GEN 1:1 Pues entonces tama ucajyesnibꞌir tunor lo que ayan, Cadiosir uche tunor ut e qꞌuin y tunor or e rum.
GEN 1:2 Y matucꞌa uwirnar xeꞌ chequer tama tunor or e rum, jax taca que ayan inteꞌ nuxi jaꞌ xeꞌ intam xeꞌ war umaqui tunor or e rum y quetpa incsibꞌan tunor, y Unawalir e Dios war anumuy tujor e jaꞌ era.
GEN 1:3 Entonces ojron e Dios y che: “Que chectac e janchꞌaquenar”, che e Dios. Y wacchetaca checta e janchꞌaquenar.
GEN 1:4 Pues e Dios uwira que galan e janchꞌaquenar y ixin uxere tama e incsibꞌaner.
GEN 1:5 Y tama e janchꞌaquenar uturbꞌa ucꞌabꞌa “día”, y tama e incsibꞌaner uturbꞌa ucꞌabꞌa “acbꞌar”. Y tamar era checta e bꞌajxan acbꞌar este que sacojpa. Y bꞌan cocha era cꞌapa e bꞌajxan día.
GEN 1:6 Y de allí ojron e Dios y che: “Que chectac inteꞌ nuxi uwamir tuaꞌ uxere e nuxi jaꞌ lo que ayan tujor e rum tacar e nuxi jaꞌ lo que achꞌuwan tichan tama e icꞌar”, che e Dios. Y bꞌan numuy.
GEN 1:7 Pues e Dios uche inteꞌ nuxi uwamir tuaꞌ uxere tunor e sian jaꞌ lo que ayan. Ayan e jaꞌ xeꞌ quetpa yebꞌar uwamir, y ayan e jaꞌ xeꞌ quetpa tujor uwamir.
GEN 1:8 Pues e Dios uturbꞌa ucꞌabꞌa e nuxi jaꞌ xeꞌ aquetpa tujor e nuxi uwamir que jax “ut e qꞌuin”. Y tamar era ayan e acbꞌar y ayan e sacojpar tama e chateꞌ día.
GEN 1:9 Entonces che e Dios: “Que umorojsic ubꞌa e jaꞌ lo que ayan yebꞌar ut e qꞌuin tama intera taca lugar tuaꞌ achecta e lugar xeꞌ taquin”, che e Dios. Y bꞌan numuy.
GEN 1:10 Pues tama e lugar xeꞌ taquin e Dios uturbꞌa ucꞌabꞌa “rum”, y e jaꞌ lo que e Dios cay umorojse uturbꞌa ucꞌabꞌa “e nuxi jaꞌ”. Y conda cꞌapa uche tunor era, e Dios tzay uwira que imbꞌutz tunor lo que uche
GEN 1:11 y che: “Que chectac meyra sian teꞌ tama inteꞌ inteꞌ clase tama tunor or e rum, y que chectac uyarumir e car xeꞌ uyari ut, y que chectac e sian teꞌ xeꞌ axin acꞌawanobꞌ”, che e Dios. Y bꞌan numuy.
GEN 1:12 Y tamar era checta meyra sian teꞌ tama inteꞌ inteꞌ clase, y checta uyarumir e car xeꞌ uyari ut, y checta e sian teꞌ xeꞌ ayutiriobꞌ. Y conda cꞌapa uche tunor era, e Dios tzay uwira que imbꞌutz tunor lo que uche.
GEN 1:13 Y tamar era ayan e acbꞌar y ayan e sacojpar tama e uxteꞌ día.
GEN 1:14 Entonces ojron e Dios y che: “Que chectac cora sian janchꞌaquenar tama ut e qꞌuin tuaꞌ ujanchꞌacnes or e rum tuaꞌ uxere e día tama e acbꞌar, y que axin uchecsu que ayan inteꞌ inteꞌ día, y que ayan ucajyesnibꞌir y ucꞌapesnibꞌir inteꞌ inteꞌ año,
GEN 1:15 y que quetpac ucꞌampibꞌir e janchꞌaquenar era xeꞌ turu tut e qꞌuin tuaꞌ ujanchꞌacnes or e rum”, che e Dios. Y bꞌan numuy.
GEN 1:16 Entonces e Dios uche chateꞌ janchꞌaquenar. Uche inteꞌ janchꞌaquenar xeꞌ nojta tuaꞌ ujanchꞌacnes e día, y uche otronteꞌ janchꞌaquenar xeꞌ más chuchuꞌ tuaꞌ ujanchꞌacnes e acbꞌar. Y uche e sian lucero lo que ayan tut e qꞌuin ubꞌan.
GEN 1:17 Pues e Dios uturbꞌa tunor e janchꞌaquenar era tut e qꞌuin tuaꞌ ujanchꞌacnes tunor or e rum,
GEN 1:18 y uturbꞌa e qꞌuin tuaꞌ acꞌotori tama e día y uturbꞌa e luna tuaꞌ acꞌotori tama e acbꞌar. Y e Dios ucꞌampes tunor era tuaꞌ uxere e janchꞌaquenar tama e incsibꞌaner. Y conda cꞌapa uche tunor era e Dios tzay uwira que imbꞌutz tunor lo que uche.
GEN 1:19 Pues ayan e acbꞌar y ayan e sacojpar tama e cuatro día. Pues tama e día era e Dios cꞌapa uche tunor lo que ubꞌijnu uche tama e cuatro día.
GEN 1:20 Entonces ojron e Dios otronyajr y che: “Que chectac meyra sian animalobꞌ tama inteꞌ inteꞌ clase tama e jaꞌ, y que chectac e sian mut xeꞌ atobꞌoyobꞌ cora cora tama e icꞌar tut e qꞌuin”, che e Dios. Y bꞌan numuy.
GEN 1:21 Entonces e Dios uche meyra nuquir animalobꞌ xeꞌ anujxiobꞌ axin macuir e nuxi jaꞌ, y uche tunor e sian animalobꞌ xeꞌ aturuanobꞌ macuir e jaꞌ, y uche tunor e sian mut ubꞌan. Y e Dios tzay uwira que imbꞌutz tunor lo que uche era.
GEN 1:22 Entonces e Dios cay uchojbꞌes ut tunor e sian animalobꞌ y che: “Chꞌijrsenicobꞌ tunor e sian animalobꞌ xeꞌ aturuanobꞌ tama e jaꞌ tuaꞌ axin ubꞌutꞌiobꞌ tunor e nuxi jaꞌ, y que ayanic meyra sian mut tara tor e rum”, che e Dios.
GEN 1:23 Y tamar era ayan e acbꞌar y ayan e sacojpar tama e cinco día.
GEN 1:24 Entonces e Dios ojron otronyajr y che: “Que chectac meyra sian animalobꞌ y aracꞌobꞌ tama inteꞌ inteꞌ clase tama tunor or e rum, y que chectac e sian animalobꞌ xeꞌ uquejruꞌ ubꞌobꞌ tor e rum”, che e Dios. Y bꞌan numuy.
GEN 1:25 Pues conda cꞌapa uche tunor e sian animalobꞌ era y tunor e sian aracꞌobꞌ y tunor e animalobꞌ xeꞌ uquejruꞌ ubꞌobꞌ tor e rum, e Dios tzay uwira que imbꞌutz tunor lo que uche.
GEN 1:26 Entonces e Dios ojron otronyajr y che: “Cachic e winic tuaꞌ aquetpa bꞌan cocha cawirnar, y cawajcꞌuic tuaꞌ acꞌotori tujor tunor e sian chay, y tujor tunor e sian mut, y tujor tunor e aracꞌobꞌ, y cawajcꞌuic tuaꞌ acꞌotori tujor tunor e animalobꞌ, y tujor tunor e animalobꞌ xeꞌ uquejruꞌ ubꞌobꞌ tor e rum”, che e Dios.
GEN 1:27 Pues conda e Dios uche e winic, uche tuaꞌ aquetpa bꞌan cocha uwirnar jaxir. Y uche inteꞌ winic y uche inteꞌ ixic.
GEN 1:28 Y de allí e Dios uyajcꞌu uchojbꞌesiaj e winic y e ixic y che: “Chꞌijrsenic meyra maxtac este que axin abꞌutcꞌa tunor or e rum, y cꞌotorienic tujor tunor lo que ayan tara tor e rum ubꞌan, y cꞌotorienic tujor tunor e sian chay, y tujor tunor e sian mut, y tujor tunor e sian animalobꞌ xeꞌ uquejruꞌ ubꞌobꞌ tor e rum”, che e Dios.
GEN 1:29 Y nacpat era e Dios sutpa ojron otronyajr y che: “Ubꞌinic, nen cꞌani inwajcꞌox tunor e sian car lo que ayan tara tor e rum xeꞌ uyari ut, y tunor e sian teꞌ xeꞌ uyajcꞌu uyutir tuaꞌ icꞌuxi y tuaꞌ imaqꞌui.
GEN 1:30 Pero cꞌani inwajcꞌu e cꞌopot tuaꞌ ucꞌuxiobꞌ tunor e animalobꞌ xeꞌ aturuanobꞌ tama e cꞌopot. Y bꞌan tuaꞌ inwajcꞌu e animalobꞌ xeꞌ uquejruꞌ ubꞌobꞌ tor e rum y tunor e sian mut tuaꞌ ucꞌuxiobꞌ ubꞌan”, che e Dios. Y bꞌan numuy.
GEN 1:31 Y conda cꞌapa uche tunor era e Dios tzay uwira que imbꞌutz ixto tunor lo que uche. Pues ayan e acbꞌar y ayan e sacojpar tama e seis día.
GEN 2:1 Pues entonces bꞌan cocha era cꞌapa chempa tunor ut e qꞌuin y tunor or e rum y tunor lo que ayan tamar.
GEN 2:2 Y nacpat era e Dios ubꞌijnu tuaꞌ ajiri tama e siete día cocha cꞌapa uche tunor lo que cay ubꞌijnu uche.
GEN 2:3 Y de allí e Dios uchojbꞌes ut e siete día y uchecsu que jax inteꞌ día xeꞌ erach, porque jax tama e día era conda jiri tama tunor upatnar lo que cay ubꞌijnu uche tama ucajyesnibꞌir tunor era.
GEN 2:4 Pues jax era e checsuyaj tamar cocha chena tunor ut e qꞌuin y tunor or e rum. Pues conda Cawinquirar Dios uche tunor ut e qꞌuin y tunor or e rum,
GEN 2:5 ma ani tucꞌa e teꞌ y nien mato tucꞌa uyarumir e cꞌopot umen que Cawinquirar Dios merato uche acꞌaxi e jajar tor e rum, y mato majchi war apatna tamar.
GEN 2:6 Pero ayan e jaꞌ xeꞌ tꞌabꞌay tichan xeꞌ sutpa wechcꞌa tujor e rum tuaꞌ utzꞌayi tunor e sian teꞌ.
GEN 2:7 Entonces Cawinquirar Dios umori imbꞌijc utanlumir e rum y uche inteꞌ winic, y de allí uyujta tama uniꞌ tuaꞌ uyajcꞌu ucuxtar, y bꞌan cocha era turuan e bꞌajxan winic.
GEN 2:8 Y Cawinquirar Dios upaqꞌui meyra sian teꞌ tama inteꞌ lugar tiaꞌ atobꞌoy watar e qꞌuin y uturbꞌa ucꞌabꞌa Edén. Pues jax tama e Edén era tiaꞌ aquetpa tuaꞌ aturuan e winic xeꞌ chena umen e Dios.
GEN 2:9 Y Cawinquirar Dios uche aꞌchꞌi meyra sian teꞌ tama inteꞌ inteꞌ clase xeꞌ galan uwirnarobꞌ y xeꞌ uyajcꞌu uyutir y xeꞌ intzaj tuaꞌ acꞌujxa. Y tujam e sian teꞌ era e Dios uwabꞌu inteꞌ teꞌ xeꞌ uyubꞌi uyajcꞌu e cuxtar xeꞌ machi tuaꞌ acꞌapa tin e ucꞌuxi, y uwabꞌu otronteꞌ teꞌ xeꞌ uche aquetpa chequer tut tin e ucꞌuxi tin xeꞌ erach y tin xeꞌ mabꞌambꞌan.
GEN 2:10 Pues jax tama e Edén era tiaꞌ alocꞌoy inteꞌ xucur xeꞌ axin utzꞌayi tunor e sian teꞌ tama e lugar era, y de allí uxere ubꞌa tama cuatro nuquir xucur.
GEN 2:11 E bꞌajxan xucur ucꞌabꞌa Pisón xeꞌ ucꞌocchi ubꞌa axin tama tunor or e lugar xeꞌ ucꞌabꞌa Havilá tiaꞌ ayan e oro.
GEN 2:12 Y galan uwirnar e oro tama e lugar era, y ayan e ujtzꞌubꞌ xeꞌ galan ojtzꞌun ubꞌan, y ayan e tun xeꞌ cꞌancꞌan ut.
GEN 2:13 Y ayan otronteꞌ xucur xeꞌ ucꞌabꞌa Guihón xeꞌ ucꞌocchi ubꞌa anumuy tama tunor e lugar xeꞌ ucꞌabꞌa Cus.
GEN 2:14 Y ayan otronteꞌ xucur xeꞌ ucꞌabꞌa Tigris xeꞌ anumuy tama e lado tiaꞌ atobꞌoy watar e qꞌuin tama e Asiria. Y ayan intex xucur xeꞌ ucꞌabꞌa Éufrates.
GEN 2:15 Y Cawinquirar Dios uturbꞌa e winic tama e lugar Edén tuaꞌ apatna tamar y tuaꞌ ucojco.
GEN 2:16 Entonces Cawinquirar Dios uyare e winic y che: “Erer acꞌuxi tunor uyutirobꞌ e teꞌ lo que ayan tama tunor e lugar era.
GEN 2:17 Pero machi tuaꞌ acꞌuxi uyutir e teꞌ xeꞌ uche aquetpa chequer tut tin e ucꞌuxi tin xeꞌ erach y tin xeꞌ mabꞌambꞌan, porque tama e día conda acꞌuxi uyutir e teꞌ era iꞌxin ichamay”, che e Dios.
GEN 2:18 Y nacpat era Cawinquirar Dios sutpa ojron otronyajr y che: “Majax utꞌojrir tuaꞌ aquetpa ubꞌajner e winic. Cꞌani inche inteꞌ ajtacarsiaj xeꞌ tuaꞌ aquetpa tuyejtzꞌer y xeꞌ tuaꞌ atzay eꞌrna umener”, che e Dios.
GEN 2:19 Entonces Cawinquirar Dios cay umori cora rum y uche tunor e sian arac y tunor e sian ajcꞌopot animalobꞌ y tunor e sian mut. Y uqꞌueche ixin tunor era tut e winic tuaꞌ uturbꞌa ucꞌabꞌobꞌ tunor e animalobꞌ y tunor e aracꞌobꞌ.
GEN 2:20 Entonces e winic uche bꞌan cocha arobꞌna umen e Dios y uturbꞌa ucꞌabꞌa inteꞌ inteꞌ arac, y inteꞌ inteꞌ mut xeꞌ atobꞌoy axin tut e qꞌuin, y uturbꞌa ucꞌabꞌa inteꞌ inteꞌ animal. Y bꞌan cocha turbꞌana ucꞌabꞌobꞌ umen e winic y bꞌan aquetpa esto coner. Pero e winic matucꞌa upiar xeꞌ uyubꞌi aquetpa tuyejtzꞌer xeꞌ tuaꞌ aquetpa uyajtacarsiaj y xeꞌ tuaꞌ atzay eꞌrna umener.
GEN 2:21 Entonces Cawinquirar Dios uche wayan meyra e winic, y de allí upasi uwerir tuaꞌ ulocse inteꞌ ut uchejchec, y entonces umaqui uwerir otronyajr y uyustes tuaꞌ aquetpa bꞌan cocha turu ani.
GEN 2:22 Y taca ut uchejchec e winic e Dios uche inteꞌ ixic. Y de allí Cawinquirar Dios uqꞌueche ixin tut e winic tuaꞌ aquetpa tuyejtzꞌer.
GEN 2:23 Y conda e winic uwira e ixic tzay meyra y che: “E ixic era aquetpa bꞌan cocha nen cocha loqꞌuesna tama niwerir y chena tama nibꞌaquer. Cꞌani aquetpa ucꞌabꞌa ‘ixic’ cocha loqꞌuesna tama e winic”, che e Adán.
GEN 2:24 Y tamar era inteꞌ winic ucꞌani tuaꞌ uyacta utuꞌ y utata tuaꞌ axin uchꞌami uwixcar, y conda axin uchꞌami ubꞌobꞌ chatertiobꞌ era axin aquetpobꞌ intera.
GEN 2:25 Pues e winic war aquetpa pispis y bꞌan ubꞌan uwixcar, pero machi war asubꞌajra uwira ubꞌobꞌ cocha merato oꞌchoy e mabꞌambꞌanir tara tor e rum.
GEN 3:1 Pues entonces conda Cawinquirar Dios uche tunor e sian animal ayan inteꞌ xeꞌ más ayan ubꞌijnusiaj que tunor e inmojr animalobꞌ xeꞌ jax e chan. Y tama e día era e Satanás uche ojron e chan. Y ayan inyajr conda cꞌotoy e chan tut e ixic y uyubꞌi tuaꞌ y che: —¿O erach canic que e Dios uyareox que ma erer icꞌuxi uyutir tunor e teꞌ lo que ayan tiaꞌ turon tara? che e chan.
GEN 3:2 Y sutpa ojron e ixic y che: —Uyubꞌi ixto cacꞌuxi uyutir tuqꞌuic tuqꞌuic teꞌ.
GEN 3:3 Pero uyutir e teꞌ xeꞌ war tuyuxin e sian teꞌ era uyareon e Dios que machi tuaꞌ cacꞌuxi y nien machi tuaꞌ capijchꞌi, porque jay caxin capijchꞌi caxin cachamay, che e ixic.
GEN 3:4 Entonces ojron e chan otronyajr y che: —Majresiaj. Mix chamicox jay icꞌuxi uyutir e teꞌ era.
GEN 3:5 Pues e Dios warix unata que jay ixixin icꞌuxi uyutir e teꞌ era que nox cꞌani ixeron y axin aquetpa chequer tiut tin xeꞌ erach y tin xeꞌ mabꞌambꞌan, y tamar era nox cꞌani ixcꞌotoy ixquetpa bꞌan cocha e Dios, che e chan.
GEN 3:6 Entonces e ixic tzay uchꞌami e ojroner lo que arobꞌna umen e chan. Y uwira que inchiꞌ uyutir e teꞌ y que galan uwirnar, y tamar era cay ubꞌijnu que galan ani tuaꞌ ucꞌuxi y que galan ani tuaꞌ uchꞌami meyra e natanyaj bꞌan cocha aquetpa tuaꞌ uchꞌami jay ucꞌuxi ani, y tamar era uyuxi ingojr uyutir e teꞌ y ucꞌuxi, y nacpat era uyajcꞌu unoxibꞌ y jaxir tzay ucꞌuxi ubꞌan.
GEN 3:7 Y tama e hora yajaꞌ wechcꞌa unacꞌutobꞌ y cay uwirobꞌ que pispis turobꞌ y tamar era cay subꞌajrobꞌ y cay ujuxiobꞌ uyopor e teꞌ xeꞌ ucꞌabꞌa higuera tuaꞌ umaqui ubꞌobꞌ tamar.
GEN 3:8 Y conda war amaxian e winic y e ixic cay uyubꞌiobꞌ que war axana Cawinquirar Dios tujam e sian teꞌ, y tamar era locꞌoy ajniobꞌ y mucuanobꞌ tupat e sian teꞌ.
GEN 3:9 Entonces Cawinquirar Dios upejca e winic y uyubꞌi tuaꞌ y che: —¿Tiaꞌ turet? che e Dios.
GEN 3:10 Y ojron e winic y che: —Umbꞌi que war ixana tujam e sian teꞌ y bꞌacten umen que pispis turen y tamar era war inmucuan, che e winic.
GEN 3:11 Entonces e Dios uyubꞌi tuaꞌ e winic otronyajr y che: —¿Chi uyaret que pispis turet? O ¿acꞌuxi ca uyutir e teꞌ lo que inwaret que machi ani tuaꞌ acꞌuxi? che e Dios.
GEN 3:12 Y sutpa ojron e winic otronyajr y che: —E ixic xeꞌ net awajqꞌuen xeꞌ quetpa ani tuaꞌ utacren jax xeꞌ ixin uyajqꞌuen uyutir e teꞌ era, y nen incꞌuxi, che e winic.
GEN 3:13 Entonces Cawinquirar Dios uyubꞌi tuaꞌ e ixic y che: —¿Tucꞌa tuaꞌ que ache cocha era? che Cawinquirar Dios. Y che e ixic: —Pues jax e chan xeꞌ umajresen, y tamar era incꞌuxi uyutir e teꞌ xeꞌ machi ani tuaꞌ incꞌuxi, che e ixic.
GEN 3:14 Entonces Cawinquirar Dios uyare e chan y che: —Pues cocha cꞌapa ache cocha era, net tuaꞌ iquetpa más bꞌaxbꞌiret que tunor e sian animalobꞌ lo que ayan. Pues coner era y ejcꞌar ejcꞌar net tuaꞌ ixana tut anac y aquetpa tuaꞌ taca aquejruꞌ abꞌa iꞌxin tor e rum, y tanlum taca tuaꞌ amaqꞌui.
GEN 3:15 Y cꞌani inche tuaꞌ ixqꞌuijna iwira ibꞌa taca e ixic inyajrer, y bꞌan taca tuaꞌ aquetpa achꞌajnarir taca uchꞌajnarir e ixic ubꞌan. Y incojt sitz tuaꞌ e ixic era tuaꞌ axin upachꞌi ajor, y net tuaꞌ iꞌxin acꞌuxi e sitz era tusuy uyoc, che e Dios.
GEN 3:16 Y de allí e Dios uyare e ixic y che: —Cꞌani inche abꞌoro meyra acꞌuxner conda iꞌxin ichꞌijrtesian, y taca meyra cꞌuxner tuaꞌ icuxma. Pero net tuaꞌ oꞌsre icꞌotori tujor anoxibꞌ pero jax jaxir xeꞌ tuaꞌ acꞌotori tajor, che Cawinquirar Dios uyare e ixic.
GEN 3:17 Y nacpat era sutpa ojron taca e winic y che: —Pues cocha ubꞌianet tut awixcar y acꞌuxi uyutir e teꞌ lo que inwaret ani tuaꞌ machi acꞌuxi, coner tunor or e rum cꞌani aquetpa yebꞌar e bꞌax umen que machi ubꞌianet tut lo que inwaret. Y tamar era net ucꞌani tuaꞌ ipatna meyra tuaꞌ achecta lo que tuaꞌ iweꞌ tama tunor acuxtar tara tor e rum.
GEN 3:18 Y cꞌani achecta meyra sian tꞌix tama e rum y cꞌani acꞌuxi e sian car lo que axin acuxpa tacꞌopot.
GEN 3:19 Y ucꞌani tuaꞌ ipatna meyra este que axin abꞌurchi ut ajor tuaꞌ uyubꞌiet iweꞌ este que acꞌotoy e día tuaꞌ isutpa iquetpa rum otronyajr. Pues cocha rumet ani, ucꞌani tuaꞌ isutpa iquetpa rum otronyajr conda iꞌxin ichamay, che e Dios.
GEN 3:20 Pues e winic uturbꞌa ucꞌabꞌa uwixcar Eva. Y jaxir quetpa tubꞌir tuaꞌ tunor e gente xeꞌ aturuanobꞌ tama tunor or e rum.
GEN 3:21 Y Cawinquirar Dios uche cora bꞌujc taca uqꞌuewerir e animalobꞌ y uyajcꞌu e winic y uwixcar tuaꞌ ubꞌujcse ubꞌobꞌ tamar.
GEN 3:22 Y che e Dios: “Coner e winic cꞌotoy quetpa bꞌan cocha non. Pues cꞌotoy quetpa chequer tutobꞌ tin xeꞌ erach y tin xeꞌ mabꞌambꞌan. Pero majax utꞌojrir tuaꞌ aturuan bꞌan taca tama e mabꞌambꞌanir, y bꞌan ani tuaꞌ uche jay axin ucꞌuxi uyutir e teꞌ xeꞌ uyajcꞌu e cuxtar xeꞌ machi tuaꞌ acꞌapa”, che e Dios.
GEN 3:23 Y tamar era Cawinquirar Dios ulocse e winic tama e lugar Edén era, y uyare tuaꞌ apatna tama e rum xeꞌ uche xeꞌ aquetpa najtir tut e Edén.
GEN 3:24 Y nacpat que Cawinquirar Dios ulocse e winic tama e lugar Edén, uturbꞌa cora angelobꞌ tama e ocher tiaꞌ atobꞌoy watar e qꞌuin xeꞌ qꞌuecher inteꞌ inteꞌ machit umenerobꞌ xeꞌ tzꞌajbꞌesbꞌir y xeꞌ war asutrema tama tunor uyejtzꞌer e Edén. Y bꞌan aquetpa tuaꞌ uchiobꞌ tuaꞌ uquete uwabꞌu tin tin xeꞌ cꞌani ani oꞌchoy ucꞌuxiobꞌ uyutir e teꞌ xeꞌ uyajcꞌu e cuxtar xeꞌ machi tuaꞌ acꞌapa.
GEN 4:1 Pues entonces e Adán ixin uchꞌami ubꞌobꞌ taca uwixcar xeꞌ jax e Eva. Y jaxir quetpa wawan y cuxpa uyaxar sitz y uturbꞌa ucꞌabꞌa Caín y che: “Inchꞌami niwar era taca utacarsiaj Niwinquirar Dios”, che e Eva.
GEN 4:2 Y nacpat era cuxpa otronteꞌ uyar xeꞌ jax uwijtzꞌin e Caín y uturbꞌa ucꞌabꞌa Abel. Y conda e Abel cꞌapa chꞌi cay utꞌoxi cora oveja, y e Caín cay patna tama e rum.
GEN 4:3 Pues e Caín cay pacma y conda turix e cosecha cay ubꞌijnu tuaꞌ utares inteꞌ ofrenda tama e cosecha era tuaꞌ uyajcꞌu Cawinquirar Dios.
GEN 4:4 Y e Abel ubꞌijnu ubꞌan tuaꞌ utares inteꞌ ofrenda, y utares cora unorir oveja y uchamse y uturbꞌa e wer xeꞌ más incꞌun tujor inteꞌ altar y uputa tut e Dios. Y Cawinquirar Dios uyare e Abel que atzay uwira ut jaxir y uyofrenda,
GEN 4:5 pero Cawinquirar Dios uyare e Caín que machi atzay uwira ut jaxir y nien uyofrenda machi atzay uwira. Y wacchetaca qꞌuijna meyra e Caín este que quetpa calapir uyeroj.
GEN 4:6 Entonces Cawinquirar Dios uyare e Caín y che: “¿Tucꞌa tuaꞌ que war iqꞌuijna meyra cocha era este que war aquetpa calapir aweroj?
GEN 4:7 Pues quisinic ache lo que imbꞌutz, nen inchꞌamiet ani. Pero cocha war abꞌijnu ache lo que mabꞌambꞌan y machi war abꞌijnu ache lo que imbꞌutz, e mabꞌambꞌanir war aquetpa bꞌan ani cocha inteꞌ ajcꞌopot animal xeꞌ war ucojco tuaꞌ uchuquiet. Pero net ucꞌani tuaꞌ acojco abꞌa tuaꞌ machi ache e mabꞌambꞌanir y tuaꞌ ache lo que imbꞌutz”, che Cawinquirar Dios.
GEN 4:8 Pues tama inteꞌ día e Caín uyare uwijtzꞌin xeꞌ jax e Abel y che: “Incoꞌ xanacon”, che e Caín. Y conda cꞌotoyobꞌ tama inteꞌ choquem lugar e Caín cay uwatzꞌi uwijtzꞌin este que uchamse.
GEN 4:9 Entonces Cawinquirar Dios uchectes ubꞌa tut e Caín y cay uyubꞌi tuaꞌ y che: —¿Tiaꞌ turu awijtzꞌin Abel? che Cawinquirar Dios. Y sutpa ojron e Caín y che: —Nen machi innata. ¿O nen ca ajcojquen tuaꞌ niwijtzꞌin? che e Caín.
GEN 4:10 Y Cawinquirar Dios sutpa ojron otronyajr y che: —¿Tucꞌa tuaꞌ achamse awijtzꞌin? Pues uchꞌichꞌer awijtzꞌin xeꞌ tzꞌuna umen e rum war ucꞌajti tacaren tuaꞌ inwebꞌta watar e jatzꞌuar tajor.
GEN 4:11 Y tamar era net ucꞌani tuaꞌ iquetpa yebꞌar inteꞌ bꞌax, y ucꞌani tuaꞌ iloqꞌuesna tama e rum xeꞌ utzꞌuꞌ uchꞌichꞌer awijtzꞌin.
GEN 4:12 Y motor que net isutpa ipatna tama e rum, pero machi ixto tuaꞌ uyajqꞌuet uyutirir apatnar. Y net ucꞌani tuaꞌ aꞌjpi inteꞌ xambꞌar tic taca tama tunor or e rum, y ma tiaꞌ tuaꞌ aquetpa ingojr oꞌtot tiaꞌ tuaꞌ uyubꞌiet ijiri tama tunor acuxtar, che Cawinquirar Dios.
GEN 4:13 Entonces e Caín sutpa ojron taca Cawinquirar Dios y che: —Intran taniut e nuxi jatzꞌuar lo que war ache acꞌaxi tama nijor.
GEN 4:14 Pues war awajnesen tama e rum era tuaꞌ machi impatna más tamar, y aquetpa tuaꞌ taca inxana tama tunor or e rum, y machi ixto uyubꞌien tuaꞌ incꞌotoy toit net yaꞌ, y ma tiaꞌ uyubꞌi injiri. Y chic taca xeꞌ utajwien axin uturbꞌa ubꞌobꞌ tuaꞌ uchamsen, che e Caín.
GEN 4:15 Pero ojron Cawinquirar Dios otronyajr y che: —Pues jay ayan tin xeꞌ axin uchamset nen cꞌani inche utoyi uyeror siete veces, che Cawinquirar Dios. Y entonces Cawinquirar Dios uturbꞌa inteꞌ chequerir tama ut ujor e Caín tuaꞌ anatanwa umen tin tin xeꞌ axin utajwi que machi tuaꞌ achamesna.
GEN 4:16 Pues e Caín locꞌoy tama e lugar era tiaꞌ war oꞌjron taca Cawinquirar Dios, y ixin tuaꞌ aturuan tama e lugar Nod xeꞌ turu más bꞌatbꞌir que e Edén tiaꞌ atobꞌoy watar e qꞌuin.
GEN 4:17 Pues entonces e Caín ixin uchꞌami uwixcar xeꞌ cꞌotoy quetpa wawan tacar uyar, y uchꞌijrse uyaxar sitz y uturbꞌa ucꞌabꞌa Enoc. Pues e Caín ixin uche inteꞌ nuxi chinam y uturbꞌa ucꞌabꞌa bꞌan cocha ucꞌabꞌa uyunen xeꞌ jax e Enoc.
GEN 4:18 Pues e Enoc cꞌotoy quetpa tatabꞌir tuaꞌ e Irad, y e Irad cꞌotoy quetpa tatabꞌir tuaꞌ e Mehujael, y e Mehujael cꞌotoy quetpa tatabꞌir tuaꞌ e Metusael, y e Metusael cꞌotoy quetpa tatabꞌir tuaꞌ e Lámec.
GEN 4:19 Pues e Lámec ayan chateꞌ uwixcar, inteꞌ ucꞌabꞌa Ada y otronteꞌ ucꞌabꞌa Silá.
GEN 4:20 Pues e Ada uchꞌijrse e Jabal xeꞌ cꞌotoy quetpa bꞌajxan tuaꞌ aturuan tama inteꞌ otot xeꞌ chembꞌir taca e bꞌujc y xeꞌ utꞌoxi meyra sian wacax.
GEN 4:21 Pues e Jabal ayan inteꞌ uwijtzꞌin xeꞌ ucꞌabꞌa Jubal xeꞌ cꞌotoy quetpa bꞌajxan tuaꞌ alajbꞌa tama e arpa y tama e flauta.
GEN 4:22 Y e Silá uchꞌijrse inteꞌ uyar xeꞌ ucꞌabꞌa Tubal-caín xeꞌ cꞌotoy quetpa e bꞌajxan ajcheyaj taqꞌuin y cay uche meyra cosa tama e bronce y tama e taqꞌuin. Y de allí e Silá chꞌijrtesian otronyajr y uchꞌijrse inteꞌ ijchꞌoc xeꞌ ucꞌabꞌa Naamá xeꞌ jax uwijtan e Tubal-caín.
GEN 4:23 Pues tama inteꞌ día e Lámec cay ojron taca uwixcarobꞌ xeꞌ jax e Ada y e Silá y che: “Ubꞌinic niwojroner lo que cꞌani inwareox era, ixien inchamse inteꞌ winic umen que cay uyopruen. Pues jax taca inteꞌ chꞌom sitz xeꞌ cay uyajqꞌuen cora, pero nen inchamse.
GEN 4:24 Pues jay tin e axin ani uchamse e Caín aquetpa tuaꞌ atojya uyeror siete veces umen e Dios, entonces jay ayan tin e axin uchamsen nen ucꞌani ani tuaꞌ atojya uyeror setenta y siete veces umener”, che e Lámec.
GEN 4:25 Pues entonces e Adán sutpa uchꞌami ubꞌa taca uwixcar otronyajr y jaxir qꞌuechuan otronteꞌ uyar y uturbꞌa ucꞌabꞌa Set. Pues ojron e Eva jax taca y che: “E Dios ixin uyajqꞌuen otronteꞌ niwar tuaꞌ aquetpa tama ulugar e Abel xeꞌ chamesna umen e Caín”, che e Eva.
GEN 4:26 Pues e Set cꞌotoy uchꞌijrse inteꞌ uyunen ubꞌan y uturbꞌa ucꞌabꞌa Enós. Pues jax tama e tiempo era conda e winicobꞌ cay upejcobꞌ ucꞌabꞌa Cawinquirar Dios.
GEN 5:1 Pues jax era e checsuyaj tama uchꞌajnarir e Adán. Pues conda e Dios uche e bꞌajxan winic y e bꞌajxan ixic, uche tuaꞌ aquetpa uwirnar bꞌan cocha jaxir.
GEN 5:2 Pues uche e winic y e ixic y uchojbꞌes utobꞌ. Y tama e día conda chenobꞌ umen e Dios, ojron jaxir y che: “Cꞌani apejcnobꞌ que winicobꞌ”, che e Dios.
GEN 5:3 Pues conda e Adán war ucojco 130 año cuxpa otronteꞌ uyunen y uturbꞌa ucꞌabꞌa Set. Pues uwirnar e Set quetpa bꞌan cocha uwirnar e Adán.
GEN 5:4 Y nacpat era e Adán turuanto 800 año, y cayto uchꞌijrse cora tejromtac y cora ijchꞌoctac.
GEN 5:5 Y bꞌan cocha era e Adán turuan 930 año tama tunor ucuxtar. Y tamar ujabꞌ era chamay.
GEN 5:6 Pues conda e Set war ucojco 105 año cuxpa inteꞌ uyunen xeꞌ ucꞌabꞌa Enós.
GEN 5:7 Y nacpat era e Set turuanto 807 año, y cayto uchꞌijrse cora tejromtac y cora ijchꞌoctac.
GEN 5:8 Y bꞌan cocha era e Set turuan 912 año tama tunor ucuxtar. Y tamar ujabꞌ era chamay.
GEN 5:9 Y conda e Enós war ucojco noventa año cuxpa inteꞌ uyunen xeꞌ ucꞌabꞌa Cainán.
GEN 5:10 Y nacpat era e Enós turuanto 815 año, y cayto uchꞌijrse cora tejromtac y cora ijchꞌoctac.
GEN 5:11 Y bꞌan cocha era e Enós turuan 905 año tama tunor ucuxtar. Y tamar ujabꞌ era chamay.
GEN 5:12 Y conda e Cainán war ucojco setenta año cuxpa inteꞌ uyunen xeꞌ ucꞌabꞌa Mahalalel.
GEN 5:13 Pues nacpat era e Cainán turuanto 840 año, y cayto uchꞌijrse cora tejromtac y cora ijchꞌoctac.
GEN 5:14 Y bꞌan cocha era e Cainán turuan 910 año tama tunor ucuxtar. Y tamar ujabꞌ era chamay.
GEN 5:15 Y conda e Mahalalel war ucojco sesenta y cinco año cuxpa uyunen xeꞌ ucꞌabꞌa Jéred.
GEN 5:16 Y nacpat era e Mahalalel turuanto 830 año, y cayto uchꞌijrse cora tejromtac y cora ijchꞌoctac.
GEN 5:17 Y bꞌan cocha era e Mahalalel turuan 895 año tama tunor ucuxtar. Y tamar ujabꞌ era chamay.
GEN 5:18 Y conda e Jéred war ucojco 162 año cuxpa uyunen xeꞌ ucꞌabꞌa Enoc.
GEN 5:19 Y nacpat era e Jéred turuanto 800 año, y cayto uchꞌijrse cora tejromtac y cora ijchꞌoctac.
GEN 5:20 Y bꞌan cocha era e Jéred turuan 962 año tama tunor ucuxtar. Y tamar ujabꞌ era chamay.
GEN 5:21 Y conda e Enoc war ucojco sesenta y cinco año cuxpa uyunen xeꞌ ucꞌabꞌa Matusalén.
GEN 5:22 Pues e Enoc tzay irna umen e Dios. Y conda cꞌapa cuxpa e Matusalén, e Enoc turuanto 300 año y cayto uchꞌijrse cora tejromtac y cora ijchꞌoctac.
GEN 5:23 Y bꞌan cocha era e Enoc turuan 365 año tama tunor ucuxtar.
GEN 5:24 Pero cocha e Enoc tzay irna umen e Dios, cꞌotoy inteꞌ día que intaca satpa ut tut e gente tara tor e rum umen que e Dios intaca uqꞌueche ixin tut e qꞌuin tichan.
GEN 5:25 Y conda e Matusalén war ucojco 187 año cuxpa inteꞌ uyunen xeꞌ ucꞌabꞌa Lámec.
GEN 5:26 Pues nacpat era e Matusalén turuanto 782 año, y cayto uchꞌijrse cora tejromtac y cora ijchꞌoctac.
GEN 5:27 Y bꞌan cocha era e Matusalén turuan 969 año tama tunor ucuxtar. Y tamar ujabꞌ era chamay.
GEN 5:28 Y conda e Lámec war ucojco 182 año cuxpa inteꞌ uyunen
GEN 5:29 y uturbꞌa ucꞌabꞌa Noé xeꞌ war che “Jiriar”, y ojron y che: “Cawinquirar Dios cꞌapa ubꞌaxe or e rum y tamar era ucꞌani tuaꞌ capatna meyra tuaꞌ alocꞌoy e cosecha tamar. Pero e sitz era axin uchion cajiri”, che e Lámec.
GEN 5:30 Y nacpat que cuxpa e Noé, e Lámec turuanto 595 año, y cayto uchꞌijrse cora tejromtac y cora ijchꞌoctac.
GEN 5:31 Y bꞌan cocha era turuan e Lámec 777 año tama tunor ucuxtar. Y tamar ujabꞌ era chamay.
GEN 5:32 Y conda e Noé war ucojco 500 año cuxpa inteꞌ uyunen xeꞌ ucꞌabꞌa Sem, y nacpat era cuxpa e Cam, y de allí cuxpa e Jafet.
GEN 6:1 Pues entonces conda e gente cay bꞌoruobꞌ meyra tara tor e rum y cay cuxpobꞌ meyra ijchꞌoctacobꞌ,
GEN 6:2 ayan cora uyunenobꞌ e Dios xeꞌ cay uwirobꞌ que galanic tunor e ijchꞌoctacobꞌ era, y tamar era cay usicbꞌobꞌ tin tin xeꞌ más galanic tujamobꞌ tuaꞌ anujbꞌiobꞌ tacar.
GEN 6:3 Entonces cocha Cawinquirar Dios machi atzay uwira tunor era ojron Unawalir y che: “War incꞌoyran inwira que e gente era war uchiobꞌ meyra mabꞌambꞌanir iraj iraj, y cocha jaxirobꞌ werobꞌ taca, machi ixto tuaꞌ inwactobꞌ aturuanobꞌ meyra tiempo, ajtaca 120 año tuaꞌ aturuanobꞌ tara tor e rum”, che Unawalir e Dios.
GEN 6:4 Entonces conda umaxtacobꞌ e Dios cay uchꞌami ubꞌobꞌ taca e ijchꞌoctacobꞌ xeꞌ tuobꞌ e winicobꞌ tara tor e rum, cay cuxpobꞌ cora nuquir winicobꞌ xeꞌ achejcha uyocobꞌ. Pues jaxirobꞌ quetpobꞌ tattzbꞌirobꞌ que obꞌna atzꞌojyobꞌ meyra tama e onian tiempo.
GEN 6:5 Pero conda Cawinquirar Dios uwira que e gente tara tor e rum war uchiobꞌ meyra e mabꞌambꞌanir, y que war taca ubꞌijnuobꞌ tuaꞌ uchiobꞌ más e mabꞌambꞌanir iraj iraj,
GEN 6:6 cay ubꞌijnu que ma ani jax bueno que uche e gente xeꞌ aturuanobꞌ tara tor e rum, y cꞌuxun meyra uyalma Cawinquirar Dios conda uwira que e gente war uchiobꞌ meyra e mabꞌambꞌanir.
GEN 6:7 Y ojron Cawinquirar Dios y che: “Pues cꞌani insati tunor e gente xeꞌ inche tara tor e rum, y cꞌani insati ubꞌan tunor e aracꞌobꞌ y tunor e animalobꞌ, y tunor lo que uquejruꞌ ubꞌobꞌ tut e rum, y tunor e sian mut. Pues uchienobꞌ imbꞌijnu que ma ani jax bueno que inchiobꞌ”, che Cawinquirar Dios.
GEN 6:8 Pero ayan inteꞌ taca winic xeꞌ atzay eꞌrna umen Cawinquirar Dios xeꞌ jax inteꞌ winic xeꞌ ucꞌabꞌa Noé.
GEN 6:9 Jax era e checsuyaj tama e Noé. Pues e Noé jax inteꞌ winic xeꞌ erach y xeꞌ obꞌian tut e Dios iraj iraj y xeꞌ xana imbꞌutz taca e Dios.
GEN 6:10 Y ayan uxteꞌ uyunenobꞌ xeꞌ ucꞌabꞌobꞌ Sem y Cam y Jafet.
GEN 6:11 Pues e Dios war uwira que bꞌutꞌur tunor or e rum taca meyra mabꞌambꞌanir y que e gente war uyobꞌi ubꞌobꞌ iraj iraj,
GEN 6:12 y uwira que satpobꞌ tunor e gente y que intaca war uyusre uchiobꞌ lo que más calapir tama tunor or e rum.
GEN 6:13 Entonces e Dios uyare e Noé y che: “Pues cꞌani incꞌapes tunor e gente, porque umenerobꞌ cꞌotoy quetpa meyra cꞌuxner tama tunor or e rum. Y tamar era cꞌani insati tunor e gente y tunor lo que ayan tama tunor or e rum ubꞌan.
GEN 6:14 Entonces cꞌani inwaret tuaꞌ ache inteꞌ nuxi barco taca e teꞌ xeꞌ ayan meyra uchuꞌ xeꞌ intactac tamar. Y maca tunor e barco era taca uchuꞌ e teꞌ tama unac patir y tama unac macuir tuaꞌ machi oꞌchoy e jaꞌ tamar. Y chen meyra cuarto macuir.
GEN 6:15 Y chen e barco tuaꞌ aquetpa ubꞌijsibꞌir cocha era: que aquetpa 135 metros tama ularguir, y aquetpa veintitrés metros tama uyanchuir, y aquetpa catorce metros tama uwatar.
GEN 6:16 Y chen e barco taca uxteꞌ piso, y chen cora ventana tichan tama tunor unac e barco xeꞌ aquetpa medio metro yebꞌar ujor, y chen inteꞌ puerta tama unac.
GEN 6:17 Pues cꞌani inwebꞌta watar inteꞌ nuxi jajar xeꞌ tuaꞌ uche abꞌoro meyra sian jaꞌ este que axin umaqui tunor or e rum. Y tunor lo que ayan ucuxtar tara tor e rum cꞌani asatpa. Entonces matucꞌa tuaꞌ aquetpa xeꞌ ayan ucuxtar tama tunor or e rum.
GEN 6:18 Pero tacaret cꞌani inche inteꞌ pacto. Pues net taca tunor afamilia ucꞌani tuaꞌ ixochoy tama e barco. Entonces jax taca net taca awixcar y uxteꞌ amaxtac taca uwixcarobꞌ xeꞌ tuaꞌ ixcorpa tama e barco.
GEN 6:19 Y cꞌani inwaret tuaꞌ oꞌse tama e barco incojt utuꞌ y incojt utata tama tunor e sian animalobꞌ lo que ayan tama tunor or e rum tuaꞌ acorpobꞌ tacaret.
GEN 6:20 Y cꞌani inwebꞌta watar chateꞌ animalobꞌ tama inteꞌ inteꞌ clase. Pues watar chateꞌ mut tama inteꞌ inteꞌ clase, y watar chateꞌ arac tama inteꞌ inteꞌ clase, y watar chateꞌ animal xeꞌ uquejruꞌ ubꞌobꞌ tut e rum tama inteꞌ inteꞌ clase tuaꞌ oꞌchoyobꞌ tama e barco tacaret tuaꞌ aquetpobꞌto bꞌixir.
GEN 6:21 Y morojsenic tuqꞌuic tuqꞌuic lo que ucꞌani tuaꞌ icꞌuxi nox, y morojsenic ubꞌan tunor lo que ucꞌani tuaꞌ ucꞌuxiobꞌ e sian animalobꞌ y chꞌujbꞌanic tunor era tama e barco”, che e Dios.
GEN 6:22 Entonces e Noé ixin uche bꞌan taca cocha arobꞌna umen e Dios.
GEN 7:1 Entonces Cawinquirar Dios uyare e Noé y che: “Pues jax taca net xeꞌ erachet taniut tujam tunor e sian winicobꞌ lo que ayan tama e tiempo era, y jax taca net xeꞌ war ache bꞌan taca cocha war incꞌani nen. Y tamar era ochenic tama e barco taca amaxtac y uwixcarobꞌ.
GEN 7:2 Qꞌueche chic tuaꞌ axin tacaret tama e barco siete utata y siete utuꞌ tama tunor e sian aracꞌobꞌ xeꞌ imbꞌutz xeꞌ uwajpi tuaꞌ ajcꞌuna tut e Dios bꞌan cocha inteꞌ ofrenda, pero qꞌueche chic incojt taca utata y incojt taca utuꞌ tama tunor e inmojr animalobꞌ xeꞌ machi uwajpi tuaꞌ ajcꞌuna e Dios.
GEN 7:3 Qꞌueche chic tacaret tama e barco ubꞌan siete pareja mut tama inteꞌ inteꞌ clase tuaꞌ machi asatpobꞌ tunor e mutobꞌ tara tor e rum.
GEN 7:4 Porque conda acꞌapa inteꞌ semana cꞌani inche acꞌaxi meyra jajar tama meyra día y meyra acbꞌar este que acꞌotoy utzꞌacse cuarenta día. Y tamar era cꞌani inxin insati tunor lo que inche xeꞌ aturuanobꞌ tama tunor or e rum”, che Cawinquirar Dios.
GEN 7:5 Entonces e Noé ixin uche tunor bꞌan taca cocha arobꞌna umen Cawinquirar Dios.
GEN 7:6 Pues e Noé war ucojco 600 año conda cay cꞌaxi e nuxi jajar era xeꞌ ubꞌutꞌi tunor or e rum taca e jaꞌ.
GEN 7:7 Entonces e Noé taca umaxtac y uwixcar y uyaribꞌobꞌ ochoyobꞌ tama e barco tuaꞌ ucorpes ubꞌobꞌ tama e nuxi jaꞌ xeꞌ cꞌanix acay ubꞌutꞌi tunor or e rum.
GEN 7:8 Entonces cay ochoyobꞌ tama e barco tunor e sian animalobꞌ xeꞌ imbꞌutz xeꞌ uwajpi tuaꞌ ajcꞌuna tut e Dios bꞌan cocha inteꞌ ofrenda, y cay ochoyobꞌ ubꞌan e animalobꞌ xeꞌ majax imbꞌutz xeꞌ machi uwajpi tuaꞌ ajcꞌuna tut e Dios. Y ochoyobꞌ e sian mut, y ochoyobꞌ e sian animal xeꞌ uquejruꞌ ubꞌobꞌ tut e rum.
GEN 7:9 Pues ochoyobꞌ tunor e animalobꞌ era tama e barco taca e Noé. Pues chateꞌ chateꞌ ochoyobꞌ, inteꞌ utata y inteꞌ utuꞌ tama inteꞌ inteꞌ clase, bꞌan taca cocha arobꞌnobꞌ tuaꞌ uchiobꞌ umen e Dios.
GEN 7:10 Y conda cꞌapa numuy e siete día era cay cꞌaxi meyra e jajar y cay bꞌutcꞌa tunor or e rum taca e sian jaꞌ.
GEN 7:11 Y tama e diecisiete día tama e chateꞌ mes tuaꞌ e año conda e Noé war ucojco 600 año, wacchetaca cay bꞌocbꞌa locꞌoy meyra sian jaꞌ lo que ayan macuir e rum, y pascꞌa e tocar tichan tut e qꞌuin y cay cꞌaxi meyra sian jajar.
GEN 7:12 Y cay cꞌaxi meyra e jajar tama tunor or e rum tama inteꞌ tiempo de cuarenta día.
GEN 7:13 Pues jax tama e día era conda cay cꞌaxi e jajar conda ochoy e Noé tama e barco tacar umaxtac xeꞌ jax e Sem y e Cam y e Jafet. Y ochoy uwixcar taca uyaribꞌobꞌ ubꞌan.
GEN 7:14 Y tacarobꞌ ochoyobꞌ tunor e sian animalobꞌ tama inteꞌ inteꞌ clase, y e aracꞌobꞌ tama inteꞌ inteꞌ clase, y e animalobꞌ tama inteꞌ inteꞌ clase xeꞌ uquejruꞌ ubꞌobꞌ tut e rum, y ochoyobꞌ ubꞌan e sian mut tama inteꞌ inteꞌ clase.
GEN 7:15 Y ochoyobꞌ tunor e sian animalobꞌ chateꞌ chateꞌ taca e Noé macuir e barco.
GEN 7:16 Y ochoy inteꞌ utata y inteꞌ utuꞌ tama inteꞌ inteꞌ clase animal, bꞌan cocha arobꞌna e Noé umen e Dios. Y nacpat era Cawinquirar Dios umaqui e puerta tama e barco.
GEN 7:17 Entonces cay cꞌaxi e jajar tama inteꞌ tiempo de cuarenta día este que tꞌabꞌay ixin e jaꞌ tichan, y cay tꞌabꞌay ixin e barco tor e rum y cay chꞌuwan tor e jaꞌ.
GEN 7:18 Pues e jaꞌ war atꞌabꞌay axin y e barco war atobꞌoy y war achꞌuwan axin cora cora tor e jaꞌ.
GEN 7:19 Y tꞌabꞌay meyra e jaꞌ este que cꞌapa umaqui tunor or e nuquir witzir lo que ayan tama tunor or e rum.
GEN 7:20 Y tꞌabꞌayto e jaꞌ siete metros más tujor tunor or e nuquir witzirobꞌ era.
GEN 7:21 Y tamar era cꞌapa chamay tunor e sian gente xeꞌ turuanobꞌ ani tama tunor or e rum, y chamayobꞌ ubꞌan tunor e sian mut, y tunor e sian aracꞌobꞌ, y tunor e sian animalobꞌ, y chamayobꞌ ubꞌan tunor e sian animalobꞌ xeꞌ uquejruꞌ ubꞌobꞌ tut e rum.
GEN 7:22 Y tamar era cꞌapa chamayobꞌ tunor lo que ayan ucuxtarobꞌ tama tunor or e rum y xeꞌ ayan ani umusicꞌobꞌ.
GEN 7:23 Pues tamar era e Dios ucꞌajpes tunor tin e turobꞌ ani tama tunor or e rum. Pues bꞌan numuy taca tunor e sian animalobꞌ y e sian aracꞌobꞌ, y tunor e sian mut, y bꞌan numuy taca tunor e sian animalobꞌ xeꞌ uquejruꞌ ubꞌobꞌ tut e rum. Cꞌapa satpobꞌ tunorobꞌ. Pues jax taca e Noé y tin e turobꞌ tacar tama e barco xeꞌ corpobꞌ.
GEN 7:24 Y quetpa bꞌutꞌur tunor or e rum taca e sian jaꞌ tama inteꞌ tiempo de 150 día.
GEN 8:1 Pues entonces e Dios sutpa ubꞌijnu tama e Noé y tama tunor e sian animalobꞌ y tama tunor e sian aracꞌobꞌ lo que ayan tama e barco taca e Noé. Y tamar era e Dios cay uche jicna numuy inteꞌ nuxi icꞌar tama tunor or e rum y e jaꞌ cay ecmay ixin.
GEN 8:2 Entonces e Dios umaqui tunor utiꞌ e jaꞌ tiaꞌ bꞌocbꞌa locꞌoy tama utamir e nuxi jaꞌ y umaqui e nuxi jaꞌ lo que chꞌur tama e tocar tut e qꞌuin ubꞌan, y tamar era quetruma e jajar tama tunor or e rum.
GEN 8:3 Y cay ecmay ixin e jaꞌ cora cora lo que war tama tunor or e rum. Y conda numuy e 150 día chequer que warix ecmay e jaꞌ.
GEN 8:4 Entonces tama e diecisiete día tama e siete mes e barco quetpa wawan tujor inteꞌ witzir tama e lugar xeꞌ ucꞌabꞌa Ararat.
GEN 8:5 Pues e jaꞌ warto ecmay axin, y tama e bꞌajxan día tama e diez mes tama e año era, cay checta ujor cora witzir xeꞌ más nojta uwatar tujam tunor e sian witzirobꞌ.
GEN 8:6 Y conda numuy otro cuarenta día, e Noé upasi e ventana lo que ayan tama e barco lo que uche,
GEN 8:7 y uyacta ixin inteꞌ oror, pero e mut era intaca chꞌuwan ixin cora cora este que utajwi inteꞌ lugar xeꞌ taquin.
GEN 8:8 Y nacpat era e Noé uyebꞌta ixin incojt sacsac mut tuaꞌ uwira jay utajwi tiaꞌ taquin or e rum.
GEN 8:9 Pero e mut era sutpa cꞌotoy tama e barco otronyajr umen que machi utajwi inteꞌ lugar tiaꞌ tuaꞌ apacuan ajiri cocha macbꞌirto tunor or e rum umen e jaꞌ. Entonces e Noé ulocse ucꞌabꞌ tama e barco y uchuqui e mut y uyose macuir e barco otronyajr.
GEN 8:10 Y de allí e Noé ucojcoto otro siete día, y entonces uyebꞌta ixin e sacsac mut otronyajr.
GEN 8:11 Y warix acbꞌare conda sutpa cꞌotoy e sacsac mut, y qꞌuecher umener inteꞌ uyopor teꞌ tama uniꞌ xeꞌ ucꞌabꞌa olivo, y tamar era e Noé cꞌotoy unata que warix ataqui e jaꞌ tor e rum.
GEN 8:12 Y de allí ucojco otro siete día y sutpa uyebꞌta ixin e sacsac mut. Pero e sacsac mut machix sutpa cꞌotoy tut e barco otronyajr.
GEN 8:13 Y conda e Noé war ucojco 601 año cꞌotoy quetpa taquin or e rum. Pues tama e bꞌajxan día tama e bꞌajxan mes e Noé upasi ujor e barco, y tamar era cꞌotoy uwira que war ataqui or e rum axin.
GEN 8:14 Pues tama e veintisiete día tama e chateꞌ mes uwira que cꞌapa taqui tunor or e rum.
GEN 8:15 Entonces e Dios uyare e Noé y che:
GEN 8:16 “Loqꞌuen tama e barco taca awixcar y oynenobꞌ y awaribꞌobꞌ.
GEN 8:17 Y locsen tunor e sian animalobꞌ y tunor e sian aracꞌobꞌ lo que ayan tacaret tama e barco. Y locsen tunor e mutobꞌ y tunor e animalobꞌ xeꞌ uquejruꞌ ubꞌobꞌ tut e rum, y tamar era erer axiobꞌ esto tama tunor or e rum tuaꞌ achꞌijrtesianobꞌ y tuaꞌ ubꞌutꞌiobꞌ tunor or e rum”, che e Dios.
GEN 8:18 Entonces e Noé y uwixcar y uyunenobꞌ y uyaribꞌobꞌ locꞌoyobꞌ tama e barco.
GEN 8:19 Y locꞌoyobꞌ ubꞌan tunor e sian aracꞌobꞌ taca upiarobꞌ, y locꞌoyobꞌ tunor e animalobꞌ taca upiarobꞌ, y locꞌoyobꞌ tunor e animalobꞌ xeꞌ uquejruꞌ ubꞌobꞌ tut e rum taca upiarobꞌ, y locꞌoyobꞌ tunor e sian mut taca upiarobꞌ.
GEN 8:20 Y nacpat era e Noé cay umorojse cora tun tuaꞌ aquetpa bꞌan cocha inteꞌ altar. Y de allí uchuqui incojt arac y incojt mut xeꞌ imbꞌutz tut e Dios tama inteꞌ inteꞌ clase, y de allí uchamse y uputa inteꞌ intiobꞌ tut Cawinquirar Dios tujor e tun xeꞌ morojsebꞌir turu umener.
GEN 8:21 Y conda cꞌotoy uyujtzner ubꞌutzꞌar tunor e aracꞌobꞌ era esto tichan, cay tzay Cawinquirar Dios cocha galan ojtzꞌun tunor era tut. Y entonces ojron Cawinquirar Dios jax taca y che: “Pues motor que e winicobꞌ war taca uchiobꞌ meyra e sian mabꞌambꞌanir iraj iraj, cocha bꞌan acay ubꞌijnuobꞌ tuaꞌ uchiobꞌ conda chꞌom maxtacobꞌto, y bꞌan taca axin uchiobꞌ iraj iraj, pero ma tiaꞌ tuaꞌ insutpa incꞌapes tunor lo que ayan tor e rum cocha cay inche era. Y ma tiaꞌ tuaꞌ insutpa incꞌapes tunor e animalobꞌ y tunor e aracꞌobꞌ otronyajr bꞌan cocha cay inche era”, che Cawinquirar Dios.
GEN 8:22 Y de allí sutpa ojron e Dios y che: “Este que axin acꞌapa or e rum era cꞌani achecta watar e pacmar y e cosecha tama utiempo. Y cꞌani achecta e calor y e sisar tama inteꞌ inteꞌ año, y cꞌani acꞌaxi e jajar y cꞌani watar e verano y e invierno, y cꞌani achecta e día y e acbꞌar iraj iraj”, che Cawinquirar Dios.
GEN 9:1 Entonces e Dios uchojbꞌes ut e Noé y uyunenobꞌ cocha era y che: “Chꞌijrtesianenic este que ayan meyra imaxtac tuaꞌ axiobꞌ aturuanobꞌ tic taca este que axin abꞌutcꞌa tunor or e rum taca e gente.
GEN 9:2 Y tunor e sian animalobꞌ lo que ayan tara tor e rum cꞌani axin abꞌactobꞌ uwirox. Y bꞌan tuaꞌ uchiobꞌ tunor e sian mut, y tunor e sian animalobꞌ xeꞌ aturuanobꞌ tacꞌopot, y tunor e sian animalobꞌ xeꞌ uquejruꞌ ubꞌobꞌ tut e rum, y tunor e sian chay.
GEN 9:3 Pues era war inwareox que erer icꞌuxi tuqꞌuic tuqꞌuic animal lo que icꞌani. Y bꞌan cocha cay inwareox que erer icꞌuxi tuqꞌuic tuqꞌuic car ixnix, y era war inwareox que erer icꞌuxi tunor e animalobꞌ.
GEN 9:4 Pero uwerir inteꞌ chamen animal xeꞌ ayanto uchꞌichꞌer tamar machi tuaꞌ icꞌuxi, cocha ucuxtar turu tama uchꞌichꞌer.
GEN 9:5 Y cꞌani inwareox era que inteꞌ inteꞌ winic xeꞌ axin ulocse ucuxtar uyet winiquir ucꞌani tuaꞌ achamesna. Y jay ayan inteꞌ animal xeꞌ axin ulocse ucuxtar inteꞌ winic, ucꞌani tuaꞌ achamesna ubꞌan.
GEN 9:6 “Pues e winicobꞌ chembꞌirobꞌ bꞌan cocha uwirnar e Dios, y tamar era tin e axin uchamse uyet winiquir ucꞌani tuaꞌ achamesna umen uyet winiquir ubꞌan.
GEN 9:7 Pero nox, chꞌijrsenic meyra imaxtac tuaꞌ axiobꞌ aturuanobꞌ tic taca este que axin abꞌutcꞌa tunor or e rum taca e gente”, che e Dios.
GEN 9:8 Y de allí e Dios sutpa ojron taca e Noé y umaxtacobꞌ otronyajr y che:
GEN 9:9 “Cꞌani inche inteꞌ pacto tacarox y taca tunor ichꞌajnarir,
GEN 9:10 y taca tunor e sian animalobꞌ xeꞌ turobꞌ tacarox y xeꞌ locꞌoyobꞌ tama e barco, y taca tunor e sian mut y taca tunor e sian aracꞌobꞌ xeꞌ aturuanobꞌ tama tunor or e rum.
GEN 9:11 Pues e pacto lo que cꞌani inche tacarox y xeꞌ ma tiaꞌ tuaꞌ aquetpa intiach jax era: Que ma tiaꞌ tuaꞌ insutpa incꞌapes tunor e winicobꞌ y tunor e animalobꞌ y tunor lo que ayan tara tor e rum taca e sian jajar xeꞌ axin ubꞌutꞌi tunor or e rum bꞌan cocha cay inche era.
GEN 9:12 Pues cꞌani inturbꞌa inteꞌ chequerir tama e pacto lo que war inche tacarox xeꞌ tuaꞌ aquetpa bꞌan taca tama tunor e tiempo, y bꞌan tuaꞌ aquetpa taca tunor e sian animalobꞌ ubꞌan.
GEN 9:13 Y e chequerir jax era, cꞌani inturbꞌa inteꞌ macchan tut e qꞌuin inyajr inyajr tuaꞌ aquetpa inteꞌ chequerir tama e pacto lo que war inche tacarox y taca tunor lo que ayan tara tor e rum.
GEN 9:14 Entonces conda inwebꞌta watar inteꞌ tocar tara tor e rum, y achecta inteꞌ macchan macuir e tocar
GEN 9:15 entonces axin acꞌajpa nimener que ayan inteꞌ pacto xeꞌ chembꞌir tacarox nimener y taca tunor e sian animalobꞌ, que ma tiaꞌ tuaꞌ insutpa inche acꞌaxi inteꞌ nuxi jajar xeꞌ axin ubꞌutꞌi tunor or e rum tuaꞌ ucꞌajpes tunor lo que ayan tamar.
GEN 9:16 Entonces conda achecta inteꞌ macchan macuir e tocar nen tuaꞌ inwira y cꞌani incꞌajpes e pacto xeꞌ ma tiaꞌ tuaꞌ acꞌapa lo que cay inche taca tunor e winicobꞌ y taca tunor e animalobꞌ lo que ayan tama tunor or e rum.
GEN 9:17 Pues jax era e chequerir tama e pacto lo que cꞌapa inche taca e winicobꞌ y taca tunor e sian animalobꞌ lo que ayan tara tor e rum.” Bꞌan che e Dios uyare e Noé.
GEN 9:18 Pues uyunenobꞌ e Noé xeꞌ locꞌoyobꞌ tama e barco jax era: Ayan e Sem y ayan e Cam xeꞌ quetpa tatabꞌir tuaꞌ e Canaán, y ayan e Jafet.
GEN 9:19 Pues jax era e uxteꞌ unembꞌirobꞌ tuaꞌ e Noé xeꞌ cꞌotoy quetpobꞌ tatabꞌirobꞌ tuaꞌ tunor e sian chꞌajnarirobꞌ lo que ayan tama tunor or e rum esto coner.
GEN 9:20 Pues e Noé jax inteꞌ ajpatnar tama e rum y tamar era ixin upaqꞌui cora sian uva.
GEN 9:21 Y conda checta e cosecha tama e uva era cay uche cora vino. Pues tama inteꞌ día e Noé cay uyuchꞌi meyra vino este que cay caray. Y de allí cucrema chꞌan wayan macuir uyotot y quetpa pispis.
GEN 9:22 Conda e Cam uwira que pispis utata, locꞌoy patir y uchecsu tunor era tut usacunobꞌ.
GEN 9:23 Y tamar era e Sem y e Jafet uchꞌamiobꞌ inteꞌ bꞌujc y uxichꞌiobꞌ tupatobꞌ y pacaxpatiobꞌ ochoyobꞌ y machi uwirobꞌ ut utatobꞌ y uyactobꞌ ojri e bꞌujc era tama ujor utatobꞌ tuaꞌ aquetpa macar.
GEN 9:24 Pero conda sutpa bꞌixcꞌa e Noé tama ucarer cꞌotoy unata lo que chena tacar xeꞌ calapir umen e Cam xeꞌ jax e cumix sitz tuaꞌ.
GEN 9:25 Y tamar era e Noé qꞌuijna meyra y uyare e Canaán cocha era y che: “¡Quetpac bꞌaxbꞌir inyajrer uyunen e Cam xeꞌ jax e Canaán! ¡Jaxir tuaꞌ aquetpa inteꞌ man xeꞌ mambꞌir inyajrer tut usacunobꞌ!” che e Noé.
GEN 9:26 Y wacchetaca sutpa ojron otronyajr e Noé y che: “Que Niwinquirar Dios uchojbꞌesic ut e Sem, y que e Canaán quetpac inteꞌ man xeꞌ mambꞌir inyajrer tut jaxir.
GEN 9:27 Que e Dios uchic tuaꞌ abꞌoro meyra tunor e rum lo que ayan tuaꞌ e Jafet, y que aturuan tujam uchꞌajnarir e Sem taca e jiriar, y que uchꞌajnarir e Canaán quetpac manobꞌ tuaꞌ”, che e Noé.
GEN 9:28 Pues conda cꞌapa numuy tunor e nuxi jajar, e Noé turuanto 350 año.
GEN 9:29 Y bꞌan cocha era chamay e Noé conda cꞌotoy ucojco 950 año.
GEN 10:1 Pues jax era uchꞌajnarir e Sem y e Cam y e Jafet xeꞌ jax uyunenobꞌ e Noé. Pues conda cꞌapa numuy tunor e nuxi jajar, uyunenobꞌ e Noé cꞌotoy quetpobꞌ tatabꞌirobꞌ tuaꞌ meyra maxtacobꞌ.
GEN 10:2 Pues umaxtacobꞌ e Jafet jax era: Ayan e Gómer y e Magog y e Madai y e Javán y e Tubal y e Mésec y e Tirás.
GEN 10:3 Y uyunenobꞌ e Gómer jax era: Ayan e Asquenaz y e Rifat y e Togarmá.
GEN 10:4 Y umaxtacobꞌ e Javán jax era: Ayan e Elisá y e Tarsis y e Quitim y e Rodanim.
GEN 10:5 Pues uchꞌajnarir e Jafet cay bꞌoro ixin esto que cꞌotoy turuanobꞌ tic taca tama utiꞌ e nuxi jaꞌ, y uchꞌajnarirobꞌ cꞌotoy turuanobꞌ tama inteꞌ inteꞌ chinam tiaꞌ cay ojronobꞌ tama inteꞌ inteꞌ uyojronerobꞌach.
GEN 10:6 Pues uchꞌajnarirobꞌ e Cam jax era: Ayan e Cus y e Misraim y e Fut y e Canaán.
GEN 10:7 Pues jax era uchꞌajnarirobꞌ e Cus: Ayan e Sebá y e Havilá y e Sabtá y e Raamá y e Sabtecá. Y uchꞌajnarirobꞌ e Raamá jax era: Ayan e Sebá y e Dedán.
GEN 10:8 Y e Cus cꞌotoy quetpa tatabꞌir tuaꞌ e Nimrod xeꞌ jax e bꞌajxan winic xeꞌ cꞌotoy uchꞌami meyra uqꞌuecꞌojsiaj tujam tunor e winicobꞌ tara tor e rum.
GEN 10:9 Pues taca utacarsiaj Cawinquirar Dios e Nimrod cꞌotoy quetpa inteꞌ nuxi ajcorom. Y tamar era checta inteꞌ ojroner xeꞌ chena tamar tin e obꞌna acorma y che: “Net tacarnet umen Cawinquirar Dios tuaꞌ uyubꞌiet icorma y tamar era war iquetpa bꞌan cocha e Nimrod”, che e ojroner era.
GEN 10:10 Y e Nimrod cꞌotoy quetpa inteꞌ nuxi ajcꞌotorer y cꞌotori tama e chinam Babel y tama e chinam Érec y tama e chinam Acad y tama e chinam Calné xeꞌ quetpobꞌ tama e lugar Sinar.
GEN 10:11 Y de allí e Nimrod locꞌoy tama e lugar era y ixin esto tama e lugar Asur y uche e chinam Nínive y e chinam Rehobot-ir y e chinam Quélah.
GEN 10:12 Y uche e nuxi chinam Resen xeꞌ quetpa tuyuxin e chinam Nínive y tuyuxin e chinam Quélah.
GEN 10:13 Y e Misraim cꞌotoy quetpa tatabꞌir tuaꞌ tin e tuaꞌ uchꞌajnarir e Lud, y quetpa tatabꞌir tuaꞌ tin e tuaꞌ uchꞌajnarir e Anam, y quetpa tatabꞌir tuaꞌ tin e tuaꞌ uchꞌajnarir e Lehab, y quetpa tatabꞌir tuaꞌ tin e tuaꞌ uchꞌajnarir e Neftu.
GEN 10:14 Y quetpa tatabꞌir tuaꞌ tin e tuaꞌ uchꞌajnarir e Patrus, y quetpa tatabꞌir tuaꞌ tin e tuaꞌ uchꞌajnarir e Caslu, y quetpa tatabꞌir tuaꞌ tin e tuaꞌ uchꞌajnarir e Caftor xeꞌ quetpa tatabꞌir tuaꞌ tin e tuaꞌ uchꞌajnarir e Filisti.
GEN 10:15 Y e Canaán cꞌotoy quetpa tatabꞌir tuaꞌ e Sidón xeꞌ jax e yaxar sitz, y conda numuy cora tiempo cꞌotoy quetpa tatabꞌir tuaꞌ e Het ubꞌan.
GEN 10:16 Y e Canaán cꞌotoy quetpa tatabꞌir tuaꞌ tin e tuaꞌ uchꞌajnarir e Jebús y tin e tuaꞌ uchꞌajnarir e Emor, y tin e tuaꞌ e Gerges.
GEN 10:17 Y e Canaán cꞌotoy quetpa tatabꞌir tuaꞌ tin e turuan tama e lugar Hermón, y quetpa tatabꞌir tuaꞌ tin e turobꞌ tama e lugar Arqué, y quetpa tatabꞌir tuaꞌ tin e turobꞌ tama e lugar Sin.
GEN 10:18 Y cꞌotoy quetpa tatabꞌir ubꞌan tuaꞌ tin e tuaꞌ uchꞌajnarir e Arvad, y quetpa tatabꞌir tuaꞌ tin e tuaꞌ uchꞌajnarir e Semar, y quetpa tatabꞌir tuaꞌ tin e tuaꞌ uchꞌajnarir e Hamat, y quetpa tatabꞌir tuaꞌ tunor tin e tuaꞌ uchꞌajnarir e Canaán. Pues conda numuy e tiempo tunor uchꞌajnarirobꞌ e Canaán cay uxere ubꞌobꞌ y ixiobꞌ tic taca tama tunor or e lugar.
GEN 10:19 Y e lugar tuaꞌ e gente era bꞌoro ixin esto tama e chinam Sidón y ixin esto tama e chinam Guerar. Y bꞌoro ixin e lugar tuobꞌ esto tama e chinam Gaza y esto tama e chinam Sodoma y e chinam Gomorra y bꞌoro ixin e lugar tuobꞌ esto tama e chinam Admá y tama e chinam Seboím, y bꞌoro ixin esto tama e chinam Lesa.
GEN 10:20 Pues tunor era jax uchꞌajnarir e Cam y umaxtacobꞌ xeꞌ ixiobꞌ tic taca y ayan uyojronerobꞌach tiaꞌ cꞌotoyobꞌ y inteꞌ intiobꞌ ayan urumobꞌ y ayan uchinamobꞌ.
GEN 10:21 Y e Sem, xeꞌ jax usacun e Jafet, cꞌotoy quetpa tata viejobꞌir tuaꞌ e Héber xeꞌ jax tiaꞌ locꞌoy e ojroner hebreo.
GEN 10:22 Pues uyunenobꞌ e Sem jax era: Ayan e Elam y e Asur y e Arfaxad y e Lud y e Aram.
GEN 10:23 Y uyunenobꞌ e Aram jax era: Ayan e Us y e Hul y e Guéter y e Mas.
GEN 10:24 Y e Arfaxad cꞌotoy quetpa tatabꞌir tuaꞌ e Sélah, y e Sélah cꞌotoy quetpa tatabꞌir tuaꞌ e Héber.
GEN 10:25 Y de allí e Héber qꞌuechuan chateꞌ umaxtacobꞌ: Ucꞌabꞌa e yaxar sitz Péleg xeꞌ war che “Xerbꞌir”, cocha jax tama e tiempo era conda cay uxere ubꞌobꞌ e gente tuaꞌ axiobꞌ tic taca tama tunor or e rum. Y ayan uwijtzꞌin e Péleg xeꞌ ucꞌabꞌa Joctán.
GEN 10:26 Y e Joctán cꞌotoy quetpa tatabꞌir tuaꞌ meyra maxtacobꞌ xeꞌ jax e Almodad y e Sélef y e Hasar-mávet y e Jérah
GEN 10:27 y e Hadoram y e Uzal y e Diclá.
GEN 10:28 Y ayan e Obal y e Abimael y e Sebá
GEN 10:29 y e Ofir y e Havilá y e Jobab. Pues tunor e gente era jax umaxtacobꞌ e Joctán.
GEN 10:30 Y tunorobꞌ ixiobꞌ najt najt este que turuanobꞌ tama meyra lugar. Y ayan tin e cꞌotoyobꞌ esto tama e lugar Mesá xeꞌ aquetpa tama e lado tiaꞌ anamtzꞌa axin e qꞌuin, y ayan tin e cꞌotoyobꞌ esto tama e lugar Sefar xeꞌ aquetpa tama e lugar tiaꞌ ayan meyra witzir tama e lado tiaꞌ atobꞌoy watar e qꞌuin.
GEN 10:31 Pues jax era uchꞌajnarir e Sem. Y umaxtacobꞌ ixiobꞌ tic taca y cꞌotoy quetpobꞌ inteꞌ inteꞌ grupo gente xeꞌ ayan inteꞌ inteꞌ uyojronerobꞌach, y ayan urumobꞌ tiaꞌ cꞌotoyobꞌ, y ayan uchinamobꞌ inteꞌ inteꞌ grupo era.
GEN 10:32 Pues tunor era jax uchꞌajnarir uyunenobꞌ e Noé y lo que numuy tacarobꞌ y cocha cꞌotoy quetpobꞌ intiach inteꞌ inteꞌ grupo tama uchꞌajnarir. Pues tunor e grupo gente era ixin uchiobꞌ meyra nuquir chinamobꞌ tama tunor or e rum. Pues numuy tunor era conda cꞌapa chꞌancabꞌa tunor e nuxi jajar lo que cay cꞌaxi xeꞌ ubꞌutꞌi tunor or e rum tama utiempo e Noé.
GEN 11:1 Pues entonces tama e onian tiempo tunor e gente xeꞌ turuanobꞌ tama tunor or e rum ojronobꞌ ani tama inteꞌ taca ojroner.
GEN 11:2 Y conda locꞌoyobꞌ tama e lugar tiaꞌ turobꞌ ani, ixiobꞌ esto tama e lado tiaꞌ atobꞌoy watar e qꞌuin. Y yajaꞌ utajwiobꞌ inteꞌ nuxi lugar xeꞌ cꞌatar xeꞌ turu tama e lugar Sinar. Y yajaꞌ taca quetpobꞌ tunor e gente tuaꞌ aturuanobꞌ.
GEN 11:3 Pues tama inteꞌ día cay ojronobꞌ inteꞌ intiobꞌ y chenobꞌ: “Incuic cachic meyra ladrillo taca e pacbꞌir rum y capojpic tuaꞌ aqꞌuecꞌo”, chenobꞌ. Pues ucꞌampesobꞌ e pacbꞌir rum tuaꞌ uchiobꞌ inteꞌ otot cocha matucꞌa e tun tama e lugar era, y cay ucꞌampesobꞌ e chꞌabꞌi xeꞌ alocꞌoy macuir e rum xeꞌ incsibꞌan ut y xeꞌ intactac ut tuaꞌ ucachiobꞌ e pacbꞌir rum tamar, cocha bꞌan uchiobꞌ e ajcheyaj ototobꞌ tama e lugar yajaꞌ.
GEN 11:4 Y nacpat era tunor e winicobꞌ cay ojronobꞌ otronyajr y chenobꞌ: “Cachicobꞌ inteꞌ nuxi chinam y cachicobꞌ inteꞌ nuxi torre xeꞌ tuaꞌ acꞌotoy esto tut e tocar tichan. Y tamar era machi tuaꞌ caxere cabꞌa tuaꞌ caxin caturuan tic taca tama tunor or e rum, y aquetpa que non axin catajttzꞌa meyra umen e tunor gente umen que cache e nuxi torre era”, chenobꞌ e winicobꞌ.
GEN 11:5 Pero Cawinquirar Dios cay uwira e chinam y e nuxi torre xeꞌ ucꞌabꞌa Babel xeꞌ war achena umen e winicobꞌ tama e tiempo yajaꞌ.
GEN 11:6 Y e Dios cay ubꞌijnu y che: “Pues iran cocha war aturuanobꞌ tunor e gente tama inteꞌ taca chinam y que war oꞌjronobꞌ tama inteꞌ taca ojroner. Pues tamar era cay ubꞌijnuobꞌ tuaꞌ uchiobꞌ e patnar era. Y cay ubꞌijnuobꞌ que matucꞌa intran tutobꞌ tuaꞌ uchiobꞌ.
GEN 11:7 Pues más ani bueno tuaꞌ quecmay cache aquetpa intiach uyojronerobꞌ inteꞌ intiobꞌ tuaꞌ machi uyubꞌi ubꞌobꞌ conda upejca ubꞌobꞌ”, che e Dios.
GEN 11:8 Y bꞌan uche Cawinquirar Dios. Y tamar era e winicobꞌ uyactobꞌ tuaꞌ uchiobꞌ e nuxi torre lo que war ani uchiobꞌ tama e lugar Sinar, cocha quetpa nutꞌur utobꞌ umen que mamajchi uyubꞌi upejca ubꞌobꞌ. Entonces cay uxere ubꞌobꞌ tuaꞌ axin aturuanobꞌ tic taca tama tunor or e rum.
GEN 11:9 Y tamar era turbꞌana ucꞌabꞌa e lugar Babel xeꞌ war che “Nutꞌur utobꞌ” umen que jax e lugar tiaꞌ Cawinquirar Dios uche aquetpa intiach uyojronerobꞌ tunor e gente. Y tamar era tunor e gente quetpobꞌ xerbꞌirobꞌ umen e Dios y ixiobꞌ tuaꞌ aturuanobꞌ tic taca tama tunor or e rum.
GEN 11:10 Pues jax era uchꞌajnarir e Sem. Pues tama e chateꞌ año conda numuy e nuxi jajar, e Sem war ucojco 100 año, y tamar ujabꞌ era cuxpa inteꞌ uyunen xeꞌ ucꞌabꞌa Arfaxad.
GEN 11:11 Y nacpat que uchꞌijrse e Arfaxad, e Sem turuanto 500 año y tama e tiempo era cayto uchꞌijrse cora tejromtac y cora ijchꞌoctac.
GEN 11:12 Y conda e Arfaxad war ucojco treinta y cinco año cuxpa uyunen xeꞌ ucꞌabꞌa Sélah.
GEN 11:13 Y nacpat era e Arfaxad turuanto 403 año y tama e tiempo era cayto uchꞌijrse cora tejromtac y cora ijchꞌoctac.
GEN 11:14 Pues conda e Sélah war ucojco treinta año cuxpa inteꞌ uyunen xeꞌ ucꞌabꞌa Héber.
GEN 11:15 Y nacpat era e Sélah turuanto 403 año y tama e tiempo era cayto uchꞌijrse cora tejromtac y cora ijchꞌoctac.
GEN 11:16 Y conda e Héber war ucojco treinta y cuatro año cuxpa inteꞌ uyunen xeꞌ ucꞌabꞌa Péleg.
GEN 11:17 Y nacpat era e Héber turuanto 430 año y tama e tiempo era cayto uchꞌijrse cora tejromtac y cora ijchꞌoctac.
GEN 11:18 Y conda e Péleg war ucojco treinta año cuxpa inteꞌ uyunen xeꞌ ucꞌabꞌa Reú.
GEN 11:19 Y nacpat era e Péleg turuanto 209 año y tama e tiempo era cayto uchꞌijrse cora tejromtac y cora ijchꞌoctac.
GEN 11:20 Y conda e Reú war ucojco treinta y dos año cuxpa inteꞌ uyunen xeꞌ ucꞌabꞌa Serug.
GEN 11:21 Y nacpat era e Reú turuanto 207 año y tama e tiempo era cayto uchꞌijrse cora tejromtac y cora ijchꞌoctac.
GEN 11:22 Y conda e Serug war ucojco treinta año cuxpa inteꞌ uyunen xeꞌ ucꞌabꞌa Nahor.
GEN 11:23 Y nacpat era e Serug turuanto 200 año y tama e tiempo era cayto uchꞌijrse cora tejromtac y cora ijchꞌoctac.
GEN 11:24 Y conda e Nahor war ucojco veintinueve año cuxpa inteꞌ uyunen xeꞌ ucꞌabꞌa Térah.
GEN 11:25 Y nacpat era e Nahor turuanto 119 año y tama e tiempo era cayto uchꞌijrse cora tejromtac y cora ijchꞌoctac.
GEN 11:26 Y conda e Térah war ucojco setenta año cuxpa e yaxar unembꞌir xeꞌ jax e Abram, y de allí cuxpa uyunen Nahor, y de allí cuxpa uyunen Harán.
GEN 11:27 Pues jax era uchꞌajnarir e Térah: Ayan uyunenobꞌ xeꞌ jax e Abram y e Nahor y e Harán. Pues e Harán ayan uyunen xeꞌ ucꞌabꞌa Lot.
GEN 11:28 Pero conda turuto utata xeꞌ jax e Térah, chamay e Harán tiaꞌ cuxpa tama inteꞌ lugar xeꞌ ucꞌabꞌa Ur xeꞌ turu tama e lugar Caldea.
GEN 11:29 Pues e Abram nujbꞌi taca inteꞌ ijchꞌoc xeꞌ ucꞌabꞌa Sarai, y e Nahor nujbꞌi taca inteꞌ ijchꞌoc xeꞌ ucꞌabꞌa Milcá xeꞌ jax uwijchꞌoc e Harán xeꞌ ayan otronteꞌ uwijchꞌoc xeꞌ ucꞌabꞌa Iscá ubꞌan.
GEN 11:30 Pero e Sarai machi obꞌna achꞌijrtesian.
GEN 11:31 Entonces e Térah locꞌoy tama e lugar Ur tuaꞌ ani axin esto tama e lugar xeꞌ ucꞌabꞌa Canaán, y uqꞌueche ixin e Abram xeꞌ jax uyunen y e Lot xeꞌ sitzbꞌir tuaꞌ, y uqꞌueche ixin uyaribꞌ xeꞌ jax e Sarai ubꞌan. Pero conda cꞌotoyobꞌ esto tama inteꞌ chinam xeꞌ ucꞌabꞌa Harán, yajaꞌ taca quetpobꞌ tuaꞌ aturuanobꞌ.
GEN 11:32 Y jax taca tama e chinam era tiaꞌ chamay e Térah conda war ucojco 205 año.
GEN 12:1 Pues tama inteꞌ día Cawinquirar Dios ojron taca e Abram cocha era y che: “Actan achinam era y actan atata y atuꞌ y tunor apiarobꞌ y quiqui tama inteꞌ lugar xeꞌ cꞌani inwirset.
GEN 12:2 Pues nen cꞌani inche abꞌoro achꞌajnarir este que axin aquetpa inteꞌ nuxi chinam, y cꞌani inchojbꞌeset meyra, y cꞌani inchiet iquetpa inteꞌ nuxi winic, y cꞌani iquetpa inteꞌ nuxi chojbꞌesiaj tut tunor tin e turobꞌ tawejtzꞌer.
GEN 12:3 Y cꞌani inchojbꞌes ut tin e axin uchojbꞌesetobꞌ, y cꞌani imbꞌaxe tin e axin ubꞌaxetobꞌ ubꞌan. Y tamaret tuaꞌ aquetpobꞌ chojbꞌesbꞌirobꞌ tunor e sian chꞌajnarir lo que ayan tama tunor or e rum”, che Cawinquirar Dios uyare e Abram.
GEN 12:4 Pues nacpat era e Abram locꞌoy tama e chinam Harán bꞌan cocha arobꞌna tuaꞌ uche umen Cawinquirar Dios. Y uqꞌueche ixin e Lot ubꞌan. Pues e Abram war ucojco setenta y cinco año conda locꞌoy tama e chinam Harán.
GEN 12:5 Y uqꞌueche ixin uwixcar xeꞌ jax e Sarai y usobrino xeꞌ jax e Lot, y uqꞌueche ixin tunor lo que ayan tuaꞌ, y uqꞌueche ixin tunor umanobꞌ xeꞌ cay patna tacar tama e chinam Harán. Pues conda cꞌotoyobꞌ tama e lugar Canaán,
GEN 12:6 numuyobꞌ tama tunor or e lugar este que cꞌotoyobꞌ tama e lugar Siquem y esto tama inteꞌ lugar xeꞌ ucꞌabꞌa Moré tiaꞌ war inteꞌ nuxi chꞌoror teꞌ. Y jax e lugar era tiaꞌ aturuanobꞌ tunor tin e tariobꞌ tama uchꞌajnarir inteꞌ winic xeꞌ ucꞌabꞌa Canaán.
GEN 12:7 Y jax ubꞌan tama e lugar era tiaꞌ Cawinquirar Dios uchectes ubꞌa tut e Abram y che: “Cꞌani inwajcꞌu achꞌajnarir e lugar era”, che Cawinquirar Dios uyare e Abram. Y wacchetaca e Abram cay umorojse cora tun y upetzꞌe tuaꞌ aquetpa bꞌan cocha inteꞌ altar tiaꞌ tuaꞌ uyujtzꞌi ut Cawinquirar Dios, cocha jax e lugar era tiaꞌ e Dios cay uchectes ubꞌa tut.
GEN 12:8 Entonces e Abram taca uwixcar y e inmojr xeꞌ war axanobꞌ tacar ixiobꞌ tama e sur esto tiaꞌ ayan cora witzir xeꞌ aquetpa tuyuxin e chinam Betel y e chinam Ai xeꞌ aquetpa tama e lado tiaꞌ atobꞌoy watar e qꞌuin. Y yajaꞌ taca ujachiobꞌ cora otot xeꞌ chembꞌir taca e bꞌujc. Pues jax tama e lugar era tiaꞌ e Abram uche otronteꞌ altar tiaꞌ tuaꞌ uyujtzꞌi ut Cawinquirar Dios.
GEN 12:9 Y nacpat era e Abram uwajpi ubꞌir taca tunor tin xeꞌ war axanobꞌ tacar y ixiobꞌ imbꞌijc imbꞌijc este que cꞌotoyobꞌ tama inteꞌ choquem lugar xeꞌ ucꞌabꞌa Négueb.
GEN 12:10 Pues tama e tiempo era checta inteꞌ nuxi winar tama e lugar Canaán, y tamar era e Abram ixin taca e inmojr tuaꞌ aturuanobꞌ tama e lugar Egipto, cocha matucꞌa tuaꞌ ucꞌuxiobꞌ tama e lugar tiaꞌ turobꞌ.
GEN 12:11 Y conda warix acꞌotoyobꞌ tama e lugar Egipto, e Abram uyare Sarai y che: “Pues taniut nen jaxet inteꞌ ixic xeꞌ galan awirnar,
GEN 12:12 y conda axin uwiretobꞌ e winicobꞌ tama e lugar Egipto axin oꞌjronobꞌ cocha era y che: ‘E ixic era jax uwixcar e winic yax. Cachamsic e winic era tuaꞌ aquetpa e ixic tacaron.’ Bꞌan axin oꞌjronobꞌ e winicobꞌ xeꞌ ajlugarobꞌ Egipto.
GEN 12:13 Y tamar era cꞌani inwaret tuaꞌ awareobꞌ que net niwijtanet, y jay bꞌan aware jaxirobꞌ cꞌani axin atzay uwirenobꞌ y machi tuaꞌ uchamsenobꞌ y net intaca uqꞌuechietobꞌ iꞌxin”, che e Abram uyare e Sarai.
GEN 12:14 Pues conda cꞌotoy e Abram esto tama e lugar Egipto, irna e Sarai umen e winicobꞌ que galan uwirnar.
GEN 12:15 Y bꞌan irna umen uyajcꞌamparobꞌ e rey tama e lugar Egipto ubꞌan, y tamar era ixin uyareobꞌ e rey que galan uwirnar e ixic era xeꞌ jax e Sarai. Y de allí uqꞌuechiobꞌ ixin e Sarai esto tama uyotot e rey tuaꞌ aquetpa inteꞌ uwixcar.
GEN 12:16 Y e rey tzay uwira e Abram umen que war atzay uwira e Sarai. Y tamar era uyajcꞌu e Abram meyra oveja y meyra wacax y meyra man, y uyajcꞌu meyra chij y meyra camello ubꞌan.
GEN 12:17 Pero ayan lo que cay unumse ubꞌa e rey umen que uqꞌueche ixin e Sarai esto tama uyotot tuaꞌ aquetpa inteꞌ uwixcar. Pues Cawinquirar Dios ixin ubꞌaxe e rey y tunor tin e turobꞌ tama uyotot taca inteꞌ nuxi muaquir.
GEN 12:18 Y conda e rey cꞌotoy unata que war acꞌaxi inteꞌ nuxi muaquir tujor umen que uqꞌueche ixin e Sarai tuaꞌ aquetpa ani inteꞌ uwixcar, uyare tuaꞌ apejcna e Abram y uyare cocha era y che: “¿Tucꞌa tuaꞌ ache cocha era tacaren? Y ¿tucꞌa tuaꞌ machi awaren que jax awixcar e ixic era?
GEN 12:19 Net awaren que jax awijtan, y tamar era nen cꞌani ani inqꞌueche axin tuaꞌ aquetpa inteꞌ niwixcar. Pero coner cꞌani inwaret que qꞌuechic chic awixcar y loqꞌuen tama e lugar era”, che e rey uyare e Abram.
GEN 12:20 Y wacchetaca e rey uyare uyajcꞌamparobꞌ tuaꞌ utacriobꞌ e Abram tuaꞌ alocꞌoy tama e lugar Egipto taca uwixcar y taca tunor lo que ayan tuaꞌ.
GEN 13:1 Pues entonces conda e Abram locꞌoy tama e lugar Egipto taca uwixcar y taca tunor lo que ayan tuaꞌ, sutpa ixin esto tama inteꞌ choquem lugar xeꞌ ucꞌabꞌa Négueb. Y ixin tacar ubꞌan e Lot xeꞌ jax usobrino.
GEN 13:2 Pues e Abram ayan meyra utumin, y ayan meyra oro, y ayan meyra plata, y ayan meyra sian aracꞌobꞌ tacar.
GEN 13:3 Y cay xana imbꞌijc imbꞌijc tama tunor or e choquem lugar xeꞌ jax e Négueb este que cꞌotoy tama e chinam Betel, y de allí ixin tuaꞌ aturuan tama e lugar tiaꞌ cay turuan bꞌajxan xeꞌ aquetpa tuyuxin e chinam Betel y tuyuxin e chinam Ai.
GEN 13:4 Pues jax tama e lugar era tiaꞌ cay umorojse cora tun tuaꞌ uche e bꞌajxan altar tut Cawinquirar Dios y yajaꞌ taca cay uqꞌui tuaꞌ ucꞌajti taca e Dios.
GEN 13:5 Pues e Lot ayan meyra lo que ayan tuaꞌ ubꞌan bꞌan cocha ayan tuaꞌ e Abram, y ayan meyra oveja y meyra wacax, y ayan meyra otot xeꞌ chembꞌir taca e bꞌujc tiaꞌ tuaꞌ aquetpobꞌ tin e manobꞌ tuaꞌ.
GEN 13:6 Pero machi atzꞌacta e cꞌopot tama e lugar tiaꞌ turobꞌ tuaꞌ awiobꞌ tunor e sian aracꞌobꞌ. Y umen era machi ixto uyubꞌiobꞌ aturuanobꞌ chatertiobꞌ yajaꞌ taca
GEN 13:7 cocha e manobꞌ xeꞌ ucojcobꞌ uyaracꞌobꞌ e Abram cay ucꞌaye ubꞌobꞌ taca tin e war ucojcobꞌ uyaracꞌobꞌ e Lot. Pues tama e tiempo era ayan meyra gente xeꞌ tuobꞌ uchꞌajnarir e Canaán y ayan tin e tuobꞌ uchꞌajnarir e Pérez xeꞌ turobꞌ tama e lugar era ubꞌan.
GEN 13:8 Y tamar era cꞌotoy inteꞌ día conda e Abram uyare e Lot cocha era y che: “Pues net y nen familion y tamar era ma cocha erer aquetpa inteꞌ qꞌuecraner ticajam, y nien taca awajcojcobꞌ y nien taca niwajcojcobꞌ.
GEN 13:9 Pues ayan meyra sian lugar era tiaꞌ uyubꞌiet asajca e rum lo que más bueno toit. Y tamar era cꞌani inwaret que más ani bueno tuaꞌ ilocꞌoy innajt cora tama niwejtzꞌer. Entonces jay net cꞌani iꞌxin tama e lado tiaꞌ atobꞌoy watar e qꞌuin, nen inxin tama e lado tiaꞌ anamtzꞌa axin e qꞌuin. Pero jay net iꞌxin tama e lado tiaꞌ anamtzꞌa axin e qꞌuin, nen tuaꞌ inxin tama e lado tiaꞌ atobꞌoy watar e qꞌuin”, che e Abram uyare e Lot.
GEN 13:10 Entonces e Lot cay uchꞌujcu uwira tunor e lugar lo que ayan tuyejtzꞌer e xucur Jordán xeꞌ aquetpa tama e lado tiaꞌ atobꞌoy watar e qꞌuin y uwira e chuchuꞌ chinam xeꞌ ucꞌabꞌa Zoar, y uwira que ayan meyra jaꞌ tamar y que jax inteꞌ lugar tiaꞌ erer aꞌchꞌi meyra cosecha bꞌan ani cocha turu tama e lugar Edén tama e onian tiempo. Y uwira que yaxax tunor e lugar bꞌan cocha aquetpa tama utiꞌ e xucur tama e lugar Egipto. Pues numuy tunor era conda Cawinquirar Dios merato utijres e chinam Sodoma y e chinam Gomorra.
GEN 13:11 Entonces e Lot usajca tunor e lugar xeꞌ aquetpa tuyejtzꞌer e xucur Jordán. Pues bꞌan cocha era uxere ubꞌobꞌ e Abram taca e Lot.
GEN 13:12 Entonces e Abram quetpa tama e lugar Canaán, y e Lot y tunor tin e turobꞌ tacar ixiobꞌ esto tama e chinamobꞌ xeꞌ turobꞌ tuyejtzꞌer e xucur Jordán y cay turuanobꞌ patir cora tama e chinam Sodoma.
GEN 13:13 Pues tunor e gente tama e lugar era calapir uwirnarobꞌ umen que war uchiobꞌ meyra sian mabꞌambꞌanir xeꞌ más calapir tut Cawinquirar Dios iraj iraj.
GEN 13:14 Pues nacpat que locꞌoy e Lot tuyejtzꞌer e Abram, Cawinquirar Dios uyare e Abram cocha era y che: “Pues chꞌujcun awira tama e lugar tiaꞌ turet tama e lado tiaꞌ atobꞌoy watar e qꞌuin y tama e lado tiaꞌ anamtzꞌa axin e qꞌuin, y tama e lado yajaꞌ y tama e lado bꞌana.
GEN 13:15 Pues nen cꞌani inwajqꞌuet tunor e rum lo que war awira era, y axin aquetpa tabꞌa tama tunor e tiempo, y axin aquetpa tuaꞌ tunor achꞌajnarirobꞌ ubꞌan.
GEN 13:16 Y cꞌani inche abꞌoro meyra tunor achꞌajnarir este que axin aquetpobꞌ bꞌan cocha utanlumir e rum. Y bꞌan cocha ma tiaꞌ obꞌna atzijca ingojr ingojr ut utanlumir e rum y bꞌan tuaꞌ aquetpobꞌ achꞌajnarirobꞌ que mamajchi tuaꞌ obꞌna utziqui ubꞌan.
GEN 13:17 Achpen xanen tuaꞌ awira tunor or e lugar era lo que cꞌani inwajqꞌuet. Quiqui awira tama tunor or e rum xeꞌ aquetpa yajaꞌ y quiqui awira tunor e lugar xeꞌ aquetpa más bꞌana porque nen cꞌani inwajqꞌuet tunor e lugar era”, che Cawinquirar Dios.
GEN 13:18 Pues bꞌan cocha era e Abram ixin taca tunor tin e war aquetpobꞌ tacar tuaꞌ aturuanobꞌ tiaꞌ ayan cora chꞌoror teꞌ xeꞌ tuaꞌ inteꞌ winic xeꞌ ucꞌabꞌa Mamré xeꞌ aquetpa tuyejtzꞌer e chinam Hebrón. Y yajaꞌ taca ujachi uyotot xeꞌ chembꞌir taca e bꞌujc. Y jax tama e lugar era ubꞌan tiaꞌ cay umorojse cora tun tuaꞌ uche inteꞌ altar tiaꞌ tuaꞌ uyujtzꞌi ut Cawinquirar Dios.
GEN 14:1 Pues jax era inteꞌ ojroner tama inteꞌ tiempo conda cuatro reyobꞌ ubꞌijnuobꞌ tuaꞌ uchiobꞌ e tzꞌojyir upater cinco reyobꞌ. Y e cuatro reyobꞌ jax era: Ayan e Amrafel xeꞌ jax e rey tama e chinam Sinar, y ayan e Arioc xeꞌ jax e rey tama e chinam Elasar, y ayan e Quedorlaómer xeꞌ jax e rey tama e chinam Elam, y ayan e Tidal xeꞌ jax e rey tama e chinam Goím.
GEN 14:2 Y e cinco reyobꞌ xeꞌ quetpa tuaꞌ ucorpes ubꞌobꞌ tutobꞌ jax era: Ayan e Bera xeꞌ jax e rey tama e chinam Sodoma, y ayan e Birsá xeꞌ jax e rey tama e chinam Gomorra, y ayan e Sinab xeꞌ jax e rey tama e chinam Admá, y ayan e Seméber xeꞌ jax e rey tama e chinam Seboím, y ayan e rey tuaꞌ e chinam Bela xeꞌ arobꞌna Zoar ubꞌan.
GEN 14:3 Pues e cinco reyobꞌ era cay umorojse ubꞌobꞌ tama e lugar xeꞌ ucꞌabꞌa Sidim tiaꞌ turu e nuxi jaꞌ xeꞌ ucꞌabꞌa Mar Muerto tuaꞌ ucorpes ubꞌobꞌ upater e cuatro reyobꞌ. Pero machi ubꞌnobꞌ ucorpes ubꞌobꞌ sino que cucurnobꞌ y quetpa tuaꞌ utoyobꞌ inteꞌ nuxi impuesto tama inteꞌ inteꞌ año.
GEN 14:4 Pues e cinco reyobꞌ era quetpobꞌ yebꞌar ucꞌotorer e rey Quedorlaómer tama inteꞌ tiempo de doce año, pero conda tzꞌacta trece año e cinco reyobꞌ era cay ubꞌijnuobꞌ que machi ixto tuaꞌ utoyobꞌ e impuesto lo que quetpa ani tuaꞌ utoyobꞌ e rey Quedorlaómer tama inteꞌ inteꞌ año.
GEN 14:5 Entonces tama otronteꞌ año conda e rey Quedorlaómer warix acꞌotori catorce año ixin taca e inmojr reyobꞌ xeꞌ quetpobꞌ yebꞌar ucꞌotorer esto tama e lugar Astarot Carnaim y ucucruobꞌ tin e tuobꞌ uchꞌajnarir e Refa. Y de allí sutpa ucucruobꞌ tin e tuobꞌ uchꞌajnarirobꞌ e Zuz xeꞌ achejcha uyocobꞌ xeꞌ turobꞌ tama e lugar Ham, y ucucruobꞌ tin e tuobꞌ uchꞌajnarir e Emim xeꞌ turobꞌ tama e lugar Savé-quiriataim ubꞌan.
GEN 14:6 Y de allí cay ucucruobꞌ tin e turobꞌ tama inteꞌ lugar xeꞌ ucꞌabꞌa Seír tiaꞌ ayan meyra witzir, y uyajnes ixiobꞌ esto tama e lugar El-parán xeꞌ aquetpa tuyejtzꞌer e choquem lugar.
GEN 14:7 Y de allí e rey Quedorlaómer taca tin e turobꞌ tacar sutpa ixiobꞌ esto tama e lugar En-mispat xeꞌ arobꞌna Cadés coner. Y yajaꞌ taca cay ucucruobꞌ tunor tin e turobꞌ tama tunor e lugar tuaꞌ tin e tuobꞌ uchꞌajnarir e Amalec, y bꞌan uchiobꞌ tama tunor e lugar xeꞌ tuaꞌ tin e tuobꞌ uchꞌajnarir e Emor xeꞌ turobꞌ tama e lugar Hasesón-tamar.
GEN 14:8 Entonces e cinco reyobꞌ xeꞌ tuaꞌ e chinam Sodoma y tuaꞌ e chinam Gomorra y tuaꞌ e chinam Admá y tuaꞌ e chinam Seboím y tuaꞌ e chinam Bela (xeꞌ arobꞌna Zoar coner) taca tunor e soldadobꞌ tuobꞌ ixiobꞌ esto tama e lugar Sidim.
GEN 14:9 Y conda cꞌotoyobꞌ e cuatro reyobꞌ era cay uchiobꞌ e tzꞌojyir taca e Quedorlaómer xeꞌ rey tama e lugar Elam, y taca e Tidal xeꞌ rey tama e lugar Goím, y taca e Amrafel xeꞌ rey tama e lugar Sinar, y taca e Arioc xeꞌ rey tama e lugar Elasar, xeꞌ jax e cinco reyobꞌ.
GEN 14:10 Pues tama tunor or e lugar tama e lugar Sidim ayan meyra chꞌen tama ut e rum tiaꞌ ayan e sian chꞌabꞌi tamar xeꞌ incsibꞌan ut y xeꞌ intactac ut, y conda e rey tuaꞌ e chinam Sodoma taca cora soldadobꞌ, y e rey tuaꞌ e chinam Gomorra taca cora soldadobꞌ locꞌoy ajniobꞌ tama e lugar tiaꞌ war achempa e tzꞌojyir, ayan tin e ojriobꞌ tama inteꞌ chꞌen tiaꞌ ayan e chꞌabꞌi y quetpobꞌ cachar tamar. Y e inmojr reyobꞌ ixin ajniobꞌ tuaꞌ amucuanobꞌ tama cora bꞌiqꞌuit witzir lo que ayan tama e lugar era.
GEN 14:11 Entonces conda cꞌapa cucurnobꞌ e cinco reyobꞌ era taca tunor e soldadobꞌ xeꞌ turobꞌ tacar, e cuatro reyobꞌ uqꞌuechiobꞌ ixin tunor lo que tuaꞌ ucꞌuxiobꞌ y tunor lo que ayan xeꞌ atujri tama e chinam Sodoma y tama e chinam Gomorra. Y de allí locꞌoy ixiobꞌ tama e lugar era tuaꞌ asutpa axiobꞌ esto tama ulugarobꞌ otronyajr.
GEN 14:12 Pero cocha usobrino e Abram xeꞌ jax e Lot war aturuan tama e chinam Sodoma, jaxir taca tunor lo que ayan tuaꞌ qꞌuejcha ixin umen e reyobꞌ era ubꞌan.
GEN 14:13 Pero tujam tin e war uchiobꞌ e tzꞌojyir ayan inteꞌ winic xeꞌ locꞌoyto ajni xeꞌ ixin tuaꞌ uchecsu tunor era tut e Abram xeꞌ tuaꞌ uchꞌajnarir e Héber. Pues jaxir war aturuan tiaꞌ war inteꞌ nuxi chꞌoror teꞌ xeꞌ tuaꞌ inteꞌ winic xeꞌ ucꞌabꞌa Mamré xeꞌ tuaꞌ uchꞌajnarir e Emor. Pues e Mamré ayan chateꞌ uwijtzꞌinobꞌ xeꞌ ucꞌabꞌobꞌ Escol y Aner xeꞌ cay uchiobꞌ inteꞌ acuerdo taca e Abram tuaꞌ utacre ubꞌobꞌ jay achecta inteꞌ tzꞌojyir.
GEN 14:14 Entonces conda e Abram cꞌotoy unata que e Lot qꞌuejcha ixin umen e reyobꞌ era, achpa uqꞌueche ixin tunor e winicobꞌ xeꞌ cuxpobꞌ tama uyotot xeꞌ war apatnobꞌ tacar y xeꞌ obꞌna atzꞌojyobꞌ. Pues ayanobꞌ 318 winicobꞌ tama tunor. Entonces ixin ajniobꞌ tuaꞌ utajwiobꞌ e reyobꞌ y uyajnesobꞌ esto tama e lugar Dan.
GEN 14:15 Entonces conda acbꞌare e Abram uxere uwinicobꞌ tuaꞌ uchiobꞌ e tzꞌojyir teinxejr teinxejr, y tamar era cay ucucruobꞌ e reyobꞌ y e soldadobꞌ xeꞌ turobꞌ tacar. Entonces cay ajniobꞌ ixin e reyobꞌ taca usoldadobꞌ y e Abram ixin tupatobꞌ taca uwinicobꞌ, war achamsanobꞌ cora cora este que cꞌotoyobꞌ tama e chinam Hobá xeꞌ turu más bꞌana que e chinam Damasco.
GEN 14:16 Entonces e Abram taca e winicobꞌ xeꞌ turobꞌ tacar ulocsiobꞌ tunor lo que qꞌuecher umen e reyobꞌ era. Y bꞌan cocha era e Abram ucorpes e Lot taca tunor lo que ayan tuaꞌ, y ucorpes tunor e ixictac taca e inmojr xeꞌ qꞌuecher umen e reyobꞌ ubꞌan.
GEN 14:17 Entonces conda e Abram taca e winicobꞌ xeꞌ turobꞌ tacar cꞌapa ucucruobꞌ e rey Quedorlaómer taca e inmojr reyobꞌ xeꞌ turobꞌ tacar, y conda war asutpa axin tuaꞌ acꞌotoy tama uyotot otronyajr, locꞌoy tajwina umen e rey tuaꞌ e chinam Sodoma tama e lugar Savé xeꞌ arobꞌna “E lugar tuaꞌ e reyobꞌ” ubꞌan.
GEN 14:18 Y locꞌoy ubꞌan e Melquisedec xeꞌ jax e rey tuaꞌ e chinam Salem xeꞌ jax inteꞌ sacerdote tuaꞌ e Dios Ajtichaner. Pues jaxir uqꞌueche ixin cora pan y imbꞌijc e vino,
GEN 14:19 y cay uchojbꞌes ut e Abram y che: “Que e Dios xeꞌ Ajtichaner xeꞌ uche tunor ut e qꞌuin y tunor or e rum uchojbꞌesiquet meyra.
GEN 14:20 Catattzꞌi ucꞌabꞌa e Dios Ajtichaner xeꞌ utacret achamse tunor tin e war aqꞌuijna uwiretobꞌ”, che e Melquisedec uyare e Abram. Entonces e Abram uyajcꞌu e diezmo e Melquisedec tama tunor lo que cay ulocse tama e tzꞌojyir.
GEN 14:21 Y de allí e rey tuaꞌ e chinam Sodoma uyare e Abram cocha era y che: —Ajcꞌunen tunor e winicobꞌ y e ixictac xeꞌ qꞌuejcha ixiobꞌ tama nichinam umen e inmojr reyobꞌ xeꞌ cucurnobꞌ amener, pero tunor lo que atujri lo que alocse tuobꞌ e sian reyobꞌ era erer aquetpa tacaret, che e rey tuaꞌ e chinam Sodoma uyare e Abram.
GEN 14:22 Entonces ojron e Abram y che: —Pues unaten Niwinquirar Dios xeꞌ Ajtichaner xeꞌ uche tunor ut e qꞌuin y tunor or e rum
GEN 14:23 que matucꞌa tuaꞌ inchꞌami xeꞌ ayan tabꞌa, y machi tuaꞌ inchꞌami nien inteꞌ ut tzꞌojnoc y nien inteꞌ ut axanabꞌ tuaꞌ machi uyubꞌiet aware que jax net xeꞌ achien inquetpa tacar lo que ayan meyra tacaren.
GEN 14:24 Nen matucꞌa cꞌani inchꞌami tabꞌa. Tzꞌactix lo que ucꞌuxiobꞌ nimanobꞌ. Pero cocha e Aner y e Escol y e Mamré cay utacrenobꞌ tama e tzꞌojyir ucꞌani tuaꞌ uchꞌamiobꞌ lo que tuobꞌ, che e Abram uyare e rey tuaꞌ e chinam Sodoma.
GEN 15:1 Pues entonces nacpat era Cawinquirar Dios upejca e Abram tama inteꞌ umayjut y che: —Abram, ira ibꞌacta porque nen jax Awajcojcuen. Cꞌani inwajqꞌuet meyra atuanibꞌir, che Cawinquirar Dios.
GEN 15:2 Entonces ojron e Abram y che: —Niwinquiraret Dios, ¿tucꞌa cora ucꞌampibꞌir tuaꞌ iꞌxin awajqꞌuen inteꞌ nuxi tuanibꞌir, cocha matucꞌa nien incojt niunen? Y tamar era conda inxin inchamay tunor lo que ayan tanibꞌa axin aquetpa tuaꞌ inteꞌ niman xeꞌ ucꞌabꞌa Eliézer xeꞌ ajlugar tama e chinam Damasco.
GEN 15:3 Pero cocha merato awajqꞌuen nien incojt niunen, tunor lo que ayan tanibꞌa axin aquetpa tuaꞌ inteꞌ niman xeꞌ apatna tama niotot, che e Abram.
GEN 15:4 Entonces Cawinquirar Dios sutpa ojron otronyajr y che: —Machi. Pues majax inteꞌ aman xeꞌ tuaꞌ aquetpa ajyum tama tunor lo que ayan tabꞌa conda iꞌxin ichamay, sino que jax inteꞌ oynen xeꞌ tuaꞌ acuxpa watar e día, che Cawinquirar Dios.
GEN 15:5 Y de allí Cawinquirar Dios uqꞌueche ixin e Abram esto tupat e otot y che cocha era: —Chꞌujcun awira ut e qꞌuin. ¿Uyubꞌiet ca atziqui tunor e sian lucero lo que ayan tut e qꞌuin? Machi. Pues bꞌan tuaꞌ abꞌoro achꞌajnarir ubꞌan este que machi tuaꞌ uyubꞌiet atziqui, che Cawinquirar Dios.
GEN 15:6 Entonces e Abram ucꞌubꞌse lo que arobꞌna umen Cawinquirar Dios. Y tamar era chꞌajma umener que erach uwirnar.
GEN 15:7 Entonces ojron Cawinquirar Dios otronyajr y che: —Nen jax Awinquiraren y jax nen xeꞌ inlocset tama e lugar Ur xeꞌ turu tama e lugar Caldea tuaꞌ inwajqꞌuet e rum era xeꞌ tuaꞌ aquetpa bꞌan cocha inteꞌ herencia tabꞌa, che Cawinquirar Dios.
GEN 15:8 Entonces ojron e Abram y che: —Pero Niwinquiraret Dios, ¿cocha tuaꞌ incꞌotoy innata jay e rum era tuaꞌ axin aquetpa tanibꞌa? che e Abram.
GEN 15:9 Entonces ojron Cawinquirar Dios y che: —Tares incojt utuꞌ chꞌom wacax, y incojt chivo, y incojt utata oveja xeꞌ war ucojcobꞌ uxteꞌ año inteꞌ inteꞌ, y tares ubꞌan incojt mucuy y incojt sacsac mut xeꞌ chꞌomto, che Cawinquirar Dios.
GEN 15:10 Entonces e Abram utares tunor e aracꞌobꞌ era tut e Dios, y uchamse y utajchu y uturbꞌa intajch tama inteꞌ lado e bꞌir y intajch tama inxejr e bꞌir, pero machi utajchu e mut.
GEN 15:11 Y de allí ecmay tari cora sian usij tuaꞌ ani ucꞌuxiobꞌ e chamen aracꞌobꞌ era, pero e Abram uyajnes locꞌoyobꞌ.
GEN 15:12 Entonces conda warix anamtzꞌa axin e qꞌuin cꞌaxi inteꞌ nuxi waynij tama e Abram. Y wacchetaca cay xojyna umen inteꞌ nuxi incsibꞌaner y cay bꞌacta meyra.
GEN 15:13 Entonces Cawinquirar Dios ojron taca e Abram tama uwayac y che: —Natan ixto que achꞌajnarir cꞌani axin aquetpobꞌ tama intex lugar tiaꞌ tuaꞌ aquetpobꞌ ajnajtir gente y tiaꞌ tuaꞌ aquetpobꞌ bꞌan cocha cora man xeꞌ mambꞌir inyajrer tut e gente yajaꞌ, y que cꞌani achena unumse ubꞌobꞌ meyra tama inteꞌ tiempo de 400 año.
GEN 15:14 Pero conda anumuy e tiempo era cꞌani inwebꞌta axin inteꞌ jatzꞌuar xeꞌ tuaꞌ acꞌaxi tama ujorobꞌ e ajnajtir gente yajaꞌ xeꞌ cꞌani uche aquetpobꞌ manobꞌ tunor achꞌajnarir. Y de allí cꞌani alocꞌoyobꞌ achꞌajnarir tama e lugar yajaꞌ y inteꞌ intiobꞌ cꞌani uqꞌuechiobꞌ axin lo que meyra atujri.
GEN 15:15 Pero net ucꞌanto tuaꞌ ituruan meyra año taca e jiriar tama awalma bꞌajxan que iꞌxin ichamay, y de allí iꞌxin ijiri taca atata viejobꞌirobꞌ.
GEN 15:16 Pero conda atzꞌacta e 400 año que turobꞌ najtir, achꞌajnarirobꞌ axin asutpobꞌ esto tama e lugar era. Pues bꞌan aquetpa tuaꞌ anumuy umen que tin e turobꞌ tama uchꞌajnarir e Emor xeꞌ war aturuanobꞌ tara tama e lugar Canaán, merato acꞌapa uchiobꞌ tunor e mabꞌambꞌanir lo que aquetpa tuaꞌ inwatzꞌiobꞌ tamar, che Cawinquirar Dios uyare e Abram tama uwayac.
GEN 15:17 Entonces conda ecsijbꞌa, wacchetaca checta inteꞌ nuxi bꞌejt xeꞌ chꞌur xeꞌ war alocꞌoy meyra bꞌutz tamar, y checta cora tajteꞌ ubꞌan xeꞌ war atzꞌajbꞌa xeꞌ intaca numuy ubꞌajner tuyuxin e aracꞌobꞌ xeꞌ tajchbꞌir turobꞌ.
GEN 15:18 Pues jax e día era conda Cawinquirar Dios uche e pacto taca e Abram y che: —Pues cꞌani inwajcꞌu achꞌajnarir e rum era xeꞌ acꞌotoy esto tama e xucur lo que ayan tama utiꞌ e Egipto y acꞌotoy esto tama utiꞌ e nuxi xucur xeꞌ ucꞌabꞌa Éufrates.
GEN 15:19 Pues e lugar era jax lo que aquetpa tuaꞌ tin e ajchꞌajnarirobꞌ tuaꞌ e Quen, y tuaꞌ tin e ajchꞌajnarirobꞌ tuaꞌ e Queniz, y tuaꞌ tin e ajchꞌajnarirobꞌ tuaꞌ e Cadmo.
GEN 15:20 Y e lugar lo que war inwajqꞌuet jax lo que tuaꞌ tin e ajchꞌajnarirobꞌ tuaꞌ e Het, y tuaꞌ tin e ajchꞌajnarirobꞌ tuaꞌ e Pérez, y tuaꞌ tin e ajchꞌajnarirobꞌ tuaꞌ e Refa.
GEN 15:21 Y war inwajqꞌuet ubꞌan e lugar xeꞌ tuaꞌ tin e ajchꞌajnarirobꞌ tuaꞌ e Emor, y xeꞌ tuaꞌ tin e ajchꞌajnarirobꞌ tuaꞌ e Canaán, y xeꞌ tuaꞌ tin e ajchꞌajnarirobꞌ tuaꞌ e Gerges, y xeꞌ tuaꞌ tin e ajchꞌajnarirobꞌ tuaꞌ e Jebús.
GEN 16:1 Pues uwixcar e Abram xeꞌ jax e Sarai machi obꞌna achꞌijrtesian. Pero jaxir ayan inteꞌ uman xeꞌ ajlugar Egipto xeꞌ ucꞌabꞌa Agar.
GEN 16:2 Entonces e Sarai uyare e Abram y che: —Ubꞌin lo que cꞌani inwaret era: Cawinquirar Dios uchien tuaꞌ machi inchꞌijrseyan. Y tamar era cꞌani inwaret tuaꞌ iꞌxin achꞌami niman xeꞌ jax e Agar. Pues bꞌajcꞌat cocha era axin achecta nimaxtac tamar jaxir, che e Sarai. Pues e bꞌijnusiaj era quetpa imbꞌutz tut e Abram.
GEN 16:3 Entonces e Sarai uyare e Agar tuaꞌ aquetpa ixcarbꞌir tuaꞌ e Abram. Pues numuy tunor era conda ayix diez año desde que cꞌotoyobꞌ tama e lugar Canaán.
GEN 16:4 Entonces e Abram uchꞌami ubꞌa taca e Agar y jaxir quetpa wawan tacar uyar. Pero conda e Agar cꞌotoy unata que war ucojco uyar, cay uxejbꞌe ut e Sarai.
GEN 16:5 Entonces e Sarai uyare e Abram y che: —Pues amener taca que e Agar war uxejbꞌe niut. Pues cꞌajric amener que jax nen xeꞌ inwajqꞌuet e Agar tuaꞌ ichꞌijrtesian tacar, y era que war ucojco uyar cꞌani uche ubꞌa que más ayan ucꞌampibꞌir que nen. Que Cawinquirar Dios uchecsuic chi tujor tuaꞌ acꞌaxi e jatzꞌuar, jay tama nijor nen o jay tama ajor net, che e Sarai uyare e Abram.
GEN 16:6 Entonces ojron e Abram y che: —Tama acꞌabꞌ turu aman. Chen tacar bꞌan taca cocha net abꞌijnu ache, che e Abram. Entonces e Sarai cay ucꞌaye meyra e Agar este que locꞌoy ajni.
GEN 16:7 Pero tajwina umen e Ángel tuaꞌ Cawinquirar Dios tama e choquem lugar tiaꞌ turu ut e jaꞌ xeꞌ aquetpa tama utiꞌ e bꞌir xeꞌ axin esto tama e chinam xeꞌ ucꞌabꞌa Sur.
GEN 16:8 Entonces ojron e Ángel tuaꞌ Cawinquirar Dios y che: —Agar xeꞌ manet tuaꞌ e Sarai, ¿tiaꞌ war iyopa? Y ¿tiaꞌ war iꞌxin? che e Ángel. Entonces ojron e Agar y che: —War inlocꞌoy anjni tut e Sarai xeꞌ jax niwajyum, che e Agar.
GEN 16:9 Entonces ojron e Ángel tuaꞌ Cawinquirar Dios otronyajr y che: —Sutpen tuyejtzꞌer jaxir y ubꞌianen tut tunor lo que uyaret, che e Ángel. Y de allí sutpa ojron e Ángel otronyajr y che:
GEN 16:10 “Nen cꞌani imbꞌorojse meyra achꞌajnarir este que mamajchi tuaꞌ obꞌna utziqui.
GEN 16:11 Pues era war acojco awar y conda axin acuxpa ucꞌani tuaꞌ aturbꞌa ucꞌabꞌa Ismael xeꞌ war che que ‘E Dios uyubꞌi canuc’, cocha Cawinquirar Dios uyubꞌi tunor e tzꞌintzꞌar lo que ayan tama awalma.
GEN 16:12 Y cꞌani aquetpa uwirnar e sitz era bꞌan cocha inteꞌ chij xeꞌ ajcꞌopot, y axin uche e tzꞌojyir taca tunor e inmojr, y tunor e gente tuaꞌ asutpa uchiobꞌ e tzꞌojyir tacar jaxir ubꞌan, y cꞌani aqꞌuijna uwira ubꞌa taca tunor upiarobꞌ”, che e Ángel tuaꞌ Cawinquirar Dios uyare e Agar.
GEN 16:13 Pero cꞌotoy unata e Agar que e Ángel xeꞌ cay ojron tacar jax Cawinquirar Dios, entonces ubꞌijnu tuaꞌ uturbꞌa ucꞌabꞌa ut e jaꞌ era: “E Dios xeꞌ uwiren.” Entonces ojron y che: “Inwirix ut e Dios, pero machi chamayen.”
GEN 16:14 Y tamar era uturbꞌa ucꞌabꞌa ut e jaꞌ y che: “Ut e jaꞌ xeꞌ tuaꞌ Tin e Turu xeꞌ uwiren”. Pues ut e jaꞌ era turu tuyuxin e chinam Cadés y tuyuxin e chinam Béred.
GEN 16:15 Entonces conda cꞌotoy e día cuxpa uyar e Agar xeꞌ qꞌuechuan taca e Abram, y e Abram uturbꞌa ucꞌabꞌa Ismael.
GEN 16:16 Pues e Abram war ucojco ochenta seis año conda cuxpa e Ismael.
GEN 17:1 Pues entonces conda e Abram war ucojco noventa y nueve año, Cawinquirar Dios uchectes ubꞌa tut y che: —Nen jax e Dios xeꞌ meyra ayan nicꞌotorer. Ubꞌianen taniut iraj iraj, y turbꞌan abꞌa tuaꞌ aquetpa imbꞌutz tunor awirnar taniut iraj iraj ubꞌan.
GEN 17:2 Porque jay bꞌan ache, nen cꞌani inche inteꞌ pacto tacaret cocha era y che: Cꞌani inche abꞌoro meyra tunor achꞌajnarir, che Cawinquirar Dios uyare e Abram.
GEN 17:3 Entonces e Abram cotuan este que utacbꞌu ut ujor tut e rum, y tamar era e Dios sutpa ojron otronyajr y che:
GEN 17:4 —Pues jax era e pacto lo que cꞌani inche tacaret: Cꞌani inche tuaꞌ iquetpa tatabꞌir tuaꞌ meyra chinamobꞌ,
GEN 17:5 y machi ixto tuaꞌ ipejcna tama acꞌabꞌa Abram, sino que desde coner era ucꞌani tuaꞌ ipejcna tama intex acꞌabꞌa xeꞌ jax e Abraham, xeꞌ war che ‘Tatabꞌir tuaꞌ meyra chinamobꞌ’ cocha bꞌan tuaꞌ inche iquetpa net.
GEN 17:6 Cꞌani inche abꞌoro tunor achꞌajnarir, y tama achꞌajnarir cꞌani alocꞌoyobꞌ meyra sian reyobꞌ y meyra sian chinamobꞌ.
GEN 17:7 Pues e pacto lo que war inche tacaret y xeꞌ cꞌani inche taca tunor achꞌajnarir watar e día jax era: Que nen tuaꞌ inquetpa Adiosiren y Udiosirenobꞌ tunor achꞌajnarirobꞌ ubꞌan ejcꞌar ejcꞌar.
GEN 17:8 Pues cꞌani inwajqꞌuet y tunor achꞌajnarirobꞌ tunor e rum tama e lugar Canaán tiaꞌ turet era tuaꞌ aquetpa bꞌan cocha inteꞌ herencia tabꞌa inyajrer. Y nen tuaꞌ inquetpa Udiosirenobꞌ iraj iraj ubꞌan, che e Dios.
GEN 17:9 Y de allí e Dios sutpa ojron taca e Abraham otronyajr y che: —Pero net ucꞌani tuaꞌ iyubꞌian tut lo que aquetpa tuaꞌ ache tama nipacto era ubꞌan. Y bꞌan tuaꞌ uchiobꞌ tunor achꞌajnarirobꞌ tama tunor e tiempo xeꞌ watar.
GEN 17:10 Pues e pacto lo que war inche tacarox jax era: Que net y tunor e winicobꞌ xeꞌ turobꞌ tacaret ucꞌani tuaꞌ axujra imbꞌijc uqꞌuewerir itejromar. Bꞌan aquetpa tuaꞌ uchiobꞌ tunor achꞌajnarirobꞌ watar e tiempo ubꞌan.
GEN 17:11 Pues ucꞌani tuaꞌ ixuri imbꞌijc uqꞌuewerir itejromar tunorox, y bꞌan cocha era axin aquetpa chequer que war ixubꞌian tut e pacto lo que war inche tacarox.
GEN 17:12 Y tamar era tunor e tejromtac tama inteꞌ inteꞌ familia ucꞌani tuaꞌ axujra imbꞌijc uqꞌuewerir utejromar conda atzꞌacta ocho día que cuxpa, y bꞌan tuaꞌ achempa taca e bꞌiqꞌuit tejromtac xeꞌ acuxpa tama uyototobꞌ tin e manobꞌ xeꞌ mambꞌir inyajrer tibꞌa, y bꞌan tuaꞌ achempa conda acuxpa inteꞌ tejromtac tuaꞌ tin e ajnatir gente xeꞌ aturuanobꞌ tijam ubꞌan.
GEN 17:13 Pues ucꞌani tuaꞌ axujra imbꞌijc uqꞌuewerir utejromar tunor e tejromtac xeꞌ acuxpobꞌ tama iyototobꞌ. Pues bꞌan cocha era axin aquetpa inteꞌ chequerir tama iwerir que ayan nipacto tacarox tama tunor e tiempo.
GEN 17:14 Pero tin e machi cꞌani uyacta ubꞌa tuaꞌ axujra imbꞌijc uqꞌuewerir utejromar ucꞌani tuaꞌ aloqꞌuesna tijam nox, cocha machi cꞌani oꞌbꞌianobꞌ tut nipacto, che e Dios.
GEN 17:15 Entonces ojron e Dios taca e Abraham otronyajr y che: —Pues awixcar xeꞌ jax e Sarai machi ixto tuaꞌ apejcna tamar ucꞌabꞌa era, sino que desde coner ucꞌani tuaꞌ apejcna tama intex ucꞌabꞌa xeꞌ jax e Sara.
GEN 17:16 Y cꞌani inchojbꞌes ut y cꞌani inche tuaꞌ aquetpa awawan taca uyar. Y bꞌan cocha era cꞌani inchojbꞌes ut meyra. Y jaxir tuaꞌ aquetpa tubꞌir tuaꞌ meyra chinamobꞌ y tama uchꞌajnarir axin alocꞌoy meyra reyobꞌ xeꞌ tuaꞌ acꞌotoriobꞌ tama uchinamobꞌ, che e Dios.
GEN 17:17 Entonces e Abraham cotuan esto que utacbꞌu ut ujor tama ut e rum y cay tzene y cay ojron jax taca y che: “¿O ererto ca aquetpa tatabꞌir inteꞌ winic xeꞌ war ucojco 100 año? Y e Sara, ¿cochato tuaꞌ achꞌijrtesian cocha warix ucojco noventa año?” che e Abraham.
GEN 17:18 Entonces e Abraham uyare e Dios cocha era y che: —Quisinic awacta aturuan e Ismael taca achojbꞌesiaj, y que jax jaxir xeꞌ tuaꞌ uchꞌami tunor lo que ayan tanibꞌa conda inxin inchamay, che e Abraham uyare e Dios.
GEN 17:19 Entonces ojron e Dios y che: —Machi. Y motor que machi war acꞌubꞌse lo que war inwaret era, pero e Sara cꞌani ixto aqꞌuechuan incojt uyar, y net tuaꞌ aturbꞌa ucꞌabꞌa Isaac. Y tacar jaxir cꞌani inche inteꞌ pacto, y e pacto era cꞌani aquetpa taca uchꞌajnarir tama tunor e tiempo.
GEN 17:20 Pues tama e Ismael, nen umbꞌi lo que war acꞌani tuaꞌ anumuy tacar, y cꞌani inchojbꞌes ut este que aquetpa meyra umaxtac xeꞌ axin abꞌoro meyra uchꞌajnarir. Pues e Ismael cꞌani acꞌotoy aquetpa tatabꞌir tuaꞌ doce ajcꞌotorerobꞌ xeꞌ más nojta ucꞌampibꞌirobꞌ, y que tamar jaxir cꞌani inche aquetpa inteꞌ nuxi chinam.
GEN 17:21 Pero e pacto lo que war inche era cꞌani aquetpa tamar taca e Isaac, xeꞌ jax e sitz xeꞌ cꞌani uchꞌijrse e Sara tama inteꞌ año xeꞌ watar tama e mes xeꞌ bꞌan cocha era, che e Dios uyare e Abraham.
GEN 17:22 Pues conda e Dios cꞌapa ojron taca e Abraham, locꞌoy tama e lugar era.
GEN 17:23 Entonces tama e día era e Abraham uxuri imbꞌijc uqꞌuewerir utejromar e Ismael xeꞌ jax uyunen, y bꞌan uche ubꞌan taca tunor umanobꞌ xeꞌ cuxpobꞌ tama uyotot, y taca tunor e manobꞌ xeꞌ umani taca e tumin. Pues tunor e winicobꞌ xeꞌ turobꞌ tama uyotot y tin xeꞌ apatnobꞌ tacar quetpobꞌ xurbꞌir imbꞌijc uqꞌuewerir utejromarobꞌ, bꞌan taca cocha arobꞌna umen e Dios tuaꞌ uche.
GEN 17:24 Pues e Abraham war ucojco noventa y nueve año conda xujra imbꞌijc uqꞌuewerir utejromar,
GEN 17:25 y e Ismael xeꞌ jax uyunen war ucojco trece año conda xujra imbꞌijc uqꞌuewerir utejromar.
GEN 17:26 Pues e Abraham y e Ismael intera taca día xujra imbꞌijc uqꞌuewerir utejromarobꞌ.
GEN 17:27 Y tunor e winicobꞌ xeꞌ turobꞌ tama uyotot, y e manobꞌ xeꞌ cuxpobꞌ tama uyotot, y e manobꞌ xeꞌ mambꞌir taca e ajnajtir gente, tunorobꞌ xujra imbꞌijc uqꞌuewerir utejromarobꞌ tama e día era.
GEN 18:1 Pues tama inteꞌ día conda ayan meyra calor Cawinquirar Dios uchectes ubꞌa tut e Abraham conda war aturuan tama uyocher uyotot xeꞌ chembꞌir taca e bꞌujc. Pues numuy tunor era tama e lugar tiaꞌ war cora nuquir chꞌoror teꞌ xeꞌ tuobꞌ inteꞌ winic xeꞌ ucꞌabꞌa Mamré.
GEN 18:2 Pues lo que numuy jax era: E Abraham ujachi ujor tuaꞌ achꞌujcsan y uwira que ayan uxteꞌ winicobꞌ xeꞌ warobꞌ innajt cora. Pues chateꞌ winicobꞌ era angelobꞌ xeꞌ tariobꞌ tuaꞌ uwarajse e Abraham taca e Sara, y incojt jax Cawinquirar Dios xeꞌ cꞌotoy tuaꞌ uchectes ubꞌa tutobꞌ. Entonces e Abraham achpa wacchetaca y ajni ixin tuaꞌ upejca e winicobꞌ, y conda cꞌotoy tiaꞌ turobꞌ, cotuan tutobꞌ este que utacbꞌu ut ujor tut e rum,
GEN 18:3 y upejca inteꞌ tujamobꞌ y che: —Niwinquiret, jay itzay awiren y jay bꞌan acꞌani quisinic iquetpa tacaren.
GEN 18:4 Cꞌani inware tuaꞌ ataresna imbꞌijc e jaꞌ tuaꞌ uyubꞌiox ipoqui iyoc tamar, y de allí erer ixjiri cora yebꞌar e teꞌ era.
GEN 18:5 Y cocha cꞌotoyox tiaꞌ turen tara quisinic inwesiox tuaꞌ ixqꞌuecꞌo otronyajr tuaꞌ uyubꞌiox ixixinto tama ixambꞌar, che e Abraham uyare e uxteꞌ winicobꞌ era. Y chenobꞌ jaxirobꞌ: —Bueno pue, chenobꞌ.
GEN 18:6 Entonces e Abraham ochoy tama uyotot y uyare e Sara cocha era y che: —Chꞌama cora harina xeꞌ más imbꞌutz, y chen e pan, pero wacchetaca, che e Abraham uyare e Sara.
GEN 18:7 Entonces e Abraham ajni ixin macuir e macteꞌ tiaꞌ turobꞌ meyra wacax, y usicbꞌa incojt chꞌom xeꞌ incꞌunto uwerir, y de allí uyare cora umanobꞌ tuaꞌ uchamse y tuaꞌ uyustesobꞌ lo que tuaꞌ ucꞌuxiobꞌ e ajwarobꞌ.
GEN 18:8 Y conda turix e wiar taresna cora mantequilla xeꞌ loqꞌuesna tama e leche y e wer y e pan lo que chembꞌir umen e Sara tuaꞌ uyajcꞌu inteꞌ inteꞌ ajwarobꞌ. Y yajaꞌ taca quetpa e Abraham yebꞌar inteꞌ teꞌ tuaꞌ taca uyajcꞌu tuqꞌuic tuqꞌuic lo que ucꞌaniobꞌ e ajwarobꞌ.
GEN 18:9 Entonces conda cꞌapa wiobꞌ e ajwarobꞌ, uyubꞌiobꞌ tuaꞌ e Abraham cocha era y chenobꞌ: —¿Turu ca e Sara xeꞌ jax awixcar? chenobꞌ. Y ojron e Abraham y che: —Yajaꞌ taca turu macuir niotot, che e Abraham.
GEN 18:10 Y de allí tin e quetpa líder tujam e winicobꞌ era ojron y che: —Pues bꞌan cocha e mes era tama e año xeꞌ watar cꞌani inyopa tuaꞌ inwarajset otronyajr, y tama e día yajaꞌ cꞌani cawira que cuxpix incojt uyar e Sara, che e winic era. Pues e Sara yaꞌ war tupat e winicobꞌ tama e ocher tama e otot war uchiquini tunor lo que war arobꞌna e Abraham umen e winicobꞌ.
GEN 18:11 Pues e Abraham y e Sara ayix meyra ujabꞌobꞌ, y numuyix utiempo e Sara tuaꞌ ani uyubꞌi achꞌijrtesian.
GEN 18:12 Y wacchetaca e Sara cay tzene, y ubꞌijnu cocha era y che: “¿Cocha nic tuaꞌ inchꞌami inteꞌ nuxi tzayer tuaꞌ inchꞌijrtesian, cocha nen y ninoxibꞌ ayix meyra cajabꞌ?” che e Sara jax taca.
GEN 18:13 Pero Cawinquirar Dios sutpa uyare e Abraham cocha era y che: —¿Tucꞌa tuaꞌ war atzene e Sara? O ¿war ca ubꞌijnu que: ‘Machi ixto tuaꞌ uyubꞌien inchꞌijrtesian cocha onian ixiquen?’
GEN 18:14 Pues nen Awinquiraren Dios. Taniut matucꞌa intran tuaꞌ inche. Y cꞌani inwaret era que tama e tiempo conda war achena e pacmar tama e año xeꞌ watar cꞌani insutpa inyopa tuaꞌ inwarajset otronyajr, y que tama e día yajaꞌ e Sara cuxpix incojt uyar, che Cawinquirar Dios uyare e Abraham.
GEN 18:15 Pues conda e Sara uyubꞌi tunor era bꞌacta meyra y umuqui que cay tzene. Y tamar era ojron y che: —Nen machi war intzene, che e Sara. Pero sutpa ojron Cawinquirar Dios y che: —Ira amuqui lo que ache cocha taniut nen matucꞌa xeꞌ mucur y tamar era chequer taniut que tzenet, che Cawinquirar Dios uyare e Sara.
GEN 18:16 Entonces achpobꞌ e ajwarobꞌ y cay xanobꞌ tuaꞌ acꞌotoyobꞌ esto tama e chinam Sodoma. Y e Abraham ixin cora tacarobꞌ ubꞌan y che: “Cꞌotenic pue”, che e Abraham.
GEN 18:17 Entonces Cawinquirar Dios ojron jax taca y che: “Pues majax bueno tuaꞌ inmuqui tut e Abraham lo que cꞌani inche era,
GEN 18:18 cocha uchꞌajnarir cꞌani aquetpa inteꞌ nuxi chinam xeꞌ meyra ayan ucꞌotorer. Y jaxir tuaꞌ axin aquetpa inteꞌ nuxi chojbꞌesiaj tut tunor e sian chinamobꞌ lo que ayan tama tunor or e rum umen que war inchojbꞌes ut jaxir.
GEN 18:19 Pues nen insicbꞌa e Abraham tuaꞌ axin uchecsu tut umaxtac y tut tunor uchꞌajnarir que ucꞌani tuaꞌ oꞌbꞌianobꞌ tut tunor niwojroner y que ucꞌani tuaꞌ axin uchiobꞌ tunor lo que imbꞌutz y lo que erach. Porque jay bꞌan uche e Abraham, nen cꞌani acꞌapa inche tunor lo que cay inware que bꞌan tuaꞌ inche”, che Cawinquirar Dios jax taca.
GEN 18:20 Entonces Cawinquirar Dios uyare e Abraham cocha era y che: —Pues meyra gente war aqꞌuecranobꞌ taniut iraj iraj que tin e turobꞌ tama e chinam Sodoma y tin e turobꞌ tama e chinam Gomorra war uchiobꞌ meyra mabꞌambꞌanir y que war abꞌoro tunor era iraj iraj.
GEN 18:21 Y tamar era cꞌani inxin inwira jay erach que war achempa bꞌan cocha war achecsuna taniut iraj iraj. Porque jay majax bꞌan cocha cay umbꞌi era nen tuaꞌ acꞌotoy innata, y tamar era machi tuaꞌ insatiobꞌ, che Cawinquirar Dios uyare e Abraham.
GEN 18:22 Entonces locꞌoyobꞌ e chateꞌ ajwarobꞌ tama e lugar era y cay xanobꞌ tuaꞌ acꞌotoyobꞌ esto tama e chinam Sodoma, pero e Abraham quetpato tiaꞌ war awawan tut Cawinquirar Dios.
GEN 18:23 Y de allí e Abraham ixin más tuyejtzꞌer Cawinquirar Dios y uyubꞌi tuaꞌ y che: —¿Asati ca tunor e gente tama e chinam era motor jay ayan tin e matucꞌa war uchiobꞌ xeꞌ mabꞌambꞌan?
GEN 18:24 Porque bꞌajcꞌat ayan cincuenta gente xeꞌ imbꞌutz turobꞌ tujam tunor tin e war uchiobꞌ e sian mabꞌambꞌanir lo que war achempa tama e chinam era. Y jay bꞌan, ¿asatito ca tunor tin e turobꞌ tama e chinam era motor que ayan ani cincuenta gente xeꞌ imbꞌutz tamar?
GEN 18:25 Pues ma cocha erer asatpobꞌ tin e imbꞌutz turobꞌ taca tin e war uchiobꞌ e sian mabꞌambꞌanir, bꞌan ani cocha jay tunorobꞌ war ani uchiobꞌ e mabꞌambꞌanir era. Pues cꞌani ixto iquetpa erach conda abꞌijnu awira tucꞌa war uchiobꞌ tunor e gente tama tunor or e rum jay erach o jay mabꞌambꞌan lo que war uchiobꞌ watar e día, y entonces tara ubꞌan ucꞌani tuaꞌ iquetpa erach conda asati e chinamobꞌ era, che Abraham uyare Cawinquirar Dios.
GEN 18:26 Entonces ojron Cawinquirar Dios y che: —Pues jay erer intajwi cincuenta gente xeꞌ erach turobꞌ tama e chinam Sodoma, machi tuaꞌ insati tunor e chinam umen taca que ayan cincuenta gente xeꞌ imbꞌutz turobꞌ tamar, che Cawinquirar Dios uyare e Abraham.
GEN 18:27 Pero e Abraham sutpa ojron otronyajr y che: —Majax ani bueno tuaꞌ onjron tacaret cocha era, pero cocha net jax Niwinquiraret y nen jax taca inteꞌ winic xeꞌ imbꞌijc taca nicꞌampibꞌir, ucꞌani tuaꞌ inturbꞌa nibꞌa tuaꞌ inche.
GEN 18:28 Pues bꞌajcꞌat ayan taca cuarenta y cinco gente xeꞌ erach turobꞌ tama e chinam era, ¿asatito ca tunor e chinam umen que ucꞌanto ani cinco xeꞌ erach? che e Abraham. Entonces ojron Cawinquirar Dios otronyajr y che: —Pues jay intajwi cuarenta y cinco xeꞌ erach turobꞌ, machi tuaꞌ insati tunor e gente tama e chinam, che Cawinquirar Dios.
GEN 18:29 Entonces ojron e Abraham otronyajr y che: —Bꞌajcꞌat ayan taca cuarenta gente xeꞌ erach turobꞌ tama e chinam, che e Abraham. Y che Cawinquirar Dios: —Pues tamar e cuarenta gente era xeꞌ erach, machi tuaꞌ insati e chinam, che Cawinquirar Dios.
GEN 18:30 Pero e Abraham ojronto otronyajr taca Cawinquirar Dios y che: —Pues quisinic que machi iqꞌuijna tacaren umen que warto onjron cocha era, pero bꞌajcꞌat ayan taca treinta gente xeꞌ erach turobꞌ, che e Abraham. Y de allí ojron Cawinquirar Dios y che: —Pues jay ayan treinta gente xeꞌ erach turobꞌ, machi tuaꞌ insati e chinam, che Cawinquirar Dios.
GEN 18:31 Pero e Abraham sutpa ojron otronyajrto y che: —Niwinquiraret, pues machi incꞌani tuaꞌ aquetpa intran tunor niwojroner toit, pero ¿tucꞌa tuaꞌ anumuy jay atajwi veinte taca xeꞌ erach turobꞌ? che e Abraham. Y Cawinquirar Dios ojron y che: —Pues jay ayan taca veinte xeꞌ erach turobꞌ, machi tuaꞌ insati e chinam, che Cawinquirar Dios.
GEN 18:32 Pero e Abraham ojronto y che: —Niwinquiraret Dios, quisinic que machi iqꞌuijna tacaren, pero cꞌanto onjron tacaret otronyajrto era, y de allí machix tuaꞌ insutpa onjron más tacaret, ¿pero tucꞌa tuaꞌ ache jay iꞌxin atajwi ajrer taca diez gente xeꞌ erach turobꞌ? che e Abraham. Y che Cawinquirar Dios: —Pues motor que ayan diez taca gente xeꞌ erach turobꞌ, machi tuaꞌ insati e chinam, che Cawinquirar Dios.
GEN 18:33 Pues conda cꞌapa ojron Cawinquirar Dios taca e Abraham, locꞌoy tama e lugar era, y e Abraham sutpa ixin tama uyotot.
GEN 19:1 Pues conda war acꞌapa e día cꞌotoyobꞌ e chateꞌ angelobꞌ esto tama e chinam Sodoma. Y e Lot war aturuan tama e ocher tama e chinam war achꞌujcsan. Y conda uwira que war acꞌotoyobꞌ e chateꞌ ajxambꞌarobꞌ era achpa wacchetaca tuaꞌ upejca, y cotuan tutobꞌ esto que utacbꞌu ut ujor tut e rum bꞌan cocha e costumbre tuobꞌ,
GEN 19:2 y ojron cocha era y che: —Niwinquirox xeꞌ ajxambꞌarox, quisinic ixquetpa tacaren tuaꞌ inumse e acbꞌar tama niotot, y yaꞌ yajaꞌ erer ipoqui iyoc, y ejcꞌar asacojpa erer ixlocꞌoy ixixin, che e Lot uyare e ajxambꞌarobꞌ era. Entonces ojronobꞌ e angelobꞌ y chenobꞌ: —Machi. Non erer taca canumse e acbꞌar tama e parque, chenobꞌ.
GEN 19:3 Pero e Lot cayto uyare tuaꞌ aquetpobꞌ tama uyotot, entonces jaxirobꞌ ixiobꞌ tacar esto tama uyotot. Y conda cꞌotoyobꞌ e Lot cay uyare tin e ajpatnarobꞌ tama uyotot tuaꞌ uyustesobꞌ e wiar tuaꞌ awesenobꞌ e ajwarobꞌ, y uyareobꞌ tuaꞌ uchiobꞌ e pan xeꞌ machi atꞌabꞌay ut. Y conda turix lo que tuaꞌ ucꞌuxiobꞌ cay wiobꞌ e ajwarobꞌ.
GEN 19:4 Pero conda e ajwarobꞌ merato achꞌanobꞌ, cꞌotoyobꞌ cora sian winicobꞌ xeꞌ ajlugarobꞌ tama e chinam Sodoma era y cay uxoyjruobꞌ uyotot e Lot. Y ayan meyra sian chꞌom maxtacobꞌ y ayan meyra sian winicobꞌ xeꞌ más ayan ujabꞌobꞌ.
GEN 19:5 Y cay upejcobꞌ e Lot taca inteꞌ nuxi nuc y chenobꞌ: —¿Tiaꞌ turobꞌ e winicobꞌ xeꞌ yopobꞌ tama oꞌtot sajmi era? Locsenobꞌ patir. Non cꞌani cachꞌan tacarobꞌ, chenobꞌ e sian winicobꞌ era.
GEN 19:6 Entonces locꞌoy e Lot patir tuaꞌ ojron tacarobꞌ, y wacchetaca umaqui e puerta tuaꞌ mamajchi oꞌchoy macu.
GEN 19:7 Entonces ojron e Lot cocha era y che: —Nipiarox, ubꞌinic lo que cꞌani inwareox. Ira iche e mabꞌambꞌanir xeꞌ calapir cocha era.
GEN 19:8 Y jay warto ibꞌijnu tuaꞌ iche e mabꞌambꞌanir, nen ayan chateꞌ niwijchꞌoctac xeꞌ mato tiaꞌ uchꞌami ubꞌobꞌ taca inteꞌ winic, y jay nox icꞌani, erer inlocsiobꞌ tuaꞌ iche lo que icꞌani tacarobꞌ. Pero e winicobꞌ era ajwarobꞌ tanibꞌa, y nen aquetpa tuaꞌ incojcobꞌ. Entonces ma cocha erer inwactox iche e mabꞌambꞌanir lo que war iyusre iche, che e Lot uyare e sian winicobꞌ era.
GEN 19:9 Entonces qꞌuijnobꞌ e winicobꞌ y chenobꞌ: —Loqꞌuen tara net. ¿Tuqꞌuet cora net tuaꞌ awareon tucꞌa tuaꞌ cache? Pues net majax ajlugaret tara. Y tamar era cꞌani cachiet anumse abꞌa más meyra que e winicobꞌ yax, chenobꞌ. Y de allí cay uwatzꞌiobꞌ e Lot y cay uquerejbꞌobꞌ locꞌoy tut e puerta, y cay uyobꞌiobꞌ e puerta tuaꞌ ani uche acꞌaxi tut e rum.
GEN 19:10 Pero e winicobꞌ xeꞌ ajwarobꞌ ulocse ucꞌabꞌobꞌ patir e puerta y uquerejbꞌobꞌ ochoy e Lot macuir e otot, y de allí umaquiobꞌ e puerta.
GEN 19:11 Y wacchetaca tajpesna unacꞌutobꞌ tin e turobꞌ patir umen e angelobꞌ. Bꞌan numuy taca tunor e sian chꞌom maxtacobꞌ y tunor e inmojr winicobꞌ xeꞌ turobꞌ patir era. Y tamar era mamajchi uyubꞌi uwira tiaꞌ aquetpa e puerta.
GEN 19:12 Entonces e ajwarobꞌ cay uyubꞌiobꞌ tuaꞌ e Lot y chenobꞌ: —¿Ayan ca más familia tabꞌa tama e chinam era? ¿Ayan ca aniarobꞌ o oynenobꞌ o awijchꞌoctac o otro inmojr apiarobꞌ tama e chinam era? Pues jay ayan ucꞌani tuaꞌ aqꞌuechiobꞌ axin najtir tama e lugar era wacchetaca.
GEN 19:13 Pues non ebꞌtana tarion umen Cawinquirar Dios tuaꞌ casati e chinam era, cocha war acꞌotoy meyra qꞌuecraner tut jaxir que calapir uwirnarobꞌ tunor e gente tama e chinam era. Y umen era uyebꞌta tarion tuaꞌ casati e chinam inyajrer, chenobꞌ e angelobꞌ tut e Lot.
GEN 19:14 Entonces e Lot ixin tuaꞌ ojron taca tin e turix tuaꞌ anujbꞌiobꞌ tacar uwijchꞌoctac y uyare cocha era y che: —Achpenic y loqꞌuenic wacchetaca tama e chinam era, porque Cawinquirar Dios cꞌani usati tunor e lugar coner era, che e Lot uyare e chꞌom sitzꞌobꞌ. Pero jaxirobꞌ intaca uchebꞌiobꞌ que aras ojroner war uche e Lot.
GEN 19:15 Entonces conda war asacojpa e angelobꞌ uyareobꞌ e Lot cocha era y chenobꞌ: —Achpen wacchetaca y qꞌueche chic awixcar y awijchꞌoctac tuaꞌ machi ixchamay conda asajta e chinam era, chenobꞌ e angelobꞌ.
GEN 19:16 Pero conda irna umen e angelobꞌ que e Lot machi cꞌani alocꞌoy wacchetaca, uchuquiobꞌ ucꞌabꞌ taca uwixcar y uwijchꞌoctac y uquerejbꞌobꞌ locꞌoyobꞌ patir e chinam tuaꞌ machi achamesnobꞌ, cocha war ayajtna utobꞌ meyra umen Cawinquirar Dios.
GEN 19:17 Entonces conda yaꞌ turobꞌ patir e chinam, ojron inteꞌ ángel y che: —Jay machi cꞌani ixchamay ajnienic wacchetaca. Y ira ixsutpa ixchꞌujcsan tama ipat, y nien machi tuaꞌ ixquetpa ixwawan tama e bꞌir. Quiquic wacchetaca tama or e witzir jay machi cꞌani ixchamay, che e ángel uyare e Lot.
GEN 19:18 Entonces ojron e Lot y che: —Pues nen ma cocha erer incꞌotoy esto tiaꞌ war awaren.
GEN 19:19 Quisinic iyubꞌi lo que cꞌani inwareox era. Nox cay iche meyra tacarsiaj tacaren, y incꞌun iwirnar taniut que ixin icorpes nicuxtar, pero nen machi uyubꞌien incꞌotoy esto tor e witzir bꞌana, porque conda war inxana tor e bꞌir bꞌajcꞌat utajwien e nuxi cꞌajc lo que cꞌani acꞌaxi tama e chinam era, y entonces inxin inchamay ubꞌan.
GEN 19:20 ¿Awirix ca e chuchuꞌ chinam bꞌana? Pues machi aquetpa innajt ticoit era. Actanen tuaꞌ inxin yajaꞌ. Pues erach que chuchuꞌ taca e chinam, pero erer cacorpa jay caxin bꞌana, che e Lot uyare e ángel.
GEN 19:21 Entonces ojron e ángel y che: —Pues umbꞌix tunor awojroner y cꞌani inche bꞌan cocha awaren, y machi tuaꞌ insati e chinam lo que war awaren.
GEN 19:22 Pero quiqui wacchetaca esto tama e chinam yajaꞌ, porque nen ma erer insati e chinam tara este que icꞌotoy tama e lugar yajaꞌ, che e ángel uyare e Lot. Pues arobꞌna tama inyajr umen e Lot que chuchuꞌ e chinam yajaꞌ, y tamar era turbꞌana ucꞌabꞌa Zoar xeꞌ war che “Chuchuꞌ”.
GEN 19:23 Entonces xana ixin e Lot y conda warix atobꞌoy watar e qꞌuin, cꞌotoyobꞌ tama e chinam Zoar.
GEN 19:24 Entonces Cawinquirar Dios uyebꞌta tari e cꞌajc taca cora cꞌancꞌan tun xeꞌ ucꞌabꞌa azufre xeꞌ war apuruy y uche acꞌaxi tujor e chinam Sodoma y tujor e chinam Gomorra.
GEN 19:25 Y tamar era cꞌapa satpa e chateꞌ chinamobꞌ era taca tunor e gente xeꞌ turobꞌ ani tamar, y cꞌapa puruy tunor e cosecha y tunor e teꞌ lo que ayan ani tama e lugar.
GEN 19:26 Y uwixcar e Lot sutpa chꞌujcsan tupat tiaꞌ war axin tama e bꞌir tuaꞌ uwira tucꞌa war anumuy, y wacchetaca chamay y cꞌotoy quetpa inteꞌ nuxi tun y atzꞌam.
GEN 19:27 Pues entonces tama otronteꞌ día conda sacojpa, ixin e Abraham esto tama e lugar tiaꞌ war cora nuquir chꞌoror teꞌ xeꞌ tuaꞌ inteꞌ winic xeꞌ ucꞌabꞌa Mamré tiaꞌ cay ojron taca Cawinquirar Dios tama inyajr.
GEN 19:28 Y uchꞌujcu uwira innajt tiaꞌ turu e chinam Sodoma y e chinam Gomorra y or e witzir xeꞌ aquetpa tuyejtzꞌer, y uwira que tama tunor or e lugar era war alocꞌoy meyra sian bꞌutz bꞌan cocha atꞌabꞌay axin conda war apurutna cora sojc.
GEN 19:29 Y bꞌan cocha era e Dios usati e chateꞌ chinam era xeꞌ jax e lugar xeꞌ más galan uwirnar bꞌan cocha ubꞌijnu ani e Lot, pero cꞌajpa umen e Dios e pacto lo que cay uche taca e Abraham, y tamar era ulocse e Lot tama e lugar era bꞌajxan que usati.
GEN 19:30 Pues entonces conda cꞌapa satpa e chateꞌ chinam era, ixin e Lot esto tama e chinam Zoar, pero bꞌacta tuaꞌ aquetpa tamar. Y tamar era ixin taca uwijchꞌoctac tuaꞌ aturuanobꞌ tama inteꞌ chꞌen lo que ayan tama unac inteꞌ witzir.
GEN 19:31 Entonces tama inteꞌ día e yaxar ijchꞌoc uyare uwijtzꞌin cocha era y che: —Pues onian winiquix catata, y tama e choquem lugar era matucꞌa e winicobꞌ tuaꞌ uwironobꞌ tuaꞌ anujbꞌi ani tacaron, y ma cocha erer tuaꞌ cachꞌijrtesian tuaꞌ achecta camaxtac. Pues tunor e ijchꞌoctacobꞌ tic taca tama tunor or e rum aloqꞌuesnobꞌ umen utatobꞌ tuaꞌ eꞌrnobꞌ.
GEN 19:32 Pero nen ayan inteꞌ nibꞌijnusiaj, quisinic que cawajcꞌu uyuchꞌi e vino catata tuaꞌ cacarse. Y de allí erer cachꞌan tacar y jaxir matucꞌa tuaꞌ unata jay war cachꞌijrtesian tacar, che e yaxar ijchꞌoc.
GEN 19:33 Entonces tamar taca e acbꞌar era jaxirobꞌ uyajcꞌobꞌ uyuchꞌi e vino utatobꞌ, y de allí conda e yaxar ijchꞌoc uwira que warix acaray utata, ochoy chꞌan tacar. Pero utata matucꞌa unata tamar lo que numuy tama e acbꞌar.
GEN 19:34 Y tama otronteꞌ día conda sacojpa, e yaxar ijchꞌoc uyare uwijtzꞌin cocha era y che: —Pues acbꞌar acbꞌi nen chꞌanen taca catata. Pero coner cawajcꞌuic uyuchꞌi e vino otronyajr tuaꞌ cacarse, y de allí net erer ichꞌan tacar ubꞌan, y bꞌan cocha era chatertion tuaꞌ cachꞌijrtesian tacar tuaꞌ machi asatpa cachꞌajnarir, che e yaxar ijchꞌoc uyare uwijtzꞌin.
GEN 19:35 Entonces tama e acbꞌar era sutpa uyajcꞌobꞌ uyuchꞌi e vino otronyajr. Entonces e ijtzꞌimbꞌir ochoy chꞌan taca utata, pero jaxir matucꞌa unata tama tunor lo que numuy tama e acbꞌar.
GEN 19:36 Y bꞌan cocha era e chateꞌ ijchꞌoctacobꞌ cꞌotoy quetpa wawanobꞌ taca uyarobꞌ xeꞌ jax tuaꞌ utatobꞌ.
GEN 19:37 Y e yaxar ijchꞌoc qꞌuechuan inteꞌ uyar y uturbꞌa ucꞌabꞌa Moab, y tamar jaxir chꞌajnari tari e gente tama e lugar Moab.
GEN 19:38 Y e ijtzꞌimbꞌir qꞌuechuan inteꞌ uyar ubꞌan y uturbꞌa ucꞌabꞌa Ben-amí. Pues tamar jaxir chꞌajnari tari tunor e gente tama e lugar Amón.
GEN 20:1 Entonces e Abraham locꞌoy tama e lugar Mamré y ixin esto tama e lugar Négueb tuaꞌ aturuan tama e chinam Guerar xeꞌ aquetpa tuyuxin e chinam Cadés y tuyuxin e chinam Sur.
GEN 20:2 Y conda cꞌotoyobꞌ tama e lugar era, e Abraham uchecsu tut e gente que e Sara jax uwijtan y majax uwixcar. Y tamar era e Abimelec xeꞌ jax e rey tama e chinam era uyare tuaꞌ ataresna e Sara tuaꞌ aquetpa tama uyotot tuaꞌ anujbꞌi tacar watar e día.
GEN 20:3 Pero tamar taca e acbꞌar era e Dios uchectes ubꞌa tut e Abimelec tama inteꞌ uwayac y che: “Cꞌani ichamay wacchetaca cocha e ixic xeꞌ aware tuaꞌ ataresna sajmi nujbꞌabꞌirix”, che e Dios uyare e Abimelec tama uwayac.
GEN 20:4 Pues cocha e Abimelec merato uchꞌami ubꞌa tacar jaxir, ojron y che: “Niwinquiraret Dios, ¿O war ca abꞌijnu tuaꞌ achamse tin e matucꞌa war uche xeꞌ mabꞌambꞌan?
GEN 20:5 Pues e Abraham uyaren que jax uwijtan y bꞌan che e Sara ubꞌan que jaxir ijtambꞌir tuaꞌ. Y tamar era matucꞌa innata jay mabꞌambꞌan lo que war inche”, che e Abimelec.
GEN 20:6 Entonces e Dios ojron taca e Abimelec tama uwayac y che: “Pues nen innata que majax mabꞌambꞌan lo que ache. Pues jax nen xeꞌ machi inwactet tuaꞌ achꞌami abꞌa taca e Sara, porque machi war incꞌani tuaꞌ ache e mabꞌambꞌanir taniut.
GEN 20:7 Pero ucꞌani tuaꞌ isutpa aqꞌueche axin e Sara tut e Abraham wacchetaca, porque jaxir jax inteꞌ profeta, y jay ache bꞌan cocha war inwaret era, jaxir tuaꞌ ucꞌajti tacaren tuaꞌ ichojbꞌesna y tuaꞌ ituruan meyra año tara tor e rum. Pero jay machi aqꞌueche axin e Sara tut e Abraham wacchetaca era, entonces net taca tunor tin e turobꞌ tama oꞌtot san tuaꞌ ixchamay”, che e Dios uyare e Abimelec tama uwayac.
GEN 20:8 Entonces conda sacojpa tama inteꞌ día achpa e Abimelec y upejca uyajcꞌamparobꞌ y uchecsu tutobꞌ tunor lo que uwira tama uwayac. Y e ajcꞌamparobꞌ bꞌactobꞌ meyra que bꞌajcꞌat axin ajajtzꞌobꞌ umen e Dios umen que uqꞌuechiobꞌ ixin e Sara.
GEN 20:9 Entonces e Abimelec upejca e Abraham y che: —¿Tucꞌa tuaꞌ que war ache tunor era tacaron? O ¿ayan ca inteꞌ mabꞌambꞌanir lo que war inche apater? Porque net war ache acꞌaxi meyra jatzꞌuar tama nijor nen y tama ujorobꞌ tunor tin e turobꞌ tama niotot. Pues majax imbꞌutz tunor lo que ixiet ache tacaren.
GEN 20:10 ¿Tucꞌa tar war abꞌijnu que ixiet ache tunor era nipater? Pues bꞌan che e Abimelec uyare e Abraham.
GEN 20:11 Entonces ojron e Abraham y che: —Pues nen cay imbꞌijnu que e gente tama e lugar era machi tuaꞌ ubꞌijnuobꞌ oꞌbꞌianobꞌ tut e Dios, y tamar era cay imbꞌijnu que jay inware que jax niwijtan, bꞌajcꞌat axin utoyenobꞌ tuaꞌ uqꞌuechiobꞌ axin. Pero jay inware ani que jax niwixcar, bꞌajcꞌat axin uchamsenobꞌ tuaꞌ uyubꞌi uqꞌuechiobꞌ axin.
GEN 20:12 Pero erach que e Sara jax niwijtan porque jax uwijchꞌoc nitata motor que majax intera catuꞌ, pero nen nujbꞌien ixto tacar.
GEN 20:13 Pues conda arobꞌnen umen e Dios que ucꞌani tuaꞌ inlocꞌoy tama uyotot nitata, cay inware niwixcar, que jay erach que war uyajta niut, que ucꞌani tuaꞌ uchecsu tut e gente tic taca tiaꞌ cacꞌotoy que jaxir jax niwijtan, che e Abraham uyare Abimelec.
GEN 20:14 Entonces e Abimelec uchꞌami cora oveja y cora wacax y uyajcꞌu e Abraham. Y uyajcꞌu cora winicobꞌ y cora ixictac xeꞌ tuaꞌ aquetpobꞌ manobꞌ xeꞌ mambꞌir inyajrer tuaꞌ e Abraham, y de allí sutpa uyajcꞌu e Sara e Abraham.
GEN 20:15 Y de allí ojron y che: —Ubꞌin lo que cꞌani inwaret era, tunor e lugar lo que erer awira tara jax tanibꞌa. Sicbꞌan e lugar xeꞌ más imbꞌutz toit tiaꞌ tuaꞌ ixturuan, che e Abimelec.
GEN 20:16 Y de allí uyare e Sara y che: —Pues inwajcꞌu e Abraham 1000 ut e tumin xeꞌ chembꞌir taca e plata tuaꞌ aquetpa najpesbꞌir inyajrer tunor lo que numuy era, y que ma tiaꞌ tuaꞌ aware que nen ixien inche lo que mabꞌambꞌan. Y tamar era mamajchi tuaꞌ axin oꞌjron apater, che e Abimelec uyare e Sara.
GEN 20:17 Entonces e Abraham cay ucꞌajti taca e Dios tama e Abimelec, y Cadiosir utzꞌacpes e Abimelec y uwixcar. Y utzꞌacpes ubꞌan tunor umanobꞌ xeꞌ ixictac tuaꞌ oꞌbꞌna achꞌijrtesianobꞌ otronyajr.
GEN 20:18 Pues conda qꞌuejcha ixin e Sara umen e Abimelec, Cawinquirar Dios uche que mamajchi tujam e ixictac tama uyotot e Abimelec tuaꞌ oꞌbꞌna achꞌijrseyan.
GEN 21:1 Pues entonces Cawinquirar Dios ixin uche taca e Sara bꞌan taca cocha cay uyare.
GEN 21:2 Entonces e Sara quetpa wawan taca uyar y qꞌuechuan incojt uyar taca e Abraham motor que jaxir onian winiquix. Y e chꞌurcabꞌ cuxpa tama e tiempo bꞌan cocha arobꞌna umen Cawinquirar Dios.
GEN 21:3 Y e Abraham uturbꞌa ucꞌabꞌa e chꞌurcabꞌ era Isaac.
GEN 21:4 Y conda utzꞌacse ocho día xujra imbꞌijc uqꞌuewerir utejromar umen e Abraham, bꞌan cocha arobꞌna tuaꞌ achempa umen e Dios.
GEN 21:5 Pues e Abraham war ucojco 100 año conda cuxpa e Isaac.
GEN 21:6 Entonces ojron e Sara y che: “Pues e Dios uchien intzene conda uyajqꞌuen incojt niwar motor que onian ixiquen, y tamar era tunor tin e acꞌotoy unatobꞌ que cuxpa incojt niwar axin atzeniobꞌ tacaren ubꞌan.
GEN 21:7 Pero ¿chi ani erer uche ubꞌijnu e Abraham que nen ucꞌanto tuaꞌ inchuse incojt niwar xeꞌ tuaꞌ jaxir? Pero bꞌan numuy motor que non onian gention”, che e Sara.
GEN 21:8 Entonces conda e Isaac chꞌi cora, loqꞌuesna e chuꞌ tut, y e Abraham uche inteꞌ nuxi nojqꞌuin.
GEN 21:9 Pero tama e día tuaꞌ e nojqꞌuin e Sara uwira que uyar e Agar xeꞌ jax inteꞌ uyunen e Abraham ubꞌan war asactzene uwira e Isaac.
GEN 21:10 Entonces e Sara ixin tuyejtzꞌer e Abraham y che: “Ajnes chic e ixic xeꞌ ajlugar Egipto taca uyar, porque e Isaac ma cocha erer uxere uyerencia taca uyar e ixic era”, che e Sara uyare e Abraham.
GEN 21:11 Pues quetpa intran e ojroner era tut e Abraham cocha e Ismael unembꞌir tuaꞌ ubꞌan.
GEN 21:12 Pero Cadiosir sutpa uyare e Abraham cocha era y che: “Ira ibꞌacta abꞌijnu tamar lo que arobꞌnet umen awixcar tamar e Ismael y utuꞌ, sino que chen bꞌan taca cocha war uyaret tuaꞌ ache, porque jax taca tin e alocꞌoy tama uchꞌajnarir e Isaac tuaꞌ aquetpobꞌ sicbꞌabꞌir nimener.
GEN 21:13 Pero tama e Ismael xeꞌ uyar aman, cꞌani inche tuaꞌ aquetpa inteꞌ nuxi chinam tunor uchꞌajnarir, cocha jaxir unembꞌir tabꞌa ubꞌan”, che e Dios uyare e Abraham.
GEN 21:14 Entonces conda sacojpa tama inteꞌ día, achpa e Abraham y uchꞌami imbꞌijc e pan y inteꞌ bolsa jaꞌ xeꞌ chembꞌir taca e qꞌuewer y uchꞌubꞌa yebꞌar ucꞌabꞌ e Agar. Y de allí utzacre locꞌoy tama uyotot taca usitz xeꞌ jax e Ismael. Entonces locꞌoy ixin e Agar taca uyar y xanobꞌ cora cora tama tunor e choquem lugar xeꞌ ucꞌabꞌa Beerseba.
GEN 21:15 Y conda cꞌapa e jaꞌ lo que ayan tama e qꞌuewer, jaxir uyacta e sitz yebꞌar cora cꞌopot.
GEN 21:16 Entonces ixin turuan innajt cora tut e sitz cocha machi cꞌani uwira achamay umen e taquijtir. Y de allí uyacta ubꞌa aturuan y cay aru taca inteꞌ nuxi nuc.
GEN 21:17 Pero conda e Dios xeꞌ turu tut e qꞌuin cay uyubꞌi que war aꞌru e sitz, uyebꞌta ixin inteꞌ ángel tuaꞌ oꞌjron taca e Agar cocha era y che: “Agar, ¿tucꞌa tamar war anumse abꞌa? Ira ibꞌacta, porque umbꞌix uyaruar e sitz tiaꞌ turu yebꞌar e cꞌopot.
GEN 21:18 Achpen quiqui chꞌama e sitz, y chucu ucꞌabꞌ y qꞌueche chic, porque tamar jaxir cꞌani alocꞌoy inteꞌ nuxi chinam”, che e ángel tuaꞌ e Dios uyare e Agar.
GEN 21:19 Y wacchetaca e Dios uchectes tut e Agar inteꞌ ut jaꞌ. Entonces ixin esto tama ut e jaꞌ y ubꞌutꞌi e qꞌuewer taca e jaꞌ y uyajcꞌu e Ismael tuaꞌ uyuchꞌi.
GEN 21:20 Pues e Dios utacre e sitz este que cꞌotoy quetpa inteꞌ winic y turuan tama e choquem lugar. Y tama e lugar era cano ucꞌampes e chꞌantꞌin.
GEN 21:21 Y bꞌan cocha era quetpa turuan tama e choquem lugar xeꞌ ucꞌabꞌa Parán, y conda cꞌapa chꞌi chena nujbꞌi taca inteꞌ ixic xeꞌ ajlugar Egipto umen utuꞌ.
GEN 21:22 Pues entonces tama e tiempo era e rey Abimelec ixin tuaꞌ oꞌjron taca e Abraham y war axana e Ficol tacar xeꞌ jax e capitán tuaꞌ e soldadobꞌ. Entonces e Abimelec uyare e Abraham cocha era y che: —Pues chequer ticoit non que Cawinquirar Dios war utacret tama tunor lo que ache.
GEN 21:23 Pues quisinic que achecsu abꞌa ticoit tama ucꞌabꞌa e Dios tara taca que ma tiaꞌ tuaꞌ amajresen y nien nimaxtac, y que ma tiaꞌ tuaꞌ amajresobꞌ nichꞌajnarirobꞌ ubꞌan. Y checsun abꞌa que cꞌani aquetpa incꞌun awirnar taniut bꞌan cocha war aquetpa incꞌun niwirnar toit net, y que bꞌan tuaꞌ aquetpa awirnar taca tunor e gente xeꞌ turobꞌ tama e lugar era, che e Abimelec uyare e Abraham.
GEN 21:24 Entonces ojron e Abraham y che: —Pues san cꞌani inche bꞌan cocha aware, che e Abraham.
GEN 21:25 Entonces conda numuy cora día e Abraham utajwi ubꞌa taca e Abimelec y cay uchecsu que ayan inteꞌ chꞌen tiaꞌ tuaꞌ umorojse ubꞌa e jajar xeꞌ pambꞌir umener xeꞌ loqꞌuesna umen umanobꞌ e Abimelec.
GEN 21:26 Entonces ojron e Abimelec y che: —Pues este era matucꞌa war innata tama tunor era, y nien net matucꞌa achecsu tacaren. Pues machi innata chi xeꞌ uche tunor era, che e Abimelec.
GEN 21:27 Entonces e Abraham ixin uchꞌami cora oveja y cora wacax y uyajcꞌu e Abimelec. Y tama e día era chatertiobꞌ cꞌotoy quetpobꞌ de acuerdo tama e chꞌen era.
GEN 21:28 Entonces e Abraham ulocse siete chꞌom utuꞌ oveja tujam e inmojr.
GEN 21:29 Y e Abimelec uyubꞌi tuaꞌ y che: —¿Tucꞌa tuaꞌ war alocse e siete chꞌom utuꞌ oveja era? che e Abimelec.
GEN 21:30 Entonces che e Abraham: —Pues e siete chꞌom utuꞌ oveja era lo que war inwajqꞌuet cꞌani aquetpa inteꞌ chequerir que tanibꞌa e chꞌen era tiaꞌ tuaꞌ umorojse ubꞌa e jajar conda acꞌaxi cocha jax nen xeꞌ impasi, che e Abraham.
GEN 21:31 Entonces e Abimelec uchꞌami e siete chꞌom utuꞌ oveja. Y de allí e Abraham uturbꞌa ucꞌabꞌa e lugar Beerseba xeꞌ war che “E chꞌen tama e acuerdo”, cocha jax e lugar tiaꞌ uchiobꞌ inteꞌ acuerdo tama e chꞌen era.
GEN 21:32 Entonces conda cꞌapa uchiobꞌ e acuerdo tama e lugar Beerseba era, sutpa ixiobꞌ e Abimelec y e Ficol esto tama e lugar xeꞌ tuaꞌ tin e uchꞌajnarir e Filisti.
GEN 21:33 Y e Abraham upaqꞌui inteꞌ teꞌ xeꞌ ucꞌabꞌa tamarisco tama e lugar era, y cay uyujtzꞌi ut Cawinquirar Dios xeꞌ turu iraj iraj.
GEN 21:34 Y e Abraham turuan meyra tiempo tama e lugar era xeꞌ tuobꞌ e Filisti.
GEN 22:1 Pues entonces conda numuy cora año Cawinquirar Dios cay ubꞌijnu que cꞌani uwira cobꞌa cꞌubꞌesiaj ayan tuaꞌ e Abraham, y jay axin oꞌbꞌian tut. Y tamar era upejca y che: —Abraham, che e Dios. Y e Abraham che: —Tara turen, che e Abraham.
GEN 22:2 Entonces Cawinquirar Dios sutpa ojron y che: —Pues e Isaac jax acojto oynen xeꞌ turu tacaret y xeꞌ war ayajta ut meyra. Cꞌani inwaret tuaꞌ aqꞌueche axin esto tor e witzir xeꞌ ucꞌabꞌa Moria. Y conda ixcꞌotoy, ajcꞌun e Isaac bꞌan cocha inteꞌ arac conda achamesna y apurutna. Bꞌan tuaꞌ ache tor inteꞌ witzir xeꞌ cꞌani inwirset, che Cawinquirar Dios uyare e Abraham.
GEN 22:3 Entonces tama otronteꞌ día conda sacojpa, achpa e Abraham y ucachi e turibꞌ tupat uchij. Y usicbꞌa cora siꞌ tuaꞌ uqꞌueche axin tuaꞌ uxuni e cꞌajc tacar, y de allí ixin esto tama e lugar tiaꞌ arobꞌna umen e Dios. Y uqꞌueche ixin uyunen xeꞌ jax e Isaac y chateꞌ uman.
GEN 22:4 Y tama e uxteꞌ día e Abraham uchꞌujcu uwira innajt cora tiaꞌ turu or e witzir tiaꞌ aquetpa tuaꞌ acꞌotoy.
GEN 22:5 Entonces e Abraham ojron taca umanobꞌ y che: —Quetpenic tara tuaꞌ icojco e chij. Nen taca e sitz cꞌani caxin más tichambꞌir tuaꞌ cojytzꞌi ut e Dios, y de allí cꞌani casutpa waton otronyajr, che e Abraham uyare e chateꞌ uman.
GEN 22:6 Entonces e Abraham ucachi e siꞌ lo que cꞌani ucꞌampes tuaꞌ uxuni e cꞌajc tacar y ucꞌatbꞌu tujor uquejrebꞌ e Isaac tuaꞌ uqꞌueche axin. Y de allí uchꞌami ingojr bꞌejt xeꞌ bꞌutꞌur taca ut e cꞌajc, y inteꞌ cuchillo y locꞌoy ixiobꞌ.
GEN 22:7 Y conda war axanobꞌ tor e bꞌir ojron e Isaac taca utata y che: —Tata, che e chꞌom sitz. Y e Abraham ojron y che: —¿Tucꞌa acꞌani, sitz? che e Abraham. Y che e Isaac: —Non war caqꞌueche axin e siꞌ y ayan ut e cꞌajc ubꞌan, pero ¿tiaꞌ aquetpa e arac lo que aquetpa tuaꞌ cachamse? che e Isaac.
GEN 22:8 Y ojron e Abraham y che: —Pues jax Cadiosir xeꞌ tuaꞌ uturbꞌa e arac lo que tuaꞌ cachamse, che e Abraham. Y cayto xanobꞌ.
GEN 22:9 Y conda cꞌotoyobꞌ tujor e witzir tiaꞌ irsenobꞌ umen e Dios, e Abraham upetzꞌe cora tun tuaꞌ aquetpa bꞌan cocha inteꞌ altar y de allí uturbꞌa e siꞌ tujor. Y de allí uchuqui uyunen xeꞌ jax e Isaac y uturbꞌa tujor e siꞌ tama e altar.
GEN 22:10 Pero conda uchꞌami e cuchillo y ujachi ucꞌabꞌ tuaꞌ uchamse uyunen
GEN 22:11 wacchetaca pejcna umen inteꞌ ángel tuaꞌ Cawinquirar Dios tut e qꞌuin y che: —Abraham, Abraham, che e ángel. Y ojron e Abraham y che: —Tara turen, che e Abraham.
GEN 22:12 Y sutpa ojron e ángel tuaꞌ Cawinquirar Dios otronyajr y che: —Ira ayobꞌi oynen era. Pues inwirix que turix tuaꞌ iyubꞌian taniut, y que turetix tuaꞌ awajqꞌuen esto oynen xeꞌ jax acojto, che e ángel uyare e Abraham.
GEN 22:13 Entonces e Abraham sutpa eron tupat, y uwira que war incojt utata oveja macuir e cꞌopot xeꞌ cachbꞌir ucacho tama cora chꞌan. Entonces ixin uchuqui e oveja y uchamse y uputa tama e altar tuaꞌ aquetpa uyeror ut uyunen.
GEN 22:14 Entonces e Abraham uturbꞌa ucꞌabꞌa or e witzir era que: “Cawinquirar Dios uche achecta tunor lo que ucꞌani inteꞌ.” Y bꞌanto arobꞌna esto coner, “Pues tor e witzir era Cawinquirar Dios uche achecta tunor lo que ucꞌani inteꞌ.”
GEN 22:15 Entonces Cawinquirar Dios sutpa upejca e Abraham otronyajr
GEN 22:16 y che: —Pues bꞌan cocha inware nen xeꞌ Awinquiraren Dios: ‘Pues cocha war ache tunor lo que inwaret, y machi atzunle tuaꞌ awajqꞌuen oynen xeꞌ jax acojto, nen cꞌani inwaret tama nicꞌabꞌa
GEN 22:17 que san tuaꞌ inchojbꞌeset meyra. Y cꞌani inche abꞌoro meyra tunor achꞌajnarir este que aquetpobꞌ bꞌan cocha e sian lucero que meyra ayan tut e qꞌuin, y cꞌani inche abꞌoro este que aquetpobꞌ bꞌan cocha e sian jiꞌ lo que ayan tutiꞌ e nuxi jaꞌ que machi uyubꞌiet atziqui. Y cꞌani inqꞌuecꞌojse tunor achꞌajnarirobꞌ tuaꞌ oꞌbꞌnobꞌ ucucru tunor e chinamobꞌ tuaꞌ tin e aqꞌuijna uwira ubꞌobꞌ tacar.
GEN 22:18 Y cocha ubꞌianet taniut cꞌani aquetpa chojbꞌesbꞌir utobꞌ tunor e gente xeꞌ turobꞌ tara tor e rum umen inteꞌ sitzbꞌir tabꞌa.’ Bꞌan che Cawinquirar Dios uyare e Abraham.
GEN 22:19 Entonces e Abraham sutpa ixin esto tiaꞌ turobꞌ umanobꞌ. Y de allí ixiobꞌ esto tama e lugar Beerseba cocha jax e lugar tiaꞌ war aturuan e Abraham.
GEN 22:20 Entonces conda numuy cora tiempo ayan chi xeꞌ yopa tut e Abraham tuaꞌ uchecsu tut que qꞌuechuan cora uyar e Milcá xeꞌ jax uwixcar uwijtzꞌin e Abraham xeꞌ jax e Nahor.
GEN 22:21 Pues e yaxar sitz xeꞌ cuxpa jax e Us, y de allí cuxpa uwijtzꞌin xeꞌ ucꞌabꞌa Buz, y de allí cuxpa e Quemuel xeꞌ cꞌotoy quetpa tatabꞌir tuaꞌ e Aram.
GEN 22:22 Y nacpat era cuxpobꞌ e Quésed y e Hazó y e Pildás y e Idlaf y e Betuel.
GEN 22:23 Y e Betuel uchꞌijrse inteꞌ uwijchꞌoc xeꞌ ucꞌabꞌa Rebeca. Pues jax era e ocho uyunenobꞌ xeꞌ ajcꞌuna e Nahor umen e Milcá, xeꞌ jax uwijtzꞌin e Abraham.
GEN 22:24 Pues e Nahor ayan umaxtac taca inteꞌ uman ubꞌan xeꞌ ucꞌabꞌa Reumá xeꞌ cꞌotoy quetpa inteꞌ uwixcar. Pues uyunenobꞌ xeꞌ ajcꞌuna umen e Reumá jax e Teba y e Gáham y e Tahas y e Maacá.
GEN 23:1 Pues e Sara turuan 127 año,
GEN 23:2 y de allí chamay tama inteꞌ lugar xeꞌ ucꞌabꞌa Quiriat-arbá xeꞌ arobꞌna Hebrón coner xeꞌ aquetpa tama e lugar Canaán. Pues e Abraham cay aru tama uchamer e Sara y cay tzꞌintzꞌa meyra tiempo.
GEN 23:3 Y de allí locꞌoy tama e lugar tiaꞌ quetpa chꞌar ucuerpo e Sara, y ixin usicbꞌa tin e tuobꞌ uchꞌajnarir e Het xeꞌ turobꞌ tama e lugar era y che:
GEN 23:4 —Pues motor que nen majax ajlugaren tara y matucꞌa nirum, pero quisinic achoni tacaren inteꞌ tajo rum tiaꞌ tuaꞌ amujca niwixcar, che e Abraham.
GEN 23:5 Entonces ojronobꞌ tin e tuobꞌ uchꞌajnarir e Het y chenobꞌ:
GEN 23:6 —Pues net jax inteꞌ winic xeꞌ nojta acꞌampibꞌir ticajam y sicbꞌabꞌiret umen e Dios. Y tamar era cꞌani cawaret que sicbꞌan tuqꞌuic tuqꞌuic rum lo que acꞌani tiaꞌ tuaꞌ amujca awixcar tama tunor e rum lo que ayan ticabꞌa tara. Pues mamajchi ticajam tuaꞌ utzunle e rum era, chenobꞌ tin e tuobꞌ uchꞌajnarir e Het.
GEN 23:7 Entonces e Abraham achpa wawan y uchꞌubꞌa ut tut tin e tuobꞌ uchꞌajnarir e Het
GEN 23:8 y che cocha era: —Pues jay erach que war icꞌani tuaꞌ inmuqui niwixcar tama e lugar era, entonces quisinic iware e Efrón xeꞌ jax uyunen e Zohar
GEN 23:9 tuaꞌ uchoni e chꞌen tacaren lo que ayan tama unac e peña tama e lugar Macpelá xeꞌ aquetpa tama urum jaxir. Y nen cꞌani intoyi bꞌan taca cocha atujri e chꞌen yax, y bꞌan cocha era cꞌani inquetpa ajyum tama inteꞌ tajo rum tiaꞌ tuaꞌ amujca chi chi xeꞌ axin achamay tama nifamilia, che e Abraham uyare tin e tuobꞌ uchꞌajnarir e Het.
GEN 23:10 Y cocha yajaꞌ taca turu e Efrón taca e inmojr era xeꞌ tuobꞌ uchꞌajnarir e Het, achpa y cay ojron taca e Abraham taca inteꞌ nuxi nuc tuaꞌ uyubꞌiobꞌ tunor tin e morojsebꞌir turobꞌ tama uyocher e chinam era y che:
GEN 23:11 —Machi, niwinquiret. Nen cꞌani inwajqꞌuet e rum bꞌan taca lo que war cojron tamar taca tunor e chꞌen lo que ayan tamar. Y cꞌani aquetpobꞌ ajchecsuyajobꞌ tunor tin e turobꞌ tara que nen war inwajqꞌuet e rum era, y tamar era erer amuqui awixcar tamar bꞌan taca, che e Efrón uyare e Abraham. Pero e Efrón machi war ucꞌani tuaꞌ uyajcꞌu e rum bꞌan taca, pero bꞌan quetpa tuaꞌ uyare cocha bꞌan e costumbre tuobꞌ conda cꞌani uchoni inteꞌ tajo rum.
GEN 23:12 Entonces e Abraham sutpa uchꞌubꞌa ut otronyajr tut e winicobꞌ era
GEN 23:13 y uyare e Efrón tut e inmojr era y che: —Ubꞌin. Pues ayan lo que cꞌani inwaret era. Quisinic que awacten intoyi bꞌan taca cocha atujri e rum, porque ma cocha erer inmuqui ucuerpo niwixcar tamar jay machi inquetpa ajyum tamar. Pero jay awacten inmani e rum erer asisa niwalma tuaꞌ inmuqui ucuerpo niwixcar tamar. Entonces arenen jayteꞌ atujri e rum y bꞌan tuaꞌ intoyi, che e Abraham uyare e Efrón.
GEN 23:14 Entonces ojron e Efrón y che:
GEN 23:15 —Niwinquiret, ubꞌin lo que cꞌani inwaret. Jay cꞌani amani e rum ucꞌani tuaꞌ atoyen lo que atujri xeꞌ jax e 400 ut tumin xeꞌ chembꞌir taca e plata. Pero cocha nuquir winicon net y nen, machi aquetpa meyra e tumin era ticoit, che e Efrón uyare e Abraham.
GEN 23:16 Entonces quetpa imbꞌutz tunor era tut e Abraham y utoyi e Efrón bꞌan taca cocha atujri e rum y quetpobꞌ ajchecsuyajobꞌ tama e manuar tunor tin e tuobꞌ uchꞌajnarir e Het. Y utoyi 400 ut tumin xeꞌ chembꞌir taca e plata, bꞌan cocha atujri e tumin xeꞌ cꞌampesna umen tin e ajchonmarobꞌ tama e tiempo yajaꞌ.
GEN 23:17 Y bꞌan cocha era e tajo rum xeꞌ tuaꞌ ani e Efrón xeꞌ aquetpa tama e lugar Macpelá xeꞌ turu tuyejtzꞌer e lugar Mamré taca tunor e chꞌen xeꞌ turu tamar y taca tunor e sian teꞌ xeꞌ war tama e rum cꞌotoy quetpa tuaꞌ e Abraham.
GEN 23:18 Y bꞌan cocha era e Abraham cꞌotoy quetpa ajyum tama e rum, y tin e tuobꞌ uchꞌajnarir e Het xeꞌ turobꞌ tama uyocher e chinam quetpobꞌ ajchecsuyajobꞌ tama e chonmar era.
GEN 23:19 Entonces e Abraham umuqui ucuerpo e Sara tama inteꞌ chꞌen xeꞌ turu tama unac inteꞌ peña xeꞌ turu tama e rum xeꞌ intocto umani. Pues e rum era aquetpa tuyejtzꞌer e chinam Mamré xeꞌ arobꞌna Hebrón ubꞌan y aquetpa tama e lugar Canaán.
GEN 23:20 Y bꞌan cocha era e Abraham cꞌotoy quetpa ajyum tama inteꞌ tajo rum xeꞌ umani tuaꞌ e Efrón xeꞌ tuaꞌ uchꞌajnarir e Het taca tunor e chꞌen xeꞌ turu tamar. Pues umani tuaꞌ uyubꞌi acꞌampesna bꞌan cocha inteꞌ lugar tiaꞌ tuaꞌ amujca tin e axin achamay tama ufamilia e Abraham.
GEN 24:1 Pues entonces e Abraham cꞌotoy quetpa onian winic, y chojbꞌesna meyra umen Cawinquirar Dios tama tunor lo que uche.
GEN 24:2 Y tama inteꞌ día e Abraham upejca uman xeꞌ más ayan ucꞌampibꞌir xeꞌ jax xeꞌ aquetpa tuaꞌ acꞌotori tujor tunor lo que ayan tuaꞌ e Abraham. Entonces e Abraham uyare uman cocha era y che: —Turbꞌan acꞌabꞌ yebꞌar ut niwaꞌ tuaꞌ achecsu que san tuaꞌ acꞌapa ache lo que war inwaret era:
GEN 24:3 Arenen tama ucꞌabꞌa Cawinquirar Dios xeꞌ jax Cadiosir xeꞌ uche ut e qꞌuin tichan y xeꞌ uche or e rum ubꞌan, que net ma tiaꞌ tuaꞌ awacta anujbꞌi e Isaac xeꞌ jax niunen taca incojt ijchꞌoc xeꞌ ajlugar tara Canaán.
GEN 24:4 Sino que quisinic que iꞌxin esto tama e chinam Harán tuaꞌ asicbꞌa incojt ijchꞌoc tujam e ijchꞌoctacobꞌ tama nifamilia tuaꞌ acꞌotoy aquetpa uwixcar e Isaac, che e Abraham uyare uman.
GEN 24:5 Entonces ojron e man y che: —Pero jay intajwi incojt ijchꞌoc bꞌan cocha acꞌani, y jaxir machi cꞌani watar tacaren, ¿tucꞌa tuaꞌ inche? O ¿ucꞌani ca tuaꞌ inqꞌueche axin oynen esto tama e lugar tiaꞌ aturuanobꞌ apiarobꞌ tuaꞌ anujbꞌi? che e man uyare e Abraham.
GEN 24:6 Entonces ojron e Abraham y che: —Machi incꞌani tuaꞌ aqꞌueche axin niunen esto tama e lugar yajaꞌ.
GEN 24:7 Porque jax Niwinquirar Dios xeꞌ turu tut e qꞌuin xeꞌ uyaren que san tuaꞌ uyajcꞌu e lugar Canaán nichꞌajnarir. Y jax jaxir xeꞌ ulocsen tama uyotot nitata y tama e lugar tuaꞌ, y jax jaxir xeꞌ tuaꞌ uyebꞌta axin uyangel toit tuaꞌ utacret atajwi incojt ijchꞌoc tama e lugar yajaꞌ tuaꞌ atares esto tama e lugar tara tuaꞌ aquetpa uwixcar niunen.
GEN 24:8 Pero jay e ijchꞌoc xeꞌ atajwi machi ucꞌani tuaꞌ watar tacaret, entonces net tuaꞌ iquetpa bꞌambꞌir tamar lo que aquetpa tuaꞌ ache, pero ma tiaꞌ tuaꞌ aqꞌueche axin niunen esto tama e lugar bꞌana, che e Abraham uyare uman.
GEN 24:9 Entonces e man uturbꞌa ucꞌabꞌ yebꞌar ut uyaꞌ uwinquir Abraham, y uyare que san tuaꞌ uche tunor lo que arobꞌna umener.
GEN 24:10 Y de allí e man cay umorojse meyra regalo xeꞌ más galanic xeꞌ ayan tuaꞌ uwinquir tuaꞌ uqꞌueche axin, y uchꞌami diez aracꞌobꞌ xeꞌ ucꞌabꞌa camello tuaꞌ uqꞌueche axin tunor era, y ixin taca cora man esto tama e chinam tiaꞌ aturuan e Nahor xeꞌ jax uwijtzꞌin e Abraham xeꞌ turu tama e lugar Mesopotamia.
GEN 24:11 Entonces conda cꞌotoy esto tuyejtzꞌer e chinam tiaꞌ aturuan e Nahor, warix amaxan. Y jax e hora era conda e ixictac acꞌotoy tama ut e jaꞌ tuaꞌ ubꞌutꞌiobꞌ ubꞌujrobꞌ tuaꞌ uqꞌueche axin esto tama uyototobꞌ. Entonces e man uyare tuaꞌ ajiriobꞌ e camellobꞌ tuyejtzꞌer ut e jaꞌ era.
GEN 24:12 Y entonces cay ucꞌajti taca e Dios y che: “O Cawinquirar Dios xeꞌ Udiosir niwinquir Abraham, tacrenen tuaꞌ alocꞌoy imbꞌutz tunor lo que aquetpa tuaꞌ inche tama nixambꞌar era, y chectes abꞌa que incꞌun awirnar tut niwinquir Abraham.
GEN 24:13 Pues tara turen tuyejtzꞌer ut e jaꞌ, war incojco este que watobꞌ e ijchꞌoctac tama e chinam era tuaꞌ acꞌotoy ulocsiobꞌ e jaꞌ tuaꞌ ubꞌutꞌiobꞌ ubꞌujrobꞌ.
GEN 24:14 Y incꞌajti tacaret tuaꞌ awacta que e ijchꞌoc xeꞌ inxin impejca y inware cocha era: ‘Emsen abꞌujr tuaꞌ awajqꞌuen unchꞌi e jaꞌ,’ que jaxir tuaꞌ asutpa uyaren cocha era y che: ‘Uchꞌen, y cꞌani inwajcꞌu e jaꞌ tuaꞌ uyuchꞌi acamellobꞌ ubꞌan.’ Pues incꞌajti tacaret que jax jaxir xeꞌ tuaꞌ aquetpa tin e sicbꞌabꞌir amener tuaꞌ anujbꞌi taca aman Isaac. Y bꞌan cocha era erer acꞌotoy innata que war awirse abꞌa que incꞌun awirnar tut niwinquir Abraham”, che uman e Abraham war ucꞌajti taca e Dios.
GEN 24:15 Pues conda e man era merato acꞌapa ucꞌajti taca e Dios, uwira que war watar incojt ijchꞌoc taca ingojr bꞌujr bꞌitir umener. Pues e ijchꞌoc era ucꞌabꞌa Rebeca y jax uwijchꞌoc e Betuel. Y e Betuel jax uyar e Milcá taca e Nahor xeꞌ jax uwijtzꞌin e Abraham.
GEN 24:16 Pues e Rebeca jax incojt ijchꞌoc xeꞌ galan uwirnar xeꞌ ma tiaꞌ chꞌajma umen inteꞌ winic. Entonces jaxir ecmay esto tama ut e jaꞌ y ubꞌutꞌi ubꞌujr, y de allí cay xana tuaꞌ asutpa axin tama uyotot.
GEN 24:17 Y tama e momento era irna umen uman e Abraham xeꞌ cay ajni ixin tupat e ijchꞌoc y conda utajwi cay uyare cocha era y che: —¿Erer ca unchꞌi imbꞌijc e jaꞌ lo que ayan tama abꞌujr? che e man uyare e Rebeca.
GEN 24:18 Y che e ijchꞌoc: —Uchꞌen, niwinquiret, che e ijchꞌoc. Y tamar era uyemse ubꞌujr, y chucur tama ucꞌabꞌ uyajcꞌu tuaꞌ uyuchꞌi e jaꞌ.
GEN 24:19 Y conda e man cꞌapa uyuchꞌi e jaꞌ ojron e Rebeca y che: —Pues cꞌani inlocse e jaꞌ tuaꞌ uyuchꞌiobꞌ acamellobꞌ ubꞌan, este que acꞌapa uyuchꞌiobꞌ bꞌan cocha ucꞌaniobꞌ, che e Rebeca uyare e man.
GEN 24:20 Entonces wacchetaca e Rebeca uyari e jaꞌ lo que ayan tama ubꞌujr tama e pila tiaꞌ tuaꞌ uyuchꞌiobꞌ e jaꞌ e camellobꞌ, y de allí sutpa ixin tama ut e jaꞌ tuaꞌ ulocse más jaꞌ xeꞌ uyari tama e pila otronyajr, y bꞌan uche este que cꞌapa uyuchꞌiobꞌ tunor e jaꞌ lo que ucꞌaniobꞌ e camellobꞌ.
GEN 24:21 Y e man quetpa wawan, intaca war uwira lo que war uche e ijchꞌoc, pero matucꞌa uyare conda war uche tunor era, cocha cꞌani unata jay jax Cawinquirar Dios xeꞌ war uche alocꞌoy imbꞌutz tunor lo que aquetpa tuaꞌ uche tama uxambꞌar.
GEN 24:22 Entonces conda e camellobꞌ cꞌapa uyuchꞌiobꞌ tunor e jaꞌ lo que ucꞌaniobꞌ, uman e Abraham uchꞌami inteꞌ anillo xeꞌ chembꞌir taca e oro xeꞌ abꞌari chateꞌ onza, y uturbꞌa tama uniꞌ e Rebeca. Y de allí uyajcꞌu chateꞌ brazalete xeꞌ chembꞌir taca e oro xeꞌ abꞌari más de cuatro onzas y ujuriꞌ tama unuc ucꞌabꞌ.
GEN 24:23 Entonces uyubꞌi tuaꞌ e ijchꞌoc y che: —¿Tucꞌa ucꞌabꞌa atata? Y ¿ayan ca e lugar tama uyotot atata tuaꞌ uyubꞌion caquetpa tama e acbꞌar era? che uman e Abraham uyare e Rebeca.
GEN 24:24 Entonces ojron e Rebeca y che: —Pues nen uwijchꞌoquen e Betuel xeꞌ jax uyar e Milcá taca e Nahor.
GEN 24:25 Y ayan meyra lugar tama cotot tuaꞌ uyubꞌi iquetpa. Y ayan meyra ac y lo que tuaꞌ ucꞌuxiobꞌ e camellobꞌ ubꞌan, che e Rebeca.
GEN 24:26 Entonces uman e Abraham cotuan y utattzꞌi ucꞌabꞌa Cawinquirar Dios
GEN 24:27 y che: “Tattzbꞌir ucꞌabꞌa Cawinquirar Dios xeꞌ Udiosir niwinquir Abraham, porque erach jaxir y incꞌun uwirnar taca niwinquir, y jax xeꞌ uwirsen e bꞌir xeꞌ acꞌotoy esto tama uyotot ufamilia niwinquir”, che uman e Abraham.
GEN 24:28 Entonces e Rebeca ixin wacchetaca esto tuyotot utuꞌ y uchecsu lo que numuy tut tunor tin e turobꞌ.
GEN 24:29 Y e Rebeca ayan incojt uwijtzꞌin xeꞌ ucꞌabꞌa Labán xeꞌ ixin ajner esto tut e jaꞌ tuaꞌ usicbꞌa e winic xeꞌ quetpato turuan tuyejtzꞌer ut e jaꞌ.
GEN 24:30 Pues jaxir uwira tunor lo que qꞌuecher umen usacun xeꞌ jax inteꞌ anillo xeꞌ chꞌur tama uniꞌ y e chateꞌ brazalete xeꞌ lucur tama unuc ucꞌabꞌ, y uyubꞌi ubꞌan tunor lo que checsuna umen e Rebeca tamar lo que numuy taca e winic. Entonces e Labán ixin ajner tuaꞌ usicbꞌa uman e Abraham, y utajwi que turuto tuyejtzꞌer ut e jaꞌ taca ucamellobꞌ.
GEN 24:31 Entonces Labán upejca uman e Abraham y che: —Lar tacaren, net xeꞌ chojbꞌesbꞌiret umen Cawinquirar Dios. Majax bueno tuaꞌ taca iquetpa tara. Pues ustabꞌirix nimener tiaꞌ tuaꞌ iquetpa tama niotot, y ustabꞌirix ubꞌan tiaꞌ tuaꞌ aquetpa acamellobꞌ, che e Labán uyare uman e Abraham.
GEN 24:32 Entonces ixin uman e Abraham taca tunor uyaracꞌobꞌ esto tama uyotot e Labán. Y conda cꞌotoyobꞌ umanobꞌ e Labán uyemsiobꞌ tunor lo que ayan tama upatobꞌ e camellobꞌ, y de allí utaresobꞌ cora ac y lo que ucꞌani tuaꞌ ucꞌuxiobꞌ e camellobꞌ, y de allí utaresobꞌ cora jaꞌ y uyajcꞌu uman e Abraham taca tin e war axanobꞌ tacar tuaꞌ upoquiobꞌ uyocobꞌ.
GEN 24:33 Y conda turbꞌana e wiar tor e mesa, ojron uman e Abraham y che: —Pues nen ma cocha erer inweꞌ bꞌajxan que inchecsu tiut lo que ebꞌtanen tarien tuaꞌ inwareox, che uman e Abraham. Entonces ojron e Labán y che: —Pues erer achecsu lo que cꞌani aware, che e Labán.
GEN 24:34 Entonces cay ojron uman e Abraham y che: —Pues nen manen tuaꞌ e Abraham.
GEN 24:35 Y Cawinquirar Dios uchojbꞌesix meyra niwinquir este que cꞌotoy quetpa meyra lo que ayan tuaꞌ. Pues Cawinquirar Dios ixin uyajcꞌu meyra oveja, y meyra wacax, y meyra oro y meyra plata. Y ixin uyajcꞌu meyra umanobꞌ xeꞌ winicobꞌ y meyra umanobꞌ xeꞌ ixictac, y uyajcꞌu meyra camello y meyra chijobꞌ ubꞌan.
GEN 24:36 Y e Sara xeꞌ jax uwixcar e Abraham cꞌotoy chꞌijrtesiaj conda onian ixiquix y cuxpa incojt uyar, y niwinquir war uyacta tunor lo que ayan tuaꞌ tacar uyunen era.
GEN 24:37 Y niwinquir uyaren ubꞌan que san machi tuaꞌ insicbꞌa inteꞌ ijchꞌoc xeꞌ ajlugar Canaán tuaꞌ anujbꞌi taca uyunen y che: ‘Machi incꞌani tuaꞌ awacta anujbꞌi niunen taca incojt ijchꞌoc xeꞌ ajlugar tara Canaán.
GEN 24:38 Pues lo que incꞌani tuaꞌ ache jax era: Quiqui esto tiaꞌ aturuanobꞌ ufamilia nitata y sicbꞌan incojt ijchꞌoc tujam nipiarobꞌ tuaꞌ aquetpa uwixcar niunen,’ xeꞌ arobꞌnen umen e Abraham.
GEN 24:39 Y de allí nen inware cocha era y che: ‘Niwinquiret, y jay e ijchꞌoc xeꞌ intajwi machi ucꞌani tuaꞌ watar tacaren, ¿tucꞌa tuaꞌ inche?’ inware.
GEN 24:40 Entonces jaxir sutpa uyaren cocha era y che: ‘Pues nen war inxana imbꞌutz tama ubꞌir Niwinquirar Dios, y tamar era cꞌani inwaret que jax Nidiosir xeꞌ tuaꞌ uyebꞌta axin uyangel tacaret tama axambꞌar y jax jaxir xeꞌ tuaꞌ uche alocꞌoy imbꞌutz tunor lo que aquetpa tuaꞌ ache. Y jax jaxir xeꞌ tuaꞌ utacret atajwi incojt ijchꞌoc tujam nipiarobꞌ tuaꞌ aquetpa uwixcar niunen.
GEN 24:41 Pero jay ufamilia nitata machi ucꞌaniobꞌ tuaꞌ uyajqꞌuetobꞌ e ijchꞌoc, entonces net tuaꞌ iquetpa bꞌambꞌir tamar lo que aquetpa tuaꞌ ache.’
GEN 24:42 “Pues sajmi conda cꞌotoyen tama ut e jaꞌ, cay incꞌajti taca Cawinquirar Dios xeꞌ jax Udiosir niwinquir Abraham, y inware cocha era: ‘Pues cꞌani incꞌajti tacaret tuaꞌ ache alocꞌoy imbꞌutz tunor lo que aquetpa tuaꞌ inche tama e xambꞌar era,
GEN 24:43 y incꞌajti tacaret tara tiaꞌ turen tuyejtzꞌer ut e jaꞌ que axin anumuy tunor bꞌan cocha era: Que e ijchꞌoc xeꞌ inxin impejca y inware cocha era: Emsen abꞌujr tuaꞌ awajqꞌuen unchꞌi e jaꞌ,
GEN 24:44 y de allí jaxir tuaꞌ asutpa uyaren cocha era y che: Uchꞌen, y cꞌani inwajcꞌu e jaꞌ tuaꞌ uyuchꞌiobꞌ acamellobꞌ ubꞌan. Pues incꞌajti tacaret que jax jaxir xeꞌ tuaꞌ aquetpa tin xeꞌ sicbꞌabꞌir amener tuaꞌ anujbꞌi taca uyunen niwinquir.’
GEN 24:45 Pero conda merato acꞌapa incꞌajti taca e Dios, inwira que war watar e Rebeca bꞌitir ubꞌujr umener. Entonces jaxir ecmay esto tama ut e jaꞌ y ubꞌutꞌi ubꞌujr, y de allí nen inware: ‘¿Erer ca unchꞌi imbꞌijc e jaꞌ lo que ayan tama abꞌujr?’ xeꞌ inware.
GEN 24:46 Y jaxir uyemse ubꞌujr wacchetaca y uyaren y che: ‘Uchꞌen, y cꞌani inlocse e jaꞌ tuaꞌ uyuchꞌiobꞌ acamellobꞌ ubꞌan este que acꞌapa uyuchꞌiobꞌ bꞌan cocha ucꞌaniobꞌ,’ che uyaren.
GEN 24:47 Y de allí umbꞌi tuaꞌ jaxir y inware: ‘¿Tucꞌa ucꞌabꞌa atata?’ inware. Y jaxir uyaren y che: ‘Pues nen uwijchꞌoquen e Betuel xeꞌ jax uyar e Milcá taca e Nahor,’ uyaren. Y de allí cay inturbꞌa inteꞌ anillo tama uniꞌ y chateꞌ brazalete tamar unuc ucꞌabꞌ.
GEN 24:48 Y tama e momento era cotuanen tuaꞌ intattzꞌi ucꞌabꞌa Cawinquirar Dios xeꞌ jax Udiosir niwinquir Abraham y tuaꞌ unjtzꞌi ut umen que jaxir ubꞌijresen tuaꞌ inwajpi e bꞌir xeꞌ acꞌotoy esto tama uyotot ufamilia niwinquir tuaꞌ incꞌajti e ijchꞌoc tuaꞌ aquetpa uwixcar uyunen niwinquir.
GEN 24:49 Entonces cꞌani innata jay nox war ibꞌijnu tuaꞌ aquetpa incꞌun y erach iwirnar tut niwinquir tuaꞌ iwajcꞌu e Rebeca tuaꞌ aquetpa uwixcar uyunen niwinquir. Pues jay bꞌan war ibꞌijnu, areniquen. Pero jay machi icꞌani, pues quisinic iwaren ubꞌan. Y tamar era erer innata tucꞌa ucꞌani tuaꞌ inche”, che uman e Abraham.
GEN 24:50 Entonces e Labán y e Betuel ojronobꞌ y chenobꞌ: —Pues chequer ticoit que tunor era war watar tuaꞌ Cawinquirar Dios, y tamar era matucꞌa tuaꞌ cawaret.
GEN 24:51 Pero lo que erer cawaret jax era: Tara turu e Rebeca toit, qꞌueche chic tuaꞌ aquetpa uwixcar uyunen awinquir bꞌan cocha ucꞌani Cawinquirar Dios, chenobꞌ e Labán taca e Betuel.
GEN 24:52 Entonces conda uman e Abraham uyubꞌi tunor era, cotuan tut Cawinquirar Dios esto que utacbꞌu ut ujor esto tut e rum.
GEN 24:53 Y de allí uman e Abraham cay ulocse meyra cosa tama ubolsa xeꞌ chembꞌir taca e oro y xeꞌ chembꞌir taca e plata tuaꞌ uyajcꞌu e Rebeca. Y ulocse meyra bꞌujc tuaꞌ uyajcꞌu ubꞌan. Y de allí uyajcꞌu inteꞌ regalo utuꞌ e Rebeca xeꞌ meyra atujri y bꞌan uche taca uwijtzꞌin ubꞌan.
GEN 24:54 Y nacpat era uman e Abraham taca tin e war axanobꞌ tacar cay wiobꞌ y cay uyuchꞌiobꞌ lo que ajcꞌunobꞌ, y yajaꞌ taca quetpobꞌ tuaꞌ awayanobꞌ tama e acbꞌar. Y conda sacojpa achpobꞌ y cay ojron uman e Abraham y che: —Actanen tuaꞌ inlocꞌoy coner era tuaꞌ machi eixna inturuan najtir tuyotot niwinquir, cocha jaxir cꞌani unata wacchetaca jay actana alocꞌoy e ijchꞌoc, che uman e Abraham.
GEN 24:55 Entonces ojron uwijtzꞌin y utuꞌ e Rebeca y chenobꞌ: —Quetpacto e ijchꞌoc tacaron tama otro diez día, y de allí erer axin tacaret, che uwijtzꞌin y utuꞌ e Rebeca.
GEN 24:56 Entonces ojron uman e Abraham otronyajr y che: —Pues Cawinquirar Dios uchix tuaꞌ alocꞌoy imbꞌutz tunor nixambꞌar. Quisinic que machi iquete iwabꞌuen tuaꞌ machi inlocꞌoy rajxa era, che e man.
GEN 24:57 Entonces sutpa ojronobꞌ jaxirobꞌ y chenobꞌ: —Capejquic e ijchꞌoc tuaꞌ coybꞌi tuaꞌ jay cꞌani axin rajxa era o machi, che utuꞌ y uwijtzꞌin e Rebeca.
GEN 24:58 Entonces ixin upejcobꞌ e Rebeca y uyubꞌiobꞌ tuaꞌ y chenobꞌ: —¿Cꞌani ca iꞌxin taca e winic rajxa era? chenobꞌ. Y ojron e Rebeca y che: —Cꞌani, che e Rebeca.
GEN 24:59 Entonces uyactobꞌ locꞌoy e Rebeca y e ixic xeꞌ cay ucojco conda war aꞌchꞌi, y ixiobꞌ taca uman e Abraham taca tin e war axanobꞌ tacar.
GEN 24:60 Pero bꞌajxan que alocꞌoyobꞌ e Labán cay uchojbꞌes ut e Rebeca taca e ojroner era y che: “O nisacunet, que net iꞌxin iquetpa tubꞌir tuaꞌ meyra sian chꞌajnarir, y que tin e turobꞌ tama achꞌajnarir axin ucucruobꞌ tunor uchinamobꞌ xeꞌ aqꞌuijna uwiretobꞌ”, che e Labán.
GEN 24:61 Entonces e Rebeca taca cora ixictac xeꞌ manobꞌ tuaꞌ tabꞌayobꞌ tujor inteꞌ inteꞌ ucamello y cay xanobꞌ tupat uman e Abraham. Y bꞌan cocha era e Rebeca qꞌuejcha ixin umen uman e Abraham y uyactobꞌ e lugar tiaꞌ chꞌi.
GEN 24:62 Pues tama e tiempo era e Isaac war aturuan tama e lugar Négueb, cocha sutpa tari tama ut e jaꞌ xeꞌ ucꞌabꞌa “Ut e jaꞌ xeꞌ tuaꞌ Tin e Turu xeꞌ Uwiren” tiaꞌ ixin xana.
GEN 24:63 Y tama inteꞌ día conda war acbꞌare locꞌoy tuaꞌ axana tama e choquem lugar tuaꞌ ubꞌijnu tama e Dios. Y conda war axana cay uwira que war watar cora sian camello.
GEN 24:64 Y e Rebeca conda innajtto watar, uwira que ayan inteꞌ winic xeꞌ war watar bꞌana, pero machi unata jay jax e Isaac. Entonces ecmay tupat ucamello
GEN 24:65 y uyubꞌi tuaꞌ uman e Abraham y che: —¿Chi canic e winic era xeꞌ war watar yajaꞌ? che e Rebeca. Entonces ojron uman e Abraham y che: —Jax e Isaac xeꞌ jax uyunen niwinquir, che e man. Entonces e Rebeca uchꞌami inteꞌ payuj y umaqui ut.
GEN 24:66 Entonces conda e man utajwi ubꞌa taca e Isaac cay uchecsu tut tunor lo que numuy tama uxambꞌar.
GEN 24:67 Y de allí e Isaac uqꞌueche ixin e Rebeca esto tuyotot utuꞌ, y nujbꞌi tacar. Y e Isaac cay uyajta ut meyra e Rebeca, y bꞌan cocha era cay ucꞌuni ubꞌa tamar uchamer utuꞌ.
GEN 25:1 Entonces conda numuy cora tiempo nacpat que chamay e Sara, e Abraham sutpa uchꞌami otronteꞌ uwixcar xeꞌ ucꞌabꞌa Quetura.
GEN 25:2 Y jaxir ixin ucuxi seis tejromtac taca e Abraham xeꞌ jax era: ayan e Zimrán y e Jocsán y e Medán y e Madián y e Isbac y e Súah.
GEN 25:3 Y e Jocsán cꞌotoy quetpa tatabꞌir tuaꞌ e Sebá y e Dedán. Y e Dedán cꞌotoy quetpa tatabꞌir tuaꞌ tin e chꞌajnarir tuaꞌ e Asir, y tuaꞌ tin e chꞌajnarir tuaꞌ e Letus, y tuaꞌ tin e chꞌajnarir tuaꞌ e Leum.
GEN 25:4 Y e Madián cꞌotoy quetpa tatabꞌir tuaꞌ e Efá y e Éfer y e Hanoc y e Abidá y e Eldaá. Pues tunor era chꞌajnarir tuaꞌ e Quetura taca e Abraham.
GEN 25:5 Y e Abraham uyacta que jax e Isaac xeꞌ tuaꞌ uchꞌami tunor lo que ayan tuaꞌ conda axin achamay.
GEN 25:6 Pero conda merato achamay e Abraham ixin uxere cora regalo taca umaxtacobꞌ xeꞌ uchꞌijrse taca e inmojr uwixcar, y de allí utzacre locꞌoyobꞌ najtir tut uyunen Isaac tuaꞌ aturuanobꞌ tama e lugar tiaꞌ atobꞌoy watar e qꞌuin.
GEN 25:7 Pues e Abraham turuan 175 año tama tunor ucuxtar.
GEN 25:8 Entonces conda e Abraham onian winiquix, chamay. Y ixin tuaꞌ aquetpa taca utata viejobꞌirobꞌ xeꞌ turuanobꞌ tama e onian tiempo.
GEN 25:9 Y mujca umen uyunenobꞌ xeꞌ jax e Isaac y e Ismael tama e chꞌen lo que ayan tama e lugar Macpelá xeꞌ aquetpa tuyejtzꞌer e lugar Mamré. Pues e rum era majna tuaꞌ e Efrón xeꞌ uyunen e Zohar xeꞌ tuaꞌ uchꞌajnarir e Het.
GEN 25:10 Pues jax era e rum lo que mambꞌir umen e Abraham tacar uchꞌajnarir e Het. Y yajaꞌ taca mujca e Abraham tuyejtzꞌer tiaꞌ mucbꞌir uwixcar Sara.
GEN 25:11 Pues nacpat que chamay e Abraham, e Isaac chojbꞌesna ut meyra umen e Dios, y ixin turuan tuyejtzꞌer ut e jaꞌ xeꞌ ucꞌabꞌa “Ut e jaꞌ xeꞌ tuaꞌ Tin e Turu xeꞌ Uwiren”.
GEN 25:12 Pues entonces jax era uyunenobꞌ e Ismael xeꞌ jax uyunen e Abraham taca e Agar xeꞌ uman e Sara y xeꞌ ajlugar Egipto.
GEN 25:13 Y ucꞌabꞌobꞌ bꞌan cocha cuxpobꞌ jax era: Ayan e Nebayot xeꞌ jax e yaxar sitz y de allí ayan e Quedar y e Adbeel y e Mibsam
GEN 25:14 y e Mismá y e Dumá y e Masá
GEN 25:15 y e Hadar y e Temá y e Jetur y e Nafís y e Quedmá.
GEN 25:16 Pues jax era ucꞌabꞌobꞌ e doce unembꞌirobꞌ tuaꞌ e Ismael, y bꞌan taca cocha ucꞌabꞌobꞌ y bꞌan quetpa ucꞌabꞌa ulugarobꞌ inteꞌ intiobꞌ ubꞌan. Y inteꞌ intiobꞌ quetpobꞌ ajcꞌotorer tujor ufamilia.
GEN 25:17 Pues e Ismael war ucojco 137 año conda chamay, y ixin tuaꞌ aquetpa taca utata viejobꞌirobꞌ xeꞌ turuanobꞌ tama e onian tiempo.
GEN 25:18 Y uchꞌajnarir e Ismael quetpobꞌ tama e lugar xeꞌ turu tuyuxin e chinam Havilá y tuyuxin e chinam Sur xeꞌ aquetpa tuyejtzꞌer e lugar Egipto tama e bꞌir xeꞌ axin esto tama e lugar Asiria. Y jaxirobꞌ war uchiobꞌ e tzꞌojyir taca ubꞌobꞌ iraj iraj.
GEN 25:19 Pues jax era e checsuyaj tamar lo que numuy tama ucuxtar e Isaac xeꞌ jax uyunen e Abraham.
GEN 25:20 Pues e Isaac war ucojco cuarenta año conda nujbꞌi taca e Rebeca xeꞌ jax uwijchꞌoc e Betuel y sacumbꞌir tuaꞌ e Labán. Pues jaxirobꞌ tuobꞌ uchꞌajnarir e Aram xeꞌ turobꞌ tama e lugar Padán-aram.
GEN 25:21 Pero e Rebeca machi obꞌna achꞌijrtesian, motor que numuy veinte año que nujbꞌabꞌir taca e Isaac. Entonces jaxir cay ucꞌajti taca Cawinquirar Dios tuaꞌ atacarna uwixcar. Y Cawinquirar Dios uyubꞌi lo que ucꞌajti e Isaac tacar, y e Rebeca cꞌotoy quetpa wawan taca uyar.
GEN 25:22 Pero cocha cuach war ucojco e Rebeca, e chꞌurcabꞌobꞌ era cay uyobꞌi ubꞌobꞌ macuir unac. Entonces cay ubꞌijnu y che: “Pues jay bꞌan war uchiobꞌ conda merato acuxpobꞌ, ¿tucꞌa tuaꞌ inxin innumse nibꞌa conda acuxpobꞌ?” xeꞌ che e Rebeca jax taca. Entonces jaxir cay uyubꞌi tuaꞌ Cawinquirar Dios tama tunor era,
GEN 25:23 y Cawinquirar Dios uyare cocha era y che: “Pues tama anac ayan chateꞌ bꞌiqꞌuit maxtac xeꞌ tuaꞌ axin aquetpobꞌ chateꞌ nuquir chinam, y conda axin acuxpobꞌ cꞌani uchiobꞌ e tzꞌojyir iraj iraj. Y inteꞌ chinam cꞌani aqꞌuecꞌo más que inteꞌ, y e ijtzꞌimbꞌir tuaꞌ acꞌotori tujor e yaxar”, che Cawinquirar Dios uyare e Rebeca.
GEN 25:24 Entonces conda cꞌotoy e día tuaꞌ acuxpobꞌ, e Rebeca uwira que erach que cuach.
GEN 25:25 Y xeꞌ cuxpa bꞌajxan chacchac ut y ayan meyra tzutz tama tunor ucuerpo, y tamar era turbꞌana ucꞌabꞌa Esaú xeꞌ war che “Tzutz”.
GEN 25:26 Y de allí cuxpa uwijtzꞌin y chucur usuy uyoc usacun umener, y tamar era turbꞌana ucꞌabꞌa Jacob. Pues e Isaac war ucojco sesenta año conda cuxpobꞌ uyar e Rebeca.
GEN 25:27 Pues entonces chꞌiobꞌ e cuach. Y e Esaú atzay aturuan tama e choquem lugar y cꞌotoy cano corma. Pero e Jacob incꞌun uwirnar y atzay aquetpa tama uyotot xeꞌ chembꞌir taca e bꞌujc.
GEN 25:28 Pues e Esaú más chojresbꞌir ut umen utata xeꞌ jax e Isaac cocha jaxir atzay ucꞌuxi lo que achujca umen e Esaú. Pero e Jacob más atzay eꞌrna umen utuꞌ xeꞌ jax e Rebeca.
GEN 25:29 Pues entonces tama inyajr conda e Jacob war apatna tama e cocina cꞌotoy e Esaú tama uxambꞌar taca meyra winar.
GEN 25:30 Entonces uyare uwijtzꞌin y che: —Quisinic awajqꞌuen imbꞌijc e chacchac quisado lo que war ache, porque nen war inchamay umen e winar, che e Esaú. Y tamar era e Esaú arobꞌna Edom ubꞌan. Pues e ojroner Edom lar uyubꞌnar cocha inteꞌ ojroner hebreo xeꞌ war che “Chacchac”.
GEN 25:31 Entonces ojron e Jacob y che: —Pero bꞌajxan ucꞌani tuaꞌ awajqꞌuen awerencia xeꞌ ajcꞌunet, cocha net jax e yaxar unembꞌiret, che e Jacob.
GEN 25:32 Entonces ojron e Esaú y che: —Pues war inchamay umen e winar. Y jay inxin ani inchamay rajxa era, matucꞌa ucꞌampibꞌir niwerencia taniut motor que yaxar unembꞌiren, che e Esaú.
GEN 25:33 Entonces ojron e Jacob y che: —Bꞌajxan arenen cocha era y che: San tuaꞌ inwajqꞌuet niwerencia, che e Jacob. Entonces bꞌan uche e Esaú y bꞌan cocha era uchoni uyerencia lo que ayan ani tuaꞌ umen que jaxir jax e yaxar sitz, y cꞌotoy quetpa e herencia tuaꞌ e Jacob.
GEN 25:34 Entonces e Jacob uyajcꞌu e Esaú e chacchac guisado y e pan. Y conda cꞌapa weꞌ y cꞌapa uyuchꞌi e vino e Esaú achpa locꞌoy ixin, y machi war ubꞌijnu jay nojta ucꞌampibꞌir lo que quetpa ani tuaꞌ uchꞌami tuaꞌ utata umen que jaxir jax e yaxar unembꞌir.
GEN 26:1 Entonces conda numuy cora tiempo checta inteꞌ nuxi verano tama tunor or e lugar Canaán tiaꞌ turu e Isaac, y matucꞌa e cosecha. Y tamar era checta inteꞌ nuxi winar bꞌan cocha numuy conda turuto e Abraham. Y tamar era ixin e Isaac taca tunor ufamilia esto tama e chinam Guerar tiaꞌ war acꞌotori e Abimelec tujor tin e tuobꞌ uchꞌajnarir e Filisti. Pero warto ubꞌijnu tuaꞌ axin esto tama e lugar Egipto.
GEN 26:2 Pero conda turuto tama e chinam Guerar Cawinquirar Dios uchectes ubꞌa tut e Isaac y uyare cocha era y che: “Pues ira iꞌxin esto tama e lugar Egipto, sino que quetpen tama e lugar tiaꞌ cꞌani inwaret tuaꞌ iquetpa.
GEN 26:3 Y quetpen tama e lugar era, y nen cꞌani inquetpa tacaret y cꞌani inchojbꞌeset, porque cꞌani inwajcꞌu tunor e sian lugarobꞌ era achꞌajnarir. Y bꞌan cocha era cꞌani acꞌapa inche tunor bꞌan taca cocha cay inware atata Abraham que bꞌan tuaꞌ inche tama e pacto lo que cay inche tacar.
GEN 26:4 Y cꞌani inche abꞌoro axin tunor achꞌajnarir este que aquetpobꞌ bꞌan cocha e sian lucero lo que ayan tichan tut e qꞌuin, y cꞌani inwajcꞌuobꞌ tunor e sian lugarobꞌ era. Y cꞌani incꞌampes achꞌajnarir tuaꞌ aquetpobꞌ inteꞌ nuxi chojbꞌesiaj tut tunor e sian gente lo que ayan tama tunor or e rum.
GEN 26:5 Y bꞌan tuaꞌ inche umen que e Abraham cꞌapa ubꞌian taniut y cꞌapa uche tunor lo que inware tuaꞌ uche, y cꞌubꞌseyan tut tunor niwojroner”, che Cawinquirar Dios uyare e Isaac.
GEN 26:6 Entonces e Isaac quetpa tama e chinam Guerar era taca uwixcar y uyunenobꞌ.
GEN 26:7 Y conda e gente xeꞌ ajlugarobꞌ yajaꞌ cay uyubꞌiobꞌ tuaꞌ e Isaac que tucꞌa ubꞌa taca e Rebeca, jaxir uyare que jax uwijtan cocha ayan meyra ubꞌajcꞌut que erer achamesna jay acꞌotoy unatobꞌ e gente era que e Rebeca jax uwixcar, cocha jaxir galan uwirnar. Pero jay ubꞌijnuobꞌ e winicobꞌ que e Rebeca jax uwijtan machi ani tuaꞌ ubꞌijnuobꞌ tuaꞌ uchamse e Isaac tuaꞌ uyubꞌiobꞌ uchꞌamiobꞌ e Rebeca.
GEN 26:8 Pero conda numuy cora tiempo ayan inteꞌ día conda e Abimelec war achꞌujcsan tama e ventana tama uyotot xeꞌ más nojta tichan y uwira que e Isaac war umeqꞌue ubꞌobꞌ taca e Rebeca.
GEN 26:9 Entonces e Abimelec uyare tuaꞌ apejcna e Isaac, y conda cꞌotoy tut, cay ojron e Abimelec y che: —Pues e Rebeca jax ixto awixcar. Entonces ¿tucꞌa tuaꞌ que aware que jaxir jax awijtan? che e Abimelec. Entonces ojron e Isaac y che: —Pues nen cay imbꞌijnu que bꞌajcꞌat axin inchamesna umen e winicobꞌ tara tuaꞌ uyubꞌiobꞌ uqꞌueche axin e Rebeca jay unatobꞌ ani que jaxir jax niwixcar, che e Isaac.
GEN 26:10 Entonces ojron e Abimelec y che: —¿Tucꞌa tuaꞌ que ache cocha era tacaron? Porque bꞌajcꞌat inteꞌ winic ticajam ixin ani tuaꞌ awayan taca awixcar, y tamar era war ani ache acꞌaxi inteꞌ nuxi mabꞌambꞌanir ticajor, che e Abimelec.
GEN 26:11 Entonces e Abimelec uyare tunor e winicobꞌ tama ulugar y che: —Mamajchi tuaꞌ uche unumse ubꞌa e winic era o uwixcar. Pero jay ayan tin e bꞌan uche, ucꞌani tuaꞌ achamesna, che e Abimelec.
GEN 26:12 Entonces tama e año era e Isaac cay uche e pacmar y locꞌoy meyra sian cosecha este que uchꞌami cien ut tama inteꞌ ut semilla lo que upaqꞌui, y bꞌan numuy umen que chojbꞌesna meyra umen Cawinquirar Dios.
GEN 26:13 Y tamar era cꞌotoy quetpa que ayan meyra lo que ayan tuaꞌ e Isaac y cay bꞌoro ixin.
GEN 26:14 Y cay utꞌoxi meyra oveja y meyra wacax y meyra chivo, y ayan meyra sian manobꞌ ubꞌan, y tamar era tin e tuobꞌ uchꞌajnarir e Filisti cay cꞌuxnaqꞌuiobꞌ uwirobꞌ ut e Isaac.
GEN 26:15 Y tamar era cay umaquiobꞌ tunor ut e jaꞌ lo que cay upajniobꞌ umanobꞌ e Abraham ixnix e tiempo y ubꞌutꞌiobꞌ e rum tamar.
GEN 26:16 Entonces e Abimelec uyare e Isaac y che: —Loqꞌuen tama e lugar era, porque net ayan meyra lo que ayan tabꞌa y cꞌotoy quetpet que net ayan más acꞌotorer que non, che e Abimelec uyare Isaac.
GEN 26:17 Entonces locꞌoy e Isaac tama e lugar era y ixin turuan najtir e chinam Guerar, y yajaꞌ taca ujachiobꞌ uyototobꞌ xeꞌ chembꞌir taca e bꞌujc.
GEN 26:18 Y de allí sutpa upajni meyra sian chꞌen xeꞌ pambꞌir ixnix e tiempo umen utata xeꞌ jax e Abraham tiaꞌ umorojse ubꞌa e jaꞌ conda acꞌaxi e jajar. Pues tin e tuobꞌ uchꞌajnarir e Filisti cay umaquiobꞌ tunor e sian chꞌen era conda chamay e Abraham. Y e Isaac sutpa uturbꞌa ucꞌabꞌobꞌ tunor e sian chꞌen bꞌan cocha turbꞌana umen utata.
GEN 26:19 Y ayan inteꞌ día conda war upajniobꞌ inteꞌ chꞌen umanobꞌ e Isaac conda wacchetaca utajwiobꞌ inteꞌ manojo jaꞌ xeꞌ intaca locꞌoy macu rum xeꞌ galan charan ut.
GEN 26:20 Pero tin e ajcojcobꞌ tuaꞌ e Abimelec cay ucꞌaye tin e ajcojcobꞌ tuaꞌ e Isaac, y chenobꞌ que tuobꞌach e chꞌen era tiaꞌ ayan e jaꞌ. Y tamar era e Isaac uturbꞌa ucꞌabꞌa “Qꞌuecraner”, porque cay ucꞌaye ubꞌobꞌ tamar.
GEN 26:21 Y de allí umanobꞌ e Isaac cay upajniobꞌ otronteꞌ chꞌen, y bꞌan taca cocha numuy tama inyajr y bꞌan numuy era otronyajr que umanobꞌ e Abimelec sutpa ucꞌayobꞌ umanobꞌ e Isaac que tuobꞌach e chꞌen era ubꞌan tiaꞌ ayan e jaꞌ. Entonces e Isaac uturbꞌa ucꞌabꞌa e chꞌen era “Qꞌuijnar”.
GEN 26:22 Entonces e Isaac taca tunor ufamilia locꞌoyobꞌ najtir tama e lugar era, y umanobꞌ cay upajniobꞌ otronteꞌ chꞌen tiaꞌ tuaꞌ umorojse ubꞌa e jajar conda acꞌaxi. Y cocha mamajchi umen tuaꞌ acꞌaynobꞌ uturbꞌa ucꞌabꞌa “Rehobot” xeꞌ war che choquem lugar, y che: “Coner Cawinquirar Dios uyajcꞌon inteꞌ choquem lugar tiaꞌ tuaꞌ caquetpa y tiaꞌ erer abꞌoro tunor lo que ayan ticabꞌa”, che e Isaac.
GEN 26:23 Entonces e Isaac ixin esto tama e lugar Beerseba.
GEN 26:24 Y jax tama e bꞌajxan acbꞌar era conda cꞌotoy Cawinquirar Dios tuaꞌ uchectes ubꞌa tut e Isaac y che: “Pues nen jax Udiosiren e Abraham xeꞌ jax atata. Ira ibꞌacta porque nen turen tacaret y cꞌani inchojbꞌeset. Y cꞌani inche abꞌoro meyra tunor achꞌajnarir y cꞌani inchiobꞌ aquetpobꞌ inteꞌ nuxi chinam. Y bꞌan tuaꞌ inche umen que bꞌan inware niman xeꞌ jax e Abraham que san tuaꞌ inche”, che Cawinquirar Dios uyare e Isaac.
GEN 26:25 Entonces e Isaac cay upetzꞌe cora tun tuaꞌ aquetpa inteꞌ altar y cay utattzꞌi ucꞌabꞌa Cawinquirar Dios. Y yajaꞌ taca quetpa tuaꞌ aturuanobꞌ y ujachiobꞌ uyototobꞌ xeꞌ chembꞌir taca e bꞌujc. Y tama e tiempo era umanobꞌ cay upajniobꞌ inteꞌ chꞌen tiaꞌ tuaꞌ umorojse ubꞌa e jaꞌ conda acꞌaxi e jajar.
GEN 26:26 Pues tama inteꞌ día e Abimelec locꞌoy tama ulugar xeꞌ jax e chinam Guerar tuaꞌ acꞌotoy tiaꞌ turu e Isaac tuaꞌ oꞌjron tacar. Y war axana tacar inteꞌ ajcꞌampar tuaꞌ xeꞌ ucꞌabꞌa Ahuzat y e Ficol xeꞌ jax e capitán tuaꞌ e soldadobꞌ.
GEN 26:27 Entonces e Isaac upejca e Abimelec y che: —Pues cocha nox cay ichectes ibꞌa que war ixejbꞌe niut conda ilocsen tama ilugar, ¿tucꞌato tuaꞌ war watox tuaꞌ iwiren? che e Isaac.
GEN 26:28 Entonces e Abimelec sutpa ojron y che: —Pues non war cawira que Cawinquirar Dios war utacret meyra, y tamar era non cay cabꞌijnu que nojta ucꞌampibꞌir tuaꞌ cache inteꞌ acuerdo tacaret. Y e acuerdo lo que cꞌani cache tacaret jax era:
GEN 26:29 Que net matucꞌa tuaꞌ ache capater bꞌan cocha non matucꞌa cay cache apater net, sino que non tzayon cawiret y conda catzacriet tuaꞌ ilocꞌoy tama calugar cache taca e jiriar, y coner Cawinquirar Dios war uchojbꞌeset meyra, che e Abimelec.
GEN 26:30 Entonces e Isaac cay uche inteꞌ nojqꞌuin tacarobꞌ, y tunorobꞌ cay wiobꞌ y cay uchꞌiobꞌ e vino.
GEN 26:31 Y tama inteꞌ día conda sacojpa e Abimelec y e Isaac cay uchiobꞌ e acuerdo que san machi tuaꞌ utzꞌojyru ubꞌobꞌ. Y entonces conda cꞌapa uche tunor e ojroner era ojron e Abimelec y che: “Cꞌani inxin”, che. Y ojron e Isaac y che: “Uyubꞌi”, che e Isaac. Y bꞌan cocha era locꞌoy ixin e Abimelec taca tin e war axanobꞌ tacar taca inteꞌ jiriar.
GEN 26:32 Pues tamar taca e día era yopobꞌ cora man tuaꞌ e Isaac tuaꞌ uchecsuobꞌ tut que utajwiobꞌ e jaꞌ macuir e chꞌen xeꞌ war upajniobꞌ.
GEN 26:33 Y entonces e Isaac uturbꞌa ucꞌabꞌa ut e jaꞌ era Beerseba xeꞌ war che “Pacto tuaꞌ e jiriar”. Y tamar era bꞌan quetpa ucꞌabꞌa e chinam ubꞌan xeꞌ ucꞌabꞌa Beerseba xeꞌ war che “Ut e jaꞌ tuaꞌ e pacto”.
GEN 26:34 Entonces conda e Esaú war ucojco cuarenta año, nujbꞌi taca e Judit xeꞌ jax uwijchꞌoc e Beerí xeꞌ tuaꞌ uchꞌajnarir e Het. Y nujbꞌi ubꞌan taca e Basemat xeꞌ jax uwijchꞌoc e Elón xeꞌ tuaꞌ uchꞌajnarir e Het ubꞌan.
GEN 26:35 Pues e chateꞌ ixictac era uchiobꞌ tuaꞌ unumse ubꞌobꞌ meyra e Isaac y e Rebeca.
GEN 27:1 Pues entonces e Isaac cꞌotoy quetpa onian winic y tajpemix unacꞌut. Entonces tama inteꞌ día upejca e Esaú xeꞌ jax e yaxar uyunen y uyare cocha era y che: —¿Jax ca net Esaú? che e Isaac. Entonces ojron e Esaú y che: —Nen, che e Esaú.
GEN 27:2 Entonces ojron e Isaac cocha era y che: —Pues net war awira que nen onian winiquenix y que bꞌajcꞌat inxin inchamay era.
GEN 27:3 Entonces chꞌama achꞌantꞌin y quiqui tama e cꞌopot y chamsen inteꞌ animal.
GEN 27:4 Y de allí watet oꞌstes inteꞌ caldo xeꞌ intzaj bꞌan cocha unsre tuaꞌ incꞌuxi, y de allí tares taniut. Y conda acꞌapa inweꞌ cꞌani inchojbꞌeset bꞌajxan que axin inchamay, che e Isaac uyare e Esaú.
GEN 27:5 Pero e Rebeca war achiquini tunor lo que war arobꞌna e Esaú umen utata. Entonces conda locꞌoy e Esaú tuaꞌ axin tama e cꞌopot tuaꞌ usicbꞌa inteꞌ animal tuaꞌ uchamse tuaꞌ uyajcꞌu utata,
GEN 27:6 uyare e Jacob y che: —Ubꞌin lo que cꞌani inwaret. Sajmix umbꞌi ojron atata taca asacun Esaú y che cocha era:
GEN 27:7 ‘Quiqui chamsen inteꞌ animal tacꞌopot, y de allí watet oꞌstes inteꞌ caldo xeꞌ intzaj bꞌan cocha unsre tuaꞌ incꞌuxi. Y conda acꞌapa inweꞌ cꞌani inchojbꞌeset tut Niwinquirar Dios bꞌajxan que axin inchamay,’ xeꞌ arobꞌna asacun umen atata, che e Rebeca.
GEN 27:8 Entonces ubꞌin lo que cꞌani inwaret, y ubꞌianen tut lo que cꞌani inwaret.
GEN 27:9 Quiqui tiaꞌ turobꞌ e aracꞌobꞌ macuir e macteꞌ y chamsen chateꞌ bꞌiqꞌuit chivo xeꞌ galan, y tares uwerir taniut y nen tuaꞌ unstes inteꞌ caldo xeꞌ intzaj bꞌan cocha uyusre ucꞌuxi atata.
GEN 27:10 Y de allí jax net xeꞌ tuaꞌ aqꞌueche axin e caldo tut atata tuaꞌ ucꞌuxi, y tamar era jaxir tuaꞌ axin uchojbꞌeset net bꞌajxan que axin achamay, che e Rebeca uyare e Jacob.
GEN 27:11 Entonces e Jacob uyare utuꞌ cocha era y che: —Pero nisacun ayan meyra tzutz tama tunor ucuerpo, y nen matucꞌa.
GEN 27:12 Entonces jay nitata axin upijchꞌien, cꞌani acꞌotoy unata que jax nen y majax nisacun, y de allí axin unata que war inmajresian. Y jay bꞌan anumuy jaxir machi tuaꞌ uchojbꞌesen sino que cꞌani ubꞌaxien, che e Jacob uyare utuꞌ.
GEN 27:13 Entonces ojron utuꞌ otronyajr y che: —Sitz, pues jay bꞌan anumuy, que e bꞌax axin acꞌaxi tama nijor nen. Pero net, chen lo que war inwaret y quiqui tares chateꞌ bꞌiqꞌuit chivo, che e Rebeca uyare e Jacob.
GEN 27:14 Entonces e Jacob ixin uchamse chateꞌ bꞌiqꞌuit chivo y uqꞌueche ixin tut utuꞌ. Entonces e Rebeca uyustes e caldo xeꞌ intzaj bꞌan cocha uyusre ucꞌuxi e Isaac.
GEN 27:15 Y de allí ixin uchꞌami inteꞌ bꞌujc tuaꞌ e Esaú xeꞌ más imbꞌutz uwirnar lo que tꞌabꞌesbꞌir umener tama uyotot, y ixin uyajcꞌu e Jacob tuaꞌ ulapi.
GEN 27:16 Y de allí uchꞌami imbꞌijc uqꞌuewerir e bꞌiqꞌuit chivo, y ucachi tama ut ucꞌabꞌ y tupat unuc tiaꞌ matucꞌa utzutzer e Jacob,
GEN 27:17 y de allí uturbꞌa e caldo xeꞌ intzaj tama ucꞌabꞌ e Jacob taca tunor e pan lo que chena umener.
GEN 27:18 Entonces e Jacob uchꞌami e wiar y ixin tiaꞌ turu utata, y uyare cocha era y che: —Tata, che e Jacob. Y ojron e Isaac y che: —Tara turen. Y ¿chiet net tama e chateꞌ unembꞌir tanibꞌa? che e Isaac.
GEN 27:19 Entonces ojron e Jacob y che: —Pues nen e Esaú xeꞌ jax ayaxar oynen. Pues ixien inche bꞌan cocha awaren. Achpen turuanen tara tuaꞌ acꞌuxi imbꞌijc uwerir e animal lo que inchuqui, y de allí erer awajqꞌuen achojbꞌesiaj, che e Jacob uyare utata.
GEN 27:20 Entonces ojron e Isaac y che: —Sitz, ¿cocha ache tuaꞌ atajwi e animal wacchetaca cocha era? che e Isaac. Entonces ojron e Jacob y che: —Pues Cawinquirar Dios xeꞌ jax Adiosir ixin utacren tuaꞌ inchuqui e animal wacchetaca, che e Jacob uyare utata.
GEN 27:21 Entonces ojron e Isaac otronyajr y che: —Lar taniwejtzꞌer y actanen tuaꞌ impijchꞌiet tuaꞌ innata jay erach que net niunenet Esaú, che e Isaac uyare e Jacob.
GEN 27:22 Entonces e Jacob ixin tuyejtzꞌer utata tuaꞌ asajpna ut umener. Entonces ojron e Isaac y che: “Pues uyubꞌnar awojroner aquetpa bꞌan cocha uyubꞌnar uyojroner e Jacob, pero ut acꞌabꞌ ayan utzutzer bꞌan cocha ayan tama ucꞌabꞌ e Esaú”, che e Isaac uyare e Jacob.
GEN 27:23 Pero cocha tajpemix unacꞌut e Isaac machi cꞌotoy unata jay jax e Jacob xeꞌ uqꞌueche tari e caldo, cocha ayan meyra tzutz tama ut ucꞌabꞌ bꞌan cocha ayan tama ut ucꞌabꞌ e Esaú. Pero conda cꞌanix uyajcꞌu e chojbꞌesiaj
GEN 27:24 sutpato uyubꞌi tuaꞌ otronyajr y che: —¿Erachet canic que jaxet niunenet Esaú? che e Isaac. Entonces sutpa ojron e Jacob otronyajr y che: —Bꞌan yaꞌ. Jaxen e Esaú, che Jacob.
GEN 27:25 Entonces ojron utata y che: —Sitz, tares e caldo lo que ustana amener tama uwerir e animal lo que achuqui. Nen cꞌani incꞌuxi. Y de allí erer inwajqꞌuet e chojbꞌesiaj, che e Isaac uyare e Jacob. Entonces e Jacob uturbꞌa e caldo y e pan tut utata tuaꞌ ucꞌuxi, y uyajcꞌu e vino ubꞌan. Entonces e Isaac ucꞌuxi e caldo y uyuchꞌi e vino,
GEN 27:26 y de allí cay ojron cocha era y che: —Lar taniwejtzꞌer sitz y tzꞌujtzꞌin nicajram, che e Isaac.
GEN 27:27 Pues conda e Jacob cꞌotoy tuyejtzꞌer utata tuaꞌ utzꞌujtzꞌi ucajram, e Isaac uyujtzꞌi ut ubꞌujc e Jacob y unata que bꞌan uyujtzner bꞌan cocha uyujtzner ubꞌujc e Esaú. Entonces uchojbꞌes ut taca e ojroner era y che: “Pues erach que uyujtzner niunen era bꞌan cocha uyujtzner e cꞌopot xeꞌ chojbꞌesbꞌir umen Cawinquirar Dios.
GEN 27:28 Y que e Dios uyebꞌtic taric meyra tijuꞌ lo que ayan tut e qꞌuin tuaꞌ utzꞌayi e rum tuaꞌ alocꞌoy meyra cosecha tamar. Y que locꞌoyic meyra cosecha tama e trigo y tama e uva tuaꞌ alocꞌoy e vino tamar.
GEN 27:29 Pues que tin e aturuanobꞌ tama meyra chinamobꞌ axin aquetpobꞌ manobꞌ tabꞌa y axin acotuanobꞌ toit, y que net tuaꞌ icꞌotori tujor tunor uyarobꞌ atuꞌ, y que tunorobꞌ axin acotuanobꞌ toit, y que tunor tin e axin ubꞌaxietobꞌ axin aquetpobꞌ bꞌaxbꞌirobꞌ ubꞌan, y que tunor tin e axin uchojbꞌesetobꞌ axin aquetpobꞌ chojbꞌesbꞌirobꞌ ubꞌan”, che e Isaac uyare e Jacob.
GEN 27:30 Pero conda e Isaac wartocto acꞌapa uchojbꞌes ut e Jacob, y wartocto alocꞌoy e Jacob macu tiaꞌ turu taca utata, sutpa cꞌotoy e Esaú taca uwerir e animal lo que uchuqui.
GEN 27:31 Y uqꞌueche e caldo lo que ustabꞌir umener lo que quetpa ani tuaꞌ ucꞌuxi utata. Entonces upejca utata cocha era y che: —Tata, achpen tuaꞌ acꞌuxi e caldo lo que unstes tama e animal lo que inchuqui sajmi, tuaꞌ uyubꞌi awajqꞌuen e chojbꞌesiaj, che e Esaú uyare utata.
GEN 27:32 Entonces e Isaac uyubꞌi tuaꞌ y che: —¿Chiet net? che e Isaac. Entonces ojron e Esaú y che: —Nen jaxen e Esaú xeꞌ jax e yaxar unembꞌir tabꞌa, che e Esaú.
GEN 27:33 Entonces e Isaac cꞌotoy unata que majax e Esaú xeꞌ yopa sajmix y xeꞌ uchꞌamix e chojbꞌesiaj, y tamar era cay chincha meyra y cay ojron taca inteꞌ nuxi bꞌajcꞌut y che: —Pues entonces ¿chi xeꞌ utares e caldo sajmix xeꞌ chembꞌir tama inteꞌ animal lo que chujca umener y nen incꞌuxi? Y cocha cꞌapa incꞌuxi tunor era bꞌajxan que net yopet, y de allí cꞌapa inwajcꞌu e chojbꞌesiaj, pues coner jax jaxir xeꞌ quetpa chojbꞌesbꞌir, che e Isaac uyare e Esaú.
GEN 27:34 Pero conda e Esaú uyubꞌi tunor era, cay aru taca inteꞌ nuxi nuc y uyare utata cocha era y che: —Tata, chojbꞌesen nen ubꞌan, che e Esaú uyare utata.
GEN 27:35 Entonces ojron e Isaac y che: —Pues yopix awijtzꞌin sajmi y umajresen y uchꞌamix e chojbꞌesiaj lo que tabꞌa ani, che e Isaac uyare e Esaú.
GEN 27:36 Entonces ojron e Esaú y che: —Pues tamar era turbꞌana ucꞌabꞌa Jacob xeꞌ lar uyubꞌnar bꞌan cocha e ojroner hebreo xeꞌ war che ‘Ajmajresiaj’. Porque jaxir chajrix umajresen cocha era. Pues bꞌajxan ulocse taniut niwerencia xeꞌ ajcꞌunen umen que nen e yaxar unembꞌiren, y era ulocsix otronyajr e chojbꞌesiaj taniut xeꞌ quetpa ani tuaꞌ inchꞌami nen. Y ¿machi ca aquetpa nien inteꞌ chojbꞌesiaj tanibꞌa? che e Esaú uyare utata.
GEN 27:37 Entonces ojron e Isaac y che: —Ubꞌin, nen inwajcꞌuix e cꞌotorer e Jacob tuaꞌ acꞌotori tajor. Y inwajcꞌu tuaꞌ aquetpa manobꞌ tunor afamilia. Y inware ubꞌan que ayanic meyra cosecha tama e trigo y ayanic meyra uva tiaꞌ tuaꞌ alocꞌoy e vino. Y era ¿tucꞌa chojbꞌesiaj erer inwajqꞌuet net, niunenet? che e Isaac uyare e Esaú.
GEN 27:38 Entonces e Esaú sutpa uyubꞌi tuaꞌ utata otronyajr y che: —Tata ¿machi ca uyubꞌi awajqꞌuen nien inteꞌ chojbꞌesiaj? Chojbꞌesen nen ubꞌan, che e Esaú. Y sutpa aru taca inteꞌ nuxi nuc otronyajr.
GEN 27:39 Entonces ojron e Isaac y che: “Pues net aquetpa tuaꞌ ituruan tama inteꞌ lugar tiaꞌ machi alocꞌoy e cosecha, y net tuaꞌ ituruan tama inteꞌ lugar tiaꞌ machi acꞌaxi e tijuꞌ.
GEN 27:40 Y cꞌani achamse meyra gente taca amachit tuaꞌ atajwi tucꞌa tuaꞌ acꞌuxi, y cꞌani iquetpa man tuaꞌ awijtzꞌin. Pero conda axin icꞌoyran iquetpa yebꞌar ucꞌabꞌ awijtzꞌin, cꞌani ixto ilocꞌoy yebꞌar ucꞌotorer”, che e Isaac uyare e Esaú.
GEN 27:41 Pues entonces e Esaú cay uxejbꞌe ut e Jacob meyra umen que ajcꞌuna e chojbꞌesiaj umen utata. Y tamar era cay ubꞌijnu cocha era y che: “Pues watarix e día conda cꞌani caquetpa tzajtaca coit tama uchamer nitata. Pero conda acꞌapa anumuy tunor era, cꞌani ixto inchamse e Jacob yaꞌ”, xeꞌ cay ubꞌijnu e Esaú.
GEN 27:42 Pero conda e Rebeca cꞌotoy unata lo que war ubꞌijnu e Esaú, uyare tuaꞌ apejcna e Jacob y uyare cocha era y che: —Ubꞌin, asacun war ubꞌijnu tuaꞌ uchamset tuaꞌ utoyet tamar lo que ache upater.
GEN 27:43 Y tamar era ubꞌin lo que cꞌani inwaret sitz, loqꞌuen ajnien wacchetaca y quiqui esto tama uyotot niwijtzꞌin Labán xeꞌ turu tama e lugar Harán.
GEN 27:44 Y quetpen tama e lugar yajaꞌ cora tiempo este que axin asisa uqꞌuijnar asacun apater,
GEN 27:45 y este que axin unajpes tunor lo que cay ache upater. Y conda axin asisa uqꞌuijnar asacun nen tuaꞌ inwebꞌta axin inteꞌ checsuyaj tabꞌa tuaꞌ anata que erer isutpa watet esto tara otronyajr. Pero jay machi iꞌxin iyajni tut asacun, entonces jaxir tuaꞌ axin uchamset. Y jay bꞌan uche, entonces ayan tin e tuaꞌ axin uchamse jaxir ubꞌan, y tamar era axin asatpa e chateꞌ niwarobꞌ tama inteꞌ taca día, che e Rebeca.
GEN 27:46 Entonces tama inteꞌ día e Rebeca uyare e Isaac cocha era y che: —Cꞌoyranenix inturuan tara tor e rum, cocha tin e ixcarbꞌirobꞌ tuaꞌ e Esaú chꞌajnarirobꞌ tuaꞌ e Het. Pero jay e Jacob axin anujbꞌi taca inteꞌ ijchꞌoc xeꞌ chꞌajnarir tuaꞌ e Het xeꞌ ajlugar tara tama e lugar Canaán ubꞌan, más ani bueno tuaꞌ taca inxin inchamay rajxa era, che e Rebeca.
GEN 28:1 Entonces e Isaac upejca e Jacob y uchojbꞌes ut. Y de allí uyare cocha era y che: “Machi tuaꞌ inujbꞌi taca inteꞌ ijchꞌoc xeꞌ ajlugar tara Canaán.
GEN 28:2 Sino que quiqui esto tama e lugar Padán-aram esto tama uyotot e Betuel xeꞌ jax atatanoy, y yajaꞌ taca nujbꞌien taca incojt uwijchꞌoc e Labán xeꞌ jax amamaꞌ.
GEN 28:3 Y que Cadiosir xeꞌ ayan meyra ucꞌotorer axin uchojbꞌesiquet y que axin uche abꞌoro meyra achꞌajnarir, y que uche alocꞌoy meyra chinamobꞌ tama achꞌajnarirobꞌ.
GEN 28:4 Y que Cawinquirar Dios uchojbꞌesiquet taca achꞌajnarirobꞌ bꞌan cocha cay uchojbꞌes ut e Abraham tuaꞌ erer ixcꞌotoy ixquetpa ajyumox tama e lugar era tiaꞌ war caturuan bꞌan cocha ajnajtir gention. Porque jax Cawinquirar Dios xeꞌ che que cꞌani uyajcꞌu tunor e rum era e Abraham taca uchꞌajnarir”, che e Isaac uyare e Jacob.
GEN 28:5 Entonces bꞌan cocha era e Isaac uyebꞌta ixin e Jacob esto tama e lugar Padán-aram. Entonces cꞌotoy e Jacob esto tama uyotot e Labán xeꞌ jax uyunen e Betuel xeꞌ tuaꞌ uchꞌajnarir e Aram y xeꞌ jax uwijtzꞌin e Rebeca.
GEN 28:6 Entonces e Esaú cꞌotoy unata lo que arobꞌna e Jacob umen utata y que ebꞌtana ixin esto tama e lugar Padán-aram tuaꞌ anujbꞌi bꞌana. Y cꞌotoy unata ubꞌan que conda cꞌapa chojbꞌesna ut e Jacob que arobꞌna tuaꞌ machi anujbꞌi taca inteꞌ ijchꞌoc xeꞌ ajlugar Canaán.
GEN 28:7 Y de allí cꞌotoy unata que e Jacob ubꞌian tut utata y tut utuꞌ tuaꞌ axin esto tama e lugar Padán-aram bꞌan cocha arobꞌna umenerobꞌ.
GEN 28:8 Y tamar era e Esaú cꞌotoy unata que machi atzayobꞌ utatobꞌ que anujbꞌi uyunenobꞌ taca e ijchꞌoctac xeꞌ ajlugarobꞌ Canaán.
GEN 28:9 Entonces lo que uche e Esaú, ixin tuaꞌ uwarajse e Ismael xeꞌ jax uyunen e Abraham, y uchꞌami inteꞌ uwijchꞌoc xeꞌ ucꞌabꞌa Mahalat tuaꞌ aquetpa uwixcar motor que ayix chateꞌ uwixcar xeꞌ ajlugarobꞌ Canaán. Pues e Mahalat jax uwijtan e Nebayot y sitzbꞌir tuaꞌ e Abraham.
GEN 28:10 Entonces e Jacob locꞌoy tama e lugar Beerseba tuaꞌ axin esto tama e chinam Harán.
GEN 28:11 Y war axana tor e bꞌir conda cay acbꞌare, entonces yajaꞌ taca quetpa tuaꞌ unumse e acbꞌar. Y uchꞌami ingojr tun tuaꞌ aquetpa bꞌan cocha utꞌijribꞌ ujor, y de allí chꞌan wayan.
GEN 28:12 Y cay waycꞌa y tama uwayac uwira que ayan inteꞌ escalera xeꞌ war tama ut e rum y xeꞌ acꞌotoy esto tut e tocar tichan, y uwira que ayan cora uyangelobꞌ e Dios xeꞌ war atꞌabꞌayobꞌ y xeꞌ war ecmayobꞌ tama e escalera era.
GEN 28:13 Y uwira que war Cawinquirar Dios tama ujor e escalera. Entonces Cawinquirar Dios uyare e Jacob y che: “Pues nen jax Awinquiraren Dios xeꞌ ujtzna niut umen atatanoy Abraham y umen atata Isaac ubꞌan. Pues jax nen xeꞌ war inwaret que cꞌani inwajqꞌuet tunor e lugar era y cꞌani aquetpa tuaꞌ tunor achꞌajnarir ubꞌan.
GEN 28:14 Y jaxirobꞌ tuaꞌ acꞌotoy aquetpobꞌ inteꞌ nuxi chinam bꞌan cocha ayan meyra tanlum tara tor e rum, y cꞌani aturuanobꞌ tama tunor or e lugar tama e lado tiaꞌ atobꞌoy watar e qꞌuin, y tama e lado tiaꞌ anamtzꞌa axin e qꞌuin, y tama e lado bꞌana, y tama e lado yajaꞌ. Y tunor e sian chꞌajnarir lo que ayan tama tunor or e rum cꞌani achojbꞌesnobꞌ tamaret y tama achꞌajnarir xeꞌ axin watar ubꞌan.
GEN 28:15 Pues nen cꞌani inquetpa tacaret, y cꞌani incojcuet tic taca tiaꞌ iꞌxin, y cꞌani intareset esto tama e lugar era otronyajr. Y machi tuaꞌ inwactet este que acꞌapa inche tunor lo que war inwaret era”, che Cawinquirar Dios uyare e Jacob tama uwayac.
GEN 28:16 Pues conda e Jacob bꞌixcꞌa, cay ubꞌijnu cocha era y che: “Erach ajchi que Cawinquirar Dios turu tama e lugar era, y nen machi ani innata”, xeꞌ ubꞌijnu e Jacob.
GEN 28:17 Entonces bꞌacta meyra y sutpa ojron jax taca otronyajr y che: “Pues imbꞌacꞌajr uwirnar e lugar era cocha jax e lugar tiaꞌ aturuan e Dios, y jax e ocher tut e qꞌuin ubꞌan”, che e Jacob jax taca.
GEN 28:18 Pues conda sacojpa tama otronteꞌ día, e Jacob ixin uchꞌami e tun lo que cay utꞌiri ujor tamar, y uwabꞌu tuaꞌ aquetpa bꞌan cocha inteꞌ chequerir, y de allí uyari e aceite olivo tamar tuaꞌ aquetpa chequer que erach e tun era tut e Dios.
GEN 28:19 Y uturbꞌa ucꞌabꞌa e lugar era Betel xeꞌ war che uyotot e Dios, motor que arobꞌna ani Luz.
GEN 28:20 Pues jax tama e lugar era tiaꞌ e Jacob cay uche inteꞌ acuerdo taca Cawinquirar Dios y che: “Pues jay Net iꞌxin tacaren y iꞌxin acojcuen tama tunor e xambꞌar lo que war inche era, y jay awajqꞌuen tucꞌa tuaꞌ incꞌuxi y tucꞌa tuaꞌ inlapi,
GEN 28:21 y jay matucꞌa innumse nibꞌa xeꞌ imbꞌacꞌajr uwirnar tor e bꞌir, y jay matucꞌa innumse nibꞌa conda insutpa incꞌotoy tama uyotot nitata, entonces net san tuaꞌ iquetpa Nidiosiret.
GEN 28:22 Y e tun era lo que inwabꞌu cꞌani aquetpa bꞌan cocha inteꞌ chequerir que e lugar tara jax uyotot e Dios. Y tama tunor lo que iꞌxin awajqꞌuen, cꞌani inwajqꞌuet e diezmo tamar”, che e Jacob uyare Cawinquirar Dios.
GEN 29:1 Pues entonces e Jacob cayto xana ixin y cꞌotoy esto tama e lugar xeꞌ aquetpa tama e lado tiaꞌ atobꞌoy watar e qꞌuin.
GEN 29:2 Y conda cꞌotoy tuyejtzꞌer e chinam Harán, uwira que ayan inteꞌ chꞌen xeꞌ bꞌutꞌur taca e jaꞌ tama inteꞌ uyoc chor, y que tuyejtzꞌer e chꞌen era ayan uxteꞌ grupo oveja war ajiriobꞌ. Pues jax e lugar era tiaꞌ cꞌotesnobꞌ e sian aracꞌobꞌ tuaꞌ uyuchꞌiobꞌ e jaꞌ lo que ayan tama e chꞌen. Pero tama utiꞌ e chꞌen ayan ingojr nuxi tun xeꞌ cꞌatar tamar.
GEN 29:3 Y tama inteꞌ inteꞌ día conda tunor e sian oveja acꞌapa umorojse ubꞌobꞌ tut e chꞌen, tin e ajcojcobꞌ oveja ulocsiobꞌ e nuxi tun lo que ayan tutiꞌ e chꞌen tuaꞌ uyubꞌi ulocsiobꞌ e jaꞌ tuaꞌ uyajcꞌobꞌ e sian oveja. Y conda acꞌapa uyuchꞌiobꞌ e jaꞌ, e ajcojcobꞌ asutpa umaquiobꞌ e chꞌen otronyajr.
GEN 29:4 Entonces tama e día era e Jacob uyubꞌi tuaꞌ e ajcojcobꞌ oveja y che: —¿Tiaꞌ ajlugarox nox? che e Jacob. Entonces ojronobꞌ e ajcojcobꞌ oveja y chenobꞌ: —Pues non ajlugaron tama e chinam Harán, chenobꞌ.
GEN 29:5 Entonces ojron e Jacob y che: —Y ¿war ca inata nox chi e Labán xeꞌ unembꞌir tuaꞌ e Nahor? che e Jacob. Entonces jaxirobꞌ chenobꞌ: —Canata ixto yaꞌ, chenobꞌ. Y che e Jacob:
GEN 29:6 —¿Bueno ca turu? che e Jacob. Entonces e ajcojcobꞌ oveja chenobꞌ: —Pues bueno turu. Chꞌujcun awira que tara watar uwijchꞌoc e Labán xeꞌ ucꞌabꞌa Raquel taca uyovejobꞌ, chenobꞌ e ajcojcobꞌ oveja.
GEN 29:7 Entonces ojron e Jacob y che: —Pero era mato jax e hora tuaꞌ camaqui e sian oveja tama umactiobꞌ. ¿Tucꞌa tuaꞌ que machi intaca iwajcꞌu e jaꞌ tuaꞌ uyuchꞌiobꞌ rajxa era, y de allí erer iqꞌueche axin e aracꞌobꞌ esto tiaꞌ ayan e cꞌopot tuaꞌ upojrobꞌ tucꞌa tuaꞌ ucꞌuxiobꞌ? che e Jacob.
GEN 29:8 Pero jaxirobꞌ ojronobꞌ y chenobꞌ: —Machi uyubꞌion cache cocha era. Porque ucꞌani tuaꞌ cacojco este que acꞌapa amorojsena tunor e sian oveja umen uyajcojcobꞌ, y de allí erer calocse e tun tama utiꞌ chꞌen tuaꞌ cawajcꞌu e jaꞌ e sian oveja, chenobꞌ e ajcojcobꞌ.
GEN 29:9 Y warto ojron e Jacob taca e ajcojcobꞌ era conda e Raquel cꞌotoy taca e sian oveja xeꞌ tuaꞌ utata, cocha jax jaxir xeꞌ aquetpa tuaꞌ ucojco.
GEN 29:10 Y conda e Jacob uwira que jax e Raquel xeꞌ war acꞌotoy taca e sian oveja tuaꞌ umamaꞌ Labán, tzay meyra y ixin ulocse e tun wacchetaca lo que cꞌatar tutiꞌ e chꞌen, y cay uyajcꞌu e jaꞌ e sian oveja.
GEN 29:11 Y de allí e Jacob ixin tut e Raquel y utzꞌujtzꞌi ucajram y cay uqꞌui umen e tzayer.
GEN 29:12 Y de allí e Jacob cay uchecsu que jaxir jax uyar e Rebeca y que e Labán jax umamaꞌ. Y entonces e Raquel ajni ixin wacchetaca tuaꞌ uchecsu tunor era tut utata.
GEN 29:13 Y conda e Labán cꞌapa uyubꞌi tunor era y que yaꞌ turu e Jacob xeꞌ jax uyar usacun, locꞌoy ajner tuaꞌ axin utajwi, y umori umeqꞌue y utzꞌujtzꞌi ucajram, y de allí uqꞌueche ixin esto tuyotot. Y entonces e Jacob cay uchecsu tunor lo que numuy tacar tut tin e turobꞌ tama e otot.
GEN 29:14 Entonces ojron e Labán y che: “Pues erach ixto que net familiet tacaren”, che e Labán. Entonces e Jacob quetpa inteꞌ mes tama uyotot e Labán war atacarsan.
GEN 29:15 Y conda cꞌapa e mes era ojron e Labán taca e Jacob y che: —Ma cocha erer ipatna tanibꞌa bꞌan taca umen que familion, sino que ucꞌani tuaꞌ itoytzꞌa tama apatnar. Arenen cobꞌa ucꞌani tuaꞌ intoyet, che e Labán uyare e Jacob.
GEN 29:16 Pues e Labán ayan chateꞌ uwijchꞌoctac. E yaxar ijchꞌoc ucꞌabꞌa Lea y e ijtzꞌimbꞌir ucꞌabꞌa Raquel.
GEN 29:17 Pues e Lea galan unacꞌut, pero e Raquel más galan ustabꞌir tunor uwirnar.
GEN 29:18 Y cocha e Jacob chꞌabꞌna uyalma umen e Raquel, ojron cocha era y che: —Pues nen cꞌani impatna siete año tabꞌa tuaꞌ uyubꞌien innujbꞌi taca awijchꞌoc Raquel xeꞌ jax e ijtzꞌimbꞌir, che e Jacob uyare e Labán.
GEN 29:19 Entonces ojron e Labán y che: —Pues más ani bueno tuaꞌ inwajqꞌuet niwijchꞌoc tuaꞌ machi inwajcꞌu inteꞌ ajnajtir winic. Quetpento tacaren, che e Labán uyare e Jacob.
GEN 29:20 Y bꞌan cocha era e Jacob patna siete año tuaꞌ uyubꞌi anujbꞌi taca e Raquel, pero tut jaxir majax meyra tiempo cocha war uyajta ut meyra e Raquel.
GEN 29:21 Y conda tzꞌacta e siete año e Jacob ixin uyare e Labán cocha era y che: —Ajcꞌunen ixto yaꞌ e Raquel tuaꞌ innujbꞌi tacar, porque tzꞌactix e tiempo lo que quetpa tuaꞌ impatna tamar, che e Jacob uyare e Labán.
GEN 29:22 Entonces e Labán upejca tunor e gente xeꞌ turobꞌ tama e lugar era tuaꞌ aturuanobꞌ tama e nuxi nojqꞌuin lo que cꞌani uche tama e nujbꞌiar.
GEN 29:23 Pero conda acbꞌare y cꞌapix e nojqꞌuin e Labán uqꞌueche ixin e Lea y majax e Raquel tuaꞌ uyajcꞌu e Jacob. Y cocha incsibꞌan e Jacob machi unata jay majax e Raquel era, y ixin wayan taca e Lea.
GEN 29:24 Y e Lea ayix inteꞌ uman ubꞌan xeꞌ ajcꞌuna umen utata xeꞌ ucꞌabꞌa Zilpa.
GEN 29:25 Entonces conda sacojpa e Jacob sutpa uwira ut uwixcar y uwira que jax e Lea xeꞌ wayan tacar y majax e Raquel. Entonces qꞌuijna y achpa wacchetaca tuaꞌ axin oꞌjron taca upixam y che: —¿Tucꞌa tuaꞌ ache cocha era tacaren? Patnen meyra tiempo tacaret tuaꞌ innujbꞌi taca e Raquel. Y sacojpa sajmi inwira que jax e Lea xeꞌ turu taniwejtzꞌer y majax e Raquel. ¿Tucꞌa tuaꞌ que ixiet amajresen? che e Jacob uyare upixam war aqꞌuijna.
GEN 29:26 Entonces ojron e Labán y che: —Pues tama e lugar tara machi tuaꞌ anujbꞌi e ijtzꞌimbꞌir bꞌajxan que e sacumbꞌir.
GEN 29:27 Pero jay net turetix tuaꞌ ipatna otro siete año tanibꞌa tuaꞌ itojma tama e Raquel, bueno. Pero ucꞌani tuaꞌ atzayres e Lea tama tunor e semana era tama e nujbꞌiar, y de allí erer cawajqꞌuet e Raquel ubꞌan tuaꞌ inujbꞌi tacar, che e Labán uyare e Jacob.
GEN 29:28 Entonces e Jacob quetpa de acuerdo taca upixam tuaꞌ apatna otro siete año tacar tuaꞌ uyubꞌi anujbꞌi taca e Raquel. Entonces conda tzꞌacta e semana era tama e nojqꞌuin tama e nujbꞌiar taca e Lea, e Labán uyajcꞌu e Raquel tuaꞌ aquetpa uwixcar e Jacob.
GEN 29:29 Y e Raquel ajcꞌuna ubꞌan inteꞌ uman xeꞌ ucꞌabꞌa Bilhá umen utata.
GEN 29:30 Y e Jacob ixin wayan taca e Raquel, y cay uchojres ut más meyra que e Lea, motor que quetpato tuaꞌ apatna otro siete año taca e Labán tuaꞌ atojma.
GEN 29:31 Pues entonces conda Cawinquirar Dios uwira que e Jacob war uyajta ut más e Raquel que e Lea, uche tuaꞌ achꞌijrtesian e Lea. Pero machi actana tuaꞌ achꞌijrtesian e Raquel.
GEN 29:32 Y e Lea quetpa wawan taca uyar y qꞌuechuan incojt usitz, y uturbꞌa ucꞌabꞌa Rubén. Pues uyubꞌnar e ojroner Rubén lar tacar e ojroner hebreo xeꞌ war che: “Chꞌujcun awira que ayan nisitz.” Y de allí ojron e Lea y che: “Niwinquirar Dios uwira que tzajtaca niut. Y coner que ayan niwar, niviejo axin ixto uyajta niut yaꞌ”, che e Lea.
GEN 29:33 Y de allí e Lea sutpa qꞌuechuan otronteꞌ uyar, y uturbꞌa ucꞌabꞌa Simeón xeꞌ war che “Ayan tin e uyubꞌi ninuc.” Entonces ojron y che: “Niwinquirar Dios uyubꞌi que war axejbꞌna niut, y tamar era uyajqꞌuen otronteꞌ niwar”, che e Lea.
GEN 29:34 Y sutpa qꞌuechuan otronteꞌ uyar y uturbꞌa ucꞌabꞌa Leví xeꞌ war che “Inmejcꞌa”, y tamar era ojron cocha era y che: “Coner más axin umeqꞌuen niviejo umen que ayix uxteꞌ umaxtac tacaren”, che e Lea.
GEN 29:35 Entonces e Lea qꞌuechuan otronteꞌ uyar, y uturbꞌa ucꞌabꞌa Judá xeꞌ war che “Tattzꞌarsiaj”. Y ojron y che: “Pues coner cꞌani intattzꞌi ucꞌabꞌa Niwinquirar Dios”, che e Lea. Y nacpat era machix chꞌijrtesian más.
GEN 30:1 Entonces conda e Raquel cꞌotoy unata que machi obꞌna achꞌijrtesian cay cꞌuxnaqꞌui uwira usacun xeꞌ jax e Lea. Entonces uyare uviejo y che: —Ajcꞌunen niwar. Porque jay majax bꞌan ache, inxin inchamay, che e Raquel.
GEN 30:2 Pero e Jacob qꞌuijna tacar y che: —Pues nen majax Diosen tuaꞌ awaren cocha era. Pues jax jaxir xeꞌ uchiet tuaꞌ machi ichꞌijrtesian, che e Jacob.
GEN 30:3 Entonces ojron Raquel y che: —Pues tara turu niman Bilhá. Erer ituruan tacar tuaꞌ ichꞌijrtesian, y conda jaxir axin aqꞌuechuan uyar, axin aquetpa bꞌan cocha jay nen ani war inchꞌijrtesian. Y bꞌan cocha era axin achecta camaxtac, che e Raquel.
GEN 30:4 Pues bꞌan cocha era e Raquel uyajcꞌu uman Bilhá e Jacob tuaꞌ aquetpa uwixcar ubꞌan. Entonces e Jacob cay wayan taca e Bilhá.
GEN 30:5 Y tamar era quetpa wawan e Bilhá y qꞌuechuan incojt uyar taca e Jacob.
GEN 30:6 Entonces ojron e Raquel y che: “E Dios uyubꞌi lo que cay incꞌajti tacar y uchecsu que imbꞌutz lo que cay inche y uyajqꞌuen incojt niwar. Y tamar era cꞌani inturbꞌa ucꞌabꞌa Dan”, che e Raquel. Pues uyubꞌnar e ojroner Dan lar tacar e ojroner hebreo xeꞌ war che: “E Dios cay ubꞌijnu uwiren y uchecsu que imbꞌutz turen.”
GEN 30:7 Y nacpat era e Bilhá sutpa quetpa wawan otronyajr taca inteꞌ uyar xeꞌ tuaꞌ e Jacob.
GEN 30:8 Entonces ojron e Raquel otronyajr y che: “Pues nisacun war uchien innumse nibꞌa meyra, pero era inchꞌancabꞌesix. Y cꞌani inturbꞌa ucꞌabꞌa e sitz era Neftalí”, che e Raquel. Pues uyubꞌnar e ojroner Neftalí lar tacar e ojroner hebreo xeꞌ war che: “Qꞌuecꞌojsiaj.”
GEN 30:9 Entonces conda e Lea uwira que machixto obꞌna achꞌijrtesian, uyare e Jacob tuaꞌ uchꞌami uman Zilpa tuaꞌ anujbꞌi tacar.
GEN 30:10 Y tamar era e Zilpa uchꞌijrse incojt uyar taca e Jacob.
GEN 30:11 Entonces ojron e Lea y che: “Pues jax inteꞌ nuxi chojbꞌesiaj taniut, y tamar era axin caturbꞌa ucꞌabꞌa Gad”, che e Lea. Pues uyubꞌnar e ojroner Gad lar tacar e ojroner hebreo xeꞌ war che: “Chojbꞌesiaj”.
GEN 30:12 Entonces e Zilpa uchꞌijrse otro incojt uyar taca e Jacob.
GEN 30:13 Entonces ojron e Lea y che: “War intzay meyra, y bꞌan tuaꞌ axin uyarenobꞌ e ixictac ubꞌan que ayan meyra nitzayer. Y tamar era axin caturbꞌa ucꞌabꞌa Aser”, che e Lea. Pues uyubꞌnar e ojroner Aser lar tacar e ojroner hebreo xeꞌ war che “Tzayer”.
GEN 30:14 Pues tama inteꞌ día e Rubén ixin innajt cora tiaꞌ war achempa cosechar e trigo, y yajaꞌ taca utajwi cora uyutir e teꞌ xeꞌ ucꞌabꞌa mandrágoras xeꞌ utacre e ixictac tuaꞌ uyubꞌi achꞌijrtesianobꞌ, y uqꞌueche ixin tuaꞌ uyajcꞌu utuꞌ xeꞌ jax e Lea. Pero conda e Raquel cꞌotoy uwira que e Lea uchꞌamix cora uyutir e teꞌ era uyare cocha era y che: —Ajcꞌunen chagojr uyutir e teꞌ yax xeꞌ taresna umen asitz, che e Raquel uyare e Lea.
GEN 30:15 Entonces ojron e Lea y che: —Pues nen war innumse nibꞌa umen que alocsix niviejo. Y era war abꞌijnu tuaꞌ alocse ubꞌan uyutir e teꞌ era lo que taresna umen nisitz, che e Lea uyare e Raquel. Entonces ojron e Raquel y che: —Pues jay net awajqꞌuen uyutir e teꞌ era lo que taresna umen asitz, erer awayan e Jacob tacaret tama e acbꞌar coner, che e Raquel uyare e Lea. Entonces e Lea quetpa de acuerdo.
GEN 30:16 Entonces war acbꞌare conda sutpa cꞌotoy e Jacob tama upatnar. Entonces locꞌoy tajwina umen e Lea xeꞌ uyare cocha era y che: —Pues coner ucꞌani tuaꞌ iwayan tacaren cocha sajmi taresna cora uyutir e teꞌ xeꞌ ucꞌabꞌa mandrágoras umen nisitz y nen inwajcꞌu e Raquel tuaꞌ intoyi tuaꞌ uyacten inwayan tacaret, che e Lea uyare e Jacob. Entonces tama e acbꞌar era wayan e Jacob taca e Lea.
GEN 30:17 Y bꞌan cocha cay ucꞌajti e Lea taca e Dios, y bꞌan numuy que cꞌotoy quetpa wawan taca uyar otronyajr, y tamar era tzꞌacta cinco umaxtac taca e Jacob.
GEN 30:18 Entonces ojron e Lea y che: “Pues e Dios uyajqꞌuenix nituanibꞌir umen que inwajcꞌu niman tuaꞌ aquetpa uwixcar niviejo, y tamar era cꞌani caturbꞌa ucꞌabꞌa e sitz Isacar”, che e Lea. Pues uyubꞌnar e ojroner Isacar lar tacar e ojroner hebreo xeꞌ war che “Tuanibꞌir”.
GEN 30:19 Y de allí e Lea cꞌotoy quetpa wawan taca otronteꞌ uyar.
GEN 30:20 Entonces ojron y che: “Pues e Dios uyajqꞌuenix lo que galan uwirnar. Y tamar era niviejo axin uyajta niut más meyra umen que inchꞌijrsix seis uyunenobꞌ. Y tamar era cꞌani caturbꞌa ucꞌabꞌa Zabulón”, che e Lea. Pues uyubꞌnar e ojroner Zabulón lar tacar e ojroner hebreo xeꞌ war che “Sijpar lo que chꞌajma”.
GEN 30:21 Y nacpat tunor era e Lea qꞌuechuan inteꞌ uwijchꞌoc y uturbꞌa ucꞌabꞌa Dina.
GEN 30:22 Pero e Dios cay ubꞌijnu tama e Raquel y uyubꞌi lo que cay ucꞌajti tacar, y tamar era uyacta tuaꞌ achꞌijrtesian.
GEN 30:23 Entonces e Raquel ucuxi inteꞌ uyar, y che cocha era: “Pues e Dios ulocsix e subꞌar lo que ayan ani tamaren y coner uyubꞌien inchꞌijrtesian”, che e Raquel.
GEN 30:24 Y uturbꞌa ucꞌabꞌa José. Entonces ojron e Raquel y che: “Incꞌajti taca e Dios tuaꞌ asutpa uyajqꞌuen otronteꞌ niwar”, che e Raquel. Pues uyubꞌnar e ojroner José lar tacar e ojroner hebreo xeꞌ war che “Tzꞌacbꞌir”.
GEN 30:25 Pues conda e Raquel cꞌapa ucuxi e José, e Jacob uyare e Labán cocha era y che: —Actanen tuaꞌ insutpa inxin esto tama nilugar.
GEN 30:26 Pues net anata que patnen meyra año tacaret. Entonces actanen tuaꞌ inqꞌueche axin niwixcarobꞌ y nimaxtacobꞌ xeꞌ cay patnen meyra año tuaꞌ intoyi tamar, che e Jacob uyare e Labán.
