﻿Ébéru.
9.
A *piapwo ânebun ke tii ne he ni *patén de Moosé. Ke, he ni patén ânebun, ke e pihuôhi ne te lépwo apulie a bwo pwoiitihi telé, ne he ni duaan na iitihi ne kolé, ne éni pwo bwohemwo. 
Ke lé pacuuli a mwa mwaanu beme a *mwaiitihi, ke alo lupwo nemwa hen. Pwo ‘a nen na iitihi’, ke a céiu nen, ke ‘a nen na junihe iitihi’. Ke a nen naa, ke capuhi bwonihi ko a mwaanu. Ke a nen na iitihi, ke e hen a taap, me a mwomiû, me ni pwoloa na ne te Padué. 
Ke a nen na junihe iitihi, ke e hen a *apwoâpwailo na timi ko mwani megele, na lé mu cini encens ni dep na ûde wâé nelang. Ke e lang mwo a piélele mwopiapwo na timi ati ko mwani megele. Ke é ha a mwopiapwo naa, ke pwo ni naado na cié, na te junihe iitihi na élé hen: A piélele na mwani megele na oba ko ni nehi pwoloa manne opé mu he miiden; Ali bwaja *Aarona li e muu; Lupwoli péi na tii ne pwon li 10 patén ko a piapwo ânebun. 
É ne pwo a capuhe ali piélele mwopiapwo, ke pwo lupwo déme âcélo na mwani megele. Be lu habwii a bwo mu te Padué me *a wâé ten. Ke ni puuilu, ke talui ali capuhe piélele, é nelang he na lé mu pétaabwon ni ta pwo te a bele, ko ni cewéhe ni wota. Kehe mwo time uce téele a benaamwon me genye nihe cihe ko ni bwomunen naa. 
A mwa mwaanu, ke alo ni nemwa hen. Ke lépwo apwoâpwailo, ke lé mu taa ha a duaan na iitihi, ati he ni tan, beme lé pwo ni penem delé. 
Kehe te icehi pa apwoâpwailo ubwo, na pwo mwomwon den me e taa ha a béalohe nemwa ha a duaan na junihe iitihi. Ke te océiu nang ko taa lang ha a jo. Ke e pé da a cewéhe ni wota, na e ne beme âpipati te Padué. Ke a cewéle naa, ke a âpwailo bépineuhi ni ta: ni ta pwo ten me ni ta pwo te a puapulie, na lé pwo he time lé uce temehi. 
Ati ninaa, ke weengi ana nime a *Jenen Iitihi me e habwii tenye: Be time uce jan ne konye me nye taa ha a duaan na junihe iitihi jeda he miiden mu ko a bwo pwoâpwailo ne ha a mwa mwaanu ânebun ne éni pwo bwohemwo. 
Be genye alihi pie é ha a benaamwon ce, ke hiwon ni utepanu me ni âpwailo na lé ne te Padué ne ni apulie. Kehe icehi ana time uce jan me e pwo me mwomwon ni pwonimelé ne ânebuhen. 
Be a pwoiitihi naa, me ati ni patén den, ne ko ni wiinaado me ûdu, me ni bwo pipuulé, ke te ju ni naado ha a éé apulie, ke e te ju engen cehi die ko a ju bwopwonen de Padué. 
Mepwo é ne ko Kériso, ke caa apwoâpwailo ubwo tenye, na e pébé céiikenye ati ni *adéihi na genye ko mulie hen. E caa taa ha a mwaiitihi na e jeda he miiden, na e piwéden ke hején. Be time uce pwo ko ni i apulie, ke time uce a naado pwo a bwohemwo ce. 
Ke wo Kériso, ke e te taa me océiu ne ha a duaan na junihe iitihi. Ke e pé da lang a cewéle beme âpwailo bépineuhi ni ta. Time uce a cewéhe nani me paaci, kehe te a cewéhen na e tée, he li e pineeng beme e âpwailo. Ke me wonaa, ke e tuwo ni apulie mu ko ni ta pwo telé dieli mwo. 
Âcehi ni patén ko a bwo pwoiitihi ânebun ke hiwon ni naado na *mwiihi te ni apulie kon. Ke hiwon ni âpwailo me ni pwopwoiitihi telé, beme puu taabwon ni ta pwo telé. Ke lé mu pitaipuulé ko a cewéhe nani, me a cewéhe paaci, me ni dep ko a nahi paaci na cini, ne ko nina lé pwo na ta. Ke é alecehe a bwo puu taabwon na a ta mu ko ni éélé, ke jan me lé bo pwoiitihi mwo. 
