﻿কুলিজকুরাআ কামি.
4.
চিন্তং পিতর হেৎদ যোহন হড়কু রাঃআ হান্ডে থুতিকেনাকিন গটা ইনা হুলাং মারাং মীদুন রিঙ্কূ বামড়েকু হেৎদ জাহের থান্তে রিঙ্কূ হরয়ান কু রাঃআ বহঃ কু হেৎদ সদ্দুকিকু ঘিড়মেন্তাং ইঙ্কিনা হান্ডে হিচ সেটেরেনাকু। 
ইঙ্কিন গাহির এটকেটরেৎ রে নুরলেনাকিন চিয়াচি ইঙ্কিন হড়কুকে উপদেশ এমকেনা কুয়াকিন হেৎদ যীশু যে গয়চ কু রাঃআ তালা হাতেন জীউৎ রাকাবা কানায় ইনা পাসনাৎ কেনাকিন। 
হেৎদ ইঙ্কূ ইঙ্কিন কে সাবকেৎ কিনকুতে গাপা হুলাং যাকিৎ আটকা দঃহঅ লাৎ কিনাকু, 
চিয়াচি ইন্তং আয়ুব চাবালেনা, তুবুই রহঅ অকয় জাগার আয়ুমেৎ কেনাকু ইঙ্কূয়া তালারে গাদাকু পাতিয়ায়না, ইঙ্কূয়া তালারে কড়াহন কু রাঃআ গুঁডুর হুডাংঢের মড়ে জুলু লেকা তাহিলেনাকু। 
গাপা হুলাং হড়কু রাঃআ শাসককু, মুরুব্বিকু হেৎদ চেচেদিজ গমকেকু যিরুশালেম শেহার রে হুন্ডিলেনাকু, 
হেৎদ হানন মারাং বামড়ে, কায়াফা, যোহন, আলেকসান্দর হেৎদ মারাং বামড়ে রাঃআ হড়কু হাজির তাহিলেনাকু। 
ইঙ্কূ ইঙ্কিন পিতর হেৎদ যহন কে তালা মাঙ্গারে তিঙ্গুকেৎ কিনাকুতে কুলিকেৎ কিনাকু কিনা দাড়ীয়ানতে চি অকয় রাঃআ নুতুমতে আবেন নিয়া কামি করায়তানা বেন? 
ইন্তং পিতর রীলামালা আত্মাতে পেরেজেন্তে ইঙ্কূকে গামলাৎ কুয়ায়্য় য় এ মান্মিকুরাঃআ শাসককু হেৎদ মুরুব্বিকু, 
মিয়াৎ কাহিলাকান হড়রাঃআ উপকার করা নাতিনাং যদি তিহিঞ আলিঞকে কুলি তানাপে চিল্কাতে নিই হড়টাকে বুগিনায়, 
এন্খান আপে যতচ হেৎদ যত খেরোয়াল হড়কু নিয়া সারি কাআকু যে, নাসরত রিনিজ যীশু খ্রীষ্ট রাঃআ নুতুমতে অকয়কে আপে ত্রুশরে এমলিয়াপে, অকয়কে ঈশ্বর গয়চকু রাঃআ তালা হাতেন জিউৎ রাকাব লিয়ায়, ইনি রাঃআ নুতুম গুণতেগে নিই হড় আপেয়া হান্ডে বুগিন হড়মোতে তিঙ্গু মেনাইয়া। 
ইনি ইনা দিরিতানা অকাটা কারিগরি মিস্ত্রীকু যে আপেতানা আপেয়া দ্বারায়তেগে কায় ছুতাংলেনায়, অকাদ কোণ রাঃআ বঃহঅ দিরি হুইয়েনা 
অট এটা যাহায় রাঃআ হান্ডে রুক্ষীয়া বায়ায়না, চিয়াচি নিরালা রাঃআ লাতাররে হেৎদ মান্মিকু রাঃআ তালারে এমাআ কানা এনকান অট যাহায় রাঃআ নুতুম বায়ায়না অকা নুতুমতে আবু রুক্ষীয়া নাম দাড়িয়াবু। 
ইনা হুলাং খেরয়াল কুরা আ গম্কেকু পিতর হেৎদ যোহন রাঃআ সাহস নেলকেৎ তেকু হেৎদ নিকিন যে বিন অল ফড়া নিরহ হড়তানা কিন নিয়া নেলকেৎতেকু হায় কাটেনা কু হেৎদ চিহ্না নামকেৎ কিনাকু যে নিকিন যীশু লঅ তাহিন কেনাকিন। 