GEN 30:27 Entonces ojron e Labán y che: —Pues jay itzay awiren quisinic que iquetpa tara tacaren. Pues cꞌotoyen umbꞌi tuaꞌ inteꞌ xeꞌ obꞌna aqꞌuini que war inchojbꞌesna umen Cawinquirar Dios umen taca que net turet tacaren.
GEN 30:28 Arenen cobꞌa acꞌani tuaꞌ intoyet tuaꞌ iquetpa tara tacaren, y bꞌan tuaꞌ intoyet, che e Labán uyare e Jacob.
GEN 30:29 Entonces ojron e Jacob y che: —Pues net war anata cocha cay patnen tabꞌa y cocha cay incojco tunor awaracꞌobꞌ tuaꞌ abꞌoruobꞌ meyra.
GEN 30:30 Porque conda yopen tara chacojt taca ayan ani awaracꞌobꞌ, y era ayan meyra awaracꞌobꞌ. Y tamar era chequer que umen taca que turen tacaret que Cawinquirar Dios war uchojbꞌeset meyra, pero era ucꞌani tuaꞌ acay imbꞌijnu impatna tanibꞌach tuaꞌ uyubꞌien intacre nifamilia, che e Jacob uyare e Labán.
GEN 30:31 Entonces ojron e Labán otronyajr y che: —¿Jayteꞌ acꞌani tuaꞌ intoyet? che e Labán. Y ojron e Jacob y che: —Machi incꞌani tuaꞌ atoyen nien imbꞌijc. Pero jay aquetpa imbꞌutz toit lo que cꞌani inwaret era, ererto incojco awaracꞌobꞌ.
GEN 30:32 Quisinic awacten tuaꞌ innumuy tujam tunor awaracꞌobꞌ tama e día coner tuaꞌ inlocse tunor e chuchuꞌ oveja xeꞌ incsibꞌan ut y xeꞌ bꞌonem ut y xeꞌ sarin ut, y tunor e chuchuꞌ chivo xeꞌ bꞌonem ut y xeꞌ sarin ut tuaꞌ aquetpa tanibꞌa. Y jax taca tuaꞌ aquetpa nituanibꞌir.
GEN 30:33 Y entonces desde coner erer iꞌxin awira que erachen conda watet tuaꞌ awira tunor niwaracꞌobꞌ. Porque jay atajwi tujam tunor niwaracꞌobꞌ yer inteꞌ chivo xeꞌ majax bꞌonem ut o xeꞌ majax sarin ut, o jay atajwi inteꞌ chuchuꞌ oveja xeꞌ majax incsibꞌan ut, entonces tamar era erer anata que cꞌapa inxujchꞌi lo que tabꞌa, che e Jacob uyare e Labán.
GEN 30:34 Entonces ojron e Labán y che: —Bueno pue, imbꞌutz taniut tunor lo war awaren era, che e Labán.
GEN 30:35 Pero e Labán machi uyajcꞌu tunor e aracꞌobꞌ lo que war acꞌajtna umen e Jacob, sino que tamar taca e día era ixin tuaꞌ uxere tunor utata e chivo xeꞌ bꞌonem ut y xeꞌ sarin ut, y uxere tunor utuꞌ e chivo xeꞌ bꞌonem ut y xeꞌ sarin ut, y uxere tunor e chivo xeꞌ ayan imbꞌijc e sacsac tamar, y uxere ubꞌan tunor e chuchuꞌ oveja xeꞌ incsibꞌan ut. Pues tunor e aracꞌobꞌ era cꞌapa uxere y uyare uyunenobꞌ tuaꞌ ucojcobꞌ najtir tut e inmojr aracꞌobꞌ xeꞌ tuach.
GEN 30:36 Y de allí e Labán uqꞌueche ixin tunor e sian aracꞌobꞌ era innajt cora esto tama inteꞌ lugar xeꞌ uwajpi uxteꞌ día tuaꞌ acꞌotoy. Pues jaxir war ucꞌani tuaꞌ aquetpobꞌ innajt tunor e aracꞌobꞌ era xeꞌ intiach uwirnar tut e Jacob y tunor e inmojr oveja xeꞌ sacsac ut y e chivo xeꞌ incsibꞌan ut lo que war acojcna umener. Pues entonces e Jacob quetpato tut e Labán tuaꞌ ucojco tunor uyaracꞌobꞌ era.
GEN 30:37 Pero ayix inteꞌ ubꞌijnusiaj cocha tuaꞌ uche abꞌoro e aracꞌobꞌ xeꞌ tuaꞌ aquetpa tuach. Y tamar era ixin uchꞌaqui cora ucꞌabꞌ teꞌ xeꞌ verde xeꞌ aquetpa sacsac ut conda aloqꞌuesna upat, y ususi cora cora upat ucꞌabꞌ e teꞌ era tuaꞌ aquetpa chequer que ayan imbꞌijc xeꞌ sacsac ut y que ayan imbꞌijc xeꞌ aquetpa taca upat xeꞌ incsibꞌan ut.
GEN 30:38 Y de allí ixin uwabꞌu ucꞌabꞌ teꞌ era tut e lugar tiaꞌ uyuchꞌiobꞌ e jaꞌ e aracꞌobꞌ.
GEN 30:39 Pues yajaꞌ taca jax e lugar tiaꞌ utuꞌ e oveja y utata e oveja uchꞌami ubꞌobꞌ, y cocha war uwirobꞌ ucꞌabꞌ e teꞌ xeꞌ rayado ut conda war uchꞌami ubꞌobꞌ, ixin locꞌoy uyarobꞌ xeꞌ sarin ut o xeꞌ bꞌonem ut o xeꞌ incsibꞌan ut.
GEN 30:40 Y de allí inyajr inyajr conda axin acuxpa inteꞌ chuchuꞌ oveja xeꞌ intiach uwirnar cocha era uxere y uturbꞌa tujam e inmojr aracꞌobꞌ xeꞌ sarin utobꞌ y xeꞌ incsibꞌan utobꞌ. Y de allí conda achecta e hora conda aquetpobꞌ embrama utuꞌ e aracꞌobꞌ xeꞌ intiach uwirnarobꞌ xeꞌ tuaꞌ e Labán, e Jacob ixin uturbꞌa tunor e chuchuꞌ oveja xeꞌ intiach uwirnarobꞌ tutobꞌ, y tamar era uche acuxpobꞌ intiach uwirnarobꞌ uyarobꞌ. Y bꞌan cocha era e Jacob cꞌotoy ubꞌorojse tunor e sian aracꞌobꞌ xeꞌ aquetpa tuach.
GEN 30:41 Y inyajr inyajr conda e Jacob uwira que incojt oveja war aquetpa embrama xeꞌ más aqꞌuecꞌo, jaxir ixin uwabꞌu inteꞌ ucꞌabꞌ teꞌ tut e lugar tiaꞌ uyuchꞌi e jaꞌ, y bꞌan cocha era e aracꞌobꞌ uwirobꞌ ucꞌabꞌ e teꞌ yajaꞌ taca conda war uchꞌami ubꞌobꞌ.
GEN 30:42 Pero conda e Jacob uwira incojt arac xeꞌ cꞌox aquetpa embrama machi uwabꞌu ucꞌabꞌ e teꞌ tut. Y tamar era e aracꞌobꞌ xeꞌ cꞌox quetpobꞌ tuaꞌ e Labán, y e aracꞌobꞌ xeꞌ aqꞌuecꞌo quetpobꞌ tuaꞌ e Jacob.
GEN 30:43 Y bꞌan cocha era e Jacob cꞌotoy quetpa que meyra ayan lo que ayan tuaꞌ, y ayan meyra uyoveja, y ayan meyra umanobꞌ xeꞌ winicobꞌ y xeꞌ ixictac, y ayan meyra uyaracꞌobꞌ xeꞌ ucꞌabꞌa camello, y ayan ubꞌan meyra chij.
GEN 31:1 Pues entonces e Jacob cꞌotoy unata que uyunenobꞌ e Labán war axana oꞌjronobꞌ upater cocha era y chenobꞌ: “E Jacob cꞌapa uchꞌami meyra lo que tuaꞌ ani catata, y coner ayan ixto meyra utumin”, xeꞌ chenobꞌ uyunenobꞌ e Labán.
GEN 31:2 Y e Jacob uwira ubꞌan que machixto war atzay eꞌrna umen e Labán, bꞌan cocha acay atzay ani eꞌrna umener.
GEN 31:3 Entonces Cawinquirar Dios uyare e Jacob y che: “Sutpen quiqui esto tama ulugar atata tiaꞌ aturuanobꞌ tunor apiarobꞌ, y nen tuaꞌ inquetpa tacaret”, che Cawinquirar Dios uyare e Jacob.
GEN 31:4 Entonces e Jacob uyare tuaꞌ apejcnobꞌ e Raquel y e Lea tuaꞌ acꞌotoyobꞌ tiaꞌ turu jaxir tama e lugar tiaꞌ war ucojco e aracꞌobꞌ.
GEN 31:5 Entonces conda cꞌotoyobꞌ, jaxir uyare e Raquel y Lea cocha era y che: —Pues cꞌotoy innata que machixto war atzay uwiren itata bꞌan cocha cay tzay uwiren ani ixnix, pero e Dios xeꞌ ujtzna ut umen nitata war utacren iraj iraj.
GEN 31:6 Y nox war inata que cꞌapa inturbꞌa nibꞌa tuaꞌ inche tunor upatnar itata.
GEN 31:7 Pero lo que uche jaxir, ixin umajresen y ixin uche aquetpa intiach lo que quetpa tuaꞌ utoyen inyajr inyajr. Pero Cawinquirar Dios machi uyacta tuaꞌ uche e mabꞌambꞌanir nipater.
GEN 31:8 Pues lo que cay uche itata tacaren jax era: Ayan inyajr conda uyaren y che: ‘Cꞌani intoyet taca tunor e aracꞌobꞌ xeꞌ bꞌonem utobꞌ,’ xeꞌ che itata tacaren. Y entonces Cawinquirar Dios uche tuaꞌ alocꞌoy bꞌonem utobꞌ meyra uyarobꞌ e oveja. Y de allí sutpa uyaren otronyajr itata y che: ‘Machixto cꞌani intoyet taca e aracꞌobꞌ xeꞌ bꞌonem utobꞌ, sino que coner cꞌani intoyet taca e aracꞌobꞌ xeꞌ sarin utobꞌ,’ xeꞌ che uyaren itata otronyajr. Y entonces Cawinquirar Dios sutpa uche tuaꞌ alocꞌoy sarin utobꞌ meyra oveja otronyajr.
GEN 31:9 Y bꞌan cocha era Cawinquirar Dios cay ulocse uyaracꞌobꞌ itata tuaꞌ asutpa uyajqꞌuen.
GEN 31:10 “Pues tama inyajr conda quetpobꞌ embrama tunor e aracꞌobꞌ cay inwira inteꞌ niwayac, y inwira que ayan cora utata e chivo xeꞌ war uchꞌami ubꞌobꞌ taca cora utuꞌ e chivo xeꞌ sarin utobꞌ y xeꞌ bꞌonem utobꞌ.
GEN 31:11 Y tama niwayac ayan inteꞌ ángel tuaꞌ Cawinquirar Dios xeꞌ upejquen tama nicꞌabꞌa, y nen inware: ‘Tara turen,’ inware.
GEN 31:12 Entonces e ángel uyaren y che: ‘Chꞌujcun awira que tunor utata e chivo xeꞌ war uchꞌami ubꞌobꞌ era taca utuꞌ e chivo aquetpobꞌ sarin utobꞌ y bꞌonem utobꞌ y cusum utobꞌ. Y bꞌan war inche anumuy umen que inwirix tunor e majresiaj lo que war uche e Labán tacaret.
GEN 31:13 Pues nen jax Adiosiren xeꞌ cay inchectes nibꞌa toit tama e chinam Betel tiaꞌ cay ayari e aceite olivo tama e tun xeꞌ wabꞌubꞌir amener y tiaꞌ cay ache inteꞌ acuerdo tacaren. Pues coner cꞌani inwaret tuaꞌ ilocꞌoy tama e lugar era y tuaꞌ isutpa iꞌxin esto tama e lugar tiaꞌ cuxpet,’ che uyaren e ángel tuaꞌ Cawinquirar Dios tama niwayac”, che e Jacob uyare e Raquel y e Lea.
GEN 31:14 Entonces e Raquel y e Lea ojronobꞌ y chenobꞌ: —Pues non mix tucꞌa nien imbꞌijc herencia aquetpa tuaꞌ cachꞌami tuaꞌ catata conda axin achamay.
GEN 31:15 Y jaxir war uchion canumse cabꞌa bꞌan ani cocha jay ajnajtir gention. Y esto que ixin uchonion y de allí cꞌapa usati tunor lo que toybꞌir amener tuaꞌ inujbꞌi tacaron.
GEN 31:16 Pues tunor lo que Cadiosir war ulocse tut catata ticabꞌa ani y tuaꞌ camaxtac. Entonces chen tunor lo que Cawinquirar Dios war uyaret tuaꞌ ache, che e Raquel y e Lea.
GEN 31:17 Pues entonces e Jacob cay uyustes ubꞌa tuaꞌ alocꞌoy y uyare umaxtac y uwixcarobꞌ tuaꞌ aturuanobꞌ tupat e camellobꞌ.
GEN 31:18 Y de allí umorojse tunor e aracꞌobꞌ y cay uxantesobꞌ y uqꞌueche ixin tunor lo que cay umorojse tama e tiempo era conda turu tama e lugar Padán-aram, y locꞌoy tuaꞌ asutpa axin esto tama e lugar Canaán tiaꞌ aturuan e Isaac xeꞌ jax utata.
GEN 31:19 Pero conda merato alocꞌoyobꞌ, e Raquel uwira que machi turu utata cocha ixin tuaꞌ ususi utzutzer cora oveja, y tamar era ochoy macuir uyotot utata y uxujchꞌi cora chamen dios tuaꞌ.
GEN 31:20 Y bꞌan cocha era e Jacob cꞌotoy umajres e Labán xeꞌ tuaꞌ uchꞌajnarir e Aram, y machi uchecsu tut que cꞌani alocꞌoy.
GEN 31:21 Entonces locꞌoy ajni e Jacob taca tunor ufamilia y tunor lo que ayan tuaꞌ. Y conda numuyobꞌ teinxejr bꞌana tama e xucur Éufrates, xana ixiobꞌ tuaꞌ acꞌotoyobꞌ tama cora witzir xeꞌ ucꞌabꞌa Galaad.
GEN 31:22 Pues tama e uxteꞌ día, e Labán cꞌotoy unata que locꞌoy ajni e Jacob.
GEN 31:23 Entonces cay ubꞌijnu tuaꞌ axin usicbꞌa e Jacob, y tamar era ixin umorojse cora upiarobꞌ tuaꞌ axiobꞌ tacar. Y conda tzꞌacta siete día que war axanobꞌ, cꞌotoyobꞌ tama cora witzir xeꞌ ucꞌabꞌa Galaad.
GEN 31:24 Pero tama e acbꞌar era Cawinquirar Dios uchectes ubꞌa tut e Labán tama inteꞌ uwayac y che: “Conda atajwi abꞌa taca e Jacob machi tuaꞌ iyojron taca inteꞌ qꞌuijnar conda apejca”, che Cawinquirar Dios uyare e Labán tama uwayac.
GEN 31:25 Entonces e Labán utajwi ubꞌa taca e Jacob tama e witzir Galaad xeꞌ jax e lugar tiaꞌ war aquetpa e Jacob taca ufamilia. Y e Labán ujachi uyotot ubꞌan xeꞌ chembꞌir taca e bꞌujc tuaꞌ aturuan tamar taca tin e war axanobꞌ tacar.
GEN 31:26 Entonces ixin e Labán tuaꞌ oꞌjron taca e Jacob y che: —¿Tucꞌa tuaꞌ que ache cocha era tacaren? Y ¿tucꞌa tuaꞌ que ixiet amajresen cocha era? Pues aqꞌueche locꞌoyobꞌ niwijchꞌoctac bꞌan ani cocha jay war alocsiobꞌ tama inteꞌ tzꞌojyir.
GEN 31:27 Y ¿tucꞌa tuaꞌ que locꞌoy ajniet mucur taca? Pues machi achecsu taniut que cꞌani ilocꞌoy. Jay innata ani que cꞌanix ilocꞌoy inche ani inteꞌ nuxi nojqꞌuin taca e lajbꞌar y e tambor y e arpa.
GEN 31:28 Pues machi awacten nien tuaꞌ intzꞌujtzꞌi ucajram niwijchꞌoctac y nien tuaꞌ intzꞌujtzꞌi ucajram nisitzꞌobꞌ. Pues tunor lo que ache matucꞌa ucꞌampibꞌir inyajrer taniut.
GEN 31:29 Pues nen turenix ani tuaꞌ inche e tzꞌojyir tacaret, pero tama e acbꞌar sajmi e Dios xeꞌ oꞌjtzna ut umen atata upejquen y uyaren cocha era y che: ‘Conda atajwi abꞌa taca e Jacob machi tuaꞌ iyojron taca inteꞌ qꞌuijnar conda apejca,’ che uyaren e Dios.
GEN 31:30 Pues jay war ani oꞌsre isutpa iꞌxin tama uyotot atata, pues bueno. Pero ¿tucꞌa tuaꞌ que ixiet axujchꞌi nidiosobꞌ? che e Labán uyare e Jacob.
GEN 31:31 Entonces e Jacob uyare e Labán cocha era y che: —Pues nen inche cocha era umen e bꞌajcꞌut. Porque cay imbꞌijnu que jay inwaret ani que cꞌani inlocꞌoy, bꞌajcꞌat iꞌxin alocse awijchꞌoctac taniut.
GEN 31:32 Pues jay ayan tin e qꞌuecher adiosobꞌ umener xeꞌ turobꞌ tara, ucꞌani tuaꞌ achamesna. Pues jax capiarobꞌ era xeꞌ tuaꞌ aquetpobꞌ ajchecsuyajobꞌ tama tunor era. Lar sicbꞌan tuaꞌ awira jay ayan lo que tabꞌa. Y jay atajwi chꞌama qꞌueche chic, che e Jacob uyare e Labán. Pero e Jacob machi war unata que jax e Raquel xeꞌ uxujchꞌi e chamen diosobꞌ tuaꞌ utata.
GEN 31:33 Entonces e Labán ochoy usicbꞌa macuir uyotot e Jacob, y de allí ochoy usicbꞌa tama uyotot e Lea y tama uyotot umanobꞌ e Lea. Pero matucꞌa utajwi. Entonces locꞌoy tama uyotot e Lea y ixin ochoy tama uyotot e Raquel.
GEN 31:34 Pero e Raquel, cocha jax jaxir xeꞌ cay uxujchꞌi e chamen diosobꞌ tuaꞌ utata, cay umuqui wacchetaca yebꞌar uturibꞌ e camello tiaꞌ turu tor e rum, y de allí ixin turuan tujor. Entonces conda ochoy e Labán tama e otot tuaꞌ upojro e chamen diosobꞌ, matucꞌa utajwi.
GEN 31:35 Entonces ojron e Raquel y che: —Tata, ira iqꞌuijna umen que machi anchpa tiaꞌ turen cocha majax imbꞌutz turen era, che e Raquel. Entonces e Labán usicbꞌa tama tunor e otot, pero matucꞌa utajwi.
GEN 31:36 Entonces e Jacob qꞌuijna y cay ucꞌaye e Labán cocha era y che: —¿Tucꞌa mabꞌambꞌanir cay inche? Y ¿tucꞌa tuaꞌ que tariox ticapat cocha era taca inteꞌ nuxi qꞌuijnar?
GEN 31:37 Pojremetix tama tunor lo que ayan ticabꞌa, y ¿tucꞌa atajwix xeꞌ tabꞌa? Turbꞌan tara tut apiarobꞌ y tut nipiarobꞌ jay ayan lo que atajwix, y jaxirobꞌ tuaꞌ ubꞌijnuobꞌ uwira chi tamar tuaꞌ acꞌaxi e jatzꞌuar.
GEN 31:38 Pues nen patnen veinte año tacaret, y tama tunor e tiempo era ma tiaꞌ cꞌaxariobꞌ e oveja y nien e chivo. Y ma tiaꞌ cay incꞌuxi nien incojt utata oveja.
GEN 31:39 Y ma tiaꞌ intares toit inteꞌ arac xeꞌ chamesna umen inteꞌ ajcꞌopot animal, sino que nen quetpen tuaꞌ insuti uyeror. Y jay axujchna incojt arac tama e día o tama e acbꞌar, net achien tuaꞌ insuti uyeror.
GEN 31:40 Pues tama e día ayan conda cꞌanix inchamay umen e calor, y tama e acbꞌar ayan conda cꞌani inchamay umen e sisar, y conda aquetpa ani tuaꞌ inwayan esto que machi uyubꞌien inwayan.
GEN 31:41 Pues veinte año turuanen tama oꞌtot, y jax era lo que aquetpa tuaꞌ inchꞌami: Patnen catorce año tacaret tuaꞌ intoyi awijchꞌoctac, y de allí patnen seis año tuaꞌ intoyi e aracꞌobꞌ lo que inchꞌami tabꞌa. Y iraj iraj war awemse e tuanibꞌir lo que quetpa ani tuaꞌ inchꞌami.
GEN 31:42 Pues jay Nidiosir, xeꞌ jax e Dios xeꞌ ujtzna ut umen nitata viejo Abraham y xeꞌ ujtzna ut umen nitata Isaac, jay jaxir machi ani aquetpa tacaren y jay machi ani utacren iraj iraj, nen innata que machi ani intojya nien imbꞌijc amener tama tunor e nuxi patnar lo que cay inche tacaret. Pero Niwinquirar Dios uwira cobꞌa cay innumse nibꞌa y cobꞌa patnar cay inche tacaret, y tamar era jaxir cꞌotoy tuaꞌ uwarajset acbꞌar acbꞌi tuaꞌ uchecsu toit que mabꞌambꞌan lo que ache tacaren, che e Jacob uyare e Labán.
GEN 31:43 Entonces e Labán uyare e Jacob y che: —Pues e ixictac era jax niwijchꞌoctac, y e maxtacobꞌ era jax nisitzꞌobꞌ, y tunor e sian oveja lo que ayan tara tanibꞌa ubꞌan. Pues tunor lo que erer awira tama tunor or e lugar era aquetpa tanibꞌa. Pero coner ¿tucꞌa canic tuaꞌ uyubꞌien inche taca niwijchꞌoctac y umaxtacobꞌ tuaꞌ inchiobꞌ aquetpobꞌ tacaren? Matucꞌa.
GEN 31:44 Entonces cocha matucꞌa más tuaꞌ inche, cachic inteꞌ acuerdo tuaꞌ cacojco e jiriar net y nen, y cachic lo que erer utacrion tuaꞌ cacꞌajpes e acuerdo era, che e Labán uyare e Jacob.
GEN 31:45 Entonces e Jacob uchꞌami ingojr tun bꞌan cocha obꞌna uchꞌuyi inteꞌ winic, y ujachi uwabꞌu tuaꞌ aquetpa bꞌan cocha inteꞌ chequerir.
GEN 31:46 Entonces e Jacob uyare tin e turobꞌ tacar y che: —Morojsenic cora tun, che e Jacob. Y entonces tunorobꞌ cay umorojse uturbꞌobꞌ e sian tun, y yajaꞌ taca cay wiobꞌ.
GEN 31:47 Pues e Labán uturbꞌa ucꞌabꞌa e sian tun xeꞌ morojsena “Jegar Sahadutá” bꞌan cocha che tama e ojroner arameo xeꞌ war che “E tun xeꞌ uchion cacꞌajpes”, y e Jacob uturbꞌa ucꞌabꞌa “Galaad” xeꞌ bꞌan che tama e ojroner hebreo.
GEN 31:48 Entonces ojron e Labán y che: —Pues e sian tun xeꞌ morojsebꞌir era cꞌani aquetpa bꞌan cocha inteꞌ chequerir ticabꞌa que cꞌani cacojco e jiriar, che e Labán. Y tamar era turbꞌana ucꞌabꞌa e lugar Galaad.
GEN 31:49 Y turbꞌana ucꞌabꞌa Mispá ubꞌan xeꞌ war che que jax inteꞌ nuxi torre, porque ojron e Labán y che: —Que Cawinquirar Dios uwiricon conda innajt turon tuaꞌ machi canajpes e acuerdo lo que cache sajmi y tuaꞌ machi asutpa caqꞌuijna cawira cabꞌa.
GEN 31:50 Porque jay iꞌxin ache tzajtzaj niwijchꞌoctac, o jay iꞌxin inujbꞌi taca otro inmojr ixictac motor que turobꞌto niwijchꞌoctac tacaret, pues cꞌajric amener que turu e Dios xeꞌ war aquetpa ajchꞌecsuyaj tamaron, motor que nen machi war inwira lo que war anumuy tacaret, che e Labán uyare e Jacob.
GEN 31:51 Y e Labán ojronto taca e Jacob y che: —Pues tara turu e sian tun xeꞌ morojsebꞌir camener y ayan e tun xeꞌ wabꞌubꞌir amener xeꞌ tuaꞌ aquetpa bꞌan cocha inteꞌ chequerir tama e acuerdo lo que cache sajmi.
GEN 31:52 Entonces tunor era axin acꞌampa cocha inteꞌ chequerir tuaꞌ machi anajpa e acuerdo lo que chembꞌir camener. Entonces e acuerdo jax era: Que nen machi tuaꞌ innumuy más bꞌana que e sian tun era, y que nien net machi tuaꞌ inumuy más tara que e sian tun. Y tamar era machi tuaꞌ cacꞌoyres cabꞌa y ma tiaꞌ tuaꞌ cache e tzꞌojyir.
GEN 31:53 Pues que e Dios xeꞌ ujtzna ut umen catata viejo Abraham y umen catata viejo Nahor axin uwatzꞌicon jay machi acꞌapa cache tunor lo que war caware era, y jay machi asutpa cache e tzꞌojyir, che e Labán. Entonces e Jacob uyare tama ucꞌabꞌa e Dios xeꞌ ujtzna ut umen utata Isaac que san tuaꞌ acꞌapa uche tunor lo que ayan tama e acuerdo era.
GEN 31:54 Entonces e Jacob uchamse inteꞌ arac tama e witzir era y uputa cora uwerir tut e Dios, y ayan lo que uyacta tuaꞌ acꞌujxa. Y de allí upejca tunor upiarobꞌ tuaꞌ awiobꞌ tacar. Y yajaꞌ taca wayanobꞌ tama e acbꞌar era.
GEN 31:55 Entonces conda sacojpa tama inteꞌ día, achpa e Labán y utzꞌujtzꞌi ucajram usitzꞌobꞌ y uwijchꞌoctac. Y conda cꞌapa uchojbꞌes utobꞌ, locꞌoy ixin tuaꞌ asutpa acꞌotoy tama uyotot otronyajr taca tunor e winicobꞌ xeꞌ war axanobꞌ tacar.
GEN 32:1 Pues entonces locꞌoy e Jacob taca ufamilia tuaꞌ asutpa axin esto tama ulugar, y conda war axin tor e bꞌir tajwina umen cora angelobꞌ tuaꞌ e Dios.
GEN 32:2 Y conda uwira e angelobꞌ ojron e Jacob y che: “Jax era e lugar tiaꞌ usoldadobꞌ e Dios umorojse ubꞌobꞌ tuaꞌ aquetpobꞌ tama e acbꞌar”, che e Jacob. Y tamar era uturbꞌa ucꞌabꞌa e lugar Mahanaim xeꞌ war che “Chateꞌ lugar tiaꞌ aquetpobꞌ tama inteꞌ acbꞌar”.
GEN 32:3 Y de allí e Jacob uyebꞌta ixin cora umanobꞌ tut usacun xeꞌ jax e Esaú xeꞌ turu tama e lugar Seír xeꞌ jax e lugar tuaꞌ tin e tuobꞌ uchꞌajnarir e Edom tuaꞌ uyare e Esaú que cꞌani acꞌotoy e Jacob.
GEN 32:4 Y e Jacob uyare umanobꞌ tuaꞌ uchecsu inteꞌ ojroner tut e Esaú y che: “Cꞌani cawaret que ebꞌtana tarion umen aman xeꞌ jax awijtzꞌin Jacob tuaꞌ cawaret que jaxir quetpa turuan tama uyotot e Labán tunor e tiempo desde que locꞌoy tara.
GEN 32:5 Y uyebꞌta tarion tuaꞌ cawaret que jaxir ayan meyra uwacax, y meyra uchij, y meyra uyoveja, y que ayan meyra umanobꞌ xeꞌ winicobꞌ y meyra umanobꞌ xeꞌ ixictac. Pues war uyebꞌta watar e checsuyaj era toit tuaꞌ uwira jay iꞌxin itzay ani achꞌami”, xeꞌ quetpa tuaꞌ achecsuna umen umanobꞌ e Jacob tut e Esaú.
GEN 32:6 Entonces conda umanobꞌ e Jacob cꞌapa uchecsu tunor e ojroner era tut e Esaú sutpa cꞌotoyobꞌ tut jaxir otronyajr, y uyareobꞌ cocha era y chenobꞌ: —Ixion cachecsu tut asacun Esaú bꞌan taca cocha awareon, y jaxir war watar esto tara tuaꞌ utajwi ubꞌa tacaret, y war watobꞌ 400 winicobꞌ tacar ubꞌan, che umanobꞌ e Jacob.
GEN 32:7 Entonces conda e Jacob uyubꞌi tunor era cay bꞌacta y cay ubꞌijnu meyra. Y tamar era cay uxere tunor e winicobꞌ y e ixictac xeꞌ turobꞌ tacar tama chateꞌ grupo. Y cay uxere ubꞌan tunor e oveja y tunor e wacax y tunor e camello tuaꞌ aquetpa chateꞌ grupo.
GEN 32:8 Pues jaxir war ubꞌijnu cocha era y che: “Jay e Esaú war aqꞌuijna conda utajwi ubꞌa taca inteꞌ grupo este que axin uche e tzꞌojyir tacarobꞌ, entonces intex grupo ererto alocꞌoy ajniobꞌ tut”, xeꞌ ubꞌijnu e Jacob.
GEN 32:9 Entonces e Jacob cay ucꞌajti taca e Dios y che: “Niwinquiraret Dios xeꞌ ujtzna oit umen nitata viejo Abraham y umen nitata Isaac, pues jax net xeꞌ awaren que ucꞌani tuaꞌ insutpa waten otronyajr esto tama nilugar xeꞌ jax e lugar tiaꞌ turobꞌ tunor nifamilia. Y jax net xeꞌ cay awaren que cꞌani atacren tuaꞌ alocꞌoy imbꞌutz tunor tama nicuxtar.
GEN 32:10 Ma tawaren tuaꞌ inchꞌami tunor e tacarsiaj y e cꞌunersiaj lo que cay awajqꞌuen era. Pues conda numuyen ixien tama e xucur Jordán tuaꞌ inxin esto tama e lugar Padán-aram matucꞌa ayan tacaren, sino que jax taca inteꞌ bordón xeꞌ qꞌuecher nimener. Pero coner ayan meyra lo que ayan tanibꞌa este que ayan meyra gente y meyra aracꞌobꞌ este que axin aquetpobꞌ chateꞌ nuxi grupo.
GEN 32:11 Cꞌani incꞌajti tacaret tuaꞌ acorpesen tama ucꞌabꞌ nisacun Esaú. Pues war imbꞌacta que jaxir axin watar uchamsen taca tunor e ixictac y e maxtacobꞌ.
GEN 32:12 Pero net cay awaren que san tuaꞌ ache alocꞌoy imbꞌutz tunor tama nicuxtar, y que tunor nichꞌajnarir axin abꞌoro meyra este que axin aquetpa bꞌan cocha e jiꞌ lo que ayan tutiꞌ e nuxi jaꞌ este que mamajchi uyubꞌi utziqui”, che e Jacob uyare Cawinquirar Dios.
GEN 32:13 Entonces e Jacob quetpa yajaꞌ taca tuaꞌ awayan. Y conda sacojpa cay usicbꞌa tucꞌa regalo erer uyajcꞌu usacun Esaú tamar lo que ayan tacar.
GEN 32:14 Y cay usicbꞌa 200 utuꞌ chivo, y veinte utata chivo, y 200 utuꞌ oveja, veinte utata oveja.
GEN 32:15 Y usicbꞌa treinta utuꞌ camello xeꞌ intocto cuxpa uyarobꞌ, cuarenta utuꞌ wacax y diez utata wacax y veinte utuꞌ chij y diez utata chij.
GEN 32:16 Y de allí e Jacob uyare cora umanobꞌ tuaꞌ ucojcobꞌ inteꞌ grupo aracꞌobꞌ xeꞌ xerbꞌir umener, y uyare otro inmojr umanobꞌ tuaꞌ ucojcobꞌ intex grupo aracꞌobꞌ. Entonces uyare umanobꞌ xeꞌ war ucojcobꞌ inteꞌ grupo aracꞌobꞌ y che: —Qꞌueche chic e aracꞌobꞌ xeꞌ war icojco bꞌajxan que e inmojr, y nen tuaꞌ waten tipat, che e Jacob. Y de allí uyare umanobꞌ xeꞌ war ucojcobꞌ intex grupo aracꞌobꞌ y che: —Qꞌueche chic e aracꞌobꞌ xeꞌ war icojco, pero quetpenic innajt cora tut inteꞌ grupo aracꞌobꞌ xeꞌ war axiobꞌ bꞌajxan, che e Jacob.
GEN 32:17 Entonces ojron e Jacob taca inteꞌ uman xeꞌ war axin bꞌajxan tut e inmojr y che: —Pues conda atajwi abꞌa taca nisacun Esaú, y jaxir axin uyubꞌi tabꞌa que: ‘¿chi awinquir? Y ¿tiaꞌ war iꞌxin? Y ¿chi tuaꞌ e aracꞌobꞌ era xeꞌ war aqꞌuejcha axin amener?’ xeꞌ axin uyubꞌi e Esaú tabꞌa.
GEN 32:18 Aren cocha era y che: ‘Niwinquiret Esaú, jax era inteꞌ regalo tabꞌa xeꞌ ebꞌtana tari umen e Jacob xeꞌ jax aman. Y jaxir war watar ticapat ubꞌan,’ bꞌan tuaꞌ aware, che e Jacob uyare uman.
GEN 32:19 Y bꞌan uchecsu tut e inmojr manobꞌ xeꞌ war uqꞌueche axiobꞌ inteꞌ inteꞌ grupo aracꞌobꞌ xeꞌ warto watobꞌ tupat e bꞌajxan grupo aracꞌobꞌ era. Pues uyare cocha era y che: —Pues conda itajwi ibꞌa taca e Esaú, arenic bꞌan taca cocha cay inware e bꞌajxan man
GEN 32:20 y che: ‘Pues e Jacob xeꞌ jax aman war watar ticapat,’ bꞌan tuaꞌ iware e Esaú, che e Jacob tut umanobꞌ. Pues e Jacob war ubꞌijnu cocha era y che: “Pues bꞌajcꞌat axin inchꞌancabꞌes uqꞌuijnar e Esaú taca tunor e sijpar lo que war inwebꞌta axin tut era. Y de allí conda inxin intajwi nibꞌa tacar bꞌajcꞌat axin atzay uwiren”, xeꞌ war ubꞌijnu e Jacob.
GEN 32:21 Y bꞌan cocha era e Jacob uyebꞌta ixin tunor e sijpar lo que quetpa tuaꞌ ajcꞌuna e Esaú. Pero jaxir taca ufamilia quetpobꞌ yajaꞌ taca tuyejtzꞌer e xucur Jaboc tuaꞌ awayanobꞌ tama e acbꞌar era.
GEN 32:22 Entonces tama uyuxin e acbꞌar achpa e Jacob y ubꞌixqꞌues e chateꞌ uwixcarobꞌ taca e chateꞌ umanobꞌ y e once uyunenobꞌ, y uyare tuaꞌ anumuyobꞌ teinxejr e xucur Jaboc era tiaꞌ majax intam e jaꞌ.
GEN 32:23 Y uyare umanobꞌ tuaꞌ uqꞌuechiobꞌ axin tunor lo que ayan tuaꞌ ubꞌan.
GEN 32:24 Pero e Jacob quetpa ubꞌajner yajaꞌ taca. Y tamarto e acbꞌar era checta inteꞌ winic tut y cay uchiobꞌ e fuerza tuaꞌ ucucru ubꞌobꞌ este que sacojpa.
GEN 32:25 Y eixna uchiobꞌ e tzꞌojyir era y conda e winic uwira que aqꞌuecꞌo e Jacob y que machi obꞌna ucucru, entonces uyobꞌi e Jacob tama ut uyaꞌ y e bꞌac era jotzpa locꞌoy tor ubꞌaquer.
GEN 32:26 Entonces e winic uyare e Jacob cocha era y che: —Actanen inxin, porque warix asacojpa, che e winic. Y tama e momento era e Jacob cꞌotoy unata que jax e Dios xeꞌ war uche e tzꞌojyir tacar. Entonces ojron y che: —Pues machi tuaꞌ inwactet iꞌxin este que achojbꞌesen, che e Jacob.
GEN 32:27 Entonces ojron e winic y che: —¿Tucꞌa acꞌabꞌa? che e winic. Y che e Jacob: —Nicꞌabꞌa nen Jacob, che.
GEN 32:28 Entonces ojron e winic y che: —Machi ixto tuaꞌ ipejcna que Jacobet, sino que coner acꞌabꞌa tuaꞌ aquetpa Israel xeꞌ war che ‘Tin e uche ubꞌa tuaꞌ ucucru e Dios’, porque cꞌapa ache e tzꞌojyir taca e Dios y taca e winicobꞌ y jax net xeꞌ amanxujresobꞌ, che e winic uyare e Jacob.
GEN 32:29 Entonces ojron e Jacob y che: —Y net, ¿tucꞌa acꞌabꞌa? che e Jacob. Pero e winic sutpa ojron y che: —¿Tucꞌa tar war oꞌybꞌi tucꞌa nicꞌabꞌa, cocha warix anata chien nen? che e winic. Entonces e winic uchojbꞌes ut e Jacob yajaꞌ taca.
GEN 32:30 Y e Jacob uturbꞌa ucꞌabꞌa e lugar era Penuel xeꞌ che “Ut e Dios”, y ojron cocha era y che: “Motor que cꞌapa inwira ut e Dios, pero bꞌixirento”, che e Jacob.
GEN 32:31 Pues conda e Jacob achpa tuaꞌ alocꞌoy tama e lugar Penuel era, war atobꞌoy e qꞌuin. Pero cocha war acꞌuxun meyra or ubꞌaquer intaca acojxiꞌ axana.
GEN 32:32 Y tamar era esto coner tin e tuobꞌ uchꞌajnarir e Israel machi ucꞌuxiobꞌ e chich lo que ayan tama ut uyaꞌ inteꞌ arac, cocha jax e chich era xeꞌ quetpa yobꞌorbꞌir tama e Jacob.
GEN 33:1 Pues entonces ixin e Jacob y utajwi ubꞌa taca e inmojr ufamilia. Y warto axana tor e bꞌir conda uchꞌujcu uwira que war watar e Esaú y que ayan 400 winicobꞌ tacar. Y cay bꞌacta e Jacob y tamar era cay uxere umaxtacobꞌ cora cora tujam e Lea y e Raquel y umanobꞌ xeꞌ ixictac.
GEN 33:2 Y uyare uman uwixcarobꞌ taca umaxtacobꞌ tuaꞌ axiobꞌ bꞌajxan, y de allí uyare tuaꞌ axin e Lea taca umaxtacobꞌ, y nacpat era uyare tuaꞌ axin e Raquel taca e José.
GEN 33:3 Y de allí numuy e Jacob bꞌajxan que e inmojr, y conda innajtto turu e Esaú, e Jacob cay cotuan tut jaxir este que utacbꞌu ut ujor tut e rum. Y bꞌan uche siete veces este que cꞌotoy usacun tuyejtzꞌer.
GEN 33:4 Y de allí ajni ixin e Esaú tuaꞌ utajwi ubꞌa taca e Jacob, y umori umeqꞌue ubꞌobꞌ y utzꞌujtzꞌi ucajram y cay aruobꞌ.
GEN 33:5 Y de allí e Esaú cay uchꞌujcu uwira que ayan e ixictac y e bꞌiqꞌuit maxtac tacarobꞌ, y entonces ojron cocha era y che: —Y ¿chiobꞌ tunor e gente era xeꞌ turobꞌ tacaret? che e Esaú. Y ojron e Jacob y che: —Pues jaxirobꞌ jax niwixcarobꞌ y nimaxtacobꞌ xeꞌ ajcꞌunen umen e Dios cocha nojta ucꞌunersiaj tacaren, che e Jacob.
GEN 33:6 Entonces ixiobꞌ e manobꞌ taca uyarobꞌ esto tuyejtzꞌer e Esaú y cotuanobꞌ tut este que utacbꞌu ut ujorobꞌ tut e rum.
GEN 33:7 Y de allí tari e Lea taca umaxtacobꞌ y cotuanobꞌ tut jaxir bꞌan taca cocha uchiobꞌ e inmojr, y de allí tari e José taca e Raquel y cotuanobꞌ ubꞌan.
GEN 33:8 Entonces ojron e Esaú y che: —¿Tucꞌa war abꞌijnu ache taca tunor e sian aracꞌobꞌ era xeꞌ inwira conda yopen? che e Esaú uyare e Jacob. Entonces ojron e Jacob y che: —Pues cꞌani inwajqꞌuet tunor era tuaꞌ icꞌotoy itzay awiren, che e Jacob uyare e Esaú.
GEN 33:9 Entonces ojron e Esaú y che: —Ira abꞌijnu meyra tama tunor era, niwijtzꞌinet. Nen ayan meyra aracꞌobꞌ tacaren. Más imbꞌutz tuaꞌ taca acojco net tunor e aracꞌobꞌ era, che e Esaú.
GEN 33:10 Pero e Jacob ojron y che: —Machi. Pues quisinic que achꞌami lo que war inwajqꞌuet era. Porque jay war itzay tacaren ucꞌani tuaꞌ achꞌami e aracꞌobꞌ lo que war inwajqꞌuet. Pues conda inwira oit sajmi que war itzay meyra, quetpa bꞌan ani cocha jay war inwira ut e Dios, cocha war itzay apejquen.
GEN 33:11 Y tamar era quisinic que achꞌami e aracꞌobꞌ era xeꞌ intares, porque Nidiosir xeꞌ nojta ucꞌunersiaj tacaren, ixin ubꞌorojse tunor lo que ayan tanibꞌa, che e Jacob. Y cocha e Jacob war uyare iraj iraj tuaꞌ uchꞌami e aracꞌobꞌ, entonces e Esaú ixin uchꞌami.
GEN 33:12 Entonces ojron e Esaú cocha era y che: —Incoꞌ ixto yaꞌ, porque ucꞌanto tuaꞌ caxana meyra tuaꞌ cacꞌotoy tiaꞌ turen, che e Esaú uyare e Jacob.
GEN 33:13 Pero majax bꞌan war ucꞌani e Jacob, y entonces ojron y che: —Pues net jax nisacunet xeꞌ inyajta oit. Net anata que injayjayobꞌ nimaxtacobꞌ, y que ucꞌani tuaꞌ imbꞌijnu ubꞌan tama tunor e aracꞌobꞌ y tama tunor e wacaxobꞌ xeꞌ intocto acuxpa uyarobꞌ. Porque jay incꞌoyyesobꞌ umen que inchiobꞌ axanobꞌ wacchetaca, bꞌajcꞌat axin achamayobꞌ tunor e bꞌiqꞌuit aracꞌobꞌ tama inteꞌ taca día.
GEN 33:14 Pues más ani bueno taniut tuaꞌ iꞌxin bꞌajxan taca tunor aman, y nen tuaꞌ inxin cora cora bꞌan cocha ucꞌani tuaꞌ axanobꞌ e aracꞌobꞌ, y bꞌan cocha ucꞌani tuaꞌ axanobꞌ e bꞌiqꞌuit maxtac. Y tamar era axin incꞌotoy intajwiet watar e día tiaꞌ turet tama e lugar Seír, che e Jacob uyare e Esaú.
GEN 33:15 Entonces ojron e Esaú y che: —Bueno pue. Pero quisinic inwacta cora nimanobꞌ tuaꞌ ucojquetobꞌ, che e Esaú. Entonces ojron e Jacob y che: —Machi, ¿tucꞌa tuaꞌ que war abꞌijnu cocha era? Lo que más ayan ucꞌampibꞌir jax que cꞌumponix, che e Jacob uyare e Esaú.
GEN 33:16 Entonces tamar taca e día era cay xana e Esaú tuaꞌ asutpa axin esto tama e lugar Seír.
GEN 33:17 Pero e Jacob machi ixin esto tama e lugar Seír, sino que ixin esto tama e lugar Sucot, y yajaꞌ taca cay ujachi inteꞌ uyotot xeꞌ chembꞌir taca e bꞌujc y cay uche cora galera tuaꞌ uyaracꞌobꞌ ubꞌan. Pues jax tamar era que turbꞌana ucꞌabꞌa e lugar Sucot, cocha e ojroner Sucot war che “Galera” tama e ojroner hebreo.
GEN 33:18 Entonces bꞌan cocha era locꞌoyobꞌ e Jacob taca tunor ufamilia tama e lugar Padán-aram tuaꞌ axiobꞌ esto tama e lugar Canaán. Y tama tunor uxambꞌarobꞌ era mamajchi cay unumse ubꞌa, y cꞌotoy turuan tuyejtzꞌer inteꞌ chinam xeꞌ ucꞌabꞌa Siquem.
GEN 33:19 Pues ayan inteꞌ nuxi winic tama e chinam era xeꞌ ucꞌabꞌa Hamor xeꞌ ayan uyunenobꞌ y e Jacob umani inteꞌ tajo rum tuobꞌ tama cien ut e tumin xeꞌ chembꞌir taca e plata. Y yajaꞌ taca cay ujachiobꞌ uyototobꞌ.
GEN 33:20 Y nacpat era upetzꞌe cora tun tuaꞌ aquetpa bꞌan cocha inteꞌ altar tiaꞌ tuaꞌ uyujtzꞌi ut e Dios, y uturbꞌa ucꞌabꞌa El-elohé-israel xeꞌ war che “Cadiosir jax e Dios tuaꞌ e Israel”.
GEN 34:1 Pues entonces ayan inyajr que e Dina, xeꞌ jax inteꞌ uwijchꞌoc e Lea taca e Jacob, ixin tuaꞌ uwarajse e ijchꞌoctac xeꞌ turuanobꞌ tama e chinam Siquem era.
GEN 34:2 Y conda ochoy tama e chinam irna umen inteꞌ sitz xeꞌ ucꞌabꞌa Siquem xeꞌ jax inteꞌ uyunen e Hamor xeꞌ ajcꞌotorer tama e chinam era y xeꞌ tuaꞌ uchꞌajnarir e Hiv. Pero lo que uche e Siquem, ixin uchuqui e Dina y chꞌan tacar y uche forzar.
GEN 34:3 Pero de allí cay ubꞌijnu que war uyajta ut, y tamar era cay ubꞌijnu cocha tuaꞌ uchꞌabꞌu uyalma e ijchꞌoc.
GEN 34:4 Entonces ixin e Siquem tuaꞌ oꞌjron taca utata xeꞌ jax e Hamor y che: —Quiqui cꞌajtin e ijchꞌoc yax. Nen cꞌani innujbꞌi tacar, che e Siquem uyare utata.
GEN 34:5 Pero e Jacob cꞌotoyix unata que subꞌarna uwijchꞌoc xeꞌ jax e Dina umen e Siquem, pero cocha najtir turobꞌ uyunenobꞌ tiaꞌ war ucojcobꞌ uyaracꞌobꞌ, machi ojron este que sutpa tariobꞌ uyunenobꞌ.
GEN 34:6 Pero utata e Siquem xeꞌ jax e Hamor ixin wacchetaca tuaꞌ utajwi ubꞌa taca e Jacob tuaꞌ oꞌjron tacar.
GEN 34:7 Pero conda uyunenobꞌ e Jacob sutpa tariobꞌ tiaꞌ war ucojcobꞌ e aracꞌobꞌ, y cꞌotoy unatobꞌ tunor lo que cay unumse ubꞌa uwijtan, cay cꞌuxun meyra uyalmobꞌ y qꞌuijnobꞌ meyra ubꞌan upater e Siquem. Pues tut tin e tuobꞌ e Israel tunor era jax inteꞌ nuxi mabꞌambꞌanir que ma tiaꞌ ani tuaꞌ achena.
GEN 34:8 Pero ojronto e Hamor tacarobꞌ y che: —Niunen xeꞌ jax e Siquem war uyajta ut meyra iwijtan. Y tamar era quisinic incꞌajti tacarox tuaꞌ iwacta anujbꞌi jaxir taca niunen.
GEN 34:9 Pues quisinic cache inteꞌ acuerdo tuaꞌ erer caquetpa intera taca familia. Y bꞌan cocha era tin e tuaꞌ cafamilia erer axin anujbꞌi taca e ijchꞌoctac tibꞌa, y nox ubꞌan erer ixnujbꞌi taca e ijchꞌoctacobꞌ ticabꞌa.
GEN 34:10 Entonces quetpenic tuaꞌ ixturuan tacaron. Pues ayan meyra rum tiaꞌ erer ixturuan, y jay icꞌani erer ixchonma, y erer imani e rum tuaꞌ aquetpa tibꞌa ubꞌan, che e Hamor uyare e Jacob.
GEN 34:11 Entonces e Siquem ojron ubꞌan taca utata y usacunobꞌ e Dina y che: —Pues jay uyubꞌiox ixcꞌotoy ixtzay iwiren, erer inwajcꞌox tuqꞌuic tuqꞌuic lo que axin icꞌajti tacaren.
GEN 34:12 Erer iwaren cobꞌa icꞌani tuaꞌ intoyi tama e ijchꞌoc, y erer iwaren jayteꞌ regalo war icꞌani tuaꞌ inwajcꞌox, y bꞌan tuaꞌ inche. Pero actanic tuaꞌ anujbꞌi e ijchꞌoc tacaren, che e Siquem uyare e Jacob taca uyunenobꞌ.
GEN 34:13 Pero cocha war aqꞌuijnobꞌ usacunobꞌ e Dina umen que jaxir chena forzar umen e Siquem, ojronobꞌ taca e Siquem y e Hamor taca e majresiaj,
GEN 34:14 y chenobꞌ cocha era: —Machi. Ma cocha erer cawajcꞌu cawijtzꞌin tut inteꞌ winic xeꞌ majax xurbꞌir imbꞌijc uqꞌuewerir utejromar, porque ticoit non jax inteꞌ nuxi subꞌar jay cache ani cocha era.
GEN 34:15 Pues non ma cocha erer cachꞌamiet bꞌan taca, sino que ucꞌani ani tuaꞌ axujra imbꞌijc uqꞌuewerir itejromar tuaꞌ uyubꞌion cawajqꞌuet cawijtan. Pero jay bꞌan icꞌani y axin uchiobꞌ cocha era tunor e winicobꞌ tijam, entonces tamar era erer ixixin ixquetpa bꞌan cocha non.
GEN 34:16 Entonces jay bꞌan iche, nox uyubꞌiox ixnujbꞌi taca cawijchꞌoctac, y non uyubꞌion caxin canujbꞌi taca iwijchꞌoctac ubꞌan. Y erer caturuan tacarox y erer caxin caquetpa intera chinam.
GEN 34:17 Pero jay machi aquetpa imbꞌutz tiut lo que war cawareox era que ucꞌani tuaꞌ axujra imbꞌijc uqꞌuewerir itejromar, entonces non cꞌani calocꞌoy tama e lugar era y cꞌani caqꞌueche axin cawijtan ubꞌan, chenobꞌ uyunenobꞌ e Jacob uyareobꞌ e Siquem taca utata.
GEN 34:18 Entonces quetpobꞌ de acuerdo e Hamor y e Siquem tama tunor lo que arobꞌnobꞌ era.
GEN 34:19 Y cocha e Siquem war uyajta ut meyra e Dina machi ucojco nien imbꞌijc e tiempo tuaꞌ axujra imbꞌijc uqꞌuewerir utejromar. Y cocha e Siquem jax xeꞌ más acꞌubꞌesna tama tunor ufamilia utata,
GEN 34:20 ixin taca utata Hamor esto tama e ocher tama e chinam, y yajaꞌ taca cay ojronobꞌ taca e sian winicobꞌ, y chenobꞌ cocha era:
GEN 34:21 —Pues e winicobꞌ era war atzay uwironobꞌ. Y ticoit non bueno tuaꞌ cawactobꞌ aturuanobꞌ tara. Pues war usicbꞌobꞌ tucꞌa rum tiaꞌ tuaꞌ umaniobꞌ, y cocha ayan meyra rum tacaron, non caware que bueno tuaꞌ cawactobꞌ aturuanobꞌ tacaron. Y tamar era non uyubꞌion canujbꞌi taca uwijchꞌoctacobꞌ y jaxirobꞌ uyubꞌiobꞌ anujbꞌiobꞌ taca cawijchꞌoctac ubꞌan.
GEN 34:22 Y jaxirobꞌ turix tuaꞌ aquetpobꞌ ticajam, pero ayan lo que quetpa tuaꞌ cache tuaꞌ cacꞌotoy caquetpa intera taca chinam tacarobꞌ. Pues jaxirobꞌ war ucꞌaniobꞌ que inteꞌ inteꞌ tejromtac ticajam axin axujra imbꞌijc uqꞌuewerir utejromar, bꞌan cocha acay uchiobꞌ jaxirobꞌ.
GEN 34:23 Pero bꞌijnunic cobꞌa axin aquetpa ticabꞌa jay caxin cache bꞌan cocha ucꞌaniobꞌ: Tunor lo que ayan tuobꞌ axin aquetpa ticabꞌa, y tunor uyaracꞌobꞌ axin aquetpa ticabꞌa ubꞌan. Jax taca aquetpa tuaꞌ caware que caquetpa de acuerdo tacarobꞌ tama tunor era, y tuaꞌ aquetpobꞌ tacaron, chenobꞌ e Siquem y utata.
GEN 34:24 Y bꞌan cocha era tunor e winicobꞌ xeꞌ morojsebꞌir turobꞌ tama uyocher e chinam cꞌotoy quetpobꞌ de acuerdo taca e Hamor y e Siquem. Y tamar era tunor e winicobꞌ ixiobꞌ tuaꞌ axujra imbꞌijc uqꞌuewerir utejromarobꞌ.
GEN 34:25 Pero tama e uxteꞌ día conda warto acꞌuxun e winicobꞌ tama e chinam era umen que xujra imbꞌijc uqꞌuewerir utejromarobꞌ ixin e Simeón y e Leví xeꞌ uyunenobꞌ e Jacob y xeꞌ sacumbꞌirobꞌ tuaꞌ e Dina esto tama e chinam era. Y conda cꞌotoyobꞌ utajwiobꞌ que mamajchi tujam e winicobꞌ uyubꞌi ucorpes ubꞌobꞌ, y entonces jaxirobꞌ cꞌapa uchamsiobꞌ tunor e winicobꞌ era taca umachitobꞌ.
GEN 34:26 Y uchamsiobꞌ ubꞌan e Hamor y e Siquem taca umachitobꞌ. Y de allí ixiobꞌ esto tuyotot e Siquem y ulocsiobꞌ e Dina y uqꞌuechiobꞌ ixin.
GEN 34:27 Y conda cꞌotoyobꞌ e inmojr uyunenobꞌ e Jacob tama e chinam tiaꞌ turu tunor e sian chamenobꞌ, cay ulocsiobꞌ tunor lo que ayan tama inteꞌ inteꞌ otot cocha war ucꞌaniobꞌ tuaꞌ atoytzꞌa tama e nuxi mabꞌambꞌanir xeꞌ subꞌar uwirnar lo que chempa upater uwijtan.
GEN 34:28 Y uqꞌuechiobꞌ ixin tunor e oveja y tunor e wacax y tunor e chij. Pues uqꞌuechiobꞌ ixin tunor lo que ayan tama e chinam y tunor lo que ayan najtir e chinam ubꞌan.
GEN 34:29 Y cꞌapa uxujchꞌiobꞌ tunor lo que ayan ucꞌampibꞌir tama inteꞌ inteꞌ otot, y uqꞌuechiobꞌ ixin tunor e maxtac y tunor e ixictac.
GEN 34:30 Pero conda tajwina e Simeón y e Leví umen e Jacob, jaxir cay ucꞌaye cocha era y che: —Pues nox war itares inteꞌ cꞌuxner tanior tama tunor lo que war iche era. Porque coner cꞌani aqꞌuijnobꞌ tunor tin e tuobꞌ uchꞌajnarir e Canaán y tunor tin e tuobꞌ uchꞌajnarir e Pérez conda uwirenobꞌ. Pues bꞌajcꞌat axin umorojse ubꞌobꞌ tuaꞌ uchiobꞌ e tzꞌojyir nipater. Y cocha majax meyron, bꞌajcꞌat axin uchamsenobꞌ taca tunor nifamilia, che e Jacob uyare Simeón y e Leví.
GEN 34:31 Pero jaxirobꞌ sutpa ojronobꞌ y chenobꞌ: —¿Ucꞌani ca ani tuaꞌ taca cawacta uche cocha era upater cawijtan que ixin uchꞌami ubꞌa tacar bꞌan cocha jay jax ani inteꞌ ajnajtir ixic? chenobꞌ e Simeón y e Leví.
GEN 35:1 Pues entonces ojron e Dios taca e Jacob y che: “Quiqui tuaꞌ ituruan tama e chinam Betel y petzꞌe cora tun tuaꞌ aquetpa bꞌan cocha inteꞌ altar taniut xeꞌ Adiosiren xeꞌ inchectes nibꞌa toit conda war ilocꞌoy iyajni tut asacun Esaú”, che e Dios.
GEN 35:2 Entonces e Jacob upejca tunor ufamilia y tunor tin e turobꞌ tacarobꞌ y che: —Locsenic choquic tunor e chamen diosobꞌ lo que ayan tacarox xeꞌ taresna esto tama e lugar Padán-aram, y atenic y lapic e bꞌujc xeꞌ más imbꞌutz.
GEN 35:3 Y incuic esto tama e chinam Betel, y yajaꞌ taca cꞌani impetzꞌe cora tun tuaꞌ aquetpa bꞌan cocha inteꞌ altar tiaꞌ tuaꞌ cojytzꞌi ut e Dios xeꞌ jax e Dios xeꞌ utacren conda cay innumse nibꞌa nojta, y xeꞌ jax xeꞌ quetpa tacaren tic taca tiaꞌ ixien, che e Jacob.
GEN 35:4 Entonces ixin uyajcꞌobꞌ e Jacob tunor e chamen diosobꞌ xeꞌ qꞌuecher umenerobꞌ y tunor e arete xeꞌ chꞌur tama uchiquinobꞌ, y jaxir ixin umuqui macu rum yebꞌar inteꞌ chꞌoror teꞌ xeꞌ war najtir cora tama e chinam Siquem era.
GEN 35:5 Y conda locꞌoyobꞌ tama e chinam era, Cadiosir uche tuaꞌ acꞌaxi inteꞌ nuxi bꞌajcꞌut tama tunor e gente xeꞌ turobꞌ tama inteꞌ inteꞌ chinam tama e lugar era, y tamar era mamajchi ixin tupat ufamilia e Jacob umen e nuxi mabꞌambꞌanir lo que cay uchiobꞌ cocha chamsanobꞌ.
GEN 35:6 Entonces locꞌoy e Jacob taca tunor e gente xeꞌ war axanobꞌ tacar y cꞌotoyobꞌ esto tama e chinam Luz xeꞌ arobꞌna Betel coner xeꞌ turu tama e nuxi lugar Canaán.
GEN 35:7 Y yajaꞌ taca e Jacob cay upetzꞌe cora tun tuaꞌ aquetpa bꞌan cocha inteꞌ altar, y uturbꞌa ucꞌabꞌa e lugar era El-betel xeꞌ war che “E Dios tuaꞌ e lugar Betel”, porque jax tama e lugar era tiaꞌ Cadiosir uchectes ubꞌa tut e Jacob conda war alocꞌoy aꞌjni tut usacun Esaú.
GEN 35:8 Y jax taca tama e lugar era tiaꞌ chamay e Débora xeꞌ jax e ixic xeꞌ cay ucojco e Rebeca ixnix e tiempo, y umuquiobꞌ yebꞌar inteꞌ chꞌoror teꞌ xeꞌ war najtir cora tama e chinam Betel. Y tamar era e Jacob uturbꞌa ucꞌabꞌa e lugar era: “E chꞌoror teꞌ tuaꞌ e aruar.”
GEN 35:9 Pues conda e Jacob locꞌoy tama e lugar Padán-aram taca tunor ufamilia y sutpa cꞌotoy esto tama e lugar Betel era, Cadiosir sutpa uchectes ubꞌa tut otronyajr y uchojbꞌes ut
GEN 35:10 y che: “Pues net acꞌabꞌa Jacob. Pero coner machixto tuaꞌ ipejcna cocha era, sino que ucꞌani tuaꞌ ipejcna tama acꞌabꞌa Israel.” Y bꞌan cocha era turbꞌana intex ucꞌabꞌa umen e Dios.
GEN 35:11 Y e Dios che cocha era: “Pues nen jax Adiosiren xeꞌ meyra ayan nicꞌotorer. Y cꞌani inwaret que chꞌijrsen meyra amaxtac tuaꞌ erer axin abꞌoro meyra tunor achꞌajnarir. Tamar achꞌajnarirobꞌ cꞌani alocꞌoy meyra nuquir chinamobꞌ, y ayan tin e tuaꞌ acꞌotoy aquetpa rey ubꞌan.
GEN 35:12 Pues tunor e nuxi lugar xeꞌ cay inwajcꞌu e Abraham y e Isaac, cꞌani inwajqꞌuet net ubꞌan. Y axin aquetpa tuaꞌ achꞌajnarirobꞌ ubꞌan”, che Cawinquirar Dios uyare e Jacob.
GEN 35:13 Y tamar era locꞌoy Cawinquirar Dios tama e lugar tiaꞌ cay ojron taca e Jacob.
GEN 35:14 Entonces e Jacob uchꞌami ingojr tun bꞌan cocha obꞌna uchꞌuyi inteꞌ winic y uwabꞌu tuaꞌ aquetpa bꞌan cocha inteꞌ chequerir tama e lugar era tiaꞌ e Dios cay ojron tacar. Y de allí cay utzijtzruꞌ e aceite y e vino tamar tuaꞌ uche aquetpa erach.
GEN 35:15 Y uturbꞌa ucꞌabꞌa e lugar era Betel xeꞌ war che “Uyotot e Dios”, cocha jax e lugar era tiaꞌ ojron e Dios tacar.
GEN 35:16 Pues entonces conda cꞌapa numuy tunor era, locꞌoyobꞌ tama e chinam Betel, y conda innajtto turobꞌ tama e lugar Efrata tiaꞌ war axiobꞌ, cꞌotoy e hora tuaꞌ acuxpa uyar e Raquel. Pero quetpa intran tuaꞌ acuxpa uyar.
GEN 35:17 Y tama e momento conda más war unumse ubꞌa, arobꞌna umen e partera cocha era y che: “Ira ibꞌacta. Cꞌani acuxi inteꞌ yer sitz”, che e partera.
GEN 35:18 Pero cocha jaxir cꞌanix achamay, y conda warix acꞌapa umusic uturbꞌa ucꞌabꞌa uyar Ben-oní xeꞌ war che “Jax niwar xeꞌ uyajqꞌuen e tzꞌintzꞌar”, pero umen utata turbꞌana ucꞌabꞌa Benjamín xeꞌ war che “Niunen xeꞌ aqꞌuecꞌo bꞌan cocha ninojcꞌabꞌ”.
GEN 35:19 Pues bꞌan cocha era chamay e Raquel y mujca tuyejtzꞌer e bꞌir era xeꞌ acꞌotoy esto tama e chinam Efrata. Pues e chinam era arobꞌna Belén coner.
GEN 35:20 Y e Jacob uchꞌami ingojr tun bꞌan cocha obꞌna uchꞌuyi inteꞌ winic y uwabꞌu tujor umujr e Raquel tuaꞌ uchecsu esto coner tiaꞌ aquetpa umujr.
GEN 35:21 Entonces e Israel, xeꞌ ucꞌabꞌa ani Jacob, xanato tama e bꞌir taca ufamilia y cꞌotoyobꞌ más bꞌana que e torre xeꞌ ucꞌabꞌa Éder y yajaꞌ taca ujachiobꞌ uyototobꞌ xeꞌ chembꞌir taca e bꞌujc.
GEN 35:22 Y conda war aturuanobꞌ tama e lugar era, ayan inyajr conda e Rubén ochoy chꞌan taca e Bilhá xeꞌ jax inteꞌ uwixcar utata. Pero conda cꞌotoy unata utata tama tunor era, qꞌuijna meyra. Pues e Jacob ayan doce uyunenobꞌ.
GEN 35:23 Y xeꞌ qꞌuechuan taca e Lea jax era: Ayan e Rubén, xeꞌ jax uyaxar uyunen, y de allí ayan e Simeón y ayan e Leví y ayan e Judá y ayan e Isacar y ayan e Zabulón.
GEN 35:24 Y xeꞌ qꞌuechuan taca e Raquel jax era: Ayan e José y ayan e Benjamín.
GEN 35:25 Y xeꞌ qꞌuechuan taca e Bilhá xeꞌ jax uman e Raquel jax era: Ayan e Dan y ayan e Neftalí.
GEN 35:26 Y xeꞌ qꞌuechuan taca e Zilpa xeꞌ jax uman e Lea jax era: Ayan e Gad y ayan e Aser. Pues tunor uyunenobꞌ e Jacob era cuxpobꞌ tama e lugar Padán-aram. Jax taca e Benjamín xeꞌ machi cuxpa bꞌana.
GEN 35:27 Entonces ixin e Jacob tuaꞌ uwira utata Isaac tama e lugar Mamré xeꞌ turu tuyejtzꞌer e chinam xeꞌ ucꞌabꞌa Arbá xeꞌ arobꞌna Hebrón coner. Pues jax tama e lugar era tiaꞌ cay turuan e Abraham y e Isaac.
GEN 35:28 Pues e Isaac war ucojco 180 año conda chamay.
GEN 35:29 Y ixin tuaꞌ aquetpa taca utata viejobꞌirobꞌ. Pues ayix meyra ujabꞌ conda chamay, y mujca umen uyunen Esaú y uyunen Jacob.
GEN 36:1 Pues entonces jax era uchꞌajnarir e Esaú xeꞌ arobꞌna Edom ubꞌan.
GEN 36:2 Pues e Esaú nujbꞌi taca uxteꞌ ixictac xeꞌ ajlugarobꞌ Canaán. Pues e bꞌajxan uwixcar jax e Ada xeꞌ jax uwijchꞌoc e Elón xeꞌ tuaꞌ uchꞌajnarir e Het. Y de allí ayan e Oholibamá xeꞌ jax uwijchꞌoc e Aná y xeꞌ sitzbꞌir tuaꞌ Sibón xeꞌ chꞌajnarir tuaꞌ e Hiv.
GEN 36:3 Y ayan otronteꞌ uwixcar e Esaú xeꞌ ucꞌabꞌa Basemat xeꞌ jax uwijchꞌoc e Ismael y xeꞌ ijtambꞌir tuaꞌ e Nabaiot.
GEN 36:4 Pues ucꞌabꞌobꞌ uyunenobꞌ e Esaú xeꞌ uchꞌijrse taca e Ada jax e Elifaz, y xeꞌ chꞌijrsena umen e Basemat jax e Reuel.
GEN 36:5 Y xeꞌ cuxpobꞌ taca e Oholibamá jax e Jeús y e Jaalam y e Coré. Pues jax era uyunenobꞌ e Esaú xeꞌ cuxpobꞌ conda turu tama e lugar Canaán.
GEN 36:6 Pues e Esaú uqꞌueche ixin uwixcarobꞌ y utejromtac y iwijchꞌoctac y tunor xeꞌ tuaꞌ, y ixin tuaꞌ aturuan tama otronteꞌ lugar tuaꞌ aquetpa najtir tut uwijtzꞌin Jacob. Y uqꞌueche ixin tunor uyaracꞌobꞌ y tunor lo que cay uchꞌami conda turu tama e lugar Canaán.
GEN 36:7 Pues chatertiobꞌ ayan meyra cosa tuobꞌ y tamar era machix uyubꞌi tuaꞌ aturuanobꞌ tama inteꞌ taca lugar. Pues e rum tiaꞌ turobꞌ machi atzꞌacta tuaꞌ awiobꞌ tunor e sian aracꞌobꞌ.
GEN 36:8 Y tamar era e Esaú, xeꞌ arobꞌna Edom ubꞌan, ixin tuaꞌ aturuan tama e lugar Seír tiaꞌ ayan meyra witzir.
GEN 36:9 Pues jax era uchꞌajnarir e Esaú xeꞌ tata viejobꞌir tuaꞌ tunor tin e aturuanobꞌ tama e lugar Edom y xeꞌ aturuanobꞌ tama e lugar Seír tiaꞌ ayan meyra sian witzir.
GEN 36:10 Pues jax era ucꞌabꞌa uyunenobꞌ e Esaú: Ayan e Elifaz xeꞌ jax uyar e Ada, y ayan e Reuel xeꞌ jax uyar e Basemat.
GEN 36:11 Y uyunenobꞌ e Elifaz jax era: Ayan e Temán y ayan e Omar y ayan e Sefó y ayan e Gatam y ayan e Quenaz.
GEN 36:12 Y e Elifaz ayan inteꞌ uman xeꞌ cꞌotoy quetpa inteꞌ uwixcar xeꞌ ucꞌabꞌa Timná xeꞌ uchꞌijrse inteꞌ uyar y uturbꞌa ucꞌabꞌa Amalec. Pues tunor era jax uchꞌajnarir e Ada xeꞌ jax inteꞌ uwixcar e Esaú.
GEN 36:13 Y ayan uyunenobꞌ e Reuel xeꞌ jax e Náhat y e Zérah y e Samá y e Mizá. Pues tunor era sitzbꞌirobꞌ tuaꞌ e Basemat xeꞌ otronteꞌ uwixcar e Esaú.
GEN 36:14 Pues e Oholibamá xeꞌ jax otronteꞌ uwixcar e Esaú ixin uchꞌijrse e Jeús y e Jaalam y e Coré. Pues jaxir jax uwijchꞌoc e Aná y sitzbꞌir tuaꞌ e Sibón.
GEN 36:15 Pues jax era tin xeꞌ cay cꞌotoriobꞌ tujor tin e tuobꞌ uchꞌajnarir e Esaú. Pues tujam uyunenobꞌ e Elifaz xeꞌ yaxar unembꞌir tuaꞌ e Esaú, tin xeꞌ cay cꞌotoriobꞌ jax era: Ayan e Temán y e Omar y e Sefó y e Quenaz.
GEN 36:16 Y ayan e Coré y e Gatam y e Amalec. Pues jax xeꞌ cay cꞌotoriobꞌ tama e lugar Edom xeꞌ tuobꞌ uchꞌajnarir e Elifaz. Pues tunor e winicobꞌ era sitzbꞌirobꞌ tuaꞌ e Ada.
GEN 36:17 Y ayan inteꞌ uyunen e Esaú xeꞌ ucꞌabꞌa Reuel. Y ayan uyunenobꞌ e Reuel xeꞌ cꞌotoy quetpobꞌ tata viejobꞌirobꞌ tujor uchꞌajnarirobꞌ xeꞌ ucꞌabꞌobꞌ Náhat y Zérah y Samá y Mizá. Pues e chꞌajnarirobꞌ era jax xeꞌ cay turuanobꞌ tama e lugar Edom. Y tunor e chꞌajnarirobꞌ era quetpobꞌ sitzbꞌirobꞌ tuaꞌ e Basemat xeꞌ jax otronteꞌ uwixcar e Esaú.
GEN 36:18 Y ayan uyarobꞌ e Oholibamá xeꞌ ijchꞌoc tuaꞌ e Aná xeꞌ cꞌotoy quetpobꞌ tata viejobꞌirobꞌ tujor uchꞌajnarirobꞌ xeꞌ ucꞌabꞌobꞌ Jeús y Jaalam y Coré.
GEN 36:19 Pues tunorobꞌ tuobꞌ uchꞌajnarir e Esaú, y jax xeꞌ cꞌotoy quetpobꞌ tata viejobꞌirobꞌ tujor inteꞌ inteꞌ uchꞌajnarirobꞌ.
GEN 36:20 Pues jax era uchꞌajnarirobꞌ e Seír xeꞌ tuaꞌ uchꞌajnarir e Hor xeꞌ cꞌotoy turuanobꞌ bꞌajxan tama e lugar Edom: Ayan e Lotán y e Sobal y e Sibón y e Aná.
GEN 36:21 Y ayan e Disón y e Éser y e Disán. Pues jaxirobꞌ cꞌotoy quetpobꞌ tata viejobꞌirobꞌ tujor tunor tin e turobꞌ tama e lugar Edom.
GEN 36:22 Y e Lotán ayan uyunenobꞌ xeꞌ jax era: Ayan e Horí y ayan e Hemam. Y e Lotán ayan inteꞌ uwijtan xeꞌ ucꞌabꞌa Timná.
GEN 36:23 Y e Sobal ayan uyunenobꞌ xeꞌ jax era: Ayan e Alván y ayan e Manáhat y ayan e Ebal y ayan e Sefó y ayan e Onam.
GEN 36:24 Y e Sibón ayan uyunenobꞌ xeꞌ jax era: Ayan e Ayá y ayan e Aná. Pues jax e Aná era xeꞌ utajwi inteꞌ ut jaꞌ tiaꞌ alocꞌoy e jaꞌ xeꞌ inqꞌuijn ut conda war ucojco cora chijobꞌ tuaꞌ utata Sibón tama e choquem lugar.
GEN 36:25 Pues e Aná ayan inteꞌ uyunen xeꞌ ucꞌabꞌa Disón, y ayan inteꞌ uwijchꞌoc xeꞌ ucꞌabꞌa Oholibamá.
GEN 36:26 Y uyunenobꞌ e Disón jax era: Ayan e Hemdán y ayan e Esbán y ayan e Itrán y ayan e Querán.
GEN 36:27 Y uyunenobꞌ e Éser jax era: Ayan e Bilhán y ayan e Zaaván y ayan e Acán.
GEN 36:28 Y uyunenobꞌ e Disán jax e Us y e Arán.
GEN 36:29 Pues tin e tuobꞌ uchꞌajnarir e Hor xeꞌ cꞌotoy quetpobꞌ tata viejobꞌirobꞌ tujor inteꞌ inteꞌ chꞌajnarir jax e Lotán y e Sobal y e Sibón y e Aná
GEN 36:30 y e Disón y e Éser y e Disán.
GEN 36:31 Pues conda mato tucꞌa inteꞌ rey tama e lugar Israel ayan tin xeꞌ cay cꞌotoriobꞌ tama e lugar Edom xeꞌ jax era:
GEN 36:32 Ayan e Bela xeꞌ unembꞌir tuaꞌ e Beor xeꞌ cꞌotoy quetpa e bꞌajxan rey tama inteꞌ chinam xeꞌ ucꞌabꞌa Dinaba tama e lugar Edom.
GEN 36:33 Y conda chamay e Bela cay cꞌotori e Jobab xeꞌ unembꞌir tuaꞌ e Zérah xeꞌ ajlugar tama e chinam Bosrá.
GEN 36:34 Y conda chamay e Jobab cay cꞌotori e Husam xeꞌ tuaꞌ uchꞌajnarir e Temán.
GEN 36:35 Y conda e Husam chamay cay cꞌotori e Hadad xeꞌ unembꞌir tuaꞌ e Bedad xeꞌ ajlugar tama e chinam Avit. Pues jax e Hadad era taca usoldadobꞌ xeꞌ cꞌapa ucucruobꞌ tin e tuobꞌ e Madián tama e lugar Moab conda cay uchiobꞌ e tzꞌojyir tacarobꞌ.
GEN 36:36 Y conda chamay e Hadad cay cꞌotori e Samlá xeꞌ ajlugar tama e chinam Masrecá.
GEN 36:37 Y conda chamay e Samlá cay cꞌotori e Saúl xeꞌ ajlugar tama e chinam Rehobot xeꞌ jax inteꞌ chinam xeꞌ aquetpa tutiꞌ e xucur Éufrates.
GEN 36:38 Y conda chamay e Saúl cay cꞌotori e Baal-hanán xeꞌ unembꞌir tuaꞌ e Acbor.
GEN 36:39 Y conda chamay e Baal-hanán cay cꞌotori e Hadad xeꞌ ajlugar tama inteꞌ chinam xeꞌ ucꞌabꞌa Pau. Pues e Hadad ayan inteꞌ uwixcar xeꞌ ucꞌabꞌa Mehetabel xeꞌ ijchꞌoc tuaꞌ e Matred y sitzbꞌir tuaꞌ e Mezaab.
GEN 36:40 Pues jax era ucꞌabꞌobꞌ tin e cay cꞌotoriobꞌ xeꞌ chꞌajnarirobꞌ tuaꞌ e Esaú tama inteꞌ inteꞌ familia y tama inteꞌ inteꞌ lugar: Ayan e Timná y ayan e Alva y ayan e Jetet
GEN 36:41 y ayan e Oholibamá y ayan e Elá y ayan e Pinón
GEN 36:42 y ayan e Quenaz y ayan e Temán y ayan e Mibsar
GEN 36:43 y ayan e Magdiel y ayan e Iram. Pues e Esaú arobꞌna Edom ubꞌan, y jax era tin e cay cꞌotoriobꞌ tama e lugar Edom. Pues bꞌan cocha ucꞌabꞌa tin e war acꞌotori y bꞌan cꞌotoy quetpa ucꞌabꞌa e lugar ubꞌan.
GEN 37:1 Pues entonces e Jacob sutpa ixin tuaꞌ aturuan tama e lugar Canaán tiaꞌ cay turuan utata tama inteꞌ tiempo.
GEN 37:2 Y jax era e checsuyaj tama ufamilia e Jacob. Pues e José jax inteꞌ chꞌom sitz xeꞌ war ucojco diecisiete año xeꞌ jax inteꞌ ajcojc oveja y e chivo taca usacunobꞌ tama uchatuobꞌ xeꞌ jax umaxtacobꞌ e Bilhá y umaxtacobꞌ e Zilpa xeꞌ jax uwixcarobꞌ utata. Y e José cꞌotoy qꞌuecran taca utata tamar e mabꞌambꞌanir lo que war uchiobꞌ usacunobꞌ.
GEN 37:3 Pues e Jacob war atzay uwira ut e José más meyra que tunor e inmojr umaxtacobꞌ, cocha e José cuxpa conda jaxir onian winic. Y tamar era uche inteꞌ ubꞌujc e José xeꞌ galan uwirnar y xeꞌ meyra atujri.
GEN 37:4 Pero conda usacunobꞌ cꞌotoy unatobꞌ que utata war uyajta ut e José más que jaxirobꞌ, cꞌotoy uxejbꞌiobꞌ ut e José inyajrer este que nien machi cꞌani upejcobꞌ.
GEN 37:5 Pues tama inteꞌ acbꞌar e José cꞌotoy uwira inteꞌ uwayac, y conda sacojpa ixin tuaꞌ uchecsu tunor era tut usacunobꞌ. Pero conda cꞌapa uyubꞌiobꞌ tunor era jaxirobꞌ uxejbꞌiobꞌ ut más meyra
GEN 37:6 cocha jaxir uyare y che: —Ubꞌinic, cꞌani inwareox e wayac lo que inwira.
GEN 37:7 Inwira que tunoron turon tama inteꞌ chor war cacachi e trigo tuaꞌ aquetpa utzajqꞌuir, y wacchetaca e tzajqꞌuir tanibꞌa wawan tama uyuxinar tibꞌa y tunor e tzajqꞌuir tibꞌa cay cotuanobꞌ tut e tanibꞌa, che e José.
GEN 37:8 Pero usacunobꞌ sutpa ojronobꞌ taca e José y chenobꞌ: —¿War ca aware que net tuaꞌ icꞌotori ticajor, y que net tuaꞌ achion camanxujres cabꞌa toit? che usacunobꞌ. Y cay uxejbꞌiobꞌ ut más e José tamar uwayac lo que cay uchecsu tutobꞌ.
GEN 37:9 Pues nacpat era e José uwira otronteꞌ uwayac xeꞌ ixin uchecsu tut usacunobꞌ. Y che: —Pues inwira otronteꞌ niwayac tiaꞌ inwira que e qꞌuin y e luna y once lucero war acotuanobꞌ taniut, che e José.
GEN 37:10 Y de allí e José ixin uchecsu e wayac era tut utata. Pero utata cay ucꞌaye y che: —¿Tucꞌa cꞌani aware taca e wayac era xeꞌ awira? ¿War ca abꞌijnu que atuꞌ y nen taca tunor awermanobꞌ ucꞌani tuaꞌ cacotuan toit? che utata e José.
GEN 37:11 Y tamar era cay cꞌuxnaqꞌui meyra usacunobꞌ upater e José. Pero utata utꞌabꞌse tunor era tama uyalma y ubꞌijnu tamar iraj iraj.
GEN 37:12 Entonces tama inteꞌ día usacunobꞌ e José ixiobꞌ esto tama inteꞌ lugar xeꞌ ucꞌabꞌa Siquem tiaꞌ ayan meyra ac tuaꞌ ucꞌuxiobꞌ e sian oveja y e sian chivo tuaꞌ utata.
GEN 37:13 Entonces conda numuy cora tiempo e Jacob uyare e José y che: —Pues ayix cora día desde que ixiobꞌ asacunobꞌ esto tama e lugar Siquem tuaꞌ ucojcobꞌ e sian aracꞌobꞌ. Quisinic iꞌxin tuaꞌ awira cocha turobꞌ, che e Jacob. Y ojron e José y che: —Bueno, che e José.
GEN 37:14 Y che e Jacob: —Chꞌujcun awira cocha turobꞌ asacunobꞌ y e sian oveja, y sutpen wacchetaca tuaꞌ achecsu taniut jay imbꞌutz turobꞌ, che e Jacob. Y tamar era e Jacob uyare e José tuaꞌ alocꞌoy tama e lugar tiaꞌ turobꞌ tama e chinam Hebrón tuaꞌ axin esto tama e lugar Siquem, y conda e José cꞌotoy tama e lugar era,
GEN 37:15 usati e bꞌir. Y entonces e José tajwina umen inteꞌ winic xeꞌ ubꞌna tuaꞌ y che: —¿Tucꞌa war ixana asajca? che e winic.
GEN 37:16 Entonces ojron e José y che: —War inxana insajca nisacunobꞌ. ¿Erer ca awaren tiaꞌ war ucojcobꞌ e sian aracꞌobꞌ? che e José.
GEN 37:17 Y e winic che: —Yopobꞌ tara, pero de allí locꞌoy ixiobꞌ otronyajr. Pero umbꞌi oꞌjronobꞌ que cꞌani axiobꞌ esto tama e lugar Dotán, che e winic. Entonces e José ixin esto tama e lugar Dotán tuaꞌ usajca usacunobꞌ y yaꞌ yajaꞌ utajwiobꞌ.
GEN 37:18 Pero usacunobꞌ e José cꞌotoy uwirobꞌ que jax e José conda innajtto turu, y conda merato acꞌotoy cay ubꞌijnuobꞌ tuaꞌ uchamsiobꞌ.
GEN 37:19 Y cay uyare ubꞌobꞌ jaxobꞌ taca y che inteꞌ: —Iranic, yajaꞌ watar e ajwayac, che inteꞌ.
GEN 37:20 Y sutpa ojron otronteꞌ y che: —Laric, incuic cachamsic, y nacpat era erer cayari tama inteꞌ pambꞌir chꞌen y erer caware que cꞌujxa umen inteꞌ nuxi animal, che inteꞌ. Y de allí sutpa ojron otronteꞌ y che: —Entonces caxin cawira tucꞌa tuaꞌ anumuy taca tunor uwayac, che otronteꞌ tujam usacunobꞌ e José.
GEN 37:21 Pero conda e Rubén cꞌotoy unata lo que war ubꞌijnuobꞌ uchiobꞌ e inmojr era, cay usicbꞌa cocha tuaꞌ ucorpes e José y che: —Ma ani jax bueno tuaꞌ cachamse cawijtzꞌin.
GEN 37:22 Machi tuaꞌ cawechꞌe uchꞌichꞌer e sitz. Mejor cayaric tama inteꞌ nuxi chꞌen xeꞌ intam tara tama e choquem lugar, pero machix tuaꞌ cayobꞌi e sitz, che e Rubén. Bꞌan ojron e Rubén umen que war ubꞌijnu tuaꞌ ani ucorpes e José y tuaꞌ uqꞌueche axin tut utata otronyajr conda machi turobꞌ e inmojr era.
GEN 37:23 Entonces conda e José cꞌotoy tiaꞌ turobꞌ usacunobꞌ, jaxirobꞌ ulocsiobꞌ ubꞌujc xeꞌ galan uwirnar lo que lapar umener,
GEN 37:24 y uchuquiobꞌ y uyariobꞌ tama inteꞌ nuxi chꞌen xeꞌ intam xeꞌ matucꞌa e jaꞌ tamar.
GEN 37:25 Entonces nacpat era conda turuanobꞌ tuaꞌ awiobꞌ uwirobꞌ que war anumuy cora ajchonmarobꞌ xeꞌ chꞌajnarirobꞌ tuaꞌ e Ismael xeꞌ war watobꞌ tama e lugar Galaad y xeꞌ war uqꞌuechiobꞌ axin meyra cosa tama ucamellobꞌ, bꞌan cocha e perfume xeꞌ galan ojtzꞌun, y e bálsamo y e mirra que erer acꞌampesna bꞌan cocha e ujtzꞌubꞌ. Y war uqꞌuechiobꞌ axin tunor era esto tama e lugar Egipto tuaꞌ uchoniobꞌ.
GEN 37:26 Entonces ojron e Judá taca upiarobꞌ y che: —¿Tucꞌa tuaꞌ cachꞌami jay cachamse cawijtzꞌin y de allí aquetpato tuaꞌ cabꞌijnu cocha tuaꞌ camuqui uchamer?
GEN 37:27 Más ani bueno tuaꞌ cachoni e sitz taca e ajchonmarobꞌ era y machi cachamse, porque nacpat tunor era jaxir jax cawijtzꞌin, che e Judá. Entonces e inmojr era chenobꞌ que bueno.
GEN 37:28 Y conda e ajchonmarobꞌ xeꞌ tuaꞌ e lugar Midian numuyobꞌ tiaꞌ turobꞌ, ixin usacunobꞌ e José tuaꞌ ulocsiobꞌ tiaꞌ turu macuir e nuxi chꞌen y uchoniobꞌ taca e ajchonmarobꞌ era tama veinte ut tumin xeꞌ chembꞌir tama e plata. Y bꞌan cocha era e ajchonmarobꞌ uqꞌuechiobꞌ ixin e José esto tama e lugar Egipto.
GEN 37:29 Pero conda e Rubén sutpa yopa esto tama e nuxi chꞌen y uwira que machi turu e José macuir, uwejru ubꞌujc cocha inteꞌ chequerir que war acꞌuxun uyalma.
GEN 37:30 Y wacchetaca sutpa ixin esto tiaꞌ turobꞌ upiarobꞌ, y uyare y che: —E sitz machix turu. ¿Tucꞌa tuaꞌ cache coner? che e Rubén.
GEN 37:31 Entonces cay ubꞌijnuobꞌ inteꞌ intiobꞌ que mabꞌambꞌan tunor lo que cay uchiobꞌ y que ma cocha erer uchecsuobꞌ tunor era tut utatobꞌ. Y tamar era cay ubꞌijnuobꞌ tuaꞌ umajresobꞌ utatobꞌ tamar lo que uchiobꞌ taca e José. Entonces uchꞌamiobꞌ ubꞌujc e José y ubꞌoniobꞌ taca uchꞌichꞌer incojt chuchuꞌ chivo xeꞌ uchamsiobꞌ.
GEN 37:32 Y entonces uqꞌuechiobꞌ ixin e bꞌujc era tut utatobꞌ y chenobꞌ: “Catajwi e bꞌujc era. Chꞌujcun awira jay jax ubꞌujc oynen”, che e inmojr unembꞌirobꞌ era.
GEN 37:33 Pero conda e Jacob uwira e bꞌujc cay aru y che: “Bꞌan. Jax ubꞌujc nisitz. Cꞌujxa umen inteꞌ nuxi animal”, che e Jacob.
GEN 37:34 Entonces e Jacob uwejru ubꞌujc y ubꞌujcse ubꞌa taca inteꞌ bꞌujc xeꞌ chembꞌir taca e succhij, y tama meyra día cay aru tama uchamer usitz.
GEN 37:35 Y tunor uyunenobꞌ y tunor uwijchꞌoctac cay uturbꞌobꞌ ubꞌobꞌ tuaꞌ ucꞌuniobꞌ, pero jaxir machi ucꞌani tuaꞌ acꞌujna, y machi uchꞌami e jiriar tama uyalma, y aru tama uyunen y che: “Cꞌani inlapi nibꞌujc xeꞌ chembꞌir taca e succhij tama uchamer nisitz, esto que inxin inmorojse nibꞌa tacar jaxir tujam e chamenobꞌ”, che e Jacob.
GEN 37:36 Pues entonces qꞌuejcha ixin e José esto tama e lugar Egipto, y e ajchonmarobꞌ xeꞌ tuaꞌ e lugar Midian uchoniobꞌ taca inteꞌ winic xeꞌ ucꞌabꞌa Potifar xeꞌ jax inteꞌ ajcꞌampar tuaꞌ e rey y xeꞌ jax e capitán tuaꞌ e policia xeꞌ aquetpobꞌ tuaꞌ ucojcobꞌ e rey tuaꞌ e lugar Egipto.
GEN 38:1 Pues tama e tiempo yajaꞌ e Judá uxere ubꞌa taca usacunobꞌ y taca uwijtzꞌinobꞌ y ixin tuaꞌ aturuan tama uyotot inteꞌ winic xeꞌ ucꞌabꞌa Hirá xeꞌ ajlugar tama e chinam Adulam.
GEN 38:2 Y tama e lugar era e Judá cꞌotoy unata que ayan inteꞌ winic xeꞌ ucꞌabꞌa Súa xeꞌ ajlugar Canaán y que jaxir ayan inteꞌ uwijchꞌoc. Entonces e Judá ixin nujbꞌi tacar. Y conda ixin uchꞌami ubꞌobꞌ,
GEN 38:3 e ijchꞌoc cꞌotoy quetpa wawan taca uyar, y conda numuy cora día cuxpa inteꞌ sitz y uturbꞌobꞌ ucꞌabꞌa Er.
GEN 38:4 Y de allí quetpa wawan otronyajr taca otronteꞌ uyar y sutpa cuxpa otronteꞌ sitz y uturbꞌobꞌ ucꞌabꞌa Onán.
GEN 38:5 Pues conda numuy cora año e Judá taca tunor ufamilia ixiobꞌ tuaꞌ aturuanobꞌ tama e chinam Quezib y uwixcar e Judá cꞌotoy quetpa wawan otronyajr, y cuxpa otronteꞌ sitz y uturbꞌobꞌ ucꞌabꞌa Selá.
GEN 38:6 Pues conda e Er xeꞌ jax e yaxar sitz cꞌapa chꞌi, e Judá ixin usicbꞌa inteꞌ ijchꞌoc tuaꞌ anujbꞌi tacar xeꞌ ucꞌabꞌa Tamar.
GEN 38:7 Pero Cawinquirar Dios machi tzay uwira e sian mabꞌambꞌanir lo que cay uche e Er, y tamar era ulocse ucuxtar.
GEN 38:8 Entonces e Judá uyare e Onán cocha era y che: —Nujbꞌien taca uwixcar asacun ani cocha net mubꞌiret tuaꞌ, bꞌan cocha ucꞌani cacostumbre conda achamay e sacumbꞌir y matucꞌa umaxtac. Y bꞌan cocha era erer axin achecta uchꞌajnarir asacun tamaret, che e Judá.
GEN 38:9 Pero cocha e Onán war unata que e maxtac xeꞌ axin acuxpa taca e Tamar machi tuaꞌ aquetpa tuach, sino que axin aquetpa tuaꞌ usacun ani, machi ucꞌani. Y tamar era conda ixin uchꞌami ubꞌa taca uwixcar, uche ubꞌa tuaꞌ machi achecta uyar e ixic umener, cocha machi war ucꞌani tuaꞌ alocꞌoy uchꞌajnarir usacun tamar jaxir.
GEN 38:10 Y tamar era Cawinquirar Dios qꞌuijna meyra tamar lo que uche e Onán, y ixin ulocse ucuxtar ubꞌan.
GEN 38:11 Entonces e Judá uyare uyaribꞌ xeꞌ jax e Tamar y che: —Quiqui esto tuyotot atata y quetpen abꞌajner tama inteꞌ tiempo este que axin aꞌchꞌi niunen xeꞌ jax e Selá, y de allí erer inujbꞌi tacar, che e Judá uyare e Tamar. Pero e Judá machi ixto war ucꞌani tuaꞌ uyacta anujbꞌi e Selá tacar, y tamar era cay uyare e Tamar cocha era umen que war abꞌacta que bꞌajcꞌat axin achamay e Selá bꞌan taca cocha chamayobꞌ usacunobꞌ. Y entonces ixin e Tamar tuaꞌ aturuan tama uyotot utata.
GEN 38:12 Entonces conda numuy cora año chamay uwixcar e Judá xeꞌ ijchꞌoc tuaꞌ e Súa. Y conda sisa cora e cꞌuxner lo que war unumse ubꞌa tama uchamer uwixcar, e Judá ixin esto tama e chinam Timnat tiaꞌ war asujsa utzutzer uyoveja, y ixin ubꞌan e Hirá xeꞌ ajlugar tama e chinam Adulam cocha war atzay uwira ubꞌa taca e Judá.
GEN 38:13 Pero conda cꞌotoy unata e Tamar que upixam ixin esto tama e chinam Timnat tuaꞌ utacre asujsa utzutzer uyoveja,
GEN 38:14 ixin ulocse ubꞌujc xeꞌ jarbꞌir taca e succhij bꞌan ani cocha cay uche e ixictac ixnix conda achamay uviejo inteꞌ ixic, y ubꞌochꞌi ut tacar inteꞌ payuj tuaꞌ machi anatanwa chi jaxir umen tin e turobꞌ yajaꞌ, y de allí ixin turuan tama uyocher e chinam Enaim, xeꞌ turu tama ubꞌirar e chinam Timnat. Y bꞌan uche umen que cꞌotoy unata que e Selá ayix meyra ujabꞌ, pero que upixam merato uche anujbꞌi tacar jaxir.
GEN 38:15 Pues conda e Judá uwira e ixic era, cay ubꞌijnu que jax inteꞌ ixic xeꞌ unata uchoni ubꞌa cocha bien bꞌochꞌor ut bꞌan ani cocha uche inteꞌ ajmabꞌambꞌan ixic.
GEN 38:16 Y tamar era quetpa wawan tama e bꞌir tut e ixic, cocha machi unata jay jax uyaribꞌ, y de allí upejca cocha era y che: —¿Awacten ca tuaꞌ inchꞌan tacaret? che e Judá uyare e ixic. Y che e ixic: —Y ¿tucꞌa tuaꞌ awajqꞌuen jay ichꞌan tacaren? che e ixic.
GEN 38:17 Ojron e Judá y che: —Cꞌani inwebꞌta watar incojt bꞌiqꞌuit chivo xeꞌ ayan tacaren, che e Judá. Y che e ixic: —Bueno pue. Pero actan tacaren cora lo que qꞌuecher amener bꞌan cocha inteꞌ regalo este que axin awebꞌta watar lo que cꞌani awajqꞌuen, che e ixic.
GEN 38:18 Entonces ojron e Judá y che: —¿Tucꞌa acꞌani tuaꞌ inwajqꞌuet? che e Judá. Y che e ixic: —Ajcꞌunen awanillo xeꞌ ayan acꞌabꞌa tamar xeꞌ chꞌur tama anuc taca e tzꞌojnoc y e bordón lo que qꞌuecher amener, che e ixic. Entonces e Judá uyajcꞌu tunor lo que cꞌajna umener, y de allí ixin chꞌan taca e ixic, y jaxir cuchuan incojt uyar.
GEN 38:19 Y de allí sutpa ixin e ixic esto tuyotot y ulocse e payuj xeꞌ bꞌochꞌor ani ut tamar, y sutpa ulapi ubꞌujc otronyajr xeꞌ jarbꞌir taca e succhij bꞌan cocha ucꞌani e costumbre tuaꞌ.
GEN 38:20 Pues conda numuy cora día, e Judá uyebꞌta ixin incojt bꞌiqꞌuit chivo taca e Hirá tuaꞌ uyajcꞌu e ixic tuaꞌ uyubꞌi asutpa uchꞌami lo que ajcꞌuna tama inyajr, pero e Hirá machi utajwi tiaꞌ turu e ixic.
GEN 38:21 Entonces cay uyubꞌi tuaꞌ e winicobꞌ tama e lugar yajaꞌ y che: —¿Tiaꞌ turu e ixic xeꞌ unata uchoni ubꞌa xeꞌ ajlugar Enaim xeꞌ turu ani tama utiꞌ e bꞌir? che e Hirá. Entonces ojronobꞌ e winicobꞌ y chenobꞌ: —Pues tama e lugar era matucꞌa e ixictac xeꞌ unatobꞌ uchoni ubꞌobꞌ, chenobꞌ e winicobꞌ era.
GEN 38:22 Entonces e Hirá sutpa ixin tiaꞌ turu e Judá y uyare cocha era y che: —Machi intajwi e ixic y e winicobꞌ tama e lugar yajaꞌ chenobꞌ que matucꞌa e ixictac xeꞌ unatobꞌ uchoni ubꞌobꞌ, che Hirá uyare e Judá.
GEN 38:23 Entonces ojron e Judá y che: —Pues erer aquetpa taca e ixic tunor lo que inwajcꞌu tama inyajr. Porque jay casutpa coybꞌi tuaꞌ e gente otronyajrto que: ‘¿Tiaꞌ turu e ixic?’ bꞌajcꞌat axin asactzeniobꞌ tamaron. Pero cocha inwebꞌtix ixin incojt bꞌiqꞌuit chivo tuaꞌ ani inwajcꞌu bꞌan cocha quetpa tuaꞌ inche, pues ma cocha más cocha machi atajwi e ixic, che e Judá.
GEN 38:24 Pues conda numuy uxteꞌ mes, cꞌotoy arobꞌna e Judá cocha era y che: —Pues e Tamar xeꞌ jax awaribꞌ machi cay ucojco ubꞌa, y coner war ucojco uyar umen que chꞌajma umen inteꞌ winic, che arobꞌna e Judá. Entonces ojron e Judá y che: —Locsenic patir e chinam y putanic este que achamay, che e Judá taca inteꞌ nuxi nuc.
GEN 38:25 Pero conda war aloqꞌuesna najtir e chinam, e Tamar uyare tuaꞌ arobꞌna upixam cocha era y che: “Pues uwinquir tunor lo que qꞌuecher nimener era jax tuaꞌ e winic xeꞌ uchien inquetpa inwawan conda uchꞌamien. Chꞌujcun awira chi tuaꞌ e anillo era xeꞌ ayan e tzꞌojnoc tamar, y chꞌujcun awira chi tuaꞌ e bordón era”, che e Tamar.
GEN 38:26 Y conda e Judá uwira tunor era ojron y che: “Pues e ixic era war uche lo que imbꞌutz, y jax nen xeꞌ ixien inche e mabꞌambꞌanir tacar cocha machi inche bꞌan cocha aquetpa ani tuaꞌ inche cocha machi inche anujbꞌi taca e Selá xeꞌ jax niunen xeꞌ cumix”, che e Judá. Y tamar era uyare tuaꞌ machi achamesna. Pero mix tiaꞌ sutpa uchꞌami ubꞌa taca e Tamar otronyajr.
GEN 38:27 Pues conda cuxpa uyar e Tamar, uwira que cuach uchꞌurcabꞌ.
GEN 38:28 Y tama e hora conda war acuxpa, incojt ulocse ucꞌabꞌ bꞌajxan y e partera ucachi inteꞌ chacchac tzꞌojnoc tama unuc ucꞌabꞌ y ojron cocha era y che: “Jax era xeꞌ cuxpa bꞌajxan”, che e partera.
GEN 38:29 Pero wacchetaca e chꞌurcabꞌ era sutpa uyose ucꞌabꞌ, y de allí cuxpa uwijtzꞌin bꞌajxan. Entonces e partera uturbꞌa ucꞌabꞌa e chꞌurcabꞌ era Fares xeꞌ war che: “Jax era tin xeꞌ upasi e bꞌir tiaꞌ tuaꞌ anumuy”, che e partera.
GEN 38:30 Y de allí cuxpa e incojt chꞌurcabꞌ xeꞌ cachar e chacchac tzꞌojnoc tama unuc ucꞌabꞌ, y tamar era uturbꞌobꞌ ucꞌabꞌa Zérah xeꞌ war che “Chacchac”.
GEN 39:1 Pues entonces e José qꞌuejcha ixin esto tama e lugar Egipto umen cora ajchonmarobꞌ xeꞌ tuaꞌ uchꞌajnarir e Ismael xeꞌ sutpa uchoniobꞌ taca inteꞌ winic xeꞌ ajlugar Egipto xeꞌ ucꞌabꞌa Potifar. Pues e Potifar era jax inteꞌ ajcꞌampar tuaꞌ e rey y jax e capitán tuaꞌ e policia xeꞌ aquetpobꞌ tuaꞌ ucojcobꞌ e rey.
GEN 39:2 Pero Cawinquirar Dios war utacre e José, y tamar era locꞌoy imbꞌutz tunor lo que uche, y war aturuan tama uyotot upatron xeꞌ jax e Potifar.
GEN 39:3 Y conda upatron cꞌotoy uwira que Cawinquirar Dios war utacre e José y que war uche alocꞌoy imbꞌutz tunor lo que uche tama uyotot
GEN 39:4 jaxir tzay meyra uwira e José y uche tuaꞌ aquetpa ajtacarsiaj tuaꞌ, y de allí uturbꞌa tuaꞌ aquetpa ajcojc tama tunor uyotot, y uturbꞌa tunor lo que ayan tuaꞌ tama ucꞌabꞌ e José tuaꞌ acꞌotori tamar.
GEN 39:5 Pues tama e día yajaꞌ conda e Potifar uyacta tunor lo que ayan tuaꞌ tama ucꞌabꞌ e José tuaꞌ aquetpa bꞌan cocha inteꞌ ajyum tamar, Cawinquirar Dios cay uchojbꞌes ut meyra tunor lo que ayan tuaꞌ e Potifar tama uyotot y tiaꞌ war apatna tama e rum y tama uyaracꞌobꞌ ubꞌan.
GEN 39:6 Entonces cocha e José war ucojco tunor lo que actana tacar, e Potifar machixto war ubꞌijnu tamar lo que ayan tuaꞌ, sino que war taca ubꞌijnu tamar lo que cꞌani ucꞌuxi. Pues e José galan uwirnar y aqꞌuecꞌo.
GEN 39:7 Y conda numuy cora día, uwixcar upatron cay uyusre ut jaxir y tamar era upejca e José tama inteꞌ día y che. —Chꞌaren tacaren era, che uwixcar upatron.
GEN 39:8 Pero e José machi ucꞌani y uyare uwixcar upatron y che: —Ubꞌin lo que cꞌani inwaret era, nipatron uyacta tacaren tunor lo que ayan tuaꞌ y umen taca era que turen tama uyotot, y tamar era jaxir machi tuaꞌ ubꞌijnu tamar lo que anumuy tama uyotot.
GEN 39:9 Pues tama e otot era mamajchi acꞌotori más que nen y nipatron matucꞌa war umuqui taniut tama tunor lo que ayan tama uyotot, sino que jax taca net xeꞌ machi turet yebꞌar nicꞌotorer cocha jaxet uwixcar nipatron. Y tamar era ma cocha erer inche e mabꞌambꞌanir lo que net war awaren tuaꞌ inche tacaret. Y ma cocha erer tuaꞌ inche e mabꞌambꞌanir cocha era tut e Dios, che e José uyare uwixcar upatron.
GEN 39:10 Y motor que uwixcar e Potifar war uyare e José tama inteꞌ inteꞌ día tuaꞌ axin achꞌan tacar, pero e José machi ixin tacar y machi quetpa macuir e otot tacar.
GEN 39:11 Pues tama inteꞌ día ochoy e José tama e otot tuaꞌ uche upatnar, y mamajchi ayan macu sino que jax taca jaxir y e ixic
GEN 39:12 conda wacchetaca e ixic uchuqui ubꞌujc e José xeꞌ coyor tama unac y uyare cocha era y che: —Chꞌaren tacaren, che e ixic. Pero jaxir locꞌoy ajni tut e ixic y quetpato ubꞌujc tama ucꞌabꞌ e ixic.
GEN 39:13 Pero conda e ixic uwira que actana ubꞌujc e José tama ucꞌabꞌ conda locꞌoy ajni,
GEN 39:14 cay aru taca inteꞌ nuxi nuc este que uyubꞌiobꞌ e inmojr ajpatnarobꞌ xeꞌ turobꞌ patir e otot. Entonces ojron e ixic tacarobꞌ y che: —Iranic, e winic xeꞌ tuaꞌ uchꞌajnarir e Héber xeꞌ taresna umen niviejo cꞌani ani uche e mabꞌambꞌanir tacaren sajmi. Pues jaxir ochoy macu tama niotot tiaꞌ turen, y cꞌani ani achꞌan tacaren, pero nen cay aruen taca inteꞌ nuxi nuc.
GEN 39:15 Y conda uyubꞌi que war anru taca inteꞌ nuxi nuc, locꞌoy ajni y unajpes ubꞌujc, che uwixcar e Potifar.
GEN 39:16 Y tamar era uwixcar e Potifar uquete ubꞌujc e José este que cꞌotoy uviejo tama uyotot otronyajr.
GEN 39:17 Entonces conda cꞌotoy uviejo uyare cocha era y che: —Aman xeꞌ tuaꞌ uchꞌajnarir e Héber lo que net atares ticoit ochoy macuir e otot y cꞌani ani achꞌan tacaren,
GEN 39:18 pero conda aruen taca inteꞌ nuxi nuc, locꞌoy ajni y unajpes ubꞌujc y uyacta tacaren.
GEN 39:19 Pues bꞌan cocha era uche aman tacaren, che e ixic uyare uviejo. Entonces qꞌuijna meyra upatron e José conda uyubꞌi tunor lo que arobꞌna umen uwixcar,
GEN 39:20 y tamar era uchuqui e José y uyare tuaꞌ aqꞌuejcha axin tama e cárcel tiaꞌ macarobꞌ tunor tin e war aqꞌuijna eꞌrna umen e rey. Pero conda turu e José tama e cárcel
GEN 39:21 war atacarna umen Cawinquirar Dios y war eꞌrsena ucꞌunersiaj e Dios iraj iraj, y uche tuaꞌ atacbꞌajri e ajcojc cárcel tacar.
GEN 39:22 Y tamar era e José actana tuaꞌ ucojco tunor tin e chꞌarobꞌ tama e cárcel. Y quetpa yebꞌar ucꞌabꞌ e José tunor lo que numuy tama e cárcel.
GEN 39:23 Y tamar era e ajcojc cárcel machi war ubꞌijnu tamar lo que war uche e José cocha Cawinquirar Dios war utacre y war uche alocꞌoy imbꞌutz tunor lo que war uche.
GEN 40:1 Pues entonces conda numuy cora tiempo, ayan lo que cay unumse ubꞌa e rey tama e lugar Egipto umen que chateꞌ manobꞌ tuaꞌ cay uchiobꞌ lo que mabꞌambꞌan tut, inteꞌ era jax xeꞌ aquetpa tuaꞌ uyajcꞌu e vino tama uchꞌeu e rey, y inteꞌ jax xeꞌ aquetpa tuaꞌ uche e pan lo que ucꞌuxi e rey.
GEN 40:2 Pues e rey qꞌuijna meyra taca e chateꞌ manobꞌ era.
GEN 40:3 Y tamar era uyebꞌta ixiobꞌ esto tama e cárcel lo que ayan tama uyotot e capitán tuaꞌ e policia xeꞌ jax e lugar tiaꞌ macar e José ubꞌan.
GEN 40:4 Entonces e capitán tuaꞌ e policia xeꞌ aquetpobꞌ tuaꞌ ucojcobꞌ e rey uyare e José tuaꞌ ucojco e chateꞌ manobꞌ era. Y bꞌan taca quetpobꞌ tama e cárcel meyra tiempo.
GEN 40:5 Pues tama inteꞌ acbꞌar e chateꞌ manobꞌ cay waycꞌobꞌ inteꞌ intiobꞌ, inteꞌ man jax xeꞌ aquetpa ani tujor e manobꞌ xeꞌ uyajcꞌu e vino e rey, y inteꞌ jax xeꞌ aquetpa ani tujor e manobꞌ xeꞌ uyajcꞌu e pan e rey. Y chatertiobꞌ waycꞌobꞌ y inteꞌ inteꞌ wayac ayan lo que war che.
GEN 40:6 Y conda sacojpa tama inteꞌ día tari e José tuaꞌ uwira e manobꞌ era, y uwira que war amerecnobꞌ meyra.
GEN 40:7 Y tamar era e José uyubꞌi tuobꞌ y che: —¿Tucꞌa tuaꞌ que war ixmerecna meyra sacojpox sajmi? che e José.
GEN 40:8 Y ojron inteꞌ tujamobꞌ y che: —Pues nen y nipiar era waycꞌon acbꞌar y mamajchi uyubꞌi uyareon tucꞌa war che cawayac era, chenobꞌ tin e macarobꞌ turobꞌ tama e cárcel. Entonces sutpa ojron e José y che: —Pues jax taca e Dios xeꞌ unata uchecsu lo que war che inteꞌ wayac. che e José. Entonces e José uyubꞌi tuobꞌ tuaꞌ unata tucꞌa e wayac lo que uwirobꞌ.
GEN 40:9 Entonces inteꞌ man era xeꞌ aquetpa ani tama ujor e manobꞌ xeꞌ uyajcꞌu e vino e rey, cay uchecsu tut e José lo que uwira tama uwayac y che: —Pues tama niwayac inwira unojwir inteꞌ chꞌan
GEN 40:10 xeꞌ ayan uxteꞌ ucꞌabꞌ. Y unojwir e chꞌan era war achujchuri y war anichiri, y unichirobꞌ sutpa quetpa bꞌan cocha urasimuir e uva conda war atacꞌa.
GEN 40:11 Y nen qꞌuecher nimener uchꞌeu e rey tama nicꞌabꞌ, y war inyatzꞌi uyarar e uva tama e chꞌeu. Y nacpat era inturbꞌa e chꞌeu tama ucꞌabꞌ e rey, che e man era.
GEN 40:12 Entonces ojron e José y che: —Pues Niwinquirar Dios uwirsen lo que war che awayac. Y che cocha era: E uxteꞌ ucꞌabꞌ unojwir e chꞌan era war che que ayan uxteꞌ día.
GEN 40:13 Entonces tama e uxteꞌ día era e rey cꞌani uturbꞌet tuaꞌ ipatna tacar otronyajr, y net tuaꞌ isutpa awajcꞌu uchꞌeu e rey xeꞌ ayan e vino tamar, bꞌan taca cocha cay ache.
GEN 40:14 Pero conda awira que acꞌapa alocꞌoy imbꞌutz tunor era toit, acꞌajpesiquen tamar lo que inwaret y turbꞌan abꞌa tuaꞌ aquetpa incꞌun awirnar taniut, y aren e rey que turen tara y aren tuaꞌ ulocsen tama e cárcel.
GEN 40:15 Pues nen xujchnen tama e lugar tuaꞌ tin e tuobꞌ uchꞌajnarir e Héber y taresnen esto tara tama e lugar Egipto, y motor conda yopen tara matucꞌa inche xeꞌ mabꞌambꞌan tuaꞌ ani inturbꞌana tama e cárcel era, che e José.
GEN 40:16 Pues conda e man xeꞌ uturbꞌa ani e pan tama ucꞌabꞌ e rey cꞌapa uyubꞌi tunor lo que che e José tamar uwayac inteꞌ man era, cay uchecsu tut e José e wayac lo que uwira jaxir y che: —Pues nen wayqꞌuen inwira que qꞌuecher nimener uxteꞌ bꞌiqꞌuit chiquiꞌ xeꞌ bꞌutꞌur taca e pan tama nijor.
GEN 40:17 Y e chiquiꞌ xeꞌ cꞌatar tichan tama nijor bꞌutꞌur taca meyra sian pan xeꞌ aquetpa tuaꞌ inwajcꞌu e rey, pero cꞌotoy cora mut xeꞌ cay ucꞌuxiobꞌ tunor e pan lo que ayan tama e chiquiꞌ, che e man era.
GEN 40:18 Entonces ojron e José y che: —Pues awayac lo que cay awira war che cocha era: E uxteꞌ bꞌiqꞌuit chiquiꞌ lo que awira tama awayac war uchecsu que ayan uxteꞌ día.
GEN 40:19 Entonces tama e uxteꞌ día era e rey cꞌani uyare cora ajcꞌamparobꞌ tuaꞌ ujuxiobꞌ ajor y tuaꞌ uchꞌubꞌetobꞌ tama inteꞌ teꞌ, y de allí axin watarobꞌ cora usij tuaꞌ ucꞌuxiobꞌ awerir, che e José uyare e man era.
GEN 40:20 Pues e rey quetpa tuaꞌ utzꞌacse año tama e uxteꞌ día y tamar era cay nojqꞌuiniobꞌ taca tunor uyajcꞌamparobꞌ. Y achpa e rey tut tunor tin e turobꞌ tama e nojqꞌuin, y uyare tuaꞌ aloqꞌuesna tama e cárcel uman xeꞌ quetpa ani tujor tin e uyajcꞌu uchꞌeu e rey, y uyare tuaꞌ aloqꞌuesna uman xeꞌ quetpa ani tujor tin e uyajcꞌu e pan e rey ubꞌan.
GEN 40:21 Pues e man xeꞌ quetpa ani tujor tin e uyajcꞌu e vino e rey uturbꞌa tuaꞌ apatna tacar otronyajr, y tamar era sutpa uyajcꞌu e vino e rey otronyajr, bꞌan cocha war ani uche.
GEN 40:22 Pero e man xeꞌ quetpa ani tujor tin e uche e pan uyare tuaꞌ ajijtꞌa unuc y tuaꞌ achꞌubꞌna tama inteꞌ teꞌ, bꞌan taca cocha arobꞌna umen e José.
GEN 40:23 Pero e man xeꞌ aquetpa tuaꞌ uyajcꞌu e vino e rey unajpes e José y matucꞌa uchecsu tut e rey.
GEN 41:1 Pues entonces conda numuy chateꞌ año e rey waycꞌa que war awawan tama utiꞌ inteꞌ xucur xeꞌ ucꞌabꞌa Nilo,
GEN 41:2 y uwira tama uwayac que tamar e xucur locꞌoyobꞌ siete wacax xeꞌ galan utobꞌ y xeꞌ anojranobꞌ meyra, y war ucꞌuxiobꞌ e cꞌopot tujam e pojp.
GEN 41:3 Y de allí locꞌoyobꞌ otro siete wacax tama e xucur xeꞌ calapir utobꞌ y xeꞌ cꞌoxobꞌ xeꞌ ixiobꞌ wawanobꞌ tuyejtzꞌer e inmojr wacaxobꞌ era.
GEN 41:4 Y de allí e siete wacax xeꞌ calapir utobꞌ y xeꞌ cꞌoxobꞌ cꞌapa ucꞌuxiobꞌ e siete wacax xeꞌ galanic y xeꞌ anojranobꞌ meyra. Y de allí bꞌixcꞌa e rey.
GEN 41:5 Entonces e rey sutpa wayan otronyajr y sutpa uwira otronteꞌ uwayac, y waycꞌa uwira cocha era: Ayan siete uchujchur e trigo xeꞌ bꞌutꞌur ut tamar y xeꞌ galan uwirnarobꞌ y que war aꞌchꞌiobꞌ tama inteꞌ taca ucujquir.
GEN 41:6 Y de allí chujchuri otronteꞌ siete uchujchur xeꞌ taquin y xeꞌ purem ut umen e icꞌar xeꞌ apurutsan meyra.
GEN 41:7 Y e siete uchujchur era xeꞌ taquin ut ixin ucꞌuxi e siete uchujchur xeꞌ galanic y xeꞌ bꞌutꞌur ut. Y de allí bꞌixcꞌa e rey otronyajr, y cꞌotoy ubꞌijnu que jax taca inteꞌ wayac.
GEN 41:8 Pero conda sacojpa tama inteꞌ día cay ubꞌijnu meyra tamar uwayac lo que uwira, y tamar era uyare tuaꞌ apejcna watobꞌ tin tin xeꞌ unata uchecsu lo que war che inteꞌ wayac. Entonces conda yopobꞌ, e rey cay uchecsu tin e unatobꞌ aqꞌuiniobꞌ, pero mamajchi tujamobꞌ ubꞌna uyare lo que che uwayac era.
GEN 41:9 Entonces e man xeꞌ aquetpa tujor e inmojr manobꞌ xeꞌ uyajcꞌu e vino e rey cay uyare e rey y che: —Pues este era cꞌajpa nimener tama e mabꞌambꞌanir lo que cay inche.
GEN 41:10 Pues ayan inyajr conda net cay qꞌuijnet meyra taca chateꞌ aman, y tamar era awebꞌta ixion chatertion taca e ajcheyaj pan tama e cárcel lo que ayan tama uyotot e capitán tuaꞌ e policia.
GEN 41:11 Y conda turon yajaꞌ tama e cárcel ayan inteꞌ acbꞌar conda chatertion cay cawira inteꞌ cawayac, y inteꞌ inteꞌ wayac ayan lo que che.
GEN 41:12 Y tama e cárcel era turu inteꞌ chꞌom sitz tacaron xeꞌ tuaꞌ uchꞌajnarir e Héber xeꞌ jax inteꞌ man tuaꞌ e capitán tuaꞌ e policia. Y cachecsu cawayac tacar y jaxir cay uchecsu lo que war che tunor era.
GEN 41:13 Y numuy tunor bꞌan taca cocha jaxir cay uyareon. Pues net sutpet awajqꞌuen nipatnar otronyajr, y e incojt aware tuaꞌ ajijtꞌa unuc y tuaꞌ achꞌubꞌna tama inteꞌ teꞌ este que chamay, bꞌan taca cocha e chꞌom sitz uyareon, che e man era.
GEN 41:14 Entonces e rey uyare tuaꞌ apejcna watar e José. Entonces e José loqꞌuesna tama e cárcel wacchetaca, y de allí ususi utzucti, y ulapi e bꞌujc xeꞌ más galan, y de allí ixin tuaꞌ awawan tut e rey.
GEN 41:15 Entonces e rey uyare e José y che: —Pues nen ayan chateꞌ wayac lo que inwira, y mamajchi ubꞌna uchecsu lo que war che. Pero nen cꞌotoy innata que net uyubꞌiet achecsu lo que war che inteꞌ wayac conda iyarobꞌna tamar, che e rey.
GEN 41:16 Entonces ojron e José y che: —Pues majax nen xeꞌ uyubꞌien innata lo que war che inteꞌ wayac cocha era, jax taca e Dios xeꞌ uyubꞌi uchecsu lo que war che awayac tuaꞌ uyubꞌiet ijiri tama awalma, che e José uyare e rey.
GEN 41:17 Entonces e rey uyare e José y che: —Pues tama niwayac inwira que waren tama utiꞌ e xucur Nilo,
GEN 41:18 y que tama e xucur era locꞌoyobꞌ siete wacax xeꞌ anojranobꞌ meyra y que galan uwirnarobꞌ, y war ucꞌuxiobꞌ e cꞌopot tujam e pojp.
GEN 41:19 Pero tama upatobꞌ jaxirobꞌ locꞌoyobꞌ otro siete wacax xeꞌ calapir uwirnarobꞌ y xeꞌ cꞌoxobꞌ. Pues nen ma tiaꞌ acay inwira cora wacax xeꞌ más calapir uwirnarobꞌ tama tunor or e lugar Egipto.
GEN 41:20 Pues e wacax era xeꞌ cꞌoxobꞌ y xeꞌ calapir uwirnarobꞌ cꞌapa ucꞌuxiobꞌ e bꞌajxan siete wacax xeꞌ anojranobꞌ meyra.
GEN 41:21 Y motor que cꞌapa ucꞌuxiobꞌ e siete wacax xeꞌ anojranobꞌ meyra, pero ma chequer tama uwirnarobꞌ, cocha quetpobꞌto cꞌoxobꞌ y calapir uwirnarobꞌ bꞌan taca cocha turobꞌ bꞌajxan. “Y de allí nen bꞌixqꞌuen.
GEN 41:22 Pues nacpat era inwira otronteꞌ wayac tiaꞌ ayan siete uchujchur e trigo xeꞌ bꞌutꞌur ut y que galan uwirnar xeꞌ war aꞌchꞌiobꞌ tama intera taca ucujquir.
GEN 41:23 Y de allí chꞌiobꞌ otro siete uchujchur e trigo xeꞌ taquin y xeꞌ chilin chilin ut y xeꞌ purem ut umen e icꞌar xeꞌ apurutsan meyra.
GEN 41:24 Pues e siete uchujchur e trigo era xeꞌ taquin cꞌapa ucꞌuxiobꞌ e siete uchujchur e trigo xeꞌ galanic uwirnar. Pues cay inchecsu tunor era tut tin e war unatobꞌ aqꞌuiniobꞌ, pero nien incojt tujamobꞌ machi uyubꞌi uyarenobꞌ tucꞌa war che e wayac era”, che e rey.
GEN 41:25 Entonces e José uyare e rey y che: —Pues intera taca lo que war che e chateꞌ wayac lo que awira. Pues tamar awayac era e Dios war uchecsu toit lo que cꞌani uche watar e día.
GEN 41:26 Porque e siete wacax xeꞌ galanic uwirnarobꞌ aquetpobꞌ bꞌan cocha siete año, y bꞌan ubꞌan e siete uchujchur e trigo xeꞌ galanic uwirnarobꞌ.
GEN 41:27 Pues e siete wacax xeꞌ cꞌoxobꞌ y xeꞌ calapir uwirnarobꞌ xeꞌ locꞌoyobꞌ tupatobꞌ e siete wacax xeꞌ anojranobꞌ aquetpobꞌ bꞌan cocha siete año ubꞌan, y bꞌan ubꞌan e siete uchujchur e trigo xeꞌ taquin y xeꞌ purem ut umen e icꞌar xeꞌ apurutsan. Pues jax era aquetpobꞌ bꞌan cocha e siete año tama e winar.
GEN 41:28 Pues lo que war inwaret era jax lo que e Dios war uchecsu toit tamar lo que cꞌani uche watar e día.
GEN 41:29 Porque cꞌani watar siete año conda axin alocꞌoy meyra cosecha tama tunor or e lugar Egipto.
GEN 41:30 Pero nacpat era axin watar siete año conda machi cꞌani alocꞌoy nien imbꞌijc e cosecha. Y mamajchi axin ucꞌajpes tunor e sian cosecha lo que cay locꞌoy tama e lugar Egipto, porque e sian winar xeꞌ watar axin ucꞌajpes tunor e cosecha lo que ayan ani tama e lugar Egipto.
GEN 41:31 Pues imbꞌacꞌajr uwirnar e nuxi winar lo que axin watar, cocha machi ixto axin aquetpa chequer nien imbꞌijc e cosecha lo que locꞌoy bꞌajxan.
GEN 41:32 Pues aquetpa inteꞌ taca bꞌijnusiaj tamar e chateꞌ wayac lo que awira, y bꞌan uche e Dios tuaꞌ uwirset que cꞌani ixto uche tunor era, y que machi tuaꞌ anumuy meyra tiempo bꞌajxan que cꞌani uche.
GEN 41:33 “Pues tamar era quisinic que asicbꞌa inteꞌ winic xeꞌ ayan meyra unatanyaj e Dios tamar, y conda aturbꞌana que jaxir aquetpa tuaꞌ acꞌotori tujor tunor lo que ucꞌani tuaꞌ achempa tama e día xeꞌ watar tama e lugar Egipto.
GEN 41:34 Y tamar era quisinic que ache cocha era: Que aturbꞌa cora ajcꞌamparobꞌ tuaꞌ axiobꞌ tama tunor or e lugar Egipto tuaꞌ umorojsiobꞌ chateꞌ pana tama e diez pana lo que axin alocꞌoy tama e cosecha tama tunor e siete año era,
GEN 41:35 y que umorojsicobꞌ e trigo cora cora cocha era tama e siete año conda war alocꞌoy meyra e sian cosecha y que utꞌabꞌsicobꞌ tama inteꞌ lugar tama inteꞌ inteꞌ chinam y que aquetpa tunor era yebꞌar acꞌotorer tuaꞌ uyubꞌiet iꞌxin awese e gente otronyajr conda matucꞌa e cosecha.
GEN 41:36 Y tamar era atzꞌacta e trigo lo que axin aquetpa tꞌabꞌesbꞌir tama inteꞌ inteꞌ chinam tuaꞌ machi axin achamayobꞌ e gente umen e winar tama e siete año xeꞌ watar conda matucꞌa e cosecha tama e lugar Egipto”, che e José.
GEN 41:37 Pues quetpa imbꞌutz tunor e bꞌijnusiaj era tut e rey y tut uyajcꞌamparobꞌ,
GEN 41:38 y tamar era e rey ojron y che: —Ma cocha erer catajwi otronteꞌ winic cocha era xeꞌ ayan unatanyaj e Dios tamar, che e rey.
GEN 41:39 Entonces uyare e José y che: —Mamajchi otronteꞌ xeꞌ ayan meyra unatanyaj e Dios tamar bꞌan cocha ayan tamaret y xeꞌ war unata tucꞌa tuaꞌ uche bꞌan cocha net. Pues chequer que jax e Dios xeꞌ war ubꞌijreset tuaꞌ anata ache tunor era.
GEN 41:40 Pues jax net xeꞌ tuaꞌ iquetpa ajcꞌotorer tama tunor or e lugar Egipto, y tunor e gente axin aquetpa tuaꞌ oꞌbꞌianobꞌ tut tunor lo que net aware. Y jax taca nen xeꞌ tuaꞌ inquetpa más nojta que net, cocha nen jax e reyen, che e rey.
GEN 41:41 Entonces sutpa ojron e rey otronyajr taca e José y che: —Ubꞌin ninuc, nen cꞌani inturbꞌet tuaꞌ iquetpa ajcꞌotorer tama tunor or e lugar Egipto, che e rey.
GEN 41:42 Y de allí e rey ulocse e anillo xeꞌ ayan usello tamar xeꞌ jurur tor ucꞌabꞌ, y ujuriꞌ tor ucꞌabꞌ e José, y uyare tuaꞌ abꞌujcsena taca e bꞌujc xeꞌ más atujri, y que tuaꞌ achꞌubꞌna inteꞌ yujy tama unuc xeꞌ chembꞌir taca e oro.
GEN 41:43 Y nacpat era uyare tuaꞌ atꞌabꞌay tama e carruaje lo que aquetpa tuaꞌ tin e acꞌotori yebꞌar e rey. Y uyare tin e war axanobꞌ tuyejtzꞌerobꞌ tuaꞌ aꞌruobꞌ tut jaxir y che: “Jabꞌic e bꞌir”. Y bꞌan cocha era uche e rey tuaꞌ uche aquetpa ajcꞌotorer e José tama tunor or e lugar Egipto.
GEN 41:44 Entonces e rey uyare e José y che: —Pues nen jax e reyen, pero matucꞌa tuaꞌ uche e gente tama tunor or e lugar Egipto jay majax net aware, che e rey.
GEN 41:45 Entonces e rey uturbꞌa ucꞌabꞌa e José Safenat-panéah xeꞌ jax xeꞌ tuaꞌ acꞌampesna tama e lugar Egipto, y uche tuaꞌ anujbꞌi taca e Asenat xeꞌ jax uwijchꞌoc e Potifera xeꞌ jax inteꞌ sacerdote tama e chinam On. Y bꞌan cocha era e José cꞌotoy quetpa ajcꞌotorer tama e lugar Egipto.
GEN 41:46 Pues war ucojco treinta año e José conda cay cꞌotori yebꞌar ucꞌotorer e rey tama e lugar Egipto. Entonces e José locꞌoy tut e rey y cay xana cora cora tama tunor or e lugar Egipto.
GEN 41:47 Pues tama e siete año yajaꞌ locꞌoy meyra sian cosecha.
GEN 41:48 Y e José uyare tuaꞌ amorojsena tunor e sian trigo lo que locꞌoy tama e siete año era, y utꞌabꞌsiobꞌ e trigo tama inteꞌ lugar tama inteꞌ inteꞌ chinam.
GEN 41:49 Pues morojsena meyra sian trigo bꞌan cocha e sian jiꞌ lo que ayan tutiꞌ e nuxi jaꞌ. Y morojsena meyra sian trigo este que uyacta tuaꞌ ubꞌisiobꞌ, cocha machi uyubꞌi tuaꞌ atzijca tuaꞌ eꞌrna jayteꞌ trigo ayan, cocha ayan meyra sian cosecha.
GEN 41:50 Entonces conda merato acay e año conda aquetpa tuaꞌ achecta e nuxi winar, e José qꞌuechuan chateꞌ umaxtac tacar uwixcar xeꞌ jax e Asenat xeꞌ jax uwijchꞌoc e Potifera xeꞌ jax inteꞌ sacerdote tama e chinam On.
GEN 41:51 Y e bꞌajxan unembꞌir uturbꞌa ucꞌabꞌa Manasés xeꞌ war che: “E Dios uche tuaꞌ innajpes tunor lo que cay innumse nibꞌa y uche tuaꞌ innajpes tunor nifamilia”.
GEN 41:52 Y tama e ijtzꞌimbꞌir uturbꞌa ucꞌabꞌa Efraín xeꞌ war che: “E Dios uche tuaꞌ inchꞌijrse nimaxtac tama e lugar tiaꞌ cay innumse nibꞌa meyra”, che e José.
GEN 41:53 Pues entonces numuy e siete año conda ayan meyra sian cosecha tama e lugar Egipto,
GEN 41:54 y de allí cay e siete año conda ayan meyra winar, bꞌan taca cocha e ojroner xeꞌ ajcꞌuna umen e José. Y checta meyra winar tama tunor e sian chinamobꞌ xeꞌ aquetpobꞌ tuyejtzꞌer, pero tama e lugar Egipto matucꞌa e winar, cocha yajaꞌ ayan e trigo tuaꞌ acꞌujxa.
GEN 41:55 Y conda e gente tama e lugar Egipto cay jaytzꞌobꞌ, cay ixiobꞌ tuaꞌ ucꞌajtiobꞌ e trigo taca e rey. Pero e rey uyare tunor e gente y che: “Quiquic iranic e José, y chenic lo que uyareox”, che e rey.
GEN 41:56 Pues conda e winar wechcꞌa ixin tama tunor e sian chinamobꞌ, e José uyare tuaꞌ apajsa tunor e sian granero tiaꞌ ayan e trigo tuaꞌ uchoni taca tunor e gente tama e lugar Egipto cocha war abꞌoro e winar iraj iraj.
GEN 41:57 Y tunor e gente xeꞌ turobꞌ tama otro inmojr chinamobꞌ war acꞌotoyobꞌ tama e lugar Egipto tuaꞌ umaniobꞌ e trigo taca e José, cocha matucꞌa ayan tuaꞌ ucꞌuxiobꞌ tama tunor e sian chinam.
GEN 42:1 Pues entonces checta inteꞌ nuxi winar tama tunor or e lugar Canaán, y conda e Jacob cꞌotoy unata que war achojna e trigo tama e lugar Egipto, uyare umaxtac y che: “¿Tucꞌa war iche tarex? Intaca turox war isati e tiempo.
GEN 42:2 Pues nen arobꞌnen que achojnato e trigo tama e lugar Egipto. Pues era cꞌani intzacriox tuaꞌ ixixin imani e trigo tama e lugar yajaꞌ, y umen era machi tuaꞌ cachamay umen e winar”, che e Jacob.
GEN 42:3 Entonces e diez usacunobꞌ e José ixiobꞌ esto tama e lugar Egipto tuaꞌ umaniobꞌ e trigo.
GEN 42:4 Pero e Jacob machi uyacta tuaꞌ axin e Benjamín, xeꞌ jax uwijtzꞌin e José, cocha war ubꞌijnu que bꞌajcꞌat ayan lo que axin unumse ubꞌa xeꞌ intran bꞌan cocha cay unumse ubꞌa e José.
GEN 42:5 Entonces umaxtac e Jacob ixiobꞌ taca e inmojr gente xeꞌ war axiobꞌ tuaꞌ umaniobꞌ e trigo ubꞌan.
GEN 42:6 Pues tama e tiempo era e José warix acꞌotori tama e lugar Egipto, y jax jaxir xeꞌ war uchoni e trigo taca tunor e gente xeꞌ war acꞌotoyobꞌ tama inteꞌ inteꞌ lugar. Y conda cꞌotoyobꞌ usacunobꞌ tut jaxir, cotuanobꞌ este que utacbꞌu ut ujorobꞌ tut e rum.
GEN 42:7 Y e José uwira que jax usacunobꞌ. Pero jaxir uche ubꞌa que machi unata chiobꞌ jaxirobꞌ, y tamar era uche ubꞌa que war aqꞌuijna conda uyubꞌi tuaꞌ usacunobꞌ y che: —Y nox ¿tiaꞌ ajlugarox pue? che e José. Entonces ojron inteꞌ tujam usacunobꞌ y che: —Pues war waton tama e lugar Canaán tuaꞌ camani e trigo, chenobꞌ usacunobꞌ e José.
GEN 42:8 Pues e José uwira que jax usacunobꞌ, pero jaxirobꞌ machi war unatobꞌ jay jax uwijtzꞌinobꞌ.
GEN 42:9 Y wacchetaca cꞌajpa umen e José e chateꞌ wayac lo que cay uwira tama inyajr, y tamar era cay ubꞌijnu tuaꞌ machi uchecsu ubꞌa tut usacunobꞌ rajxa era, y entonces uyare usacunobꞌ y che: —Pues nox ebꞌetbꞌir tariox tuaꞌ iwira lo que ayan tara. Y war watox tuaꞌ iwira tucꞌa tucꞌa lugar xeꞌ matucꞌa e ajcojc tamar, che e José.
GEN 42:10 Entonces ojronobꞌ usacunobꞌ y chenobꞌ: —Cawinquiret, majax bꞌan cocha war abꞌijnu. Pues non tarion tuaꞌ taca camani e trigo.
GEN 42:11 Pues tunoron maxtacon tuaꞌ intera taca tatabꞌir. Y jaxon cora winicon xeꞌ erachon. Y ma tiaꞌ tzacarnon ixion tuaꞌ cawira tucꞌa tucꞌa ayan tama otronteꞌ lugar, chenobꞌ usacunobꞌ e José.
GEN 42:12 Y che e José: —Majax erach lo que war iware. Nox war watox tuaꞌ iwira tucꞌa tucꞌa lugar xeꞌ machi uyubꞌion cacojco cabꞌa, che e José.
GEN 42:13 Entonces ojron inteꞌ tujamobꞌ otronyajr y che: —Majax bꞌan, cawinquiret. Ayanon doce tama e familia, y maxtacon tuaꞌ intera taca tatabꞌir, y caturuan tama e lugar Canaán. Y cawijtzꞌin xeꞌ cumix quetpa tacar catata, y ayan incojt xeꞌ chamay, chenobꞌ usacunobꞌ e José.
GEN 42:14 Pero e José sutpa uyubꞌi tuobꞌ otronyajr y che: —Bꞌan cocha war inwareox, que nox ebꞌetbꞌir tariox tuaꞌ iwira tucꞌa tucꞌa ayan tara.
GEN 42:15 Pues cꞌani cawira jay erach lo que war iware. Cꞌani inwareox tama ucꞌabꞌa e rey que machi tuaꞌ ixlocꞌoy tama e lugar era este que watar iwijtzꞌin.
GEN 42:16 Pues erer axin incojt tijam tuaꞌ utares iwijtzꞌin, pero e inmojr ucꞌani tuaꞌ aquetpobꞌ macbꞌirobꞌ tara tama e cárcel. Pues tamar era cꞌani cawira jay erach lo que war iware, y jay majax bꞌan, entonces chequer que ebꞌetbꞌir tariox tuaꞌ iwira tucꞌa tucꞌa ayan tama e lugar era. Pues war inwareox tunor era tama ucꞌabꞌa e rey, che José.
GEN 42:17 Entonces tunorobꞌ yajrobꞌ tama e cárcel umen e José, y bꞌan taca quetpobꞌ tama uxteꞌ día.
GEN 42:18 Pero tama e uxteꞌ día pejcnobꞌ umen e José y che: —Pues nen umbꞌian tut e Dios, y ma cocha erer inwacta tuaꞌ inche lo que arobꞌnen umen e Dios tuaꞌ machi uyebꞌta watar inteꞌ jatzꞌuar tanior. Chenic cocha era y machi tuaꞌ ixchamesna.
GEN 42:19 Jay erach lo que war iware, actanic incojt ipiar tara tama e cárcel, y e inmojr erer axiobꞌ tuaꞌ uqꞌuechiobꞌ axin e trigo tuaꞌ uwesiobꞌ e familia.
GEN 42:20 Pero taresic wacchetaca iwijtzꞌin xeꞌ cumix, y tamar era cꞌani cawira jay erach lo que cay iware. Y jay majax bꞌan cocha cay iware, entonces ucꞌani tuaꞌ ixchamesna, che e José. Pues jaxirobꞌ ubꞌijnuobꞌ que bueno y de allí ixin uchiobꞌ lo que arobꞌnobꞌ,
GEN 42:21 y de allí cay uyare ubꞌobꞌ inteꞌ intiobꞌ y chenobꞌ: —Pues non cꞌapa cache e mabꞌambꞌanir tacar cawijtzꞌin, y machi cacꞌubꞌse conda cay uyareon tuaꞌ cayajta ut motor que cawira que tzajtaca ut. Y tamar era war acꞌaxi e jatzꞌuar era tama cajor, chenobꞌ inteꞌ intiobꞌ.
GEN 42:22 Entonces ojron e Rubén y che: —Pues nen inwareoxto ani que ira iche e mabꞌambꞌanir taca e chꞌom sitz. Pero machi icꞌubꞌsen, y tamar era war catojma tama uchamer, che e Rubén.
GEN 42:23 Pues jaxirobꞌ war oꞌjronobꞌ tama uyojronerobꞌach y tamar era uchebꞌiobꞌ que e José machi war uyubꞌi lo que war oꞌjronobꞌ, cocha e José war oꞌjron tama e ojroner tuaꞌ e gente tama e Egipto y ayan inteꞌ tujamobꞌ xeꞌ war uchecsu lo que war oꞌjronobꞌ.
GEN 42:24 Y wacchetaca locꞌoy e José tuyejtzꞌerobꞌ usacunobꞌ cocha machi war ucꞌani tuaꞌ eꞌrna umenerobꞌ que jaxir war aꞌru. Y conda sutpa tiaꞌ turobꞌ usacunobꞌ cay ojron tacarobꞌ otronyajr, y de allí ulocse e Simeón y uyare tuaꞌ acajcha tut tunor usacunobꞌ y de allí uyare que erer axiobꞌ e inmojr.
GEN 42:25 Y nacpat era uyare tuaꞌ abꞌujtꞌa ucostalobꞌ taca e trigo, y que ucꞌani tuaꞌ asujta utuminobꞌ inteꞌ intiobꞌ y que aturbꞌana macuir inteꞌ inteꞌ costal, y que ajcꞌunobꞌ lo que tuaꞌ ucꞌuxiobꞌ tama e bꞌir. Y bꞌan chempa.
GEN 42:26 Entonces jaxirobꞌ cay utꞌabꞌsiobꞌ e trigo tama upat uchijobꞌ, y locꞌoyobꞌ tama e lugar yajaꞌ.
GEN 42:27 Pues conda cꞌotoyobꞌ tama e lugar tiaꞌ tuaꞌ unumsiobꞌ e acbꞌar, incojt tujamobꞌ ubꞌani ucostal tuaꞌ ulocse lo que cꞌani uyajcꞌu tuaꞌ ucꞌuxi uchij, y uwira que yaꞌ chꞌar utumin tama utiꞌ ucostal.
GEN 42:28 Entonces uyare usacunobꞌ y che: —Iranic, sujta nitumin. Chꞌar era tama nicostal, che incojt tujamobꞌ. Pues tunorobꞌ bꞌactobꞌ meyra, y cay chinchobꞌ umen e bꞌajcꞌut, y cay uyare ubꞌobꞌ inteꞌ intiobꞌ y chenobꞌ: —¿Tucꞌa war uche e Dios tacaron? chenobꞌ.
GEN 42:29 Y conda cꞌotoyobꞌ tama e lugar Canaán, cay uchecsuobꞌ taca utatobꞌ xeꞌ jax e Jacob tunor lo que numuy tacarobꞌ, y uyareobꞌ cocha era y che:
GEN 42:30 —Pues e winic xeꞌ war acꞌotori tama e lugar yajaꞌ war aqꞌuijna conda upejcon y uyareon que ebꞌetbꞌir ixion tuaꞌ cawira tin tin xeꞌ más injayjay tama ulugar.
GEN 42:31 Pero non caware que non cora winicon xeꞌ erachon, y que mato inyajr catzacarna caxin tuaꞌ cawira tucꞌa tucꞌa ayan tama otronteꞌ lugar.
GEN 42:32 Y caware que ayan doce uyunen tama cafamilia y que intera taca catata; pero que ayan incojt xeꞌ chamay, y ayan inteꞌ ijtzꞌimbꞌir xeꞌ quetpa taca utata tama e lugar Canaán.
GEN 42:33 Y de allí jaxir uyareon y che: ‘Tacar era cꞌani inwira jay erach lo que war iware. Actanic tara tacaren incojt tama ipiar, y nox erer ixixin tuaꞌ iqꞌueche axin imbꞌijc e trigo tama ifamilia,
GEN 42:34 pero taresic iwijtzꞌin conda watox otronyajr. Y bꞌan cocha era erer incꞌotoy innata jay erachox y jay majax ebꞌetbꞌir tariox tuaꞌ iwira tucꞌa tucꞌa ayan tama e lugar era. Entonces conda asutpa watox otronyajr erer inwacta alocꞌoy inteꞌ xeꞌ war aquetpa tama e cárcel, y de allí nox tuaꞌ uyubꞌiox ixyopa ixchonma tama e lugar era inyajr inyajr cocha icꞌani, che e winic uyareon,’ chenobꞌ usacunobꞌ e José.
GEN 42:35 Entonces conda cay uyojyobꞌ e trigo tut e rum, bꞌactobꞌ meyra conda uwirobꞌ que ayan e tumin tama inteꞌ inteꞌ costal bꞌan cocha utoyobꞌ tama e trigo era, y bꞌacta utata ubꞌan.
GEN 42:36 Entonces ojron e Jacob y che: —Nox cꞌani iwacten nibꞌajner inyajrer cocha war iche asatpa nimaxtac axin. Pues e José machix turu tacaron, y machix turu e Simeón cocha turu tama e cárcel tama e lugar Egipto, y coner cꞌani iqꞌueche axin e Benjamín najtir taniut ubꞌan. Pues tunor era war aquetpa intran taniut, che e Jacob.
GEN 42:37 Entonces e Rubén ojron taca utata y che: —Actan axin e Benjamín tacaren, y nen tuaꞌ incojco. Y nen ubꞌan tuaꞌ insutpa intares toit otronyajr. Y jay machi asutpa intares otronyajr, erer achamse e chateꞌ nimaxtac, che e Rubén.
GEN 42:38 Entonces ojron e Jacob y che: —Pues ma cocha erer axin nisitz tacarox. Porque e José xeꞌ jax usacun chamenix, y tama e chateꞌ uyar e Raquel jax taca e Benjamín xeꞌ turuto tacaren. Y jay ayan lo que axin unumse ubꞌa xeꞌ imbꞌacꞌajr uwirnar tama ixambꞌar, nen xeꞌ onian winiquenix tuaꞌ inchamay umen e tzꞌintzꞌar y tama ijor nox tuaꞌ acꞌaxi e culpa tama nichamer, che e Jacob.
GEN 43:1 Pues entonces bꞌan taca quetpa tama tunor or e lugar Canaán que matucꞌa e cosecha.
GEN 43:2 Y conda cꞌapa tunor e trigo lo que mambꞌir umen uyunenobꞌ e Jacob tama e lugar Egipto, e Jacob ojron taca uyunenobꞌ y che: —Quiquic otronyajr esto tama e lugar Egipto y manic cora trigo cocha cꞌapa lo que imani tama inyajr, che e Jacob.
GEN 43:3 Entonces oꞌjron e Judá y che: —Pues cꞌajric imener lo que arobꞌnon umen e ajcꞌotorer tama e lugar Egipto que: ‘Jay machi itares iwijtzꞌin conda watox otronyajr, machi ixto tuaꞌ inwactox ixochoy iwiren,’ che uyareon e winic.
GEN 43:4 Entonces jay awacton tuaꞌ caqꞌueche axin cawijtzꞌin conda caxin camani e trigo, erer caxin.
GEN 43:5 Pero jay machi acꞌani tuaꞌ axin cawijtzꞌin tacaron, entonces machix tuaꞌ caxin cocha arobꞌnon umen e ajcꞌotorer y che: ‘Jay machi itares iwijtzꞌin conda watox otronyajr, machi ixto tuaꞌ inwactox ixochoy iwiren,’ che uyareon e winic, che e Judá.
GEN 43:6 Entonces sutpa ojron e Jacob y che: —¿Tucꞌa tuaꞌ que ichecsu tut e ajcꞌotorer yajaꞌ que ayan otro incojt iwijtzꞌin? Pues ichien innumse nibꞌa meyra conda iware e winic tunor era, che e Jacob.
GEN 43:7 Entonces ojronobꞌ jaxirobꞌ otronyajr y chenobꞌ: —Pues cocha jaxir cay uyubꞌi tacaron y tama cafamilia, y uyareon cocha era y che: ‘¿Turuto ca itata? Y ¿ayan ca otro incojt iwijtzꞌin?’ che e winic. Y tamar era non matucꞌa más tuaꞌ cache sino que quetpa tuaꞌ cachecsu tut jaxir lo que war uyubꞌi ticabꞌa. Y ¿cocha tuaꞌ canata jay jaxir tuaꞌ uyareon y che: ‘Taresic iwijtzꞌin tacarox conda watox otronyajr’? xeꞌ uyareon winic, che e Judá.
GEN 43:8 Entonces sutpa ojron e Judá taca utata otronyajr y che: —Pues jay machi cꞌani cachamay umen e winar ucꞌani tuaꞌ awacta axin e sitz tacaron, y erer ani caxin coner era. Pues jay bꞌan ani cache machix tuaꞌ cachamay nien net y nien non y nien camaxtac.
GEN 43:9 Y jax nen xeꞌ tuaꞌ incojco e sitz, y jay ayan lo que axin unumse ubꞌa este que machi asutpa watar tacaron, axin aquetpa que nen xeꞌ tuaꞌ inchꞌami e jatzꞌuar tama tunor nicuxtar tamar lo que axin unumse ubꞌa e sitz.
GEN 43:10 Pues quisinic ani machi war quexna cabꞌijnu tama tunor era, ixionix ani y sutponix ani chajr otronyajr, che e Judá.
GEN 43:11 Entonces sutpa ojron utata otronyajr y che: —Pues cocha mix tucꞌa más tuaꞌ cache, yaric tama icostal tunor lo que alocꞌoy tama e lugar era xeꞌ más atujri, y qꞌuechic chic cocha inteꞌ regalo tuaꞌ e ajcꞌotorer yajaꞌ. Pues qꞌuechic chic cora ujtzꞌubꞌ xeꞌ ucꞌabꞌa bálsamo, y cora uchabꞌir e xux, y cora perfume, y cora uchuꞌ e teꞌ xeꞌ ucꞌabꞌa mirra, y cora uyutir e teꞌ xeꞌ arobꞌna nuez, y cora uyutir e teꞌ xeꞌ ucꞌabꞌa almendra.
GEN 43:12 Y qꞌuechic chic e tumin lo que ucꞌani tuaꞌ uyubꞌiox iwajcꞌu tin e usuti uturbꞌa itumin tama icostal otronyajr conda ixiox tuaꞌ imani e trigo bꞌajxan, porque bꞌajcꞌat intaca nutpa ujorobꞌ conda bꞌan uchiobꞌ. Y qꞌuechic chic ubꞌan e tumin lo que ucꞌani tuaꞌ imani e trigo otronyajr era.
GEN 43:13 Entonces quiquic warajsenic otronyajr e ajcꞌotorer yajaꞌ y qꞌuechic chic iwijtzꞌin ubꞌan.
GEN 43:14 Y que Cadiosir xeꞌ ayan meyra ucꞌotorer uchic quetpac incꞌun uwirnar e ajcꞌotorer yajaꞌ tiut, y que uyacta asutpa watar taniut isacun y e Benjamín. Y jay nen ucꞌani tuaꞌ aquetpa tzajtaca niut umen que axin asatpa otronteꞌ niunen, pues bꞌan tuaꞌ inquetpa cocha matucꞌa más tuaꞌ inche, che e Jacob.
GEN 43:15 Entonces uyunenobꞌ e Jacob uchꞌamiobꞌ e regalo y e tumin y e Benjamín y ixiobꞌ esto tama e lugar Egipto tuaꞌ amanuobꞌ. Y conda cꞌotoyobꞌ tut e José
GEN 43:16 y conda irna e Benjamín umener, e José uyare e ajcojc tama uyotot y che: —Qꞌueche chicobꞌ e winicobꞌ era tama niotot, y chamsen incojt wacax y ustes e wiar, porque jaxirobꞌ yaꞌ tuaꞌ awiobꞌ tacaren coner, che e José.
GEN 43:17 Entonces e ajcojc uche bꞌan taca cocha arobꞌna umen e José, y uqꞌueche ixiobꞌ e winicobꞌ esto tama uyotot e José.
GEN 43:18 Pero conda cꞌotoy unatobꞌ que esto tama uyotot e José war axiobꞌ, cay bꞌactobꞌ meyra y cay ojronobꞌ jaxobꞌ taca y chenobꞌ: —Pues taresnon tara umen que war ubꞌijnu tama e tumin lo que sujta turbꞌana tama cacostal conda tarion tuaꞌ camani e trigo bꞌajxan. Pues bꞌajcꞌat axin uwatzꞌionobꞌ y axin uchionobꞌ capatna bꞌan cocha inteꞌ man xeꞌ mambꞌir inyajrer, y axin ulocsiobꞌ cawaracꞌobꞌ ubꞌan, chenobꞌ uyunenobꞌ e Jacob jaxobꞌ taca.
GEN 43:19 Entonces conda cꞌotoyobꞌ tama uyotot e José, ixiobꞌ tuyejtzꞌer e ajcojc tuaꞌ oꞌjronobꞌ tacar
GEN 43:20 y chenobꞌ: —Pues non era tzajtaca coit. Pues tama inyajr conda tarion tuaꞌ camani e trigo ayan lo que numuy.
GEN 43:21 Conda locꞌoyon tuaꞌ caxin tama cotot otronyajr y conda cꞌotoyon tama e lugar tiaꞌ tuaꞌ canumse e acbꞌar cay capasi cacostal y catajwi que ayan e tumin tama utiꞌ inteꞌ inteꞌ costal bꞌan cocha catares tuaꞌ camani e trigo tamar. Y cawira que turu tunor e tumin. Pero era war catares tuaꞌ casuti lo que cabꞌeto tacaret,
GEN 43:22 y catares más tumin ubꞌan tuaꞌ camani más e trigo. Pero cꞌani cawaret que machi canata chi uturbꞌa e tumin tama cacostal, chenobꞌ uyunenobꞌ e Jacob.
GEN 43:23 Entonces ojron e ajcojc y che: —Tzꞌustaquic. Ira ixbꞌacta. Pues bꞌajcꞌat jax Idiosir xeꞌ tuaꞌ itata xeꞌ ixin uturbꞌa e tumin tama icostal, porque jax nen xeꞌ inchꞌami e tumin lo que itoyi tama e trigo, che e ajcojc. Y de allí ixin ulocse e Simeón tiaꞌ macar turu tama e cárcel y uqꞌueche ixin esto tiaꞌ turobꞌ e inmojr era.
GEN 43:24 Y de allí uyosiobꞌ macuir uyotot e José, y uyajcꞌu e jaꞌ tuaꞌ upoqui uyocobꞌ tamar, y cay uwese uchijobꞌ ubꞌan.
GEN 43:25 Y de allí uyunenobꞌ e Jacob cay uyustesobꞌ cora regalo lo que utaresobꞌ y de allí ucojcobꞌ ucꞌoter e José cocha jaxirobꞌ arobꞌnobꞌ que yaꞌ tuaꞌ awiobꞌ tacar.
GEN 43:26 Entonces conda cꞌotoy e José tama uyotot, jaxirobꞌ cay uyajcꞌobꞌ cora regalo lo que uqꞌuechiobꞌ, y de allí cotuanobꞌ tut esto que utacbꞌu ut ujorobꞌ tut e rum.
GEN 43:27 Entonces e José ojron tama e ojroner tuaꞌ e gente tama e Egipto y ayan otronteꞌ winic xeꞌ sutpa uyare usacunobꞌ e José tama e ojroner hebreo y che: —¿Cocha turox? Pues ¿turuto ca itata xeꞌ meyra ayan ujabꞌ xeꞌ cay ichecsu taniut tama inyajr? che e José.
GEN 43:28 Entonces jaxirobꞌ ojronobꞌ y chenobꞌ: —Turuto pue yaꞌ, y imbꞌutz turu, chenobꞌ uyunenobꞌ e Jacob. Y de allí sutpa cotuanobꞌ tut e José otronyajr.
GEN 43:29 Entonces e José sutpa chꞌujcsan tama tunor uyejtzꞌer y uchꞌujcu uwira e Benjamín xeꞌ jax uwijtzꞌin tama utata y utuꞌ, y uyubꞌi tuobꞌ y che: —¿Jax ca era iwijtzꞌin xeꞌ jax e cumix xeꞌ cay ichecsu tacaren? che e José. Y sutpa ojronobꞌ usacunobꞌ e José y chenobꞌ: —Jax pue, chenobꞌ. Entonces uyare e Benjamín cocha era y che: —E Dios uchojbꞌesiquet, sitz, che e José. Y conda e José cꞌapa uyare tunor era,
GEN 43:30 y conda uwira uwijtzꞌin, tzay meyra tama uyalma, y cay tzꞌintzꞌa. Entonces locꞌoy tiaꞌ turobꞌ usacunobꞌ era y ixin wacchetaca tuaꞌ oꞌchoy tama ucuarto, y yaꞌ yajaꞌ cay aru.
GEN 43:31 Y conda quetruma uyaruar, cay upoqui ut, y de allí locꞌoy patir y uyare umanobꞌ y che: “Turbꞌaniquix e wiar”, che e José.
GEN 43:32 Pues turbꞌana lo que tuaꞌ ucꞌuxi e José tama inteꞌ mesa, y turbꞌana lo que tuaꞌ ucꞌuxiobꞌ uyunenobꞌ e Jacob tama otronteꞌ mesa, y turbꞌana tama otronteꞌ mesa lo que tuaꞌ ucꞌuxiobꞌ cora winicobꞌ xeꞌ ajlugarobꞌ Egipto xeꞌ arobꞌnobꞌ tuaꞌ awiobꞌ tacarobꞌ ubꞌan. Pues tut e winicobꞌ xeꞌ ajlugarobꞌ Egipto mabꞌambꞌan tuaꞌ awiobꞌ taca tin xeꞌ tuobꞌ uchꞌajnarir e Héber.
GEN 43:33 Pues usacunobꞌ e José turuanobꞌ tut jaxir bꞌan taca cocha arobꞌnobꞌ umener, y turbꞌana tuaꞌ aturuanobꞌ taca tin e yaxar sitz tama e bꞌajxan cꞌajn y bꞌan turuanobꞌ bꞌan cocha ujabꞌ inteꞌ inteꞌ usacunobꞌ e José, y de allí turuan e ijtzꞌimbꞌir tama ucꞌajn xeꞌ aquetpa tama ucꞌapesnibꞌir. Y jaxirobꞌ quetpobꞌ que war achinchobꞌ uwira ut ubꞌobꞌ.
GEN 43:34 Y e José uyare tuaꞌ ajcꞌunobꞌ usacunobꞌ tuaꞌ ucꞌuxiobꞌ tunor lo que ayan tujor umesa, pero e Benjamín uyajcꞌu más meyra que e inmojr. Y de allí cay uyuchꞌiobꞌ e vino tunorobꞌ y cay tzayobꞌ meyra.
GEN 44:1 Entonces conda cꞌanix alocꞌoyobꞌ e José uyare uyajcojc y che: —Bꞌutꞌu ucostalobꞌ e winicobꞌ era taca e trigo bꞌan taca cocha obꞌna ucachiobꞌ axin tama upat uchijobꞌ, y turbꞌan ubꞌan e tumin xeꞌ qꞌuecher umenerobꞌ inteꞌ intiobꞌ tama utiꞌ ucostalobꞌ.
GEN 44:2 Y turbꞌan ubꞌan nichꞌeu xeꞌ chembꞌir taca e plata tama utiꞌ ucostal e cumix sitz taca e tumin xeꞌ utoyi tama e trigo, che e José. Y e ajcojc uche bꞌan taca cocha arobꞌna tuaꞌ uche umen e José.
GEN 44:3 Entonces conda sacojpa tama otronteꞌ día, locꞌoyobꞌ usacunobꞌ e José taca uchijobꞌ.
GEN 44:4 Entonces conda mato jax innajt war axiobꞌ jaxirobꞌ, e José uyare uyajcojc y che: —Quiqui tupatobꞌ e winicobꞌ yajaꞌ, y conda atajwiobꞌ arenobꞌ cocha era y che: ‘¿Tucꞌa tuaꞌ que war itoyi taca e mabꞌambꞌanir tunor lo que imbꞌutz? ¿Tucꞌa tuaꞌ que ixujchꞌi e chꞌeu xeꞌ chembꞌir taca e plata
GEN 44:5 lo que ucꞌampes nipatron tuaꞌ uyuchꞌi e vino tamar y xeꞌ aqꞌuini tacar ubꞌan? Pues mabꞌambꞌan lo que ixiox iche,’ bꞌan tuaꞌ aware, che e José uyare e ajcojc.
GEN 44:6 Entonces e ajcojc ixin tupatobꞌ e winicobꞌ, y conda utajwiobꞌ cay uyare bꞌan taca cocha arobꞌna.
GEN 44:7 Entonces ojron inteꞌ tujamobꞌ y che: —¿Tucꞌa tuaꞌ que war awareon cocha era? Pues ma tiaꞌ tuaꞌ cache inteꞌ mabꞌambꞌanir bꞌan cocha war awareon.
GEN 44:8 Pues non catares e tumin lo que catajwi tama utiꞌ cacostal tuaꞌ casuti tacaret otronyajr desde tama e lugar Canaán. Entonces ¿cocha tuaꞌ caxujchꞌi e plata y e oro lo que ayan tama uyotot apatron?
GEN 44:9 Pues jay axin atajwina ticajam chi xeꞌ war uqꞌueche axin e chꞌeu tama ucostal, ucꞌani tuaꞌ achamesna, y non tuaꞌ caxin caquetpa cora man xeꞌ mambꞌir inyajrer tibꞌa, che usacunobꞌ e José.
GEN 44:10 Entonces ojron e ajcojc y che: —Pues erer achempa bꞌan cocha war iware, pero mamajchi tuaꞌ achamesna sino que tin e qꞌuecher e chꞌeu umener ucꞌani tuaꞌ aquetpa man tanibꞌa, y e inmojr erer axiobꞌ tama ulugarobꞌ, che e ajcojc.
GEN 44:11 Entonces inteꞌ intiobꞌ cay uyemsiobꞌ ucostalobꞌ wacchetaca y uturbꞌobꞌ tut e rum, y cay ubꞌaniobꞌ utiꞌ.
GEN 44:12 Y de allí e ajcojc cay upojro e chꞌeu tama inteꞌ inteꞌ costal. Cay tama ucostal e sacumbꞌir y cꞌapa upojro esto tama ucostal e ijtzꞌimbꞌir, y conda upasi ucostal e Benjamín utajwi que yaꞌ chꞌar e chꞌeu.
GEN 44:13 Entonces jaxirobꞌ uwejru ubꞌujcobꞌ cocha inteꞌ chequerir que war acꞌuxun uyalmobꞌ. Y de allí inteꞌ intiobꞌ cay utacbꞌuobꞌ e tercio tupat uchijobꞌ, y sutpa ixiobꞌ esto tama e lugar Egipto otronyajr.
GEN 44:14 Y conda e Judá y upiarobꞌ cꞌotoyobꞌ tama uyotot e José, jaxir yato turu. Entonces conda e ajcojc cꞌapa uchecsu tunor lo que numuy tama e chꞌeu tut e José, usacunobꞌ cotuanobꞌ tut jaxir esto que utacbꞌu ut ujorobꞌ tut e rum.
GEN 44:15 Entonces ojron e José y che: —¿Tucꞌa tuaꞌ que nox war iche cocha era? ¿Machi ca inata ani que inteꞌ winic cocha nen innata inqꞌuini? che e José.
GEN 44:16 Entonces ojron e Judá y che: —Pues matucꞌa tuaꞌ cawaret, cawinquiret. Y ma cocha erer cachecsu toit que non erachon. Y tamar era chequer que Cawinquirar Dios war uyebꞌta watar inteꞌ jatzꞌuar tuaꞌ acꞌaxi tama cajor tamar e mabꞌambꞌanir lo que cꞌapa cache ixnix. Tara turon toit. Pues erer caquetpa man tabꞌa taca tin e qꞌuecher e chꞌeu umener, che e Judá.
GEN 44:17 Entonces ojron e José y che: —Ma cocha erer. Pues tin e ucꞌani tuaꞌ aquetpa man tanibꞌa jax taca tin e qꞌuecher e chꞌeu umener. Y e inmojr erer asutpa axiobꞌ esto tama uyototobꞌ tiaꞌ turu utatobꞌ, che e José.
GEN 44:18 Entonces e Judá ixin tuyejtzꞌer e José tuaꞌ oꞌjron tacar y che: —Niwinquiret, quisinic que awacten tuaꞌ onjron tacaret. Y ira iqꞌuijna tacaren, cocha net ayan acꞌotorer bꞌan taca cocha ayan tuaꞌ e rey y uyubꞌiet awebꞌta watar e jajtzꞌuar tama nijor jay bꞌan abꞌijnu.
GEN 44:19 Pues net cay oybꞌi tacaron jay turuto catata o jay ayan otronteꞌ cawijtzꞌin,
GEN 44:20 y non cawaret que turuto catata xeꞌ onian winiquix y que ayanto incojt cawijtzꞌin xeꞌ jax e cumix xeꞌ cuxpa conda catata onian winiquix. Y non cachecsu toit ubꞌan que jaxir cꞌajna meyra umen catata, porque jax taquix jaxir xeꞌ unembꞌir xeꞌ aquetpa tama e tubꞌir. Porque ayan incojt usacun xeꞌ chamay.
GEN 44:21 Entonces net awareon tuaꞌ catares e sitz conda casutpa waton otronyajr porque net cꞌani ani awira.
GEN 44:22 Y non cawaret ubꞌan que e sitz machi uyubꞌi uyacta utata, porque jay axin uyacta utata, jaxir axin achamay umen e tzꞌintzꞌar.
GEN 44:23 Pero cocha net awareon que jay jaxir machi watar tacaron, net machix tuaꞌ awacton cawira oit otronyajr.
GEN 44:24 “Pues conda cꞌotoyon tuyejtzꞌer catata, cachecsu tut tunor lo que net awareon.
GEN 44:25 Y de allí conda cꞌanix acꞌapa e trigo otronyajr catata cay uyareon cocha era y che: ‘Quiquic otronyajr esto tama e lugar Egipto tuaꞌ imani e trigo.’
GEN 44:26 Pero non casutpa caware: ‘Pues ma cocha erer caxin, porque net machi cꞌani awacta tuaꞌ axin cawijtzꞌin tacaron. Porque jay jaxir machi axin tacaron, ma erer cawira ut e ajcꞌotorer yajaꞌ otronyajr.’ Bꞌan caware catata.
GEN 44:27 Y nitata uyareon cocha era y che: ‘Pues nox inata que e Raquel uchꞌijrse chateꞌ nimaxtac,
GEN 44:28 y incojt locꞌoy tama niwejtzꞌer, y desde que locꞌoy ixin merato inwira ut otronyajr. Pues nen imbꞌijnu que cꞌujxa umen inteꞌ animal.
GEN 44:29 Y jay nox iqꞌueche axin niunen era xeꞌ turuto tacaren, y jay ayan lo que axin unumse ubꞌa tama e xambꞌar, entonces imener taca tuaꞌ inxin inchamay umen e tzꞌintzꞌar nen xeꞌ onian winiquen,’ xeꞌ che uyaren nitata.
GEN 44:30 “Pues cocha nitata atacbꞌajri meyra taca e sitz era, y jay e sitz machi axin acꞌotoy tacaron,
GEN 44:31 entonces catata axin achamay. Y cꞌani acꞌaxi tama cajor non que axin achamay catata umen e tzꞌintzꞌar lo que cꞌani acꞌaxi tamar conda acꞌotoy unata que machi tari e sitz. Porque jax non xeꞌ catares e sitz tacaron.
GEN 44:32 Y nen inware nitata que jax nen xeꞌ tuaꞌ incojco e sitz tuaꞌ machi unumse ubꞌa, y inware ubꞌan que: ‘Jay machi asutpa watar tacaron, axin aquetpa que nen xeꞌ tuaꞌ inchꞌami e jatzꞌuar tama tunor nicuxtar tamar lo que axin unumse ubꞌa e sitz’. Bꞌan inware nitata.
GEN 44:33 Y tamar era cꞌani incꞌajti tacaret tuaꞌ awacten inquetpa man tabꞌa uyeror ut e chꞌom sitz, y que awacta axin jaxir taca usacunobꞌ esto tut utata otronyajr.
GEN 44:34 Porque ¿cocha tuaꞌ incꞌotoy tuyejtzꞌer nitata jay machi axin e sitz tacaren? Porque nen machi cꞌani inwira cobꞌa tuaꞌ axin unumse ubꞌa nitata jay machi acꞌotoy e sitz”, che e Judá.
GEN 45:1 Entonces cocha e José machi ixto ubꞌna uqꞌuecꞌojse ubꞌa tut usacunobꞌ, ojron taca inteꞌ nuxi nuc tut uyajpatnarobꞌ y che: “Loqꞌuenic tara tunorox”, che e José. Y wacchetaca locꞌoyobꞌ tunor e ajpatnarobꞌ y machi quetpa nien incojt man tuyejtzꞌer e José conda uchectes ubꞌa tut usacunobꞌ.
GEN 45:2 Entonces jaxir cay aru taca inteꞌ nuxi nuc, y tunor tin e turobꞌ macuir uyotot cay uyubꞌiobꞌ. Y wacchetaca cꞌotoy e checsuyaj tama tunor era esto tama uyotot e rey.
GEN 45:3 Entonces e José uyare usacunobꞌ tama uyojronerach y che: —Pues nen jaxen e José. ¿Turuto ca nitata? che e José. Entonces jaxirobꞌ bꞌactobꞌ meyra conda uyubꞌiobꞌ e ojroner lo que arobꞌnobꞌ umen e José, y mamajchi unatobꞌ tucꞌa tuaꞌ uyare.
GEN 45:4 Entonces ojron otronyajr e José y che: —Laric taniwejtzꞌer, che e José. Y conda cꞌotoyobꞌ tuyejtzꞌer, jaxir ojron y che: —Pues jax nen e José xeꞌ iwijtzꞌinen xeꞌ ichonien taca uchꞌajnarir e Ismael xeꞌ uqꞌuechienobꞌ tarien esto tama e lugar Egipto era.
GEN 45:5 Y bꞌan iche pero cꞌani inwareox que ira ixbꞌacta y que ira ixqꞌuijna iwira ibꞌa nox taca umen lo que iche nipater, porque jax e Dios xeꞌ uyebꞌta tarien bꞌajxan tama e lugar era tuaꞌ uyubꞌien incorpes ucuxtarobꞌ meyra gente y tuaꞌ uyubꞌien incorpesox nox ubꞌan.
GEN 45:6 Porque ayix chateꞌ año que ayan e winar tama e lugar era, y ucꞌanto cinco año que machi tuaꞌ alocꞌoy e cosecha, motor que ayan tin e axin upaqꞌuiobꞌ ut e semilla.
GEN 45:7 Pero e Dios uyebꞌta tarien bꞌajxan que nox tama e lugar era tuaꞌ uyubꞌien incorpes icuxtar y ucuxtarobꞌ ichꞌajnarir tuaꞌ aturuanobꞌto tara tor e rum taca inteꞌ cuxtar xeꞌ galan.
GEN 45:8 Y tamar era innata que majax nox xeꞌ iwebꞌta tarien esto tara, sino que jax e Dios xeꞌ uyebꞌta tarien, y jax jaxir xeꞌ uturbꞌen tuaꞌ inquetpa inteꞌ ajcanseyaj tut e rey, y tuaꞌ inquetpa bꞌan cocha inteꞌ ajyum tama tunor lo que ayan tama uyotot e rey, y tuaꞌ inquetpa ajcꞌotorer tama tunor or e lugar Egipto.
GEN 45:9 Y tamar era quiquic wacchetaca esto tiaꞌ turu nitata, y arenic cocha era y che: ‘Bꞌan cocha era che oynen xeꞌ jax e José: “E Dios uturbꞌen tuaꞌ inquetpa ajcꞌotorer tama tunor or e lugar Egipto. Laric wacchetaca tama e lugar era.
GEN 45:10 Pues cꞌani inwajqꞌuet e lugar xeꞌ ucꞌabꞌa Gosén tuaꞌ ituruan tamar taca tunor oynenobꞌ y tunor asitzꞌobꞌ y taca tunor awaracꞌobꞌ y taca tunor lo que ayan tacaret. Y bꞌan cocha era net tuaꞌ icꞌotoy iquetpa tacaren tama e lugar Egipto.
GEN 45:11 Y nen cꞌani inwajqꞌuet lo que tuaꞌ acꞌuxi taca tunor afamilia y taca tunor tin xeꞌ turobꞌ tacaret tuaꞌ machi aquetpa que matucꞌa tuaꞌ icꞌuxi. Pues ayanto cinco año este que axin acꞌapa e winar era y este que axin alocꞌoy e cosecha otronyajr. Pero jay machi cꞌani icꞌotoy esto tara tama e lugar Egipto, cꞌani axin asatpa tunor lo que ayan tacaret este que iquetpa tzajtaca oit inyajrer”, xeꞌ jax lo que cꞌani inware nitata’.
GEN 45:12 Pues nox y niwijtzꞌin Benjamín erer ixto iwira que nen jaxen e José.
GEN 45:13 Quiquic checsunic tut nitata tucꞌa nicꞌampibꞌir tama e lugar era, y tama tunor lo que iwirix tara ubꞌan. Quiquic wacchetaca y taresic nitata, che e José.
GEN 45:14 Entonces conda cꞌapa ojron e José cay umori umeqꞌue uwijtzꞌin Benjamín y cay aru. Y aru ubꞌan e Benjamín conda war umeqꞌue ubꞌobꞌ.
GEN 45:15 Y de allí e José cay utzꞌujtzꞌi ucajram tunor usacunobꞌ, y aru conda war umeqꞌue ubꞌobꞌ. Y de allí usacunobꞌ cay ojronobꞌ taca e José.
GEN 45:16 Y wacchetaca checsuna taca e rey que yaꞌ turobꞌ usacunobꞌ e José. Y tamar era cay tzay meyra e rey taca tunor uyajcꞌamparobꞌ.
GEN 45:17 Entonces ojron e rey taca e José y che: —Arenobꞌ asacunobꞌ tuaꞌ ucachiobꞌ ucostalobꞌ taca e trigo tupat uchijobꞌ y que sutpicobꞌ esto tama e lugar Canaán,
GEN 45:18 y que utaresicobꞌ utatobꞌ y ufamiliobꞌ. Y nen cꞌani inwajcꞌuobꞌ cora rum tiaꞌ más alocꞌoy e cosecha tama tunor or e lugar Egipto, y erer ucꞌuxiobꞌ lo que más galan xeꞌ achena cosechar tama tunor e lugar era.
GEN 45:19 Y arenobꞌ cora ajcꞌamparobꞌ tanibꞌa tuaꞌ uqꞌuechiobꞌ axin cora carruaje tuaꞌ utaresobꞌ uwixcarobꞌ asacunobꞌ taca tunor umaxtacobꞌ y e tatabꞌir tabꞌa.
GEN 45:20 Y arenobꞌ tuaꞌ machi ubꞌijnuobꞌ tuaꞌ utaresobꞌ tunor lo que ayan tacarobꞌ coner, porque tunor lo que ayan xeꞌ más galan tama e lugar Egipto jax tuobꞌ, che e rey.
GEN 45:21 Entonces uyunenobꞌ e Jacob uchiobꞌ bꞌan taca cocha arobꞌnobꞌ. Y e José uyajcꞌu cora carruaje bꞌan cocha arobꞌna umen e rey, y uyajcꞌu lo que tuaꞌ ucꞌuxiobꞌ tama e bꞌir ubꞌan.
GEN 45:22 Y uyajcꞌu ubꞌan cora bꞌujc xeꞌ más imbꞌutz tuaꞌ ulapiobꞌ. Pero e Benjamín uyajcꞌu 300 ut tumin xeꞌ chembꞌir taca e plata y cinco mudada bꞌujc.
GEN 45:23 Y tut utata uyebꞌta ixin diez chij taca meyra cosa xeꞌ más imbꞌutz lo que ayan tama e lugar Egipto, y uyebꞌta ixin otro diez chij taca e trigo y e pan y lo que ucꞌani tuaꞌ ucꞌuxi utata tama e bꞌir.
GEN 45:24 Y conda e José locꞌoy tuyejtzꞌer usacunobꞌ ojron y che: —Ira itzꞌojyro ibꞌa tama e bꞌir, che e José.
GEN 45:25 Entonces jaxirobꞌ locꞌoyobꞌ tama e lugar Egipto y ixiobꞌ tama e lugar Canaán tiaꞌ turu e Jacob xeꞌ jax utatobꞌ.
GEN 45:26 Pero conda uchecsuobꞌ tut e Jacob que turuto e José, y que jax jaxir xeꞌ war acꞌotori tama tunor or e lugar Egipto, jaxir nien unata tucꞌa tuaꞌ uche y machi unata tucꞌa tuaꞌ ucꞌajti, cocha jaxir machi war ucꞌubꞌse lo que war arobꞌna umen uyunenobꞌ era.
GEN 45:27 Pero conda cay uchecsuobꞌ tut tunor lo que arobꞌnobꞌ umen e José, y conda uwira cora carruaje lo que ebꞌtana tari umen e José tuaꞌ aqꞌuejcha axin tamar, entonces nojran uyalma.
GEN 45:28 Y de allí ojron cocha era y che: “Tzꞌacarix era, innata ixto yaꞌ que turuto niunen José. Cꞌani inxin inwira bꞌajxan que inchamay”, che e Jacob.
GEN 46:1 Pues entonces e Jacob ucajyes uxambꞌar taca tunor lo que ayan tuaꞌ. Y conda cꞌotoy tama e lugar Beerseba, uchamse inteꞌ arac y cay uputa tut e Dios xeꞌ ujtzna ut umen utata Isaac.
GEN 46:2 Y tama e acbꞌar yajaꞌ e Dios ojron taca e Jacob tama inteꞌ umayjut y che: —Jacob, Jacob. Bꞌixqꞌuen, che e Dios. Entonces ojron e Jacob y che: —Tara turen, che e Jacob.
GEN 46:3 Entonces ojron e Dios y che: —Nen jaxen Adiosiren xeꞌ cay uyujtzꞌi niut atata. Ira ibꞌacta tuaꞌ iꞌxin esto tama e lugar Egipto, porque nen cꞌani inche tuaꞌ anojran achꞌajnarir este que aquetpa inteꞌ nuxi chinam conda turobꞌ tama e lugar yajaꞌ.
GEN 46:4 Y nen cꞌani incojcuet conda turet tama e lugar Egipto, y jax nen xeꞌ tuaꞌ inlocse achꞌajnarir tama e lugar yajaꞌ otronyajr, y conda iꞌxin ichamay cꞌani aquetpa tawejtzꞌer e José, che e Dios uyare e Jacob.
GEN 46:5 Entonces e Jacob locꞌoy tama e lugar Beerseba. Y tacarna umen uyunenobꞌ tuaꞌ atꞌabꞌay tama e carruaje xeꞌ ebꞌtana tari umen e rey tuaꞌ uqꞌuechiobꞌ axin esto tama e lugar Egipto, y utꞌabꞌsiobꞌ ubꞌan umaxtacobꞌ y uwixcarobꞌ.
GEN 46:6 Entonces morojsena tunor uwacax e Jacob y tunor uyoveja y tunor lo que cꞌotoy quetpa tuaꞌ tama e lugar Canaán y uqꞌueche ixin esto tama e lugar Egipto.
GEN 46:7 Y uqꞌueche ixin tunor utejromtac y tunor uwijchꞌoctac y tunor usitzꞌobꞌ.
GEN 46:8 Pues jax era ucꞌabꞌobꞌ uyunenobꞌ e Jacob xeꞌ arobꞌna Israel ubꞌan xeꞌ ixiobꞌ esto tama e lugar Egipto: E Rubén xeꞌ jax e yaxar unembꞌir tuaꞌ e Jacob.
GEN 46:9 Y uyunenobꞌ e Rubén jax e Hanoc y e Falú y e Hesrón y e Carmí.
GEN 46:10 Y uyunenobꞌ e Simeón jax e Jemuel y e Jamín y e Óhad y e Jaquín y e Zohar y e Saúl xeꞌ jax uyar inteꞌ ixic tama e lugar Canaán.
GEN 46:11 Y uyunenobꞌ e Leví jax e Guersón y e Quehat y e Merarí.
GEN 46:12 Y uyunenobꞌ e Judá jax e Selá y e Fares y e Zérah. Pues ayan uyunenobꞌ xeꞌ chamayobꞌ conda turobꞌto tama e lugar Canaán xeꞌ jax e Er y e Onán. Y uyunenobꞌ e Fares jax e Hesrón y e Hamul.
GEN 46:13 Y uyunenobꞌ e Isacar jaxobꞌ e Tolá y e Fúa y e Job y e Simrón.
GEN 46:14 Y uyunenobꞌ e Zabulón jax e Séred y e Elón y e Jahleel.
GEN 46:15 Pues jax era e maxtacobꞌ xeꞌ cay uchꞌijrse e Lea taca e Jacob conda turobꞌto tama e lugar Padán-aram, y uchꞌijrse incojt uwijchꞌoc ubꞌan xeꞌ jax e Dina. Pues tama tunor ayan treinta y tres maxtacobꞌ.
GEN 46:16 Y uyunenobꞌ e Gad jax e Sefón y e Haguí y e Esbón y e Suní y e Erí y e Arodí y e Arelí.
GEN 46:17 Y uyunenobꞌ e Aser jax e Imná y e Isvá y e Isví y e Beriá y e Sérah xeꞌ ijtambꞌir tuobꞌ. Y uyunenobꞌ e Beriá jax e Héber y e Malquiel.
GEN 46:18 Pues jax era e maxtac xeꞌ uchꞌijrse e Zilpa taca e Jacob. Y jaxir jax e man tuaꞌ e Lea xeꞌ ajcꞌuna umen utata Labán, y ayan dieciséis maxtacobꞌ tama tunor.
GEN 46:19 Y umaxtac e Raquel xeꞌ jax uwixcar e Jacob, jax e José y e Benjamín.
GEN 46:20 Y uyunenobꞌ e José xeꞌ uchꞌijrse taca e Asenat, jax e Manasés y e Efraín. Pues jaxirobꞌ machi tariobꞌ tama lugar Canaán taca e inmojr era cocha cuxpobꞌ tama e lugar Egipto. Pues e Asenat jax uwijchꞌoc e Potifera, xeꞌ jax inteꞌ sacerdote tama e chinam On.
GEN 46:21 Y uyunenobꞌ e Benjamín jax e Bela y e Béquer y e Asbel y e Guerá y e Naamán y e Ehi y e Ros y e Mupim y e Hupim y e Ard.
GEN 46:22 Pues jax era e maxtac xeꞌ uchꞌijrse e Raquel taca e Jacob xeꞌ cꞌotoy quetpa catorce maxtac tama tunor.
GEN 46:23 Y uyunen e Dan jax e Husim.
GEN 46:24 Y uyunenobꞌ e Neftalí jax e Jahseel y e Guní y e Jezer y e Silem.
GEN 46:25 Pues jax era e maxtac xeꞌ uchꞌijrse e Bilhá taca e Jacob. Pues jaxir man tuaꞌ e Raquel xeꞌ ajcꞌuna umen utata Labán, y ayan siete maxtacobꞌ tama tunor.
GEN 46:26 Pues tunor e gente xeꞌ cꞌotoyobꞌ taca e Jacob esto tama e lugar Egipto intera taca chꞌajnarir, y ayan sesenta y seis tama tunor, y machi tzijca uwixcarobꞌ uyunenobꞌ.
GEN 46:27 Y ayan chateꞌ uyunenobꞌ e José xeꞌ cuxpobꞌ tama e lugar Egipto. Y tama tunor ayan setenta gente xeꞌ familia tuaꞌ e Jacob xeꞌ turobꞌ tama e lugar Egipto.
GEN 46:28 Pues e Jacob uyebꞌta ixin e Judá tuaꞌ acꞌotoy tiaꞌ turu e José tuaꞌ ucꞌajti utacarsiaj tuaꞌ abꞌijresnobꞌ esto tama e lugar Gosén. Y de allí sutpa ixin e Judá esto tiaꞌ turu utata y ixiobꞌ comon esto tama e lugar Gosén taca tunor tin e war axanobꞌ tacarobꞌ.
GEN 46:29 Entonces conda e José cꞌotoy unata que cꞌotoyix utata uyare tuaꞌ oꞌstana ucarruaje y ixin esto tama e lugar Gosén tuaꞌ utajwi ubꞌa taca utata. Y conda cꞌotoy utajwi utata umori umeqꞌue y cay aru tor uquejrebꞌ.
GEN 46:30 Entonces e Jacob uyare e José y che: —Pues era que inwiretix y innata que turetto, uyubꞌi ixto inchamay yaꞌ, che e Jacob.
GEN 46:31 Entonces e José uyare usacunobꞌ y e inmojr familia tuaꞌ utata y che: —Cꞌani inxin inwira e rey tuaꞌ inchecsu tut jaxir que yopoxix tama e lugar era tuaꞌ ixquetpa tacaren y que intocto yopox tama e lugar Canaán.
GEN 46:32 Y cꞌani inware que itares meyra iwoveja y meyra wacax y meyra lo que ayan tibꞌa y que ipatnar jax tuaꞌ icojco e oveja y tuaꞌ itꞌoxi e wacax.
GEN 46:33 Entonces conda e rey axin upejcox tuaꞌ uyubꞌi tibꞌa que tucꞌa patnar iche,
GEN 46:34 arenic que ipatnar nox jax taca tuaꞌ itꞌoxi e oveja desde que bꞌiqꞌuit maxtacox bꞌan cocha acay uchiobꞌ catata viejobꞌirobꞌ xeꞌ turuanobꞌ tama e onian tiempo. Pues jay bꞌan iware e rey entonces axin ixactana ixturuan tama e lugar Gosén cocha tut e gente xeꞌ turobꞌ tama e lugar Egipto jax inteꞌ mabꞌambꞌanir tuaꞌ unutꞌi ubꞌobꞌ taca tin e ajcojc oveja, che e José uyare usacunobꞌ.
GEN 47:1 Pues entonces e José usicbꞌa cinco usacunobꞌ y uqꞌueche ixin tut e rey tuaꞌ eꞌrnobꞌ umener. Entonces conda cꞌotoyobꞌ tut e rey e José uyare y che: “Pues nitata y nisacunobꞌ tariobꞌ desde tama e lugar Canaán y yopobꞌix tama e lugar Gosén. Y utaresobꞌ uyovejobꞌ y uwacaxobꞌ y tunor lo que ayan tacarobꞌ”, che e José uyare e rey.
GEN 47:3 Entonces e rey cay uyubꞌi tuaꞌ usacunobꞌ e José y che: —Y nox, ¿tucꞌa patnar inata iche? che e rey. Entonces ojron inteꞌ tujamobꞌ y che: —Pues capatnar non jax tuaꞌ cacojco e oveja, y bꞌan upatnar catata viejobꞌirobꞌ ubꞌan.
GEN 47:4 Pues non tarion tuaꞌ caturuan tama e lugar era tama inteꞌ tiempo umen que ayan meyra winar tama tunor or e lugar Canaán y matucꞌa tuaꞌ ucꞌuxiobꞌ cawoveja. Y tamar era quisinic cawaret tuaꞌ awacton caturuan tama e lugar Gosén tiaꞌ ayan meyra ac tuaꞌ ucꞌuxiobꞌ tunor cawoveja, chenobꞌ usacunobꞌ e José uyareobꞌ e rey.
GEN 47:5 Entonces e rey uyare e José y che: —Pues nen intzay que tariobꞌ atata y asacunobꞌ esto tama e lugar era tuaꞌ aquetpobꞌ tacaret.
GEN 47:6 Pues net erer asicbꞌa e lugar xeꞌ más imbꞌutz toit tama tunor or e lugar Egipto tiaꞌ tuaꞌ aturuanobꞌ. Pues taniut nen e lugar Gosén jax e lugar xeꞌ más galan tama tunor or e lugar y bueno taniut tuaꞌ aware atata taca asacunobꞌ tuaꞌ aquetpobꞌ yajaꞌ. Y jay net anata que ayan tujam asacunobꞌ tin e más obꞌnobꞌ ucojcobꞌ e aracꞌobꞌ, arenobꞌ tuaꞌ ucojcobꞌ niwacax ubꞌan, che e rey uyare e José.
GEN 47:7 Y de allí e José uqꞌueche ixin utata esto tut e rey ubꞌan, y conda cꞌotoy, e Jacob cotuan tut e rey.
GEN 47:8 Entonces e rey uyubꞌi tuaꞌ e Jacob y che: —¿Jayteꞌ año acojco? che e rey.
GEN 47:9 Entonces ojron e Jacob y che: —Pues nen incojcuix 130 año que war inxana tic taca. Y motor que ayan cora año xeꞌ intran conda quetpa tuaꞌ innumse nibꞌa cora cora, pero merato intzꞌacse meyra año bꞌan cocha utzꞌacsiobꞌ nitata viejobꞌirobꞌ, che e Jacob.
GEN 47:10 Entonces e Jacob uchojbꞌes ut e rey y de allí locꞌoy tama e lugar yajaꞌ.
GEN 47:11 Y e José uyajcꞌu utata e lugar xeꞌ más galan tama tunor or e lugar Egipto tuaꞌ aturuan tamar bꞌan taca cocha arobꞌna tuaꞌ uche umen e rey. Pues bꞌan cocha era que utata y usacunobꞌ e José cꞌotoy quetpobꞌ ajyumobꞌ tama e rum xeꞌ aquetpa tama e lugar Gosén xeꞌ arobꞌna coner que “Tuaꞌ e Ramsés”.
GEN 47:12 Y e José uyajcꞌu lo que tuaꞌ ucꞌuxiobꞌ tunor ufamilia, bꞌan taca cocha war ucꞌaniobꞌ inteꞌ inteꞌ familia.
GEN 47:13 Pues matucꞌa e cosecha nien tama inteꞌ lugar y nien tama otronteꞌ lugar, y e winar war abꞌoro axin iraj iraj. Pues bꞌan cocha numuy tama e lugar Egipto y bꞌan numuy tama e lugar Canaán ubꞌan, y tamar era tunor e gente jayjayranobꞌ umen e winar.
GEN 47:14 Y e José war umorojse tunor e tumin tuaꞌ e gente xeꞌ turuanobꞌ tama e lugar Egipto y tama e lugar Canaán conda utoyobꞌ e trigo lo que war umaniobꞌ tuaꞌ. Y utꞌabꞌse tunor e tumin era tama uyotot e rey.
GEN 47:15 Y conda mix tucꞌa más e tumin tama tunor or e lugar Egipto y tunor or e lugar Canaán, tunorobꞌ cꞌotoyobꞌ tut e José tuaꞌ oꞌjronobꞌ tacar y chenobꞌ: —Quisinic awajcꞌon tucꞌa tuaꞌ cacꞌuxi cocha cꞌapa tunor e trigo lo que ayan ani tacaron. Pues majax bueno tuaꞌ taca cachamay umen que cꞌapix catumin. Pues matucꞌa catumin tuaꞌ camani más e trigo, chenobꞌ e gente.
GEN 47:16 Entonces ojron e José y che: —Pues jay mix tucꞌa más itumin, taresic iwaracꞌobꞌ lo que ayan tibꞌa, y nen cꞌani inwajcꞌox e trigo tamar, che e José.
GEN 47:17 Entonces tunor e gente tama e lugar Egipto cay uqꞌuechiobꞌ ixin tunor uchij y tunor uyoveja y tunor uwacax esto tut e José, y jaxir sutpa uyajcꞌuobꞌ e trigo tamar tuaꞌ uyubꞌiobꞌ awiobꞌ tama tunor e año era.
GEN 47:18 Pero conda cꞌapa e año yajaꞌ, y conda cay otronteꞌ año ixiobꞌ e gente tut e José otronyajr y chenobꞌ: —Machi uyubꞌion camuqui toit que cꞌapa catumin y tabꞌix ixto tunor cawaracꞌobꞌ. Y mix tucꞌa más tuaꞌ cawajqꞌuet tuaꞌ camani e trigo, sino que jax taquix tuaꞌ caquetpa cora man xeꞌ mambꞌir inyajrer tabꞌa, y ayan carum que erer cachoni tacaret.
GEN 47:19 Y tamar era cꞌani cawaret tuaꞌ amanion y tuaꞌ amani carum tuaꞌ uyubꞌion asutpa camani cora trigo tamar. Y non tuaꞌ caquetpa cora man xeꞌ mambꞌir inyajrer tuaꞌ e rey, y e cosecha lo que axin alocꞌoy tama e rum axin aquetpa tuaꞌ e rey ubꞌan. Pero net ucꞌani tuaꞌ awajcꞌon e semilla tuaꞌ capaqꞌui tuaꞌ machi cachamay umen e winar y tuaꞌ machi aquetpa bꞌan taca e rum. Porque matucꞌa cacꞌampibꞌir jay intaca caxin cachamay umen que matucꞌa tuaꞌ cacꞌuxi, chenobꞌ e gente uyareobꞌ e José.
GEN 47:20 Entonces e José ixin umani tunor e rum tuaꞌ e gente tama tunor or e lugar Egipto, y tamar era e rey cꞌotoy quetpa ajyum tama tunor e rum tama tunor e lugar Egipto, cocha tunor e gente quetpa tuaꞌ uchoniobꞌ urum tuaꞌ umaniobꞌ e trigo tamar.
GEN 47:21 Y tunor e gente tama e lugar e Egipto quetpobꞌ cora manobꞌ xeꞌ mambꞌir inyajrer tuaꞌ e rey.
GEN 47:22 Pues jax taquix e rum xeꞌ tuaꞌ tin e sacerdotiobꞌ tama e lugar Egipto xeꞌ machi majna umen e José, cocha e rey war uyajcꞌu e sacerdotiobꞌ e trigo tuaꞌ ucꞌuxiobꞌ iraj iraj, y tamar taca era machi quetpa tuaꞌ uchoniobꞌ urum.
GEN 47:23 Entonces e José cay upejca tunor e gente y che: —Pues coner nox y tunor e rum aquetpa tuaꞌ e rey, cocha cꞌapa inmani tunor era. Y cꞌani inwajcꞌox cora ut e semilla tuaꞌ ipaqꞌui.
GEN 47:24 Pero cꞌani inwareox que ucꞌani tuaꞌ iwajcꞌu e rey chateꞌ pana tama e diez pana lo que alocꞌoy tama e cosecha. Y e ocho pana lo que aquetpa erer icꞌampes tuaꞌ ipaqꞌui tuaꞌ achecta e cosecha otronyajr y tuaꞌ icꞌuxi nox y imaxtac y tunor tin xeꞌ turobꞌ tacarox, che e José.
GEN 47:25 Entonces sutpa ojronobꞌ e gente era y chenobꞌ: —Pues net war achectes meyra cꞌunersiaj ticoit, cocha ixiet acorpes cacuxtar. Y non era cꞌani caquetpa man tuaꞌ e rey inyajrer, chenobꞌ e gente.
GEN 47:26 Y bꞌan cocha era e José uyacta inteꞌ ley tama tunor or e lugar Egipto que e gente ucꞌani tuaꞌ uyajcꞌuobꞌ e rey chateꞌ pana tama e diez pana lo que alocꞌoy tama e cosecha. Pues e ley era aquetpato esto coner, jax taca tin e sacerdotiobꞌ tama e lugar Egipto machi quetpa tuaꞌ utoyobꞌ e impuesto era, cocha e rum tuobꞌ machi cꞌotoy quetpa tuaꞌ e rey.
GEN 47:27 Pues entonces e gente tuaꞌ Israel quetpobꞌ tama e lugar Egipto, y cꞌotoy quetpobꞌ ajyumobꞌ tama e lugar Gosén, y cay bꞌoruobꞌ meyra tama e lugar yajaꞌ.
GEN 47:28 Pues e Jacob turuan diecisiete año tama e lugar Egipto, y tama tunor ujabꞌ cꞌotoy utzꞌacse 147 año.
GEN 47:29 Pues tama inteꞌ día conda e Jacob war ubꞌijnu que cꞌanix achamay uyare tuaꞌ apejcna e José y uyare cocha era y che: —Pues jay erachet que war acꞌanien, turbꞌan acꞌabꞌ yebꞌar ut niwaꞌ y arenen tama ucꞌabꞌa e Dios que cꞌani ache lo que cꞌani inwaret era. Pues cꞌani inwaret que machi incꞌani tuaꞌ inmujca tama e lugar Egipto.
GEN 47:30 Y conda nen inxin inchamay incꞌani tuaꞌ inmujca tiaꞌ mucbꞌirobꞌ nitata viejobꞌirobꞌ tama e lugar Canaán, che e Jacob. Entonces ojron e José y che: —Pues bꞌan cꞌani inche, che e José. Y sutpa ojron e Jacob otronyajr y che:
GEN 47:31 —Arenen jay erach que san tuaꞌ ache lo que war inwaret era, che utata e José. Y e José sutpa uyare otronyajr que bꞌan tuaꞌ uche. Entonces e Jacob sutrema achpa cora tuaꞌ acotuan tujor uchꞌacteꞌ tuaꞌ uyujtzꞌi ut e Dios.
GEN 48:1 Pues nacpat era conda numuy cora tiempo e José arobꞌna que cꞌanix achamay utata. Entonces e José ubꞌijnu tuaꞌ axin uwira, y uqꞌueche ixin e chateꞌ uyunenobꞌ tacar xeꞌ jax e Manasés y e Efraín.
GEN 48:2 Y conda cꞌotoyobꞌ, arobꞌna e Jacob que cꞌotoyix e José taca uyunenobꞌ tuaꞌ uwarajse. Entonces e Jacob uturbꞌa ubꞌa tuaꞌ achpa aturuan tama uchꞌacteꞌ.
GEN 48:3 Y ojron taca e José cocha era y che: —Pues Nidiosir xeꞌ meyra ayan ucꞌotorer uchectes ubꞌa taniut tama e chinam xeꞌ ucꞌabꞌa Luz xeꞌ turu tama e lugar Canaán, y yaꞌ yajaꞌ cay uchojbꞌesen
GEN 48:4 cocha era y che: ‘Nen cꞌani inche abꞌoro meyra amaxtac, y cꞌani inche que achꞌajnarir axin aquetpa meyra chinamobꞌ. Y cꞌani inwajcꞌu e rum era achꞌajnarir tuaꞌ aquetpa tuobꞌ inyajrer.’ Bꞌan uyaren Niwinquirar Dios.
GEN 48:5 Y era cꞌani inwaret que oynenobꞌ xeꞌ jax e Efraín y e Manasés xeꞌ cuxpobꞌ tara tama e lugar Egipto bꞌajxan que cꞌotoyen tuaꞌ inturuan tacaret, cꞌani aquetpobꞌ bꞌan cocha jay unembꞌirobꞌ ani tanibꞌa, y cꞌani uchꞌamiobꞌ inteꞌ herencia tanibꞌa. Pues bꞌan cocha niunenobꞌ Rubén y e Simeón cꞌani uchꞌamiobꞌ inteꞌ herencia tanibꞌa, y bꞌan tuaꞌ uchꞌamiobꞌ e Efraín y e Manasés ubꞌan.
GEN 48:6 Pero jay axin achecta más oynenobꞌ nacpat que jaxirobꞌ, cꞌani aquetpobꞌ tabꞌa y majax tanibꞌa, y axin uchꞌamiobꞌ uyerencia bꞌan cocha jay umaxtacobꞌ ani e Efraín o e Manasés.
GEN 48:7 Pues war inwaret cocha era, porque taniut nen quisinic ani que achecta más umaxtac atuꞌ xeꞌ jax e Raquel, pero matucꞌa más cocha chamay jaxir tama e lugar Canaán conda war insutpa incꞌotoy tama e lugar Padán-aram. Pues tzajtaca niut que chamay conda cꞌanix cacꞌotoy tama e chinam Efrata, y yajaꞌ taca inmuqui tuyejtzꞌer e bꞌir xeꞌ axin tama e chinam Efrata, che e Jacob uyare e José. Pues e chinam Efrata ucꞌabꞌa Belén coner.
GEN 48:8 Entonces e Jacob sutpa uwira uyunenobꞌ e José ojron y che: —Y e maxtacobꞌ era, ¿chiobꞌ pue? che e Jacob.
GEN 48:9 Entonces ojron e José y che: —Jax e maxtac que e Dios uyajqꞌuen tara tama e lugar Egipto, che e José. Entonces ojron utata otronyajr y che: —Taresobꞌ tara más tama niwejtzꞌer tuaꞌ uyubꞌien inwajcꞌobꞌ nichojbꞌesiaj, che e Jacob.
GEN 48:10 Pues e Jacob onian winiquix y warix asatpa unacꞌut y tamar era machix eꞌron bien. Entonces e José uqꞌueche ixin umaxtac esto tut utata. Entonces e Jacob utzꞌujtzꞌi ucajram e maxtac y umeqꞌue.
GEN 48:11 Y de allí uyare e José cocha era y che: —Pues nen ma tiaꞌ imbꞌijnu jay cꞌanto insutpa inwira oit otronyajr, pero Cadiosir uyacten tuaꞌ inwira esto amaxtac ubꞌan, che e Jacob uyare e José.
GEN 48:12 Entonces e José ulocse umaxtac tiaꞌ turobꞌ tuyejtzꞌer or upixutata, y de allí cotuan esto que utacbꞌu ut ujor tama ut e rum.
GEN 48:13 Y de allí e José uchuqui ucꞌabꞌ e chateꞌ maxtac, y uturbꞌa e Efraín tama unojcꞌabꞌ y uturbꞌa e Manasés tama utzꞌejcꞌabꞌ. Entonces uqꞌueche ixin esto tuyejtzꞌer utata. Y bꞌan cocha era e Efraín quetpa tama utzꞌejcꞌabꞌ e Jacob y e Manasés quetpa tama unojcꞌabꞌ.
GEN 48:14 Pero conda e Jacob upacbꞌu ucꞌabꞌ tujor e maxtac, uche cruzar y uturbꞌa unojcꞌabꞌ tama ujor e Efraín xeꞌ jax e ijtzꞌimbꞌir, y uturbꞌa utzꞌejcꞌabꞌ tama ujor e Manasés motor que jax e sacumbꞌir.
GEN 48:15 Entonces e Jacob uchojbꞌes ut e José taca uyunenobꞌ cocha era y che: “Que Cadiosir xeꞌ tuaꞌ nitatobꞌ xeꞌ jax e Abraham y e Isaac xeꞌ cay xanobꞌ tacar y Cadiosir era xeꞌ jax xeꞌ cay ucojcuen tama tunor nicuxtar desde que cuxpen,
GEN 48:16 y Uyangel e Dios xeꞌ cay ucorpesen tama tunor lo que intran taniut, uchojbꞌesic ut e maxtacobꞌ era. Y quisinic que umenerobꞌ axin acꞌajpesna nicꞌabꞌa y ucꞌabꞌobꞌ nitatobꞌ xeꞌ jax e Abraham y e Isaac, y que uchꞌajnarir axin abꞌoro meyra tara tor e rum”, che e Jacob uyare e José.
GEN 48:17 Pero conda e José uwira que utata uturbꞌa unojcꞌabꞌ tama ujor e Efraín y majax tujor e Manasés machi tzay, y tamar era uwajpi ucꞌabꞌ utata tuaꞌ ulocse tama ujor e Efraín y tuaꞌ uturbꞌa tama ujor e Manasés.
GEN 48:18 Entonces e José uyare utata y che: —Tata, ira ache cocha era. E Manasés jax e sacumbꞌir. Turbꞌan anojcꞌabꞌ tama ujor jaxir, che e José uyare utata.
GEN 48:19 Pero utata machi uche cocha arobꞌna umen e José, sino que ojron y che: —Sitz, innatix que bꞌan y innata lo que war inche. Pues uchꞌajnarir e Manasés cꞌani acꞌotoy aquetpa inteꞌ nuxi chinam xeꞌ nojta ucꞌampibꞌir ubꞌan. Pero uchꞌajnarir uwijtzꞌin xeꞌ jax e Efraín cꞌani aquetpa más nojta ucꞌampibꞌir, y uchꞌajnarir jaxir axin aquetpa meyra chinamobꞌ, che e Jacob uyare e José.
GEN 48:20 Pues e Jacob uchojbꞌes ut umaxtacobꞌ e José tama e día era y che: —Pues que e chinam tuaꞌ e Israel axin ucꞌampes e cꞌabꞌa tibꞌa tuaꞌ uchojbꞌes ut e inmojr gente, y axin oꞌjronobꞌ cocha era y che: ‘Que e Dios utacriox bꞌan cocha cay utacre e Efraín y e Manasés,’ che e Jacob. Y tamar era e Jacob uturbꞌa e Efraín bꞌajxan que e Manasés.
GEN 48:21 Y de allí uyare e José cocha era che: —Pues nen cꞌanix inchamay, pero Cadiosir cꞌani ucojcuet y axin uqꞌueche axin achꞌajnarir tuaꞌ asutpa esto tama e lugar tiaꞌ turuanobꞌ atata viejobꞌirobꞌ.
GEN 48:22 Pues tama achꞌajnarir cꞌani inwajcꞌu e rum xeꞌ más imbꞌutz que lo que cꞌani inwajcꞌu asacunobꞌ xeꞌ jax e lugar Siquem xeꞌ inlocse tut tin e tuaꞌ uchꞌajnarir e Emor xeꞌ ajlugarobꞌ tama e lugar Canaán conda cay inche e tzꞌojyir tacarobꞌ, che e Jacob uyare e José.
GEN 49:1 Entonces e Jacob upejca uyunenobꞌ y cay uyare cocha era y che: “Laric taniwejtzꞌer. Cꞌani inwareox lo que tuaꞌ anumuy watar e día:
GEN 49:2 “Laric taniut tuaꞌ iyubꞌi nox xeꞌ unembꞌirox tanibꞌa, ubꞌinic lo que cꞌani inwareox xeꞌ tatabꞌiren tibꞌa xeꞌ Jacoben.
GEN 49:3 “Pues net Rubén, jaxet e yaxar unembꞌir tanibꞌa, y jax e yaxar unembꞌir conda nen chꞌom maxtaquento conda nen ayanto niqꞌuecꞌojsiaj, y jax net xeꞌ tuaꞌ itajttzꞌa más meyra que e inmojr niunenobꞌ, y jax net xeꞌ ayan meyra acꞌotorer.
GEN 49:4 Pero mix jax net xeꞌ tuaꞌ iquetpa bꞌajxan tujam niunenobꞌ, porque net bꞌanet cocha inteꞌ nuxi jaꞌ que ma cocha tuaꞌ aquejta. Pues net ixiet ache lo que subꞌar uwirnar taniut conda ixiet chꞌanet tama nichꞌacteꞌ taca incojt niwixcar”, che e Jacob uyare e Rubén.
GEN 49:5 Y de allí sutpa ojron e Jacob taca e Simeón y e Leví y che: “Pues nox xeꞌ Simeón y e Leví intera taca iwirnar y ixquetpa bꞌan cocha cora ajcꞌopot animal, porque ixiox iche meyra mabꞌambꞌanir taca icorbo.
GEN 49:6 Pues nen ma tiaꞌ cꞌani inturuan tiwejtzꞌer tuaꞌ umbꞌi iwojroner conda war ibꞌijnu tuaꞌ iche e mabꞌambꞌanir. Porque conda nox qꞌuijnox ixiox ichamse meyra gente, y ixiox ichꞌaqui meyra wacax ubꞌan tuaꞌ taca ixasi tacarobꞌ.
GEN 49:7 Pues bꞌaxbꞌir tuaꞌ aquetpa iqꞌuijnar xeꞌ calapir inyajrer. Cꞌani inwajnes alocꞌoyobꞌ ichꞌajnarir tuaꞌ axiobꞌ tic taca tama tunor or e lugar Israel”, che e Jacob uyare e Simeón y e Leví.
GEN 49:8 Y de allí ojron e Jacob taca e Judá y che: “Pues net Judá, cꞌani axin utattzꞌietobꞌ awijtzꞌinobꞌ. Y net tuaꞌ acucru tunor tin e aqꞌuiniobꞌ uwiretobꞌ, y conda awijtzꞌinobꞌ axin uwirobꞌ tunor lo que ache cꞌani acotuanobꞌ toit.
GEN 49:9 Porque bꞌanet cocha inteꞌ bꞌiqꞌuit león conda acꞌapa ucꞌuxi incojt animal lo que uchamse, que axin uyacta ubꞌa achꞌan tama ut e rum, bꞌan cocha jay jax ani inteꞌ nuxi león. Y bꞌanet ubꞌan. Y tamar era mamajchi tuaꞌ ubꞌijnu tuaꞌ ubꞌixqꞌueset.
GEN 49:10 Pues mamajchi tuaꞌ ulocse e cꞌotorer lo que qꞌuecher umen uchꞌajnarir e Judá, y nien machi tuaꞌ aloqꞌuesna e teꞌ xeꞌ qꞌuecher umenerobꞌ tama ucꞌabꞌ xeꞌ uchectes que jax era e ajcꞌotorer. Y bꞌan tuaꞌ aquetpa este que acꞌotoy e Ajyum tuaꞌ tunor or e rum xeꞌ aquetpa tuaꞌ atajttzꞌa umen tunor e sian chinamobꞌ lo que ayan tara tor e rum.
GEN 49:11 Pues tama e tiempo xeꞌ watar axin alocꞌoy meyra cosecha este que axin ucachi e chuchuꞌ chij tama e lugar tiaꞌ apajcꞌa e uva tuaꞌ uyubꞌi ucꞌuxi uyopor e uva era, y cꞌani alocꞌoy meyra cosecha tama e uva este que erer upojchꞌiobꞌ ubꞌujcobꞌ tama uyarar.
GEN 49:12 Pues unacꞌutobꞌ tuaꞌ aquetpa más incsibꞌan que e vino, y ut uyejobꞌ tuaꞌ aquetpa más sacsac que uyarar e chuꞌ”, che e Jacob uyare e Judá.
GEN 49:13 Y de allí sutpa ojron e Jacob taca e Zabulón y che: “Pues net xeꞌ Zabulón, cꞌani ituruan tama utiꞌ e nuxi jaꞌ tiaꞌ ayan e ocher tama e barco. Y ucꞌapesnibꞌir ulugar achꞌajnarir cꞌani acꞌotoy esto tuyejtzꞌer e chinam Sidón”, che e Jacob.
GEN 49:14 Y de allí e Jacob uyare e Isacar y che: “Pues net xeꞌ Isacar, achꞌajnarir cꞌani aqꞌuecꞌo bꞌan cocha aqꞌuecꞌo incojt chij xeꞌ uqꞌueche axin e carga tama upat, pero conda acꞌoy, axin achꞌan yebꞌar e carga y machi ucꞌani tuaꞌ achpa.
GEN 49:15 Y achꞌajnarir cꞌani uwirobꞌ que galan uwirnar e lugar tiaꞌ turu, y que galan e lugar tiaꞌ tuaꞌ ajiriobꞌ. Pero jaxirobꞌ aquetpobꞌ tuaꞌ ucoti upatobꞌ tuaꞌ ucuchiobꞌ axin e carga, y cꞌani atzayobꞌ uyajcꞌu ubꞌobꞌ tuaꞌ aquetpobꞌ cora man tuaꞌ e inmojr”, che e Jacob.
GEN 49:16 Y de allí ojron e Jacob taca e Dan y che: “Pues net xeꞌ Dan, achꞌajnarir aquetpobꞌ ajbꞌijresiajobꞌ tujor e gente tama uchinam bꞌan cocha achena tama tunor e inmojr chinamobꞌ tama e lugar Israel.
GEN 49:17 Y uwirnarobꞌ tuaꞌ aquetpa bꞌan cocha incojt chan xeꞌ chꞌar tut e bꞌir xeꞌ axin ucꞌuxi utunir uyoc e chij este que axin acucurna tin e turu tama ujor e chij”, che e Jacob.
GEN 49:18 Y de allí e Jacob ucꞌajti taca e Dios y che: “Niwinquiraret Dios, war incojco tamaret tuaꞌ acorpesen tut tin e aqꞌuijnobꞌ uwirenobꞌ”, che e Jacob.
GEN 49:19 Y de allí ojron e Jacob taca e Gad y che: “Pues net xeꞌ Gad, achꞌajnarir cꞌani uchiobꞌ e tzꞌojyir taca cora sian ajxujchobꞌ xeꞌ tuaꞌ ulocsiobꞌ meyra cosa tuaꞌ achꞌajnarir, pero jaxirobꞌ tuaꞌ axiobꞌ tupatobꞌ e ajxujchobꞌ este que axin utajwiobꞌ y este que axin ucucruobꞌ”, che e Jacob.
GEN 49:20 Y de allí ojron e Jacob taca e Aser y che: “Pues net xeꞌ Aser taca achꞌajnarir cꞌani iche meyra pan, y cꞌani iyustes lo que más intzaj tuaꞌ iwese e inmojr xeꞌ tawar tuaꞌ acꞌujxa umen inteꞌ rey”, che e Jacob.
GEN 49:21 Y ojron e Jacob otronyajr y che: “Pues net xeꞌ Neftalí, achꞌajnarir axin aquetpobꞌ bꞌan cocha incojt masaꞌ xeꞌ bꞌambꞌir xeꞌ axin ucuxi meyra uyarobꞌ xeꞌ galanic”, che e Jacob.
GEN 49:22 Y de allí ojron e Jacob taca e José y che: “Pues net xeꞌ José, achꞌajnarir cꞌani aquetpobꞌ bꞌan cocha cora teꞌ xeꞌ war tutiꞌ inteꞌ ut jaꞌ xeꞌ axin uchꞌubꞌa meyra uyutir y ucꞌabꞌ axin ajaywan tujor e petzbꞌir tun.
GEN 49:23 Y tin e ucꞌampesobꞌ e chꞌantꞌin axin aqꞌuijnobꞌ uwirobꞌ achꞌajnarir y cꞌani uchiobꞌ unumse ubꞌobꞌ iraj iraj.
GEN 49:24 Pero axin aqꞌuecꞌobꞌ meyra ucꞌabꞌobꞌ achꞌajnarir tuaꞌ ucꞌampesobꞌ uchꞌantꞌinobꞌ, y axin aqꞌuecꞌobꞌ umen que Cadiosir xeꞌ jax e Ajcꞌotorer tuaꞌ e Jacob cꞌani aquetpa tacarobꞌ, y axin acojcnobꞌ umen e Ajcojc tuaꞌ e Israel xeꞌ aquetpa bꞌan cocha ingojr nuxi tun tiaꞌ erer amucuan inteꞌ tuaꞌ machi achamesna.
GEN 49:25 Que Cadiosir xeꞌ tuaꞌ atata axin utacre achꞌajnarir, y que jaxir xeꞌ ayan meyra ucꞌotorer axin uchojbꞌesicobꞌ meyra taca e chojbꞌesiaj lo que watar tichan tut e qꞌuin, y taca e chojbꞌesiaj lo que watar tara tor e rum y que axin achojbꞌesnobꞌ taca meyra maxtac y taca meyra aracꞌobꞌ.
GEN 49:26 Pues que net iꞌxin ichojbꞌesna más meyra umen atata que e nuxi chojbꞌesiaj lo que inchꞌami nen tuaꞌ nitatobꞌ y que axin aquetpa más nojta achojbꞌesiaj que lo que ayan tama e nuquir witzirobꞌ xeꞌ ma tiaꞌ tuaꞌ acꞌapa. Pues que tunor e nuxi chojbꞌesiaj era axin aquetpa tamaret xeꞌ sicbꞌabꞌiret tujam tunor asacunobꞌ tuaꞌ iquetpa líder tamarobꞌ”, che e Jacob.
GEN 49:27 Entonces ojron e Jacob otronyajrto y che: “Pues net xeꞌ Benjamín, uwirnar achꞌajnarir cꞌani aquetpa bꞌan cocha incojt tigre xeꞌ imbꞌacꞌajr uwirnar xeꞌ axin uchamse tuqꞌuic tuqꞌuic animal tuaꞌ ucꞌuxi conda asacojpa, y de allí uxere lo que aquetpato conda anamtzꞌa e qꞌuin”, che e Jacob.
GEN 49:28 Pues jax era e doce unembꞌirobꞌ xeꞌ cꞌotoy quetpobꞌ tatabꞌirobꞌ tuaꞌ e doce chꞌajnarirobꞌ tuaꞌ e Israel, y jax era lo que arobꞌnobꞌ inteꞌ inteꞌ unembꞌir umen utatobꞌ bꞌan cocha uwajpi tama inteꞌ intiobꞌ conda chojbꞌesnobꞌ umener.
GEN 49:29 Y de allí e Jacob uyare uyunenobꞌ cocha era y che: “Pues mix jax meyra día ucꞌanto este que inxin inchamay. Pues incꞌani tuaꞌ imuquien tuyejtzꞌerobꞌ nitata viejobꞌirobꞌ tama e rum lo que umani e Abraham taca e Efrón xeꞌ chꞌajnarir tuaꞌ e Het.
GEN 49:30 Pues e rum era turu tama e lugar Canaán, o erer caware, que e rum turu tama e lugar Macpelá xeꞌ aquetpa tama e lado tiaꞌ atobꞌoy watar e qꞌuin tama e lugar Mamré. Pues e Abraham umani e rum era tuaꞌ e Efrón tuaꞌ aquetpa inteꞌ lugar tiaꞌ tuaꞌ umuqui tunor ufamilia.
GEN 49:31 Y yaꞌ yajaꞌ mujca e Abraham xeꞌ jax nitata viejo y yaꞌ yajaꞌ mujca uwixcar xeꞌ jax e Sara, y yaꞌ yajaꞌ mujca e Isaac xeꞌ jax nitata y yaꞌ yajaꞌ mujca uwixcar xeꞌ jax e Rebeca, y yaꞌ yajaꞌ inmuqui e Lea ubꞌan xeꞌ jax niwixcar.
GEN 49:32 Pues e rum y e chꞌen xeꞌ turu tama unac e peña yajaꞌ jax lo que mantzꞌa taca uchꞌajnarir e Het”, che e Jacob uyare uyunenobꞌ.
GEN 49:33 Pues conda e Jacob cꞌapa ojron tacar uyunenobꞌ, sutpa chꞌan otronyajr tama uchꞌacteꞌ y chamay.
GEN 50:1 Pues entonces e José umori umeqꞌue ucuerpo utata y war aꞌru utzꞌujtzꞌi ucajram.
GEN 50:2 Y de allí uyare e ajtzꞌaconerobꞌ xeꞌ apatnobꞌ tacar tuaꞌ uyustesobꞌ ucuerpo utata tuaꞌ machi atujran este que axin acꞌotoy e día tuaꞌ amujca. Y uchiobꞌ bꞌan taca cocha arobꞌnobꞌ.
GEN 50:3 Y qꞌuejchiobꞌ cuarenta día tuaꞌ uyustesobꞌ ucuerpo e Jacob ani, porque jax e tiempo xeꞌ uwajpi tuaꞌ oꞌstana ucuerpo inteꞌ chamen. Pues e gente tama e lugar Egipto quetpobꞌ tzajtaca utobꞌ setenta día tama uchamer e Jacob.
GEN 50:4 Y conda numuy e setenta día tama e tzꞌintzꞌar, ojron e José taca e ajcꞌamparobꞌ tuaꞌ e rey y che: —Jay nox xeꞌ ajcꞌamparox tuaꞌ e rey cꞌayoxix tacaren, quisinic incꞌajti tibꞌa tuaꞌ iware e rey cocha era y che:
GEN 50:5 ‘Pues conda nitata cꞌanix achamay, uyubꞌi tanibꞌa tuaꞌ inware tama ucꞌabꞌa e Dios que san tuaꞌ inxin inmuqui ucuerpo tama e mujr lo que ustabꞌir umener tama e lugar Canaán. Y tamar era cꞌani incꞌajti tabꞌa tuaꞌ awacten inxin inmuqui ucuerpo nitata, y conda acꞌapa inmuqui cꞌani insutpa waten otronyajr.’ Bꞌan tuaꞌ iware e rey, che e José. Entonces bꞌan ixin uche e ajcꞌampar.
GEN 50:6 Entonces sutpa ixin e ajcꞌampar tuaꞌ e rey y uchecsu tut e José lo que arobꞌna umen e rey y che: —Quiqui mucu atata bꞌan cocha cay aware que san tuaꞌ ache, xeꞌ arobꞌna umen e rey.
GEN 50:7 Entonces ixin e José esto tama e lugar Canaán tuaꞌ umuqui utata, y ixiobꞌ ubꞌan meyra sian ajcꞌamparobꞌ tuaꞌ e rey taca tunor e nuquir winicobꞌ tama e lugar Egipto.
GEN 50:8 Y ixiobꞌ ubꞌan tunor ufamilia e Jacob taca ufamilia e José y tunor usacunobꞌ y uwijtzꞌin. Y ajrer taca e bꞌiqꞌuit maxtac y e aracꞌobꞌ xeꞌ machi ixiobꞌ, sino que quetpobꞌ tama e lugar Gosén.
GEN 50:9 Y ayan meyra gente xeꞌ ixiobꞌ taca e José. Y ayan tin e ayan ucarruaje y ayan tin e ayan uchij, y bꞌan cocha era bꞌoro meyra e gente xeꞌ ixiobꞌ tacar.
GEN 50:10 Y conda cꞌotoyobꞌ tama e lugar xeꞌ ucꞌabꞌa Hatad tiaꞌ ajajtzꞌa e trigo xeꞌ aquetpa tama inxejr lado tiaꞌ atobꞌoy watar e qꞌuin tama e xucur Jordán, e José taca e inmojr quetpobꞌ yajaꞌ taca y cay aruobꞌ tama inteꞌ tiempo de siete día tama uchamer e Jacob.
GEN 50:11 Pues conda e gente xeꞌ ajlugarobꞌ Canaán cay uwirobꞌ cobꞌa war aruobꞌ e sian gente tiaꞌ turobꞌ tama e lugar Hatad, cay ojronobꞌ y chenobꞌ: “Jax era e lugar tiaꞌ war aquetpobꞌ tzajtaca utobꞌ tin e ajlugarobꞌ Egipto war amucmayanobꞌ”, chenobꞌ tin e ajlugarobꞌ Canaán. Y tamar era turbꞌana ucꞌabꞌa e lugar era Abel-misraim xeꞌ war che “E lugar tiaꞌ amucmayanobꞌ tin e tuobꞌ e Egipto”.
GEN 50:12 Entonces tamar era uyunenobꞌ e Jacob cꞌapa uchiobꞌ tunor lo que arobꞌna umener.
GEN 50:13 Y uqꞌuechiobꞌ ixin ucuerpo e Jacob teinxejr lado e xucur Jordán esto tama e lugar Canaán tuaꞌ umuquiobꞌ tama e chꞌen xeꞌ aquetpa tama e lugar Macpelá, xeꞌ mambꞌir umen e Abraham tuaꞌ e Efrón xeꞌ tuaꞌ uchꞌajnarir e Het, tuaꞌ acꞌampesna bꞌan cocha inteꞌ mujr tama tunor ufamilia. Pues e rum era y e chꞌen xeꞌ turu tamar aquetpa tuyejtzꞌer e lugar Mamré.
GEN 50:14 Entonces conda cꞌapa umuqui utata, e José sutpa ixin esto tama e lugar Egipto taca usacunobꞌ y uwijtzꞌin y tunor tin e cay xanobꞌ tacar.
GEN 50:15 Pues entonces cocha cꞌapa chamay utatobꞌ, usacunobꞌ e José cay ubꞌijnuobꞌ cocha era y chenobꞌ: “Bꞌajcꞌat warto aqꞌuijna e José tamar lo que cay cache upater ixnix, y bꞌajcꞌat axin ubꞌijnu tuaꞌ uchion catoyi uyeror”, che usacunobꞌ e José.
GEN 50:16 Entonces uyebꞌtobꞌ ixin inteꞌ ojroner tut e José y che: “Conda merato achamay catata uyareon
GEN 50:17 tuaꞌ cawaret e ojroner era: ‘Cꞌani inwaret tuaꞌ icꞌumpa taca asacunobꞌ tama tunor e mabꞌambꞌanir lo que cay uchiobꞌ apater’, bꞌan e ojroner xeꞌ actana umen catata tuaꞌ cawaret. Y tamar era quisinic que icꞌumpa tacaron tama tunor e nuxi mabꞌambꞌanir lo que cay cache apater, cocha non manon tuaꞌ Udiosir atata ubꞌan”, xeꞌ ebꞌtana ixin tut e José umen usacunobꞌ. Pero conda cꞌapa arobꞌna tunor e ojroner era tut e José umen tin e ucꞌotes, jaxir cay aru.
GEN 50:18 Y de allí cꞌotoyobꞌ usacunobꞌ e José y cotuanobꞌ tut este que utacbꞌu ut ujorobꞌ tut e rum, y chenobꞌ: —Non manon tabꞌa, chenobꞌ usacunobꞌ e José.
GEN 50:19 Entonces ojron e José y che: —Ira ixbꞌacta. Pues nen ma erer inquetpa bꞌan cocha e Dios xeꞌ ubꞌijnu uwira tamar lo que iche.
GEN 50:20 Pues nox cay ibꞌijnu tuaꞌ iche inteꞌ nuxi mabꞌambꞌanir nipater, pero e Dios uche tuaꞌ alocꞌoy imbꞌutz lo que cay iche nipater xeꞌ mabꞌambꞌan. Y tamar era cꞌotoy corpesna ucuxtar meyra gente tuaꞌ machi achamayobꞌ tama e winar.
GEN 50:21 Y tamar era inwareox que ira ixbꞌacta porque nen cꞌani inwajcꞌox tunor lo que ucꞌani tuaꞌ icꞌuxi taca tunor imaxtac, che e José. Y bꞌan cocha era e José usisijres uyalmobꞌ usacunobꞌ, cocha jaxir ojron taca meyra cꞌunersiaj.
GEN 50:22 Pues entonces e José taca tunor ufamilia utata quetpobꞌ tuaꞌ aturuanobꞌ tama e lugar Egipto. Y e José cꞌotoy utzꞌacse 110 año.
GEN 50:23 Y jaxir uwirato e chajr sitzꞌobꞌ tuaꞌ e Efraín. Y cꞌotoyto uwira ubꞌan conda cuxpobꞌ uyunenobꞌ e Maquir xeꞌ jax uyunen e Manasés. Y uyunenobꞌ e Maquir quetpobꞌ bꞌan cocha jay unembꞌirobꞌ tuaꞌ e José.
GEN 50:24 Pues entonces tama inteꞌ día e José uyare usacunobꞌ cocha era y che: “Nen mix jax meyra día tuaꞌ inturuan, pero e Dios turix tuaꞌ utacriox, y tuaꞌ ulocsiox tama e lugar era, y tuaꞌ uqꞌueche axin ichꞌajnarir esto tama e lugar xeꞌ arobꞌna e Abraham y e Isaac y e Jacob que san tuaꞌ ajcꞌunobꞌ umen e Dios”, che e José uyare usacunobꞌ.
GEN 50:25 Y de allí e José uyareobꞌ tuaꞌ uchiobꞌ inteꞌ acuerdo tacar y che: “Pues Cadiosir cꞌani ixto utacriox. Pero quisinic que iwaren coner era que san tuaꞌ iqꞌueche axin nibꞌaquer tuaꞌ amujca tuyejtzꞌer nitata conda achecta e día tuaꞌ alocꞌoyobꞌ ichꞌajnarir”, che e José uyare usacunobꞌ.
GEN 50:26 Entonces e José chamay tama e lugar Egipto conda war ucojco 110 año. Y conda cꞌapa ustana ucuerpo, yajra tama inteꞌ caja tuaꞌ atꞌabꞌesna.
RUT 1:1 Pues tama e onian tiempo conda mato tucꞌa inteꞌ rey tama e lugar Israel tunor tin e turuanobꞌ tama e lugar era quetpobꞌ yebꞌar cora ajbꞌijresiajobꞌ. Y tama e tiempo era checta inteꞌ nuxi winar cocha machi cꞌaxi e jajar tama tunor or e lugar. Entonces inteꞌ winic xeꞌ turuan tama e chinam Belén xeꞌ turu tama e departamento Judá ixin innajt cora tuaꞌ aturuan tama inteꞌ lugar xeꞌ ucꞌabꞌa Moab. Y uqꞌueche ixin uwixcar, y e chateꞌ uyunenobꞌ.
RUT 1:2 Pues jaxir ucꞌabꞌa Elimelec y uwixcar ucꞌabꞌa Noemí y uyunenobꞌ ucꞌabꞌobꞌ Mahlón y Quilión. Tunorobꞌ ajlugarobꞌ tama e chinam Belén tama e departamento Judá y ixiobꞌ tuaꞌ aturuanobꞌ cora año tama e lugar Moab.
RUT 1:3 Pero conda numuy cora tiempo chamay e Elimelec, y tamar era uwixcar xeꞌ e Noemí quetpa ubꞌajner taca e chateꞌ uyarobꞌ.
RUT 1:4 Pero conda numuy cora tiempo umaxtacobꞌ utajwi ubꞌobꞌ taca chateꞌ ijchꞌoctac xeꞌ ajlugarobꞌ Moab, y nujbꞌiobꞌ tacarobꞌ. Inteꞌ ijchꞌoc ucꞌabꞌa Orfa y inteꞌ ucꞌabꞌa Rut. Pero conda numuy diez año
RUT 1:5 chamayobꞌ e Mahlón y e Quilión, y tamar era quetpa ubꞌajner e Noemí. Matucꞌa uyarobꞌ y matucꞌa uviejo.
RUT 1:6 Pues entonces cꞌotoy unata e Noemí tiaꞌ turu tama e lugar Moab que Cawinquirar Dios sutpa uchojbꞌes ut e gente tama uchinam otronyajr xeꞌ jax e Belén y que cꞌapa e winar.
RUT 1:7 Y tamar era ubꞌijnu e Noemí tuaꞌ asutpa axin esto tama e departamento Judá otronyajr y tuaꞌ uqꞌueche axin e chateꞌ uyaribꞌobꞌ.
RUT 1:8 Pero conda war axanobꞌ tama e bꞌir xeꞌ acꞌotoy esto tama e departamento Judá cay ojron e Noemí taca uyaribꞌobꞌ y che: —Sutpenic quiquic tama uyotot ituꞌ otronyajr tuaꞌ machi ixixin tacaren. Y que Cawinquirar Dios uyajtanicox bꞌan cocha cay quetpox incꞌun iwirnar tacaren y taca niviejo ani, y taca nimaxtac ani ubꞌan.
RUT 1:9 Y que Cawinquirar Dios utacricox tuaꞌ ixsutpa ixnujbꞌi otronyajr, y tuaꞌ itajwi inteꞌ iviejo tuaꞌ ucojcox y tuaꞌ ixtzay otronyajr. Y de allí e Noemí utzꞌujtzꞌi utiꞌ uyaribꞌobꞌ y tamar era cay aruobꞌ jaxirobꞌ.
RUT 1:10 Pero ojronobꞌ jaxirobꞌ y chenobꞌ: —Machi ixto cꞌani casutpa caxin otronyajr esto tama uyototobꞌ catuꞌ. Non cꞌani caxin tacaret esto tama e chinam tabꞌa, chenobꞌ e Rut y e Orfa.
RUT 1:11 Pero sutpa ojron e Noemí otronyajr y che: —Quiquic niwijchꞌoctacox. ¿Tucꞌa tuaꞌ cꞌani ixixin tacaren? Nen machix tuaꞌ inchꞌijrse más nimaxtac tuaꞌ uyubꞌiox ixnujbꞌi tacarobꞌ.
RUT 1:12 Sutpenic quiquic tama iyotot. Nen onian ixiquen y tamar era ma cocha erer insutpa innujbꞌi otronyajr. Y motor jay ayan ani niviejo y tama e acbꞌar era inxin ani tuaꞌ inwayan tacar, y jay tamar era inxin inchꞌijrse más niwarobꞌ ani,
RUT 1:13 y nox, ¿icojcoto ca este que axin aꞌchꞌiobꞌ ani tuaꞌ ixnujbꞌi tacarobꞌ? Machi. Y jay bꞌan ani inche, ¿ixquetpato ca ani ibꞌajner tunor e tiempo era este que aꞌchꞌiobꞌ tuaꞌ ixsutpa ixnujbꞌi tacarobꞌ? Machi, niwijchꞌoctacox. Pues Cawinquirar Dios war uchien innumse nibꞌa taca inteꞌ nuxi cꞌuxner xeꞌ inchꞌaj ut, y más ani inxin innumse nibꞌa jay inwira que nox war inumse ibꞌa ubꞌan umen que war ani ixquetpa ibꞌajner tacaren, che e Noemí.
RUT 1:14 Y entonces jaxirobꞌ cay aruobꞌ otronyajr, y de allí e Orfa utzꞌujtzꞌi utiꞌ upixam y locꞌoy ixin. Pero e Rut war uyajta ut upixam y tamar era machi cꞌani uyacta tuaꞌ umeqꞌue y machi cꞌani alocꞌoy najtir tut.
RUT 1:15 Entonces ojron e Noemí otronyajr y che: —Iran, war asutpa axin awet aribꞌnar esto tama uchinam otronyajr y war asutpa axin esto tut udiosobꞌ ubꞌan. Quiqui net tacar ubꞌan, che e Noemí.
RUT 1:16 Entonces ojron e Rut y che: —Machi awaren tuaꞌ inlocꞌoy inxin innajt toit, y machi awaren tuaꞌ inwactet. Nen cꞌani inxin tiaꞌ iꞌxin net, y nen cꞌani inturuan tiaꞌ ituruan net. Y achinam cꞌani acꞌotoy aquetpa tanibꞌa, y Adiosir cꞌani acꞌotoy aquetpa Nidiosir ubꞌan.
RUT 1:17 Nen cꞌani inchamay tiaꞌ tuaꞌ iꞌxin ichamay net, y tiaꞌ tuaꞌ iꞌxin imujca net, yajaꞌ taca cꞌani inmujca nen ubꞌan. Que e Dios axin uwatzꞌien meyra jay inlocꞌoy inxin innajt toit. Jax taca e chamer xeꞌ tuaꞌ axin uxereon, che e Rut.
RUT 1:18 Pues conda e Noemí uwira que e Rut cꞌani ixto axin tacar, machi ixto ojron más.
RUT 1:19 Entonces ixiobꞌ chatertiobꞌ este que cꞌotoyobꞌ tama e chinam Belén. Pero conda war oꞌchoyobꞌ tama e chinam, e gente cay bꞌactobꞌ uwirobꞌ ut e Noemí y cay tzayobꞌ meyra ubꞌan este que cay ojronobꞌ e ixictac y chenobꞌ: —¿Ma ca jax era e Noemí? chenobꞌ e ixictac.
RUT 1:20 Pero ojron jaxir y che: —Nen. Pero machix ipejquen tama e Noemí, sino que pejcaniquen que inchꞌaj niut, porque Cadiosir xeꞌ nojta ucꞌotorer uturbꞌa lo que inchꞌaj ut tamaren, che e Noemí.
RUT 1:21 Pues conda locꞌoyen tama e lugar era ayan niviejo y ayan chateꞌ nimaxtac xeꞌ ixiobꞌ tacaren, pero coner war inyopa nibꞌajner umen que bꞌan war ucꞌani Cawinquirar Dios. Entonces ¿tucꞌato tuaꞌ ipejquen Noemí xeꞌ war che “Atzay”, cocha Cawinquirar Dios xeꞌ nojta ucꞌotorer ixin uchien innumse nibꞌa este que war aquetpa tzajtaca niut, che e Noemí.
RUT 1:22 Pues entonces bꞌan numuy conda sutpa tari e Noemí tama e lugar Moab taca e Rut xeꞌ jax uyaribꞌ xeꞌ ajlugar Moab. Pues conda cꞌotoyobꞌ, intocto war acay amorojsena e cosecha tama e cebada tama e chinam era.
RUT 2:1 Pues e Noemí ayan inteꞌ ufamiliar xeꞌ tuaꞌ uviejo ani xeꞌ ucꞌabꞌa Booz. Pues e Booz jax inteꞌ winic xeꞌ ayan meyra ucꞌampibꞌir y xeꞌ ayan utumin y xeꞌ acꞌubꞌesna umen e gente.
RUT 2:2 Entonces tama inteꞌ día e Rut war uwira que matucꞌa ayan tuaꞌ ucꞌuxiobꞌ y tamar era uyare e Noemí y che: —¿Erer ca inxin tama inteꞌ chor tuaꞌ inwira jay ayan tin e incꞌun uwirnar taniut xeꞌ axin uyacten inxin tupat e ajpatnarobꞌ tuaꞌ incꞌopi cora cora e cosecha lo que aquetpato tuyoc e chor conda acꞌapa amorojsena tunor era? che e Rut. Entonces ojron e Noemí y che: —Erer iꞌxin, ijchꞌoc, che e Noemí.
RUT 2:3 Entonces ixin e Rut tama inteꞌ chor y cay ucꞌopi lo que actana umen tin e war apatnobꞌ tama e cosecha. Pero wacchetaca cꞌotoy unata que tuaꞌ e Booz e chor era.
RUT 2:4 Entonces conda yaꞌ war tama uyoc e chor e Booz cꞌotoy tama uxambꞌar tama e chinam Belén, y upejca e ajpatnarobꞌ y che: —Que Cawinquirar Dios aquetpa tacarox, che jaxir. Y e ajpatnarobꞌ chenobꞌ: —Que Cawinquirar Dios uchojbꞌesiquet net ubꞌan, chenobꞌ.
RUT 2:5 Entonces e Booz cay uyubꞌi tuaꞌ e man xeꞌ aquetpa tujor e inmojr manobꞌ y che: —¿Chi tuaꞌ familia e ixic yax? che e Booz.
RUT 2:6 Y che e man: —Jax e ixic xeꞌ tuaꞌ e lugar Moab xeꞌ sutpa tari taca e Noemí.
RUT 2:7 Yopa sajmi y ucꞌajti jay erer axin ticapat tuaꞌ ucꞌopi e cosecha lo que aquetpato tuyoc e chor, y caware que uyubꞌi. Y cay patna y bꞌan war uche tunor e día, y este era ixin tuaꞌ ajiri imbꞌijc tama e bꞌiqꞌuit otot bꞌana, che e man.
RUT 2:8 Entonces ixin e Booz esto tiaꞌ turu e Rut y che: —Ubꞌin, ixic, ira iꞌxin tuaꞌ acꞌopi e cosecha tama otronteꞌ chor. Quetpen tara taca e ijchꞌoctacobꞌ xeꞌ manobꞌ tanibꞌa,
RUT 2:9 y iran tiaꞌ war apatnobꞌ e winicobꞌ y quiqui net tupatobꞌ taca e ijchꞌoctacobꞌ tuaꞌ amorojse lo que aquetpato tuyoc e chor. Inwareobꞌix e winicobꞌ era tuaꞌ machi upejquetobꞌ. Y conda ataqui atiꞌ, chꞌujcun awira tiaꞌ aquetpa e murur taca e jaꞌ xeꞌ taresna umen nimanobꞌ sajmi y uchꞌen tamar, che e Booz.
RUT 2:10 Entonces e Rut uche bꞌan cocha acay uchiobꞌ e gente tama e tiempo yajaꞌ y cotuan tut e Booz este que utacbꞌu ujor tut e rum y uyubꞌi tuaꞌ y che: —¿Tucꞌa tuaꞌ que war itzay awiren y que incꞌun awirnar taniut cocha nen majax tuen e Israel? che e Rut.
RUT 2:11 Entonces ojron e Booz y che: —Innata tunor lo que cay ache tuaꞌ atacre apixam desde que chamay aviejo y que ixiet awacta tunor atata y atuꞌ y e lugar tiaꞌ cuxpet tuaꞌ watet ituruan tacaron xeꞌ ajnajtir gention ani toit.
RUT 2:12 Que Cawinquirar Dios uyajqꞌuiquet meyra atuanibꞌir y que axin uchojbꞌeset Cawinquirar Dios xeꞌ ticabꞌa xeꞌ tuon e Israel xeꞌ jax xeꞌ war asajca tuaꞌ ucojcuet, che e Booz.
RUT 2:13 Entonces sutpa ojron e Rut otronyajr y che: —Pues quisinic itzay awiren iraj iraj bꞌan cocha war ache era. Porque war atꞌabꞌse niwalma tacar awojroner xeꞌ incꞌun, motor que nen ma tawaren nien tuaꞌ inquetpa inteꞌ aman, che e Rut.
RUT 2:14 Entonces conda cꞌotoy e hora tuaꞌ awiobꞌ, e Booz upejca e Rut y che: —Lar tara y chꞌama imbꞌijc e pan y tzꞌaya tama e salsa xeꞌ chembꞌir taca e vinagre, che e Booz. Entonces e Rut turuan tuyejtzꞌer e ajpatnarobꞌ, y e Booz uyajcꞌu cora grano xeꞌ chꞌijrbꞌir y jaxir weꞌ este que chuan y quetpato lo que ajcꞌuna tuaꞌ ucꞌuxi.
RUT 2:15 Entonces conda achpa e Rut y ixin tuaꞌ ucꞌopi e cebada otronyajr, e Booz uyare umanobꞌ y che: —Actanic tuaꞌ umorojse e cebada tic taca motor que tama utzajqꞌuir y ira iquete iwabꞌu.
RUT 2:16 Y actanic acꞌaxi tama icꞌabꞌ cora cebada tama utzajqꞌuir tuaꞌ uyubꞌi ucꞌopi jaxir. Y mamajchi tijam tuaꞌ icꞌaye e ixic era, che e Booz.
RUT 2:17 Entonces e Rut cay ucꞌopi e cebada tama e chor este que acbꞌare. Y de allí cay uwatzꞌi lo que cay umorojse y locꞌoy inteꞌ arroba ut e cebada.
RUT 2:18 Entonces sutpa ixin tama e chinam esto tiaꞌ turu upixam, y uqꞌueche ixin tunor ut e cebada lo que cay umorojse y uchecsu tut upixam. Y nacpat era ulocse lo que ayan tama ubolsa y uyajcꞌu e Noemí tuaꞌ ucꞌuxi.
RUT 2:19 Entonces che e Noemí: —¿Tiaꞌ patnet sajmi? ¿Y tiaꞌ ixiet acꞌopi meyra cebada cocha era cocha machi uyubꞌiet ache tunor era abꞌajner? Que e Dios uchojbꞌesic ut tin e cay utacret tuaꞌ alocse meyra cebada cocha era, che e Noemí. Entonces e Rut cay uchecsu tut upixam chi tacar cay patna y che: —Pues ucꞌabꞌa e winic tiaꞌ cay patnen sajmi jax Booz, che e Rut.
RUT 2:20 Entonces tzay meyra e Noemí conda uyubꞌi que jax uchor e Booz tiaꞌ ixin e Rut tuaꞌ apatna y che: —Que Cawinquirar Dios uchojbꞌesic ut jaxir umen que war aquetpa incꞌun uwirnar tacaron, y umen que war aquetpa cꞌar umener chi niviejo ani. Pues e winic era familia tacaron, y tamar era jaxir jax inteꞌ xeꞌ uyubꞌi ucojcon, che e Noemí.
RUT 2:21 Entonces ojron e Rut y che: —Y uyaren que ererto impatna taca umanobꞌ este que acꞌapa amorojsena tunor e cosecha, che e Rut.
RUT 2:22 Entonces e Noemí uyare uyaribꞌ y che: —Ijchꞌoc, quisinic iquetpa tuaꞌ ipatna taca umanobꞌ e Booz y que machi iꞌxin tama uchor otronteꞌ, porque tama uchor e Booz mamajchi tuaꞌ ucꞌayetobꞌ conda war amorojse lo aquetpato tor e rum tama e cosecha, che e Noemí.
RUT 2:23 Entonces e Rut quetpa yajaꞌ taca tuaꞌ ucꞌopi e trigo taca umanobꞌ e Booz este que cꞌapa morojsena tunor e cosecha tama e cebada y tama e trigo. Y tama tunor e tiempo era e Rut war aturuan taca upixam.
RUT 3:1 Pues entonces tama inteꞌ día cay ojron e Noemí taca e Rut y che: —Ijchꞌoc, nen ucꞌani tuaꞌ insicbꞌa inteꞌ aviejo xeꞌ uyubꞌi ucojcuet.
RUT 3:2 Y e Booz xeꞌ ajyum rum tiaꞌ cay patnet taca e ijchꞌoctac familia tacaron. Pues coner acbꞌar jaxir cꞌani axin tama e lugar tiaꞌ tuaꞌ uwajri alocꞌoy ut ucebada tama usojqꞌuir.
RUT 3:3 Entonces cꞌani inwaret lo que ucꞌani tuaꞌ ache. Atien y yara e perfume y lapa abꞌujc xeꞌ más galan y quiqui esto tiaꞌ war apatna e Booz. Pero ira awacta unata e Booz que turet este que acꞌapa aweꞌ y este que acꞌapa uyuchꞌi uvino.
RUT 3:4 Y conda axin achꞌan tuaꞌ awayan chꞌujcun awira tiaꞌ aquetpa. Entonces conda war awayan quiqui locsen ubꞌojchꞌibꞌir unuc uyoc y chꞌanen yajaꞌ ubꞌan. Y de allí jaxir tuaꞌ uyaret lo que ucꞌani tuaꞌ ache otronyajr, che e Noemí.
RUT 3:5 Y che e Rut: —Cꞌani inche tunor lo que awaren, che e Rut.
RUT 3:6 Entonces ixin e Rut esto tama e lugar xeꞌ arobꞌna umen upixam y uche tunor lo que arobꞌna umener.
RUT 3:7 Y conda e Booz cꞌapa weꞌ y cꞌapa uyuchꞌi uvino war atzay. Entonces ixin chꞌan tuaꞌ awayan tuyejtzꞌer tiaꞌ morojsempa tunor e sian ut cebada. Y nacpat era yopa e Rut tzꞌustaca y ulocse e bꞌojchꞌibꞌ tama unuc uyoc e Booz y chꞌan yajaꞌ.
RUT 3:8 Pero tama uyuxin e acbꞌar bꞌixcꞌa e Booz, y conda sutrema uwira que ayan inteꞌ ixic chꞌar tut utajn uyoc, bꞌacta.
RUT 3:9 Y che e Booz: —¿Chiet net, pue? che e Booz. Y e Rut che: —Jax nen e Rut xeꞌ amanen. Net familiaret taca nipixam winic ani y tamar era jax net xeꞌ ucꞌani ani tuaꞌ acojcon. Entonces jayaꞌ abꞌojchꞌibꞌ tamaren tuaꞌ achecsu abꞌa que cꞌani inujbꞌi tacaren, che e Rut.
RUT 3:10 Entonces ojron e Booz y che: —Que Cawinquirar Dios uchojbꞌesiquet, ijchꞌoc. Coner war achectes abꞌa que turix tuaꞌ inujbꞌi tacaren y que war ayajta ut apixam coner motor más que conda chamay aviejo. Pues erer ani asajca inteꞌ xeꞌ más chꞌom sitz que nen tuaꞌ inujbꞌi tacar, motor que jax inteꞌ xeꞌ matucꞌa utumin o inteꞌ xeꞌ ayan meyra utumin, pero majax bꞌan war ache.
RUT 3:11 Pero ira ibꞌacta, ixic, porque cꞌani inche tunor lo que war acꞌajti tacaren era. Pues tunor e gente tama cachinam war unatobꞌ que net erachet y tamar era mamajchi tuaꞌ ubꞌijnuobꞌ que majax bueno tuaꞌ innujbꞌi tacaret xeꞌ ajnajtir gentiet.
RUT 3:12 Pues erach que nen familiaren tacaret, y tamar era nen ucꞌani ani tuaꞌ incojcuet. Pero ucꞌani tuaꞌ anata que ayan otronteꞌ que más familia tacaret que nen.
RUT 3:13 Quetpen tara tama tunor e acbꞌar. Ejcꞌar jay e familia era cꞌani umani e rum xeꞌ tuaꞌ ani e Elimelec xeꞌ chamay y anujbꞌi tacaret, erer uche. Pero jay jaxir machi ucꞌani, entonces cꞌani inwaret tut Catata Dios que nen turix tuaꞌ inche. Pero coner era waynen tara este que asacojpa, che e Booz.
RUT 3:14 Entonces e Rut quetpa wayan tama tunor e acbꞌar tut utajn uyoc e Booz. Entonces conda ne mato asacojpa tama inteꞌ día e Rut achpa, porque arobꞌna umen e Booz que mamajchi tuaꞌ unata que yopa inteꞌ ixic tama e lugar era.
RUT 3:15 Entonces achpa e Booz ubꞌan y che: —Tares ujojbꞌibꞌ ajor y apasi y aquete taniut. Cꞌani imbꞌutꞌi taca e cebada, che e Booz. Y tamar era e Booz uyari chateꞌ arroba cebada tamar, y de allí utacre e Rut tuaꞌ utꞌabꞌse uturbꞌa tor uquejrebꞌ tuaꞌ ucuchi axin. Y de allí e Booz locꞌoy tama uchor y sutpa ixin esto tama e chinam ubꞌan.
RUT 3:16 Entonces e Rut sutpa ixin esto tiaꞌ turu upixam. Y conda cꞌotoy, e Noemí uyubꞌi tuaꞌ y che: —¿Cocha locꞌoy tunor taca e Booz? che e Noemí. Entonces e Rut uyare upixam tunor lo que uche e Booz tuaꞌ utacre.
RUT 3:17 Y de allí ojron e Rut otronyajr y che: —Y uyajqꞌuen tunor e cebada era y uyaren que ma cocha erer tuaꞌ insutpa inyopa tut nipixam bꞌan taca, che e Rut.
RUT 3:18 Entonces ojron e Noemí y che: —Pues coner ucꞌani tuaꞌ taca cacojco tuaꞌ cawira tucꞌa tuaꞌ achecta watar otronyajr. Machi tuaꞌ ajiri e Booz este que aquetpa chequer cocha tuaꞌ alocꞌoy tunor era. Pues conda merato acꞌapa e día cꞌani oꞌstampa tunor era, che e Noemí.
RUT 4:1 Entonces ixin turuan e Booz tuyejtzꞌer e ocher tama e chinam cocha jax e lugar tiaꞌ acay umorojse ubꞌobꞌ e winicobꞌ. Y tamar era numuy e winic xeꞌ familia taca e Booz xeꞌ cay uchecsu taca e Rut. Entonces ojron e Booz y che: —Eee, net lar tara, y turen taniwejtzꞌer, che e Booz. Entonces ixin e winic esto tiaꞌ turu e Booz y turuan.
RUT 4:2 Entonces e Booz upejca diez nuquir winicobꞌ tama e chinam tuaꞌ aquetpobꞌ ajchecsuyajobꞌ tamar lo que cꞌani uchiobꞌ, y uyare tuaꞌ aturuanobꞌ tacar.
RUT 4:3 Entonces e Booz uyare e winic xeꞌ familia tacar y che: —E Noemí xeꞌ sutpa tari tama e lugar Moab cꞌani uchoni e rum xeꞌ tuaꞌ ani e Elimelec.
RUT 4:4 Pues bꞌan ucꞌani tuaꞌ anata net tuaꞌ uyubꞌiet abꞌijnu jay cꞌani amani. Y jay bꞌan war acꞌani, erer aware coner tut tunor e ajchecsuyajobꞌ era y tut e nuquir winicobꞌ era xeꞌ tuobꞌ cachinam. Pues jax net xeꞌ más familiaret taca e Elimelec y tamar era jax net xeꞌ erer ani amani e rum. Pero jay net machi acꞌani, arenen era tuaꞌ innata. Pues mamajchi uyubꞌi umani e rum era sino que jax taca net. Pero nacpat net, jax nen xeꞌ uyubꞌien inmani e rum era otronyajr jay net machi acꞌani, che e Booz. Entonces ojron e winic y che: —Cꞌani inmani, che e winic era.
RUT 4:5 Entonces sutpa ojron e Booz otronyajr tuaꞌ uchecsu ubꞌa tut e winic y che: —Pues jay amani e rum tuaꞌ e Noemí aquetpa ubꞌan tuaꞌ inujbꞌi taca e Rut xeꞌ tuaꞌ e lugar Moab xeꞌ jax ani uwixcar e Mahlón tuaꞌ uyubꞌi aquetpa e rum tama ucꞌabꞌa e chamen, che e Booz.
RUT 4:6 Pero conda e winic uyubꞌi e ojroner era cay ojron otronyajr y che: —Pues jay bꞌan aquetpa entonces nen machi tuaꞌ uyubꞌien inmani e rum cocha machi incꞌani tuaꞌ innujbꞌi taca e Rut, porque jay inmani ani e rum era bꞌajcꞌat axin asatpa imbꞌijc e rum lo que aquetpa ani tuaꞌ uchꞌamiobꞌ nimaxtac conda inxin inchamay. Pero jay net cꞌani amani e rum, mana. Nen machi ixto tuaꞌ uyubꞌien inmani, che e winic.
RUT 4:7 Pues tama e tiempo yajaꞌ ayan inteꞌ costumbre tama e Israel que conda inteꞌ war achempa inteꞌ contrato tuaꞌ e manuar o tuaꞌ e chonmar, tin e war uyajcꞌu o xeꞌ war achonma, ixin ulocse inteꞌ uxanabꞌ y uyajcꞌu otronteꞌ tuaꞌ aquetpa chequer que ayan inteꞌ acuerdo. Pues bꞌan ani e costumbre.
RUT 4:8 Pues entonces e winic xeꞌ familia taca e Booz ulocse uxanabꞌ y uyajcꞌu e Booz y che: —Mana net, che e winic.
RUT 4:9 Entonces e Booz uyare e nuquir winicobꞌ xeꞌ war aturuanobꞌ tuyejtzꞌer era y tin tin xeꞌ turobꞌ yajaꞌ y che: —Coner era tunorox war ixquetpa ajchecsuyajox que nen cꞌapa inmani e rum taca e Noemí xeꞌ tuaꞌ ani e Elimelec y e Quilión y e Mahlón.
RUT 4:10 Y nox ajchecsuyajox ubꞌan que nen war innujbꞌi taca e Rut xeꞌ tuaꞌ e Moab y xeꞌ chamen uviejo tuaꞌ aquetpa e rum tama ucꞌabꞌa e Mahlón xeꞌ jax ani uviejo e Rut. Y tamar era machi tuaꞌ asatpa ucꞌabꞌa e Mahlón ticajam, y nien machi tuaꞌ anajpesna tama cachinam. Coner nox war ixquetpa ajchecsuyajox tama tunor era, che e Booz.
RUT 4:11 Entonces tunor e nuquir winicobꞌ era y tunor tin e turobꞌ yajaꞌ quetpobꞌ intera ubꞌijnusiajobꞌ y chenobꞌ: —Non jax awajchecsuyajon. Que Cawinquirar Dios uche que e ixic xeꞌ axin oꞌchoy tama oꞌtot axin aquetpa bꞌan cocha e Raquel y axin aquetpa bꞌan cocha e Lea xeꞌ ixin uchꞌijrsiobꞌ meyra nuquir winicobꞌ tama cachinam xeꞌ jax e Israel, y que net iꞌxin iquetpa inteꞌ nuxi winic tama cachinam xeꞌ ucꞌabꞌa ani Efrata, y que acꞌabꞌa axin aquetpa nojta tama cachinam xeꞌ ucꞌabꞌa Belén coner.
RUT 4:12 Y que Cawinquirar Dios uyajqꞌuiquet meyra amaxtac taca e ixic era, bꞌan cocha numuy taca e Fares xeꞌ jax uyar e Tamar taca e Judá, che e nuquir winicobꞌ era.
RUT 4:13 Pues entonces e Booz nujbꞌi taca e Rut. Y conda ixin uchꞌami uwixcar, Cawinquirar Dios utacre e Rut tuaꞌ uyubꞌi achꞌijrtesian y aquetpa awawan taca uyar.
RUT 4:14 Entonces conda cꞌapa cuxpa uyar e Rut e ixictac tama e chinam uyareobꞌ e Noemí y chenobꞌ: —Catattzꞌic ucꞌabꞌa Cawinquirar Dios xeꞌ ixin uyajqꞌuet inteꞌ asitz tuaꞌ ucojcuet. Que jaxir axin aquetpa nojta tama e Israel conda acꞌapa aꞌchꞌi.
RUT 4:15 Pues e sitz era tuaꞌ axin utzayreset y tuaꞌ axin utacret conda más onian ixiquet, porque e Rut xeꞌ awaribꞌ meyra uyajta oit y más ayan ucꞌampibꞌir toit que siete maxtac, chenobꞌ e ixictac era.
RUT 4:16 Entonces e Noemí uchꞌami yer e sitz y cay uchꞌijrse bꞌan ani cocha jay tuach.
RUT 4:17 Y conda e ixictac xeꞌ turobꞌ yajaꞌ uwirobꞌ tunor era ojronobꞌ y chenobꞌ: —Coner e Noemí ayix otronteꞌ uyar, chenobꞌ e ixictac era. Y uturbꞌa ucꞌabꞌa Obed. Pues e Obed cꞌotoy quetpa utata e Isaí, y e Isaí cꞌotoy quetpa utata e David.
RUT 4:18 Pues jax era uchꞌajnarir e Fares. E Fares ayan uyunen xeꞌ ucꞌabꞌa Jezrón.
RUT 4:19 Y e Jezrón ayan uyunen xeꞌ ucꞌabꞌa Ram, y e Ram ayan uyunen xeꞌ ucꞌabꞌa Aminadad.
RUT 4:20 Y e Aminadad ayan uyunen xeꞌ ucꞌabꞌa Naasón, y e Naasón ayan uyunen xeꞌ ucꞌabꞌa Salmón.
RUT 4:21 Y e Salmón ayan uyunen xeꞌ ucꞌabꞌa Booz, y e Booz ayan uyunen xeꞌ ucꞌabꞌa Obed.
RUT 4:22 Y e Obed ayan uyunen xeꞌ ucꞌabꞌa Isaí, y e Isaí ayan uyunen xeꞌ ucꞌabꞌa David xeꞌ cꞌotoy quetpa rey tama e Israel. Tara acꞌapa tunor niwojroner tama e Rut, che e Samuel.
EST 1:1 Pues entonces ayan inteꞌ rey xeꞌ ucꞌabꞌa Asuero xeꞌ cay cꞌotori tama e lugar Persia y tama e lugar Media tiaꞌ ayan 127 departamento. Pues meyra nuxi lugar tiaꞌ cꞌotori e Asuero era. Pues e lugar tiaꞌ cꞌotori axin innajt tama e lado tiaꞌ atobꞌoy watar e qꞌuin esto tama e lugar India, y acꞌotoy tama e lado tiaꞌ anamtzꞌa axin e qꞌuin esto tama e lugar Etiopía.
EST 1:2 Y e capital tiaꞌ cay turuan tuaꞌ acꞌotori jax inteꞌ nuxi chinam xeꞌ ucꞌabꞌa Susa.
EST 1:3 Pues tama e uxteꞌ año que war acꞌotori, e rey Asuero cay ubꞌijnu que cꞌani uche inteꞌ nuxi nojqꞌuin taca tunor uyajcꞌamparobꞌ y taca tunor e nuquir winicobꞌ, y upejca tuaꞌ acꞌotoyobꞌ ubꞌan tunor e nuquir ajwinquirobꞌ tuaꞌ e soldadobꞌ, y tunor e nuquir ajcꞌotorerobꞌ y e ajcꞌamparobꞌ lo que ayan tama inteꞌ inteꞌ departamento tama tunor e lugar Persia y tama tunor e lugar Media.
EST 1:4 Pues cay uche e nuxi nojqꞌuin tama inteꞌ tiempo de seis mes. Pues jaxir war uyusre tuaꞌ uchecsu tunor lo que ayan tacar xeꞌ meyra atujri tut tunor e gente era, y tuaꞌ uwirsiobꞌ cobꞌa e tawarer lo que ayan tuaꞌ.
EST 1:5 Y conda tzꞌacta seis mes tama e nojqꞌuin, e Asuero sutpa uche otronteꞌ nojqꞌuin tama inteꞌ tiempo de siete día. Y uche e nojqꞌuin tor e tinaj tuyotot xeꞌ tiaꞌ pacbꞌir meyra sian teꞌ y meyra sian nichir. Y upejca tuaꞌ acꞌotoyobꞌ tunor e gente xeꞌ turobꞌ tama e capital Susa era motor jay ayan utuminobꞌ o jay matucꞌa utuminobꞌ.
EST 1:6 Pues tor e tinaj era ayan meyra cortina xeꞌ chꞌur tichan xeꞌ sacsac utobꞌ y xeꞌ azul utobꞌ, y quetpobꞌ cachbꞌir taca e lazo xeꞌ jarbꞌir taca e sacsac bꞌujc xeꞌ más atujri y taca e bꞌujc xeꞌ chacbꞌurem ut, y e lazo jurbꞌir tama e argolla xeꞌ chembꞌir taca e plata. Y e argolla era quetpa jurur tama cora oy xeꞌ chembꞌir taca e sacsac tun xeꞌ atzꞌapruma ut. Y ayan tiaꞌ aturuanobꞌ e gente tama meyra cꞌajn xeꞌ chembꞌir taca e plata y xeꞌ chembꞌir taca e oro. Y ut e otot era chembꞌir taca e tun xeꞌ más atujri y xeꞌ galan atzꞌapruma ut xeꞌ chacchac ut y xeꞌ sacsac ut y xeꞌ incsibꞌan ut.
EST 1:7 Pues ayan meyra vino xeꞌ ajcꞌuna umen e rey tuaꞌ apujca axin taca tunor e winicobꞌ, y ajcꞌunobꞌ tuaꞌ uyuchꞌiobꞌ e vino tama e chꞌeu xeꞌ chembꞌir taca e oro. Y inteꞌ inteꞌ chꞌeu intiach uwirnar.
EST 1:8 Y arobꞌna tin e war upuquiobꞌ axin e vino que inteꞌ inteꞌ winic erer uyuchꞌi e vino bꞌan taca cocha ucꞌani, y que mamajchi tuaꞌ achena uyuchꞌi meyra vino jay majax bꞌan ucꞌani, y que tin e cꞌani uyuchꞌi meyra vino erer ubꞌan.
EST 1:9 Y macuir uyotot e rey ayan ubꞌan inteꞌ nojqꞌuin tuaꞌ e ixictac xeꞌ war achena umen e Vasti xeꞌ jax uwixcar e rey Asuero tiaꞌ cꞌotoyobꞌ tunor uwixcarobꞌ e winicobꞌ xeꞌ pejcbꞌirobꞌ tama unojqꞌuin e rey.
EST 1:10 Pues conda tzꞌacta e siete día tama e nojqꞌuin, war atzay meyra e rey umen que war uyuchꞌi meyra vino. Entonces uyare tuaꞌ apejcna siete umanobꞌ xeꞌ más atacbꞌajriobꞌ tacar xeꞌ jax era: Ayan e Mehumán y ayan e Biztá y ayan e Harboná y ayan e Bigtá y ayan e Abagtá y ayan e Zetar y ayan e Carcás.
EST 1:11 Y uyare tuaꞌ axiobꞌ upejcobꞌ e Vasti xeꞌ jax e reina tuaꞌ acꞌotoy tut jaxir. Y uyebꞌta ixin e ojroner que jaxir ucꞌani tuaꞌ uturbꞌa ujojbꞌibꞌ ujor xeꞌ meyra atujri tuaꞌ erer eꞌrna umen tunor e ajcꞌamparobꞌ y umen tunor e nuquir winicobꞌ que jaxir galan ixto uwirnar y que jaxir galan ustabꞌir.
EST 1:12 Entonces ixiobꞌ umanobꞌ e rey tuaꞌ uyare e Vasti lo que quetpa tuaꞌ uchecsuobꞌ tut. Pero conda e Vasti cꞌotoy unata lo que war ucꞌani e rey, jaxir machi ucꞌani tuaꞌ axin. Pero conda e rey arobꞌna lo que che e Vasti, qꞌuijna meyra este que cay ojmay uchꞌichꞌer.
EST 1:13 Entonces ixin wacchetaca tuaꞌ oꞌjron taca tin xeꞌ más unatobꞌ tama e ley lo que chꞌar tzꞌijbꞌabꞌir umenerobꞌ, cocha bꞌan uche e rey de por si conda achecta lo que intran tut. Entonces uyare tuaꞌ amorojsena cora winicobꞌ cocha era tuaꞌ ubꞌijnuobꞌ tucꞌa tuaꞌ achempa.
EST 1:14 Y xeꞌ turobꞌ tama e nojqꞌuin era jax e Carsená y e Setar y e Admata y e Tarsis y e Meres y e Marsená y e Memucán xeꞌ jax e siete ajcꞌamparobꞌ jax taca xeꞌ ajcꞌunobꞌ tuaꞌ oꞌchoyobꞌ tut e rey iraj iraj, y jax tin xeꞌ uchiobꞌ e patnar xeꞌ más nojta tama tunor e lugar Persia y tama tunor e lugar Media.
EST 1:15 Entonces e rey cay uyubꞌi tuobꞌ y che: —Pues cꞌani umbꞌi tibꞌa tamar lo que chꞌar tzꞌijbꞌabꞌir tama e ley tamar inteꞌ ixic xeꞌ machi cꞌani obꞌian tut uviejo. Entonces ¿tucꞌa ucꞌani tuaꞌ achempa taca e Vasti xeꞌ jax e reina tara? Pues jaxir machi cꞌani uche lo que inware, y machi tari tuaꞌ uchectes ubꞌa tut tunor e winicobꞌ bꞌan cocha inware tuaꞌ arobꞌna umen nimanobꞌ, che e rey.
EST 1:16 Entonces cay ojron e Memucán taca e rey y taca tunor e inmojr ajcꞌamparobꞌ y che: —Pues e Vasti xeꞌ jax e reina tara majax upater taca e rey xeꞌ cay uche e mabꞌambꞌanir era, sino uche upater tunor e ajcꞌamparobꞌ, y upater tunor tin e turobꞌ tama inteꞌ inteꞌ chinam lo que ayan tama tunor e departamento tiaꞌ war acꞌotori e rey Asuero.
EST 1:17 Pues tunor lo que cay uche e Vasti axin anatanwa umen tunor e ixictacobꞌ tic taca, y tamar era mamajchi tujam e sian ixictacobꞌ axin oꞌbꞌianobꞌ tut uviejobꞌ. Porque axin oꞌjronobꞌ cocha era y chenobꞌ: ‘Conda e rey Asuero uyare ani tuaꞌ ataresna e reina Vasti tut, jaxir machi ixin,’ xeꞌ tuaꞌ arobꞌna umen e sian ixictacobꞌ tama tunor or e lugar.
EST 1:18 Y entonces conda merato acꞌapa e día coner tunor uwixcarobꞌ e ajcꞌamparobꞌ tama tunor or e lugar Persia y tama tunor or e lugar Media axin acꞌotoy unatobꞌ tama tunor lo que cay uche e reina. Y entonces tunor e ixictacobꞌ machi ixto tuaꞌ oꞌbꞌianobꞌ tut uviejobꞌ, y axin acꞌaxi meyra qꞌuecraner tamaron watar e día.
EST 1:19 Pues quisinic catzꞌijbꞌa inteꞌ ley, jay aquetpa imbꞌutz toit net xeꞌ nireyet, tuaꞌ caware que e reina Vasti mix tiaꞌ tuaꞌ acꞌotoy tut e rey otronyajr, y que axin atzꞌijbꞌna e ley era xeꞌ tuaꞌ aquetpa tzꞌijbꞌabꞌir tama e jun xeꞌ tuaꞌ e gente tama e lugar Persia y xeꞌ tuaꞌ e gente tama e lugar Media. Y axin aquetpa e ley era bꞌan cocha e inmojr leyobꞌ que mamajchi uyubꞌi tuaꞌ uche aquetpa intiach. Y de allí ucꞌani tuaꞌ asicbꞌa otronteꞌ ijchꞌoc xeꞌ más tawar que jaxir tuaꞌ aquetpa reina.
EST 1:20 Y entonces conda axin achecsuna e ley era umen e rey, axin anatanwa umen tunor e gente tic taca tama tunor or e lugar que e ixictac ucꞌani tuaꞌ oꞌbꞌianobꞌ tut uviejobꞌ, motor jay nuquir winicobꞌ o motor jay majax nuquir winicobꞌ, che e Memucán.
EST 1:21 Entonces tunor lo que cay checsuna tut e rey y tut e ajcꞌamparobꞌ umen e Memucán quetpa imbꞌutz tutobꞌ.
EST 1:22 Y de allí cay uyebꞌta ixin cora carta tama inteꞌ inteꞌ departamento tiaꞌ war acꞌotori e rey, y e carta quetpa tzꞌijbꞌabꞌir tama inteꞌ inteꞌ ojroner xeꞌ ojronobꞌ e gente, y quetpa tzꞌijbꞌabꞌir tama inteꞌ inteꞌ letra lo que ucꞌampesobꞌ e gente tama inteꞌ inteꞌ lugar. Y e carta che que inteꞌ inteꞌ winic ucꞌani tuaꞌ obꞌna acꞌotori tujor ufamilia.
EST 2:1 Pues entonces conda numuy cora tiempo, sisa uqꞌuijnar e rey Asuero y machi ixto war oꞌjmay uchꞌichꞌer yaꞌ y cay ubꞌijnu tama lo que cay uche e Vasti y tama e ley lo que quetpa tzꞌijbꞌabꞌir upater. Y cay ubꞌijnu que ucꞌani otronteꞌ uwixcar.
EST 2:2 Entonces ojronobꞌ umanobꞌ e rey tut jaxir y chenobꞌ: —Pues jay imbꞌutz toit, erer asajcna cora ijchꞌoctac xeꞌ galan uwirnarobꞌ tuaꞌ ataresnobꞌ tuaꞌ aquetpobꞌ tabꞌa.
EST 2:3 Entonces erer asicbꞌa cora winicobꞌ tama inteꞌ inteꞌ departamento tiaꞌ war icꞌotori tuaꞌ axin umorojsiobꞌ cora chꞌom ijchꞌoctac xeꞌ galanic uwirnarobꞌ y de allí erer aqꞌuejcha watobꞌ esto tuyotot e rey xeꞌ aquetpa tara tama e chinam Susa. Y de allí erer aquetpobꞌ yebꞌar ucojcsiaj e Hegai, xeꞌ jax e man xeꞌ ucojco tunor e ixictac tuaꞌ e rey. Y entonces e Hegai erer uyajcꞌu e crema e ijchꞌoctacobꞌ tuaꞌ uyariobꞌ tutobꞌ.
EST 2:4 Y e ijchꞌoc xeꞌ axin atzay eꞌrna más umen rey, jax xeꞌ tuaꞌ aquetpa reina uyeror ut e Vasti. Entonces tunor e bꞌijnusiaj era quetpa imbꞌutz tut e rey, y tamar era uyare que bꞌan tuaꞌ achempa.
EST 2:5 Pues ayan inteꞌ winic xeꞌ tuaꞌ e Israel xeꞌ ucꞌabꞌa Mardoqueo xeꞌ aturuan tama e chinam Susa. Pues e Mardoqueo unembꞌir tuaꞌ e Jaír, y e Jaír unembꞌir tuaꞌ e Simí, y e Simí unembꞌir tuaꞌ e Quis, y e Quis quetpa tama uchꞌajnarir e Benjamín.
EST 2:6 Pues jaxir jax inteꞌ winic xeꞌ loqꞌuesna taca e inmojr gente tama e chinam Jerusalem umen e rey Nabucodonosor xeꞌ jax e rey tama e lugar Babilonia. Pues numuy tunor era tama e tiempo conda qꞌuejcha ixin e Jeconías xeꞌ jax ani e rey tama e lugar Judá.
EST 2:7 Pues e Mardoqueo ayan incojt uwijtan xeꞌ ucꞌabꞌa Hadasá xeꞌ ijchꞌoc tuaꞌ umamaꞌ ani y tuaꞌ ucꞌojna. Entonces jaxir uqꞌueche ixin tuaꞌ uchꞌijrse. Pues e ijchꞌoc arobꞌna Ester ubꞌan, y jaxir galan uwirnar y galan ustabꞌir tunor.
EST 2:8 Y conda checsuna e ley era tuaꞌ e rey, cay morojsena meyra ijchꞌoctac tama e chinam era y qꞌuejcha ixiobꞌ esto tama uyotot e rey, y quetpobꞌ yebꞌar ucojcsiaj e Hegai, y cꞌotoy quetpa e Ester tujamobꞌ ubꞌan.
EST 2:9 Y e Hegai uwira que galan uwirnar e Ester y chꞌabꞌna uyalma umener. Y tamar era cay uyajcꞌu e crema lo que quetpa tuaꞌ ucꞌampes y uyajcꞌu lo que más imbꞌutz tuaꞌ ucꞌuxi. Y uyare siete manobꞌ xeꞌ ixictac xeꞌ más atzay apatnobꞌ tama tunor xeꞌ war apatnobꞌ tama uyotot e rey tuaꞌ ucojcobꞌ e Ester, y de allí uqꞌueche ixin taca e ixictacobꞌ era esto tama inteꞌ nuxi cuarto xeꞌ más imbꞌutz tiaꞌ tuaꞌ aturuanobꞌ.
EST 2:10 Pero e Ester machi uchecsu jay chꞌajnarir tuaꞌ e Israel, y nien machi uchecsu chi tuaꞌ familia, porque bꞌan arobꞌna tuaꞌ uche umen e Mardoqueo.
EST 2:11 Y e Mardoqueo acꞌotoy ajqꞌuin ajqꞌuin tama uyocher or e tinaj tama uyotot e ixictac, cocha cꞌani unata jay imbꞌutz turu e Ester, y jay war alocꞌoy imbꞌutz tunor.
EST 2:12 Pues tunor e chꞌom ijchꞌoctacobꞌ era quetpa tuaꞌ oꞌstanobꞌ tunor ucuerpo tama inteꞌ tiempo de doce mes tuaꞌ aquetpobꞌ más galan uwirnarobꞌ. Pues tama e bꞌajxan seis mes ucꞌani tuaꞌ ayajra e aceite xeꞌ chembꞌir taca e mirra tama tunor ucuerpo, y de allí tama otro seis mes quetpa tuaꞌ ayajra e perfume yabꞌabꞌir taca e crema, y quetpa tuaꞌ oꞌstana uyeroj taca e polvo. Y conda acꞌapa e tiempo que war oꞌstana, entonces inteꞌ inteꞌ ijchꞌoc aquetpa tuaꞌ acꞌotoy tut e rey Asuero.
EST 2:13 Y inteꞌ inteꞌ chꞌom ijchꞌoctac actana tuaꞌ uchꞌami tuqꞌuic tuqꞌuic bꞌujc xeꞌ más atzay uwira lo que ayan tama e otot tiaꞌ aturuanobꞌ e ijchꞌoctac tuaꞌ ubꞌujcse ubꞌa tacar. Y actana tuaꞌ uchꞌami e tunyujy bꞌan taca cocha ucꞌani ubꞌan. Y bꞌan cocha era axin acꞌotoy tut e rey.
EST 2:14 Entonces aquetpa taca e rey tama inteꞌ acbꞌar, y de allí conda asacojpa axin tama otrontex otot tiaꞌ aturuanobꞌ e ixictac xeꞌ turuanobꞌix taca e rey xeꞌ war acojcnobꞌ umen e Saasgaz. Pues jaxir jax xeꞌ ajcojc tuaꞌ tunor uwixcarobꞌ e rey. Y de allí inteꞌ ixic ma tiaꞌ tuaꞌ asutpa axin tut e rey otronyajr jay machi apejcna tama ucꞌabꞌa tuaꞌ acꞌotoy.
EST 2:15 Entonces conda cꞌotoy e hora tuaꞌ acꞌotoy e Ester tut e rey, jaxir intaca uchꞌami e bꞌujc y e tunyujy lo que arobꞌna umen e Hegai tuaꞌ ulapi, cocha jax xeꞌ aquetpa tuaꞌ ucojco tunor e ixictac. Pues e Ester cꞌajna umen tunor e gente.
EST 2:16 Entonces qꞌuejcha ixin e Ester esto tuyotot e rey Asuero tuaꞌ aquetpa tama e acbꞌar tacar. Pues bꞌan numuy tama e mes Tébet xeꞌ jax e diez mes tama e siete año que war acꞌotori e rey Asuero.
EST 2:17 Pues e rey Asuero tzay uwira e Ester más meyra que e inmojr ijchꞌoctac, y chꞌabꞌna uyalma umener y tamar era cay uchojres ut más que e inmojr ijchꞌoctac. Y de allí uturbꞌa ujojbꞌibꞌ ujor y uyare tuaꞌ aquetpa reina uyeror ut e Vasti.
EST 2:18 Entonces e rey cay uche inteꞌ nuxi nojqꞌuin tuaꞌ utattzꞌi e Ester, y uyare tuaꞌ acꞌotoyobꞌ tunor e ajcꞌamparobꞌ y tunor e nuquir winicobꞌ tama tunor e lugar tiaꞌ war acꞌotori. Y uyare tuaꞌ ajiriobꞌ tunor e gente tama inteꞌ día, y uyare tuaꞌ atzꞌupesna e impuesto tama inteꞌ inteꞌ departamento, y cay uyajcꞌu meyra regalo bꞌan cocha uwajpi tuaꞌ ajcꞌuna umen inteꞌ rey.
EST 2:19 Entonces tama e día conda morojsena cora chꞌom ijchꞌoctacobꞌ otronyajr tuaꞌ aqꞌuejcha axin esto tuyotot e rey, war aturuan e Mardoqueo tama uyocher uyotot e rey cocha jax inteꞌ ajcꞌampar tuaꞌ e rey.
EST 2:20 Pero e Ester mamajchi tut uchecsu tin ufamilia y nien machi uchecsu jay tuaꞌ uchꞌajnarir e Israel, porque bꞌan arobꞌna tuaꞌ uche umen e Mardoqueo, cocha warto obꞌian tut bꞌan taca cocha cay uche conda turuto tuyotot.
EST 2:21 Y jax tamar taca e día era conda warto aturuan e Mardoqueo tama uyocher uyotot e rey, conda cay uchiquini lo que war oꞌjron e Bigtán y e Teres xeꞌ chateꞌ guarde espalda tuaꞌ e rey xeꞌ quetpobꞌ tuaꞌ ucojcobꞌ e ocher tama ucuarto. Y uchiquini que war oꞌjronobꞌ taca meyra qꞌuijnar que cꞌani uchamsiobꞌ e rey Asuero.
EST 2:22 Entonces conda e Mardoqueo cꞌotoy unata tama tunor era, ixin uchecsu tut e Ester, y jaxir sutpa uyare e rey Asuero que bꞌan arobꞌna umen e Mardoqueo.
EST 2:23 Entonces e rey uyare tuaꞌ obꞌna axin tuaꞌ anatanwa jay erach tunor era, y conda cꞌotoy unatobꞌ que bꞌan, entonces uqꞌueche ixin e chateꞌ guarde espalda era tuaꞌ achꞌubꞌnobꞌ tama upunto inteꞌ teꞌ. Y tunor lo que chempa era quetpa tzꞌijbꞌabꞌir tut e rey tama inteꞌ jun lo que qꞌuecher umener.
EST 3:1 Entonces conda cꞌapa numuy tunor era, e rey Asuero uturbꞌa e Amán xeꞌ jax uyunen e Hamedata xeꞌ chꞌajnarir tuaꞌ e Agag tuaꞌ aquetpa ajcꞌotorer tujor tunor e inmojr ajcꞌamparobꞌ tama e lugar era.
EST 3:2 Y tamar era tunor e ajcꞌamparobꞌ xeꞌ apatnobꞌ tama uyotot e rey aquetpa tuaꞌ acotuanobꞌ tut e Amán esto que utacbꞌu ut ujorobꞌ tut e rum tuaꞌ utattzꞌiobꞌ conda anumuy, porque bꞌan arobꞌnobꞌ umen e rey. Pero e Mardoqueo machi acotuan y machi utattzꞌi ut conda anumuy.
EST 3:3 Entonces e ajcꞌamparobꞌ xeꞌ apatnobꞌ tama uyotot e rey cay uyubꞌiobꞌ tuaꞌ e Mardoqueo y chenobꞌ: “¿Tucꞌa tuaꞌ que machi acꞌubꞌse e orden tuaꞌ e rey?” chenobꞌ.
