.
1CO 10:15 Üa kapas ngenikemi usun ai kapas ngeni aramas mi mirit. Oupwe püsin apwüngü mine üa apasa.
1CO 10:16 Lupwen sia ün seni ewe kap sia aea lupwen ach eäni ewe mongö än ach Samol o sia kilisou ngeni Kot ren, sia chiechifengen lon ewe chaan Kraist. Nge ren ach utu ewe pilawa lupwen sia mongö seni, sia chiechifengen lon ewe inisin Kraist.
1CO 10:17 Pokiten mi wor efoch chök pilawa, kich mi chomong, sia eu chök inis, pun kich meinisin sia mongö seni ewe chök efoch pilawa.
1CO 10:18 Oupwe ekieki usun ekewe aramasen Israel. Chokewe mi mongö seni ewe asor ra chiechifengen me Kot, i ewe, ekewe aramas ra uwala ar asor ngeni won ewe rongen asor.
1CO 10:19 Met wewen ai kei kapas? Wewen pwe eu uluulun anümwäl ika ewe mongö aramas ra asor ngeni a wor lomotan?
1CO 10:20 Apwi! Wewen ai kei kapas, pwe mine chon lükün ra eäni asor won ekewe rongen asor ra asor ngeni ekewe anün rochopwak, nge sap ngeni Kot. Iwe, ngang üsap mochen ämi oupwe chiechi ngeni ekewe anün rochopwak.
1CO 10:21 Ousap tongeni ün seni än ach Samol kap pwal ün seni än ekewe anün rochopwak kap. Ousap pwal tongeni mongö seni än ach Samol chepel, nge pwal mongö seni än ekewe anün rochopwak chepel.
1CO 10:22 Ika sia mochen asonga ach Samol? Ifa usun, sia pöchökül seni i?
1CO 10:23 Iwe, ra apasa, “A mwümwütä ngenikich pwe sipwe föri mettoch meinisin.” Ewer, mi pwüng, nge sap mettoch meinisin ra lomot ngenikich. “A mwümwü ngenikich ach sipwe föri mettoch meinisin,” nge sap mettoch meinisin ra alisikich.
1CO 10:24 Esap wor eman leimi epwe chök kütta püsin an feiöch, nge epwe pwal kütta feiöchün chiechian souläng.
1CO 10:25 A mwümwü ngenikemi ämi oupwe ochoch ewe fituk oua möni me lon ewe lenien amömö, nge ousap ais och kapas ais, pun ete fis mengiringirin lelukemi.
1CO 10:26 Pun iei usun a mak lon ekewe Toropwe mi Pin, “Fanüfan me masouan meinisin än ewe Samol.”
1CO 10:27 Are eman esap souläng a körikemi pwe oupwe mongö ren, o ämi oua feila, oupwe mongö met a molotä mwemi, nge ousap ais och kapas ais, pun ete fis mengiringirin lelukemi.
1CO 10:28 Nge are eman a ürenikemi, “Ei mongö aramas ra fen asor ngeni uluulun anümwäl,” mürin ousap mongö, pokiten ätewe mi asile ngenikemi, pwal pokiten mengiringirin leluken eman.
1CO 10:29 Üsap kapas usun mengiringirin lelukemi, nge üa kapas usun mengiringirin leluken ewe eman. Eli eman epwe ais, “Pwota üpwe küna apwüng won mine üa föri lon ai ngas, pokiten mengiringirin leluken eman?
1CO 10:30 Are üa kilisou ngeni Kot fän iten anei, pwota eman epwe esitaei usun och mongö üa kilisou ren?”
1CO 10:31 Iei mine are oua momongö ika ükün, ika met oua föri, oupwe föri meinisin pwe Kot epwe ling ren.
1CO 10:32 Ousap manaueni eu sokun manau epwe afisätä chepetek ngeni ekewe chon Juta, ika ngeni ekewe chon lükün Israel, ika ngeni chon ewe mwichefelin Kot.
1CO 10:33 Oupwe chök föri usun mine ngang üa föri. Üa sotuni ai üpwe apwapwai aramas meinisin lon meinisin mine üa föri. Üsap kütta mine üpwe püsin feiöch ren, nge üa kütta mine ekewe chomong repwe feiöch ren, pun üa mochen pwe repwe küna manau.
1CO 11:1 Oupwe apirüei usun ngang üa apirü Kraist.
1CO 11:2 Iwe, üa mwareitikemi pokiten oua chechemeniei fansoun meinisin, oua pwal aleasochisi ekewe afalafal üa ngenikemi.
1CO 11:3 Nge üa mochen oupwe weweiti pwe Kraist möküren mwän meinisin, nge mwän möküren fefin, nge Kot möküren Kraist.
1CO 11:4 Iwe, are eman mwän epwe iotek ika pwärätä met mi monomon lon imwenfel, nge a pwölüela möküran, ätei a aitengaua Kraist möküran we.
1CO 11:5 Nge are eman fefin epwe iotek ika pwärätä met mi monomon lon imwenfel, nge esap pwölüela möküran, neminei a aitengaua pwülüan möküran we. Esap wor sokofesenin neminei me eman fefin mi reipöpöla möküran.
1CO 11:6 Are eman fefin esap pwölüela möküran, mei fen öch an epwe fichi möküran. Nge are och minen asäw ren eman fefin an epwe reipöpöla möküran ika fichi möküran, epwe fokun pwölüela möküran.
1CO 11:7 Esap wor lomoten än eman mwän epwe pwölüela möküran, pun i lapalapen Kot mi aliosunätä lingen Kot, nge eman fefin a aliosunatä lingen mwän.
1CO 11:8 Pun mwän esap för seni fefin, nge fefin a för seni mwän.
1CO 11:9 Mwän esap pwal för fänäsengesin fefin, nge fefin a för fänäsengesin mwän.
1CO 11:10 Iwe, pokiten ekewe chon läng, eman fefin epwe pwölüela möküran pwe epwe pwä, pwe a nom fän nemenien pwülüan.
1CO 11:11 Nge lon ach Samol, esap tufich pwe eman fefin epwe imwüla won an seni mwän, esap pwal tufich pwe eman mwän epwe imwüla won an seni fefin.
1CO 11:12 Pun usun ewe fefin a för seni mwän, pwal ina chök usun mwän a uputiu seni fefin, nge Kot a förätä mettoch meinisin.
1CO 11:13 Oupwe püsin apwüngü lefilemi ika a öch ngeni eman fefin pwe epwe iotek ngeni Kot lon imwenfel mwen mesen aramas, nge esap pwölüela möküran.
1CO 11:14 Ifa usun, ousap püsin mefi pwe a asäw ngeni eman mwän epwe tam meten möküran?
1CO 11:15 Nge are meten möküren eman fefin a langatam, iei met a liöch ren. Pun Kot a ngeni meten möküran pwe pwölüpwölün.
1CO 11:16 Nge are eman a mochen anini won ekei mettoch, üa chök tongeni apasa, pwe äm me ekewe mwichefelin Kot esap wor rem och sokun lapalap ika örüni.
1CO 11:17 Nge lon ekei kapasen öüröür üpwe ngenikemi, üsap tongeni mwareitikemi, pun lupwen oua mwichfengen esap fisöchüla ämi souläng, pwe a fen ngauala.
1CO 11:18 Akomwan üa rongorong pwe a wor kinikinfesen lefilemi lupwen oua mwichfengen. Esopun ei pworaus üa fen lükü.
1CO 11:19 Ewer, epwe fokun wor kinikinfesen lefilemi, pwe chokewe mi pwüng repwe fokun pwäpwäla.
1CO 11:20 Lupwen oua mwichfengen, esap iei ewe mongö än ach Samol oua eäni.
1CO 11:21 Pun lupwen oua mongö, eman me eman a popuetä le mongö püsin anan, nge esap witiwit. Iei mine ekoch me leimi ra echik lupwen ekoch ra sakauala.
1CO 11:22 Ifa usun, esap wor püsin imwemi ia oua tongeni momongö o ükün ie? Are ifa usun, oua mochen turunufasei ewe mwichefelin Kot o aitengaua ekewe aramas mi wöüngau? Met üpwe ürenikemi usun ei? Ifa usun, üpwe mwareitikemi? Apwi! Üsap fokun mwareitikemi!
1CO 11:23 Pun üa angei seni ach Samol ekewe kapas üa aiti ngenikemi, pwe lon ewe pwinin Jutas epwe afangamä ach Samol Jesus, Jesus a angei ewe pilawa,
1CO 11:24 a iotekin kilisou ngeni Kot won, a utu o apasa, “Oupwe angei o äni, pun iei inisi üa fangala fänäsengesimi. Iei met oupwe föri pwe oupwe chechemeniei.”
1CO 11:25 Pwal ina chök usun mürin ar mongö, a angei ewe kap o apasa, “Ei kap iei än Kot we pwon mi fö lon chai. Iteiten fansoun oupwe ün seni ei kap, oupwe chechemeniei.”
1CO 11:26 Wewen ei, pwe iteiten fansoun lupwen oupwe mongö ei pilawa o ün seni ei kap, oupwe asilefeili mälan ach Samol tori epwe war.
1CO 11:27 Iei mine are eman epwe mongö ei pilawa ika ün seni ei kap än ach Samol lon an esap fich ngeni, i epwe tipis ngeni inisin ach Samol me chaan.
1CO 11:28 Iei mine eman aramas epwe akomwen atittina manauan, mürin epwapw mongö ewe pilawa o ün seni ewe kap.
1CO 11:29 Pun are eman esap aücheani wewen inisin ach Samol lupwen a mongö ewe pilawa o ün seni ewe kap, i epwe atoto apwüng won ren an mongö me ün.
1CO 11:30 Ina popun chomong me leimi ra samau o apwangapwang, nge ekoch ra fen mäla.
1CO 11:31 Nge are sia akomwen atittinakich, Kot esap apwüngükich.
1CO 11:32 Nge lupwen sia küna apwüng me ren ach Samol, i a amiritikich, pwe sisap eti fanüfan le küna liwiningauen tipis.
1CO 11:33 Iei mine, ämi pwii kana, lupwen oua mwichfengen le mongö ewe mongö än ach Samol, oupwe witiwiti chiechiemi kewe.
1CO 11:34 Nge are eman a echik, epwe mongö lon imwan, pwe ousap küna apwüng me ren Kot lupwen oua mwichfengen. Iwe, ren ekewe ekoch mettoch, üpwe öüröüra ngenikemi lupwen üpwe feila remi.
1CO 12:1 Iwe, ämi pwii kana, üa mochen pwe oupwe silei met a let usun ekewe lifang seni ewe Ngünmifel.
1CO 12:2 Oua fen silei, pwe lupwen ousamwo souläng, oua tokola lon chomong sokun lapalap, pwe ämi oupwe fel ngeni ekewe uluulun anümwäl resap manau.
1CO 12:3 Iei mine üa mochen ämi oupwe silei, pwe esap wor eman epwe tongeni apasa fän emwenien ewe Ngünün Kot, “Jesus epwe anümamau,” esap pwal wor eman a tongeni pwärätä, “Jesus i Samol”, are ewe Ngünmifel esap emweni.
1CO 12:4 Mi wor sokopaten lifangen ngün, nge eman chök Ngün a fangeto.
1CO 12:5 Mi wor sokopaten angang, nge kich meinisin sia angang ngeni eman chök Samol.
1CO 12:6 Mi wor sokopaten tufich ach sipwe föri angang, nge ewe eman chök Kot a ngeni aramas meinisin ewe tufich fänäsengesin en me an angang.
1CO 12:7 Ewe Ngünmifel a pwäla lon sokopaten lapalap lon manauen eman me eman leich, pwe epwe wor ach feiöch meinisin.
1CO 12:8 Ewe Ngün a lifang ngeni eman aramas an epwe afalafala ewe kapas fän tipachem, pwal ewe chök Ngün a lifang ngeni eman an epwe afalafala ewe kapas fän silelap.
1CO 12:9 Ewe chök Ngün a lifang ngeni eman an epwe wor an lükülük, nge ngeni pwal eman a lifang ewe tufich an epwe apöchöküla aramas.
1CO 12:10 Ewe Ngün a lifang ngeni eman aramas ewe tufich an epwe föri manaman, a pwal lifang ngeni eman ewe tufich an epwe afalafala än Kot kapas, nge pwal ngeni eman an epwe tufichin alefila lefilen ekewe lifang mi pop seni ewe Ngünmifel me ekewe lifang resap pop seni. Ngeni eman aramas a lifang ngeni tufichin an epwe fos lon kapasen ekis, nge ngeni pwal eman a lifang ewe tufichin an epwe awewei met eman a apasa.
1CO 12:11 Nge ewe eman chök Ngün a föri ekei mettoch meinisin, a ngeni eman me eman aramas ekewe sokopaten lifang usun an mochen.
1CO 12:12 Iwe, usun inisich a chök eu o a wor chomong kifetin, inamwo ika a sokopat ekewe kifet, nge ra nom lon eu chök inis. Ina chök usun Kraist.
1CO 12:13 Iei usun oukich meinisin, ese lifilifil ika chon Juta ika chon lükün Israel, ika amanau ika aramas mi ngas, kich meinisin sia papatais lon eu chök inis ren eman chök Ngün, kich meinisin sia pwal ün seni eman chök Ngün.
1CO 12:14 Pun inisich esap fis ren eu chök kifet, nge a fis ren chomong kifet.
1CO 12:15 Are pechech epwe apasa, “Pokiten ngang üsap efoch pau, üsap chu ngeni ewe inis,” ei esap tongeni imwüwu seni an epwe eu kifetin inisich.
1CO 12:16 Nge are selingach epwe apasa, “Pokiten ngang üsap eföü mas, üsap chu ngeni ewe inis,” ei esap tongeni imwüwu seni an epwe eu kifetin inisich.
1CO 12:17 Are unusen eu inis epwe chök eföü mas, epwe ifa usun an epwe tongeni rongorong? Nge are epwe chök eu seling, epwe ifa usun an epwe tongeni tini och?
1CO 12:18 Iei usun Kot a anomu ekewe sokopaten kifet won inisich usun met mochenin letipan.
1CO 12:19 Esap wor eu inis are unusan meinisin epwe eu chök kifet!
1CO 12:20 Iei usun a wor chomong kifet, nge eu chök inis.
1CO 12:21 Iei mine mesach esap tongeni apasa ngeni pöüch, “Esap wor lomotom ngeniei.” Pwal mökürach esap tongeni apasa ngeni pechech, “Esap wor lomotom ngeniei.”
1CO 12:22 Nge a fokun lomot ngenikich ekewe kifetin inisich usun nge sia ekieki pwe itä ra apwangapwang.
1CO 12:23 Iwe, ekewe kifet sia ekieki pwe esap wor aüchear, sia fokun achocho ngeni ach sipwe kütta met repwe aüchea ren. Nge ekewe kifet resap nien lapalapöch, sia kütta met sipwe pwölürela ren, pwe esap pwä asäwir.
1CO 12:24 Nge ekewe kifet ra fen lapalapöch, esap lomot ach sipwe pwölürela. Püsin Kot a achufengeni inisich lon eu sokun lapalap pwe a fokun alinga ekewe sokun kifet esap wor linger.
1CO 12:25 Iei mine esap wor kinikinfesen lon ewe inis, nge ekewe sokopaten kifet meinisin repwe chüngüfengeniir lefiler.
1CO 12:26 Are eu kifet a riaföü, ekewe lusun kifet meinisin ra eti le riaföü, nge are eu kifet a iteüöch, ekewe lusun kifet meinisin ra eti lon an pwapwa.
1CO 12:27 Ämi meinisin inisin Kraist, nge eman me eman leimi kifetin.
1CO 12:28 Iwe, Kot a awiser meinisin lon en me lenian lon imwenfel: Akomwan ekewe soukünö, aruan ekewe soufos, nge aülüngatin ekewe sense. Mürin chokewe mi föri manaman, pwal chokewe mi wor ar tufichin apöchöküla aramas, chokewe mi alisi aramas, chokewe ir souemwen, pwal chokewe mi fos lon kapasen ekis.
1CO 12:29 Ifa usun, ir meinisin ra soukünö, ika soufos, ika sense? Ifa usun, ir meinisin a wor rer tufichin föri manaman,
1CO 12:30 ika tufichin apöchöküla aramas, ika tufichin fos lon kapasen ekis, ika tufichin awewei ekewe kapasen ekis?
1CO 12:31 Iwe, oupwe achocho le kütta ämi oupwe eäni ekewe lifang mi fokun aüchea. Nge iei üpwe aiti ngenikemi eu sokun manau mi mürina seni meinisin.
1CO 13:1 Are üpwe tongeni kapas lon kapasen aramas me chon läng kana, nge üsap eäni chen, üpwe wewe ngeni och piras mi tik me och mächä mi akürang.
1CO 13:2 Are üpwe eäni ewe tufichin osuni o weweöchiti meinisin mine a monomon o eäni silelap meinisin, are üpwe pwal eäni lükülük meinisin, pwe üpwe tongeni amwökütü chuk kana, nge üsap eäni chen, esap wor ai aüchea.
1CO 13:3 Are üpwe fangala piseki meinisin ngeni chon wöüngau, are üpwe pwal fangetä inisi pwe epwe kek, nge üsap eäni chen, üsap feiöch ren.
1CO 13:4 Chen a mosonotam o kirikiröch, chen esap lolowo ika sikesik ika lamalamtekia.
1CO 13:5 Chen esap föri mine a asäw, esap kütta püsin an, esap koum, esap ekieki o chechemeni mine eman a mwäl ngeni won.
1CO 13:6 Chen esap pwapwaäsini mine a ngau, nge a pwapwaäsini mine a let.
1CO 13:7 Chen a engila fän mettoch meinisin, a lükü meinisin, a apilüküni meinisin, a tipeppos fän mettoch meinisin.
1CO 13:8 Chen epwe nonomola tori feilfeilachök. Ach kapasen osuni epwe müchüla, ach fos lon kapasen ekis epwe ükütiu, nge ach silelap epwe müchüla.
1CO 13:9 Pun ach silelap me ach kapasen osuni resap unus,
1CO 13:10 nge lupwen epwe war met mi unus, mürin met esap unus epwe müchüla.
1CO 13:11 Lupwen ngang üa eman semirit, üa kapas usun eman semirit o ai memef me ekiek mefien semirit me ekiekin semirit. Nge iei lupwen üa mwän, üsap chüen usuni ususun eman semirit.
1CO 13:12 Pun mine sia küna iei a usun chök ngününgünün mettoch mi toputop lon kilas, nge mürin sipwe tongeni wesewesen küna fatöchün ren mesach. Met ngang üa silei iei esap unus, nge mürin üpwe silei unusan, usun chök Kot a wesewesen sileei.
1CO 13:13 Iei usun ekei ülüngat repwe nonomola: lükülük, apilükülüköch me chen, nge chen a lapalap seniir.
1CO 14:1 Iwe, oupwe fokun achocho ngeni ämi oupwe eäni chen. Nge oupwe pwal kütta ekewe lifang seni Ngünmifel, akaeuin ewe lifangen afalafala än Kot kapas.
1CO 14:2 Pun eman mi fos lon kapasen ekis, esap kapas ngeni aramas pwe a kapas ngeni Kot, pun esap wor eman a weweiti an kapas. Ätewe a pwärätä monomonen ewe let ren manamanen Ngünmifel.
1CO 14:3 Nge ewe eman mi afalafala än Kot kapas, a kapas ngeni aramas, a alisiir, a apöchöküla ar souläng o echiper lon manauer.
1CO 14:4 Iwe, ewe eman mi fos lon kapasen ekis a chök püsin alisi won inisin, nge ewe eman mi afalafala än Kot kapas a alisi unusen mwichefel.
1CO 14:5 Üa mochen pwe ämi meinisin oupwe fos lon kapasen ekis, nge üpwe fokun mochen pwe epwe wor remi ewe lifangen afalafala än Kot kapas. Pun ätewe mi afalafala än Kot kapas a lap seni ewe eman mi fos lon kapasen ekis. A chök wor lomoten än eman fos lon kapasen ekis are a wor eman a aföüü an kapas, pwe unusen ewe mwichefel epwe fefeitä ren.
1CO 14:6 Iei mine, ämi pwii kana, lupwen üpwe feito remi, met sokun feiöch üpwe ngenikemi are üpwe fos lon kapasen ekis? Ese fokun wor, are üsap ngenikemi och kapasen pwärätä seni Kot, ika och kapasen silelap, ika och kapasen osuni, ika och kapasen kait.
1CO 14:7 Oupwe ekieki usun ekewe pisekin ettik esap wor manau lor, usun ewe likaangün ika ewe kitar. Epwe ifa usun än eman epwe silei ngingiin echö köl, are ewe chon ettik epwe chök ettikichou, nge esap fiti notenin pwe epwe fatöch ngingin?
1CO 14:8 Nge are ewe mwän mi ettiki ewe rappwa esap fat an ettiki asilesilen maun, iö epwe amolätä ngeni maun?
1CO 14:9 Ina chök usun met a fis remi. Are ämi afalafal lon kapasen ekis esap fat wewen, ifa usun än eman epwe tongeni weweiti? Ämi kapas epwe chök morola lon asepwäl.
1CO 14:10 A wor chomong sokun än aramas fos lon ei fanüfan, nge esap wor eu me leir esap wor wewen.
1CO 14:11 Nge are üsap silei ewe fos eman a kapas lon, ewe aramas mi kapas epwe usun eman chon ekis ngeniei, nge ngang üpwe usun eman chon ekis ngeni.
1CO 14:12 Pokiten ämi oua fokun mochen an epwe wor remi ekewe lifang seni ewe Ngünmifel, oupwe fokun achocho ngeni an epwe chomongola ekewe sokun lifang mi alisi mwichefel pwe epwe fefeitä ren.
1CO 14:13 Iei mine ewe aramas mi fos lon kapasen ekis epwe iotek, pwe epwe wor an tufich an epwe aföüü mine a apasa.
1CO 14:14 Pun are üpwe iotek lon kapasen ekis, ngüni a wesewesen iotek, nge ai ekiek esap nom lon.
1CO 14:15 Iwe, met üpwe föri? Üpwe iotek lon ngüni, nge üpwe pwal iotek fiti ekiekin letipei. Üpwe köl lon ngüni, nge üpwe pwal köl fiti ekiekin letipei.
1CO 14:16 Lupwen oua kilisou ngeni Kot lon ngünümi chök, epwe ifan usun än eman mi fiti ämi mwich epwe tongeni apasa “Amen” wesin ämi iotekin kilisou, are esap silei met oua kapas usun?
1CO 14:17 Inamwo ika ämi iotekin kilisou ngeni Kot a mürina, nge esap alisi ekewe ekoch aramas.
1CO 14:18 Üa kilisou ngeni Kot pwe üa tongeni kapas lon kapasen ekis lap seni ämi meinisin.
1CO 14:19 Nge lon imwenfel, lupwen ach fel ngeni Kot, üa efich ai üpwe apasa limu kapas pwe aramas ra tongeni wewe ren lupwen üpwe asukuler, lap seni ai üpwe fos lon ngeröün kapasen ekis.
1CO 14:20 Ämi pwii kana, ousap wewe ngeni semirit lon ämi ekiek. Oupwe semirit lon föför mi ngau, nge oupwe mirit lon ämi ekiek.
1CO 14:21 Pun iei usun mine a mak lon ekewe Toropwe mi Pin, “Üpwe kapas ngeni nei aramas ren aramas mi fos lon kapasen ekis. Üpwe kapas ngeniir ren awen chon ekis, nge iei mwo nei aramas resap mochen aüselingaei.”
1CO 14:22 Iei usun ewe lifangen ach fos lon kapasen ekis eu asisil fän iten chokewe resap lükü, sap fän iten chon lükü. Nge ewe lifangen afalafala än Kot kapas eu asisil fän iten ekewe chon lükü, sap fän iten chokewe resap lükü.
1CO 14:23 Iei mine are unusen ewe mwichefel a mwichfengen o ir meinisin repwe fos lon kapasen ekis, are ekoch chon lükün ika chon resap lükü repwe tolong remi, ifa usun, resap apasa pwe ämi oua umwes?
1CO 14:24 Nge are eman a afalafala än Kot kapas lupwen eman aramas esap lükü ika eman chon lükün epwe tolong remi, i epwe mefi an tipis ren met a rongorong. Epwe küna apwüng ren meinisin mine a rongorong,
1CO 14:25 ekiekin letipan mi monomon epwe pwäpwäla. Iwe, epwe chapetiu o fel ngeni Kot, epwe pwal pwärätä, “Enlet, Kot a nonom lefilemi!”
1CO 14:26 Iwe, ämi pwii kana, iei met üpwe kapas usun. Lupwen oua mwichfengen pwe oupwe fel ngeni Kot, oupwe apasa en me mefian eman echö köl, eman eu afalafal, eman eu kapasen pwärätä seni Kot, pwal eman eu fos lon kapasen ekis, nge pwal eman eu kapasen aföüü met ätewe a apasa. Nge ekei alilis meinisin repwe fokun afefetai mwichefel.
1CO 14:27 Are eman epwe fos lon kapasen ekis, ruoman ika ülüman echök repwe fos, eman mürin eman, nge epwe pwal wor eman epwe aföüü met ra apasa.
1CO 14:28 Nge are esap wor eman a tongeni aföüü, ätewe mi fos lon kapasen ekis epwe fanafanala, epwe chök fos ngeni püsin i me Kot.
1CO 14:29 Ruoman ika ülüman chon afalafal ra tongeni kapas, nge ekewe ekoch repwe apwüngü mine ra afalafal won.
1CO 14:30 Are eman mi mot lon ewe mwich a angei eu kapasen pwärätä seni Kot, ewe eman mi kapas epwe köüla, nge ewe mi angei ewe kapasen pwärätä epwe kapas.
1CO 14:31 Ämi meinisin oua tongeni afalafala än Kot kapas, eman mürin pwal eman, pwe ekewe aramas meinisin repwe kaiö seni o ar souläng epwe pöchökül ren.
1CO 14:32 Iwe, ewe lifangen afalafala än Kot kapas epwe nonom fän nemenien ewe chon afalafal,
1CO 14:33 pun Kot esap mochen pwe epwe wor fitikoko, nge a mochen pwe epwe wor kinamwe. Lon ekewe mwichefelin chon pin meinisin
1CO 14:34 ekewe fefin repwe fanafanala lon ekewe mwich. Esap mwümwütä ngeniir ar repwe kapas, usun mine a mak lon än ekewe chon Juta Allük pwe esap wor ar nemenem.
1CO 14:35 Are ra mochen silei och, repwe aisini pwülüer lon imwer. Pun a fokun asäw ngeni eman fefin an epwe kapas lon ekewe mwich lon imwenfel.
1CO 14:36 Ifa usun, än Kot kapas a pop senikemi? Ika ewe kapasen Kot a chök torikemi?
1CO 14:37 Are eman a ekieki pwe i eman nöün Kot chon afalafal, ika a wor ren eu lifang seni Ngünmifel, epwe mefi pwe mine üa mak ngenikemi, iei än Kot allük.
1CO 14:38 Nge ika esap afäli ekei kapas, ousap pwal afäli.
1CO 14:39 Iei mine ämi pwii kana, oupwe fokun achocho ngeni ämi oupwe afalafala än Kot kapas. Ousap pinei chokewe mi fos lon kapasen ekis,
1CO 14:40 nge mettoch meinisin epwe fis fän pwüng me kokotöch.
1CO 15:1 Iwe, ämi pwii kana, iei üa mochen achema ngenikemi usun ewe Pworausen Manau üa fen afalafala ngenikemi, ewe oua etiwa o alonga ämi lükülük won.
1CO 15:2 Iei ewe Pworausen Manau oua küna manau ren are oupwe kamwöchünük won. Nge are ousap kamwöchünük won, ämi lükü a lomotongau.
1CO 15:3 Üa ngenikemi mine üa fen angei met a fokun aüchea: pwe Kraist a mäla fän iten ach tipis usun a mak lon ekewe Toropwe mi Pin,
1CO 15:4 pwe a peias, nge mürin ülüngat rän a manausefälitä usun a mak lon ekewe Toropwe mi Pin,
1CO 15:5 pwe a pwä ngeni Petrus, nge mürin a pwä ngeni ekewe engol me ruoman soukünö.
1CO 15:6 Mürin a pwä ngeni lap seni limupükü chon lükü i lon eu chök fansoun, chomong me leir ra chüen manau, nge ekoch ra mäla.
1CO 15:7 Mürin a pwä ngeni James, mürin a pwal pwä ngeni ekewe soukünö meinisin.
1CO 15:8 Iwe, amüchülan a pwal pwä ngeniei, inamwo ika üa wewe ngeni eman aramas mi uputiu lon fansoun esap pwüng ngeni.
1CO 15:9 Pun ngang üa kis seni ekewe soukünö meinisin, esap fich ngeniei ai üpwe iteni eman soukünö, pun üa ariaföüü chon ewe mwichefelin Kot.
1CO 15:10 Nge ren än Kot ümöümöch üa wilila o wiliti eman soukünö. Iwe, an ümöümöch ngeniei esap lomotongau, pun mi enlet üa fokun achocho le angang lap seniir meinisin. Nge pwüngün pwe sap ngang üa föri ei angang pwe än Kot ümöümöch a nom rei.
1CO 15:11 Iei mine ese lifilifil ika ngang üa afalafala ewe Pworausen Manau ika pwal ekewe ekoch soukünö, äm meinisin aia afalafala eu chök Pworausen Manau, iei met oua lükü.
1CO 15:12 Iwe, pokiten sia afalafala pwe Kot a amanauasefäli Kraist seni mäla, pwota ekoch me leimi ra apasa pwe ekewe mi mäla resap manausefäl?
1CO 15:13 Are mi pwüng pwe resap manausefäl, wewen Kraist esap pwal manausefäl.
1CO 15:14 Nge are Kraist esap manausefäl seni mäla, mürin äm afalafal a lomotongau, pwal ämi lükü a lomotongau.
1CO 15:15 Pwal och, epwe pwäla pwe aia chofona usun Kot, pun aia apasa pwe Kot a amanauasefäli Kraist seni mäla. Nge are a pwüng pwe ekewe mi mäla resap manausefäl, mürin Kot esap amanauasefäli Kraist.
1CO 15:16 Pun are ekewe mi mäla resap manausefäl, Kraist esap pwal manausefäl.
1CO 15:17 Nge are Kraist esap manausefäl, ämi lükü i a aücheangau o ämi oua chüen nom lon ämi tipis.
1CO 15:18 Iwe, pwal wewen, pwe ekewe chon lükü Kraist mi fen mäla ra pöütmwälila.
1CO 15:19 Are sia apilükülükü Kraist lon ei chök manau, sia attong seni aramas meinisin mi nom won ei fanüfan.
1CO 15:20 Nge a pwüng pwe Kot a amanauasefäli Kraist seni mäla, iei mine a allükülük pwe chokewe mi mäla repwe pwal manausefäl.
1CO 15:21 Pun usun chök mäla a pop seni eman aramas, pwal ina chök usun ewe manausefäl seni mäla a pop seni eman aramas.
1CO 15:22 Pun usun aramas meinisin ra mäla lon Atam, iei usun aramas meinisin repwe manausefäl lon Kraist.
1CO 15:23 Nge meinisin repwe manausefäl lon en me tettelin: Kraist a akom, mürin chokewe ir nöün Kraist repwe manausefäl lon fansoun an liwinsefäl.
1CO 15:24 Mürin epwe war ewe fansoun sopolan. Kraist epwe akufu ekewe samol, ekewe sounemenem me ekewe manaman o atolonga mwün fän nemenien Saman Kot.
1CO 15:25 Pun Kraist epwe fokun nemenem tori Kot epwe akufu chon oputan meinisin o anomuur fän pechen.
1CO 15:26 Iwe, ewe amüchülan chon oputan epwe mola, iei mäla.
1CO 15:27 Pun iei mine a mak lon ekewe Toropwe mi Pin, “Kot a anomu mettoch meinisin fän pechen.” Ewer, a fokun fat pwe ewe kapas “mettoch meinisin” Kot esap pachelong lon, i ewe mi anomu mettoch meinsin fän nemenien Kraist.
1CO 15:28 Iwe, nge lupwen ekewe mettoch meinisin ra nom fän nemenien Kraist, mürin ewe Nau epwe püsin anomu i fän nemenien Kot, i ewe mi anomu mettoch meinisin fän nemenian. Iwe, Kot epwe unusen nemeni mettoch meinisin.
1CO 15:29 Iwe, ifa usun ren ekewe aramas mi papatais fänäsengesin ekewe mi mäla? Pwota ra föri iei usun? Are a let pwe ekewe mi mäla resap manausefäl, pwota ekei aramas ra papatais fänäsengesin ekewe mi mäla?
1CO 15:30 Nge me rem, pwota äm aipwe küküna feiengau iteiten fansoun meinisin?
1CO 15:31 Ämi pwii kana, üa sereni feiengauen mäla iteiten rän. Üa apasa ei lon ai sikäsinikemi lon Kraist Jesus ach Samol.
1CO 15:32 Are ngang üa fiu ngeni ekewe manmwacho lon Efisos fänäsengesin ekoch popun mi fis seni ekiekin aramas, met lomotan ngeniei? Nge are ekewe mi mäla resap manausefäl, pwota sisap chök föri usun met ekewe ekoch ra apasa, “Ousipwe momongö o ükün, pun lesor sipwe mäla”?
1CO 15:33 Ousap püsin atupukemi: “Chiechi ngeni aramas mi ngau a angauala manauach.”
1CO 15:34 Oupwe miritila, iwe, oupwe ükütiu le föri tipis. Pun ekoch me leimi resap silei Kot, üa pwärätä ei pwe oupwe säw ren.
1CO 15:35 Iwe, eli eman epwe ais, “Ifa usun än ekewe mi mäla repwe manausefäl? Met sokun inis repwe inisini?”
1CO 15:36 Ka umwes! Lupwen ka fotuki eföü pwükil lon pwül, esap pwükütä are esap akomwen mäla.
1CO 15:37 Nge mine ka fotuki eföü chök pwükil, eli eföü föün wiich ika och sokun föün irä, sap inisin ewe irä epwe märitä me mürin.
1CO 15:38 Iwe, Kot a ngeni ewe pwükil eu inis usun i a mochen. A ngeni eföü me eföü pwükil en me inisin.
1CO 15:39 Fituken mönümanau meinisin a sokofesen. Mi wor och sokun fituken aramas, och sokun fituken man, och sokun fituken machang, pwal och sokun fituken ik.
1CO 15:40 A wor inis minen läng, a pwal wor inis minen fanüfan. Lingen ekewe inis minen läng a sokola seni lingen ekewe inis minen fanüfan.
1CO 15:41 A wor eu sokun lingen akkar, eu sokun lingen maram, pwal eu sokun lingen ekewe fü, pwal mwo nge lefilen ekewe fü a sokofesen linger.
1CO 15:42 Iei usun mine epwe fis lupwen ekewe mi mäla repwe manausefäl. Ewe inis mi fotutiu a mämmä, nge ewe inis mi manausefäl esap mämmä.
1CO 15:43 Lupwen a fotutiu a lingengau o apwangapwang, nge lupwen epwe manausefäl epwe ling o pöchökül.
1CO 15:44 Met a fotutiu eu inis sokun fituk, nge met epwe manausefäl eu inis sokun ngün. Are a wor eu inis sokun fituk, epwe pwal wor eu inis sokun ngün.
1CO 15:45 Pun iei usun mine a mak lon ekewe Toropwe mi Pin, “Ewe poputän aramas Atam, i eman aramas mi manau”, nge ewe amüchülan Atam, i eman Ngün mi afisätä manau.
1CO 15:46 Nge sap ewe inis sokun ngün a akom, pwe ewe inis sokun fituk, mürin ewe inis sokun ngün.
1CO 15:47 Ewe aeumanün Atam a för seni pwül, nge ewe aruomanün Atam a feito seni läng.
1CO 15:48 Chokewe mi pop seni pwül ra usun chök ätewe mi för seni pwül, nge chokewe mi pop seni läng ra usun chök ätewe mi feito seni läng.
1CO 15:49 Usun sia sokuni sokun ewe aramas mi för seni pwül, ina usun sipwe pwal sokuni sokun ewe Aramas seni läng.
1CO 15:50 Ämi pwii kana, iei wewen ai kei kapas: Mine a för seni fituk me cha esap tongeni mwüni mwün Kot, nge mine a morola esap tongeni eäni mine esap morola.
1CO 15:51 Oupwe rongorong, üpwe ürenikemi eu kapas monomon: Sap kich meinisin sipwe mäla, nge lupwen ewe amüchülan rappwa epwe tik, kich meinisin sipwe müttir wilila
1CO 15:52 lon eu chök morupun mas. Pun lupwen ewe rappwa epwe tik, ekewe mi mäla repwe manausefäl, nge resap chüen mälasefäl, nge kich meinisin sipwe wilila.
1CO 15:53 Pun met mi morola epwe siwil ngeni met esap tongeni morola, nge met mi mämmä epwe siwil ngeni met esap tongeni mämmä.
1CO 15:54 Iwe, lupwen met mi morola epwe siwil ngeni met esap tongeni morola, o met mi mämmä epwe siwil ngeni met esap tongeni mämmä, mürin epwe pwönüetä mine a mak lon ekewe Toropwe mi Pin, “Manau a akufu mäla pwe esap chüen wor!”
1CO 15:55 “En mäla, ifa om win? En mäla, ifa om manamanen akafeiengau?”
1CO 15:56 Mäla a angei an manamanen akafeiengau seni tipis, nge tipis a angei an manaman seni ekewe Allük.
1CO 15:57 Nge kilisou ngeni Kot mi ngenikich ach win ren ach Samol Jesus Kraist!
1CO 15:58 Iei mine ämi pwii kana mi achengicheng, oupwe apposakemi, ousap mwöküt seni ämi souläng. Oupwe alapalafochei ämi achocho lon ewe angangen ach Samol, pun oua silei pwe esap lomotongau ämi angang lon ach Samol.
1CO 16:1 Iwe, iei mine üa makkei ngenikemi usun ewe alilis oua ionifengeni fän iten ekewe chon pin lon Jutea: oupwe fokun föri usun met üa fen üreni ekewe souläng lon ekewe mwichefel lon Kalatia.
1CO 16:2 Iteiten räninfel eman me eman leimi epwe aimwüela och alilis lon ükükün met a tufich ngeni. Iwe, oupwe iseis, pwe esap fis ämi ionifengeni ewe alilis lupwen üpwe war.
1CO 16:3 Lupwen üpwe torikemi, üpwe tinala ätekewe oua filiiretä o ngeniir toropwe, pwe repwe uwala ewe lifang lon Jerusalem.
1CO 16:4 Nge are epwe öch ngeniei ai üpwe pwal feila, iwe, ir repwe tongeni etiei.
1CO 16:5 Iwe, üpwe feila remi mürin ai saifeil lon Masetonia, pun üa fen akota ai üpwe saifeil lon Masetonia.
1CO 16:6 Eli üpwe nom remi lon ekoch fansoun, eli lon unusen fansoun patapat. Iwe, oua tongeni alisiei pwe üpwe sopwela ai sai ekis meinisin ia üpwe feila ie.
1CO 16:7 Pun üsap mochen üpwe churikemi fansoun mochomoch, nge üa apilüköch pwe üpwe nonom remi fansoun langatam are ach Samol a mwüt ngeniei.
1CO 16:8 Üpwe nonom ikei lon Efisos tori ewe ränin Pentikost,
1CO 16:9 pun a wor eu asam mi suk chöchöla pwe üpwe föri ewe angang mi aüchea, nge a pwal wor chomong chon pinei ewe angang.
1CO 16:10 Iwe, are Timoty epwe torikemi, oupwe tümwünüfichi ämi oupwe etiwöchü, pun i a angang fän iten ach Samol usun chök ngang.
1CO 16:11 Esap wor eman leimi epwe ösüfölüngauei, nge oupwe alisi pwe epwe sopwela an sai fän kinamwe. Iwe, epwe liwinsefälito rei, pun üa witiwiti fiti pwal pwiich kewe.
1CO 16:12 Iwe, ren pwiich we Apolos, ngang üa fokun tüngor ngeni fän chomong, pwe epwe churikemi me pwal pwiich kewe ekoch, nge esap fokun mefi pwe a öch an epwe feila lon ei fansoun. Iwe, epwe feila remi are a wor an fansoun.
1CO 16:13 Oupwe mamasa, oupwe üppos lon ämi lükülük, oupwe eäni sokun mwän, oupwe pöchökülela.
1CO 16:14 Meinisin mine oupwe föri, oupwe föri lon chen.
1CO 16:15 Oua silei usun Stefanas me chon an famili. Ir ra akom le soulängila me lon Akaia, ra fokun achocho le angang ngeni ekewe chon pin. Ämi pwii kana, üa tüngormau ngenikemi,
1CO 16:16 pwe oupwe aleasochis ngeni ekei sokun aramas usun ir, pwal ngeni chokewe mi etiir le angang o angang weires.
1CO 16:17 Üa pwapwa ren än Stefanas, Fortunatus me Akaikus wareto, pun ra siwilikemi lupwen ämi ousap nom rei.
1CO 16:18 Ra apwapwai letipei usun chök ra apwapwai letipemi. Ekana sokun aramas oupwe aücheaniir.
1CO 16:19 Chon ekewe mwichefel lon ewe fanü Asia ra kapong ngenikemi. Akwila me Prisila pwal chon ewe mwichefel mi mwichfengen lon imwer ra fokun kapong ngenikemi lon ach Samol.
1CO 16:20 Pwiich kewe meinisin mi nom ikei ra kapong ngenikemi. Oupwe kapongfengen lefilemi ren ewe kapongen souläng.
1CO 16:21 Ngang Paulus üa makkei ai ei kapong ren püsin pei.
1CO 16:22 Iö esap tongei ach Samol i epwe anümamau! Maranatha. (wewen: Äm Samol kopwe feito!)
1CO 16:23 Ümöümöchün ach Samol Jesus epwe nonom remi.
1CO 16:24 Ai chen epwe nonom remi meinisin lon Kraist Jesus. Amen.
2CO 1:1 Ngang Paulus, eman nöün Kraist Jesus soukünö ren letipen Kot, pwal pwiich ei Timoty, aia kapong ngeni chon ewe mwichefel lon Korint, pwal ngeni ekewe chon pin meinisin lon unusen ewe fanü Akaia.
2CO 1:2 Samach Kot me ach Samol Jesus Kraist epwe ngenikemi ümöümöch me kinamwe.
2CO 1:3 Sipwe mwareiti Kot i Semen ach Samol Jesus Kraist, ewe Sam mi eäni tong me ewe Kot mi echipakich lon mettoch meinisin.
2CO 1:4 A akachipakich lon ach riaföü meinisin, pwe pwal kich sipwe tongeni echipa chokewe mi nom lon sokopaten riaföü meinisin ren ewe chip sia püsin angei me ren Kot.
2CO 1:5 Pun usun sia eti Kraist lon an kewe riaföü mi chomong, ina usun sia pwal angei ewe chip mi lapalap me ren Kraist.
2CO 1:6 Are aia küna riaföü, a fis ämi chip me manau ren. Nge are aia küna chip, a pwal fis ämi chip mi pwä lupwen oua mosonotam o engila lon ekewe chök riaföü äm aia fen tolong lon.
2CO 1:7 Iwe, äm apilükülüköch fänäsengesimi a fokun nükücharala, pun aia silei, pwe usun oua etikem lon äm riaföü, ina usun oupwe pwal etikem lon äm küna chip.
2CO 1:8 Ämi pwii kana, aia mochen achema ngenikemi usun ekewe riaföü mi torikem lon ewe fanü Asia. Äm aia nom fän watten me choun ekewe weires mi lap seni äm tongeni, pwe aia apilükingau ngeni äm aipwe chüen manau.
2CO 1:9 Aia fokun mefi pwe aipwele mäla. Nge ei a fis, pwe äm aisap anomu äm apilükülük won püsin äm, pwe won Kot echök mi amanauasefäli ekewe mi mäla.
2CO 1:10 I a angasakem seni ekewe feiengauen mäla, i epwe pwal fokun angasakem. Äm aia anomu äm apilükülük won, pwe epwe sopwela le angasakem,
2CO 1:11 ika ämi oua alisikem lon ämi iotek. Iwe, epwe iei usun pwe ekewe chomong iotek fän item epwe pwönüetä o Kot epwe afeiöchükem, mürin chomong repwe kilisou ngeni fän item.
2CO 1:12 Iwe, iei met aia aingaing won, pwe mwelien letipem a pwäri ngenikem pwe manauem won ei fanüfan, pwal fokun äm chiechifengen me ämi a fis fän let me wenechar mi feito seni Kot. Äm aia föri iei usun, sap fän tipachemen fanüfan, nge fän än Kot ümöümöch.
2CO 1:13 Äm aia chök mak ngenikemi met oua tongeni aleani o wewe ren. Iwe, üa apilükülük,
2CO 1:14 pwe usun oua weweitikem eu kinikin chök, iei usun oupwe unusen weweiti, pwe oua tongeni aingaing wom usun chök pwal äm aipwe aingaing womi lon ewe Ränin ach Samol Jesus.
2CO 1:15 Pokiten üa apilükülükü ei, üa akota ai üpwe akomwen churikemi, pwe oupwe küna feiöch fän ruu.
2CO 1:16 Üa fen akota ai üpwe churikemi lon ai sai ngeni Masetonia, pwal lupwen üpwe liwinsefäl ngenikemi seni Masetonia. Mürin oupwe tongeni alisiei lon ai sai ngeni Jutea.
2CO 1:17 Lupwen üa akota ei, ifa usun üa siwilikisi ai ekiek, nge esap wor popun? Ika üa föri ai akot lon ekiekin fanüfan, pwe üpwe apasa “Ewer, ewer,” pwal “Apw, apw” lon eu chök otun?
2CO 1:18 Nge usun Kot a enletin allükülük, ai pwon ngenikemi esap “Ewer” me “Apw”.
2CO 1:19 Pun Jesus Kraist ewe Nöün Kot, äm me Silas me Timoty aia afalafala leimi, i sap eman mi apasa, “Ewer” me “Apw” lon eu chök otun, nge lon i Kot a apasa “Ewer” iteiten fansoun.
2CO 1:20 Pun än Kot kewe pwon meinisin ra pwönüetä lon Kraist. Iei popun ren Jesus Kraist sia apasa “Amen”, pwe Kot epwe ling ren.
2CO 1:21 Iwe, püsin Kot a anükücharakem me ämi lon Kraist. I a afilikich
2CO 1:22 o pwaunikich pwe sipwe nöün. A fangelong lon lelukach Ngünün pwe allükülükün mettoch meinisin mine a molotä fän itach.
2CO 1:23 Ngang üa köri Kot pwe nei chon pwärätä, i a silei letipei. Iwe, üsap mochen aweiresikemi, iei mine üsap chüen ekiekin feila Korint.
2CO 1:24 Äm aisap mochen pese ngenikemi met oupwe lükü, pun oua nüküchar lon ämi lükülük. Nge sia chök angangfengen fänäsengesin ämi pwapwa.
2CO 2:1 Iei mine üa ekiekietä pwe üsap chüen liwinsefälitikemi, pun üsap mochen oupwe letipeta.
2CO 2:2 Pun are üpwe föri pwe oupwe letipeta, iö chök epwe chüen echipaei, nge chokewe chök ra küna letipeta rei?
2CO 2:3 Iei popun üa makkei ena toropwe ngenikemi, pun üsap mochen feila remi o küna letipeta ren chokewe ürürün pwe repwe apwapwaei. Pun üa mefi, pwe lupwen ngang üa pwapwa, pwal ämi meinisin oupwe pwapwa.
2CO 2:4 Pun üa mak ngenikemi fän watten weires me riaföün letipei, pwal fän watten chönün mesei. Üsap mochen pwe oupwe küna letipeta, nge üa mochen pwe oupwe mefi alololun ewe chen üa eäni ngenikemi meinisin.
2CO 2:5 Iwe, are eman a afisätä än eman letipeta, esap föri ngeniei, nge a föri ngenikemi meinisin, ika ngeni ekoch me leimi. Üa apasa ei, pun üsap mochen pöchökül ngeni ätewe mi föri ei sokun föför.
2CO 2:6 A naf fän iten ei aramas pwe a küna apwüng lon ei ükükün me ren chomong leimi.
2CO 2:7 Nge iei oupwe amusala tipisin ätewe o echipa letipan, pwe esap tolong lon letipeta mi fokun watte, pwe epwe fangatä an souläng.
2CO 2:8 Iei mine üa tüngor ngenikemi ämi oupwe asile ngeni pwe oua wesewesen tongei.
2CO 2:9 Iei popun üa makkei ngenikemi ena toropwe, pun üa mochen sotunikemi, pwe üpwe silei are oua aleasochisiei lon mettoch meinisin.
2CO 2:10 Lupwen oua amusala tipisin eman ren met a föri, ngang üa pwal amusala an tipis. Pun are mi wor och mine üpwe amusala won, ngang üa amusala fänäsengesimi mwen mesen Kraist.
2CO 2:11 Üa föri ei, pwe esap wor än Satan nemenem woch, pun sia silei an ekiek.
2CO 2:12 Iwe, lupwen üa tori Troas pwe üpwe afalafala ewe Pworausen Manau usun Kraist, üa küna pwe ach Samol a suki eu asam ngeniei fän iten ewe angang.
2CO 2:13 Nge letipei esap kinamwe, pun üsap küna pwii we Titus. Iei mine üa kapong ngeni ekewe aramas ikenan o feila Masetonia.
2CO 2:14 Nge kilisou ngeni Kot! Pun lon Kraist Kot a emwenikich fansoun meinisin, pwe sipwe eti Kraist lon an win. Kot a nöünöükich, pwe sipwe achöfetalei ewe pworaus usun Kraist pwe aramas repwe silei i, usun och löpwokus mi pwopwonfeil.
2CO 2:15 Pun sia usun chök och pwokusun Kraist ngeni Kot, a pwopwonfeil lein chokewe mi küna manau, pwal lein chokewe mi pöütmwälila.
2CO 2:16 Iwe, ngeni chokewe mi pöütmwälila, iei eu pwokus mi afisätä mäla, nge ngeni chokewe mi küna manau, iei eu pwokus mi atoto manau. Iwe, iö a lipwäköch ngeni ei sokun angang?
2CO 2:17 Äm aisap usun ekewe chomong aramas ra aea än Kot kapas minen amömö fän iten ar repwe kütta win. Nge pokiten Kot a tinikem, äm aia kapas fän wenechar mwen mesan usun nöün Kraist chon angang.
2CO 3:1 Ifa usun, oua ekieki pwe aia püsin sikäsinikem? Ika epwe lomot ngenikem äm aipwe uwala remi ika tüngor senikemi toropwen allükülük usun ekoch ra föri?
2CO 3:2 Püsin ämi nöüm toropwen allükülük, a mak won letipem, pwe aramas repwe tongeni silei o aleani.
2CO 3:3 A fat pwe püsin Kraist a makkei ei toropwe o tinato rech. Esap mak ren ink, nge ren Ngünün ewe Kot mi manau, esap mak won fau mi chöpöp, nge a mak won letipen aramas.
2CO 3:4 Aia apasa ei, pun a wor äm apilükülük won Kot ren Kraist.
2CO 3:5 Esap wor och rem äm aipwe tongeni apasa, pwe a wor äm lipwäköch le föri ei angang, pwe äm lipwäköch a pop seni Kot.
2CO 3:6 I ewe mi alipwäköchükem äm aipwe chon angang ngeni ewe pwon mi fö. Ei pwon esap fis ren allük mi mak, nge a fis ren Ngünmifel, pun ewe allük mi mak a afisätä mäla, nge ewe Ngünmifel a ngenikich manau.
2CO 3:7 Ekewe Allük ra rup ren mesen mak won ekewe fau mi chöpöp o än Kot ling a pwä lupwen a tori aramas. Inamwo ika saramaramen won mesen Moses a kisikisila, nge a fokun saram pwe ekewe chon Israel resap tongeni nenengeni won mesan. Ika ekewe Allük mi afisätä mäla ra toriir lon ena sokun ling,
2CO 3:8 epwe fen ifan me watten ewe ling lon angangen ewe Ngünmifel?
2CO 3:9 Are ewe angang mi atoto liwiningau ngeni aramas a ling, epwe fen ifan me watten ewe ling mi atoto ach pwüng?
2CO 3:10 Pun mine a ling me lom, esap chüen ling ikenai, are sia awewe ngeni ewe ling mi fokun lapalap.
2CO 3:11 Are a wor ling lon ewe pwonen lom mi chök nom ekis chök fansoun, epwe fen ifan me watten ewe ling lon ewe pwon mi fö mi nonom tori feilfeilachök!
2CO 3:12 Pokiten mi wor rem ei sokun apilükülük, äm aia pwora le kapas.
2CO 3:13 Aisap wewe ngeni Moses mi pwölüela won mesan ren echö mangaku, pwe ekewe chon Israel resap tongeni küna pwe ewe ling a kisikisila o wesila.
2CO 3:14 Nge letiper a kopüngüla, tori ikenai ekiekin letiper a pwölüla ren ewe chök pwölüpwöl, lupwen ra aleani ekewe puken ewe pwonen lom. Ewe pwölüpwöl a särifila ren Kraist chök.
2CO 3:15 Tori mwo nge ikenai, iteiten fansoun ar aleani än Moses kewe Allük, ewe pwölüpwöl a chüen pwölüela ekiekin letiper.
2CO 3:16 Nge ewe pwölüpwöl a särifila, lupwen eman aramas a kul ngeni ach Samol.
2CO 3:17 Iwe, ach Samol, i ewe Ngün, nge ia Ngünün ach Samol a nom ie, ikenan a wor ngasala.
2CO 3:18 Nge kich meinisin esap pwölüpwöl won mesach, sia nenengeni lingen ach Samol o lingela ren. A awilikich ngeni eu ling tori pwal eu ling, tori sipwe fokun wewe ngeni i lon ususun. Ei a pop seni ach Samol, i ewe Ngünmifel.
2CO 4:1 Iwe, pokiten än Kot tong a atolongakem lon ei angang, iei mine aisap apilükingau.
2CO 4:2 Nge aia pöütala ekewe föför meinisin mi monomon me ekewe föför mi asäw. Aisap föri föförün atuputup, aisap pwal amwäli än Kot kapas. Nge aia pwärätä mine a let mwen mesen Kot o sotuni äm aipwe aitöchükem ngeni ekiekin aramas meinisin.
2CO 4:3 Pun are ewe Pworausen Manau äm aia afalafala a monomonola, a chök monomonola ngeni chokewe mi pöütmwälila.
2CO 4:4 Ewe koten ei fanüfan a achuna ekiekin letipen chokewe resap lükü, pwe resap tongeni küna saramen ewe Pworausen Manau usun ewe lingen Kraist, i ewe mi lapalapeni lapalapen Kot.
2CO 4:5 Pun aisap afalafal usun püsin äm, nge aia afalafal usun Jesus Kraist, pwe i Samol, nge aia nöümi chon angang fän iten Kraist.
2CO 4:6 Pun Kot, ewe mi apasa, “Saram epwe tinewu seni lon rochopwak”, i chök ewe Kot mi asarama letipem o ngenikem ewe saram, pwe aipwe silei usun än Kot we ling mi pwä won mesen Kraist.
2CO 4:7 Nge a wor rem ei feiöch mi aüchea lon sepi mi för seni pwül, pwe epwe pwä pwe ei tufich mi somwola a pop seni Kot, nge esap pop senikem.
2CO 4:8 Fän chomong aia küna riaföü, nge aisap fangatä. Fän ekoch aia tipemwaramwar, nge aisap apilükingau.
2CO 4:9 Aia küna ninni, nge aisap küna tamepich, aia kufula, nge aisap feiengau.
2CO 4:10 Fansoun meinisin aia uwoufeili än Jesus mäla lon inisim, pwe än Jesus manau epwe pwal pwä lon inisim.
2CO 4:11 Pun lon unusen manauem aia nonom lon feiengauen mäla fansoun meinisin fän iten Jesus, pwe manauen Jesus epwe pwä lon inisim inisin mäla.
2CO 4:12 Iei usun mäla a angang lom, nge manau a angang lomi.
2CO 4:13 A mak lon ekewe Toropwe mi Pin, “Üa lükü, iei mine üa kapas.” Ren ena chök ngünün lükülük äm aia pwal lükü, iei mine aia kapas.
2CO 4:14 Äm aia silei, pwe Kot ewe mi amanauasefäli ach Samol Jesus, epwe pwal amanauasefälikem fiti Jesus o uweikeemila me ämi mwen mesan.
2CO 4:15 Ekei mettoch meinisin ra fis ngenikem fän itemi, pwe än Kot ümöümöch mi tori chomong, chomong aramas epwe afisätä ar iotekin kilisou mi urourela, pwe Kot epwe ling ren.
2CO 4:16 Iei mine sisap apilükingau. Inamwo ika inisich a apwangapwangala o mäla, nge manauen ngünüch a söföla rän me rän.
2CO 4:17 A müchükai ach riaföü, a pwal pal, nge epwe atoto ngenikich eu watten ling esemüch a fokun lapalap seni ekei riaföü.
2CO 4:18 Pun sisap afota mesach won ekewe mettoch sia tongeni küna, nge sia afota mesach won ekewe mettoch sisap tongeni küna. Pun ekewe mettoch sia tongeni küna repwe müchüla, nge ekewe mettoch sisap tongeni küna repwe nonom tori feilfeilachök.
2CO 5:1 Pun sia silei, pwe lupwen imwach imwen siamü sia nom lon, wewen inisich won ei fanüfan, epwe tala, mi wor imwach me ren Kot, imwach imwen wilipos mi nom läng tori feilfeilachök, esap förien aramas.
2CO 5:2 Nge iei sia ngüngü lon ach pwos, pun sia mochen pwe sipwe tolong lon imwach mi nom läng.
2CO 5:3 Pun lupwen sia tolong lon, esap pwäla selelan ngünüch.
2CO 5:4 Iwe, lupwen sia nom lon imwach imwen siamü, sia ngüngü fän ach weires. Esap wewen pwe sia mochen towu seni inisich me fanüfan, nge sia mochen pwe inisich me läng epwe pwilipwil woch, pwe mine a mämmä epwe wili ngeni manau.
2CO 5:5 Iwe, Kot ewe mi amolakich ngeni ei sokun siwil, i a ngenikich Ngünün pwe allükülükün mettoch meinisin a amolätä fän itach.
2CO 5:6 Iei mine fansoun meinisin sia fokun apilükülük o silei, pwe lupwen sia nom lon inisich me fanüfan, sia toau seni lenien ach Samol.
2CO 5:7 Pun sia manau lon lükülük, nge sap lon met sia küna.
2CO 5:8 Sia fokun apilükülüköch o sia fokun mochen ach sipwe towu seni inisich o feila pwe sipwe nom ren ach Samol.
2CO 5:9 Iei mine sia fokun mochen apwapwai i, ese lifilifil ika sia nom lon inisich me ikei, ika lon inisich me läng.
2CO 5:10 Pun kich meinisin sipwe ütä me mwen Kraist, pwe i epwe apwüngükich. Eman me eman epwe angei en me liwinin an föför a föri lon manauan, liwinin föför mürina, ika liwinin föför mi ngau.
2CO 5:11 Äm aia silei usun ach niuokusiti ach Samol, iei mine aia sotuni le pese ngeni aramas ar repwe etiwa ewe Pworausen Manau. Kot a wesewesen silekem, nge ngang üa apilükülüköch pwe ämi oua pwal sileei lon letipemi.
2CO 5:12 Äm aisap mochen sotunisefäli le allükülükü püsin äm ngenikemi, nge aia mochen ngenikemi och popun mi mürina pwe oupwe sikäsinikem, pwe oupwe tongeni pölüeni chokewe mi sikesik won met ra küna ren lapalapen eman aramas me lükün, nge esap met a nom lon letipan.
2CO 5:13 Oua ekieki pwe äm mi umwes? Ika äm mi umwes, iwe, epwe fänäsengesin Kot. Nge pwüngün pwe aia mirit. Ren ei oua küna feiöch.
2CO 5:14 Sia nom fän nemenien än Kraist we chen ngenikich, pun sia silei pwe eman aramas a mäla fän iten aramas meinisin, iei mine ir meinisin ra eti lon an mäla.
2CO 5:15 A mäla fän iten aramas meinisin, pwe chokewe mi manau resap chüen manau fän püsin iter, nge repwe chök manau fän iten ewe mi mäla o manausefäl fän iter.
2CO 5:16 Seni ei fansoun sisap chüen ekieki och mettoch usun eman aramas lon pekin fituk. Inamwo ika sia ekieki usun Kraist lon pekin fituk me mwan, nge iei sisap chüen ekieki usun ei.
2CO 5:17 Iei mine are eman a nonom lon Kraist, i eman förien Kot mi fö. Ewe manauen lom a wes, nge eu manau mi fö a fis.
2CO 5:18 Ekei mettoch meinisin ra pop seni Kot, i ewe mi achäfengenikich me i ren Kraist o ngenikich ewe angangen achächä.
2CO 5:19 Iei masouen ach afalafal, pwe Kot a nonom lon Kraist o achäsefäli chon fanüfan ngeni püsin i. Esap chüen chechemeni ar tipis, pwe a awisakich pwe sipwe afalafala ewe kapasen achächä.
2CO 5:20 Iei mine äm aia chon arong fän iten Kraist usun itä nge Kot a nöünöü äm le tüngor ngenikemi. Äm aia tüngormau ngenikemi fän iten Kraist: Oupwe chäfengen me Kot.
2CO 5:21 Kraist esap wor an tipis, nge fän itach Kot a föri pwe i a tipisini tipisich, pwe kich sipwe küna pwüngün Kot lon i.
2CO 6:1 Iwe, lon äm angangfengen me Kot, aia tüngormau ngenikemi, pwe ousap alomotongauei än Kot ümöümöch oua angei.
2CO 6:2 Pun iei met Kot a apasa, “Lon fansoun fich üa aüselingok, lon ränin küna manau üa alisuk.” Nengeni, ikenai fokun fansoun fich, nengeni, ikenai ränin küna manau!
2CO 6:3 Äm aisap mochen än eman epwe küna och mwälin äm angang, iei mine aisap anomu ngeni eman och lenien chepetek.
2CO 6:4 Nge lon mettoch meinisin aia föri aia pwärätä pwe äm nöün Kot chon angang: Ren äm engila fän riaföü me weires me feiengau.
2CO 6:5 Ra wichikem, ra aturukeemilong lon imwen fötek, ra afitikoko ngenikem. Äm aia fokun angang weires, fän ekoch esap wor fansoun äm möür, aia pwal echik.
2CO 6:6 Aia pwärätä pwe äm nöün Kot chon angang ren limöch, silelap, mosonotam me kirikiröch, ren ewe Ngünmifel, ren äm eäni chen enlet,
2CO 6:7 ren äm afalafala ewe kapas mi let pwal ren manamanen Kot. Aia eäni pwüng pisekin maun, pwal äm pisekin epet senikem feiengau.
2CO 6:8 Ekoch ra aitöchükem o ekoch ra aitengauakem, ekoch ra turunufaseikem o ekoch ra mwareitikem. Ra apasa pwe aia chon atuputup, nge äm aia apasatä kapas mi let.
2CO 6:9 Aramas resap silekem, nge aia sil me ren aramas lon ekewe leni meinisin. Aia wewe ngeni chon mäla, nge nengeni aia manau. Ra wichikem, nge resap nikeemila.
2CO 6:10 Aia letipeta, nge aia pwapwa fansoun meinisin. Aia usun itä nge chon wöüngau, nge aia awöüü chomong aramas. Aia usun itä nge aisap eäni och, nge aia wesewesen eäni mettoch meinisin.
2CO 6:11 Ämi chiechiem kana mi achengicheng lon Korint! Aia kapas ngenikemi fän wenechar. Aia fokun suki letipem ngenikemi.
2CO 6:12 Äm aisap apüngala letipem ngenikemi, nge ämi oua apüngala letipemi ngenikem.
2CO 6:13 Iei üa kapas ngenikemi usun itä nge ämi nei kana. Oupwe pwäri ngenikem ewe chök sokun memef äm aia eäni ngenikemi. Oupwe pwal fokun suki letipemi ngenikem!
2CO 6:14 Ousap rifengenikemi me chokewe resap lükü Kot, ousap etiir lon ar angang. Pun ifa usun än pwüng me pwüngingau epwe chufengen ren? Are meta saram epwe chiechi ngeni rochopwak ren?
2CO 6:15 Ifa usun än Kraist me Satan repwe tongeni tipeeufengen? Ika met eman chon lükü Kot epwe eänifengeni me eman esap lükü?
2CO 6:16 Ifa usun, än Kot imwenfel me uluulun anümwäl ra tongeni nonomfengen? Pun kich än ewe Kot mi manau imwenfel. Usun Kot a apasa, “Üpwe nonom rer o fetalfeil lefiler. Ngang üpwe ar Kot, nge ir repwe nei aramas.”
2CO 6:17 Iei mine ach Samol a apasa, “Oupwe towu seniir o aimwükemiila seniir. Ousap atapa och mettoch mi limengau, pwe üpwe etiwakemi.
2CO 6:18 Ngang üpwe sememi, Nge ämi oupwe nei mwän me nei fefin, iei alon ewe Samol mi Unusen Manaman.”
2CO 7:1 Ämi chiechiei kana mi achengicheng, Kot a fen ngenikich ekei kapasen pwon meinisin, iei mine sipwe püsin limetikich seni sokun limengauen inis me ngün, o sipwe manaueni eu manau mi unusen pin lon ach niuokusiti Kot.
2CO 7:2 Oupwe suki letipemi ngenikem. Äm aisap föri och mi mwäl ngeni eman, aisap afeiengaua eman are atupu eman.
2CO 7:3 Üsap apasa ei ren ai üpwe apwüngükemi, pun üa fen apasa me mwan pwe aia echenikemi, pwe sia nonomfengen fansoun meinisin, ese lifilifil ika sia manau ika sia mäla.
