﻿Ébéru.
3.
Ni acéihi bééng, wo Padué, ke e caa todekewé, beme geé apulie ten. Ke wâé heme geé nenimewé ne ko Iésu, be pa watihe a céihi tenye. Be e neeng bé céiikenye wo Padué, beme pa *apwoâpwailo ubwo tenye. 
Ke e piténede Padué na e pipégalieng, ke e penem den ehi pwohewii *Moosé, he li e penem me de ati a puapulie te Padué, a mwa ten. 
Kehe icehi ana te nihe pwonaado ne ko Iésu, ke wâé heme te nihe pipaunueng koja Moosé. Be pa abahi mwa, ke e te nihe piwéden koja a mwa. 
Be muko pétaapwo ni mwa, ke te pwo ni abahi mwa, ke te wo Padué, na e pwo ati ni naado. 
Mepwo é ne ko Moosé, ke te nihe pa apenem ehi, ne ha ati a mwa te Padué, ke e te nihe piténedeeng. Kehe icehi ana te ju pa apenem cehi. Be te ju pa déme ati nina e bo patemehi wo Padué, alecehen. 
Ke wo *Kériso, ke pa *Naî Padué ne ha a mwa te Padué, ke ne ten a pihuô. Ke a mwa naa, ke wogenye, hemepie genye te *ucéihi ne ha a céihi, ke genye imwi mangihi a céihi tenye. 
É mu ko ninaa, ke wâé heme nye piténedehi nina e pii na a *Jenen Iitihi pie: Me geé téne a pwoto te Padué ha a tan jenaa, 
ke geé piténedehi! Geé nemwo bitekewé kojan pwohewii ni *Isaraéla ne ha a melé. Be muhi telé ko Padué helé, ke lé ne jéilé ne kon. Lé tee pipwopwocihe ko ni bwomu telé. Psaume 95.7−8 
Ke te piwien mwo me ana e pii ne kolé wo Padué, pie: Lé tacebwéniéo ne ha a melé wo lépwo caa tewé, ke lé alihiana é pwo 
ne he na 40 ni jo. É okéé ne kolé, ke é patemehi pie: “Lé ne jéilé ne kong, ke time lé mu uce piténedeéo! 
O time lé bo uce tuie nge ha amwaale tong, a péém na é caa pipwopweehi!” Psaume 95.9−11 
Geé pipwocile, wogewé ni bééng! Be mepie geé cile ni âniimihinaado na ta, ke mepie muhi tewé me geé céihi, ke wieli geé bo piâ ité koja Padué na e mulip. 
Be a ta na genye pwo, ke e pahaulikenye, ke e pwo me mwoiu ni puninye ke e pwo me genye bitekenye koja Padué. Ke anaa, na me geé te pipamwoiukewé ibu, beme time e uce tuiebé kowé ninaa! Ke geé wonaa ati he ni tan. Be a tan naa, na caa te tii ne he ni tii iitihi ke caa te é jenaa kehe time bo uce é meé! 
Genye caa béé Kériso, wogenye na nye céihi ne kon. Ke wâé heme genye imwi mangihi a céihi naa, pwohewiin he li genye céihi, die ha a pwonehin beme o pwo ce denye mu ko nina eten. 
Ke genye nemwo pineuhi ana genye pine ne he ni tii iitihi pie: Me geé téne a pwoto te Padué ha a tan jenaa, ke geé piténedehi! Geé nemwo bitekewé kojan pwohewii ni Isaraéla ne ha a melé. Psaume 95.7−8 
Wooélé lépwona lé téne a pwoto te Padué, ke li lé bitelé ne kon? Te wo lépwo watihenye kuti, li e péélé wie wo Moosé mu ha amu *Aigupito, 
ke li e ne a pwo-okéé kon wo Padué, ne he na 40 ni jo. Te woélé, li lé pwo ana ta ne ha a melé, ke li lé tai mele nelang. 
Ke te woélé, li e apwolé wo Padué pie, o time lé uce tuie nge ha amu li e caa pipwopweehi me delé. 
Ke caa time lé uce tuie nge ha amwaale me a péém te Padué mu ko ana muhi telé me lé céihi ne kon. 