EST 3:4 Y iraj iraj uyubꞌiobꞌ tuaꞌ e Mardoqueo que tucꞌa tuaꞌ que machi ucꞌubꞌse e orden tuaꞌ e rey, pero jaxir machi uturbꞌa ubꞌa tamar lo que chenobꞌ. Entonces jaxirobꞌ ixin uchecsuobꞌ tunor era tut e Amán. Cꞌani uwirobꞌ tucꞌa tuaꞌ uche e Amán upater e Mardoqueo. Pero tama tunor era cꞌani uwirobꞌ jay e Mardoqueo asutpa uchecsu otronyajr bꞌan cocha uchecsu bꞌajxan, que jaxir chꞌajnarir tuaꞌ e Israel, cocha tin e tuaꞌ e Israel ma tiaꞌ tuaꞌ acotuanobꞌ tut inteꞌ winic sino que ajtaca tut e Dios.
EST 3:5 Y entonces e Amán cay uwira que conda numuy tuyejtzꞌer e Mardoqueo que jaxir machi acotuan tut tuaꞌ utacbꞌu ut ujor tut e rum tuaꞌ utattzꞌi ut, y tamar era qꞌuijna meyra.
EST 3:6 Pero conda e Amán cꞌotoy unata tucꞌa Dios ucꞌubꞌse e Mardoqueo, entonces cay ubꞌijnu que majax jax taca e Mardoqueo tuaꞌ uchamse, sino que cay ubꞌijnu tuaꞌ uchamse tunor e gente tuaꞌ e Israel tic taca tiaꞌ turobꞌ tama tunor or e lugar tiaꞌ war acꞌotori e rey Asuero.
EST 3:7 Pues tama e bꞌajxan mes xeꞌ ucꞌabꞌa Nisán, xeꞌ jax e doce año que war acꞌotori e rey Asuero, cay uriobꞌ e pur, o erer caware que cay uchiobꞌ suertiar, tut e Amán tuaꞌ uwirobꞌ tucꞌa día y tucꞌa mes xeꞌ aquetpa tuaꞌ uyare achamesnobꞌ e gente xeꞌ tuobꞌ e Israel. Y checta que ucꞌani tuaꞌ achamesnobꞌ tama e trece día tama e doce mes, o erer caware que tama e mes xeꞌ ucꞌabꞌa Adar.
EST 3:8 Entonces ixin e Amán tuaꞌ oꞌjron taca e rey Asuero y che: —Niwinquiret, pues tujam tunor e sian gente xeꞌ aturuanobꞌ tama inteꞌ inteꞌ chinam xeꞌ turu tama tunor e departamento tiaꞌ war icꞌotori, ayan tin e tuobꞌ inteꞌ chꞌajnarir xeꞌ aquetpa intiach ubꞌijnusiajobꞌ que e inmojr, y jaxirobꞌ ayan intex uleyobꞌ ubꞌan, y machi oꞌbꞌianobꞌ tut e ley tabꞌa. Y tamar era, niwinquiret, cꞌani inwaret que mabꞌambꞌan tunor e chꞌajnarir era y machi uwajpi tuaꞌ awactobꞌ aturuanobꞌto tama e lugar tiaꞌ war icꞌotori.
EST 3:9 Entonces, niwinquiret, jay aquetpa imbꞌutz toit, quisinic atzꞌijbꞌa inteꞌ ley xeꞌ che que ucꞌani tuaꞌ achamesnobꞌ tunor e chꞌajnarir era, y jay bꞌan ache nen cꞌani inwajcꞌu 10,000 ut e tumin xeꞌ chembꞌir taca e plata tin e ucojcobꞌ e caja tuaꞌ e rey, che e Amán.
EST 3:10 Pues e rey ayan inteꞌ uyanillo xeꞌ ayan e sello tamar. Y e sello era acꞌampesna bꞌan cocha inteꞌ firma xeꞌ aturbꞌana tama inteꞌ jun conda war achena inteꞌ ley. Entonces lo que uche e rey jax era: Ulocse uyanillo lo que jurur tama or ucꞌabꞌ y uyajcꞌu e Amán tuaꞌ ucꞌampes tuaꞌ uche inteꞌ ley upater tin tuobꞌ uchꞌajnarir e Israel. Pues e Amán era jax inteꞌ xeꞌ aqꞌuijna uwira tunor tin e tuobꞌ e Israel.
EST 3:11 Y entonces ojron e rey y che: —Erer iquetpa taca e tumin. Pero tama e gente tin e war iyojron upater era, chen tuqꞌuic tuqꞌuic lo que abꞌijnu ache tacarobꞌ, che e rey.
EST 3:12 Entonces tama e trece día tama e bꞌajxan mes tama e año, pejcnobꞌ tuaꞌ umorojse ubꞌobꞌ tunor e sian secretario xeꞌ tuobꞌ inteꞌ inteꞌ ojroner y xeꞌ tuobꞌ inteꞌ inteꞌ chinam lo que ayan tama tunor or e lugar tiaꞌ war acꞌotori e rey. Y entonces inteꞌ intiobꞌ cay utzꞌijbꞌobꞌ e ley lo que arobꞌnobꞌ umen e Amán tama inteꞌ inteꞌ uyojronerobꞌ, y de allí quetpa tuaꞌ achena sellar taca e sello lo que ayan tama uyanillo e rey Asuero. Pues e carta era quetpa tzꞌijbꞌabꞌir tama ucꞌabꞌa e rey. Y entonces uyebꞌtobꞌ ixin e carta esto tut inteꞌ inteꞌ gobernador tama inteꞌ inteꞌ departamento, y tut inteꞌ inteꞌ ajcꞌotorer lo que ayan tama inteꞌ inteꞌ chinam.
EST 3:13 Y de allí qꞌuejchiobꞌ ixin e sian carta umen tin e axanobꞌ tujor uchijobꞌ tuaꞌ acꞌotoyobꞌ tama inteꞌ inteꞌ departamento tiaꞌ war acꞌotori e rey. Y lo que che tama e carta lo que war eꞌbꞌtana axin jax era: Aquetpa tuaꞌ achamesnobꞌ inyajrer tunor tin e chꞌajnarir tuaꞌ e Israel tama inteꞌ taca día. Y aquetpa tuaꞌ achamesna inteꞌ intiobꞌ motor jay chꞌom maxtacobꞌ o jay onian gente o jay bꞌiqꞌuit maxtac o jay ixictac. Y de allí aquetpa tuaꞌ aloqꞌuesna tunor lo que ayan tuaꞌ e gente era xeꞌ tuobꞌ e Israel. Pues bꞌan tuaꞌ anumuy tama e día xeꞌ actabꞌir xeꞌ jax e trece día tama e doce mes, o erer caware que jax e mes xeꞌ ucꞌabꞌa Adar.
EST 3:14 Y entonces ebꞌtana ixin e carta tama inteꞌ inteꞌ departamento y tama inteꞌ inteꞌ chinam tuaꞌ achecsuna axin e ley era tut tunor e gente, y tamar era erer aquetpobꞌ turix tunor e gente tuaꞌ achamsanobꞌ conda achecta e día.
EST 3:15 Entonces locꞌoyobꞌ wacchetaca tunor tin e quetpa tuaꞌ uqꞌuechiobꞌ axin e sian carta bꞌan cocha che e orden tuaꞌ e rey. Y bꞌan cocha era cꞌotoy natanwa e ley umen tunor e gente tama e capital Susa ubꞌan. Y e rey Asuero y e Amán intaca ixin tuaꞌ oꞌychꞌiobꞌ comon, pero tunor e gente xeꞌ turobꞌ tama e capital Susa era cay bꞌactobꞌ y ubꞌijnuobꞌ que ¿tucꞌa tuaꞌ que aquetpa tuaꞌ achamesnobꞌ tunor tin e tuobꞌ e Israel?
EST 4:1 Pero conda e Mardoqueo cꞌotoy unata tama e ley era, uwejru ubꞌujc cocha inteꞌ chequerir que war acꞌuxun uyalma, y ubꞌujcse ubꞌa taca e bꞌujc xeꞌ jarbꞌir taca e succhij y uyari e tan tama ujor, y cay xana tama tunor or e chinam war aꞌru taca inteꞌ nuxi nuc.
EST 4:2 Y bꞌan cocha era cꞌotoy e Mardoqueo esto tama uyocher uyotot e rey, pero machi actana tuaꞌ oꞌchoy cocha mamajchi xeꞌ war ulapi e bꞌujc cocha era actana tuaꞌ oꞌchoy tama uyotot e rey.
EST 4:3 Y tama inteꞌ inteꞌ departamento tic taca tiaꞌ achectesna e ley era, tin e tuobꞌ e Israel quetpobꞌ tzajtaca utobꞌ, y tamar era cay uyactobꞌ tuaꞌ awiobꞌ y cay aruobꞌ taca inteꞌ nuxi nuc. Y meyra gente tuaꞌ e Israel cay ulapiobꞌ e bꞌujc xeꞌ jarbꞌir taca e succhij y uyariobꞌ e tan tujorobꞌ y chꞌanobꞌ tut e rum.
EST 4:4 Entonces conda e ijchꞌoctac y e manobꞌ xeꞌ quetpobꞌ tuaꞌ ucojcobꞌ e Ester cꞌotoy unatobꞌ lo que war anumuy, ixin tuaꞌ uchecsuobꞌ tunor era tut jaxir. Y conda e Ester cꞌapa uyubꞌi tunor era, cay merecna meyra. Entonces jaxir uyebꞌta ixin cora bꞌujc xeꞌ más galan tut e Mardoqueo tuaꞌ ulapi tuaꞌ uyubꞌi oꞌchoy tama e otot tiaꞌ turu jaxir. Pero e Mardoqueo machi uchꞌami e bꞌujc xeꞌ ebꞌtana tari umen e Ester.
EST 4:5 Y tamar era e Ester upejca tari e Hatac xeꞌ jax inteꞌ man tuaꞌ e rey xeꞌ quetpa tuaꞌ ucojco jaxir, y uyare tuaꞌ axin usicbꞌa e Mardoqueo y tuaꞌ uyubꞌi tuaꞌ tucꞌa war anumuy y que tucꞌa tuaꞌ que war uche cocha era.
EST 4:6 Entonces e Hatac ixin tuaꞌ oꞌjron taca e Mardoqueo tiaꞌ turu tama e plaza xeꞌ aquetpa tuyejtzꞌer e ocher tama uyotot e rey.
EST 4:7 Y entonces e Mardoqueo cay uchecsu tunor lo que numuy, y que e Amán quetpa tuaꞌ utoyi taca e rey 10,000 ut e tumin xeꞌ chembꞌir taca e plata tuaꞌ uyubꞌi achamesna tunor tin e tuobꞌ uchꞌajnarir e Israel.
EST 4:8 Y entonces uyebꞌta ixin tut e Ester inteꞌ jun tiaꞌ chꞌar tzꞌijbꞌabꞌir tunor lo que che e ley xeꞌ wejchꞌa ixin tama tunor e chinam Susa que che que ucꞌani tuaꞌ achamesna inyajrer tunor tin e tuobꞌ uchꞌajnarir e Israel. Y uyare ubꞌan tuaꞌ arobꞌna e Ester que ucꞌani tuaꞌ oꞌchoy oꞌjron taca e rey tuaꞌ ucꞌajti tuaꞌ ayajtna utobꞌ upiarobꞌ y tuaꞌ ucꞌajti tacar tuaꞌ acorpesna uchinam.
EST 4:9 Entonces sutpa ixin e Hatac tuaꞌ uchecsu tut e Ester tunor lo que arobꞌna umen e Mardoqueo.
EST 4:10 Y entonces e Ester uyebꞌta ixin e Hatac tuaꞌ oꞌjron otronyajr taca e Mardoqueo y che:
EST 4:11 “Pues tunor e ajcꞌamparobꞌ tuaꞌ e rey y tunor tin e turobꞌ tama inteꞌ inteꞌ departamento tiaꞌ acꞌotori e rey, unatobꞌ que ayan inteꞌ taca ley xeꞌ che que ucꞌani tuaꞌ achamesna e winic o e ixic xeꞌ axin oꞌchoy tiaꞌ turu e rey tama uyotot jay majax pejcbꞌir umener tuaꞌ oꞌchoy. Pero jay e rey atzay uwira xeꞌ oꞌchoy era, uqꞌueche ubordon tut tuaꞌ oꞌchoy, y tamar era machi tuaꞌ uyare tuaꞌ achamesna. Pero cꞌani inwaret que ayix treinta día que e rey machi upejquen tuaꞌ incꞌotoy tut, y machi innata jay axin upejquen tama e día xeꞌ watar,” che e Ester.
EST 4:12 Entonces sutpa ixin e Hatac tut e Mardoqueo tuaꞌ uchecsu tut lo que arobꞌna umen e Ester. Y conda cꞌapa uyubꞌi uyojroner e Ester,
EST 4:13 e Mardoqueo uyebꞌta ixin otronteꞌ ojroner xeꞌ che cocha era: “Ira abꞌijnu que umen taca que war ituruan tama uyotot e rey, que net abꞌajner tuaꞌ iꞌxin icorpa conda axin achamesna tunor e inmojr xeꞌ tuobꞌ e Israel.
EST 4:14 Pero jay machi cꞌani iyojron tama e hora era conda cꞌanix achamesnobꞌ tunor tin e tuobꞌ e Israel, cꞌani catacarna umen otronteꞌ. Pero jay bꞌan anumuy, net y tunor ufamilia atata axin achamesnobꞌ. Pues bꞌajcꞌat turbꞌanet tuaꞌ iquetpa reina tama e chinam era tuaꞌ uyubꞌi atacrion tamar lo que war canumse cabꞌa coner,” che e Mardoqueo.
EST 4:15 Entonces e Ester uyebꞌta ixin e Hatac tut e Mardoqueo otronyajr taca e ojroner era y che:
EST 4:16 “Quiqui tama e chinam Susa y morojsen tunor tin e tuobꞌ e Israel y arenobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios tuaꞌ utacren. Y arenobꞌ tuaꞌ machi awiobꞌ y que matucꞌa tuaꞌ uyuchꞌiobꞌ tama uxteꞌ día, y que bꞌan tuaꞌ uchiobꞌ tama e día y tama e acbꞌar ubꞌan. Y nen y nimanobꞌ tara bꞌan tuaꞌ cache ubꞌan. Y de allí cꞌani inxin tuaꞌ inwira e rey, motor que tamar era inxin incꞌocchi e ley. Y jay tamar era axin uchamsen, uchamsiquen,” che e Ester.
EST 4:17 Entonces e Mardoqueo ixin y uche tunor lo que arobꞌna tuaꞌ uche umen e Ester.
EST 5:1 Entonces conda numuy uxteꞌ día que uyacta tuaꞌ aweꞌ, e Ester ulapi ubꞌujc lo que ucꞌampes tuaꞌ aquetpa chequer que jaxir reina, y ixin ochoy macuir e otot tiaꞌ turu e rey. Y quetpa wawan innajt cora tiaꞌ aquetpa chequer tut e rey. Y e rey war aturuan tama uturtar tiaꞌ aquetpa chequer e puerta tama e ocher.
EST 5:2 Y conda e rey uwira que war e Ester innajt cora tiaꞌ chequer tut, cay tzay y ubꞌijnu tuaꞌ uqꞌueche ubordon tut tuaꞌ uyare oꞌchoy. Entonces ixin e Ester tuyejtzꞌer e rey y upijchꞌi ujor e bordón.
EST 5:3 Entonces ojron e rey taca e Ester y che: —Ester, ¿ayan ca tucꞌa war acꞌani? Cꞌajtin lo que acꞌani y nen cꞌani inwajqꞌuet, motor que iꞌxin acꞌajti tacaren mitad tama tunor lo que ayan tanibꞌa, che e rey. Entonces ojron e Ester y che:
EST 5:4 —Pues jay aquetpa imbꞌutz toit, niwinquiret, quisinic inwaret tuaꞌ icꞌotoy coner tama inteꞌ wiar xeꞌ ustabꞌir nimener xeꞌ tuaꞌ aquetpa bꞌan cocha inteꞌ tattzꞌarsiaj tabꞌa, y quisinic que aqꞌueche axin e Amán ubꞌan, che e Ester. Y quetpa imbꞌutz tut e rey lo que arobꞌna umen e Ester. Entonces e rey uyare cora umanobꞌ y che:
EST 5:5 —Quiquic sajcanic e Amán, y arenic tuaꞌ uche lo que war uyusre e reina Ester, che e rey. Y bꞌan cocha era ixin e rey y e Amán esto tama e wiar lo que ustabꞌir umen e Ester.
EST 5:6 Y conda war uyuchꞌiobꞌ e vino e rey sutpa uyubꞌi tuaꞌ e Ester y che: —Cꞌajtin lo que acꞌani y nen cꞌani inwajqꞌuet, motor que iꞌxin acꞌajti mitad tama tunor lo que ayan tacaren, che e rey.
EST 5:7 Entonces ojron e Ester y che: —Pues unsre tuaꞌ incꞌajti tacaret cocha era:
EST 5:8 Pues jay net, niwinquiret, war ayajta niut, y jay itzay tuaꞌ ache lo que war unsre era, y jay turix tuaꞌ awajqꞌuen lo que axin incꞌajti tacaret, entonces cꞌani inwaret tuaꞌ icꞌotoy ejcꞌar taca e Amán tama otronteꞌ wiar xeꞌ cꞌani unstes. Y yajaꞌ taca cꞌani inwaret lo que war incꞌani, che e Ester uyare e rey.
EST 5:9 Pues conda cꞌapa e wiar locꞌoy e Amán war atzay meyra. Pero conda uwira e Mardoqueo tiaꞌ turu tama uyocher uyotot e rey, y conda uwira que machi achpa y que nien machi bꞌacta conda uwira numuy e Amán, qꞌuijna meyra este que cay ojmay uchꞌichꞌer.
EST 5:10 Pero jaxir machi uchecsu ubꞌa tama e hora era que war aqꞌuijna uwira e Mardoqueo. Pero conda cꞌotoy tuyotot uyare tuaꞌ apejcna cora winicobꞌ xeꞌ atzay uwira ubꞌa tacar y e Zeres xeꞌ jax uwixcar,
EST 5:11 y cay utattzꞌi ubꞌa tutobꞌ que jaxir ayan meyra lo que ayan tacar, y que ayan meyra umaxtacobꞌ, y cay uchecsu ubꞌan cocha sicbꞌana umen e rey tuaꞌ aquetpa tujor e inmojr ajcꞌotorerobꞌ y tujor e inmojr ajcꞌamparobꞌ.
EST 5:12 Y de allí ojronto e Amán y che: —Pues jax taca nen xeꞌ pejcnen umen e reina Ester tuaꞌ incꞌotoy tama e wiar lo que uyajcꞌu e rey sajmi, y uyarenix ubꞌan tuaꞌ incꞌotoy otronyajr tama inteꞌ wiar lo que cꞌani uyajcꞌu ejcꞌar.
EST 5:13 Pero matucꞌa ucꞌampibꞌir tunor era taniut conda inwira e Mardoqueo xeꞌ chꞌajnarir tuaꞌ e Israel que intaca turu tama uyocher uyotot e rey y que machi acotuan taniut conda innumuy, che e Amán.
EST 5:14 Entonces ojron uwixcar y e winicobꞌ xeꞌ atzay uwira ubꞌa tacar y chenobꞌ: —¿Tucꞌa tuaꞌ machi aware tuaꞌ oꞌstana inteꞌ nuxi teꞌ xeꞌ ucojco veintidós metro tama uwatar, y conda war asacojpa ejcꞌar erer iꞌxin tut e rey tuaꞌ acꞌajti tuaꞌ achꞌubꞌna e Mardoqueo tamar? Y jay ache cocha era erer itzay iꞌxin taca rey tama e wiar, chenobꞌ e winicobꞌ era. Pues tunor e bꞌijnusiaj era quetpa imbꞌutz tut e Amán y uyare tuaꞌ oꞌstana e nuxi teꞌ.
EST 6:1 Pero tama e acbꞌar era e rey machi uyubꞌi awayan, y tamar era uyare tuaꞌ ataresna e jun tiaꞌ chꞌar tzꞌijbꞌabꞌir tunor lo que numuy xeꞌ más nojta ucꞌampibꞌir tama e lugar era tiaꞌ war acꞌotori e rey. Y de allí uyare tuaꞌ achena leer.
EST 6:2 Y tama e jun era utajwiobꞌ tiaꞌ quetpa chꞌar tzꞌijbꞌabꞌir tama e tiempo conda e Mardoqueo cay uchecsu que cꞌanix achamesna e rey Asuero umen e Bigtán y umen e Teres xeꞌ guarde espalda xeꞌ quetpobꞌ tuaꞌ ucojcobꞌ e ocher tama uyotot e rey.
EST 6:3 Entonces ojron e rey y che: —¿Tucꞌa tuanibꞌir y tucꞌa tattzꞌarsiaj cay uchꞌami e Mardoqueo tama tunor lo que cay uche tacaren? che e rey. Entonces ojronobꞌ uyajcꞌamparobꞌ y chenobꞌ: —Matucꞌa, chenobꞌ uyajcꞌamparobꞌ.
EST 6:4 Pues entonces tama e hora era warix oꞌchoy e Amán tama uyotot e rey tuaꞌ ucꞌajti tacar tuaꞌ achꞌubꞌna e Mardoqueo tama e nuxi teꞌ xeꞌ ustabꞌir umener. Entonces ojron e rey y che: — ¿Chi war axana tara patir? che e rey.
EST 6:5 Entonces ojronobꞌ uyajcꞌamparobꞌ y chenobꞌ: —Jax e Amán, chenobꞌ uyajcꞌamparobꞌ. Y ojron e rey y che: —Arenic tuaꞌ oꞌchoy, che e rey.
EST 6:6 Entonces e Amán ochoy y arobꞌna umen e rey cocha era y che: —¿Tucꞌa erer achena taca inteꞌ winic xeꞌ cꞌani intattzꞌi? che e rey. Entonces e Amán cay ubꞌijnu tama uyalma y che: “¿Chi canic cꞌani uyajcꞌu e tattzꞌarsiaj e rey? O ¿nen canic?” xeꞌ che e Amán tama uyalma.
EST 6:7 Y tamar era ojron y che: —Pues e winic lo que cꞌani atajttzꞌa umen e rey
EST 6:8 ucꞌani tuaꞌ abꞌujcsena taca inteꞌ nuxi bꞌujc xeꞌ cay alapi net, y ucꞌani tuaꞌ ataresna incojt chij xeꞌ cay turuanet tujor xeꞌ ayan inteꞌ ujojbꞌibꞌ ujor bꞌan cocha cay acꞌampes conda turet tamar.
EST 6:9 Y entonces e bꞌujc y e chij ucꞌani tuaꞌ ajcꞌuna inteꞌ ajcꞌampar xeꞌ más nojta ucꞌampibꞌir tuaꞌ asutpa ubꞌujcse e winic xeꞌ cꞌani atajttzꞌa umen e rey, y de allí e ajcꞌampar era ucꞌani tuaꞌ uxantes tujor e chij tama tunor or e chinam, y ucꞌani tuaꞌ aꞌru taca inteꞌ nuxi nuc y che: ‘Pues bꞌan cocha era achena taca inteꞌ winic xeꞌ cꞌani atajttzꞌa umen e rey,’ che e Amán.
EST 6:10 Entonces e rey quetpa de acuerdo y tamar era uyare e Amán cocha era y che: —Pues ajnien quiqui chꞌama e bꞌujc y e chij, y chen bꞌan taca cocha war aware taca e Mardoqueo xeꞌ chꞌajnarir tuaꞌ e Israel xeꞌ war aturuan tama uyocher niotot. Y machix tuaꞌ awacta nien inteꞌ ojroner tama tunor lo que arobꞌna amener, che e rey.
EST 6:11 Entonces e Amán uchꞌami e bꞌujc y e chij, y cay ubꞌujcse e Mardoqueo, y de allí cay uxantes tujor e chij tama tunor or e chinam, y war aꞌru axin taca inteꞌ nuxi nuc y che: “Bꞌan cocha era achena taca e winic xeꞌ cꞌani atajttzꞌa umen e rey,” che e Amán.
EST 6:12 Pues conda cꞌapa uchiobꞌ e xambꞌar, e Mardoqueo sutpa ixin tuaꞌ aturuan tama uyocher uyotot e rey, y e Amán sutpa ixin tuyotot war aquetpa tzajtaca ut y quetpa jobꞌor ut.
EST 6:13 Y conda cꞌotoy cay uchecsu tunor lo que numuy taca uwixcar Zeres y taca tunor e winicobꞌ xeꞌ war atzay uwira ubꞌa tacar. Entonces jaxirobꞌ ojronobꞌ y chenobꞌ: —Pues jay machi uyubꞌiet amanxujres ut e Mardoqueo, motor que jax taca inteꞌ xeꞌ chꞌajnarir tuaꞌ e Israel, entonces chequer que jax net xeꞌ tuaꞌ iquetpa manxujresbꞌir umener, che uwixcar y e winicobꞌ era.
EST 6:14 Pues warto oꞌjronobꞌ e Amán, conda cꞌotoyobꞌ e manobꞌ tuaꞌ e rey tuaꞌ uqꞌuechiobꞌ axin esto tama e wiar xeꞌ ustabꞌir umen e Ester.
EST 7:1 Entonces e rey y e Amán ixiobꞌ tama e wiar lo que ustabꞌir umen e reina Ester.
EST 7:2 Y tama e wiar era, cay ojron e rey taca e Ester y che: —Cꞌajtin lo que acꞌani y nen cꞌani inwajqꞌuet, motor que iꞌxin acꞌajti mitad tama tunor lo que ayan tacaren, che e rey.
EST 7:3 Entonces ojron e Ester y che: —Pues jay war itzay awiren, niwinquiret, y jay aquetpa imbꞌutz toit tunor lo que cꞌani inwaret, cꞌani incꞌajti tacaret que iꞌxin acorpesen tuaꞌ machi inchamesna y que acorpes ucuxtarobꞌ nichinam ubꞌan.
EST 7:4 Pues nen y tunor nichinam xeꞌ turobꞌ tama nichꞌajnarir war caquetpa bꞌan cocha cora aracꞌobꞌ xeꞌ chombꞌiron tuaꞌ cachamesna y tuaꞌ casajta inyajrer. Pues jay chojnon ani tuaꞌ taca caquetpa cora man xeꞌ mambꞌir inyajrer, nen matucꞌa ani inwaret, y nien machi ani aquetpa tuaꞌ inyopa toit tuaꞌ incꞌajti atacarsiaj tama tunor era, che e Ester.
EST 7:5 Entonces e rey Asuero uyubꞌi tuaꞌ e Ester y che: —Y ¿chi canic uyacta oꞌchoy e bꞌijnusiaj tuaꞌ uche inteꞌ nuxi mabꞌambꞌanir cocha era tama uyalma, y que nienix abꞌacta? Y ¿tiaꞌ turu? che e rey.
EST 7:6 Entonces ojron e Ester y che: —Pues xeꞌ war ixto aqꞌuijna uwiron yaꞌ jax e tzuc Amán era, che e Ester. Y tama e momento era e Amán cay chincha meyra umen e bꞌajcꞌut tiaꞌ turu tut e rey y tut e reina Ester.
EST 7:7 Entonces qꞌuijna meyra e rey, y achpa wacchetaca y locꞌoy tama e otot, y ixin patir tiaꞌ ayan cora teꞌ tor e tinaj. Y e Amán cꞌotoy unata wacchetaca que e rey war ubꞌijnu tuaꞌ uyare achamesna, y tamar era jaxir quetpa macu tiaꞌ turu e Ester tuaꞌ ucꞌajti tacar tuaꞌ machi achamesna.
EST 7:8 Y conda sutpa tari e rey tiaꞌ turu patir y ochoy tama e otot otronyajr tiaꞌ war uchiobꞌ e wiar, uwira que e Amán cotor tuyejtzꞌer e sillón tiaꞌ chꞌar e Ester. Entonces ojron e rey y che: —¿O warto ca abꞌijnu tuaꞌ ache forzar e reina conda turuto tama niotot? che e rey. Y conda cꞌapa ojron e rey cocha era, uyare umanobꞌ tuaꞌ uqꞌuechiobꞌ axin e Amán. Y wacchetaca jaxirobꞌ ujuriobꞌ inteꞌ saco tujor y uqꞌuechiobꞌ locꞌoy.
EST 7:9 Y entonces ojron e Harboná xeꞌ jax inteꞌ tujam umanobꞌ e rey y che: —Pues tuyejtzꞌer uyotot e Amán ustabꞌir inteꞌ nuxi teꞌ xeꞌ ucojco veintidós metro tama uwatar xeꞌ war ucꞌani tuaꞌ achꞌubꞌna e Mardoqueo tamar. Y e Mardoqueo jax xeꞌ cay ucorpes acuxtar tama inyajr, che e Harboná. Entonces ojron e rey y che: —Chꞌubꞌanic e Amán tamar, che e rey.
EST 7:10 Pues bꞌan cocha era cꞌotoy chamesna e Amán conda chꞌubꞌna tamar taca e teꞌ xeꞌ uyare tuaꞌ oꞌstana tuaꞌ ani achꞌubꞌna e Mardoqueo tamar. Y bꞌan cocha era sisa uqꞌuijnar e rey.
EST 8:1 Pues entonces tamar taca e día era e rey uyajcꞌu e reina Ester tunor lo que ayan ani tuaꞌ e Amán. Pues e Amán era jax xeꞌ más ani aqꞌuijna uwira utobꞌ tin e tuobꞌ e Israel. Entonces e Mardoqueo actana tuaꞌ oꞌchoy tuyotot e rey cocha chectesna tut jaxir umen e Ester que e Mardoqueo jax uprimo hermano.
EST 8:2 Entonces e rey uchꞌami e anillo xeꞌ ayan e sello tamar lo que cay ulocse tut e Amán y uyajcꞌu e Mardoqueo. Y e Ester uturbꞌa e Mardoqueo tuaꞌ aquetpa ajcojc tama tunor lo que ayan ani tuaꞌ e Amán.
EST 8:3 Y de allí e Ester ixin tuaꞌ uwira e rey otronyajr y cotuan tama unuc uyoc y war oꞌyqꞌui oꞌjron tacar. Y ucꞌajti tuaꞌ usati e ley lo que tzꞌijbꞌabꞌir umen e Amán, y que uquete uwabꞌu tunor lo que war ani ubꞌijnu tuaꞌ achena upater tin e tuobꞌ e Israel.
EST 8:4 Entonces e rey uqꞌueche ubordon xeꞌ chembꞌir taca e oro tut e Ester. Entonces jaxir achpa wawan tut e rey
EST 8:5 y ojron cocha era y che: —Pues jay aquetpa imbꞌutz toit tunor lo que war inwaret era, niwinquiret, y jay itzay awiren, y jay abꞌijnu que bꞌan ucꞌani, entonces quisinic inwaret tuaꞌ aware achena inteꞌ ley tuaꞌ aquetpa satbꞌir lo que arobꞌna tama e carta lo que ebꞌtana ixin umen e Amán xeꞌ che que ucꞌani tuaꞌ asajta inyajrer tunor tin e tuobꞌ e Israel tic taca tiaꞌ turobꞌ tama inteꞌ inteꞌ departamento tiaꞌ war icꞌotori.
EST 8:6 Porque nen ma tawaren tuaꞌ inwira acꞌapesna tunor nichinam y tunor nifamilia, che e Ester.
EST 8:7 Entonces e rey Asuero uyare e Ester y e Mardoqueo cocha era y che: —Pues nen inwajcꞌuix e Ester e otot xeꞌ tuaꞌ ani e Amán, y inwarix tuaꞌ achꞌubꞌna tama inteꞌ teꞌ umen que war ubꞌijnu tuaꞌ uchamse tunor ichinam.
EST 8:8 Entonces coner cꞌani inwajcꞌox e cꞌotorer tuaꞌ itzꞌijbꞌa inteꞌ carta tiaꞌ tuaꞌ aquetpa tzꞌijbꞌabꞌir lo que nox icꞌani tuaꞌ achempa tuaꞌ acorpesna tin e tuobꞌ e Israel. Y chenic tama nicꞌabꞌa. Y de allí chenic sellar taca e sello lo que incꞌampes. Pero cꞌajric imener que inteꞌ carta xeꞌ firmado nimener y xeꞌ sellado taca nisello, ma cocha erer asatpa, che e rey.
EST 8:9 Entonces wacchetaca pejcnobꞌ cora sian secretario tuaꞌ e rey. Y bꞌan achempa tama e veintitrés día tama e uxteꞌ mes, o erer caware tama e mes Siván. Y quetpa tuaꞌ utzꞌijbꞌobꞌ tunor lo que arobꞌnobꞌ umen e Mardoqueo tama inteꞌ carta, y quetpa tuaꞌ eꞌbꞌtana axin e carta era esto tut tin e tuobꞌ e Israel, y tut tunor e ajcꞌotorerobꞌ tama inteꞌ inteꞌ departamento, y tut tunor e inmojr ajcꞌamparobꞌ lo que ayan tama e 127 departamento. Pues ayan meyra sian lugar tiaꞌ war acꞌotori e rey xeꞌ acay tama e lugar India y acꞌotoy esto tama e lugar Etiopía. Y e carta quetpa tzꞌijbꞌabꞌir tama e letra y tama inteꞌ inteꞌ ojroner bꞌan cocha ojronobꞌ e gente tama inteꞌ inteꞌ departamento, y bꞌan chempa tama e ojroner tuaꞌ tin e tuobꞌ e Israel ubꞌan.
EST 8:10 Y e carta era tzꞌijbꞌabꞌir tama ucꞌabꞌa e rey Asuero umen e Mardoqueo, y chena sellar taca e sello tuaꞌ e rey, y de allí qꞌuejcha ixin umen cora sian manobꞌ tuaꞌ e rey xeꞌ ixiobꞌ tujor inteꞌ inteꞌ chij xeꞌ más ajniobꞌ lo que ayan tuaꞌ e rey.
EST 8:11 Y tama e carta era e rey uyacta inteꞌ ley xeꞌ che que tin e tuobꞌ e Israel erer umorojse ubꞌobꞌ tic taca tiaꞌ turobꞌ tuaꞌ ucorpes ubꞌobꞌ tut tin e cꞌani uchiobꞌ e tzꞌojyir tacarobꞌ. Y aquetpa tuaꞌ ucojcobꞌ tunor e ixictac y e bꞌiqꞌuit maxtacobꞌ tuobꞌ tuaꞌ machi achamesnobꞌ ubꞌan. Y aquetpa tuaꞌ uchamsiobꞌ y usatiobꞌ inyajrer tunor tin e acꞌotoy tuaꞌ uchiobꞌ e tzꞌojyir tacarobꞌ. Y bꞌan aquetpa tuaꞌ uchiobꞌ motor jay watobꞌ tama tuqꞌuic tuqꞌuic chinam o jay watobꞌ tama tuqꞌuic tuqꞌuic departamento, y erer uchꞌamiobꞌ tunor lo que ayan tuaꞌ e gente era.
EST 8:12 Y tunor era aquetpa tuaꞌ achempa tama inteꞌ taca día tama inteꞌ inteꞌ departamento tiaꞌ war acꞌotori e rey Asuero. Y e día xeꞌ actabꞌir tuaꞌ achempa tunor era jax e trece día tama e doce mes, o erer caware tama e mes Adar.
EST 8:13 Y inteꞌ copia tama e carta era ucꞌani tuaꞌ achecsuna tama tunor or e lugar tama inteꞌ inteꞌ departamento y tama inteꞌ inteꞌ chinam, tuaꞌ acꞌotoy unatobꞌ tunor tin e tuobꞌ e Israel que watar e día conda ucꞌani tuaꞌ uchiobꞌ e tzꞌojyir taca tunor tin e aqꞌuijna uwirobꞌ ubꞌobꞌ tacar.
EST 8:14 Y entonces arobꞌnobꞌ cora manobꞌ tuaꞌ e rey tuaꞌ uqꞌuechiobꞌ axin e carta era, y quetpa tuaꞌ axiobꞌ ajner tujor e chijobꞌ xeꞌ tuaꞌ e rey tuaꞌ acꞌotoyobꞌ tama inteꞌ inteꞌ departamento y tama inteꞌ inteꞌ chinam. Y checsuna e carta era tama e capital Susa ubꞌan.
EST 8:15 Entonces e Mardoqueo locꞌoy tama e uyotot e rey bꞌujcsebꞌir taca e bꞌujc xeꞌ meyra atujri xeꞌ azul ut y sacsac ut xeꞌ ajcꞌuna umen e rey, y turbꞌana inteꞌ ujojbꞌibꞌ ujor xeꞌ ayan e oro tamar, y ajcꞌuna tuaꞌ ulapi inteꞌ bata xeꞌ chembꞌir taca e bꞌujc xeꞌ galan atzꞌapruma ut xeꞌ chacbꞌurem ut. Entonces tunor e gente tama e chinam Susa aruobꞌ taca inteꞌ nuxi nuc umen e tzayer cocha corpesnobꞌ tunor tin e tuobꞌ e Israel.
EST 8:16 Entonces cꞌapa tunor e bꞌajcꞌut lo que ayan ani tama uyalmobꞌ e gente xeꞌ tuobꞌ e Israel, y bꞌutcꞌa uyalmobꞌ taca e tzayer, y war atajttzꞌobꞌ umen tunor e gente axin.
EST 8:17 Y tama inteꞌ inteꞌ departamento y tama inteꞌ inteꞌ chinam tunor tin e tuobꞌ e Israel cay tzayobꞌ meyra conda cꞌotoy unatobꞌ tama e ley era. Y bꞌan numuy tama tunor or e lugar tiaꞌ chectesna e carta xeꞌ ebꞌtana ixin umen e rey. Y tamar era cay uchiobꞌ meyra sian wiar y meyra sian nojqꞌuin. Y meyra gente xeꞌ majax tuobꞌ e Israel cꞌotoy quetpobꞌ intera tacarobꞌ, cocha cay ubꞌacriobꞌ que bꞌajcꞌat erer achena unumse ubꞌobꞌ umenerobꞌ.
EST 9:1 Pues conda cꞌotoy e día lo que actabꞌir tuaꞌ achempa tunor e ley tuaꞌ e rey xeꞌ jax e trece día tama e doce mes xeꞌ arobꞌna Adar, jax e día ubꞌan conda tin e aqꞌuijna uwira ubꞌobꞌ taca e gente tuaꞌ e Israel aquetpa tuaꞌ acꞌapa usatiobꞌ. Pero tunor e nuxi tzꞌojyir lo que war ani ubꞌijnuobꞌ tuaꞌ uchiobꞌ tama e día era machi locꞌoy uchiobꞌ, porque jax jaxirobꞌ xeꞌ cꞌotoy quetpobꞌ manxujresbꞌirobꞌ umen e gente tuaꞌ e Israel.
EST 9:2 Pues tama inteꞌ inteꞌ departamento tiaꞌ acꞌotori e rey Asuero, tin e tuobꞌ e Israel cay umorojse ubꞌobꞌ tic taca tiaꞌ turobꞌ tama inteꞌ inteꞌ chinam tuaꞌ uchiobꞌ e tzꞌojyir taca tin xeꞌ war aqꞌuijnobꞌ uwira ubꞌobꞌ xeꞌ war ubꞌijnuobꞌ tuaꞌ achamsanobꞌ. Pero mamajchi ubꞌna uche e tzꞌojyir upater e gente xeꞌ tuobꞌ e Israel, cocha cꞌaxi inteꞌ nuxi bꞌajcꞌut tama ujor tunor e gente tama inteꞌ inteꞌ chinam.
EST 9:3 Y tunor e ajcꞌamparobꞌ tama inteꞌ inteꞌ departamento, y tin e ajwinquirobꞌ y tin e ajcꞌotorerobꞌ tuaꞌ e rey cay ubꞌijnuobꞌ tuaꞌ utacriobꞌ tin e tuobꞌ e Israel umen que war ubꞌacriobꞌ e Mardoqueo.
EST 9:4 Porque jaxir cꞌotoy quetpa inteꞌ nuxi ajcꞌampar tama uyotot e rey, y war atajttzꞌa iraj iraj umen e ajcꞌamparobꞌ tama inteꞌ inteꞌ departamento, y war uchꞌami más ucꞌotorer iraj iraj ubꞌan.
EST 9:5 Y e gente xeꞌ tuobꞌ e Israel cꞌapa uchamsiobꞌ taca umachitobꞌ tunor tin e war aqꞌuijna upaterobꞌ, y cꞌapa usatiobꞌ tunorobꞌ inyajrer, y uchiobꞌ tacarobꞌ bꞌan taca cocha ubꞌijnuobꞌ.
EST 9:6 Y tamar taca e chinam Susa uchamsiobꞌ 500 winicobꞌ,
EST 9:7 y uchamsiobꞌ ubꞌan e Parsandata y e Dalfón y e Aspata
EST 9:8 y e Porata y e Adalías y e Aridata
EST 9:9 y e Parmasta y e Arisai y e Aridai y e Vaizata
EST 9:10 xeꞌ jax ani e diez uyunenobꞌ e Amán, xeꞌ jax xeꞌ qꞌuijna uwira ubꞌa taca tunor tin e tuobꞌ e Israel. Pero jaxirobꞌ machi uchꞌamiobꞌ lo que ayan ani tuobꞌ tin xeꞌ uchamsiobꞌ.
EST 9:11 Pues tamar taca e día era checsuna tut e rey cobꞌa winicobꞌ xeꞌ chamesnobꞌix tama e chinam Susa,
EST 9:12 y entonces jaxir uyare e reina Ester cocha era y che: —Jay tin e tuobꞌ e Israel ixin uchamsiobꞌ 500 winicobꞌ y e diez uyunenobꞌ e Amán tamar taca e chinam era, entonces ¿cobꞌa canic uchamsiobꞌix tama tunor e inmojr departamento tiaꞌ war incꞌotori? O ¿ayanto ca más lo que acꞌani? Arenen y cꞌani inwajqꞌuet, che e rey uyare e Ester.
EST 9:13 Entonces ojron e Ester y che: —Pues jay aquetpa imbꞌutz toit, niwinquiret, actan que e gente xeꞌ tuobꞌ e Israel xeꞌ turobꞌ tama e chinam era asutpa uchiobꞌ ejcꞌar bꞌan cocha cay uchiobꞌ sajmi. Y quisinic que axin achꞌubꞌnobꞌ e diez uyunenobꞌ ani e Amán tama inteꞌ inteꞌ uteꞌ, che e Ester.
EST 9:14 Entonces e rey uyare tuaꞌ achena bꞌan taca cocha arobꞌna umen e Ester. Y entonces checsuna ixin e ley tic taca tama tunor or e lugar tama e chinam Susa. Y de allí chꞌubꞌnobꞌ ucuerpobꞌ e diez uyunenobꞌ e Amán tama inteꞌ inteꞌ uteꞌ.
EST 9:15 Entonces e gente xeꞌ tuobꞌ e Israel xeꞌ turobꞌ tama e chinam Susa, sutpa umorojse ubꞌobꞌ tama e catorce día tama e mes Adar, y sutpa uchamsiobꞌ 300 winicobꞌ otronyajr. Pero machi uchꞌamiobꞌ lo que ayan ani tuobꞌ tin e chamesnobꞌ.
EST 9:16 Y tin e tuobꞌ e Israel xeꞌ turobꞌ tama inteꞌ inteꞌ departamento cay umorojse ubꞌobꞌ ubꞌan tuaꞌ ucorpes ubꞌobꞌ y tuaꞌ uchamsiobꞌ tin e war aqꞌuijna uwira ubꞌobꞌ tacar. Y tama e día era cꞌapa uchamsiobꞌ 75,000 winicobꞌ. Pero machi uchꞌamiobꞌ lo que ayan tuaꞌ tin e chamesnobꞌ.
EST 9:17 Y bꞌan numuy tama e trece día tama e mes Adar. Y tama e catorce día jiriobꞌ y cay uyustesobꞌ inteꞌ nuxi wiar y cay tzayobꞌ meyra taca inteꞌ nuxi nojqꞌuin.
EST 9:18 Pero tin e tuobꞌ e Israel xeꞌ turobꞌ tama e chinam Susa cay umorojse ubꞌobꞌ tama e chateꞌ día xeꞌ jax e trece día y e catorce día tuaꞌ uchamsiobꞌ tin xeꞌ ayopobꞌ tutobꞌ. Y de allí tama e quince día jiriobꞌ y nojqꞌuiniobꞌ, y cay uyustesobꞌ inteꞌ nuxi wiar y tzayobꞌ meyra.
EST 9:19 Y entonces quetpa que tin e turobꞌ tama inteꞌ bꞌiqꞌuit chinam y tama inteꞌ aldea ajiriobꞌ y anojqꞌuiniobꞌ tama e catorce día, cocha utata viejobꞌirobꞌ cay chamsanobꞌ tama inteꞌ taca día xeꞌ jax e trece día. Entonces jax e catorce día conda axin atzayobꞌ meyra y conda uyustesobꞌ inteꞌ nuxi wiar taca inteꞌ nuxi nojqꞌuin. Y uyajcꞌuobꞌ e regalo upiarobꞌ ubꞌan.
EST 9:20 Entonces e Mardoqueo cay utzꞌijbꞌa tama inteꞌ jun tunor lo que numuy, y de allí uyebꞌta ixin e carta era tut tunor tin e tuobꞌ e Israel tic taca tiaꞌ turobꞌ tama inteꞌ inteꞌ departamento tiaꞌ war acꞌotori e rey Asuero. Y uyebꞌta ixin e carta tut tin e aturuanobꞌ más innajt, y tut tin e aturuanobꞌ majax innajt.
EST 9:21 Y uyare tama e carta que ucꞌani tuaꞌ uchiobꞌ inteꞌ nojqꞌuin tama inteꞌ inteꞌ año tama e catorce día y tama e quince día tama e mes Adar
EST 9:22 cocha jax tama e día era conda tin e tuobꞌ e Israel ucorpes ubꞌobꞌ tama ucꞌabꞌ tin e aqꞌuijnobꞌ. Y jax tama e mes era conda sutpa quetpa tzayer y jiriar tunor e sian cꞌuxner y e nuxi tzꞌintzꞌar lo que war ani unumse ubꞌobꞌ tamar. Y e Mardoqueo uyare que jax tama e día era conda ucꞌani tuaꞌ uyustesobꞌ inteꞌ nuxi wiar taca meyra tzayer, y que ucꞌani tuaꞌ uyajcꞌuobꞌ e regalo upiarobꞌ, y que ucꞌani tuaꞌ utacriobꞌ tin e tzajtaca utobꞌ.
EST 9:23 Y bꞌan cocha era tin e tuobꞌ e Israel cay ucojcobꞌ e nojqꞌuin era tama inteꞌ inteꞌ año, tuaꞌ acꞌapa uchiobꞌ bꞌan cocha chꞌar tzꞌijbꞌabꞌir umen e Mardoqueo.
EST 9:24 Porque e Amán xeꞌ jax xeꞌ qꞌuijna meyra uwira utobꞌ tunor tin e tuobꞌ e Israel, cay ani ubꞌijnu tuaꞌ acꞌapa usati inyajrer tunor tin e tuobꞌ e Israel. Y cay uri e pur, o erer caware que cay uchiobꞌ suertiar tuaꞌ unatobꞌ tucꞌa día aquetpa tuaꞌ acꞌapa uchamsiobꞌ tunor tin e tuobꞌ e Israel.
EST 9:25 Pero conda e Ester cay uyare e rey tama tunor era, jaxir cay utzꞌijbꞌa inteꞌ ley tuaꞌ asutpa acꞌaxi e jatzꞌuar tama ujor e Amán tama tunor lo que war ubꞌijnu uche. Y bꞌan cocha era e Amán chꞌubꞌna taca uyunenobꞌ tama inteꞌ inteꞌ uteꞌ.
EST 9:26 Y tamar era cꞌotoy turbꞌana ucꞌabꞌa e día era “Purim”, bꞌan cocha alocꞌoy tama e ojroner pur. Entonces cay ubꞌijnuobꞌ tuaꞌ anojqꞌuiniobꞌ bꞌan cocha war ucꞌani e Mardoqueo tuaꞌ achena xeꞌ actabꞌir tama e carta lo que tzꞌijbꞌabꞌir umener. Y bꞌan cocha era quetpobꞌ tuaꞌ ajiriobꞌ tama tunor lo que cay uwirobꞌ, y tama tunor lo que cay unumse ubꞌobꞌ.
EST 9:27 Entonces tin e tuobꞌ e Israel uturbꞌobꞌ e día tuaꞌ anojqꞌuiniobꞌ tama inteꞌ inteꞌ año. Y bꞌan tuaꞌ uchiobꞌ tunor uchꞌajnarirobꞌ, y bꞌan tuaꞌ uchiobꞌ tunor tin e ajnajtir gente xeꞌ cꞌotoy quetpobꞌ intera tacarobꞌ. Y machi tuaꞌ uyactobꞌ tuaꞌ anojqꞌuiniobꞌ tama e chateꞌ día era bꞌan cocha actabꞌir tama e carta xeꞌ tzꞌijbꞌabꞌir umen e Mardoqueo.
EST 9:28 Y tamar era cꞌotoy quetpa que inteꞌ inteꞌ familia tama inteꞌ inteꞌ departamento y tama inteꞌ inteꞌ chinam ucꞌani tuaꞌ uchiobꞌ e nojqꞌuin era tama inteꞌ inteꞌ año. Y bꞌan tuaꞌ uchiobꞌ tunor uchꞌajnarirobꞌ ubꞌan. Y aquetpa tuaꞌ achempa cocha era tuaꞌ machi axin anajpesna lo que numuy conda jujra e pur tama inyajr.
EST 9:29 Entonces e Ester, xeꞌ ijchꞌoc tuaꞌ e Abihail, taca e Mardoqueo xeꞌ chꞌajnarir tuaꞌ e Israel ubꞌan, cay utzꞌijbꞌobꞌ e chajr carta era tama ucꞌotorer e Ester xeꞌ jax e reina tuaꞌ aquetpa chequer que ucꞌani tuaꞌ achempa e nojqꞌuin era xeꞌ ucꞌabꞌa Purim bꞌan cocha che tama e carta xeꞌ tzꞌijbꞌabꞌir bꞌajxan umen e Mardoqueo.
EST 9:30 Y de allí uyebꞌtobꞌ ixin e carta tut tunor tin e tuobꞌ e Israel xeꞌ turobꞌ tama e 127 departamento tiaꞌ war acꞌotori e rey Asuero. Y tama e carta era uyebꞌtobꞌ ixin cora ojroner tuaꞌ utꞌabꞌse uyalmobꞌ upiarobꞌ tuaꞌ machi abꞌactobꞌ y tuaꞌ machi amerecnobꞌ.
EST 9:31 Y tamar era cꞌotoy quetpa que e nojqꞌuin Purim ucꞌani tuaꞌ achempa tama e día bꞌan cocha quetpa tzꞌijbꞌabꞌir umen e Mardoqueo y e reina Ester tama ucarta. Y bꞌan aquetpa tuaꞌ achempa umen tunor uchꞌajnarirobꞌ ubꞌan. Y tama e día era cꞌotoy quetpobꞌ de acuerdo que ucꞌani tuaꞌ uyactobꞌ tuaꞌ awiobꞌ y que ucꞌani tuaꞌ aꞌruobꞌ taca inteꞌ nuxi nuc conda uchiobꞌ e nojqꞌuin era.
EST 9:32 Y aquetpa que ucꞌani tuaꞌ achempa e nojqꞌuin Purim tama inteꞌ inteꞌ año umen que bꞌan che tama e ley lo que tzꞌijbꞌabꞌir umen e reina Ester. Y tunor era quetpa tzꞌijbꞌabꞌir tama inteꞌ jun xeꞌ tuaꞌ tin e tuobꞌ e Israel.
EST 10:1 Pues entonces e rey Asuero uyare tuaꞌ amorojsena e impuesto tama inteꞌ inteꞌ departamento y tama inteꞌ inteꞌ chinam, y aquetpa tuaꞌ amorojsena e impuesto motor tama e chinamobꞌ xeꞌ aquetpobꞌ más innajt xeꞌ turobꞌ tutiꞌ e nuxi jaꞌ.
EST 10:2 Y e Mardoqueo cay uche meyra cosa xeꞌ nojta ucꞌampibꞌir taca ucꞌotorer xeꞌ meyra ayan xeꞌ ajcꞌuna umen e rey. Y tamar era jaxir tajttzꞌa meyra umen e rey ubꞌan. Pues tunor era chꞌar tzꞌijbꞌabꞌir tama inteꞌ jun xeꞌ tuaꞌ e rey tiaꞌ quetpa tzꞌijbꞌabꞌir tunor lo que numuy tama tunor or e lugar Media y tama tunor or e lugar Persia.
EST 10:3 Pues e Mardoqueo cay cꞌotori yebꞌar taca e rey Asuero. Y jaxir quetpa nuxi winic tujam tunor e gente xeꞌ tuobꞌ e Israel, y tama tunor era cꞌubꞌesna meyra umenerobꞌ, cocha cay usajca cocha tuaꞌ upasi e bꞌir tutobꞌ tuaꞌ uyubꞌi apatnobꞌ taca e jiriar. Y iraj iraj war ubꞌijnu cocha tuaꞌ utacre upiarobꞌ.
JON 1:1 Pues entonces Cawinquirar Dios uyare e Jonás xeꞌ jax uyunen e Amitay cocha era y che:
JON 1:2 “Pues achpen quiqui esto tama e nuxi chinam Nínive y checsun tut e gente yajaꞌ que nen cꞌani insati tunor uchinam, porque cꞌotoy umbꞌi esto tiaꞌ turen tara tut e qꞌuin que meyra mabꞌambꞌanir war uchiobꞌ,” che Cawinquirar Dios.
JON 1:3 Pero e Jonás machi cꞌani uche lo que arobꞌna umen e Dios cocha machi war ucꞌani tuaꞌ acorpesnobꞌ tin e turobꞌ tama e chinam Nínive cocha mabꞌambꞌan uwirnarobꞌ. Y tamar era ubꞌijnu tuaꞌ alocꞌoy aꞌjni tut Cawinquirar Dios y tuaꞌ axin esto tama e chinam Tarsis xeꞌ aquetpa más innajt tut e chinam Nínive. Entonces ixin esto tama e chinam Jope xeꞌ turu tuyejtzꞌer e nuxi jaꞌ tiaꞌ ayan e sian barco xeꞌ axiobꞌ esto tama inteꞌ inteꞌ lugar. Y conda cꞌotoy e Jonás utajwi que ayan inteꞌ barco xeꞌ turix tuaꞌ alocꞌoy esto tama e lugar Tarsis. Entonces ixin utoyi uboleto y tꞌabꞌay ixin tama e barco.
JON 1:4 Pues entonces chꞌuwan ixin e barco tor e nuxi jaꞌ, conda wacchetaca Cawinquirar Dios uyebꞌta tari inteꞌ nuxi icꞌar xeꞌ jicna numuy tujor e nuxi jaꞌ, y cay cꞌaxi inteꞌ nuxi tormenta y e jaꞌ cay utꞌabꞌse e barco tichan y uyemse e barco ejmar otronyajr este que cꞌanix atajchpa e barco umener.
JON 1:5 Y tamar era tin e war apatnobꞌ tama e barco cay bꞌactobꞌ meyra, y cay ucꞌajtiobꞌ taca udiosobꞌ inteꞌ intiobꞌ, y cay utobꞌsiobꞌ ixin ta jaꞌ tunor lo que war uqꞌuechiobꞌ axin tama e barco tuaꞌ atzꞌupa ubꞌarir. Pero e Jonás yaꞌ turu tama usuy e barco war awayan y machi cꞌani abꞌixcꞌa.
JON 1:6 Y de allí e capitán xeꞌ jax xeꞌ aquetpa tujor e inmojr xeꞌ turobꞌ tama e barco ixin tiaꞌ turu e Jonás y ubꞌixqꞌues y che: —¿Tucꞌa war ache tarex ajwaynijet? Achpen y cꞌajtin taca Adios. Bꞌajcꞌat axin ubꞌijnu tuaꞌ uyajta coit tuaꞌ machi cachamay tama e nuxi jaꞌ era, che e capitán.
JON 1:7 Pero tin war apatnobꞌ tama e barco cay uyare ubꞌobꞌ y chenobꞌ: —Cachic suertiar tuaꞌ canata chi umen que war canumse cabꞌa cocha era, chenobꞌ. Entonces cay uchiobꞌ suertiar y tujchꞌa que jax e Jonás que war uche unumse ubꞌobꞌ.
JON 1:8 Y de allí ixin uyareobꞌ e Jonás y chenobꞌ: —Arenon, ¿tucꞌa tuaꞌ que war canumse cabꞌa cocha era? Y ¿tucꞌa patnar ache? Y ¿tiaꞌ ajlugaret? Y ¿tiaꞌ ajchinamet? Y ¿tin achꞌajnarir?, che e winicobꞌ era.
JON 1:9 Entonces ojron e Jonás y che: —Pues nen chꞌajnariren tuaꞌ e Héber, y unjtzꞌi ut Niwinquirar Dios xeꞌ turu tut e qꞌuin y xeꞌ uche tunor e nuxi jaꞌ y xeꞌ uche tunor or e rum, che e Jonás.
JON 1:10 Entonces conda tin e apatnobꞌ tama e barco cꞌotoy unatobꞌ chi e Jonás y que war alocꞌoy aꞌjni tut Cawinquirar Dios sutpa uyubꞌiobꞌ tuaꞌ y chenobꞌ: —¿Tucꞌa tuaꞌ que ache cocha era? chenobꞌ.
JON 1:11 Y cocha uwirobꞌ que war atobꞌoy más meyra e nuxi jaꞌ uyubꞌiobꞌ tuaꞌ e Jonás y chenobꞌ: —¿Tucꞌa nic cachic tacaret tuaꞌ achꞌancabꞌa e nuxi jaꞌ? chenobꞌ.
JON 1:12 Entonces e Jonás sutpa ojron y che: —Yarieniquen tama e nuxi jaꞌ y cꞌani achꞌancabꞌa. Pues war innata que nimener taca que war acꞌaxi e nuxi tormenta era, che e Jonás.
JON 1:13 Pero tin e war apatnobꞌ tama e barco machi cꞌani uꞌriobꞌ e Jonás tama e jaꞌ, y tamar era cay ujoqꞌuiobꞌ meyra e jaꞌ taca cora teꞌ lo que ucꞌampesobꞌ tuaꞌ utacsuobꞌ axin e barco tor e jaꞌ tuaꞌ uwirobꞌ jay uyubꞌi asutpa axiobꞌ esto tutiꞌ e nuxi jaꞌ otronyajr. Pero machi obꞌnobꞌ cocha e nuxi jaꞌ war atobꞌoy meyra y war utacsu axin e barco más bꞌana.
JON 1:14 Entonces e ajpatnarobꞌ tama e barco era cocha machi tacarnobꞌ conda ucꞌajtiobꞌ tacar udiosobꞌach, cay ucꞌajtiobꞌ taca Cawinquirar Dios y chenobꞌ: “Uwinquiret e Jonás era, ira achamsion umen que ucꞌani tuaꞌ coyri e Jonás tama e jaꞌ. Y jay jaxir matucꞌa war uche, ira ache acꞌaxi tama cajor non uchamer, porque net xeꞌ Uwinquiret e Jonás war ache bꞌan taca cocha war acꞌani”, che e ajpatnarobꞌ tama e barco.
JON 1:15 Entonces utobꞌsiobꞌ ixin e Jonás tama e jaꞌ, y wacchetaca chꞌancabꞌa e nuxi jaꞌ.
JON 1:16 Y bꞌactobꞌ meyra e ajpatnarobꞌ tama e barco conda uwirobꞌ que ayan meyra ucꞌotorer Cawinquirar Dios, cocha wacchetaca corpesnobꞌ umener. Entonces uchamsiobꞌ inteꞌ arac tut Cawinquirar Dios y uputobꞌ y cay uchecsu ubꞌobꞌ que cꞌani acay axanobꞌ tama ubꞌir e Dios.
JON 1:17 Pero Cawinquirar Dios ayanto lo que cꞌani uche taca e Jonás, y tamar era usicbꞌa inteꞌ nuxi chay tuaꞌ ubꞌuqꞌui e Jonás. Y jaxir quetpa tama unac e nuxi chay era uxteꞌ día y uxteꞌ acbꞌar.
JON 2:1 Pues entonces e Jonás cay ucꞌajti taca Cawinquirar Dios tiaꞌ turu macuir unac e nuxi chay,
JON 2:2 y che: “Niwinquiraret Dios, conda cay innumse nibꞌa taca meyra cꞌuxner cay imbꞌijnu tuaꞌ incꞌajti tacaret, y net oybꞌi ninuc. Y cay impejquet tiaꞌ turen tujam e chamenobꞌ y net oybꞌi lo que cay incꞌajti tacaret.
JON 2:3 Atobꞌsien ixien esto tama utamir e nuxi jaꞌ, y cay ajni e jaꞌ tamaren. Y tunor e sian jaꞌ era xeꞌ awebꞌta tari numuy tama nijor y muctzꞌa ixien macuir e jaꞌ.
JON 2:4 Y de allí nen cay imbꞌijnu cocha era: ‘Nen loqꞌuesbꞌiren najtir toit net, Niwinquiraret Dios. ¿Cocha anon tuaꞌ insutpa inwira oꞌtot xeꞌ erach otronyajr?’ Bꞌan cay imbꞌijnu.
JON 2:5 Pues e nuxi jaꞌ cay uxojyren inyajrer y cay uyarien esto tiaꞌ más intam e jaꞌ, y e sian cꞌopot lo que ayan macuir e nuxi jaꞌ cay ubꞌacruꞌ ubꞌa tanior.
JON 2:6 Y muctzꞌa ixien esto tiaꞌ ayan ucajyesnibꞌir e witzir, y cay imbꞌijnu que turenix tama e lugar tiaꞌ aquetpobꞌ e sian chamenobꞌ. Pero net, Niwinquiraret xeꞌ jax Nidiosiret, ixiet acorpesen tama e chamer.
JON 2:7 Y conda cꞌotoy innata que nicuxtar war alocꞌoy tamaren sutpa incꞌajpeset otronyajr, Niwinquiraret Dios, y lo que cay incꞌajti tacaret cꞌotoy toit tiaꞌ turet tama oꞌtot xeꞌ erach, y acorpesen.
JON 2:8 Y cay imbꞌijnu tama tin e uyujtzꞌiobꞌ ut e chamen diosobꞌ y cꞌotoy innata que tunor tin e axin uchiobꞌ cocha era war uxejbꞌiobꞌ ut e cꞌunersiaj lo que erer ani uchꞌamiobꞌ tuaꞌ Cadiosir.
JON 2:9 Pero nen cꞌanto incꞌaywijres toit taca meyra tzayer y cꞌani inxin inchamse inteꞌ arac tuaꞌ imputa toit, y cꞌani acꞌapa inche tunor lo que cay inwaret que bꞌan tuaꞌ inche, Niwinquiraret Dios. Pues jax taca net xeꞌ uyubꞌiet icorpesian,” che e Jonás.
JON 2:10 Y de allí Cawinquirar Dios uyare e nuxi chay tuaꞌ uxeꞌ e Jonás esto tama e taquin jiꞌ lo que ayan tutiꞌ e nuxi jaꞌ.
JON 3:1 Entonces Cawinquirar Dios sutpa ojron taca e Jonás otronyajr y che:
JON 3:2 “Jonás, achpen quiqui esto tama e nuxi chinam Nínive, y checsun tut e gente yajaꞌ lo que war inwaret era”, che Cawinquirar Dios.
JON 3:3 Entonces e Jonás ixin esto tama e chinam Nínive, bꞌan cocha arobꞌna tuaꞌ uche umen Cawinquirar Dios. Pues e Nínive jax inteꞌ chinam xeꞌ nojta, y tamar era tin e cꞌani axin uwira tunor or e chinam era aquetpa tuaꞌ axana uxteꞌ día tuaꞌ taca uwira tunor.
JON 3:4 Entonces e Jonás ochoy tama e chinam y cay xana tama tunor e día y de allí cay uchecsu tut e gente axin taca inteꞌ nuxi nuc y che: “Pues conda acꞌapa anumuy cuarenta día cꞌani acꞌapa atijresna tunor e nuxi chinam era umen Cawinquirar Dios”, che e Jonás.
JON 3:5 Entonces tunor tin e turobꞌ tama e chinam Nínive, cay cꞌubꞌseyanobꞌ tama uyojroner e Dios lo que checsuna umen e Jonás, y cay uyactobꞌ tuaꞌ awiobꞌ, y cay ulapiobꞌ e bꞌujc xeꞌ jarbꞌir taca e succhij tuaꞌ aquetpa chequer que war aquetpobꞌ tzajtaca utobꞌ tamar e mabꞌambꞌanir lo que cay uchiobꞌ. Pues bꞌan cay uchiobꞌ e nucta gente y bꞌan uchiobꞌ e bꞌiqꞌuit maxtac ubꞌan.
JON 3:6 Y conda cꞌotoy unata tama tunor era tin e rey tama e chinam era, ecmay locꞌoy tama uturtar y ulocse ubꞌujc xeꞌ galan atzꞌapruma ut y ulapi e bꞌujc xeꞌ jarbꞌir taca e succhij ubꞌan, y uyari e tan tama ujor tuaꞌ aquetpa chequer que tzajtaca ut tamar e mabꞌambꞌanir lo que cay uche.
JON 3:7 Y nacpat era e rey y tunor uyajcꞌamparobꞌ cay uyebꞌtobꞌ ixin inteꞌ checsuyaj tut tunor e gente tama e chinam y che: “Mamajchi tuaꞌ aweꞌ y matucꞌa tuaꞌ uyuchꞌiobꞌ, y mamajchi tuaꞌ uwese uyaracꞌobꞌ y nien machi tuaꞌ uyajcꞌu e jaꞌ tuaꞌ uyuchꞌiobꞌ,
JON 3:8 sino que lapic e bꞌujc xeꞌ jarbꞌir taca e succhij tuaꞌ aquetpa chequer que tzajtaca iut tamar e mabꞌambꞌanir lo que cay iche upater e Dios, y cꞌajtinic taca e Dios taca tunor iwalma. Y actanic tuaꞌ iche e mabꞌambꞌanir inteꞌ intiox, y actanic tuaꞌ iche e tzꞌojyir upater e inmojr.
JON 3:9 Pues bꞌajcꞌat tamar era e Dios axin acꞌumpa tacaron, y axin asisa uqꞌuijnar capater, y bꞌan cocha era machi tuaꞌ acꞌapa usation.” Bꞌan che e checsuyaj lo que uyebꞌtobꞌ ixin e rey taca uyajcꞌamparobꞌ tut tunor e gente tama e chinam era.
JON 3:10 Entonces conda Cawinquirar Dios cay uwira que tunor e gente tama e chinam Nínive cay uyactobꞌ tuaꞌ uchiobꞌ e mabꞌambꞌanir, cꞌunlan uyalma tacarobꞌ y ubꞌijnu que machi ixto tuaꞌ acꞌapa usati tunor e chinam era bꞌan cocha war ani ubꞌijnu tuaꞌ uche.
JON 4:1 Pues e Jonás machi tzay tamar lo que uche e Dios, y tamar era qꞌuijna meyra.
JON 4:2 Y war aqꞌuecran cay uyare e Dios cocha era y che: —O Niwinquiraret Dios, jax era lo que cay imbꞌijnu que bꞌan tuaꞌ ache conda turento tama nilugar, y tamar era locꞌoy ajnien tuaꞌ inxin esto tama e lugar Tarsis. Pues cocha nen warix innata que net incꞌun awirnar, y que machi iqꞌuijna wacchetaca y que nojta acꞌunersiaj tut tunor e gente tara tor e rum y que tamar era conda aware que cꞌani awebꞌta inteꞌ nuxi jatzꞌuar tama ujor e gente tama e chinam era, innata que cꞌani isutpa abꞌijnu otronyajr tuaꞌ machi acꞌapa asati tunorobꞌ.
JON 4:3 Y tamar era, Niwinquiraret Dios, inwaret tuaꞌ alocse nicuxtar. Taniut nen más ani bueno tuaꞌ intaca inchamay y que machi ixto tuaꞌ inturuan, che e Jonás.
JON 4:4 Entonces Cawinquirar Dios sutpa ojron taca e Jonás otronyajr y che: —Jonás, pues majax bueno tuaꞌ iqꞌuijna tama tunor era, che Cawinquirar Dios.
JON 4:5 Entonces e Jonás locꞌoy tama e chinam y ixin turuan tut e rum tama e lugar tiaꞌ atobꞌoy watar e qꞌuin. Y yajaꞌ taca uche inteꞌ chuchuꞌ champa y turuan tamar, war achꞌujcsan tuaꞌ uwira tucꞌa tuaꞌ anumuy tama e chinam Nínive, jay cꞌanto atijresna umen e Dios conda acꞌapa e cuarenta día era.
JON 4:6 Y de allí Cawinquirar Dios uche cuxpa inteꞌ chꞌan xeꞌ nojta uyopor xeꞌ chꞌi wacchetaca tuyejtzꞌer yer uchampa e Jonás, y jaxir cay turuan yebꞌar usombrir e chꞌan tuaꞌ machi apurutna umen e qꞌuin, y tamar era cay tzay meyra e Jonás que chꞌi yer e chꞌan era.
JON 4:7 Pero conda sacojpa tama otronteꞌ día Cawinquirar Dios uche locꞌoy incojt ubꞌiꞌ xeꞌ cay ucꞌuxi e chꞌan y tamar era taqui.
JON 4:8 Y conda tobꞌoy locꞌoy e qꞌuin e Dios uyebꞌta tari inteꞌ nuxi icꞌar xeꞌ apurutsan xeꞌ tari tiaꞌ atobꞌoy watar e qꞌuin, y cay purutna ujor e Jonás umen e qꞌuin y jaxir cay jayjayran umen e qꞌuin, y tamar era cay ubꞌijnu que cꞌanix achamay otronyajr. Entonces ojron jax taca y che: —Pues taniut nen más ani bueno tuaꞌ inchamay, che e Jonás.
JON 4:9 Entonces sutpa ojron e Dios otronyajr y che: —O ¿war ca iqꞌuijna tamar taca que taqui e chꞌan? che e Dios. Entonces ojron e Jonás otronyajr y che: —Bꞌan yaꞌ. War inqꞌuijna meyra este que cꞌanix inchamay, che e Jonás.
JON 4:10 Entonces ojron Cawinquirar Dios otronyajr y che: —Pues majax net xeꞌ apaqꞌui e chꞌan era, y nien majax net xeꞌ ache aꞌchꞌi. Pues tamar taca inteꞌ acbꞌar cuxpa, y tama otronteꞌ acbꞌar taqui. Pues net war ayajta ut yer e chꞌan xeꞌ taqui, y net abꞌijnu que ucꞌani ani tuaꞌ incorpes.
JON 4:11 Y nen, ¿machi ca erer inyajta ut tin e turobꞌ tama e nuxi chinam Nínive tuaꞌ incorpesobꞌ jay bꞌan imbꞌijnu inche? Pues jax inteꞌ nuxi chinam tiaꞌ ayan más que 120,000 maxtac xeꞌ machito unatobꞌ tin unojcꞌabꞌ y tin utzꞌejcꞌabꞌ. Y ayan meyra aracꞌobꞌ tama e chinam era ubꞌan, che e Dios uyare e Jonás. Tara acꞌapa tunor niwojroner, che e Jonás.
MAT 1:1 Pues jax era tunor ucꞌabꞌobꞌ utata viejobꞌirobꞌ Cawinquirar Jesucristo. Tari uchꞌajnarir e Jesucristo tama e David y tama e Abraham.
MAT 1:2 Pues entonces uyunen e Abraham ucꞌabꞌa Isaac, y uyunen e Isaac era ucꞌabꞌa Jacob, y uyunen e Jacob era ucꞌabꞌa Judá, y ayanto cora usacunobꞌ y uwijtzꞌinobꞌ e Judá era ubꞌan.
MAT 1:3 Y umaxtac e Judá era ucꞌabꞌobꞌ Fares y Zara. Y utuꞌ e Fares y e Zara era ucꞌabꞌa Tamar. Y uyunen e Fares era ucꞌabꞌa Esrom, y uyunen e Esrom era ucꞌabꞌa Aram.
MAT 1:4 Y uyunen e Aram era ucꞌabꞌa Aminadab, y uyunen e Aminadab era ucꞌabꞌa Naasón, y uyunen e Naasón era ucꞌabꞌa Salmón,
MAT 1:5 y uyunen e Salmón era ucꞌabꞌa Booz. Pues utuꞌ e Booz era ucꞌabꞌa Rahab. Y uyunen e Booz era ucꞌabꞌa Obed. Pues utuꞌ e Obed era ucꞌabꞌa Rut. Y uyunen e Obed era ucꞌabꞌa Isaí,
MAT 1:6 y uyunen e Isaí era ucꞌabꞌa David. Pues e David era jax xeꞌ quetpa rey. Y uyunen e David era ucꞌabꞌa Salomón. Pues utuꞌ e Salomón era jax uwixcar ani e Urías xeꞌ chamesna.
MAT 1:7 Entonces uyunen e Salomón era ucꞌabꞌa Roboam, y uyunen e Roboam era ucꞌabꞌa Abías, y uyunen e Abías era ucꞌabꞌa Asa,
MAT 1:8 y uyunen e Asa era ucꞌabꞌa Josafat, y uyunen e Josafat era ucꞌabꞌa Joram, y uyunen e Joram era ucꞌabꞌa Uzías,
MAT 1:9 y uyunen e Uzías era ucꞌabꞌa Jotam, y uyunen e Jotam era ucꞌabꞌa Acaz, y uyunen e Acaz era ucꞌabꞌa Ezequías,
MAT 1:10 y uyunen e Ezequías era ucꞌabꞌa Manasés, y uyunen e Manasés era ucꞌabꞌa Amón, y uyunen e Amón era ucꞌabꞌa Josías.
MAT 1:11 Y uyunen e Josías era ucꞌabꞌa Jeconías. Pues ayanto meyra uyermanuobꞌ e Jeconías era conda qꞌuejcha ixin tunor e gente tuaꞌ e Israel esto tama e lugar Babilonia.
MAT 1:12 Y conda cꞌapa qꞌuejcha ixin tunor e gente tuaꞌ e Israel esto tama e lugar Babilonia cay cuxpa más utata viejobꞌirobꞌ Cawinquirar Jesucristo xeꞌ jax era: Uyunen e Jeconías ucꞌabꞌa Salatiel, y uyunen e Salatiel era ucꞌabꞌa Zorobabel,
MAT 1:13 y uyunen e Zorobabel era ucꞌabꞌa Abiud, y uyunen e Abiud era ucꞌabꞌa Eliaquim, y uyunen e Eliaquim era ucꞌabꞌa Azor,
MAT 1:14 y uyunen e Azor era ucꞌabꞌa Sadoc, y uyunen e Sadoc era ucꞌabꞌa Aquim, y uyunen e Aquim era ucꞌabꞌa Eliud,
MAT 1:15 y uyunen e Eliud era ucꞌabꞌa Eleazar, y uyunen e Eleazar era ucꞌabꞌa Matán, y uyunen e Matán era ucꞌabꞌa Jacob,
MAT 1:16 y uyunen e Jacob era ucꞌabꞌa José. Pues e José era jax uviejo e María xeꞌ jax utuꞌ e Jesús. Y e Jesús era jax xeꞌ arobꞌna e Cristo.
MAT 1:17 Entonces tama tunor utata viejobꞌirobꞌ e Cristo ayan catorce utata viejobꞌirobꞌ xeꞌ cayespa tama e Abraham esto tama e David. Y de allí ayan otro catorce utata viejobꞌirobꞌ xeꞌ cayespa tama e David este que qꞌuejcha ixiobꞌ tunor e gente tuaꞌ e Israel esto tama e lugar Babilonia. Y de allí ayan otro catorce utata viejobꞌirobꞌ xeꞌ cayespa tama e tiempo conda qꞌuejcha ixiobꞌ e gente tuaꞌ e Israel esto tama e lugar Babilonia este que cuxpa e Cristo.
MAT 1:18 Pues entonces jax era e ojroner tama e tiempo conda cuxpa e Jesucristo. Pues utuꞌ e Jesucristo ucꞌabꞌa María, y jaxir turix uyojroner tuaꞌ anujbꞌi taca inteꞌ sitz xeꞌ ucꞌabꞌa José. Pero conda merato aturuan taca e José checta que ayan uyar e María, pero uyar era checta umen ucꞌotorer Unawalir e Dios.
MAT 1:19 Y motor que quetpix tuaꞌ anujbꞌiobꞌ watar e día, pero cocha e José war axana erach tut e Dios, war ubꞌijnu tuaꞌ uyacta e María tzꞌustaca umen que machi cꞌani usubꞌajres ut tut e gente.
MAT 1:20 Y bꞌan war ubꞌijnu uche e José conda checta inteꞌ ángel tuaꞌ Cawinquirar tut tama inteꞌ uwayac y che: “José xeꞌ sitzbꞌiret tuaꞌ e rey David, ira ibꞌacta tuaꞌ achꞌami e María tuaꞌ inujbꞌi tacar, porque cꞌani inwaret era que e sitz xeꞌ axin acuxpa tama e María majax tuaꞌ inteꞌ winic sino que tari tamar Unawalir e Dios.
MAT 1:21 Pues e María axin aqꞌuechuan inteꞌ usitz y net tuaꞌ aturbꞌa ucꞌabꞌa Jesús porque jaxir tuaꞌ axin ucorpes tunor uchinam tama umabꞌambꞌanirobꞌ. Bꞌan war che e ojroner Jesús”, che e ángel.
MAT 1:22 Pues tunor era numuy tuaꞌ acꞌapa achempa lo que chꞌar tzꞌijbꞌabꞌir tama uyojroner e Dios umen inteꞌ profeta xeꞌ turuan tama e onian tiempo xeꞌ che:
MAT 1:23 E ijchꞌoc era tuaꞌ aquetpa awawan taca uyar xeꞌ jax inteꞌ sitz. Y e sitz era tuaꞌ aturbꞌana ucꞌabꞌa Emanuel xeꞌ war che: “Turu e Dios tacaron.” Bꞌan chꞌar tzꞌijbꞌabꞌir tama uyojroner e Dios.
MAT 1:24 Entonces conda bꞌixcꞌa e José tama uwayac, ixin uche bꞌan cocha arobꞌna umen e ángel tuaꞌ Cawinquirar, y ixin uchꞌami e María y nujbꞌi tacar.
MAT 1:25 Pero machito uchꞌami ubꞌobꞌ este que cuxpa usitz e María. Y e José uturbꞌa ucꞌabꞌa Jesús.
MAT 2:1 Pues entonces e Jesús cuxpa tama e chinam Belén tama e departamento Judea tama e tiempo conda war acꞌotori inteꞌ rey xeꞌ ucꞌabꞌa Herodes. Pues jax tama e tiempo era conda cora winicobꞌ xeꞌ sabiobꞌ xeꞌ meyra unatobꞌ tama e lucero cꞌotoyobꞌ tama e chinam Jerusalem tiaꞌ turu e rey Herodes. Pues e winicobꞌ era tariobꞌ tama e lugar tiaꞌ atobꞌoy watar e qꞌuin.
MAT 2:2 Y cꞌotoyobꞌ tut e rey Herodes y cay uyubꞌiobꞌ tuaꞌ y chenobꞌ: —¿Tiaꞌ turu e rey tuaꞌ e gente tuaꞌ e Israel xeꞌ wartocto acuxpa? Porque non cawira ejpray ut ulucero tiaꞌ atobꞌoy watar e qꞌuin y tamar era tarion tuaꞌ cojytzꞌi ut, chenobꞌ e sabiobꞌ era.
MAT 2:3 Pero conda e rey Herodes cꞌapa uyubꞌi tunor e ojroner era cay jayjayran este que bꞌacta tama uyalma. Y bꞌan numuy taca tunor e gente xeꞌ turobꞌ tama e chinam Jerusalem ubꞌan.
MAT 2:4 Entonces e Herodes ixin upejca uwinquirobꞌ e inmojr sacerdotiobꞌ y tunor e ajcanseyajobꞌ tama uley e Moisés, y cay uyubꞌi tuobꞌ y che: “¿Tiaꞌ tuaꞌ acuxpa e Cristo?”
MAT 2:5 Entonces ojronobꞌ y chenobꞌ: —Cꞌani acuxpa e Cristo tama e chinam Belén tama e departamento Judea, porque bꞌan chꞌar tzꞌijbꞌabꞌir umen e profeta que:
MAT 2:6 E chuchu chinam Belén xeꞌ turu tama e departamento Judea más ayan ucꞌampibꞌir que e inmojr nuquir chinamobꞌ porque tamar e chuchu chinam era cꞌani acuxpa tin e tuaꞌ acꞌotori tujor tunor e gente tama e Israel. Bꞌan chꞌar tzꞌijbꞌabꞌir tama uyojroner e Dios, che e nuquir winicobꞌ era.
MAT 2:7 Entonces e Herodes upejca e sabiobꞌ otronyajr, pero mucur taca uche. Y cay uyubꞌi tuobꞌ que tucꞌa día y que tucꞌa mes y que tucꞌa año conda cay uwirobꞌ ejpray ut e lucero xeꞌ cay uchecsu tutobꞌ que cuxpa e Cristo.
MAT 2:8 Entonces utzacre ixin e sabiobꞌ era esto tama e chinam Belén y che: —Quiquic isicbꞌa tuaꞌ iwira tiaꞌ aquetpa e sitz, y conda itajwi tiaꞌ turu, iwareniquen tuaꞌ uyubꞌien inxin unjtzꞌi ut nen ubꞌan, che e Herodes.
MAT 2:9 Entonces conda e sabiobꞌ cꞌapa uyubꞌiobꞌ uyojroner e Herodes, locꞌoy ixiobꞌ. Y e lucero lo que cay uwirobꞌ tama ulugarobꞌ cay xana ixin tutobꞌ tuaꞌ uwirse e bꞌir este que cꞌotoy quetpa wawan tujor e otot tiaꞌ turu e sitz.
MAT 2:10 Pues conda e sabiobꞌ cay uwirobꞌ ut e lucero era cay tzayobꞌ meyra.
MAT 2:11 Entonces conda utajwiobꞌ e otot tiaꞌ turu e sitz ochoyobꞌ macu y cay uwirobꞌ yar e sitz xeꞌ qꞌuecher umen utuꞌ xeꞌ jax e María. Entonces cotuanobꞌ tut e sitz y cay uyujtzꞌiobꞌ ut. Y de allí cay uyajcꞌuobꞌ lo que qꞌuecher umenerobꞌ inteꞌ intiobꞌ y cay sijpobꞌ taca e chuchu sitz era y cay uyajcꞌuobꞌ e oro y e ujtzꞌubꞌ xeꞌ ojtzꞌun ubꞌutzꞌar y e perfume xeꞌ meyra atujri.
MAT 2:12 Pero cocha arobꞌnobꞌ umen e Dios tama inteꞌ wayac que machix tuaꞌ asutpobꞌ tut e Herodes otronyajr, sutpa ixiobꞌ tama ulugar tama otronteꞌ bꞌir.
MAT 2:13 Entonces conda cꞌapa ixiobꞌ tunor e sabiobꞌ era checta inteꞌ ángel tuaꞌ Cawinquirar Dios tama uwayac e José y che: “Achpen loqꞌuen taca yar e sitz y utuꞌ y quiquic ajner coner era esto tama e lugar Egipto y ira ixlocꞌoy tama e lugar yajaꞌ este que inwaret, porque e Herodes war usicbꞌa yar e sitz era tuaꞌ uchamse”, che e ángel tama uwayac e José.
MAT 2:14 Entonces achpa e José y uchꞌami yar e sitz taca utuꞌ y locꞌoyobꞌ tama e acbꞌar y ixiobꞌ esto tama e lugar Egipto.
MAT 2:15 Y yajaꞌ turuanobꞌ este que chamay e Herodes. Pues tunor era numuy tuaꞌ acꞌapa achempa lo que arobꞌna umen Cawinquirar Dios tama inteꞌ profeta tiaꞌ che que: “Nen inware nisitz tuaꞌ alocꞌoy tama e lugar Egipto.” Bꞌan chꞌar tzꞌijbꞌabꞌir umen inteꞌ profeta.
MAT 2:16 Entonces conda e Herodes cꞌotoy unata que intaca majresna umen e sabiobꞌ era, qꞌuijna y ixin uyare tuaꞌ achamesna tunor e bꞌiqꞌuit tejromtac xeꞌ merato utzꞌacsiobꞌ chateꞌ año xeꞌ turobꞌ tama e chinam Belén y xeꞌ turobꞌ tutiꞌ e chinam era ubꞌan. Pues chamesna tunor e bꞌiqꞌuit tejromtac cocha era umen que arobꞌna e Herodes umen e sabiobꞌ que tzꞌacta chateꞌ año conda cay uwirobꞌ ejpray e lucero.
MAT 2:17 Y tamar era cꞌapa chempa lo que chꞌar tzꞌijbꞌabꞌir umen e profeta Jeremías que:
MAT 2:18 Cꞌani oꞌbꞌna meyra aruar tama e lugar Ráma esto acay oꞌbꞌna innajt uyaruarobꞌ. Y tunor e ixictac tama e Israel cay aruobꞌ meyra tamar umaxtac. Y machi achꞌancabꞌa uyalmobꞌ porque chamenix tunor umaxtacobꞌ. Bꞌan chꞌar tzꞌijbꞌabꞌir umen e profeta Jeremías.
MAT 2:19 Pero conda chamay e Herodes checta inteꞌ uyangel Cawinquirar Dios tut e José tama inteꞌ wayac conda turuto tama e lugar Egipto y che:
MAT 2:20 —Achpen chꞌama e sitz taca utuꞌ y sutpenic quiquic tama e lugar Israel, porque cꞌapa chamay tin e cay uyare tuaꞌ achamesna ani asitz, che e ángel.
MAT 2:21 Entonces achpa e José y uqꞌueche ixin e sitz taca utuꞌ y sutpa ixiobꞌ esto tama e lugar Israel otronyajr.
MAT 2:22 Pero conda e José cꞌotoy unata que war acꞌotori uyunen e Herodes xeꞌ ucꞌabꞌa Arquelao tama e departamento Judea, bꞌacta. Y cocha jaxir wayqꞌuijresna umen e Dios que imbꞌacꞌajr tuaꞌ axin tama e departamento Judea, ixin esto tama e departamento Galilea.
MAT 2:23 Y conda cꞌotoyobꞌ, ixiobꞌ tuaꞌ aturuanobꞌ tama e chinam Nazaret. Y bꞌan numuy tuaꞌ acꞌapa achempa lo que arobꞌna umen cora profetobꞌ que e Jesús tuaꞌ aꞌrobꞌna que jax inteꞌ nazareno.
MAT 3:1 Pues entonces ayan inteꞌ winic xeꞌ ucꞌabꞌa Juan xeꞌ ajchꞌuymar xeꞌ ixin tama inteꞌ choquem lugar tama e departamento Judea tuaꞌ uchecsu uyojroner e Dios tut e gente.
MAT 3:2 Y jaxir che: —Turbꞌanic ibꞌa tuaꞌ uꞌstesna iwirnar y cꞌupseyanenic tama e Dios porque watarix e día conda cꞌani acꞌotori Cadiosir tara tor e rum, che e Juan.
MAT 3:3 Pues e Juan era jax xeꞌ cay ojron e profeta Isaías tamar conda che: Ayan inteꞌ winic xeꞌ war oꞌjron taca inteꞌ nuxi nuc tama e choquem lugar y che: “Ustesic e bꞌir tuaꞌ Cawinquirar; pasic inteꞌ bꞌir tut jaxir xeꞌ war che que e gente ucꞌani tuaꞌ uyustes uyalmobꞌ tuaꞌ uchꞌamiobꞌ ucꞌabꞌa Cawinquirar.” Bꞌan chꞌar tzꞌijbꞌabꞌir tama uyojroner e Dios.
MAT 3:4 Y ubꞌujc e Juan chembꞌir taca utzutzer inteꞌ arac xeꞌ ucꞌabꞌa camello y ayan inteꞌ ucajchibꞌ unac xeꞌ chembꞌir taca e qꞌuewer. Y lo que ucꞌuxi jax lo que ayan tama e cꞌopot cocha e sajc y e chabꞌ lo que achecta tama e cꞌopot.
MAT 3:5 Y meyra gente ixiobꞌ tuaꞌ uyubꞌiobꞌ lo que war uchecsu e Juan era tama e Dios. Y ayan tin e tariobꞌ tama e chinam Jerusalem, y ayan tin e tariobꞌ tama tunor or e lugar tama e departamento Judea, y ayan tin e tariobꞌ tama e lugar tiaꞌ anumuy e xucur Jordán.
MAT 3:6 Y tin e ixin uchecsu umabꞌambꞌanir tut e Juan, war achꞌujyobꞌ inteꞌ intiobꞌ umener tama e xucur Jordán.
MAT 3:7 Pero conda e Juan uwira que war ayopobꞌ meyra winicobꞌ tut tuaꞌ achꞌujyobꞌ xeꞌ tuobꞌ e grupo religioso xeꞌ ucꞌabꞌa fariseo y xeꞌ tuobꞌ e grupo religioso xeꞌ ucꞌabꞌa saduceo cay ojron y che: —¡Nox larox cocha incojt chan xeꞌ war alocꞌoy ajni tut inteꞌ cꞌajc tuaꞌ machi apurutna, y bꞌanox nox! ¿Chi uyareox tuaꞌ ixyopa tara taniut tuaꞌ ixcorpa tuaꞌ machi ichꞌami uqꞌuijnar e Dios xeꞌ watar wacchetaca era?
MAT 3:8 Ustesic ibꞌa tut e Dios y checsunic ibꞌa tut e gente que sutpox tut e Dios.
MAT 3:9 Y ira ibꞌijnu tuaꞌ itattzꞌi ibꞌa umen que nox sitzbꞌirox tuaꞌ e Abraham xeꞌ turuan tama e onian tiempo y que tamar taca era tuaꞌ ixcorpa, porque majax bꞌan. Porque jay e Dios ucꞌani ani más umaxtac e Abraham erer ani usuti e sian tun era tuaꞌ aquetpobꞌ más umaxtacobꞌ e Abraham.
MAT 3:10 Nox larox cocha inteꞌ teꞌ, y cꞌani inwareox era que chꞌarix e hacha tuaꞌ ucucruox porque tunor e teꞌ xeꞌ machi acꞌawan ucꞌani tuaꞌ acucurna y tuaꞌ ayajra tama e cꞌajc.
MAT 3:11 Pues nen era war inchꞌuyma taca e jaꞌ tuaꞌ ichectes ibꞌa que iwactix tunor imabꞌambꞌanir y que sutpoxix tut e Dios. Pero watar otronteꞌ tanipat xeꞌ axin uchꞌuyox taca Unawalir e Dios y taca e cꞌajc. Y jaxir más nojta ucꞌotorer que nen. Porque nen ma tawaren nien tuaꞌ imbꞌani ut uxanabꞌ porque meyra ayan ucꞌotorer jaxir.
MAT 3:12 Pues jaxir lar tacar inteꞌ winic xeꞌ war uwajri utrigo tuaꞌ alocꞌoy usojqꞌuir y tuaꞌ aquetpa jax taca ut. Y tamar era war uꞌri e trigo tichan taca inteꞌ upala tuaꞌ aloqꞌuesna usojqꞌuir umen e icꞌar, pero ut e trigo era xeꞌ war awajrna war acꞌaxi tama ut e rum. Y ut e trigo xeꞌ wajrbꞌir war umorojse tuaꞌ uyari tama ugranero, pero usojqꞌuir war umorojse tuaꞌ uyari tama inteꞌ cꞌajc xeꞌ ma tiaꞌ tuaꞌ atajpa. Pues bꞌan cocha era tuaꞌ uxere e gente conda acꞌotoy e día tuaꞌ e juicio, che e Juan.
MAT 3:13 Pues entonces locꞌoy e Jesús tama e departamento Galilea y ixin esto tama e xucur Jordán tiaꞌ turu e Juan tuaꞌ achꞌujya umener.
MAT 3:14 Pero e Juan machi ani ucꞌani. Y tamar era ojron taca e Jesús y che: —Nen ani tuaꞌ inchꞌujya amener, y majax nen tuaꞌ inchꞌuyet, che e Juan.
MAT 3:15 Pero che e Jesús: —Cꞌani inwaret tuaꞌ awacta bꞌan taca, porque ucꞌani tuaꞌ cache bꞌan taca cocha ucꞌani Cadiosir, che e Jesús. Entonces e Juan uche lo que arobꞌna umen e Jesús
MAT 3:16 y uchꞌuyi e Jesús. Y conda locꞌoy e Jesús macuir e jaꞌ uwira que pascꞌa ut e qꞌuin tichan, y uwira Unawalir e Dios ecmay tari turuan tamar bꞌan cocha uwirnar incojt sacsac mut.
MAT 3:17 Y tamar era checta inteꞌ nuxi nuc xeꞌ tari tichan xeꞌ che: “Jax era Niunen xeꞌ inyajta ut y xeꞌ intzay inwira”, che e nuc era xeꞌ tari tut e qꞌuin tichan.
MAT 4:1 Entonces e Jesús qꞌuejcha ixin tama inteꞌ choquem lugar umen Unawalir e Dios tiaꞌ tuaꞌ apijchna ani umen e diablo.
MAT 4:2 Y yajaꞌ quetpa e Jesús cuarenta día y matucꞌa cay ucꞌuxi tama e día y nien tama e acbꞌar, pero conda cꞌapa e cuarenta día era jajpna umen e winar.
MAT 4:3 Y tamar era cꞌotoy e diablo tut e Jesús tuaꞌ upijchꞌi ani y che: —Jay erachet que net jax Uyunenet e Dios aren e tun era tuaꞌ aquetpa ingojr pan, che e diablo.
MAT 4:4 Pero e Jesús che: —Chꞌar tzꞌijbꞌabꞌir tama uyojroner e Dios que: “Inteꞌ winic machi tuaꞌ aturuan tamar taca e pan, sino que tamar inteꞌ inteꞌ ojroner lo que alocꞌoy tama uyej e Dios”, che e Jesús.
MAT 4:5 Entonces e Satanás uqꞌueche ixin e Jesús esto tama e chinam Jerusalem y utꞌabꞌse uturbꞌa tujor e templo.
MAT 4:6 Entonces ojron e diablo y che: —Jay erachet que net jax Uyunenet e Dios, tobꞌen quiqui ta rum porque chꞌar tzꞌijbꞌabꞌir tama uyojroner e Dios que: E Dios uyebꞌta watar uyangelobꞌ tuaꞌ ucojcuet. Turobꞌix tuaꞌ uchuquiet taca ucꞌabꞌobꞌ tuaꞌ machi ayobꞌi oꞌc tama ingojr tun. Bꞌan chꞌar tzꞌijbꞌabꞌir tama uyojroner e Dios, che e diablo.
MAT 4:7 Y e Jesús uyare e diablo y che: —Machi, porque chꞌar tzꞌijbꞌabꞌir ubꞌan que: “Ira amajres Adiosir tuaꞌ uche e mabꞌambꞌanir”, che e Jesús.
MAT 4:8 Entonces e diablo uqꞌueche ixin e Jesús esto tujor inteꞌ nuxi witzir y cay uwirse wacchetaca tunor e chinamobꞌ lo que ayan tama tunor or e rum taca tunor lo que galan tamar.
MAT 4:9 Y che e diablo: —Chꞌujcun awira tunor e nuxi lugar era. Pues nen cꞌani inwajqꞌuet tunor era jay net icotuan ojytzꞌi niut, che e diablo.
MAT 4:10 Y che e Jesús: —Loqꞌuen tara Satanás, porque chꞌar tzꞌijbꞌabꞌir tama uyojroner e Dios que: “Ojytzꞌin ut Awinquirar Dios y chen jax taca lo que ucꞌani jaxir”, che e Jesús.
MAT 4:11 Entonces locꞌoy ajni e diablo tut e Jesús, y wacchetaca tariobꞌ cora angelobꞌ tuaꞌ utacriobꞌ e Jesús.
MAT 4:12 Pues conda e Jesús cꞌotoy unata que osena e Juan tama e cárcel sutpa ixin esto tama e departamento Galilea otronyajr.
MAT 4:13 Pero machi quetpa tama e chinam Nazaret sino que ixin tuaꞌ aturuan tama e chinam Capernaum xeꞌ turu tutiꞌ inteꞌ nuxi jaꞌ. Y jax e lugar era tiaꞌ turuanobꞌ e Zabulón y e Neftalí tama e onian tiempo.
MAT 4:14 Bꞌan numuy tuaꞌ acꞌapa achempa lo que chꞌar tzꞌijbꞌabꞌir tama uyojroner e Dios umen e profeta Isaías:
MAT 4:15 Ayan meyra gente xeꞌ aturuanobꞌ tama e lugar xeꞌ tuaꞌ ani e Zabulón y xeꞌ aturuanobꞌ tama e lugar xeꞌ tuaꞌ ani e Neftalí, y ayan tin e aturuanobꞌ tutiꞌ e nuxi jaꞌ y tin e aturuanobꞌ teinxejr e xucur Jordán, y tin e aturuanobꞌ tama e departamento Galilea xeꞌ majax tuobꞌ e Israel.
MAT 4:16 Pues e gente era quetpobꞌ tamar lo que lar tacar inteꞌ incsibꞌaner xeꞌ war che que ma chequer tutobꞌ lo que erach, pero era cay uwirobꞌ e janchꞌaquenar xeꞌ ejpray meyra. Y tin e aturuanobꞌ tama e choquem lugar xeꞌ intaca war ucojcobꞌ uchamer, cꞌotoy cuxpobꞌ otronyajr conda uwirobꞌ e janchꞌaquenar era xeꞌ jax lo que erach. Bꞌan chꞌar tzꞌijbꞌabꞌir tama uyojroner e Dios.
MAT 4:17 Pues tama e tiempo era e Jesús cay uchecsu uyojroner e Dios y che: —Ustesic ibꞌa tut e Dios porque watarix e día conda Cadiosir tuaꞌ acꞌotori tara tor e rum, che e Jesús.
MAT 4:18 Pues tama inyajr conda e Jesús war axana tutiꞌ e nuxi jaꞌ xeꞌ ucꞌabꞌa Galilea uwira chateꞌ ijtzꞌimbꞌirobꞌ. Inteꞌ ucꞌabꞌa Simón xeꞌ ucꞌabꞌa Pedro ubꞌan, y inteꞌ ucꞌabꞌa Andrés. Jaxirobꞌ ajcoromobꞌ xeꞌ war upojchiobꞌ uchijrobꞌ tama e jaꞌ.
MAT 4:19 Entonces ojron e Jesús y che: —Laric tanipat y nen tuaꞌ inwajcꞌox e cꞌotorer tuaꞌ uyubꞌiox ixcorma tamar, pero mixto jax chay tuaꞌ ichuqui, sino que winicobꞌ tuaꞌ ipejca tamar uyojroner e Dios, che e Jesús.
MAT 4:20 Y wacchetaca uyactobꞌ uchijrobꞌ y ixiobꞌ taca e Jesús.
MAT 4:21 Y nacpat era conda e Jesús warto axana tutiꞌ e nuxi jaꞌ era uwira otro chateꞌ ijtzꞌimbꞌirobꞌ. E sacumbꞌir ucꞌabꞌa Santiago y e ijtzꞌimbꞌir ucꞌabꞌa Juan. Y utatobꞌ ucꞌabꞌa Zebedeo. Y turobꞌ tama ubarcuobꞌ taca utatobꞌ, war uyustesobꞌ uchijrobꞌ conda checta tari e Jesús tutiꞌ e jaꞌ. Y tamar era e Jesús upejcobꞌ tuaꞌ axiobꞌ tupat jaxir.
MAT 4:22 Y wacchetaca uyactobꞌ ubarcuobꞌ y utatobꞌ tuaꞌ axiobꞌ tupat e Jesús.
MAT 4:23 Entonces ixin e Jesús tama tunor or e lugar tama e departamento Galilea, war acanseyan tama tunor e sian sinagoga. Y war ucansiobꞌ que watarix e día conda Cadiosir tuaꞌ watar tuaꞌ acꞌotori tara tor e rum, y war utzꞌacpes tunor tin e war ucojco inteꞌ inteꞌ muaquir.
MAT 4:24 Y cay unatobꞌ tunor e gente tama e departamento Siria que e Jesús ayan ucꞌotorer. Entonces cay qꞌuejcha cꞌotoyobꞌ tunor tin e ajmuacobꞌ. Y ayan tin e chucur umen inteꞌ mabꞌambꞌan mein, y ayan tin e intaca achamay achꞌan, y ayan tin e chamen ucuerpo. Pero e Jesús utzꞌacpes tunorobꞌ.
MAT 4:25 Y meyra gente cay xanobꞌ tupat e Jesús. Y tujam tunor e gente era ayan tin e tariobꞌ tama e departamento Galilea, y ayan tin e tariobꞌ tama e departamento Decápolis, y ayan tin e tariobꞌ tama e chinam Jerusalem, y ayan tin e tariobꞌ tama tunor or e departamento Judea, y ayan tin e tariobꞌ teinxejr e xucur Jordán.
MAT 5:1 Entonces conda e Jesús uwira e sian gente era tꞌabꞌay ixin cora tama inteꞌ witzir y turuan. Y uyajcanuarobꞌ cay umorojse ubꞌobꞌ tuyejtzꞌer.
MAT 5:2 Entonces cay ucanse uyajcanuarobꞌ y che:
MAT 5:3 —Chojbꞌesbꞌirobꞌ tunor tin e tzajtaca utobꞌ tama uyalmobꞌ coner porque jaxirobꞌ tuaꞌ acꞌotoy aturuanobꞌ tama uchinam e Dios.
MAT 5:4 ’Chojbꞌesbꞌirobꞌ tunor tin e war atzꞌintzꞌa tama uyalmobꞌ tamar lo que cay uchiobꞌ xeꞌ mabꞌambꞌan porque e Dios tuaꞌ ucꞌunles uyalmobꞌ conda axin acꞌumpa tacarobꞌ.
MAT 5:5 ’Chojbꞌesbꞌirobꞌ tunor tin e war umanxujres ubꞌobꞌ tama uyalmobꞌ coner porque axin uchꞌamiobꞌ tunor or e rum era bꞌan cocha inteꞌ herencia.
MAT 5:6 ’Chojbꞌesbꞌirobꞌ tunor tin e war uyusre uchiobꞌ lo que ucꞌani Cadiosir porque e Dios axin utacre tuaꞌ uchiobꞌ lo que ucꞌani jaxir.
MAT 5:7 ’Chojbꞌesbꞌirobꞌ tunor tin e incꞌun uyalmobꞌ tut e inmojr porque Cadiosir axin uchectes ubꞌa que incꞌun uwirnar tutobꞌ ubꞌan.
MAT 5:8 ’Chojbꞌesbꞌirobꞌ tunor tin e imbꞌutz uyalmobꞌ tut e Dios porque jaxirobꞌ tuaꞌ uwirobꞌ ut e Dios.
MAT 5:9 ’Chojbꞌesbꞌirobꞌ tunor tin e war usisijres tin e war aqꞌuijnobꞌ porque jaxirobꞌ tuaꞌ aꞌrobꞌnobꞌ que jax umaxtacobꞌ e Dios.
MAT 5:10 ’Chojbꞌesbꞌirobꞌ tunor tin e war axejbꞌna utobꞌ tamar taca que war uchiobꞌ lo que ucꞌani Cadiosir porque cꞌani acꞌotoy aturuanobꞌ tama uchinam e Dios.
MAT 5:11 ’Chojbꞌesbꞌirox tunorox xeꞌ war ixcꞌayna y xeꞌ war ixarobꞌna calapir y xeꞌ war ixtujchꞌa tamar lo que machi iche umen taca que ichꞌami nicꞌabꞌa.
MAT 5:12 Tzayjresic ibꞌa meyra porque watar e día conda ixixin ichꞌami inteꞌ nuxi tuanibꞌir tuaꞌ e Dios conda ixixin tichan tut e qꞌuin. Porque bꞌan cꞌaynobꞌ e profetobꞌ xeꞌ turuanobꞌ tama e onian tiempo ubꞌan, che e Jesús.
MAT 5:13 Entonces che e Jesús: —Nox xeꞌ turox tara tor e rum bꞌanox cocha e atzꞌam. Pero jay e atzꞌam apaxran ut mix tucꞌa ucꞌampibꞌir inyajrer, sino que intaca aquetpa tuaꞌ apujsa tut e bꞌir tuaꞌ ateqꞌuerna axin umen e gente.
MAT 5:14 ’Nox xeꞌ turox tara tor e rum bꞌanox cocha inteꞌ cꞌajc xeꞌ aquetpa chequer tut tunor e gente. Pues inteꞌ chinam xeꞌ turu tujor inteꞌ witzir chequer innajt y ma cocha erer umuqui ubꞌa.
MAT 5:15 Mamajchi utzꞌajpes inteꞌ cꞌajc tuaꞌ uwabꞌu yebꞌar inteꞌ cajón, sino que utzꞌajpes tuaꞌ uwabꞌu tichan tiaꞌ tuaꞌ ujanchꞌacnes tunor tin e oꞌchoyobꞌ macuir e otot era.
MAT 5:16 Y tamar era turbꞌanic ibꞌa tuaꞌ ijanchꞌacnes e gente axin tuaꞌ uwirobꞌ lo que war iche xeꞌ imbꞌutz tut e Dios, y tamar era jaxirobꞌ axin utattzꞌiobꞌ ucꞌabꞌa Catata Dios xeꞌ turu tichan tut e qꞌuin, che e Jesús.
MAT 5:17 Entonces che e Jesús: —Ira ibꞌijnu que tarien tuaꞌ intijres uley e Moisés y ira ibꞌijnu que tarien tuaꞌ intijres lo que chꞌar tzꞌijbꞌabꞌir umen e profetobꞌ porque majax bꞌan. Nen tarien tuaꞌ acꞌapa inche tunor lo que chꞌar tzꞌijbꞌabꞌir tama uyojroner e Dios.
MAT 5:18 Pues cꞌani inwareox era que nien inteꞌ chuchu letra machi tuaꞌ asatpa tama uley e Moisés este que acꞌapa achempa tunor lo que chꞌar tzꞌijbꞌabꞌir tamar. Y bꞌan taca tuaꞌ aquetpa este que acꞌapa ut e qꞌuin y este que acꞌapa or e rum.
MAT 5:19 Y tamar era cꞌani inwareox que tin e machi acꞌupseyan tut uley e Moisés, motor que tamar taca inteꞌ chuchu ley y bꞌan ucanse e gente tuaꞌ uche ubꞌan, jaxir tuaꞌ aꞌrobꞌna que imbꞌijc taca ucꞌampibꞌir tama uchinam e Dios. Pero tin e axin acꞌupseyan tut tunor lo que ayan tama uley e Moisés y bꞌan ucanse e gente tuaꞌ uche ubꞌan, jaxir tuaꞌ aꞌrobꞌna que meyra ayan ucꞌampibꞌir tama uchinam e Dios.
MAT 5:20 Pues tin e aquetpa ajcanseyajobꞌ tama uley e Moisés y tin e fariseobꞌ meyra uchiobꞌ leer uyojroner e Dios. Pero cꞌani inwareox era que jay machi aquetpa más erach iwirnar nox que jaxirobꞌ, ma cocha erer ixochoy tama uchinam e Dios, che e Jesús.
MAT 5:21 Entonces che e Jesús: —Nox iyubꞌix lo que arobꞌnobꞌ itata viejobꞌirobꞌ que: “Ira ichamsan, porque tin e axin achamsan ucꞌani tuaꞌ ajajtzꞌa.”
MAT 5:22 Pero nen inwareox que tunor tin e axin aqꞌuijna taca inteꞌ upiar cꞌani ajajtzꞌa. Y tin e axin uqꞌuijnes inteꞌ upiar cꞌani aqꞌuejcha axin tut cora juez. Y tin e axin uyare calapir inteꞌ upiar ucꞌani tuaꞌ ayajra axin tama e cꞌajc.
MAT 5:23 ’Y conda iqꞌueche axin inteꞌ iwofrenda tut e altar, jay ayopa tama ijor que war iqꞌuijna upater inteꞌ ipiar,
MAT 5:24 actanic iwofrenda tut e altar y quiquic bꞌajxan tut ipiar era tuaꞌ ixcꞌumpa. Y de allí erer ixsutpa iwajcꞌu iwofrenda e Dios.
MAT 5:25 ’Y jay ayan inteꞌ xeꞌ war aqꞌuijna uwiret y axin uqꞌuechiet iꞌxin tut e juez, ustes abꞌa tacar conda warto ixixin tama e bꞌir tuaꞌ machi ucꞌoteset tut e juez. Porque jay ucꞌoteset tut e juez, jaxir tuaꞌ uyajqꞌuet tama ucꞌabꞌ e ajcꞌampar xeꞌ tuaꞌ asutpa uyaret tama e cárcel.
MAT 5:26 Y cꞌani inwaret era que machi tuaꞌ ilocꞌoy tama e cárcel este que acꞌapa asuti tunor uyeror tamar lo que ibꞌeto, che e Jesús.
MAT 5:27 Entonces che e Jesús: —Nox iyubꞌix lo que arobꞌnobꞌ itata viejobꞌirobꞌ que: “Ira iyose ibꞌa taca tin e majax nujbꞌirox tacar.”
MAT 5:28 Pero cꞌani inwareox era que tunor tin e axin uchꞌujcu uwira inteꞌ ixic tuaꞌ uyusre ut, war uyose ubꞌa taca e ixic era tama uyalma.
MAT 5:29 ’Bꞌajcꞌat war itzay ache e mabꞌambꞌanir tamar taca lo que awira taca ingojr unacꞌoit xeꞌ tama anojcꞌabꞌ. Y jay bꞌan entonces más ani bueno tuaꞌ alocse achoqui najtir. Porque más ani bueno tuaꞌ asatpa ingojr unacꞌoit xeꞌ turu tama acuerpo que jay aquetpa tunor acuerpo tuaꞌ iꞌxin tama e cꞌajc.
MAT 5:30 Bꞌajcꞌat war itzay ache e mabꞌambꞌanir tamar taca lo que ache taca anojcꞌabꞌ. Y jay bꞌan entonces más ani bueno tuaꞌ axuri achoqui najtir. Porque más ani bueno jay asatpa inteꞌ acꞌabꞌ xeꞌ turu tama acuerpo que jay aquetpa tunor acuerpo tuaꞌ iꞌxin tama e cꞌajc, che e Jesús.
MAT 5:31 Entonces che e Jesús: —Nox iyubꞌix ubꞌan lo que arobꞌnobꞌ itata viejobꞌirobꞌ que: “Tin e cꞌani uyacta uwixcar tuaꞌ utijres unujbꞌiar ucꞌani tuaꞌ uyajcꞌu inteꞌ jun xeꞌ che que tijresbꞌirix unujbꞌiar.”
MAT 5:32 Pero nen cꞌani inwareox que tin e axin uyacta uwixcar tuaꞌ utijres unujbꞌiar war uyari uwixcar tama e mabꞌambꞌanir taca otronteꞌ winic. Pero jay uwixcar war uyose ubꞌa taca otronteꞌ winic entonces erer uyacta. Y tin e axin anujbꞌi taca inteꞌ ixic xeꞌ actana umen uviejo war acꞌaxi tama e mabꞌambꞌanir tacar ubꞌan, che e Jesús.
MAT 5:33 Entonces che e Jesús: —Nox iyubꞌix ubꞌan lo que arobꞌnobꞌ itata viejobꞌirobꞌ que: “Ira ixmajresian, y ira iwacta tuaꞌ acꞌapa iche tunor lo que icachi ibꞌa tama iwojroner tut e Dios.”
MAT 5:34 Pero nen cꞌani inwareox que ira ixojron cocha era: “Unaten ut e qꞌuin”, porque jax e lugar tiaꞌ aquetpa uturtar e Dios.
MAT 5:35 Y ira ixojron cocha era: “Unaten or e rum era”, porque e rum jax uwabꞌnibꞌ uyoc Cadiosir. Y ira ixojron cocha era: “Unaten e chinam Jerusalem”, porque jax uchinam Carey tichan.
MAT 5:36 Y ira ixojron cocha era: “Unaten nijor”, porque machi uyubꞌiox isuti utzutzer ijor tuaꞌ aquetpa sacsac o tuaꞌ aquetpa incsibꞌan ut.
MAT 5:37 Pero nox jax taca tuaꞌ iware “Bꞌan”, jay bꞌan y “Machi”, jay machi. Porque jay iware más ojroner war iche jax taca lo que ucꞌani e diablo, che e Jesús.
MAT 5:38 Entonces che e Jesús: —Nox cay iyubꞌi lo que arobꞌnobꞌ itata viejobꞌirobꞌ que: “Tin e axin ulocse unacꞌut otronteꞌ ucꞌani tuaꞌ aloqꞌuesna unacꞌut jaxir ubꞌan. Y tin e axin ucꞌocchi ut uyej otronteꞌ ucꞌani tuaꞌ acꞌocchina ut uyej jaxir ubꞌan”, bꞌan cocha che tama uley e Moisés.
MAT 5:39 Pero nen inwareox era que ira iqꞌuecꞌojse ibꞌa tut tin e cꞌani uche lo que mabꞌambꞌan ipater, y jay ayan tin e uyajqꞌuet tama acajram, actan tuaꞌ uyajqꞌuiquet tama inxejr ubꞌan.
MAT 5:40 Y jay ayan tin e ulocse inteꞌ abꞌujc tuaꞌ uqꞌueche axin, ajcꞌun ubꞌan lo que lapar amen.
MAT 5:41 Y jay arobꞌnox tuaꞌ icuchi axin inteꞌ tercio tama inteꞌ kilómetro y medio cuchic chic otronteꞌ kilómetro y medio ubꞌan.
MAT 5:42 Y jay acꞌotoy tiut tin e ucꞌajti lo que ayan tibꞌa, ajcꞌunic. Y jay acꞌotoy tiut tin e cꞌani uchꞌami lo que ayan tibꞌa tuaꞌ asutpa uyajcꞌox otronyajr ira isuti ipat tut, che e Jesús.
MAT 5:43 Entonces che e Jesús: —Y nox cay iyubꞌi ubꞌan lo que arobꞌnobꞌ itata viejobꞌirobꞌ que: “Yajtan ut tin e atzay uwiret, y xejbꞌen ut tin e aqꞌuijna uwiret”, bꞌan che tama uley e Moisés.
MAT 5:44 Pero nen inwareox era que yajtanic ut tin aqꞌuijna uwirox ubꞌan, y cꞌajtinic taca e Dios tuaꞌ atacarna tunor tin e war uchiox inumse ibꞌa.
MAT 5:45 Y tamar era nox tuaꞌ ixquetpa umaxtac Catata Dios xeꞌ turu tichan. Porque Cadiosir uche atobꞌoy watar e qꞌuin tujor tin e imbꞌutz y tujor tin e ajmabꞌambꞌanirobꞌ ubꞌan, y jaxir uyebꞌta watar e jajar tuaꞌ acꞌaxi tut urumobꞌ tin e imbꞌutz y tut urumobꞌ tin e ajmabꞌambꞌanirobꞌ ubꞌan.
MAT 5:46 Y jay nox ajtaca war iyajta ut tin e war uyajta iut entonces matucꞌa ituanibꞌir tuaꞌ ichꞌami tuaꞌ e Dios tamar era. Porque motor tin e ajmorojseyaj tumin tuaꞌ e gobierno war uchiobꞌ cocha era ubꞌan.
MAT 5:47 Y jay ajtaca war ipejca tin e atzay uwirox ¿tucꞌa war iche que más imbꞌutz que e inmojr? Porque bꞌan war uchiobꞌ tunor tin e machi unatobꞌ chi Cadiosir.
MAT 5:48 Quetpenic erach bꞌan cocha erach Catata Dios xeꞌ turu tichan, che e Jesús.
MAT 6:1 Entonces che e Jesús: —Inwiranic conda war iche lo que imbꞌutz tut e Dios que machi war iche tunor era tuaꞌ taca ixerna umen e gente. Porque jay bꞌan iche, Catata Dios xeꞌ turu tichan machi ixto tuaꞌ uyajcꞌox ituanibꞌir.
MAT 6:2 Y conda war iwajcꞌu inteꞌ tacarsiaj inteꞌ xeꞌ tzajtaca ut ira ixlajbꞌa tama icorneta tuaꞌ eꞌrna lo que war iche umen e gente, porque bꞌan uche tin e unatobꞌ amajresian tuaꞌ taca atajttzꞌobꞌ umen e gente. Bꞌan uchiobꞌ tama e sinagoga y bꞌan uchiobꞌ tama e calle. Pero cꞌani inwareox era que tunor tin e axin uchiobꞌ cocha era cꞌapa uchꞌamiobꞌ tunor utuanibꞌirobꞌ cocha cꞌapix tajttzꞌobꞌ umen e gente.
MAT 6:3 Pero nox conda iwajcꞌu inteꞌ tacarsiaj inteꞌ xeꞌ tzajtaca ut ira iware otronteꞌ tucꞌa war iche era, bꞌan cocha jay atzꞌejcꞌabꞌ machi war unata lo que war uche anojcꞌabꞌ.
MAT 6:4 Pero ajcꞌunic iwofrenda tzꞌustaca. Y tamar era Catata Dios xeꞌ turu tichan axin uwira lo que war iche tzꞌustaca y axin uyajcꞌox ituanibꞌir tama tunor era, che e Jesús.
MAT 6:5 Entonces che e Jesús: —Conda ixixin icꞌajti taca e Dios, ira iche cocha uchiobꞌ e ajmajresiajobꞌ, porque jaxirobꞌ achpa awawanobꞌ tama inteꞌ sinagoga tuaꞌ ucꞌajtiobꞌ taca e Dios taca inteꞌ nuxi nuc, pero uchiobꞌ cocha era tuaꞌ taca atajttzꞌobꞌ umen e gente. Y bꞌan uchiobꞌ tama inteꞌ calle tama e chinam ubꞌan. Pero cꞌani iwareox era que tamar taca era cꞌapix uchꞌamiobꞌ tunor utuanibꞌirobꞌ.
MAT 6:6 Pero net conda abꞌijnu tuaꞌ acꞌajti taca e Dios ira ache cocha uchiobꞌ e inmojr era, sino que ochen macuir oꞌtot y amaqui e puerta y abꞌajner cꞌajtin taca e Dios xeꞌ turu tacaret iraj iraj. Y tamar era Cadiosir xeꞌ war uwira lo que war ache tzꞌustaca cꞌani uyajqꞌuet atuanibꞌir.
MAT 6:7 Entonces conda war acꞌajti taca e Dios ira isutpa aware inteꞌ ojroner iraj iraj bꞌan cocha uchiobꞌ tin e machi unatobꞌ chi Cadiosir. Porque jaxirobꞌ uchebꞌiobꞌ que más tuaꞌ oꞌbꞌnobꞌ umen e Dios umen e sian ojroner xeꞌ war uchiobꞌ cocha era.
MAT 6:8 Ira iche ibꞌa cocha jaxirobꞌ, porque Catata Dios warix unata tunor lo que icꞌani conda ne mato icꞌajti tacar.
MAT 6:9 Y tamar era nox ucꞌani tuaꞌ icꞌajti taca e Dios cocha era y che: Catata Dios xeꞌ turet tichan, catattzꞌi acꞌabꞌa xeꞌ erach.
MAT 6:10 Lar tuaꞌ icꞌotori tara tor e rum wacchetaca. Y chen lo que acꞌani tara tor e rum bꞌan cocha war ache tichan tut e qꞌuin.
MAT 6:11 Ajcꞌunon lo que ucꞌani tuaꞌ cacꞌuxi tama inteꞌ inteꞌ día.
MAT 6:12 Cꞌumpen tacaron tamar camabꞌambꞌanir lo que cay cache toit net, bꞌan cocha war cacꞌumpa taca tin e cay uchiobꞌ e mabꞌambꞌanir capater ubꞌan.
MAT 6:13 Ira awacton tuaꞌ capijchna sino que corpeson tama tunor ucꞌotorer e diablo. Porque net jax Careyet, y net ayan meyra acꞌotorer, y net ayan meyra atawarer xeꞌ machi tuaꞌ acꞌapa. Amén.
MAT 6:14 ’Porque jay nox war ixcꞌumpa taca tin e war uche e mabꞌambꞌanir ipater, entonces Catata Dios xeꞌ turu tichan axin acꞌumpa tacarox ubꞌan.
MAT 6:15 Pero jay machi cꞌani ixcꞌumpa taca tin e war uchiobꞌ e mabꞌambꞌanir ipater, entonces Catata Dios machix tuaꞌ acꞌumpa tacarox tama e mabꞌambꞌanir lo que cay iche nox ubꞌan, che e Jesús.
MAT 6:16 Entonces che e Jesús: —Y conda machi war ixweꞌ tuaꞌ icꞌajti taca e Dios ira iche iwirnar que tzajtaquix iut, porque bꞌan uchiobꞌ e ajmajresiajobꞌ. Pues jaxirobꞌ uchiobꞌ cocha era tuaꞌ anatanwa umen e gente que machi war awiobꞌ tuaꞌ atajttzꞌobꞌ umenerobꞌ. Pero nen cꞌani inwareox era que jaxirobꞌ cꞌapix uchꞌamiobꞌ tunor utuanibꞌirobꞌ umen que tajttzꞌobꞌix umen e gente.
MAT 6:17 Pero net conda machi war iweꞌ tuaꞌ acꞌajti taca e Dios ucꞌani tuaꞌ uꞌstes ajor y ucꞌani tuaꞌ apoqui oit.
MAT 6:18 Bꞌan tuaꞌ ache tuaꞌ machi aquetpa chequer tut e gente que machi war iweꞌ tuaꞌ acꞌajti taca e Dios. Jax taca Catata Dios xeꞌ turu tacaret xeꞌ tuaꞌ unata lo que war ache era, y tamar era jax jaxir xeꞌ tuaꞌ uyajqꞌuet atuanibꞌir, che e Jesús.
MAT 6:19 Entonces che e Jesús: —Ira iturbꞌa ibꞌa tuaꞌ imorojse iturbꞌa meyra lo que ayan tara tor e rum xeꞌ atujri. Porque tunor era erer acꞌapa umen e max o erer axombꞌran ut o erer axujchna axin.
MAT 6:20 Sino que turbꞌanic ibꞌa tuaꞌ itꞌabꞌse iturbꞌa meyra lo que atujri tut e qꞌuin tichan tiaꞌ machi uyubꞌi oꞌchoy e max y nien machi axombꞌran ut y nien machi uyubꞌi tuaꞌ axujchna.
MAT 6:21 Y bꞌan tuaꞌ iche porque tiaꞌ turu tunor lo que ayan tibꞌa, yajaꞌ ubꞌan tuaꞌ aquetpa iwalma, che e Jesús.
MAT 6:22 Entonces che e Jesús: —Unacꞌut inteꞌ aquetpa bꞌan cocha inteꞌ janchꞌaquenar tama ucuerpo, y jay imbꞌutz unacꞌut inteꞌ erer abꞌutcꞌa tunor ucuerpo taca e janchꞌaquenar. Y tamar era tin e axin uchꞌami niwojroner cꞌani aquetpa chequer tunor nicanseyaj tut ubꞌan.
MAT 6:23 Pero tin e ajmuac unacꞌut machi eꞌron, y bꞌan ubꞌan inteꞌ xeꞌ machi uchꞌami niwojroner porque cꞌani aquetpa mucur tunor nicanseyaj tut. Pues inteꞌ cocha era machi tuaꞌ uwira lo que erach sino que cꞌani aquetpa incsibꞌan tunor era tut, che e Jesús.
MAT 6:24 Entonces che e Jesús: —Inteꞌ man machi uyubꞌi apatna tut chateꞌ upatron, porque jay bꞌan uche entonces e man axin uxejbꞌe ut inteꞌ upatron y axin uyajta ut otronteꞌ. Mamajchi chi erer uturbꞌa ubꞌa tama e Dios y tama e tumin ubꞌan, che e Jesús.
MAT 6:25 Entonces che e Jesús: —Cꞌani inwareox era que ira iturbꞌa ibꞌa tuaꞌ ibꞌijnu y che: ¿Tucꞌa tuaꞌ incꞌuxi? y ¿tucꞌa tuaꞌ unchꞌi? Y nien machi tuaꞌ ibꞌijnu y che: ¿Tucꞌa tuaꞌ inlapi? Porque más atujri icuxtar que lo que war icꞌuxi, y más atujri icuerpo que lo que war ilapi.
MAT 6:26 Bꞌijnunic tama e oror porque jaxir machi apatna, y matucꞌa umorojse tuaꞌ ucꞌuxi, y matucꞌa ugranero tiaꞌ macar ucosecha tamar, pero machi war aytzꞌa porque war awesena umen Catata Dios. ¿Y machi ca ixtujri más nox tut e Dios que incojt mut?
MAT 6:27 ¿Y chi tijam nox umen taca ubꞌijnusiaj tama ujor erer abꞌitzꞌa uyoc más nojta nien imbꞌijc tuaꞌ aquetpa más nojta?
MAT 6:28 ’¿Y tucꞌa tuaꞌ war ibꞌijnu cocha era y che: “Matucꞌa tuaꞌ inlapi?” Bꞌijnunic iwira tama unichir e cꞌopot xeꞌ machi apatna y nien machi aꞌrma.
MAT 6:29 Pero cꞌani inwareox era que nien e rey Salomón xeꞌ meyra usati utumin tama ubꞌujc xeꞌ galan uwirnar, pero nien jaxir machi ubꞌujcse ubꞌa bꞌan cocha inteꞌ unichir cꞌopot xeꞌ más galan uwirnar porque bꞌujcsebꞌir umen e Dios.
MAT 6:30 Y jay e Dios war ubꞌujcse unichir e cꞌopot cocha era xeꞌ coner chꞌur y xeꞌ ejcꞌar ayajra tama e cꞌajc, ¿machi ca uyubꞌi ubꞌujcsiox nox ubꞌan Catata Dios motor que imbꞌijc taca war ixcꞌupseyan tamar?
MAT 6:31 Y tamar era war inwareox que ira ibꞌijnu cocha era y che: “¿Tucꞌa tuaꞌ incꞌuxi?” y “¿tucꞌa tuaꞌ unchꞌi?” y “¿tucꞌa tuaꞌ inlapi?”
MAT 6:32 Porque bꞌan war ubꞌijnuobꞌ tunor e gente xeꞌ machi unatobꞌ chi Cadiosir, pero non ayan Catata Dios xeꞌ turu tichan xeꞌ war unata tunor lo que war cacꞌani.
MAT 6:33 Y tamar era inwareox que turbꞌanic ibꞌa tuaꞌ ixochoy tama uchinam e Dios y tuaꞌ ixquetpa erach bꞌan cocha jaxir, y tunor era cꞌani ixajcꞌuna.
MAT 6:34 Y ira ibꞌijnu tamar lo que cꞌani anumuy ejcꞌar, porque axin achecta ejcꞌar lo que tuaꞌ anumuy ejcꞌar. Pues tzꞌacar lo que war unumse ubꞌa inteꞌ tama inteꞌ día tuaꞌ machi ubꞌijnu tamar lo que cꞌani anumuy tama otronteꞌ día, che e Jesús.
MAT 7:1 Entonces che e Jesús: —Ira ixojron upater otronteꞌ tuaꞌ machi ixcꞌayna umen e Dios.
MAT 7:2 Porque bꞌan cocha ibꞌijnu iwira e gente axin y bꞌan tuaꞌ ixerna umenerobꞌ ubꞌan, porque bꞌan cocha ibꞌisi e inmojr y bꞌan tuaꞌ ixbꞌijsa nox umen e Dios ubꞌan.
MAT 7:3 ¿Tucꞌa tuaꞌ que wacchetaca awira que ayan imbꞌijc sojc chꞌur tama unacꞌut inteꞌ apiar, pero tamaret machi war awira jay ayan inteꞌ nuxi teꞌ chꞌar tama unacꞌoit?
MAT 7:4 Y cocha chꞌar inteꞌ nuxi teꞌ tama unacꞌoit, ¿cocha tuaꞌ aware apiar y che: “Actanen inlocsic e sojc tama unacꞌoit net?”
MAT 7:5 Ajmajresiajet, locsen bꞌajxan e teꞌ xeꞌ chꞌar tama unacꞌoit net, y de allí uyubꞌiet awira tuaꞌ alocse e sojc lo que chꞌar tama unacꞌut apiar.
MAT 7:6 ’Y ira iwajcꞌu lo que imbꞌutz tut e Dios tin e bꞌanobꞌ cocha incojt tzꞌiꞌ. Porque inteꞌ cocha era intaca asutpa tiut tuaꞌ ucꞌuxiox. Y ira iwajcꞌu inteꞌ tunyujy tin e lar uwirnarobꞌ cocha incojt chitam porque inteꞌ cocha era intaca axin upachꞌi tut e rum, che e Jesús.
MAT 7:7 Entonces che e Jesús: —Cꞌajtinic taca e Dios y jaxir tuaꞌ uyajcꞌox, sicbꞌanic e Dios y ixixin itajwi, pejcanic e Dios tut e puerta y jaxir axin upasi tiut.
MAT 7:8 Porque tin e ucꞌajti taca e Dios axin uchꞌami lo que war ucꞌajti era, y tin e usicbꞌa e Dios axin utajwi utacarsiaj, y tin e upejca e Dios tut e puerta axin apascꞌa tut.
MAT 7:9 ’Y nox xeꞌ tatabꞌirox, jay imaxtac ucꞌajti ingojr pan tibꞌa, ¿iwajcꞌu ca ingojr tun?
MAT 7:10 Y jay ucꞌajti incojt chay tibꞌa, ¿Iwajcꞌu ca incojt chan?
MAT 7:11 Y jay nox xeꞌ ajmabꞌambꞌanirox war inata iwajcꞌu imaxtac lo que imbꞌutz, ¿ma ca jax más imbꞌutz Catata Dios xeꞌ turu tichan tuaꞌ uyajcꞌu lo que más imbꞌutz ubꞌan tunor tin e ucꞌajti tacar?
MAT 7:12 ’Entonces tunor lo que war icꞌani que e inmojr uchiobꞌ tacarox, bꞌan ixto ucꞌani tuaꞌ iche nox ubꞌan tacarobꞌ. Pues tunor era watar tuaꞌ lo que chꞌar tzꞌijbꞌabꞌir tama uley e Moisés y tuaꞌ tunor lo que cay utzꞌijbꞌobꞌ e profetobꞌ xeꞌ turuanobꞌ tama e onian tiempo, che e Jesús.
MAT 7:13 Entonces che e Jesús: —Ochenic tama e puerta xeꞌ intꞌum taca ut, porque nojta ujam e puerta y galan e nuxi bꞌir xeꞌ axin acꞌotoy tama e cꞌajc, y meyra ayan tin e war oꞌchoyobꞌ tamar.
MAT 7:14 Pero e bꞌir xeꞌ axin acꞌotoy tama e cuxtar xeꞌ machi tuaꞌ acꞌapa intꞌum taca ut y bꞌan e puerta ubꞌan, y tamar era inteꞌ inteꞌ taca xeꞌ axin oꞌchoy tamar, che e Jesús.
MAT 7:15 Entonces che e Jesús: —Iwiric tama e profetobꞌ xeꞌ ajmajresiajobꞌ xeꞌ war uche ubꞌobꞌ que war uchꞌamiobꞌ inteꞌ ojroner tuaꞌ e Dios, pero majax bꞌan. Y war uche ubꞌobꞌ cocha incojt oveja xeꞌ incꞌun uwirnar pero tama uyalmobꞌ bꞌanobꞌ cocha incojt animal xeꞌ imbꞌacꞌajr uwirnar.
MAT 7:16 Pero nox erer iwira cocha turu uyalma inteꞌ winic tamar lo que axin uche jay imbꞌutz o jay majax imbꞌutz. Y aquetpa chequer inteꞌ teꞌ ubꞌan conda acꞌawan. Pues mamajchi ucojco tuaꞌ uchꞌami ingojr muy tama inteꞌ tꞌix y mamajchi ucojco tuaꞌ uchꞌami ingojr un tama inteꞌ chꞌan.
MAT 7:17 Pues inteꞌ teꞌ xeꞌ imbꞌutz uyajcꞌu uyutir xeꞌ imbꞌutz ubꞌan, y bꞌan inteꞌ teꞌ xeꞌ mabꞌambꞌan, uyajcꞌu uyutir xeꞌ mabꞌambꞌan ubꞌan.
MAT 7:18 Y inteꞌ teꞌ xeꞌ imbꞌutz machi uyubꞌi uyajcꞌu uyutir xeꞌ mabꞌambꞌan, y nien inteꞌ teꞌ xeꞌ mabꞌambꞌan machi uyubꞌi uyajcꞌu uyutir xeꞌ imbꞌutz.
MAT 7:19 Pues tunor e sian teꞌ xeꞌ machi uyajcꞌu uyutir xeꞌ imbꞌutz, awacarna tuaꞌ ayajra tama e cꞌajc. Y bꞌan tuaꞌ achempa taca tunor e winicobꞌ xeꞌ war amajresianobꞌ.
MAT 7:20 Y tamar era nox tuaꞌ ixcꞌotoy inata tucꞌa e winic era tamar lo que uche jay imbꞌutz o jay majax imbꞌutz, che e Jesús.
MAT 7:21 Entonces che e Jesús: —Majax tunor tin e uyaren y che: “Niwinquiraret” axin oꞌchoy tama uchinam e Dios, sino que ajtaca cꞌani oꞌchoyobꞌ tin e axin uchiobꞌ lo que ucꞌani Catata Dios xeꞌ turu tichan.
MAT 7:22 Conda acꞌotoy e día tuaꞌ e juicio ayan meyra gente xeꞌ axin uyarenobꞌ y che: “Cawinquiraret, non ojronon tama acꞌabꞌa, y tama acꞌabꞌa cawajnes ixin e sian mabꞌambꞌan mein, y tama acꞌabꞌa cay cache meyra milagro”, bꞌan cꞌani uyarenobꞌ tama e día yajaꞌ.
MAT 7:23 Pero nen cꞌani inwareobꞌ y che: “Machi innata chiox nox. Loqꞌuenic tara tunorox xeꞌ ajmabꞌambꞌanirox”, che e Jesús.
MAT 7:24 Entonces che e Jesús: —Cꞌani inwareox era que tin e uyubꞌi niwojroner y axin oꞌbꞌian tut aquetpa bꞌan cocha inteꞌ winic xeꞌ ixin uche uyotot tujor ingojr nuxi tun. Y tamar era cay uche e chꞌen tama e tun tuaꞌ uwabꞌu uyoiyir e otot tamar.
MAT 7:25 Entonces conda cꞌapa uyustes uyotot tari e jajar y cay chꞌiꞌ e nuxi xucur y cay jicna tari e sian icꞌar tut e otot, pero machi cucrema porque uyoiyirobꞌ e otot tzꞌaparobꞌ macuir e tun.
MAT 7:26 Pero tin e uyubꞌi niwojroner y machi oꞌbꞌian tut aquetpa bꞌan cocha inteꞌ winic xeꞌ satrem usasaꞌ xeꞌ uche uyotot tujor e jiꞌ.
MAT 7:27 Entonces conda cꞌapa uyustes uyotot tari e jajar y cay chꞌiꞌ e nuxi xucur y cay jicna tari e sian icꞌar tut e otot era, y cucrema inyajrer e otot, che e Jesús.
MAT 7:28 Entonces conda cꞌapa ojron e Jesús cocha era, cay bꞌacta uwirobꞌ ucanseyaj tunor e sian gente era,
MAT 7:29 porque jaxir canseyan taca tunor ucꞌotorer y majax bꞌan cocha uchiobꞌ tin e ajcanseyajobꞌ tama uley e Moisés.
MAT 8:1 Entonces conda cꞌapa ojron e Jesús taca tunor e sian gente tut e witzir, ecmay tari y meyra gente ixin tupat.
MAT 8:2 Y cꞌotoy inteꞌ winic tuyejtzꞌer e Jesús xeꞌ ayan e sian chec tut xeꞌ ucꞌabꞌa lepra xeꞌ cotuan tut y che: —Niwinquiraret, jay net acꞌani atzꞌaquen, uyubꞌiet porque meyra ayan acꞌotorer, che e winic.
MAT 8:3 Entonces e Jesús ucꞌatbꞌu ucꞌabꞌ tama ujor e winic y che: —Nen incꞌani intzꞌacpeset. Cꞌani inware e chec era: “Loqꞌuen actan e winic era”, che e Jesús. Y conda cꞌapa ojron e Jesús, wacchetaca quetpa tzꞌacpesbꞌir e winic.
MAT 8:4 Entonces e Jesús uyare e winic y che: —Ira achecsu tut e gente que tzꞌacpesbꞌiret sino que quiqui chectes abꞌa tut tin e sacerdote tama e templo y ajcꞌun incojt awarac tuaꞌ aquetpa purutbꞌir tujor e altar bꞌan cocha chꞌar tzꞌijbꞌabꞌir tama uley e Moisés. Y tamar era erer unatobꞌ tunor que net tzꞌacpesbꞌiret inyajrer, che e Jesús.
MAT 8:5 Entonces conda cꞌapa ojron e Jesús taca e winic era ixin esto tama e chinam Capernaum. Y conda cꞌotoy tajwina umen inteꞌ capitán romano xeꞌ uyare cocha era y che:
MAT 8:6 —Niwinquiraret, chꞌar niman tama uchꞌacteꞌ tama niotot y chamen ucuerpo y war acꞌuxun meyra tunor ucuerpo, che e capitán romano era.
MAT 8:7 Y che e Jesús: —Entonces inxin tuaꞌ intzꞌacpes, che e Jesús.
MAT 8:8 Y che e capitán: —Niwinquiraret, nen ma tawaren tuaꞌ acꞌotoy inteꞌ nuxi winic cocha net tama niotot, pero jay net ajtaca aware e ojroner, axin atzꞌacpa niman.
MAT 8:9 Porque nen turen yebꞌar ucꞌotorer inteꞌ nijefe, y nen ayan cora nisoldadobꞌ xeꞌ turobꞌ yebꞌar nicꞌotorer nen ubꞌan. Y tamar era jay nen inware inteꞌ tujamobꞌ que: “Quiqui chen era”, axin uche. Y jay inware otronteꞌ tujamobꞌ que: “Lar chen era”, axin watar uche. Y jay inware niman y che: “Chen era”, axin uche. Y bꞌan ixto net ubꞌan, jay aware e ojroner cꞌani atzꞌacpa niman, che e capitán.
MAT 8:10 Conda e Jesús uyubꞌi tunor era bꞌacta ubꞌijnu tamar e capitán y cay uyare tin e war axana tacar y che: —Cꞌani inwareox que nien tujam tunor e gente tuaꞌ e Israel ma inyajr intajwi inteꞌ winic xeꞌ meyra acꞌupseyan tama e Dios cocha war uche e winic era.
MAT 8:11 Y cꞌani inwareox ubꞌan que meyra gente watar tama e lugar tiaꞌ atobꞌoy e qꞌuin, y meyra gente watar tama e lugar tiaꞌ anamtzꞌa e qꞌuin tuaꞌ acꞌotoyobꞌ tama e nuxi nojqꞌuin lo que cꞌani achempa tama uchinam e Dios tut e qꞌuin taca e Abraham y taca e Isaac y taca e Jacob.
MAT 8:12 Pero ayan meyra winicobꞌ y meyra ixictac tuaꞌ e Israel xeꞌ cꞌani ani acꞌotoyobꞌ tama e nojqꞌuin era, pero umen que machi cꞌotoy cꞌupseyanobꞌ tamaren cꞌani atobꞌesna axiobꞌ macuir e incsibꞌaner tiaꞌ cꞌani aruobꞌ y tiaꞌ tuaꞌ ucꞌuxi ut uyejobꞌ umen e cꞌuxner, che e Jesús.
MAT 8:13 Entonces e Jesús sutpa uyare e capitán y che: —Quiqui tama oꞌtot, porque tzꞌacpesbꞌir ixto aman umen que net war icꞌupseyan tamaren que ayan nicꞌotorer tuaꞌ intzꞌacpes, che e Jesús. Y tama e hora era quetpa tzꞌacpesbꞌir inyajrer e uman e capitán era.
MAT 8:14 Entonces ixin e Jesús tama uyotot upixam e Pedro y cay uwira que ajmuac chꞌar tama uchꞌacteꞌ upixam ixic e Pedro y que war ucojco inteꞌ nuxi purer.
MAT 8:15 Entonces e Jesús uchuqui ucꞌabꞌ e ixic era y wacchetaca locꞌoy e purer. Y tamar era achpa e ixic y cay usicbꞌa tucꞌa tuaꞌ uyajcꞌu tuaꞌ ucꞌuxiobꞌ e ajwarobꞌ era.
MAT 8:16 Entonces conda acbꞌare cay taresnobꞌ tunor tin e ajmuacobꞌ tut e Jesús. Y ayan tin e chucurobꞌ umen inteꞌ mabꞌambꞌan mein ubꞌan. Pero e Jesús uyajnes locꞌoy tunor e sian mabꞌambꞌan mein era tamar taca inteꞌ ojroner. Y cꞌapa utzꞌacpes tunor tin e ajmuacobꞌ ubꞌan.
MAT 8:17 Pues numuy tunor era tuaꞌ acꞌapa achempa lo que chꞌar tzꞌijbꞌabꞌir umen e profeta Isaías xeꞌ turuan tama e onian tiempo xeꞌ che: “Uqꞌueche ixin tunor camuaquir, y xujra uwerir tuaꞌ utzꞌacpeson”, que chꞌar tzꞌijbꞌabꞌir umen e Isaías.
MAT 8:18 Entonces conda e Jesús uwira que war axojyna umen meyra gente cay uyare uyajcanuarobꞌ y che: —Incuic teinxejr e nuxi jaꞌ era, che e Jesús.
MAT 8:19 Pero conda ne mato oꞌchoy e Jesús tama e barco cꞌotoy inteꞌ ajcanseyaj tama uley e Moisés tut xeꞌ che: —Niwajcanseyajet, cꞌani inxin tacaret tic taca tiaꞌ iꞌxin, che e ajcanseyaj tama uley e Moisés era.
MAT 8:20 Y che e Jesús: —E chꞌajch ayan uchꞌen tiaꞌ tuaꞌ awayan, y e mut ayan usijc tiaꞌ tuaꞌ apacwan awayan, pero nen xeꞌ Uyunenen e winic ma tiaꞌ tuaꞌ inchꞌabꞌu nijor tuaꞌ inwayan, che e Jesús.
MAT 8:21 Y cꞌotoy otronteꞌ ajcanuar tut e Jesús xeꞌ che: —Niwinquiret, actanento tuaꞌ inxin incojco nitata este que axin achamay y de allí waten tacaret, che e winic era.
MAT 8:22 Pero e Jesús uyare e ajcanuar era y che: —Lar tacaren coner era, y actan tin e chamen turu tama uyalma tuaꞌ axin umuqui tin e war achamay, che e Jesús.
MAT 8:23 Entonces ochoy e Jesús tama inteꞌ barco taca tunor uyajcanuarobꞌ y cay ixiobꞌ tor e jaꞌ tama e barco.
MAT 8:24 Y wacchetaca checta tari inteꞌ nuxi icꞌar xeꞌ cay uche tobꞌoy e jaꞌ tama e mar esto cay ochoy tama e barco. Pero e Jesús war awayan.
MAT 8:25 Entonces ixin uyajcanuarobꞌ tuaꞌ ubꞌixqꞌuesobꞌ e Jesús y uyareobꞌ y che: —Cawinquiraret, corpeson porque war camuctzꞌa macuir e jaꞌ, che uyajcanuarobꞌ.
MAT 8:26 Entonces e Jesús uyare uyajcanuarobꞌ y che: —¿Tucꞌa tuaꞌ war ixbꞌacta meyra cocha era, nox xeꞌ imbꞌijc taca war ixcꞌupseyan tamaren? che e Jesús. Entonces achpa e Jesús y cay ucꞌaye e icꞌar y e jaꞌ xeꞌ war atobꞌoy axin. Y wacchetaca chꞌancabꞌa tunor y sisa.
MAT 8:27 Y tunor uyajcanuarobꞌ bꞌactobꞌ uwirobꞌ y chenobꞌ: —¿Tucꞌa winic era que uche chꞌancabꞌa e icꞌar y e jaꞌ y cꞌupesna umenerobꞌ? che uyajcanuarobꞌ era.
MAT 8:28 Entonces ixin e Jesús teinxejr e nuxi jaꞌ era y cꞌotoy tama inteꞌ lugar xeꞌ ucꞌabꞌa Gadara. Y tama e lugar era ayan chateꞌ winicobꞌ xeꞌ turobꞌ macuir umujr e chamenobꞌ, y conda cꞌotoy unatobꞌ que war axana era e Jesús locꞌoyobꞌ tuaꞌ axin uwirobꞌ ut. Pues e chateꞌ winicobꞌ era bꞌutꞌur uyalmobꞌ taca e sian mabꞌambꞌan mein y tamar era jaxirobꞌ imbꞌacꞌajr uwirnarobꞌ. Y conda anumuy e gente tama e bꞌir era alocꞌoyobꞌ tuaꞌ uyajcꞌuobꞌ, y tamar era mix majchi anumuy tiaꞌ turobꞌ.
MAT 8:29 Y conda cꞌotoyobꞌ tut e Jesús cay ojronobꞌ taca inteꞌ nuxi nuc y chenobꞌ: —¿Tucꞌa tuaꞌ war oꞌse abꞌa tacaron, net xeꞌ Jesús xeꞌ Uyunenet e Dios? ¿O tariet ca tuaꞌ achion canumse cabꞌa conda ne mato achecta e juicio? che e winicobꞌ era xeꞌ bꞌutꞌur uyalmobꞌ taca e sian mabꞌambꞌan mein.
MAT 8:30 Y majax innajt tiaꞌ turobꞌ ayan cora sian chitam xeꞌ war awiobꞌ.
MAT 8:31 Entonces ojronobꞌ e mabꞌambꞌan meinobꞌ era taca e Jesús y chenobꞌ: —Jay cꞌani atzacrion calocꞌoy tara, actanon chicon cochoy tama e sian chitam era, che e sian mabꞌambꞌan meinobꞌ era.
MAT 8:32 Entonces che e Jesús: —Erer ixixin. Quiquic ochenic era, che e Jesús. Entonces e sian mabꞌambꞌan meinobꞌ uyactobꞌ e winicobꞌ y ixin ochoyobꞌ tama e sian chitam. Y e sian chitam satpa ujorobꞌ y wacchetaca ajniobꞌ tama e xijrcojt ejmar este que cꞌapa uyojres ubꞌobꞌ tama e jaꞌ y cꞌapa cuchpobꞌ chamayobꞌ.
MAT 8:33 Pues tin e war ani ucojcobꞌ e sian chitam era cay bꞌactobꞌ y locꞌoy ajniobꞌ tuaꞌ acꞌotoyobꞌ tiaꞌ turobꞌ y cay uchecsuobꞌ ixin tut e gente tunor lo que numuy taca e sian chitam y tunor lo que numuy taca e chateꞌ winicobꞌ xeꞌ chucur ani umen e sian mabꞌambꞌan mein.
MAT 8:34 Entonces tunor e gente tama e chinam yajaꞌ locꞌoyobꞌ tuaꞌ uwirobꞌ e Jesús. Y conda uwirobꞌ ut cay uyareobꞌ tuaꞌ alocꞌoy tama ulugarobꞌ era.
MAT 9:1 Entonces ochoy e Jesús tama e barco otronyajr y ixin teinxejr jaꞌ y sutpa cꞌotoy tama ulugar otronyajr.
MAT 9:2 Y tamar era ayan cora winicobꞌ xeꞌ cꞌotoyobꞌ tut e Jesús xeꞌ war uqꞌuechiobꞌ axin inteꞌ winic xeꞌ chamen ucuerpo tama inteꞌ chꞌacteꞌ. Y conda e Jesús uwira que meyra war acꞌupseyanobꞌ tama e Dios e winicobꞌ era, ojron y che: —Tzayen que nen incꞌumpa tacaret tuaꞌ asajta tunor amabꞌambꞌanir nimener, che e Jesús.
MAT 9:3 Pero ayan cora ajcanseyajobꞌ tama uley e Moisés xeꞌ turobꞌ era xeꞌ cay ubꞌijnuobꞌ que: “E winic era war uqꞌuijnes e Dios taca uyojroner era”, ubꞌijnuobꞌ e nuquir winicobꞌ era jaxobꞌ taca.
MAT 9:4 Pero cocha e Jesús war unata lo que war ubꞌijnuobꞌ e winicobꞌ era, ojron y che: —¿Tucꞌa tuaꞌ war ibꞌijnu que nen war inche e mabꞌambꞌanir tamar lo que war inche era?
MAT 9:5 Pues ma erer inata jay aquetpa erach niwojroner jay inware que: “Asajta tunor amabꞌambꞌanir nimener”, porque ma chequer tiut jay asajta umabꞌambꞌanir o jay machi. Pero jay inware: “Achpen”, wacchetaca erer iwira jay erach niwojroner jay achpa axana e winic.
MAT 9:6 Pero tuaꞌ inata que nen xeꞌ Uyunenen e winic ayan nicꞌotorer tuaꞌ incꞌumpa taca e winicobꞌ xeꞌ war uchiobꞌ e mabꞌambꞌanir tara tor e rum, cꞌani inware e winic era xeꞌ chamen ucuerpo tuaꞌ achpa axana, che e Jesús. Entonces e Jesús uyare e winic xeꞌ chamen ucuerpo y che: —Inwaret era que achpen, chꞌama achꞌacteꞌ, y cuchu quiqui toꞌtot, che e Jesús.
MAT 9:7 Entonces e winic xeꞌ chamen ani ucuerpo achpa y ixin tama uyotot.
MAT 9:8 Y conda e gente uwirobꞌ lo que numuy era bꞌactobꞌ, y cay utattzꞌiobꞌ ucꞌabꞌa e Dios umen que jaxir uyajcꞌu ucꞌotorer e winicobꞌ tuaꞌ uyubꞌi utzꞌacpesobꞌ tin e ajmuacobꞌ ubꞌan.
MAT 9:9 Entonces conda e Jesús tacpa xana cora cay uwiren xeꞌ nicꞌabꞌa Mateo tiaꞌ turen tama nilugar tiaꞌ war inmorojse e tumin tuaꞌ e gobierno. Entonces e Jesús uyaren cocha era y che: —Incoꞌ tacaren, che e Jesús. Entonces achpen wacchetaca y ixien tacar.
MAT 9:10 Entonces ixin weꞌ e Jesús tama niotot taca tunor uyajcanuarobꞌ. Y conda ya turu e Jesús cay cꞌotoy meyra ajmorojseyajobꞌ tumin tuaꞌ e gobierno bꞌan cocha nen y ayan más ajmabꞌambꞌanirobꞌ ubꞌan xeꞌ cay cꞌotoyobꞌ xeꞌ cay wiobꞌ taca e Jesús.
MAT 9:11 Y cꞌotoy wawanobꞌ otro inmojr xeꞌ war achꞌujcsanobꞌ y bꞌan war uchiobꞌ cora fariseo ubꞌan. Y conda cay uwirobꞌ tucꞌa war anumuy cay uyubꞌiobꞌ tuaꞌ uyajcanuarobꞌ e Jesús y chenobꞌ: —¿Tucꞌa tuaꞌ war aweꞌ Awajcanseyaj taca e ajmorojseyajobꞌ tumin tuaꞌ e gobierno y taca e sian ajmabꞌambꞌanirobꞌ era? chenobꞌ e fariseobꞌ era.
MAT 9:12 Pero e Jesús war uyubꞌi tunor era y che: —Tin e majax ajmuac machi ucꞌani inteꞌ ajtzꞌaconer, sino que ajtaca tin e ajmuacobꞌ.
MAT 9:13 Quiquic canoenic lo que war che uyojroner e Dios tiaꞌ che que: “Nen más incꞌani que ixixin ichecsu ibꞌa que incꞌun iwirnar tut e gente que jay ixixin iwajcꞌu inteꞌ arac tuaꞌ apurutna tama e altar.” Bꞌan chꞌar tzꞌijbꞌabꞌir tama uyojroner e Dios. Pues nen tarien majax tuaꞌ impejca tin e unatobꞌ que imbꞌutz turobꞌ sino que tarien tuaꞌ impejca tin e satrem turobꞌ tuaꞌ asutpobꞌ uchꞌamiobꞌ uyojroner e Dios, che e Jesús.
MAT 9:14 Pues entonces cꞌotoyobꞌ cora ajcanuarobꞌ tuaꞌ e Juan xeꞌ ajchꞌuymar tut e Jesús xeꞌ cay uyubꞌiobꞌ tuaꞌ y chenobꞌ: —Pues non xeꞌ ajcanuaron tuaꞌ e Juan war cawacta tuaꞌ caweꞌ tuaꞌ cacꞌajti taca e Dios iraj iraj y bꞌan war uchiobꞌ uyajcanuarobꞌ e fariseobꞌ ubꞌan, pero awajcanuarobꞌ tabꞌa machi war uchiobꞌ cocha era. ¿Pues tucꞌa tuaꞌ machi war uyactobꞌ tuaꞌ awiobꞌ tuaꞌ ucꞌajtiobꞌ taca e Dios? che uyajcanuarobꞌ e Juan xeꞌ ajchꞌuymar era.
MAT 9:15 Y che e Jesús: —Erer cabꞌijnu que niwajcanuarobꞌ era larobꞌ tacar tin e pejcnobꞌ tama inteꞌ nujbꞌiar tiaꞌ cꞌani anojqꞌuiniobꞌ ubꞌan. Pues conda turobꞌ tama e nojqꞌuin era war atzayobꞌ taca e noxipbꞌir y ma cocha erer ubꞌijnuobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios tama e hora era. Pero acꞌotoy e día conda axin aloqꞌuesna e noxipbꞌir era tutobꞌ y entonces tin e pejcbꞌir ani tama e nujbꞌiar erer ubꞌijnuobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios. Y bꞌan tamaren ubꞌan, conda inloqꞌuesna tara, cꞌani ubꞌijnuobꞌ niwajcanuarobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios.
MAT 9:16 ’Mamajchi axin uxuri imbꞌijc bꞌujc xeꞌ imbꞌutz tuaꞌ utaqꞌui tama inteꞌ tzuc bꞌujc. Porque jay bꞌan ani uche, e bꞌujc xeꞌ imbꞌutz axin achuchuran y axin uchꞌijse más e chꞌen tama e tzuc bꞌujc.
MAT 9:17 Y mamajchi uyari e vino xeꞌ intocto achena tama inteꞌ bolsa xeꞌ chembꞌir taca e qꞌuewer xeꞌ bꞌitzꞌemix ut, porque jay bꞌan uche, conda acay oꞌjmay e vino y axin atꞌabꞌay, axin awejrtzꞌa e qꞌuewer cocha machi uyubꞌi abꞌitzꞌa más, y acꞌapa atucpa tunor e vino y asatpa e qꞌuewer ubꞌan. Y tamar era ucꞌani tuaꞌ ayajra e vino xeꞌ intocto achena tama e qꞌuewer xeꞌ intocto achena ubꞌan y tamar era chatertiꞌ axin acꞌampesna. Bꞌan che e Jesús tuaꞌ uchecsu que ma cocha erer uyapru ucanseyaj taca e onian bꞌijnusiaj tuaꞌ e gente era.
MAT 9:18 Pues entonces conda e Jesús warto oꞌjron cocha era cꞌotoy tut inteꞌ ajcꞌampar tuaꞌ e gente tama e Israel xeꞌ cotuan tut e Jesús y che: —Niwijchꞌoc wartocto acꞌapa achamay pero jay net icꞌotoy apacbꞌu acꞌabꞌ tamar, cꞌani asutpa abꞌixcꞌa, che e winic.
MAT 9:19 Entonces achpobꞌ e Jesús y uyajcanuarobꞌ y ixiobꞌ tacar.
MAT 9:20 Pero conda cay xana e Jesús taca e winic era cꞌotoy inteꞌ ixic tupat xeꞌ ayan inteꞌ muaquir xeꞌ intaca anumuy uchꞌichꞌer, y ayix doce año que war unumse ubꞌa taca e muaquir era. Entonces e ixic ixin tzꞌustaca tupat e Jesús y upijchꞌi ubꞌujc
MAT 9:21 porque jaxir war ubꞌijnu y che: “Jay jax taca uyubꞌien impijchꞌi ubꞌujc e Jesús, cꞌani intzꞌacpesna”, xeꞌ ubꞌijnu e ixic era.
MAT 9:22 Pero e Jesús usuti ut y uwira e ixic y che: —Ixic, tzayen era que tzꞌacpesbꞌiret coner umen que war icꞌupseyan tamaren, che e Jesús. Y wacchetaca quetpa tzꞌacpesbꞌir e ixic inyajrer.
MAT 9:23 Entonces cꞌotoy e Jesús tama uyotot e ajcꞌampar. Y conda ochoy cay uwira que turix e ajlabꞌarobꞌ tuaꞌ achena e mucmayaj y que ayan tin e war aꞌru taca inteꞌ nuxi nuc.
MAT 9:24 Entonces ojron e Jesús y che: —Loqꞌuenic tara porque e ijchꞌoc era majax chamen sino que intaca war awayan, che e Jesús. Pero e gente intaca utzeniobꞌ.
MAT 9:25 Pero jaxir uche tuaꞌ alocꞌoyobꞌ patir tunor e gente era. Y conda cꞌapa locꞌoyobꞌ, ochoy macu tiaꞌ chꞌar e ijchꞌoc y ujajpi ucꞌabꞌ y wacchetaca achpa.
MAT 9:26 Pues lo que numuy tama e ijchꞌoc era cay checsuna ixin tama tunor or e lugar.
MAT 9:27 Entonces conda locꞌoy e Jesús tama e otot era ayan chateꞌ winicobꞌ xeꞌ tajpem unacꞌutobꞌ xeꞌ cay ixiobꞌ tupat xeꞌ ojronobꞌ taca inteꞌ nuxi nuc y chenobꞌ: —Yajtan coit net xeꞌ sitzbꞌiret tuaꞌ e rey David, che e winicobꞌ era.
MAT 9:28 Y conda e Jesús cꞌotoy tama e otot tiaꞌ war axin ochoyobꞌ ubꞌan e chateꞌ winicobꞌ era xeꞌ tajpem unacꞌutobꞌ y e Jesús uyubꞌi tuobꞌ y che: —¿Icꞌupse ca que uyubꞌien inche lo que war icꞌajti tacaren? che e Jesús. Y jaxirobꞌ chenobꞌ: —Cawinquiraret, cacꞌupseyan ixto tamaret, chenobꞌ e winicobꞌ era.
MAT 9:29 Entonces e Jesús upacbꞌu ucꞌabꞌ tama unacꞌutobꞌ y che: —Cocha meyra war ixcꞌupseyan tama e Dios meyra erer ichꞌami tuaꞌ e Dios ubꞌan, che e Jesús.
MAT 9:30 Y wacchetaca eron unacꞌutobꞌ. Entonces e Jesús uyareobꞌ y che: —Ira ichecsu tut e gente chi umen tzꞌacpesnox, che e Jesús.
MAT 9:31 Pero conda ne mato alocꞌoy e Jesús tama e lugar era e winicobꞌ cay uchecsuobꞌ tama tunor or e lugar tunor lo que chena tacarobꞌ y que umen e Jesús que quetpobꞌ tzꞌacpesbꞌir.
MAT 9:32 Entonces conda wartocto alocꞌoy e chateꞌ winicobꞌ era xeꞌ tajpem ani unacꞌutobꞌ cꞌotoy cora winicobꞌ tut e Jesús xeꞌ war utares inteꞌ winic xeꞌ machi ojron y xeꞌ chucur umen inteꞌ mabꞌambꞌan mein.
MAT 9:33 Entonces e Jesús cay ucꞌaye e mabꞌambꞌan mein tuaꞌ alocꞌoy tama e winic y tamar era cay ojron e winic xeꞌ machi ani ojron. Pero e gente cay bꞌacta uwirobꞌ tunor era y cay ojronobꞌ y chenobꞌ: —Ma tiaꞌ cawira anumuy inteꞌ nuxi milagro cocha era tama tunor e lugar Israel, che e gente.
MAT 9:34 Entonces e fariseobꞌ cay ojronobꞌ y chenobꞌ: —Pues jaxir jax uwinquir e inmojr mabꞌambꞌan meinobꞌ y tamar era abꞌacꞌajrna umenerobꞌ, che cora fariseobꞌ era.
MAT 9:35 Pues entonces e Jesús ixin tama inteꞌ inteꞌ chinam y tama inteꞌ inteꞌ aldea y war acanseyan tama tunor e sian sinagoga ubꞌan. Y war uchecsu uyojroner e Dios tama uchinam e Dios tut tunor e gente. Y war utzꞌacpes tunor tin e ajmuac tama inteꞌ inteꞌ muaquir.
MAT 9:36 Y conda e Jesús uwira tunor e sian gente, uyajta utobꞌ porque war uwira que tzajtaca utobꞌ, y que matucꞌa e jiriar tamarobꞌ, y que bꞌanobꞌ cocha cora oveja xeꞌ choquem xeꞌ matucꞌa uyajcojcobꞌ.
MAT 9:37 Y tamar era e Jesús uyare uyajcanuarobꞌ y che: —Cꞌani inwareox era que ayan meyra winicobꞌ xeꞌ turix tuaꞌ uchꞌamiobꞌ niwojroner, pero ma tzꞌacarobꞌ tin e war uchecsuobꞌ niwojroner, bꞌan cocha inteꞌ nuxi rum xeꞌ turix tuaꞌ amorojsena e cosecha tamar pero que mato tzꞌacar e manobꞌ xeꞌ tuaꞌ umorojsiobꞌ e cosecha era.
MAT 9:38 Y tamar era inwareox que cꞌajtinic taca Cawinquirar Dios tuaꞌ uyebꞌta watar más ajpatnarobꞌ tuaꞌ uchecsuobꞌ niwojroner, bꞌan cocha ucꞌani tuaꞌ acꞌajtna tut e ajyum cosecha tuaꞌ uyebꞌta watar más ajpatnarobꞌ tuaꞌ umorojsiobꞌ tunor e nuxi cosecha era, che e Jesús.
MAT 10:1 Entonces e Jesús upejca tuaꞌ ayopobꞌ tuyejtzꞌer doce uyajcanuarobꞌ y cay uyajcꞌuobꞌ ucꞌotorer tuaꞌ uyajnes alocꞌoy e sian mabꞌambꞌan mein y cay uyajcꞌuobꞌ ucꞌotorer tuaꞌ utzꞌacpesobꞌ inteꞌ inteꞌ muaquir ubꞌan.
MAT 10:2 Pues jax era ucꞌabꞌobꞌ e doce apostolobꞌ xeꞌ sicbꞌabꞌirobꞌ umen e Jesús. Bꞌajxan quetpa sicbꞌabꞌir e Simón xeꞌ ucꞌabꞌa Pedro ubꞌan, y quetpa sicbꞌabꞌir ubꞌan uwijtzꞌin e Pedro xeꞌ ucꞌabꞌa Andrés. Y quetpa sicbꞌabꞌir e Santiago taca uwijtzꞌin xeꞌ ucꞌabꞌa Juan xeꞌ jax uyunenobꞌ e Zebedeo.
MAT 10:3 Y quetpa sicbꞌabꞌir e Felipe y e Bartolomé y e Tomás y nen xeꞌ Mateoen xeꞌ jaxen inteꞌ ajmorojseyaj tumin tuaꞌ e gobierno. Y quetpa sicbꞌabꞌir e Jacobo xeꞌ jax uyunen e Alfeo.
MAT 10:4 Y quetpa sicbꞌabꞌir e Simón xeꞌ jax ani inteꞌ miembro tuaꞌ inteꞌ partido xeꞌ ucꞌabꞌa cananista. Y quetpa sicbꞌabꞌir e Judas Iscariote xeꞌ jax xeꞌ utuchꞌi e Jesús.
MAT 10:5 Entonces e Jesús uyebꞌta ixin e doce uyajcanuarobꞌ era tuaꞌ axin uche cocha era y che: —Ira ixixin tiaꞌ turobꞌ e gente xeꞌ majax tuobꞌ e Israel, y ira ixochoy tama e chinamobꞌ lo que ayan tama e departamento Samaria.
MAT 10:6 Pero quiquic tut tin e tuobꞌ e Israel xeꞌ larobꞌ tacar cora sian oveja xeꞌ satremobꞌ.
MAT 10:7 Quiquic checsunic que cꞌanix acay acꞌotori Cadiosir tara tor e rum.
MAT 10:8 Tzꞌacpesic e ajmuacobꞌ, bꞌixqꞌuesic e chamenobꞌ, ustesic tin e ayan e sian chec tamar xeꞌ ucꞌabꞌa lepra, y ajnesic chic tunor e mabꞌambꞌan mein lo que ayan tama e gente. Cocha nox bꞌan taca war ichꞌami e cꞌotorer era ira icꞌajti tuaꞌ ixtojya tamar.
MAT 10:9 ’Y ira iqꞌueche axin itumin tama ibolsa xeꞌ jax e oro o e plata o e cobre.
MAT 10:10 Y ira iqꞌueche axin ibolsa tama e bꞌir, y ira iqꞌueche axin otronteꞌ ibꞌujc, y ira iqꞌueche axin otronteꞌ xanabꞌ, y nien inteꞌ teꞌ tuaꞌ ixbꞌoyo tamar, porque tiaꞌ apatna inteꞌ ajpatnar yajaꞌ tuaꞌ acojcna tama tunor.
MAT 10:11 ’Y conda ixcꞌotoy tama inteꞌ chinam o tama inteꞌ aldea sicbꞌanic inteꞌ winic xeꞌ incꞌun uwirnar xeꞌ turix tuaꞌ utacriox y quetpenic tama uyotot este que ixlocꞌoy tama e lugar yajaꞌ.
MAT 10:12 Y conda ixochoy tama e otot era arenicobꞌ cocha era y che: “Que ujiriar e Dios aquetpa tacarox.”
MAT 10:13 Y jay e gente tama e otot era atzay uwirox entonces aquetpa ujiriar e Dios tacarobꞌ. Pero jay e gente tama e otot era machi atzay uwirox entonces machi tuaꞌ aquetpa ujiriar e Dios tacarobꞌ.
MAT 10:14 Y jay ayan e gente tama ingojr otot o tama inteꞌ chinam xeꞌ machi uchꞌamiox y xeꞌ machi cꞌani uyubꞌiobꞌ lo que cꞌani ichecsu tutobꞌ tama uyojroner e Dios, loqꞌuenic tama e otot era o tama e chinam era y tijtinic ixanabꞌ tutobꞌ tuaꞌ unatobꞌ que mabꞌambꞌan war uchiobꞌ que machi cꞌani uyubꞌiobꞌ uyojroner e Dios.
MAT 10:15 Porque cꞌani inwareox era que tin e machi cꞌani uchꞌamiox tuaꞌ uyubꞌiobꞌ uyojroner e Dios cꞌani ajajtzꞌobꞌ más nojta conda acꞌotoy e día tuaꞌ e juicio. Pues tin e turuanobꞌ ani tama e chinam Sodoma y tin e turuanobꞌ ani tama e chinam Gomorra cꞌani ajajtzꞌobꞌ nojta conda acꞌotoy e día tuaꞌ e juicio. Pero tin e machi uchꞌamiox tuaꞌ uyubꞌiobꞌ uyojroner e Dios más meyra tuaꞌ ajajtzꞌobꞌ que e inmojr era, che e Jesús.
MAT 10:16 Entonces che e Jesús: —Pues war inwebꞌtox ixixin tuaꞌ ichecsu tut e gente cocha tuaꞌ acꞌupseyanobꞌ tamaren. Pues conda ixixin era cꞌani ixquetpa bꞌan cocha incojt oveja xeꞌ machi uyubꞌi ucorpes ubꞌa conda acꞌotoy tujam cora nuquir coyote. Pero chenic ibꞌa bꞌan cocha incojt mis xeꞌ uwira cora cora lo que watar, y chenic ibꞌa ubꞌan bꞌan cocha incojt sacsac mut xeꞌ incꞌun uwirnar.
MAT 10:17 Iwiranic ibꞌa porque watar e día conda ixixin ixajcꞌuna tama ucꞌabꞌobꞌ e nuquir ajcꞌamparobꞌ umen taca que war ixcꞌupseyan tamaren. Y cꞌani uwatzꞌiox tama inteꞌ inteꞌ sinagoga tuobꞌ.
MAT 10:18 Y cꞌani uqꞌuechiox ixixin tut cora gobernador y tut cora reyobꞌ umen taca que war ixcꞌupseyan tamaren. Y tamar era cꞌani ixquetpa ajchecsuyajox tamaren tut e nuquir winicobꞌ era y tut tin e majax tuobꞌ e Israel ubꞌan.
MAT 10:19 Pero conda ixcꞌotesna tut e nuquir ajcꞌamparobꞌ cocha era ira ibꞌijnu tucꞌa tuaꞌ iware tuaꞌ icorpes ibꞌa y nien cocha tuaꞌ iware tunor era, porque Cadiosir axin uyajcꞌox tunor e ojroner lo que ucꞌani tuaꞌ iware tama e hora yajaꞌ.
MAT 10:20 Porque mix jax nox xeꞌ tuaꞌ ixojron tama e hora yajaꞌ sino que jax Unawalir Catata Dios xeꞌ tuaꞌ uchiox ixojron tama e hora yajaꞌ.
MAT 10:21 ’Y watar e día conda inteꞌ sacumbꞌir cꞌani uqꞌueche axin uwijtzꞌinobꞌ tut tin e aqꞌuijna uwirobꞌ tuaꞌ achamesnobꞌ umen taca que war acꞌupseyanobꞌ tamaren. Y inteꞌ ijtzꞌimbꞌir cꞌani uqꞌueche axin usacunobꞌ tut tin e aqꞌuijna uwirobꞌ tuaꞌ achamesnobꞌ. Y inteꞌ tatabꞌir cꞌani uqꞌueche axin umaxtac tuaꞌ achamesnobꞌ, y e maxtac cꞌani uqꞌueche axin utuꞌ y utata tuaꞌ achamesnobꞌ ubꞌan.
MAT 10:22 Y tunor e winicobꞌ cꞌani uxejbꞌiobꞌ iut umen que war ixcꞌupseyan tamaren. Pero tin e aqꞌuecꞌo axana tama nibꞌir tuaꞌ machi uyacten esto tama ucꞌapesnibꞌir tunor era cꞌani acorpesnobꞌ.
MAT 10:23 Y conda ixajnesna tama inteꞌ chinam, quiquic tama otronteꞌ chinam. Pues cꞌani inwareox era que conda merato acꞌapa ichecsu uyojroner e Dios tama tunor e sian chinam lo que ayan tama e lugar Israel que nen xeꞌ Uyunenen e winic cꞌani insutpa waten otronyajr tuaꞌ incꞌotori tara tor e rum.
MAT 10:24 Pues inteꞌ ajcanuar majax más nuquir winic que uyajcanseyaj, y inteꞌ man xeꞌ mambꞌir inyajrer majax más nojta ucꞌampibꞌir que upatron.
MAT 10:25 Pues atzay inteꞌ ajcanuar conda acꞌotoy unata tunor lo que unata uyajcanseyaj, y atzay inteꞌ man xeꞌ mambꞌir inyajrer conda acꞌotoy aquetpa bꞌan cocha upatron. Y jay nen xeꞌ Iwinquiraren arobꞌnen que jaxen e Beelzebú xeꞌ jax uwinquir e inmojr mabꞌambꞌan meinobꞌ, entonces ¿tucꞌa nic tuaꞌ ixarobꞌna nox? che e Jesús.
MAT 10:26 Entonces e Jesús che: —Ira ibꞌacre lo que erer uche inteꞌ winic. Pues tunor lo que chembꞌir mucur axin achectesna, y tunor lo que unata mucur inteꞌ ucꞌani tuaꞌ acꞌotoy anatanwa ubꞌan.
MAT 10:27 Lo que inwareox tama e incsibꞌaner checsunic tama e janchꞌaquenar tama e día, y lo que inwareox tzꞌustaca tama ichiquin arenic taca inteꞌ nuxi nuc este que uyubꞌiobꞌ tunor ipiarobꞌ.
MAT 10:28 Ira ibꞌacre tin e erer uchamse icuerpo taca pero xeꞌ matucꞌa más tuaꞌ uche. Pero tin e ucꞌani tuaꞌ ibꞌacre jax e Dios xeꞌ erer uchamse ucuerpo inteꞌ y xeꞌ ayan ucꞌotorer tuaꞌ uyari uyalma tama e cꞌajc ubꞌan.
MAT 10:29 ’Pues motor que achojna chacojt mut tama inteꞌ centavo pero nien incojt mut cocha era machi ojri tama e rum jay machi actana umen Catata Dios.
MAT 10:30 Y este tunor utzutzer ijor tzicbꞌir umen e Dios tuaꞌ unata jayteꞌ ayan.
MAT 10:31 Ira ixbꞌacta, pues nox más ixtujri tut e Dios que tunor e sian mut era, che e Jesús.
MAT 10:32 Entonces e Jesús che: —Tunorox xeꞌ ixixin ichecsu ibꞌa tut e gente que: “Nen ajcꞌupesiajen tama e Cristo”, nen ubꞌan cꞌani inxin inware Nitata Dios xeꞌ turu tichan que nox war ixcꞌupseyan tamaren.
MAT 10:33 Pero tunor tin e axin umuqui nicꞌabꞌa tut e gente, nen ubꞌan cꞌani inxin inware Nitata Dios xeꞌ turu tichan que machi innata chi e gente era, che e Jesús.
MAT 10:34 Entonces che e Jesús: —Ira ibꞌijnu que tarien tara tor e rum tuaꞌ intares e jiriar, porque nen machi intares e jiriar sino que intares inteꞌ nuxi qꞌuijnar. Porque tin e machi ucꞌanien axin aqꞌuijna uwirobꞌ tin e ucꞌanien.
MAT 10:35 Porque nen tarien tuaꞌ inche aqꞌuijna inteꞌ winic uwira utata, y tuaꞌ inche aqꞌuijna inteꞌ ijchꞌoc uwira utuꞌ, y tuaꞌ inche aqꞌuijna inteꞌ aribꞌtzir uwira upixam ixic.
MAT 10:36 Y tamar era tin e turobꞌ tama inteꞌ familía axin aqꞌuijna uwira ubꞌobꞌ jaxobꞌ taca.
MAT 10:37 ’Pues tin e uyajta ut utata o utuꞌ más que nen ma tawar tuaꞌ aquetpa niwajcanuar. Y tin e uyajta ut uyunen o uwijchꞌoc más que nen ma tawar tuaꞌ aquetpa niwajcanuar.
MAT 10:38 Y tin e axin tanipat ucꞌani tuaꞌ aquetpa turix tuaꞌ ani achamesna tamaren, porque tin e machi aquetpa turix tuaꞌ achamesna ani tamaren ma tawar tuaꞌ aquetpa niwajcanuar.
MAT 10:39 Y tin e cꞌani ani ucorpes ucuxtar cꞌani asatpa, pero tin e axin usati ucuxtar tamaren axin uchꞌami e corpesiaj, che e Jesús.
MAT 10:40 Entonces che e Jesús: —Tin e war atzay uchꞌamiox war atzay uchꞌamien nen ubꞌan. Y tin e war atzay uchꞌamien nen, war atzay uchꞌami tin e uyebꞌta tarien.
MAT 10:41 Pues ayan tin e war uchꞌami inteꞌ ojroner tuaꞌ e Dios xeꞌ asutpa uchecsu tunor era tut e gente. Y ayan tin e uchꞌami inteꞌ winic cocha era umen taca que war uchecsu lo que arobꞌna umen e Dios. Entonces tin e war uchꞌami inteꞌ winic cocha era cꞌani uchꞌami utuanibꞌir bꞌan cocha aꞌjcꞌuna tin e war uchecsu lo que arobꞌna umen e Dios. Y ayan e winicobꞌ xeꞌ erach uwirnar y ayan tin e uchꞌami inteꞌ winic cocha era umen taca que erach uwirnar. Entonces tin e war uchꞌami inteꞌ winic xeꞌ erach uwirnar cocha era cꞌani uchꞌami utuanibꞌir bꞌan cocha aꞌjcꞌuna tin e erach uwirnar.
MAT 10:42 Y tin e axin utacre inteꞌ umaxtac e Dios motor jay jax taca imbꞌijc jaꞌ axin uyajcꞌu tuaꞌ uyuchꞌi umen que war unata que jax inteꞌ niwajcanuar, cꞌani inwareox que jaxir xeꞌ war uyajcꞌu e jaꞌ era machi tuaꞌ usati utuanibꞌir, che e Jesús.
MAT 11:1 Entonces conda e Jesús cꞌapa ucanse e doce uyajcanuarobꞌ tama tunor era, locꞌoy ixin tuaꞌ acanseyan y tuaꞌ uchecsu uyojroner e Dios tama tunor or e lugar tama e departamento Galilea.
MAT 11:2 Pues tama e tiempo era e Juan xeꞌ ajchꞌuymar ya turu tama e cárcel. Y cꞌotoy unata tunor lo que war uche e Cristo. Y tamar era e Juan cay uyare cora uyajcanuarobꞌ tuaꞌ axin uwarajsiobꞌ e Jesús.
MAT 11:3 Entonces conda cꞌotoyobꞌ uyajcanuarobꞌ e Juan tut e Jesús cay uyubꞌiobꞌ tuaꞌ y chenobꞌ: —¿Jax ca net xeꞌ quetpet tuaꞌ watet tuaꞌ acorpeson non xeꞌ tuon e Israel? ¿O ucꞌanto ca tuaꞌ cacojco otronteꞌ? che uyajcanuarobꞌ e Juan era.
MAT 11:4 Y che e Jesús: —Quiquic arenic e Juan lo que war iwira y lo que war iyubꞌi.
MAT 11:5 Arenic que tin e tajpem ani unacꞌutobꞌ war ixto eꞌronobꞌ, y arenic que tin e tzꞌej ani uyoc war ixto axanobꞌ, y arenic que tin e ayan ani e chec tut xeꞌ ucꞌabꞌa lepra cꞌapa ixto ojri tutobꞌ. Y arenic que tin e macar ani uchiquin war ixto obꞌian, y arenic que tin e chamenobꞌ ani sutpa bꞌixcꞌobꞌ ixto otronyajr, y arenic que tin e tzajtaca utobꞌ war ixto uyubꞌiobꞌ uyojroner e Dios tama e corpesiaj.
MAT 11:6 Chojbꞌesbꞌir ut tin e machi usati ucꞌupesiaj tamaren conda uyubꞌi niwojroner, che e Jesús.
MAT 11:7 Entonces conda locꞌoyobꞌ uyajcanuarobꞌ e Juan, e Jesús cay uyare e gente tama e Juan y che: —Conda ixiox tama e choquem lugar tuaꞌ iyubꞌi uyojroner e Juan, ¿war ca ibꞌijnu que jax inteꞌ winic xeꞌ machi aqꞌuecꞌo tama ubꞌijnusiaj?
MAT 11:8 Y jay machi, ¿tucꞌa tuaꞌ ixiox iwira? ¿Ixiox ca tuaꞌ iwira inteꞌ winic xeꞌ galan bꞌujcsebꞌir? Machi, porque tin e galan bꞌujcsebꞌir xeꞌ war utzayjres ubꞌa jax taca, ajtaca cꞌani aturuan tama inteꞌ otot bꞌan cocha tiaꞌ aturuan inteꞌ rey.
MAT 11:9 ¿Tucꞌa ixiox tuaꞌ iwira? ¿Jax ca inteꞌ profeta? Jax pues. Pero cꞌani inwareox era que más ayan ucꞌampibꞌir e Juan tut e Dios que tunor e profetobꞌ xeꞌ turuanobꞌ tama e onian tiempo.
MAT 11:10 Porque tamar e Juan era ayan lo que chꞌar tzꞌijbꞌabꞌir tama uyojroner e Dios que che: Cꞌani inwebꞌta axin inteꞌ niman xeꞌ tuaꞌ axin bꞌajxan toit. Jaxir cꞌani uyustes uyalmobꞌ e gente tuaꞌ uyubꞌiobꞌ awojroner. Bꞌan che tama uyojroner e Dios.
MAT 11:11 Y cꞌani inwareox era que tujam tunor e winicobꞌ xeꞌ turobꞌ tara tor e rum ma incojt xeꞌ más nojta tut e Dios que e Juan xeꞌ ajchꞌuymar era. Pero cꞌani inwareox ubꞌan que tin e más chuchu ucꞌampibꞌir tama uchinam e Dios, jaxir tuaꞌ aquetpa más nojta que e Juan.
MAT 11:12 ’Pues conda e Juan cay uchecsu uyojroner e Dios esto coner machi war acꞌoy tin e war uturbꞌa ubꞌobꞌ tuaꞌ uche unumse ubꞌobꞌ tin e tuobꞌ uchinam e Dios. Y tin e imbꞌacꞌajr uwirnar quisinic utijresobꞌ inyajrer tunor uchinam e Dios tuaꞌ mix majchi erer oꞌchoy tamar.
MAT 11:13 Pues tunor e profetobꞌ tama e onian tiempo y tunor uley e Moisés cay ojronobꞌ tama e día conda cꞌani acꞌotoy tin e tuaꞌ acꞌotori tama uchinam e Dios este que cꞌotoy e Juan. Y tamar jaxir cꞌapa tunor e ojroner cocha era.
MAT 11:14 Y jay nox turoxix tuaꞌ ixcꞌupseyan tamar, erer porque cꞌani inwareox era que e Juan jax e Elías xeꞌ quetpa tuaꞌ watar.
MAT 11:15 Tin e ayan uchiquin uyubꞌic tunor era.
MAT 11:16 ’¿Tucꞌa tacar tuaꞌ inwareox que lar e gente tor e rum coner? Pues larobꞌ tacar cora bꞌiqꞌuit maxtac xeꞌ war umorojse ubꞌobꞌ aturuanobꞌ tut e rum tuaꞌ asiobꞌ. Y acay uyaru ubꞌobꞌ taca inteꞌ nuxi nuc y che:
MAT 11:17 “Cay lajbꞌon tama e píto bꞌan cocha jay turon ani tama inteꞌ nujbꞌiar, pero nox machi icꞌani ixacta. Y cay aruon bꞌan cocha jay turon ani tama inteꞌ mucmayaj, pero machi icꞌani ixaru.”
MAT 11:18 Y bꞌan e gente tor e rum coner, porque tari e Juan xeꞌ ajchꞌuymar tuaꞌ uchecsu uyojroner e Dios, pero cocha machi cay weꞌ y machi cay uyuchꞌi lo que iyuchꞌi nox, nox cay iware que jaxir ayan inteꞌ mabꞌambꞌan mein tamar.
MAT 11:19 Y de allí tarien nen xeꞌ Uyunenen e winic xeꞌ cay wien y xeꞌ cay unchꞌi lo que ajcꞌunen, pero nox cay ojronox nipater que calapir inweꞌ y que meyra war unchꞌi. Y cay ojronox nipater que nen intzay inwira tin e ajmabꞌambꞌanirobꞌ y tin e ajmorojseyajobꞌ tumin tuaꞌ e gobierno. Pero tamar era war aquetpa chequer que erach unatanyaj e Dios porque alocꞌoy tut tunor tin e axin ucꞌampes, che e Jesús.
MAT 11:20 Pues entonces e Jesús cay ucꞌaye e gente tama e chinamobꞌ tiaꞌ cay uche e sian milagro era porque machi cꞌani uyactobꞌ umabꞌambꞌanirobꞌ tuaꞌ axin axanobꞌ tama ubꞌir e Dios. Entonces ojron e Jesús y che:
MAT 11:21 —Tzajtaca iut nox xeꞌ turox tama e chinam Corazín. Y tzajtaca iut nox xeꞌ turox tama e chinam Betsaida ubꞌan. Porque jay chembꞌir ani e sian milagro tama e chinam Tiro y tama e chinam Sidón lo que chembꞌir tiut nox, ayix día ani que uchꞌamiobꞌix ani niwojroner y uyactobꞌix ani tunor e nuxi mabꞌambꞌanir lo que cay uchiobꞌ. Y ixiobꞌix ani uchectes ubꞌobꞌ tut e gente que war uyactobꞌ tunor umabꞌambꞌanirobꞌ umen que ulapiobꞌ ani e bꞌujc xeꞌ jarbꞌir tama e succhij y umen que uyari ani e tan tama ujorobꞌ, bꞌan cocha cay uchiobꞌ e gente era.
MAT 11:22 Pero cꞌani inwareox era que tama e día tuaꞌ e juicio más nojta tuaꞌ ixjajtzꞌa nox que tin e turobꞌ ani tama e chinam Tiro y tin e turobꞌ ani tama e chinam Sidón xeꞌ meyra cay uchiobꞌ e mabꞌambꞌanir.
MAT 11:23 Pues nox xeꞌ turox tama e chinam Capernaum war itattzꞌi ibꞌa que cꞌani ixixin tichan tuaꞌ ixturuan taca e Dios umen taca que galan uwirnar ichinam. Pero machi tuaꞌ ixixin tichan sino que ucꞌani tuaꞌ ixixin tama uchꞌenir e diablo, porque jay chembꞌir ani e sian milagro tama e chinam Sodoma lo que chembꞌir tiut nox, machito ani quetpa tijresbꞌir e chinam era esto coner.
MAT 11:24 Pero cꞌani inwareox era que tama e día tuaꞌ e juicio más nojta tuaꞌ ixjajtzꞌa nox que tin e turobꞌ ani tama e chinam Sodoma xeꞌ meyra cay uchiobꞌ e mabꞌambꞌanir, che e Jesús.
MAT 11:25 Entonces cay ojron e Jesús y che: —Intattzꞌi acꞌabꞌa Nitatet xeꞌ turet tichan porque net jax Uwinquiraret tunor lo que ayan tichan y tunor lo que ayan tara tor e rum ubꞌan. Porque net war awirse tin e chuchu ujorobꞌ tunor lo que quetpa mucur amener tut tin e nojta ujorobꞌ y tut tin e nojta ucanuar.
MAT 11:26 Y bꞌan ache, Nitatet, porque bꞌan itzay abꞌijnu ache, che e Jesús.
MAT 11:27 Entonces e Jesús uyare uyajcanuarobꞌ y che: —Nitata cꞌapix uyajqꞌuen tunor lo que ayan. Y mamajchi unata chien nen xeꞌ Uyunenen e winic sino que jax taca Nitata xeꞌ war unata. Y mamajchi unata chi Nitata sino que jax taca nen xeꞌ war innata, y tut tin e inxin inchecsu.
MAT 11:28 Laric taniut tunorox xeꞌ war ixcꞌoy umen que war ixpatna meyra y umen lo que cuchur imener, porque nen cꞌani inchiox ixjiri tamar.
MAT 11:29 Pues conda war apatnobꞌ chateꞌ wacax axin aturbꞌana inteꞌ teꞌ tama ujorobꞌ xeꞌ ucꞌabꞌa yugo. Y cocha nen cꞌani intacriox tama tunor ipatnar ochenic yebꞌar niyugo xeꞌ qꞌuecher nimen era y canoenic tamaren porque nen incꞌun niwirnar y machi tuaꞌ inqꞌuijna tacarox, y tamar era ixixin itajwi que ayan e jiriar tama iwalma.
MAT 11:30 Porque conda ixquetpa nutꞌur tacaren yebꞌar niyugo cꞌani inata que ma intran tuaꞌ ixxana tacaren y que ma intran tuaꞌ ixpatna tacaren, che e Jesús.
MAT 12:1 Pues tama inteꞌ día tuaꞌ e jiriar e Jesús war axana taca uyajcanuarobꞌ macuir cora trigo conda cay jajpnobꞌ uyajcanuarobꞌ umen e winar y tamar era cay uwotzꞌiobꞌ locꞌoy ut e trigo, y cay umuxrobꞌ upat tama ucꞌabꞌobꞌ, y cay uyujtobꞌ locꞌoy usojqꞌuir, y cay ucꞌuxiobꞌ ut e trigo era.
MAT 12:2 Pero ayan cora fariseobꞌ xeꞌ war axanobꞌ tupat e Jesús tama e día era xeꞌ war uwirobꞌ tunor era. Entonces cay uyubꞌiobꞌ tuaꞌ e Jesús y chenobꞌ: —Chꞌujcun awira lo que war uchiobꞌ awajcanuarobꞌ porque war uchiobꞌ inteꞌ patnar xeꞌ machi acꞌajna tuaꞌ achempa umen uley e Moisés tama inteꞌ día tuaꞌ e jiriar cocha era, che e fariseobꞌ era.
MAT 12:3 Y che e Jesús: —¿Machi ca iche leer lo que chꞌar tzꞌijbꞌabꞌir tama uyojroner e Dios tama e David conda war axana taca cora upiarobꞌ conda jajpnobꞌ umen e winar?
MAT 12:4 Pues ochoy e David macuir e templo tuaꞌ e Dios y cay uchꞌami cora pan xeꞌ quetpa ajcꞌubꞌir e Dios. Y ma erer ani acꞌujxa e pan era umenerobꞌ sino que ajrer taca e sacerdotiobꞌ que erer ucꞌuxiobꞌ. Pero conda jajpnobꞌ umen e winar e David taca upiarobꞌ cay ucꞌuxiobꞌ e pan era.
MAT 12:5 ¿O machi ca iche leer lo que chꞌar tzꞌijbꞌabꞌir tama uley e Moisés que e sacerdotiobꞌ xeꞌ patnobꞌ tama e templo machi jiriobꞌ motor tama inteꞌ día tuaꞌ e jiriar? Y cocha bꞌan arobꞌnobꞌ tuaꞌ uchiobꞌ umen e Dios ma erer cabꞌijnu que mabꞌambꞌan tunor era.
MAT 12:6 Pero cꞌani inwareox era que tara war inteꞌ winic tiut que más ayan ucꞌampibꞌir que e templo yajaꞌ.
MAT 12:7 Y chequer que nox machi inata tucꞌa war che uyojroner e Dios tiaꞌ che: “Nen más incꞌani que ixixin ichecsu ibꞌa que incꞌun iwirnar tut e gente que jay ixixin iwajcꞌu inteꞌ arac tuaꞌ apurutna tama e altar.” Jay inata ani tucꞌa war che e ojroner era machi ani war icꞌaye e gente conda ma ani tucꞌa war uchiobꞌ.
MAT 12:8 Y tamar era cꞌani inwareox que nen xeꞌ Uyunenen e winic ayan nicꞌotorer tuaꞌ inware tucꞌa erer uche inteꞌ y tucꞌa ma erer uche inteꞌ tama inteꞌ día tuaꞌ e jiriar ubꞌan, che e Jesús.
MAT 12:9 Entonces locꞌoy e Jesús tama e lugar tiaꞌ ayan e sian trigo y ixin esto tama inteꞌ chinam y ochoy tama e sinagoga.
MAT 12:10 Y ayan inteꞌ winic xeꞌ chamen inteꞌ ucꞌabꞌ tama e sinagoga era. Y ayan cora fariseobꞌ ubꞌan xeꞌ war usicbꞌobꞌ cocha tuaꞌ utuchꞌiobꞌ e Jesús que machi ani war acꞌupseyan tut uley e Moisés. Y tamar era uyubꞌiobꞌ tuaꞌ e Jesús y chenobꞌ: —¿Bueno ca tut uley e Moisés tuaꞌ atzꞌacpesna inteꞌ ajmuac tama inteꞌ día tuaꞌ e jiriar? che e fariseobꞌ era.
MAT 12:11 Y che e Jesús: —Tinox xeꞌ ayan incojt iwoveja, jay axin ajotzpa tama inteꞌ chꞌen tama inteꞌ día tuaꞌ e jiriar ¿machi ca ixixin ilocse tama e día era?
MAT 12:12 Y cocha más atujri inteꞌ winic que incojt oveja war che era que erer achempa lo que imbꞌutz tama inteꞌ día tuaꞌ e jiriar ubꞌan, che e Jesús.
MAT 12:13 Entonces e Jesús uyare e winic xeꞌ chamen ucꞌabꞌ y che: —Tutzꞌu acꞌabꞌ, che e Jesús. Y conda ututzꞌi ucꞌabꞌ tzꞌacpesna inyajrer y quetpa bꞌan cocha inteꞌ ucꞌabꞌ xeꞌ imbꞌutz.
MAT 12:14 Entonces locꞌoy ixiobꞌ e fariseobꞌ taca inteꞌ qꞌuijnar tama uyalmobꞌ y cay ubꞌijnuobꞌ cocha tuaꞌ uchamsiobꞌ e Jesús.
MAT 12:15 Pues cocha e Jesús war unata lo que war ubꞌijnuobꞌ e fariseobꞌ locꞌoy tama e lugar era ubꞌan. Y meyra sian gente ixiobꞌ tupat. Y jaxir war utzꞌacpes tunor tin e ajmuacobꞌ.
MAT 12:16 Y e Jesús war uyare e gente y che: —Ira iware e gente chien nen, che e Jesús.
MAT 12:17 Pues bꞌan che e Jesús tuaꞌ acꞌapa achempa lo que chꞌar tzꞌijbꞌabꞌir umen e Isaías tiaꞌ che:
MAT 12:18 —Chꞌujcunic iwira niman xeꞌ sicbꞌabꞌir nimener xeꞌ inchoj ut nimener y xeꞌ intzay inwira. Cꞌani inturbꞌa Ninawalir tamar y jaxir tuaꞌ axin uchecsu tut e gente tara tor e rum tunor lo que erach, che e Dios.
MAT 12:19 Y mamajchi tuaꞌ uqꞌuijnes taca uyojroner, y nien machi tuaꞌ uyaru taca unuc, y nien mamajchi tuaꞌ uyubꞌi unuc xeꞌ nojta tama inteꞌ calle, che e Dios.
MAT 12:20 Y jaxir machi tuaꞌ ucꞌocchi tin e machi aqꞌuecꞌo tama uyalma xeꞌ bꞌan cocha inteꞌ jinaj xeꞌ cꞌocchemix xeꞌ chꞌar tut e rum. Y jaxir machi tuaꞌ utajpes e cꞌajc tama uyalma inteꞌ winic xeꞌ bꞌan cocha umechir inteꞌ candil conda cꞌanix atajpa. Y bꞌan tuaꞌ uche este que acꞌapa acucurna tunor e mabꞌambꞌanir umen lo que erach, che e Dios.
MAT 12:21 Y tunor e gente tara tor e rum cꞌani uturbꞌobꞌ ucojcsiajobꞌ tamar taca ucꞌabꞌa jaxir tuaꞌ erer atacarnobꞌ umener. Bꞌan chꞌar tzꞌijbꞌabꞌir tama uyojroner e Dios umen e profeta Isaías.
MAT 12:22 Pues taresna inteꞌ winic tut e Jesús xeꞌ chucur umen inteꞌ mabꞌambꞌan mein y xeꞌ tajpem unacꞌut y xeꞌ machi oꞌjron. Entonces e Jesús uyajnes ixin e mabꞌambꞌan mein y quetpa tzꞌacpesbꞌir e winic, y tamar era eꞌron unacꞌut y erer oꞌjron.
MAT 12:23 Y tunor e gente cay ubꞌijnuobꞌ y cay bꞌactobꞌ tama tunor era y chenobꞌ: —¿Jax ca nic era uyunen e rey David xeꞌ turuan tama e onian tiempo? che e gente era.
MAT 12:24 Pero conda cꞌotoy unatobꞌ e fariseobꞌ tama tunor era cay ojronobꞌ upater e Jesús y chenobꞌ: —E winic era war ulocse e mabꞌambꞌan mein tamar taca ucꞌotorer e Beelzebú xeꞌ jax uwinquir e inmojr mabꞌambꞌan meinobꞌ, che e fariseobꞌ era.
MAT 12:25 Pero e Jesús war unata lo que war ubꞌijnuobꞌ e fariseobꞌ era y tamar era cay ojron y che: —Jay tunor e gente tama ulugar inteꞌ ajcꞌotorer axin aqꞌuijna uwira ubꞌobꞌ cꞌani acꞌapa atijresna tunor ulugar e ajcꞌotorer era. Y bꞌan tama ingojr otot o tama inteꞌ chinam, jay axin aqꞌuijna uwira ubꞌobꞌ tunor e gente, cꞌani acꞌapa atijresna tunor e lugar era.
MAT 12:26 Y bꞌan tama e Satanás ubꞌan. Jay acay ulocse ani inteꞌ mabꞌambꞌan mein war che que jaxir war utijres ubꞌa, y ma cocha erer ucojco ucꞌotorer jay axin ani uche cocha era.
MAT 12:27 Y jay nen war ani incꞌampes ucꞌotorer e diablo tuaꞌ inwajnes axin inteꞌ mabꞌambꞌan mein, entonces bꞌan war uchiobꞌ iwajcanuarobꞌ tibꞌa ubꞌan xeꞌ fariseox. Pero chequer tut iwajcanuarobꞌ era que majax ucꞌotorer e Satanás lo que acꞌampesna tuaꞌ aloqꞌuesna inteꞌ mabꞌambꞌan mein. Y tamar era chequer que majax erach lo que war iware nipater era que war ani incꞌampes ucꞌotorer e Beelzebú tuaꞌ inlocse inteꞌ mabꞌambꞌan mein.
MAT 12:28 Pero jay nen era war inlocse inteꞌ mabꞌambꞌan mein tamar taca ucꞌotorer Unawalir e Dios war che que war ixto achecta uchinam e Dios tiut.
MAT 12:29 ’Pues e Satanás aquetpa bꞌan cocha inteꞌ winic xeꞌ aqꞌuecꞌo xeꞌ war ucojco tunor lo que ayan macuir uyotot. Pero jay watar otronteꞌ winic xeꞌ más aqꞌuecꞌo bꞌan cocha nen xeꞌ Uyunenen e winic, e winic era xeꞌ más aqꞌuecꞌo ucꞌani tuaꞌ ucucru e ajyum otot y ucachi uchꞌabꞌu y de allí erer axin apojrsan.
MAT 12:30 ’Pues tin e machi atzay uwiren war aqꞌuijna uwiren, y tin e machi utacren inmorojse niwoveja, más war acꞌapa upucujcse axin tunor niwoveja era.
MAT 12:31 ’Entonces cꞌani inwareox era que Cadiosir erer acꞌumpa tama tunor e mabꞌambꞌanir y tama tunor e mabꞌambꞌan ojroner lo que uchiobꞌ e winicobꞌ, pero jay ayan inteꞌ xeꞌ axin uqꞌuijnes Unawalir e Dios, ma tiaꞌ tuaꞌ acꞌumpa e Dios taca e winic era.
MAT 12:32 Tin e oꞌjron nipater nen xeꞌ Uyunenen e winic cꞌanto acꞌumpa e Dios taca e winic era. Pero tunor tin e axin oꞌjron upater Unawalir e Dios ma tiaꞌ tuaꞌ acꞌumpa e Dios taca e winic era, nien coner y nien tama e tiempo xeꞌ watar, che e Jesús.
MAT 12:33 Entonces che e Jesús: —Inteꞌ teꞌ xeꞌ imbꞌutz axin uyajcꞌu uyutir xeꞌ imbꞌutz ubꞌan. Y inteꞌ teꞌ xeꞌ mabꞌambꞌan axin uyajcꞌu uyutir xeꞌ mabꞌambꞌan ubꞌan. Pues erer iwira tunor e teꞌ tamar taca uyutir.
MAT 12:34 Nox larox cocha incojt chan xeꞌ mabꞌambꞌan. Pues ma cocha erer alocꞌoy inteꞌ ojroner xeꞌ incꞌun tama uyej inteꞌ xeꞌ mabꞌambꞌan uwirnar, porque lo que ayan tama uyalma jax tuaꞌ alocꞌoy tama uyej ubꞌan.
MAT 12:35 Imbꞌutz tunor e ojroner xeꞌ alocꞌoy tama uyej inteꞌ winic xeꞌ imbꞌutz uwirnar porque imbꞌutz tunor lo que chꞌar tama uyalma. Pero mabꞌambꞌan tunor e ojroner xeꞌ alocꞌoy tama uyej inteꞌ winic xeꞌ mabꞌambꞌan uwirnar porque mabꞌambꞌan tunor lo que chꞌar tama uyalma.
MAT 12:36 Pero cꞌani inwareox era que tama e día tuaꞌ e juicio tunor e winicobꞌ cꞌani uchꞌamiobꞌ uyeror tama tunor uyojronerobꞌ xeꞌ matucꞌa ucꞌampibꞌirobꞌ xeꞌ arobꞌna umenerobꞌ.
MAT 12:37 Porque bꞌan cocha oꞌjron inteꞌ tara tor e rum y bꞌan tuaꞌ uchꞌami uyeror inteꞌ. Jay imbꞌutz tunor lo que oꞌjron inteꞌ tara tor e rum, erer acꞌotoy tut e qꞌuin. Pero jay mabꞌambꞌan tunor lo que oꞌjron tara tor e rum, ucꞌani tuaꞌ axin tama e cꞌajc, che e Jesús.
MAT 12:38 Entonces cꞌotoy cora fariseobꞌ y cora ajcanseyajobꞌ tama uley e Moisés tut e Jesús y chenobꞌ: —Ajcanseyajet, cꞌani cawira ache watar inteꞌ nuxi seña tut e qꞌuin, che e nuquir winicobꞌ era.
MAT 12:39 Entonces che e Jesús: —E gente xeꞌ mabꞌambꞌan uwirnarobꞌ y xeꞌ machi cꞌani acꞌupseyanobꞌ tamaren intaca war ucꞌajtiobꞌ tuaꞌ uwirobꞌ watar inteꞌ seña tut e qꞌuin tuaꞌ unatobꞌ jay ayan ucꞌotorer e Dios tamaren. Pero machi tuaꞌ achecta más seña tiut sino que jax taca e seña lo que arobꞌnon umen e profeta Jonás xeꞌ turuan tama e onian tiempo.
MAT 12:40 Porque bꞌan cocha e Jonás quetpa uxteꞌ día y uxteꞌ acbꞌar tama unac e nuxi chay, y bꞌan tuaꞌ inquetpa macuir e rum uxteꞌ día y uxteꞌ acbꞌar nen xeꞌ Uyunenen e winic ubꞌan.
MAT 12:41 Tin e turobꞌ ani tama e chinam Nínive tama e onian tiempo cꞌani achpobꞌ tama e día tuaꞌ e juicio tuaꞌ ucꞌayobꞌ tunor e gente xeꞌ turobꞌ tor e rum coner, porque tin e turobꞌ tama e chinam Nínive sutpa uchꞌamiobꞌ uyojroner e Dios lo que arobꞌnobꞌ umen e Jonás, pero turu era tiut inteꞌ xeꞌ más nuxi winic que e Jonás, pero nox machi cꞌani ixcꞌupseyan tamaren.
MAT 12:42 Y cꞌani achpa e ixic xeꞌ cꞌotori tama inteꞌ nuxi lugar innajt teinxejr bꞌana tama e día tuaꞌ e juicio tuaꞌ ucꞌaye e gente xeꞌ turobꞌ tor e rum coner, porque jaxir tari tama inteꞌ lugar más innajt tara tor e rum tuaꞌ uyubꞌi unatanyaj e Salomón, pero turu era tiut inteꞌ xeꞌ más nuxi winic que e Salomón, pero nox machi cꞌani ixcꞌupseyan tamaren, che e Jesús.
MAT 12:43 Entonces che e Jesús: —Ayan inteꞌ ojroner tama inteꞌ winic xeꞌ locꞌoy inteꞌ mabꞌambꞌan mein tamar. Y conda locꞌoy e mabꞌambꞌan mein era, ixin usajca inteꞌ lugar tiaꞌ taquin tuaꞌ ajiri tamar, pero conda machi utajwi acay ayopa tama ujor y che:
MAT 12:44 “¿Tucꞌa tuaꞌ machi insutpa inxin tama uyalma e winic tiaꞌ locꞌoyen?” che e mabꞌambꞌan mein era jax taca. Entonces conda sutpa ixin, utajwi e winic bꞌan cocha inteꞌ otot xeꞌ turu ubꞌajner xeꞌ galan uwirnar y xeꞌ bien bꞌujcsebꞌir y xeꞌ bien mesbꞌir macuir.
MAT 12:45 Entonces e mabꞌambꞌan mein axin utares otro siete mein xeꞌ más calapir uwirnarobꞌ y oꞌchoy aturuanobꞌ tama e winic. Y e winic axin aquetpa más calapir uwirnar otronyajr. Y bꞌan tuaꞌ anumuy tama e gente xeꞌ turobꞌ tara tor e rum coner ubꞌan, che e Jesús.
MAT 12:46 Pues conda e Jesús warto oꞌjron taca e gente era cꞌotoyobꞌ utuꞌ y uwijtzꞌinobꞌ. Pero quetpobꞌ patir, war ucojcobꞌ tuaꞌ oꞌjronobꞌ tacar.
MAT 12:47 Entonces cꞌotoy inteꞌ winic tut e Jesús y che: —Turobꞌ atuꞌ y awijtzꞌinobꞌ patir, cꞌani oꞌjronobꞌ tacaret, che e winic.
MAT 12:48 Y che e Jesús: —¿Chi nituꞌ y chi niwijtzꞌinobꞌ? che e Jesús.
MAT 12:49 Entonces e Jesús utuchꞌi ut uyajcanuarobꞌ taca ucꞌabꞌ y che: —Jax nituꞌ y niwijtzꞌinobꞌ.
MAT 12:50 Porque tunor tin e axin uche lo que ucꞌani Nitata xeꞌ turu tichan, jax niwijtzꞌin y jax niwijtan y jax nituꞌ, che e Jesús.
MAT 13:1 Pues entonces tama e día era locꞌoy e Jesús tama e otot y ixin turuan tutiꞌ e nuxi jaꞌ.
MAT 13:2 Y cay umorojse ubꞌobꞌ meyra sian gente tut y tamar era e Jesús ochoy turuan tama inteꞌ barco. Pero e gente quetpobꞌ tor e rum tiaꞌ taquin.
MAT 13:3 Entonces e Jesús cay canseyan tacar inteꞌ ojroner xeꞌ mucur cora y che: —Ayan inteꞌ ojroner tama inteꞌ ajpatnar xeꞌ ixin tuaꞌ apacma tama uchor.
MAT 13:4 Y tamar e pacmar era intaca uwechꞌe ixin ut e semilla y ayan ut e semilla xeꞌ cꞌaxi tut e bꞌir xeꞌ conda irna ut umen e mut ixin ucꞌopiobꞌ ucꞌuxiobꞌ.
MAT 13:5 Y ayan ut e semilla xeꞌ cꞌaxi macuir e cherem tun tiaꞌ imbꞌijc taca e rum, y wacchetaca cuxpa ut e semilla era cocha ma intam e rum y chꞌiꞌ cora.
MAT 13:6 Pero conda fuerteran e qꞌuin acay aluccha uyopor y cocha ma tiaꞌ tuaꞌ awiri más, taqui.
MAT 13:7 Y ayan ut e semilla xeꞌ cꞌaxi macuir e sian tꞌix, y conda cuxpa ut e semilla era cuxpa macuir e sian tꞌix, y umen e tꞌix era machi actana chꞌiꞌ, y lo que uche, ocꞌoy.
MAT 13:8 Pero ayan ut e semilla xeꞌ cꞌaxi tama or e rum xeꞌ incꞌun. Cuxpa y chꞌiꞌ y meyra uyutir uyari tama ingojr ut e semilla era. Y conda cay cꞌawan ayan tin e uyari cien ut tama ingojr ut, y ayan tin e uyari sesenta ut tama ingojr ut, y ayan tin e uyari treinta ut tama ingojr ut.
MAT 13:9 Tunor tin e ayan uchiquin, uyubꞌic niwojroner era, che e Jesús.
MAT 13:10 Entonces cꞌotoy uyajcanuarobꞌ e Jesús tuyejtzꞌer y uyubꞌiobꞌ tuaꞌ y chenobꞌ: —¿Tucꞌa tuaꞌ war acanse e gente tamar taca inteꞌ ojroner xeꞌ mucur cora? che uyajcanuarobꞌ.
MAT 13:11 Y che e Jesús: —Pues tama e onian tiempo quetpa mucur cocha tuaꞌ aquetpa uchinam e Dios, pero coner aquetpa tuaꞌ achectesna tunor era tiut. Pero tut e inmojr gente era machi tuaꞌ achectesna tunor era.
MAT 13:12 Porque tunor tin e uyubꞌi niwojroner y uturbꞌa ubꞌa tamar axin aꞌjcꞌuna más este que anojran ujor axin. Pero tin e uyubꞌi cora niwojroner y machi uturbꞌa ubꞌa tamar cꞌani aloqꞌuesna lo que ayan ani cora tamar.
MAT 13:13 Pero tut e inmojr gente era war onjron tama inteꞌ ojroner xeꞌ mucur cora tuaꞌ alocꞌoy bꞌan cocha chꞌar tzꞌijbꞌabꞌir tama uyojroner e Dios que: “Motor que eꞌrna umenerobꞌ pero ma chequer tutobꞌ tucꞌa war uwirobꞌ, y motor que war oꞌbꞌianobꞌ pero machi unatobꞌ tucꞌa war che lo que war uyubꞌiobꞌ”, che tama uyojroner e Dios.
MAT 13:14 Pues tamar e gente era war acꞌapa achempa lo que chꞌar tzꞌijbꞌabꞌir umen e profeta Isaías tama e onian tiempo xeꞌ che: Motor que war ichiquini niwojroner pero machi tuaꞌ inata tucꞌa war che niwojroner era, y motor que war iwira pero machi tuaꞌ inata tucꞌa era que war iwira.
MAT 13:15 Porque macar ujorobꞌ e gente era tut lo que ayan tuaꞌ e Dios, y tutur uchiquin, y macar unacꞌutobꞌ. Y umaquiobꞌ unacꞌutobꞌ tuaꞌ machi eꞌron, y ututiobꞌ uchiquinobꞌ tuaꞌ machi uyubꞌiobꞌ, y umaquiobꞌ ujorobꞌ tuaꞌ machi unatobꞌ tucꞌa ayan taniut. Y nien machi cꞌani usuti utobꞌ taniut tuaꞌ atzꞌacpesnobꞌ nimener, che e Dios. Bꞌan chꞌar tzꞌijbꞌabꞌir umen e profeta Isaías.
MAT 13:16 ’Pero chojbꞌesbꞌirox nox era umen que war iwira niut y umen que war iyubꞌi niwojroner.
MAT 13:17 Porque cꞌani inwareox era que meyra profeta xeꞌ turuanobꞌ tama e onian tiempo y meyra winicobꞌ xeꞌ erach uwirnarobꞌ uyusreobꞌ tuaꞌ ani uwirobꞌ lo que war iwira nox era, pero machi uwirobꞌ; y uyusreobꞌ tuaꞌ ani uyubꞌiobꞌ lo que war iyubꞌi nox era, pero machi uyubꞌiobꞌ, che e Jesús.
MAT 13:18 Entonces che e Jesús: —Ubꞌinic era porque cꞌani inchecsu tiut lo que war che e ojroner xeꞌ mucur cora tamar e ajpacmar.
MAT 13:19 Pues ut e semilla xeꞌ cꞌaxi tut e bꞌir xeꞌ cꞌojpa umen e mut lar tacar tin e axin uyubꞌi uyojroner e Dios tama e corpesiaj pero xeꞌ machi acꞌotoy unata tucꞌa tunor era, pues tut inteꞌ cocha era watar e diablo wacchetaca tuaꞌ ulocse uyojroner e Dios lo que ochoy ani tama uyalma tuaꞌ machi acꞌupseyan tamar.
MAT 13:20 Y ut e semilla xeꞌ cꞌaxi macuir e cherem tun tiaꞌ imbꞌijc taca e rum lar tacar tin e uyubꞌi uyojroner e Dios y atzay uchꞌamiobꞌ.
MAT 13:21 Pero cocha machi wiri e ojroner era tama uyalmobꞌ, acꞌupseyanobꞌ tama e Dios cora, pero conda watar lo que uche unumse ubꞌobꞌ, wacchetaca uyactobꞌ e Dios y axiobꞌ.
MAT 13:22 Y ut e semilla xeꞌ cꞌaxi macuir e sian tꞌix lar tacar tin e uyubꞌi uyojroner e Dios y uchꞌami, pero de allí acay ubꞌijnu meyra tama tunor lo que ayan tara tor e rum y war ubꞌijnu cocha era: “Pero nen cꞌani inchonma más tuaꞌ abꞌoro nitumin, y nen cꞌani inwejta inche tunor lo que ayan tara tor e rum”, xeꞌ ubꞌijnu inteꞌ. Y umen tunor e majresiaj era acꞌapa oꞌcꞌoy lo que uchꞌami ani tama e Dios, y aquetpa lar tacar e teꞌ xeꞌ intaca asacnichi, pero matucꞌa uyutir uyajcꞌu.
MAT 13:23 Y ut e semilla xeꞌ cꞌaxi tama e rum xeꞌ incꞌun lar tacar e gente xeꞌ incꞌun uyalma y conda uyubꞌi uyojroner e Dios uturbꞌa ubꞌa tamar, y axana bueno tamar. Y ayan tin e aquetpa lar tacar inteꞌ nar xeꞌ meyra uwiximir uyari tama ingojr ut. Y ayan tin e lar tacar inteꞌ nar xeꞌ uyari cien ut tama ingojr ut. Y ayan tin e lar tacar inteꞌ nar xeꞌ uyari sesenta ut. Y ayan tin e lar tacar inteꞌ nar xeꞌ uyari treinta ut, che e Jesús.
MAT 13:24 Entonces e Jesús cay uchecsu otronteꞌ ojroner xeꞌ mucur cora y che: —Ayan inteꞌ ojroner xeꞌ erer uchecsu tucꞌa lar tacar uchinam e Dios. Pues ayan inteꞌ winic xeꞌ ixin upaqꞌui uchor taca ut e semilla xeꞌ más ustabꞌir.
MAT 13:25 Pero conda war awayan e ajyum chor, ochoy inteꞌ winic xeꞌ aqꞌuijna uwira ut e ajyum chor era y cay upaqꞌui e cuscus macuir e trigo, y de allí locꞌoy ixin.
MAT 13:26 Entonces cuxpa y cay chꞌiꞌ e trigo taca e cuscus y conda cay checta unuc tuaꞌ awitcꞌa, checta que ayan e cuscus ubꞌan.
MAT 13:27 Y ayan cora man xeꞌ war apatnobꞌ tama e ajyum chor era xeꞌ ixiobꞌ tut y chenobꞌ: “¿Ustabꞌir ca ut e semilla xeꞌ cay apaqꞌui tama achor? Y jay bꞌan ¿tucꞌa numuy que checta e sian cuscus era macuir e trigo?” che e manobꞌ era.
MAT 13:28 Entonces ojron e ajyum chor y che: “Ayan inteꞌ xeꞌ war aqꞌuijna uwiren xeꞌ ochoy upaqꞌui e sian cuscus era”, che e ajyum chor. Y che e manobꞌ: “¿O acꞌani ca tuaꞌ caxin cabꞌaxi e sian cuscus era?” che e manobꞌ era.
MAT 13:29 Y che e ajyum chor: “Machi. Jay ixixin ibꞌaxi e sian cuscus era axin abꞌaxcꞌa e trigo ubꞌan.
MAT 13:30 Más ani bueno tuaꞌ iwacta achꞌiꞌ taca e trigo este que acꞌotoy e hora tuaꞌ caxuri camorojse. Y tama e hora yajaꞌ cꞌani inware cora man tuaꞌ axin umorojsiobꞌ e cuscus bꞌajxan tuaꞌ ucachiobꞌ intzajc intzajc ut tuaꞌ uyariobꞌ tama e cꞌajc. Y conda acꞌapa uchiobꞌ tunor era cꞌani inware tuaꞌ umorojsiobꞌ e trigo tuaꞌ ubꞌutꞌiobꞌ tama e granero”, che e ajyum chor, che e Jesús.
MAT 13:31 Entonces e Jesús cay uchecsu otronteꞌ ojroner xeꞌ mucur cora y che: —Uchinam e Dios lar tacar ut usemilla e mostaza que inteꞌ winic ixin upaqꞌui tama uchor.
MAT 13:32 Pues ut e semilla era jax xeꞌ más chuchu tama tunor ut e semilla pero conda axin achꞌiꞌ aquetpa más nojta que tunor e cꞌopot este que aquetpa bꞌan cocha inteꞌ nuquir teꞌ xeꞌ tzꞌacar tuaꞌ acꞌotoy aturuan e mut tamar y tuaꞌ uchiobꞌ usijcobꞌ tamar ucꞌabꞌ ubꞌan. Y bꞌan uchinam e Dios ubꞌan, che e Jesús.
MAT 13:33 Entonces e Jesús cay uchecsu otronteꞌ ojroner xeꞌ mucur cora y che: —Uchinam e Dios lar tacar imbꞌijc levadura lo que ayabꞌarna taca uxgojr ruch harina conda war achena e pan umen inteꞌ ixic, y asibꞌi watar tunor e cꞌum umener, che e Jesús.
MAT 13:34 Pues arobꞌnobꞌ e gente tunor era umen e Jesús tamar taca e ojroner xeꞌ mucur cora. Y matucꞌa war uyare xeꞌ aquetpa chequer tutobꞌ sino que war ucꞌampes e ojroner xeꞌ aquetpa mucur cora tutobꞌ.
MAT 13:35 Y uche cocha era tuaꞌ acꞌapa achempa bꞌan cocha chꞌar tzꞌijbꞌabꞌir umen inteꞌ profeta tama e onian tiempo tiaꞌ che: —Cꞌani inwareobꞌ meyra ojroner xeꞌ mucur cora, y cꞌani inchecsu meyra lo que quetpa mucur conda merato ani achena or e rum. Bꞌan chꞌar tzꞌijbꞌabꞌir tama uyojroner e Dios.
MAT 13:36 Entonces e Jesús ecmay tama e barco y ixin tama uyotot otronyajr. Y cꞌotoy uyajcanuarobꞌ tuyejtzꞌer y uyubꞌiobꞌ tuaꞌ y chenobꞌ: —¿Tucꞌa war che e ojroner tama e cuscus taca e trigo? che uyajcanuarobꞌ.
MAT 13:37 Entonces cay ojron e Jesús y uchecsu lo que war che e ojroner era y che: —Pues tin e upaqꞌui ut e semilla xeꞌ más ustabꞌir jax nen xeꞌ Uyunenen e winic.
MAT 13:38 Y e chor jax tunor or e rum era. Y ut e semilla xeꞌ ustabꞌir jax tin e tuobꞌ uchinam e Dios. Y ut e semilla xeꞌ bꞌan cocha e cuscus jax tin e tuobꞌ e diablo.
MAT 13:39 Y tin e war aqꞌuijna uwira ut e ajyum chor xeꞌ cay upaqꞌui e cuscus macuir e trigo jax e diablo. Y e hora conda cꞌani amorojsena e cosecha jax conda cꞌani acꞌapa or e rum era. Y e manobꞌ xeꞌ cꞌani umorojse e cosecha jax uyangelobꞌ e Dios.
MAT 13:40 Y bꞌan cocha e cuscus quetpa tuaꞌ abꞌojca tuaꞌ ayajra tama e cꞌajc, y bꞌan tuaꞌ achempa taca e gente xeꞌ tuobꞌ e diablo conda acꞌapa or e rum era.
MAT 13:41 Y nen xeꞌ Uyunenen e winic cꞌani intzacre e angelobꞌ tuaꞌ axin umorojsiobꞌ tunor tin e uche acucrema otronteꞌ tama e mabꞌambꞌanir y tunor tin e uchiobꞌ e mabꞌambꞌanir.
MAT 13:42 Y cꞌani ayajrobꞌ tama inteꞌ chꞌen xeꞌ bꞌutꞌur taca e cꞌajc tiaꞌ tuaꞌ aruobꞌ y ucꞌuxiobꞌ ut uyejobꞌ umen e nuxi cꞌuxner.
MAT 13:43 Y tama e tiempo yajaꞌ tin e erach tut Catata Dios cꞌani ejpray utobꞌ tama uchinam e Dios bꞌan cocha ejpray e qꞌuin. Tin e ayan uchiquin, uyubꞌic niwojroner, che e Jesús.
MAT 13:44 Entonces ojron e Jesús otronyajr y che: —Uchinam e Dios lar tacar lo que meyra atujri xeꞌ mucbꞌir macuir e rum. Y lo que quetpa macuir e rum era tajwina umen inteꞌ winic tama ucꞌopot otronteꞌ. Y wacchetaca sutpa umaqui otronyajr, y atzay sutpa ixin tama uyotot tuaꞌ uchoni tunor lo que ayan tuaꞌ. Y conda cꞌapa uchoni uyotot, ixin tuaꞌ umani e cꞌopot tiaꞌ mucbꞌir lo que meyra atujri. Y bꞌan uchinam e Dios ubꞌan, meyra atujri, che e Jesús.
MAT 13:45 Entonces e Jesús che: —Uchinam e Dios lar tacar inteꞌ ajchonmar xeꞌ war axana war usicbꞌa e tunyujy xeꞌ más atujri y xeꞌ más galan uwirnar.
MAT 13:46 Y tama inteꞌ día cꞌotoy utajwi inteꞌ tunyujy xeꞌ meyra atujri. Entonces ixin uchoni tunor lo que ayan tuaꞌ y utzꞌacse utumin. Entonces ixin y umani e tunyujy era. Y bꞌan uchinam e Dios ubꞌan, meyra atujri, che e Jesús.
MAT 13:47 Entonces che e Jesús: —Uchinam e Dios lar tacar inteꞌ chijr xeꞌ achujca e chay tamar. Y conda e chijr apocchina axin macuir e jaꞌ majax intera chay amorojsena tamar.
MAT 13:48 Y conda abꞌutcꞌa e chijr, e ajchucchayobꞌ uquerejbꞌobꞌ alocꞌoy tutiꞌ e jaꞌ. Y de allí aturuanobꞌ tuaꞌ ulocsiobꞌ tin e bueno y uyariobꞌ tama uchijrobꞌ, y tin e mabꞌambꞌan war ulocsiobꞌ ujuriobꞌ tor e jiꞌ.
MAT 13:49 Y bꞌan tuaꞌ anumuy conda acꞌotoy e hora tuaꞌ acꞌapa or e rum era ubꞌan. Uyangelobꞌ e Dios tuaꞌ watar tuaꞌ usicbꞌobꞌ tin e mabꞌambꞌan uwirnar y tin e erach uwirnar.
MAT 13:50 Y tin e mabꞌambꞌan uwirnar cꞌani ayajrobꞌ tama inteꞌ chꞌen xeꞌ bꞌutꞌur taca e cꞌajc tiaꞌ tuaꞌ aruobꞌ y ucꞌuxi ut uyejobꞌ umen e cꞌuxner, che e Jesús.
MAT 13:51 Entonces e Jesús uyubꞌi tuaꞌ uyajcanuarobꞌ y che: —¿War ca inata tucꞌa war che tunor lo que war inwareox era? che e Jesús. Y jaxirobꞌ chenobꞌ: —Canata, chenobꞌ.
MAT 13:52 Entonces che e Jesús: —Tunor tin e ajcanseyajobꞌ tama uley e Moisés xeꞌ acꞌotoy acanuobꞌ tamar uchinam e Dios aquetpobꞌ bꞌan cocha inteꞌ ajyum otot xeꞌ unata tunor lo que tꞌabꞌesbꞌir umener. Y bꞌan e ajcanseyajobꞌ era ubꞌan xeꞌ war unatobꞌ meyra tamar uyojroner e Dios y tamar era ayan lo que unatobꞌ ixnix y ayan lo que wartocto ucaniobꞌ xeꞌ war ulocse tuaꞌ ucꞌampesobꞌ conda war acanseyanobꞌ, che e Jesús.
MAT 13:53 Pues conda e Jesús cꞌapa ojron tama cora ojroner xeꞌ mucur cora, locꞌoy tama e chinam Capernaum
MAT 13:54 y ixin tama uchinam xeꞌ jax e Nazaret. Y ixin tama e sinagoga y cay canseyan. Pero e gente cay bꞌacta ubꞌijnuobꞌ y chenobꞌ: —¿Y tiaꞌ cay ucani tunor e nuxi canseyaj cocha era? ¿Y tucꞌa nic e natanyaj era lo que ajcꞌuna? ¿Y tiaꞌ utajwi e cꞌotorer era tuaꞌ uche e sian milagro lo que war coybꞌi tamar?
MAT 13:55 Pues jaxir jax taca uyunen inteꞌ ajpajrteꞌ xeꞌ jax e José, y utuꞌ jax e María, y canata chi uwijtzꞌinobꞌ xeꞌ jax e Santiago, y e José, y e Simón, y e Judas.
MAT 13:56 Y war canata chi uwijtanobꞌ ubꞌan xeꞌ aturuanobꞌ tama cachinam tara. ¿Y tiaꞌ tari tunor era lo que uyubꞌi uche jaxir? che e gente xeꞌ turobꞌ tama e chinam Nazaret era.
MAT 13:57 Y machi war atzayobꞌ que e Jesús ayan ucꞌotorer tuaꞌ uche tunor era. Pero ojron e Jesús y che: —Tunor tin e aꞌjcꞌuna ucꞌotorer tuaꞌ aquetpa inteꞌ profeta atzay eꞌrna umen tunor e gente. Pero tin e turobꞌ tama uchinam y tin e turobꞌ tama uyotot machi tuaꞌ atzay uwirobꞌ que inteꞌ upiar ayan ucꞌotorer cocha era, che e Jesús.
MAT 13:58 Y e Jesús machi actana tuaꞌ uche meyra milagro tama e lugar era umen que e gente matucꞌa ucꞌupesiajobꞌ tamar jaxir.
MAT 14:1 Pues entonces tama e tiempo era ayan inteꞌ winic xeꞌ ucꞌabꞌa Herodes xeꞌ war acꞌotori tama e departamento Galilea. Y jaxir cay uyubꞌi que e Jesús war uche meyra milagro.
MAT 14:2 Entonces cay ojron e Herodes taca tin e turobꞌ tuyejtzꞌer y che: —Jax era e Juan xeꞌ ajchꞌuymar xeꞌ sutpa bꞌixcꞌa tujam e chamenobꞌ y tamar era ayan ucꞌotorer tuaꞌ uche tunor e milagro era, che e Herodes.
MAT 14:3 Pues e Herodes ayan lo que cay uche taca e Juan xeꞌ ajchꞌuymar conda uyare tuaꞌ acajcha aqꞌuejcha axin tama e cárcel. Y bꞌan uche umen que e Herodes arobꞌna umen e Juan que majax imbꞌutz que war aturuan taca e Herodías xeꞌ jax ani uwixcar uwijtzꞌin xeꞌ ucꞌabꞌa ani Felipe.
MAT 14:4 Y tamar era e Herodes arobꞌna umen e Juan y che: —Ma ani jax imbꞌutz tuaꞌ achꞌami amuꞌ tuaꞌ aquetpa awixcar, che e Juan xeꞌ ajchꞌuymar.
MAT 14:5 Y tamar era qꞌuijna e Herodes este que cꞌani uchamse e Juan. Pero cocha tunor e gente war unatobꞌ que e Juan jax inteꞌ nuxi profeta tuaꞌ e Dios, ma erer achamesna umen e Herodes cocha war ubꞌacre e gente.
MAT 14:6 Pero conda e Herodes utzꞌacse otronteꞌ año tuaꞌ, cay uchiobꞌ inteꞌ nuxi nojqꞌuin. Y uwixcar e Herodes xeꞌ jax e Herodías ayan inteꞌ uwijchꞌoc xeꞌ chꞌom ijchꞌocto xeꞌ locꞌoy y cay acta tut e sian gente tama e nojqꞌuin. Y e Herodes war atzay uwira aꞌcta e ijchꞌoc.
MAT 14:7 Entonces e Herodes uyare e ijchꞌoc y che: —Unaten e Dios xeꞌ turu tut e qꞌuin y tut e rum ubꞌan que inxin inwajqꞌuet bꞌan taca cocha acꞌani, che e Herodes.
MAT 14:8 Entonces cocha arobꞌna e ijchꞌoc umen utuꞌ tucꞌa tuaꞌ ucꞌajti tuaꞌ e rey, ojron e ijchꞌoc y che: —Ajcꞌunen coner era ujor e Juan xeꞌ ajchꞌuymar tama inteꞌ plato, che e ijchꞌoc bꞌan taca cocha arobꞌna umen utuꞌ.
MAT 14:9 Pero conda e Herodes uyubꞌi e ojroner era quetpa tzajtaca ut. Pero cocha arobꞌna umener tut tunor e sian gente era que cꞌani uyajcꞌu e ijchꞌoc bꞌan taca cocha ucꞌani, uyare tuaꞌ aꞌjcꞌuna lo que ucꞌajti era.
MAT 14:10 Entonces utzacre ixin tuaꞌ ajujxa ujor e Juan xeꞌ ajchꞌuymar tiaꞌ turu tama e cárcel.
MAT 14:11 Y de allí sutpa utares ujor e Juan tama inteꞌ plato y uyajcꞌu e ijchꞌoc. Y jaxir uqꞌueche ixin y uyajcꞌu utuꞌ.
MAT 14:12 Entonces cꞌotoyobꞌ uyajcanuarobꞌ e Juan y ulocsiobꞌ ucuerpo e Juan tama e cárcel tuaꞌ axin umuquiobꞌ. Y de allí ixin uyareobꞌ e Jesús.
MAT 14:13 Pues conda e Jesús cꞌotoy unata tamar uchamer e Juan tꞌabꞌay tama inteꞌ barco y ixin tor e jaꞌ tuaꞌ acꞌotoy tama inteꞌ choquem lugar. Pero e gente cay unatobꞌ tiaꞌ ixin e Jesús y tamar era locꞌoyobꞌ tama uchinamobꞌ tuaꞌ axiobꞌ tiaꞌ turu jaxir.
MAT 14:14 Pero conda e Jesús ecmay tama e barco tor e rum y uwira que war acꞌotoy meyra gente tut, uyajta utobꞌ y cay utzꞌacpes tunor tin e ajmuacobꞌ.
MAT 14:15 Y cocha wix anamtzꞌa e qꞌuin uyajcanuarobꞌ e Jesús uyareobꞌ y chenobꞌ: —Tardix era y mix tucꞌa e ototobꞌ tara. Tzacren chicobꞌ e gente era tiaꞌ ayan e ototobꞌ tuaꞌ erer utajwiobꞌ lo que ucꞌani tuaꞌ ucꞌuxiobꞌ, che uyajcanuarobꞌ.
MAT 14:16 Y che e Jesús: —Machi ucꞌani tuaꞌ axin usicbꞌobꞌ e comida. Wesenicobꞌ nox, che e Jesús.
MAT 14:17 Y che uyajcanuarobꞌ: —Matucꞌa más qꞌuecher camener sino que cinco ut pan y chacojt chay, che uyajcanuarobꞌ.
MAT 14:18 Y che e Jesús: —Quiqui chꞌamic taric, che e Jesús.
MAT 14:19 Entonces arobꞌna e sian gente tuaꞌ aturuanobꞌ tor e cꞌopot. Y nacpat era e Jesús uchꞌami e cinco ut pan y e chacojt chay y sutpa chꞌujcsan tut e qꞌuin y utattzꞌi ucꞌabꞌa e Dios tamar. Y de allí utajchu e pan y cay upuqui ixin taca uyajcanuarobꞌ y jaxirobꞌ cay uyajcꞌuobꞌ ixin incojt incojt e sian gente era.
MAT 14:20 Y tunorobꞌ wiobꞌ y tzayobꞌ ubꞌan, y nacpat era umorojsiobꞌ doce chiquiꞌ tamar lo que quetpa.
MAT 14:21 Y ayan 5,000 winicobꞌ xeꞌ wiobꞌ, y ayan e ixictac y e bꞌiqꞌuit maxtac xeꞌ wiobꞌ ubꞌan.
MAT 14:22 Pues nacpat era e Jesús uyare uyajcanuarobꞌ tuaꞌ ochoyobꞌ tama e barco tuaꞌ axiobꞌ teinxejr jaꞌ bꞌajxan que jaxir. Pero jaxir quetpato, war oꞌjron taca e gente este que locꞌoyobꞌ.
MAT 14:23 Y conda cꞌapa locꞌoyobꞌ tunor e gente era e Jesús ixin tꞌabꞌay tama inteꞌ witzir tuaꞌ ucꞌajti taca e Dios ubꞌajner. Y conda acbꞌare turuto e Jesús tama e witzir ubꞌajner.
MAT 14:24 Y e barco taca uyajcanuarobꞌ yix turobꞌ tor e jaꞌ, najtix quetpobꞌ tutiꞌ e jaꞌ. Y cay jajtzꞌo e icꞌar tari y cay jicna e jaꞌ tari.
MAT 14:25 Y conda cꞌanix asacojpa ixin e Jesús tutobꞌ, war axana tor e jaꞌ.
MAT 14:26 Y conda uyajcanuarobꞌ cay uwirobꞌ, unatobꞌ que jax inteꞌ bulto xeꞌ chequer war axana watar tor e jaꞌ, y bꞌacta uwirobꞌ y cay aruobꞌ taca inteꞌ nuxi nuc y chenobꞌ: —Jax inteꞌ nuxi qꞌuechꞌuj, che uyajcanuarobꞌ.
MAT 14:27 Pero ojron e Jesús y che: —Qꞌuecꞌojsenic iwalma. Ira ixbꞌacta porque jax nen xeꞌ war waten era, che e Jesús.
MAT 14:28 Y che e Pedro: —Niwinquiraret, jay jax net, arenen tuaꞌ waten intajwiet tor e jaꞌ, che e Pedro.
MAT 14:29 Y che e Jesús: —Xanen lar, che e Jesús. Entonces e Pedro ecmay tama e barco y cay xana tor e jaꞌ tuaꞌ acꞌotoy tut e Jesús.
MAT 14:30 Pero conda cay uwira que war aꞌtzꞌo e icꞌar meyra, bꞌacta tama uyalma, y conda cay muctzꞌa ixin macuir e jaꞌ aru taca inteꞌ nuxi nuc y che: —Corpesen, Niwinquiraret, che e Pedro.
MAT 14:31 Y wacchetaca jajpna ucꞌabꞌ umen e Jesús. Y che jaxir: —Imbꞌijc taca war icꞌupseyan tama e Dios. ¿Tucꞌa tuaꞌ war ibꞌacta? che e Jesús.
MAT 14:32 Entonces xanobꞌ tor e jaꞌ este que utajwiobꞌ e barco y ochoyobꞌ tamar. Y wacchetaca sisa e icꞌar.
MAT 14:33 Y tamar era tin e turobꞌ tama e barco cotuanobꞌ tut e Jesús y chenobꞌ: —Net ajchi Uyunenet e Dios, che uyajcanuarobꞌ.
MAT 14:34 Entonces numuyobꞌ tor e jaꞌ tama e barco este que cꞌotoyobꞌ teinxejr jaꞌ tama inteꞌ lugar xeꞌ ucꞌabꞌa Genesaret.
MAT 14:35 Y conda e gente xeꞌ turobꞌ tama e lugar era cay unatobꞌ que jax era e Jesús, cay uyebꞌta ixin e ojroner tic taca que yajaꞌ turu e Jesús. Y cay uqꞌuechiobꞌ tari tunor tin e ajmuacobꞌ tut e Jesús.
MAT 14:36 Y tunor e gente cay ucꞌajtiobꞌ taca e Jesús tuaꞌ aꞌctana apijchna ubꞌujc umen tin e ajmuac tuaꞌ atzꞌacnobꞌ. Y tunor tin e cꞌotoy upijchꞌiobꞌ ubꞌujc e Jesús quetpobꞌ tzꞌacpesbꞌir.
MAT 15:1 Pues entonces ayan cora fariseobꞌ taca cora ajcanseyajobꞌ tama uley e Moisés xeꞌ tariobꞌ tama e chinam Jerusalem xeꞌ cꞌotoyobꞌ tuyejtzꞌer e Jesús tuaꞌ uyubꞌiobꞌ tuaꞌ y chenobꞌ:
MAT 15:2 —¿Tucꞌa tuaꞌ war ucꞌocchiobꞌ e onian canseyaj tuaꞌ catata viejobꞌirobꞌ awajcanuarobꞌ que machi war uchiobꞌ e rito tama ucꞌabꞌobꞌ conda cꞌanix awiobꞌ? che e nuquir winicobꞌ era.
MAT 15:3 Pero e Jesús sutpa uyubꞌi tuobꞌ e winicobꞌ era y che: —¿Y coxto nox war icꞌocchi ubꞌan lo que arobꞌnon umen Catata Dios tuaꞌ taca icꞌupse e onian bꞌijnusiaj tuaꞌ catata viejobꞌirobꞌ?
MAT 15:4 Porque che e Dios que: “Cꞌupsen atata y atuꞌ.” Y che ubꞌan que: “Tin e ubꞌaxe ut utata o ut utuꞌ ucꞌani tuaꞌ achamesna.”
MAT 15:5 ¿Pero ma ca jax bꞌan war iche nox conda ixixin iware itata o ituꞌ que: “Machi uyubꞌien intacriet porque tunor lo que ayan tanibꞌa ajcꞌubꞌirix e Dios nimener?”
MAT 15:6 Y nox war inata que jay bꞌan uche inteꞌ entonces machito tuaꞌ utacre utata o utuꞌ. Y tamar era chequer que war ichoqui lo que e Dios war uyareox. Pero nox war inata que más ayan ucꞌampibꞌir e onian bꞌijnusiaj tuaꞌ catata viejobꞌirobꞌ que lo que arobꞌnon umen Catata Dios.
MAT 15:7 Ajqꞌuecranerox, chequer que jax nox xeꞌ war ixpejcna umen e profeta Isaías conda utzꞌijbꞌa que:
MAT 15:8 E winicobꞌ era war utattzꞌienobꞌ tamar uyejobꞌ taca, pero tama uyalmobꞌ najtir turobꞌ taniut.
MAT 15:9 Pero matucꞌa ucꞌampibꞌir que war uyujtzꞌiobꞌ niut porque lo que war ucansiobꞌ e gente jax taca lo que ubꞌijnuobꞌ e winicobꞌ. Bꞌan chꞌar tzꞌijbꞌabꞌir umen e Isaías, che e Jesús.
MAT 15:10 Y de allí e Jesús upejca e gente y che: —Ubꞌinic lo que cꞌani inwareox era y natanic tunor era porque
MAT 15:11 lo que oꞌchoy tama uyej inteꞌ winic machi tuaꞌ ubꞌoni uyalma, pero e ojroner lo que ulocse tama uyej jax lo que tuaꞌ ubꞌoni e winic, che e Jesús.
MAT 15:12 Entonces uyajcanuarobꞌ cꞌotoyobꞌ tuyejtzꞌer e Jesús y chenobꞌ: —¿War ca anata que aqꞌuijnesobꞌ e fariseobꞌ tamar lo que awareobꞌ sajmix? che uyajcanuarobꞌ.
MAT 15:13 Pero che e Jesús: —E winicobꞌ era bꞌanobꞌ cocha e teꞌ. Y tunor e teꞌ xeꞌ majax pacbꞌir umen Nitata xeꞌ turu tichan cꞌani abꞌojca alocꞌoy taca tunor uwir. Y bꞌan tuaꞌ uche Nitata taca e winicobꞌ era ubꞌan.
MAT 15:14 Actanic e winicobꞌ era porque larobꞌ tacar inteꞌ ajbꞌijresiaj xeꞌ tajpem unacꞌut xeꞌ war uchuqui ucꞌabꞌ otronteꞌ xeꞌ tajpem unacꞌut ubꞌan. Porque jay inteꞌ xeꞌ tajpem unacꞌut axin ubꞌijres otronteꞌ xeꞌ tajpem unacꞌut ubꞌan chatertiobꞌ axin oꞌjriobꞌ tama inteꞌ chꞌen, che e Jesús.
MAT 15:15 Entonces ojron e Pedro y che: —Checsun ticoit tucꞌa war che e ojroner era, che e Pedro.
MAT 15:16 Y che e Jesús: —¿Machi ca war inata tucꞌa war che e ojroner era?
MAT 15:17 ¿Machi ca inata que tunor lo que oꞌchoy tama uyej inteꞌ winic axin oꞌchoy macuir unac y de allí alocꞌoy otronyajr tama ucuerpo?
MAT 15:18 Pero e ojroner xeꞌ mabꞌambꞌan lo que inteꞌ winic ulocse tama uyej xeꞌ alocꞌoy tama uyalma jax lo que abꞌonon.
MAT 15:19 Porque tama uyalma inteꞌ winic alocꞌoy tunor e mabꞌambꞌan bꞌijnusiaj xeꞌ jax e bꞌijnusiaj tuaꞌ axin achamsan, y tuaꞌ axin taca inteꞌ ajnajtir ixic, y tunor e bꞌijnusiaj cocha era, y e mabꞌambꞌan bꞌijnusiaj tuaꞌ axin axujchꞌian, y tuaꞌ axin amajresian, y tuaꞌ axin uqꞌuijnes otronteꞌ. Tunor era alocꞌoy tama uyalma inteꞌ.
MAT 15:20 Pues jax era lo que uche abꞌontzꞌa inteꞌ winic, pero conda axin aweꞌ inteꞌ, motor que machi acꞌapa uche e rito tama ucꞌabꞌobꞌ lo que ucꞌaniobꞌ catata viejobꞌirobꞌ, ma cocha erer abꞌontzꞌa inteꞌ tamar era, che e Jesús.
MAT 15:21 Entonces locꞌoy e Jesús tama e lugar era y ixin esto tama e chinam Tiro y esto tama e chinam Sidón.
MAT 15:22 Y ayan inteꞌ ixic tama e lugar era xeꞌ tuaꞌ e lugar Canaán xeꞌ majax tuaꞌ e lugar Israel. Entonces e ixic cꞌotoy tut e Jesús y cay ojron taca inteꞌ nuxi nuc y che: —Niwinquiraret, uyunenet e rey David, yajtan niut. Chucur uyalma yar niwijchꞌoc umen inteꞌ mabꞌambꞌan mein y meyra war unumse ubꞌa umener, che e ixic.
MAT 15:23 Pero xanato e Jesús y matucꞌa uyare e ixic. Cꞌani unata cobꞌa war acꞌupseyan e ixic era tamar. Pero cꞌotoyobꞌ uyajcanuarobꞌ tuyejtzꞌer e Jesús y che: —Aren e ixic yax que chic porque calapir war aꞌru watar ticapat, che uyajcanuarobꞌ.
MAT 15:24 Y che e Jesús: —Nen ebꞌetbꞌir tarien tuaꞌ taca intacre tin e turobꞌ tama e lugar Israel xeꞌ larobꞌ taca cora oveja xeꞌ satrem, che e Jesús.
MAT 15:25 Entonces cꞌotoy cotuan e ixic tut e Jesús y che: —Niwinquiraret, tacrenen, che e ixic.
MAT 15:26 Y che e Jesús: —Mabꞌambꞌan tuaꞌ calocse e comida tuaꞌ e maxtac tuaꞌ cawajcꞌu inteꞌ tzꞌiꞌ, che e Jesús.
MAT 15:27 Pero ojronto e ixic y che: —Pues erach awojroner, Niwinquiraret. Pero yebꞌar e mesa tiaꞌ war aweꞌ e ajyum ayan tiaꞌ ojri uchꞌeir e pan y e tzꞌiꞌ war ucꞌopi ucꞌuxi, che e ixic.
MAT 15:28 Y che e Jesús: —Ixic, nojta war icꞌupseyan tamaren, y tamar era cꞌani achena tacaret bꞌan taca cocha war acꞌajti era, che e Jesús. Y wacchetaca locꞌoy e mabꞌambꞌan mein tama uwijchꞌoc y tzꞌacpa.
MAT 15:29 Entonces locꞌoy e Jesús tama e lugar era y ixin xana tutiꞌ e nuxi jaꞌ Galilea. Y de allí tꞌabꞌay ixin tama inteꞌ witzir y turuan.
MAT 15:30 Y meyra gente cay cꞌotoyobꞌ tut. Y war uqꞌuechiobꞌ watar meyra tin e ajmuac. Y ayan tin e tzꞌej inteꞌ uyoc, y ayan tin e tajpem ut, y ayan tin e machi uyubꞌi oꞌjron, y ayan tin e matucꞌa inteꞌ ucꞌabꞌ, y ayan tin e war ucojco otronteꞌ muaquir. Y war utaresobꞌ tunor e ajmuacobꞌ era y war uturbꞌobꞌ tut e Jesús y jaxir war utzꞌacpes tunorobꞌ.
MAT 15:31 Y tamar era tunor e sian gente era bꞌactobꞌ conda uwirobꞌ que war oꞌjronobꞌ tin e machi ani uyubꞌi oꞌjronobꞌ, y que tin e matucꞌa ani ut ucꞌabꞌ y era ayan ucꞌabꞌ, y que tin e tzꞌej ani uyoc y era war axanobꞌ, y que tin e tajpem ani unacꞌut y era war eꞌronobꞌ. Y cay utattzꞌiobꞌ ucꞌabꞌa e Dios tuaꞌ e Israel.
MAT 15:32 Entonces e Jesús upejca uyajcanuarobꞌ y che: —Nen inyajta ut e sian gente era porque uxiꞌ era turobꞌ tacaron y matucꞌa ayan tuobꞌ tuaꞌ ucꞌuxiobꞌ. Y machi incꞌani inwareobꞌ tuaꞌ axiobꞌ tama uyototobꞌ bꞌan taca porque bꞌajcꞌat acucremobꞌ tama e bꞌir umen e winar, che e Jesús.
MAT 15:33 Pero uyajcanuarobꞌ che: —¿Y tiaꞌ tuaꞌ catajwi e sian comida tuaꞌ cawese tunor e sian gente era tama inteꞌ choquem lugar cocha era? che uyajcanuarobꞌ.
MAT 15:34 Entonces e Jesús uyubꞌi tuobꞌ y che: —¿Y jaygojr pan ayan tibꞌa? che e Jesús. Y jaxirobꞌ chenobꞌ: —Ayan siete ut pan y cora yarobꞌ chay, che uyajcanuarobꞌ.
MAT 15:35 Entonces e Jesús uyare e gente tuaꞌ aturuanobꞌ tor e cꞌopot.
MAT 15:36 Y de allí uchꞌami e siete ut pan y uchꞌami yar e chayobꞌ ubꞌan tama ucꞌabꞌ y cay utattzꞌi ucꞌabꞌa e Dios tamar. Y de allí cay uxere ixin taca uyajcanuarobꞌ y jaxirobꞌ upuquiobꞌ ixin taca tunor e gente.
MAT 15:37 Y tunorobꞌ wiobꞌ y chuanobꞌ. Y conda cꞌapa wiobꞌ cay umorojsiobꞌ lo que quetpa tama e pan y ubꞌutꞌiobꞌ siete chiquiꞌ tamar.
MAT 15:38 Y tin e wiobꞌ cocha era ayanobꞌ 4,000 winicobꞌ. Y ayan e ixictac y e bꞌiqꞌuit maxtac xeꞌ wiobꞌ ubꞌan.
MAT 15:39 Entonces e Jesús uyare e gente tuaꞌ axiobꞌ tama uyototobꞌ, y conda cꞌapa locoyobꞌ tunorobꞌ e Jesús ixin tꞌabꞌay tama inteꞌ barco taca uyajcanuarobꞌ y ixiobꞌ tor e jaꞌ esto tama inteꞌ lugar xeꞌ ucꞌabꞌa Magdala.
MAT 16:1 Pues entonces cꞌotoy cora fariseobꞌ y cora saduceobꞌ tut e Jesús xeꞌ war usicbꞌobꞌ cocha tuaꞌ utuchꞌiobꞌ e Jesús, y tamar era cay ucꞌajtiobꞌ tuaꞌ eꞌrsenobꞌ inteꞌ seña tut e qꞌuin umener tuaꞌ unatobꞌ jay ayan ucꞌotorer e Dios tacar.
MAT 16:2 Pero jaxir uyare y che: —Conda iwira que achacojpa ut e qꞌuin conda war acꞌapa e día iware que cꞌani aquetpa galan e día xeꞌ watar.
MAT 16:3 Y conda iwira que achacojpa ut e qꞌuin conda asacojpa y iwira que ayan e tocar, iware que cꞌani acꞌaxi e jajar coner. Ajqꞌuecranerox, war inata tucꞌa war che tunor e seña lo que ayan tara tor e rum pero machi war inata tucꞌa war che e seña tama e tiempo conda tuaꞌ ayopa Uyunen e Dios tara tor e rum otronyajr.
MAT 16:4 E gente era xeꞌ mabꞌambꞌan uwirnarobꞌ y xeꞌ machi cꞌani acꞌupseyanobꞌ tamaren intaca war ucꞌajti tuaꞌ uwirobꞌ watar inteꞌ seña tut e qꞌuin tuaꞌ unatobꞌ jay nen ayan ucꞌotorer e Dios tamaren. Pero machi tuaꞌ achecta más seña tiut sino que jax taca e seña lo que arobꞌnon umen e profeta Jonás xeꞌ turuan tama e onian tiempo, che e Jesús. Y tamar era locꞌoy ixin e Jesús.
MAT 16:5 Entonces uyajcanuarobꞌ ixiobꞌ teinxejr e nuxi jaꞌ y conda cꞌotoyobꞌ cay checta tujorobꞌ que najpa umenerobꞌ tuaꞌ utaresobꞌ e pan.
MAT 16:6 Entonces ojron e Jesús y che: —Chꞌujcunic iwira tuaꞌ machi ixmajresna tama ulevadura e fariseobꞌ y tama ulevadura e saduceobꞌ, che e Jesús.
MAT 16:7 Pero cay ojronobꞌ uyajcanuarobꞌ jaxobꞌ taca y chenobꞌ: —¿Umen ca que machi catares e pan que war oꞌjron cocha era? che uyajcanuarobꞌ jaxobꞌ taca.
MAT 16:8 Pero e Jesús unata tucꞌa war oꞌjronobꞌ y tamar era uyubꞌi tuobꞌ y che: —¿Y tucꞌa tuaꞌ war iware que matucꞌa e pan? Pues nox imbꞌijc taca war ixcꞌupseyan tama e Dios.
MAT 16:9 Merato inata tama tunor era. ¿Mix ca cꞌar imener tama e cinco ut pan xeꞌ cay capuqui ixin tama e 5,000 winicobꞌ y jayteꞌ chiquiꞌ camorojse tamar lo que quetpa?
MAT 16:10 ¿Y nien mix ca cꞌar imener tama e siete ut pan lo que cay capuqui ixin tama e 4,000 winicobꞌ y jayteꞌ chiquiꞌ camorojse tamar lo que quetpa?
MAT 16:11 ¿Y tucꞌa tuaꞌ machi inata tucꞌa war inwareox era que machi war onjron tamar e pan? Pero cꞌani inwareox otronyajr que: “Chꞌujcunic iwira tuaꞌ machi ixmajresna tama ulevadura e fariseobꞌ y tama ulevadura e saduceobꞌ”, che e Jesús.
MAT 16:12 Entonces cꞌotoy unatobꞌ que e Jesús machi war oꞌjron tamar e levadura xeꞌ ayajra macuir e pan, sino que war uyare tuaꞌ ucojco ubꞌobꞌ tama ucanseyaj e fariseobꞌ y e saduceobꞌ.
MAT 16:13 Pues entonces conda e Jesús cꞌotoy tama inteꞌ lugar xeꞌ ucꞌabꞌa Cesarea de Filipo cay uyubꞌi tuaꞌ uyajcanuarobꞌ y che: —¿Y tucꞌa war che e gente que nen xeꞌ Uyunenen e winic? che e Jesús.
MAT 16:14 Y che uyajcanuarobꞌ: —Ayan tin e war ubꞌijnuobꞌ que net jax e Juan xeꞌ ajchꞌuymar, y ayan tin e war ubꞌijnuobꞌ que net jax e profeta Elías xeꞌ turuan tama e onian tiempo, y ayan tin e war ubꞌijnuobꞌ que net jax e profeta Jeremías o otronteꞌ profeta xeꞌ sutpa bꞌixcꞌa tujam e chamenobꞌ, che uyajcanuarobꞌ.
MAT 16:15 Entonces che e Jesús: —Y nox, ¿tucꞌa iware tamaren? che e Jesús.
MAT 16:16 Entonces ojron e Simón Pedro y che: —Net jax e Cristo y net jax Uyunenet e Dios xeꞌ bꞌixir, che e Pedro.
MAT 16:17 Y che e Jesús: —Net e Simón xeꞌ uyunenet e Jonás. Net chojbꞌesbꞌiret porque mamajchi xeꞌ turu tara tor e rum cay uwirset chien nen sino que jax taca Nitata xeꞌ turu tichan xeꞌ cay uwirset chien nen.
MAT 16:18 Y cꞌani inwaret era que net jax e Pedro xeꞌ bꞌan cocha ingojr tun. Y tujor e tun era nen tuaꞌ inche inteꞌ nuxi otot xeꞌ ucꞌabꞌa iglesia xeꞌ war che: “Tunor tin e pejcbꞌir nimener tuaꞌ aquetpobꞌ tanibꞌa.” Y tamar era nien ucꞌotorer uchꞌenar e diablo ma erer uquete uwabꞌu niwiglesia era.
MAT 16:19 Y cꞌani inwajqꞌuet lo que bꞌan cocha cora llave tuaꞌ apasi e puerta tama uchinam e Dios tuaꞌ erer oꞌchoy e gente tamar. Y lo que acachi tara tor e rum cꞌani acajcha tichan tut e qꞌuin ubꞌan. Y lo que abꞌani tara tor e rum cꞌani abꞌantzꞌa tichan tut e qꞌuin ubꞌan, che e Jesús.
MAT 16:20 Entonces e Jesús uyare uyajcanuarobꞌ que mamajchi tut tuaꞌ uyareobꞌ que jaxir jax e Cristo xeꞌ jax e Ajcorpesiaj tuaꞌ tunor e gente.
MAT 16:21 Pues entonces e Jesús cay uchecsu tut uyajcanuarobꞌ tama e día yajaꞌ que jaxir ucꞌani tuaꞌ axin tama e chinam Jerusalem y que ucꞌani tuaꞌ achena unumse ubꞌa meyra umen e nuquir winicobꞌ y umen uwinquir e inmojr sacerdotiobꞌ y umen e ajcanseyajobꞌ tama uley e Moisés. Y cay uchecsu tutobꞌ ubꞌan que jaxir ucꞌani tuaꞌ achamesna, pero que tama e uxteꞌ día cꞌani asujta abꞌixqꞌuesna tujam e chamenobꞌ.
MAT 16:22 Pero e Pedro upejca e Jesús tuaꞌ alocꞌoy patir tacar y cay uyare que majax imbꞌutz lo que war oꞌjron e Jesús y che: —Niwinquiraret, ira iyojron cocha era porque ma tiaꞌ tuaꞌ anumse abꞌa cocha era, che e Pedro.
MAT 16:23 Pero e Jesús wacchetaca sutpa uwira ut e Pedro y che: —Loqꞌuen tara Satanás, porque net war ani aquete awabꞌu lo que ucꞌani e Dios tamaren. Net machi anata tucꞌa war ubꞌijnu e Dios. Net intaca war abꞌijnu lo que war ubꞌijnuobꞌ e winicobꞌ tara tor e rum, che e Jesús.
MAT 16:24 Entonces e Jesús uyare uyajcanuarobꞌ y che: —Tin e cꞌani axin tanipat ucꞌani tuaꞌ unajpes ubꞌa y axin tanipat ejcꞌar ejcꞌar motor que axin achamesna ani tamaren.
MAT 16:25 Porque tin e cꞌani ucorpes ucuxtar cꞌani asatpa, pero tin e usati ucuxtar tamaren cꞌani acorpesna.
MAT 16:26 ¿Y tucꞌa ucꞌampibꞌir tut inteꞌ winic jay axin uchꞌami tunor lo que ayan tara tor e rum jay tamar era axin usati uyalma? ¿Y cobꞌa nic tumin tuaꞌ utoyi inteꞌ winic tuaꞌ ucorpes uyalma?
MAT 16:27 Porque nen xeꞌ Uyunenen e winic cꞌani waten taca utawarer Nitata y taca tunor uyangelobꞌ e Dios. Y cꞌani intoyi uyeror inteꞌ inteꞌ tamar lo que cꞌapa uche tara tor e rum.
MAT 16:28 Y cꞌani inwareox era que ayan tin e turox tara que machi tuaꞌ achamay este que iwiren nen xeꞌ Uyunenen e winic waten taca nicꞌotorer, che e Jesús.
MAT 17:1 Entonces conda numuy seis día era e Jesús upejca e Pedro y e Santiago y e Juan xeꞌ jax uwijtzꞌin e Santiago y tꞌabꞌay ixiobꞌ esto tama ujor inteꞌ nuxi witzir.
MAT 17:2 Y conda cꞌotoyobꞌ sutpa intiach uwirnar e Jesús tutobꞌ. Y uyeroj galan ejpray cocha uwarar e qꞌuin, y ubꞌujc sutpa sacsac este que ejpray ut.
MAT 17:3 Y wacchetaca checta chacojt winicobꞌ. Inteꞌ jax e Moisés y inteꞌ jax e Elías. Y war oꞌjronobꞌ taca e Jesús.
MAT 17:4 Entonces e Pedro uyare e Jesús y che: —Niwinquiraret, catzay que turon tara tacaret. Jay acꞌani erer cache uxteꞌ yar bꞌiqꞌuit otot, inteꞌ tabꞌa, y inteꞌ tuaꞌ e Moisés, y inteꞌ tuaꞌ e Elías, che e Pedro.
MAT 17:5 Y merato acꞌapa oꞌjron e Pedro conda checta tari inteꞌ tocar xeꞌ galan ejpray xeꞌ ubꞌujcse tunor e lugar tiaꞌ turobꞌ. Y macuir e tocar cay uyubꞌiobꞌ inteꞌ nuc xeꞌ ojron y che: —Jaxto era Niunen xeꞌ inyajta ut y xeꞌ intzay inwira lo que war uche. Ubꞌinic lo que uyareox, che inteꞌ nuc xeꞌ uyubꞌiobꞌ locꞌoy tama e tocar.
MAT 17:6 Y conda uyajcanuarobꞌ uyubꞌiobꞌ e ojroner era pacwanobꞌ tut e rum, war abꞌactobꞌ meyra.
MAT 17:7 Pero ixin e Jesús tutobꞌ y upijchꞌi utobꞌ y che: —Achpenic. Ira ixbꞌacta, che e Jesús.
MAT 17:8 Y conda sutpa uwirobꞌ mamajchi más ayan, jax taca e Jesús xeꞌ turu tacarobꞌ.
MAT 17:9 Y conda cay ecmayobꞌ tama e nuxi witzir era cay ojron e Jesús tacarobꞌ y che: —Ira iware nien inteꞌ tama e mayjut era este que nen xeꞌ Uyunenen e winic insujta imbꞌixqꞌuesna tujam e chamenobꞌ, che e Jesús.
MAT 17:10 Entonces uyajcanuarobꞌ uyubꞌiobꞌ tuaꞌ e Jesús y chenobꞌ: —¿Tucꞌa tuaꞌ war acanseyanobꞌ e ajcanseyajobꞌ tama uley e Moisés que ucꞌani tuaꞌ asutpa watar e profeta Elías bꞌajxan y de allí tuaꞌ watar e Cristo? che uyajcanuarobꞌ.
MAT 17:11 Y che e Jesús: —Chequer que watar e Elías más bꞌajxan y que jaxir axin ucꞌunles tunor uyalmobꞌ e gente.
MAT 17:12 Pero nen cꞌani inwareox era que e Elías yopix ixto pero e nuquir winicobꞌ machi unatobꞌ chi era. Y tamar era jaxirobꞌ cay uchiobꞌ meyra lo que mabꞌambꞌan upater. Y bꞌan cꞌani uchiobꞌ nipater nen ubꞌan. Cꞌani uchienobꞌ innumse nibꞌa meyra, che e Jesús.
MAT 17:13 Y tamar era uyajcanuarobꞌ cꞌotoy unatobꞌ tucꞌa tamar war oꞌjron e Jesús que e Elías xeꞌ war oꞌjron tamar jax e Juan xeꞌ ajchꞌuymar.
MAT 17:14 Pues conda ecmayobꞌ tama or e witzir era sutpa ixiobꞌ esto tiaꞌ quetpobꞌ e inmojr ajcanuarobꞌ y uwirobꞌ que ayan meyra gente tuyejtzꞌerobꞌ. Entonces cꞌotoy inteꞌ winic xeꞌ cotuan tut e Jesús y che:
MAT 17:15 —Niwinquiraret, yajtan ut nisitz porque iraj iraj aꞌjcꞌuna umen inteꞌ ataque y war achena unumse ubꞌa meyra tamar era, y war acucurna axin tama e cꞌajc o tama e jaꞌ iraj iraj ubꞌan.
MAT 17:16 Y nen intares nisitz tut awajcanuarobꞌ, pero machi obꞌnobꞌ tuaꞌ utzꞌacpes, che utata e sitz era.
MAT 17:17 Y che e Jesús: —Winicox xeꞌ machi cꞌani ixcꞌupseyan tama e Dios y xeꞌ warto ibꞌijnu tama e onian bꞌijnusiaj, ¿cobꞌa tiempo tuaꞌ inquetpa tacarox? ¿Cobꞌato tuaꞌ innumse nibꞌa tacarox? Taresic tara e sitz, che e Jesús.
MAT 17:18 Entonces e Jesús ucꞌaye e mabꞌambꞌan mein y tamar era locꞌoy tama e sitz. Y wacchetaca tzꞌacpa e sitz.
MAT 17:19 Entonces cꞌotoyobꞌ uyajcanuarobꞌ e Jesús tut conda turu ubꞌajner y chenobꞌ: —¿Y tucꞌa tuaꞌ machi cobꞌna cawajnes alocꞌoy e mabꞌambꞌan mein era? che uyajcanuarobꞌ.
MAT 17:20 Y che e Jesús: —Pues ma tzꞌacar icꞌupesiaj tama e Dios y tamar era machi uyubꞌiox iwajnes locꞌoy e mabꞌambꞌan mein. Pero cꞌani inwareox era que jay imbꞌijc taca war ixcꞌupseyan tama e Dios bꞌan cocha ut usemilla e mostaza xeꞌ chuchu ut, erer itzacre or e witzir era y che: “Loqꞌuen tara y quiqui teinxejr”, y or e witzir era anumuy axin. Pues matucꞌa tuaꞌ aquetpa intran tiut jay war ixcꞌupseyan tama e Dios.
MAT 17:21 Pues inteꞌ mabꞌambꞌan mein cocha era machi uyubꞌi aloqꞌuesna umen inteꞌ jay merato uyustes uyalma tama e oración y e ayuno, che e Jesús.
MAT 17:22 Pues tama inyajr war axana e Jesús taca uyajcanuarobꞌ tama e departamento Galilea y cay uyare uyajcanuarobꞌ y che: —Nen xeꞌ Uyunenen e winic cꞌani inqꞌuejcha axin tuaꞌ inquetpa yebꞌar ucꞌabꞌobꞌ e winicobꞌ tara tor e rum,
MAT 17:23 y jaxirobꞌ axin uchamsenobꞌ, pero tama e uxteꞌ día cꞌani insujta imbꞌixqꞌuesna tujam e chamenobꞌ, che e Jesús. Conda uyubꞌiobꞌ e ojroner era quetpobꞌ tzajtaca ut uwirnarobꞌ.
MAT 17:24 Pues conda e Jesús y uyajcanuarobꞌ cꞌotoyobꞌ tama e chinam Capernaum ayan cora ajmorojseyajobꞌ tumin tuaꞌ e templo lo que ayan tama e chinam Jerusalem xeꞌ cꞌotoy upejcobꞌ y che: —Y Awajcanseyaj, ¿machi ca utoyi e impuesto tama e templo lo que war camorojse era? che e ajmorojseyaj tumin tama e templo.
MAT 17:25 Y che e Pedro: —Utoyi, che e Pedro. Y conda ochoy tama e otot pejcna umen e Jesús bꞌajxan y che: —¿Tucꞌa abꞌijnu, Simón? ¿Chi tuaꞌ cꞌani uchꞌami e tumin inteꞌ rey? ¿Tuaꞌ ca upiarobꞌ, o tuaꞌ e ajnajtir gente? che e Jesús.
MAT 17:26 Y e Pedro che: —Tuaꞌ e ajnajtir gente, che e Pedro. Y che e Jesús: —Entonces tin e ajlugar taca e rey machi tuaꞌ utoyi.
MAT 17:27 Pero tuaꞌ machi caqꞌuijnesobꞌ quiqui tutiꞌ e jaꞌ y aqꞌueche axin alucmar tuaꞌ achꞌubꞌa tama e jaꞌ. Y macuir uyej e bꞌajxan chay xeꞌ iꞌxin achuqui iꞌxin atajwi inteꞌ taqꞌuin tumin xeꞌ atzꞌacta tuaꞌ atoyi lo que war ucꞌajti ticabꞌa. Y de allí quiqui toyo tanibꞌa y tabꞌa ubꞌan, che e Jesús.
MAT 18:1 Entonces tama e momento era cꞌotoyobꞌ uyajcanuarobꞌ e Jesús tuyejtzꞌer y uyubꞌiobꞌ tuaꞌ y chenobꞌ: —¿Chi tuaꞌ aquetpa más nuxi winic tama uchinam e Dios? che uyajcanuarobꞌ.
MAT 18:2 Entonces e Jesús upejca inteꞌ yar chuchu sitz y uwabꞌu tujamobꞌ
MAT 18:3 y che: —Cꞌani inwareox era que jay machi iwacta e onian bꞌijnusiaj tuaꞌ erer ixcꞌupseyan tama e Dios bꞌan cocha war acꞌupseyan inteꞌ chuchu sitz cocha era, machi tuaꞌ ixochoy tama uchinam e Dios.
MAT 18:4 Tin e axin umanxujres ubꞌa bꞌan cocha e chuchu sitz era jax xeꞌ ayan más ucꞌampibꞌir tama uchinam e Dios.
MAT 18:5 Y tin e atzay uchꞌami tama nicꞌabꞌa inteꞌ chuchu sitz cocha era xeꞌ war acꞌupseyan tamaren, war uchꞌamien nen ubꞌan, che e Jesús.
MAT 18:6 Y che e Jesús: —Tin e axin uche acucrema tama e mabꞌambꞌanir inteꞌ chuchu cocha era xeꞌ war acꞌupseyan tamaren más ani bueno tuaꞌ acajcha inteꞌ nuxi chaꞌ tama unuc y tuaꞌ atobꞌesna axin tama e jaꞌ tiaꞌ más intam tuaꞌ achamay macuir e jaꞌ.
MAT 18:7 Tzajtaca ut lo que ayan tara tor e rum xeꞌ axin upejca uyalmobꞌ e gente tuaꞌ uchiobꞌ e mabꞌambꞌanir. Pero más tzajtaca utobꞌ tin e cꞌampesnobꞌ tuaꞌ upejcobꞌ e gente tuaꞌ uchiobꞌ e mabꞌambꞌanir porque más nojta tuaꞌ ajajtzꞌobꞌ tama e juicio.
MAT 18:8 ’Bꞌajcꞌat war itzay ache e mabꞌambꞌanir tama inteꞌ acꞌabꞌ o tama inteꞌ oꞌc, y jay bꞌan entonces más ani bueno tuaꞌ axuri alocꞌoy inteꞌ acꞌabꞌ o inteꞌ oꞌc. Pues más ani bueno jay asati inteꞌ acꞌabꞌ o inteꞌ oꞌc que jay tamar era machi tuaꞌ iꞌxin bꞌixir tut e cꞌajc xeꞌ ma tiaꞌ tuaꞌ atajpa taca chateꞌ acꞌabꞌ y taca chateꞌ oꞌc.
MAT 18:9 Bꞌajcꞌat war itzay ache e mabꞌambꞌanir tamar taca lo que awira tamar ingojr unacꞌoit, y jay bꞌan entonces más ani bueno tuaꞌ alocse achoqui ingojr unacꞌoit. Pues más ani bueno jay iquetpa taca ingojr taca unacꞌoit tara tor e rum jay tamar era machi tuaꞌ iꞌxin bꞌixir tut e cꞌajc xeꞌ ma tiaꞌ tuaꞌ atajpa taca chagojr unacꞌoit, che e Jesús.
MAT 18:10 Y che e Jesús: —Ira ixejbꞌe ut inteꞌ xeꞌ war acꞌupseyan tamaren bꞌan cocha e chuchu era. Porque cꞌani inwareox que ayan meyra angelobꞌ tut e qꞌuin xeꞌ war uchꞌujcu uwirobꞌ uyeroj Nitata Dios iraj iraj xeꞌ war ucojcobꞌ incojt incojt tin e war acꞌupseyanobꞌ tamaren tara tor e rum ubꞌan.
MAT 18:11 Pues nen xeꞌ Uyunenen e winic tarien tara tor e rum tuaꞌ incorpes tunor tin e satrem.
MAT 18:12 ’Pues ayan inteꞌ ojroner tama inteꞌ winic xeꞌ ayan 100 oveja tuaꞌ. Pero jay asatpa incojt, ¿machi ca uyacta e noventa y nueve macuir e macteꞌ tuaꞌ axin usajca incojt xeꞌ satrem este que utajwi?
MAT 18:13 Y cꞌani inwareox era que conda utajwi e oveja xeꞌ satrem ani más cꞌani atzay tamar que tama e inmojr noventa y nueve xeꞌ machi satpobꞌ.
MAT 18:14 Y bꞌan Nitata Dios xeꞌ turu tichan ubꞌan, machi ucꞌani tuaꞌ asatpa nien incojt xeꞌ war acꞌupseyan tamaren bꞌan cocha e chuchu sitz era, che e Jesús.
MAT 18:15 Y che e Jesús: —Jay inteꞌ awermano uche inteꞌ mabꞌambꞌanir apater, quiqui tut tuaꞌ aware tuaꞌ ubꞌijnu tucꞌa cay uche apater pero conda turox ibꞌajner. Y jay uyubꞌi awojroner atacrix inteꞌ awermano tuaꞌ uyustes ubꞌa.
MAT 18:16 Pero jay machi cꞌani uyubꞌi awojroner quiqui pejcan inteꞌ o chateꞌ awermano y aqꞌuechiobꞌ axin tut inteꞌ awermano era otronyajr. Y tamar era aquetpa chateꞌ o uxteꞌ ajchecsuyajobꞌ tama tunor e ojroner xeꞌ arobꞌna era.
MAT 18:17 Y jay machito cꞌani uyubꞌi iwojroner arenic tunor era tut e grupo ajcꞌupesiajobꞌ conda morojsebꞌir. Y jay machi cꞌani uyubꞌi nien uyojroner inteꞌ grupo ajcꞌupesiajobꞌ, chenic ibꞌa tut bꞌan cocha tut inteꞌ xeꞌ merato acꞌupseyan tama e Dios, o bꞌan cocha tut inteꞌ xeꞌ majax cꞌajna imener bꞌan cocha inteꞌ ajmorojseyaj tumin tuaꞌ e gobierno.
MAT 18:18 ’Y cꞌani inwareox era que lo que nox icachi tara tor e rum cꞌani aquetpa cachar tichan tut e qꞌuin ubꞌan, y que lo que nox ibꞌani tara tor e rum cꞌani aquetpa bꞌambꞌir tichan tut e qꞌuin ubꞌan.
MAT 18:19 ’Y cꞌani inwareox era ubꞌan que conda ixquetpa intera ibꞌijnusiajobꞌ chateꞌ tijam xeꞌ turox tara tor e rum conda war icꞌajti taca e Dios, pues Nitata xeꞌ turu tichan cꞌani uyajcꞌox lo que war icꞌajti tacar.
MAT 18:20 Porque tiaꞌ war umorojse ubꞌobꞌ chateꞌ o uxteꞌ cocha era tama nicꞌabꞌa yajaꞌ turen tujamobꞌ ubꞌan, che e Jesús.
MAT 18:21 Entonces cꞌotoy e Pedro tut e Jesús y che: —Niwinquiraret, ¿y jayteꞌ nic veces ucꞌani tuaꞌ incꞌumpa taca inteꞌ niwermano xeꞌ axin uche lo que mabꞌambꞌan nipater? ¿Jax ca siete veces? che e Pedro.
MAT 18:22 Y che e Jesús: —Cꞌani inwaret era que ma tzꞌacar tuaꞌ icꞌumpa jax taca siete veces, sino que ucꞌani tuaꞌ icꞌumpa taca inteꞌ awermano setenta veces siete xeꞌ war che este 490 veces, che e Jesús.
MAT 18:23 Entonces ojron e Jesús y che: —Uchinam e Dios lar tacar inteꞌ rey xeꞌ cꞌani uwira jayteꞌ tumin war uchꞌami y jayteꞌ tumin war abꞌetna umen umanobꞌ.
MAT 18:24 Y wartocto uwira e jun tiaꞌ tzꞌijbꞌabꞌir chi chi abꞌeto tacar, conda qꞌuejcha cꞌotoy inteꞌ uman xeꞌ war abꞌeto meyra sian tumin tacar.
MAT 18:25 Y e man era, cocha matucꞌa ayan ma cocha erer utoyi. Y tamar era upatron uyare tuaꞌ achojna taca uwixcar y umaxtac tuaꞌ aquetpobꞌ bꞌan cocha cora man xeꞌ mambꞌirobꞌ inyajrer. Y upatron uyare tuaꞌ achojna tunor lo que ayan tuaꞌ e man era ubꞌan tuaꞌ atoytzꞌa tamar lo que abꞌeto.
MAT 18:26 Entonces e man cotuan tut upatron y cay ucꞌajti tacar y che: “Niwinquiret, yajtan niut y cojconento cora y nen inxin intoyet tunor”, che e man.
MAT 18:27 Entonces e patrón uyajta ut uman y ubꞌijnu tuaꞌ unajpes tunor lo que abꞌeto uman tacar y uyacta ixin bꞌan taca.
MAT 18:28 Pero conda wartocto alocꞌoy e man era tut e rey xeꞌ abꞌeto ani, utajwi ubꞌa taca otronteꞌ man xeꞌ abꞌeto imbꞌijc tumin tacar. Pero e winic era uchuqui ubꞌujc e man y cay ucꞌotꞌi unuc y che: “Toyo tunor lo que ibꞌeto tacaren”, che e winic.
MAT 18:29 Entonces e man cotuan tut e winic y cay ucꞌajti tacar y che: “Yajtan niut y cojconento cora y nen inxin intoyet tunor”, che e man.
MAT 18:30 Pero e winic machi cꞌani ucojco sino que uqꞌueche ixin e man y uyose tama e cárcel este que acꞌapa utoyi tunor lo que abꞌeto tacar.
MAT 18:31 Pero conda e inmojr manobꞌ cay uwirobꞌ tunor era cꞌuxun uyalmobꞌ este que ixiobꞌ tuaꞌ uyareobꞌ upatron tunor lo que uwirobꞌ era.
MAT 18:32 Entonces e patrón uyare tuaꞌ apejcna e man xeꞌ abꞌeto ani tacar. Y conda cꞌotoy tut upatron cay cꞌayna umener y che: “Net jax inteꞌ man xeꞌ calapir oit. ¿Ma ca cꞌar amener que nen cay innajpes tunor e sian tumin lo que ibꞌeto ani tacaren umen que awaren y che: ‘Yajtan niut?’
MAT 18:33 Bꞌan ixto ani tuaꞌ ayajta ut awet manir bꞌan cocha cay inyajta oit nen ubꞌan”, che e patrón.
MAT 18:34 Y e patrón qꞌuijna meyra upater e man era este que uyebꞌta ixin tama e cárcel tut tin e usumi e gente. Y bꞌan quetpa tuaꞌ unumse ubꞌa este que acꞌapa utoyi tunor lo que abꞌeto. Y bꞌan numuy umen taca que machi cꞌani acꞌumpa taca uyet manir, che e Jesús.
MAT 18:35 Entonces che e Jesús: —Y bꞌan ixto tuaꞌ uche Nitata xeꞌ turu tichan tacarox ubꞌan jay machi ixixin ixcꞌumpa tama iwalma taca inteꞌ inteꞌ iwermano xeꞌ cay uchiobꞌ lo que mabꞌambꞌan ipater, che e Jesús.
MAT 19:1 Pues conda cꞌapa ojron e Jesús tama tunor era locꞌoy tama e departamento Galilea y ixin esto tama e departamento Judea y esto tama einxejr lugar xeꞌ turu tuyejtzꞌer e xucur Jordán tiaꞌ atobꞌoy watar e qꞌuin.
MAT 19:2 Y meyra sian gente cay xanobꞌ tupat y jaxir cay utzꞌacpes tunor tin e ajmuac.
MAT 19:3 Entonces cꞌotoyobꞌ cora fariseobꞌ xeꞌ war usicbꞌobꞌ cocha tuaꞌ umajresobꞌ e Jesús tuaꞌ uyubꞌi utuchꞌiobꞌ tut e ley, y tamar era cay uyubꞌiobꞌ tuaꞌ y chenobꞌ: —¿Uyajcꞌon ca lugar uley e Moisés tuaꞌ catijres canujbꞌiar motor que matucꞌa war uche cawixcar? che e fariseobꞌ era.
MAT 19:4 Y che e Jesús: —¿Machi ca iche leer tama uyojroner e Dios que tama ucajyesnibꞌir or e rum conda wartocto achena tunor era umen e Dios que jaxir uche inteꞌ winic y inteꞌ ixic?
MAT 19:5 Y che jaxir: “Y tamar era inteꞌ winic ucꞌani tuaꞌ uyacta utuꞌ y utata tuaꞌ axin uchꞌami uwixcar, y conda uchꞌami ubꞌobꞌ aquetpobꞌ intera”, che e Dios.
MAT 19:6 Y tamar era mixto jax chateꞌ yaꞌ sino que aquetpobꞌ intera taca. Y tamar era lo que e Dios unutꞌi ma erer atijresna umen inteꞌ winic, che e Jesús.
MAT 19:7 Y de allí e fariseobꞌ cay uyubꞌiobꞌ tuaꞌ otronyajr y chenobꞌ: —Y jay bꞌan, entonces ¿tucꞌa tuaꞌ uyareon e Moisés que: “Tin e cꞌani uyacta uwixcar tuaꞌ utijres unujbꞌiar ucꞌani tuaꞌ uyajcꞌu inteꞌ jun xeꞌ che que tijresbꞌir e nujbꞌiar era”, y tamar era erer uyacta inyajrer? che e fariseobꞌ era.