2CO 7:4 A fokun watte ai apilükülükükemi, üa fokun sikäsinikemi. Lon äm riaföü meinisin ngang üa chüen apilükülüköch, a fokun somwola ai pwapwa.
2CO 7:5 Pun lupwen aia tori Masetonia, esap wor äm asösö, nge aia tolong lon riaföü fansoun meinisin. Ekoch aramas ra anini ngenikem, o niuokus a wor lon letipem.
2CO 7:6 Nge Kot, ewe mi echipa chokewe mi tipetekison, a echipakem ren wareton Titus.
2CO 7:7 Nge aisap chök chip ren an feito, pwe aia pwal chip ren an apworausa ngenikem usun ämi echipa i. A apworausa ngenikem usun ämi pwositiei, usun ämi letipeta, pwal usun ämi tiliken le peniei. Iei mine a lapalap ai pwapwa lon ei fansoun.
2CO 7:8 Pun inamwo ika nei we toropwe a afisätä ämi letipeta, üsap liamam usun mine üa makkei lon. Ngang üpwe tongeni liamam lupwen üa küna pwe masouen nei we toropwe a afisätä ämi letipeta lon ekis chök fansoun.
2CO 7:9 Nge iei üa pwapwa, sap pokiten üa afisätä ämi letipeta, nge pokiten ämi letipeta a afisätä ämi ekieksefäl. Ei sokun letipeta oua nom lon a fis ren letipen Kot, iei mine äm aisap atoto feiengau womi.
2CO 7:10 Pun ewe letipeta me ren Kot a atoto ekieksefäl mi emweni ngenikich ach sipwe küna manau, nge esap wor liamam lon. Nge ewe letipeta me ren fanüfan a atoto mäla.
2CO 7:11 Oupwe nenengeni met Kot a föri ren ämi letipeta: A afisätä ämi achocho pwal ämi mochen alletätä pwe esap wor ämi tipis. A afisätä ämi song, ämi niuokus, ämi pwos, ämi tiliken me ämi mochen apwüngü mine a ngau. Ren ekei mettoch meinisin oua pwärätä pwe esap wor och mwäl remi.
2CO 7:12 Iwe, inamwo ika üa makkei ngenikemi ena toropwe, üsap mak fän iten ätewe mi föri mine a mwäl, ika ätewe mi weires ren ewe mwäl, nge üa makkei ai üpwe afata ngenikemi pwe Kot a silei pwe oua fokun chüngükem.
2CO 7:13 Iei popun äm aia apilükülüköch. Nge äm aisap chök apilükülüköch, aia pwal fokun pwapwa pokiten än Titus pwapwa, pun ämi meinisin oua alisi i pwe epwe chip.
2CO 7:14 Ngang üa sikäsinikemi ngeni Titus, o ämi ousap alichipüngüei. Äm aia kapas let ngenikemi fansoun meinisin, ina chök usun äm sikäsinikemi ngeni Titus a pwä pwe a let.
2CO 7:15 Iwe, än Titus tongekemi a fokun lalapala, lupwen a chechemeni usun ämi meinisin oua aleasochis ngeni an kewe öüröür, pwal usun ämi etiwa i fän tipetekison me menin.
2CO 7:16 Üa fokun pwapwa pwe üa tongeni apilükülükükemi lon mettoch meinisin.
2CO 8:1 Ämi pwiich kana souläng, aia mochen ämi oupwe silei usun mine a fis lon ekewe mwichefel lon Masetonia ren än Kot ümöümöch.
2CO 8:2 Ra küna watten sosot ren ekewe riaföü a toriir. Nge ar pwapwa a fokun lapalap, pwe ra fokun fangafangöch lon ar lifang, inamwo ika ra fokun wöüngau.
2CO 8:3 Üa pwäri ngenikemi, pwe ra lifang won ükükün ar tongeni, nge pwal lap seni ar tongeni. Seni püsin mochenin letiper
2CO 8:4 ra fokun tütüngor ngenikem, pwe repwe pachelong lon ewe angangen alilis fän iten ekewe chon pin lon Jutea.
2CO 8:5 Iwe, ei alilis a fen lap seni mine aia tongeni apilükülükü. Akomwan ra fangala püsin manauer ngeni ach Samol, nge mürin ra pwal fangala püsin ir ngenikem ren letipen Kot.
2CO 8:6 Iei mine aia pesei Titus, ätewe mi popuetä ei angang, pwe epwe sopwela o alisikemi, pwe oupwe awesala ei angang mi fis fän tong.
2CO 8:7 Ämi oua fokun pisekisekila lon mettoch meinisin: lon ämi lükü Kraist, lon ämi silei kapas, lon ämi silelap, lon ämi achocho le alilis, pwal lon ämi tongekem. Iei mine sia mochen pwe oupwe pwal fangafangöch lon ei angang mi fis fän tong.
2CO 8:8 Üsap mochen allük ngenikemi ren ekei kapas. Nge ren ai aiti ngenikemi usun än ekewe pwal ekoch achocho le alilis, üa sotuni ai üpwe küna enletin ämi chen.
2CO 8:9 Pun oua silei ewe ümöümöch än ach Samol Jesus Kraist, inamwo ika a pisekisekila, nge a wöüngauela fän itemi, pwe ämi oupwe pisekisekila ren an wöüngau.
2CO 8:10 Iwe, iei ai öüröür ngenikemi won ei angangen alilis: A mürina ngenikemi, pwe oupwe awesala iei met oua popuetäni lon ewe ier a la. Ousap chök akom le föri ewe alilis, nge oua pwal tipeeu ngeni le föri.
2CO 8:11 Iei mine oupwe sopwela o awesala ewe angang. Oupwe achocho ngeni an epwe wesila, usun oua fen amolätä lon ämi akot. Oupwe lifang won ükükün met mi wor remi.
2CO 8:12 Pun are a wor remi ewe mochen lifang, Kot epwe etiwa ämi lifang won ükükün met oua tongeni, sap won ükükün met ousap tongeni.
2CO 8:13 Ngang üsap mochen pwe ekoch repwe mecheres, nge ämi oupwe weires, nge üa mochen pwe ämi oupwe wewefengen.
2CO 8:14 Pun lon fansoun ikenai somwen wöümi epwe alisi met ra osupwang ren, pwe lupwen epwe tori ämi osupwang, ir repwe alisikemi ren somwen wöür. Iwe, iei usun ämi meinisin oupwe wewefengen.
2CO 8:15 Pun a mak lon ekewe Toropwe mi Pin, “Iö a ioni chomong esap wor somwan, nge iö a ioni kükün esap nafangau.”
2CO 8:16 Iwe, aia kilisou ngeni Kot ren an atolonga lon letipen Titus pwe epwe achocho le alisikemi usun chök pwal äm.
2CO 8:17 Titus esap chök etiwa äm tüngor, nge a pwal fokun achocho an epwe alisikemi, pwe a püsin filätä seni mochenin letipan pwe epwe feila remi.
2CO 8:18 Aia pwal tinala eman pwiich pwe epwe eti Titus, i eman mi iteföüla lon ekewe mwichefel meinisin fän iten an angangen afalafala ewe Pworausen Manau.
2CO 8:19 Sap iei chök, nge a pwal fil me ren chon ekewe mwichefel pwe epwe etikem lon äm sai. Epwe alisikem le tümwünü ei alilis aia ionifengeni, pwe ach Samol Jesus Kraist epwe ling ren, epwe pwal pwä pwe aia achocho le alisi ekewe souläng mi osupwang.
2CO 8:20 Äm aia püsin afälikem, pwe esap wor eman epwe tongeni atipisikem ren lapalapen äm tümwünü ei lifang mi watte.
2CO 8:21 Pun aia fokun ekiekin föri met mi pwüng, sap chök me mwen mesen ach Samol, nge pwal me mwen mesen aramas meinisin.
2CO 8:22 Aia pwal tinala pwiich we pwe epwe etiir. Aia sotuni i fän chomong o küna pwe a fokun achocho le alilis fansoun meinisin. Nge iei a fen alapala an achocho, pun a fokun apilükülükükemi.
2CO 8:23 Iwe, ren Titus, i chiechiei mi etiei lon ai angangen alisikemi. Nge ren pwiich kewe ekoch mi eti Titus, ir ra tupuni ekewe mwichefel o alinga Kraist.
2CO 8:24 Iei mine oupwe pwäri ngeni ekei mwän leten ämi chen, pwe chon ekewe mwichefel meinisin repwe küna o silei pwe a pwüng äm sikäsinikemi.
2CO 9:1 Iwe, esap wor lomoten ai üpwe mak ngenikemi usun ewe alilis epwe titila ngeni ekewe chon pin lon Jutea.
2CO 9:2 Üa silei pwe oua fokun mochen alilis o üa sikäsinikemi ngeni ekewe souläng lon Masetonia. Üa apasa ngeniir, pwe chiechiach kewe souläng lon Akaia ra fen molotä seni lon ewe ier a la ar repwe alilis. Iwe, chomong me leir ra lolloletä ren ämi achocho.
2CO 9:3 Iei üpwe tinala remi pwiich kei, pwe epwe pwä pwe äm sikäsinikemi usun ei mettoch esap kapas pön chök. Nge ämi oupwe molotä ngeni ämi alilis usun üa fen apasa.
2CO 9:4 Pun are ekewe souläng seni Masetonia repwe etiei o künakemi pwe oua molongau, äm aipwe fokun säw pokiten äm apilükülükükemi, nge ämi oupwe pwal säw.
2CO 9:5 Iei mine üa ekieki, pwe a lomot ai üpwe pesei pwiich kei, pwe repwe akomwola remi pwe repwe akomwen amolätä ewe lifang oua pwon pwe oupwe föri. Mürin epwe molotä lupwen ngang üpwe torikemi. Iwe, epwe pwä pwe oua fang seni mochenin letipemi, nge sap seni än eman pese ngenikemi.
2CO 9:6 Oupwe chechemeni, pwe are fotan eman a üküküngau, kinian epwe pwal üküküngau, nge are fotan eman a somwosomwöch, kinian epwe pwal somwosomwöch.
2CO 9:7 Oupwe fang en me usun mefien letipan. Ousap fangürüfituk ika fang fän echimw. Pun Kot a echeni eman mi pwapwa le lifang.
2CO 9:8 Iwe, Kot a tufichin fang ngenikemi sokopaten feiöch mi somwola, pwe fansoun meinisin epwe naf ngenikemi mettoch meinisin fän püsin itemi, epwe pwal somwola ämi pisekisek, pwe oupwe tongeni föri sokun föför mürina meinisin.
2CO 9:9 Pun iei usun mine a mak lon ekewe Toropwe mi Pin, “A fangafangöch ngeni ekewe chon wöüngau, an kirikiröch epwe nonom tori feilfeilachök.”
2CO 9:10 Iwe, Kot mi awora pwükil fän iten ewe chon fofot, pwal föri pwe epwe wor mongö, i epwe pwal awora ngenikemi ekewe pwükil meinisin oua tongeni fotuki, epwe pwal amäriiretä, pwe epwe wor räs watte ngenikemi ren ämi fangafangöch.
2CO 9:11 Kot epwe apisekisekikemi lon mettoch meinisin, pwe oupwe tongeni fangafangöch fansoun meinisin. Iwe, chomong aramas repwe kilisou ngeni Kot fän iten ämi lifang repwe angei senikemi.
2CO 9:12 Pun ei angangen alilis oua föri esap chök awesi än ekewe chon pin osupwang, nge a pwal efisätä pwe chomong aramas repwe iotekin kilisou ngeni Kot ren.
2CO 9:13 Iwe, pokiten a pwä allükülükün ämi angangen alilis, chomong aramas repwe mwareiti Kot fän iten ämi aleasochis ngeni ewe Pworausen Manau usun Kraist ämi oua pwärätä, pwal fän iten ämi fangafangöch lon ämi alilis ngeniir pwal ngeni aramas meinisin.
2CO 9:14 Iwe, fän watten ar tongekemi, repwe iotek fänäsengesimi, pokiten ewe ümöümöch mi fokun lapalap Kot a ngenikemi.
2CO 9:15 Ousipwe kilisou ngeni Kot ren an we lifang ngenikich, esap tufich ach sipwe awewei lon ach kapas.
2CO 10:1 Iwe, püsin ngang Paulus üa tüngormau ngenikemi, ngang ätewe aramas ra apasa pwe üa tekison lupwen üa nom remi, nge üa kapas pöchökül lupwen üa toau senikemi. Ren än Kraist tekison me kirikiröch
2CO 10:2 üa tüngor ngenikemi, pwe ousap peseei ai üpwe kapas pöchökül ngenikemi, lupwen üpwe feila remi. Üa silei pwe üpwe tongeni eäni kapas pöchökül ngeni chokewe mi apasa pwe aia chök föri föförün fanüfan.
2CO 10:3 Mi pwüng pwe aia nom lon ei fanüfan, nge aisap maun lon lapalapen fanüfan.
2CO 10:4 Ekewe pisekin maun aia aea le maun sap pisekin ei fanüfan, nge pisekin Kot mi manaman, aia aea le atai ekewe lenien pöchökül.
2CO 10:5 Äm aia awesi ekewe kapas mi mwäl o ataetiu ekewe leni mi tekia meinisin mi epeti än aramas repwe silei Kot. Aia liapeni sokun ekiekin aramas meinisin, pwe repwe aleasochis ngeni Kraist.
2CO 10:6 Nge mürin ämi alletätä unusen ämi aleasochis, äm aia molotä ngeni äm aipwe apwüngü chokewe meinisin mi aleasolap.
2CO 10:7 Ämi oua chök nenengeni met a pwä me lükün. Are mi wor eman a ekieki pwe i nöün Kraist, i epwe ekiekisefäli usun püsin i, pun pwal äm nöün Kraist usun chök i.
2CO 10:8 Pun ngang üsap säw, inamwo ika a kon lap ai aingaing won ewe manaman ach Samol a ngenikem pwe aipwe aea le apöchöküla manauen ämi souläng, nge sap fän iten aipwe aea le atai ämi souläng.
2CO 10:9 Üsap mochen pwe oupwe ekieki pwe üa mochen aniuokusukemi ren nei kewe toropwe.
2CO 10:10 Pun ekoch aramas ra apasa, “Kapasen nöün Paulus kewe toropwe ra ken o pöchökül, nge lupwen a püsin nom rech a apwangapwang o an kewe kapas ra aücheangau.”
2CO 10:11 Ena sokun aramas repwe fokun weweiti pwe esap wor sokofesenin lefilen met aia makkei lon nöüm toropwe lupwen aia toau senikemi me met aia föri lupwen aia nonom remi.
2CO 10:12 Ewer, aisap tongeni püsin atettelikem ika anönnöfengenikem me chokewe mi püsin aitöchüür. A ifan me watten umwesiir! Ra püsin föri och aükük pwe repwe maselong lon, mürin ra püsin aükü manauer ren.
2CO 10:13 Nge me rem, äm aingaing esap lu seni ewe aükük, epwe chök nom won aükükün ewe angang Kot a awisa ngenikem, a pwal pachelong äm angang leimi.
2CO 10:14 Pokiten ämi oua nom lon ei aükük, äm aisap lu seni lupwen aia feila remi o uwato ewe Pworausen Manau usun Kraist.
2CO 10:15 Iei mine aisap aingaing won ewe angang ekewe ekoch aramas ra föri mi lu seni ewe aükük Kot a awisa ngenikem. Nge aia apilükülüköch pwe ämi lükü epwe mämäritä, pwe aipwe tongeni föri lefilemi eu angang mi fokun watte, nge aipwe chök föri lon ewe aükük Kot a awisa ngenikem.
2CO 10:16 Mürin aia tongeni afalafala ewe Pworausen Manau lon pwal ekoch fanü pekilan fanüemi, nge aisap aingaing won och angang eman a fen föri lon ewe leni Kot a awisa ngeni.
2CO 10:17 Iei usun mine a mak lon ekewe Toropwe mi Pin, “Iö a mochen aingaing epwe fokun aingaing won ach Samol.”
2CO 10:18 Pun esap wor allükülükün än eman püsin aitöchü, nge iö ach Samol a aitöchü, ina i a iteüöch.
2CO 11:1 Amwo ämi oupwe songomang ngeniei, inamwo ika üa aloni alon eman esap mirit. Ouse mochen oupwe föri iei usun.
2CO 11:2 Üa lukomong womi, usun chök Kot a lukomong womi. Ämi oua wewe ngeni eman föpwül mi limelimöch, üa pwon pwe epwe pwülüeni eman chök mwän, iei i Kraist.
2CO 11:3 Nge ngang üa niuokus pwe usun ewe serepenit a atupu Efa ren an tipachemsolä, iei usun ämi ekiek epwe tokola seni ämi enletin echeni Kraist fän allükülük.
2CO 11:4 Pun ämi oua pwapwa ika eman a feito o afalafala ngenikemi usun eman Jesus mi sokola seni ewe eman aia fen afalafal usun, ika oua angei eman ngün mi sokola seni ewe ngün oua fen angei, ika oua pwal angei eu pworausen manau mi fokun sokola seni ewe aia aiti ngenikemi.
2CO 11:5 Üa ekieki pwe üsap fokun kuf ren ätekewe oua aita ngeniir “soukünö mi lap”.
2CO 11:6 Inamwo ika ngang üsap angangöch le kapas, nge a fokun alolol ai silelap. Äm aia afata ei ngenikemi fansoun meinisin pwal lon mettoch meinisin.
2CO 11:7 Üa afalafala ngenikemi ewe Pworausen Manau seni Kot, nge ousap möni ngeniei och. Üa püsin atekisonaeitiu, pwe ämi oupwe tekiatä. Ifa usun, üa tipis ren ei?
2CO 11:8 Lupwen üa angang leimi, ekoch ekewe mwichefel ra tinato alilisi, pwe üpwe tongeni angang ngenikemi. Ren ei usun itä nge üa soläniir.
2CO 11:9 Lon fansoun üa nom remi, üsap aweiresikemi lupwen üa nom lon osupwang. Pun pwiich kewe mi feito seni Masetonia ra uwato meinisin met üa osupwang ren. Usun mine üa föri lon ekewe fansoun me mwan, iei usun üpwe pwal föri lon kan fansoun mwach: Üsap fokun aweiresikemi!
2CO 11:10 Pokiten än Kraist we let mi nom loi üa pwon pwe ai ei aingaing esap wor eman epwe aükätiu lon unusen ewe fanü Akaia.
2CO 11:11 Ifa usun, üa apasa ei pokiten üsap echenikemi? Kot a silei pwe üa echenikemi!
2CO 11:12 Iwe, ngang üpwe chök sopwela le föri mine üa föri iei, pun üa mochen pinei än ekewe pwal ekoch “soukünö” aingaing pwe ra föri ar angang usun chök äm.
2CO 11:13 Pun ekei mwän ir soukünö mi chofona, chon angang mi atuputup, ra siwili lapalaper usun itä nge ir wesewesen nöün Kraist soukünö.
2CO 11:14 Sisap mairü ren ei sokun föför, pun Satan a püsin siwili lapalapan usun itä nge i eman chon längin saram!
2CO 11:15 Iei mine sisap mairü ren are nöün Satan chon angang ra siwili lapalaper pwe repwe usun itä nge ir chon angangen ewe Kot mi pwüng. Iwe, sopolan manauer repwe chök küna liwinin ar föför.
2CO 11:16 Iwe, üpwe aliwinisefäli mine üa apasa: Esap wor eman epwe ekieki pwe üsap mirit. Nge are oua ekieki pwe üsap mirit, oupwe chök etiwaei usun eman esap mirit, pwe epwe wor popun ai üpwe ekis aingaing.
2CO 11:17 Ewer, met üpwe apasa iei, esap iei met ach Samol a mochen üpwe apasa. Ren ei sokun aingaing üa wesewesen kapas usun eman esap mirit.
2CO 11:18 Nge pokiten a wor chomong mi aingaing won mettochun ei fanüfan, pwal ngang üpwe aingaing.
2CO 11:19 Püsin ämi oua fokun tipachem, iei mine oua songomang ngeni chokewe resap mirit!
2CO 11:20 Ousap song ngeni chokewe mi nöünikemi amanau, ika chokewe mi ariaföüükemi, ika chokewe mi aliapakemi, ika chokewe mi lamalamtekia womi me chokewe mi pösapeikemi.
2CO 11:21 Ngang üa säw ai üpwe pwärätä pwe aia kon apwangapwang le föri ekei sokun föför! Nge ngang üa aloni alon eman esap mirit. Are eman a pwora an epwe aingaing won och mettoch, ngang üpwe pwal pwora lon ai aingaing.
2CO 11:22 Ra apasa pwe ir re Ipru, pwal ngang. Ra apasa pwe ir chon Israel, pwal ngang. Ra apasa pwe ir mwirimwirin Apraham, pwal ngang.
2CO 11:23 Ra apasa pwe ir nöün Kraist chon angang. Üa aloni alon eman mi umwes, ngang eman nöün Kraist chon angang mi mürina seniir! Üa fokun angang weires lap seniir, üa nom lon imwen fötek lap seniir, üa angei wichiwich lap seniir, üa arap ngeni ar repwe nieila lap seniir.
2CO 11:24 Lon limu fansoun ekewe chon Juta ra wichiei fän ilik me tiu.
2CO 11:25 Fän ülüngat ekewe chon Rom ra wichiei, fän eu ra mone ngeniei fau. Fän ülüngat üa küna wata me le matau, fän eu üa ämmün le matau lon ükükün rüwe me rüanü awa.
2CO 11:26 Lon ai saifeil fän chomong üa nom lon feiengauen puun chanpupu, pwal feiengau seni chon achomau, feiengau me ren aramasei ekewe chon Juta me feiengau me ren ekewe chon lükün Israel. A wor afeiengau lon ekewe telinimw, afeiengau lon fanüapö, afeiengau me le matau, pwal afeiengau seni ekewe souläng chofona.
2CO 11:27 Mi wor ai angang weires, fän chomong üsap möür. Üa echik me kaka, fän chomong esap naf anei, üa föü, esap wor üfei.
2CO 11:28 A pwal wor ekoch me lükün ekei riaföü üsap föüni. Iteiten rän üa nom fän weiresin ai öürek fän iten ekewe mwichefel meinisin.
2CO 11:29 Lupwen eman a apwangapwang, ngang üa pwal mefi apwangapwang. Lupwen eman a tur lon tipis, ngang üa fokun riaföü.
2CO 11:30 Are ngang üpwe fokun aingaing, üpwe aingaing won ekewe mettoch mi pwärätä ai apwangapwang.
2CO 11:31 Ewe Kot, i Semen ach Samol Jesus a silei pwe üsap chofona. Itan epwe feiöch tori feilfeilachök!
2CO 11:32 Lupwen üa nom Tamaskus, ewe kepina mi nom fän ewe king Aretas a anomu chon mas, pwe repwe mamasa asamalapen ewe telinimw pwe repwe turufiei.
2CO 11:33 Nge chiechiei kewe souläng ra aürüeitiu lon eu paskit seni eu asamachon tittin ewe telinimw. Iwe, üa sü seni.
2CO 12:1 Iwe, üpwe chök sopwela le aingaing, inamwo ika esap wor lomotan. Nge iei üpwe kapas usun mine ach Samol a aküna o pwäri ngeniei.
2CO 12:2 Ngang üa silei eman aramas lon Kraist, engol me rüanü ier a la a feitä o tori ewe aülüngatin sässärin läng. Üsap silei ika a nom ikenan lon inisin ika lon ngünün, Kot chök a silei.
2CO 12:3 Üpwe apasasefäli, üa silei pwe ei mwän a feitä o nom lon Paratis, üsap silei ika a nom ikenan lon inisin ika lon ngünün, Kot chök a silei.
2CO 12:4 Ikenan a rongorong sokun kapas esap wor eman a tongeni apasatä, esap mwümwü ngeni eman an epwe kapas usun.
2CO 12:5 Iwe, üpwe aingaing won ei aramas, nge üsap aingaing won püsin ngang, pwe won chök ekewe mettoch mi pwärätä ai apwangapwang.
2CO 12:6 Are üa mochen aingaing, üsap eman aramas ese wor an mirit, pun üpwe kapas won mine a let. Nge üsap mochen aingaing, pun üsap mochen pwe eman epwe ekieki ngeniei pwe üa tekia seni mine a küna rei ika rongorong seniei.
2CO 12:7 Pwe üsap fokun lamalamtekia ren chomongun ekewe mettoch mi amwarar üa küna lon künaei we, Kot a ngeniei eu samau üa fokun metek ren usun itä nge eman nöün Satan chon künö a wichiei, pwe üsap lamalamtekia.
2CO 12:8 Fän ülüngat üa iotek ngeni ach Samol usun ei o tüngor ngeni pwe epwe angei seniei.
2CO 12:9 Nge a pölüeniei, “Ai ümöümöch a naf ngonuk, pun ai manaman a fokun unusöchüla lon om apwangapwang.” Iei mine üa fokun pwapwa lon ai aingaing won ai apwangapwang, pwe ewe manamanen Kraist epwe tümwünüei.
2CO 12:10 Iei mine üa pwapwa lon ai apwangapwang, lon ai küna turunufas, lon ai weires, lon ai ninni, pwal lon ai riaföü fän iten Kraist. Pun lupwen üa apwangapwang, ngang üa pöchökül.
2CO 12:11 Ngang üa föri föförün eman esap mirit, nge ämi oua arianiei, pwe üpwe föri iei usun. Ämi ätekewe oupwe aitöchüei. Inamwo ika ngang üa aücheangau, üsap fokun kis seni nöümi kana “soukünö mi lap”.
2CO 12:12 Ekewe asisil me manaman me sokun föför mi amwarar ra fis lefilemi fän watten mosonotam ra alletätä pwe ngang eman soukünö.
2CO 12:13 Pun ren met a kis ämi feiöch seni ekewe ekoch mwichefel, nge eu chök pwe üsap aweiresikemi pwe oupwe ngeniei och alilis? Ouse mochen oupwe amusala ai mwäl.
2CO 12:14 Iei üa amolätä ai üpwe churikemi lon aülüngatin fansoun. Nge üsap mochen aweiresikemi, pun üsap mochen nöümi moni, ngei ämi. Ewer, iei pwüngün pwe esap ekewe semirit repwe tümwünü semer me iner, nge ekewe sam me in repwe tümwünü nöür.
2CO 12:15 Iei mine üpwe pwapwa le fangala meinisin met mi wor rei, pwal püsin manauei, pwe üpwe alisikemi. Ifa usun, epwe kisikisila ämi echeniei pokiten a watte ai echenikemi?
2CO 12:16 Iwe, üa alletä pwe üsap aweiresikemi. Nge eman a tongeni apasa, pwe üa eman souraw, üa säreikemi ren kapas chofona.
2CO 12:17 Ifa usun, üa atupukemi ren eman lein ekewe soukünö üa tinala remi?
2CO 12:18 Üa tüngormau ngeni Titus pwe epwe feila remi, üa pwal tinala eman pwii souläng pwe epwe eti. Ifa usun, Titus a atupukemi? Ifa usun, Titus me ngang aisap tipeeufengen lon äm ekiek me äm föför?
2CO 12:19 Ifa usun, oua ekieki pwe äm aia püsin penikem me mwemi lon ekewe fansoun me mwan? Apwi, äm aia kapas mwen mesen Kot usun chon nom lon Kraist. Ämi pwiim kana mi achengicheng, aia föri mettoch meinisin pwe aipwe alisikemi lon ämi souläng.
2CO 12:20 Pun ngang üa niuokus, pwe lupwen üpwe torikemi üsap küna remi usun met üa mochen küna, nge ämi ousap küna rei met oua mochen küna. Üa niuokus pwe mi wor remi anini me lolowo, lisosong me meicha, kapasen esit me uwokükü, pwal lamalamtekia me fitikoko.
2CO 12:21 Üa niuokus, pwe lupwen üpwe liwinsefälito remi, ai Kot epwe atekisonaeitiu me mwemi, iwe, ngang üpwe kechüeiti chomong mi tipis me lom, nge resap aier seni ar föför mi fokun ngau, ar föförün lisowu me ar mocheisou.
2CO 13:1 Iwe, iei aülüngatin fansoun ai üpwe feila churikemi. Usun a mak lon ekewe Toropwe mi Pin, “A chök fis allükülükün tipisin eman are a wor ruoman ika ülüman chon pwärätä.”
2CO 13:2 Üa fen ürenikemi me mwan lupwen üa nom remi aruen fansoun, nge iei üpwe pwal aliwinisefäli ngenikemi ai kewe kapas lupwen üa toau senikemi: Lupwen üpwe liwinsefälitikemi üpwe fokun apwüngü chokewe mi tipis me mwan ika pwal ekewe ekoch,
2CO 13:3 pun oua kütta och minen pwärätä pwe Kraist a kapas me rei. I esap apwangapwang lon an angang ngenikemi, nge a pwärätä an manaman leimi.
2CO 13:4 Pun inamwo ika Kraist a iräpenges lon an apwangapwang, nge a manau ren än Kot manaman. Pwal äm aia apwangapwang lon Kraist, nge ren manamanen Kot aipwe eti Kraist le manau, pwe aipwe angang ngenikemi.
2CO 13:5 Oupwe püsin sotunikemi o apwüngükemi, pwe oupwe silei ika oua wesewesen lükü Kraist. Ifa usun, ousap silei pwe Jesus Kraist a nonom lomi? Are ousap silei, oua lipwäkingau lon ewe sosot.
2CO 13:6 Üa apilükülüköch pwe oua silei pwe äm aisap lipwäkingau.
2CO 13:7 Nge aia tüngor ngeni Kot pwe ousap föri mine a mwäl, sap fän iten an epwe pwä äm lipwäköch, nge fän iten ämi oupwe föri mine a mürina, inamwo ika usun itä nge äm aia lipwäkingau.
2CO 13:8 Pun äm aisap tongeni föri och mine epwe tongeni ü ngeni ewe let, nge äm aia chök tongeni föri met epwe alisi ngeni.
2CO 13:9 Äm aia pwapwa lupwen aia apwangapwang, nge ämi oua pöchökül. Iei mine aia iotek pwe ämi oupwe unusöchüla lon ämi souläng.
2CO 13:10 Iei popun üa makkei ekei toropwe lupwen üa toau senikemi, pun lupwen üpwe wareitikemi üsap mochen pöchökül ngenikemi lon ai üpwe aea ewe pwüüng ach Samol a ngeniei, ewe pwüüng üpwe aea le apöchöküla ämi souläng, nge üsap aea le atai ämi souläng.
2CO 13:11 Ämi pwii kana, iei lesopolan mine üa makkei lon ei toropwe. Kot epwe etikemi. Oupwe achocho ngeni ämi oupwe unusöch lon ämi souläng. Oupwe aleasochis ngeni ai kewe kapasen öüröür. Oupwe tipeeufengen lefilemi, oupwe kinamwefengen. Iwe, ewe Kot mi echenikich o ngenikich kinamwe epwe nonom remi.
2CO 13:12 Oupwe kapongfengen lefilemi ren ewe kapongen souläng.
2CO 13:13 Ekewe chon pin meinisin ra kapong ngenikemi.
2CO 13:14 Ümöümöchün ach Samol Jesus Kraist me än Kot chen me chiechifengenin Ngünmifel epwe nonom remi meinisin.
GAL 1:1 Ngang Paulus, eman soukünö, üsap angei wisei seni eman aramas, esap pwal feito seni eman aramas, nge üa angei seni Jesus Kraist me Samach Kot ewe mi amanauasefäli Jesus seni mäla.
GAL 1:2 Äm me pwiich kei souläng meinisin mi nom ikei aia kapong ngeni chon ekewe mwichefel lon Kalatia:
GAL 1:3 Samach Kot me ach Samol Jesus Kraist epwe fang ngenikemi ümöümöch me kinamwe.
GAL 1:4 Kraist a fangala manauan fänäsengesin ach tipis kana ren an aleasochisi letipen ach Kot i Samach pwe epwe angasakich seni ei fansoun mi ngau.
GAL 1:5 Ousipwe mwareiti Kot tori feilfeilachök! Amen.
GAL 1:6 Ngang üa mairü remi, pwe oua müttir sü seni ewe mi körikemi ren än Kraist ümöümöch, nge oua etiwa pwal eu Pworausen Manau.
GAL 1:7 Enlet, esap fokun wor “pwal eu Pworausen Manau”. Üa apasa ei ititin kapas, pun a wor ekoch aramas mi afitikokokemi o sotuni ar repwe sorei ewe Pworausen Manau usun Kraist.
GAL 1:8 Nge ikamwo epwe fen äm ika eman chon läng epwe afalafala ngenikemi eu Pworausen Manau mi soko seni ewe eu aia fen afalafala ngenikemi, i epwe anümamau!
GAL 1:9 Aia fen apasa me mwan, nge iei üpwe pwal apasasefäli: Are eman epwe afalafala ngenikemi eu Pworausen Manau mi soko seni ewe oua fen etiwa, i epwe anümamau!
GAL 1:10 Ifa usun, üa sotuni ai üpwe apwapwai letipen aramas? Apwi! Üa mochen kütta met Kot epwe pwapwa ren! Ifa usun, üa sotuni ai üpwe kütta itei me ren aramas? Are üpwe chüen kütta itei me ren aramas, ngang üsap nöün Kraist chon angang.
GAL 1:11 Ämi pwii kana, üpwe ürenikemi, pwe ewe Pworausen Manau üa afalafala esap pop seni aramas.
GAL 1:12 Üsap angei seni eman aramas, esap pwal wor eman a aiti ngeniei. Püsin Kraist a pwäri ngeniei.
GAL 1:13 Ämi oua fen rong usun manauei me lom, lupwen üa achocho lon ewe lamalamen chon Juta. Oua rong usun ai ariaföüü chon ewe mwichefelin Kot, nge üsap eäni tong, üa pwal achocho ngeni ai üpwe atala ewe mwichefel.
GAL 1:14 Üa fokun fefeitä lon ai angang ngeni ewe lamalamen chon Juta lap seni chomong piloi kana me lein aramasei, üa pwal fokun tiliken le apwönüetä örünien ach kewe lewo.
GAL 1:15 Nge Kot a filieitä lon an ümöümöch mwen üsamwo uputiu o köriei ai üpwe angang ngeni. Iwe, lupwen a filätä
GAL 1:16 an epwe pwäri ngeniei Nöün we, pwe üpwe afalafala ewe Pworausen Manau usun i ngeni ekewe chon lükün Israel, ngang üsap angei än eman öüröür ngeniei,
GAL 1:17 üsap pwal feila Jerusalem fän iten ai üpwe churi ätekewe mi akom mwei lon ewe wisen soukünö. Nge üa müttir feila lon ewe fanü Arapia, mürin üa liwinsefäliti Tamaskus.
GAL 1:18 Iwe, mürin ülüngat ier üa feila Jerusalem pwe üpwe churi Petrus o üa nonom ren lon ükükün engol me limu rän.
GAL 1:19 Üsap küna pwal eman ekewe soukünö, chilon chök James pwiin ach Samol.
GAL 1:20 Met üa makkei a let. Kot a silei pwe üsap chofona!
GAL 1:21 Mürin üa feila lon ekewe fanü Siria me Silisia.
GAL 1:22 Lon ena fansoun chon ekewe mwichefel lon Juta resap mwo künaei.
GAL 1:23 Ra chök silei mine pwal ekoch ra apasa, “Ewe mwän mi ariaföüü kich me lom, iei a afalafala ewe lükülük i a achocho le atala me lom.”
GAL 1:24 Iei usun ra mwareiti Kot fänäsengesin met Kot a föri fän itei.
GAL 2:1 Iwe, mürin engol me rüanü ier üa liwinsefäliti Jerusalem, nge Parnapas a fitiei, üa pwal uwei Titus.
GAL 2:2 Üa liwinsefäl, pun Kot a pwäri ngeniei pwe üpwe liwinla. Lon äm chufengen me ekewe souakom, üa awewe ngeniir ewe Pworausen Manau üa afalafala ngeni ekewe chon lükün Israel. Üsap mochen pwe ai angang lon ekewe fansoun ra la ika pwal lon fansoun ikenai epwe lomotongau.
GAL 2:3 Iwe, chiechiei Titus, inamwo ika i eman re Krik, nge ekewe souakom rese echimwa pwe epwe sirkomsais,
GAL 2:4 usun ekoch ra mochen. Ekei mwän ra pomweni pwe ir chiechiach chon lükülük o ra anifilong lon ach mwich pwe repwe operi ach ngas sia eäni lon Kraist Jesus. Ra mochen ach sipwe wewe ngeni amanau lon ach sipwe apwönüetä mine ekewe allük ra apasa pwe sipwe föri.
GAL 2:5 Nge sisap fokun tipeeu ngeni ar kewe allük, pun sia mochen pwe enletin ewe Pworausen Manau epwe chök nonom remi.
GAL 2:6 Nge ätekewe, aramas ra apasa pwe ir souakom, üa apasa ei pokiten esap lifilifil me rei met sokun aramas ir. Kot esap nenengeni lapalapen aramas me lükün, üpwe apasa, ekei souakom resap apasa pwe üpwe siwili och lon ai afalafal.
GAL 2:7 Nge ra fen mefi pwe Kot a ngeniei ewe wis pwe üpwe afalafala ewe Pworausen Manau ngeni ekewe chon lükün Israel, usun chök a ngeni Petrus ewe wis an epwe afalafala ewe Pworausen Manau ngeni ekewe chon Juta.
GAL 2:8 Pun ren än manaman Kot a awisaei pwe üpwe eman soukünö ngeni ekewe chon lükün Israel, usun chök an awisa Petrus pwe epwe eman soukünö ngeni ekewe chon Juta.
GAL 2:9 Iwe, James, Petrus me Johannes, ir ekewe ürelapen mwichefel, ra mefi pwe Kot a ngeniei ei wis. Iei mine ra kapong won pöür ngenikem me Parnapas, iei ewe asisil pwe sia tipeeufengen lon ach angang. Ra tipeeu ngeni pwe Parnapas me ngang aipwe angang lein ekewe chon lükün Israel, nge ir repwe angang lein ekewe chon Juta.
GAL 2:10 Iwe, ra chök tüngor pwe aipwe chechemeni ekewe mi osupwang lon ar we mwich, iei ewe mettoch üa fen achocho le föri.
GAL 2:11 Nge lupwen Petrus a tori Antiokia, üa kapas awenewen ngeni me mwen ekewe aramas, pun a mwäl an föför.
GAL 2:12 Pun me mwen ekoch mwän, James a tiniirela, resamwo tori Antiokia, Petrus a momongöfengen me ekewe soulängin chon lükün Israel. Nge lupwen an ekei mwän war, Petrus a ütä seniir o esap chüen etiir le mongö, pun a niuokusiti ätekewe mi apasa pwe ekewe chon lükün Israel repwe sirkomsais.
GAL 2:13 Iwe, pwal ekewe ekoch souläng ir chon Juta ra pwal eti Petrus lon an likatuputup, pwal mwo nge Parnapas a tokola ren ar likatuputup.
GAL 2:14 Lupwen üa küna pwe ra föri och mine esap pwüng ngeni enletin ewe Pworausen Manau, üa üreni Petrus me mwer meinisin, “En eman chon Juta, nge ka föri örünien ekewe chon lükün Israel, nge sap örünien ekewe chon Juta. Pwota ka sotuni le echimwa ekewe chon lükün Israel pwe repwe föri örünien ekewe chon Juta?”
GAL 2:15 Kich pwükütän chon Juta pokiten samach me inach ir chon Juta, nge sisap “chon tipis seni chon lükün Israel”.
GAL 2:16 Nge sia silei pwe eman aramas a küna pwüng me ren Kot ren an lükü Jesus Kraist chök, nge esap ren an apwönüetä ekewe Allük. Iei usun pwal kich sia lükü Jesus Kraist, pwe sipwe küna pwüng me ren Kot ren ach lükü Kraist, nge sap ren ach apwönüetä ekewe Allük. Pun esap fokun wor eman a küna pwüng me ren Kot ren an apwönüetä ekewe Allük.
GAL 2:17 Nge lupwen sia kütta pwe sipwe küna pwüng me ren Kot ren ach eufengen me Kraist, a pwä pwe kich chon tipis usun chök ekewe chon lükün Israel. Iwe, ifa usun, wewen ei pwe Kraist eman mi alisätä tipis? Apwi, esap fokun ina!
GAL 2:18 Are ngang üa aüsefälietä ewe lamalamen Allük üa fen atala, mürin a pwä pwe üa püsin atala ewe Allük.
GAL 2:19 Iei mine ren pwüngün ekewe Allük ngang üa fen mäla, üa mäla ngeni ekewe Allük pwe üpwe manau fän iten Kot. Ngang üa fen iräpenges me Kraist,
GAL 2:20 iei mine sap ngang üa chüen manau, nge Kraist a manau loi. Ei manau üa manaueni iei üa manau ren ai lükü ewe Nöün Kot mi echeniei o fangala manauan fän itei.
GAL 2:21 Üsap fokun mochen pwe üpwe pöütala än Kot ümöümöch. Pun ika eman aramas epwe küna pwüng me ren Kot ren ekewe Allük, wewen pwe än Kraist mäla a lomotongau!
GAL 3:1 Ämi chon Kalatia oua tiparoch! Iö a arocha letipemi? Ngang üa afata ngenikemi mwen mesemi usun än Jesus Kraist mäla won iräpenges.
GAL 3:2 Oupwe pölüeni ngeniei ewe eu chök kapas ais, “Ifa usun, oua angei ewe Ngünün Kot ren ämi apwönüetä pwüngün ekewe Allük, ika ren ämi rongorong o lükü ewe Pworausen Manau?”
GAL 3:3 Pwota a iei me tiparochumi? Oua popuetä ämi souläng ren ewe Ngünün Kot, ifa usun, oua mochen sopwela ämi souläng iei lon fituk?
GAL 3:4 Ifa usun, a lomotongau ekewe mettoch ra fis ngenikemi? Enlet, mi wor lomoter!
GAL 3:5 Ifa usun, Kot a ngenikemi Ngünmifel o föri manaman leimi pokiten oua apwönüetä pwüngün ekewe Allük, ika pokiten oua rongorong o lükü ewe Pworausen Manau?
GAL 3:6 Oupwe ekieki usun mine a fis ngeni Apraham. Usun a mak lon ekewe Toropwe mi Pin, “Apraham a lükü Kot, nge pokiten an lükülük a küna pwüng me ren Kot.”
GAL 3:7 Iei mine oupwe silei, pwe ekewe wesewesen mwirimwirin Apraham, ir ekewe aramas mi wor ar lükülük.
GAL 3:8 Ekewe Toropwe mi Pin ra fen pwärätä me mwan, pwe Kot epwe anomu ekewe chon lükün Israel lon tettelin chon pwüng ren ar lükülük. Iei usun mine a mak lon ekewe Toropwe mi Pin usun ewe Pworausen Manau a tori Apraham, “Aramas meinisin won fanüfan repwe küna feiöch reöm.”
GAL 3:9 Apraham a lükü Kot o a feiöch ren, iei usun chokewe mi lükü Kot repwe pwal feiöch usun Apraham.
GAL 3:10 Iwe, chokewe meinisin mi anomu ar apilükülük won ar aleasochisi ekewe Allük ra anümamau. Pun a mak lon ekewe Toropwe mi Pin, “Iö esap aleasochisi meinisin mine a mak lon ewe puken Allük epwe anümamau!”
GAL 3:11 Iwe, iei a fat pwe esap wor eman aramas epwe küna pwüng me ren Kot ren an apwönüetä ekewe Allük, pun a mak lon ekewe Toropwe mi Pin, “Ewe chök aramas mi küna pwüng me ren Kot epwe manau ren an lükülük.”
GAL 3:12 Nge ekewe Allük resap longolong won lükülük, pun iei usun mine a mak lon ekewe Toropwe mi Pin, “Iö a föri pwüngün ekewe Allük epwe manau.”
GAL 3:13 Nge ren än Kraist küna anümamau fän itach a angasakich seni ewe anümamau ekewe Allük ra atoto woch, pun a mak lon ekewe Toropwe mi Pin, “Iö a mwöch won efoch irä a anümamau me ren Kot.”
GAL 3:14 Kraist a föri ei, pwe ewe feiöch Kot a pwon ngeni Apraham epwe tori ekewe chon lükün Israel ren Kraist Jesus, pwe ren ach lükü sipwe angei ewe Ngünmifel Kot a fen pwon ngenikich.
GAL 3:15 Ämi pwii kana, üpwe eäni eu pworausen awewe usun nonomun aramas: Lupwen ruoman aramas ra tipeeufengen won och o saini eu toropwen atipeeu, esap fokun wor eman a tongeni atai ewe toropwen atipeeu ika apacha och ngeni mürin an sain.
GAL 3:16 Iwe, Kot a föri an pwon ngeni Apraham me mwirimwirin we. Lon ekewe Toropwe mi Pin esap mak “mwirimwirin kana”, wewen chomong aramas, nge a mak “mwirimwirin we”, wewen eman chök aramas, iei i Kraist.
GAL 3:17 Iei usun mine üa mochen apasa: Kot a föri eu pwonen atipeeu ngeni Apraham o pwon ngeni pwe epwe apwönüetä. Ekewe Allük Kot a ngeni ekewe chon Israel föpükü ilik ier mürin resap tongeni atala ewe pwonen atipeeu, esap pwal tongeni amorala än Kot we pwon.
GAL 3:18 Pun are än Kot we lifang epwe longolong won ekewe Allük, mürin esap chüen longolong won än Kot pwon. Nge Kot a ngeni Apraham ei lifang pokiten an we pwon.
GAL 3:19 Iwe, met popun a wor ekewe Allük? Kot a apachatä ekewe Allük ngeni ewe pwonen atipeeu ar repwe aiti ngeni aramas ar föför mi mwäl, repwe pwal nonom tori epwe war mwirimwirin Apraham we, ätewe Kot a eäni ewe pwon fän itan. Ekewe chon läng ra uwätiu ekewe Allük le pöün eman chon afför lefilen Kot me aramas.
GAL 3:20 Esap wor lomoten eman chon afför lupwen a wor eman chök aramas, pun Kot eman chök.
GAL 3:21 Iwe, ifa usun, wewen ei pwe ekewe Allük ra ü ngeni än Kot kewe pwon? Apwi, esap fokun ina! Pun are aramas ra angei eu allük mi atoto manau, mürin ir meinisin repwe tongeni küna pwüng me ren Kot ren ar aleasochis ngeni ei allük.
GAL 3:22 Nge a mak lon ekewe Toropwe mi Pin pwe unusen fanüfan a nom fän nemenien tipis. Iei mine ewe lifang Kot a pwon, a longolong won än eman lükü Jesus Kraist, a tori chokewe mi lükü.
GAL 3:23 Nge mwen ewe fansoun ewe lükülük esamwo wor, ekewe Allük ra fötekinikich tori wareton ei lükülük epwe pwäpwäla.
GAL 3:24 Iei usun ekewe Allük ra nemenikich tori Kraist a war, pwe sia tongeni küna pwüng me ren Kot ren ach lükülük.
GAL 3:25 Nge iei otun ewe lükülük a war, ekewe Allük resap chüen nemenikich.
GAL 3:26 Lon Kraist Jesus ämi meinisin oua nöün Kot ren ämi lükü.
GAL 3:27 Pun ämi meinisin mi fen papatais lon Kraist oua manaueni manauen Kraist.
GAL 3:28 Esap wor sokofesenin lefilen chon Juta me chon lükün Israel, lefilen amanau me aramas mi ngas, lefilen mwän me fefin, pun ämi meinisin oua eufengen lon Kraist Jesus.
GAL 3:29 Are ämi oua nöün Kraist, mürin oua mwirimwirin Apraham, iwe, oupwe angei ewe mine Kot a fen pwonei.
GAL 4:1 Iei met üpwe sopwela le apasa: Eman nau epwe angei mettochun saman meinisin, nge lupwen fansoun a chüen eman semirit, a usun chök eman amanau, inamwo ika i a wesewesen eäni ekewe mettoch meinisin.
GAL 4:2 Lupwen a chüen eman semirit, mi wor mwän ra wisen tümwünü i o nemeni mettochun kewe tori ewe fansoun mi kefilitä me ren saman we.
GAL 4:3 Ina chök pwal usun kich. Lupwen sia chüen semirit lon ach souläng, sia nonom fän nemenien ekewe ngün mi nemeni ei fanüfan.
GAL 4:4 Nge lupwen a war ewe fansoun mi kapwüngüla, Kot a tinato püsin Nöün. A uputiu seni eman fefin o a nonom fän ekewe Allük,
GAL 4:5 pwe epwe angasa chokewe mi nonom fän ekewe Allük, pwe sipwe tolong lon tettelin nöün Kot.
GAL 4:6 Iwe, pokiten ämi oua nöün Kot, Kot a tinato Ngünün Nöün we lon lelukemi, ewe Ngün mi apasa, “Sam, Semei!”
GAL 4:7 Iei mine ämi ousap chüen usun amanau, pun oua nöün. Nge pokiten oua nöün, Kot epwe ngenikemi meinisin mine a iseis fän iten nöün kana.
GAL 4:8 Me lom, lupwen ousap silei Kot, oua nonom fän nemenien ekewe ngün esap ir kot.
GAL 4:9 Nge iei oua silei Kot, ika üpwe tongeni apasa, pwe iei Kot a silekemi, pwota oua mochen kulsefäliti ekewe ngün mi apwangapwang o attong? Pwota oua mochen oupwe nomsefäl fän nemenier?
GAL 4:10 Oua pinini ekoch rän, maram, kinikinin fansoun me ekoch ier.
GAL 4:11 Üa öürekikemi! Ifa usun, epwe tufich pwe ai angang ngenikemi a lomotongau?
GAL 4:12 Ämi pwii kana, üa fokun tüngor ngenikemi, pwe oupwe wewe ngeniei, pun pwal ngang üa wewe ngenikemi. Ämi ousap föri och mi mwäl ngeniei.
GAL 4:13 Oua silei pwe pokiten üa samau üa afalafala ewe Pworausen Manau ngenikemi lon ewe aeuin fansoun.
GAL 4:14 Nge inamwo ika lapalapen inisi a fokun aweiresikemi, nge ousap turunufaseei ika pöütieila. Iwe, nge oua fen etiwaei usun ämi oua etiwa eman chon läng, oua etiwaei usun ämi etiwa Kraist Jesus.
GAL 4:15 Ämi oua fokun pwapwa! Met a fis ngenikemi iei? Püsin ngang üa tongeni pwärätä, pwe are epwe tufich oupwe alusawu föün mesemi o ngeniei.
GAL 4:16 Iwe, ifa usun, üa wiliti eman chon oputemi iei, pokiten ai ürenikemi mine a let?
GAL 4:17 Iwe, ekewe ekoch aramas ra achocho le chäächäärikemi, nge popun ar chäächäärikemi esap mürina. Ra chök mochen aimwüfesenikich, pwe oupwe chäächääriir usun chök ir ra chäächäärikemi.
GAL 4:18 A öch ach sipwe achocho le chäächääri eman ren eu popun mi mürina. Ei a pwüng fansoun meinisin, nge sap chök lupwen ai nom remi.
GAL 4:19 Ämi nei kana mi achengicheng! Üa usun chök eman fefin lon fansoun an nöünöü. Üa mefi ei sokun metek fänäsengesimi tori manauen Kraist epwe fis lomi.
GAL 4:20 Üa fokun äneän ai üpwe nonom remi iei, pwe üpwe tongeni siwili itiitin ai kapas ngenikemi. Ngang üa fokun öürekikemi!
GAL 4:21 Üa mochen aisini iö kewe me leimi ra mochen nonom fän nemenien ekewe Allük: Ifa usun, oua wesewesen weweiti mine ekewe Allük ra apasa?
GAL 4:22 A mak pwe a wor ruoman nöün Apraham ät, eman a nöüni me won eman amanau fefin, nge eman a nöüni me won eman fefin mi ngas.
GAL 4:23 Nöün we ät a nöüni me won ewe amanau fefin a uputiu lon lapalapen än aramas uputiu. Nge nöün we a nöüni me won ewe fefin mi ngas a uputiu lon pwüngün än Kot we pwon.
GAL 4:24 Ekei mettoch sia tongeni awewe ngeni eu lios: Ekewe ruoman fefin ra aliosunätä ruu pwon. Nöün ewe fefin Hakar kewe mi up seni ir amanau. Hakar a aliosunatä ewe pwon mi fis me won ewe chuk Sinai.
GAL 4:25 Hakar mi wewe ngeni ewe chuk Sinai lon Arapia a aliosunätä ewe telinimw Jerusalem ikenai, aramasen lon meinisin ir amanau.
GAL 4:26 Nge ewe Jerusalem lon läng mi ngas, iei i inach.
GAL 4:27 Pun a mak lon ekewe Toropwe mi Pin, “Kopwe pwapwa en fefin mi rit! Kopwe kökkö fän leüömong o mweireir fän pwapwa, en neminewe esap toruk cheuchen fam! Pun ewe fefin mi aleman epwe wor chomong nöün, lap seni ewe fefin mi wor pwülüan.”
GAL 4:28 Ämi pwii kana, iei ämi oua nöün Kot pokiten an we pwon, usun chök Isaak.
GAL 4:29 Lon ena fansoun ewe nau mi uputiu lon lapalapen än aramas uputiu a ariaföüü ewe eman mi uputiu ren manamanen ewe Ngünün Kot. Iei usun a pwal fis ikenai.
GAL 4:30 Nge met a mak lon ekewe Toropwe mi Pin? A mak, “Kopwe asüela ewe amanau fefin me nöün we, pun nöün ewe amanau fefin esap eti nöün ewe fefin mi ngas le wöüni wöün ewe sam.”
GAL 4:31 Iei mine ämi pwii kana, sisap nöün ewe amanau fefin, nge sia nöün ewe fefin mi ngas.
GAL 5:1 Iwe, sia ngasala, pun Kraist a angasakich. Iei mine oupwe üppos usun aramas mi ngas, ousap chüen atolongasefälikemi lon tettelin amanau.
GAL 5:2 Oupwe aüseling! Ngang Paulus üpwe ürenikemi, pwe are oupwe mwütätä pwe oupwe sirkomsais, wewen chök nge a fokun lomotongau mine Kraist a föri fän itemi.
GAL 5:3 Üpwe asilesefäli ngenikemi, pwe ika eman mwän epwe tipeeu ngeni an epwe sirkomsais, ätewe epwe fokun aleasochisi ekewe Allük meinisin.
GAL 5:4 Iwe, chokewe me leimi mi sotuni ar repwe küna pwüng me ren Kot ren ar aleasochisi ekewe Allük, ra püsin aimwürela seni Kraist. Iwe, ir ra nonom lükün än Kot ümöümöch.
GAL 5:5 Nge kich sia apilükülükü pwe Kot epwe föri pwe sipwe küna pwüng me ren. Iei met sia witiwiti ren ewe manamanen Ngünün Kot mi angang loch ren ach lükülük.
GAL 5:6 Pun lupwen sia fen nonom lon Kraist Jesus, esap chüen wor lomoten ach sipwe sirkomsais ika sisap sirkomsais, nge met chök a aüchea, iei ach lükü Jesus mi pwä lon ach echeni aramas.
GAL 5:7 Oua fokun fefeitä lon ämi lükü Kraist! Iö a aükätiu ämi aleasochisi mine a let? Ifa usun an pesekemi?
GAL 5:8 Ei sokun pesepes esap pop seni Kot, ewe mi körikemi.
GAL 5:9 Mi wor eu mwiitun a apasa, “Ekis chök iis a apwotä unusen ewe pilawa.”
GAL 5:10 Nge ngang üa chüen apilükülükükemi. Ach eufengen me ach Samol a eselipato ai apilükülük, pwe ämi oupwe tipeeu ngeniei lon ai ekiek. Nge Kot epwe apwüngü ätewe mi atolongakemi lon fitikoko, ese lifilifil ika i iö.
GAL 5:11 Ämi pwii kana, are üpwe chüen afalafal pwe aramas repwe sirkomsais, pwota chök üpwe chüen küna riaföü? Ika epwe pwüng ei, mürin ai afalafal usun ewe iräpengesin Kraist esap eselipato osukosuk.
GAL 5:12 Üa äneän pwe amwo chokewe mi afitikokokemi repwe chök sopwela ar föför o püsin pöküela och kinikinin inisiir.
GAL 5:13 Nge ämi pwii kana, Kot a körikemi pwe oupwe ngas. Nge pokiten oua ngas, ousap ekieki pwe oua tongeni mwüt ngeni mochenian fitukemi epwe chüen nemenikemi, nge oupwe angangfengen lefilemi fän tong.
GAL 5:14 Pun ekewe Allük meinisin ra unusolong lon ewe eu chök allük, “Kopwe echeni chon arum usun püsin om echenuk.”
GAL 5:15 Nge are oua usun manmwacho ren ämi küfengenikemi o ocheifengenikemi, oupwe tümwünükemi pwe ousap arosafengenikemi.
GAL 5:16 Iei wewen mine üa mochen apasa: Oupwe tipeni pwe ewe Ngünmifel epwe emwenikemi, mürin ousap apwönüetä mochenian fitukemi.
GAL 5:17 Pun mochenin fitukach a ü ngeni mine Ngünmifel a mochen, iwe, mine Ngünmifel a mochen a ü ngeni mochenin fitukach. Ekei ruu mochen ra üküfengen, wewen pwe ousap tongeni föri met oua mochen föri.
GAL 5:18 Nge are Ngünmifel a emwenikemi, mürin ousap nonom fän nemenien ekewe Allük.
GAL 5:19 Iwe, a pwä ekewe angangen fituk: Lisowu, limengau, mocheisou,
GAL 5:20 fel ngeni anümwäl, angangen rong, oputfengen me fiufengen, koumfengen, song, apangau, tipefesen, mwichaiei,
GAL 5:21 lolowo, ünüpuch, mongömong me sokun föför mi wewe ngeni ekei. Üpwe apasasefäli ngenikemi iei, met üa fen ürenikemi me mwan: chokewe mi föri ekei sokun föför resap tongeni mwüni Mwün Kot.
GAL 5:22 Nge iei ekewe uän Ngün: chen, pwapwa, kinamwe, mosonotam, kirikiröch, aramasöch, allükülük,
GAL 5:23 tipetekison me tipepwora. Esap wor och allük a ü ngeni ekei sokun föför.
GAL 5:24 Iwe, chokewe ir nöün Kraist Jesus ra iräpengesi mochenian fituker me sokun ar mocheniangau me mochenian leluker.
GAL 5:25 Ewe Ngünmifel a fang ngenikich manau, i epwe pwal fokun nemeni manauach.
GAL 5:26 Sisap lamalamtekia ika akuffengenikich ika lolowofengen lefilach.
GAL 6:1 Ämi pwii kana, are eman me leimi a tur lon tipis, chokewe me leimi mi eäni Ngünmifel repwe apwüngü fän tipepwetete. Nge oupwe püsin afälikemi pwe ousap pwal turulong lon sosot.
GAL 6:2 Oupwe mwärelong fän wosen chiechiemi wosochou, ika oupwe föri ei, oupwe aleasochisi än Kraist allük.
GAL 6:3 Are eman a ekieki pwe mi wor itan, nge esap fokun wor, ätewe a püsin atupu.
GAL 6:4 Eman me eman epwe püsin apwüngü an föför. Are a mürina, mürin a tongeni pwapwa ren met a föri, nge esap awewei met i a föri ngeni met eman a föri.
GAL 6:5 Pun eman me eman epwe püsin mwärei wosan wosochou.
GAL 6:6 Eman mi kaiö Kapasen Kot epwe aeafengen me nöün we sense ekewe mettoch meinisin mi mürina a eäni.
GAL 6:7 Ousap püsin atupukemi. Sisap tongeni urumwotei Kot. Pun mine eman aramas a fotuki, iei met epwe pwal kini.
GAL 6:8 Are eman a fofot lon mochenian fitukan, epwe kini mäla. Nge are eman a fofot lon Ngün, epwe kini manau esemüch.
GAL 6:9 Iwe, sisap achanü le föföri mine a mürina. Pun are sisap achanü, epwe war ewe fansoun lupwen sipwe kini ewe räs.
GAL 6:10 Iei mine lupwen mi wor ach fansoun fich, sipwe eäni kirikiröch ngeni aramas meinisin, nge akaeuin ngeni chokewe mi nom lon ewe familien chon lükülük.
GAL 6:11 Oupwe nengeni ekei mesen mak mi watte üa makkei ngenikemi ren püsin pei!
GAL 6:12 Ekewe aramas mi mochen erianikemi pwe oupwe sirkomsais, ir ätekewe mi sikesik o aingaing won mettochun lükün. Ra föri ei, pwe resap küna riaföü pokiten ewe iräpengesin Kraist.
GAL 6:13 Pwal mwo nge chokewe mi sirkomsais resap aleasochis ngeni ekewe Allük. Ra mochen pwe ämi oupwe pwal sirkomsais, pwe ra tongeni aingaing won ämi tipeeu ngeni ei sokun föför.
GAL 6:14 Nge ngang won inisi üpwe chök aingaing won ewe iräpengesin ach Samol Jesus Kraist. Pun ren an we iräpenges fanüfan a iräpenges ngeniei, nge ngang üa iräpenges ngeni fanüfan.
GAL 6:15 Esap wor lomoten än eman sirkomsais ika esap sirkomsais, nge a chök lomot än eman epwe wiliti eman aramas mi fö.
GAL 6:16 Kinamwe me tong epwe nom ren chokewe meinisin mi aleasochisi ai kei kapas lon manauer, ewer, epwe nonom rer pwal ren nöün Kot kewe aramas meinisin.
GAL 6:17 Iwe, lesopolan ai kei kapas: Esap wor eman epwe chüen aweiresiei, pun ekewe lemon kinas mi nom won inisi ra pwärätä pwe ngang nöün Jesus amanau.
GAL 6:18 Ümöümöchün ach Samol Jesus Kraist epwe nonom remi meinisin, pwii kana. Amen.
EPH 1:1 Ngang Paulus eman nöün Kraist Jesus soukünö fän letipen Kot, üa kapong ngeni ekewe chon pin lon Efisos mi allükülük lon manauer lon Kraist Jesus:
EPH 1:2 Samach Kot me ach Samol Jesus Kraist epwe fang ngenikemi ümöümöch me kinamwe.
EPH 1:3 Sipwe kilisou ngeni Kot Semen ach Samol Jesus Kraist, pun a afeiöchükich lon Kraist ren ekewe feiöchün ngün meinisin ra nonom lon läng.
EPH 1:4 Kot a afilikich lon Kraist me mwen än fanüfan esamwo fis, pwe sipwe pin o unusöch me mwen mesan.
EPH 1:5 Lon an chen a fen afilikich pwe sipwe tolong lon tettelin püsin nöün ren Jesus Kraist, pun iei usun met a apwapwai letipan.
EPH 1:6 Sipwe mwareiti Kot ren an we ümöümöch mi fokun amwarar, a lifang ngenikich lon püsin Nöün we mi achengicheng!
EPH 1:7 Pun lon Kraist sia ngasala ren chaan, pwe ach kewe tipis ra musala. A ifan me watten än Kot we ümöümöch
EPH 1:8 a fang ngenikich lon an kisäsew mi somwosomwola!
EPH 1:9 Lon än Kot tipachem me tipemirit meinisin a apwönüetä mine a fen eäni akot o asile ngenikich an ekiek mi monomon a fen filätä pwe epwe aunusala ren Kraist.
EPH 1:10 Ei ekiek Kot epwe aunusöchü lupwen epwe tori ewe fansoun mi afat pwe epwe achufengeni förian meinisin lon läng me fanüfan, pwe repwe nonom fän nemenien Kraist.
EPH 1:11 Ekei mettoch meinisin ra fisitä usun met Kot a fen ekiekietä o filätä. Kot a afilikichetä pwe sipwe nöün aramas lon Kraist lon pwüngün an akot mi longolong won met a fen filätä me lepoputän.
EPH 1:12 Iei mine kich mi akomwen apilükülükü Kraist sipwe eu lenien mwareiti lingen Kot.
EPH 1:13 Pwal ämi oua wiliti nöün Kot aramas lupwen oua rongorong ewe kapasen Kot mi let, iei ewe Pworausen Manau oua küna manau ren. Ämi oua lükü Kraist, nge Kot a pwaunikemi pwe oupwe nöün ren an ngenikemi ewe Ngünmifel, usun i a fen pwonei.
EPH 1:14 Pokiten sia eäni Ngünmifel, sia fokun silei pwe sipwe angei mine Kot a fen pwon ngeni nöün aramas. Ei a allükülükü ngenikich pwe Kot epwe wesewesen angasala nöün kana meinisin. Sipwe mwareiti an we ling!
EPH 1:15 Iei popun, seni ewe fansoun üa rongorong usun ämi lükü ach Samol Jesus pwal usun ämi echeni ekewe chon pin meinisin,
EPH 1:16 üsap ükütiu le kilisou ngeni Kot fänäsengesimi. Üa chechemenikemi lon ai iotek
EPH 1:17 o tüngor ngeni än ach we Samol Jesus Kraist we Kot, i Samach we mi ling, pwe epwe ngenikemi ewe Ngünmifel. I ewe mi atipachemakemi o asile ngenikemi usun Kot, pwe epwe lapala ämi silei i.
EPH 1:18 Üa tüngor pwe mesen letipemi epwe nennela pwe oupwe küna an saram, pwe oupwe silei usun ewe apilükülüköch i a köri ngenikemi, pwal usun watten ekewe feiöch mi amwarar i a pwon ngeni ekewe chon pin,
EPH 1:19 pwal usun löllön an we manaman mi angang loch chon lükü i. Ei sokun manaman a wewe ngeni än Kot we manaman mi pöchökül
EPH 1:20 a aea lupwen a amanauasefäli Kraist seni mäla o amota i lepelifichin lon läng.
