﻿Luka.
16.
E pacémuni lépwo acémun den wo Iésu, ke e pii telé a ocine ce: «E bwo mu wo pa céiu apenem de pa céiu apulie na pwo den. Be pa apiwéihi ne ni mwani ten. «Ke é ha a céiu tan, ke lé âbé pitéteiminaado te pali daame hen ne ni béé apulie, ke lé pii ten pie: “E te nihe pihoonihi li mwani tem wo pali apenem dem.” 
«Ke e todeeng wo pali daame, ke e pii ten pie: “Aje! Lé pitéteiminaado ne tong kom! Go pii pwaatihi tong aceli go pwo ko li mwani tong. Be o time go uce tee wéihi!” 
«Ke e te pitautinaado wo pali apenem, ke e pipii ten pie: ‘É te ju nebwén kuti! Ke é bo pwo de? Caa tice niihung me é penem he pule. Ke te nihe tanim jo me é ile.’ 
«Ke e te niimihi kuti ana me e pwo, beme pwo ce béén celi me lé picani ten, hemepie caa tice penem den. 
«Ke e tode he picéiu lépwona pwo ni kérédi telé ne pele pali daame hen. Ke e tahimwo pa bécéiuhen pie: “Niile ce kérédi tem?” 
«Ke e hegi ne ten pie: “100 piibwi ko géréén.” «Ke e pii ten wo pali apenem pie: “Ûhu! Go te ju wodehi cehi celi 50, go pali bééng. Neko a metii bépajuujuhi nen pie caa nebwén ati li kérédi tem.” 
«Ke e tode mwo pa céiu, ke e tahimwoeng pie: “Wogo paje, ke niile ce kérédi tem?” «Ke e hegi ne ten pie: “100 ni cang ko blé.” «Ke e pii ten wo pali apenem pie: “Ûhu! Neko a metii tem, ke go te ju tii cehi pie 80, ke nebwén ati a kérédi tem.” 
«Ke é he e téne anaa wo pali daame, ke e te nihe téele, ke e picedi pali apulie ko a bwo pipwocileeng, ke te piwien hemepie pa apipwohuô.» Ke e panebwénihi nelang a ocine naa wo Iésu, ke e pii pie: «Geé alihi, wo lépwo apulie éni pwo bwohemwo, ke lé te nihe temehi me lé pipwocilelé, koja ni apulie te Padué na mwomwon ke juuju ni huô telé. 
Ke é o pii tewé pie: A mwani, ke pa apipaupaakenye! Wâé heme go pé ni mwani tem, beme go picani te lépwo apulie kon ne éni pwo bwohemwo, beme o pwo ce béém. Be é alecehen, hemepie go caa mele koja ni mwani tem, ke wo Padué, ke e o te hegiko ehi ne ha a pomwa ten ne jeda he miiden dieli mwo.» 
E pacihelé mwo wo Iésu ko a mwani, ke e pii pie: «Hemepie go temehi pwoiipihi ace cuwo nahi naado, ke go te temehi mwo me go pwoiipihi ni naado na ubwo. Ke é hemepie time go uce temehi me go pwoiipihi ni naado na wahin, ke o time go bo uce temehi me go pwoiipihi ni naado na ubwo. 
Ke é hemepie time go uce temehi me go pwoiipihi ni naado na te ju wahin ne éni pwo bwohemwo, pwohewii a mwani, ke é mu ko ade na go niimihi pie wo Padué, ke e o bo ne tem, me go papenemihi nina wâé na ni junaado ne he miiden? 
«Te tice pace apulie celi jan ne kon me pa apipenem de lupwoce daame celi alo julu, ati ha a pwonimen. Be e o pipenem ehi te pace céiu, ke e o tééti pa céiu. Kehe time uce jan me geé tai apipenem de Padué me a mwani!» 
Ke he lé téne a pwooti naa wo lépwo béé *Farasaio, ke lé pihoonieng, be wâé telé a mwani. 
Ke e pii telé pie: «Geé pipwocile, be geé te nihe pihabwiikewé ne he pwahamii ni apulie, kehe icehi ana e te temehi ni pwonimewé wo Padué. Ke nina pwonaado ne kon ne te pa apulie, ke te junihe ta ne he pwahamii Padué.» 
