﻿1 Tésalonik.
1.
Woéo Paulo na é pwotii, he wogeme me Silas me Timoté.É pwotii lé céiikewé, ni acéihi ne ha a pwomwo ubwo Tésalonik, na geé mu ko Padué Caa tenye, me Padaame Iésu *Kériso. Wâé heme e mu kowé a *pipwoééhe tice ja kon, me a péém. Adéikewé! 
Geme te cuwo ko pipwo-olé te Padué Caa, heme geme pwoiitihi me dewé. Geme pipwo-olé ten ko ati ni penem na geé pwo, ne ha a céihi me a pipwoééhe tewé. Ke geme pipwo-olé ten mwo ko a bwo cumang dewé, be geé ucéihi ne he ni céihi tewé a bwo mwojuia mwobé te Padaame Iésu Kériso. 
Lépwo bééme ne ko Kériso, geme te temehi pie, e pipwoééhewé wo Padué, ke e pipégalikewé, beme geé apulie ten. 
He li geme pii beetihi tewé a *Pwooti Wâé te Iésu, ke time geme uce ju pii tewé ko pwocihe cehi; kehe geme pipatemehi tewé ko a junuu a *Jenen Iitihi. Geme céihi pie, a pwooti teme, ke a juuju. Ke geé temehi ehi a muliheme ne pelewé, me a bwo picani teme tewé. 
Ke wogewé, ke geé âcehi a bwo mulie teme me a bwo mulie te Padaame. Be geé caa hegi a pwooti, ne he ni tacebwén na ubwo. Kehe icehi ana a Jenen Iitihi, ke e ne tewé a pipwodéén na te junihe ubwo. 
Ke geé caa béhabwiinen de ni acéihi, ati ne he lupwo province Macédoine, me Akaï. 
Be a pwooti te Padaame, na e engen mu pelewé, ke genye téne a één pitihi a Macédoine, me a Akaï pwohewii a tikekele. Ke ati ni apulie lang, ke lé temehi pie, geé céihi ne ko Padué. Te tice pwooti celi jan me geme pii. 
Be, me lé pwojepule kome, ke lé te piuti mwo a bwo hegikeme tewé, ne pelewé. Ke lé pii pie, geé caa bitekewé nge céii Padué. Ke geé necu ni *déme duéé, beme geé pipaunu, me piténede Padué na e mulip, ke juuju. 
Ke lé piuti ngen pie, geé *ucéihi ne ha a céihi, pa Naîn Iésu Kériso, na e bo mwojuia mwobé, mu he *miiden. Be e caa mulie cemwo mu ha amele, ke e celuimikenye mu ha a cuhinaado ko ni ta: a cuhinaado na e bo ne te ni apulie wo Padué, ne ha a okéé ten. 