EPH 1:21 Kraist a watte an nemenem ikenan lap seni ekewe sounemenem lon läng, seni ekewe manaman me ekewe samol. Wisan a tekia seni wisen ekewe sounemenem lon ei fansoun pwal lon ekewe fansoun repwe feito.
EPH 1:22 Kot a anomu mettoch meinisin fän nemenien Kraist. A awisa i pwe epwe möküren mwichefel o nemeni mettoch meinisin.
EPH 1:23 Mwichefel iei ewe inisin Kraist. Iwe, mwichefel a afisätä unusöchülan Kraist, usun püsin Kraist a aunusöchüela mettoch meinisin ekis meinisin.
EPH 2:1 Me lom oua mäla lon pekin ngün pokiten ämi lükümach me tipis.
EPH 2:2 Lon ena fansoun oua manaueni ewe manauen fanüfan mi ngau. Oua aleasochis ngeni ewe mi nemeni ekewe ngününgau mi nom fän läng, ewe ngün mi nemeni ekewe aramas mi aleasolap ngeni Kot iei.
EPH 2:3 Enletin, oukich meinisin sia usun chök ir me lom, sia manau lon mochenian fitukach, sia chök apwönüetä mochenin inisich me ekiekin letipach. Pokiten sia usun chök aramas meinisin, sia nom fän riaföün än Kot song.
EPH 2:4 Nge pokiten än Kot ümöümöch a fokun somwosomwola o an echenikich a fokun lapalap,
EPH 2:5 a amanauakich me Kraist lupwen sia mäla lon ach pupungau. Ren än Kot ümöümöch sia küna manau.
EPH 2:6 Lon ach eufengen me Kraist Jesus, Kot a amanauakich me Kraist pwe sipwe eti Kraist le nemenem lon läng.
EPH 2:7 A föri iei usun, pwe epwe pwärätä lon ekewe fansoun repwe feito an we ümöümöch mi fokun lapalap esap wor eman a tongeni awewei, a nom lon an we chen a pwäri ngenikich lon Kraist Jesus.
EPH 2:8 Pun ren än Kot we ümöümöch oua küna manau ren ämi lükülük. Nge ei manau oua eäni esap afisiemi, pwe än Kot lifang ngenikemi,
EPH 2:9 esap pwal liwinin ämi angang, pwe esap wor eman epwe tongeni aingaing ren.
EPH 2:10 Pun Kot a förikich pwe sipwe eäni ei manau, a förikich lon Kraist Jesus pwe sipwe föri ekewe föför mi mürina a fen amolätä fän itach pwe sipwe föföri.
EPH 2:11 Iwe, ämi chon lükün Israel lon pekin fituk, ekewe chon Juta ra aita ngenikemi “chon resap sirkomsais”, nge ir ra püsin aita ngeniir “chon sirkomsais”, (aramas ra föri ei ngeni püsin inisiir) oupwe chechemeni met sokun lapalap oua eäni me lom.
EPH 2:12 Lon ena fansoun oua imwü seni Kraist. Oua chon ekis, nge ousap pachelong lein ekewe aramas mi fil me ren Kot. Esap wor wisemi lon ekewe pwon mi longolong won än Kot pwon ngeni nöün kewe aramas, pwe oua nonom lon ei fanüfan, nge esap wor ämi apilüköch, esap pwal wor ämi Kot.
EPH 2:13 Nge iei, pokiten oua nonom lon Kraist Jesus, ämi mi toauala me lom, oua kaneto ren chaan Kraist.
EPH 2:14 Pun püsin Kraist i ach kinamwe. A föri pwe chon Juta me chon lükün Israel repwe eu chök sokun aramas. Ren püsin inisin a ataetiu ewe tit mi aimwüfeseniir o afisätä ar oputfengen lefiler.
EPH 2:15 A amorala än ekewe chon Juta Allük fiti pwüngün me tichikin, nge a föri seni ekewe ruu sokun mwichen aramas eu chök mwichen aramas mi fö lon püsin i. Ren ei a awora kinamwe.
EPH 2:16 Ren än Kraist mäla won ewe iräpenges a amola ar oputfengen lefiler. Pun ren ewe iräpenges a achäfengeni ekewe ruu sokun mwichen aramas, pwe repwe eu chök mwich o aliwinisefäliir ngeni Kot.
EPH 2:17 Iei usun Kraist a feito o afalafala ewe Pworausen Manau usun kinamwe ngeni aramas meinisin, ngeni ämi chon lükün Israel mi toau seni Kot, pwal ngeni ekewe chon Juta mi arap ngeni.
EPH 2:18 Pun ren Kraist kich meinisin, chon Juta me chon lükün Israel, sia tongeni feito mwen mesen Samach ren eman chök Ngün.
EPH 2:19 Iei mine ämi chon lükün Israel ousap chüen chon ekis ika wasöla, nge iei oua chon wilipos fiti nöün Kot kewe aramas, oua chon ewe familien Kot.
EPH 2:20 Pwal ämi oua köütä won ewe longolong mi för ren ekewe soukünö me ekewe soufos, nge püsin Kraist Jesus i ewe föün lepwokuku.
EPH 2:21 I ewe eman mi amwöchüfengeni unusen ewe imw o föri an epwe fefeitä, pwe epwe eu imwenfel fän iten ach we Samol.
EPH 2:22 Lon Kraist pwal ämi oua köüpökütä fiti ekewe chon lükü, pwe oupwe eu leni ia Kot epwe nonom ie ren Ngünün.
EPH 3:1 Fän iten ei popun, ngang Paulus, eman chon fötek fän iten Kraist Jesus fänäsengesin ämi chon lükün Israel, üa iotek ngeni Kot.
EPH 3:2 Üa lükü pwe oua fen rong, pwe lon än Kot ümöümöch a ngeniei ei angang pwe üpwe föri fänäsengesimi.
EPH 3:3 Kot a pwäri ngeniei an we ekiek mi monomon o a aiti ngeniei wewen, usun üa manlapei le makkei me mwan.
EPH 3:4 Nge are oupwe aleani mine üa fen makkeetiu, oupwe tongeni silei usun ai weweiti ewe monomonen Kraist.
EPH 3:5 Lon ekewe fansoun ra la Kot esap asile ngeni aramas won fanüfan usun ei monomon, nge iei Kot a pwärala ren Ngünmifel ngeni nöün kewe soukünö me soufos mi pin.
EPH 3:6 Iei ewe monomon: Ren ewe Pworausen Manau ekewe chon lükün Israel repwe eti ekewe chon Juta le feiöchüni än Kot kewe feiöch, repwe chufengen lon ewe eu chök inis o aeafengen ewe feiöchün pwon Kot a föri ren Kraist Jesus.
EPH 3:7 Kot a awisaei pwe üpwe eman chon angang ngeni ewe Pworausen Manau, ren an we lifangen ümöümöch a ngeniei ren tufichin an we manaman.
EPH 3:8 Ngang ewe mi kis seni ekewe chon pin meinisin, nge Kot a ngeniei ei wis mi aüchea pwe üpwe uwei ngeni ekewe chon lükün Israel ewe Pworausen Manau usun ewe wöün Kraist esap wor epin,
EPH 3:9 üpwe pwal afataöchü ngeni aramas meinisin usun än Kot we ekiek mi monomon epwe pwönüetä. Kot ewe mi föri mettoch meinisin a amonomona an we monomon lon ekewe fansoun lomlom,
EPH 3:10 pwe lon fansoun ikenai mwichefel epwe iei ewe leni ia ekewe sounemenem me manaman mi nom lon läng repwe silei usun mesemesekisin än Kot tipachem.
EPH 3:11 Iei än Kot we akot seni chök me lomlom, nge a apwönüetä lon Kraist Jesus ach Samol.
EPH 3:12 Lon Kraist pwal ren ach lükü i sia pwora o apilükülük lon ach churi Kot.
EPH 3:13 Iei mine üa tüngor ngenikemi pwe ousap apilükingau ren ekei riaföü ra toriei fän itemi, pun iei ämi feiöch.
EPH 3:14 Iwe, ren ei popun üa fotopwäsuk me mwen Samach lon läng,
EPH 3:15 pun iteiten famili lon läng pwal won fanüfan ra angei iter me ren.
EPH 3:16 Üa tüngor ngeni Kot pwe epwe fang ngenikemi tufichin Ngünün we seni lon wöün an we ling, pwe oupwe pöchökül lon letipemi.
EPH 3:17 Üa iotek pwe Kraist epwe nonom lon lelukemi ren ämi lükü i. Üa pwal iotek pwe oupwe warar o longolong won chen,
EPH 3:18 pwe ämi me ekewe chon pin meinisin oupwe tufichin weweiti ükükün chölapan me langataman, pwal tekian me alololun än Kraist we chen.
EPH 3:19 Ewer, oupwe silei usun an we chen, inamwo ika esap fokun wor eman a tongeni silei unusan, pwe oupwe unusen urela ren lapalapen Kot.
EPH 3:20 Sipwe mwareiti Kot, i ewe a tongeni föri mettoch meinisin lap seni mine sia tongeni tüngor ika ekieki ren an we manaman mi akangang loch,
EPH 3:21 sipwe alinga i me lon mwichefel pwal lon Kraist Jesus lon fansoun meinisin tori feilfeilachök! Amen.
EPH 4:1 Ngang eman chon fötek pokiten ai angang ngeni ach Samol, üa mochen pese ngenikemi pwe oupwe manaueni eu manau mi fich ngeni ewe kö seni Kot.
EPH 4:2 Oupwe tipetekison fansoun meinisin, oupwe tipepwetete o mosonotam. Oupwe echenifengenikemi ren ämi songomangfengen lefilemi.
EPH 4:3 Oupwe fokun achocho le tümwünü ämi tipeeufengen lon ewe Ngünmifel ren ewe kinamwe mi rifengenikemi.
EPH 4:4 Mi wor eu chök inis me eman chök Ngün, usun a pwal wor eu chök apilükülüköch Kot a köri ngenikemi.
EPH 4:5 Mi wor eman chök ämi Samol, eu chök lükülük, eu chök papatais,
EPH 4:6 oua pwal eäni eman chök Kot, ewe Semen aramas meinisin, i a nemeni mettoch meinisin, a angang ren mettoch meinisin o nonom loch meinisin.
EPH 4:7 Iwe, iteiten eman me eman leich sia fen angei ewe lifangen ümöümöch lon aükükün ewe lifang Kraist a ngenikich.
EPH 4:8 Iei usun mine a mak lon ekewe Toropwe mi Pin: “Lupwen a feitä won ewe chuk mi fokun tekia, a emwenatä chomong chon oola lon an we mwich a pwal ngeni ekewe aramas lifanger.”
EPH 4:9 Iwe, met wewen “a feitä”? Wewen pwe a akomwen feitiu lon ekewe leni mi alolol epin fanüfan.
EPH 4:10 Ewe eman mi feitiu pwal i chök ewe eman mi feitä asen ekewe läng meinisin, pwe epwe amasoua unusen läng me fanüfan.
EPH 4:11 I ewe mi “ngeni aramas lifanger”. A filätä ekoch pwe repwe soukünö, pwal ekoch repwe soufos, pwal ekoch repwe chon asoulängala aramas, nge pwal ekoch repwe soumas me sense.
EPH 4:12 A föri ei pwe epwe amolöchü nöün Kot kewe aramas meinisin fän iten ewe angang souläng ra wisen föri, pwe repwe apöchökülätä ewe inisin Kraist.
EPH 4:13 Iei usun oukich meinisin sipwe achufengenikich pwe sipwe eufengen lon ach lükü Jesus pwal lon ach sileöchü ewe Nöün Kot. Sipwe eäni tipen mwän lon manauach, pwe sipwe tori ükükün ewe unusöchün Kraist.
EPH 4:14 Mürin sisap chüen sokuni sokun semirit, sisap chüen chüwölüwölfeil ren no kana o mamaanfeil ren enienin asepwälin än chon likatuputup afalafal, ir ätekewe mi emweningaua ekoch aramas ren ar tunochofona.
EPH 4:15 Nge ren ach kapas wenechar fän tong sipwe fokun mämäritä lon mettoch meinisin ngeni Kraist, i ewe möküren mwichefel.
EPH 4:16 Fan an nemenem ekewe sokopaten kifetin ewe inis meinisin ra masfengen, nge unusen ewe inis a kochufengen ren ekewe kirupun lekupukup meinisin mi wor ren. Iei usun lupwen eu me eu kewe kifetin inis a föri wisan, unusen ewe inis epwe mämäritä o püsin pöchökületä ren tong.
EPH 4:17 Iwe, fän iten ach Samol üa fönöökemi pwe ousap sopwela le manaueni manauen chokewe mi nom lon rochopwak, pun ar ekiek a lomotongau,
EPH 4:18 a rochopwak lon letiper. Resap etikich le manaueni ewe manau mi fö Kot a ngenikich, pun ra fokun tiparoch o tipeförea.
EPH 4:19 Resap mefi säw. Ra fangatä püsin ir ngeni mocheisou me sokun föför mi limengau meinisin, nge resap mochen ükütiu seni.
EPH 4:20 Nge mine oua kaiö usun Kraist esap iei usun.
EPH 4:21 Enlet, ämi oua fen rongorong usun i, oua pwal kaiö ewe let mi nom lon Jesus, pokiten oua chon tapwela mürin.
EPH 4:22 Iei mine oupwe likitätiu ekewe föför oua föföri lupwen oua manaueni ewe manauen lom, iei ewe manau a katala ren an kewe mochenia mi atuputup.
EPH 4:23 Letipemi me ekiekimi epwe fokun söfösefäl,
EPH 4:24 oupwe fokun angei ewe manau mi fö mi för lon lapalapen Kot o pwäla lon eu manau mi enletin pwüng me pin.
EPH 4:25 Iei mine ousap chüen kapas chofona. Oupwe eäni kapas wenechar ngeni pwimi kewe souläng, pun kich meinisin kifetin ewe inisin Kraist.
EPH 4:26 Are oua song, ousap mwüt ngeni ämi song epwe emwenikemiilong lon tipis! Ousap amwöchü ämi song tori akkar epwe tuputiu.
EPH 4:27 Ousap mwüt ngeni Tefil an epwe sotunikemi pwe oupwe tipis.
EPH 4:28 Eman mi sosolä me lom epwe ükütiu le solä, nge epwe achocho le angang pwe epwe wor met epwe lomot ngeni püsin i, epwe pwal tongeni alisi ekewe mi wöüngau.
EPH 4:29 Esap wor kapas mi ngau epwe towu seni lon awemi, pwe kapas mi mürina chök, sokun kapas mi afefetai aramas o alisiir lon ar osupwang, pwe chokewe mi rongorong ngeni repwe feiöch ren.
EPH 4:30 Ousap achouala Ngünmifel, ewe Ngünün Kot, oua pwau ren tori ewe ränin än Kot epwe angasakemi.
EPH 4:31 Oupwe atoaua senikemi sokun koum, chou me song. Ousap chüen akürang ngeni aramas ika turunufaser, ousap pwal chüen oput eman aramas.
EPH 4:32 Nge oupwe eäni kirikiröch o leluköch lefilemi, oupwe amusamusfengen usun chök Kot a amusala ämi tipis ren Kraist.
EPH 5:1 Pokiten ämi nöün Kot mi achengicheng, oupwe fokun apirü i.
EPH 5:2 Chen epwe nemeni manauemi, usun Kraist a echenikich o fangala manauan fän itach pwe epwe eu asor mi pwoöch me eu lifang mi apwapwai Kot.
EPH 5:3 Pokiten ämi nöün Kot aramas mi pin, esap pwüng pwe sokopaten föförün lisowu ika mocheisou ika tipemong epwe fen mwo nge fis ika föü lefilemi.
EPH 5:4 Esap pwal fichitikemi pwe oupwe apasa sokun kapas mi ngau, kapas mi lomotongau me kapasen turunufas, nge oupwe chök kilisou ngeni Kot.
EPH 5:5 Oupwe fokun silei, pwe esap wor eman mi föri sokun föförün lisowu ika mocheisou ika tipemong (pun tipemong a wewe ngeni angang ngeni anümwäl) epwe angei och feiöch seni lon ewe Mwün Kraist me Kot.
EPH 5:6 Ousap tup ren än aramas kapasen atuputup, pun ren ekei sokun föför än Kot song epwe tori chokewe mi lükümach ngeni.
EPH 5:7 Iei mine ousap chiechi ngeni ekei sokun aramas.
EPH 5:8 Me lom oua nom lon rochopwak, nge iei oua nom lon saram pokiten oua wiliti nöün ach Samol aramas. Iei mine oupwe manaueni eu manau mi nom fän ewe saram,
EPH 5:9 pun ewe saram a atoto eu räs mi watte ren sokun föför mürina, föförün pwüng me let.
EPH 5:10 Oupwe achocho le kütta mine ach Samol epwe pwapwa ren.
EPH 5:11 Ousap eti aramas le föri ekewe föför mi lomotongau, ekewe föförün rochopwak, nge oupwe sarifiir, pwe repwe pwäwu lon saram.
EPH 5:12 Pun a fokun asäw ach sipwe mwo nge föüni ekewe föför ra föri le monomon.
EPH 5:13 Nge lupwen ekewe mettoch meinisin ra pwäwu lon saram, mürin enletin sokosokun manauer a pwäöchüla.
EPH 5:14 Pun meinisin mine a pwäöchüla a saram. Iei mine a mak: “En chon möür, kopwe pwätä, kopwe towu seni mäla, pun Kraist epwe asaramok.”
EPH 5:15 Iei mine oupwe afälikemi lon mine oua föri. Ousap föri föförün chon tiparoch, nge oupwe föri föförün chon tipachem.
EPH 5:16 Oupwe alomota fansoun manauemi, pun ekei rän ra ngau.
EPH 5:17 Iei mine ousap föri föförün chon tiparoch, nge oupwe achocho le kütta met letipen ach Samol fän itemi.
EPH 5:18 Ousap apuchakemi ren wain, pun ei epwe afeiengauakemi. Nge oupwe urela ren Ngünmifel.
EPH 5:19 Oupwe aea le kapasfengen lefilemi ekewe kölfel, ekewe kölün lamalam me ekewe köl mi pin. Oupwe kölü ekewe kölün lamalam me ekewe kölfel ngeni ach Samol, oupwe mwareiti i lon lelukemi.
EPH 5:20 Oupwe kilisou fansoun meinisin ren mettoch meinisin ngeni Samach Kot fän iten ach Samol Jesus Kraist.
EPH 5:21 Oupwe aleasochisfengen lefilemi pokiten oua asamolu Kraist.
EPH 5:22 Ämi fefin kana, oupwe aleasochisi pwülüemi usun chök ämi oupwe aleasochisi ach Samol.
EPH 5:23 Pun eman mwän möküren pwülüan usun Kraist möküren mwichefel. Kraist ewe Chon Amanauen mwichefel, nge mwichefel iei inisin Kraist.
EPH 5:24 Iei usun chök pwal ekewe fefin repwe fokun aleasochisi pwülüer kewe lon mettoch meinisin usun chök mwichefel a aleasochisi Kraist.
EPH 5:25 Ämi mwän kana oupwe echeni pwülüemi usun Kraist a echeni mwichefel o fangala manauan fän itan.
EPH 5:26 A föri ei pwe epwe apini mwichefel fän iten Kot, a limeti mwichefel ren koluk, iei an kapas,
EPH 5:27 fän iten an epwe aütai mwichefel fän püsin itan lon unusen lingöchün, pwe esap wor tikitikipwülün are lemomon are och limengau, nge epwe pin o unusöch.
EPH 5:28 Ina usun ekewe mwän repwe echeni pwülüer usun chök ar püsin echeni inisiir. Eman mwän mi echeni pwülüan a echeni püsin i.
EPH 5:29 Esap fokun wor eman a oput püsin inisin, nge a fokun amongöni o tümwünü usun chök met Kraist a föri ngeni mwichefel.
EPH 5:30 Pun oukich meinisin kifetin inisin.
EPH 5:31 Usun a mak lon ekewe Toropwe mi Pin, “Iei mine eman mwän epwe likitala saman me inan o pache ngeni pwülüan, nge ekewe ruoman repwe wiliti eu chök inis.”
EPH 5:32 Iei eu monomon mi fokun watte a pwä lon ei wokisin, nge usun ai weweiti pwe a wewe ngeni Kraist me mwichefel.
EPH 5:33 Nge a pwal wewe ngenikemi: Ämi mwän meinisin oupwe fokun echeni en me pwülüan usun ämi echeni püsin inisimi, nge ämi fefin meinisin oupwe meniniti pwülüemi.
EPH 6:1 Ämi nau kana, oupwe aleasochisi sememi me inemi lon ach Samol, pun iei met mi pwüng pwe oupwe föri.
EPH 6:2 “Kopwe asamolu semom me inom,” iei ewe aeuin allük a riri ngeni eu pwon,
EPH 6:3 “pwe kopwe feiöch me manauatam won fanüfan.”
EPH 6:4 Ämi sam me in ousap föri ngeni nöümi kana mine repwe song ren. Nge oupwe tümwünüöchür fän ämi fönöör o öüröürer lon ach Samol.
EPH 6:5 Ämi amanau, oupwe aleasochisi ämi samol lon ei fanüfan fän niuokus me chechech. Oupwe föri ei fän wenecharen lelukemi usun chök nge oupwe aleasochisi Kraist.
EPH 6:6 Ousap föri chök ei lupwen ra nenengenikemi pokiten oua mochen ar repwe aitöchükemi, nge seni unusen letipemi oupwe föri letipen Kot usun eman nöün Kraist amanau.
EPH 6:7 Ämi amanau oupwe föri ämi angang fän pwapwa usun ämi oupwe angang ngeni ach Samol, nge sap ngeni aramas.
EPH 6:8 Oupwe chechemeni pwe ach Samol epwe liwini ngeni eman me eman an föför mürina, ese lifilifil ika i eman amanau ika i eman chon ngas.
EPH 6:9 Ämi samol kana, oupwe pwal föri usun chök ngeni nöümi amanau, oupwe ükütiu le aniuokusur. Oupwe chechemeni pwe ämi me nöümi kewe amanau oua nöün ewe eman chök Samol lon läng, i ewe esap lifilifil aramas.
EPH 6:10 Iwe, iei ai kapasen lesopolan: Oupwe apöchökülakemi lon ach Samol pwal lon pöchökülen an we manaman.
EPH 6:11 Oupwe pwilitalong womi ekewe pisekin maun Kot a ngenikemi, pwe oupwe tongeni üpöchökül ngeni än ewe Tefil angangen atuputup.
EPH 6:12 Pun sisap maun ngeni fituk me cha, nge sia maun ngeni ekewe anün rochopwak mi nom fän läng, ngeni ekewe anüsamol, ngeni ekewe anüsor, pwal ngeni ekewe ngününgau mi nemeni aramas lon ei fanüfan mi rochopwak.
EPH 6:13 Iei mine oupwe pwilitalong womi än Kot kewe pisekin maun iei! Mürin, lupwen epwe war ewe rän mi ngau, oupwe tongeni pworacho ngeni än ewe chon oputemi maun ngenikemi. Iwe, mürin oupwe chök üpöchökül tori lesopolan ämi maun.
EPH 6:14 Iwe, oupwe amolakemi, oupwe peliti ngeni lukalapemi let, oupwe üföüf pwüng pwe iei ämi chechen leupw mi för seni mächä,
EPH 6:15 nge oupwe ipweipw susun molotä ngeni ämi oupwe aronga ewe Pworausen Manau mi wor kinamwe lon.
EPH 6:16 Iteiten fansoun meinisin oupwe lükü Kot pwe ina ämi epetin maun, pwe oupwe tongeni kunu ngeni ekewe föün esefich mi pulopulen ekkei seni ewe Eman mi Ngau.
EPH 6:17 Oupwe angei ewe Manau pwe ina imwemi akau, pwal ewe kapasen Kot pwe ina nöümi ketilas ewe Ngünmifel a ngenikemi.
EPH 6:18 Oupwe föri ekei mettoch meinisin lon ämi iotek ngeni Kot pwe epwe alisikemi. Oupwe iotek won met oua föri usun Ngünmifel a emwenikemi. Iei popun ämi oupwe mamasa o tupwöl fansoun meinisin, oupwe iotek fän iten ekewe chon pin meinisin iteiten fansoun meinisin.
EPH 6:19 Oupwe pwal iotek fän itei pwe Kot epwe aiti ngeniei ekewe kapas üpwe apasa lon ai afalafal, pwe üpwe pwora le kapas o asile ngeni aramas monomonen ewe Pworausen Manau.
EPH 6:20 Pun ngang eman chon künö fän iten ei Pworausen Manau, inamwo ika ngang üa nom lon imwen fötek iei. Oupwe iotek pwe üpwe pwora le apasatä ewe Pworausen Manau, pun iei wisei.
EPH 6:21 Tikikus pwiich ei mi achengicheng, pwal i ewe chon angang mi allükülük lon ewe angangen ach Samol epwe apworausa ngenikemi pworausei meinisin, pwe oupwe silei usun met üa föri o pwal usun nonomi.
EPH 6:22 Ina popun üa tinala i remi, pwe epwe apworausa ngenikemi usun nonomum, epwe pwal apöchöküla letipemi.
EPH 6:23 Samach Kot me ach Samol Jesus Kraist epwe ngenikemi ämi pwiich lon Kraist kinamwe, chen me lükü.
EPH 6:24 Än Kot ümöümöch epwe nonom remi meinisin ämi mi echeni ach Samol Jesus Kraist ren ewe chen esap ükütiu.
PHI 1:1 Äm Paulus me Timoty, äm nöün Kraist kewe chon angang, aia kapong ngeni ekewe chon pin lon Kraist Jesus mi nom lon Filipi, pwal ngeni ekewe soumasen mwichefel me ekewe sounkoa:
PHI 1:2 Samach Kot me ach Samol Jesus Kraist epwe ngenikemi ümöümöch me kinamwe.
PHI 1:3 Ngang üa kilisou ngeni ai Kot fansoun meinisin lupwen ai chechemenikemi.
PHI 1:4 Fansoun meinisin lupwen üa iotek fän itemi, üa iotek fän pwapwa
PHI 1:5 pokiten ämi oua alisiei lon ai angangen arongafeili ewe Pworausen Manau seni lepoputän ai nom remi tori ikenai.
PHI 1:6 Üa fokun lükü, pwe Kot ewe mi popuetä lomi ei angang mi mürina epwe pwal sopwela tori an epwe wesöchüela lon ewe Ränin än Kraist Jesus epwe liwinsefälito.
PHI 1:7 Üa chechemenikemi lon letipei fansoun meinisin, iei mine a pwüng ngeniei an epwe iei usun ai tongekemi. Pun ämi meinisin oua chieneniei lon ei angang mi aüchea Kot a ngeniei, sap chök lon ei fansoun üa nom lon imwen fötek, nge pwal lon ewe fansoun lupwen üa ngasala pwe üpwe peni ewe Pworausen Manau o anüküchara.
PHI 1:8 Kot i nei chon pwärätä pwe a let mine üa apasa, pwe üa tongekemi meinisin, usun chök Kraist Jesus a fen tongekemi.
PHI 1:9 Ngang üa iotek pwe ämi chen epwe fokun lalapala lefilemi, oupwe pwal silei mine a let o weweöchiti mettoch meinisin,
PHI 1:10 pwe oupwe tongeni filätä mine a fokun mürina. Mürin oupwe limöch, esap pwal wor och mine oupwe mwäl won lon ewe Ränin än Kraist epwe liwinsefäl.
PHI 1:11 Iwe, manauemi epwe urela ren sokun föför mürina Jesus Kraist chök a tongeni afisätä, pwe Kot epwe ling o iteüöch ren.
PHI 1:12 Iwe, ämi pwii kana, üa mochen pwe oupwe silei pwe ekewe mettoch mi fis ngeniei ra wesewesen alisi chöülan ewe Pworausen Manau.
PHI 1:13 Iei popun ekewe sounfiu mi mamasa imwen Sisar pwal ekewe ekoch aramas ra silei pwe üa nom lon imwen fötek pokiten ngang eman chon angang ngeni Kraist.
PHI 1:14 Ren ai nonom lon imwen fötek a fis pwe chomong pwiich kewe souläng ra apilükülükü ach Samol, iei mine a lapala ar pwora le afalafala ewe kapasen Kot, nge resap niuokus.
PHI 1:15 Ewer, ekoch me leir ra afalafala Kraist pokiten ra lolowo me anini, nge pwal ekoch ra afalafala ren öchün letiper.
PHI 1:16 Ätekei ra föri ei seni ar eäni chen, pokiten ar silei pwe Kot a ngeniei ewe angangen peni ewe Pworausen Manau,
PHI 1:17 nge ekewe ekoch resap afalafala Kraist fän wenecharen letiper, nge ren ar mochen kütta püsin ar, ra ekieki pwe repwe chök ariaföüüei lupwen üa nom lon imwen fötek.
PHI 1:18 Iwe, nge pwota üpwe lolilen ren? Ngang üpwe chök pwapwa pwe aramas ra afalafala Kraist lon sokopaten lapalap, ese lifilifil ika a pop seni och ekiek mi mwäl ika och ekiek mi pwüng. Ewer, üpwe chök sopwela le pwapwa,
PHI 1:19 pun üa silei pwe pokiten ämi iotek, pwal ren än Ngünün Jesus Kraist alisiei üpwe ngasala.
PHI 1:20 Üa fokun ösüküsükü o apilükülükü pwe üsap achanü, pwe üpwe föri wisei, nge fansoun meinisin epwe wor ai tipepwora, fokun lon ei fansoun, pwe üpwe alinga Kraist lon unusen manauei, ese lifilifil ika üpwe manau ika üpwe mäla.
PHI 1:21 Pun me rei Kraist ai manau, nge mäla ai feiöch.
PHI 1:22 Nge are ren ai üpwe sopwela le manau üa tongeni föri chomong sokun angang mi lomot, iwe, nge üsap silei mine üpwe filätä.
PHI 1:23 Iei mine üa tiperüörü lefilen ekei ruu ekiek: Üa fokun mochen ai üpwe feila o nom ren Kraist, pun iei met epwe fokun mürina,
PHI 1:24 nge ren ai üpwe manau epwe watte lomotan fänäsengesimi.
PHI 1:25 Üa fokun lükü pwe met üa apasa a pwüng, iei mine üa silei pwe üpwe nonometiu. Üpwe nonom remi meinisin pwe üpwe alisikemiitä pwe oupwe fefeitä o pwapwa lon ämi lükülük,
PHI 1:26 pwe lupwen üpwe liwinsefäl o nonom remi epwe fokun wor popun ämi oupwe aingaing lon Kraist Jesus fänäsengesi.
PHI 1:27 Iwe, iei ewe mettoch mi aüchea, pwe lapalapen manauemi epwe fich ngeni ewe Pworausen Manau usun Kraist. Mürin ese lifilifil ika ngang üpwe tongeni feila churikemi ika üsap, nge üpwe rongorong pwe oua üppos lon eu chök popun, oua pwal achocho le ütä lon eu chök tip fän iten ämi lükü ewe Pworausen Manau.
PHI 1:28 Ousap niuokusiti ekewe aramas mi ü ngenikemi. Oupwe tipepwora fansoun meinisin. Ei epwe alletätä ngeniir pwe ir ra lus, nge ämi oua win, pokiten Kot a fang ngenikemi ämi win.
PHI 1:29 Pun Kot a ngenikemi ewe wis mi aüchea pwe oupwe angang ngeni Kraist, sap chök ren ämi oupwe lükü i, nge pwal ren ämi oupwe riaföü fän itan.
PHI 1:30 Iei ämi oua tongeni etiei lon ewe fiu üa eäni fän iten ai peni ewe Pworausen Manau. Iei pwal chök ewe fiu oua küna me rei me lom, nge oua pwal rongorong pwe üa chüen eäni iei.
PHI 2:1 Iwe, manauemi lon Kraist a apöchöküla letipemi, an chen a echipakemi, oua chiechifengen me Ngünmifel, oua pwal eäni kirikiröch me tongfengen lefilemi.
PHI 2:2 Iei mine üa pese ngenikemi ämi oupwe föri met ai pwapwa epwe unus ren. Oupwe eäni eu chök ekiek, eu chök chen, oupwe pwal ngün eu me tipeeu.
PHI 2:3 Ousap föri föförün apangau are föri och ekiekin sikesik, nge oupwe tipetekisonfengen lefilemi, ousap ekieki pwe oua mürina seni ekewe ekoch.
PHI 2:4 Ousap chök ekieki en me an feiöch, nge oupwe pwal ekieki feiöchün chienemi.
PHI 2:5 Oupwe eäni ewe chök ekiek Kraist Jesus a eäni:
PHI 2:6 A lapalapeni lapalapen Kot, nge esap ekiekin amwöchünükü an wewe ngeni Kot usun ach amwöchünükü mettochüch.
PHI 2:7 Nge seni lon letipan a fangala meinisin mine a eäni, pwe a lapalapeni lapalapen eman chon angang. A wiliti ususun aramas o pomweni pomwen aramas.
PHI 2:8 A püsin atekisonatiu o eäni aleasochis tori mäla, tori an mäla won iräpenges.
PHI 2:9 Iei mine Kot a atekiatai won eu leni mi fokun tekia, a pwal ngeni eu it mi iteföüla seni it meinisin.
PHI 2:10 Iwe, chokewe meinisin mi nom won läng me fanüfan pwal failol repwe fotopwäsuk o asamolu ewe it iten Jesus,
PHI 2:11 nge ir meinisin repwe pwärätä pwe Jesus Kraist i Samol, pwe Kot Sam epwe ling ren.
PHI 2:12 Iei mine chienei kana mi achengicheng, usun ämi oua aleasochisiei fansoun meinisin lupwen üa nonom remi, iei usun a men aüchea ämi oupwe aleasochisiei lupwen üa toau senikemi. Oupwe achocho le anganga püsin ämi küna manau fän niuokus me chechech,
PHI 2:13 pun Kot ewe a angang lomi, epwe afisätä ämi mochen me ämi tufichin apwönüetä letipan.
PHI 2:14 Oupwe föri ämi angang meinisin, nge ousap lal are anini,
PHI 2:15 pwe esap wor och mi mwäl lon manauemi, nge oupwe limöch usun nöün Kot kana mi unusöch ra nonom won ei fanüfan mi ur ren aramas mi kirikiringau me tipis. Oupwe fokun tittin lefiler usun ekewe fü ra tittin fän läng,
PHI 2:16 lupwen oua ngeniir ewe Kapasen Manau. Are epwe iei usun mine oua föri, epwe wor popun ai üpwe sikäsinikemi lon ewe Ränin än Kraist epwe liwinsefäl, pun epwe pwä pwe ai achocho me ai angang weires esap lomotongau.
PHI 2:17 Nge inamwo ika chai epwe ninnila usun eu asoren ün won ewe asor me ewe angang mi fis ren ämi lükülük, ngang üpwe chök pwapwa o ämi meinisin oupwe etiei lon ai pwapwa.
PHI 2:18 Ina usun ämi oupwe pwal pwapwa, nge ngang üpwe etikemi lon ämi pwapwa.
PHI 2:19 Iwe, are iei letipen ach Samol, üa apilükülüköch pwe üpwe tongeni müttir tinala Timoty remi, pwe letipei epwe pöchökületä lupwen üpwe rongorong ewe pworaus usumi.
PHI 2:20 I chök ewe eman aia wewefengen lon äm ekiek, i a pwal wesewesen chüngükemi.
PHI 2:21 Pun ekewe ekoch ra chök ekieki püsin ar, nge resap ekieki usun ewe angangen Jesus Kraist.
PHI 2:22 Iwe, ämi oua püsin silei usun lomotöchün ätei, pwe i me ngang aia angangfengen fän iten ewe Pworausen Manau usun chök eman nau a angangfengen me saman.
PHI 2:23 Iei mine üa apilüköch ai üpwe tinala ätei remi lon ewe chök otun üa silei met epwe fis ngeniei lon ai nom lon fötek.
PHI 2:24 Nge ngang üa apilükülük lon ach Samol pwe püsin ngang üpwe tongeni müttir feila remi.
PHI 2:25 Ngang üa ekieki pwe epwe öch ai üpwe tinsefäliela remi pwiich Epafrotitus, ätei a etiei le angang pwal le maun, ätewe ämi oua akünöü pwe epwe alisiei.
PHI 2:26 Epafrotitus a fokun positikemi meinisin, a pwal fokun lolilen pokiten oua rongorong pwe a samau.
PHI 2:27 Enlet, a fokun samau o arap ngeni an epwe mäla. Nge Kot a tongei, nge sap i chök pwe pwal ngang, pun esap mochen ai üpwe tolong lon watten letipeta.
PHI 2:28 Iei mine üa fokun mochen amüttirala remi, pwe oupwe pwapwasefäl lupwen oupwe küna i, nge ai lolilen epwe wesila.
PHI 2:29 Iwe, oupwe etiwa i fän pwapwa usun eman pwimi lon ach Samol. Oupwe meniniti ei sokun aramas,
PHI 2:30 pun a fangala manauan o arapakan ngeni an epwe mäla fän iten än Kraist angang, pwe epwe siwilikemi le alisiei, lupwen ämi ousap tongeni.
PHI 3:1 Ämi pwii kana, iei amüchülan ai kapas ngenikemi: Oupwe pwapwa lon ach Samol. Üsap weires ren ai üpwe aliwinisefäli mine üa fen makkei ngenikemi me mwan, nge oupwe fen feiöch ren are üpwe föri iei usun.
PHI 3:2 Oupwe afälikemi ren chokewe mi föri föför mi ngau, ra usun chök kolak. Ir ätekewe mi apöchöküla an epwe fis reirei won inisin aramas.
PHI 3:3 Sap ir, nge kich sia angei ewe enletin sirkomsais, pun sia fel ngeni Kot ren Ngünün, sia pwapwa lon manauach lon Kraist Jesus, nge sisap anomu ach apilükülük won met sia föri ngeni inisich.
PHI 3:4 Ewer, ngang üa tongeni anomu ai apilükülük won ena sokun lapalap. Are eman a ekieki pwe mi wor popun an epwe tongeni anomu an apilükülük won ei sokun lapalap, ngang won inisi a fen wor rei ekoch popun mi watte:
PHI 3:5 Ngang üa sirkomsais lon awaluen ränin mürin ai uputiu, ngang eman wesewesen re Israel seni chök ai uputiu, seni lon ewe ainangen Peniamin, ai kewe lewo meinisin ir re Ipru. Ngang eman Farisi lon ai apwönüetä än ekewe chon Juta kewe Allük,
PHI 3:6 üa pwal fokun tiliken lon ai ariaföüü ekewe chon lükü Jesus. Are eman aramas a ekieki pwe a tongeni küna pwüng ren an aleasochisi ekewe Allük, ngang üa apwönüretä meinisin.
PHI 3:7 Nge ekei mettoch meinisin üa aita ngeni feiöch me lom, iei üa aita ngeniir feiengau pokiten Kraist.
PHI 3:8 Nge sap ikei chök. Ngang üa ekieki pwe mettoch meinisin ra fokun aücheangau fän iten ewe eu mi fokun aüchea seni meinisin, iei ai silei Kraist Jesus ai Samol. Pun fän itan üa pöütala meinisin, üa ekieki pwe meinisin ra usun chök pipi lon lenien koturula, pwe üpwe eäni Kraist
PHI 3:9 o wesewesen eufengen me i. Üsap chüen eäni püsin ai pwüng, ewe sokun pwüng üa angei ren ai aleasochisi ekewe Allük. Iei üa eäni ewe pwüng a toriei ren ai lükü Kraist, ewe pwüng mi feito seni Kot o a longolong won ai lükü Kraist.
PHI 3:10 Üa fokun mochen ai üpwe silei Kraist o mefi manamanen an manausefäl, üpwe pwal eti i lon an riaföü, pwe üpwe wewe ngeni i lon an mäla.
PHI 3:11 Pun üa apilükülükü pwe ngang üpwe eti ewe mwen manausefäl seni mäla ngeni manau.
PHI 3:12 Üsap apasa pwe üa fen apwönüetä ekei mettoch ika üa fen unusöchüla lon. Nge üa chök achocho ngeni ai üpwe angei ewe win, pun iei mine Kraist Jesus a turufiei ren.
PHI 3:13 Ämi pwii kana, ngang won inisi üsap ekieki pwe üa fen angei ewe win, nge eu mettoch üa föri: Üa manlükala mine a nom lükisöküri, nge üa achocho ngeni ai üpwe tori mine a nom mwei.
PHI 3:14 Iei mine üa säwenewen ngeni ewe sopolan ai üpwe angei ewe win, iei än Kot kö ren Kraist Jesus ngeni ewe manau esemüch.
PHI 3:15 Kich meinisin mi eäni mirit lon ach souläng sipwe ekiekipökü usun ekei mettoch. Nge are ekoch leimi a sokola ar ekiek, Kot epwe afatöchü ngenikemi.
PHI 3:16 Nge ousipwe chök fefetal ngeni mwach lon pwüngün ekewe allük sia fen aleasochisi tori iei.
PHI 3:17 Ämi pwii kana, oupwe chök sopwela le apirüei. Oupwe nenengeni chokewe mi föri sokun föför mi pwüng äm aia aiti ngenikemi.
PHI 3:18 Ngang üa fen ürenikemi ei fän chomong me mwan, nge iei üpwe aliwinisefäli ngenikemi fän ai kechü: A wor chomong aramas mi manaueni eu sokun manau a pwärätä pwe ir ra oputa ewe iräpengesin Kraist.
PHI 3:19 Lesopolan manauer repwe nom lon hell, pun ar kot iei mochenian inisiir. Ra sikäsini mine repwe säw ren o ekieki chök mettochun lon ei fanüfan.
PHI 3:20 Nge kich sia chon wiliposun läng. Sia ösüküsükü eman Chon Amanau ach Samol Jesus Kraist pwe epwe feito seni läng,
PHI 3:21 i ätewe epwe awili inisich inisin tekison pwe epwe wewe ngeni inisin we mi ling ren an we manaman a tongeni anomu mettoch meinisin fän nemenian.
PHI 4:1 Iwe, ämi pwii kana, üa fokun echenikemi o positikemi. Ämi oua apwapwaei o üa sikäsinikemi. Iei mine, ämi pwii kana mi achengicheng, oupwe nüküchar lon manauemi lon ach Samol.
PHI 4:2 Ngang üa tüngormau ngenikemi Eutia me Sintike, ouse mochen oupwe tipeeufengen usun chök pwipwi lon ach Samol.
PHI 4:3 Iwe, pwal en chienei chon angang mi allükülük, üa tüngor ngonuk pwe kopwe alisi ekei fefin, pun ra fokun angang weires o etiei le arongafeili ewe Pworausen Manau, irfengen me Klement me pwal ekewe ekoch mi etiei lon ewe angang, ir chokewe meinisin mi mak iter lon än Kot we puken iten chon manau.
PHI 4:4 Oupwe pwapwa lon ach Samol fansoun meinisin, üpwe apasasefäli: Oupwe pwapwa!
PHI 4:5 Oupwe tipepwetete ngeni aramas meinisin. Ach Samol a arapoto.
PHI 4:6 Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou.
PHI 4:7 Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi lon Kraist Jesus.
PHI 4:8 Iwe, amüchülan ai kapas, ämi pwii kana, oupwe amwöchünükü lon ämi ekiek ekei mettoch mi mürina o amwarar: mettoch mi let me aüchea, mettoch mi pwüng me limöch, mettoch aramas ra efich me meniniti.
PHI 4:9 Oupwe apwönüetä mine oua kaiö o angei seniei, mine oua rong seni ai kewe kapas o küna seni ai kewe föför. Iwe, Kot ewe mi ngenikich kinamwe epwe nonom remi.
PHI 4:10 Iwe, a fokun watte ai pwapwa lon ach Samol, pwe mürin fansoun langatam oua tongeni pwärisefäli ämi alisiei. Esap wewen pwe oua ükütiu le alisiei, nge esap chök wor alen ämi oupwe pwäri ngeniei.
PHI 4:11 Üsap apasa ei pokiten a wor ai osupwang, pun üa asipaei ai üpwe menemenöch ren mine a wor rei.
PHI 4:12 Üa silei ai üpwe nonom lon wöüngau pwal ai üpwe nonom lon wöümong. Üa kaiö ewe monomon pwe üpwe kinamwe ekis meinisin me fansoun meinisin, ese lifilifil ika üa möt ika üa echik, ika piseki a somwosomwola ika üa mwelele.
PHI 4:13 Meinisin a ki ngeniei ren Kraist ewe mi atufichiei.
PHI 4:14 Nge a fokun öch pwe oua alisiei lon ai osupwang.
PHI 4:15 Iwe, ämi chon Filipi, oua fokun silei, pwe lupwen üa feila seni Masetonia, lon ewe fansoun üa popuetä le afalafala ewe Pworausen Manau, ämi na chök mwichefel a alisiei, ämi chök oua lifang ngeniei usun mine üa lifang ngenikemi.
PHI 4:16 Lupwen üa nom lon Tesalonika oua tinato rei ai alilis fän ekoch pwe üsap osupwang.
PHI 4:17 Esap wewen pwe üa chök mochen angei lifang, nge üa mochen ai üpwe küna watten ämi föför mürina epwe kapach ngeni mine oua fen föri.
PHI 4:18 Iei toropwen ekewe mettoch meinisin oua ngeniei, ewer, a fen somwosomwola. Iei a wor rei mettoch meinisin, pun üa angei seni Epafrotitus ekewe lifang oua tinato rei. Ekei lifang ra usun chök eu asor ngeni Kot mi poöch, eu lifang Kot a etiwa o pwapwa ren.
PHI 4:19 Nge ai Kot epwe ngenikemi meinisin mine oua osupwang ren lon wöün mi somwola lon Kraist Jesus.
PHI 4:20 Ach Kot, i Samach epwe küna ling tori feilfeilachök! Amen.
PHI 4:21 Ai kapong ngeni ekewe chon pin meinisin ir nöün Kraist Jesus. Pwiich kewe souläng mi nom rei ra pwal kapong ngenikemi.
PHI 4:22 Ekewe chon pin meinisin ra kapong ngenikemi, lapalan chokewe mi nom lon imwen Sisar.
PHI 4:23 Ümöümöchün ach Samol Jesus Kraist epwe nonom remi meinisin. Amen.
COL 1:1 Ngang Paulus eman nöün Kraist Jesus soukünö ren letipen Kot, pwal pwiich ei Timoty,
COL 1:2 aia kapong ngeni ekewe chon pin lon Kolose, ir pwiich kewe mi allükülük lon Kraist: Samach Kot epwe fang ngenikemi ümöümöch me kinamwe.
COL 1:3 Äm aia kilisou ngeni Kot Semen ach Samol Jesus Kraist fansoun meinisin lupwen aia iotek fänäsengesimi.
COL 1:4 Pun aia rongorong usun ämi lükü Kraist Jesus, pwal usun ämi echeni ekewe chon pin meinisin.
COL 1:5 Lupwen ewe Pworausen Manau mi enlet a akomwen torikemi, oua rongorong usun ewe apilükülük mi pop seni ewe Pworausen Manau. Iei mine ämi lükülük me chen a longolong won met oua apilükülükü a iseis lon läng fän itemi.
COL 1:6 Ei Pworausen Manau a akatoto feiöch, a chöfetal won unusen fanüfan usun a fen fis lefilemi, seni ewe rän oua kärän popuetä le rongorong o weweöchiti än Kot ümöümöch mi wesewesen enlet.
COL 1:7 Oua rongorong usun än Kot ümöümöch seni Epafras chienach we chon angang mi achengicheng, i nöün Kraist chon angang mi allükülük fänäsengesimi.
COL 1:8 Epafras a pwal asile ngenikem usun ewe chen ewe Ngünmifel a fang ngenikemi.
COL 1:9 Iei popun, seni ewe rän aia rongorong usumi, aisap ükütiu le iotek fän itemi. Aia tüngor ngeni Kot pwe epwe aurakemi ren tufichin silei letipan me unusen mirit me weweöchiti ekewe mettoch lon pekin ngün.
COL 1:10 Mürin oupwe tongeni manaueni eu manau mi fich ngeni ach Samol o oupwe föri mine epwe pwapwa ren. Iwe, epwe wor sokopaten föför mürina lon manauemi, oupwe mämäritä lon ämi silei Kot.
COL 1:11 Iwe, oupwe pöchökülela ren sokun tufich meinisin mi pop seni an manaman me ling, pwe oupwe tongeni likitü o mosonotam.
COL 1:12 Oupwe pwapwa lon ämi kilisou ngeni Samach Kot, i ewe mi atufichikemi pwe oupwe eäni ekewe feiöch Kot a iseis fän iten ekewe chon pin lon ewe mwün saram.
COL 1:13 A angasakich seni fän nemenien rochopwak o atolongakich lon mwün Nöün we mi achengicheng.
COL 1:14 I ewe mi angasakichela, wewen pwe a amusala ach tipis.
COL 1:15 Kraist, ätewe sia tongeni küna, a lapalapeni lapalapen Kot, ewe sisap tongeni küna. I Nöün we mwänichi, a tekia seni förien Kot meinisin.
COL 1:16 Pun ren Kraist Kot a föri mettoch meinisin lon läng me won fanüfan, ekewe mettoch sia tongeni küna me ekewe mettoch sisap tongeni küna, pwal ekewe ngün mi wor ar pöchökül me nemenem, ir samol mi fokun manaman. Kot a föri mettoch meinisin ren i o pwal fän itan.
COL 1:17 Kraist a fen nonom mwen mettoch meinisin, nge lon i mettoch meinisin ra chufengen.
COL 1:18 I möküren inisin we, iei ewe mwichefel. I popun pwe ewe inis a manau. I Nöün Kot, ewe mwänichi, Kot a amanauasefäli seni mäla, pwe i chök epwe tekia mwen mettoch meinisin.
COL 1:19 Pun iei püsin än Kot akot, pwe unusen lapalapen Kot epwe unusolong lon Nöün we.
COL 1:20 Ren Nöün we Kot a akota pwe epwe achäsefäli mettoch meinisin ngeni püsin i. Kot a afisätä kinamwe ren chaan Nöün we mi pupula me won ewe iräpenges o a achäsefäli mettoch meinisin won fanüfan pwal lon läng ngeni püsin i.
COL 1:21 Me lom oua toau seni Kot o chon oputa i pokiten ekewe mettoch oua föföri o ekkekieki.
COL 1:22 Nge iei oua chä ngeni Kot ren mälan Nöün we, pwe epwe aütaikemi mwen mesan fän pin me limöch, pwe esap wor och mine oua mwäl won.
COL 1:23 Nge ämi oupwe fokun sopwela lon ämi lükülük won eu longolong mi pöchökül o nüküchar, ousap fokun mwöküt seni ewe apilükülüköch oua angei lupwen oua rongorong ewe Pworausen Manau. Iei ewe Pworausen Manau aramas ra arongafeili ngeni aramas meinisin won fanüfan, ngang Paulus üa pwal eman chon angang ngeni.
COL 1:24 Iwe, iei üa pwapwa lon ai riaföü fänäsengesimi, pun ren ai riaföü lon inisi üa alisi le aunusöchüela mine esamwo unus lon än Kraist riaföü fänäsengesin inisin we, iei ewe mwichefel.
COL 1:25 Kot a awisaei, pwe üpwe eman chon angang ngeni mwichefel, i ewe mi ngeniei ei angang ai üpwe föri pwe oupwe feiöch ren. Iei ewe angangen arongafeili unusen an we kapas,
COL 1:26 ewe monomon Kot a amonala seni aramas meinisin lon ekewe fansoun lomlom, nge iei a pwärala ngeni ekewe chon pin.
COL 1:27 Kot a mochen pwe epwe pwäri ngeniir an we monomon mi aüchea o ling a amolätä fän iten aramas meinisin. Iei ewe monomon pwe Kraist a nonom lomi, i ach apilükülük pwe sipwe eti lon an ling.
COL 1:28 Iei mine sia arongafeili Kraist ngeni aramas meinisin. Sia fönöör o asukuler ren sokun tipachem meinisin, pwe sipwe emwenato eman me eman mwen Kot fän ar unusöch lon Kraist.
COL 1:29 Üa fokun angang weires pwe epwe fis ei o üa aea ewe watten pöchökül Kraist a ngeniei, ewe a pwal akangang loi.
COL 2:1 Üa mochen asile ngenikemi usun ai weires le angang fän itemi, fän iten ekewe souläng lon Laotisea, pwal fän iten ekewe ekoch aramas resap sisileei.
COL 2:2 Popun ai föri ei, pwe letiper epwe pöchökületä, repwe pwal tipeeufengen lon chen, pwe repwe mefi unusen aüchean ar weweöchiti o silei ewe monomonen Kot, iei i Kraist.
COL 2:3 Kraist i ewe mi tongeni pwärala wöün än Kot tipachem me silelap meinisin mi monomonola.
COL 2:4 Iei mine üa ürenikemi, pwe ousap tupula ren ekewe kapasen anini mi mwäl, inamwo ika ra usun chök kapas mi mürina.
COL 2:5 Pun ikamwo ngang üsap nom remi ren inisi, nge üa nom remi lon ngüni. Üa pwapwa lupwen üa küna usun ämi tipeeufengen o nükücharfengen lon ämi lükü Kraist.
COL 2:6 Pokiten oua fen etiwa Kraist Jesus pwe ämi Samol, oupwe le sopwela lon ämi nonom lon i.
COL 2:7 Oupwe warar lon i usun efoch irä mi warar, oupwe fefeitä lon manauemi o pöpöchökülela lon ämi lükü Kraist usun oua fen kaiö. Iwe, oupwe fokun pwärätä ämi kilisou.
COL 2:8 Oupwe tümwünükemi, pwe esap wor eman epwe liapenikemi ren atuputupun tipachemen fanüfan mi aücheangau, a pop seni sokopaten uruwon lom aramas ra aiti ngeni aramas, pwal seni ekewe ngün mi wor ar nemenem fän läng, nge esap pop seni Kraist.
COL 2:9 Pun sokun Kot meinisin a nom lon Kraist lupwen a manau won fanüfan.
COL 2:10 Iwe, lon Kraist oua tongeni manaueni eu manau mi unusöch. I a tekia seni ekewe ngün meinisin mi nemenem me ekewe manaman.
COL 2:11 Lon Kraist oua sirkomsais, sap ren ewe sirkomsais aramas ra föri, nge ren ewe sirkomsais Kraist a föri, pwe oua ngas seni fän nemenien fitukemi mi tipis.
COL 2:12 Pun lupwen oua papatais, oua eti Kraist le peias, nge lon ämi papatais oua pwal eti Kraist lon an manausefäl ren ämi lükü manamanen Kot mi amanauasefäli Kraist seni mäla.
COL 2:13 Me lom oua mäla lon pekin ngün pokiten oua tipis, pwal pokiten oua chon lükün Israel, esap nom remi än Moses kewe Allük. Nge iei Kot a amanauakemi fiti Kraist. A amusala ach tipis meinisin
COL 2:14 o amola makken ach kewe liwinimang mi mak lon ewe toropwe fiti allükün kewe mi ü ngenikich. A angei senikich meinisin o chüfölüüretä won ewe iräpenges.
COL 2:15 Iwe, won ewe iräpenges Kraist a awesi pöchökülen ekewe ngün mi nemenem o manaman. A asäwer mwen mesen aramas ren an emweniir usun chon fötek mi fetalela mürin ewe chon win.
COL 2:16 Iei mine ousap mwüt ngeni än eman epwe föri allük usun met oupwe mongö ika ün, ika meni rän oupwe pinini, ika usun ekewe chulap mi fis lon fansoun lelingen maram me ekewe ränin sapat.
COL 2:17 Ekei mettoch meinisin ngünüen chök ekewe mettoch repwe feito me mürin, nge ewe mi wesewesen enlet, iei i Kraist.
COL 2:18 Ousap mwüt ngeni eman epwe angei senikemi winnemi, ewe mi apasa pwe a tekia pokiten künaan mi mürina, a pwapwaiti an epwe atekisonamwälietiu o fel ngeni chon läng. Ei sokun aramas a sikesik ren ekiekin fituk, nge esap wor popun an epwe föri iei usun,
COL 2:19 a ükütiu le pach ngeni Kraist, i möküren ewe inis. Fän än Kraist nemenem unusen ewe inis a manauöch o chufengen ren ekewe kirupun lekupukup me ekewe wa mi pöchökül, a mämäritä usun Kot a mochen.
COL 2:20 Iwe, oua mäla fiti Kraist o ngas seni fän nemenien ekewe ngün mi nemeni ei fanüfan. Pwota chök oua manaueni eu sokun manau usun itä nge ämi nöün ei fanüfan? Pwota oua aleasochisi ekei sokun allük,
COL 2:21 “Ousap amwöchü ei! Ousap neni ena! Ousap atapa ekei mettoch!?”
COL 2:22 Ekei allük meinisin ra kapas usun mettoch repwe morola mürin ach eäniir. Förien aramas chök ekei allük, pwal mine ra aiti ngeni aramas.
COL 2:23 Ewer, ekei sokun allük usun itä nge mi longolong won tipachem. Ra ariani aramas ngeni sokun angangen fel, ra atekisonamwäliiretiu o ra föri pwe aramas repwe püsin ariaföüü inisiir. Nge ekei allük esap fokun wor lomoter ngeni än eman epwe nemeni mocheniangauen inisin.
COL 3:1 Iwe, pokiten oua manausefäl fiti Kraist, iei mine oupwe anomu ämi ekiek won ekewe mettoch mi nom läng ia Kraist a mot ie won an lenien mot mi nom lepelifichin Kot.
COL 3:2 Oupwe tipeni ekewe mettoch mi nom läng, nge sap ekewe mettoch mi nom ikei won fanüfan.
COL 3:3 Pun oua fen mäla, iwe, manauemi a opola ren Kraist lon Kot.
COL 3:4 Kraist i wesewesen ämi manau, nge lupwen i epwe pwä, mürin pwal ämi oupwe pwä fiti i lon lingan.
COL 3:5 Iei mine oupwe amäloi ekewe mochenian fanüfan mi nom remi: sokopaten föförün lisowu, lüangau, mocheisou, mocheniangau me tipemong. (Pun tipemong och sokun angang ngeni anümwäl.)
COL 3:6 Pun pokiten ekei mettoch än Kot song epwe tori chokewe resap aleasochis ngeni.
COL 3:7 Me lom pwal ämi oua soun manaueni ei sokun manau, lupwen oua nom fän nemenien ekei sokun mochenia.
COL 3:8 Nge iei oupwe fokun ükütiu le föri ekei sokun föför: song, lingeringer me koput. Esap wor kapasen turunufas ika kapasingau epwe towu seni lon awemi.
COL 3:9 Ousap kapas chofona lefilemi, pun oua pwilitawu ewe manauen lom me föförün,
COL 3:10 nge oua pwilitalong ewe manau mi fö. Iei ewe aramas mi fö Kot a förätä, epwe pwal akasöfösefäli lon püsin lapalapan, pwe ämi silei Kot epwe unusöch.
COL 3:11 Iwe, pokiten ei, esap chüen wor sokofesenin lefilen chon lükün Israel me chon Juta, chon sirkomsais me chon resap sirkomsais, chon ekis, chon kichiniwel, ekewe amanau me ekewe aramas mi ngas, pun Kraist chök a aüchea seniir meinisin a pwal nom lor meinisin.
COL 3:12 Ämi chon fil me ren Kot, ämi chon pin kana i a echenikemi, oupwe pwilitalong womi tong, kirikiröch, tipetekison, lukpwetete me mosonotam.
COL 3:13 Oupwe songomangfengen o amusamusfengen are eman a chou ngeni eman. Oupwe fokun amusamusfengen usun ach Samol a amusala ämi tipis.
COL 3:14 Nge lükün ekei föför meinisin oupwe echenifengenikemi lefilemi, pun chen a pilüküfengeni ekei mettoch meinisin, pwe ra unusöch lon ar chufengen.
COL 3:15 Iwe, ewe kinamwe Kraist a ngenikemi epwe nemeni letipemi, pun Kot a körifengenikemi lon eu chök inis ngeni ei kinamwe. Iwe, oupwe kilisou ngeni Kot.
COL 3:16 Än Kraist kapas mi fokun aüchea epwe nonom lon letipemi. Oupwe aiti ngeni eman me eman lefilemi ei kapas o fönööfengenikemi fän mirit. Oupwe kölü ekewe kölfel, ekewe kölün lamalam me ekewe köl mi pin. Oupwe köl ngeni Kot fän kilisou lon letipemi.
COL 3:17 Iwe, meinisin mine oupwe föri ika apasa, oupwe föri fän iten ach Samol Jesus o oupwe kilisou ngeni Samach Kot ren i.
COL 3:18 Ämi fefin kana, oupwe aleasochis ngeni pwülüemi, pun iei met oupwe föri lon ämi souläng.
COL 3:19 Ämi mwän kana, oupwe echeni pwülüemi, nge ousap pöchökül ngeniir.
COL 3:20 Ämi nau kana, oupwe aleasochisi sememi me inemi lon mettoch meinisin, pun iei met Kot a pwapwa ren.
COL 3:21 Ämi sam me in kana, ousap asonga nöümi kana ren ämi apwüngüchouur, pwe resap apilükingau.
COL 3:22 Ämi amanau kana, oupwe aleasochisi ämi samol lon ei fanüfan lon mettoch meinisin, sap lupwen chök ar nenengenikemi pokiten oua mochen aitöchükemi. Nge oupwe föri ämi angang fän wenecharen letipemi, pun oua meniniti ach Samol.
COL 3:23 Meinisin mine oua föri, oupwe angang ngeni ren unusen letipemi usun itä nge oua angang ngeni ach Samol, nge sap ngeni aramas.
COL 3:24 Oupwe chechemeni pwe ach Samol epwe ngenikemi liwinimi mine a iseis fän iten nöün aramas. Pun Kraist i wesewesen ämi Samol oua angang ngeni.
COL 3:25 Nge aramas meinisin mi föri mine a ngau repwe angei liwinin ar föför, pun Kot esap lifilifil aramas lon an apwüngüür.
COL 4:1 Ämi samol kana, oupwe aramasöch o eäni pwüng ngeni nöümi amanau. Oupwe chechemeni pwe mi pwal wor ämi Samol lon läng.
COL 4:2 Oupwe likitü o mamasa lon ämi iotek, oupwe pwal iotekin kilisou ngeni Kot.
COL 4:3 Oupwe pwal iotek fän item pwe Kot epwe suki eu asam ngenikem, pwe aipwe tongeni afalafala an kapas usun ewe monomonen Kraist. Pun iei popun pwe üa nom lon imwen fötek.
COL 4:4 Iei mine oupwe iotek pwe mine üa eäni afalafal epwe fatöch, usun a pwüng ngeni wisei.
COL 4:5 Oupwe eäni tipachem lon ämi föför ngeni chokewe resap lükü, oupwe alomotöchü ämi fansoun.
COL 4:6 Ämi kapas epwe pwetete o apwapwai aramas, iwe, oupwe silei mine oupwe pölüeniöchü ngeni aramas meinisin.
COL 4:7 Tikikus pwiich we mi achengicheng, i eman chon angang mi allükülük me chienem chon angang lon angangen ach Samol, epwe apworausa ngenikemi usun pworausei meinisin.
COL 4:8 Ina popun üa tinala i remi pwe epwe apöchöküla letipemi ren an apworausa ngenikemi usun mine a fis ngenikem.
COL 4:9 Iwe, Onesimus pwiich we mi achengicheng me allükülük epwe eti Tikikus le feila remi, ätei i eman chon ämi mwich. Ätekei repwe apworausa ngenikemi mine a fis me ikei.
COL 4:10 Aristarkus chienei chon fötek a tinala an kapong ngenikemi, pwal Markus pwiin Parnapas. (Oua fen angei ekewe kapasen öüröür usun ämi oupwe etiwa Markus are epwe feito remi.)
COL 4:11 Josua mi pwal iteni Justus a pwal kapong ngenikemi. Ätekei me ülüman ir chök me lein ekewe chon Juta mi soulängila, ra etiei lon ewe angang fän iten ewe Mwün Kot, a fokun watte ar alilis ngeniei.
COL 4:12 Kapong seni Epafras, pwal i eman chon ämi we mwich me eman nöün Kraist Jesus chon angang. A fokun achocho le iotek fän itemi o tüngor ngeni Kot an epwe anükücharakemi, pwe oupwe mirit lon ämi souläng, nge ousap tipemwaramwar, oupwe pwal fokun aleasochisi letipen Kot.
COL 4:13 Püsin ngang üa tongeni pwärätä usun an angang weires fän itemi pwal fän iten ekewe souläng lon Laotisea me Hierapolis.
COL 4:14 Lukas nöüch we sousafei mi achengicheng pwal Temas ra tinala ar kapong ngenikemi.
COL 4:15 Oupwe uwei äm kapong ngeni pwiich kewe lon Laotisea, pwal ngeni Nimfa me chon ewe mwichefel mi chufengen lon imwan.
COL 4:16 Iwe, mürin ämi wes me aleani ei toropwe, oupwe pii pwe epwe pwal alea ngeni chon ewe mwichefel lon Laotisea. Nge pwal ämi oupwe aleani ewe toropwe pwiich kewe lon Laotisea repwe tinala remi.
COL 4:17 Oupwe üreni Arkipus, “Kopwe föri ewe angang ra awisa ngonuk lon än ewe Samol we angang pwe kopwe apwönüetä.”
COL 4:18 Ei kapong ngang Paulus üa makkei ren püsin pei. Oupwe chechemeni pwe üa nom lon imwen fötek! Än Kot ümöümöch epwe nonom remi meinisin.
1TH 1:1 Äm Paulus, Silas me Timoty aia kapong ngeni chon ewe mwichefel lon Tesalonika, ir nöün Samach Kot me ach Samol Jesus Kraist: Ümöümöch me kinamwe epwe nonom remi.
1TH 1:2 Äm aia kilisoufochofoch ngeni Kot fänäsengesimi meinisin lupwen aia chechemenikemi lon äm iotek.
