﻿Cang.
1.
Woéo Cang, pa eabwé te Padué me Padaame Iésu *Kériso, na é pwotii lé céiikewé ati, wogewé a puapulie te Padué, na papiidenikewé ne pwo a bwohemwo ati. 
Lépwo bééng, geé pipwodéén heme e tuie ne kowé ni pétaapwo tacebwén. 
Be geé temehi pie, a tacebwén, ke e ne me nye cumang ne ha a piuca ke e habwii a bwomune a céihi. 
Kehe a piuca, ke wâé heme e pwo a penem den. Be me wonaa, ke me wâé ne kowé, ke me hején gewé, ke heme te tice aceli me tieden mu kowé. 
Hemepie pwo pace mu hadeniiwé celi time e uce temehinaado, ke wâé heme e ile Padué, be weeng pana e ne me piticenaado ne kon, ke e bo ne ten. 
Ke wâé heme e ilehi ne ha a céihi, ke me time uce pinekepé ne ten. Kehe wo pana pinekepé ne ten, ke e pwohewii a jié na me e cuu na a dan, ke e â he ni piduaan. 
Wo pa apulie na e wonaa, ke e nemwo niimihi pie, e bo hegi ace céiu naado mu ko Padaame. Be time e uce mu mang ne he ni bwopemieng. 
Ke mepwo wo pa acéihi na te tice den, ke me e pwo me piwâénimen, be e bo pineeng da wo Padué. 
Ke mepwo wo pana pwo den, ke me e pwo me piwâénimen ko a bwo neeng ole. Be bo tieeng pwohewii ne ko a muu meté. 
Be heme e taawie a téale, ke te nihe pwo niihen, ke e pwo me meiu a meté, ke e tupwo a muun, ke tieden a bwo wâé nen. Ke e wonaa wo pana pwo den, be e o mele ke o tieden ni penem den. 
Piwâénime pa apulie na e cumang ne he ni tacebwén, be é alecehen, ke e bo hegi a kuron ko a mulie na e caa mi pii wo Padaame pie e bo ne te lépwona eânimelé ten. 
Ke me te tice paceli e pii, heme tacebwénieng, pie: «Wo Padué na e tacebwéniéo.» Be wo Padué, ke pwocoon me e tacebwénieng na a ta, ke pwocoon mwo me e uce tacebwéni pace. 
Kehe muko pétaapwo ni apulie na tacebwénilé, heme lé âcehi nina te nimelé kon. 
Ke ana nimem kon, ke me go te âcehin, ke e pééko nge ha a ta. Ke a ta, ke me go tee pwo, ke e pééko nge ha a mele. 
Geé nemwo pipweéo, wogewé ni ju bééng: 
Ati ni âpipati na junihe wâé, ke ni *adéihi na nye hegi, ke tai opé mu jeda, pele Caa na e ne ni pwéélang. Te tice celi taatééhi ne pelen, te tice celi mu ha a melepiing. 
Te é mu ko ana nimen kon, ke e ne tenye *a ju mulip, mu ko a pwooti na juuju, beme junihe pwonaado ne konye mu ko ati nina e tabuhi. 
Geé téne ehi, wogewé ni bééng na eânimung dewé: Geé muko pétaapwo tabemi ehi. Ke me bwolihi me cihe. Ke me bwolihi me okéé. 
Be a okéé te pa apulie, ke time e uce pwo ana nime Padué kon. 
É mu ko anaa, ke geé necu nina ta, ke ni naado na mwiihi. Ke geé pwo me piwahin gewé, ke geé hegi a pwooti na e caa cemi he ni pwonimewé wo Padué, ke anaa, ke jan me e celuimikewé. 
Geé tabemi a pwooti ke geé ténedehi! Be hemepie geé te ju tabemi cehi, ke geé pipweéo, pwohewii pa apulie na e omehi a démen ne ha apiocile, 
kehe é alecehen, ke e engen, ke e te ju pwome neuhi ace bwo alieng! 
Kehe adéi pana e te nihe cémun ko ni patén de Padué hemepie e tee penem, ke me time e uce neuhi nina e téne. Ke e bo pituume ne ha ana e pwo. Be hején a pwooti naa, ke e tuwokenye mu he nina e imwikenye. 
Hemepie pwo pace apulie celi e pipii den pie pa apwoiitihi, ke hemepie time e uce pipwocile a bwo cihe ten, ke e te pigeti a pwonimen, ke te ju piticenaado ne ko a pwopwoiitihi ten. 
Weengi a pwopwoiitihi na te tice ta hen ne ânebuhe Padué, pa Caa tenye: Me nye cile ni ewa na te tice nyaa me caa telé; Me nye picani te ni depwele ne he ni picani me téé na lé mu hen; Me time genye uce pwo me e âbé konye a ta pwo a bwohemwo. 