MAT 19:8 Y e Jesús che: —Umen taca que nox machi cꞌani iwacta ibꞌa tuaꞌ ixarobꞌna umen e Dios tucꞌa tuaꞌ iche y tamar taca era e Moisés ixin uyareox que erer itijres inujbꞌiar. Pero tama ucajyesnibꞌir tunor era ma ani jax bꞌan.
MAT 19:9 Y cꞌani inwareox era que tin e axin uyacta uwixcar tuaꞌ utijres unujbꞌiar y asutpa anujbꞌi taca otronteꞌ war acꞌaxi tama e mabꞌambꞌanir. Pero jay uwixcar inteꞌ war axana taca otronteꞌ winic erer ani uyacta, che e Jesús.
MAT 19:10 Entonces arobꞌna umen uyajcanuarobꞌ y chenobꞌ: —Jay unatanic ani que bꞌan tuaꞌ unumse ubꞌa inteꞌ winic más ani bueno tuaꞌ machi anujbꞌi, che uyajcanuarobꞌ.
MAT 19:11 Y che e Jesús: —Majax tunor e winicobꞌ xeꞌ erer uchꞌamiobꞌ e ojroner era tuaꞌ aturuanobꞌ ubꞌajner sino que ajtaca tin e ajcꞌunobꞌ umen e Dios tuaꞌ aquetpobꞌ ubꞌajner que erer uchꞌamiobꞌ e ojroner era.
MAT 19:12 Ayan e winicobꞌ xeꞌ cuxpobꞌ tacar lo que ayan tamarobꞌ que machi uyusre tuaꞌ anujbꞌiobꞌ. Y ayan e winicobꞌ xeꞌ machi cꞌani anujbꞌiobꞌ umen que chichbꞌana umen uyet winiquirobꞌ. Y ayan e winicobꞌ xeꞌ ubꞌijnuobꞌ que machi cꞌani anujbꞌiobꞌ tuaꞌ erer uturbꞌa ubꞌobꞌ más tama e Dios tuaꞌ utacre e gente oꞌchoyobꞌ tama uchinam e Dios. Pues tin e erer uchꞌami e ojroner era, uchꞌamic, che e Jesús.
MAT 19:13 Pues ayan tin e cay utaresobꞌ cora maxtacobꞌ tut e Jesús tuaꞌ erer upacbꞌu ucꞌabꞌ tamarobꞌ tuaꞌ ucꞌajti taca e Dios tamarobꞌ. Pero uyajcanuarobꞌ cay ucꞌayobꞌ tin e war utares e maxtacobꞌ era.
MAT 19:14 Pero e Jesús uyare uyajcanuarobꞌ y che: —Actanic ayopobꞌ taniut tunor e maxtac y ira iquete iwabꞌuobꞌ, porque tunor tin e axin acꞌupseyanobꞌ tamaren bꞌan cocha war uchiobꞌ e maxtacobꞌ era cꞌani oꞌchoyobꞌ tama uchinam e Dios, che e Jesús.
MAT 19:15 Entonces upacbꞌu ucꞌabꞌ tujor e maxtacobꞌ y de allí locꞌoy tama e lugar era.
MAT 19:16 Pues ayan inteꞌ chꞌom sitz xeꞌ meyra ayan utumin xeꞌ cꞌotoy tuyejtzꞌer e Jesús xeꞌ cay uyubꞌi tuaꞌ y che: —Niwajcanseyajet xeꞌ erachet, ¿tucꞌa erer inche xeꞌ imbꞌutz tuaꞌ erer inchꞌami e cuxtar xeꞌ machi tuaꞌ acꞌapa? che e chꞌom sitz era.
MAT 19:17 Y che e Jesús: —Net war awaren que erachen. Pero jax taca e Dios xeꞌ erach. Y tamar era war awaren que Diosen nen ubꞌan. Pero jay cꞌani achꞌami e cuxtar xeꞌ machi tuaꞌ acꞌapa, ucꞌani tuaꞌ icꞌupseyan tut uley e Moisés, che e Jesús.
MAT 19:18 Y che e chꞌom sitz: —¿Y tucꞌa ojroner xeꞌ chꞌar tzꞌijbꞌabꞌir umen e Moisés que ucꞌanto tuaꞌ incꞌupseyan tut? che e chꞌom sitz. Y che e Jesús: —Ira ichamsan, ira iꞌxin taca inteꞌ ajnajtir ixic, ira ixujchꞌian, ira imajresian,
MAT 19:19 cꞌupsen atata y atuꞌ, y yajtan ut apiarobꞌ bꞌan cocha acꞌani tuaꞌ ayajtanwa oit umen apiarobꞌ era, che e Jesús.
MAT 19:20 Y che e chꞌom sitz: —Inchix tunor era desde chuchuento. ¿Tucꞌa más ucꞌani tuaꞌ inche? che e chꞌom sitz.
MAT 19:21 Y che e Jesús: —Jay acꞌani tuaꞌ aquetpa erach tunor awirnar quiqui chono lo que ayan tabꞌa y ajcꞌun tin e tzajtaca ut. Y tamar era axin aquetpa meyra atuanibꞌir tichan tut e qꞌuin, y de allí lar incoꞌ tacaren, che e Jesús.
MAT 19:22 Pero conda e chꞌom sitz uyubꞌi tunor era quetpa tzajtaca uwirnar porque jaxir meyra ayan lo que ayan tuaꞌ.
MAT 19:23 Entonces e Jesús uyare uyajcanuarobꞌ y che: —Cꞌani inwareox era que intran tuaꞌ oꞌchoyobꞌ tama uchinam e Dios tin e ayan meyra utumin.
MAT 19:24 Pues cꞌani inwareox otronyajr que más ani uyubꞌi oꞌchoy inteꞌ nuxi arac xeꞌ ucꞌabꞌa camello tama uchꞌenar inteꞌ aguja, pero más intran tuaꞌ oꞌchoy tama uchinam e Dios inteꞌ xeꞌ meyra war ucojco tama utumin xeꞌ meyra ayan tuaꞌ, che e Jesús.
MAT 19:25 Pues conda uyajcanuarobꞌ uyubꞌiobꞌ tunor e ojroner era cay bꞌactobꞌ y cay ojronobꞌ jaxobꞌ taca y chenobꞌ: —Y jay inteꞌ xeꞌ meyra ayan utumin cocha era machi uyubꞌi acorpesna, ¿chi tuaꞌ acorpesna? che uyajcanuarobꞌ.
MAT 19:26 Entonces e Jesús uchꞌujcu uwira utobꞌ y che: —Mamajchi tuaꞌ acorpesna tamar taca utumin, pero tunor era intran tut e winicobꞌ. Pero tut Cadiosir matucꞌa intran tuaꞌ uche, che e Jesús.
MAT 19:27 Entonces che e Pedro: —Niwinquiraret, non era cꞌapa cawacta tunor lo que ayan ticabꞌa tuaꞌ caxin tacaret. ¿Y tucꞌa tuanibꞌir tuaꞌ cachꞌami non? che e Pedro.
MAT 19:28 Y che e Jesús: —Cꞌani inwareox era lo que tuaꞌ ichꞌami nox xeꞌ cay xanox tacaren, porque tama e tiempo xeꞌ watar conda achecta or e rum xeꞌ imbꞌutz conda nen xeꞌ Uyunenen e winic incay inturuan tor niturtar xeꞌ ayan meyra utawarer, nox tuaꞌ ixturuan tama e doce turtar xeꞌ tuaꞌ aquetpa tibꞌa. Y tamar era nox tuaꞌ iche juzgar tunor e doce grupo gente lo que ayan tama e Israel.
MAT 19:29 Y tunor tin e axin uyacta lo que ayan tuaꞌ bꞌan cocha inteꞌ uyotot, o usacunobꞌ, o uwijtzꞌinobꞌ, o uwijtanobꞌ, o utuꞌ, o utata, o uwixcar, o umaxtac, o ucꞌopot tuaꞌ taca uche lo que ucꞌani e Dios cocha war iche nox era, cꞌani uchꞌamiobꞌ cien veces lo que uyactobꞌ era bꞌan cocha inteꞌ utuanibꞌir, y de allí cꞌani uchꞌamiobꞌ e cuxtar xeꞌ machi tuaꞌ acꞌapa.
MAT 19:30 Y tama e tiempo xeꞌ watar era tin e nuxi winic tara tor e rum cꞌani aquetpa inteꞌ xeꞌ majax nuxi winic yajaꞌ, y tin e majax nuxi winic tara axin aquetpa inteꞌ nuxi winic yajaꞌ, che e Jesús.
MAT 20:1 Entonces che e Jesús: —Uchinam e Dios bꞌan cocha inteꞌ winic xeꞌ ayan inteꞌ uchor. Y conda cꞌotoy e día tuaꞌ e cosecha ixin tuaꞌ usicbꞌa meyra man conda wartoco asacojpa.
MAT 20:2 Y cay utajwi cora man y cay uyare jayteꞌ tuaꞌ utoyobꞌ y de allí uyebꞌta ixiobꞌ tama uchor tuaꞌ apatnobꞌ.
MAT 20:3 Y de allí locꞌoy e ajyum otronyajr a las nueve de la mañana y utajwi tin e intaca war axanobꞌ.
MAT 20:4 Y uyare y che: “Quiquic patnenic tama nicosecha y nen tuaꞌ intoyox bꞌan cocha ixpatna”, che e ajyum. Y jaxirobꞌ ixin tuaꞌ apatnobꞌ ubꞌan.
MAT 20:5 Y bꞌan uche e ajyum otronyajr tama uyuxinar e ajqꞌuin, y bꞌan uche conda tꞌerpix e qꞌuin ubꞌan.
MAT 20:6 Y bꞌan taca uche conda warix anamtzꞌa e qꞌuin, ixin usicbꞌa tucꞌa man ayan tama e chinam. Y utajwi cora winicobꞌ xeꞌ intaca turobꞌ. Entonces jaxir uyubꞌi tuobꞌ y che: “¿Y tucꞌa tuaꞌ intaca turox era? ¿O mato tucꞌa e patnar xeꞌ achecta tibꞌa?” che e ajyum.
MAT 20:7 Y jaxirobꞌ che: “Tara turon cocha mamajchi war umajnon”, che e winicobꞌ era. Entonces che e ajyum: “Quiquic patnenic tama nicosecha y nen tuaꞌ intoyox bꞌan cocha ixpatna”, che e ajyum.
MAT 20:8 Y conda acbꞌare e ajyum ixin upejca tin e aquetpa tujor e manobꞌ era y che: “Quiqui pejcan taric tunor tin e patnobꞌ tuaꞌ atoyobꞌ. Toyo bꞌajxan tin e yopobꞌ conda warix acꞌapa e día y bꞌan tuaꞌ ache este que atoyi tin e yopobꞌ conda wartocto acay e día tama e patnar”, che ajyum.
MAT 20:9 Entonces cꞌotoyobꞌ xeꞌ ajcꞌunobꞌ upatnar conda wix aturuan e qꞌuin tor e witzir y cay tojyobꞌ bꞌan cocha jay patnobꞌ ani tama tunor e día.
MAT 20:10 Y conda cay utoyi tin e cay patnobꞌ conda tꞌabꞌay e qꞌuin, war ubꞌijnuobꞌ que más nojta tuaꞌ atojyobꞌ que e inmojr xeꞌ intocto apatnobꞌ. Pero tojyobꞌ bꞌan taca cocha e inmojr.
MAT 20:11 Pero conda tojyobꞌ, cay uwirobꞌ que lar tacar lo que uchꞌamiobꞌ e inmojr y tamar era cay qꞌuecranobꞌ tut e ajyum rum
MAT 20:12 y chenobꞌ: “E inmojr era patnobꞌ inteꞌ taca hora pero non patnon tunor e día y war uputon e qꞌuin”, che e manobꞌ era.
MAT 20:13 Pero e ajyum rum uyare inteꞌ y che: “Nimanet, majax majresiaj lo que war inche tacaret. ¿Machi ca cay inwaret cocha tuaꞌ intoyi e día y net aware que bueno?
MAT 20:14 Jun atumin y quiqui. Nen cꞌani intoyi e inmojr era xeꞌ cay patnobꞌ más tarde bꞌan cocha war intoyet.
MAT 20:15 ¿O ma ca jax nen xeꞌ incꞌotori tujor nitumin era tuaꞌ insati cocha incꞌani nen? ¿O ma ca jax bueno toit que wechꞌer nicꞌabꞌ tut e inmojr era?” che e ajyum.
MAT 20:16 Tunor era war che que tin e war ubꞌijnuobꞌ que jax jaxirobꞌ xeꞌ tuaꞌ oꞌchoyobꞌ tama uchinam e Dios bꞌajxan que e inmojr axin aquetpobꞌ tuaꞌ oꞌchoyobꞌ nacpat e inmojr. Y tin e war ubꞌijnuobꞌ que cꞌani oꞌchoyobꞌ este nacpat e inmojr axin oꞌchoyobꞌ bꞌajxan. Porque meyra ayan tin e war apejcnobꞌ tuaꞌ uyactobꞌ acꞌotori e Dios tama uyalmobꞌ, pero majax meyra tin e acꞌotoy acꞌupseyanobꞌ tut e Dios, che e Jesús.
MAT 20:17 Pues entonces conda e Jesús war axin tama e bꞌir tuaꞌ acꞌotoy tama e chinam Jerusalem cay ojron taca e doce uyajcanuarobꞌ ubꞌajnerobꞌ y che:
MAT 20:18 —Pues erer iwira que war catꞌabꞌay caxin esto tama e chinam Jerusalem, y conda cacꞌotoy nen xeꞌ Uyunenen e winic cꞌani anjcꞌuna tama ucꞌabꞌobꞌ tin e uwinquir e inmojr sacerdotiobꞌ y tama ucꞌabꞌobꞌ tin e ajcanseyajobꞌ tama uley e Moisés. Jaxirobꞌ tuaꞌ uyareobꞌ tuaꞌ inchamesna.
MAT 20:19 Y de allí cꞌani uyajqꞌuenobꞌ tama ucꞌabꞌobꞌ e gente romano y jaxirobꞌ tuaꞌ utzenienobꞌ y tuaꞌ uwatzꞌienobꞌ y tuaꞌ uchꞌubꞌenobꞌ tut inteꞌ cruz tuaꞌ uchamsenobꞌ. Pero tama e uxteꞌ día cꞌani insujta imbꞌixqꞌuesna tujam e chamenobꞌ, che e Jesús.
MAT 20:20 Entonces cꞌotoy tut e Jesús utuꞌ e Santiago y e Juan xeꞌ jax uyunenobꞌ e Zebedeo. Y conda cꞌotoy e ixic era taca uyarobꞌ cotuan tut e Jesús y che: —Chen lo que cꞌani cacꞌajti tacaret era, che utuꞌ e Santiago y e Juan.
MAT 20:21 Y che e Jesús: —¿Tucꞌa acꞌani tuaꞌ inche tacaret? che e Jesús. Y che e ixic: —Ajcꞌun uturtarobꞌ inteꞌ intiobꞌ e chateꞌ nimaxtacobꞌ era tuaꞌ aturuanobꞌ inteꞌ tama anojcꞌabꞌ y inteꞌ tama atzꞌejcꞌabꞌ conda iꞌxin icꞌotori tama uchinam e Dios, che e ixic.
MAT 20:22 Pero che e Jesús: —Pues nox machi war inata tucꞌa war icꞌajti. ¿O erer ca ani ichꞌami e nuxi cꞌuxner lo que ucꞌani tuaꞌ inxin innumse nibꞌa tama niwalma bꞌan cocha jay iyuchꞌi ani lo que ayan tama nichꞌeu lo que aquetpa tuaꞌ unchꞌi nen, o bꞌan cocha jay ichꞌami ani inteꞌ chꞌuymar xeꞌ meyra ayan e cꞌuxner tamar xeꞌ aquetpa tuaꞌ inchꞌami nen? che e Jesús. Y jaxirobꞌ che: —Erer ani, che e Santiago y e Juan.
MAT 20:23 Y che e Jesús: —Erer ixto yaꞌ. Nox ucꞌani tuaꞌ iyuchꞌi lo que ayan tama nichꞌeu era y ucꞌani tuaꞌ ichꞌami e chꞌuymar lo que aquetpa tuaꞌ inchꞌami nen, pero lo que war icꞌajti era tuaꞌ ixturuan taniwejtzꞌer tama nichinam majax nen tuaꞌ inwareox sino que jax Nitata. Porque tin e tuaꞌ aturuanobꞌ taniwejtzꞌer tama nichinam cꞌani aꞌjcꞌunobꞌ tin e sicbꞌabꞌirix umen Nitata, che e Jesús.
MAT 20:24 Pues conda e inmojr diez uyajcanuarobꞌ e Jesús cay uyubꞌiobꞌ e ojroner era qꞌuijnobꞌ upater e chateꞌ hermanuobꞌ era.
MAT 20:25 Pero e Jesús upejca tunor uyajcanuarobꞌ y che: —Pues nox inata que tunor e nuxi winicobꞌ tujam e gente xeꞌ machi ubꞌacriobꞌ e Dios war uwirsiobꞌ ucꞌotorer tujor e gente tamar lo que uchiobꞌ. Y tin e war uchꞌami ucꞌotorer tuaꞌ inteꞌ uwinquir war utattzꞌi ubꞌa tamar.
MAT 20:26 Pero majax bꞌan tuaꞌ aquetpa tijam nox sino que tin e cꞌani aquetpa nuquir winic tijam ucꞌani tuaꞌ aquetpa ajtacarsiaj tuaꞌ e inmojr.
MAT 20:27 Y tin e cꞌani aquetpa más nuxi winic tijam nox ucꞌani tuaꞌ uche ubꞌa bꞌan cocha inteꞌ chuchu winic y ucꞌani tuaꞌ uche ubꞌa bꞌan cocha umanir e inmojr.
MAT 20:28 Bꞌan cocha nen xeꞌ Uyunenen e winic tarien majax tuaꞌ intacarna umen e inmojr, sino que tarien tuaꞌ intacriox y tuaꞌ inwajcꞌu nibꞌa tuaꞌ inchamesna tuaꞌ incorpes meyra gente, che e Jesús.
MAT 20:29 Pues conda e Jesús y uyajcanuarobꞌ wartocto alocꞌoyobꞌ tama e chinam Jericó, ayan meyra gente xeꞌ cay xanobꞌ tupat e Jesús.
MAT 20:30 Y ayan chateꞌ winicobꞌ xeꞌ tajpem unacꞌutobꞌ xeꞌ turobꞌ tuyejtzꞌer e bꞌir y conda arobꞌnobꞌ que war anumuy e Jesús tuyejtzꞌerobꞌ cay ojronobꞌ taca inteꞌ nuxi nuc y chenobꞌ: —Cawinquiraret Oo, uyunenet e David, yajtan coit, che e winicobꞌ era xeꞌ tajpem unacꞌutobꞌ.
MAT 20:31 Pero e gente xeꞌ war axanobꞌ tupat e Jesús cay ucꞌayobꞌ e winicobꞌ era tuaꞌ aquetpobꞌ tzꞌustaca. Pero jaxirobꞌ más nojta cay aruobꞌ otronyajr y chenobꞌ: —Cawinquiraret Oo, uyunenet e David, yajtan coit, che e winicobꞌ era.
MAT 20:32 Entonces e Jesús quetpa wawan y upejca tin e tajpem unacꞌutobꞌ y uyubꞌi tuobꞌ y che: —¿Tucꞌa icꞌani tuaꞌ inche tacarox? che e Jesús.
MAT 20:33 Entonces ojronobꞌ jaxirobꞌ y chenobꞌ: —Cawinquiraret, cacꞌani tuaꞌ awerojse unaccoit, che e winicobꞌ era.
MAT 20:34 Entonces e Jesús uyajta utobꞌ y ixin ucꞌatbꞌu ucꞌabꞌ tama unacꞌutobꞌ, y wacchetaca bꞌantzꞌa unacꞌutobꞌ y eronobꞌ y cay xanobꞌ tupat e Jesús.
MAT 21:1 Pues entonces conda warto axin e Jesús tama uxambꞌar esto tama e chinam Jerusalem cꞌotoy tama e chinam Betfagé xeꞌ turu tuyejtzꞌer or e witzir xeꞌ ucꞌabꞌa Olivo. Entonces e Jesús uyare chateꞌ uyajcanuarobꞌ y che:
MAT 21:2 —Quiquic tama e aldea teinxejr bꞌana y yajaꞌ tuaꞌ itajwi incojt chij xeꞌ cachar war y xeꞌ ayan inteꞌ uyar tacar. Bꞌanic tuaꞌ iqꞌueche watar tara.
MAT 21:3 Y jay ayan chi xeꞌ upejcox tamar y che: “¿Tucꞌa tuaꞌ war ibꞌani e chij era?” Arenic cocha era y che: “Jax Cawinquirar xeꞌ cꞌani ucꞌampes, pero wacchetaca cꞌani catares otronyajr”, y jaxir tuaꞌ uyareox que erer, che e Jesús.
MAT 21:4 Y bꞌan numuy tuaꞌ acꞌapa achempa lo que chꞌar tzꞌijbꞌabꞌir umen e profeta tama e onian tiempo xeꞌ che que:
MAT 21:5 Arenic tin e turobꞌ tama e chinam Sión y che: “Ira ixbꞌacta, ajchinamox tuaꞌ e Sión xeꞌ jax e Jerusalem. Chꞌujcunic iwira que watarix Iwajcꞌotorer xeꞌ incꞌun uwirnar xeꞌ war aturuan tama upat inteꞌ chuchu chij”, che tama uyojroner e Dios.
MAT 21:6 Entonces uyajcanuarobꞌ e Jesús ixin uchiobꞌ bꞌan taca cocha arobꞌnobꞌ umener.
MAT 21:7 Y utaresobꞌ e chij taca uyar y uxichꞌiobꞌ ubꞌujc tama upatobꞌ y de allí e Jesús tꞌabꞌay turuan tamar.
MAT 21:8 Y e sian gente cay uxichꞌiobꞌ ubꞌujcobꞌ tut e bꞌir y ayan tin e uxuriobꞌ ucꞌabꞌ e teꞌ tuaꞌ uturbꞌobꞌ tut e bꞌir. Y bꞌan uchiobꞌ e gente umen que war ucꞌaniobꞌ e Jesús.
MAT 21:9 Y meyra gente war axiobꞌ más bꞌajxan que e Jesús, y ayan tin e war axiobꞌ tupat ubꞌan. Y tunor e gente era war aruobꞌ taca inteꞌ nuxi nuc y chenobꞌ: —¡Catattzꞌic ucꞌabꞌa usitz e rey David xeꞌ turuan tama e onian tiempo! ¡Chojbꞌesbꞌir jaxir xeꞌ axin watar tama ucꞌabꞌa Cawinquirar! ¡Catattzꞌic ucꞌabꞌa Cadiosir! che e sian gente era.
MAT 21:10 Entonces conda e Jesús ochoy tama e chinam Jerusalem cay uqꞌuitru ubꞌobꞌ tunor e sian gente y cay uyubꞌi ubꞌobꞌ jaxobꞌ taca y chenobꞌ: —¿Chi nic era? che e sian gente.
MAT 21:11 Y ayan tin e che: —Jax era e profeta xeꞌ ucꞌabꞌa Jesús xeꞌ tuaꞌ e chinam Nazaret tama e departamento Galilea, chenobꞌ.
MAT 21:12 Entonces nacpat era e Jesús ochoy macuir e templo y cay uyajnes locꞌoy tunor tin e war achonma y tin e war amanuobꞌ tama e templo. Y cay ucucru e mesa tuaꞌ tin e war uwechꞌiobꞌ ut e tumin tuaꞌ e gente. Y cꞌapa ucucru ucꞌajnobꞌ tin e war uchoniobꞌ e sacsac mut.
MAT 21:13 Y che e Jesús: —Chꞌar tzꞌijbꞌabꞌir tama uyojroner e Dios que: “Niotot, che e Dios, jax inteꞌ lugar tiaꞌ tuaꞌ ucꞌajtiobꞌ e gente taca e Dios”, pero nox era war icꞌampes bꞌan cocha inteꞌ uchꞌenir e ajxujchꞌobꞌ, che e Jesús.
MAT 21:14 Y tamar era cꞌotoy tut e Jesús cora gente xeꞌ tajpem unacꞌutobꞌ y tin e tzꞌej uyocobꞌ y jaxir utzꞌacpes tunorobꞌ.
MAT 21:15 Pero uwinquirobꞌ e inmojr sacerdotiobꞌ y e ajcanseyajobꞌ tama uley e Moisés qꞌuijnobꞌ conda uwirobꞌ e sian milagro lo que war uche e Jesús y conda uyubꞌiobꞌ lo que war aruobꞌ taca inteꞌ nuxi nuc e bꞌiqꞌuit maxtac tama e templo xeꞌ chenobꞌ: “¡Catattzꞌi ucꞌabꞌa usitz e rey David!” chenobꞌ.
MAT 21:16 Entonces e nuquir winicobꞌ uyareobꞌ e Jesús y chenobꞌ: —¿War ca oybꞌi lo que war aruobꞌ e maxtac era? che e nuquir winicobꞌ. Y e Jesús che: —Umbꞌi. Pero, ¿machi ca iche leer tama uyojroner e Dios tiaꞌ che: Net cꞌapa awajcꞌu e maxtac y e bꞌiqꞌuit maxtac xeꞌ warto achuobꞌ tuaꞌ uyareobꞌ e tattzꞌarsiaj xeꞌ erach? Bꞌan chꞌar tzꞌijbꞌabꞌir tama uyojroner e Dios, che e Jesús.
MAT 21:17 Entonces e Jesús locꞌoy tama e chinam y ixin esto tama e chinam Betania tiaꞌ tuaꞌ awayan tama e acbꞌar era.
MAT 21:18 Pues entonces conda sacojpa tama inteꞌ día y war asutpa axin tama e chinam Jerusalem otronyajr e Jesús cay jaytzꞌa.
MAT 21:19 Entonces cay uwira que ayan inteꞌ teꞌ war tama utiꞌ e bꞌir xeꞌ ucꞌabꞌa higuera. Entonces ixin tut e teꞌ era tuaꞌ uwira jay ayan uyutir, pero matucꞌa ayan tamar, sino que uyopor taca ayan tamar. Y tamar era uyare e teꞌ era y che: —Mix tiaꞌ tuaꞌ isutpa icꞌawan otronyajr, che e Jesús. Y wacchetaca cay taqui ixin.
MAT 21:20 Pero conda uyajcanuarobꞌ uwirobꞌ tunor era que taqui e teꞌ wacchetaca, cay ubꞌijnu uwirobꞌ y chenobꞌ: —¿Y tucꞌa tuaꞌ taqui e teꞌ wacchetaca cocha era? che uyajcanuarobꞌ.
MAT 21:21 Y che e Jesús: —Cꞌani inwareox era que jay ayan icꞌupesiaj tama e Dios y machi ixbꞌacta tama iwalma que machi tuaꞌ anumuy lo que war icꞌani, entonces cꞌani anumuy tunor lo que iware era. Y jay war ixcꞌupseyan tama e Dios cocha era, majax jax taca lo que cay inche nen taca e teꞌ era tuaꞌ iche nox, sino que ayanto más que erer iche ubꞌan. Y erer iware inteꞌ or e witzir y che: “Loqꞌuen tara y tobꞌen quiqui tama e jaꞌ”, y or e witzir era tuaꞌ ucꞌupsiox.
MAT 21:22 Y tunor lo que ixixin icꞌajti taca e Dios, cꞌupseyanenic tama e Dios que san tuaꞌ ichꞌami tunor era, y bꞌan tuaꞌ anumuy, che e Jesús.
MAT 21:23 Entonces ixin e Jesús tama e chinam Jerusalem y conda cꞌotoy ochoy tama e templo y cay canseyan. Pero ayan cora uwinquirobꞌ e inmojr sacerdotiobꞌ y ayan cora nuquir winicobꞌ tuaꞌ e Israel xeꞌ cꞌotoyobꞌ tut e Jesús xeꞌ cay uyubꞌiobꞌ tuaꞌ y chenobꞌ: —¿Chi tuaꞌ e cꞌotorer lo que war acꞌampes tuaꞌ awajnes e ajchonmarobꞌ y tuaꞌ atzꞌacpes e ajmuacobꞌ y tuaꞌ achꞌami utattzꞌarsiaj e maxtac era? ¿Y chi uyajqꞌuet acꞌotorer tuaꞌ ache tunor era? che e nuquir winicobꞌ era.
MAT 21:24 Y che e Jesús: —Y bꞌanen ubꞌan, ayan lo que cꞌani umbꞌi tibꞌa. Y jay iwaren, entonces cꞌani inwareox chi umen ajcꞌunen nicꞌotorer era ubꞌan.
MAT 21:25 ¿Chi umen tzacarna ixin e Juan tuaꞌ achꞌuyma? ¿Umen ca e Dios? o ¿umen ca e winicobꞌ? che e Jesús. Entonces e nuquir winicobꞌ cay ojronobꞌ jaxobꞌ taca y chenobꞌ: —¿Y tucꞌa tuaꞌ caware era? Jay caware que e Juan ebꞌetbꞌir tari umen e Dios, entonces jaxir tuaꞌ uyareon y che: “¿Tucꞌa tuaꞌ machi cꞌupseyanox tamar?”
MAT 21:26 Pero jay caware que e Juan ebꞌetbꞌir tari umen e winicobꞌ, cꞌani aqꞌuijnobꞌ tunor e gente este que axin urionobꞌ taca e tun tuaꞌ uchamsionobꞌ porque tunorobꞌ war ucꞌupsiobꞌ que e Juan ebꞌetbꞌir tari umen e Dios y que jaxir jax inteꞌ profeta tuaꞌ e Dios, che e nuquir winicobꞌ jaxobꞌ taca.
MAT 21:27 Y tamar era ojronobꞌ e nuquir winicobꞌ y chenobꞌ: —Machi canata chi umen ebꞌetbꞌir tari e Juan, che e nuquir winicobꞌ era. Entonces ojron e Jesús y che: —Y nien nen machi tuaꞌ inwareox chi umen ajcꞌunen nicꞌotorer era, che e Jesús.
MAT 21:28 Entonces ojron e Jesús taca e nuquir winicobꞌ era y che: —¿Y tucꞌa ibꞌijnu nox tamar era? Ayan inteꞌ winic xeꞌ ayan chateꞌ uyunenobꞌ. Y e winic uyare inteꞌ uyunen y che: “Quiqui acninic ut nijinaj”, che e tatabꞌir.
MAT 21:29 Pero uyunen era ojron y che: “Incꞌoyi inxin.” Pero nacpat era yopa tama ujor que: “Más ani bueno tuaꞌ inxin impatna.” Y ixin patna.
MAT 21:30 Y de allí ixin e tatabꞌir y uyare otronteꞌ uyunen y che: “Quiqui acninic ut nijinaj”, che e tatabꞌir. Entonces ojron uyunen era y che: “Nen inxin ya”, che inteꞌ uyunen era. Pero nacpat era yopa tama ujor que: “Más ani bueno que machi inxin.” Y machi ixin patna.
MAT 21:31 ¿Chi tujam e chateꞌ sitz era ixin uche lo que arobꞌna umen utata? che e Jesús. Y che e nuquir winicobꞌ: —Jax e bꞌajxan sitz, che e nuquir winicobꞌ. Entonces e Jesús che: —Cꞌani inwareox era que ayan tin e ajmorojseyaj tumin tuaꞌ e gobierno y ayan tin e ajnajtir ixictac xeꞌ más war uyustes ubꞌobꞌ tuaꞌ oꞌchoyobꞌ tama uchinam e Dios que nox.
MAT 21:32 Porque e Juan xeꞌ ajchꞌuymar xeꞌ ebꞌetbꞌir tari umen e Dios cꞌotoy tijam tuaꞌ ucansiox cocha tuaꞌ iyustes ibꞌa tut e Dios, pero nox machi icꞌani. Pero tin e ajmorojseyaj tumin tuaꞌ e gobierno y tin e ajnajtir ixictac cay cꞌupseyanobꞌ tamar lo que arobꞌnobꞌ umener. Y nox, motor que cay iwira tunor era, pero machi cay ibꞌijnu tuaꞌ iwacta imabꞌambꞌanir y tuaꞌ ichꞌami uyojroner e Juan era, che e Jesús.
MAT 21:33 Entonces cay ojron e Jesús taca e nuquir winicobꞌ era taca inteꞌ ojroner xeꞌ mucur cora y che: —Ubꞌinic porque cꞌani inwareox otronteꞌ ojroner. Ayan inteꞌ ajyum rum xeꞌ ixin upaqꞌui cora chꞌan xeꞌ ucꞌabꞌa uva xeꞌ lar uwirnar cocha e chꞌuyur chꞌan tama inteꞌ nuxi chor. Y cay uyustes e macteꞌ ixin. Y de allí cay uyustes lo que ucꞌampes tuaꞌ ulocse uyarar e uva era. Y de allí ujachi ingojr otot macuir uchor xeꞌ nojta uyoquir tiaꞌ chequer uwira tunor uchor tiaꞌ tuaꞌ atꞌabꞌay inteꞌ ajcojc chor. ’Y de allí utajwi cora ajpatnarobꞌ xeꞌ utoyobꞌ e rum tuaꞌ apatnobꞌ tamar. Y de allí locꞌoy ixin e ajyum innajt tama inteꞌ uxambꞌar.
MAT 21:34 Entonces conda cꞌotoy e día tuaꞌ e cosecha e ajyum uyebꞌta ixin cora umanobꞌ tuaꞌ axin uchꞌamiobꞌ imbꞌijc e cosecha lo que quetpa tuaꞌ uchꞌami tamar.
MAT 21:35 Pero conda cꞌotoyobꞌ jajpnobꞌ umen e ajpatnarobꞌ y cꞌapa uwatzꞌiobꞌ inteꞌ, y inteꞌ uchamsiobꞌ, y inteꞌ uriobꞌ taca e tun.
MAT 21:36 Entonces e ajyum uyebꞌta ixin meyra umanobꞌ, pero conda cꞌotoyobꞌ bꞌan taca chena tacarobꞌ otronyajr.
MAT 21:37 ’Y nacpat era uyebꞌta ixin uyunen porque war ubꞌijnu que: “Conda axin uwirobꞌ e ajpatnarobꞌ que jax era nisitz xeꞌ war acꞌotoy, ucꞌani tuaꞌ abꞌacta uwirobꞌ”, xeꞌ war ubꞌijnu e ajyum chor era.
MAT 21:38 Pero conda irna e sitz era umen e ajpatnarobꞌ, jaxirobꞌ cay ojronobꞌ jaxobꞌ taca y chenobꞌ: “¿O jax era xeꞌ axin aquetpa ajyum tuaꞌ tunor era conda axin achamay utata? Cachamsenic ubꞌan tuaꞌ caquetpa non taca tunor e cꞌopot era”, che e ajpatnarobꞌ era jaxobꞌ taca.
MAT 21:39 Y lo que uchiobꞌ e ajpatnarobꞌ era, ujajpiobꞌ uquerejbꞌobꞌ e sitz patir e macteꞌ y yajaꞌ uchamsiobꞌ uyactobꞌ. Tara acꞌapa e ojroner, che e Jesús.
MAT 21:40 Entonces e Jesús uyubꞌi tuaꞌ e nuquir winicobꞌ era y che: —Y conda acꞌotoy e ajyum cꞌopot ¿tucꞌa tuaꞌ uche taca e ajpatnarobꞌ era? che e Jesús.
MAT 21:41 Entonces ojronobꞌ e nuquir winicobꞌ y chenobꞌ: —Watar jaxir y uwatzꞌi inteꞌ intiobꞌ e ajpatnarobꞌ era este que acꞌapa uchamsiobꞌ. Y de allí axin utajwi otro inmojr ajpatnarobꞌ tuaꞌ apatnobꞌ tama e chor, pero xeꞌ axin utoyi utuanibꞌir e rum, che e nuquir winicobꞌ era.
MAT 21:42 Y che e Jesús: —¿Ma ca tiaꞌ cay iche leer tiaꞌ chꞌar tzꞌijbꞌabꞌir tama uyojroner e Dios que: E tun xeꞌ chocbꞌirix ani umen e ajcheyaj otot más nojta ucꞌampibꞌir coner? Chembꞌir tunor era umen Cawinquirar, y galan ticoit lo que cꞌapa uche. Bꞌan chꞌar tzꞌijbꞌabꞌir tama uyojroner e Dios.
MAT 21:43 Y tamar era cꞌani inwareox que cꞌani aloqꞌuesna uchinam e Dios tibꞌa tuaꞌ asutpa aꞌjcꞌuna otro inmojr xeꞌ cꞌani utattzꞌi e Dios tamar.
MAT 21:44 Nen laren tacar e tun xeꞌ chocbꞌir ani umen e ajcheyaj otot. Tin e axin acucrema tujor e tun era cꞌani acꞌocchina umener. Y jay ojri e tun era tama ujor inteꞌ, jaxir tuaꞌ aquetpa uchꞌeir umen umabꞌambꞌanir, che e Jesús.
MAT 21:45 Entonces conda uwinquirobꞌ e inmojr sacerdotiobꞌ y e fariseobꞌ uyubꞌiobꞌ tunor uyojroner era cay yopa tujorobꞌ que tamarobꞌ war oꞌjron e Jesús.
MAT 21:46 Y tamar era cꞌani ani uqꞌuechiobꞌ axin e Jesús tama e cárcel, pero cꞌotoy inteꞌ bꞌajcꞌut tamarobꞌ porque tunor e gente war ucꞌupsiobꞌ que e ojroner lo que arobꞌnobꞌ umen e Jesús jax inteꞌ ojroner xeꞌ tari tuaꞌ e Dios.
MAT 22:1 Pues e Jesús cay canseyan otronyajr taca inteꞌ ojroner xeꞌ mucur cora y che:
MAT 22:2 —Uchinam e Dios lar tacar inteꞌ rey xeꞌ ixin uyustes inteꞌ nuxi nojqꞌuin conda cꞌotoy e hora tuaꞌ anujbꞌi uyunen.
MAT 22:3 Entonces e rey uyebꞌta ixin cora umanobꞌ tuaꞌ axin uyare tin e pejcbꞌirobꞌix xeꞌ jax e gente tuaꞌ e Israel que cꞌotoyix e hora tuaꞌ e nojqꞌuin. Pero mamajchi cꞌotoy tama e nojqꞌuin.
MAT 22:4 Entonces e rey sutpa utzacre ixin otro inmojr umanobꞌ y che: “Quiquic arenic tin e pejcbꞌirobꞌix que cꞌotoyix e hora tuaꞌ ucajyes e nojqꞌuin. Cachamsix inteꞌ wacax y cachamsix inteꞌ chꞌom wacax ubꞌan xeꞌ más nojta unojrir. Y ustabꞌirix tunor e comida ubꞌan. Laric ixto yaꞌ tama e nojqꞌuin era.”
MAT 22:5 Pero tunor e gente cay uche ubꞌobꞌ que matucꞌa ucꞌampibꞌir unojqꞌuin e rey era. Intaca ixin uchiobꞌ lo que ubꞌijnu uchiobꞌ. Y ayan tin e ixin tama uchor y ayan tin e ixin chonma.
MAT 22:6 Pero ayan tin e uxejbꞌiobꞌ utobꞌ umanobꞌ e rey este que cay uwatzꞌiobꞌ, y ayan tin e uchamsiobꞌ.
MAT 22:7 Pero conda e rey cꞌotoy uyubꞌi lo que numuy que chamesnobꞌ umanobꞌ, qꞌuijna uwira tunor e gente era. Y cay uyebꞌta ixin usoldadobꞌ tuaꞌ axin uchamsiobꞌ tunor e gente era y tuaꞌ uputa tunor uchinamobꞌ.
MAT 22:8 Entonces e rey sutpa uyare umanobꞌ otronyajr y che: “Turix tunor tama e nojqꞌuin tuaꞌ e nujbꞌiar, pero tin e arobꞌbꞌirobꞌix ani tuaꞌ ayopobꞌ ma ani tawarobꞌ”, che e rey.
MAT 22:9 “Y tamar era quiquic sajcanic tuqꞌuic tuqꞌuic gente xeꞌ itajwi tama e calle tama e chinam y pejcanic taricobꞌ tama e nojqꞌuin tuaꞌ e nujbꞌiar era”, che e rey.
MAT 22:10 Entonces locꞌoy ixiobꞌ umanobꞌ e rey tama e calle y cay umorojsiobꞌ tunor tin e utajwiobꞌ, y ayan tin e imbꞌutz uwirnar y ayan tin e mabꞌambꞌan uwirnar. Y tamar era bꞌutcꞌa uyotot e rey taca e sian ajwarobꞌ era.
MAT 22:11 ’Entonces e rey cay uchꞌujcu uwira tunor e ajwarobꞌ era. Y checta uwira inteꞌ winic xeꞌ majax bꞌujcsebꞌir cocha ucꞌani tuaꞌ acꞌotoy tama inteꞌ nojqꞌuin, motor que inteꞌ inteꞌ ajwara ajcꞌuna ubꞌujc umen e rey.
MAT 22:12 Entonces e rey uyare e winic era y che: “¿Tucꞌa tuaꞌ machi alapi e bꞌujc tuaꞌ e nojqꞌuin conda ochoyet tara tama e nojqꞌuin?” che e rey. Pero e winic machi oꞌjron.
MAT 22:13 Entonces e rey uyare tin e war uturbꞌobꞌ e comida tor e mesa y che: “Jajpinic y cachic ucꞌabꞌ y uyoc ubꞌan y yaric chic patir tama e incsibꞌaner tiaꞌ axin aꞌru y tiaꞌ axin ucꞌuxi ut uyej umen e cꞌuxner”, che e rey.
MAT 22:14 Y bꞌan tuaꞌ anumuy porque uchinam e Dios lar tacar tin e yopobꞌ tama e nojqꞌuin era. Ayan meyra tin e pejcbꞌirobꞌ umen e Dios tuaꞌ acꞌotoy tut jaxir, pero majax meyra xeꞌ sicbꞌabꞌirobꞌ umener xeꞌ acꞌotoy uchꞌamiobꞌ ucꞌabꞌa, che e Jesús.
MAT 22:15 Pues ixin umorojse ubꞌobꞌ cora fariseobꞌ jaxobꞌ taca tuaꞌ aquetpobꞌ intera ubꞌijnusiajobꞌ tuaꞌ umajresobꞌ e Jesús tuaꞌ usicbꞌobꞌ tacar uyojroner tucꞌa tamar tuaꞌ utuchꞌiobꞌ.
MAT 22:16 Y tamar era jaxirobꞌ utzacre ixiobꞌ cora uyajcanuarobꞌ e fariseobꞌ taca cora winicobꞌ tuaꞌ upartido político e Herodes tuaꞌ acꞌotoyobꞌ tut e Jesús. Entonces jaxirobꞌ uyareobꞌ e Jesús y chenobꞌ: —Cawajcanseyajet, canata que net acanse jax taca lo que erach y que war acanse e gente cocha tuaꞌ axanobꞌ tama ubꞌir e Dios. Y canata que net machi abꞌacre lo que arobꞌna umen e gente y que machi war abꞌijnu cobꞌa ucꞌampibꞌir inteꞌ winic tamar taca uwirnar jay galan ubꞌujc o jay tzajtaca ut uwirnar.
MAT 22:17 Pero cꞌani canata tacaret jay bueno tuaꞌ catoyi lo que arobꞌnon umen e rey César, o machi, che e ajmajresiajobꞌ era.
MAT 22:18 Pero e Jesús cꞌotoy unata tamar umajresiajobꞌ y tamar era ucꞌajti tacarobꞌ y che: —Ajqꞌuecranerox ¿tucꞌa tuaꞌ war iturbꞌa ibꞌa tuaꞌ imajresen?
MAT 22:19 Irsenen inteꞌ ut tumin lo que acꞌampesna tuaꞌ itoyi e gobierno, che e Jesús. Y jaxirobꞌ uwirsiobꞌ inteꞌ ut tumin.
MAT 22:20 Y conda uwira ut e tumin e Jesús uyubꞌi tuobꞌ y che: —¿Chi uyeroj xeꞌ tzꞌijbꞌabꞌir tama e tumin era? ¿Y tucꞌa ucꞌabꞌa xeꞌ tzꞌijbꞌabꞌir tamar? che e Jesús.
MAT 22:21 Y jaxirobꞌ che: —Tuaꞌ e rey César, che e winicobꞌ era. Y che e Jesús: —Ajcꞌunic e César lo que jaxir ucꞌajti y ajcꞌunic e Dios lo que jaxir ucꞌajti, che e Jesús.
MAT 22:22 Y conda uyubꞌiobꞌ e ojroner era bꞌacta uwirobꞌ y locꞌoyobꞌ.
MAT 22:23 Y nacpat era yopobꞌ cora winicobꞌ tut e Jesús xeꞌ saduceobꞌ. Pues e saduceobꞌ era acanseyanobꞌ que mamajchi tuaꞌ asutpa abꞌixcꞌa tujam e chamenobꞌ. Y tamar era cꞌani ani umajresobꞌ e Jesús y chenobꞌ:
MAT 22:24 —Cawajcanseyajet, chꞌar tzꞌijbꞌabꞌir tama uley e Moisés que jay ayan inteꞌ sitz xeꞌ axin anujbꞌi taca inteꞌ ijchꞌoc pero conda mato tucꞌa umaxtac achamay e winic, entonces uwijtzꞌin e winic era ucꞌani tuaꞌ asutpa anujbꞌi taca e ixic tuaꞌ achꞌijtesian tacar. Y e sitz xeꞌ axin acuxpa bꞌajxan cꞌani aquetpa ucꞌabꞌa tuaꞌ usacun xeꞌ chamay.
MAT 22:25 Pues tama inyajr ayan inteꞌ familía xeꞌ ayan siete xeꞌ intarer tejromtac tacaron. Entonces xeꞌ bꞌajxan ixin nujbꞌi taca inteꞌ ijchꞌoc, pero chamay y matucꞌa umaxtac uyacta. Y tamar era quetpa e ixic taca uwijtzꞌin.
MAT 22:26 Pero e ijtzꞌimbꞌir era quetpa bꞌan taca cocha e sacumbꞌir xeꞌ chamay, y jaxir chamay ubꞌan y matucꞌa umaxtac uyacta. Y bꞌan unumse ubꞌa e uxteꞌ ijtzꞌimbꞌir era ubꞌan, y bꞌan unumse ubꞌobꞌ tunor e siete tejromtac era, war uchꞌamiobꞌ intera ixic y mamajchi ayan umaxtac tacar, y bꞌan chamayobꞌ tunor e siete tejromtac era.
MAT 22:27 Y tama ucꞌapesnibꞌir tunor era chamay e ixic ubꞌan. Tara acꞌapa e ojroner era.
MAT 22:28 Entonces arenon era, ¿tucꞌa tuaꞌ anumuy conda asujta abꞌixqꞌuesna tunor e gente tara tor e rum? Y ¿chi tacar tuaꞌ aquetpa ixcarbꞌir e ixic era cocha cꞌapa nujbꞌi taca inteꞌ inteꞌ e siete tejromtac era? che e saduceobꞌ.
MAT 22:29 Entonces che e Jesús: —Pues nox era majresbꞌir turox y machi war inata lo que ayan tama uyojroner e Dios y machi war inata tucꞌa ucꞌotorer e Dios.
MAT 22:30 Pues conda acꞌotoy e día conda asujta abꞌixqꞌuesna tunor tin e chamenobꞌ, machi ixto tuaꞌ anujbꞌiobꞌ más y nien machi ixto tuaꞌ uyajcꞌuobꞌ uwijchꞌoctacobꞌ tuaꞌ anujbꞌiobꞌ más. Porque bꞌan tuaꞌ aquetpobꞌ tama e tiempo yajaꞌ bꞌan cocha uyangelobꞌ e Dios xeꞌ machi anujbꞌiobꞌ.
MAT 22:31 Pero tama e bꞌijnusiaj jay cꞌani asujta abꞌixqꞌuesna e gente tujam e chamenobꞌ o jay machi, nen ayan lo que cꞌani umbꞌi tibꞌa. ¿Ma ca tiaꞌ iche leer tama uyojroner e Dios tiaꞌ e Dios uyareox y che:
MAT 22:32 “Nen Udiosiren e Abraham y Udiosiren e Isaac y Udiosiren e Jacob?” che e Dios. Pues Cadiosir jax inteꞌ Dios tuaꞌ tin e bꞌixir turobꞌ y majax Udiosirobꞌ tin e chamenobꞌ. Y tamar era erer canata que bꞌixirto e winicobꞌ era motor que non machito cawira utobꞌ, che e Jesús.
MAT 22:33 Pues conda e gente cꞌapa uyubꞌiobꞌ tunor ucanseyaj e Jesús era bꞌacta uwirobꞌ.
MAT 22:34 Pues conda e fariseobꞌ uyubꞌiobꞌ lo que numuy taca e saduceobꞌ que conda cꞌapa ojron e Jesús chꞌancabꞌobꞌ tunorobꞌ y que machi unatobꞌ tucꞌa tuaꞌ uyare otronyajr, e fariseobꞌ umorojse ubꞌobꞌ.
MAT 22:35 Y tujamobꞌ e fariseobꞌ era ayan inteꞌ nuxi ajcanseyaj tama uley e Moisés xeꞌ cay uyubꞌi tuaꞌ e Jesús tuaꞌ ani umajres y che:
MAT 22:36 —Ajcanseyajet, ¿tucꞌa ojroner xeꞌ actabꞌir umen e Dios tama uley e Moisés xeꞌ más nojta ucꞌampibꞌir? che e fariseo era.
MAT 22:37 Y che e Jesús: —Yajtanic ut Iwinquirar Dios taca tunor iwalma, y taca tunor icuxtar y taca tunor ijor.
MAT 22:38 Jax era e ojroner xeꞌ actabꞌir umen e Dios tama uley e Moisés xeꞌ más bꞌajxan y xeꞌ más nojta ucꞌampibꞌir.
MAT 22:39 Y de allí ayan otronteꞌ ojroner xeꞌ lar tacar xeꞌ che: “Yajtan ut apiarobꞌ bꞌan cocha ayajta oit abꞌa net.”
MAT 22:40 Pues tunor e inmojr ojroner xeꞌ chꞌar tzꞌijbꞌabꞌir umen e Moisés y lo que chꞌar tzꞌijbꞌabꞌir umen e sian profetobꞌ tzꞌijbꞌabꞌir tunor tuaꞌ acꞌupsena e chateꞌ ojroner era, che e Jesús.
MAT 22:41 Y conda morojsebꞌirto e fariseobꞌ e Jesús cay uyubꞌi tuobꞌ
MAT 22:42 y che: —¿Y tucꞌa ibꞌijnu nox tama e Cristo? ¿Y chi tuaꞌ sitzbꞌir e Cristo? che e Jesús. Y jaxirobꞌ che: —E Cristo jax usitz e David xeꞌ turuan tama e onian tiempo, che e fariseobꞌ.
MAT 22:43 Entonces e Jesús che: —¿Y tucꞌa tuaꞌ bꞌijresna e David umen Unawalir e Dios tuaꞌ upejca e Cristo que jax “Niwinquiraret?” Porque chꞌar tzꞌijbꞌabꞌir umen e David y che:
MAT 22:44 E Dios uyare Niwinquirar: “Turen taniwejtzꞌer tama ninojcꞌabꞌ tuaꞌ icꞌotori tacaren este que inturbꞌa tunor tin e aqꞌuijna uwiretobꞌ yebꞌar utajn oꞌc”, xeꞌ chꞌar tzꞌijbꞌabꞌir umen e David.
MAT 22:45 Entonces cocha e David uyare “Niwinquiraret” tamar e Cristo, ¿cocha tuaꞌ caware que e Cristo jax usitz e David ubꞌan? che e Jesús.
MAT 22:46 Y tamar era mamajchi uyubꞌi uyare e Jesús nien inteꞌ ojroner. Y tama e día yajaꞌ uyactobꞌ tuaꞌ uyubꞌiobꞌ más tuaꞌ e Jesús.
MAT 23:1 Entonces e Jesús cay ojron taca tunor e gente y taca uyajcanuarobꞌ y che:
MAT 23:2 —E ajcanseyajobꞌ tama uley e Moisés y e fariseobꞌ uturbꞌa ubꞌobꞌ tama uturtar e Moisés tuaꞌ ucansiox tunor lo que chꞌar tzꞌijbꞌabꞌir tama uley e Moisés y bueno tunor era.
MAT 23:3 Y tamar era ucꞌani tuaꞌ ixcꞌupseyan tutobꞌ y ucꞌani tuaꞌ iche tunor lo que ucansiox, y bueno war iche. Pero ira iche lo que uchiobꞌ jaxirobꞌ, porque lo que ucansiox majax bꞌan cocha war uchiobꞌ jaxirobꞌ.
MAT 23:4 Pues e winicobꞌ era war uturbꞌobꞌ inteꞌ nuxi tercio tupat e gente y uyareobꞌ tuaꞌ ucuchiobꞌ axin. Pero jaxirobꞌ nien imbꞌijc cꞌani utacriobꞌ e gente tuaꞌ utꞌabꞌse uturbꞌobꞌ e tercio era tama upatobꞌ, y bꞌan ucanseyaj e winicobꞌ era.
MAT 23:5 Tunor lo que uchiobꞌ e winicobꞌ era war uchiobꞌ tuaꞌ taca eꞌrnobꞌ umen e gente tuaꞌ atajttzꞌa umenerobꞌ. Y tamar era war uchiobꞌ más nojta e chuchu cajón tiaꞌ uchꞌubꞌa imbꞌijc jun tiaꞌ tzꞌijbꞌabꞌir imbꞌijc uyojroner e Dios xeꞌ uchꞌubꞌa tut ujor y tut ucꞌabꞌ. Y tuaꞌ taca eꞌrnobꞌ umen e gente tuaꞌ ubꞌijnuobꞌ que jaxirobꞌ más nuxi winicobꞌ tut e Dios war utzꞌacru inteꞌ tájo más nojta tor uyoc ubꞌujc.
MAT 23:6 Y jaxirobꞌ aturuanobꞌ tut e mesa tiaꞌ tuaꞌ awiobꞌ bꞌajxan tama inteꞌ nojqꞌuin, y usajcobꞌ e turtar tiaꞌ aturuanobꞌ tin e más nuxi winicobꞌ tama e sinagoga.
MAT 23:7 Y jaxirobꞌ uyusreobꞌ tuaꞌ apejcnobꞌ umen e gente tama e calle, y atzayobꞌ conda war aꞌrobꞌnobꞌ umen e gente que jax inteꞌ nuxi ajcanseyaj.
MAT 23:8 ’Pero nox machi tuaꞌ ixarobꞌna que jax inteꞌ nuxi ajcanseyaj, porque nox hermanuox y ayan inteꞌ taca Iwajcanseyaj xeꞌ nen xeꞌ jax e Cristoen.
MAT 23:9 Y ira iware inteꞌ winic tara tor e rum que jax itata, porque ayan inteꞌ taca Catata xeꞌ turu tichan xeꞌ jax Catata Dios.
MAT 23:10 Ira iwacta tuaꞌ ixarobꞌna que ajwinquirox umen e gente porque ayan inteꞌ taca Iwinquirar xeꞌ jax nen.
MAT 23:11 Y tin e ayan más ucꞌampibꞌir tijam nox jax xeꞌ tuaꞌ utacriox más nojta ubꞌan bꞌan cocha inteꞌ man.
MAT 23:12 Porque tin e uche ubꞌa que jax inteꞌ nuxi winic cꞌani amanxujresna, pero tin e axin umanxujres ubꞌa cꞌani achꞌijsena tuaꞌ aquetpa nuxi winic.
MAT 23:13 ’Tzajtaca iut nox xeꞌ ajcanseyajox tama uley e Moisés y xeꞌ fariseox, ajqꞌuecranerox, porque war imaqui e puerta tut tin e cꞌani ani oꞌchoy tama uchinam e Dios tuaꞌ machi oꞌchoyobꞌ. Nox machi cꞌani ixochoy y nien machi war iwacta oꞌchoy tin e cꞌani ani oꞌchoy.
MAT 23:14 ’Tzajtaca iut nox xeꞌ ajcanseyajox tama uley e Moisés y xeꞌ fariseox, ajqꞌuecranerox, porque war ilocse uyototobꞌ e ixictac xeꞌ chamen uviejobꞌ, y nacpat era ixixin icꞌajti meyra tiempo taca e Dios tuaꞌ taca ixirna umen e gente. Y tamar era nox tuaꞌ ixjajtzꞌa más nojta umen e Dios tama e día tuaꞌ e juicio.
MAT 23:15 ’Tzajtaca iut nox xeꞌ ajcanseyajox tama uley e Moisés y xeꞌ fariseox, ajqꞌuecranerox, porque ixixin innajt este teinxejr e nuxi jaꞌ o este teinxejr or e rum tuaꞌ itajwi tin e erer icanse, y conda acꞌapa acano tin e war icanse, axin aquetpobꞌ chajr utawarer tuaꞌ axiobꞌ tama e nuxi chꞌen tuaꞌ e diablo que nox.
MAT 23:16 ’Tzajtaca iut porque nox larox tacar inteꞌ ajbꞌijresiaj xeꞌ tajpem unacꞌut porque war ixcanseyan que tin e axin uyare que: “Unaten ut e templo” machi tuaꞌ aquetpa cachbꞌir tama uyojroner, pero que tin e axin uyare que: “Unaten e oro tama e templo” aquetpa cachbꞌir tamar.
MAT 23:17 ’Ay nox xeꞌ matucꞌa ayan tama ijor, y xeꞌ tajpem unaqꞌuiut. ¿Tucꞌa ayan más ucꞌampibꞌir, e oro o e templo xeꞌ uyajcꞌu ucꞌampibꞌir e oro?
MAT 23:18 Y nox war ixcanseyan ubꞌan que tin e axin uyare que: “Unaten ut e altar” machi tuaꞌ aquetpa cachbꞌir tama uyojroner, pero que tin e axin uyare que: “Unaten e ofrenda tor e altar” aquetpa cachbꞌir tamar.
MAT 23:19 Ay nox xeꞌ matucꞌa ayan tama ijor, y xeꞌ tajpem unaqꞌuiut. ¿Tucꞌa ayan más ucꞌampibꞌir, e ofrenda o e altar xeꞌ uyajcꞌu ucꞌampibꞌir e ofrenda?
MAT 23:20 Porque tin e axin uyare que: “Unaten ut e altar” war uyacta inteꞌ ojroner majax tujor taca e altar sino que war uyacta inteꞌ ojroner tujor tunor lo que ayan tujor e altar ubꞌan.
MAT 23:21 Y tin e axin uyare que: “Unaten ut e templo” war uyacta inteꞌ ojroner majax tujor taca e templo sino que war uyacta inteꞌ ojroner tujor e Dios ubꞌan xeꞌ aturuan tama e templo.
MAT 23:22 Y tin e axin uyare que: “Unaten ut e qꞌuin” war uyacta inteꞌ ojroner tujor uturtar e Dios y war uyacta inteꞌ ojroner ubꞌan tujor e Dios xeꞌ aturuan tama e turtar era.
MAT 23:23 ’Tzajtaca iut nox xeꞌ ajcanseyajox tama uley e Moisés y xeꞌ fariseox, ajqꞌuecranerox. War iche diezmar tama tunor lo que ayan tibꞌa. War iche diezmar tama e hierba buena y tama e ruda y tama tunor e sian cajr, pero machi war iturbꞌa ibꞌa tama e canseyaj lo que más ayan ucꞌampibꞌir tama uley e Moisés. Porque najpa imener tuaꞌ iche lo que erach, y tuaꞌ iyajta utobꞌ e gente, y tuaꞌ ixcꞌupseyan tama e Dios. Y jaxto era xeꞌ más ayan ani ucꞌampibꞌir tuaꞌ iche. Pero ira iwacta tuaꞌ iche diezmar taca e Dios bꞌan cocha war iche.
MAT 23:24 Nox larox tacar inteꞌ ajbꞌijresiaj xeꞌ tajpem unacꞌut, porque war iturbꞌa ibꞌa tamar lo que matucꞌa ucꞌampibꞌir, pero machi war ibꞌijnu tamar lo que meyra ayan ucꞌampibꞌir. Bꞌanox cocha inteꞌ xeꞌ axin ulocse inteꞌ us tama uchꞌeu pero xeꞌ machi ubꞌijnu que war ubꞌuqꞌui ani inteꞌ nuxi arac xeꞌ ucꞌabꞌa camello.
MAT 23:25 ’Tzajtaca iut nox xeꞌ ajcanseyajox tama uley e Moisés y xeꞌ fariseox, ajqꞌuecranerox. Porque war ipoqui upat inteꞌ chꞌeu o upat inteꞌ plato pero macuir war aquetpa calapir porque machi war ipoqui. Y bꞌan iwalma nox ubꞌan, motor que war iyates tunor ipeyejo pero macuir iwalma war ibꞌijnu tamar taca e tumin y war iwajcꞌu iwerir tunor lo que war uyusre.
MAT 23:26 Nox xeꞌ fariseox larox tacar cora gente xeꞌ tajpem unacꞌutobꞌ porque machi cꞌani iwira lo que e Dios cꞌani ani uwirsiox. Bꞌajxan ucꞌani tuaꞌ ipoqui macuir e chꞌeu y e plato y de allí axin aquetpa pocbꞌir tama upat ubꞌan. Y bꞌan iwalma ubꞌan, ucꞌani tuaꞌ apojca umen e Dios tuaꞌ aloqꞌuesna e mabꞌambꞌanir y de allí erer iwira lo que e Dios cꞌani uwirsiox.
MAT 23:27 ’Tzajtaca iut nox xeꞌ ajcanseyajox tama uley e Moisés y xeꞌ fariseox, ajqꞌuecranerox. Nox larox cocha inteꞌ otot xeꞌ sacsac ut tiaꞌ achꞌabꞌna inteꞌ chamen, pero macuir e otot era tiaꞌ chꞌar ucuerpo e chamen intuj tunor.
MAT 23:28 Y bꞌanox nox ubꞌan. Tut e gente war iche ibꞌa que erach, pero bꞌutꞌur iwalma taca e qꞌuecraner y taca tunor e mabꞌambꞌanir.
MAT 23:29 ’Tzajtaca iut nox xeꞌ ajcanseyajox tama uley e Moisés y xeꞌ fariseox, ajqꞌuecranerox. Porque nox war iche umujrobꞌ e profetobꞌ xeꞌ turuanobꞌ tama e onian tiempo y war iche galan umujrobꞌ tin e erach uwirnarobꞌ.
MAT 23:30 Y de allí iware y che: “Quisinic ani que turuanonix non conda chamesnobꞌ e onian profetobꞌ umen catata viejobꞌirobꞌ, porque non machi ani catacre tuaꞌ achamesnobꞌ”, xeꞌ arobꞌna umen e fariseobꞌ jaxobꞌ taca.
MAT 23:31 Pues tamar era nox war ichecsu ibꞌa que umaxtacox tin e cay uchamsiobꞌ e profetobꞌ tama e onian tiempo.
MAT 23:32 Chenic nox entonces tunor e mabꞌambꞌanir lo que machi cꞌapa uchiobꞌ itata viejobꞌirobꞌ tama e onian tiempo.
MAT 23:33 ’Nox larox cocha incojt chan xeꞌ war alocꞌoy ajni tut inteꞌ cꞌajc tuaꞌ machi apuruy tamar. ¿Y cocha tuaꞌ ixlocꞌoy ixajni tut e nuxi jatzꞌuar xeꞌ tuaꞌ uqꞌuechiox ixixin esto tama uchꞌenir e diablo?
MAT 23:34 Y tamar era cꞌani inwebꞌta axin tiut cora profetobꞌ y cora winicobꞌ xeꞌ ayan unatanyaj y cora ajcanseyajobꞌ tuaꞌ uwirsiox nibꞌir. Pero nox ayan tin e tuaꞌ ichamse, y ayan tin e tuaꞌ ichꞌubꞌa tut inteꞌ cruz tuaꞌ ichamsiobꞌ, y ayan tin e ixixin iwatzꞌi tama inteꞌ sinagoga, y ayan tin e ixixin iwajnes tama inteꞌ inteꞌ chinam.
MAT 23:35 Y tamar era cꞌani acꞌaxi tijor nox uyeror tunor tin e erach uwirnarobꞌ xeꞌ chamesnobꞌ tara tor e rum. Pues xeꞌ chamesna bꞌajxan xeꞌ erach uwirnar jax e Abel. Y chamesna imener ubꞌan e Zacarías xeꞌ jax uyunen e Berequías conda chamesna taca e tun macuir e templo tut e altar.
MAT 23:36 Y cꞌani inwareox era que san tuaꞌ acꞌaxi uyeror tijor nox xeꞌ turox tara tor e rum coner tama tunor tin e chamesnobꞌ, che e Jesús.
MAT 23:37 Y che e Jesús: —Nox xeꞌ turox tama e chinam Jerusalem, cay ichamse tunor e profetobꞌ tama e onian tiempo y cay ichamse tunor tin e ebꞌetbꞌir tariobꞌ umen e Dios taca e tun. Meyra cꞌani ani incorpes imaxtac bꞌan cocha incojt acꞌach xeꞌ umeqꞌue tunor uyarobꞌ taca uwich, pero nox machi icꞌani.
MAT 23:38 Ubꞌinic, e Dios machi ixto tuaꞌ ucojco más ichinam era, y tamar era cꞌani axin aquetpobꞌ choquem tunor iyototobꞌ.
MAT 23:39 Y cꞌani inwareox era que machi ixto tuaꞌ ixsutpa iwira niut este que acꞌotoy e día conda ixixin iware: “Chojbꞌesbꞌir jaxir xeꞌ watar tama ucꞌabꞌa Cawinquirar”, che e Jesús.
MAT 24:1 Entonces conda e Jesús locꞌoy tama e templo cꞌotoyobꞌ uyajcanuarobꞌ tut y cay ojronobꞌ tama tunor e nuxi ototobꞌ xeꞌ turobꞌ tama e templo.
MAT 24:2 Pero ojron e Jesús y che: —¿O war ca iwira tunor era? Cꞌani inwareox era que cꞌani acucurna tunor e nuquir ototobꞌ era y que ma ingojr tun tuaꞌ aquetpa tujor upiar. Tunor era tuaꞌ atijresna axin, che e Jesús.
MAT 24:3 Entonces ixin e Jesús tama or e witzir xeꞌ ucꞌabꞌa Olivo. Y conda turuan yajaꞌ yopobꞌ uyajcanuarobꞌ tut y cay ojronobꞌ tzꞌustaca y chenobꞌ: —¿Tucꞌa día tuaꞌ acucurna tunor e templo era? ¿Y tucꞌa nic tuaꞌ achecta tuaꞌ canata que cꞌanix isutpa watet? ¿Y tucꞌa nic tuaꞌ achecta tuaꞌ canata conda cꞌanix acꞌapa atijresna tunor or e rum era? che uyajcanuarobꞌ.
MAT 24:4 Entonces che e Jesús: —Iwiranic que mamajchi axin umajresox.
MAT 24:5 Porque meyra ajmajresiajobꞌ watobꞌ y cꞌani uyareox tama nicꞌabꞌa que: “Nen e Cristoen.” Pero majax, y cꞌani axin umajresobꞌ meyra gente taca uyojroner era.
MAT 24:6 Y conda iyubꞌi que watarix e tzꞌojyir tama inteꞌ lugar o tama otronteꞌ lugar, ira ixbꞌacta, porque bꞌan ucꞌani tuaꞌ anumuy bꞌajxan que merato acꞌotoy e día conda cꞌani acꞌapa tunor era.
MAT 24:7 Y ayan e nuquir chinam xeꞌ cꞌani aqꞌuijna upater otronteꞌ nuquir chinam este que axin uyajcꞌu ubꞌobꞌ, y ayan e nación xeꞌ cꞌani uche e tzꞌojyir upater otronteꞌ nación. Y watar e sian muaquir y e sian winar, y watar e sian yujcbꞌar tama meyra lugar.
MAT 24:8 Pero tunor era jax tocto ucajyesnibꞌir tunor e cꞌuxner xeꞌ tuaꞌ watar.
MAT 24:9 ’Entonces cꞌani ixqꞌuejcha ixixin tut e ajcꞌamparobꞌ xeꞌ tuaꞌ uwatzꞌiox, y ayan tin e axin uchamsiobꞌ. Y tunor e gente axin uxejbꞌiobꞌ iut umen taca que war ixcꞌupseyan tamaren.
MAT 24:10 Y tama e tiempo yajaꞌ meyra gente tuaꞌ axin uyactobꞌ nibꞌir umen lo que acay unumse ubꞌobꞌ cocha era, y axin utuchꞌi ubꞌobꞌ y axin uxejbꞌiobꞌ ut ubꞌobꞌ.
MAT 24:11 Y cꞌani achectobꞌ meyra profetobꞌ xeꞌ ajmajresiajobꞌ xeꞌ axin umajresobꞌ meyra gente.
MAT 24:12 Y cꞌani abꞌoro meyra e mabꞌambꞌanir este que axin asisa ucꞌunersiaj e Dios tama uyalmobꞌ meyra hermanuobꞌ.
MAT 24:13 Pero tin e axin uqꞌuecꞌojse uyalma tamaren y xeꞌ machi uyacten este que acꞌapa tunor era cꞌani acorpesnobꞌ.
MAT 24:14 Y uyojroner e Dios tama e corpesiaj ucꞌani tuaꞌ achecsuna tut tunor e gente tama tunor or e rum bꞌan cocha inteꞌ checsuyaj. Y conda acꞌapa achecsuna tunor e ojroner era tut tunor e gente, entonces axin acꞌapa or e rum era, che e Jesús.
MAT 24:15 Pues tin e axin uche leer lo que war intzꞌijbꞌa tibꞌa era ubꞌinic, che nen xeꞌ Mateoen. Y che e Jesús: —E Daniel xeꞌ turuan tama e onian tiempo uyacta tzꞌijbꞌabꞌir que watar e día conda axin achecta inteꞌ winic xeꞌ tuaꞌ uturbꞌa inteꞌ nuxi mabꞌambꞌanir tujor e altar tama e templo tama e chinam Jerusalem xeꞌ tuaꞌ axin ubꞌoni e altar era. Conda iwira anumuy tunor era,
MAT 24:16 tunor tin e turobꞌ tama e departamento Judea ucꞌani tuaꞌ alocꞌoy aꞌjniobꞌ wacchetaca tuaꞌ axiobꞌ tujor e witzir tuaꞌ machi achamesnobꞌ.
MAT 24:17 Y tin e turu tichan tujor uyotot, ucꞌani tuaꞌ ecmay wacchetaca tuaꞌ alocꞌoy aꞌjni, y machix tuaꞌ oꞌchoy macuir uyotot tuaꞌ ulocse lo que ayan tuaꞌ uqꞌueche axin, sino que ucꞌani tuaꞌ alocꞌoy ajner.
MAT 24:18 Y tin e war axana tama e cꞌopot machix tuaꞌ asutpa axin tama uyotot tuaꞌ uchꞌami ubꞌujc, sino ucꞌani tuaꞌ alocꞌoy aꞌjni wacchetaca.
MAT 24:19 Tzajtaca utobꞌ e ixictac xeꞌ cuchur uyarobꞌ tama e tiempo era, y bꞌan tin e qꞌuecherix uchꞌurcabꞌobꞌ ubꞌan porque intran tutobꞌ tuaꞌ alocꞌoy aꞌjniobꞌ.
MAT 24:20 Y cꞌajtinic taca e Dios que machi tuaꞌ ixlocꞌoy ixajni tama e tiempo conda meyra war asisi, y cꞌajtinic taca e Dios que machi tuaꞌ ixlocꞌoy ixajni tama inteꞌ día tuaꞌ e jiriar.
MAT 24:21 Porque tama e hora xeꞌ watar era cꞌani achecta watar inteꞌ nuxi cꞌuxner xeꞌ más inyaj que mato inyajr eꞌrna desde que chena or e rum era y nien ma tiaꞌ tuaꞌ eꞌrna otronteꞌ cocha era.
MAT 24:22 Pero Catata Dios tuaꞌ axin uxuri e tiempo tuaꞌ e nuxi cꞌuxner era tuaꞌ machi eixna meyra, y bꞌan tuaꞌ uche porque jay machi uche cocha era mamajchi tuaꞌ ani acorpesna. Pero cocha e Dios war uyajta utobꞌ tin e sicbꞌabꞌirix umener, jaxir axin uxuri e tiempo era.
MAT 24:23 ’Entonces jay achecta watar e gente tuaꞌ uyareox: “Laric iranic que tara turu e Cristo”, ira icꞌupsiobꞌ, o jay axin uyareox: “Larix iranic que yajaꞌ turu e Cristo”, ira icꞌupsiobꞌ ubꞌan.
MAT 24:24 Porque achecta watar cora winicobꞌ xeꞌ tuaꞌ oꞌjron y che: “Nen e Cristoen”, pero majax sino que ajtaca war umajres e gente axin. Y ayan tin e achecta watar xeꞌ tuaꞌ oꞌjron y che: “Pero nen jaxen inteꞌ profeta tuaꞌ e Dios”, pero majax. Y jaxirobꞌ tuaꞌ axin uchiobꞌ meyra seña y tuaꞌ uchiobꞌ meyra milagro tut e gente, y tamar era cꞌani umajres meyra gente este que axin umajres ani ubꞌan tin e sicbꞌabꞌirobꞌix umen e Dios.
MAT 24:25 Iwiric tuaꞌ machi ixmajresna porque cꞌapa inwareoxix bꞌajxan lo que tuaꞌ anumuy.
MAT 24:26 Y tamar era jay ayan tin e acꞌotoy tiut y che: “Chꞌujcunic iwira, yajaꞌ turu e Cristo tama e choquem lugar”, ira ixixin iwira. Y jay ayan tin e uyareox y che: “Chꞌujcunic iwira, tara turu e Cristo war amucwan macuir e otot”, ira icꞌupse.
MAT 24:27 Porque bꞌan cocha iwira eijbꞌi ut e qꞌuin tiaꞌ anamtzꞌa e qꞌuin xeꞌ axin wacchetaca tuaꞌ ujanchꞌacnes tunor ut e qꞌuin este que aquetpa chequer tiaꞌ atobꞌoy watar e qꞌuin ubꞌan, y bꞌan ixto tuaꞌ iwiren nen xeꞌ Uyunenen e winic conda acꞌotoy e día conda insutpa waten otronyajr.
MAT 24:28 Cꞌani anumuy tunor era bꞌan cocha e ojroner tama e usij, que tiaꞌ chꞌar inteꞌ chamen, y ya war umorojse ubꞌobꞌ e sian usij, che e Jesús.
MAT 24:29 Entonces ojron e Jesús otronyajr y che: —Conda war acꞌapa tunor e día tuaꞌ e cꞌuxner era cꞌani ecsibꞌa e qꞌuin, y e luna cꞌani amactzꞌa uwarar, y meyra lucero axin oꞌjri watar tut e qꞌuin, y tunor e nuxi cꞌotorer lo que ayan tut e qꞌuin axin anijquesna ubꞌan.
MAT 24:30 Y de allí cꞌani achecta inteꞌ nuxi seña tut e qꞌuin xeꞌ jax uchequerir que watenix nen xeꞌ Uyunenen e winic tuaꞌ incꞌotori tara tor e rum. Y tunor e gente tama tunor e sian chinamobꞌ tara tor e rum cꞌani aꞌruobꞌ. Y tunorobꞌ cꞌani uwirenobꞌ conda inchecta tama e tocar conda insutpa waten taca nicꞌotorer y meyra nitawarer.
MAT 24:31 Y de allí nen xeꞌ Uyunenen e winic cꞌani inwebꞌta axiobꞌ niwangelobꞌ taca inteꞌ nuxi lajbꞌar tama e corneta tuaꞌ axin umorojsiobꞌ tunor tin e sicbꞌabꞌirix umen e Dios tama tunor or e rum: Tama e lugar inxejr ut e qꞌuin, y tama e lugar teinxejr bꞌana, y tama e lugar tiaꞌ atobꞌoy watar e qꞌuin, y tama e lugar tiaꞌ anamtzꞌa e qꞌuin ubꞌan. Y cꞌani axin umorojsiobꞌ tin e sicbꞌabꞌirobꞌ umen e Dios tic taca tiaꞌ turobꞌ tama tunor or e rum, che e Jesús.
MAT 24:32 Entonces ojron e Jesús y che: —Ayan inteꞌ ojroner tama inteꞌ teꞌ xeꞌ ucꞌabꞌa higuera. Inteꞌ higuera, conda achꞌocnuqꞌui unuc e teꞌ y conda achecta watar uyopor otronyajr, war inata que watarix e verano.
MAT 24:33 Y bꞌan tama tunor e seña era ubꞌan, conda iwira acay anumuy tunor era natanic que watarix ucꞌapesnibꞌir or e rum ubꞌan, bꞌan cocha inteꞌ winic xeꞌ war tuyejtzꞌer inteꞌ otot xeꞌ turix tuaꞌ oꞌchoy macu.
MAT 24:34 Pero cꞌani inwareox era que tin e turobꞌ tara tor e rum conda acay anumuy tunor era machi tuaꞌ achamayobꞌ este que acꞌapa uwirobꞌ tunor era.
MAT 24:35 Tunor ut e qꞌuin y tunor or e rum cꞌani acꞌapa, pero niwojroner machi tuaꞌ acꞌapa, sino que ucꞌani tuaꞌ acꞌapa achempa tunor bꞌan taca cocha war inwareox era.
MAT 24:36 ’Pues mamajchi war unata tucꞌa día y nien tucꞌa hora conda tuaꞌ inchecta waten otronyajr. Machi war unatobꞌ e angelobꞌ xeꞌ turobꞌ tut e qꞌuin y nien nen xeꞌ Uyunenen e Dios machi war innata tucꞌa hora tuaꞌ inchecta waten, sino que ajtaca Catata Dios xeꞌ war unata.
MAT 24:37 ’Bꞌan cocha numuy tama e onian tiempo conda turu ani e Noé y bꞌan tuaꞌ anumuy tama e día conda tuaꞌ insutpa waten nen xeꞌ Uyunenen e winic otronyajr.
MAT 24:38 Porque tama utiempo e Noé e gente war awiobꞌ, war oychꞌiobꞌ, war anujbꞌiobꞌ, y war anujbꞌiobꞌ taca otronteꞌ, war ubꞌijnuobꞌ que imbꞌutz tunor este que cꞌotoy e día conda e Noé ixin ochoy tama e nuxi barco.
MAT 24:39 Y matucꞌa unatobꞌ tamar lo que cꞌani anumuy que cꞌanix asatpa tunor or e rum este que cay cꞌaxi e nuxi jajar y cay tꞌabꞌay e jaꞌ este que bꞌutcꞌa tunor or e rum y cay aruobꞌ e gente, cay nujxiobꞌ y cꞌoyobꞌ muctzꞌa ixiobꞌ chamayobꞌ. Y bꞌan tuaꞌ anumuy conda insutpa waten nen xeꞌ Uyunenen e winic otronyajr, matucꞌa tuaꞌ unatobꞌ e gente este que inchecta tutobꞌ.
MAT 24:40 Y tama e tiempo yajaꞌ cꞌani inxere axin tunor e gente tama tunor or e rum. Bꞌajcꞌat war apatnobꞌ chateꞌ winicobꞌ tama inteꞌ chor. Inteꞌ cꞌani aqꞌuejcha axin y inteꞌ aquetpa.
MAT 24:41 Bꞌajcꞌat chateꞌ ixictac war oychꞌuobꞌ, inteꞌ cꞌani aqꞌuejcha axin y inteꞌ aquetpa.
MAT 24:42 ’Entonces turuanenic bꞌixir porque machi war inata tucꞌa día tuaꞌ insutpa waten nen xeꞌ Iwinquiraren otronyajr.
MAT 24:43 Pero natanic nox que jay inteꞌ ajyum otot unata ani tucꞌa hora acbꞌar conda cꞌani acꞌotoy inteꞌ ajxujch, bꞌixir ani turu war ucojco tuaꞌ machi apajsa uyotot y tuaꞌ machi axujchna lo que ayan macu.
MAT 24:44 Y tamar era chꞌujcunic iwira ibꞌa porque nen xeꞌ Uyunenen e winic cꞌani insutpa waten tama inteꞌ hora conda mamajchi war ubꞌijnu que waten tama e hora yajaꞌ, che e Jesús.
MAT 24:45 Entonces ojron e Jesús y che: —Ayan inteꞌ ojroner tama inteꞌ man xeꞌ nojta ujor y xeꞌ más war acꞌupseyan tut upatron. Jaxir tuaꞌ aꞌjcꞌuna tuaꞌ ucojco uyotot upatron y tuaꞌ uwese tunor e inmojr manobꞌ conda acꞌotoy e hora.
MAT 24:46 Pues chojbꞌesbꞌir e man xeꞌ atajwina umen upatron que war uche tunor lo que ucꞌani upatron conda acꞌotoy.
MAT 24:47 Y cꞌani inwareox era que upatron cꞌani uyajcꞌu más ucꞌotorer e man era este que aquetpa uwinquir tama tunor lo que ayan tuaꞌ upatron era.
MAT 24:48 Pero jay mabꞌambꞌan e man acay ubꞌijnu cocha era y che: “Pero nipatron machito tuaꞌ ayopa rajxa era”, che e man era jax taca,
MAT 24:49 y tamar era acay uwatzꞌi e inmojr manobꞌ, y acay aweꞌ, y acay oychꞌi taca e inmojr ajcarer.
MAT 24:50 Entonces tama inteꞌ día conda machi war ubꞌijnu jay cꞌani ayopa upatron tama e día era, wacchetaca tuaꞌ achecta watar y ayopa tama uyotot tama inteꞌ hora conda machi unata e man.
MAT 24:51 Entonces upatron tuaꞌ axin uwatzꞌi uman nojta este que axin achamay y cꞌani uyebꞌta axin esto tiaꞌ tuaꞌ aquetpobꞌ tin e ajqꞌuecranerobꞌ xeꞌ tuaꞌ aꞌruobꞌ y tuaꞌ ucꞌuxi ut uyejobꞌ umen e cꞌuxner, che e Jesús.
MAT 25:1 Entonces che e Jesús: —Ayan inteꞌ ojroner tama e diez ijchꞌoctacobꞌ xeꞌ larobꞌ tacar uchinam e Dios. Pues e diez ijchꞌoctacobꞌ era war uqꞌuechiobꞌ axin inteꞌ inteꞌ ulamparobꞌ tuaꞌ axin utajwiobꞌ e novio conda ayopa tuaꞌ oꞌchoyobꞌ tacar tama e nojqꞌuin tama e nujbꞌiar.
MAT 25:2 Y ayan cinco ijchꞌoctacobꞌ xeꞌ war ubꞌijnuobꞌ tucꞌa tuaꞌ uchiobꞌ y ayan cinco ijchꞌoctacobꞌ ubꞌan xeꞌ machi war ubꞌijnuobꞌ jay ayan lo que ucꞌani tuaꞌ uchiobꞌ.
MAT 25:3 Y tin e machi war ubꞌijnuobꞌ jay ayan lo que ucꞌani tuaꞌ uchiobꞌ intaca uqꞌuechiobꞌ ulamparobꞌ, pero matucꞌa uqꞌuechiobꞌ tuaꞌ uyubꞌi utzꞌajpes ulamparobꞌ.
MAT 25:4 Pero tin e war ubꞌijnuobꞌ tucꞌa ucꞌani tuaꞌ uchiobꞌ uqꞌuechiobꞌ ixin tucꞌa tamar tuaꞌ utzꞌajpesobꞌ ulamparobꞌ.
MAT 25:5 Pero e novio eixna tuaꞌ ayopa y tamar era jajpnobꞌ umen e waynij e diez ijchꞌoctacobꞌ era este que wayanobꞌ tunorobꞌ.
MAT 25:6 Entonces tama uyuxin e acbꞌar ayan tin e cay aru taca inteꞌ nuxi nuc y che: “Achpenic, que watarix e novio. Quiquic tajwinic”, che e nuc era.
MAT 25:7 Entonces achpobꞌ e ijchꞌoctacobꞌ y cay utzꞌajpesobꞌ ulamparobꞌ.
MAT 25:8 Y wacchetaca cay ojronobꞌ e cinco ijchꞌoctac xeꞌ machi ubꞌijnuobꞌ jay ayan lo que ucꞌani tuaꞌ uchiobꞌ y uyareobꞌ e inmojr ijchꞌoctacobꞌ y chenobꞌ: “Ajcꞌunicon tucꞌa tacar tuaꞌ catzꞌajpes calamparobꞌ cocha war atajpobꞌ era”, chenobꞌ.
MAT 25:9 Pero e inmojr ijchꞌoctacobꞌ chenobꞌ: “Ma erer cawajcꞌox, porque jay cawajcꞌox, machi axin atzꞌacta ticabꞌa y nien tibꞌa ani ubꞌan. Quiquic manic tiaꞌ ayan tuaꞌ achojna”, chenobꞌ.
MAT 25:10 Pero conda e ijchꞌoctacobꞌ xeꞌ machi ubꞌijnuobꞌ jay ayan lo que ucꞌani tuaꞌ uchiobꞌ war axanobꞌ tuaꞌ umaniobꞌ tucꞌa tacar tuaꞌ utzꞌajpes ulamparobꞌ, yopa e novio. Entonces e ijchꞌoctacobꞌ xeꞌ war ubꞌijnuobꞌ lo que ucꞌani tuaꞌ uchiobꞌ ixiobꞌ taca e novio y ochoyobꞌ tacar macuir e otot tiaꞌ tuaꞌ uchiobꞌ e nojqꞌuin. Y de allí majca e puerta.
MAT 25:11 Y conda numuy cora hora, cꞌotoyobꞌ e ijchꞌoctacobꞌ xeꞌ machi ubꞌijnuobꞌ jay ayan lo que ucꞌani tuaꞌ uchiobꞌ y cay ojronobꞌ tut e puerta patir y chenobꞌ: “Cawinquiraret, pasa e puerta, cꞌani cochoy”, chenobꞌ.
MAT 25:12 Y che e novio: “Machi innata tiaꞌ tariox.” Tara acꞌapa e ojroner, che e Jesús.
MAT 25:13 Entonces e Jesús uyare uyajcanuarobꞌ y che: —Ira ixwayan porque bꞌan cocha machi unatobꞌ e diez ijchꞌoctacobꞌ era tucꞌa hora tuaꞌ ayopa e novio y bꞌanox ubꞌan que machi inata tucꞌa día y nien tucꞌa hora conda nen tuaꞌ inchecta waten otronyajr xeꞌ Uyunenen e winic. Y tamar era iwiric ibꞌa tuaꞌ ixquetpa turix tama e hora conda nen tuaꞌ insutpa waten, che e Jesús.
MAT 25:14 Entonces ojron e Jesús otronyajr y che: —Ayan inteꞌ ojroner tamar inteꞌ nuxi winic xeꞌ lar tacar uchinam e Dios. Pues e nuxi winic era ayan meyra utumin y cay ubꞌijnu que cꞌani axana innajt esto tama otronteꞌ nuxi chinam y machi tuaꞌ asutpa watar este que ubꞌijnu. Pero conda ne mato axin tama uxambꞌar cay upejca cora umanobꞌ y cay uyajcꞌu cora utumin tuaꞌ apatnobꞌ tamar conda machi turu.
MAT 25:15 ’Y tama incojt uman uyajcꞌu 5,000 ut utumin. Y tama incojt uyajcꞌu 2,000 ut utumin. Y ayan otronteꞌ xeꞌ uyajcꞌu 1,000. Pues tzijca ajcꞌunobꞌ incojt incojt bꞌan cocha obꞌnobꞌ tuaꞌ apatnobꞌ tamar. Y de allí locꞌoy ixin e winic tama uxambꞌar.
MAT 25:16 Entonces e man xeꞌ uchꞌami 5,000 ut e tumin ixin patna tamar este que uchꞌami otro 5,000 ut e tumin tamar.
MAT 25:17 Y bꞌan uche e man xeꞌ uchꞌami 2,000 ut e tumin. Ixin patna tamar este que uchꞌami otro 2,000 ut e tumin tamar.
MAT 25:18 Pero e man xeꞌ ajcꞌuna 1,000 machi patna tamar sino que ixin upajni e rum y umuqui utumin upatron macuir inteꞌ chꞌen.
MAT 25:19 ’Pues e patronbꞌir era quetpa meyra tiempo najtir esto que sutpa yopa otronyajr. Y conda yopa cay upejca umanobꞌ tuaꞌ unata tucꞌa cay uchiobꞌ taca utumin.
MAT 25:20 Entonces e man xeꞌ ajcꞌuna 5,000 ut e tumin yopa tut upatron. Y utares e 5,000 ut e tumin lo que ajcꞌuna y utares otronteꞌ 5,000 ubꞌan xeꞌ jax uyeror xeꞌ uchꞌami tamar. Entonces e man uyare upatron y che: “Jax era e 5,000 lo que awajqꞌuen y tara ayan otronteꞌ 5,000 xeꞌ inchꞌami tamar”, che e man.
MAT 25:21 Y ojron upatron y che: “Intzay inwiret que imbꞌutz locꞌoy tunor lo que ache era. Y cocha cay aturbꞌa abꞌa tama tunor e patnar era, cꞌani inwajqꞌuet apatnar xeꞌ más nojta tiaꞌ tuaꞌ achꞌami más ubꞌan. Ochen y tzayen tacaren”, che upatron.
MAT 25:22 Y nacpat era e man xeꞌ ajcꞌuna 2,000 ut e tumin yopa tut upatron. Y utares e 2,000 ut e tumin lo que ajcꞌuna taca otronteꞌ 2,000 xeꞌ uchꞌami tamar. Entonces e man uyare upatron y che, “Jax era e 2,000 lo que awajqꞌuen y tara ayan otronteꞌ 2,000 xeꞌ inchꞌami tamar”, che e man.
MAT 25:23 Y ojron upatron y che: “Intzay inwiret que imbꞌutz locꞌoy tunor lo que ache era. Y cocha cay aturbꞌa abꞌa tama tunor e patnar era, cꞌani inwajqꞌuet apatnar xeꞌ más nojta tiaꞌ tuaꞌ achꞌami más ubꞌan. Ochen y tzayen tacaren”, che upatron.
MAT 25:24 Y nacpat era yopa e man xeꞌ ajcꞌuna 1,000 ut e tumin. Pero jaxir uyare upatron y che: “Niwinquiret, nen innata que net intran awirnar, y que war amorojse lo que majax net apaqꞌui, y que war achꞌami meyra e tumin motor que majax net xeꞌ war ipatna.
MAT 25:25 Y tamar era bꞌacten y ixien inmuqui e tumin macuir e rum. Pero chꞌar era e tumin xeꞌ tabꞌa”, che e man.
MAT 25:26 Entonces qꞌuijna upatron y uyare uman y che: “Net jax inteꞌ man xeꞌ mabꞌambꞌan awirnar y xeꞌ meyra icꞌoyi. ¿O war ca anata que nen war inmorojse lo que machi impaqꞌui nen, y que war inchꞌami meyra e tumin motor que majax nen xeꞌ war impatna?
MAT 25:27 Pues ucꞌani ani tuaꞌ awacta nitumin tama e banco tuaꞌ ani insutpa inchꞌami nitumin taca uyeror otronyajr”, che upatron.
MAT 25:28 Entonces uyare e inmojr manobꞌ y che: “Locsenic e 1,000 ut tumin tuaꞌ e man era y ajcꞌunic tin e ayan e 10,000.
MAT 25:29 Porque tin e ayan más tacar axin aꞌjcꞌuna más este que ayan meyra lo que aquetpa, y tin e matucꞌa ayan tamar cꞌani aloqꞌuesna tunor lo que ayan tuaꞌ motor que imbꞌijc taca ayan tuaꞌ.
MAT 25:30 Y e man era xeꞌ matucꞌa ucꞌampibꞌir choquic patir tama e incsibꞌaner tiaꞌ tuaꞌ aꞌru y tiaꞌ tuaꞌ ucꞌuxi ut uyej umen e cꞌuxner”, che e patronbꞌir era. Tara acꞌapa e ojroner, che e Jesús.
MAT 25:31 Entonces ojron e Jesús otronyajr y che: —Conda nen xeꞌ Uyunenen e winic inchecta waten taca tunor uyangelobꞌ e Dios tuaꞌ incꞌotori tara tor e rum, cꞌani inturuan tor inteꞌ nuxi turtar xeꞌ galan uwirnar.
MAT 25:32 Y tunor e gente xeꞌ turobꞌ tama tunor or e rum cꞌani umorojse ubꞌobꞌ taniut y nen cꞌani inxere tunor e sian gente era bꞌan cocha inteꞌ ajcojc oveja conda uxere e oveja taca e chivo.
MAT 25:33 Cꞌani inturbꞌa tunor e sian oveja tama ninojcꞌabꞌ y cꞌani inturbꞌa tunor e sian chivo tama nitzꞌejcꞌabꞌ.
MAT 25:34 Entonces nen xeꞌ reyen tuaꞌ inware tin e turobꞌ tama ninojcꞌabꞌ y che: “Laric tunorox xeꞌ chojbꞌesbꞌirox umen Nitata Dios. Laric tuaꞌ ichꞌami uchinam e Dios xeꞌ ustabꞌir tuaꞌ ixajcꞌuna conda ne mato achena or e rum era.
MAT 25:35 Porque conda nen cay jaytzꞌen, nox iwesen; y conda nen ataqui nitiꞌ, nox iwajqꞌuen e jaꞌ tuaꞌ unchꞌi; y conda nen xanen choquem, nox iwajqꞌuen tiaꞌ tuaꞌ inturuan.
MAT 25:36 Y conda cꞌapa nibꞌujc, nox ixin iwajqꞌuen; y conda cay muacranen, nox cay iwarajsen; y conda turen tama e cárcel, nox ixiox iwarajsen.” Bꞌan aquetpa tuaꞌ inware tin e turobꞌ tama ninojcꞌabꞌ tama e día yajaꞌ.
MAT 25:37 Entonces tin e aquetpobꞌ erach uwirnarobꞌ tuaꞌ uyarenobꞌ y chenobꞌ: “Cawinquiraret, ¿tucꞌa día cawiret que war ijaytzꞌa y cawajqꞌuet tucꞌa tuaꞌ acꞌuxi? Y ¿tucꞌa día cawiret que war ataqui atiꞌ y cawajqꞌuet e jaꞌ tuaꞌ oychꞌi?
MAT 25:38 Y ¿tucꞌa día cawiret que war ixana choquem y cawajqꞌuet tiaꞌ tuaꞌ ituruan? Y ¿tucꞌa día cawiret que war acꞌapa abꞌujc y cawajqꞌuet abꞌujc?
MAT 25:39 Y ¿tucꞌa día cawiret que ajmuaquet o conda turet tama e cárcel y ixion tuaꞌ cawarajset?” Bꞌan cꞌani uyarenobꞌ tin e aquetpobꞌ erach uwirnarobꞌ.
MAT 25:40 Entonces nen xeꞌ reyen cꞌani inwareobꞌ y che: “Cꞌani inwareox era que conda cay itacre inteꞌ niwermano xeꞌ tzajtaca ut y xeꞌ war unumse ubꞌa, war itacren nen ubꞌan.” Bꞌan cꞌani inware tin e aquetpa erach uwirnarobꞌ.
MAT 25:41 ’Y nacpat era nen xeꞌ reyen tuaꞌ inware tin e turobꞌ tama nitzꞌejcꞌabꞌ y che: “Loqꞌuenic tara taniut tunorox xeꞌ satremox. Quiquic tama e cꞌajc xeꞌ machi tuaꞌ atajpa xeꞌ ustabꞌir tiaꞌ tuaꞌ ayajra e diablo taca tunor e sian mabꞌambꞌan mein.
MAT 25:42 Porque conda nen cay jaytzꞌen nox machi iwesen, y conda ataqui nitiꞌ nox machi iwajqꞌuen e jaꞌ tuaꞌ unchꞌi.
MAT 25:43 Y conda nen xanen choquem nox machi iwajqꞌuen tiaꞌ tuaꞌ inturuan, y conda cꞌapa nibꞌujc nox machi iwajqꞌuen tucꞌa tuaꞌ inlapi, y conda cay muacranen y conda turen tama e cárcel nox machi tariox tuaꞌ iwarajsen.” Bꞌan tuaꞌ inware tin e satremobꞌ.
MAT 25:44 Entonces jaxirobꞌ cꞌani uyarenobꞌ y chenobꞌ: “Cawinquiret, ¿tucꞌa día cawiret que war ijaytzꞌa o conda war ataqui atiꞌ o conda xanet choquem o conda war acꞌapa abꞌujc o conda war imuacran o conda turet tama e cárcel y machi ixion tuaꞌ catacret?” Bꞌan tuaꞌ uyarenobꞌ e gente xeꞌ satremobꞌ era.
MAT 25:45 Entonces nen xeꞌ reyen cꞌani inwareobꞌ y che: “Cocha machi cay itacre inteꞌ niwermano xeꞌ tzajtaca ut conda war unumse ubꞌa, chequer que machi cꞌani itacren nen ubꞌan.” Bꞌan cꞌani inware tin e satremobꞌ.
MAT 25:46 Y nacpat era tin e mabꞌambꞌan uwirnarobꞌ axiobꞌ tama e cꞌajc xeꞌ machi tuaꞌ atajpa, y tin e aquetpa erach uwirnarobꞌ axin uchꞌamiobꞌ e cuxtar xeꞌ machi tuaꞌ acꞌapa, che e Jesús.
MAT 26:1 Pues conda cꞌapa ojron tama tunor era, e Jesús cay uyare uyajcanuarobꞌ y che:
MAT 26:2 —Nox inata que chabꞌij era acay e nojqꞌuin pascua, y tama e nojqꞌuin era nen xeꞌ Uyunenen e winic cꞌani inqꞌuejcha inxin tuaꞌ inchamesna tut inteꞌ cruz, che e Jesús.
MAT 26:3 Pues tama e tiempo era cay umorojse ubꞌobꞌ uwinquirobꞌ e inmojr sacerdotiobꞌ taca e ajcanseyajobꞌ tama uley e Moisés taca e nuquir winicobꞌ tama e Israel tama inteꞌ nuxi otot xeꞌ tuaꞌ e Caifás xeꞌ jax e más nuquir winquir tuaꞌ e inmojr sacerdotiobꞌ.
MAT 26:4 Y cay usicbꞌobꞌ cocha erer umajresobꞌ e Jesús tuaꞌ uyubꞌi uqꞌuechiobꞌ axin tama e cárcel tuaꞌ uyubꞌi uchamsiobꞌ.
MAT 26:5 Pero chenobꞌ: —Machi tuaꞌ caqꞌueche axin e Jesús este que acꞌapa e nojqꞌuin era tuaꞌ machi asutpobꞌ ticajor tunor e sian gente, chenobꞌ.
MAT 26:6 Entonces ixin e Jesús tama e chinam Betania y ixin esto tama uyotot inteꞌ winic xeꞌ ucꞌabꞌa Simón xeꞌ ayan ani e sian chec tut xeꞌ ucꞌabꞌa lepra.
MAT 26:7 Entonces cꞌotoy inteꞌ ixic tut e Jesús xeꞌ war uqꞌueche axin inteꞌ bote perfume xeꞌ bꞌan cocha e brillantina pero puro perfume era y tamar era meyra atujri. Y conda turu e Jesús tor e mesa jaxir utuqui e perfume tama ujor.
MAT 26:8 Pero conda irna tunor era umen uyajcanuarobꞌ cay qꞌuijnobꞌ y cay qꞌuecranobꞌ jaxobꞌ taca y chenobꞌ: —¿Tucꞌa tuaꞌ war uchoqui e perfume era?
MAT 26:9 Erer ani achompa tama meyra tumin tuaꞌ uyubꞌion catacre tin e tzajtaca utobꞌ, che uyajcanuarobꞌ jaxobꞌ taca.
MAT 26:10 Pero e Jesús uyubꞌi lo que arobꞌna umenerobꞌ y tamar era ojron jaxir y che: —¿Tucꞌa tuaꞌ war icꞌaye e ixic era? Pues lo que war uche tacaren era bueno tunor.
MAT 26:11 Pues ayan tin e tzajtaca ut tijam iraj iraj, pero nen machi tuaꞌ inquetpa tacarox iraj iraj cocha turen era.
MAT 26:12 Conda e ixic cay utuqui e perfume taniut, bꞌan uche tuaꞌ uyustes niut tuaꞌ inquetpa turix conda inxin inmujca.
MAT 26:13 Y cꞌani inwareox era que tic taca tiaꞌ achecsuna uyojroner e Dios tama e corpesiaj tama tunor or e rum cꞌani achecsuna ubꞌan lo que cay uche e ixic era tacaren tuaꞌ machi anajpesna lo que cay uche era, che e Jesús.
MAT 26:14 Pues ayan inteꞌ tujam e doce uyajcanuarobꞌ e Jesús xeꞌ ucꞌabꞌa Judas Iscariote. Y jaxir ixin tuaꞌ oꞌjron taca uwinquirobꞌ e inmojr sacerdotiobꞌ
MAT 26:15 y che: —¿Jayteꞌ tuaꞌ iwajqꞌuen jay inwajcꞌox e Jesús tuaꞌ iqꞌueche axin? che e Judas. Y jaxirobꞌ chenobꞌ: —Cawajqꞌuet treinta ut tumin xeꞌ plata, che e nuquir winicobꞌ era. Entonces jaxir uchꞌami e tumin y ixin.
MAT 26:16 Y tama e día era e Judas cay usajca cocha tuaꞌ uche tuaꞌ uyajcꞌu e Jesús tama ucꞌabꞌobꞌ e winicobꞌ era.
MAT 26:17 Entonces conda cꞌotoy e bꞌajxan día tuaꞌ e nojqꞌuin conda ucꞌuxi e pan xeꞌ machi atꞌabꞌay ut, uyajcanuarobꞌ e Jesús cꞌotoyobꞌ tuyejtzꞌer tuaꞌ uyubꞌiobꞌ tuaꞌ y chenobꞌ: —¿Tiaꞌ acꞌani tuaꞌ caxin costes e comida tuaꞌ cache e wiar tuaꞌ e nojqꞌuin pascua conda acꞌotoy e hora? che uyajcanuarobꞌ.
MAT 26:18 Y che e Jesús: —Quiquic tama e chinam Jerusalem tama uyotot inteꞌ winic, nox inata chi, y arenic y che: “Cawajcanseyaj che que: Warix acꞌotoy e hora conda cꞌani inchamesna, pero cꞌanto inxin toꞌtot tuaꞌ cache e nojqꞌuin pascua taca niwajcanuarobꞌ”, bꞌan tuaꞌ iware e winic, che e Jesús.
MAT 26:19 Entonces uyajcanuarobꞌ ixin uchiobꞌ bꞌan cocha arobꞌnobꞌ umen e Jesús y uyustesobꞌ e comida tuaꞌ aquetpa turix tuaꞌ awiobꞌ tama e nojqꞌuin pascua era.
MAT 26:20 Y conda acbꞌare ya turu e Jesús tor e mesa taca e doce uyajcanuarobꞌ.
MAT 26:21 Y conda war awiobꞌ cay ojron e Jesús tacarobꞌ y che: —Cꞌani inwareox era que ayan inteꞌ tijam xeꞌ axin utuchꞌien tut e nuquir winicobꞌ tuaꞌ uqꞌuechien inxin, che e Jesús.
MAT 26:22 Entonces quetpa uwirnarobꞌ que mixto jax incꞌajyer ya y cay uyubꞌiobꞌ tuaꞌ e Jesús inteꞌ inteꞌ y chenobꞌ: —Niwinquiraret, ¿nen ca nic? che uyajcanuarobꞌ inteꞌ inteꞌ.
MAT 26:23 Entonces che e Jesús: —Tin e war aweꞌ intera chꞌeu tacaren, jax xeꞌ tuaꞌ axin utuchꞌien tut e nuquir winicobꞌ tuaꞌ uqꞌuechien inxin.
MAT 26:24 Pues nen xeꞌ Uyunenen e winic ucꞌani tuaꞌ inxin inchamesna bꞌan cocha chꞌar tzꞌijbꞌabꞌir tama uyojroner e Dios, pero tzajtaca ut tin e acꞌampesna tuaꞌ utuchꞌien. Más ani bueno que machi ani cuxpa e winic era, che e Jesús.
MAT 26:25 Entonces e Judas xeꞌ jax xeꞌ tuaꞌ utuchꞌi e Jesús ojron tacar y che: —Niwajcanseyajet, ¿o nen ca nic? che e Judas. Y e Jesús che: —Net, che e Jesús.
MAT 26:26 Pues conda warto awiobꞌ tunorobꞌ tor e mesa e Jesús uchꞌami ingojr pan tama ucꞌabꞌ, y cay utattzꞌi e Dios tamar y cay uxere e pan y cay uyajcꞌu uyajcanuarobꞌ y che: —Junic e pan era y cꞌuxic. Pues e pan era bꞌan cocha uwerir nicuerpo xeꞌ tuaꞌ inchamesna tamarox, che e Jesús.
MAT 26:27 Y nacpat era e Jesús uchꞌami inteꞌ chꞌeu tama ucꞌabꞌ y utattzꞌi ucꞌabꞌa e Dios tamar y uyajcꞌu uyajcanuarobꞌ y che: —Uchꞌenic imbꞌijc imbꞌijc tunorox lo que ayan tama e chꞌeu era.
MAT 26:28 Porque lo que ayan tama e chꞌeu era aquetpa bꞌan cocha nichꞌichꞌer xeꞌ axin awechcꞌa tamarox y xeꞌ tuaꞌ utacre meyra gente tuaꞌ acꞌumpesnobꞌ tama tunor umabꞌambꞌanirobꞌ. Y nichꞌichꞌer era jax tuaꞌ uchectes tiut ubꞌan que ayan inteꞌ nipacto xeꞌ imbꞌutz tacarox.
MAT 26:29 Pero cꞌani inwareox era que nen machi tuaꞌ insutpa unchꞌi lo que ayan tama e chꞌeu era este que acꞌotoy e día conda cꞌani unchꞌi e vino xeꞌ imbꞌutz conda watar Catata Dios tuaꞌ acꞌotori tara tor e rum, che e Jesús.
MAT 26:30 Entonces conda cꞌapa ucꞌaywijresobꞌ inteꞌ himno locꞌoyobꞌ tama e otot era y ixiobꞌ esto tama or e witzir xeꞌ ucꞌabꞌa Olivo.
MAT 26:31 Entonces ojron e Jesús y che: —Conda acbꞌare coner tunorox cꞌani ixixin iwacten, porque bꞌan chꞌar tzꞌijbꞌabꞌir tama uyojroner e Dios que: “Conda achamesna e ajcojc oveja, tunor e ovejobꞌ cꞌani uxere ubꞌobꞌ axin.” Bꞌan chꞌar tzꞌijbꞌabꞌir tama uyojroner e Dios.
MAT 26:32 Pero nacpat era conda insujta imbꞌixqꞌuesna tujam e chamenobꞌ cꞌani inxin tama e departamento Galilea bꞌajxan que ixixin nox, che e Jesús.
MAT 26:33 Entonces ojron e Pedro y che: —Motor axin uyactet tunor e inmojr era, pero nen ma tiaꞌ tuaꞌ inxin inwactet, che e Pedro.
MAT 26:34 Y che e Jesús: —Cꞌani inwaret que tama e acbꞌar era conda ne mato aꞌru e acꞌach, net iꞌxin amuqui nicꞌabꞌa uxyajr que machi anata chien nen, che e Jesús.
MAT 26:35 Y che e Pedro: —Motor que nen ucꞌani tuaꞌ inxin inchamay tacaret, pero nen ma tiaꞌ tuaꞌ inxin inmuqui acꞌabꞌa, che e Pedro. Y bꞌan arobꞌna umen tunor e inmojr ajcanuarobꞌ era ubꞌan.
MAT 26:36 Entonces cꞌotoy e Jesús taca tunor uyajcanuarobꞌ tama inteꞌ huerto xeꞌ ucꞌabꞌa Getsemaní. Y ojron e Jesús y che: —Turenic tara. Nen cꞌani inxin más bꞌat tuaꞌ incꞌajti taca e Dios, che e Jesús.
MAT 26:37 Entonces e Jesús uqꞌueche ixin e Pedro y chateꞌ uyunenobꞌ e Zebedeo y cay oyqꞌui tama uyalma y cay yopa inteꞌ nuxi cꞌuxner tama uyalma xeꞌ cay unumse ubꞌa tamar.
MAT 26:38 Y che e Jesús: —Ayan inteꞌ nuxi cꞌuxner tama niwalma que war uchien imbꞌijnu que chamenenix umener. Quetpenic tara, pero ira ixwayan, che e Jesús.
MAT 26:39 Entonces e Jesús ixin innajt cora y uyacta ubꞌa apacwan tut e rum y cay ucꞌajti taca e Dios y che: —Nitatet, quisinic ani machi inchꞌami e nuxi cꞌuxner lo que cꞌanix watar tamaren, pero chen bꞌan taca cocha net acꞌani y majax bꞌan cocha incꞌani nen, che e Jesús.
MAT 26:40 Entonces sutpa cꞌotoy tiaꞌ turobꞌ uyajcanuarobꞌ y utajwi que war awayanobꞌ. Entonces e Jesús uyare e Pedro y che: —¿Machi ca uyubꞌiox icojquen nien inteꞌ hora?
MAT 26:41 Turuanenic bꞌixir y cꞌajtinic taca e Dios tuaꞌ machi ixpijchna umen e Satanás. Pues tama iwalma turix tuaꞌ ixcꞌupseyan tamaren, pero tama iwerir injayjayox, che e Jesús.
MAT 26:42 Entonces e Jesús sutpa ixin otronyajr tuaꞌ ucꞌajti taca e Dios y che: “Nitatet, jay erer atacren tuaꞌ machi innumse nibꞌa tama e nuxi cꞌuxner lo que watarix era, pues bueno. Pero chen lo que acꞌani net”, che e Jesús.
MAT 26:43 Y de allí sutpa ixin otronyajr tut uyajcanuarobꞌ y utajwi que war awayanobꞌ cocha unacꞌutobꞌ chꞌuyur chꞌuyur umen e waynij.
MAT 26:44 Entonces e Jesús sutpa ixin tuaꞌ ucꞌajti taca e Dios otronyajr, y bꞌan taca uyare e Dios otronyajr.
MAT 26:45 Y de allí sutpa ixin tut uyajcanuarobꞌ otronyajr y che: —¿Warto ca ixwayan? Y ¿warto ca ixjiri? Pues cꞌotoyix e hora conda nen xeꞌ Uyunenen e winic ucꞌani tuaꞌ anjcꞌuna tama ucꞌabꞌobꞌ tin e ajmabꞌambꞌanirobꞌ.
MAT 26:46 Achpenic incuic era, porque watarix tin e tuaꞌ utuchꞌien, che e Jesús.
MAT 26:47 Entonces conda warto oꞌjron e Jesús cꞌotoy e Judas xeꞌ jax inteꞌ tujam e doce uyajcanuarobꞌ y tupat jaxir war watobꞌ meyra winicobꞌ taca umachitobꞌ y taca uteobꞌ. Y tunor e winicobꞌ era ebꞌetbꞌir tari umen uwinquirobꞌ e inmojr sacerdotiobꞌ y umen e nuquir winicobꞌ tama e Israel.
MAT 26:48 Y e Judas, xeꞌ jax xeꞌ quetpa tuaꞌ utuchꞌi e Jesús, cay uyare tunor e winicobꞌ cocha tuaꞌ unatobꞌ chi e Jesús y che: —E Jesús jax tin e inxin intzꞌujtzꞌi ut. Conda iwira chi e Jesús quiqui jajpinic y qꞌuechic chic, xeꞌ cay arobꞌnobꞌ e winicobꞌ era umen e Judas bꞌajxan.
MAT 26:49 Entonces e Judas ixin wawan tuyejtzꞌer e Jesús y che: —Niwajcanseyajet, ¿cocha turet? che e Judas. Y tamar era utzꞌujtzꞌi ut.
MAT 26:50 Y che e Jesús: —Nipiaret, lo que war abꞌijnu tuaꞌ ache, chen wacchetaca, che e Jesús. Y wacchetaca tobꞌoy tariobꞌ ujajpiobꞌ e Jesús tin e war axanobꞌ taca e Judas y uqꞌuechiobꞌ ixin tama e cárcel.
MAT 26:51 Entonces wacchetaca tobꞌoy inteꞌ uyajcanuar e Jesús y uquerejbꞌa locꞌoy umachit tama upat y ixin uxuri locꞌoy inteꞌ uchiquin uman uwinquir e inmojr sacerdotiobꞌ.
MAT 26:52 Entonces che e Jesús: —Actaniquix. Tziri amachit tupat, porque tunor tin e axin ucꞌampes e machit tuaꞌ achamsan, axin achamesna taca e machit ubꞌan.
MAT 26:53 Pues nox war inata que nen erer ani incꞌajti taca Nitata tuaꞌ utacren, y wacchetaca jaxir uyebꞌta ani watar más que doce nuxi grupo angelobꞌ tuaꞌ ucorpesenobꞌ.
MAT 26:54 Pero jay incꞌajti ani taca Nitata cocha era, ma cocha erer anumuy tunor lo que ucꞌani tuaꞌ anumuy xeꞌ chꞌar tzꞌijbꞌabꞌir tama uyojroner e Dios tamaren, che e Jesús.
MAT 26:55 Entonces e Jesús uyare e sian winicobꞌ era y che: —¿O yopoxix ca taca e sian machit y taca e sian teꞌ tuaꞌ iqꞌuechien inxin bꞌan cocha jay jaxen ani inteꞌ ajxujch? Ajqꞌuin ajqꞌuin nen turen tama e templo war incanseyan y ma inyajr cay cꞌotoyox tuaꞌ iqꞌuechien inxin tama e cárcel.
MAT 26:56 Pero war anumuy tunor era umen que bꞌan tuaꞌ achempa tuaꞌ acꞌapa achempa tunor lo que chꞌar tzꞌijbꞌabꞌir tama uyojroner e Dios umen e profetobꞌ, che e Jesús. Y tamar era locꞌoy ajniobꞌ tunor uyajcanuarobꞌ e Jesús y uyactobꞌ ubꞌajner taca e sian winicobꞌ era.
MAT 26:57 Pues tin e ujajpiobꞌ e Jesús uqꞌuechiobꞌ ixin esto tama uyotot e Caifás xeꞌ jax e más nuquir winquir tuaꞌ e inmojr sacerdotiobꞌ. Y ya morojsebꞌir turobꞌ e ajcanseyajobꞌ tama uley e Moisés taca e nuquir winicobꞌ.
MAT 26:58 Pero e Pedro war axin tupat e Jesús motor que innajt cora war axin este que cꞌotoyobꞌ tama uyotot e Caifás. Y de allí ochoy tor utinaj y turuan tuyejtzꞌer cora soldadobꞌ tuaꞌ uwira tucꞌa tuaꞌ achena taca e Jesús.
MAT 26:59 Entonces uwinquirobꞌ e inmojr sacerdotiobꞌ taca tunor e nuquir winicobꞌ tama e nuxi concilio cay usicbꞌobꞌ tucꞌa tamar tuaꞌ utuchꞌiobꞌ e Jesús tut e ley tuaꞌ uyubꞌi uchamsiobꞌ motor que jax taca inteꞌ majresiaj tuaꞌ uchiobꞌ.
MAT 26:60 Y motor que cay yopobꞌ meyra ajchecsuyajobꞌ xeꞌ ajmajresiajobꞌ tut e nuquir winicobꞌ era, pero machi tajwina chateꞌ xeꞌ lar uyojronerobꞌ. Pero conda numuy cora tiempo yopobꞌ chateꞌ ajchecsuyajobꞌ xeꞌ ajmajresiajobꞌ xeꞌ lar uyojronerobꞌ.
MAT 26:61 Pues jaxirobꞌ che: —E winic era ojron y che: “Tijresic e templo era y tama e uxteꞌ día nen tuaꞌ insuti anchi otronyajr”, xeꞌ chenobꞌ que bꞌan che e Jesús e ajmajresiaj winicobꞌ era.
MAT 26:62 Entonces achpa uwinquir e inmojr sacerdotiobꞌ y uyare e Jesús y che: —¿Tucꞌa tuaꞌ que machi cꞌani iyojron? ¿Y tucꞌa nic era que war oꞌjronobꞌ apater? che uwinquir e inmojr sacerdotiobꞌ.
MAT 26:63 Pero e Jesús machi ojron. Entonces ojron uwinquir e inmojr sacerdotiobꞌ otronyajr y che: —Tama ucꞌabꞌa e Dios xeꞌ bꞌixir cꞌani inwaret tuaꞌ awareon lo que erach. Arenon ixto yaꞌ jay net e Cristoet xeꞌ jax Uyunen e Dios, che uwinquir e inmojr sacerdotiobꞌ.
MAT 26:64 Y che e Jesús: —Nen, bꞌan cocha war awaren. Y cꞌani inwareox era que watar e día conda cꞌani iwiren xeꞌ Uyunenen e winic war inturuan tama niturtar tama unojcꞌabꞌ e Dios xeꞌ meyra ayan ucꞌotorer. Y nox cꞌani iwiren conda insutpa waten tama e tocar tichan tuaꞌ inqꞌueche axin tunor tin e war acꞌupseyanobꞌ tamaren, che e Jesús.
MAT 26:65 Entonces wacchetaca qꞌuijna uwinquir e inmojr sacerdotiobꞌ conda uyubꞌi lo que che e Jesús que: “Nen e Cristoen”, y tamar era uxixi ubꞌujc xeꞌ lapar umener. Entonces ojron uwinquir era y che: —E winic era war uqꞌuijnes e Dios tacar uyojroner. ¿Tucꞌa tuaꞌ otronteꞌ ajchecsuyaj upater e winic era? Coybꞌix uyojroner que jaxir war uqꞌuijnes e Dios.
MAT 26:66 ¿Tucꞌa ibꞌijnu nox tamar? che uwinquir e inmojr sacerdotiobꞌ. Y e nuquir winicobꞌ chenobꞌ: —Checta ixto yaꞌ que ayan umabꞌambꞌanir. Ucꞌani tuaꞌ achamesna, che e nuquir winicobꞌ.
MAT 26:67 Y tamar era cay utujbꞌiobꞌ ut y cay uyajcꞌuobꞌ ut. Y ayan tin e cay uyopruobꞌ ut
MAT 26:68 y chenobꞌ: —Net xeꞌ jax e Cristoet, arenon, ¿chi xeꞌ uyopruet? chenobꞌ.
MAT 26:69 Pues ya turu e Pedro tor e tinaj conda numuy inteꞌ ijchꞌoc xeꞌ jax inteꞌ man xeꞌ apatna tama e cosina xeꞌ uwira e Pedro y che: —Net ubꞌan xanet taca e Jesús xeꞌ tuaꞌ e departamento Galilea, che e ijchꞌoc.
MAT 26:70 Pero e Pedro umuqui tut tunor e gente era y che: —Machi innata tucꞌa war aware, che e Pedro.
MAT 26:71 Entonces e Pedro ixin wawan esto tiaꞌ oꞌchoy e gente conda irna umen otronteꞌ ijchꞌoc xeꞌ man ubꞌan xeꞌ uyare e gente y che: —E winic era jax xeꞌ war axana taca e Jesús xeꞌ tuaꞌ e chinam Nazaret ubꞌan, che e ijchꞌoc era.
MAT 26:72 Pero e Pedro sutpa umuqui otronyajr y che: —Machi innata chi e winic era, che e Pedro.
MAT 26:73 Y nacpat era ayan tin e warobꞌ yajaꞌ xeꞌ cꞌotoyobꞌ tut e Pedro y che: —San jaxet que net upiaret e Jesús. Y chequer que net ajlugaret tama e departamento Galilea ubꞌan porque chequer tamar awojroner, che e winic era.
MAT 26:74 Entonces e Pedro ojron otronyajr y che: —Unaten e Dios que majax majresiaj lo que war inche tacarox que machi innata chi e winic era xeꞌ war ixojron tamar, che e Pedro. Y tama e momento era aru e acꞌach.
MAT 26:75 Entonces yopa tujor e Pedro lo que cay arobꞌna umen e Jesús que: “Cꞌani inwaret que tama e acbꞌar era conda ne mato aꞌru e acꞌach, net iꞌxin amuqui nicꞌabꞌa uxyajr que machi anata chien nen”, xeꞌ cꞌajpa umen e Pedro. Y conda cay ubꞌijnu tama tunor era locꞌoy e Pedro y cay aru taca inteꞌ nuxi nuc.
MAT 27:1 Pues entonces conda war asacojpa cay umorojse ubꞌobꞌ tunor uwinquirobꞌ e inmojr sacerdotiobꞌ taca e nuquir winicobꞌ tuaꞌ e Israel y cay ubꞌijnuobꞌ tuaꞌ uchamsiobꞌ e Jesús.
MAT 27:2 Y uqꞌuechiobꞌ ixin e Jesús cachar tuaꞌ aꞌjcꞌuna e gobernador xeꞌ jax e Poncio Pilato.
MAT 27:3 Pues conda e Judas xeꞌ jax xeꞌ utuchꞌi e Jesús cay uwira que arobꞌna tuaꞌ achamesna e Jesús cay cꞌuxun uyalma tamar. Entonces uqꞌueche ixin e treinta ut tumin xeꞌ plata tuaꞌ usuti tut uwinquir e inmojr sacerdotiobꞌ y tut e nuquir winicobꞌ,
MAT 27:4 y che: —Mabꞌambꞌan lo que cay inche conda inwareox tuaꞌ iqꞌueche axin e Jesús porque matucꞌa war uche, che e Judas. Pero ojronobꞌ e sacerdotiobꞌ y chenobꞌ: —Non matucꞌa canata tama tunor era. Net anata jay war anumse abꞌa tama tunor era, che e nuquir winicobꞌ era.
MAT 27:5 Entonces e Judas ixin uwechꞌe e tumin tut e otot tama e templo y de allí ixin ulucbꞌa e lazo tama unuc y uchamse ubꞌa.
MAT 27:6 Entonces uwinquirobꞌ e inmojr sacerdotiobꞌ cay umorojsiobꞌ ut e tumin y chenobꞌ: —Machi uyubꞌion cayabꞌi e tumin era tama e ofrenda porque cꞌampesbꞌir tuaꞌ utoyi achamesna inteꞌ, che uwinquirobꞌ e inmojr sacerdotiobꞌ.
MAT 27:7 Entonces cay ubꞌijnuobꞌ tuaꞌ umaniobꞌ imbꞌijc rum xeꞌ tuaꞌ ani inteꞌ ajpacbꞌejt taca e tumin. Y quetpa tuaꞌ ucꞌampesobꞌ e rum era tuaꞌ amujca tin e majax ajlugar tama e Israel.
MAT 27:8 Y tamar era quetpa ucꞌabꞌa e rum: “E rum tiaꞌ yajra e chꞌich” esto coner.
MAT 27:9 Y tamar era cꞌapa chena lo que chꞌar tzꞌijbꞌabꞌir umen e profeta Jeremías xeꞌ che: “Uchꞌamiobꞌ e treinta ut tumin xeꞌ plata xeꞌ jax lo que quetpa tuaꞌ atojya umen e nuquir winicobꞌ tuaꞌ e Israel tuaꞌ aꞌrobꞌnobꞌ tiaꞌ turu e Ajcorpesiaj.
MAT 27:10 Y tamar e tumin era e nuquir winicobꞌ tuaꞌ e Israel ixin umaniobꞌ imbꞌijc rum xeꞌ tuaꞌ ani inteꞌ ajpacbꞌejt. Bꞌan arobꞌnen umen Niwinquirar”, che e profeta Jeremías tiaꞌ chꞌar tzꞌijbꞌabꞌir tama uyojroner e Dios.
MAT 27:11 Entonces conda e Jesús cꞌotoy wawan tut e gobernador jaxir cay uyubꞌi tuaꞌ y che: —¿Net ca ureyetobꞌ e gente xeꞌ tuobꞌ e Israel? che e Pilato. Y e Jesús che: —Bꞌan ya cocha war aware net era, che e Jesús.
MAT 27:12 Pero conda war atujchꞌa umen uwinquirobꞌ e inmojr sacerdotiobꞌ y umen e nuquir winicobꞌ jaxir matucꞌa uyare.
MAT 27:13 Y che e Pilato: —¿Machi ca oybꞌi cobꞌa war oꞌjronobꞌ apater? che e Pilato.
MAT 27:14 Pero e Jesús matucꞌa uyare, y e gobernador bꞌacta uwira este que machi unata tucꞌa tuaꞌ ubꞌijnu tama e Jesús.
MAT 27:15 Pues e gobernador ayan lo que war uche tama inteꞌ inteꞌ año conda anumuy e nojqꞌuin pascua que jaxir ubꞌani inteꞌ xeꞌ turu tama e cárcel bꞌan cocha acꞌajtna umen e gente.
MAT 27:16 Y ayan inteꞌ winic tama e cárcel xeꞌ atajttzꞌa umen e gente xeꞌ ucꞌabꞌa Barrabás.
MAT 27:17 Y conda ya turobꞌ tunor e gente tut e Pilato jaxir cay uyubꞌi tuaꞌ e gente y che: —¿Chi icꞌani tuaꞌ imbꞌani? ¿Imbꞌani ca e Barrabás? ¿O icꞌani ca tuaꞌ imbꞌani e Jesús xeꞌ arobꞌna e Cristo? che e Pilato.
MAT 27:18 Pues jaxir warix unata que umen que war acꞌuxnaqꞌuiobꞌ e nuquir winicobꞌ upater e Jesús que taresna tut jaxir.
MAT 27:19 Y conda turu e Pilato tor uturtar tiaꞌ aturuan tuaꞌ ubꞌijnu uwira tamar lo que atujchꞌa e gente, cꞌotoy arobꞌna inteꞌ ojroner xeꞌ ebꞌetbꞌir ixin umen uwixcar xeꞌ che: “Ira oꞌse abꞌa taca e winic era xeꞌ erach uwirnar porque acbꞌar sajmi inwira inteꞌ wayac xeꞌ calapir uwirnar tama e winic era”, che e ojroner xeꞌ ebꞌetbꞌir ixin umen uwixcar.
MAT 27:20 Pero uwinquirobꞌ e inmojr sacerdotiobꞌ taca e nuquir winicobꞌ cay uchiobꞌ qꞌuijna tunor e gente upater e Jesús y tuaꞌ uyareobꞌ que jax e Barrabás xeꞌ tuaꞌ abꞌajna y que e Jesús ucꞌani tuaꞌ achamesna.
MAT 27:21 Entonces ojron e Pilato otronyajr y che: —¿Tin icꞌani tuaꞌ imbꞌani era? ¿E Jesús ca o e Barrabás? che e Pilato. Y e gente chenobꞌ: —Bꞌana e Barrabás, chenobꞌ e gente.
MAT 27:22 Entonces e Pilato sutpa uyubꞌi tuaꞌ e gente otronyajr y che: —¿Y tucꞌa icꞌani tuaꞌ inche taca e Jesús xeꞌ arobꞌna que jax e Cristo? che e Pilato. Entonces ojronobꞌ tunor e gente y chenobꞌ: —Chꞌubꞌanic tut e cruz, chenobꞌ tunor e gente.
MAT 27:23 Entonces sutpa ojron e Pilato y che: —¿Y tucꞌa cay uche e winic era tuaꞌ cachamse? che e Pilato. Pero jaxirobꞌ intaca sutpa aruobꞌ otronyajr y chenobꞌ: —Chꞌubꞌanic tut e cruz, che sian e gente.
MAT 27:24 Pero conda cꞌotoy unata e Pilato que machi uyubꞌi uche aquetpa intiach ubꞌijnusiajobꞌ e gente, y que intaca war uqꞌuitru ubꞌobꞌ axin, entonces uyare tuaꞌ ataresna imbꞌijc jaꞌ y cay upoqui ucꞌabꞌ tut e gente tuaꞌ uchectes tutobꞌ que machi utajwi jay ayan umabꞌambꞌanir e Jesús. Y tamar era ojron e Pilato y che: —Matucꞌa umabꞌambꞌanir e winic era, y tamar era majax tanijor nen tuaꞌ acꞌaxi e mabꞌambꞌanir lo que cꞌani iche nox, che e Pilato.
MAT 27:25 Y che e gente: —Jay mabꞌambꞌan ani tuaꞌ achamesna e Jesús que cꞌajxic ticajor non taca camaxtac, che e gente era.
MAT 27:26 Entonces e Pilato uyare tuaꞌ abꞌajna e Barrabás. Y de allí uyare tuaꞌ ajajtzꞌa e Jesús taca inteꞌ jarbꞌir qꞌuewer y tuaꞌ aꞌjcꞌuna tin e tuaꞌ uchꞌubꞌobꞌ tut e cruz tuaꞌ uchamsiobꞌ.
MAT 27:27 Entonces e soldadobꞌ tuaꞌ e Pilato uqꞌuechiobꞌ ixin e Jesús esto tor utinaj e Pilato y de allí cay umorojse tunor e soldadobꞌ xeꞌ turobꞌ era y e Jesús quetpa tuyuxinobꞌ.
MAT 27:28 Entonces e soldadobꞌ ulocsiobꞌ ubꞌujc e Jesús y cay uriobꞌ inteꞌ chacchac bꞌujc tama unuc bꞌan cocha ubꞌujc ani inteꞌ rey.
MAT 27:29 Y de allí ujariobꞌ cora tꞌix y uturbꞌobꞌ tama ujor e Jesús bꞌan cocha inteꞌ corona, y uchꞌamiobꞌ inteꞌ ucꞌabꞌ teꞌ xeꞌ impacpac ut y utzꞌiriobꞌ tama unojcꞌabꞌ e Jesús. De allí cay acotuanobꞌ tut tuaꞌ asiobꞌ tacar y chenobꞌ: —¡Que turuanic meyra tiempo jaxir xeꞌ jax e Rey tuaꞌ tunor e gente tama e Israel! chenobꞌ tunor e soldadobꞌ era.
MAT 27:30 Y de allí e soldadobꞌ cay utujbꞌiobꞌ ut e Jesús y ulocsiobꞌ e teꞌ tama ucꞌabꞌ y cay uyajcꞌuobꞌ tama ujor.
MAT 27:31 Y conda cꞌapa asiobꞌ taca e Jesús cocha era ulocsiobꞌ e chacchac bꞌujc tama unuc y uriobꞌ ubꞌujc xeꞌ tuach. Entonces uqꞌuechiobꞌ ixin e Jesús tuaꞌ uchꞌubꞌobꞌ tut e cruz tuaꞌ uchamsiobꞌ.
MAT 27:32 Pues ayan inteꞌ winic xeꞌ ucꞌabꞌa Simón xeꞌ tari tama inteꞌ chinam xeꞌ ucꞌabꞌa Cirene. Y conda cay ulocsiobꞌ e Jesús tama e chinam Jerusalem utajwiobꞌ e Simón era y uyareobꞌ tuaꞌ ubꞌiti axin ucruz e Jesús.
MAT 27:33 Y bꞌan cocha era cꞌotoyobꞌ tama or inteꞌ witzir xeꞌ ucꞌabꞌa Calavera xeꞌ bꞌan uwirnar cocha ubꞌaquer ujor inteꞌ winic. Y ucꞌabꞌa or e witzir era tama e ojroner hebreo jax: “Gólgota.”
MAT 27:34 Y ayan lo que cꞌani ani uyajcꞌu e Jesús tuaꞌ uyuchꞌi xeꞌ jax imbꞌijc vino yabꞌarbꞌir taca otronteꞌ jaꞌ xeꞌ inchꞌaj ut xeꞌ conda ochna umen inteꞌ wacchetaca aquetpa sispanen ucuerpo. Pero conda e Jesús uyejta uwira tucꞌa era machi uyuchꞌi.
MAT 27:35 Y conda cꞌapa uchꞌubꞌobꞌ e Jesús tut e cruz, e soldadobꞌ cay uchiobꞌ suertiar tama ubꞌujc tuaꞌ uwirobꞌ chi tacar tuaꞌ aquetpa. Bꞌan uchiobꞌ tuaꞌ acꞌapa achempa lo que chꞌar tzꞌijbꞌabꞌir tama uyojroner e Dios umen inteꞌ profeta tiaꞌ che: “Uxere ubꞌobꞌ tama nibꞌujc, uchiobꞌ suertiar tuaꞌ uwirobꞌ chi tuaꞌ uchꞌami.” Bꞌan chꞌar tzꞌijbꞌabꞌir umen inteꞌ profeta.
MAT 27:36 Y nacpat era turuanobꞌ tuaꞌ ucojcobꞌ este que achamay.
MAT 27:37 Y uturbꞌobꞌ inteꞌ pachpachteꞌ tor ucruz e Jesús tiaꞌ chꞌar tzꞌijbꞌabꞌir y che: JAX ERA E JESÚS XEꞌ JAX E REY TUAꞌ E GENTE TUAꞌ E ISRAEL. Bꞌan chꞌar tzꞌijbꞌabꞌir tor ucruz e Jesús.
MAT 27:38 Y ayan chateꞌ ajxujchꞌobꞌ xeꞌ chꞌubꞌnobꞌ tuaꞌ achamesnobꞌ taca e Jesús era ubꞌan, inteꞌ chꞌubꞌna tama ut ucruz tama unojcꞌabꞌ e Jesús y otronteꞌ chꞌubꞌna tama ut ucruz tama utzꞌejcꞌabꞌ e Jesús.
MAT 27:39 Y ayan e gente xeꞌ war axanobꞌ tut e cruz era xeꞌ cay uyujcu ujorobꞌ tut e Jesús tuaꞌ uqꞌuijnesobꞌ,
MAT 27:40 y chenobꞌ: —Net xeꞌ cay aware que erer atijres e templo y asutpa achi wacchetaca tamar taca e uxteꞌ día, corpes abꞌa. Jay net jax ani Uyunenet e Dios, ecmen tarex tut e cruz, che e gente era taca inteꞌ tzener tut e Jesús.
MAT 27:41 Y bꞌan cay ojronobꞌ taca inteꞌ tzener ubꞌan uwinquirobꞌ e inmojr sacerdotiobꞌ y e ajcanseyajobꞌ tama uley e Moisés y e fariseobꞌ y e nuquir winicobꞌ, cay ojronobꞌ jaxobꞌ taca tut e Jesús y chenobꞌ:
MAT 27:42 —Pues jaxir uyubꞌi ucorpes e inmojr gente, pero machi uyubꞌi ucorpes ubꞌa. Jay jax ani e Rey tuaꞌ e gente tuaꞌ e Israel ecmic taric tut e cruz y non ubꞌan caxin cacꞌupseyan tamar.
MAT 27:43 Jaxir acꞌupseyan tama e Dios, y ya ca ani war ayajtna ut umen e Dios acorpesna ani umener, cocha jaxir che que jaxir jax Uyunen e Dios, che tunor e nuquir winicobꞌ era jaxobꞌ taca tut e Jesús.
MAT 27:44 Y e chateꞌ ajxujchꞌobꞌ xeꞌ war achamesnobꞌ tuyejtzꞌer e Jesús war uqꞌuijnesobꞌ bꞌan taca ubꞌan.
MAT 27:45 Pues entonces tama uyuxin e día ecsibꞌa tunor ut e qꞌuin tama tunor or e lugar era y quetpa bꞌan cocha e acbꞌar tama inteꞌ tiempo de tres hora.
MAT 27:46 Entonces a las tres de la tarde cay aru e Jesús taca inteꞌ nuxi nuc y che: —Elí, Elí, ¿Lama sabactani? che e Jesús. E ojroner era war che: “Nidiosiret, Nidiosiret ¿tucꞌa tuaꞌ achoqui awacten era?”
MAT 27:47 Y ayan tin e turobꞌ era xeꞌ uyubꞌiobꞌ e Jesús xeꞌ chenobꞌ: —E winic era war upejca e profeta Elías xeꞌ turuan tama e onian tiempo, chenobꞌ.
MAT 27:48 Y tama e momento era ayan inteꞌ tujam e winicobꞌ era xeꞌ ixin ajner tuaꞌ utares inteꞌ tinam xeꞌ cachar tama inteꞌ teꞌ y uturbꞌa cora vino tamar y utꞌabꞌse esto tutiꞌ e Jesús tuaꞌ ochna umener.
MAT 27:49 Pero ojronobꞌ e inmojr era y chenobꞌ: —Actan bꞌan taca. Cꞌani cawira jay ayopa e Elías tuaꞌ ucorpes, che e inmojr era.
MAT 27:50 Y nacpat era sutpa aru e Jesús otronyajr taca inteꞌ nuxi nuc y de allí chamay.
MAT 27:51 Y tama e momento era e nuxi bꞌujc xeꞌ chꞌur macuir e templo xeꞌ jax umajquibꞌir ut e altar tajchpa tari tichan esto tut e rum. Y chincha tunor or e lugar era y e nuquir tun tajchpa ixin.
MAT 27:52 Y pascꞌa ut meyra mujrobꞌ tuaꞌ e chamenobꞌ tama e lugar era. Y meyra tin e erachobꞌ tut e Dios xeꞌ cꞌapa chamayobꞌ, sutpa bꞌixcꞌobꞌ tama e día era.
MAT 27:53 Pues conda sutpa bꞌixcꞌa e Jesús, intaca bꞌixcꞌobꞌ locꞌoyobꞌ tama umujrobꞌ tin e chamenobꞌ era y ixin ochoyobꞌ tama e chinam Jerusalem tiaꞌ irnobꞌ umen meyra gente.
MAT 27:54 Y ayan inteꞌ capitán romano xeꞌ war ucojco e Jesús taca cora soldadobꞌ, y conda uwirobꞌ e nuxi yujcbꞌar y tunor lo que war anumuy era, bꞌactobꞌ meyra y chenobꞌ: —E winic era jax ani Uyunen e Dios, che e soldadobꞌ era.
MAT 27:55 Y ayan ubꞌan cora ixictac xeꞌ turobꞌ najtir cora xeꞌ war achꞌucsanobꞌ. Pues e ixictac era jax tin e cay xanobꞌ taca e Jesús tuaꞌ utacriobꞌ desde que locꞌoy tama e departamento Galilea.
MAT 27:56 Y tujam e ixictac era ya war e María xeꞌ tari tama e chinam Magdala, y war e María xeꞌ jax utuꞌ e Santiago y e José, y war utuꞌ uyunenobꞌ e Zebedeo.
MAT 27:57 Pues entonces ayan inteꞌ winic xeꞌ ucꞌabꞌa José xeꞌ ayan meyra utumin xeꞌ ajchinam Arimatea xeꞌ jax inteꞌ ajcanuar tuaꞌ e Jesús ubꞌan. Y conda acbꞌare tama e día era cꞌotoy tut e Pilato
MAT 27:58 y ucꞌajti ucuerpo e Jesús tuaꞌ uyubꞌi uqꞌueche axin tuaꞌ umuqui. Y tamar era e Pilato uyare tuaꞌ aꞌjcꞌuna ucuerpo e Jesús.
MAT 27:59 Entonces e José uqꞌueche ixin ucuerpo e Jesús y ubꞌaqꞌui taca inteꞌ sacsac bꞌujc.
MAT 27:60 Pues e José era ayan inteꞌ umujr xeꞌ ustabꞌir umener xeꞌ jax inteꞌ chꞌen tama ut inteꞌ tun tiaꞌ ani tuaꞌ amujca e José conda axin achamay. Entonces uqꞌuechiobꞌ ixin ucuerpo e Jesús y uchꞌabꞌu macuir e chꞌen, y de allí umaqui utiꞌ e chꞌen taca inteꞌ nuxi tun, y de allí locꞌoy ixiobꞌ.
MAT 27:61 Y ya turu e María xeꞌ tari tama e chinam Magdala taca inteꞌ María tuyejtzꞌer e mujr era.
MAT 27:62 Pues chamesna e Jesús tama e día conda e gente tama e Israel uyustes tunor tuaꞌ e día tuaꞌ e jiriar xeꞌ jax inteꞌ día antes que acꞌotoy e día tuaꞌ e jiriar. Entonces tama otronteꞌ día uwinquirobꞌ e inmojr sacerdotiobꞌ taca e fariseobꞌ cꞌotoyobꞌ tut e Pilato tuaꞌ oꞌjronobꞌ tacar.
MAT 27:63 Entonces ojronobꞌ taca e Pilato y chenobꞌ: —Cawajcꞌotoreret, cꞌarto camener e majresiaj lo que che e Jesús conda bꞌixirto ani y che: “Conda anumuy tres día nen inxin insutpa imbꞌixcꞌa tujam e chamenobꞌ”, que arobꞌna umen e Jesús.
MAT 27:64 Y tamar era aren cora soldadobꞌ tuaꞌ axin ucojcobꞌ umujr e Jesús este que acꞌapa anumuy e tres día era, porque bꞌajcꞌat watar uyajcanuarobꞌ tuaꞌ uxujchꞌiobꞌ ucuerpo e Jesús y uqꞌuechiobꞌ axin. Y jay bꞌan ani uyubꞌi uchiobꞌ, cꞌani acay uyareobꞌ e gente que sutpa bꞌixcꞌa e Jesús tujam e chamenobꞌ. Y jay bꞌan anumuy, más nojta tuaꞌ aquetpa tunor e nuxi majresiaj era, che e nuquir winicobꞌ era.
MAT 27:65 Entonces ojron e Pilato y che: —Ayan cora soldadobꞌ tiwejtzꞌer tarex. Qꞌuechic chic tuaꞌ iwirsiobꞌ e mujr y cocha icꞌani tuaꞌ ucojcobꞌ, che e Pilato.
MAT 27:66 Entonces uqꞌuechiobꞌ ixin e soldadobꞌ era esto tiaꞌ mujcbꞌir e Jesús y uwirsiobꞌ cocha ucꞌani tuaꞌ ucojcobꞌ e mujr, y de allí uturbꞌobꞌ inteꞌ nuxi sello tama ut e nuxi tun xeꞌ macar utiꞌ e chꞌen tamar.
MAT 28:1 Entonces conda cꞌapa numuy e día tuaꞌ e jiriar y conda sacojpa tama otronteꞌ día xeꞌ jax e día domingo, e María xeꞌ tuaꞌ e chinam Magdala ixin taca otronteꞌ María tuaꞌ uwirobꞌ umujr e Jesús.
MAT 28:2 Y wacchetaca checta inteꞌ nuxi yujcbꞌar tama e lugar era. Y ecmay tari inteꞌ ángel tuaꞌ Cawinquirar Dios tut e qꞌuin y cꞌotoy tuyejtzꞌer e mujr y ulocse e nuxi tun xeꞌ macar ani utiꞌ e chꞌen tamar. Y nacpat era e ángel turuan tujor e tun.
MAT 28:3 Y galan uwirnar e ángel era xeꞌ ejpray ut bꞌan cocha conda eijbꞌi ut e qꞌuin. Y sacsac ut ubꞌujc bꞌan cocha e tocar.
MAT 28:4 Y e soldadobꞌ conda uwirobꞌ tunor era bꞌactobꞌ meyra este que chinchobꞌ y quetpobꞌ bꞌan cocha cora chamenobꞌ.
MAT 28:5 Entonces ojron e ángel taca e ixictac y che: —Ira ixbꞌacta. Nen innata que war isajca e Jesús xeꞌ chamesna tut inteꞌ cruz.
MAT 28:6 Machi chꞌar tara porque sutpa bꞌixcꞌa tujam e chamenobꞌ bꞌan cocha cay uyareox. Lar chꞌujcunic iwira tiaꞌ chꞌar ani tama umujr.
MAT 28:7 Y quiquic wacchetaca tuaꞌ iware uyajcanuarobꞌ que sutpa bꞌixcꞌa e Jesús tujam e chamenobꞌ, y que axix era esto tama e departamento Galilea, y que yajaꞌ tuaꞌ uwirobꞌ ut. Jax taca era lo que quetpa tuaꞌ inwareox, che e ángel.
MAT 28:8 Entonces e ixictac locꞌoyobꞌ wacchetaca tama e mujr, war abꞌactobꞌ y war atzayobꞌ meyra, y ixiobꞌ ajner tuaꞌ uyareobꞌ uyajcanuarobꞌ e Jesús tama tunor lo que numuy era.
MAT 28:9 Y warto axiobꞌ tor e bꞌir conda checta e Jesús tutobꞌ. Entonces ojron jaxir y che: —¿Cocha turox? ¿Tucꞌa war inumse ibꞌa? che e Jesús. Y atzay e ixictac uwirobꞌ e Jesús este que ixin cotuanobꞌ tut y cay umeqꞌuiobꞌ uyoc e Jesús, y uyujtzꞌiobꞌ ut.
MAT 28:10 Y che e Jesús: —Ira ixbꞌacta. Quiquic arenic niwermanuobꞌ que ucꞌani tuaꞌ alocꞌoy axiobꞌ esto tama e departamento Galilea tiaꞌ tuaꞌ uwirenobꞌ, che e Jesús.
MAT 28:11 Pues conda wartocto alocꞌoy e ixictac, locꞌoyobꞌ cora soldadobꞌ xeꞌ war ucojcobꞌ e mujr tuaꞌ axiobꞌ tut uwinquirobꞌ e inmojr sacerdotiobꞌ. Y conda cꞌotoyobꞌ cay uchecsu tutobꞌ tunor lo que numuy.
MAT 28:12 Entonces uwinquirobꞌ e inmojr sacerdotiobꞌ umorojse ubꞌobꞌ taca e nuquir winicobꞌ y cay ojronobꞌ este que quetpobꞌ tama intera ubꞌijnusiajobꞌ tuaꞌ uyajcꞌuobꞌ meyra tumin e soldadobꞌ era.
MAT 28:13 Entonces uyareobꞌ e soldadobꞌ y chenobꞌ: —Arenic nox cocha era que conda war ixwayan tama e acbꞌar cꞌotoyobꞌ uyajcanuarobꞌ e Jesús tuaꞌ uxujchꞌiobꞌ ucuerpo y uqꞌuechiobꞌ ixin.
MAT 28:14 Pero jay acꞌotoy unata e gobernador tama tunor era, non tuaꞌ caxin cacorpesox tuaꞌ machi ixjajtzꞌa tama tunor era, che e nuquir winicobꞌ era.
MAT 28:15 Entonces e soldadobꞌ uchꞌamiobꞌ e tumin y ixin uchiobꞌ bꞌan taca cocha arobꞌnobꞌ. Y bꞌan arobꞌna tujam e gente tuaꞌ e Israel esto coner.
MAT 28:16 Entonces e once uyajcanuarobꞌ e Jesús ixiobꞌ tama e departamento Galilea esto tor inteꞌ witzir xeꞌ arobꞌnobꞌ umen e Jesús tiaꞌ tuaꞌ utajwi ubꞌobꞌ.
MAT 28:17 Y conda uwirobꞌ ut e Jesús cay uyujtzꞌiobꞌ ut. Pero ayan tin e machi unatobꞌ jay bꞌan tuaꞌ uchiobꞌ.
MAT 28:18 Entonces cꞌotoy e Jesús tuyejtzꞌerobꞌ y che: —Nen ajcꞌubꞌiren tunor e cꞌotorer lo que ayan tut e qꞌuin y lo que ayan tara tor e rum ubꞌan.
MAT 28:19 Y tamar era inwareox que quiquic tut tunor e gente tama tunor or e rum y cansenicobꞌ tuaꞌ aquetpobꞌ niwajcanuarobꞌ, y chꞌuymenic tunorobꞌ tama ucꞌabꞌa Nitata Dios, y tama nicꞌabꞌa nen xeꞌ Uyunenen e Dios, y tama ucꞌabꞌa Unawalir e Dios.
MAT 28:20 Y cansenicobꞌ tunorobꞌ tuaꞌ acꞌupseyanobꞌ tut tunor lo que cay incansiox. Y cꞌajpesic y natanic que nen turen tacarox iraj iraj este que acꞌapa tunor or e rum era, che e Jesús. Tara acꞌapa tunor niwojroner, che e Mateo.
MAR 1:1 Pues jax era ucajyesnibꞌir tama tunor e ojroner tamar e Jesucristo xeꞌ jax Uyunen e Dios.
MAR 1:2 Pues cay tunor era tamar lo que chꞌar tzꞌijbꞌabꞌir umen inteꞌ profeta xeꞌ ucꞌabꞌa Isaías xeꞌ turuan tama e onian tiempo xeꞌ cay utzꞌijbꞌa lo que e Dios uyare Uyunen y che: —Nen cꞌani inwebꞌta axin inteꞌ niman tuaꞌ upasi e bꞌir toit net, Niunenet, che e Dios.
MAR 1:3 Y e winic era cꞌani oꞌjron taca inteꞌ nuxi nuc tama inteꞌ choquem lugar y che cocha era: “Ustanic e bꞌir tuaꞌ Cawinquirar. Pasic inteꞌ bꞌir tut jaxir xeꞌ cꞌatar”, que war che que e gente ucꞌani tuaꞌ uyustes ubꞌobꞌ tuaꞌ uchꞌamiobꞌ ucꞌabꞌa Cawinquirar Jesucristo.
MAR 1:4 Pues entonces ayan inteꞌ winic xeꞌ ucꞌabꞌa Juan xeꞌ cay uchꞌuyi e gente tama inteꞌ choquem lugar y cay uyare e gente axin que ucꞌani tuaꞌ uyactobꞌ umabꞌambꞌanirobꞌ, y de allí que ucꞌani tuaꞌ achꞌujyobꞌ tama e jaꞌ tuaꞌ aquetpa chequer que cꞌumpa e Dios tacarobꞌ.
MAR 1:5 Y tunor e gente xeꞌ turobꞌ tama e departamento Judea y xeꞌ turobꞌ tama e chinam Jerusalem cay cꞌotoyobꞌ tuaꞌ uyubꞌiobꞌ lo que che e Juan era. Y conda cꞌapa uchecsuobꞌ umabꞌambꞌanirobꞌ e gente era, chꞌujyobꞌ inteꞌ intiobꞌ umen e Juan tama e xucur Jordán xeꞌ anumuy tama e choquem lugar era.
MAR 1:6 Y e bꞌujc lo que lapar umen e Juan chembꞌir taca utzutzer inteꞌ arac xeꞌ ucꞌabꞌa camello y ucajchibꞌ unac jax inteꞌ qꞌuewer. Y lo que war ucꞌuxi jaxir jax taca lo que ayan tama e cꞌopot cocha e sajc y uchabꞌir e xux.
MAR 1:7 Y jaxir war uyare e gente y che: —Ayan inteꞌ winic xeꞌ watar tanipat xeꞌ más ayan ucꞌotorer que nen. Porque nen ma tawaren nien tuaꞌ imbꞌani ut uxanabꞌ porque meyra ayan ucꞌotorer.
MAR 1:8 Pues nen era war inchꞌuyma taca e jaꞌ, pero jaxir cꞌani uchꞌuyox taca Unawalir e Dios, che e Juan.
MAR 1:9 Pues entonces tama e tiempo era locꞌoy e Jesús tama e chinam Nazaret tama e departamento Galilea tuaꞌ axin esto tama e choquem lugar tiaꞌ turu e Juan tuaꞌ achꞌujya umener tama e xucur Jordán.
MAR 1:10 Entonces chꞌujya e Jesús, y conda war alocꞌoy macuir e jaꞌ uwira que pascꞌa ut e qꞌuin tichan, y uwira Unawalir e Dios ecmay tari tujor bꞌan cocha uwirnar incojt sacsac mut.
MAR 1:11 Y wacchetaca pejcna umen Catata Dios xeꞌ turu tichan y ubꞌna cocha era: —Net Nisitzet xeꞌ war inyajta oit y xeꞌ war intzay inwiret, che e ojroner era xeꞌ tari tut e qꞌuin tichan.
MAR 1:12 Entonces wacchetaca qꞌuejcha ixin e Jesús esto tama inteꞌ choquem lugar umen Unawalir e Dios.
MAR 1:13 Y turuan yajaꞌ cuarenta día tujam e sian animal xeꞌ imbꞌacꞌajr uwirnarobꞌ, y tama e tiempo era e Satanás war uturbꞌa ubꞌa tuaꞌ upijchꞌi e Jesús, pero tariobꞌ cora angelobꞌ tuaꞌ utacre.
MAR 1:14 Pues entonces tari e día conda osena e Juan tama e cárcel, y tamar era e Jesús ixin esto tama e departamento Galilea y cay uchecsu e ojroner xeꞌ imbꞌutz tamar uchinam e Dios.
MAR 1:15 Jaxir war uyare e gente y che: —Cꞌotoyix e día conda cꞌani acay acꞌotori Cadiosir tara tor e rum. Actanic entonces tunor imabꞌambꞌanir y cꞌupseyanenic tama uyojroner e Dios xeꞌ imbꞌutz tama e corpesiaj, che e Jesús.
MAR 1:16 Entonces conda e Jesús war axana tutiꞌ e nuxi jaꞌ xeꞌ ucꞌabꞌa Galilea uwira chateꞌ ijtzꞌimbꞌirobꞌ; inteꞌ ucꞌabꞌa Simón y inteꞌ ucꞌabꞌa Andrés. Y jaxirobꞌ ajcoromobꞌ xeꞌ war uyariobꞌ uchijrobꞌ tama e jaꞌ tuaꞌ uchuquiobꞌ e chay.
MAR 1:17 Entonces ojron e Jesús y che: —Laric tanipat y nen inwajcꞌox e cꞌotorer tuaꞌ ixixin ixcorma, pero mixto jax chay yaꞌ, sino que e winicobꞌ tuaꞌ ipejca tama uyojroner e Dios, che e Jesús.
MAR 1:18 Y wacchetaca uchoqui uyactobꞌ uchijrobꞌ y ixiobꞌ taca e Jesús.
MAR 1:19 Y nacpat era war axana e Jesús tutiꞌ e nuxi jaꞌ era conda uwira otro chateꞌ winicobꞌ xeꞌ ijtzꞌimbꞌirobꞌ ubꞌan: e sacumbꞌir ucꞌabꞌa Santiago y e ijtzꞌimbꞌir ucꞌabꞌa Juan. Y ya turu utata ubꞌan xeꞌ ucꞌabꞌa Zebedeo. Y turobꞌ tor ubarco taca utatobꞌ war uyustesobꞌ uchijrobꞌ.
MAR 1:20 Entonces e Jesús upejca e Santiago y e Juan tuaꞌ axanobꞌ tacar, y wacchetaca uyactobꞌ utatobꞌ xeꞌ jax e Zebedeo taca e barco y taca tunor umanobꞌ, y locꞌoy ixiobꞌ tupat e Jesús.
MAR 1:21 Entonces ixin e Jesús tacar uyajcanuarobꞌ esto tama e chinam Capernaum xeꞌ turu tama e departamento Galilea. Y conda cꞌotoy e día tuaꞌ e jiriar xeꞌ jax inteꞌ día sábado, ochoy e Jesús tama e sinagoga y cay ucanse e gente.
MAR 1:22 Y cay ubꞌijnu uwirobꞌ e gente era tama tunor uyojroner e Jesús porque galan locꞌoy tunor ucanseyaj. Pues jaxir machi canseyan bꞌan cocha inteꞌ ajcanseyaj tama uley e Moisés sino que jaxir canseyan tacar ucꞌotorer e Dios.
MAR 1:23 Y tama e sinagoga era ayan inteꞌ winic xeꞌ chucur uyalma umen inteꞌ mabꞌambꞌan mein xeꞌ cay ojron taca inteꞌ nuxi nuc y che:
MAR 1:24 —¿Tucꞌa tuaꞌ war oꞌse abꞌa tacaron, net xeꞌ Jesuset xeꞌ tuaꞌ e chinam Nazaret? ¿Tariet ca tuaꞌ acꞌapa atijreson era? Canata que net jax xeꞌ erachet tuaꞌ e Dios, che e mabꞌambꞌan meinobꞌ era.
MAR 1:25 Entonces cay ojron e Jesús y ucꞌaye e sian mabꞌambꞌan mein y che: —Chꞌanchenic, y loqꞌuenic tama uyalma e winic era, che e Jesús.
MAR 1:26 Entonces e sian mabꞌambꞌan mein cay ucucru e winic taca inteꞌ ataque y cay aruobꞌ taca inteꞌ nuxi nuc, y de allí locꞌoyobꞌ tama e winic era.
MAR 1:27 Y bꞌactobꞌ tunor e gente tama e sinagoga conda uwirobꞌ lo que numuy tama e winic y cay uyubꞌi ubꞌobꞌ jaxobꞌ taca y chenobꞌ: —Pues ¿tucꞌa era? ¿Y tucꞌa e canseyaj era que ma tiaꞌ coybꞌi que war uche taca e cꞌotorer? Y uyare e mabꞌambꞌan meinobꞌ tuaꞌ alocꞌoyobꞌ tama e winic y obꞌna umenerobꞌ, che e gente era jaxobꞌ taca.
MAR 1:28 Y wacchetaca cꞌotoy natanwa lo que cay uche e Jesús era tama tunor or e departamento Galilea.
MAR 1:29 Entonces locꞌoy e Jesús taca e Santiago y e Juan tama e sinagoga era y ixiobꞌ esto tama uyotot e Simón Pedro y e Andrés.
MAR 1:30 Y conda yopobꞌ tama e otot cay uwirobꞌ que upixam ixic e Pedro chꞌar tama uchꞌacteꞌ y war apuruy. Entonces uyareobꞌ e Jesús que ajmuac e ixic era.
MAR 1:31 Y tamar era e Jesús ochoy tiaꞌ chꞌar e ixic y uchuqui ucꞌabꞌ y cay utacre achpa, y wacchetaca locꞌoy e purer y achpa e ixic y cay usicbꞌa tucꞌa tuaꞌ uyajcꞌu tuaꞌ ucꞌuxiobꞌ e ajwarobꞌ era.
MAR 1:32 Entonces conda war anamtzꞌa e qꞌuin y war acbꞌare cay taresnobꞌ meyra ajmuacobꞌ tut e Jesús. Y ayan tin e chucur umen inteꞌ mabꞌambꞌan mein ubꞌan.
MAR 1:33 Y tunor e gente xeꞌ turobꞌ tama e chinam era cay umorojse ubꞌobꞌ tuyejtzꞌer e otot tiaꞌ turu e Jesús.
MAR 1:34 Y jaxir cay utzꞌacpes ixin meyra gente xeꞌ war ucojcobꞌ e sian muaquir, y cay uyajnes locꞌoy tunor e sian mabꞌambꞌan mein, pero machi war uyacta tuaꞌ oꞌjronobꞌ e mabꞌambꞌan meinobꞌ era porque jaxirobꞌ war unatobꞌ chi e Jesús.
MAR 1:35 Pues conda merato asacojpa, achpa e Jesús y locꞌoy tama e chinam era y ixin esto tama inteꞌ choquem lugar tuaꞌ ucꞌajti taca e Dios.
MAR 1:36 Pero conda e Simón Pedro uwira que mamajchi e Jesús, ixin taca tunor upiarobꞌ tuaꞌ uchꞌujcobꞌ e Jesús.
MAR 1:37 Y conda cꞌotoy utajwiobꞌ, ojron e Pedro y che: —Tunor e sian gente war usicbꞌetobꞌ, che e Pedro.
MAR 1:38 Pero ojron e Jesús y che: —Incuic tama e inmojr lugar xeꞌ aquetpobꞌ ya taca porque ucꞌani tuaꞌ inchecsu uyojroner e Dios tut e gente tama tunor or e lugar era porque tamar era tarien, che e Jesús.
MAR 1:39 Entonces e Jesús ixin xana tama tunor or e lugar tama e departamento Galilea, war acanseyan tama inteꞌ inteꞌ sinagoga tic taca tiaꞌ war axin, y war uyajnes axin e mabꞌambꞌan mein tic taca ubꞌan.
MAR 1:40 Pues cꞌotoy inteꞌ winic tuyejtzꞌer e Jesús xeꞌ ayan cora sian chec tut xeꞌ ucꞌabꞌa lepra xeꞌ uyacta ubꞌa cotuan tut e Jesús y che: —Jay net acꞌani atzꞌaquen tama nimuaquir era uyubꞌiet porque ayan meyra acꞌotorer, che e winic.
MAR 1:41 Entonces e Jesús uyajta ut e winic era y ucꞌatbꞌu ucꞌabꞌ tama ujor e winic y che: —Nen incꞌani. Inware e chec era que loqꞌuen quiqui tama e winic era, che e Jesús.
MAR 1:42 Y wacchetaca satpa e sian chec lo que ayan ani tama e winic y quetpa tzꞌacpesbꞌir inyajrer.
MAR 1:43 Entonces arobꞌna e winic umen e Jesús que machi tuaꞌ uchecsu tut e gente lo que chena tacar. Pero antes que ebꞌtana ixin e winic e Jesús uyare y che:
MAR 1:44 —Ubꞌin, ira aware nien inteꞌ winic tama tunor era, sino que quiqui tama e templo tama e chinam Jerusalem y chectes abꞌa tut inteꞌ sacerdote y ajcꞌun incojt arac tuaꞌ achamesna bꞌan cocha chꞌar tzꞌijbꞌabꞌir tama uley e Moisés. Y tamar era erer acꞌotoy unatobꞌ que net tzꞌacpesbꞌiret inyajrer, che e Jesús.
MAR 1:45 Pero e winic machi obꞌian tamar lo que arobꞌna umen e Jesús y conda locꞌoy cay uchecsu tut tunor e gente tic taca tamar lo que numuy. Y tamar era e Jesús machi ixto uyubꞌi oꞌchoy tama inteꞌ chinam, sino que quetpa patir tama tunor e chinamobꞌ tiaꞌ matucꞌa e gente. Pero warto asicbꞌana umen e gente tama tunor or e lugar y jaxir war uchꞌamiobꞌ.
MAR 2:1 Entonces cꞌapa numuy cora día conda turu e Jesús tama e choquem lugar, y de allí sutpa ixin esto tama e chinam Capernaum. Pero cꞌotoy unatobꞌ e gente wacchetaca que sutpa tari e Jesús otronyajr esto tama uyotot e Simón Pedro.
MAR 2:2 Y wacchetaca cay cꞌotoyobꞌ tama e otot era este que bꞌutcꞌa ixto yaꞌ y ma cocha erer uwajpi otronteꞌ winic macu y nien tama e puerta mamajchi más erer oꞌchoy. Y e Jesús cay ucanse uyojroner e Dios tutobꞌ.
MAR 2:3 Y tamar era cꞌotoyobꞌ cuatro winicobꞌ xeꞌ war uqꞌuechiobꞌ axin inteꞌ winic xeꞌ chamen ucuerpo tama inteꞌ chꞌacteꞌ.
MAR 2:4 Pero cocha ayan e sian gente xeꞌ war ubꞌutꞌiobꞌ e otot era tiaꞌ turu e Jesús, ma cocha erer oꞌchoyobꞌ macu. Y tamar era uqꞌuechiobꞌ ixin e winic esto tujor e otot y cay upasiobꞌ ujor e otot tuaꞌ uyubꞌi uyemsiobꞌ e ajmuac era tama uchꞌacteꞌ esto tut e Jesús macuir e otot.
MAR 2:5 Y conda e Jesús uwira cobꞌa ucꞌupesiaj e winicobꞌ era cay ojron taca e winic xeꞌ chamen ucuerpo y che: —Nimaxtaquet, cꞌani incꞌumpa tacaret tama tunor amabꞌambꞌanir, che e Jesús.
MAR 2:6 Pero ayan cora ajcanseyajobꞌ tama uley e Moisés xeꞌ turobꞌ tama e otot era xeꞌ cay ubꞌijnuobꞌ tamar uyojroner e Jesús y chenobꞌ:
MAR 2:7 “¿Tucꞌa tuaꞌ war oꞌjron cocha era e winic era? Porque tamar uyojroner era war uqꞌuijnes e Dios. Porque mamajchi uyubꞌi usati e mabꞌambꞌanir sino que jax taca e Dios”, xeꞌ war ubꞌijnuobꞌ e nuquir winicobꞌ era jaxobꞌ taca.
MAR 2:8 Pero wacchetaca cꞌotoy unata e Jesús tama uyalma tucꞌa war ubꞌijnuobꞌ e winicobꞌ era y tamar era ojron y che: —¿Tucꞌa tuaꞌ war ibꞌijnu que mabꞌambꞌan lo que war inche?
MAR 2:9 Ma erer inata jay erach niwojroner jay inware que cꞌumpix e Dios tama imabꞌambꞌanir porque ma chequer tiut jay ayan e cꞌumpar tama imabꞌambꞌanir o jay machi. Pero jay inware: “Achpen cuchu achꞌacteꞌ y quiqui tama oꞌtot”, wacchetaca erer iwira jay erach niwojroner jay achpa axana e winic.
MAR 2:10 Entonces cꞌani inwirsiox era que nen xeꞌ Uyunenen e winic ayan nicꞌotorer tara tor e rum tuaꞌ incꞌumpa tama umabꞌambꞌanir inteꞌ winic, che e Jesús. Entonces e Jesús uyare e winic xeꞌ chamen ucuerpo y che:
MAR 2:11 —Achpen waren y chꞌama achꞌacteꞌ y cuchu quiqui tama oꞌtot, che e Jesús.
MAR 2:12 Entonces achpa e winic xeꞌ chamen ani ucuerpo, uchꞌami uchꞌacteꞌ y locꞌoy ixin. Y bꞌan uche tut tunor e gente xeꞌ turobꞌ era. Y tamar era tunor e gente cay bꞌactobꞌ tamar y cay utattzꞌiobꞌ ucꞌabꞌa e Dios y chenobꞌ: —Ma tiaꞌ cawira numuy lo que war uche e winic era, chenobꞌ tunor e gente era.
MAR 2:13 Pues entonces sutpa ixin e Jesús esto tutiꞌ e nuxi jaꞌ xeꞌ ucꞌabꞌa Galilea. Y cay yopa meyra gente tut tuaꞌ uyubꞌiobꞌ uyojroner. Entonces jaxir cay ucansiobꞌ.
MAR 2:14 Y conda e Jesús war axana cay uwira e Mateo xeꞌ jax uyunen e Alfeo. Y e Mateo era turu tut inteꞌ mesa war uchꞌami e tumin tuaꞌ e gente lo que quetpa tuaꞌ utoyobꞌ e gobierno. Entonces e Jesús uyare e Mateo y che: —Incoꞌ tacaren, che e Jesús. Entonces achpa e Mateo y locꞌoy tuaꞌ axin taca e Jesús.
MAR 2:15 Y nacpat era ixin e Jesús esto tama uyotot e Mateo y cay weꞌ tacar. Y tama e otot era ayan meyra ajmorojseyajobꞌ tumin tuaꞌ e gobierno bꞌan cocha e Mateo, y ayanto más ajmabꞌambꞌanirobꞌ ubꞌan xeꞌ turobꞌ tor e mesa war awiobꞌ taca e Jesús y taca uyajcanuarobꞌ. Y ayanto más gente tama e otot era ubꞌan xeꞌ war axanobꞌ tupat e Jesús iraj iraj.
MAR 2:16 Y cꞌotoy cora winicobꞌ xeꞌ ajcanseyajobꞌ tama uley e Moisés taca cora fariseobꞌ xeꞌ war achꞌujcsanobꞌ. Y conda cay uwirobꞌ tucꞌa war anumuy que e Jesús war aweꞌ taca tunor e ajmabꞌambꞌanirobꞌ era, jaxirobꞌ cay ojronobꞌ taca uyajcanuarobꞌ e Jesús y chenobꞌ: —¿Tucꞌa tuaꞌ war aweꞌ Iwajcanseyaj taca e ajmorojseyajobꞌ tumin tuaꞌ e gobierno y taca tunor e sian ajmabꞌambꞌanirobꞌ? che e nuquir winicobꞌ era.
MAR 2:17 Pero e Jesús war uyubꞌi tunor era y che: —Tin e majax ajmuac machi ucꞌani inteꞌ ajtzꞌaconer sino que jax taca tin e ajmuac. Nen tarien majax tuaꞌ impejca tin e unatobꞌ que imbꞌutzobꞌ, sino que tarien tuaꞌ impejca tin e satrem turobꞌ, che e Jesús.
MAR 2:18 Pues entonces tama inyajr ayan cora ajcanuarobꞌ tuaꞌ e Juan xeꞌ ajchꞌuymar y cora ajcanuarobꞌ tuaꞌ e fariseobꞌ xeꞌ machi war awiobꞌ tuaꞌ ucꞌajtiobꞌ taca e Dios. Entonces yopobꞌ cora winicobꞌ tut e Jesús y cay uyubꞌiobꞌ tuaꞌ y chenobꞌ: —Pues uyajcanuarobꞌ e Juan xeꞌ ajchꞌuymar y uyajcanuarobꞌ e fariseobꞌ machi war awiobꞌ tuaꞌ ucꞌajtiobꞌ taca e Dios iraj iraj, pero awajcanuarobꞌ tabꞌa majax bꞌan war uchiobꞌ, che e winicobꞌ era.
MAR 2:19 Y che e Jesús: —Erer cabꞌijnu que niwajcanuarobꞌ larobꞌ tacar tin e pejcnobꞌ tuaꞌ acꞌotoyobꞌ tama inteꞌ nujbꞌiar. Pues conda war atzayobꞌ taca e noxipbꞌir tama inteꞌ nojqꞌuin cocha era ¿erer ca ubꞌijnuobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios? Pues conda turuto e noxipbꞌir ma cocha erer.
MAR 2:20 Pero watar e día conda axin aloqꞌuesna e noxipbꞌir tutobꞌ tama e nojqꞌuin era y entonces tin e pejcbꞌirobꞌ era erer uyactobꞌ tuaꞌ awiobꞌ tuaꞌ ucꞌajtiobꞌ taca e Dios. Y bꞌan ubꞌan conda inxin inlocꞌoy tara tor e rum, cꞌani ubꞌijnuobꞌ niwajcanuarobꞌ tuaꞌ uyactobꞌ tuaꞌ awiobꞌ tuaꞌ ucꞌajtiobꞌ taca e Dios.
MAR 2:21 ’Mamajchi axin uxuri imbꞌijc bꞌujc xeꞌ imbꞌutz tuaꞌ utaqꞌui tama inteꞌ tzuc bꞌujc. Porque jay bꞌan ani uche e bꞌujc xeꞌ tacbꞌir era axin uchꞌijse más nojta e chꞌen tama e tzuc bꞌujc, y de allí matucꞌa ucꞌampibꞌir e bꞌujc lo que utaqꞌui tama e tzuc bꞌujc era ubꞌan.
MAR 2:22 Pues tin e war uche e vino axin uyari e vino xeꞌ intocto achena tama inteꞌ bolsa xeꞌ chembꞌir taca e qꞌuewer xeꞌ intocto achena ubꞌan. Pero mamajchi axin uyari e vino xeꞌ intocto achena tama inteꞌ bolsa xeꞌ chembꞌir taca e qꞌuewer xeꞌ bꞌitzꞌemix ut porque jay bꞌan uche, entonces conda acay oꞌjmay e vino y axin atꞌabꞌay, axin awejrtzꞌa e qꞌuewer cocha machi uyubꞌi abꞌitzꞌa más, y asatpa atucpa e vino y acꞌapa e qꞌuewer ubꞌan. Bꞌan che e Jesús tuaꞌ uchecsu tut e gente que ma cocha erer uyapru e canseyaj tuaꞌ e Jesús taca e onian bꞌijnusiaj tuaꞌ e gente.
MAR 2:23 Pues tama inteꞌ día tuaꞌ e jiriar war axana e Jesús taca tunor uyajcanuarobꞌ macuir cora trigo. Y conda uyajcanuarobꞌ cay jajpnobꞌ umen e winar cay uwotzꞌiobꞌ locꞌoy ut e trigo y cay umuxrobꞌ upat tama ucꞌabꞌobꞌ y cay uyujtobꞌ locꞌoy usojqꞌuir y cay ucꞌuxiobꞌ ut e trigo era.
MAR 2:24 Y ayan cora fariseobꞌ xeꞌ war axanobꞌ tupat e Jesús xeꞌ war uwirobꞌ lo que war uchiobꞌ uyajcanuarobꞌ era. Entonces cay uyareobꞌ e Jesús y chenobꞌ: —Chꞌujcun awira que awajcanuarobꞌ war uchiobꞌ inteꞌ patnar que machi acꞌajna tuaꞌ uchiobꞌ umen uley e Moisés tama inteꞌ día tuaꞌ e jiriar cocha era, che e fariseobꞌ era.
MAR 2:25 Y che e Jesús: —¿Machi ca iche leer lo que chꞌar tzꞌijbꞌabꞌir tama uyojroner e Dios tama e David taca upiarobꞌ conda jajpnobꞌ umen e winar conda war axanobꞌ?
MAR 2:26 Pues numuy tunor era conda quetpa Abiatar cocha uwinquir e inmojr sacerdotiobꞌ. Pues ochoy e David macuir utemplo e Dios y cay uchꞌami cora pan xeꞌ quetpa ajcꞌubꞌir e Dios. Y mix erer ani ucꞌuxi e pan era nien jaxir y nien upiarobꞌ sino que ajtaca e sacerdote xeꞌ erer ucꞌuxi. Pero conda jajpnobꞌ umen e winar, e David cay uchꞌami e pan era y cay uyajcꞌu upiarobꞌ y cay ucꞌuxiobꞌ tunorobꞌ, che e Jesús.
MAR 2:27 Entonces ojron otronyajr e Jesús y che: —Pues e día tuaꞌ e jiriar chembꞌir umen e Dios tuaꞌ utacre e winicobꞌ, y majax tuaꞌ aquetpa tujor e winicobꞌ.
MAR 2:28 Y tamar era cꞌani inwareox que nen xeꞌ Uyunenen e winic ayan nicꞌotorer tuaꞌ inware tucꞌa erer uche inteꞌ y tucꞌa ma erer uche tama e día era xeꞌ jax inteꞌ día tuaꞌ e jiriar, che e Jesús.
MAR 3:1 Entonces ixin e Jesús esto tama inteꞌ chinam y ochoy tama inteꞌ sinagoga. Y ya turu inteꞌ winic xeꞌ taquin ucꞌabꞌ tama e sinagoga era.
MAR 3:2 Y ayan ubꞌan cora fariseobꞌ yajaꞌ xeꞌ war uchꞌujcu uwirobꞌ tunor lo que war uche e Jesús, war usicbꞌobꞌ cocha tuaꞌ utuchꞌiobꞌ e Jesús que mabꞌambꞌan lo que war uche. Y tamar era cꞌani uwirobꞌ jay cꞌani utzꞌacpes e winic era tama inteꞌ día tuaꞌ e jiriar.
MAR 3:3 Entonces e Jesús upejca e winic xeꞌ taquin ucꞌabꞌ y che: —Achpen lar tara tut tunor e gente, che e Jesús.
MAR 3:4 Y de allí e Jesús uyubꞌi tuaꞌ tunor e gente yajaꞌ y che: —¿Tucꞌa che tama uley e Moisés que erer uche inteꞌ tama inteꞌ día tuaꞌ e jiriar? ¿Erer ca cache lo que imbꞌutz tama inteꞌ día tuaꞌ e jiriar? ¿O más ca bueno tuaꞌ cache lo que mabꞌambꞌan tama inteꞌ día tuaꞌ e jiriar? ¿Bueno ca tuaꞌ cacorpes ucuxtar inteꞌ tama inteꞌ día tuaꞌ e jiriar? ¿O más ca bueno tuaꞌ cachamsan tama inteꞌ día tuaꞌ e jiriar? che e Jesús. Pero mamajchi ojron.
MAR 3:5 Entonces qꞌuijna e Jesús y cay uwira ut inteꞌ inteꞌ winic xeꞌ turobꞌ tut era, pero war atzꞌintzꞌa tama uyalma ubꞌan umen que machi cꞌani uwirobꞌ jay ayan lo que ucꞌani e winic era. Entonces e Jesús upejca e winic xeꞌ taquin ucꞌabꞌ y che: —Tutzꞌu acꞌabꞌ, che e Jesús. Y conda ututzꞌi ucꞌabꞌ tzꞌacpesna inyajrer y quetpa bꞌan cocha turu ani.
MAR 3:6 Entonces locꞌoy ixiobꞌ e fariseobꞌ, war aqꞌuijnobꞌ y cay ubꞌijnuobꞌ taca tin e tuobꞌ e partido tuaꞌ e Herodes cocha tuaꞌ uchamsiobꞌ e Jesús.
MAR 3:7 Entonces locꞌoy e Jesús tama e sinagoga era y ixin taca uyajcanuarobꞌ esto tutiꞌ e nuxi jaꞌ Galilea. Y ayan meyra gente xeꞌ war axanobꞌ tupat e Jesús xeꞌ tuobꞌ e departamento Galilea.
MAR 3:8 Pero conda cꞌotoy unatobꞌ e sian gente xeꞌ turobꞌ tama tunor or e lugar era que e Jesús war uche e sian milagro, cay locꞌoyobꞌ tama inteꞌ inteꞌ lugar tuaꞌ axin uwirobꞌ e Jesús. Y locꞌoyobꞌ tama e departamento Judea, y tama e chinam Jerusalem, y tama e lugar Idumea, y tama e lugar xeꞌ turu tama einxejr e xucur Jordán, y ayan tin e locꞌoyobꞌ tama e chinam Tiro y tama e chinam Sidón tuaꞌ axin uwirobꞌ e Jesús.
MAR 3:9 Y tamar era conda e Jesús uwira e sian gente era xeꞌ war acꞌotoyobꞌ tut jaxir, uyare uyajcanuarobꞌ tuaꞌ axin utares inteꞌ barco tuaꞌ aquetpa turix tuaꞌ acꞌampesna umener jay ucꞌani, porque e sian gente era war utacsu ubꞌobꞌ y war uquerejbꞌa ubꞌobꞌ axin y jaxir quetpa tuyuxinobꞌ.
MAR 3:10 Entonces cay utzꞌacpes meyra gente y tamar era tin e ajmuacto war utacsu ubꞌobꞌ tuaꞌ oꞌchoy tujam e gente tuaꞌ upijchꞌi motor jax taca ubꞌujc e Jesús porque tamar era war unatobꞌ que cꞌani atzꞌacpesnobꞌ.
MAR 3:11 Y tunor tin e chucur uyalma umen inteꞌ mabꞌambꞌan mein, conda cay uwirobꞌ ut e Jesús cay cotuanobꞌ tut y cay aruobꞌ taca inteꞌ nuxi nuc y chenobꞌ: —Net jax Uyunenet e Dios, che e sian mabꞌambꞌan mein era.
MAR 3:12 Pero e Jesús uyare e sian mabꞌambꞌan mein que machi tuaꞌ uyare e gente que jaxir jax Uyunen e Dios.
MAR 3:13 Pues entonces tꞌabꞌay ixin e Jesús esto tujor inteꞌ witzir tiaꞌ cay upejca tin tin xeꞌ ucꞌani xeꞌ turobꞌ tujam uyajcanuarobꞌ tuaꞌ aquetpobꞌ uyapostolobꞌ, y jaxirobꞌ tariobꞌ tuyejtzꞌer.
MAR 3:14 Entonces usicbꞌa doce tujam uyajcanuarobꞌ era tuaꞌ axanobꞌ tacar y tuaꞌ uyebꞌta axiobꞌ tuaꞌ uchecsuobꞌ uyojroner e Jesús tama tunor or e lugar.
MAR 3:15 Y cay uyajcꞌu uyajcanuarobꞌ e cꞌotorer tuaꞌ utzꞌacpesobꞌ tin e ajmuac y tuaꞌ uyajnesobꞌ axin e sian mabꞌambꞌan mein xeꞌ ayan tama e winicobꞌ.
MAR 3:16 Y jax era ucꞌabꞌobꞌ e doce uyapostolobꞌ e Jesús: Bꞌajxan quetpa sicbꞌabꞌir e Simón xeꞌ ajcꞌuna ucꞌabꞌa Pedro ubꞌan.
MAR 3:17 Y de allí quetpa sicbꞌabꞌir e Santiago taca uwijtzꞌin xeꞌ jax e Juan xeꞌ uyunenobꞌ e Zebedeo. Pues e Jesús uyajcꞌu ucꞌabꞌobꞌ e chateꞌ winicobꞌ era que Boanerges xeꞌ war che: “Uyunenobꞌ e quiricnar ut e qꞌuin.”
MAR 3:18 Y quetpa sicbꞌabꞌir e Andrés taca e Felipe y e Bartolomé, y quetpa sicbꞌabꞌir e Mateo y e Tomás y e Santiago xeꞌ jax uyunen e Alfeo. Y quetpa sicbꞌabꞌir e Tadeo y e Simón xeꞌ jax ani tuaꞌ inteꞌ partido político xeꞌ ucꞌabꞌa Cananista.
MAR 3:19 Y quetpa sicbꞌabꞌir e Judas Iscariote xeꞌ jax xeꞌ ixin utuchꞌi e Jesús tuaꞌ ajajpna. Entonces ixin ochoy e Jesús tama inteꞌ otot taca tunor uyajcanuarobꞌ.
MAR 3:20 Y cay umorojse ubꞌobꞌ e sian gente tut e Jesús y uyajcanuarobꞌ este que ma jabꞌarobꞌ nien tuaꞌ awiobꞌ.
MAR 3:21 Pero conda cꞌotoy unatobꞌ utuꞌ y uwijtzꞌinobꞌ e Jesús tunor lo que war unumse ubꞌa, cꞌotoyobꞌ tuaꞌ ujajpiobꞌ y tuaꞌ uqꞌuechiobꞌ axin tujam e sian gente era porque chenobꞌ que jaxir tijrpa usasaꞌ.
MAR 3:22 Y ayan cora ajcanseyajobꞌ tama uley e Moisés xeꞌ tariobꞌ tama e chinam Jerusalem xeꞌ cay ojronobꞌ y chenobꞌ: —E winic era ayan ucꞌotorer e Beelzebú xeꞌ jax uwinquir e inmojr mabꞌambꞌan meinobꞌ, y tamar era ayan ucꞌotorer tuaꞌ uyajnes axin e inmojr mabꞌambꞌan meinobꞌ era, che e nuquir winicobꞌ era.
MAR 3:23 Entonces e Jesús upejca e winicobꞌ era y cay canseyan taca inteꞌ ojroner xeꞌ mucur cora, y tamar era uyubꞌi tuobꞌ y che: —¿Cocha tuaꞌ aꞌjnesna e Satanás umen taca e Satanás?
MAR 3:24 Jay e gente tama inteꞌ chinam acay uxere ubꞌobꞌ entonces tin e war acꞌotori tama e chinam era ma cocha erer aquetpa ajcꞌotorer meyra tiempo cocha war atijrpa axin tunor uchinam.
MAR 3:25 Y bꞌan e gente tama ingojr otot, jay axin uxere ubꞌobꞌ entonces ma cocha erer aquetpa intera e otot era y aquetpa tuaꞌ atijrpa tunor.
MAR 3:26 Y bꞌan ubꞌan tama e Satanás, jay jaxir axin asutpa tujor taca y acay uyajnes ani tin e turu umener, entonces ma cocha erer aquetpa intera ucꞌotorer sino que ya tuaꞌ acꞌapa tunor ucꞌotorer era.
MAR 3:27 Pues mamajchi erer oꞌchoy tama uyotot inteꞌ winic xeꞌ aqꞌuecꞌo tuaꞌ ulocse lo que ayan tuaꞌ jay machi axin ucachi bꞌajxan. Pues e Satanás bꞌan cocha e winic era xeꞌ aqꞌuecꞌo xeꞌ war ucojco tunor lo que ayan macuir uyotot. Pero jay watar otronteꞌ winic xeꞌ más aqꞌuecꞌo bꞌan cocha nen xeꞌ Uyunenen e winic, entonces e winic xeꞌ más aqꞌuecꞌo ucꞌani tuaꞌ ucucru e ajyum otot y ucachi uchꞌabꞌu, y de allí erer axin apojrsan.
MAR 3:28 ’Y cꞌani inwareox era que Cadiosir erer acꞌumpa taca tunor e winicobꞌ tama tunor lo que uchiobꞌ xeꞌ mabꞌambꞌan y tama tunor e mabꞌambꞌan ojroner.
MAR 3:29 Pero jay axin oꞌjron inteꞌ upater Unawalir e Dios, ma tiaꞌ tuaꞌ acꞌumpa e Dios taca inteꞌ xeꞌ oꞌjron cocha era, y ma tiaꞌ tuaꞌ acorpesna tama e mabꞌambꞌanir era. Bꞌan che e Jesús uyare e winicobꞌ era.
MAR 3:30 Pues ojron e Jesús cocha era umen que jaxirobꞌ cay ojronobꞌ upater que ayan inteꞌ mabꞌambꞌan mein tamar.
MAR 3:31 Y warto oꞌjron e Jesús taca tunor e gente era conda cꞌotoyobꞌ utuꞌ y uwijtzꞌinobꞌ. Pero machi ochoyobꞌ macu sino que jax taca uyebꞌtobꞌ inteꞌ ojroner tut e Jesús que jaxirobꞌ cꞌani oꞌjronobꞌ tacar.
MAR 3:32 Entonces tin e turobꞌ tuyejtzꞌer e Jesús ojron y che: —Turobꞌ atuꞌ y awijtzꞌinobꞌ patir, war usicbꞌetobꞌ, chenobꞌ.
MAR 3:33 Y e Jesús che: —¿Chi aquetpa nituꞌ y chi aquetpobꞌ niwijtzꞌinobꞌ? che e Jesús.
MAR 3:34 Entonces cay uchꞌujcu uwira tunor e winicobꞌ y e ixictac xeꞌ war aturuanobꞌ tuyejtzꞌer y che: —Jax era nituꞌ y jax era niwijtzꞌinobꞌ.
MAR 3:35 Porque tunor tin e axin uchiobꞌ lo que ucꞌani e Dios xeꞌ turu tichan tut e qꞌuin jaxobꞌ tuaꞌ aquetpobꞌ niwijtzꞌinobꞌ y niwijtanobꞌ, y jax tuaꞌ aquetpobꞌ nituꞌ, che e Jesús.
MAR 4:1 Pues tama e día era locꞌoy e Jesús tama e otot tiaꞌ turu y ixin esto tutiꞌ e nuxi jaꞌ y cay bꞌoruobꞌ meyra gente tut y jaxir cay canseyan. Pero cocha bꞌutcꞌa tunor or e lugar era taca e sian gente, e Jesús ixin ochoy turuan tama inteꞌ barco y uxantesobꞌ cora e barco tor e jaꞌ tuyejtzꞌer tiaꞌ bꞌutꞌur e gente tor e taquin rum.
MAR 4:2 Entonces e Jesús cay canseyan taca meyra ojroner xeꞌ mucur cora, y tamar ucanseyaj era cay ojron y che:
MAR 4:3 —Ubꞌinic tunor era, ayan inteꞌ ojroner tama inteꞌ ajpatnar xeꞌ locꞌoy tuaꞌ apacma tama uchor.
MAR 4:4 Y tamar upacmar era pusbꞌir taca uche ut e semilla. Y ayan ut e semilla xeꞌ cꞌaxi tut e bꞌir xeꞌ conda irna umen e mut ucꞌopiobꞌ ucꞌuxiobꞌ.
MAR 4:5 Y ayan ut e semilla xeꞌ cꞌaxi macuir e cherem tun tiaꞌ imbꞌijc taca e rum, y wacchetaca cuxpa ut e semilla era umen que majax intam e rum.
MAR 4:6 Pero conda fuerteran e qꞌuin acay aluccha uyopor, y cocha ma tiaꞌ tuaꞌ awiri más, taqui.
MAR 4:7 Y ayan ut e semilla xeꞌ cꞌaxi macuir e sian tꞌix, y conda acuxpa ut e semilla era cuxpa macuir e sian tꞌix, y umen e tꞌix era machi actana chꞌiꞌ, y tamar era matucꞌa uyutir uyari.
MAR 4:8 Pero ayan ut e semilla xeꞌ cꞌaxi tama or e rum xeꞌ incꞌun. Cuxpa y chꞌiꞌ, y meyra uyutir uyari tama ingojr ut e semilla era. Y conda cay cꞌawan ayan tin e uyari treinta ut tama ingojr ut, y ayan tin e uyari sesenta ut tama ingojr ut, y ayan tin e uyari cien ut tama ingojr ut.
MAR 4:9 ’Tunor tin e ayan uchiquin, uyubꞌic niwojroner era. Tara acꞌapa e ojroner, che e Jesús.
MAR 4:10 Pues entonces conda e Jesús turu ubꞌajner, tin e turobꞌ tuyejtzꞌer taca e doce uyajcanuarobꞌ cay uyubꞌiobꞌ tuaꞌ; cꞌani unatobꞌ tucꞌa war che e ojroner era xeꞌ mucur cora.
MAR 4:11 Y che e Jesús: —Pues tama e onian tiempo quetpa mucur cocha tuaꞌ aquetpa uchinam e Dios, pero coner cꞌani achectesna tunor era tiut. Pero tut e inmojr gente era machi tuaꞌ achectesna tunor era, y tamar era war onjron tacarobꞌ tama inteꞌ ojroner xeꞌ mucur cora.
MAR 4:12 Bꞌan tuaꞌ anumuy porque chꞌar tzꞌijbꞌabꞌir tama uyojroner e Dios que: “Motor que eꞌrna umenerobꞌ pero ma chequer tutobꞌ tucꞌa war uwirobꞌ, y motor que war oꞌbꞌianobꞌ pero machi unatobꞌ tucꞌa war che lo que war uyubꞌiobꞌ, porque jay uyubꞌiobꞌ ani entonces cꞌani ani uyactobꞌ umabꞌambꞌanirobꞌ, y cꞌani ani acꞌumpa e Dios tacarobꞌ.” Bꞌan chꞌar tzꞌijbꞌabꞌir tama uyojroner e Dios, che e Jesús.
MAR 4:13 Y che e Jesús: —¿War ca inata lo que war che e ojroner era xeꞌ mucur cora? Y jay machi war inata, entonces ¿cocha tuaꞌ ixcꞌotoy inata lo que war che otronteꞌ ojroner xeꞌ mucur cora?
MAR 4:14 Pues cꞌani inchecsu lo que war che e ojroner xeꞌ mucur cora tama e ajpacmar. Pues e ajpatnar era bꞌan cocha inteꞌ xeꞌ war uchecsu uyojroner e Dios tamar e corpesiaj.
MAR 4:15 Y ut e semilla xeꞌ cꞌaxi tut e bꞌir xeꞌ cꞌojpa umen e mut lar tacar tin e uyubꞌi uyojroner e Dios. Pero wacchetaca watar e Satanás tuaꞌ ulocse e ojroner era lo que ochoy ani tama uyalma.
MAR 4:16 Y ut e semilla xeꞌ cꞌaxi macuir e cherem tun tiaꞌ imbꞌijc taca e rum lar tacar tin e uyubꞌi uyojroner e Dios y atzay uchꞌamiobꞌ.
MAR 4:17 Pero cocha machi wiri meyra e ojroner era tama uyalmobꞌ, acꞌupseyanobꞌ tama e Dios cora, pero conda watar lo que uche unumse ubꞌobꞌ, wacchetaca uyactobꞌ e Dios y axiobꞌ.
MAR 4:18 Y ut e semilla xeꞌ cꞌaxi macuir e sian tꞌix lar tacar tin e uyubꞌi uyojroner e Dios y uchꞌami,
MAR 4:19 pero de allí acay ubꞌijnu meyra tama tunor lo que ayan tara tor e rum y war ubꞌijnu cocha era: “Pero nen cꞌani inchonma más tuaꞌ abꞌoro nitumin, y nen cꞌani inwejta inche tunor lo que ayan tara tor e rum”, xeꞌ ubꞌijnu inteꞌ. Y umen tunor e majresiaj era acꞌapa oꞌcꞌoy lo que uchꞌami ani tama e Dios, y aquetpa lar tacar e teꞌ xeꞌ intaca asacnichi, pero matucꞌa uyutir uyajcꞌu.
MAR 4:20 Y ut e semilla xeꞌ cꞌaxi tama e rum xeꞌ incꞌun lar tacar e gente xeꞌ incꞌun uyalma xeꞌ conda uyubꞌi uyojroner e Dios uturbꞌa ubꞌa tamar, y axana bueno tamar. Y ayan tin e aquetpa lar tacar inteꞌ nar xeꞌ meyra uwiximir uyari tama ingojr ut. Y ayan tin e lar tacar inteꞌ nar xeꞌ uyari treinta ut tama ingojr ut. Y ayan tin e lar tacar inteꞌ nar xeꞌ uyari sesenta ut. Y ayan tin e lar tacar inteꞌ nar xeꞌ uyari cien ut. Tara acꞌapa e ojroner, che e Jesús.
MAR 4:21 Entonces ojron e Jesús y che: —Mamajchi utzꞌajpes inteꞌ cꞌajc tuaꞌ ucotbꞌa inteꞌ bꞌejt tujor nien tuaꞌ uwabꞌu yebꞌar inteꞌ chꞌacteꞌ, sino que catzꞌajpes inteꞌ cꞌajc tuaꞌ cachꞌubꞌa tichan tuaꞌ ujanchꞌacnes tunor tin e oꞌchoy tama e otot era.
MAR 4:22 Pues tunor lo que achena xeꞌ mucur motor que jax taca ubꞌijnu tuaꞌ uche inteꞌ, ucꞌani tuaꞌ achectesna, y tunor lo que uche inteꞌ tama e incsibꞌaner ucꞌani tuaꞌ acꞌotoy anatanwa.
MAR 4:23 Tin e ayan uchiquin uyubꞌic niwojroner era, che e Jesús.
MAR 4:24 Entonces ojron otronyajr e Jesús y che: —Ubꞌinic niwojroner lo que war iyubꞌi era. Porque tin e axin uchꞌujcu uwira niwojroner axin achojbꞌesna umen e Dios. Pero tin e axin uchꞌujcu uwira más tunor niwojroner cꞌani achojbꞌesna más nojta ubꞌan.
MAR 4:25 Ubꞌinic ixto niwojroner era, porque tunor tin e uyubꞌi ixto niwojroner y uchꞌubꞌa tama uyalma cꞌani aꞌjcꞌuna más, pero tin e uyubꞌi cora niwojroner y machi uchꞌubꞌa tama uyalma cꞌani acꞌapa aloqꞌuesna lo que ayan ani cora tuaꞌ, che e Jesús.
MAR 4:26 Entonces ojron otronyajr e Jesús y che: —Uchinam e Dios lar tacar lo que anumuy conda inteꞌ winic axin upaqꞌui ut e semilla tama uchor.
MAR 4:27 Y conda acꞌapa apacma axin tama uyotot. Y conda acbꞌare axin awayan y conda asacojpa tama otronteꞌ día aꞌchpa. Y bꞌan taca uche ajqꞌuin ajqꞌuin, y war acuxpa axin ut e semilla y war achꞌiꞌ, y motor que axin uwira tiaꞌ war achꞌiꞌ ut e semilla era, pero matucꞌa unata tamar cocha acay achꞌiꞌ.
MAR 4:28 Pero jax e rum ubꞌajner xeꞌ uche acuxpa ut e semilla y uche alocꞌoy tujor e rum este que achecta watar e cosecha. Bꞌajxan acuxpa ut e semilla, y de allí atꞌixian, y de allí acay apitaqui, y de allí ya war achecta e an.
MAR 4:29 Y conda acꞌapa achecta e an y ataqui, entonces axin e ajyum chor tuaꞌ uqꞌueche axin ucosecha porque cꞌotoyix e hora tuaꞌ axin uchꞌami tunor ucosecha era, che e Jesús.
MAR 4:30 Entonces ojron e Jesús otronyajr y che: —¿Tucꞌa erer inwareox xeꞌ aquetpa lar tacar uchinam e Dios? ¿Y tucꞌa ojroner tuaꞌ incꞌampes tuaꞌ ichecsu tiut que bꞌan uchinam e Dios?
MAR 4:31 Pues uchinam e Dios lar tacar ut usemilla e mostaza lo que inteꞌ winic axin upaqꞌui tama uchor. Pues ut e semilla era jax xeꞌ más chuchu tama tunor ut e semilla lo que ayan tama or e rum.
MAR 4:32 Pero conda pacbꞌir y conda acꞌapa acuxpa y achꞌiꞌ, aquetpa e cꞌopot xeꞌ más nojta este que aquetpa nojta ucꞌabꞌ tuaꞌ uyubꞌi watar e mut tuaꞌ aturuan tamar tuaꞌ ajiriobꞌ tama usombrair, che e Jesús.
MAR 4:33 Pues entonces e Jesús cay canseyan taca meyra ojroner xeꞌ mucur cora esto tiaꞌ erer oꞌbꞌna umen e gente.
MAR 4:34 Y matucꞌa uyare e gente xeꞌ aquetpa chequer tutobꞌ bꞌan taca sino que war ucꞌampes e ojroner xeꞌ aquetpa mucur cora tutobꞌ. Pero tut uyajcanuarobꞌ war uchecsu tunor era.
MAR 4:35 Y tama e día era conda war acbꞌare ojron e Jesús taca uyajcanuarobꞌ y che: —Incuic teinxejr e nuxi jaꞌ era, che e Jesús.
MAR 4:36 Entonces uyactobꞌ e gente xeꞌ turobꞌ era tutiꞌ e jaꞌ, y ayan uyajcanuarobꞌ e Jesús xeꞌ turobꞌix tama inteꞌ barco tutiꞌ e jaꞌ xeꞌ uqꞌuechiobꞌ ixin e Jesús tacarobꞌ tama e barco y cay xanobꞌ tor e jaꞌ ixin. Y ayanto más barco xeꞌ war axanobꞌ tor e jaꞌ tacarobꞌ ubꞌan.
MAR 4:37 Y wacchetaca tari inteꞌ nuxi icꞌar xeꞌ cay utꞌabꞌse ixin e jaꞌ tichan este que war abꞌutcꞌa e barco taca e jaꞌ.
MAR 4:38 Pero e Jesús war awayan tut e barco latbꞌir ujor tama inteꞌ tꞌijribꞌ jor. Entonces uyajcanuarobꞌ ixiobꞌ tut e Jesús tuaꞌ ubꞌixqꞌuesobꞌ y chenobꞌ: —Cawajcanseyajet ¿machi ca war abꞌijnu tamaron que non cꞌanix cachamay umen que cꞌani camuctzꞌa era? che uyajcanuarobꞌ.
MAR 4:39 Entonces achpa e Jesús y cay ucꞌaye e icꞌar y che: —¡Chꞌancabꞌen! Y de allí ucꞌaye e jaꞌ xeꞌ war atobꞌoy axin y che: —¡Sisijres abꞌa! che e Jesús. Y tamar era chꞌancabꞌa e icꞌar y e jaꞌ y sisa tunor.
MAR 4:40 Entonces cay ojron e Jesús taca uyajcanuarobꞌ y che: —¿Y tucꞌato tuaꞌ war ixbꞌacta era? ¿Y tucꞌa tuaꞌ que machi war ixcꞌupseyan tama e Dios? che e Jesús.
MAR 4:41 Pero jaxirobꞌ bꞌactobꞌ tamar lo que uwirobꞌ uche e Jesús y cay ojronobꞌ jaxobꞌ taca y chenobꞌ: —¿Tucꞌa nic winic era que acꞌupesna umen e icꞌar y umen e jaꞌ? che uyajcanuarobꞌ e Jesús.
MAR 5:1 Pues entonces ixin e Jesús taca uyajcanuarobꞌ teinxejr e nuxi jaꞌ era y cꞌotoy tama inteꞌ lugar xeꞌ ucꞌabꞌa Gadara.
MAR 5:2 Y conda e Jesús ecmay tama e barco wacchetaca tari inteꞌ winic xeꞌ bꞌutꞌur uyalma taca inteꞌ mabꞌambꞌan mein xeꞌ war aturuan tujam e sian mujr tuaꞌ e chamenobꞌ lo que ayan tama e lugar era.
MAR 5:3 Pues e winic era war aturuan tama inteꞌ chꞌen tama unac e witzir tiaꞌ amujca e chamenobꞌ y mamajchi chi uyubꞌi ucachi umen que jaxir war aqꞌuecꞌojsena umen e sian mabꞌambꞌan mein, y nien taca inteꞌ cadena machi uyubꞌi tuaꞌ acajcha tuaꞌ aquetpa tzꞌustaca.
MAR 5:4 Pues ayan ani e hora conda turu cora usasaꞌ e winic era pero conda ajajpna otronyajr umen e mabꞌambꞌan mein, entonces ajajpna umen e winicobꞌ tuaꞌ ucachiobꞌ uyoc y unuc ucꞌabꞌ taca e cadena tuaꞌ aturuan tzꞌustaca. Pero jaxir intaca utzꞌoqui e cadena este que aquetpa uchꞌeir tunor e cadena era, y tamar era mamajchi uyubꞌi ucucru.
MAR 5:5 Y war axana tama e día y tama e acbꞌar tor e sian witzir o tiaꞌ ayan e mujr y war aꞌru taca inteꞌ nuxi nuc y war uyobꞌi ubꞌa taca e tun.
MAR 5:6 Pero conda uwira ut e Jesús innajtto cay ajni ixin esto tut e Jesús y uyacta ubꞌa acotuan tut,
MAR 5:7 y cay aru taca inteꞌ nuxi nuc y che: —¿Tucꞌa tuaꞌ war oꞌse abꞌa tacaren net xeꞌ acꞌabꞌa Jesús xeꞌ Uyunenet e Dios Ajtichaner? Incꞌajti tacaret tama ucꞌabꞌa e Dios tuaꞌ machi achien innumse nibꞌa era, che e winic era xeꞌ chucur umen inteꞌ mabꞌambꞌan mein.
MAR 5:8 Pero bꞌan ojron e winic umen que e Jesús ya war oꞌjron ubꞌan y che: —Ajmabꞌambꞌan mein, loqꞌuen tama e winic era, che e Jesús.
MAR 5:9 Entonces uyubꞌi e Jesús tuaꞌ e winic era y che: —¿Tucꞌa acꞌabꞌa? che e Jesús. Y jaxir che: —Nicꞌabꞌa nen: “Meyra”, porque meyron xeꞌ turon tama e winic era, che e winic.
MAR 5:10 Pues e mabꞌambꞌan meinobꞌ war ucꞌajtiobꞌ taca e Jesús tuaꞌ machi eꞌbꞌtanobꞌ axin innajt tama e lugar era.
MAR 5:11 Y cocha ayan cora sian chitam tor e witzir xeꞌ war awiobꞌ,
MAR 5:12 ojron e mabꞌambꞌan meinobꞌ y chenobꞌ: —Tzacrenon chicon tuaꞌ cochoy tama e sian chitamobꞌ era, che e mabꞌambꞌan meinobꞌ.
MAR 5:13 Entonces ojron e Jesús y che: —Erer ixixin, che e Jesús. Entonces locꞌoyobꞌ e sian mabꞌambꞌan meinobꞌ tama e winic y ixin ochoyobꞌ tama e sian chitam. Y tama e lugar era ayan 2,000 chitam y tunorobꞌ cꞌapa satpa usasobꞌ y cay ajniobꞌ y ixin uyojres ubꞌobꞌ tama inteꞌ chꞌen y cꞌaxiobꞌ tama e nuxi jaꞌ y cꞌapa cuchpobꞌ tama e jaꞌ y ya cꞌapa chamayobꞌ.
MAR 5:14 Pero conda tin e war ucojcobꞌ e chitamobꞌ cay uwirobꞌ lo que numuy, bꞌactobꞌ y locꞌoy ixiobꞌ ajner y cay uyareobꞌ e gente xeꞌ turobꞌ tama e chinam y xeꞌ turobꞌ tama e aldea tama tunor era. Entonces e gente tama e chinam locꞌoyobꞌ tuaꞌ uwirobꞌ lo que numuy.
MAR 5:15 Y conda cꞌotoyobꞌ tut e Jesús uwirobꞌ e winic xeꞌ chucur ani umen e sian mabꞌambꞌan mein que war aturuan tzꞌustaca y que bꞌujcsebꞌir y que turu ixto usasaꞌ yaꞌ. Y tamar era bꞌactobꞌ.
MAR 5:16 Y tin e uwirobꞌ tunor lo que numuy era cay uyareobꞌ tunor e gente xeꞌ cꞌotoyobꞌ lo que numuy taca e winic xeꞌ chucur ani umen e sian mabꞌambꞌan mein y tamar lo que numuy taca e sian chitam.
MAR 5:17 Y tamar era tunor e gente cay uyareobꞌ e Jesús tuaꞌ alocꞌoy tama e lugar era.
MAR 5:18 Entonces conda tꞌabꞌay e Jesús otronyajr tama e barco tari e winic xeꞌ chucur ani umen e sian mabꞌambꞌan mein y cay uyubꞌi tuaꞌ e Jesús jay erer axin tacar.
MAR 5:19 Pero e Jesús machi uyacta tuaꞌ axin tacar sino que uyare y che: —Quiqui tama oꞌtot tiaꞌ turu atata y atuꞌ y arenicobꞌ tunor lo que Cadiosir uche tuaꞌ utacret y que jaxir war uyajta oit, che e Jesús.
MAR 5:20 Entonces ixin e winic y cay xana tama e diez chinamobꞌ lo que ayan teinxejr e xucur Jordán y cay uyare tunor e gente ixin tunor lo que e Jesús cay uche tacar, y tunor e gente ubꞌijnu uwirobꞌ tama tunor lo que cay uche e Jesús.
MAR 5:21 Entonces sutpa ixin e Jesús tor e jaꞌ tama e barco esto teinxejr e nuxi jaꞌ era, y conda wartocto acꞌotoy cay umorojse ubꞌobꞌ meyra gente tut e Jesús, y jaxir quetpa tacarobꞌ tutiꞌ e nuxi jaꞌ era.
MAR 5:22 Entonces cꞌotoy inteꞌ winic tuyejtzꞌer e Jesús xeꞌ ucꞌabꞌa Jairo xeꞌ jax inteꞌ ajcꞌampar tama inteꞌ sinagoga. Y conda uwira ut e Jesús uyacta ubꞌa acotuan tut.
MAR 5:23 Y cay ucꞌajti meyra taca e Jesús y che: —Niwijchꞌoc cꞌanix achamay. Lar pacpun acꞌabꞌ tamar tuaꞌ atzꞌacpa y tuaꞌ machi achamay, che e ajcꞌampar era.
MAR 5:24 Entonces cay ixin e Jesús tuaꞌ acꞌotoy tama uyotot e Jairo, pero ayan meyra gente xeꞌ war axin tacar ubꞌan este que war utacsu ubꞌobꞌ axin.
MAR 5:25 Y ayan inteꞌ ixic tujam e sian gente era xeꞌ ajmuac que intaca anumuy uchꞌichꞌer, y ayix doce año que war unumse ubꞌa cocha era.
MAR 5:26 Y cay cꞌotoy meyra tut e sian ajtzꞌaconer y tamar era cay unumse ubꞌa meyra ubꞌan, pero intaca cꞌapa usati tunor utumin, y ma tiaꞌ tacarna tamar, sino que más cay erpa ixin umuaquir.
MAR 5:27 Y conda cay uyubꞌi que war anumuy e Jesús, cay ixin tupat tuaꞌ acꞌotoy tut este que ixin upijchꞌi ubꞌujc.
MAR 5:28 Porque jaxir war ubꞌijnu cocha era: “Jay erer taca impijchꞌi ubꞌujc e Jesús, nen inxin intzꞌacpa”, xeꞌ war ubꞌijnu e ixic era jax taca.
MAR 5:29 Entonces tama e momento era quetruma uchꞌichꞌer y cay unata tama ucuerpo que tzꞌacpesna ixto tama tunor e muaquir era.
MAR 5:30 Y wacchetaca unata e Jesús que locꞌoy e cꞌotorer tamar y que ayan chi xeꞌ tzꞌacpesna umener era. Entonces sutpa uwira e sian gente xeꞌ war axanobꞌ tupat y che: —¿Chi upijchꞌien tama nibꞌujc? che e Jesús.
MAR 5:31 Entonces ojron uyajcanuarobꞌ y che: —¿Y tucꞌa tuaꞌ war aware que ‘¿chi upijchꞌien?’ ¿Machi ca awira que ayan meyra gente xeꞌ war uquejquetobꞌ cora cora axin? che e uyajcanuarobꞌ.
MAR 5:32 Pero e Jesús sutpa uwira ut e gente, war usicbꞌa chi umen xeꞌ pijchna ubꞌujc.
MAR 5:33 Entonces e ixic, cocha unata ixto yaꞌ que tzꞌacpesna, tari tut e Jesús y war achincha umen e bꞌajcꞌut y uyacta ubꞌa cotuan tut y cay uchecsu tut e Jesús tunor lo que uche era.
MAR 5:34 Y e Jesús uyare e ixic y che: —Ijchꞌoc, tzꞌacpet era umen que war icꞌupseyan tamaren. Quiqui tama oꞌtot taca ujiriar e Dios, y quetpaquet tzꞌacpesbꞌir inyajrer tama tunor amuaquir era, che e Jesús.
MAR 5:35 Pues entonces conda warto oꞌjron e Jesús taca e ixic cꞌotoyobꞌ cora winicobꞌ tuaꞌ uyotot e ajcꞌampar tuaꞌ e sinagoga xeꞌ cay ojronobꞌ taca utata e ijchꞌoc y chenobꞌ: —Chamay awijchꞌoc. ¿Tucꞌato tuaꞌ warto aware Cawajcanseyaj tuaꞌ axin tama oꞌtot? che e winicobꞌ xeꞌ tariobꞌ tama uyotot e ajcꞌampar era.
MAR 5:36 Pero e Jesús machi ubꞌijnu tamar uyojronerobꞌ era. Intaca sutpa uyare e ajcꞌampar tuaꞌ e sinagoga xeꞌ jax e Jairo y che: —Ira ibꞌacta. Cꞌupseyanen tamaren taca, che e Jesús.
MAR 5:37 Entonces e Jesús uyare tunor e sian gente era tuaꞌ machi axiobꞌ tacar, sino que ajtaca tuaꞌ axiobꞌ e Pedro y e Santiago taca uwijtzꞌin xeꞌ jax e Juan.
MAR 5:38 Entonces conda cꞌotoyobꞌ tama uyotot e Jairo cay uwirobꞌ que satrem usasobꞌ e gente, y que machi war unatobꞌ tucꞌa war uchiobꞌ, y que intaquix turu war aꞌruobꞌ taca inteꞌ nuxi nuc umen que inyaj tama uyalmobꞌ tamar uchamer e ijchꞌoc.
MAR 5:39 Entonces ochoyobꞌ tama e otot y cay ojron e Jesús taca tunor e gente era y che: —¿Tucꞌa tuaꞌ war iche e sian aruar era taca e nuxi nuc? E ijchꞌoc majax chamen sino que intaca war awayan, che e Jesús.
MAR 5:40 Pero e gente intaca tzeniobꞌ tut e Jesús porque war unatobꞌ que chamen ixto e ijchꞌoc. Entonces e Jesús uyare tuaꞌ alocꞌoy tunor e gente era y uyacta oꞌchoyobꞌ macu jax taca utuꞌ y utata e ijchꞌoc y uyajcanuarobꞌ.
MAR 5:41 Entonces e Jesús uchuqui ucꞌabꞌ e ijchꞌoc y che: —Talita cumi, xeꞌ war che: “Ijchꞌoc, nen inwaret, ¡achpen!” che e Jesús.
MAR 5:42 Y tama e momento era achpa e ijchꞌoc y cay xana. Y e ijchꞌoc war ucojco doce año. Y e gente xeꞌ turobꞌ patir cay bꞌacta uwirobꞌ lo que numuy era.
MAR 5:43 Pero e Jesús cay uyare e gente que mamajchi tut tuaꞌ axin uchecsuobꞌ lo que cay uwirobꞌ numuy era, y de allí uyare tuaꞌ awesena e ijchꞌoc.
MAR 6:1 Pues entonces e Jesús locꞌoy tama uyotot e Jairo tuaꞌ asutpa axin esto tama uyotot tama e chinam Nazaret, y ixiobꞌ uyajcanuarobꞌ tacar.
MAR 6:2 Y tama e día tuaꞌ e jiriar e Jesús ixin ochoy tama e sinagoga y cay canseyan. Y ayan meyra gente tama e sinagoga tama e día era xeꞌ uyubꞌiobꞌ lo que che e Jesús, y tamar era cay bꞌacta ubꞌijnuobꞌ y chenobꞌ: —¿Tiaꞌ cay ucani jaxir tunor e nuxi canseyaj era? ¿Y tucꞌa nic e natanyaj era lo que ajcꞌuna? ¿Y tiaꞌ utajwi e cꞌotorer tuaꞌ uche e sian milagro lo que war coybꞌi tamar?
MAR 6:3 Pues jaxir jax taca inteꞌ ajpajrteꞌ xeꞌ jax uyar e María, y canata chi uwijtzꞌinobꞌ xeꞌ jax e Santiago y e José y e Judas y e Simón. Y war canata chi uwijtanobꞌ ubꞌan xeꞌ aturuanobꞌ tama cachinam tara, che e gente era. Y tamar era machi ucꞌupsiobꞌ lo que che e Jesús.
MAR 6:4 Entonces ojron e Jesús y che: —Tunor tin e ajcꞌuna ucꞌampibꞌir tuaꞌ aquetpa inteꞌ profeta atzay eꞌrna umen tunor e gente. Pero tin e turobꞌ tama uchinam y upiarobꞌ y tin e turobꞌ tama uyotot machi tuaꞌ atzay uwirobꞌ que inteꞌ upiar ayan ucꞌampibꞌir cocha era, che e Jesús.
MAR 6:5 Y tamar era machi uyubꞌi uche nien inteꞌ milagro tujam e gente era, jax taca uyubꞌi ucꞌatbꞌu ucꞌabꞌ tujor cora ajmuacobꞌ tuaꞌ utzꞌacpesobꞌ.
MAR 6:6 Pues e Jesús bꞌacta uwira e gente era porque mamajchi tujamobꞌ cꞌani acꞌupseyanobꞌ tamar. Y de allí locꞌoy ixin esto tama cora aldea lo que ayan tuyejtzꞌer e chinam era tuaꞌ acanseyan.
MAR 6:7 Pues tama inyajr e Jesús cay upejca e doce uyajcanuarobꞌ y cay uyebꞌta ixiobꞌ chacojt chacojt tuaꞌ uchecsuobꞌ uchinam e Dios tut e gente axin. Y cay uyajcꞌuobꞌ e cꞌotorer tuaꞌ uyajnesobꞌ axin tunor e mabꞌambꞌan mein.
MAR 6:8 Y cay uyare que machi tuaꞌ uqꞌuechiobꞌ axin lo que acꞌampa tacarobꞌ tama e bꞌir, sino que jax taca inteꞌ teꞌ xeꞌ erer abꞌoyobꞌ tamar. Y uyare que machi tuaꞌ uqꞌuechiobꞌ axin e pan y nien e mucuc y nien e tumin.
MAR 6:9 Y uyare tuaꞌ ulapiobꞌ uxanabꞌobꞌ, pero que machi tuaꞌ uqꞌuechiobꞌ axin otronteꞌ bꞌujc, sino que jax taca lo que lapar umenerobꞌ.
MAR 6:10 Y che e Jesús: —Conda ixcꞌotoy tama inteꞌ chinam o tama inteꞌ aldea y ixochoy tama inteꞌ otot tuaꞌ ichꞌami e posada, quetpenic tama e otot era este que ixlocꞌoy ixixin tama e lugar era.
MAR 6:11 Y tama e lugarobꞌ era jay ayan tin e machi cꞌani uchꞌamiox y nien machi cꞌani uyubꞌiobꞌ lo que cꞌani iwareobꞌ tama uyojroner e Dios, loqꞌuenic tama e lugar era y tijtinic e tanlum tama ixanabꞌ tuaꞌ unatobꞌ que mabꞌambꞌan lo que war uchiobꞌ que machi cꞌani uyubꞌiobꞌ uyojroner e Dios. Y cꞌani inwareox que tama e día conda acꞌotoy e juicio más nojta tuaꞌ ajajtzꞌobꞌ tin turobꞌ tama e chinamobꞌ era que machi cꞌani uyubꞌiobꞌ iwojroner que tin e turobꞌ ani tama e chinam Sodoma y tin e turobꞌ ani tama e chinam Gomorra xeꞌ meyra uchiobꞌ e mabꞌambꞌanir. Bꞌan che e Jesús uyare uyajcanuarobꞌ conda war uyebꞌta axin chacojt chacojt tuaꞌ uchecsuobꞌ uyojroner e Dios tut e gente axin.
MAR 6:12 Entonces locꞌoyobꞌ uyajcanuarobꞌ y cay uchecsuobꞌ tut e gente axin que ucꞌani tuaꞌ uyactobꞌ tunor umabꞌambꞌanirobꞌ.
MAR 6:13 Y uyajnesobꞌ ixin meyra mabꞌambꞌan mein, y uturbꞌobꞌ e aceite tamar tin e ajmuac y war atzꞌacpobꞌ.
MAR 6:14 Pues tama e tiempo era ayan inteꞌ winic xeꞌ ucꞌabꞌa Herodes xeꞌ war acꞌotori tama e departamento Galilea. Y conda jaxir cꞌotoy unata tama e Jesús que meyra milagro war uche, cocha tunor e gente war oꞌjronobꞌ tamar e Jesús, ojron e Herodes y che: —Jax era e Juan xeꞌ ajchꞌuymar xeꞌ sutpa bꞌixcꞌa tujam e chamenobꞌ y tamar era ayan ucꞌotorer tuaꞌ uche tunor e milagro era, che e Herodes.
MAR 6:15 Pero ayan tin e ojronobꞌ y che: —Majax. Jax era e onian Elías xeꞌ sutpa bꞌixcꞌa tujam e chamenobꞌ, che e winicobꞌ era. Pero ayan otro inmojr xeꞌ ojronobꞌ y chenobꞌ: —Jax era inteꞌ profeta bꞌan cocha e profetobꞌ xeꞌ turuanobꞌ tama e onian tiempo, chenobꞌ e inmojr era.
MAR 6:16 Pero conda e Herodes uyubꞌi tunor era ojron otronyajr y che: —Jaxir jax e Juan xeꞌ ajchꞌuymar. Y jax nen xeꞌ inware tuaꞌ axujra alocꞌoy ujor y era war asutpa abꞌixcꞌa tujam e chamenobꞌ otronyajr, che e Herodes.
MAR 6:17 Pues e Herodes cay uche lo que majax imbꞌutz tut e Juan conda cay turuan taca e Herodías xeꞌ jax ani uwixcar uwijtzꞌin xeꞌ ucꞌabꞌa ani Felipe. Y tamar era umen que inyaj tama uyalma e Herodías conda arobꞌna umen e Juan que majax imbꞌutz tunor era, jaxir upejca e Herodes tuaꞌ uyare tuaꞌ oꞌsena e Juan tama e cárcel y tuaꞌ acajcha taca e cadena.
MAR 6:18 Pero conda ne mato oꞌsena tama e cárcel, e Juan cay uyare e Herodes y che: —Majax imbꞌutz tuaꞌ ituruan taca uwixcar awijtzꞌin, che e Juan xeꞌ ajchꞌuymar.
MAR 6:19 Y tamar era e Herodías war aqꞌuijna upater e Juan y war ucꞌani tuaꞌ achamesna pero ma cocha erer uche jaxir.
MAR 6:20 Pues e Herodes war unata que e Juan jax inteꞌ winic xeꞌ imbꞌutz uwirnar y xeꞌ erach, y tamar era war ubꞌacre y uche ubꞌa tuaꞌ ucorpes. Y jaxir atzay uyubꞌi oꞌjron e Juan, pero conda uyubꞌi e ojroner era, machi unata tucꞌa tuaꞌ uche tamar.
MAR 6:21 Pero tari e día conda checta cocha tuaꞌ usuti uyeror ut upater e Juan e Herodías. Pues e Herodes war utzꞌacse otronteꞌ año tuaꞌ, y tamar era cay uche inteꞌ nuxi nojqꞌuin. Y tamar e nojqꞌuin era cay upejca ayopobꞌ tunor tin e ajcꞌamparobꞌ tuaꞌ e gobierno, y tin e comandante militar taca tunor tin e nuxi winicobꞌ tama e departamento Galilea era.
MAR 6:22 Y e Herodías ayan inteꞌ chꞌom ijchꞌoc tuaꞌ xeꞌ ochoy tama e nojqꞌuin y cay acta tut tunor e winicobꞌ era. Y tzayobꞌ meyra e Herodes taca tunor tin e war awiobꞌ tacar tama e nojqꞌuin conda uwirobꞌ acta e ijchꞌoc. Entonces jaxir ojron taca e ijchꞌoc y che: —¿Tucꞌa acꞌani tuaꞌ inwajqꞌuet? Nen cꞌani inwajqꞌuet lo que acꞌani, che e Herodes.
MAR 6:23 Y cay uyare que san cꞌani uyajcꞌu tunor lo que jaxir cꞌani ucꞌajti tacar y che: —Unaten e Dios xeꞌ turu tut e qꞌuin que inxin inwajqꞌuet tunor lo que acꞌani era. Y esto intajch tama tunor lo que ayan tama nicꞌotorer erer inwajqꞌuet jay bꞌan acꞌajti, che e Herodes uyare e ijchꞌoc.
MAR 6:24 Entonces e ijchꞌoc ixin tut utuꞌ y cay ucꞌajti tucꞌa tuaꞌ ucꞌajti tuaꞌ e rey. Y utuꞌ uyare y che: —Cꞌajtin tuaꞌ ataresna ujor e Juan xeꞌ ajchꞌuymar tama inteꞌ plato, che utuꞌ e ijchꞌoc era.
MAR 6:25 Entonces wacchetaca sutpa ixin e ijchꞌoc tut e rey y che: —Ajcꞌunen coner era ujor e Juan xeꞌ ajchꞌuymar tama inteꞌ plato, che e ijchꞌoc.
MAR 6:26 Pero conda e Herodes uyubꞌi e ojroner era quetpa tzajtaca ut. Pero cocha cꞌapa uyacta inteꞌ ojroner que san tuaꞌ uyajcꞌu e ijchꞌoc lo que ucꞌajti, y cocha uchix tunor era tut tunor e nuxi winicobꞌ era, uyare tuaꞌ aꞌjcꞌuna lo que ucꞌajti era.
MAR 6:27 Entonces utzacre ixin inteꞌ soldado tuaꞌ axin wacchetaca esto tama e cárcel tuaꞌ ulocse ujor e Juan xeꞌ ajchꞌuymar y tuaꞌ utares.
MAR 6:28 Entonces bꞌan ixin uche e soldado, y de allí sutpa utares ujor e Juan tama inteꞌ plato y uyajcꞌu e ijchꞌoc y jaxir sutpa uyajcꞌu utuꞌ.
MAR 6:29 Entonces conda cꞌotoy unatobꞌ uyajcanuarobꞌ e Juan tama tunor era ixiobꞌ tama e cárcel tuaꞌ ulocsiobꞌ ucuerpo e Juan y tuaꞌ uqꞌuechiobꞌ axin tuaꞌ umuquiobꞌ.
MAR 6:30 Pues entonces conda sutpa tariobꞌ e apostolobꞌ otronyajr cay umorojse ubꞌobꞌ tut e Jesús y cay uyareobꞌ tunor lo que cay uchiobꞌ y tunor lo que cay canseyanobꞌ tamar.
MAR 6:31 Pero tama e lugar era ayan e sian gente xeꞌ war ayopobꞌ tuaꞌ uwirobꞌ e Jesús y de allí war asutpa alocꞌoyobꞌ, y e Jesús y uyajcanuarobꞌ ma jabꞌarobꞌ nien tuaꞌ awiobꞌ porque war utacriobꞌ tunor e sian gente era. Entonces e Jesús uyare uyajcanuarobꞌ y che: —Incuic bꞌana tama inteꞌ choquem lugar tiaꞌ erer caquetpa cabꞌajner tuaꞌ cojron y tuaꞌ cajiri tama inteꞌ tiempo, che e Jesús.
MAR 6:32 Entonces e Jesús y uyapostolobꞌ tꞌabꞌayobꞌ tama inteꞌ barco y ixiobꞌ tor e jaꞌ tuaꞌ aquetpobꞌ ubꞌajnerobꞌ tama inteꞌ choquem lugar.
MAR 6:33 Pero ayan meyra gente xeꞌ cay uwirobꞌ que e Jesús y uyapostolobꞌ war alocꞌoyobꞌ tama e barco y war unatobꞌ que ya turu e Jesús tama e barco era ubꞌan. Y ayan tin e cꞌotoy unatobꞌ tiaꞌ war axiobꞌ y tamar era cay locꞌoy meyra gente tama inteꞌ inteꞌ chinam y cay ajniobꞌ ixin tor e rum tutiꞌ e nuxi jaꞌ tuaꞌ acꞌotoyobꞌ bꞌajxan tama e lugar tiaꞌ cꞌani axiobꞌ e Jesús taca uyajcanuarobꞌ.
MAR 6:34 Entonces conda ecmay e Jesús tama e barco cay uwira que ayan e sian gente y cay uyajta utobꞌ porque jaxirobꞌ bꞌanobꞌ cocha cora oveja que matucꞌa uyajcojc. Entonces cay ucansiobꞌ meyra tama uyojroner e Dios.
MAR 6:35 Pero conda cꞌanix acbꞌare yopobꞌ e apostolobꞌ tut e Jesús y che: —Cꞌanix acbꞌare y mix tucꞌa e ototobꞌ tara tiaꞌ erer utajwiobꞌ lo que ucꞌani tuaꞌ ucꞌuxiobꞌ.
MAR 6:36 Tzacren chicobꞌ e gente era tama inteꞌ inteꞌ aldea xeꞌ majax innajt tuaꞌ uyubꞌiobꞌ umaniobꞌ e pan, porque matucꞌa qꞌuecher umenerobꞌ tuaꞌ ucꞌuxiobꞌ, che e apostolobꞌ.
MAR 6:37 Y che e Jesús: —¿Y tucꞌa tuaꞌ machi iwesiobꞌ nox? che e Jesús. Y jaxirobꞌ sutpa uyubꞌiobꞌ tuaꞌ e Jesús y che: —¿O acꞌani ca tuaꞌ caxin camani 200 denarios e pan tuaꞌ cawese tunor e gente era? che e apostolobꞌ.
MAR 6:38 Entonces e Jesús uyubꞌi tuobꞌ otronyajr y che: —¿Y jayteꞌ pan ayan tibꞌa? Quiqui iranic, che e Jesús. Y conda ixin usajcobꞌ jayteꞌ e pan ayan, sutpa uyareobꞌ e Jesús y che: —Matucꞌa ayan tara, ajtaca cinco ut pan y chacojt chay, che e apostolobꞌ.
MAR 6:39 Entonces e Jesús uyare uyajcanuarobꞌ tuaꞌ uxere uturbꞌa e gente tor e cꞌopot tama inteꞌ inteꞌ grupo.
MAR 6:40 Entonces e gente cay turuanobꞌ tama inteꞌ inteꞌ grupo. Y ayan e grupo de a cien y ayan e grupo de a cincuenta.
MAR 6:41 Entonces e Jesús uchꞌami e cinco ut pan y e chacojt chay y chꞌujcsan tut e qꞌuin y cay utattzꞌi ucꞌabꞌa e Dios tamar. Y de allí cay uxere e pan y cay upuqui ixin taca uyajcanuarobꞌ y jaxirobꞌ cay upuquiobꞌ taca e gente ixin. Y cay uxere e chacojt chay ubꞌan tuaꞌ upuqui axin taca e tunor gente ubꞌan.
MAR 6:42 Y tunorobꞌ wiobꞌ y chuanobꞌ.
MAR 6:43 Y de allí uyajcanuarobꞌ umorojsiobꞌ tunor lo que quetpa tama e pan y tama e chay y bꞌutcꞌa doce chiquiꞌ tamar.
MAR 6:44 Y ayan 5,000 winicobꞌ xeꞌ cay ucꞌuxiobꞌ e pan era.
MAR 6:45 Entonces e Jesús uyare uyajcanuarobꞌ tuaꞌ atꞌabꞌayobꞌ tama e barco tuaꞌ axiobꞌ teinxejr jaꞌ esto tama e chinam Betsaida. Pero jaxir quetpato cocha warto oꞌjron taca tunor e gente era.
MAR 6:46 Y conda cꞌapa locꞌoyobꞌ tunor e gente, ixin e Jesús esto tujor inteꞌ witzir tuaꞌ ucꞌajti taca e Dios ubꞌajner.
MAR 6:47 Y conda acbꞌare uyajcanuarobꞌ e Jesús turobꞌto tor e jaꞌ tama e barco y e Jesús turuto tutiꞌ e jaꞌ ubꞌajner.
MAR 6:48 Pero e Jesús uwira lo que war unumse ubꞌobꞌ uyajcanuarobꞌ tama e barco tor e jaꞌ porque machi cꞌani axana e barco umen que e icꞌar war utacsuobꞌ watar. Y conda cꞌanix asacojpa ixin e Jesús, war axana tor jaꞌ y war anumuy innajt cora tuyejtzꞌer e barco y cꞌani ani anumuy tiaꞌ turobꞌ
MAR 6:49 conda erna umen uyajcanuarobꞌ. Pero jaxirobꞌ uchebꞌiobꞌ que jax taca inteꞌ bulto xeꞌ chequer war axana watar tor e jaꞌ, y bꞌacta uwirobꞌ y cay aruobꞌ taca inteꞌ nuxi nuc y chenobꞌ: —¡Jax inteꞌ nuxi qꞌuechꞌuj era! che uyajcanuarobꞌ.
MAR 6:50 Porque tunorobꞌ warto uwirobꞌ ut y war abꞌactobꞌ. Pero e Jesús ojron y che: —Qꞌuecꞌojsenic iwalma. Ira ixbꞌacta porque jax nen xeꞌ war waten era, che e Jesús.
MAR 6:51 Entonces ixin e Jesús warto axana tor e jaꞌ este que cꞌotoy tut e barco tiaꞌ chꞌur tor e jaꞌ y tꞌabꞌay tamar. Y tama e momento era sisa tunor e sian icꞌar. Y uyajcanuarobꞌ bꞌacta uwirobꞌ tunor era.
MAR 6:52 Pues jaxirobꞌ merato cꞌotoy unatobꞌ tucꞌa war che tunor e nuxi milagro lo que cay uche e Jesús conda ubꞌorojse ut e pan, y tamar era quetpa mucur tunor era tutobꞌ y uqꞌuecꞌojse uyalmobꞌ tamar era.
MAR 6:53 Entonces numuyobꞌ tor e jaꞌ tama e barco este que cꞌotoyobꞌ teinxejr jaꞌ tama inteꞌ lugar xeꞌ ucꞌabꞌa Genesaret, y ucachiobꞌ e barco tutiꞌ e jaꞌ.
MAR 6:54 Y conda wartocto ecmayobꞌ tama e barco cay unatobꞌ e gente xeꞌ turobꞌ yajaꞌ que jax era e Jesús.
MAR 6:55 Y tamar era wacchetaca cay ajniobꞌ ixin e gente tama tunor or e lugar tuaꞌ uyare tunor e inmojr gente que ya turu e Jesús. Entonces cay uqꞌuechiobꞌ tari tunor tin e ajmuac tama uchꞌacteꞌ esto tiaꞌ turu e Jesús.
MAR 6:56 Y tic taca tiaꞌ ixin e Jesús tama inteꞌ chinam o tama inteꞌ aldea yajaꞌ war aqꞌuejcha axin tin e ajmuac y war aturbꞌana tut e bꞌir tiaꞌ war anumuy e Jesús y war ucꞌajtiobꞌ tacar tuaꞌ actana apijchna ubꞌujc umen tin e ajmuac era. Y tunor tin e cꞌotoy upijchꞌiobꞌ ubꞌujc e Jesús quetpobꞌ tzꞌacpesbꞌir.
MAR 7:1 Pues ayan cora fariseobꞌ y cora ajcanseyajobꞌ tama uley e Moisés xeꞌ tariobꞌ tama e chinam Jerusalem xeꞌ cay umorojse ubꞌobꞌ tuyejtzꞌer e Jesús.
MAR 7:2 Y cay uwirobꞌ que uyajcanuarobꞌ e Jesús machi war uchiobꞌ e rito tama ucꞌabꞌobꞌ lo que ucꞌaniobꞌ utata viejobꞌirobꞌ conda cꞌanix awiobꞌ motor que uyajcanuarobꞌ e Jesús war upoquiobꞌ ucꞌabꞌobꞌ iraj iraj. Y tamar era e nuquir winicobꞌ cay ucꞌayobꞌ e Jesús y uyajcanuarobꞌ.
MAR 7:3 Pues e fariseobꞌ taca e inmojr gente tama e Israel cꞌupseyanobꞌ tut inteꞌ onian bꞌijnusiaj xeꞌ actana umen utata viejobꞌirobꞌ que ayan cocha ucꞌani tuaꞌ upoquiobꞌ ucꞌabꞌobꞌ conda cꞌanix awiobꞌ que intaca uchꞌubꞌa ucꞌabꞌobꞌ yebꞌar e jaꞌ y war ubꞌijnuobꞌ que cocha era tuaꞌ aquetpa pocbꞌir ucꞌabꞌobꞌ. Y bꞌan ucꞌaniobꞌ ani e fariseobꞌ era tuaꞌ uchiobꞌ uyajcanuarobꞌ e Jesús conda cꞌanix awiobꞌ ubꞌan.
MAR 7:4 Y tamar e onian bꞌijnusiaj era, conda asutpa ayopa inteꞌ tama e mercado machi tuaꞌ ucꞌuxi e comida xeꞌ wartocto utares este que axin uche e rito era. Y ayanto más onian bꞌijnusiaj lo que cay uchiobꞌ xeꞌ tari tama utata viejobꞌirobꞌ xeꞌ quetpa tuaꞌ uchiobꞌ. Y tamar era war utzijtzru e jaꞌ tujor inteꞌ taza conda cꞌani ucꞌampesobꞌ y bꞌan tujor inteꞌ bꞌejt o tujor inteꞌ chꞌeu y bꞌan war uchiobꞌ tujor uchꞌactiobꞌ ubꞌan.
MAR 7:5 Entonces e fariseobꞌ y e ajcanseyajobꞌ tama uley e Moisés cay uyubꞌiobꞌ tuaꞌ e Jesús y chenobꞌ: —¿Tucꞌa tuaꞌ war ucꞌocchiobꞌ e onian bꞌijnusiaj tuaꞌ catata viejobꞌirobꞌ awajcanuarobꞌ que machi cꞌani uchꞌubꞌa ucꞌabꞌobꞌ yebꞌar e jaꞌ conda cꞌanix awiobꞌ? che e nuquir winicobꞌ era.
MAR 7:6 Entonces ojron e Jesús y che: —Ajqꞌuecranerox, locꞌoy erach que jax nox xeꞌ war ixarobꞌna umen e profeta Isaías conda cay utzꞌijbꞌa y che: E winicobꞌ era tama uyejobꞌ taca war utattzꞌienobꞌ, pero tama uyalmobꞌ najtir turobꞌ taniut.
MAR 7:7 Pero matucꞌa ucꞌampibꞌir que war uyujtzꞌiobꞌ niut porque lo que war ucansiobꞌ e gente jax taca lo que ubꞌijnuobꞌ e winicobꞌ tara tor e rum, xeꞌ chꞌar tzꞌijbꞌabꞌir umen e profeta Isaías.
MAR 7:8 Pero nox war iwacta tuaꞌ iche lo que ucꞌani ani e Dios bꞌan cocha chꞌar tzꞌijbꞌabꞌir tama uyojroner tuaꞌ ixixin iche jax taca e onian bꞌijnusiaj tuaꞌ itata viejobꞌirobꞌ. Y war icanse e gente axin que tuaꞌ e Dios tunor lo que war icansiobꞌ era, y majax. Y tamar era nox war ixcanseyan axin que e gente ucꞌani tuaꞌ utzijtzru e jaꞌ tujor e bꞌejt o tujor inteꞌ vaso. Pero tunor era jax taca inteꞌ onian bꞌijnusiaj y majax tuaꞌ e Dios, che e Jesús.
MAR 7:9 Y ojron e Jesús otronyajr y che: —Y umen que nox war iyusre icꞌupse e onian bꞌijnusiaj tuaꞌ catata viejobꞌirobꞌ war iwacta tuaꞌ iche lo que war ucꞌani e Dios.
MAR 7:10 Porque chꞌar tzꞌijbꞌabꞌir tama uyojroner e Dios umen e Moisés y che: “Cꞌupsen atata y atuꞌ.” Y otronyajrto che jaxir que: “Tin e ucꞌaye utata o utuꞌ ucꞌani tuaꞌ achamesna.” Bꞌan chꞌar tzꞌijbꞌabꞌir umen e Moisés.
MAR 7:11 Pero nox iware que inteꞌ winic erer uyare utata o utuꞌ y che: “Machi uyubꞌien intacriet era porque tunor lo que ayan tanibꞌa ajcꞌubꞌirix e Dios nimener.”
MAR 7:12 Entonces jay nox ixixin iche cocha era war iware que machi ixto tuaꞌ itacre itata o ituꞌ.
MAR 7:13 Y tamar era nox war iche aquetpa que matucꞌa ucꞌampibꞌir ani lo que arobꞌbꞌiron umen e Dios tuaꞌ ixixin icꞌupse tunor e onian bꞌijnusiaj xeꞌ cay uchiobꞌ itata viejobꞌirobꞌ ixnix. Y ayan meyra lo que ayan cocha era lo que war iche ubꞌan, che e Jesús.
MAR 7:14 Entonces e Jesús upejca e gente otronyajr y che: —Ubꞌinic tunorox lo que cꞌani inwareox era, y natanic tunor era.
MAR 7:15 Porque lo que oꞌchoy tama uyej inteꞌ winic machi tuaꞌ ubꞌoni uyalma, pero lo que ulocse tama uyej jax lo que axin ubꞌoni e winic era.
MAR 7:16 Tin e ayan uchiquin uyubꞌic niwojroner era, che e Jesús.
MAR 7:17 Entonces e Jesús uyacta tunor e gente era patir y ochoy macuir inteꞌ otot y ochoyobꞌ uyajcanuarobꞌ ubꞌan. Entonces uyajcanuarobꞌ cay uyubꞌiobꞌ tuaꞌ e Jesús tuaꞌ unatobꞌ tucꞌa war che e ojroner xeꞌ mucur cora era.
MAR 7:18 Y ojron e Jesús y che: —Y nien nox ¿machi ca inata tucꞌa war che e ojroner era? ¿Y machi ca inata que tunor lo que oꞌchoy tama uyej inteꞌ winic machi uyubꞌi ubꞌoni uyalma?
MAR 7:19 Porque lo que ucꞌuxi inteꞌ winic machi oꞌchoy esto tama uyalma sino que oꞌchoy macuir unac taca y de allí alocꞌoy otronyajr tama ucuerpo, che e Jesús. Y tamar era war uchecsu tut uyajcanuarobꞌ que matucꞌa e comida xeꞌ ma erer acꞌujxa.
MAR 7:20 Entonces ojron e Jesús otronyajr y che: —Lo que inteꞌ winic ulocse tama uyalma jax lo que abꞌonon.
MAR 7:21 Porque tama uyalma inteꞌ winic alocꞌoy tunor e mabꞌambꞌan bꞌijnusiaj xeꞌ jax e bꞌijnusiaj tuaꞌ axin taca inteꞌ ajnajtir ixic, y tunor e bꞌijnusiaj cocha era, y e bꞌijnusiaj tuaꞌ axin achamsan.
MAR 7:22 Y alocꞌoy tama uyalma inteꞌ winic e bꞌijnusiaj tuaꞌ axin axujchꞌian, y e bꞌijnusiaj tuaꞌ uyusre uchꞌami lo que tuaꞌ otronteꞌ, y e bꞌijnusiaj tuaꞌ axin uche tunor e mabꞌambꞌanir lo que erer ubꞌijnu uche, y e bꞌijnusiaj tuaꞌ axin amajresian, y e bꞌijnusiaj tuaꞌ axin aturuan tama e vicio, y e bꞌijnusiaj tuaꞌ axin acꞌuxnaqꞌui uwira lo que ayan xeꞌ imbꞌutz tuaꞌ otronteꞌ, y e bꞌijnusiaj tuaꞌ axin oꞌjron upater otronteꞌ, y e bꞌijnusiaj tuaꞌ axin utattzꞌi ubꞌa que jax taca ayan ucꞌampibꞌir, y e bꞌijnusiaj tuaꞌ axin uche lo que matucꞌa ucꞌampibꞌir.
MAR 7:23 Pues tunor e mabꞌambꞌan bꞌijnusiaj cocha era xeꞌ war alocꞌoy tama uyalma inteꞌ winic jax lo que uche aquetpa bꞌombꞌir inteꞌ winic, che e Jesús.
MAR 7:24 Entonces locꞌoy e Jesús tama e otot era y ixin esto tama e lugar tuyejtzꞌer e chinam Tiro y tuyejtzꞌer e chinam Sidón. Y ixin ochoy tama ingojr otot porque machi war ucꞌani tuaꞌ anatanwa umen e gente tiaꞌ turu, pero machi uyubꞌi amucwan.
MAR 7:25 Y ayan inteꞌ ixic xeꞌ ayan inteꞌ uwijchꞌoc xeꞌ chucur uyalma umen inteꞌ mabꞌambꞌan mein xeꞌ cꞌotoy unata que ya turu e Jesús tama e otot era, y tamar era ixin cotuan tut nuc uyoc e Jesús.
MAR 7:26 Pero e ixic era tari tama e lugar Sirofenicia y cay ucꞌajti taca e Jesús tuaꞌ aloqꞌuesna e mabꞌambꞌan mein tama uwijchꞌoc.
MAR 7:27 Pero ojron e Jesús y che: —Actan ucꞌuxicobꞌ bꞌajxan e maxtac porque mabꞌambꞌan tuaꞌ calocse e comida tuobꞌ tuaꞌ cawajcꞌu inteꞌ tzꞌiꞌ, che e Jesús.
MAR 7:28 Pero ojron otronyajr e ixic y che: —Pues erach awojroner, Niwinquiraret. Pero yebꞌar e mesa tiaꞌ war aweꞌ e maxtacobꞌ ayan tiaꞌ ojri uchꞌeir e pan y e tzꞌiꞌ war ucꞌopi ucꞌuxi, che e ixic.
MAR 7:29 Y che e Jesús: —Imbꞌutz awojroner lo que aware. Pues erer iꞌxin era porque cꞌapa locꞌoy e mabꞌambꞌan mein lo que ayan ani tama awijchꞌoc, che e Jesús.
MAR 7:30 Entonces ixin e ixic esto tama uyotot y conda cꞌotoy utajwi chꞌar uwijchꞌoc tut uchꞌacteꞌ y mix tucꞌa e mabꞌambꞌan mein tamar.
MAR 7:31 Entonces e Jesús sutpa locꞌoy tama e lugar era xeꞌ turu tuyejtzꞌer e chinam Tiro y numuy tama e chinam Sidón, y numuy tama e lugar tiaꞌ ayan diez chinamobꞌ teinxejr e xucur Jordán, y de allí ixin cꞌotoy esto tutiꞌ e nuxi jaꞌ xeꞌ turu tama e departamento Galilea.
MAR 7:32 Y conda cꞌotoy ayan cora winicobꞌ xeꞌ uqꞌuechiobꞌ ixin inteꞌ winic tut e Jesús xeꞌ macar uchiquin y xeꞌ machi oꞌjron, y cay upejcobꞌ e Jesús tuaꞌ uturbꞌa ucꞌabꞌ tamar tuaꞌ atzꞌacpesna.
MAR 7:33 Entonces e Jesús uqꞌueche ixin e winic innajt cora tut tunor e gente y cay uyose or ucꞌabꞌ tama uchiquin e winic, y de allí cay utujbꞌa or ucꞌabꞌ taca uyar utiꞌ, y de allí upijchꞌi or uyac e winic tacar.
MAR 7:34 Y de allí e Jesús sutpa uchꞌujcu tichan y war ujaqꞌui umusic y cay upejca uchiquin y or uyac e winic y che: —Bꞌantzꞌen, che e Jesús.
MAR 7:35 Y wacchetaca ubꞌian uchiquin e winic y bꞌantzꞌa or uyac y uyubꞌi ixto oꞌjron era.
MAR 7:36 Entonces e Jesús uyare e winic tacar tin e taresna umenerobꞌ que machix tuaꞌ uyareobꞌ e gente lo que numuy era taca e winic. Pero lo más que uyare que machi tuaꞌ uchecsuobꞌ tut e gente axin, más ixin uchecsuobꞌ tic taca.
MAR 7:37 Y tunor e gente war ubꞌijnuobꞌ tamar y chenobꞌ: —Galan uche tunor. Jaxir erer uche apascꞌa ut uchiquin tin e macar ani uchiquin, y tin e machi uyubꞌi oꞌjron uche tuaꞌ abꞌantzꞌa uyej tuaꞌ uyubꞌi oꞌjron, che tunor e gente.
MAR 8:1 Pues tama e tiempo era cay umorojse ubꞌobꞌ meyra sian gente tut e Jesús pero matucꞌa tuaꞌ ucꞌuxiobꞌ, y tamar era e Jesús upejca uyajcanuarobꞌ y che:
MAR 8:2 —Nen inyajta ut e sian gente era porque desde uxiꞌ turobꞌ tacaren y matucꞌa war ucꞌuxiobꞌ.
MAR 8:3 Y machi cꞌani inwareobꞌ tuaꞌ axiobꞌ tama uyototobꞌ bꞌan taca porque bꞌajcꞌat acucremobꞌ tama e bꞌir umen que machi war awiobꞌ y ayan tin e tariobꞌ innajt tara ubꞌan, che e Jesús.
MAR 8:4 Pero ojron uyajcanuarobꞌ y chenobꞌ: —¿Y tiaꞌ tuaꞌ catajwi e sian comida tuaꞌ cawese tunor e gente era tama inteꞌ choquem lugar cocha era? che uyajcanuarobꞌ.
MAR 8:5 Entonces e Jesús uyubꞌi tuobꞌ y che: —¿Y jaygojr pan ayan tibꞌa? che e Jesús. Y jaxirobꞌ chenobꞌ: —Ayan siete ut pan, che uyajcanuarobꞌ.
MAR 8:6 Entonces e Jesús uyare e gente tuaꞌ aturuanobꞌ tor e cꞌopot y de allí uchꞌami tama ucꞌabꞌ e siete ut pan y cay utattzꞌi ucꞌabꞌa e Dios tamar. Y de allí cay uxere ixin taca uyajcanuarobꞌ y jaxirobꞌ upuquiobꞌ ixin taca tunor e gente.
MAR 8:7 Y ayan ubꞌan cora yarobꞌ chay tuobꞌ era y conda e Jesús cꞌapa uchojbꞌes utobꞌ uyare uyajcanuarobꞌ tuaꞌ upuquiobꞌ axin taca e gente ubꞌan.
MAR 8:8 Y tunor e gente wiobꞌ y chuanobꞌ. Y conda cꞌapa wiobꞌ cay umorojsiobꞌ lo que quetpa tama e pan y ubꞌutꞌiobꞌ siete chiquiꞌ tamar.
MAR 8:9 Y tin e wiobꞌ cocha era ayanobꞌ 4,000 winicobꞌ. Entonces e Jesús uyare e gente tuaꞌ axiobꞌ tama uyototobꞌ.
MAR 8:10 Y de allí ixin tꞌabꞌay tama inteꞌ barco xeꞌ turu tutiꞌ e nuxi jaꞌ taca uyajcanuarobꞌ y ixiobꞌ tor e jaꞌ tama e barco esto tama e lugar Dalmanuta.
MAR 8:11 Entonces conda yopobꞌ teinxejr e nuxi jaꞌ era ecmobꞌ tama e barco. Y ayan cora fariseobꞌ xeꞌ turobꞌ yajaꞌ xeꞌ cay ojronobꞌ taca e Jesús, pero war aqꞌuijnobꞌ. Pues war usicbꞌobꞌ cocha tuaꞌ umajresobꞌ e Jesús y tamar era war uyareobꞌ e Jesús tuaꞌ uche inteꞌ nuxi milagro tutobꞌ tuaꞌ aquetpa chequer jay atzay eꞌrna umen e Dios.
MAR 8:12 Pero e Jesús sutpa ujaqꞌui umusic y che: —¿Tucꞌa tuaꞌ war ucꞌajtiobꞌ inteꞌ seña tanibꞌa e gente era? Pero cꞌani inwareobꞌ que machi ixto tuaꞌ aꞌjcꞌunobꞌ inteꞌ seña cocha war ucꞌajtiobꞌ, che e Jesús.
MAR 8:13 Entonces e Jesús uyacta e gente era y sutpa tꞌabꞌay tama e barco otronyajr tuaꞌ axin esto teinxejr e nuxi jaꞌ era.
MAR 8:14 Pues war axiobꞌ tor e jaꞌ tama e barco, pero najpa umenerobꞌ tuaꞌ utaresobꞌ lo que tuaꞌ ucꞌuxiobꞌ y jax taca ayan ingojr pan tacarobꞌ tama e barco.
MAR 8:15 Entonces ojron e Jesús y che: —Chꞌujcunic iwira tuaꞌ machi ixmajresna tama ulevadura e fariseobꞌ y tama ulevadura e Herodes, che e Jesús.
MAR 8:16 Pero uyajcanuarobꞌ cay ubꞌijnuobꞌ jaxobꞌ taca y chenobꞌ: —¿Umen ca que machi catares e pan que war oꞌjron cocha era? che uyajcanuarobꞌ jaxobꞌ taca.
MAR 8:17 Pero e Jesús unata tucꞌa war oꞌjronobꞌ y tamar era uyubꞌi tuobꞌ y che: —¿Tucꞌa tuaꞌ war iware que matucꞌa e pan? Merato ixcꞌotoy inata tama tunor era, y macarto ijor. Pues nox imbꞌijc taca war ixcꞌupseyan tama e Dios.
MAR 8:18 Nox ayan unaqꞌuiut pero machi war ixeron, y ayan ichiquin pero machi war ixobꞌian. Y machi acꞌajpa imener.
MAR 8:19 Conda cay impuqui ixin e cinco ut pan tama e 5,000 winicobꞌ ¿jayteꞌ chiquiꞌ cay imorojse tamar lo que quetpa? che e Jesús. Y jaxirobꞌ chenobꞌ: —Doce, chenobꞌ.
MAR 8:20 Y che e Jesús: —Y conda cay impuqui e siete ut pan tama e 4,000 winicobꞌ ¿jayteꞌ chiquiꞌ cay imorojse tamar lo que quetpa? che e Jesús. Y jaxirobꞌ chenobꞌ: —Siete, chenobꞌ.
MAR 8:21 Entonces ojron e Jesús otronyajr y che: —¿Machi ixto ca iyubꞌi tunor era? che e Jesús.
MAR 8:22 Pues entonces e Jesús y uyajcanuarobꞌ ixiobꞌ esto tama e chinam Betsaida y yajaꞌ ayan cora winicobꞌ xeꞌ utaresobꞌ inteꞌ winic xeꞌ tajpem unacꞌut tut e Jesús xeꞌ cay ucꞌajtiobꞌ taca e Jesús tuaꞌ ucꞌatbꞌu ucꞌabꞌ tamar.
MAR 8:23 Entonces e Jesús uchuqui ucꞌabꞌ e winic xeꞌ tajpem unacꞌut y cay uqꞌueche ixin patir e chinam. Y entonces utujbꞌa orucꞌabꞌ y uturbꞌa tama unacꞌut e winic, y de allí ucꞌatbꞌu ucꞌabꞌ tama ujor e winic y cay uyubꞌi tuaꞌ y che: —¿Erer ca awira lo que ayan tara? che e Jesús.
MAR 8:24 E winic uchꞌujcu uwira y che: —Pues erer inwira cora winicobꞌ pero uwirnarobꞌ bꞌan taca cocha cora teꞌ, pero xeꞌ war axanobꞌ, che e winic.
MAR 8:25 Entonces e Jesús sutpa ucꞌatbꞌu ucꞌabꞌ tama unacꞌut e winic otronyajr, y de allí e winic cay uchꞌujcu uwira y quetpa chequer tut tunor lo que ayan tama e lugar era y quetpa tzꞌacpesbꞌir inyajrer.
MAR 8:26 Y de allí e Jesús uyare e winic tuaꞌ axin tama uyotot y che: —Ira iyochoy tama e chinam era otronyajr y ira aware e gente lo que numuy tacaret era, che e Jesús.
MAR 8:27 Entonces ixin e Jesús taca tunor uyajcanuarobꞌ tuaꞌ acꞌotoyobꞌ tama cora aldea lo que ayan tuyejtzꞌer inteꞌ chinam xeꞌ ucꞌabꞌa Cesarea de Filipo. Y conda war axanobꞌ tama e bꞌir e Jesús cay uyubꞌi tuaꞌ uyajcanuarobꞌ y che: —¿Y tucꞌa war chenobꞌ e gente tamaren xeꞌ Uyunenen e winic? che e Jesús.
MAR 8:28 Y uyajcanuarobꞌ chenobꞌ: —Ayan tin e war ubꞌijnuobꞌ que net jax e Juan xeꞌ ajchꞌuymar, y ayan tin e war ubꞌijnuobꞌ que net jax e profeta Elías xeꞌ turuan tama e onian tiempo, y ayan tin e war ubꞌijnuobꞌ que net jax otronteꞌ profeta xeꞌ turuan tama e onian tiempo xeꞌ sutpa bꞌixcꞌa, che uyajcanuarobꞌ.
MAR 8:29 Entonces e Jesús uyubꞌi tuobꞌ y che: —Y nox, ¿tucꞌa iware tamaren? che e Jesús. Entonces ojron e Pedro y che: —Net jax e Cristoet, che e Pedro.
MAR 8:30 Entonces e Jesús uyare uyajcanuarobꞌ que machito tuaꞌ uyare e gente que jaxir jax e Cristo xeꞌ war che que jaxir jax Cawajcorpesiaj.
MAR 8:31 Pues entonces e Jesús cay uchecsu tut uyajcanuarobꞌ que jaxir xeꞌ jax Uyunen e Winic ucꞌani tuaꞌ unumse ubꞌa meyra tama ucꞌabꞌobꞌ e nuquir winicobꞌ, y que ucꞌani tuaꞌ unumse ubꞌa meyra tama ucꞌabꞌobꞌ tin e uwinquir e inmojr sacerdotiobꞌ y tama ucꞌabꞌobꞌ tin e ajcanseyajobꞌ tama uley e Moisés. Y cay uchecsu tutobꞌ ubꞌan que jaxir ucꞌani tuaꞌ achamesna, pero que tama e uxteꞌ día cꞌani asujta abꞌixqꞌuesna tujam e chamenobꞌ.
MAR 8:32 Y war uchecsu ubꞌa tut uyajcanuarobꞌ cocha era, conda e Pedro upejca e Jesús tuaꞌ alocꞌoy patir tacar y cay uyare que majax imbꞌutz lo que war oꞌjron e Jesús era.
MAR 8:33 Pero e Jesús wacchetaca sutpa uwira ut uyajcanuarobꞌ y cay ucꞌaye e Pedro y che: —Loqꞌuen tara Satanás, porque net machi anata tucꞌa war ubꞌijnu e Dios. Net intaca war abꞌijnu bꞌan cocha ubꞌijnuobꞌ e winicobꞌ tara tor e rum, che e Jesús.
MAR 8:34 Entonces e Jesús cay upejca uyajcanuarobꞌ y e gente xeꞌ turobꞌ tuyejtzꞌer y che: —Tin e cꞌani axin tanipat ucꞌani tuaꞌ unajpes ubꞌa y axin tanipat ejcꞌar ejcꞌar motor que axin ani achamesna tamaren.
MAR 8:35 Porque tin e cꞌani ucorpes ucuxtar cꞌani asatpa, pero tin e usati ucuxtar tamaren y tamar uyojroner e Dios cꞌani acorpesna.
MAR 8:36 ¿Y tucꞌa ucꞌampibꞌir tut inteꞌ winic jay axin uchꞌami tunor lo que ayan tara tor e rum jay tamar era axin usati uyalma?
MAR 8:37 ¿Y cobꞌa nic tumin tuaꞌ utoyi inteꞌ winic tuaꞌ ucorpes ani uyalma?
MAR 8:38 Y jay ayan tin e axin asubꞌajra tamaren y tamar niwojroner tut e gente tara tor e rum xeꞌ machi war acꞌupseyanobꞌ tamaren y xeꞌ mabꞌambꞌan uwirnarobꞌ, entonces nen xeꞌ Uyunenen e winic cꞌani insubꞌajra tamarobꞌ ubꞌan conda insutpa waten taca tunor utawarer Nitata y taca tunor e angelobꞌ xeꞌ erach, che e Jesús.
MAR 9:1 Y e Jesús cay ojron otronyajr y che: —Cꞌani inwareox era que ayan tin e turox tara xeꞌ machi tuaꞌ ixchamay este que iwira watar uchinam e Dios taca ucꞌotorer e Dios, che e Jesús.
MAR 9:2 Entonces conda numuy seis día e Jesús upejca e Pedro taca e Santiago y e Juan y tꞌabꞌay ixiobꞌ esto tujor inteꞌ nuxi witzir. Y conda cꞌotoyobꞌ sutpa intiach uwirnar e Jesús tutobꞌ.
MAR 9:3 Y ubꞌujc sutpa sacsac este que ejpray ut, y quetpa más sacsac ut que inteꞌ bꞌujc xeꞌ bien pojchbꞌir tara tor e rum.
MAR 9:4 Entonces e uxteꞌ ajcanuarobꞌ era uwirobꞌ checta chacojt winicobꞌ. Inteꞌ jax e Elías y inteꞌ jax e Moisés, y war oꞌjronobꞌ taca e Jesús.
MAR 9:5 Entonces e Pedro uyare e Jesús y che: —Niwinquiraret, catzay que turon tara tacaret. Jay acꞌani erer cache uxteꞌ yar bꞌiqꞌuit otot, inteꞌ tabꞌa, inteꞌ tuaꞌ e Moisés, y inteꞌ tuaꞌ e Elías, che e Pedro.
MAR 9:6 Pues war abꞌactobꞌ uyajcanuarobꞌ era y tamar era e Pedro machi unata tucꞌa war oꞌjron.
MAR 9:7 Y wacchetaca ecmay tari inteꞌ tocar xeꞌ ubꞌujcse tunor e lugar tiaꞌ turobꞌ. Y macuir e tocar cay uyubꞌiobꞌ inteꞌ nuc xeꞌ ojron y che: —Jaxto era Niunen xeꞌ inyajta ut. Ubꞌinic lo que uyareox, che e nuc xeꞌ uyubꞌiobꞌ locꞌoy tama e tocar era.
MAR 9:8 Y tama e momento era conda war uwirobꞌ tuyejtzꞌerobꞌ, mamajchi uwirobꞌ, sino que ubꞌajner taca turu e Jesús tacarobꞌ.
MAR 9:9 Y conda war ecmayobꞌ axin tama e nuxi witzir era cay arobꞌnobꞌ umen e Jesús y che: —Ira iware nien inteꞌ tama lo que iwira tama imayjut era este que nen xeꞌ Uyunenen e winic inxin insujta imbꞌixqꞌuesna tujam e chamenobꞌ, che e Jesús.
MAR 9:10 Y tamar era cay uquetiobꞌ tunor lo que numuy era y mamajchi tut uchecsuobꞌ. Pero cay uyubꞌi ubꞌobꞌ jaxobꞌ taca tamar lo que cay ojron e Jesús que jaxir cꞌani asutpa abꞌixcꞌa tujam e chamenobꞌ.
MAR 9:11 Y tamar era uyubꞌiobꞌ tuaꞌ e Jesús y chenobꞌ: —¿Tucꞌa tuaꞌ war acanseyanobꞌ e ajcanseyajobꞌ tama uley e Moisés que ucꞌani tuaꞌ asutpa watar e profeta Elías bꞌajxan y de allí cꞌani watar e Cristo? che uyajcanuarobꞌ.
MAR 9:12 Entonces ojron e Jesús y che: —Chequer que watar e Elías más bꞌajxan y que jaxir cꞌani ucꞌunles tunor uyalmobꞌ e gente axin. ¿Pues tucꞌa che tama uyojroner e Dios tamaren xeꞌ Uyunenen e winic? Che que ucꞌani tuaꞌ innumse nibꞌa meyra y que ucꞌani tuaꞌ axejbꞌna niut.
MAR 9:13 Pero nen cꞌani inwareox era que e Elías yopix, pero e nuquir winicobꞌ tama e chinam Jerusalem cay uchiobꞌ meyra lo que mabꞌambꞌan upater bꞌan cocha chꞌar tzꞌijbꞌabꞌir tama uyojroner e Dios, che e Jesús.
MAR 9:14 Pues conda e Jesús y uyajcanuarobꞌ cꞌapa ecmayobꞌ tama or e witzir era sutpa ixiobꞌ esto tiaꞌ quetpobꞌ e inmojr ajcanuarobꞌ, y cay uwirobꞌ que ayan meyra gente tuyejtzꞌerobꞌ. Y ayan cora ajcanseyajobꞌ tama uley e Moisés xeꞌ turobꞌ yajaꞌ ubꞌan y jaxirobꞌ war abꞌiritiobꞌ taca uyajcanuarobꞌ e Jesús.
MAR 9:15 Y conda irna e Jesús umen tunor e gente era bꞌacta uwirobꞌ y cay ajniobꞌ tut tuaꞌ upejcobꞌ ut.
MAR 9:16 Entonces e Jesús uyubꞌi tuobꞌ e gente era y che: —¿Tucꞌa tamar war ixojron era? che e Jesús.
MAR 9:17 Pues ayan inteꞌ winic tujam tunor e gente era xeꞌ cay ojron y che: —Niwinquiraret, nen intares nisitz toit porque chucur uyalma umen inteꞌ mabꞌambꞌan mein xeꞌ uche aquetpa cachar uyej.
MAR 9:18 Y tic taca tiaꞌ axin ajajpna umen e mabꞌambꞌan mein otronyajr y acay aꞌjcꞌuna inteꞌ ataque y war acucurna tut e rum axin y ojmay uyar utiꞌ y este war ucꞌuxi ut uyej. Y tamar era war aquetpa injayjay. Y nen cay inware awajcanuarobꞌ tuaꞌ ulocsiobꞌ e mabꞌambꞌan mein era pero machi obꞌnobꞌ, che e winic.
MAR 9:19 Y che e Jesús: —Winicox, ¿tucꞌa tiempo tuaꞌ acay ixcꞌupseyan tama e Dios? Pues nox turoxto tama e onian bꞌijnusiaj. ¿Cobꞌa tiempo tuaꞌ inquetpa tacarox? ¿Cobꞌato tuaꞌ innumse nibꞌa tacarox? Taresic tara e sitz, che e Jesús.
MAR 9:20 Entonces utaresobꞌ e sitz y conda irna ut e Jesús umen e mabꞌambꞌan mein uyajcꞌu inteꞌ ataque e sitz y tamar era cucrema tut e rum y cay gorcha ixin tut e rum y cay ojmay uyar utiꞌ.
MAR 9:21 Entonces e Jesús uyubꞌi tuaꞌ utata e sitz y che: —¿Y tucꞌa día cay unumse ubꞌa cocha era? che e Jesús. Y utata e sitz che: —Cay tunor era conda chuchuto.
MAR 9:22 Y ayan ani conda e mabꞌambꞌan mein uyojres e sitz tama e cꞌajc o uyojres tama e jaꞌ tuaꞌ uchamse. Pues jay ayan lo que erer ache tuaꞌ atacrion, yajtan coit era y tacrenon, che e tatabꞌir.
MAR 9:23 Entonces ojron e Jesús y che: —Pues tut tin e war acꞌupseyan tamaren, tunor erer achena umener, che e Jesús.
MAR 9:24 Entonces aru e tatabꞌir taca inteꞌ nuxi nuc y che: —Incꞌupseyan tamaret, tacrenen tuaꞌ incꞌupseyan tamaret más, che e winic era taca inteꞌ nuxi nuc.
MAR 9:25 Y conda e Jesús uwira que war umorojse ubꞌobꞌ meyra gente tuyejtzꞌer cay utzacre e mabꞌambꞌan mein y che: —Ajmabꞌambꞌan meinet xeꞌ macar achiquin y xeꞌ macar awej, nen inwaret que loqꞌuen tama e sitz era. Y actan uyalma quiqui, y ira isutpa oꞌchoy tamar otronyajr, che e Jesús.
MAR 9:26 Y tamar era e mabꞌambꞌan mein aru taca inteꞌ nuxi nuc y uyajcꞌu e sitz otronteꞌ ataque, y de allí locꞌoy tama e sitz, y jaxir quetpa bꞌan cocha inteꞌ chamen este que ayan tin e cay ojron que chamen ixto e sitz era.
MAR 9:27 Pero e Jesús uchuqui ucꞌabꞌ e sitz y cay utꞌabꞌse, y wacchetaca achpa wawan e sitz.
MAR 9:28 Entonces ochoy e Jesús tama inteꞌ otot taca tunor uyajcanuarobꞌ y conda turobꞌ ubꞌajnerobꞌ macu jaxobꞌ taca cay uyubꞌiobꞌ tuaꞌ y chenobꞌ: —¿Y tucꞌa tuaꞌ machi cobꞌna cawajnes alocꞌoy e mabꞌambꞌan mein era? che uyajcanuarobꞌ.
MAR 9:29 Y jaxir che: —Pues inteꞌ mabꞌambꞌan mein cocha era machi uyubꞌi aloqꞌuesna umen inteꞌ jay merato uyustes uyalma taca e oración y e ayuno, che e Jesús.
MAR 9:30 Pues entonces e Jesús locꞌoy taca uyajcanuarobꞌ tama e lugar era y ixiobꞌ esto tama e departamento Galilea. Pero e Jesús machi ucꞌani tuaꞌ anatanwa umen e gente tiaꞌ war axin.
MAR 9:31 Porque war ucanse uyajcanuarobꞌ y che: —Nen xeꞌ Uyunenen e winic cꞌani inqꞌuejcha axin tuaꞌ inquetpa yebꞌar ucꞌabꞌobꞌ e winicobꞌ tara tor e rum, y jaxirobꞌ axin uchamsenobꞌ, pero tama e uxteꞌ día cꞌani insujta imbꞌixqꞌuesna tujam e chamenobꞌ, che e Jesús.
MAR 9:32 Pero jaxirobꞌ machi unatobꞌ tucꞌa war che e ojroner xeꞌ war aꞌrobꞌnobꞌ era, pero bꞌactobꞌ tuaꞌ uyubꞌiobꞌ tuaꞌ otronyajr.
MAR 9:33 Entonces conda cꞌotoyobꞌ tama e chinam Capernaum ochoyobꞌ e Jesús taca uyajcanuarobꞌ tama ingojr otot y e Jesús cay uyubꞌi tuobꞌ y che: —¿Tucꞌa tamar war ixojron conda war ixxana tama e bꞌir sajmi era? che e Jesús.
MAR 9:34 Pero jaxirobꞌ subꞌajrobꞌ y machi ojronobꞌ porque war oꞌjronobꞌ tor bꞌir jaxobꞌ taca que chi tuaꞌ aquetpa más nuxi winic tujamobꞌ tama uchinam e Dios.
MAR 9:35 Entonces turuan e Jesús tama inteꞌ cꞌajn y cay upejca e doce uyajcanuarobꞌ y che: —Pues tin e cꞌani aquetpa e más nuxi winic tama uchinam e Dios ucꞌani tuaꞌ uche ubꞌa más chuchu que e inmojr, y ucꞌani tuaꞌ aquetpa uman e inmojr, che e Jesús.
MAR 9:36 Entonces e Jesús upejca inteꞌ yar chuchu sitz y uwabꞌu tujamobꞌ y cay umeqꞌue y che:
MAR 9:37 —Tin e uchꞌami inteꞌ yar chuchu sitz cocha era tama nicꞌabꞌa war uchꞌamien nen ubꞌan. Y tin e war uchꞌamien nen, majax nen taca war uchꞌami sino que war uchꞌami ubꞌan tin e uyebꞌta tarien, che e Jesús.
MAR 9:38 Entonces ojron e Juan y che: —Niwajcanseyajet, non catajwi cabꞌa taca inteꞌ winic xeꞌ war ucꞌampes acꞌabꞌa tuaꞌ utzacre alocꞌoy inteꞌ mabꞌambꞌan mein, pero cocha jaxir machi war axana tacaron cay caware que machi tuaꞌ ucꞌampes acꞌabꞌa cocha era, che e Juan.
MAR 9:39 Pero ojron e Jesús y che: —Ira iware inteꞌ winic cocha era que machi tuaꞌ ucꞌampes nicꞌabꞌa, porque tin e axin ucꞌampes nicꞌabꞌa cocha era tuaꞌ uche inteꞌ milagro ma cocha erer asutpa oꞌjron nipater.
MAR 9:40 Porque tin e machi war aqꞌuijna uwiron jax capiar ubꞌan.
MAR 9:41 Y cꞌani inwareox era que tunor tin e axin utacre inteꞌ tama nicꞌabꞌa umen taca que jax inteꞌ ajcꞌupesiaj tamaren, motor que imbꞌijc jaꞌ taca axin uyajcꞌu tuaꞌ ojchna, pero cꞌani inwareox que jaxir san tuaꞌ uchꞌami utuanibꞌir tuaꞌ e Dios tamar lo que uche era, che e Jesús.
MAR 9:42 Entonces ojron e Jesús otronyajr y che: —Tin e axin uche acucrema tama e mabꞌambꞌanir inteꞌ chuchu cocha era xeꞌ war acꞌupseyan tamaren más ani bueno tuaꞌ acajcha inteꞌ nuxi chaꞌ tama unuc y tuaꞌ atobꞌesna axin tama e jaꞌ tiaꞌ más intam tuaꞌ achamay macuir e jaꞌ.
MAR 9:43 Bꞌajcꞌat war itzay ache e mabꞌambꞌanir tama inteꞌ acꞌabꞌ, y jay bꞌan entonces más ani bueno tuaꞌ axuri alocꞌoy inteꞌ acꞌabꞌ era. Pues más ani bueno jay iquetpa taca inteꞌ taca acꞌabꞌ tara tor e rum jay tamar era machi tuaꞌ iꞌxin bꞌixir tut e cꞌajc xeꞌ machi tuaꞌ atajpa taca chateꞌ acꞌabꞌ.
MAR 9:44 Pues tama e lugar era ma tiaꞌ tuaꞌ achamay e sian ubꞌi y ma tiaꞌ tuaꞌ atajpa e cꞌajc.
MAR 9:45 Bꞌajcꞌat war itzay ache e mabꞌambꞌanir tamar taca inteꞌ oꞌc, y jay bꞌan entonces más ani bueno tuaꞌ axuri alocꞌoy inteꞌ oꞌc. Pues más ani bueno jay iquetpa taca inteꞌ taca oꞌc tara tor e rum jay tamar era machi tuaꞌ iꞌxin bꞌixir tut e cꞌajc xeꞌ machi tuaꞌ atajpa taca chatertiꞌ oꞌc.
MAR 9:46 Pues tama e lugar era ma tiaꞌ tuaꞌ achamay e sian ubꞌi y ma tiaꞌ tuaꞌ atajpa e cꞌajc.
MAR 9:47 Bꞌajcꞌat war itzay ache e mabꞌambꞌanir tamar taca lo que awira tamar ingojr unacꞌoit, y jay bꞌan entonces más ani bueno tuaꞌ alocse achoqui ingojr unacꞌoit. Pues más ani bueno jay iquetpa taca ingojr taca unacꞌoit tara tor e rum jay tamar era machi tuaꞌ iꞌxin bꞌixir tut e cꞌajc taca chagojr unacꞌoit.
MAR 9:48 Pues tama e lugar era ma tiaꞌ tuaꞌ achamay e sian ubꞌi y ma tiaꞌ tuaꞌ atajpa e cꞌajc.
MAR 9:49 ’Porque bꞌan cocha machi asatpa e wer conda cayari e atzꞌam tamar, y bꞌan ubꞌan cacꞌupesiaj que machi tuaꞌ asisa conda axin canumse cabꞌa tamar lo que intran ticoit. Porque bꞌan era cocha jay cacꞌupesiaj ucꞌani ani tuaꞌ unumse inteꞌ cꞌajc tuaꞌ aquetpa chequer que war aqꞌuecꞌo cacꞌupesiaj.
MAR 9:50 Y bueno e atzꞌam, pero jay e atzꞌam apaxran ut entonces mix tucꞌa ucꞌampibꞌir inyajrer. ¿Y cocha tuaꞌ asutpa watar utzeir otronyajr? Y tamar era nox ucꞌani tuaꞌ icojco ibꞌa tuaꞌ ixquetpa imbꞌutz tut e Dios y tuaꞌ ixquetpa imbꞌutz taca e inmojr ubꞌan, bꞌan cocha e wer conda ayan e atzꞌam tamar que machi asatpa. Y tamar era nox ucꞌani tuaꞌ icojco e jiriar tijam inteꞌ intiox, che e Jesús.
MAR 10:1 Entonces locꞌoy e Jesús tama e chinam Capernaum era y ixin esto tama e departamento Judea y esto tama e lugar xeꞌ turu teinxejr e xucur Jordán. Y conda cꞌotoy ayan e sian gente xeꞌ sutpa umorojse ubꞌobꞌ tut e Jesús y jaxir cay canseyan tama uyojroner e Dios otronyajr bꞌan cocha cay uche.
MAR 10:2 Entonces cꞌotoyobꞌ cora fariseobꞌ xeꞌ war usicbꞌobꞌ cocha tuaꞌ umajresobꞌ e Jesús tuaꞌ uyubꞌi utuchꞌiobꞌ tut uley e Moisés, y tamar era cay uyubꞌiobꞌ tuaꞌ y chenobꞌ: —¿Uyajcꞌon ca lugar uley e Moisés tuaꞌ catijres canujbꞌiar? che e fariseobꞌ era.
MAR 10:3 Y che e Jesús: —¿Y tucꞌa uyareox tuaꞌ iche e Moisés? che e Jesús.
MAR 10:4 Entonces ojronobꞌ e fariseobꞌ y chenobꞌ: —Pues chꞌar tzꞌijbꞌabꞌir umen e Moisés que erer atzꞌijbꞌana inteꞌ jun tuaꞌ aꞌjcꞌuna uwixcar inteꞌ tiaꞌ che que machi ixto acꞌajna y tamar era erer uyacta ubꞌobꞌ, che e fariseobꞌ era.
MAR 10:5 Entonces ojron e Jesús otronyajr y che: —Pues bꞌan tzꞌijbꞌabꞌir umen e Moisés pero umen taca que nox war iqꞌuecꞌojse iwalma y machi war icꞌani lo que ucꞌani e Dios.
MAR 10:6 Pero tama ucajyesnibꞌir or e rum era conda wartocto achena tunor era umen e Dios, che que jaxir: “Uche inteꞌ winic y inteꞌ ixic.”
MAR 10:7 Y de allí e Dios che: “Y tamar era inteꞌ winic ucꞌani tuaꞌ uyacta utuꞌ y utata tuaꞌ axin uchꞌami uwixcar,
MAR 10:8 y conda uchꞌami ubꞌobꞌ, axin aquetpobꞌ intera”, che e Dios. Y tamar era mixto jax chateꞌ yaꞌ sino que intera taca tuaꞌ aquetpobꞌ.
MAR 10:9 Y tamar era lo que e Dios unutꞌi ma erer atijresna umen inteꞌ winic, che e Jesús.
MAR 10:10 Entonces conda cꞌotoyobꞌ tama uyototobꞌ otronyajr uyajcanuarobꞌ e Jesús cay uyubꞌiobꞌ tuaꞌ tamar lo que cay ojron era.
MAR 10:11 Entonces ojron e Jesús y che: —E winic xeꞌ axin uyacta uwixcar tuaꞌ utijres unujbꞌiar y xeꞌ axin anujbꞌi taca otronteꞌ ixic war acꞌaxi tama e mabꞌambꞌanir upater xeꞌ uwixcar ani.
MAR 10:12 Y jay inteꞌ ixic axin uyacta uviejo tuaꞌ asutpa anujbꞌi taca otronteꞌ winic, jaxir war acꞌaxi tama e mabꞌambꞌanir ubꞌan, che e Jesús.
MAR 10:13 Entonces cay taresna cora maxtac tut e Jesús tuaꞌ upacbꞌu ucꞌabꞌ tamarobꞌ tuaꞌ uchojbꞌes utobꞌ. Pero uyajcanuarobꞌ cay ucꞌayobꞌ tin e war utares e maxtacobꞌ era.
MAR 10:14 Pero conda e Jesús cay uwira tucꞌa war uchiobꞌ uyajcanuarobꞌ cay qꞌuijna cora y tamar era uyare uyajcanuarobꞌ y che: —Actanic yopac taniut tunor e maxtac y ira iquete iwabꞌu, porque tunor tin e axin acꞌupseyanobꞌ tamaren bꞌan cocha war uchiobꞌ e maxtacobꞌ era axin oꞌchoyobꞌ tama uchinam e Dios.
MAR 10:15 Y cꞌani inwareox que tin e machi cꞌani uchꞌamiobꞌ uchinam e Dios bꞌan cocha war uchiobꞌ e maxtacobꞌ era, machi ixto tuaꞌ oꞌchoyobꞌ tamar, che e Jesús.
MAR 10:16 Entonces e Jesús cay umeqꞌue e bꞌiqꞌuit maxtac era y upacbꞌu ucꞌabꞌ tama ujorobꞌ y uchojbꞌes utobꞌ inteꞌ intiobꞌ.
MAR 10:17 Pues warto axana e Jesús tama uxambꞌar era conda tari inteꞌ winic ajner xeꞌ uyacta ubꞌa cotuan tut y che: —Niwajcanseyajet xeꞌ erachet, ¿tucꞌa ucꞌani tuaꞌ inche nen tuaꞌ inchꞌami e cuxtar xeꞌ machi tuaꞌ acꞌapa? che e winic era.
MAR 10:18 Y che e Jesús: —Net war awaren que erachen. Pero jax taca e Dios xeꞌ erach. Y tamar era war awaren que Diosen nen ubꞌan.
MAR 10:19 Pero net war anata lo que chꞌar tzꞌijbꞌabꞌir tama uley e Moisés tiaꞌ che: “Ira ichamsan, ira iꞌxin taca inteꞌ ajnajtir ixic o taca inteꞌ ajnajtir winic, ira ixujchꞌian, ira imajresian, ira aware bꞌan conda majax bꞌan, y cꞌupsen atata y atuꞌ”, che e Jesús.
