﻿মার্ক.
5.
তায়্মতে যীশু হেৎদ চেলা কুদ দরেয়া রাঃআ হানা কাতা রে গেরাঃআসেনি কুরাঃআ দিসুমতে সেটেরেনাকু। 
যীশু দ লাউকা হাতেৎ উডুং হিচেন্খান ইন্তং গে কবর দাঙ্গা হাতেৎ মিত হড় আয়া সমান রে উডুং হিচ্ এনায়, অকয় কে বঙ্গা আত্মা নাম লিয়াআয়্য়। 
ইনিদ কবর ডাঙ্গা রে তাহিনায়, হেৎদ ইনিকে অকয় হঅ ঝিঁঝরিতে কাকু তল দহ দাড়ি ইচ কেনা। 
চিয়াঃচি হড় কু ঘনে ঘনে খাড়ুয়া হেৎদ ঝিঁঝরি তেকু ত্লিচ কেনা,মেন্খান ইনি দ ঝিঁঝরি টটা গিডিট কেনায়, হেৎদ খাড়ুয়া খন্ডচ খুন্ডিচ পেটেজেত কেনায়; যাহায় ইনিকে কাকু বাগত দাড়িয়ায় কেনা। 
হেৎদ ইনি মিত সিঙ্গি-নিন্দা সারাঃআ ঘড়ি কবর ডাঙ্গা রে হেৎদ বুরু চেতান রে তাহি কাতে কিকিচ এত কেনায়, হেৎদ ধিরিতে হড়মরে আচ আচতে রগড়া গেদ কেনায়। 
ইনি দ সাঙ্গীং হাতেৎ যীশু কে নেল কাতেত নির আড়গু এন্তে, ইনিকে গড় জহার কিআয়, 
হেৎদ কিকিচ কাতে কুলি কিআয়, এ যীশু দাড়িয়ান ঈশ্বর রাঃআ হন, আম লঅ ইঞাঃ আ সাগাই কিনা আ ? ইঞ আমকে ঈশ্বর রাঃআ দিব্বি ইমাম তানা, ইঞ কে আলম সাতাঞা। 
চিয়া চি যীশু আনিকে গামা লিআয়, এ বঙ্গা আত্মা, হিঁই হড় রাঃআ হাঁন্ডে হাতেৎ উদু গদম। 
যীশু আনিকে কুলি কিঃআয়, আমাঃআ নুতুম কিনা আ? আনি তেলা কেৎআয়, ইঞাআ নুতুম বাহিনী, চিয়া চি আলে গাদা লেকাঃলে। 
তায়্মতে আনি কঠিন কাকুতি কেৎআয়, যাতে যীশু আনিকে ইনা টলা হাতেৎ আলয় কুদা গিডিই কাঃআ। 
ইনা বুরু কাতারে গাদা মারাঃআং সুকরি গট আতিঞ্চ কেনা কু। 
হেৎদ ইঙ্কূ কাকুতি কেৎ আ কু, ইঙ্কূ সুকরি কুরাঃআ হান্ডে বলঃঅ নাতিনাং আলেকে কুল্লেম। 
ইনি ইঙ্কূ কে সায় এমাৎ কুয়ায়্য় য় ইন্তং ইঙ্কূ বঙ্গ আত্মা কু উডুং কাতেৎ সুকরি রাঃআ হান্ডে কু বলএনা, ইনাতে ইঙ্কূ সুকরি পাল, হান্তে নাতেতে বার জুলু সুকরি, খুব রাঃআগ্তে বুরু রাঃআ ঢালু হরকাতে নির খাজুই নাকু দরেয়া দা আ রে, হেৎদ দরেয়া দাঃআ রে ডুবুজ গজ চাবায় নাকু। 
ইন্তং বাগাল ইঙ্কূকে গুপিৎ কুকেনা, ইঙ্কূ নিরেন্তেকু সরগ নাগার রে হেৎদ ডিহি ডিহি তে সেন কাতেৎ খবর কু এম্কেৎ আ। ইন্তং কিনা আ হ্যুয়া কানা, নেনেল নাতিনাং হড় কু হিচ্ এনা; 
হাতু হড় যীশু রাঃআ হান্ডে হিচ্ কাতে নেল কেৎআয় ইনি বঙ্গা আত্মাভেট হড়, অক্য়্কে বাহিনী বঙ্গা ভেট লিয়ায়, ইনি দ কিচিঃ সিনিপ ভাগয়া কাতেৎ খুশিতে দুপা কানায়; 
এন্খান গে ইঙ্কূ বর কেৎআকু হেৎদ হানি বঙ্গা আত্মা হড় রাঃআ হেৎদ সুকুরি গট রাঃআ কান্ড অকয় কু নেল লাঃআ, ইঙ্কূ হান্কু কে যত বৃতান্ত কু গামাৎ কুয়া। 