E pacémuni ni apulie wo Iésu ko ni béé pwooti, ke e pii telé pie: «Lé pihuôkenye ne ni *patén de Moosé, me ni pwooti te lépwo péroféta, die ha a benaamwon na e pipune wo *Ioane pa apipuu apulie. Kehe icehi ana é jenaa, ke é ko patemehi a Pwooti Wâé ko a *Mwametau te Padué. Ke te nihe hiwon ni apulie na lé ko pipwopa hane beme lé taa hen. 
Kehe icehi ana hemepie e mwo teko mu a miiden me a bwohemwo, ke o te tice ace céiu atii celi e o pétaabwon mu ko ni patén. 
«É mu ko anaa, na é pii pie: Hemepie go cibéé ê mwodem, beme go piaten mwo, ke pa apibune be go engen koja êgi mwodem ânebun. Ke piwien mwo heme go piaten me êce céiu toomwo celi e caa tahagéi piaten.» 
E pii wo Iésu a ocine ce: «Lu bwo mu wo lupwo apulie na alo julu. Wo pa céiu, ke pa apulie na nihe pwo den. Ke e mu cuwohe ni epwén na te nihe wâé ne kon, ke te nihe ubwo ni cuhin. Ati he ni tan, ke e te pwo nina te wâé ten, ke e mu pwo ni piwiinaado na ubwo. 
«Ke wo Lazare, ke tice den, ke tome ahinaado kon, be e pwo katia, ke lé mu tami ni ahinaado kon ne ni wotaahen. Ke e tee pule ha a pomwa ko a babé ko ali mwa te pali pwo den. Ke te nihe nimen me e eni ni mewiinaado na e mu tupwo mu pwo a taap te pali pwo den. 
«Ke nebwén, ke lu mele wo lupwoli apulie, ke lé âbé wo lépwo *âcélo, ke lé pé Lazare nge pele *Abérama ne he miiden. 
Kehe é ne ko pali pwo den, ke lé pééeng ole céii lépwo amele. Ke te nihe cunu nang, ke e te nihe mu he ni picani nelang. «Ke me e alehede, ke e ali Lazare me Abérama, ke he nihe woilu ité kojaeng. 
Ke e toii da céii Abérama pie: “Au, caa, go pipwoééhung! Ke go neopé Lazare, beme e te ju neole ha a tabe a mwodéin, ke me e ne pwo a upehung. Be é te nihe mu he ni picani ne ha a miû ce.” 
«Ke e hegi ne ten wo Abérama pie: “Pa naîng, go teko niimihi he li go mwo mulie pwo bwohemwo. Ke te tice celi tieden pelem, ke go mulie ha a pipwodéén. Kehe wo Lazare, ke e mu he ni cunu me ni picani. Ke go alihi, jenaa, ke e pipwodéén, ke wogo, ke go mu he ni cunu me ni picani. 
Ke a céiu mwo, ke pwo a pwon na nihe ubwo ne ha awiemenye. Ke pwocoon me geme oté céiikewé, ke pwocoon me geé taabé céiikeme.” 
«Ke e hegi ne ten wo pali pwo naamuun pie: “Ke me wonaa, go caa, ke é ileko pie, go pahede Lazare nge ha a pomwa te caa tong, ne pwo bwohemwo. 
Be mwo élé lang wo lépwo âjiénung na nim jélé; be wâé heme e pacihelé ko a duaan ce é ko mu hen. Be koli lé bo opé ne éni, he ni cunu me ni picani hemepie lé bo mele.” 
«Ke e hegi ne ten wo Abérama pie: “Ûhu! Be caa te e pelelé wo Moosé me lépwo péroféta. Kehe wâé heme lé piténedehi!” 
«Ke e pii ten wo pali pie: “Ûhu go caa. Be te nihe wâé heme e mwojuia mu ha amele wo pace céiu apulie me e pacihelé, beme lé pininim, ke me lé bitelé.” 
«Kehe icehi ana e hegi ne ten wo Abérama pie: “Mepie time lé uce piténede Moosé me lépwo péroféta, ke time lé o uce piténede pace apulie celi e mulie cemwo mu ha amele!”» 