1TH 1:3 Pun aia chechemeni me mwen ach Kot i Samach usun ämi lükülük mi pwä lon ämi föför, usun ämi tong mi pwä lon ämi angang weires, pwal usun ämi apilükülüköch mi nüküchar lon ach Samol Jesus Kraist.
1TH 1:4 Ämi pwiim kana, aia silei pwe Kot a echenikemi o afilikemi pwe oupwe nöün.
1TH 1:5 Pun aia uwato ewe Pworausen Manau ngenikemi, sap lon kapas chök, nge ren manaman me Ngünmifel, pwal ren äm wesewesen lükü pwe a let ewe kapas. Ämi oua silei ifa usun nonomum lupwen aia nonom remi lon fansoun äm alisikemi.
1TH 1:6 Ämi oua apirükem me ach Samol. Inamwo ika oua tolong lon watten riaföü, oua etiwa ewe Kapasen Kot fän pwapwa mi feito seni ewe Ngünmifel.
1TH 1:7 Iei usun oua wiliti eu lenien apirü fän iten ekewe chon lükü meinisin mi nom lon Masetonia me Akaia.
1TH 1:8 Pun esap chök ewe kapas usun ach Samol a towu senikemi o chöfetal lon Masetonia me Akaia, nge pwal ewe pworaus usun ämi lükü Kot a chöfetal ekis meinisin. Esap wor och mine aipwe chüen tongeni apasa.
1TH 1:9 Ekei aramas meinisin ra kapas usun ämi etiwakem lupwen aia churikemi, pwal usun ämi kul ngeni Kot o kul seni ekewe uluulun anümwäl, pwe oupwe angang ngeni ewe Kot mi manau o wesewesen Kot,
1TH 1:10 pwal usun ämi witiwiti nöün we epwe feito seni läng. Iei i Jesus nöün we i a amanauasefäli seni mäla, epwe angasakich seni än Kot song epwe feito.
1TH 2:1 Ämi pwiim kana, oua püsin silei pwe äm churikemi esap lomotongau.
1TH 2:2 Ämi oua silei pwe aia fen küna riaföü me itengau lon Filipi me mwen äm feito remi lon Tesalonika. Inamwo ika a wor chomong chon ü ngenikem, nge ach Kot a ngenikem pwora pwe aipwe aiti ngenikemi ewe Pworausen Manau mi feito seni i.
1TH 2:3 Äm afalafal ngenikemi esap longolong won met mi mwäl ika won ekieksolä, sisap pwal atupu eman.
1TH 2:4 Nge iteiten fansoun aia apasatä mine Kot a mochen, pun a apwüngala pwe aipwe fich ngeni an epwe lükü ngenikem ewe Pworausen Manau. Äm aisap mochen apwapwai aramas, nge aia mochen apwapwai Kot ewe mi sotuni ekiekin letipach.
1TH 2:5 Pun oua fokun silei pwe aisap feito remi fän kapas amichimich, aisap pwal aea sokun kapas epwe pwölüela äm tipemong. Kot i nöüch chon pwärätä.
1TH 2:6 Aisap pwal föri met aramas repwe mwareitikem ren, aisap föri ngenikemi, aisap pwal föri ngeni ekoch.
1TH 2:7 Inamwo ika a wor äm pwüüng womi pokiten äm nöün Kraist soukünö, nge aia tipepwetete lupwen aia nonom remi, usun eman in a tümwünü püsin nöün kana.
1TH 2:8 Iwe, pokiten aia fokun tongekemi, aia pwal pwapwa le fang ngenikemi sap chök ewe Pworausen Manau seni Kot, nge pwal püsin manauem, pun aia fokun echenikemi.
1TH 2:9 Ämi pwiim kana, oua fokun chechemeni usun äm angang weires. Äm aia angang lerän me lepwin pwe aisap aweiresikemi lupwen aia afalafala ngenikemi ewe Pworausen Manau seni Kot.
1TH 2:10 Ämi nöüm chon pwärätä, pwal Kot, pwe äm föför ngenikemi ämi mi lükü ewe Pworausen Manau a limöch me pwüng, nge esap wor mwäl lon.
1TH 2:11 Ämi oua silei pwe aia alisi eman me eman leimi usun chök eman sam a alisi püsin nöün kana.
1TH 2:12 Äm aia apöchöküla letipemi o aururukemi, aia pwal allük ngenikemi pwe oupwe manaueni ewe sokun manau mi apwapwai Kot, ewe mi körikemi pwe oupwe eti i lon Mwün me lingan.
1TH 2:13 Iwe, mi pwal wor eu popun pwota sia kilisoufochofoch ngeni Kot. Lupwen sia uwato remi ewe kapasen Kot, oua rongorong ngeni o etiwa. Ousap ekieki pwe kapasen aramas, nge oua etiwa pwe iei wesewesen kapasen Kot. Pun ewe kapas a angang lomi ämi mi lükülük.
1TH 2:14 Ämi pwiim kana, mine a fis ngenikemi a fen fis ngeni än Kot kewe mwichefel lon Jutea, ir chokewe nöün Kraist Jesus. Ämi oua küna riaföü seni püsin chon fanüemi, usun chök ir ra küna riaföü seni ekewe chon Juta,
1TH 2:15 ir chokewe mi niela ach Samol Jesus me ekewe soufos, ra pwal ariaföüükem. Ifan me ar asonga Kot! Ifan me ar oput aramas meinisin.
1TH 2:16 Ra pwal mwo nge sotuni ar repwe pinekem seni äm afalafala ngeni ekewe chon lükün Israel ewe kapasen Kot mi atoto rer manau. Iei ewe amüchülan me lein ekewe tipis meinisin ra föri seni me lom. Iwe, iei än Kot song a fokun feitiu wor.
1TH 2:17 Ämi pwiim kana, lupwen sia imwüfesen o sia nonom toau senikemi ekis chök fansoun,- ewer, sia chök imwü senikemi ren inisim, nge sap ren lelukem,- äm aia fokun positikemi o achocho ngeni äm aipwe künasefälikemi.
1TH 2:18 Äm aia mochen liwinsefälitikemi. Ngang Paulus üa sotuni ai üpwe liwinsefälitikemi fän ekoch, nge Satan a pinekem.
1TH 2:19 Pun ämi chök popun äm apilükülüköch, äm pwapwa, pwal popun äm aingaing lon äm win mwen mesen ach Samol Jesus lupwen epwe liwinsefälito.
1TH 2:20 Enlet, ämi chök popun äm ling me äm pwapwa!
1TH 3:1 Iwe, lupwen aisap chüen tongeni engila ren äm positikemi, aia ekiekifengeni, pwe äm chök aipwe nonom lon Aten,
1TH 3:2 nge aipwe tinala Timoty, pwiim we mi etikem le angang ngeni Kot lon äm afalafala ewe Pworausen Manau usun Kraist. Äm aia tinala pwe epwe apöchöküla letipemi o alisikemi lon ämi lükülük,
1TH 3:3 pwe esap wor eman me leimi epwe kulsefäl pokiten ekei riaföü mi torikemi. Oua püsin silei pwe iei letipen Kot ngenikich pwe sipwe tolong lon ekei sokun riaföü.
1TH 3:4 Pun lupwen aia chüen nom remi, aia ürenikemi me mwen an esamwo fis, pwe sipwe tolong lon riaföü. Iwe, ei a wesewesen fis usun oua fokun silei.
1TH 3:5 Iei popun üa tinala Timoty, pun üsap chüen tongeni engila ngeni ai üsap silei pworausemi. Iei usun üa tinala i an epwe pii ika ifa usun ämi lükülük. Ewer, üa chök niuokus ika Tefil a sotunikemi o äm angang meinisin epwe lomotongau.
1TH 3:6 Nge iei Timoty a liwinsefälito o uwato rem pworaus mi mürina usun ämi lükülük me tong. A apworausa ngenikem pwe fansoun meinisin oua chechemenikem fän pwapwa o oua fokun mochen churikem, usun pwal äm aia fokun mochen churikemi.
1TH 3:7 Iei mine ämi pwiim kana, lon ekei weires me riaföü meinisin mi torikem, letipem a pöchökülela fänäsengesimi ren ämi lükülük.
1TH 3:8 Pun iei aia wesewesen manau, pokiten oua nüküchar lon ämi souläng lon ach Samol.
1TH 3:9 Iei aia kilisou ngeni Kot fänäsengesimi. Aia kilisou ngeni fän iten ewe pwapwa aia eäni mwen mesen Kot pokitemi.
1TH 3:10 Lerän me lepwin aia tüngor ngeni Kot ren unusen letipem pwe epwe mwüt ngenikem pwe aipwe churikemi o awora ngenikemi met oua osupwang ren lon ämi lükülük.
1TH 3:11 Amwo Samach Kot me ach Samol Jesus epwe püsin wäsi alem, pwe aipwe tongeni feila remi.
1TH 3:12 Amwo ach Samol epwe alapala ämi chen lefilemi pwal ngeni aramas meinisin, pwe epwe fokun wattela usun watten äm echenikemi.
1TH 3:13 Ach Samol epwe apöchöküla letipemi, pwe oupwe unusöch o pin mwen mesen Samach Kot, lupwen ach Samol Jesus epwe liwinsefälito fiti nöün kewe chon pin meinisin.
1TH 4:1 Ämi pwiim kana, iei soposopolan met oua kaiö senikem usun ewe sokun manau oupwe manaueni pwe oupwe apwapwai Kot ren. Ewer, iei usun mine oua fen manau lon. Nge iei äm aia tüngormau o pese ngenikemi fän iten ach Samol Jesus, pwe manauemi epwe fokun mürinala.
1TH 4:2 Pun oua fen silei ekewe kapasen öüröür aia ngenikemi fän alon ach Samol Jesus.
1TH 4:3 Pun iei letipen Kot pwe oupwe pin o unusen ngas seni sokun föförün lisowu.
1TH 4:4 Ämi mwän kana, eman me eman leimi epwe silei usun an nomofengen me pwülüan fän pin me üöch,
1TH 4:5 esap fän mocheisou usun ekewe aramas mi nom lon rochopwak resap silei Kot.
1TH 4:6 Iwe, ren ei lapalap esap wor eman mwän epwe föri och mi mwäl ngeni chiechian souläng ika föri angangen atuputup ngeni. Äm aia fen ürenikemi ei me mwan o aia fokun fönöü ngenikemi, pwe ach Samol epwe apwüngü chokewe mi föri ei sokun föför mi ngau.
1TH 4:7 Pun Kot esap körikich pwe sipwe manau lon ei sokun manauen mocheniangau, nge a körikich pwe sipwe manaueni eu manau mi pin.
1TH 4:8 Iei mine iö a pöütala ekei kapasen fön, esap pöütala kapasen aramas pwe kapasen Kot, ewe mi fang ngenikich ngünün we Ngünmifel.
1TH 4:9 Iwe, esap wor lomoten äm aipwe mak ngenikemi usun ämi oupwe echeni chiechiemi kewe souläng, pun püsin Kot a fen aiti ngenikemi usun ämi oupwe echenifengenikemi lefilemi.
1TH 4:10 Enlet, oua fen echeni pwimi kewe souläng meinisin lon Masetonia. Iei mine pwiim kana, aia tüngormau ngenikemi, oupwe alapala ämi echenifengenikemi lefilemi.
1TH 4:11 Oupwe achocho ngeni ämi oupwe manaueni eu manau mi mosonoson, oupwe en me püsin föri an angang o anganga met oupwe manau ren usun aia fen ürenikemi me mwan.
1TH 4:12 Are oua föri ei, chokewe resap lükü Jesus repwe meninitikemi, ousap pwal tüngor än eman epwe fang ngenikemi met oua osupwang ren.
1TH 4:13 Ämi pwiim kana, äm aia mochen pwe oupwe silei mine a let usun chokewe mi mäla, pwe ousap lolilen usun chokewe esap wor ar apilükülüköch.
1TH 4:14 Sia lükü pwe Jesus a mäla o manausefälitä, iei mine sia pwal lükü pwe Kot epwe aliwinisefäli Jesus me chokewe mi mäla lon ar lükü i.
1TH 4:15 Mine aia aiti ngenikemi iei alon ach Samol: Kich mi chüen manau ngeni ewe rän ach Samol epwe liwinsefälito lon sisap akom mwen chokewe ra fen mäla.
1TH 4:16 Pun püsin ach Samol epwe feitiu me läng fän mwelian mi leüömong, fän mwelien ewe samolun chon läng, pwal fän puun nöün Kot rappwa. Iwe, chokewe ra fen mäla lon ar lükü Kraist repwe akomwen manausefäl.
1TH 4:17 Mürin kich mi chüen manau ngeni ena fansoun sipwe etekitä o chufengen me ir lon kuchu, pwe sipwe churi ach Samol lon längin asepwäl. Iei usun sipwe nonomfengen me ach Samol fansoun meinisin.
1TH 4:18 Iei mine oupwe echipafengenikemi ren ekei kapas.
1TH 5:1 Iwe, ämi pwiim kana, esap wor lomoten aipwe mak ngenikemi usun ewe fansoun ika ewe rän ekei mettoch repwe fisitä lon.
1TH 5:2 Pun ämi oua püsin silefichi, pwe ewe rän ach Samol epwe war lon epwe usun chök än eman chon solä war lepwin.
1TH 5:3 Lupwen aramas ra apasa, “Mettoch meinisin a kinamwe o nükünüköch”, mürin feiengau epwe müttir toriir usun cheuchen fam a tori eman fefin, nge esap wor eman aramas epwe tongeni sü seni.
1TH 5:4 Nge ämi pwiim kana, ousap nonom lon rochopwak, pwe ousap serengau ren ewe Rän usun än eman serengau ren eman chon solä.
1TH 5:5 Ämi meinisin oua aramas mi nom lon saram, oua chon lerän. Kich sisap chon lepwin ika nonom lon rochopwak.
1TH 5:6 Iei mine sisap möür usun pwal ekoch, nge sipwe nenela o mamasafichi.
1TH 5:7 Pun chokewe mi möür, ra möür lepwin, nge chokewe mi puch, ra puch lepwin.
1TH 5:8 Nge kich sia chon lerän, ousipwe mamasafichi. Sipwe üföüf lükülük me chen usun chök eman a üföüf echö chechen leupw mi för seni mächä, sipwe pwal eäni apilüköchün manau pwe ina imwach akau.
1TH 5:9 Kot esap afilikich pwe sipwe angei riaföün an song, nge a afilikich pwe sipwe küna manau ren ach Samol Jesus Kraist,
1TH 5:10 i ätewe a mäla fän itach pwe sipwe nonomfengen me i, ese lifilifil ika sia manau ika sia mäla lupwen an epwe liwinsefälito.
1TH 5:11 Iei mine oupwe apöchökülafengenikemi o alilisfengen lefilemi, usun oua fen föri iei.
1TH 5:12 Ämi pwiim kana, aia tüngormau ngenikemi pwe oupwe meniniti ätekewe mi angang ngenikemi, ir mi emwenikemi o öüröürakemi lon manauen ämi souläng.
1TH 5:13 Oupwe asamoluur fän watten suföl me chen pokiten ewe angang ra föri ngenikemi. Oupwe kinamwefengen lefilemi.
1TH 5:14 Ämi pwiim kana, aia pesekemi pwe oupwe fönöü chokewe mi chipwang, oupwe apöchöküla letipen chon niuokus, oupwe alisi ekewe chon apwangapwang, oupwe pwal mosonotam ngeni aramas meinisin.
1TH 5:15 Oupwe pii pwe esap wor eman epwe liwiningauei föföringauen eman ngeni, nge fansoun meinisin oupwe achocho le föri mine a mürina lefilemi, pwal ngeni aramas meinisin.
1TH 5:16 Oupwe pwapwafochofoch,
1TH 5:17 oupwe iotek fansoun meinisin,
1TH 5:18 oupwe kilisou lon mettoch meinisin, pun iei letipen Kot ngenikemi lon Kraist Jesus.
1TH 5:19 Ousap kunuela ewe Ngünmifel,
1TH 5:20 ousap turunufasei ekewe kapasen osuni,
1TH 5:21 nge oupwe sotuniir meinisin. Iwe, oupwe amwöchü mine a mürina
1TH 5:22 o pöütala meinisin mine a ngau.
1TH 5:23 Kot, ewe mi fang ngenikich kinamwe epwe unusen apinikemi, pwe unusen ngünümi me letipemi me inisimi epwe unusöch tori ach Samol Jesus Kraist epwe war.
1TH 5:24 A allükülük ewe mi körikemi, i ewe epwe föri ngenikemi iei usun.
1TH 5:25 Ämi pwiim kana, oupwe iotek fänäsengesim.
1TH 5:26 Oupwe kapong ngeni ekewe chon lükü Jesus meinisin ren ewe kapongen souläng.
1TH 5:27 Üa allük ngenikemi fän iten ach Samol pwe oupwe aleani ei toropwe ngeni ekewe chon lükü Jesus meinisin.
1TH 5:28 Ümöümöchün ach Samol Jesus Kraist epwe nonom remi meinisin.
2TH 1:1 Äm Paulus me Timoty aia kapong ngeni chon ewe mwichefel lon Tesalonika, ir nöün Samach Kot me ach Samol Jesus Kraist:
2TH 1:2 Samach Kot me ach Samol Jesus Kraist epwe ngenikemi ümöümöch me kinamwe.
2TH 1:3 Ämi pwiim kana, äm aia fokun kilisou ngeni Kot fänäsengesimi fansoun meinisin. A pwüng ngenikem pwe aipwe föri ei, pokiten ämi lükülük a fokun fefeitä o ämi chen lefilemi a fokun lapalapala.
2TH 1:4 Iei popun äm aia aingaing womi lein än Kot kewe mwichefel. Aia aingaing won ämi likitü me ämi lükülük lon ekewe ninni me riaföü meinisin mi fis ngenikemi.
2TH 1:5 Ekei mettoch meinisin ra alletätä pwe än Kot kapwüng a pwüng. Iei popun oupwe fich ngeni ämi oupwe alealong lon Mwün Kot, ewe mwü oua riaföü fänäsengesin.
2TH 1:6 Enlet, Kot epwe föri mine a pwüng: Epwe atoto riaföü won chokewe mi ariaföüükemi,
2TH 1:7 epwe pwal angasakemi ämi mi riaföü, epwe pwal angasakem. Ei epwe fis lupwen ach Samol epwe feito seni läng fiti nöün kewe chon läng mi pöchökül,
2TH 1:8 epwe pwal feito ren ngetengeten ekkei, pwe epwe apwüngü chokewe mi pöütala Kot, resap pwal aleasochis ngeni ewe Pworausen Manau usun ach Samol Jesus.
2TH 1:9 Ir repwe riaföü ren ewe apwüngün feiengau esemüch, repwe imwü seni mwen mesen ach Samol pwal seni an we pöchökül mi amwarar,
2TH 1:10 lupwen epwe war lon ewe Ränin, nöün kewe chon pin meinisin repwe alinga i o ekewe chon lükülük meinisin repwe asamolu i. Pwal ämi oupwe etiir, pun oua lükü ewe kapasen Kot äm aia aiti ngenikemi.
2TH 1:11 Iei mine äm aia iotek fän itemi fansoun meinisin. Aia tüngor ngeni ach Kot pwe epwe alisikemi, pwe oupwe fich ngeni ewe manau i a körikemiilong lon. Iwe, Kot epwe atufichikemi ren an manaman, pwe oupwe tongeni föri ekewe föför mi mürina meinisin oua mochen föriir, epwe pwal aunusöchü ämi angang oua föri pokiten ämi lükülük.
2TH 1:12 Ren ei iten ach Samol Jesus epwe ling me remi, nge pwal ämi oupwe ling me ren. Ei epwe fis pokiten ümöümöchün ach Kot me ach Samol Jesus ngenikemi.
2TH 2:1 Nge usun waren ach Samol Jesus Kraist, pwal usun ach chufengen me i o nonom ren, ngang üa tüngormau ngenikemi, ämi pwii kana,
2TH 2:2 pwe ousap müttir rukola lon ämi ekiek, ika osukosuk ren ewe kapas pwe ewe Ränin ach Samol a fen war. Eli oua ekieki, pwe aia apasa ei lupwen aia osuni ika aia afalafal ika aia makkei ekei kapas lon toropwe.
2TH 2:3 Ousap mwüt ngeni eman epwe atupukemi lon sokopaten angangen atuputup. Pun ewe Rän esap wareto mwen an epwe fis pwe aramas repwe üfengen me Kot o ewe Aramas mi Tipis epwe pwäto, i ewe epwe kiteterila lon ewe hell.
2TH 2:4 I epwe ü ngeni iteiten mettoch aramas ra aita ngeni Kot o fel ngeni, epwe pwal püsin seikätä wor meinisin. Epwe mwo nge feila lon än Kot we imwenfel o mot won an lenien mot o püsin aita ngeni pwe i Kot.
2TH 2:5 Ousap chechemeni pwe üa fen ürenikemi ekei mettoch meinisin lupwen üa nonom remi?
2TH 2:6 Nge mi wor och a pinei ei an epwe fis iei, o ämi oua silei met a pinei. Iwe, ewe Aramas mi Tipis epwe pwäto lon ewe fansoun mi fich ngeni.
2TH 2:7 Pun ewe tipis mi monomonola a fen akangang iei, nge ewe eman mi pinei an epwe fis ei iei epwe chök sopwela le föri iei usun tori Kot epwe angeala.
2TH 2:8 Mürin ewe Aramas mi Tipis epwe pwäla. Nge lupwen ach Samol Jesus epwe war epwe niela i ren enienin ngasangasan mi towu seni awan o amüchala ren lingen an war.
2TH 2:9 Ewe Aramas mi Tipis epwe war fän pöchökülen Satan o föri sokopaten manaman me asisil mi chofona,
2TH 2:10 epwe aea sokopaten angangen atuputup mi ngau ngeni chokewe repwe pöütmwälila. Repwe pöütmwälila pokiten resap fokun mochen etiwa o aücheani ewe kapas mi let pwe repwe küna manau ren.
2TH 2:11 Iei popun Kot a tinala rer ewe manamanen atuputup, pwe repwe lükü mine a chofona.
2TH 2:12 Iei mine chokewe meinisin resap lükü ewe kapas mi let, nge ra pwapwa le föri tipis, Kot epwe apwüngala pwe ra tipis.
2TH 2:13 Iwe, äm aipwe fokun kilisou ngeni Kot fansoun meinisin fänäsengesimi pwiim kana mi chen me ren ach Samol. Pun seni lepoputän, Kot a afilikemi pwe oupwe küna manau ren än Ngünmifel apinikemi, pwal ren ämi lükü ewe kapas mi let.
2TH 2:14 Kot a körikemi ngeni ei manau mi fö ren ewe Pworausen Manau aia afalafala ngenikemi. A körikemi pwe oupwe angei wisemi lon lingen ach Samol Jesus Kraist.
2TH 2:15 Iei mine ämi pwiim kana, oupwe üppos o kamwöchünük won ekewe kapas mi let äm aia aiti ngenikemi lon äm kewe afalafal pwal lon ekewe toropwe aia mak ngenikemi.
2TH 2:16 Püsin ach Samol Jesus Kraist me Samach Kot, ewe mi echenikich o fang ngenikich chipen letipach fansoun meinisin pwal ach apilükülüköch ren an ümöümöch,
2TH 2:17 epwe echipa letipemi o apöchökülakemi, pwe oupwe föri o apasa mine a mürina fansoun meinisin.
2TH 3:1 Iwe, ämi pwiim kana, oupwe iotek fän item, pwe än ewe Samol kapas epwe müttir chöfetal o aramas repwe etiwa fän ar suföl, usun chök a fen fisitä lefilemi.
2TH 3:2 Oupwe pwal iotek, pwe Kot epwe angasakem seni ekewe aramas mi ngau me kirikiringau. Pun sap aramas meinisin ra lükü ewe kapas.
2TH 3:3 Nge ach Samol a allükülük, i epwe apöchökülakemi o tümwünükemi seni ewe mi ngau.
2TH 3:4 Iwe, äm aia apilükülük ngeni ach Samol fänäsengesimi pwe oupwe apwönüetä o sopwela le föri meinisin mine aia allük ngenikemi.
2TH 3:5 Ach Samol epwe emweni letipemi ngeni än Kot chen, pwal ngeni än Kraist tipeppos.
2TH 3:6 Ämi pwiim kana, äm aia allük ngenikemi fän iten ach Samol Jesus Kraist pwe oupwe aimwükemi seni ekewe pwipwi meinisin mi chipwang le angang, resap pwal aleasochisi ekewe kapasen öüröür aia ngeniir.
2TH 3:7 Ämi oua fokun silei pwe oupwe chök föri usun mine aia föri. Äm aisap chipwang le angang lupwen aia nonom remi,
2TH 3:8 aisap pwal angei anem mongö ika aisap isetiu liwinin. Nge aia achocho le angang lerän me lepwin fän weires, pwe aisap aweiresikemi.
2TH 3:9 Aia föri ei, sap pokiten esap wor äm pwüüng äm aipwe angei äm alilis senikemi, nge aia föri ei pwe aipwe eu lenien apirü fän itemi.
2TH 3:10 Pun lupwen aia nom remi aia ükürenikemi, “Iö esap mochen angang esap pwal tongeni mongö.”
2TH 3:11 Aia apasa ei pun aia rongorong pwe ekoch me leimi ra chipwang le angang, resap föri och, chilon chök pwe ra angelong lon än eman angang.
2TH 3:12 Fän iten ach Samol Jesus Kraist äm aia allük ngeni ekei aramas o fönöör, pwe repwe manauöch o föri ar angang pwe epwe wor liwinin aner mongö.
2TH 3:13 Nge ämi pwiim kana, ousap fokun chipwangela lon ämi föföröch.
2TH 3:14 Are eman esap mochen aleasochisi äm kewe kapasen öüröür mi mak lon ei toropwe, oupwe asilla i. Ousap chiechi ngeni, pwe epwe mefi an säw.
2TH 3:15 Nge ousap föri ngeni usun itä nge i eman oua oputa, nge oupwe fönöü usun chök eman pwiimi.
2TH 3:16 Ach Samol, i popun ach kinamwe, epwe püsin ngenikemi kinamwe fansoun meinisin pwal ekis meinisin. Ach Samol epwe nonom remi meinisin.
2TH 3:17 Ngang Paulus üa makkei ekei kapasen kapong ren püsin pei. Iei usun ai saini ekewe toropwe meinisin. Iei usun ai mak.
2TH 3:18 Ümöümöchün ach Samol Jesus Kraist epwe nonom remi meinisin.
1TI 1:1 Ngang Paulus, eman nöün Kraist Jesus soukünö fän än Kot ach we Chon Amanau allük me Kraist Jesus ach apilükülük,
1TI 1:2 üa kapong ngonuk Timoty wesewesen nei lon lükülük: Samach Kot me ach Samol Kraist Jesus epwe ngonuk ümöümöch, tong me kinamwe.
1TI 1:3 Üa mochen pwe kopwe nonometiu lon Efisos, usun üa fen tüngor ngonuk lupwen üa saila Masetonia. Mi wor ekoch aramas ikenan ra afalafalafeili sokun afalafal chofona usun ewe lükülükün souläng. Iwe, kopwe allük ngeniir, pwe repwe ükütiu.
1TI 1:4 Kopwe üreniir, pwe resap asolapala ar fansoun le apworausa ekewe tutulap me tettelin uruwon ekewe lewo, pun ra chök afisätä anini, nge resap apwönüetä än Kot akot fän itach, ewe sia silei ren ach lükü.
1TI 1:5 Popun ai ei allük pwe epwe afisätä ewe chen mi pop seni eu leluk mi limöch me eu mwelien letip mi mürina, pwal eu lükülük mi let.
1TI 1:6 Ekoch aramas ra kul seni ekei sokun mettoch o ra tokola seni aler ren sokopaten kapasen anini mi lomotongau.
1TI 1:7 Ra mochen asukula än Kot kewe allük, nge resap silei mine ra kapas usun ika ekewe mettoch ra fos won fän watten ar apilükülük.
1TI 1:8 Kich sia silei pwe ekewe Allük ra mürina are sia eäniir lon met pwüngün.
1TI 1:9 Sia pwal silei pwe ekewe allük resap för fän iten ekewe chon pwüng, nge ra för fän iten ekewe chon atai allük me chon ü ngeni mwü, fän iten chokewe resap meniniti Kot me chon tipis, fän iten chokewe resap mochen apini manauer me chokewe resap meniniti lamalam, fän iten chokewe mi niela semer me iner, pwal fän iten ekewe chon niela aramas,
1TI 1:10 fän iten chokewe mi föri föförün lisowu me chokewe mi föri sokun föförün lisowu lefilen mwän me mwän, fän iten chokewe mi soläni aramas me chokewe mi eäni kapas chofona o pwärätä pwärier mi mwäl, pwal fän iten chokewe meinisin mi ü ngeni ewe kapasen Kot mi let sia afalafala.
1TI 1:11 Ei sokun afalafal a pwä lon ewe Pworausen Manau mi lükülük ngeniei pwe üpwe arongafeili, iei ewe Pworausen Manau seni ewe Kot mi ling o pin.
1TI 1:12 Üa kilisou ngeni Kraist Jesus ach Samol, ewe mi fang ngeniei pöchökül fän iten ai angang. Üa kilisou ngeni ren an ekieki pwe ngang mi allükülük o a awisaei pwe üpwe angang ngeni.
1TI 1:13 Inamwo ika me lom üa kapasingau usun i, üa ariaföüü o turunufaseei. Nge Kot a eäni tong ngeniei, pun esap mwo wor ai lükülük, iei mine üsap silei mine üa föri.
1TI 1:14 Iwe, ach Samol a tinatiu woi an ümöümöch mi somwola o fang ngeniei lükülük me chen mi nom lon Kraist Jesus.
1TI 1:15 A allükülük ewe kapas pwe aramas repwe fokun etiwa o lükü: Kraist Jesus a feito lon ei fanüfan pwe epwe amanaua chon tipis. Ngang eman chon tipis mi ngau seniir meinisin.
1TI 1:16 Nge Kot a eäni tong ngeniei, pwe Kraist Jesus epwe pwärala unusen an mosonotam lon met a föri ngeniei, ngang eman chon tipis mi ngau seniir meinisin, pwe üpwe eu minen awewe ngeni chokewe repwe lükü i me mürin o repwe küna ewe manau esemüch.
1TI 1:17 Ewe King mi nonom tori feilfeilachök, ewe eman chök Kot, ewe esap tongeni mäla, esap wor eman a tongeni küna, sipwe meniniti o alinga tori feilfeilachök! Amen.
1TI 1:18 En nei Timoty, üpwe ngonuk ei allük, a usun chök mine ekewe soufos ra apasa usumw me lom. Kopwe aea ekei kapas pwe om pisekin fiu, pwe kopwe mauneni ewe maun mi öch,
1TI 1:19 kopwe pwal amwöchü om lükülük me eu mwelien letip mi mürina. Ekoch aramas resap rongorong ngeni mwelien letiper, iwe, ra küna wata lon ar lükülük.
1TI 1:20 Ruoman me leir Himenäus me Aleksanter, ätekei üa likitiir ngeni Satan pwe epwe apwüngüür. Ren ei repwe kaiö pwe repwe ükütiu le turunufasei Kot.
1TI 2:1 Iwe, mwen mettoch meinisin üa pese ngonuk, pwe souläng repwe iotekin tüngor me kilisou ngeni Kot fänäsengesin aramas meinisin,
1TI 2:2 fänäsengesin ekewe king me ekewe nöüwis meinisin, pwe sipwe manaueni eu manau fän mosonoson me kinamwe, sipwe pwal asamolu Kot o aramasöch ngeni aramas.
1TI 2:3 Pun iei a mürina o apwapwai Kot ach Chon Amanau,
1TI 2:4 i ewe mi mochen pwe aramas meinisin repwe küna manau, repwe pwal silei ewe let.
1TI 2:5 Pun mi wor eman chök Kot, pwal eman chök chon afför lefilen Kot me aramas kana, iei i ewe aramas Kraist Jesus,
1TI 2:6 i ewe mi fangala püsin manauan, pwe epwe angasala aramas meinisin seni tipis. Iei och minen pwärätä lon fansoun mi fich, pwe Kot a mochen pwe aramas meinisin repwe küna manau.
1TI 2:7 Iei popun üa fil pwe üpwe eman soukünö me eman senseen ekewe chon lükün Israel ai üpwe arongafeili ewe kapasen lükülük me let. Ngang üa kapas wenechar, üsap chofona.
1TI 2:8 Üa mochen pwe lon ekewe lenien fel meinisin mwän repwe iotek, ir mwän mi pin fän iten Kot, repwe aitietä pöür lon ar iotek, nge resap song ika anini.
1TI 2:9 Üa pwal mochen pwe ekewe fefin repwe üföüföch, repwe öüköchü üfer o üföüf sokun üf mi fich ngeni souläng. Resap firesi mökürer ren sokopaten fifires, ika mwärämwär kolt ika fau aüchea ika üföüf üf mi mömong,
1TI 2:10 nge repwe foute ngeniir föför mürina usun a fich ngeni fefin kana mi souläng.
1TI 2:11 Ekewe fefin repwe kaiö fän mosonoson me tipetekison.
1TI 2:12 Üsap mwüt ngeniir pwe repwe asukul ika repwe nemenem won mwän. Repwe fokun tipemosonoson.
1TI 2:13 Pun Kot a akomwen föri Atam, mürin a föri Efa.
1TI 2:14 Iwe, esap Atam a tupula, nge ewe fefin a tupula o atai än Kot allük.
1TI 2:15 Nge ekewe fefin repwe küna manau ren ar nöünöü, are repwe likitü lon ar lükü, lon ar eäni chen, lon ar pin me mirit.
1TI 3:1 A let ewe kapas: Are eman a mochen wiseni ewe wisen soumasen mwichefel, a tipeni eu angang mi aüchea.
1TI 3:2 Iwe, eman soumas epwe fokun unusöch lon manauan. Epwe pwülüeni eman chök fefin, epwe tipefesir, epwe tufichin nemeni püsin inisin, epwe mirit, epwe etiwaöchü wasöla, epwe pwal lipwäköch le asukul.
1TI 3:3 Esap ünüpuch are rochongau, nge epwe tipepwetete o afisätä kinamwe, esap eman mi mochenian moni.
1TI 3:4 Epwe emwenöchü püsin chon an famili o aörüni ngeni nöün kana ar repwe aleasochis ngeni fän menin.
1TI 3:5 Pun are eman esap silei usun an epwe emwenöchü püsin chon an famili, ifa usun an epwe tongeni tümwünüöchü mwichefelin Kot?
1TI 3:6 Esap öch an epwe eman souläng mi fö, pwe ete lamalamtekia o tolong lon kapwüng usun än ewe Tefil küna kapwüng.
1TI 3:7 Iwe, epwe pwal iteüöch me ren ekewe chon lükün, pwe esap tolong lon itengau o tup lon än Tefil sär.
1TI 3:8 Ekewe soualilis repwe usun chök ekewe soumas, repwe aramasöch, resap aweruu, resap ünümong wain ika tipemong won moni.
1TI 3:9 Repwe kamwöchünük won ewe monomonen lükülük mi let ren mwelien letiper mi limöch.
1TI 3:10 Iwe, repwe akomwen küna sosot, mürin are a pwä pwe esap wor eman a atipisiir, repwapw alilis lon angangen mwichefel.
1TI 3:11 Pwal ina chök usun ekewe soualilis fefin repwe aramasöch, resap luapas, repwe tipefesir o allükülük lon mettoch meinisin.
1TI 3:12 Eman soualilis epwe pwülüeni eman chök fefin, epwe pwal emwenöchü püsin nöün kana me chon an famili.
1TI 3:13 Iwe, ekana soualilis mi angangöch repwe küna iteüöch me ren aramas, repwe pwal tufichin pworacho le kapas usun ar lükü Kraist Jesus.
1TI 3:14 Lupwen üa makkei ei toropwe ngonuk, üa apilükülük pwe üpwe müttirila reöm pwe üpwe churuk.
1TI 3:15 Nge are üpwe mang, ei toropwe epwe afata ngonuk usun ach föför lein chon ewe familien Kot, iei än Kot, ewe mi manau we mwichefel, ewe ürelap me longolongun ewe let.
1TI 3:16 Kich sia pwärätä pwe a fokun lapalap monomonen ach lükülük: I a pwäla lon fituk, a pwä pwe a pwüng me ren Ngünmifel, chon läng kana ra küna i, chon fanüfan ra rongorong pworausan, won fanüfan mi wor chon lükü itan, Kot a angeatä lon lingan.
1TI 4:1 Iwe, ewe Ngünmifel a afata, pwe lon ekewe fansoun mürin ekoch aramas repwe pöütala ar lükülük, repwe rongorong ngeni ekewe ngün mi chofona o aleasochis ngeni aitien ekewe anün rochopwak.
1TI 4:2 Ekei sokun kapasen kait ra chöüfeil ren ekewe chon chofona mi atuputup, mwelien letiper a mä, ra usun itä nge ra kar ren efoch mächä mi fokun sarara.
1TI 4:3 Ekei sokun aramas ra afalafala pwe a ngau pwüpwülü, ra pwal apini ekoch sokun mongö. Nge Kot a awora ekei sokun mongö pwe sipwe mongö. Iwe, kich mi lükü o silei ewe let sipwe eni ewe mongö fän ach iotekin kilisou.
1TI 4:4 Pun meinisin mine Kot a föri a mürina. Esap wor och sipwe oput are sipwe angei fän ach iotekin kilisou,
1TI 4:5 pun än Kot kapas me ewe iotek ra afisätä pwe epwe mürina me ren Kot.
1TI 4:6 Iwe, are kopwe aiti ngeni pwiüm kewe souläng ekei kapasen öüröür, kopwe eman chon angangen Kraist Jesus mi mürina. Kopwe püsin amongöni ngünum ekewe kapasen lükülük, pwal ekewe kapasen kait ka fen aleasochisi tori ikenai.
1TI 4:7 Kopwe afäluk ren ekewe tutulap mi ü ngeni ewe kapasen Kot, esap wor lomoten ach sipwe apworausa, nge kopwe chök achocho le asipok lon om souläng.
1TI 4:8 Pun ach achocho le asipa inisich a atoto ekis chök feiöch, nge ach achocho le asipakich lon ach souläng a atoto rech feiöch meinisin, pun a pwon ngenikich manau lon ei fansoun ikenai pwal lon ekewe fansoun repwe feito.
1TI 4:9 A allükülük ei kapas pwe aramas repwe fokun etiwa o lükü.
1TI 4:10 Iei popun sia achocho le angang weires, pun sia anomu ach apilükülük won ewe Kot mi manau, i ewe Chon Amanau fän iten aramas meinisin, nge lapalan fän iten chokewe mi lükü ewe kapasen Kot.
1TI 4:11 Kopwe afalafala o aiti ngeni ekewe souläng ekei kapasen öüröür me ekei kapasen kait.
1TI 4:12 Kopwe tümwünuk, pwe esap wor eman epwe urumwoteek pokiten om alüal, nge kopwe eu lenien apirü ngeni ekewe chon lükü lon om kapas, lon om föför, lon om chen, lon om lükülük, pwal lon om limöch.
1TI 4:13 Tori ai üpwe war, kopwe likitü lon om aleani ekewe Toropwe mi Pin ngeni ekewe souläng, kopwe afalafaleer usun o asukula ngeniir.
1TI 4:14 Kosap tümwününgau ngeni ewe lifang seni ewe Ngünmifel, a toruk ren än ekewe soufos kapas, lupwen ekewe souakom ra iseis pöür womw.
1TI 4:15 Kopwe föri pwüngün ekei mettoch o fokun achocho ngeni om kopwe apwönüretä, pwe aramas meinisin repwe küna om fefeitä lon om souläng.
1TI 4:16 Kopwe püsin tümwünuk, kopwe pwal tümwünü mine ka afalafal won. Kopwe likitü le föri ekei mettoch, pun are kopwe föri iei usun, kopwe püsin amanauok me chokewe mi aüselingok.
1TI 5:1 Kosap apwüngüchou eman mwän mi chinlap, nge kopwe chök fönöü usun itä nge om kopwe fönöü semom. Kopwe fönöü ekewe alüal usun itä nge ir pwiüm kewe.
1TI 5:2 Kopwe fönöü ekewe chinlap fefin usun itä nge ir inelap, kopwe pwal fönöü ekewe föpwül usun itä nge ir fefinom. Kopwe föri ei ren limöchün lelukom.
1TI 5:3 Kopwe meniniti ekewe fefin mi mä pwülüer, chokewe mi wesewesen akaleman, esap wor eman a tümwünüür.
1TI 5:4 Nge ika eman fefin mi mä pwülüan a wor nöün ika nöün nöün, ir repwe akomwen apwönüetä pwüngün wiser lon ar souläng ngeni püsin ar famili. Ren ei repwe liwini ngeni semer me iner, pwal ngeni semen me inen semer me iner mine ra piin föri ngeniir, pun iei met Kot a pwapwa ren.
1TI 5:5 Eman fefin mi mä pwülüan o akaleman, esap wor eman a tümwünü, a anomu an apilükülük won Kot, a sopwela le iotek lerän me lepwin o tüngor ngeni Kot pwe epwe alisi.
1TI 5:6 Nge eman fefin mi mä pwülüan nge a chök apwapwai inisin lon sokun pwapwan fanüfan, neminei a fen mäla, inamwo ika a chüen manau lon inisin.
1TI 5:7 Kopwe aiti ngeni ekewe aramas ekei kapasen öüröür, pwe esap wor och mine eman epwe atipisimwäliir won.
1TI 5:8 Nge are eman esap püsin tümwünü aramasan, fokun püsin chon an famili, a amamäsini an lükülük o an föför a ngau seni föförün eman esap souläng.
1TI 5:9 Kopwe makkeelong eman fefin mi mä pwülüan lon tettelin ewe mwichen fefin mi mä pwülüer are a ierini wone feitä. Pwal eu, are neminewe a chök pwülüeni eman chök mwän,
1TI 5:10 a pwal sil me ren aramas ren an föför mürina, a foleniöchü nöün kana, a etiwaöchü wasöla lon imwan, a talü pechen ekewe chon pin, a alisi aramas mi nom lon osupwang o fokun achocho le föri föför mürina fansoun meinisin.
1TI 5:11 Nge kosap apachalong ekewe fefin mi mä pwülüer lon ewe tettel are ierir a kis seni wone, pun lupwen ra mochen pwüpwülü lon ar mochenia, repwe kul seni Kraist.
1TI 5:12 Iei usun repwe tipis ren ar atai ar we pwon ngeni Kraist ra eäni me mwan.
1TI 5:13 Ra pwal aörüni ngeniir ar repwe asolapala ar fansoun ren ar einimweifeil. Nge resap chök asolapala ar fansoun, pwe ra pwal aörüni ngeniir ar epwe luapas o fosolong lon än eman angang, ra kakapas won mettoch esap wiser pwe repwe kapas won.
1TI 5:14 Iei mine üa mochen pwe ekewe fefin mi mä pwülüer nge ra ier kükün repwe pwüpwülüsefäl, repwe nöünöü o tümwünü angangen lon imwer. Repwe föri ei pwe resap awora ngeni ekewe chon oputakich och popun ar repwe kapasingau usuch.
1TI 5:15 Pun ekoch me leir ra fen tokola o ra aleasochis ngeni Satan.
1TI 5:16 Nge are eman souläng fefin a wor ren fefin mi mä pwülüer, i epwe fokun tümwünüür, nge esap wätä won mwichefel och weires, pwe mwichefel epwe tongeni tümwünü ekewe fefin mi mä pwülüer, ir chokewe mi akaleman chök.
1TI 5:17 Ekewe souakom mi angangöch le emweni mwichefel a aüchea ngeniir ar repwe angei liwiniir fän ruu, fokun ätekewe mi angang weires lon ar afalafal me asukula aramas ewe kapasen Kot.
1TI 5:18 Pun iei usun mine a mak lon ekewe Toropwe mi Pin, “Kosap föti awen eman ätemwänin kow lupwen a puri ekewe irän wiich, pwe föür repwe towu seni pöör.” A pwal mak, “Eman chon angang epwe angei liwinin.”
1TI 5:19 Kosap aüseling ngeni än eman atipisi eman souakom are esap wor ruoman ika ülüman chon pwärätä an tipis.
1TI 5:20 Kopwe apwüngüchou ekewe souakom mi föri tipis mwen mesen souläng meinisin, pwe pwal ekewe ekoch souläng repwe niuokus.
1TI 5:21 Me mwen mesen Kot me Kraist Jesus me ekewe chon läng mi fil üa fokun allük ngonuk pwe kopwe aleasochis ngeni ekei kapasen öüröür, nge kosap oput eman ika efich eman lon meinisin mine ka föri.
1TI 5:22 Kosap müttir le iseis poumw won eman om kopwe afeiöchü fän iten ewe angangen ach Samol. Kosap atolongok lon tipisin pwal ekoch aramas. Kopwe püsin tümwünuk om kopwe limöch.
1TI 5:23 Kosap ünümi koluk echök, nge kopwe ünümi ekis wain pokiten chükünükanom, pwal pokiten ka samau fän chomong.
1TI 5:24 Tipisin ekoch aramas ra fokun pwäpwäla, ra akomwola mwer lon ewe lenien kapwüng, nge tipisin ekoch a chök pwä me mürin.
1TI 5:25 Ina chök usun föför mi mürina ra fokun pwäpwäla, inamwo ika ekoch ekei föför resap kon pwäpwäla, nge resap tongeni monola.
1TI 6:1 Iwe, ätekewe ir amanau repwe fokun asamolu ar kewe masta, pun iei pwüngün mine repwe föri ngeniir, pwe esap wor eman epwe kapasingau usun iten Kot pwal usun ach afalafal.
1TI 6:2 Nge ekewe amanau mi nom fän nemenien ekewe masta mi souläng resap turunufasei ar kewe masta pokiten ir pwiir souläng. Nge repwe alapala ar achocho le angang ngeniir, pun chokewe mi feiöch seni ar angang, ir chon lükü Kraist ra chen me rer. Ikei ekewe kapas kopwe aiti ngeni ekewe souläng o pese ngeniir pwe repwe aleasochis ngeni.
1TI 6:3 Nge are eman a asukula och sokun kapas, esap pwal tipeeu ngeni ewe kapas enlet än ach Samol me ewe kapasen kait lon ach lamalam,
1TI 6:4 i a uren lamalamtekia o esap silei och. A chök mochen akanini o afitikoko won kapas mi afisätä lolowo, tipefesen, turunufas me ekiekingau,
1TI 6:5 pwal fitikoko lefilen aramas. Än ekei aramas ekiek a fokun ngau, resap silei mine a let, ra ekieki pwe ach souläng a awora ngenikich ach win.
1TI 6:6 Ewer, ach souläng eu win mi lapalap are a wor rech menemenöch.
1TI 6:7 Pun esap wor och mettoch sia uwalong lon fanüfan, esap pwal wor och mine sipwe uwawu me lon.
1TI 6:8 Iei mine are a wor anach me üfach sipwe menemenöch ren.
1TI 6:9 Nge chokewe mi mochen ar repwe pisekisek ra tolong lon sosot o ra tup lon eu särin chomong sokun mochenia mi umwes me afeiengau, ra atururelong lon feiengau me pöütüla.
1TI 6:10 Pun mochenian moni iei popun sokopaten ngau meinisin. Ekoch mi ekieki ar repwe pisekisek ra mwalech seni ar lükülük o ra püsin aworato wor chomong riaföü mi fokun aweires.
1TI 6:11 Nge en nöün Kot aramas, kopwe sü seni ekei mettoch meinisin. Kopwe fokun achocho ngeni om kopwe eäni pwüng, soulängöch, lükülük, chen, likitü me kirikiröch.
1TI 6:12 Kopwe eäni ewe maunen lükülük mi fokun mürina, iwe, kopwe angei ewe manau esemüch, pun iei met Kot a köruk ngeni, lupwen ka pwora le pwärätä om lükülük mwen mesen chomong chon pwärätä.
1TI 6:13 Üa allük ngonuk mwen mesen Kot mi fang manau ngeni mettoch meinisin, pwal mwen mesen Kraist Jesus mi pwora le pwärätä an lükülük mwen mesen Pontius Pilatus,
1TI 6:14 pwe kopwe aleasochisi ekei allük fän allükülük, pwe esap wor eman epwe tongeni atipisuk tori ewe rän lupwen ach Samol Jesus Kraist epwe wareto.
1TI 6:15 An wareto epwe fis lon ewe otun Kot a filätä. Kot i ewe eman chök Sounemenem sipwe mwareiti, i ewe King mi lapalap seni king meinisin, pwal i ewe Samol mi lapalap seni samol meinisin.
1TI 6:16 I chök ewe eman esap tongeni mäla, a nom lon eu leni mi fokun saram, pwe esap wor eman a tongeni arap ngeni. Esap wor eman a piin küna, esap pwal fokun wor eman epwe tongeni küna i. I epwe angei iteüöch me nemenem tori feilfeilachök! Amen.
1TI 6:17 Kopwe allük ngeni ekewe mi pisekisek lon mettochun ei fanüfan pwe resap lamalamtekia. Resap pwal anomu ar apilükülük won wöür epwe morola, nge repwe apilükülükü Kot mi fangesom ngenikich mettoch meinisin pwe sipwe feiöch ren.
1TI 6:18 Kopwe allük ngeniir, pwe repwe föri mine a mürina, pwe repwe pisekisek lon ar föför mürina, repwe kichiöch o mochen alisi aramas.
1TI 6:19 Ren ei repwe iseis fän iter och wöü epwe eu longolong mi nükünük fän iten ewe fansoun epwe feito. Mürin repwe angei ewe manau, iei ewe enletin manau.
1TI 6:20 Iwe, en Timoty, kopwe tümwünü met Kot a lükü ngonuk. Kosap aüseling ngeni kapas mi ngau me ekewe kapasen anini mi lomotongau, ekoch aramas ra aita ngeni “silelap”, nge a mwäl rer.
1TI 6:21 Pun ekoch ra apasa pwe ra eäni ei silelap, iei mine ra tokola seni ar lükülük. Än Kot ümöümöch epwe nonom remi meinisin.
2TI 1:1 Ngang Paulus, eman nöün Kraist Jesus soukünö ren letipen Kot, a tiniei pwe üpwe arongafeili ewe manau a pwon ngenikich, sia eäni lon Kraist Jesus,
2TI 1:2 üa kapong ngonuk Timoty nei mi achengicheng: Samach Kot me Kraist Jesus ach Samol epwe ngonuk ümöümöch, chen me kinamwe.
2TI 1:3 Üa kilisou ngeni Kot, ewe üa angang ngeni ren mwelien letipei mi limöch usun ai kewe lewo ra föri. Üa kilisou ngeni Kot lupwen üa chechemenuk fansoun meinisin lon ai iotek lerän me lepwin.
2TI 1:4 Üa chechemeni om kechü o üa fokun mochen künok, pwe üpwe urela ren pwapwa.
2TI 1:5 Üa chechemeni ewe lükülük mi let ka eäni, ewe sokun lükülük a pwal nom ren inen inom Lois me inom Eunike. Üa fokun lükü pwe a pwal nom reöm.
2TI 1:6 Iei popun üa achema ngonuk, pwe kopwe alapala le aea än Kot we lifang mi nom reöm ren ai iseis pei womw.
2TI 1:7 Pun ewe Ngünmifel Kot a ngenikich esap afisi ngenikich ach sipwe pireir, nge a ngenikich Ngünün mi aurakich ren pwora, chen me ewe tufichin püsin nemeni inisich.
2TI 1:8 Iei mine kosap säwäsini om kopwe pwärätä ach Samol, kosap pwal säwäsiniei, ngang eman chon fötek fän iten Kraist. Nge kopwe etiei le riaföü fän iten ewe Pworausen Manau ren än Kot manaman.
2TI 1:9 I a amanauakich o körikich pwe sipwe manaueni eu manau mi pin, sap pokiten ach föför, nge pokiten püsin an ekiek me an ümöümöch. A ngenikich ei ümöümöch lon Kraist Jesus mwen fanüfan esamwo wor,
2TI 1:10 nge iei a pwäla ngenikich ren wareton ach chon Amanau Kraist Jesus. I a awesi ewe manamanen mäla o pwärala lon saram ren ewe Pworausen Manau eu sokun manau esap tongeni mäla.
2TI 1:11 Kot a awisaei pwe üpwe eman soukünö me sense, pwe üpwe arongafeili ewe Pworausen Manau.
2TI 1:12 Iei popun üa nom lon ei sokun riaföü, nge üsap säw ren. Pun üa silei iö üa lükü, nge üa alletä pwe a tongeni tümwünü mine a lükü ngeniei tori ewe Ränin lesopolan.
2TI 1:13 Kopwe kamwöchünük won ekewe kapas mi let üa aiti ngonuk, pwe repwe eu lenien apirü ngonuk lon om afalafal. Kopwe apposok lon ewe lükülük me chen mi nom lon Kraist Jesus.
2TI 1:14 Ren manamanen ewe Ngünmifel mi nom loch kopwe tümwünüöchü ewe Pworausen Manau Kot a lükü ngonuk.
2TI 1:15 En ka fen silei pwe ekewe souläng meinisin lon Asia ra sü seniei, pwal Fikelus me Hermokenes.
2TI 1:16 Ach Samol epwe ümöümöch ngeni chon familien Onesiforus, pun i a echipaei fän chomong. Esap säwäsiniei pwe ngang üa nom lon fötek,
2TI 1:17 nge lupwen a tori Rom a achocho le küttaei tori a künaei.
2TI 1:18 Ach Samol epwe ümöümöch ngeni lon ewe Ränin kapwüng! Ka fokun silei usun ükükün an alisiei me lon Efisos.
2TI 2:1 Iwe, en nei, kopwe pöchökül ren ewe ümöümöch mi nom lon Kraist Jesus.
2TI 2:2 Met ka rongorong seniei pwe üa afalafala me mwen chomong chon pwärätä, kopwe lükü ngeni ätekewe mi allükülük o tufichin asukula pwal ekewe ekoch souläng.
2TI 2:3 Kopwe molotä om kopwe pwal tolong lon riaföü usun eman nöün Kraist Jesus sounfiu mi allükülük.
2TI 2:4 Eman sounfiu mi föri wisan a mochen föri met an samol epwe pwapwa ren, nge esap pachelong lon sokun angangen manauen aramas.
2TI 2:5 Eman chon kitir mi sä lon eu kitir esap tongeni angei winnan, are esap aleasochisi allükün kitir.
2TI 2:6 Eman chon tanipi mi föri an angang weires epwe akomwen angei wisan seni uän ewe räs.
2TI 2:7 Kopwe ekieki usun mine üa apasa, pun ach Samol epwe atufichuk om kopwe weweiti ekei mettoch meinisin.
2TI 2:8 Kopwe chechemeni Jesus Kraist, ewe mi manausefäl seni mäla, i eman mwirimwirin Tafit, usun a pwäla lon ai afalafala ewe Pworausen Manau.
2TI 2:9 Pokiten ngang üa afalafala ewe Pworausen Manau, üa tolong lon riaföü, üa fen mwo nge föfö ngeni selimächä usun eman chon föföringau. Nge än Kot kapas esap föfö.
2TI 2:10 Iei mine üa likitü lon ekei riaföü meinisin fänäsengesin nöün Kot kewe mi fil, pwe pwal ir repwe küna ewe manau a nom lon Kraist Jesus me ewe ling esemüch.
2TI 2:11 Iei eu fos mi let: “Are sia eti Kraist le mäla, sipwe pwal eti i lon an manau.
2TI 2:12 Are sia likitü, sipwe eti i lon an nemenem. Are sia amamäsini i, i epwe pwal amamäsinikich.
2TI 2:13 Are sisap allükülük, i epwe chök nonom lon an allükülük, pun i esap tongeni siwili sokun.”
2TI 2:14 Iwe, kopwe achema ngeni noum kewe aramas ekei mettoch o allük ngeniir mwen mesen Kot, pwe resap anini won kapas, pun esap wor lomotan, nge a chök afeiengaua aramas mi aüseling ngeni.
2TI 2:15 Kopwe fokun achocho ngeni pwe Kot epwe tipeeu ngenuk, pwe kopwe eman chon angang esap säw ren an angang, pun ka afalafala än Kot kapas mi let fän pwüng.
2TI 2:16 Kopwe afäluk seni ekewe kapas mi ngau me ekewe kapasen anini mi lomotongau, ra chök atoauala aramas seni Kot.
2TI 2:17 Pun ekei sokun afalafal ra usun chök ruup mi enala fituk. Ruoman mwän, Himenäus me Filetus, ra afalafala ekei kapas.
2TI 2:18 Ra tokola seni mine a let ren ar afalafala pwe a fen fis manausefälin sotup kana, iwe, ra atai än ekoch souläng lükülük.
2TI 2:19 Nge ewe longolong mi nükünük Kot a anomu esap tongeni mwökütüküt. A mak won ei longolong ekei kapas: “Ach Samol a silei chokewe ir nöün,” a pwal mak “Iö a apasa pwe i nöün ach Samol epwe fokun kul seni föföringau.”
2TI 2:20 Iwe, lon eu imw mi watte a wor sokopaten sepi: ekoch ra för seni silifer me kolt, nge pwal ekoch ra för seni mwüch me pwülüpar. Ekoch sepi ra aea fän iten rän mi aüchea, nge ekoch ra aea fän iten iteiten rän.
2TI 2:21 Are eman aramas a püsin limeti seni ekana sokun lapalap mi ngau, i epwe eu pisekin aea fän iten ekoch popun mi aüchea, pun a pin o lomot fän iten an Samol, a molotä pwe epwe eu pisekin aea fän iten föför mürina meinisin.
2TI 2:22 Kopwe sü seni tipen alüal, nge kopwe fokun achocho ngeni om kopwe eäni pwüng, lükülük, chen me kinamwe, fiti chokewe meinisin mi köri iten ach Samol ren eu leluk mi limöch.
2TI 2:23 Kopwe afäluk seni ekewe kapasen anini mi umwes o lomotongau, pun ka silei pwe ra chök afisätä fitikoko.
2TI 2:24 Eman nöün ach Samol chon angang esap fokun anini, nge epwe kirikiröch ngeni aramas meinisin, epwe lipwäköch le asukula aramas fän mosonotam,
2TI 2:25 epwe pwal tipepwetete lon an fönöü chokewe mi ü ngeni, pun eli epwe fis pwe Kot epwe ngeniir tufichin ar repwe ekieksefäl, pwe repwe silei ewe let.
2TI 2:26 Mürin repwe miritila o sü seni ewe särin Tefil mi liapeniir, pwe repwe föri letipan.
2TI 3:1 Iwe, kopwe chechemeni pwe lon ekewe ränin lesopolan epwe wor fansoun weires.
2TI 3:2 Aramas repwe ekieki chök püsin ir, repwe efich moni, repwe tunomong me lamalamtekia, repwe turunufas o aleasolap ngeni semer me iner, resap sile kilisou, resap meniniti lamalam,
2TI 3:3 resap eäni tong, resap amusala tipisin aramas, ra luapas, resap tongeni püsin nemeni inisir, ra lingeringerikai, ra oput mine a mürina,
2TI 3:4 ra rawangauei aramas, ra rochongau o uren lamalamtekia, ra efich pwapwan fanüfan, nge resap echeni Kot.
2TI 3:5 Repwe pomweni pomwen souläng, nge manamanan ra pöütala. Kosap chiechi ngeni ekei sokun aramas.
2TI 3:6 Iwe, ekoch me leir ra tolong lon imwen aramas o liapeni ekewe fefin mi apwangapwang lon ar souläng, ra nonom fän choun ar tipis o chuwenewenfeil ren sokopaten ar mochenia,
2TI 3:7 fefin mi chök kakaiö fansoun meinisin, nge resap fokun tongeni silei ewe let.
2TI 3:8 Usun Jannes me Jampres ra ü ngeni Moses, ina usun ekei aramas ra ü ngeni ewe let, ir aramas mi fokun ngau ar ekiek, ar lükülük esap pwüng.
2TI 3:9 Nge resap fefeitä lon manauer, pun aramas meinisin repwe küna ar tiparoch. Ina chök usun mine a fis ngeni Jannes me Jampres.
2TI 3:10 Nge en ka sileöchü ai afalafal, ai föför me met üa awena manauei ngeni. Ka silei ai lükülük, ai mosonotam, ai chen, ai likitü,
2TI 3:11 ai küna ninni me ai riaföü. Ka silei meinisin mine a fis ngeniei me lon Antiokia, Ikonium me Listra, pwe a fokun afeiengau ekewe sokun ninni üa engila fan. Nge ach Samol a angasaei seniir meinisin.
2TI 3:12 A pwüng pwe aramas meinisin mi mochen manaueni eu manauen souläng lon Kraist Jesus repwe tolong lon ninni.
2TI 3:13 Nge ekewe aramasangau me soulängatuputup repwe chök fokun ngauala, ra atupu aramas o püsin küna atuputup.
2TI 3:14 Nge en Timoty, kopwe chök kamwöchünük won mine ka kaiö o nüküchar le lükü. Ka silei iö a asukulok,
2TI 3:15 ka chechemeni pwe seni chök lekükünum ka silei kapasen ekewe Toropwe mi Pin, ra tongeni atipachemok o emwenuk ngeni om kopwe küna manau ren om lükü Kraist Jesus.
2TI 3:16 Iwe, kapasen lon ekewe Toropwe mi Pin meinisin ra pop seni Ngünün Kot, ra aüchea fän iten afalafala ewe kapas mi let, ra amiritikich, ra apwüngükich o aiti ngenikich usun ach sipwe manau fän pwüng,
2TI 3:17 pwe ewe aramas mi angang ngeni Kot epwe fokun tufich o lipwäköch ngeni sokun angang mürina meinisin.
2TI 4:1 Üpwe fokun fönok me mwen mesen Kot me Kraist Jesus, ätewe epwe apwüngü ekewe mi manau me ekewe mi mäla, pwal i epwe war o nemenem usun eman king,
2TI 4:2 pwe kopwe afalafala ewe Kapasen Kot. Kopwe achocho ngeni om kopwe arongafeili ewe Kapas, ese lifilifil ika lon fansoun öch ika lon fansoun ese öch. Kopwe föri ewe angangen fön, apwüng me apöchöküla manauen souläng lupwen ka föri ewe angangen asukul fän mosonotam.
2TI 4:3 Pun epwe war ewe fansoun, lupwen aramas resap mochen aüseling ngeni afalafal mi let. Nge repwe chök fiti mochenin letiper o repwe achufengeni chomong sense fän iter, ir ätekewe repwe üreniir mine ra mochen rongorong.
2TI 4:4 Repwe kul seni ar aüseling ngeni ewe kapas mi let, nge repwe aüseling ngeni ekewe tutulap.
2TI 4:5 Nge en kopwe ekisaram lon om föför meinisin, kopwe likitü lon riaföü, kopwe föri angangen eman chon asoulängala aramas, kopwe unusen apwönüetä wisom usun eman nöün Kot chon angang.
2TI 4:6 Nge me rei, a tori ewe fansoun ai üpwe fangala manauei ngeni Kot pwe eu asor, a tori ewe otun ai üpwe mäla.
2TI 4:7 Üa eäni ewe maun mi öch, üa awesöchüela ewe kitir, üa amwöchü ai lükülük.
2TI 4:8 Seni iei a iseis ngeniei ewe mwärin pwüng, ewe win ach Samol ewe Soukapwüng mi pwüng epwe ngeniei lon ewe Rän. Nge esap ngeniei chök, nge pwal ngeni chokewe meinisin mi fokun witiwiti an wareto.
2TI 4:9 Kopwe achocho ngeni om kopwe müttir feito rei.
2TI 4:10 Pun Temas a echeni ei fanüfanen ikenai, a likitiei o feila Tesalonika. Kresens a feila Kalatia o Titus a feila Talmatia.
2TI 4:11 Lukas chök a nom rei. Kopwe angei Markus pwe epwe etuketo, pun a tongeni alisiei lon ai angang.
2TI 4:12 Üa tinala Tikikus ngeni Efisos.
2TI 4:13 Lupwen kopwe feito, kopwe uweeto üfei na sekit üa likitala lon Troas ren Karpus, kopwe pwal uwato ekewe puk, akaeuin ekewe mi för seni silin man.
2TI 4:14 Aleksanter, ätewe mi föri pisek seni mächä, a fokun ariaföüüei. Ach Samol epwe ngeni chappen an föför ngeniei.
2TI 4:15 Kopwe afäluk ren ätewe, pun a fokun pöchökül le ü ngeni ach afalafal.
2TI 4:16 Lon aeuin fansoun üa küna kapwüng esap wor eman a alisiei. Ir meinisin ra likitieila. Amwo Kot esap liwini ngeniir liwinin ar föför!
2TI 4:17 Nge ach Samol a nom rei, a atufichiei pwe üpwe tongeni arongafeili unusen ewe Kapasen Kot, pwe ekewe chon lükün Israel meinisin repwe rongorong. Iwe, üa ngas seni ar apwüngüei ngeni mäla.
2TI 4:18 Ach samol epwe pwal angasaei seni ekewe sokun angangingau meinisin o amanauaei, pwe epwe uweeila ngeni mwün lon läng. I epwe ling tori feilfeilachök! Amen.
2TI 4:19 Ngang üa kapong ngeni Prisila me Akwila, pwal ngeni chon ewe familien Onesiforus.
2TI 4:20 Erastus a nometiu lon Korint, nge Trofimus üa likitala lon Miletus, pun a samau.
2TI 4:21 Kopwe achocho ngeni om kopwe feito rei mwen lefen. Eupulus, Putens, Linus me Klautia ra kapong ngonuk, pwal pwiich kewe souläng meinisin ra kapong ngonuk.
2TI 4:22 Ach Samol epwe eti ngünum. Än Kot ümöümöch epwe nonom remi meinisin.
