﻿2 Pétéru.
1.
Woéo Simon Pétéru na é pwotii. Woéo pa eabwé te Iésu *Kériso, ke é apostolo ten be e pahedeéo ngen, beme é â pipatemehi a pwooti ten. É pwotii lé céiikewé, wogewé nina céiu a céihi tenye. A céihi tenye naa, ke a naado na te junihe wâé, be genye caa hegi mu ko Iésu Kériso, Padué henye, na weeng wo Padué ke pa *aceluimikenye. Junihe mwomwon ati ni bwopwonen den, be time e uce pipwoinen ne konye, be e tai ne tenye a céihi na piwien. 
Wâé heme lu adéikewé wo Padué henye ke wo Padaame henye Iésu Kériso. Wâé heme te piubwo ngen a bwo temehinaado tewé ne kolu, beme piubwo ngen ne kowé a *pipwoééhe tice ja kon me a péém delu! 
E todekenye wo Padaame, beme nye mu ha *a wâé ten na te junihe ubwo! Ke é mu ko a bwo temehieng denye, ke jan me nye mulie ha a mulie na iitihi ke wâé ten. Ke e ne tenye, ko a junuun, ati ni junaado, be me wonaa a bwo mulie tenye. 
É mu ko ati ninaa, ke e ne tenye ali e caa mi pii ânebun: ati ni *adéihi na te junihe wâé, ke te junihe ubwo wéden! Geé imwi ehi ninaa beme o tuwokewé koja nina nimewé kon na ta, na e pwotahi ne ko ni apulie pwo bwohemwo! Ke o céiu a pwonimewé me Padué, ke geé o pwohewiieng. 
Ke geé te nihe hane beme e ne kowé ni acehin ce, na a céihi tewé: Geé mulie ha a mulie na mwomwon; Geé temehi Padué, ke o piubwo da a bwo temehieng dewé; 
Geé pipwoiipikewé; Geé cumang ne he ni picani; Geé paciiti Padué me piténedeeng; 
Geé pwo me eânimewé te ni acéihi bééwé; Geé pipwoééhe ati ni apulie. 
Weengaa ni wâé na me e mu kowé. Ke mepie ubwo ne kowé, ke o pepule gewé, beme geé pwo celi wâé, ke o jan ne kowé me geé temehi ehi Padaame henye, Iésu Kériso. 
Hemepie pwo pace apulie celi tieden ne ten ni wâé naa, ke e pwohewii pana bwi nang. Be e neuhi pie, caa puueng mu he ni ta na e pwo bwolihi. 
E caa pipégalikewé wo Padué, wogewé lépwo bééng, ke e todekewé beme lépwo apulie ten. Ke wâé heme geé te junihe mwoiu, me geé habwii anaa ne he ni bwomu tewé. Be me wonaa, ke time o uce tacida mwodawé, ke o time geé uce tupwo. 
Ke e bobe hegikewé ha a pipwodéén, ne ha a Mwametau te pa Naîn Iésu Kériso, Padaame henye, ke pa aceluimikenye; ne ha a Mwametau na tice pwonehin. 
Geé caa te temehi ati ni naado naa, na é ko pii ni, ke geé caa te cumang, ne ha a bwo mulie tewé âcehi a juuju. Kehe icehi ana time uce piwâ jo me é te paniimihi tewé mwo. 
Ke é niimihi pie, o wâé heme é te cuwo ko wonaa, he é mwo teko mu éni pwo bwohemwo. 
Be e caa habwii tong wo Padaame Iésu Kériso pie, time o uce bwolihi, ke é o caa engen mu éni pwo a bwohemwo ce. 
Ke wâé heme é te nihe penem ni, beme é alecehen, ke me geé bo tee niimihi nina é patemehi tewé. 
Wogeme me lépwo *apostolo bééng, ke geme caa pipatemehi tewé a junuu Padaame Iésu Kériso, me a bwo mwojuia cemwo ten. Time uce ace céiu jemaa te lépwo apulie, ke time uce ace jepule celi e âbé mu ko ace pitemang deme.Be geme te ju piuti tewé cehi nina geme alihi ko ni naamiime. Be geme alihi a bwo ubwo na a wâé te Padaame Iésu na pwomelaan, 
he li geme mu pwo ali juwole iitihi. Ke geme téne a pwocihe te Padué Caa mu he miiden, Padaame henye na te junihe ubwo a wâé ten ke a junuun. Be e te junihe pipaunu me pipwoun de Iésu ânebuheme he e pii beetihi pie: «Wo paje, ke pa Naîng na te céiu nang na te junihe eânimung den. Weeng na é caa te pipégalieng ha a pipwodéén dong.» 
É mu ko anaa kuti, ke jan me nye céihi ne ko ati ni pwooti te lépwo *péroféta, ke me nye nenimenye ne kon. Be lé pwohewii a mwomiû na e pwéélang ha a melepiing, ucéihi a bwo taa te a ceni pwopwometan, ânebuhe a téale. Be é jenaa, ke wo Kériso ke e caa tuie ne he ni pwonimenye! 
Go nemwo niimihi pie, jan me go te pitemehi cehi ce bwopiine ni pwooti he ni *tii iitihi, na lé pwaadeniin bé wo lépwo péroféta. 
Be time uce aceli e âbé mu kolé lépwo apulie. Kehe te a *Jenen Iitihi na e penem kolé, beme lé pébé a pwooti na e âbé mu ko Padué. 
