﻿Pii Beetihi.
18.
É alecehe ninaa, ke é ali mwo pa céiu *âcélo na e opé mu he miiden, ke ne ten a junuun na ubwo. Ke pwéélang pitihi a bwohemwo *a wâé ten. 
Ke e toii da pie: «E caa tupwo, e caa tupwo ali pilehe *Babulona. É jenaa, ke lé caa mu lang ne ni iténaado. Caa a ataduwo te ni jenen na ta, ke ni toto meni na *mwiihi. 
Be e pwo me lé ûdu a tabe megele ten na ati ni bele ke ni daame pwo bwohemwo. Ke lé pipule hauli me weeng. Ke pwo naamuu ni a-icu pwo bwohemwo mu ko ni huô ten na ta.» 
Ke é téne a céiu pwocihe bé mu he miiden, na e pii pie: «Go wie koja Babulona, wogo a bele tong, beme time go bo uce mu he ni huô ten na ta, ke me time go uce picani ne he ni apwohi na ubwo na é bo ne ten. 
Éa, ni ta pwo ten, ke pitahipwon die he miiden. Ke wo Padué, ke time e uce pineuhi ni ta pwo ten. 
Wâé heme pwocuhinaado ten âcehi ati nina e pwo. Ne ten aceli junihe ubwo koja ana e pwo. Paobaanihi a mwoûdu ten. Be e ne a tabe megele ten beme e pwotahi ne ko ni bele. Paobaanihi beme e te ûdu mwo ke me te nihe cunu nang kon. 
Te nihe eânimen ko a wâé ten, me ni naamuunaado. Ne mwo ten ni picani, me ni doole tahagéi. Be e pipii den pie: “É tebwo pwo a atebwo he toomwo daame, ke time é o uce depwele, ke time o uce piwahin jo.” 
É mu ko anaa, ke weengi ni apwohi me den: O tupwo ne huîin a mele, ke a piwahin, ke a menele, ha a tan na te céiu, ke o éle nang ko a miû. Éa, pwojunuu Padaame Padué na e tautieng.» 
Lépwo daame pwo bwohemwo, na lé pipule hauli me weeng, ke lé téele ne kon, mu ko ni naamuun na te junihe ubwo. Ke heme lé bo alihi a muu a miû na éle nang kon, ke lé bo é, ke pihemun ne ko a pwomwo ubwo naa. 
Ke lé bo cuwo ité kojaeng, be bwo mwotilé ko ni picani na e mu hen. Ke lé bo pii pie: «Mwoli Babulona! Mwolihi a pwomwo ubwo! Tanahi me tieeng, ha a inetéale na te ju céiu!» 
Lé é niimieng, me pihemun wo lépwo api-icu éni pwo bwohemwo, be caa tice apulie celi me lé pwocuhi ni âicu telé. 
Be weeng na e mu pwocuhi ati ni naado na te junihe ubwo ni cuhin, na lé mu icuhi: Ni mwani megele, me ni mwani pwojo; Ni péi na te junihe ubwo ni cuhin; Ni toto mwaanu na te junihe wâé; Ni ba-acuwo na ûde wâé; Ni naado na pwo ko ni béokéé te ni éléphant; Ni naado na pwo ko ba-acuwo; Ni toki na mwoiu; Ni péi na pwojo na te junihe wâé; 
Ni toto tabe ûde, me ni eti na ûde wâé; Ni wie acuwo na ûde wâé heme nye cini; Ni tabe megele, me géréén, me farine, me blé; Ni paaci, me muto, me haricaan, me otuun; Ni *apenem tice ja kon. 
Lé pii te a pwomwo ubwo wo lépwo a-icu pie: «Ati ni âicu na nimem kon, ke caa tieden mu pelem. Ati ni naamuunaado na wâé, ke caa tice dem kon. Ati ninaa, ke time go bo uce tooli mwo!» 
Lépwo a-icu na pwo delé, ko a bwo icu ha a pwomwo ubwo naa, ke lé o cuwo ité kojaeng, ko ni bwo mwotilé ko ce picani celi e o mu hen, ke lé bo é me pihemun. 
Ke lé bo pii pie: «Mwoli Babulona! Weeng na e cuwohe ali mwaanu megele pun, ke te junihe wâé, ke ubwo a cuhin. Ke oba nang ko mwani megele, ke ni péi na pwomelaan. 
É he na te ju céiu inetéale, ke te jan me tai tanahi ati ni naamuunaado naa!» Ati ni apihuô pwo ong, ke nina lé engen pwo ong, ke ni apenem, me lépwo awoli ikua, ke lé caa mu ité kojaeng. 
É he lé alihi a muu a miû na éle nang kon, ke lé toii da pie: «Mwo te tice ace pwomwo ubwo celi pwohewii a pwomwo ubwo ce!» 
Ke lé o é me pihemun, ke lé tahi muu pule ne he ni punilé ko ni bwo téé jélé. Ke lé o wiikau ko pii pie: «Mwoli Babulona! Mwolihi a pwomwo ubwo naa, be te junihe pwo naamuu ati nina pwo ni ongelé he jié. Ke é he na te ju céiu inetéale, ke tanahi ati ninaa!» 
Miiden, go pipwodéén! Caa tanahi a pwomwo ubwo! Geé pipwodéén mwo, wogewé ni apulie te Padué, ni *apostolo, ke ni péroféta! Éa, be e caa tautieng wo Padué ko ni ta na e pwo tewé. 
Ke é ali pa âcélo na te junihe pwojunuun, na e pé a péi na te junihe ubwo, ke e tahi ne he jié, ke e pii pie: «O wonaa ace bwo pabetii Babulona, a pwomwo na te junihe ubwo, ke o tahi taabwonieng. Ke time genye bo uce alieng mwo. 
Ke time genye bo uce téne mwo, ce pati gitar, me ce pwocuu oopwé, me ce pwocuu tutu. O te tice pace apenem ko ba-acuwo me toki celi te ju céiu nang. Ke time genye bo uce téne mwo ce tihi bécemeii blé. 
Ke o caa time bo uce pwéélang mwo ce miû lang. Ke o caa time genye uce téne mwo ce pwocihe te pa apiaten me ê mwoden. «O pé kojako, go Babulona, ati ninaa, watihen ni huô tem na ta. Be go pwohewii ni toomwo apwodooki. Be lé pwo me lé pipatieden ati ni bele wo lépwo a-icu tem, na caa junihe piubwo jélé ne pwo a bwohemwo ati. 
«A céiu mwo, ke tée ne pelem a cewéhe ni péroféta, ke a cewéhe mwo ni apulie te Padué, ke ati nina taunulé ne pwo bwohemwo.» 