MAR 10:20 Y e winic che: —Niwajcanseyajet, tunor era inchix desde que chuchuento, che e winic.
MAR 10:21 Entonces e Jesús uyajta ut e winic era y cay uwira ut y che: —Ayanto lo que aquetpa tuaꞌ ache: Quiqui chono tunor lo que ayan tabꞌa y ajcꞌun tin e tzajtaca ut. Y tamar era cꞌani aquetpa meyra atuanibꞌir tichan tut e qꞌuin, y de allí lar incoꞌ tacaren, che e Jesús.
MAR 10:22 Pero conda e winic uyubꞌi tunor era satpa tunor uwirnar y locꞌoy tzajtaca ut porque meyra ayan lo que ayan tacar.
MAR 10:23 Entonces e Jesús sutpa uwira tuyejtzꞌer y uyare uyajcanuarobꞌ y che: —Intran tuaꞌ oꞌchoy tama uchinam e Dios tin e ayan meyra utumin, che e Jesús.
MAR 10:24 Pero uyajcanuarobꞌ bꞌactobꞌ conda uyubꞌiobꞌ e ojroner era, y tamar era e Jesús sutpa ojron otronyajr y che: —Nimaxtacox, intran tuaꞌ oꞌchoy tama uchinam e Dios tin e war ucojco tamar taca lo que ayan tuaꞌ.
MAR 10:25 Pues más erer anumuy inteꞌ nuxi arac xeꞌ ucꞌabꞌa camello tama uchꞌenar inteꞌ aguja que erer oꞌchoy tama uchinam e Dios tin e war ucojco meyra tama e tumin xeꞌ meyra ayan tuaꞌ, che e Jesús.
MAR 10:26 Conda uyajcanuarobꞌ uyubꞌiobꞌ tunor era bꞌactobꞌ y cay ojronobꞌ jaxobꞌ taca y chenobꞌ: —Y jay inteꞌ winic cocha era xeꞌ ayan meyra utumin machi uyubꞌi acorpesna, ¿chi erer acorpesna? che uyajcanuarobꞌ jaxobꞌ taca.
MAR 10:27 Pero e Jesús sutpa uwira utobꞌ y che: —Pues mamajchi tuaꞌ acorpesna tamar taca utumin, pero tunor era intran tut e winicobꞌ. Pero tut Cadiosir matucꞌa intran tuaꞌ uche, che e Jesús.
MAR 10:28 Entonces ojron e Pedro y che: —Cawinquiraret, non era cꞌapa cawacta tunor lo que ayan ticabꞌa tuaꞌ caxin tacaret, che e Pedro.
MAR 10:29 Y che e Jesús: —Cꞌani inwareox era que tunor tin e axin uyacta lo que ayan tuaꞌ bꞌan cocha inteꞌ uyotot o usacunobꞌ o uwijtzꞌinobꞌ o uwijtanobꞌ o utuꞌ o utata o uwixcar o umaxtac o ucꞌopot tuaꞌ taca uche lo que ucꞌani e Dios o tuaꞌ uqꞌueche axin uyojroner e Dios tama e corpesiaj,
MAR 10:30 inteꞌ cocha era cꞌani uchꞌami cien veces más que lo que uyacta tama ucuxtar tara tor e rum cocha utuanibꞌir. Y tamar era axin uchꞌami más uyototobꞌ y más usacunobꞌ y más uwijtzꞌinobꞌ y más uwijtanobꞌ y más utuobꞌ y más umaxtacobꞌ y más e cꞌopot motor que ayan ubꞌan lo que aquetpa tuaꞌ unumse ubꞌa tara tor e rum, pero conda axin tut e qꞌuin aquetpa tuaꞌ uchꞌami e cuxtar xeꞌ machi tuaꞌ acꞌapa.
MAR 10:31 Y conda cacꞌotoy tut e qꞌuin tin e nuxi winic tara tor e rum cꞌani aquetpa inteꞌ xeꞌ majax nuxi winic yajaꞌ, y tin e majax nuxi winic tara tor e rum cꞌani aquetpa nuxi winic yajaꞌ, che e Jesús.
MAR 10:32 Pues war atꞌabꞌay axiobꞌ tama e bꞌir tuaꞌ acꞌotoyobꞌ tama e chinam Jerusalem, y uyajcanuarobꞌ war axin tupat e Jesús. Pero jaxirobꞌ war ubꞌijnuobꞌ y war abꞌactobꞌ tama tunor lo que war anumuy era. Entonces e Jesús sutpa upejca e doce uyajcanuarobꞌ tuaꞌ alocꞌoyobꞌ najtir cora tut e inmojr porque jaxir cꞌani oꞌjron tacarobꞌ ubꞌajnerobꞌ. Y tamar era cay uyare lo que tuaꞌ anumuy tacar.
MAR 10:33 Entonces ojron e Jesús y che: —Pues erer iwira que war catꞌabꞌay caxin esto tama e chinam Jerusalem, y conda cacꞌotoy nen xeꞌ Uyunenen e winic cꞌani anjcꞌuna tama ucꞌabꞌobꞌ tin e uwinquir e inmojr sacerdotiobꞌ y tama ucꞌabꞌobꞌ tin e ajcanseyajobꞌ tama uley e Moisés. Jaxirobꞌ tuaꞌ uyareobꞌ tuaꞌ inchamesna, y de allí cꞌani uyajqꞌuenobꞌ tama ucꞌabꞌobꞌ e gente romano
MAR 10:34 xeꞌ tuaꞌ utzenienobꞌ y xeꞌ tuaꞌ utujbꞌienobꞌ y xeꞌ tuaꞌ uwatzꞌienobꞌ y de allí cꞌani uchamsenobꞌ. Pero tama e uxteꞌ día cꞌani insujta imbꞌixqꞌuesna tujam e chamenobꞌ, che e Jesús.
MAR 10:35 Entonces cꞌotoy e Santiago y e Juan xeꞌ jax uyunenobꞌ e Zebedeo tut e Jesús. Y cay upejcobꞌ e Jesús y chenobꞌ: —Cawajcanseyajet, ¿erer ca ani ache lo que cꞌani cacꞌajti tacaret era? che e Santiago y e Juan era.
MAR 10:36 Y che e Jesús: —¿Y tucꞌa icꞌani tuaꞌ inche tacarox? che e Jesús.
MAR 10:37 Y jaxirobꞌ chenobꞌ: —Ajcꞌunon tiaꞌ tuaꞌ caturuan tama awejtzꞌer conda iꞌxin icꞌotori tama uchinam e Dios xeꞌ meyra ayan utawarer, y que non erer caturuan inteꞌ tama anojcꞌabꞌ y inteꞌ tama atzꞌejcꞌabꞌ, che e Santiago y e Juan.
MAR 10:38 Entonces che e Jesús: —Pues nox era machi war inata tucꞌa war icꞌajti. ¿Erer ca ani ichꞌami e nuxi cꞌuxner lo que ucꞌani tuaꞌ inxin innumse nibꞌa tama niwalma bꞌan cocha jay iyuchꞌi ani lo que ayan tama nitaza xeꞌ aquetpa tuaꞌ unchꞌi nen, o bꞌan cocha jay ichꞌami ani inteꞌ chꞌuymar xeꞌ meyra ayan e cꞌuxner tamar xeꞌ aquetpa tuaꞌ inchꞌami nen? che e Jesús.
MAR 10:39 Y jaxirobꞌ chenobꞌ: —Erer ani, che e Santiago y e Juan. Y che e Jesús: —Erer ixto yaꞌ. Nox ucꞌani tuaꞌ iyuchꞌi lo que ayan tama nitaza era y ucꞌani tuaꞌ ichꞌami e chꞌuymar lo que aquetpa tuaꞌ inchꞌami nen.
MAR 10:40 Pero lo que war icꞌajti nox era tuaꞌ ixturuan taniwejtzꞌer tama nichinam majax nen tuaꞌ inwareox. Porque tin e tuaꞌ aturuanobꞌ taniwejtzꞌer tama nichinam cꞌani aꞌjcꞌunobꞌ tin e sicbꞌabꞌirobꞌix umen Nitata, che e Jesús.
MAR 10:41 Pero conda e inmojr diez uyajcanuarobꞌ e Jesús cay uyubꞌiobꞌ e ojroner era qꞌuijnobꞌ upater e Santiago y e Juan.
MAR 10:42 Pero e Jesús upejca tunor uyajcanuarobꞌ era y che: —Pues nox inata que tunor e nuquir winicobꞌ tujam e gente xeꞌ machi ubꞌacriobꞌ e Dios war uwirsiobꞌ ucꞌotorer tujor e gente tamar lo que uchiobꞌ. Y tin e war uchꞌami ucꞌotorer tuaꞌ inteꞌ uwinquir war utattzꞌi ubꞌa tamar.
MAR 10:43 Pero majax bꞌan tuaꞌ aquetpa tijam nox, sino que tin e cꞌani aquetpa nuquir winic tijam ucꞌani tuaꞌ aquetpa ajtacarsiaj tuaꞌ e inmojr.
MAR 10:44 Y tin e cꞌani aquetpa más nuxi winic tijam ucꞌani tuaꞌ uche ubꞌa bꞌan cocha inteꞌ chuchu winic y ucꞌani tuaꞌ uche ubꞌa bꞌan cocha umanir tunor e inmojr.
MAR 10:45 Porque nen xeꞌ Uyunenen e winic tarien majax tuaꞌ intacarna umen e inmojr, sino que tarien tuaꞌ intacriox y tuaꞌ inwajcꞌu nibꞌa tuaꞌ inchamesna tuaꞌ incorpes meyra gente, che e Jesús.
MAR 10:46 Entonces ixin e Jesús taca uyajcanuarobꞌ y cꞌotoyobꞌ esto tama e chinam Jericó. Pero conda war alocꞌoyobꞌ otronyajr tama e chinam era ayan e sian gente xeꞌ war axanobꞌ tacarobꞌ. Y tuyejtzꞌer e bꞌir tiaꞌ war axanobꞌ ayan inteꞌ winic xeꞌ tajpem unacꞌut xeꞌ ucꞌabꞌa Bartimeo xeꞌ jax uyunen e Timeo. Y jaxir turu tut e bꞌir war ucꞌajti e tumin.
MAR 10:47 Y conda uyubꞌi que war anumuy e Jesús xeꞌ tuaꞌ e chinam Nazaret, cay aru taca inteꞌ nuxi nuc y che: —¡Jesús, Uyunenet e David, yajtan niut! che e winic era taca inteꞌ nuxi nuc.
MAR 10:48 Pero tin e turobꞌ tuyejtzꞌer e winic era cay ucꞌayobꞌ y uyareobꞌ tuaꞌ aquetpa tzꞌustaca. Pero jaxir más nojta cay aru otronyajr y che: —¡Uyunenet e David, yajtan niut! che e winic.
MAR 10:49 Entonces quetpa wawan e Jesús y uyare uyajcanuarobꞌ y che: —Pejcanic e winic yax, che e Jesús. Entonces ixin upejcobꞌ e winic xeꞌ tajpem unacꞌut y chenobꞌ: —Tzayjres abꞌa y achpen porque war upejquet, che uyajcanuarobꞌ era.
MAR 10:50 Entonces jaxir jobꞌor ubꞌa tama cora bꞌujc y uchoqui tunor e bꞌujc era tor e rum, y tobꞌoy achpa y ixin tut e Jesús.
MAR 10:51 Entonces e Jesús uyubꞌi tuaꞌ e winic y che: —¿Y tucꞌa acꞌani tuaꞌ inche tacaret? che e Jesús. Y e winic xeꞌ tajpem unacꞌut che: —Niwajcanseyajet, incꞌani tuaꞌ awerojse unacniut, che e winic.
MAR 10:52 Y che e Jesús: —Erer iꞌxin era porque tzꞌacpesnet ixto umen que war icꞌupseyan tamaren, che e Jesús. Y wacchetaca cay eron e winic y cay xana tupat e Jesús.
MAR 11:1 Pues warto axin e Jesús tama uxambꞌar tuaꞌ acꞌotoy tama e chinam Jerusalem conda cꞌotoy tama e chinam Betfagé y tama e chinam Betania xeꞌ turu tuyejtzꞌer or e witzir xeꞌ ucꞌabꞌa Olivo. Entonces cay uyare chateꞌ uyajcanuarobꞌ y che:
MAR 11:2 —Quiquic tama e aldea teinxejr bꞌana y yajaꞌ tuaꞌ itajwi incojt chij xeꞌ cachar war y xeꞌ mato chi xeꞌ cay turuan tamar. Y bꞌanic qꞌuechic taric tara.
MAR 11:3 Y jay ayan chi upejcox y uyareox y che: “¿Tucꞌa tuaꞌ war ibꞌani e chij era?” Arenic que Cawinquirar cꞌani ucꞌampes, y que wacchetaca cꞌani itares otronyajr, che e Jesús.
MAR 11:4 Entonces ixiobꞌ uyajcanuarobꞌ era esto tama e aldea yajaꞌ y utajwiobꞌ e chij cachar war tut inteꞌ macteꞌ xeꞌ turu tutiꞌ e bꞌir, y entonces ubꞌaniobꞌ e chij tuaꞌ uqꞌuechiobꞌ axin tut e Jesús.
MAR 11:5 Y ayan cora winicobꞌ xeꞌ warobꞌ yajaꞌ xeꞌ cay uyubꞌiobꞌ tuobꞌ uyajcanuarobꞌ y chenobꞌ: —¿Y tucꞌa war iche era que war ibꞌani e chij yax? chenobꞌ.
MAR 11:6 Entonces cay uyareobꞌ bꞌan cocha arobꞌnobꞌ umen e Jesús tuaꞌ uchiobꞌ, y e winicobꞌ era chenobꞌ que erer ucꞌampesobꞌ.
MAR 11:7 Entonces uqꞌuechiobꞌ ixin e chij esto tut e Jesús y cay ubꞌujcsiobꞌ upat e chij taca ubꞌujcobꞌ, y de allí e Jesús tꞌabꞌay turuan tamar.
MAR 11:8 Y ayan meyra gente xeꞌ cay uxichꞌiobꞌ ubꞌujcobꞌ tut e bꞌir y ayan tin e cay uxuriobꞌ ucꞌabꞌ e teꞌ tuaꞌ uturbꞌobꞌ tor e bꞌir. Y bꞌan uchiobꞌ e gente porque war ucꞌaniobꞌ e Jesús.
MAR 11:9 Y meyra gente war axiobꞌ más bꞌajxan que e Jesús y ayan tin e war axiobꞌ tupat ubꞌan. Y tunor e gente era war aꞌruobꞌ taca inteꞌ nuxi nuc y chenobꞌ: —¡Catattzꞌi ucꞌabꞌa Cadiosir! ¡Chojbꞌesbꞌir jaxir xeꞌ axin watar tama ucꞌabꞌa Cawinquirar!
MAR 11:10 ¡Que e Dios axin uchojbꞌes ut e nuxi chinam lo que axin watar xeꞌ tuaꞌ aquetpa tuaꞌ catata viejobꞌir David! ¡Catattzꞌic ucꞌabꞌa Cadiosir! che e sian gente era.
MAR 11:11 Entonces bꞌan cocha era ochoy e Jesús tama e chinam Jerusalem, y de allí ixin ochoy tama e templo y cay uwira tunor lo que ayan yajaꞌ. Pero cocha cꞌanix acbꞌare era jaxir locꞌoy ixin esto tama e chinam Betania taca e doce uyajcanuarobꞌ.
MAR 11:12 Pues tama inteꞌ día conda locꞌoyobꞌ tama e chinam Betania tuaꞌ axiobꞌ tama e chinam Jerusalem otronyajr cay aytzꞌa e Jesús.
MAR 11:13 Entonces e Jesús cay uwira innajt taca que ayan inteꞌ teꞌ war xeꞌ ucꞌabꞌa higuera y que ayan e sian uyopor tamar. Entonces ixin tut e teꞌ era tuaꞌ uwira jay ayan uyutir, pero matucꞌa ayan tamar, sino que uyopor taca ayan porque majax jax e tiempo era tuaꞌ achecta uyutir tamar.
MAR 11:14 Entonces e Jesús uyare e teꞌ higuera era y che: —Mix majchi tuaꞌ asutpa umaqꞌui e higo lo que alocꞌoy tamaret otronyajr, che e Jesús. Y uyajcanuarobꞌ war uyubꞌiobꞌ tunor era.
MAR 11:15 Pues entonces ixin e Jesús taca uyajcanuarobꞌ esto tama e chinam Jerusalem. Y conda cꞌotoy ochoyobꞌ macuir e templo y e Jesús cay uyajnes locꞌoy tunor tin e war achonmobꞌ y tin e war amanuobꞌ tama e templo era. Y ucucru e mesa tuaꞌ tin e war uwechꞌiobꞌ ut e tumin tuaꞌ e gente. Y cꞌapa ucucru ucꞌajnobꞌ tin e war uchoniobꞌ e sacsac mut.
MAR 11:16 Y machi war uyacta tuaꞌ uqꞌuechiobꞌ axin lo que ayan tuobꞌ era macuir e templo.
MAR 11:17 Entonces cay canseyan taca e gente y che: —Pues chꞌar tzꞌijbꞌabꞌir tama uyojroner e Dios que: “Niotot”, che e Dios, “jax inteꞌ lugar tiaꞌ tuaꞌ ucꞌajtiobꞌ e gente taca e Dios, y e templo era tuaꞌ aquetpa tuaꞌ tunor e gente”, pero nox war icꞌampes e templo era bꞌan cocha inteꞌ uchꞌenir e ajxujchꞌobꞌ, che e Jesús.
MAR 11:18 Y tin e uwinquir e inmojr sacerdotiobꞌ y tin e ajcanseyajobꞌ tama uley e Moisés war uyubꞌiobꞌ tunor era, y tamar era cay usicbꞌobꞌ cocha tuaꞌ uchamsiobꞌ e Jesús. Pero war abꞌactobꞌ ubꞌan porque tunor e gente war atzay uwirobꞌ e Jesús y war ubꞌijnuobꞌ meyra tamar ucanseyaj.
MAR 11:19 Pero conda acbꞌare locꞌoy e Jesús taca uyajcanuarobꞌ y ixiobꞌ patir e chinam era.
MAR 11:20 Entonces tama otronteꞌ día conda war axanobꞌ tama e bꞌir sutpa uwirobꞌ e teꞌ higuera. Pero taqui inyajrer tunor e teꞌ era esto tama uwirir.
MAR 11:21 Y cꞌar umen e Pedro lo que numuy tama inteꞌ día y tamar era cay uyare e Jesús y che: —Niwajcanseyajet, iran e teꞌ higuera era lo que cay abꞌaxe acbꞌi que taquix ixto yaꞌ, che e Pedro.
MAR 11:22 Entonces ojron e Jesús y che: —Cꞌupsenic tama e Dios.
MAR 11:23 Y cꞌani inwareox era que tin e axin uyare or e witzir era y che: “Loqꞌuen tara y tobꞌen quiqui tama e jaꞌ”, y jay machi ixbꞌacta tama iwalma que machi tuaꞌ anumuy, sino que war ixcꞌupseyan que cꞌani anumuy lo que war iware era, entonces bꞌan tuaꞌ anumuy.
MAR 11:24 Y tamar era war inwareox era que tunor lo que ixixin icꞌajti taca e Dios, cꞌupseyanenic tama e Dios que san tuaꞌ ichꞌami tunor era, y bꞌan tuaꞌ anumuy.
MAR 11:25 Y conda war icꞌajti taca e Dios, jay oꞌchoy tama ijor que war ixqꞌuijna upater otronteꞌ cꞌumpenic tacar tama tunor era, y tamar era Cadiosir tuaꞌ axin acꞌumpa tacarox tama tunor imabꞌambꞌanir ubꞌan.
MAR 11:26 Pero jay machi ixcꞌumpa taca tin e war uchiobꞌ e mabꞌambꞌanir ipater, entonces nien Catata Dios xeꞌ turu tichan machi tuaꞌ acꞌumpa tama imabꞌambꞌanir ubꞌan, che e Jesús.
MAR 11:27 Entonces sutpa ixin e Jesús esto tama e chinam Jerusalem. Y conda war axana tama e templo cay irna umen uwinquir e inmojr sacerdotiobꞌ y cora ajcanseyajobꞌ tama uley e Moisés y cora nuquir winicobꞌ. Entonces jaxirobꞌ ixiobꞌ tuyejtzꞌer e Jesús
MAR 11:28 y cay uyubꞌiobꞌ tuaꞌ y chenobꞌ: —¿Y chi tuaꞌ e cꞌotorer lo que war acꞌampes tuaꞌ awajnes e ajchonmarobꞌ y tuaꞌ achꞌami utattzꞌarsiaj e maxtac era? ¿Y chi uyajqꞌuet acꞌotorer tuaꞌ ache tunor era? che e nuquir winicobꞌ era.
MAR 11:29 Entonces ojron e Jesús y che: —Y bꞌanen ubꞌan, ayan lo que cꞌani umbꞌi tibꞌa. Y jay iwaren, entonces cꞌani inwareox ubꞌan chi umen ajcꞌunen nicꞌotorer era.
MAR 11:30 ¿Chi umen tzacarna ixin e Juan tuaꞌ achꞌuyma? ¿Umen ca e Dios? o ¿umen ca e winicobꞌ? Areniquen chi umen, che e Jesús.
MAR 11:31 Entonces cay ojronobꞌ e nuquir winicobꞌ era jaxobꞌ taca y chenobꞌ: —¿Y tucꞌa tuaꞌ caware era? Jay caware que e Juan ebꞌetbꞌir tari umen e Dios, entonces jaxir tuaꞌ uyareon y che: “¿Entonces tucꞌa tuaꞌ machi cꞌupseyanox tamar?”
MAR 11:32 ¿O cꞌani ca caware que e Juan ebꞌetbꞌir tari umen e winicobꞌ? che e nuquir winicobꞌ era jaxobꞌ taca. Pues jaxirobꞌ war ubꞌacre e gente porque war ucꞌupsiobꞌ que e Juan ebꞌetbꞌir tari umen e Dios y que jaxir jax inteꞌ profeta tuaꞌ e Dios.
MAR 11:33 Y tamar era ojronobꞌ e nuquir winicobꞌ taca e Jesús y chenobꞌ: —Machi canata chi umen ebꞌtana tari e Juan, che e nuquir winicobꞌ. Entonces ojron e Jesús y che: —Y nien nen machi tuaꞌ inwareox chi umen ajcꞌunen nicꞌotorer era, che e Jesús.
MAR 12:1 Entonces cay ojron e Jesús taca e nuquir winicobꞌ era taca inteꞌ ojroner xeꞌ mucur cora y che: —Ayan inteꞌ ajyum rum xeꞌ ixin upaqꞌui cora chꞌan xeꞌ ucꞌabꞌa uva xeꞌ lar uwirnar cocha e chꞌuyur chꞌan tama inteꞌ nuxi chor. Y cay uyustes e macteꞌ ixin. Y de allí cay uyustes lo que ucꞌampes tuaꞌ ulocse uyarar e uva era. Y de allí ujachi ingojr otot macuir uchor xeꞌ nojta uyoquir tiaꞌ chequer uwira tunor uchor tiaꞌ tuaꞌ atꞌabꞌay inteꞌ ajcojc chor. ’Pues de allí utajwi cora ajpatnarobꞌ xeꞌ utoyobꞌ e rum tuaꞌ acay apatnobꞌ tamar. Y de allí e ajyum locꞌoy ixin innajt tama inteꞌ uxambꞌar.
MAR 12:2 Entonces conda cꞌotoy e día tuaꞌ e cosecha e ajyum uyebꞌta ixin inteꞌ uman tuaꞌ axin uchꞌami lo que quetpa tuaꞌ uchꞌami tama e cosecha era.
MAR 12:3 Pero conda cꞌotoy, jajpna umen e ajpatnarobꞌ xeꞌ war apatnobꞌ tama e rum y uwatzꞌiobꞌ e man y uyebꞌtobꞌ ixin bꞌan taca.
MAR 12:4 Entonces e ajyum sutpa uyebꞌta ixin otronteꞌ uman. Pero inteꞌ uman era jujra taca e tun umen e ajpatnarobꞌ y uwatzꞌiobꞌ tama ujor y uqꞌuijnesobꞌ ixin.
MAR 12:5 Entonces e ajyum sutpa uyebꞌta ixin otronteꞌ uman. Pero e man era cꞌapa chamesna umen e ajpatnarobꞌ. Y ebꞌtana ixin meyra uman incojt incojt, y ayan tin e intaca uyobꞌiobꞌ meyra y ayan tin e uchamsiobꞌ inyajrer.
MAR 12:6 ’Pero quetpato jax taca uyunen e ajyum tuaꞌ uyebꞌta axin otronyajr era, y jaxir meyra acꞌajna umen utata. Y tamar era uyebꞌta ixin uyunen porque war ubꞌijnu que: “Conda e ajpatnarobꞌ uwirobꞌ que jax era nisitz xeꞌ war acꞌotoy, cꞌani abꞌacta uwirobꞌ”, xeꞌ war ubꞌijnu e ajyum chor.
MAR 12:7 Pero conda irna e sitz umen e ajpatnarobꞌ, cay ojronobꞌ jaxobꞌ taca y chenobꞌ: “¿O jax ca era xeꞌ axin aquetpa ajyum tuaꞌ tunor era conda axin achamay utata? Cachamsenic ubꞌan tuaꞌ caquetpa ajyum non tama tunor e cꞌopot era”, che e ajpatnarobꞌ jaxobꞌ taca.
MAR 12:8 Entonces e ajpatnarobꞌ ujajpiobꞌ uquerejbꞌobꞌ e sitz y uchamsiobꞌ uyactobꞌ patir e macteꞌ. Tara acꞌapa e ojroner, che e Jesús.
MAR 12:9 Entonces e Jesús uyubꞌi tuaꞌ e nuquir winicobꞌ y che: —Y conda acꞌotoy e ajyum cꞌopot ¿tucꞌa tuaꞌ uche taca e ajpatnarobꞌ era? che e Jesús. Entonces ojronobꞌ e nuquir winicobꞌ y chenobꞌ: —Watar jaxir y uchamse inteꞌ inteꞌ e ajpatnarobꞌ era, y de allí axin utajwi otro inmojr ajpatnarobꞌ, pero xeꞌ axin utoyi utuanibꞌir e rum, che e nuquir winicobꞌ era.
MAR 12:10 Entonces ojron e Jesús y che: —¿Ma ca tiaꞌ cay iche leer tiaꞌ chꞌar tzꞌijbꞌabꞌir tama uyojroner e Dios que: “E tun xeꞌ chocbꞌirix ani umen e ajcheyaj otot cꞌotoy quetpa más nojta ucꞌampibꞌir coner.
MAR 12:11 Tunor era chembꞌir umen Cawinquirar, y galan ticoit lo que cꞌapa uche era?” Bꞌan chꞌar tzꞌijbꞌabꞌir tama uyojroner e Dios, che e Jesús.
MAR 12:12 Entonces e nuquir winicobꞌ cay ubꞌijnuobꞌ tuaꞌ uqꞌuechiobꞌ axin e Jesús tama e cárcel porque war unatobꞌ que jaxir war ucꞌampes e ojroner era upaterobꞌ. Pero cocha war ubꞌacriobꞌ lo que erer uchiobꞌ tunor e sian gente, uyactobꞌ e Jesús bꞌan taca y ixiobꞌ.
MAR 12:13 Pues entonces ebꞌtana ixin cora fariseobꞌ taca cora winicobꞌ tuaꞌ e partido político tuaꞌ e Herodes tuaꞌ umajresobꞌ e Jesús tuaꞌ usicbꞌobꞌ tacar uyojroner tucꞌa tamar tuaꞌ utuchꞌiobꞌ.
MAR 12:14 Entonces cꞌotoyobꞌ tuyejtzꞌer e Jesús y chenobꞌ: —Cawajcanseyajet, war canata que net acanse tunor lo que erach y que machi abꞌacre lo que arobꞌna umen e gente, y que net machi war abꞌijnu cobꞌa ucꞌampibꞌir inteꞌ winic tamar taca uwirnar jay galan ubꞌujc o jay tzajtaca ut uwirnar, y que war acanse e gente cocha tuaꞌ axanobꞌ ixto tama ubꞌir e Dios. Pero cꞌani canata tacaret jay bueno tuaꞌ catoyi lo que arobꞌnon umen e rey César, o jay machi, chenobꞌ e winicobꞌ era.
MAR 12:15 Pero e Jesús cꞌotoy unata tamar umajresiajobꞌ era y tamar era ucꞌajti tuobꞌ y che: —Ajqꞌuecranerox, ¿tucꞌa tuaꞌ war iturbꞌa ibꞌa tuaꞌ imajresen? Taresic inteꞌ ut tumin y irsenen era, che e Jesús.
MAR 12:16 Entonces ixin utaresobꞌ inteꞌ ut tumin y uyajcꞌuobꞌ e Jesús. Entonces ojron jaxir y che: —¿Chi uyeroj xeꞌ tzꞌijbꞌabꞌir tama e tumin era? ¿Y tucꞌa ucꞌabꞌa xeꞌ tzꞌijbꞌabꞌir tara? che e Jesús. Entonces jaxirobꞌ chenobꞌ: —Tuaꞌ e rey César, chenobꞌ.
MAR 12:17 Y che e Jesús: —Ajcꞌunic e César lo que jaxir ucꞌajti, y ajcꞌunic e Dios lo que jaxir ucꞌajti, che e Jesús. Y jaxirobꞌ machi unatobꞌ tucꞌa tuaꞌ uchiobꞌ tamar uyojroner era.
MAR 12:18 Entonces yopobꞌ cora winicobꞌ tut e Jesús xeꞌ tuaꞌ inteꞌ grupo religioso xeꞌ ucꞌabꞌa saduceo. Y e saduceobꞌ era acanseyanobꞌ que mamajchi tuaꞌ asutpa abꞌixcꞌa tujam e chamenobꞌ. Y tamar era cꞌani ani umajresobꞌ e Jesús y chenobꞌ:
MAR 12:19 —Cawajcanseyajet, chꞌar tzꞌijbꞌabꞌir tama uley e Moisés que jay ayan inteꞌ sitz xeꞌ axin anujbꞌi taca inteꞌ ijchꞌoc pero conda mato tucꞌa umaxtac achamay e winic, entonces uwijtzꞌin e winic era ucꞌani tuaꞌ asutpa anujbꞌi taca uwixcar usacun ani tuaꞌ achꞌijtesian tacar. Y e sitz xeꞌ axin acuxpa bꞌajxan ucꞌani tuaꞌ aquetpa ucꞌabꞌa tuaꞌ inteꞌ xeꞌ chamay.
MAR 12:20 Pues tama inyajr ayan inteꞌ familía xeꞌ ayan siete sacumbꞌirobꞌ xeꞌ intarer tejromtac. Y xeꞌ bꞌajxan ixin nujbꞌi taca inteꞌ ijchꞌoc, pero chamay y matucꞌa umaxtac uyacta.
MAR 12:21 Entonces uwixcar e winic ani sutpa nujbꞌi taca uwijtzꞌin uviejo ani. Pero uwijtzꞌin e winic era chamay ubꞌan, y matucꞌa umaxtac uyacta. Y bꞌan unumse ubꞌa e uxteꞌ ijtzꞌimbꞌir era ubꞌan.
MAR 12:22 Y bꞌan unumse ubꞌobꞌ tunor e siete tejromtac era, inteꞌ inteꞌ ixin uchꞌamiobꞌ e ixic y mamajchi xeꞌ checta umaxtac tacar, y bꞌan taca chamayobꞌ tunorobꞌ. Y de allí chamay e ixic ubꞌan. Tara acꞌapa e ojroner.
MAR 12:23 Entonces arenon era: ¿Tucꞌa tuaꞌ anumuy conda asutpa abꞌixqꞌuesna tunor e gente tara tor e rum? Y ¿chi tacar tuaꞌ aquetpa ixcajrbꞌir e ixic cocha cꞌapa nujbꞌi taca inteꞌ inteꞌ e siete tejromtac era? che e saduceobꞌ era.
MAR 12:24 Entonces ojron e Jesús y che: —Pues nox era majresbꞌir turox y machi war inata lo que ayan tama uyojroner e Dios y machi war inata tucꞌa ucꞌotorer e Dios.
MAR 12:25 Pues conda acꞌotoy e día conda asujta abꞌixqꞌuesna tunor tin e chamenobꞌ, machi ixto tuaꞌ anujbꞌiobꞌ más y nien machi ixto tuaꞌ uyajcꞌuobꞌ uwijchꞌoctacobꞌ tuaꞌ anujbꞌiobꞌ más. Porque bꞌan tuaꞌ aquetpobꞌ tama e tiempo yajaꞌ bꞌan cocha uyangelobꞌ e Dios xeꞌ machi anujbꞌiobꞌ.
MAR 12:26 Pero tama e bꞌijnusiaj jay ucꞌani tuaꞌ asujta abꞌixqꞌuesna e gente tujam e chamenobꞌ o jay machi, nen ayan lo que cꞌani umbꞌi tibꞌa: ¿Ma ca tiaꞌ cay iche leer tama uley e Moisés tiaꞌ che que e Dios cay ojron macuir inteꞌ chactꞌix xeꞌ war atzꞌajbꞌa pero xeꞌ machi acꞌapa? Pues tama e lugar era cay ojron e Dios taca e Moisés y che: “Nen Udiosiren e Abraham y Udiosiren e Isaac y Udiosiren e Jacob”, che e Dios.
MAR 12:27 Pues Cadiosir jax inteꞌ Dios tuaꞌ tin e bꞌixir turobꞌ y majax Udiosirobꞌ tin e chamenobꞌ. Y tamar era erer canata que bꞌixirto e winicobꞌ era motor que non machito cawira utobꞌ. Y tamar era chequer que nox majresbꞌir turox tamar lo que war ibꞌijnu era, che e Jesús.
MAR 12:28 Pues turu ubꞌan inteꞌ ajcanseyaj tama uley e Moisés tujam e gente era xeꞌ war uyubꞌi tunor e ojroner era, y cocha jaxir war uwira que e Jesús war uyare bien tunor lo que ubꞌna tuaꞌ umen e saduceobꞌ, ixin ubꞌan tuaꞌ uyubꞌi tuaꞌ y che: —¿Tucꞌa ojroner xeꞌ actabꞌir umen e Dios ayan más nojta ucꞌampibꞌir? che e ajcanseyaj tama uley e Moisés era.
MAR 12:29 Y e Jesús che: —E ojroner xeꞌ actabꞌir umen e Dios xeꞌ más ayan ucꞌampibꞌir jax era: “Ubꞌinic tunorox xeꞌ tuox e Israel, jax taca Cawinquirar Dios xeꞌ awinquiri tamaron.
MAR 12:30 Yajtanic ut Iwinquirar Dios taca tunor iwalma, y taca tunor icuxtar, y taca tunor ijor, y taca tunor iqꞌuecꞌojsiaj”, bꞌan che e ojroner era xeꞌ actabꞌir umen e Dios.
MAR 12:31 Y de allí ayan otronteꞌ ojroner xeꞌ lar tacar xeꞌ che: “Yajtan ut apiarobꞌ bꞌan cocha ayajta oit abꞌa net.” Bꞌan che e ojroner era xeꞌ actabꞌir umen e Dios. Pues matucꞌa más ojroner xeꞌ actabꞌir umen e Dios xeꞌ más nojta ucꞌampibꞌir que e chateꞌ ojroner era, che e Jesús.
MAR 12:32 Entonces sutpa ojron e ajcanseyaj tama uley e Moisés otronyajr y che: —Ajcanseyajet, galan awojroner era. Porque tunor lo que war aware erach conda aware que inteꞌ taca Cadiosir ayan, y que otronteꞌ cocha jaxir matucꞌa.
MAR 12:33 Y que inteꞌ winic ucꞌani tuaꞌ uyajta ut e Dios taca tunor uyalma, y taca tunor ujor, y taca tunor uqꞌuecꞌojsiaj, y que ucꞌani tuaꞌ uyajta ut upiar bꞌan cocha uyajta ut ubꞌa jaxir. Pues más ayan ucꞌampibꞌir tuaꞌ cacꞌupse e chateꞌ ojroner era xeꞌ actabꞌir umen e Dios que tuaꞌ caxin cacꞌupse e ojroner xeꞌ che que ucꞌani tuaꞌ cachamse e sian aracꞌobꞌ o que ucꞌani tuaꞌ caputa e sian aracꞌobꞌ tujor e altar tama e templo. Bꞌan che e ajcanseyaj tama uley e Moisés era.
MAR 12:34 Pues conda e Jesús uwira que imbꞌutz uyojroner e winic era y que ayan unatanyaj, uyare y che: —Mix jax innajt turet tut uchinam e Dios, che e Jesús. Y conda uyubꞌiobꞌ uyojroner e Jesús era mamajchi más cꞌani uyubꞌi tuaꞌ tama e día era.
MAR 12:35 Pues conda turuto e Jesús tama e templo war acanseyan, cay uyubꞌi tuaꞌ e gente xeꞌ turobꞌ era y che: —¿Tucꞌa era que e ajcanseyajobꞌ tama uley e Moisés war acanseyanobꞌ que e Cristo jax usitz e David xeꞌ turuan tama e onian tiempo?
MAR 12:36 Porque jax e David era ubꞌan xeꞌ cay utzꞌijbꞌa lo que bꞌijresna umen Unawalir e Dios y che: “E Dios uyare Niwinquirar”, che e David, “turen taniwejtzꞌer tama ninojcꞌabꞌ tuaꞌ icꞌotori tacaren este que inturbꞌa tunor tin e aqꞌuijna uwiretobꞌ yebꞌar utajn oꞌc”, xeꞌ chꞌar tzꞌijbꞌabꞌir umen e David.
MAR 12:37 Entonces cocha e David uyare e Cristo que jax Uwinquirar, ¿cocha tuaꞌ caware que e Cristo jax taca usitz e David era ubꞌan? che e Jesús. Y ayan meyra gente xeꞌ war uyubꞌiobꞌ uyojroner e Jesús era, y war atzay uyubꞌiobꞌ.
MAR 12:38 Entonces e Jesús cay ucanse e gente era y che: —Iwiric tama tin e ajcanseyajobꞌ tama uley e Moisés, pues jaxirobꞌ atzay axanobꞌ tama e calle taca ubꞌujcobꞌ xeꞌ más largo, y atzayobꞌ conda apejcnobꞌ tama e calle, y atzayobꞌ conda atajttzꞌobꞌ umen tunor e gente axin.
MAR 12:39 Y jaxirobꞌ usajcobꞌ e turtar tiaꞌ aturuanobꞌ tin e más nuxi winicobꞌ tama e sinagoga, y aturuanobꞌ tut e mesa tiaꞌ tuaꞌ awiobꞌ bꞌajxan tama inteꞌ nojqꞌuin.
MAR 12:40 Pues jaxirobꞌ war ulocsiobꞌ uyototobꞌ e ixictac xeꞌ chamen uviejobꞌ, y de allí ucꞌajtiobꞌ meyra tiempo taca e Dios tuaꞌ taca eꞌrnobꞌ umen e gente axin. Y tamar era jaxirobꞌ tuaꞌ axin ajajtzꞌobꞌ más nojta umen e Dios tama e día tuaꞌ e juicio tamar lo que cꞌapa uchiobꞌ, che e Jesús.
MAR 12:41 Pues tama inyajr turu e Jesús macuir e templo tuyejtzꞌer inteꞌ caja tiaꞌ oꞌsena e ofrenda, y war uwira ayopa cora winicobꞌ tuaꞌ uyose e tumin tama e caja, y war uwira que meyra winicobꞌ xeꞌ ayan utumin war uyariobꞌ meyra tumin ubꞌan.
MAR 12:42 Pero tama e momento era yopa inteꞌ yar ixic xeꞌ chamen uviejo xeꞌ war uqꞌueche axin chateꞌ ut centavo xeꞌ ixin uyari tama e caja ubꞌan.
MAR 12:43 Y tamar era e Jesús upejca uyajcanuarobꞌ tuaꞌ umorojse ubꞌobꞌ tuyejtzꞌer y uyare y che: —Cꞌani inwareox era que e ixic era xeꞌ chamen uviejo xeꞌ tzajtaca ut ixin uyajcꞌu inteꞌ ofrenda más nojta tut e Dios que lo que ajcꞌuna umen tunor e inmojr era.
MAR 12:44 Porque e inmojr era war uyajcꞌuobꞌ imbꞌijc taca tama tunor lo que qꞌuechbꞌir umenerobꞌ, pero e ixic era xeꞌ tzajtaca ut ixin uyari tunor lo que ayan ani tuaꞌ y xeꞌ jax taca ani tuaꞌ aweꞌ tamar, che e Jesús.
MAR 13:1 Pues conda war alocꞌoy e Jesús tama e templo cꞌotoy inteꞌ uyajcanuar tut y che: —Niwajcanseyajet, chꞌujcun awira cobꞌa nuxi otot era y que galan e sian tun xeꞌ uchiobꞌ e otot era tamar, che uyajcanuar era.
MAR 13:2 Entonces ojron e Jesús y che: —¿O war ca awira tunor e nuxi ototobꞌ era? Cꞌani inwaret era que cꞌani acucurna tunor e nuxi ototobꞌ era y que ma ingojr tun tuaꞌ aquetpa tujor upiar. Tunor era cꞌani atijresna axin, che e Jesús.
MAR 13:3 Entonces ixin e Jesús tama or e witzir xeꞌ ucꞌabꞌa Olivo xeꞌ majax innajt tut e templo. Y yajaꞌ war aturuan conda yopobꞌ cora uyajcanuarobꞌ tuaꞌ oꞌjronobꞌ tacar. Yopobꞌ era e Pedro y e Santiago y e Juan y e Andrés, pero cꞌani oꞌjronobꞌ tacar ubꞌajnerobꞌ. Entonces chenobꞌ:
MAR 13:4 —¿Tucꞌa día tuaꞌ acucurna tunor e templo era? ¿Y tucꞌa nic tuaꞌ achecta tuaꞌ canata que cꞌanix acꞌotoy e día conda tuaꞌ anumuy tunor era? che uyajcanuarobꞌ era.
MAR 13:5 Y che e Jesús: —Iwiranic que mamajchi axin umajresox.
MAR 13:6 Porque meyra ajmajresiajobꞌ watobꞌ xeꞌ cꞌani uyareox tama nicꞌabꞌa que: “Nen e Cristoen.” Pero majax, y cꞌani axin umajresobꞌ meyra gente taca uyojroner era.
MAR 13:7 ’Y conda iyubꞌi que watarix e tzꞌojyir tama inteꞌ lugar o tama otronteꞌ lugar, ira ixbꞌacta, porque bꞌan tuaꞌ anumuy bꞌajxan que merato acꞌotoy e día conda cꞌani acꞌapa tunor era.
MAR 13:8 Y ayan e nación xeꞌ cꞌani aqꞌuijna upater otronteꞌ nación este que axin uyajcꞌu ubꞌobꞌ, y ayan e nación xeꞌ cꞌani uche e tzꞌojyir upater otronteꞌ nación. Y watar e sian yujcbꞌar tama meyra lugar, y watar e sian winar, y cꞌani apucꞌujqꞌuiobꞌ e gente axin. Pero tunor era jax tocto ucajyesnibꞌir tunor e cꞌuxner xeꞌ tuaꞌ watar.
MAR 13:9 ’Pero nox iwiric ibꞌa, porque ayan tin e cꞌani uqꞌuechiox ixixin tut e ajcꞌamparobꞌ, y nox tuaꞌ ixqꞌuejcha ixixin tama inteꞌ sinagoga tuaꞌ ixjajtzꞌa. Y watar e hora conda nox tuaꞌ ixarobꞌna tuaꞌ ixcꞌotoy ixwawan tut inteꞌ gobernador o tut inteꞌ rey umen taca que war ixcꞌupseyan tamaren, y tamar era erer iwareobꞌ tunor niwojroner.
MAR 13:10 Pero antes que acꞌapa tunor era, ucꞌani tuaꞌ achecsuna tunor e ojroner tama e corpesiaj tama tunor or e rum.
MAR 13:11 Pero conda ixqꞌuejcha ixixin tut e nuquir ajcꞌamparobꞌ cocha era ira ibꞌijnu tucꞌa tuaꞌ iware tuaꞌ icorpes ibꞌa. Y ira iwacta aꞌjni ijor tama tunor era. Y tamar era arenic intaca lo que aꞌjcꞌunox umen e Dios tama e hora yajaꞌ, porque mix jax nox xeꞌ tuaꞌ ibꞌijnu ixojron tama e hora yajaꞌ sino que jax Unawalir e Dios xeꞌ tuaꞌ uchiox ixojron lo que ucꞌani tuaꞌ iware tama e hora yajaꞌ.
MAR 13:12 Y watar e día conda e gente tara tor e rum cꞌani aqꞌuijna uwira ubꞌobꞌ motor jay familiarobꞌ jaxirobꞌ. Y tamar era inteꞌ winic cꞌani uqꞌueche axin usacun y uwijtzꞌin tuaꞌ achamesnobꞌ umen taca que war acꞌupseyanobꞌ tamaren. Y tin e tatabꞌir cꞌani uqꞌueche axin umaxtac tuaꞌ achamesnobꞌ umen taca que war acꞌupseyanobꞌ tamaren, y tin e maxtacobꞌ cꞌani uqꞌueche axin utuꞌ y utata tuaꞌ achamesnobꞌ umen taca que war acꞌupseyanobꞌ tamaren.
MAR 13:13 Y tunor e gente tara tor e rum cꞌani uxejbꞌiobꞌ iut umen taca que war ixcꞌupseyan tamaren. Pero tin e axin uqꞌuecꞌojse uyalma tamaren y xeꞌ machi uyacten este que acꞌapa tunor era cꞌani acorpesnobꞌ, che e Jesús.
MAR 13:14 Pues entonces tin e axin uche leer lo que war intzꞌijbꞌa tibꞌa era, ubꞌinic, che nen xeꞌ Marcosen. Y che e Jesús: —E profeta Daniel xeꞌ turuan tama e onian tiempo uyacta tzꞌijbꞌabꞌir que watar e día conda tuaꞌ achecta inteꞌ winic xeꞌ tuaꞌ uturbꞌa inteꞌ nuxi mabꞌambꞌanir tujor e altar tama e templo tama e chinam Jerusalem xeꞌ tuaꞌ axin ubꞌoni e altar era. Entonces conda iwira anumuy tunor era, tunor tin e turobꞌ tama e departamento Judea ucꞌani tuaꞌ alocꞌoy aꞌjniobꞌ wacchetaca tuaꞌ axiobꞌ tujor e witzir tuaꞌ machi achamesnobꞌ.
MAR 13:15 Y tin e turu tichan tujor uyotot, ucꞌani tuaꞌ ecmay wacchetaca tuaꞌ alocꞌoy aꞌjni, y machix tuaꞌ oꞌchoy macuir uyotot tuaꞌ ulocse lo que ayan tuaꞌ uqꞌueche axin, sino que ucꞌani tuaꞌ alocꞌoy ajner.
MAR 13:16 Y tin e war axana tama e cꞌopot machix tuaꞌ asutpa axin tama uyotot tuaꞌ uchꞌami ubꞌujc, sino que ucꞌani tuaꞌ alocꞌoy ajni wacchetaca.
MAR 13:17 Y tzajtaca utobꞌ e ixictac xeꞌ cuchur uyarobꞌ tama e tiempo era, y bꞌan tin e qꞌuecherix uchꞌurcabꞌobꞌ ubꞌan porque intran tutobꞌ tuaꞌ alocꞌoy aꞌjniobꞌ tama e tiempo era.
MAR 13:18 Pues cꞌajtinic taca e Dios tuaꞌ machi anumuy tunor era tama e tiempo conda war asisi porque intran tuaꞌ alocꞌoy aꞌjni inteꞌ tama e sisar.
MAR 13:19 Porque tama e hora xeꞌ watar era cꞌani achecta watar inteꞌ nuxi cꞌuxner xeꞌ más inyaj que mato inyajr eꞌrna desde que chena or e rum era umen e Dios, y nien machi tuaꞌ eꞌrna otronteꞌ cꞌuxner cocha era ubꞌan.
MAR 13:20 Pero Catata Dios tuaꞌ axin uxuri e tiempo tuaꞌ e nuxi cꞌuxner era tuaꞌ machi eixna meyra tiempo, y bꞌan tuaꞌ uche porque jay machi uche cocha era mamajchi tuaꞌ acorpesna. Pero cocha Catata Dios war uyajta ut tin e sicbꞌabꞌirix umener, jaxir cꞌani uxuri e tiempo era.
MAR 13:21 ’Entonces jay achecta watar e gente tiut xeꞌ uyareox y che: “Laric iranic que tara turu e Cristo”, ira icꞌupsiobꞌ, o jay axin uyareox y che: “Laric iranic que yajaꞌ turu e Cristo”, ira icꞌupsiobꞌ ubꞌan.
MAR 13:22 Porque achecta watar cora winicobꞌ xeꞌ tuaꞌ oꞌjron y che: “Nen e Cristoen”, pero majax sino que ajtaca war umajres e gente axin. Y ayan tin e cꞌani achecta watar xeꞌ tuaꞌ oꞌjron y che: “Pero nen jaxen inteꞌ profeta tuaꞌ e Dios”, pero majax. Y jaxirobꞌ tuaꞌ axin uchiobꞌ meyra seña y tuaꞌ uchiobꞌ meyra milagro tut e gente, y tamar era cꞌani umajresobꞌ meyra gente este que axin umajres ani ubꞌan tin e sicbꞌabꞌirobꞌix umen e Dios.
MAR 13:23 Pero iwiric nox tuaꞌ machi ixmajresna tama tunor era conda axin watar, porque nen cꞌapa inwareoxix bꞌajxan lo que tuaꞌ anumuy, che e Jesús.
MAR 13:24 Entonces ojron e Jesús otronyajr y che: —Conda war acꞌapa tunor e día tuaꞌ e cꞌuxner era cꞌani ecsibꞌa e qꞌuin, y e luna cꞌani amactzꞌa uwirnar.
MAR 13:25 Y meyra lucero tuaꞌ oꞌjri watar tut e qꞌuin, y tunor e nuxi cꞌotorer lo que ayan tut e qꞌuin axin anijquesna ubꞌan.
MAR 13:26 Y de allí cꞌani iwira inchecta waten nen xeꞌ Uyunenen e winic macuir e tocar lo que ayan tut e qꞌuin conda insutpa waten taca meyra nicꞌotorer y taca nitawarer.
MAR 13:27 Y de allí nen xeꞌ Uyunenen e winic cꞌani inwebꞌta axiobꞌ niwangelobꞌ tuaꞌ axin umorojsiobꞌ tunor tin e sicbꞌabꞌirix umen e Dios tama tunor or e rum: Tama e lugar inxejr ut e qꞌuin, y tama e lugar teinxejr bꞌana, y tama e lugar tiaꞌ atobꞌoy watar e qꞌuin, y tama e lugar tiaꞌ anamtzꞌa e qꞌuin ubꞌan. Pues cꞌani axin umorojsiobꞌ tin e sicbꞌabꞌir umen e Dios tic taca tiaꞌ turobꞌ tama tunor or e rum, che e Jesús.
MAR 13:28 Entonces ojron e Jesús y che: —Ayan inteꞌ ojroner tama inteꞌ teꞌ xeꞌ ucꞌabꞌa higuera. Inteꞌ higuera, conda achꞌocnuqꞌui unuc e teꞌ y achecta watar uyopor otronyajr, war inata que watarix e verano.
MAR 13:29 Y bꞌan tama tunor e seña era ubꞌan, conda iwira acay anumuy tunor era, natanic que watarix ucꞌapesnibꞌir or e rum ubꞌan, bꞌan cocha inteꞌ winic xeꞌ warix tut e puerta xeꞌ turix tuaꞌ oꞌchoy macu.
MAR 13:30 Pero cꞌani inwareox era que tin e turobꞌ tara tor e rum conda acay anumuy tunor era machi tuaꞌ achamayobꞌ este que acꞌapa uwirobꞌ tunor era.
MAR 13:31 Pues tunor ut e qꞌuin y tunor or e rum cꞌani acꞌapa, pero niwojroner machi tuaꞌ acꞌapa, sino que ucꞌani tuaꞌ acꞌapa achena tunor bꞌan taca cocha war inwareox era, che e Jesús.
MAR 13:32 Entonces ojron e Jesús y che: —Mamajchi war unata tucꞌa día y nien tucꞌa hora conda cꞌani inchecta waten otronyajr. Machi war unatobꞌ e angelobꞌ xeꞌ turobꞌ tut e qꞌuin y nien nen xeꞌ Uyunenen e Dios machi war innata tucꞌa hora tuaꞌ inchecta waten, sino que ajtaca Catata Dios xeꞌ war unata.
MAR 13:33 Y tamar era turuanenic bꞌixir, y chꞌujcunic iwira tuaꞌ inata lo que war anumuy. Y cꞌajtinic taca e Dios porque machi war inata tucꞌa hora tuaꞌ achecta watar tunor era.
MAR 13:34 Porque e hora conda tuaꞌ insutpa waten otronyajr bꞌan cocha inteꞌ winic xeꞌ locꞌoy tama uyotot tuaꞌ axin tama inteꞌ uxambꞌar. Pero conda merato alocꞌoy, uyacta cora umanobꞌ tuaꞌ ucojcobꞌ uyotot. Y uyare inteꞌ inteꞌ uman tucꞌa patnar tuaꞌ uchiobꞌ. Y tin e ajcojc puerta aquetpa tuaꞌ uchꞌujcu uwira chi chi war ayopa. Tara acꞌapa niwojroner.
MAR 13:35 Turuanenic bꞌixir nox porque machi war inata tucꞌa hora tuaꞌ asutpa watar e ajyum otot era. Bꞌajcꞌat achecta watar e ajyum conda war acbꞌare, o bꞌajcꞌat achecta watar tuyuxin e acbꞌar, o bꞌajcꞌat achecta watar conda aꞌru e acꞌach, o bꞌajcꞌat achecta watar conda war asacojpa.
MAR 13:36 Porque jay e ajyum otot era achecta watar wacchetaca, bꞌajcꞌat utajwiox que war ixwayan.
MAR 13:37 Pues tunor lo que war inwareox era, war inware tunor e inmojr gente ubꞌan, que turbꞌanic ibꞌa tuaꞌ ibꞌijnu tamar lo que war anumuy tuaꞌ uyubꞌiox iwira tucꞌa tunor era, che e Jesús.
MAR 14:1 Pues tama e día era ucꞌanto dos día tuaꞌ acꞌotoy e nojqꞌuin xeꞌ ucꞌabꞌa pascua conda e gente tuaꞌ e Israel ucꞌuxiobꞌ e pan xeꞌ machi atꞌabꞌay ut. Y tin e uwinquirobꞌ e inmojr sacerdotiobꞌ y tin e ajcanseyajobꞌ tama uley e Moisés cay usicbꞌobꞌ cocha erer umajresobꞌ e Jesús tuaꞌ uyubꞌi uqꞌuechiobꞌ axin tama e cárcel tuaꞌ uyubꞌi uchamsiobꞌ.
MAR 14:2 Pero ojronobꞌ jaxobꞌ taca y chenobꞌ: —Machi tuaꞌ caqꞌueche axin e Jesús este que acꞌapa e nojqꞌuin era tuaꞌ machi asutpobꞌ ticajor tunor e gente, che e nuquir winicobꞌ era jaxobꞌ taca.
MAR 14:3 Entonces ixin e Jesús tama e chinam Betania y ixin esto tama uyotot inteꞌ winic xeꞌ ucꞌabꞌa Simón xeꞌ ayan ani e sian chec tut xeꞌ ucꞌabꞌa lepra. Y conda turu e Jesús tor e mesa war aweꞌ checta tari inteꞌ ixic tut xeꞌ qꞌuecher umener inteꞌ bote perfume xeꞌ ucꞌabꞌa nardo xeꞌ bꞌan cocha e brillantina pero puro perfume era y tamar era meyra atujri. Y entonces e ixic ucꞌocchi e bote y utuqui e perfume tama ujor e Jesús.
MAR 14:4 Y ayan cora winicobꞌ xeꞌ tacꞌarobꞌ tama unac e otot era xeꞌ intaca war uwirobꞌ tunor lo que war uche e ixic. Pero qꞌuijnobꞌ conda uwirobꞌ tunor era y cay ojronobꞌ jaxobꞌ taca y chenobꞌ: —¿Y tucꞌa tuaꞌ war uchoqui e perfume era?
MAR 14:5 Erer ani achompa tama meyra tumin tuaꞌ uyubꞌion ani catacre tin e tzajtaca utobꞌ, chenobꞌ e winicobꞌ era. Y tamar era cay ucꞌayobꞌ e ixic.
MAR 14:6 Pero che e Jesús: —Actanic e ixic bꞌan taca. ¿Tucꞌa tuaꞌ war icꞌaye? Pues lo que war uche tacaren era bueno tunor.
MAR 14:7 Pues ayan tin e tzajtaca ut tijam iraj iraj, y erer itacriobꞌ tuqꞌuic tuqꞌuic momento conda icꞌani. Pero nen machi tuaꞌ inquetpa inyajrer tacarox cocha turen era.
MAR 14:8 Pero e ixic cay uche lo que uyubꞌi conda utuqui e perfume taniut tuaꞌ uyustes niut tuaꞌ inquetpa turix conda inxin inmujca.
MAR 14:9 Y cꞌani inwareox era que tic taca tiaꞌ achecsuna uyojroner e Dios tama e corpesiaj tama tunor or e rum cꞌani achecsuna ubꞌan lo que cay uche e ixic era tacaren tuaꞌ machi anajpesna lo que cay uche era, che e Jesús.
MAR 14:10 Pues ayan inteꞌ tujam e doce uyajcanuarobꞌ e Jesús xeꞌ ucꞌabꞌa Judas Iscariote. Y jaxir ixin oꞌjron taca uwinquirobꞌ e inmojr sacerdotiobꞌ tuaꞌ uwira jayteꞌ erer atojya tuaꞌ uyajcꞌu e Jesús tama ucꞌabꞌobꞌ e nuquir winicobꞌ era.
MAR 14:11 Y tzayobꞌ e nuquir winicobꞌ era conda uyubꞌiobꞌ lo que war ubꞌijnu uche e Judas, y tamar era cay chiobꞌ que cꞌani uyajcꞌuobꞌ e tumin. Y tamar era e Judas cay usajca cocha tuaꞌ uche tuaꞌ uyajcꞌu e Jesús tama ucꞌabꞌobꞌ e nuquir winicobꞌ era.
MAR 14:12 Pues entonces conda cꞌotoy e bꞌajxan día tuaꞌ e nojqꞌuin conda acꞌujxa e pan xeꞌ machi atꞌabꞌay ut xeꞌ jax e día conda achamesna yar inteꞌ cordero tuaꞌ e nojqꞌuin era, cꞌotoyobꞌ uyajcanuarobꞌ e Jesús tuyejtzꞌer tuaꞌ uyubꞌiobꞌ tuaꞌ y chenobꞌ: —¿Tiaꞌ acꞌani tuaꞌ caxin costes e comida tuaꞌ cache e wiar tuaꞌ e pascua conda acꞌotoy e hora? che uyajcanuarobꞌ.
MAR 14:13 Entonces e Jesús uyebꞌta ixin chateꞌ uyajcanuarobꞌ y che: —Quiquic tama e chinam Jerusalem y conda war ixochoy cꞌani iwira inteꞌ winic xeꞌ war ucuchi axin inteꞌ bꞌujr jaꞌ. Quiquic tupat jaxir.
MAR 14:14 Y conda jaxir oꞌchoy tama e otot, pejcanic e ajyum otot era y arenic: “Cawajcanseyaj cꞌani unata tucꞌa cuarto tabꞌa xeꞌ erer ucꞌampes tuaꞌ uche e wiar tama e nojqꞌuin pascua taca tunor uyajcanuarobꞌ.”
MAR 14:15 Y tamar era e ajyum cꞌani uwirsiox inteꞌ cuarto xeꞌ nojta cora xeꞌ más tichan tujor inteꞌ otot xeꞌ turix tuaꞌ acꞌampa. Entonces ustesic e cuarto era tuaꞌ canojqꞌuini tamar, che e Jesús.
MAR 14:16 Entonces ixiobꞌ uyajcanuarobꞌ era esto tama e chinam tiaꞌ arobꞌnobꞌ y cay numuy tunor bꞌan taca cocha arobꞌnobꞌ umen e Jesús, y tamar era ixiobꞌ tama e otot y cay uyustesobꞌ e comida tuaꞌ aquetpa turix tunor tuaꞌ awiobꞌ tama e nojqꞌuin pascua.
MAR 14:17 Entonces conda acbꞌare cꞌotoy e Jesús taca tunor e doce uyajcanuarobꞌ.
MAR 14:18 Y conda ya turobꞌ tor e mesa war awiobꞌ cay ojron e Jesús y che: —Cꞌani inwareox era que ayan inteꞌ tijam xeꞌ war aweꞌ tacaron tara tor e mesa xeꞌ axin utuchꞌien tut e nuquir winicobꞌ tuaꞌ uqꞌuechienobꞌ inxin, che e Jesús.
MAR 14:19 Entonces quetpa uwirnarobꞌ que mixto jax incꞌajyer yaꞌ y cay uyubꞌiobꞌ tuaꞌ e Jesús inteꞌ inteꞌ y chenobꞌ: —¿O nen ca nic? che uyajcanuarobꞌ inteꞌ inteꞌ. Y ayan otronteꞌ xeꞌ ojron y che: —¿O nen ca? che inteꞌ.
MAR 14:20 Y che e Jesús: —Tin e tuaꞌ axin uche tunor era jax inteꞌ tijam nox xeꞌ doceox era xeꞌ war aweꞌ intera chꞌeu tacaren.
MAR 14:21 Pues nen xeꞌ Uyunenen e winic ucꞌani tuaꞌ inxin inchamesna bꞌan cocha chꞌar tzꞌijbꞌabꞌir tama uyojroner e Dios, pero tzajtaca ut tin e tuaꞌ acꞌampesna tuaꞌ utuchꞌien. Más ani bueno jay machi ani cuxpa e winic era, che e Jesús.
MAR 14:22 Entonces conda warto awiobꞌ tunorobꞌ tor e mesa e Jesús uchꞌami ingojr pan tama ucꞌabꞌ, y utattzꞌi ut e Dios y cay uxere e pan y cay uyajcꞌu uyajcanuarobꞌ y che: —Junic e pan era y cꞌuxic. Pues e pan era bꞌan cocha uwerir nicuerpo xeꞌ ajcꞌubꞌir bꞌan cocha ajcꞌuna inteꞌ arac tuaꞌ achamesna tujor e altar tamarox, che e Jesús.
MAR 14:23 Y nacpat era e Jesús uchꞌami inteꞌ chꞌeu tama ucꞌabꞌ y uyajcꞌu gracias e Dios y cay uyajcꞌu uyajcanuarobꞌ tuaꞌ uyuchꞌiobꞌ inteꞌ inteꞌ tamar.
MAR 14:24 Y che e Jesús: —Lo que ayan tama e chꞌeu era aquetpa bꞌan cocha nichꞌichꞌer xeꞌ axin awechcꞌa tamarox y xeꞌ tuaꞌ utacre meyra gente. Y nichꞌichꞌer era jax tuaꞌ uchectes tiut que ayan inteꞌ nipacto xeꞌ imbꞌutz tacarox.
MAR 14:25 Pero cꞌani inwareox era que nen machi tuaꞌ insutpa unchꞌi lo que ayan tama e chꞌeu era este que acꞌotoy e día conda cꞌani unchꞌi e vino xeꞌ imbꞌutz conda watar Catata Dios tuaꞌ acꞌotori tara tor e rum, che e Jesús.
MAR 14:26 Entonces conda cꞌapa ucꞌaywijresobꞌ inteꞌ himno locꞌoyobꞌ tama e otot era y ixiobꞌ esto tama or e witzir Olivo.
MAR 14:27 Entonces ojron e Jesús y che: —Conda acbꞌare coner tunorox tuaꞌ ixixin iwacten, porque bꞌan chꞌar tzꞌijbꞌabꞌir tama uyojroner e Dios que: “Conda achamesna e ajcojc oveja tunor e ovejobꞌ cꞌani uxere ubꞌobꞌ axin.” Bꞌan chꞌar tzꞌijbꞌabꞌir tama uyojroner e Dios.
MAR 14:28 Pero nacpat era conda insujta imbꞌixqꞌuesna tujam e chamenobꞌ cꞌani inxin tama e departamento Galilea bꞌajxan que ixixin nox, che e Jesús.
MAR 14:29 Entonces ojron e Pedro y che: —Motor que axin uyactet tunor e inmojr era, pero nen ma tiaꞌ tuaꞌ inxin inwactet, che e Pedro.
MAR 14:30 Y che e Jesús: —Cꞌani inwaret que tama e acbꞌar era conda ne mato aꞌru e acꞌach chajr, net iꞌxin amuqui nicꞌabꞌa uxyajr que machi anata chien nen, che e Jesús.
MAR 14:31 Pero e Pedro machi ucꞌani lo que war aꞌrobꞌna umen e Jesús y che: —Motor que nen ucꞌani tuaꞌ inxin inchamay tacaret, pero nen ma tiaꞌ tuaꞌ inxin inmuqui acꞌabꞌa, che e Pedro. Y bꞌan arobꞌna umen tunor e inmojr ajcanuarobꞌ era ubꞌan.
MAR 14:32 Entonces cꞌotoy e Jesús taca tunor uyajcanuarobꞌ tama inteꞌ huerto xeꞌ ucꞌabꞌa Getsemaní. Entonces e Jesús uyare uyajcanuarobꞌ y che: —Turenic tara. Nen cꞌani inxin más bꞌat tuaꞌ incꞌajti taca e Dios, che e Jesús.
MAR 14:33 Entonces e Jesús uqꞌueche ixin e Pedro y e Santiago y e Juan y cay oyqꞌui tama uyalma y cay unumse ubꞌa meyra.
MAR 14:34 Y che e Jesús: —Ayan inteꞌ nuxi cꞌuxner tama niwalma que war uchien imbꞌijnu que chamenenix umener. Quetpenic tara, pero ira ixwayan, che e Jesús.
MAR 14:35 Entonces e Jesús ixin innajt cora y uyacta ubꞌa apacwan tut e rum y cay ucꞌajti taca e Dios. Y cay uyare e Dios que quisinic ani que machi tuaꞌ unumse ubꞌa tama e nuxi cꞌuxner lo que cꞌanix watar tama e hora era.
MAR 14:36 Y cay ucꞌajti taca e Dios y che: —Nitatet, tunor uyubꞌiet ache net, pero era quisinic acorpesen tamar e chꞌeu xeꞌ inchꞌaj ut lo que ucꞌani tuaꞌ unchꞌi era. Pero ira ache cocha incꞌani ani nen, sino que chen lo que acꞌani net, che e Jesús.
MAR 14:37 Entonces sutpa cꞌotoy tiaꞌ turu uyajcanuarobꞌ y utajwi que war awayanobꞌ. Entonces uyare e Pedro y che: —Pedro, ¿war ca iwayan? Pero ¿machi ca uyubꞌiet acojcuen nien inteꞌ hora?
MAR 14:38 Turuanenic bꞌixir y cꞌajtinic taca e Dios tuaꞌ machi ixpijchna umen e Satanás. Pues tama iwalma turix tuaꞌ ixcꞌupseyan tamaren, pero tama iwerir injayjayox, che e Jesús.
MAR 14:39 Entonces sutpa ixin otronyajr tuaꞌ ucꞌajti taca e Dios bꞌan taca cocha cay ucꞌajti bꞌajxan.
MAR 14:40 Y de allí sutpa ixin otronyajr tut uyajcanuarobꞌ, y conda cꞌotoy utajwi que war awayanobꞌ porque unacꞌutobꞌ chꞌuyur chꞌuyur umen e waynij. Pero jaxirobꞌ machi unatobꞌ tucꞌa tuaꞌ uyareobꞌ e Jesús otronyajr era.
MAR 14:41 Entonces e Jesús sutpa ixin tuaꞌ ucꞌajti taca e Dios otronyajr, y de allí sutpa ixin tut uyajcanuarobꞌ otronyajr y che: —¿Warto ca ixwayan? Y ¿warto ca ixjiri? Pues tzꞌacarix era porque cꞌotoyix e hora conda nen xeꞌ Uyunenen e winic ucꞌani tuaꞌ anjcꞌuna tama ucꞌabꞌobꞌ tin e ajmabꞌambꞌanirobꞌ.
MAR 14:42 Achpenic incuic era, porque watarix tin xeꞌ tuaꞌ utuchꞌien, che e Jesús.
MAR 14:43 Y tama e momento era conda warto oꞌjron e Jesús taca uyajcanuarobꞌ cꞌotoy e Judas xeꞌ jax inteꞌ tujam e doce uyajcanuarobꞌ e Jesús y tupat jaxir war watobꞌ meyra winicobꞌ taca umachitobꞌ y taca uteobꞌ. Pues tunor e winicobꞌ era ebꞌetbꞌirobꞌ tari umen uwinquirobꞌ e inmojr sacerdotiobꞌ y umen e ajcanseyajobꞌ tama uley e Moisés y umen e nuquir winicobꞌ tama e Israel.
MAR 14:44 Y e Judas xeꞌ jax xeꞌ quetpa tuaꞌ utuchꞌi e Jesús, cay uyare tunor e sian winicobꞌ era cocha tuaꞌ unatobꞌ chi e Jesús y che: —E Jesús jax tin e tuaꞌ inxin intzꞌujtzꞌi ut. Conda iwira chi e Jesús quiquic jajpinic y qꞌuechic chic cachar, xeꞌ cay arobꞌnobꞌ e winicobꞌ era umen e Judas bꞌajxan.
MAR 14:45 Entonces conda cꞌotoy e Judas ixin wawan tuyejtzꞌer e Jesús y che: —Ajcanseyajet, ¿Cocha turet? Cꞌani inmeqꞌuiet, che e Judas. Y tamar era utzꞌujtzꞌi ut.
MAR 14:46 Y wacchetaca tobꞌoy tariobꞌ ujajpiobꞌ e Jesús tin e war axanobꞌ taca e Judas y uqꞌuechiobꞌ ixin tama e cárcel.
MAR 14:47 Y tama e momento era tobꞌoy inteꞌ uyajcanuar e Jesús y ixin uxuri locꞌoy inteꞌ uchiquin uman uwinquir e inmojr sacerdotiobꞌ.
MAR 14:48 Entonces e Jesús uyare e sian winicobꞌ era y che: —¿Tucꞌa tuaꞌ war watox taca e sian machit y taca e sian teꞌ era tuaꞌ iqꞌuechien inxin? ¿War ca ibꞌijnu que nen jaxen inteꞌ ajxujch?
MAR 14:49 Pues nen turen ajqꞌuin ajqꞌuin tama e templo tiaꞌ war incanseyan y nox ma tiaꞌ cꞌotoyox tuaꞌ iqꞌuechien inxin tama e cárcel. Pero war anumuy tunor era umen que bꞌan tuaꞌ achempa tuaꞌ acꞌapa achempa tunor lo que chꞌar tzꞌijbꞌabꞌir tama uyojroner e Dios, che e Jesús.
MAR 14:50 Y wacchetaca locꞌoy ajniobꞌ tunor uyajcanuarobꞌ e Jesús y uyactobꞌ ubꞌajner taca e sian winicobꞌ era.
MAR 14:51 Pues ayan inteꞌ chꞌom sitz xeꞌ war axana tupat e Jesús xeꞌ bꞌacꞌar tamar taca inteꞌ sábana porque matucꞌa más ubꞌujc. Pero cꞌani ani ajajpna umen e winicobꞌ era tuaꞌ uqꞌuechiobꞌ ani axin tama e cárcel.
MAR 14:52 Pero jaxir bꞌacta y locꞌoy ajni, y cocha chujca e sábana umen e winicobꞌ uyacta tama ucꞌabꞌobꞌ y ixin ajni pispis bꞌan taca.
MAR 14:53 Entonces uqꞌuechiobꞌ ixin e Jesús esto tama uyotot e más nuquir winquir tuaꞌ e inmojr sacerdotiobꞌ. Y ya morojsebꞌir turobꞌ tunor uwinquirobꞌ e inmojr sacerdotiobꞌ, y tunor e nuxi winicobꞌ tuaꞌ e Israel, y tunor tin e ajcanseyajobꞌ tama uley e Moisés.
MAR 14:54 Y e Pedro war axin innajt cora tupat e Jesús este que cꞌotoy tor utinaj e winic era y quetpa turuan tuyejtzꞌer cora policía tiaꞌ war aqꞌuixiobꞌ tut e cꞌajc.
MAR 14:55 Entonces uwinquirobꞌ e inmojr sacerdotiobꞌ taca tunor e nuquir winicobꞌ xeꞌ turobꞌ tama e nuxi concilio cay usicbꞌobꞌ tucꞌa tamar tuaꞌ utuchꞌiobꞌ e Jesús tut e ley tuaꞌ uyubꞌi uchamsiobꞌ, pero matucꞌa utajwiobꞌ tamar.
MAR 14:56 Y cay yopobꞌ meyra ajchecsuyajobꞌ xeꞌ war amajresian tut e nuquir winicobꞌ era, pero lo que uyare inteꞌ uche aquetpa chequer que war amajresian otronteꞌ, y machi quetpa nien chateꞌ xeꞌ lar uyojronerobꞌ.
MAR 14:57 Pero de allí achpobꞌ cora winicobꞌ xeꞌ cay utuchꞌiobꞌ e Jesús taca e majresiaj y chenobꞌ:
MAR 14:58 —Non coybꞌi ojron e winic era y che: “Nen cꞌani intijres e templo era xeꞌ chembꞌir umen e winicobꞌ, y tama e uxteꞌ día cꞌani insuti anchi otronteꞌ templo xeꞌ majax chembꞌir umen e winicobꞌ”, xeꞌ chenobꞌ que bꞌan che e Jesús e ajmajresiaj winicobꞌ era.
MAR 14:59 Pero uyojroner inteꞌ ajchecsuyaj majax intera taca e inmojr ajchecsuyajobꞌ.
MAR 14:60 Entonces achpa uwinquir e inmojr sacerdotiobꞌ tujamobꞌ y uyubꞌi tuaꞌ e Jesús y che: —¿Tucꞌa tuaꞌ machi cꞌani iyojron? ¿Y tucꞌa nic era que war oꞌjronobꞌ apater? che uwinquir e inmojr sacerdotiobꞌ era.
MAR 14:61 Pero e Jesús quetpa bꞌan taca y machi ojron. Entonces uwinquir e inmojr sacerdotiobꞌ sutpa uyubꞌi tuaꞌ e Jesús otronyajr y che: —¿Net ca e Cristoet? ¿Net ca Uyunenet e Dios xeꞌ chojbꞌesbꞌir inyajrer? che uwinquir e inmojr sacerdotiobꞌ.
MAR 14:62 Y che e Jesús: —Nen. Y watar e día conda cꞌani iwiren xeꞌ Uyunenen e winic que war inturuan tama niturtar tama unojcꞌabꞌ e Dios xeꞌ meyra ayan ucꞌotorer. Y nox cꞌani iwiren conda insutpa waten tama e tocar tichan tuaꞌ inqꞌueche axin tunor tin e war acꞌupseyanobꞌ tamaren, che e Jesús.
MAR 14:63 Entonces wacchetaca qꞌuijna uwinquir e inmojr sacerdotiobꞌ conda uyubꞌi lo que che e Jesús que: “Nen jax e Cristoen.” Y tamar era uxixi ubꞌujc xeꞌ lapar umener. Entonces ojron uwinquir e inmojr sacerdotiobꞌ era y che: —¿Tucꞌato tuaꞌ otronteꞌ ajchecsuyaj upater e winic era?
MAR 14:64 Coybꞌix que jaxir war uqꞌuijnes e Dios tacar uyojroner. ¿Tucꞌa ibꞌijnu nox tamar? che uwinquir e inmojr sacerdotiobꞌ era. Y tunor e nuquir winicobꞌ quetpobꞌ tama intera taca bꞌijnusiaj que ucꞌani tuaꞌ achamesna e Jesús.
MAR 14:65 Y tamar era ayan tin e cay utujbꞌiobꞌ ut e Jesús, y ayan tin e cay umaqui unacꞌut e Jesús tuaꞌ uyopruobꞌ ut y chenobꞌ: —Arenon chi uyopruet, chenobꞌ. Y ayan e policía xeꞌ cay uyopro ut ubꞌan.
MAR 14:66 Pues ya turu e Pedro tor e tinaj conda numuy inteꞌ ijchꞌoc xeꞌ jax uman uwinquir e inmojr sacerdotiobꞌ.
MAR 14:67 Y conda uwira ut e Pedro xeꞌ war aqꞌuixi tut e cꞌajc, quetpa wawan y uchꞌujcu ut e Pedro y che: —Net ubꞌan xanet taca e Jesús xeꞌ tuaꞌ e chinam Nazaret, che e ijchꞌoc era.
MAR 14:68 Pero e Pedro umuqui tut tunor e gente era y che: —Machi innata chi e winic era, y machi innata tucꞌa war aware era, che e Pedro. Entonces ixin wawan esto tiaꞌ oꞌchoy e gente. Y tama e momento era uyubꞌi aꞌru e acꞌach.
MAR 14:69 Pero e ijchꞌoc sutpa uwira ut e Pedro otronyajr y cay uyare tin e turobꞌ tuyejtzꞌer y che: —E winic era jax xeꞌ war axana taca e Jesús ubꞌan, che e ijchꞌoc.
MAR 14:70 Pero e Pedro sutpa umuqui otronyajr. Y de allí cay ojronobꞌ tin e warobꞌ yajaꞌ y chenobꞌ: —San jaxet que net upiaret e Jesús. Y chequer que net ajlugaret tama e departamento Galilea ubꞌan porque chequer tama awojroner, che e winicobꞌ era.
MAR 14:71 Pero ojron e Pedro otronyajr y che: —Unaten e Dios que majax majresiaj lo que war inche tacarox que machi innata chi e winic era xeꞌ war ixojron tamar, che e Pedro.
MAR 14:72 Y tama e momento era cay aru e acꞌach otronyajr. Entonces yopa tujor e Pedro lo que cay arobꞌna umen e Jesús que: “Cꞌani inwaret que tama e acbꞌar era conda merato aꞌru e acꞌach chajr, net iꞌxin amuqui nicꞌabꞌa uxyajr que machi anata chien nen”, xeꞌ cꞌajpa umen e Pedro. Y conda cay ubꞌijnu tama tunor era locꞌoy e Pedro y cay aru taca inteꞌ nuxi nuc.
MAR 15:1 Pues entonces conda war asacojpa cay umorojse ubꞌobꞌ tin e uwinquirobꞌ e inmojr sacerdotiobꞌ taca tin e ajcanseyajobꞌ tama uley e Moisés y tin e tuobꞌ e nuxi concilio. Y uqꞌuechiobꞌ ixin e Jesús cachar tuaꞌ aꞌjcꞌuna e Pilato.
MAR 15:2 Y conda e Jesús cꞌotoy tut e Pilato jaxir cay uyubꞌi tuaꞌ e Jesús y che: —¿Net ca ureyetobꞌ e gente xeꞌ tuobꞌ e Israel? che e Pilato. Y ojron e Jesús y che: —Bꞌan ya cocha war aware net era, che e Jesús.
MAR 15:3 Y tin e uwinquirobꞌ e inmojr sacerdotiobꞌ cay utuchꞌiobꞌ e Jesús que meyra mabꞌambꞌanir cay uche.
MAR 15:4 Entonces e Pilato sutpa uyubꞌi tuaꞌ e Jesús y che: —¿Acꞌani ca iyojron o machi? Ubꞌin cobꞌa war oꞌjronobꞌ apater, che e Pilato.
MAR 15:5 Pero e Jesús machi ojron, y e Pilato bꞌacta uwira este que machi unata tucꞌa tuaꞌ ubꞌijnu tama e Jesús.
MAR 15:6 Pues e Pilato ayan lo que uche tama inteꞌ inteꞌ año conda anumuy e nojqꞌuin pascua que jaxir ubꞌani inteꞌ xeꞌ turu tama e cárcel bꞌan cocha cꞌajtna umen e gente.
MAR 15:7 Y ayan inteꞌ winic xeꞌ ucꞌabꞌa Barrabás xeꞌ turu tama e cárcel umen que cay chamsan tama inteꞌ nuxi qꞌuijnar xeꞌ checta tujam e gente tama e chinam era. Y ayanto más winicobꞌ xeꞌ turobꞌ tama e cárcel era umen e qꞌuijnar era ubꞌan.
MAR 15:8 Y cay cꞌotoyobꞌ e sian gente tut e Pilato xeꞌ cay ucꞌajtiobꞌ tuaꞌ aloqꞌuesna inteꞌ winic xeꞌ chꞌar tama e cárcel bꞌan cocha cay uche tama inteꞌ inteꞌ año.
MAR 15:9 Entonces ojron e Pilato y che: —¿War ca icꞌani tuaꞌ inlocse e winic xeꞌ arobꞌna que jax ureyobꞌ tunor e gente tuaꞌ e Israel? che e Pilato.
MAR 15:10 Pues jaxir warix unata que umen que war acꞌuxnaqꞌuiobꞌ uwinquirobꞌ e inmojr sacerdotiobꞌ upater e Jesús que taresna tut jaxir.
MAR 15:11 Pero tin e uwinquirobꞌ e inmojr sacerdotiobꞌ cay uchiobꞌ aqꞌuijna tunor e gente upater e Jesús y uyareobꞌ tuaꞌ ucꞌajtiobꞌ tuaꞌ aloqꞌuesna e Barrabás.
MAR 15:12 Entonces e Pilato uyubꞌi tuobꞌ y che: —¿Y tucꞌa icꞌani tuaꞌ inche taca e Jesús xeꞌ arobꞌna que jax ureyobꞌ e gente tuaꞌ e Israel? che e Pilato.
MAR 15:13 Entonces cay aruobꞌ tunor e gente taca inteꞌ nuxi nuc y chenobꞌ: —Chꞌubꞌanic tut e cruz, chenobꞌ tunor e gente era.
MAR 15:14 Entonces ojron e Pilato otronyajr y che: —¿Y tucꞌa cay uche e winic era tuaꞌ cachamse? che e Pilato. Pero jaxirobꞌ intaca sutpa aruobꞌ otronyajr y chenobꞌ: —Chꞌubꞌanic tut e cruz, chenobꞌ e sian gente.
MAR 15:15 Y e Pilato cocha cꞌani aquetpa imbꞌutz taca tunor e gente era uyare tuaꞌ abꞌajna e Barrabás. Y de allí uyare tuaꞌ ajajtzꞌa e Jesús y tuaꞌ aqꞌuejcha axin tuaꞌ achꞌubꞌna tut e cruz.
MAR 15:16 Entonces e soldadobꞌ tuaꞌ e Pilato uqꞌuechiobꞌ ixin e Jesús esto tor utinaj uyotot e Pilato y de allí cay umorojse tunor e soldadobꞌ xeꞌ turobꞌ era.
MAR 15:17 Entonces e soldadobꞌ cay uriobꞌ inteꞌ chacchac bꞌujc tama unuc e Jesús bꞌan cocha ubꞌujc ani inteꞌ rey, y de allí ujariobꞌ cora tꞌix y uturbꞌobꞌ tama ujor e Jesús bꞌan cocha inteꞌ corona.
MAR 15:18 Y entonces cay aruobꞌ taca inteꞌ nuxi nuc y chenobꞌ: —¡Que turuanic meyra tiempo jaxir xeꞌ jax e rey tuaꞌ tunor e gente tuaꞌ e Israel! chenobꞌ tunor e soldadobꞌ era.
MAR 15:19 Y de allí e soldadobꞌ cay uyajcꞌuobꞌ tujor e Jesús taca inteꞌ teꞌ y cay utujbꞌiobꞌ ut e Jesús, y de allí ayan tin e cay cotuanobꞌ tut e Jesús bꞌan cocha jay war ani utattzꞌiobꞌ ut e Jesús.
MAR 15:20 Y conda cꞌapa asiobꞌ taca e Jesús cocha era ulocsiobꞌ e chacchac bꞌujc tama unuc y sutpa uriobꞌ ubꞌujc xeꞌ tuach. Entonces uqꞌuechiobꞌ ixin e Jesús esto tiaꞌ tuaꞌ uchꞌubꞌobꞌ tut e cruz tuaꞌ uchamsiobꞌ.
MAR 15:21 Pues ayan inteꞌ winic xeꞌ ucꞌabꞌa Simón xeꞌ jax utata e Alejandro y e Rufo xeꞌ tari tama inteꞌ chinam xeꞌ ucꞌabꞌa Cirene xeꞌ war ayopa tama uxambꞌar ta cꞌopot. Entonces conda e soldadobꞌ cay ulocsiobꞌ e Jesús tama e chinam Jerusalem cay uwirobꞌ e Simón y tamar era uyareobꞌ tuaꞌ ubꞌiti axin ucruz e Jesús.
MAR 15:22 Y cꞌotoyobꞌ tama or inteꞌ witzir xeꞌ ucꞌabꞌa Calavera xeꞌ bꞌan uwirnar cocha ubꞌaquer ujor inteꞌ winic. Y ucꞌabꞌa or e witzir era tama e ojroner hebreo arobꞌna: “Gólgota.”
MAR 15:23 Y ayan lo que cꞌani ani uyajcꞌu e Jesús tuaꞌ uyuchꞌi xeꞌ jax imbꞌijc vino yabꞌarbꞌir taca otronteꞌ jaꞌ xeꞌ inchꞌaj ut que conda ochna umen inteꞌ wacchetaca aquetpa sispanen ucuerpo. Pero conda cꞌotoy unata e Jesús tucꞌa era machi uyuchꞌi.
MAR 15:24 Y conda cꞌapa uchꞌubꞌobꞌ e Jesús tut e cruz, e soldadobꞌ cay uchiobꞌ suertiar tama ubꞌujc tuaꞌ uwirobꞌ chi tacar tuaꞌ aquetpa inteꞌ inteꞌ ubꞌujc e Jesús.
MAR 15:25 Entonces conda chꞌubꞌna e Jesús tut e cruz jax e las nueve de la mañana.
MAR 15:26 Y cay uturbꞌobꞌ inteꞌ pachpachteꞌ tujor e cruz tiaꞌ tzꞌijbꞌabꞌir tamar tucꞌa tuaꞌ war achamesna jaxir. Y lo que chꞌar tzꞌijbꞌabꞌir tamar jax era: UREYOBꞌ E GENTE TUAꞌ E ISRAEL.
MAR 15:27 Y ayan chateꞌ ajxujch xeꞌ chꞌubꞌnobꞌ tuaꞌ achamesnobꞌ taca e Jesús era ubꞌan; inteꞌ chꞌubꞌna tama ut ucruz tama unojcꞌabꞌ e Jesús, y otronteꞌ chꞌubꞌna tama ut ucruz tama utzꞌejcꞌabꞌ e Jesús.
MAR 15:28 Y tamar era cꞌapa chempa bꞌan cocha chꞌar tzꞌijbꞌabꞌir tama uyojroner e Dios tiaꞌ che que: —Uchebꞌiobꞌ que jaxir jax inteꞌ ajmabꞌambꞌanir ubꞌan, xeꞌ chꞌar tzꞌijbꞌabꞌir tama uyojroner e Dios.
MAR 15:29 Y ayan e gente xeꞌ war axanobꞌ tut e cruz era xeꞌ cay uyujcu ujorobꞌ tut e Jesús tuaꞌ uqꞌuijnesobꞌ y chenobꞌ: —Net xeꞌ cay aware que erer atijres catemplo y asutpa achi otronyajr wacchetaca en tres día,
MAR 15:30 corpes abꞌa y ecmen tarex tut e cruz, che e gente era taca inteꞌ tzener tut e Jesús.
MAR 15:31 Y bꞌan ubꞌan cay ojronobꞌ taca inteꞌ tzener tin e uwinquirobꞌ e inmojr sacerdotiobꞌ y tin e ajcanseyajobꞌ tama uley e Moisés, cay ojronobꞌ jaxobꞌ taca tut e Jesús y chenobꞌ: —Pues jaxir uyubꞌi ucorpes e inmojr gente, pero machi uyubꞌi ucorpes ubꞌa.
MAR 15:32 Jay erer ecmay tama e cruz e winic era xeꞌ jax ani e Cristo xeꞌ jax ani Ureyobꞌ e gente tuaꞌ e Israel, entonces non ubꞌan caxin cacꞌupseyan tamar, xeꞌ chenobꞌ e nuquir winicobꞌ era war utzeniobꞌ tut e Jesús. Y tin e war achamesnobꞌ tuyejtzꞌer e Jesús war utzeniobꞌ tut jaxir ubꞌan.
MAR 15:33 Entonces conda cꞌotoy uyuxin e día ecsibꞌa tunor ut e qꞌuin tama tunor or e lugar era y quetpa bꞌan cocha e acbꞌar tama inteꞌ tiempo de tres hora.
MAR 15:34 Entonces a las tres de la tarde cay aru e Jesús taca inteꞌ nuxi nuc y che: —Eloi, Eloi, lama sabactani, che e Jesús. Pues war che e ojroner era que: “Nidiosiret, Nidiosiret, ¿tucꞌa tuaꞌ achoqui awacten era?”
MAR 15:35 Y ayan tin e turobꞌ era xeꞌ war uyubꞌiobꞌ uyojroner e Jesús xeꞌ chenobꞌ: —Ubꞌinic, war upejca e profeta Elías xeꞌ turuan tama e onian tiempo, chenobꞌ.
MAR 15:36 Y ayan inteꞌ tujam e winicobꞌ era xeꞌ ixin ajner tuaꞌ utares inteꞌ tinam xeꞌ cachar tama inteꞌ teꞌ y uturbꞌa cora vinagre tamar y utꞌabꞌse tutiꞌ e Jesús tuaꞌ oꞌchna umener. Y che e winic: —Actanic bꞌan taca. Cꞌani cawira jay ayopa e Elías tuaꞌ uyemse, che e winic.
MAR 15:37 Y tama e momento era e Jesús uyajcꞌu inteꞌ nuxi aruar y chamay.
MAR 15:38 Y e nuxi bꞌujc xeꞌ chꞌur macuir e templo xeꞌ jax umajquibꞌir ut e altar tajchpa tari tichan esto tut e rum.
MAR 15:39 Y ayan inteꞌ capitán romano xeꞌ war tut ucruz e Jesús, y conda uyubꞌi uyaruar e Jesús y conda uwira cocha chamay jaxir, ojron y che: —E winic era jax ani Uyunen e Dios, che e capitán era.
MAR 15:40 Y ayan ubꞌan cora ixictac xeꞌ turobꞌ najtir cora xeꞌ war achꞌujcsanobꞌ. Y tujamobꞌ e ixictac era ya war e María xeꞌ tari tama e chinam Magdala, y war e María xeꞌ jax utuꞌ e Santiago xeꞌ jax uwijtzꞌinobꞌ e José y e Salomé.
MAR 15:41 Pues e ixictac era jax xeꞌ cay xanobꞌ taca e Jesús tuaꞌ utacriobꞌ conda jaxir war axana tama e departamento Galilea. Y ayanto más ixictac ubꞌan xeꞌ warobꞌ era xeꞌ tariobꞌ tama e chinam Jerusalem taca e Jesús.
MAR 15:42 Pues entonces conda acbꞌare tama e día era xeꞌ jax e día conda e gente tuaꞌ e Israel war uyustes ubꞌobꞌ tuaꞌ ucajyesobꞌ e día tuaꞌ e jiriar xeꞌ jax e día sábado xeꞌ tuaꞌ watar era,
MAR 15:43 cꞌotoy e José xeꞌ tuaꞌ e chinam Arimatea, y xeꞌ jax inteꞌ miembro tama e nuxi concilio tama e Israel, y xeꞌ war ucojco e día conda tuaꞌ achecta watar uchinam e Dios tara tor e rum. Pues jaxir cay uqꞌuecꞌojse uyalma tuaꞌ uyubꞌi axin oꞌchoy tiaꞌ turu e Pilato tuaꞌ ucꞌajti ucuerpo e Jesús.
MAR 15:44 Pero e Pilato bꞌacta conda uyubꞌi que chamenix e Jesús, y tamar era cay uyubꞌi tuaꞌ inteꞌ capitán jay bꞌan.
MAR 15:45 Entonces conda e Pilato cꞌotoy unata tama e capitán era que chamenix e Jesús, uyajcꞌu ucuerpo e José.
MAR 15:46 Entonces e José ixin umani inteꞌ sacsac bꞌujc tuaꞌ ubꞌaqꞌui ucuerpo e Jesús tamar. Y de allí ixin uyemse ucuerpo e Jesús tama ut e cruz y uqꞌueche ixin tuaꞌ uturbꞌa tama inteꞌ mujr xeꞌ ustabꞌirix umener tama unac inteꞌ nuxi tun. Entonces conda cꞌapa umuqui ucuerpo e Jesús macuir e chꞌen, umaqui e chꞌen taca inteꞌ nuxi tun.
MAR 15:47 Y ya turu e María xeꞌ tuaꞌ e chinam Magdala taca e María xeꞌ jax utuꞌ e José, war uwirobꞌ tiaꞌ war amujca ucuerpo e Jesús.
MAR 16:1 Pues entonces conda cꞌapa e día tuaꞌ e jiriar ixiobꞌ e María xeꞌ tuaꞌ e chinam Magdala taca e María xeꞌ jax utuꞌ e Santiago y e Salomé tuaꞌ umaniobꞌ cora perfume tuaꞌ axin uyariobꞌ tama ucuerpo e Jesús tiaꞌ chꞌar chamen.
MAR 16:2 Entonces conda war asacojpa tama e bꞌajxan día tuaꞌ e semana xeꞌ jax inteꞌ día domingo, ixiobꞌ e ixictac era tuaꞌ acꞌotoyobꞌ tiaꞌ turu umujr e Jesús, pero esto conda chectix tari e qꞌuin.
MAR 16:3 Y cay ojronobꞌ jaxobꞌ taca y chenobꞌ: —¿Chi nic tuaꞌ ulocse e nuxi tun lo que war umaqui utiꞌ e chꞌen tiaꞌ chꞌar e Jesús chamen macuir? chenobꞌ e ixictac era.
MAR 16:4 Pero conda cꞌotoy uwirobꞌ tiaꞌ turu umujr e Jesús uwirobꞌ que loqꞌuesbꞌir e nuxi tun xeꞌ macar ani utiꞌ e chꞌen tamar.
MAR 16:5 Entonces ixin ochoyobꞌ tama e chꞌen y cay uwirobꞌ que macuir ayan inteꞌ chꞌom sitz xeꞌ turu tuyejtzꞌer unojcꞌabꞌ tiaꞌ chꞌar ani e Jesús. Pues bꞌujcsebꞌir e sitz era taca inteꞌ bꞌujc xeꞌ largo y xeꞌ galan sacsac ut. Pero bꞌactobꞌ e ixictac conda uwirobꞌ e chꞌom sitz.
MAR 16:6 Entonces ojron e sitz y che: —Ira ixbꞌacta. Nen innata que nox war isajca e Jesús xeꞌ tuaꞌ e chinam Nazaret xeꞌ chamesna tut e cruz. Pues jaxir machix chꞌar tara sino que sutpix bꞌixcꞌa tujam e chamenobꞌ. Iranic iwira tiaꞌ chꞌar ani ucuerpo.
MAR 16:7 Quiquic arenic uyajcanuarobꞌ e Jesús y e Pedro y arenic cocha era y che: “Jaxir axix era esto tama e departamento Galilea, y yajaꞌ tuaꞌ iwira ut bꞌan cocha cay arenox umener”, che e chꞌom sitz era.
MAR 16:8 Entonces locꞌoyobꞌ e ixictac y ixiobꞌ ajner tama e mujr era porque war achinchobꞌ y war abꞌactobꞌ, y mamajchi uyareobꞌ tucꞌa numuy era umen que war abꞌactobꞌ meyra.
MAR 16:9 Pues entonces conda cꞌapa sutpa bꞌixcꞌa e Jesús tujam e chamenobꞌ conda war asacojpa tama e bꞌajxan día tuaꞌ e semana, ixin uchectes ubꞌa bꞌajxan tut e María xeꞌ tuaꞌ e chinam Magdala xeꞌ jax xeꞌ loqꞌuesna siete mabꞌambꞌan mein tamar.
MAR 16:10 Pues ixin e María era y cay uyare tin e xanobꞌ taca e Jesús xeꞌ tzajtaca utobꞌ y xeꞌ war aruobꞌ upater e Jesús.
MAR 16:11 Pero conda uyubꞌiobꞌ que sutpa bꞌixcꞌa e Jesús tujam e chamenobꞌ y que e María cay uwira ut, machi ucꞌupsiobꞌ.
MAR 16:12 Pues entonces otronyajrto cay uchectes ubꞌa e Jesús pero intiach uwirnar tut chateꞌ uyajcanuarobꞌ conda war axanobꞌ tama e bꞌir.
MAR 16:13 Pero conda cꞌotoy unatobꞌ chi era sutpa ixiobꞌ tut e inmojr uyajcanuarobꞌ y cay uyareobꞌ que uwirobꞌix e Jesús, pero jaxirobꞌ machi ucꞌupsiobꞌ.
MAR 16:14 Pues entonces otronyajrto e Jesús ixin uchecsu ubꞌa tut e once uyajcanuarobꞌ. Y conda cꞌotoy tutobꞌ war awiobꞌ. Y cay ucꞌayobꞌ cora umen que machi cꞌupseyanobꞌ tamar lo que arobꞌnobꞌ umen tin e cay uwirobꞌ ut jaxir, y umen que uqꞌuecꞌojse uyalmobꞌ tuaꞌ machi ucꞌupsiobꞌ que bꞌixir jaxir.
MAR 16:15 Entonces ojron e Jesús y che: —Quiquic tama tunor or e rum y checsunic uyojroner e Dios tama e corpesiaj tut tunor e gente axin.
MAR 16:16 Y tunor tin e axin acꞌupseyanobꞌ tamaren y achꞌujyobꞌ, cꞌani acorpesnobꞌ. Pero tunor tin e machi acꞌupseyanobꞌ tamaren axin asatpobꞌ.
MAR 16:17 Y tin e axin acꞌupseyanobꞌ tamaren cꞌani aꞌjcꞌunobꞌ cora chequerir que ayan nicꞌotorer tacarobꞌ. Jaxirobꞌ axin uyajnesobꞌ alocꞌoy e sian mabꞌambꞌan mein tama nicꞌabꞌa. Y axin aꞌjcꞌunobꞌ tuaꞌ oꞌjronobꞌ tama inteꞌ ojroner xeꞌ ma tiaꞌ cano oꞌjronobꞌ tamar.
MAR 16:18 Y jay axin ujajpiobꞌ inteꞌ chan tama ucꞌabꞌ, o jay axin uyuchꞌiobꞌ lo que jax inteꞌ veneno, machix tuaꞌ unumse ubꞌobꞌ tamar. Y conda axin ucꞌatbꞌu ucꞌabꞌobꞌ tujor tin e ajmuac, axin atzꞌacpobꞌ ubꞌan, che e Jesús.
MAR 16:19 Entonces conda cꞌapa ojron Cawinquirar Jesús taca uyajcanuarobꞌ qꞌuejcha ixin tichan tut e qꞌuin y cꞌotoy turuan tama unojcꞌabꞌ Catata Dios tichan.
MAR 16:20 Entonces jaxirobꞌ locꞌoyobꞌ y cay uchecsuobꞌ axin tunor uyojroner e Dios tama e corpesiaj tic taca tama tunor or e rum. Y Cawinquirar war utacre uyajcanuarobꞌ taca ucꞌotorer y war uchecsu que erach uyojroner taca meyra sian milagro xeꞌ chembꞌir umenerobꞌ. Tara acꞌapa tunor niwojroner, che e Marcos.
LUK 1:1 Nen xeꞌ Lucasen war intzꞌijbꞌa e ojroner era tabꞌa xeꞌ Teofiloet xeꞌ intzay inwiret, porque ayan meyra gente xeꞌ cay usatiobꞌ meyra día tuaꞌ uyustes bien y tuaꞌ utzꞌijbꞌobꞌ tama tunor lo que numuy tamaron xeꞌ cay cꞌupseyanon tama Cawinquirar Jesucristo.
LUK 1:2 Jaxirobꞌ utzꞌijbꞌobꞌ tunor lo que irsenobꞌ umen tin e cay uwirobꞌ lo que uche Cawinquirar Jesucristo desde ucajyesnibꞌir tunor era y xeꞌ cay uchecsuobꞌ e ojroner tamar Cawinquirar Jesucristo ubꞌan.
LUK 1:3 Y tamar era, cocha war innata tama tunor lo que cay numuy tama Cawinquirar Jesucristo desde ucajyesnibꞌir tunor era, nen ubꞌan cꞌani ixto onstes tunor e ojroner era tuaꞌ intzꞌijbꞌa tabꞌa
LUK 1:4 tuaꞌ anata, O Teófilo, que erach tunor lo que cansebꞌiret tamar Cawinquirar Jesucristo.
LUK 1:5 Pues ayan inteꞌ ojroner tamar inteꞌ sacerdote tuaꞌ e Israel xeꞌ ucꞌabꞌa Zacarías. Y tama utiempo e Zacarías era war acꞌotori inteꞌ rey tama e departamento Judea xeꞌ ucꞌabꞌa Herodes. Pues e Zacarías quetpa tuaꞌ apatna tama inteꞌ grupo sacerdote xeꞌ arobꞌnobꞌ: “Tuobꞌ e Abías”, xeꞌ jax ani inteꞌ winic xeꞌ turuan tama e onian tiempo. Y uwixcar e Zacarías ucꞌabꞌa Elisabet. Pues e ixic era sitzbꞌir ubꞌan tuaꞌ e Aarón xeꞌ turuan tama e onian tiempo xeꞌ arobꞌna que jax e bꞌajxan sacerdote tuaꞌ e Israel.
LUK 1:6 Pues e Zacarías y e Elisabet erobꞌach tut e Dios y war acꞌupseyanobꞌ tut uyojroner e Dios y war uchiobꞌ tunor lo que arobꞌnobꞌ tuaꞌ uchiobꞌ umen e Dios. Y tamar era mamajchi war oꞌjronobꞌ upater.
LUK 1:7 Pero e Elisabet machi oꞌbꞌna achꞌijtesian taca e Zacarías, y tamar era matucꞌa umaxtacobꞌ y bꞌan taca numuy utiempo este que quetpobꞌ onian gente.
LUK 1:8 Y tama inteꞌ día quetpa que jax e grupo tuaꞌ e Zacarías xeꞌ tuaꞌ uchiobꞌ e servicio tut e Dios tama e templo.
LUK 1:9 Y acay uchiobꞌ cocha era tuaꞌ usicbꞌobꞌ tucꞌa sacerdote xeꞌ tuaꞌ oꞌchoy tama e templo, y tamar era cay uturbꞌobꞌ ucꞌabꞌa inteꞌ inteꞌ tut cora tun y e tun xeꞌ achꞌajma bꞌajxan aquetpa tuaꞌ oꞌchoy tin e chꞌar ucꞌabꞌa tamar, y tamar era upejcobꞌ e Zacarías tuaꞌ oꞌchoy tama e templo tuaꞌ uputa e ujtzꞌubꞌ tut Cawinquirar Dios.
LUK 1:10 Entonces ochoy e Zacarías tama e templo y cay uputa e ujtzꞌubꞌ, y tunor e gente quetpobꞌ patir, war ucꞌajtiobꞌ taca e Dios.
LUK 1:11 Y conda war acay uputa e ujtzꞌubꞌ, checta inteꞌ ángel tuaꞌ Cawinquirar Dios tut e Zacarías. Y e ángel cꞌotoy wawan tuyejtzꞌer e altar tiaꞌ war uputa e ujtzꞌubꞌ.
LUK 1:12 Conda e Zacarías uwira e ángel, bꞌacta meyra y machi ixto unata tucꞌa tuaꞌ uche.
LUK 1:13 Pero ojron e ángel taca e Zacarías y che: —Ira ibꞌacta, porque Cadiosir cꞌapa uyubꞌi tunor lo que cay acꞌajti tacar, y tamar era awixcar xeꞌ jax e Elisabet cꞌani achꞌijtesian y axin acuxpa inteꞌ oynen y net tuaꞌ aturbꞌa ucꞌabꞌa Juan.
LUK 1:14 Y nox ixixin ixtzay meyra conda axin acuxpa oynen era, y meyra gente cꞌani atzayobꞌ conda uwirobꞌ ut.
LUK 1:15 Porque oynen era cꞌani aquetpa nojta tut Cawinquirar Dios conda acꞌapa achꞌiꞌ, y machi tuaꞌ uyuchꞌi e chicha y nien e vino machi tuaꞌ uyuchꞌi, sino que cꞌani abꞌutcꞌa uyalma tacar Unawalir e Dios conda merato acuxpa.
LUK 1:16 Y jaxir tuaꞌ uche usuti ubꞌijnusiajobꞌ meyra gente tama e chinam Israel tuaꞌ asutpa acꞌotoyobꞌ tut Cawinquirar Dios otronyajr.
LUK 1:17 Y oynen era xeꞌ jax e Juan cꞌani axin bꞌajxan tut Cawinquirar tuaꞌ uyustes uyalmobꞌ e gente tuaꞌ uchꞌamiobꞌ ucꞌabꞌa Cawinquirar, y cꞌani aquetpa Unawalir e Dios y ucꞌotorer e Dios tacar e Juan era ubꞌan, bꞌan cocha ayan ani taca e Elías xeꞌ cay uchecsu uyojroner e Dios tama e onian tiempo. Y jaxir cꞌani acꞌampesna umen e Dios tuaꞌ ucꞌunles tunor uyalmobꞌ tin e tatabꞌir y tin e tubꞌir tuaꞌ acꞌotoy ucꞌaniobꞌ umaxtacobꞌ. Y jaxir cꞌani acꞌampesna umen e Dios tuaꞌ upejca uyalmobꞌ e gente xeꞌ machi ani acꞌupseyanobꞌ tut e Dios tuaꞌ asutpobꞌ tut. Y bꞌan cocha era axin utacre e gente tuaꞌ uyustes ubꞌobꞌ tuaꞌ uchꞌamiobꞌ ucꞌabꞌa Cawinquirar. Bꞌan che e ángel uyare e Zacarías.
LUK 1:18 Pero e Zacarías sutpa uyubꞌi tuaꞌ e ángel y che: —Non era onian genteon, nen y niwixcar, ¿y cocha tuaꞌ innata jay ererto cachꞌijteseyan? che e Zacarías uyare e ángel.
LUK 1:19 Entonces ojron e ángel otronyajr y che: —Nen Gabrielen xeꞌ inwawan tut Catata Dios xeꞌ utzacren tarien tuaꞌ inwaret e ojroner era.
LUK 1:20 Pero era, cocha machi cꞌani acꞌupse lo que war inwaret era, net machi tuaꞌ iyojron este que axin acuxpa oynen. Tunor era cꞌani anumuy bꞌan taca cocha war inwaret, y net machix uyubꞌiet tuaꞌ iyojron este que acuxpa oynen. Bꞌan che e ángel.
LUK 1:21 Y e sian gente xeꞌ turobꞌ patir war acojcsanobꞌ y war oꞌjronobꞌ y che: —¿Tucꞌa war uche e Zacarías que machi cꞌani alocꞌoy macuir e templo? che e gente.
LUK 1:22 Y conda e Zacarías locꞌoy patir, machi uyubꞌi oꞌjron. Entonces cay ubꞌijnuobꞌ e gente que jaxir uwirix inteꞌ mayjut conda turu macuir e templo, porque e Zacarías war upejca e gente tamar taca ucꞌabꞌ.
LUK 1:23 Entonces conda cꞌapa e semana era conda quetpa tuaꞌ uputa e ujtzꞌubꞌ e Zacarías, sutpa ixin tama uyotot.
LUK 1:24 Entonces uwixcar e Zacarías xeꞌ jax e Elisabet quetpa wawan bꞌan taca cocha arobꞌnobꞌ umen e ángel. Y jaxir machi locꞌoy tama uyotot tama inteꞌ tiempo de cinco mes umen que machi cꞌani asubꞌajra tut e gente. Y war ubꞌijnu tama uyalma y che:
LUK 1:25 “Coner innata que Cawinquirar Dios war utacren porque jaxir ixin uyajqꞌuen tuaꞌ inquetpa inwawan, y tamar era machi ixto tuaꞌ uxejbꞌiobꞌ niut e gente que matucꞌa ani nimaxtac.” Bꞌan ojron e Elisabet jax taca tama uyalma.
LUK 1:26 Entonces conda e Elisabet quetpa wawan seis mesix, Cadiosir uyebꞌta ixin inteꞌ ángel xeꞌ ucꞌabꞌa Gabriel esto tama inteꞌ chinam xeꞌ ucꞌabꞌa Nazaret xeꞌ turu tama e departamento Galilea.
LUK 1:27 Y ebꞌetna ixin e Gabriel tuaꞌ oꞌjron taca inteꞌ ijchꞌoc xeꞌ ucꞌabꞌa María xeꞌ cꞌajtbꞌirix umen inteꞌ sitz xeꞌ ucꞌabꞌa José tuaꞌ anujbꞌi tacar. Pues e José sitzbꞌir tuaꞌ e rey David xeꞌ turuan tama e onian tiempo.
LUK 1:28 Entonces ochoy e ángel macuir e otot tiaꞌ turu e María y che: —Cꞌani inwaret coner que Cawinquirar Dios war uyajta oit meyra. Y cꞌani inwaret que Cawinquirar Dios turu tacaret, y que net más chojbꞌesbꞌiret umen e Dios que tunor e inmojr ijchꞌoctac xeꞌ turobꞌ tama tunor or e rum, che e ángel.
LUK 1:29 Pero e María bꞌacta tama uyalma conda uwira e ángel, y cay ubꞌijnu tama uyalma y che: —¿Tucꞌa tuaꞌ war uyaren cocha era? Bꞌan ubꞌijnu e María tama uyalma.
LUK 1:30 Entonces sutpa ojron e ángel y che: —María, ira ibꞌacta porque net war achꞌami meyra chojbꞌesiaj tuaꞌ e Dios.
LUK 1:31 Porque net cꞌani iquetpa iwawan y cꞌani acuxpa inteꞌ awar, y ucꞌani tuaꞌ aturbꞌa ucꞌabꞌa Jesús.
LUK 1:32 Y conda jaxir achꞌiꞌ axin aquetpa inteꞌ nuxi winic, y cꞌani aꞌrobꞌna que jaxir jax Uyunen e Dios xeꞌ turu tichan, y Cawinquirar Dios cꞌani uyajcꞌu e turtar xeꞌ tuaꞌ e rey David xeꞌ turuan tama e onian tiempo.
LUK 1:33 Y jaxir cꞌani axin acꞌotori tujor tunor e chinam Israel ajqꞌuin ajqꞌuin, y machi watar e tiempo conda machi tuaꞌ acꞌotori, che e ángel.
LUK 1:34 Entonces e María sutpa ojron taca e ángel y che: —¿Y cocha tuaꞌ anumuy tunor era tamaren cocha nen merato inturuan taca inteꞌ winic? che e María.
LUK 1:35 Entonces ojron e ángel y che: —Unawalir e Dios axin watar tama ajor, y ucꞌotorer e Dios Ajtichaner tuaꞌ axin ubꞌochꞌiet, y awar lo que tuaꞌ acuxpa tamaret cꞌani aquetpa erach tut e Dios iraj iraj, y cꞌani aꞌrobꞌna que jax Uyunen e Dios.
LUK 1:36 Y e Elisabet xeꞌ jax acꞌojna war ucojco tucꞌa día tuaꞌ acuxpa uyar, motor que jaxir onian ixic xeꞌ war aꞌrobꞌna ani umen e gente que jaxir machi uyubꞌi achꞌijtesian, pero era ayanix seis mes cuchur uyar.
LUK 1:37 Conda Cadiosir ixin uche cocha era taca e Elisabet, war che que tut e Dios matucꞌa xeꞌ intran tut, che e ángel.
LUK 1:38 Y e María che: —Nen manen tuaꞌ Niwinquirar. Que jaxir uchic tacaren bꞌan taca cocha awaren net, che e María. Y de allí locꞌoy e ángel ixin.
LUK 1:39 Pues entonces tama e día era e María cay uyustes ubꞌa tuaꞌ axin wacchetaca esto tama inteꞌ witzir xeꞌ turu tama e departamento Judea.
LUK 1:40 Entonces ixin e María esto tama e chinam tiaꞌ turu e Elisabet. Y conda cꞌotoy tama e chinam era ochoy tama uyotot e Zacarías y cay upejca e Elisabet.
LUK 1:41 Y e Elisabet conda uyubꞌi uyojroner e María, nijqui uchꞌurcabꞌ tama unac y bꞌutcꞌa uyalma taca Unawalir e Dios.
LUK 1:42 Y tamar era cay ojron e Elisabet taca inteꞌ nuxi nuc y che: —María, más chojbꞌesbꞌiret umen e Dios que tunor e inmojr ixictac o ijchꞌoctac xeꞌ turobꞌ tama tunor or e rum, y e chꞌurcabꞌ xeꞌ cuchur amener chojbꞌesbꞌir umen e Dios ubꞌan.
LUK 1:43 ¿Y tuqꞌuen cora nen que net war iyopa tuaꞌ awarajsen net xeꞌ tubꞌiret tuaꞌ Niwinquirar?
LUK 1:44 Porque conda umbꞌi awojroner, nijqui e chꞌurcabꞌ tama ninac umen e tzayer.
LUK 1:45 Chojbꞌesbꞌiret umen e Dios umen que cꞌupseyanet tamar, porque ucꞌani tuaꞌ acꞌapa anumuy tunor lo que arobꞌnet umen Cawinquirar Dios, che e Elisabet uyare e María.
LUK 1:46 Y che e María: Intattzꞌi ucꞌabꞌa Niwinquirar Dios taca tunor niwalma.
LUK 1:47 Y niwalma war atzay meyra tama Nidiosir xeꞌ jax Niwajcorpesiaj.
LUK 1:48 Porque Nidiosir cay usajquen nen xeꞌ jax umanen xeꞌ tzajtaca niut tut, y desde coner meyra gente tama tunor e tiempo cꞌani utattzꞌienobꞌ umen que chojbꞌesbꞌir niut.
LUK 1:49 Porque Nidiosir cay uche meyra lo que nojta tamaren tacar ucꞌotorer. Erach ucꞌabꞌa Nidiosir.
LUK 1:50 Y Nidiosir uche ubꞌa que incꞌun uwirnar iraj iraj tut tunor tin e ubꞌacriobꞌ ut jaxir.
LUK 1:51 Ayan meyra lo que cay uche taca ucꞌotorer, y unutꞌi ut ubꞌijnusiajobꞌ tunor tin e uche ubꞌobꞌ que jax taquix.
LUK 1:52 War umanxujres tin e ayan ucꞌampibꞌir tuaꞌ acꞌotori, y war utꞌabꞌse tin e umanxujres ubꞌobꞌ.
LUK 1:53 Tin e war aytzꞌa war ubꞌutꞌi unac taca tunor lo que ucꞌani, y tin e ayan meyra utumin war utzacre tuaꞌ axiobꞌ bꞌan taca tojbꞌen ucꞌabꞌobꞌ.
LUK 1:54 Y Nidiosir war utacrion non xeꞌ tuon e Israel xeꞌ umanon, y machi unajpes tuaꞌ uche ubꞌa que incꞌun uwinar ticoit.
LUK 1:55 Porque bꞌan arobꞌna catata viejobꞌir Abraham umen e Dios, y bꞌan quetpa inyajrer tuaꞌ achena tama umaxtacobꞌ ubꞌan, che e María.
LUK 1:56 Pues entonces quetpa e María tama uyotot e Elisabet tama inteꞌ tiempo de tres mes, y de allí sutpa ixin tama uyotot.
LUK 1:57 Entonces conda cꞌotoy e día tuaꞌ acuxpa e chꞌurcabꞌ tuaꞌ e Elisabet, cuxpa inteꞌ yar sitz.
LUK 1:58 Y conda ubꞌnobꞌ ucuxpar uchꞌurcabꞌ e Elisabet umen upiarobꞌ y umen tunor tin e turobꞌ majax innajt tama uyotot, ixiobꞌ tuaꞌ uwarajsiobꞌ. Tunorobꞌ war atzayobꞌ meyra tamar lo que numuy que Cawinquirar Dios uchojbꞌes e Elisabet nojta cocha era.
LUK 1:59 Y conda tzꞌacta e ocho día conda cuxpa e yar sitz, e Zacarías taca e Elisabet uqꞌuechiobꞌ ixin tama e templo tuaꞌ axujra imbꞌijc uqꞌuewerir utejromar tuaꞌ acꞌapa uche lo que chꞌar tzꞌijbꞌabꞌir tama uley e Moisés. Y tama e día era cꞌotoy e hora tuaꞌ uturbꞌa ucꞌabꞌa e yar sitz era ubꞌan. Y tin e war umorojse ubꞌobꞌ taca utuꞌ y utata yar e chuchu cꞌani ani uturbꞌobꞌ ucꞌabꞌa cocha ucꞌabꞌa utata xeꞌ jax e Zacarías.
LUK 1:60 Pero utuꞌ yar e sitz majax bꞌan ucꞌani, y che: —Machi. Tuaꞌ caturbꞌa ucꞌabꞌa Juan, che e Elisabet.
LUK 1:61 Y upiarobꞌ e Elisabet chenobꞌ: —¿Y tucꞌa tuaꞌ acꞌani aturbꞌa ucꞌabꞌa e sitz era Juan, cocha mamajchi ayan ucꞌabꞌa cocha era tujam apiarobꞌ? che upiarobꞌ e Elisabet.
LUK 1:62 Entonces cay upejcobꞌ e Zacarías taca ucꞌabꞌobꞌ tuaꞌ unatobꞌ tucꞌa ucꞌabꞌa tuaꞌ uturbꞌobꞌ yar e chuchu sitz era.
LUK 1:63 Entonces jaxir ucꞌajti inteꞌ utajwir tabla tuaꞌ utzꞌijbꞌa tamar. Y tamar e tabla utzꞌijbꞌa que: “Tuaꞌ caturbꞌa ucꞌabꞌa Juan.” Y tunor tin e war umorojse ubꞌobꞌ taca utuꞌ y utata yar e sitz ubꞌijnu uwirobꞌ que bꞌan cocha war ubꞌijnu utuꞌ y bꞌan utzꞌijbꞌa e Zacarías tama e tabla.
LUK 1:64 Y wacchetaca bꞌantzꞌa uyej e Zacarías umen e Dios y cay ojron otronyajr y cay utattzꞌi ucꞌabꞌa e Dios.
LUK 1:65 Y tunor upiarobꞌ xeꞌ turobꞌ tacarobꞌ era cay bꞌactobꞌ uwirobꞌ lo que numuy taca e Zacarías, y cay ixiobꞌ tuaꞌ uchecsu tunor era tama tunor or e lugar tor e witzir tama e departamento Judea.
LUK 1:66 Y tunor tin e uyubꞌiobꞌ lo que numuy taca e Zacarías y e Elisabet cay utꞌabꞌsiobꞌ tama uyalmobꞌ tunor e ojroner era y cay ubꞌijnuobꞌ taca e gente y che: —¿Tucꞌa tuaꞌ uche e sitz era conda acꞌapa achꞌiꞌ? Porque jaxir chequer que nojta uchojbꞌesiaj e Dios tacar, chenobꞌ e gente.
LUK 1:67 Entonces bꞌutcꞌa uyalma utata e Juan xeꞌ jax e Zacarías taca Unawalir e Dios, y cay utattzꞌi ucꞌabꞌa e Dios taca e ojroner era lo que ajcꞌuna umen e Dios y che:
LUK 1:68 Intattzꞌi ucꞌabꞌa Cawinquirar Dios xeꞌ tuon non xeꞌ Ajisraelon, que jaxir yopix uwarajsion xeꞌ uchinamon, y war ucorpeson.
LUK 1:69 Porque jaxir uyebꞌta tari Cawajcorpesiaj xeꞌ meyra ayan ucꞌotorer, xeꞌ jax uyunen e rey David xeꞌ turuan tama e onian tiempo.
LUK 1:70 Y bꞌan cocha cay ojron Cadiosir tama e onian tiempo taca e profetobꞌ xeꞌ erobꞌach y che:
LUK 1:71 Cꞌani ucorpeson tama tunor tin e aqꞌuijna uwironobꞌ y cꞌani ucorpeson tama tunor tin e uxejbꞌiobꞌ coit.
LUK 1:72 Y e Dios cay uyareon que cꞌani aquetpa incꞌun uwirnar tut tunor catata viejobꞌirobꞌ, y que machi tuaꞌ unajpes lo que cay uyare que cꞌani uche lo que erach tacaron xeꞌ Ajisraelon.
LUK 1:73 Jax era inteꞌ ojroner xeꞌ actana umen Cadiosir taca catata viejobꞌir Abraham,
LUK 1:74 que jaxir cꞌani ucorpeson tama tunor tin e war aqꞌuijna uwironobꞌ tuaꞌ uyubꞌion catzay cojytzꞌi ut Cadiosir y mamajchi tuaꞌ cabꞌacre conda cache,
LUK 1:75 y tuaꞌ caquetpa erach tut Cadiosir taca inteꞌ cuxtar xeꞌ turbꞌana tamar tama tunor e tiempo xeꞌ turon tara tor e rum, che e Zacarías.
LUK 1:76 Y de allí e Zacarías sutpa upejca uyunen y che: Y net, niunenet, cꞌani iyarobꞌna que net jax inteꞌ profeta tuaꞌ e Dios Ajtichaner, y net tuaꞌ iꞌxin bꞌajxan tut Cawinquirar tuaꞌ uꞌstes tunor uyalmobꞌ e gente tuaꞌ uchꞌamiobꞌ ucꞌabꞌa conda achecta watar Cawinquirar tutobꞌ.
LUK 1:77 Y net tuaꞌ achecsu tut tunor e chinamobꞌ tama e Israel que cꞌani aloqꞌuesna tunor umabꞌambꞌanirobꞌ, y que tamar era tuaꞌ uchꞌamiobꞌ e corpesiaj.
LUK 1:78 Pues incꞌun uwirnar Cadiosir ticoit, y tamar era war uyebꞌta watar tin e tuaꞌ ujanchꞌacnes ticoit tucꞌa e corpesiaj bꞌan cocha conda atobꞌoy watar e qꞌuin.
LUK 1:79 Y conda acꞌotoy tin e tuaꞌ ucorpeson jaxir tuaꞌ ujanchꞌacnes tunor tin e turobꞌ tama uyencsibꞌaner e mabꞌambꞌanir y tin e turobꞌ tama uyencsibꞌaner e chamer, y jaxir tuaꞌ uqꞌuechion caxin tama e bꞌir tiaꞌ ayan e jiriar. Bꞌan che uyojroner e Zacarías lo que ajcꞌuna umen e Dios.
LUK 1:80 Pues entonces e sitz era xeꞌ jax e Juan xeꞌ ajchꞌuymar cay chꞌiꞌ, y qꞌuecꞌo tama uyalma taca unatanyaj e Dios. Y cay turuan tama inteꞌ choquem lugar este que cꞌotoy e día tuaꞌ uchectes ubꞌa tut e gente tama e Israel que jaxir jax inteꞌ profeta tuaꞌ e Dios.
LUK 2:1 Pues tama e onian tiempo e rey Agusto César ulocse inteꞌ orden xeꞌ che que ucꞌani tuaꞌ axin atzijca tunor e sian gente tuaꞌ anatanwa cobꞌa gente ayan tama tunor or e rum.
LUK 2:2 Pues e bꞌajxan tzicmar era chena conda ayan ani inteꞌ winic xeꞌ ucꞌabꞌa Cirenio xeꞌ war acꞌotori tama e departamento Siria.
LUK 2:3 Y tunor e sian gente quetpobꞌ tuaꞌ axiobꞌ inteꞌ inteꞌ esto tama uchinamobꞌ tuaꞌ atzꞌijbꞌna ucꞌabꞌobꞌ.
LUK 2:4 Y tamar e tzicmar era quetpa tuaꞌ axin e José esto tama uchinam ubꞌan. Y jaxir ubꞌijnu tuaꞌ uqꞌueche axin e María tacar. Y tamar era locꞌoyobꞌ tama e chinam Nazaret xeꞌ turu tama e departamento Galilea y ixiobꞌ esto tama e chinam Belén xeꞌ turu tama e departamento Judea. Pues e chinam Belén jax e chinam tiaꞌ cuxpa e David xeꞌ jax utata viejobꞌir e José, y tamar era quetpa tuaꞌ axin e José esto tama e chinam era.
LUK 2:5 Y ixin taca e María porque ayanix uyojronerobꞌ tuaꞌ anujbꞌiobꞌ watar e día pero e María warix ucojco uyar.
LUK 2:6 Entonces conda turobꞌ tama e chinam Belén, cꞌotoy e día tuaꞌ acuxpa uchꞌurcabꞌ e María.
LUK 2:7 Y cuxpa inteꞌ yar chuchu sitz xeꞌ jax uyaxajr, y cay ubꞌasi taca e bꞌajqꞌuibꞌ, y uchꞌabꞌu tor e ac tama inteꞌ canoba tiaꞌ aweꞌ e wacax, porque ma tiaꞌ más tiaꞌ tuaꞌ aquetpobꞌ porque bꞌutꞌur tunor e posada umen e sian gente xeꞌ war ayopobꞌ tama e tzicmar era.
LUK 2:8 Pues tuyejtzꞌer e chinam Belén era ayan cora sian ajcojc oveja xeꞌ war acojcsanobꞌ acbꞌar tama e choquem lugar,
LUK 2:9 conda wacchetaca checta inteꞌ ángel tuaꞌ Cawinquirar Dios tutobꞌ y cay uwirobꞌ utawarer Cawinquirar Dios xeꞌ war ujanchꞌacnes tunor or e lugar tiaꞌ turobꞌ y bꞌactobꞌ inyajrer.
LUK 2:10 Pero e ángel uyare e ajcojcobꞌ oveja era y che: —Ira ixbꞌacta, porque nen war intares inteꞌ ojroner tibꞌa xeꞌ galan, y que cꞌani utzayjresox taca tunor e gente tama tunor or e rum ubꞌan,
LUK 2:11 porque sajmi cuxpa inteꞌ yar chuchu sitz xeꞌ jax xeꞌ tuaꞌ aquetpa Iwajcorpesiaj y xeꞌ tuaꞌ aquetpa e Cristo xeꞌ jax Cawinquirar. Y yar e sitz era cuxpa tama e chinam Belén xeꞌ arobꞌna que jax uchinam e David.
LUK 2:12 Y tuaꞌ inata chi Iwajcorpesiaj era, nox tuaꞌ itajwi e chꞌurcabꞌ bꞌasbꞌir tama inteꞌ bꞌajqꞌuibꞌ chꞌar tama inteꞌ canoba tiaꞌ aweꞌ e wacax. Bꞌan che e ángel.
LUK 2:13 Y wacchetaca checta tari tupat e ángel era meyra sian angelobꞌ xeꞌ cay utattzꞌiobꞌ ucꞌabꞌa e Dios y che cocha era:
LUK 2:14 Catattzꞌiet Cadiosiret Ajtichanet porque ayan e jiriar tara tor e rum tujam e winicobꞌ tin e war itzay awira. Bꞌan chenobꞌ e angelobꞌ era.
LUK 2:15 Entonces conda cꞌapa ojronobꞌ e angelobꞌ, tꞌabꞌay ixiobꞌ tichan. Y cay ojronobꞌ e ajcojcobꞌ oveja y chenobꞌ: —Incuic ajner esto tama e chinam Belén tuaꞌ cawira tucꞌa numuy, bꞌan cocha arenon umen Cawinquirar wartuix, xeꞌ chenobꞌ e ajcojcobꞌ oveja era.
LUK 2:16 Entonces ixiobꞌ ajner esto tama e chinam Belén y yajaꞌ utajwiobꞌ e José taca e María y utajwiobꞌ yar e chuchu chꞌar tama inteꞌ canoba.
LUK 2:17 Y conda uwirobꞌ yar e sitz era, cay uyareobꞌ e José y e María tunor lo que cay arobꞌnobꞌ umen e ángel tamar e sitz era.
LUK 2:18 Y tunor tin e war uyubꞌiobꞌ e ojroner era, cay bꞌacta uwirobꞌ tunor lo que cay numuy.
LUK 2:19 Pero e María uquete tunor era tama uyalma y atzay ubꞌijnu uwira tunor era tama ujor iraj iraj.
LUK 2:20 Entonces locꞌoyobꞌ e ajcojcobꞌ oveja tuaꞌ axin uwirobꞌ tiaꞌ macar uyaracobꞌ otronyajr. War atzayobꞌ y war utattzꞌiobꞌ ucꞌabꞌa e Dios tama tunor lo que cay uyubꞌiobꞌ y tama tunor lo que cay uwirobꞌ, porque tunor era numuy bꞌan taca cocha arobꞌnobꞌ umen e ángel.
LUK 2:21 Entonces conda cꞌotoy e ocho día conda cuxpa e sitz, yopa tutobꞌ cora winicobꞌ tuaꞌ uxuri imbꞌijc uqꞌuewerir utejromar yar e chuchu sitz tuaꞌ e María. Pues uchiobꞌ cocha era tuaꞌ acꞌapa uche lo que chꞌar tzꞌijbꞌabꞌir tama uley e Moisés. Y turbꞌana ucꞌabꞌa yar e sitz Jesús bꞌan cocha arobꞌna e María umen e ángel conda ne mato tucꞌa ayan tama unac e María.
LUK 2:22 Pues entonces conda cꞌotoy e día tuaꞌ e María tuaꞌ axin uyustes ubꞌa tuaꞌ aloqꞌuesna e bꞌonemar lo que ayan tamar umen que cuxpa inteꞌ uchꞌurcabꞌ, ixin taca e José y e chꞌurcabꞌ esto tama e chinam Jerusalem. Uchiobꞌ cocha era tuaꞌ acꞌapa uche bꞌan cocha chꞌar tzꞌijbꞌabꞌir tama uley e Moisés que inteꞌ ixic xeꞌ ucuxi inteꞌ uchꞌurcabꞌ ucꞌani tuaꞌ uyajcꞌu inteꞌ arac tuaꞌ apurutna tujor e altar tuaꞌ ulocse e bꞌonemar lo que ayan tamar. Entonces uqꞌuechiobꞌ ixin yar e sitz esto tama e templo tama e chinam Jerusalem tuaꞌ uchiobꞌ dedicar tut Cawinquirar Dios.
LUK 2:23 Bꞌan uchiobꞌ e José y e María porque chꞌar tzꞌijbꞌabꞌir tama uley e Moisés que conda uyaxajr jax inteꞌ sitz, ucꞌani tuaꞌ uyajcꞌobꞌ tut Cawinquirar Dios.
LUK 2:24 Entonces ixin uchiobꞌ bꞌan cocha chꞌar tzꞌijbꞌabꞌir tama uley e Moisés y uyajcꞌuobꞌ chacojt bꞌiqꞌuit mucuy tuaꞌ apurutna tujor e altar, porque chꞌar tzꞌijbꞌabꞌir tama uley e Moisés que: “Chacojt cuncuna xeꞌ nuquir o chacojt mucuy tuaꞌ iwajcꞌu.” Bꞌan chꞌar tzꞌijbꞌabꞌir tama uyojroner e Dios.
LUK 2:25 Y tama e tiempo era ayan inteꞌ winic xeꞌ ucꞌabꞌa Simeón tama e chinam Jerusalem. Y e winic era erach tut e Dios y war uyujtzꞌi ut e Dios iraj iraj. Y war ucojco e día conda tuaꞌ acorpesna e gente tama e Israel, y turu Unawalir e Dios tacar.
LUK 2:26 Y tamar era arobꞌna e Simeón umen Unawalir e Dios que jaxir machi tuaꞌ achamay este que axin uwira e Cristo xeꞌ axin eꞌbꞌetna watar umen Cawinquirar Dios.
LUK 2:27 Y tamar era ixin jaxir esto tama e templo porque bꞌan bꞌijresna umen Unawalir e Dios tuaꞌ uche. Y jax tama e día era ubꞌan conda taresna yar e Jesús umen utuꞌ y utata esto tama e templo tuaꞌ acꞌapa uchiobꞌ lo que chꞌar tzꞌijbꞌabꞌir tama uley e Moisés.
LUK 2:28 Y cocha ya turu e Simeón tama e templo ubꞌan ixin uchꞌami yar e Jesús y cay umeqꞌue y cay utattzꞌi ucꞌabꞌa e Dios y che:
LUK 2:29 Niwinquirar Dios, coner uyubꞌi ixto awacten inchamay yaꞌ, porque cꞌapa inwira lo que cay awaren ixnix que machi tuaꞌ inchamay este que acꞌapa inwira e Cristo.
LUK 2:30 Inwira ixto yaꞌ Niwajcorpesiaj,
LUK 2:31 xeꞌ awebꞌta tari tuaꞌ eꞌrna umen tunor e sian gente xeꞌ turobꞌ tama tunor or e rum.
LUK 2:32 Porque jaxir axin ujanchꞌacnes e gente xeꞌ majax tuobꞌ e Israel, xeꞌ war che que jaxir tuaꞌ axin uchectes e bꞌir xeꞌ erach tut e gente era. Y jaxir tuaꞌ uyajcꞌu utawarer tama cachinam xeꞌ jax e Israel ubꞌan, che e Simeón.
LUK 2:33 Pues e José y e María cay bꞌacta ubꞌijnu uwirobꞌ e ojroner xeꞌ arobꞌnobꞌ umen e Simeón tama yar usitz era.
LUK 2:34 Entonces e Simeón uyari uchojbꞌesiaj tujor e José y e María. Y de allí sutpa uyare e María y che: —Ubꞌinen, awar era cꞌani axin uche que meyra gente tama cachinam Israel axin acorpesnobꞌ y que meyra gente axin asatpobꞌ. Y chequer que jaxir ebꞌetbꞌir tari umen e Dios, pero axin axejbꞌna ut umen meyra gente ubꞌan.
LUK 2:35 Y jaxir tuaꞌ uchectes e mabꞌambꞌanir lo que ayan mucur tama uyalmobꞌ inteꞌ inteꞌ winic tama e Israel. Y tamar era ayan meyra lo que tuaꞌ achempa upater awar conda axin achꞌiꞌ, y tamar era cꞌani acꞌuxun awalma meyra bꞌan cocha jay axejcꞌa ani anac taca inteꞌ nuxi cuchillo, che e Simeón.
LUK 2:36 Y tama e templo era turu ubꞌan inteꞌ ixic xeꞌ ucꞌabꞌa Ana. Y jaxir jax inteꞌ xeꞌ erer uchꞌami inteꞌ ojroner tuaꞌ e Dios y tuaꞌ asutpa uyare e gente. Y utata e Ana era ucꞌabꞌa Fanuel xeꞌ tari tama uchꞌajnar e Aser xeꞌ turuan tama e onian tiempo. Y e Ana ilamix. Jaxir nujbꞌi conda ijchꞌocto, y turuan taca uviejo siete año, y de allí chamay uviejo.
LUK 2:37 Y jaxir machi sutpa nujbꞌi y era war ucojco ochenta y cuatro año. Y jaxir ya turu tama e templo tama e día y tama e acbꞌar ubꞌan war ucꞌajti taca e Dios. Y ayan e día conda machi aweꞌ tuaꞌ taca oꞌjron taca e Dios.
LUK 2:38 Y conda cꞌapa ojron e Simeón ya turu e Ana tutobꞌ, y conda uwira ut yar e Jesús, cay utattzꞌi ucꞌabꞌa e Dios tama e sitz era. Y war unata que yar e Jesús jax e Ajcorpesiaj. Y de allí cay uyare tunor e gente tama e chinam Jerusalem xeꞌ war ucojcobꞌ e día conda tuaꞌ acorpesna e chinam Jerusalem que yopix e Ajcorpesiaj.
LUK 2:39 Entonces conda e José y e María cꞌapa uchiobꞌ tunor lo que chꞌar tzꞌijbꞌabꞌir tama uley e Moisés tamar lo que ucꞌani tuaꞌ uche inteꞌ conda acuxpa inteꞌ yar chuchu, sutpa ixiobꞌ tama uyotot otronyajr xeꞌ turu tama e chinam Nazaret tama e departamento Galilea.
LUK 2:40 Y yar e sitz cay chꞌiꞌ, y más cay qꞌuecꞌo ixin, y cay bꞌutcꞌa ujor taca e natanyaj, y cay chojbꞌesna ut meyra umen e Dios.
LUK 2:41 Entonces utuꞌ y utata e Jesús cay ixiobꞌ esto tama e chinam Jerusalem tama inteꞌ inteꞌ año conda acꞌotoy e día tuaꞌ e nojqꞌuin xeꞌ ucꞌabꞌa pascua.
LUK 2:42 Entonces conda e Jesús utzꞌacse doce año ixin taca e inmojr gente esto tama e chinam Jerusalem ubꞌan, bꞌan cocha uchiobꞌ tunor e gente tama e Israel tama inteꞌ inteꞌ año conda acꞌotoy e día tuaꞌ e nojqꞌuin era.
LUK 2:43 Y conda cꞌapa e nojqꞌuin sutpa ixiobꞌ e José taca e María esto tama uyotot. Pero conda cꞌapa xanobꞌ inteꞌ día tama e bꞌir machi uwirobꞌ ut e Jesús porque jaxir quetpa tama e chinam Jerusalem, y nien machi unatobꞌ.
LUK 2:44 Pues e José y e María war uchebꞌiobꞌ que war watar e sitz ubꞌan macuir e sian gente, y tamar era cay xanobꞌ este que acbꞌare. Pero conda cay usicbꞌobꞌ tujam upiarobꞌ y tujam tin e atzay uwirobꞌ, mamajchi unata tiaꞌ aquetpa e Jesús.
LUK 2:45 Y cocha machi utajwiobꞌ tujam e sian gente era, sutpa ixiobꞌ e José taca e María esto tama e chinam Jerusalem otronyajr, war usicbꞌobꞌ e Jesús tama e bꞌir yajaꞌ.
LUK 2:46 Entonces conda numuy tres día cꞌotoy utajwiobꞌ e Jesús macuir e templo war oꞌjron taca e nuquir winicobꞌ xeꞌ ajcanseyajobꞌ tama uley e Moisés. Y jaxir war obꞌian y war uyubꞌi tuobꞌ ubꞌan.
LUK 2:47 Y tunor tin e war uyubꞌiobꞌ lo que oꞌjron e sitz era war abꞌacta ubꞌijnuobꞌ, porque tunor lo que war uꞌbꞌna tuaꞌ umen e ajcanseyajobꞌ era, jaxir war uchecsu tunor. Y tamar era war unatobꞌ que ayan unatanyaj e Dios tacar.
LUK 2:48 Y ya turu e Jesús tama e templo conda e María y e José cꞌotoy utajwiobꞌ y bꞌactobꞌ conda uwirobꞌ tunor era. Entonces ojron e María y che: —¿Tucꞌa tuaꞌ ache cocha era tacaron? ¿Y tucꞌa tuaꞌ quetpet tara y matucꞌa awareon? Atata y nen war casajquet tama tunor or e lugar y machi catajwiet, che e María.
LUK 2:49 Y che e Jesús, —¿Y tucꞌa tuaꞌ war isajquen? ¿Machi ca inata que ucꞌani tuaꞌ inche tunor lo que uyaren Nitata? che e Jesús.
LUK 2:50 Pero utuꞌ y utata machi unatobꞌ tucꞌa war che lo que arobꞌnobꞌ umen usitz era.
LUK 2:51 Entonces sutpa ixin e sitz taca utuꞌ y utata esto tama uyotot tama e chinam Nazaret. Y e sitz galan acꞌupseyan tut utuꞌ y utata. Pero e María uquete tunor lo que numuy taca usitz tama e chinam Jerusalem tama uyalma.
LUK 2:52 Y e Jesús war achꞌiꞌ y war achꞌiꞌ unatanyaj, y war atzay iꞌrna ut umen e Dios, y war atzay iꞌrna ut umen e gente.
LUK 3:1 Pues entonces conda e Juan xeꞌ ajchꞌuymar cay uchecsu uyojroner e Dios, e Tiberio César war aquetpa rey tama inteꞌ tiempo de quince año tama e lugar xeꞌ ucꞌabꞌa Roma. Y ayan ubꞌan cora sian ajcꞌotorerobꞌ xeꞌ quetpobꞌ yebꞌar ucꞌotorer e Tiberio. Y ayan inteꞌ winic xeꞌ ucꞌabꞌa Poncio Pilato xeꞌ quetpa gobernador tama e departamento Judea. Y ayan inteꞌ winic xeꞌ ucꞌabꞌa Herodes xeꞌ quetpa gobernador tama e departamento Galilea. Y de allí ayan inteꞌ winic xeꞌ ucꞌabꞌa Felipe xeꞌ jax uwijtzꞌin e Herodes xeꞌ quetpa gobernador tama e departamento Iturea y tama e departamento Traconite. Y ayan inteꞌ winic xeꞌ ucꞌabꞌa Lisanias xeꞌ quetpa gobernador tama e departamento Abilinia.
LUK 3:2 Y tama e tiempo era e Anás y e Caifás quetpobꞌ uwinquirobꞌ e inmojr sacerdotiobꞌ tama e templo tama e chinam Jerusalem. Y jax tama e tiempo era conda cay ojron e Dios taca e Juan xeꞌ jax uyunen e Zacarías tama e choquem lugar.
LUK 3:3 Entonces e Juan xeꞌ ajchꞌuymar cay xana tama tunor or e lugar tama utiꞌ e xucur Jordán, y war uyare e gente axin xeꞌ war acꞌotoyobꞌ tut que ucꞌani tuaꞌ uyactobꞌ umabꞌambꞌanirobꞌ y que ucꞌani tuaꞌ achꞌujyobꞌ. Y umen era e Dios tuaꞌ acꞌumpa tama tunor umabꞌambꞌanirobꞌ.
LUK 3:4 Y tunor era tama e Juan numuy bꞌan taca cocha cay utzꞌijbꞌa e profeta Isaías tama e onian tiempo que: Ayan inteꞌ winic xeꞌ war oꞌjron taca inteꞌ nuxi nuc tama e choquem lugar y che: “Ustanic e bꞌir tuaꞌ Cawinquirar”, que war che que ucꞌani ustanar uyalmobꞌ e gente tuaꞌ uchꞌamiobꞌ ucꞌabꞌa Cawinquirar.
LUK 3:5 “Y ucꞌani tuaꞌ aquetpa ustabꞌir tunor ubꞌir Cawinquirar. Tunor e bꞌir tiaꞌ chꞌen chꞌen ut ucꞌani bꞌujtꞌar ut, y tiaꞌ ayan e witzir xeꞌ atꞌabꞌay ucꞌani emsenar, y e bꞌir xeꞌ cꞌocho cꞌocho ucꞌani tujtzar, y tiaꞌ calapir ut e bꞌir ucꞌani ustanar.
LUK 3:6 Y tunor e sian gente xeꞌ aturuanobꞌ tama tunor or e rum cꞌani uwirobꞌ e corpesiaj que e Dios axin uyajcꞌuobꞌ.” Bꞌan chꞌar tzꞌijbꞌabꞌir umen e profeta Isaías xeꞌ turuan tama e onian tiempo.
LUK 3:7 Entonces conda cꞌotoyobꞌ e gente tut e Juan tuaꞌ achꞌujyobꞌ umener, jaxir ojron y che: —Nox larox cocha incojt chan xeꞌ war alocꞌoy aꞌjni tut inteꞌ cꞌajc tuaꞌ machi apurutna, y bꞌanox nox. ¿Chi uyareox tuaꞌ ixyopa tara taniut tuaꞌ ixcorpa tut uqꞌuijnar e Dios xeꞌ cꞌanix acꞌaxi tama ijor wacchetaca era?
LUK 3:8 Ustesic iweroj tut e Dios tuaꞌ ichecsu ibꞌa tut e gente que nox tuox e Dios coner. Y ira ibꞌijnu que cocha nox sitzbꞌirox tuaꞌ e onian Abraham ani que tamar taca era cꞌani ixcorpa, porque majax bꞌan. Porque jay e Dios ucꞌani ani más umaxtac e Abraham erer ani usuti e tun era tuaꞌ aquetpa más umaxtac e Abraham.
LUK 3:9 Nox larox cocha inteꞌ teꞌ, y cꞌani inwareox era que chꞌarix e hacha tuaꞌ ucucruox, porque tunor e teꞌ xeꞌ machi acꞌawan ucꞌani tuaꞌ acucurna y tuaꞌ ayajra tama e cꞌajc, che e Juan.
LUK 3:10 Entonces e gente cay uyubꞌiobꞌ tuaꞌ e Juan y che: —Entonces ¿tucꞌa tuaꞌ cache non? che e gente era.
LUK 3:11 Entonces ojron e Juan y che: —Tin e ayan chateꞌ ubꞌujc erer uyajcꞌu inteꞌ ubꞌujc otronteꞌ xeꞌ matucꞌa ayan tuaꞌ. Y tin e ayan meyra tuaꞌ ucꞌuxi erer uyajcꞌu otronteꞌ tin e matucꞌa ayan tuaꞌ ucꞌuxi, che e Juan.
LUK 3:12 Y de allí cꞌotoyobꞌ cora ajmorojseyajobꞌ tumin tuaꞌ e gobierno tuaꞌ achꞌujyobꞌ xeꞌ cay uyubꞌiobꞌ tuaꞌ e Juan y chenobꞌ: —Ajcanseyajet, ¿tucꞌa tuaꞌ cache non? che e ajmorojseyajobꞌ tumin era.
LUK 3:13 Y e Juan uyare e ajmorojseyajobꞌ tumin era y che: —Cꞌajtinic ajtaca lo que uyareox e ley, y ira icꞌajti más, che e Juan.
LUK 3:14 Y cꞌotoyobꞌ cora soldadobꞌ tut e Juan xeꞌ cay uyubꞌiobꞌ tuaꞌ y che: —Y non, ¿tucꞌa tuaꞌ cache non? che e soldadobꞌ era. Y e Juan che: —Ira ilocse lo que ayan tuaꞌ e gente bꞌan taca, y ira ituchꞌi e gente jay matucꞌa war uchiobꞌ, y tzayenic tamar lo que war ixtuana, che e Juan.
LUK 3:15 Pues tama e tiempo era ayan meyra gente xeꞌ war ubꞌijnuobꞌ que jax era e hora conda cꞌani watar e Cristo, y tamar era tin e war umorojse ubꞌobꞌ tut e Juan war ubꞌijnuobꞌ que bꞌajcꞌat e Juan jax e Cristo xeꞌ tuaꞌ acorpesian. Pero majax.
LUK 3:16 Y tamar era ojron e Juan taca e gente tin e turobꞌ era y che: —Pues nen era war inchꞌuyma taca e jaꞌ, pero watar otronteꞌ tanipat xeꞌ axin uchꞌuyox taca Unawalir e Dios y taca e cꞌajc. Pues jaxir más nojta ucꞌotorer que nen. Porque nen ma tawaren nien tuaꞌ imbꞌani ut uxanabꞌ porque jaxir meyra ayan ucꞌotorer.
LUK 3:17 Porque jaxir bꞌan cocha inteꞌ winic conda war uwajri utrigo tuaꞌ alocꞌoy usojqꞌuir tuaꞌ aquetpa jax taca ut. Jaxir taca e pala war uꞌri tichan tuaꞌ aloqꞌuesna usojqꞌuir umen e icꞌar, pero ut e trigo war acꞌaxi tama ut e rum. Y war umorojse ut e trigo tuaꞌ uyari tama ugranero, pero usojqꞌuir war umorojse tuaꞌ uputa tama inteꞌ cꞌajc xeꞌ ma tiaꞌ tuaꞌ atajpa. Y bꞌan tuaꞌ axin uxere e gente tama e juicio tin e watar tanipat porque meyra ayan ucꞌotorer, che e Juan.
LUK 3:18 Pues entonces e Juan cay ucꞌampes meyra canseyaj cocha era tuaꞌ uchecsu uyojroner e Dios tama e corpesiaj tut e gente.
LUK 3:19 Y tama inyajr e Juan ixin tuaꞌ oꞌjron taca e Herodes xeꞌ jax e gobernador tama e departamento Galilea. Pues e Herodes era cꞌapa uchꞌami umuꞌ tuaꞌ aquetpa cocha uwilama. Pues e ixic era ucꞌabꞌa Herodías xeꞌ jax ani uwixcar e Felipe xeꞌ jax uwijtzꞌin e Herodes. Y tamar era e Juan cay ucꞌaye e Herodes, y cay ucꞌaye tama otronteꞌ mabꞌambꞌanir lo que war uche ubꞌan.
LUK 3:20 Pero e Herodes uche ubꞌa que machi uyubꞌi, y cay uche otronteꞌ mabꞌambꞌanir xeꞌ más calapir conda uyari e Juan tama e cárcel.
LUK 3:21 Entonces conda merato oꞌsena e Juan tama e cárcel conda warto uchꞌuyi tunor sian e gente, cꞌotoy e Jesús tuaꞌ achꞌujya ubꞌan. Y conda e Jesús war ucꞌajti taca e Dios pascꞌa ut e qꞌuin tichan,
LUK 3:22 y cay uwira ecmay watar Unawalir e Dios xeꞌ bꞌan uwirnar cocha incojt sacsac mut xeꞌ cꞌotoy turuan tamar, y wacchetaca uyubꞌi inteꞌ nuc xeꞌ tari tichan xeꞌ che cocha era: —Net Niunenet xeꞌ war inyajta oit y xeꞌ war intzay inwiret, che e ojroner xeꞌ tari tut e qꞌuin tichan.
LUK 3:23 Pues cay canseyan e Jesús tama uyojroner e Dios conda utzꞌacse treinta año. Y utata e Jesús era José ucꞌabꞌa, porque uchebꞌe e gente que jax utata. Y utata e José era Elí ucꞌabꞌa,
LUK 3:24 y utata e Elí era Matat ucꞌabꞌa, y utata e Matat era Leví ucꞌabꞌa, y utata e Leví era Melqui ucꞌabꞌa, y utata e Melqui era Jana ucꞌabꞌa, y utata e Jana era José ucꞌabꞌa,
LUK 3:25 y utata e José era Matatías ucꞌabꞌa, y utata e Matatías era Amós ucꞌabꞌa, y utata e Amós era Nahum ucꞌabꞌa, y utata e Nahum era Esli ucꞌabꞌa, y utata e Esli era Nagai ucꞌabꞌa,
LUK 3:26 y utata e Nagai era Maat ucꞌabꞌa, y utata e Maat era Matatías ucꞌabꞌa, y utata e Matatías era Semei ucꞌabꞌa, y utata e Semei era José ucꞌabꞌa, y utata e José era Judá ucꞌabꞌa,
LUK 3:27 y utata e Judá era Joana ucꞌabꞌa, y utata e Joana era Resa ucꞌabꞌa, y utata e Resa era Zorobabel ucꞌabꞌa, y utata e Zorobabel era Salatiel ucꞌabꞌa, y utata e Salatiel era Neri ucꞌabꞌa,
LUK 3:28 y utata e Neri era Melqui ucꞌabꞌa, y utata e Melqui era Adi ucꞌabꞌa, y utata e Adi era Cosam ucꞌabꞌa, y utata e Cosam era Elmodam ucꞌabꞌa, y utata e Elmodam era Er ucꞌabꞌa,
LUK 3:29 y utata e Er era Josué ucꞌabꞌa, y utata e Josué era Eliezer ucꞌabꞌa, y utata e Eliezer era Jorim ucꞌabꞌa, y utata e Jorim era Matat ucꞌabꞌa,
LUK 3:30 y utata e Matat era Leví ucꞌabꞌa, y utata e Leví era Simeón ucꞌabꞌa, y utata e Simeón era Judá ucꞌabꞌa, y utata e Judá era José ucꞌabꞌa, y utata e José era Jonán ucꞌabꞌa, y utata e Jonán era Eliaquim ucꞌabꞌa,
LUK 3:31 y utata e Eliaquim era Melea ucꞌabꞌa, y utata e Melea era Mainán ucꞌabꞌa, y utata e Mainán era Matata ucꞌabꞌa, y utata e Matata era Natán ucꞌabꞌa,
LUK 3:32 y utata e Natán era David ucꞌabꞌa, y utata e David era Isaí ucꞌabꞌa, y utata e Isaí era Obed ucꞌabꞌa, y utata e Obed era Booz ucꞌabꞌa, y utata e Booz era Salmón ucꞌabꞌa, y utata e Salmón era Naasón ucꞌabꞌa,
LUK 3:33 y utata e Naasón era Aminadab ucꞌabꞌa, y utata e Aminadab era Aram ucꞌabꞌa, y utata e Aram era Esrom ucꞌabꞌa, y utata e Esrom era Fares ucꞌabꞌa, y utata e Fares era Judá ucꞌabꞌa,
LUK 3:34 y utata e Judá era Jacob ucꞌabꞌa, y utata e Jacob era Isaac ucꞌabꞌa, y utata e Isaac era Abraham ucꞌabꞌa, y utata e Abraham era Taré ucꞌabꞌa, y utata e Taré era Nacor ucꞌabꞌa,
LUK 3:35 y utata e Nacor era Serug ucꞌabꞌa, y utata e Serug era Ragau ucꞌabꞌa, y utata e Ragau era Peleg ucꞌabꞌa, y utata e Peleg era Heber ucꞌabꞌa, y utata e Heber era Sala ucꞌabꞌa,
LUK 3:36 y utata e Sala era Cainán ucꞌabꞌa, y utata e Cainán era Arfaxad ucꞌabꞌa, y utata e Arfaxad era Sem ucꞌabꞌa, y utata e Sem era Noé ucꞌabꞌa, y utata e Noé era Lamec ucꞌabꞌa, y utata e Lamec era Matusalén ucꞌabꞌa,
LUK 3:37 y utata e Matusalén era Enoc ucꞌabꞌa, y utata e Enoc era Jared ucꞌabꞌa, y utata e Jared era Majalaleel ucꞌabꞌa, y utata e Majalaleel era Cainán ucꞌabꞌa,
LUK 3:38 y utata e Cainán era Enós ucꞌabꞌa, y utata e Enós era Set ucꞌabꞌa, y utata e Set era Adán ucꞌabꞌa, y e Adán era uyunen e Dios.
LUK 4:1 Pues entonces tama e día era conda chꞌujya e Jesús, bꞌutcꞌa uyalma taca Unawalir e Dios ubꞌan. Y de allí sutpa ixin esto tutiꞌ e xucur Jordán. Y de allí Unawalir e Dios uqꞌueche ixin e Jesús esto tama inteꞌ choquem lugar.
LUK 4:2 Y ya turu e Jesús cuarenta día tama e choquem lugar, y tama e tiempo era cꞌotoy e diablo tuaꞌ upijchꞌi ani e Jesús. Y machi weꞌ tama tunor e tiempo era, y nacpat era cay jaytzꞌa.
LUK 4:3 Entonces e diablo upejca e Jesús y che: —Cocha net Uyunenet e Dios sutu e tun era tuaꞌ aquetpa pan, che e diablo.
LUK 4:4 Pero e Jesús che: —Tzꞌijbꞌabꞌir chꞌar tama uyojroner e Dios que inteꞌ winic majax tama e pan taca bꞌixir, sino que uchꞌami ucuxtar tama uyojroner e Dios ubꞌan, che e Jesús.
LUK 4:5 Y de allí e diablo uqꞌueche ixin e Jesús esto tujor inteꞌ nuxi witzir y wacchetaca cay uwirse e Jesús tunor e chinamobꞌ lo que ayan tama tunor or e rum.
LUK 4:6 Y e diablo che: —Chꞌujcun awira tunor e nuxi lugar era, galan uwirnar, pero cꞌani inwajqꞌuet tunor era taca ucꞌotorer, y nen ayan niderecho tuaꞌ inwajcꞌu tunor era tin e incꞌani porque quetpa ajcꞌubꞌir tacaren.
LUK 4:7 Pero ayanto lo que aquetpa tuaꞌ ache net. Net ucꞌani tuaꞌ icotuan taniut tuaꞌ ojytzꞌi niut, y de allí tunor era tuaꞌ aquetpa tabꞌa, che e diablo.
LUK 4:8 Y che e Jesús: —Tzꞌijbꞌabꞌir chꞌar tama uyojroner e Dios que: “Inteꞌ taca Adiosir tuaꞌ acꞌupse y jax taca tuaꞌ ojytzꞌi ut”, che e Jesús.
LUK 4:9 Entonces e Satanás uqꞌueche e Jesús ixin esto tama e chinam Jerusalem y utꞌabꞌse uturbꞌa tujor e templo y che: —Cocha net Uyunenet e Dios, tobꞌen tara,
LUK 4:10 porque chꞌar tzꞌijbꞌabꞌir tama uyojroner e Dios que: E Dios uyebꞌta watar uyangelobꞌ tuaꞌ ucojcuet.
LUK 4:11 Turobꞌix tuaꞌ uchuquiet taca ucꞌabꞌ tuaꞌ machi ayobꞌi abꞌa y nien tuaꞌ machi ayobꞌi oꞌc tama ingojr tun. Bꞌan chꞌar tzꞌijbꞌabꞌir tama uyojroner e Dios, che e diablo.
LUK 4:12 Y sutpa ojron e Jesús otronyajr y che: —Machi, porque tzꞌijbꞌabꞌir chꞌar tama uyojroner e Dios ubꞌan que: “Ira amajres Awinquirar Dios tuaꞌ uche e mabꞌambꞌanir”, che e Jesús.
LUK 4:13 Entonces cocha e diablo machi utajwi cocha tuaꞌ upijchꞌi e Jesús, uyacta cora era, y locꞌoy ajni tut.
LUK 4:14 Pues entonces sutpa ixin e Jesús esto tama e departamento Galilea, y bꞌutꞌur uyalma taca ucꞌotorer Unawalir e Dios. Y cay checta ixin e ojroner tama e Jesús tama tunor or e lugar era este tama e aldea ubꞌan.
LUK 4:15 Y e Jesús war acanseyan tama uyojroner e Dios tama inteꞌ inteꞌ sinagoga lo que ayan tama inteꞌ inteꞌ lugar, y tunor tin e cay uyubꞌiobꞌ uyojroner war utattzꞌiobꞌ ut e Jesús.
LUK 4:16 Entonces ixin e Jesús esto tama e chinam Nazaret tiaꞌ chꞌijtesna. Entonces tama e día tuaꞌ e jiriar ixin tama e sinagoga bꞌan cocha acay uche. Y de allí achpa wawan tut e gente tuaꞌ uche leer uyojroner e Dios.
LUK 4:17 Y ajcꞌuna inteꞌ tzꞌotbꞌir jun xeꞌ jax lo que tzꞌijbꞌabꞌir umen e profeta Isaías tama e onian tiempo. Y conda uwechꞌe e jun utajwi tiaꞌ tzꞌijbꞌabꞌir que:
LUK 4:18 Turu Unawalir e Dios tacaren porque sicbꞌabꞌiren tuaꞌ inchecsu uyojroner e Dios tama e corpesiaj tut tin e tzajtaca ut. Y Cadiosir uyebꞌta tarien tuaꞌ intzꞌacpes tin e machi acꞌay tama uyalma, y uyebꞌta tarien tuaꞌ inchecsu e corpesiaj tut tin e macarobꞌ tama e cárcel, y uyebꞌta tarien tuaꞌ inwerojse ut tin e machi eꞌron, y uyebꞌta tarien tuaꞌ injirijse tin e war achena tzajtzaj.
LUK 4:19 Y uyebꞌta tarien tuaꞌ inchecsu e día conda Cawinquirar Dios cꞌani ucorpesox. Bꞌan chꞌar tzꞌijbꞌabꞌir umen e profeta Isaías, che e Jesús.
LUK 4:20 Entonces e Jesús umaqui e libro y uyajcꞌu e ajcojc sinagoga y de allí turuan e Jesús tut e gente tuaꞌ oꞌjron. Y tunor e gente xeꞌ turobꞌ tama e sinagoga era war uchꞌujcu uwirobꞌ e Jesús y war ubꞌijnuobꞌ, —¿Y tucꞌa tuaꞌ uche jaxir era? xeꞌ war ubꞌijnuobꞌ e gente era.
LUK 4:21 Entonces cay ojron e Jesús y che: —Coner era cꞌapa chena tiut lo que chꞌar tzꞌijbꞌabꞌir tama uyojroner e Dios era, che e Jesús.
LUK 4:22 Y tunor e gente tin e uyubꞌiobꞌ uyojroner era cay bꞌactobꞌ ubꞌijnuobꞌ que galan locꞌoy tunor uyojroner e Jesús, pero ayan tin e cay ojronobꞌ y che: —Pero ¿ma ca jax uyunen e José era? ¿Y tiaꞌ cano más ya? che e gente era.
LUK 4:23 Pero e Jesús che: —Bꞌajcꞌat war ibꞌijnu tuaꞌ iwaren que: “Jay net ajtzꞌaconeret, tzꞌacan abꞌa net taca.” O bꞌajcꞌat cꞌani iwaren que: “Non coybꞌi que chena cora nuxi milagro tama e chinam Capernaum amener. ¿Tucꞌa tuaꞌ machi ache inteꞌ milagro ticajam non tiaꞌ chꞌiet net ubꞌan?”
LUK 4:24 Y era cꞌani inwareox inteꞌ ojroner xeꞌ erach, que inteꞌ profeta tuaꞌ e Dios machi tuaꞌ achꞌajma umen tin e ajlugarobꞌ tacar.
LUK 4:25 Pues chequer que meyra ayan ani e ixictac xeꞌ chamen uviejobꞌ tama e Israel tama utiempo e profeta Elías xeꞌ turuan tama e onian tiempo. Porque machi cꞌaxi e jajar tama inteꞌ tiempo de tres año y medio, y meyra winar ayan tama tunor or e lugar Israel tama e tiempo yajaꞌ.
LUK 4:26 Pero e Elías machi tzacarna ixin umen e Dios tuaꞌ utacre e ixictac xeꞌ chamen uviejobꞌ xeꞌ turobꞌ tama e lugar Israel, sino que jaxir tzacarna ixin tuaꞌ utacre inteꞌ choquem ixic xeꞌ chamen uviejo xeꞌ turuan tama e chinam Sarepta tama e lugar Sidón xeꞌ majax tuaꞌ e Israel.
LUK 4:27 Y chequer ubꞌan que ayan ani meyra gente tama e Israel tin e ajmuac taca e sian chec xeꞌ ucꞌabꞌa lepra tama e onian tiempo conda turuto e profeta Eliseo. Pero mamajchi tzꞌacpesna tujam e ajmuacobꞌ tama e Israel umen e Eliseo, sino que jax taca inteꞌ choquem winic xeꞌ ucꞌabꞌa Naamán xeꞌ turuan tama e departamento Siria xeꞌ majax tuaꞌ e Israel, che e Jesús.
LUK 4:28 Pero conda cꞌapa uyubꞌiobꞌ e ojroner era tuaꞌ e Jesús, qꞌuijnobꞌ tunor tin e turobꞌ macuir e sinagoga era.
LUK 4:29 Y de allí achpobꞌ tunorobꞌ y uquerejbꞌobꞌ locꞌoy najtir e Jesús uqꞌuechiobꞌ ixin esto tama utiꞌ e chinam tiaꞌ ayan inteꞌ nuxi chꞌen tiaꞌ cꞌani uyojresobꞌ axin e Jesús.
LUK 4:30 Pero conda cꞌotoyobꞌ tujor e nuxi chꞌen era, e Jesús machi uwirobꞌ tiaꞌ ixin tujam e sian gente, intaca satpa tutobꞌ.
LUK 4:31 Pues entonces ixin e Jesús tama e chinam Capernaum xeꞌ turu tama e departamento Galilea, y ochoy tama inteꞌ sinagoga tama e día tuaꞌ e jiriar y cay ucanse e gente.
LUK 4:32 Pero e gente cay bꞌacta uwirobꞌ ucanseyaj e Jesús porque jaxir canseyan taca ucꞌotorer e Dios.
LUK 4:33 Y tama e sinagoga era chꞌar inteꞌ winic xeꞌ chucur uyalma umen inteꞌ mabꞌambꞌan mein xeꞌ cay aru taca inteꞌ nuxi nuc y che:
LUK 4:34 —¡Actanon! ¡Ira oꞌse abꞌa tacaron! ¡Non canata chiet net xeꞌ acꞌabꞌa Jesús xeꞌ tuet e chinam Nazaret! ¿Tariet ca tuaꞌ acꞌapa atijreson era? Canata que net tariet tuaꞌ e Dios, y que net erach, che e mabꞌambꞌan mein era.
LUK 4:35 Pero e Jesús ucꞌaye e mabꞌambꞌan mein era y che: —¡Chꞌanche y loqꞌuen tama uyalma! che e Jesús. Entonces e mabꞌambꞌan mein ucucru e winic tut e rum tutobꞌ, y de allí locꞌoy ajni e mabꞌambꞌan mein tama e winic, pero e winic machi uyobꞌi ubꞌa tiaꞌ cucrema tut e rum.
LUK 4:36 Y tunor e gente xeꞌ turobꞌ tama e sinagoga era bꞌactobꞌ uwirobꞌ y cay ojronobꞌ jaxobꞌ taca y chenobꞌ: —¿Tucꞌa e ojroner era xeꞌ más unata e winic era? Pues uyare e mabꞌambꞌan mein tuaꞌ alocꞌoy taca ucꞌotorer y wacchetaca locꞌoy ixin, che e gente.
LUK 4:37 Y pucujqꞌui ixin e ojroner tamar lo que numuy taca e Jesús tama tunor or e lugar.
LUK 4:38 Pues entonces locꞌoy e Jesús tama e sinagoga era y ixin esto tama uyotot e Simón Pedro. Pues upixam ixic e Pedro era chꞌar ajmuac, war apuruy. Entonces cꞌajtna tuaꞌ e Jesús tuaꞌ utzꞌacpes.
LUK 4:39 Y tamar era e Jesús ixin wawan tuyejtzꞌer e ixic y cay upejca e purer cocha era y che: —Loqꞌuen tama e ixic era, che e Jesús. Y wacchetaca ajnesna locꞌoy e purer, y achpa e ixic y cay usicbꞌa tucꞌa tuaꞌ uyajcꞌu tuaꞌ ucꞌuxi tin e ajwara era.
LUK 4:40 Pues entonces conda namtzꞌa e qꞌuin cay utaresobꞌ tunor tin e ajmuacobꞌ tut e Jesús. Pero e ajmuacobꞌ era majax intera muac. Entonces e Jesús cay upacbꞌu ucꞌabꞌ tujor inteꞌ intiobꞌ, y tamar era cꞌapa utzꞌacpes tunorobꞌ.
LUK 4:41 Y tujam tunor e sian ajmuacobꞌ era ayan tin e chucur uyalmobꞌ umen inteꞌ mabꞌambꞌan mein xeꞌ cay ojronobꞌ taca inteꞌ nuxi nuc conda loqꞌuesnobꞌ y ajnesnobꞌ umen e Jesús y chenobꞌ: —¡Net Uyunenet e Dios! chenobꞌ e mabꞌambꞌan meinobꞌ era. Pero e Jesús cay ucꞌaye e sian mabꞌambꞌan meinobꞌ era y che: “Ira ixojron”. Pues e mabꞌambꞌan meinobꞌ war unatobꞌ que e Jesús jax e Cristo, y tamar era machi actanobꞌ oꞌjronobꞌ más.
LUK 4:42 Pues entonces conda sacojpa e Jesús tama inteꞌ día, locꞌoy tama e chinam Capernaum era, y ixin tama inteꞌ choquem lugar. Pero e gente cay usicbꞌobꞌ e Jesús y cꞌotoy utajwiobꞌ tiaꞌ turu. Pues e gente era cꞌani ani uquete uwabꞌuobꞌ e Jesús tuaꞌ machi alocꞌoy tutobꞌ.
LUK 4:43 Pero sutpa ojron e Jesús taca e gente era y che: —Ucꞌani tuaꞌ inxin inchecsu e ojroner tama uchinam e Dios tut e gente tama e inmojr chinamobꞌ ubꞌan porque tamar era ebꞌetnen tarien umen Nitata, che e Jesús.
LUK 4:44 Entonces ixin e Jesús tic taca, war uchecsu uyojroner e Dios tama uchinam e Dios tama tunor e sinagoga tama e departamento Galilea.
LUK 5:1 Pues entonces tama inyajr conda turu e Jesús tutiꞌ inteꞌ nuxi jaꞌ xeꞌ ucꞌabꞌa Genesaret, cꞌotoyobꞌ meyra sian gente tiaꞌ turu jaxir este que war utacsu ubꞌobꞌ tuaꞌ acꞌotoyobꞌ tuyejtzꞌer tuaꞌ uyubꞌiobꞌ uyojroner e Dios.
LUK 5:2 Y e Jesús uwira que ayan chateꞌ barco chꞌur tama utiꞌ e jaꞌ y que mamajchi turu tamar. Y tin e war acormobꞌ ani ecmay ixiobꞌ tut e rum y war upojchiobꞌ uchijrobꞌ.
LUK 5:3 Entonces ochoy e Jesús tama inteꞌ barco xeꞌ tuaꞌ e Simón Pedro y uyare tuaꞌ ulocse e barco más tutiꞌ e jaꞌ tiaꞌ majax intam tuyejtzꞌer tiaꞌ turobꞌ e sian gente tor e rum tiaꞌ taquin. Entonces turuan e Jesús macuir e barco y cay ucanse e gente.
LUK 5:4 Y conda cꞌapa ucanse e gente, uyare e Pedro y che: —Yara chic abarco tiaꞌ más intam e jaꞌ y juric chic ichijr tuaꞌ ixcorma, che e Jesús.
LUK 5:5 Pero e Simón Pedro uyare e Jesús y che: —Pero Niwinquiraret, tunor e acbꞌar war capatna y ma incojt chay catajwi, pero cocha net war awareon tuaꞌ caxin cayari cachijr otronyajr, caxin cache bꞌan cocha war awareon era, che e Simón.
LUK 5:6 Y conda uyariobꞌ e chijr tama e jaꞌ y cay uquerejbꞌobꞌ tari uchijrobꞌ otronyajr cay uwirobꞌ que bꞌutꞌur uchijrobꞌ taca e sian chay este que cꞌanix awejrtzꞌa.
LUK 5:7 Entonces e Pedro cay uche e seña tut upiarobꞌ xeꞌ turobꞌ tama otronteꞌ barco tuaꞌ watar utacriobꞌ tuaꞌ ulocsiobꞌ e chijr taca e sian chay. Entonces yopobꞌ y cay ubꞌutꞌiobꞌ chatertiꞌ e barco era taca e sian chay este que cꞌanix amuctzꞌa e barco macuir e jaꞌ umen ubꞌarir e sian chay.
LUK 5:8 Pero e Simón Pedro conda uwira lo que numuy era ixin cotuan tut e Jesús y che: —Loqꞌuen tama niwejtzꞌer, Niwinquiraret, porque nen ajmabꞌambꞌaniren toit, che e Pedro.
LUK 5:9 Bꞌan ojron e Pedro umen que bꞌacta uwira e sian chay lo que cormobꞌ, y bꞌan ubꞌan tunor tin e turobꞌ tacar.
LUK 5:10 Y bꞌan ubꞌan e Santiago y e Juan xeꞌ jax uyunenobꞌ e Zebedeo xeꞌ war apatnobꞌ taca e Pedro. Pero e Jesús sutpa uyare e Pedro y che: —Ira ibꞌacta, porque coner era net tuaꞌ icay icorma pero mixto jax chay yaꞌ sino que winicobꞌ tuaꞌ apejca taca uyojroner e Dios, che e Jesús.
LUK 5:11 Entonces conda cꞌapa uqꞌuechiobꞌ ixin e barco esto tutiꞌ e jaꞌ, uyactobꞌ tunor lo que ayan ani tuobꞌ y ixiobꞌ taca e Jesús.
LUK 5:12 Pues entonces tama inyajr conda e Jesús turu tama inteꞌ chinam, cꞌotoy inteꞌ winic tuyejtzꞌer xeꞌ ayan cora sian chec tut xeꞌ ucꞌabꞌa lepra xeꞌ uyacta ubꞌa cotuan tut e Jesús y uchꞌubꞌa ujor xijrcojt este tut e rum tuaꞌ ucꞌajti tuaꞌ atacarna. Y uyare e Jesús y che: —Niwinquiraret, jay net acꞌani atzꞌacpesen uyubꞌiet ache, porque meyra ayan acꞌotorer, che e winic.
LUK 5:13 Entonces e Jesús upacbꞌu ucꞌabꞌ tama ujor e winic y che: —Nen incꞌani intzꞌacpeset. Cꞌani inware e chec era que: “Loqꞌuen actan e winic era”, che e Jesús. Y conda cꞌapa ojron e Jesús, wacchetaca quetpa tzꞌacpesbꞌir e winic.
LUK 5:14 Entonces e Jesús uyare e winic que machi tuaꞌ uchecsu tut e gente lo que chena tacar. Y de allí ojron e Jesús y che: —Quiqui tama e templo tama e chinam Jerusalem y chectes abꞌa tut inteꞌ sacerdote y ajcꞌun incojt arac tuaꞌ apurutna tujor e altar bꞌan cocha chꞌar tzꞌijbꞌabꞌir tama uley e Moisés. Y tamar era erer unatobꞌ tunorobꞌ que net tzꞌacpesbꞌiret inyajrer, che e Jesús. Entonces e winic ixin uche bꞌan cocha arobꞌna umen e Jesús.
LUK 5:15 Pero cay tajttzꞌa meyra e Jesús umen tunor e gente tamar lo que cay uche. Y meyra gente war umorojse ubꞌobꞌ tut e Jesús tuaꞌ uyubꞌiobꞌ uyojroner y tuaꞌ atzꞌacpesnobꞌ umener ubꞌan.
LUK 5:16 Pero e Jesús locꞌoy ixin tama inteꞌ choquem lugar tuaꞌ ucꞌajti taca e Dios.
LUK 5:17 Pues entonces tama inteꞌ día e Jesús war acanseyan tut e gente, y ya turobꞌ cora fariseobꞌ y cora ajcanseyajobꞌ tama uley e Moisés xeꞌ war uyubꞌiobꞌ. Pues cꞌotoyobꞌ tunor e nuquir winicobꞌ era tama tunor e chinamobꞌ tama e departamento Galilea y tama e departamento Judea y tama e chinam Jerusalem. Y tama e hora era checta ucꞌotorer Cawinquirar Dios tama e Jesús tuaꞌ utzꞌacpes tin e ajmuac.
LUK 5:18 Entonces cꞌotoyobꞌ cora winicobꞌ tuyejtzꞌer e Jesús xeꞌ war uqꞌuechiobꞌ axin inteꞌ winic xeꞌ chamen ucuerpo tama uchꞌacteꞌ. Cꞌani ani uyosiobꞌ macuir e otot tuaꞌ uchꞌabꞌuobꞌ tut e Jesús.
LUK 5:19 Pero cocha machi utajwiobꞌ tiaꞌ tuaꞌ oꞌchoyobꞌ umen e sian gente, tꞌabꞌayobꞌ tama ujor e otot y upasiobꞌ ujor e otot y uyemsiobꞌ e ajmuac tama uchꞌacteꞌ tujam e gente tut e Jesús.
LUK 5:20 Y conda e Jesús uwira e winicobꞌ era que meyra war acꞌupseyanobꞌ tama e Dios, uyare e ajmuac y che: —Winiquet, natan que incꞌumpa tacaret tuaꞌ asatpa tunor amabꞌambꞌanir, che e Jesús.
LUK 5:21 Pero tin e ajcanseyajobꞌ tama uley e Moisés cay ubꞌijnuobꞌ taca e fariseobꞌ jaxobꞌ taca y chenobꞌ: —¿Chi ca nic e winic era que war uqꞌuijnes e Dios tacar uyojroner? Porque mamajchi erer usati e mabꞌambꞌanir sino que ajtaca e Dios, che e nuquir winicobꞌ era.
LUK 5:22 Pero cocha e Jesús war unata tucꞌa war ubꞌijnuobꞌ ojron jaxir y che: —¿Tucꞌa tuaꞌ war ibꞌijnu cocha era?
LUK 5:23 Ma erer inata jay erach niwojroner jay inware que: “Imabꞌambꞌanir ayix e cꞌumpar tamar”, porque ma chequer tiut jay ayan e cꞌumpar o jay machi. Pero jay inware: “Achpen”, wacchetaca erer iwira jay erach niwojroner jay achpa axana e winic o jay machi.
LUK 5:24 Pero tuaꞌ inata que nen xeꞌ Uyunenen e winic ayan nicꞌotorer tuaꞌ incꞌumpa tama e mabꞌambꞌanir tara tor e rum, cꞌani inware e winic era xeꞌ chamen ucuerpo tuaꞌ achpa axana tuaꞌ achecta tiut que ayan nicꞌotorer bꞌan cocha war inwareox, che e Jesús. Entonces e Jesús uyare e winic xeꞌ chamen ucuerpo y che: —Inwaret era que achpen waren chꞌama achꞌacteꞌ y cuchu quiqui toꞌtot, che e Jesús.
LUK 5:25 Y wacchetaca achpa e winic tut e sian gente era, uchꞌami uchꞌacteꞌ xeꞌ chꞌar ani tamar, y ucuchi ixin tama uyotot war utattzꞌi ucꞌabꞌa e Dios.
LUK 5:26 Y tunor e sian gente bꞌactobꞌ ubꞌijnuobꞌ tamar lo que numuy y cay utattzꞌiobꞌ ucꞌabꞌa e Dios. Y war abꞌactobꞌ y chenobꞌ: —Ma tiaꞌ cawira anumuy lo que uche e winic era, che e winicobꞌ era.
LUK 5:27 Pues entonces locꞌoy e Jesús tama e otot era y cay xana cora y tamar era uwira ut inteꞌ ajmorojseyaj tumin tuaꞌ e gobierno xeꞌ ucꞌabꞌa Leví xeꞌ turu tama ulugar war ucꞌajti e tumin tama e impuesto. Entonces ojron e Jesús taca e Leví era y che: —Incoꞌ tacaren, che e Jesús.
LUK 5:28 Entonces achpa e Leví y uyacta tunor upatnar y ixin tupat e Jesús.
LUK 5:29 Y war atzay meyra e Leví, y tamar era cay uche inteꞌ nuxi nojqꞌuin tuaꞌ e Jesús tama uyotot. Y upejcobꞌ cꞌotoyobꞌ meyra ajmorojseyajobꞌ tumin tuaꞌ e gobierno, y ayanto otro inmojr gente ubꞌan xeꞌ turobꞌ tor e mesa tacarobꞌ.
LUK 5:30 Y cꞌotoy wawanobꞌ ubꞌan cora gente xeꞌ majax pejcbꞌirobꞌ xeꞌ war achꞌujcsanobꞌ y bꞌan war uchiobꞌ cora fariseobꞌ taca cora ajcanseyajobꞌ tama uley e Moisés, y conda uwirobꞌ tucꞌa war anumuy cay murmurtiobꞌ upater uyajcanuarobꞌ e Jesús y che: —¿Tucꞌa tuaꞌ war ixweꞌ y war ixuchꞌi taca e sian ajmorojseyajobꞌ tumin tuaꞌ e gobierno y taca e sian ajmabꞌambꞌanirobꞌ era? chenobꞌ.
LUK 5:31 Pero e Jesús uyare y che: —Tin e majax ajmuac machi ucꞌani inteꞌ ajtzꞌaconer, sino que tin e ajmuac.
LUK 5:32 Nen tarien majax tuaꞌ impejca tin e unatobꞌ que imbꞌutz turobꞌ, sino que tarien tuaꞌ impejca tin e satrem tuaꞌ asutpa uchꞌamiobꞌ uyojroner e Dios, che e Jesús.
LUK 5:33 Pues entonces e fariseobꞌ cay uyubꞌiobꞌ tuaꞌ e Jesús otronyajr y che: —Pues canata que uyajcanuarobꞌ e Juan xeꞌ ajchꞌuymar war uyactobꞌ tuaꞌ awiobꞌ tuaꞌ ucꞌajtiobꞌ taca e Dios y bꞌan war uchiobꞌ uyajcanuarobꞌ e fariseobꞌ ubꞌan. Pero awajcanuarobꞌ tabꞌa war awiobꞌ y war oychꞌiobꞌ y machi cꞌani uyactobꞌ tuaꞌ awiobꞌ tuaꞌ ucꞌajtiobꞌ taca e Dios. ¿Tucꞌa tuaꞌ war uchiobꞌ cocha era? chenobꞌ e fariseobꞌ era.
LUK 5:34 Y che e Jesús: —Erer cabꞌijnu que niwajcanuarobꞌ era larobꞌ tacar tin e pejcnobꞌ tuaꞌ acꞌotoyobꞌ tama inteꞌ nujbꞌiar tiaꞌ cꞌani uchiobꞌ inteꞌ nojqꞌuin ubꞌan. Pero conda turobꞌ tama e nojqꞌuin era war atzayobꞌ taca e noxipbꞌir ma cocha erer cache uyactobꞌ tuaꞌ awiobꞌ tuaꞌ ucꞌajtiobꞌ taca e Dios conda turuto e noxipbꞌir tacarobꞌ.
LUK 5:35 Pero watar e día conda axin aloqꞌuesna e noxipbꞌir tutobꞌ y entonces tin e pejcbꞌir tama e nujbꞌiar era erer uyactobꞌ tuaꞌ awiobꞌ tuaꞌ ucꞌajtiobꞌ taca e Dios. Y bꞌanen nen ubꞌan. Conda axin inloqꞌuesna tara tor e rum entonces niwajcanuarobꞌ cꞌani uyactobꞌ tuaꞌ awiobꞌ tuaꞌ ucꞌajtiobꞌ taca e Dios, che e Jesús.
LUK 5:36 Entonces e Jesús cay ucꞌampes inteꞌ ojroner xeꞌ mucur cora y che: —Mamajchi axin uxuri imbꞌijc bꞌujc xeꞌ imbꞌutz tuaꞌ utaqꞌui tama inteꞌ tzuc bꞌujc. Porque jay bꞌan ani uche, axin aquetpa tzuc e bꞌujc xeꞌ imbꞌutz ani, y nien matucꞌa ucꞌampibꞌir e bꞌujc lo que utaqꞌui tama e tzuc bꞌujc era ubꞌan.
LUK 5:37 Y mamajchi uyari e vino xeꞌ intocto achena tama inteꞌ bolsa xeꞌ chembꞌir taca e qꞌuewer xeꞌ bꞌitzꞌemix ut, porque jay bꞌan uche, conda acay oꞌjmay e vino y axin atꞌabꞌay, axin awejrtzꞌa e qꞌuewer cocha machi uyubꞌi abꞌitzꞌa más, y acꞌapa atucpa tunor e vino y asatpa e qꞌuewer ubꞌan.
LUK 5:38 Y tamar era ucꞌani tuaꞌ ayajra e vino xeꞌ intocto achena tama e qꞌuewer xeꞌ intocto achena ubꞌan, y tamar era chatertiꞌ axin acꞌampesna.
LUK 5:39 Pues tunor tin e war uyuchꞌi e onian vino machi war ucꞌani tuaꞌ uyuchꞌi e vino xeꞌ intocto achena porque che que: “Más intzaj e onian vino”, che e Jesús. Bꞌan che e Jesús tuaꞌ uchecsu tutobꞌ que ma cocha erer uyapru ucanseyaj xeꞌ tuaꞌ taca e onian bꞌijnusiaj tuaꞌ e gente era.
LUK 6:1 Pues entonces tama inteꞌ día tuaꞌ e jiriar war axanobꞌ e Jesús taca uyajcanuarobꞌ macuir cora trigo. Y uyajcanuarobꞌ cay uwotzꞌiobꞌ locꞌoy ut e trigo, y cay umuxrobꞌ upat tama ucꞌabꞌobꞌ, y cay uyujtobꞌ locꞌoy usojqꞌuir, y cay ucꞌuxiobꞌ ut e trigo era.
LUK 6:2 Y ayan cora fariseobꞌ xeꞌ war axanobꞌ tupat e Jesús xeꞌ war uwirobꞌ tunor era. Entonces cay uyubꞌiobꞌ tuaꞌ e Jesús y chenobꞌ: —Chꞌujcun awira lo que war uchiobꞌ awajcanuarobꞌ porque war uchiobꞌ inteꞌ patnar que machi acꞌajna tuaꞌ achempa umen uley e Moisés tama inteꞌ día tuaꞌ e jiriar cocha era, che e fariseobꞌ era.
LUK 6:3 Entonces e Jesús uyare e fariseobꞌ era y che: —¿Machi ca iche leer lo que chꞌar tzꞌijbꞌabꞌir tama uyojroner e Dios tama e David conda war axana taca cora upiarobꞌ conda jajpnobꞌ umen e winar?
LUK 6:4 Pues ochoy e David macuir utemplo e Dios y cay uchꞌami cora pan xeꞌ quetpa ajcꞌubꞌir e Dios. Y ma erer ani acꞌujxa e pan era umenerobꞌ sino que ajrer taca e sacerdotiobꞌ xeꞌ erer ucꞌuxiobꞌ. Pero conda jajpnobꞌ umen e winar e David y upiarobꞌ cay ucꞌuxiobꞌ e pan era.
LUK 6:5 Y cꞌani inwareox era que nen xeꞌ Uyunenen e winic ayan nicꞌotorer tuaꞌ inware tucꞌa erer uche inteꞌ y tucꞌa ma erer uche inteꞌ tama inteꞌ día tuaꞌ e jiriar ubꞌan, che e Jesús.
LUK 6:6 Pues entonces tama otronteꞌ día tuaꞌ e jiriar ochoy e Jesús tama inteꞌ sinagoga y cay canseyan. Y ya turu inteꞌ winic xeꞌ taquin unojcꞌabꞌ tama e sinagoga era.
LUK 6:7 Y ya turobꞌ ubꞌan cora ajcanseyajobꞌ tama uley e Moisés taca cora fariseobꞌ xeꞌ war achꞌujcsanobꞌ tuaꞌ uwirobꞌ jay e Jesús axin utzꞌacpes e ajmuac era tama inteꞌ día tuaꞌ e jiriar. Pues jaxirobꞌ war usajcobꞌ cocha tuaꞌ utuchꞌiobꞌ e Jesús que machi ani war acꞌupseyan tut uley e Moisés, pero machi obꞌnobꞌ.
LUK 6:8 Pero e Jesús war unata lo que war ubꞌijnuobꞌ e winicobꞌ era y tamar era uyare e winic xeꞌ taquin ucꞌabꞌ y che: —Achpen waren taniut era, che e Jesús. Y achpa e winic y ixin wawan tut e Jesús.
LUK 6:9 Entonces ojron e Jesús taca e fariseobꞌ y e ajcanseyajobꞌ tama uley e Moisés y che: —Cꞌani umbꞌi tibꞌa era: ¿Tucꞌa che tama uley e Moisés que erer uche inteꞌ tama inteꞌ día tuaꞌ jiriar? ¿Erer ca cache lo que imbꞌutz tama inteꞌ día tuaꞌ jiriar? ¿O más ca bueno tuaꞌ cache lo que mabꞌambꞌan tama inteꞌ día tuaꞌ jiriar? ¿Bueno ca tuaꞌ cacorpes ucuxtar inteꞌ tama inteꞌ día tuaꞌ e jiriar? ¿O más ca bueno tuaꞌ cachamsan tama inteꞌ día tuaꞌ e jiriar? che e Jesús.
LUK 6:10 Entonces e Jesús uchꞌujcu uwira ut inteꞌ intiobꞌ tin e turobꞌ tuyejtzꞌer, y ojron taca e winic xeꞌ taquin ucꞌabꞌ y che: —Tutzꞌu acꞌabꞌ, che e Jesús. Y conda ututzꞌi ucꞌabꞌ tzꞌacpesna inyajrer.
LUK 6:11 Pero e fariseobꞌ y e ajcanseyajobꞌ tama uley e Moisés qꞌuijnobꞌ meyra upater e Jesús que tzꞌacon tama e día tuaꞌ e jiriar era. Y tamar era cay ojronobꞌ jaxobꞌ taca y chenobꞌ: —¿Tucꞌa cachic upater e Jesús era? che e fariseobꞌ taca e ajcanseyajobꞌ tama uley e Moisés jaxobꞌ taca.
LUK 6:12 Pues entonces tama inteꞌ día ixin e Jesús tujor inteꞌ witzir tuaꞌ ucꞌajti taca e Dios. Y ya quetpa tunor e acbꞌar.
LUK 6:13 Y conda sacojpa cay upejca tunor uyajcanuarobꞌ tuaꞌ watobꞌ tuyejtzꞌer. Y tujam e sian winicobꞌ era cay usicbꞌa doce uyajcanuarobꞌ tuaꞌ aquetpobꞌ uyapostolobꞌ.
LUK 6:14 Y quetpa sicbꞌabꞌir e Simón xeꞌ turbꞌana ucꞌabꞌa Pedro ubꞌan umen e Jesús. Y quetpa sicbꞌabꞌir e Andrés xeꞌ jax uwijtzꞌin e Simón Pedro. Y quetpobꞌ sicbꞌabꞌir e Santiago y e Juan y e Felipe y e Bartolomé y e Mateo y e Tomás.
LUK 6:15 Y quetpa sicbꞌabꞌir e Jacobo xeꞌ jax uyunen e Alfeo. Y quetpa sicbꞌabꞌir otronteꞌ Simón xeꞌ arobꞌna que jax ani inteꞌ Cananista.
LUK 6:16 Y quetpa sicbꞌabir e Judas xeꞌ uwijtzꞌin e Jacobo. Y quetpa sicbꞌabꞌir e Judas Iscariote xeꞌ jax xeꞌ utuchꞌi e Jesús.
LUK 6:17 Pues entonces ecmay e Jesús taca uyajcanuarobꞌ tama e witzir era y cꞌotoy wawan tama inteꞌ lugar xeꞌ cꞌatar ut. Y cay cꞌotoyobꞌ meyra gente tama tunor or e lugar yajaꞌ. Y ayan tin e tariobꞌ tama e departamento Judea, y ayan tin e tariobꞌ tama e chinam Jerusalem, y ayan tin e tariobꞌ tama utiꞌ e mar tiaꞌ aquetpa e chinam Tiro y tiaꞌ aquetpa e chinam Sidón. Cꞌotoyobꞌ tunor e sian gente era tuaꞌ uyubꞌiobꞌ uyojroner e Jesús y tuaꞌ atzꞌacpesnobꞌ tama tunor umuaquirobꞌ.
LUK 6:18 Y tunor tin e chucur umen inteꞌ mabꞌambꞌan mein tzꞌacpesnobꞌ umen e Jesús.
LUK 6:19 Y tunor e gente war ucꞌani tuaꞌ upijchꞌiobꞌ ut e Jesús porque tunor tin e cꞌotoy upijchꞌi ut tzꞌacpobꞌ taca e cꞌotorer lo que locꞌoy tamar.
LUK 6:20 Pues entonces e Jesús cay uchꞌujcu uwira ut uyajcanuarobꞌ y che: —Chojbꞌesbꞌirox tunorox xeꞌ tzajtaca iut coner porque nox tuaꞌ ixcꞌotoy ixturuan tama uchinam e Dios.
LUK 6:21 ’Chojbꞌesbꞌirox nox xeꞌ war ixjaytzꞌa coner porque watar e día conda e Dios cꞌani uwesiox este que ixchuan. Chojbꞌesbꞌirox nox xeꞌ war ixaru coner porque watar e día conda e Dios cꞌani utzayjresox.
LUK 6:22 ’Chojbꞌesbꞌirox nox xeꞌ war ixxejbꞌna iut umen e gente, y conda uchoquiox najtir, y conda ucꞌayox, y conda uturbꞌobꞌ icꞌabꞌa bꞌan cocha lo que intuj umen taca que war ixcꞌupseyan tamaren xeꞌ Uyunenen e winic.
LUK 6:23 ’Tzayenic nox y tzayjresic ibꞌa meyra porque watar e día conda ixixin ichꞌami inteꞌ nuxi tuanibꞌir tuaꞌ e Dios conda ixixin tichan tut e qꞌuin. Pues bꞌan cay cꞌaynobꞌ tunor e profetobꞌ xeꞌ turuanobꞌ tama e onian tiempo umen utata viejobꞌirobꞌ e gente era, che e Jesús. Y de allí cay ojron e Jesús taca e inmojr gente y che:
LUK 6:24 Tzajtaca iut nox xeꞌ ricox tara tor e rum porque tamar taca era cꞌapa ichꞌami ituanibꞌir, y matucꞌa más tuaꞌ ichꞌami otronyajr.
LUK 6:25 Tzajtaca iut nox xeꞌ chuanox tara tor e rum porque watar e día conda cꞌani ixjaytzꞌa. Tzajtaca iut nox xeꞌ war ixtzene tara tor e rum porque watar e día conda cꞌani ixaru.
LUK 6:26 Tzajtaca iut nox xeꞌ tattzbꞌirox umen tunor e gente porque bꞌan uchiobꞌ itata viejobꞌirobꞌ taca e profetobꞌ xeꞌ ajmajresiajobꞌ tama e onian tiempo, che e Jesús.
LUK 6:27 Y che e Jesús: —Pero nox xeꞌ war iyubꞌi ninuc era, cꞌani inwareox que ucꞌani tuaꞌ iyajta ut tunor tin e war aqꞌuijna uwirox, y ucꞌani tuaꞌ itacre tin e war uxejbꞌiobꞌ iut.
LUK 6:28 Chojbꞌesic ut tin e war ubꞌaxeox y cꞌajtinic taca e Dios tuaꞌ atacarna tin e war ucꞌayox.
LUK 6:29 Y jay ayan tin e uyajqꞌuet tama inxejr acajram, actan uyajqꞌuiquet teinxejr ubꞌan. Y jay ayan tin e ulocse inteꞌ abꞌujc y uqꞌueche axin, actan uqꞌuechic chic otronteꞌ abꞌujc ubꞌan.
LUK 6:30 Chic taca tiaꞌ ayan tin e ucꞌajti tabꞌa, ajcꞌun. Y tin e ulocse lo que ayan tabꞌa, ira acꞌajti tuaꞌ achꞌami uyeror otronyajr.
LUK 6:31 Y tunor lo que war icꞌani que e inmojr uchiobꞌ tacarox, bꞌan ixto ucꞌani tuaꞌ iche nox tacarobꞌ ubꞌan.
LUK 6:32 Porque jay war iyajta ut tin taca xeꞌ war uyajta iut, matucꞌa tuaꞌ ichꞌami tuaꞌ e Dios tamar era, porque tin e mabꞌambꞌan uwirnar war ucꞌani tin e uyet ajmabꞌambꞌanirobꞌ.
LUK 6:33 Y jay war itacre ajtaca tin e war utacriox, matucꞌa tuaꞌ ichꞌami tuaꞌ e Dios tamar era, porque bꞌan taca uchiobꞌ tunor tin e ajmabꞌambꞌanirobꞌ.
LUK 6:34 Jay war iwajcꞌu ajtaca tin e axin utoyet otronyajr, matucꞌa tuaꞌ ichꞌami tuaꞌ e Dios tamar era, porque tin e ajmabꞌambꞌanirobꞌ uyajcꞌuobꞌ uyet ajmabꞌambꞌanirobꞌ y war ucojcobꞌ tuaꞌ uchꞌamiobꞌ uyeror otronyajr.
LUK 6:35 Pero nox ucꞌani tuaꞌ iyajta utobꞌ tin e uxejbꞌiobꞌ iut, y tacrenicobꞌ, y ajcꞌunic prestado, y ira iware que ucꞌanto uyeror. Porque jay ixixin iche cocha era, cꞌani ichꞌami inteꞌ nuxi tuanibꞌir tuaꞌ e Dios. Y tamar era cꞌani anatanwa que nox uyunenox e Dios tichan, porque jaxir war uchojbꞌes utobꞌ tunor e gente tara tor e rum iraj iraj, motor jay ayan tin e machi war utattzꞌiobꞌ ucꞌabꞌa tamar y motor jay ajmabꞌambꞌanirobꞌ, pero e Dios warto uchojbꞌes utobꞌ tunorobꞌ.
LUK 6:36 Turbꞌanic ibꞌa tuaꞌ aquetpa incꞌun iwirnar tut e gente tuaꞌ itacriobꞌ conda ayan lo que ucꞌaniobꞌ tibꞌa, bꞌan cocha incꞌun uwirnar e Dios ticoit tuaꞌ utacrion conda ayan lo que cacꞌani non, che e Jesús.
LUK 6:37 Y che e Jesús: —Ira ixojron upater otronteꞌ tuaꞌ machi ixcꞌayna umen e Dios. Y ira ixbꞌaxon tuaꞌ machi ixjajtzꞌa umen e Dios. Cꞌumpenic taca tunor tin e axin uche e mabꞌambꞌanir ipater y e Dios axin acꞌumpa tacarox nox ubꞌan.
LUK 6:38 Ajcꞌunic otronteꞌ lo que ucꞌani, porque bꞌan cocha itacre otronteꞌ y bꞌan tuaꞌ ixtacarna umen e Dios ubꞌan. Y e Dios tuaꞌ asutpa ubꞌutꞌi más ibolsa umen que war itacre otronteꞌ. Y jaxir axin uteqꞌue ibolsa tama ubꞌijsibꞌir xeꞌ bueno. Y axin utene ibolsa tuaꞌ uwajpi más tama unac. Pero e Dios axin ucꞌampes ubꞌijsibꞌir bꞌan cocha war icꞌampes tuaꞌ asutpa ubꞌisi otronyajr lo que cꞌani asutpa uyajcꞌox, che e Jesús.
LUK 6:39 Y de allí e Jesús ojron tama inteꞌ ojroner xeꞌ mucur cora y che: —Ma erer aqꞌuejcha axin inteꞌ winic xeꞌ tajpem unacꞌut umen otronteꞌ winic xeꞌ tajpem unacꞌut ubꞌan. Porque jay bꞌan uchiobꞌ, chatertiobꞌ erer oꞌjriobꞌ axin tama inteꞌ chꞌen.
LUK 6:40 Y inteꞌ ajcanuar machi unata más que lo que unata uyajcanseyaj, este que acꞌapa acano tunor lo que unata uyajcanseyaj, y entonces erer acꞌotoy unata jax taca lo que unata uyajcanseyaj.
LUK 6:41 ’¿Y tucꞌa era que net wacchetaca war awira que ayan imbꞌijc sojc chꞌur tama unacꞌut inteꞌ awermano, pero net machi cꞌani awira abꞌa que ayan inteꞌ nuxi teꞌ chꞌur tama unacꞌoit?
LUK 6:42 Y jay chꞌur inteꞌ nuxi teꞌ tama unacꞌoit y machi cꞌani anata que bꞌan, ¿cocha tuaꞌ aware awermano que: “Actanen inlocsic e sojc tama unacꞌoit?” Ajqꞌuecraneret, locsen bꞌajxan e teꞌ xeꞌ chꞌur tama unacꞌoit net, y de allí uyubꞌi awira bien tuaꞌ atacre ulocse e sojc lo que chꞌur tama unacꞌut awermano, che e Jesús.
LUK 6:43 Y che e Jesús: —Inteꞌ teꞌ xeꞌ bueno machi uyubꞌi uyajcꞌu uyutir xeꞌ mabꞌambꞌan, y nien inteꞌ teꞌ xeꞌ mabꞌambꞌan machi uyubꞌi uyajcꞌu uyutir xeꞌ bueno.
LUK 6:44 Pues tunor e teꞌ chequer tama uyutir, porque ma erer ichꞌami ingojr muy tama inteꞌ tꞌix, y ma erer ichꞌami inteꞌ poxteꞌ tama inteꞌ chꞌuyur chꞌan.
LUK 6:45 Y bꞌan ixto cocha era tama e winicobꞌ ubꞌan, que inteꞌ winic xeꞌ imbꞌutz uwirnar, imbꞌutz uyojroner ubꞌan, porque bꞌutꞌur uyalma tacar lo que imbꞌutz. Y inteꞌ winic xeꞌ mabꞌambꞌan uwirnar, mabꞌambꞌan uyojroner ubꞌan, porque bꞌutꞌur uyalma taca e mabꞌambꞌanir. Porque tamar lo que bꞌutꞌur uyalma inteꞌ, jax taca tuaꞌ alocꞌoy oꞌjron tama uyej, che e Jesús.
LUK 6:46 Y che e Jesús: —¿Y tucꞌa tuaꞌ war iwaren que Iwinquiraren conda machi cꞌani iche lo que inwareox?
LUK 6:47 Cꞌani inwareox chi tacar lar tin e ayopa taniut y uyubꞌi niwojroner y oꞌbꞌian tut.
LUK 6:48 Larobꞌ tacar inteꞌ winic xeꞌ locꞌoy ubꞌijnu que cꞌani uche uyotot tujor inteꞌ nuxi tun. Y cay uche intam uchꞌenar esto tiaꞌ erer aqꞌuecꞌo e oy tamar. Entonces conda cꞌapa uyustes uyotot tari e jajar y chꞌiꞌ e xucur meyra y tari inteꞌ nuxi icꞌar xeꞌ uyajcꞌu e otot, pero machi cucrema e otot era porque war uwir tujor e tun.
LUK 6:49 Pero tin e uyubꞌi niwojroner y machi oꞌbꞌian tut, aquetpa bꞌan cocha inteꞌ winic xeꞌ satrem usasaꞌ xeꞌ uche uyotot tor e jiꞌ. Entonces conda cꞌapa uyustes uyotot tari e jajar y cay chꞌiꞌ e nuxi xucur y cay jicna tari e sian icꞌar tut e otot era, y wacchetaca cucrema inyajrer e otot, che e Jesús.
LUK 7:1 Pues entonces conda cꞌapa ojron e Jesús taca e winicobꞌ era ixin tama e chinam Capernaum.
LUK 7:2 Y ayan inteꞌ capitán romano xeꞌ ayan inteꞌ uman xeꞌ ucꞌani meyra pero xeꞌ chꞌar ajmuac y xeꞌ cꞌanix achamay.
LUK 7:3 Pero conda e capitán era uyubꞌi que ayan ucꞌotorer e Jesús tuaꞌ utzꞌacpes e ajmuacobꞌ, uyebꞌta ixin cora nuquir winicobꞌ xeꞌ tuaꞌ e Israel tuaꞌ axin ucꞌajtiobꞌ tuaꞌ e Jesús tuaꞌ axin tama uyotot e capitán tuaꞌ utzꞌacpes uman.
LUK 7:4 Entonces conda cꞌotoyobꞌ e winicobꞌ era tut e Jesús, cay ucꞌajtiobꞌ tuaꞌ e Jesús tuaꞌ axin utzꞌacpes e man. Y tamar era ojronobꞌ y chenobꞌ: —E capitán tawar tuaꞌ atacarna amener,
LUK 7:5 porque jaxir uyajta coit tunoron xeꞌ Ajisraelon, y jaxir utoyi tuaꞌ achena casinagoga, chenobꞌ e winicobꞌ era.
LUK 7:6 Entonces ixin e Jesús tacarobꞌ, pero conda tuix tuaꞌ acꞌotoy tama uyotot e capitán, ebꞌetna tari cora winicobꞌ xeꞌ atzay iꞌrna umen e capitán tuaꞌ upejca e Jesús y che: —Niwinquiraret, ira aturbꞌa abꞌa tamar era, porque ma tawaren tuaꞌ iyochoy tama niotot,
LUK 7:7 porque nien nen machi imbꞌijnu tuaꞌ incꞌotoy toit tuaꞌ onjron tacaret, pero jay net intaca aware tuaꞌ atzꞌacpa niman, entonces atzꞌacpa.
LUK 7:8 Porque nen war innata que turen yebꞌar ucꞌotorer inteꞌ nijefe, y nen ayan cora nisoldado xeꞌ turobꞌ yebꞌar nicꞌotorer nen ubꞌan. Y jay inware inteꞌ tujamobꞌ que: “Quiqui chen era”, y axin uche. Y jay inware otronteꞌ tujamobꞌ que: “Lar chen era”, y watar uche, y jay inware niman que: “Chen era”, y uche. Y bꞌan ixto net ubꞌan, jay aware e ojroner entonces cꞌani atzꞌacpa niman, che e winicobꞌ era xeꞌ atzay iꞌrna umen e capitán romano.
LUK 7:9 Pues conda e Jesús cꞌapa uyubꞌi tunor e ojroner era bꞌacta uwira e capitán que war acꞌupseyan meyra tama e Dios. Entonces sutpa uchꞌujcu uwira tin e war axanobꞌ tacar y che: —Nien tujam tunor e sian gente xeꞌ turobꞌ tama e Israel ma inyajr intajwi inteꞌ winic xeꞌ meyra war acꞌupseyan tama e Dios cocha war uche e capitán era, che e Jesús.
LUK 7:10 Y conda sutpa ixiobꞌ esto tama uyotot e capitán, utajwiobꞌ que e man tzꞌacpesbꞌirix.
LUK 7:11 Pues entonces conda cꞌapa numuy tunor era, ixin e Jesús taca uyajcanuarobꞌ esto tama inteꞌ chinam xeꞌ ucꞌabꞌa Naín, y ayan cora sian gente xeꞌ war axiobꞌ tupat e Jesús ubꞌan.
LUK 7:12 Y conda cꞌotoyobꞌ tutiꞌ e chinam era, cay uwirobꞌ que war aqꞌuejcha axin inteꞌ chamen tuaꞌ amujca xeꞌ cojto sitz tuaꞌ inteꞌ tubꞌir xeꞌ chamen uviejo. Y ayan meyra gente tuaꞌ e chinam era xeꞌ war axin tacarobꞌ ubꞌan.
LUK 7:13 Y conda Cawinquirar uwira e ixic era uyajta ut y che: —Ira iyaru, che e Jesús.
LUK 7:14 Entonces cꞌotoy tuyejtzꞌer e chamen y upacbꞌu ucꞌabꞌ tujor e cajón y quetpobꞌ wawan tin e war uqꞌuechiobꞌ axin e cajón era. Entonces e Jesús upejca e sitz xeꞌ chamen y che: —Sitz, cꞌani inwaret que achpen era, che e Jesús.
LUK 7:15 Y entonces achpa turuan e sitz xeꞌ chamen ani y cay ojron, y de allí e Jesús uyare tuaꞌ aqꞌuejcha axin e sitz umen utuꞌ.
LUK 7:16 Y conda e gente cꞌapa uwirobꞌ tunor era bꞌacta uwirobꞌ y cay utattzꞌiobꞌ ucꞌabꞌa e Dios y chenobꞌ: —Checta ixto yaꞌ inteꞌ nuxi profeta tuaꞌ e Dios ticajam, che e gente era. Y chenobꞌ ubꞌan: —Tari Cadiosir tuaꞌ utacrion xeꞌ Ajisraelon, che e gente era.
LUK 7:17 Y wacchetaca cay checta ixin e ojroner tamar lo que uche e Jesús tama tunor or e departamento Judea.
LUK 7:18 Pues entonces cꞌotoy unata e Juan xeꞌ ajchꞌuymar tama tunor lo que war uche e Jesús umen que arobꞌna umen uyajcanuarobꞌ. Entonces jaxir upejca chateꞌ uyajcanuarobꞌ
LUK 7:19 y utzacre ixiobꞌ tuaꞌ uyubꞌiobꞌ tuaꞌ Cawinquirar jay jaxir jax e Cristo xeꞌ tuaꞌ watar tuaꞌ ucorpeson xeꞌ tuon e Israel, o jay ucꞌanto tuaꞌ cacojco otronteꞌ.
LUK 7:20 Entonces ixiobꞌ uyajcanuarobꞌ e Juan era y cꞌotoyobꞌ tuyejtzꞌer e Jesús y uyubꞌiobꞌ tuaꞌ y che: —Ebꞌetna tarion umen e Juan xeꞌ ajchꞌuymar tuaꞌ coybꞌi tabꞌa jay net jax e Cristo xeꞌ tuaꞌ watar tuaꞌ ucorpeson xeꞌ tuon e Israel, o jay ucꞌanto tuaꞌ cacojco otronteꞌ, che uyajcanuarobꞌ e Juan era.
LUK 7:21 Pero e Jesús machi ojron sino cay utzꞌacpes meyra tin e ajmuac y tin e ayan e chec tut, y tin e chucur uyalma umen inteꞌ mabꞌambꞌan mein, y jaxir ulocse. Y cay uyerojse ut meyra tin e tajpem unacꞌut.
LUK 7:22 Entonces conda cꞌapa uche tunor era e Jesús uyare uyajcanuarobꞌ e Juan y che: —Quiqui arenic e Juan lo que war iwira y lo que war iyubꞌi. Arenic que tin e tajpem ani unacꞌut y era war eꞌron, y arenic que tin e tzꞌej ani uyoc y era war axana, y arenic que tin e ayan ani e chec tut xeꞌ ucꞌabꞌa lepra y era cꞌapa ojri usta. Y arenic que tin e macar ani uchiquin y era war oꞌbꞌian, y arenic que tin e chamenobꞌ ani y era sutpa bꞌixqꞌuesnobꞌ, y arenic que tin e tzajtaca ut que era war uyubꞌiobꞌ tamar e corpesiaj.
LUK 7:23 Pues chojbꞌesbꞌir ut tin e machi achecta e qꞌuijnar tama uyalma conda uyubꞌi niwojroner, che e Jesús.
LUK 7:24 Entonces conda cꞌapa locꞌoy uyajcanuarobꞌ e Juan, e Jesús cay uyare e gente tamar e Juan y che: —Conda ixiox tama e choquem lugar tuaꞌ iyubꞌi uyojroner e Juan, ¿war ca ibꞌijnu que jax inteꞌ winic xeꞌ matucꞌa ubꞌijnusiaj?
LUK 7:25 Y jay ma, ¿tucꞌa tuaꞌ ixiox iwira? ¿Ixiox ca tuaꞌ iwira inteꞌ winic xeꞌ galan bꞌujcsebꞌir? Machi, porque e Juan machi ulapi e bꞌujc xeꞌ utzic utzic. Nox inatix que tin e galan bꞌujcsebꞌir xeꞌ war utzayjres ubꞌa jax taca, ajtaca cꞌani aturuan tama inteꞌ otot bꞌan cocha uyotot inteꞌ rey.
LUK 7:26 Entonces ¿tucꞌa ixiox tuaꞌ iwira? ¿Jax ca inteꞌ profeta? Jax pues. Pero cꞌani inwareox era que e Juan más ayan ucꞌampibꞌir tut e Dios que tunor e onian profetobꞌ.
LUK 7:27 Porque tamar e Juan era ayan lo que chꞌar tzꞌijbꞌabꞌir tama uyojroner e Dios xeꞌ che que: Cꞌani inwebꞌta axin inteꞌ niman tuaꞌ axin bꞌajxan toit. Jaxir tuaꞌ uyustes uyalmobꞌ e gente tuaꞌ uyubꞌiobꞌ awojroner, che tama uyojroner e Dios.
LUK 7:28 Pero cꞌani inwareox era que tujam tunor e gente lo que ayan tara tor e rum ma incojt winic xeꞌ más nojta tut e Dios que e Juan xeꞌ ajchꞌuymar. Pero cꞌani inwareox ubꞌan que tin e aquetpa más chuchu tama uchinam e Dios, cꞌani aquetpa más nojta que e Juan, che e Jesús.
LUK 7:29 Conda e gente xeꞌ turobꞌ era y e ajmorojseyajobꞌ tumin tuaꞌ e gobierno xeꞌ cay chꞌujyobꞌ umen e Juan uyubꞌiobꞌ tunor era cay ubꞌijnu uwirobꞌ que erach e Dios.
LUK 7:30 Pero majax bꞌan tama e fariseobꞌ y e ajcanseyajobꞌ tama uley e Moisés porque jaxirobꞌ machi uchꞌamiobꞌ uchꞌuymar e Juan, y machi war ucꞌaniobꞌ e tacarsiaj lo que cꞌani ani aꞌjcꞌunobꞌ umen e Dios.
LUK 7:31 Y che e Jesús: —¿Tucꞌa larobꞌ tacar e gente xeꞌ turobꞌ tara tor e rum coner? Ubꞌinic, cꞌani inwareox era.
LUK 7:32 E gente xeꞌ turobꞌ tor e rum coner larobꞌ tacar cora maxtac xeꞌ umorojse ubꞌobꞌ y aturuanobꞌ tuaꞌ aꞌsiobꞌ. Cay uyareobꞌ uyet maxtaquir y che: “Calajbꞌa tama e píto cocha achena tama inteꞌ nujbꞌiar, pero nox machi actox. Y de allí cay aruon bꞌan cocha achena tama inteꞌ chamen, pero nox machi aruox.”
LUK 7:33 Y bꞌan e gente tor e rum coner, porque yopa ticoit e Juan xeꞌ ajchꞌuymar, pero jaxir machi ucꞌuxi e pan y machi uyuchꞌi e vino, y nox war iware que jaxir ayan inteꞌ mabꞌambꞌan mein tamar.
LUK 7:34 Y de allí yopen nen xeꞌ Uyunenen e winic xeꞌ war incꞌuxi tunor lo que ajcꞌunen umen e gente, y xeꞌ war unchꞌi lo que ajcꞌunen ubꞌan, pero nox war iware que calapir inweꞌ y que fuerte unchꞌi, y que nen war intzay inwira e gente xeꞌ más calapir uwirnarobꞌ y tin e ajmorojseyajobꞌ tumin tuaꞌ e gobierno.
LUK 7:35 Pero chequer que ayan ucꞌampibꞌir unatanyaj e Dios porque tunor tin e axin uchꞌami, alocꞌoy bueno tunor lo que uchiobꞌ, che e Jesús.
LUK 7:36 Pues entonces pejcna e Jesús umen inteꞌ fariseo xeꞌ ucꞌabꞌa Simón tuaꞌ acꞌotoy tama uyotot tuaꞌ aweꞌ tacar, y tamar era e Jesús ixin ochoy tama uyotot y turuan tor e mesa.
LUK 7:37 Y tama e chinam era ayan inteꞌ ixic xeꞌ ajmabꞌambꞌanir xeꞌ cꞌotoy unata que cꞌotoy e Jesús y que turu era tama uyotot e Simón war aweꞌ. Entonces jaxir ixin cꞌotoy tama e otot era ubꞌan, pero war uqꞌueche axin inteꞌ yar chuchu bote xeꞌ bꞌutꞌur taca e perfume.
LUK 7:38 Y e ixic conda cꞌotoy tama e otot uyacta ubꞌa cotuan tut uyoc e Jesús, y cay oyqꞌui y cay utzꞌayi upat uyoc e Jesús taca uyar unacꞌut, y de allí cay utaquijse upat uyoc e Jesús taca utzutzer ujor, y war utzꞌujtzꞌi upat uyoc e Jesús y de allí cay uyari e perfume tar.
LUK 7:39 Pero conda e fariseo era xeꞌ jax xeꞌ upejca e Jesús tuaꞌ ayopa tama uyotot cay uwira lo que war uche e ixic, cay ubꞌijnu cocha era y che: “¿Erach ca nic e winic era que jax inteꞌ profeta tuaꞌ e Dios? Porque jay jax nic ani inteꞌ profeta tuaꞌ e Dios unata ani tucꞌa e ixic era xeꞌ war upijchꞌi upat uyoc, porque e ixic era ajmabꞌambꞌanir.” Bꞌan war ubꞌijnu e fariseo era xeꞌ jax e Simón.
LUK 7:40 Entonces e Jesús uyare e Simón y che: —Ayan lo que cꞌani inwaret era, che e Jesús. Y che e Simón: —Arenen, Ajcanseyajet.
LUK 7:41 Y che e Jesús: —Ayan inteꞌ ojroner tama inteꞌ winic xeꞌ uyajcꞌu meyra utumin prestado. Y ayan chateꞌ winicobꞌ xeꞌ cay uchꞌamiobꞌ e tumin cocha inteꞌ préstamo tuaꞌ e winic era. Y inteꞌ winic xeꞌ bꞌajxan uchꞌami 500 denarios, y otronteꞌ winic uchꞌami cincuenta denarios.
LUK 7:42 Pero chatertiobꞌ e winicobꞌ era usatiobꞌ e tumin y ma cocha uyubꞌi utoyobꞌ otronyajr. Pero cocha e ajyum tumin uyajta utobꞌ e winicobꞌ era uyacta bꞌan taca. Tara acꞌapa e ojroner, che e Jesús. Entonces e Jesús sutpa uyubꞌi tuaꞌ e Simón y che: —¿Chi tujam e winicobꞌ era tuaꞌ uyajta ut más e ajyum tumin? ¿Jax ca tin e uchꞌami e 500? ¿O jax ca tin e uchꞌami e cincuenta? che e Jesús.
LUK 7:43 Y e Simón che: —Nen imbꞌijnu que jax e winic xeꞌ más nojta abꞌeto xeꞌ actana bꞌan taca tamar lo que abꞌeto umen e ajyum tumin, che e Simón. Y che e Jesús: —Bꞌan ya, che e Jesús.
LUK 7:44 Y de allí e Jesús uchꞌujcu uwira ut e ixic y uyare e Simón y che: —Chꞌujcun awira e ixic era. Nen ochoyen tama oꞌtot y mamajchi upoqui nioc bꞌan cocha acay uchiobꞌ e gente tara, pero e ixic yopa y cay uyates upat nioc taca uyar unacꞌut y de allí cay utaquijse nioc taca utzutzer ujor.
LUK 7:45 Y net machi atzꞌujtzꞌien, y e ixic era desde que ochoyen turuanen merato uyacta utzꞌujtznar upat nioc.
LUK 7:46 Y net machi ayari e aceite tama nijor bꞌan cocha acay uchiobꞌ e gente tara, pero e ixic cꞌapa utuqui tunor e perfume tupat nioc.
LUK 7:47 Y tamar era cꞌani inwaret era que jaxir war uchectes ubꞌa que war uyajta niut meyra porque meyra ayan umabꞌambꞌanir xeꞌ cꞌumpa e Dios tacar. Pero tin e ayan imbꞌijc taca umabꞌambꞌanir xeꞌ cꞌumpesna tamar, imbꞌijc taca ubꞌan tuaꞌ uyajta ut tin e acꞌumpa tacar, che e Jesús.
LUK 7:48 Entonces e Jesús uyare e ixic y che: —Incꞌumpa tacaret tama tunor amabꞌambꞌanir, che e Jesús.
LUK 7:49 Pero e winicobꞌ xeꞌ turobꞌ tor e mesa war awiobꞌ taca e Jesús cay ojronobꞌ jaxobꞌ taca y chenobꞌ: —¿Tucꞌa cora winic era que war acꞌumpa tama umabꞌambꞌanir e gente? che e winicobꞌ.
LUK 7:50 Pero e Jesús uyare e ixic otronyajr y che: —Corpesbꞌiret coner era umen que war icꞌupseyan tamaren. Erer iꞌxin bꞌan taca, che e Jesús.
LUK 8:1 Pues entonces conda locꞌoy tama uyotot e Simón ixin e Jesús war axana esto tama tunor e sian chinamobꞌ y esto tama tunor e sian aldea ubꞌan. War uchecsu uchinam e Dios tut e gente. Y war axanobꞌ e doce apostolobꞌ taca e Jesús ubꞌan.
LUK 8:2 Y ayan cora ixictac xeꞌ war axanobꞌ taca e Jesús ubꞌan. Y tujam e ixictac era ayan tin e loqꞌuesna e mabꞌambꞌan mein tamarobꞌ, y ayan tin e tzꞌacpesnobꞌ. Y tujam e ixictac era ayan inteꞌ xeꞌ ucꞌabꞌa María xeꞌ tuaꞌ e chinam Magdala xeꞌ loqꞌuesna siete mabꞌambꞌan mein tamar.
LUK 8:3 Y war axana taca e Jesús e Juana ubꞌan xeꞌ jax uwixcar e Cusa xeꞌ jax inteꞌ ajcꞌampar tuaꞌ e gobernador Herodes. Y ayan otronteꞌ ixic ubꞌan xeꞌ ucꞌabꞌa Susana. Y ayanto más ixictac ubꞌan. Ixiobꞌ tunor e ixictac era tuaꞌ utacriobꞌ e Jesús tamar lo que war uqꞌuechiobꞌ axin.
LUK 8:4 Pues entonces ayan cora sian gente tama e chinamobꞌ tama e lugar era xeꞌ locꞌoyobꞌ tuaꞌ axin uwirobꞌ ut e Jesús. Entonces cay umorojse ubꞌobꞌ e sian gente era tut e Jesús, y tamar era jaxir cay ojron tama inteꞌ ojroner xeꞌ mucur cora y che:
LUK 8:5 —Ayan inteꞌ ojroner tamar inteꞌ ajpatnar xeꞌ ixin tuaꞌ upaqꞌui uchor. Y tamar upacmar era intaca upusi ixin ut e semilla. Y ayan ut e semilla xeꞌ cꞌaxi tut e bꞌir tiaꞌ axana e gente, y conda irna ut e semilla era umen e mut ucꞌopiobꞌ ucꞌuxiobꞌ.
LUK 8:6 Y ayan otro inmojr ut e semilla xeꞌ cꞌaxi macuir e cherem tun tiaꞌ imbꞌijc taca e rum, y conda cuxpa ut e semilla era, chꞌiꞌ cora. Pero conda fuerteran e qꞌuin acay aluccha uyopor, y conda más fuerteran e qꞌuin taqui inyajrer porque ma tiaꞌ tuaꞌ awiri más.
LUK 8:7 Y ayan otro inmojr ut e semilla xeꞌ cꞌaxi macuir e sian tꞌix, y conda acuxpa ut e semilla era cuxpa macuir e sian tꞌix, y tamar era jacpa umen e sian tꞌix y taqui.
LUK 8:8 Pero ayan otro inmojr ut e semilla xeꞌ cꞌaxi tama or e rum xeꞌ incꞌun, y cuxpa, y chꞌiꞌ, y meyra uyutir uyari tama ingojr ut e semilla era. Y ayan tin e uyari 100 ut tama ingojr ut. Tara acꞌapa e ojroner, che e Jesús. Y de allí e Jesús ojron taca inteꞌ nuxi nuc y che: —Tunor tin e ayan uchiquin uyubꞌic niwojroner era, che e Jesús.
LUK 8:9 Pues entonces cay uyubꞌiobꞌ uyajcanuarobꞌ e Jesús tuaꞌ y chenobꞌ: —¿Tucꞌa war che e ojroner xeꞌ mucur cora era? che uyajcanuarobꞌ e Jesús.
LUK 8:10 Y che e Jesús: —Pues tama e onian tiempo quetpa mucur cocha tuaꞌ aquetpa uchinam e Dios, pero coner cꞌani inchectes tunor era tiut. Pero tut e inmojr era machi tuaꞌ inchectes tunor era sino que war onjron tacarobꞌ tama inteꞌ ojroner xeꞌ mucur cora tuaꞌ alocꞌoy bꞌan cocha chꞌar tzꞌijbꞌabꞌir tama uyojroner e Dios que: “Motor que war eꞌronobꞌ pero ma chequer tutobꞌ tucꞌa war uwirobꞌ, y motor que war oꞌbꞌianobꞌ pero machi unatobꞌ tucꞌa war che lo que war uyubꞌiobꞌ”, che e Jesús.
LUK 8:11 Entonces ojron e Jesús y che: —Pues cꞌani inchecsu lo que war che e ojroner xeꞌ mucur cora tama e ajpacmar. Pues ut e semilla lar tacar uyojroner e Dios tama e corpesiaj.
LUK 8:12 Y ut e semilla xeꞌ cꞌaxi tut e bꞌir xeꞌ cꞌojpa umen e mut lar tacar tin e uyubꞌi uyojroner e Dios. Pero wacchetaca watar e diablo tuaꞌ ulocse e ojroner lo que ochoy ani tama uyalma, y tamar era tin e cay uyubꞌi uyojroner e Dios machi ixto tuaꞌ acꞌupseyan tamar y machi ixto tuaꞌ acorpesna.
LUK 8:13 Y ut e semilla xeꞌ cꞌaxi macuir e cherem tun tiaꞌ imbꞌijc taca e rum lar tacar tin e uyubꞌi uyojroner e Dios y atzay uchꞌamiobꞌ, pero cocha machi wiri meyra e ojroner era tama uyalmobꞌ, acꞌupseyanobꞌ tama e Dios cora pero conda watar lo que uche unumse ubꞌobꞌ, wacchetaca uyactobꞌ e Dios y axiobꞌ.
LUK 8:14 Y ut e semilla xeꞌ cꞌaxi macuir e sian tꞌix lar tacar tin e uyubꞌi uyojroner e Dios y de allí acay ubꞌijnu meyra tama tunor lo que ayan tara tor e rum y war ubꞌijnu cocha era: “Pero nen cꞌani inche más e chonmar tuaꞌ abꞌoro nitumin, y nen cꞌani inwejta inche tunor lo que ayan tara tor e rum”, che ubꞌijnu inteꞌ. Y umen tunor e majresiaj era acꞌapa oꞌcꞌoy lo que uchꞌami ani tama e Dios, y aquetpa lar tacar inteꞌ teꞌ xeꞌ intaca asacnichi, pero matucꞌa uyutir uyajcꞌu.
LUK 8:15 Pero ut e semilla xeꞌ cꞌaxi tama e rum xeꞌ incꞌun lar tacar e gente xeꞌ incꞌun uyalma y conda uyubꞌi uyojroner e Dios uturbꞌa ubꞌa tamar, y axana bueno tamar, y uchꞌubꞌa iraj iraj, che e Jesús.
LUK 8:16 Entonces ojron e Jesús otronyajr y che: —Mamajchi utzꞌajpes inteꞌ cꞌajc tuaꞌ ucotbꞌa inteꞌ bꞌejt tujor y nien tuaꞌ uwabꞌu yebꞌar inteꞌ chꞌacteꞌ, sino que catzꞌajpes inteꞌ cꞌajc tuaꞌ cachꞌubꞌa tichan tuaꞌ ujanchꞌacnes tunor tin e oꞌchoy tama e otot era.
LUK 8:17 Pues tunor lo que achena mucur, motor que jax taca lo que ubꞌijnu uche inteꞌ ucꞌani tuaꞌ achectesna, y tunor lo que uche inteꞌ tama e incsibꞌaner cꞌani acꞌotoy anatanwa.
LUK 8:18 Ubꞌinic niwojroner era, porque tunor tin e uyubꞌi niwojroner y uchꞌubꞌa tama uyalma axin aꞌjcꞌuna más, pero tin e uyubꞌi cora niwojroner y machi uchꞌubꞌa tama uyalma cꞌani acꞌapa aloqꞌuesna lo que ayan ani cora tamar, che e Jesús.
LUK 8:19 Pues entonces cꞌotoy utuꞌ y uwijtzꞌinobꞌ e Jesús tuaꞌ oꞌjron tacar, pero cocha ayan meyra gente tama e otot tiaꞌ turu e Jesús machi uyubꞌi tuaꞌ acꞌotoyobꞌ tuyejtzꞌer.
LUK 8:20 Entonces cꞌotoy inteꞌ winic tut e Jesús y che: —Turobꞌ atuꞌ y awijtzꞌinobꞌ patir, cꞌani oꞌjronobꞌ tacaret, che e winic.
LUK 8:21 Pero ojron e Jesús y che: —Tunor tin e uyubꞌi uyojroner e Dios y uturbꞌa ubꞌa tamar, aquetpobꞌ bꞌan cocha inteꞌ nituꞌ y bꞌan cocha inteꞌ niwijtzꞌin ubꞌan, che e Jesús.
LUK 8:22 Pues tama inteꞌ día ochoy e Jesús tama inteꞌ barco taca tunor uyajcanuarobꞌ y che: —Incuic teinxejr e jaꞌ era, che e Jesús. Entonces cay uxantesobꞌ e barco tor e jaꞌ.
LUK 8:23 Y wacchetaca tari inteꞌ nuxi icꞌar xeꞌ war utꞌabꞌse axin e jaꞌ tichan, y e jaꞌ war atobꞌoy axin tor e mar este que cay ochoy tama e barco, y warix abꞌactobꞌ uyajcanuarobꞌ que cꞌanix amuctzꞌa e barco macuir e jaꞌ. Pero e Jesús war awayan.
LUK 8:24 Y entonces e ajcanuarobꞌ ixiobꞌ tuaꞌ ubꞌixqꞌues e Jesús y chenobꞌ: —Cawinquiraret, achpen porque cꞌanix cacuchpa, che uyajcanuarobꞌ. Entonces achpa e Jesús y cay ucꞌaye e icꞌar y e jaꞌ xeꞌ war atobꞌoy axin. Y wacchetaca chꞌancabꞌa e icꞌar y e jaꞌ, y sisa tunor.
LUK 8:25 Y de allí uyare uyajcanuarobꞌ y che: —¿Y tucꞌa tuaꞌ machi war ixcꞌupseyan tamaren? che e Jesús. Pero jaxirobꞌ war abꞌacta uwirobꞌ y cay ojronobꞌ jaxobꞌ taca y chenobꞌ: —¿Tucꞌa winic era que uche achꞌancabꞌa e icꞌar y e jaꞌ y acꞌupesna umener? che uyajcanuarobꞌ jaxobꞌ taca.
LUK 8:26 Entonces numuyobꞌ tor e jaꞌ tama e barco este que cꞌotoyobꞌ teinxejr e nuxi jaꞌ era esto tama inteꞌ lugar xeꞌ ucꞌabꞌa Gadara xeꞌ turu tama e departamento Galilea.
LUK 8:27 Y conda e Jesús ecmay tama e barco yopa inteꞌ winic tuaꞌ e chinam era xeꞌ ixnix chucur uyalma umen e sian mabꞌambꞌan meinobꞌ. Y jaxir pispis axana porque machi ulapi ubꞌujc y nien machi aturuan tama ingojr otot sino que aturuan tama or inteꞌ witzir tiaꞌ amujca e chamenobꞌ.
LUK 8:28 Pero conda e winic era uwira ut e Jesús uyacta ubꞌa cotuan tut y cay aru taca inteꞌ nuxi nuc y che: —¿Tucꞌa tuaꞌ war oꞌse abꞌa tacaren, net xeꞌ acꞌabꞌa Jesús xeꞌ Uyunenet e Dios Ajtichaner? Cꞌani inwaret que ira achien innumse nibꞌa, che e winic era xeꞌ chucur uyalma umen e sian mabꞌambꞌan mein.
LUK 8:29 Pues ojron e mabꞌambꞌan mein cocha era porque e Jesús war utzacre tuaꞌ alocꞌoy e mabꞌambꞌan mein y che: —Loqꞌuen tama e winic era, che e Jesús. Pues ayan hora conda ayan cora usasaꞌ e winic era pero conda ajajpna umen e mabꞌambꞌan mein otronyajr, ayan e winicobꞌ xeꞌ watar tuaꞌ ucachiobꞌ ucꞌabꞌ y uyoc taca e cadena tuaꞌ uchiobꞌ aturuan tzꞌustaca. Pero e winic intaca asutpa utzꞌoqui e cadena y achena alocꞌoy ajni umen e mabꞌambꞌan mein tuaꞌ axin aturuan tama inteꞌ choquem lugar otronyajr.
LUK 8:30 Entonces e Jesús uyubꞌi tuaꞌ e winic y che: —¿Tucꞌa acꞌabꞌa? che e Jesús. Y jaxir che: —Nicꞌabꞌa nen: “Meyra,” porque meyron, che e mabꞌambꞌan mein xeꞌ turu tama e winic era. Pues ojron cocha era e mabꞌambꞌan mein umen que ayan meyra sian mabꞌambꞌan mein xeꞌ ochoyobꞌ turuan tama uyalma e winic era.
LUK 8:31 Y de allí sutpa ojron e sian mabꞌambꞌan mein otronyajr y ucꞌajtiobꞌ tuaꞌ e Jesús tuaꞌ machi atzacarna axiobꞌ esto tama e cꞌajc.
LUK 8:32 Y tor e witzir yajaꞌ ayan cora sian chitam xeꞌ war awiobꞌ, y tamar era e sian mabꞌambꞌan mein cay ucꞌajtiobꞌ tuaꞌ e Jesús tuaꞌ aꞌctanobꞌ oꞌchoyobꞌ tama e sian chitam era. Y e Jesús che: —Erer ixixin, che e Jesús.
LUK 8:33 Y tamar era locꞌoyobꞌ tunor e sian mabꞌambꞌan meinobꞌ tama e winic y sutpa ochoyobꞌ tama sian chitam. Y de allí e sian chitam cay locꞌoy ajniobꞌ tama inteꞌ xijrcojt y ojri cꞌaxiobꞌ tama e jaꞌ, cuchpobꞌ y chamayobꞌ.
LUK 8:34 Entonces conda tin e war ani ucojcobꞌ e sian chitam era cay uwirobꞌ lo que numuy, bꞌactobꞌ y locꞌoy ixiobꞌ ajner y cay uchecsu tunor era tut e gente xeꞌ turobꞌ tama e chinam yajaꞌ y tama e aldea ubꞌan.
LUK 8:35 Entonces e gente tama e chinam locꞌoyobꞌ tuaꞌ uwirobꞌ tucꞌa numuy. Y conda cꞌotoyobꞌ tut e Jesús utajwiobꞌ que e winic xeꞌ chucur ani uyalma umen e sian mabꞌambꞌan mein ya war aturuan tuyejtzꞌer e Jesús y que bꞌujcsebꞌir y que turu ixto usasaꞌ yaꞌ. Y tamar era bꞌactobꞌ tunorobꞌ.
LUK 8:36 Entonces tin e uwirobꞌ lo que numuy cay uchecsu tut tin e war acꞌotoyobꞌ tucꞌa numuy y que tzꞌacpesna e winic xeꞌ chucur ani umen e sian mabꞌambꞌan mein.
LUK 8:37 Y tamar era tunor e gente xeꞌ turobꞌ tama e lugar Gadara era cay upejcobꞌ e Jesús tuaꞌ alocꞌoy tama e lugar era, porque war abꞌactobꞌ meyra. Entonces ochoy e Jesús tama e barco y ixin.
LUK 8:38 Pero conda merato alocꞌoy e Jesús, cay pejcna umen e winic xeꞌ loqꞌuesna e sian mabꞌambꞌan mein tamar y che: —¿Erer ca inxin tacaret? che e winic. Pero ojron e Jesús y che:
LUK 8:39 —Sutpen quiqui tama oꞌtot y chectes tut amaxtac tunor lo que e Dios uche tacaret, che e Jesús. Entonces e winic ixin y cay uchecsu tut tunor e gente tama uchinam tunor lo que cay chena tacar umen e Jesús.
LUK 8:40 Entonces conda e Jesús sutpa cꞌotoy teinxejr jaꞌ ya turobꞌ meyra gente xeꞌ war ucojcobꞌ ucꞌoter, y atzay uwirobꞌ acꞌotoy e Jesús.
LUK 8:41 Entonces cꞌotoy inteꞌ winic tut e Jesús xeꞌ ucꞌabꞌa Jairo xeꞌ jax inteꞌ ajcꞌampar tama inteꞌ sinagoga xeꞌ cotuan tut e Jesús y cay upejca jay erer axin esto tama uyotot
LUK 8:42 porque cꞌanix achamay uwijchꞌoc. Y e ijchꞌoc era war ucojco doce año y jaxir incojt taca tuaꞌ e Jairo. Entonces cay ixin e Jesús tuaꞌ acꞌotoy tama uyotot e Jairo, pero meyra gente war axin tacar ubꞌan este war utacsu ubꞌobꞌ axin.
LUK 8:43 Y ayan inteꞌ ixic tujam e sian gente era xeꞌ ajmuac que intaca anumuy uchꞌichꞌer y ayix doce año que war unumse ubꞌa cocha era. Y iraj iraj war axin tut inteꞌ ajtzꞌaconer tuaꞌ atzꞌacpesna, pero intaca usati tunor utumin y mamajchi umen tzꞌacpesna.
LUK 8:44 Entonces e ixic ixin tupat e Jesús tuaꞌ utajwi ubꞌa tacar y upijchꞌi ubꞌujc. Y tama e momento era conda cꞌapa upijchꞌi ubꞌujc e Jesús quetruma uchꞌichꞌer y tzꞌacpa.
LUK 8:45 Pero e Jesús sutpa uyubꞌi tuaꞌ e gente y che: —¿Chi upijchꞌien? che e Jesús. Pero ojronobꞌ e gente y che: —Machi canata, che tunor e gente era. Pero e Pedro taca e inmojr ajcanuarobꞌ uyareobꞌ e Jesús y chenobꞌ: —¿Y cocha tuaꞌ aware que: “¿Chi war upijchꞌien?” ¿Machi ca awira que war ucꞌotretobꞌ e gente cora cora y que war utacsuetobꞌ axin tic taca? che e Pedro.
LUK 8:46 Pero e Jesús che: —Ayan chi xeꞌ upijchꞌien, porque quetpa chequer taniut que ayan nicꞌotorer xeꞌ locꞌoy tuaꞌ atzꞌacon, che e Jesús.
LUK 8:47 Pero e ixic, cocha majax mucur lo que uche, cꞌotoy cotuan tut e Jesús war achincha y cay uchecsu tut tunor e gente tucꞌa tuaꞌ que upijchꞌi ubꞌujc e Jesús, y que tzꞌacpesna wacchetaca tamar taca era.
LUK 8:48 Entonces e Jesús uyare e ixic y che: —Tzꞌacpesbꞌiret coner umen que war icꞌupseyan tamaren. Quiqui tama oꞌtot taca ujiriar e Dios, che e Jesús.
LUK 8:49 Y merato acꞌapa oꞌjron e Jesús taca e ixic conda yopa inteꞌ winic xeꞌ tari tama uyotot e Jairo taca inteꞌ ojroner tuaꞌ uyare e Jairo y che: —Awijchꞌoc chamenix. Irix aqꞌueche axin e Ajcanseyaj, che e winic xeꞌ tari tama uyotot e Jairo.
LUK 8:50 Pero conda e Jesús uyubꞌi e ojroner era uyare e Jairo y che: —Ira ibꞌacta. Cꞌupseyanen tamaren taca y awijchꞌoc cꞌani atzꞌacpa, che e Jesús.
LUK 8:51 Entonces conda cꞌotoyobꞌ tama uyotot e Jairo, e Jesús mamajchi uyacta oꞌchoy, sino que ajrer uyacta ochoyobꞌ e Pedro taca e Santiago y e Juan, y utuꞌ y utata e ijchꞌoc.
LUK 8:52 Y tunor e gente xeꞌ turobꞌ era taquix aꞌruobꞌ porque inyaj tama uyalmobꞌ tamar uchamer e ijchꞌoc. Pero e Jesús che: —Ira ixaru, e ijchꞌoc majax chamen, sino que intaca war awayan, che e Jesús.
LUK 8:53 Pero jaxirobꞌ intaca utzeniobꞌ porque war unatobꞌ que chamenix e ijchꞌoc.
LUK 8:54 Entonces e Jesús ujajpi ucꞌabꞌ e ijchꞌoc y uyare taca inteꞌ nuxi nuc: —Achpen, ijchꞌoc, che e Jesús.
LUK 8:55 Y tama e momento era sutpa bꞌixcꞌa e ijchꞌoc, y wacchetaca achpa. Entonces e Jesús uyare utuꞌ tuaꞌ uwese.
LUK 8:56 Y utuꞌ y utata bꞌacta uwirobꞌ, pero e Jesús uyare y che: —Ira ichecsu tut e gente lo que numuy era, che e Jesús.
LUK 9:1 Pues tama inyajr e Jesús cay umorojse e doce uyajcanuarobꞌ y cay uyajcꞌu ucꞌotorer tuaꞌ uyajnes axin tunor e mabꞌambꞌan mein y tuaꞌ utzꞌacpes tunor tin e ajmuac.
LUK 9:2 Y war uyebꞌta axiobꞌ uyajcanuarobꞌ tuaꞌ uchecsuobꞌ uyojroner e Dios tama uchinam e Dios tut e gente axin y tuaꞌ utzꞌacpesobꞌ tunor tin e ajmuac.
LUK 9:3 Y e Jesús uyare e doce uyajcanuarobꞌ y che: —Matucꞌa tuaꞌ iqꞌueche axin conda ixixin tama e bꞌir. Ira iqꞌueche axin inteꞌ iteꞌ tuaꞌ ixbꞌoyo tamar, y nien imucuc machi tuaꞌ iqꞌueche axin, y nien e pan, y nien itumin, y ma erer iqꞌueche axin chateꞌ ibꞌujc.
LUK 9:4 Y tic taca tiaꞌ ixcꞌotoy tama ingojr otot, quetpenic yajaꞌ este que ixlocꞌoy tama e lugar yajaꞌ.
LUK 9:5 Y tiaꞌ machi cꞌani uchꞌamiox, loqꞌuenic quiquic tama e chinam era y tijtinic e tanlum tama iyoc tuaꞌ unatobꞌ e gente era que mabꞌambꞌan lo que war uchiobꞌ que machi cꞌani uyubꞌiobꞌ uyojroner e Dios, che e Jesús.
LUK 9:6 Entonces locꞌoyobꞌ e doce uyajcanuarobꞌ y ixiobꞌ tama inteꞌ inteꞌ aldea, war uchecsuobꞌ uyojroner e Dios tama e corpesiaj tut e gente axin y war utzꞌacpesobꞌ tin e ajmuac.
LUK 9:7 Pues entonces conda e Herodes xeꞌ jax gobernador tama e departamento Galilea cꞌotoy unata tunor lo que war uche e Jesús, machi unata tucꞌa tuaꞌ ubꞌijnu porque ayan tin e chenobꞌ que jax e Juan xeꞌ ajchꞌuymar xeꞌ sutpa bꞌixcꞌa.
LUK 9:8 Y ayan tin e chenobꞌ que sutpa checta e profeta Elías xeꞌ turuan tama e onian tiempo. Y ayan tin e chenobꞌ que sutpa bꞌixcꞌa inteꞌ profeta xeꞌ turuan tama e onian tiempo.
LUK 9:9 Pero e Herodes che: —Nen inwarix tuaꞌ axujra alocꞌoy ujor e Juan, pero ¿chito ca nic era, que nen warto umbꞌi acꞌajna ucꞌabꞌa? che e Herodes. Y war usajca cocha tuaꞌ uwira ut e Jesús.
LUK 9:10 Pues entonces sutpa tariobꞌ e doce apostolobꞌ y cay uyareobꞌ e Jesús tunor lo que numuy. Entonces e Jesús uqꞌueche ixiobꞌ tama inteꞌ choquem lugar xeꞌ majax innajt tut e chinam Betsaida.
LUK 9:11 Pero ayan cora sian gente xeꞌ cꞌotoy unatobꞌ tiaꞌ ixin e Jesús, y tamar era ixiobꞌ tupat ubꞌan. Y conda cꞌotoyobꞌ tiaꞌ turu e Jesús, jaxir atzay uchꞌamiobꞌ y cay uchecsu tutobꞌ tunor uchinam e Dios y cay utzꞌacpes tin e ajmuac.
LUK 9:12 Y conda e doce apostolobꞌ cay uwirobꞌ que cꞌanix acbꞌare, uyareobꞌ e Jesús y che: —Cꞌanix acbꞌare y mix tucꞌa e ototobꞌ tara tiaꞌ erer utajwiobꞌ tucꞌa tuaꞌ ucꞌuxiobꞌ tunor e sian gente era. Actan chicobꞌ tuaꞌ axiobꞌ ajiriobꞌ y tuaꞌ awiobꞌ tama inteꞌ aldea o tama inteꞌ lugar xeꞌ majax innajt ticoit, che e apostolobꞌ.
LUK 9:13 Pero e Jesús che: —Wesenic nox, che e Jesús. Y che e apostolobꞌ: —Pero matucꞌa ayan tara, ajrer taca cinco ut pan y chacojt chay. O ¿acꞌani ca tuaꞌ caxin camani e comida tuaꞌ cawese e sian gente era? che e apostolobꞌ.
LUK 9:14 Y ayan meyra sian gente era este 5,000 winicobꞌ, pero e Jesús uyare uyajcanuarobꞌ y che: —Arenic e sian gente era tuaꞌ aturuanobꞌ intzujc intzujc de a cincuenta, che e Jesús.
LUK 9:15 Y bꞌan uchiobꞌ y turuanobꞌ tunorobꞌ.
LUK 9:16 Entonces e Jesús uchꞌami e cinco ut pan y chacojt chay tama ucꞌabꞌ y sutpa uwira tut e qꞌuin tichan y cay ucꞌajti taca e Dios y uyajcꞌu gracias tama e comida era y cay ucꞌajti que e pan y e chay axin abꞌoro. Y de allí cay uyajcꞌu uyajcanuarobꞌ tuaꞌ uxeriobꞌ taca e sian gente. Y conda war uxeriobꞌ e comida más abꞌoro axin.
LUK 9:17 Y tunor e gente wiobꞌ y chuanobꞌ, y nacpat era umorojsiobꞌ doce chiquiꞌ tamar lo que quetpato.
LUK 9:18 Pues tama inyajr e Jesús war ucꞌajti taca e Dios ubꞌajner y ya turobꞌ uyajcanuarobꞌ tacar ubꞌan. Entonces sutpa uyubꞌi tuobꞌ y che: —¿Tucꞌa war che e gente tacaren? che e Jesús.
LUK 9:19 Y che uyajcanuarobꞌ: —Ayan tin e war ubꞌijnuobꞌ que net jax e Juan xeꞌ ajchꞌuymar, y ayan tin e war ubꞌijnu que net jax e profeta Elías, y ayan tin e war ubꞌijnu que net jax inteꞌ onian profeta xeꞌ sutpa bꞌixcꞌa, che uyajcanuarobꞌ.
LUK 9:20 Entonces e Jesús sutpa uyubꞌi tuobꞌ y che: —Y nox, ¿tucꞌa iware tamaren? che e Jesús. Y e Pedro che: —Net jax e Cristo xeꞌ ebꞌetna tariet umen e Dios tuaꞌ acorpeson, che e Pedro.
LUK 9:21 Pues entonces e Jesús uyare uyajcanuarobꞌ y che: —Ira iwirse e gente lo que cꞌani inwareox era.
LUK 9:22 Nen xeꞌ Uyunenen e winic ucꞌani tuaꞌ innumse nibꞌa meyra y ucꞌani tuaꞌ axejbꞌna niut umen e nuquir winicobꞌ tama e Israel y umen uwinquir e inmojr sacerdotiobꞌ, y ucꞌani tuaꞌ axejbꞌna niut umen e ajcanseyajobꞌ tama uley e Moisés. Jaxirobꞌ tuaꞌ uchamsenobꞌ pero tama e uxteꞌ día cꞌani insujta imbꞌixqꞌuesna tujam e chamenobꞌ, xeꞌ ojron e Jesús taca uyajcanuarobꞌ.
LUK 9:23 Y de allí cay ojron e Jesús taca tunor e inmojr gente era y che: —Jay ayan tin e cꞌani axin tanipat, ucꞌani tuaꞌ unajpes ubꞌa y axin tanipat ejcꞌar ejcꞌar motor que axin achamesna ani tamaren.
LUK 9:24 Porque tin e cꞌani ucorpes ucuxtar cꞌani asatpa, pero tin e usati ucuxtar tamaren cꞌani acorpesna.
LUK 9:25 ¿Tucꞌa ucꞌampibꞌir tut inteꞌ winic jay axin uchꞌami tunor lo que ayan tara tor e rum jay tamar era axin usati uyalma?
LUK 9:26 Y jay ayan tin e axin asubꞌajra tamaren y tamar niwojroner, nen xeꞌ Uyunenen e winic cꞌani insubꞌajra tamar jaxir ubꞌan conda waten tuaꞌ incꞌotori taca tunor utawarer Nitata y taca utawarer tunor e angelobꞌ xeꞌ erach.
LUK 9:27 Y inwareox coner que ayan tin e turox tara que machi tuaꞌ ixchamay este que iwiren waten taca ucꞌotorer e Dios, che e Jesús
LUK 9:28 Pues entonces conda cꞌapa numuy ocho día desde que e Jesús ojron cocha era, ixin tꞌabꞌay tujor inteꞌ witzir tuaꞌ ucꞌajti taca e Dios, y ixin ubꞌan e Pedro y e Santiago y e Juan.
LUK 9:29 Y conda e Jesús war ucꞌajti taca e Dios, sutpa intiach uwirnar, y ubꞌujc sutpa sacsac este que ejpray ut.
LUK 9:30 Y wacchetaca checta chateꞌ winicobꞌ; inteꞌ jax e Moisés y otronteꞌ jax e Elías. Y war oꞌjronobꞌ taca e Jesús.
LUK 9:31 Y war ejpray xojyna e winicobꞌ era umen utawarer e Dios, y cay ojronobꞌ taca e Jesús tamar e cꞌuxner lo que aquetpa tuaꞌ unumse ubꞌa conda axin achamay tama e chinam Jerusalem.
LUK 9:32 Y motor que e Pedro y upiarobꞌ jajpnobꞌ meyra umen e waynij pero machi wayanobꞌ, y tamar era uwirobꞌ utawarer e Jesús y uwirobꞌ utawarer e chateꞌ winicobꞌ era ubꞌan.
LUK 9:33 Entonces conda cay locꞌoyobꞌ e Moisés y e Elías, e Pedro uyare e Jesús y che: —Cawajcanseyajet, catzay que turon tara tacaret. Cachenic uxteꞌ rancho, inteꞌ tabꞌa, y inteꞌ tuaꞌ e Moisés, y inteꞌ tuaꞌ e Elías, che e Pedro. Pero e Pedro machi unata tucꞌa war oꞌjron.
LUK 9:34 Y conda wartocto oꞌjron e Pedro wacchetaca checta tari inteꞌ tocar xeꞌ ubꞌujcse tunor or e lugar era. Y conda cay uwirobꞌ macuir e tocar bꞌactobꞌ.
LUK 9:35 Y de allí cay uyubꞌiobꞌ inteꞌ nuc macuir e tocar xeꞌ ojron y che: —Jaxto era Niunen xeꞌ inyajta ut, ubꞌinic lo que uyareox, che e nuc xeꞌ uyubꞌiobꞌ locꞌoy tama e tocar.
LUK 9:36 Pero conda cꞌapa ojron e nuc era, sutpa uwirobꞌ que ajtaca e Jesús war ubꞌajner. Pero uyajcanuarobꞌ quetpobꞌ tzꞌustaca, y mamajchi tacar ucꞌajtiobꞌ lo que uwirobꞌ era.
LUK 9:37 Entonces tama otronteꞌ día ecmay tariobꞌ tor e witzir, y conda ecmay utajwiobꞌ ubꞌobꞌ taca meyra gente.
LUK 9:38 Y ayan inteꞌ winic tujam e gente era xeꞌ cay ojron taca inteꞌ nuxi nuc y che: —Cawajcanseyajet, yajtan ut yar niunen era, porque inteꞌ taca ayan tanibꞌa,
LUK 9:39 y jaxir chucur umen inteꞌ mabꞌambꞌan mein y achena aꞌru umener, y achamay achꞌan, y oꞌjmay uyar utiꞌ, y ucꞌuxi ut uyej, y utori ubꞌa iraj iraj, y machi cꞌani aꞌctana umen e mabꞌambꞌan mein era.
LUK 9:40 Y inwarix awajcanuarobꞌ tuaꞌ ulocsiobꞌ e mabꞌambꞌan mein pero machi obꞌnobꞌ, che utata e sitz era.
LUK 9:41 Y e Jesús uyare uyajcanuarobꞌ y che: —Tzajtaca iut nox xeꞌ machi cꞌani ixcꞌupseyan tama e Dios porque warto ibꞌijnu tama e onian bꞌijnusiaj. ¿Cobꞌa tiempo tuaꞌ inquetpa tacarox y cobꞌa tiempo tuaꞌ innumse nibꞌa tama tunor lo que war iche? Tares e sitz yax, che e Jesús.
LUK 9:42 Pero conda e sitz war acꞌotoy tuyejtzꞌer e Jesús, wacarpa ixin tut e rum umen e mabꞌambꞌan mein y cay utori ubꞌa otronyajr. Pero e Jesús cay utzacre alocꞌoy e mabꞌambꞌan mein tama e sitz, y tamar era locꞌoy ajni e mabꞌambꞌan mein. Entonces cocha tzꞌacpesna e sitz sutpa ixin taca utata.
LUK 9:43 Y tunor e gente cay bꞌacta uwirobꞌ que nojta ucꞌotorer e Dios. Entonces cay ojron e Jesús taca uyajcanuarobꞌ y che:
LUK 9:44 —Ubꞌinic lo que cꞌani inwareox era y ira inajpes; pues nen xeꞌ Uyunenen e winic ucꞌani tuaꞌ inqꞌuejcha inxin tuaꞌ inquetpa yebꞌar ucꞌabꞌobꞌ e winicobꞌ xeꞌ turobꞌ tara tor e rum, che e Jesús.
LUK 9:45 Pero uyajcanuarobꞌ machi unatobꞌ tucꞌa war aꞌrobꞌnobꞌ umen e Jesús, pues mucresbꞌir tunor era tutobꞌ umen e Dios, y tamar era ma chequer tutobꞌ. Y bꞌactobꞌ tuaꞌ ucꞌajtiobꞌ tuaꞌ e Jesús tuaꞌ uchectes tunor era tutobꞌ otronyajr.
LUK 9:46 Pues tama inyajr uyajcanuarobꞌ e Jesús cay bꞌiritiobꞌ jaxobꞌ taca que chi ca nic xeꞌ más ayan ucꞌampibꞌir tujamobꞌ.
LUK 9:47 Pero e Jesús war unata tucꞌa war ubꞌijnuobꞌ. Entonces uchꞌami inteꞌ yar chuchu sitz y uwabꞌu tuyejtzꞌerobꞌ
LUK 9:48 y che: —Tin e uchꞌami inteꞌ yar chuchu sitz cocha era xeꞌ war acꞌupseyan tamaren, war uchꞌamien nen ubꞌan. Y tin e uchꞌamien nen, war uchꞌami tin e uyebꞌta tarien ubꞌan. Y tamar era tin e más chuchu tijam nox, jax xeꞌ más nojta tut e Dios, che e Jesús.
LUK 9:49 Pues tama inyajr conda e ajcanuarobꞌ turobꞌ taca e Jesús cay ojron e Juan y che: —Niwinquiraret, catajwi cabꞌa taca inteꞌ winic xeꞌ war ucꞌampes acꞌabꞌa tuaꞌ utzacre alocꞌoy inteꞌ mabꞌambꞌan mein, pero machi cacꞌani y caware que ma erer ucꞌampes acꞌabꞌa cocha jaxir machi war axana tacaron, che e Juan.
LUK 9:50 Pero e Jesús che: —Ira iware e winicobꞌ que ma erer ucꞌampesobꞌ nicꞌabꞌa, porque tin e machi war aqꞌuijna uwiron jax capiar ubꞌan, che e Jesús.
LUK 9:51 Pues conda warix acꞌotoy e día conda aquetpa tuaꞌ atꞌabꞌay axin e Jesús tut e qꞌuin, cay uyare uyajcanuarobꞌ y che: —Nen ucꞌani ixto tuaꞌ inxin esto tama e chinam Jerusalem, che e Jesús.
LUK 9:52 Entonces e Jesús uyebꞌta ixin bꞌajxan cora winicobꞌ esto tama inteꞌ aldea tama e departamento Samaria tuaꞌ usajcobꞌ tiaꞌ tuaꞌ awayanobꞌ y tiaꞌ tuaꞌ awesenobꞌ.
LUK 9:53 Pero conda e gente xeꞌ turobꞌ tama e aldea era cꞌotoy unatobꞌ que war axiobꞌ esto tama e chinam Jerusalem, qꞌuijnobꞌ y machi acꞌajnobꞌ.
LUK 9:54 Pero conda natanwa tunor era umen uyajcanuarobꞌ e Jesús xeꞌ jax e Santiago y e Juan, cay uyareobꞌ e Jesús y chenobꞌ: —Cawinquiraret, ¿Acꞌani ca tuaꞌ caware eꞌcmay watar e cꞌajc tichan tut e qꞌuin tuaꞌ acꞌaxi tama ujorobꞌ tuaꞌ acꞌapesnobꞌ umen e cꞌajc era bꞌan cocha cay uche e profeta Elías tama e onian tiempo? che e Santiago y e Juan.
LUK 9:55 Pero sutpa irna utobꞌ umen e Jesús xeꞌ cay ucꞌaye y che: —Nox machi war inata tucꞌa mein xeꞌ war ubꞌijres ijor.
LUK 9:56 Porque nen xeꞌ Uyunenen e winic machi ebꞌetna tarien tuaꞌ insati e winicobꞌ axin, sino que tuaꞌ incorpesobꞌ, che e Jesús. Entonces locꞌoy ixiobꞌ esto tama otronteꞌ aldea.
LUK 9:57 Entonces conda war axanobꞌ tama inteꞌ bꞌir, cꞌotoy inteꞌ winic tut e Jesús y che: —Niwinquiraret, cꞌani inxin tacaret tic taca tiaꞌ iꞌxin, che e winic.
LUK 9:58 Y e Jesús uyare e winic y che: —E chꞌajch ayan uchꞌen tiaꞌ tuaꞌ awayan, y e mut ayan usijc tiaꞌ tuaꞌ apacwan awayan, pero nen xeꞌ Uyunenen e winic ma tiaꞌ tuaꞌ inchꞌabꞌu nijor tuaꞌ inwayan, che e Jesús.
LUK 9:59 Y e Jesús uyare otronteꞌ winic y che: —Lar tacaren, che e Jesús. Pero e winic che: —Niwinquiret, actanento tuaꞌ inxin incojco nitata este que axin achamay, y de allí waten tacaret, che e winic.
LUK 9:60 Pero e Jesús uyare e winic otronyajr y che: —Actan tin e chamen turu tama uyalma tuaꞌ axin umuqui tin e war achamay, pero net, quiqui chectes tut e gente tic taca cocha tuaꞌ oꞌchoyobꞌ tama uchinam e Dios, che e Jesús.
LUK 9:61 Y cꞌotoy otronteꞌ winic xeꞌ upejca e Jesús y che: —Niwinquiret, cꞌani inxin tacaret pero actanento tuaꞌ inxin tama niotot tuaꞌ inware nitata y nituꞌ y tunor nipiarobꞌ tucꞌa war inche era tuaꞌ machi ubꞌijnuobꞌ que ¿tiaꞌ ixien? che e winic.
LUK 9:62 Entonces e Jesús uyare e winic era y che: —Tunor tin e war apatnobꞌ war uwirobꞌ tuaꞌ unatobꞌ jay war alocꞌoy imbꞌutz tunor upatnar. Pero jay war apatna inteꞌ winic y war achꞌujcsan tupat, machi tuaꞌ alocꞌoy imbꞌutz upatnar. Y bꞌan ubꞌan tin cꞌani oꞌchoy tama uchinam e Dios. Conda acay axana tama ubꞌir e Dios, jay warto uwira tupat tuaꞌ ubꞌijnu uche e mabꞌambꞌanir otronyajr, machi tuaꞌ oꞌchoy tama uchinam e Dios, che e Jesús.
LUK 10:1 Pues entonces conda cꞌapa ojron Cawinquirar, cay usajca setenta uyajcanuarobꞌ tujor lo que ayanix, y uyebꞌta ixiobꞌ bꞌajxan tuaꞌ uchecsu uchinam e Dios tut e gente ixin. Chacojt chacojt ixiobꞌ tama tunor e aldea y tama tunor e chinam tiaꞌ aquetpa tuaꞌ acꞌotoy nacpat Cawinquirar.
LUK 10:2 Pero conda merato axin e Jesús, cay uyare uyajcanuarobꞌ y che: —Cꞌani inwareox era que ayan meyra gente xeꞌ turix tuaꞌ uchꞌamiobꞌ niwojroner, pero ma tzꞌacar tin e war uchecsuobꞌ uyojroner e Dios tama e corpesiaj tut e gente bꞌan cocha inteꞌ nuxi rum xeꞌ turix tuaꞌ amorojsena e cosecha tamar pero que mato tzꞌacar e manobꞌ xeꞌ tuaꞌ umorojsiobꞌ e cosecha era. Y tamar era inwareox que cꞌajtinic taca Cawinquirar Dios tuaꞌ uyebꞌta watar más ajpatnarobꞌ tuaꞌ uchescuobꞌ niwojroner bꞌan cocha ucꞌani tuaꞌ acꞌajtna tut e ajyum cosecha tuaꞌ uyebꞌta watar más ajpatnarobꞌ tuaꞌ umorojsiobꞌ tunor e nuxi cosecha era.
LUK 10:3 Pero cꞌani inwareox era que nox larox tacar cora yar oveja y e gente tiaꞌ tuaꞌ ixcꞌotoy larobꞌ tacar cora sian coyote. Pero ira ixbꞌacta porque Cadiosir ya turu tacarox.
LUK 10:4 Ira iqꞌueche axin itumin, y nien inteꞌ ichijr machi tuaꞌ iqꞌueche axin. Y machi tuaꞌ iqꞌueche axin otronteꞌ ixanabꞌ, y ira ixquetpa ixwawan ixojron tut e bꞌir, sino que quiquic esto tiaꞌ cꞌani ixcꞌotoy.
LUK 10:5 Y conda ixochoy tama inteꞌ otot arenic e ajyum otot cocha era y che: “Que ujiriar e Dios turic taca tunorox xeꞌ turox tama e otot era.”
LUK 10:6 Y jay e gente tama e otot era atzay uchꞌamiox tuaꞌ uyubꞌiobꞌ uyojroner e Dios, entonces axin aquetpa ujiriar e Dios tacarobꞌ. Pero jay e gente tama e otot era machi atzay uchꞌamiox, entonces machi tuaꞌ aquetpa ujiriar e Dios tacarobꞌ.
LUK 10:7 Pues quetpenic tama inteꞌ taca otot tiaꞌ ixcꞌotoy tiaꞌ atzay uwirox y ya taca tuaꞌ ixweꞌ y tuaꞌ ixoychꞌi lo que ixajcꞌuna. Porque inteꞌ man ucꞌani tuaꞌ atojya tama e patnar lo que war uche.
LUK 10:8 Conda ixcꞌotoy tama inteꞌ chinam tiaꞌ atzay ixchꞌajma, cꞌuxic tunor lo que ixajcꞌuna. Y ira ixnumuy cora cora tama e ototobꞌ.
LUK 10:9 Y tzꞌacpesic e ajmuacobꞌ y arenic cocha era y che: “Watarix e día conda Cadiosir axin acꞌotori tara tor e rum.”
LUK 10:10 Y jay ixcꞌotoy tama inteꞌ chinam tiaꞌ machi ixchꞌajma, loqꞌuenic tama e calle tama e chinam era y arenic e gente cocha era y che:
LUK 10:11 “Y este e tanlum lo que chꞌuwan tama coc era war catijti tiut tuaꞌ inata que mabꞌambꞌan lo que war iche que machi cꞌani ichꞌami uyojroner e Dios. Y natanic era que cꞌanix ani ichꞌami uchinam e Dios.”
LUK 10:12 Bꞌan tuaꞌ iware tin e machi uchꞌamiox tuaꞌ uyubꞌiobꞌ uyojroner e Dios porque jaxirobꞌ más meyra tuaꞌ ajajtzꞌobꞌ conda acꞌotoy e día tuaꞌ e juicio. Pues canata que tin e turobꞌ ani tama e chinam Sodoma tama e onian tiempo cꞌani ajajtzꞌobꞌ meyra conda acꞌotoy e día tuaꞌ e juicio. Pero tin e machi uchꞌamiox tuaꞌ uyubꞌiobꞌ uyojroner e Dios más meyra tuaꞌ ajajtzꞌobꞌ que jaxirobꞌ, che e Jesús.
LUK 10:13 Pues entonces ojron e Jesús otronyajr y che: —Tzajtaca iut nox xeꞌ ixturuan tama e chinam Corazín. Y tzajtaca iut nox xeꞌ ixturuan tama e chinam Betsaida ubꞌan. Porque jay chembꞌir ani e sian milagro tama e chinam Tiro y tama e chinam Sidón lo que chembꞌir tiut nox, ayix día ani que uchꞌamiobꞌix ani niwojroner y uyactobꞌix ani tunor e nuxi mabꞌambꞌanir lo que cay uchiobꞌ. Y ixiobꞌix ani uchectes ubꞌobꞌ tut e gente que war uyactobꞌ tunor umabꞌambꞌanirobꞌ umen que ulapiobꞌ ani e bꞌujc xeꞌ jarbꞌir tama e succhij y umen que uyariobꞌ ani e tan tama ujorobꞌ, bꞌan cocha cay uchiobꞌ e gente era.
LUK 10:14 Pero tama e día tuaꞌ e juicio más nojta tuaꞌ ixjajtzꞌa nox que tin e turobꞌ ani tama e chinam Tiro y xeꞌ turobꞌ ani tama e chinam Sidón xeꞌ meyra cay uchiobꞌ e mabꞌambꞌan.
LUK 10:15 Y nox xeꞌ turox tama e chinam Capernaum war itattzꞌi ibꞌa que cꞌani ixixin tichan tuaꞌ ixturuan taca e Dios umen taca que galan uwirnar ichinam. Pero machi tuaꞌ ixixin tichan, sino que ucꞌani tuaꞌ ixixin tama uchꞌenir e diablo.
LUK 10:16 ’Tin e atzay uchꞌamiox tuaꞌ uyubꞌiobꞌ uyojroner e Dios war uchꞌamienobꞌ nen ubꞌan, y tin e uxejbꞌiobꞌ iut war uxejbꞌiobꞌ niut nen ubꞌan, y tin e uxejbꞌiobꞌ niut nen war uxejbꞌiobꞌ ut Nitata Dios xeꞌ uyebꞌta tarien ubꞌan, che e Jesús uyare e setenta uyajcanuarobꞌ. Entonces locꞌoy ixiobꞌ e setenta uyajcanuarobꞌ era tuaꞌ uchiobꞌ lo que arobꞌnobꞌ umen e Jesús.
LUK 10:17 Entonces conda sutpa cꞌotoyobꞌ e setenta ajcanuarobꞌ era tut e Jesús otronyajr war atzayobꞌ tunorobꞌ y cay ojronobꞌ y chenobꞌ: —Cawinquiraret, este e mabꞌambꞌan meinobꞌ ucꞌupsionobꞌ conda catzacre tama acꞌabꞌa tuaꞌ alocꞌoyobꞌ tama e gente, che uyajcanuarobꞌ.
LUK 10:18 Y che e Jesús: —Bꞌan ya, pero iwiric ibꞌa tuaꞌ machi itattzꞌi ibꞌa bꞌan cocha cay uche e Satanás, porque nen inwira conda cucrema tut e qꞌuin y ojri tari tor e rum wacchetaca bꞌan cocha conda eijbꞌi ut e qꞌuin.
LUK 10:19 Pero nen cꞌani inwajcꞌox e cꞌotorer tuaꞌ iwajnes axin tunor ucꞌotorer e diablo xeꞌ jax xeꞌ war aqꞌuijna uwiron. Y war inwajcꞌox e cꞌotorer ubꞌan tuaꞌ ixxana tujor e chan o tujor e sinam, y jay axin ucꞌuxiox, machi tuaꞌ ixchamay y machi tuaꞌ acꞌuxun.
LUK 10:20 War ixtzay era que ucꞌupsiox e sian mabꞌambꞌan mein, pero más ucꞌani tuaꞌ ixtzay que erer ixcꞌotoy tut e qꞌuin conda ixchamay porque chꞌar tzꞌijbꞌabꞌir icꞌabꞌa tichan taca e Dios, che e Jesús.
LUK 10:21 Pues entonces bꞌutcꞌa uyalma e Jesús taca Unawalir e Dios y cay tzay meyra. Y cay ucꞌajti taca e Dios y che: —Intattzꞌi acꞌabꞌa Nitatet xeꞌ turet tichan porque net Uwinquiraret tujor tunor lo que ayan tichan y tujor tunor lo que ayan tara tor e rum ubꞌan. Porque net war acanse tin e chuchu ujor tunor lo que mucresbꞌir amener tut tin e nojta ujor. Y bꞌan war ache, Nitatet, porque bꞌan war acꞌani, che e Jesús conda war ucꞌajti taca e Dios.
LUK 10:22 Y de allí e Jesús uyare e gente y che: —Nitata cꞌapa uyajqꞌuen tunor lo que ayan. Y mamajchi unata chien nen sino que ajtaca Nitata unata. Y mamajchi unata chi Nitata sino que nen taca innata y tin e inxin incanse ubꞌan, che e Jesús.
LUK 10:23 Entonces e Jesús sutpa uwira ut uyajcanuarobꞌ y che: —Chojbꞌesbꞌirobꞌ tunor tin e axin uwirobꞌ taca unacꞌutobꞌ lo que war iwira nox era.
LUK 10:24 Porque meyra profetobꞌ xeꞌ turuanobꞌ tama e onian tiempo y meyra reyobꞌ xeꞌ turuanobꞌ tama e onian tiempo uyusreobꞌ tuaꞌ uwirobꞌ lo que war iwira nox era, pero machi uwirobꞌ. Y uyusreobꞌ tuaꞌ uyubꞌiobꞌ lo que war iyubꞌi nox era, pero machi uyubꞌiobꞌ jaxirobꞌ, che e Jesús.
LUK 10:25 Pues ayan inteꞌ ajcanseyaj tama uley e Moisés xeꞌ cꞌotoy tut e Jesús, war ubꞌijnu tuaꞌ umajres ani e Jesús y tamar era cay uyubꞌi tuaꞌ y che: —Niwinquiret, ¿tucꞌa ucꞌani tuaꞌ inche tuaꞌ inchꞌami e cuxtar xeꞌ machi tuaꞌ acꞌapa? che e ajcanseyaj tama uley e Moisés era.
LUK 10:26 Y che e Jesús: —¿Tucꞌa chꞌar tzꞌijbꞌabꞌir tama uley e Moisés? ¿Tucꞌa oybꞌi net tamar? che e Jesús.
LUK 10:27 Entonces sutpa ojron e ajcanseyaj tama uley e Moisés era y che: —Pues chꞌar tzꞌijbꞌabꞌir umen e Moisés que: “Yajtan ut Iwinquirar Dios taca tunor iwalma, y taca tunor icuxtar, y taca tunor iqꞌuecꞌojsiaj, y taca tunor ijor, y yajtan ut apiarobꞌ bꞌan cocha ayajta oit abꞌa net”, che e ajcanseyaj tama uley e Moisés era.
LUK 10:28 Entonces che e Jesús: —Bꞌan ixto yaꞌ. Y jay iꞌxin ache tunor era, entonces iꞌxin achꞌami e cuxtar xeꞌ machi tuaꞌ acꞌapa, che e Jesús.
LUK 10:29 Pero e ajcanseyaj tama uley e Moisés, cocha ayan tin e tujam upiarobꞌ xeꞌ machi war uyajta ut, sutpa uyubꞌi tuaꞌ e Jesús otronyajr y che: —¿Y chi nipiar? che e ajcanseyaj tama uley e Moisés.
LUK 10:30 Entonces ojron e Jesús otronyajr y che: —Ayan inteꞌ ojroner tama inteꞌ winic xeꞌ turu tama e chinam Jerusalem xeꞌ locꞌoy ixin tama inteꞌ uxambꞌar. Y tama uxambꞌar quetpa tuaꞌ axin esto tama e chinam Jericó, y conda war axin tama e bꞌir wacchetaca checta cora ajxujch xeꞌ cay ucucruobꞌ cꞌaxi tut e bꞌir y cay uyobꞌpruobꞌ, y ulocsiobꞌ tunor utumin y ulocsiobꞌ tunor ubꞌujc y uyactobꞌ satar usasaꞌ tor e rum, y locꞌoy ixiobꞌ e ajxujchꞌobꞌ era.
LUK 10:31 Y numuy inteꞌ sacerdote tama e bꞌir era y conda uwira que chꞌar inteꞌ winic xeꞌ satar ut uwirnar tor e bꞌir, matucꞌa uche, intaca numuy ixin.
LUK 10:32 Y de allí sutpa numuy otronteꞌ winic tama e bꞌir era xeꞌ jax inteꞌ levita xeꞌ jax inteꞌ ajtacarsiaj tuaꞌ e sacerdotiobꞌ, y conda sutpa uwira que chꞌar e winic era tor e bꞌir, matucꞌa uche, intaca numuy ixin.
LUK 10:33 Pero de allí numuy inteꞌ winic tama e bꞌir era xeꞌ tuaꞌ e chinam Samaria, y conda sutpa uwira que chꞌar e winic era, cay uyajta ut.
LUK 10:34 Entonces ixin tuyejtzꞌer tuaꞌ utacre y cay uyari e vino taca e aceite tama uchec e winic. Y de allí utꞌabꞌse tujor uchij y uqꞌueche ixin y cay usicbꞌa ingojr otot tiaꞌ tuaꞌ aquetpa achꞌan, y yajaꞌ cay ucojco e winic.
LUK 10:35 Entonces tama otronteꞌ día conda cꞌanix alocꞌoy e winic xeꞌ tuaꞌ e chinam Samaria cay ulocse chateꞌ ut utumin y uyajcꞌu e ajyum otot tuaꞌ ucojco e ajmuac era este que atzꞌacpa y che: “Y jay asati más e tumin, inxin inwajqꞌuet uyeror conda insutpa inyopa otronyajr”, che e winic xeꞌ tuaꞌ e chinam Samaria. Tara acꞌapa e ojroner, che e Jesús.
LUK 10:36 Entonces e Jesús sutpa uyubꞌi tuaꞌ e ajcanseyaj tama uley e Moisés y che: —¿Tucꞌa abꞌijnu? ¿Chi xeꞌ más upiar e winic xeꞌ chꞌar tut e bꞌir tujam e uxteꞌ winicobꞌ era? che e Jesús.
LUK 10:37 Entonces ojron e ajcanseyaj tama uley e Moisés y che: —Jax xeꞌ uyajta ut upiar, che e ajcanseyaj era. Entonces che e Jesús: —Quiqui chen bꞌan cocha cay uche e winic xeꞌ tuaꞌ e chinam Samaria, che e Jesús.
LUK 10:38 Pues entonces warto axana e Jesús tuaꞌ acꞌotoy tama e chinam Jerusalem, y tamar era cꞌotoy tama inteꞌ aldea tiaꞌ turu inteꞌ ixic xeꞌ ucꞌabꞌa Marta, y jaxir upejca e Jesús tuaꞌ oꞌchoy tama uyotot.
LUK 10:39 Pues e Marta era ayan inteꞌ uwijtzꞌin xeꞌ ucꞌabꞌa María xeꞌ cꞌotoy turuan tuyejtzꞌer unuc uyoc e Jesús tuaꞌ uyubꞌi tunor uyojroner.
LUK 10:40 Pero e Marta ma jabꞌar tuaꞌ uyubꞌi uyojroner e Jesús porque war ubꞌijnu tama tunor lo que war uche tama ucocina, y tamar era cꞌotoy tut e Jesús tuaꞌ aqꞌuecran y che: —Niwinquiraret, ¿machi ca abꞌijnu tamaren que niwijtzꞌin war uyacten nibꞌajner tama e cocina? Tzacren chic niwijtzꞌin era tuaꞌ utacren, che e Marta.
LUK 10:41 Pero che Cawinquirar: —Marta, net war abꞌijnu meyra tama tunor e patnar lo que war ache tama e cocina y tamar era machi war icꞌay.
LUK 10:42 Pero ayan lo que más ayan ucꞌampibꞌir tuaꞌ achempa, y jax lo que war uche e María era. Y tamar era machi tuaꞌ aloqꞌuesna tamar lo que war ubꞌijnu uche era, che e Jesús.
LUK 11:1 Pues tama inyajr e Jesús war ucꞌajti taca e Dios tama inteꞌ lugar, y conda cꞌapa ucꞌajti taca e Dios cꞌotoy inteꞌ uyajcanuar tut xeꞌ cay uyubꞌi tuaꞌ y che: —Niwinquiraret, cansenon tuaꞌ cacꞌajti taca e Dios bꞌan cocha cay uche e Juan xeꞌ ajchꞌuymar taca uyajcanuarobꞌ, che uyajcanuar e Jesús era.
LUK 11:2 Y che e Jesús: —Conda cꞌani icꞌajti taca e Dios, arenic cocha era y che: Catata Dios xeꞌ turet tichan, catattzꞌi acꞌabꞌa xeꞌ erach. Lar tuaꞌ icꞌotori tara tor e rum wacchetaca era. Chen lo que acꞌani net tara tor e rum bꞌan cocha war ache tichan tut e qꞌuin.
LUK 11:3 Ajcꞌunon xeꞌ atzꞌacta tuaꞌ cacꞌuxi tama e día coner.
LUK 11:4 Cꞌumpen tacaron tama tunor camabꞌambꞌanir bꞌan cocha war cacꞌumpa taca tunor tin e uche e mabꞌambꞌanir capater. Ira awacton tuaꞌ capijchna sino corpeson tama tunor ucꞌotorer e mabꞌambꞌanir, che e Jesús.
LUK 11:5 Y de allí sutpa ojron e Jesús otronyajr y che: —Bꞌijnunic nox jay acꞌotoy inteꞌ apiar tama oꞌtot uyuxin e acbꞌar y matucꞌa ayan tuaꞌ awajcꞌu ucꞌuxi, y tamar era iꞌxin tama uyotot inteꞌ apiar y apejca cocha era y che: “¿Oo, war ca iwayan? ¿Ma ca tucꞌa e paꞌ tabꞌa tuaꞌ awajqꞌuen chacojt ut?
LUK 11:6 Porque yopa tama niotot inteꞌ ajnajtir ajwara, y matucꞌa tuaꞌ inwajcꞌu ucꞌuxi.” Bꞌan tuaꞌ aware apiar.
LUK 11:7 Y bꞌijnunic jay oꞌjron e ajyum otot era macu y che: “Ira acꞌapa atijres nipuerta, porque chꞌarenix y warix inwayan nen y nimaxtac tacaren. Machi uyubꞌien anchpa inwajqꞌuet lo que war acꞌajti era”, xeꞌ tuaꞌ uyaret apiar era.
LUK 11:8 Pero cꞌani inwareox que motor que e ajyum otot era machi ani cꞌani aꞌchpa tuaꞌ uyajcꞌu upiar lo que war ucꞌajti umen que atzay uwira ubꞌobꞌ, pero axin ixto aꞌchpa umen que war aꞌru upiar taca inteꞌ nuxi nuc tut upuerta. Y axin uyajcꞌu tunor lo que war ucꞌajti era.