Te icehi a cewéhe Kériso na te nihe pwojunuun koja ninaa! Be e puu taabwon ni ta mu he ni pwonimenye dieli mwo. Ke e tuwokenye mu he ni huô me ni ta, na lé péékenye nge ha a mele. Be é mu ko a Jenen Iitihi, ke e pineeng wo Kériso ne te Padué, beme pa âpwailo na hején, na tice tooli me ta kon. Ke é mu ko anaa kuti, na o time e uce pipé ne konye ni *pwonimenye. Ke jan me genye cuwo ânebuhe Padué na e *mulie dieli mwo, beme genye pipaunueng, ke me genye penem den. 
Ke a bwo mele te Kériso, ke e tuwokenye koja ni ta na genye pwo, na genye mulie hen haahi a piapwo ânebun. Ke e ne a piapwo na mwo coho. Ke ati lépwona e caa todelé wo Padué, ke lé bo tai hegi ati ni adéihi naa, dieli mwo. 
Mepwo é ne ko a piapwo, ke pwohewii a tii na e tii wo pa apulie, ânebuhe a bwo mele ten. Be e tii ni nii ati ni apulie na lé o hegi ni wâé ten. Kehe icehi ana mwo time uce cuwo a tii naa, be mwo time e uce mele wo pa atii nen. Ke o mwo te tice apulie celi me e hegi ce den mu ko ni wâé ten. 
Ke piwien ne mwo ko a piapwo ânebun. Be e te *pajuujuhi cehi ne ko a bwo téte na a cewéhe a wota na taunuhi. 
Be, me e pipatemehi ati ni patén te a puapulie wo Moosé, ke e pé a cewéhe ni nahi paaci me ni nani, na e bitehi neibuhi me a tabe. Ke e neole hen a dihe acuwo hysope na cie ko a pumajoo megele. Ke e taipuu a tii ko patén. Ke e wonaa mwo ne ko ni apulie ati. 
Ke e patemehi telé pie: Weengi a cewéle bépajuujuhi na a piapwo na e pwo wo Padué me dewé, ke wâé heme geé âcehin. 
Ke e taipuu ko a cewéle a *mwaiitihi na pwo ko mwaanu, me ati ni naado na iitihi na lé mu hen. 
Âcehi ni patén, ke te icehi a cewéle na jan me e ne me wâé ni naado ne ânebuhe Padué. Ke te tice ace bwo pineuhi ne ni ta, hemepie time uce téte a cewéle. 
Genye caa alihi pie, a mwaiitihi pwo ko mwaanu, me ni naado na lé mu hen, ke wâé ne ânebuhe Padué. Be wâé ko a cewéhe ni wota. Kehe icehi ana ni naado naa, ke te ju a déme ni naado na piwéden, na e jeda he miiden. Ke é mu ko ninaa, ke o wâé mwo ni âpwailo na nihe piwéden. Be time uce jan a cewéhe ni wota, me e ciitili ni ta. 
Wo Kériso, ke e taa ha a mwaiitihi na e jeda he miiden, beme e habwiikenye te Padué. Kehe time e uce wonaa ne ha a mwaiitihi ne éni pwo bwohemwo, na pwo ko ni i apulie. Be a mwaiitihi naa, ke te ju a déme a junaado na e jeda he miiden. 
Ke a céiu mwo, ke a âpwailo na e pébé wo Kériso, ke te a cewéhen kehe time uce a cewéhe ni wota. Ke time e uce pwo me piohiwon ko pwoâpwailo, pwohewii pa apwoâpwailo ubwo juif ne éni pwo bwohemwo, na e te pwo téteda ati he ni jo. 
Be mepie wonaa, ke me e o pwo me piohiwon ko mu he ni téé me mele tabuhi mu ha atabuhi ko a bwohemwo. Time uce wonaa! E caa te océiu ko tuie, ha a céiu benaamwon, ânebuhe a anebwén ko a bwohemwo. Ke e pineeng beme pa âpwailo. Ke e caa pwo me tieden a ta, ko a bwo mele ten. 
Mepwo é ne ko ni apulie, ke lé te océiu ko mele. Ke é alecehen, ke e bo tautilé wo Padué. 
Ke wo Kériso mwo, ke e te océiu ko mele, beme pineuhi ni ta pwo te ni apulie na hiwon jélé. Ke mepie e bo âmwobé, ke caa time uce a bwopwonen me e mwo tuwokenye mwo mu ha a ta. Kehe e o âmwobé beme e celuimikenye, wogenye na genye ucéieng. Ke *a ju mulip na e ne tenye, ke o é dieli mwo. 