ইন্খান গে ইঙ্কূ ইনি কে আকুয়াআ সীমানা হাতেৎ সেনঅ নাতিনাং তিহি-কাটা স্যাপ কেৎয়াকু। 
ইনা তায়্ম যীশু ডঁঙ্গা রে দেচঃতান খানে, ইন্তং ইনি বঙ্গা ভেট আত্মা হড়, এনি ইনিকে বিন্তি কিঃআয়, আয়ঃ লঃঅ যাতে তাহি দাড়ি কাঃআয়। 
মেন্খান ইনি হানিকে সায় কায় এম দাড়ি লিঃআয়, গামাকিঃআ, আয়াঃআ আত্মীয় কু লঃঅ আমাঃআ অড়াঃতে সেনম দু, হেৎদ প্রভু আমাঃ নাতিনাং অকা হাহাড়া কামিকু কামী তাঃআয়, হেৎদ আমকে অকা কৃপা এমাতাৎ মেয়া, ইনা কু জ্ত্চ কে সারিঞাম তুকা কুম। 
ইন্তং ইনি উডুঁং এন্তে, যীশু আয়াঃআ নাতিনাং অকা অকা হাহাড়া কামি লাতঃআয় ইনাকু দিকাপলি এলাকারে গাম উচ্ছানেৎ আয়, অকয় কু আয়ুম লাআ, এন্খান গে যত হড় খুব কু হাহাড়ায়না। 
ইনা তায়্ম যীশু ডঁঙ্গাতে অটঃ হঅগে পারম হিচেন খান আয়াঃ হান্ডে মিত্গাদা হড় কু হুঁডিএনা; ইন্তং ইনিদ দরেয়া কাতারে তাহীন কেনায়। 
হেৎদ জিহুদী জাহের থান রেনিচ কটাল কুরাঃআ তালা হাতেৎ যায়ীর নুতুমান মিৎ হড় হিচ্ কাতেৎ, ইনিকে নেল কাতে আয়া আ কাটারে নুরেনায়। 
হেৎদ গাদা বিন্তি কাতেৎ গামা কিয়ায় ইঞাঃআ হনেরাঃআ গ্চা কানায়, আবেন হিচ্ কাতে হানি রাঃআ চেতানরে তিহি বাড়ায় বেন, যাতে হানি দ বেশ কাতে বাঞ্চা কা আয়। 
ইন্তং ইনি হানি লঃঅ সেঃএনায়; হেৎদ গাদা হড় আয়াঃআ তায়্ম তায়্মতে সেএ নাকু, হেৎদ আয়াঃ চেতানরে ধাপা ধাপি কাতেৎ কু নুরুঃ এনা। 
অটঃ হঅগে মিয়াৎ এরাঃআ হন ১২ সির্মাং উকু আজার (গুপ্ত রোগ) তাহিলেনা, 
গাদা সায়্পু (ডাক্তার) লিয়া গাদা হার্কেৎ নাম তাৎ আয় হেৎদ সর্ব্বস বেয়্য় কাতে রহঃঅ যাহানা আ উপশম কা হুয়া কানা, বরংচ অটঃ হঅগে বেরাঃআম ভাড়াঃ কানা। 
ইনি দ যীশু রাঃআ বাব্ত্তে আয়ুম কাতেৎ ভিড় রাঃআ তলাতে হিচ্ কাতে তায়্ম হরতে যীশু রাঃআ কিচি জুটেৎ লাত আয়। 
চিয়াঃ চি ইনি গাম লাত আয়, ইঞ যদি যীশু রাঃআ কিচিঃ জুটেৎ দাড়িয়াঞ, এন্খান ইঞ দ বেশ গেয়াঞ। 
হেৎদ ইন্তং গে ইনি রাঃআ মায়ম লিঙ্গী থাম্বানা; হেৎদ আচ তেগে বেরাঃআম বেসেনা হড়ম রে আটকার ঞাম কেৎআয়। হাসু য়ান বেরাঃআম হাতেৎ ইনি দ বেসেনায় ইন্তং ইনি হানি লঃঅ সেঃএনায়। 
যীশু ইন্তং গে অন্তর্তে আটকার নাম কেৎআয় চি আয়ায়্য় হান্ডে হাতেৎ দাড়ি উডুঙ্গা কানা, এন্খান ভিড় রাঃআ তালা হাতেৎ মচা গুরাঃআ কাতেৎ কুলি কেৎ কুয়া, অকয় ইঞাআ কিচিপে জুটেৎ কেৎ আ ? 