TIT 1:1 Kapong seni ngang Paulus, eman nöün Kot chon angang me eman nöün Jesus Kraist soukünö. Kot a filiei o tinieila, pwe üpwe alisi nöün Kot kewe mi fil lon ar lükülük o emweniir ngeni ar repwe silei ewe let sia kaiö seni ach lamalam.
TIT 1:2 Iei ewe let mi longolong won ach apilükülük ngeni ewe manau esemüch. Kot, ewe esap chofona, a pwon ngenikich ei manau me mwen fansoun esepop,
TIT 1:3 nge lon fansoun mi fich a pwärala ewe let lon an kapas. Kot, ach Chon Amanau, a lükü ngeniei ei kapas, pwe üpwe arongafeili ren an we allük ngeniei.
TIT 1:4 Üa makkei ei toropwe ngonuk, Titus, en wesewesen nei lon ewe lükülük sia eänifengeni. Samach Kot me Kraist Jesus ach Chon Amanau epwe ngonuk ümöümöch me kinamwe.
TIT 1:5 Üa likituketiu lon Kreta, pwe kopwe akota ekewe mettoch resamwo kotöch, kopwe pwal filätä souakom lon iteiten ekewe mwichefel. Kopwe chechemeni ai kewe kapasen öüröür ngonuk:
TIT 1:6 Eman souakom epwe fokun unusöch lon manauan, epwe pwülüeni eman chök fefin, nge nöün kana repwe souläng, pwe esap wor eman epwe tip ngeniir pwe ra föföringau ika lükümach.
TIT 1:7 Pokiten eman soumas epwe tümwünü än Kot angang, i epwe eman mi unusöch lon manauan, esap eman mi lamalamtekia are songokai, are eman mi ünüpuch, are rochongau are tipemong won moni.
TIT 1:8 Epwe etiwöchü wasöla, epwe pwapwaiti le föri mine a mürina, epwe tufichin nemeni püsin inisin, epwe föri mine a pwüng, epwe apini manauan o eäni mirit lon manauan.
TIT 1:9 Epwe fokun kamwöchünük won ewe Kapasen Kot mi allükülük usun a kaiö ngeni, pwe epwe tongeni apöchöküla ekewe souläng ren an afalafala ewe kapas mi let usun ach lükülük, epwe pwal tongeni pölüeni chokewe mi ü ngeni.
TIT 1:10 Pun mi wor chomong aramas mi lükümach, ar kapas a lomotongau, ra atupu aramas, akaeuin ir seni ewe mwichen chon Juta mi soulängila.
TIT 1:11 Kopwe fokun aükätiu ar kapas, pun ra afitikokoi ekoch chon ekewe famili ren ar afalafala mine esap pwüng. Ra föri ei fän iten eu popun mi asäw, pun ra mochen angei moni.
TIT 1:12 Eman me lein nöür kewe soufos seni Kreta a apasa, “Chon Kreta ra kapas chofona fansoun meinisin, ra usun chök manmwacho mi ngau me chon mongömong mi chipwang.”
TIT 1:13 Ekei kapas ra let. Iei mine kopwe fokun apwüngüür, pwe epwe pwüng ar lükülük,
TIT 1:14 nge resap chüen aüseling ngeni än ekewe chon Juta tutulap, pwal ngeni ekewe allük mi pop seni ekewe aramas mi likitala ewe let.
TIT 1:15 Mettoch meinisin ra limöch ngeni chokewe mi limöch manauer, nge esap wor och a limöch ngeni chokewe mi limengau manauer, ir chokewe mi lükümang, pun ar ekiek me mwelien letiper a fen limengau.
TIT 1:16 Ra apasa pwe ra silei Kot, nge ar föför a pwärätä pwe resap silei i. Ra anioput me ren Kot, ra lükümach, resap tongeni ar repwe föri och mi mürina.
TIT 2:1 Nge en Titus, kopwe fokun afalafal won met mi tipeeu ngeni pwüngüöchün ach lükülük.
TIT 2:2 Kopwe aiti ngeni ekewe chinlap mwän ar repwe tipefesir me tipepwetete, repwe tufichin nemeni püsin inisiir, repwe pöchökül lon ar lükülük, lon ar chen, pwal lon ar likitü.
TIT 2:3 Ina chök usun om kopwe aiti ngeni ekewe chinlap fefin ar repwe usun ekewe fefin mi manaueni eu manau mi pin. Resap luapas, resap riri ngeni ükün wain. Repwe fokun asukula mine a mürina
TIT 2:4 lon ar aiti ngeni ekewe föpwül usun ar repwe echeni pwülüer me nöür kana,
TIT 2:5 usun ar repwe nemeni püsin inisiir o eäni eu letip mi limöch, usun ar repwe sipeöch le angang lon imw, repwe eäni kirikiröch o aleasochis ngeni pwülüer, pwe esap wor eman epwe kapas ingau usun än Kot kapas.
TIT 2:6 Ina chök usun om kopwe fönöü ekewe alüal ar repwe nemeni püsin inisiir.
TIT 2:7 Nge en kopwe fokun eu lenien apirü lon om föför mi mürina. Kopwe wenechar o tiliken lon om afalafal.
TIT 2:8 Kopwe aea kapas mi pwüng, pwe esap wor eman epwe tongeni esitok. Mürin, ekewe chon oputom repwe säw, pun esap wor och kapas mi ngau repwe tongeni apasatä usuch.
TIT 2:9 Kopwe aiti ngeni ekewe amanau pwe repwe anomur fän nemenien ar kewe masta o apwapwaar lon mettoch meinisin. Resap wippin ngeniir,
TIT 2:10 ika soläni och seniir, nge repwe fokun pwärala pwe ra wenechar o allükülük. Iei usun repwe aitöchü ewe angangen asukul usun Kot ach Chon Amanau lon mettoch meinisin.
TIT 2:11 Pun Kot a pwärala an ümöümöch, pwe aramas meinisin repwe küna manau ren.
TIT 2:12 Än Kot ümöümöch a aiti ngenikich ach sipwe likitala ach turunufas me mochenian fanüfan, nge sipwe eäni mirit, pwüng me soulängöch lon ach manau lon ei fanüfan.
TIT 2:13 Iwe, sipwe witiwiti ewe Ränin feiöch sia apilükülük ngeni, lupwen lingen ach we Kot mi tekia, ach Chon Amanau Jesus Kraist epwe wareto.
TIT 2:14 I a fangala manauan fänäsengesich, pwe epwe angasakich seni ach föföringau meinisin, epwe pwal limetikich seni ach tipis, pwe sipwe nöün aramas mi fokun achocho le föri mine a mürina.
TIT 2:15 Ikkei ekewe mettoch kopwe aiti ngeni ekewe souläng. Kopwe aea om pwüüng lon wisom, lupwen kopwe apöchöküla än ekewe souläng lükülük, pwal lupwen om kopwe apwüngüür. Kosap mwüt ngeni eman epwe turunufaseek.
TIT 3:1 Kopwe achema ngeni noumw kewe souläng, pwe repwe fokun aleasochis ngeni ekewe samol me sounemenem, repwe pwal molotä ngeni ar repwe föri sokun föför mi mürina.
TIT 3:2 Kopwe üreniir, pwe resap kapas ingau usun eman aramas, repwe afisätä kinamwe me chiechiöch o pwärala ar tipepwetete ngeni aramas meinisin.
TIT 3:3 Pun me lom püsin kich sia miritimang o aleasolap, sia pwal mwalechela. Sia nom fän nemenien sokopaten mochenia me pwapwan fanüfan. Sia manaueni eu manau mi ngau me lolowo, aramas ra oputakich, nge kich sia oputa ir.
TIT 3:4 Nge lupwen än Kot, ach Chon Amanau kirikiröch me tong a pwäla,
TIT 3:5 i a amanauakich, esap pokiten föriach föförün pwüng, nge pokiten an tong. A amanauakich ren ewe Ngünmifel, ewe mi aupusefälikich o ngenikich eu manau mi fö ren an limetikich.
TIT 3:6 Kot a fokun tinatiu woch ewe Ngünmifel ren Jesus Kraist ach Chon Amanau,
TIT 3:7 pwe ren an ümöümöch sipwe küna pwüng me ren Kot o eäni ewe manau esemüch sia apilükülük ngeni.
TIT 3:8 A allükülük ekei kapas. Üa mochen pwe kopwe fokun aweweöchü ekei mettoch, pwe chokewe mi lükü Kot repwe fokun alomota ar fansoun le föri föför mi mürina, sokun föför mi öch o lomot ngeni aramas meinisin.
TIT 3:9 Nge kopwe afäluk seni ekewe kapasen anini esor mirit lon, seni tettelin uruwon ekewe lewo, seni ekiekin tipefesen me kapasen anini usun ekewe allük, pun ra lomotongau o aücheangau.
TIT 3:10 Kopwe chök apwüngü fän eu ika fän ruu eman aramas mi afisätä tipefesen, nge mürin kosap chüen iamüri.
TIT 3:11 En ka silei, pwe ena sokun aramas a fokun ngau. An kewe tipis a alletätä pwe i mi mwäl.
TIT 3:12 Lupwen üpwe tinala reöm Artemas ika Tikikus, kopwe achocho ngeni om kopwe feito rei Nikapolis, pun üa fen ekiekin nonom ikenan lon fansoun lefen.
TIT 3:13 Kopwe pwal achocho le alisi Senas ewe souallük me Apolos lon ar sai, kopwe pii pwe resap osupwang ren och.
TIT 3:14 Kopwe aiti ngeni chiechiach kewe souläng, pwe repwe fokun alomota ar fansoun le föri föför mürina, pwe epwe wor rer mine ra osupwang ren, pwe manauer esap lomotongau.
TIT 3:15 Chokewe meinisin mi nom rei ra kapong ngonuk. Kopwe uwei äm kapong ngeni chiechiach kewe souläng lon ach lükülük. Än Kot ümöümöch epwe nonom remi meinisin.
PHM 1:1 Ngang Paulus eman chon fötek fän iten Kraist Jesus, pwal pwiich ei Timoty, aia kapong ngonuk en achengicheng Filimon, en chienach we chon angangen Kraist.
PHM 1:2 Aia pwal kapong ngeni fefinach Appia, ngeni Arkipus chienach we sounfiu fän iten Kraist, pwal ngeni chon ewe mwichefel mi chufengen lon imwom:
PHM 1:3 Samach Kot me ach Samol Jesus Kraist epwe fang ngenikemi ümöümöch me kinamwe.
PHM 1:4 Pwii Filimon, fansoun meinisin üa kilisou ngeni ai Kot lupwen üa chechemenuk lon ai iotek,
PHM 1:5 pun üa rongorong usun om tong ngeni ekewe chon pin meinisin, pwal usun om lükü ach Samol Jesus Kraist.
PHM 1:6 Üa iotek pwe ach chiechifengen me en lon ach lükü Jesus epwe atoto watten ach weweöchiti ekewe sokopaten feiöch sia eäni lon Kraist.
PHM 1:7 En pwii achengicheng, om tong a atoto ngeniei watten pwapwa me watten chip, pun en ka apwapwai leluken ekewe chon pin meinisin.
PHM 1:8 Iei popun üa tongeni pwora lon Kraist, pwe üpwe allük ngonuk mine kopwe föri.
PHM 1:9 Nge pokiten ai echenuk üpwe le tüngor ngonuk. Ngang üa föri ei, inamwo ika ngang Paulus üa chinlap, nge pwal lon ei fansoun üa eman chon fötek fän iten Kraist Jesus.
PHM 1:10 Iei mine üa tüngor ngonuk fänäsengesin Onesimus, i wesewesen nei lon Kraist, pun lupwen üa nonom lon fötek üa wiliti eman semelapan lon ngün.
PHM 1:11 Me lom i a lomotongau ngonuk, nge iei a fokun lomotöch ngonuk, pwal ngeniei.
PHM 1:12 Ngang üa tinsefäliela reöm iei, nge lelukei a pwal etala i.
PHM 1:13 Ngang üa mochen amwöchü i, pwe epwe nom rei lupwen üa nom lon imwen fötek fän iten ewe Pworausen Manau, pwe epwe tongeni siwiliik le alisiei.
PHM 1:14 Nge ngang üsap mochen arianuk om kopwe alisiei, pun üa mochen pwe kopwe föri ei seni mochenin letipom. Iei mine üsap föri och are kosap tipeeu ngeni.
PHM 1:15 Eli a fis pwe Onesimus a toau senuk lon eu fansoun mochomoch, pwe kopwe angesefäli pwe epwe nom reöm fansoun meinisin.
PHM 1:16 Iwe, iei esap chüen chök eman amanau, nge a kon aüchea seni eman amanau, pun i eman pwiich mi achengicheng lon Kraist. A men fokun aüchea me rei! Nge epwe le fen ifan me aüchean me reöm, pwe i eman amanau nge pwal eman pwiich lon ach Samol.
PHM 1:17 Iei mine are ka ekieki pwe ngang eman chienom, kopwe etiwasefäli Onesimus usun chök om etiwaei.
PHM 1:18 Nge are Onesimus a föri och mi mwäl ngonuk, are a liwinimang ngonuk won och, kopwe makkei itei won pwe üpwe wisen mönätiu.
PHM 1:19 Ngang Paulus üa makkei ei ren püsin pei, pwe üpwe mönisefäli ngonuk meinisin. Nge enlet, üsap wisen achema ngonuk pwe en ka liwinimang ngeniei ren püsin manauom.
PHM 1:20 Iei mine en pwii, kose mochen kopwe apwönüetä ai ei tüngor fän iten ach Samol. Kopwe apwapwai letipei, pun en pwii lon Kraist.
PHM 1:21 Lupwen üa makkei ei toropwe ngonuk, üa silei pwe kopwe aleasochisi mine üa tüngor. Enlet, üa silei pwe kopwe fen föri lap seni mine üa tüngor.
PHM 1:22 Iwe, pwal och: Kose mochen kopwe amolätä eu ruum fän itei, pun üa apilüköch pwe Kot epwe apwönüetä mine oua tüngor lon ämi iotek pwe üpwe liwinsefälila remi.
PHM 1:23 Epafras mi nom rei lon imwen fötek fän iten Kraist Jesus a tinala an kapong ngonuk,
PHM 1:24 pwal Markus, Aristarkus, Temas me Lukas chienei kewe chon angang ra kapong ngonuk.
PHM 1:25 Ümöümöchün ach Samol Jesus Kraist epwe nonom remi meinisin.
HEB 1:1 Me lom Kot a kapas ngeni ach kewe lewo fän chomong pwal lon sokopaten lapalap ren ekewe soufos.
HEB 1:2 Nge lon ekei ränin sopolan a kapas ngenikich ren Nöün we. I ätewe Kot a föri fanüfan me läng ren, ätewe Kot a filätä pwe epwe eäni mettoch meinisin.
HEB 1:3 A lingeni lingen Kot o wesewesen lapalapeni lapalapen Kot. A anükünüköchü mettoch meinisin ren an kapas mi manaman. Mürin an awesala amusamusen än chon fanüfan tipis, a mottiu lepelifichin Kot lon läng, i ewe mi manaman seni meinisin.
HEB 1:4 Ewe Nau a tekia seni ekewe chon läng, usun chök ewe it Kot a ngeni a tekia seni iter.
HEB 1:5 Pun Kot esamwo apasa ngeni eman nöün kewe chon läng, “En nei, ikenai üa wiliti Semom.” Kot esap pwal apasa usun eman chon läng, “Ngang üpwe Saman, nge i epwe Nei.”
HEB 1:6 Nge lupwen Kot ekärän tinato Nöün mwänichi lon ei fanüfan, a apasa, “Nöün Kot kewe chon läng meinisin repwe fokun fel ngeni.”
HEB 1:7 Iwe, Kot a apasa usun ekewe chon läng, “Kot a föri pwe nöün kewe chon läng ra usun asepwäl, pwal nöün kewe chon angang ra usun pulopulen ekkei.”
HEB 1:8 Nge usun Nöün we Kot a apasa, “O Kot, mwum epwe nonom tori feilfeilachök. Ka nemeni noumw aramas fän pwüng.
HEB 1:9 Ka efich pwüng, nge ka oput mine a ngau. Iei mine Kot, om we Kot a filuketä, a fang ngonuk pwapwan om iteüöch lap seni an fang ngeni chiechiom kewe.”
HEB 1:10 A pwal apasa, “En Samol, lepoputän ka föri fanüfan, nge ren püsin poumw ka föri ekewe läng.
HEB 1:11 Ir repwe tala, nge en kopwe nonom fochofoch, repwe mesila usun echö üf.
HEB 1:12 Kopwe numufengeniir usun echö sekit, kopwe siwiliir usun eman a siwili üfan. Nge en ka ususum we chök, manauom esap müchüla.”
HEB 1:13 Kot esap fokun apasa ngeni eman nöün kewe chon läng, “Kopwe mottiu lepelifichi tori üpwe anomu chon oputom, pwe repwe lenien puun pecheöm.”
HEB 1:14 Iwe, nge met ren ekewe chon läng? Ir meinisin ngün mi angang ngeni Kot. Kot a tiniirela pwe repwe alisi chokewe repwe küna manau.
HEB 2:1 Iei mine sipwe fokun kamwöchünük won ekewe kapas mi let sia fen rongorong, pwe sisap tokola seni.
HEB 2:2 Ekewe kapas, ekewe chon läng ra ngeni ach kewe lewo a pwä pwe ra let, nge are eman esap tümwünü ika aleasochis ngeni a angei liwiningauen an föför usun a fich ngeni.
HEB 2:3 Epwe ifa usun ach sipwe tongeni sü seni ach küna liwiningau are sisap aüseling ngeni ekewe kapas usun ach küna manau mi fokun aüchea. Ewe Samol a akomwen asile ngeni aramas usun ei küna manau, nge chokewe mi rongorong ngeni ra alletätä ngenikich pwe a let.
HEB 2:4 Lon ena chök fansoun Kot a apacha an kapasen pwärätä ngeni ar ren an föri asisil me manaman me sokopaten föför mi amwarar, pwal ren an aineti ekewe lifangen Ngünmifel usun mochenin letipan.
HEB 2:5 Iwe, Kot esap awisa ngeni ekewe chon läng pwe repwe nemeni ewe fanüfan mi fö epwe fisitä, iei ewe fanüfan sia fen kapas usun.
HEB 2:6 Nge iei usun a mak lon eu kewe Toropwe mi Pin, “Ai Kot, met aüchean aramas pwe ka ekieki usun, nge met aüchean nöün aramas pwe ka tümwünü?
HEB 2:7 Ka föri pwe i epwe kis fän ekewe chon läng lon fansoun mochomoch. Ka ämwärämwära ngeni ling me iteüöch
HEB 2:8 o awisa pwe epwe nemeni mettoch meinisin.” A apasa pwe Kot a awisa ngeni aramas pwe epwe “nemeni mettoch meinisin”. Wewen ei, esap fokun wor och mine esap nonom fän nemenian. Iwe, lon ei fansoun kich sisap küna pwe mettoch meinisin ra nom fän nemenian.
HEB 2:9 Nge sia küna Jesus, ewe Kot a föri pwe epwe kis fän ekewe chon läng lon fansoun mochomoch, pwe ren än Kot ümöümöch epwe mäla fänäsengesin aramas meinisin. Iwe, iei sia küna i, pwe a mwärini ling me iteüöch pokiten an riaföü me mäla.
HEB 2:10 A fokun pwüng pwe Kot, ewe mi föri o tümwünü mettoch meinisin, a föri pwe Jesus epwe unusöch ren an riaföü fän iten an epwe emwenato chomong nöün, pwe repwe eti i lon an ling. Pun Jesus ewe mi emweniir ngeni ar repwe küna manau.
HEB 2:11 Jesus a alimöchü aramas seni ar tipis, iwe, i me chokewe mi küna limöch ra semeni eman chök Sam. Iei popun Jesus esap säwäsini an aita ngeniir pwiin.
HEB 2:12 Iwe, a apasa ngeni Kot, “Üpwe apworausa ngeni pwii kewe mine ka föri, üpwe mwareituk lein ewe mwichen aramas.”
HEB 2:13 A pwal apasa, “Üpwe anomu ai apilükülük won Kot.” A pwal apasa, “Ngang üa nom ikei me ekewe nau Kot a ngeniei.”
HEB 2:14 Pokiten ekei nau, ir aramas seni fituk me cha, püsin Jesus a wiliti aramas usun ir o sokuni sokur. A föri ei, pwe ren an mäla epwe atala manamanen Tefil a eäni nemenem won mäla.
HEB 2:15 Iwe, ren ei a angasala chokewe mi fötek lon unusen manauer pokiten ar niuokusiti mäla.
HEB 2:16 Pun a fat pwe esap alisi ekewe chon läng. Nge usun a mak lon ekewe Toropwe mi Pin, “A alisi ekewe mwirimwirin Apraham.”
HEB 2:17 Wewen ei, pwe epwe wiliti aramas usun pwiin kewe lon mettoch meinisin fän iten an epwe nöür Souasor mi Lap mi eäni tong o allükülük lon an angang ngeni Kot, pwe än ekewe aramas tipis epwe musala.
HEB 2:18 Iwe, iei a tongeni alisi chokewe mi tolong lon sosot, pun püsin i a fen piin tolong lon sosot me riaföü.
HEB 3:1 Iei mine ämi pwii kana souläng mi pwal kö me ren Kot, oupwe fokun ekieki usun Jesus, ewe Soukünö me Souasor mi Lap sia pwärätä usun.
HEB 3:2 I a allükülük ngeni Kot, ewe mi filätä an epwe föri ei angang, usun chök Moses a allükülük lon an angang lon imwen Kot.
HEB 3:3 Eman mwän mi aüetä eu imw a angei iteüöch lap seni ewe imw. Ina usun Jesus a fokun fich ngeni an epwe angei iteüöch lap seni Moses.
HEB 3:4 Ewer, iteiten imw aramas ra aüetä, nge Kot ewe mi aüetä mettoch meinisin.
HEB 3:5 Moses a allükülük lon wisen eman chon angang lon unusen imwen Kot, a kapas usun ekewe mettoch Kot epwe apasa lon ekewe fansoun repwe feito.
HEB 3:6 Nge Kraist a allükülük lon wisen eman nau o nemeni imwen Kot. Iwe, kich imwen Kot are sia likitü lon ach tipepwora me ach apilükülük lon met sia apilükülük ngeni.
HEB 3:7 Iwe, iei usun met ewe Ngünmifel a apasa, “Ikenai are oua rong mwelien Kot,
HEB 3:8 ousap apöchöküla lelukemi usun ämi kewe lewo, lupwen ar pöchökül le ü ngeni Kot, usun met ra föri lon ewe rän lon fanüapö, lupwen ra sotuni Kot.
HEB 3:9 Kot a apasa: Ikenan ra sotuniei, inamwo ika ra küna mine üa föri lon ekewe ükükün faik ier.
HEB 3:10 Iei mine üa song ngeni ekei aramas o üa üra, ‘Ir eu mwichen aramas mi tokola leluker, resap fokun mochen aleasochisi ai kewe allük.’
HEB 3:11 Iwe, lon ai song üa pwon fän akapel ngeniir: ‘Resap fokun tolong lon ewe fanü ia üpwe asösöör ie!’”
HEB 3:12 Ämi pwii kana mi lükü Jesus, oupwe afälikemi pwe esap wor eman leimi epwe eäni eu leluk mi ngau o lükümang, pwe epwe tokola seni ewe Kot mi manau.
HEB 3:13 Nge oupwe fokun alilisfengen lefilemi iteiten rän lon ei ükükün fansoun mi iteni “Ikenai”, pwe esap wor eman epwe tup lon tipis o tipepöchökül lon letipan.
HEB 3:14 Pun oukich meinisin sia chiechien Kraist are sia kamwöchünük tori lesopolan won ewe apilüköch sia eäni seni me lepoputän.
HEB 3:15 Iei usun met a mak lon ekewe Toropwe mi Pin, “Ikenai are oua rong mwelien Kot, ousap apöchöküla lelukemi usun ämi kewe lewo, lupwen ra pöchökül le ü ngeni Kot.”
HEB 3:16 Iö ekewe aramas mi rong mwelien Kot o pöchökül le ü ngeni? Ir chokewe meinisin Moses a emweniirewu seni Isip.
HEB 3:17 Nge iö Kot a song ngeni lon ükükün faik ier? Ir chokewe mi tipis o mätiu lon ewe fanüapö.
HEB 3:18 Ngeni iö Kot a pwon fän akapel pwe resap fokun tolong lon ewe fanü ia repwe asösö ie? Sap ir chokewe mi aleasolap?
HEB 3:19 Iei usun sia silei pwe resap tongeni tolong lon ewe fanü pokiten ar lükülükümang.
HEB 4:1 Iwe, Kot a ngenikich ewe pwon, pwe sipwe tolong lon ewe asösö a kapas usun me mwan. Iei mine sipwe fokun tümwünüfichi pwe esap wor eman leimi esap tolong lon ewe asösö Kot a fen pwon.
HEB 4:2 Pun sia pwal rongorong ewe Pworausen Manau usun chök ir. Ir ra rongorong ewe pworaus, nge resap feiöch ren, pun lupwen ar rongorong, resap etiwa fän ar lükü.
HEB 4:3 Iei mine oukich mi lükü sia tolong lon ewe asösö Kot a fen pwonei. Iei usun a fen apasa, “Lon ai song üa pwon fän akapel ngeniir, ‘Resap fokun tolong lon ewe fanü ia üpwe asösöör ie.’” Iei usun met Kot a apasa, inamwo ika an kewe angang ra wesila seni ewe fansoun a föri fanüfan.
HEB 4:4 Pun a mak lon eu kewe Toropwe mi Pin usun ewe afisuen rän, “Kot a asösö seni an kewe angang meinisin lon ewe afisuen rän.”
HEB 4:5 A pwal mak lon eu kewe wokisin usun ewe kapas asösö, “Resap fokun tolong lon ewe fanü ia üpwe asösöör ie.”
HEB 4:6 Iwe, chokewe mi akomwen rongorong ewe Pworaus Allim resap tolong lon ewe asösö, pun ra aleasolap. Nge mi wor pwal ekoch a mwümwütä ngeniir pwe repwe tolong lon ewe asösö.
HEB 4:7 Ei a fat ren än Kot filätä pwal eu rän mi iteni “Ikenai”. Chomong ier mürin a kapas me ren Tafit usun met a fen mak lon ekewe Toropwe mi Pin, “Ikenai are oua rong mwelien Kot, ousap apöchöküla lelukemi.”
HEB 4:8 Pun are Josua a atolonga ekewe aramas lon ewe asösö Kot a fen pwon, Kot esap pwal kapassefäl me mürin usun pwal eu rän.
HEB 4:9 Iwe, mi chüen wor eu asösö a witiwit fän iten nöün Kot kewe aramas, a usun chök ewe asösö än Kot lon ewe afisuen rän.
HEB 4:10 Pun iö a tolong lon ewe asösö Kot a pwonei, epwe pwal asösö seni an angang usun chök Kot a asösö seni an angang.
HEB 4:11 Iei mine sipwe fokun achocho ach sipwe tolong lon ewe asösö, pwe esap wor eman leich epwe tur usun ir pokiten ar aleasolap.
HEB 4:12 Pun än Kot kapas a manau o manaman, a ken seni efoch ketilas mi seisei me rüepek. A tililong lon manauach o aimwüfeseni letipach me ngünüch, pwal lekupukupun lon chü me fituken lon chü. A pwal apwüngü mochen me ekiekin letipen aramas.
HEB 4:13 Esap fokun wor och epwe tongeni monola seni Kot. Förian kana meinisin ra säretä o pwäpwäla mwen mesan. Iwe, kich meinisin sipwe fokun pwärätä ngeni i ach föför meinisin.
HEB 4:14 Iei mine ousipwe kamwöchünük won ewe lükü sia pwärätä usun. Pun a nom rech eman Souasor mi Lap, Jesus ewe Nöün Kot, a feitä läng o a nonom mwen mesen Kot.
HEB 4:15 Pun ach we Souasor mi Lap esap eman mi tongomang ngeni ach apwangapwang. Nge a nom rech eman Souasor mi Lap mi tolong lon sokopaten sosot usun chök kich, nge esap tipis.
HEB 4:16 Iei mine sipwe arap ngeni än Kot we lenien mot fän apilüköch, ia sia küna ümöümöch me ie. Ikenan sipwe angei tong o küna ümöümöch, pwe epwe alisikich lon fansoun ach osupwang.
HEB 5:1 Iwe, iteiten souasor mi lap a kefilitä me lein aramasan, a angei wisan an epwe angang ngeni Kot fän iten ekewe aramas, pwe epwe föri angangen asor o föri ekewe asoren tipis.
HEB 5:2 Pokiten i a apwangapwang lon püsin manauan, a tongeni tipepwetete ngeni chokewe mi wewemang o föri mine a mwäl.
HEB 5:3 Iwe, pokiten püsin i a apwangapwang, epwe fokun föri asoren amusamusen tipis, sap fän iten chök än ekewe aramas tipis, pwe pwal fän iten püsin an tipis.
HEB 5:4 Esap wor eman a seikätä püsin i an epwe wiseni ewe wisen souasor mi lap. Nge Kot echök a seikätä eman aramas an epwe wiseni ewe wisen souasor mi lap, usun chök mine a fis ngeni Aaron.
HEB 5:5 Ina chök usun Kraist, esap püsin seikätä an epwe wiseni ewe wisen souasor mi lap. Nge Kot a üreni, “En Nei, ikenai üa wiliti Semom.”
HEB 5:6 A pwal apasa lon eu kewe Toropwe mi Pin, “En kopwe eman souasor tori feilfeilachök lon tettelin Melkisetek.”
HEB 5:7 Lon fansoun än Jesus manau won fanüfan, a iotek o tüngor fän mwelian mi leüömong, a pwal kechü ngeni Kot, ewe mi tongeni amanaua i seni mäla. Iwe, Kot a aüselinga i, pun a meniniti i.
HEB 5:8 Iwe, inamwo are i Nöün Kot, nge a kaiö aleasochis ren ekewe riaföü a tolong lon.
HEB 5:9 Iwe, lupwen a unusöchüla manauan won fanüfan, a wiliti ewe popun küna manau esemüch fän iten chokewe mi aleasochis ngeni.
HEB 5:10 Iwe, Kot a aita ngeni souasor mi lap lon tettelin Melkisetek.
HEB 5:11 Mi wor chomong mine aipwe tongeni apasa usun ei mettoch, nge a weires äm aipwe awewe ngenikemi, pun oua fokun wewemang.
HEB 5:12 A fen tori fansoun ämi oupwe sense, nge oua chüen osun än eman epwe asukulakemi ekewe lessen fän iten chon popuetä kaiö kapasen Kot. Ürürün pwe oupwe mongö mongö mi pöchökül, nge oua chüen chök ükün milik.
HEB 5:13 Eman mi chök ükün milik a chüen eman mönükol, esap tongeni sipeöch lon ewe kapasen pwüng.
HEB 5:14 Nge mongö mi pöchökül a chök fän iten ekewe aramas mi mwukula, ir chokewe mi aörüni ngeniir ar repwe tufichin alefila lefilen mine a öch me mine a ngau.
HEB 6:1 Iei mine sisap chüen eäni ekewe lepoputän lessen usun Kraist, nge sipwe sopwela ren ekewe afalafal mi fich ngeni chokewe mi mirit lon ar souläng. Sisap chüen aliwinisefäli ngenikemi ewe afalafalen longolongun ach souläng usun ach aier seni ekewe föför mi lomotongau, usun ach lükü Kot,
HEB 6:2 ekewe afalafal usun papatais me ach isetä pöüch won aramas, usun ewe manausefäl seni sotup, pwal usun ewe kapwüng esemüch.
HEB 6:3 Iwe, iei met sipwe föri are Kot epwe mwüt ngenikich.
HEB 6:4 Pun epwe ifa usun ach sipwe tongeni aliwinisefäli chokewe mi pöütala ar lükü, pwe repwe aiersefäl? Ra eäni än Kot saram me mwan, ra neni ewe lifang seni läng o angei ewe Ngünmifel.
HEB 6:5 Ra silei seni mine a fis ngeniir, pwe än Kot kapas a mürina o ra mefi ekewe manamanen ewe fansoun epwe feito.
HEB 6:6 Nge mürin ra pöütala ar lükü! Ese fokun tufich ach sipwe aliwinisefäliir pwe repwe aiersefäl, pun ra iräpengesisefäli ewe Nöün Kot o asäwa i me mwen mesen aramas.
HEB 6:7 Kot a afeiöchü ewe pwül mi ünümi ewe üt a püngütiu won fän chomong, pwe a amärätä irä mi lomot ngeni chokewe ewe pwül a molotä fän iter.
HEB 6:8 Nge ika ewe pwül a amärätä iräfölüföl me pötöwölingau, esap fokun wor lomotan. A fetal ngeni chök an epwe anümamau me ren Kot, nge feilfeil epwe karala ren ekkei.
HEB 6:9 Iwe, ämi chiechiem kana mi achengicheng, inamwo ika aia eäni ekei sokun kapas, nge aia apilüköch fän itemi o silei pwe oua eäni ekewe feiöch mi kon aüchea ra nom lon ämi küna manau.
HEB 6:10 Kot esap eäni föför esepwüng, esap manlükala ewe angang oua föri me ewe chen oua pwäri ngeni i lupwen oua alisi chiechiemi kewe souläng, nge oua pwal sopwela le alisiir.
HEB 6:11 Äm aia fokun mochen, pwe eman me eman leimi epwe chök achocho tori sopolan, pwe ekewe mettoch oua apilükülükü repwe pwönüetä.
HEB 6:12 Äm aisap mochen pwe oupwe chipwang, nge oupwe wewe ngeni chokewe mi angei mine Kot a eäni pwon ren ar lükü me mosonotam.
HEB 6:13 Iwe, lupwen Kot a pwon ngeni Apraham, a pwon fän akapel pwe epwe apwönüetä. Pokiten esap wor eman mi tekia seni püsin i, a akapelü püsin itan.
HEB 6:14 A apasa, “Üpwe fokun afeiöchuk o achomongala mwirimwirum.”
HEB 6:15 Apraham a likitü fän mosonotam, iei mine a fis ngeni mine Kot a eäni pwon.
HEB 6:16 Are eman aramas a eäni eu akapel, a akapelü iten eman mi tekia seni püsin i. Iwe, ei akapel a alükülükü met a pwon o aükätiu än aramas anini meinisin.
HEB 6:17 Kot a mochen afata ngeni chokewe repwe angei mine a eäni pwon pwe esap fokun siwili ekiekin letipan, iei mine a apacha an akapel ngeni mine a eäni pwon.
HEB 6:18 Ikkei ekewe ruu mettoch resap tongeni siwil, pun esap tufich pwe Kot epwe tongeni chofona. Iei mine kich mi nom fän tümwünüan sia fokun tipepwora lon ach kamwöchünük lon ewe apilükülüköch a anomu mwach.
HEB 6:19 Sia eäni ei apilükülüköch usun eu angkö mi allükülük o nüküchar fän iten manauach, a tolong pekilongen ewe cheech mangaku lon ewe imwenfel lon läng o tolong lon ewe leni mi unusen pin.
HEB 6:20 Fän itach Jesus a akomwolong mwach lon ewe leni o wiliti eman souasor mi lap tori feilfeilachök lon tettelin Melkisetek.
HEB 7:1 Ätei Melkisetek i kingen Salem, pwal eman souasor nöün Kot ewe mi Unusen Tekia. Lon fansoun Apraham a liwinto seni ewe maun lupwen a akufu ekewe föman king, Melkisetek a churi o afeiöchü.
HEB 7:2 Iwe, Apraham a ngeni ätei eu leengolun choon wokun meinisin. Aeuin wewen ei it Melkisetek “Kingen Pwüng”, nge pokiten i kingen Salem itan a pwal iei wewen “Kingen Kinamwe”.
HEB 7:3 Esap wor uruwon saman ika inan ika an lewo, esap pwal wor uruwon an uputiu ika an mäla. Iwe, a usun ewe Nöün Kot, a nonom lon wisen souasor tori feilfeilachök.
HEB 7:4 Ren ei oua silei usun tekian Melkisetek. Apraham ach we lewo mi iteföüla a ngeni eu leengolun choon wokun meinisin.
HEB 7:5 Iwe, lon pwüngün ewe allük ekewe mwirimwirin Lefi, ir mi wiseni ewe wisen souasor, ra wisen angei ewe leengolun seni mine ekewe chon Israel ra eäni, wewen seni pwiir kewe. Nge inamwo ika ir pwiir kewe, ir pwal mwirimwirin Apraham.
HEB 7:6 Melkisetek esap eman mwirimwirin Lefi, nge a angei ewe leengol seni Apraham o afeiöchü Apraham, nge Apraham ätewe Kot a fen pwon ngeni.
HEB 7:7 Sia fokun silei pwe ätewe mi lap a wisen afeiöchü ätewe mi kis.
HEB 7:8 Ren ekewe souasor mi ionifengeni ewe leengol, ir aramas repwe tolong lon mäla. Nge ren Melkisetek a angei ewe leengol, i ewe eman mi manau, esap mäla usun mine a mak lon ekewe Toropwe mi Pin.
HEB 7:9 Iwe, sipwe tongeni apasa, pwe lupwen Apraham a isetiu ewe leengol, Lefi a pwal isetiu, inamwo ika mwirimwirin kana ra angei ewe leengol seni aramas.
HEB 7:10 Pun Lefi esamwo uputiu, nge sia tongeni apasa pwe a nom lon inisin an we lewo Apraham, lupwen Melkisetek a churi.
HEB 7:11 Kot a ngeni ekewe aramasen Israel ekewe Allük, nge ra longolong won angangen ekewe souasor, ir mwirimwirin Lefi. Iwe, are angangen ekewe souasor, ir mwirimwirin Lefi, epwe unusöch, esap wor lomoten än pwal eman souasor epwe wareto seni lon tettelin Melkisetek, nge sap eman seni lon tettelin Aaron.
HEB 7:12 Pun are tettelin ekewe souasor epwe siwil, epwe pwal wor siwilin ekewe allük.
HEB 7:13 Iwe, ekei kapas ra makketiu fän iten ach Samol a nom lon pwal eu sokun ainang. Esap wor eman seni an we ainang a fen mwo nge wiseni ewe wisen souasor.
HEB 7:14 Pun a fokun fat pwe ach Samol a uputiu seni ewe ainangen Juta. Nge Moses esap kapas usun ei ainang lupwen a fos usun ekewe souasor.
HEB 7:15 Ei pworaus a fokun fatafatöchüla, pwe pwal eman souasor usun chök Melkisetek a wareto.
HEB 7:16 I a tolong lon ewe wisen souasor sap pokiten än aramas allük ika akot, nge pokiten manamanen eu manau esap tongeni müchüla.
HEB 7:17 Pun a mak lon ekewe Toropwe mi Pin, “En kopwe eman souasor tori feilfeilachök lon tettelin Melkisetek.”
HEB 7:18 Iei usun ewe allük minen lom a wesila, pun a apwangapwang o lomotongau.
HEB 7:19 Pun ekewe Allük resap tongeni aunusöchüela och mettoch. Nge iei eu apilükülüköch mi mürina seni a fen molotä fän itach, pwe sipwe arap ngeni Kot ren.
HEB 7:20 Iwe, mi pwal wor än Kot pwon fän akapel. Lupwen ekewe pwal ekoch ra tolong lon wisen souasor, esap wor ena sokun akapel.
HEB 7:21 Nge Jesus a wiseni ewe wisen souasor ren eu pwon fän akapel, lupwen Kot a üreni, “Ewe Samol a pwon fän akapel, nge esap siwili an ekiek, ‘En kopwe eman souasor tori feilfeilachök.’”
HEB 7:22 Pokiten ei pwon fän akapel Jesus a wiliti eu minen allükülükün eu pwon mi fokun mürina.
HEB 7:23 Iwe, mi wor chomong ekewe souasor, pokiten ra mäla resap tongeni sopwela angangen wiser.
HEB 7:24 Nge Jesus a manau tori feilfeilachök, an angang lon wisan wisen souasor esap la ngeni pwal eman.
HEB 7:25 Iei mine a tongeni amanaua chokewe meinisin mi arap ngeni Kot ren i fansoun meinisin, pun a manau tori feilfeilachök pwe epwe tüngor ngeni Kot fänäsengesiir.
HEB 7:26 Iei usun Jesus ewe Souasor mi Lap a alisikich lon ach osupwang meinisin. I ewe mi pin, esap wor an mwäl ika an tipis. Kot a aimwüela i seni chon tipis o atekiatai seni ekewe läng.
HEB 7:27 Nge Jesus esap pwal wewe ngeni ekewe ekoch souasor mi lap. Esap wor lomoten an epwe eäni asor iteiten rän, akom fän iten püsin an tipis, mürin fän iten än ekewe aramas tipis. A eäni eu asor fän eu chök, nge a naf ngeni fansoun meinisin, lupwen a asor püsin inisin.
HEB 7:28 Lon pwüngün ekewe Allük, aramas resap unusöch ra kefilitä lon ewe wisen souasor mi lap. Nge än Kot pwon mi fis fän akapel a tapweto me mürin ekewe Allük, a filätä ewe Nau mi unusöch tori feilfeilachök.
HEB 8:1 Iwe, iei aüchean mine sia kapas usun: Sia eäni eman Souasor mi Lap a mot lepelifichin ewe mi Unusen Tekia lon läng.
HEB 8:2 I a angang lon ewe wisen souasor mi lap lon ewe Leni mi Unusen Pin, iei wesewesen ewe imwenfel seni mangaku ewe Samol a aüetä, nge sap aramas.
HEB 8:3 Iteiten eman me eman souasor mi lap a kefilitä pwe epwe uwato sokopaten asor o eäni asoren man ngeni Kot. Iei mine ach we Souasor mi Lap epwe pwal fokun wor mine epwe eäni asor.
HEB 8:4 Ika i epwe nonom won fanüfan, esap fokun wiseni ewe wisen souasor, pun mi wor souasor ra eäni asor ekewe lifang fän pwüngün än ekewe chon Juta allük.
HEB 8:5 Ewe angang ra föri lon wiser wisen souasor a chök eu lios me ngünüen ekewe mettoch mi wor lon läng. Pwal iei chök usun mine a fis ren Moses. Me mwen an epwe aüetä ewe imwenfel seni mangaku, Kot a üreni, “Kopwe tümwünüfichi pwe kopwe föri meinisin lon lapalapen ewe lios ka küna me won ewe chuk.”
HEB 8:6 Nge iei Jesus a angei ewe wisen souasor mi tekia seni wisen ekewe souasor mi lap, usun chök ewe pwon i a föri lefilen Kot me nöün kewe aramas a fokun aüchea seni ewe pwonen lom, pun a longolong won ekewe pwon mi fokun mürina.
HEB 8:7 Pun are esap wor och mwäl lon ewe aeuin pwon, esap wor lomoten an epwe pwal wor eu aruen pwon.
HEB 8:8 Nge lupwen Kot a küna mwälin nöün kewe aramas, a apasa, “Ewe Samol a apasa: Epwe war ewe fansoun, lupwen üpwe föri eu pwon mi fö ngeni chon Israel me chon Juta.
HEB 8:9 Ei pwon esap wewe ngeni ewe üa föri ngeni ar kewe lewo, lon ewe rän üa amwöchü pöür o emweniirewu seni ewe fanü Isip. Resap apwönüetä pwüngün ewe pwon üa föri ngeniir, iei mine üa kul seniir.
HEB 8:10 Iwe, iei ewe pwon üpwe föri ngeni ekewe chon Israel lon ewe fansoun epwe feito, iei alon ewe Samol: Üpwe atolonga ai kewe allük lon ekiekiir o makkeretiu lon letiper. Iwe, ngang üpwe ar Kot, nge ir repwe nei aramas kana.
HEB 8:11 Esap wor eman epwe aiti ngeni chon lenian, ika apworausa ngeni chon fanüan, ‘Kopwe silei ewe Samol.’ Pun ir meinisin repwe sileei, seni ekewe mi kis tori ekewe mi lap.
HEB 8:12 Pun üpwe amusala ar tipis, nge üsap chüen chechemeni ar kewe föför mi ngau.”
HEB 8:13 Lupwen Kot a kapas usun eu pwon mi fö, a föri pwe ewe aeuin pwon epwe mesila. Nge mine a mes esap chüen wor lomotan, epwe müttir morola.
HEB 9:1 Iwe, ewe aeuin pwon a wor allükün fän iten än aramas repwe fel ngeni Kot, pwal eu leni mi pin aramas ra föri fän iten ar repwe fel lon.
HEB 9:2 Ra aüetä eu imwenfel seni mangaku mi wor ruu kinikin lon. Ewe aeuin kinikin a iteni ewe Leni mi Pin. Lon ei leni a nom ewe lenien atittin me ewe chepel ia ekewe pilawa mi pin ra nom ie.
HEB 9:3 Pekilongen ewe aruachön cheech mangaku a wor eu leni mi iteni Unusen Pin.
HEB 9:4 Lon ei leni a nom ewe rongen asoren ötüöt seni kolt me ewe Pworun Pwon mi pwölüpwöl ngeni kolt. Lon ei Pworun Pwon a wor ewe pör seni kolt ia ekewe mana ra nom ie me wokun Aaron we mi fasar, pwal ekewe rüepek fau ia ekewe allük ra mak ie.
HEB 9:5 Won öppüngün ewe Pworun Pwon ra nom uluulun ruoman kerop, asisilen pwe Kot a nom ikiwe ie, pöükässiir ra itiwu o meresila won ewe leni ia aramas ra küna amusamusen ar tipis ie. Nge iei esap wor fansoun ach sipwe awewei tichikin ekei mettoch meinisin.
HEB 9:6 Iei usun kokotöchün ekei mettoch meinisin. Ekewe souasor ra tolong lon ewe Leni mi Pin iteiten rän ar repwe föri ar angang.
HEB 9:7 Nge ewe Souasor mi Lap echök a tolong lon ewe Leni mi Unusen Pin fän eu chök lon eu ier. A uwei chaan ewe mönün asor a eäni asor ngeni Kot fän püsin itan pwal fän iten än ekewe aramas tipis ra föri lon ar chechengau.
HEB 9:8 Iwe, ewe Ngünmifel a afatöchü lon ekei kokot meinisin, pwe ewe al ngeni ewe Leni mi Unusen Pin esamwo suk lupwen fansoun ewe Leni mi Pin a chüen nom.
HEB 9:9 Iei eu lios fän itach ikenai. Wewen pwe ekewe sokopaten asor me ekewe asoren man aramas ra uwato pwe ar asor ngeni Kot, resap tongeni aunusöchüela letipen chokewe mi fel ngeni Kot.
HEB 9:10 Pun ekei sokun asor ra chök masoueni mongö, minen ün me sokopaten angangen limelim. Ekei mettoch allük fän iten chök inisich, ra chök pöchökül tori ewe fansoun lupwen Kot epwe akotasefäli me asöföü mettoch meinisin.
HEB 9:11 Nge Kraist a feito lon ewe wisen Souasor mi Lap fän iten ekewe mettoch mi mürina ra fen nom ikei. Ewe imwenfel seni mangaku i a angang lon a lap o fokun unusöch. Esap för ren pöün aramas, pun esap eu kinikinin minen fanüfan.
HEB 9:12 Lupwen Kraist a tolong lon ewe imwenfel seni mangaku, a tolong lon ewe Leni mi Unusen Pin fän eu chök, nge a naf ngeni fansoun meinisin. Iwe, esap uwalong chaan kuuch me chaan ätemwänin kow, pwe epwe eäni asor, nge a uwalong püsin chaan, pwe epwe angasakich seni ach tipis tori feilfeilachök.
HEB 9:13 Iwe, ra angei chaan ekewe kuuch me chaan ekewe ätemwänin kow, pwal falangen ewe nienifön kow mi kekkila mi nofit ngeni koluk o äsupu ngeni ekewe aramas mi nom lon tettelin limengau, pwe repwe limöch seni sokun ar limengau.
HEB 9:14 Pokiten ei a pwüng, epwe le ifan me ükükün aüchean ewe chaan Kraist. Ren ewe Ngün esemüch a asor ngeni Kot püsin inisin pwe eu asor mi unusöch. Chaan Kraist epwe limeti mwelien letipach seni sokun föför mi lomotongau, pwe sipwe tongeni angang ngeni ewe Kot mi manau.
HEB 9:15 Iei popun Kraist a wisen chon afförün ewe pwon mi fö, pwe chokewe Kot a köriir repwe angei ewe feiöch esemüch, Kot a fen pwon. Ei a tongeni fis, pun Kraist a mäla pwe epwe angasa aramas seni ar tipis kana ra föri fän ewe aeuin pwon.
HEB 9:16 Are a fis eu pwonen amwirinimä, a chök manaman lupwen eman a pwärätä pwe ewe aramas mi föri a mäla.
HEB 9:17 Pun eu amwirinimä a lomotongau are ewe aramas mi föri a chüen manau, pwe a chök tongeni pwönüetä mürin an mäla.
HEB 9:18 Iei popun pwe ewe aeuin pwon a chök fis lupwen ra aea cha.
HEB 9:19 Akomwan Moses a asile ngeni ekewe aramas masouen ekewe allük meinisin. Mürin a angei chaan ekewe ätemwänin kow me chaan ekewe kuuch mi nofitfengen me koluk o aea ülün ewe irä isop me ülen sip mi parapar le äsupu ngeni ewe puken allük pwal ngeni ekewe aramas meinisin.
HEB 9:20 Iwe, Moses a apasa, “Iei ewe cha mi anüküchara ewe pwon Kot a allük ngenikemi pwe oupwe aleasochisi.”
HEB 9:21 Ina chök usun Moses a pwal äsupu ewe cha won ewe imwenfel seni mangaku pwal won ekewe mettoch meinisin ra aea lon ar fel ngeni Kot.
HEB 9:22 Pwüngün lon ewe Allük pwe arapakan mettoch meinisin ra limelim ren cha, pwal ina usun tipis a chök tongeni musala ren pupulan cha.
HEB 9:23 Ekei mettoch, aramas ra wisen limeti lon ei chök lapalap, liosun ekewe mettochun lon läng. Nge fän iten limelimen ekewe mettochun lon läng epwe fokun wor sokun asor mi mürina seni.
HEB 9:24 Pun Kraist esap tolong lon eu Leni mi Pin aramas ra föri, ewe mi chök aliosunätä ewe wesewesen Leni mi Pin. Nge a tolong lon läng o a nonom mwen mesen Kot iei fänäsengesich.
HEB 9:25 Ewe Souasor mi Lap a tolong lon ewe Leni mi Unusen Pin iteiten ier ren chaan eman man. Nge Kraist esap tolong läng pwe epwe asor inisin fän chomong,
HEB 9:26 pun are epwe iei usun, epwe riaföü fän chomong seni ewe fansoun Kot a föri fanüfan. Nge iei lupwen a arapakan sopolan fansoun fanüfan, Kraist a wareto fän eu chök, nge a naf ngeni fansoun meinisin, pwe epwe amorala tipis ren an asor püsin inisin.
HEB 9:27 Aramas meinisin repwe mäla fän eu chök, nge mürin Kot epwe apwüngüür.
HEB 9:28 Iei usun Kraist a fangala püsin inisin pwe eu asor fän eu chök, pwe epwe amorala tipisin chomong aramas. Iwe, lupwen epwe wareto fän aruan, esap chüen föri och fänäsengesin tipis, nge epwe amanaua chokewe mi witiwiti.
HEB 10:1 Pun ekewe Allük ra chök ngünüen ekewe mettoch mi mürina repwe feito, nge esap wesewesen iei inisin ekewe mettoch. Ra eäni ekewe chök sokun asor fansoun meinisin iteiten ier me ier. Epwe ifa usun än ekewe aramas mi feito ren Kot repwe tongeni unusöchüla ren ar apwönüetä ekewe allük usun ekewe asor?
HEB 10:2 Ika ekewe aramas mi fel ngeni Kot ra wesewesen limöchüla seni ar tipis, resap chüen mefi ar tipis o ekewe asor meinisin repwe köüla.
HEB 10:3 Nge ekewe asor mi fis iteiten ier ra achema ngeni ekewe aramas ar tipis.
HEB 10:4 Pun chaan ekewe ätemwänin kow me chaan ekewe kuuch resap fokun tongeni amorala tipis.
HEB 10:5 Iei mine, lupwen Kraist epwele feito fanüfan a üreni Kot, “Kosap mochen ekewe asor me lifang, nge ka ngeniei eu inis.
HEB 10:6 Kosap pwapwaiti asoren man mi kekkila won ewe rongen asor, ika sokun asor mi amorala tipis.
HEB 10:7 Mürin üa apasa, ‘Ai Kot, ngang iei, üpwe föri letipom, usun a mak usi lon ewe puken Allük.’”
HEB 10:8 A akomwen apasa, “Kosap mochen ika pwapwaiti ekewe asor me lifang, ika asoren man mi kekkila won ewe rongen asor me sokun asor mi amorala tipis.” A apasa ei, inamwo ika ekei asor meinisin ra fis fän pwüngün ekewe Allük.
HEB 10:9 Mürin a apasa, “Ai Kot, ngang iei, üpwe föri letipom.” Iei mine Kot a awesi ekewe asor minen lom o atolonga ewe asor än Kraist lon lenier.
HEB 10:10 Pokiten Jesus Kraist a föri mine Kot a mochen pwe epwe föri, kich meinisin sia küna limöch seni tipis pun a eäni asor püsin inisin fän eu chök, nge a naf ngeni fansoun meinisin.
HEB 10:11 Ekewe souasor meinisin ra föri ar angang iteiten rän o eäni asor ekewe chök sokun asor fän chomong. Nge ekei asor resap tongeni amorala än aramas tipis.
HEB 10:12 Nge Kraist a eäni eu chök asor fän iten tipis, eu asor mi manaman tori feilfeilachök. Mürin a mottiu lepelifichin Kot.
HEB 10:13 Seni ena fansoun a witiwit tori Kot epwe anomu chon oputan pwe repwe lenien puun pechen.
HEB 10:14 Pun ren eu chök asor a aunusöchüela chokewe meinisin mi küna limöch seni ar tipis tori feilfeilachök.
HEB 10:15 Iwe, pwal ewe Ngünmifel a pwärätä ngenikich usun ei. Akomwan a apasa,
HEB 10:16 “Iei ewe pwon üpwe föri ngeniir lon ekewe rän repwe feito, iei alon ewe Samol: Üpwe atolonga ai kewe allük lon leluker o makkeretiu lon letiper.”
HEB 10:17 Mürin a apasa, “Ngang üsap chüen chechemeni ar kewe tipis me föför mi ngau.”
HEB 10:18 Iei mine lupwen ar kewe tipis a musala, esap chüen wor lomoten an epwe fis asoren amusamusen tipis.
HEB 10:19 Iei mine ämi pwii kana, esap fokun wor och mine epwe epetikich ach sipwe tolong lon ewe Leni mi Unusen Pin ren chaan Jesus.
HEB 10:20 I a suki ngenikich efoch al mi fö, efoch al mi manau, mi pwerelong pekilan ewe cheech mangaku, wewen iei püsin inisin.
HEB 10:21 Sia eäni eman souasor mi tekia, a nemeni ewe imwen Kot.
HEB 10:22 Iei mine ousipwe arap ngeni Kot ren wenecharen letipach, pwal fän lükülük mi nüküchar, ren letipach mi limöch seni mengiringirin ach tipis, pwal ren inisich mi limelim ren koluk mi limöch.
HEB 10:23 Ousipwe kamwöchünük won ewe apilüköch sia pwärätä, pun Kot ewe mi pwon a allükülük.
HEB 10:24 Ousipwe ekiekifengeni usun ach sipwe tongeni alollolätai chienach ren ach eäni chen me föför mürina.
HEB 10:25 Sisap likiti ach eti ach mwichfengen usun ekoch ra föföri. Nge sipwe fokun apöchökülafengenikich lefilach, pun sia silei pwe Ränin ach Samol a arapoto.
HEB 10:26 Pun are sia chök sopwela le föri tipis mürin ach sia fen silei ewe let, esap chüen wor och asor fänäsengesin ach tipis.
HEB 10:27 Nge sipwe chök witiwit fän niuokus ren ewe Ränin Kapwüng me afeiengauen ewe ekkei epwe arosala chokewe mi ü ngeni Kot.
HEB 10:28 Are ruoman ika ülüman chon pwärätä ra tongeni alletätä pwe eman aramas a tipisin aleasolap ngeni än Moses Allük, epwe chök ninnila, nge esap küna ümöümöch.
HEB 10:29 Oupwe ekieki epwe ifan me watten liwinin tipisin eman aramas mi aitengaua ewe Nöün Kot o aüongaua pinin chaan än Kot we pwon a küna pin ren, a pwal turunufasei ewe Ngünün ümöümöch.
HEB 10:30 Pun sia silei ewe mi apasa, “Üpwe ngeniir chappen ar föför, ngang üpwe liwini ngeniir.” A pwal apasa, “Ewe Samol epwe apwüngü nöün aramas.”
HEB 10:31 A men fokun eniweniw ach turulong lepöün ewe Kot mi manau!
HEB 10:32 Oupwe chechemeni mine a fis ngenikemi me lom. Lon ekewe rän, mürin än Kot saram a tin lomi, oua küna chomong sokun riaföü, nge ousap kuf lon ekewe weires oua tolong lon.
HEB 10:33 Fän ekoch oua küna turunufas me riaföü mwen mesen aramas, nge pwal fän ekoch oua chiechi ngeni chokewe mi tolong lon ekei sokun riaföü.
HEB 10:34 Oua tongäsini chokewe mi nom lon imwen fötek, nge lupwen ra angei pisekimi meinisin fän pöchökül, oua likiti ngeniir fän pwapwa, pun oua silei pwe oua chüen eäni och mi mürina seni, epwe nonomola tori feilfeilachök.
HEB 10:35 Ousap pöütala ämi apilüköch, pun epwe atoto ngenikemi eu liwin mi watte.
HEB 10:36 Oupwe fokun likitü, pwe oupwe föri letipen Kot o angei mine a eäni pwon.
HEB 10:37 Pun a mak lon ekewe Toropwe mi Pin, “Ekis chök fansoun mürin ätewe epwe feito epwe war, esap mang.
HEB 10:38 Ekewe chon pwüng repwe manau ren ar lükü Kot. Nge are eman leir epwe liwinsefäl, ngang üsap pwapwaiti.”
HEB 10:39 Nge kich sisap eti chokewe mi liwinsefäl o pöütmwälila, pwe sia eti chokewe mi lükü o küna manau.
HEB 11:1 Iwe, iei wewen lükü: sia alletätä ekewe mettoch sia apilüküni, sia pwal silei usun mettoch mi wor sisap tongeni küna.
HEB 11:2 Ren ar lükü ekewe aramasen lom ra küna iteüöch me ren Kot.
HEB 11:3 Ren ach lükü sia tongeni weweiti pwe läng me fanüfan ra för ren än Kot kapas, pwe mine sia tongeni küna a fisitä ren mine sisap tongeni küna.
HEB 11:4 Ren än Epel lükü, a eäni ngeni Kot eu asor mi mürina seni än Kain asor. Ren an lükü Kot a alletätä pwe i eman chon pwüng, pun Kot a tipeeu ngeni an lifang kana. Ren än Epel lükülük a chüen afalafal ikenai, inamwo ika a fen mäla.
HEB 11:5 Ren än Enok lükü, a fis pwe esap mäla. Kot a angeatä läng, iei mine esap wor eman a chüen tongeni küna. Pun a mak lon ekewe Toropwe mi Pin, pwe mwen än Enok feitä läng, Kot a pwapwa ren.
HEB 11:6 Esap wor eman a tongeni apwapwai Kot are esap wor an lükü. Pun iö a feito ren Kot epwe fokun lükü pwe mi wor Kot, nge epwe ngeni chokewe mi kütta i liwiniir.
HEB 11:7 Ren än Noa lükü, a rongorong än Kot kapasen fön usun ekewe mettoch repwe fis lon ekewe fansoun repwe feito, nge esamwo tongeni küna. A aleasochisi Kot o föri efoch waimw ia i me chon an famili ra tongeni manau ie. Ren an lükü a pwä pwe fanüfan a tipis. Nge Noa a angei ewe sokun pwüng me ren Kot pokiten an lükü.
HEB 11:8 Ren än Apraham lükü, a aleasochisi Kot lupwen a köri pwe epwe towu seni fanüan o feila ngeni eu fanü Kot a pwon ngeni pwe epwe fanüeni. A feila seni fanüan, nge esap silei ia epwe feila ie.
HEB 11:9 Ren an lükü a nonom lon ewe fanü Kot a pwon ngeni usun eman chon ekis. A nom lon imw mangaku usun chök pwal Isaak me Jakop, ätekewe mi pwal angei ewe chök pwon me ren Kot.
HEB 11:10 Pun Apraham a witiwiti ewe fansoun pwe epwe nom lon ewe telinimw Kot a föri liosun o aüetä, ewe telinimw a wor longolongun esap tongeni tala.
HEB 11:11 Ren än Apraham lükü a wiliti eman sam, inamwo ika a fokun chinlap, pwal Sara a rit. Apraham a lükü Kot an epwe apwönüetä mine a eäni pwon ngeni.
HEB 11:12 Inamwo ika Apraham a usun chök eman mi mäla, seni ei chök eman mwän a wor chomong mwirimwirin usun chomongun ekewe fü, pwal usun chomongun ekewe pien aroset.
HEB 11:13 Ekei aramas meinisin ra mäla lon ar lükülük, nge resap angei ekewe mettoch Kot a pwon ngeniir. Ra küna ekewe mettoch me toau o ra pwapwa rer. Ra pwärätä mwen mesen aramas pwe ir chon ekis me choisä won fanüfan.
HEB 11:14 Chokewe mi apasatä ei sokun kapas ra afatafichi, pwe ir ra kütta eu fanü repwe tongeni fanüeni.
HEB 11:15 Resap ekieki ewe fanü ra likitala, pun ika repwe ekieki usun, epwe wor fansoun ar repwe liwinsefäl ngeni.
HEB 11:16 Nge ra ösüküsükü eu fanü mi mürina seni, ewe fanü mi nom läng. Iei mine Kot esap säwäsiniir ar repwe aita ngeni i ar Kot, pun a amolätä eu telinimw fän iter.
HEB 11:17 Ren än Apraham lükü, a eäni asor Isaak nöün we, lupwen Kot a sotuni. Apraham, ätewe Kot a eäni ewe pwon ngeni, nge a fen molotä an epwe eäni asor nöün we aleman,
HEB 11:18 inamwo ika Kot a fen üreni, “Mwirimwirum epwe chök seni Isaak, usun üa fen pwon ngonuk.”
HEB 11:19 Apraham a apilükülükü pwe Kot a tongeni amanauasefäli Isaak seni mäla. Iwe, sia tongeni apasa, pwe Apraham a angesefäli Isaak seni mäla.
HEB 11:20 Ren än Isaak lükü, a eäni pwon ngeni Jakop me Esau pwe repwe feiöch lon ekewe fansoun repwe feito.
HEB 11:21 Ren än Jakop lükü, a afeiöchü nöün Josef kewe ät me mwen an epwe mäla. Iwe, a itetiu won wokun we o fel ngeni Kot.
HEB 11:22 Ren än Josef lükü, a kapas usun än chon Israel towu seni Isip o amwirimwir ngeniir usun mine repwe föri ngeni chün, lupwen an fetal ngeni an epwe mäla.
HEB 11:23 Ren än semen me inen Moses lükü, ra aopala Moses lon ükükün ülüngat maram mürin an uputiu, pun ra küna pwe i eman mönükol mi äteöch, resap pwal niuokusiti än ewe king allük.
HEB 11:24 Ren än Moses lükü, esap mochen an epwe iteni nöün nöün ewe king föpwül lupwen an mwän.
HEB 11:25 A filätä an epwe eti nöün Kot kewe aramas le riaföü, lap seni an epwe pwapwaiti tipis lon ekis chök fansoun.
HEB 11:26 A ekieki pwe an küna itengau fän iten ewe Mesaia a aüchea seni wöün Isip, pun a nenengeni ewe liwin epwe angei me mürin.
HEB 11:27 Ren än Moses lükü, a likitala Isip, nge esap niuokusiti än ewe king song. Moses a chök likitü, pun usun chök nge a küna ewe Kot sisap tongeni küna.
HEB 11:28 Ren an lükü a föri ewe Pasofer o a allük pwe repwe äsupu chaan ewe mönün asor ngeni penkasamen imwer, pwe ewe chon läng mi ni aramas esap niela mwänichien nöün ekewe chon Israel.
HEB 11:29 Ren än ekewe chon Israel lükü, ra tolong o fetalela epek ewe Setipar usun chök ar fetal won fanü mi pwasapwas. Nge lupwen ekewe chon Isip ra sotuni ar repwe föri iei usun, ewe sät a amopuretiu.
HEB 11:30 Ren än ekewe chon Israel lükü ewe tittin Jeriko a turutiu mürin ar karisfeil ünükün lon ükükün fisu rän.
HEB 11:31 Ren än ewe fin lisowu Rahap lükü, i esap ninnila usun chokewe mi aleasolap ngeni Kot, pun a etiwa ekewe chon Israel mi operi ewe fanü.
HEB 11:32 Iwe, met üpwe sopwela le pworaus won? Esap naf fansoun ai üpwe kapas usun Kition, Parak, Samson, Jefta, Tafit, Samuel me ekewe soufos.
HEB 11:33 Ren ar lükü ra maun ngeni ekewe mwü o pworaitiir. Ra föri met mi pwüng o angei mine Kot a pwon ngeniir. Ra pinei awen ekewe laion
HEB 11:34 o kunuela ekkei mi fokun sarara, ra sü seni ar repwe ninnila ren ketilas. Ra apwangapwang, nge ra pöchökületä, ra pwora lon maun o akufu ekewe mwichen sounfiun chon ekis.