LUK 11:9 Entonces cꞌani inwareox era que cꞌajtinic taca e Dios y jaxir axin uyajcꞌox, sajcanic taca e Dios lo que war icꞌani tuaꞌ y ixixin itajwi, tꞌojtꞌinic ut e puerta y axin apascꞌa tiut.
LUK 11:10 Porque tin e war ucꞌajti taca e Dios axin uchꞌami, y tin e war usajca axin utajwi, y tin e war utꞌojtꞌi ut e puerta axin apascꞌa tut.
LUK 11:11 ’Y nox xeꞌ tatabꞌirox, jay imaxtac ucꞌajti ingojr pan tibꞌa, ¿iwajcꞌu ca ingojr tun? ¿O iwajcꞌu ca incojt chan conda imaxtac ucꞌajti incojt chay?
LUK 11:12 ¿O iwajcꞌu ca incojt sinam conda imaxtac ucꞌajti ingojr cum?
LUK 11:13 Pues jay nox xeꞌ ajmabꞌambꞌanirox war isicbꞌa lo que imbꞌutz tuaꞌ iwajcꞌu imaxtac, y Catata Dios xeꞌ turu tichan ¿machi ca axin uyajcꞌu Unawalir tunor tin e ucꞌajti tacar? che e Jesús.
LUK 11:14 Pues entonces e Jesús cay ulocse inteꞌ mabꞌambꞌan mein tama inteꞌ winic xeꞌ machi ojron umen que chꞌar e mabꞌambꞌan mein era tama uyalma. Entonces conda e Jesús cꞌapa uyajnes ixin e mabꞌambꞌan mein cay ojron e winic otronyajr. Y tunor e gente bꞌacta uwirobꞌ lo que numuy era.
LUK 11:15 Pero ayan tin e cay ojronobꞌ upater e Jesús jaxobꞌ taca y chenobꞌ: —E winic era war ulocse e mabꞌambꞌan mein tamar taca ucꞌotorer e Beelzebú xeꞌ jax uwinquir e inmojr mabꞌambꞌan meinobꞌ, xeꞌ ojronobꞌ e winicobꞌ era upater e Jesús jaxobꞌ taca.
LUK 11:16 Pero ayan otro inmojr winicobꞌ xeꞌ cꞌani ani umajres e Jesús, y tamar era cay ucꞌajtiobꞌ tuaꞌ jay erer uyebꞌta watar inteꞌ seña tut e qꞌuin.
LUK 11:17 Pero e Jesús war unata tucꞌa war ubꞌijnuobꞌ y tamar era ojron y che: —Jay tunor e chinamobꞌ lo que ayan yebꞌar ucꞌotorer inteꞌ gobernador acay uxere ubꞌobꞌ axin, entonces acꞌapa utijres ubꞌobꞌ tunor e chinamobꞌ era. Y bꞌan ubꞌan tama inteꞌ winic xeꞌ ayan umaxtac, jay acay uxere ubꞌobꞌ umaxtac era, entonces intaca alocꞌoy axin inteꞌ intiobꞌ, y acꞌapa tunor e familía.
LUK 11:18 Y bꞌan ubꞌan tama ucꞌotorer e Satanás, jay axin uxere ubꞌobꞌ tunor tin e aquetpobꞌ yebꞌar ucꞌotorer, ma cocha erer aqꞌuecꞌo ucꞌotorer y axin acꞌapa atijrpa tunor. War inwareox tunor era porque nox war iware que nen war incꞌampes ucꞌotorer e Beelzebú tuaꞌ inlocse e mabꞌambꞌan meinobꞌ.
LUK 11:19 Y jay nen war ani incꞌampes ucꞌotorer e diablo tuaꞌ inlocse e mabꞌambꞌan mein, entonces bꞌan war uchiobꞌ iwajcanuarobꞌ tibꞌa ubꞌan. Pero chequer tut iwajcanuarobꞌ tibꞌa que majax ucꞌotorer e Satanás lo que acꞌampesna tuaꞌ aloqꞌuesna inteꞌ mabꞌambꞌan mein. Y tamar era chequer que majax erach lo que war ixojron nipater que war ani incꞌampes ucꞌotorer e Satanás tuaꞌ inlocse e mabꞌambꞌan mein tamarobꞌ.
LUK 11:20 Pero jay nen era war inlocse e mabꞌambꞌan mein tamar taca ucꞌotorer e Dios entonces war che que war ixto achecta uchinam e Dios tiut.
LUK 11:21 ’Pues e Satanás era bꞌan cocha inteꞌ winic xeꞌ aqꞌuecꞌo xeꞌ war ucojco tunor lo que ayan macuir uyotot. Y tamar era tzꞌustaca turu macuir uyotot umener.
LUK 11:22 Pero jay watar otronteꞌ winic xeꞌ más aqꞌuecꞌo bꞌan cocha nen xeꞌ Uyunenen e winic, entonces e winic xeꞌ más aqꞌuecꞌo ucꞌani tuaꞌ ucucru e ajyum otot y ucachi uchꞌabꞌu, y de allí erer axin apojrsan.
LUK 11:23 ’Tin e machi atzay uwiren war aqꞌuijna uwiren, y tin e machi utacren tuaꞌ inmorojse niwoveja, más war acꞌapa upucujcse axin tunor, che e Jesús.
LUK 11:24 Y de allí ojron e Jesús otronyajr y che: —Ayan inteꞌ ojroner tama inteꞌ winic xeꞌ locꞌoy ixin inteꞌ mabꞌambꞌan mein tamar. Y conda locꞌoy ixin e mabꞌambꞌan mein era, cay usajca inteꞌ lugar tiaꞌ taquin tuaꞌ ajiri tamar, pero conda machi utajwi acay ayopa tujor que: “¿Tucꞌa tuaꞌ machi insutpa inxin tama uyalma e winic tiaꞌ locꞌoyen?” che e mabꞌambꞌan mein jax taca.
LUK 11:25 Entonces sutpa ixin tama uyalma e winic otronyajr y utajwi que quetpa e winic era bꞌan cocha inteꞌ otot xeꞌ galan uwirnar xeꞌ bien ustabꞌir y bien mesbꞌir macuir.
LUK 11:26 Entonces e mabꞌambꞌan mein sutpa utares otro siete meinobꞌ xeꞌ más calapir uwirnarobꞌ y ixin ochoyobꞌ tama uyalma e winic era otronyajr. Y tamar era e winic más erpa, che e Jesús.
LUK 11:27 Pues conda warto oꞌjron e Jesús tama tunor era cay ojron inteꞌ ixic tujam e gente taca inteꞌ nuxi nuc e che: —¡Chojbꞌesbꞌir ut e ixic xeꞌ ucuxiet y xeꞌ uchꞌijrset net! che e ixic.
LUK 11:28 Pero e Jesús che: —¡Pero más chojbꞌesbꞌir ut tin e uyubꞌi uyojroner e Dios y axin acꞌupseyanobꞌ tut! che e Jesús.
LUK 11:29 Pues entonces conda e sian gente era war umorojse ubꞌobꞌ tuyejtzꞌer e Jesús cay ojron jaxir y che: —E gente xeꞌ turobꞌ tara tor e rum tama e tiempo era mabꞌambꞌan porque iraj iraj war ucꞌajtiobꞌ tanibꞌa tuaꞌ uwirobꞌ watar inteꞌ nuxi seña tut e qꞌuin tuaꞌ unatobꞌ jay nen ayan ucꞌotorer e Dios tacaren. Pero machi tuaꞌ achecta más seña tutobꞌ sino que jax taca tuaꞌ aquetpa e seña lo que cay uche e profeta xeꞌ turu tama e onian tiempo xeꞌ ucꞌabꞌa Jonás.
LUK 11:30 Porque chequer tut e gente tama e onian chinam Nínive que ebꞌetna tari e profeta Jonás umen e Dios, y bꞌanen nen ubꞌan. Porque cꞌani aquetpa chequer tut tunor e gente xeꞌ turobꞌ tara tor e rum coner que nen xeꞌ Uyunenen e winic ebꞌetna tarien umen e Dios.
LUK 11:31 Pero conda watar e juicio e Dios axin umorojse tunor tin e ajmabꞌambꞌanirobꞌ tama inteꞌ taca lugar tuaꞌ ubꞌijnu uwira lo que cay uchiobꞌ. Y tama e día era cꞌani achpa e ixic xeꞌ cꞌotori ani tama inteꞌ nuxi lugar teinxejr bꞌana xeꞌ tuaꞌ ucꞌaye e gente xeꞌ turobꞌ tor e rum coner, porque jaxir tari tama inteꞌ lugar xeꞌ más innajt tara tor e rum tuaꞌ uyubꞌi unatanyaj e Salomón, pero turu tiut nox era inteꞌ xeꞌ más nuxi winic que e Salomón pero nox machi cꞌani ixcꞌupseyan tamaren.
LUK 11:32 Y tin e turobꞌ ani tama e chinam Nínive tama e onian tiempo cꞌani achpobꞌ tama e juicio tuaꞌ ucꞌayobꞌ tunor e gente xeꞌ turobꞌ tara tor e rum coner, porque tin e turobꞌ tama e chinam Nínive sutpa uchꞌamiobꞌ uyojroner e Dios lo que arobꞌnobꞌ umen e Jonás, pero turu era tiut nox inteꞌ xeꞌ más nuxi winic que e Jonás pero nox machi cꞌani ixcꞌupseyan tamaren, che e Jesús.
LUK 11:33 Pues entonces ojron e Jesús y che: —Mamajchi utzꞌajpes inteꞌ lámpara tuaꞌ umuqui tiaꞌ ma chequer nien tuaꞌ uwabꞌu macuir inteꞌ bꞌejt, sino utzꞌajpes inteꞌ lámpara tuaꞌ uwabꞌu tichan tiaꞌ tuaꞌ ujanchꞌacnes tut tunor tin e oꞌchoyobꞌ macuir e otot era.
LUK 11:34 Y unacꞌut inteꞌ lar tacar inteꞌ janchꞌaquenar tama ucuerpo inteꞌ, y tin e imbꞌutz unacꞌut erer ixto eꞌron. Pero tin e ajmuac unacꞌut machi eꞌron. Y bꞌan ubꞌan tin e axin uchꞌami niwojroner, tunor nicanseyaj cꞌani aquetpa chequer tut. Pero tin e machi uchꞌami niwojroner machi tuaꞌ unata tucꞌa war che tunor nicanseyaj era, y aquetpa mucur tunor era tut.
LUK 11:35 Pues tin e war uyusre uchꞌami tunor nicanseyaj aquetpa bꞌan cocha inteꞌ winic xeꞌ bꞌutꞌur uyalma taca e janchꞌaquenar. Cojconic e janchꞌaquenar lo que ayan tacarox tuaꞌ machi atajpa y tuaꞌ machi asutpa incsibꞌaner tiut.
LUK 11:36 Pues tin e war uyusre uchꞌamiobꞌ nicanseyaj era larobꞌ tacar ingojr otot xeꞌ matucꞌa e incsibꞌaner tamar umen que chꞌur inteꞌ cꞌajc tzꞌajpesbꞌir, y bꞌanox nox ubꞌan jay matucꞌa e mabꞌambꞌanir tama iwalma, erer inata tucꞌa war che tunor lo que erach, che e Jesús.
LUK 11:37 Entonces conda cꞌapa ojron e Jesús pejcna umen inteꞌ fariseo tuaꞌ axin aweꞌ tama uyotot. Entonces ixin e Jesús esto tama uyotot e fariseo era y ochoy turuan tor e mesa.
LUK 11:38 Pero e fariseo cay bꞌacta uwira que e Jesús machi war uche e rito tama ucꞌabꞌobꞌ lo que ucꞌaniobꞌ utata viejobꞌirobꞌ conda cꞌanix aweꞌ motor que e Jesús war upoqui ucꞌabꞌobꞌ iraj iraj.
LUK 11:39 Pero che Cawinquirar: —Nox xeꞌ fariseox war ipoqui upat inteꞌ chꞌeu o upat inteꞌ plato pero macuir war aquetpa calapir, porque machi war ipoqui. Y bꞌan iwalma nox ubꞌan, motor que war iyates tunor ipeyejo pero macuir iwalma war ibꞌijnu tamar taca e tumin y war iwajcꞌu iwerir tunor lo que war uyusre.
LUK 11:40 Ajqꞌuecranerox, ¿machi ca inata que e Dios xeꞌ cay uche tunor ucuerpo e winicobꞌ jax taca xeꞌ uche tunor uyalma e winicobꞌ ubꞌan?
LUK 11:41 Ustanic iwirnar bꞌajxan y de allí erer iwajcꞌu tin e tzajtaca utobꞌ lo que ayan tama ichꞌeu y lo que ayan tama iplato. Y jay bꞌan iche, axin aquetpa pocbꞌir tunor iwalma.
LUK 11:42 ’Tzajtaca iut nox xeꞌ fariseox. Nox war iche diezmar tama tunor lo que ayan tibꞌa. War iche diezmar tama e hierba buena y tama e ruda y tama tunor e sian cajr. Pero machi war iturbꞌa ibꞌa tuaꞌ iche lo que erach, y machi war iturbꞌa ibꞌa tuaꞌ iyajta ut e Dios. Y jaxto era xeꞌ más ayan ani ucꞌampibꞌir tuaꞌ iche. Pero ira iwacta tuaꞌ iche diezmar taca e Dios bꞌan cocha war iche.
LUK 11:43 ’Tzajtaca iut nox xeꞌ fariseox, porque nox war isajca e turtar xeꞌ más galanic tuaꞌ ixturuan tamar tama e sinagoga. Y war iyusre tuaꞌ ixcꞌajna umen e gente tama e calle.
LUK 11:44 Tzajtaca iut nox xeꞌ ajcanseyajox tama uley e Moisés y nox xeꞌ fariseox, ajqꞌuecranerox. Nox larox cocha inteꞌ mujr tuaꞌ inteꞌ chamen que machi eꞌrna y que motor que war axana e gente tujor, pero ma erer unatobꞌ tucꞌa ayan macuir, che e Jesús.
LUK 11:45 Entonces ojron inteꞌ ajcanseyaj tama uley e Moisés y che: —Conda awareon cocha era, intran ticoit conda coybꞌi, che e ajcanseyaj tama uley e Moisés era.
LUK 11:46 Pero e Jesús che: —Tzajtaca iut nox xeꞌ ajcanseyajox tama uley e Moisés ubꞌan, porque intran icanseyaj tama uley e Moisés tut e gente. Pues nox bꞌanox cocha inteꞌ winic xeꞌ war uyajcꞌu inteꞌ nuxi tercio xeꞌ imbꞌar tuaꞌ acujcha axin, pero nien imbꞌijc machi war itacre nox tuaꞌ erer aꞌchpa tacar, y bꞌan icanseyaj tut e gente.
LUK 11:47 ’Tzajtaca iut nox, porque war iche umujrobꞌ e onian profetobꞌ tuaꞌ itattzꞌi utobꞌ, pero jax taca itata viejobꞌirobꞌ tibꞌa xeꞌ ixin uchamsiobꞌ.
LUK 11:48 Y tamar era chequer que intera ibꞌijnusiaj taca tunor lo que cay uchiobꞌ itata viejobꞌirobꞌ. Jaxirobꞌ ixin uchamsiobꞌ e onian profetobꞌ, y nox war iyustes umujrobꞌ.
LUK 11:49 ’Y tamar era Cadiosir uyareon taca unatanyaj y che: “Cꞌani inwebꞌta axin cora profetobꞌ y cora apostolobꞌ tuaꞌ uchecsuobꞌ niwojroner tut e gente axin. Pero tujam tin e war inwebꞌta axin ayan tin e tuaꞌ achamesna y ayan tin e tuaꞌ ayobꞌorna”, che Cadiosir.
LUK 11:50 Y cꞌani inwareox era que tunor tin e turobꞌ tor e rum coner ucꞌani tuaꞌ utoyobꞌ uyeror tama tunor uchamesnarobꞌ e profetobꞌ xeꞌ turuanobꞌ ani tara tor e rum.
LUK 11:51 Y bꞌan tama uchamesnar e Abel xeꞌ yobꞌorna bꞌajxan esto uchamesnar e Zacarías xeꞌ chamesna tuyejtzꞌer e templo tut e altar tiaꞌ apurutna e arac. Y tamar era cꞌani inwareox otronyajr que nox xeꞌ turox tara tor e rum coner ucꞌani tuaꞌ itoyi uyeror tama tunor uchamesnarobꞌ e winicobꞌ era.
LUK 11:52 ’Tzajtaca iut nox xeꞌ ajcanseyajox tama uley e Moisés, porque nox war imuqui uyojroner e Dios tut e gente axin, y nox machi war ixcano, y nien machi war icꞌani tuaꞌ acanuobꞌ e inmojr gente ubꞌan, che e Jesús.
LUK 11:53 Entonces conda e Jesús cꞌapa ojron cocha era, cay qꞌuijnobꞌ meyra tunor e ajcanseyajobꞌ tama uley e Moisés y tunor e fariseobꞌ upater e Jesús, y tamar era cay uyubꞌiobꞌ meyra ojroner tuaꞌ e Jesús tuaꞌ uwirobꞌ jay erer uqꞌuijnesobꞌ ani.
LUK 11:54 Y war usicbꞌobꞌ tucꞌa tamar tuaꞌ utuchꞌiobꞌ e Jesús tut e ley.
LUK 12:1 Pues nacpat era cay umorojse ubꞌobꞌ meyra sian gente tut e Jesús este que machix utajwiobꞌ tiaꞌ tuaꞌ awawanobꞌ. Entonces bꞌajxan e Jesús cay ojron taca uyajcanuarobꞌ y che: —Iwiric tuaꞌ machi ixmajresna umen e ucanseyajobꞌ e fariseobꞌ, porque jaxirobꞌ war uyareobꞌ e gente que ucꞌani tuaꞌ uchiobꞌ lo que machi war uchiobꞌ jaxirobꞌ.
LUK 12:2 Porque tunor lo que achempa mucur ucꞌani tuaꞌ achecsuna tut e gente, y tunor lo que unata inteꞌ xeꞌ mucur ucꞌani tuaꞌ achectesna.
LUK 12:3 Y tamar era tunor lo que war iware tama e incsibꞌaner xeꞌ mabꞌambꞌan ucꞌani tuaꞌ oꞌbꞌna tama e janchꞌaquenar tama e día, y lo que iware tzꞌustaca macuir iyotot, ucꞌani tuaꞌ aꞌrobꞌna taca inteꞌ nuxi nuc patir este que uyubꞌiobꞌ tunor ipiarobꞌ, che e Jesús.
LUK 12:4 Pues entonces sutpa ojron e Jesús taca e sian gente era y che: —Nen cꞌani inwareox nox xeꞌ intzay inwirox que ira ibꞌacre tin e ajrer icuerpo erer uchamse, pero de allí matucꞌa más tuaꞌ uche.
LUK 12:5 Pero cꞌani inwareox era chi xeꞌ ucꞌani tuaꞌ ibꞌacre xeꞌ jax e Dios. Porque jaxir erer uchamse inteꞌ y de allí ayan ucꞌotorer tuaꞌ uyari uyalma inteꞌ tama e cꞌajc ubꞌan. Jaxir ayan ucꞌotorer cocha era y jax ixto tuaꞌ ibꞌacre yaꞌ.
LUK 12:6 Tama e mercado achojna cinco ut mut tama chateꞌ centavo, pero cꞌani inwareox era que nien incojt mut cocha era machi anajpesna umen e Dios.
LUK 12:7 Y nox este tunor utzutzer ijor tzicbꞌir umen e Dios tuaꞌ unata jayteꞌ ayan. Ira ixbꞌacta, porque más nojta icꞌampibꞌir nox tut e Dios que e sian mut era, che e Jesús.
LUK 12:8 Entonces ojron e Jesús y che: —Cꞌani inwareox era que tunorox xeꞌ ixixin ichecsu tut e gente y che: “Nen inchꞌamix ucꞌabꞌa Niwinquirar”, que nen ubꞌan xeꞌ Uyunenen e winic cꞌani inxin inware tunor e angelobꞌ tuaꞌ e Dios tichan que nox ichꞌamix nicꞌabꞌa.
LUK 12:9 Y tunorox xeꞌ ixixin imuqui nicꞌabꞌa tut e gente tara tor e rum, nen ubꞌan cꞌani inxin inmuqui icꞌabꞌa tut e angelobꞌ tuaꞌ e Dios tichan que machi innata chiox nox.
LUK 12:10 ’Y jay ayan tin e axin oꞌjron upater Uyunen e winic ererto acꞌumpa e Dios taca inteꞌ cocha era, pero jay inteꞌ axin uqꞌuijnes Unawalir e Dios ma cocha erer tuaꞌ acꞌumpa e Dios tacar.
LUK 12:11 ’Y jay acꞌotoy e día conda ixqꞌuejcha ixixin tut inteꞌ sacerdote tama inteꞌ sinagoga tuaꞌ utuchꞌiox o jay ixqꞌuejcha ixixin tut inteꞌ juez o tut otronteꞌ ajcꞌampar tuaꞌ utuchꞌiox, ira ibꞌijnu cocha tuaꞌ icorpes ibꞌa o tucꞌa tuaꞌ iware
LUK 12:12 porque conda acꞌotoy e hora tuaꞌ ixojron, wacchetaca watar Unawalir e Dios tuaꞌ ucansiox tucꞌa tuaꞌ iware tuaꞌ icorpes ibꞌa, che e Jesús.
LUK 12:13 Pues ayan inteꞌ winic tujam e gente xeꞌ cay ojron taca e Jesús y che: —Niwinquiraret, aren nisacun tuaꞌ uyajqꞌuen lo que aquetpa tuaꞌ inchꞌami tamar lo que uyacta nitata, che e winic era.
LUK 12:14 Y che e Jesús: —¿Chi war uyajqꞌuen nen e patnar tuaꞌ inquetpa tijor nox tuaꞌ inxere inwajqꞌuet lo que uyacta itata? che e Jesús.
LUK 12:15 Y e Jesús uyare tunor e gente y che: —Iwiric tuaꞌ machi iwacta ajni ijor tama e tumin tuaꞌ machi iche e mabꞌambꞌanir tut e Dios, porque majax tamar taca lo que ayan ticabꞌach tara tor e rum que bꞌixiron, che e Jesús.
LUK 12:16 Entonces e Jesús cay uchecsu inteꞌ ojroner tut e gente y che: —Tama inyajr ayan inteꞌ winic xeꞌ ayan meyra utumin y meyra urum xeꞌ locꞌoy meyra ucosecha tamar.
LUK 12:17 Y cay ubꞌijnu jax taca y che: “¿Tucꞌa tuaꞌ inche taca tunor e sian cosecha lo que cay inlocse porque machi atzꞌacta nigranero tuaꞌ imbꞌutꞌi tunor nicosecha era?” che e winic era jax taca.
LUK 12:18 Y che jaxir: “Pero nen innata ixto yaꞌ tucꞌa ucꞌani tuaꞌ inche era: Cꞌani incucru e otot era tiaꞌ war incojco nicosecha tuaꞌ insutpa inche inteꞌ xeꞌ más nojta tuaꞌ uwajpi tunor nicosecha y tunor lo que ayan tanibꞌa”, che e winic era jax taca.
LUK 12:19 Y de allí sutpa ojron otronyajr jax taca y che: “Nen ayan nitumin, ayan ninar, ayan nibꞌur, y ayan e sian wacax tanibꞌa.” Entonces upejca ubꞌa jax taca y che: “Jirien, wen, uchꞌen, tzayen”, che e winic jax taca.
LUK 12:20 Pero tama e momento era e Dios upejca e winic era y che: “Net matucꞌa anata. Net tuaꞌ ichamay tama e acbꞌar era. Y lo que tꞌabꞌesbꞌir amener ¿chi tacar tuaꞌ aquetpa coner?” che e Dios.
LUK 12:21 Y bꞌan ixto cocha era e winicobꞌ xeꞌ war ubꞌorojsiobꞌ e sian tumin tuaꞌ taca usatiobꞌ tamar lo que ucꞌaniobꞌ, pero tut e Dios tzajtaca utobꞌ e winicobꞌ cocha era, che e Jesús.
LUK 12:22 Pues entonces cay ojron e Jesús taca uyajcanuarobꞌ y che: —Cꞌani inwareox era que ira ibꞌijnu y che: ‘¿Tucꞌa tuaꞌ cacꞌuxi era?’ Y ira ibꞌijnu y che: “¿Tucꞌa tuaꞌ calapi non?”
LUK 12:23 Porque más atujri icuxtar tara tor e rum que lo que war ixweꞌ, y más atujri icuerpo que lo que war ilapi.
LUK 12:24 Bꞌijnunic tama e mut porque machi war apatna, y matucꞌa war umorojse tuaꞌ ucꞌuxi, y matucꞌa ugranero tiaꞌ macar ucosecha tamar, pero machi war aytzꞌa porque war awesena umen e Dios. ¿Y machi ca más ixtujri nox tut e Dios que cora mut?
LUK 12:25 ¿Y chi tijam nox, umen taca que war ubꞌijnu meyra tama ujor erer abꞌitzꞌa uyoc más nojta nien imbꞌijc tuaꞌ aquetpa más nojta?
LUK 12:26 Y jay machi uyubꞌiox iche lo que chuchu cocha era, ¿tucꞌa tuaꞌ war ibꞌijnu tamar lo que más nojta cocha era que: “Matucꞌa tuaꞌ incꞌuxi”, y que: “Matucꞌa tuaꞌ inlapi?”
LUK 12:27 ’Bꞌijnunic tama unichir e cꞌopot que machi apatna y nien machi aꞌrma, pero cꞌani inwareox era que nien e rey Salomón xeꞌ turuan tama e onian tiempo, motor que meyra usati utumin tama ubꞌujc xeꞌ galan uwirnar, pero nien jaxir majax bꞌan cocha inteꞌ unichir cꞌopot xeꞌ más galan uwirnar porque bꞌujcsebꞌir umen e Dios.
LUK 12:28 Entonces jay e Dios war ubꞌujcse unichir e cꞌopot cocha era xeꞌ coner chꞌur y xeꞌ ejcꞌar tama e cꞌajc chꞌar, y ¿machi ca tuaꞌ ubꞌujcsiox nox ubꞌan e Dios motor que imbꞌijc taca war ixcꞌupseyan tamar?
LUK 12:29 Y tamar era ira ibꞌijnu tama ijor que: “¿Tucꞌa tuaꞌ incꞌuxi?” y “¿tucꞌa tuaꞌ unchꞌi?”
LUK 12:30 Porque bꞌan war ubꞌijnuobꞌ tunor e gente tara tor e rum, pero nox ayan inteꞌ xeꞌ war unata tucꞌa icꞌani xeꞌ jax Catata Dios xeꞌ turu tichan.
LUK 12:31 Pero nox turbꞌanic ibꞌa tuaꞌ ixochoy tama uchinam e Dios, y cꞌani ixajcꞌuna tunor era ubꞌan, che e Jesús.
LUK 12:32 Entonces ojron e Jesús y che: —Ira ixbꞌacta, porque motor que majax meyrox xeꞌ turox tara pero Catata Dios cꞌani atzay uyajcꞌox inteꞌ nuxi lugar tiaꞌ tuaꞌ ixcꞌotori tacar jaxir.
LUK 12:33 Y tamar era chonic lo que ayan tibꞌa, y ajcꞌunic tin e tzajtaca utobꞌ tuaꞌ itacriobꞌ, y tamar era war ichꞌubꞌa meyra tumin tama inteꞌ ibolsa tichan tut e qꞌuin xeꞌ machi tuaꞌ axombꞌran ut y xeꞌ machi tuaꞌ acꞌapa. Porque yajaꞌ tut e qꞌuin machi uyubꞌi tuaꞌ oꞌchoy inteꞌ ajxujch y e max machi uyubꞌi acꞌotoy uxuyi ut.
LUK 12:34 Y bꞌan ucꞌani tuaꞌ iche nox porque tiaꞌ turu tunor lo que ayan tibꞌa y yajaꞌ axin aturuan iwalma ubꞌan, che e Jesús.
LUK 12:35 Y che e Jesús: —Ustesic ibꞌa tuaꞌ ixpatna y tzꞌajpesic ilámpara
LUK 12:36 bꞌan cocha inteꞌ man xeꞌ war ucojco acꞌotoy upatron tama inteꞌ nujbꞌiar acbꞌar. Pues inteꞌ man cocha era war uyustes ubꞌa tuaꞌ apatna y aquetpa tzꞌajpesbꞌir e cꞌajc tuaꞌ aquetpa turix tunor tuaꞌ oꞌchoy wacchetaca e patrón conda acꞌotoy. Y e man era ya turu tama e puerta war acojcsan tuaꞌ upasi e puerta wacchetaca conda apejcna umen upatron.
LUK 12:37 Atzayobꞌ tunor e man xeꞌ atajwinobꞌ umen upatron que bꞌixir war acojcsanobꞌ. Porque cꞌani inwareox era que conda acꞌotoy e patrón cꞌani atzay uwira uman que bꞌixir turu, y tamar era e patrón cꞌani uturbꞌa e man tor e mesa tuaꞌ uwese.
LUK 12:38 Y cꞌani atzayjresna tunor e man xeꞌ atajwina bꞌixir umen upatron motor que bꞌajcꞌat acꞌotoy este uyuxin e acbꞌar o bꞌajcꞌat acꞌotoy este que war asacojpa.
LUK 12:39 Y bꞌan ubꞌan tama inteꞌ ajyum otot que jay unata ani tucꞌa hora tuaꞌ acꞌotoy inteꞌ ajxujch, machi ani war awayan tuaꞌ machi uyacta apajsa uyotot tuaꞌ machi axujchna lo que ayan macu.
LUK 12:40 Y nox ubꞌan, ustesic ibꞌa porque cꞌani insutpa waten nen xeꞌ Uyunenen e winic tama inteꞌ día conda mamajchi war ubꞌijnu, che e Jesús.
LUK 12:41 Pues entonces e Pedro uyubꞌi tuaꞌ e Jesús y che: —Niwinquiraret, ¿war ca achecsu e ojroner era ticoit taca o tut tunor e gente era ubꞌan? che e Pedro.
LUK 12:42 Y che Cawinquirar: —Cꞌani inwareox era que inteꞌ man xeꞌ más acꞌupseyan tut upatron, más tuaꞌ aꞌjcꞌuna e patnar xeꞌ más galan ubꞌan. Porque jaxir cꞌani aꞌjcꞌuna tuaꞌ aquetpa tujor e inmojr ajpatnarobꞌ lo que ayan tama uyotot upatron, y cꞌani aquetpa tuaꞌ uwese e inmojr man xeꞌ war apatnobꞌ tama e otot era tama e hora conda ucꞌani.
LUK 12:43 Pues atzay e man jay atajwina umen upatron que war uche lo que aꞌjcꞌuna tuaꞌ uche umen upatron conda acꞌotoy.
LUK 12:44 Y cꞌani inwareox era que upatron cꞌani uyajcꞌu e man era más ucꞌotorer este que aquetpa uwinquir tunor lo que ayan tuaꞌ upatron era.
LUK 12:45 Pero jay e man acay ubꞌijnu cocha era y che: “Pero nipatron machito tuaꞌ ayopa rajxa”, che e man jax taca, y tamar era acay uwatzꞌi e inmojr manobꞌ este que acay uwatzꞌi cora ixictac, y acay aweꞌ, y acay oychꞌi, y acay acaray.
LUK 12:46 Y tama inteꞌ día conda machi war ubꞌijnu que cꞌani ayopa upatron y wacchetaca tuaꞌ achecta ayopa tama uyotot. Y e patrón cꞌani uwatzꞌi e man era y cꞌani ulocse tunor upatnar este que uyajnes alocꞌoy y cꞌani uyari axin tama e lugar tiaꞌ tuaꞌ aquetpobꞌ e inmojr ajmabꞌambꞌanirobꞌ.
LUK 12:47 ’Inteꞌ man xeꞌ war unata lo que ucꞌani upatron pero xeꞌ machi uyustes ubꞌa tuaꞌ acꞌupseyan tut upatron cꞌani ajajtzꞌa meyra.
LUK 12:48 Pero inteꞌ man xeꞌ machi war unata tucꞌa war ucꞌani upatron pero xeꞌ axin uche cora e mabꞌambꞌanir, cꞌani ajajtzꞌa imbꞌijc taca. Tin e ajcꞌuna meyra ucꞌampibꞌir cꞌani acꞌajtna tuaꞌ uche meyra ubꞌan. Y tin e ajcꞌuna más nojta upatnar, ucꞌani tuaꞌ acꞌapa uche tunor e patnar era ubꞌan, che e Jesús.
LUK 12:49 Entonces ojron e Jesús y che: —Nen tarien tara tor e rum tuaꞌ inche lo que ucꞌani Nitata Dios, y tamar era ucꞌani tuaꞌ aquetpobꞌ xerbꞌir tunor e gente nimener. Pues incꞌanix ani que cꞌapa ixto yaꞌ tunor nipatnar era.
LUK 12:50 Nen era war imbꞌijnu meyra tama tunor lo que ucꞌani tuaꞌ innumse nibꞌa taca inteꞌ nuxi cꞌuxner xeꞌ tuaꞌ watar tama nijor. Pero war innumse nibꞌa meyra era umen taca que war imbꞌijnu tama tunor e cꞌuxner era este que acꞌapa achempa.
LUK 12:51 ¿War ca ibꞌijnu que tarien tuaꞌ intares e jiriar tara tor e rum? Pues cꞌani inwareox era que machi, sino que tarien tuaꞌ inxere e gente axin.
LUK 12:52 Porque cꞌani inwareox era que desde coner tin e turobꞌ imbꞌonobꞌ tama ingojr otot cꞌani aqꞌuijna uwira ut ubꞌobꞌ. Uxteꞌ ut e familía era cꞌani aqꞌuijna uwira ut e chateꞌ, y e chateꞌ ut e familía era cꞌani aqꞌuijna uwira ut e uxteꞌ.
LUK 12:53 Tin e machi uchꞌami uyojroner e Dios cꞌani aqꞌuijna uwira ut tin e uchꞌami porque bꞌan tuaꞌ anumuy. Y tamar era inteꞌ tatabꞌir cꞌani aqꞌuijna uwira ut inteꞌ uyunen, y e unembꞌir era cꞌani aqꞌuijna uwira ut utata, y e tubꞌir cꞌani aqꞌuijna uwira ut inteꞌ uwijchꞌoc, y e ijchꞌoc era cꞌani aqꞌuijna uwira ut utuꞌ, y e pixambꞌir cꞌani aqꞌuijna uwira ut uyaribꞌ, y e aribꞌtzir era cꞌani aqꞌuijna uwira ut upixam, che e Jesús.
LUK 12:54 Pues e Jesús cay ojron taca e gente era otronyajr y che: —Conda iwira aꞌchpa watar inteꞌ tocar tiaꞌ anamtzꞌa e qꞌuin iware que cꞌani acꞌaxi e jajar, y bꞌan anumuy.
LUK 12:55 Y conda watar e icꞌar tama e inxejr bꞌana iware que cꞌani eꞌron e qꞌuin coner, y bꞌan anumuy.
LUK 12:56 Ajqꞌuecranerox, war inata tucꞌa war che tunor e seña lo que ayan tut e qꞌuin y lo que ayan tara tor e rum, pero machi war inata tucꞌa war che e seña tama e tiempo conda cꞌani ayopa Uyunen e Dios tara tor e rum, che e Jesús.
LUK 12:57 Y che e Jesús: —¿Y tucꞌa tuaꞌ machi ibꞌijnu nox tucꞌa xeꞌ erach conda ayan lo que war anumuy tijam?
LUK 12:58 Pues jay ayan inteꞌ xeꞌ war aqꞌuijna uwiret xeꞌ war uqꞌuechiet iꞌxin tut e juez, nutꞌic ibꞌa tuaꞌ ixquetpa taca intera ibꞌijnusiaj conda warto ixixin tama e bꞌir tuaꞌ machi ucꞌoteset tut e juez. Porque jay ucꞌoteset tut e juez jaxir tuaꞌ uyajqꞌuet tama ucꞌabꞌ inteꞌ policía, y de allí e policía tuaꞌ uyaret tama e cárcel.
LUK 12:59 Y inwaret era que machi tuaꞌ ilocꞌoy tama e cárcel este que acꞌapa asuti tunor uyeror lo que ibꞌeto, che e Jesús.
LUK 13:1 Pues entonces tama e momento era cꞌotoyobꞌ cora winicobꞌ xeꞌ cay uyareobꞌ e Jesús tamar lo que numuy jax tocto taca cora winicobꞌ tuaꞌ e departamento Galilea xeꞌ arobꞌna tuaꞌ achamesnobꞌ tama e templo umen e gobernador Pilato. Jaxirobꞌ war uxuriobꞌ unuc cora arac tuaꞌ uputobꞌ tujor e altar conda jajpnobꞌ chamesnobꞌ ubꞌan, y tin e cay chamsan uyapru uchꞌichꞌer e winicobꞌ era taca uchꞌichꞌer e aracꞌobꞌ.
LUK 13:2 Y che e Jesús: —¿War ca ibꞌijnu que e winicobꞌ era cay unumse ubꞌobꞌ cocha era umen que más ani ayan umabꞌambꞌanir que e inmojr winicobꞌ tama e departamento Galilea?
LUK 13:3 Pues cꞌani inwareox era que majax bꞌan. Pero nox, jay machi ixsutpa iwacta imabꞌambꞌanir, nox ubꞌan tuaꞌ ixixin ixchamesna.
LUK 13:4 ¿Y tucꞌa ibꞌijnu tama e dieciocho winicobꞌ xeꞌ chamesnobꞌ conda cucrema inteꞌ nuxi otot xeꞌ ucꞌabꞌa Siloé xeꞌ cꞌaspa tari tama ujorobꞌ y ya mactzꞌobꞌ macuir e otot era? ¿War ca ibꞌijnu que e winicobꞌ era más ani ayan umabꞌambꞌanirobꞌ que e inmojr winicobꞌ xeꞌ turobꞌ tama e chinam Jerusalem?
LUK 13:5 Pues cꞌani inwareox era que majax bꞌan. Y nox, jay machi ixsutpa iwacta imabꞌambꞌanir, nox ubꞌan tuaꞌ ixixin ixchamesna, che e Jesús.
LUK 13:6 Entonces e Jesús cay ojron taca inteꞌ ojroner xeꞌ mucur cora y che: —Ayan inteꞌ ojroner tama inteꞌ winic xeꞌ ayan inteꞌ uwerto, y tama urum era ayan inteꞌ uterar higuera. Y ixin e winic era tuaꞌ uwira jay war achꞌuan uyutir uteꞌ. Pero conda cꞌotoy uwira uteꞌ era, matucꞌa uyutir tamar.
LUK 13:7 Entonces e winic era xeꞌ ajyum rum cay uyare inteꞌ uman xeꞌ war ucojco e rum y che: “Ayanix tres año que war inyopa tuaꞌ insajca uyutir e teꞌ era, y ma ingojr uyutir intajwi. Y tamar era cucrun tuaꞌ machi usati más e rum.”
LUK 13:8 Pero e man uyare upatron y che: “Nen inware que más ani bueno tuaꞌ cacojco otronteꞌ año tuaꞌ cawira jay acꞌawan. Cꞌani imbꞌutꞌi usuy e teꞌ era taca e rum y cꞌani inyari e abono tama usuy.
LUK 13:9 Y taca e abono era bꞌajcꞌat axin acꞌawan tama e año xeꞌ watar y cawira jay acꞌawan, y jay machi erer cacucru ixto yaꞌ”, che e man era, che e Jesús.
LUK 13:10 Pues entonces tama inteꞌ día tuaꞌ e jiriar e Jesús ixin ochoy tama inteꞌ sinagoga y cay canseyan.
LUK 13:11 Y tujam e gente xeꞌ turobꞌ tama e sinagoga era ya turu inteꞌ ixic xeꞌ ayanix dieciocho año que ajmuac. Pues e ixic era quetpa cꞌototoj upat umen inteꞌ mabꞌambꞌan mein, y tamar era machi uyubꞌi aꞌchpa awawan.
LUK 13:12 Y conda e Jesús uwira e ixic era, upejca y che: —Ixic, locꞌoyix amuaquir y tzꞌacpesbꞌiret ixto yaꞌ, che e Jesús.
LUK 13:13 Entonces e Jesús upacbꞌu ucꞌabꞌ tama ujor e ixic, y wacchetaca tutz cajbꞌa upat y cay utattzꞌi ucꞌabꞌa e Dios.
LUK 13:14 Pero uwinquir e sinagoga qꞌuijna conda uwira que e Jesús war utzꞌacpes e ajmuacobꞌ tama e día tuaꞌ e jiriar, y tamar era uyare e gente y che: —Ayan seis día conda erer capatna, y tamar e seis día era erer watox tuaꞌ ixtzꞌacpesna, pero machi tuaꞌ iche tama e día tuaꞌ e jiriar, che uwinquir e sinagoga era.
LUK 13:15 Entonces ojron Cawinquirar y che: —Ajqꞌuecranerox, ¿machi ca iwiti iwacax o ichij tuaꞌ iqꞌueche axin tuaꞌ iwajcꞌu e jaꞌ tuaꞌ uyuchꞌi tama inteꞌ día tuaꞌ e jiriar?
LUK 13:16 Pero e ixic era xeꞌ jax inteꞌ uwijchꞌoc catata viejobꞌir Abraham y xeꞌ turu dieciocho añoix ajmuac umen e Satanás, ¿machi ca uyubꞌi atzꞌacpesna tama e día tuaꞌ e jiriar? che e Jesús.
LUK 13:17 Pues conda cꞌapa ojron e Jesús cocha era, subꞌajrobꞌ tunor tin e war aqꞌuijna uwirobꞌ e Jesús. Pero tunor e sian gente war atzay uwirobꞌ tunor e nuxi milagro lo que cay uche e Jesús.
LUK 13:18 Pues ojron e Jesús otronyajr y che: —¿Tucꞌa tuaꞌ inwareox que lar tacar uchinam e Dios? ¿Tucꞌa ojroner tuaꞌ inchecsu tiut que bꞌan uchinam e Dios?
LUK 13:19 Uchinam e Dios lar tacar ut e mostaza que motor que chuchu ut e semilla era pero conda apajcꞌa umen inteꞌ winic y acay achꞌiꞌ aquetpa inteꞌ nuxi teꞌ tiaꞌ erer acꞌotoy aturuan e mut tama ucꞌabꞌ y tiaꞌ erer uche usijcobꞌ. Y bꞌan uchinam e Dios ubꞌan. Tama ucajyesnibꞌir imbꞌijc taca ayan e gente tamar, pero axin abꞌoro este que aquetpa inteꞌ nuxi chinam, che e Jesús.
LUK 13:20 Entonces ojron e Jesús otronyajr y che: —Cꞌani inwareox otronyajr era tucꞌa lar tacar uchinam e Dios.
LUK 13:21 Uchinam e Dios lar tacar imbꞌijc e levadura lo que uche asibꞌi e pan conda ayajra tama e harina conda war achena e pan umen inteꞌ ixic, che e Jesús.
LUK 13:22 Pues conda war axana e Jesús tama e bꞌir tuaꞌ acꞌotoy tama e chinam Jerusalem, war uchecsu uyojroner e Dios tut tunor e sian gente tama e chinamobꞌ y tama e aldea tiaꞌ war anumuy.
LUK 13:23 Entonces checta inteꞌ winic tut e Jesús xeꞌ uyubꞌi tuaꞌ y che: —Niwinquiraret, ¿ma ca jax meyra xeꞌ tuaꞌ acorpesnobꞌ? che e winic.
LUK 13:24 Y e Jesús che: —Turbꞌanic ibꞌa tuaꞌ ixochoy tama e puerta xeꞌ intꞌum taca ut tuaꞌ ixcꞌotoy tama uchinam e Dios, porque cꞌani inwareox era que ayan meyra gente xeꞌ cꞌani uyusre oꞌchoyobꞌ tamar, pero machi tuaꞌ oꞌbꞌnobꞌ.
LUK 13:25 Conda inteꞌ ajyum otot acꞌapa umaqui e puerta tuaꞌ axin awayan, nox xeꞌ warox patir cꞌani icay ipejca tut e puerta y che: “Cawinquiraret, pasa apuerta.” Pero e ajyum otot tuaꞌ asutpa uyareox y che: “Machi innata tiaꞌ tariox.”
LUK 13:26 Y de allí nox xeꞌ turox patir tuaꞌ ixsutpa iware e ajyum otot y che: “Non cay cacꞌuxi e paꞌ tacaret, y net cay acansion tama cachinam.”
LUK 13:27 Pero e ajyum otot asutpa uyareox y che: “Inwareoxix que machi innata tiaꞌ tariox. Loqꞌuenic tara tunorox xeꞌ ajmabꞌambꞌanirox.”
LUK 13:28 Y tama e día yajaꞌ conda ixixin ixyajra patir ucꞌani tuaꞌ ixaru y tuaꞌ icꞌuxi ut iwej conda ixixin iwira que turobꞌ e Abraham taca e Isaac y e Jacob taca tunor e profetobꞌ macuir uchinam e Dios, pero que nox war ixquetpa patir.
LUK 13:29 Y cꞌani acꞌotoyobꞌ meyra sian gente tama tunor or e rum. Watobꞌ tama e lugar tiaꞌ atobꞌoy watar e qꞌuin, y watobꞌ tiaꞌ anamtzꞌa e qꞌuin, y bꞌan teinxejr yajaꞌ y bꞌan teinxejr bꞌana. Tama tunor or e rum cꞌani watobꞌ e gente tuaꞌ umorojse ubꞌobꞌ tor e mesa tuaꞌ awiobꞌ tama e nojqꞌuin tiaꞌ tuaꞌ acay acꞌotori Cadiosir.
LUK 13:30 Y tama e tiempo yajaꞌ tin e nuquir winic tara tor e rum cꞌani aquetpa que majax nuquir winic, y tin e majax nuquir winic tara tor e rum cꞌani aquetpa nuquir winic yajaꞌ, che e Jesús.
LUK 13:31 Y tama e día era cꞌotoyobꞌ cora fariseobꞌ xeꞌ cay uyareobꞌ e Jesús y che: —Loqꞌuen tara porque e rey Herodes cꞌani uchamset, che e fariseobꞌ.
LUK 13:32 Pero che e Jesús: —Quiqui arenic e ajmajresiaj yajaꞌ xeꞌ jax e Herodes y che: “Cꞌani inwareox era que coner y ejcꞌar cꞌani inwajnes axin e mabꞌambꞌan meinobꞌ y cꞌani intzꞌacpes tin e ajmuac, pero que chabꞌij cꞌani acꞌapa tunor nipatnar.”
LUK 13:33 Pero ucꞌani tuaꞌ inxin tama nibꞌir tuaꞌ inche lo que aquetpa tuaꞌ inche coner y ejcꞌar y chabꞌij, porque ma cocha erer achamesna inteꞌ profeta najtir e chinam Jerusalem, che e Jesús. Entonces uchꞌujcu uwira ejmar tiaꞌ turu e chinam Jerusalem y che:
LUK 13:34 —Nox xeꞌ turox tama e chinam Jerusalem, cay ichamse tunor e profetobꞌ xeꞌ turuanobꞌ tama e onian tiempo y cay chamsanox taca e tun tunor tin e ebꞌetbꞌir tari umen e Dios. Meyra unsre tuaꞌ ani incorpes imaxtac bꞌan cocha incojt acꞌach xeꞌ umeqꞌue tunor uyarobꞌ taca uwich, pero nox machi icꞌani.
LUK 13:35 Ubꞌinic, e Dios machix tuaꞌ ucojco más e chinam era, y cꞌani inwareox era que machix tuaꞌ isutpa iwira niut este que acꞌotoy e tiempo conda ixixin iware y che: “Chojbꞌesbꞌir jaxir xeꞌ war watar tama ucꞌabꞌa Cawinquirar”, che e Jesús.
LUK 14:1 Pues tama inteꞌ día tuaꞌ e jiriar ixin e Jesús tuaꞌ aweꞌ tama uyotot inteꞌ winic xeꞌ jax inteꞌ ajcꞌotorer tuaꞌ e fariseobꞌ, y ayan ubꞌan cora fariseobꞌ xeꞌ intaca turobꞌ xeꞌ war achꞌujcsanobꞌ.
LUK 14:2 Y tama e otot era ya turu ubꞌan inteꞌ winic xeꞌ asampa uyoc y ucꞌabꞌ.
LUK 14:3 Entonces e Jesús uyubꞌi tuaꞌ e ajcanseyajobꞌ tama uley e Moisés y tuaꞌ e fariseobꞌ y che: —¿Erer ca atzꞌacpesna inteꞌ ajmuac tama e día tuaꞌ e jiriar? ¿O machi? che e Jesús.
LUK 14:4 Pero mamajchi ojron. Entonces upacbꞌu ucꞌabꞌ tama e ajmuac y utzꞌacpes, y de allí uyare tuaꞌ axin.
LUK 14:5 Entonces e Jesús sutpa uyare e fariseobꞌ y che: —Pero ¿chi tijam nox, jay axin oꞌjri incojt ichij o incojt iwacax tama inteꞌ chꞌen, ¿machi ca ixixin ilocse wacchetaca, motor que jax inteꞌ día tuaꞌ e jiriar? che e Jesús.
LUK 14:6 Pero mamajchi obꞌna ojron.
LUK 14:7 Pues tama inyajr conda turu e Jesús tama inteꞌ nojqꞌuin tuaꞌ inteꞌ nujbꞌiar war uwira que tin e pejcnobꞌ tama e nojqꞌuin era war usajcobꞌ inteꞌ uturtar xeꞌ más galan tuaꞌ aturuan tamar tor e mesa, y tamar era e Jesús cay uyareobꞌ cocha era y che:
LUK 14:8 —Conda ipejcna tuaꞌ iꞌxin tama inteꞌ nojqꞌuin tuaꞌ inteꞌ nujbꞌiar, ira ituruan tama e turtar xeꞌ más galan, porque bꞌajcꞌat axin ayopa otronteꞌ xeꞌ apejcna ubꞌan xeꞌ más nuquir winic.
LUK 14:9 Entonces watar uwinquir e otot y uyaret: “Loqꞌuen tarex net, ajcꞌun tuaꞌ aturuan e nuxi winic era.” Entonces cꞌani iꞌxin taca inteꞌ subꞌar tuaꞌ asicbꞌa otronteꞌ aturtar.
LUK 14:10 Pero net, conda ipejcna tuaꞌ icꞌotoy tama inteꞌ nojqꞌuin, sajcan tucꞌa tar tuaꞌ ituruan, porque nacpat era watar tin e upejquet tama e nojqꞌuin y che: “Lar turen tara tama e cꞌajn xeꞌ más galan uwirnar.” Y bꞌan ixto tuaꞌ eꞌrna umen e gente xeꞌ turobꞌ tor e mesa que net pejcnet tuaꞌ ituruan tiaꞌ ayan inteꞌ turtar xeꞌ más galan.
LUK 14:11 Porque tin e uche ubꞌa que jax inteꞌ nuxi winic cꞌani amanxujresna, pero tin e axin umanxujres ubꞌa cꞌani achꞌijsena tuaꞌ aquetpa nuxi winic, che e Jesús.
LUK 14:12 Entonces e Jesús sutpa uyare e ajyum otot xeꞌ jax xeꞌ cay upejca e Jesús tuaꞌ aweꞌ tacar y che: —Conda ayan inteꞌ anojqꞌuin ira apejca jax taca tin e atzay uwiret, y nien jax taca tin e awermanuobꞌ, y nien jax taca atata y atuꞌ, y nien machi tuaꞌ apejca jax taca apiarobꞌ xeꞌ ayan utumin tuaꞌ asutpa ipejcna umenerobꞌ otronyajr, porque jay bꞌan ache, ya chꞌar atuanibꞌir tamar.
LUK 14:13 Pero net conda ayan anojqꞌuin, pejcan tin e tzajtaca utobꞌ, y tin e machi axana imbꞌutz, y tin e tzꞌej uyoc, y tin e tajpem unacꞌutobꞌ.
LUK 14:14 Y tamar era net tuaꞌ itzay porque jaxirobꞌ machi uyubꞌi tuaꞌ utoyetobꞌ otronyajr, y tamar era nox tuaꞌ ixixin itajwi inteꞌ nuxi tuanibꞌir tuaꞌ e Dios conda asujta abꞌixqꞌuesnobꞌ tunor tin e erobꞌach, che e Jesús.
LUK 14:15 Pues conda cꞌapa uyubꞌi tunor uyojroner e Jesús era cay ojron inteꞌ winic xeꞌ turu tor e mesa y che: —Chojbꞌesbꞌir tin e axin ucꞌuxi e pan tama uchinam e Dios, che e winic era.
LUK 14:16 Entonces ojron e Jesús y che: —Ayan inteꞌ ojroner tama inteꞌ winic xeꞌ uche inteꞌ nuxi nojqꞌuin tama uyotot. Y tamar era uyebꞌta ixin inteꞌ uman tuaꞌ axin uyare cora gente tuaꞌ ayopobꞌ tama unojqꞌuin era.
LUK 14:17 Y tama e hora conda turix tunor e nuxi comida, uyebꞌta ixin uman tuaꞌ uyare tin e pejcbꞌirobꞌ y che: “Laric ixto yaꞌ, turix tunor e comida tor e mesa.”
LUK 14:18 Pero tunor tin e pejcbꞌirobꞌ cay uyareobꞌ e man y che: “Machi axin uyubꞌien, porque nen wartocto inmani inteꞌ nirum y cꞌani inxin inwira. Aren e ajyum otot que machi axin uyubꞌien tuaꞌ waten. Bꞌajcꞌat otronyajrto.”
LUK 14:19 Y otronteꞌ winic xeꞌ pejcna umen e man cay uyare e man y che: “Wartocto inmani cinco par buey y cꞌani inxin inwejtobꞌ tama e patnar. Quiqui aren e ajyum otot que machi uyubꞌien era. Bꞌajcꞌat otronyajrto.”
LUK 14:20 Y arobꞌna umen otronteꞌ winic y che: “Wartocto innujbꞌi era y machi axin uyubꞌien tuaꞌ inxin. Aren e ajyum otot que bꞌajcꞌat otronyajrto.”
LUK 14:21 Entonces conda e man sutpa cꞌotoy tama uyotot upatron cay uyare tunor lo que numuy. Entonces qꞌuijna upatron conda uyubꞌi tunor e ojroner era y sutpa uyare uman y che: “Quiqui sajcan e gente macuir e chinam y atares tara tunor tin e atajwi. Tares tin e tzajtaca utobꞌ, y tin e machi axanobꞌ imbꞌutz, y tin e tzꞌej uyocobꞌ, y tin e tajpem unacꞌutobꞌ. Ucꞌani tuaꞌ atares tunorobꞌ tuaꞌ awiobꞌ tara”, che e patrón.
LUK 14:22 Entonces ixin e man y uche tunor lo que arobꞌna umen upatron. Y de allí sutpa ixin tut upatron otronyajr y che: “Ixien inche tunor lo que awaren, pero ayanto lugar tuaꞌ cawese más gente”, che e man.
LUK 14:23 Entonces e patrón uyare uman y che: “Xanen tama tunor or e carretera y ochen tama tunor e bꞌirobꞌ y arenobꞌ tunor tin e atajwi tuaꞌ watar awiobꞌ tuaꞌ uyubꞌi abꞌutcꞌa niotot tama e nojqꞌuin era.
LUK 14:24 Porque cꞌani inwaret era que tunor tin e pejcbꞌirobꞌ nimener xeꞌ machi yopobꞌ machi tuaꞌ awiobꞌ tacaren”, che e patrón. Tara acꞌapa e ojroner, che e Jesús.
LUK 14:25 Pues ayan meyra gente xeꞌ war axanobꞌ tupat e Jesús y tamar era jaxir sutpa ojron tacarobꞌ y che:
LUK 14:26 —Tin e cꞌani axana tacaren ucꞌani tuaꞌ uyajta niut nen taca tunor uyalma. Y ucꞌani tuaꞌ uyajta niut más que utata, y más que utuꞌ, y más que uwixcar, y más que uyunen, y más que usacun, y más que uwijtzꞌin, y más que ucuxtar jaxir ubꞌan. Porque tin e machi uche cocha era ma erer aquetpa niwajcanuar.
LUK 14:27 Y tin e axin tanipat ucꞌani tuaꞌ aquetpa turix tuaꞌ ani achamesna tamaren, porque tin e majax turix tuaꞌ achamesna ani tamaren ma cocha erer aquetpa niwajcanuar.
LUK 14:28 Pues jay ayan inteꞌ tijam xeꞌ cꞌani uche inteꞌ nuxi otot, ¿machi ca ubꞌijnu bꞌajxan jay atzꞌacta utumin tuaꞌ uwira jay uyubꞌi uche uyotot era?
LUK 14:29 Porque jay intaca ucajyes e otot y machi oꞌbꞌna tuaꞌ uyustes entonces acay oꞌjron e gente upater.
LUK 14:30 Y cꞌani oꞌjron e gente y che cocha era: “E winic era uyusre ani uche uyotot. Intaca ucajyes pero machi obꞌna”, che e gente.
LUK 14:31 O jay ayan inteꞌ rey xeꞌ cꞌani uche inteꞌ tzꞌojyir upater otronteꞌ rey, ¿machi ca ubꞌijnu bꞌajxan jay machi uyubꞌi ucucru inteꞌ rey taca 10,000 soldadobꞌ conda inteꞌ rey ayan 20,000 soldadobꞌ tacar?
LUK 14:32 Y jay machi oꞌbꞌna, entonces uyebꞌta axin inteꞌ winic tuaꞌ usajca e jiriar taca inteꞌ rey conda innajtto turu.
LUK 14:33 Y tamar era tin e cꞌani axana tacaren pero xeꞌ machi cꞌani uyacta tunor lo que ayan tuaꞌ, ma erer aquetpa niwajcanuar, che e Jesús.
LUK 14:34 Entonces ojron e Jesús y che: —Inchiꞌ e atzꞌam, pero jay e atzꞌam apaxran ut entonces mix tucꞌa ucꞌampibꞌir inyajrer.
LUK 14:35 Y nien erer uquete uturbꞌa e atzꞌam cocha era tor e rum, y nien erer umorojse uturbꞌa cocha e abono. Más ani bueno que chic chojcac inyajrer. Tin e ayan uchiquin ubꞌinic niwojroner era, che e Jesús.
LUK 15:1 Pues tama inyajr tunor e ajmorojseyajobꞌ tumin tuaꞌ e gobierno y cora ajmabꞌambꞌanirobꞌ cꞌotoyobꞌ tut e Jesús tuaꞌ uyubꞌiobꞌ uyojroner.
LUK 15:2 Pero conda irnobꞌ umen cora fariseobꞌ y umen cora ajcanseyajobꞌ tama uley e Moisés lo que war uche e Jesús, qꞌuijnobꞌ y cay ojronobꞌ upater y chenobꞌ: —E winic era war uchꞌami e ajmabꞌambꞌanirobꞌ y war aweꞌ tacarobꞌ ubꞌan, che e fariseobꞌ y e ajcanseyajobꞌ tama uley e Moisés.
LUK 15:3 Entonces e Jesús cay uchecsu inteꞌ ojroner tutobꞌ y che:
LUK 15:4 —Ayan inteꞌ ojroner tama inteꞌ winic xeꞌ ayan 100 oveja tuaꞌ. Pero jay asatpa incojt, ¿machi ca uyacta e noventa y nueve macu umacteꞌ tuaꞌ axin usajca e incojt xeꞌ satpa esto tiaꞌ axin utajwi?
LUK 15:5 Y conda e winic era utajwi uyoveja, cꞌani atzay uwira ut y axin ucꞌatbꞌu tor uquejrebꞌ y uqꞌueche axin tama uyotot.
LUK 15:6 Y conda acꞌotoy tama uyotot cꞌani uyare tunor upiarobꞌ y tin e atzay uwira y che: “Tzayenic tacaren porque intajwi niwoveja xeꞌ satpa ani”, che e winic. Y cꞌani atzayobꞌ tunorobꞌ tacar jaxir.
LUK 15:7 Y tamar era cꞌani inwareox que más axin atzayobꞌ tin e turobꞌ tichan tut e qꞌuin tama inteꞌ winic xeꞌ ajmabꞌambꞌanir cocha era xeꞌ axin uyacta umabꞌambꞌanir tuaꞌ asutpa uchꞌami uyojroner e Dios que tama e noventa y nueve winicobꞌ xeꞌ imbꞌutzix uwirnarobꞌ xeꞌ machix cꞌani uyactobꞌ umabꞌambꞌanir. Tara acꞌapa e ojroner, che e Jesús.
LUK 15:8 Entonces e Jesús uyare e fariseobꞌ y e ajcanseyajobꞌ tama uley e Moisés otronyajr y che: —Ayan inteꞌ ojroner tama inteꞌ ixic xeꞌ ayan diez ut utumin. Pero nien uwira tucꞌa hora uchoqui inteꞌ ut. Y tamar era e ixic cay usajca tama tunor tut uyotot tuaꞌ utajwi. Y utzꞌajpes inteꞌ lámpara y uchꞌujcu uwira tama tunor ut usuy uyotot pero machi achecta. Entonces uchꞌami inteꞌ mesiobꞌ y cay umesu ixin tama tunor usuy uyotot este que utajwi ut utumin era.
LUK 15:9 Pero conda utajwi ut utumin cay umorojse upiarobꞌ y tin e atzay uwira y uyare cocha era y che: “Tzayenic tacaren porque intajwix ut nitumin xeꞌ chocpa ani”, che e ixic.
LUK 15:10 Cꞌani inwareox era que bꞌan ixto cocha era ayan meyra tzayer tichan tut e qꞌuin tujam e sian angelobꞌ tuaꞌ e Dios conda uwirobꞌ asutpa uyacta umabꞌambꞌanir inteꞌ winic, che e Jesús.
LUK 15:11 Entonces e Jesús cay uyare e fariseobꞌ y e ajcanseyajobꞌ tama uley e Moisés era otronyajr y che: —Ayan inteꞌ ojroner tama inteꞌ winic xeꞌ ayan chateꞌ uyunenobꞌ.
LUK 15:12 Y e ijtzꞌimbꞌir uyare utata y che: “Ajcꞌunen era lo que tuaꞌ awajqꞌuen conda ichamay”, che uyunen era. Entonces e tatabꞌir cay uxere lo que aquetpa tuaꞌ uchꞌamiobꞌ.
LUK 15:13 Pero tunor lo que uchꞌami tuaꞌ utata cꞌapa uchoni wacchetaca, y taca e tumin era putzꞌuy ixin tama inteꞌ nuxi chinam xeꞌ innajt y cay usati tunor utumin tamar lo que uyusre uche uwerir.
LUK 15:14 Pero conda cꞌapa usati tunor utumin, tari inteꞌ tiempo conda checta inteꞌ nuxi winar tama e lugar yajaꞌ, y cay cꞌujya uyalma umen e winar.
LUK 15:15 Entonces ixin usicbꞌa inteꞌ patnar taca inteꞌ winic tama e lugar yajaꞌ. Y umen e winic era tzacarna ixin e sitz tuaꞌ ucojco cora sian chitam xeꞌ tuaꞌ e ajyum rum.
LUK 15:16 Pero conda más cay ecsibꞌa ut umen e winar cay ubꞌijnu que cꞌani ani ubꞌutꞌi unac tacar lo que war ucꞌuxi e chitam, porque mamajchi umen ajcꞌuna tucꞌa tuaꞌ ucꞌuxi jaxir.
LUK 15:17 Entonces cay ubꞌijnu tamar uyotot utata otronyajr y che jax taca: “Ayan uman nitata y lo que war aꞌjcꞌuna tuaꞌ ucꞌuxiobꞌ machi uyubꞌiobꞌ tuaꞌ acꞌapa ucꞌuxiobꞌ, y nen tara turen war ecsibꞌa niut umen e winar.
LUK 15:18 Cꞌani insutpa inxin tut nitata otronyajr y cꞌani inware cocha era y che: ‘Nitatet, nen inchix e mabꞌambꞌanir tut e Dios y toit net ubꞌan.
LUK 15:19 Irix awaren que oynenento. Chenen cocha inteꞌ aman’. Bꞌan war ubꞌijnu tuaꞌ uyare utata”, xeꞌ ubꞌijnu tuaꞌ oꞌjron e sitz.
LUK 15:20 Entonces locꞌoy ixin tama e bꞌir tuaꞌ acꞌotoy tama uyotot utata. ’Pero conda innajt tocto irna umen utata y yajtna ut, y tamar era ixin utajwi tama uni e bꞌir, y umori umeqꞌuen y uqꞌueche ixin tama uyotot.
LUK 15:21 Entonces e sitz uyare utata y che: “Nitatet, nen inchix e mabꞌambꞌanir tut e Dios y toit net ubꞌan. Irix awaren que oynenento”, che e sitz era.
LUK 15:22 Pero e tatabꞌir uyare umanobꞌ y che: “Quiqui taresic inteꞌ bꞌujc xeꞌ más galan uwirnar y juric tama unuc, y juric inteꞌ anillo tama or ucꞌabꞌ, y juric e xanabꞌ tama uyoc.
LUK 15:23 Y quiqui taresic incojt chꞌom wacax xeꞌ más nojta unojrir y chamsenic tuaꞌ cacꞌuxi porque cꞌani canojqꞌuini coner.
LUK 15:24 Porque nisitz chamen ani taniut y era sutpa yopa otronyajr. Satpa ani ut pero sutpa yopa tama niotot otronyajr”, che e tatabꞌir. Y cay ubꞌijnu tuaꞌ anojqꞌuiniobꞌ.
LUK 15:25 ’Pero tama otronteꞌ lugar xeꞌ innajt cora war apatna e sacumbꞌir tama inteꞌ uchor, pero conda sutpa yopa tuyejtzꞌer uyotot cay uyubꞌi que turix cora lajbꞌar y que warix anojqꞌuiniobꞌ tama uyotot.
LUK 15:26 Entonces upejca inteꞌ man y uyubꞌi tuaꞌ y che: “¿Tucꞌa war uche nitata?” che e sacumbꞌir.
LUK 15:27 Y che e man: “Awijtzꞌin sutpa yopa tama uyotot otronyajr, y atata war atzay y uyareon tuaꞌ cachamse inteꞌ chꞌom wacax xeꞌ más nojta unojrir, porque majax ajmuac conda sutpa yopa awijtzꞌin”, che e man.
LUK 15:28 Pero e sacumbꞌir cay qꞌuijna conda uyubꞌi e ojroner era, y cocha jaxir war aqꞌuijna uwira uwijtzꞌin, machi cꞌani oꞌchoy macuir uyotot. Entonces locꞌoy tajwina umen utata tama uni e bꞌir y cay uyare tuaꞌ oꞌchoy macu.
LUK 15:29 Pero e sacumbꞌir uyare utata y che: “Net anata que ixnix war impatna tacaret y que mato inyajr que machi incꞌupset. Pero net mato inyajr awajqꞌuen incojt yar chivo tuaꞌ inchamse tuaꞌ innojqꞌuini taca tin e intzay inwira.
LUK 15:30 Pero coner yopa ixto oynen era xeꞌ intaca ixin usati tunor atumin taca e ajnajtir ixictac y tama tunor e mabꞌambꞌanir lo que cay ubꞌijnu uche. Y jaxir ma tiaꞌ cay cꞌupseyan toit, y era intaca war asati e chꞌom wacax tama oynen era”, che e sacumbꞌir.
LUK 15:31 Entonces e tatabꞌir che: “Net nisitzet, y net turet tacaren iraj iraj, y tunor lo que ayan tanibꞌa cꞌani aquetpa tabꞌa.
LUK 15:32 Pero coner ucꞌani tuaꞌ canojqꞌuini porque awijtzꞌin xeꞌ quetpa bꞌan cocha jay chamen ani taniut, y era sutpa yopa otronyajr. Jaxir satpa ani pero era sutpa yopa otronyajr taniut”, che e tatabꞌir. Tara acꞌapa e ojroner, che e Jesús.
LUK 16:1 Pues entonces e Jesús uyare uyajcanuarobꞌ y che: —Ayan inteꞌ ojroner tama inteꞌ ajyum tumin, y ayan inteꞌ uman xeꞌ war ucojco tunor e tumin lo que ayan tuaꞌ. Pero e man era war uchꞌami e tumin tuaꞌ umani tunor lo que war ucꞌani jaxir. Y tama inyajr yopa inteꞌ winic tama uyotot e ajyum tumin y uyare cocha era y che: “Aman war usati atumin tama tunor lo que war ucꞌani jaxir”, che e winic.
LUK 16:2 Entonces e ajyum tumin upejca uman y uyare cocha era y che: “Ayan inteꞌ ojroner xeꞌ war umbꞌi tamaret. Tzꞌijbꞌan tunor e tumin xeꞌ war acojco tanibꞌa tama inteꞌ jun, porque cꞌani inlocsiet tuaꞌ machi ipatna más tacaren”, che e ajyum tumin.
LUK 16:3 Entonces e man cay ubꞌijnu jax taca y che: “¿Tucꞌa tuaꞌ inche era, que cꞌani ulocse nipatnar? Machi uyubꞌien impatna tama e rum y insubꞌajra tuaꞌ incꞌajti e tumin tuaꞌ e gente.
LUK 16:4 Pues nen innata tucꞌa tuaꞌ inche era tuaꞌ machi inquetpa bꞌan taca que matucꞌa nipatnar. Porque conda axin acꞌotoy e día conda tuaꞌ inloqꞌuesna tara, ucꞌani chi tuaꞌ uchꞌamien tama uyototobꞌ tiaꞌ tuaꞌ erer inturuan y tiaꞌ tuaꞌ erer inwesena”, che e man era jax taca.
LUK 16:5 Entonces cay upejca tari tunor tin e abꞌetuobꞌ taca upatron. Y cay uyubꞌi ixin tuaꞌ inteꞌ inteꞌ e winicobꞌ era y che: “¿Jayteꞌ ibꞌeto net taca nipatrón?” che e man.
LUK 16:6 Entonces tin e abꞌeto oꞌjron cocha era y che: “Nen imbꞌeto tama 100 lata manteca”, che e winic era. Y entonces che e man: “Chꞌar e jun era xeꞌ tzꞌijbꞌabꞌir amener lo que ibꞌeto. Wejrun choco era y tzꞌijbꞌan otronteꞌ jun wacchetaca tama cincuenta lata taca xeꞌ jax la mitad”, che e man.
LUK 16:7 Y nacpat era e man uyubꞌi tuaꞌ otronteꞌ ajbꞌetuar y che: “¿Y net, jayteꞌ ibꞌeto?” che e man. Y entonces che e ajbꞌetuar: “Nen imbꞌeto tama 100 carga trigo”, che e winic era. Entonces che e man: “Jax era e jun xeꞌ tzꞌijbꞌabꞌir amener lo que ibꞌeto tamar. Wejrun choco era y tzꞌijbꞌan tama otronteꞌ jun wacchetaca tama ochenta carga taca”, che e man.
LUK 16:8 Pero conda cꞌotoy unata e patrón lo que war uche uman, cay bꞌacta ubꞌijnu que nojta ujor tuaꞌ uche e mabꞌambꞌanir y que alocꞌoy ubꞌijnu tuaꞌ axujchꞌian. Pues más alocꞌoy achonmobꞌ tin e turobꞌ tara tor e rum taca uyet ajmabꞌambꞌanir que tin e turobꞌ tamar ujanchꞌaquenar e Dios. Tara acꞌapa e ojroner.
LUK 16:9 ’Pero cꞌani inwareox nox que: Cꞌampesic lo que ayan tibꞌa tara tor e rum tuaꞌ itajwi más tin e atzay uwirox. Y tamar era conda axin acꞌapa lo que ayan tibꞌa tara tor e rum aquetpa tin e erer uchꞌamiox tama inteꞌ lugar xeꞌ machi tuaꞌ acꞌapa.
LUK 16:10 Tin e uturbꞌa ubꞌa tuaꞌ ucojco lo que ayan tuaꞌ upiar motor que imbꞌijc taca ayan tuaꞌ, erer aquetpa ajcojc ubꞌan tuaꞌ upiar conda meyra ayan lo que ayan tuaꞌ. Pero tin e axin axujchꞌian tamar lo que war ucojco tuaꞌ upiar motor que imbꞌijc taca ayan tuaꞌ, axin axujchꞌian ubꞌan jay ajcꞌuna más tuaꞌ ucojco.
LUK 16:11 Porque jay machi caturbꞌa cabꞌa tuaꞌ cache lo que erach tamar lo que ayan tara tor e rum, ¿chi tuaꞌ uyajcꞌon e tacarsiaj xeꞌ watar tut e qꞌuin tuaꞌ e Dios?
LUK 16:12 Y jay machi iturbꞌa ibꞌa tuaꞌ icojco lo que ayan tuaꞌ otronteꞌ, ¿chi tuaꞌ uyajcꞌox lo que tuaꞌ aquetpa tibꞌa?
LUK 16:13 ’Pues inteꞌ man machi uyubꞌi apatna tut chateꞌ ut upatron, porque jay bꞌan uche, e man axin uxejbꞌe ut inteꞌ upatron y axin uyajta ut inteꞌ. Pues mamajchi uyubꞌi uturbꞌa ubꞌa tama e Dios y uturbꞌa ubꞌa tama e tumin ubꞌan, che e Jesús.
LUK 16:14 Pero ya turobꞌ cora fariseobꞌ xeꞌ turu ujorobꞌ tama e tumin xeꞌ war uyubꞌiobꞌ tunor era, y tamar era cay utzeniobꞌ y cay ucꞌayobꞌ e Jesús jaxobꞌ taca.
LUK 16:15 Entonces che e Jesús: —Nox iche ibꞌa que erachox tut e gente, pero Cadiosir war unata tucꞌa ayan tama iwalma. Ayan lo que war ubꞌijnuobꞌ e winicobꞌ tara tor e rum que meyra ayan ucꞌampibꞌir, pero tut e Dios matucꞌa ucꞌampibꞌir tunor era, che e Jesús.
LUK 16:16 Entonces ojron e Jesús otronyajr y che: —E ley xeꞌ tzꞌijbꞌabꞌir umen e Moisés tama e onian tiempo y tunor lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo war acꞌotori este que e Juan xeꞌ ajchꞌuymar cꞌapa uche tunor upatnar. Pero conda numuy tunor era cay chectesna e ojroner tama uchinam e Dios tut tunor e gente y meyra sian gente cay uqꞌuitꞌi ubꞌobꞌ tuaꞌ oꞌchoyobꞌ tamar.
LUK 16:17 Pero cꞌani inwareox era que más ma intran tuaꞌ acꞌapa atijresna tunor or e rum y tunor ut e qꞌuin que tuaꞌ aloqꞌuesna ingojr chuchu letra tama uley e Moisés, che e Jesús.
LUK 16:18 Entonces ojron e Jesús y che: —Jay inteꞌ winic axin uyacta uwixcar tuaꞌ utijres unujbꞌiar y axin anujbꞌi taca otronteꞌ ixic, jaxir war acꞌaxi tama e mabꞌambꞌanir. Y tin e axin anujbꞌi taca inteꞌ ixic xeꞌ actana umen uviejo ani war acꞌaxi tama e mabꞌambꞌanir ubꞌan, che e Jesús.
LUK 16:19 Y che e Jesús: —Ayan inteꞌ ojroner tama inteꞌ winic xeꞌ meyra ayan utumin xeꞌ ayan ubꞌujc xeꞌ meyra atujri, y ajqꞌuin ajqꞌuin war anojqꞌuini.
LUK 16:20 Y ayan inteꞌ winic xeꞌ ucꞌabꞌa Lázaro xeꞌ tzajtaca ut xeꞌ ayan e sian chec tut xeꞌ calapir xeꞌ ixin tuaꞌ aturuan tama usuy upuerta e winic xeꞌ meyra ayan utumin.
LUK 16:21 War ucꞌani tuaꞌ ucꞌuxi lo que oꞌjri acꞌaxi tama ut e rum yebꞌar e mesa, y war acꞌotoy cora tzꞌiꞌ tuyejtzꞌer xeꞌ cay tzꞌujpa ut uchec.
LUK 16:22 Y tama inteꞌ día chamay e Lázaro, y cꞌotoy cora angelobꞌ tuaꞌ uqꞌueche axin uyalma tut e Abraham tiaꞌ aquetpobꞌ e sian chamenobꞌ xeꞌ erach. Y chamay e winic xeꞌ meyra ayan utumin ubꞌan y mujca.
LUK 16:23 Pero e winic xeꞌ meyra ayan utumin conda ubꞌijnu ya chꞌar macuir e cꞌajc, war unumse ubꞌa y conda uchꞌujcu uwira ya turu e Lázaro innajt tichan tuyejtzꞌer e Abraham.
LUK 16:24 Pero jaxir aru taca inteꞌ nuxi nuc y che: “Nitata viejoet Abraham, yajtan niut, ebꞌtan taric e Lázaro tuaꞌ umuqui or ucꞌabꞌ tama e jaꞌ tuaꞌ watar utzꞌayi niwac, porque meyra war innumse nibꞌa tara tama uyamir e cꞌajc”, che e winic xeꞌ meyra ayan utumin.
LUK 16:25 Pero che e Abraham: “¿Ma ca cꞌar amener que turuanet imbꞌutz tama tunor acuxtar tor e rum? Pero e Lázaro ma ani tucꞌa ayan tacar tama ucuxtar tor e rum. Y tamar era war atzay jaxir y net era war anumse abꞌa meyra tama uyamir e cꞌajc.
LUK 16:26 Pero tara ticajam ayan ubꞌan inteꞌ nuxi chꞌen tiaꞌ mamajchi erer anumuy axin tarex, y nien nox ma erer ixnumuy watox tara”, che e Abraham.
LUK 16:27 Entonces e winic xeꞌ meyra ayan utumin uyare e Abraham y che: “Pero ninoiyet, ¿machi ca uyubꞌiet atzacre axin e Lázaro tama uyotot nitata
LUK 16:28 tiaꞌ turobꞌ cinco niwijtzꞌinobꞌ? Porque ucꞌani tuaꞌ aꞌrobꞌnobꞌ que ira watobꞌ tama e lugar tara tiaꞌ chꞌaren war innumse nibꞌa meyra”, che e winic xeꞌ meyra ayan utumin.
LUK 16:29 Pero che e Abraham: “Ayan e ojroner lo que tzꞌijbꞌabꞌir umen e Moisés y lo que tzꞌijbꞌabꞌir umen e profetobꞌ xeꞌ turuanobꞌ tama e onian tiempo tuaꞌ uchecsu tutobꞌ tucꞌa tuaꞌ anumuy conda axin achamayobꞌ. Pero jaxirobꞌ ucꞌani tuaꞌ ucꞌupsiobꞌ lo que tzꞌijbꞌabꞌir tama e ojroner era”, che e Abraham.
LUK 16:30 Pero sutpa ojron e winic xeꞌ meyra ayan utumin otronyajr y che: “Jaxto, ninoiyet. Pero jay acꞌotoy inteꞌ xeꞌ sutpa bꞌixcꞌa tujam e chamenobꞌ tutobꞌ, axin ucꞌupsiobꞌ uyojroner, y tamar era cꞌani asutpa uyactobꞌ umabꞌambꞌanirobꞌ”, che e winic era.
LUK 16:31 Pero e Abraham che: “Pero cocha machi ucꞌupsiobꞌ lo que chꞌar tzꞌijbꞌabꞌir umen e Moisés y lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo, mix ucꞌupsicobꞌ uyojroner inteꞌ motor que asutpa abꞌixcꞌa tujam e chamenobꞌ”, che e Abraham. Tara acꞌapa e ojroner, che e Jesús.
LUK 17:1 Entonces e Jesús uyare uyajcanuarobꞌ y che: —Pues ayan ixto lo que upejca uyalmobꞌ e gente tuaꞌ uchiobꞌ e mabꞌambꞌanir, pero tzajtaca ut tin e axin uche acucrema e gente tama e mabꞌambꞌanir cocha era.
LUK 17:2 Más ani bueno tuaꞌ acajcha inteꞌ chaꞌ tama unuc y tuaꞌ atobꞌesna axin tama e jaꞌ tiaꞌ intam tuaꞌ achamay macu jaꞌ tuaꞌ machi uche acucrema inteꞌ xeꞌ wartocto acꞌupseyan tamaren.
LUK 17:3 Iwiric tama tunor era. ’Jay inteꞌ awet ajcꞌupesiajir tamaren uche e mabꞌambꞌanir apater, aren cora tuaꞌ uyacta y jay bꞌan uche, cꞌumpen tacar otronyajr.
LUK 17:4 Y motor jay uche e mabꞌambꞌanir apater este siete veces tama inteꞌ taca día pero jay watar siete veces toit ubꞌan tuaꞌ uyaret y che: “Cꞌumpen tacaren tama tunor era, machi cꞌani insutpa inche otronyajr”, che uyaret, entonces cꞌumpen tacar siete veces ubꞌan, che e Jesús.
LUK 17:5 Pues entonces ojronobꞌ e apostolobꞌ taca Cawinquirar y che: —Non imbꞌijc taca war cacꞌupseyan tamaret coner, pero tacrenon tuaꞌ cacꞌupseyan más tamaret, chenobꞌ e apostolobꞌ era.
LUK 17:6 Entonces e Jesús che: —Jay nox ayan icꞌupesiaj tamaren xeꞌ chuchu bꞌan cocha ut e mostaza xeꞌ chuchu ut ubꞌan pero xeꞌ axin achꞌiꞌ, erer icꞌampes icꞌupesiaj tuaꞌ itzacre e teꞌ era y che: “Paxqꞌuen tara, quiqui pactzꞌen macuir e jaꞌ”, y e teꞌ era tuaꞌ ucꞌupsiox, che e Jesús.
LUK 17:7 Entonces ojron e Jesús y che: —Jay ayan inteꞌ tijam xeꞌ ayan uman xeꞌ war apatna tama e chor o xeꞌ war ucojco cora wacax, conda asutpa acꞌotoy toꞌtot ¿aware ca y che: “Ochen turen tor e mesa tuaꞌ iweꞌ?”
LUK 17:8 Machi, porque lo que cꞌani oꞌjron e patrón jax era: “Ustes e comida wacchetaca porque nen cꞌani inweꞌ. Conda acꞌapa incꞌuxi tunor lo que incꞌani nen, net erer iweꞌ”, che e patrón uyare uman.
LUK 17:9 Y conda acꞌapa aweꞌ e patrón era ¿cꞌani ca utattzꞌi uman umen que uche lo que tzacarna? Machi.
LUK 17:10 Y bꞌan ixto nox ubꞌan, conda acꞌapa iche tunor lo que arobꞌnox tuaꞌ iche umen e Dios, nox ucꞌani tuaꞌ iware cocha era y che: “Non manon tuaꞌ e Dios xeꞌ imbꞌijc taca cacꞌampibꞌir tut porque majax meyra war cache, ajtaca lo que arobꞌnon tuaꞌ cache war cache non”, che e Jesús.
LUK 17:11 Pues warto axin e Jesús tama e bꞌir tuaꞌ acꞌotoy tama e chinam Jerusalem, y tamar era war unumse e departamento Samaria y e departamento Galilea.
LUK 17:12 Y conda war acꞌotoy tama utiꞌ inteꞌ aldea, locꞌoy tajwina umen diez winicobꞌ xeꞌ ajmuacobꞌ taca e sian chec xeꞌ ucꞌabꞌa lepra, pero machi cꞌotoyobꞌ tut e Jesús sino que
LUK 17:13 cay aruobꞌ taca inteꞌ nuxi nuc y chenobꞌ: —Jesús Oo, Ajcanseyajet, yajtan coit, che e winicobꞌ era.
LUK 17:14 Y conda irnobꞌ umen e Jesús ojron jaxir y che: —Quiqui irsenic ibꞌa tut e sacerdote tama e chinam Jerusalem, che e Jesús. Y conda warto axiobꞌ tama e bꞌir cay ojri ixin e chec tutobꞌ y tzꞌacpesnobꞌ inyajrer.
LUK 17:15 Entonces inteꞌ tujamobꞌ cay uwira que cꞌapa ojri tunor e sian chec tut, y tamar era sutpa ixin tut e Jesús y war utattzꞌi ucꞌabꞌa e Dios taca inteꞌ nuxi nuc.
LUK 17:16 Y ixin cotuan tut e Jesús y pacwan esto tut e rum tuaꞌ uyajcꞌu gracias. Y e winic era tuaꞌ e departamento Samaria.
LUK 17:17 Entonces ojron e Jesús y che: —¿Ma ca jax diez ani xeꞌ tzꞌacpesnobꞌ? ¿Y tiaꞌ quetpobꞌ e inmojr nueve winicobꞌ xeꞌ tzꞌacpesnobꞌ ubꞌan?
LUK 17:18 Ajtaca e choquem winic era xeꞌ sutpa yopa tuaꞌ utattzꞌi ucꞌabꞌa e Dios tamar lo uche tamarobꞌ. Y e inmojr nueve xeꞌ tzꞌacpesnobꞌ, ¿tiaꞌ quetpobꞌ jaxirobꞌ? che e Jesús.
LUK 17:19 Entonces e Jesús uyare e winic y che: —Achpen quiqui era, porque tzꞌacpesnet umen que war icꞌupseyan tamaren, che e Jesús.
LUK 17:20 Pues entonces e fariseobꞌ cay uyubꞌiobꞌ tuaꞌ e Jesús que tucꞌa día tuaꞌ watar Catata Dios tuaꞌ acꞌotori tara tor e rum. Y jaxir uyare y che: —Machi tuaꞌ iwira e seña tama e día conda watar Catata Dios tuaꞌ acꞌotori tara tor e rum.
LUK 17:21 Mamajchi tuaꞌ oꞌjron y che: “Tara turu uchinam e Dios”, o que: “Yajaꞌ turu uchinam e Dios”, porque ya turu uchinam e Dios tiut nox, che e Jesús.
LUK 17:22 Entonces e Jesús uyare uyajcanuarobꞌ y che: —Cꞌani acꞌotoy e día conda nox tuaꞌ iyusre iwiren nen xeꞌ Uyunenen e winic bꞌan cocha war iwiren coner era, pero machi tuaꞌ uyubꞌiox iwiren.
LUK 17:23 Y ayan tin e cꞌani ayopa tiut xeꞌ tuaꞌ uyareox cocha era y che: “Tara turu Uyunen e winic war acꞌotori tujor tunor e gente”, o que: “Yajaꞌ turu Uyunen e winic war acꞌotori.” Pero ira ixixin iwira, y nien machi tuaꞌ ixixin tupatobꞌ.
LUK 17:24 Porque bꞌan cocha iwira eijbꞌi ut e qꞌuin xeꞌ ujanchꞌacnes axin tunor ut e qꞌuin, bꞌan ixto tuaꞌ iwiren nen xeꞌ Uyunenen e winic conda acꞌotoy e día tuaꞌ insutpa waten otronyajr.
LUK 17:25 Pero era ucꞌani tuaꞌ innumse nibꞌa meyra taca e cꞌuxner y cꞌani axejbꞌna niut umen tunor e gente xeꞌ turobꞌ tara tor e rum.
LUK 17:26 Bꞌan cocha numuy tama e onian tiempo conda turu ani e Noé y bꞌan tuaꞌ anumuy tama e día conda cꞌani insutpa waten nen xeꞌ Uyunenen e winic otronyajr.
LUK 17:27 Porque tama utiempo e Noé e gente war awiobꞌ, war oychꞌiobꞌ, war anujbꞌiobꞌ, y war anujbꞌiobꞌ taca otronteꞌ, y war ubꞌijnuobꞌ que imbꞌutz tunor este que cꞌotoy e día conda e Noé ixin ochoy tama e nuxi barco, y cay cꞌaxi e jajar y cay tꞌabꞌay e jaꞌ este que bꞌutcꞌa tunor or e rum y e gente war aruobꞌ, y war anujxiobꞌ y cꞌoyobꞌ muctzꞌa ixiobꞌ chamayobꞌ.
LUK 17:28 Y bꞌan numuy tama e onian tiempo conda turu ani inteꞌ winic xeꞌ ucꞌabꞌa Lot; e gente war awiobꞌ, war oychꞌiobꞌ, war amanuobꞌ, war achonmobꞌ, war apacmobꞌ, y war uche uyototobꞌ.
LUK 17:29 Pero tama e día conda locꞌoy e Lot tama e chinam Sodoma tiaꞌ chena meyra mabꞌambꞌanir cay cꞌaxi e cꞌajc tari tut e qꞌuin taca e tun xeꞌ ayan e cꞌajc tar xeꞌ ojri tujor tunor e gente, y cꞌapa puruy chamay tunorobꞌ.
LUK 17:30 Y bꞌan ixto tuaꞌ anumuy tama tunor e gente tama tunor or e rum conda acꞌotoy e día conda inchecta waten nen xeꞌ Uyunenen e winic otronyajr.
LUK 17:31 ’Y tama e día yajaꞌ tunor e gente ucꞌani tuaꞌ alocꞌoy aꞌjni tut e nuxi qꞌuijnar xeꞌ tuaꞌ watar tama ujorobꞌ. Y tamar era jay ayan inteꞌ winic xeꞌ war apatna tujor uyotot machix tuaꞌ ecmay oꞌchoy tama uyotot tuaꞌ ulocse lo que ayan macu. Y jay ayan inteꞌ winic xeꞌ war apatna tama uchor machix tuaꞌ asutpa acꞌotoy tama uyotot.
LUK 17:32 Bꞌijnunic tamar uwixcar e Lot xeꞌ motor que arobꞌna tuaꞌ alocꞌoy aꞌjni y que machi ani tuaꞌ asutpa achꞌujcsan tupat, pero cocha bꞌan uche jaxir sutpa tun y atzꞌam y chamay.
LUK 17:33 Tin e cꞌani ucorpes ucuxtar axin asatpa, pero tin e axin usati ucuxtar cꞌani acorpesna.
LUK 17:34 Cꞌani inwareox era que tama e acbꞌar yajaꞌ bꞌajcꞌat chꞌar chateꞌ gente tama inteꞌ chꞌacteꞌ, inteꞌ tuaꞌ aqꞌuejcha axin tut e qꞌuin y inteꞌ tuaꞌ aquetpa.
LUK 17:35 Bꞌajcꞌat chateꞌ ixictac war oychꞌuobꞌ, inteꞌ tuaꞌ aqꞌuejcha axin tut e qꞌuin, y inteꞌ aquetpa.
LUK 17:36 Bꞌajcꞌat war apatnobꞌ chateꞌ winicobꞌ tama inteꞌ chor, inteꞌ tuaꞌ aqꞌuejcha axin tut e qꞌuin, y inteꞌ aquetpa, che e Jesús.
LUK 17:37 Pero conda uyajcanuarobꞌ uyubꞌiobꞌ tunor era, upejcobꞌ Cawinquirar y che: —¿Y tiaꞌ tuaꞌ anumuy tunor era? che uyajcanuarobꞌ. Y jaxir che: —Cꞌani anumuy tunor era bꞌan cocha e ojroner tama e usij, que tiaꞌ chꞌar inteꞌ chamen, y ya war umorojse ubꞌobꞌ e sian usij, che e Jesús.
LUK 18:1 Entonces e Jesús cay ucanse uyajcanuarobꞌ taca inteꞌ ojroner xeꞌ mucur cora que machi tuaꞌ acꞌoyobꞌ conda war ucꞌajtiobꞌ taca e Dios tamar lo que war ucꞌaniobꞌ.
LUK 18:2 Y che jaxir: —Ayan inteꞌ ojroner tama inteꞌ juez xeꞌ machi ubꞌacre e Dios y nien e winicobꞌ machi ubꞌacre.
LUK 18:3 Y tama e chinam tiaꞌ patna e juez era ayan inteꞌ ixic xeꞌ chamen uviejo xeꞌ war ayopa tut tuaꞌ atacarna umener tamar lo que war unumse ubꞌa taca inteꞌ xeꞌ war aqꞌuijna uwira ubꞌobꞌ tacar.
LUK 18:4 Y ixin e tiempo pero e juez machi cꞌani utacre e ixic. Pero tari e tiempo conda e juez cay ubꞌijnu jax taca y che: “Motor que machi imbꞌacre e Dios y nien e winicobꞌ,
LUK 18:5 pero cocha e ixic era war ucꞌoyjresen umen que war ayopa taniut iraj iraj, cꞌani intacre tuaꞌ machi ayopa más”, jaxto ubꞌijnu e juez. Tara acꞌapa e ojroner.
LUK 18:6 ’Ubꞌinic lo que uche e juez xeꞌ ajmabꞌambꞌanir que conda numuy cora día cay ubꞌijnu tuaꞌ utacre e ixic xeꞌ chamen uviejo.
LUK 18:7 Y Cadiosir, ¿machi ca tuaꞌ ucorpes tunor tin e axin usicbꞌa ut conda war ucꞌajtiobꞌ tacar iraj iraj? ¿Machi ca tuaꞌ utacre e gente era wacchetaca?
LUK 18:8 Bꞌan ucꞌani yaꞌ. Y cꞌani inwareox era que Cadiosir cꞌani axin utacre e gente era wacchetaca. Pero conda insutpa waten nen xeꞌ Uyunenen e winic otronyajr, ¿intajwito ca nic tara tor e rum tin e warto acꞌupseyanobꞌ tama e Dios? che e Jesús.
LUK 18:9 Pues entonces e Jesús cay canseyan taca otronteꞌ ojroner xeꞌ mucur cora tama tin e uchebꞌiobꞌ que imbꞌutz turobꞌ tut e Dios, pero xeꞌ war uxejbꞌiobꞌ ut e inmojr gente. Y che:
LUK 18:10 —Ayan chateꞌ winicobꞌ xeꞌ ixiobꞌ tama e templo tuaꞌ ucꞌajtiobꞌ taca e Dios. Y inteꞌ winic jax inteꞌ fariseo y otronteꞌ winic jax inteꞌ ajmorojseyaj tumin tuaꞌ e gobierno.
LUK 18:11 Y e fariseo war eꞌron tut e altar y cay ucꞌajti taca e Dios cocha era y che: “O Dios, intattzꞌi acꞌabꞌa que nen majax bꞌanen cocha e inmojr winicobꞌ xeꞌ ajxujchꞌobꞌ, o xeꞌ ajmajresiajobꞌ, o xeꞌ meyra axanobꞌ taca e ajnajtir ixictac, y nien majax bꞌanen cocha e ajmorojseyaj tumin tuaꞌ e gobierno era.
LUK 18:12 Nen meyra war inche lo que imbꞌutz este que inwacta tuaꞌ inweꞌ dos día tama inteꞌ inteꞌ semana tuaꞌ incꞌajti taca e Dios, y war intoyi nidiezmo tama tunor lo que intojya.” Bꞌan che e fariseo conda war ucꞌajti taca e Dios.
LUK 18:13 Pero e ajmorojseyaj tumin tuaꞌ gobierno quetpa wawan innajt cora tut e altar y uchꞌubꞌa ut y machi utꞌabꞌse ut tuaꞌ uwira tichan. Y cay uyobꞌi uyalma y cay ucꞌajti taca e Dios y che: “O Dios, yajtan niut, porque nen ajmabꞌambꞌaniren toit”, che e ajmorojseyaj tumin tuaꞌ e gobierno conda war ucꞌajti taca e Dios.
LUK 18:14 Y cꞌani inwareox era que e ajmorojseyaj tumin tuaꞌ gobierno era sutpa ixin tama uyotot corpesbꞌir umen e Dios. Pero majax bꞌan chena taca e fariseo porque tin e uche ubꞌa que jax inteꞌ nuxi winic cꞌani amanxujresna, pero tin e axin umanxujres ubꞌa cꞌani achꞌijsena tuaꞌ aquetpa nuxi winic, che e Jesús.
LUK 18:15 Pues ayan tin e cay utares cora maxtac tut e Jesús tuaꞌ upacbꞌu ucꞌabꞌ tama ujorobꞌ, pero conda uyajcanuarobꞌ uwirobꞌ tunor era cay chenobꞌ que: “Ira itares imaxtac tut Cawinquirar.”
LUK 18:16 Pero e Jesús upejca e maxtac y che: —Actanic tuaꞌ ayopobꞌ taniut tunor e chuchu maxtac, y ira iquete iwabꞌuobꞌ, porque tunor tin e axin acꞌupseyanobꞌ tama e Dios bꞌan cocha war uchiobꞌ e chuchu maxtacobꞌ era cꞌani oꞌchoyobꞌ tama uchinam e Dios.
LUK 18:17 Y cꞌani inwareox coner que tin e machi uchꞌami uchinam e Dios bꞌan cocha inteꞌ chuchu maxtac machi tuaꞌ oꞌchoy tamar, che e Jesús.
LUK 18:18 Pues entonces cꞌotoy inteꞌ nuxi winic tut e Jesús y cay uyubꞌi tuaꞌ y che: —Niwajcanseyajet xeꞌ erachet, ¿tucꞌa tuaꞌ inche nen tuaꞌ inchꞌami e cuxtar xeꞌ machi tuaꞌ acꞌapa? che e nuxi winic era.
LUK 18:19 Y che e Jesús: —Net war awaren que nen erachen. Pero jax taca e Dios xeꞌ erach. Y tamar era war awaren que Diosen nen ubꞌan.
LUK 18:20 Pero net anata lo que arobꞌna umen e Dios, que ira iꞌxin taca inteꞌ ajnajtir ixic, ira ichamsan, ira ixujchꞌian, ira imajresian, y cꞌupsen atata y atuꞌ, che e Jesús.
LUK 18:21 Y che e winic: —Tunor era inchix desde chuchuento, che e winic.
LUK 18:22 Pero conda e Jesús uyubꞌi e ojroner era, sutpa ojron y che: —Ayanto lo que ucꞌanto tuaꞌ ache, quiqui chono tunor lo que ayan tabꞌa y ajcꞌun tin e tzajtaca ut. Y tamar era cꞌani aquetpa meyra atuanibꞌir tuaꞌ achꞌami conda iꞌxin tut e qꞌuin. Y conda acꞌapa achoni tunor lo que tabꞌa, lar incoꞌ tacaren, che e Jesús.
LUK 18:23 Pero conda e winic uyubꞌi e ojroner era quetpa tzajtaca ut cocha ayan meyra utumin y machi cꞌani uchoni lo que ayan tuaꞌ.
LUK 18:24 Pero conda e Jesús uwira que tzajtaca ut uwirnar, ojron otronyajr y che: —Intran tuaꞌ oꞌchoy tama uchinam e Dios tin e ayan meyra utumin.
LUK 18:25 Y intran tuaꞌ anumuy inteꞌ nuxi arac xeꞌ ucꞌabꞌa camello tama uchꞌenar inteꞌ aguja, pero más intran tuaꞌ oꞌchoy tama uchinam e Dios inteꞌ xeꞌ war ucojco tama utumin xeꞌ meyra ayan tuaꞌ, che e Jesús.
LUK 18:26 Entonces tin e war uyubꞌiobꞌ lo que ojron chenobꞌ: —Y jay inteꞌ xeꞌ meyra ayan utumin cocha era machi uyubꞌi acorpesna, ¿chi tuaꞌ acorpesna? chenobꞌ.
LUK 18:27 Y che e Jesús: —Pues mamajchi tuaꞌ acorpesna tamar taca utumin, pero tunor era intran tut e winicobꞌ. Pero Cadiosir erer uche tunor cocha jaxir ayan ucꞌotorer, che e Jesús.
LUK 18:28 Y che e Pedro: —Pero Niwinquiraret, non era cawactix tunor lo que ayan ticabꞌa tuaꞌ caxin tacaret, che e Pedro.
LUK 18:29 Entonces ojron e Jesús y che: —Cꞌani inwareox era que tunor tin e axin uyacta uyotot o utuꞌ y utata o usacunobꞌ y uwijtzꞌinobꞌ o uwixcar o umaxtac tuaꞌ taca ucꞌupse e Dios,
LUK 18:30 cꞌani uchꞌami más tuaꞌ e Dios tara tor e rum y nacpat era cꞌani uchꞌami e cuxtar xeꞌ machi tuaꞌ acꞌapa conda axin tichan tut e qꞌuin, che e Jesús.
LUK 18:31 Entonces e Jesús upejca e doce uyajcanuarobꞌ tuaꞌ alocꞌoyobꞌ cora najtir, y de allí cay ojron tacarobꞌ y che: —Coner era cꞌani caxin esto tama e chinam Jerusalem tuaꞌ acꞌapa achempa tunor lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo tamaren nen xeꞌ Uyunenen e winic.
LUK 18:32 Porque yajaꞌ tama e chinam Jerusalem cꞌani anjcꞌuna tama ucꞌabꞌobꞌ e gente xeꞌ majax tuobꞌ e Israel, y cꞌani atzeniobꞌ nipater, y cꞌani ucꞌayenobꞌ bꞌan taca cocha ubꞌijnu uchiobꞌ, y axin utujbꞌienobꞌ.
LUK 18:33 Y de allí axin uwatzꞌienobꞌ y axin uchamsenobꞌ. Pero tama e uxteꞌ día cꞌani insujta imbꞌixqꞌuesna tujam e chamenobꞌ, che e Jesús.
LUK 18:34 Pero uyajcanuarobꞌ machi unatobꞌ tucꞌa tamar war oꞌjron era, y machi unatobꞌ tucꞌa war che e ojroner era, y tamar era quetpa mucur tunor era tutobꞌ.
LUK 18:35 Entonces conda e Jesús cꞌanix acꞌotoy tama e chinam Jericó, turu inteꞌ winic xeꞌ tajpem unacꞌut tutiꞌ e bꞌir xeꞌ war ucꞌajti e tumin taca e gente.
LUK 18:36 Pero conda cꞌotoy unata que war anumuy meyra gente tut e bꞌir tiaꞌ turu cay uyubꞌi tuaꞌ e gente tuaꞌ unata chi war anumuy era.
LUK 18:37 Y arobꞌna que jax e Jesús xeꞌ tuaꞌ e chinam Nazaret xeꞌ war anumuy.
LUK 18:38 Entonces jaxir cay aru taca inteꞌ nuxi nuc y che: —Jesús Oo, sitzbꞌiret tuaꞌ e David, yajtan niut tara, che e winic xeꞌ tajpem unacꞌut.
LUK 18:39 Entonces tin e war axanobꞌ tut e bꞌir cay chenobꞌ tuaꞌ machi aꞌru. Pero jaxir más cay aru y che: —Sitzbꞌiret tuaꞌ e David, yajtan niut, inwaret, che e winic.
LUK 18:40 Entonces quetpa wawan e Jesús y uyare tuaꞌ ataresna. Y conda qꞌuejcha cꞌotoy e winic tuyejtzꞌer cay uyubꞌi tuaꞌ y che:
LUK 18:41 —¿Tucꞌa acꞌani tuaꞌ inche tacaret? che e Jesús. Y e winic xeꞌ tajpem unacꞌut che: —Niwinquiraret, incꞌani tuaꞌ awajqꞌuen unacniut tuaꞌ enron, che e winic.
LUK 18:42 Y e Jesús che: —Chꞌama unacꞌoit, tzꞌacpesbꞌiret umen que war icꞌupseyan tamaren, che e Jesús.
LUK 18:43 Y wacchetaca uchꞌami unacꞌut tuaꞌ uyubꞌi eꞌron. Y ixin tupat e Jesús, war utattzꞌi ucꞌabꞌa e Dios. Y tunor e gente xeꞌ uwirobꞌ lo que numuy era cay utattzꞌiobꞌ ucꞌabꞌa e Dios ubꞌan.
LUK 19:1 Pues entonces ochoy e Jesús tama e chinam Jericó; war anumuy tama e chinam era tuaꞌ acꞌotoy tama e chinam Jerusalem.
LUK 19:2 Y ayan inteꞌ winic yajaꞌ xeꞌ ucꞌabꞌa Zaqueo xeꞌ jax uwinquir e inmojr ajmorojseyajobꞌ tumin tuaꞌ e gobierno. Y jaxir meyra ayan utumin.
LUK 19:3 Y cꞌani ani uwira ut e Jesús, pero cocha ayan meyra gente tuyejtzꞌer e Jesús, y cocha jaxir chuchu uyoc, ma cocha erer uwira ut.
LUK 19:4 Entonces ajni ixin más bꞌana tama e bꞌir tiaꞌ tuaꞌ anumuy e Jesús y utajwi inteꞌ teꞌ y tꞌabꞌay tama ucꞌabꞌ e teꞌ era tuaꞌ utajwi cocha tuaꞌ uwira ut e Jesús.
LUK 19:5 Y conda cꞌotoy e Jesús yebꞌar e teꞌ era uchꞌujcu uwira tichan tiaꞌ turu e Zaqueo tama ucꞌabꞌ e teꞌ y che: —Zaqueo, ecmen tarex wacchetaca, porque cꞌani inxin tacaret tama oꞌtot tuaꞌ inwarajset, che e Jesús.
LUK 19:6 Entonces wacchetaca ecmay e Zaqueo y atzay ixin uchꞌami e Jesús y uqꞌueche ixin tama uyotot.
LUK 19:7 Pero e sian gente xeꞌ war axanobꞌ tupat e Jesús, conda uwirobꞌ lo que cay uche jaxir, cay ojronobꞌ upater y che que e Jesús war aquetpa tama uyotot inteꞌ ajmabꞌambꞌanir.
LUK 19:8 Entonces conda cꞌotoyobꞌ tama uyotot e Zaqueo, jaxir achpa wawan y cay ojron taca e Jesús y che: —Ubꞌin lo que cꞌani inwaret era: Cꞌani inwajcꞌu intajch tama tunor lo que ayan tanibꞌa tin e tzajtaca ut. Y jay ayan tin e cay inmajres tuaꞌ inlocse más utumin que lo que ucꞌani ani e gobierno cꞌani insutpa intoyi otronyajr pero cuatro veces más, che e Zaqueo.
LUK 19:9 Y entonces che e Jesús: —Chequer tama awojroner que corpesbꞌirox tunor tin e turox tama oꞌtot era, porque net ubꞌan jax inteꞌ umaxtac e Abraham xeꞌ turuan tama e onian tiempo.
LUK 19:10 Pues nen xeꞌ Uyunenen e winic tarien tuaꞌ insicbꞌa y tuaꞌ incorpes tin e satrem, che e Jesús.
LUK 19:11 Pues ayan cora winicobꞌ tama e otot era xeꞌ war uyubꞌiobꞌ tunor lo que arobꞌna umen e Jesús. Y tamar era jaxir cay uchecsu inteꞌ ojroner tutobꞌ, porque cocha majax innajt turobꞌ tut e chinam Jerusalem war uchebꞌiobꞌ e gente que cꞌani acꞌotoy e hora rajxa era conda e Dios tuaꞌ acay acꞌotori tara tor e rum.
LUK 19:12 Entonces e Jesús che: —Ayan inteꞌ ojroner tama inteꞌ nuxi winic xeꞌ ixin esto tama inteꞌ lugar innajt tuaꞌ uchꞌami e cꞌotorer tuaꞌ aquetpa rey tujor e lugar tiaꞌ aturuan, y de allí cꞌani asutpa acꞌotoy tama uyotot otronyajr.
LUK 19:13 Pero conda merato axin tama uxambꞌar upejca diez ut umanobꞌ y cay uyajcꞌu cora tumin inteꞌ inteꞌ uman y uyare y che: “Chenic e chonmar tama e tumin era este que insutpa inyopa otronyajr”, che e nuxi winic era.
LUK 19:14 Pero cocha war axejbꞌna ut umen tin e turobꞌ tama uchinam ebꞌetna ixin cora winicobꞌ tupat tuaꞌ uchecsu que: “Non machi cacꞌani tuaꞌ acꞌotori e winic era ticajor non.”
LUK 19:15 Pero conda cꞌotoy e winic tiaꞌ war acꞌotoy aꞌrobꞌna que jaxir tuaꞌ aquetpa rey tama uchinam. Entonces conda sutpa ixin tama uchinam otronyajr cay uyare tuaꞌ apejcna tunor umanobꞌ xeꞌ cay uchꞌamiobꞌ e tumin tuaꞌ porque cꞌani unata tucꞌa cay uchiobꞌ taca e tumin lo que cay uchꞌamiobꞌ inteꞌ intiobꞌ.
LUK 19:16 Entonces yopa e bꞌajxan man tut uwinquir y che: “Tamar e tumin lo que awajqꞌuen ixin inchꞌami otro diez ut e tumin”, che e man era.
LUK 19:17 Entonces ojron e rey y che: “Intzay inwiret que imbꞌutz locꞌoy tunor lo que cay ache era. Y cocha inwira que cꞌapa aturbꞌa abꞌa tama tunor e patnar era tama imbꞌijc nitumin lo que cay inwajqꞌuet, cꞌani inwajqꞌuet tuaꞌ icꞌotori tujor diez chinamobꞌ”, che e rey. Locꞌoy ixin e man.
LUK 19:18 Entonces yopa otronteꞌ man tut e rey y che: “Tamar e tumin lo que awajqꞌuen ixin inchꞌami otro cinco ut e tumin”, che e man era.
LUK 19:19 Entonces ojron e rey y che: “Bueno ixto yaꞌ, y era cꞌani inwajqꞌuet tuaꞌ icꞌotori tujor cinco chinamobꞌ”, che e rey. Locꞌoy ixin e man.
LUK 19:20 Entonces yopa otronteꞌ man tut e rey y che: “Tara chꞌar atumin. Inchꞌubꞌa tama inteꞌ payuj tuaꞌ machi insati.
LUK 19:21 Pues nen war imbꞌacret, porque nen innata que net intran awirnar, y que war itojya motor que majax net xeꞌ war ipatna, y que net war amorojse lo que majax net apaqꞌui”, che e man.
LUK 19:22 Entonces qꞌuijna e rey y uyare e man cocha era y che: “Chequer tamar awojroner que net ajmabꞌambꞌaniret. Jay net war ani anata que nen jax inteꞌ winic xeꞌ intran ani niwirnar, y que war intojya motor que majax nen xeꞌ war impatna y que war inmorojse lo que majax nen impaqꞌui,
LUK 19:23 entonces ¿tucꞌa tuaꞌ machi ayari nitumin tama e banco tuaꞌ asutpa taca uyeror tanibꞌa conda insutpa inyopa tama niotot otronyajr?” che e rey.
LUK 19:24 Y de allí sutpa ojron e rey taca e inmojr man y che: “Locsenic e tumin tuaꞌ e man era y ajcꞌunic tin e uchꞌami diez ut e tumin”, che e rey.
LUK 19:25 Y de allí ojronobꞌ e manobꞌ y chenobꞌ: “Pero ¿tucꞌa tuaꞌ cꞌani awajcꞌu más tumin tin e ayanix diez ut utumin tacar? Porque tamar era tzꞌacarix lo que ayan tacar”, chenobꞌ.
LUK 19:26 Pero che e rey: “Cꞌani inwareox era que tin e ayan más tacar cꞌani axin aꞌjcꞌuna más este que ayan meyra lo que aquetpa, pero tin e matucꞌa ayan tamar cꞌani aloqꞌuesna tunor lo que ayan cora tuaꞌ motor que imbꞌijc taca ayan tuaꞌ.
LUK 19:27 Y tunor tin e war aqꞌuijna uwirenobꞌ, y xeꞌ machi war ucꞌanienobꞌ tuaꞌ incꞌotori tama e lugar era, taresic coner tuaꞌ achamesnobꞌ tunorobꞌ taniut era”, che e rey. Tara acꞌapa e ojroner, che e Jesús.
LUK 19:28 Conda cꞌapa tunor uyojroner era, e Jesús cay xana otronyajr tuaꞌ acꞌotoy tama e chinam Jerusalem.
LUK 19:29 Y conda cꞌanix acꞌotoyobꞌ tama e chinam Betfagé y tama e chinam Betania xeꞌ majax innajt tut or e witzir xeꞌ ucꞌabꞌa Olivo, ojron e Jesús taca chacojt uyajcanuarobꞌ y che:
LUK 19:30 —Quiquic tama e aldea teinxejr bꞌana y yajaꞌ ixixin itajwi incojt chij cachar war xeꞌ mato majchi aturuan tujor. Bꞌanic y taresic.
LUK 19:31 Y jay ayan chi xeꞌ oꞌjron tacarox y che: “¿Tucꞌa tuaꞌ war ibꞌani e chij era?” arenic y che: “Cawinquirar cꞌani ucꞌampes”, che e Jesús.
LUK 19:32 Entonces ixin uyajcanuarobꞌ y utajwiobꞌ e chij bꞌan taca cocha arobꞌnobꞌ umen e Jesús.
LUK 19:33 Y conda tajwinobꞌ que war ubꞌaniobꞌ e chij umen uyajyumobꞌ e chij entonces arobꞌnobꞌ y chenobꞌ: —¿Tucꞌa tuaꞌ war ibꞌani e chij era? che e ajyumobꞌ.
LUK 19:34 Y e ajcanuarobꞌ chenobꞌ: —Pues Cawinquirar cꞌani ucꞌampes, che e ajcanuarobꞌ era. Entonces e ajyumobꞌ chij che que: —Erer icꞌampes, chenobꞌ e ajyumobꞌ chij.
LUK 19:35 Entonces uqꞌuechiobꞌ ixin e chij esto tut e Jesús, y uxichꞌiobꞌ ubꞌujc tama upat e chij y de allí utꞌabꞌse uturbꞌobꞌ e Jesús tamar.
LUK 19:36 Y conda war axin e Jesús tor e chij tunor e gente cay uxichꞌiobꞌ ubꞌujcobꞌ tut e bꞌir axin. Pues uchiobꞌ cocha era umen que bꞌan cay uchiobꞌ e gente tama e Israel tuaꞌ uchectes ubꞌobꞌ que war ucꞌaniobꞌ tin e war anumuy era.
LUK 19:37 Entonces conda war axanobꞌ tiaꞌ axin xijrcojt e bꞌir tama or e witzir Olivo, tunor e sian ajcanuarobꞌ tuaꞌ e Jesús cay aruobꞌ taca inteꞌ nuxi nuc umen que war atzayobꞌ, y war utattzꞌiobꞌ ucꞌabꞌa e Dios tama tunor e nuxi milagro lo que cay uwirobꞌ.
LUK 19:38 Y aruobꞌ tunor uyajcanuarobꞌ cocha era y chenobꞌ: —Chojbꞌesbꞌir ut e Rey xeꞌ axin watar tama ucꞌabꞌa Cawinquirar. Ayan e tzayer umen que watar e jiriar tut e qꞌuin tichan tiaꞌ ayan meyra utawarer e Dios. ¡Catattzꞌi ucꞌabꞌa Cadiosir! che uyajcanuarobꞌ era.
LUK 19:39 Pues ayan cora fariseobꞌ xeꞌ turobꞌ tujam e ajcanuarobꞌ era xeꞌ cay ojronobꞌ taca e Jesús y chenobꞌ: —Aren awajcanuarobꞌ tuaꞌ machi oꞌjronobꞌ cocha era, chenobꞌ e fariseobꞌ era.
LUK 19:40 Pero e Jesús che: —Jay jaxirobꞌ machi utattzꞌiobꞌ ucꞌabꞌa e Dios coner era, inwareox era que e sian tun xeꞌ turobꞌ tor e rum axin oꞌjronobꞌ tuaꞌ utattzꞌiobꞌ ucꞌabꞌa e Dios, che e Jesús.
LUK 19:41 Y conda cꞌanix acꞌotoy e Jesús tama e chinam Jerusalem cay aru y che:
LUK 19:42 —Jay tin e turobꞌ tama e chinam Jerusalem tama e día coner unatobꞌ nic ani chi xeꞌ erer uyajcꞌu e jiriar, galan ani yaꞌ. Pero cocha machi ucꞌaniobꞌ, aquetpa mucur tunor era tutobꞌ.
LUK 19:43 Pues watarto inteꞌ tiempo xeꞌ inyaj meyra tutobꞌ, porque tunor tin aqꞌuijna uwirobꞌ axin uxojyo umaquiobꞌ ut e chinam era taca inteꞌ nuxi macteꞌ xeꞌ petzbꞌir tun tuaꞌ uquete uwabꞌu tunor tin e turobꞌ macuir e chinam tuaꞌ machi uyubꞌi alocꞌoyobꞌ.
LUK 19:44 Pues bꞌan tuaꞌ uchiobꞌ tin e aqꞌuijnobꞌ uwirobꞌ e gente era este que acꞌapa utijresobꞌ tunor e chinam. Y axin uchamsiobꞌ tunor tin e turobꞌ tama e chinam era. Y nien ingojr tun machi tuaꞌ uyactobꞌ tujor upiar. Y cꞌani anumuy tunor era umen taca que machi cꞌupseyanobꞌ tin e turobꞌ tama e chinam Jerusalem tama e día conda checta tari e Dios tuaꞌ acorpesian, che e Jesús.
LUK 19:45 Entonces conda cꞌotoy e Jesús tama e chinam Jerusalem ixin ochoy macuir e templo y cay uyajnes locꞌoy tunor tin e war achonma y tin e war amano yajaꞌ.
LUK 19:46 Y che e Jesús: —Chꞌar tzꞌijbꞌabꞌir tama uyojroner e Dios que: “Niotot, che e Dios, jax inteꞌ lugar tiaꞌ tuaꞌ ucꞌajti inteꞌ taca e Dios”, pero nox war icꞌampes bꞌan cocha inteꞌ uchꞌen e ajxujchꞌobꞌ, che e Jesús.
LUK 19:47 Y ejcꞌar ejcꞌar e Jesús war acanseyan tama e templo, pero uwinquirobꞌ e inmojr sacerdotiobꞌ y e ajcanseyajobꞌ tama uley e Moisés war aqꞌuijnobꞌ, y bꞌan war uchiobꞌ tunor e ajcꞌamparobꞌ tama e chinam Jerusalem ubꞌan, y cay usajcobꞌ cocha tuaꞌ uchamsiobꞌ e Jesús.
LUK 19:48 Pero machi utajwiobꞌ cocha tuaꞌ uchamsiobꞌ porque tunor e gente tama e chinam era war atzayobꞌ conda uyubꞌiobꞌ tunor lo que che e Jesús.
LUK 20:1 Pues tama inteꞌ día conda turu e Jesús macuir e templo war acanseyan tut tunor e sian gente tama ucorpesiaj e Dios, checta cꞌotoyobꞌ uwinquirobꞌ e inmojr sacerdotiobꞌ taca cora ajcanseyajobꞌ tama uley e Moisés y cora nuquir winicobꞌ
LUK 20:2 xeꞌ chenobꞌ: —¿Chi tuaꞌ tunor e nuxi cꞌotorer lo que war acꞌampes tuaꞌ awajnes e ajchonmarobꞌ y tuaꞌ atzꞌacpes tin e ajmuacobꞌ y tuaꞌ achꞌami utattzꞌarsiaj e maxtacobꞌ era? ¿Chi uyajqꞌuet e cꞌotorer era? chenobꞌ e nuquir winicobꞌ era.
LUK 20:3 Y che e Jesús: —Bꞌanen ubꞌan, ayan lo que cꞌani umbꞌi tibꞌa. Y jay iwaren entonces cꞌani inwareox chi umen ajcꞌunen e cꞌotorer era.
LUK 20:4 ¿Chi umen tzacarna ixin e Juan tuaꞌ achꞌuyma? ¿Umen ca e Dios, o umen e winicobꞌ? che e Jesús.
LUK 20:5 Entonces cay ojronobꞌ jaxobꞌ taca y chenobꞌ: —¿Y tucꞌa tuaꞌ caware era? Jay caware que e Juan ebꞌetbꞌir tari umen e Dios, jaxir tuaꞌ uyareon que: “¿Y tucꞌa tuaꞌ machi icꞌupse?”
LUK 20:6 Pero jay caware que e Juan ebꞌetbꞌir tari umen e winicobꞌ, cꞌani aqꞌuijnobꞌ tunor e gente este que axin urionobꞌ taca e tun tuaꞌ uchamsionobꞌ porque tunorobꞌ war unatobꞌ que e Juan ojron tamar taca lo que ajcꞌuna umen e Dios, chenobꞌ e nuquir winicobꞌ era jaxobꞌ taca.
LUK 20:7 Y tamar era uyareobꞌ e Jesús que machi unatobꞌ chi umen ebꞌetbꞌir tari e Juan tuaꞌ achꞌuyma.
LUK 20:8 Entonces e Jesús che: —Y nien nen machi tuaꞌ inwareox chi umen ajcꞌunen e cꞌotorer tuaꞌ inche tunor era, che e Jesús.
LUK 20:9 Pues entonces cay ojron e Jesús tut e gente otronyajr y uchecsu inteꞌ ojroner xeꞌ mucur cora tutobꞌ y che: —Ayan inteꞌ ojroner tama inteꞌ ajyum chor xeꞌ ixin upaqꞌui cora chꞌan xeꞌ ucꞌabꞌa uva tama inteꞌ nuxi chor. Meyra lugar upaqꞌui. Y nacpat era utajwi cora winicobꞌ xeꞌ cꞌani utoyi e rum era tuaꞌ apatnobꞌ tamar. Y jaxirobꞌ quetpa tuaꞌ utoyi taca imbꞌijc e cosecha xeꞌ alocꞌoy tama e rum. Y de allí e ajyum locꞌoy ixin innajt tama meyra tiempo.
LUK 20:10 Entonces conda cꞌotoy e día tuaꞌ e cosecha e ajyum uyebꞌta ixin inteꞌ uman tuaꞌ axin ucꞌajti imbꞌijc e cosecha xeꞌ quetpa tuaꞌ uchꞌami, pero e ajpatnarobꞌ cay uwatzꞌiobꞌ e man y utzacriobꞌ ixin bꞌan taca, matucꞌa uyajcꞌuobꞌ.
LUK 20:11 Entonces e ajyum sutpa uyebꞌta ixin otronteꞌ uman, pero intaca ucꞌayobꞌ y uwatzꞌiobꞌ otronyajr y utzacriobꞌ ixin bꞌan taca, matucꞌa uyajcꞌuobꞌ otronyajr.
LUK 20:12 Y de allí e ajyum sutpa uyebꞌta ixin otronteꞌ uman pero e ajpatnarobꞌ cꞌapa uchꞌaquiobꞌ y uyajnesobꞌ locꞌoy ixin.
LUK 20:13 ’Pero tama ucꞌapesnibꞌir cay ubꞌijnu e ajyum jax taca y che, “Pero ¿tucꞌa tuaꞌ inche tamar era? ¿O inwebꞌta ca axin niunen xeꞌ inyajta ut? Y conda uwirobꞌ e ajpatnarobꞌ que jax era niunen xeꞌ war acꞌotoy, bꞌajcꞌat ubꞌacriobꞌ este que axin uyajcꞌuobꞌ imbꞌijc e cosecha xeꞌ aquetpa tuaꞌ ani uyajqꞌuenobꞌ”, xeꞌ ubꞌijnu e ajyum jax taca. Entonces ixin uche e ajyum cocha cay ubꞌijnu era.
LUK 20:14 Pero conda irna usitz umen e ajpatnarobꞌ cay ojronobꞌ jaxobꞌ taca y chenobꞌ: “¿O jax ca era xeꞌ tuaꞌ aquetpa ajyum tuaꞌ tunor e rum era conda axin achamay utata? Cachamsenic tuaꞌ aquetpa tunor e cꞌopot era tacaron”, chenobꞌ e ajpatnarobꞌ xeꞌ calapir uwirnarobꞌ jaxobꞌ taca.
LUK 20:15 Entonces ulocsiobꞌ macuir e chor y uchamsiobꞌ. Tara acꞌapa e ojroner, che e Jesús. Entonces e Jesús sutpa uyubꞌi tuaꞌ e gente y che: —¿Y tucꞌa tuaꞌ uche e ajyum rum taca e ajpatnarobꞌ era?
LUK 20:16 Cꞌani inwareox era tucꞌa cꞌani uche: Jaxir cꞌani axin uchamse tunor e ajpatnarobꞌ era y de allí cꞌani axin upojro otro inmojr ajpatnarobꞌ xeꞌ cꞌani utoyi tuaꞌ apatnobꞌ tama e rum era, che e Jesús. Pues conda e gente cꞌapa uyubꞌiobꞌ tunor e ojroner era bꞌactobꞌ meyra y quetpobꞌ tzajtaca utobꞌ porque war unatobꞌ que e ajpatnarobꞌ xeꞌ calapir uwirnarobꞌ era jax e gente xeꞌ tuobꞌ e Israel.
LUK 20:17 Pero e Jesús uchꞌujcu uwira tunor e gente era y che: —¿Y tucꞌa war che lo que chꞌar tzꞌijbꞌabꞌir tama uyojroner e Dios tiaꞌ che que: E tun xeꞌ chocbꞌir ani umen e ajcheyaj ototobꞌ ayan meyra ucꞌampibꞌir coner? Bꞌan che tama uyojroner e Dios.
LUK 20:18 Tin e axin acucrema tujor e tun era axin ucꞌocchi ubꞌa tamar, y jay oꞌjri e tun era tujor inteꞌ, jaxir tuaꞌ aquetpa uchꞌeir umen umabꞌambꞌanir, che e Jesús war uchecsu tut e gente que jaxir jax e tun era.
LUK 20:19 Pues entonces qꞌuijnobꞌ uwinquirobꞌ e inmojr sacerdotiobꞌ y e ajcanseyajobꞌ tama uley e Moisés umen lo que arobꞌnobꞌ umen e Jesús porque uyubꞌiobꞌ lo que che e ojroner era que jaxirobꞌ jax e ajpatnarobꞌ xeꞌ calapir uwirnarobꞌ. Y tamar era cay usajcobꞌ cocha tuaꞌ uquete uturbꞌobꞌ e Jesús macuir e cárcel, pero ma cocha tuaꞌ uchiobꞌ coner porque war ubꞌacriobꞌ e gente umen que tunorobꞌ war ucꞌaniobꞌ e Jesús.
LUK 20:20 Entonces cay uyebꞌta ixin cora winicobꞌ tuaꞌ uche ubꞌobꞌ que erobꞌach ani tut e Jesús. Cꞌani ani umajresobꞌ e Jesús tuaꞌ erer utuchꞌiobꞌ tut e ley tamar taca uyojroner tuaꞌ uyubꞌi uqꞌuechiobꞌ axin tut e gobernador.
LUK 20:21 Y tamar era e winicobꞌ era cay uyubꞌiobꞌ tuaꞌ e Jesús y chenobꞌ: —Cawajcanseyajet, canata que aware ajtaca lo que erach. Y bꞌan war ache tut tunor e gente, y machi war aturbꞌa abꞌa tamar inteꞌ jay nuquir winic o jay chuchu. Y non war canata que war icanseyan bꞌan taca cocha ucꞌani tuaꞌ axana inteꞌ tama ubꞌir e Dios.
LUK 20:22 Pero ayan lo que cꞌani canata tacaret: ¿Ucꞌani ca tuaꞌ catoyi e tumin lo que arobꞌnon umen e César que ucꞌani tuaꞌ amorojsena iraj iraj, o machi? che e ajmajresiajobꞌ era.
LUK 20:23 Pero e Jesús cꞌotoy unata lo que cꞌani ani achena upater umenerobꞌ y che: —¿Tucꞌa tuaꞌ war iche cocha era tuaꞌ imajresen ani?
LUK 20:24 Irseniquen inteꞌ tumin xeꞌ wechꞌer ut. ¿Chi uyeroj xeꞌ turu tamar? ¿Tucꞌa ucꞌabꞌa xeꞌ tzꞌijbꞌabꞌir tamar? che e Jesús. Entonces chenobꞌ: —Jax tuaꞌ e rey César, che e gente.
LUK 20:25 Y che e Jesús: —Ajcꞌunic e César lo que jaxir ucꞌajti y ajcꞌunic e Dios lo que jaxir ucꞌajti, che e Jesús.
LUK 20:26 Y matucꞌa tamar obꞌnobꞌ umajresobꞌ e Jesús tut e gente, sino que bꞌactobꞌ tama tunor lo que che e Jesús y subꞌajrobꞌ que matucꞌa obꞌna uchiobꞌ tacar.
LUK 20:27 Pues nacpat era checta tari cora winicobꞌ tut e Jesús xeꞌ tuaꞌ inteꞌ grupo religioso xeꞌ ucꞌabꞌa saduceo. Y e saduceobꞌ era ucansiobꞌ que mamajchi tuaꞌ asutpa abꞌixcꞌa tujam e chamenobꞌ. Y tamar era cꞌani ani umajresobꞌ e Jesús y chenobꞌ:
LUK 20:28 —Cawinquiret, chꞌar tzꞌijbꞌabꞌir tama uley e Moisés que jay axin anujbꞌi inteꞌ sitz taca inteꞌ ijchꞌoc, pero conda mato tucꞌa umaxtac achamay e winic, entonces uwijtzꞌin e winic era ucꞌani tuaꞌ asutpa anujbꞌi taca e ixic tuaꞌ achꞌijtesian tacar. Y e sitz xeꞌ axin acuxpa bꞌajxan ucꞌani tuaꞌ aquetpa tama ucꞌabꞌa usacun xeꞌ chamay.
LUK 20:29 Pues tama inyajr ayan inteꞌ familía xeꞌ ayan siete xeꞌ intarer tejromtac tacaron. Entonces xeꞌ bꞌajxan ixin nujbꞌi taca inteꞌ ijchꞌoc pero chamay y matucꞌa umaxtac uyacta.
LUK 20:30 Entonces e ijtzꞌimbꞌir uchꞌami uwixcar usacun ani tuaꞌ anujbꞌi tacar, pero jaxir chamay ubꞌan, matucꞌa umaxtac uyacta.
LUK 20:31 Entonces e uxteꞌ tejromtac sutpa nujbꞌi otronyajr taca uwixcar usacunobꞌ, y bꞌan cꞌapa uchiobꞌ tunor e siete tejromtac, inteꞌ intiobꞌ ixin uchꞌamiobꞌ e ixic era y mamajchi checta umaxtac tacar, y bꞌan taca chamayobꞌ tunor e siete tejromtac era.
LUK 20:32 Entonces tama ucꞌapesnibꞌir tunor era chamay e ixic ubꞌan. Tara acꞌapa e ojroner era.
LUK 20:33 Entonces arenon ¿tucꞌa tuaꞌ anumuy conda asujta abꞌixqꞌuesna tunor e gente tara tor e rum? Y ¿chi tacar tuaꞌ aquetpa ixcarbꞌir e ixic cocha cꞌapa nujbꞌi taca inteꞌ inteꞌ e siete tejromtac era? che e saduceobꞌ era.
LUK 20:34 Entonces che e Jesús: —Tara tor e rum e winicobꞌ y e ixictac war anujbꞌiobꞌ.
LUK 20:35 Pero tama e tiempo xeꞌ tuaꞌ watar tunor tin e tawar cꞌani asujta abꞌixqꞌuesna tujam e chamenobꞌ, y machi ixto tuaꞌ anujbꞌiobꞌ más y nien machi ixto tuaꞌ uyajcꞌuobꞌ uwijchꞌoctacobꞌ tuaꞌ anujbꞌiobꞌ más.
LUK 20:36 Porque machi ixto tuaꞌ asutpa achamayobꞌ más. Pero tunor e gente era xeꞌ tuaꞌ asujta abꞌixqꞌuesna tujam e chamenobꞌ cꞌani aquetpobꞌ bꞌan cocha uyangelobꞌ e Dios y aquetpobꞌ umaxtacobꞌ e Dios umen que sujta bꞌixqꞌuesnobꞌ.
LUK 20:37 Pues e Moisés canseyan ubꞌan que cꞌani asutpa abꞌixqꞌuesna e gente. Porque chꞌar tzꞌijbꞌabꞌir umener que conda jaxir turu tut e chꞌac tꞌix xeꞌ war atzꞌajbꞌa cay uyubꞌi unuc e Dios xeꞌ che que Cawinquirar Dios jax Udiosir e Abraham y que jax Udiosir e Isaac y que jax Udiosir e Jacob.
LUK 20:38 Pues Cadiosir majax Udiosirobꞌ tin e chamen, sino que jax Udiosirobꞌ tin e bꞌixir turobꞌ, che e Jesús.
LUK 20:39 Entonces cay tzayobꞌ cora ajcanseyajobꞌ tama uley e Moisés y chenobꞌ: —Imbꞌutz lo que war acanse era, chenobꞌ. Bꞌan chenobꞌ porque jaxirobꞌ ucꞌupsiobꞌ que cꞌani asujta abꞌixqꞌuesnobꞌ tin e chamenobꞌ.
LUK 20:40 Entonces subꞌajrobꞌ e saduceobꞌ era y matucꞌa más uyubꞌiobꞌ tuaꞌ e Jesús.
LUK 20:41 Pues entonces che e Jesús: —¿Tucꞌa war che tiut lo que chꞌar tzꞌijbꞌabꞌir tama uyojroner e Dios que che que e David jax utata viejobꞌir e Cristo xeꞌ jax xeꞌ tuaꞌ watar ucorpeson?
LUK 20:42 Porque chꞌar tzꞌijbꞌabꞌir umen e David tama e ojroner xeꞌ ucꞌabꞌa Salmos que: E Dios uyare Niwinquirar y che: “Turen taniwejtzꞌer tama ninojcꞌabꞌ tuaꞌ icꞌotori tacaren
LUK 20:43 este que inturbꞌa tunor tin e aqꞌuijna uwiretobꞌ yebꞌar utajn oꞌc este que ucꞌupsetobꞌ tunorobꞌ.” Bꞌan chꞌar tzꞌijbꞌabꞌir umen e David.
LUK 20:44 Entonces cocha e David uyare: “Niwinquiraret” tama e Cristo, ¿cocha tuaꞌ caware que e Cristo jax taca usitz e David ubꞌan? che e Jesús.
LUK 20:45 Pues tunor e gente war uyubꞌiobꞌ uyojroner e Jesús y tamar era jaxir cay uyare uyajcanuarobꞌ y che:
LUK 20:46 —Iwiric tamar lo que acanseyanobꞌ e ajcanseyajobꞌ tama uley e Moisés, porque jaxirobꞌ war uyusre tuaꞌ ulapiobꞌ e bꞌujc xeꞌ nojta xeꞌ acꞌaxi esto tama unuc uyocobꞌ tuaꞌ anatanwa umen e gente que jaxirobꞌ nuquir winicobꞌ. Y jaxirobꞌ war uyusreobꞌ tuaꞌ atajttzꞌobꞌ umen e gente tama e chinam. Y jaxirobꞌ war usajcobꞌ e turtar xeꞌ más galanic tuaꞌ aturuanobꞌ tamar tama e sinagoga. Y jaxirobꞌ war usajcobꞌ e bꞌajxan turtar tor e mesa tama inteꞌ nojqꞌuin tuaꞌ awiobꞌ bꞌajxan.
LUK 20:47 Y ulocsiobꞌ uyototobꞌ e ixictac xeꞌ chamen uviejobꞌ. Y tuaꞌ eꞌrnobꞌ umen e gente que imbꞌutzobꞌ tut e Dios axin ucꞌajtiobꞌ meyra tiempo taca e Dios. Y tamar era cꞌani ajajtzꞌobꞌ más nojta umen e Dios tama e día tuaꞌ e juicio, che e Jesús.
LUK 21:1 Pues ya turu e Jesús tama e templo conda cay uwira cꞌotoy cora winicobꞌ xeꞌ ayan meyra utumin xeꞌ cay uyariobꞌ e tumin xeꞌ wechꞌer ut macuir e cajón. Pero jaxirobꞌ uchiobꞌ tuaꞌ atzinluma axin e tumin tuaꞌ atajttzꞌobꞌ umen e gente que jaxirobꞌ más nojta uyofrendobꞌ lo que war uyariobꞌ.
LUK 21:2 Y uwira cꞌotoy inteꞌ ixic xeꞌ chamen uviejo xeꞌ tzajtaca ut xeꞌ cay uyari chateꞌ ut e tumin tama e ofrenda,
LUK 21:3 Y che e Jesús: —Cꞌani inwareox que e ixic era xeꞌ chamen uviejo xeꞌ tzajtaca ut jaxto uyajcꞌu uyofrenda más nojta tut e Dios que tunor e inmojr gente era.
LUK 21:4 Pues tunorobꞌ war uyajcꞌuobꞌ imbꞌijc taca tamar lo que qꞌuecher umenerobꞌ, pero e ixic era war uyajcꞌu tunor lo que ayan ani tuaꞌ, che e Jesús.
LUK 21:5 Pues entonces ya turobꞌ cora gente tama e templo xeꞌ war chenobꞌ que galan e tun lo que chena e templo tamar, y war chenobꞌ que ayan meyra sijpar xeꞌ ajcꞌuna tuaꞌ achena tunor e nuxi templo era. Entonces ojron e Jesús y che:
LUK 21:6 —Watar e día conda tunor lo que war iwira era cꞌani acucurna axin y axin atijresna tunor e templo era, y ma ingojr tun tuaꞌ aquetpa tujor upiar, che e Jesús.
LUK 21:7 Pues entonces e gente cay uyubꞌiobꞌ tuaꞌ e Jesús y che: —¿Tucꞌa día tuaꞌ acucurna e templo era? ¿Y tucꞌa seña tuaꞌ achecta tuaꞌ canata que cꞌanix acꞌotoy e día conda tuaꞌ anumuy tunor era? chenobꞌ.
LUK 21:8 Y che e Jesús: —Iwiranic que mamajchi umajresox, porque axin watar meyra ajmajresiajobꞌ tama nicꞌabꞌa y che: “Nen e Cristoen”, y cꞌani uyareox que: “Cꞌotoyix e día tuaꞌ watar e Cristo tuaꞌ acꞌotori tara tor e rum”, xeꞌ tuaꞌ uyareox. Pero ira ixixin tupatobꞌ.
LUK 21:9 Y conda iyubꞌi que watarix e tzꞌojyir o que ayan e revolución, ira ixbꞌacta, porque bꞌan tuaꞌ anumuy bꞌajxan conda merato acꞌotoy e día conda cꞌani acꞌapa tunor or e rum era.
LUK 21:10 ’Y cꞌani aqꞌuijna inteꞌ paíz upater otronteꞌ paíz este que uyajcꞌu ubꞌobꞌ, y inteꞌ paíz cꞌani uche e tzꞌojyir upater otronteꞌ paíz.
LUK 21:11 Y watar e sian yujcbꞌar, y watar e sian winar, y nacpat era watar e sian muaquir tama tunor or e lugar, y ixixin iwira e seña xeꞌ watar tut e qꞌuin xeꞌ meyra imbꞌacꞌajr uwirnar.
LUK 21:12 Pero conda merato anumuy tunor era nox ixixin ixchujca y ixixin ixjajtzꞌa y cꞌani ixqꞌuejcha ixixin tama e sinagoga umen taca que war ixcꞌupseyan tamaren. Y ixixin ixyajra tama e cárcel, y cꞌani ixqꞌuejcha ixixin tut e rey y tut e gobernador umen taca que war ixcꞌupseyan tamaren.
LUK 21:13 Pero conda axin achena tunor era ipater, jax e hora conda ucꞌani tuaꞌ itattzꞌi nicꞌabꞌa tut tunor e sian ajcꞌamparobꞌ era.
LUK 21:14 Y ira ibꞌijnu tamar lo que cꞌani iware tama e hora yajaꞌ tuaꞌ icorpes ibꞌa,
LUK 21:15 porque nen cꞌani inwajcꞌox tunor e ojroner lo que ucꞌani tuaꞌ iware tama e hora yajaꞌ. Y tunor tin e war aqꞌuijna uwirox machi tuaꞌ aqꞌuecꞌo awawan tut niwojroner conda ixojron porque nen cꞌani inwajcꞌox tunor ninatanyaj. Y tamar era mamajchi erer uyare que matucꞌa ayan tacarox, y tamar era erer unatobꞌ que majax majresbꞌirox.
LUK 21:16 Y nox tuaꞌ ixajcꞌuna tama ucꞌabꞌobꞌ tin e war aqꞌuijna uwirox umen itata y umen iwermanuobꞌ y umen ipiarobꞌ y umen tin e atzay uwirox ani. Y ayan tin e tijam xeꞌ ixixin ixchamesna.
LUK 21:17 Y tunor e gente tara tor e rum cꞌani uxejbꞌiobꞌ iut umen taca que war ixcꞌupseyan tamaren.
LUK 21:18 Pero e Dios cꞌani ucojcox este que nien inteꞌ utzutzer ijor machi tuaꞌ asatpa.
LUK 21:19 Y jay iturbꞌa ibꞌa tamaren tuaꞌ machi ixcucrema, cꞌani ichꞌami e cuxtar xeꞌ machi tuaꞌ acꞌapa, che e Jesús.
LUK 21:20 Y che e Jesús: —Conda iwira que war axojyna tunor e chinam Jerusalem umen e sian soldadobꞌ, natanic que cꞌanix acucurna tuaꞌ asatpa tunor e chinam era.
LUK 21:21 Entonces tin e turobꞌ tama e departamento Judea ucꞌani tuaꞌ alocꞌoy aꞌjniobꞌ tuaꞌ axiobꞌ tujor e witzir, y tin e turobꞌ tama e chinam Jerusalem ucꞌani tuaꞌ alocꞌoy wacchetaca tuaꞌ axiobꞌ innajt, y tin e turobꞌ tama e chor machix tuaꞌ asutpa axiobꞌ tama e chinam tuaꞌ machi achamesnobꞌ.
LUK 21:22 Porque tama e día xeꞌ watar conda tuaꞌ anumuy tunor era, jax e día conda aquetpa tuaꞌ acꞌotoy uqꞌuijnar e Dios tujor e chinam era tuaꞌ ajajtzꞌobꞌ, porque ucꞌani tuaꞌ acꞌapa achempa tunor lo que chꞌar tzꞌijbꞌabꞌir tama uyojroner e Dios.
LUK 21:23 Tzajtaca utobꞌ e ixictac xeꞌ cuchur uyarobꞌ y bꞌan tin e qꞌuecherix uchꞌurcabꞌ ubꞌan porque intran tutobꞌ tuaꞌ alocꞌoy aꞌjniobꞌ. Porque ayan meyra cꞌuxner xeꞌ tuaꞌ watar tujor e chinam era conda acꞌotoy uqꞌuijnar e Dios tamar.
LUK 21:24 Ayan tin e tuaꞌ achamesna tama e tzꞌojyir, y ayan tin e tuaꞌ aqꞌuejcha axiobꞌ tama e cárcel tama inteꞌ inteꞌ lugar tama tunor or e rum, y e gente xeꞌ majax tuobꞌ e Israel axin acꞌotoriobꞌ tama e chinam Jerusalem este que acꞌapa e tiempo conda axin aloqꞌuesnobꞌ tamar, che e Jesús.
LUK 21:25 Entonces ojron e Jesús otronyajr y che: —Entonces ixixin iwira e seña tama e qꞌuin y tama e luna y tama tunor e lucero, y tunor e gente tara tor e rum cꞌani aquetpobꞌ nutꞌur utobꞌ y cꞌani abꞌactobꞌ meyra conda uyubꞌiobꞌ aquiricna watar e jaꞌ tor e mar.
LUK 21:26 Y axin ecsibꞌa utobꞌ e gente umen e bꞌajcꞌut conda ubꞌijnuobꞌ tamar lo que war anumuy tara tor e rum y conda uwirobꞌ que war ayujcna axin tunor ut e qꞌuin.
LUK 21:27 Y de allí tunor e gente axin uwirenobꞌ conda waten nen xeꞌ Uyunenen e winic tama e tocar tuaꞌ incꞌotori tara tor e rum taca tunor nitawarer.
LUK 21:28 Conda iwira acay anumuy tunor era chꞌujcunic iwira tichan taca e tzayer porque warix watar e día conda tuaꞌ ixcorpesna, che e Jesús.
LUK 21:29 Entonces e Jesús uchecsu inteꞌ ojroner tama inteꞌ teꞌ tutobꞌ y che: —Chꞌujcunic iwira e cꞌucꞌumteꞌ y tunor e teꞌ.
LUK 21:30 Conda iwira achecta watar uyopor war inata que watarix e verano.
LUK 21:31 Y bꞌan tama tunor e seña era, conda iwira acay anumuy tunor era natanic que watarix uchinam e Dios tara tor e rum.
LUK 21:32 ’Pero cꞌani inwareox era que tin e turobꞌ tara tor e rum conda acay anumuy tunor era machi tuaꞌ achamayobꞌ este que acꞌapa uwirobꞌ tunor era.
LUK 21:33 Tunor ut e qꞌuin y tunor or e rum cꞌani acꞌapa, pero niwojroner machi tuaꞌ acꞌapa sino que cꞌani acꞌapa achempa tunor bꞌan taca cocha chꞌar tzꞌijbꞌabꞌir tamar.
LUK 21:34 Ira iturbꞌa iwalma tamar lo que uyusre uche iwerir tuaꞌ machi ixcaray y nien tuaꞌ machi ibꞌijnu meyra tamar lo que ucꞌani tamar icuxtar tara tor e rum, porque jay machi icojco ibꞌa cocha era wacchetaca axin acꞌotoy e día era conda machi war ibꞌijnu.
LUK 21:35 Porque cꞌani achecta e día era bꞌan cocha conda acꞌaxi incojt mut yebꞌar inteꞌ coroteꞌ, y bꞌan watar e día era tujor tunor e gente tara tor e rum.
LUK 21:36 Entonces ustanic icuxtar y cꞌajtinic taca e Dios iraj iraj tuaꞌ ixcorpa ixlocꞌoy ixajni tut tunor e cꞌuxner lo que tuaꞌ anumuy tama e día xeꞌ watar y tuaꞌ uyubꞌiox ixcꞌotoy ixwawan taniut nen xeꞌ Uyunenen e winic, che e Jesús.
LUK 21:37 Pues e Jesús war acanseyan tama e templo tama e día, pero acbꞌar war alocꞌoy tuaꞌ awayan tor e witzir Olivo.
LUK 21:38 Y ajqꞌuin ajqꞌuin tunor e gente war acꞌotoyobꞌ tama e templo conda intocto ajanchꞌacna tuaꞌ uyubꞌiobꞌ uyojroner e Jesús.
LUK 22:1 Pues entonces cꞌotoy e día conda cꞌanix acay e nojqꞌuin conda ucꞌuxiobꞌ e pan xeꞌ machi atꞌabꞌay ut xeꞌ jax e nojqꞌuin pascua.
LUK 22:2 Y uwinquirobꞌ e inmojr sacerdotiobꞌ y e ajcanseyajobꞌ tama uley e Moisés cay usajcobꞌ cocha tuaꞌ uchamsiobꞌ e Jesús, pero war abꞌactobꞌ tuaꞌ uqꞌuechiobꞌ axin e Jesús tut tunor e sian gente.
LUK 22:3 Entonces ochoy e Satanás tama uyalma e Judas xeꞌ ucꞌabꞌa Iscariote ubꞌan xeꞌ jax inteꞌ tujam e doce apostolobꞌ.
LUK 22:4 Y ixin jaxir tuaꞌ oꞌjron taca uwinquir e inmojr sacerdotiobꞌ y taca e sian ajcꞌamparobꞌ tama e templo, y cay ubꞌijnuobꞌ cocha tuaꞌ aꞌjcꞌuna e Jesús tama ucꞌabꞌobꞌ e winicobꞌ era umen e Judas.
LUK 22:5 Y atzayobꞌ e winicobꞌ era conda uyubꞌiobꞌ que e Judas cꞌani atacarsan tuaꞌ ujajpiobꞌ e Jesús, y tamar era quetpa tuaꞌ atojya e Judas tama utarcarsiaj.
LUK 22:6 Entonces e Judas cay usajca cocha tuaꞌ uchuqui e Jesús conda mamajchi chi tuyejtzꞌer tuaꞌ uyajcꞌu e nuquir winicobꞌ era tuaꞌ uqꞌuechiobꞌ axin.
LUK 22:7 Entonces cꞌotoy e día tama e nojqꞌuin pascua conda quetpa tuaꞌ ucꞌuxiobꞌ e pan xeꞌ machi atꞌabꞌay ut y conda quetpa tuaꞌ uxuriobꞌ unuc inteꞌ yar oveja tama e altar tuaꞌ aquetpa ajcꞌubꞌir e Dios tama e nojqꞌuin era.
LUK 22:8 Entonces e Jesús uyare e Pedro y e Juan y che: —Quiqui chenic lo que tuaꞌ cacꞌuxi tama e nojqꞌuin era, che e Jesús.
LUK 22:9 Entonces jaxirobꞌ uyubꞌiobꞌ tuaꞌ e Jesús y chenobꞌ: —¿Y tiaꞌ tuaꞌ caxin cache? chenobꞌ.
LUK 22:10 Y che e Jesús: —Conda ixochoy tama e chinam Jerusalem ixixin itajwi inteꞌ winic xeꞌ war ucuchi axin ingojr bꞌujr taca e jaꞌ. Quiquic tupat jaxir esto que oꞌchoy tama ingojr otot.
LUK 22:11 Y conda ixcꞌotoy tama e otot era, ubꞌinic tuaꞌ e ajyum otot y arenic: “Cawinquirar war ucꞌani tuaꞌ coybꞌi tacaret cocha era y che: ‘¿Tiaꞌ aquetpa e otot tiaꞌ tuaꞌ inweꞌ tama e nojqꞌuin era taca tunor niwajcanuarobꞌ?’”
LUK 22:12 Entonces jaxir tuaꞌ axin uwirsiox inteꞌ nuxi cuarto xeꞌ turu tichan xeꞌ ustabꞌir ut, y yajaꞌ tuaꞌ iyustes lo que tuaꞌ cacꞌuxi tama e nojqꞌuin, che e Jesús.
LUK 22:13 Entonces ixiobꞌ utajwiobꞌ tunor bꞌan taca cocha arobꞌnobꞌ umen e Jesús, y tamar era cay uyustesobꞌ lo que tuaꞌ ucꞌuxiobꞌ tama e nojqꞌuin.
LUK 22:14 Entonces conda cꞌotoy e hora tuaꞌ ucꞌuxiobꞌ e wiar ochoy e Jesús taca uyapostolobꞌ y turuanobꞌ tor e mesa.
LUK 22:15 Entonces cay ojron e Jesús y che: —War onsre tuaꞌ inche e wiar era tacarox tama e nojqꞌuin pascua bꞌajxan que inxin inchamesna.
LUK 22:16 Pero cꞌani inwareox que machix tuaꞌ insutpa inche e nojqꞌuin era otronyajr este que acꞌapa achempa tunor lo que war che e nojqꞌuin era tama uchinam e Dios, che e Jesús.
LUK 22:17 Entonces e Jesús uchꞌami inteꞌ chꞌeu tama ucꞌabꞌ y cay utattzꞌi e Dios tamar y de allí uyare uyajcanuarobꞌ y che: —Uchꞌenic imbꞌijc imbꞌijc lo que ayan tama e chꞌeu era y xeric ibꞌa tamar.
LUK 22:18 Porque cꞌani inwareox que machi tuaꞌ insutpa unchꞌi lo que ayan tama e chꞌeu era este que achecta watar uchinam e Dios tara tor e rum, che e Jesús.
LUK 22:19 Y nacpat era e Jesús uchꞌami ingojr pan tama ucꞌabꞌ y utattzꞌi ut e Dios tamar y cay uxere e pan y cay uyajcꞌu uyajcanuarobꞌ y che: —E pan era bꞌan cocha uwerir nicuerpo xeꞌ ajcꞌubꞌir bꞌan cocha ajcꞌuna inteꞌ arac xeꞌ achamesna tujor e altar tamarox. Chenic cocha era iraj iraj tuaꞌ ixcꞌajpesian tamaren, che e Jesús.
LUK 22:20 Y bꞌan uche tama e chꞌeu ubꞌan conda cꞌapa wiobꞌ, y tamar era ojron e Jesús otronyajr y che: —Lo que ayan tama e chꞌeu era bꞌan cocha nichꞌichꞌer xeꞌ awechcꞌa axin tamarox war uchectes tiut que ayan inteꞌ nipacto xeꞌ imbꞌutz tacarox.
LUK 22:21 ’Y cꞌani inwareox era que tin e tuaꞌ utuchꞌien ya war aweꞌ tacaron tara tor e mesa.
LUK 22:22 Nen xeꞌ Uyunenen e winic ucꞌani tuaꞌ inchamesna xeꞌ jax e bꞌir xeꞌ irsenen umen Nitata que ucꞌani tuaꞌ inxana tamar, pero tzajtaca ut e winic xeꞌ acꞌampesna tuaꞌ utuchꞌien, che e Jesús.
LUK 22:23 Entonces cay uyubꞌiobꞌ inteꞌ taca inteꞌ y che: —¿Chi ca nic ticajam xeꞌ tuaꞌ uche cocha era? che uyajcanuarobꞌ jaxobꞌ taca.
LUK 22:24 Entonces uyajcanuarobꞌ e Jesús cay ojronobꞌ jaxobꞌ taca tuaꞌ unatobꞌ chi xeꞌ más nuxi winic tujamobꞌ.
LUK 22:25 Pero e Jesús che: —Nox inata que tunor e nuquir winicobꞌ tujam e gente xeꞌ machi ubꞌacriobꞌ e Dios war uwirsiobꞌ ucꞌotorer tujor e gente tamar lo que uchiobꞌ. Y tin e aquetpa jefe tujor e inmojr gente arobꞌna que jax e patrón.
LUK 22:26 Pero majax bꞌan tuaꞌ aquetpa tijam nox sino que tin e cꞌani aquetpa nuxi winic tijam ucꞌani tuaꞌ uche ubꞌa bꞌan cocha inteꞌ maxtac. Y tin e aquetpa tuaꞌ utzacre e inmojr ucꞌani tuaꞌ uche ubꞌa bꞌan cocha inteꞌ man tut e inmojr era.
LUK 22:27 ¿Y chi xeꞌ más nuxi winic, e patronbꞌir xeꞌ turu tor e mesa o e man xeꞌ war uturbꞌa e comida tor e mesa? ¿Ma ca jax tin e turu tor e mesa xeꞌ más nuxi winic? Pero nen turen tijam tuaꞌ intacriox.
LUK 22:28 ’Pues nox xeꞌ turox tacaren iraj iraj war iwira tunor lo que war innumse nibꞌa.
LUK 22:29 Y tamar era cꞌani inwajcꞌox tuaꞌ ixcꞌotori tacaren, cocha bꞌan cay uyaren Nitata que nen tuaꞌ incꞌotori tara tor e rum watar e día, y bꞌan ixto war inwareox nox ubꞌan.
LUK 22:30 Y tamar era nox tuaꞌ ixturuan tor e mesa tuaꞌ ixweꞌ y tuaꞌ ixuchꞌi tacaren, y nox tuaꞌ ixturuan tujor e doce turtarobꞌ tibꞌa tuaꞌ iche juzgar tujor e doce grupo gente lo que ayan tama e Israel, che e Jesús.
LUK 22:31 Entonces e Jesús che: —Simón Pedro, cꞌani inwaret era que bꞌan cocha aloqꞌuesna usojqꞌuir e trigo tama ut e semilla y bꞌan cay ucꞌajti e Satanás tuaꞌ uche ani tacarox, que cꞌani ani ulocse tunor e cꞌupesiaj tabꞌa tama e Dios.
LUK 22:32 Pero incꞌajtix taca e Dios tuaꞌ machi acꞌapa acꞌupesiaj. Y net, conda isutpa uꞌstes abꞌa taca e Dios otronyajr, ucꞌani tuaꞌ atacre tunor awermanuobꞌ tuaꞌ aqꞌuecꞌo awawanobꞌ tama ucꞌupesiajobꞌ tama e Dios, che e Jesús.
LUK 22:33 Y che e Simón Pedro: —Niwinquiraret, nen turenix tuaꞌ inxin tacaret tic taca esto tama e cárcel y este tuaꞌ inchamesna tacaret, che e Simón Pedro.
LUK 22:34 Y che e Jesús: —Pedro, cꞌani inwaret que conda merato aꞌru e acꞌach coner, net cꞌani amuqui nicꞌabꞌa uxyajr que machi anata chien nen, che e Jesús.
LUK 22:35 Entonces e Jesús cay uyubꞌi tuaꞌ uyajcanuarobꞌ y che: —Conda inwebꞌta ixiox tama inyajr conda inwareox que machi tuaꞌ iqꞌueche axin itumin, y nien ibolsa tuaꞌ e tumin, y nien otronteꞌ xanabꞌ machi tuaꞌ iqꞌueche, ¿ayan ca tucꞌa ucꞌani ani tama e hora yajaꞌ? che e Jesús. Y jaxirobꞌ chenobꞌ: —Matucꞌa.
LUK 22:36 Y che e Jesús: —Pero coner cꞌani inwareox que tin e ayan ubolsa, uqꞌuechic chic. Y jay ayan umucuquir itumin qꞌuechic chic ubꞌan. Y tin e matucꞌa umachit, más ani bueno que uchonic ubꞌujc tuaꞌ asutpa umani inteꞌ umachit.
LUK 22:37 Porque inwareox era que tunor lo que chꞌar tzꞌijbꞌabꞌir tamaren tama uyojroner e Dios ucꞌani tuaꞌ acꞌapa achempa bꞌan taca cocha tzꞌijbꞌabꞌir. Y bꞌan e ojroner tiaꞌ war che que: “Uchebꞌiobꞌ que jaxir jax inteꞌ ajchamseyaj”, che e Jesús.
LUK 22:38 Entonces chenobꞌ: —Cawinquiraret, tara ayan chateꞌ machit. Y jaxir che: —Tzꞌacar e yax, che e Jesús.
LUK 22:39 Pues entonces ixin e Jesús esto tujor e witzir Olivo tiaꞌ acay axin, y ixiobꞌ uyajcanuarobꞌ ubꞌan.
LUK 22:40 Y conda cꞌotoyobꞌ tor e witzir e Jesús che: —Cꞌajtinic taca e Dios tuaꞌ machi ixpijchna, che e Jesús.
LUK 22:41 Y nacpat era ixin cotuan e Jesús tuaꞌ ucꞌajti taca e Dios innajt cora tut uyajcanuarobꞌ bꞌan cocha unajtirar tiaꞌ acꞌotoy inteꞌ tun conda ajujra.
LUK 22:42 Y cay ucꞌajti taca e Dios y che: —Nitatet, quisinic ani machi inchꞌami e nuxi cꞌuxner lo que cꞌanix watar tamaren era, pero chen bꞌan taca cocha net acꞌani y majax bꞌan cocha incꞌani nen, che e Jesús.
LUK 22:43 Y conda warto ucꞌajti taca e Dios, checta inteꞌ ángel xeꞌ tari tut e qꞌuin tuaꞌ uqꞌuecꞌojse e Jesús.
LUK 22:44 Y war unumse ubꞌa meyra este que war atzꞌintzꞌa meyra tama uyalma y más war oyqꞌui conda war ucꞌajti taca e Dios. Y war achꞌujchꞌi upurich acꞌaxi tor e rum yabꞌarbꞌir taca uchꞌichꞌer.
LUK 22:45 Y conda achpa tiaꞌ war ucꞌajti taca e Dios ixin tiaꞌ turobꞌ uyajcanuarobꞌ y utajwi que war awayanobꞌ umen que tzajtaca utobꞌ tamar lo que war unumse ubꞌa e Jesús.
LUK 22:46 Entonces che jaxir: —¿Y tucꞌa tuaꞌ war ixwayan? Achpenic y cꞌajtinic taca e Dios tuaꞌ machi ixpijchna, che e Jesús.
LUK 22:47 Y conda warto oꞌjron e Jesús cocha era cꞌotoyobꞌ meyra winicobꞌ xeꞌ qꞌuechbꞌirobꞌ umen e Judas xeꞌ jax inteꞌ tujam e doce uyajcanuarobꞌ e Jesús. Entonces cꞌotoy e Judas tut e Jesús tuaꞌ utzꞌujtzꞌi ut.
LUK 22:48 Y che e Jesús: —Judas, ¿war ca atuchꞌien tacar e tzꞌujtzmayaj era tuaꞌ incajcha inxin nen xeꞌ Uyunenen e winic? che e Jesús.
LUK 22:49 Conda tin e turobꞌ taca e Jesús cay uwirobꞌ lo que war anumuy, cay uyubꞌiobꞌ tuaꞌ y chenobꞌ: —Cawinquiraret, ¿acꞌani ca tuaꞌ cawajnesobꞌ aꞌjni taca e machit? chenobꞌ.
LUK 22:50 Entonces inteꞌ uyajcanuar e Jesús tobꞌoy ixin y wacchetaca uxuri locꞌoy inteꞌ uchiquin uman uwinquir e inmojr sacerdotiobꞌ.
LUK 22:51 Pero e Jesús che: —Actanic, tzꞌactix, che e Jesús. Y de allí e Jesús ucꞌopi uchiquin e man y cay utaqꞌui y utzꞌacpes.
LUK 22:52 Pues tin e cꞌotoyobꞌ tuaꞌ uqꞌuechiobꞌ axin e Jesús tama or e witzir era jax uwinquir e inmojr sacerdotiobꞌ y e ajcꞌamparobꞌ tama e templo y cora nuquir winicobꞌ. Entonces ojron e Jesús taca e winicobꞌ era y che: —¿Tucꞌa tuaꞌ war iqꞌueche axin e sian machit y e sian teꞌ yax? ¿O war ca ibꞌijnu que nen jax inteꞌ ajxujchꞌen?
LUK 22:53 Ajqꞌuin ajqꞌuin turen tacarox tama e templo y ma tiaꞌ cay icachien tuaꞌ iqꞌuechien inxin tama e cárcel. Pero cocha acbꞌar era jax e hora tibꞌa conda war acꞌotori e incsibꞌaner tamarox, che e Jesús.
LUK 22:54 Entonces ucachiobꞌ e Jesús y uqꞌuechiobꞌ ixin tama uyotot uwinquir e inmojr sacerdotiobꞌ, y e Pedro war axin ubꞌan pero innajt cora tuaꞌ machi eꞌrna umen e winicobꞌ xeꞌ war uqꞌuechiobꞌ axin e Jesús.
LUK 22:55 Y ayan tin e uxuniobꞌ inteꞌ cꞌajc tama yuxinar or e tinaj y cay turuan qꞌuixiobꞌ tuyejtzꞌer e cꞌajc, y ya turu e Pedro taca e winicobꞌ era ubꞌan.
LUK 22:56 Y ayan inteꞌ ijchꞌoc xeꞌ jax inteꞌ ajpatnar tama e otot era xeꞌ turu tor e tinaj era ubꞌan xeꞌ cay uwira e Pedro tama ujanchꞌaquenar e cꞌajc tiaꞌ war aqꞌuixi. Entonces ojron e ijchꞌoc y che: —E winic era cay xana taca e Jesús ubꞌan, che e ijchꞌoc.
LUK 22:57 Pero e Pedro bꞌacta y cay umuqui ucꞌabꞌa e Jesús y che: —Ixic, nen machi innata chi e winic era, che e Pedro.
LUK 22:58 Pero nacpat cora era, irna umen otronteꞌ xeꞌ ojron y che: —Net xanet taca e Jesús ubꞌan, che inteꞌ. Pero e Pedro che: —Ubꞌin, majax nen, che e Pedro.
LUK 22:59 Y nacpat era tama inteꞌ hora cay ojron otronteꞌ y che: —Pero e winic era xana taca e Jesús ubꞌan, porque jaxir tuaꞌ e departamento Galilea, che inteꞌ.
LUK 22:60 Entonces ojron e Pedro y che: —Nen machi innata tucꞌa tamar war iyojron, che e Pedro. Y wacchetaca conda merato acꞌapa oꞌjron e Pedro cay aru e acꞌach.
LUK 22:61 Entonces sutpa irna ut e Pedro umen Cawinquirar y tamar era e Pedro ucꞌajpes lo que arobꞌna umen Cawinquirar que: “Coner conda merato aꞌru e acꞌach, net iꞌxin amuqui nicꞌabꞌa uxyajr que machi anata chien nen.” Bꞌan che e Jesús más bꞌajxan.
LUK 22:62 Y tamar era e Pedro cay subꞌajra meyra y locꞌoy ixin y ucucru ubꞌa y cay aru.
LUK 22:63 Pues entonces tin e war ucojcobꞌ e Jesús cay tzeniobꞌ tut y cay uwatzꞌiobꞌ.
LUK 22:64 Y de allí umaquiobꞌ unacꞌut y cay uyobꞌiobꞌ unac uchiquin y chenobꞌ: —Qꞌuinin awira chi xeꞌ war uyajqꞌuet, chenobꞌ.
LUK 22:65 Y war atzeniobꞌ tut e Jesús taca meyra ojroner xeꞌ mabꞌambꞌan.
LUK 22:66 Entonces conda sacojpa cay umorojse ubꞌobꞌ e nuquir winicobꞌ tama e Israel taca uwinquir e inmojr sacerdotiobꞌ y taca e ajcanseyajobꞌ tama uley e Moisés, y de allí qꞌuejcha ixin e Jesús tuaꞌ aturbꞌana tut e nuquir winicobꞌ era. Entonces jaxirobꞌ uyubꞌiobꞌ tuaꞌ e Jesús y chenobꞌ:
LUK 22:67 —Arenon era, jay net jax e Cristoet xeꞌ eꞌbꞌetna tariet umen e Dios tuaꞌ acorpeson, chenobꞌ. Y che e Jesús: —Jay inwareox que nen, machi ixixin icꞌupsen.
LUK 22:68 Y nen, jay ayan lo que cꞌani umbꞌi tibꞌa matucꞌa ixixin iwaren, y nien machi iwacten tuaꞌ inxin bꞌan taca.
LUK 22:69 Pues coner era nen xeꞌ Uyunenen e winic cꞌani incay inturuan tama niturtar tama unojcꞌabꞌ Nitata Dios tichan xeꞌ meyra ayan ucꞌotorer, che e Jesús.
LUK 22:70 Entonces sutpa uyubꞌiobꞌ tunorobꞌ tuaꞌ e Jesús otronyajr y chenobꞌ: —¿Net ca jax Uyunenet e Dios? chenobꞌ. Y e Jesús che: —Bꞌan ya, bꞌan cocha iware nox, che e Jesús.
LUK 22:71 Entonces ojron tunorobꞌ y chenobꞌ: —¿Tucꞌato tuaꞌ cacꞌani más checsuyaj tuaꞌ canata jay jaxir jax inteꞌ ajmabꞌambꞌanir? Nonach coybꞌi ojron tama uyej que jaxir che que jax Uyunen e Dios, chenobꞌ e nuquir winicobꞌ era.
LUK 23:1 Entonces achpobꞌ tunorobꞌ y uqꞌuechiobꞌ ixin e Jesús tut e gobernador Pilato.
LUK 23:2 Y conda cꞌotoyobꞌ cay utuchꞌiobꞌ e Jesús tut y chenobꞌ: —Non catajwi e winic era que war utijres tunor ujor e gente tama cachinam. Y war ucanse e gente que machi tuaꞌ utoyobꞌ uboleto lo que arobꞌnon umen e rey romano que bꞌan ucꞌani tuaꞌ catoyi. Y jaxir che que jaxir jax e Cristo xeꞌ ebꞌetna tari umen e Dios y que jaxir jax inteꞌ rey, chenobꞌ.
LUK 23:3 Entonces e Pilato uyubꞌi tuaꞌ e Jesús y che: —¿Net ca ureyet tuaꞌ e gente xeꞌ tuobꞌ e Israel? che e Pilato. Y e Jesús che: —Bꞌan ya cocha war aware net era, che e Jesús.
LUK 23:4 Entonces e Pilato uyare uwinquir e inmojr sacerdotiobꞌ taca e inmojr gente xeꞌ turobꞌ era y che: —Matucꞌa intajwi tama e winic era tuaꞌ achamesna, che e Pilato.
LUK 23:5 Pero tunorobꞌ aruobꞌ taca inteꞌ nuxi nuc y chenobꞌ: —Pero jaxir cay upucujcse e gente tama e departamento Galilea y coner bꞌan taca war uche tara tama e departamento Judea ubꞌan, chenobꞌ.
LUK 23:6 Pues conda e gobernador Pilato uyubꞌi tunor era, cay uyubꞌi tuaꞌ e gente jay erach que e Jesús tari tama e departamento Galilea.
LUK 23:7 Y conda arobꞌna que e departamento Galilea jax uchinam e Jesús, e Pilato uyebꞌta ixin e Jesús tut e Herodes xeꞌ jax e gobernador tuaꞌ e departamento Galilea. Y tama e día era e Herodes war axana tama e chinam Jerusalem tuaꞌ uwira e nojqꞌuin lo que war achena.
LUK 23:8 Entonces conda cꞌotesna e Jesús tut e gobernador Herodes, jaxir atzay porque ixnix war ani uyusre tuaꞌ uwira ut e Jesús porque war uyubꞌi meyra tamar y war ani uyusre tuaꞌ uwira achena inteꞌ milagro.
LUK 23:9 Y tamar era e Herodes cay uyubꞌi meyra tuaꞌ e Jesús, pero jaxir machi ojron umen que machi cꞌani ucorpes ubꞌa.
LUK 23:10 Y ya turobꞌ ubꞌan uwinquirobꞌ e inmojr sacerdotiobꞌ taca e ajcanseyajobꞌ tama uley e Moisés. Y war utuchꞌiobꞌ e Jesús meyra tut e Herodes.
LUK 23:11 Entonces e Herodes taca tunor usoldadobꞌ cay uxejbꞌiobꞌ ut e Jesús, y cay tzeniobꞌ tut este que cay ubꞌujcsiobꞌ tama inteꞌ bꞌujc bꞌan cocha ulapi inteꞌ rey. Y de allí e Herodes uyebꞌta ixin e Jesús tut e Pilato otronyajr.
LUK 23:12 Y tamar era cay cꞌumpobꞌ e Pilato taca e Herodes xeꞌ war ani aqꞌuijna uwirobꞌ ubꞌobꞌ.
LUK 23:13 Entonces e Pilato umorojse uwinquirobꞌ e inmojr sacerdotiobꞌ taca e sian ajcꞌamparobꞌ xeꞌ turobꞌ tama e chinam Jerusalem y taca cora winicobꞌ.
LUK 23:14 Y che e Pilato: —Nox itares e winic era taniut y war iwaren que jaxir war upucujcse e gente axin tama tunor cachinam. Pero conda cay umbꞌi tuaꞌ jaxir tiut machi intajwi jay ayan tucꞌa war uche lo que war ituchꞌi tamar.
LUK 23:15 Y e Herodes uyebꞌta tari tara otronyajr cocha matucꞌa utajwi tamar tuaꞌ achamesna. Y tamar era erer iwira que matucꞌa war uche tuaꞌ achamesna tamar.
LUK 23:16 Entonces lo que cꞌani inche nen tacar, cꞌani inwatzꞌi cora y de allí cꞌani inwacta axin bꞌan taca, che e Pilato.
LUK 23:17 Pues tama e nojqꞌuin era tama inteꞌ inteꞌ año e Pilato cayix utzayjres e gente umen que acay ubꞌani axin inteꞌ winic xeꞌ turu tama e cárcel, y tamar era war ubꞌijnu tuaꞌ ubꞌani e Jesús.
LUK 23:18 Pero tunor e gente tama e chinam cay umorojse ubꞌobꞌ y cay aruobꞌ taca inteꞌ nuxi nuc y chenobꞌ: —Bꞌana e Barrabás, chenobꞌ.
LUK 23:19 Pues e Barrabás osena tama e cárcel umen que jaxir war uyose ubꞌa tama e política tuaꞌ ucucru ani e gobierno tama e chinam era, y jaxir jax inteꞌ ajchamseyaj ubꞌan.
LUK 23:20 Pero e Pilato cꞌani ani uyacta axin e Jesús bꞌan taca y bꞌan uyare e sian gente era.
LUK 23:21 Pero e gente machi ucꞌaniobꞌ, y cay aruobꞌ taca inteꞌ nuxi nuc upater e Jesús y chenobꞌ: —Chamsenic, chamsenic, chenobꞌ.
LUK 23:22 Pero sutpa ojron e Pilato otronyajr y che: —¿Tucꞌa mabꞌambꞌanir war uche jaxir? Nen machi intajwi tucꞌa tamar tuaꞌ achamesna. Lo que nen cꞌani inche tacar, cꞌani inwatzꞌi cora y de allí cꞌani inwacta axin bꞌan taca, che e Pilato.
LUK 23:23 Pero e sian gente más aqꞌuijna conda uyubꞌiobꞌ uyojroner era y cay aruobꞌ otronyajr y chenobꞌ: —Chamsenic, chamsenic, chenobꞌ. Y bꞌan cay uchiobꞌ tunor e gente taca uwinquirobꞌ e inmojr sacerdotiobꞌ este que utajwiobꞌ lo que war uyusreobꞌ.
LUK 23:24 Entonces cꞌoyran e Pilato cora cora umen e sian aruar era este que cay ubꞌijnu tuaꞌ uyare achamesna e Jesús.
LUK 23:25 Entonces e Pilato ubꞌani e Barrabás xeꞌ turu ani tama e cárcel umen que cꞌani ani ucucru e gobierno y umen que jaxir jax inteꞌ ajchamseyaj. Entonces tuaꞌ atzay eꞌrna e Pilato umen e gente, uyare tuaꞌ achamesna e Jesús.
LUK 23:26 Entonces conda war uqꞌuechiobꞌ axin e Jesús tuaꞌ uchamsiobꞌ utajwiobꞌ inteꞌ winic xeꞌ ucꞌabꞌa Simón xeꞌ tari tama inteꞌ chinam xeꞌ ucꞌabꞌa Cirene. Pues jaxir wartocto ayopa tutiꞌ e chinam era conda arobꞌna tuaꞌ ubꞌiti axin ucruz e Jesús esto tiaꞌ tuaꞌ achꞌubꞌna tamar. Y arobꞌna tuaꞌ ubꞌiti axin e cruz era tupat e Jesús.
LUK 23:27 Y meyra gente war axin tupatobꞌ y ayan e ixictac ubꞌan xeꞌ war aꞌruobꞌ axin umen que war acꞌuxun uyalmobꞌ tamar lo que war achena taca e Jesús.
LUK 23:28 Entonces e Jesús sutpa uwira e ixictac era y che: —Ixicox xeꞌ turox tama e chinam Jerusalem, ira ixaru tamaren, sino que aruenic tamarox taca y tamar imaxtac.
LUK 23:29 Porque watar e día conda cꞌani ixarobꞌna que: “Atzay e ixic xeꞌ matucꞌa umaxtac, y atzay e ixic tin e machi acuxma, y tin e machi achuseyan.”
LUK 23:30 Y tama e día xeꞌ watar e gente axin uyusreobꞌ uchamerobꞌ umen e bꞌajcꞌut, y tamar era axin oꞌjronobꞌ taca inteꞌ witzir y chenobꞌ: “Cucremenic tama cajor era”, y axin oꞌjronobꞌ taca inteꞌ nuxi tun y chenobꞌ: “Mucteson.”
LUK 23:31 Porque jay war uchienobꞌ innumse nibꞌa cocha era xeꞌ bꞌanen cocha inteꞌ teꞌ xeꞌ bꞌixir war, ¿tucꞌa tuaꞌ uchiobꞌ tacarox xeꞌ bꞌanox cocha inteꞌ teꞌ xeꞌ taquin? che e Jesús.
LUK 23:32 Y ayan chateꞌ ajxujchꞌobꞌ xeꞌ war aqꞌuejchobꞌ axin ubꞌan tuaꞌ achamesnobꞌ taca e Jesús.
LUK 23:33 Y conda cꞌotoyobꞌ tama e lugar xeꞌ ucꞌabꞌa Calavera xeꞌ jax inteꞌ or witzir xeꞌ bꞌan uwirnar cocha ubꞌaquer ujor inteꞌ winic, cay uchamsiobꞌ e Jesús chꞌubꞌna tama ut inteꞌ cruz. Y cay uchamsiobꞌ e chateꞌ ajxujchꞌobꞌ era ubꞌan, inteꞌ chꞌubꞌna tama ut ucruz tama unojcꞌabꞌ e Jesús y otronteꞌ chꞌubꞌna tama ut ucruz tama utzꞌejcꞌabꞌ e Jesús.
LUK 23:34 Y conda e Jesús ya chꞌur tut ucruz y merato achamay, cay ojron y che: —Nitatet, cꞌumpen tacarobꞌ xeꞌ war uchamsenobꞌ era porque machi war unatobꞌ tucꞌa war uchiobꞌ tacaren, che e Jesús. Y e soldadobꞌ xeꞌ turobꞌ tuyejtzꞌer e Jesús cay uchiobꞌ suertiar tuaꞌ uwirobꞌ chi tacar tuaꞌ aquetpa ubꞌujc e Jesús.
LUK 23:35 Y warobꞌ meyra gente era xeꞌ war uwirobꞌ lo que war achena taca e Jesús, y ya warobꞌ cora nuquir ajcꞌamparobꞌ ubꞌan xeꞌ cay tzeniobꞌ tut e Jesús y chenobꞌ: —Pues jaxir uyubꞌi ucorpes e inmojr gente, y coner ucorpesic ubꞌa jaxir ubꞌan, jay erach ani que jax e Cristo xeꞌ sicbꞌabꞌir umen e Dios, che e nuquir ajcꞌamparobꞌ era.
LUK 23:36 Y e soldadobꞌ cay tzeniobꞌ tut e Jesús ubꞌan, y tamar era cay uyajcꞌuobꞌ cora vino xeꞌ impajix,
LUK 23:37 y chenobꞌ: —Jay net jax ani ureyet e gente tama e Israel, corpes abꞌa net taca, chenobꞌ e soldadobꞌ.
LUK 23:38 Y utacbꞌobꞌ inteꞌ pachpachteꞌ tujor e cruz tiaꞌ chꞌur e Jesús. Y utzꞌijbꞌobꞌ inteꞌ ojroner uxyajr tama e tabla era, inyajr tama e ojroner griego, y inyajr tama e ojroner latín, y inyajr tama e ojroner hebreo. Y lo que che tama e pachpachteꞌ jax era: JAXTO ERA UREY E GENTE TUAꞌ E ISRAEL.
LUK 23:39 Y inteꞌ ajxujch xeꞌ chꞌur tama ut ucruz tuyejtzꞌer e Jesús warto uqꞌuijnes ut jaxir y tamar era cay utzene ut y che: —Jay erach ani que net e Cristoet corpes abꞌa, y corpeson non ubꞌan, che e ajxujch era.
LUK 23:40 Pero otronteꞌ ajxujch xeꞌ chꞌur tama ut ucruz cay uyare uyet ajxujch y che: —Net nien machi abꞌacre e Dios y warix acꞌotoy e hora tuaꞌ ichamay net ubꞌan.
LUK 23:41 Pues non era ucꞌani tuaꞌ cachamay tamar lo que cabꞌeto, pero e winic era matucꞌa uche xeꞌ mabꞌambꞌan, che otronteꞌ ajxujch.
LUK 23:42 Y sutpa ojron e ajxujch era taca e Jesús y che: —Conda iꞌxin watet y icay icꞌotori otronyajr, cꞌajpesiquen nen ubꞌan, che e ajxujch era.
LUK 23:43 Y che e Jesús: —Cꞌani inwaret que coner era net tuaꞌ iꞌxin tacaren esto tiaꞌ aquetpobꞌ tunor tin e erach tama inteꞌ lugar tut e qꞌuin, che e Jesús.
LUK 23:44 Pues entonces tama uyuxin e día era cay ecsibꞌa tunor ut e qꞌuin tama tunor or e rum y quetpa acbꞌar esto a las tres de la tarde.
LUK 23:45 Y e qꞌuin ecsibꞌa y machi eꞌron, y e nuxi bꞌujc xeꞌ chꞌur xeꞌ jax umajquibꞌir ut e altar macuir e templo wejrtzꞌa tuyuxin.
LUK 23:46 Entonces e Jesús aru taca inteꞌ nuxi nuc y che: —Nitatet, tama acꞌabꞌ inwacta niwalma, che e Jesús. Y conda cꞌapa ojron cocha era, chamay.
LUK 23:47 Y ayan inteꞌ capitán romano xeꞌ war uwira tunor era xeꞌ cay utattzꞌi ucꞌabꞌa e Dios y che: —Erach ajchi que e winic era matucꞌa ani unata uche, che e capitán.
LUK 23:48 Y tunor e gente xeꞌ cꞌotoy uwirobꞌ lo que numuy taca e Jesús sutpa ixiobꞌ y cay uyobꞌi ubꞌobꞌ tama uyalmobꞌ umen que war acꞌuxun uyalmobꞌ.
LUK 23:49 Y tunor tin e atzay ani uwirobꞌ e Jesús y e ixictac xeꞌ cay xanobꞌ tacar tama e departamento Galilea, turobꞌ najtir cora war uwirobꞌ tunor lo que numuy era.
LUK 23:50 Pues ayan inteꞌ winic xeꞌ ucꞌabꞌa José xeꞌ imbꞌutz uwirnar xeꞌ tari tama inteꞌ chinam xeꞌ ucꞌabꞌa Arimatea xeꞌ turu tama e departamento Judea. Y jaxir jax inteꞌ ajcꞌampar tama e concilio tuaꞌ e Israel.
LUK 23:51 Y cocha jaxir war ucojco uyopar Cadiosir tuaꞌ acꞌotori tara tor e rum, machi unutꞌi ubꞌijnusiaj taca e inmojr xeꞌ turobꞌ tama e concilio tamar lo que cay ubꞌijnu uchiobꞌ taca e Jesús.
LUK 23:52 Y e winic era conda uwira que cꞌapa chamay e Jesús, ixin tut e Pilato tuaꞌ ucꞌajti ucuerpo tuaꞌ umuqui. Y e Pilato che que erer.
LUK 23:53 Entonces conda uyemse e Jesús tut e cruz, cay ubꞌasi taca inteꞌ nuxi bꞌujc y de allí uqꞌueche ixin y uyose macuir inteꞌ chꞌen tama ut inteꞌ tun tiaꞌ mato majchi amujca tamar.
LUK 23:54 Y e día era jax e día conda ustesna tunor tuaꞌ e día tuaꞌ e jiriar xeꞌ cꞌanix ucajyes era.
LUK 23:55 Y e ixictac xeꞌ cay xanobꞌ taca e Jesús tama e departamento Galilea ixiobꞌ ubꞌan tuaꞌ uwirobꞌ tiaꞌ tuaꞌ amujca e Jesús. Cꞌani uwirobꞌ jay bꞌan chꞌar ucuerpo cocha ucꞌani.
LUK 23:56 Y entonces e ixictac era sutpa ixiobꞌ tama uyototobꞌ y cay uyustesobꞌ cora perfume tuaꞌ uyariobꞌ tama ujor e chamen. Y de allí cay jiriobꞌ tama e día era bꞌan cocha chꞌar tzꞌijbꞌabꞌir tama uley e Moisés.
LUK 24:1 Pues entonces tama e bꞌajxan día tama e semana conda sacojpa e ixictac era sutpa ixiobꞌ esto tiaꞌ mujca e Jesús. Y war uqꞌuechiobꞌ axin e perfume lo que cay uyustesobꞌ tuaꞌ uyariobꞌ tama ujor e chamen. Y ayan otro inmojr ixictac xeꞌ ixiobꞌ ubꞌan.
LUK 24:2 Pero conda cꞌotoyobꞌ tama umujr e Jesús utajwiobꞌ que jachbꞌirix e nuquir tun xeꞌ macar ani e chꞌen tacar.
LUK 24:3 Y ochoyobꞌ tama e chꞌen, pero machi utajwiobꞌ ucuerpo Cawinquirar Jesús.
LUK 24:4 Y bꞌactobꞌ taca y machi unatobꞌ tucꞌa tuaꞌ uchiobꞌ, conda wacchetaca checta tuyejtzꞌerobꞌ chateꞌ winicobꞌ xeꞌ bꞌujcsebꞌirobꞌ tama e bꞌujc xeꞌ ejpray ut.
LUK 24:5 Entonces e ixictac pacwanobꞌ tut e rum umen e bꞌajcꞌut, pero cay ojronobꞌ e winicobꞌ y chenobꞌ: —¿Tucꞌa tuaꞌ war isicbꞌa tin e bꞌixir tujam e chamenobꞌ?
LUK 24:6 Machix turu tara, sino que sutpa bꞌixcꞌa tujam e chamenobꞌ. Cꞌajpesic imener lo que uyareox conda turuan tacarox tama e departamento Galilea.
LUK 24:7 Porque yajaꞌ cay uyareox que Uyunen e winic cꞌani aꞌjcꞌuna tama ucꞌabꞌobꞌ e ajmabꞌambꞌanirobꞌ tuaꞌ achamesna, y tama e uxteꞌ día cꞌani asutpa abꞌixcꞌa tujam e chamenobꞌ, che e winicobꞌ era.
LUK 24:8 Y tamar era cꞌajpa umen e ixictac tamar lo que arobꞌnobꞌ umen e Jesús.
LUK 24:9 Y conda locꞌoyobꞌ tama e mujr, ixiobꞌ y cay uyareobꞌ e once apostolobꞌ y e inmojr gente xeꞌ turobꞌ yajaꞌ tunor lo que numuy tacarobꞌ.
LUK 24:10 Y xeꞌ uqꞌueche ixin e ojroner era tut e apostolobꞌ jax e María xeꞌ tuaꞌ e chinam Magdala y e Juana y e María xeꞌ jax utuꞌ e Santiago y e inmojr ixictac.
LUK 24:11 Pero e apostolobꞌ machi ucꞌupsiobꞌ lo que arobꞌnobꞌ umen e ixictac, sino que uchebꞌiobꞌ que wayac taca cay uchiobꞌ e ixictac era.
LUK 24:12 Pero e Pedro conda cꞌapa uyubꞌi tunor era, ixin ajner esto tama umujr e Jesús y ochoy uwira tama e chꞌen pero matucꞌa ayan, ajrer taquix e bꞌujc turu. Entonces sutpa ixin tama uyotot, war abꞌacta ubꞌijnu tama tunor lo que numuy era.
LUK 24:13 Pues entonces tama e día era locꞌoyobꞌ chateꞌ uyajcanuarobꞌ e Jesús y ixiobꞌ esto tama inteꞌ aldea xeꞌ ucꞌabꞌa Emaús xeꞌ ayan unajtirar de once kilómetros.
LUK 24:14 Y war oꞌjronobꞌ axin tama tunor lo que numuy taca e Jesús.
LUK 24:15 Y bꞌan war uchiobꞌ conda cꞌotoy tajwinobꞌ umen e Jesús xeꞌ cay xana tacarobꞌ.
LUK 24:16 Y motor que jaxirobꞌ war axanobꞌ taca e Jesús, pero machi unatobꞌ jay jax.
LUK 24:17 Entonces e Jesús uyubꞌi tuaꞌ uyajcanuarobꞌ era y che: —¿Tucꞌa tamar war ixojron? ¿Y tucꞌa tuaꞌ que tzajtaca iut era? che e Jesús.
LUK 24:18 Y inteꞌ uyajcanuar xeꞌ war axin era ucꞌabꞌa Cleofas. Y che jaxir: —¿Abꞌajner taca ca net xeꞌ war ixana tama e chinam Jerusalem xeꞌ machi anata tucꞌa numuy? che e Cleofas.
LUK 24:19 Entonces che e Jesús: —¿Y tucꞌa numuy? Y chenobꞌ: —Pues tamar lo que numuy taca e Jesús xeꞌ tuaꞌ e chinam Nazaret. Jaxir jax ani inteꞌ profeta xeꞌ ayan meyra ucꞌotorer xeꞌ cay ucꞌampes tamar lo que uche y tamar lo que ojron. Galan tut e Dios y galan tut e gente ubꞌan tunor lo que cay uche jaxir.
LUK 24:20 Pero uwinquirobꞌ e inmojr sacerdotiobꞌ y e nuquir ajcꞌamparobꞌ tama cachinam ucachiobꞌ uyajcꞌuobꞌ tuaꞌ achamesna tut inteꞌ cruz.
LUK 24:21 Y non canata ani que jaxir jax ani xeꞌ quetpa tuaꞌ ucorpeson xeꞌ tuon e Israel tama ucꞌabꞌobꞌ e gente romano. Y era ayix uxteꞌ día que chamen jaxir.
LUK 24:22 Pero ayan cora ixictac xeꞌ ixiobꞌ sacojpa sajmi tama umujr e Jesús xeꞌ cay ubꞌajcꞌusionobꞌ tamar uyojronerobꞌ.
LUK 24:23 Pues jaxirobꞌ machi utajwiobꞌ ucuerpo e Jesús tama umujr, y tamar era sutpa tariobꞌ ticoit y cay uyareon que uwirobꞌ inteꞌ umayjutobꞌ tiaꞌ checta chateꞌ ángel tutobꞌ xeꞌ uyareobꞌ que e Jesús bꞌixir turu.
LUK 24:24 Y nacpat era ixiobꞌ ajner cora winicobꞌ ticajam esto tama umujr e Jesús, y conda cꞌotoyobꞌ bꞌan utajwiobꞌ cocha arobꞌnobꞌ umen e ixictac, pero e Jesús machi uwirobꞌ ut, che e winic era.
LUK 24:25 Entonces che e Jesús: —¿Machi ca ixobꞌian? ¿Y tucꞌa tuaꞌ war iqꞌuecꞌojse iwalma tuaꞌ machi icꞌupse lo que chꞌar tzꞌijbꞌabꞌir umen e onian profetobꞌ?
LUK 24:26 ¿Machi ca inata que quetpa tuaꞌ unumse ubꞌa e Cristo cocha era tuaꞌ axin ucorpeson, y que de allí quetpa tuaꞌ uchꞌami utawarer e Dios? che e Jesús.
LUK 24:27 Entonces cay uchecsu tutobꞌ tunor e lugar tama uyojroner e Dios tiaꞌ oꞌjron tamar e Cristo. Y ucajyes tamar lo que chꞌar tzꞌijbꞌabꞌir umen e Moisés y de allí uchecsu tutobꞌ lo que chꞌar tzꞌijbꞌabꞌir umen e profetobꞌ ubꞌan.
LUK 24:28 Entonces conda cꞌotoyobꞌ tama e aldea Emaús, e Jesús uche ubꞌa que cꞌanto axana más innajt.
LUK 24:29 Pero conda uwirobꞌ lo que war ubꞌijnu uche jaxir cay upejcobꞌ y chenobꞌ: —Quetpen tacaron tara. Porque tardix era, y wix acbꞌare. Cꞌapix e día, chenobꞌ. Entonces e Jesús ochoy macuir uyototobꞌ y quetpa tacarobꞌ.
LUK 24:30 Y conda ochoy turuan tor e mesa tacarobꞌ cay uchꞌami e pan y ucꞌajti taca e Dios tuaꞌ achojbꞌesna ut e pan, y de allí uxere ixin taca e chateꞌ ajcanuarobꞌ era.
LUK 24:31 Y tama e momento era checta tutobꞌ que e winic era jax e Jesús, pero wacchetaca satpa tutobꞌ y ixin.
LUK 24:32 Entonces cay ojronobꞌ jaxobꞌ taca y chenobꞌ: —¿Machi ca aquirca cawalma conda war oꞌjron tacaron waton tama e bꞌir conda war uchecsu ticoit tunor uyojroner e Dios? chenobꞌ.
LUK 24:33 Entonces wacchetaca achpobꞌ y sutpa ixiobꞌ esto tama e chinam Jerusalem otronyajr. Y conda cꞌotoyobꞌ utajwiobꞌ que ya moror turobꞌ e once apostolobꞌ tuaꞌ e Jesús taca e inmojr ajcanuarobꞌ ubꞌan.
LUK 24:34 Entonces cay ojron inteꞌ tujamobꞌ era y che: —Cawinquirar sutpa bꞌixcꞌa ixto yaꞌ y uchectesix ut tut e Pedro, che inteꞌ.
LUK 24:35 Entonces tin e tariobꞌ tama e aldea Emaús cay uchecsu tutobꞌ tunor lo que numuy tacarobꞌ que checta inteꞌ winic tutobꞌ tama e bꞌir xeꞌ cay uchecsu tutobꞌ tunor uyojroner e Dios. Pero conda e winic cay uxere e pan, wacchetaca pascꞌa unacꞌutobꞌ tuaꞌ unatobꞌ que e winic era jax e Jesús.
LUK 24:36 Entonces conda tunorobꞌ warto oꞌjronobꞌ cocha era, intaca checta e Jesús tutobꞌ y che: —Chꞌamic e jiriar tama iwalma, che e Jesús.
LUK 24:37 Y bꞌactobꞌ meyra este que cay chinchobꞌ. Uchebꞌiobꞌ que war uwirobꞌ inteꞌ mein.
LUK 24:38 Pero jaxir che: —¿Tucꞌa tuaꞌ war ixbꞌacta cocha era? ¿Tucꞌa tuaꞌ war ibꞌijnu tama iwalma que majax erach lo que war iwira era?
LUK 24:39 Chꞌujcunic iwira nicꞌabꞌ y nioc que nen jax e Jesús xeꞌ war iwiren. Pijchꞌinic niut tuaꞌ iwira que nen, porque inteꞌ mein matucꞌa uwerir y matucꞌa ubꞌaquer cocha war iwira era que nen ayan tanibꞌa, che e Jesús.
LUK 24:40 Entonces conda cꞌapa ojron cocha era cay uwirse utajn ucꞌabꞌ y upat uyoc que ayan e chec tamar tiaꞌ osena e clavo.
LUK 24:41 Pero machito war ucꞌupsiobꞌ jay jax e Jesús era. Y cocha war atzayobꞌ y war abꞌactobꞌ, jaxir cay uyubꞌi tuobꞌ y che: —¿Ayan ca tucꞌa tuaꞌ incꞌuxi tara? che e Jesús.
LUK 24:42 Entonces uyajcꞌuobꞌ incojt chay xeꞌ pojbꞌir.
LUK 24:43 Y e Jesús uchꞌami y cay ucꞌuxi tunor era tutobꞌ.
LUK 24:44 Y de allí che: —Tunor lo que cay innumse nibꞌa jax lo que cay inwareox conda turen tacarox tama ucajyesnibꞌir tunor era, que quetpa tuaꞌ innumse nibꞌa tunor bꞌan taca cocha chꞌar tzꞌijbꞌabꞌir tamaren tama uley e Moisés, y bꞌan taca cocha chꞌar tzꞌijbꞌabꞌir tamaren umen e profetobꞌ, y bꞌan taca cocha chꞌar tzꞌijbꞌabꞌir tamaren tama e Salmo, che e Jesús.
LUK 24:45 Entonces e Jesús cꞌapa ujanchꞌacnes tunor ujorobꞌ uyajcanuarobꞌ tuaꞌ acꞌotoy unatobꞌ tunor lo que war che uyojroner e Dios.
LUK 24:46 Y che e Jesús: —Chꞌar tzꞌijbꞌabꞌir tama uyojroner e Dios ixnix e tiempo que e Cristo ucꞌani tuaꞌ achamesna, y de allí cꞌani asutpa abꞌixcꞌa tujam e chamenobꞌ tama e uxteꞌ día.
LUK 24:47 Y chꞌar tzꞌijbꞌabꞌir ubꞌan que tama ucꞌabꞌa e Cristo ucꞌani tuaꞌ ixixin ichecsu tut tunor e gente xeꞌ aturuanobꞌ tama tunor or e rum que ucꞌani tuaꞌ uyactobꞌ tunor umabꞌambꞌanirobꞌ, y tamar era e Dios tuaꞌ acꞌumpa tacarobꞌ. Pero nox ucꞌani tuaꞌ icajyes iche tunor era tama e chinam Jerusalem.
LUK 24:48 Pues nox ajchecsuyajox tama tunor era.
LUK 24:49 Y cꞌani inwareox era que nen cꞌani inwebꞌta watar e chojbꞌesiaj bꞌan cocha cay uyareox Catata Dios y tamar era nox tuaꞌ ichꞌami Unawalir e Dios. Pero irato ixlocꞌoy tama e chinam Jerusalem era este que acꞌapa ichꞌami tunor ucꞌotorer Unawalir e Dios xeꞌ watar tichan tut e qꞌuin, che e Jesús.
LUK 24:50 Entonces e Jesús uqꞌuechiobꞌ ixin uyajcanuarobꞌ innajt tut e chinam era este que cꞌotoyobꞌ tuyejtzꞌer e chinam Betania. Entonces jaxir uyachi ucꞌabꞌobꞌ y cay uchojbꞌes utobꞌ tunor tin e turobꞌ tacar era.
LUK 24:51 Y conda cꞌapa uchojbꞌes ut uyajcanuarobꞌ, bꞌan taca achpa qꞌuejcha ixin tichan tutobꞌ este que namtzꞌa ixin tichan tut e qꞌuin.
LUK 24:52 Y tamar era tunor uyajcanuarobꞌ cay uyujtzꞌiobꞌ ut, y de allí sutpa ixiobꞌ esto tama e chinam Jerusalem otronyajr. Tunorobꞌ war atzayobꞌ.
LUK 24:53 Y quetpobꞌ tama e templo ejcꞌar ejcꞌar, war utattzꞌiobꞌ ucꞌabꞌa Cadiosir. Tara acꞌapa tunor niwojroner, che e Lucas.
JOH 1:1 Pues entonces conda ne mato achena ani or e rum era, ayix inteꞌ xeꞌ turu. Y jaxir ucꞌabꞌa Ojroner. Y e Ojroner era turu taca e Dios. Y e Ojroner jax e Dios ubꞌan.
JOH 1:2 Y jaxir yix turu taca Catata Dios conda ne mato achena ani or e rum era.
JOH 1:3 Y jaxir uche tunor lo que ayan, y matucꞌa ayan xeꞌ majax chembꞌir umener.
JOH 1:4 Y tamar jaxir ayan e cuxtar xeꞌ machi tuaꞌ acꞌapa, y e cuxtar era jax lo que war ujanchꞌacnes tunor e gente tara tor e rum tuaꞌ uwirsiobꞌ lo que erach.
JOH 1:5 Y lo que war ujanchꞌacnes lo que erach tut e gente axin war uyajnes axin e incsibꞌaner. Y e incsibꞌaner era machi uyubꞌi utajpes e janchꞌaquenar.
JOH 1:6 Pues ayan inteꞌ winic xeꞌ ucꞌabꞌa Juan xeꞌ ebꞌetbꞌir tari umen e Dios.
JOH 1:7 Y e Juan era tari tuaꞌ aquetpa inteꞌ ajchecsuyaj tuaꞌ uchecsu tut e gente axin tucꞌa e janchꞌaquenar. Y tamar era tunor tin e ixin uyubꞌi lo que checsuna tutobꞌ erer acꞌotoy acꞌupseyanobꞌ tama e janchꞌaquenar.
JOH 1:8 E Juan majax e janchꞌaquenar sino que jax taca inteꞌ ajchecsuyaj xeꞌ tari tuaꞌ uchectes tut e gente tucꞌa e janchꞌaquenar era.
JOH 1:9 Y e janchꞌaquenar era xeꞌ erach tari tara tor e rum tuaꞌ ujanchꞌacnes tunor ubꞌijnusiajobꞌ e winicobꞌ.
JOH 1:10 Pues entonces tin xeꞌ jax e Ojroner quetpa tara tor e rum, y umen jaxir chena tunor or e rum era ubꞌan, pero e gente tara tor e rum machi cꞌotoy unatobꞌ chi jaxir.
JOH 1:11 Yopa e Ojroner tama uchinamach, pero nien upiarobꞌ era machi uchꞌamiobꞌ ucꞌabꞌa.
JOH 1:12 Pero tunor tin e uchꞌamiobꞌ ucꞌabꞌa y xeꞌ cꞌupseyanobꞌ tamar, jaxir uyajcꞌu e cꞌotorer tuaꞌ aquetpobꞌ umaxtacobꞌ e Dios.
JOH 1:13 Y tin e cꞌupseyanobꞌ tamar jaxir cocha era, cꞌotoy cuxpobꞌ otronyajr. Pero mixto jax bꞌan cocha acuxpa inteꞌ tara tor e rum. Y mixto jax umen lo que ucꞌani inteꞌ winic, sino que cuxpobꞌ otronyajr umen que bꞌan ucꞌani e Dios.
JOH 1:14 Pues e Ojroner era xeꞌ turu taca Catata Dios tari tor e rum y quetpa bꞌan cocha inteꞌ winic y turuan tujam e gente. Y non xeꞌ caturuan tara tor e rum cawira utawarer umen que jaxir jax Uyunen e Dios xeꞌ inteꞌ taca ayan. Y jaxir meyra uyusre utacre e gente y erach uwirnar inyajrer.
JOH 1:15 Entonces cay ojron e Juan tamar Uyunen e Dios era y che: —Jax era tin e cay inwareox y che: “Tin e watar tanipat más ayan ucꞌotorer que nen. Nen cuxpen bꞌajxan que jaxir, pero conda ne mato incuxpa jaxir yix turu”, che e Juan xeꞌ achꞌuyma.
JOH 1:16 Y e Ojroner meyra ayan ucꞌunersiaj, y tunoron cay cachꞌami utacarsiaj iraj iraj.
JOH 1:17 Pues e Moisés cay ucanse e gente tucꞌa e ley lo que ajcꞌuna umen e Dios. Pero jax e Jesucristo xeꞌ cay uwirse e gente tucꞌa utacarsiaj e Dios y tucꞌa xeꞌ erach.
JOH 1:18 Pues ma tiaꞌ irna ut e Dios umen inteꞌ winic, pero Uyunen e Dios xeꞌ inteꞌ taca ayan xeꞌ turu tuyejtzꞌer e Dios cay uchecsu ticoit que ayan inteꞌ Catata Dios.
JOH 1:19 Pues entonces e nuquir winicobꞌ tama e chinam Jerusalem uyebꞌta ixin cora sacerdote taca cora levita tuaꞌ uyubꞌiobꞌ tuaꞌ e Juan xeꞌ ajchꞌuymar que chi jaxir.
JOH 1:20 Pero e Juan uchecsu lo que erach y machi majresian tutobꞌ y che: —Nen majax e Cristoen, che e Juan.
JOH 1:21 Entonces uyubꞌiobꞌ tuaꞌ e Juan otronyajr y chenobꞌ: —¿Pues chiet net entonces? ¿O net ca jax e profeta xeꞌ ucꞌabꞌa Elías xeꞌ sutpa bꞌixqꞌuet otronyajr? che e winicobꞌ era. Y e Juan che: —Majax nen, che e Juan. Entonces uyubꞌiobꞌ tuaꞌ e Juan otronyajr y chenobꞌ: —¿O net ca jax e profeta xeꞌ arobꞌnon umen e Moisés xeꞌ aquetpa tuaꞌ ayopa? che e winicobꞌ. Pero e Juan che: —Majax nen, che e Juan.
JOH 1:22 Entonces ojronobꞌ e winicobꞌ otronyajr y chenobꞌ: —¿Pues chiet net entonces? Porque tin e uyebꞌta tarion war ucꞌani tuaꞌ caware chiet net conda cacꞌotoy tut otronyajr. Arenon chiet net, che e sacerdotiobꞌ era.
JOH 1:23 Entonces ojron e Juan y che: —Nen jax inteꞌ winic xeꞌ war onjron tama inteꞌ choquem lugar xeꞌ che: “Ucꞌani tuaꞌ uꞌstana tunor ubꞌir Cawinquirar”, que war che que ucꞌani tuaꞌ uꞌstana uyalmobꞌ e gente tuaꞌ uchꞌamiobꞌ ucꞌabꞌa Cawinquirar bꞌan cocha chꞌar tzꞌijbꞌabꞌir umen e profeta Isaías tama e onian tiempo, che e Juan.
JOH 1:24 Pues ebꞌetna ixiobꞌ cora fariseobꞌ tut Juan
JOH 1:25 xeꞌ chenobꞌ: —Y jay majax net e Cristoet, y majax net e Elías, y majax net e profetaet, entonces ¿tucꞌa tuaꞌ war ichꞌuyma? che e sacerdotiobꞌ era.
JOH 1:26 Entonces ojron e Juan y che: —Nen war inchꞌuyma taca e jaꞌ, pero ayan inteꞌ tijam xeꞌ machito war inata chi
JOH 1:27 xeꞌ watar tanipat xeꞌ más ayan ucꞌotorer que nen. Nen cuxpen bꞌajxan que jaxir, pero conda ne mato incuxpa jaxir yix turu. Pero nen ma tawaren nien tuaꞌ imbꞌani ut uxanabꞌ porque meyra ayan ucꞌotorer, che e Juan.
JOH 1:28 Pues numuy tunor era tama e chinam Betania xeꞌ turu teinxejr e xucur Jordán tiaꞌ war achꞌuyma e Juan.
JOH 1:29 Pues entonces tama otronteꞌ día e Juan cay uwira que war acꞌotoy e Jesús tut y tamar era e Juan cay uyare e gente xeꞌ turobꞌ tuyejtzꞌer y che: —Chꞌujcunic iwira e winic era xeꞌ aquetpa bꞌan cocha inteꞌ cordero xeꞌ ajcꞌunon umen e Dios xeꞌ aquetpa tuaꞌ achamesna tamaron tuaꞌ ulocse umabꞌambꞌanirobꞌ tunor e gente tara tor e rum.
JOH 1:30 Pues tamar jaxir war imbꞌijnu conda cay inwareox que: “Tin e watar tanipat más ayan ucꞌotorer que nen. Nen cuxpen bꞌajxan que jaxir, pero conda ne mato incuxpa jaxir yix turu.”
JOH 1:31 Pues nen machi ani innata chi e winic era. Pero cay chꞌuymen taca e jaꞌ tuaꞌ taca acꞌotoy unatobꞌ e gente tama e Israel chi e winic era, che e Juan xeꞌ ajchꞌuymar.
JOH 1:32 Entonces ojron e Juan otronyajr y uyajcꞌu e checsuyaj era y che: —Inwira ecmay Unawalir e Dios xeꞌ tari tut e qꞌuin xeꞌ bꞌan uwirnar cocha incojt sacsac mut xeꞌ cꞌotoy turuan tama e winic era.
JOH 1:33 Pues nen machi ani innata chi era, pero tin e uyebꞌta tarien tuaꞌ inchꞌuyma taca e jaꞌ cay uyaren y che: “Conda awira ecmay watar Unawalir e Dios tama ujor inteꞌ winic y aquetpa tamar, jax e winic era xeꞌ tuaꞌ achꞌuyma taca Unawalir e Dios”, che uyaren e Dios.
JOH 1:34 Y nen inwira conda ecmay tari Unawalir e Dios y quetpa tamar, y tamar era erer inchectes tiut que jaxir jax Uyunen e Dios, che e Juan xeꞌ ajchꞌuymar.
JOH 1:35 Entonces tama otronteꞌ día e Juan ya turu tama e lugar era otronyajr taca chateꞌ uyajcanuarobꞌ.
JOH 1:36 Y conda uwira anumuy e Jesús, ojron e Juan y che: —Chꞌujcunic iwira e winic era xeꞌ aquetpa bꞌan cocha inteꞌ cordero xeꞌ ajcꞌunon umen e Dios xeꞌ aquetpa tuaꞌ achamesna tamaron, che e Juan xeꞌ ajchꞌuymar.
JOH 1:37 Pues conda e chateꞌ ajcanuarobꞌ era tuaꞌ e Juan uyubꞌiobꞌ lo que che jaxir, ixiobꞌ tupat e Jesús.
JOH 1:38 Y conda e Jesús sutpa uwira que war axin tupat e chateꞌ ajcanuarobꞌ era cay ojron y che: —¿Tucꞌa icꞌani nox? che e Jesús. Y jaxirobꞌ chenobꞌ: —Ajcanseyajet, ¿tiaꞌ turet? che e ajcanuarobꞌ era.
JOH 1:39 Y che e Jesús: —Laric iwira, che e Jesús. Entonces ixiobꞌ e chateꞌ winicobꞌ era tuaꞌ uwirobꞌ tiaꞌ turu e Jesús y quetpobꞌ tacar tunor e día porque cꞌanix acꞌapa e día conda utajwiobꞌ.
JOH 1:40 Y inteꞌ ajcanuar era xeꞌ cay uyubꞌi lo que che e Juan y xeꞌ cay ixin tupat e Jesús ucꞌabꞌa Andrés xeꞌ jax uwijtzꞌin e Simón Pedro.
JOH 1:41 Y conda e Andrés cꞌotoy unata que e Jesús jax e Cristo ixin wacchetaca tuaꞌ usicbꞌa usacun xeꞌ jax e Simón. Entonces uyare e Simón y che: —Lar wacchetaca porque catajwix e Mesías xeꞌ war che que jax e Cristo, che e Andrés.
JOH 1:42 Entonces e Andrés uqꞌueche ixin usacun tut e Jesús. Y conda irna e Simón umen e Jesús cay ojron y che: —Net jax e Simón xeꞌ uyunenet e Jonás, pero acꞌabꞌa tuaꞌ aquetpa Cefas xeꞌ war che Pedro ubꞌan, che e Jesús. Pues e ojroner Pedro war che: “Tun” tama e ojroner griego.
JOH 1:43 Entonces tama otronteꞌ día e Jesús cay ubꞌijnu tuaꞌ axin tama e departamento Galilea. Y conda war axin tama e bꞌir utajwi inteꞌ winic xeꞌ ucꞌabꞌa Felipe. Entonces ojron tacar y che: —Incoꞌ tacaren, che e Jesús.
JOH 1:44 Pues e Felipe era ajlugar tama e chinam Betsaida bꞌan cocha e Andrés y e Pedro.
JOH 1:45 Entonces e Felipe ixin tuaꞌ usajca e Natanael y uyare: —Catajwix ixto e winic xeꞌ cay utzꞌijbꞌa e Moisés tamar y xeꞌ cay utzꞌijbꞌa e profetobꞌ tamar tama e onian tiempo ubꞌan. Y jax era e Jesús xeꞌ uyunen e José xeꞌ tari tama e chinam Nazaret, che e Felipe.
JOH 1:46 Y che Natanael: —¿O ayan ca lo que imbꞌutz xeꞌ erer alocꞌoy tama e chinam Nazaret? che e Natanael. Y che e Felipe: —Lar chꞌujcun awira.
JOH 1:47 Y conda e Jesús uwira que e Natanael war ayopa tut, cay ojron y che: —Iran, tara war ayopa inteꞌ winic xeꞌ jax niwet ajlugarir tama e Israel xeꞌ machi unata amajresian, che e Jesús.
JOH 1:48 Entonces e Natanael uyubꞌi tuaꞌ e Jesús y che: —¿Cocha cꞌotoy anata chien nen? che e Natanael. Y che e Jesús: —Pues inwiret conda turet yebꞌar ucꞌabꞌ inteꞌ teꞌ higuera conda merato acꞌotoy e Felipe tuaꞌ upejquet, che e Jesús.
JOH 1:49 Entonces ojron e Natanael y che: —Ajcanseyajet, net jax Uyunenet e Dios, y net jax e Rey tuaꞌ e Israel, che e Natanael.
JOH 1:50 Y e Jesús che: —¿War ca icꞌupseyan tamaren umen taca que cay inwaret que inwiret conda turet yebꞌar ucꞌabꞌ e teꞌ higuera? Pues net tuaꞌ iꞌxin awira más nojta ucꞌotorer e Dios tamaren que cay awira era, che e Jesús.
JOH 1:51 Y ojron e Jesús otronyajr y che: —Cꞌani inwareox era que nox tuaꞌ ixixin iwira apascꞌa ut e qꞌuin y cꞌani iwira uyangelobꞌ e Dios xeꞌ war atꞌabꞌay axiobꞌ y xeꞌ war ecmay watobꞌ tama nijor nen xeꞌ Uyunenen e winic, che e Jesús.
JOH 2:1 Pues entonces tama e uxteꞌ día chempa inteꞌ nujbꞌiar tama e chinam Caná tama e departamento Galilea. Y ya turu utuꞌ e Jesús tama e nujbꞌiar era.
JOH 2:2 Y pejcna e Jesús tacar uyajcanuarobꞌ tuaꞌ acꞌotoyobꞌ tama e nujbꞌiar ubꞌan.
JOH 2:3 Pero conda merato acꞌapa e nojqꞌuin cꞌapa e vino lo que war oꞌchna. Entonces utuꞌ e Jesús uyare y che: —Cꞌapa e vino lo que ayan ani. ¿Y tucꞌa tuaꞌ cache coner? ¿O ayan ca tucꞌa erer ache net tuaꞌ atacrion era? che utuꞌ e Jesús.
JOH 2:4 Pero e Jesús uyare utuꞌ y che: —Ixic, ¿tucꞌa tuaꞌ war awaren cocha era? ¿Machi ca anata que merato acꞌotoy niwora tuaꞌ acay inchectes nicꞌotorer tut e gente? Actan tunor era tacaren, che e Jesús.
JOH 2:5 Pero utuꞌ e Jesús, cay uyare tin e war upuquiobꞌ axin e comida taca e gente y che: —Chenic tunor lo que axin uyareox jaxir, che utuꞌ e Jesús.
JOH 2:6 Y yajaꞌ warobꞌ seis nuquir bongo xeꞌ chembꞌir taca e tun xeꞌ uwajpi seis bꞌujr jaꞌ tama unac. Pues e bongo ayan ucꞌampibꞌir tuaꞌ ucojco e jaꞌ tuaꞌ upoquiobꞌ tuqꞌuic tuqꞌuic tamar. Porque chꞌar tzꞌijbꞌabꞌir tama uley e Moisés que ucꞌani tuaꞌ apojca tunor lo que ayan.
JOH 2:7 Entonces ojron e Jesús taca tin e war upuqui e comida axin tut e gente y che: —Yaric e jaꞌ tama tunor e bongo era este que abꞌutcꞌa tunor, che e Jesús. Entonces uchiobꞌ bꞌan cocha arobꞌnobꞌ umen e Jesús.
JOH 2:8 Entonces e Jesús sutpa uyare otronyajr y che: —Locsenic imbꞌijc y qꞌuechic chic tut e ajyum nojqꞌuin, che e Jesús. Y bꞌan uchiobꞌ.
JOH 2:9 Entonces conda e ajyum nojqꞌuin cay uyejta imbꞌijc e jaꞌ cꞌotoy unata que vino. Pero machi war unata tiaꞌ tari, ajtaca tin e war upuqui axin e comida war unatobꞌ que e vino era jaꞌ ani. Y tamar era e ajyum nojqꞌuin upejca tari e winic xeꞌ war anujbꞌi
JOH 2:10 y uyare: —Tama inteꞌ nojqꞌuin bꞌajxan apujca axin e vino xeꞌ más galan uyuchnar, y de allí conda uchnix meyra vino acay aꞌjcꞌunobꞌ e vino xeꞌ más calapir. Pero net war acojco este era tuaꞌ awajcꞌu e vino xeꞌ más galan uyuchnar. Bꞌan che e ajyum nojqꞌuin uyare e winic xeꞌ war anujbꞌi.
JOH 2:11 Pues jax era e bꞌajxan milagro lo que chena umen e Jesús, y conda uche tunor era cay checsuna que jaxir ayan utawarer y tamar era uyajcanuarobꞌ cay cꞌupseyanobꞌ tamar jaxir. Pues tunor era numuy tama e chinam Caná tama e departamento Galilea.
JOH 2:12 Entonces conda cꞌapa e nujbꞌiar ixin e Jesús esto tama e chinam Capernaum taca utuꞌ y uwijtzꞌinobꞌ y taca uyajcanuarobꞌ. Y yajaꞌ quetpobꞌ cora día.
JOH 2:13 Pues entonces cocha war acꞌotoy e día tuaꞌ acay e nojqꞌuin tuaꞌ e gente tama e Israel xeꞌ ucꞌabꞌa pascua, ixin e Jesús esto tama e chinam Jerusalem.
JOH 2:14 Y conda cꞌotoy tama e templo cay uwira que war achojna e sian wacax y e sian oveja y e sacsac mut. Y uwira que ayan tin e turobꞌ tor e mesa xeꞌ war uwechꞌiobꞌ ut e tumin.
JOH 2:15 Y conda e Jesús uwira tunor era, uchꞌami inteꞌ jarbꞌir qꞌuewer y cay uwatzꞌi uyajnes tunor e ajchonmar taca tunor e wacax y e oveja. Y cay upusi e tumin tuaꞌ tin e war uwechꞌiobꞌ ut e tumin y ucucru ixin e sian mesa tuobꞌ.
JOH 2:16 Y uyare tunor tin e war uchoni e sacsac mut y che: —Locsenic tara tunor. Ira iche más e chonmar tama uyotot Nitata, che e Jesús.
JOH 2:17 Y tamar era cꞌajpesna umen uyajcanuarobꞌ que chꞌar tzꞌijbꞌabꞌir tama uyojroner e Dios y che: —War uchien innumse nibꞌa umen que war intzꞌunle uyotot Nitata Dios, xeꞌ che chꞌar tzꞌijbꞌabꞌir tama uyojroner e Dios.
JOH 2:18 Entonces cora winicobꞌ tuaꞌ Israel cay uyubꞌiobꞌ tuaꞌ e Jesús y chenobꞌ: —¿Y tucꞌa tuaꞌ awirsion tuaꞌ achectes ticoit que net ayan acꞌotorer tuaꞌ ache tunor era? che e winicobꞌ era.
JOH 2:19 Y che e Jesús: —Tijresic e templo era y nen tuaꞌ anchi otronyajr tama uxteꞌ día, che e Jesús.
JOH 2:20 Y che e winicobꞌ: —Cuarenta y seis año uqꞌuechion tuaꞌ cachi e templo era ¿y net ca tuaꞌ abꞌijnu aꞌchi tama uxteꞌ día? che e winicobꞌ era.
JOH 2:21 Pero e templo xeꞌ war oꞌjron e Jesús tamar, majax e nuxi otot lo que ayan tara sino que jax ucuerpo jaxir.
JOH 2:22 Y tamar era conda sutpa bꞌixcꞌa e Jesús tujam e chamenobꞌ cꞌajpa umen uyajcanuarobꞌ tunor lo que cay arobꞌnobꞌ umener, y tamar era cꞌupseyanobꞌ tamar lo que chꞌar tzꞌijbꞌabꞌir tama uyojroner e Dios y tama tunor lo que arobꞌnobꞌ umen e Jesús.
JOH 2:23 Pues tama e tiempo era conda turu e Jesús tama e chinam Jerusalem tama e nojqꞌuin pascua, meyra gente cay cꞌupseyanobꞌ tamar conda uwirobꞌ que war uche e sian milagro.
JOH 2:24 Pero e Jesús machi cꞌupseyan tama e winicobꞌ era porque war unata tunor lo que war ubꞌijnuobꞌ.
JOH 2:25 Y mamajchi umen arobꞌna tucꞌa ayan tama e winicobꞌ era, porque jaxir warix unata tunor lo que ayan tama uyalmobꞌ.
JOH 3:1 Pues entonces ayan inteꞌ fariseo xeꞌ ucꞌabꞌa Nicodemo xeꞌ jax inteꞌ nuquir winic tama e Israel
JOH 3:2 xeꞌ ixin tuaꞌ uwarajse e Jesús acbꞌar porque war asubꞌajra. Entonces ojron jaxir y che: —Ajcanseyajet, war canata que net ebꞌetbꞌir tariet umen e Dios tuaꞌ acansion, porque mamajchi uyubꞌi uche e sian milagro lo que war ache net jay machi turu e Dios tacar, che e Nicodemo.
JOH 3:3 Entonces ojron e Jesús y che: —Cꞌani inwaret que tin e machi asutpa acuxpa otronyajr machi uyubꞌi uwira uchinam e Dios, che e Jesús.
JOH 3:4 Entonces e Nicodemo uyubꞌi tuaꞌ e Jesús y che: —¿Y cocha tuaꞌ asutpa acuxpa otronyajr inteꞌ xeꞌ winiquix uwirnar? ¿O ererto ca asutpa oꞌchoy inteꞌ macuir unac utuꞌ tuaꞌ asutpa acuxpa otronyajr? che e Nicodemo.
JOH 3:5 Y che e Jesús: —Cꞌani inwaret que tunor tin e cꞌani oꞌchoy tama uchinam e Dios ucꞌani tuaꞌ acuxpa taca e jaꞌ tama uwerir y ucꞌani tuaꞌ acuxpa otronyajr taca Unawalir e Dios.
JOH 3:6 Pues tin e acuxpa tara tor e rum aquetpa bꞌan cocha e gente tara tor e rum. Y tin e acuxpa tama Unawalir e Dios aquetpa taca e cuxtar xeꞌ tuaꞌ uqꞌueche axin inteꞌ tut e qꞌuin.
JOH 3:7 Pero ira ibꞌacta que inwaret que ucꞌani tuaꞌ icuxpa otronyajr.
JOH 3:8 Pues e icꞌar ajicna axin y ajicna watar y coybꞌi que war ajicna axin, pero machi cawira tiaꞌ watar y nien machi cawira tiaꞌ war axin. Y bꞌan ubꞌan tin e acuxpa tama Unawalir e Dios, machi cawira tucꞌa anumuy conda axin uchꞌami e cuxtar xeꞌ machi tuaꞌ acꞌapa, che e Jesús.
JOH 3:9 Y che e Nicodemo: —Machi innata tucꞌa war awaren era, che e Nicodemo.
JOH 3:10 Y che e Jesús: —Pues net nuxi ajcanseyajet tama e gente tuaꞌ e Israel y ¿tucꞌa tuaꞌ machi war anata tama tunor era?
JOH 3:11 Cꞌani inwaret era que war cawaret tamar taca lo que war canata porque war cachecsu toit jax taca lo que cay cawira, pero nox xeꞌ fariseox machi cꞌani ixcꞌupseyan tamar lo que war cawareox.
JOH 3:12 Y jay machi cꞌani ixcꞌupseyan tamar lo que inwareox conda war incansiox tamar lo que ayan tara tor e rum ¿cocha tuaꞌ ixcꞌupseyan tamar lo que inwareox jay inxin incansiox tamar lo que ayan tut e qꞌuin tichan?
JOH 3:13 ’Mamajchi tꞌabꞌay ixin tut e qꞌuin sino que ajtaca nen xeꞌ jax Uyunenen e winic xeꞌ ecmay tarien tichan.
JOH 3:14 Pues bꞌan cocha e Moisés utꞌabꞌse uturbꞌa tichan incojt chan tama e choquem lugar tama e onian tiempo, y bꞌan ixto tuaꞌ achena tamaren xeꞌ Uyunenen e winic que cꞌani intꞌabꞌesna inchꞌubꞌna tut inteꞌ teꞌ.
JOH 3:15 Y tamar era tunor tin e axin acꞌupseyan tamaren cꞌani uchꞌamiobꞌ e cuxtar xeꞌ machi tuaꞌ acꞌapa, che e Jesús.
JOH 3:16 Entonces che e Jesús: —E Dios meyra uyajta utobꞌ e gente tara tor e rum y umen era uyebꞌta tari Uyunen xeꞌ inteꞌ taca ayan tuaꞌ achamay tamarobꞌ, y tamar era tunor tin e acꞌotoy acꞌupseyanobꞌ tamar machi tuaꞌ asatpobꞌ sino que cꞌani uchꞌamiobꞌ e cuxtar xeꞌ machi tuaꞌ acꞌapa.
JOH 3:17 Porque conda Catata Dios uyebꞌta tari Uyunen tara tor e rum, machi uyare Uyunen tuaꞌ utijres tin e turobꞌ tara tor e rum, sino que uyare tuaꞌ watar acorpesian.
JOH 3:18 ’Pues tin e war acꞌupseyan tama Uyunen e Dios machi tuaꞌ asatpa, pero tin e machi acꞌupseyan tamar satrem ixto, porque machi cꞌotoy cꞌupseyan tama Uyunen e Dios xeꞌ inteꞌ taca ayan.
JOH 3:19 Y tamar era tunor tin e machi cꞌani acꞌupseyanobꞌ tamar aquetpobꞌ satrem inyajrer, porque conda uwirobꞌ e janchꞌaquenar xeꞌ jax Uyunen e Dios xeꞌ tari tara tor e rum, machi ucꞌaniobꞌ, sino que más war ucꞌaniobꞌ e incsibꞌaner porque mabꞌambꞌan tunor lo que war uchiobꞌ.
JOH 3:20 Tunor tin e war uchiobꞌ e mabꞌambꞌanir war uxejbꞌiobꞌ ut e janchꞌaquenar, y tamar era machi acꞌotoyobꞌ tut e janchꞌaquenar porque machi ucꞌaniobꞌ tuaꞌ achectesna que mabꞌambꞌan tunor lo que war uchiobꞌ.
JOH 3:21 Pero tunor tin e war uchiobꞌ lo que erach acꞌotoy awawanobꞌ tiaꞌ janchꞌaquen tuaꞌ achectesna que war atacarnobꞌ umen e Dios tuaꞌ uchiobꞌ ajtaca lo que ucꞌani jaxir, che e Jesús.
JOH 3:22 Pues nacpat era ixin e Jesús taca uyajcanuarobꞌ esto tama e departamento Judea tiaꞌ cay chꞌuymobꞌ tama inteꞌ tiempo.
JOH 3:23 Y e Juan ubꞌan war achꞌuyma ya taca tuyejtzꞌer e chinam Enón xeꞌ majax innajt tut e chinam Salim porque ayan meyra e jaꞌ. Y war acꞌotoyobꞌ e gente iraj iraj tuaꞌ achꞌujyobꞌ umen e Juan.
JOH 3:24 Pues tunor era cay numuy conda ne mato ayajra e Juan tama e cárcel.
JOH 3:25 Entonces cay ojronobꞌ taca cora winicobꞌ xeꞌ tuobꞌ e Israel y taca uyajcanuarobꞌ e Juan y chenobꞌ: —¿Tucꞌa chꞌuymar xeꞌ más erach? chenobꞌ.
JOH 3:26 Entonces ixiobꞌ uyajcanuarobꞌ era tut e Juan y chenobꞌ: —Ajcanseyajet, e winic xeꞌ turet tacar conda turon teinxejr e xucur Jordán que awareon que jax e Cristo war achꞌuyma ubꞌan y tunor e gente war axin tupat, che uyajcanuarobꞌ e Juan era.
JOH 3:27 Pero e Juan che: —Matucꞌa tuaꞌ uchꞌami inteꞌ winic jay majax ajcꞌubꞌir umen e Dios.
JOH 3:28 Pues nox ajchecsuyajox que nen cay inware que majaxen e Cristo sino que ebꞌetbꞌir tarien tuaꞌ unstes e bꞌir tut jaxir.
JOH 3:29 Bꞌan cocha conda ayan inteꞌ nujbꞌiar, e ijchꞌoc xeꞌ tuaꞌ anujbꞌi aquetpa tuaꞌ e sitz xeꞌ tuaꞌ anujbꞌi tacar. Y tin e war utacre e sitz tuaꞌ uche e nojqꞌuin axin atzay conda uyubꞌi ojron e sitz era. Y bꞌanen nen ubꞌan, intzay conda umbꞌi ojron e Cristo.
JOH 3:30 Y tamar era jaxir ucꞌani tuaꞌ aquetpa más nuxi winic, y nen ucꞌani tuaꞌ inquetpa más chuchu nicꞌampibꞌir, che e Juan.
JOH 3:31 Y de allí ojron e Juan otronyajr y che: —Tin e ecmay tari tut e qꞌuin xeꞌ jax e Jesús más meyra ayan ucꞌampibꞌir que tin e turu tara tor e rum bꞌan cocha nen, porque nen erer onjron ajrer taca tamar lo que ayan tara tor e rum. Pero jaxir xeꞌ ecmay tari tut e qꞌuin más meyra ayan ucꞌampibꞌir.
JOH 3:32 Pues jaxir war uchecsu tut e gente axin lo que uwira y lo que uyubꞌi tut e qꞌuin, pero mamajchi cꞌani acꞌupseyan tamar lo que war uchecsu tutobꞌ era.
JOH 3:33 Pero tin e axin uchꞌami lo que checsuna umen e Jesús, war uchecsu ubꞌa que erach lo que arobꞌna umen e Dios.
JOH 3:34 Pues tin e ebꞌtana tari umen e Dios axin uchecsu lo que arobꞌna umener, porque Cadiosir uturbꞌa meyra Unawalir e Dios tamar.
JOH 3:35 Y chequer que Catata Dios uyajta ut Uyunen, porque ixin uyajcꞌu tuaꞌ acꞌotori tujor tunor lo que ayan.
JOH 3:36 Pues tin e acꞌupseyan tama Uyunen e Dios cꞌani uchꞌami e cuxtar xeꞌ machi tuaꞌ acꞌapa. Pero tin e machi cꞌani acꞌupseyan tamar machi tuaꞌ uchꞌami e cuxtar xeꞌ machi tuaꞌ acꞌapa, sino que cꞌani acꞌaxi tunor e nuxi qꞌuijnar tuaꞌ e Dios tama ujor, che e Juan xeꞌ ajchꞌuymar.
JOH 4:1 Pues entonces tama e tiempo era meyra gente cay chꞌujyobꞌ tuaꞌ aquetpobꞌ uyajcanuarobꞌ e Jesús. Y e Juan war achꞌuyma ubꞌan pero majax meyra gente cocha war uche e Jesús y uyajcanuarobꞌ. Y conda cꞌotoy unatobꞌ tunor era tin e fariseobꞌ, cay ojronobꞌ.
JOH 4:2 Pero e Jesús machi war achꞌuyma sino que jax taca uyajcanuarobꞌ.
JOH 4:3 Y conda Cawinquirar cay uyubꞌi lo que war aꞌrobꞌna umen e fariseobꞌ locꞌoy tama e departamento Judea y sutpa ixin esto tama e departamento Galilea otronyajr.
JOH 4:4 Pero tamar uxambꞌar era quetpa tuaꞌ unumse e departamento Samaria tuaꞌ acꞌotoy tama e departamento Galilea.
JOH 4:5 Y bꞌan war axin e Jesús conda cꞌotoy tama inteꞌ chinam tama e departamento Samaria xeꞌ ucꞌabꞌa Sicar xeꞌ majax innajt tiaꞌ turu e rum lo que e Jacob cay uyacta taca e José xeꞌ jax inteꞌ uyunen tama e onian tiempo.
JOH 4:6 Y conda qꞌuix acꞌotoy uyuxin e día cꞌotoy e Jesús tiaꞌ turu ut e jaꞌ xeꞌ chembꞌir umen e Jacob tama e onian tiempo. Entonces turuan tama utiꞌ ut e jaꞌ era cocha war acꞌoy meyra umen e xambꞌar.
JOH 4:7 Y tama e hora era cꞌotoy inteꞌ ixic xeꞌ tuaꞌ e departamento Samaria xeꞌ cꞌani ubꞌutꞌi ubꞌujr taca e jaꞌ. Entonces ojron e Jesús taca e ixic y che: —Ajcꞌunen e jaꞌ, cꞌani unchꞌi, che e Jesús.
JOH 4:8 Pues turu e Jesús ubꞌajner cocha ixiobꞌ uyajcanuarobꞌ tama e chinam yajaꞌ tuaꞌ usajca umaniobꞌ lo que tuaꞌ ucꞌuxiobꞌ.
JOH 4:9 Pero cocha e gente tuaꞌ e Israel machi upejca ubꞌobꞌ taca e gente tuaꞌ e Samaria, ojron e ixic y che: —Nen ajlugaren tama e departamento Samaria, y net ajlugaret tama e lugar Israel. ¿Y tucꞌa tuaꞌ war acꞌajti e jaꞌ tanibꞌa? che e ixic.
JOH 4:10 Entonces che e Jesús: —Jay net anata ani cobꞌa erer achꞌami tuaꞌ e Dios, o jay anata ani chi xeꞌ war ucꞌajti e jaꞌ tacaret, net acꞌajti ani tacar y jaxir uyajqꞌuet ani e jaꞌ xeꞌ bꞌixir xeꞌ machi tuaꞌ acꞌapa, che e Jesús.
JOH 4:11 Y che e ixic: —¿Pero tucꞌa tamar tuaꞌ alocse e jaꞌ? Porque matucꞌa nien inteꞌ aruch xeꞌ qꞌuecher amen tuaꞌ alocse jaꞌ tamar, y intam e nuxi chꞌen era. ¿Y tiaꞌ tuaꞌ atajwi e jaꞌ awajqꞌuen xeꞌ bꞌixir?
JOH 4:12 ¿Más ca anata net que catata viejobꞌir Jacob? Porque jax jaxir xeꞌ upasi e chꞌen era tuaꞌ utajwi e jaꞌ y tiaꞌ cay uyuchꞌi jaxir taca umaxtac y taca tunor uyarac ubꞌan, che e ixic.
JOH 4:13 Y che e Jesús: —Tunor tin e uyuchꞌi e jaꞌ era axinto asutpa ataqui utiꞌ otronyajr.
JOH 4:14 Pero tin e axin uyuchꞌi e jaꞌ xeꞌ cꞌani inwajcꞌu nen machi tuaꞌ asutpa ataqui utiꞌ otronyajr. Porque e jaꞌ xeꞌ tuaꞌ inwajcꞌu nen aquetpa tama uyalma inteꞌ bꞌan cocha inteꞌ jaꞌ xeꞌ abꞌocbꞌa alocꞌoy macuir e rum xeꞌ tuaꞌ uyajcꞌu e cuxtar xeꞌ machi tuaꞌ acꞌapa, che e Jesús.
JOH 4:15 Entonces ojron e ixic otronyajr y che: —Ajcꞌunen ixto e jaꞌ era tuaꞌ machi asutpa ataqui nitiꞌ otronyajr y tuaꞌ machi insutpa waten tuaꞌ inlocse e jaꞌ lo que ayan tama e chꞌen era, che e ixic.
JOH 4:16 Y che e Jesús: —Quiqui pejcan aviejo y sutpen lar otronyajr, che e Jesús.
JOH 4:17 Y che e ixic: —Pero matucꞌa niviejo, che e ixic. Y che e Jesús: —Erach lo que awaren era que matucꞌa aviejo.
JOH 4:18 Porque nen innata que cinco ut ani aviejo, pero xeꞌ qꞌuecher amener coner ajxambꞌar winic taca y majax aviejo. Y tamar era chequer que majax majresiaj lo que war ache tacaren, che e Jesús.
JOH 4:19 Y che e ixic: —Chequer taniut tamar awojroner que net jax inteꞌ profeta tuaꞌ e Dios.
JOH 4:20 Tunor catata viejobꞌir tara tama e Samaria cay uyujtzꞌiobꞌ ut e Dios tor e witzir era, pero nox xeꞌ tuox e Israel war iware que jax taca tama e chinam Jerusalem tiaꞌ ucꞌani tuaꞌ cojytzꞌi ut e Dios, che e ixic.
JOH 4:21 Y che e Jesús: —Cꞌupsen niwojroner era, ixic. Watar e día conda tuaꞌ ojytzna ut Catata Dios tic taca y majax tor e witzir era y majax tamar taca e chinam Jerusalem.
JOH 4:22 Nox xeꞌ tuox e Samaria machi inata chi xeꞌ war iyujtzꞌi ut. Pero non xeꞌ tuon e Israel war canata chi xeꞌ war cojytzꞌi ut, porque e corpesiaj watar tuaꞌ e gente xeꞌ tuobꞌ e Israel.
JOH 4:23 Watar e día xeꞌ jax coner conda tunor tin e cꞌani uyujtzꞌiobꞌ ut e Dios ucꞌani tuaꞌ uyujtzꞌiobꞌ ut taca tunor uyalma y ucꞌani tuaꞌ uchiobꞌ bꞌan cocha ucꞌani xeꞌ erach. Porque bꞌan ucꞌani Catata Dios.
JOH 4:24 Porque e Dios nawalbꞌir xeꞌ machi cawira ut, y tamar era tin e cꞌani uyujtzꞌiobꞌ ut e Dios ucꞌani tuaꞌ uchiobꞌ taca tunor uyalmobꞌ y ucꞌani tuaꞌ uchiobꞌ bꞌan cocha ucꞌani xeꞌ erach, che e Jesús.
JOH 4:25 Y che e ixic: —Nen innata que watar e Ajcorpesiaj tuaꞌ tunor e gente tara tor e rum xeꞌ jax e Cristo. Conda ayopa jaxir axin uchectes tunor ticoit, che e ixic.
JOH 4:26 Y e Jesús che: —Jax nen e Cristoen xeꞌ war iyojron tacar, che e Jesús.
JOH 4:27 Y tamar era cꞌotoy uyajcanuarobꞌ otronyajr. War ubꞌijnu uwirobꞌ que war oꞌjron e Jesús taca inteꞌ ixic. Pero mamajchi uyubꞌi tuaꞌ e ixic que tucꞌa ucꞌani, y nien mamajchi uyubꞌi tuaꞌ e Jesús que tucꞌa tamar war oꞌjronobꞌ.
JOH 4:28 Entonces e ixic uyacta ubꞌujr y locꞌoy ixin tama e chinam tiaꞌ cay uyare tunor e gente y che:
JOH 4:29 —Lar chꞌujcunic inteꞌ winic xeꞌ cay uyaren tunor lo que cꞌapa inche. ¿Ma ca nic jax era e Ajcorpesiaj? che e ixic.
JOH 4:30 Entonces locꞌoyobꞌ e gente tama e chinam era tuaꞌ axin uwirobꞌ e Jesús.
JOH 4:31 Pero uyajcanuarobꞌ e Jesús uyareobꞌ y chenobꞌ: —Cawajcanseyajet, cꞌuxu imbꞌijc lo que catares era, che uyajcanuarobꞌ.
JOH 4:32 Pero che e Jesús: —Nen ayan lo que erer incꞌuxi que nox machi war inata tucꞌa, che e Jesús.
JOH 4:33 Entonces cay ojronobꞌ uyajcanuarobꞌ jaxobꞌ taca y chenobꞌ: —¿Ayan ca nic tucꞌa taresna lo que tuaꞌ ucꞌuxi jaxir? che uyajcanuarobꞌ.
JOH 4:34 Pero ojron e Jesús y che: —Lo que tuaꞌ incꞌuxi jax tuaꞌ inche lo que ucꞌani jaxir xeꞌ uyebꞌta tarien y tuaꞌ acꞌapa inche tunor e patnar lo que arobꞌnen umener tuaꞌ inche.
JOH 4:35 Ira iwaren que ucꞌanto cuatro mes tuaꞌ watar e cosecha. Chꞌujcunic iwira e sian gente lo que watobꞌ era. Larobꞌ tacar inteꞌ jinaj xeꞌ warix ataqui porque turobꞌix tunorobꞌ tuaꞌ uchꞌamiobꞌ niwojroner.
JOH 4:36 Pues tin e war apatnobꞌ tama e cosecha ucꞌani tuaꞌ atojyobꞌ. Y lo que war uchꞌamiobꞌ tama e cosecha era jax e cuxtar xeꞌ machi tuaꞌ acꞌapa. Y tamar era tin e cay pacma y tin e war umorojse tunor e cosecha era erer axin atzayobꞌ chatertiobꞌ tamar lo que war uchꞌamiobꞌ era.
JOH 4:37 Pues erach e ojroner xeꞌ che: “Ayan inteꞌ xeꞌ apacma y ayan otronteꞌ xeꞌ axin umorojse conda acꞌotoy e día”, che e ojroner era.
JOH 4:38 Pues nen inwareox tuaꞌ ixixin imorojse lo que pacbꞌirix umen otronteꞌ, y nox intaquix ixiox imorojse, che e Jesús.
JOH 4:39 Y tamar era meyra gente tama e chinam era tama e departamento Samaria cay cꞌupseyanobꞌ tama e Jesús umen lo que cay arobꞌnobꞌ umen e ixic xeꞌ che: “Uyaren tunor lo que inchix”, xeꞌ arobꞌnobꞌ umen e ixic.
JOH 4:40 Y tamar era conda cꞌotoyobꞌ tunor e gente era cay upejcobꞌ e Jesús tuaꞌ acꞌotoy tama uchinam tuaꞌ ucansiobꞌ cora. Entonces quetpa e Jesús tacarobꞌ chateꞌ día.
JOH 4:41 Y ayanto meyra gente xeꞌ cay cꞌupseyanobꞌ tama e Jesús conda uyubꞌiobꞌ lo que che jaxir.
JOH 4:42 Entonces ojronobꞌ e gente era taca e ixic y chenobꞌ: —Pues majax tamar taca lo que cay awareon que war cacꞌupseyan era sino que war cacꞌupseyan coner umen que cay coybꞌi uyojroner jaxir, y tamar era war canata que jaxir jax e Cristo xeꞌ jax e Ajcorpesiaj tuaꞌ tunor e gente tara tor e rum, che e gente era.
JOH 4:43 Pues entonces conda cꞌapa e chateꞌ día era locꞌoy e Jesús tama e departamento Samaria y ixin esto tama e departamento Galilea.
JOH 4:44 Pues cꞌar umen uyajcanuarobꞌ que arobꞌnobꞌ tama inyajr umen e Jesús que: “Tin e profetobꞌ tuaꞌ e Dios cꞌani axejbꞌna utobꞌ umen uyet ajlugarir”, xeꞌ arobꞌnobꞌ umen e Jesús tama inyajr.
JOH 4:45 Entonces conda cꞌotoy e Jesús tama e departamento Galilea cay chꞌajma umen e gente umen que ayan tin e ixiobꞌ tama e nojqꞌuin pascua tama e chinam Jerusalem xeꞌ cay uwirobꞌ tunor lo que cay uche e Jesús.
JOH 4:46 Entonces sutpa ixin e Jesús esto tama e chinam Caná tama e departamento Galilea tiaꞌ cay uche aquetpa vino e jaꞌ. Y tama e chinam era ayan inteꞌ winic xeꞌ war axana xeꞌ jax inteꞌ nuxi ajcꞌampar tuaꞌ e gobierno. Pero jaxir ayan inteꞌ uyunen xeꞌ chꞌar ajmuac tama uyotot tama e chinam Capernaum.
JOH 4:47 Y e ajcꞌampar era conda cꞌotoy unata que e Jesús locꞌoy tama e departamento Judea y que era war ayopa tama e departamento Galilea, ixin uwira y cay upejca tuaꞌ axin tama uyotot tuaꞌ utzꞌacpes uyunen xeꞌ cꞌanix achamay.
JOH 4:48 Entonces e Jesús uyare e gente y che: —Nox era machi cꞌani ixcꞌupseyan tamaren jay machi iwira inche meyra milagro tiut, che e Jesús.
JOH 4:49 Pero ojron e ajcꞌampar y che: —Ajnen quiqui tama niotot porque niunen cꞌanix achamay, che e ajcꞌampar era.
JOH 4:50 Y che e Jesús: —Sutpen quiqui toꞌtot. Oynen machi tuaꞌ achamay sino que war atzꞌacpa era, che e Jesús. Entonces cꞌupseyan e ajcꞌampar tamar lo que arobꞌna umen e Jesús y ixin tama uyotot.
JOH 4:51 Y conda e ajcꞌampar warix acꞌotoy tama uyotot locꞌoy tajwina umen umanobꞌ y cay arena y che: —Oynen war atzꞌacpa, che e man.
JOH 4:52 Entonces cay uyubꞌi tuobꞌ que tucꞌa hora cay tzꞌacpa uyunen, y jaxirobꞌ cay chiobꞌ: —Acbꞌi tama uyuxin e día cꞌapa locꞌoy tunor e purer y sisa ut, che e man.
JOH 4:53 Entonces e tatabꞌir cay ubꞌijnu que jax tama e hora era conda arena umen e Jesús que: “Oynen machi tuaꞌ achamay sino que war atzꞌacpa era”, que arobꞌna umen e Jesús. Y tamar era jaxir cay cꞌupseyan tama e Jesús taca tunor ufamilia.
JOH 4:54 Pues jax era e chajr milagro lo que chena umen e Jesús tama e departamento Galilea conda sutpa tari tama uxambꞌar tama e departamento Judea.
JOH 5:1 Pues entonces conda checta otronteꞌ nojqꞌuin tama e Israel ixin e Jesús esto tama e chinam Jerusalem otronyajr.
JOH 5:2 Pues tunor e chinam Jerusalem xojybꞌir taca inteꞌ macteꞌ xeꞌ chembꞌir taca e petzbꞌir tun. Y tama e petzbꞌir tun era ayan cora puerta. Y ayan inteꞌ puerta xeꞌ ucꞌabꞌa Oveja. Y ayan inteꞌ atibꞌir macuir e chinam xeꞌ majax innajt tama e puerta era. Y e atibꞌir era ucꞌabꞌa Betesda tama e ojroner hebreo. Y ayan cinco ut champa yajaꞌ.
JOH 5:3 Y tama e cinco ut champa era chꞌarobꞌ meyra ajmuacobꞌ. Ayan tin mutzꞌur unacꞌut, y ayan tin e tzꞌej uyoc, y ayan tin e chamen ucuerpo. Y tunorobꞌ war ucojcobꞌ tuaꞌ anijquesna e jaꞌ.
JOH 5:4 Porque ayan ayan e día conda ecmay watar inteꞌ ángel tuaꞌ e Dios tuaꞌ unijques e jaꞌ. Y conda acay anijqui e jaꞌ e ajmuac xeꞌ oꞌchoy bꞌajxan macuir e jaꞌ axin atzꞌacpesna.
JOH 5:5 Y yajaꞌ chꞌar inteꞌ ajmuac xeꞌ ayanix treinta y ocho año xeꞌ ajmuac.
JOH 5:6 Entonces conda e Jesús cay uwira e winic y conda cꞌotoy unata cobꞌa año xeꞌ war ucojco e muaquir era, uyare e winic y che: —¿Cꞌani ca itzꞌacpa? che e Jesús.
JOH 5:7 Y che e ajmuac: —Pues conda anijquesna e jaꞌ mamajchi ayan tuaꞌ utacrien onchoy tama e jaꞌ. Y conda cꞌani onchoy tama e jaꞌ wacchetaca anumuy otronteꞌ que nen, che e ajmuac era.
JOH 5:8 Entonces che e Jesús: —Achpen xanen, jacha achꞌacteꞌ y cuchu chic, che e Jesús.
JOH 5:9 Entonces wacchetaca quetpa tzꞌacpesbꞌir e winic y ujachi uchꞌacteꞌ y cay xana tacar. Pero cocha jax era inteꞌ día tuaꞌ e jiriar,
JOH 5:10 y cocha ayan cora winicobꞌ tuaꞌ e Israel xeꞌ war uwirobꞌ tunor era, jaxirobꞌ cay ucꞌayobꞌ e winic y che: —Coner jax e día tuaꞌ e jiriar y ma erer aqꞌueche axin achꞌacteꞌ, che e winicobꞌ era.
JOH 5:11 Entonces che e winic: —Tin e utzꞌacpesen uyaren y che: “Jacha achꞌacteꞌ y cuchu chic”, che e winic.
JOH 5:12 Entonces uyubꞌiobꞌ tuaꞌ e winic y chenobꞌ: —¿Tucꞌa winic xeꞌ cay uyaret y che: “Jacha achꞌacteꞌ y cuchu chic?” che e winicobꞌ era.
JOH 5:13 Pero e winic machi unata chi umen tzꞌacpesna porque e Jesús satpa ut tujam e sian gente lo que ayan yajaꞌ.
JOH 5:14 Entonces e Jesús utajwi e winic otronyajr macuir e templo y cay uyare cocha era y che: —Iran que tzꞌacpesbꞌiret era. Pero actan tuaꞌ ache más e mabꞌambꞌanir tuaꞌ machi asutpa acꞌaxi inteꞌ muaquir xeꞌ más nojta tamaret, che e Jesús.
JOH 5:15 Entonces ixin e winic tuaꞌ utajwi e winicobꞌ xeꞌ cay ojronobꞌ tacar tuaꞌ uyare que jax e Jesús xeꞌ utzꞌacpes.
JOH 5:16 Y tamar era qꞌuijnobꞌ e nuquir winicobꞌ upater e Jesús umen que jaxir utzꞌacpes e ajmuac tama inteꞌ día tuaꞌ e jiriar. Y tamar era cay xanobꞌ tupat e Jesús.
JOH 5:17 Pero e Jesús uyare e winicobꞌ y che: —Nitata Dios apatna iraj iraj, y nen ubꞌan ucꞌani tuaꞌ impatna iraj iraj, che e Jesús.
JOH 5:18 Y tamar era qꞌuijnobꞌ meyra e winicobꞌ era y cay ubꞌijnuobꞌ tuaꞌ uchamsiobꞌ e Jesús porque jaxir machi war acꞌupseyan tut lo que chꞌar tzꞌijbꞌabꞌir tama uley e Moisés tama e día tuaꞌ e jiriar. Y war aqꞌuijnobꞌ ubꞌan umen que jaxir che que e Dios jax Utata xeꞌ war che que jaxir Dios ubꞌan.
JOH 5:19 Entonces ojron e Jesús y che: —Cꞌani inwareox era que Uyunen e Dios matucꞌa erer uche ubꞌajner, sino que war uche jax taca lo que war uwira uche Utata. Y tunor lo que uwira uche Utata war uche jaxir ubꞌan.
JOH 5:20 Y e Tatabꞌir war uyajta ut Uyunen y war uwirse tunor lo que war uche. Y cꞌanto uwirse Uyunen meyra milagro lo que tuaꞌ axin uche este que ixixin ixbꞌacta iwira conda axin uche.
JOH 5:21 Y cocha e Tatabꞌir usuti ubꞌixqꞌues tin e chamen tuaꞌ uyajcꞌuobꞌ ucuxtar otronyajr, bꞌan erer uche Uyunen ubꞌan taca tin e ucꞌani.
JOH 5:22 Y e Tatabꞌir mamajchi tuaꞌ ubꞌijnu uwira jay cꞌani asatpa o jay cꞌani uchꞌami e cuxtar xeꞌ machi tuaꞌ acꞌapa, porque ixin uyajcꞌu e cꞌotorer era Uyunen tuaꞌ axin ubꞌijnu uwira tunor e gente jay cꞌani asatpobꞌ o jay cꞌani uchꞌamiobꞌ e cuxtar xeꞌ machi tuaꞌ acꞌapa.
JOH 5:23 Y bꞌan uche e Tatabꞌir tuaꞌ atajttzꞌa Uyunen bꞌan cocha atajttzꞌa jaxir. Porque tin e machi war utattzꞌi e Unembꞌir ma cocha erer utattzꞌi e Tatabꞌir ubꞌan, porque jax jaxir xeꞌ uyebꞌta tari e Unembꞌir era.
JOH 5:24 ’Y cꞌani inwareox que tunor tin e axin uyubꞌi niwojroner y axin acꞌupseyan tamar tin xeꞌ uyebꞌta tarien, ayan ucuxtar xeꞌ machi tuaꞌ acꞌapa. Y machi tuaꞌ asatpobꞌ porque locꞌoyobꞌ tama e chamer y numuyobꞌ tama e cuxtar xeꞌ machi tuaꞌ acꞌapa.
JOH 5:25 Cꞌani inwareox que watar e hora xeꞌ jax e hora era conda tunor tin e machi unata chi e Dios cꞌani uyubꞌiobꞌ unuc Uyunen e Dios. Y tunor tin e acꞌotoy uyubꞌiobꞌ unuc e Unembꞌir era cꞌani uchꞌamiobꞌ e cuxtar xeꞌ machi tuaꞌ acꞌapa.
JOH 5:26 Porque bꞌan cocha ayan ucꞌotorer e Tatabꞌir tuaꞌ uyajcꞌu e cuxtar, y bꞌan Uyunen ubꞌan que ayan ucꞌotorer tuaꞌ uyajcꞌu e cuxtar.
JOH 5:27 Y Uyunen era ajcꞌuna e cꞌotorer tuaꞌ uche juzgar umen e Tatabꞌir cocha jaxir tari tara tor e rum y cuxpa tuaꞌ aquetpa Uyunen e winic.
JOH 5:28 Ira ixbꞌacta tamar lo que cꞌani inwareox era, porque acꞌotoy e día conda tunor tin e chamen cꞌani uyubꞌiobꞌ unuc Uyunen e Dios.
JOH 5:29 Y tamar era tunorobꞌ cꞌani asujta abꞌixqꞌuesnobꞌ y axin alocꞌoyobꞌ tama umujrirobꞌ. Y tunor tin e cay uchiobꞌ lo que erach tama ucuxtarobꞌ tara tor e rum cꞌani uchꞌamiobꞌ e cuxtar xeꞌ machi tuaꞌ acꞌapa. Pero tunor tin e cay uchiobꞌ e mabꞌambꞌanir tama ucuxtarobꞌ tara tor e rum cꞌani asatpobꞌ, che e Jesús.
JOH 5:30 Pues warto oꞌjron e Jesús taca e nuquir winicobꞌ era y che: —Pues nen matucꞌa erer inche nibꞌajner taca. Y tamar era bꞌan cocha war umbꞌi tama Nitata y bꞌan war imbꞌijnu inwira tama tunor. Y tamar era machi cꞌani inware que erach lo que mabꞌambꞌan, y machi cꞌani inware que mabꞌambꞌan lo que erach, porque machi war insicbꞌa tuaꞌ intzayjres nibꞌa sino que war inche bꞌan taca cocha ucꞌani jaxir xeꞌ uyebꞌta tarien.
JOH 5:31 Pues jay nen war inchecsu nibꞌa tamaren taca, ma chequer tiut jay erach lo que war inwareox.
JOH 5:32 Pero ayan otronteꞌ xeꞌ ajchecsuyaj tamaren, y nen innata que erach tunor uyojroner.
JOH 5:33 Nox cay iwebꞌta ixin cora winicobꞌ tut e Juan xeꞌ ajchꞌuymar tuaꞌ uwirobꞌ tucꞌa ubꞌijnu jaxir, y jaxir cay uchecsu tutobꞌ jax taca lo que erach tamaren.
JOH 5:34 Pero ayanto inteꞌ ajchecsuyaj xeꞌ más ayan ucꞌampibꞌir que lo que uchecsu e Juan, cocha jaxir winic. Pero war inwareox tunor era tuaꞌ uyubꞌiox ixcꞌotoy ixcꞌupseyan tamaren este que axin ixcorpesna.
JOH 5:35 Pues e Juan quetpa bꞌan cocha inteꞌ cꞌajc xeꞌ war atzꞌajbꞌa y xeꞌ war ujanchꞌacnesox, y nox cay ibꞌijnu tama inyajr tuaꞌ ixtzay iwira e cꞌajc era xeꞌ jax uyojroner e Juan.
JOH 5:36 Pero ayanto lo que erer uchecsu más que uyojroner e Juan, que jax e sian milagro xeꞌ ajcꞌubꞌiren umen Nitata tuaꞌ inche. Y e sian milagro era war uchecsu tiut que jax Nitata xeꞌ uyebꞌta tarien.
JOH 5:37 Y e Tatabꞌir xeꞌ uyebꞌta tarien jax inteꞌ ajchecsuyaj tanibꞌa ubꞌan. Y nox mato inyajr cay iyubꞌi unuc e Dios y nien uyeroj ma tiaꞌ iwira.
JOH 5:38 Y machi war iwacta tuaꞌ aquetpa uyojroner e Dios tama ijor, porque machi war ixcꞌupseyan tamar tin e uyebꞌta tarien.
JOH 5:39 Nox war iche leer meyra uyojroner e Dios porque war inata que tamar taca era cꞌani itajwi e cuxtar xeꞌ machi tuaꞌ acꞌapa, pero jax uyojroner e Dios era xeꞌ war uchecsu tiut chien nen ubꞌan.
JOH 5:40 Pero nox machi war icꞌani ichꞌamien y tamar era machi uyubꞌiox itajwi e cuxtar era xeꞌ machi tuaꞌ acꞌapa.
JOH 5:41 ’Pues nen machi cꞌani inchꞌami e tattzꞌarsiaj tuaꞌ e winicobꞌ.
JOH 5:42 Porque war innata tucꞌa war ibꞌijnu tama iwalma y tamar era war innata que machi war iyajta ut e Dios.
JOH 5:43 Nen tarien tamar ucꞌabꞌa Nitata xeꞌ uyebꞌta tarien, y nox machi cꞌani ichꞌamien. Pero jay watar otronteꞌ winic tamar taca ucꞌabꞌach, pues jaxir cꞌani ani achꞌajma imener.
JOH 5:44 Nox ixtzay conda ixtajttzꞌa umen e gente, pero machi war ibꞌijnu isicbꞌa tuaꞌ ixtajttzꞌa umen e Dios. Y tamar era machi cꞌani ixcꞌupseyan tamaren.
JOH 5:45 Pero ira ibꞌijnu que jax nen xeꞌ tuaꞌ intuchꞌiox tut Nitata tichan, sino que jax e Moisés xeꞌ jax xeꞌ war iturbꞌa ibꞌa tamar xeꞌ tuaꞌ utuchꞌiox tut Nitata tichan.
JOH 5:46 Porque jay ixcꞌupseyan ani tamar lo que tzꞌijbꞌabꞌir umen e Moisés, ixcꞌupseyan ani tamaren nen ubꞌan, porque e Moisés cay utzꞌijbꞌa tamar lo que quetpa tuaꞌ inche nen.
JOH 5:47 Pero cocha machi war ixcꞌupseyan tamar lo que tzꞌijbꞌabꞌir umen e Moisés, ¿cocha tuaꞌ ixcꞌupseyan tamaren? che e Jesús.
JOH 6:1 Pues nacpat era ixin e Jesús teinxejr e nuxi jaꞌ xeꞌ ucꞌabꞌa Galilea y xeꞌ ucꞌabꞌa Tiberias ubꞌan.
JOH 6:2 Y meyra sian gente war axiobꞌ tupat e Jesús cocha cay uwirobꞌ e sian milagro lo que cay uche conda utzꞌacpes tunor tin e ajmuac.
JOH 6:3 Entonces tꞌabꞌay ixin e Jesús tut inteꞌ witzir y turuan taca tunor uyajcanuarobꞌ.
JOH 6:4 Y warix acꞌotoy e día tama e nojqꞌuin tuaꞌ e gente tama e Israel xeꞌ ucꞌabꞌa pascua.
JOH 6:5 Pero conda e Jesús sutpa chꞌujcsan, uwira que ayan meyra sian gente xeꞌ war ayopobꞌ tut. Y tamar era uyare e Felipe y che: —¿Tiaꞌ tuaꞌ camani e comida tuaꞌ cawese tunor e sian gente era? che e Jesús.
JOH 6:6 Pero jaxir intaca war uyubꞌi tuaꞌ e Felipe tuaꞌ uwira tucꞌa axin uche, porque e Jesús warix unata lo que cꞌani uche era.
JOH 6:7 Pero ojron e Felipe y che: —Pues jay apatna ani inteꞌ man casi tunor inteꞌ año nien tamar era ma tzꞌacar tunor lo que atoana tuaꞌ awesena tunor e sian gente era motor que imbꞌijc taca aꞌjcꞌuna inteꞌ inteꞌ, che e Felipe.
JOH 6:8 Entonces ojron e Andrés xeꞌ jax inteꞌ uyajcanuar e Jesús y xeꞌ jax uwijtzꞌin e Simón Pedro ubꞌan y che:
JOH 6:9 —Tara turu inteꞌ chuchu sitz xeꞌ qꞌuecher umen cinco ut pan xeꞌ chembꞌir tama e cebada y qꞌuecher ubꞌan chacojt chay, pero tut tunor e sian gente era ma tzꞌacar lo que qꞌuecher era, che e Andrés.
JOH 6:10 Entonces ojron otronyajr e Jesús y che: —Arenicobꞌ e gente tuaꞌ aturuanobꞌ, che e Jesús. Pues tama e lugar era ayan meyra cꞌopot y cay turuanobꞌ tunor e gente tujor. Y ayan 5,000 winicobꞌ.
JOH 6:11 Entonces e Jesús uchꞌami e cinco ut pan y uyajcꞌu gracias e Dios, y cay uyajcꞌu uyajcanuarobꞌ tuaꞌ upuquiobꞌ axin taca tunor e gente era. Y bꞌan uche taca e chay ubꞌan, y e gente cꞌapa ucꞌuxiobꞌ tunor lo que ucꞌaniobꞌ.
JOH 6:12 Y conda e Jesús uwira que cꞌapa wiobꞌ tunor e gente uyare uyajcanuarobꞌ y che: —Morojsenic uchꞌeir e pan lo que quetpa tama e chiquiꞌ era tuaꞌ machi asatpa lo que aquetpa, che e Jesús.
JOH 6:13 Entonces cay umorojsiobꞌ tunor lo que quetpa tama e cinco ut pan xeꞌ chembꞌir tama e cebada y bꞌutcꞌa doce chiquiꞌ tamar lo que quetpa.
JOH 6:14 Y conda e gente uwirobꞌ e nuxi milagro era cay ojronobꞌ y chenobꞌ: —Checta ixto e profeta lo que che e Moisés que ucꞌani tuaꞌ watar, che e gente.
JOH 6:15 Pero e Jesús warix unata que e gente war ubꞌijnuobꞌ tuaꞌ uqꞌuechiobꞌ axin tuaꞌ uchiobꞌ aquetpa inteꞌ ajcꞌotorer tama ujorobꞌ, y tamar era ixin tupat e witzir yajaꞌ tuaꞌ aquetpa ubꞌajner.
JOH 6:16 Entonces conda acbꞌare uyajcanuarobꞌ e Jesús ecmay ixiobꞌ tutiꞌ e nuxi jaꞌ yajaꞌ.
JOH 6:17 Y conda cꞌotoyobꞌ tutiꞌ e jaꞌ ochoyobꞌ tama inteꞌ barco y cay xanobꞌ tor e jaꞌ tamar tuaꞌ acꞌotoyobꞌ teinxejr e jaꞌ era tiaꞌ turu e chinam Capernaum. Pero incsibꞌanix tama e hora era y e Jesús merato ayopa tut uyajcanuarobꞌ.
JOH 6:18 Y cay atzꞌo e icꞌar y cay jicna e jaꞌ tari.
JOH 6:19 Y conda xanobꞌix seis kilómetro tor e jaꞌ tama ubarco, uwirobꞌ que war ayopa e Jesús tutobꞌ, y que war axana watar tor e jaꞌ. Pero conda uwirobꞌ bꞌactobꞌ meyra.
JOH 6:20 Pero e Jesús uyare: —Jax nen. Ira ixbꞌacta, che e Jesús.
JOH 6:21 Entonces tzayobꞌ uchꞌamiobꞌ e Jesús y uyosiobꞌ tama e barco. Y wacchetaca numuyobꞌ este teinxejr jaꞌ tiaꞌ war axiobꞌ.
JOH 6:22 Pues entonces conda sacojpa tama inteꞌ día, e gente xeꞌ quetpobꞌ teinxejr jaꞌ cay ubꞌijnuobꞌ que locꞌoyobꞌ uyajcanuarobꞌ e Jesús ubꞌajnerobꞌ tama inteꞌ barco xeꞌ jax taca y que e Jesús machi ixin tacarobꞌ tama e barco.
JOH 6:23 Pero cꞌotoyobꞌ cora barco tuaꞌ e chinam Tiberias xeꞌ majax innajt tama e lugar tiaꞌ cay wesena e sian gente conda Cawinquirar cay uyajcꞌu gracias e Dios tama e pan.
JOH 6:24 Pero conda e gente era uwirobꞌ que machi turu e Jesús y que nien machi turobꞌ uyajcanuarobꞌ, cay ochoyobꞌ tama cora barco tuaꞌ axin usajcobꞌ e Jesús tama e chinam Capernaum.
JOH 6:25 Pues conda tunor e gente era cꞌotoyobꞌ teinxejr jaꞌ cay usicbꞌobꞌ e Jesús. Y conda utajwiobꞌ cay uyubꞌiobꞌ tuaꞌ y chenobꞌ: —Cawajcanseyajet, ¿tucꞌa hora yopet tara? che e gente era.
JOH 6:26 Entonces ojron e Jesús y che: —Cꞌani inwareox era que nox war isicbꞌen umen taca que cay icꞌuxi e pan este que bꞌutcꞌa inac y majax umen que cay iwira inche e sian milagro tiut.
JOH 6:27 Nox war ixpatna tamar taca lo que cꞌani icꞌuxi xeꞌ axin acꞌapa. Pero más ayan ucꞌampibꞌir jay ixpatna tuaꞌ ichꞌami e comida xeꞌ axin uyajcꞌox e cuxtar xeꞌ machi tuaꞌ acꞌapa lo que cꞌani inwajcꞌox nen xeꞌ Uyunenen e winic. Pues Catata Dios ixin uyajqꞌuen e cꞌotorer tuaꞌ uyubꞌien inwajcꞌox e cuxtar era xeꞌ machi tuaꞌ acꞌapa, che e Jesús.
JOH 6:28 Entonces sutpa uyubꞌiobꞌ tuaꞌ e Jesús y chenobꞌ: —¿Y tucꞌa patnar ucꞌani tuaꞌ cache tuaꞌ cache lo que ucꞌani e Dios? che e gente era.
JOH 6:29 Y ojron e Jesús y che: —E patnar lo que ucꞌani e Dios tuaꞌ iche jax era: Ucꞌani tuaꞌ ixcꞌupseyan tamar jaxir xeꞌ ebꞌetna tari umen e Dios, che e Jesús.
JOH 6:30 Entonces e gente sutpa uyubꞌiobꞌ otronyajr tuaꞌ e Jesús y chenobꞌ: —¿Y tucꞌa milagro tuaꞌ awirsion? Porque ucꞌani tuaꞌ cawira tunor era tuaꞌ uyubꞌion cacꞌupseyan tamaret. ¿Tucꞌa tuaꞌ ache?
JOH 6:31 Pues tama e choquem lugar catata viejobꞌirobꞌ cay ucꞌuxiobꞌ e pan xeꞌ ucꞌabꞌa maná xeꞌ ojri tari tut e qꞌuin, bꞌan cocha chꞌar tzꞌijbꞌabꞌir y che: “Jaxir uyajcꞌuobꞌ e pan xeꞌ ojri tari tut e qꞌuin tuaꞌ ucꞌuxiobꞌ”, che e gente.
JOH 6:32 Y che e Jesús: —Cꞌani inwareox era que majax e Moisés xeꞌ cay uyajcꞌu e pan xeꞌ tari tut e qꞌuin, sino que jax Nitata xeꞌ uyajcꞌu e pan xeꞌ erach xeꞌ watar tut e qꞌuin.
JOH 6:33 Porque e pan xeꞌ war uyajcꞌu e Dios jax lo que ecmay tari tut e qꞌuin, y jax jaxir xeꞌ war uyajcꞌu e cuxtar xeꞌ machi tuaꞌ acꞌapa tunor e winicobꞌ tara tor e rum, che e Jesús.
JOH 6:34 Y che e gente: —Cawinquiraret, ajcꞌunon e pan era iraj iraj, che e sian gente.
JOH 6:35 Y che e Jesús: —Nen jax e pan era xeꞌ uyajcꞌu e cuxtar xeꞌ machi tuaꞌ acꞌapa. Tunor tin e ayopa taniut machi ixto tuaꞌ aytzꞌa, y tunor tin e acꞌupseyan tamaren machi ixto tuaꞌ ataqui utiꞌ ubꞌan.
JOH 6:36 Pero bꞌan cocha cay inwareox tama inyajr que motor que war iwiren tara pero machi war ixcꞌupseyan tamaren.
JOH 6:37 Tunor tin e ajcꞌunen umen Nitata cꞌani ayopobꞌ taniut. Y tunor tin e ayopobꞌ taniut machi tuaꞌ intzacre axiobꞌ patir.
JOH 6:38 Porque ecmay tarien tut e qꞌuin majax tuaꞌ inche lo que nen incꞌani, sino que tarien tuaꞌ inche lo que ucꞌani jaxir xeꞌ uyebꞌta tarien.
JOH 6:39 Y lo que ucꞌani jaxir xeꞌ uyebꞌta tarien jax era: Que machi tuaꞌ asatpa nien incojt tin e uyajqꞌuen, sino que nen tuaꞌ insuti imbꞌixqꞌues tunorobꞌ tujam e chamenobꞌ tama ucꞌapesnibꞌir tunor era.
JOH 6:40 Y lo que ucꞌani Nitata xeꞌ uyebꞌta tarien jax era: Que tunor tin e war uchꞌujcu uwiren y xeꞌ war acꞌupseyanobꞌ tamaren cꞌani uchꞌamiobꞌ e cuxtar xeꞌ machi tuaꞌ acꞌapa, y nen tuaꞌ insuti imbꞌixqꞌues tunorobꞌ tujam e chamenobꞌ tama ucꞌapesnibꞌir tunor era, che e Jesús.
JOH 6:41 Pues entonces cay murmurtiobꞌ tunor e winicobꞌ tuobꞌ e Israel era umen que e Jesús che que: “Nen jax e pan xeꞌ ecmay tari tut e qꞌuin”, xeꞌ arobꞌna umen e Jesús más bꞌajxan.
JOH 6:42 Entonces ojronobꞌ e winicobꞌ era otronyajr y chenobꞌ: —¿Ma ca jax uyunen e José e Jesús era? Pues non canata chi utata y canata chi utuꞌ, y ¿cocha tuaꞌ uyareon que: “Nen ecmay tarien tut e qꞌuin?” che e winicobꞌ era.
JOH 6:43 Y che e Jesús: —Actanic e qꞌuecraner yax.
JOH 6:44 Tunor tin e ayopa taniut taresbꞌir umen Nitata xeꞌ uyebꞌta tarien. Y tunor tin e watar taniut cꞌani asujta abꞌixqꞌuesnobꞌ tujam e chamenobꞌ nimener tama ucꞌapesnibꞌir tunor era.
JOH 6:45 Chꞌar tzꞌijbꞌabꞌir tama uyojroner e Dios umen e profetobꞌ xeꞌ turuanobꞌ tama e onian tiempo que: “Tunor e gente cꞌani aquetpobꞌ cansebꞌir umen e Dios.” Y tamar era tunor tin e uyubꞌiobꞌ unuc e Tatabꞌir y acanuobꞌ tamar watobꞌ taniut.
JOH 6:46 ’Mamajchi cay uwira ut e Tatabꞌir, sino que jax taca jaxir xeꞌ ecmay tari tut e qꞌuin. Jax taca jaxir xeꞌ cay uwira ut e Tatabꞌir.
JOH 6:47 Cꞌani inwareox era que tunor tin e acꞌupseyanobꞌ tamaren cꞌani uchꞌamiobꞌ e cuxtar xeꞌ machi tuaꞌ acꞌapa.
JOH 6:48 Pues nen jax e pan xeꞌ uyajcꞌu e cuxtar xeꞌ machi tuaꞌ acꞌapa.
JOH 6:49 Itata viejobꞌirobꞌ cay ucꞌuxiobꞌ e pan xeꞌ ucꞌabꞌa maná xeꞌ tari tut e qꞌuin tama e choquem lugar, pero motor que cay ucꞌuxiobꞌ e maná era, chamayobꞌ.
JOH 6:50 Pero nen war inwareox era tama e pan xeꞌ ecmay tari tut e qꞌuin que conda axin acꞌujxa umen inteꞌ machi tuaꞌ achamay.
JOH 6:51 Pues nen jax e pan era xeꞌ bꞌixir xeꞌ ecmay tari tut e qꞌuin. Tunor tin e axin ucꞌuxi e pan era machi ixto tuaꞌ achamay. Pues e pan era jax niwerir xeꞌ war inwajcꞌu tuaꞌ incorpes e gente tara tor e rum, che e Jesús.
JOH 6:52 Pues tamar era e winicobꞌ era xeꞌ tuobꞌ e Israel cay qꞌuijnobꞌ inteꞌ intiobꞌ y chenobꞌ: —¿Cocha tuaꞌ uyajcꞌon uwerir tuaꞌ cacꞌuxi? che e winicobꞌ era.
JOH 6:53 Y che e Jesús: —Cꞌani inwareox era que jay machi ixixin icꞌuxi niwerir xeꞌ Uyunenen e winic y jay machi ixixin iyuchꞌi nichꞌichꞌer, machi tuaꞌ ichꞌami e cuxtar xeꞌ machi tuaꞌ acꞌapa ubꞌan.
JOH 6:54 Tin e ucꞌuxi niwerir y uyuchꞌi nichꞌichꞌer cꞌani uchꞌamiobꞌ e cuxtar xeꞌ machi tuaꞌ acꞌapa, y nen cꞌani insuti imbꞌixqꞌuesobꞌ tujam e chamenobꞌ tama ucꞌapesnibꞌir tunor era.
JOH 6:55 Porque niwerir jax e comida xeꞌ erach y nichꞌichꞌer xeꞌ oꞌchna erach ubꞌan.
JOH 6:56 Y tin e ucꞌuxi niwerir y uyuchꞌi nichꞌichꞌer cꞌani aquetpa intera ubꞌijnusiajobꞌ tacaren y nen tacarobꞌ.
JOH 6:57 Pues Nitata xeꞌ bꞌixir xeꞌ uyebꞌta tarien war uyajqꞌuen ucꞌotorer tuaꞌ uyubꞌien inturuan, y bꞌan ubꞌan tin e axin ucꞌuxi niwerir, cꞌani inwajcꞌuobꞌ nicꞌotorer tuaꞌ uyubꞌiobꞌ aturuanobꞌ.
JOH 6:58 Pero nen era war inwareox tamar e pan xeꞌ ecmay tari tut e qꞌuin. Machi war inwareox tamar e pan xeꞌ ucꞌabꞌa maná xeꞌ cꞌuxbꞌir umen itata viejobꞌirobꞌ tama e onian tiempo, porque tunorobꞌ sutpa chamayobꞌ motor que cay ucꞌuxiobꞌ e maná. Pero tunor tin e axin ucꞌuxi e pan xeꞌ inwajcꞌu nen ma tiaꞌ tuaꞌ axin achamay, che e Jesús.
JOH 6:59 Pues jax era e canseyaj lo que cay uyajcꞌu e Jesús tama e sinagoga tama e chinam Capernaum.
JOH 6:60 Pues entonces conda tin e war axiobꞌ tupat e Jesús cay uyubꞌiobꞌ e canseyaj era cay ojronobꞌ jaxobꞌ taca y chenobꞌ: —¿Chi erer uyubꞌi e ojroner era xeꞌ intran uyubꞌnar? ¿Chi ani tuaꞌ uturbꞌa ubꞌa tamar? che e gente era.
JOH 6:61 Pero e Jesús war unata que e gente era war awixwixtiobꞌ tamar jaxir. Y tamar era ojron y che: —¿O uche ca ixqꞌuijna e ojroner lo que cay inwareox sajmix?
JOH 6:62 ¿Y tucꞌa ani tuaꞌ ibꞌijnu jay iwiren xeꞌ Uyunenen e winic intꞌabꞌay inxin tut e qꞌuin tiaꞌ tarien?
JOH 6:63 Unawalir e Dios jax xeꞌ uyajcꞌu e cuxtar xeꞌ machi tuaꞌ acꞌapa. Pero uwerir inteꞌ ma cocha erer uyajcꞌu e cuxtar cocha era. Pues e ojroner lo que war inwareox era tari tuaꞌ Unawalir e Dios. Y e ojroner era jax lo que tuaꞌ uyajcꞌu e cuxtar xeꞌ machi tuaꞌ acꞌapa.
JOH 6:64 Pero ayan meyra tijam xeꞌ machi cꞌani ixcꞌupseyan tamaren, che e Jesús. Pues e Jesús unatix tama ucajyesnibꞌir tunor era chi xeꞌ machi tuaꞌ acꞌupseyanobꞌ tamar, y unatix chi umen tuaꞌ atujchꞌa ubꞌan.
JOH 6:65 Y che e Jesús: —Y tamar era inwareoxix que mamajchi erer ayopa taniut jay machi ataresna umen Nitata, che e Jesús.
JOH 6:66 Pues tama e hora era ayan meyra gente xeꞌ war ani axiobꞌ tupat e Jesús xeꞌ uyactobꞌ y xeꞌ machi ixto cꞌani axanobꞌ tacar otronyajr.
JOH 6:67 Entonces e Jesús uyubꞌi tuaꞌ e doce uyajcanuarobꞌ y che: —¿O icꞌani ca ixixin nox ubꞌan? che e Jesús.
JOH 6:68 Pero cay ojron e Simón Pedro y che: —Niwinquiraret, ¿chito tut tuaꞌ caxin non? Tamar taca awojroner net ayan e cuxtar xeꞌ machi tuaꞌ acꞌapa.
JOH 6:69 Y non era cꞌupseyanonix tamaret y canata ixto yaꞌ que net jax xeꞌ erach tuaꞌ e Dios, che e Pedro.
JOH 6:70 Y che e Jesús: —¿Ma ca jax nen xeꞌ cay insicbꞌox xeꞌ doceox? Pero ayan inteꞌ tijam xeꞌ chucur umen inteꞌ mabꞌambꞌan mein, che e Jesús.
JOH 6:71 Pues tamar e ojroner era e Jesús war oꞌjron tamar e Judas xeꞌ uyunen e Simón Iscariote, porque jax jaxir xeꞌ tuaꞌ axin utuchꞌi e Jesús motor que turu tujam e doce ajcanuarobꞌ era.
JOH 7:1 Pues entonces e Jesús cay xana tic taca tama tunor or e departamento Galilea. Pero machi cꞌani axin tama e departamento Judea umen que ayan tin tuobꞌ e Israel xeꞌ war ucojcobꞌ uyopar e Jesús tuaꞌ uchamsiobꞌ.
JOH 7:2 Pero war acꞌotoy e día conda e gente tama e Israel uchiobꞌ e nojqꞌuin conda uchiobꞌ e sian champa tuaꞌ aturuanobꞌ tamar tama inteꞌ semana.
JOH 7:3 Y tamar era uwijtzꞌinobꞌ e Jesús cay ojronobꞌ tacar y chenobꞌ: —Ucꞌani ixto tuaꞌ iꞌxin tama e nojqꞌuin tama e departamento Judea tuaꞌ uyubꞌi uwirobꞌ awajcanuarobꞌ tunor e sian milagro lo que war ache.
JOH 7:4 Porque tunor tin e cꞌani aquetpa chequer lo que war uche tut e gente ma erer uche mucur. Y cocha net war ache e sian milagro coner quiqui tama e chinam Jerusalem tuaꞌ awirse abꞌa tut tunor e gente, che uwijtzꞌinobꞌ e Jesús.
JOH 7:5 Pues ojronobꞌ uwijtzꞌinobꞌ e Jesús cocha era umen que mamajchi tujamobꞌ war acꞌupseyanobꞌ tamar.
JOH 7:6 Pero e Jesús che: —Merato acꞌotoy e día conda tuaꞌ inxin nen. Pero nox erer ixixin tama e hora conda nox icꞌani.
JOH 7:7 Pues e gente tara tor e rum ma erer aqꞌuijna uwirox nox, pero war aqꞌuijna ixto uwirenobꞌ nen umen que war inchecsu tutobꞌ que mabꞌambꞌan lo que war uchiobꞌ.