হেৎদ ইনি বুগিন হড়টা ইঙ্কিন লঅ তিঙ্গুয়া কানায় নেলকিচ তেকু ইঙ্কূ দরবার রে ইঙ্কিনা বিরুধতে যাহানা কাকু গাম দাড়িলাৎ আ। 
মেন্খান ইঙ্কূ কুলিচ কুরাঃআ দরবার কুঠুরি হাতেন বাহারতে সেনঅ হুকুমকেৎ কিনাকু হেৎদ নিজে রাঃআ তালারে থুতি জাগার লাগায়নাকু। 
যে নিকিন হড়কিনকে ইদিকাতে কিনা চিকা হয়য়া? চিয়াচি ইঙ্কিন অকা হাহাড়া কামি করালাৎ আকিন ইনা যিরুশালেম শেহার রিঙ্কূ হড়কু সারিনাম লাৎ আকু, আবু ইনা কাবু পাতিয়া দাড়িয়া ইঙ্কা দ ল্হয়। 
মেন্খান নিয়া থুতি যেন হড়কুরাঃআ তালারে আল পাসরাকাআ, ইনাতে ইঙ্কূ ইঙ্কিন কে বরঅ ধমকাকেৎ কিনাকুতে গামকেৎ কিনাকু ইঙ্কিন যেন যীশু নুতুমতে যাহায়কে যাহানা আল কিন গামকুকা। 
ইনাতে ইঙ্কূ পিতর হেৎদ যোহনকে ভীতিরতে রাঃআকেৎ কিনাকু হেৎদ ইঙ্কিন কে আদেশকেৎ কিনাকু যাহায়কে যেন যাহানা আল গামকুকাকিন হেৎদ যীশু রাঃআ নুতুমতে চেচেদ আল এমকুকাকিন। 
পিতর হেৎদ যোহন উত্তর এমকাতে ইঙ্কূকে গামকেৎ কুয়াকিন "ঈশ্বর রাঃআ থুতি বাগিকাতে আপেয়া থুতি আয়ুম ঈশ্বর রাঃআ নজররে লাক্তি চি লহয় আপেগে দরবারপে। 
মেন্খান অকা আলিং নেলতাৎ আ হেৎদ আয়ুমতাৎ আ ইনা কা গামকাতে তাহি কালিং দাড়িয়া। 
তায়মতে ইঙ্কূ দরবার রিঙ্কু বহঃকু পিতর হেৎদ যোহনকে অটঃহঅ বর দেখাকাতে আড়াকেৎ কিনাকু। চিয়াচি হড়রাঃআ বরতে ইঙ্কিন কে সাজা এমরাঃআ কাকু নামলাৎ আ চিয়াচি অকা করা হুইলেনা ইনা নাতিনাং হড় ঈশ্বর রাঃআ গৌনজহারে কেনাকু। 
অকা হড় নিয়া হাহাড়া কামিরাঃআ দ্বারায়তে বুগিলেনায় ইনি হুডাংঢের পুলি সির্মাং রাঃআ চেতাংরে তাহিলেনায়। 
ইঙ্কিন কে আড়া গিডি রাঃআ তায়ম ইঙ্কিন আকিনা গাতি কু রাঃআ হান্ডে সেনেএ নাকিন হেৎদ মারাং বামড়ে হেৎদ মুরুব্বিকু ইঙ্কিন কে অকা থুতি গামালাৎ কিনাকু ইনা ইঙ্কূকে সারি তুকাকেৎ কুয়াকিন। 
চিন্তং ইঙ্কূ নিয়া থুতি আয়ুমেৎ কেনাকু ইঙ্কূ মিশাতে কুঠিন জোর কিকিচ কাতে ঈশ্বর রাঃআ নাতিনাং গামেৎ কেনাকু, প্রভু আম অকয় সেরমা পুরি, ধার্তি, দরেয়া হেৎদ ইনা রাঃআ তালারে অকাগে মেনা যতচ রাঃআগে সির্জন বাঃআ। 
আম আমা মুনিশ আলেয়া হাপড়াম দাউদরাঃআ মচা হাতেন রীলামালা আত্মারাঃআ দ্বারায়তে জাগার তাৎ আম চিল্কা বিনইহুদিকু চিয়া হুইহুল্লাকেৎয়াকু ? হড়কু চিয়া বেকার বাবত তে ধ্যান কেৎয়াকু ? 