HEB 11:35 Ren än ekewe fefin lükü, ra angesefäli aramaser kewe mi mäla mürin ar manausefäl. Nge pwal ekoch aramas resap tipeeu ngeni ar repwe ngasala, iei mine ra mäla pokiten aramas ra fokun ariaföüür, pwe repwe manausefäl ngeni eu sokun manau mi fokun mürina.
HEB 11:36 Ekoch ra küna turunufas me wichiwich, nge pwal ekoch ra föfö o koturulong lon imwen fötek.
HEB 11:37 Ra mäla ren ar monei ngeniir fau, ren ar ngerefeseni inisiir, pwal ar niirela ren ketilas. Ra fetalfeil fän üfer seni ünüchen sip ika kuuch, ra mwelele, aramas ra ariaföüür o aweiresiir.
HEB 11:38 Fanüfan esap eu leni mi öch fän iter. Ra süsüfeil lon ekewe fanüapö pwal won ekewe chuk, ra nom lon ekewe föimw me ekewe pwang fän pwül.
HEB 11:39 Ekei aramas meinisin ra fokun iteüöch ren ar lükü, nge resap angei mine Kot a pwon ngeniir,
HEB 11:40 pun Kot a akota och mi fokun mürina fän itach, pwe repwe chök tongeni unusöchüla lupwen kich sipwe unusöchüla.
HEB 12:1 Pokiten a fen wor rech eu watten mwichen chon pwärätä ar lükü ra pwelifeilikich, iei mine ousipwe likitätiu mettoch meinisin mi epetikich, pwal sokun tipis mi alikafifikich, nge sipwe tipeppos le sä lon ewe kitir mi nom mwach.
HEB 12:2 Ousipwe chök nenengeni Jesus ewe chon popuetä me chon awesala ach lükülük. Esap fangatä pokiten ewe iräpenges, nge fänäsengesin ewe pwapwa mi nom mwan esap ekieki itengauen an mäla won ewe iräpenges. Iwe, iei a mottiu lepelifichin Kot.
HEB 12:3 Oupwe ekieki usun watten an riaföü pokiten ekewe chon tipis mi oput i! Iei mine ousap apilükingau o fangatä.
HEB 12:4 Pun lon ämi fiu ngeni tipis ousamwo üpöchökül tori ewe aükük pwe oupwe ninnila.
HEB 12:5 Ifa usun, oua manlükala ekewe kapasen apöchökül Kot a ürenikemi pokiten ämi nöün kana? “Nei, kosap aücheangauei än ewe Samol kapasen fön, Kosap apilükingau lupwen a amirituk.
HEB 12:6 Pun ewe Samol a fönöü iö a echeni, a fokun apwüngü meinisin i a etiweer pwe nöün.”
HEB 12:7 Oupwe likitü fän ewe riaföü a torikemi usun än sememi apwüngükemi. Kot a föri ngenikemi usun mine a föri ngeni nöün kana. Ifa usun, mi wor eman nau saman esap apwüngü?
HEB 12:8 Are Kot esap apwüngükemi usun an apwüngü nöün kana meinisin, wewen ämi ousap wesewesen nöün, pwe ämi upun leroch.
HEB 12:9 Ina chök usun samach lon pekin fituk, ra apwüngükich, nge kich sia meninitiir. Epwe ifan me watten ach sipwe aleasochisi Samach we lon pekin ngünüch o manau!
HEB 12:10 Samach kana lon pekin fituk ra apwüngükich lon fansoun mochomoch, usun ra ekieki pwe a pwüng. Nge Kot a ekieki ach feiöch lupwen a apwüngükich, pwe sipwe eäni an pin.
HEB 12:11 Lupwen Kot a apwüngükich usun itä nge sia mefi lon ewe otun pwe och mettoch sia letipeta ren, nge sisap pwapwa. Nge mürin chokewe mi angei ei sokun apwüng repwe manaueni eu manauen kinamwe me pwüng.
HEB 12:12 Iei mine oupwe apöchökülätä pöümi me pwäsukumi kana mi apwangapwang.
HEB 12:13 Oupwe awenechara ekewe al oupwe fetal won, pwe ekewe chon pechemä resap apwangapwangala, nge repwe pöchökülela.
HEB 12:14 Oupwe achocho ngeni ämi oupwe kinamwefengen me aramas meinisin, oupwe pwal achocho ngeni ämi oupwe manaueni eu manau mi pin, pun esap wor eman epwe küna ach Samol are esap pin.
HEB 12:15 Oupwe tümwünüfichikemi pwe esap wor eman leimi epwe kul seni än Kot ümöümöch. Esap pwal wor eman epwe usun chök efoch irä maras mi märitä o afisätä chomong fitikoko, pwe chomong repwe limengau ren.
HEB 12:16 Esap pwal wor eman epwe föri föförün lisowu ika sufölingau ngeni Kot usun chök Esau, pun a amömöla wisan wisen mwänichi ren eu chök mongö.
HEB 12:17 Iwe, oua silei pwe a mochen angei feiöchün me ren saman me mürin, nge esap chüen tongeni angei. Esap chüen küna efoch alen an epwe siwilisefäli mine a fen föri, inamwo ika a kütta ewe feiöch fän chönün mesan.
HEB 12:18 Ämi ousap feito ngeni eu chuk oua tongeni atapa, ousap feito ngeni ewe chuk Sinai mi ngetenget ren ekkei, mi rochopwak me toputop me mölümöl,
HEB 12:19 ren tikimongun rappwa me eu möngüngü. Lupwen ekewe aramasen Israel ra rongorong ewe möngüngü, ra tüngor pwe resap chüen rongorong pwal eu kapas,
HEB 12:20 pun resap tongeni etiwa ewe allük a apasa, “Ikamwo eman man epwe tori ewe chuk, epwe fokun momon ngeni fau tori an epwe mäla.”
HEB 12:21 Mine ekewe aramas ra küna a fokun eniweniw, pwe Moses a apasa, “Ngang üa chechech ren ai niuokus.”
HEB 12:22 Nge ämi oua feito ngeni ewe Chuk Sion, pwal ngeni ewe telinimwen ewe Kot mi manau, ewe Jerusalem mi nom läng fiti ngeröün chon läng.
HEB 12:23 Oua feito ren ewe mwichen souläng mi usun chök nöün Kot kewe mwänichi, ra chufengen fän pwapwa, iter a mak lon läng. Oua feito ren Kot ewe soukapwüng fän iten aramas meinisin, pwal ren ngünün ekewe chon pwüng mi unusöch.
HEB 12:24 Oua feito ren Jesus ewe chon afförün eu pwon mi fö, pwal ren ewe cha ra aea le käsup, a eäni kapas mürina seni chaan Epel.
HEB 12:25 Iwe, oupwe tümwünüfichi pwe ousap oput ätewe mi kapas. Chokewe mi oput ätewe mi aronga än Kot kapas won fanüfan, resap tongeni sü seni liwiningauen ar tipis. Are epwe iei usun, epwe ifan me watten ewe liwiningau sipwe küna, are sia kul seni ewe mi kapas seni läng.
HEB 12:26 An möngüngü a achechecha fanüfan lon ena fansoun, nge iei a pwon, “Pwal fän eu üpwe achechecha fanüfan, nge sap fanüfan chök pwe pwal läng.”
HEB 12:27 Ewe kapas “pwal fän eu” a pwärätä pwe ekewe mettoch mi för repwe chechech o morola, pwe ekewe mettoch resap tongeni chechech repwe nonomola.
HEB 12:28 Iei mine ousipwe kilisou, pun sia mwüni eu mwü esap tongeni siwil. Ousipwe kilisou o fel ngeni Kot fän suföl me menin lon eu lapalap i epwe pwapwa ren,
HEB 12:29 pun ach Kot a wesewesen eu ekkei mi fokun afeiengau.
HEB 13:1 Oupwe sopwela le tongfengen lefilemi, pun ämi pwipwi lon Kraist.
HEB 13:2 Oupwe chechemeni ämi oupwe etiwa chon ekis lon imwemi. Pun mi wor ekoch aramas mi föri iei usun, ra etiwa chon läng, nge resap silei.
HEB 13:3 Oupwe chechemeni chokewe mi nom lon imwen fötek, usun chök itä nge oua etiir le nom lon imwen fötek. Oupwe pwal chechemeni chokewe mi küna riaföü, usun chök nge itä oua püsin nom lon ewe riaföü.
HEB 13:4 Aramas meinisin repwe aücheani pwüpwülü. Ekewe mi pwüpwülü resap kirikiringaufengen lefiler, pun Kot epwe apwüngü chokewe mi lisowu ngeni mi lipich, pwal chokewe mi lisowu ngeni mi pwüpwülü.
HEB 13:5 Oupwe afälikemi pwe ousap manaueni eu manauen mochenian moni, nge oupwe menemenöch ren mine oua eäni. Pun Kot a apasa, “Ngang üsap fokun likituk, üsap pwal tümwününgau ngonuk.”
HEB 13:6 Iei mine sipwe tongeni apasa fän apilükülüköch, “Ewe Samol i ai Soualilis, üsap fokun niuokus, met aramas repwe tongeni föri ngeniei?”
HEB 13:7 Oupwe chechemeni ämi souemwen me lom, chokewe mi afalafalakemi kapasen Kot. Oupwe ekieki usun nonomur, pwal usun ar mäla, pwe oupwe apirü ar lükülük.
HEB 13:8 Jesus Kraist usun ewe chök lom, ikenai tori feilfeilachök.
HEB 13:9 Ousap mwüt ngeni sokopaten afalafal mi mwäl repwe atokakemi seni ewe al mi pwüng. A fokun mürina ngenikemi pwe letipemi epwe pöchökül ren än Kot ümöümöch, nge sap ren ämi aleasochisi ekewe allük usun mongö. Chokewe mi aleasochisi ekei allük resap angei ar feiöch seniir.
HEB 13:10 Ekewe souasor mi angang lon ewe imwenfel seni mangaku esap wor ar pwüng ar repwe mongö seni ewe asor mi nom won ach rongen asor.
HEB 13:11 Ewe Souasor mi Lap a uwato chaan ekewe mönün asor lon ewe Leni mi Unusen Pin, pwe epwe eäni asor fän iten amusamusen tipis, nge inisin ekewe man ra kek lükün ewe leni ia ekewe aramas ra nom ie.
HEB 13:12 Iei popun Jesus a pwal mäla lükün ewe telinimw, pwe epwe apini ekewe aramas ren püsin chaan.
HEB 13:13 Iei mine ousipwe feila ren lükün ewe leni ia ekewe aramas ra nom ie, pwe sipwe eti i lon an itengau.
HEB 13:14 Pun esap wor ach lenien wilipos ikei won fanüfan, pwe sia kütta ewe leni a souni kich me mürin.
HEB 13:15 Iei mine ousipwe mwareiti Kot fansoun meinisin pwe iei ach asor ngeni ren Jesus. Iei ewe asor sia eäni ren tinawach, lupwen sia pwärätä pwe Jesus ach Samol.
HEB 13:16 Ousap manlükala ämi oupwe föri föför mi öch o alilisfengen lefilemi, pun ena sokun asor Kot a pwapwa ren.
HEB 13:17 Oupwe aleasochisi nöümi kewe souemwen o föri mine ra allük ngenikemi. Ra mamasa ngünümi fansoun meinisin, pun ra wisen pwäri ngeni Kot usun mine ra föri lon ar angang. Are oua aleasochisiir, repwe föri ar angang fän pwapwa, nge are oua lükümach, repwe föri ar angang fän letipeta. Ren ei ousap feiöch ren.
HEB 13:18 Oupwe sopwela le iotek fän item. Sia silei, pwe mwelien letipem a limelimöch, pun sia fokun mochen föri mine a pwüng fansoun meinisin.
HEB 13:19 Üa fokun tüngormau ngenikemi, pwe oupwe iotek pwe Kot epwe müttir tinsefälieila remi.
HEB 13:20 Iwe, ewe Koten kinamwe mi amanauasefäli ach Samol Jesus seni mäla ren chaan ewe pwon mi nom tori feilfeilachök, i ewe Chon Masen sip mi fokun tekia,
HEB 13:21 epwe atufichikemi ren mettoch meinisin mi mürina, pwe oupwe föri letipan. Epwe föri loch ren Jesus Kraist mine i epwe pwapwa ren. Kraist epwe ling tori feilfeilachök! Amen.
HEB 13:22 Ämi pwii kana, üa fokun tüngor ngenikemi, pwe oupwe rongorong ngeni ekei kapasen apöchökül fän tipeppos. Pun ei toropwe üa makkei ngenikemi esap langatam.
HEB 13:23 Üa mochen ämi oupwe silei pwe pwiich we Timoty a fen musowu seni imwen fötek. Are epwe müttir feito, i epwe etiei lupwen üpwe feila churikemi.
HEB 13:24 Äm kapong ngeni nöümi kewe souemwen meinisin, pwal ngeni nöün Kot kewe aramas meinisin. Pwiimi kewe souläng seni Itali ra pwal kapong ngenikemi.
HEB 13:25 Än Kot ümöümöch epwe nonom remi meinisin.
JAM 1:1 Ngang James, eman nöün Kot me ach Samol Jesus Kraist chon angang, üa kapong ngeni ekewe engol me ruu ainang mi toropasfeil won unusen fanüfan.
JAM 1:2 Ämi pwii kana, oupwe fokun ekiekin pwapwa lupwen oupwe tolong lon sokopaten sosot,
JAM 1:3 pun oua silei pwe mine a sotuni ämi lükülük a afisätä ämi tipeppos.
JAM 1:4 Iwe, ämi tipeppos epwe chöchöla lon föförümi meinisin, pwe oupwe mirit o unusöchüla, nge ousap osun och mettoch lon manauemi.
JAM 1:5 Nge are eman leimi a osun tipachem, epwe tüngor ngeni Kot, iwe, i epwe fang ngeni, pun Kot a fangafangöch ngeni aramas meinisin, nge esap laleiti eman.
JAM 1:6 Nge lupwen epwe tüngor, epwe tüngor fän lükülük, nge esap tipemwaramwar. Pun eman mi tipemwaramwar a wewe ngeni eu noon lematau, a mwökütüküt o nono ren asepwäl.
JAM 1:7 Ei sokun aramas esap ekieki pwe epwe angei och seni ach Samol,
JAM 1:8 pun i eman aramas mi tipekinikin, a wiliwilikis lon an föför meinisin.
JAM 1:9 Eman souläng mi wöüngau epwe fokun pwapwa lupwen Kot epwe atekiatä.
JAM 1:10 Nge eman souläng mi pisekisek epwe fokun pwapwa lupwen Kot epwe atekisonatiu. Pun ekewe chon pisekisek repwe mwor usun epö pön irän lemäl a mworotiu.
JAM 1:11 Pun akkar a tötä fiti pwichikaran o a keni ewe irä, pwe pön ewe irä a mworotiu o lingan a tala. Ina usun ewe mwän mi pisekisek epwe müch manauan lon an föri an kewe angang.
JAM 1:12 A feiöch eman aramas mi tipeppos lon sosot, pun are epwe mokos lon ewe sosot, epwe angei ewe mwärin manau Kot a pwon ngeni chokewe mi echeni i.
JAM 1:13 Are eman aramas a tolong lon sosot, esap fokun apasa, “Ei sosot a feito seni Kot.” Pun Kot esap tongeni küna sosotingau, i esap pwal sotuningauei eman.
JAM 1:14 Nge eman me eman aramas a tori sosotun ren püsin an mochenia mi atekini o pani letipan.
JAM 1:15 Iwe, are än eman mochenia a liapeni letipan, a fis an tipis, nge are an tipis a unusela, a fis an mäla.
JAM 1:16 Ämi pwii kana mi achengicheng, ousap tupula!
JAM 1:17 Lifang mi mürina meinisin me feiöch mi unusöch meinisin ra feitiu seni läng, ra feitiu seni ewe Sam mi föri ekewe Saram lon läng, ewe esap siwil, esap pwal fis rochopwak ren an kul.
JAM 1:18 Ren püsin letipan a afisikich ren ewe kapas mi let, pwe sipwe nöün mwänichi lein förian kana meinisin.
JAM 1:19 Ämi pwii kana mi achengicheng, oupwe chechemeni ei: Aramas meinisin repwe müttir ngeni rong, mang ngeni kapas pwal mang ngeni song,
JAM 1:20 pun än aramas song esap apwönüetä ewe pwüng Kot a mochen.
JAM 1:21 Iei mine oupwe likitätiu sokun limelimengau me sokun föföringau meinisin. Oupwe atekisonakemi mwen mesen Kot o oupwe etiwa ewe kapas a fot lomi, a tongeni amanauakemi.
JAM 1:22 Oupwe chon föri kapasen Kot, nge ousap chon rong chök, pwe ousap püsin atupukemi.
JAM 1:23 Are eman a rong ewe kapas, nge esap föri, a wewe ngeni eman aramas mi ori lon eu kilas o a küna lapalapen inisin.
JAM 1:24 Mürin an küna püsin inisin, a feila o müttir manlükala lapalapen inisin.
JAM 1:25 Nge eman mi likitü le nenelong lon ewe allük mi unusöch, ewe a angasakich, o sopwela le föri ei, nge esap manlükala rongean, pwe a apwönüetä pwüngün, ei aramas epwe feiöch lon met a föri.
JAM 1:26 Are eman a ekieki pwe i eman souläng, nge esap nemeni chönawan, ewe aramas a püsin atupu i, nge an souläng a lomotongau.
JAM 1:27 Än eman souläng limöch me pwüng mwen mesen Samach Kot a fis are epwe iei usun: epwe tümwünü ekewe mi mäsen me ekewe fefin mi mä pwülüer lon ar riaföü, epwe pwal püsin tümwünü i, pwe esap limengau ren ngauen ei fanüfan.
JAM 2:1 Ämi pwii kana, ämi chon lükü ach Samol Jesus Kraist, ewe Samol mi ling, ousap lifilifil aramas pokiten chök lapalapen inisiir me lükün.
JAM 2:2 Are eman aramas mi pisekisek a feito lon ämi mwich fän nöün ring seni kolt, pwal fän üfan mi lingöch, nge eman aramas mi wöüngau a pwal feito fän üfan mi mesingau,
JAM 2:3 nge are oua pwärala ämi meniniti ewe aramas mi üföüf üf mi lingöch o oua üreni, “Kopwe mottiu ikei won ei lenien mot mi mürina”, nge oua üreni ewe aramas mi wöüngau, “Kopwe ütä ikenan”, ika “Kopwe mottiu ikei arun pechei”,
JAM 2:4 mürin oua tipis ren ämi lifilifil aramas lefilemi, pwal ren ämi longuni pwüngün ämi apwüng won ekiek mi ngau.
JAM 2:5 Ämi pwii kana mi achengicheng, oupwe aüseling! Ifa usun, Kot esap filätä ekewe aramas mi wöüngau won ei fanüfan pwe repwe pisekisek lon ar lükülük o feiöchüni feiöchün ewe Mwün Kot, i a pwon ngeni chokewe mi echeni?
JAM 2:6 Nge ämi oua asäwa ekewe mi wöüngau. Ifa usun, esap ekewe chon pisekisek ir ekewe mi ariaföüükemi o atekinikemiila mwen ekewe soukapwüng?
JAM 2:7 Ifa usun, esap pwal ir chokewe mi turunufasei ewe it mi mürina a föü womi?
JAM 2:8 Oua föri mine a pwüng are oua aleasochis ngeni allükün ewe Mwün Kot mi mak lon ekewe Toropwe mi Pin, “Kopwe echeni chon arum usun püsin om echenuk.”
JAM 2:9 Nge are oua lifilifil aramas ren chök lapalapen inisiir me lükün, oua tipis, pun ewe Allük a atipisikemi pwe oua chon atai allük.
JAM 2:10 Pun iö a apwönüetä ekewe allük meinisin, nge a atai eu chök kewe allük, ätewe a tipisin atai ekewe allük meinisin.
JAM 2:11 Pun ewe eman mi apasa, “Kosap lisowu”, a pwal apasa, “Kosap niela aramas”. Inamwo ika kosap lisowu, nge ka niela aramas, ka eman chon atai allük.
JAM 2:12 Iei mine oupwe kapas o föri sokun föför usun chök aramas repwe küna kapwüng ren ewe allük mi angasakichela.
JAM 2:13 Pun Kot esap eäni tong ngeni eman aramas esap eäni tong, lupwen a apwüngü. Pun tong a win lon kapwüng.
JAM 2:14 Ämi pwii kana, met lomoten are eman aramas a apasa pwe a wor an lükülük, are an föför esap alletätä? Ifa usun, ei sokun lükülük epwe tongeni amanaua i?
JAM 2:15 Are mi wor pwiich souläng are fefinach souläng esap wor üfer, esap pwal naf aner mongö,
JAM 2:16 nge eman me leimi epwe üreniir, “Oupwe feila fän kinamwe. Oupwe aüföüfakemi o amongökemi!” nge ousap ngeniir mine ra osupwang ren lon manauen inisiir, met chök lomoten ämi afeiöchüür?
JAM 2:17 Ina chök usun ren lükülük. Are epwe wor chök ämi lükülük, nge esap fiti föför, a mäla ämi lükülük.
JAM 2:18 Nge eli eman epwe üra, “En ka eäni lükülük, nge ngang üa eäni föför.” Pölüan me rei, “Kopwe pwäri ngeniei om we lükülük ese fiti föför, nge ngang üpwe pwäri ngonuk ai lükülük mi fiti föför.”
JAM 2:19 Ifa usun, ka lükü pwe mi wor eman chök Kot? A öch om lükü. Ekewe anün rochopwak ra pwal lükü, nge ra chechech ren niuokus.
JAM 2:20 Ka umwes! Ifa usun, ka mochen än eman epwe alletätä ngonuk, pwe lükülük ese fiti föför a mä?
JAM 2:21 Ifa usun, ach we lewo Apraham esap küna pwüng me ren Kot ren an föför, lupwen a eäni asor Isaak nöün we won ewe rongen asor?
JAM 2:22 Ka küna pwe an lükülük me an föför ra angangfengen, nge an lükülük a unusöchüla ren an föför.
JAM 2:23 Iwe, mine a mak lon ekewe Toropwe mi Pin a pwönüetä, “Apraham a lükü Kot, nge pokiten an lükü a küna pwüng me ren Kot”. Iei mine Apraham a iteni “Chiechien Kot”.
JAM 2:24 Iei usun oua küna pwe eman aramas a küna pwüng me ren Kot ren an föför, sap ren an lükülük echök.
JAM 2:25 Ina chök usun ren ewe fin lisowu Rahap. Neminei a küna pwüng me ren Kot ren an föför, lupwen a etiwa ekewe chon Israel mi operi ewe fanü o alisiir pwe repwe süla won pwal efoch al.
JAM 2:26 Pun usun eu inis a mäla are ewe ngün esap nom lon, pwal iei usun ewe lükülük a mäla are ese fiti föför.
JAM 3:1 Ämi pwii kana, esap chomong me leimi repwe wiseni ewe wisen sense, pun oua silei pwe kich mi wiseni wisen sense sipwe küna kapwüng mi fokun chou lap seni ekewe ekoch.
JAM 3:2 Kich meinisin sia mwälila fän chomong. Nge are eman aramas esap fokun mwälila won mine a apasa, i eman mi unusöch, a pwal tongeni püsin nemeni unusen inisin.
JAM 3:3 Lupwen sia uwalong efoch mächä lon awen eman oris pwe epwe aleasochis ngenikich, sia tongeni emwenala ia sia mochen epwe feila ie.
JAM 3:4 Sipwe eäni awewe efoch sip. Inamwo ika a fokun watte ewe sip o asepwäl mi pöchökül a afetala, nge eman pölü a kasini ren efoch kasi mi kükün o emwenala ia a mochen epwe feila ie.
JAM 3:5 Iei usun pwal ren chönawach. A chök eu kükün kifetin inisich, nge a tongeni sikesik won mettoch mi lapalap. Oupwe ekieki usun eu kükün ngeten ekkei a tongeni kenala eu wöllap mi watte.
JAM 3:6 Iwe, chönawach a pwal usun chök eu ekkei, och mettoch mi ngau lein ekewe kifetin inisich. A alimengaua unusen inisich o küri föförün manauach ren ewe ekkei mi feito seni hell.
JAM 3:7 Aramas ra tongeni afesira ekewe sokopaten man meinisin, ekewe manmwacho me ekewe mansüsü, ekewe mantötö me ekewe mönün leset.
JAM 3:8 Nge esap wor eman a tongeni afesira chönawen eman aramas. Iei och mettoch mi ngau, esap wor an asösö, a uren poison mi afeiengau.
JAM 3:9 Pun ren chönawach sia mwareiti ach Samol, i Samach, nge ren chönawach sia pwal otteki aramas, ir chokewe mi för lon lapalapen Kot.
JAM 3:10 Iotek me ottek ra towu seni eu chök aw. Ämi pwii kana, esap öch pwe epwe iei usun!
JAM 3:11 Ifa usun, koluk mi annö me koluk mi maras ra tongeni pupuwu seni eu chök puächen koluk?
JAM 3:12 Ämi pwii kana, efoch irä fiik esap tongeni uani uän olif, nge efoch irän wain esap tongeni uani uän fiik. Ina usun eu puächen koluk mi maras esap tongeni apupuwu koluk mi annö.
JAM 3:13 Iö leimi a ekieki pwe a tipachem o mirit? Epwe alletätä ren an manaueni eu manau mi mürina me an föför mürina a föri fän tipetekison me tipachem.
JAM 3:14 Nge are a wor lon letipemi lolowo me ekieki chök püsin ämi, ousap sikäsini ämi tipachem, ousap pwal amamäsini ewe let.
JAM 3:15 Ena sokun tipachem esap feitiu seni läng, nge a feito seni fanüfan, seni pekin fituk, pwal seni anün rochopwak.
JAM 3:16 Pun ia a wor ie lolowo me ekieki chök en me püsin an, ikenan a pwal wor kotongau me sokun föför mi ngau meinisin.
JAM 3:17 Nge ewe tipachem seni läng a fokun limelimöch, a pwal akinamwe, tipepwetete me kirikiröch, a uren tong o awora chomong föför mi mürina, esap lifilifil aramas, esap pwal atuputup.
JAM 3:18 Ekewe chon afisätä kinamwe mi fofot fän kinamwe repwe kini ewe uän pwüng.
JAM 4:1 Ia ra feito me ie fiu me anini lefilemi? Resap feito seni ämi mochenia kana mi fiufengen lon letipemi?
JAM 4:2 Oua mochen mettoch, nge esap torikemi. Oua ninni o mochenia, nge ousap tongeni angei met oua mochen. Oua anini o fiu. Ousap eäni mine oua mochen, pun ousap tüngor seni Kot.
JAM 4:3 Nge lupwen oua tüngor, ousap angei och, pun oua tüngor fän ämi ekiek mi ngau, pwe oupwe asolapa lon ämi mocheniangau.
JAM 4:4 Ämi aramas mi kirikiringau! Ousap silei pwe chiechi ngeni fanüfan wewen fiu ngeni Kot? Iö a mochen chiechi ngeni fanüfan, i ewe aramas mi fiu ngeni Kot.
JAM 4:5 Ousap ekieki pwe a lomotongau mine a mak lon ekewe Toropwe mi Pin, “Ewe ngün Kot a anomu loch a fokun ekimong woch.”
JAM 4:6 Nge Kot a awattei ngenikich an ümöümöch. Iei mine a mak lon ekewe Toropwe mi Pin, “Kot a ü ngeni ekewe chon lamalamtekia, nge a ümöümöch ngeni ekewe chon tipetekison.”
JAM 4:7 Iei mine oupwe aleasochisi Kot. Oupwe ü ngeni Tefil, iwe, epwe sü senikemi.
JAM 4:8 Oupwe arap ngeni Kot, iwe, epwe arap ngenikemi. Oupwe limeti pöümi, ämi chon tipis kana, oupwe limeti lelukemi, ämi chon tipekinikin kana.
JAM 4:9 Oupwe letipeta, oupwe kechü o ngüngüres. Oupwe siwili ämi takir ngeni kechü, pwal ämi pwapwa ngeni lolilen!
JAM 4:10 Oupwe püsin atekisonakemi mwen mesen ach Samol, iwe, i epwe atekiakemiitä.
JAM 4:11 Ämi pwii kana, ousap aitengauafengenikemi lefilemi. Iö a aitengaua eman pwiin souläng ika apwüngü, a aitengaua o apwüngü ewe Allük. Are ka apwüngü ewe Allük, mürin kosap chüen eman chon aleasochis ngeni, nge ka eman chon apwüngü ewe Allük.
JAM 4:12 Kot echök ewe mi föri ewe Allük, pwal i ewe souapwüng. I chök a tongeni amanaua o afeiengaua aramas. Nge en iö, pwe kopwe apwüngü chon arum?
JAM 4:13 Oupwe aüselingaei, ämi mi apasa, “Ikenai ika lesor sipwe feila lon enan telinimw. Ikenan sipwe nonom eu ier, sipwe föri ach angangen amömö o angei winnach.”
JAM 4:14 Ämi ousap fen mwo nge silei met epwe fis ngeni manauemi lesor. Pun manauemi a usun chök eu ötüöt mi pwä lon ekis chök fansoun mochomoch, mürin esap chüen nom.
JAM 4:15 Iwe, iei usun mine oupwe apasa, “Are a fän letipen ach Samol, sipwe manau o föri ei ika enan.”
JAM 4:16 Nge iei oua lamalamtekia o sikesik. Ämi sikesik meinisin a ngau.
JAM 4:17 Iei mine eman aramas mi silei mine a mürina, nge esap föri, a tipis.
JAM 5:1 Iwe, iei oupwe aüselinga, ämi aramas mi pisekisek! Oupwe kechü o ngüngüres usun ekewe riaföü repwe torikemi.
JAM 5:2 Pisekimi ra kiroula, nge pwötür ra äni üfemi.
JAM 5:3 Ämi kolt me silifer ra parangela, nge ei parang epwe atipisikemi o änala fitukemi usun chök än ekkei kenala mettoch. Oua achukuchukatä pisekimi lon ekei ränin lesopolan.
JAM 5:4 Ousap ngeni ekewe chon angang mi angang ngeni ämi kewe mälämäl liwinin ar angang. Oupwe aüseling ngeni ar lalangau! Än ekewe chon kini ämi kewe räs siöngau a tori selingen Kot, ewe Samol mi Unusen Manaman.
JAM 5:5 Oua manaueni eu manau mi fokun mecheres won ei fanüfan, oua pwal eäni pwapwan fanüfan. Oua püsin föri met oupwe kitinup ren fän iten ewe ränin ninnila.
JAM 5:6 Oua atipisi o niela ekewe aramas esap wor ar tipis, nge ir resap ü ngenikemi.
JAM 5:7 Iei mine ämi pwii kana, oupwe mosonotam tori ach Samol epwe war. Oupwe nenengeni usun än eman chon tanipi mosonotam le witiwiti pwe fanüan epwe awora ua mi fokun aüchea. A mosonotam le witiwit an epwe püngütiu ewe üten leräs me üten lefeng.
JAM 5:8 Iei usun pwal ämi, oupwe mosonotam o anüküchara letipemi, pun waren ach Samol a arapoto.
JAM 5:9 Ämi pwii kana, ousap lalefengen lefilemi, pwe Kot esap apwüngükemi. Ewe Soukapwüng a ütä arun asam.
JAM 5:10 Ämi pwii kana, oupwe chechemeni ekewe soufos mi kapas fän iten ach Samol. Oupwe eäniir lenien apirü lon ar mosonotam me likitü fän ekewe riaföü.
JAM 5:11 Sia apasa pwe ir chon feiöch pokiten ar likitü. Oua rongorong usun än Hiop likitü, oua pwal silei met ach Samol a amolätä fän itan lesopolan. Pun ach Samol a uren kirikiröch me tong.
JAM 5:12 Ämi pwii kana, mwen mettoch meinisin, ousap pwon fän akapel. Ousap ö: pölü läng ika fanüfan ika och mettoch. Are oua apasa “Ewer”, epwe enletin ewer, nge are oua apasa “Apw”, epwe enletin apw, pwe ousap tolong lon än Kot kapwüng.
JAM 5:13 Iö me leimi a nom lon weires? Epwe iotek. Iö me leimi a pwapwa? Epwe kölün mwareiti Kot.
JAM 5:14 Iö me leimi a samau? Epwe titi ekewe souakomwen mwichefel, pwe repwe iotek won o epiti ngeni lö seni föün olif fän iten ach we Samol.
JAM 5:15 Iwe, ei iotekin lükülük epwe apöchöküla ewe chon samau. Ach Samol epwe apwäki, nge ekewe tipis a föriir repwe musala.
JAM 5:16 Iei mine oupwe pwärifengeni ämi tipis kana, eman ngeni eman o iotekifengenikemi, pwe oupwe pöchökületä. Än eman chon pwüng iotek a manaman o a fokun pwönüetä.
JAM 5:17 Elias eman aramas usun chök kich. A tiliken lon an iotek pwe esap püng üt, iwe, esap püngütiu üt lon ükükün ülüngat esop ier won ewe fanü.
JAM 5:18 Mürin a pwal ioteksefäl, iwe, läng a apüngatiu üt o ewe fanü a awora uän irä.
JAM 5:19 Ämi pwii kana, are eman me leimi epwe tokola seni mine a let, nge eman epwe aliwinisefäli,
JAM 5:20 oupwe chechemeni ei: Iö a aliwinisefäli eman chon tipis seni alan mi mwäl, epwe amanaua ewe chon tipis seni mäla o epwe pwölüela chomong tipis.
1PE 1:1 Ngang Petrus nöün Jesus Kraist we soukünö, üa kapong ngeni nöün Kot kewe aramas mi fil, ir choisä mi toropasfeil lon ekewe fanü Pontus, Kalatia, Kapatosia, Asia me Petinia.
1PE 1:2 Ämi oua fil me ren Samach Kot, pun iei usun letipan, Ngünmifel a apinikemi pwe oupwe aleasochisi Jesus Kraist o küna limöch ren chaan. Ümöümöch me kinamwe epwe chomongola remi.
1PE 1:3 Ousipwe mwareiti Kot ewe Semen ach Samol Jesus Kraist! Pun lon an tong mi lapalap a aupusefälikich ren än Jesus Kraist manausefäl seni mäla. Ei a aurakich ren eu apilükülük mi manau,
1PE 1:4 pwe sipwe feiöchüni och feiöch esap morola, esap tikipwül, esap pwal aiolol, a iseis lon läng fänäsengesimi.
1PE 1:5 Ekei feiöch ra fän itemi. Ren ämi lükülük oua küna tümwün ren än Kot manaman tori oupwe küna ewe manau mi molotä pwe epwe pwäla lon fansoun sopolan.
1PE 1:6 Oupwe fokun pwapwa ren ekei feiöch, inamwo ika oua küna letipeta iei lon fansoun mochomoch chök pokiten chomong sokun sosot oua riaföü ren.
1PE 1:7 Popun ämi tolong lon sosot, pwe epwe pwä enletin ämi lükülük. Kolt mi tongeni tala, nge a ketel lon ekkei pwe epwe pwä ewe enletin kolt. Iei usun ämi lükülük mi aüchea seni kolt epwe fokun küna sosot, pwe epwe nükücharala. Mürin oupwe küna iteüöch me ling me itetekia lon ewe Rän lupwen Jesus Kraist epwe pwä.
1PE 1:8 Ämi oua echeni Jesus, inamwo ika ousap fen küna i, oua lükü i, inamwo ika ousap küna i iei. Iei mine oua fokun pwapwa, ren sokun pwapwa esap naf lon ach kapas ach sipwe pwärätä, pun pwapwa mi ling,
1PE 1:9 pun oupwe küna sopolan ämi lükülük, iei manauen ngünümi.
1PE 1:10 Ekewe soufos ra achocho le küttaöchü pwe repwe silei usun ei manau. Ra osuni usun ei lifang Kot epwe ngenikemi.
1PE 1:11 Ra küttafichi inet fansoun me lapalapen an epwe feito. Iei ewe fansoun ewe Ngünün Kraist mi nom lor a itini lupwen ra kapas usun ekewe riaföü Kraist epwe tolong lon, pwal usun ewe ling epwe tori me mürin.
1PE 1:12 Kot a pwäri ngeni ekei soufos, pwe ar angang esap fän iten püsin ar feiöch, nge fän iten ämi feiöch, lupwen ar kapas usun ekewe mettoch oua rongorong iei seni ekewe chon künö mi aronga ngenikemi ewe Pworausen Manau ren manamanen Ngünmifel mi titito seni läng. Ikkei ekewe mettoch ekewe chon läng mwo nge ra mochen weweiti.
1PE 1:13 Iei mine oupwe amolätä ekiekimi ngeni ei angang. Oupwe püsin tümwünükemi o fokun anomu ämi lükülük won ewe feiöch epwe torikemi lupwen Jesus Kraist epwe pwäto.
1PE 1:14 Oupwe aleasochis ngeni Kot. Ousap mwüt ngeni manauemi epwe nom fän nemenien ekewe mocheniangau oua eäni me lom lupwen ousap mwo silei Kot.
1PE 1:15 Nge oupwe pin lon mettoch meinisin mine oua föri, usun chök Kot, ewe mi körikemi, a pin.
1PE 1:16 Pun a mak lon ekewe Toropwe mi Pin, “Oupwe pin, usun ngang üa pin.”
1PE 1:17 Lupwen oua iotek ngeni Kot, oua aita ngeni i Samach, i ewe mi apwüngü aramas meinisin won ükükün mine eman me eman a föri, nge esap lifilifil. Iei mine lon fansoun ämi manau won ei fanüfan oupwe asamolu o meniniti i.
1PE 1:18 Pun oua silei pwe ousap mö ren mettoch mi morokai usun silifer ika kolt pwe oupwe ngas seni ewe manau mi lomotongau oua angei me ren ämi kewe lewo,
1PE 1:19 nge oua mö ren chaan Kraist mi aüchea, i eman lam esap wor terin are lapalapangauan.
1PE 1:20 Kraist a fen fil me ren Kot mwen esamwo fis fanüfan, nge a pwä lon fansoun sopolan fänäsengesimi.
1PE 1:21 Pokiten Kraist oua lükü Kot, ewe mi amanauasefäli i seni mäla o ngeni lingan. Iei mine ämi lükülük me ämi apilükülük a nom won Kot.
1PE 1:22 Iwe, pokiten oua alimöchükemi ren ämi aleasochisi mine a let o oua eäni tong enlet ngeni pwiimi kewe souläng, oupwe wesewesen echenifengenikemi ren unusen lelukemi.
1PE 1:23 Pun oua upsefäl ren Kapasen Kot mi manau o nonom tori feilfeilachök, usun nau nöün eman mi manau tori feilfeilachök, nge sap nöün eman mi mäla.
1PE 1:24 Pun iei usun mine a mak lon ekewe Toropwe mi Pin, “Aramas meinisin ra wewe ngeni fetil, nge linger meinisin ra wewe ngeni pön irä. Ewe fetil a pwasala, nge ekewe pön irä ra mworotiu.
1PE 1:25 Nge än ewe Samol kewe kapas repwe nonom tori feilfeilachök.” Ei kapas iei ewe Pworausen Manau ra aronga ngenikemi.
1PE 2:1 Iei mine oupwe pöütala sokun föför mi ngau meinisin. Ousap chüen eäni kapas chofona, ika angangen atuputup, ika lolowo, ika eäni kapasen turunufas.
1PE 2:2 Oupwe usun chök ekewe mönükol mi upufö, fansoun meinisin oupwe fokun moneti ewe chönün oup mi wewe ngeni Kapasen Kot, esap nofit ngeni och, pwe ren ämi ün oupwe mämäritä o küna manau.
1PE 2:3 Usun a mak lon ekewe Toropwe mi Pin, “Ämi oua püsin neni pwe ewe Samol a kirikiröch.”
1PE 2:4 Oupwe feito ren ach we Samol, i ewe fau mi manau, aramas ra pöütala, pun resap aücheani, nge a fil o aüchea me ren Kot.
1PE 2:5 Pwal ämi oua usun chök fau mi manau. Oupwe mwüt ngeni Kot pwe epwe aükemiitä, pwe oupwe eu imwen ngün, ia oupwe angang ie lon wisen souasor mi pin, pwe oupwe eäni sokun asor Ngünmifel a tipeni, Kot a etiwa ren Kraist.
1PE 2:6 Pun iei mine a mak lon ekewe Toropwe mi Pin, “Üa filätä eföü fau mi fokun aüchea, üa anomu lon Sion, pwe epwe eföü föün lepwokuku. Iö a lükü i esap fokun lichipüng.”
1PE 2:7 Ei fau a fokun aüchea fän itemi mi lükü. Nge fän iten chokewe resap lükü: “Ewe fau ekewe chon kaü imw ra pöütala, pun resap aücheani, a wiliti ewe fau mi aüchea seni meinisin.”
1PE 2:8 A pwal mak, “Iei ewe fau aramas repwe chepetek won, eu achau mi afisätä än aramas repwe turula won.” Repwe chepetek, pun resap aleasochisi ewe kapas, pwe iei usun mine Kot a akota fän iter.
1PE 2:9 Nge ämi eu ainang mi fil, eu mwichen souasor än ewe king, eu mwün aramas mi pin, nöün Kot kewe aramas, oua fil pwe oupwe arongafeili än Kot kewe föför mi manaman, i ewe mi körikemiiwu seni rochopwak, pwe oupwe tolong lon an saram mi amwarar.
1PE 2:10 Me lom ousap nöün Kot aramas, nge ikenai oua nöün. Me lom ousap angei än Kot ümöümöch, nge ikenai oua angei an ümöümöch.
1PE 2:11 Ämi chiechiei mi achengicheng, üa tüngormau ngenikemi usun ämi chon ekis me choisä won ei fanüfan, ousap apwönüetä ekewe mochenian fituk mi fiu ngeni ngünümi.
1PE 2:12 Oupwe eäni föföröch lein ekewe chon lükün lamalam, pwe lupwen repwe atipisikemi pwe oua föri föför mi ngau, repwe küna ämi föför mürina o mwareiti Kot lon ewe Rän epwe wareto lon.
1PE 2:13 Fänäsengesin ach we Samol oupwe aleasochisi nöüwisen ekewe mwü: Oupwe aleasochisi ewe king, pun i ewe samol mi lap,
1PE 2:14 pwal ngeni ekewe kepina, i a awiser pwe repwe apwüngü chokewe mi föföringau o aitöchü chokewe mi föri mine a mürina.
1PE 2:15 Pun iei letipen Kot, pwe ren ämi föföröch oupwe aükätiu än ekewe chon tiparoch kapasen miritimang.
1PE 2:16 Oupwe manau usun aramas mi ngas, nge ousap aea ämi ngas le pwölüela ämi föför mi ngau, pwe oupwe manau usun nöün Kot chon angang.
1PE 2:17 Oupwe meniniti aramas meinisin, oupwe echeni chienemi kewe souläng, oupwe niuokusiti Kot o suföliti ewe king.
1PE 2:18 Ämi chon amanau, oupwe aleasochisi ämi kewe masta o meninitiir, sap ngeni chök chokewe mi eäni kirikiröch me tipepwetete, nge pwal ngeni chokewe mi tipepöchökül.
1PE 2:19 Kot epwe afeiöchükemi are oupwe anomukemi fän weiresin ekewe riaföü esepwüng, pokiten oua mefi pwe iei letipen Kot.
1PE 2:20 Pun met lomotan ngenikemi are oupwe likitü lupwen ra wichikemi ren ämi föri föför esepwüng? Nge are oua likitü fän ämi riaföü lupwen oua föri mine a pwüng, Kot epwe afeiöchükemi.
1PE 2:21 Pun iei mine Kot a körikemi ren, pun Kraist a pwal riaföü fänäsengesimi o likiti ngenikemi eu lenien apirü, pwe oupwe tapwela mürin lon ipwan.
1PE 2:22 Esap föri och tipis, esap wor eman a rongorong eu kapas chofona seni lon awan.
1PE 2:23 Lupwen ra kapasingau usun esap pwal pölüeni lon kapas mi ngau. Lupwen aramas ra ariaföüü esap pwal eniweer, nge a anomu an apilükülüköch won Kot ewe soukapwüng mi eäni pwüng lon kapwüng.
1PE 2:24 Kraist a püsin uwei ach kewe tipis won inisin o uweiretä won ewe iräpenges, pwe kich sipwe mäla seni tipis o manau ngeni pwüng. Ren an kinas kana sia küna pöchökül.
1PE 2:25 Pun me lom oua wewe ngeni sip kana mi mwalechela, nge ikenai oua liwinsefäl ngeni ewe Chon Fol me Chon Masa ngünümi.
1PE 3:1 Pwal ina usun ämi fefin kana, oupwe fokun aleasochisi pwülüemi kana, pun ika ekoch me leir resap lükü än Kot kapas, repwe tongeni lükü Jesus ren ämi föför. Ousap wisen apasatä och kapas,
1PE 3:2 pun repwe chök soulängila ren ar küna ämi föför mi limöch me ämi sile menin.
1PE 3:3 Ousap eäni fouten lükün, pwe oupwe liöch ren sokun firesin möküremi are mwärimi mwärämwär kolt are sokopaten üf oua üföüf.
1PE 3:4 Nge ämi liöch epwe pwä ren mine a nom lon letipemi, iei eu liöch esap fokun tongeni siwil, a wor ren eman aramas mi tipemecheres o lukpwetete. Ei sokun liöch a fokun aüchea mwen mesen Kot.
1PE 3:5 Pun iei usun ekewe fefin mi pin me lom ra anomu ar apilükülük won Kot. Ar liöch a fis ren ar aleasochisi pwülüer kana,
1PE 3:6 usun Sara a aleasochisi Apraham o aita ngeni an samol. Ämi oua nöün Sara fefin are oua föri mine a mürina, nge ousap niuokusiti och.
1PE 3:7 Ina usun pwal ämi mwän kana, oupwe nonom ngeni pwülüemi kana fän mirit, pun inisiir a apwangapwang mwen inisimi. Oupwe meninitiir, pun pwal ir repwe angei än Kot we lifangen manau usun chök ämi. Oupwe föri iei usun, pwe esap wor och mine epwe epeti ämi iotek.
1PE 3:8 Iwe, iei sopolan mine üa mochen ürenikemi: Oupwe eänifengeni eu chök tip me eu chök memef. Oupwe echenifengenikemi lefilemi usun chök pwipwi, oupwe eäni kirikiröch o tipetekisonfengen lefilemi.
1PE 3:9 Ousap liwini ngau ngeni ngau are ottek ngeni ottek, nge oupwe afeiöchüür, pun Kot a körikemi ämi oupwe föri iei usun, pwe oupwe angei eu feiöch.
1PE 3:10 Pun iei usun a mak lon ekewe Toropwe mi Pin, “Iö a mochen an epwe pwapwaiti manau o küna feiöch lon manauan, esap fokun chüen apasa kapas mi ngau, nge epwe ükütiu le kapas chofona.
1PE 3:11 Epwe fokun kul seni mine a ngau o föri mine a mürina, epwe fokun kütta kinamwe ren unusen lelukan.
1PE 3:12 Pun ewe Samol a amanaua ekewe chon pwüng, a rongorong ngeni ar iotek, nge a ü ngeni chokewe mi föri mine a ngau.”
1PE 3:13 Iö epwe tongeni afeiengauakemi are oua achocho le föri mine a mürina?
1PE 3:14 Nge are oupwe fen küna riaföü pokiten ämi föri mine a pwüng, oupwe feiöch. Ousap niuokusiti aramas, ousap öürek.
1PE 3:15 Oupwe meniniti Kraist lon lelukemi, oupwe asamolu i, pun i ämi Samol. Oupwe molotä fansoun meinisin pwe oupwe pölüeni chokewe mi aisinikemi, pwe oupwe awewe ngeniir usun ewe apilükülük oua eäni,
1PE 3:16 nge oupwe kapas ngeniir fän pwetete me menin. Oupwe tümwünü pwe esap wor mengiringirin letipemi, pwe chokewe mi kapas ingau usun ämi föför mürina pokiten oua tapwela mürin Kraist, repwe säw ren ar kapasen esitakemi.
1PE 3:17 Are iei letipen Kot pwe oupwe küna riaföü, a fen öch ämi oupwe riaföü fän iten ämi föför mürina, nge sap fän iten ämi föföringau.
1PE 3:18 Pun Kraist a mäla fän iten tipis fän eu chök, nge a naf ngeni fansoun meinisin, ewe chon pwüng fän iten ekewe chon tipis, pwe epwe emwenikich ngeni Kot. A mäla lon inisin, nge a manausefäl lon ngünün.
1PE 3:19 Iwe, lon ngünün a feila o afalafala ekewe ngün mi nom lon fötek.
1PE 3:20 Ikei ir ngünün chokewe mi aleasolap ngeni Kot, lupwen a witiwit lon an mosonotam lon ekewe rän, lupwen Noa a föri ewe waimw. Ekoch chök aramas, fokun waluman chök, ra nonom lon ewe waimw o küna manau seni ewe koluk.
1PE 3:21 Ei koluk eu liosun papatais mi amanauakemi iei. Esap limetala pwülün inis, nge eu pwon ngeni Kot oua eäni seni eu mwelien letipemi mi limöch. Iwe, a amanauakemi ren än Jesus Kraist manausefäl,
1PE 3:22 i ewe mi feitä läng, a nonom lepelifichin Kot o a nemeni ekewe chon läng meinisin, pwal ekewe ngün mi wor ar nemenem me manaman.
1PE 4:1 Iwe, pokiten Kraist a riaföü lon inisin, iei mine oupwe pwal amolakemi pwe oupwe eäni ewe sokun ekiek Kraist a eäni, pun eman mi riaföü lon inisin esap chüen föföri tipis.
1PE 4:2 Iei mine seni ikenai tori ekewe lusun ränin manauemi oupwe manaueni eu manau mi nom fän nemenien letipen Kot, nge esap nom fän nemenien mochenian fituk.
1PE 4:3 Pun lon ewe fansoun a la a naf fansoun ämi föri mine ekewe chon lükün lamalam ra pwapwa le föri. Oua föri föförün lisowu, mocheisou, ünüpuch, mongömong, mwichen ün sakau me angangen fel ngeni anümwäl mi anioput.
1PE 4:4 Nge iei ekewe chon lükün lamalam ra weitifengeniir pwe ousap chüen etiir lon ewe sokun föför mi anioput ra manau lon, iei mine ra turunufaseikemi.
1PE 4:5 Nge ir repwe püsin peniir me mwen Kot usun meinisin mine ra föri. Kot ewe mi molotä an epwe apwüngü chon manau me chon mäla kana.
1PE 4:6 Iei popun ewe Pworausen Manau a pwal arongfeil ngeni ekewe mi mäla, ngeni chokewe mi fen küna apwüng lon pekin inisiir usun chök aramas meinisin, nge lon pekin ngünür repwe manau usun Kot a manau.
1PE 4:7 Iwe, a arapoto sopolan mettoch meinisin. Iei mine oupwe püsin nemeni letipemi o mamasakemi, pwe epwe tongeni fis ämi iotek.
1PE 4:8 Nge mwen mettoch meinisin oupwe tupwöl le echenifengenikemi lefilemi, pun chen a pwölüela chomong tipis.
1PE 4:9 Oupwe etiwafengenikemi lefilemi, nge ousap lal ren.
1PE 4:10 Ämi meinisin oua angei en me an lifang, oupwe aea fän iten chienemi usun nöün Kot kewe chon souwani ekewe sokopaten lifang.
1PE 4:11 Are eman a afalafal, epwe fokun afalafala än Kot Kapas. Are eman a alisi aramas, epwe alilis lon ükükün an pöchökül Kot a ngeni lon ewe angang, pwe lon mettoch meinisin Kot epwe küna ling ren Jesus Kraist, ewe mi eäni ling me manaman tori feilfeilachök. Amen.
1PE 4:12 Ämi chienei mi achengicheng, ousap weitifengenikemi ren pwichikaren ewe riaföü a torikemi, pwe oupwe sosot ren. Ousap ekieki pwe iei och mine esap öch ngenikemi.
1PE 4:13 Nge oupwe pwapwa pwe oua eti Kraist lon an riaföü, pwe oupwe pwal uren pwapwa lupwen an ling epwe pwä.
1PE 4:14 Oua feiöch are oua küna turunufas pokiten ämi tapwela mürin Kraist, pun ewe Ngünün ling, Ngünün Kot epwe nonom lomi.
1PE 4:15 Are eman me leimi a küna riaföü, esap itä pokiten i eman chon niela aramas, ika eman chon solä, ika eman chon föföringau, ika eman chon etilepat.
1PE 4:16 Nge are eman a küna riaföü pokiten an souläng, esap säw ren, nge epwe kilisou ngeni Kot pwe a uwou iten Kraist.
1PE 4:17 A tori ewe fansoun pwe Kot epwe popuetä le eäni kapwüng, nge epwe akomwen popuetä won nöün Kot aramas. Iwe, are epwe popuetä rech, epwe ifa usun sopolan chokewe resap aleasochisi ewe Pworausen Manau seni Kot?
1PE 4:18 Pun iei usun mine a mak lon ekewe Toropwe mi Pin, “A men weires fän iten ekewe chon pwüng ar repwe küna manau, nge epwe fen ifa usun ren ekewe aramasangau me ekewe chon tipis?”
1PE 4:19 Iei mine chokewe mi küna riaföü pokiten iei letipen Kot ngeniir, repwe atolonga manauer lepöün ewe Chon Föriir mi allükülük o sopwela le föri mine a mürina.
1PE 5:1 Ngang pwal eman souakom üa pesei ekewe souakom me leimi lon ämi kewe mwichefel. Ngang eman chon pwärätä usun än Kraist riaföü, üpwe pwal angei wisei lon ewe ling epwe pwä. Iwe, üpwe pesekemi
1PE 5:2 pwe oupwe tümwünü ewe mwichen sip Kot a ngenikemi, pwe oupwe foleniir ren unusen letipemi, pun iei usun met Kot a mochen pwe oupwe föri, nge esap me lükitipemi. Oupwe föri ämi angang, sap fänäsengesin ämi chök mochen angei liwin, nge seni wesewesen ämi mochen föri ewe angang.
1PE 5:3 Ousap nemenemengau ngeni chokewe mi nom fän ämi tümwün, nge oupwe eu lenien apirü ngeni ewe mwich.
1PE 5:4 Iwe, lupwen ewe Meilapen Chonmas epwe pwä, oupwe angei ewe mwärämwär mi ling esap fokun aiolol.
1PE 5:5 Ina usun pwal ämi alüal kana, oupwe aleasochisi ekewe chinlap. Ämi meinisin oupwe fokun eäni tipetekison lon ämi alilisfengen lefilemi. Pun a mak lon ekewe Toropwe mi Pin, “Kot a ü ngeni chon lamalamtekia kana, nge a ümöümöch ngeni chon tipetekison kana.”
1PE 5:6 Iei mine oupwe atekisonakemi fän pöün Kot mi manaman, pwe epwe atekiakemi lon an fansoun mi fich.
1PE 5:7 Oupwe likiti ngeni Kot ämi öürek meinisin, pun i a ekieki met oupwe feiöch ren.
1PE 5:8 Oupwe amolakemi o mamasa, pun Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.
1PE 5:9 I ewe oupwe ü ngeni, oupwe nüküchar lon ämi lükülük, pun oua silei pwe pwiimi kewe souläng won unusen fanüfan ra nonom lon ewe chök sokun riaföü.
1PE 5:10 Nge mürin ämi küna riaföü lon fansoun mochomoch, ewe Koten ümöümöch meinisin mi körikemi pwe oupwe eti lon an ling esemüch lon Kraist, i epwe püsin aunusöchükemiila, epwe anükücharakemi o apöchöküla letipemi, pwe oupwe nük lon ämi lükü Kraist.
1PE 5:11 Manaman a nonom ren i tori feilfeilachök. Amen.
1PE 5:12 Üa makkei ei toropwe mi mochomoch ngenikemi ren än Silas alisiei, ätewe üa silei pwe i eman pwiich souläng mi allükülük. Üa mochen apöchöküla letipemi o pwäri ngenikemi, pwe iei enletin än Kot ümöümöch. Oupwe nüküchar lon.
1PE 5:13 Ewe mwichefel lon Papilon mi usun chök eman pwiimi, a pwal fil me ren Kot, a kapong ngenikemi, pwal nei we Markus.
1PE 5:14 Oupwe kapongfengen lefilemi ren ewe kapongen souläng mi wor tong lon. Kinamwe epwe nonom remi meinisin mi nonom lon Kraist.
2PE 1:1 Ngang Simon Petrus, eman nöün Jesus Kraist chon angang me soukünö, üa kapong ngeni ämi mi angei eu lükülük mi aüchea usun chök äm ren än ach Kot me Chon Amanau Jesus Kraist pwüng.
2PE 1:2 Ümöümöch me kinamwe epwe chomongola remi ren ämi silei Kot me Jesus ach Samol.
2PE 1:3 Än Kot manaman mi pin a fen fang ngenikich meinisin mine a lomot ngeni ach manaueni eu manauen souläng mi enlet ren ach silei i, ewe mi körikich pwe sipwe angei wisach lon an we ling me kirikiröch.
2PE 1:4 Ren ei lapalap a fen fang ngenikich ekewe feiöchün pwon mi fokun watte o aüchea, pwe ren ekei feiöch oupwe tongeni sü seni mochenian ei fanüfan mi afeiengau o oupwe tongeni angei sokun Kot.
2PE 1:5 Iwe, iei popun oupwe achocho le apachatä manauöch ngeni ämi lükülük, silelap ngeni ämi manauöch,
2PE 1:6 ämi tufuchin püsin nemeni inisimi ngeni silelap, soulängöch ngeni ämi tufichin püsin nemeni inisimi, tipeppos ngeni ämi soulängöch,
2PE 1:7 ämi tongei pwimi souläng ngeni tipeppos, chen ngeni ämi tongei pwimi souläng.
2PE 1:8 Ikkei ekewe mettoch epwe wor remi, nge are a wor chomong remi, epwe fis ämi mwökütöch me lipwäköch lon ämi silei ach Samol Jesus Kraist.
2PE 1:9 Nge are ekei mettoch esap wor ren eman, ätewe a nenengau o chun, iwe, a manlükala pwe a fen limöch seni an kewe tipis a föri me lom.
2PE 1:10 Iei mine ämi pwii kana, oupwe fokun achocho le anüküchara ämi kö me fil, pun are oupwe föri iei usun, ousap fokun tur lon tipis.
2PE 1:11 Ren ei oupwe fokun angei ewe pwüüng pwe oupwe tolong lon ewe Mwü esemüch än ach Samol me Chon Amanau Jesus Kraist.
2PE 1:12 Iei usun üpwe achema ngenikemi ekei mettoch fansoun meinisin, inamwo ika oua fen silei usur, oua pwal nüküchar lon ewe kapas mi let oua fen rongorong.
2PE 1:13 Üa ekieki pwe a chök pwüng ngeniei ai üpwe achema ngenikemi usun ekei mettoch lon ükükün fansoun üa chüen manau.
2PE 1:14 Üa silei pwe epwe fisikai ai üpwe mäla usun ach Samol Jesus Kraist a fen asile ngeniei.
2PE 1:15 Iei mine üpwe achocho ngeni ai üpwe alisikemi, pwe oupwe chechemeni ekei mettoch fansoun meinisin mürin ai mäla.
2PE 1:16 Äm aisap longolong won ekewe pworaus aramas ra afisätä, lupwen aia aronga ngenikemi usun manamanen ach Samol Jesus Kraist lon ewe fansoun epwe liwinsefäl. Äm aia küna ren püsin mesem an we ling mi lapalap.
2PE 1:17 Äm aia nom ren, lupwen Saman Kot a ngeni iteüöch me ling. Lon ena fansoun eu möngüngü a tori i seni ewe mi Unusen Ling a apasa, “Iei i nei mi achengicheng üa fokun pwapwa ren.”
2PE 1:18 Püsin äm aia rongorong ei möngüngü mi feito seni läng, lupwen aia nom ren won ewe chuk mi pin.
2PE 1:19 Iei mine aia fokun apilükülükü ekewe kapas ekewe soufos ra arongafeili. A men öch ngenikemi pwe oupwe tümwünüöchü, pun a usun chök eu lamp mi tittin lon eu leni mi rochopwak tori an epwe ränila o ewe füün rän epwe tin lon letipemi.
2PE 1:20 Nge mwen mettoch meinisin oupwe chechemeni, pwe esap wor eman epwe püsin tongeni awewei eu kapasen osuni me lon ekewe Toropwe mi Pin.
2PE 1:21 Pun esap wor och kapasen osuni a feito seni letipen aramas, nge ekewe aramas ra nom fän nemenien ewe Ngünmifel ra apasatä ewe kapas a feito seni Kot.
2PE 2:1 Nge mi pwal wor soufos chofona me lein ekewe aramas me lom, pwal ina chök usun epwe pwal wor chon afalafal chofona leimi. Repwe atolonga sokun afalafal mi afeiengau o chofona, repwe amamäsini ewe Samol mi angaseer seni tipis. Iwe, repwe püsin atoto wor feiengau mi fisikai.
2PE 2:2 Iwe, chomong aramas repwe apirü ar föför mi fokun ngau. Nge pokiten mine ra föri, ekoch aramas repwe kapasingau usun ewe Al mi Let.
2PE 2:3 Lon ar tipemong ekei chon afalafal chofona ra angei ar win ren ar aronga ngenikemi pworaus ra püsin afisätä. Fansoun langatam tori iei, Kot nöür we soukapwüng, ewe Chon Afeiengaueer, a fen molotä o a chök nenela pwe epwe apwüngüür.
2PE 2:4 Pun Kot esap achika ekewe chon läng mi tipis, nge a atururelong lon hell, ewe ia ra fötek ie lon rochokichin rochopwak o witiwiti ewe Ränin Kapwüng.
2PE 2:5 Kot esap achika ewe fanüfan me lom, nge a aworato ewe noter won ekewe aramas resap meniniti i. A chök amanaua Noa ewe chon afalafala usun pwüng me pwal füman aramas.
2PE 2:6 Kot a apwüngü ekewe telinimw Sotom me Komora o atarela ren ekkei. A föri pwe ir eu lenien eniweniw ngeni chokewe resap meniniti Kot.
2PE 2:7 A amanaua Lot eman aramas mi pwüng, a fokun riaföü ren ekewe föför mi fokun ingau än ekewe aramas mi ngau.
2PE 2:8 Ei aramas mi pwüng a nonom leir, iteiten rän a fokun riaföü lon letipan, lupwen a küna o rongorong usun ar föför mi ngau.
2PE 2:9 Ekei pworaus ra aiti ngenikich, pwe ewe Samol a silei usun an epwe amanaua ekewe aramas mi likitü lon ar lükü seni sosot, nge epwe amwöchü ekewe chon föföringau ngeni ewe Ränin Kapwüng, pwe epwe apwüngüür.
2PE 2:10 Ei epwe fokun fis ngeni chokewe mi apwönüetä mochenian fituker mi fokun ingau o turunufasei än Kot nemenem. Ekei chon afalafal mi chofona ra lamalamtekia o üleförea, resap meniniti ekewe meilap lon läng mi wor ar ling, nge ra kapasingau usur.
2PE 2:11 Pwal mwo nge ekewe chon läng mi watte ar pöchökül me manaman seni ekei chon afalafal mi chofona resap apasa och kapas mi ngau usur mwen mesen ewe Samol.
2PE 2:12 Nge ekei mwän ra sokuni sokun man lon ar föför, ra usun chök ekewe manmwacho mi uputiu pwe aramas repwe liapeniir o niirela. Ra eäni kapas ingau usun ekewe mettoch resap weweiti. Iwe, repwe ninnila usun ekewe manmwacho,
2PE 2:13 repwe angei liwiniir sokun riaföü ra ariaföüü ngeni aramas. Ra chök pwapwaiti ar repwe momongö o ükün lon ar kametip le rän. Ra eu minen asäw me itengau lupwen ra etikemi le mongö, nge ra pwal pwapwaiti ar kewe föförün likatuputup.
2PE 2:14 Ra chök mochen nenengeni ekewe fin lisowu, resap fokun ükütiu le föri föför mi ngau. Ra atupu ekewe aramas mi apwangapwang lon ar lükü pwe repwe tipis. Ra sipeöch lon ar tipemong. Ra nom fän än Kot anümamau!
2PE 2:15 Ra tokola seni ewe al mi wenechar o mwalechela. Ra apirü föförün Palam nöün Peor we mi echeni ewe moni epwe angei seni an föri mine a ngau,
2PE 2:16 iwe, a küna apwüng fän iten an tipis. Nöün we aas a kapas ngeni lon möngüngün eman aramas o aükätiu än ewe soufos föför mi umwes.
2PE 2:17 Ekei mwän ra usun chök chönüttu esor koluk lon, ra usun chök kuchu mi ässila ren eu mölümöl. Kot a amolätä fän iter eu leni mi fokun rochokich.
2PE 2:18 Ra lamalamtekia lon ar apasatä kapas mi pön o aea sokun mochenian fituk mi ngau le atupu chokewe mi kärän sü seni ekewe aramas mi manaueni ei manau mi mwäl.
2PE 2:19 Ra pwon ngeniir ar repwe ngasala, nge püsin ir ra nom fän nemenien ekewe föför epwe afeiengauer. Pun eman aramas a nom fän nemenien ewe mettoch a kuf ren.
2PE 2:20 Are aramas ra sü seni limengauen tipisin ei fanüfan ren ar silei ach Samol me Chon Amanau Jesus Kraist, nge mürin ra tupusefälilong lon o kuf rer, ekei sokun aramas repwe feiengau lesopolan lap seni lepoputän.
2PE 2:21 Epwe fen öch ngeniir ar resap silei ewe alen pwüng, lap seni ar repwe silei, nge mürin ra kul seni ewe allük mi pin a toriir.
2PE 2:22 Met a fis ngeniir a pwärätä pwe ekei mwiitun ra let: “Eman kolak a änisefäli mine a musäsinawu”, pwal “Eman pik mi fen limöch a liwinsefäliti ewe pokak o asokopöla lon.”