JOH 7:8 Pero quiquic nox tama e nojqꞌuin. Nen machito cꞌani inxin porque merato acꞌotoy e día tuaꞌ inxin, che e Jesús uyare uwijtzꞌinobꞌ era.
JOH 7:9 Pues bꞌan che e Jesús y quetpato tama e departamento Galilea.
JOH 7:10 Pues entonces conda cꞌapa locꞌoyobꞌ uwijtzꞌinobꞌ e Jesús, ixin jaxir ubꞌan, pero majax chectesbꞌir tut e inmojr conda ixin, sino que mucur taca ixin.
JOH 7:11 Pero e nuquir winicobꞌ tama e Israel cay usajcobꞌ e Jesús tama e nojqꞌuin y chenobꞌ: —¿Y tiaꞌ turu e winic yax? che e nuquir winicobꞌ era.
JOH 7:12 Y ayan meyra gente xeꞌ war oꞌjronobꞌ tamar e Jesús y chenobꞌ: —Pero e winic yax bueno, chenobꞌ. Pero ayan otro inmojr xeꞌ oꞌjronobꞌ upater ubꞌan y chenobꞌ: —E winic yax majax bueno. Intaca war umajres e gente axin, chenobꞌ e inmojr era.
JOH 7:13 Pero tunor e gente war ubꞌacriobꞌ e nuquir winicobꞌ tama e Israel y tamar era mamajchi cꞌani oꞌjron tutobꞌ tamar e Jesús.
JOH 7:14 Y conda numuyix uyuxin e semana tama e nojqꞌuin ochoy e Jesús tama e templo y cay canseyan.
JOH 7:15 Pero e nuquir winicobꞌ tama e Israel bꞌactobꞌ uwirobꞌ e Jesús conda war acanseyan y chenobꞌ: —¿Tiaꞌ cay cano tama tunor lo que war acanseyan tamar coner, cocha ma tiaꞌ cay cawira ixin cano? che e nuquir winicobꞌ era.
JOH 7:16 Y che e Jesús: —E canseyaj era majax tanibꞌa sino que tuaꞌ tin e uyebꞌta tarien.
JOH 7:17 Tin e war uturbꞌa ubꞌa tuaꞌ uche lo que ucꞌani e Dios axin unata jay watar nicanseyaj tuaꞌ e Dios o jay ojroner taca.
JOH 7:18 Tin e oꞌjron tamar taca lo que ubꞌijnu war uche cocha era tuaꞌ taca atajttzꞌa umen e gente. Pero tin e war usicbꞌa tuaꞌ utattzꞌi tin e uyebꞌta tari war oꞌjron tamar lo que erach, y tamar era chequer que matucꞌa e majresiaj tamar.
JOH 7:19 ’Pues jax e Moisés xeꞌ uyajcꞌox e ley, pero mamajchi tijam war ixcꞌupseyan tut e ley era. Porque ¿tucꞌa tuaꞌ war ibꞌijnu tuaꞌ ichamsen? che e Jesús.
JOH 7:20 Pero sutpa ojronobꞌ e winicobꞌ taca e Jesús y chenobꞌ: —Chucuret umen inteꞌ mabꞌambꞌan mein. ¿Chi cꞌani uchamset? che e sian gente era.
JOH 7:21 Y che e Jesús: —Tamar taca inteꞌ milagro xeꞌ cay inche tama inteꞌ día tuaꞌ e jiriar que war ixqꞌuijna.
JOH 7:22 Pues e Moisés uyacta e ley que ucꞌani tuaꞌ axujra imbꞌijc uqꞌuewerir utejromar tunor e tejromtac, y bꞌan iche tama inteꞌ inteꞌ día motor jay jax inteꞌ día tuaꞌ e jiriar. Pues majax e Moisés xeꞌ ucajyes tunor era xeꞌ war achempa esto coner sino que jax itata viejobꞌirobꞌ xeꞌ ucajyes tunor era tama e onian tiempo.
JOH 7:23 Pues tuaꞌ machi icꞌocchi uley e Moisés war ixuri imbꞌijc uqꞌuewerir utejromar e bꞌiqꞌuit tejromtac motor jay jax inteꞌ día tuaꞌ e jiriar. Y jay bꞌan iche tama inteꞌ día tuaꞌ e jiriar ¿tucꞌa tuaꞌ war ixqꞌuijna tacaren umen que nen intzꞌacpes tunor ucuerpo inteꞌ winic tama inteꞌ día tuaꞌ e jiriar?
JOH 7:24 Ira ibꞌijnu iwira que mabꞌambꞌan lo que war uche otronteꞌ este que ixcꞌotoy inata tucꞌa numuy. Bꞌijnunic iwira tucꞌa xeꞌ erach bꞌajxan, che e Jesús.
JOH 7:25 Pues ayan cora winicobꞌ xeꞌ turobꞌ tama e chinam Jerusalem xeꞌ cay ojronobꞌ jaxobꞌ taca y chenobꞌ: —¿Ma ca jax e winic era xeꞌ war asicbꞌana umen e nuquir winicobꞌ tuaꞌ uchamsiobꞌ?
JOH 7:26 Y tara turu war acanseyan tut tunor e gente y tin e war aqꞌuijna uwirobꞌ matucꞌa war uyareobꞌ. ¿O ubꞌijnuobꞌ ca e nuquir winicobꞌ que jax ixto e Cristo era?
JOH 7:27 Porque non canata tiaꞌ tari e winic era. Pero conda achecta watar e Cristo mamajchi tuaꞌ unata tiaꞌ tari, che cora winicobꞌ.
JOH 7:28 Pues e Jesús warto acanseyan tut e gente tama e templo, y conda uyubꞌi e ojroner era cay ojron taca inteꞌ nuxi nuc y che: —Nox era war inata chien nen y war inata tiaꞌ chꞌien. Pero machi tarien umen taca que bꞌan imbꞌijnu inche, sino que ayan inteꞌ xeꞌ uyebꞌta tarien; y jaxir erach. Pero nox machi war inata chi umen ebꞌtana tarien.
JOH 7:29 Pero nen innata ixto chi jaxir porque tarien tamar y jax jaxir xeꞌ uyebꞌta tarien tiut nox, che e Jesús.
JOH 7:30 Pues tamar era e nuquir winicobꞌ cꞌani ani uqꞌuechiobꞌ axin e Jesús esto tama e cárcel tama e día era, pero mamajchi ixin ucachi umen que merato acꞌotoy e día conda aquetpa tuaꞌ aqꞌuejcha axin.
JOH 7:31 Y ayan meyra gente xeꞌ turobꞌ macuir e templo xeꞌ cay cꞌupseyanobꞌ tama e Jesús xeꞌ cay ojronobꞌ taca e inmojr xeꞌ merato acꞌupseyanobꞌ tamar y chenobꞌ: —Jay mato jax ani e Cristo era ¿cobꞌato milagro war icojco tuaꞌ achempa umener que lo que chembꞌirix umen e Jesús era? che e gente era.
JOH 7:32 Entonces conda e fariseobꞌ uyubꞌiobꞌ lo que war oꞌjronobꞌ e gente tamar e Jesús que jaxir jax e Cristo, jaxirobꞌ taca e uwinquir e inmojr sacerdotiobꞌ utzacre ixiobꞌ cora policía tuaꞌ e templo tuaꞌ axin utaresobꞌ e Jesús cachbꞌir.
JOH 7:33 Entonces ojron e Jesús y che: —Majax meyra tiempo tuaꞌ inquetpa tacarox, y de allí cꞌani insutpa inxin tut tin e uyebꞌta tarien.
JOH 7:34 Nox ixixin isajquen, pero machi tuaꞌ itajwien, porque machi uyubꞌiox ixcꞌotoy tiaꞌ cꞌani inxin inturuan nen, che e Jesús.
JOH 7:35 Entonces cay ojronobꞌ e nuquir winicobꞌ era jaxobꞌ taca y chenobꞌ: —¿Y tiaꞌ tuaꞌ axin e winic era tiaꞌ machi uyubꞌion catajwi? ¿O ucꞌani ca axin aturuan tujam e gente tuaꞌ e Israel xeꞌ ixiobꞌ innajt tuaꞌ aturuanobꞌ tujam e gente xeꞌ majax tuobꞌ e Israel?
JOH 7:36 ¿Y tucꞌa nic war che lo que war uyareon era que: “Nox ixixin isajquen, pero machi tuaꞌ itajwien, porque nox machi uyubꞌiox ixcꞌotoy tiaꞌ cꞌani inxin inturuan nen?” che e nuquir winicobꞌ era.
JOH 7:37 Pues entonces conda cꞌotoy e día xeꞌ ucꞌapesnibꞌir e nojqꞌuin era xeꞌ jax e día xeꞌ más nojta, achpa wawan e Jesús tut e gente y cay ojron taca inteꞌ nuxi nuc y che: —Jay ayan chi xeꞌ ataqui utiꞌ laric taniut y nen tuaꞌ inwajcꞌu uyuchꞌi.
JOH 7:38 Pues tunor tin e acꞌupseyanobꞌ tamaren, bꞌan cocha chꞌar tzꞌijbꞌabꞌir tama uyojroner e Dios, que tama uyalma cꞌani apocbꞌa alocꞌoy meyra jaꞌ xeꞌ cꞌani uyajcꞌu e cuxtar xeꞌ machi tuaꞌ acꞌapa, che e Jesús.
JOH 7:39 Pues ojron e Jesús tamar e jaꞌ cocha era tuaꞌ uchecsu tut e gente que tin e axin acꞌupseyanobꞌ tamar jaxir cꞌani aꞌjcꞌunobꞌ Unawalir e Dios. Pues ojron cocha era umen que merato ayopa Unawalir e Dios umen que e Jesús merato asutpa uchꞌami tunor utawarer.
JOH 7:40 Pues entonces conda tunor e gente cꞌapa uyubꞌiobꞌ uyojroner e Jesús ayan tin e cay ojronobꞌ y chenobꞌ: —Chequer que e winic era jax e profeta xeꞌ quetpa tuaꞌ watar, che e gente era.
JOH 7:41 Y ayan tin e ojronobꞌ y che: —Jaxir jax e Cristo, chenobꞌ. Pero e inmojr gente ojronobꞌ y chenobꞌ: —¿Cocha tuaꞌ ibꞌijnu que erer alocꞌoy e Cristo tama e departamento Galilea?
JOH 7:42 Porque chꞌar tzꞌijbꞌabꞌir tama uyojroner e Dios que e Cristo cꞌani alocꞌoy tama uchꞌajnarir e rey David y que cꞌani acuxpa tama e chinam Belén xeꞌ jax uchinam e David, chenobꞌ e inmojr era.
JOH 7:43 Y tamar era e gente cay uxere ubꞌobꞌ tamar e Jesús.
JOH 7:44 Y ayan tin e cꞌani ani uqꞌuechiobꞌ axin e Jesús tama e cárcel, pero mamajchi ixin ucachi.
JOH 7:45 Entonces tin e policía sutpa ixiobꞌ tut e fariseobꞌ y tut uwinquir e inmojr sacerdotiobꞌ. Y de allí ubꞌna tuobꞌ e policía era y arenobꞌ: —¿Tucꞌa tuaꞌ machi itares e winic yax era? che e nuquir winicobꞌ era.
JOH 7:46 Y che e policía: —Ma tiaꞌ coybꞌi ojron inteꞌ winic cocha ojron e winic era, che e policía.
JOH 7:47 Entonces ojronobꞌ e fariseobꞌ y chenobꞌ: —¿O nox ca ubꞌan iwactix ibꞌa tuaꞌ ixmajresna umener?
JOH 7:48 ¿O ayan ca inteꞌ winic tujam e nuquir winicobꞌ tara o inteꞌ winic tujam e fariseobꞌ xeꞌ war acꞌupseyan tama e winic yax? Mamajchi.
JOH 7:49 Pero cocha e sian gente matucꞌa unatobꞌ tama uley e Moisés, bꞌaxbꞌirobꞌ inyajrer, che e nuquir winicobꞌ era.
JOH 7:50 Pero ya turu inteꞌ winic tacarobꞌ xeꞌ ucꞌabꞌa Nicodemo xeꞌ jax inteꞌ fariseo ubꞌan xeꞌ ixin inyajr tuaꞌ uwarajse e Jesús acbꞌar. Pues jaxir cay ojron y che:
JOH 7:51 —Pues che tama uley e Moisés que ma erer cabꞌijnu cawira jay ucꞌani tuaꞌ achamesna inteꞌ winic jay machi coybꞌi bꞌajxan tucꞌa ubꞌijnu tuaꞌ canata jay war uche e mabꞌambꞌanir, che e Nicodemo.
JOH 7:52 Entonces ojronobꞌ e nuquir winicobꞌ taca e Nicodemo y chenobꞌ: —¿Net ca tuet e Galilea ubꞌan bꞌan cocha e winic era? Sicbꞌan awira tama uyojroner e Dios y iꞌxin awira que mato tucꞌa e profeta xeꞌ tari tama e departamento Galilea, che e nuquir winicobꞌ era.
JOH 7:53 Entonces locꞌoy ixiobꞌ tunorobꞌ tama uyototobꞌ.
JOH 8:1 Entonces ixin e Jesús tama or e witzir xeꞌ ucꞌabꞌa Olivo.
JOH 8:2 Y conda sacojpa tama otronteꞌ día sutpa cꞌotoy tama e templo. Y tunor e gente cay umorojse ubꞌobꞌ tuyejtzꞌer, y jaxir turuan y cay canseyan tama uyojroner e Dios.
JOH 8:3 Y de allí cꞌotoyobꞌ cora ajcanseyajobꞌ tama uley e Moisés taca cora fariseobꞌ xeꞌ war utaresobꞌ inteꞌ ixic xeꞌ tajwina que war uyose ubꞌa taca inteꞌ ajnajtir winic. Entonces uturbꞌobꞌ e ixic era tujam tunor e gente
JOH 8:4 y chenobꞌ: —Ajcanseyajet, tajwina e ixic era conda war uyose ubꞌa taca inteꞌ winic xeꞌ majax nujbꞌir tacar.
JOH 8:5 Pues tama uley e Moisés che que ucꞌani tuaꞌ achamesna jurbꞌir taca e tun inteꞌ ixic xeꞌ uche cocha era. Pero net, ¿tucꞌa aware tama tunor era? che e nuquir winicobꞌ era.
JOH 8:6 Pues jaxirobꞌ uyubꞌiobꞌ tuaꞌ e Jesús cocha era tuaꞌ taca umajresobꞌ ani, porque war usicbꞌobꞌ cocha tuaꞌ utuchꞌi e Jesús tut e ley tuaꞌ uyubꞌi uchamsiobꞌ. Pero e Jesús intaca uchꞌubꞌa ut tut e rum y cay utzꞌijbꞌa tut e rum tacar or ucꞌabꞌ.
JOH 8:7 Pero e winicobꞌ era machi uyactobꞌ tuaꞌ uyubꞌiobꞌ tuaꞌ e Jesús. Entonces jaxir ujachi ujor y che: —Tin e unata que matucꞌa umabꞌambꞌanir uꞌric e ixic era taca e tun bꞌajxan, che e Jesús.
JOH 8:8 Y conda cꞌapa ojron cocha era sutpa uchꞌubꞌa ut y cay utzꞌijbꞌa otronyajr tut e rum.
JOH 8:9 Pero conda e nuquir winicobꞌ uyubꞌiobꞌ e ojroner era cay locꞌoyobꞌ tzꞌustaca inteꞌ intiobꞌ. Cay locꞌoy tin e más onian winic bꞌajxan este que cꞌapa ixiobꞌ tunorobꞌ. Entonces quetpa e Jesús ubꞌajner taca e ixic xeꞌ quetpa yajaꞌ.
JOH 8:10 Entonces e Jesús ujachi ut otronyajr y uyubꞌi tuaꞌ e ixic y che: —¿Tiaꞌ ixiobꞌ tunor e winicobꞌ era? ¿Ma ca majchi xeꞌ quetpa xeꞌ war ubꞌijnu que net ucꞌani tuaꞌ ichamesna? che e Jesús.
JOH 8:11 Y e ixic che: —Niwinquiret, mamajchi, che e ixic. Y che e Jesús: —Nien nen ubꞌan. Quiqui y actan tuaꞌ ache e mabꞌambꞌanir, che e Jesús.
JOH 8:12 Entonces cay ojron e Jesús otronyajr tut e gente y che: —Nen jax e janchꞌaquenar y tamar era jax nen xeꞌ injanchꞌacnes tunor tin e turobꞌ tara tor e rum. Tin e uturbꞌa ubꞌa tamaren axin uchꞌami e janchꞌaquenar xeꞌ tuaꞌ uyajcꞌu e cuxtar xeꞌ machi tuaꞌ acꞌapa, y machi ixto tuaꞌ axana tama e incsibꞌaner, che e Jesús.
JOH 8:13 Entonces ojronobꞌ e fariseobꞌ y che: —Net ajtaca war achecsu abꞌa tamar lo que war aware, y awojroner cocha era matucꞌa ucꞌampibꞌir, che e fariseobꞌ.
JOH 8:14 Entonces ojron e Jesús y che: —Motor que nibꞌajner war inchecsu nibꞌa tiut pero erach tunor niwojroner. Porque nen innata tiaꞌ tarien y innata tiaꞌ tuaꞌ inxin otronyajr, pero nox machi war inata tiaꞌ tarien y nien machi war inata tiaꞌ tuaꞌ inxin otronyajr.
JOH 8:15 Nox war ibꞌijnu iwira bꞌan taca cocha ubꞌijnuobꞌ e gente tara tor e rum. Pero nen mamajchi tamar war imbꞌijnu que mabꞌambꞌan lo que war uche.
JOH 8:16 Pero jay imbꞌijnu ani tuaꞌ inware que mabꞌambꞌan o jay imbꞌutz lo que war uche inteꞌ, nen inxin inche ajtaca lo que erach, porque majax nibꞌajner tuaꞌ inware tunor era sino que Nitata xeꞌ uyebꞌta tarien axin utacren.
JOH 8:17 Pues chꞌar tzꞌijbꞌabꞌir tama uley e Moisés que jay ayan chateꞌ ajchecsuyajobꞌ xeꞌ intera uyojronerobꞌ, jaxirobꞌ tuaꞌ acꞌupesnobꞌ.
JOH 8:18 Pues nen war inchecsu nibꞌa y Nitata xeꞌ uyebꞌta tarien jax inteꞌ ajchecsuyaj tanibꞌa ubꞌan, che e Jesús.
JOH 8:19 Entonces sutpa uyubꞌiobꞌ tuaꞌ e Jesús e fariseobꞌ era otronyajr y chenobꞌ: —¿Y tiaꞌ turu atata? chenobꞌ. Y che e Jesús: —Nox machi inata chien nen y nien machi inata chi Nitata. Jay inata ani chien nen, inata ani chi Nitata ubꞌan, che e Jesús.
JOH 8:20 Pues arobꞌna tunor era umen e Jesús conda war acanseyan tama e templo tama e lugar tiaꞌ war e cajón tiaꞌ ayajra e tumin. Pero mamajchi ucachi e Jesús tuaꞌ uqꞌueche axin tama e cárcel porque merato acꞌotoy e día.
JOH 8:21 Entonces ojron e Jesús otronyajr y che: —Nen cꞌani inlocꞌoy tama e lugar era, y nox cꞌani isajquen y cꞌani ixchamay tamar imabꞌambꞌanir. Pero tiaꞌ inxin nen, nox machi uyubꞌiox ixcꞌotoy, che e Jesús.
JOH 8:22 Entonces ojronobꞌ e nuquir winicobꞌ era y chenobꞌ: —¿O war ca nic ubꞌijnu tuaꞌ uchamse ubꞌa y tamar era war uyareon que machi uyubꞌion caxin tiaꞌ axin jaxir? che e nuquir winicobꞌ era.
JOH 8:23 Entonces e Jesús che: —Nox ajlugarox tara yebꞌar ut e qꞌuin, pero nen ajlugaren tichan. Nox tuox e rum era pero nen majax tuen e rum era.
JOH 8:24 Y tamar era inwareox que nox ucꞌani tuaꞌ ixchamay tamar imabꞌambꞌanir, porque jay nox machi ixcꞌotoy icꞌupse que nen turen xeꞌ turen entonces nox ucꞌani tuaꞌ ixchamay tamar imabꞌambꞌanir, che e Jesús.
JOH 8:25 Entonces e nuquir winicobꞌ sutpa uyubꞌiobꞌ tuaꞌ e Jesús otronyajr y chenobꞌ: —¿Y chiet net? chenobꞌ. Y che e Jesús: —Cay inwareox bꞌajxan chien nen pero machi icꞌupsen.
JOH 8:26 Pues ayanto meyra lo que cꞌani ani inwareox tamar lo que war iche xeꞌ mabꞌambꞌan. Pues tin e uyebꞌta tarien uyaren jax taca lo que erach. Y nen war inware e gente tara tor e rum jax taca lo que cay umbꞌi tuaꞌ jaxir, che e Jesús.
JOH 8:27 Pero jaxirobꞌ machi cꞌotoy unatobꞌ que e Jesús war oꞌjron tamar Utata.
JOH 8:28 Y tamar era ojron e Jesús otronyajr y che: —Conda acꞌapa itꞌabꞌsen nen xeꞌ Uyunenen e winic tuaꞌ ichꞌubꞌen tut e cruz, cꞌani aquetpa chequer tiut que nen turen xeꞌ turen y que matucꞌa war inche xeꞌ bꞌan cocha incꞌani nen. Cay inwareox ajtaca lo que cay ucansen Nitata.
JOH 8:29 Porque tin e uyebꞌta tarien turu tacaren. Y ma tiaꞌ uyacten nibꞌajner porque war inche jax taca lo que atzay uwira iraj iraj, che e Jesús.
JOH 8:30 Pues conda e Jesús cay ojron cocha era meyra gente cay cꞌupseyanobꞌ tamar.
JOH 8:31 Pues entonces e Jesús cay ojron taca cora nuquir winicobꞌ xeꞌ tuobꞌ e Israel xeꞌ cay cꞌupseyanobꞌ tamar y che: —Jay nox iturbꞌa ibꞌa tamar lo que war incansiox era, cꞌani ixto ixquetpa niwajcanuarox.
JOH 8:32 Y nox tuaꞌ ixcꞌotoy inata lo que erach, y lo que erach era cꞌani ubꞌaniox inyajrer, che e Jesús.
JOH 8:33 Entonces ojronobꞌ e nuquir winicobꞌ era y chenobꞌ: —Non sitzbꞌiron tuaꞌ catata viejobꞌir Abraham, y mato inyajr cabꞌijnu jay cacharon ani bꞌan cocha inteꞌ man xeꞌ mambꞌir inyajrer. Y ¿cocha tuaꞌ awareon que non ucꞌani tuaꞌ cabꞌajna? che e nuquir winicobꞌ era.
JOH 8:34 Y che e Jesús: —Cꞌani inwareox era que tunor tin e axin uche e mabꞌambꞌanir, war aquetpa cachar yebꞌar ucꞌotorer e mabꞌambꞌanir era.
JOH 8:35 Inteꞌ man xeꞌ mambꞌir inyajrer ma erer aquetpa bꞌan cocha inteꞌ umaxtac upatron. Pero umaxtac upatron tuobꞌ e tatabꞌir era inyajrer.
JOH 8:36 Pues nen xeꞌ Uyunenen e winic erer imbꞌaniox tuaꞌ machi ixto ixquetpa cachar bꞌan cocha inteꞌ man xeꞌ mambꞌir inyajrer. Y jay bꞌan inche, nox cꞌani ixquetpa bꞌambꞌir inyajrer.
JOH 8:37 Innata que nox umaxtacox catata viejobꞌir Abraham. Pero ma jabꞌar tama ijor tuaꞌ ichꞌami niwojroner y tamar era war ibꞌijnu tuaꞌ ichamsen.
JOH 8:38 Nen era war inchecsu tiut lo que irsenen umen Nitata, y nox ubꞌan war iche bꞌan cocha cansenox umen itata, che e Jesús
JOH 8:39 Entonces ojronobꞌ e winicobꞌ otronyajr y chenobꞌ: —Catata non jax catata viejobꞌir Abraham, che e nuquir winicobꞌ era. Entonces sutpa ojron e Jesús y che: —Jay nox nic ani maxtacox tuaꞌ catata viejobꞌir Abraham war ani iche bꞌan cocha cay uche jaxir.
JOH 8:40 Pero nox era war ibꞌijnu tuaꞌ ichamsen tamar e ojroner xeꞌ erach lo que cay inchecsu tiut bꞌan cocha cay inchꞌami tuaꞌ Nitata. Pero catata viejobꞌir Abraham ma inyajr cay ubꞌijnu tuaꞌ uche cocha war ibꞌijnu iche nox.
JOH 8:41 Pero nox era war ibꞌijnu tuaꞌ iche bꞌan cocha cay uchiobꞌ itatobꞌ, che e Jesús. Entonces ojronobꞌ e nuquir winicobꞌ otronyajr y chenobꞌ: —Pero non majax chocbꞌir genteon, porque inteꞌ taca Catata xeꞌ jax e Dios, che e winicobꞌ era.
JOH 8:42 Y e Jesús che: —Jay nox nic ani maxtacox tuaꞌ e Dios war ani iyajta niut porque nen ebꞌetbꞌir tarien umen e Dios y tara turen tiut. Machi tarien umen que bꞌan cay imbꞌijnu inche, sino que ebꞌetbꞌir tarien umen que bꞌan ucꞌani Catata Dios.
JOH 8:43 ¿Y tucꞌa tuaꞌ machi cꞌani ixcꞌotoy inata lo que war inwareox era? Pues umen taca que machi cꞌani iyubꞌi niwojroner.
JOH 8:44 Nox ayan itata xeꞌ jax e diablo, y war iche jax taca lo que ucꞌani jaxir. Pues jaxir jax inteꞌ ajchamseyaj conda cayespa or e rum era. Y lo que erach matucꞌa ucꞌampibꞌir tut jaxir porque matucꞌa xeꞌ erach tamar. Y conda amajresian jaxir, war oꞌjron uyojroner xeꞌ tuach porque jaxir jax e tatabꞌir tuaꞌ tunor e majresiaj.
JOH 8:45 Pero cocha nen war inwareox lo que erach machi cꞌani icꞌupse niwojroner.
JOH 8:46 ¿O ayan ca inteꞌ tijam xeꞌ erer uwirsen jay inche ani inteꞌ mabꞌambꞌanir? Mamajchi. Pero cocha war inwareox lo que erach ¿tucꞌa tuaꞌ machi cꞌani icꞌupse lo que war inwareox?
JOH 8:47 Tin e tuaꞌ e Dios cꞌani uyubꞌi uyojroner e Dios. Pero cocha nox majax tuox e Dios machi cꞌani iyubꞌi uyojroner, che e Jesús.
JOH 8:48 Entonces ojron e nuquir winicobꞌ era otronyajr y chenobꞌ: —Pues erach lo que caware non que net jax inteꞌ ajlugar Samaria tiaꞌ tari tunor e ajmabꞌambꞌanirobꞌ y que net chucuret umen inteꞌ mabꞌambꞌan mein, che e nuquir winicobꞌ era.
JOH 8:49 Y che e Jesús: —Matucꞌa e mabꞌambꞌan mein tamaren. Pues nen war intattzꞌi ucꞌabꞌa Nitata, pero nox war isubꞌajres nicꞌabꞌa.
JOH 8:50 Pues nen machi war insicbꞌa tuaꞌ intajttzꞌa imener, pero ayan inteꞌ xeꞌ cꞌani utattzꞌi nicꞌabꞌa. Y jaxir war uwira que erach tunor niwirnar.
JOH 8:51 Y cꞌani inwareox era que tunor tin e uturbꞌa ubꞌa tuaꞌ obꞌian tut niwojroner machi tuaꞌ achamay, che e Jesús.
JOH 8:52 Entonces ojronobꞌ e nuquir winicobꞌ otronyajr y chenobꞌ: —Coner canata ixto yaꞌ que net chucuret umen inteꞌ mabꞌambꞌan mein porque chamay catata viejobꞌir Abraham y chamayobꞌ tunor e onian profetobꞌ ubꞌan, y net war aware que: “Tin e uturbꞌa ubꞌa tuaꞌ obꞌian tut niwojroner machi tuaꞌ achamay.”
JOH 8:53 ¿O war ca abꞌijnu que net más nuxi winiquet que catata viejobꞌir Abraham? Porque jaxir chamay, y bꞌan numuy tama tunor e profetobꞌ tama e onian tiempo ubꞌan. ¿Y chiet cora net tuaꞌ abꞌijnu cocha era? che e nuquir winicobꞌ era.
JOH 8:54 Y che e Jesús: —Jay nen intattzꞌi nibꞌa nen taca, matucꞌa ucꞌampibꞌir tunor era. Pero tin e war utattzꞌien jax Nitata xeꞌ nox iware que jax Idiosir ubꞌan.
JOH 8:55 Pero nox machi war inata chi Nitata, pero nen war ixto innata chi. Y jay inware ani que machi innata chi Nitata inquetpa ani inteꞌ ajmajresiaj bꞌan cocha nox. Pero nen innata ixto chi Nitata y war inturbꞌa nibꞌa tuaꞌ umbꞌian tut tunor uyojroner.
JOH 8:56 Pues itata viejobꞌir Abraham atzay ubꞌijnu tama niyopar tara, y conda uwira inyopa abꞌutcꞌa uyalma taca e tzayer, che e Jesús.
JOH 8:57 Entonces sutpa ojronobꞌ e nuquir winicobꞌ era otronyajr y chenobꞌ: —Net merato atzꞌacse cincuenta año tabꞌa y warix aware que awirix ut e Abraham xeꞌ chamay tama e onian tiempo, che e winicobꞌ era.
JOH 8:58 Y che e Jesús: —Cꞌani inwareox era que nen turenix más bꞌajxan que e Abraham, che e Jesús.
JOH 8:59 Entonces qꞌuijnobꞌ e nuquir winicobꞌ era y cay ucꞌopiobꞌ e sian tun tuaꞌ uriobꞌ tujor e Jesús. Pero jaxir cay mucwan tutobꞌ y locꞌoy tama e templo y ixin.
JOH 9:1 Pues entonces conda war axana e Jesús tama e chinam Jerusalem cay uwira inteꞌ winic xeꞌ cuxpa tajpem unacꞌut.
JOH 9:2 Y uyajcanuarobꞌ uyubꞌiobꞌ tuaꞌ e Jesús y chenobꞌ: —Cawajcanseyajet, ¿tucꞌa tuaꞌ cuxpa tajpem unacꞌut e winic era? ¿Umen ca nic umabꞌambꞌanir utata o utuꞌ? ¿O umen ca nic umabꞌambꞌanirach jaxir? che uyajcanuarobꞌ era.
JOH 9:3 Y che e Jesús: —Pues majax umen umabꞌambꞌanirach jaxir que cuxpa tajpem ut y nien majax umen umabꞌambꞌanir utata o utuꞌ. Cuxpa tajpem unacꞌut tuaꞌ achecsuna ucꞌotorer e Dios.
JOH 9:4 Y non ucꞌani tuaꞌ cache lo que ucꞌani jaxir xeꞌ uyebꞌta tarien conda janchꞌaquento, porque watar e hora conda axin acbꞌare conda mix majchi uyubꞌi apatna.
JOH 9:5 Pues conda nen turento tara tor e rum nen jax e janchꞌaquenaren tut tunor e gente, che e Jesús.
JOH 9:6 Conda cꞌapa ojron cocha era, utujbꞌa uyar utiꞌ tut e rum tuaꞌ uche imbꞌijc anam tamar y uturbꞌa tama unacꞌut e winic xeꞌ tajpem unacꞌut.
JOH 9:7 Y uyare e winic y che: —Quiqui poco unacꞌoit tama e pila xeꞌ ucꞌabꞌa Siloé, che e Jesús. Pues e ojroner Siloé war che: “Ebꞌetbꞌir” tama e ojroner hebreo. Entonces ixin e winic tuaꞌ upoqui unacꞌut bꞌan cocha arobꞌna umen e Jesús, y conda sutpa yopa tut e Jesús, uyubꞌi ixto eꞌron unacꞌut yaꞌ.
JOH 9:8 Entonces conda irna e winic era umen cora upiarobꞌ y umen tin e unata que tajpem ani unacꞌut cay ojronobꞌ jaxobꞌ taca y chenobꞌ: —¿Ma ca jax e winic era xeꞌ acay ucꞌajti e tumin? che e gente era jaxobꞌ taca.
JOH 9:9 Y ayan tin e war chenobꞌ: —Jax e winic era, chenobꞌ. Y ayan e inmojr xeꞌ chenobꞌ: —Majax jaxir, pero lar uwirnar, chenobꞌ. Pero jaxir che: —Nen, che e winic xeꞌ tajpem ani unacꞌut.
JOH 9:10 Y ayan tin e cay uyubꞌiobꞌ tuaꞌ e winic y chenobꞌ: —¿Y tucꞌa ache tuaꞌ uyubꞌiet iyeron? che cora winicobꞌ era.
JOH 9:11 Y che e winic: —Jax inteꞌ winic xeꞌ ucꞌabꞌa Jesús xeꞌ ugoro e anam tama unacniut y uyaren: “Quiqui poco unacꞌoit tama e pila xeꞌ ucꞌabꞌa Siloé.” Y nen ixien inche bꞌan cocha uyaren. Y conda cꞌapa impoqui unacniut, eꞌron niut, che e winic era xeꞌ tajpem ani unacꞌut.
JOH 9:12 Entonces ubꞌna tuaꞌ e winic era y arena: —¿Y tiaꞌ turu e winic xeꞌ utzꞌacpes unacꞌoit coner? che e gente era. Y jaxir che: —Nen machi innata tiaꞌ turu, che e winic.
JOH 9:13 Entonces uqꞌuechiobꞌ ixin e winic era xeꞌ tajpem ani unacꞌut tut e fariseobꞌ.
JOH 9:14 Pues jax inteꞌ día tuaꞌ e jiriar conda chena tunor era umen e Jesús; que uche e anam tuaꞌ utzꞌacpes e winic xeꞌ tajpem ani unacꞌut.
JOH 9:15 Entonces e fariseobꞌ cay uyubꞌiobꞌ tuaꞌ e winic que tucꞌa uche que uyubꞌi eꞌron coner. Y jaxir che: —Anam ugoro tama unacniut y uchien impoqui y umen era cay eronen, che e winic.
JOH 9:16 Entonces cay ojron cora fariseobꞌ y chenobꞌ: —Pues chequer ticoit que e Jesús majax ebꞌetbꞌir umen e Dios cocha machi acꞌupseyan tut e día tuaꞌ e jiriar, che e fariseobꞌ era. Pero ayan e inmojr fariseobꞌ ubꞌan xeꞌ chenobꞌ: —Jay jax ani inteꞌ ajmabꞌambꞌanir ma cocha erer uche inteꞌ nuxi milagro cocha era, che e inmojr era. Y tamar era cay uxere ubꞌobꞌ tamar e Jesús.
JOH 9:17 Entonces cay uyubꞌiobꞌ otronyajr tuaꞌ e winic xeꞌ tajpem ani unacꞌut y chenobꞌ: —¿Y tucꞌa abꞌijnu net upater tin e utzꞌacpes unacꞌoit? che e nuquir winicobꞌ era. Y jaxir che: —Nen inware que jax inteꞌ profeta, che e winic.
JOH 9:18 Pero e nuquir winicobꞌ machito ucꞌupsiobꞌ que e winic era tajpem ani unacꞌut. Y tamar era ixin upejcobꞌ utata y utuꞌ e winic
JOH 9:19 y uyubꞌiobꞌ tuobꞌ y che: —¿Isitz ca era? ¿Tajpem ca ani unacꞌut conda cuxpa? ¿Y tucꞌa uche tuaꞌ uyubꞌi eꞌron coner? che e nuquir winicobꞌ era.
JOH 9:20 Y ojronobꞌ utata y utuꞌ e winic y chenobꞌ: —Canata que jax casitz era y que tajpem unacꞌut conda cuxpa.
JOH 9:21 Pero non machi canata tucꞌa uche tuaꞌ uyubꞌi eꞌron coner, y machi canata chi umen erojsena unacꞌut. Ubꞌinic nox tuaꞌ jaxir tuaꞌ inata tama tunor era cocha jaxir nojta winiquix xeꞌ erer uchecsu ubꞌa tiut, che utata y utuꞌ e winic xeꞌ tajpem ani unacꞌut.
JOH 9:22 Pues ojronobꞌ cocha era utuꞌ y utata e winic xeꞌ tajpem ani unacꞌut umen que war ubꞌacriobꞌ e nuquir winicobꞌ porque jaxirobꞌ ojronobꞌix que cꞌani ulocsiobꞌ tama e sinagoga tunor tin e war ubꞌijnuobꞌ que e Jesús jax e Cristo.
JOH 9:23 Y tamar era arobꞌnobꞌ umen utata e winic que: “Ubꞌinic nox tuaꞌ jaxir tuaꞌ inata tama tunor era cocha jaxir nojta winiquix”, xeꞌ arobꞌna umen utata e winic era.
JOH 9:24 Entonces e nuquir winicobꞌ sutpa upejcobꞌ e winic xeꞌ tajpem ani unacꞌut otronyajr y chenobꞌ: —Arenon tin xeꞌ erach tut e Dios. Porque non canata que e Jesús jax inteꞌ ajmabꞌambꞌanir, che e nuquir winicobꞌ era.
JOH 9:25 Entonces ojron e winic xeꞌ tajpem ani unacꞌut y che: —Nen machi innata jay ajmabꞌambꞌanir o jay machi. Ajrer taca innata que tajpem ani unacniut y que coner uyubꞌien enron, che e winic.
JOH 9:26 Pero sutpa uyubꞌiobꞌ tuaꞌ e winic otronyajr y chenobꞌ: —¿Y tucꞌa uche tacaret? ¿Y tucꞌa uche tuaꞌ uyerojse unacꞌoit? che e nuquir winicobꞌ.
JOH 9:27 Y jaxir che: —Nen inwareoxix tama tunor era pero nox machi cꞌani icꞌupse lo que cay inwareox. ¿Tucꞌa tuaꞌ war icꞌani tuaꞌ insutpa inwareox otronyajr? ¿O war ca ibꞌijnu tuaꞌ ixquetpa ajcanuarox tuaꞌ ubꞌan? che e winic xeꞌ tajpem ani unacꞌut.
JOH 9:28 Entonces e nuquir winicobꞌ cay ucꞌayobꞌ e winic xeꞌ tajpem ani unacꞌut y chenobꞌ: —Net ajcanuaret tuaꞌ e Jesús, pero non ajcanuaron tuaꞌ lo que chꞌar tzꞌijbꞌabꞌir umen e Moisés.
JOH 9:29 Non canata que e Dios cay ojron taca e Moisés, pero e Jesús nien machi canata tiaꞌ tari, che e nuquir winicobꞌ.
JOH 9:30 Entonces e winic che: —Pero ¿tucꞌa tuaꞌ que machi war inata tiaꞌ tari jaxir? Pues jax jaxir xeꞌ uyerojse unacniut.
JOH 9:31 Tunoron canata que e Dios machi uyubꞌi lo que cꞌajtna umen tin e ajmabꞌambꞌanir. E Dios ajtaca uyubꞌi lo que acꞌajtna umen tin e erach uwirnar y umen tin e uche lo que ucꞌani jaxir.
JOH 9:32 Ma tiaꞌ coybꞌi achecsuna jay ayan inteꞌ xeꞌ uyubꞌi utzꞌacpes inteꞌ xeꞌ cuxpa tajpem unacꞌut.
JOH 9:33 Y jay e Jesús machi tari tuaꞌ e Dios, matucꞌa ani erer uche, che e winic xeꞌ tajpem ani unacꞌut.
JOH 9:34 Entonces e nuquir winicobꞌ cay uyareobꞌ e winic y chenobꞌ: —Chequer que net cuxpet bꞌutꞌur taca e sian mabꞌambꞌanir umen que cuxpet tajpem unacꞌoit, ¿y cocha tuaꞌ acansion non xeꞌ erachon? che e nuquir winicobꞌ era. Y tamar era ulocsiobꞌ e winic era tama e sinagoga inyajrer.
JOH 9:35 Pues entonces e Jesús uyubꞌi que loqꞌuesna e winic xeꞌ tajpem ani unacꞌut tama e sinagoga. Y conda utajwi ubꞌa tacar otronyajr uyubꞌi tuaꞌ y che: —¿Icꞌupseyan ca tama Uyunen e winic? che e Jesús.
JOH 9:36 Y e winic che: —Arenen chi era tuaꞌ erer incꞌupseyan tamar, che e winic.
JOH 9:37 Y che e Jesús: —Awirix ixto yaꞌ. Jax nen xeꞌ war onjron tacaret, che e Jesús.
JOH 9:38 Entonces e winic cotuan tut e Jesús y che: —Niwinquiraret, incꞌupseyan tamaret, che e winic.
JOH 9:39 Y che e Jesús: —Nen tarien tara tor e rum tuaꞌ intares e jatzꞌuar, y tuaꞌ atzꞌacpesna tin e tajpem unacꞌut, y tuaꞌ aquetpa tajpem unacꞌut tin e eꞌron, che e Jesús.
JOH 9:40 Pero ayan cora fariseobꞌ tuyejtzꞌer e Jesús xeꞌ uyubꞌiobꞌ uyojroner era xeꞌ cay uyubꞌiobꞌ tuaꞌ y chenobꞌ: —¿O non ca ubꞌan tajpem unaccoit? che e nuquir winicobꞌ era.
JOH 9:41 Y che e Jesús: —Jay tajpem ani unaqꞌuiut, ma ani tucꞌa imabꞌambꞌanir. Pero cocha war iware que ixeron, tamar era ayan meyra imabꞌambꞌanir, che e Jesús.
JOH 10:1 Entonces ojron e Jesús y che: —Cꞌani inwareox era que tin e machi oꞌchoy tama e puerta lo que ayan tama e macteꞌ tiaꞌ macar e ovejobꞌ, sino que intaca atobꞌoy tujor e macteꞌ tuaꞌ oꞌchoy, jax inteꞌ ajxujch.
JOH 10:2 Pero tin e oꞌchoy tama e puerta tama e macteꞌ tiaꞌ macar e ovejobꞌ, jax e ajcojc oveja.
JOH 10:3 Y ayan inteꞌ xeꞌ ucojco e puerta era xeꞌ upasi e puerta tut e ajcojc oveja tuaꞌ uyubꞌi oꞌchoy macu. Y e ajcojc oveja upejca alocꞌoy tunor e oveja tama ucꞌabꞌobꞌ inteꞌ intiobꞌ, y tunor e oveja era unatobꞌ chi uyajyum y oꞌbꞌianobꞌ tut uyojroner.
JOH 10:4 Y conda acꞌapa alocꞌoy tunor e ovejobꞌ tama e macteꞌ axiobꞌ tupat e ajcojc oveja tic taca tiaꞌ axin porque unatobꞌ tamar unuc chi era.
JOH 10:5 Pero e ovejobꞌ machi axiobꞌ tupat otronteꞌ xeꞌ machi unatobꞌ chi sino que alocꞌoy aꞌjniobꞌ tut porque tamar unuc machi unatobꞌ chi era, che e Jesús.
JOH 10:6 Pues tin e uyubꞌiobꞌ uyojroner e Jesús xeꞌ mucur cora era machi unatobꞌ tucꞌa war che tunor era.
JOH 10:7 Pues entonces e Jesús sutpa ojron otronyajr y che: —Cꞌani inwareox era que nen jax e puerta tama e macteꞌ tiaꞌ tuaꞌ oꞌchoy e sian oveja.
JOH 10:8 Tunor tin e yopobꞌ bꞌajxan que nen ajxujchꞌobꞌ taca, y tamar era e sian oveja machi oꞌbꞌianobꞌ tutobꞌ.
JOH 10:9 Nen jax e puerta, y tunor tin e oꞌchoy tama e puerta era cꞌani acorpesna. Y tin e acorpesna era erer oꞌchoy y erer alocꞌoy tuaꞌ usajca tucꞌa tuaꞌ ucꞌuxi.
JOH 10:10 ’E ajxujch watar tuaꞌ taca axujchꞌian, y tuaꞌ taca achamsan, y tuaꞌ taca usati lo que ayan, pero nen tarien tuaꞌ inwajcꞌu e cuxtar xeꞌ más nojta y xeꞌ axin abꞌoro iraj iraj.
JOH 10:11 Nen e ajcojc oveja xeꞌ imbꞌutz. Inteꞌ ajcojc oveja cocha era axin uyajcꞌu esto ucuxtar tuaꞌ ucorpes uyoveja.
JOH 10:12 Pero inteꞌ man xeꞌ war atojya tuaꞌ ucojco e sian oveja, conda uwira watar inteꞌ nuxi tigre uyacta tunor e oveja y alocꞌoy aꞌjni porque majax tuach e sian oveja era. Y e tigre axin tujor e sian oveja tuaꞌ ujajpi, y e sian oveja uxere ubꞌobꞌ y alocꞌoy aꞌjniobꞌ.
JOH 10:13 Y e man intaca alocꞌoy aꞌjni porque war ubꞌijnu tamar taca lo que war atojya y machi war uyajta ut e sian oveja.
JOH 10:14 ’Pues nen e ajcojc oveja xeꞌ imbꞌutz, y innata chi niwoveja, y jaxirobꞌ unatobꞌ chien nen ubꞌan,
JOH 10:15 bꞌan cocha innata chi Nitata, y Nitata unata chien nen. Pues nen inwajcꞌu nicuxtar tuaꞌ incorpes tunor e niwoveja era.
JOH 10:16 Ayanto más oveja xeꞌ machito turobꞌ macuir e macteꞌ era xeꞌ majax tuobꞌ e Israel xeꞌ ucꞌanto tuaꞌ inxin intares ubꞌan. Y jaxirobꞌ tuaꞌ axin acꞌupseyanobꞌ tut niwojroner y axin aquetpobꞌ intera grupo taca tin e turobꞌ macuir e macteꞌ coner y tunorobꞌ aquetpobꞌ yebꞌar inteꞌ taca ajcojc.
JOH 10:17 ’Nitata ucꞌanien umen que nen inwajcꞌu nicuxtar tuaꞌ inchamesna, pero de allí cꞌani insujta imbꞌixqꞌuesna tujam e chamenobꞌ.
JOH 10:18 Mamajchi uyubꞌi ulocse nicuxtar, pero nen cꞌani inwajcꞌu nicuxtar tuaꞌ inchamesna umen taca que bꞌan cꞌani inche. Y nen ayan nicꞌotorer tuaꞌ inwajcꞌu nicuxtar y ayan nicꞌotorer ubꞌan tuaꞌ insutpa imbꞌixcꞌa tujam e chamenobꞌ. Y bꞌan war inche porque bꞌan uyaren Nitata tuaꞌ inche, che e Jesús.
JOH 10:19 Entonces conda e nuquir winicobꞌ tuaꞌ e Israel cꞌapa uyubꞌiobꞌ e ojroner era cay uxere ubꞌobꞌ y ixiobꞌ.
JOH 10:20 Y ayan meyra tin e ojronobꞌ y chenobꞌ: —¿Tucꞌa tuaꞌ war iyubꞌi lo que war oꞌjron e winic era? Porque jaxir chucur umen inteꞌ mabꞌambꞌan mein y tijrem usasaꞌ, che e winicobꞌ era.
JOH 10:21 Pero ayan e inmojr xeꞌ cay ojronobꞌ y chenobꞌ: —Mamajchi xeꞌ chucur umen inteꞌ mabꞌambꞌan mein uyubꞌi oꞌjron cocha war coybꞌi era. ¿O erer ca inteꞌ mabꞌambꞌan mein uyerojse unacꞌut inteꞌ xeꞌ tajpem unacꞌut? chenobꞌ e inmojr era.
JOH 10:22 Pues entonces cꞌotoy e día tuaꞌ uchiobꞌ e nojqꞌuin tamar ucheyaj e nuxi templo tama e chinam Jerusalem. Y jax era e tiempo conda ayan e sisar.
JOH 10:23 Y ya turu e Jesús tama e templo war axana tama inteꞌ corredor xeꞌ ucꞌabꞌa Salomón.
JOH 10:24 Entonces e nuquir winicobꞌ tuaꞌ e Israel cay uxojyobꞌ e Jesús y uyubꞌiobꞌ tuaꞌ y chenobꞌ: —¿Tucꞌa día tuaꞌ awareon jay net e Cristoet o jay machi? Arenon era inyajrer, che e nuquir winicobꞌ era.
JOH 10:25 Y che e Jesús: —Inwareoxix pero nox machi war icꞌupse niwojroner. Tunor lo que war inche tacar ucꞌotorer Nitata war uchecsu tiut chien nen.
JOH 10:26 Pero nox machi cꞌani ixcꞌupseyan tamaren umen que majax tanibꞌox, bꞌan cocha cay inwareox tamar e oveja.
JOH 10:27 E ovejobꞌ xeꞌ tanibꞌa unatobꞌ jay jax nen xeꞌ war onjron, y nen innata chiobꞌ jaxirobꞌ, y jaxirobꞌ axiobꞌ tanipat.
JOH 10:28 Y nen inwajcꞌuobꞌ e cuxtar xeꞌ machi tuaꞌ acꞌapa y machi ixto tuaꞌ asatpobꞌ, y mamajchi tuaꞌ uyubꞌi ulocse inteꞌ oveja cocha era tama nicꞌabꞌ.
JOH 10:29 Porque jax Nitata xeꞌ ixin uyajqꞌuen y jaxir más ayan ucꞌotorer tama tunor, y mamajchi chi uyubꞌi ulocsiobꞌ tama ucꞌabꞌ Nitata.
JOH 10:30 Nen y Nitata interon taca, che e Jesús.
JOH 10:31 Entonces qꞌuijnobꞌ otronyajr e nuquir winicobꞌ y cay ucꞌopiobꞌ e tun tuaꞌ uriobꞌ e Jesús tamar otronyajr.
JOH 10:32 Entonces che e Jesús: —Cay inche meyra milagro xeꞌ galan tiut taca ucꞌotorer Nitata. ¿Y tucꞌa inche xeꞌ galan tiut que cꞌani ichamsen taca e tun tamar? che e Jesús.
JOH 10:33 Entonces sutpa ojronobꞌ e nuquir winicobꞌ otronyajr y chenobꞌ: —Cꞌani coyriet era taca e tun majax tamar lo que war ache xeꞌ imbꞌutz sino que umen que war coybꞌi aqꞌuijnes ut e Dios. Pues non canata que net jax taca inteꞌ winic bꞌan cocha non, pero net war ache abꞌa ticoit bꞌan cocha e Dios, che e nuquir winicobꞌ era.
JOH 10:34 Y che e Jesús: —Pero chꞌar tzꞌijbꞌabꞌir tama uyojroner e Dios que e Dios che que: “Nox diosox.”
JOH 10:35 Y canata que tunor lo que chꞌar tzꞌijbꞌabꞌir tama uyojroner e Dios majax tuqꞌuic ojroner y que machi uyubꞌion camuqui, porque Cadiosir ixin uyare tin e war uyubꞌiobꞌ uyojroner tama inyajr que jaxirobꞌ diosobꞌ.
JOH 10:36 Y cocha Nitata usicbꞌen y uyebꞌta tarien tara tor e rum, ¿cocha tuaꞌ iware era que nen war inqꞌuijnes ut e Dios conda inware que nen Uyunenen e Dios?
JOH 10:37 Pero jay nen machi ani inche lo que uche Nitata pues ma erer icꞌupsen.
JOH 10:38 Pero jay inche lo que uche Nitata, motor que nox machi cꞌani icꞌupsen, pero cꞌupsenic e sian milagro lo que war inche porque tamar era erer inata inyajrer que turu Nitata tamaren y que nen turen tama Nitata, che e Jesús.
JOH 10:39 Pues tamar era jaxirobꞌ cꞌani ani uchuquiobꞌ e Jesús tuaꞌ uqꞌuechiobꞌ axin tama e cárcel, pero jaxir intaca locꞌoy tutobꞌ.
JOH 10:40 Entonces sutpa ixin e Jesús teinxejr e xucur Jordán y quetpa yajaꞌ. Jax era e lugar tiaꞌ cay chꞌuyma e Juan bꞌajxan.
JOH 10:41 Y meyra gente cay ixin uwirobꞌ y chenobꞌ: —E Juan machi uche nien inteꞌ milagro, pero tunor lo que cay ojron tamar e Jesús era erach tunor, che e gente era.
JOH 10:42 Y meyra gente cꞌupseyanobꞌ tama e Jesús tama e lugar yajaꞌ.
JOH 11:1 Pues entonces ayan inteꞌ winic xeꞌ ajmuac xeꞌ ucꞌabꞌa Lázaro. Jaxir ajlugar tama e chinam Betania tiaꞌ turuan e María taca usacun xeꞌ ucꞌabꞌa Marta.
JOH 11:2 Pues e María jax xeꞌ cay uyari e perfume tama uyoc Cawinquirar y xeꞌ utaquijse tacar utzutzer ujor. Pues e María taca e Marta era sacumbꞌirobꞌ tuaꞌ e Lázaro.
JOH 11:3 Y tamar era jaxirobꞌ ubꞌijnuobꞌ tuaꞌ uyebꞌtobꞌ axin inteꞌ ojroner tut e Jesús y che: —Cawinquiraret, e winic xeꞌ war achojres ut ajmuac era, che e ojroner era.
JOH 11:4 Entonces conda cꞌotoy e ojroner era tut e Jesús, ojron jaxir y che: —E Lázaro machi tuaꞌ achamay umen e muac era, sino que cꞌani acꞌampesna umen e Dios tuaꞌ atajttzꞌa ucꞌabꞌa y axin atajttzꞌa ucꞌabꞌa Uyunen e Dios ubꞌan, che e Jesús.
JOH 11:5 Pues e Jesús meyra war uyajta utobꞌ e Marta y e María y e Lázaro.
JOH 11:6 Pero conda uyubꞌi que ajmuac e Lázaro, e Jesús machi ixin sino que quetpato tiaꞌ turu chateꞌ día.
JOH 11:7 Entonces conda cꞌapa e chateꞌ día era e Jesús uyare uyajcanuarobꞌ y che: —Incuic otronyajr tama e departamento Judea, che e Jesús.
JOH 11:8 Y che uyajcanuarobꞌ: —Cawajcanseyajet, ¿cꞌar ca amener lo que cay canumse cabꞌa jax tocto tama e lugar yajaꞌ, que e nuquir winicobꞌ cꞌani ani uchamset taca e tun? ¿Y tucꞌa tuaꞌ cꞌani isutpa iꞌxin yajaꞌ otronyajr? che uyajcanuarobꞌ.
JOH 11:9 Y che e Jesús: —¿Machi ca inata que ayan doce hora tama inteꞌ día? Pues tin e axana tama e día machi axin uyobꞌi or uyoc tama ingojr tun porque chequer e bꞌir tama e janchꞌaquenar.
JOH 11:10 Pero tin e axana acbꞌar axin uyobꞌi or uyoc y acucrema porque matucꞌa e janchꞌaquenar, che e Jesús.
JOH 11:11 Pero nacpat era e Jesús sutpa ojron y che: —E Lázaro xeꞌ catzay cawira wayan, pero nen cꞌani inxin imbꞌixqꞌues, che e Jesús.
JOH 11:12 Entonces chenobꞌ uyajcanuarobꞌ: —Cawinquiraret, jay waynij taca war uche war che que axin atzꞌacpa umen e waynij era, che uyajcanuarobꞌ.
JOH 11:13 Pues e Jesús ojron cocha era tuaꞌ uyare uyajcanuarobꞌ que chamay e Lázaro, pero jaxirobꞌ uchebꞌiobꞌ que bꞌojbꞌir waynij taca war uche.
JOH 11:14 Entonces e Jesús ojron más chequer tut uyajcanuarobꞌ y che: —Chamay e Lázaro.
JOH 11:15 Pero nen war intzay que machi turen conda chamay e Lázaro porque tamar era cꞌani ixixin ixcꞌupseyan tamaren conda inxin insuti imbꞌixqꞌues tujam e chamenobꞌ. Pero incuic cawiric e Lázaro era, che e Jesús.
JOH 11:16 Entonces e Tomás xeꞌ arobꞌna Cuach uyare uyet ajcanuarobꞌ y che: —Incuic non ubꞌan tuaꞌ caxin cachamay taca e Jesús, che e Tomás.
JOH 11:17 Pues entonces conda cꞌotoy e Jesús tutiꞌ e chinam Betania utajwi que ayix cuatro día que mujcbꞌir e Lázaro.
JOH 11:18 Pues e chinam era majax innajt tut e chinam Jerusalem,
JOH 11:19 y tamar era meyra gente tama e chinam era tari tuaꞌ uwarajsiobꞌ e Marta taca e María tuaꞌ ucꞌuniobꞌ tamar uchamer uwijtzꞌin.
JOH 11:20 Pero conda e Marta cꞌotoy unata que war acꞌotoy e Jesús, ixin tuaꞌ utajwi tama uni e bꞌir. Pero e María quetpa tama uyotot.
JOH 11:21 Entonces e Marta uyare e Jesús y che: —Niwinquiraret, jay turet nic ani tara niwijtzꞌin machi ani chamay.
JOH 11:22 Pero nen innata que e Dios axin uyajqꞌuet tunor lo que iꞌxin acꞌajti tacar, che e Marta.
JOH 11:23 Y che e Jesús: —Awijtzꞌin cꞌani asutpa abꞌixcꞌa, che e Jesús.
JOH 11:24 Y che e Marta: —Nen innata que axin asutpa abꞌixcꞌa, pero este que acꞌotoy e día conda asujta abꞌixqꞌuesnobꞌ tunor e gente tama ucꞌapesnibꞌir tunor era, che e Marta.
JOH 11:25 Y che e Jesús: —Jax nen xeꞌ tuaꞌ insuti imbꞌixqꞌues tunor tin e chamenobꞌ. Y jax nen ubꞌan xeꞌ inwajcꞌu e cuxtar xeꞌ machi tuaꞌ acꞌapa. Y tunor tin e acꞌupseyanobꞌ tamaren motor que axin achamayobꞌ pero nen cꞌani insuti imbꞌixqꞌuesobꞌ otronyajr.
JOH 11:26 Y tin e turobꞌ tara tor e rum xeꞌ bꞌixirobꞌto xeꞌ war acꞌupseyanobꞌ tamaren machi tuaꞌ achamayobꞌ inyajrer. ¿War ca acꞌupse tunor era? che e Jesús.
JOH 11:27 Y che e Marta: —Incꞌupse yaꞌ, Niwinquiraret, que net jax e Cristo, y que net jax Uyunenet e Dios, y que net jax tin e quetpa tuaꞌ watar, che e Marta.
JOH 11:28 Conda cꞌapa ojron cocha era ixin e Marta tuaꞌ upejca uwijtzꞌin tzꞌustaca xeꞌ jax e María y uyare: —Yopa Cawajcanseyaj, cꞌani oꞌjron tacaret, che e Marta.
JOH 11:29 Pues e María conda uyubꞌi e ojroner era achpa wacchetaca y ixin tuaꞌ utajwi e Jesús.
JOH 11:30 Pero e Jesús merato oꞌchoy macuir e chinam sino que quetpato tama uni e bꞌir tiaꞌ cay ojron taca e Marta.
JOH 11:31 Pero conda e sian ajwarobꞌ xeꞌ turobꞌ tama e otot xeꞌ war ucꞌuniobꞌ e Marta y e María uwirobꞌ que e María achpa wacchetaca y locꞌoy ixin, locꞌoyobꞌ jaxirobꞌ ubꞌan y ixiobꞌ tupat, porque war uchebꞌiobꞌ que e María war axin tor umujrir uwijtzꞌin tuaꞌ aꞌru yajaꞌ.
JOH 11:32 Entonces conda cꞌotoy e María tuyejtzꞌer e Jesús cotuan tut y che: —Niwinquiraret, jay turet nic ani tara, niwijtzꞌin machi ani chamay, che e María.
JOH 11:33 Pero conda e Jesús uwira que war aꞌru e María y que war aruobꞌ tunor e ajwarobꞌ xeꞌ war axiobꞌ tupat, jaxir tzꞌintzꞌa tama uyalma ubꞌan.
JOH 11:34 Entonces e Jesús uyubꞌi tuobꞌ y che: —¿Tiaꞌ imuqui? che e Jesús. Y chenobꞌ: —Cawinquiraret, lar chꞌujcun awira, che e gente era.
JOH 11:35 Y cay uqꞌui e Jesús ubꞌan.
JOH 11:36 Entonces ojronobꞌ e ajwarobꞌ y chenobꞌ: —Iranic que meyra war ani ucꞌani tin e chamay era, chenobꞌ e gente era.
JOH 11:37 Pero ayan tin e ojronobꞌ y che: —Jaxir ayan ucꞌotorer tuaꞌ uyerojse unacꞌut tin e tajpem ani ut. ¿Ma ca nic obꞌna ani tuaꞌ utzꞌacpes e Lázaro tuaꞌ machi achamay? che e gente era.
JOH 11:38 Pues entonces ixin e Jesús esto tiaꞌ mujca xeꞌ chamay era. Y tzꞌintzꞌa tama uyalma otronyajr. Pues e mujr jax inteꞌ chꞌen xeꞌ chembꞌir tama unac inteꞌ witzir xeꞌ macar taca inteꞌ nuxi tun.
JOH 11:39 Y che e Jesús: —Locsenic e tun tama utiꞌ e chꞌen, che e Jesús. Pero e Marta xeꞌ jax usacun e chamen ojron y che: —Niwinquiraret, Intujix. Ayix cuatro día que mujcbꞌir, che e Marta.
JOH 11:40 Y che e Jesús: —¿Machi ca inwaret que jay icꞌupseyan tamaren cꞌani awira utawarer e Dios? che e Jesús.
JOH 11:41 Entonces ixin cora ajwarobꞌ era y ulocsiobꞌ e nuxi tun xeꞌ war umaqui e chꞌen. Entonces e Jesús sutpa chꞌujcsan tichan tut e qꞌuin y che: —Nitatet, chꞌajbꞌex que oybꞌi tunor lo que incꞌajti tacaret.
JOH 11:42 Pues nen innata que oybꞌi tunor lo que incꞌajti tacaret. Pero war incꞌajti cocha era tut e gente tuaꞌ acꞌotoy unatobꞌ que net awebꞌta tarien, che e Jesús.
JOH 11:43 Conda cꞌapa ucꞌajti cocha era, ojron taca inteꞌ nuxi nuc y che: —Lázaro, loqꞌuen tarex, che e Jesús.
JOH 11:44 Y wacchetaca achpa e chamen y locꞌoy bꞌacbꞌir taca e sian bꞌujc. Y bꞌan quetpa ucꞌabꞌ y uyoc y bꞌasbꞌir ujor y uyeroj ubꞌan taca e bꞌujc. Entonces e Jesús uyare e gente era y che: —Cꞌoric e sian bꞌujc tamar y actanic chic, che e Jesús.
JOH 11:45 Pues entonces ayan meyra tujam tin e tuobꞌ e Israel xeꞌ war uwarajsiobꞌ e María que cꞌotoy cꞌupseyanobꞌ tama e Jesús umen lo que cay uwirobꞌ uche.
JOH 11:46 Pero ayan tin e ixiobꞌ tut e fariseobꞌ tuaꞌ uchecsu tutobꞌ lo que cay uwirobꞌ uche e Jesús.
JOH 11:47 Entonces umorojse ubꞌobꞌ e fariseobꞌ taca uwinquir e inmojr sacerdotiobꞌ y taca tunor e concilio tuaꞌ oꞌjronobꞌ y chenobꞌ: —¿Tucꞌa tuaꞌ cache taca e winic era? Porque meyra sian milagro war uche.
JOH 11:48 Jay cawacta bꞌan taca cocha era, tunor e gente axin acꞌupseyanobꞌ tamar, y de allí axin watobꞌ e ajcꞌamparobꞌ romano tuaꞌ utijresobꞌ tunor cacꞌotorer y tunor calugar, che e nuquir winicobꞌ tama e concilio era.
JOH 11:49 Pero ayan inteꞌ tujam e nuquir winicobꞌ era xeꞌ ucꞌabꞌa Caifás xeꞌ jax e más nuquir winquirar tuaꞌ e inmojr sacerdotiobꞌ tama e año era xeꞌ cay ojron y che: —Pues nox matucꞌa war inata tama tunor era,
JOH 11:50 porque machi war ibꞌijnu. Porque más ani bueno jay axin achamay inteꞌ taca winic tamaron xeꞌ tuon e Israel tuaꞌ machi axin asatpa tunor cachinam inyajrer, che e Caifás.
JOH 11:51 Pues machi checta e ojroner era tamar taca jaxir, sino que bꞌijresbꞌir umen e Dios cocha jaxir jax e más nuquir winquirar tuaꞌ e inmojr sacerdotiobꞌ tama e año era. Y jaxir war uchecsu lo que arobꞌna umen e Dios que e Jesús axin achamay tama tunor e gente tama e Israel.
JOH 11:52 Pero e Jesús cꞌani achamay majax tamar taca e gente tuaꞌ e Israel, sino que tamar uchamer era cꞌani axin umorojse tunor umaxtac e Dios tic taca tiaꞌ turobꞌ tama tunor or e rum tuaꞌ acꞌotoy aquetpobꞌ intera tunorobꞌ.
JOH 11:53 Entonces tama e día era e nuquir winicobꞌ cay ubꞌijnuobꞌ tuaꞌ uchamsiobꞌ e Jesús.
JOH 11:54 Pero e Jesús war unata tucꞌa war ubꞌijnuobꞌ e nuquir winicobꞌ era, y tamar era machi ixto war uchecsu ubꞌa war axana tama e departamento Judea, sino que locꞌoy ixin esto tama inteꞌ chinam xeꞌ ucꞌabꞌa Efraín. Pues e chinam era turu tutiꞌ inteꞌ nuxi choquem lugar. Y yajaꞌ ixin e Jesús tuaꞌ aquetpa taca uyajcanuarobꞌ.
JOH 11:55 Entonces conda cꞌanix acꞌotoy e día conda tuaꞌ achempa e nojqꞌuin tuaꞌ e gente tama e Israel xeꞌ ucꞌabꞌa pascua, meyra gente cay cꞌotoyobꞌ esto tama e chinam Jerusalem tuaꞌ uyustesobꞌ ubꞌobꞌ tuaꞌ actana oꞌchoyobꞌ tama e nojqꞌuin conda acꞌotoy e día.
JOH 11:56 Y e gente era war usicbꞌobꞌ e Jesús y conda cꞌotoyobꞌ tama e templo cay uyubꞌi ubꞌobꞌ y chenobꞌ: —¿Tucꞌa ibꞌijnu? ¿Watar ca jaxir tama e nojqꞌuin era ubꞌan, o machi? che e winicobꞌ era.
JOH 11:57 Pero uwinquirobꞌ e inmojr sacerdotiobꞌ y e fariseobꞌ uyajcꞌuobꞌ inteꞌ orden que jay ayan tin e acꞌotoy unata tiaꞌ war aquetpa e Jesús que ucꞌani tuaꞌ uyare e sacerdotiobꞌ era tuaꞌ erer ujajpiobꞌ tuaꞌ uqꞌuechiobꞌ axin tama e cárcel.
JOH 12:1 Pues entonces conda ucꞌanto seis día tuaꞌ acꞌotoy e nojqꞌuin pascua, ixin e Jesús esto tama e chinam Betania. Jax e chinam era tiaꞌ turu e Lázaro xeꞌ sujta bꞌixqꞌuesna tujam e chamenobꞌ umen e Jesús.
JOH 12:2 Y cay uchiobꞌ inteꞌ cena tuaꞌ utattzꞌiobꞌ ucꞌabꞌa e Jesús. Y e Marta jax xeꞌ war upuqui e comida tut e gente axin. Y e Lázaro ya turu tujam e inmojr gente xeꞌ war awiobꞌ taca e Jesús.
JOH 12:3 Entonces e María utares inteꞌ media botella perfume xeꞌ meyra atujri xeꞌ ucꞌabꞌa nardo. Y cay uyari e perfume era tupat uyoc e Jesús, y de allí cay utaquijse taca utzutzer ujor. Y bꞌutcꞌa tunor e otot era taca uyujtzner e perfume era.
JOH 12:4 Y ayan inteꞌ tujam uyajcanuarobꞌ e Jesús xeꞌ ucꞌabꞌa Judas Iscariote xeꞌ jax uyunen e Simón. Pues e Judas era jax xeꞌ quetpa tuaꞌ utuchꞌi ut e Jesús tut tin e war aqꞌuijna uwirobꞌ tuaꞌ erer uqꞌuechiobꞌ axin. Entonces che e Judas:
JOH 12:5 —¿Y tucꞌa tuaꞌ machi achompa e nuxi perfume era tama 300 denarios tuaꞌ uyubꞌion ani catacre tin e tzajtaca utobꞌ? che e Judas.
JOH 12:6 Pues ojron e Judas cocha era majax umen que war uyajta ut tin e tzajtaca ut, sino que umen que jaxir quetpa tuaꞌ uqꞌueche axin ubolsa e tumin tuaꞌ e Jesús y tuaꞌ e inmojr uyajcanuarobꞌ, y jaxir war uxujchꞌi cora cora lo que ayan tama e bolsa era.
JOH 12:7 Pero che e Jesús: —Actan uchic lo que war uche era. Pues jaxir war ani uquete e perfume era tanibꞌa tuaꞌ ucꞌampes conda nen tuaꞌ inxin inmujca.
JOH 12:8 Pues tin e tzajtaca ut cꞌani aquetpa tijam iraj iraj, pero nen machi tuaꞌ inquetpa tacarox inyajrer cocha turen era, che e Jesús.
JOH 12:9 Pues entonces meyra gente tuaꞌ e Israel cꞌotoy unatobꞌ que e Jesús turu tama e chinam Betania y tamar era ixin uwirobꞌ. Pero conda ixiobꞌ cꞌani uwirobꞌ e Lázaro ubꞌan cocha jax jaxir xeꞌ bꞌixqꞌuesna tujam e chamenobꞌ umen e Jesús.
JOH 12:10 Y tamar era uwinquirobꞌ e inmojr sacerdotiobꞌ cay ubꞌijnuobꞌ tuaꞌ uchamsiobꞌ e Lázaro ubꞌan.
JOH 12:11 Porque umen lo que chena tama e Lázaro meyra gente cay uyactobꞌ e canseyaj tuaꞌ e sacerdotiobꞌ y cay ixiobꞌ tupat e Jesús tuaꞌ acꞌupseyanobꞌ tamar.
JOH 12:12 Pues entonces tunor e sian gente xeꞌ cꞌotoyobꞌ tama e chinam Jerusalem tama e nojqꞌuin pascua cay uyubꞌiobꞌ que cꞌani acꞌotoy e Jesús tama e chinam era ubꞌan.
JOH 12:13 Entonces cay uxuriobꞌ uyopor e xan y uqꞌuechiobꞌ ixin tuaꞌ axin uchꞌamiobꞌ e Jesús tutiꞌ e chinam, y cay aruobꞌ taca inteꞌ nuxi nuc y chenobꞌ: —Catattzꞌi ucꞌabꞌa Cadiosir. Chojbꞌesbꞌir jaxir xeꞌ axin watar tama ucꞌabꞌa Cawinquirar. Chojbꞌesbꞌir jaxir xeꞌ tuaꞌ aquetpa e nuxi Ajcꞌotorer tama e Israel, che e sian gente era.
JOH 12:14 Y e Jesús utajwi inteꞌ chuchu chij y turuan tamar bꞌan cocha chꞌar tzꞌijbꞌabꞌir tama uyojroner e Dios y che:
JOH 12:15 Ira ixbꞌacta, ajchinamox tuaꞌ e chinam Sión xeꞌ jax e Jerusalem. Chꞌujcunic iwira que watar Iwajcꞌotorer war aturuan tama upat inteꞌ chuchu chij, xeꞌ che tama uyojroner e Dios.
JOH 12:16 Pues conda numuy tunor era uyajcanuarobꞌ e Jesús machi unatobꞌ tucꞌa war che tunor era. Pero conda tꞌabꞌay ixin e Jesús tut e qꞌuin cꞌotoy unatobꞌ. Pues cꞌajpa umenerobꞌ que tunor lo que numuy tama e Jesús chꞌar tzꞌijbꞌabꞌir tama uyojroner e Dios. Y bꞌan cocha chꞌar tzꞌijbꞌabꞌir y bꞌan numuy.
JOH 12:17 Pues tunor tin e turobꞌ taca e Jesús conda upejca e Lázaro tama umujr tuaꞌ usuti ubꞌixqꞌues tujam e chamenobꞌ cay uchecsu tunor lo que uwirobꞌ tic taca tiaꞌ ixiobꞌ.
JOH 12:18 Y tamar era locꞌoyobꞌ meyra gente tama e chinam era tuaꞌ axin utajwiobꞌ e Jesús tama e bꞌir porque cay uyubꞌiobꞌ que sujta bꞌixqꞌuesna e Lázaro tujam e chamenobꞌ umener.
JOH 12:19 Y e fariseobꞌ cay ojronobꞌ jaxobꞌ taca y chenobꞌ: —Chꞌujcunic iwira que non mix tucꞌa tuaꞌ cache taca e sian gente era porque tunorobꞌ war uyactonobꞌ tuaꞌ axiobꞌ tupat e winic era, che e fariseobꞌ era jaxobꞌ taca.
JOH 12:20 Pues tujam e sian gente xeꞌ cꞌotoyobꞌ tama e chinam Jerusalem tama e nojqꞌuin era ayan cora gente xeꞌ tariobꞌ tama inteꞌ lugar griego ubꞌan.
JOH 12:21 Y cꞌotoyobꞌ tut e Felipe xeꞌ jax inteꞌ ajcanuar tuaꞌ e Jesús xeꞌ tari tama e chinam Betsaida tama e departamento Galilea. Pues jaxirobꞌ ojronobꞌ tacar y chenobꞌ: —Cꞌani ani cawira ut e Jesús, che e winicobꞌ griego era.
JOH 12:22 Entonces ixin e Felipe tuaꞌ uyare e Andrés, y ixiobꞌ chatertiobꞌ tuaꞌ uyareobꞌ e Jesús.
JOH 12:23 Y che e Jesús: —War acꞌotoy e hora conda nen xeꞌ Uyunenen e winic cꞌani insutpa inxin tut e qꞌuin.
JOH 12:24 Cꞌani inwareox era que jay machi apajcꞌa ingojr ut e trigo tama e rum tuaꞌ oꞌcꞌoy upat y acuxpa ut, aquetpa ingojr taca ut. Pero jay apajcꞌa y oꞌcꞌoy upat y acuxpa ut, meyra sian ut tuaꞌ uyajcꞌu tama ingojr ut trigo era.
JOH 12:25 Pues tin e uyajta ut ucuxtar tara tor e rum axin usati ucuxtar era. Pero tin e machi uyajta ut ucuxtar tara tor e rum machi tuaꞌ usati e cuxtar xeꞌ machi tuaꞌ acꞌapa.
JOH 12:26 Y tin e cꞌani uche nipatnar ucꞌani tuaꞌ acꞌupseyan tut niwojroner, y tiaꞌ turen nen yajaꞌ tuaꞌ aturuan tin e war uche nipatnar ubꞌan. Y Nitata cꞌani utattzꞌi tunor tin e war uche nipatnar, che e Jesús.
JOH 12:27 Entonces ojron e Jesús y che: —War intzꞌintzꞌa tama niwalma. ¿Y tucꞌa tuaꞌ inware era? ¿Cꞌani ca inware que: “Nitatet, corpesen tamar lo que aquetpa tuaꞌ innumse nibꞌa era?” Machi, porque tamar era tarien tor e rum.
JOH 12:28 Nitatet, chectes atawarer tut e gente era, che e Jesús. Y de allí cay uyubꞌiobꞌ inteꞌ nuxi nuc xeꞌ tari tut e qꞌuin xeꞌ che: —Inchectesix nitawarer tut e gente, y cꞌani inchectes otronyajr era, che e nuc xeꞌ tari tut e qꞌuin.
JOH 12:29 Entonces cay ojronobꞌ e sian gente xeꞌ turobꞌ era y chenobꞌ: —Bꞌajcꞌat quiricna ut e qꞌuin era, chenobꞌ. Pero ojronobꞌ e inmojr gente y chenobꞌ: —Jax inteꞌ ángel xeꞌ cay ojron taca e Jesús, chenobꞌ e inmojr era.
JOH 12:30 Entonces che e Jesús: —E nuc xeꞌ tari tut e qꞌuin machi tuaꞌ utacren innata chien nen, sino tari tuaꞌ utacriox ixcꞌotoy inata chien nen.
JOH 12:31 Cꞌotix e hora tuaꞌ aꞌrobꞌnobꞌ e gente tara tor e rum que ucꞌani tuaꞌ ajajtzꞌobꞌ, y cꞌotix e hora conda cꞌani aloqꞌuesna e diablo xeꞌ war ani acꞌotori tara tor e rum.
JOH 12:32 Y conda nen inxin inchꞌubꞌna tut e cruz cꞌani axin apejcna uyalmobꞌ tunor e gente tara tor e rum tuaꞌ acꞌotoy acꞌupseyanobꞌ tamaren, che e Jesús.
JOH 12:33 Y tamar era cꞌotoy unatobꞌ cocha tuaꞌ achamay jaxir.
JOH 12:34 Pero ojronobꞌ e sian gente era taca e Jesús y chenobꞌ: —Coybꞌix tama uley e Moisés que e Cristo ma tiaꞌ tuaꞌ axin achamay, y que cꞌani aturuan iraj iraj. ¿Y tucꞌa tuaꞌ war awareon que Uyunen e winic axin achꞌubꞌna tut inteꞌ cruz tuaꞌ achamesna? ¿Y chi Uyunen e winic xeꞌ war awareon tamar? che e gente era.
JOH 12:35 Entonces che e Jesús: —Coner ayanto e janchꞌaquenar tijam nox, pero mix jax tama meyra tiempo tuaꞌ inturuan tacarox. Y tamar era war inwareox que xanenic conda ayanto e janchꞌaquenar tiut bꞌajxan que e incsibꞌaner axin umaquiox. Porque tin e axana tama e incsibꞌaner machi war unata tiaꞌ war acꞌotoy.
JOH 12:36 Turbꞌanic ibꞌa tuaꞌ ixcꞌupseyan tama e janchꞌaquenar conda turuto tacarox tuaꞌ uyubꞌi aquetpa e janchꞌaquenar era tama iwalma, che e Jesús. Conda cꞌapa ojron cocha era locꞌoy e Jesús tujamobꞌ y ixin mucwan cora tutobꞌ, porque cꞌani aquetpa ubꞌajner.
JOH 12:37 Pues entonces e Jesús cay uche meyra milagro tut e gente tuaꞌ e Israel pero machi ixto cꞌani acꞌupseyanobꞌ tamar.
JOH 12:38 Pero ucꞌani tuaꞌ acꞌapa achempa lo que chꞌar tzꞌijbꞌabꞌir umen e profeta Isaías tiaꞌ che que: Niwinquiraret, mamajchi cꞌani acꞌupseyan tama e ojroner ticabꞌa, y nien machi cꞌotoy unatobꞌ tucꞌa era conda uwirobꞌ acꞌotorer, che tama e Isaías.
JOH 12:39 Y cocha bꞌan chꞌar tzꞌijbꞌabꞌir tama uyojroner e Dios y bꞌan numuy que e gente machi cꞌotoy cꞌupseyanobꞌ tama e Jesús tama e hora era. Pero ayanto lo que chꞌar tzꞌijbꞌabꞌir umen e Isaías tiaꞌ che:
JOH 12:40 E Dios ixin umaqui unacꞌutobꞌ tuaꞌ machi eꞌronobꞌ, y uche aquetpa sispanen uyalmobꞌ tuaꞌ machi acꞌotoy unatobꞌ lo que war achecsuna tutobꞌ, y tuaꞌ machi asutpobꞌ tut e Dios tuaꞌ atzꞌacnobꞌ umener, xeꞌ che tama e Isaías.
JOH 12:41 Pues e Isaías cay ojron cocha era tama e onian tiempo umen que cay uwira utawarer e Jesús y tamar era cay ojron tamar.
JOH 12:42 Pero motor que bꞌan chꞌar tzꞌijbꞌabꞌir pero ayanto meyra tujam e gente tama e Israel xeꞌ cay cꞌupseyanobꞌ tama e Jesús. Y ayan ubꞌan tin e nuquir winicobꞌ xeꞌ cay cꞌupseyanobꞌ tamar, pero machi war uchecsu ubꞌobꞌ tut e gente umen que war ubꞌacriobꞌ e fariseobꞌ xeꞌ erer ani ulocsiobꞌ tama e sinagoga.
JOH 12:43 Pues más war ucꞌaniobꞌ e tattzꞌarsiaj lo que erer uchꞌamiobꞌ tuaꞌ e winicobꞌ que e tattzꞌarsiaj lo que erer ani uchꞌamiobꞌ tuaꞌ e Dios.
JOH 12:44 Entonces ojron e Jesús taca inteꞌ nuxi nuc y che: —Tin e acꞌupseyan tamaren, war acꞌupseyan majax tamaren taca sino que war acꞌupseyan tama Nitata ubꞌan xeꞌ uyebꞌta tarien.
JOH 12:45 Y tin e uwiren, war uwira majax nen taca sino que war uwira tin e uyebꞌta tarien ubꞌan.
JOH 12:46 Nen tarien tara tor e rum tuaꞌ injanchꞌacnes tunor e gente y tuaꞌ intacre tunor tin e acꞌotoy acꞌupseyanobꞌ tamaren tuaꞌ machi ixto aquetpobꞌ macuir e incsibꞌaner.
JOH 12:47 Pero jay ayan tin e uyubꞌi niwojroner y machi oꞌbꞌianobꞌ tut, majax nen xeꞌ tuaꞌ inxin insatiobꞌ. Porque nen tarien tara tor e rum majax tuaꞌ insati e gente sino que tarien tuaꞌ incorpesobꞌ.
JOH 12:48 Pero ayan tin e cꞌani ubꞌijnu uwira conda uwirobꞌ lo que war uche tin e war uxejbꞌe niut y xeꞌ war uxejbꞌe ut niwojroner. Pues jax niwojroner xeꞌ cꞌani usatpes e gente era tama ucꞌapesnibꞌir tunor era.
JOH 12:49 Porque nen machi war onjron jax taca lo que incꞌani nen, sino que war incanse jax taca lo que uyaren tuaꞌ inche Nitata xeꞌ uyebꞌta tarien.
JOH 12:50 Y nen innata que uyojroner Nitata jax lo que uyajcꞌon e cuxtar xeꞌ machi tuaꞌ acꞌapa. Y tamar era war inware jax taca lo que uyaren Nitata tuaꞌ inware, che e Jesús tama inteꞌ nuxi nuc.
JOH 13:1 Pues entonces cꞌotoy e día conda cꞌanix achena e nojqꞌuin pascua y e Jesús war unata que cꞌanix acꞌotoy e hora conda tuaꞌ alocꞌoy tara tor e rum tuaꞌ asutpa axin tut Utata tut e qꞌuin. Y war uyajta utobꞌ meyra tunor tin e war acꞌupseyanobꞌ tamar, y tamar era cꞌani uchectes tutobꞌ cobꞌa war uyajta utobꞌ tunorobꞌ.
JOH 13:2 Y ya turu e Jesús tor e mesa war aweꞌ taca uyajcanuarobꞌ tama e tarde. Pero cocha ochoyix e diablo tama uyalma e Judas Iscariote xeꞌ jax uyunen e Simón, jaxir war ubꞌijnu tuaꞌ axin utuchꞌi ut e Jesús tut tin e war aqꞌuijna uwirobꞌ ut tuaꞌ aqꞌuejcha axin tama e cárcel.
JOH 13:3 Pues e Jesús war unata que Utata cꞌapa uyajcꞌu tunor lo ayan tama ucꞌabꞌ, y que tari tut e Dios y que cꞌani asutpa axin tut e Dios otronyajr.
JOH 13:4 Y conda war awiobꞌ tor e mesa, achpa wawan e Jesús y ulocse intꞌojr ubꞌujc y uchꞌami inteꞌ payuj y ubꞌaqꞌui tama unac.
JOH 13:5 Entonces uyari e jaꞌ tama inteꞌ upojquibꞌ cꞌabꞌ y cay upoqui uyocobꞌ uyajcanuarobꞌ, y cay utaquijse uyocobꞌ taca e payuj lo que bꞌacꞌar tama unac.
JOH 13:6 Entonces conda cꞌotoy tut e Pedro tuaꞌ upoqui uyoc cay ojron jaxir y che: —Niwinquiraret, ¿net ca tuaꞌ apoqui nioc? che e Pedro:
JOH 13:7 Y che e Jesús: —Machito anata tucꞌa tuaꞌ war inche tunor era. Pero icꞌotoyto anata, che e Jesús.
JOH 13:8 Entonces sutpa ojron e Pedro che: —Pero nen ma tiaꞌ tuaꞌ inwactet apoqui nioc, che e Pedro. Entonces e Jesús che: —Jay machi awacta abꞌa tuaꞌ impoqui oꞌc, ma erer iquetpa inteꞌ niwajcanuar, che e Jesús.
JOH 13:9 Entonces che e Pedro: —Jay bꞌan anata, Niwinquiraret, ira apoqui nioc taca, sino que poco nicꞌabꞌ y poco nijor ubꞌan, che e Pedro.
JOH 13:10 Y che e Jesús: —Tin e wartocto acꞌapa aꞌti machi ucꞌani tuaꞌ aꞌti otronyajr, sino que jax taca uyoc tuaꞌ apoctzꞌa. Y tamar era nox matucꞌa e bꞌonemar tamarox. Pero ayan inteꞌ xeꞌ ayanto e bꞌonemar tamar, che e Jesús.
JOH 13:11 Pues e Jesús cay che que ayan inteꞌ xeꞌ ayanto e bꞌonemar tamar porque war unata chi umen tuaꞌ atujchꞌa.
JOH 13:12 Entonces conda cꞌapa upoqui uyoc uyajcanuarobꞌ, sutpa ulapi ubꞌujc y turuan tor e mesa otronyajr y che: —¿Inata ca tucꞌa inche tacarox era?
JOH 13:13 Nox iwaren que nen Iwajcanseyajen y que nen Iwinquiraren. Y bueno que war iwaren cocha era porque jax.
JOH 13:14 Pues jay nen xeꞌ Iwajcanseyajen y xeꞌ Iwinquiraren cay impoqui iyoc nox, entonces nox ubꞌan ucꞌani tuaꞌ ipoqui uyocobꞌ e inmojr inteꞌ intiox.
JOH 13:15 Pues cay inche tunor era tuaꞌ inwirsiox lo que ucꞌani tuaꞌ iche nox. Chenic ubꞌan nox bꞌan cocha cay inche nen era.
JOH 13:16 Cꞌani inwareox era que inteꞌ man majax más nuquir winic que upatron. Y tin e ebꞌetbꞌir axin majax más nuquir winic que tin e uyebꞌta ixin.
JOH 13:17 Pues jay inata tunor era cꞌani ixtzay jay iturbꞌa ibꞌa tamar.
JOH 13:18 ’Pero machi war onjron tama tunorox, porque nen innata chi xeꞌ sicbꞌabꞌir nimener. Y cꞌani acꞌapa achempa tunor lo que chꞌar tzꞌijbꞌabꞌir tama uyojroner e Dios tiaꞌ che que: “Tin e cay weꞌ tacaren cꞌani aqꞌuijna nipater.” Bꞌan che tama uyojroner e Dios.
JOH 13:19 War inwareox tunor era bꞌajxan conda merato anumuy porque tamar era conda axin anumuy ixixin ixcꞌupseyan tamaren que nen jax e Ajcorpesiaj tuaꞌ tunor e gente tara tor e rum.
JOH 13:20 Cꞌani inwareox era que tunor tin e axin uchꞌami tin e inwebꞌta axin war uchꞌamien nen ubꞌan, y tunor tin e uchꞌamien nen war uchꞌami ubꞌan tin e uyebꞌta tarien, che e Jesús.
JOH 13:21 Entonces conda e Jesús cꞌapa ojron cocha era cay uqꞌui tama uyalma y uyare uyajcanuarobꞌ y che: —Cꞌani inwareox era que ayan inteꞌ tijam xeꞌ tuaꞌ axin utuchꞌien, che e Jesús.
JOH 13:22 Entonces uyajcanuarobꞌ cay uwira ubꞌobꞌ, pero machi unatobꞌ chi tamar war oꞌjron.
JOH 13:23 Y ayan inteꞌ uyajcanuar xeꞌ más achojresna ut umen e Jesús xeꞌ war aweꞌ tuyejtzꞌer tama e wiar era.
JOH 13:24 Entonces e Simón Pedro cay uche ucꞌabꞌ tut e ajcanuar era xeꞌ turu tuyejtzꞌer e Jesús tuaꞌ asutpa uyubꞌi tuaꞌ e Jesús que: “¿Chi umen tuaꞌ itujchꞌa?”
JOH 13:25 Entonces e ajcanuar era uqꞌueche uyej más tut uchiquin e Jesús y uyubꞌi tuaꞌ y che: —¿Chi era, Niwinquiraret? che uyajcanuar era.
JOH 13:26 Y che e Jesús: —Cꞌani inxere imbꞌijc e pan tuaꞌ intzꞌayi y tin e iwira que inwajcꞌu e pan era, natanic que jax era, che e Jesús. Y tamar era cay uxere imbꞌijc e pan y utzꞌayi, y uyajcꞌu e Judas Iscariote xeꞌ uyunen e Simón.
JOH 13:27 Entonces conda e Judas uchꞌami e pan wacchetaca ochoy e Satanás tama uyalma. Entonces ojron e Jesús y che: —Lo que quetpa tuaꞌ ache, chen rajxa era, che e Jesús.
JOH 13:28 Pues mamajchi xeꞌ turobꞌ tor e mesa era cꞌotoy unatobꞌ tucꞌa tuaꞌ ojron e Jesús cocha era taca e Judas.
JOH 13:29 Pues e Judas jax xeꞌ quetpa tuaꞌ uqꞌueche axin e tumin tuaꞌ e inmojr era, y tamar era ayan tin e cay ubꞌijnuobꞌ que e Jesús uyare e Judas tuaꞌ axin umani lo que ucꞌani tama e nojqꞌuin era. Pero ayan ubꞌan tin e cay ubꞌijnuobꞌ que cꞌani axin uyajcꞌu e tumin tin e tzajtaca ut.
JOH 13:30 Entonces conda e Judas cꞌapa uchꞌami e pan wacchetaca locꞌoy ixin, cocha warix acbꞌare era.
JOH 13:31 Pues entonces conda cꞌapa locꞌoy e Judas cay ojron e Jesús y che: —Coner era cꞌani achecta nitawarer xeꞌ Uyunenen e winic, y cꞌani achecta utawarer Catata Dios tamaren ubꞌan.
JOH 13:32 Y cocha nen era xeꞌ Uyunenen e winic cꞌani inchectes utawarer Catata Dios, jaxir cꞌani asutpa uchectes nitawarer nen ubꞌan, y bꞌan tuaꞌ uche rajxa era.
JOH 13:33 Pues machi ixto tuaꞌ inquetpa tacarox nox xeꞌ bꞌanox cocha nimaxtac. Nox ixixin isajquen, pero bꞌan cocha cay inware e winicobꞌ xeꞌ tuobꞌ e Israel y bꞌan tuaꞌ inwareox nox ubꞌan: “Tiaꞌ inxin nen, nox machi uyubꞌiox ixcꞌotoy.”
JOH 13:34 Cꞌani inwareox inteꞌ ojroner xeꞌ imbꞌutz xeꞌ jax era: Yajtanic ut ibꞌa inteꞌ intiox. Bꞌan cocha nen war inyajta iut, y bꞌan ubꞌan tuaꞌ iyajta ut ibꞌa inteꞌ intiox.
JOH 13:35 Porque jay iyajta ut ibꞌa tunorox entonces tunor e gente tara tor e rum cꞌani acꞌotoy unatobꞌ que nox niwajcanuarox, che e Jesús.
JOH 13:36 Entonces e Pedro uyubꞌi tuaꞌ e Jesús y che: —Niwinquiraret, ¿tiaꞌ war iꞌxin? che e Pedro. Y e Jesús che: —Net machi uyubꞌiet iꞌxin tiaꞌ war inxin era, pero nacpat era erer iꞌxin tanipat, che e Jesús.
JOH 13:37 Y che e Pedro: —Niwinquiraret, ¿tucꞌa tuaꞌ machi uyubꞌien inxin tapat coner era? Nen turenix tuaꞌ inwajcꞌu nibꞌa tamaret este que inxin inchamesna ani tamaret jay bꞌan ucꞌani, che e Pedro.
JOH 13:38 Y che e Jesús: —¿O erachet ca nic que cꞌani awajcꞌu acuxtar tamaren? Cꞌani inwaret era que conda ne mato aꞌru e acꞌach tama e acbꞌar era, net iꞌxin amuqui nicꞌabꞌa uxyajr, che e Jesús.
JOH 14:1 Entonces ojron e Jesús y che: —Ira ixtzꞌintzꞌa tama iwalma. Cꞌupseyanenic tama e Dios, y cꞌupseyanenic tamaren ubꞌan.
JOH 14:2 Tiaꞌ turu Nitata tut e qꞌuin ayan meyra otot xeꞌ ustabꞌirix tiaꞌ tuaꞌ ixturuan. Jay majax bꞌan ani, nen inwareox ani. Pues era cꞌani inxin onstes inteꞌ lugar tibꞌa.
JOH 14:3 Y conda acꞌapa onstes e lugar tibꞌa cꞌani insutpa waten otronyajr tuaꞌ inqꞌuechiox ixixin tuaꞌ ixturuan tacaren.
JOH 14:4 Y nox era warix inata e bꞌir tuaꞌ ixcꞌotoy tiaꞌ war inxin nen, che e Jesús.
JOH 14:5 Entonces ojron e Tomás y che: —Niwinquiraret, non era machi canata tiaꞌ war iꞌxin. ¿Y cocha tuaꞌ canata tin e bꞌir tuaꞌ cacꞌotoy tamar? che e Tomás.
JOH 14:6 Y che e Jesús: —Nen e bꞌiren tuaꞌ acꞌotoy inteꞌ tut e Dios. Y tamaren ayan e ojroner xeꞌ erach, y tamaren ayan e cuxtar xeꞌ machi tuaꞌ acꞌapa. Y tamaren taca erer acꞌotoy inteꞌ tut Catata Dios.
JOH 14:7 Jay inata chi ani nen, inata ani chi Nitata. Pero era inatix chi Nitata y cay iwira ut, che e Jesús.
JOH 14:8 Y che e Felipe: —Niwinquiraret, actanon cawiric tin e Tatabꞌir y tzꞌacar era ticoit, che e Felipe.
JOH 14:9 Entonces e Jesús uyare e Felipe y che: —Meyra tiempo turuanen tacarox y merato inata chien nen. Pues tin e unatix chien nen, unata ubꞌan chi Nitata. ¿Pues tucꞌa tuaꞌ warto iwaren que: “Actanon cawiric tin e Tatabꞌir?”
JOH 14:10 ¿Merato ca icꞌupse que e Tatabꞌir turu tacaren y que nen turen tama Nitata? Tunor lo que war inwareox era machi war inwareox tamar taca nibꞌijnusiaj nen, sino que jax Nitata xeꞌ turu tacaren xeꞌ war uche upatnar.
JOH 14:11 Cꞌupsenic lo que inwareox que nen turen tama Nitata, y que Nitata turu tacaren. Jay machi cꞌani icꞌupse lo que war inwareox era, pero cꞌupsenic e sian milagro lo que war inche.
JOH 14:12 Cꞌani inwareox era que tunor tin e war acꞌupseyan tamaren cꞌani axin uche e milagro bꞌan cocha war inche nen. Y ayanto lo que más nojta xeꞌ tuaꞌ axin uchiobꞌ ubꞌan umen que nen cꞌani inxin tiaꞌ turu Nitata.
JOH 14:13 Y nen cꞌani inche tunor lo que icꞌajti taca e Dios tama nicꞌabꞌa tuaꞌ inche achecta utawarer Nitata.
JOH 14:14 Y nox erer icꞌajti tunor lo que icꞌani tacaren tama nicꞌabꞌa, y nen tuaꞌ inwajcꞌox tunor era, che e Jesús.
JOH 14:15 Entonces che e Jesús: —Jay war icꞌanien, ubꞌianenic tut niwojroner.
JOH 14:16 Y nen cꞌani incꞌajti taca Nitata y jaxir tuaꞌ uyebꞌta watar otronteꞌ Ajtacarsiaj tuaꞌ aturuan tacarox iraj iraj
JOH 14:17 xeꞌ jax Unawalir e Dios xeꞌ erach. Tin e turu tara tor e rum machi uyubꞌi uchꞌamiobꞌ Unawalir e Dios porque machi uwirobꞌ ut y nien machi unatobꞌ tucꞌa era. Pero nox war ixto inata tucꞌa Unawalir e Dios porque jaxir turu tacarox y cꞌani aquetpa tacarox iraj iraj.
JOH 14:18 Y nen machi tuaꞌ inwactox ibꞌajner, sino que cꞌani insutpa waten tuaꞌ inturuan tacarox.
JOH 14:19 Pues machix tuaꞌ eixna tuaꞌ acꞌotoy e día conda e gente tara tor e rum machix tuaꞌ uwirenobꞌ, pero nox cꞌani ixto iwiren. Y cocha nen tuaꞌ insutpa imbꞌixcꞌa, nox tuaꞌ ixsutpa ixbꞌixcꞌa ubꞌan.
JOH 14:20 Y conda acꞌotoy e día era nox cꞌani inata que nen turen tama Nitata y que nox turox tamaren y que nen turen tamarox.
JOH 14:21 Tin e uchꞌami niwojroner y acꞌupseyan tut, war uchectes ubꞌa que war ucꞌanien. Y tin e war ucꞌanien cocha era cꞌani ayajtna ut umen Nitata, y nen ubꞌan tuaꞌ inyajta ut y cꞌani inxin inchectes nibꞌa tut jaxir, che e Jesús.
JOH 14:22 Y che e Judas (pero majax e Judas Iscariote): —Niwinquiraret, ¿y tucꞌa tuaꞌ cꞌani achectes abꞌa ticoit taca y majax tut tunor gente tara tor e rum ubꞌan? che e Judas era.
JOH 14:23 Entonces che e Jesús: —Tin e war ucꞌanien war acꞌupseyan tut niwojroner. Y jaxir cꞌani ayajtna ut umen Nitata. Y nen taca Nitata cꞌani caxin caturuan tamar jaxir.
JOH 14:24 Pero tin e machi war ucꞌanien machi war oꞌbꞌian tut niwojroner. Pues e ojroner era lo que war iyubꞌi majax tanibꞌa sino que tari tuaꞌ Nitata xeꞌ uyebꞌta tarien.
JOH 14:25 ’Pues war inwareox tunor era conda turento tacarox.
JOH 14:26 Pero cꞌani inware Nitata tuaꞌ uyebꞌta watar Unawalir e Dios tuaꞌ aquetpa tacarox y tuaꞌ utacriox. Pues jaxir cꞌani ucansiox tunor lo que ayan, y cꞌani utacriox tuaꞌ acꞌajpa imener tunor lo que cay inwareox tama ucajyesnibꞌir tunor era.
JOH 14:27 ’Y cꞌani inwacta nijiriar tacarox y cꞌani inwajcꞌox nijiriar tuaꞌ aquetpa tama iwalma, pero e jiriar lo que war inwajcꞌox era majax bꞌan cocha ayan tara tor e rum. Pues ira ixtzꞌintzꞌa tama iwalma y ira ixbꞌacta.
JOH 14:28 Pues cay iyubꞌi inwareox que cꞌani inxin, pero watento otronyajr tuaꞌ inturuan tacarox. Jay war ani icꞌanien ixtzay ani tuaꞌ inata que cꞌani inxin inturuan taca Nitata porque jaxir más nojta que nen.
JOH 14:29 Pues war inwareox tunor era bꞌajxan, porque tamar era conda ixixin iwira anumuy tunor era cꞌani ixcꞌupseyan tamaren.
JOH 14:30 ’Pero machi ixto tuaꞌ onjron más tacarox era porque watarix e diablo xeꞌ war acꞌotori tara tor e rum. Pero jaxir ma cocha erer acꞌotori tama nijor nen.
JOH 14:31 Pero e gente tara tor e rum ucꞌani tuaꞌ acꞌotoy unatobꞌ que nen inyajta ut Nitata y que inche tunor bꞌan taca cocha uyaren. Pero achpenic y loqꞌuicon incuic tara, che e Jesús.
JOH 15:1 Entonces ojron e Jesús y che: —Nen bꞌanen cocha unojwir inteꞌ chꞌan xeꞌ ucꞌabꞌa uva. Y Nitata lar tacar inteꞌ ajpatnar xeꞌ war apatna tamar iraj iraj.
JOH 15:2 Y tunor ucꞌabꞌ e chꞌan era xeꞌ machi uyajcꞌu uyutir jaxir uxuri uchoqui. Y ucꞌabꞌ e chꞌan era xeꞌ war uyajcꞌu uyutir war asujsa achojca tunor umutzuquir tuaꞌ uyajcꞌu más uyutir.
JOH 15:3 Pues nox larox cocha uchꞌajnar e uva era xeꞌ susbꞌirix umutzuquir ut y bꞌanox ubꞌan umen e canseyaj lo que cay inwajcꞌox.
JOH 15:4 Quetpenic tamaren y nen cꞌani inquetpa tamarox. Pues inteꞌ ucꞌabꞌ e chꞌan ma erer uyajcꞌu uyutir jay majax chꞌur tama unojwir. Y bꞌan ixto nox ubꞌan, machi uyubꞌiox iwajcꞌu iyutir jay machi ixquetpa tamaren.
JOH 15:5 ’Pues nen bꞌanen cocha unojwir inteꞌ chꞌan, y nox larox tacar ucꞌabꞌ e chꞌan era. Jay inteꞌ winic aquetpa tamaren y jay nen inquetpa tamar, jaxir tuaꞌ uyajcꞌu meyra uyutir. Y tamar era chequer que matucꞌa uyubꞌi iche jay machi ixquetpa tamaren.
JOH 15:6 Tin e machi aquetpa tamaren, axin achojca najtir tuaꞌ ataqui. Y axin amorojsena tuaꞌ ayajra tama e cꞌajc tuaꞌ acꞌapa apuruy.
JOH 15:7 ’Pero jay ixquetpa tamaren y niwojroner aquetpa tamarox, erer icꞌajti tunor lo que icꞌani tacaren, y ixixin ixajcꞌuna tunor era.
JOH 15:8 Y jay nox ixixin iwajcꞌu meyra iyutir xeꞌ erach, entonces axin atajttzꞌa meyra ucꞌabꞌa Cadiosir, y cꞌani aquetpa chequer que nox niwajcanuarox.
JOH 15:9 Bꞌan cocha Nitata war uyajta niut y bꞌan cocha era war inyajta iut nox ubꞌan. Quetpenic tama nicꞌunersiaj era.
JOH 15:10 Jay war ixcꞌupseyan tut niwojroner, chequer que war ixquetpa tama nicꞌunersiaj. Bꞌan cocha nen xeꞌ war incꞌupseyan tut uyojroner Nitata y tamar era war inquetpa tama ucꞌunersiaj ubꞌan.
JOH 15:11 ’War inwareox tunor era tuaꞌ erer aquetpa nitzayer tamarox, y que nitzayer era erer axin ubꞌutꞌi tunor iwalma.
JOH 15:12 Jax era lo que cꞌani inwareox tuaꞌ iche: Yajtanic ut ibꞌa inteꞌ intiox, bꞌan cocha nen war inyajta iut.
JOH 15:13 Tin e uyajta ut upiar meyra este que axin uyajcꞌu ucuxtar tuaꞌ ucorpes, war uyajta ut upiar era más nojta que tunor.
JOH 15:14 Y nox jax nipiarox jay ixixin iche bꞌan cocha inwareox.
JOH 15:15 Inteꞌ man machi unata lo que acay uche upatron. Pero nen cꞌapa inwareox tunor lo que cay uyaren Nitata, y tamar era war inwareox que majax bꞌanox cocha inteꞌ man coner sino que bꞌanox cocha inteꞌ nipiar.
JOH 15:16 Pues majax nox xeꞌ cay isicbꞌen sino que jax nen xeꞌ cay insicbꞌox y inwebꞌtox ixiox tuaꞌ iwajcꞌu meyra iyutir xeꞌ erach y xeꞌ machi tuaꞌ acꞌapa. Y tamar era tunor lo que ixixin icꞌajti taca Nitata tama nicꞌabꞌa cꞌani aꞌjcꞌunox.
JOH 15:17 Y jax era lo que war inwareox tuaꞌ iche: Yajtanic ut ibꞌa inteꞌ intiox, che e Jesús.
JOH 15:18 Entonces che e Jesús: —Jay e gente tara tor e rum axin uxejbꞌiobꞌ iut nox, natanic que cay uxejbꞌiobꞌ niut nen bꞌajxan.
JOH 15:19 Jay warto iche bꞌan cocha uchiobꞌ e gente tara tor e rum, war ani ucꞌaniox bꞌan cocha war ucꞌaniobꞌ ubꞌobꞌ tunor tin e turobꞌ tara tor e rum. Pero cocha nen cay insajcox tuaꞌ ixlocꞌoy tujam e gente tara tor e rum, war uxejbꞌiobꞌ iut umen que machi ixto war iche e mabꞌambꞌanir bꞌan cocha war uchiobꞌ jaxirobꞌ.
JOH 15:20 Cꞌajpesic imener lo que cay inwareox bꞌajxan: “Que inteꞌ man majax más nuquir winic que upatron.” Jay war aqꞌuijnobꞌ uwirenobꞌ e gente tara tor e rum, entonces cꞌani aqꞌuijnobꞌ uwirox nox ubꞌan. Pero cocha ayan tin e cay cꞌupseyanobꞌ tut niwojroner, ayan ubꞌan tin e axin acꞌupseyanobꞌ tut iwojroner nox.
JOH 15:21 Y cꞌani inumse ibꞌa tama tunor era umen que war ixcꞌupseyan tamaren, porque e gente tara tor e rum machi war unatobꞌ chi xeꞌ uyebꞌta tarien.
JOH 15:22 ’Jay machi ani yopen tuaꞌ inwareobꞌ e gente tara tor e rum lo que ucꞌani e Dios tuaꞌ uchiobꞌ, matucꞌa ani umabꞌambꞌanirobꞌ. Pero coner ma cocha erer ulocse ubꞌobꞌ que matucꞌa umabꞌambꞌanirobꞌ porque chequer tutobꞌ tucꞌa war uchiobꞌ.
JOH 15:23 Tin e war uxejbꞌiobꞌ niut nen war uxejbꞌiobꞌ ut Nitata ubꞌan.
JOH 15:24 Nen cay inche meyra milagro tut e gente tara tor e rum. Jay machi ani inche tunor era tutobꞌ, matucꞌa ani umabꞌambꞌanirobꞌ. Y mamajchi más xeꞌ war uche tunor e sian milagro lo que war inche nen, pero e gente tara tor e rum war uxejbꞌiobꞌ niut umen que cay uwirenobꞌ inche tunor era. Y war uxejbꞌiobꞌ ut Nitata ubꞌan.
JOH 15:25 Pero bꞌan numuy tuaꞌ acꞌapa achempa lo que chꞌar tzꞌijbꞌabꞌir tama uley e Moisés tiaꞌ che: “Motor que matucꞌa war inche pero warto uxejbꞌiobꞌ niut”, xeꞌ che tama uley e Moisés.
JOH 15:26 ’Y nen cꞌani inwebꞌta watar e Ajtacarsiaj xeꞌ jax Unawalir e Dios xeꞌ axin ucansiox tunor lo que erach. Jaxir tuaꞌ watar tut Nitata tuaꞌ ucansiox tamaren.
JOH 15:27 Y nox ubꞌan ucꞌani tuaꞌ ichecsu nicꞌabꞌa tut e gente tara tor e rum porque nox turox tacaren conda incajyes tunor nipatnar era, che e Jesús.
JOH 16:1 Entonces ojron e Jesús y che: —War inwareox tunor era tuaꞌ machi isati icꞌupesiaj tamaren.
JOH 16:2 Pues e gente tuaꞌ e Israel axin ulocsiox tama e sinagoga inyajrer. Y watar e día conda e gente acay uchebꞌiobꞌ que war uchiobꞌ lo que ucꞌani e Dios conda axin uchamsiox.
JOH 16:3 Y bꞌan ixto tuaꞌ uchiobꞌ umen que machi unatobꞌ chi Nitata y nien machi unatobꞌ chien nen ubꞌan.
JOH 16:4 War inwareox tunor era tuaꞌ acꞌajpa imener conda acay anumuy tunor era que nen cay inwareox bꞌajxan que bꞌan tuaꞌ anumuy, che e Jesús. Entonces che e Jesús: —Pues machi inwareox tunor era tama ucajyesnibꞌir tunor era porque nen yato turen tacarox.
JOH 16:5 Pero era que cꞌani insutpa inxin tut tin e uyebꞌta tarien, mamajchi tijam war iyubꞌi tanibꞌa que: “¿Tiaꞌ war iꞌxin?”
JOH 16:6 Pues tzajtaquix iut era umen que inwareox que cꞌani inxin.
JOH 16:7 War inwareox jax taca lo que erach. Pues bueno que war inlocꞌoy, porque jay machi ani inxin machi ani watar e Ajtacarsiaj tibꞌa xeꞌ jax Unawalir e Dios. Pero conda inxin tut e qꞌuin cꞌani inwebꞌta watar e Ajtacarsiaj tibꞌa.
JOH 16:8 Pero conda acꞌotoy Unawalir e Dios jaxir axin uwirse tunor e gente tara tor e rum que ayan umabꞌambꞌanirobꞌ. Y axin uwirsiobꞌ que erach niwirnar, y que axin asatpobꞌ tunor tin e war uchiobꞌ e mabꞌambꞌanir.
JOH 16:9 Pues Unawalir e Dios axin uwirse e gente tara tor e rum que ayan umabꞌambꞌanirobꞌ umen que machi war acꞌupseyanobꞌ tamaren.
JOH 16:10 Y axin uwirsiobꞌ que erach niwirnar umen que nen cꞌani inxin tut Nitata y machi ixto tuaꞌ iwiren otronyajr.
JOH 16:11 Y axin uwirsiobꞌ que ucꞌani tuaꞌ asatpobꞌ tunor tin e war uchiobꞌ e mabꞌambꞌanir porque e diablo xeꞌ war acꞌotori tara tor e rum quetpix tuaꞌ asatpa umen que cay uche meyra e mabꞌambꞌanir.
JOH 16:12 Pues ayanto meyra lo que cꞌani ani inwareox era, pero nox merato ixqꞌuecꞌo tuaꞌ uyubꞌiox inata tunor era.
JOH 16:13 Pero conda watar Unawalir e Dios cꞌani ubꞌijresox tama tunor lo que erach. Pues jaxir machi tuaꞌ oꞌjron tamar lo que ubꞌijnu, sino que cꞌani uyareox jax taca lo que uyubꞌi aꞌrobꞌna nimener, y axin uwirsiox lo que axin achempa tara tor e rum watar e día.
JOH 16:14 Y Unawalir e Dios axin utattzꞌien umen que axin uchꞌami niwojroner y asutpa uwirsiox otronyajr.
JOH 16:15 Pues tunor lo que ayan tuaꞌ Nitata tanibꞌa ubꞌan, y tamar era cay inwareox que Unawalir e Dios cꞌani uchꞌami niwojroner y asutpa uwirsiox otronyajr.
JOH 16:16 Pues conda anumuy cora día machi ixto tuaꞌ iwira niut. Y de allí conda anumuy cora día otronyajr cꞌani ixsutpa iwiren otronyajr, che e Jesús.
JOH 16:17 Pues entonces cay ojronobꞌ cora ajcanuarobꞌ jaxobꞌ taca y chenobꞌ: —¿Y tucꞌa war che uyojroner era que: “Conda anumuy cora día machi ixto tuaꞌ iwira niut, y de allí conda anumuy cora día otronyajr cꞌani ixsutpa iwiren otronyajr?” Y de allí che que: “Nen cꞌani inxin tut Nitata.”
JOH 16:18 ¿Y tucꞌa war che uyojroner era que: “Conda anumuy cora día?” Machi canata tucꞌa war che uyojroner era, chenobꞌ uyajcanuarobꞌ era jaxobꞌ taca.
JOH 16:19 Pero e Jesús warix unata que cꞌani ani uyubꞌiobꞌ tuaꞌ tamar lo que arobꞌna umener, y tamar era ojron tacarobꞌ y che: —¿O war ca iyubꞌi tijam nox que tucꞌa war che niwojroner conda inwareox que: “Conda anumuy cora día machi ixto tuaꞌ iwira niut, y de allí conda anumuy cora día otronyajr cꞌani ixsutpa iwiren otronyajr?” ¿Jax ca lo que war iyubꞌi ibꞌa era?
JOH 16:20 Cꞌani inwareox era que nox cꞌani ixtzꞌintzꞌa tama iwalma umen que machi ixto tuaꞌ iwira niut. Pero tin e turobꞌ tara tor e rum cꞌani atzayobꞌ umen que machix cꞌani uwirobꞌ niut. Pero nox machi tuaꞌ ixtzꞌintzꞌa inyajrer, porque itzꞌintzꞌar era cꞌani asutpa tzayer tama iwalma.
JOH 16:21 Bꞌan cocha inteꞌ ixic conda acꞌotoy e hora tuaꞌ acuxpa inteꞌ uyar que war oyqꞌui umen e nuxi cꞌuxner, pero wacchetaca asisa ucꞌuxner y acay atzay umen que cuxpa inteꞌ uyar.
JOH 16:22 Y bꞌanox cocha era nox xeꞌ war ixtzꞌintzꞌa coner. Pero conda insutpa waten otronyajr tuaꞌ inwirox ixixin ixtzay meyra tama iwalma, y e tzayer era mamajchi tuaꞌ ulocse tiut.
JOH 16:23 ’Y tama e día era machi ixto tuaꞌ icꞌajti tacaren. Pero cꞌani inwareox era que Nitata axin uyajcꞌox tunor lo que icꞌajti tacar tama nicꞌabꞌa.
JOH 16:24 Pues ma tiaꞌ cay icꞌajti taca e Dios tama nicꞌabꞌa. Pero era cꞌani inwareox tuaꞌ icꞌajti tunor lo que war icꞌani taca Nitata tama nicꞌabꞌa, y ixixin ichꞌami tunor lo que war icꞌajti era. Y tamar era cꞌani abꞌutcꞌa iwalma taca e tzayer, che e Jesús.
JOH 16:25 Entonces che e Jesús: —Esto era war onjron tacarox taca inteꞌ ojroner xeꞌ mucur cora, pero watar e día conda machi ixto tuaꞌ onjron tacarox cocha era, sino que cꞌani inwareox tamar Nitata taca inteꞌ ojroner xeꞌ más chequer tiut.
JOH 16:26 Y tama e día xeꞌ watar era nox ixixin icꞌajti taca Nitata tama nicꞌabꞌa, y jaxir tuaꞌ axin uyajcꞌox tunor lo que war icꞌajti era. Pero machi war inwareox que nen tuaꞌ incꞌajti taca Nitata tamar lo que war icꞌani era.
JOH 16:27 Porque Nitata war uyajta iut umen que nox war iyajta niut y war icꞌupse que nen tarien tut e Dios.
JOH 16:28 Locꞌoy tarien tut Nitata xeꞌ turu tut e qꞌuin tuaꞌ inyopa tara tor e rum. Pero era cꞌani insutpa inxin tut Nitata otronyajr, che e Jesús.
JOH 16:29 Entonces ojronobꞌ uyajcanuarobꞌ y chenobꞌ: —Pues chequer ixto awojroner coner porque mixto jax taca inteꞌ ojroner xeꞌ mucur cora war achecsu tunor era ticoit.
JOH 16:30 Coner chequer ticoit que net war anata tunor, y chequer ubꞌan que mix majchi ucꞌani tuaꞌ acꞌotoy uyaret lo que war anumuy porque net warix anata tunor. Y tamar era cacꞌupset que locꞌoy tariet tut e Dios, chenobꞌ e uyajcanuarobꞌ.
JOH 16:31 Entonces che e Jesús: —Coner war ixto ixcꞌupseyan tamaren.
JOH 16:32 Watar e hora xeꞌ jax coner era conda tunorox tuaꞌ iwacten nibꞌajner tuaꞌ ixixin inteꞌ intiox tama iyotot. Pero machi tuaꞌ inquetpa nibꞌajner porque Nitata tuaꞌ aquetpa tacaren.
JOH 16:33 War inwareox tunor era tuaꞌ aquetpa nijiriar tama iwalma. Tara tor e rum ayan lo que tuaꞌ inumse ibꞌa, pero ira ixbꞌacta porque nen incucruix ucꞌotorer tin e war ani acꞌotori tara tor e rum, che e Jesús.
JOH 17:1 Pues conda cꞌapa ojron tama tunor era, e Jesús sutpa chꞌujcsan tichan y cay ucꞌajti taca Catata Dios y che: —Nitatet, cꞌotoy e hora tuaꞌ inchamesna. Ajcꞌunen nitawarer xeꞌ Oynenen era tuaꞌ uyubꞌien insutpa inwajqꞌuet atawarer net ubꞌan.
JOH 17:2 Porque net cꞌapa awajqꞌuen e cꞌotorer tujor tunor e gente tara tor e rum tuaꞌ erer inwajcꞌu e cuxtar xeꞌ machi tuaꞌ acꞌapa tunor tin e cay awajqꞌuen.
JOH 17:3 Y jax era e cuxtar xeꞌ machi tuaꞌ acꞌapa: Tuaꞌ acꞌotoy unatobꞌ chiet net xeꞌ ajrer taca Cadiosir, y tuaꞌ acꞌotoy unatobꞌ chien nen xeꞌ jax e Jesucristoen xeꞌ awebꞌta tarien.
JOH 17:4 ’Y nen cꞌapix intattzꞌi acꞌabꞌa tara tor e rum, y cꞌapix inche tunor lo que cay awaren tuaꞌ inche.
JOH 17:5 Y era Nitatet, ajcꞌunen tunor nitawarer bꞌan cocha ayan ani tanibꞌa conda turento tichan tacaret conda ne mato achena or e rum era.
JOH 17:6 ’Pues cay inchecsu tutobꞌ tin e sicbꞌabꞌirobꞌ amener tujam e gente tara tor e rum tuaꞌ unatobꞌ chiet net. Pues tunor e gente era tabꞌa ani, pero net awajqꞌuenobꞌ y jaxirobꞌ cꞌotoy cꞌupseyanobꞌ tut awojroner.
JOH 17:7 Y coner war unatobꞌ que tunor lo que awajqꞌuen tari tamaret.
JOH 17:8 Pues cꞌapa inwareobꞌ tunor e ojroner lo que awajqꞌuen, y jaxirobꞌ uchꞌamiobꞌ tunor era. Y coner aquetpa chequer tutobꞌ que nen ebꞌtana tarien amener.
JOH 17:9 ’Pues nen era machi war incꞌajti tama tunor e gente tara tor e rum, sino que war incꞌajti tamar taca tin e awajqꞌuen porque tabꞌa tunor e gente era.
JOH 17:10 Y tunor lo que tanibꞌa tabꞌa ubꞌan, y tunor lo que tabꞌa tanibꞌa ubꞌan, y cꞌani achectesna nitawarer tamarobꞌ.
JOH 17:11 ’Pues machix cꞌani inquetpa tara tor e rum sino que cꞌani incꞌotoy tiaꞌ turet. Pero tin e awajqꞌuen aquetpobꞌto tara tor e rum. Nitatet xeꞌ erachet, cojconobꞌ tin e awajqꞌuenobꞌ era taca ucꞌotorer acꞌabꞌa xeꞌ jax e cꞌabꞌa xeꞌ awajqꞌuen ubꞌan tuaꞌ aquetpa intera ubꞌijnusiajobꞌ bꞌan cocha intera cabꞌijnusiaj non ubꞌan.
JOH 17:12 Pues conda turento tara tor e rum cay incojcuobꞌ tin e awajqꞌuen taca ucꞌotorer acꞌabꞌa xeꞌ awajqꞌuen y incorpesobꞌ. Y mamajchi tujamobꞌ xeꞌ satpobꞌ sino que ajtaca tin e quetpa tuaꞌ asatpa tuaꞌ acꞌapa achempa tunor lo que chꞌar tzꞌijbꞌabꞌir tama uyojroner e Dios.
JOH 17:13 ’Pues rajxa era cꞌani incꞌotoy tiaꞌ turet tut e qꞌuin. Pero war inwaret tunor era conda turento tara tor e rum tuaꞌ abꞌutcꞌa uyalmobꞌ tunor tin e tanibꞌa taca e tzayer bꞌan cocha bꞌutꞌur niwalma nen taca e tzayer ubꞌan.
JOH 17:14 Pues nen cꞌapa inwareobꞌ tunor awojroner, pero tamar era axejbꞌna utobꞌ umen tin e turobꞌ tara tor e rum. Pero jaxirobꞌ majax intera ubꞌijnusiajobꞌ taca tin e turobꞌ tara tor e rum bꞌan cocha nen majax intera nibꞌijnusiaj tacar tin e turobꞌ tara tor e rum ubꞌan.
JOH 17:15 Machi war incꞌajti tacaret tuaꞌ alocse tin e tanibꞌa tara tor e rum, sino que war incꞌajti tuaꞌ acorpesobꞌ tama ucꞌotorer e mabꞌambꞌanir.
JOH 17:16 Y bꞌan cocha nen majax intera nibꞌijnusiaj taca tin e turobꞌ tara tor e rum, y bꞌanobꞌ tin e awajqꞌuen ubꞌan.
JOH 17:17 Chꞌijsenobꞌ tuaꞌ aquetpa erach uwirnarobꞌ tacar lo que erach. Pues jax awojroner xeꞌ erach.
JOH 17:18 Y bꞌan cocha awebꞌta tarien tut e gente tara tor e rum tuaꞌ inche lo que acꞌani, y bꞌan war inwebꞌta axiobꞌ tut e gente tara tor e rum tin e awajqꞌuen ubꞌan.
JOH 17:19 Y tama tunor tin e awajqꞌuen cꞌani inturbꞌa nibꞌa tuaꞌ intacriobꞌ tuaꞌ acꞌotoy achꞌijrsena uwirnarobꞌ umen lo que erach.
JOH 17:20 ’Pues nen era war incꞌajti tacaret tuaꞌ achojbꞌes utobꞌ tunor niwajcanuarobꞌ era. Pero cꞌani incꞌajti ubꞌan tama tin e axin acꞌupseyanobꞌ tamaren conda uyubꞌiobꞌ awojroner xeꞌ axin achecsuna tutobꞌ umen niwajcanuarobꞌ era.
JOH 17:21 Y cꞌani incꞌajti tacaret ubꞌan que jaxirobꞌ axin aquetpobꞌ intera ubꞌijnusiajobꞌ inteꞌ intiobꞌ, y que axin aquetpobꞌ intera ubꞌijnusiajobꞌ tacaron non ubꞌan, bꞌan cocha intera nibꞌijnusiaj tacaret. Nitatet, cꞌani incꞌajti tama tunor tin e cꞌanto acꞌupseyanobꞌ tamaren tuaꞌ atacriobꞌ aquetpa intera ubꞌijnusiajobꞌ inteꞌ intiobꞌ tuaꞌ uyubꞌi acꞌotoy ucꞌupsiobꞌ e gente tara tor e rum que net awebꞌta tarien.
JOH 17:22 Y cay inwajcꞌuobꞌ e tawarer lo que awajqꞌuen tuaꞌ aquetpobꞌ intera ubꞌijnusiajobꞌ inteꞌ intiobꞌ, bꞌan cocha non intera cabꞌijnusiaj.
JOH 17:23 Pues nen turen tacarobꞌ y net turet tacaren, y tamar era jaxirobꞌ axin aquetpobꞌ intera ubꞌijnusiajobꞌ inteꞌ intiobꞌ. Y tamar era cꞌani unatobꞌ e gente tara tor e rum que net awebꞌta tarien, y que net war ayajta utobꞌ tin e tanibꞌa bꞌan cocha war ayajta niut nen ubꞌan.
JOH 17:24 Entonces Nitatet, net cꞌapa awajqꞌuen tunor niwajcanuarobꞌ era, y war incꞌani que axin aturuanobꞌ tiaꞌ turen tuaꞌ erer uwirobꞌ nitawarer lo que awajqꞌuenix conda ne mato achena or e rum era umen que ayajta niut.
JOH 17:25 Nitatet xeꞌ erachet, tin e turobꞌ tara tor e rum machi unatobꞌ chiet net, pero nen war ixto innata chiet net. Y niwajcanuarobꞌ era ubꞌan war unatobꞌ que jax net xeꞌ awebꞌta tarien.
JOH 17:26 Pues nen cay inchecsu tutobꞌ tamaret y bꞌan cꞌanto inche ubꞌan tuaꞌ unatobꞌ que bꞌan cocha war ayajta niut y bꞌan war ayajta utobꞌ ubꞌan. Y cꞌanto inchecsu tut niwajcanuarobꞌ era chiet net tuaꞌ unatobꞌ que nen tuaꞌ inturuan tama uyalmobꞌ tunorobꞌ, che e Jesús conda war ucꞌajti taca Catata Dios.
JOH 18:1 Pues entonces conda e Jesús cꞌapa ucꞌajti taca e Dios ixin taca uyajcanuarobꞌ esto teinxejr e cojn xeꞌ ucꞌabꞌa Cedrón. Y yajaꞌ ayan inteꞌ huerto tuaꞌ e teꞌ olivo. Entonces ixin ochoyobꞌ macuir e huerto era taca uyajcanuarobꞌ.
JOH 18:2 Pero e Judas xeꞌ ixin utuchꞌi e Jesús tut e ajcꞌamparobꞌ war unata ubꞌan tiaꞌ aquetpa e lugar era porque ya cay ixin e Jesús taca uyajcanuarobꞌ tama e lugar era.
JOH 18:3 Y tamar era cꞌotoy e Judas taca cora sian soldadobꞌ y taca cora sian policía tuaꞌ e templo xeꞌ ebꞌetbꞌir ixiobꞌ umen uwinquir e inmojr sacerdotiobꞌ y umen e fariseobꞌ. Y cꞌotoyobꞌ e winicobꞌ era taca e sian machit y taca e sian teꞌ tama ucꞌabꞌobꞌ, y war uqꞌuechiobꞌ axin ulamparobꞌ y war axiobꞌ taca meyra cꞌajc.
JOH 18:4 Pero e Jesús warix unata tunor lo que cꞌani anumuy y tamar era achpa locꞌoy y uyare e winicobꞌ y che: —¿Y chi war isajca tara? che e Jesús.
JOH 18:5 Entonces ojronobꞌ e winicobꞌ y chenobꞌ: —E Jesús xeꞌ tuaꞌ e chinam Nazaret, che e winicobꞌ era. Y che e Jesús: —Jax nen, che e Jesús. Y e Judas xeꞌ war utuchꞌi e Jesús ya war tujam e winicobꞌ era ubꞌan.
JOH 18:6 Pero conda ojron e Jesús cocha era y che: “Jax nen”, ixiobꞌ tupatobꞌ y cucremobꞌ tut e rum tunorobꞌ.
JOH 18:7 Y ojron e Jesús otronyajr y che: —¿Y chi war isajca? Y che e winicobꞌ: —E Jesús xeꞌ tuaꞌ e chinam Nazaret, che e winicobꞌ era.
JOH 18:8 Y che e Jesús: —Inwareoxix que: “Jax nen”. Y jay nen war isicbꞌen actanic chicobꞌ tunor tin e turobꞌ taniwejtzꞌer era, che e Jesús.
JOH 18:9 Pues numuy tunor era tuaꞌ acꞌapa achempa lo que arobꞌna umen e Jesús que: “Mamajchi satpa tujam tin e ajcꞌunen umen Nitata”, que cay che e Jesús tama inyajr.
JOH 18:10 Pues ayan inteꞌ winic tujam e sian winicobꞌ era xeꞌ ucꞌabꞌa Malco xeꞌ jax inteꞌ man tuaꞌ e más nuquir winquir tuaꞌ e inmojr sacerdotiobꞌ. Y tujam uyajcanuarobꞌ e Jesús turu e Simón Pedro xeꞌ qꞌuecher umener inteꞌ umachit. Y tamar era e Pedro ujajpi umachit y usani tama ujor e Malco pero jax taca uchiquin ujuxi ojri esto tut e rum.
JOH 18:11 Pero wacchetaca e Jesús uyare e Pedro y che: —Pedro, turbꞌan amachit tiaꞌ atajwi. ¿O war ca abꞌijnu que machi tuaꞌ innumse nibꞌa era? Pero bꞌan tuaꞌ anumuy porque Nitata bꞌan ucꞌani tuaꞌ inche, che e Jesús.
JOH 18:12 Entonces e sian soldadobꞌ era y tin e quetpa ajcꞌotorer tujorobꞌ y cora sian policía xeꞌ tuobꞌ e templo ixin ucachiobꞌ e Jesús y uqꞌuechiobꞌ ixin.
JOH 18:13 Y bꞌajxan uqꞌuechiobꞌ ixin esto tama uyotot inteꞌ winic xeꞌ ucꞌabꞌa Anás. Y e Anás era jax upixam e Caifás xeꞌ jax e más nuquir winquir tuaꞌ e inmojr sacerdotiobꞌ tama e año yajaꞌ.
JOH 18:14 Pues e Caifás era jax tin e cay ojron bꞌajxan tut e nuquir winicobꞌ tama e chinam Jerusalem que más ani bueno que achamay inteꞌ taca winic tama tunor e chinam.
JOH 18:15 Entonces ixin e Pedro tupat e Jesús taca otronteꞌ ajcanuar. Y inteꞌ ajcanuar era acayix eꞌrna umen e nuquir winquir tuaꞌ e inmojr sacerdotiobꞌ, y tamar era actana ochoy macu tor e tinaj tupat e Jesús.
JOH 18:16 Pero e Pedro quetpa patir tupat e macteꞌ. Y tamar era locꞌoy inteꞌ ajcanuar tuaꞌ oꞌjron taca e ijchꞌoc xeꞌ war ucojco e puerta tuaꞌ uyacta oꞌchoy e Pedro.
JOH 18:17 Entonces ojron e ijchꞌoc era xeꞌ war ucojco e puerta y uyubꞌi tuaꞌ e Pedro y che: —¿Ma ca jax net xeꞌ jax inteꞌ ajcanuar tuaꞌ e winic? che e ijchꞌoc era. Pero e Pedro che: —Nen machi, che e Pedro.
JOH 18:18 Y ayan meyra e sisar tama e acbꞌar era, y tamar era ayan cora manobꞌ y e policiobꞌ tuaꞌ e templo xeꞌ cay uxuniobꞌ inteꞌ cꞌajc tor e tinaj tuaꞌ aqꞌuixiobꞌ tamar. Y e Pedro ixin tuyejtzꞌer e cꞌajc tuaꞌ aqꞌuixi ubꞌan.
JOH 18:19 Pues entonces e nuquir winquir tuaꞌ e inmojr sacerdotiobꞌ cay uyubꞌi tuaꞌ e Jesús que jayteꞌ uyajcanuarobꞌ y que tucꞌa tamar war acanseyan.
JOH 18:20 Y che e Jesús: —Nen cay canseyanen tut tunor e gente tic taca y tama e sian sinagoga y tama e templo tara tama e chinam Jerusalem tiaꞌ acay umorojse ubꞌobꞌ tunor e gente tuaꞌ e Israel iraj iraj. Y tamar era erer inata que matucꞌa war incanseyan xeꞌ mucur.
JOH 18:21 ¿Y tucꞌa tuaꞌ war iyubꞌi tanibꞌa? Ubꞌinic tuaꞌ tunor e gente xeꞌ cay uyubꞌiobꞌ lo que incansiobꞌ. Jaxirobꞌ erer uyareox tucꞌa tamar cay canseyanen, che e Jesús.
JOH 18:22 Pero conda e Jesús cꞌapa ojron cocha era inteꞌ policía tuaꞌ e templo achpa y ixin uyajcꞌu tuyej e Jesús y che: —Ira oꞌjron cocha era tut e nuquir winquir tuaꞌ e inmojr sacerdotiobꞌ, che e policía.
JOH 18:23 Y che e Jesús: —¿O ayan ca lo que cay inware xeꞌ mabꞌambꞌan? Jay ayan, aren tunor e gente era tuaꞌ aquetpa chequer tutobꞌ lo que cay inware. Pero jay matucꞌa ¿tucꞌa tuaꞌ war awajqꞌuen era? che e Jesús.
JOH 18:24 Entonces e Anás uyebꞌta ixin e Jesús cacharto tut e Caifás xeꞌ jax uwinquir e inmojr sacerdotiobꞌ.
JOH 18:25 Entonces conda turuto e Pedro war aqꞌuixi tuyejtzꞌer e cꞌajc ayan inteꞌ xeꞌ cay uyubꞌi tuaꞌ y che: —¿Ma ca jax net xeꞌ jax inteꞌ ajcanuar tuaꞌ e winic era? che inteꞌ. Pero e Pedro umuqui y che: —Nen machi, che e Pedro.
JOH 18:26 Y ayan ubꞌan inteꞌ winic xeꞌ jax inteꞌ man tama uyotot e nuquir winquir tuaꞌ e inmojr sacerdotiobꞌ. Y e man era jax inteꞌ upiar e winic xeꞌ ojresna uchiquin umen e Pedro. Entonces ojron jaxir y che: —¿Ma ca jax net xeꞌ inwiret taca e Jesús tama e huerto yajaꞌ? che e man era.
JOH 18:27 Pero e Pedro umuqui otronyajr y wacchetaca aru inteꞌ acꞌach.
JOH 18:28 Pues entonces ulocsiobꞌ e Jesús tama uyotot e Caifás y uqꞌuechiobꞌ ixin esto tama e palacio tiaꞌ turu e gobernador romano. Y cꞌanix asacojpa tama e hora era conda tuaꞌ acay e nojqꞌuin pascua. Y tamar era e winicobꞌ tuaꞌ e Israel machi ochoyobꞌ tama e palacio umen que machi cꞌani ubꞌoni ubꞌobꞌ taca e choquem gente, porque jay bꞌan ani uchiobꞌ machi ani actanobꞌ tuaꞌ oꞌchoyobꞌ awiobꞌ tama e nojqꞌuin pascua era.
JOH 18:29 Y tamar era e gobernador xeꞌ ucꞌabꞌa Pilato locꞌoy tama uyotot tuaꞌ oꞌjron taca e winicobꞌ era y che: —¿Y tucꞌa tamar war ituchꞌi e winic era? che e Pilato.
JOH 18:30 Y che e winicobꞌ: —Jay ma ani tucꞌa war uche, machi ani war catares toit tuaꞌ cawajqꞌuet, che e winicobꞌ era.
JOH 18:31 Y che e Pilato: —Qꞌuechic chic nox tuaꞌ ibꞌijnu iwira tama iley tibꞌa, che e Pilato. Pero ojronobꞌ e winicobꞌ tuaꞌ e Israel otronyajr y chenobꞌ: —Pero non xeꞌ tuon e Israel ma erer cachamse inteꞌ winic motor que ayan lo que war uche xeꞌ más intuj. Jax taca net xeꞌ erer aware tuaꞌ achamesna inteꞌ cocha era, che e winicobꞌ era.
JOH 18:32 Pues bꞌan numuy tuaꞌ acꞌapa achempa bꞌan cocha arobꞌna umen e Jesús que jaxir tuaꞌ achamay achꞌubꞌna tama ut inteꞌ cruz.
JOH 18:33 Entonces e Pilato sutpa ochoy macuir upalacio otronyajr y upejca e Jesús y uyubꞌi tuaꞌ: —¿Net ca e rey tuaꞌ e gente tuaꞌ e Israel? che e Pilato.
JOH 18:34 Y che e Jesús: —¿War ca abꞌijnu abꞌajner que nen jax inteꞌ rey? O ¿ayan ca chi xeꞌ war uyaret tamaren? che e Jesús.
JOH 18:35 Y che e Pilato: —¿O war ca abꞌijnu que jaxen inteꞌ winic tuaꞌ e Israel? Porque jax taca apiarobꞌ tama alugar taca uwinquir e inmojr sacerdotiobꞌ xeꞌ uqꞌuechiet tariet taniut. ¿Y tucꞌa cay ache tacarobꞌ? che e Pilato.
JOH 18:36 Y che e Jesús: —Pues tiaꞌ tuaꞌ incꞌotori majax tara tor e rum. Tara nic ani tuaꞌ incꞌotori ayan ani meyra tin e tuaꞌ axin atzꞌojyobꞌ tacaren tuaꞌ machi inqꞌuejcha inxin umen e gente tuaꞌ e Israel era. Pero majax tara tor e rum tuaꞌ incꞌotori era, che e Jesús.
JOH 18:37 Entonces e Pilato che: —¿Erach ca que net reyet? che e Pilato. Y e Jesús che: —Nen jax inteꞌ rey bꞌan cocha war aware. Pues nen tarien tara tor e rum tuaꞌ incuxpa y tuaꞌ inchecsu tunor lo que erach tut e gente axin. Y tunor tin e uchiobꞌ lo que erach war uyubꞌienobꞌ, che e Jesús.
JOH 18:38 Y che e Pilato: —¿O ayan ca lo que erach? che e Pilato. Entonces conda cꞌapa uyubꞌi tuaꞌ e Jesús cocha era, e Pilato locꞌoy patir y cay ojron taca e winicobꞌ tuaꞌ e Israel y che: —Nen matucꞌa intajwi tama e winic era.
JOH 18:39 Pero cocha nox cꞌayoxix que imbꞌani axin inteꞌ winic xeꞌ turu tama e cárcel tama inteꞌ inteꞌ nojqꞌuin pascua, ¿icꞌani ca tuaꞌ imbꞌani e winic era xeꞌ war iware que jax e rey tuaꞌ e gente tama e Israel? che e Pilato.
JOH 18:40 Pero cay aruobꞌ tunor e winicobꞌ taca inteꞌ nuxi nuc y chenobꞌ: —Ira abꞌani e Jesús. Actan loqꞌuic e Barrabás, che e sian winicobꞌ era. Pues e Barrabás era jax inteꞌ ajxujch.
JOH 19:1 Entonces e Pilato uyare cora soldadobꞌ tuaꞌ uwatzꞌi e Jesús. Pues e soldadobꞌ era ucꞌampesobꞌ inteꞌ jarbꞌir qꞌuewer xeꞌ cachar e taqꞌuin tama upunto.
JOH 19:2 Entonces e soldadobꞌ cay ujariobꞌ cora tꞌix tuaꞌ aquetpa bꞌan cocha inteꞌ corona tuaꞌ uturbꞌobꞌ tama ujor e Jesús, y ubꞌujcsiobꞌ taca inteꞌ bꞌujc xeꞌ chacpurem ut bꞌan cocha ubꞌujc inteꞌ rey.
JOH 19:3 Y ayan cora soldadobꞌ xeꞌ cay yopobꞌ tut e Jesús xeꞌ cay utzeniobꞌ y che: —¡Tattzbꞌir coner e rey tuaꞌ e gente tama e Israel! chenobꞌ e soldadobꞌ era. Y cay uyajcꞌuobꞌ e Jesús.
JOH 19:4 Entonces e Pilato locꞌoy patir otronyajr y cay ojron y che: —Ubꞌinic tunorox, intares e Jesús tara tiut tuaꞌ inwirsiox que matucꞌa intajwi tamar xeꞌ erer achamesna tamar, che e Pilato.
JOH 19:5 Entonces locꞌoy e Jesús patir taca inteꞌ corona tama ujor xeꞌ jarbꞌir tama e tꞌix y bꞌujcsebꞌir taca inteꞌ bꞌujc xeꞌ chacpurem ut bꞌan cocha inteꞌ bꞌujc tuaꞌ inteꞌ rey. Entonces ojron e Pilato y che: —Iranic, jaxto era e winic, che e Pilato.
JOH 19:6 Pero conda irna e Jesús umen uwinquir e inmojr sacerdotiobꞌ y umen e sian policía tuaꞌ e templo cay aruobꞌ taca inteꞌ nuxi nuc y chenobꞌ: —Chamsenic, chamsenic, che e nuquir winicobꞌ era. Y che e Pilato: —Qꞌuechic chic y chamsenic nox, porque nen matucꞌa intajwi tamar, che e Pilato.
JOH 19:7 Pero e nuquir winicobꞌ chenobꞌ: —Non ayan caley xeꞌ chꞌar tzꞌijbꞌabꞌir que che que ucꞌani tuaꞌ achamesna e winic era umen que jaxir war uche ubꞌa que jax Uyunen e Dios, che e nuquir winicobꞌ era.
JOH 19:8 Pero conda e Pilato uyubꞌi tunor e ojroner era más bꞌacta.
JOH 19:9 Entonces sutpa ochoy macu otronyajr y uyubꞌi tuaꞌ e Jesús y che: —¿Y tiaꞌ ajlugaret net? che e Pilato. Pero e Jesús machi ojron.
JOH 19:10 Entonces ojron e Pilato otronyajr y che: —¿O machi ca cꞌani apejquen? ¿Machi ca anata que nen ayan nicꞌotorer tuaꞌ inware ichamesna y ayan nicꞌotorer ubꞌan tuaꞌ inwactet iꞌxin bꞌan taca? che e Pilato.
JOH 19:11 Entonces ojron e Jesús y che: —Matucꞌa nien imbꞌijc acꞌotorer tanijor nen jay e Dios machi ani uyajqꞌuet. Pero tin e uqꞌuechien tarien toit jax tin e ucojco más e mabꞌambꞌanir, che e Jesús.
JOH 19:12 Y tamar era e Pilato cay usicbꞌa cocha tuaꞌ ubꞌani axin e Jesús. Pero e gente tuaꞌ e Israel cay aruobꞌ otronyajr y chenobꞌ: —Jay abꞌani axin e Jesús bꞌan taca machi war iquetpa intera taca e rey tama e chinam Roma. Porque tunor tin e axin uche ubꞌa que jax inteꞌ rey war aqꞌuijna uwira e rey romano, che e sian gente era taca inteꞌ nuxi nuc.
JOH 19:13 Entonces conda e Pilato cꞌapa uyubꞌi tunor e ojroner era uyare tuaꞌ aloqꞌuesna e Jesús patir tuaꞌ achena juzgar. Y de allí locꞌoy e Pilato turuan tor uturtar tiaꞌ aturuan tuaꞌ uche juzgar. Pues e lugar era ucꞌabꞌa Gabata tama e ojroner hebreo y war che: “Sorbꞌir tun” tama cawojroner.
JOH 19:14 Pues e día era jax conda e gente tuaꞌ e Israel uyustes ubꞌobꞌ tuaꞌ uyubꞌi oꞌchoyobꞌ tama e nojqꞌuin pascua. Y e hora era jaxix tama uyuxin e día. Entonces e Pilato uyare e gente era y che: —Tara war Irey, che e Pilato.
JOH 19:15 Pero jaxirobꞌ aruobꞌ taca inteꞌ nuxi nuc otronyajr y chenobꞌ: —Chamsenic, chamsenic. Chꞌubꞌanic tut e cruz, che e gente era. Pero e Pilato che: —¿O icꞌani ca tuaꞌ inchꞌubꞌa Irey era tut e cruz? che e Pilato. Pero uwinquir e inmojr sacerdotiobꞌ ojron y che: —Non matucꞌa otronteꞌ carey, sino que jax taca carey xeꞌ turu tama e chinam Roma, che uwinquir e inmojr sacerdotiobꞌ era.
JOH 19:16 Entonces e Pilato uyajcꞌu e Jesús tama ucꞌabꞌobꞌ tuaꞌ uchꞌubꞌobꞌ tut e cruz. Y e gente era cay uquerejbꞌobꞌ uqꞌuechiobꞌ ixin e Jesús.
JOH 19:17 Entonces e Jesús ubꞌiti ucruz tor uquejrebꞌ y ixin tama inteꞌ lugar xeꞌ ucꞌabꞌa Calvario xeꞌ jax or inteꞌ witzir xeꞌ bꞌan uwirnar cocha ubꞌaquer ujor e gente. Y ucꞌabꞌa or e witzir era Gólgota tama e ojroner hebreo.
JOH 19:18 Y jax tama e lugar era tiaꞌ chꞌubꞌna e Jesús tama ut ucruz. Y ayan chateꞌ ajxujch xeꞌ chꞌubꞌna tuyejtzꞌer e Jesús ubꞌan xeꞌ chꞌubꞌnobꞌ tama ut inteꞌ inteꞌ ucruz y ya chꞌubꞌna e Jesús tuyuxin tama ut ucruz.
JOH 19:19 Entonces e Pilato uyare tuaꞌ aturbꞌana inteꞌ pachpachteꞌ tujor ucruz e Jesús tiaꞌ chꞌar tzꞌijbꞌabꞌir y che: JAX ERA E JESÚS XEꞌ TUAꞌ E CHINAM NAZARET XEꞌ JAX E REY TUAꞌ E GENTE TUAꞌ E ISRAEL. Bꞌan chꞌar tzꞌijbꞌabꞌir tujor ucruz e Jesús.
JOH 19:20 Y meyra gente tuaꞌ e Israel ixiobꞌ y uchiobꞌ leer lo que quetpa tzꞌijbꞌabꞌir tujor ucruz e Jesús, cocha e lugar era majax innajt tut e chinam Jerusalem. Y e ojroner tama e pachpachteꞌ era chꞌar tzꞌijbꞌabꞌir uxyajr, inyajr tama e ojroner hebreo, inyajr tama e ojroner latín, y inyajr tama e ojroner griego.
JOH 19:21 Y tamar era cay qꞌuecranobꞌ uwinquirobꞌ e inmojr sacerdotiobꞌ y uyareobꞌ e Pilato y che: —Ira atzꞌijbꞌa que ‘Jax e Rey tuaꞌ e gente tuaꞌ e Israel’ sino que tzꞌijbꞌan que: “Jaxir che que nen e Rey tuaꞌ e gente tuaꞌ e Israel”, che e nuquir winicobꞌ era.
JOH 19:22 Pero ojron e Pilato y che: —Lo que intzꞌijbꞌix intzꞌijbꞌix, y bꞌan taca tuaꞌ aquetpa, che e Pilato.
JOH 19:23 Pues entonces conda e soldadobꞌ cꞌapa uchꞌubꞌobꞌ e Jesús tut e cruz, cay uxixiobꞌ ubꞌujc tuaꞌ alocꞌoy cuatro tájo tamar. Y tamar era inteꞌ inteꞌ soldado uchꞌami inteꞌ tájo. Pero ayan otronteꞌ ubꞌujc e Jesús xeꞌ galan jarbꞌir xeꞌ intera taca bꞌujc.
JOH 19:24 Entonces ojronobꞌ e soldadobꞌ era jaxobꞌ taca y chenobꞌ: —Ma erer cawejru e bꞌujc era. ¿Ma ca nic más bueno tuaꞌ catzꞌijbꞌa inteꞌ inteꞌ cacꞌabꞌa tama inteꞌ inteꞌ tun tuaꞌ cawira chi tuaꞌ uchꞌami e bꞌujc era? che e soldadobꞌ. Y bꞌan uchiobꞌ tuaꞌ acꞌapa achempa bꞌan cocha chꞌar tzꞌijbꞌabꞌir tama uyojroner e Dios tiaꞌ che que: “Uxere ubꞌobꞌ tama nibꞌujc, y utzꞌijbꞌobꞌ ucꞌabꞌobꞌ tama cora tun tuaꞌ uwirobꞌ chi tacar tuaꞌ aquetpa.”
JOH 19:25 Y tuyejtzꞌer e cruz tiaꞌ chꞌubꞌna e Jesús ya warobꞌ cora ixictac xeꞌ jax utuꞌ e Jesús taca ucꞌojna, y e María xeꞌ jax uwixcar e Cleofas, y e María xeꞌ tari tama e chinam Magdala.
JOH 19:26 Y conda e Jesús uwira utuꞌ y que ya war uyajcanuar xeꞌ war uchojres ut meyra tacar, uyare utuꞌ y che: —Ixic, niwajcanuar era tuaꞌ aquetpa bꞌan cocha inteꞌ asitz, che e Jesús.
JOH 19:27 Y nacpat era ojron e Jesús otronyajr y uyare e ajcanuar era y che: —Nituꞌ era tuaꞌ aquetpa bꞌan cocha atuꞌ coner, che e Jesús. Y tama e día era e ajcanuar era uqꞌueche ixin utuꞌ e Jesús tuaꞌ aquetpa tama uyotot.
JOH 19:28 Entonces conda e Jesús unata que cꞌapa tunor upatnar cay ojron y che: —Ataqui nitiꞌ, che e Jesús. Bꞌan uche tuaꞌ acꞌapa achempa tunor lo que chꞌar tzꞌijbꞌabꞌir tama uyojroner e Dios tamar jaxir.
JOH 19:29 Y ayan ingojr bꞌejt xeꞌ bꞌutꞌur taca e vino xeꞌ inchꞌaj ut. Entonces uchꞌaquiobꞌ inteꞌ teꞌ y ucachiobꞌ cora tinam tama upunto e teꞌ y umuquiobꞌ tama e vino y utꞌabꞌsiobꞌ tuaꞌ uyariobꞌ tuyej e Jesús.
JOH 19:30 Entonces e Jesús uyuchꞌi imbꞌijc e vino era xeꞌ inchꞌaj ut y che: —Cꞌapa ixto yaꞌ tunor nipatnar, che e Jesús. Entonces luccha ujor y chamay.
JOH 19:31 Pues e día era jax e día conda war uyustes ubꞌobꞌ e gente tama e Israel tuaꞌ oꞌchoy awiobꞌ tama e nojqꞌuin pascua. Y tamar era machix cꞌani uwirobꞌ tin e chꞌurobꞌ tut e cruz tama inteꞌ nuxi día tuaꞌ e jiriar cocha era. Y tamar era e nuquir winicobꞌ tuaꞌ e Israel ucꞌajtiobꞌ tuaꞌ e Pilato tuaꞌ uyare acꞌocchina ut uyaꞌ tin e chꞌubꞌna tut e cruz tuaꞌ achamayobꞌ inyajrer tuaꞌ erer uyemsiobꞌ wacchetaca.
JOH 19:32 Y tamar era ixin cora soldadobꞌ tut e winicobꞌ xeꞌ chꞌurobꞌ inteꞌ inteꞌ tama ut ucruz y ucꞌocchiobꞌ ut uyaꞌ inteꞌ ajxujch y de allí ucꞌocchiobꞌ ut uyaꞌ otronteꞌ ajxujch xeꞌ chꞌur tuyejtzꞌer e Jesús.
JOH 19:33 Pero conda cꞌotoyobꞌ tuyejtzꞌer e Jesús uwirobꞌ que chamenix y tamar era machi ucꞌocchiobꞌ ut uyaꞌ jaxir.
JOH 19:34 Entonces inteꞌ soldado era ixin y uxeqꞌue uchejchec e Jesús, y wacchetaca locꞌoy uchꞌichꞌer yabꞌarbꞌir taca e jaꞌ.
JOH 19:35 Y cocha nen xeꞌ war intzꞌijbꞌa e jun era inwira tunor era taca unacniut nen innata que erach tunor lo que war inwareox era, y tamar era erer ixcꞌupseyan tama tunor era.
JOH 19:36 Y numuy tunor era tuaꞌ acꞌapa achempa tunor lo que chꞌar tzꞌijbꞌabꞌir tama uyojroner e Dios tiaꞌ che: “Machi tuaꞌ axin acꞌajsa nien inteꞌ ut ubꞌaquer”, xeꞌ che tama uyojroner e Dios.
JOH 19:37 Y chꞌar tzꞌijbꞌabꞌir otronyajr tama uyojroner e Dios ubꞌan tiaꞌ che: “Tin e uxeqꞌuiobꞌ ut e Jesús cꞌani asutpa uwirobꞌ ut”, xeꞌ che tama uyojroner e Dios.
JOH 19:38 Pues entonces ayan inteꞌ winic xeꞌ ucꞌabꞌa José xeꞌ tari tama e chinam Arimatea xeꞌ jax inteꞌ ajcꞌupesiaj tama e Jesús pero mucur taca war uche umen que war ubꞌacre e inmojr nuquir winicobꞌ tuaꞌ e Israel. Entonces ixin tut e Pilato tuaꞌ uyubꞌi tuaꞌ jay erer uqꞌueche axin ucuerpo e Jesús tuaꞌ umuqui. Y e Pilato uyare que erer. Entonces e José uqꞌueche ixin e cuerpo y umuqui.
JOH 19:39 Y ayan otronteꞌ nuquir winic xeꞌ ucꞌabꞌa Nicodemo xeꞌ ixin tuaꞌ uwarajse e Jesús tama inyajr, pero acbꞌar uche umen que war asubꞌajra. Pues jaxir uqꞌueche ixin tres arroba perfume xeꞌ ucꞌabꞌa mirra xeꞌ yabꞌarbꞌir taca otronteꞌ perfume xeꞌ ucꞌabꞌa áloes xeꞌ galan ojtzꞌun pero xeꞌ atujri meyra.
JOH 19:40 Entonces ixin e José taca e Nicodemo tuaꞌ uqꞌuechiobꞌ axin ucuerpo e Jesús y tuaꞌ ubꞌaqꞌuiobꞌ taca e bꞌujc. Pues bꞌan uchiobꞌ: Umuquiobꞌ e bꞌujc bꞌajxan tama e perfume y de allí ubꞌaqꞌuiobꞌ ucuerpo e Jesús tamar, bꞌan cocha acay uchiobꞌ e gente tuaꞌ e Israel conda cꞌani umuquiobꞌ inteꞌ chamen.
JOH 19:41 Y tama e lugar tiaꞌ chamesna e Jesús ayan inteꞌ huerto. Y macuir e huerto era ayan inteꞌ chꞌen tama ut inteꞌ nuxi tun xeꞌ jax inteꞌ mujr tiaꞌ mato majchi amujca tamar.
JOH 19:42 Entonces ixin mujca ucuerpo e Jesús tama e mujr era porque machi quetpa innajt tutobꞌ y umen que cꞌanix anamtzꞌa ut e qꞌuin xeꞌ jax ucajyesnibꞌir e día tuaꞌ e jiriar tuaꞌ e gente tama e Israel.
JOH 20:1 Pues entonces tama e bꞌajxan día tuaꞌ e semana xeꞌ jax inteꞌ día domingo ixin e María xeꞌ tuaꞌ e chinam Magdala esto tiaꞌ mujca e Jesús. Y incsibꞌanto tama e hora era. Pero conda cꞌotoy, uwira que loqꞌuesbꞌirix e nuxi tun xeꞌ macar ani utiꞌ e chꞌen tamar.
JOH 20:2 Entonces ixin e María ajner tuaꞌ acꞌotoy tut e Pedro y tut inteꞌ ajcanuar xeꞌ chojresbꞌir ut meyra umen e Jesús y che: —Ayan chi ulocse ucuerpo Cawinquirar macuir e chꞌen y machi canata tiaꞌ qꞌuejcha ixin, che e María.
JOH 20:3 Entonces locꞌoy wacchetaca e Pedro taca e ajcanuar era tuaꞌ axiobꞌ esto tiaꞌ mujca e Jesús.
JOH 20:4 Y war aꞌjniobꞌ chatertiobꞌ era, pero más ajni e ajcanuar era, y tamar era cꞌotoy tut e mujr bꞌajxan que e Pedro.
JOH 20:5 Y jaxir pacwan uchꞌujcu macuir e chꞌen y uwira que ajtaquix ubꞌajqꞌuibꞌir turu, pero machi ochoy macuir e chꞌen.
JOH 20:6 Y de allí cꞌotoy e Simón Pedro. Pero jaxir machi quetpa patir sino que ochoy wacchetaca macuir e chꞌen, y uwira ubꞌan que ajtaquix e bꞌajqꞌuibꞌir turu.
JOH 20:7 Pero uwira que ujobꞌ jor e Jesús quetpa najtir y que tzꞌotbꞌir turu y que majax tacar e bꞌujc xeꞌ bꞌacꞌar ani ucuerpo e Jesús tamar.
JOH 20:8 Y nacpat era ochoy e ajcanuar xeꞌ cꞌotoy bꞌajxan tama e chꞌen. Y uwira tunor era y cay cꞌupseyan tama e Jesús que jaxir sutpa bꞌixcꞌa tujam e chamenobꞌ.
JOH 20:9 Pues tama e hora era machito unatobꞌ tucꞌa war che uyojroner e Dios tiaꞌ che que e Jesús cꞌani asutpa abꞌixcꞌa tujam e chamenobꞌ.
JOH 20:10 Entonces sutpa ixiobꞌ esto tama uyototobꞌ otronyajr.
JOH 20:11 Pero e María xeꞌ tuaꞌ e chinam Magdala quetpa wawan patir tutiꞌ e chꞌen era, war aꞌru. Y conda warto aꞌru pacwan uchꞌujcu macuir e chꞌen.
JOH 20:12 Y uwira que ayan chateꞌ ángel xeꞌ sacsac ut ubꞌujcobꞌ, y uwira que turobꞌ tiaꞌ chꞌar ani ucuerpo e Jesús: inteꞌ tiaꞌ chꞌar ani ujor y otronteꞌ tiaꞌ aquetpa ani unuc uyoc.
JOH 20:13 Entonces ojronobꞌ e angelobꞌ y chenobꞌ: —Ixic, ¿tucꞌa tuaꞌ war iyaru? che e angelobꞌ. Y che e María: —Pues umen que qꞌuejcha ixin Niwinquirar, y machi innata tiaꞌ ixin chꞌabꞌna, che e María.
JOH 20:14 Y wacchetaca sutpa eron tupat y uwira ut e Jesús, pero machi unata jay jax e Jesús era.
JOH 20:15 Entonces e Jesús uyubꞌi tuaꞌ e María y che: —Ixic, ¿tucꞌa tuaꞌ war iyaru? Y ¿chi war asajca? che e Jesús. Pues e María uchebꞌe que e Jesús jax e ajcojc huerto. Y tamar era uyare y che: —¿O net ca xeꞌ aqꞌueche ixin ucuerpo e Jesús? Arenen tiaꞌ ixiet achꞌabꞌu tuaꞌ erer inxin impojro tuaꞌ inqꞌueche axin, che e María.
JOH 20:16 Entonces ojron e Jesús y che: —María, che e Jesús. Y wacchetaca e María sutpa uwira e Jesús y ojron tama e ojroner hebreo y che: —Raboni, che e María. Pues e ojroner raboni war che Niwajcanseyajet.
JOH 20:17 Y che e Jesús: —Actanen era. Irix ameqꞌuen más era, porque merato inxin tut Nitata. Pero quiqui aren tunor niwermanuobꞌ que nen cꞌani intꞌabꞌay inxin tut Nitata xeꞌ jax Itata nox ubꞌan, y tut Nidiosir xeꞌ jax Idiosir nox ubꞌan, che e Jesús.
JOH 20:18 Entonces e María xeꞌ tuaꞌ e chinam Magdala ixin tuaꞌ uyare uyajcanuarobꞌ e Jesús que uwira ut Cawinquirar y uchecsu tutobꞌ tunor lo que arobꞌna umener.
JOH 20:19 Pues entonces tama e día era xeꞌ jax inteꞌ día domingo conda war acbꞌare, ya morojsebꞌir turobꞌ uyajcanuarobꞌ e Jesús tama inteꞌ otot tiaꞌ umaqui ubꞌobꞌ umen que war ubꞌacriobꞌ e gente tuaꞌ e Israel. Y wacchetaca checta wawan e Jesús tujamobꞌ y che: —Chꞌamic e jiriar, che e Jesús.
JOH 20:20 Y conda cꞌapa ojron cocha era e Jesús cay uwirse ucꞌabꞌ y uchejchec tiaꞌ xejcꞌa. Y conda uyajcanuarobꞌ uwirobꞌ tunor era tzayobꞌ meyra porque uwirobꞌ ut Cawinquirar.
JOH 20:21 Entonces ojron e Jesús otronyajr y che: —Chꞌamic e jiriar. Bꞌan cocha Nitata uyebꞌta tarien, y bꞌan ixto nen war inwebꞌtox ixixin ubꞌan tuaꞌ ichecsu niwojroner tut tunor e gente tara tor e rum, che e Jesús.
JOH 20:22 Y de allí uyujta umusic tamarobꞌ y che: —Chꞌamic Unawalir e Dios.
JOH 20:23 Inwajcꞌox e cꞌotorer tuaꞌ iware e gente que: “Cꞌumpix e Dios tacarox tama tunor imabꞌambꞌanir.” Pues conda iware cocha era Cadiosir axin ixto acꞌumpa tacarobꞌ. Y inwajcꞌox e cꞌotorer ubꞌan tuaꞌ iware e gente que machito war acꞌumpa e Dios tacarobꞌ tamar e mabꞌambꞌanir lo que cay uchiobꞌ. Y conda iware cocha era war che que aquetpato tama ujorobꞌ e mabꞌambꞌanir lo que cay uchiobꞌ, che e Jesús.
JOH 20:24 Pues entonces e Tomás xeꞌ arobꞌna Cuach xeꞌ jax inteꞌ tujam e once ajcanuarobꞌ machi turu conda checta e Jesús tujam e inmojr era tama inteꞌ acbꞌar.
JOH 20:25 Pero e inmojr ajcanuarobꞌ uyareobꞌ e Tomás y chenobꞌ: —Non cawira ut Cawinquirar, che e ajcanuarobꞌ era. Pero e Tomás che: —Jay machi inwira uchꞌenar e clavo tama ucꞌabꞌ machi tuaꞌ incꞌupse. Y jay machi onse nicꞌabꞌ tama uchꞌenar e clavo, y onse nicꞌabꞌ tama uchejchec, machi tuaꞌ incꞌupse, che e Tomás.
JOH 20:26 Entonces conda numuy ocho día sutpa umorojse ubꞌobꞌ uyajcanuarobꞌ e Jesús otronyajr tama inteꞌ otot. Y yixto turu e Tomás tacarobꞌ. Y macar e puerta tupatobꞌ conda wacchetaca checta wawan e Jesús tutobꞌ otronyajr y che: —Chꞌamic e jiriar, che e Jesús.
JOH 20:27 Y wacchetaca uyare e Tomás y che: —Chꞌujcun awira nicꞌabꞌ y osen or acꞌabꞌ tama uchꞌenar e clavo, y tares acꞌabꞌ era y osen tama nichejchec. Ira ache abꞌa que machi icꞌupseyan, sino que cꞌupsen que sutpa bꞌixqꞌuen, che e Jesús.
JOH 20:28 Entonces che e Tomás: —Net jax Niwinquiraret y jax Nidiosiret, che e Tomás.
JOH 20:29 Y che e Jesús: —Tomás, coner era war icꞌupseyan tamaren umen que awira niut. Pero más chojbꞌesbꞌir utobꞌ tin e axin acꞌupseyanobꞌ tamaren motor que ma tiaꞌ uwirenobꞌ, che e Jesús.
JOH 20:30 Pues entonces ayan meyra sian milagro xeꞌ cay uche e Jesús tut uyajcanuarobꞌ que majax tzꞌijbꞌabꞌir tama e jun era.
JOH 20:31 Pero tunor e sian milagro lo que tzꞌijbꞌabꞌir tama e jun era, tzꞌijbꞌabꞌir tuaꞌ erer ixcꞌupseyan tama e Jesús xeꞌ jax e Cristo xeꞌ jax Uyunen e Dios. Y tunor tin e acꞌotoy acꞌupseyanobꞌ tamar ucꞌabꞌa e Jesús era axin uchꞌamiobꞌ e cuxtar xeꞌ machi tuaꞌ acꞌapa.
JOH 21:1 Pues entonces nacpat era e Jesús uchectes ubꞌa otronyajr tut cora uyajcanuarobꞌ tama utiꞌ e nuxi jaꞌ xeꞌ ucꞌabꞌa Tiberias. Y lo que numuy jax era:
JOH 21:2 Ya turu e Pedro taca e Tomás xeꞌ arobꞌna Cuach. Y turu ubꞌan e Natanael xeꞌ tari tama e chinam Caná tama e departamento Galilea. Y turobꞌ ubꞌan chateꞌ uyunenobꞌ e Zebedeo taca otro chateꞌ uyajcanuarobꞌ e Jesús.
JOH 21:3 Entonces ojron e Pedro y che: —Nen cꞌani inxin ta chucchay era, che e Pedro. Y e inmojr che: —Caxin ubꞌan tacaret, che e inmojr era. Entonces ochoyobꞌ tama inteꞌ barco y xanobꞌ cora tor e jaꞌ y cay upojchiobꞌ uchijrobꞌ macuir e jaꞌ. Pero tama e acbꞌar era matucꞌa cꞌaxi tama uchijrobꞌ.
JOH 21:4 Entonces conda cay sacojpa uwirobꞌ que ayan inteꞌ winic war tama utiꞌ e jaꞌ, pero machi unatobꞌ jay jax e Jesús era.
JOH 21:5 Entonces e Jesús che cocha era: —Apaxtac, ¿cormoxix ca? che e Jesús. Y jaxirobꞌ chenobꞌ: —Mato tucꞌa cachuqui, che e ajcanuarobꞌ era.
JOH 21:6 Entonces e Jesús che: —Tobꞌsenic ichijr chic teinxejr tama inojcꞌabꞌ y yajaꞌ tuaꞌ ixcorma, che e Jesús. Y bꞌan uchiobꞌ y bꞌutcꞌa uchijrobꞌ taca e sian chay este que machi uyubꞌiobꞌ uchꞌuyobꞌ alocꞌoy macuir e jaꞌ.
JOH 21:7 Entonces e ajcanuar xeꞌ chojresbꞌir ut meyra umen e Jesús uyare e Pedro y che: —Jax Cawinquirar. Entonces e Pedro xeꞌ war apatna pispis tacar taca uchanex ulapi ubꞌujc wacchetaca y tobꞌoy ixin tama e jaꞌ y cay nujxi tuaꞌ acꞌotoy tama utiꞌ e jaꞌ.
JOH 21:8 Pero e inmojr ajcanuarobꞌ era quetpobꞌ macuir e barco y cay uquerejbꞌobꞌ e chijr xeꞌ bꞌutcꞌa taca e sian chay esto cꞌotoyobꞌ tutiꞌ e jaꞌ, porque majax innajt e barco tutiꞌ e jaꞌ; quetpobꞌ cocha cuarenta y ocho brazada.
JOH 21:9 Y conda cꞌotoy, locꞌoyobꞌ tor e rum y utajwiobꞌ inteꞌ cꞌajc xeꞌ xumbꞌir tor e rum taca e siꞌ, y yajaꞌ chꞌar incojt chay tor e cꞌajc. Y ayan e pan ubꞌan.
JOH 21:10 Y che e Jesús: —Qui taresic cora chay tama e chijr xeꞌ wartocto ichuqui, che e Jesús.
JOH 21:11 Entonces e Simón Pedro ochoy tama e barco y cay uquerejbꞌa e chijr esto tiaꞌ taquin e rum. Y ayan meyra sian chay tama e chijr era, esto 153. Y motor que ayan meyra sian chay pero machi wejrtzꞌa e chijr.
JOH 21:12 Entonces ojron e Jesús y che: —Laric ixto wenic yaꞌ, che e Jesús. Y ma inteꞌ uyajcanuar cay uyubꞌiobꞌ tuaꞌ que: ¿Chiet net? porque tunorobꞌ war unatobꞌ que jax Cawinquirar.
JOH 21:13 Entonces e Jesús ixin tuyejtzꞌer e cꞌajc y uchꞌami e pan y cay uxere taca inteꞌ intiobꞌ. Y bꞌan uche taca e chay ubꞌan.
JOH 21:14 Pues jax era e uxyajr que e Jesús uwirse ubꞌa tut uyajcanuarobꞌ conda cꞌapa sutpa bꞌixcꞌa tujam e chamenobꞌ.
JOH 21:15 Pues entonces conda cꞌapa wiobꞌ e Jesús cay uyubꞌi tuaꞌ Pedro xeꞌ ucꞌabꞌa Simón ubꞌan y che: —Net acꞌabꞌa Simón xeꞌ uyunenet e Jonás. ¿Acꞌanien ca más que e inmojr era? che e Jesús. Y ojron e Pedro y che: —Niwinquiraret, inyajta ixto oit yaꞌ. Net anata que intzay inwiret, che e Pedro. Y che e Jesús: —Quiqui cojcsanen tama tunor tin e wartocto acay acꞌupseyanobꞌ tamaren bꞌan cocha inteꞌ ajcojc oveja xeꞌ axin ucojco tunor e chuchu oveja, che e Jesús.
JOH 21:16 Y nacpat era e Jesús uyubꞌi tuaꞌ e Pedro otronyajr y che: —Net acꞌabꞌa Simón xeꞌ uyunenet e Jonás. ¿Acꞌanien ca? che e Jesús. Y e Pedro che: —Niwinquiraret, inyajta ixto oit yaꞌ. Net anata que intzay inwiret, che e Pedro. Y che e Jesús: —Quiqui cojcsanen tama tunor tin e acꞌupseyanobꞌ tamaren bꞌan cocha inteꞌ ajcojc oveja xeꞌ axin ucojco tunor e oveja, che e Jesús.
JOH 21:17 Entonces e Jesús sutpa uyubꞌi tuaꞌ e Pedro uxyajr y che: —Net acꞌabꞌa Simón xeꞌ uyunenet e Jonás. ¿Erachet ca que war ayajta niut? che e Jesús. Y e Pedro quetpa tzajtaca ut umen que uxyajr war ubꞌna tuaꞌ jay uyajta ut e Jesús. Y che e Pedro: —Niwinquiraret, net anata tunor, y net anata que inyajta oit, che e Pedro. Y che e Jesús: —Quiqui cojcsanen tama tunor tin acꞌupseyanobꞌ tamaren bꞌan cocha inteꞌ ajcojc oveja xeꞌ axin ucojco tunor e oveja.
JOH 21:18 Cꞌani inwaret era que conda maxtaquetto ani alapi abꞌujc cocha acꞌani tuaꞌ iꞌxin tiaꞌ acꞌani net, pero conda iꞌxin iquetpa nojta gente cꞌani atuttzꞌi ut acꞌabꞌ tuaꞌ ibꞌujcsena umen otronteꞌ y ucꞌani tuaꞌ iqꞌuejcha iꞌxin tiaꞌ machi ani acꞌani net, che e Jesús.
JOH 21:19 Pues tamar uyojroner era e Jesús uchecsu tut e Pedro cocha quetpa tuaꞌ achamesna tuaꞌ atajttzꞌa ucꞌabꞌa e Dios tamar. Entonces ojron e Jesús otronyajr y che: —Incoꞌ tanipat, che e Jesús.
JOH 21:20 Entonces e Pedro sutpa uwira que war axana tupat e ajcanuar xeꞌ chojresbꞌir ut meyra umen e Jesús. Pues e ajcanuar era jax xeꞌ cay weꞌ tuyejtzꞌer e Jesús conda merato achamesna y xeꞌ cay uyubꞌi tuaꞌ que: “¿Chi umen tuaꞌ atujchꞌa?”
JOH 21:21 Y conda e Pedro sutpa uwira ut e ajcanuar era cay uyubꞌi tuaꞌ e Jesús y che: —Niwinquiraret, ¿y e winic era, tucꞌa tuaꞌ anumuy tacar? che e Pedro.
JOH 21:22 Y che e Jesús: —Jay nen incꞌani tuaꞌ aturuan este que insutpa waten otronyajr, majax net tuaꞌ anata tama tunor era. Pero net, lar tanipat, che e Jesús.
JOH 21:23 Y tamar era cay xana ixin inteꞌ ojroner tut tunor e hermanuobꞌ que e ajcanuar era machi tuaꞌ achamay. Pero majax bꞌan cocha era arobꞌna umen e Jesús, sino lo que che e Jesús jax era: “Jay nen incꞌani tuaꞌ aturuan este que insutpa waten otronyajr, majax net tuaꞌ anata tama tunor era”, che e Jesús.
JOH 21:24 Pues jax e ajcanuar era xeꞌ war utzꞌijbꞌa tunor era tibꞌa, y bꞌan cocha cay inwira numuy y bꞌan war intzꞌijbꞌa. Y canata que erach tunor e ojroner era.
JOH 21:25 Pues ayanto meyra lo que uche e Jesús que machi quetpa tzꞌijbꞌabꞌir tara. Pero jay tzꞌijbꞌabꞌir ani tunor lo que cay uche e Jesús, nen innata que ma tzꞌacar e lugar tama tunor or e rum tiaꞌ erer aquetpa ani tunor e sian jun. Tara acꞌapa tunor niwojroner, che e Juan.
ACT 1:1 Pues era cꞌani intzꞌijbꞌet otronyajr, Teófilo xeꞌ intzay inwiret. Pues cay intzꞌijbꞌet inteꞌ ojroner ixnix cora tama tunor lo que cay uche e Jesús, y tama tunor lo que cay ucansion desde ucajyesnibꞌir tunor era
ACT 1:2 este que cꞌotoy e día conda tꞌabꞌesna ixin tut e qꞌuin tichan. Pero conda merato tꞌabꞌesna ixin Cawinquirar tut e qꞌuin, cay uyare tin e sicbꞌabꞌir umener tuaꞌ aquetpobꞌ uyapostolobꞌ tunor lo que ucꞌani tuaꞌ uchiobꞌ. Bꞌan uche taca utacarsiaj Unawalir e Dios.
ACT 1:3 Y conda cꞌapa chamay Cawinquirar Jesucristo, sutpa bꞌixcꞌa tujam e chamenobꞌ y cay uwirse ubꞌa tut uyajcanuarobꞌ tuaꞌ aquetpa chequer tutobꞌ que jaxir bꞌixir ixto yaꞌ, y bꞌan cocha era uche tama inteꞌ tiempo de cuarenta día, y war acanseyan tamar uchinam e Dios.
ACT 1:4 Y conda turuto e Jesús taca uyapostolobꞌ tama e chinam Jerusalem, cay uyareobꞌ que machi tuaꞌ alocꞌoyobꞌ tama e chinam era tama inteꞌ tiempo y che: —Cojconic tara tama e chinam Jerusalem este que axin ixajcꞌuna Unawalir e Dios bꞌan cocha arobꞌnox umen Catata Dios, y bꞌan cocha arobꞌnox nimener ubꞌan.
ACT 1:5 Pues e Juan chꞌuyma taca e jaꞌ, pero watar e día era conda tuaꞌ ixchꞌujya taca Unawalir e Dios, che e Jesús.
ACT 1:6 Y tama inteꞌ día conda morojsebꞌirobꞌ tunorobꞌ taca e Jesús tujor e witzir xeꞌ ucꞌabꞌa Olivo, jaxirobꞌ cay uyubꞌiobꞌ tuaꞌ jaxir y chenobꞌ: —Cawinquiraret, ¿coner ca era conda iꞌxin awajcꞌon tunor cacꞌotorer otronyajr tama cachinam Israel tuaꞌ cacꞌotori non y que machi ixto tuaꞌ acꞌotori e gente romano ticajor? che e apostolobꞌ.
ACT 1:7 Y e Jesús y che: —Mix jax nox xeꞌ tuaꞌ inata tucꞌa día y nien tucꞌa año conda cꞌani uche tunor era Catata Dios, cocha tunor era quetpa yebꞌar ucꞌabꞌ jax taca.
ACT 1:8 Pero nox tuaꞌ ichꞌami ucꞌotorer e Dios conda acꞌotoy Unawalir e Dios tuaꞌ uchꞌuyox, y tamar era nox cꞌani ixquetpa ajchecsuyajox tanibꞌa tama tunor or e lugar tama e chinam Jerusalem, y tama tunor or e lugar tama e departamento Judea, y tama tunor or e lugar tama e departamento Samaria, y cꞌani ixquetpa ajchecsuyajox tanibꞌa tama tunor ucꞌapesnibꞌir or e rum este tama e lugar xeꞌ más innajt, che e Jesús.
ACT 1:9 Conda e Jesús cꞌapa ojron cocha era, cay tꞌabꞌay ixin tichan, y uyajcanuarobꞌ war awawanobꞌ war uwirobꞌ tunor era, y e Jesús intaca cay tꞌabꞌay ixin tut e qꞌuin, y ochoy tama inteꞌ tocar y namtzꞌa ut ixin macuir, y jaxirobꞌ machi sutpa uwirobꞌ ut otronyajr.
ACT 1:10 Y ya warobꞌ war uchꞌujcobꞌ tichan warto atꞌabꞌay axin e Jesús, conda wacchetaca checta chateꞌ winicobꞌ tutobꞌ xeꞌ bꞌujcsebꞌirobꞌ taca e bꞌujc xeꞌ sacsac ut.
ACT 1:11 Y ojronobꞌ y chenobꞌ: —Winicox xeꞌ tuox e departamento Galilea, ¿tucꞌato warox ichꞌujcu tichan tut e qꞌuin? E Jesús era xeꞌ loqꞌuesna ixin tijam y xeꞌ tꞌabꞌesna ixin tut e qꞌuin, cꞌani asutpa watar otronyajr bꞌan cocha cay iwira ixin tichan tut e qꞌuin era, che e chateꞌ winicobꞌ era.
ACT 1:12 Entonces locꞌoyobꞌ e apostolobꞌ tama e witzir Olivo era y ixin ochoyobꞌ tama e chinam Jerusalem xeꞌ majax innajt tutobꞌ bꞌan cocha actana axana inteꞌ umen uley e Moisés, porque ma erer axin innajt inteꞌ tama inteꞌ día tuaꞌ e jiriar.
ACT 1:13 Entonces conda cꞌotoyobꞌ tama e chinam Jerusalem ixiobꞌ esto tama inteꞌ otot y tꞌabꞌay ixin y ochoyobꞌ macuir inteꞌ cuarto tichan tiaꞌ war uchꞌamiobꞌ e posada. Y xeꞌ war acꞌotoyobꞌ era jax e Pedro, y e Santiago, y e Juan, y e Andrés. Y war acꞌotoyobꞌ e Felipe, y e Tomás, y e Bartolomé. Y war acꞌotoyobꞌ e Mateo, y e Jacobo xeꞌ jax uyunen e Alfeo, y e Simón xeꞌ tuaꞌ e partido xeꞌ ucꞌabꞌa Cananista, y e Judas xeꞌ jax uwijtzꞌin e Jacobo.
ACT 1:14 Y e apostolobꞌ era war umorojse ubꞌobꞌ iraj iraj tuaꞌ ucꞌajtiobꞌ taca e Dios taca uwijtzꞌinobꞌ e Jesús, y taca e María xeꞌ jax utuꞌ e Jesús, y taca e inmojr ixictac.
ACT 1:15 Pues entonces tama inteꞌ día conda war umorojse ubꞌobꞌ cocha era, ayan meyra ajcꞌupesiajobꞌ yajaꞌ esto 120 winicobꞌ taca e ixictac. Y tamar era achpa wawan e Pedro tujamobꞌ y cay ojron y che:
ACT 1:16 —Niwermanuox, ucꞌani tuaꞌ acꞌapa achempa lo que chꞌar tzꞌijbꞌabꞌir tama uyojroner e Dios umen e David tamar e Judas. Pues arobꞌna e David umen Unawalir e Dios que jax e Judas era xeꞌ quetpa tuaꞌ ubꞌijres tin e tuaꞌ uqꞌueche axin e Jesús tama e cárcel.
ACT 1:17 Pues e Judas sicbꞌabꞌir ani, y chena cocha non xeꞌ apostolon tuaꞌ aquetpa ticajam tuaꞌ apatna tama upatnar e Jesús.
ACT 1:18 Pero ixin umani imbꞌijc rum taca e tumin lo que toana tamar e mabꞌambꞌanir lo que cay uche. Y tamar era conda ochoy tama e rum xeꞌ umani jotzpa tari tichan y wawan xijrcojt tama ujor y witcꞌa unac y locꞌoy tunor usojyom tor e rum.
ACT 1:19 Y tunor e gente xeꞌ turobꞌ tama e chinam Jerusalem cay uyubꞌiobꞌ tamar lo que numuy, y tamar era uturbꞌobꞌ ucꞌabꞌa e rum era que: Acéldama, xeꞌ war che: “E rum tiaꞌ yajra e chꞌich.”
ACT 1:20 Y bꞌan numuy tama e Judas porque chꞌar tzꞌijbꞌabꞌir tama e Salmos que: Cꞌani aquetpa choquem uyotot, y mamajchi tuaꞌ aturuan tamar. Y chꞌar tzꞌijbꞌabꞌir ubꞌan y che: Ucꞌani tuaꞌ achꞌajma lo que cay uche umen otronteꞌ. Bꞌan chꞌar tzꞌijbꞌabꞌir tama uyojroner e Dios.
ACT 1:21 ’Entonces nox era erer iwira que tara ayan cora winicobꞌ ticajam xeꞌ cay xanobꞌ tacaron tunor e tiempo conda war axana Cawinquirar Jesús ticajam.
ACT 1:22 Pues cay xanobꞌ tacaron desde que chꞌujya e Jesús umen e Juan xeꞌ ajchꞌuymar, y warto axanobꞌ tacaron conda tꞌabꞌesna ixin Cawinquirar tut e qꞌuin. Y tamar era ucꞌani tuaꞌ casicbꞌa inteꞌ tujam e winicobꞌ era tuaꞌ aquetpa ajchecsuyaj tacaron xeꞌ uwira y xeꞌ unata que sutpix bꞌixcꞌa Cawinquirar Jesucristo tujam e chamenobꞌ, che e Pedro.
ACT 1:23 Entonces uturbꞌobꞌ chateꞌ winicobꞌ tuaꞌ ubꞌijnuobꞌ chi tuaꞌ aquetpa apóstol tama upuesto e Judas. Y uturbꞌobꞌ e José xeꞌ ucꞌabꞌa Barsabás xeꞌ arobꞌna Justo ubꞌan, y uturbꞌobꞌ e Matías.
ACT 1:24 Y cay ucꞌajtiobꞌ taca e Dios cocha era y che: —Cawinquiraret, net anata lo que ayan tama uyalmobꞌ tunor e gente. Irsenon era chi acꞌani tuaꞌ aquetpa
ACT 1:25 tuaꞌ uchꞌami e patnar cocha inteꞌ apóstol lo que satpa umen e Judas conda cucrema tama e mabꞌambꞌanir y ixin tuaꞌ uchꞌami uyeror tamar lo que uche. Bꞌan cay ucꞌajtiobꞌ taca e Dios.
ACT 1:26 Y tamar era cay utzꞌijbꞌobꞌ ucꞌabꞌobꞌ tama inteꞌ inteꞌ tun y e tun xeꞌ ajacha tuaꞌ uwirsiobꞌ chi tuaꞌ aquetpa apóstol tamar e cꞌabꞌa xeꞌ tzꞌijbꞌabꞌir tamar. Y tamar era jax e Matías xeꞌ quetpa sicbꞌabꞌir tuaꞌ aquetpa inteꞌ tujam e doce apostolobꞌ.
ACT 2:1 Pues entonces conda cꞌotoy e día tuaꞌ e nojqꞌuin xeꞌ ucꞌabꞌa Pentecostés, umorojse ubꞌobꞌ tunor tin e war acꞌupseyanobꞌ tama e Cristo tama inteꞌ taca lugar.
ACT 2:2 Y wacchetaca cay uyubꞌiobꞌ inteꞌ nuxi jicnar xeꞌ tari tut e qꞌuin. Bꞌan e jicnar era cocha conda war ajicna axin inteꞌ nuxi icꞌar. Y tunor tin e turobꞌ macuir e otot cay uyubꞌiobꞌ e jicnar era.
ACT 2:3 Entonces cay checta lo que lar uwirnar cocha inteꞌ cꞌajc xeꞌ awawan tujorobꞌ tama e icꞌar, y bꞌan uwirnar e cꞌajc era cocha inteꞌ uyac inteꞌ winic. Y cay uxere ubꞌa ixin e cꞌajc era este que war inteꞌ cꞌajc tujor inteꞌ inteꞌ ajcꞌupesiajobꞌ xeꞌ turobꞌ tama e otot era.
ACT 2:4 Y bꞌujtꞌa uyalmobꞌ tunor e ajcꞌupesiajobꞌ era taca Unawalir e Dios y cay ojronobꞌ inteꞌ intiobꞌ tama inteꞌ ojroner xeꞌ majax tuobꞌach. Jax Unawalir e Dios xeꞌ uche tuaꞌ uyubꞌiobꞌ oꞌjron inteꞌ intiobꞌ tama inteꞌ ojroner xeꞌ majax tuobꞌach.
ACT 2:5 Y tama e día era ayan meyra gente xeꞌ tuobꞌ e Israel tama e chinam Jerusalem era xeꞌ war acꞌapa uchiobꞌ tunor bꞌan cocha arobꞌnobꞌ umen e religión tuaꞌ e gente tuaꞌ e Israel. Y e gente era tariobꞌ tama tunor or e rum tuaꞌ acꞌotoyobꞌ tama e nojqꞌuin era.
ACT 2:6 Y conda cay uyubꞌiobꞌ e nuxi jicnar tunor e gente era xeꞌ war axanobꞌ tama e calle cay umorojse ubꞌobꞌ tuaꞌ uwirobꞌ tucꞌa war anumuy. Y machi unatobꞌ tucꞌa tuaꞌ ubꞌijnuobꞌ, porque war uyubꞌiobꞌ uyojronerobꞌach inteꞌ intiobꞌ bꞌan cocha ojronobꞌ e gente tama ulugarobꞌach.
ACT 2:7 Y war ubꞌijnu uwirobꞌ tunor e gente era y war abꞌactobꞌ uwirobꞌ, y cay uyare ubꞌobꞌ y che: —¿Ma ca jax tama e departamento Galilea tariobꞌ tunor e winicobꞌ xeꞌ war oꞌjronobꞌ era?
ACT 2:8 ¿Y tucꞌa nic era que war coybꞌi oꞌjronobꞌ tama inteꞌ inteꞌ cawojroner bꞌan cocha cay cansenon ojronon inteꞌ intion umen catuꞌ tiaꞌ chꞌion?
ACT 2:9 Porque ticajam non xeꞌ ajwaron tara tama e chinam Jerusalem ayan tin e tariobꞌ tama e lugar Partia, y tama e lugar Media, y tama e lugar Elam. Y ayan ticajam tin e tariobꞌ tama e lugar Mesopotamia, y tama e lugar Judea, y tama e lugar Capadocia. Y ayan ticajam tin e tariobꞌ tama e lugar Ponto, y tama e departamento Asia.
ACT 2:10 Y ayan ticajam tin e tariobꞌ tama e lugar Frigia, y tama e lugar Panfilia, y tama e lugar Egipto, y xeꞌ tariobꞌ tama e lugar Africa xeꞌ jax e lugar más innajt que e Cirene. Y ayan ticajam e gente romano xeꞌ turobꞌ tara ubꞌan, y tujam e gente romano era ayan tin e cuxpobꞌ tama careligión tara, y ayan tin e cꞌotoy uchꞌamiobꞌ careligión ubꞌan conda nuquir gentiobꞌix.
ACT 2:11 Y ayan e gente ticajam xeꞌ tariobꞌ tama e lugar Creta, y tama e lugar Arabia. Pero tunoron war coybꞌi uyareonobꞌ lo que galan tama Cadiosir, pero war coybꞌi tama inteꞌ inteꞌ cawojroner tiaꞌ chꞌion. Bꞌan ojronobꞌ e gente era jaxobꞌ taca.
ACT 2:12 Y tunor e sian gente era war ubꞌijnu uwirobꞌ tunor era y machi unatobꞌ tucꞌa tuaꞌ ubꞌijnuobꞌ tamar, y cay uyubꞌi ubꞌobꞌ jaxobꞌ taca y chenobꞌ: —¿Y tucꞌa war che tunor era? che e gente era.
ACT 2:13 Pero ayan tujam e gente era tin e intaca war atzeniobꞌ jaxobꞌ taca y chenobꞌ: —E gente era intaca war acarayobꞌ, che e gente era xeꞌ war atzeniobꞌ.
ACT 2:14 Pues entonces achpa wawan e Pedro taca e inmojr once apostolobꞌ y cay ojron taca inteꞌ nuxi nuc y uyare e gente cocha era y che: —Winicox xeꞌ tuox e Israel y tunorox xeꞌ turox tara tama e chinam Jerusalem, natanic tunor lo que cꞌani inwareox y ubꞌinic tunor era.
ACT 2:15 Cꞌani inwareox que e winicobꞌ era machi war acarayobꞌ cocha nox war ani ibꞌijnu, porque era wartocto atꞌabꞌay ut e qꞌuin.
ACT 2:16 Ma cocha erer. Lo que war iwira era jax taca lo que chꞌar tzꞌijbꞌabꞌir umen e profeta Joel xeꞌ che cocha era:
ACT 2:17 Tama e tiempo conda axin acꞌapa tunor or e rum era, che e Dios, cꞌani inwechꞌe axin Ninawalir tama tunor e gente xeꞌ turobꞌ tama tunor or e rum. Y cꞌani inware isitzobꞌ y iwijchꞌoctacobꞌ inteꞌ inteꞌ ojroner y jaxirobꞌ tuaꞌ asutpa uyareox tucꞌa era otronyajr, y e chꞌom maxtacobꞌ tuaꞌ amayjutiobꞌ tamar lo que cꞌani inwirsiobꞌ, y e onian winicobꞌ tuaꞌ uchꞌamiobꞌ cora wayac lo que cꞌani inwajcꞌuobꞌ, che e Dios.
ACT 2:18 Y cꞌani inwechꞌe axin Ninawalir tama nimanobꞌ xeꞌ winicobꞌ y xeꞌ ixictacobꞌ, y cꞌani uchecsuobꞌ tut e gente lo que cꞌani inwareobꞌ, che e Dios.
ACT 2:19 Y nen cꞌani inwirsiox meyra seña tut e qꞌuin xeꞌ imbꞌacꞌajr uwirnar, y cꞌani inwirsiox meyra seña tor e rum ubꞌan. Y cꞌani achecta e chꞌich y e cꞌajc y e sian bꞌutz, che e Dios.
ACT 2:20 Y e qꞌuin cꞌani asutpa incsibꞌan uwirnar, y e luna cꞌani asutpa uwirnar bꞌan cocha e chꞌich. Bꞌan tuaꞌ anumuy bꞌajxan que acꞌotoy e día conda watar Iwinquirar, xeꞌ jax e día xeꞌ más imbꞌacꞌajr uwirnar y xeꞌ más nojta tama tunor, che e Dios.
ACT 2:21 Y tunor tin e axin upejca Cawinquirar cꞌani acorpesnobꞌ. Bꞌan chꞌar tzꞌijbꞌabꞌir tama uyojroner e Dios umen e profeta Joel.
ACT 2:22 ’Niwermanuox xeꞌ tuox e Israel, ubꞌinic ninuc era. Cꞌani inwareox era que e Jesús xeꞌ tuaꞌ e chinam Nazaret jax inteꞌ winic xeꞌ chectesna umen e Dios que tuaꞌ ixto yaꞌ umen que cay uche meyra sian maravilla, y meyra sian milagro, y que cay uche meyra sian checsuyaj cocha jax e Dios xeꞌ cay uyajcꞌu ucꞌotorer tuaꞌ uche tunor era. Tunor era chequer tiut cocha bꞌan cay iwira nox.
ACT 2:23 Pues natanwa y cꞌajna umen e Dios ixnix e tiempo que e Jesucristo ucꞌani tuaꞌ aꞌjcꞌuna tama icꞌabꞌ nox. Pero conda chequer tiut que tama icꞌabꞌ turu e Jesús era, iware tuaꞌ achꞌubꞌna tut inteꞌ cruz tuaꞌ achamay tama ucꞌabꞌobꞌ e winicobꞌ xeꞌ mabꞌambꞌan uwirnarobꞌ.
ACT 2:24 Pero e Dios usuti ubꞌixqꞌues Cawinquirar Jesucristo tujam e chamenobꞌ; pues ixin ucorpes tama ucꞌotorer e chamer, porque ma cocha erer acꞌotori más e chamer tujor Cawinquirar Jesucristo.
ACT 2:25 Y canata que bꞌan porque ayan lo que utzꞌijbꞌa e rey David tama uyojroner e Dios tamar Cawinquirar Jesús tama e onian tiempo xeꞌ che: Nen inwira que turu Niwinquirar taniut tama tunor e tiempo, y que turu jaxir tama ninojcꞌabꞌ tuaꞌ ucojcuen tuaꞌ machi imbꞌajcꞌusena, che e David.
ACT 2:26 Y tamar era bꞌutcꞌa niwalma taca inteꞌ nuxi tzayer este que ojronen meyra ojroner tama niwej, y tamar era cꞌani aturuan atzay nicuerpo ubꞌan umen que war incojco tama e Dios, che e David.
ACT 2:27 Porque net, Nidiosiret, machix tuaꞌ awacta aquetpa niwalma tujam e chamenobꞌ, y nien machix tuaꞌ awacta oꞌcꞌoy nicuerpo tama e mujr, cocha nen amanen xeꞌ yajtanbꞌir niut amener, che e David.
ACT 2:28 Y net, Nidiosiret, awirsenix cocha tuaꞌ inxana tama abꞌir tiaꞌ ayan e cuxtar xeꞌ machi tuaꞌ acꞌapa, y tamar era cꞌani abꞌutcꞌa niwalma taca e nuxi tzayer conda incꞌotoy tawejtzꞌer net. Bꞌan chꞌar tzꞌijbꞌabꞌir umen e David tama e onian tiempo tamar Cawinquirar Jesucristo.
ACT 2:29 ’Niwermanuox, cꞌani inwareox era que natanwa umen tunor que chamay catata viejobꞌir David, y que mujca y que ya turu umujr tara tama e chinam Jerusalem este coner.
ACT 2:30 Pero e David jax inteꞌ profeta tuaꞌ e Dios y tamar era unata que e Dios uyacta inteꞌ ojroner tacar que tamar uchꞌajnarir e David era cꞌani achecta inteꞌ sitzbꞌir xeꞌ tuaꞌ aquetpa e Cristo, y que jaxir cꞌani aturuan tama uturtar e David.
ACT 2:31 Pues e David unata ixnix tucꞌa cꞌani uche e Dios, y tamar era cay ojron tamar e tiempo conda cꞌani asujta abꞌixqꞌuesna e Cristo. Y tamar era chꞌar tzꞌijbꞌabꞌir tama uyojroner e Dios que uyalma e Cristo machix tuaꞌ aquetpa tujam e inmojr chamenobꞌ, y nien machix tuaꞌ oꞌcꞌoy uwerir.
ACT 2:32 Pues e Dios ixin usuti ubꞌixqꞌues e Jesús tujam e chamenobꞌ, y tunoron era ajchecsuyajon que bꞌan numuy cocha cawirix que bꞌixirix e Jesús.
ACT 2:33 Y de allí e Jesús tꞌabꞌesna ixin tut e qꞌuin tichan umen ucꞌotorer e Dios y aquetpa tama unojcꞌabꞌ Cadiosir, y de allí e Jesús ajcꞌuna Unawalir e Dios umen Catata Dios bꞌan cocha quetpa arobꞌbꞌir desde ixnix, y de allí Cawinquirar Jesucristo sutpa uyari Unawalir e Dios tamaron era este que cay iyubꞌi e nuxi icꞌar y e sian ojroner xeꞌ majax natanbꞌir camener, y cay iwira tunor lo que cay numuy sajmi era.
ACT 2:34 Pues majax e David xeꞌ tꞌabꞌay ixin tut e qꞌuin, sino que jax Cawinquirar Jesucristo xeꞌ tꞌabꞌay ixin tut e qꞌuin. Y tamar era chequer que majax tamar taca ubꞌa war oꞌjron e David conda che: E Dios uyare Niwinquirar, che e David: “Turen taniwejtzꞌer tama ninojcꞌabꞌ tuaꞌ icꞌotori tacaren
ACT 2:35 este que inturbꞌa tunor tin e aqꞌuijna uwiretobꞌ yebꞌar utajn oꞌc.” Bꞌan chꞌar tzꞌijbꞌabꞌir umen e David tama e onian tiempo.
ACT 2:36 ’Y tamar era natanic tunorox xeꞌ tuox e Israel que e Jesús ajcꞌuna umen e Dios tuaꞌ aquetpa Cawinquirar y tuaꞌ aquetpa e Cristo. Y jax jaxir xeꞌ chamesna imener, che e Pedro uyare e gente tuaꞌ e Israel era.
ACT 2:37 Conda e gente xeꞌ turobꞌ yajaꞌ cꞌapa uyubꞌiobꞌ tunor era cay uqꞌuiobꞌ tama uyalmobꞌ y uyubꞌiobꞌ tuaꞌ e Pedro y tuaꞌ e inmojr apostolobꞌ y chenobꞌ: —Cawermanuox, ¿tucꞌa tuaꞌ cache era? che e gente era xeꞌ tuobꞌ e Israel.
ACT 2:38 Entonces ojron e Pedro y che: —Actanic tunor e mabꞌambꞌanir lo que war iche, y actanic ibꞌa tuaꞌ ixchꞌujya inteꞌ intiox taca e jaꞌ tama ucꞌabꞌa e Jesucristo tuaꞌ ixcorpesna tama tunor imabꞌambꞌanir, y de allí erer ichꞌami Unawalir e Dios.
ACT 2:39 Pues Cawinquirar Dios cꞌani uyajcꞌox y tunor imaxtac e tacarsiaj era, y bꞌan cꞌani uyajcꞌu tunor tin e turobꞌ teinxejr or e rum era ubꞌan que war che que e Dios cꞌani uyajcꞌu utacarsiaj era tunor tin e axin apejcnobꞌ umener, che e Pedro uyare e gente tuaꞌ e Israel era.
ACT 2:40 Pues entonces tamar lo que e Pedro ojron era, y tamar lo que ojronto cay uyare tunor e gente xeꞌ turobꞌ tama e chinam Jerusalem que ucꞌani tuaꞌ acꞌupseyanobꞌ tamar lo que arobꞌnobꞌ umener y che: —Corpesic ibꞌa tujam e inmojr gente era xeꞌ war ubꞌijnuobꞌ tuaꞌ uchiobꞌ e mabꞌambꞌanir iraj iraj, che e Pedro.
ACT 2:41 Y tamar era meyra gente cay uchꞌamiobꞌ uyojroner e Pedro y ixin chꞌujyobꞌ tunorobꞌ taca e jaꞌ tama ucꞌabꞌa Cawinquirar Jesús. Y tama e día era ayanobꞌ 3,000 winicobꞌ taca e ixictac xeꞌ cay cꞌupseyanobꞌ tama Cawinquirar Jesucristo.
ACT 2:42 Y tunor tin e cay cꞌupseyanobꞌ tama Cawinquirar Jesucristo qꞌuecꞌobꞌ tamar lo que war acansenobꞌ umen e apostolobꞌ, y war atzayobꞌ y war umorojse ubꞌobꞌ y war ucꞌuni ubꞌobꞌ tamar Cawinquirar, y inteꞌ intiobꞌ war utaresobꞌ lo que tuaꞌ ucꞌuxiobꞌ y war awiobꞌ tama inteꞌ taca lugar, y war ucꞌajtiobꞌ taca e Dios. Y bꞌan war uchiobꞌ iraj iraj.
ACT 2:43 Pues entonces tunor e gente xeꞌ turobꞌ tama e chinam Jerusalem war abꞌactobꞌ uwirobꞌ lo que war anumuy, porque war uwirobꞌ que war achena meyra milagro y meyra seña umen e apostolobꞌ.
ACT 2:44 Y tunor tin e cay cꞌupseyanobꞌ tama Cawinquirar cay sutpa ubꞌijnusiajobꞌ tuaꞌ aquetpa intera ubꞌijnusiajobꞌ tunorobꞌ, y war uyajcꞌuobꞌ lo que ayan tama ucꞌabꞌobꞌ tuaꞌ utacriobꞌ uyet ajcꞌupesiajirobꞌ tin e matucꞌa ayan tacarobꞌ.
ACT 2:45 Y war uchoniobꞌ lo que ayan tuobꞌ y war uyajcꞌuobꞌ e tumin era inteꞌ inteꞌ tin e ayan unecesidobꞌ. Y tin e más nojta unecesidobꞌ más nojta war aꞌjcꞌunobꞌ.
ACT 2:46 Y iraj iraj war umorojse ubꞌobꞌ tama e templo, y war umorojse ubꞌobꞌ tama uyototobꞌ tuaꞌ awiobꞌ y war atzayobꞌ tama uyalmobꞌ y war uchiobꞌ tunor era taca e cꞌunersiaj tama uyalmobꞌ.
ACT 2:47 Y war utattzꞌiobꞌ ucꞌabꞌa e Dios iraj iraj, y war atzay irnobꞌ umen tunor upiarobꞌ, y ajqꞌuin ajqꞌuin war abꞌoro e gente watar y Cawinquirar war uche abꞌoro e gente era tin e war acorpesnobꞌ. Y tamar era war achꞌiꞌ axin tunor e nuxi grupo ajcꞌupesiajobꞌ tama Cawinquirar Jesucristo.
ACT 3:1 Pues entonces tama inteꞌ día conda tꞌerpix cora e qꞌuin tꞌabꞌay ixin e Pedro taca e Juan tama e templo porque jax e hora era conda umorojse ubꞌobꞌ e gente tuaꞌ ucꞌajtiobꞌ taca e Dios.
ACT 3:2 Y yajaꞌ turu inteꞌ winic xeꞌ tzꞌej uyoc xeꞌ bꞌan turu conda cuxpa xeꞌ war ucꞌajti e tumin tuaꞌ e gente tin e war oꞌchoyobꞌ. Pues jaxir aqꞌuejcha axin ajqꞌuin ajqꞌuin tuaꞌ aturuan tuyejtzꞌer inteꞌ puerta tuaꞌ e templo xeꞌ ucꞌabꞌa Galan tuaꞌ ucꞌajti e tumin.
ACT 3:3 Y conda e winic era xeꞌ tzꞌej uyoc uwira ut e Pedro y ut e Juan conda war oꞌchoyobꞌ tama e templo, cay ucꞌajti e tumin tuobꞌ.
ACT 3:4 Y tamar era e Pedro y e Juan cay uwirobꞌ ut e winic y e Pedro uyare cocha era y che: —Iran coit, che e Pedro.
ACT 3:5 Entonces e winic cay uwira utobꞌ war ubꞌijnu que ayan lo que cꞌani uchꞌami tuobꞌ.
ACT 3:6 Pero ojron e Pedro y che: —Nen matucꞌa niplata y matucꞌa niworo, pero lo que ayan tacaren inwajqꞌuet. Tama ucꞌabꞌa e Jesucristo xeꞌ tuaꞌ e chinam Nazaret inwaret: Achpen waren y xanen, che e Pedro.
ACT 3:7 Entonces e Pedro uchuqui unojcꞌabꞌ e winic tuaꞌ utꞌabꞌse, y wacchetaca qꞌuecꞌo unuc uyoc y qꞌuecꞌo uyoc.
ACT 3:8 Y tamar era tobꞌoy achpa e winic y war awawan tamar uyoc y cay xana. Y ochoy macuir e templo taca e Pedro y e Juan y war axana, y war atobꞌoy axin, y war utattzꞌi ucꞌabꞌa e Dios.
ACT 3:9 Y tunor e gente uwirobꞌ que war axana e winic y que war utattzꞌi ucꞌabꞌa e Dios.
ACT 3:10 Y conda e gente sutpa uwirobꞌ e winic era, unatobꞌ que jaxir jax xeꞌ turuan ani tuyejtzꞌer e puerta tuaꞌ e templo xeꞌ ucꞌabꞌa Galan, y que jax xeꞌ tzꞌej ani uyoc y que era axana ixto yaꞌ. Entonces bꞌactobꞌ uwirobꞌ lo que numuy tama e winic era.
ACT 3:11 Pues e winic xeꞌ tzꞌej ani uyoc war uchuqui ucꞌabꞌ e Pedro y e Juan y machi cꞌani uyacta. Y tunor e sian gente xeꞌ turobꞌ tama e templo bꞌactobꞌ y cay ajniobꞌ tuaꞌ uwirobꞌ tucꞌa numuy tama e winic. Y cay umorojse ubꞌobꞌ tut e Pedro y tut e Juan xeꞌ turobꞌ tama e corredor xeꞌ ucꞌabꞌa Salomón xeꞌ quetpa tuyejtzꞌer e templo.
ACT 3:12 Y e Pedro conda uwira que war umorojse ubꞌobꞌ e sian gente tut cay ojron y che cocha era: —Winicox xeꞌ tuox e Israel, ¿tucꞌa tuaꞌ war ixbꞌacta iwira lo que numuy tama e winic era? ¿Y tucꞌa tuaꞌ war ichꞌujcu iwiron cocha era? ¿O war ca ibꞌijnu que non catzꞌaca e winic era umen que non ayan cacꞌotorer xeꞌ ticabꞌach o umen que non más imbꞌutzon tut e Dios? Pero majax bꞌan cocha war ibꞌijnu.
ACT 3:13 Pues Cadiosir xeꞌ jax Udiosirobꞌ catata viejobꞌirobꞌ xeꞌ jax e Abraham y e Isaac y e Jacob, jax Cadiosir era xeꞌ ixin utattzꞌi más nojta Uyunen xeꞌ jax e Jesús. Y e Jesús era jax tin e xejbꞌebꞌir ut nojta imener este que iwajcꞌu tama ucꞌabꞌobꞌ e ajcꞌamparobꞌ tuaꞌ uqꞌuechiobꞌ axin cachbꞌir. Y de allí ichecsu que ixejbꞌe ut jaxir tut e Pilato ubꞌan, porque conda cꞌanix abꞌajna umen e Pilato, nox machi icꞌani.
ACT 3:14 Y nox isuti ipat tut jaxir xeꞌ erach y xeꞌ matucꞌa war uche, y cay icꞌajti tuaꞌ e Pilato tuaꞌ uyacta alocꞌoy tama e cárcel inteꞌ winic xeꞌ calapir uwirnar y xeꞌ jax inteꞌ ajchamseyaj.
ACT 3:15 Y tamar era chequer que jax nox xeꞌ ixiox ichamse e Jesús xeꞌ tari tuaꞌ uyajcꞌu e gente e cuxtar xeꞌ machi tuaꞌ acꞌapa. Pero e Dios ixin usuti ubꞌixqꞌues e Jesús era tujam e chamenobꞌ, y war canata era que tunoron ajchecsuyajon tama tunor era.
ACT 3:16 Pues tamar e cꞌupesiaj tama ucꞌabꞌa e Jesús e winic era xeꞌ war iwira y xeꞌ natanwa imener qꞌuecꞌojsena inyajrer tuaꞌ uyubꞌi axana. Pues jax ucꞌabꞌa e Jesús y e cꞌupesiaj lo que tari tamar xeꞌ uche aquetpa tzꞌacpesbꞌir e winic era bꞌan cocha war iwira tunorox.
ACT 3:17 ’Pero niwermanuox, chequer taniut era que machix war inata tucꞌa war iche, nien nox, y nien tin e ajcꞌotorerobꞌ tibꞌa conda ixiox ichamse e Jesús.
ACT 3:18 Pues Cadiosir cꞌapa uche bꞌan taca cocha chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo que e Cristo quetpa tuaꞌ unumse ubꞌa meyra conda cꞌotoy turuan tara tor e rum.
ACT 3:19 Y tamar era ucꞌani tuaꞌ iwacta tunor imabꞌambꞌanir y ucꞌani tuaꞌ isuti tunor ibꞌijnusiaj tuaꞌ uyubꞌiox ixxana tama ubꞌir e Dios. Jay bꞌan iche entonces Cawinquirar Dios axin ucorpesox tama tunor imabꞌambꞌanir y axin uyebꞌta watar inteꞌ nuxi chojbꞌesiaj tama iwalma.
ACT 3:20 Y de allí Cadiosir tuaꞌ uyebꞌta watar e Jesús tibꞌa otronyajr xeꞌ jax xeꞌ sicbꞌabꞌir bꞌajxan umen e Dios tuaꞌ aquetpa e Cristo tibꞌa.
ACT 3:21 Pero tama e tiempo era jaxir ucꞌani tuaꞌ aquetpa tut e qꞌuin tichan este que acꞌotoy e hora conda Cadiosir acꞌapa uyustes tunor lo que ayan, bꞌan cocha chꞌar tzꞌijbꞌabꞌir tama uyojroner e Dios umen e profetobꞌ xeꞌ erachobꞌ tama e onian tiempo.
ACT 3:22 Y bꞌan che e Moisés ubꞌan conda che que: “Cawinquirar Dios cꞌani uyebꞌta watar otronteꞌ profeta tibꞌa, bꞌan cocha uyebꞌta tarien nen”, che e Moisés. “Ubꞌinic tunor lo que tuaꞌ uyareox jaxir.
ACT 3:23 Porque tunor tin e machi obꞌian tut e profeta era cꞌani aloqꞌuesna tujam umaxtacobꞌ e Dios.” Bꞌan chꞌar tzꞌijbꞌabꞌir tama uyojroner e Dios umen e Moisés tama e onian tiempo.
ACT 3:24 ’Pues tunor tin e profetobꞌ tama e onian tiempo desde Samuel y nacpat xeꞌ war uchꞌamiobꞌ inteꞌ ojroner tuaꞌ e Dios cay ojronobꞌ tunorobꞌ tama e día era conda aquetpa tuaꞌ achecta e Cristo.
ACT 3:25 Pues nox quetpa tuaꞌ ichꞌami lo que actana umen e profetobꞌ xeꞌ turuanobꞌ tama e onian tiempo, y quetpa ubꞌan tuaꞌ ichꞌami e pacto xeꞌ chembꞌir umen e Dios taca catata viejobꞌirobꞌ conda uyare e Abraham y che: “Tunor e sian familiobꞌ tama tunor or e rum cꞌani achojbꞌesnobꞌ umen isitzbꞌirobꞌ.” Bꞌan chꞌar tzꞌijbꞌabꞌir tama uyojroner e Dios.
ACT 3:26 Y tamar era conda cꞌapa usuti ubꞌixqꞌues Cawinquirar Jesucristo tujam e chamenobꞌ, Cadiosir uyebꞌta ixin Uyunen tuaꞌ uchojbꞌesox nox bꞌajxan tuaꞌ ixixin iwacta tunor imabꞌambꞌanir inteꞌ intiox. Bꞌan che e Pedro uyare e sian gente xeꞌ wawanobꞌ tut tama inteꞌ corredor tama e templo.
ACT 4:1 Pues entonces conda wartocto oꞌjronobꞌ e Pedro y e Juan taca e gente era, yopobꞌ cora sacerdote taca e capitán tuaꞌ e guardia tuaꞌ e templo taca cora nuquir winicobꞌ xeꞌ saduceobꞌ.
ACT 4:2 Pues war aqꞌuijnobꞌ e saduceobꞌ era umen que e Pedro y e Juan war ucansiobꞌ e gente que tunor tin e chamen cꞌani asujta abꞌixqꞌuesna tujam e chamenobꞌ cocha bꞌan numuy taca e Jesús.
ACT 4:3 Entonces e saduceobꞌ era uqꞌuechiobꞌ ixin e Pedro y e Juan y uyosiobꞌ tama e cárcel tiaꞌ quetpobꞌ este que yopa otronteꞌ día, cocha tardix tama e hora era.
ACT 4:4 Pero ayan meyra gente xeꞌ uyubꞌiobꞌ uyojroner e Pedro y e Juan xeꞌ cay cꞌupseyanobꞌ tama Cawinquirar Jesucristo tama e día era. Y e número tama e winicobꞌ xeꞌ cay cꞌupseyanobꞌ tama Cawinquirar Jesucristo, ayan 5,000.
ACT 4:5 Entonces tama otronteꞌ día tama e chinam Jerusalem cay umorojse ubꞌobꞌ tunor tin e ajcꞌotorerobꞌ tama e Israel taca tin e nuquir winicobꞌ y taca tin e ajcanseyajobꞌ tama uley e Moisés.
ACT 4:6 Y tacarobꞌ turu uwinquir e inmojr sacerdotiobꞌ xeꞌ jax e Anás. Y ya turu e Caifás taca e Juan y e Alejandro y tunor tin e familiarobꞌ tuaꞌ uwinquir e inmojr sacerdotiobꞌ era.
ACT 4:7 Y conda ya turobꞌ tunor e winicobꞌ era tama inteꞌ taca lugar uyebꞌtobꞌ ixin tuaꞌ ataresnobꞌ e Pedro y e Juan tutobꞌ. Y conda cꞌotoyobꞌ e Pedro y e Juan tutobꞌ, cay ubꞌna tuobꞌ umen uwinquir e inmojr sacerdotiobꞌ y che: —¿Tucꞌa nic era que numuy e nuxi milagro era? ¿Y tiaꞌ cay itajwi e cꞌotorer tuaꞌ iche e milagro era? ¿O ayan ca inteꞌ ucꞌabꞌa tiaꞌ ichꞌami e cꞌotorer tuaꞌ iche tunor era? che uwinquir e inmojr sacerdotiobꞌ era.
ACT 4:8 Entonces Cadiosir ubꞌutꞌi uyalma e Pedro taca Unawalir y tamar era cay ojron y che: —Ajcꞌotorerox tuaꞌ e gente y nox xeꞌ nuquir winicox tuaꞌ e Israel,
ACT 4:9 cocha nox war isicbꞌa tuaꞌ iyubꞌi ticabꞌa tamar lo que chena xeꞌ bueno tama e winic xeꞌ tzꞌej ani uyoc, y tucꞌa umen que tzꞌacpesna, pues erer cawareox.
ACT 4:10 Pero cꞌani inwareox era tuaꞌ inata taca tunor e gente tama e Israel que tamar taca ucꞌabꞌa e Jesucristo que e winic era war awawan tiut tzꞌacpesbꞌir. Y e Jesucristo era xeꞌ tuaꞌ e chinam Nazaret jax xeꞌ chamesna tut inteꞌ cruz imener. Pero de allí jaxir sujta bꞌixqꞌuesna tujam e chamenobꞌ umen e Dios.
ACT 4:11 Pues e Jesús jax e tun xeꞌ chocbꞌirix imener, y nox larox tacar cora ajcheyaj otot xeꞌ ichoqui e tun era acbꞌi y coner war asutpa icꞌopi. Pero coner e tun era war aquetpa lo que más ayan ucꞌampibꞌir.
ACT 4:12 Pues tamar taca jaxir erer cacorpesna, porque matucꞌa otronteꞌ cꞌabꞌa yebꞌar ut e qꞌuin xeꞌ ajcꞌuna tuaꞌ unatobꞌ e gente tara tor e rum que tamar erer cacorpesna. Jax taca tama ucꞌabꞌa e Jesucristo que erer cacorpesna, che e Pedro.
ACT 4:13 Pues entonces conda e nuquir winicobꞌ tama e concilio uwirobꞌ que machi war abꞌactobꞌ tuaꞌ oꞌjronobꞌ e Pedro y e Juan, y conda cꞌotoy unatobꞌ que e winicobꞌ era mamajchi umen cansenobꞌ, y que jax taca cora choquem winicobꞌ era, bꞌactobꞌ uwirobꞌ y cꞌajpa umenerobꞌ que e winicobꞌ era jax tin e xanobꞌ taca e Jesús y que tamar era ayan ucꞌotorerobꞌ.
ACT 4:14 Y tujor tunor era ya war e winic xeꞌ tzꞌacpesna tutobꞌ, y tamar era ma cocha erer uyare que majax tzꞌacpesbꞌir e winic era.
ACT 4:15 Y cocha machi ixto unatobꞌ tucꞌa tuaꞌ uchiobꞌ, uyareobꞌ tuaꞌ aloqꞌuesna e Pedro y e Juan taca e winic xeꞌ tzꞌej ani uyoc. Y conda cꞌapa locꞌoyobꞌ y quetpobꞌ jaxobꞌ taca e winicobꞌ tama e concilio xeꞌ turobꞌ macu, cay ojronobꞌ tamar lo que tuaꞌ uchiobꞌ era.
ACT 4:16 Y ojronobꞌ cocha era y chenobꞌ: —¿Tucꞌa tuaꞌ cache taca e winicobꞌ era? Pues tunor e gente tama e chinam Jerusalem war unatobꞌ que chena inteꞌ nuxi milagro umenerobꞌ que tzꞌacpesna e winic xeꞌ tzꞌej ani uyoc, y tamar era ma cocha erer caware que majax bꞌan chena.
ACT 4:17 Pero lo que ucꞌani tuaꞌ cache tamar era tuaꞌ machi apucꞌujqꞌui axin e ojroner era más tujam tunor e gente, ucꞌani tuaꞌ cacꞌayobꞌ e winicobꞌ era taca cawojroner tuaꞌ machi ixto oꞌjronobꞌ tama ucꞌabꞌa e Jesús tut e gente. Bꞌan chenobꞌ e nuquir winicobꞌ era tama e concilio jaxobꞌ taca.
ACT 4:18 Entonces uyareobꞌ tuaꞌ ataresnobꞌ e Pedro y e Juan tutobꞌ otronyajr, y cay ucꞌayobꞌ meyra que ma tiaꞌ más tuaꞌ oꞌjronobꞌ tamar ucꞌabꞌa e Jesús, y que ma tiaꞌ más tuaꞌ axin acanseyanobꞌ tamar ucꞌabꞌa.
ACT 4:19 Pero ojronobꞌ e Pedro y e Juan otronyajr y chenobꞌ: —Bꞌijnunic nox tuaꞌ inata jay más bueno tuaꞌ cacꞌupseyan tiut nox jay machi war cacꞌupseyan tut e Dios conda war cache lo que war icꞌani nox.
ACT 4:20 Pues nox erer inata que machi uyubꞌion cawacta tuaꞌ cojron tamar lo que cawirix y tamar lo que coybꞌix, che e Pedro y e Juan.
ACT 4:21 Entonces e nuquir winicobꞌ tama e concilio sutpa uyareobꞌ e Pedro y e Juan tuaꞌ uyactobꞌ ucꞌampesnar ucꞌabꞌa e Jesús tama tunor ucanseyajobꞌ, y jay machi cꞌani uyactobꞌ cꞌani aqꞌuejchobꞌ axin tama e cárcel. Pero cocha matucꞌa utajwiobꞌ tamarobꞌ tuaꞌ uwatzꞌiobꞌ tamar, y cocha war atzayobꞌ tunor e gente uwirobꞌ e nuxi milagro lo que chena tama e winic xeꞌ tzꞌej ani uyoc, y cocha war utattzꞌiobꞌ ucꞌabꞌa e Dios tamar, matucꞌa uchiobꞌ. Uyactobꞌ ixiobꞌ bꞌan taca.
ACT 4:22 Pues e winic xeꞌ tzꞌacpesna umen e milagro war ucojco más que cuarenta año.
ACT 4:23 Pues entonces conda actanobꞌ locꞌoy e Pedro y e Juan umen e nuquir winicobꞌ, ixiobꞌ este tama e lugar tiaꞌ turobꞌ e inmojr ajcꞌupesiajobꞌ tama e Cristo. Y conda cꞌotoyobꞌ, cay uyareobꞌ tunor lo que numuy conda turobꞌto tut uwinquir e inmojr sacerdotiobꞌ y e nuquir winicobꞌ tama e Israel.
ACT 4:24 Y conda e ajcꞌupesiajobꞌ era uyubꞌiobꞌ tunor lo que numuy, cay ucꞌajtiobꞌ taca e Dios y chenobꞌ: —Cawinquiraret, net jax Cadiosiret xeꞌ ache tunor ut e qꞌuin y tunor or e rum y tunor e nuxi jaꞌ, y net xeꞌ ixiet ache tunor lo que ayan ubꞌan.
ACT 4:25 Y net, Cadiosiret, cay acꞌampes Anawalir tuaꞌ oꞌjron tama uyej aman xeꞌ jax catata viejobꞌir David y che: ¿Tucꞌa tuaꞌ aqꞌuijnobꞌ tunor e choquem gente conda ubꞌijnuobꞌ tama e Dios? ¿Y tucꞌa tuaꞌ ubꞌijnu uchiobꞌ lo que matucꞌa ucꞌampibꞌir?
ACT 4:26 Y este tin e nuquir reyobꞌ cay umorojse ubꞌobꞌ taca tin e nuquir ajcꞌamparobꞌ tuaꞌ uchiobꞌ e tzꞌojyir upater Cawinquirar Dios y upater e Cristo. Bꞌan che tama awojroner.
ACT 4:27 ’Y bꞌan war anumuy tara tama e chinam Jerusalem que e Herodes y e Poncio Pilato war umorojse ubꞌobꞌ taca e choquem gente y taca e gente tuaꞌ e Israel tuaꞌ ubꞌijnuobꞌ tucꞌa uyubꞌi uchiobꞌ upater Oynen xeꞌ erach y xeꞌ aman xeꞌ jax e Jesús xeꞌ sicbꞌabꞌir amener.
ACT 4:28 Pero jaxirobꞌ war uchiobꞌ cocha era porque bꞌan cay abꞌijnu net ixnix e tiempo taca acꞌotorer que bꞌan ucꞌani tuaꞌ anumuy.
ACT 4:29 Y era Cawinquiraret, chꞌujcun awira que war aqꞌuijnobꞌ e nuquir winicobꞌ era este que cꞌani ubꞌajcꞌusionobꞌ que cꞌani uqꞌuechion caxin tama e cárcel jay cojron más tama acꞌabꞌa, pero non era war cacꞌajti tacaret tuaꞌ aqꞌuecꞌojsion meyra tuaꞌ caxin cachecsu más tunor awojroner, y cacꞌajti tacaret tuaꞌ alocse tunor e bꞌajcꞌut lo que ayan tama cawalma.
ACT 4:30 Y era war cacꞌajti tacaret tuaꞌ awebꞌta watar acꞌotorer tuaꞌ atzꞌacpesna meyra tin e ajmuac y tuaꞌ achena meyra sian seña y meyra sian milagro tama ucꞌabꞌa aman xeꞌ jax e Jesús xeꞌ erach. Bꞌan ucꞌajtiobꞌ taca e Dios tunor e ajcꞌupesiajobꞌ conda uyubꞌiobꞌ lo que unumse ubꞌobꞌ e Pedro y e Juan tut e nuquir winicobꞌ tama e Israel.
ACT 4:31 Y conda cꞌapa ucꞌajtiobꞌ taca e Dios cocha era chincha or e rum tiaꞌ turobꞌ y bꞌutcꞌa uyalmobꞌ tunorobꞌ taca Unawalir e Dios y cay uchecsuobꞌ uyojroner e Dios tic taca, y machi war abꞌactobꞌ uchiobꞌ.
ACT 4:32 Pues entonces tunor tin e ajcꞌupesiajobꞌ tama Cawinquirar quetpobꞌ taca intera ubꞌijnusiaj, y bꞌan war unatobꞌ tama uyalmobꞌ ubꞌan. Y mamajchi war ubꞌijnu que tuach taca lo que ayan tuaꞌ, sino que tunor e ajcꞌupesiajobꞌ war uxeriobꞌ tunor lo que ayan tuobꞌ taca e inmojr.
ACT 4:33 Y tin e apostolobꞌ war uyare e gente axin que Cawinquirar Jesús sutpa bꞌixcꞌa tujam e chamenobꞌ, y ayan meyra ucꞌotorer e Dios tacarobꞌ. Y nojta uchojbꞌesiaj e Dios tujam tunorobꞌ era ubꞌan.
ACT 4:34 Y mamajchi tujamobꞌ ayan unecesidobꞌ porque tunorobꞌ war utacre ubꞌobꞌ inteꞌ intiobꞌ. Y tin e ayan imbꞌijc urum o ingojr uyotot war uchoni, y de allí war utares e tumin era xeꞌ uchꞌamiobꞌ conda cꞌapa uchoniobꞌ imbꞌijc urum o ingojr uyotot,
ACT 4:35 y war uyajcꞌuobꞌ e tumin era e apostolobꞌ. Y e apostolobꞌ war uxeriobꞌ e tumin era taca inteꞌ inteꞌ ajcꞌupesiaj bꞌan cocha ucꞌani tuaꞌ uchꞌamiobꞌ.
ACT 4:36 Y tamar era ayan inteꞌ winic xeꞌ ucꞌabꞌa José xeꞌ jax inteꞌ levita xeꞌ cuxpa tama e lugar Chipre. Pero e apostolobꞌ uturbꞌobꞌ ucꞌabꞌa Bernabé xeꞌ war che: “Tin e unojres uyalmobꞌ e inmojr.”
ACT 4:37 Pero lo que uche e José era ixin uchoni imbꞌijc urum, y utares e tumin y uyajcꞌu e apostolobꞌ.
ACT 5:1 Pues entonces ayan inteꞌ winic xeꞌ ucꞌabꞌa Ananías y ayan uwixcar xeꞌ ucꞌabꞌa Safira. Y jaxirobꞌ ixin uchoniobꞌ imbꞌijc urum ubꞌan.
ACT 5:2 Pero e winic era conda cꞌapa uchoni e rum machi utares tunor e tumin sino que uquete imbꞌijc e tumin era y xeꞌ quetpa uqꞌueche uyajcꞌu e apostolobꞌ. Pues war ubꞌijnu amajresian. Y uwixcar war unata tunor era.
ACT 5:3 Pero e Pedro, cocha ajcꞌuna tuaꞌ unata tunor era umen Unawalir e Dios, uyare e Ananías y che: —Ananías ¿tucꞌa tuaꞌ awacta ochoy e Satanás tama awalma tuaꞌ uchiet amajres Unawalir e Dios conda ixiet aquete imbꞌijc e tumin lo que cay achꞌami conda achoni e rum?
ACT 5:4 ¿Ma ca jax tabꞌa ani e rum era? Y conda ixiet achoni e rum, ¿ma ca jax tabꞌa e tumin era? ¿Tucꞌa tuaꞌ abꞌijnu ache cocha era? Majax e winicobꞌ xeꞌ war aturbꞌa abꞌa tuaꞌ amajres sino que jax e Dios xeꞌ cꞌani ani amajres, che e Pedro.
ACT 5:5 Entonces conda cꞌapa uyubꞌi tunor e ojroner era, cucrema chamay e Ananías. Y tunor tin e cꞌotoy unata lo que numuy taca e Ananías era bꞌacta uwirobꞌ.
ACT 5:6 Entonces yopobꞌ cora chꞌom sitz xeꞌ ubꞌasiobꞌ ucuerpo e chamen era taca inteꞌ bꞌujc, y uqꞌuechiobꞌ ixin y umuquiobꞌ.
ACT 5:7 Pues conda numuy uxteꞌ hora, yopa uwixcar e Ananías, pero machi unata tucꞌa numuy taca uviejo ani.
ACT 5:8 Entonces ojron e Pedro taca e Safira y che: —Arenen, ¿erachox ca que nox ichoni e rum tama e tumin era lo que war iwareon? che e Pedro. Y jaxir che: —Bꞌan pue yaꞌ, jax e tumin yax, che e ixic.
ACT 5:9 Entonces ojron e Pedro y che: —¿Tucꞌa tuaꞌ ibꞌijnu tuaꞌ iturbꞌa ibꞌa tuaꞌ ipijchꞌi ani Unawalir e Dios? Yajaꞌ patir yix warobꞌ cora chꞌom maxtac xeꞌ uqꞌuechiobꞌ ixin aviejo tuaꞌ umuquiobꞌ. Y era watobꞌ tuaꞌ uqꞌuechietobꞌ iꞌxin tuaꞌ asutpa umuquietobꞌ net ubꞌan, che e Pedro.
ACT 5:10 Entonces wacchetaca cucrema chamay e ixic tama unuc uyoc e Pedro. Y conda ochoyobꞌ e chꞌom maxtac uwirobꞌ que chamay e ixic. Entonces ulocsiobꞌ ucuerpo y umuquiobꞌ tuyejtzꞌer uviejo.
ACT 5:11 Y tunor e gente tama e grupo ajcꞌupesiajobꞌ tama e Jesús y tunor e inmojr gente xeꞌ cꞌotoy unatobꞌ lo que numuy era, bꞌactobꞌ meyra conda uyubꞌiobꞌ.
ACT 5:12 Pues entonces tama e día era war achena meyra seña y meyra milagro tujam e gente umen e apostolobꞌ, y tunor tin e war acꞌupseyanobꞌ tama e Cristo war umorojse ubꞌobꞌ tuyejtzꞌer e templo tama inteꞌ corredor xeꞌ ucꞌabꞌa: “Tuaꞌ e Salomón”.
ACT 5:13 Pero tin e majax ajcꞌupesiajobꞌ tama Cawinquirar war ubꞌacriobꞌ tuaꞌ umorojse ubꞌobꞌ taca e grupo ajcꞌupesiajobꞌ motor que war acꞌajnobꞌ umenerobꞌ.
ACT 5:14 Pero ayan ubꞌan tin e war acꞌotoyobꞌ iraj iraj tuaꞌ acꞌupseyanobꞌ tama ucꞌabꞌa Cawinquirar. Bꞌan war uchiobꞌ e winicobꞌ y e ixictac ubꞌan.
ACT 5:15 Y tamar era e gente war uqꞌuechiobꞌ axin tin e ajmuac, y war uturbꞌobꞌ tut e calle tama inteꞌ chꞌacteꞌ o tama inteꞌ pojp, porque war unatobꞌ que jay anumuy e Pedro tut e ajmuacobꞌ era, motor que jax taca usombrair ut e Pedro xeꞌ anumuy tujor inteꞌ ajmuac, pero que tamar era cꞌani atzꞌacpa tin e ajmuac era.
ACT 5:16 Y de allí ayan e gente xeꞌ turuanobꞌ tama cora chinamobꞌ xeꞌ turu tuyejtzꞌer e chinam Jerusalem xeꞌ war utares tin e ajmuac y tin e chucur uyalmobꞌ umen inteꞌ mabꞌambꞌan mein. Y tunor tin e taresnobꞌ tzꞌacnobꞌ.
ACT 5:17 Pues entonces uwinquir e inmojr sacerdotiobꞌ taca e winicobꞌ xeꞌ xanobꞌ tacar xeꞌ tuobꞌ e grupo religioso xeꞌ ucꞌabꞌa saduceo cay atzꞌunerwa meyra umen que war atajttzꞌobꞌ más e apostolobꞌ umen e gente que jaxirobꞌ.
ACT 5:18 Entonces e winicobꞌ era uyareobꞌ tuaꞌ acajchobꞌ e apostolobꞌ y tuaꞌ ayajrobꞌ tama e cárcel.
ACT 5:19 Pero tama e acbꞌar era yopa inteꞌ ángel tuaꞌ Cawinquirar xeꞌ upasi e puerta tama e cárcel tiaꞌ turobꞌ e apostolobꞌ y ulocsiobꞌ. Entonces e ángel uyare e apostolobꞌ era y che:
ACT 5:20 —Quiquic warenic tama e templo tuaꞌ iware e gente tama tunor e cuxtar xeꞌ imbꞌutz, che e ángel.
ACT 5:21 Entonces conda cꞌapa uyubꞌiobꞌ e ojroner era e apostolobꞌ ixin uchiobꞌ bꞌan cocha arobꞌnobꞌ. Y conda sacojpa otronteꞌ día ixiobꞌ tama e templo y cay ucanse e gente tama e cuxtar xeꞌ imbꞌutz. Pero tama e hora era war umorojse ubꞌobꞌ tunor tin e turobꞌ tama e concilio xeꞌ jax uwinquir e inmojr sacerdotiobꞌ taca tin e atzay uwirobꞌ ut y taca tunor e nuquir winicobꞌ tama e Israel. Y tamar era uyebꞌtobꞌ ixin tuaꞌ ataresnobꞌ e apostolobꞌ tama e cárcel.
ACT 5:22 Pero conda cꞌotoyobꞌ tama e cárcel tin e ebꞌetnobꞌ ixin tuaꞌ utaresobꞌ e apostolobꞌ, uwirobꞌ que ma incojt apóstol turu macuir e cárcel. Entonces sutpa ixiobꞌ tut e concilio otronyajr
ACT 5:23 y chenobꞌ: —Ixion tama e cárcel bꞌan cocha iwareon y conda cꞌotoyon cawira que warobꞌ cora policía xeꞌ war ucojcobꞌ e puerta, y cawira que cachar e puerta taca e candado, pero conda upasiobꞌ e puerta mix majchi ayan macuir e cárcel, chenobꞌ tin e ebꞌetna ixiobꞌ tuaꞌ utares e apostolobꞌ.
ACT 5:24 Entonces bꞌacta uwirobꞌ uwinquir e inmojr sacerdotiobꞌ y e capitán tuaꞌ e guardia tuaꞌ e templo y cora nuquir sacerdote conda uyubꞌiobꞌ tunor era y cay ubꞌijnuobꞌ que esto tiaꞌ tuaꞌ acꞌotoy acꞌapa tunor e canseyaj era.
ACT 5:25 Pero wacchetaca yopa inteꞌ winic xeꞌ ojron y che: —E winicobꞌ xeꞌ iturbꞌa tama e cárcel acbꞌi yix turobꞌ otronyajr tama e templo war ucansiobꞌ e gente, che e winic era.
ACT 5:26 Entonces tin e más nuxi policía upejca cora policía y ixin tuaꞌ utaresobꞌ e apostolobꞌ tuaꞌ acꞌotoyobꞌ tut e nuquir winicobꞌ era otronyajr. Pero machi ucachiobꞌ y machi uquerejbꞌobꞌ e apostolobꞌ umen que war abꞌactobꞌ que bꞌajcꞌat aqꞌuijnobꞌ e gente este que bꞌajcꞌat ajujrobꞌ e policía era taca e tun tuaꞌ uchamsiobꞌ.
ACT 5:27 Entonces conda cꞌapa utaresobꞌ e apostolobꞌ otronyajr, uyareobꞌ tuaꞌ awawanobꞌ tut e nuquir winicobꞌ. Entonces ojron uwinquir e inmojr sacerdotiobꞌ y che:
ACT 5:28 —¿Machi ca cawareox que ira ixcanseyan más tama ucꞌabꞌa e Jesús? Y era ¿tucꞌa war iche? War ibꞌutꞌi tunor e chinam Jerusalem taca e canseyaj era, y war iturbꞌa ibꞌa tuaꞌ iche acꞌaxi ticajor non tunor uchamer e Jesús, che uwinquir e inmojr sacerdotiobꞌ.
ACT 5:29 Entonces ojron e Pedro y e inmojr apostolobꞌ y chenobꞌ: —Machix tuaꞌ cacꞌupseyan tut inteꞌ winic jay majax bꞌan cocha ucꞌani e Dios.
ACT 5:30 Pues Cadiosir xeꞌ tuaꞌ catata viejobꞌirobꞌ ubꞌan ixin usuti ubꞌixqꞌues e Jesús tujam e chamenobꞌ. Y jax jaxir xeꞌ cꞌapa ichamse conda ichꞌubꞌa tut inteꞌ cruz.
ACT 5:31 Pues Cadiosir ixin utꞌabꞌse e Jesús tuaꞌ aquetpa tuyejtzꞌer unojcꞌabꞌ tut e qꞌuin, y uche aquetpa Cawajcꞌotorer y Cawajcorpesiaj tuaꞌ upasi e bꞌir tut e gente tama e Israel tuaꞌ uyubꞌiobꞌ uyustes ubꞌobꞌ y tuaꞌ acorpesnobꞌ tama tunor umabꞌambꞌanirobꞌ.
ACT 5:32 Y non era ajchecsuyajon tama tunor era y bꞌan ubꞌan Unawalir e Dios. Y Cadiosir war uyajcꞌu Unawalir tunor tin e war acꞌupseyanobꞌ tut jaxir. Bꞌan che e Pedro y e inmojr apostolobꞌ.
ACT 5:33 Pues conda e nuquir winicobꞌ tama e Israel uyubꞌiobꞌ tunor era, qꞌuijnobꞌ meyra y cꞌani uchamsiobꞌ.
ACT 5:34 Pero tujam e nuquir winicobꞌ era ayan inteꞌ winic xeꞌ jax inteꞌ fariseo xeꞌ ucꞌabꞌa Gamaliel xeꞌ jax inteꞌ ajcanseyaj tama uley e Moisés xeꞌ obꞌna meyra umen e gente. Jaxir achpa wawan tujam e nuquir winicobꞌ era y cay ojron, pero cꞌani oꞌjron tacar taca e concilio, y tamar era uyare tuaꞌ aloqꞌuesnobꞌ e apostolobꞌ patir cora era.
ACT 5:35 Y conda cꞌapa loqꞌuesnobꞌ e apostolobꞌ, jaxir cay ojron taca e concilio y che: —Winicox xeꞌ tuox e Israel, iwiric tamar lo que war ibꞌijnu iche taca e winicobꞌ era.
ACT 5:36 Cꞌar imener lo que numuy jax tocto era conda ayan ani inteꞌ winic xeꞌ ucꞌabꞌa Teudas xeꞌ cay ucanse e gente que jaxir nuxi winic. Y cay xanobꞌ tupat jaxir 400 winicobꞌ. Pero conda chamesna e Teudas, cꞌapa locꞌoy tunor e winicobꞌ, inteꞌ inteꞌ ixiobꞌ tama uyototobꞌach y cꞌapa tunor lo que cay ubꞌijnu uche e Teudas era.
ACT 5:37 Y otronyajr, conda war achena e censo, achpa inteꞌ winic xeꞌ ucꞌabꞌa Judas xeꞌ turu ani tama e departamento Galilea. Y cay xanobꞌ tacar meyra winicobꞌ. Pero jaxir sutpa chamesna ubꞌan, y de allí cꞌapa ixiobꞌ inteꞌ inteꞌ tama uyototobꞌach otronyajr, y cꞌapa tunor lo que cay ubꞌijnu uche e Judas era.
ACT 5:38 Y tamar era cꞌani inwareox que ira iyose ibꞌa taca e winicobꞌ era y que actanicobꞌ bꞌan taca. Porque jay lo que war uchiobꞌ jax taca tuaꞌ inteꞌ winic cꞌani acꞌapa.
ACT 5:39 Pero jay lo que war uchiobꞌ tuaꞌ e Dios, ma cocha erer itijres nox. Y tamar era war inwareox que iwiric, porque jay tuaꞌ e Dios tunor era, machi cꞌani catajwi que war caturbꞌa cabꞌa tuaꞌ cache pelear upater e Dios, che e Gamaliel tut e concilio.
ACT 5:40 Y tamar era tunor e nuquir winicobꞌ quetpobꞌ tzꞌustaca. Entonces uyareobꞌ tuaꞌ ataresnobꞌ e apostolobꞌ otronyajr y uyareobꞌ tuaꞌ ajajtzꞌobꞌ taca inteꞌ jarbꞌir qꞌuewer, y de allí uyareobꞌ y che: —Irix ixojron tama ucꞌabꞌa e Jesús, che e nuquir winicobꞌ. Y de allí tzacarna tuaꞌ alocꞌoy axiobꞌ.
ACT 5:41 Entonces conda e apostolobꞌ locꞌoyobꞌ tut e nuquir winicobꞌ era, war atzayobꞌ que tajwinobꞌ tawar umen e Dios tuaꞌ asubꞌajrnobꞌ tama ucꞌabꞌa e Jesús.
ACT 5:42 Pero jaxirobꞌ machi uyactobꞌ e canseyaj tama e Jesús, y machi uyactobꞌ tuaꞌ uchecsuobꞌ ucꞌabꞌa e Jesús xeꞌ jax e Cristo, y bꞌan uchiobꞌ iraj iraj tama tunor e ototobꞌ tama e chinam era y tama e templo ubꞌan.
ACT 6:1 Pues entonces tama e tiempo era, cocha war abꞌoro e grupo xeꞌ war acꞌupseyanobꞌ tama e Cristo, cay checta inteꞌ wixwixtir upater e apostolobꞌ. Pues ayan tin e tujam e grupo era xeꞌ ojronobꞌ tama e ojroner griego, y ayan e inmojr xeꞌ ojronobꞌ tama e ojroner hebreo xeꞌ jax e ojroner tuaꞌ e gente tuaꞌ e Israel. Y xeꞌ ojronobꞌ tama e ojroner griego cay qꞌuecranobꞌ upater tin e ojronobꞌ tama e ojroner hebreo que machix war atacarnobꞌ e onian ixictac xeꞌ chamen uviejobꞌ xeꞌ ojronobꞌ tama e ojroner griego conda war uxeriobꞌ e comida ajqꞌuin ajqꞌuin.
ACT 6:2 Entonces e doce apostolobꞌ uyareobꞌ tunor e sian ajcanuarobꞌ tuaꞌ umorojse ubꞌobꞌ y chenobꞌ: —Pues cawermanuox, chequer tiut que majax bueno tuaꞌ casati catiempo tamar taca que war cawese tunor e sian gente, jay tamar era machi ixto tuaꞌ cacanseyan tama uyojroner e Dios.
ACT 6:3 Y tamar era cawermanuox, sajcanic tijam siete winicobꞌ xeꞌ war icojco tamar, y xeꞌ nojta ujorobꞌ, y xeꞌ bꞌutꞌur uyalmobꞌ taca Unawalir e Dios, y ajcꞌunicobꞌ upatnarobꞌ tuaꞌ uxeriobꞌ e comida taca e sian gente era.
ACT 6:4 Y non xeꞌ apostolon cꞌani caturbꞌa cabꞌa tuaꞌ cacꞌajti taca e Dios y tuaꞌ cacanseyan tama uyojroner e Dios iraj iraj. Bꞌan chenobꞌ e apostolobꞌ era.
ACT 6:5 Pues tzayobꞌ tunor e gente tama uyojroner e apostolobꞌ era, y cay usajcobꞌ e Esteban xeꞌ jax inteꞌ winic xeꞌ bꞌutꞌur uyalma taca Unawalir e Dios y xeꞌ cꞌupseyan nojta tama e Dios. Y cay usajcobꞌ e Felipe y e Prócoro, y e Nicanor, y e Timón, y e Parmenas, y e Nicolás xeꞌ jax inteꞌ winic xeꞌ tuaꞌ e chinam Antioquía xeꞌ cay cꞌupseyan más bꞌajxan tama ureligión e gente tama e Israel.
ACT 6:6 Y tama e hora era taresnobꞌ e siete winicobꞌ era y turbꞌanobꞌ tut e apostolobꞌ. Y e apostolobꞌ cay upacbꞌu ucꞌabꞌobꞌ tujor e winicobꞌ era y cay ucꞌajtiobꞌ taca e Dios tamarobꞌ.
ACT 6:7 Y tamar era cay bꞌoruobꞌ meyra tin e war acꞌupseyanobꞌ tama e Cristo. Y war alocꞌoy tunor e canseyaj tama uyojroner e Dios. Y tama e chinam Jerusalem meyra gente cay uchꞌamiobꞌ ucꞌabꞌa e Cristo, y ayan ubꞌan meyra winicobꞌ xeꞌ sacerdotiobꞌ tama e Israel xeꞌ cꞌotoy cꞌupseyanobꞌ tama Cawinquirar.
ACT 6:8 Pues ayan inteꞌ hermano tujam e siete ajtacarsiajobꞌ era xeꞌ ucꞌabꞌa Esteban. Jaxir war acꞌampesna nojta umen e Dios cocha ayan ucꞌotorer e Dios tamar, y war achojbꞌesna meyra umen e Dios. Pues jaxir war uche meyra milagro y war uche meyra seña tujam e gente.
ACT 6:9 Y tama e chinam Jerusalem era ayan meyra sian sinagoga xeꞌ jax inteꞌ otot xeꞌ awawan ubꞌajner tiaꞌ ayopobꞌ e gente tuaꞌ e Israel tuaꞌ uyubꞌiobꞌ uyojroner e Dios. Pero e gente era xeꞌ warto umorojse ubꞌobꞌ tama inteꞌ sinagoga machi ixto war uchꞌamiobꞌ ucꞌabꞌa e Cristo. Y ayan inteꞌ sinagoga tiaꞌ ayan e sian gente xeꞌ mambꞌirobꞌ ani inyajrer pero que era majax bꞌan. Y ayan otronteꞌ sinagoga tuaꞌ e gente xeꞌ tariobꞌ tama e chinam Cirene. Y ayan otronteꞌ sinagoga tuaꞌ e gente xeꞌ tariobꞌ tama e chinam Alejandría. Y ayan inteꞌ sinagoga tuaꞌ e gente xeꞌ tariobꞌ tama e chinam Cilicia. Y ayan inteꞌ sinagoga tuaꞌ e gente xeꞌ tariobꞌ tama e departamento Asia. Pero era ayan cora winicobꞌ xeꞌ tariobꞌ cora cora tuaꞌ tunor e sian sinagoga era xeꞌ cꞌotoyobꞌ y cay umorojse ubꞌobꞌ tut e Esteban tuaꞌ ucꞌayobꞌ tama tunor lo que war uche.
ACT 6:10 Pero mamajchi uyubꞌi awawan tut e Esteban cocha jaxir qꞌuecꞌojsena umen Unawalir e Dios umen que ajcꞌuna meyra unatanyaj umen e Dios. Y conda ojron jaxir mamajchi umen acucurna taca uyojroner.
ACT 6:11 Y tamar era e winicobꞌ cay utoyi cora winicobꞌ tuaꞌ axin umajresobꞌ e ajcꞌamparobꞌ que jaxirobꞌ cay uyubꞌiobꞌ ojron e Esteban que war uqꞌuijnes e Moisés y que war uqꞌuijnes ut e Dios.
ACT 6:12 Y tamar era cay uqꞌuijnesobꞌ e gente ixin tuaꞌ upucujcsiobꞌ tunor e sian gente upater e Esteban, y bꞌan uchiobꞌ tama e nuquir winicobꞌ tama e Israel ubꞌan, y bꞌan uchiobꞌ tama e ajcanseyajobꞌ tama uley e Moisés. Entonces ixiobꞌ cora winicobꞌ tuaꞌ utajwiobꞌ e Esteban, y ucachiobꞌ y uqꞌuechiobꞌ ixin tut e concilio.
ACT 6:13 Entonces usicbꞌobꞌ cora winicobꞌ xeꞌ ajmajresiajobꞌ tuaꞌ oꞌjronobꞌ upater e Esteban xeꞌ chenobꞌ: —E winic era machi uyacta tuaꞌ oꞌjron upater catemplo xeꞌ erach tut e Dios, y machi uyacta tuaꞌ uqꞌuijnes uley e Moisés.
ACT 6:14 Y coybꞌi ojron jaxir que e Jesús xeꞌ tuaꞌ e chinam Nazaret cꞌani utijres e templo era y que cꞌani utijres tunor cacanseyaj lo que cachꞌamix tuaꞌ e Moisés. Bꞌan che e winicobꞌ xeꞌ ajmajresiajobꞌ era.
ACT 6:15 Y tunor e ajcꞌamparobꞌ taca e inmojr winicobꞌ xeꞌ turobꞌ tama e concilio era, conda uwirobꞌ ut uyeroj e Esteban uwirobꞌ que bꞌan ut uwirnar bꞌan cocha ut uwirnar inteꞌ ángel tuaꞌ e Dios.
ACT 7:1 Entonces ojron uwinquir e inmojr sacerdotiobꞌ tut e Esteban y che: —¿Bꞌan ca che tunor era? che uwinquir e inmojr sacerdotiobꞌ.
ACT 7:2 Y ojron e Esteban y che: —Pues niwermanuox y catatox tama Israel, ubꞌinic ninuc era. Catata Dios xeꞌ meyra ayan utawarer checta tut catata viejobꞌir Abraham tama e onian tiempo conda turuan tama e lugar Mesopotamia conda ne mato axin aturuan tama e lugar Harán.
ACT 7:3 Y ojron Catata Dios taca e Abraham y che: “Actan tunor alugar era y actan tunor atata y atuꞌ y quiqui tama e lugar lo que cꞌani inwirset.” Bꞌan che e Dios uyare e Abraham.
ACT 7:4 Entonces e Abraham uyacta e lugar tiaꞌ turu xeꞌ jax e lugar Caldea y ixin turuan tama e lugar Harán. Y nacpat era conda chamay utata, arobꞌna umen e Dios tuaꞌ alocꞌoy tama e lugar yajaꞌ tuaꞌ watar aturuan tama e lugar era xeꞌ jax e lugar tiaꞌ turox nox coner.
ACT 7:5 Pero matucꞌa urum tara y nien imbꞌijc machi ajcꞌuna umen e Dios cocha inteꞌ herencia tama e lugar era. O erer caware que matucꞌa urum inyajrer nien tiaꞌ tuaꞌ uwabꞌu uyoc. Pero actana inteꞌ ojroner umen e Dios que cꞌani aꞌjcꞌuna e lugar tara y que e rum era tuaꞌ aquetpa tuaꞌ umaxtac y tuaꞌ usitzobꞌ nacpat conda axin achamay jaxir. Bꞌan arobꞌna umen e Dios motor que tama e tiempo era mato tucꞌa ani umaxtac e Abraham.
ACT 7:6 Pero e Dios uyare e Abraham y che: “Asitzobꞌ axin aturuanobꞌ tama inteꞌ lugar innajt, y amaxtac axin aquetpobꞌ bꞌan cocha inteꞌ man xeꞌ mambꞌir inyajrer, y xeꞌ upatron tujorobꞌ cꞌani ucꞌayobꞌ meyra, y cꞌani uchiobꞌ unumse ubꞌobꞌ meyra tama e lugar yajaꞌ, y bꞌan taca tuaꞌ anumuy tama 400 año”, che e Dios uyare e Abraham.
ACT 7:7 Y otronyajrto ojron e Dios taca e Abraham y che: “Pero nen cꞌani inwatzꞌi e gente tama e lugar yajaꞌ tiaꞌ tuaꞌ aquetpobꞌ asitzobꞌ cocha inteꞌ man xeꞌ mambꞌir inyajrer. Pero conda acꞌapa e tiempo yajaꞌ jaxirobꞌ tuaꞌ asutpa alocꞌoyobꞌ tama e lugar yajaꞌ, y cꞌani uyujtzꞌiobꞌ niut tama e lugar tara xeꞌ jax e lugar xeꞌ tuaꞌ e Israel coner.” Bꞌan che e Dios uyare e Abraham.
ACT 7:8 Y de allí Cadiosir uche inteꞌ pacto taca e Abraham. Y tama e pacto era ayan inteꞌ chequerir que tunor e tejromtac ucꞌani tuaꞌ axujra imbꞌijc uqꞌuewerir utejromar, y jax era tuaꞌ aquetpa cocha inteꞌ chequerir que jaxirobꞌ war ucojcobꞌ e pacto. Y tamar era e Abraham ixin uxuri imbꞌijc uqꞌuewerir utejromar uyunen xeꞌ jax e Isaac conda tzꞌacta ocho día. Y de allí lar tacar era ixin uche e Isaac taca uyunen xeꞌ jax e Jacob. Y bꞌan cocha era ixin uche e Jacob ubꞌan taca tunor uyunenobꞌ xeꞌ jax tin e quetpobꞌ catata viejobꞌirobꞌ tama e doce uchꞌajnarir lo que ayan tama e Israel.
ACT 7:9 ’Y umaxtac e Jacob era xeꞌ jax catata viejobꞌirobꞌ qꞌuijnobꞌ upater uwijtzꞌin xeꞌ jax e José, porque e José más chojbꞌesbꞌir ut umen utata que e inmojr. Y tamar era jaxirobꞌ ixin uchoniobꞌ tuaꞌ aquetpa inteꞌ man xeꞌ mambꞌir inyajrer, y de allí qꞌuejcha ixin esto tama e lugar Egipto. Pero e Dios turu taca e José iraj iraj.
ACT 7:10 Y e Dios ixin ucojco e José y ucorpes tama tunor lo que cay unumse ubꞌa. Y conda e José ixin ojron taca e Faraón xeꞌ jax e rey tama e lugar Egipto, e Dios uyajcꞌu e chojbꞌesiaj tuaꞌ atzay eꞌrna umen e rey era. Y e José ajcꞌuna meyra unatanyaj ubꞌan. Y tamar era e Faraón uyare que e José tuaꞌ aquetpa cocha inteꞌ xeꞌ más nuxi ajcꞌotorer tujor tunor lo que ayan tama e lugar Egipto, y este tama uyotot e rey ubꞌan tuaꞌ acꞌotori.
ACT 7:11 ’Pues entonces yopa inteꞌ tiempo conda matucꞌa e jajar. Y tamar era cay checta inteꞌ nuxi winar y cay unumse ubꞌobꞌ tunor e gente tama tunor or e lugar Egipto, y tama tunor or e lugar Canaán. Y matucꞌa utajwiobꞌ tuaꞌ ucꞌuxiobꞌ tunor catata viejobꞌirobꞌ.
ACT 7:12 Pero conda catata Jacob cꞌotoy unata que ayan tucꞌa tuaꞌ acꞌujxa xeꞌ jax e trigo tama e lugar Egipto, uyebꞌta ixiobꞌ esto yajaꞌ uyunenobꞌ xeꞌ jax catata viejobꞌirobꞌ ticabꞌa. Y tamar era uchiobꞌ e bꞌajxan xambꞌar tuobꞌ esto tama e lugar Egipto.
ACT 7:13 Pero conda sutpa ixiobꞌ otronyajr esto tama e lugar Egipto e José uchectes ubꞌa tut usacunobꞌ que jaxir ijtzꞌimbꞌir tuobꞌ. Y tamar era e Faraón cꞌotoy unata tiaꞌ tari e José.
ACT 7:14 Entonces e José uyebꞌta ixin inteꞌ ojroner tut utata xeꞌ jax e Jacob tuaꞌ watar esto tama e lugar Egipto tiaꞌ turu jaxir, pero taca tunor umaxtacobꞌ. Entonces ixin e Jacob taca tunor umaxtacobꞌ xeꞌ ayanobꞌ tunorobꞌ setenta y cinco.
ACT 7:15 Y bꞌan numuy que ixin e Jacob tuaꞌ aturuan tama e lugar Egipto. Y quetpa tama e lugar yajaꞌ este que chamay. Y bꞌan numuy ubꞌan tama tunor catata viejobꞌirobꞌ, que cora cora chamayobꞌ tunorobꞌ tama e lugar Egipto.
ACT 7:16 Y de allí qꞌuejchobꞌ ixin ubꞌaquerobꞌ catata viejobꞌirobꞌ esto tama e lugar Siquem, y yajaꞌ mujcobꞌ tama inteꞌ mujr xeꞌ mambꞌir ixnix tuaꞌ umaxtac e Hamor umen e Abraham taca imbꞌijc tumin.
ACT 7:17 ’Y nacpat era conda ya war acꞌotoy e hora tuaꞌ acꞌapa uche Cadiosir bꞌan cocha cay uyare e Abraham ixnix, cay bꞌoruobꞌ e gente tama e Israel. Y tamar era cay chꞌijtesianobꞌ e gente era y cay bꞌoruobꞌ meyra este machix uyubꞌi utziquiobꞌ.
ACT 7:18 Entonces numuy cora sian año y cay cꞌotori otronteꞌ rey tama e lugar Egipto que machito unata chi e José.
ACT 7:19 Y e rey era cay umajres tunor catata viejobꞌirobꞌ y cay uche e mabꞌambꞌanir upaterobꞌ este que cay uyareobꞌ tuaꞌ uyactobꞌ uchꞌurcabꞌobꞌ patir tiaꞌ tuaꞌ achamayobꞌ.
ACT 7:20 Y jax tama e tiempo era conda cuxpa e Moisés. Y e Moisés era jax inteꞌ chꞌurcabꞌ xeꞌ atzay irna umen e Dios. Y tamar era utuꞌ y utata ucojcobꞌ e Moisés tama uyotot tama inteꞌ tiempo de tres mes, y machi uchoquiobꞌ.
ACT 7:21 Y conda cꞌotoy e hora tuaꞌ uyacta e chꞌurcabꞌ patir, yajaꞌ tajwina umen uwijchꞌoc e rey tuaꞌ e Egipto. Y conda uwira e chꞌurcabꞌ uqꞌueche ixin esto tama uyotot tuaꞌ uchꞌijrse bꞌan ani cocha inteꞌ uyar xeꞌ tuach.
ACT 7:22 ’Y e Moisés cansena tunor e natanyaj lo que ayan tuaꞌ e gente yajaꞌ. Y nojta ujor y checta que jaxir jax inteꞌ winic xeꞌ galan ojron y xeꞌ imbꞌutz locꞌoy tunor lo que uche.
ACT 7:23 Y conda tzꞌacta cuarenta año tama e Moisés, cay ubꞌijnu que cꞌani axin uwarajse upiarobꞌ tama e Israel.
ACT 7:24 Y conda yopa tujam upiarobꞌ, cay uwira que ayan inteꞌ upiar xeꞌ war unumse ubꞌa umen que ayan inteꞌ winic tuaꞌ e Egipto xeꞌ war uwatzꞌi. Y tamar era e Moisés cay ubꞌijnu que cꞌani ucorpes upiar era, y ixin uchamse e winic tuaꞌ e Egipto.
ACT 7:25 Pues e Moisés war ani unata que tunor e gente tama e Israel tuaꞌ unatobꞌ que jaxir tuaꞌ acꞌampesna umen e Dios tuaꞌ ucorpes tunor upiarobꞌ era, pero upiarobꞌ era machi war unatobꞌ tunor era.
ACT 7:26 Y tama otronteꞌ día conda ixin e Moisés otronyajr uwira que ayan chateꞌ upiarobꞌ xeꞌ war uwatzꞌi ubꞌobꞌ. Entonces jaxir ubꞌijnu que cꞌani atacarsan y cay ucꞌuniobꞌ tuaꞌ machi aqꞌuijnobꞌ meyra. Y tamar era ojron e Moisés y che: “Ubꞌinic winicox, nox ijtzꞌimbꞌirox nox taca, y ¿tucꞌa tuaꞌ war iwatzꞌi ibꞌa cocha era?” Bꞌan che e Moisés uyare e chateꞌ upiarobꞌ era.
ACT 7:27 Pero inteꞌ winic xeꞌ qꞌuijna bꞌajxan cay utacsu e Moisés y che: “¿Chi upejquet tuaꞌ iquetpa cawinquirar ticajor non? Y ¿chi upejquet tuaꞌ iquetpa cocha inteꞌ juez ticajor non?” che e winic.
ACT 7:28 Y ojron otronyajr e winic y che: “¿O acꞌani ca achamsen nen cocha achamse e winic tuaꞌ e Egipto acbꞌi?” che e winic uyare e Moisés.
ACT 7:29 Pero conda e Moisés uyubꞌi tunor era, bꞌacta y locꞌoy ajni tama e lugar Egipto, y ixin tuaꞌ aturuan tama inteꞌ lugar innajt xeꞌ ucꞌabꞌa Madián tiaꞌ quetpa bꞌan cocha inteꞌ ajsatpar winic. Y tama e lugar yajaꞌ checta chateꞌ uyunenobꞌ.
ACT 7:30 ’Pues conda ya turu e Moisés cuarenta año tama e lugar Madián era ayan inteꞌ día conda war axana tama inteꞌ choquem lugar tuyejtzꞌer e witzir Sinaí, que checta inteꞌ ángel tut xeꞌ chequer war macuir e cꞌajc tama inteꞌ chactꞌix xeꞌ war atzꞌajbꞌa.
ACT 7:31 Bꞌacta e Moisés conda uwira tunor era, y ixin tuyejtzꞌer e chactꞌix tuaꞌ uwira. Y conda ya turu tuyejtzꞌer e cꞌajc cay uyubꞌi unuc Cawinquirar Dios xeꞌ war oꞌjron tacar jaxir y che:
ACT 7:32 “Nen Udiosirenobꞌ tunor atata viejobꞌirobꞌ xeꞌ jax e Abraham, y e Isaac, y e Jacob.” Bꞌan che Cawinquirar Dios uyare e Moisés tama e chactꞌix. Y tamar era e Moisés cay chincha meyra, war abꞌacta, y machi ixto cꞌani uwira ut e chactꞌix era porque yajaꞌ turu e Dios.
ACT 7:33 Entonces ojron Cawinquirar Dios otronyajr y che: “Locsen axanabꞌ porque erach e rum tiaꞌ turet.
ACT 7:34 Nen war inwira cobꞌa war unumse ubꞌobꞌ apiarobꞌ tama e lugar Egipto, y nen war umbꞌi que war aruobꞌ taniut tuaꞌ incorpesobꞌ. Y tamar era nen war encmay tuaꞌ incorpesobꞌ. Lar tacaren era, pues nen cꞌani inwebꞌtet iꞌxin esto tama e lugar Egipto.” Bꞌan che e Dios uyare e Moisés.
ACT 7:35 ’Y e Moisés era jax xeꞌ machi war acꞌajna umen e gente tuaꞌ e Israel porque jax jaxirobꞌ xeꞌ cay ojronobꞌ upater e Moisés y che: “¿Chi upejquet tuaꞌ iquetpa cawinquirar ticajor non? Y ¿chi upejquet tuaꞌ iquetpa juez ticajor non?” chenobꞌ. Y motor que machi war acꞌajna umen e gente tuaꞌ e Israel pero jax e Moisés era xeꞌ sicbꞌana umen e Dios tuaꞌ axin acꞌotori y tuaꞌ ucorpes tunor e gente tuaꞌ e Israel. Y bꞌan numuy conda uyangel e Dios uchectes ubꞌa tut e Moisés tama e chactꞌix xeꞌ war atzꞌajbꞌa.
ACT 7:36 Y jax e Moisés era ubꞌan xeꞌ ixin ulocse e gente tuaꞌ e Israel tama e lugar Egipto. Y jax jaxir xeꞌ cay uche meyra milagro y meyra seña tama e lugar Egipto, y tama e nuxi jaꞌ xeꞌ arobꞌna Chacchac, y tama e choquem lugar tama inteꞌ tiempo de cuarenta año.
ACT 7:37 Y jax e Moisés era ubꞌan xeꞌ cay uyare e gente tuaꞌ e Israel y che: “Cadiosir cꞌani uyebꞌta watar inteꞌ winic xeꞌ jax inteꞌ profeta bꞌan cocha uyebꞌta tarien nen, y e profeta era axin acuxpa tujam ipiarobꞌ tama e chinam Israel. Ubꞌinic unuc jaxir”, che e Moisés.
ACT 7:38 Y jax e Moisés era ubꞌan xeꞌ turuan taca tunor e gente tuaꞌ e Israel tama e choquem lugar. Y jax jaxir xeꞌ turu taca e ángel xeꞌ cay ojron tacar conda turu tujor e witzir xeꞌ ucꞌabꞌa Sinaí, y jax jaxir ubꞌan xeꞌ cay uchꞌami e ojroner xeꞌ bꞌixir xeꞌ ajcꞌuna umen e Dios y xeꞌ sutpa uyareon non otronyajr.
ACT 7:39 ’Pero catata viejobꞌirobꞌ machi ucꞌaniobꞌ lo que arobꞌnobꞌ umen e Moisés. Machi ucꞌaniobꞌ tuaꞌ acꞌupseyanobꞌ tut jaxir. Y tamar era cay uxejbꞌiobꞌ ut y cay ubꞌijnuobꞌ que cꞌani ani asutpa axiobꞌ esto tama e lugar Egipto otronyajr.
ACT 7:40 Entonces conda e Moisés turu tujor e witzir Sinaí, catata viejobꞌirobꞌ cay ojronobꞌ taca e Aarón y che: “Quisinic achic cora chamen dios tuaꞌ axin ticoit conda war caxana. Porque non era machi canata tucꞌa numuy taca e Moisés. Porque jaxir intaca ixin ulocsion tama e lugar Egipto y uchoquion tara.” Bꞌan che catata viejobꞌirobꞌ taca e Aarón.
ACT 7:41 Y tamar era uchiobꞌ inteꞌ chamen dios xeꞌ bꞌan uwirnar cocha inteꞌ chuchu wacax, y cay uchamsiobꞌ cora arac tut, y cay nojqꞌuiniobꞌ, y war atzayobꞌ tamar lo que chembꞌir umenerobꞌ que jaxirobꞌ cꞌapa uchiobꞌ inteꞌ udiosirobꞌ.
ACT 7:42 Y tamar era chojca actanobꞌ umen e Dios, y actanobꞌ ubꞌan tuaꞌ uyujtzꞌiobꞌ ut e sian lucero lo que ayan tut e qꞌuin. Bꞌan era cocha chꞌar tzꞌijbꞌabꞌir umen inteꞌ profeta tama uyojroner e Dios que che: Winicox xeꞌ tuox e Israel, majax taniut nen xeꞌ cay ichamse e sian arac tuaꞌ iturbꞌa tujor inteꞌ altar tuaꞌ apurutna tama e tiempo de cuarenta año conda turox tama e choquem lugar.
ACT 7:43 Pues más cay iturbꞌa ibꞌa tama e champa xeꞌ chembꞌir imener taca e bꞌujc xeꞌ quetpa tuaꞌ e chamen dios Moloc xeꞌ cay iqꞌueche ixin tama ilugar. Y war ixtzay iqꞌueche axin inteꞌ chamen dios xeꞌ bꞌan uwirnar cocha inteꞌ lucero xeꞌ ucꞌabꞌa Renfán. Y jax nox xeꞌ cay iche e chateꞌ chamen dios era tuaꞌ iyujtzꞌi ut, y tamar era cꞌani intzacriox ixixin esto tama e lugar Babilonia xeꞌ más innajt teinxejr bꞌana. Bꞌan chꞌar tzꞌijbꞌabꞌir umen e profeta.
ACT 7:44 ’Y tama e choquem lugar catata viejobꞌirobꞌ uqꞌuechiobꞌ ixin inteꞌ champa xeꞌ chembꞌir taca e bꞌujc tiaꞌ ucojcobꞌ e tun xeꞌ tzꞌijbꞌabꞌir ani uley e Moisés tamar, y e champa era chembꞌir umenerobꞌ bꞌan cocha irsena e Moisés umen e Dios.
ACT 7:45 Pues catata viejobꞌirobꞌ uchꞌamiobꞌ e tabernáculo cocha inteꞌ herencia. Y tunor tin e ixiobꞌ taca e Josué cay uqꞌuechiobꞌ ixin e tabernáculo tacarobꞌ conda ixiobꞌ tuaꞌ ucucruobꞌ tunor e sian chinamobꞌ lo que ayan ani tama e lugar xeꞌ jax e Israel coner. Pues e Dios uyajnes ixin tunor e gente tama e lugar era tut e gente tuaꞌ e Israel tuaꞌ acꞌotoy aquetpa tuobꞌ tunor e lugar era. Y bꞌan taca quetpa e tabernáculo tacarobꞌ tama e lugar Israel este que cꞌotoy utiempo catata viejobꞌir David.
ACT 7:46 Y e David xeꞌ jax inteꞌ rey tujor tunor e gente tuaꞌ e Israel chojbꞌesna meyra umen e Dios. Y tamar era cay ubꞌijnu tuaꞌ uyustes inteꞌ uyotot e Dios. Y Udiosir era jax Udiosir catata viejobꞌir Jacob ubꞌan xeꞌ turuan tama e onian tiempo.
ACT 7:47 Pero e David machi actana umen e Dios tuaꞌ uyustes e otot era, sino que jax uyunen Salomón xeꞌ quetpa tuaꞌ uyustes e otot era xeꞌ arobꞌna templo umenerobꞌ.
ACT 7:48 Pero Cadiosir xeꞌ Ajtichaner machi aturuan tama ingojr otot xeꞌ chembꞌir umen inteꞌ winic. Bꞌan chꞌar tzꞌijbꞌabꞌir tama uyojroner e Dios umen inteꞌ profeta tiaꞌ che que:
ACT 7:49 Tunor ut e qꞌuin jax niturtar, che Cawinquirar Dios, y or e rum jax e lugar tiaꞌ inwabꞌu nioc tuaꞌ injiri. ¿Y tucꞌa otot war ibꞌijnu tuaꞌ iche tamaren? che Cawinquirar Dios. ¿Y tucꞌa lugar war ibꞌijnu iche tuaꞌ injiri nen tamar?
ACT 7:50 ¿Ma ca jax nen xeꞌ ixien inche tunor lo que ayan taca nicꞌabꞌ? Bꞌan chꞌar tzꞌijbꞌabꞌir tama uyojroner e Dios umen inteꞌ profeta.
ACT 7:51 ’Pero nox caprichuduox. War iqꞌuecꞌojse iwalma iraj iraj tuaꞌ machi iche lo que arobꞌnox umen e Dios, y war imaqui ichiquin tuaꞌ machi iyubꞌi lo que arobꞌnox umen e Dios. War iche bꞌan cocha uchiobꞌ tin e machi unatobꞌ chi e Dios. Y nox larox taca itata viejobꞌirobꞌ xeꞌ machi ucꞌaniobꞌ lo que arobꞌnobꞌ umen Unawalir e Dios.
ACT 7:52 ¿Y chi tujam tunor e sian profetobꞌ xeꞌ machi chena unumse ubꞌobꞌ umen itata viejobꞌirobꞌ? Pues tunor e profetobꞌ xeꞌ tariobꞌ tuaꞌ uyareobꞌ itata viejobꞌirobꞌ tamar e tiempo conda tuaꞌ watar tin e erach inyajrer chamesnobꞌ tunorobꞌ. Y era que tari tin e erach inyajrer, nox intaca iwajcꞌu tama ucꞌabꞌobꞌ e choquem gente tuaꞌ uchamsiobꞌ.
ACT 7:53 Y jax nox xeꞌ cay ichꞌami tunor uley e Moisés umen utacarsiaj e angelobꞌ, y esto nox ubꞌan xeꞌ machi war icꞌani tuaꞌ ixcꞌupseyan tut. Bꞌan che e Esteban uyare e nuquir winicobꞌ era tama e concilio.
ACT 7:54 Entonces conda e nuquir winicobꞌ tama e concilio cꞌapa uyubꞌiobꞌ tunor era, qꞌuijnobꞌ meyra este que cay ucꞌuxi ut uyejobꞌ uwirobꞌ ut e Esteban.
ACT 7:55 Pero e Esteban bꞌutꞌur uyalma taca Unawalir e Dios, cay uchꞌujcu uwira tichan esto tut e qꞌuin, y cay uwira utawarer Catata Dios. Y war uwira que war awawan e Jesús tuyejtzꞌer unojcꞌabꞌ Catata Dios.
ACT 7:56 Entonces ojron e Esteban y che: —Ubꞌinic tunorox, que era war inwira que pasar ut e qꞌuin y que Uyunen e winic war awawan tuyejtzꞌer unojcꞌabꞌ Catata Dios, che e Esteban uyare tunor e nuquir winicobꞌ era.
ACT 7:57 Pero jaxirobꞌ umaquiobꞌ uchiquinobꞌ taca ucꞌabꞌobꞌ y cay ojronobꞌ tunorobꞌ taca inteꞌ nuxi nuc y ixiobꞌ ajner tut e Esteban y cay uchuquiobꞌ y ucachiobꞌ.
ACT 7:58 Y cay uqꞌuechiobꞌ ixin, war utacsuobꞌ y war uquerejbꞌobꞌ, uqꞌuechiobꞌ ixin esto tutiꞌ e chinam. Y cay uchamsiobꞌ e Esteban taca e tun. Y tin e cay utuchꞌiobꞌ era xeꞌ jax xeꞌ war uchamsiobꞌ e Esteban cay ucoriobꞌ intꞌojr ubꞌujc y uyactobꞌ tut inteꞌ chꞌom sitz tuaꞌ ucojco. Y e sitz era ucꞌabꞌa Saulo.
ACT 7:59 Y e nuquir winicobꞌ war uriobꞌ e Esteban taca e tun tuaꞌ uchamsiobꞌ. Pero jaxir war upejca ucꞌabꞌa Cawinquirar y che: —Niwinquiraret Jesús, chꞌama niwalma era, che e Esteban.
ACT 7:60 Y tamar era e Esteban cotuan y ojron tama inteꞌ nuxi nuc y che: —Niwinquiraret, ira acꞌajpes umabꞌambꞌanirobꞌ e gente era. Bꞌan che e Esteban. Y conda cꞌapa ojron, chamay.
ACT 8:1 Y e Saulo war uchecsu ubꞌa que war atzay que chamesna e Esteban. Pues entonces tama e día era cay unumse ubꞌobꞌ meyra tunor tin e war acꞌupseyanobꞌ tama Cawinquirar xeꞌ turobꞌ tama e chinam Jerusalem. Y tunorobꞌ cay ajniobꞌ locꞌoyobꞌ tama e chinam era tuaꞌ machi achamesnobꞌ. Y jax taca e apostolobꞌ xeꞌ quetpobꞌ tama e chinam Jerusalem. Pero tin e locꞌoyobꞌ era ixiobꞌ tama tunor or e departamento Judea y tama tunor or e departamento Samaria.
ACT 8:2 Y ayan cora winicobꞌ xeꞌ uyajtobꞌ ut e Dios xeꞌ ixiobꞌ umuquiobꞌ ucuerpo e Esteban. Y oyqꞌuiobꞌ taca inteꞌ nuxi nuc conda umuquiobꞌ.
ACT 8:3 Pero e Saulo war uturbꞌa ubꞌa tuaꞌ usati ani inyajrer tunor e grupo ajcꞌupesiajobꞌ. Ixin tama inteꞌ otot y tama otronteꞌ otot tuaꞌ usicbꞌa chi xeꞌ ajcꞌupesiajobꞌ tama Cawinquirar, y conda utajwiobꞌ uquerejbꞌobꞌ uqꞌuechiobꞌ ixiobꞌ esto tama e cárcel. Y bꞌan uche taca e winicobꞌ, y bꞌan uche taca e ixictac ubꞌan xeꞌ utajwi xeꞌ war acꞌupseyanobꞌ tama Cawinquirar.
ACT 8:4 Y tunor e ajcꞌupesiajobꞌ tama Cawinquirar xeꞌ locꞌoyobꞌ tama e chinam Jerusalem cay ixiobꞌ cora cora. Y tic taca tiaꞌ ixiobꞌ war uchecsuobꞌ uyojroner Cawinquirar tama e corpesiaj tut e gente ixin.
ACT 8:5 Y e Felipe xeꞌ jax inteꞌ ajcꞌupesiaj tama Cawinquirar ixin esto tama inteꞌ chinam tama e departamento Samaria y cay uyare e gente que Cawinquirar jax e Cristo.
ACT 8:6 Y e sian gente xeꞌ umorojse ubꞌobꞌ tuaꞌ uyubꞌiobꞌ lo que che e Felipe cay uturbꞌa ubꞌobꞌ tama tunor lo que arobꞌnobꞌ umener, cocha war uwirobꞌ e sian milagro lo que war uche e Felipe.
ACT 8:7 Pues meyra gente tzꞌacpesnobꞌ umen e Felipe. Y ayan meyra gente xeꞌ chamen ucuerpo xeꞌ tzꞌacpesnobꞌ, y ayan tin e tzꞌej uyoc xeꞌ tzꞌacpesnobꞌ ubꞌan, y ayan e gente xeꞌ chucur ani uyalma umen inteꞌ mabꞌambꞌan mein xeꞌ loqꞌuesna xeꞌ aruobꞌ taca inteꞌ nuxi nuc conda locꞌoyobꞌ tama e gente.
ACT 8:8 Y tamar era meyra gente cay tzayobꞌ tama e chinam yajaꞌ.
ACT 8:9 Y tama e chinam yajaꞌ ayan inteꞌ winic xeꞌ ucꞌabꞌa Simón xeꞌ war uche ubꞌa que jax ani inteꞌ nuxi winic tut tunor e gente xeꞌ turobꞌ tama e departamento yajaꞌ. Pues jaxir unata aqꞌuini, unata aniro, y unata abꞌaxon. Y tama tunor era war umajres e gente axin tama e departamento Samaria que jaxir jax inteꞌ winic xeꞌ meyra war unata uche.
ACT 8:10 Y tunor e gente tama e lugar era, motor jay nuxi winic o motor jay cualquier winic, war uturbꞌa ubꞌobꞌ tama uyojroner e winic era este que ojronobꞌ y chenobꞌ: —E winic era meyra ayan ucꞌotorer e Dios tamar. Bꞌan che e gente tamar e winic era.
ACT 8:11 Pues e winic era ayix tiempo que war umajres e gente ixin, y tamar era e gente war uturbꞌa ubꞌobꞌ tamar lo que uche jaxir.
ACT 8:12 Pero e gente tama e lugar era, conda cay uturbꞌa ubꞌobꞌ tamar lo que war achecsunobꞌ umen e Felipe tama e corpesiaj, cay cꞌupseyanobꞌ tama uchinam e Dios, y cay cꞌupseyanobꞌ tama ucꞌabꞌa e Jesucristo. Entonces cay yopobꞌ cora winicobꞌ y cora ixictac tut e Felipe xeꞌ wartocto acꞌupseyanobꞌ tama e Cristo tuaꞌ achꞌujyobꞌ.
ACT 8:13 Y e Simón xeꞌ jax inteꞌ ajnirom cay cꞌupseyan tama e Cristo ubꞌan. Y conda cꞌapa chꞌujya quetpa tuyejtzꞌer e Felipe, y war atzay uwira e sian milagro y e sian seña lo que war achena umen e Felipe.
ACT 8:14 Entonces conda e apostolobꞌ tama e chinam Jerusalem uyubꞌiobꞌ que e gente tama e departamento Samaria war uchꞌamiobꞌ uyojroner e Dios, uyebꞌtobꞌ ixin e Pedro y e Juan tuaꞌ axiobꞌ esto tama e lugar yajaꞌ.
ACT 8:15 Y conda cꞌotoyobꞌ e apostolobꞌ cay ucꞌajtiobꞌ taca e Dios tujor tunor tin e war acꞌupseyanobꞌ tama e Cristo tuaꞌ uchꞌamiobꞌ Unawalir e Dios.
ACT 8:16 Pues e gente era tama e departamento Samaria cay cꞌupseyanobꞌ tama e Cristo y chꞌujyobꞌ tama ucꞌabꞌa Cawinquirar Jesús, pero mato majchi tujamobꞌ e ajcꞌupesiajobꞌ era xeꞌ cay uchꞌamiobꞌ Unawalir e Dios.
ACT 8:17 Entonces e Pedro y e Juan upacbꞌuobꞌ ucꞌabꞌobꞌ tamar tin e war acꞌupseyanobꞌ tama e Cristo y jaxirobꞌ uchꞌamiobꞌ Unawalir e Dios.