ধার্তি রিঙ্কূ রাপাজ কু মিশাতে তিঙ্গুইনাকু, শাসককু মিৎ থাংরে হুন্ডিইনাকু প্রভু রাঃআ বিরুধরে হেৎদ ইনি রাঃআ আভিষিক্ত খ্রীষ্টরাঃআ বিরুধরে, 
চিয়াচি সার্তি যীশু অকয় আমা রীলামালা হন অকয়কে আম আভিষিক্ত তিয়াম, ইনি রাঃআ বিরুধরে হেরোদ (অন্তিওপা) হেৎদ পন্তীয় পিলাত বিনইহুদিকুরাঃআ হঅ হেৎদ খেরোয়াল হড়কু লঅ মেশা লেনাকু, 
যেন আমা তিহিরাঃআ হেৎদ আমা আকেল রাঃআ দ্বারায়তে মাড়াঙ অকা যত বাবত গটা হুইলেনা ইনা পুরাঃআ তাৎআয়। 
হেৎদ নাহা হে প্রভু, ইঙ্কূয়া বরঃঅ প্রভেট রাঃআ (বরঃঅয়ান রাঃআ) হান্তে নেলেম, হেৎদ আমা নিকু মুনিশ কুকে কুঠিন সাহসলঅ আমা জাগার গামরাঃআ দাড়ি এমকুম, রোগ বুগিকা ইনা আশীষাকুম, 
হেৎদ আমা রীলামালা হন যীশু রাঃআ নুতুমতে যেন চিহ্না হেৎদ হাহাড়া কামি পুরাঃআ কাআ। 
ইঙ্কূ কথাংরে বিন্তিই কেনাকু ইনা ঘাড়িগে এনথাংরে থারথারা রাকাবেনা হেৎদ ইঙ্কূ যতচ রীলামালা আত্মাতে পেরেজেনাকু হেৎদ সাহসতে ঈশ্বর রাঃআ জাগার পাসনা লাগায়নাকু। 
অটঅ যে গাদা হড় অকয় পাতিয়া লেনাকু, ইঙ্কূ মিৎ অন্তর হেৎদ মিৎ মনে রিঙ্কূ পাতিয়ান তাহিনকেনাকু, ইঙ্কূয়া মিহুড়হঅ নিজের সম্পত্তিরাঃআ যাহানা নিজেরাঃআ কায় গামেকেনায়, মেন্খান ইঙ্কূয়া যতচয়া যতচ হড়কু রাঃআ তাহিন কেনা। 
হেৎদ কুলিচ কু কুঠিন ক্ষমতাতে প্রভু যীশু রাঃআ জীউৎ রুয়াড় বাবত তে লুকুন্দী এমেকেনাকু হেৎদ ইঙ্কূ যতচ রাঃআ চেতাংরে বহুত দায়া-দুলাড় তাহিন কেনা। 
এমনকি ইঙ্কূয়া তালারে যাহায় রেঙ্গেজ কাকু তাহিলেনা, চিয়াচি অকয় বাইত বাংখানদ অড়া দুয়ার রিঙ্কূ হাকদারি তাহিন কেনাকু, ইঙ্কূ ইনা আখরিং কাতে সম্পতি রাঃআ কাউডি আগুই কেনাকু, 
হেৎদ ইঙ্কূ কুলিচ কুরাঃআ কাটা রাঃআ কাতারে দঃহয় কেনাকু, তায়মতে অকয় রাঃআ চিল্কা জরুর ইনিকে এনকা এমঅ হুইওকেনা। 
হেৎদ যোষেফ অকয়কে কুলিচ কু বার্ণবা নুতুম এমলিয়াকু অনুবাদ লেংখান নিয়া নুতুম রাঃআ মানে উৎসাহএমিজ, অকয় লেবিয় হেৎদ ইনি হড় অকয় কুপ্র ঢিপ রে তাহিনায়, 
ইনি রাঃআ ইতিজ তরাং বাইত তাহিনকেনা, ইনি ইনা আখরিং কাতে ইনারাঃআ কাউডি আগুকাতে কুলিচ কুরাঃআ কাটারে দঃহকেয়ায়। 
