﻿Éféso.
1.
Woéo, Paulo, na é pwotii lé céiikewé, woéo pa apostolo te *Kériso Iésu, âcehi a bwo niimihinaado te Padué. Be e pahedeéo ngen, me é pipatemehi a pwooti ten. É pwotii lé céiikewé, wogewé ni apulie iitihi ten ne Éféso, ke é ne mwo he ni béé duaan mwo wogewé na geé *cumang ne ha a céihi ne ko Kériso Iésu, ke céiu gewé me weeng. 
Wâé heme e mu kowé a *pipwoééhe tice ja kon me a péém na e âbé mu pele Padué Caa tenye, me Padaame Iésu Kériso. Adéikewé! 
Wâé heme nye pipaunu Padué! Weeng Padué na e Caa te Padaame henye Iésu Kériso. Be e ne tenye mu he miiden ati ni *adéihi ten, mu ko ana céiu genye me Kériso. 
Ânebuhe a bwo tabuhi na a bwohemwo, ke e caa te mi pipégalikenye wo Padué, beme nye apulie ten, na e pwaadeniin bé wo Kériso. Ke nimen me wâé genye, ke me tice ta konye ne he pwahamiin. Be te junihe eânimen denye. 
Ke é mu ko a pipwoééhe ten, ke a âniimihinaado ten ânebun pie, me e bo pwo me wogenye ni naîn, mu ko Iésu Kériso. Weengaa a bwo niimihinaado ten, ke e te pacuwohi. 
Wâé heme nye pipaunueng, me picedieng. Be te junihe ubwo *a wâé ten, me a pipwoééhe tice ja kon den me denye! Be e ne, me piticenaado ne kon, ne tenye ni adéihi ten, na e pwaadeniin bé wo pa Naîn na te junihe eânimen den. 
Ke caa céiu genye me weeng. Ke e caa tuwokenye wo Padué ke e caa pineuhi ni ta pwo tenye, mu ko a cewéhe Kériso na tée he li e mele me denye. Be te junihe ubwo a pipwoééhe tice ja kon den 
na e ne tenye me tice ja kon. Ke e ne tenye ati a pitemang me a bwo temehinaado. 
E habwii tenye *a bwo niimihinaado ten li e ha aduwo ânebun. Ke e pacuwohi ne tenye, mu ko Kériso, 
ha a benaamwon na e caa te mi pacuwohi ânebun. Ke e bo neibuhi ati nina e tabuhi ne jeda he miiden, ke e jeoté pwo bwohemwo. Ke e bo tai nelé ati haahi a pihuô te Kériso. 
E pipégalikeme wo Padué, wogeme na geme mi céihi ne ko Kériso, me ucéieng. Ke e niimihi ânebun me e pwo me wogeme ni apulie ten, mu ko ana céiu geme me Kériso. Be ati ni naado na nimen kon, ke e te pacuwohi. E pwo me wonaa, beme geme habwii *a wâé ten na junihe ubwo. 
Wogewé mwo, ke geé téne a pwooti na a juuju. Ke a pwooti ce, ke a *Pwooti Wâé, na e celuimikewé kon. Be geé caa téneeng, ke geé caa céihi ne ko Iésu Kériso. Ke e habwii wo Padué, pie, geé caa apulie ten. Be e caa ne kowé a inen, a *Jenen Iitihi, pwohewii a bwo *piapwo ten ânebun. 
Ke a Jenen Iitihi naa, ke e ânebuhe ni wâé ten, na e ne tenye, ni apulie ten. Ke é mu ko anaa, ke genye temehi pie, genye o bo hegi ati ni wâé ten. Ke bobe tuwokenye ati koja a ta. Wâé heme nye pipii de Padué na ubwo nang ne ha a wâé ten! 
É mu ko ati ninaa, ke é te cuwo ko niimikewé ne he ni pwopwoiitihi tong. Ke é te cuwo ko pwo-olé ten kowé. Be é téne jepule kowé pie, geé te junihe céihi ne ko Padaame Iésu, ke geé pipwoééhe ati ni apulie ten. 
Heme é pwoiitihi me dewé ke é ilehi koja Padué pie, me e picani tewé, me geé temehieng ehi ko a Jenen Iitihi ten. Be a Jenen Iitihi, ke e bo habwii tewé a ju bwomu te Padué: wo Padué te Padaame henye Iésu Kériso, me pa Caa na oba nang ko a wâé. 
Ke é ilehi kojaeng pie, me pwéélang ehi ne he ni pwonimewé ko ati ni wâé ten na e ne tewé. Be junihe ubwo nina e bo ne te ati ni apulie ten. Be wonaa a cemewé na geé *ucéihi ne ha a céihi, alecehe a bwo todekewé ten. 
Ke é pwoiitihi mwo pie me geé temehi a junuu Padué na te junihe ubwo me denye, wogenye nina genye céihi ne kon. E habwii a niihen me a junuun naa wo Padué, 
he e pamulipi Kériso mu ha amele, ke e pwo me e tebwo *pwo a juin ne he miiden. 
Ke e pwo me e pihuôhi ati ni apihuô ke ni pwojunuun ne jeda he miiden, ke éni pwo bwohemwo; he ni benaamwo amu ce, ke ni benaamwo amu na e bo âbé. 
Éa, e tai ne ati wo Padué haahi ni pihuô te Kériso. Ke e pwo me pa daame he a puapulie ten, a Mwaiitihi, 
na a één, ke wo Kériso, ke e punin; ke céiu julu. Ke ati ni naado na e ne wo Padué, ke te tai oba ko Kériso. 
