﻿Filipi.
1.
Woéo Paulo na é pwotii, he wogemu me Timoté, be lupwo apenem de *Kériso Iésu. É pwotii lé céiikewé, wogewé lépwo apulie te Padué na geé mu Filipi, me lépwo apihuô me lépwo dikone. Wogewé lépwo apulie te Padué, be geé mu he Kériso Iésu. 
Wâé heme e mu pelewé a *pipwoééhe tice ja kon me a péém na e âbé mu ko Padué Caa tenye, me Iésu Kériso, Padaame henye. Adéikewé! 
É ati he ni benaamwon na é niimikewé hen, ke é pwo-olé te Padué kowé. 
Be é te pipwodéén taaci, ne he ni pwopwoiitihi tong me dewé. 
Be geé picani tong ko a bwo patemehi na a *Pwooti Wâé, tabuhi he geé mi céihi, dieli jenaa. 
Wo Padué, ke e tabuhi a penem na te nihe wâé ne he ni pwonimewé. Ke é céihi me mwoiu pie, e bo nihe penem kowé, ke e bo panebwénihi ha ace tan celi e bo mwojuia mwobé hen wo Kériso Iésu. 
Nihe eânimung dewé! Ke wonaa a pwonimung kowé ati, be geé te nihe picani tong ne he ni penem na e ne tong wo Padué. Ke genye tai hegi neibuhi a *adéihi ten jenaa, he é mu he karépu; pwohewiin ânebun he mwo time uce téele cieéo. É ha a benaamwon naa, ke é pwopahi a Pwooti Wâé, ke é patemehi te ni apulie beme lé céihi ne kon. 
Éa, e te temehi wo Padué pie, é pii a juuju. Be é nihe tai pipwoééhewé pwohewii a bwo pipwoééhewé te Kériso Iésu. 
Wonaa a pwopwoiitihi tong, beme o piubwo da a pipwoééhe tewé. Wâé heme geé temehi ehi a céihi na e mu konye. Ke wâé heme geé temehi pineitééhi aceli wâé me aceli ta. 
Ke me wonaa, ke geé o alihi temehi ana wâé me ana juuju, beme geé mulie hen. Ke é ha a tan na e bo mwojuia mwo hen wo Kériso, ke o te tice ta kowé celi me tautikewé kon. 
Ke e o te nihe wâé ke hején ni acehi ni penem dewé, é mu ko ana e mulie kowé wo Iésu Kériso. Ke wo lépwo apulie, ke lé bo alihi *a wâé te Padué, ke lé bo pipaunueng. 
Lépwo bééng acéihi, nimung me geé temehi pie, a bwo mu he karépu tong, ke pwo a naado na wâé hen. Be é mu ko anaa, ke e te nihe piân a Pwooti Wâé. 
Be wo lépwo coda na lé mu ha a pomwa te pa gupéno, ke ati ni apulie éni, ke lé caa temehi pie, é mu he karépu ko a bwo penem dong ne ko Kériso. Ke hiwon ni acéihi na e nihe pamwoiulé wo Padaame, beme time uce abwobwo jélé me lé patemehi a pwooti ten. 
Be hiwon nina lé pwojepule ko Kériso mu he ni pwonimelé na wâé. Be lé temehi pie, é mu he karépu mu ko a bwo *pajuujuhi na a Pwooti Wâé. Ke lé temehi pie, wo Padué na e ne tong a penem ce. Kehe pwo lépwo béén na lé patemehi a pwooti é mu ko a pipwokon delé. Be nimelé me lé wédeniéo. Ke lé pwo me é mu he ni picani, he é mu éni. 
É hemepie lé pwo ni penem de Kériso mu he ni ju pwonimelé, ai é heme lé te piniimilé cehi, ke te ju piticenaado ne kon. Be patemehi a nii Kériso mu ko nina lé pwo. Ke é pipwodéén jenaa ko ninaa. Éa, é te cuwo ko pipwodéén. 
É pipwodéén, be é temehi pie, geé pwoiitihi me dong, ke e nihe picani tong a *Jenen Iitihi te Kériso ke e wéihi a jenung. É mu ko anaa, na é céihi pie, o bo tuwoéo mu he karépu. 
Nihe nimung me woéo pa apenem ehi te Kériso. Ke me o time uce tanim jo ko ni penem dong ke me time uce piwâ jo me é habwii pie, te nihe ubwo Kériso, é hemepie é mulie, ai é hemepie é mele. 
Be é hemepie é mulie, ke é mulie me de Kériso. Ke é hemepie é mele me de Kériso ke nihe wâé mwo. 
Be caa nihe nimung me é mu pele Kériso dieli mwo, be a naado na te junihe wâé wéden. Kehe icehi ana te nihe hiwon ni bwo niimihinaado tong. Be é hemepie é tee mulie éni pwo bwohemwo, ke é o tee pwo ni penem na wâé me den. 
Ke o wâé me dewé, heme é mu éni pwo bwohemwo, beme é picani tewé, beme o piubwo ngen a céihi me a pipwodéén dewé. Ke é mu ko anaa, na é céihi pie e o mwo te ne tong wo Padué, me é mwo te mu éni. 
Wonaa, hemepie é âdé céiikewé, ke geé o pipwodéén me pipaunu Kériso Iésu, é mu ko nina e pwo me dong. 
Ana wâé me dewé, ke me geé mulie cehi a Pwooti Wâé te Kériso. Ke é hemepie é âdé caniêkewé, ai é hemepie time é uce âdé, ke é o bo téne pie, geé cumang ne he ni céihi tewé, ke me geé pipenem ibu ne ha a pwonime na céiu. Be geé pwohewii lépwona lé pwopa, ke wâé heme geé penem me mwoiu, beme ubwo a céihi tenye na e âbé mu ko a Pwooti Wâé. 
Geé nemwo pwo me mwotikewé ko lépwona lé cuwodekewé. Be é hemepie geé mwoiu ke lé o alihi pie lé o patieden ati dieli mwo. Ke geé o temehi pie geé piwéden, ke e o bo celuimikewé wo Padué. 
Be weeng, ke e ne tewé a céihi ne ko Kériso, ke weeng mwo, ke e ne me geé mu he ni picani be wogewé lépwo apulie ten. 
Be woéo mwo, ke é te nihe mu he ni picani me den, jenaa ni, pwohewiin ânebun, he é mwo mu pelewé. Be geé caa alihi a bwo pwopahi nen dong a Pwooti Wâé. Ke a penem naa, ke tai ni penem denye ati. 
