﻿2 Tésalonik.
2.
Lépwo acéihi bééme, nimeme me geme pacémunikewé ko a bwo mwojuia mwobé te Padaame henye Iésu Kériso, me a bwo pineibukenye ten, beme nye mu me weeng. 
Geé nemwo pwo me hauli ni pwonimewé, ke mwotikewé, heme lé pii ne ni béén pie, e caa mwojuia mwo, be a jepule gele. Ke wieli lé o pii pie, te a *Jenen Iitihi na e te habwii telé anaa, ai lé o pii pie, wogeme na geme pii, ke tii ne telé anaa. 
Ûhu! Geé nemwo pwo me lé pipwohuô tewé! Time e o uce ju téele tuie a tan naa, ânebuhe a bwo tuie ne ni béé naado. Be e o mwo mi cuwo a benaamwon, na lé o pwobwoni Padué ne ni apulie na te junihe hiwon jélé. Ke e bo te â tuiebeele wo pana pii kon pie pa Acubwoni Padué. Ke wo panaa, ke wo Padué, ke e bo pwo me e patieden. 
E bo pihoonihi ati ni naado na iitihi, me ati nina lé pipaunuhi me paciitihi ne ni apulie. Ke e bo pipaunueng mwo, me pii mwo pie, e eda koja ati ni naado. E bo â taa tebwo ha a *mwaiitihi te Padué, me pipatemehi pie weeng Padué! 
É caa pii tewé ati ninaa, ha ali benaamwon li é mwo mu pelewé. Ai, kona geé caa pineuhi anaa? 
Wo pa Acubwoni Padué, ke time o uce jan me pihabwiieng, ânebuhe a tan den. Be pwo ana e pacuwoeng dieli ha a tan naa. Ke geé caa te temehi ehi anaa. 
A juuju pie, e caa teko penem éni pwo bwohemwo, a *pipwojunuun na e pwobwoni Padué. Kehe icehi ana é dieli jenaa, ke te wogenye cehi ni naî Padué na nye ali temehieng. Kehe me e céieng mwo wo pana e pacuwoeng, 
ke wo pa Acubwoni Padué, ke e bo te â tuiebeele. Weengi ana e o tuie ne kon ha anebwén kon: E bo tuie wo Padaame Iésu, ha *a wâé ten. Ke e bo pwo me e mele wo pana e cubwonieng heme e cuueng ko a pwon. Ke e bo pwo me tieeng dieli mwo ko a bwo tuiebé na a wâé ten! 
Kehe icehi ana é ânebuhe anaa, ke wo pa Acubwoni Padué, ke e bo pwo ni inenaado na hiwon ko a junuu *Caatana: ni naado na lé o téetihi ne ni apulie, ke e o pipwohuô telé kon. 
Ke o hiwon mwo ni naado na ta na e bo pwo, beme e pigeti ni apulie. Wo lépwonaa, ke o tielé dieli mwo, be muhi telé ko a juuju na me e celuimilé. 
Te wo Padué na e ne me wonaa, ke e ne a pipwojunuun na ta, me e pipwohuô telé. Ke lé o céihi ne ko a gele. 
Ke e bo tautilé, ke e bo pwocuhinaado telé, ko ana tee nimelé me lé pwo ana ta, kojan me lé céihi ne ko a juuju. 
Lépwo acéihi bééme, te junihe eânime Padaame tewé, ke wâé heme geme te cuwo ko pwo-olé ten kowé! Be e caa te mi pipégalikewé ha atabuhi kon, beme e celuimikewé. Ke e wonaa ko a Jenen Iitihi ten, ke e pwo me wogewé ni apulie iitihi te Padué, ke é mu ko a bwo céihi tewé ne ko a juuju. 
Ke e todekewé, he li geme pipatemehi tewé a *Pwooti Wâé, beme geé mu ha a bwo ubwo na a wâé te Padaame henye, Iésu Kériso. 
Ke wonaa, wogewé ni bééme, wâé heme geé te cumang ne he ni céihi tewé. Ke geé cumang ne ko ni pwooti na geme ne tewé ko patime, ai nina geme tii me dewé. 
Wo Padué Caa tenye, ke te junihe eânimen denye. Ke é mu ko a *pipwoééhe tice ja kon den, ke e o te cuwo ko pamwoiukenye dieli mwo. Ke e caa ne tenye a céihi na ubwo, ha a benaamwon na nye mwo ucéihi ati ni wâé, na me e bo ne tenye. Ke geme ilelu me Padaame Iésu Kériso, 
me lu pamwoiukewé, beme time o uce piwâ gewé, me geé te cuwo ko pwo ke pii nina wâé! 