ইনি রাঃআ চেলাকু গাম রুয়াড় কেৎ আ, কাম ঞেনেল তানা চিল্কা হড়কু আমাঃ আ চেতান রে গড়া গড়ি তানা, তবু রঃঅম কুক্লি তানাম, অকয় ইঞকে জুটেৎ কিঃইঃঞা? 
মেন্খান অকয় নিয়া কামী তাত্যায়, হানিকে ঞেল নাতিনাং ইনিদ হান্তে নান্তে কয়ঃ গুরাঃআ কেৎআয়। 
এন্খান্গে ইনি এরাঃআ হন বরতে থার থারাঃআ কাতেৎ, আচ লঅ কিনা আ হ্যুয়া কানা, গাম নাতিনাং আয়ায়্য় সামাংরে হিচ্ কাতেৎ উকড়ু মেনায়, হেৎদ সার্তিয়া কু যত গাম কেৎ আয়। 
ইন্তং যীশু হানিকে গামাকিঃয়ায়্য় এ কুড়ি হন, আমাঃ আ পাতিয়া আমকে বেশ তাৎ মায়, সুলুকতে দু সেনম, হেৎদ আমাঃ আ হান্ডে হাতেৎ বেরাঃআম সাঙ্গীঞরে তাহিকা আ। 
ইনি নিয়া থুতি জাগার তানায়, ইন্তং গে জাহের থান রেনিচ হড় কটাল রাঃআ অড়াঃ হাতেৎ হিচ্ কাতে গামাঃকিয়ায়্য়, আমাঃ আ হনেরাঃআ গচঃআ কানায়, গুরু কে চিয়াঃ কষ্ট এমাই তানাম ? 
মেন্খান যীশু ইনা থুতি আয়ুম কেৎখান জাহের থান রেনিচ কটাল কে গামাঃয়ায়্য়, আলম বরয়া, সুদু পাতিয়া দহম। 
হেৎদ যীশু দ পিতর, যাকোব, হেৎদ যাকোব রাঃআ হাগা যোহন, নুকু অপি হড়কে বিনা এটাঃ জাহায়কে আচ ল অ সেনঃ নাতিনাং কায় সতুঃ লাত্কুয়া। 
ইনা তায়্ম ইঙ্কূ জাহের থান রেনিচ রাঃআ কটাল অড়াঃতে হিচেনা কু, হেৎদ ইনি ঞেল কেৎআয়ায়্য়, এন্ডে খুব হই চই হয়ু তানা, হড় কু খুব ইয়াম হেৎদ হমরেৎ তানাকু। 
যীশু ভিতির তে বলঃঅ কাতেৎ ইঙ্কূ কে কামাৎ কুয়ায়্য় আপে দ কিকিইচ কাতে ইয়াম-হমর তানা পে চিয়াৎ ? হনেরাঃআ দ কায় গ্চাকানায়, গিতিচা কানায়। 
ইন্খান্গে যীশু কে উপ্হাস কিয়াঃকু; মেন্খান ইনি জ্ত্চ কে বাহার্তে উডুং কেৎ কুতে, কুড়ি হন রাঃআ এঁগা -অপুকে হেৎদ আয়ায়্য় চেলা কু লঅ ভিতির তে বলয় নাকু, ক্দেরে কুড়ি হন গিতিচা কানায়। 
ইনা তায়ম ইনি কুড়ি হন রাঃআ তিহি স্যাপ কাতে ইনিকে গামা কিঃআয়, ট্লিথা কুমী, তলাজোখা লেখান নেকা তিগুনা, কুড়ি হন, আমকে গামাম তানাইঞ, বিরিৎ মে, 
এন্খান্গে ইন্তং গে বিরিৎ কাতে দাড়াভাড়া কেৎ আয়্য়, চিয়া চি হানি রাঃআ উমুর দ ১২ সির্মাং তাহীন কেনা, ইনাতে ইঙ্কূ যত হড় খুব কু চমকা হেৎদ হাহাড়ায় নাকু। 
ইনা তায়্ম যীশু হড় কু কে কডরাঃআ জাগার এমাৎ কুয়া, যাতে যাহায় আলকু সারিনামে কা আ, হেৎদ হনেরাঃআ কে যাহানা আ গে জম নাতিনাং জাগার এমাৎ কুয়া। 