2PE 3:1 Iwe, ämi chiechiei mi achengicheng, iei aruachön nei toropwe ngenikemi. Lon ekei ruochö toropwe üa sotuni ai üpwe amwökütü ekewe ekiek mi limöch lon letipemi ren ai achema ngenikemi ekei mettoch.
2PE 3:2 Üa mochen pwe oupwe chechemeni ekewe kapas ekewe soufos mi pin ra apasatä me lomlom, pwal ekewe allük me ren ach Samol me Chon Amanau nöümi kewe soukünö ra aronga ngenikemi.
2PE 3:3 Me mwen mettoch meinisin oupwe fokun weweöchiti pwe lon ekewe ränin lesopolan ekoch aramas repwe pwä, manauer a nonom fän nemenien püsin ar mocheniangau. Repwe takirikemi
2PE 3:4 o apasa, “A pwon pwe epwe liwinsefälito. Iwe, met, ia a nom ie? Semelapach kewe ra fen mäla, nge ekewe mettoch meinisin ra ususur we chök seni ewe fansoun Kot a föri fanüfan.”
2PE 3:5 Ra apasa ei pokiten ra mochen manlükala pwe ren än Kot kapas läng me fanüfan ra fis. Fanüfan a fis seni koluk o pwal ren koluk.
2PE 3:6 Iwe, pwal ren koluk, iei kolukun ewe noter, ewe fanüfan me lomlom a tala ren.
2PE 3:7 Nge ekewe läng me ei fanüfan mi nom iei ra iseis ren ewe chök kapasen Kot pwe repwe tala ren ekkei. Ra nonom tori ewe rän, lupwen ekewe aramas resap meniniti Kot repwe küna kapwüng me mäla.
2PE 3:8 Ämi chiechiei mi achengicheng, ousap manlükala ei mettoch! Esap wor sokofesenin eu rän me engeröü ier me ren ewe Samol, eu rän me engeröü ier ra wewefengen me ren.
2PE 3:9 Ewe Samol esap mang le apwönüetä an pwon usun ekoch ra ekieki, pwe a mosonotam ngenikemi, pun esap mochen pwe eman epwe pöütmwälila, nge a fen mochen pwe meinisin repwe ekieksefäl.
2PE 3:10 Nge ränin ewe Samol epwe war usun eman chon solä. Lon ewe rän läng epwe morola ren püngün chopulap o minen läng repwe karala o tala, nge fanüfan me meinisin mine a nom lon resap chüen nom.
2PE 3:11 Pokiten ekei mettoch meinisin repwe tala lon ei lapalap, met sokun aramas oupwe usuni? Oupwe manaueni eu manau mi pin mi nonom fän nemenien Kot,
2PE 3:12 lupwen oua witiwiti ewe Ränin Kot o achocho ngeni tori epwe müttirito. Iei ewe Rän lupwen ekewe läng repwe karala o tala o minen läng repwe telila ren pwichikar.
2PE 3:13 Nge usun än Kot pwon sia witiwiti eu läng mi fö me eu fanüfan mi fö ia pwüng epwe chöchöla ie.
2PE 3:14 Iei mine, ämi chiechiei mi achengicheng, pokiten oua witiwiti ei Rän, oupwe fokun achocho ngeni pwe oupwe limöch, pwe esap wor ämi mwäl mwen mesen Kot, nge oupwe pwal nom lon kinamwe.
2PE 3:15 Oupwe ekieki usun ei, pwe ren mosonotamen ach Samol oua küna manau, usun chök pwiich we mi achengicheng Paulus a mak ngenikemi ren ewe tipachem Kot a fang ngeni.
2PE 3:16 Iei met a apasa lon makkean kewe toropwe meinisin, lupwen a makkei usun ekei mettoch. A wor ekoch mettoch lon an kewe toropwe ra weires pwe aramas repwe weweiti, pwe aramas mi tiparoch me tipewilikis ra awewemwäli. Iei usun mine ra pwal föri ren ekoch wokisin mi mak lon ekewe Toropwe mi Pin. Ren ei ra püsin atoto wor feiengau.
2PE 3:17 Iwe, ämi chiechiei mi achengicheng, oua fen silei ei. Iei mine oupwe mamasakemi, pwe ousap tokola ren ekewe afalafal mi mwäl än ekewe aramas mi ngau, ousap pwal tur seni leniemi mi nükünük.
2PE 3:18 Nge oupwe chök mämäritä lon än ach Samol me Chon Amanau Jesus Kraist ümöümöch me silelap. I epwe ling ikenai tori feilfeilachök. Amen.
1JO 1:1 Äm aia mak ngenikemi usun ewe Kapasen Manau mi nonom chök seni me lepoputän. Aia fen rongorong ren selingem me küna ren mesem, ewer, aia fen küna o atapa ren pöüm.
1JO 1:2 Lupwen ei manau a pwäla, aia küna. Iei mine aia kapas usun o asile ngenikemi usun ewe manau esemüch mi nom ren ewe Sam, nge a pwä ngenikem.
1JO 1:3 Mine aia fen küna o rongorong aia pwal asile ngenikemi, pwe ämi oupwe etikem lon äm chiechifengen me ewe Sam me Jesus Kraist Nöün we.
1JO 1:4 Aia makkei ei pwe ämi pwapwa epwe unusöchüla.
1JO 1:5 Iwe, iei ewe kapas aia rongorong seni Nöün we o aronga ngenikemi: Kot i saram, esap fokun wor rochopwak lon.
1JO 1:6 Are sia apasa pwe sia chiechi ngeni Kot, nge sia nom lon rochopwak, sia chofona lon ach kapas pwal lon ach föför.
1JO 1:7 Nge are sia nonom lon ewe saram usun i a nonom lon saram, iwe, sia chiechifengen lefilach, nge chaan Jesus Nöün we a limetikich seni ach tipis meinisin.
1JO 1:8 Iwe, are sia apasa pwe esap wor ach tipis, sia püsin atupukich, nge esap wor let loch.
1JO 1:9 Nge are sia pwärätä ach tipis ngeni Kot, i epwe apwönüetä an pwon o föri mine a pwüng: Epwe amusala ach tipis o limetikich seni ach pwüngingau meinisin.
1JO 1:10 Are sia apasa pwe sisap tipis, sia achofonai Kot, nge an kapas esap nom loch.
1JO 2:1 Ngang üa makkei ei ngenikemi, nei kana, pwe ousap tipis. Nge are eman a föri tipis, a wor eman mi penikich, Jesus Kraist ewe chon pwüng, a nom ren ewe Sam o a tütüngor fänäsengesich.
1JO 2:2 Püsin Kraist i ewe popun pwe ach tipis kana ra musala, nge sap ach tipis chök, pwe pwal tipisin aramas meinisin.
1JO 2:3 Are sia aleasochisi än Kot kewe allük, iwe, sia lükü pwe sia silei i.
1JO 2:4 Iwe, are eman a apasa pwe a silei i, nge esap aleasochisi an kewe allük, ei aramas i eman chon chofona, nge ewe let esap nom lon.
1JO 2:5 Nge are eman a aleasochisi an kapas, an echeni Kot a wesewesen unusöchüla. Iei met sia tongeni silei ren pwe sia nom lon Kot:
1JO 2:6 Iö a apasa pwe a nonom lon Kot epwe fokun föföri usun mine Jesus a föföri.
1JO 2:7 Ämi chiechiei mi achengicheng, ei allük üa makkei ngenikemi esap minefö, pwe eu allük minen lom. Iei ewe allük a nom remi seni chök me lepoputän. Ei allük minen lom, iei ewe kapas oua fen rongorong.
1JO 2:8 Nge iei üpwe makkei ngenikemi eu allük mi fö, pun a pwä letan lon Kraist pwal lon ämi. Pun rochopwak a wesila, nge ewe saram mi let a fen tin.
1JO 2:9 Iö a apasa pwe a nonom lon saram, nge a oput pwiin, a nom lon rochopwak tori ikenai.
1JO 2:10 Nge iö a echeni pwiin a nonom lon saram, iwe, esap wor och lon manauan mine epwe chepetek ren.
1JO 2:11 Nge iö a oput pwiin a nom lon rochopwak. A fetal lon rochopwak, nge esap silei ia epwe feila ie, pun rochopwak a achuna.
1JO 2:12 Ngang üa mak ngenikemi, nei kana, pun ämi tipis kana ra musala pokiten Kraist.
1JO 2:13 Üa mak ngenikemi samasam kana, pun oua silei ewe mi nonom seni me lepoputän. Üa mak ngenikemi alüal, pun oua akufu ewe Eman mi Ngau.
1JO 2:14 Üa mak ngenikemi nau kana, pokiten oua silei ewe Sam. Üa mak ngenikemi samasam kana, pokiten oua silei ewe mi nonom seni me lepoputän. Üa mak ngenikemi alüal kana, pokiten oua pöchökül, än Kot kapas a nonom lomi o oua akufu ewe Eman mi Ngau.
1JO 2:15 Ousap echeni fanüfan are mettochun lon fanüfan. Pun are oua echeni fanüfan, ousap echeni ewe Sam.
1JO 2:16 Pun mettochun lon fanüfan meinisin, mochenian fituk, mochenian lemas me lamalamtekian manauen aramas resap pop seni ewe Sam, nge ra pop seni ei fanüfan.
1JO 2:17 Iwe, fanüfan me mettochun lon aramas ra kon mochenia ngeni repwe morola, nge iö a föri letipen Kot epwe manau tori feilfeilachök.
1JO 2:18 Ämi nei kana, ewe fansoun sopolan a arapoto! Oua fen rongorong pwe ewe Pölüen Kraist epwe war. Nge iei chomong pölüen Kraist ra fen pwä, iei mine sia silei pwe ewe fansoun sopolan a arapoto.
1JO 2:19 Ekei aramas resap wesewesen chon ach mwich, ina popun ra likitikich. Pun are repwe chon ach mwich, repwe chök nonom rech. Nge ar likitikich a afatatä pwe ir resap wesewesen chon ach mwich.
1JO 2:20 Iwe, ewe mi Pin a fen tinatiu womi ewe Ngünmifel, iei mine ämi meinisin oua silei ewe let.
1JO 2:21 Üsap mak ngenikemi pokiten itä ousap silei ewe let. Nge pokiten oua silei, oua pwal silei pwe esap wor och chofona epwe pop seni ewe let.
1JO 2:22 Iwe, iö ewe chon chofona? Ätewe mi apasa pwe Jesus esap ewe Mesaia! Ei sokun aramas i ewe pölüen Kraist, a oput ewe Sam me ewe Nau.
1JO 2:23 Pun iö a oput ewe Nau a pwal oput ewe Sam, nge iö a etiwa ewe Nau a pwal etiwa ewe Sam.
1JO 2:24 Oupwe fokun tümwünüfichi ämi oupwe amwöchü lon letipemi ewe Kapasen Kot oua fen rong me lepoputän. Are oua amwöchü mine oua fen rong me lepoputän, oupwe nonom lon ewe Nau pwal ewe Sam fansoun meinisin.
1JO 2:25 Iwe, iei met Kraist a püsin pwon ngenikich: ewe manau esemüch.
1JO 2:26 Ngang üa makkei ei ngenikemi usun chokewe mi sotuni ar repwe atokakemi.
1JO 2:27 Nge ren ämi, Kraist a fen tinatiu womi Ngünün. Fansoun än Ngünün we epwe nonom lomi, ousap osupwangen än eman epwe aiti ngenikemi och. Pun Ngünün a aiti ngenikemi usun mettoch meinisin. Iwe, mine i a aiti ngenikemi a let, nge esap mwäl. Oupwe aleasochisi mine Ngünün we a aiti ngenikemi, iwe, oupwe nonom lon Kraist.
1JO 2:28 Ewer, nei kana, oupwe nonom lon Kraist, pun lupwen i epwe pwä, kich sipwe fokun tipepwora, nge sisap opola seni fän säw lon ewe Rän epwe wareto.
1JO 2:29 Ämi oua silei pwe Kraist a pwüng, mürin oupwe pwal silei pwe aramas meinisin mi föri mine a pwüng, ir ra up seni Kot.
1JO 3:1 Oupwe nengeni ükükün watten än ewe Sam echenikich! An chen a fokun tekia pwe a aita ngeni kich nöün. Iei mine kich wesewesen nöün Kot. Ina popun pwe fanüfan esap sileikich, pun esap silei Kot.
1JO 3:2 Ämi chiechiei kana mi achengicheng, ikenai kich nöün Kot, nge esamwo pwä mine sipwe usuni me mürin. Nge sia silei pwe lupwen Kraist epwe wareto sipwe wewe ngeni i, pun sipwe küna i lon wesewesen lapalapan.
1JO 3:3 Iwe, eman mi eäni ei apilükülüköch lon Kraist a püsin alimelimöchü manauan usun Kraist a limelimöch.
1JO 3:4 Eman mi föri tipis a atai än Kot allük, pun tipis wewen atai allük.
1JO 3:5 Ämi oua silei pwe Kraist a war an epwe angeala ach tipis kana. Iwe, oua silei pwe esap wor an tipis.
1JO 3:6 Iei mine eman mi nonom lon Kraist esap sopwela le föri tipis, nge eman mi sopwela le föri tipis esap fokun küna i ika silei i.
1JO 3:7 Nei kana, ousap mwüt ngeni eman epwe atupukemi! Eman mi föri mine a pwüng, a pwüng usun chök Kraist a pwüng.
1JO 3:8 Are eman a sopwela le föri tipis, i nöün Tefil, pun Tefil a tipis seni lepoputan. Iei popun pwe Nöün Kot a war an epwe atala än Tefil angang.
1JO 3:9 Eman mi nöün Kot esap sopwela le föri tipis, pun manauen Kot a nonom lon. Iwe, esap tongeni sopwela le föri tipis, pun a up seni Kot.
1JO 3:10 Iei fatöchün sokofesenin lefilen nöün Kot me nöün Tefil: Eman esap föri mine a pwüng, ika esap echeni pwiin we, i esap nöün Kot.
1JO 3:11 Iei ewe pworaus oua rongorong seni lepopun: Sipwe echenifengenikich lefilach.
1JO 3:12 Sisap wewe ngeni Kain, i nöün Ewe mi Ngau, a püsin niela pwiin we Epel. Pwota Kain a niela pwiin we? Pun ekewe föför a föri ra ngau, nge än pwiin kewe föför ra pwüng.
1JO 3:13 Ämi pwii kana, ousap weitifengenikemi are aramasen fanüfan ra oputakemi.
1JO 3:14 Kich sia silei, pwe sia towu seni mäla o tolong lon manau, pun sia echeni pwiich kana. Eman esap echeni pwiin a chüen nonom fän nemenien mäla.
1JO 3:15 Eman mi oput pwiin, i eman chon niela aramas. Iwe, oua silei pwe eman chon niela aramas esap eäni manau esemüch lon manauan.
1JO 3:16 Iei usun sia silei met wewen chen: Kraist a fangela manauan fän itach, ina usun pwal kich sipwe fangala manauach fän iten pwiich kana!
1JO 3:17 Are eman aramas mi pisekisek a küna pwiin lon an osupwang, nge esap tongei o alisi, ifa usun a eäni än Kot we chen lon letipan?
1JO 3:18 Ämi nei kana, ach chen esap fis lon kapas chök, pwe pwal lon ach föför mi let.
1JO 3:19 Iwe, iei usun sia silei pwe sia pop seni ewe let. Iei usun sipwe pwal eäni apilükülük mwen mesen Kot.
1JO 3:20 Are mwelien letipach a atipisikich, sia silei pwe Kot a tekia seni mwelien letipach, a pwal silei mettoch meinisin.
1JO 3:21 Iei mine chiechiei kana mi achengicheng, are mwelien letipach esap atipisikich, sia eäni apilükülük mwen mesen Kot.
1JO 3:22 Sia angei seni Kot meinisin mine sia tüngor, pun sia aleasochisi an kewe allük o föri met epwe pwapwa ren.
1JO 3:23 Iei an allük: Sipwe lükü Nöün we Jesus Kraist, sipwe pwal echenifengenikich lefilach, usun Kraist a fen allük ngenikich.
1JO 3:24 Eman mi aleasochisi än Kot kewe allük a nom lon Kot, nge Kot a nom lon. Iwe, pokiten ewe Ngünmifel Kot a fang ngenikich sia silei pwe Kot a nom loch.
1JO 4:1 Ämi chiechiei kana mi achengicheng, ousap lükü chokewe meinisin mi apasa pwe ra eäni Ngünmifel, nge oupwe sotuniir o küttaöchü are ekewe ngün ra feito seni Kot. Pun chomong soufos chofona ra feilfetal won fanüfan.
1JO 4:2 Iei usun ämi oupwe tongeni silei ika iei i ewe Ngünün Kot: Iteiten ngün mi pwärätä pwe Jesus Kraist a feito o wiliti aramas a feito seni Kot.
1JO 4:3 Nge iteiten ngün a amamäsini ei pworaus usun Jesus esap feito seni Kot. Iei i ngünün ewe Pölüen Kraist, oua fen rong pwe epwe war, nge iei a fen nom won fanüfan.
1JO 4:4 Nge ämi nei kana, oua nöün Kot, oua akufu ekewe soufos chofona, pun ewe Ngün mi nom lomi a manaman seni ewe ngün mi nom lon chokewe ra pop seni fanüfan.
1JO 4:5 Ekei sokun soufos chofona ra kapas usun mettochun fanüfan, iwe, chon fanüfan ra aüseling ngeniir, pun ir ra pop seni fanüfan.
1JO 4:6 Nge kich sia nöün Kot. Eman mi silei Kot a aüseling ngenikich, nge eman esap nöün Kot esap aüseling ngenikich. Iei usun sia tongeni esilla eman Ngün mi let me eman ngün mi chofona.
1JO 4:7 Ämi chiechiei kana mi achengicheng, ousipwe echenifengenikich lefilach, pun chen a pop seni Kot. Eman mi eäni chen a up seni Kot, a pwal silei Kot.
1JO 4:8 Nge eman esap eäni chen, esap silei Kot, pun Kot chen.
1JO 4:9 Iwe, Kot a pwäri an echenikich ren an tinato Nöün Aleman lon fanüfan, pwe kich sipwe manau ren.
1JO 4:10 Iei wewen chen: Esap pwe kich sia echeni Kot, nge i a echenikich o tinato Nöün we pwe i popun pwe ach tipis kana ra musala.
1JO 4:11 Ämi chiechiei kana mi achengicheng, are iei usun än Kot echenikich, kich sipwe pwal echenifengenikich lefilach.
1JO 4:12 Esap wor mwo eman a fen küna Kot. Nge are sia echenifengenikich lefilach, Kot a nonom loch o an chen a unusöchüla loch.
1JO 4:13 Sia silei pwe sia nonom lon Kot o i a nonom loch, pun a fang ngenikich Ngünün we.
1JO 4:14 Iwe, sia küna o asile ngeni aramas, pwe ewe Sam a tinato Nöün we an epwe amanaua chon fanüfan.
1JO 4:15 Are eman a pwärätä pwe Jesus i ewe nöün Kot, Kot a nonom lon, nge i a nonom lon Kot.
1JO 4:16 Iwe, kich sia silei o lükü ewe chen Kot a eäni ngenikich. Kot chen. Eman mi nonom lon chen a nonom lon Kot, nge Kot a nonom lon.
1JO 4:17 Ren ei chen a unusöchüla loch, pwe sia apilükülüköch lon ewe Ränin Kapwüng. Ewer, sipwe eäni apilükülüköch, pun manauach won ei fanüfan a usun chök manauen Kraist.
1JO 4:18 Esap wor niuokus lon chen. Chen mi unusöch a asüela niuokus meinisin. Iei mine chen esap unusöchüla lon manauen eman mi niuokus, pun niuokus a pop seni än eman ekieki pwe epwe küna liwiningau.
1JO 4:19 Sia eäni chen, pun Kot a akomwen echenikich.
1JO 4:20 Are eman a apasa, “Üa echeni Kot,” nge a oput pwiin, i eman chon chofona. Pun epwe ifa usun an epwe echeni Kot, ewe esap küna, nge ese fen echeni pwiin we mi küna?
1JO 4:21 Iei ewe allük Kraist a ngenikich: Eman mi echeni Kot epwe pwal fokun echeni pwiin.
1JO 5:1 Eman mi lükü pwe Jesus ewe Kraist, i eman mi up seni Kot. Eman mi echeni eman sam a pwal echeni nöün.
1JO 5:2 Iei usun sia silei pwe sia echeni nöün Kot kana, pun sia echeni Kot o aleasochisi an kewe allük.
1JO 5:3 Pun wewen ach echeni Kot pwe sia aleasochisi an kewe allük. Nge an kewe allük resap weires ngenikich,
1JO 5:4 pun chokana meinisin mi up seni Kot ra tongeni akufu fanüfan. Iwe, kich sia akufu fanüfan ren ach lükülük.
1JO 5:5 Iö a tongeni akufu fanüfan? Ewe chök aramas mi lükü pwe Jesus i Nöün Kot.
1JO 5:6 Jesus Kraist i ewe eman mi feito fän ewe kolukun an papatais me chaan an mäla. Esap feito ren koluk chök, nge a pwal feito ren koluk me cha. Nge püsin Ngünmifel a pwärätä pwe ei a let, pun ewe Ngünmifel i let.
1JO 5:7 Mi wor ülüngat minen pwärätä:
1JO 5:8 ewe Ngünmifel, ewe koluk me ewe cha. Ekei ülüngat minen pwärätä a wewefengen ar kapasen pwärätä.
1JO 5:9 Sia lükü än eman aramas kapasen pwärätä, nge än Kot kapasen pwärätä a lap seni, pun iei an kapasen pwärätä usun Nöün we.
1JO 5:10 Iei mine eman mi lükü Nöün Kot a eäni ei kapasen pwärätä lon letipan. Nge iö esap lükü Kot a achofonai Kot, pun esap lükü met Kot a pwärätä usun Nöün we.
1JO 5:11 Iei ewe kapasen pwärätä: Kot a ngenikich manau esemüch, nge ei manau a nom lon Nöün we.
1JO 5:12 Eman mi eäni Nöün Kot a eäni manau esemüch, nge eman esap eäni Nöün Kot esap eäni manau.
1JO 5:13 Ngang üa makkei ekei kapas ngenikemi, ämi mi lükü Nöün Kot, pwe oupwe silei pwe oua eäni manau esemüch.
1JO 5:14 A wor ach apilükülüköch lon ach churi Kot, pun sia silei pwe are sia tüngor och mine a fich ngeni letipan, a aüselingakich.
1JO 5:15 Are sia silei pwe a aüselingakich, ese lifilifil met sia eäni tüngor, sia pwal silei pwe sia angei met sia tüngor ngeni.
1JO 5:16 Are eman a küna pwiin we pwe a föri och tipis esap emweni i ngeni mäla, epwe iotek ngeni Kot, pwe epwe ngeni i manau. Iei met epwe fis fän iten chokewe ar tipis esap emweniir ngeni mäla. Nge mi wor tipis mi emweni aramas ngeni mäla, üsap apasa pwe epwe iotek ngeni Kot usun ei.
1JO 5:17 Föför esepwüng meinisin iei tipis, nge mi wor tipis esap emweni aramas ngeni mäla.
1JO 5:18 Sia silei pwe eman mi up seni Kot esap sopwela le föri tipis, pun ewe Nöün Kot a tümwünüöchü, pwe Ewe mi Ngau esap tongeni afeiengaua.
1JO 5:19 Sia silei pwe kich sia nöün Kot, inamwo ika unusen fanüfan a nom fän nemenien Ewe mi Ngau.
1JO 5:20 Sia pwal silei pwe Nöün Kot a feito o fang ngenikich ach weweöch, pwe sipwe silei ewe Kot mi let. Sia nonom lon ewe Kot mi let pwal lon Nöün we Jesus Kraist. I ewe Kot mi let me ewe manau esemüch.
1JO 5:21 Ämi nei kana, oupwe püsin tümwünükemi seni ekewe uluulun anümwäl.
2JO 1:1 Ngang ewe Souakom üa kapong ngeni ewe Finesamol mi fil me nöün kana, ir chokewe üa wesewesen echeniir. Nge sap ngang chök üa echeniir, pwe pwal chokewe meinisin mi silei ewe let,
2JO 1:2 pun ewe let a nonom loch, epwe pwal etikich tori feilfeilachök.
2JO 1:3 Samach Kot me Jesus Kraist, i Nöün ewe Sam, epwe ngenikich ümöümöch, tong me kinamwe, repwe nonom rech lon let me chen.
2JO 1:4 Üa fokun pwapwa lupwen üa silei pwe ekoch me lein noumw kana ra manaueni ewe manauen let usun chök ewe Sam a allük ngenikich.
2JO 1:5 Iei üa tüngor ngonuk achengicheng Finesamol: Ousipwe echenifengenikich lefilach. Ei esap eu allük mi fö üa makkei ngenikemi, pwe iei eu allük sia eäni seni chök lepoputän.
2JO 1:6 Ei chen üa kapas usun, wewen pwe sipwe fokun aleasochisi än Kot kewe allük. Iei ewe allük oua rongorong seni lepoputän, pwe oupwe manaueni ewe manauen chen.
2JO 1:7 Chomong chon atuputup ra fetalfeil won unusen fanüfan, ir aramas resap pwärätä pwe Jesus Kraist a feito o wiliti aramas. Ei sokun aramas eman chon atuputup me ewe pölüen Kraist.
2JO 1:8 Iei mine oupwe mamasakemi, pwe esap pöüt senikemi mine sia angang fän itan, nge oupwe angei ewe liwin mi unus.
2JO 1:9 Eman esap kamwöchünük won än Kraist afalafal, pwe a apacha och ngeni, Kot esap nonom ren. Nge eman mi kamwöchünük won ewe afalafal, ewe Sam me ewe Nau ra nonom ren.
2JO 1:10 Iei mine are eman a feito remi nge esap uwato ei afalafal, ousap etiwa i lon imwemi, ousap mwo nge apasa lon ämi kapong, “Kinamwe epwe nonom reöm.”
2JO 1:11 Pun eman mi eäni kapongen kinamwe ngeni, a wiliti eman chiechian lon ekewe sokun föföringau a föriir.
2JO 1:12 A wor chomong mine ngang üa mochen ürenikemi, nge üsap mochen makkei ngenikemi lon toropwe ren ink. Nge üa apilükülük ngeni ai üpwe tongeni churikemi o püsin kapas ngenikemi, pwe ach pwapwa epwe unusöch.
2JO 1:13 Nöün pwiüm we mi fil ra kapong ngonuk.
3JO 1:1 Ngang ewe Souakom üa kapong ngeni en chienei mi achengicheng Kaius, en ewe üa wesewesen echenuk.
3JO 1:2 En chienei mi achengicheng, üa iotek pwe kopwe feiöch lon mettoch meinisin, pwe inisum epwe pöchökül, usun üa fen silei pwe ka pöchökül lon pekin ngünum.
3JO 1:3 Üa fokun pwapwa lupwen ekoch pwiich kewe souläng ra war o ra apworausa ngeniei usun om allükülük lon ewe let, usun chök ka manaueni ewe manauen let fansoun meinisin.
3JO 1:4 Esap wor och a apwapwaei me lükün ai rongorong pwe nei kana ra manaueni ewe manauen let.
3JO 1:5 En chiechiei mi achengicheng, ka allükülük lon ewe angang ka föri fän iten pwiich kewe souläng, inamwo ika ir chon ekis.
3JO 1:6 Ir ra apworausa ngeni chon ewe mwichefel ikei usun om tongeer. Kose mochen kopwe alisiir, pwe repwe tongeni sopwela ar sai lon met epwe apwapwai Kot.
3JO 1:7 Pun ra feila o saifetal fän iten ewe angangen Kraist, nge resap angei och alilis seni ekewe chon lükün lamalam.
3JO 1:8 Iei mine oukich souläng sipwe fokun alisi ekei sokun aramas, pwe ina ach alilis lon ar angang fän iten ewe let.
3JO 1:9 Ngang üa makkei echö toropwe ngeni mwichefel, nge Tiotrefes, ätewe mi mochen an epwe nemenem, esap aüseling ngeni met üa apasa.
3JO 1:10 Iei mine lupwen üpwe war, üpwe pwärätä meinisin mine a föri: ekewe mettoch mi fokun ingau a apasa usuch me an kapas chofona. Nge esap ikei chök mine a föri, esap pwal etiwa pwiich kewe souläng lupwen ra war. A fen mwo nge pinei chokewe mi mochen etiwer o atorowu seni lon ewe mwichefel.
3JO 1:11 En chienei mi achengicheng, kosap apirü mine a ngau, nge kopwe apirü mine a öch. Eman mi föri mine a öch i nöün Kot, nge eman mi föri mine a ngau esap silei Kot.
3JO 1:12 Aramas meinisin ra kapasöch usun Temetrius, pwal ewe let a kapasöch usun i. Iwe, pwal iei usun mine kich sia pwärätä o oua silei pwe met sia apasa a let.
3JO 1:13 A wor chomong mine üa mochen ürenuk, nge üsap mochen makkei ngonuk lon toropwe ren ink.
3JO 1:14 Nge üa apilükülük ai üpwe müttir churuk, pwe sipwe püsin kapasfengen.
3JO 1:15 Kinamwe epwe nonom reöm. Chiechiom kewe souläng meinisin mi nom ikei ra kapong ngonuk. Kopwe kapong ngeni chiechiach kewe souläng meinisin mi nom ikenan.
JUD 1:1 Ngang Jut, eman chon angang ngeni Jesus Kraist, ngang pwal pwiin James, üa kapong ngeni chokewe mi kö o chen me ren Samach Kot o nom fän tümwünüen Jesus Kraist.
JUD 1:2 Ümöümöch, kinamwe me chen epwe chomongola remi.
JUD 1:3 Ämi chiechiei kana mi achengicheng, üa achocho ngeni ai üpwe mak ngenikemi usun ewe manau mi fö sia eänifengeni. Nge iei üa mefi pwe a aüchea ai üpwe müttir mak ngenikemi o apöchökülakemi, pwe oupwe maun fänäsengesin ewe lükülük Kot a ngeni ekewe chon pin. Iei ewe lükülük esap tongeni siwil.
JUD 1:4 Pun ekoch aramas resap meniniti Kot ra anifilong leich, ir chokewe mi sorei ewe kapas usun än Kot ümöümöch, pwe epwe wor ar künetipingen won ar kewe föför mi fokun ngau. Ra pwal amamäsini Jesus Kraist, i chök ach Sounemenem me ach Samol. Me lomlom ekewe Toropwe mi Pin ra osuni usun ewe kapwüng ra tolong lon.
JUD 1:5 Pun inamwo ika oua silei ekei mettoch meinisin, nge üa chök mochen ai üpwe achema ngenikemi usun än ewe Samol a amanaua ekewe aramasen Israel seni Isip, nge mürin a arosala chokewe resap lükü.
JUD 1:6 Oupwe chechemeni ekewe chon läng resap menemenöch ren wiser, nge ra likitala wesewesen lenier. Ra föfö ngeni sein esap tongeni mwü lon ewe rochokich mi nom fan, ia Kot a fötekiniirelong ie tori ewe Rän mi lap i epwe apwüngüür lon.
JUD 1:7 Oupwe chechemeni Sotom me Komora me ekewe telinimw mi nom ünükür, aramasen lor ra föri sokun föför usun chök ekewe chon läng. Ra föri sokun föförün lisowu mi ngau o lapalapangau. Ra nom lon riaföün ewe ekkei esekun pwe ina liwinin ar tipis. Iei eu kapasen fön mi fatöch ngeni aramas meinisin.
JUD 1:8 Lon ewe chök sokun lapalap, ekei aramas a wor künaer mi aselipa ngeniir ar repwe tipis ngeni püsin inisiir. Ra turunufasei än Kot nemenem o esita ekewe meilap lon läng mi wor ar ling.
JUD 1:9 Sap mwo nge ewe meilapen chon läng Mikael a föri ei sokun. Lupwen a aninifengen me ewe Tefil ika iö leir epwe nemeni somän Moses, Mikael esap mochen apwüngü Tefil ren kapasen aitengau, nge a apasa, “Ewe Samol epwe apwünguk!”
JUD 1:10 Iwe, ekei aramas ra eäni kapas ingau usun ekewe mettoch resap weweiti. Nge ekewe mettoch ra weweiti seni chök ar mefi mi usun chök mefien ekewe manmwacho, ikkei ekei mettoch ra feiengau ren.
JUD 1:11 Epwe ifan me watten feiengauer! Ra manaueni manauen Kain. Ra atolongeer lon ewe sokun ruongau Pileam a föri fän iten ar repwe angei moni. Ra ü ngeni Kot usun chök Kora, iwe, repwe rosola usun chök i.
JUD 1:12 Ekei aramas ra usun chök och limengau lefilemi lupwen oua chiechifengen lon ämi kametip ren ar säwemang lon ar momongö o ükün. Ra chök püsin tümwünüür. Ra usun chök ekewe kuchu esor koluk lor, äsepwäl a ässirela. Ra usun irä esap wor uar lon fansoun kinikin, irä mi üttütä fiti warer, ra wesewesen mäla.
JUD 1:13 Ra usun chök ekewe nongauen lematau mi puropuretä ren ar föför mi asäw. Ra usun chök füün amwalech, Kot a fen amolätä fän iter eu leni lon rochokichin rochopwak tori feilfeilachök.
JUD 1:14 Iwe, Enok ewe afümanün täppin aramas seni Atam a osuni usur me lomlom, “Ewe Samol epwe feito fiti ngeröün chon läng mi pin
JUD 1:15 pwe epwe apwüngü aramas meinisin, epwe pwal atipisiir meinisin pokiten ar kewe föför ra föri ren ar resap meniniti Kot, pwal pokiten ekewe kapas mi fokun ngau ekewe chon tipis resap meniniti Kot ra apasatä lon ar ü ngeni.”
JUD 1:16 Ekei aramas ra chök lal o atipisi aramas. Ra chei mochenin letiper mi ngau, ra eäni kapasen tunomong usun püsin ir, ra pwal kapas amichimich, pwe repwe angei mine ra mochen.
JUD 1:17 Nge ämi chiechiei kana mi achengicheng, oupwe chechemeni mine ekewe soukünö nöün ach Samol Jesus Kraist ra osuni me lom.
JUD 1:18 Ra ürenikemi, “Lon ekewe ränin lesopolan epwe wor aramas repwe takirikemi, aramas mi chei mocheniangauen letiper.”
JUD 1:19 Ir ekewe aramas mi afisätä imwüfesen, ra nom fän nemenien mochenin fituker, resap eäni ewe Ngünün Kot.
JUD 1:20 Nge ämi chiechiei kana mi achengicheng, oupwe chök sopwela le apöchöküla ämi lükülük mi unusen pin. Oupwe iotek ren manamanen Ngünmifel.
JUD 1:21 Iwe, oupwe püsin tümwünükemi lon än Kot chen lupwen oua witiwiti ach Samol Jesus Kraist pwe epwe ngenikemi manau esemüch lon an ümöümöch.
JUD 1:22 Oupwe eäni tong ngeni chokewe mi tipemwaramwar lon ar lükü,
JUD 1:23 oupwe amanaua ekewe ekoch aramas ren ämi angeerewu seni ewe ekkei, iwe, ngeni pwal ekewe ekoch oupwe eäni tong ngeniir fiti niuokus, nge oupwe fen mwo nge oput ewe üf a limengau ren mocheniangauen fituker.
JUD 1:24 Iwe, ngeni i, ewe mi tongeni amwöchükemi pwe ousap tur lon tipis, a pwal tongeni aükemiitä, pwe oupwe unusen limöch o uren pwapwa me mwen an we ling,
JUD 1:25 ngeni ewe eman chök Kot ach Chon Amanau epwe ling, tekia, manaman me nemenem ren Jesus Kraist ach Samol lon ekewe fansoun ra la, ikenai tori fansoun esemüch. Amen.
REV 1:1 Iei ewe kapasen pwärätä seni Jesus Kraist, Kot a ngeni an epwe pwäri ngeni nöün kewe chon angang usun met epwe müttir fis. Kraist a asile ngeni nöün we chon angang Johannes ekei mettoch ren an tinala nöün chon läng ren.
REV 1:2 Iwe, Johannes a pwärätä meinisin mine a küna, iei än Kot kapas me ewe let Jesus Kraist a pwärätä.
REV 1:3 A feiöch eman mi aleani ei puk, ra pwal feiöch chokewe mi rongorong ngeni ekei kapasen pwärätä o aleasochis ngeni mine a mak lon. Pun ewe fansoun a arap än ekei mettoch meinisin repwe fisitä.
REV 1:4 Kapong seni Johannes ngeni ekewe fisu mwichefel lon ewe fanü Asia: Ümöümöch me kinamwe seni Kot epwe nonom remi, ewe Kot mi nom iei, ewe a fen nonom me ewe epwe feito me mürin, pwal seni ekewe füman ngün mi nom mwen an we lenien motun king,
REV 1:5 pwal seni Jesus Kraist ewe chon pwärätä mi allükülük, ewe mwänichi, Kot a amanauasefäli seni mäla, i ewe mi nemeni ekewe king won fanüfan. I a echenikich o angasakich seni ach tipis ren chaan,
REV 1:6 a pwal föri senikich eu mwün souasor, pwe sipwe angang ngeni Kot Saman. Jesus Kraist epwe küna ling me manaman tori feilfeilachök! Amen.
REV 1:7 Nengeni, epwe feito won ekewe kuchu! Aramas meinisin repwe küna i, pwal chokewe mi posu. Iwe, aramas meinisin won fanüfan repwe ngüngüres ren met ra föri ngeni. Epwe iei usun met epwe fis. Amen.
REV 1:8 “Ngang ewe Aemanün me Amüchülan,” iei alon ewe Samol, ewe Kot mi Unusen Manaman, i ewe a nom iei, ewe a fen nonom me ewe epwe feito me mürin.
REV 1:9 Ngang Johannes, pwiimi we lon Jesus, üa chienenikemi lon ämi likitü fän mosonotam lon ewe riaföü mi tori chokewe ir chon mwün Kraist. Ra anomuei won ewe fanü Patmos pokiten üa arongafeili än Kot kapas me ewe let Jesus a pwärätä.
REV 1:10 Lon ewe Ränin ach Samol üa nom lon Ngün, iwe, üa rongorong eu möngüngü mi leüömong a wewe ngeni efoch rappwa, a kapas me lükisöküri.
REV 1:11 A apasa, “Kopwe makkeetiu lon toropwe mine ka küna o kopwe tinala ngeni ekewe fisu mwichefel: Efisos, Smirna, Perkamon, Tiatira, Sartis, Filatelfia me Laotisea.”
REV 1:12 Mürin üa kuluei pwe üpwe nengeni iö we a kapas ngeniei. Iwe, üa küna fisu lenien atittin seni kolt,
REV 1:13 nge lukalapen ekewe fisu lenien atittin a wor eman a usun chök lapalapen eman nöün aramas, a üföüf echö üf mi tametiu tori apachapachan o a riri ngeni fän mwärin efoch riri seni kolt.
REV 1:14 Meten möküran a pwechepwech usun pwechen ülen sip, ika pwech usun pwechepwechen sno. Föün mesan ra wewe ngeni pulopulen ekkei,
REV 1:15 pachapachan ra meriweriw usun chök piras mi limelim me amis, nge möngüngün a usun chök ngüngün noon won woch.
REV 1:16 A amwöchü füföü fü lon pöüifichin, nge efoch ketilas mi seisei me ruupekin a itiwu seni lon awan. Won mesan a saramaram usun saramen akkaren leoloas.
REV 1:17 Iwe, lupwen üa küna i, üa chapetiu arun pechen, nge üa usun chök eman aramas mi mäla. Mürin a wätä pöüifichin woi o apasa, “Kosap niuokus! Ngang ewe Aemanün me ewe Amüchülan.
REV 1:18 Ngang ewe mi manau! Üa mäla, nge iei üa manau tori feilfeilachök. A wor ai nemenem won mäla me ewe lenien sotup.
REV 1:19 Iei kopwe makkei ekewe mettoch ka küna, ekewe mettoch a wor iei, pwal ekewe mettoch repwe fis me mürin.
REV 1:20 Iei wewen ewe monomonen ekewe füföü fü ka küna me lon pöüifichi, pwal wewen ekewe fisu lenien atittin seni kolt: ekewe füföü fü, ir ekewe chon künöön ekewe fisu mwichefel, nge ekewe fisu lenien atittin, ir ekewe fisu mwichefel.
REV 2:1 “Kopwe makkei ngeni ewe chon künöön ewe mwichefel lon Efisos: Iei alon ewe eman mi amwöchü ekewe füföü fü lon pöüifichin, ewe mi fetal lein ekewe fisu lenien atittin seni kolt.
REV 2:2 Üa silei om kewe föför, om angang weires me om likitü fän mosonotam. Üa silei pwe kosap etiwa ekewe aramasangau. Ka sotuni chokewe mi apasa pwe ir soukünö, nge sap ir soukünö, iwe, ka mefi pwe ir chon chofona.
REV 2:3 Ka likitü fän mosonotam, ka tolong lon riaföü fän itei, nge kosap fangatä.
REV 2:4 Nge iei met üpwe pölüenuk won: Iei kosap chüen echeniei, usun om echeniei me lepoputän.
REV 2:5 Kopwe chechemeni ia ka tur me ie, kopwe aier seni om tipis o föri ekewe föför ka föri me lepoputän. Nge are kosap aier seni om tipis, üpwe feito reöm o angei senuk om we lenien atittin seni lenian.
REV 2:6 Nge iei met a wor reöm üa efich: Ka oput mine ekewe chon Nikolaus ra föri, usun pwal ngang üa oput.
REV 2:7 Are a wor selingen eman epwe rongorong mine Ngünmifel a üreni ekewe mwichefel! Iö mi pwora ngeni mine a ngau üpwe mwütätä pwe epwe mongö seni ewe irän manau mi nom lon än Kot we tanipi.”
REV 2:8 “Kopwe makkei ngeni ewe chon künöön ewe mwichefel lon Smirna: Iei alon ewe Aemanün me ewe Amüchülan, ewe mi mäla o manausefäl.
REV 2:9 Üa silei om kewe riaföü. Üa silei pwe ka wöüngau, nge ka wesewesen pisekisek. Üa pwal silei pwe ka küna turunufas me ren chokewe mi apasa pwe ir chon Juta, nge sap ir chon Juta, pwe ir eu mwich än Satan.
REV 2:10 Kosap niuokusiti och riaföü epwe toruk. Nengeni, ewe Tefil epwe sotunikemi ren an epwe aturalong lon imwen fötek ekoch me leimi, nge oupwe küna riaföü lon ükükün engol rän. Kopwe likitü le lükü, inamwo ika kopwe tolong lon mäla, iwe, üpwe ngonuk ewe mwärin manau.
REV 2:11 Are a wor selingen eman epwe rongorong mine Ngünmifel a üreni ekewe mwichefel! Iö mi pwora ngeni mine a ngau esap küna feiengau ren ewe aruen mäla.”
REV 2:12 “Kopwe makkei ngeni ewe chon künöön ewe mwichefel lon Perkamon: Iei alon ewe mi wor ren ewe ketilas mi seisei me ruupekin.
REV 2:13 Üa silei ia ka nom ie, lon ewe leni ia än Satan lenien motun king a pwal nom ie. Ka allükülük ngeniei o kosap likitala om lüküei, inamwo ika lon ewe fansoun Antipas, nei chon pwärätä mi allükülük, a ninnila lon ewe leni ia Satan a nom ie.
REV 2:14 Nge mi wor ekoch mettoch üpwe pölüenuk won: A wor reöm ekoch ra aleasochis ngeni aitien Palam, ätewe mi aiti ngeni Palak usun an epwe emweni ekewe aramasen Israel ngeni tipis ren an pese ngeniir, pwe repwe mongö föten uluulun anümwäl o repwe pwal föri föförün lisowu.
REV 2:15 Ina chök usun a pwal wor reöm aramas mi aleasochis ngeni aitien ekewe chon Nikolaus.
REV 2:16 Iei kopwe aier seni om tipis! Are kosap aier üpwe müttir feito reöm o fiu ngeni ekewe aramas ren ewe ketilas mi itiwu seni lon awei.
REV 2:17 Are a wor selingen eman epwe rongorong mine Ngünmifel a üreni ekewe mwichefel! Iö mi pwora ngeni mine a ngau üpwe ngeni och seni ewe mana mi monomon, üpwe pwal ngeni eman me eman leir eföü fau mi pwechepwech a mak won eu it mi fö, esap wor eman epwe silei pwe ewe chök eman mi angei.”
REV 2:18 “Kopwe makkei ngeni ewe chon künöön ewe mwichefel lon Tiatira: Iei alon ewe Nöün Kot, mesan ra wewe ngeni pulopulen ekkei, pachapachan ra meriweriw usun piras mi amis.
REV 2:19 Üa silei om kewe föför. Üa silei om eäni chen, om allükülük, om angang me om mosonotam. Üa silei pwe mine ka föri iei a lapala seni mine ka föri me lepoputän.
REV 2:20 Nge iei met üpwe pölüenuk won: Ka mwüt ngeni ewe fefin Isipel mi püsin aita ngeni eman soufos fefin, pwe a asukul o emweningaua nei chon angang ar repwe föri föförün lisowu, repwe pwal mongö föten uluulun anümwäl.
REV 2:21 Üa ngeni neminei fansoun an epwe aier seni an tipis, nge esap mochen ükütiu seni an föförün lisowu.
REV 2:22 Nengeni, üpwe apwüngü i me chokewe mi föri ar föförün lisowu ngeni ren eu samau, iwe, repwe tolong lon watten riaföü. Iei met üpwe föri, are resap aier seni ar kewe föför mi ngau ra förifengeni.
REV 2:23 Üpwe pwal niela nöün kana. Mürin chon ekewe mwichefel meinisin repwe silei pwe ngang ewe eman mi silei ekiek me letipen aramas meinisin. Iwe, üpwe liwini ngeni eman me eman ükükün liwinin an föför.
REV 2:24 Nge ekewe ekoch me leimi lon Tiatira ousap aleasochisi ei sokun kait mi ngau, ämi ousap kaiö met ekewe ekoch ra aita ngeni ‘alololun monomonen ekiekin Satan’, üpwe ürenikemi pwe üsap anomu womi och chou.
REV 2:25 Nge oupwe chök kamwöchünük won mine oua eäni tori üpwe war.
REV 2:26 Iö mi pwora ngeni mine a ngau o sopwela le föri letipei tori lesopolan, üpwe ngeni nemenem won ekewe mwü,
REV 2:27 usun chök ngang üa angei ai nemenem seni Semei. Epwe nemeni ir ren efoch wokomächä, epwe atatakisiiretiu usun sepi mi för seni pwül.
REV 2:28 Üpwe pwal ngeni ewe füün rän.
REV 2:29 Are a wor selingen eman epwe rongorong mine Ngünmifel a üreni ekewe mwichefel!”
REV 3:1 “Kopwe makkei ngeni ewe chon künöön ewe mwichefel lon Sartis: Iei alon ewe eman mi eäni ekewe füman ngünün Kot me ekewe füföü fü. Üa silei om kewe föför, pwe mi wor itom itä ka manau, nge ka mä.
REV 3:2 Kopwe nela! Kopwe apöchöküla mine a chüen wor reöm me mwen an epwe wesewesen mäla. Pun üa küna pwe om kewe föför resap unusöch mwen mesen ai we Kot.
REV 3:3 Iei mine kopwe chechemeni mine ka kaiö o mine ka rongorong, kopwe aleasochis o aier seni om tipis. Nge are kosap nela, üpwe feito womw usun eman chon solä, nge kosap silei ewe otun üpwe feito reöm.
REV 3:4 Nge mi wor ekoch me leimi lon Sartis, ir resap alimengaua üfer. Iwe, repwe chiechi ngeniei fän üfer mi pwechepwech, pun ra fich ngeni.
REV 3:5 Iö mi pwora ngeni mine a ngau epwe üföüf ei sokun üf mi pwechepwech, iwe, üsap amola itan seni ewe puken iten chon manau. Nge üpwe pwärätä pwe i nei mwen mesen Semei, pwal mwen mesen nöün kewe chon läng.
REV 3:6 Are a wor selingen eman, epwe rongorong mine Ngünmifel a üreni ekewe mwichefel!”
REV 3:7 “Kopwe makkei ngeni ewe chon künöön ewe mwichefel lon Filatelfia: Iei alon ewe eman mi pin o let, ewe mi amwöchü ewe ki än Tafit. Iwe, met a suki ngeni ewe ki esap wor eman a tongeni öpüngala, nge met a öpüngala esap wor eman a tongeni suki.
REV 3:8 Üa silei om kewe föför. Nengeni, üa anomu mwomw eu asam mi suk, esap wor eman a tongeni öpüngala. Pun üa silei pwe a kisikis om tufich, nge ka aleasochisi ai kewe kapas, o kosap amamäsini itei.
REV 3:9 Nengeni, chokewe seni ewe mwich än Satan, ir mi apasa pwe ir chon Juta, nge sap ir chon Juta, pwe ra chofona, üpwe föri pwe repwe feito o chapetiu arun pecheöm. Ir meinisin repwe mefi pwe ngang üa echenuk.
REV 3:10 Pokiten ka tümwünü ai kewe kapas, pwe kopwe likitü fän mosonotam, üpwe pwal tümwünuk seni ewe fansoun riaföü epwe feito won unusen fanüfan, pwe epwe sotuni aramas meinisin mi nom won fanüfan.
REV 3:11 Üpwe warekai. Kopwe kamwöchünük won mine ka eäni, pwe esap wor eman epwe angei senuk mwärum.
REV 3:12 Iö mi pwora ngeni mine a ngau üpwe föri pwe epwe efoch ür lon än ai we Kot we imwenfel, nge esap chüen towu seni. Iwe, üpwe makkei won iten ai we Kot, pwal iten än ai we Kot we telinimw, ewe Jerusalem mi fö, epwe feitiu me läng seni ai we Kot, üpwe pwal makkei won itei we mi fö.
REV 3:13 Are a wor selingen eman epwe rongorong mine Ngünmifel a üreni ekewe mwichefel.”
REV 3:14 “Kopwe makkei ngeni ewe chon künöön ewe mwichefel lon Laotisea: Iei alon ewe eman mi iteni Amen, ewe Chon Pwärätä mi allükülük o let, i popun förien Kot meinisin.
REV 3:15 Üa silei om kewe föför, üa silei pwe kosap pat, kosap pwal pwiich. Amwo kopwe pat ika pwiich.
REV 3:16 Nge pokiten ka nom lefilen pat me pwiich, iei mine üpwe kusufukowu seni lon awei.
REV 3:17 Pun ka apasa, ‘Ngang üa pisekisek o wöü, esap wor ai osupwang.’ Nge en kosap silei pwe ka mwelele o attong, ka wöüngau me chun o selela.
REV 3:18 Iei mine üpwe ürenuk mine kopwe föri: Kopwe kamö seniei kolt mi limelim ren ekkei, pwe kopwe pisekisekila. Kopwe pwal kamö üf mi pwechepwech, pwe kopwe üföüf o pwölüela asäwen om selela. Kopwe pwal kamö säfeen mas, pwe kopwe säfeeni mesom pwe kopwe tongeni küna mwomw.
REV 3:19 Üa apwüngü o amiriti chokewe meinisin üa tongeer. Iei mine kopwe achocho o aier seni om tipis.
REV 3:20 Nengeni, üa ü lükün asam o fichifich. Are eman epwe rongorong mweliei o suki ewe asam, üpwe tolong ren o mongö ren, nge i epwe mongö rei.
REV 3:21 Iö mi pwora ngeni mine a ngau üpwe mwüt ngeni pwe epwe etiei le mot won ewe lenien motun king, usun pwal ngang üa pwora o mot ren Semei won an lenien motun king.
REV 3:22 Are a wor selingen eman epwe rongorong mine Ngünmifel a üreni ekewe mwichefel!”
REV 4:1 Mürin ei a pwal wor künaei, üa küna eu asam mi suk lon läng. Iwe, mwelien eman mi wewe ngeni tikin efoch rappwa, üa fen rongorong me mwan, a üreniei, “Kopwe feito ikei, pwe üpwe aiti ngonuk met epwe fokun fis mürin ei.”
REV 4:2 Lon ewe chök otun üa nom lon Ngün. Ikenan lon läng a wor eu lenien motun king, eman a mot won.
REV 4:3 Won mesen ewe mi mot a saramaram usun ekewe fau aüchea mi arauarau fetil me par iter jasper me karnelian, nge pwelin ünükün ewe lenien motun king a wor eu resim mi wewe ngeni anüen eföü fau aüchea itan emeralt.
REV 4:4 Iwe, pwelin ünükün ewe lenien motun king a wor rüwe me rüanü lenien motun king ia rüwe me föman souakom ra mot ie, ra üföüf üf mi pwechepwech o mwärämwär mwärämwär seni kolt.
REV 4:5 Seni ewe lenien motun king a towu inefi, ngüngü me chopun chopulap. Me mwen ewe lenien motun king a wor füfoch töl mi tin, ir ekewe füman Ngünün Kot.
REV 4:6 Me mwen ewe lenien motun king a pwal wor och mi usun chök eu matau seni kilas, a kurufat usun ewe fau itan kristal. Iwe, pwelin ünükün ewe lenien motun king me rüanü pekin a wor föman mönümanau, ra kula ren föün mas me mwer pwal me lükisökürür.
REV 4:7 Ewe aemanün mönümanau a wewe ngeni eman laion, ewe aruomanün a wewe ngeni eman ätemwänin kow, ewe aülümanün won mesan a wewe ngeni won mesen eman aramas, nge ewe afömanün a wewe ngeni eman ikel mi äkkäs.
REV 4:8 Eman me eman ekewe föman mönümanau a wor wonofoch pöükässin, nge won me fän pöükässiir ra kula ren föün mas. Lerän me lepwin resap ükütiu le kölü ei köl: “A pin, a pin, a pin ewe Samol Kot mi Unusen Manaman, i ewe a fen nonom, ewe a nom iei me ewe epwe feito me mürin.”
REV 4:9 Iwe, ekewe föman mönümanau ra köl kölün ling me iteüöch me kilisou ngeni ewe eman mi mot won ewe lenien motun king, ewe mi manau tori feilfeilachök. Lupwen ra föri iei usun,
REV 4:10 ekewe rüwe me föman souakom ra chapetiu me mwen ewe eman mi mot won ewe lenien motun king o fel ngeni ewe mi manau tori feilfeilachök. Ra isetiu mwäriir kewe me mwen ewe lenien motun king o apasa,
REV 4:11 “Ach Samol me ach Kot, en ka fich ngeni om kopwe angei ling me iteüöch me manaman. Pun ka föri mettoch meinisin, nge ren letipom ra fis o manau.”
REV 5:1 Iwe, üa küna echö toropwe mi numunumula lon pöüifichin ewe mi mot won ewe lenien motun king. A kula ren mak lepekin me rüepek, nge a pwau ren fisu pwau.
REV 5:2 Mürin üa küna eman chon läng mi pöchökül a kökkö ren mwelian mi leüömong, “Iö a fich ngeni an epwe ülei ekewe pwau o suki ewe toropwe?”
REV 5:3 Nge esap wor eman lon läng ika won fanüfan ika lon lenien sotup a tongeni suki ewe toropwe mi numunumula o nenelong lon.
REV 5:4 Iwe, üa fokun kechü, pun resap küna eman mi fich ngeni an epwe suki ewe toropwe ika nenelong lon.
REV 5:5 Mürin eman me lein ekewe souakom a üreniei, “Kosap kechü! Nengeni, ewe Laion seni ewe ainangen Juta, ewe mwirimwirin Tafit mi iteföüla a pwora o win, i epwe tongeni ülei ekewe fisu pwau o suki ewe toropwe.”
REV 5:6 Mürin üa küna eman Lam a ütä lukalapan mwen ewe lenien motun king, nge ekewe föman mönümanau me ekewe rüwe me föman souakom ra pweli ünükün. Ewe Lam a usun itä nge a ninnila. A wor füfoch mächän me füföü föün mesan, ir ekewe füman Ngünün Kot ra titila won unusen fanüfan.
REV 5:7 Iwe, ewe Lam a feila o a angei ewe toropwe seni pöüifichin ewe mi mot won ewe lenien motun king.
REV 5:8 Lupwen a föri iei usun, ekewe föman mönümanau me ekewe rüwe me föman souakom ra chapetiu mwen ewe Lam. Eman me eman a wor an pisekin ettik me eu sepi mi ur ren apach mi pwokus, iei än ekewe chon pin iotek.
REV 5:9 Iwe, ra kölü echö köl mi fö: “En ka fich ngeni om kopwe angei ewe toropwe mi numunumula, ka pwal fich ngeni om kopwe ülei pwaun kewe. Pun en ka ninnila, nge ren chaom ka möni aramas fän iten Kot, ekewe aramas seni ekewe ainang me kapas me mwü me sokopaten aramas meinisin.
REV 5:10 Ka för seniir eu mwün souasor, pwe repwe angang ngeni ach Kot, nge repwe nemenem won fanüfan.”
REV 5:11 Mürin üa nenengeni o rongorong möngüngün chomong ngeröün chon läng. Ra ütä pwelin ünükün ewe lenien motun king, pwal ünükün ekewe föman mönümanau me ekewe souakom,
REV 5:12 ra köl ren ngingi mi leüömong: “Ewe Lam mi ninnila a fich ngeni an epwe angei manaman, wöü, tipachem me pöchökül, iteüöch, ling me ingemwar.”
REV 5:13 Iwe, üa rongorong pwe förien Kot meinisin lon läng pwal won fanüfan, lon lenien failol pwal lon matau ra kölü ei köl: “Ingemwar me iteöch me ling me manaman ngeni ewe mi mot won ewe lenien motun king me ewe Lam tori feilfeilachök.”
REV 5:14 Iwe, ekewe föman mönümanau ra apasa, “Amen!” Nge ekewe souakom ra chapetiu o fel ngeni Kot me ewe Lam.
REV 6:1 Mürin üa küna pwe ewe Lam a ülei ewe aeuin pwau seni ekewe fisu. Iwe, üa rongorong pwe eman me lein ekewe föman mönümanau a apasa ren mwelian mi wewe ngeni chopun chopulap, “Etto!”
REV 6:2 Iwe, üa nenengeni o üa küna eman oris mi pwechepwech, nge ewe mi mot won a amwöchü efoch likapich, a pwal angei epa mwärämwär. Iwe, a feila, a pwora o win.
REV 6:3 Mürin ewe Lam a ülei ewe aruen pwau. Üa rongorong pwe ewe aruomanün mönümanau a apasa, “Etto!”
REV 6:4 Iwe, pwal eman oris mi parapar a towu, nge ewe mi mot won a mwümwü ngeni an epwe aworato maun won fanüfan, pwe aramas repwe nifengeniir. A angei efoch ketilas mi langatam.
REV 6:5 Mürin ewe Lam a ülei ewe aülüngatin pwau, iwe, üa rongorong ewe aülümanün mönümanau a apasa, “Etto!” Iwe, üa nenengeni o üa küna eman oris mi chochol, nge ewe mi mot won a amwöchü eu kilo lon pöün.
REV 6:6 Iwe, üa rongorong och mi wewe ngeni eu möngüngü mi feito seni lein ekewe föman mönümanau a apasa, “Liwinin ruu paun pilawa mi amas seni föün wiich iei ükükün peiofen eman chon angang lon eu rän, pwal liwinin wonu paun pilawa mi amas seni föün parli iei ükükün peiofen eman chon angang lon eu rän. Nge kosap afeiengaua ekewe irä olif me ekewe irän wain!”
REV 6:7 Mürin ewe Lam a ülei ewe arüanün pwau, iwe, üa rongorong ewe afömanün mönümanau a apasa, “Etto!”
REV 6:8 Iwe, üa nenengeni o üa küna eman oris mi sawepwech, nge ewe mi mot won a iteni mäla o ewe lenien sotup a tapw me mürin. A wor ar nemenem won eu lerüanün chon fanüfan ar repwe niirela ren maun, mailengita, samau me manmwacho.
REV 6:9 Mürin ewe Lam a ülei ewe alimuen pwau. Iwe, üa küna fän ewe rongen asor ngünün chokewe mi ninnila pokiten ar arongafeili än Kot kapas o eäni allükülük lon ar pwärätä itan.
REV 6:10 Ra kökkö fän mwelier mi leüömong, “Äm Samol mi Unusen Manaman, ka pin o let. Ifa langatamen fansoun tori om kopwe apwüngü ekewe aramas won fanüfan o kopwe ngeniir chappen ar nikeemila?”
REV 6:11 Mürin Kot a ngeni eman me eman leir echö üf mi pwechepwech o a üreniir, pwe repwe mwo asösö ekis chök fansoun mochomoch, tori epwe unus iteiten chiechier kewe chon angang me pwiir kewe repwe ninnila usun chök ir.
REV 6:12 Iwe, üa nenengeni pwe ewe Lam a ülei ewe awonuen pwau. A fis eu chechechin fanü mi fokun lapalap. Akkar a fokun rochola usun chök mangaku mi chol seni tuk, nge ewe maram a fokun parala usun chök paren cha.
REV 6:13 Iwe, ekewe fü ra turutiu won fanüfan usun chök föün ewe irä fiik resamwo nup ra turutiu, lupwen eu asepwäl mi pöchökül a amworeretiu.
REV 6:14 Läng a numufengen usun chök echö toropwe a numufengen o morola, nge ekewe chuk meinisin me ekewe fanüen leset ra mwöküt seni lenier.
REV 6:15 Mürin ekewe kingen fanüfan, ekewe sounemenem me meilapen sounfiu, ekewe chon pisekisek me ekewe mi wor maner, pwal ekewe aramas meinisin, ekewe amanau me ekewe mi ngas ra aopeer lon ekewe föüimw pwal fän säpereperen ekewe achau won ekewe chuk.
REV 6:16 Ra kökkö ngeni ekewe chuk me ekewe achau, “Oupwe turutiu wom o aopakem seni mesen ewe eman mi mot won ewe lenien motun king, pwal seni än ewe Lam song.
REV 6:17 Pun ewe rän mi lap a war, ewe ränin ar song, nge iö epwe tongeni ü ngeni?”
REV 7:1 Mürin ei, üa küna föman chon läng ra ütä le pwokukun fanüfan me rüanü, o ra amwöchü ekewe rüanü asepwäl, pwe esap chüen wor asepwäl a enien won fanüfan, ika won matau, ika won efoch irä.
REV 7:2 Mürin üa küna pwal eman chon läng, a feitä seni ötiu o a uwei ewe pwau än ewe Kot mi manau. Iwe, a kökköwu ren mwelian mi leüömong ngeni ekewe föman chon läng, chokewe Kot a ngeniir manaman, pwe repwe afeiengaua fanüfan me matau.
REV 7:3 A apasa, “Ousap afeiengaua fanüfan, ewe matau ika ekewe irä, tori aipwe pwauni won chamwen ekewe chon angang ngeni ach we Kot.”
REV 7:4 Iwe, üa rongorong pwe iteiten chokewe mi pwau won chamwer ükükün ipükü faik me rüanüngeröü, ir seni ekewe ainangen Israel meinisin.
REV 7:5 Seni ewe ainangen Juta engol me ruungeröü, seni ewe ainangen Rupen engol me ruungeröü, seni ewe ainangen Kat engol me ruungeröü,
REV 7:6 seni ewe ainangen Aser engol me ruungeröü, seni ewe ainangen Naftali engol me ruungeröü, seni ewe ainangen Manasa engol me ruungeröü,
REV 7:7 seni ewe ainangen Simeon engol me ruungeröü, seni ewe ainangen Lefi engol me ruungeröü, seni ewe ainangen Isakar engol me ruungeröü,
REV 7:8 seni ewe ainangen Sepulon engol me ruungeröü, seni ewe ainangen Josef engol me ruungeröü, seni ewe ainangen Peniamin engol me ruungeröü.
REV 7:9 Mürin ei, üa küna eu mwich mi fokun chocho, esap wor eman aramas a tongeni aleaniir. Ra feito seni sokopaten mwich, ainang, mwü me kapas meinisin. Iwe, ra ütä me mwen ewe lenien motun king me ewe Lam, ra üföüf üf mi pwechepwech o ra amwöchü paan nü lepöür.
REV 7:10 Iwe, ra kökkö ren mwelier mi leüömong, “Sia küna manau me ren ach we Kot, ewe mi mot won ewe lenien motun king, pwal me ren ewe Lam.”
REV 7:11 Ekewe chon läng meinisin ra ütä pwelin ünükün ewe lenien motun king, pwal ünükün ekewe souakom me ekewe föman mönümanau. Mürin ra chapetiu mwen ewe lenien motun king o fel ngeni Kot.
REV 7:12 Ra apasa, “Amen! Feiöch, ling, tipachem, kilisou, iteüöch, manaman me pöchökül än ach Kot tori feilfeilachök! Amen!”
REV 7:13 Mürin eman me lein ekewe souakom a aisiniei, “Iö kewe ir mi üföüf üf mi pwechepwech, nge ia ra feito me ie?”
REV 7:14 Üa pölüeni, “Ai samol, üsap silei, en mi silei.” Iwe, a üreniei, “Ekei aramas, ir chokewe mi towu seni ewe riaföü mi lapalap. Ra limeti üfer o apwecher lon chaan ewe Lam.
REV 7:15 Iei popun ra ütä mwen än Kot we lenien motun king o ra angang ngeni lerän me lepwin lon imwan imwenfel. Iwe, ewe mi mot won ewe lenien motun king epwe nonom rer o tütümwünüür.
REV 7:16 Resap chüen echik ika kaka, akkar esap chüen pwichitiir, nge och pwichikar esap toriir.
REV 7:17 Pun ewe Lam mi nom lukalapan mwen ewe lenien motun king epwe nöür chon mas o emweniir ngeni ekewe puächen kolukun manau. Iwe, Kot epwe talüpwasei chönün mas seni won meser meinisin.”
REV 8:1 Iwe, lupwen ewe Lam a ülei ewe afisuen pwau a wor eu lüa lon läng lon ükükün esop awa.
REV 8:2 Mürin üa küna ekewe füman chon läng mi ütä mwen mesen Kot, pwe ra angei füfoch rappwa.
REV 8:3 Iwe, pwal eman chon läng mi amwöchü eu sepi seni kolt fän iten apach mi pwokus a feito o a ütä ren ewe rongen asor. A angei chomong apach mi pwokus, pwe epwe achu ngeni än ekewe chon pin iotek pwe epwe eäni asor won ewe rongen asor seni kolt mi nom mwen ewe lenien motun king.
REV 8:4 Iwe, ötüötün ewe apach mi pwokus a feitä fiti än ekewe chon pin iotek seni lepöün ewe chon läng mi ütä mwen mesen Kot.
REV 8:5 Mürin ewe chon läng a angei ewe sepi fän iten apach mi pwokus, a amasoua ren ekewe molien ekkei mi nom won ewe rongen asor o a monetiu won fanüfan. Iwe, a fis ngüngü, chopun chopulap, fifi me chechechin fanü.
REV 8:6 Mürin ekewe füman chon läng mi amwöchü ekewe füfoch rappwa ra amolätä ar repwe le ettikiir.
REV 8:7 Iwe, lupwen ewe aemanün a ettiki nöün rappwa, üten fau me ekkei mi nofitfengen me cha ra turutiu won fanüfan. Eu leülüngatin fanüfan a karala, pwal eu leülüngatin irä me ekewe fetil meinisin.
REV 8:8 Mürin ewe aruomanün chon läng a ettiki nöün rappwa. Iwe, och mi wewe ngeni eu chuk mi watte mi ngetenget ren ekkei a turutiu le matau. Iwe, eu leülüngatin ewe matau a wiliti cha,
REV 8:9 o eu leülüngatin mönümanau mi nom leset ra mäla, pwal eu leülüngatin ekewe sip ra karala.
REV 8:10 Mürin ewe aülümanün chon läng a ettiki nöün rappwa. Iwe, eföü fü mi watte a ngetenget usun efoch töl a turutiu seni läng o turutiu won eu leülüngatin ekewe chanpupu me ekewe puächen koluk.
REV 8:11 Iten ewe fü “Maras”. Iwe, eu leülüngatin ekewe koluk ra maras, nge chomong aramas ra mäla ren ar ün ewe koluk, pun a maras.
REV 8:12 Mürin ewe afömanün chon läng a ettiki nöün rappwa. Iwe, eu leülüngatin ewe akkar a rochola, pwal eu leülüngatin ewe maram me eu leülüngatin ekewe fü, pwe eu leülüngatir resap chüen saram. Lerän esap wor saram lon ükükün rüanü awa, lepwin esap pwal wor saram lon ükükün rüanü awa.
REV 8:13 Mürin üa nenengeni o rongorong möngüngün eman ikel mi äkkäs tekiatä fän läng o a kökkö fän leüömong, “Feiengau, feiengau, feiengau ngeni chokewe meinisin mi nom won fanüfan lupwen ekewe ülüman chon läng repwe pwal ettiki en me nöün rappwa.”
REV 9:1 Mürin ewe alimanün chon läng a ettiki nöün rappwa. Iwe, üa küna eföü fü a turutiu won fanüfan o a angei kien ewe pwang mi alolol lon fanüfan.
REV 9:2 Lupwen ewe fü a suki ewe pwang mi alolol, ötüöt a ötütä seni lon, usun ötüötün eu um mi watte. Akkar me enienin asepwäl ra rochola ren ewe ötüöt seni lon ewe pwang mi alolol.
REV 9:3 Mürin lifichimas ra towu seni lon ewe ötüöt o sotiu won fanüfan. Iwe, ra angei ewe chök sokun manaman inenmönükam ra eäni.
REV 9:4 Iwe, Kot a allük ngeniir pwe resap afeiengaua ekewe fetil ika ekewe petewöl ika ekewe irä, nge repwe chök afeiengaua ekewe aramas resap eäni än Kot we pwau won chamwer.
REV 9:5 Esap mwüt ngeni ekei lifichimas pwe repwe niela ekewe aramas, nge repwe chök ariaföüür lon ükükün limu maram. Weiresin ar riaföü a wewe ngeni weiresin riaföün eman ren küüwen eman inenmönükam.
REV 9:6 Lon fansoun ekei limu maram aramas repwe äneänei ar repwe mäla, nge resap tongeni mäla. Repwe mochen mäla, nge mäla epwe sü seniir.
REV 9:7 Iwe, lapalapen ekewe lifichimas ra wewe ngeni oris mi molotä ngeni maun. Won mökürer a wor och mi usun chök mwärämwär seni kolt, nge won meser ra wewe ngeni won mesen aramas.
REV 9:8 Meten mökürer ra usun chök meten möküren fefin, nge ngiir ra wewe ngeni ngiin laion.
REV 9:9 Leupwer a pwölüla ren och cheech mi usun chök chechen leupw seni mächä, nge üngüngün pöükässiir ra wewe ngeni üngüngün chomong wokenin maun, oris ra nuki lupwen ra sälong lon maun.
REV 9:10 A wor wüküür me fölüür usun chök ekewe inenmönükam, o ren wüküür a wor manaman lon, pwe repwe tongeni afeiengaua aramas lon ükükün limu maram.
REV 9:11 Iwe, a wor eman nöür king mi nemeniir, i ewe chon läng mi nemeni ewe leni mi alolol. Itan lon kapasen Ipru Apaton, nge itan lon kapasen Krik Apolion (wewen “Ewe chon Kata”).
REV 9:12 A wes ewe aeuin feiengau, nengeni, a chüen wor ruu feiengau repwe war.
REV 9:13 Mürin ewe awonomanün chon läng a ettiki nöün rappwa. Iwe, üa rongorong eu möngüngü a feito seni ekewe rüanü pwokukun ewe rongen asor seni kolt mi nom mwen mesen Kot.
REV 9:14 Ewe möngüngü a apasa ngeni ewe awonomanün chon läng mi wor an rappwa, “Kopwe apichala ekewe föman chon läng mi fötek arun ewe chanpupu mi watte Oifrat.”
REV 9:15 Iei usun ekewe föman chon läng ra pichila, pun ra fen molotä fän iten ei chök awa, ei chök rän, ei chök maram pwal ei chök ier, pwe repwe niela eu leülüngatin chon fanüfan meinisin.
REV 9:16 Üa rongorong pwe iteiten ekewe sounfiu mi wawa oris ükükün ruupükü million.
REV 9:17 Iwe, lon künaei we üa küna ekewe oris me ekewe chon wawa, a iei usur: a wor chechen leupwer mi parapar usun ekkei, a arauarau usun ewe fau aüchea itan safaia, a pwal oleol usun primston, nge mökürer ra wewe ngeni möküren laion. Iwe, seni lon awer a towu ekkei, ötüöt me primston.
REV 9:18 Iwe, eu leülüngatin chon fanüfan ra mäla ren ekei ülüngat feiengau: ewe ekkei, ewe ötüöt me ewe primston mi towu seni awen ekewe oris.
REV 9:19 Iwe, manamanen ekewe oris a nom lon awer pwal lon wüküür kewe, pun wüküür kewe ra wewe ngeni serepenit mi wor mökürer ra aea le afeiengaua aramas.
REV 9:20 Iwe, ekewe lusun aramas resap mäla ren ekei feiengau resap aier seni mine ra föri ren pöür. Resap ükütiu le fel ngeni ekewe anün rochopwak me ekewe uluulun anümwäl mi för seni kolt, silifer, piras, fau me mwüch, ir ekewe uluulun anümwäl resap tongeni küna ika rongorong ika fetal.
REV 9:21 Resap pwal aier seni ar niela aramas, ar föri angangen rong me föri föförün lisowu ika ar solä.
REV 10:1 Mürin üa küna pwal eman chon läng mi pöchökül, a feitiu seni läng. A pwölüpwölüla ren eu kuchu o eu resim a pwäli won möküran. Won mesan a usun chök akkar, nge pechen kana ra usun chök üreekkei.
REV 10:2 A amwöchü lon pöün echö kükün toropwe mi suk. Iwe, a ipwetiu won matau ren pelifichin pechen, nge a ipwetiu won fanü ren pelimöngün pechen.
REV 10:3 Iwe, a kökkö ren mwelian mi leüömong mi wewe ngeni wörüwörün eman laion. Mürin an kökkö, fisu chopulap ra leüömong le pölüeni.
REV 10:4 Lupwen ekewe fisu chopulap ra kapas, üa mochen makkei met ra apasa. Nge üa rongorong mwelien eman mi kapas seni läng, “Kopwe amonomonala mine ekewe fisu chopulap ra apasa. Kosap makkeetiu!”
REV 10:5 Mürin ewe chon läng, ewe üa küna pwe a ipw won matau ren efoch pechen, nge ren efoch a ipw won fanü a aitietä pöüifichin läng
REV 10:6 o a pwon ren an öpölü iten Kot ewe mi manau tori feilfeilachök, ewe mi föri läng me fanüfan me matau pwal meinisin mine a nom lor. Iwe, ewe chon läng a apasa, “Esap chüen wor fansoun witiwit.
REV 10:7 Nge lon ena rän lupwen ewe afümanün chon läng epwe ettiki nöün rappwa, Kot epwe apwönüetä an we akot mi monomon, usun a fen asile ngeni nöün kewe chon angang ekewe soufos.”
REV 10:8 Mürin ewe möngüngü üa fen rongorong seni läng a kapassefäl ngeniei, “Kopwe feila o angei ewe toropwe mi suk seni lepöün ewe chon läng mi ipw won matau pwal won fanü.”
REV 10:9 Iei mine üa feila ren ewe chon läng o tüngor ngeni, pwe epwe ngeniei ewe kükün toropwe. Iwe, a üreniei, “Kopwe angei o äni. Epwe maras me lon lukom, nge epwe arar me lon awom usun chönün chunen.”
REV 10:10 Mürin üa angei ewe kükün toropwe seni lon pöün o äni. Iwe, nennan me lon awei a arar usun chönün chunen. Nge me mürin ai orumala a maras me lon lukei.
REV 10:11 Iwe, eman a üreniei, “Kopwe fokun osunisefäli usun chomong mwü, ainang, kapas me king kana.”
REV 11:1 Mürin eman a ngeniei efoch wok mi wewe ngeni efoch wok minen aükük. Iwe, a üreniei, “Kopwe feila o aükü än Kot we imwenfel me ewe rongen asor, kopwe pwal aleani chokewe mi fel lon.
REV 11:2 Nge kosap aükü ekewe leni lükün ewe imwenfel, pun Kot a ngeni ekewe chon lükün Israel ar repwe puri ewe Telinimw mi Pin lon ükükün faik me ruu maram.
REV 11:3 Iwe, üpwe tinala nei kewe ruoman chon pwärätä mi üföüf üf seni tuk, repwe arongafeili än Kot kapas lon ekewe engöröü ruopükü wone rän.”
REV 11:4 Ekei ruoman chon pwärätä, ir ekewe ruofoch irä olif me ekewe ruofoch lenien atittin mi ü mwen ewe Samolun fanüfan.
REV 11:5 Ika chon oputer ra mochen afeiengauer, ekkei epwe ngetewu seni lon awer o keniirela. Iei usun, ika eman a mochen afeiengauer epwe ninnila.
REV 11:6 A wor ar manaman ar repwe pinei läng pwe esap püngütiu üt lon ükükün ewe fansoun ra arongafeili än Kot kapas. A wor ar manaman won ekewe puächen koluk ar repwe awili ngeni cha. A pwal wor ar manaman ar repwe afeiengaua fanüfan ren sokopaten feiengau fansoun inet chök ra mochen.
REV 11:7 Iwe, lupwen repwe wes le arongafeili ar afalafal, ewe manmwacho mi towu seni lon ewe pwang mi alolol epwe maun ngeniir. Iwe, epwe akufuur o niirela,
REV 11:8 nge somäär repwe nom won alen ewe telinimw watte, ia ar we Samol a iräpenges ie. Iten ei telinimw lon kapasen awewe Sotom me Isip.
REV 11:9 Iwe, lon ükükün ülüngat esop rän aramasen ekewe mwü me ainang me kapas me mwich repwe nenengeni ekewe somä, nge resap mwütätä pwe repwe peias.
REV 11:10 Iwe, ekewe aramasen fanüfan repwe fokun pwapwa pokiten ekei ruoman soufos ra mäla. Repwe föri apwapwan mine a fis o lifangfengen lefiler, pun ekei ruoman ra atoto watten riaföü won chon fanüfan.
REV 11:11 Nge mürin ülüngat esop rän eu ngasangasen manau seni Kot a tolong lor, iwe, ra ütä o chokewe meinisin mi küneer ra fokun rükö.
REV 11:12 Mürin ekewe ruoman soufos ra rongorong eu möngüngü mi leüömong a kapas ngeniir seni läng, “Oupwe feitä ikei!” Lupwen ekewe chon oputer ra nenengeniir, ra feita läng lon eu kuchu.
REV 11:13 Lon ewe chök otun a wor eu chechechin fanü mi pöchökül o eu leengolun ewe telinimw a tala. Iwe, fisungeröü aramas ra mäla ren, nge ekewe lusun aramas mi chüen manau ra fokun rükö o mwareiti manamanen ewe Kot mi nom läng.
REV 11:14 Ewe aruen feiengau a wes, nge ewe aülüngatin epwe müttir feito.
REV 11:15 Mürin ewe afümanün chon läng a ettiki nöün rappwa, iwe, a wor chomong möngüngü mi leüömong lon läng, ra apasa, “Ewe manamanen nemeni fanüfan, iei a nom ren ach Samol me nöün we Messaia. Iwe, epwe nemenem tori feilfeilachök.”
REV 11:16 Mürin ekewe rüwe me föman souakom mi mot won ar lenien motun king mwen mesen Kot ra chapetiu o fel ngeni Kot.
REV 11:17 Iwe, ra apasa, “Äm aia kilisou ngonuk äm Kot, Samol mi Unusen Manaman, ka nom iei o ka fen nonom, pun ka angei om manaman mi lapalap o popuetä le nemenem!
REV 11:18 Ekewe chon lükün Israel ra fokun song, pun om lingeringer a war, ewe fansoun ekewe mi mäla repwe küna kapwüng. A war ewe fansoun om kopwe liwiniöchü ngeni noumw kewe chon angang ekewe soufos, me noumw kewe chon pin, pwal chokewe meinisin mi meninituk, ekewe aramas tekia me ekewe aramas kis. A war ewe fansoun om kopwe afeiengaua chokewe mi afeiengaua fanüfan.”
REV 11:19 Mürin än Kot we imwenfel lon läng a sukula, o a pwä ewe pworofel mi nom ikenan. Iwe, a fis fifin inefi, ngüngü me chopun chopulap, pwal chechechin fanü me üten fau mi püngüchou.
REV 12:1 Mürin eu watten asisil mi monomon a pwä me lon läng. A wor eman fefin mi üföüf ewe akkar o ewe maram a nom fän pechen, nge won möküran a nom epa mwärämwär mi wor engol me ruoföü fü won.
REV 12:2 Neminei a pwopwo o a arap ngeni an epwe nöünöü. A pupuchör ren an metek pwe epwe nöünöüla.
REV 12:3 Pwal eu asisil a pwä me lon läng. A wor eman trakon mi watte o parapar, a wor fisu möküran me engol mächän, nge a wor epa mwärämwär won eu me eu möküran kewe.
REV 12:4 Ren wükün we a amwökütü eu leülüngatin ekewe fü seni lon läng o atururetiu won fanüfan. Iwe, ewe trakon a üta me mwen ewe fefin, pwe epwe ochei nöün we lon ewe chök otun a nöünätiu.
REV 12:5 Mürin ewe fefin a nöünätiu eman ät, i ätewe epwe nemeni mwü meinisin ren efoch wokomächä. Nge eman a angeatä ewe mönükol ren Kot, ewe mi mot won an we lenien motun king.
REV 12:6 Iwe, ewe fefin a süla lon ewe fanüapö ia a wor ie eu leni Kot a amolätä fän itan. Ikenan epwe tümwün lon ükükün engeröü rüwopükü wone rän.
REV 12:7 Mürin a fis maun lon läng. Mikael me nöün kewe chon läng ra fiu ngeni ewe trakon, nge ewe trakon me nöün kewe chon läng ra pwal fiu ngeniir.
REV 12:8 Iwe, ewe trakon a kuf, nge i me nöün kewe chon läng resap chüen mwümwütä ar repwe nonom lon läng.
REV 12:9 Ewe trakon mi watte a koturuwu lükün, ewe serepenitin lom mi iteni Tefil are Satan, a atupu unusen chon fanüfan. A koturutiu won fanüfan, i me nöün kewe chon läng.
REV 12:10 Mürin üa rongorong eu möngüngü mi leüömong lon läng a apasa, “Iei a fis än Kot amanaua aramas! Iei Kot a pwärätä an tufich le nemenem. Iei nöün we Messaia a pwärätä an nemenem! Pun ewe chon atipisi pwiich kewe lerän me lepwin mwen mesen Kot a koturutiu seni läng.
REV 12:11 Pwiich kewe ra akufu Satan ren chaan ewe Lam, ren ewe kapasen manau ra pwärätä, pwal ren ar mochen fangatä manauer pwe repwe mäla.
REV 12:12 Iei mine, en läng kopwe fokun pwapwa, pwal meinisin mi nonom lon läng. Nge feiengau ngeni fanüfan me matau, pun Satan a feitiu remi o a fokun lingeringer pokiten an silei pwe a mochomoch chök an fansoun.”
REV 12:13 Lupwen ewe trakon a küna pwe a turutiu won fanüfan, a tapweri ewe fefin mi nöünätiu ewe ät.
REV 12:14 Nge ewe fefin a angei ruofoch pöükässin eman ikel mi watte, pwe epwe tongeni aea le ässila ngeni lenian we lon fanüapö ia epwe tümwün ie lon ükükün ülüngat esop ier, iei ewe leni ewe serepenit esap tongeni afeiengaua me ie.
REV 12:15 Mürin ewe trakon a kusufawu me lon awan eu chanpupun koluk mürin ewe fefin, pwe epwe öütela ren.
REV 12:16 Nge fanüfan a alisi ewe fefin. A amasala awan o otumwu ewe koluk mi towu seni lon awen ewe trakon.
REV 12:17 Iwe, ewe trakon a fokun lingeringeriti ewe fefin, a feila seni pwe epwe fiu ngeni lusun mwirimwirin kewe, ir chokewe meinisin mi aleasochisi än Kot kewe allük o ra allükülük lon ewe let Jesus a pwärätä.
REV 12:18 Nge ewe trakon a ütä aroset.
REV 13:1 Mürin üa küna eman manmwacho a feitä seni lon ewe matau. A wor engol mächän me fisu möküran. Iwe, efoch me efoch ekewe mächä a wor epa mwärämwär won, nge won eu me eu kewe mökür a mak eu it mi turunufasei Kot.
REV 13:2 Ewe manmwacho a usun chök eman lepart, pechen ra usun pechen eman pear, nge awan a usun chök awen eman laion. Ewe trakon a ngeni ewe manmwacho an manaman, an lenien motun king me an we watten nemenem.
REV 13:3 Eu me lein möküren ewe manmwacho kewe a kinas usun itä nge eu kinas epwe mäla ren. Nge ewe kinas a mola. Unusen chon fanüfan ra mairü ren o ra tapwela mürin ewe manmwacho.
REV 13:4 Iwe, aramas meinisin ra fel ngeni ewe trakon pokiten a ngeni ewe manmwacho an nemenem. Ra pwal fel ngeni ewe manmwacho o ra apasa, “Iö a wewe ngeni ewe manmwacho? Iö a tongeni fiu ngeni?”
REV 13:5 A mwümwü ngeni ewe manmwacho pwe epwe eäni kapasen lamalamtekia mi turunufasei Kot, a pwal mwümwü ngeni pwe epwe nemenem lon ükükün faik me ruu maram.
REV 13:6 A popuetä le turunufasei Kot, itan me ewe leni ia a nom ie, pwal chokewe meinisin mi nom lon läng.
REV 13:7 A mwümwü ngeni an epwe fiu ngeni ekewe chon pin o akufuur, a pwal angei an nemenem won ekewe ainang me mwü me kapas me mwich meinisin.
REV 13:8 Iwe, aramas meinisin mi nom won fanüfan repwe fel ngeni, chilon chök chokewe iter a mak lon ewe puken iten chon manau me mwen än Kot esamwo föri fanüfan, iei ewe puk än ewe Lam mi ninnila.
REV 13:9 Are a wor selingen eman epwe rongorong:
REV 13:10 Are eman epwe oola, epwe chök oola, are eman epwe ninnila ren ketilas, epwe chök ninnila ren ketilas. Iei lomotan pwe epwe wor än ekewe chon pin likitü me lükülük.
REV 13:11 Mürin üa küna pwal eman manmwacho a feitä seni lon fanüfan. A wor ruofoch mächän usun mächän eman apanen sip, nge a kapas usun eman trakon.
REV 13:12 A aea än ewe aemanün manmwacho nemenem mi watte me mwen mesan. A pöchökül ngeni chon fanüfan meinisin, pwe repwe fel ngeni ewe aemanün manmwacho, ewe kinasan we a mola.
REV 13:13 Ei aruomanün manmwacho a afisätä manaman mi lapalap. A pwal tongeni awora ekkei mi feitiu seni läng won fanüfan mwen mesen aramas meinisin.
REV 13:14 Ren ekei manaman a mwümwütä ngeni pwe epwe föri mwen mesen ewe aemanün manmwacho, a atupu ekewe aramas meinisin mi nom won fanüfan. Ewe manmwacho a üreni ekewe aramas, pwe repwe aüetä eu uluulun fän iten ewe manmwacho, ewe a fen kinas ren ewe ketilas, nge a chüen manau.
REV 13:15 A mwümwütä ngeni ewe aruomanün manmwacho pwe epwe ngaseralong manau lon uluulun ewe aemanün manmwacho, pwe ewe uluulun a tongeni kapas, a pwal tongeni niela chokewe meinisin resap mochen fel ngeni.
REV 13:16 Ewe manmwacho a pöchökül ngeni aramas meinisin, ngeni ekewe aramas lap me ekewe aramas kis, ekewe chon pisekisek me ekewe chon wöüngau, ekewe chon ngas me ekewe amanau pwe repwe eäni eu asisil won pöüifichiir ika won chamwer.
REV 13:17 Esap wor eman a tongeni kamö och ika amömö are esap eäni ei asisil. Ei asisil iei iten ewe manmwacho ika ewe nampa fän iten itan we.
REV 13:18 Iei lomoten tipachem. Iö a wor an mirit a tongeni weweöchiti wewen nampan ewe manmwacho, pun ewe nampa nampan iten eman aramas. Iei iteiten ewe nampa wonopükü wone me wonu.
REV 14:1 Mürin üa nenengeni o üa küna ewe Lam a ütä won ewe Chuk Sion, nge üa pwal küna ipükü faik me rüanüngeröü aramas ra nom ren, ir chokewe a mak itan me iten Saman won chamwer.
REV 14:2 Iwe, üa rongorong eu möngüngü seni läng a wewe ngeni ngüngün chomong koluk, a pwal wewe ngeni chopun chopulap mi leüömong. Ei möngüngü üa rongorong a usun chök ngingiin kitar lupwen ekewe chon ettik kitar ra ettiki.
REV 14:3 Ekei ipükü faik me rüanüngeröü aramas ra ütä mwen ewe lenien motun king, mwen ekewe föman mönümanau me ekewe souakom. Ekei aramas ra fen küna manau seni won fanüfan, ra kölü echö köl mi fö, ir chök ra tongeni silei.
REV 14:4 Ir chokewe mi püsin tümwünüür pwe resap alimengauer ren ar tipis ngeni fefin, ra usun chök föpwül resamwo tori mwän. Ra tapwela mürin ewe Lam ekis meinisin ia a feila ie. Ra fen küna manau me lein ekewe aramasen fanüfan, pwe ir ekewe mweinöü fän iten Kot me ewe Lam.
REV 14:5 Resap fokun apasatä kapas chofona, esap wor ar mwäl.
REV 14:6 Mürin üa küna pwal eman chon läng mi äkkäs fän läng, a uwei ewe Pworausen Manau esemüch pwe epwe arongafeili ngeni chon fanüfan, ngeni sokun mwich me ainang, kapas me mwü meinisin.
REV 14:7 A apasa ren mwelian mi leüömong, “Oupwe asamolu Kot o mwareiti an tekia! Pun a war ewe fansoun pwe epwe apwüngü chon fanüfan. Oupwe fel ngeni ewe mi föri läng me fanüfan, matau me ekewe lenien puächen koluk!”
REV 14:8 Ewe aruomanün chon läng a tapweto me mürin ewe aemanün o a apasa, “A tala, a tala, Papilon mi lapalap! A aünü ngeni chon ekewe mwü meinisin ünüman wain mi pwichikar, ewe wainen an mocheisou!”
REV 14:9 Ewe aülümanün chon läng a tapweto me mürin ewe aemanün me aruomanün o a apasa ren mwelian mi leüömong, “Iö a fel ngeni ewe manmwacho me uluulun we o eäni ewe asisil won chamwan ika won pöün
REV 14:10 epwe ün seni än Kot we wain, ewe wainen an lingeringer. Iei ewe wain mi pöchökül Kot a ninalong lon an we kapen song! Iwe, chokewe meinisin mi eäni ewe asisil repwe fokun riaföü lon ekkei me primston me mwen ekewe chon läng mi pin me ewe Lam.
REV 14:11 Iwe, ötüötün ewe ekkei mi ariaföüür a ötütä tori feilfeilachök. Lerän me lepwin esap wor ngas fän iten chokewe mi fel ngeni ewe manmwacho me uluulun we, fän iten chokewe meinisin mi eäni asisilen itan.”
REV 14:12 Iei lomoten än ekewe chon pin likitü, ir chokewe mi aleasochisi än Kot kewe allük o ra allükülük ngeni Jesus.
REV 14:13 Mürin üa rongorong eu möngüngü seni läng a apasa, “Kopwe makkei ei: Ra feiöch chokewe mi mäla lon ar lükü ach Samol seni ikenai!” Ewe Ngünmifel a pölüeni, “Ewer, repwe asösö seni ar angang weires, pun ar föför mürina a etiir.”
REV 14:14 Mürin üa nenengeni o üa küna pwe a wor eu kuchu mi pwech, nge eman a mot won ewe kuchu usun itä nge eman nöün aramas, a mwärämwär epa mwärämwär seni kolt won möküran, a pwal amwöchü lepöün efoch kama mi ken.
REV 14:15 Iwe, pwal eman chon läng a towu seni ewe imwenfel o a kökköla ren mwelian mi leüömong ren ewe eman mi mot won ewe kuchu, “Kopwe nöünöü noumw we kama o kini ewe räs! Pun ewe räsin fanüfan a fokun nup o ewe fansoun kinikinin räs a war.”
REV 14:16 Iei mine ewe mi mot won ewe kuchu a ätteri ngeni fanüfan nöün we kama o a kini räsin fanüfan.
REV 14:17 Mürin üa küna pwal eman chon läng a towu seni ewe imwenfel lon läng o a pwal amwöchü efoch kama mi ken.
REV 14:18 Mürin pwal eman chon läng, ewe mi wisen tümwünü ewe ekkei a feito seni ewe rongen asor. A kökköla ren mwelian mi leüömong ren ewe chon läng mi amwöchü ewe kama mi ken, “Kopwe nöünöü noumw we kama o pökü ekewe umwun uän wain seni lon ewe tanipin wain won fanüfan, pun ra nup!”
REV 14:19 Iei mine ewe chon läng a ätteri ngeni fanüfan nöün we kama o pökü ekewe umwun uän wain seni ewe irä o atururelong lon ewe lenien üchüch föün wain mi watte, wewen ei än Kot lingeringer.
REV 14:20 Ekewe umwun uän wain ra üchüch lon ewe lenien üchüch lükün ewe telinimw. Iwe, cha a towu seni ewe lenien üchüch föün wain, o pupuun a pula ina epwe ükükün ruwopükü mail, nge alololun ina epwe ükükün limu fiit.
REV 15:1 Mürin üa küna lon läng eu watten asisil mi monomon o amwarar. A wor füman chon läng mi wor rer fisu amüchülan feiengau, pun än Kot lingeringer epwe müchüla ren ekei feiengau.
REV 15:2 Mürin üa küna och mi usun chök eu matauen kilas mi nofitfengen me ekkei. Üa pwal küna chokewe mi akufu ewe manmwacho me uluulun we, ra pwal akufu ewe eman itan a iteit lon nampa. Ra ütä ünükün ewe matauen kilas o ra amwöchü ekewe kitar Kot a ngeniir.
REV 15:3 Iwe, ra köl ewe köl än Moses ewe chon angang ngeni Kot, pwal ewe köl än ewe Lam: “Äm Kot, Samol mi Unusen Manaman, a tekia o amwarar om angang kana! En kingen ekewe mwü, a pwüng o let om kewe föför!
REV 15:4 Iö esap niuokusituk o alinga itom, en äm Samol? Pun en chök ka pin. Chon ekewe mwü meinisin repwe feito o fel ngonuk, pun om kewe föför mi pwüng ra pwäpwäla ngeni aramas meinisin.”
REV 15:5 Mürin ei üa küna ewe imwenfel lon läng a sukula, ia ewe imw mangaku mi pin a nom ie.
REV 15:6 Iwe, ekewe füman chon läng mi wor rer ekewe fisu feiengau ra towu seni lon ewe imwenfel, ra üföüf üf mi pwechepwech o molupolup, ra pwal riri ngeni fän mwäriir efoch riri seni kolt.
REV 15:7 Mürin eman me lein ekewe föman mönümanau a ngeni ekewe füman chon läng fisu sepi seni kolt mi ur ren än Kot lingeringer, i ewe Kot mi manau tori feilfeilachök.
REV 15:8 Iwe, ewe imwenfel a ur ren ötüöt mi feito seni än Kot ling me manaman, nge esap wor eman a tongeni tolong lon ewe imwenfel tori repwe wesila ekewe fisu feiengau seni ekewe füman chon läng.
REV 16:1 Mürin üa rongorong mwelien eman mi leüömong seni lon ewe imwenfel a üreni ekewe füman chon läng, “Oupwe feila o ninätiu ekewe fisu sepi mi ur ren än Kot lingeringer won fanüfan!”
REV 16:2 Iei mine ewe aemanün chon läng a feila o ninätiu masouen sepian we won fanüfan. Iwe, och sokun ruup mi fokun ngau o metek a pwäwu me won chokewe mi eäni asisilen ewe manmwacho, pwal won chokewe mi fel ngeni uluulun we.
REV 16:3 Mürin ewe aruomanün chon läng a ninätiu masouen sepian we lon matau. Iwe, ewe matau a wiliti cha usun chök chaan eman aramas mi mäla o iteiten mönümanau meinisin lon matau ra mäla.
REV 16:4 Mürin ewe aülümanün chon läng a ninätiu masouen sepian we lon ekewe chanpupu me ekewe puächen koluk pwe ra wiliti cha.
REV 16:5 Iwe, üa rongorong pwe ewe chon läng mi wisen tümwünü ekewe koluk a apasa, “Pwüngün om kewe kapwüng ra pwüng. En ewe mi Pin, ka nom iei o ka fen nonom!
REV 16:6 Pun ra ninätiu chaan ekewe chon pin me ekewe soufos, iei mine ka ngeniir cha pwe repwe ünümi usun a fich ngeniir!”
REV 16:7 Mürin üa rongorong mwelien eman seni ewe rongen asor a apasa, “Kot, Samol mi Unusen Manaman! Pwüngün om kewe kapwüng ra wesewesen let o pwüng!”
REV 16:8 Mürin ewe afömanün chon läng a ninätiu masouen sepian we won ewe akkar. Iwe, a mwümwütä ngeni akkar pwe epwe keni aramas ren watten pwichikaran.
REV 16:9 Ra kar ren watten pwichikaran, iwe, ra otteki iten Kot, ewe mi wor an nemenem won ekei feiengau. Nge resap mochen aier seni ar tipis o alinga Kot.
REV 16:10 Mürin ewe alimanün chon läng a ninätiu masouen sepian we won än ewe manmwacho lenien motun king. Iwe, rochokich a pwölüela mwün ewe manmwacho, nge ekewe aramas ra küüwu chönawer pokiten watten ar metek.
REV 16:11 Iwe, ra otteki Kot mi nom läng pokiten metekin rupur kewe, nge resap mochen aier seni ar kewe föför mi ngau.
REV 16:12 Mürin ewe awonomanün chon läng a ninätiu masouen sepian we lon ewe chanpupu Oifrat mi fokun watte. Iwe, ewe kolukun lon a pwasetä, pwe epwe fis efoch al fän iten ekewe king repwe feito seni ötiu.
REV 16:13 Mürin üa küna ülüman ngün mi limengau ra wewe ngeni kairü. Ekei ngün ra towu seni lon awen ewe trakon, seni lon awen ewe manmwacho, pwal seni lon awen ewe soufos chofona.
REV 16:14 Ir anün rochopwak mi föri manaman. Ekei ülüman ngün ra feila ren ekewe kingen unusen fanüfan ar repwe achufengeniir, pwe repwe maun lon ewe rän mi lap än Kot ewe mi Unusen Manaman.
REV 16:15 “Nengeni, üpwe feito usun eman chon solä! A feiöch ätewe mi nenela o tümwünü üfan kewe, pwe esap fetalfeil lon an selela o säw ren aramas.”
REV 16:16 Mürin ekewe ngün ra achufengeni ekewe king lon ewe leni mi iteni lon kapasen Ipru Armaketon.
REV 16:17 Mürin ewe afümanün chon läng a ninätiu masouen sepian we lon asepwäl. Iwe, mwelien eman mi leüömong a towu seni lon ewe lenien motun king me lon ewe imwenfel, a apasa, “A fisila!”
REV 16:18 Iwe, a fis fifin inefi, ngüngü me chopun chopulap, pwal eu chechechin fanü mi fokun afeiengau. Esap fokun mwo wor eu sokun chechechin fanü seni lon fansoun popuetän än aramas nom won fanüfan mi afeiengau usun ei.
REV 16:19 Ewe telinimw watte a kinikin lon ülüngat kinikin, nge telinimwen ekewe fanü meinisin ra tala. Iwe, Kot esap manlükala Papilon, ewe telinimw mi lapalap, a aünü ngeni ewe wain seni an kap, iei ewe wainen an lingeringer mi fokun afeiengau.
REV 16:20 Iwe, ekewe fanüen lematau meinisin ra kokotiu, nge ekewe chukutekia meinisin ra morola.
REV 16:21 Üten fau mi watte, choun eföü ina epwe ükükün ipükü paun, ra turutiu seni läng won ekewe aramas. Iwe, ekewe aramas ra otteki Kot pokiten ewe feiengau ren ewe üten fau, pun ewe feiengau a fokun aniuokus.
REV 17:1 Mürin eman me lein ekewe füman chon läng mi amwöchü ekewe fisu sepi a feito rei o üreniei, “Kopwe etto, üpwe aiti ngonuk usun än ewe fin lisowu mi iteföüla epwe küna apwüng, wewen, iei ewe telinimw watte mi kaütä arun chomong chanpupu.
REV 17:2 Ekewe kingen fanüfan ra föri föförün lisowu ngeni o ekewe aramasen fanüfan ra puchula ren ar ün ünümen neminewe we wainen lisowu.”
REV 17:3 Mürin ewe chon läng a uweieila lon eu fanüapö lupwen ai nom lon Ngün. Ikenan üa küna eman fefin mi mot won eman manmwacho mi par. Ei manmwacho a kula won inisin ren it mi turunufasei Kot. A wor fisu möküran me engol mächän.
REV 17:4 Ei fefin a üföüf üf mi parachol me parapar, a pwal foute ngeni sokopaten fout seni kolt, fau mi aüchea me föün pwei. A amwöchü lepöün eu kap seni kolt mi ur ren sokopaten mettoch mi anioput me limengauen an föförün lisowu.
REV 17:5 A mak eu it won chamwan a monomon wewen: Papilon mi lapalap, inelapen ekewe fin lisowu meinisin me ekewe föför mi anioput won fanüfan.
REV 17:6 Üa küna ewe fefin pwe a puchula ren chaan ekewe chon pin me chaan chokewe mi ninnila pokiten ar allükülük ngeni Jesus. Lupwen üa küna neminewe, üa fokun mairü.
REV 17:7 Nge ewe chon läng a aisiniei, “Pwota ka mairü? Üpwe pwäri ngonuk wewen ewe monomon usun ewe fefin me ewe manmwacho mi uwei neminewe, ewe manmwacho mi wor fisu möküran me engol mächän.
REV 17:8 Ewe manmwacho ka küna a manau me lom, nge iei esap chüen manau, epwele feitä seni lon ewe pwang mi alolol pwe epwe tolong lon feiengauen pöütmwälila. Ekewe aramas mi nom won fanüfan iter esap mak lon ewe puken iten chon manau me mwen än Kot esamwo föri fanüfan, ir meinisin repwe mairü lupwen repwe nenengeni ewe manmwacho, pun a manau me lom o iei esap chüen manau, nge epwe pwal pwäsefäl.
REV 17:9 “Iei lomoten tipachem me silelap. Ekewe fisu mökür wewen fisu chuk ewe fefin a mot won.
REV 17:10 Ra pwal wewe ngeni füman king. Limman leir ra fen mäla, eman a chüen nemenem, nge ewe eman esamwo war. Iwe, lupwen epwe war, epwe chök nemenem lon fansoun mochomoch.
REV 17:11 Ewe manmwacho mi manau me lom, nge iei esap chüen manau, i ewe awalumanün king, eman me lein ekewe füman. Nge epwe tolong lon feiengauen pöütmwälila.
REV 17:12 “Ekewe engol mächä ka küna, ir engol king resamwo popuetä le nemenem, nge epwe toriir ewe pwüüng pwe repwe nemenem lon wisen king fiti ewe manmwacho lon ükükün eu awa chök.
REV 17:13 Ekei engol king ra tipeeufengen, iwe, ra ngeni ewe manmwacho ar pöchökül me nemenem.
REV 17:14 Repwe maun ngeni ewe Lam, nge ewe Lam epwe akufuur, pun i ewe Samol mi lap seni ekewe samol meinisin, pwal i ewe King mi tekia seni ekewe king meinisin. Nge chokewe mi tapwela mürin ir chon kö, chon fil me chon allükülük ngeni.”
REV 17:15 Mürin ewe chon läng a pwal üreniei, “Ekewe koluk ka küna, ewe fin lisowu a mot arur, wewen mwü, mwichen aramas, ainang me kapas.
REV 17:16 Nge ekewe engol mächä ka küna, pwal ewe manmwacho repwe oput ewe fin lisowu. Repwe angei seni mettochun meinisin o likiti neminewe lon an selela. Repwe ochei fitukan o kenala ren ekkei.
REV 17:17 Pun Kot a atolonga lon letiper pwe repwe apwönüetä an ekiek ren ar repwe tipeeufengen le ngeni ewe manmwacho pöchökülen ar nemenem tori än Kot kapas repwe pwönüetä.
REV 17:18 Ewe fefin ka küna, iei ewe telinimw mi lapalap a nemenem won ekewe kingen fanüfan.”
REV 18:1 Mürin ei, üa küna pwal eman chon läng a feitiu seni läng, a eäni watten manaman, o ren lingan a asaramala unusen fanüfan.
REV 18:2 A kökkö ren mwelian mi leüömong, “A tala, a tala Papilon mi lapalap. Iei a wiliti eu lenien anün rochopwak me ngün mi limengau. Sokopaten machang mi limengau me anioput ra nonom lon.
REV 18:3 Pun chon ekewe mwü meinisin ra puchula ren ar ün ünüman wain, iei ewe wainen an mocheisou. Ekewe kingen fanüfan ra föri föförün lisowu ngeni, nge ekewe chon amömö won fanüfan ra pisekisekila ren chomongun an kewe föför mi ngau.”
REV 18:4 Mürin üa rongorong möngüngün eman seni läng a apasa, “Oupwe towu, oupwe towu nei aramas seni lon Papilon! Iwe, ousap eti le föri an kewe tipis, pwe ousap angei och seni an kewe feiengau.
REV 18:5 Pun an kewe tipis ra chukuchukutä tori läng, nge Kot a chechemeni an kewe föför mi ngau.
REV 18:6 Oupwe föri ngeni i usun mine a fen föri ngenikemi. Oupwe liwini ngeni fän ruu liwinin meinisin mine a föri. Oupwe alölöü an we kap ngeni minen ün aükükün pöchökülan fän ruu seni ewe minen ün a amolätä fän itemi.
REV 18:7 Oupwe awora ngeni neminei chomong riaföü me letipeta, usun chök watten ewe ling a püsin alinga ngeni me ewe pwapwan fanüfan a awora ngeni. Pun a püsin ekieki lon letipan, ‘Ngang eman kiwin, üa mot won ai lenien mot! Ngang üsap eman fin lipichsefäl. Ngang üsap fokun tolong lon letipeta.’
REV 18:8 Pokiten a eäni ei sokun ekiek, lon eu chök rän neminei epwe fokun tolong lon ekei feiengau: samau, letipeta me mailengita. Iwe, epwe karala ren ekkei, pun ach Samol Kot, ewe mi apwüngü, a wor an pöchökül.”
REV 18:9 Iwe, ekewe kingen fanüfan mi eti i le föri föförün lisowu me mocheniangau repwe pupuchör o kechüeiti ewe telinimw, lupwen repwe küna ötüötün ewe ekkei mi kenala.
REV 18:10 Ra ütä me toau, pun ra niuokus ar repwe eti lon an riaföü. Ra apasa, “A ifan me watten feiengauom! A ifan me amairün feiengauom! En telinimw Papilon mi watte o pöchökül. Lon eu chök awa ka küna apwüng!”
REV 18:11 Ekewe chon amömö pisek won fanüfan ra pwal kechü o letipeta usun ewe telinimw, pun esap chüen wor eman mi kamö ar kewe pisek.
REV 18:12 Esap chüen wor eman a kamö ar kolt, silifer, fau aüchea, föün pwei, ar mangaku mi pwechepwech, mangaku mi parachol, mangaku mi mitimit me mangaku mi parapar, sokopaten mwüch mi pwoöch, sokopaten pisek mi för seni ngiin äläfan me sokun mwüch mi liwinimong, pisek seni piras me mächä me ekewe fau iter marpel.
REV 18:13 Esap chüen wor eman a kamö ar sinamon, nofitin mongö mi pwoarar, apach mi pwokus, säfei mi aüchea me lö mi pwokus. Esap chüen wor eman a kamö ar wain, apüra, pilawa mi amas me wiich, nöür kow me sip, nöür oris me waar woken, nöür amanau, pwal mwo nge aramas.
REV 18:14 Ekewe chon amömö ra kapas ngeni ewe telinimw, “Ekewe mettoch meinisin mi mürina ka mochenia ngeni om kopwe eäni resap chüen nom. Woumw kewe meinisin me lingom ra feil senuk, nge kosap chüen künasefäliir!”
REV 18:15 Ekewe chon amömö mi pisekisekila ren ar amömö pisekir me lon ewe telinimw repwe ütä me toau, pun ra niuokus ar repwe eti lon an riaföü. Repwe kechü o letipeta,
REV 18:16 repwe apasa, “A ifan me watten feiengauan! A ifan me amairün feiengauen ewe telinimw mi watte! A soun üföüf üf mi pechepwech, parachol me parapar o foutei ngeni sokun fout seni kolt, fau aüchea me föün pwei!
REV 18:17 Lon eu chök awa wöün meinisin a pöüt seni.” Iwe, käptinin waan kewe sip meinisin me ekewe pasisö, ekewe säla me chokewe meinisin mi manau seni ar angang le matau ra ütä me toau
REV 18:18 o pupuchör lupwen ra küna ötüötün ewe ekkei mi kenala ewe telinimw. Ra apasa, “Esap fokun wor pwal eu telinimw mi wewe ngeni ei telinimw mi watte!”
REV 18:19 Iwe, ra wätä pwül won mökürer, ra kechü lon ar letipeta o apasa, “A ifan me watten feiengauan! A ifan me amairün feiengauen ei telinimw! Iei ewe telinimw ia chokewe mi wor waar sip mi sai le matau ra pisekisekila ren wöün. Lon eu chök awa mettoch meinisin mine a eäni a pöüt seni.”
REV 18:20 En läng, kopwe fokun pwapwa pokiten ewe telinimw a tala. Oupwe fokun pwapwa ämi kewe chon pin, ämi kewe soukünö me ämi kewe soufos! Pun Kot a apwüngü ewe telinimw ren met a föri ngenikemi.
REV 18:21 Mürin eman chon läng mi pöchökül a ekietä eföü fau mi wewe ngeni eföü föün föir mi watte, a aturätiu lon ewe matau o apasa, “Iei usun en Papilon, ewe telinimw mi watte, kopwe fokun koturfochofochotiu fän pöchökül, o kosap chüen pwäsefäl.
REV 18:22 Esap chüen wor eman epwe rongorong tikin kitar me ngingiin chon köl, pwal tikin likaangün me tikin rappwa me lon alom kewe. Esap chüen wor sousilelap lon sokun angang meinisin epwe pwäsefäl me lon en, esap pwal chüen wor eman mi rongorong ngüngün ewe lenien kata föün wiich.
REV 18:23 Esap chüen wor eman epwe küna tinen eu lamp lon en, esap pwal chüen wor eman epwe rongorong möngüngün ekewe mwän apwüpwülü söfö me fin apwüpwülü söfö me lon en. Noumw kewe chon amömö a wor ar pöchökül won unusen fanüfan, nge ren om angangen rong ka atupu aramasen fanüfan meinisin!”
REV 18:24 Papilon a küna kapwüng pokiten chaan ekewe soufos me ekewe chon pin a ninnila lon, ewer, chaan chokewe meinisin mi ninnila won fanüfan.
REV 19:1 Mürin ei, üa rongorong och möngüngü mi wewe ngeni mwelien eu mwichen aramas mi watte seni lon läng, ra kökkö fän leüömong, “Ousipwe mwareiti Kot! Manau me ling me manaman a wor ren ach Kot!
REV 19:2 An kewe kapwüng ra let o pwüng! A apwüngü ewe fin lisowu mi iteföüla, a angauala chon fanüfan ren an föförün lisowu. Kot a ngeni chappen an föför, pun a niela nöün kewe chon angang.”
REV 19:3 Ra kökkösefäl fän leüömong, “Ousipwe mwareiti Kot! Ötüötün ewe ekkei mi kenala ewe telinimw mi watte a ötütä tori feilfeilachök.”
REV 19:4 Iwe, ekewe rüwe me föman souakom me ekewe föman mönümanau ra chapetiu o fel ngeni Kot, ewe mi mot won an lenien motun king. Ra apasa, “Amen! Ousipwe mwareiti Kot.”
REV 19:5 Mürin mwelien eman a feito seni ewe lenien motun king, a apasa, “Ousipwe mwareiti ach Kot, ämi chon angang meinisin, ämi aramas meinisin, ämi aramas tekia me aramas kis meinisin mi meniniti Kot!”
REV 19:6 Mürin üa rongorong eu möngüngü mi wewe ngeni möngüngün eu mwichen aramas mi fokun watte, a pwal wewe ngeni ngüngün chomong koluk me chopun chopulap mi leüömong a apasa, “Ousipwe mwareiti Kot! Pun ach Samol, ewe Kot mi Unusen Manaman a nemenem.
REV 19:7 Ousipwe mweireir o fokun pwapwa, ousipwe mwareiti an tekia! Pun a war fansoun apwüpwülüen ewe Lam, nge pwülüan we, ewe fin apwüpwülü söfö, a püsin amol ngeni ewe rän.
REV 19:8 Kot a ngeni echö üf mi limöch, a pwechepwech o molupolup pwe epwe üföüf.” (Ewe üf mi pwechepwech iei än ekewe chon pin föför mi pwüng.)
REV 19:9 Mürin ewe chon läng a üreniei, “Kopwe makkeetiu ekei kapas: Ra feiöch chokewe mi kö ngeni kametipen apwüpwülüen ewe Lam.” Iwe, ewe chon läng a pwal apasa, “Ikkei ekewe kapas mi let seni Kot.”
REV 19:10 Iwe, üa chapetiu arun pechen ewe chon läng pwe üpwe fel ngeni, nge i a üreniei, “Kosap föri iei usun! Ngang eman chiechiom chon angang me chiechien pwiüm kewe, chokewe meinisin mi kamwöchünük won ewe let Jesus a pwärätä. Kopwe fel ngeni Kot!” Pun ewe let Jesus a pwärätä, iei met a amwelielia ekewe soufos.
REV 19:11 Mürin üa küna pwe läng a suk, iwe, a wor eman oris mi pwechepwech. Ewe chon wawa a iteni Allükülük me Let, a eäni kapüng fän wenechar o maun fän pwüng.
REV 19:12 Mesan kana ra usun chök ngetengeten ekkei, nge a mwärämwär chomong mwärämwär won möküran. A wor eu it a mak won inisin, esap wor eman a silei pwe i chök.
REV 19:13 Üfan we a üföüf a kula ren cha. Itan “Ewe Kapasen Kot!”
REV 19:14 Iwe, ekewe mwichen sounfiu seni läng ra tapwela mürin, ra wawa oris mi pwechepwech, ra pwal üföüf üf mi limöch o pwechepwech.
REV 19:15 Seni lon awan a itiwu efoch ketilas mi ken, pwe epwe nöünöü le akufu chon ekewe mwü. Epwe nemeniir ren efoch wokomächä, epwe puri ekewe uän wain lon ewe lenien üchüch, wewen ei, än Kot, ewe mi Unusen Manaman, lingeringer mi fokun afeiengau.
REV 19:16 Won üfan pwal won wilan a mak ewe it, “Ewe King mi tekia seni ekewe king meinisin, me ewe Samol mi lap seni ekewe samol meinisin.”
REV 19:17 Mürin üa küna eman chon läng a ütä won akkar. A kökkö fän mwelian mi leüömong ngeni ekewe machang meinisin mi äkkäsfeil fän läng, “Oupwe feito o chufengen fän iten än Kot we kametip mi watte.
REV 19:18 Oupwe feito o ochoch fituken ekewe king, fituken ekewe meilapen sounfiu me fituken ekewe sounfiu, fituken ekewe oris me ekewe chon wäniir, fituken ekewe aramas meinisin: fituken ekewe amanau me ekewe chon ngas, fituken ekewe aramas tekia me ekewe aramas kis.”
REV 19:19 Mürin üa küna ewe manmwacho me ekewe kingen fanüfan pwal nöür kewe mwichen sounfiu, ra chufengen pwe repwe maun ngeni ewe eman mi wawa ewe oris, pwal ngeni nöün mwichen sounfiu.
REV 19:20 Iwe, ewe manmwacho a kuf o oola fitifengen me ewe soufos chofona, ewe mi afisätä manaman me mwen mesan. Ren ekei manaman a atupu chokewe mi eäni asisilen ewe manmwacho me chokewe mi fel ngeni uluulun we. Ewe manmwacho me ewe soufos chofona ra koturmanauolong lon ewe nomun ekkei a küü ren primston.
REV 19:21 Nge nöür kewe sounfiu ra ninnila ren ewe ketilas mi itiwu seni lon awen ewe eman mi wawa ewe oris. Iwe, ekewe machang meinisin ra ocheela fituker tori ra mötüla.
REV 20:1 Mürin üa küna eman chon läng a feitiu seni läng, nge a amwöchü lepöün efoch kien ewe pwang mi alolol, pwal efoch selimächä mi fokun chou.
REV 20:2 Iwe, a turufi ewe trakon, ewe serepenitin lom, iei i ewe Tefil ika Satan, a föti pwe epwe föfö lon ükükün engeröü ier.
REV 20:3 Iwe, ewe chon läng a aturalong i lon ewe pwang mi alolol, a lokeela o pwauni, pwe esap chüen tongeni tufichin atupu chon ekewe mwü tori ekewe engeröü ier repwe sopola. Mürin ei, ewe trakon epwe fokun musala lon ekis chök fansoun mochomoch.
REV 20:4 Mürin üa küna ekoch lenien motun king, nge chokewe mi mot wor ra angei ewe pöchökül pwe repwe tongeni eäni kapwüng. Üa pwal küna ngünün chokewe mi ninnila pokiten ar arongafeili ewe let Jesus a pwärätä me än Kot kapas. Ir chokewe resap fel ngeni ewe manmwacho ika uluulun we, resap pwal angei asisilen ewe manmwacho won chamwer ika won pöür. Ra manausefäl o eti Jesus le nemenem lon ükükün engeröü ier.
REV 20:5 (Nge ekewe lusun mi mäla resap manausefäl tori ekewe engeröü ier repwe sopola.) Iei ewe aeuin manausefäl.
REV 20:6 A feiöch o pin iö a eti ewe aeuin manausefäl. Ewe aruen mäla esap wor an nemenem wor, nge repwe nöün Kot me nöün Kraist souasor, repwe pwal eti Jesus le nemenem lon ükükün engeröü ier.
REV 20:7 Iwe, wesin ekewe engeröü ier, Satan epwe musala seni an fötek.
REV 20:8 Epwe feila pwe epwe atupu chon ekewe mwü won unusen fanüfan, ekei mwü Kok me Makok. Satan epwe achufengeniir meinisin pwe repwe maun, iteiter meinisin ra usun iteiten föün pien aroset.
REV 20:9 Ra chöfetal won fanü o rongeela lenien ewe mwichen chon pin me ewe telinimw Kot a echeni. Nge ekkei a feitiu me läng o keniirela.
REV 20:10 Mürin ewe Tefil mi atupur a koturulong lon ewe nomun ekkei me primston ia ewe manmwacho me ewe soufos chofona ra fen koturula ie. Iwe, repwe küna riaföü lerän me lepwin tori feilfeilachök.
REV 20:11 Mürin üa küna eu lenien motun king mi watte o pwechepwech me ewe eman mi mot won. Fanüfan me läng ra süla seni mwen mesan, nge esap chüen wor leni fän iter.
REV 20:12 Iwe, üa küna ekewe mi mäla, ekewe aramas tekia me aramas kis, ra ütä me mwen ewe lenien motun king. Iwe, ekewe puk ra sukula. Mürin pwal eu puk a sukula, iei ewe puken iten chon manau. Iwe, ekewe mi mäla ra küna kapwüng won mine ra föri usun a makketiu lon ekewe puk.
REV 20:13 Mürin ewe matau a fangewu ekewe mi mäla ra nom lon, pwal mäla me ewe lenien sotup ra fangewu ekewe mi mäla ra nom lor. Iwe, ir meinisin ra küna kapwüng won meinisin mine ra föri.
REV 20:14 Mürin mäla me ewe lenien sotup ra koturulong lon ewe nomun ekkei. Ei nomun ekkei, iei ewe aruen mäla.
REV 20:15 Iö esap mak itan lon ewe puken iten chon manau a koturulong lon ewe nomun ekkei.
REV 21:1 Mürin üa küna eu läng mi fö me eu fanüfan mi fö, pun ewe poputän läng me ewe poputän fanüfan ra morola, nge matau esap chüen wor.
REV 21:2 Iwe, üa küna ewe Telinimw mi Pin, ewe Jerusalem mi fö, a feitiu me läng seni Kot, a molotä usun eman fin apwüpwülü söfö a tolong lon foutan pwe epwe apwüpwülü ngeni pwülüan.
REV 21:3 Iwe, üa rong mwelien eman mi leüömong a kapasowu seni ewe lenien motun king, “Nengeni, imwen Kot a nom lein aramas! Iwe, Kot epwe nonom lefiler o ir repwe aramasan, nge püsin Kot epwe etiir pwe epwe ar Kot.
REV 21:4 Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”
REV 21:5 Mürin ewe mi mot won ewe lenien motun king a apasa, “Nengeni, üpwe asöfösefäli mettoch meinisin.” A pwal üreniei, “Kopwe makkeetiu ekei kapas, pun ra let o allükülük.”
REV 21:6 Iwe, a apasa, “Mettoch meinisin ra fisila iei. Ngang ewe Aemanün me Amüchülan, ewe Popun me ewe Sopolan. Üpwe ngeni chokewe mi kaka pwe repwe ün seni ewe puächen kolukun manau, nge resap möni.
REV 21:7 Iö mi pwora ngeni mine a ngau epwe feiöchüni ekewe feiöch meinisin. Iwe, ngang üpwe an Kot, nge i epwe nei.
REV 21:8 Nge ekewe chon niuoken me chon lükümang, ekewe chon limengau me chon niela aramas, ekewe chon lisowu me chon angangen rong, ekewe chon angang ngeni anümwäl me chon chofona meinisin repwe nom lon ewe noom mi pulopul ren ekkei me primston, iei ewe aruen mäla.”
REV 21:9 Mürin eman me lein ekewe füman chon läng mi fen wor rer ekewe fisu sepi mi ur ren ekewe fisu amüchülan feiengau a feito rei o a apasa, “Kopwe etto pwe üpwe aküna ngonuk ewe Fin apwüpwülü söfö, iei i pwülüen ewe Lam.”
REV 21:10 Iwe, lupwen ai nom lon ngün, ewe chon läng a uweieila won ungen eu chuk mi fokun tekia o a aküna ngeniei Jerusalem, ewe Telinimw mi Pin, a feitiu me läng seni Kot,
REV 21:11 a saramaram ren än Kot we ling. Ewe telinimw a tittin usun eföü fau aüchea itan jasper, a kurufat usun ewe fau itan kristal.
REV 21:12 A wor eu tit mi pöchökül o tekia pwelin ünükün ewe telinimw, a pwal wor engol me ruu asamalapan, nge engol me ruoman chon läng ra mamasa ekewe asam. Iwe, won eu me eu ekei asamalap a mak iten eu me eu ekewe engol me ruu ainangen aramasen Israel.
REV 21:13 A wor ülüngat asamalap won eu me eu pekin: ülüngat me peliötiu, ülüngat me peliör, ülüngat me peliefeng pwal ülüngat me pelilotou.
REV 21:14 Tittin ewe telinimw a kaütä won engol me ruoföü föün longolong, nge won ekei fau a mak iten nöün ewe Lam kewe engol me ruoman soukünö.
REV 21:15 Iwe, ewe chon läng mi kapas ngeniei a amwöchü efoch wokun aükük mi för seni kolt, pwe epwe aükü ewe telinimw, asamalapan me tittin.
REV 21:16 Ewe telinimw a nönnöpök chölapan me langataman. Iwe, ewe chon läng a aükü ewe telinimw ren ewe wokun aükük, nge a pwä pwe ükükün langataman engol me ruungeröü stadia, nge chölapan me tekian ra usun chök langataman.
REV 21:17 Ewe chon läng a pwal aükü ewe tit, iwe, a pwä pwe ükükün ipükü faik me rüanü cubits. An ei aükük a longolong won ewe aükük aramas ra aea le aükük.
REV 21:18 Ewe tit a för seni ewe fau aüchea itan jasper, nge ewe telinimw a för seni kolt mi fokun mürina, a kurufat usun kilas.
REV 21:19 Ekewe föün longolongun tittin ewe telinimw ra aling ngeni sokopaten fau aüchea. Ewe eföün longolong ewe fau aüchea itan jasper, ewe aruoföün safaia, ewe aülüföün akit, ewe aföföün emeralt,
REV 21:20 ewe alimeföün oniks, ewe awonoföün karnelian, ewe afüföün krisolait, ewe awaluföün peril, ewe atiweföün topas, ewe aengolunföün kalsetoni, ewe engol me eföün jasint, nge ewe engol me ruoföün ametist.
REV 21:21 Ekewe engol me ruu asamalap ra för seni engol me ruoföü föün pwei, eu me eu kewe asamalap a för seni eföü chök föün pwei. Nge alen ewe telinimw a för seni kolt mi fokun mürina, a kurufat usun kilas.
REV 21:22 Nge üsap küna eu imwenfel me lon ewe telinimw, pun imwenfelin lon iei ewe Samol Kot mi Unusen Manaman me ewe Lam.
REV 21:23 Esap lomot ngeni ewe telinimw tinen akkar ika tinen maram, pun än Kot ling a tinetiu won, o ewe Lam iei an atitin.
REV 21:24 Iwe, ekewe aramasen fanüfan repwe fetal lon an saram, nge ekewe kingen fanüfan repwe uwato wöür lon.
REV 21:25 Ekewe asamalapen ewe telinimw ra suk unusen rän me rän, nge resap kapüngüla, pun esap chüen wor pwin ikenan.
REV 21:26 Repwe uwalong lon ewe telinimw pisek mi aüchea me wöün ekewe mwü.
REV 21:27 Nge esap fokun wor och mi limengau epwe tolong lon ewe telinimw, ika eman mi föri föför mi asäw, ika eman mi chofona. Pun chokewe chök a mak iter lon än ewe Lam puken iten chon manau repwe tolong lon ewe telinimw.
REV 22:1 Mürin ewe chon läng a pwal aküna ngeniei ewe chanpupun kolukun manau, a kurufat usun ewe fau itan kristal, a pupu seni fän än Kot me än ewe Lam lenien motun king
REV 22:2 o a putiu lukalapen alen ewe telinimw. Iwe, lepekin ewe chanpupu me rüepek a wor irän manau ra ua fän engol me ruu lon eu ier, fän eu lon eu me eu maram, chör kewe ra tufichin apöchöküla chon ekewe mwü.
REV 22:3 Esap wor och mi nom fän än Kot anümamau epwe nonom lon ewe telinimw. Än Kot me ewe Lam lenien motun king epwe nom lon ewe telinimw o nöün kewe chon angang repwe angang o fel ngeni.
REV 22:4 Repwe küna won mesen Kot, nge itan epwe mak won chamwer.
REV 22:5 Esap chüen wor pwin, esap pwal chüen lomot rer lamp ika akkar, pun ewe Samol Kot epwe ar saram, nge repwe nemenem usun king tori feilfeilachök.
REV 22:6 Mürin ewe chon läng a üreniei, “Ekei kapas ra let o allükülük. Ewe Samol Kot, ewe Kot mi fang ngeni ekewe soufos Ngünün, a tinala nöün chon läng pwe epwe pwäri ngeni nöün kewe chon angang mine epwe fisikai.”
REV 22:7 Iei alon Jesus, “Nengeni, üpwe warekai. Ra feiöch chokewe mi aleasochisi ekewe kapasen osuni mi mak lon ei puk!”
REV 22:8 Ngang Johannes üa rongorong o küna ekei mettoch meinisin. Iwe, wesin ai rongorong o küna ekei mettoch, üa chapetiu arun pechen ewe chon läng mi aküna ngeniei ekei mettoch, pwe üpwe fel ngeni.
REV 22:9 Nge i a üreniei, “Kosap föri iei usun! Ngang eman chiechiom chon angang me chiechien pwiüm kewe soufos, pwal chiechien chokewe meinisin mi aleasochisi ekewe kapas mi mak lon ei puk. Kopwe fel ngeni Kot!”
REV 22:10 Iwe, a üreniei, “Kosap pwauni ekewe kapasen osuni mi mak lon ei puk, pun a arapoto ewe fansoun lupwen ekei mettoch meinisin repwe fisitä.
REV 22:11 Iö a föri mine esap pwüng epwe chök sopwela le föri mine esap pwüng, nge iö a föri mine a limengau epwe chök sopwela le föri mine a limengau. Iö a föri mine a pwüng epwe chök sopwela le föri mine a pwüng, nge iö a pin epwe chök sopwela lon an pin.”
REV 22:12 Iei alon Jesus, “Nengeni, üpwe warekai! Iwe, üpwe uwei ai kewe liwin, pwe üpwe ngeni eman me eman liwinin an föför.
REV 22:13 Ngang ewe Alfa me Omeka, ewe Aemanün me Amüchülan, ewe Popun me ewe Sopolan.”
REV 22:14 Ra feiöch chokewe mi limeti üfer pwe repwe limöch, pwe epwe wor ar pwüüng ar repwe mongö seni uän ewe irän manau, repwe pwal tolong lon ekewe asamalap o tolong lon ewe telinimw.
REV 22:15 Nge me lükün ewe telinimw a wor chon föri sokun föför mi ngau usun kolak, chon föri angangen rong, chon lisowu, chon niela aramas, chon angang ngeni anümwäl me chon chofona lon ar kapas pwal lon ar föför.
REV 22:16 “Ngang Jesus, üa tinato nei chon läng, pwe epwe asile ngenikemi ekei mettoch lon ekewe mwichefel. Ngang eman mwirimwirin ewe ainangen Tafit, Ngang ewe füün rän mi saramaram.”
REV 22:17 Iwe, Ngünmifel me ewe Fin apwüpwülü söfö ra apasa, “Etto!” Ir meinisin mi rongorong ekei kapas repwe apasa, “Etto!” Iwe, iö mi kaka epwe etto, nge iö a mochen epwe ünümi ewe kolukun manau, nge esap möni, epwe etto.
REV 22:18 Ngang Johannes, üa fönöü meinisin mi rongorong ekei kapasen osuni mi mak lon ei puk: Are eman epwe apacha och ngeni ekei kapas, Kot epwe apacha ngeni ekewe feiengau mi mak lon ei puk.
REV 22:19 Nge are eman epwe angei och seni ekewe kapasen osuni mi mak lon ei puk, Kot epwe angei seni wisan me won ewe irän manau pwal wisan me won ewe Telinimw mi Pin usun a mak lon ei puk.
REV 22:20 Ewe eman mi pwärätä ekei mettoch a apasa, “Ewer, ngang üpwe warekai.” Amen! Kopwe etto äm Samol Jesus!
REV 22:21 Ümöümöchün ach Samol Jesus epwe nonom ren nöün Kot kewe aramas meinisin. Amen.