ACT 8:18 Pero e Simón cay tzay conda uwira que ajcꞌuna Unawalir e Dios tunor tin e upacbꞌuobꞌ ucꞌabꞌobꞌ e apostolobꞌ tamar. Y tamar era cay uche ofrecer e tumin taca e Pedro y taca e Juan y che:
ACT 8:19 —Pues ajcꞌunen e cꞌotorer era nen ubꞌan tuaꞌ uyubꞌien impacbꞌu nicꞌabꞌ tujor e gente tuaꞌ uchꞌamiobꞌ Unawalir e Dios, che e Simón.
ACT 8:20 Pero e Pedro uyare e Simón y che: —Quiqui satpen taca tunor atumin, porque war abꞌijnu que e Dios axin uyajqꞌuet ucꞌotorer umen taca que cꞌani awajcꞌu e tumin tamar, porque majax bꞌan cocha war abꞌijnu era.
ACT 8:21 Y net era ma cocha erer achꞌami ucꞌotorer e Dios, y ma cocha erer iyajcꞌuna tunor era, porque awalma majax erach tut e Dios.
ACT 8:22 Actan tunor e mabꞌambꞌanir lo que war abꞌijnu ache, y cꞌajtin taca Cawinquirar Dios tuaꞌ axin acꞌumpa tacaret tamar lo que cay abꞌijnu ache era.
ACT 8:23 Porque nen inwira que bꞌutꞌur awalma taca e qꞌuijnar, y net era cacharet umen e mabꞌambꞌanir. Bꞌan che e Pedro uyare e Simón.
ACT 8:24 Entonces sutpa ojron e Simón taca e Pedro y e Juan y che: —Ay hermanuox, cꞌajtinic taca Iwinquirar Dios que machix tuaꞌ anumuy tunor era tamaren, che e Simón.
ACT 8:25 Pues entonces e Pedro y e Juan, conda cꞌapa uchecsu lo que e Dios cay uche tamarobꞌ y conda cꞌapa uchecsu tunor uyojroner Cawinquirar, sutpa ixiobꞌ esto tama e chinam Jerusalem otronyajr. Pero tama e bꞌir war uchecsu uyojroner e Cristo tama e corpesiaj tut e gente tic taca tiaꞌ numuyobꞌ, y bꞌan uchiobꞌ tama meyra chinam tama e departamento Samaria.
ACT 8:26 Pues entonces tama inteꞌ día era conda e Felipe turu ubꞌajner checta inteꞌ ángel tuaꞌ Cawinquirar tut xeꞌ ojron y che: —Achpen quiqui esto tama e lugar xeꞌ más bꞌana que e chinam Jerusalem esto tama e lugar xeꞌ ucꞌabꞌa Gaza, che e ángel. Pues e bꞌir tama e lugar yajaꞌ jax inteꞌ bꞌir xeꞌ anumuy tama inteꞌ choquem lugar.
ACT 8:27 Entonces e Felipe achpa y locꞌoy ixin. Y tama e bꞌir bꞌana utajwi inteꞌ winic xeꞌ tuaꞌ e lugar Etiopía. Y e winic era jax inteꞌ xeꞌ machi oyni, pero xeꞌ jax inteꞌ ajcꞌampar xeꞌ ucojco e tesoro tuaꞌ inteꞌ reina xeꞌ ucꞌabꞌa Candace tama e lugar Etiopía. Y e winic era ixin tama e chinam Jerusalem tuaꞌ uyujtzꞌi ut Cadiosir,
ACT 8:28 y era war asutpa axin esto tama ulugar otronyajr. Y war axin tama uxambꞌar tama inteꞌ carro xeꞌ qꞌuejcha ixin umen inteꞌ chij. Y tama uxambꞌar era war uche leer tama uyojroner e Dios xeꞌ tzꞌijbꞌabꞌir umen e profeta Isaías.
ACT 8:29 Y tamar era ojron Unawalir e Dios y uyare e Felipe y che: —Quiqui tuyejtzꞌer e carro yax tuaꞌ oꞌjron taca e winic, che Unawalir e Dios.
ACT 8:30 Y conda e Felipe ya turu tuyejtzꞌer e carro cay uyubꞌi que e winic war uche leer tama e libro tuaꞌ e profeta Isaías, y tamar era uyubꞌi tuaꞌ e winic era y che: —¿Anata ca tucꞌa war ache leer era? che e Felipe.
ACT 8:31 Y ojron e winic y che: —¿Cocha tuaꞌ innata tunor era jay mamajchi ayopa tuaꞌ uchecsu taniut tucꞌa war che tunor era? che e winic. Entonces upejca e Felipe tuaꞌ atꞌabꞌay aturuan tuyejtzꞌer tama e carro. Entonces ochoy e Felipe tama e carro.
ACT 8:32 Y tiaꞌ war uche leer e winic tama uyojroner e Dios jax era: Jaxir bꞌan cocha inteꞌ oveja xeꞌ war aqꞌuejcha axin tuaꞌ achamesna, y jaxir bꞌan cocha inteꞌ chuchu oveja xeꞌ awawan y machi aꞌru xeꞌ intaca awawan tzꞌustaca conda war axujra utzutzer. Y bꞌan jaxir ubꞌan, machi ojron tut tin e tuaꞌ uchamsiobꞌ.
ACT 8:33 Y jaxir manxujresna y majax erach e juez xeꞌ ojron tacar. ¿Chi tuaꞌ oꞌjron tamar umaxtac o tamar usitzobꞌ cocha matucꞌa? Porque jaxir chꞌom sitzto conda loqꞌuesna ucuxtar tama or e rum era. Bꞌan che tama uyojroner e Dios lo que war uche leer e winic.
ACT 8:34 Entonces ojron e ajcꞌampar taca e Felipe y che: —Aren pues ¿tucꞌa nic war ubꞌijnu e profeta conda utzꞌijbꞌa e ojroner era? ¿Jax taca ca jaxir xeꞌ tuaꞌ unumse ubꞌa tama tunor era? ¿O ayan ca otronteꞌ xeꞌ tuaꞌ unumse ubꞌa cocha era? che e ajcꞌampar.
ACT 8:35 Entonces ojron e Felipe y cay uchecsu tut e ajcꞌampar tama tunor e ojroner era tama uyojroner e Dios. Ucajyes e checsuyaj tama e ojroner tuaꞌ e profeta era, y de allí cay uyare e ajcꞌampar tama tunor e ojroner tama e corpesiaj lo que ayan tama e Jesús.
ACT 8:36 Y warto axiobꞌ tama ucarro e ajcꞌampar conda cꞌotoyobꞌ tama inteꞌ lugar tiaꞌ ayan e jaꞌ. Y ojron e ajcꞌampar y che: —Tara ayan e jaꞌ. ¿Tucꞌa tuaꞌ machi achꞌuyen tamar? che e ajcꞌampar.
ACT 8:37 Entonces ojron e Felipe y che: —Pues net erer ichꞌujya era jay icꞌupseyan tama e Cristo taca tunor awalma, che e Felipe. Y ojron e ajcꞌampar y che: —Nen incꞌupseyan tama e Jesucristo que jax Uyunen e Dios, che e ajcꞌampar.
ACT 8:38 Entonces e ajcꞌampar uyare awawan e carro y ecmay e Felipe y e ajcꞌampar, y ecmay ixiobꞌ esto tutiꞌ e jaꞌ. Y e Felipe uchꞌuyi e ajcꞌampar tama e jaꞌ.
ACT 8:39 Y war atꞌabꞌay alocꞌoyobꞌ tama e jaꞌ conda wacchetaca cꞌapa loqꞌuesna e Felipe yajaꞌ. Turu ani y de allí satpa tut e ajcꞌampar y qꞌuejcha ixin innajt umen Unawalir Cawinquirar. Y e ajcꞌampar machi sutpa uwira ut e Felipe otronyajr, intaca ixin tama uxambꞌar y war atzay meyra tama uyalma umen lo que e Dios cay uche tacar.
ACT 8:40 Y conda e Felipe ubꞌijnu yix turu tama e chinam Azoto. Entonces cay ixin tuaꞌ acꞌotoy tama e chinam Cesarea. Y tama uxambꞌar cay unumse inteꞌ inteꞌ chinam y war uchecsu uyojroner e Dios tama e corpesiaj lo que ayan tama e Jesús tut tunor e gente.
ACT 9:1 Pues entonces e Saulo machi war uyacta uqꞌuijnar upater tunor tin e war axanobꞌ tama ubꞌir Cawinquirar este que war ubꞌajcꞌusiobꞌ que cꞌani uchamsiobꞌ. Y tamar era ixin e Saulo tuaꞌ oꞌjron taca uwinquir e inmojr sacerdotiobꞌ
ACT 9:2 tuaꞌ ucꞌajti cora carta tuaꞌ aꞌjcꞌuna e cꞌotorer tuaꞌ ucachi uqꞌuechiobꞌ axin tama e cárcel tama e chinam Jerusalem tunor tin e utajwi xeꞌ war axanobꞌ tama ubꞌir e Cristo, motor jay winicobꞌ o motor jay ixictac ubꞌan. Y tamar era ajcꞌuna inteꞌ carta umen uwinquir e inmojr sacerdotiobꞌ tuaꞌ uqꞌueche axin tacar tuaꞌ uwirse e winicobꞌ tama e sian sinagoga lo que ayan tama e chinam Damasco.
ACT 9:3 Entonces war axana e Saulo tama e bꞌir, y conda tuix acꞌotoy tama e chinam Damasco wacchetaca checta inteꞌ nuxi janchꞌaquenar tut e qꞌuin, bꞌan cocha e janchꞌaquenar conda eijbꞌi ut e qꞌuin. Pero machi tajpa wacchetaca sino que intaca quetpa e nuxi cꞌajc era tut e qꞌuin xeꞌ war ujanchꞌacnes tunor or e lugar tiaꞌ turu jaxir.
ACT 9:4 Entonces e Saulo cucrema tut e rum y cay uyubꞌi inteꞌ nuc xeꞌ ojron tacar y che: —Saulo, Saulo, ¿tucꞌa tuaꞌ war aturbꞌa abꞌa tuaꞌ achien innumse nibꞌa? che e ojroner xeꞌ uyubꞌi tama e janchꞌaquenar era.
ACT 9:5 Entonces ojron e Saulo y uyubꞌi tuaꞌ tin e war oꞌjron tama e janchꞌaquenar era y che: —¿Chiet net, Niwinquiret? che e Saulo. Y ojron e nuc tama e janchꞌaquenar otronyajr y che: —Nen e Jesús xeꞌ war aturbꞌa abꞌa tuaꞌ achien innumse nibꞌa. Pero lo que war ache tama tunor era intaca war anumse abꞌa bꞌan cocha incojt wacax conda war uyajcꞌu inteꞌ patada tut inteꞌ susteꞌ lo que qꞌuecher umen e ajcojc wacax, que jax taca war uxeqꞌue ubꞌa tamar, y bꞌan war anumse abꞌa net era, che e Jesús.
ACT 9:6 Pero e Saulo war achincha taca e bꞌajcꞌut y cay ojron otronyajr y che: —Niwinquiraret ¿tucꞌa acꞌani tuaꞌ inche? che e Saulo. Y ojron e Jesús y che: —Achpen quiqui ochen tama e chinam Damasco. Y conda ya turet yajaꞌ, net tuaꞌ iyarobꞌna tucꞌa ucꞌani tuaꞌ ache. Bꞌan che e Jesús uyare e Saulo.
ACT 9:7 Pero e winicobꞌ xeꞌ war axanobꞌ taca e Saulo tama uxambꞌar era intaca quetpobꞌ wawanobꞌ y machi ojronobꞌ umen e bꞌajcꞌut. Intaca war uyubꞌiobꞌ e ojroner pero machi uwirobꞌ chi.
ACT 9:8 Entonces e Saulo achpa tiaꞌ cucrema tut e rum, pero conda cay uyerojse unacꞌut machi eꞌron. Y umen que machi eꞌron era, cay chujca tama ucꞌabꞌ umen tin e war axanobꞌ tacar tuaꞌ uqꞌuechiobꞌ axin tuaꞌ acꞌotoy esto tama e chinam Damasco.
ACT 9:9 Y conda cꞌotoy intaca turuan uxteꞌ día. Machi eꞌron, machi weꞌ, y nien matucꞌa uyuchꞌi. Bꞌan taca turuan.
ACT 9:10 Pues entonces tama e chinam Damasco ayan inteꞌ ajcꞌupesiaj xeꞌ ucꞌabꞌa Ananías. Y jaxir irsena inteꞌ umayjut tiaꞌ uwira Cawinquirar xeꞌ oꞌjron tacar y che: —Ananías, che Cawinquirar. Entonces ojron e Ananías y che: —Tara turen Niwinquiraret, che e Ananías.
ACT 9:11 Y ojron Cawinquirar y che: —Achpen quiqui tama e calle xeꞌ ucꞌabꞌa Derecha y ochen tama uyotot e Judas, y yajaꞌ cꞌani asicbꞌa inteꞌ winic xeꞌ ucꞌabꞌa Saulo xeꞌ tuaꞌ e chinam Tarso. Jaxir war ucꞌajti tacaren yajaꞌ.
ACT 9:12 Y jaxir ayan inteꞌ umayjut ubꞌan, y tama umayjut uwira que ayan inteꞌ winic xeꞌ ucꞌabꞌa Ananías xeꞌ jax net xeꞌ iyochoy tama e otot tiaꞌ turu, y tamar umayjut era uwira que net war apacbꞌu acꞌabꞌ tama ujor. Y tamar era jaxir uyubꞌi eꞌron otronyajr. Bꞌan che Cawinquirar uyare e Ananías.
ACT 9:13 Pero e Ananías conda cꞌapa uyubꞌi e ojroner era, ojron otronyajr y che: —Niwinquiraret, pero nen war umbꞌi meyra tama e winic era, y war uyaren e gente que meyra mabꞌambꞌanir war uche upater tunor tin e war acꞌupseyanobꞌ tamaret tama e chinam Jerusalem.
ACT 9:14 Y era tari esto tama cachinam tara taca ucꞌotorer uwinquir e inmojr sacerdotiobꞌ tama e chinam Jerusalem tuaꞌ uyubꞌi uqꞌueche axin tama e cárcel tunor tin e axin utajwi xeꞌ war upejca acꞌabꞌa, che e Ananías.
ACT 9:15 Pero ojron Cawinquirar otronyajr y che: —Quiqui, porque nen insicbꞌix e winic era tuaꞌ axin uyare e gente tamaren xeꞌ majax tuobꞌ e Israel. Y esto tut e nuxi ajcꞌamparobꞌ tuaꞌ axin uchecsu tunor nicꞌabꞌa. Y bꞌan tuaꞌ uche tut e gente tama e Israel ubꞌan.
ACT 9:16 Y nen cꞌani inxin inwirse cobꞌa tuaꞌ unumse ubꞌa umen que war axana tama nibꞌir nen. Bꞌan che Cawinquirar uyare e Ananías tama umayjut.
ACT 9:17 Entonces ixin e Ananías uche bꞌan taca cocha arobꞌna umen Cawinquirar y ixin esto tiaꞌ turu e Saulo. Y conda ochoy tama e otot ixin upacbꞌu ucꞌabꞌ tama ujor e Saulo y che: —Hermano Saulo, Cawinquirar Jesús xeꞌ jax xeꞌ checta toit tama e bꞌir tiaꞌ war ixana, jax xeꞌ ojron tacaren ubꞌan y uyaren tuaꞌ inyopa toit tuaꞌ impacbꞌu nicꞌabꞌ tama ajor tuaꞌ uyubꞌiet iyeron otronyajr y tuaꞌ abꞌutcꞌa awalma taca Unawalir e Dios, che e Ananías.
ACT 9:18 Y wacchetaca ojri tama unacꞌut lo que bꞌan cocha usujr e chay, y tamar era uyubꞌi eꞌron otronyajr. Entonces achpa e Saulo y ixin chꞌujya.
ACT 9:19 Y de allí ixin cay weꞌ. Y tamar era qꞌuecꞌo otronyajr y quetpa cora día taca e inmojr ajcꞌupesiajobꞌ tama Cawinquirar xeꞌ turobꞌ tama e chinam Damasco.
ACT 9:20 Pues entonces tama e día era e Saulo cay uchecsu ucꞌabꞌa e Jesús tama e sian sinagoga, y war uyare e gente que e Jesús jax Uyunen e Dios.
ACT 9:21 Y tunor tin e uyubꞌi uyojroner war ubꞌijnu uwira y chenobꞌ: —¿Ma ca jax era e winic xeꞌ cay uche unumse ubꞌobꞌ tunor tin e war upejca ucꞌabꞌa e Jesús tama e chinam Jerusalem? ¿Y ma ca jax era xeꞌ yopa tara tuaꞌ uqꞌueche axin tama e cárcel tunor tin e war upejca ucꞌabꞌa e Jesús tuaꞌ ucꞌotesobꞌ tut uwinquir e inmojr sacerdotiobꞌ? Bꞌan che e gente xeꞌ uyubꞌiobꞌ uyojroner e Saulo era.
ACT 9:22 Pero e Saulo war uchecsu tut e gente axin taca inteꞌ nuxi tzayer que e Jesús jax e Cristo este que cꞌapa ucucru taca uyojroner tunor tin e tuobꞌ e Israel xeꞌ turobꞌ tama e chinam Damasco. Y jaxirobꞌ machi unatobꞌ tucꞌa tuaꞌ oꞌjronobꞌ otronyajr.
ACT 9:23 Pues conda cꞌapa numuy meyra día, e gente tuaꞌ e Israel cay ubꞌijnuobꞌ que cꞌani uchamsiobꞌ e Saulo.
ACT 9:24 Pero e Saulo cꞌotoy unata tucꞌa war ubꞌijnuobꞌ era. Pero cocha e gente era xeꞌ tuobꞌ e Israel cꞌani utajwiobꞌ e Saulo, cay ucojcobꞌ tunor e nuxi puerta lo que ayan tama e nuxi macteꞌ xeꞌ petzbꞌir tun xeꞌ xojybꞌir macar e chinam era tamar. Y bꞌan war uchiobꞌ tama e día y acbꞌar ubꞌan, cꞌani uwirobꞌ jay erer utajwiobꞌ e Saulo.
ACT 9:25 Pero tin e war acꞌupseyanobꞌ tama Cawinquirar, cocha war uyajta ut e Saulo, uturbꞌobꞌ tama inteꞌ nuxi chiquiꞌ y ucachiobꞌ taca inteꞌ lazo, y unumsiobꞌ tama inteꞌ chꞌen tama e nuxi macteꞌ era lo que ayan tama utiꞌ e chinam, y uyemsiobꞌ este que cꞌaxi tut e rum tama inxejr e macteꞌ. Y bꞌan ixto cocha era locꞌoy ajni e Saulo. Machi tajwina umen e gente tuaꞌ e Israel xeꞌ cꞌani ani uchamsiobꞌ.
ACT 9:26 Pues entonces e Saulo ixin esto tama e chinam Jerusalem. Y conda cꞌotoy cꞌani ani umorojse ubꞌa taca e inmojr ajcꞌupesiajobꞌ tama e Jesús, pero e ajcꞌupesiajobꞌ era war abꞌactobꞌ y machi cꞌani umorojse ubꞌobꞌ tacar porque machi war ucꞌupsiobꞌ jay jaxir jax inteꞌ ajcꞌupesiaj tama e Jesús coner.
ACT 9:27 Pero e hermano Bernabé uqꞌueche ixin e Saulo tut e apostolobꞌ. Y cay uyare e apostolobꞌ que e Saulo uwira ut Cawinquirar tama inteꞌ umayjut conda war axana tama e bꞌir. Y cay uyare que Cawinquirar ojron tamar, y que e Saulo cay uchecsu ucꞌabꞌa e Jesús tama e chinam Damasco taca inteꞌ tzayer.
ACT 9:28 Entonces e Saulo quetpa taca e apostolobꞌ era, cora cora war axin tama e chinam Jerusalem. Y war uchecsu uyojroner e Dios taca inteꞌ nuxi tzayer tama ucꞌabꞌa Cawinquirar
ACT 9:29 y war upejca e winicobꞌ xeꞌ tuobꞌ e Israel xeꞌ ojronobꞌ tama e ojroner griego, y war ojron tamar uyojroner e Dios este que cay uqꞌuijnes e winicobꞌ era. Y tamar era e winicobꞌ era cay ubꞌijnuobꞌ que cꞌani uchamsiobꞌ e Saulo.
ACT 9:30 Pero conda e ajcꞌupesiajobꞌ cay unatobꞌ que e gente tuaꞌ e Israel war ubꞌijnuobꞌ tuaꞌ uchamsiobꞌ e Saulo, uqꞌuechiobꞌ ixin esto tama e chinam Cesarea. Y de allí uyare tuaꞌ axin esto tama e chinam Tarso.
ACT 9:31 Y tamar era numuy inteꞌ tiempo conda ayan e jiriar tama tunor e sian grupo ajcꞌupesiajobꞌ tama Cawinquirar xeꞌ turobꞌ tama tunor e departamento Judea. Y bꞌan ubꞌan tama tunor e departamento Galilea, y tama tunor e departamento Samaria. Y war aqꞌuecꞌo inteꞌ inteꞌ ajcꞌupesiaj y war abꞌoruobꞌ tunor e grupo ajcꞌupesiajobꞌ taca utacarsiaj Unawalir e Dios. Y tunor e ajcꞌupesiajobꞌ war acꞌupseyanobꞌ tut e Dios.
ACT 9:32 Pues entonces e Pedro war axana tic taca tuaꞌ uwarajse tunor tin e war acꞌupseyanobꞌ tama e Jesús, y tamar era ixin tuaꞌ uwarajse tin e ajcꞌupesiajobꞌ tama e chinam Lida ubꞌan.
ACT 9:33 Y tama e chinam era utajwi inteꞌ winic xeꞌ ucꞌabꞌa Eneas. Y e winic era ayix ocho año que chꞌar tama uchꞌacteꞌ umen que chamen ucuerpo.
ACT 9:34 Entonces e Pedro ojron taca e winic y che: —Eneas, e Jesucristo war utzꞌacpeset. Achpen ustes achꞌacteꞌ, che e Pedro. Entonces wacchetaca achpa wawan e Eneas y cay uyustes uchꞌacteꞌ.
ACT 9:35 Y tunor e gente xeꞌ turuan tama e chinam Lida y tama e chinam Sarón uwirobꞌ lo que numuy tama e Eneas. Y tamar era uyactobꞌ tunor e onian bꞌijnusiaj tuobꞌ y cay xanobꞌ tama ubꞌir Cawinquirar.
ACT 9:36 Pues tama e tiempo era ayan inteꞌ ixic xeꞌ jax inteꞌ ajcꞌupesiaj tama e Cristo xeꞌ turu tama e chinam Jope. Y e ixic era ucꞌabꞌa Tabita, pero tama e ojroner griego ucꞌabꞌa Dorcas. Pues e ixic era cay uche meyra lo que imbꞌutz tut tunor e gente, y war axana war utacre inteꞌ inteꞌ tin e matucꞌa ayan tuobꞌ.
ACT 9:37 Y tama e tiempo era muacran e Dorcas y chamay. Entonces uyatesobꞌ ucuerpo y uturbꞌobꞌ tama inteꞌ cuarto tama inteꞌ otot xeꞌ más tichan, y yajaꞌ tichan ixin uchꞌabꞌuobꞌ ucuerpo.
ACT 9:38 Y tunor tin e ajcꞌupesiajobꞌ tama e Cristo xeꞌ turobꞌ tama e chinam Jope era war unatobꞌ que turu e Pedro tama e chinam Lida xeꞌ majax innajt tutobꞌ y que erer acꞌotoy jaxir tuaꞌ ucꞌajti taca e Dios tuaꞌ asutpa abꞌixcꞌa e Dorcas. Y tamar era uyebꞌta ixiobꞌ chateꞌ winicobꞌ tuaꞌ usicbꞌobꞌ e Pedro. Y conda cꞌotoyobꞌ tut e Pedro, cay uyareobꞌ y chenobꞌ cocha era: —Lar wacche tacaron esto tama e chinam Jope, che e winicobꞌ era.
ACT 9:39 Entonces locꞌoy e Pedro y ixin tacarobꞌ. Y conda cꞌotoyobꞌ esto tama e otot tiaꞌ chꞌar e chamen era xeꞌ jax e Dorcas, uqꞌuechiobꞌ ixin e Pedro tama e cuarto tiaꞌ chꞌar ucuerpo e ixic era. Y yajaꞌ ayan e sian ixictac xeꞌ chamen uviejobꞌ xeꞌ war acotuanobꞌ tut ucuerpo e ixic war aruobꞌ. Y cay uwirsiobꞌ e Pedro tunor e sian bꞌujc lo que chembꞌir umen e Dorcas conda turuto ani.
ACT 9:40 Y de allí e Pedro uyare tunor e gente tuaꞌ alocꞌoyobꞌ macuir e cuarto era. Entonces conda quetpa ubꞌajner taca ucuerpo e ixic, cotuan y cay ucꞌajti taca e Dios. Entonces uchꞌujcu uwira ut e chamen ixic y che cocha era: —Tabita, achpen, che e Pedro. Entonces uyerojse unacꞌut e ixic, y conda uwira ut e Pedro achpa turuan tama uchꞌacteꞌ.
ACT 9:41 Entonces e Pedro uchuqui ucꞌabꞌ y cay utacre tuaꞌ aꞌchpa awawan e ixic, y de allí upejca e ajcꞌupesiajobꞌ tama e Cristo y tunor e sian ixictac xeꞌ chamen uviejobꞌ y uwirse tunorobꞌ que sutpa bꞌixcꞌa e ixic xeꞌ chamen ani.
ACT 9:42 Y cay natanwa umen tunor e gente tama e chinam Jope y tama tunor or lugar yajaꞌ lo que numuy tama e ixic era. Y tamar era meyra gente cay cꞌupseyanobꞌ tama Cawinquirar.
ACT 9:43 Y e Pedro quetpa cora día tama e chinam era tama uyotot e Simón xeꞌ jax inteꞌ winic xeꞌ unata uyustes e qꞌuewer.
ACT 10:1 Pues entonces tama e chinam Cesarea ayan inteꞌ winic xeꞌ ucꞌabꞌa Cornelio. Y e Cornelio era jax inteꞌ capitán tama e ejército romano, pero ucꞌabꞌa uyejército era jax: “Tuaꞌ e lugar Italia.”
ACT 10:2 Y e Cornelio war uyusre uche lo que ucꞌani e Dios, y bꞌan ufamilia ubꞌan, uyujtzꞌiobꞌ ut e Dios tunorobꞌ. Y jaxir meyra utacre tin e tzajtaca ut tujam e gente tuaꞌ e Israel, y war ucꞌajti taca e Dios iraj iraj.
ACT 10:3 Y tama inteꞌ día conda tꞌerpix e qꞌuin checta inteꞌ mayjut tut. Y tamar umayjut era checta inteꞌ ángel tuaꞌ e Dios xeꞌ ochoy tiaꞌ turu e Cornelio y cay ojron tacar y che: —Cornelio, che e ángel.
ACT 10:4 Y e Cornelio intaca quetpa wawan war uchꞌujcu uwira ut e ángel, war abꞌacta. Y jaxir uyubꞌi tuaꞌ e ángel y che: —¿Tucꞌa acꞌani, niwinquiret? che e Cornelio. Ojron e ángel otronyajr y che: —Pues cꞌar umen e Dios que war acꞌajti tacar y que war atacre tin e tzajtaca ut iraj iraj, y tunor era atzay eꞌrna umen e Dios.
ACT 10:5 Y era tzacren chic cora winicobꞌ esto tama e chinam Jope tuaꞌ upejcobꞌ inteꞌ winic xeꞌ ucꞌabꞌa Simón xeꞌ arobꞌna Pedro ubꞌan.
ACT 10:6 Pues cꞌani itajwi e Pedro era tama uyotot inteꞌ winic xeꞌ ucꞌabꞌa Simón xeꞌ jax inteꞌ xeꞌ unata apatna taca e qꞌuewer. Y uyotot e Simón era aquetpa tutiꞌ e nuxi jaꞌ. Bꞌan che e ángel uyare e Cornelio.
ACT 10:7 Entonces conda cꞌapa locꞌoy e ángel xeꞌ war oꞌjron taca e Cornelio, jaxir ixin upejca chateꞌ uman. Y upejca inteꞌ soldado tuaꞌ ubꞌan xeꞌ jax inteꞌ winic xeꞌ uyusre uche lo que ucꞌani e Dios.
ACT 10:8 Y e Cornelio cay uyare tunor lo que numuy tamar, y de allí utzacre ixiobꞌ esto tama e chinam Jope tuaꞌ usicbꞌobꞌ e Pedro tuaꞌ utaresobꞌ.
ACT 10:9 Entonces tama uyuxin e día tama otronteꞌ día warto axanobꞌ e manobꞌ era taca e soldado tuaꞌ ayopobꞌ tama e chinam Jope, y jax e hora era ubꞌan conda e Pedro cay tꞌabꞌay ixin tichan tujor uyotot tuaꞌ ucꞌajti taca e Dios.
ACT 10:10 Y cocha eixna turu tichan war ucꞌajti taca e Dios, cay jaytzꞌa, y tamar era uyare e gente tama e otot tuaꞌ uyustes e comida. Pero jaxir quetpa tichan war ucojco este que ustana tunor e comida, conda checta inteꞌ umayjut.
ACT 10:11 Y tama umayjut uwira que pasar ut e qꞌuin y que war ecmay watar lo que lar uwirnar cocha inteꞌ nuxi manta xeꞌ cachar tama inteꞌ inteꞌ upunto taca e lazo. Y war emsena watar taca e lazo esto tut e qꞌuin.
ACT 10:12 Y tama e nuxi manta ayan meyra animalobꞌ xeꞌ intajchix ucꞌabꞌobꞌ. Y ayan xeꞌ chanteꞌ uyocobꞌ y ayan lo que bꞌan uwirnar cocha e chan y ayan xeꞌ bꞌan uwirnar cocha e ajpat y ayan meyra mut xeꞌ majax intera ucꞌabꞌobꞌ.
ACT 10:13 Y e Pedro uyubꞌi inteꞌ nuc xeꞌ ojron y che: —Pedro, achpen, chamsen inteꞌ animal, cꞌuxu, che e nuc xeꞌ tari tama umayjut era.
ACT 10:14 Pero ojron e Pedro y che: —Machi Niwinquiraret, porque nen ma inyajr cꞌotoyen incꞌuxi lo que mabꞌambꞌan bꞌan cocha che tama uley e Moisés, che e Pedro.
ACT 10:15 Entonces ojron e nuc era otronyajr y che: —Pues lo que arobꞌna umen e Dios que imbꞌutz, ira aware net que mabꞌambꞌan, che e nuc tama umayjut.
ACT 10:16 Y bꞌan arobꞌna e Pedro tama uxyajr umen e nuc tama umayjut que ucꞌani tuaꞌ ucꞌuxi lo que ayan tama e nuxi manta, pero e Pedro sutpa uyare e nuc otronyajr que machix tuaꞌ ucꞌuxi porque ma inyajr cꞌotoy ucꞌuxi lo que mabꞌambꞌan bꞌan cocha che tama uley e Moisés. Y de allí sutpa qꞌuejcha ixin tichan e nuxi manta esto tut e qꞌuin.
ACT 10:17 Entonces e Pedro quetpa tujor e otot y warto ubꞌijnu tamar umayjut y tamar lo que war che tunor era. Y tamar era wacchetaca yopobꞌ e winicobꞌ xeꞌ ebꞌetnobꞌ ixin umen e Cornelio, y war uyubꞌiobꞌ tuaꞌ e gente tiaꞌ aquetpa uyotot e Simón y era ya cꞌotoy wawanobꞌ tut upuertair uyotot e Simón.
ACT 10:18 Y jaxirobꞌ upejcobꞌ taca inteꞌ nuxi nuc desde tut e puerta y che: —¿O ya ca turu inteꞌ winic tama e otot era xeꞌ ucꞌabꞌa Simón xeꞌ arobꞌna Pedro ubꞌan? che e winicobꞌ era.
ACT 10:19 Pero e Pedro turu tichan tujor e otot y tamar era machi uyubꞌi lo que arobꞌna umen e winicobꞌ ejmar. Entonces Unawalir e Dios uyare e Pedro cocha era y che: —Pedro, ayan uxteꞌ winicobꞌ ejmar xeꞌ war usicbꞌetobꞌ.
ACT 10:20 Achpen y ecmen quiqui tacarobꞌ tiaꞌ cꞌani uqꞌuechietobꞌ iꞌxin. Ira ibꞌacta porque jax nen xeꞌ intzacre tariobꞌ, che Unawalir e Dios.
ACT 10:21 Entonces ecmay e Pedro y ixin tut e winicobꞌ xeꞌ tzacarna tariobꞌ umen e Cornelio y uyare cocha era y che: —Pues nen e winic xeꞌ war isicbꞌen. ¿Y tucꞌa tuaꞌ war isicbꞌen? che e Pedro.
ACT 10:22 Entonces ojronobꞌ e winicobꞌ era y chenobꞌ: —Pues non era tarion umen que tzacarnon tarion umen e Cornelio xeꞌ jax inteꞌ capitán tama e ejército. Pues jaxir jax inteꞌ winic xeꞌ erach y xeꞌ uyujtzꞌi ut e Dios. Y jaxir jax inteꞌ winic xeꞌ war abꞌacꞌajrna y xeꞌ war acꞌajna umen tunor e gente tuaꞌ e Israel. Y checta inteꞌ ángel tut y cay arobꞌna umen tuaꞌ usicbꞌet tuaꞌ iyopa tama uyotot, y que jaxir ucꞌani tuaꞌ uyubꞌi tunor lo que cꞌani aware, che e winicobꞌ era.
ACT 10:23 Entonces e Pedro ojron y che: —Ochenic macu, turenic tacaren y tara tuaꞌ ixwayan tama e acbꞌar era. Y ejcꞌar inxin tacarox, che e Pedro. Y tama otronteꞌ día bꞌan uche e Pedro, y ixin tacarobꞌ ubꞌan cora ajcꞌupesiajobꞌ tama e Cristo xeꞌ turuanobꞌ tama e chinam Jope era.
ACT 10:24 Entonces cꞌotoyobꞌ tama e chateꞌ día era esto tama e chinam Cesarea. Y ya turu e Cornelio tama uyotot war ucojco uyopar e Pedro. Y yix turobꞌ cora upiarobꞌ taca e Cornelio era y cora gente tin e atzay uwira xeꞌ pejcbꞌirobꞌ umener.
ACT 10:25 Y conda yopa e Pedro tama uyotot e Cornelio, jaxir locꞌoy tuaꞌ uyose macu. Y conda uwira que jax e Pedro cotuan tut y cay uyujtzꞌi ut.
ACT 10:26 Pero e Pedro uchuqui ucꞌabꞌ e Cornelio tuaꞌ ujachi y che: —Ira icotuan ojytzꞌi niut. Achpen waren, porque nen winiquen bꞌan cocha net, che e Pedro.
ACT 10:27 Y warto oꞌjronobꞌ conda ochoyobꞌ macuir e otot. Y conda e Pedro cꞌotoy macu, uwira que ayan e sian gente xeꞌ morojsebꞌirobꞌ turobꞌ tuaꞌ uyubꞌiobꞌ lo que tuaꞌ aꞌrobꞌnobꞌ umener.
ACT 10:28 Entonces cay ojron jaxir y che: —Pues nox war inata que inteꞌ xeꞌ tuaꞌ e Israel machi uyubꞌi oꞌchoy aturuan tujam e gente xeꞌ majax tuobꞌ e Israel, y nien machi ani tuaꞌ cawarajse e gente cocha nox. Pero e Dios cay uwirsen que ma erer inware nien tama inteꞌ winic que bꞌonem uyalma y ma erer inware nien que matucꞌa ucꞌampibꞌir.
ACT 10:29 Y tamar era conda tzacarna ixin cora winicobꞌ tuaꞌ usicbꞌen utaresenobꞌ, tarien wacchetaca porque bꞌan uyaren e Dios tuaꞌ inche. Pero era cꞌani ani innata, ¿tucꞌa tuaꞌ iwebꞌta ixin e winicobꞌ era tuaꞌ utaresenobꞌ? ¿Y tucꞌa icꞌani tuaꞌ inche era? che e Pedro.
ACT 10:30 Entonces ojron e Cornelio y che: —Pues uxiꞌ era bꞌan cocha tama e hora era nen turen tama niotot, y machi war inweꞌ tuaꞌ incꞌajti taca e Dios conda wacchetaca checta inteꞌ winic xeꞌ ejpray ut ubꞌujc xeꞌ yopa wawan taniut.
ACT 10:31 Jaxir uyaren y che: “Cornelio, Cadiosir uyubꞌix tunor lo que cay acꞌajti tacar, y jaxir war uwira y war ucꞌajpes tunor lo que cay ache tuaꞌ atacre tin e tzajtaca ut.
ACT 10:32 Tzacren chic cora winicobꞌ tuaꞌ usicbꞌobꞌ utaresobꞌ inteꞌ winic xeꞌ ucꞌabꞌa Pedro xeꞌ turu tama uyotot inteꞌ winic xeꞌ ucꞌabꞌa Simón xeꞌ jax xeꞌ unata apatna taca e qꞌuewer. Jaxir turu tama e chinam Jope y aquetpa uyotot tutiꞌ e nuxi jaꞌ. Y conda axin watar e Pedro era, ubꞌin tunor lo que axin uyaret.” Bꞌan uyaren e ángel tama nimayjut.
ACT 10:33 Y tamar era inwebꞌta ixin cora winicobꞌ tuaꞌ usicbꞌetobꞌ y utaresetobꞌ, y era cꞌani inwaret que bueno que tariet wacchetaca. Pero era tara turon tunoron tut e Dios, cꞌani coybꞌi tunor lo que Cawinquirar war uturbꞌa tama awalma tuaꞌ awareon. Bꞌan che e Cornelio uyare e Pedro.
ACT 10:34 Entonces cay ojron e Pedro y che: —Pues coner erer innata que e Dios machi ubꞌijnu jay jax taca e gente tama e Israel xeꞌ ayan ucꞌampibꞌirobꞌ.
ACT 10:35 Porque Cadiosir war uyajta ut e winicobꞌ tama tunor or e rum tin e war acꞌupseyanobꞌ tut y tin e war uchiobꞌ lo que imbꞌutz tut.
ACT 10:36 Pues e Dios cay uyare tunor umaxtac e Israel tunor e ojroner xeꞌ galan tuaꞌ e jiriar lo que ayan tama Cawinquirar Jesucristo, y que jaxir jax xeꞌ quetpa Uwinquirar tuaꞌ tunor lo que ayan.
ACT 10:37 Y nox era inata tamar lo que cay numuy tama e lugar Israel conda cꞌapa chꞌuyma e Juan y conda cꞌapa uchecsu uyojroner e Dios jaxir. Y cay checta tunor uyojroner Cawinquirar Jesucristo tama e departamento Galilea. Y de allí checta ixin tunor e ojroner era tama tunor or e lugar Israel.
ACT 10:38 Y war inata tamar e Jesús xeꞌ tuaꞌ e chinam Nazaret, y que e Dios uyajcꞌu ucꞌotorer conda uyajcꞌu Unawalir. Y war inata que e Jesús ixin tic taca war uche lo que imbꞌutz, y war utzꞌacpes e gente ixin xeꞌ war unumse ubꞌobꞌ yebꞌar ucꞌotorer e Satanás. Y bꞌan cay uche umen taca que turu e Dios tacar.
ACT 10:39 Y non taca e hermanuobꞌ era ajchecsuyajon tama tunor lo que uche e Jesús tama e departamento Judea y tama e chinam Jerusalem. Pero tin e ajcꞌotorerobꞌ tama e chinam Jerusalem ixin uchamsiobꞌ e Jesús conda uchꞌubꞌobꞌ tut inteꞌ cruz y uyactobꞌ chamay tamar.
ACT 10:40 Pero Cadiosir usuti ubꞌixqꞌues e Jesús tujam e chamenobꞌ tama e uxteꞌ día, y de allí uyajcꞌu e Jesús tuaꞌ uchectes ubꞌa ticoit non.
ACT 10:41 Pero machi uchectes ubꞌa tut tunor e gente sino que ticoit taca non xeꞌ ajchecsuyajon xeꞌ sicbꞌabꞌironix umen e Dios. Y non wion tacar, y uchꞌion tacar conda cꞌapa sujta bꞌixqꞌuesna tujam e chamenobꞌ.
ACT 10:42 Y jaxir uyareon que ucꞌani tuaꞌ caxin cachecsu uyojroner e Dios tut tunor e gente, y que ucꞌani tuaꞌ cachecsu tutobꞌ que jax taca jaxir xeꞌ pejcna umen e Dios tuaꞌ aquetpa juez tuaꞌ tunor tin e bꞌixir y tuaꞌ tunor tin e chamen ubꞌan.
ACT 10:43 Y tunor e profetobꞌ tama e onian tiempo cay utzꞌijbꞌa uyactobꞌ que tunor tin e axin acꞌupseyanobꞌ tama e Jesús era cꞌani acorpesnobꞌ tama tunor umabꞌambꞌanirobꞌ umen que ayan e cꞌotorer tama ucꞌabꞌa e Jesús. Bꞌan che e Pedro uyare e Cornelio taca tunor tin e turobꞌ tama uyotot.
ACT 10:44 Y warto oꞌjron e Pedro conda tari Unawalir e Dios y ubꞌutꞌi uyalmobꞌ tunor e gente xeꞌ war uyubꞌiobꞌ uyojroner e Pedro.
ACT 10:45 Y tin e ajcꞌupesiajobꞌ xeꞌ tuobꞌ e Israel xeꞌ tariobꞌ taca e Pedro war uwirobꞌ lo que numuy era, y war ubꞌijnu uwirobꞌ que ajcꞌunobꞌ Unawalir e Dios tin e majax tuobꞌ e Israel ubꞌan.
ACT 10:46 Porque war uyubꞌiobꞌ que e gente era war oꞌjronobꞌ tama inteꞌ ojroner xeꞌ majax tuobꞌach, y que war utattzꞌiobꞌ ucꞌabꞌa e Dios.
ACT 10:47 Entonces ojron e Pedro y che: —¿Y tucꞌa tuaꞌ machi cachꞌuyi e gente era taca e jaꞌ cocha jaxirobꞌ ixiobꞌ uchꞌamiobꞌ Unawalir e Dios bꞌan cocha non? che e Pedro.
ACT 10:48 Entonces e Pedro uyare tuaꞌ achꞌujyobꞌ tunor e gente era tama ucꞌabꞌa e Jesucristo. Y conda cꞌapa chꞌujyobꞌ tunor e gente cay upejcobꞌ e Pedro tuaꞌ aquetpa tacarobꞌ cora día tuaꞌ uyubꞌiobꞌ más tamar e Dios.
ACT 11:1 Pues entonces tin e apostolobꞌ y tin e ajcꞌupesiajobꞌ tama e Cristo tama tunor or e departamento Judea cay uyubꞌiobꞌ que motor tin e majax tuobꞌ e Israel war uchꞌamiobꞌ uyojroner e Dios ubꞌan.
ACT 11:2 Y tama e chinam Jerusalem ayan inteꞌ grupo ajcꞌupesiajobꞌ xeꞌ war ubꞌijnuobꞌ que ucꞌani tuaꞌ axujra imbꞌijc uqꞌuewerir utejromar tunor tin e acꞌotoy uchꞌamiobꞌ ucꞌabꞌa e Cristo. Y conda ixin e Pedro esto tama e chinam era, e ajcꞌupesiajobꞌ era cay qꞌuecranobꞌ upater y che:
ACT 11:3 —¿Y tucꞌa tuaꞌ ixiet yajaꞌ tuaꞌ awarajse tin e majax tuobꞌ e Israel? Y este que wet tacarobꞌ motor que chꞌar tzꞌijbꞌabꞌir tama uley e Moisés que ma erer caweꞌ taca tin e majax tuobꞌ e Israel, che e ajcꞌupesiajobꞌ era.
ACT 11:4 Entonces ojron e Pedro y cay uchecsu cora cora tunor lo que numuy desde ucajyesnibꞌir tama tunor era y che:
ACT 11:5 —Pues nen turen tama e chinam Jope. Y yajaꞌ turen war incꞌajti taca e Dios conda checta inteꞌ nimayjut. Y tama nimayjut era cay inwira lo que lar uwirnar cocha inteꞌ nuxi manta xeꞌ ecmay tut e qꞌuin, y cachar e lazo tama inteꞌ inteꞌ upunto e nuxi manta era. Y ecmay tari e nuxi manta esto tiaꞌ turen.
ACT 11:6 Cay inchꞌujcu inwira tucꞌa ayan tama e nuxi manta era, y cay inwira que ayan tunor e animalobꞌ xeꞌ chanteꞌ uyocobꞌ. Y ayan e animal xeꞌ ajcꞌopot, y ayan e chan y ayan e ajpat, y ayan e mut.
ACT 11:7 Y bꞌan taca era cay umbꞌi inteꞌ nuc xeꞌ ojron tacaren y che: “Achpen Pedro, chamsen inteꞌ animal, cꞌuxu”, che e nuc era.
ACT 11:8 Pero nen inware e nuc era que: “Machi Niwinquirar, porque nen ma inyajr cꞌotoyen incꞌuxi lo que mabꞌambꞌan bꞌan cocha che tama uley e Moisés.” Bꞌan inware e nuc xeꞌ tari tama nimayjut.
ACT 11:9 Entonces ojron e nuc xeꞌ tari tut e qꞌuin otronyajr y che: “Pues lo que arobꞌna umen e Dios que imbꞌutz, ira aware net que mabꞌambꞌan”, che e nuc tama nimayjut era.
ACT 11:10 Y bꞌan numuy uxyajr era y wacchetaca cay tꞌabꞌay ixin tunor e nuxi manta esto tut e qꞌuin otronyajr.
ACT 11:11 Y wacchetaca yopobꞌ uxteꞌ winicobꞌ esto tama e otot tiaꞌ turen. Y e winicobꞌ era ebꞌetbꞌir tariobꞌ tama e chinam Cesarea. Y tariobꞌ tuaꞌ usicbꞌenobꞌ.
ACT 11:12 Pues jax Unawalir e Dios xeꞌ cay uyaren que ucꞌani tuaꞌ inxin tacarobꞌ, y que machix tuaꞌ imbꞌijnu jay majax bueno tunor era tut e Dios. Pero ixin ubꞌan seis hermanuobꞌ tacaren, y ixion esto tama e chinam Cesarea, y ochoyon tama inteꞌ otot xeꞌ tuaꞌ e winic xeꞌ uyebꞌta ixin e winicobꞌ tuaꞌ usicbꞌenobꞌ.
ACT 11:13 Y e winic era cay uyareon que tama inteꞌ día turu tama uyotot conda checta wawan inteꞌ ángel tut xeꞌ cay ojron tacar y che: “Ebꞌtan chic cora winicobꞌ esto tama e chinam Jope tuaꞌ upejcobꞌ inteꞌ winic xeꞌ ucꞌabꞌa Simón xeꞌ arobꞌna Pedro ubꞌan.
ACT 11:14 Y jaxir conda acꞌotoy tiut cꞌani uyareox tucꞌa ucꞌani tuaꞌ iche tuaꞌ ixcorpesna net taca tunor amaxtac y awixcar.” Bꞌan che e ángel uyare e winic era.
ACT 11:15 Entonces conda cay ojronen tacarobꞌ, Unawalir e Dios tari y ubꞌutꞌi uyalmobꞌ e gente era bꞌan cocha tari tamaron tama ucajyesnibꞌir tunor era.
ACT 11:16 Entonces cꞌajpa nimener lo que uyareon Cawinquirar tama ucajyesnibꞌir tunor era y che: “Pues e Juan chꞌuyma taca e jaꞌ, pero watar e día era conda tuaꞌ ixchꞌujya taca Unawalir e Dios.” Bꞌan uyareon Cawinquirar conda turuto tara tor e rum.
ACT 11:17 Entonces ochoy tama nijor que cocha e Dios war uyajcꞌu e gente xeꞌ majax tuobꞌ e Israel lo que cay uyajcꞌon xeꞌ cay cꞌupseyanon tama Cawinquirar Jesucristo tama ucajyesnibꞌir tunor era, ¿chien nen tuaꞌ inware e Dios que majax imbꞌutz lo que war uche jaxir? Bꞌan che e Pedro uyare e ajcꞌupesiajobꞌ tama e Cristo xeꞌ turobꞌ tama e chinam Jerusalem.
ACT 11:18 Entonces conda e ajcꞌupesiajobꞌ xeꞌ turobꞌ tama e chinam Jerusalem uyubꞌiobꞌ tunor era, uyactobꞌ e qꞌuecraner y quetpobꞌ tzꞌustaca tama tunor era y cay utattzꞌiobꞌ ucꞌabꞌa e Dios y che: —Catattzꞌi ucꞌabꞌa e Dios que esto tin e majax tuobꞌ e Israel erer uyactobꞌ umabꞌambꞌanirobꞌ, y erer uchꞌamiobꞌ e cuxtar xeꞌ machi tuaꞌ acꞌapa. Bꞌan che e ajcꞌupesiajobꞌ era xeꞌ turobꞌ tama e chinam Jerusalem.
ACT 11:19 Pues entonces tama e tiempo conda chamesna e Esteban cay chenobꞌ unumse ubꞌobꞌ tunor tin e ajcꞌupesiajobꞌ tama Cawinquirar umen tunor e gente xeꞌ turobꞌ tama e departamento Judea. Y tamar era ayan tin e cay locꞌoy ajni xeꞌ ixiobꞌ esto tama e departamento Fenicia, y esto tama e lugar Chipre, y ayan tin e ixiobꞌ esto tama e chinam Antioquía. Y tic taca tiaꞌ cay ixiobꞌ tin e ajcꞌupesiajobꞌ tama Cawinquirar war uchecsuobꞌ tunor uyojroner e Dios tama e Cristo. Pero war uyareobꞌ ajtaca tin e tuobꞌ e Israel, pero taca e inmojr machi war uchecsuobꞌ.
ACT 11:20 Pero ayan cora ajcꞌupesiajobꞌ xeꞌ tariobꞌ tama e lugar Chipre y xeꞌ tariobꞌ tama e chinam Cirene xeꞌ cꞌotoyobꞌ tama e chinam Antioquía ubꞌan, pero jaxirobꞌ cay uchecsuobꞌ uyojroner e Dios tut tin e majax tuobꞌ e Israel ubꞌan. Y war uchecsuobꞌ e ojroner xeꞌ imbꞌutz tama Cawinquirar Jesús.
ACT 11:21 Y cay checta ucꞌotorer e Dios tama ucuxtarobꞌ e ajcꞌupesiajobꞌ era. Y tamar era meyra gente cꞌotoy uyactobꞌ tunor e onian bꞌijnusiaj, y cay cꞌupseyanobꞌ tama Cawinquirar.
ACT 11:22 Pero conda cꞌotoy unatobꞌ tunor era tin e turobꞌ tama e grupo ajcꞌupesiajobꞌ xeꞌ turobꞌ tama e chinam Jerusalem, uyebꞌtobꞌ ixin inteꞌ hermano xeꞌ ucꞌabꞌa Bernabé tuaꞌ axin esto tama e chinam Antioquía.
ACT 11:23 Entonces conda cꞌotoy e Bernabé tama e chinam Antioquía cay uwira que e Dios war uchojbꞌes utobꞌ meyra tunor e gente, y tamar era cay tzay jaxir ubꞌan. Y tamar era jaxir cay utꞌabꞌse uyalmobꞌ tunor e ajcꞌupesiajobꞌ era tuaꞌ aqꞌuecꞌo axanobꞌ tama ubꞌir Cawinquirar taca tunor uyalmobꞌ.
ACT 11:24 Pues e Bernabé era jax inteꞌ winic xeꞌ atzay eꞌrna umen tunor e gente y xeꞌ bꞌutꞌur uyalma taca Unawalir e Dios. Y bꞌutꞌur uyalma tama e cꞌupesiaj tama Cawinquirar ubꞌan. Y tamar era cay cꞌupseyanobꞌ meyra gente tama Cawinquirar umener.
ACT 11:25 Entonces nacpat era ixin e Bernabé tuaꞌ usicbꞌa e Saulo tama e chinam Tarso. Y conda utajwi, sutpa ixin tacar esto tama e chinam Antioquía otronyajr.
ACT 11:26 Y conda cꞌotoyobꞌ tama e chinam Antioquía, quetpobꞌ tama inteꞌ año taca e grupo ajcꞌupesiajobꞌ, war ucanse meyra gente uyojroner e Dios. Y jax tama e chinam Antioquía era tiaꞌ cay arobꞌnobꞌ tin e ajcꞌupesiajobꞌ tama Cawinquirar Jesucristo que jaxirobꞌ Cristianobꞌ.
ACT 11:27 Y jax tama e tiempo era ubꞌan conda yopobꞌ cora winicobꞌ tuaꞌ e chinam Jerusalem xeꞌ profetobꞌ tuaꞌ Catata Dios.
ACT 11:28 Y ayan inteꞌ winic tujam e grupo era xeꞌ ucꞌabꞌa Agabo. Y tama inteꞌ día jaxir achpa wawan tujam e grupo ajcꞌupesiajobꞌ y cay ojron bꞌan cocha arobꞌna umen Unawalir e Dios. Y jaxir uyare e ajcꞌupesiajobꞌ que rajxa era watar inteꞌ nuxi winar tama tunor or e rum. Y bꞌan numuy que checta inteꞌ nuxi winar tama e tiempo conda war acꞌotori inteꞌ rey xeꞌ ucꞌabꞌa Claudio.
ACT 11:29 Y tamar era tin e ajcꞌupesiajobꞌ tama Cawinquirar xeꞌ turobꞌ tama e chinam Antioquía cay ubꞌijnuobꞌ que bueno tuaꞌ uyebꞌta axin cora tacarsiaj tama tin e war acꞌupseyanobꞌ xeꞌ turobꞌ tama e departamento Judea. Y bꞌan uchiobꞌ bꞌan cocha uyubꞌi uyajcꞌu inteꞌ inteꞌ hermano.
ACT 11:30 Entonces uyebꞌtobꞌ ixin cora ofrenda esto tama e nuquir winicobꞌ xeꞌ quetpobꞌ tujor e grupo ajcꞌupesiajobꞌ tama e departamento Judea. Y uyebꞌtobꞌ ixin e tumin era taca e Bernabé y e Saulo.
ACT 12:1 Pues entonces tama e tiempo era conda quetpa rey inteꞌ winic xeꞌ ucꞌabꞌa Herodes tama e lugar Israel, jaxir cay uche unumse ubꞌobꞌ cora hermanuobꞌ tama e grupo ajcꞌupesiajobꞌ.
ACT 12:2 Y tamar era e rey era uyare tuaꞌ achamesna e Santiago taca e machit. Pues e Santiago era jax usacun e Juan.
ACT 12:3 Y e Herodes cay uwira que war atzay uwirobꞌ tunor era e gente tuaꞌ e Israel que war uche unumse ubꞌobꞌ cora hermanuobꞌ tama e grupo ajcꞌupesiajobꞌ, y uwira ubꞌan que war atzayobꞌ e gente umen que jaxir uyare chamesna e Santiago. Y tamar era uyebꞌta ixin tuaꞌ aqꞌuejcha watar e Pedro tuaꞌ ayajra tama e cárcel ubꞌan. Pues tunor era numuy tama e tiempo conda uchiobꞌ e nojqꞌuin pascua conda ucꞌuxiobꞌ e pan xeꞌ matucꞌa e levadura tamar.
ACT 12:4 Y conda qꞌuejcha yopa e Pedro, e Herodes uyare tuaꞌ osena tama e cárcel tiaꞌ quetpa macar cojcbꞌir umen cora soldadobꞌ. Pues ayan cuatro grupo soldadobꞌ, y ayan cuatro soldadobꞌ tama inteꞌ inteꞌ grupo. Y jaxirobꞌ cay ucojcobꞌ e Pedro tama e día y tama e acbꞌar ubꞌan. Pues e Herodes war ubꞌijnu tuaꞌ uturbꞌa e Pedro tut e gente tama e chinam era tuaꞌ achena juzgar conda acꞌapa e nojqꞌuin pascua.
ACT 12:5 Y turu e Pedro tama e cárcel, pero tin e turobꞌ tama e grupo ajcꞌupesiajobꞌ war uturbꞌa ubꞌobꞌ tuaꞌ ucꞌajtiobꞌ taca e Dios tuaꞌ aloqꞌuesna e Pedro tama e cárcel.
ACT 12:6 Entonces tama inteꞌ acbꞌar conda cꞌanix asacojpa tama e día conda e Herodes war ubꞌijnu tuaꞌ uche juzgar e Pedro tut e gente tama e chinam era, ayan lo que numuy. Pues e Pedro ya chꞌar tama e cárcel y war awayan tuyuxin chateꞌ soldadobꞌ xeꞌ war ucojcobꞌ, y jaxir cachar taca chateꞌ taqꞌuin. Y ayan chateꞌ soldadobꞌ ubꞌan xeꞌ warobꞌ tut e puerta xeꞌ war ucojcobꞌ e cárcel tuaꞌ machi alocꞌoy aꞌjni e Pedro.
ACT 12:7 Y wacchetaca checta wawan inteꞌ ángel tuaꞌ Cawinquirar tama e cárcel era. Y wacchetaca checta inteꞌ nuxi janchꞌaquenar macuir e cárcel umen que checta e ángel. Entonces e ángel unijques tama uchejchec e Pedro tuaꞌ ubꞌixqꞌues. Entonces ojron e ángel taca e Pedro y che: —¡Achpen wacchetaca! che e ángel. Entonces ojri e nuxi taqꞌuin xeꞌ cachar ani ucꞌabꞌ e Pedro tamar.
ACT 12:8 Y ojron e ángel otronyajr y che: —Lapa abꞌujc y axanabꞌ, che e ángel. Entonces e Pedro uche bꞌan cocha arobꞌna tuaꞌ uche umen e ángel. Entonces ojron e ángel otronyajr y che: —Lapa e nuxi bꞌujc ubꞌan y lar tanipat, che e ángel.
ACT 12:9 Entonces e Pedro cay xana tupat e ángel tuaꞌ alocꞌoy tama e cárcel yajaꞌ. Pero jaxir machi unata jay jax ixto inteꞌ ángel era o jay jax taca inteꞌ umayjut.
ACT 12:10 Entonces numuyobꞌ tama e bꞌajxan guardia, y de allí unumse otronteꞌ guardia. Y conda cꞌotoyobꞌ tut inteꞌ nuxi puerta xeꞌ chembꞌir taca e taqꞌuin xeꞌ conda apascꞌa ut erer alocꞌoy inteꞌ esto tama e calle, intaca pascꞌa ut e puerta era tutobꞌ. Mamajchi upasi sino que ubꞌajner intaca pascꞌa ixin. Y conda locꞌoy ixiobꞌ tama e calle yajaꞌ, intaca satpa e ángel tut e Pedro, y machi sutpa uwira ut otronyajr.
ACT 12:11 Y conda e Pedro ubꞌijnu tamar era esto ubꞌajner ojron y che: —Pues coner era innata que erach tunor lo que war inwira taca unacniut. Y nen innata era que Cawinquirar uyebꞌta tari inteꞌ uyangel tuaꞌ ucorpesen tama ucꞌabꞌ e Herodes y tuaꞌ ucorpesen tama tunor lo que war ubꞌijnuobꞌ uchiobꞌ ani nipater tin e tuobꞌ e Israel, che e Pedro.
ACT 12:12 Y bꞌan war ubꞌijnu e Pedro conda cay ubꞌijnu tuaꞌ axin tama uyotot e María xeꞌ jax utuꞌ e Juan xeꞌ ucꞌabꞌa Marcos ubꞌan. Porque yajaꞌ ayan inteꞌ grupo ajcꞌupesiajobꞌ morojsebꞌir turobꞌ war ucꞌajtiobꞌ taca e Dios tuaꞌ machi achamesna e Pedro.
ACT 12:13 Entonces ixin e Pedro y cay utꞌojtꞌi ut e puerta tut e macteꞌ xeꞌ turu tor e tinaj tama e otot yajaꞌ. Y entonces locꞌoy inteꞌ ijchꞌoc xeꞌ ucꞌabꞌa Rode tuaꞌ uwira chi era.
ACT 12:14 Pero conda e ijchꞌoc cꞌotoy unata que jax e Pedro umen que uyubꞌi unuc, machi upasi e puerta sino que ajner ixin macu otronyajr war atzay y cay uyare tunor e ajcꞌupesiajobꞌ que ya war e Pedro tut e puerta.
ACT 12:15 Pero e ajcꞌupesiajobꞌ era xeꞌ turobꞌ macu machi ucꞌupsiobꞌ lo que che e ijchꞌoc, y cay uyareobꞌ y che: —Net intaca iyojron, chenobꞌ. Pero jaxir machi uyacta tuaꞌ oꞌjron que jax e Pedro xeꞌ war tut e puerta. Entonces jaxirobꞌ sutpa uyareobꞌ e ijchꞌoc otronyajr y che: —Mix jax e Pedro era, sino que jax taquix umein xeꞌ war awira, chenobꞌ.
ACT 12:16 Pero e Pedro warto utꞌojtꞌi ut e puerta patir, y mamajchi cꞌani upasi. Pero conda ixiobꞌ e ajcꞌupesiajobꞌ y upasiobꞌ e puerta y uwirobꞌ que jax era e Pedro, bꞌactobꞌ tunorobꞌ.
ACT 12:17 Pero e Pedro cay uche e seña taca ucꞌabꞌ tuaꞌ aquetpobꞌ tzꞌustaca cocha war oꞌjronobꞌ tunorobꞌ, entonces cay uyare tunor lo que chena tacar umen Cawinquirar, y cocha loqꞌuesna tama e cárcel. Y de allí e Pedro uyare y che: —Quiqui arenic e Santiago y e inmojr ajcꞌupesiajobꞌ lo que numuy tacaren, che e Pedro. Entonces locꞌoy ixin e Pedro tama otronteꞌ lugar.
ACT 12:18 Pues entonces conda sacojpa tama otronteꞌ día tunor e soldadobꞌ xeꞌ war ani ucojcobꞌ e Pedro tama e cárcel quetpobꞌ nutꞌur utobꞌ y machi unatobꞌ tiaꞌ ixin e Pedro.
ACT 12:19 Entonces e rey Herodes uyebꞌta ixiobꞌ cora soldadobꞌ tuaꞌ usicbꞌobꞌ e Pedro, pero machi utajwiobꞌ. Y tamar era e rey cay uyubꞌi tuaꞌ tunor e soldadobꞌ tin e cay cojcsanobꞌ tama e Pedro tama e cárcel, y conda utajwi tucꞌa numuy, uyare tuaꞌ achamesna tunor e soldadobꞌ era. Entonces conda cꞌapa tunor era, e Herodes locꞌoy tama e departamento Judea, y ixin tuaꞌ aturuan tama e chinam Cesarea.
ACT 12:20 Pues e rey Herodes cay qꞌuijna upater e gente xeꞌ turobꞌ tama e chinam Tiro y xeꞌ turobꞌ tama e chinam Sidón. Pero jaxirobꞌ cay ubꞌijnuobꞌ que más ani bueno tuaꞌ axin usajcobꞌ e jiriar taca e rey era. Entonces uyebꞌtobꞌ ixin cora winicobꞌ tuaꞌ oꞌjronobꞌ taca e rey. Pues utajwiobꞌ imbꞌijc tacarsiaj taca inteꞌ ajcꞌampar tuaꞌ e rey xeꞌ ucꞌabꞌa Blasto, y jaxir cay utacre tuaꞌ utajwiobꞌ e jiriar taca e rey tuaꞌ asisa tunor e qꞌuijnar era. Pues e lugar tiaꞌ turobꞌ e gente tama e chinam Tiro y tama e chinam Sidón ya war uchꞌamiobꞌ tunor lo que tuaꞌ ucꞌuxiobꞌ tama e lugar tiaꞌ war acꞌotori e rey era.
ACT 12:21 Entonces e Herodes cay ubꞌijnu que cꞌani uche inteꞌ nojqꞌuin taca e gente era. Y tamar era usicbꞌa tucꞌa día tuaꞌ uche. Y conda cꞌotoy e día ulapi ubꞌujc xeꞌ galan y xeꞌ meyra atujri y turuan tor uturtar xeꞌ galan. Entonces conda ya turobꞌ tunor e gente jaxir cay uche inteꞌ ojroner tutobꞌ.
ACT 12:22 Y de allí cay ojronobꞌ tunor e gente tut e rey y chenobꞌ: —Majax inteꞌ winic era xeꞌ war oꞌjron, sino que jax inteꞌ dios, chenobꞌ tunor e gente taca inteꞌ nuxi nuc.
ACT 12:23 Y e Herodes war atzay uyubꞌi tunor e ojroner era. Pero machi ubꞌijnu tuaꞌ utattzꞌi Catata Dios tama e tattzꞌarsiaj era, sino que intaca war ubꞌijnu que tuach. Y tamar era yopa wacchetaca inteꞌ ángel tuaꞌ Cawinquirar y uyobꞌi e Herodes tama uchejchec, y tamar era cucrema y cay cꞌujxa tunor unac umen e sian ubꞌi, y umen era chamay.
ACT 12:24 Pues entonces cay checsuna ixin uyojroner e Dios tama tunor or e lugar yajaꞌ, y cay bꞌoro ixin cora cora e grupo ajcꞌupesiajobꞌ, y meyra gente war ayopobꞌ tuaꞌ uchꞌamiobꞌ ucꞌabꞌa Cawinquirar Jesucristo.
ACT 12:25 Y e Bernabé y e Saulo, conda cꞌapa tunor lo que war uchiobꞌ tama e chinam Jerusalem, sutpa ixiobꞌ esto tama e chinam Antioquía otronyajr. Y uqꞌuechiobꞌ ixin tacarobꞌ inteꞌ sitz xeꞌ ucꞌabꞌa Juan xeꞌ arobꞌna Marcos ubꞌan.
ACT 13:1 Pues entonces tama e grupo ajcꞌupesiajobꞌ xeꞌ turu tama e chinam Antioquía ayan cora profetobꞌ y ayan cora ajcanseyajobꞌ. Y ya turu e Bernabé y e Simón xeꞌ ucꞌabꞌa Negro ubꞌan, y ya turu e Lucio xeꞌ tuaꞌ e chinam Cirene, y ya turu e Manaén xeꞌ jax inteꞌ winic xeꞌ chꞌiꞌ tuyejtzꞌer e Herodes xeꞌ jax e rey tama e departamento Galilea, y ya turu e Saulo.
ACT 13:2 Y tama inteꞌ día conda morojsebꞌir turobꞌ tunor e ajcꞌupesiajobꞌ era taca e inmojr ajcꞌupesiajobꞌ tuaꞌ uchiobꞌ inteꞌ servicio tiaꞌ war uyujtzꞌiobꞌ ut Cawinquirar taca e ayuno, ojron Unawalir e Dios tama inteꞌ profeta y che: —Ebꞌtanic chic e Bernabé y e Saulo tuaꞌ uchiobꞌ e patnar lo que war impejcobꞌ tuaꞌ uchiobꞌ, che Unawalir e Dios.
ACT 13:3 Entonces conda cꞌapa ucꞌajtiobꞌ meyra taca e Dios taca e ayuno, tin e quetpobꞌ tujor e grupo ajcꞌupesiajobꞌ era uturbꞌobꞌ ucꞌabꞌobꞌ tama e Bernabé y tama e Saulo y cay ucꞌajtiobꞌ taca e Dios tama ujorobꞌ. Y conda cꞌapa ucꞌajtiobꞌ taca e Dios, uyebꞌta ixiobꞌ.
ACT 13:4 Pues entonces e Bernabé y e Saulo ebꞌetna ixiobꞌ umen Unawalir e Dios esto tama e chinam Seleucia, y de allí ochoyobꞌ tama inteꞌ nuxi barco tuaꞌ axiobꞌ tor e jaꞌ esto tama e lugar Chipre. Pues e Chipre era jax inteꞌ lugar tiaꞌ ayan e rum xeꞌ aquetpa tuyuxin e jaꞌ.
ACT 13:5 Y tama e lugar Chipre era ayan inteꞌ chinam xeꞌ ucꞌabꞌa Salamina xeꞌ turu tutiꞌ e nuxi jaꞌ. Y e Salamina era jax inteꞌ chinam tiaꞌ erer acꞌotoy inteꞌ barco tor e jaꞌ. Entonces cay uchecsuobꞌ uyojroner e Dios tama e chinam era tama e sian sinagoga tiaꞌ umorojse ubꞌobꞌ e gente tuaꞌ e Israel. Y ya turu tacarobꞌ e Juan xeꞌ arobꞌna Marcos ubꞌan xeꞌ war utacre e Bernabé y e Saulo.
ACT 13:6 Y de allí locꞌoy xanobꞌ tama e lugar yajaꞌ y xanobꞌ esto tama e chinam Pafos. Y yajaꞌ utajwiobꞌ inteꞌ winic xeꞌ tuaꞌ e Israel xeꞌ ucꞌabꞌa Barjesús. Pero e Barjesús era jax inteꞌ ajnirom, y jax inteꞌ ajbꞌax ubꞌan. Y jaxir war umajres e gente que lo que war oꞌjron jaxir jax uyojroner e Dios, pero intaca war amajresian tama tunor era.
ACT 13:7 Y e ajnirom era jax inteꞌ winic xeꞌ atzay eꞌrna umen e gobernador xeꞌ ucꞌabꞌa Sergio Paulo. Y e Sergio era jax inteꞌ winic xeꞌ meyra canuar unata tama ujor. Entonces jaxir uyebꞌta ixin tuaꞌ ataresnobꞌ e Bernabé y e Saulo tuaꞌ erer uyubꞌi uyojroner e Dios.
ACT 13:8 Pero e ajnirom xeꞌ ucꞌabꞌa Elimas ubꞌan, machi ani ucꞌani tuaꞌ acꞌotoy e Bernabé y e Saulo tut e gobernador. Y tamar era uturbꞌa ubꞌa tuaꞌ uquete uwabꞌu ucꞌoter e Bernabé y e Saulo tut e gobernador, porque machi ucꞌani tuaꞌ acꞌotoy acꞌupseyan e gobernador tama e Dios y nien tama e Cristo.
ACT 13:9 Pero cꞌotoy e Saulo tut e gobernador y tut e ajnirom era ubꞌan. Pues e Saulo era ucꞌabꞌa Pablo ubꞌan. Y bꞌutꞌur uyalma taca Unawalir e Dios, y tamar era uchꞌujcu uwira ut e Elimas xeꞌ jax e ajnirom y che:
ACT 13:10 —Net ajmajresiajet, y net ajmabꞌambꞌaniret, y net uyunenet e diablo. Y net war iqꞌuijna awira tunor lo que erach. ¿Y tucꞌa tuaꞌ war aturbꞌa abꞌa tuaꞌ atijres e bꞌir xeꞌ erach xeꞌ tuaꞌ Cawinquirar?
ACT 13:11 Y era ucꞌotorer Cawinquirar cꞌani ucucruet. Y tamar era net tuaꞌ iquetpa tajpem unacꞌoit tama inteꞌ tiempo era, y machi ixto tuaꞌ awira nien ujanchꞌaquenar e qꞌuin. Bꞌan che e Pablo uyare e Elimas xeꞌ jax inteꞌ ajnirom. Entonces wacchetaca e Elimas machi ixto eꞌron unacꞌut yaꞌ, y quetpa incsibꞌan tunor tut, y matucꞌa uwira inyajrer. Entonces cay xana y war usicbꞌa chi umen tuaꞌ achujca ucꞌabꞌ tuaꞌ aqꞌuejcha axana porque machi ixto eꞌron ut yaꞌ.
ACT 13:12 Entonces conda e gobernador uwira lo que numuy tama e Elimas, cꞌupseyan tama Cawinquirar porque war ubꞌijnu uwira tunor e canseyaj tama Cawinquirar.
ACT 13:13 Pues entonces e Pablo taca e inmojr ajcꞌupesiajobꞌ xeꞌ war axanobꞌ tacar ixin tꞌabꞌayobꞌ tama inteꞌ nuquir barco tama e chinam Pafos. Y tamar e barco era ixiobꞌ tor e jaꞌ esto tama e chinam Perge xeꞌ turu tama e departamento Panfilia. Pero e Juan uchoqui uyacta e ajcꞌupesiajobꞌ era tama e lugar yajaꞌ, y sutpa ixin esto tama e chinam Jerusalem otronyajr.
ACT 13:14 Y de allí e inmojr era numuyobꞌ tama e chinam Perge esto tama e chinam Antioquía xeꞌ turu tama e departamento Pisidia. Y tama e chinam Antioquía era ya turobꞌ tama e día tuaꞌ e jiriar. Entonces ixin ochoyobꞌ tama e sinagoga y turuanobꞌ.
ACT 13:15 Pues conda tin e ajcꞌotorerobꞌ tama e sinagoga era cꞌapa uchiobꞌ leer uyojroner e Dios tama uley e Moisés y tama e profetobꞌ, uyebꞌtobꞌ ixin tuaꞌ apejcnobꞌ e Pablo taca e inmojr ajcꞌupesiajobꞌ y che: —Pues nipiarox, jay ayan inteꞌ ojroner imener tuaꞌ acꞌunles uyalmobꞌ e gente, erer iche era. Bꞌan che tin e ajcꞌotorerobꞌ tama e sinagoga era.
ACT 13:16 Entonces achpa wawan e Pablo y cay uche ucꞌabꞌ tut e gente tuaꞌ aquetpobꞌ tzꞌustaca y cay ojron y che: —Ubꞌinic winicox xeꞌ tuox e Israel y xeꞌ majax tuox e Israel pero xeꞌ war ibꞌacre e Dios.
ACT 13:17 Cadiosir tama cachinam Israel usicbꞌa tunor catata viejobꞌirobꞌ y cay ubꞌorojsiobꞌ tuaꞌ aquetpobꞌ inteꞌ nuxi chinam conda turobꞌto tama e lugar Egipto. Jaxirobꞌ quetpobꞌ bꞌan cocha cora man tama e lugar yajaꞌ, pero nacpat era Cadiosir ulocsiobꞌ tama e lugar yajaꞌ taca ucꞌotorer.
ACT 13:18 Pues Cadiosir intaca uwira tunor lo que majax imbꞌutz tut jaxir lo que war uchiobꞌ catata viejobꞌirobꞌ tama e choquem lugar tama inteꞌ tiempo de cuarenta año.
ACT 13:19 Y de allí Cadiosir usati siete nuquir chinam xeꞌ turobꞌ tama e lugar Canaán tuaꞌ asutpa uyajcꞌu catata viejobꞌirobꞌ.
ACT 13:20 Pues tunor era numuy tama inteꞌ tiempo de 450 años. Y de allí Cadiosir cay uturbꞌa cora winicobꞌ xeꞌ arobꞌnobꞌ juez tuaꞌ acꞌotoriobꞌ tujor e gente tama e Israel, y bꞌan taca quetpa este que cꞌotoy utiempo e Samuel xeꞌ jax inteꞌ profeta.
ACT 13:21 Entonces e gente cay ucꞌajtiobꞌ taca e Samuel era tuaꞌ aꞌjcꞌunobꞌ inteꞌ rey tuaꞌ acꞌotori tujorobꞌ. Y e Dios uturbꞌa e Saúl tuaꞌ acꞌotori tama inteꞌ tiempo de cuarenta año. Pues e Saúl era jax uyunen e Cis xeꞌ jax inteꞌ winic xeꞌ tari tama uchꞌajnarir catata viejobꞌir xeꞌ ucꞌabꞌa Benjamín xeꞌ turuan tama e onian tiempo.
ACT 13:22 Y de allí e Dios ulocse e Saúl tuaꞌ machi acꞌotori más tujor e gente tama e Israel, y uturbꞌa e David tuaꞌ aquetpa rey. Y tamar e David era ojron Cadiosir y che: “Nen intajwix e David xeꞌ jax uyunen e Isaí xeꞌ jax inteꞌ winic xeꞌ intzay inwira y xeꞌ cꞌani axin uche tunor lo que incꞌani nen”, che e Dios.
ACT 13:23 Y ayan inteꞌ usitz tama uchꞌajnar e David xeꞌ jax e Jesús. Y e Jesús era ebꞌetna tari umen e Dios tuaꞌ ucorpes e gente tama e Israel, bꞌan cocha cay uyareon e Dios ixnix que bꞌan tuaꞌ uche.
ACT 13:24 Pero conda merato ayopa e Jesús tuaꞌ acanseyan, e Juan xeꞌ ajchꞌuymar warix uchecsu uyojroner e Dios tut tunor e gente tama e Israel, y war uyare e gente que ucꞌani tuaꞌ uyactobꞌ umabꞌambꞌanirobꞌ y que ucꞌani tuaꞌ uyustes ubꞌobꞌ tut e Dios, y que ucꞌani tuaꞌ achꞌujyobꞌ.
ACT 13:25 Pero e Juan, conda cꞌanix acꞌapa tunor upatnar lo que ajcꞌuna umen e Dios tuaꞌ uche, cay uyare e gente y che: “Pues nen majax Iwajcorpesiajen cocha war ibꞌijnu, sino que watarto tanipat otronteꞌ xeꞌ jax Iwajcorpesiaj. Y conda watar jaxir cꞌani iwira que más ayan ucꞌotorer. Pues y nen ma tawaren nien tuaꞌ imbꞌani ut uxanabꞌ, porque meyra ayan ucꞌotorer jaxir,” che e Juan xeꞌ ajchꞌuymar tamar Cawinquirar Jesucristo.
ACT 13:26 ’Niwermanuox xeꞌ umaxtacox e Abraham y nox xeꞌ majax tuox e Israel pero xeꞌ war ibꞌacre e Dios, e ojroner tama e corpesiaj era ticabꞌa tunoron.
ACT 13:27 Pues tama e tiempo conda chamesna e Jesús, tin e turobꞌ tama e chinam Jerusalem y tunor e ajcꞌotorerobꞌ machi cꞌotoy unatobꞌ jay e Jesús jax Cawajcorpesiaj. Y quetpa mucur tutobꞌ tucꞌa war che e ojroner tuaꞌ e onian profetobꞌ motor que cay uchiobꞌ leer tama e sinagoga tama inteꞌ inteꞌ día tuaꞌ e jiriar. Y tamar era uyareobꞌ tuaꞌ achamesna e Jesús. Y bꞌan uchiobꞌ tuaꞌ acꞌapa uchiobꞌ tunor lo que chꞌar tzꞌijbꞌabꞌir umen e onian profetobꞌ conda utzꞌijbꞌobꞌ tamar uchamesnar e Cristo.
ACT 13:28 Y motor que machi utajwiobꞌ tucꞌa tamar tuaꞌ uyare achamesna e Jesús, pero ucꞌajtiobꞌ tuaꞌ e rey Pilato tuaꞌ uyare achamesna.
ACT 13:29 Y conda cꞌapa uchiobꞌ tunor lo que chꞌar tzꞌijbꞌabꞌir umen e onian profetobꞌ tama uyojroner e Dios que bꞌan ucꞌani tuaꞌ achena tacar e Cristo, uyemsiobꞌ tama ut e cruz y uchꞌabꞌuobꞌ tama umujr.
ACT 13:30 Pero e Dios machi uyacta e Jesús tama umujr, sino que usuti ubꞌixqꞌues tujam e chamenobꞌ.
ACT 13:31 Y turuan meyra día tara tor e rum conda war uchectes ubꞌa que jaxir bꞌixir otronyajr. Y cay uchecsu ubꞌa tut tin e xanobꞌ tacar conda turuan tara tor e rum y xeꞌ ixiobꞌ tacar conda locꞌoy tama e departamento Galilea tuaꞌ axin esto tama e chinam Jerusalem. Y coner jax ixto e winicobꞌ era xeꞌ quetpobꞌ ajchecsuyajobꞌ tut e gente que e Jesús sutpa bꞌixcꞌa tujam e chamenobꞌ.
ACT 13:32 ’Y tamar era war cawareox coner tunor e ojroner xeꞌ imbꞌutz xeꞌ jax xeꞌ quetpa arobꞌbꞌirobꞌ catata viejobꞌirobꞌ umen e Dios tama e onian tiempo.
ACT 13:33 Y non coner, cocha sitzbꞌiron tuaꞌ e onian catata viejobꞌirobꞌ, pues ticoit non e Dios cꞌapa uche tunor lo que cay uyareobꞌ que cꞌani uyajcꞌuobꞌ ixnix que cꞌani usuti ubꞌixqꞌues e Jesús tujam e chamenobꞌ. Y bꞌan chꞌar tzꞌijbꞌabꞌir tama e salmo dos ubꞌan tiaꞌ che que: “Net jax Nisitzet, y coner nen inquetpa Tatabꞌiren tabꞌa.” Bꞌan che tama e salmo dos.
ACT 13:34 Y chequer que Cadiosir quetpa tuaꞌ usuti ubꞌixqꞌues e Jesús tujam e chamenobꞌ conda che tama uyojroner e Dios que machix tuaꞌ uyacta oꞌcꞌoy uwerir e Jesús tama umujr. Bꞌan che tama uyojroner e Dios tiaꞌ che que: “Cꞌani inwajqꞌuet tunor e chojbꞌesiaj lo que cay inware e David que bꞌan tuaꞌ inwajcꞌu que watar inteꞌ usitz xeꞌ tuaꞌ acꞌotori ejcꞌar ejcꞌar.” Bꞌan che tama uyojroner e Dios xeꞌ tzꞌijbꞌabꞌir tama e onian tiempo.
ACT 13:35 Y tama inteꞌ salmo chꞌar tzꞌijbꞌabꞌir umen e David ubꞌan que cꞌani asutpa abꞌixcꞌa e Jesús tujam e chamenobꞌ conda che que: “Machix tuaꞌ awacta oꞌcꞌoy uwerir aman xeꞌ war ayajta ut.” Bꞌan che tama e salmo era xeꞌ tzꞌijbꞌabꞌir umen e David.
ACT 13:36 Pues e David cay uyujtzꞌi ut e Dios y cay uche bꞌan cocha ucꞌani e Dios tama utiempo. Y de allí chamay y mujca tuyejtzꞌer utata viejobꞌirobꞌ, y ocꞌoy uwerir tama umujr. Y tamar era chequer que majax e David xeꞌ tuaꞌ asutpa abꞌixcꞌa tujam e chamenobꞌ.
ACT 13:37 Porque tin e asujta abꞌixqꞌuesna tujam e chamenobꞌ umen e Dios machi tuaꞌ axin oꞌcꞌoy uwerir tama umujr. Pero e Jesús sujta bꞌixqꞌuesna tujam e chamenobꞌ umen e Dios.
ACT 13:38 Entonces, niwermanuox, natanic que coner war achectesna tiut que tama e Jesús ayan e corpesiaj tama tunor camabꞌambꞌanir.
ACT 13:39 Pues tunor e mabꞌambꞌanir lo que machi uyubꞌion cachꞌami e cꞌumpar tamar yebꞌar uley e Moisés cꞌotoy cachꞌami tuaꞌ e Dios conda cay cꞌupseyanon tama Cawinquirar Jesucristo.
ACT 13:40 Y tamar era awiric ibꞌa que machi acꞌaxi tijor nox lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo conda chenobꞌ que:
ACT 13:41 Ubꞌinic ajtzenerox, y bꞌijnunic iwira nox xeꞌ machi cꞌani ixcꞌupseyan tama e Dios, y satpenic, porque nen xeꞌ Idiosiren cꞌani inche inteꞌ nuxi milagro tama e tiempo era que machix tuaꞌ icꞌupse motor que ayan chi axin uyareox que bꞌan numuy. Bꞌan che e Dios tama uyojroner, che e Pablo uyare tunor e gente tama e sinagoga tama e chinam Antioquía era.
ACT 13:42 Y conda war alocꞌoy e Pablo taca upiarobꞌ tama e sinagoga, ayan cora gente xeꞌ yopobꞌ tut xeꞌ cay upejcobꞌ tuaꞌ ayopobꞌ tama otronteꞌ día tuaꞌ e jiriar tuaꞌ uchecsu más tama e Cristo era.
ACT 13:43 Entonces conda cꞌapa tunor e servicio era, locꞌoyobꞌ e gente tama e sinagoga. Y ayan e gente xeꞌ tuobꞌ e Israel y ayan tin e majax tuobꞌ e Israel pero xeꞌ uchꞌamiobꞌ e cꞌupesiaj tuaꞌ e gente tuaꞌ e Israel. Y cay xanobꞌ tunor e gente era tupat e Pablo y e Bernabé. Entonces e Pablo y e Bernabé sutpa uyareobꞌ e gente era que ucꞌani tuaꞌ aqꞌuecꞌo axanobꞌ tama utacarsiaj e Dios.
ACT 13:44 Entonces tama otronteꞌ semana tama e día tuaꞌ e jiriar cay umorojse ubꞌobꞌ tunor e gente tama e chinam era tuaꞌ uyubꞌiobꞌ uyojroner Cawinquirar.
ACT 13:45 Pero conda e gente tuaꞌ e Israel cay uwirobꞌ que yopobꞌ tunor e sian gente era que majax tuobꞌ e Israel, qꞌuijnobꞌ. Y tamar era cay ojronobꞌ upater e Pablo y cay ucꞌayobꞌ ubꞌan.
ACT 13:46 Entonces achpa wawanobꞌ e Pablo y e Bernabé, machi bꞌactobꞌ, y cay ojronobꞌ y chenobꞌ: —Pues quetpa tuaꞌ cawareox xeꞌ tuox e Israel tunor uyojroner Cawinquirar, pero era chequer que machi icꞌani y que machi ibꞌijnu jay imbꞌutz tunor e cuxtar era xeꞌ machi tuaꞌ acꞌapa. Entonces coner cꞌani caxin caware tunor era taca e gente xeꞌ majax tuobꞌ e Israel.
ACT 13:47 Porque Cawinquirar Dios war uyareon bꞌan cocha cay uyare tunor catata viejobꞌirobꞌ y che: Pues nen inchiet bꞌan cocha inteꞌ janchꞌaquenar tut tunor e gente xeꞌ majax tuobꞌ e Israel tama tunor or e rum. Y inchiet tuaꞌ awirsiobꞌ cocha tuaꞌ axin uchꞌamiobꞌ e corpesiaj tunor e gente tama tunor or e rum. Bꞌan che Cawinquirar, che e Pablo.
ACT 13:48 Pues entonces conda tin e majax tuaꞌ e Israel cay uyubꞌiobꞌ tunor era, cay tzayobꞌ meyra y cay ojronobꞌ y che que galan tunor uyojroner Cawinquirar. Y tamar era tunor tin e sicbꞌabꞌir tuaꞌ uchꞌami e cuxtar xeꞌ machi tuaꞌ acꞌapa cay cꞌupseyanobꞌ tama Cawinquirar tama e día era.
ACT 13:49 Y tamar era cay checsuna tunor uyojroner Cawinquirar tama tunor or e lugar yajaꞌ.
ACT 13:50 Pero e gente tuaꞌ e Israel cay ojronobꞌ taca cora nuquir ixictac xeꞌ ubꞌacriobꞌ e Dios, y cay ojronobꞌ taca cora nuquir winicobꞌ tama e chinam yajaꞌ tuaꞌ uyachpesobꞌ inteꞌ qꞌuijnar upater e Pablo y e Bernabé este que uyajnesobꞌ locꞌoy tama e chinam era.
ACT 13:51 Entonces e Pablo y e Bernabé unijques uxanabꞌobꞌ tuaꞌ uyacta ojri e tanlum lo que ayan tamar tuaꞌ uwirse e gente tama e lugar yajaꞌ que majax imbꞌutz lo que war uchiobꞌ. Y tamar era uyactobꞌ e lugar yajaꞌ y ixiobꞌ esto tama e chinam Iconio.
ACT 13:52 Pero tin e war acꞌupseyanobꞌ tama Cawinquirar war atzayobꞌ y war abꞌutcꞌa uyalmobꞌ taca Unawalir e Dios iraj iraj.
ACT 14:1 Entonces conda cꞌotoyobꞌ tama e chinam Iconio e Pablo y e Bernabé ixiobꞌ esto tama e sinagoga tama e día tuaꞌ e jiriar y cay uchecsuobꞌ uyojroner e Dios taca ucꞌotorer Unawalir e Dios. Y tamar era meyra gente cay cꞌupseyanobꞌ tama Cawinquirar, tin e tuobꞌ e Israel y tin e majax tuobꞌ e Israel ubꞌan.
ACT 14:2 Pero tin e tuobꞌ e Israel xeꞌ machi cꞌupseyanobꞌ tama Cawinquirar cay ojronobꞌ upater tunor era y cay uqꞌuijnesobꞌ e gente tin e majax tuobꞌ e Israel este que cay umajresobꞌ tuaꞌ ubꞌijnuobꞌ que mabꞌambꞌan lo que war uchiobꞌ tin e cay cꞌupseyanobꞌ tama Cawinquirar.
ACT 14:3 Pero e Pablo y e Bernabé quetpobꞌ meyra tiempo tama e chinam era, y machi bꞌactobꞌ tuaꞌ oꞌjronobꞌ tamar Cawinquirar. Y Cadiosir war uchecsu que erach tunor e canseyaj era tamar utacarsiaj umen que cay uyajcꞌuobꞌ e Pablo y e Bernabé e cꞌotorer tuaꞌ uchiobꞌ e milagro y tuaꞌ uchiobꞌ e seña.
ACT 14:4 Pero ayan chateꞌ grupo gente tama e chinam era. Ayan tin e war atzay uwirobꞌ lo que war ubꞌijnuobꞌ e gente xeꞌ tuobꞌ e Israel, y ayan tin e war atzay uwirobꞌ lo que war uchiobꞌ e apostolobꞌ.
ACT 14:5 Entonces tin e tuobꞌ e Israel y tin e majax tuobꞌ e Israel xeꞌ machi cꞌupseyanobꞌ tama Cawinquirar cay uturbꞌa ubꞌobꞌ tuaꞌ aquetpa intera ubꞌijnusiajobꞌ taca tin e ajcꞌamparobꞌ tama e chinam era tuaꞌ axin ucꞌayobꞌ e Pablo y e Bernabé este que uchamsiobꞌ taca e tun.
ACT 14:6 Pero e Pablo y e Bernabé, conda cay unatobꞌ tunor era, locꞌoy ajniobꞌ esto tama e chinam Listra, y esto tama e chinam Derbe xeꞌ turobꞌ tama e departamento Licaonia, y war axanobꞌ tama tunor or e lugar era.
ACT 14:7 Y war uchecsuobꞌ e ojroner tamar Cawinquirar Jesucristo xeꞌ galan tic taca tiaꞌ ixiobꞌ.
ACT 14:8 Pues entonces tama e chinam Listra ayan inteꞌ winic xeꞌ machi uyubꞌi axana. Y jaxir war aturuan yajaꞌ umen que tzꞌej uyoc desde que cuxpa y ma tiaꞌ cay xana.
ACT 14:9 Pues e winic era war uyubꞌi lo que war uchecsu e Pablo, y e Pablo cay uchꞌujcu uwira ut e winic era tiaꞌ turu y war unata tama uyalma que jaxir ayan ucꞌupesiaj tama e Dios tuaꞌ atzꞌacpesna.
ACT 14:10 Entonces ojron e Pablo taca e winic era y che: —Achpen waren y tatzꞌa oꞌc era, che e Pablo. Y e winic tobꞌoy achpa wawan tama uyoc y cay xana.
ACT 14:11 Pero conda irna umen e gente lo que cay uche e Pablo cay aruobꞌ taca inteꞌ nuxi nuc tama uyojronerobꞌach e gente tama e departamento Licaonia era y che: —Pues e winicobꞌ era diosobꞌ que intaca ecmay y chectobꞌ ticoit bꞌan cocha e winicobꞌ, che e gente tama e lugar era.
ACT 14:12 Y war chenobꞌ e winicobꞌ era que e Bernabé jax inteꞌ dios xeꞌ ucꞌabꞌa Júpiter, y war chenobꞌ que e Pablo jax inteꞌ dios xeꞌ ucꞌabꞌa Mercurio, porque jax jaxir xeꞌ war oꞌjron.
ACT 14:13 Y ayan inteꞌ winic yajaꞌ xeꞌ jax inteꞌ sacerdote tuaꞌ e chamen dios xeꞌ arobꞌna Júpiter, y jaxir ayan inteꞌ uyotot tama uyocher e chinam era tiaꞌ acꞌotoy e gente tuaꞌ uyujtzꞌiobꞌ ut e chamen dios era. Y jaxir taca uyajcanuarobꞌ cay utaresobꞌ cora wacax xeꞌ bꞌujcsebꞌir taca unichir e teꞌ xeꞌ galan. Pues war ubꞌijnuobꞌ tuaꞌ uchamsiobꞌ e wacax era tut e Bernabé y tut e Pablo tuaꞌ uyujtzꞌiobꞌ utobꞌ.
ACT 14:14 Pero conda e apostolobꞌ uwirobꞌ tunor era, cay uwejruobꞌ ubꞌujcobꞌ, y ixiobꞌ ajner y ochoyobꞌ tujam e sian gente era y cay ojronobꞌ taca inteꞌ nuxi nuc y chenobꞌ:
ACT 14:15 —Winicox, ¿tucꞌa tuaꞌ war iche cocha era? Pues non winicon ubꞌan bꞌan cocha nox, y tarion era tuaꞌ taca cawareox que ucꞌani tuaꞌ iwacta tunor e onian bꞌijnusiajobꞌ era porque matucꞌa ucꞌampibꞌirobꞌ, sino que ucꞌani tuaꞌ ixcꞌupseyan tama e Dios xeꞌ bꞌixir. Jax jaxir xeꞌ uche tunor ut e qꞌuin y tunor or e rum y xeꞌ uche tunor e nuxi jaꞌ y tunor lo que ayan tamar.
ACT 14:16 Pues tama e tiempo xeꞌ numuy e Dios war uyacta uchiobꞌ lo que ubꞌijnu uchiobꞌ tunor e gente tama tunor or rum, porque machi unatobꞌ chi e Dios.
ACT 14:17 Pero war uwirse ubꞌa que turu tama e tiempo era tamar lo que war uche xeꞌ imbꞌutz, porque Cadiosir era war uyajcꞌon e jajar, y war uyajcꞌon e cosecha, y war uyajcꞌon lo que tuaꞌ cacꞌuxi, y war uyajcꞌon lo que ucꞌani tuaꞌ catzay tamar, che e Bernabé y e Pablo.
ACT 14:18 Pero motor que cay uyareobꞌ meyra cocha, pero quetpato intran tutobꞌ tuaꞌ uquete uwabꞌu e gente era tuaꞌ machi uchamsiobꞌ e wacax era, cocha bꞌan cꞌani ani uchiobꞌ tuaꞌ uyujtzꞌiobꞌ ut e Bernabé y e Pablo.
ACT 14:19 Entonces cꞌotoyobꞌ cora gente xeꞌ tuobꞌ e Israel tama e chinam era xeꞌ tariobꞌ tama e chinam Antioquía, y ayan tin e tariobꞌ tama e chinam Iconio ubꞌan. Y jaxirobꞌ cay uche ucꞌupsiobꞌ e gente tama e chinam era esto que cay uturbꞌa ubꞌobꞌ tuaꞌ uchamsiobꞌ e Pablo taca e tun, y tamar era cay uriobꞌ e tun tujor e Pablo este que uwarcuobꞌ cꞌaxi tor e rum. Y uchebꞌiobꞌ e gente que chamenix, y tamar era uquerejbꞌobꞌ ixin esto tutiꞌ e chinam, y uriobꞌ tor e rum y uyactobꞌ. War unatobꞌ que chamay ixto e Pablo.
ACT 14:20 Pero conda tin e ajcꞌupesiajobꞌ tama Cawinquirar cay umorojse ubꞌobꞌ tuyejtzꞌer e Pablo tiaꞌ chꞌar tor e rum, jaxir achpa wawan otronyajr, y ixin esto tama e chinam otronyajr. Y tama otronteꞌ día locꞌoy taca e Bernabé, y ixiobꞌ esto tama e chinam Derbe.
ACT 14:21 Y tamar era e Pablo y e Bernabé cay uchecsuobꞌ tunor uyojroner Cawinquirar xeꞌ imbꞌutz tama e chinam Derbe. Y meyra gente cay uchꞌamiobꞌ ucꞌabꞌa Cawinquirar tama e lugar era. Entonces sutpa ixiobꞌ esto tama e chinam Listra otronyajr, y de allí ixiobꞌ esto tama e chinam Iconio, y de allí ixiobꞌ esto tama e chinam Antioquía.
ACT 14:22 Y tama inteꞌ inteꞌ chinam era war uqꞌuecꞌojsiobꞌ tin e war acꞌupseyanobꞌ tama Cawinquirar, y war uyareobꞌ que ucꞌani tuaꞌ aqꞌuecꞌuobꞌ tama e cꞌupesiaj tama Cawinquirar, y war uyareobꞌ que conda axanobꞌ tama ubꞌir e Dios axin unumse ubꞌobꞌ meyra lo que intran.
ACT 14:23 Y war usicbꞌobꞌ chi xeꞌ erer aquetpa líder tama inteꞌ inteꞌ grupo ajcꞌupesiajobꞌ. Y tamar era cay ucꞌajtiobꞌ taca e Dios taca e ayuno tama inteꞌ inteꞌ grupo ajcꞌupesiajobꞌ; war ucꞌajtiobꞌ tuaꞌ acojcnobꞌ e ajcꞌupesiajobꞌ era umen Cawinquirar xeꞌ jax xeꞌ war acꞌupseyanobꞌ tamar.
ACT 14:24 Pues entonces ixin numuyobꞌ tama e lugar Pisidia, y de allí cꞌotoyobꞌ esto tama e lugar Panfilia.
ACT 14:25 Y cay uchecsuobꞌ uyojroner Cawinquirar xeꞌ imbꞌutz tama e chinam Perge, y de allí ixiobꞌ esto tama e chinam Atalia.
ACT 14:26 Y tama e chinam era ochoyobꞌ tama inteꞌ barco y ixiobꞌ tor e jaꞌ tuaꞌ acꞌotoyobꞌ tama e chinam Antioquía tama e departamento Siria. Y jax tama e chinam era tiaꞌ ebꞌetna ixiobꞌ umen e ajcꞌupesiajobꞌ tuaꞌ alocꞌoy taca utacarsiaj e Dios tuaꞌ uchiobꞌ tunor e patnar xeꞌ cꞌapa uchiobꞌ era.
ACT 14:27 Y conda cꞌotoyobꞌ tama e chinam Antioquía cay umorojse ubꞌobꞌ taca e grupo ajcꞌupesiajobꞌ, y cay uyareobꞌ tunor lo que cay uche Cadiosir tacarobꞌ tama uxambꞌar, y cay uchecsu cocha Cawinquirar upasi e bꞌir tut tin e majax tuobꞌ e Israel tuaꞌ uyubꞌiobꞌ acꞌupseyanobꞌ jaxirobꞌ ubꞌan tama Cawinquirar.
ACT 14:28 Entonces e Pablo y e Bernabé quetpobꞌ meyra tiempo taca e ajcꞌupesiajobꞌ era tama e chinam Antioquía.
ACT 15:1 Pues entonces tama e tiempo era ayan cora winicobꞌ xeꞌ tariobꞌ tama e departamento Judea xeꞌ ixiobꞌ esto tama e chinam Antioquía. Y jaxirobꞌ cay ucansiobꞌ e ajcꞌupesiajobꞌ yajaꞌ que ucꞌani tuaꞌ axujra imbꞌijc uqꞌuewerir utejromar inteꞌ tuaꞌ uyubꞌi acorpesna, bꞌan cocha chꞌar tzꞌijbꞌabꞌir tama uley e Moisés.
ACT 15:2 Pero e Pablo y e Bernabé majax bꞌan ubꞌijnusiajobꞌ, y tamar era cay uyareobꞌ e winicobꞌ tuaꞌ e departamento Judea que majax bꞌan war acanseyanobꞌ. Entonces sicbꞌanobꞌ e Pablo y Bernabé taca cora hermanuobꞌ umen e grupo ajcꞌupesiajobꞌ tama e chinam Antioquía tuaꞌ axiobꞌ esto tama e chinam Jerusalem tuaꞌ uyubꞌiobꞌ tama tunor era taca e apostolobꞌ y taca e nuquir winicobꞌ tama e grupo ajcꞌupesiajobꞌ tama e chinam yajaꞌ.
ACT 15:3 Entonces e grupo ajcꞌupesiajobꞌ tama e chinam Antioquía uyebꞌta ixiobꞌ e Pablo y e Bernabé taca cora hermanuobꞌ tuaꞌ axiobꞌ esto tama e chinam Jerusalem. Y tamar uxambꞌarobꞌ era cay numuyobꞌ tama e departamento Fenicia y tama e departamento Samaria, y war uyareobꞌ e ajcꞌupesiajobꞌ tic taca tiaꞌ ixiobꞌ que ayan meyra gente xeꞌ majax tuobꞌ e Israel xeꞌ war uyactobꞌ tunor e onian bꞌijnusiaj xeꞌ tuobꞌ ani tuaꞌ acay axanobꞌ tama ubꞌir e Dios. Y tunor e ajcꞌupesiajobꞌ war atzayobꞌ meyra tama tunor e ojroner era.
ACT 15:4 Entonces conda e Pablo y e Bernabé taca e hermanuobꞌ tuaꞌ e grupo ajcꞌupesiajobꞌ xeꞌ turuanobꞌ tama e chinam Antioquía cꞌotoyobꞌ tama e chinam Jerusalem chꞌajmobꞌ umen e grupo ajcꞌupesiajobꞌ yajaꞌ, y umen e apostolobꞌ, y umen e nuquir winicobꞌ. Entonces cay uchecsuobꞌ tutobꞌ tunor lo que e Dios cay uche tamarobꞌ.
ACT 15:5 Pero ayan cora winicobꞌ xeꞌ ajcꞌupesiajobꞌ tama e Cristo xeꞌ tuobꞌ e fariseobꞌ xeꞌ achpa wawanobꞌ y cay ojronobꞌ y chenobꞌ: —Pues ucꞌani tuaꞌ axujra imbꞌijc uqꞌuewerir utejromar tunor tin e majax tuobꞌ e Israel tuaꞌ acorpesnobꞌ, y ucꞌani tuaꞌ iwareobꞌ que ucꞌani tuaꞌ acꞌupseyanobꞌ tut tunor lo que chꞌar tzꞌijbꞌabꞌir tama uley e Moisés. Bꞌan chenobꞌ e ajcꞌupesiajobꞌ era xeꞌ tuobꞌ e fariseobꞌ.
ACT 15:6 Entonces cay umorojse ubꞌobꞌ e apostolobꞌ taca e nuquir winicobꞌ era tuaꞌ ubꞌijnuobꞌ jay ucꞌanto tuaꞌ axujra imbꞌijc uqꞌuewerir utejromar tin e majax tuobꞌ e Israel.
ACT 15:7 Y conda cꞌapa ojronobꞌ meyra tama tunor era, achpa wawan e Pedro y cay ojron y che: —Niwermanuox, nox era war inata que ixnix cora era e Dios usicbꞌen tijam tuaꞌ inxin inware uyojroner e Dios tama e corpesiaj tut tin e majax tuobꞌ e Israel tuaꞌ acꞌotoy unatobꞌ cocha tuaꞌ acꞌupseyanobꞌ tama Cadiosir tuaꞌ uyubꞌi acorpesnobꞌ.
ACT 15:8 Y Cadiosir, xeꞌ war unata tunor lo que ayan tama uyalma inteꞌ, cay uwirse ubꞌa que war uchꞌami tunor e gente era conda ixin uyajcꞌu Unawalir e Dios bꞌan cocha cay uyajcꞌon non tama ucajyesnibꞌir tunor era.
ACT 15:9 Y chequer que e Dios machi uche aquetpa intiach uwirnarobꞌ tin e majax tuobꞌ e Israel, y que cay upoqui uyalmobꞌ umen que war acꞌupseyanobꞌ tamar jaxir, bꞌan cocha cay upoqui cawalma non.
ACT 15:10 Y ¿tucꞌa tuaꞌ war ibꞌijnu tuaꞌ iwareobꞌ que ucꞌani tuaꞌ uchiobꞌ lo que intran tut e ajcꞌupesiajobꞌ era xeꞌ majax tuobꞌ e Israel que nien non y nien catata viejobꞌirobꞌ machi uyubꞌion cache? Y ¿tucꞌa tuaꞌ war ibꞌijnu tuaꞌ iquete iwabꞌu e Dios tamar lo que cay uche tama e gente era?
ACT 15:11 Pues non cacꞌupse que corpesnon umen utacarsiaj Cawinquirar Jesús, bꞌan cocha jaxirobꞌ xeꞌ majax tuobꞌ e Israel, che e Pedro uyare tunor e nuquir winicobꞌ era.
ACT 15:12 Entonces tunor e nuquir winicobꞌ quetpobꞌ tzꞌustaca conda acay uyubꞌiobꞌ lo que war aꞌrobꞌnobꞌ umen e Bernabé y umen e Pablo. Y jaxirobꞌ cay uchecsuobꞌ tunor lo que cay uwirobꞌ chempa y tunor e sian milagro lo que e Dios cay uche tamarobꞌ conda turobꞌ tujam e gente xeꞌ majax tuobꞌ e Israel.
ACT 15:13 Y conda cꞌapa ojronobꞌ e Bernabé y e Pablo tama tunor era, ojron e Santiago y che: —Niwermanuox, ubꞌiniquen era.
ACT 15:14 E Simón Pedro cay uyareon tama e tiempo conda e Dios cay uwirsion que uyajta ut motor tin e majax tuobꞌ e Israel ubꞌan, cocha cay usicbꞌa cora gente tujamobꞌ tuaꞌ uyujtzꞌiobꞌ ut ucꞌabꞌa ubꞌan.
ACT 15:15 Pues tunor era numuy bꞌan cocha chꞌar tzꞌijbꞌabꞌir umen e profetobꞌ tama e onian tiempo tiaꞌ che:
ACT 15:16 Y otronyajrto cꞌani insutpa waten, che Cawinquirar, y cꞌani unstes uyotot e David otronyajr tiaꞌ cꞌapa cucrema, y cꞌani insutpa injachi nimaxtac tuaꞌ aqꞌuecꞌo axanobꞌ tama nibꞌir.
ACT 15:17 Y tamar era meyra gente cꞌani usicbꞌenobꞌ xeꞌ Iwinquiraren, y tunor e gente xeꞌ majax tuobꞌ e Israel tama tunor or e rum xeꞌ sicbꞌabꞌirobꞌ nimener cꞌani acꞌotoy acꞌupseyanobꞌ tamaren xeꞌ Idiosiren,
ACT 15:18 che Cawinquirar xeꞌ cay uchecsu tunor era tama e onian tiempo. Bꞌan che tama uyojroner e Dios.
ACT 15:19 ’Y tamar era nen inware que machi tuaꞌ caturbꞌa lo que meyra ubꞌarir tama e gente era xeꞌ majax tuobꞌ e Israel xeꞌ war uyactobꞌ tunor e onian bꞌijnusiaj tuobꞌ tuaꞌ axanobꞌ tama ubꞌir e Dios.
ACT 15:20 Nen inware que atzꞌacta jay catzꞌijbꞌa inteꞌ carta tuaꞌ caware e gente era que machi ixto tuaꞌ ucꞌuxi e wer xeꞌ quetpa ajcꞌubꞌir tut inteꞌ chamen dios, y que machix tuaꞌ asutpa axanobꞌ tacar e ixictac o e winicobꞌ xeꞌ majax tuobꞌ, y que machi ixto tuaꞌ asutpa ucꞌuxi inteꞌ arac xeꞌ cotbꞌir unuc, y machix tuaꞌ ucꞌuxiobꞌ uchꞌichꞌer inteꞌ arac.
ACT 15:21 Y war imbꞌijnu que atzꞌacta tuaꞌ cawareobꞌ cocha era porque desde ixnix war achecsuna uley e Moisés tama inteꞌ inteꞌ chinam tiaꞌ war achena leer tama tunor e sian sinagoga tama inteꞌ inteꞌ día tuaꞌ e jiriar. Bꞌan che e Santiago uyare tunor e nuquir winicobꞌ era.
ACT 15:22 Entonces tin e apostolobꞌ taca tin e nuquir winicobꞌ y e inmojr gente tama e grupo ajcꞌupesiajobꞌ cay ubꞌijnu usicbꞌobꞌ cora hermanuobꞌ tujam e grupo ajcꞌupesiajobꞌ era tuaꞌ uyebꞌtobꞌ axin esto tama e chinam Antioquía taca e Pablo y e Bernabé. Entonces usicbꞌobꞌ e Judas xeꞌ ucꞌabꞌa Barsabás ubꞌan, y usicbꞌobꞌ e Silas tuaꞌ axiobꞌ esto tama e chinam Antioquía. Pues e chateꞌ hermanuobꞌ era nuquir winicobꞌ tujam e inmojr ajcꞌupesiajobꞌ.
ACT 15:23 Y tacar e hermanuobꞌ era uyebꞌtobꞌ ixin inteꞌ carta xeꞌ che: Pues non xeꞌ apostolon taca e nuquir winicobꞌ y taca e ajcꞌupesiajobꞌ tara tama e chinam Jerusalem cꞌani cacꞌajpesox xeꞌ ajcꞌupesiajox tama Cawinquirar xeꞌ majax tuox e Israel xeꞌ turox tama e chinam Antioquía y xeꞌ turox tama e departamento Siria y xeꞌ turox tama e departamento Cilicia.
ACT 15:24 Pues cꞌotoyon canata que ayan cora winicobꞌ xeꞌ locꞌoyobꞌ tama e lugar tara tuaꞌ axiobꞌ esto tiaꞌ turox nox, pero matucꞌa cawareobꞌ non sino que intaca ixiobꞌ. Y cꞌotoyon canata que jaxirobꞌ cay uchiox ibꞌijnu tamar lo que ojronobꞌ este que quetpox nutꞌur iut. Pues jaxirobꞌ cay ucansiox que ucꞌani tuaꞌ axujra imbꞌijc uqꞌuewerir utejromar tunor e winicobꞌ y que ucꞌani tuaꞌ acꞌapa iche tunor lo que chꞌar tzꞌijbꞌabꞌir tama uley e Moisés tuaꞌ uyubꞌiox ixxana tama ubꞌir e Cristo.
ACT 15:25 Y tamar era tunoron war cabꞌijnu que ucꞌani tuaꞌ casicbꞌa cora ajcꞌupesiajobꞌ ticajam tara tuaꞌ cawebꞌta axin tuaꞌ uwarajsiox yajaꞌ. Cꞌani acꞌotoyobꞌ taca e Bernabé y e Pablo xeꞌ inchoj utobꞌ camener.
ACT 15:26 Pues e Bernabé y e Pablo cay unumse ubꞌobꞌ meyra umen taca que war uchecsu uyojroner Cawinquirar Jesucristo este que ayix ani conda cꞌanix achamesnobꞌ.
ACT 15:27 Pero lo que cꞌani cache era: Cꞌani cawebꞌta axin e Judas y e Silas tuaꞌ oꞌjronobꞌ tacarox tuaꞌ uchecsu tunor lo que cay ojronon non tara.
ACT 15:28 Pues imbꞌutz locꞌoy tut Unawalir e Dios y ticoit non ubꞌan que machi cꞌani caturbꞌa lo que imbꞌar tijor nox sino que jax taca era:
ACT 15:29 Pues ma erer icꞌuxi e wer xeꞌ quetpa ajcꞌubꞌir tut inteꞌ chamen dios, y ma erer icꞌuxi uchꞌichꞌer inteꞌ arac, y ma erer icꞌuxi inteꞌ arac xeꞌ cotbꞌir unuc, y ma erer iyose ibꞌa taca e ixictac xeꞌ majax tibꞌa, y nien ma erer uyose ubꞌobꞌ e ixictac taca e winicobꞌ xeꞌ majax tuobꞌ. Jay ixobꞌian tut tunor era war iche imbꞌutz tunor. Pues tara acꞌapa e ojroner. Bꞌan utzꞌijbꞌobꞌ e apostolobꞌ tama e carta xeꞌ uyebꞌtobꞌ ixin esto tiaꞌ turobꞌ e ajcꞌupesiajobꞌ tama e chinam Antioquía.
ACT 15:30 Y tamar era ebꞌtana ixin e hermanuobꞌ tuaꞌ axiobꞌ tama uxambꞌarobꞌ esto tama e chinam Antioquía. Y conda cꞌotoyobꞌ cay umorojsiobꞌ tunor e grupo ajcꞌupesiajobꞌ y uyajcꞌuobꞌ e carta era.
ACT 15:31 Y e ajcꞌupesiajobꞌ conda cꞌapa uchiobꞌ leer e carta era, bꞌutcꞌa uyalmobꞌ taca inteꞌ nuxi tzayer umen que galan locꞌoy tunor tama e carta.
ACT 15:32 Y e Judas y e Silas ayan ucꞌampibꞌir xeꞌ ajcꞌunobꞌ umen e Dios tuaꞌ uchꞌamiobꞌ inteꞌ ojroner tuaꞌ e Dios y tuaꞌ asutpa uyare e gente otronyajr. Y tamar ucꞌampibꞌirobꞌ era cay cꞌampesnobꞌ meyra umen e Dios tuaꞌ utzayjresobꞌ e ajcꞌupesiajobꞌ y tuaꞌ utꞌabꞌse uyalmobꞌ.
ACT 15:33 Y conda cꞌapa numuy cora día conda morojsebꞌirobꞌ turobꞌ, tin e tariobꞌ tama e chinam Jerusalem cay arenobꞌ umen e inmojr era que chicobꞌ taca ujiriar e Dios. Y tamar era arobꞌnobꞌ que uyubꞌi asutpa axiobꞌ otronyajr tut tin e uyebꞌta ixiobꞌ.
ACT 15:34 Pero e Silas ubꞌijnu que cꞌani aquetpa y machi ixin.
ACT 15:35 Y e Pablo y e Bernabé quetpobꞌ tama e chinam Antioquía ubꞌan. Entonces jaxirobꞌ y meyra ajcanseyajobꞌ xeꞌ turobꞌ yajaꞌ cay ucansiobꞌ y uchecsuobꞌ uyojroner Cawinquirar tama meyra día.
ACT 15:36 Pues entonces conda numuy cora mes e Pablo cay ojron taca e Bernabé y che: —Incoꞌ cawarajsic e ajcꞌupesiajobꞌ xeꞌ turobꞌ tama tunor e sian chinam tiaꞌ cay numuyon tuaꞌ cachecsu uyojroner Cawinquirar, cꞌani inxin inwira cocha turobꞌ coner, che e Pablo uyare e Bernabé.
ACT 15:37 Pero e Bernabé cay ubꞌijnu que erer uqꞌueche axin e Juan xeꞌ ucꞌabꞌa Marcos ubꞌan.
ACT 15:38 Pero e Pablo machi ucꞌani tuaꞌ axin e Juan otronyajr cocha jaxir uyacta upatnar e Dios tama inteꞌ xambꞌar tacarobꞌ conda turobꞌ tama e chinam Panfilia y intaca sutpa ixin tama uyotot.
ACT 15:39 Y e Bernabé cay ojron y che: Pero bueno tuaꞌ axin e Juan. Pero e Pablo che que: Nen machi cꞌani inxin taca e Juan. Y e Bernabé che que: Pero nen cꞌani inqꞌueche axin e Juan. Pero e Pablo che: Machi. Entonces bꞌan taca quetpa que machi uyubꞌi uyustes ubꞌobꞌ tamar lo que war anumuy era. Entonces e Bernabé uqꞌueche ixin e Marcos xeꞌ jax e Juan y ixiobꞌ tama inteꞌ barco tor e jaꞌ tuaꞌ axiobꞌ esto tama e lugar Chipre.
ACT 15:40 Y e Pablo usicbꞌa e Silas y locꞌoy ixiobꞌ tama uxambꞌar. Pero e ajcꞌupesiajobꞌ era xeꞌ turobꞌ, conda cꞌanix alocꞌoyobꞌ e Pablo y e Silas, cay ucꞌajtiobꞌ taca e Dios que utacarsiaj Cawinquirar axin aquetpa tacarobꞌ.
ACT 15:41 Entonces e Pablo y e Silas numuyobꞌ tama e departamento Siria y tama e departamento Cilicia, war uqꞌuecꞌojsiobꞌ tunor e ajcꞌupesiajobꞌ axin tama inteꞌ inteꞌ grupo ajcꞌupesiajobꞌ tiaꞌ ixiobꞌ.
ACT 16:1 Entonces e Pablo y e Silas ixiobꞌ esto tama e chinam Derbe, y de allí ixiobꞌ esto tama e chinam Listra. Y yajaꞌ utajwiobꞌ inteꞌ ajcꞌupesiaj tama Cawinquirar xeꞌ ucꞌabꞌa Timoteo xeꞌ jax uyar inteꞌ ixic xeꞌ tuaꞌ e Israel xeꞌ war acꞌupseyan tama Cawinquirar, pero utata e Timoteo jax inteꞌ winic xeꞌ tari tama e lugar Grecia.
ACT 16:2 Pues tunor e ajcꞌupesiajobꞌ tama e chinam Listra y tama e chinam Iconio ojronobꞌ que imbꞌutz e sitz era.
ACT 16:3 Y e Pablo war ucꞌani tuaꞌ uqꞌueche axin e Timoteo tacarobꞌ ubꞌan, y tamar era uyare tuaꞌ axujra imbꞌijc uqꞌuewerir utejromar tuaꞌ machi aqꞌuijnesnobꞌ tin e tuobꞌ e Israel xeꞌ turobꞌ tama e lugar era. Pues tunor e gente war unatobꞌ que utata e Timoteo jax inteꞌ griego.
ACT 16:4 Y tic taca tiaꞌ ixiobꞌ tama inteꞌ inteꞌ chinam war uyareobꞌ tunor e ajcꞌupesiajobꞌ tama e carta lo que ajcꞌunobꞌ umen e apostolobꞌ y umen e nuquir winicobꞌ xeꞌ turobꞌ tama e chinam Jerusalem. Y war uchecsuobꞌ tut tunor e ajcꞌupesiajobꞌ axin tuaꞌ unata acꞌupseyanobꞌ tut lo que arobꞌnobꞌ umen e apostolobꞌ xeꞌ turobꞌ tama e chinam Jerusalem.
ACT 16:5 Y tamar era tunor e sian grupo ajcꞌupesiajobꞌ tama inteꞌ inteꞌ chinam war aqꞌuecꞌuobꞌ tama ucꞌupesiaj tama Cawinquirar, y meyra gente war acꞌotoy acꞌupseyanobꞌ tama Cawinquirar ajqꞌuin ajqꞌuin.
ACT 16:6 Entonces locꞌoyobꞌ e Pablo taca e inmojr era y cay numuyobꞌ tama e departamento Frigia y tama e departamento Galacia, pero machi actanobꞌ tuaꞌ axiobꞌ uchecsuobꞌ uyojroner e Dios tama e departamento Asia umen Unawalir e Dios.
ACT 16:7 Y conda cꞌotoyobꞌ tama e bꞌir xeꞌ acꞌotoy tama e departamento Misia, war ubꞌijnuobꞌ tuaꞌ oꞌchoyobꞌ yajaꞌ tuaꞌ uchecsuobꞌ uyojroner e Dios tama e departamento Bitinia, pero machi actanobꞌ tuaꞌ uchiobꞌ umen Unawalir e Jesús.
ACT 16:8 Entonces ixiobꞌ tama uxambꞌar esto tama e departamento Misia, y de allí ecmay ixiobꞌ esto tama inteꞌ chinam xeꞌ ucꞌabꞌa Tróas tiaꞌ erer uchꞌamiobꞌ inteꞌ barco.
ACT 16:9 Y ya turu e Pablo tama e chinam Tróas era conda checta inteꞌ umayjut acbꞌar. Y tamar umayjut cay uwira inteꞌ winic tuaꞌ inteꞌ departamento xeꞌ ucꞌabꞌa Macedonia. Y war e winic era tut e Pablo war ucꞌajti tacar y che: “Laric esto tama e departamento Macedonia y tacrenicon tara”, che e winic xeꞌ irna umen e Pablo tama umayjut.
ACT 16:10 Y conda cꞌapa uwira umayjut era, non xeꞌ war caxana tacar cay costes cabꞌa tuaꞌ caxin esto tama e departamento Macedonia, porque war canata tama cawalma que war ucꞌani e Dios tuaꞌ caxin cachecsu uyojroner e Dios tama e corpesiaj tama e departamento yajaꞌ.
ACT 16:11 Pues entonces tꞌabꞌayon tama inteꞌ barco tama e chinam Tróas y ixion tor e jaꞌ esto tama inteꞌ lugar tiaꞌ ayan e rum tuyuxin e jaꞌ, y yajaꞌ ayan inteꞌ chinam xeꞌ ucꞌabꞌa Samotracia. Y tama otronteꞌ día ixion tama e barco tor e jaꞌ tuaꞌ cacꞌotoy tama inteꞌ chinam xeꞌ ucꞌabꞌa Neápolis.
ACT 16:12 Y de allí locꞌoy ixion tama e bꞌir tuaꞌ cacꞌotoy tama e chinam Filipos que jax inteꞌ chinam xeꞌ chembꞌir umen e ejército romano y xeꞌ jax e más nuxi chinam tama tunor e lugar yajaꞌ tama e departamento Macedonia xeꞌ aquetpa tama e lugar Grecia. Y quetpon cora día yajaꞌ.
ACT 16:13 Y tuyejtzꞌer e chinam Filipos era ayan inteꞌ xucur, y tama inteꞌ día tuaꞌ e jiriar locꞌoyon tama e chinam y ixion tutiꞌ e xucur era tama inteꞌ lugar tiaꞌ umorojse ubꞌobꞌ e gente tuaꞌ ucꞌajtiobꞌ taca e Dios. Entonces turuanon y cay ojronon tama uyojroner e Dios tama e corpesiaj taca cora ixictac xeꞌ war umorojse ubꞌobꞌ tama e lugar era.
ACT 16:14 Y ayan inteꞌ ixic tama e lugar era xeꞌ ucꞌabꞌa Lidia xeꞌ tari tama inteꞌ chinam xeꞌ ucꞌabꞌa Tiatira. Y jaxir uchoni e bꞌujc xeꞌ galan xeꞌ chacchac ut. Y e ixic era war uyujtzꞌi ut e Dios iraj iraj, y tamar era cay uyubꞌi tunor uyojroner e Pablo. Y pascꞌa ut uyalma umen Cawinquirar tuaꞌ uyubꞌi tunor lo que arobꞌna umen e Pablo.
ACT 16:15 Entonces chꞌujya e ixic taca tunor ufamilia, y de allí uyubꞌi tuaꞌ e Pablo y e Silas y che: —Jay nox war ibꞌijnu que nen ajcꞌupesiajen tama Cawinquirar coner, laric tuaꞌ ixquetpa tama niotot, che e ixic. Y tamar era jaxir uchion quetpon tama uyotot.
ACT 16:16 Entonces tama inteꞌ día conda war caxin tama e lugar tiaꞌ acay cacꞌajti taca e Dios tuti e xucur, catajwi cabꞌa taca inteꞌ ijchꞌoc xeꞌ chucur umen inteꞌ mabꞌambꞌan mein. Y e mein era ojron taca e ijchꞌoc y e ijchꞌoc uchecsu tut e gente lo que arobꞌna umen e mein. Y e ijchꞌoc jax inteꞌ man xeꞌ mambꞌir inyajrer y war atojya meyra tumin umen upatron umen que war uchecsu tut e gente lo que mucur tutobꞌ.
ACT 16:17 Pero e ijchꞌoc, conda uwira e Pablo taca tunoron xeꞌ war caxana tacar cay xana ticapat, y cay aru taca inteꞌ nuxi nuc y che: —E winicobꞌ era manobꞌ tuaꞌ e Dios xeꞌ Ajtichaner y jaxirobꞌ war uyareox cocha tuaꞌ ixcorpesna, che e ijchꞌoc taca inteꞌ nuxi nuc.
ACT 16:18 Y bꞌan uche e ijchꞌoc ajqꞌuin ajqꞌuin y che: —E winicobꞌ era manobꞌ tuaꞌ e Dios xeꞌ Ajtichaner, che e ijchꞌoc. Y bꞌan taca ojron taca inteꞌ nuxi nuc iraj iraj. Entonces e Pablo cꞌoyran uyubꞌi e nuxi nuc era, y tamar era sutpa uwira ut e ijchꞌoc y uyare e mabꞌambꞌan mein y che: —Tama ucꞌabꞌa e Jesucristo inwaret que loqꞌuen tama e ijchꞌoc era, che e Pablo uyare e mabꞌambꞌan mein. Entonces locꞌoy e mabꞌambꞌan mein tama e ijchꞌoc y jaxir quetpa tzꞌustaca.
ACT 16:19 Pero conda upatronobꞌ e ijchꞌoc cay uwirobꞌ que machi ixto uyubꞌi uchꞌamiobꞌ e tumin tama e ijchꞌoc era, cocha cꞌapa locꞌoy e mabꞌambꞌan mein, qꞌuijnobꞌ y ucachiobꞌ uqꞌuechiobꞌ ixin e Pablo y e Silas tut e sian ajcꞌamparobꞌ xeꞌ turobꞌ tama e chinam yajaꞌ.
ACT 16:20 Entonces uturbꞌobꞌ tut e sian juez y uyareobꞌ: —E winicobꞌ era tuobꞌ e lugar Israel, y jaxirobꞌ war utijresobꞌ tunor cachinam tara este que cꞌanix upucujcse ubꞌobꞌ tunor e gente.
ACT 16:21 Y war ucansiobꞌ uchiobꞌ lo que majax bꞌan cocha uyubꞌion cache non xeꞌ turon yebꞌar e ley romano, che e winicobꞌ era xeꞌ upatronobꞌ e ijchꞌoc.
ACT 16:22 Entonces achpobꞌ tunor e gente upater e Pablo y e Silas, y e sian ajcꞌamparobꞌ uyareobꞌ tuaꞌ aloqꞌuesna ubꞌujcobꞌ y tuaꞌ ajajtzꞌobꞌ taca e teꞌ.
ACT 16:23 Y conda cꞌapa uwatzꞌiobꞌ meyra, uqꞌuechiobꞌ ixin tuaꞌ uyosiobꞌ macuir e cárcel y uyareobꞌ e ajcojc cárcel tuaꞌ ucojcobꞌ.
ACT 16:24 Entonces conda e ajcojc cárcel uchꞌami e orden era, uyosiobꞌ e Pablo y e Silas tama e lugar más macu tama e cárcel era, y de allí e ajcojc cárcel ucachiobꞌ uyoc taca e teꞌ xeꞌ ayan uchꞌenar tiaꞌ uwajpi acachpa unuc uyoc, y ya quetpobꞌ e Pablo y e Silas macuir e cárcel cocha era.
ACT 16:25 Y tama uyuxin e acbꞌar ya turobꞌ e Pablo y e Silas macuir e cárcel y war ucꞌajtiobꞌ taca e Dios y war acꞌaywiobꞌ tama e Dios, y tin e turobꞌ macuir e cárcel war uyubꞌiobꞌ tunor era ubꞌan.
ACT 16:26 Y wacchetaca checta inteꞌ nuxi yujcbꞌar y cay chincha e tun xeꞌ turu macuir e rum, y conda uwirobꞌ, pascꞌa ut tunor e puerta tama e cárcel. Y tunor e teꞌ xeꞌ cacharobꞌ ani tamar witcꞌa tama uyocobꞌ, y e cadena xeꞌ cacharobꞌ ani tin e turobꞌ tama e cárcel bꞌantzꞌobꞌ.
ACT 16:27 Entonces e ajcojc cárcel bꞌixcꞌa achpa wawan y cay uwira que pascꞌa ut tunor e puerta tama e cárcel y cay ubꞌijnu que cꞌapa locꞌoy ajniobꞌ tunor e gente xeꞌ turobꞌ ani macuir e cárcel. Entonces ulocse umachit tupat y uwabꞌu tama unac tuaꞌ uchamse ubꞌa jaxir.
ACT 16:28 Pero e Pablo xeꞌ war uwira tunor era aꞌru taca inteꞌ nuxi nuc y uyare e ajcojc cárcel y che: —Ira achamse abꞌa, ya turon tunoron, che e Pablo.
ACT 16:29 Entonces e ajcojc cárcel uyare ataresna inteꞌ cꞌajc, y ajner ochoy macuir e cárcel tuaꞌ uwira tucꞌa numuy, y war achincha y uyacta ubꞌa cotuan tuyoc e Pablo y e Silas.
ACT 16:30 Y wacchetaca ulocse e Pablo y Silas patir e cárcel y cay uyubꞌi tuobꞌ y che: —Niwinquirox, ¿tucꞌa ucꞌani tuaꞌ inche tuaꞌ incorpesna? che e ajcojc cárcel era.
ACT 16:31 Y jaxirobꞌ uyare e ajcojc cárcel y che: —Cꞌupseyanen tama Cawinquirar Jesús y cꞌani icorpesna net taca tunor tin e aturuanobꞌ tama oꞌtot, che e Pablo y e Silas.
ACT 16:32 Entonces ixiobꞌ esto tama uyotot e ajcojc cárcel y cay uyareobꞌ tunor tin e aturuanobꞌ tama uyotot tunor uyojroner e Dios tama e corpesiaj.
ACT 16:33 Entonces e ajcojc cárcel motor que incsibꞌanto cay upoqui tunor tiaꞌ witcꞌa upat e Pablo y e Silas tiaꞌ jajtzꞌobꞌ, y de allí jaxir taca e inmojr ufamilia ixin tuaꞌ achꞌujyobꞌ tunorobꞌ.
ACT 16:34 Y de allí sutpa ixiobꞌ tama uyotot e ajcojc cárcel otronyajr tuaꞌ uwese e Pablo y e Silas. Y tunor ufamilia e ajcojc cárcel war atzayobꞌ meyra umen que cay cꞌupseyanobꞌ tama e Dios tama e acbꞌar era.
ACT 16:35 Y conda sacojpa tama e día era e Pablo y e Silas ya turobꞌ tama e cárcel otronyajr. Y e juez taca e sian ajcꞌamparobꞌ uyebꞌtobꞌ ixin cora policía taca inteꞌ orden tuaꞌ ulocsiobꞌ e Pablo y e Silas tama e cárcel.
ACT 16:36 Entonces e ajcojc cárcel uyare e Pablo y che: —Ajcꞌunen inteꞌ orden umen e sian juez tuaꞌ inwactox ixlocꞌoy. Entonces erer ixixin tzꞌustaca, che e ajcojc cárcel.
ACT 16:37 Pero e Pablo uyare e policía era y che: —Non era ciudadanuon tuaꞌ e Roma, y nox ixiox iwatzꞌion tut tunor e gente tara tama e chinam, y machi chenon juzgar tut inteꞌ juez, sino que intaca iwatzꞌion, y de allí iyosion esto tama e cárcel. Y era ¿war ca ibꞌijnu tuaꞌ ilocsion tama e cárcel tzꞌustaca? Machi. Ucꞌani tuaꞌ ayopobꞌ e nuquir ajcꞌamparobꞌ jaxobꞌ taca tuaꞌ ulocsion tama e cárcel era, che e Pablo.
ACT 16:38 Entonces sutpa ixiobꞌ e policía tut e sian juez, y cay uyareobꞌ que e Pablo y Silas ciudadanuobꞌ tama e Roma. Entonces cay bꞌactobꞌ meyra e sian juez conda uyubꞌiobꞌ tunor era.
ACT 16:39 Entonces e sian juez ixiobꞌ tama e cárcel tuaꞌ usisijresobꞌ e Pablo y e Silas. Entonces ulocsiobꞌ tama e cárcel y cay ucꞌajtiobꞌ tuobꞌ tuaꞌ alocꞌoyobꞌ tama e chinam era.
ACT 16:40 Entonces locꞌoyobꞌ tama e cárcel, y de allí ixiobꞌ esto tama uyotot e Lidia, y de allí ixin uwirobꞌ tunor e ajcꞌupesiajobꞌ y cay utꞌabꞌse uyalmobꞌ tama Cawinquirar, y de allí locꞌoy ixiobꞌ esto tama e chinam era.
ACT 17:1 Pues entonces tama uxambꞌar e Pablo y e Silas ixiobꞌ tama inteꞌ chinam xeꞌ ucꞌabꞌa Anfípolis, y de allí ixiobꞌ tama inteꞌ chinam xeꞌ ucꞌabꞌa Apolonia, y de allí ixiobꞌ tama inteꞌ chinam xeꞌ ucꞌabꞌa Tesalónica. Y yajaꞌ ayan inteꞌ sinagoga tuaꞌ e gente xeꞌ tuobꞌ e Israel.
ACT 17:2 Y e Pablo uche bꞌan cocha acay uche iraj iraj y ixin tama inteꞌ sinagoga tama e día tuaꞌ e jiriar. Y quetpobꞌ taca e gente era tres semana tuaꞌ acanseyan tamar Cawinquirar.
ACT 17:3 Y war uchecsu lo que ayan tama uyojroner e Dios tiaꞌ che que e Cristo ucꞌani tuaꞌ unumse ubꞌa meyra y ucꞌani tuaꞌ achamesna, pero que nacpat era ucꞌani tuaꞌ asutpa abꞌixcꞌa tujam e chamenobꞌ. Y e Pablo uyare e gente tama e sinagoga era y che: —Jax e Jesús era xeꞌ war inwareox tamar, que jaxir jax e Cristo xeꞌ arobꞌna umen e Dios ixnix que quetpa tuaꞌ watar, che e Pablo.
ACT 17:4 Entonces cay cꞌupseyanobꞌ tama Cawinquirar cora gente tuaꞌ e Israel, y jaxirobꞌ cay umorojse ubꞌobꞌ taca e Pablo y e Silas. Y ayan otronteꞌ grupo gente xeꞌ griego xeꞌ majax tuobꞌ e Israel pero xeꞌ war uyujtzꞌiobꞌ ut e Dios. Y jaxirobꞌ cay cꞌupseyanobꞌ tama Cawinquirar ubꞌan. Y ayan cora nuquir ixictac ubꞌan xeꞌ cay cꞌupseyanobꞌ tama Cawinquirar.
ACT 17:5 Pero ayan cora gente xeꞌ tuobꞌ e Israel xeꞌ machi cꞌupseyanobꞌ tama Cawinquirar xeꞌ qꞌuijnobꞌ tamar taca que tunor e gente era machi ixto war axanobꞌ tacarobꞌ. Entonces cay usicbꞌobꞌ cora winicobꞌ xeꞌ mabꞌambꞌan uwirnarobꞌ y cay umorojsiobꞌ tama e calle tuaꞌ upucujcsiobꞌ e gente tama e chinam era y tuaꞌ uchꞌijrse e qꞌuijnar tic taca. Entonces e sian winicobꞌ era xeꞌ war aqꞌuijnobꞌ ixiobꞌ tama uyotot e Jasón tuaꞌ usicbꞌobꞌ e Pablo y e Silas porque cꞌani ulocsiobꞌ macuir e otot era tuaꞌ uyajcꞌuobꞌ.
ACT 17:6 Pero machi utajwiobꞌ e Pablo y e Silas y tamar era ujajpiobꞌ e Jasón y uquerejbꞌobꞌ ixin tut e nuquir ajcꞌamparobꞌ. Y ayanto más ajcꞌupesiajobꞌ xeꞌ uqꞌuechiobꞌ ixin tut e nuquir ajcꞌamparobꞌ tama e chinam era ubꞌan. Y cay ojronobꞌ taca inteꞌ nuxi nuc y chenobꞌ: —Jax e winicobꞌ era xeꞌ war utꞌabꞌsiobꞌ e qꞌuijnar tic taca tama tunor or e rum, y coner tariobꞌ esto tara ubꞌan.
ACT 17:7 Y e Jasón era war uyajcꞌu uyotot tuaꞌ aquetpobꞌ tamar y tuaꞌ awiobꞌ tamar. Y tunor e gente era war uchiobꞌ lo que majax bꞌan cocha ucꞌani uley e rey romano, sino que war uyareobꞌ e gente axin que ayan otronteꞌ rey xeꞌ jax inteꞌ winic xeꞌ ucꞌabꞌa Jesús, xeꞌ ojronobꞌ taca inteꞌ nuxi nuc tunor e sian winicobꞌ era xeꞌ mabꞌambꞌan uwirnarobꞌ.
ACT 17:8 Entonces conda uyubꞌiobꞌ tunor era tin e ajcꞌamparobꞌ tama e chinam era cay upucujcse ubꞌobꞌ taca tunor e gente xeꞌ turobꞌ tama e calle.
ACT 17:9 Pero e Jasón y e inmojr xeꞌ turobꞌ tacar arobꞌnobꞌ umen e ajcꞌamparobꞌ que ucꞌani tuaꞌ utoyobꞌ inteꞌ multa. Entonces utoyobꞌ y de allí actanobꞌ locꞌoy.
ACT 17:10 Pues entonces e ajcꞌupesiajobꞌ uyareobꞌ e Pablo y e Silas que ucꞌani tuaꞌ alocꞌoyobꞌ wacchetaca tama e chinam Tesalónica era. Entonces conda acbꞌare locꞌoyobꞌ tama e chinam era, y ixiobꞌ esto tama e chinam Berea. Y conda cꞌotoyobꞌ tama e chinam era ixiobꞌ tama e sinagoga tuaꞌ e gente tuaꞌ e Israel.
ACT 17:11 Pero e gente tuaꞌ e Israel era más pasar ujorobꞌ que tin e turobꞌ tama e chinam Tesalónica, porque jaxirobꞌ war uyubꞌiobꞌ tunor lo que war che e Pablo, y ajqꞌuin ajqꞌuin war usicbꞌobꞌ tama uyojroner e Dios tuaꞌ uwirobꞌ jay bꞌan cocha war aꞌrobꞌnobꞌ umen e Pablo.
ACT 17:12 Y tamar era meyra gente tuaꞌ e Israel cay cꞌupseyanobꞌ tama Cawinquirar. Y cay cꞌupseyanobꞌ ubꞌan cora nuquir winicobꞌ y cora nuquir ixictac xeꞌ griego xeꞌ majax tuobꞌ e Israel.
ACT 17:13 Pero conda e gente tuaꞌ e Israel xeꞌ turobꞌ tama e chinam Tesalónica cꞌotoy unatobꞌ que ixin e Pablo esto tama e chinam Berea y que war uchecsu uyojroner e Dios tama e lugar yajaꞌ, ixiobꞌ ubꞌan y cay uwirobꞌ cocha tuaꞌ uchꞌijsiobꞌ e qꞌuijnar este que cay upucujcsiobꞌ tunor e gente tama e chinam yajaꞌ.
ACT 17:14 Pero conda e ajcꞌupesiajobꞌ cay uwirobꞌ tunor era, wacchetaca uyareobꞌ e Pablo tuaꞌ alocꞌoy axin esto tama e costa yajaꞌ. Pero quetpobꞌ e Silas y e Timoteo tama e chinam Berea era.
ACT 17:15 Y ayan tin e tuobꞌ e chinam Berea xeꞌ cay xanobꞌ taca e Pablo ubꞌan tuaꞌ uqꞌuechiobꞌ axin esto tama e chinam Atenas. Y de allí tin e tuobꞌ e chinam Berea sutpa ixiobꞌ esto tama uchinam otronyajr, pero e Pablo uyebꞌta ixin inteꞌ ojroner tacarobꞌ tuaꞌ watar e Silas y e Timoteo wacchetaca esto tama e chinam Atenas porque jaxir war ucꞌani utacarsiajobꞌ.
ACT 17:16 Pues entonces cocha e Pablo war ucojco ucꞌoter e Silas y e Timoteo tama e chinam Atenas era, jaxir war acꞌoyran cora uwira e sian chamen dios lo que ayan tic taca tama tunor e chinam era.
ACT 17:17 Y tamar era war uchecsu uyojroner e Dios tama e sinagoga taca e gente xeꞌ tuobꞌ e Israel y taca e inmojr gente xeꞌ majax tuobꞌ e Israel pero xeꞌ war uyujtzꞌiobꞌ ut e Dios. Y ajqꞌuin ajqꞌuin jaxir war axin tama e plaza tuaꞌ uyare e gente xeꞌ utajwi yajaꞌ tamar Cawinquirar.
ACT 17:18 Y tama e plaza era ayan cora winicobꞌ xeꞌ ajcanuarobꞌ tuaꞌ e canseyaj xeꞌ ucꞌabꞌa: “Epicúreos”, y ayan otro inmojr winicobꞌ xeꞌ ajcanuarobꞌ tuaꞌ e canseyaj xeꞌ ucꞌabꞌa: “Estoicos”, y jaxirobꞌ cay ojronobꞌ taca e Pablo. Y ayan tin e ojronobꞌ y che: —¿Tucꞌa tuaꞌ uyareon e winic era otronyajr xeꞌ matucꞌa ucꞌampibꞌir? che cora winicobꞌ era. Y ayan tin e ojronobꞌ y che: —Pues nen imbꞌijnu que jaxir war oꞌjron tama cora dios xeꞌ ajnajtir, che e inmojr winicobꞌ era. Pues bꞌan ojronobꞌ umen que e Pablo war uchecsu uyojroner e Dios tama e corpesiaj y war uchecsu cocha sutpa bꞌixcꞌa e Jesús tujam e chamenobꞌ.
ACT 17:19 Entonces uqꞌuechiobꞌ ixin e Pablo esto tama inteꞌ lugar xeꞌ ucꞌabꞌa Areópago tiaꞌ acay umorojse ubꞌobꞌ inteꞌ grupo winicobꞌ, y cay uyubꞌiobꞌ tuaꞌ e Pablo y chenobꞌ: —¿O erer ca canata tucꞌa e canseyaj era xeꞌ ma tiaꞌ coybꞌi xeꞌ cay achecsu ticoit non sajmi?
ACT 17:20 Pues war awareon meyra canseyaj que intiach uyubꞌnar ticoit, y non era cꞌani canata tucꞌa war che tunor era, che e winicobꞌ era.
ACT 17:21 Pues tunor e winicobꞌ tama e chinam Atenas taca tin e ajnajtirobꞌ xeꞌ turuanobꞌ tama e chinam era machi apatnobꞌ, sino que intaca umorojse ubꞌobꞌ tuaꞌ uchecsu inteꞌ canseyaj y tuaꞌ uyubꞌiobꞌ inteꞌ bꞌijnusiaj xeꞌ ma tiaꞌ uyubꞌiobꞌ.
ACT 17:22 Entonces achpa wawan e Pablo tujam e winicobꞌ tama e lugar Areópago era y cay uyareobꞌ y che: —Winicox xeꞌ tuox e chinam Atenas, nen war inwira tama ichinam era que nox war icꞌani meyra e sian diosobꞌ.
ACT 17:23 Porque nen conda cay xanen tama e chinam era cay inwira tiaꞌ acay uyujtzꞌiobꞌ ut e sian chamen dios. Pero cay inwira ubꞌan que ayan inteꞌ altar tiaꞌ chꞌar tzꞌijbꞌabꞌir e ojroner xeꞌ che: “Tuaꞌ e Dios xeꞌ machi canata chi era”, y jax e Dios era xeꞌ war iyujtzꞌi ut motor que machi war inata chi e Dios era, pero jax jaxir xeꞌ cꞌani inwareox era tamar.
ACT 17:24 ’Pues e Dios xeꞌ uche tunor or e rum y tunor lo que ayan tamar jax jaxir xeꞌ ajyum tama tunor ut e qꞌuin y tama tunor or e rum. Pero jaxir machi turuan tama inteꞌ otot xeꞌ chembꞌir umen e winicobꞌ.
ACT 17:25 Y e Dios era xeꞌ war inwareox tamar machi ucꞌani tuaꞌ acꞌotoy e winicobꞌ tuaꞌ utacre tama tunor lo que ucꞌani sino que jaxir jax xeꞌ uyajcꞌon cacuxtar y jax jaxir xeꞌ uyajcꞌon e icꞌar xeꞌ camusijcꞌa tamar, y jax jaxir xeꞌ uyajcꞌon tunor lo que ucꞌani inteꞌ.
ACT 17:26 ’Y jax e Dios era xeꞌ uche tunor uchꞌajnar e winicobꞌ axin tama tunor or e rum tuaꞌ inteꞌ taca winic xeꞌ chena umener tama ucajyesnibꞌir or e rum era. Y de allí uyare e winicobꞌ tuaꞌ aturuanobꞌ tama tunor or e rum tama inteꞌ inteꞌ chinam, y jaxir uyare tiaꞌ tuaꞌ aquetpobꞌ tunor e sian chinamobꞌ, y uyare tucꞌa tiempo tuaꞌ aquetpobꞌ e chinamobꞌ era tor e rum ubꞌan.
ACT 17:27 Y uche cocha era tuaꞌ uchion cabꞌijnu ani non que ucꞌani tuaꞌ casicbꞌa e Dios umen taca que capojro caxin este que catajwi chi e Dios era. Pues e Dios era majax innajt turu ticoit non xeꞌ inteꞌ intion tara, y tamar era erer canata que e Dios erer atajwina camener.
ACT 17:28 Porque tamar Cadiosir bꞌixiron y canijqui y turon, bꞌan cocha che inteꞌ xeꞌ unata uche inteꞌ ojroner xeꞌ che: ‘Non ubꞌan umaxtacon e Dios’, che inteꞌ cocha era.
ACT 17:29 Y cocha non umaxtacon e Dios machi uwajpi tuaꞌ cabꞌijnu que e Dios bꞌan ani cocha inteꞌ tun o lo que chena taca e oro o taca e plata xeꞌ chempa umen inteꞌ winic bꞌan cocha ubꞌijnu uche.
ACT 17:30 Pues tama e tiempo xeꞌ numuy e Dios intaca uwira lo que cay uchiobꞌ e winicobꞌ cocha machi unatobꞌ chi e Dios xeꞌ bꞌixir, y tamar era cay uyujtzꞌiobꞌ ut e sian chamen dios. Pero coner e Dios war uyare tunor e gente tama tunor or e rum que ucꞌani tuaꞌ uyactobꞌ tunor umabꞌambꞌanirobꞌ.
ACT 17:31 Porque Cadiosir uturbꞌa inteꞌ día conda cꞌani watar tuaꞌ ubꞌijnu uwira tunor e gente tama tunor or e rum tuaꞌ uwira jay bueno o jay majax bueno lo que cay uchiobꞌ. Y jaxir erach conda uche tunor era. Y ayan inteꞌ winic xeꞌ erach xeꞌ sicbꞌabꞌir umen e Dios xeꞌ cꞌani watar tuaꞌ uwira tama inteꞌ intion. Y e Dios ixin uchecsu chi e winic era umen que ixin usuti ubꞌixqꞌues tujam e chamenobꞌ. Bꞌan che e Pablo uyare tunor e winicobꞌ tama e lugar xeꞌ ucꞌabꞌa Areópago.
ACT 17:32 Entonces conda uyubꞌiobꞌ tunor e bꞌijnusiaj era que axin asutpa abꞌixcꞌa e gente tujam e chamenobꞌ, ayan tin e intaca atzeniobꞌ. Pero ayan tin e ojron y che: —Cꞌani coybꞌi iyojron tamar era otronyajr, che e winicobꞌ era.
ACT 17:33 Entonces locꞌoy e Pablo tama e lugar era tiaꞌ morojsebꞌirobꞌ ani.
ACT 17:34 Pero ayanto cora gente xeꞌ ixiobꞌ tupat e Pablo xeꞌ cay cꞌupseyanobꞌ tama Cawinquirar. Y tujam e gente era xeꞌ cay cꞌupseyanobꞌ tama Cawinquirar ayan inteꞌ winic xeꞌ ucꞌabꞌa Dionisio xeꞌ tuaꞌ e grupo xeꞌ umorojse ubꞌobꞌ tama e lugar Areópago. Y ayan inteꞌ ixic xeꞌ ucꞌabꞌa Dámaris xeꞌ cay cꞌupseyan tama Cawinquirar tama e día era ubꞌan, y ayanto más xeꞌ cay cꞌupseyanobꞌ tama Cawinquirar tama e día era.
ACT 18:1 Pues entonces conda cꞌapa locꞌoy tama e chinam Atenas, e Pablo ixin esto tama e chinam Corinto.
ACT 18:2 Y tama e chinam era cay utajwi ubꞌa taca inteꞌ winic xeꞌ ucꞌabꞌa Aquila xeꞌ jax inteꞌ winic tuaꞌ e Israel ubꞌan xeꞌ tari tama e lugar xeꞌ ucꞌabꞌa Ponto. Pues jaxir taca uwixcar xeꞌ ucꞌabꞌa Priscila wartocto ayopa tama e lugar Italia tiaꞌ locꞌoyobꞌ umen que arobꞌna umen e Emperador Claudio que tunor e gente tuaꞌ e Israel ucꞌani tuaꞌ alocꞌoyobꞌ tama e chinam Roma. Y era ixin e Pablo tuaꞌ uwarajsiobꞌ.
ACT 18:3 Y cocha jaxir bꞌan upatnar cocha e Aquila y uwixcar, e Pablo quetpa tacarobꞌ tama uyotot cocha jaxirobꞌ ajcheyaj rancho xeꞌ chembꞌir taca e bꞌujc.
ACT 18:4 Y tama inteꞌ inteꞌ día tuaꞌ e jiriar e Pablo war axin tama e sinagoga. Y jaxir war uturbꞌa ubꞌa tuaꞌ uche ucꞌupsiobꞌ e gente era que e Jesús jax Uyunen e Dios. Y ayan tin e tuobꞌ e Israel y ayan tin e majax tuobꞌ e Israel xeꞌ cay cꞌupseyanobꞌ tama Cawinquirar.
ACT 18:5 Entonces conda e Silas y e Timoteo yopobꞌ tama e departamento Macedonia cꞌotoyobꞌ tama e chinam Corinto. Y yajaꞌ utajwiobꞌ e Pablo que jaxir cꞌapa uyacta upatnar y que era war uchecsu uyojroner e Dios tut e gente tuaꞌ e Israel y que war uyareobꞌ que e Jesús jax e Cristo xeꞌ jax xeꞌ war ucojcobꞌ uyopar.
ACT 18:6 Pero e gente tuaꞌ e Israel qꞌuijnobꞌ y cay ucꞌayobꞌ e Pablo. Y tamar era jaxir cay utijti ubꞌujc tutobꞌ tuaꞌ uwirsiobꞌ que majax bueno lo que war uchiobꞌ. Entonces ojron e Pablo y che: —Jay nox ixixin tama e cꞌajc mix jax tanijor nen tuaꞌ acꞌaxi. Nen inwareoxix tunor uyojroner e Dios, pero nox machi icꞌani. Y tamar era coner cꞌani inxin inchecsu uyojroner e Dios tamar taca e gente xeꞌ majax tuobꞌ e Israel, che e Pablo.
ACT 18:7 Entonces locꞌoy e Pablo tama e sinagoga y ixin tama inteꞌ otot xeꞌ war tuyejtzꞌer e sinagoga era. Pues e otot era tuaꞌ inteꞌ winic xeꞌ ucꞌabꞌa Ticio Justo xeꞌ jax inteꞌ winic xeꞌ uyujtzꞌi ut e Dios.
ACT 18:8 Y ayan inteꞌ winic xeꞌ ucꞌabꞌa Crispo xeꞌ jax uwinquir e sinagoga yajaꞌ. Y jaxir taca tunor ufamilia cay cꞌupseyanobꞌ tama Cawinquirar. Y ayanto meyra gente tama e chinam Corinto era xeꞌ conda uyubꞌiobꞌ uyojroner e Dios cay cꞌupseyanobꞌ tama e Cristo y ixin chꞌujyobꞌ tunorobꞌ.
ACT 18:9 Entonces tama inteꞌ acbꞌar ojron Cawinquirar taca e Pablo tama inteꞌ umayjut y che: —Ira ibꞌacta. Arenobꞌ niwojroner y ira ichꞌencabꞌa.
ACT 18:10 Porque nen turen tacaret, y mamajchi tuaꞌ upijchꞌiet tuaꞌ uyobꞌiet. Pues ayan meyra gente tama e chinam era xeꞌ ucꞌanto tuaꞌ acꞌupseyanobꞌ tamaren. Bꞌan che e Dios uyare e Pablo tama inteꞌ umayjut.
ACT 18:11 Y tamar era e Pablo quetpa tama e chinam Corinto era tama inteꞌ año y medio, war ucanse e gente tama uyojroner e Dios.
ACT 18:12 Pues entonces tama inteꞌ tiempo era conda war acꞌotori inteꞌ gobernador xeꞌ ucꞌabꞌa Galión tama e departamento Acaya, cay qꞌuijnobꞌ e gente xeꞌ tuobꞌ e Israel upater e Pablo. Entonces uqꞌuechiobꞌ ixin e Pablo tut inteꞌ tribunal tuaꞌ utuchꞌiobꞌ tut e gobernador era.
ACT 18:13 Y uyareobꞌ e gobernador y chenobꞌ: —E winic era war axana y war ucꞌaye e gente axin que ucꞌani ani tuaꞌ uyujtzꞌiobꞌ ut e Dios, pero majax bꞌan cocha ucꞌani e ley. Bꞌan ojronobꞌ e gente tuaꞌ e Israel era tut e gobernador Galión.
ACT 18:14 Y e Pablo cꞌanix ani oꞌjron conda cay ojron e Galión y uyare e gente tuaꞌ e Israel era y che: —Jay inata ani que ayan lo que war uche e winic era, nen era ucꞌani tuaꞌ umbꞌi lo que war ani iwaren upater.
ACT 18:15 Pero nox era war ixqꞌuecran tamar ucanseyaj e winic era tama inteꞌ ojroner y tama inteꞌ cꞌabꞌa que mix jax bꞌan cocha nox ani war icꞌani tama iley tibꞌa. Bꞌijnunic nox entonces tucꞌa cꞌani iche tama tunor era, porque nen machi cꞌani onse nibꞌa tama tunor era, xeꞌ ojron e Galión uyare e gente xeꞌ tuobꞌ e Israel era.
ACT 18:16 Y tamar era tzacarnobꞌ locꞌoyobꞌ tunorobꞌ patir e tribunal.
ACT 18:17 Entonces tunor e gente xeꞌ griego xeꞌ turobꞌ yajaꞌ xeꞌ majax tuobꞌ e Israel ixin uchuquiobꞌ e Sóstenes xeꞌ jax uwinquir e sinagoga, y cay uwatzꞌiobꞌ y cay uyajcꞌuobꞌ meyra tut e gobernador, pero e Galión uche ubꞌa que machi uwira tucꞌa war uchiobꞌ.
ACT 18:18 Entonces e Pablo quetpato tama e chinam Corinto meyra día. Pero conda cꞌotoy e hora tuaꞌ alocꞌoy cay ojron taca tunor e ajcꞌupesiajobꞌ que axix era. Entonces locꞌoyobꞌ e Pablo taca e Priscila y e Aquila, y ixiobꞌ esto tama e chinam Cencrea tiaꞌ e Pablo cay uyare tuaꞌ asujsa ujor tuaꞌ acꞌapa uche lo que jaxir cay uyare que bꞌan tuaꞌ uche tama e tiempo era. Y nacpat era ixin tꞌabꞌayobꞌ tama inteꞌ nuxi barco tuaꞌ acꞌotoyobꞌ tama e lugar Siria.
ACT 18:19 Entonces cꞌotoyobꞌ tama e chinam Éfeso tiaꞌ e Pablo uyacta e Priscila y e Aquila. Y de allí e Pablo ixin tama inteꞌ sinagoga tuaꞌ oꞌjron taca e gente xeꞌ tuobꞌ e Israel xeꞌ war umorojse ubꞌobꞌ yajaꞌ.
ACT 18:20 Y jaxirobꞌ cay upejcobꞌ e Pablo tuaꞌ aquetpa más tiempo tacarobꞌ, pero jaxir che que machi axin uyubꞌi era.
ACT 18:21 Entonces e Pablo cay uyare e ajcꞌupesiajobꞌ que axix era y che: —Pues nen ucꞌani tuaꞌ inturuan tama inteꞌ nojqꞌuin xeꞌ watar rajxa era tama e chinam Jerusalem, pero conda acꞌapa e nojqꞌuin era, jay bꞌan ucꞌani e Dios, cꞌani insutpa waten tuaꞌ inwarajsiox otronyajr. Bꞌan che e Pablo uyare e gente tama e sinagoga era xeꞌ turu tama e chinam Éfeso. Y tamar era tꞌabꞌay tama e barco y locꞌoy tama e chinam Éfeso.
ACT 18:22 Y conda cꞌotoy e barco tama e chinam Cesarea, ecmay e Pablo y ujajpi e bꞌir y ixin esto tama e chinam Jerusalem. Y conda cꞌotoy cay upejca tunor tin e turobꞌ tama e grupo ajcꞌupesiajobꞌ yajaꞌ, y de allí sutpa ecmay ixin esto tama e chinam Antioquía.
ACT 18:23 Pero e Pablo machi quetpa meyra día tama e chinam Antioquía era, sino que locꞌoy otronyajr y ixin esto tama e departamento Galacia y esto tama e departamento Frigia tuaꞌ uwarajse tunor e ajcꞌupesiajobꞌ yajaꞌ y tuaꞌ uqꞌuecꞌojse uyalmobꞌ.
ACT 18:24 Pues ayan inteꞌ winic xeꞌ tuaꞌ e Israel xeꞌ ucꞌabꞌa Apolos xeꞌ tari tama e chinam Alejandría xeꞌ cꞌotoy tama e chinam Éfeso. Y jaxir war unata cocha tuaꞌ uchecsu uyojroner e Dios y war unata tunor lo que ayan tamar.
ACT 18:25 Pues jaxir cansebꞌir tama ubꞌir Cawinquirar, y war uchecsu uyojroner Cawinquirar taca tunor uyalma. Y erach tunor lo que war uchecsu tama e Jesús motor que jax taca uchꞌuymar e Juan xeꞌ ajchꞌuymar uchꞌami.
ACT 18:26 Y jaxir machi bꞌacta tuaꞌ acanseyan tut tunor e gente tama e sinagoga yajaꞌ. Y ya turobꞌ e Priscila y e Aquila ubꞌan war uyubꞌiobꞌ tunor lo que war aꞌrobꞌna umen e Apolos. Y tamar era uqꞌuechiobꞌ ixin e Apolos ubꞌajner tuaꞌ ucansiobꞌ más nojta tama ubꞌir e Dios.
ACT 18:27 Entonces e Apolos cay ubꞌijnu que cꞌani axin esto tama e departamento Acaya. Entonces e ajcꞌupesiajobꞌ xeꞌ turobꞌ tama e chinam Éfeso era cay ubꞌijnuobꞌ que cꞌani utacriobꞌ e Apolos, y tamar era utzꞌijbꞌobꞌ inteꞌ carta tama e ajcꞌupesiajobꞌ xeꞌ turobꞌ tama e departamento Acaya tuaꞌ uyareobꞌ tuaꞌ uchꞌamiobꞌ bien e Apolos. Y tamar era conda cꞌotoy e Apolos tama e departamento Acaya cay utacre meyra tunor tin e cay cꞌupseyanobꞌ tama e Jesús taca utacarsiaj e Dios.
ACT 18:28 Pero e gente xeꞌ tuobꞌ e Israel war acanseyanobꞌ lo que majax erach. Y tamar era e Apolos cay uchectes tunor lo que erach tama uyojroner e Dios tutobꞌ taca inteꞌ nuxi bꞌijnusiaj este que motor tin e machi ucꞌani machi uyubꞌiobꞌ tuaꞌ umuquiobꞌ tunor era. Y war uwirsiobꞌ que e Jesús jax e Cristo que e gente xeꞌ tuobꞌ e Israel war ucojcobꞌ tuaꞌ watar.
ACT 19:1 Pues entonces conda turuto e Apolos tama e chinam Corinto tama e departamento Acaya, e Pablo war axana tama e departamento Asia tiaꞌ ayan meyra witzir tuaꞌ acꞌotoy tama e chinam Éfeso. Y conda cꞌotoy utajwi ubꞌa taca cora winicobꞌ xeꞌ war acꞌupseyanobꞌ tamar lo que cansenobꞌ umen e Juan xeꞌ ajchꞌuymar.
ACT 19:2 Entonces e Pablo uyubꞌi tuobꞌ y che: —¿Ichꞌami ca Unawalir e Dios conda cay cꞌupseyanox tama e canseyaj era? che e Pablo. Y jaxirobꞌ uyareobꞌ e Pablo y che: —Machi. Non ma tiaꞌ coybꞌi jay ayan inteꞌ Unawalir e Dios, chenobꞌ e winicobꞌ era.
ACT 19:3 Entonces e Pablo uyubꞌi tuobꞌ otronyajr y che: —Y conda chꞌujyox taca e jaꞌ, ¿tucꞌa chꞌuymar ichꞌami? che e Pablo. Y jaxirobꞌ chenobꞌ: —Pues non chꞌuybꞌiron umen e Juan xeꞌ ajchꞌuymar, chenobꞌ.
ACT 19:4 Y che e Pablo: —E chꞌuymar lo que uche e Juan xeꞌ ajchꞌuymar jax taca tuaꞌ tin e war ubꞌijnu tuaꞌ uyactobꞌ e mabꞌambꞌanir. Jaxir war ucanse e gente tuaꞌ e Israel que ucꞌani tuaꞌ acꞌupseyanobꞌ tamar jaxir xeꞌ quetpa tuaꞌ watar xeꞌ jax e Jesús, che e Pablo.
ACT 19:5 Entonces conda e gente era cꞌapa uyubꞌiobꞌ tunor uyojroner e Pablo, ixiobꞌ tunorobꞌ tuaꞌ achꞌujyobꞌ taca e jaꞌ otronyajr, pero tama ucꞌabꞌa Cawinquirar Jesús.
ACT 19:6 Y conda e Pablo ucꞌatbꞌu ucꞌabꞌ tama ujorobꞌ, yopa Unawalir e Dios tamarobꞌ, y cay ojronobꞌ tama inteꞌ inteꞌ ojroner xeꞌ majax tuobꞌach. Y de allí cay uchꞌamiobꞌ cora ojroner tuaꞌ e Dios xeꞌ sutpa uchecsuobꞌ tut e inmojr era.
ACT 19:7 Y xeꞌ chꞌujyobꞌ ayanobꞌ doce winicobꞌ.
ACT 19:8 Entonces quetpa e Pablo tama e chinam Éfeso era tama uxteꞌ mes, y war axin tama e sinagoga tama inteꞌ inteꞌ día tuaꞌ e jiriar y war uturbꞌa ubꞌa tuaꞌ uche acꞌupseyanobꞌ tama uchinam e Dios tunor e gente tama e sinagoga era. Y meyra gente cay uchꞌamiobꞌ ucanseyaj.
ACT 19:9 Pero ayan ubꞌan cora winicobꞌ xeꞌ cay uqꞌuecꞌojse uyalmobꞌ upater lo que war acansenobꞌ umen e Pablo xeꞌ machi cꞌupseyanobꞌ. Y tamar era cay ojronobꞌ upater ubꞌir Cawinquirar tut tunor e gente tama e sinagoga. Entonces e Pablo uyacta e sinagoga y uqꞌueche ixin tunor tin e cay cꞌupseyanobꞌ tama e Jesús y ixiobꞌ esto tama inteꞌ escuela xeꞌ tuaꞌ inteꞌ ajcanseyaj xeꞌ ucꞌabꞌa Tirano. Y yajaꞌ cay canseyan ajqꞌuin ajqꞌuin.
ACT 19:10 Y bꞌan uche e Pablo tama chateꞌ año, y tamar era cꞌotoy uyubꞌiobꞌ uyojroner Cawinquirar tunor tin e turobꞌ tama e departamento Asia, motor tin e tuobꞌ e Israel y motor tin e majax tuobꞌ e Israel.
ACT 19:11 Y e Dios cay ucꞌampes e Pablo tuaꞌ uche e sian milagro tujam e gente era.
ACT 19:12 Y ayan meyra sian milagro xeꞌ war achena umen e Pablo que jay ajrer taca aqꞌuejcha axin inteꞌ ubꞌujc e Pablo o inteꞌ payuj tuaꞌ xeꞌ pijchbꞌir umener entonces uche atzꞌacpa tin e ajmuacobꞌ. Y tunor tin e ayan e mabꞌambꞌan mein tama uyalma acꞌapa aloqꞌuesna conda jajya e bꞌujc o e payuj cocha era tama ujorobꞌ umen e gente.
ACT 19:13 Pero ayan cora winicobꞌ xeꞌ tuobꞌ e Israel xeꞌ war axanobꞌ xeꞌ war uturbꞌa ubꞌobꞌ tuaꞌ uyajnesobꞌ axin e mabꞌambꞌan meinobꞌ lo que ayan tama e gente. Y jaxirobꞌ cay ubꞌijnuobꞌ tuaꞌ ucꞌampesobꞌ ucꞌabꞌa Cawinquirar Jesús tuaꞌ uyajnesobꞌ e mabꞌambꞌan meinobꞌ. Entonces lo que uchiobꞌ cay uyareobꞌ e mabꞌambꞌan mein y che: —Cawareox tama ucꞌabꞌa e Jesús xeꞌ war uchecsu e Pablo que loqꞌuenic quiquic era. Bꞌan cay uyareobꞌ e mabꞌambꞌan mein e winicobꞌ xeꞌ tuobꞌ e Israel era.
ACT 19:14 Y ayan inteꞌ winic tuaꞌ e Israel xeꞌ ucꞌabꞌa Esceva xeꞌ jax inteꞌ uwinquir e inmojr sacerdotiobꞌ, xeꞌ ayan siete ut uyunenobꞌ.
ACT 19:15 Y bꞌan cay uchiobꞌ jaxirobꞌ, war ucꞌampes ucꞌabꞌa e Jesús tuaꞌ uyajnesobꞌ e mabꞌambꞌan meinobꞌ. Entonces conda cay ojronobꞌ cocha era tut inteꞌ mabꞌambꞌan mein, sutpa ojron e mabꞌambꞌan mein era tutobꞌ y che: —Pues e Jesús war innata, y war innata chi e Pablo. Pero nox, ¿chiox nox? che e mabꞌambꞌan mein uyare e siete uyunenobꞌ e Esceva era.
ACT 19:16 Y tamar era e winic xeꞌ chucur umen e mabꞌambꞌan mein tobꞌoy tujorobꞌ e siete winicobꞌ era y cay tzꞌojyi taca inteꞌ qꞌuijnar nojta y qꞌuecꞌo meyra tuaꞌ ucucru tunor e winicobꞌ era este que yobꞌornobꞌ y war alocꞌoy e chꞌich tutobꞌ y cꞌapa loqꞌuesna tunor ubꞌujcobꞌ umener, y locꞌoy ajniobꞌ tama e otot era pispis tunorobꞌ.
ACT 19:17 Y ixin tic taca e ojroner tamar lo que numuy taca e winicobꞌ era tama tunor e chinam Éfeso. Y tunor e gente xeꞌ tuobꞌ e Israel taca e gente xeꞌ majax tuobꞌ e Israel bꞌactobꞌ conda cay uyubꞌiobꞌ e ojroner era y cay ojronobꞌ meyra lo que galan tamar ucꞌabꞌa Cawinquirar Jesús.
ACT 19:18 Y ayan meyra gente xeꞌ cay cꞌupseyanobꞌ tama Cawinquirar Jesucristo. Y jaxirobꞌ yopobꞌ tut e Pablo y cay uchecsuobꞌ tunor e mabꞌambꞌanir lo que cay uchiobꞌ ixnix.
ACT 19:19 Y ayan meyra gente xeꞌ ajniromobꞌ ani y xeꞌ ajbꞌaxobꞌ ani xeꞌ cay utaresobꞌ e sian jun lo que ucꞌampesobꞌ ani tama tunor upatnarobꞌ y cay uputobꞌ tut tunor e gente. Y conda cay utziquiobꞌ cobꞌa atujri tunor e sian jun era jay axin ani umaniobꞌ otronyajr, axin atujri lo que erer atojya inteꞌ man tama inteꞌ tiempo de veintisiete año.
ACT 19:20 Y tamar era qꞌuecꞌo meyra e ajcꞌupesiajobꞌ tuaꞌ axin uchecsuobꞌ uyojroner Cawinquirar tut e gente. Y cay cꞌupseyanobꞌ meyra gente tama uyojroner Cawinquirar.
ACT 19:21 Entonces conda cꞌapa uche tunor era, e Pablo cay ubꞌijnu tuaꞌ axin uwarajse e ajcꞌupesiajobꞌ xeꞌ turobꞌ tama e departamento Macedonia y xeꞌ turobꞌ tama e departamento Acaya. Y de allí cꞌani asutpa axin tama e chinam Jerusalem otronyajr. Y de allí war ubꞌijnu tuaꞌ axin esto tama e chinam Roma.
ACT 19:22 Entonces e Pablo uyebꞌta ixin chateꞌ ajtacarsiaj tuaꞌ xeꞌ jax e Timoteo y e Erasto tuaꞌ axiobꞌ esto tama e departamento Macedonia, porque jaxir warto ucꞌani tuaꞌ aquetpa cora día tama e departamento Asia era.
ACT 19:23 Pues entonces tama e tiempo era checta inteꞌ nuxi qꞌuijnar upater uyojroner Cawinquirar.
ACT 19:24 Pues ayan inteꞌ winic xeꞌ ucꞌabꞌa Demetrio xeꞌ jax inteꞌ ajcheyaj chamen dios taca e plata xeꞌ war uche cora bꞌiqꞌuit otot xeꞌ lar uwirnar cocha e otot tiaꞌ war e chamen dios xeꞌ ucꞌabꞌa Diana. Y jaxir war uchꞌami meyra tumin tama e patnar era.
ACT 19:25 Entonces jaxir cay umorojse tunor e inmojr ajcheyaj chamen dios taca e plata y cay uyare e inmojr y che: —Winicox, nox era war inata que tama capatnar taca e plata war cachꞌami meyra tumin.
ACT 19:26 Pero nox war iwira y war iyubꞌi lo que war uche e Pablo que iraj iraj war axana war uyare tunor e gente que inteꞌ dios xeꞌ chembꞌir umen e winicobꞌ majax dios, y warix uche ucꞌupsiobꞌ e gente axin. Y majax jax taca tara tama e chinam Éfeso war uche cocha era, sino que tama tunor or e departamento Asia era ubꞌan.
ACT 19:27 Y tunor era imbꞌacꞌajr uwirnar porque bꞌajcꞌat axin asatpa tunor capatnar, y majax jax taca era sino que bꞌajcꞌat axin asatpa tunor utemploir e nuxi diosa xeꞌ ucꞌabꞌa Diana, y este que watar oꞌjron e gente upater cadiosir era que matucꞌa ucꞌampibꞌir. Y majax bueno tunor era porque tunor e gente tama e departamento Asia y e gente tama tunor or e rum war uyujtzꞌiobꞌ ut cadiosir era, che e Demetrio war uyare uyet ajpatnarir tama e plata.
ACT 19:28 Entonces conda cꞌapa uyubꞌiobꞌ tunor era, e winicobꞌ qꞌuijnobꞌ meyra y cay aruobꞌ tunorobꞌ taca inteꞌ nuxi nuc y chenobꞌ: —Nojta cadiosir xeꞌ ucꞌabꞌa Diana tara tama e chinam Éfeso. Bꞌan war aruobꞌ taca inteꞌ nuxi nuc tunor e sian winicobꞌ era.
ACT 19:29 Y tamar era quetpa nutꞌur utobꞌ meyra gente tama tunor e chinam era tamar lo que numuy. Entonces ujajpiobꞌ e Chayo y e Aristarco xeꞌ jax xeꞌ war axanobꞌ taca e Pablo y xeꞌ tariobꞌ tama e departamento Macedonia, y uqꞌuechiobꞌ ixin esto tama e alcaldía tiaꞌ cay umorojse ubꞌobꞌ e winicobꞌ era.
ACT 19:30 Y e Pablo war ubꞌijnu que cꞌani oꞌchoy upejca tunor e winicobꞌ era, pero tin e ajcꞌupesiajobꞌ tama Cawinquirar machi uyactobꞌ uche.
ACT 19:31 Pues ayan cora nuquir winicobꞌ tama e departamento Asia era xeꞌ atzay uwirobꞌ e Pablo xeꞌ uyebꞌtobꞌ ixin inteꞌ ojroner tuaꞌ uyareobꞌ e Pablo que: —Ira iyochoy tiaꞌ war umorojse ubꞌobꞌ e gente era, che e ojroner era xeꞌ uyebꞌtobꞌ tari tut e Pablo.
ACT 19:32 Pero tujam tin e morojsebꞌir turobꞌ tama e alcaldía era ayan tin e war aruobꞌ taca inteꞌ nuxi nuc tamar lo que war ubꞌijnuobꞌ, y ayan tin e war aruobꞌ taca inteꞌ nuxi nuc tamar lo que intiachix, porque e winicobꞌ era machix war unatobꞌ tucꞌa war uchiobꞌ, intaca turobꞌ yajaꞌ, y war unatobꞌ que war aqꞌuijnobꞌ tunorobꞌ y war ubꞌijnuobꞌ cocha era y chenobꞌ: —¿Tucꞌa tuaꞌ turon tara? chenobꞌ e winicobꞌ era.
ACT 19:33 Pero tin e tuobꞌ e Israel uqꞌuechiobꞌ ixin e Alejandro y uturbꞌobꞌ tut tunor e winicobꞌ era. Y ayan tin e tujam e winicobꞌ era xeꞌ cay uchecsu tut e Alejandro lo que war anumuy. Y tamar era jaxir cay uche ucꞌabꞌ tut e winicobꞌ tuaꞌ aturuanobꞌ tzꞌustaca, cꞌani ani uyareobꞌ que majax jaxirobꞌ xeꞌ tuobꞌ e Israel xeꞌ war uchiobꞌ anumuy tunor era, sino que jax e Pablo.
ACT 19:34 Pero conda quetpa chequer tut e gente que jaxir jax inteꞌ winic tuaꞌ e Israel, cay aruobꞌ taca inteꞌ nuxi nuc tama dos hora y chenobꞌ: —Nojta cadiosir xeꞌ jax e Diana xeꞌ tuon tama e chinam Éfeso era. Bꞌan uchiobꞌ tama dos horas.
ACT 19:35 Entonces achpa inteꞌ winic xeꞌ jax e secretario tama e alcaldía xeꞌ cay ujachi ucꞌabꞌ tut e gente tuaꞌ aturuanobꞌ tzꞌustaca, y ojron y che: —Winicox xeꞌ tuox e chinam Éfeso, tunor e winicobꞌ tama tunor or e rum war unatobꞌ que non tama cachinam era ucꞌani tuaꞌ cacojco e templo tuaꞌ e nuxi diosa xeꞌ ucꞌabꞌa Diana, y que ucꞌani tuaꞌ cacojco e tun xeꞌ lar uwirnar cocha e Diana era xeꞌ ojri tari tut e qꞌuin ticoit.
ACT 19:36 Y cocha mamajchi erer uche ubꞌa que majax bꞌan tunor era, pues nox ucꞌani tuaꞌ isisijres ibꞌa coner era tuaꞌ machi ayopobꞌ tin e militar tuaꞌ machi canumse cabꞌa lo que más intran uwirnar.
ACT 19:37 Porque tunor e winicobꞌ xeꞌ taresna imener tara, matucꞌa war uchiobꞌ y machi war uqꞌuijnesobꞌ e nuxi diosa xeꞌ ucꞌabꞌa Diana.
ACT 19:38 Y jay e Demetrio taca e inmojr tin e ajcheyaj chamen dios taca e plata ayan lo que cꞌani aqꞌuecranobꞌ tamar, ucꞌani tuaꞌ ayopobꞌ tut e alcalde o tut inteꞌ juez tuaꞌ uwirobꞌ, y ayan e sian ajcꞌamparobꞌ tara ubꞌan jay cꞌani utuchꞌiobꞌ e winicobꞌ era, porque ayan lo que uyubꞌi uchiobꞌ tuaꞌ ucorpes ubꞌobꞌ inteꞌ intiobꞌ.
ACT 19:39 Y jay ayanto más xeꞌ war icꞌani, erer ixojron tamar conda ixixin imorojse ibꞌa bꞌan cocha ucꞌani e ley.
ACT 19:40 Pero lo que war anumuy coner era tamar e nuxi qꞌuijnar lo que war iche era, bꞌajcꞌat watar e jefe militar tuaꞌ utuchꞌion que non revolusionarion, y ma cocha erer cacorpes cabꞌa jay bꞌan ani anumuy. Y tamar era nox ucꞌani tuaꞌ iwacta tunor era wacchetaca. Bꞌan che e secretario tuaꞌ e alcalde uyare tunor e sian winicobꞌ xeꞌ morojsebꞌir turobꞌ era.
ACT 19:41 Pues conda cꞌapa ojron cocha era, uyare tunor e winicobꞌ tuaꞌ axiobꞌ tama uyototobꞌ, y bꞌan uchiobꞌ.
ACT 20:1 Pues entonces conda cꞌapa tunor e nuxi qꞌuijnar lo que war uchiobꞌ e sian winicobꞌ era, locꞌoy ixin e Pablo tuaꞌ upejca tunor tin e ajcꞌupesiajobꞌ tama Cawinquirar tuaꞌ utꞌabꞌse uyalmobꞌ y tuaꞌ uyare que jaxir cꞌani alocꞌoy era. Y entonces ixin umeqꞌue inteꞌ inteꞌ hermano, y de allí locꞌoy ixin tuaꞌ acꞌotoy tama e departamento Macedonia.
ACT 20:2 Y tamar uxambꞌar e Pablo war axana war uwarajse tunor e ajcꞌupesiajobꞌ tama inteꞌ inteꞌ lugar tiaꞌ war axin, y war utꞌabꞌse uyalmobꞌ e ajcꞌupesiajobꞌ tic taca tiaꞌ ixin este que cꞌotoy tama e lugar Grecia.
ACT 20:3 Entonces e Pablo quetpa tama e lugar era tama inteꞌ tiempo de tres mes, pero conda turuto yajaꞌ cay ubꞌijnu que cꞌani asutpa axin esto tama e departamento Siria otronyajr, y que cꞌani axin tama inteꞌ barco tor e jaꞌ. Pero wacchetaca cꞌotoy unata que e gente tuaꞌ e Israel xeꞌ turobꞌ tama e departamento Siria war ubꞌijnuobꞌ tuaꞌ uchamsiobꞌ jaxir. Y tamar era e Pablo cay ubꞌijnu tuaꞌ machi axin tujor e jaꞌ sino que ubꞌijnu tuaꞌ axin tama e bꞌir tuaꞌ anumuy tama e departamento Macedonia tuaꞌ acꞌotoy tiaꞌ erer uchꞌami intex barco más bꞌana yajaꞌ.
ACT 20:4 Y cay xanobꞌ cora ajcꞌupesiajobꞌ tacar tama uxambꞌar era. Pues cay xana inteꞌ ajcꞌupesiaj taca e Pablo xeꞌ ucꞌabꞌa Sópater xeꞌ uyunen e Pirro xeꞌ tuaꞌ e chinam Berea. Y cay xana e Aristarco y inteꞌ ajcꞌupesiaj xeꞌ ucꞌabꞌa Segundo xeꞌ tuaꞌ e chinam Tesalónica. Y cay xana taca e Pablo e Chayo xeꞌ tuaꞌ e chinam Derbe, y cay xana e Timoteo, y e Tíquico y e Trófimo xeꞌ tuobꞌ e departamento Asia.
ACT 20:5 Pero tunor e ajcꞌupesiajobꞌ era ixiobꞌ bꞌajxan que non y quetpa tuaꞌ ucojcon tama e chinam Tróas. Y nen xeꞌ Lucasen ixien taca e Pablo.
ACT 20:6 Entonces cꞌotoyon tama e chinam Filipos, y yajaꞌ canumse e nojqꞌuin tiaꞌ ucꞌuxiobꞌ e pan xeꞌ matucꞌa e levadura tamar. Y de allí tꞌabꞌay ixion tama inteꞌ barco tuaꞌ calocꞌoy caxin, y xanon tor e jaꞌ tama e barco era cinco día tuaꞌ cacꞌotoy tama e chinam Tróas tiaꞌ quetpon tama inteꞌ semana. Y yajaꞌ catajwi cabꞌa taca e inmojr ajcꞌupesiajobꞌ xeꞌ ixiobꞌ bꞌajxan.
ACT 20:7 Pues entonces tama e bꞌajxan día tama e semana xeꞌ jax inteꞌ día Domingo cay camorojse cabꞌa tunoron xeꞌ ajcꞌupesiajon tama Cawinquirar tuaꞌ cache e santa cena. Y e Pablo war ucanse tunor e ajcꞌupesiajobꞌ. Pero cocha jaxir quetpa tuaꞌ alocꞌoy tama otronteꞌ día machi uyacta e canseyaj este que cꞌotoy uyuxin e acbꞌar.
ACT 20:8 Y tiaꞌ war camorojse cabꞌa jax inteꞌ cuarto tichan tama e uxteꞌ ut e otot tama e otot era, y tzꞌajpesbꞌir meyra lámpara y tamar era quetpa inqꞌuijn coit tunoron macu.
ACT 20:9 Y ayan inteꞌ chꞌom sitz xeꞌ ucꞌabꞌa Eutico y jaxir war aturuan tutiꞌ inteꞌ ventana tichan tiaꞌ turon war uyubꞌi ucanseyaj e Pablo. Pero cocha war oꞌjron meyra e Pablo tama ucanseyaj era, jajpna umen e waynij e chꞌom sitz era, y cocha wayan machi unata tucꞌa hora ojri ixin esto tama ut e rum patir. Y conda ixiobꞌ e gente tuaꞌ uwirobꞌ tucꞌa numuy, utajwiobꞌ que chamen chꞌar y cay ujachiobꞌ.
ACT 20:10 Entonces ecmay ixin e Pablo ubꞌan tuaꞌ uwira tucꞌa war anumuy, y conda yopa tut tiaꞌ chꞌar e chꞌom sitz uyacta ubꞌa ixin tuaꞌ umeqꞌue, y de allí uyare e ajcꞌupesiajobꞌ y che: —Ira ixbꞌacta, bꞌixir e chꞌom sitz era, che e Pablo.
ACT 20:11 Entonces tꞌabꞌay ixin e Pablo otronyajr y cay uxere e pan, y de allí cay wiobꞌ tunorobꞌ, y de allí cayto ojron este que sacojpa, y de allí locꞌoy ixin e Pablo.
ACT 20:12 Y e chꞌom sitz uqꞌuechiobꞌ ixin esto tama uyotot bꞌixir. Y tunor e ajcꞌupesiajobꞌ war atzayobꞌ.
ACT 20:13 Pues entonces quetpa que e Pablo cꞌani axana tuaꞌ acꞌotoy esto tama e chinam Asón. Pero non tꞌabꞌay ixion tama inteꞌ barco y locꞌoyon tama e chinam Tróas y cꞌotoyon tama e chinam Asón bꞌajxan que e Pablo.
ACT 20:14 Entonces conda catajwi cabꞌa taca e Pablo cay tꞌabꞌay ixion tama inteꞌ nuxi barco tunoron, y ixion esto tama e chinam Mitilene.
ACT 20:15 Y entonces locꞌoy ixion tama e barco era y numuyon esto tama e lugar xeꞌ ucꞌabꞌa Quío tama inteꞌ día, y de allí tama otronteꞌ día cꞌotoyon tama e lugar Samos tiaꞌ acꞌotoy awawan e barco. Quetpon yajaꞌ tuaꞌ cajiri tama e chinam Trogilio tama inteꞌ día. Tamar otronteꞌ día ixion esto tama e chinam Mileto.
ACT 20:16 Pero e Pablo machi ucꞌani tuaꞌ aquetpa tama e departamento Asia meyra tiempo, y tamar era machi ixion tama e chinam Éfeso. Pues jaxir war ucꞌani tuaꞌ acꞌotoy wacchetaca tama e chinam Jerusalem tuaꞌ unumse e nojqꞌuin Pentecostés.
ACT 20:17 Pues entonces conda turuto e Pablo tama e chinam Mileto era uyebꞌta ixin inteꞌ ojroner esto tama e chinam Éfeso tuaꞌ upejcobꞌ tin e líder tama e grupo ajcꞌupesiajobꞌ tuaꞌ acꞌotoyobꞌ tama e chinam Mileto.
ACT 20:18 Entonces conda cꞌotoyobꞌ tin e líder era e Pablo cay ojron tacarobꞌ y che: —¿War ca inata cocha turu niwirnar conda wartocto incꞌotoy tiut bꞌajxan tama e departamento Asia esto conda locꞌoyen? xeꞌ cay uyubꞌi e Pablo tuobꞌ. Y jaxirobꞌ chenobꞌ: —Canata ya, chenobꞌ.
ACT 20:19 Entonces e Pablo uyare tin e líder y che: —Pues tunor e tiempo conda turen tacarox inche tunor upatnar Cawinquirar taca inteꞌ manxujresiaj y taca meyra uqꞌuer, porque ayan lo que cay uchien innumse nibꞌa meyra xeꞌ jax lo que ixin uchiobꞌ nipater cora winicobꞌ xeꞌ tuobꞌ e Israel.
ACT 20:20 Y nox war inata que ma tiaꞌ inwacta tuaꞌ incansiox tunor lo que erer utacriox tuaꞌ ixqꞌuecꞌo ixxana tama ubꞌir e Dios, y que ixien inchecsu uyojroner e Dios tut tunor e gente ixin y tama inteꞌ inteꞌ iyotot nox ubꞌan.
ACT 20:21 Y cay inchecsu tut tin e tuobꞌ e Israel y tut tin e majax tuobꞌ e Israel que ucꞌani tuaꞌ uyactobꞌ tunor umabꞌambꞌanirobꞌ y que ucꞌani tuaꞌ acꞌupseyanobꞌ tama Cawinquirar Jesús.
ACT 20:22 Y era war inxin esto tama e chinam Jerusalem umen que bꞌan war ubꞌijresen tuaꞌ inche Unawalir e Dios. Pero nen machi innata tucꞌa tuaꞌ innumse nibꞌa conda incꞌotoy yajaꞌ.
ACT 20:23 Ajtaca innata que war anrena umen Unawalir e Dios tic taca tiaꞌ inxin que ucꞌani tuaꞌ onsena tama e cárcel, y que ucꞌani tuaꞌ innumse nibꞌa meyra.
ACT 20:24 Pero machix war imbꞌijnu tama tunor lo que aquetpa tuaꞌ innumse nibꞌa motor que ucꞌani ani tuaꞌ inxin inchamay tama Niwinquirar Jesús. Nen lo que war incꞌani inche jax era: Tuaꞌ acꞌapa inche tunor e patnar lo que uyajqꞌuen Niwinquirar Jesús xeꞌ jax tuaꞌ inchecsu uyojroner e Dios tama e corpesiaj y tama utacarsiaj tut e gente axin.
ACT 20:25 ’Pero era cꞌotoy innata que machi ixto tuaꞌ insutpa inwira iut otronyajr xeꞌ turox conda cay inchecsu uchinam e Dios tut e gente tiaꞌ turox.
ACT 20:26 Y tamar era cꞌani inwareox que mix jax tamaren tuaꞌ aquetpa jay ayan tin e machi cꞌotoy cꞌupseyanobꞌ tama Cawinquirar Jesús tiaꞌ turox.
ACT 20:27 Porque nen matucꞌa inmuqui tiut tamar lo que canoen tama e Dios, sino que cay incansiox tunor e canseyaj lo que ayan tama uyojroner e Dios.
ACT 20:28 Y era que cꞌanix inlocꞌoy cꞌani inwareox tuaꞌ icojco ibꞌa inteꞌ intiox y tuaꞌ icojco tunor e inmojr ajcꞌupesiajobꞌ porque nox quetpox líder tuaꞌ tunor e ajcꞌupesiajobꞌ era umen que bꞌan pejcnox umen Unawalir e Dios tuaꞌ iche. Pues tunor e ajcꞌupesiajobꞌ era mambꞌirobꞌ umen Cawinquirar Jesucristo conda ixin uwechꞌe uchꞌichꞌer tut e cruz.
ACT 20:29 Y innata que conda inlocꞌoy tara axin watar tin e cꞌani umajresox y xeꞌ cꞌani ani utijresox inyajrer xeꞌ ajcꞌupesiajox tama Cawinquriar tuaꞌ machi ixto ixcꞌupseyan tamar. Pues e winicobꞌ era bꞌanobꞌ cocha inteꞌ nuxi coyote xeꞌ acꞌotoy wacchetaca tuaꞌ ucꞌuxi inteꞌ yar chuchu oveja conda uwira que machi turu uyajcojc.
ACT 20:30 Y motor tijam nox ayan tin e tuaꞌ aꞌchpa xeꞌ axin ucanse lo que majax erach tuaꞌ uxeriox y tuaꞌ uqꞌueche axin tin e axin acꞌupseyan tamar lo que war acanseyan jaxir.
ACT 20:31 Y tamar era iwiric tuaꞌ machi iwacta ibꞌa tuaꞌ ixmajresna. Niwermanuox, cꞌaric imener conda turuanen tacarox tres año que tama e día y tama e acbꞌar ubꞌan machi inwacta tuaꞌ inwareox lo que ucꞌani Cawinquirar este que war unqꞌui inche.
ACT 20:32 ’Pues entonces niwermanuox, cꞌani inwajcꞌox tama ucꞌabꞌ e Dios y tama uyojroner utacarsiaj, porque e ojroner era erer uqꞌuecꞌojsiox y erer uyajcꞌox inteꞌ herencia tujam tunor e inmojr xeꞌ sicbꞌabꞌirobꞌ umen e Dios.
ACT 20:33 Y nen matucꞌa cay unsre tuaꞌ inchꞌami tuaꞌ otronteꞌ, nien e tumin y nien e bꞌujc.
ACT 20:34 Y nox war inata ubꞌan que nen cay patnen taca nicꞌabꞌ tuaꞌ uyubꞌien inwese nibꞌa, y tuaꞌ uyubꞌien inwese tin e war axanobꞌ tacaren ubꞌan.
ACT 20:35 Bꞌan cay inche tuaꞌ inwirsiox que inteꞌ intion ucꞌani tuaꞌ capatna tuaꞌ uyubꞌion catacre tin e tzajtaca ut, bꞌan cocha che inteꞌ ojroner tuaꞌ Cawinquirar Jesús xeꞌ che: “Más chojbꞌesbꞌir ut tin e uyajcꞌu inteꞌ tacarsiaj que tin e uchꞌami e tacarsiaj era.” Bꞌan che e Pablo taca tin e líder tama e grupo ajcꞌupesiajobꞌ xeꞌ tariobꞌ tama e chinam Éfeso.
ACT 20:36 Entonces conda cꞌapa tunor e ojroner era, e Pablo cotuan taca e inmojr era y cay ucꞌajti taca e Dios tama tunor e ajcꞌupesiajobꞌ xeꞌ tariobꞌ tama e chinam Éfeso.
ACT 20:37 Y tunorobꞌ war oyqꞌuiobꞌ y cay umeqꞌue ubꞌobꞌ este que cay utzꞌujtzꞌiobꞌ ut e Pablo.
ACT 20:38 Y tunorobꞌ quetpobꞌ tzajtaca utobꞌ que cꞌani alocꞌoy e Pablo y que arobꞌnobꞌ umener que machi ixto tuaꞌ asutpa uwirobꞌ ut otronyajr. Entonces ixiobꞌ taca e Pablo esto tiaꞌ tuaꞌ ujajpi e barco.
ACT 21:1 Pues entonces cawacta tunor e ajcꞌupesiajobꞌ xeꞌ tariobꞌ tacaron y tꞌabꞌayon tama e barco tuaꞌ caxin esto tama e chinam Cos. Y tama otronteꞌ día ixion esto tama inteꞌ chinam xeꞌ ucꞌabꞌa Rodas, y de allí ixion esto tama inteꞌ chinam xeꞌ ucꞌabꞌa Pátara.
ACT 21:2 Pues tama e chinam era catajwi inteꞌ nuquir barco xeꞌ war axin esto tama e chinam Fenicia, y ochoyon y ixion tamar.
ACT 21:3 Y tama e xambꞌar era tor e jaꞌ numuyon tuyejtzꞌer inteꞌ lugar tiaꞌ ayan e rum tuyuxin e jaꞌ xeꞌ ucꞌabꞌa Chipre xeꞌ quetpa tama catzꞌejcꞌabꞌ, y ixion cꞌotoyon esto tama e departamento Siria. Y e barco quetpa tuaꞌ ulocse lo que ayan tamar tama e chinam era xeꞌ jax e Tiro, y tamar era ecmayon tama e barco y ochoyon tama e chinam era.
ACT 21:4 Y catajwi cabꞌa taca cora ajcꞌupesiajobꞌ tama Cawinquirar tama e chinam era y quetpon tacarobꞌ siete día. Pero jaxirobꞌ arobꞌbꞌirobꞌ umen Unawalir e Dios que conda acꞌotoy e Pablo tama e chinam Jerusalem que axin achecta lo que imbꞌacꞌajr uwirnar tut, y tamar era uyareobꞌ que más ani bueno que machi axin.
ACT 21:5 Pero conda cꞌapa e siete día era cꞌotoy e hora tuaꞌ calocꞌoy. Entonces ixiobꞌ tunor e ajcꞌupesiajobꞌ era tacaron taca tunor uwixcarobꞌ y taca umaxtacobꞌ esto tutiꞌ e chinam y esto que cꞌotoyon tutiꞌ e jaꞌ. Y yajaꞌ cay cotuanon tunoron tuaꞌ cacꞌajti taca e Dios.
ACT 21:6 Entonces cay cawareobꞌ que cꞌani caxin y cay cameqꞌue cabꞌa tunoron, y de allí tꞌabꞌayon tama e barco tuaꞌ calocꞌoy, y e ajcꞌupesiajobꞌ era sutpa ixiobꞌ tama uyototobꞌ.
ACT 21:7 Pues entonces locꞌoyon tama e chinam Tiro era tama e barco y ixion tor e jaꞌ esto tama e chinam Tolemaida. Y yajaꞌ cawacta e barco y catajwi cabꞌa taca cora ajcꞌupesiajobꞌ tama Cawinquirar y quetpon tacarobꞌ tama inteꞌ día. Y de allí quetpa tuaꞌ caxana tama e bꞌir tuaꞌ cacꞌotoy tama e chinam Jerusalem.
ACT 21:8 Y tama otronteꞌ día e Pablo y tunoron xeꞌ war caxana tacar locꞌoy ixion esto tama e chinam Cesarea. Y yajaꞌ ixion tama uyotot e Felipe xeꞌ jax inteꞌ evangelista y xeꞌ jax inteꞌ tujam e siete ajtacarsiajobꞌ lo que ayan tama e chinam era, y quetpon tacar.
ACT 21:9 Y e Felipe era ayan cuatro chꞌom ijchꞌoctac tuaꞌ, y jaxirobꞌ ayan ucꞌampibꞌirobꞌ tuaꞌ uchꞌamiobꞌ inteꞌ ojroner tuaꞌ e Dios y tuaꞌ asutpa uchecsu e ojroner era tut e gente axin.
ACT 21:10 Entonces conda ya turon yajaꞌ meyra día cꞌotoy inteꞌ winic xeꞌ ucꞌabꞌa Agabo xeꞌ tari tama e departamento Judea. Jaxir jax inteꞌ winic xeꞌ ayan ucꞌampibꞌir tuaꞌ uchꞌami inteꞌ ojroner tuaꞌ e Dios y tuaꞌ asutpa uchecsu e ojroner era tut e gente otronyajr.
ACT 21:11 Y jaxir cꞌotoy ticoit y cay uchꞌami ucajchibꞌ unac e Pablo y cay ucachi uyoc y ucꞌabꞌ tacar y che: —Pues Unawalir e Dios war uyaren que e winicobꞌ tuaꞌ e Israel tama e chinam Jerusalem cꞌani ucachiobꞌ uyajyum e cajchibꞌ era, y de allí cꞌani uyajcꞌuobꞌ tama ucꞌabꞌobꞌ e winicobꞌ xeꞌ majax tuobꞌ e Israel. Bꞌan che e Agabo uyare e Pablo.
ACT 21:12 Pues conda cꞌapa coybꞌi tunor e ojroner era bꞌacton tunoron xeꞌ ajcꞌupesiajon tama Cawinquirar tama e chinam Cesarea era y cay caware meyra e Pablo tuaꞌ machi ixto axin tama e chinam Jerusalem.
ACT 21:13 Pero e Pablo ojron y che: —¿Tucꞌa tuaꞌ war ixaru meyra cocha era este que war iche acꞌuxun niwalma? Nen era turenix tuaꞌ inxin inche tunor lo que ucꞌani e Dios. Y jay jaxir ucꞌani tuaꞌ incajcha yajaꞌ, bueno. Y jay ucꞌani tuaꞌ inxin inchamesna tama e chinam Jerusalem umen taca que war incꞌupseyan tama Niwinquirar Jesús, bueno ubꞌan, che e Pablo.
ACT 21:14 Y cocha machi uyubꞌion cachꞌabꞌu uyalma, cawacta bꞌan taca, y caware que: —Pues chempac tacaret bꞌan cocha ucꞌani Cawinquirar. Bꞌan caware.
ACT 21:15 Y conda turuanon cora día taca e ajcꞌupesiajobꞌ era cay costes cabꞌa y locꞌoy ixion esto tama e chinam Jerusalem.
ACT 21:16 Y ayan cora ajcꞌupesiajobꞌ xeꞌ ixiobꞌ tacaron ubꞌan xeꞌ tuobꞌ e chinam Cesarea, y tujamobꞌ ayan inteꞌ winic xeꞌ ucꞌabꞌa Mnasón xeꞌ tuaꞌ e lugar Chipre xeꞌ cay cꞌupseyan tama Cawinquirar ixnix, y ixion tunoron tama uyotot porque jaxir quetpa tuaꞌ uyajcꞌon tiaꞌ tuaꞌ caturuan.
ACT 21:17 Entonces conda cꞌotoyon tama e chinam Jerusalem war atzayobꞌ uchꞌamion tunor e ajcꞌupesiajobꞌ tama Cawinquirar.
ACT 21:18 Y tama otronteꞌ día ixion tunoron taca e Pablo tuaꞌ cawarajse e Santiago, y yajaꞌ turobꞌ tunor e nuquir winicobꞌ tuaꞌ e grupo ajcꞌupesiajobꞌ ubꞌan.
ACT 21:19 Y e Pablo, conda cꞌapa upejca tunorobꞌ, cay uyareobꞌ tama tunor lo que cay uche e Dios tujam e gente xeꞌ majax tuobꞌ e Israel, y war uyare cobꞌa war acꞌampesna umen e Dios tuaꞌ uchecsu ucꞌotorer e Dios tujam e gente yajaꞌ.
ACT 21:20 Y conda uyubꞌiobꞌ tunor era cay utattzꞌiobꞌ ucꞌabꞌa e Dios tama tunor lo que war achena tujam e gente xeꞌ majax tuobꞌ e Israel. Entonces e nuquir winicobꞌ era cay uyareobꞌ e Pablo y chenobꞌ: —Pero hermano Pablo, cꞌani cawaret era que tara tujam e gente xeꞌ tuobꞌ e Israel ayan meyra sian gente xeꞌ cay cꞌupseyanobꞌ tama Cawinquirar Jesús, pero inteꞌ intiobꞌ e ajcꞌupesiajobꞌ era war uyareonobꞌ que ucꞌani tuaꞌ cacꞌupseyan tut uley e Moisés ubꞌan.
ACT 21:21 Pues ayan inteꞌ ojroner xeꞌ war alocꞌoy tara que net conda turet najtir war acanse tunor e gente xeꞌ tuobꞌ e Israel que conda acꞌotoy acꞌupseyanobꞌ tama Cawinquirar Jesucristo que machi ixto tuaꞌ acꞌupseyanobꞌ tut uley e Moisés, y que war acanse que machi ixto tuaꞌ axujra imbꞌijc uqꞌuewerir utejromar e maxtacobꞌ, y que machi ixto tuaꞌ ucojcobꞌ e onian canseyaj tuaꞌ e gente tuaꞌ e Israel.
ACT 21:22 Y e gente era war aqꞌuijnobꞌ tamar acanseyaj era, y conda acꞌotoy unatobꞌ que turet tara tama e chinam Jerusalem, cꞌani axin umorojse ubꞌobꞌ y machi canata tucꞌa tuaꞌ ubꞌijnu uchiobꞌ tacaret.
ACT 21:23 Pero lo que ucꞌani tuaꞌ ache jax era: Ayan tara cuatro winicobꞌ xeꞌ ayan lo que cay uyareobꞌ e Dios que cꞌani uchiobꞌ tut, y coner ucꞌani tuaꞌ acꞌapa uchiobꞌ.
ACT 21:24 Entonces net era qꞌuecheobꞌ chic tacaret y chen lo que acay uchiobꞌ e gente tuobꞌ e Israel tuaꞌ aloqꞌuespa e bꞌonemar tamarobꞌ, y net erer atoyi tunor lo que atujri tama tunor era, y erer axin ususiobꞌ ujorobꞌ. Y tamar era cꞌani unatobꞌ tin e tuobꞌ e Israel que net war icꞌupseyan tut uley e Moisés ubꞌan. Y tamar era acꞌotoy unatobꞌ que majax bꞌan cocha cay uyubꞌiobꞌ tamaret.
ACT 21:25 Pero tin e majax tuobꞌ e Israel xeꞌ cay cꞌupseyanobꞌ tama Cawinquirar Jesucristo cawareobꞌix tama inteꞌ carta que machi tuaꞌ acꞌupseyanobꞌ tut tunor lo que chꞌar tzꞌijbꞌabꞌir tama uley e Moisés, pero que ayan lo que ucꞌani tuaꞌ uyacta uchiobꞌ xeꞌ jax era: Que machi ixto tuaꞌ ucꞌuxi e wer xeꞌ turbꞌana tama uyaltar inteꞌ chamen dios, y machix tuaꞌ ucꞌuxi e chꞌich, y que machi ixto tuaꞌ asutpa ucꞌuxi inteꞌ arac xeꞌ cotbꞌir unuc, y machix tuaꞌ asutpobꞌ axanobꞌ tacar e ixictac o e winicobꞌ xeꞌ majax tuobꞌ. Bꞌan che e Santiago y e nuquir winicobꞌ tama e grupo ajcꞌupesiajobꞌ era tut e Pablo.
ACT 21:26 Pues entonces tama otronteꞌ día e Pablo uqꞌueche ixin e cuatro winicobꞌ tacar tuaꞌ axin uyustes ubꞌobꞌ tama uyalmobꞌ, y de allí e Pablo ixin ochoy tama e templo tuaꞌ uyare e sacerdote tucꞌa día tuaꞌ acꞌapa uyustes ubꞌobꞌ tuaꞌ uyubꞌi uyajcꞌuobꞌ e ofrenda inteꞌ intiobꞌ.
ACT 21:27 Y conda cꞌanix acꞌapa e siete día era conda war uyustes ubꞌobꞌ tuaꞌ uyubꞌi uyajcꞌuobꞌ e ofrenda, ayan cora winicobꞌ xeꞌ tuobꞌ e Israel xeꞌ tariobꞌ tama e departamento Asia xeꞌ cay uwirobꞌ que ya turu e Pablo macuir e templo, y tamar era cay ixin upucujcsiobꞌ tunor e gente este que ixiobꞌ ujajpiobꞌ e Pablo.
ACT 21:28 Y cay aruobꞌ taca inteꞌ nuxi nuc y chenobꞌ: —Winicox xeꞌ tuox e Israel, tacrenicon era porque e winic era jax xeꞌ war axana tic taca tama tunor or e rum war ucanse e gente axin que matucꞌa ucꞌampibꞌir tunor cachinam era, y war ucanse e gente axin que uley e Moisés machi ixto tuaꞌ acꞌupsena, y que catemplo era matucꞌa ucꞌampibꞌir, y de allí coner era war uyose cora winicobꞌ xeꞌ majax tuobꞌ e Israel macuir catemplo, y tamar era war ubꞌoni catemplo, che e winicobꞌ era xeꞌ war upucujcsiobꞌ e gente y xeꞌ war uqꞌuechiobꞌ axin e Pablo.
ACT 21:29 Pues e winicobꞌ era cay uwirobꞌ que war axana inteꞌ winic xeꞌ majax tuaꞌ e Israel taca e Pablo xeꞌ ucꞌabꞌa Trófimo xeꞌ tuaꞌ e chinam Éfeso, y tamar era uchebꞌiobꞌ que e winic era war aqꞌuejcha axin macuir e templo umen e Pablo.
ACT 21:30 Entonces tunor e gente tama e chinam era cay qꞌuijnobꞌ y cay upucujcse ubꞌobꞌ tama tunor lo que war anumuy era, y cay ajniobꞌ tuaꞌ acꞌotoyobꞌ tiaꞌ turu e Pablo, y tamar era cay uquerejbꞌobꞌ ixin e Pablo y ulocsiobꞌ patir e templo y wacchetaca umaquiobꞌ e nuxi puerta.
ACT 21:31 Y turix tuaꞌ uchamsiobꞌ e Pablo bꞌan taca conda cꞌotoy unata e comandante militar que war upucujcse ubꞌobꞌ tunor e gente tama e chinam Jerusalem era.
ACT 21:32 Entonces e comandante militar umorojse tunor usoldadobꞌ taca cora oficial y ixiobꞌ ajner esto tiaꞌ turu e sian gente era. Y conda irnobꞌ e comandante militar era y e sian soldadobꞌ umen e gente uyactobꞌ uyobꞌornar e Pablo.
ACT 21:33 Entonces e comandante militar ujajpi e Pablo y uyare tuaꞌ aquetpa cachbꞌir taca chateꞌ cadena, y de allí cay uyubꞌi tuaꞌ e gente que chi e Pablo y que tucꞌa uche.
ACT 21:34 Pero e nuquir winicobꞌ cay aruobꞌ taca inteꞌ nuxi nuc, y ayan inteꞌ xeꞌ war uyare inteꞌ ojroner y ayan otronteꞌ xeꞌ war uyare intex ojroner, y tamar era matucꞌa erer unata e comandante umen e nuxi aruar era. Entonces uyare tuaꞌ aqꞌuejcha axin e Pablo esto tama e cuartel militar.
ACT 21:35 Y conda cꞌotoyobꞌ tut e otot yajaꞌ xeꞌ jax e cuartel ya turobꞌ meyra sian winicobꞌ tut tiaꞌ tuaꞌ atꞌabꞌayobꞌ e soldadobꞌ axin y machi cꞌani uyactobꞌ atꞌabꞌayobꞌ taca e Pablo. Entonces e soldadobꞌ utꞌabꞌsiobꞌ e Pablo tichan taca ucꞌabꞌobꞌ tuaꞌ anumuyobꞌ tujam e sian winicobꞌ era este que ochoyobꞌ macuir e otot. Pues uchiobꞌ cocha era umen que e gente war aqꞌuijnobꞌ meyra upater e Pablo.
ACT 21:36 Porque tunor e winicobꞌ era war axiobꞌ tupat y war aꞌruobꞌ taca inteꞌ nuxi nuc y chenobꞌ: —Chamsenic e winic era, xeꞌ che e winicobꞌ era xeꞌ war aqꞌuijnobꞌ uwirobꞌ e Pablo.
ACT 21:37 Entonces conda e comandante militar era cꞌani ani uyose e Pablo macuir e cuartel, jaxir uyare e comandante y che: —¿Bueno ca toit jay onjron imbꞌijc taca tunor e winicobꞌ era? che e Pablo. Y e comandante militar sutpa uyare e Pablo y che: —¿O anata ca iyojron tama e ojroner griego?
ACT 21:38 Entonces ¿ma ca jax net xeꞌ ajlugaret Egipto y xeꞌ jaxtocto cay ache inteꞌ nuxi rebelión y xeꞌ cay alocse esto 4,000 winicobꞌ xeꞌ ajchamseyajobꞌ tama e choquem lugar? xeꞌ uyubꞌi e comandante militar era tuaꞌ e Pablo.
ACT 21:39 Entonces e Pablo uyare e comandante militar y che: —Machi. Nen era jax inteꞌ winic xeꞌ tuaꞌ e Israel. Cuxpen tama e chinam Tarso, y nen jax inteꞌ ciudadano tuaꞌ inteꞌ chinam xeꞌ nojta ucꞌampibꞌir tama e departamento Cilicia. Pero actanento onjron tut e winicobꞌ era, che e Pablo.
ACT 21:40 Entonces actana ojron e Pablo umen e comandante militar, y tamar era achpa wawan e Pablo tujor e petzꞌejbꞌir tun, y cay ujachi ucꞌabꞌ tut e sian winicobꞌ tuaꞌ aquetpobꞌ tzꞌustaca. Y conda chꞌancabꞌobꞌ tunor e winicobꞌ, cay ojron e Pablo tama e ojroner hebreo y che:
ACT 22:1 —Niwermanuox tara tama e Israel xeꞌ nipiarox y tunorox xeꞌ nuquir winicox, ubꞌinic lo que cꞌani inwareox tamar lo que cay inche ixnix era, che e Pablo.
ACT 22:2 Conda e gente cay uyubꞌi que e Pablo war oꞌjron tama uyojronerach xeꞌ jax e hebreo cay quetpobꞌ tzꞌustaca, y tamar era cay ojron e Pablo y che:
ACT 22:3 —Nen era jaxen inteꞌ winic xeꞌ tuen e Israel. Cuxpen tama e chinam Tarso tama e departamento Cilicia, pero tara tama e chinam Jerusalem chꞌien y cay canoen taca inteꞌ nuquir winic xeꞌ ucꞌabꞌa Gamaliel y tunorox war inata chi era. Y tamar era cay incani tunor uley e Moisés bꞌan cocha ucꞌupsiobꞌ tunor catata viejobꞌirobꞌ, y nen cay cꞌupseyanen tut e Dios tama tunor niwalma bꞌan cocha war iche nox tara coner.
ACT 22:4 Tama e tiempo xeꞌ numuy nen cay inche unumse ubꞌobꞌ meyra tunor tin e cay cꞌupseyanobꞌ tama e Jesús este que ayan tin e cay inchamse. Y tic taca tiaꞌ ixien cay inqꞌuechiobꞌ ixin esto tama e cárcel motor jay winicobꞌ o motor jay ixictac.
ACT 22:5 Y tin e aquetpa uwinquir e inmojr sacerdotiobꞌ y tunor e nuquir winicobꞌ tara erer uyareox coner que erach lo que war inwareox era y que jaxirobꞌ cay uyajqꞌuenobꞌ cora carta tuaꞌ inqꞌueche axin tama tin e tuaꞌ Israel tama e chinam Damasco. Entonces tama e tiempo yajaꞌ ixien esto tama e chinam Damasco tuaꞌ insicbꞌa tin e ajcꞌupesiajobꞌ tama e Jesús tuaꞌ incachiobꞌ intaresobꞌ esto tara tama e chinam Jerusalem tuaꞌ oꞌsenobꞌ tama e cárcel, che e Pablo.
ACT 22:6 Y warto oꞌjron e Pablo y che: —Entonces tama uyuxinar e día conda war inxin tuaꞌ incꞌotoy tama e chinam Damasco, intaca checta inteꞌ nuxi janchꞌaquenar xeꞌ ejpray tari tut e qꞌuin xeꞌ cꞌaxi taniwejtzꞌer.
ACT 22:7 Cucremen tut e rum y wacchetaca cay umbꞌi inteꞌ nuc xeꞌ ojron tacaren y che: “Saulo, Saulo, ¿tucꞌa tuaꞌ war aturbꞌa abꞌa tuaꞌ achien innumse nibꞌa?” che e nuc xeꞌ tari tama e janchꞌaquenar.
ACT 22:8 Entonces umbꞌi tuaꞌ e nuc era que: “¿Y chiet net era, Niwinquiret?” inware. Y e nuc uyaren y che: “Nen jax e Jesús xeꞌ tuaꞌ e chinam Nazaret xeꞌ war achien innumse nibꞌa meyra”, xeꞌ che e Jesús.
ACT 22:9 Y tin e war axanobꞌ tacaren cay uwirobꞌ e sian janchꞌaquenar era y bꞌactobꞌ meyra, pero machi uyubꞌiobꞌ e nuc lo que cay ojron tacaren.
ACT 22:10 Entonces nen ojronen taca e nuc otronyajr y inware: “Niwinquiraret, ¿tucꞌa acꞌani tuaꞌ inche?” inware e nuc. Y jaxir uyaren otronyajr y che: “Achpen quiqui tama axambꞌar era esto tama e chinam Damasco, y conda icꞌotoy cꞌani iyarobꞌna tucꞌa ucꞌani tuaꞌ ache”, che e Jesús.
ACT 22:11 Entonces achpen, pero umen que ejpray meyra e nuxi janchꞌaquenar, quetpa tajpem unacniut y matucꞌa inwira. Entonces tin e war axanobꞌ tacaren cay uchuquiobꞌ nicꞌabꞌ tuaꞌ uqꞌuechienobꞌ inxin esto tama e chinam Damasco.
ACT 22:12 ’Pues tama e chinam Damasco ayan inteꞌ winic xeꞌ ucꞌabꞌa Ananías xeꞌ war acꞌupseyan tut uley e Moisés iraj iraj, y tunor e gente tuaꞌ e Israel xeꞌ turobꞌ tama e chinam Damasco war utattzꞌiobꞌ e winic era.
ACT 22:13 Entonces yopa e Ananías tama e otot tiaꞌ turen y upejquen cocha era y che: “Hermano Saulo, chꞌama unacꞌoit otronyajr era”, che e Ananías. Y wacchetaca inchꞌami unacniut otronyajr, y eronen otronyajr.
ACT 22:14 Entonces sutpa ojron e Ananías otronyajr tacaren y che: “Cadiosir xeꞌ tuaꞌ catata viejobꞌirobꞌ cay usicbꞌet ixnix tuaꞌ anata tucꞌa ucꞌani jaxir, y tuaꞌ awira ut uman xeꞌ erach xeꞌ jax e Jesús, y tuaꞌ oybꞌi unuc conda war oꞌjron tacaret.
ACT 22:15 Porque aquetpa tuaꞌ iꞌxin aware lo que cay oybꞌi y lo que cay awira taca tunor e gente tama tunor or e rum.
ACT 22:16 Y era matucꞌa tuaꞌ acojco más. Achpen quiqui tuaꞌ ichꞌujya cocha war icꞌupseyan tama ucꞌabꞌa Cawinquirar Jesús tuaꞌ ipojca tama tunor amabꞌambꞌanir.” Bꞌan uyaren e Ananías, che e Pablo tut tunor e sian gente era.
ACT 22:17 Y che e Pablo: —Conda sutpa ixien esto tama e chinam Jerusalem, ixien tama e templo tuaꞌ incꞌajti taca e Dios. Y conda turen yajaꞌ checta inteꞌ nimayjut taniut.
ACT 22:18 Y tamar nimayjut era war inwira ut Niwinquirar y jaxir uyaren y che: “Achpen wacchetaca, loqꞌuen tama e chinam Jerusalem era porque e winicobꞌ machix tuaꞌ acꞌupseyanobꞌ tamar lo que iꞌxin awareobꞌ tamaren”, che Niwinquirar tama nimayjut era.
ACT 22:19 Entonces nen inware Niwinquirar cocha era: “Niwinquiraret, pero nen cꞌani inware tunor tin e war acꞌupseyanobꞌ tamaret tara tama e chinam Jerusalem que war inxana tama abꞌir coner porque jaxirobꞌ war unatobꞌ que nen cay inche meyra mabꞌambꞌanir upaterobꞌ conda cay ixien tama tunor e sian sinagoga tuaꞌ inqꞌuechiobꞌ axin tin e war acꞌupseyanobꞌ tamaret esto tama e cárcel y cay inwatzꞌiobꞌ ubꞌan.
ACT 22:20 Y conda chamesna e Esteban taca e tun umen e sian gente, nen ya waren ubꞌan war inwira tucꞌa war uchiobꞌ, y nen xeꞌ cay incojco ubꞌujcobꞌ tin e war uchamsiobꞌ”, xeꞌ inware Niwinquirar tama nimayjut.
ACT 22:21 Pero sutpa ojron otronyajr Niwinquirar y che: “Loqꞌuen tama e lugar era porque nen cꞌani inwebꞌtet iꞌxin innajt tuaꞌ aware e gente xeꞌ majax tuobꞌ e Israel cocha tuaꞌ acꞌotoy unatobꞌ chien nen”, che Niwinquirar tama nimayjut era, che e Pablo uyare tunor e sian winicobꞌ era.
ACT 22:22 Pues tunor e winicobꞌ war uyubꞌiobꞌ lo que arobꞌnobꞌ umen e Pablo, pero conda cay uyare que tut e gente xeꞌ majax tuobꞌ e Israel tuaꞌ axin, y que bꞌan arobꞌna umen e Dios, qꞌuijnobꞌ tunorobꞌ y cay aruobꞌ taca inteꞌ nuxi nuc y chenobꞌ: —Chamsenic e winic era, machi ixto tuaꞌ aquetpa bꞌixir tara tor e rum, che e sian winicobꞌ era xeꞌ war aꞌruobꞌ taca inteꞌ nuxi nuc upater e Pablo.
ACT 22:23 Y bꞌan taca quetpobꞌ que war aꞌruobꞌ taca inteꞌ nuxi nuc y war uxixiobꞌ ut ubꞌujcobꞌ axin, y war upusiobꞌ axin e tanlum tichan tama e icꞌar.
ACT 22:24 Y tamar era e comandante militar uyare e soldadobꞌ tuaꞌ uqꞌuechiobꞌ axin e Pablo macuir e cuartel y uyare tuaꞌ uwatzꞌiobꞌ e Pablo tuaꞌ acꞌotoy unatobꞌ tucꞌa umen war aꞌruobꞌ e sian winicobꞌ era upater e Pablo. Pues e Pablo war oꞌjron tama e ojroner hebreo y tamar era mamajchi tujam e soldadobꞌ war unatobꞌ tucꞌa numuy era.
ACT 22:25 Pero conda ya war e Pablo tut e teꞌ cachbꞌir turix tuaꞌ ajajtzꞌa umen e soldadobꞌ, cay ojron e Pablo tut e capitán xeꞌ war tut jaxir y che: —¿O erer ca awatzꞌi inteꞌ xeꞌ jax inteꞌ ciudadano romano conda merato axin tut inteꞌ tribunal? che e Pablo uyare e capitán.
ACT 22:26 Pero conda e capitán uyubꞌi e ojroner era ixin wacchetaca tuaꞌ uyare e comandante militar y che: —Awiric tamar lo que war abꞌijnu ache taca e winic era porque jaxir jax inteꞌ ciudadano romano, che e capitán.
ACT 22:27 Entonces ixin e comandante militar esto tiaꞌ cachar e Pablo tut e teꞌ y uyubꞌi tuaꞌ y che: —¿Net ca ciudadanoet tama e Roma? che e comandante militar. Y e Pablo che: —Nen.
ACT 22:28 Entonces ojron otronyajr e comandante militar y che: —Pues nen insati meyra tumin tuaꞌ inquetpa ciudadano romano, che e comandante militar. Y e Pablo che: —Pero nen bꞌan taca cuxpen, cocha bꞌan nitata ubꞌan, che e Pablo.
ACT 22:29 Y conda e soldadobꞌ era xeꞌ quetpobꞌ tuaꞌ uwatzꞌiobꞌ ani e Pablo uyubꞌi que jaxir jax inteꞌ ciudadano romano, bꞌactobꞌ jaxirobꞌ taca e comandante militar umen que chꞌar umenerobꞌ tama e cárcel. Porque ma erer ajajtzꞌa y nien ma erer oꞌsena macuir e cárcel inteꞌ ciudadano romano jay merato axin tut inteꞌ tribunal bꞌajxan.
ACT 22:30 Entonces tama inteꞌ día e comandante militar, cocha cꞌani unata tucꞌa tamar war utuchꞌiobꞌ e Pablo tunor e winicobꞌ tuaꞌ e Israel era, jaxir uyare tuaꞌ aloqꞌuesna e cadena tama e Pablo y uyare tunor e nuquir winicobꞌ tama e Israel y tin e uwinquir e inmojr sacerdotiobꞌ y e nuquir concilio tuaꞌ umorojse ubꞌobꞌ. Entonces e comandante militar ulocse Pablo y uturbꞌa tut tunor e nuquir winicobꞌ era tuaꞌ acꞌotoy unata tucꞌa war anumuy tama tunor era.
ACT 23:1 Entonces conda ya war e Pablo tut tunor e nuquir winicobꞌ tama e nuquir concilio tuaꞌ e Israel, cay uchꞌujcu uwira tama unacꞌut e nuquir winicobꞌ era y che: —Niwermanuox, nen tama tunor nicuxtar tara tor e rum war innata tama niwalma que war inxana imbꞌutz tama ubꞌir e Dios y que matucꞌa war inche xeꞌ mabꞌambꞌan tut jaxir, che e Pablo.
ACT 23:2 Pero conda e Ananías xeꞌ jax uwinquir e inmojr sacerdotiobꞌ uyubꞌi e ojroner era, uyare cora winicobꞌ xeꞌ warobꞌ tuyejtzꞌer e Pablo tuaꞌ uyajcꞌuobꞌ tuyej.
ACT 23:3 Pero ojron e Pablo y che: —E Dios cꞌani uyajqꞌuet ubꞌan, ajqꞌuecraneret. ¿War ca abꞌijnu tuaꞌ atuchꞌien bꞌan cocha che tama uley e Moisés? ¿Y tucꞌa tuaꞌ war aware tuaꞌ anjcꞌuna conda ne mato oꞌbꞌna tucꞌa war inche umen inteꞌ juez xeꞌ bꞌan cocha ucꞌani uley e Moisés? che e Pablo.
ACT 23:4 Tin e turobꞌ tuyejtzꞌer e Pablo ojronobꞌ y che: —¿Bꞌan ixto ca cocha era tuaꞌ aqꞌuijnes e sacerdote xeꞌ más nojta tut e Dios? chenobꞌ.
ACT 23:5 Y che e Pablo: —Niwermanuox, nen machi innata jay jax e más nuxi sacerdote e winic era, porque che tama uyojroner e Dios que: “Ira ixojron upater tin e ajcꞌotorer tujor ichinam.” Bꞌan che tama uyojroner e Dios, che e Pablo.
ACT 23:6 Entonces e Pablo cay uwira que ayan tin e tujam e sian nuquir winicobꞌ era xeꞌ tuobꞌ e grupo religioso saduceo, y que ayan e inmojr xeꞌ tuobꞌ e grupo religioso fariseo. Entonces cay ojron taca inteꞌ nuxi nuc y che: —Niwermanuox, nen fariseoen ani y nitata jax ani inteꞌ fariseo ubꞌan, y nen era war inchena juzgar umen que war incꞌupse que tin e chamen coner cꞌani asutpa abꞌixcꞌobꞌ otronyajr, che e Pablo.
ACT 23:7 Pues conda cꞌapa ojron e Pablo cocha era, tin e fariseobꞌ y tin e saduceobꞌ cay bꞌiritiobꞌ jaxobꞌ taca, y tamar era cꞌapa uxere ubꞌobꞌ tunor e winicobꞌ era.
ACT 23:8 Pues tin e saduceobꞌ machi ucꞌupsiobꞌ que tin e chamen cꞌani asutpa abꞌixcꞌa, y machi ucꞌupsiobꞌ jay ayan e angelobꞌ, y machi ucꞌupsiobꞌ jay ayan e nawal ubꞌan. Pero tin e fariseobꞌ war ucꞌupsiobꞌ que ayan tunor era.
ACT 23:9 Y tunorobꞌ war aruobꞌ taca inteꞌ nuxi nuc, y tamar era cay achpa cora ajcanseyajobꞌ tama uley e Moisés xeꞌ tuobꞌ e grupo fariseobꞌ y chenobꞌ: —E winic era matucꞌa war uche. Bꞌajcꞌat jax ani inteꞌ nawal o jax inteꞌ ángel xeꞌ cay upejca e winic era, y jay jax entonces war ani casutpa upater e Dios, che e fariseobꞌ era.
ACT 23:10 Y war taca oꞌjronobꞌ tunor e nuquir winicobꞌ era este que e comandante militar war abꞌacta uwira tunor era y cay ubꞌijnu que bꞌajcꞌat atijtna axin e Pablo umen e winicobꞌ era este que ujatzꞌi, y tamar era cay uyare cora soldadobꞌ tuaꞌ axin ulocsiobꞌ e Pablo tujam e winicobꞌ era tuaꞌ uqꞌuechiobꞌ axin esto tama e cuartel.
ACT 23:11 Pues entonces tama otronteꞌ día acbꞌar checta Cawinquirar tut e Pablo y che: —Cꞌunles awalma Pablo, porque bꞌan cocha cay ojronet tamaren tujam tunor e gente tama e chinam Jerusalem, y bꞌan tuaꞌ iyojron tamaren tama e chinam Roma ubꞌan, che Cawinquirar.
ACT 23:12 Pues entonces tama otronteꞌ día ayan cora winicobꞌ xeꞌ tuobꞌ e Israel xeꞌ cay uturbꞌa ubꞌobꞌ tama inteꞌ taca bꞌijnusiaj que cꞌani uchamsiobꞌ e Pablo. Y tamar era cay ubꞌijnuobꞌ que machix tuaꞌ awiobꞌ y que machix tuaꞌ uyuchꞌiobꞌ e jaꞌ este que axin uchamsiobꞌ e Pablo.
ACT 23:13 Y ayanobꞌ cuarenta winicobꞌ xeꞌ cay ubꞌijnuobꞌ que bꞌan tuaꞌ uchiobꞌ.
ACT 23:14 Entonces e winicobꞌ era ixiobꞌ esto tut uwinquir e inmojr sacerdotiobꞌ y tut e nuquir winicobꞌ tuaꞌ e Israel y chenobꞌ: —Non era cabꞌijnuix que machix tuaꞌ caweꞌ este que caxin cachamse e Pablo.
ACT 23:15 Pues nox taca e inmojr nuquir winicobꞌ tama e tribunal era quiqui cꞌajtinic taca e comandante militar tuaꞌ utaresobꞌ e Pablo tiut tama e día ejcꞌar. Erer imajres que cꞌani inata más tamar e Pablo, y non cꞌani caturbꞌa cabꞌa tut e bꞌir tiaꞌ tuaꞌ anumuyobꞌ tuaꞌ cachamse e Pablo bꞌajxan que acꞌotoy tiut, che e winicobꞌ era xeꞌ war ubꞌijnuobꞌ tuaꞌ uchamse e Pablo.
ACT 23:16 Pero ayan inteꞌ chꞌom sitz tama e chinam Jerusalem xeꞌ jax uyunen uwijtan e Pablo xeꞌ cꞌotoy unata lo que war ubꞌijnu uchiobꞌ e winicobꞌ era. Y tamar era ixin tut e cuartel militar tuaꞌ uyare e Pablo tucꞌa war anumuy era.
ACT 23:17 Y tamar era e Pablo upejca inteꞌ capitán xeꞌ war tut tiaꞌ turu macuir e cárcel y che: —Qꞌueche chic e chꞌom sitz era tut e comandante militar porque jaxir ayan tucꞌa ucꞌani tuaꞌ uyare, che e Pablo.
ACT 23:18 Entonces e capitán uqꞌueche ixin e chꞌom sitz tut e comandante militar y che: —E Pablo xeꞌ chꞌar macuir e cárcel era ucꞌajti tanibꞌa tuaꞌ inqꞌueche ayopa e chꞌom sitz era toit net, porque jaxir ayan inteꞌ ojroner tuaꞌ uyaret, che e capitán era.
ACT 23:19 Entonces e comandante militar uchuqui ucꞌabꞌ e chꞌom sitz y uqꞌueche ixin cora najtir tut e inmojr y soldadobꞌ y uyubꞌi tuaꞌ y che: —¿Tucꞌa cꞌani awaren? che e comandante militar.
ACT 23:20 Entonces e chꞌom sitz uyare e comandante y che: —Pues ayan cora sian winicobꞌ xeꞌ tuobꞌ e Israel xeꞌ cꞌotoy quetpobꞌ tama inteꞌ taca ubꞌijnusiajobꞌ tuaꞌ ucꞌajtiobꞌ tabꞌa tuaꞌ aqꞌueche axin e Pablo tut e tribunal tuobꞌ tama e día ejcꞌar. Jaxirobꞌ cꞌani umajresetobꞌ que cꞌani unatobꞌ más tamar e Pablo.
ACT 23:21 Pero machi acꞌupsiobꞌ porque ayanobꞌ cuarenta winicobꞌ xeꞌ war ucojcobꞌ mucur tama e bꞌir tuaꞌ uchamsiobꞌ e Pablo conda war ixnumuy tuaꞌ ixcꞌotoy tut e tribunal, y jaxirobꞌ quetpobꞌ tama intera ubꞌijnusiajobꞌ que machix tuaꞌ awiobꞌ y machix tuaꞌ uyuchꞌiobꞌ e jaꞌ este que uchamsiobꞌ e Pablo. Y coner era intaquix war ucojcobꞌ tuaꞌ aware tuaꞌ axin e Pablo y jaxirobꞌ cꞌani uchamsiobꞌ, che e chꞌom sitz.
ACT 23:22 Entonces e comandante militar uyare e chꞌom sitz y che: —Ira achecsu lo que war awaren era tut e gente, che e comandante. Y de allí actana locꞌoy e chꞌom sitz.
ACT 23:23 Entonces e comandante militar upejca chateꞌ capitán tuaꞌ y che: —Quiquic morojsenic 200 soldadobꞌ tuaꞌ axanobꞌ, y morojsenic setenta winicobꞌ tuaꞌ axiobꞌ tor chij, y morojsenic 200 soldadobꞌ tuaꞌ uqꞌuechiobꞌ axin ulanzuobꞌ. Ustesic ibꞌa tuaꞌ ixlocꞌoy acbꞌar era a las nueve tuaꞌ ixixin esto tama e chinam Cesarea.
ACT 23:24 Sicbꞌanic cora chij tuaꞌ axin e Pablo tamar y qꞌuechic chic y cojconic bien tuaꞌ acꞌotoy tut e gobernador tuaꞌ e departamento Galilea xeꞌ ucꞌabꞌa Félix, che e comandante militar era.
ACT 23:25 Y tamar era cay utzꞌijbꞌa inteꞌ carta tuaꞌ uyebꞌta axin tut e gobernador taca e capitán era y che:
ACT 23:26 Nen era xeꞌ Claudio Lisias war intzꞌijbꞌa e carta era tabꞌa, gobernador Félix xeꞌ intzay inwiret.
ACT 23:27 E winic era xeꞌ taresna umen nisoldadobꞌ jax inteꞌ winic xeꞌ turbꞌana tama e cárcel umen e gente tuaꞌ e Israel, y qꞌuix ani uchamsiobꞌ, pero conda cay innata que jaxir jax inteꞌ ciudadano romano, ixien taca nisoldadobꞌ tuaꞌ incorpes.
ACT 23:28 Y cocha cꞌani innata tucꞌa tamar war utuchꞌiobꞌ, inqꞌueche ixin tut e tribunal tuaꞌ e gente tuaꞌ e Israel.
ACT 23:29 Y checta que jaxirobꞌ war utuchꞌiobꞌ tamar taca lo que ayan tama uleyobꞌ, pero matucꞌa war uche tuaꞌ achamesna jay cawira lo que ayan tama e ley romano, y matucꞌa war uche nien tuaꞌ aturbꞌana macuir e cárcel.
ACT 23:30 Pero cocha cꞌotoy innata que war ubꞌijnuobꞌ e gente tuaꞌ e Israel tuaꞌ uchamsiobꞌ e winic era, cay imbꞌijnu tuaꞌ inwebꞌta axin toit tuaꞌ awira e caso era net, y cay inware tin e war utuchꞌiobꞌ que ucꞌani tuaꞌ axiobꞌ toit net ubꞌan, y que net erer awira tucꞌa tuaꞌ ache. Chꞌajbꞌex tama tunor era. Bꞌan che e Claudio Lisias tama ucarta lo que uyebꞌta ixin esto tama e gobernador Félix.
ACT 23:31 Pues entonces e sian soldadobꞌ era locꞌoyobꞌ tama e cuartel bꞌan cocha arobꞌnobꞌ umen ucomandante, y uqꞌuechiobꞌ ixin e Pablo acbꞌar, y cꞌotoyobꞌto esto tama e chinam Antípatris.
ACT 23:32 Y tama otronteꞌ día e soldadobꞌ xeꞌ war axanobꞌ tama uyocobꞌ sutpa ixiobꞌ esto tama e cuartel tama e chinam Jerusalem otronyajr, y e inmojr xeꞌ war axanobꞌ tor chij ixiobꞌ taca e Pablo tuaꞌ acꞌotoyobꞌ tut e gobernador Félix.
ACT 23:33 Entonces conda cꞌotoyobꞌ tama e chinam Cesarea uyajcꞌuobꞌ e carta e gobernador y uyajcꞌuobꞌ e Pablo ubꞌan.
ACT 23:34 Y conda e gobernador cꞌapa uche leer e carta era cay uyubꞌi tuaꞌ e Pablo que tiaꞌ tari y que tiaꞌ cuxpa, y conda unata que tuaꞌ e departamento Cilicia cay ubꞌijnu tuaꞌ uyacta bꞌan taca era, y tamar era uyare e Pablo y che:
ACT 23:35 —Cꞌani umbꞌi tucꞌa cꞌani awaren conda ayopobꞌ tin e war utuchꞌietobꞌ, che e gobernador era. Entonces uyare cora guardia yajaꞌ tuaꞌ uqꞌuechiobꞌ axin e Pablo y tuaꞌ ucojcobꞌ tama e palacio lo que ayan tuaꞌ e Herodes.
ACT 24:1 Pues entonces ya turu e Pablo macuir e cárcel tama e chinam Cesarea, y conda numuy cinco día cꞌotoy uwinquir e inmojr sacerdotiobꞌ xeꞌ ucꞌabꞌa Ananías. Y tacar jaxir cꞌotoyobꞌ cora nuquir winicobꞌ ubꞌan taca inteꞌ abogado xeꞌ ucꞌabꞌa Tértulo. Y tunor e winicobꞌ era cꞌotoyobꞌ tut e gobernador Félix tuaꞌ utuchꞌiobꞌ e Pablo.
ACT 24:2 Entonces conda taresna e Pablo tut e Félix ya turobꞌ tunor e nuquir winicobꞌ era xeꞌ tariobꞌ tama e chinam Jerusalem. Entonces cay ojron e abogado xeꞌ jax e Tértulo y cay utuchꞌi e Pablo tut e gobernador y che: —Cawajcꞌotoreret xeꞌ jax cagobernador tama calugar tara, cꞌani cawaret chꞌajbꞌex que tara ayan e jiriar, y que matucꞌa war anumuy, y que tunor war alocꞌoy bueno umen que net war icꞌotori taca tunor anatanwar.
ACT 24:3 Tunor e nuxi tacarsiaj lo que war awajcꞌon war catzay cachꞌami umen que net xeꞌ más buenoet tama tunor, O Félix, que non era cꞌani cawaret que chꞌajbꞌex.
ACT 24:4 Y cocha canata que net ma jabꞌaret era, machi cꞌani calocse meyra atiempo, pero jay achion e favor tuaꞌ oybꞌi cawojroner cora era, pues erer cawaret wacchetaca.
ACT 24:5 Pues lo que catajwi tama e winic era xeꞌ jax inteꞌ xeꞌ mabꞌambꞌan uwirnar inyajrer, y que tic taca tiaꞌ axin war uturbꞌa ubꞌa tuaꞌ uxere e gente tuaꞌ e Israel tamar lo que war acꞌupseyanobꞌ, y jax jaxir xeꞌ quetpa tujor e secta xeꞌ arobꞌna: “Tuaꞌ e chinam Nazaret.”
ACT 24:6 Y jaxir cꞌani ani ubꞌoni catemplo xeꞌ erach tama e chinam Jerusalem, y tamar era non cajajpi tuaꞌ cayari tama e cárcel porque cꞌani ani cache juzgar bꞌan cocha ucꞌani caley xeꞌ tuaꞌ e Moisés.
ACT 24:7 Pero e comandante militar xeꞌ ucꞌabꞌa Lisias cay uyose ubꞌa tama tunor era tuaꞌ ucorpes e winic era ticoit taca e sian soldadobꞌ.
ACT 24:8 Y de allí e nuxi Lisias era cay uyareon que tin e cꞌani utuchꞌiobꞌ e winic era ucꞌani tuaꞌ acꞌotoyobꞌ toit net. Y net erer oybꞌi tuaꞌ e winic era tuaꞌ anata que erach tunor lo que war catuchꞌi tamar, che e abogado Tértulo uyare e gobernador Félix.
ACT 24:9 Y tin e tuobꞌ e Israel xeꞌ tariobꞌ taca e Tértulo era war chenobꞌ que erach tunor lo que arobꞌna umener.
ACT 24:10 Y e gobernador Félix utuchꞌi ucꞌabꞌ tut e Pablo tuaꞌ uchecsu que jaxir tuaꞌ oꞌjron era. Entonces cay ojron e Pablo y che: —Pues intzay que toit net tuaꞌ inche tunor niwojroner era, porque innata que net war icꞌotori bꞌan cocha inteꞌ juez tama cachinam Israel desde ixnix.
ACT 24:11 Y cocha net erer awira jay erach tunor lo que cꞌani inchecsu toit era, erer inwaret que ayanix doce día que cꞌotoyen tama e chinam Jerusalem tuaꞌ unjtzꞌi ut Nidiosir.
ACT 24:12 Y e winicobꞌ era ma tiaꞌ utajwienobꞌ que war imbꞌiriti tut e gente, y machi utajwienobꞌ que war impucujcsiobꞌ e gente tama e templo, y matucꞌa war inche xeꞌ mabꞌambꞌan tama inteꞌ sinagoga y nien tama otronteꞌ lugar tama e chinam yajaꞌ.
ACT 24:13 Y e winicobꞌ era ma cocha erer tuaꞌ uwirsetobꞌ que erach lo que war utuchꞌienobꞌ tamar.
ACT 24:14 Pero lo que cꞌani inwaret net tama e día era que nen jax inteꞌ man tuaꞌ e Dios xeꞌ tuaꞌ tunor catata viejobꞌirobꞌ ubꞌan, bꞌan cocha e bꞌir xeꞌ war canata non que más imbꞌutz coner xeꞌ arobꞌna umen e gente era que jax otronteꞌ canseyaj. Pero nen war incꞌupseyan tama tunor lo que chꞌar tzꞌijbꞌabꞌir tama uley e Moisés y tama e profetobꞌ ubꞌan.
ACT 24:15 Y nen war incojco tama e Dios bꞌan cocha war uchiobꞌ tin e war utuchꞌienobꞌ era que tunor tin e chamen cꞌani asutpa abꞌixcꞌobꞌ inteꞌ intiobꞌ, motor jay imbꞌutz uwirnar o motor jay mabꞌambꞌan uwirnar.
ACT 24:16 Y tamar era war inturbꞌa nibꞌa tuaꞌ aquetpa pocbꞌir tunor niwalma tuaꞌ machi atajwina umen e Dios nien imbꞌijc e mabꞌambꞌanir tamar, y que nien e winicobꞌ machi tuaꞌ utajwiobꞌ lo que mabꞌambꞌan tamar.
ACT 24:17 ’Y cocha war inxana najtir tut e chinam Jerusalem cora año cay imbꞌijnu tuaꞌ insutpa tama nilugar otronyajr tuaꞌ inqꞌueche axin cora ofrenda y tuaꞌ inturbꞌa cora arac tujor e altar tama e templo.
ACT 24:18 Y bꞌan cay inche conda cꞌotoyen tama e chinam Jerusalem. Cay inqꞌueche ixin cora arac tuaꞌ inturbꞌa tujor e altar tama e templo tuaꞌ aquetpa purutbꞌir conda checta cora winicobꞌ xeꞌ tuobꞌ e Israel xeꞌ tariobꞌ tama e departamento Asia xeꞌ cay uwirenobꞌ que turen macuir e templo. Pues intaca turen tama e templo tuaꞌ onstes nibꞌa bꞌan cocha ucꞌani uley e Moisés, y tama e hora yajaꞌ majax meyra gente turobꞌ macuir e templo y mamajchi war impucujcse.
ACT 24:19 Y jax e winicobꞌ yajaꞌ xeꞌ tuobꞌ e departamento Asia xeꞌ ucꞌani ani tuaꞌ acꞌotoyobꞌ tara coner tuaꞌ utuchꞌienobꞌ jay ayan tucꞌa war inche.
ACT 24:20 Y jay machi cꞌani acꞌotoyobꞌ e winicobꞌ yajaꞌ, entonces e winicobꞌ xeꞌ turobꞌ tara ucꞌani tuaꞌ uchecsuobꞌ jay unatobꞌ jay ayan lo que inche xeꞌ mabꞌambꞌan conda turen tut e tribunal tuaꞌ e gente tuaꞌ e Israel tama e chinam Jerusalem.
ACT 24:21 Pero quetpa inteꞌ ojroner lo que inware tutobꞌ que bꞌajcꞌat qꞌuijnobꞌ uyubꞌiobꞌ conda inwareobꞌ que: ‘Nen tara war intujchꞌa umen taca que incꞌupse que cꞌani asutpa abꞌixcꞌobꞌ tin e chamen.’ Bꞌan inware e gente yajaꞌ tama e tribunal tuaꞌ e gente tuaꞌ e Israel, che e Pablo tut e gobernador era.
ACT 24:22 Pues entonces cꞌapa uyubꞌi tunor era e Félix y cocha jaxir meyra war unata tama tunor lo que war anumuy tama e gente xeꞌ cay cꞌupseyanobꞌ tama Cawinquirar Jesucristo, jaxir ubꞌijnu tuaꞌ uyacta bꞌan taca tunor lo que war uyubꞌi tama e checsuyaj era y che: —Conda watar e comandante militar xeꞌ Lisias, jaxir erer uyaren más tama tunor era, che e Félix.
ACT 24:23 Y conda e Félix cꞌapa ojron cocha era uyare e capitán tuaꞌ uqꞌueche axin e Pablo tuaꞌ aquetpa yebꞌar ucꞌotorer, pero que erer awarajsena y que erer atacarna umen tin e atzay uwira.
ACT 24:24 Pues entonces tama e tiempo era ayan inteꞌ uxambꞌar e Félix, y conda numuy cora día sutpa tari taca uwixcar xeꞌ ucꞌabꞌa Drusila xeꞌ jax inteꞌ ixic xeꞌ tuaꞌ e Israel, y war ubꞌijnuobꞌ tuaꞌ uyubꞌiobꞌ uyojroner e Pablo. Entonces e Félix uyare ataresna e Pablo tutobꞌ tuaꞌ uyubꞌiobꞌ cocha tuaꞌ acꞌupseyan inteꞌ tama e Cristo Jesús.
ACT 24:25 Pero conda e Pablo ojron tamar e cuxtar xeꞌ erach tut e Dios, y que ucꞌani tuaꞌ cacojco cabꞌa, y que watar inteꞌ juicio tama ucꞌapesnibꞌir tunor era, bꞌacta e Félix y uyare e Pablo y che: —Pues quiqui era, y conda nen jabꞌaren cꞌani insutpa impejquet otronyajr, che e Félix uyare e Pablo.
ACT 24:26 Pero e Félix cocha war ucojco tuaꞌ atojya umen e Pablo tuaꞌ ulocse tama e cárcel, war upejca e Pablo iraj iraj tuaꞌ oꞌjron tacar.
ACT 24:27 Y bꞌan taca numuy tama dos año, y de allí locꞌoy e Félix y machi ixto quetpa gobernador y sutpa tari inteꞌ winic xeꞌ ucꞌabꞌa Porcio Festo. Pero cocha e Félix war ubꞌijnu tuaꞌ utzayjres tunor e gente tama e Israel, uyacta e Pablo macuir e cárcel.
ACT 25:1 Pues entonces cꞌotoy e Festo era tuaꞌ aquetpa gobernador, y conda cꞌapa numuy uxteꞌ día locꞌoy tama e chinam Cesarea tuaꞌ acꞌotoy esto tama e chinam Jerusalem.
ACT 25:2 Entonces conda cꞌotoy e Festo, checta tut uwinquir e inmojr sacerdotiobꞌ y e nuquir winicobꞌ tama e chinam era, y cay utuchꞌiobꞌ e Pablo otronyajr.
ACT 25:3 Y de allí cay ucꞌajtiobꞌ tuaꞌ e Festo tuaꞌ uyebꞌta watar e Pablo esto tama e chinam Jerusalem otronyajr. Pero ubꞌijnusiajobꞌ jax era: Que cꞌani uyareobꞌ achamesna e Pablo tama e bꞌir.
ACT 25:4 Pero e Festo machi ucꞌani porque e Pablo ya chꞌar tama e cárcel tama e chinam Cesarea, y jaxir quetpa tuaꞌ asutpa axin esto tama e chinam yajaꞌ tuaꞌ unata lo que war anumuy.
ACT 25:5 Entonces jaxir ojron y che: —Pues tin e ayan más ucꞌotorer tijam nox ucꞌani tuaꞌ ixixin tacaren esto tama e chinam Cesarea. Y jay ayan lo que uche e Pablo xeꞌ mabꞌambꞌan, nox erer iware taniut yajaꞌ, che e Festo uyare e nuquir winicobꞌ tama e chinam Jerusalem.
ACT 25:6 Pues e Festo quetpato ocho día o diez día tama e chinam Jerusalem, y de allí sutpa ixin esto tama e chinam Cesarea. Y tama otronteꞌ día ixin turuan tama uturtar tuaꞌ aquetpa juez tut e gente, y de allí uyare ataresna e Pablo.
ACT 25:7 Entonces conda cꞌotoy e Pablo tut e Festo yix warobꞌ tin e tariobꞌ tama e chinam Jerusalem xeꞌ cay ojronobꞌ upater e Pablo otronyajr que ayan meyra mabꞌambꞌanir lo que war uche, pero machi obꞌnobꞌ tuaꞌ uchiobꞌ acꞌupesna que bꞌan, y tamar era machi obꞌnobꞌ tuaꞌ uchiobꞌ achamesna e Pablo.
ACT 25:8 Entonces ojron e Pablo tuaꞌ ucorpes ubꞌa tutobꞌ y che: —Nen matucꞌa war inche xeꞌ mabꞌambꞌan upater uley e Moisés, y nien matucꞌa war inche upater e templo, y nien matucꞌa war inche upater e emperador romano, che e Pablo.
ACT 25:9 Pero e Festo, cocha war usicbꞌa cocha tuaꞌ utzayjres e gente tuaꞌ e Israel, cay uyubꞌi tuaꞌ e Pablo y che: —¿O cꞌani ca iꞌxin esto tama e chinam Jerusalem tuaꞌ ubꞌijnu uwirobꞌ jay net ajmabꞌambꞌaniret? che e Festo.
ACT 25:10 Y che e Pablo: —Turen era tut inteꞌ tribunal tuaꞌ e emperador romano, y ya taca tara tiaꞌ ucꞌani tuaꞌ acꞌotoy aquetpa chequer jay ayan lo que war inche o jay matucꞌa lo que war inche. Y cocha net anata que nen matucꞌa cay inche xeꞌ mabꞌambꞌan tut e gente tuaꞌ e Israel, ma erer awebꞌten inxin esto tama e chinam yajaꞌ.
ACT 25:11 Pero jay inchix ani lo que majax imbꞌutz tut e ley entonces ucꞌani ani tuaꞌ inchamesna. Pues erer ani inchamesna, pero jay matucꞌa war inche bꞌan cocha war utuchꞌienobꞌ tamar, entonces mamajchi chi ayan xeꞌ erer uyajqꞌuen tutobꞌ. Y tamar era nen incꞌajti tuaꞌ enrna umen e emperador, che e Pablo.
ACT 25:12 Entonces ojron e Festo taca uyajtacarsiajobꞌ, y de allí ojron otronyajr taca e Pablo y che: —Pues cocha net cay aware que acꞌani tuaꞌ iyerna umen e emperador romano, pues yajaꞌ tuaꞌ iꞌxin, che e Festo.
ACT 25:13 Pues entonces conda numuy cora día ayan inteꞌ rey xeꞌ ucꞌabꞌa Agripa xeꞌ cꞌotoy taca uwixcar xeꞌ ucꞌabꞌa Berenice tama e chinam Cesarea tuaꞌ uwarajse e gobernador Festo.
ACT 25:14 Y yajaꞌ quetpobꞌ cora día war uwarajse e Festo. Entonces e Festo cay uchecsu lo que war numuy tama e Pablo y tucꞌa tamar war aquetpa macuir e cárcel y che: —Tara turu inteꞌ winic xeꞌ turbꞌana tama e cárcel umen e Félix.
ACT 25:15 Y conda ixien tama e chinam Jerusalem cay uyarenobꞌ tin e uwinquir e inmojr sacerdotiobꞌ y tin e nuquir winicobꞌ tuaꞌ e Israel que e winic era xeꞌ ucꞌabꞌa Pablo cay uche meyra mabꞌambꞌanir tama e chinam Jerusalem, y tamar era war ucꞌajtiobꞌ tanibꞌa tuaꞌ inware achamesna.
ACT 25:16 Pero nen inwareobꞌ que majax imbꞌutz tut uley romano tuaꞌ atujchꞌa inteꞌ tuaꞌ achamesna jay machi aquetpa tut tin e war utuchꞌi, porque inteꞌ winic ayan lo que erer uche tuaꞌ ucorpes ubꞌa tut e ley.
ACT 25:17 Y tamar era conda cꞌotoyobꞌ e winicobꞌ era tuaꞌ e chinam Jerusalem machi insati e tiempo tacarobꞌ sino que tama otronteꞌ día ixien turuanen tama niturtar tama e tribunal, y inware e guardia tuaꞌ ataresna e Pablo tiaꞌ turu tama e cárcel.
ACT 25:18 Entonces tin e tariobꞌ tama e chinam Jerusalem cay ojronobꞌ meyra upater e Pablo, pero matucꞌa uchiobꞌ tuaꞌ acꞌupesna que erer ani achamesna e Pablo tamar. Machi utuchꞌiobꞌ tama inteꞌ nuxi mabꞌambꞌanir cocha cay imbꞌijnu que bꞌan ani tuaꞌ uchiobꞌ.
ACT 25:19 Jax taca uyarenobꞌ que jaxir war uche meyra lo que majax imbꞌutz tut ureligionobꞌ, y que ayan ani inteꞌ winic xeꞌ ucꞌabꞌa Jesús xeꞌ chamay, pero que e Pablo war che que sutpa bꞌixcꞌa otronyajr.
ACT 25:20 Y cocha nen machi innata tucꞌa tuaꞌ inche tamar inteꞌ ojroner cocha era, umbꞌi tuaꞌ e Pablo jay cꞌani ani axin tama e chinam Jerusalem tuaꞌ ubꞌijnu uwirobꞌ jay ayan lo que war uche.
ACT 25:21 Pero cocha e Pablo ucꞌajti tuaꞌ eꞌrna umen e emperador Augusto, nen inware tuaꞌ aquetpa tama e cárcel tara este que erer inwebꞌta axin esto tama e emperador romano. Bꞌan che e Festo uyare e Agripa taca e Berenice.
ACT 25:22 Entonces ojron e Agripa taca e Festo y che: —Nen ubꞌan quisinic umbꞌi lo que ojron e winic era, che e Agripa. Y che e Festo: —Pues ejcꞌarto erer inware tuaꞌ ayopa tuaꞌ oybꞌi lo que cꞌani oꞌjron jaxir, che e Festo.
ACT 25:23 Entonces tama otronteꞌ día yopobꞌ otronyajr e Agripa taca e Berenice tama e palacio, y ochoyobꞌ sorbꞌir macuir e otot tiaꞌ turobꞌ tunor e nuquir winicobꞌ xeꞌ militar taca tunor e nuquir winicobꞌ tama e chinam era. Entonces e Festo uyare e guardia tuaꞌ utaresobꞌ e Pablo tiaꞌ turu tama e cárcel.
ACT 25:24 Entonces ojron e Festo y che: —Pues Agripa xeꞌ reyet tama e lugar era, y tunorox xeꞌ nuquir winicox xeꞌ war imorojse ibꞌa tama e lugar era, tara turu e winic xeꞌ ucꞌabꞌa Pablo. Meyra gente tuaꞌ e Israel war oꞌjronobꞌ upater taniut. Bꞌan cay uchiobꞌ tama e chinam Jerusalem y bꞌan war uchiobꞌ tara ubꞌan tama e chinam Cesarea, y machi uyactobꞌ tuaꞌ uyarenobꞌ que ucꞌani tuaꞌ achamesna e winic era.
ACT 25:25 Pero taniut nen matucꞌa war uche que umen tuaꞌ achamesna, y cocha jaxir uyaren que umen e emperador Augusto tuaꞌ eꞌrna jay ayan lo que war uche, pues nen turix tuaꞌ inwebꞌta axin esto tama e chinam Roma.
ACT 25:26 Pero era matucꞌa intajwi tama e Pablo tuaꞌ intzꞌijbꞌa tama inteꞌ carta tuaꞌ inwebꞌta axin tut e emperador. Y tamar era inware tuaꞌ ataresna tara tuaꞌ aquetpa tiut nox y toit net, O rey Agripa, tuaꞌ itacren innata tucꞌa uche jaxir tuaꞌ innata tucꞌa tuaꞌ intzꞌijbꞌa tama inteꞌ carta tuaꞌ inwebꞌta axin tut e emperador.
ACT 25:27 Porque taniut nen ma cocha erer inwebꞌta axin inteꞌ winic cocha era esto tut e emperador jay machi inware tama inteꞌ carta tucꞌa cay uche, che e Festo uyare e rey Agripa taca tunor e nuquir winicobꞌ era.
ACT 26:1 Pues entonces ojron e rey Agripa taca e Pablo y che: —Erer iyojron tamar lo que war ache, y jay ayan tucꞌa tuaꞌ aware tuaꞌ acorpes abꞌa, pues erer ache, che e Agripa. Entonces e Pablo uyachi ucꞌabꞌ tuaꞌ acay oꞌjron y che:
ACT 26:2 —Pues intzay era que erer onjron toit net xeꞌ nuxi reyet, Agripa, tuaꞌ incorpes nibꞌa tama tunor e nuxi ojroner lo que cay ojronobꞌ nipater e gente tuaꞌ e Israel.
ACT 26:3 Pero tama tunor war intzay onjron toit net tama tunor era porque net war anata tunor e onian bꞌijnusiaj lo que ayan tuaꞌ e gente tama e Israel y war anata tunor lo que cabꞌiriti tamar. Y tamar era incꞌajti tabꞌa tuaꞌ oybꞌi tunor niwojroner era tzꞌustaca, che e Pablo.
ACT 26:4 Entonces cay ojron e Pablo tut tunor e gente era y che: —Tunor e gente tama e Israel war unatobꞌ cocha ani niwirnar tiaꞌ chꞌien tama nilugar y cocha turen conda turuanen tama e chinam Jerusalem desde que chuchuento.
ACT 26:5 Y jaxirobꞌ unatobꞌ y erer ani uyaretobꞌ que nen conda chꞌom sitzento jaxen inteꞌ miembro tama inteꞌ grupo xeꞌ ucꞌabꞌa fariseo xeꞌ jax e canseyaj xeꞌ más aqꞌuecꞌo tama ubꞌijnusiajobꞌ tama tunor careligión tama e Israel.
ACT 26:6 Y era utaresenobꞌ tara tuaꞌ taca utuchꞌienobꞌ umen taca que war incojco tama e Dios que jaxir tuaꞌ axin usuti ubꞌixqꞌues tunor tin e chamen, bꞌan cocha cay arobꞌnobꞌ tunor catata viejobꞌirobꞌ umen Cadiosir.
ACT 26:7 Pues ayanon doce tribu tama e Israel xeꞌ war cacojco tuaꞌ cawira que e Dios tuaꞌ acꞌapa uche tunor lo que cay uyareon ixnix que cꞌani usuti ubꞌixqꞌues tunor tin e chamen. Y tamar era war catattzꞌi ut Cadiosir era tama e día y tama e acbꞌar ubꞌan. Y umen que war incojco tama Nidiosir cocha era, O rey Agripa, qꞌuijnobꞌ uwirenobꞌ e gente tuaꞌ Israel, y tamar era war utuchꞌienobꞌ que mabꞌambꞌan war inche.
ACT 26:8 ¿Y tucꞌa tuaꞌ que intran tiut tuaꞌ icꞌupse que ayan ucꞌotorer e Dios tuaꞌ usuti ubꞌixqꞌues tunor tin e chamenobꞌ? che e Pablo.
ACT 26:9 Pues warto oꞌjron e Pablo era y che: —Pues nen tama e tiempo ixnix cay imbꞌijnu que ucꞌani tuaꞌ inche unumse ubꞌobꞌ meyra tin e war acꞌupseyanobꞌ tama ucꞌabꞌa e Jesús xeꞌ tuaꞌ e chinam Nazaret.
ACT 26:10 Y bꞌan cay inche tama e chinam Jerusalem. Y nen ixien incꞌajti cora carta tuaꞌ uwinquir e inmojr sacerdotiobꞌ tuaꞌ uyajqꞌuen e cꞌotorer tuaꞌ onse meyra tin e acꞌupseyanobꞌ tama e Jesús tama e cárcel, y conda aquetpa tuaꞌ achamesna cora ajcꞌupesiajobꞌ, nen inquetpa intera nibꞌijnusiaj tacarobꞌ.
ACT 26:11 Pero ayan ani ubꞌan conda nen cay inwatzꞌi e ajcꞌupesiajobꞌ tuaꞌ inchiobꞌ uchoquiobꞌ inyajrer ucꞌabꞌa e Jesús. Y bꞌan cay inche tama tunor or e lugar tama inteꞌ inteꞌ sinagoga, y war inqꞌuijna upaterobꞌ meyra este que ixien tama inteꞌ chinam xeꞌ innajt tuaꞌ inware ajajtzꞌobꞌ e ajcꞌupesiajobꞌ tama e Jesús yajaꞌ, che e Pablo.
ACT 26:12 Y warto oꞌjron e Pablo y che: —Y tamar era ixien esto tama e chinam Damasco tuaꞌ inche unumse ubꞌobꞌ e gente yajaꞌ, y qꞌuecher nimen tunor e cꞌotorer tuaꞌ uwinquir e inmojr sacerdotiobꞌ tuaꞌ inche tunor era.
ACT 26:13 O rey Agripa, cꞌani inwaret era que war inxana tama e bꞌir conda intaca checta inteꞌ nuxi janchꞌaquenar xeꞌ ejpray tari tut e qꞌuin xeꞌ más apurutsan que e qꞌuin xeꞌ cꞌaxi taniwejtzꞌer nen taca tin e war axanobꞌ tacaren.
ACT 26:14 Cucremon tunoron tut e rum, y nen cay umbꞌi inteꞌ nuc xeꞌ ojron tacaren tama e ojroner hebreo xeꞌ che: “Saulo, Saulo, ¿tucꞌa tuaꞌ war aturbꞌa abꞌa tuaꞌ achien innumse nibꞌa? Porque tunor lo que war ache tama tunor era intaca war anumse abꞌa bꞌan cocha incojt wacax conda war uyajcꞌu ubꞌa taca uyoc tut inteꞌ susteꞌ xeꞌ qꞌuecher umen e ajcojc wacax xeꞌ intaca war uxeqꞌue ubꞌa tamar, y bꞌan war anumse abꞌa net ubꞌan”, che e nuc era xeꞌ tari tama e janchꞌaquenar.
ACT 26:15 Entonces ojronen y inware: “¿Y chiet net, Niwinquiret?” Y uyaren Niwinquirar y che: “Pues nen jax e Jesús xeꞌ war achien innumse nibꞌa.
ACT 26:16 Pero achpen waren porque nen tarien tuaꞌ inchecsu nibꞌa toit tuaꞌ iquetpa niman y tuaꞌ iquetpa ajchecsuyajet tamar lo que war awira era y tamar lo que cꞌani awira otronyajr.
ACT 26:17 Pero cꞌani inwebꞌtet iꞌxin esto tut e gente xeꞌ majax tuobꞌ e Israel, y cꞌani incorpeset tuaꞌ machi ichamesna conda iquetpa tama ucꞌabꞌobꞌ e gente xeꞌ tuobꞌ e Israel o tama ucꞌabꞌobꞌ e gente xeꞌ majax tuobꞌ e Israel.
ACT 26:18 Pero war inwebꞌtet iꞌxin esto tut tin e majax tuobꞌ e Israel tuaꞌ acansiobꞌ tuaꞌ uwerojsiobꞌ unacꞌutobꞌ tuaꞌ uwirobꞌ cocha tuaꞌ axanobꞌ tama nibꞌir tiaꞌ ayan e janchꞌaquenar, y machi ixto tuaꞌ axanobꞌ tama e bꞌir xeꞌ incsibꞌan tiaꞌ war aquetpobꞌ yebꞌar ucꞌotorer e Satanás. Y ucꞌani tuaꞌ acansiobꞌ cocha tuaꞌ uyactobꞌ e bꞌir xeꞌ mabꞌambꞌan tuaꞌ axanobꞌ tama nibꞌir, y tuaꞌ acꞌotoy acꞌupseyanobꞌ tamaren tuaꞌ uchꞌamiobꞌ nicꞌumpar tama tunor umabꞌambꞌanirobꞌ y tuaꞌ aquetpobꞌ tujam tunor tin e sicbꞌabꞌirobꞌ umen e Dios.” Bꞌan che uyaren e Jesús conda turento tama e bꞌir xeꞌ acꞌotoy tama e chinam Damasco, che e Pablo.
ACT 26:19 Y warto oꞌjron e Pablo tama tunor era y che: —Erer inwaret, O rey Agripa, que bꞌan cocha arobꞌnen tama e mayjut xeꞌ tari tut e qꞌuin lo que cay inwira tama e día yajaꞌ y bꞌan cay inche.
ACT 26:20 Y tamar era cay inchecsu e ojroner tama Cawinquirar Jesucristo conda turen tama e chinam Damasco yajaꞌ. Y nacpat era ixien esto tama e chinam Jerusalem y cay inchecsu tunor era otronyajr, y ixien inchecsu e ojroner era tama tunor or e lugar tama e departamento Judea y taca e gente xeꞌ majax tuobꞌ e Israel ubꞌan. Cay inwareobꞌ que ucꞌani tuaꞌ uchoquiobꞌ e onian bꞌijnusiaj tuobꞌ tuaꞌ asutpa acꞌupseyanobꞌ tama e Dios, y tuaꞌ uchiobꞌ lo que imbꞌutz tut e Dios tuaꞌ aquetpa chequer tut e inmojr gente que war axanobꞌ tama ubꞌir e Dios coner.
ACT 26:21 Y tamar era e gente tuaꞌ e Israel ujajpienobꞌ tuaꞌ uqꞌuechienobꞌ inxin tama e cárcel conda turen tama e templo tama e chinam Jerusalem, y cꞌani ani uchamsenobꞌ ubꞌan.
ACT 26:22 Pero cꞌani intattzꞌi ucꞌabꞌa e Dios porque jax jaxir xeꞌ war utacren iraj iraj tuaꞌ inqꞌuecꞌo inxana tama ubꞌir jaxir, y umen que jaxir war utacren inware tunor e gente axin motor jay maxtacobꞌ o motor jay nuquir winicobꞌ, pero war inwareobꞌ tunorobꞌ e ojroner tama Cawinquirar Jesucristo. Y ma tiaꞌ inwareobꞌ e gente xeꞌ tuobꞌ e Israel nien inteꞌ ojroner que majax chꞌar tzꞌijbꞌabꞌir umen inteꞌ profeta o tama uley e Moisés tiaꞌ che que bꞌan tuaꞌ anumuy conda achecta watar e Cristo.
ACT 26:23 Porque chꞌar tzꞌijbꞌabꞌir tama uyojroner e Dios que jaxir xeꞌ tuaꞌ aquetpa e Cristo ucꞌani tuaꞌ unumse ubꞌa meyra y ucꞌani tuaꞌ achamesna. Pero nacpat era jaxir quetpa tuaꞌ asujta abꞌixqꞌuesna tujam e chamenobꞌ bꞌajxan. Y quetpa ubꞌan tuaꞌ achectesna e ojroner tama e corpesiaj era tut tunor e gente xeꞌ tuobꞌ e Israel, y tut tunor e gente xeꞌ majax tuobꞌ e Israel ubꞌan, che e Pablo.
ACT 26:24 Entonces conda e Pablo warto oꞌjron cocha era cay ojron e Festo taca inteꞌ nuxi nuc y che: —Net satrem ajor, Pablo. Meyra canuar ache y tamar era satpix asasaꞌ, che e Festo.
ACT 26:25 Pero ojron otronyajr e Pablo y che: —O Festo, machi war asatpa nisasaꞌ, sino que imbꞌutz y erach tunor lo que war inwaret era.
ACT 26:26 Y e rey Agripa war unata tama tunor lo que war onjron era, y tamar era erer onjron tama tunor era tut jaxir porque chequer que war unata tama tunor lo que numuy conda chamesna e Cristo, cocha machi chempa tunor era tama inteꞌ lugar innajt y nien tama inteꞌ lugar mucur.
ACT 26:27 Y net, reyet Agripa, ¿war ca icꞌupseyan tamar lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo? Nen innata que war icꞌupseyan tamar lo que chꞌar tzꞌijbꞌabꞌir umenerobꞌ, che e Pablo.
ACT 26:28 Entonces ojron e rey Agripa y che: —¿O war ca abꞌijnu tuaꞌ achien insutpa cristiano ubꞌan wacchetaca cocha era? che e rey Agripa.
ACT 26:29 Entonces ojron e Pablo y che: —Pues motor jay wacchetaca o motor jay eixna tuaꞌ isutpa icꞌupseyan tama Cawinquirar Jesucristo, pero bꞌan ucꞌani. Y majax ajtaca net, sino que tunor tin e war iyubꞌi niwojroner era ucꞌani tuaꞌ ixsutpa ixquetpa bꞌan cocha nen tunorox motor que matucꞌa cacharox tamar, che e Pablo.
ACT 26:30 Entonces conda cꞌapa ojron e Pablo cocha era, achpobꞌ e rey taca e gobernador Festo y e Berenice y tunor tin e turuanobꞌ yajaꞌ, y locꞌoyobꞌ patir.
ACT 26:31 Y conda ya turobꞌ patir, e Festo y e Agripa ixiobꞌ najtir cora tut e gente y cay ojronobꞌ jaxobꞌ taca y chenobꞌ: —E winic era matucꞌa war uche tuaꞌ achamesna tamar, y nien ma erer ani aquetpa macuir e cárcel, chenobꞌ.
ACT 26:32 Entonces e Agripa uyare e Festo y che: —Ererix ani abꞌani tuaꞌ awacta alocꞌoy e winic era jay machi ani ucꞌajti que tut e emperador romano tuaꞌ eꞌrna jay ayan lo que war uche, che e Agripa.
ACT 27:1 Pues entonces conda cay ubꞌijnuobꞌ tunor e nuquir winicobꞌ que cꞌani uyebꞌtobꞌ axin e Pablo esto tama e lugar Italia, quetpa tuaꞌ caxin tor e jaꞌ tama inteꞌ nuxi barco. Entonces ajcꞌuna e Pablo tama ucꞌabꞌ inteꞌ capitán romano xeꞌ ucꞌabꞌa Julio. Y e Julio era jax tuaꞌ inteꞌ grupo tama e ejército xeꞌ ucꞌabꞌa: “Tuaꞌ e Augusto.”
ACT 27:2 Entonces ixin tꞌabꞌayon tama e nuxi barco xeꞌ tuaꞌ inteꞌ chinam xeꞌ ucꞌabꞌa Adramitio que turix tuaꞌ alocꞌoy esto tama cora chinam tama e departamento Asia. Y ixin tacaron ubꞌan inteꞌ hermano xeꞌ ucꞌabꞌa Aristarco xeꞌ tari tama e chinam Tesalónica xeꞌ turu tama e departamento Macedonia.
ACT 27:3 Y tama otronteꞌ día conda cꞌotoyon tama e puerto tama e chinam Sidón e capitán Julio xeꞌ war ucojco e Pablo uchojbꞌes ut tuaꞌ uyacta ecmay tuaꞌ axin uwarajse cora ajcꞌupesiajobꞌ tama e Cristo xeꞌ turobꞌ tama e chinam era y tuaꞌ atacarna umenerobꞌ.
ACT 27:4 Y conda locꞌoy e nuquir barco tama e chinam Sidón, war caxin esto tama e norte tama e barco era, pero intran tuaꞌ caxana porque watar e sian icꞌar tiaꞌ war caxin. Entonces cora cora cay ixion y canumse e Chipre tama catzꞌejcꞌabꞌ xeꞌ jax inteꞌ lugar tiaꞌ ayan e rum tuyuxin e jaꞌ.
ACT 27:5 Y xanon tor e jaꞌ tuaꞌ canumse e nuxi jaꞌ tut e chinam Cilicia, y de allí canumse tama e chinam Panfilia tuaꞌ cacꞌotoy tama e chinam Mira xeꞌ turu tama e departamento Licia.
ACT 27:6 Y tama e chinam Mira era e capitán tuaꞌ e soldadobꞌ utajwi inteꞌ nuxi barco xeꞌ war axin esto tama e lugar Italia. Y e barco era tuaꞌ e chinam Alejandría. Entonces jaxir uchion catꞌabꞌay tamar tuaꞌ caxin tiaꞌ cꞌani cacꞌotoy tama caxambꞌar.
ACT 27:7 Entonces locꞌoyon tama e lugar era y xanon tor e jaꞌ, pero cora cora war caxin tama cora día cocha e icꞌar war uxoti coit, y tamar era intran tuaꞌ caxin tama e barco, y numuyon tut e chinam Gnido. Y cocha e icꞌar warto uxoti coit numuyon tut e chinam Salmón, y de allí ixion tupat e lugar Creta xeꞌ jax inteꞌ lugar tiaꞌ ayan e rum tuyuxin e jaꞌ porque yajaꞌ machi war aꞌtzꞌo e icꞌar meyra.
ACT 27:8 Y intran tuaꞌ caxana tor e jaꞌ tama e barco cocha machi cꞌani axin umen e sian icꞌar lo que watar, entonces numuyon tut utiꞌ e jaꞌ y canumse tutiꞌ e lugar Creta era este que cꞌotoyon tama e chinam xeꞌ ucꞌabꞌa Buenos Puertos xeꞌ majax innajt tut e chinam Lasea.
ACT 27:9 Pues quetpon cora día tama e nuxi barco tama e chinam Buenos Puertos era. Pues tarde tama e año tuaꞌ axana inteꞌ barco tor e jaꞌ porque ya war achecta e hora conda ayan e jajar fuerte y conda ayan e icꞌar fuerte, y tamar era intran tuaꞌ axana inteꞌ barco tor e jaꞌ tama e tiempo era. Y tamar era cay ubꞌijnu e Pablo que ucꞌani tuaꞌ oꞌjron taca uyajyum e barco.
ACT 27:10 Entonces uyare e ajyum barco taca e inmojr winicobꞌ yajaꞌ y che: —Winicox, war inwira que caxambꞌar era cꞌani aquetpa intran ticoit, y que cꞌani asatpa e barco taca tunor lo que ayan tamar. Y ayan tin e axin achamay umen e jaꞌ ubꞌan, che e Pablo.
ACT 27:11 Pero tin e capitán tuaꞌ e soldadobꞌ machi ucꞌupse lo que arobꞌna umen e Pablo, sino más uturbꞌa ubꞌa tamar lo que arobꞌna umen e ajyum barco y tamar lo que arobꞌna umen e capitán tama e barco.
ACT 27:12 Y cocha e puerto tiaꞌ turobꞌ majax bueno tuaꞌ unumsiobꞌ e tiempo era conda ayan e jajar, tunorobꞌ xeꞌ turobꞌ tama e barco war ubꞌijnuobꞌ que más ani bueno tuaꞌ alocꞌoyobꞌ yajaꞌ. Cꞌani uwirobꞌ jay erer acꞌotoy esto tama e chinam Fenice xeꞌ turu tama e lugar Creta. Pues e Fenice jax inteꞌ puerto tiaꞌ erer oꞌchoy inteꞌ barco tuaꞌ ajiri conda war acꞌaxi e jajar y conda ayan e icꞌar, y ayan tiaꞌ pasar tiaꞌ erer axin inteꞌ barco tor e jaꞌ esto tama e norte y esto tama e sur. Entonces war ubꞌijnuobꞌ axiobꞌ esto bꞌana tuaꞌ aquetpobꞌ tama e tiempo era.
ACT 27:13 Pues entonces conda cay moyrema e icꞌar xeꞌ tari tama e sur, cay ubꞌijnuobꞌ e winicobꞌ tama e barco que ererto axiobꞌ otronyajr tama e xambꞌar era bꞌan cocha war ucꞌaniobꞌ. Entonces locꞌoyon tama e chinam Buenos Puertos era y cay ixion tor e jaꞌ, pero machi ixion innajt tut e rum tama e Creta era.
ACT 27:14 Pero wartocto calocꞌoy tama e puerto era conda checta inteꞌ nuxi icꞌar xeꞌ tari tutiꞌ e rum, y cay uqꞌuechion ixin esto tama e sur. Pues e nuxi icꞌar era arobꞌna umen e gente yajaꞌ que: “Nordeste.”
ACT 27:15 Entonces cay uqꞌuechion ixin e nuxi icꞌar era innajt tut e rum y ma cocha erer uquetiobꞌ ujor e barco tut e icꞌar. Entonces matucꞌa más tuaꞌ cache, intaca cawacta tuaꞌ uqꞌuechion caxin e icꞌar era.
ACT 27:16 Y wacchetaca war caxin tor e jaꞌ war utacsuon e icꞌar caxin conda numuyon tupat inteꞌ chuchu lugar tiaꞌ ayan e rum tuyuxin e jaꞌ xeꞌ ucꞌabꞌa Clauda. Y tama e lugar era machi uyajcꞌon e icꞌar meyra. Y ayan inteꞌ chuchu barco xeꞌ war acuchpa tupat e nuxi barco y era war abꞌactobꞌ que bꞌajcꞌat cꞌani acuchpa asatpa, y cocha sisa e icꞌar cora era tupat e rum, cay ubꞌijnuobꞌ que más ani bueno tuaꞌ caturbꞌa e chuchu barco tujor e nuxi barco.
ACT 27:17 Entonces uturbꞌobꞌ e chuchu barco tujor e nuxi barco, y ucachiobꞌ unac e nuxi barco taca e lazo tuaꞌ aqꞌuecꞌo y tuaꞌ machi asatpa. Pues tama e costa yajaꞌ ayan inteꞌ lugar xeꞌ ucꞌabꞌa Sirte tiaꞌ ayan e sian jiꞌ macuir e jaꞌ tiaꞌ majax intam e jaꞌ, y tamar era war ubꞌacriobꞌ que bꞌajcꞌat axin atijrpa e barco y que machi ixto tuaꞌ uyubꞌiobꞌ ulocse. Y tamar era uyemsiobꞌ e nuxi vela xeꞌ chꞌur tujor e barco xeꞌ uqꞌueche axin e barco taca e icꞌar, y de allí intaca uyactobꞌ ajni e barco tut e icꞌar.
ACT 27:18 Pero e nuxi jajar taca e icꞌar era machi sisa, y tamar era tama otronteꞌ día cay uyojresobꞌ tunor lo que war uqꞌuechiobꞌ axin tama e barco era.
ACT 27:19 Y tama e uxteꞌ día cay cachoqui tama e jaꞌ tunor e lo que quetpato tama e barco tuaꞌ machi ani asatpa e barco inyajrer.
ACT 27:20 Y meyra día turon tor e jaꞌ, y machi cawira e qꞌuin y nien inteꞌ lucero machi cawira tama e acbꞌar umen e sian jajar, y e icꞌar war uyajcꞌon meyra y war uqꞌuechion caxin tor e jaꞌ, y tamar era satpa tunor cacojcsiaj tuaꞌ cacorpes cabꞌa, y cay cabꞌijnu que cꞌani cachamay tunoron macuir e jaꞌ.
ACT 27:21 Y cocha numuyix meyra día que turon tor e jaꞌ y mamajchi xeꞌ war aweꞌ, achpa e Pablo y wawan tut e winicobꞌ era y cay ojron y che: —Winicox, jax nic ani que iyubꞌi lo que inwareox conda turonto tama e lugar Creta, machi ani war asatpa tunor lo que ayan tama e barco y machi ani war atijrpa e barco coner.
ACT 27:22 Pero coner cꞌani inwareox tuaꞌ iqꞌuecꞌojse iwalma y ira ixbꞌacta, porque mamajchi tama e barco era xeꞌ cꞌani usati ucuxtar, motor que e barco cꞌani ixto asatpa.
ACT 27:23 Pues acbꞌar acbꞌi checta inteꞌ ángel taniut xeꞌ ebꞌetna tari umen e Dios xeꞌ jax xeꞌ war unjtzꞌi ut y xeꞌ tuen jaxir.
ACT 27:24 Y jaxir ojron tacaren y che: “Pablo, ira ibꞌacta, porque net ucꞌani tuaꞌ iwawan tut e emperador romano, y Adiosir, cocha war uyajta oit, cꞌani ucorpes tunor e winicobꞌ tama e chamer xeꞌ turobꞌ tacaret tama e barco era”, che e ángel.
ACT 27:25 Entonces, winicox, qꞌuecꞌojsenic iwalma, porque nen war incꞌupseyan tama e Dios que bꞌan cocha cay uyaren e ángel y bꞌan tuaꞌ anumuy.
ACT 27:26 Pero e barco cꞌani asatpa umen que cꞌani aqꞌuejcha axin umen e icꞌar esto tut e rum tiaꞌ tuaꞌ acꞌoccha tama inteꞌ lugar tiaꞌ ayan e rum tuyuxin e jaꞌ, bꞌan che e Pablo uyare e winicobꞌ tama e barco.
ACT 27:27 Pues entonces ya turuanon tor e jaꞌ quince día y warto utacsuon caxin e nuxi icꞌar conda catajwi cabꞌa tama e mar Adriático, y tama uyuxin e acbꞌar e winicobꞌ xeꞌ war ucojcobꞌ e barco cay ubꞌijnuobꞌ que bꞌajcꞌat qꞌuix cacꞌotoy tutiꞌ e rum.
ACT 27:28 Y tamar era cay ucachiobꞌ ingojr tun tama inteꞌ succhij tuaꞌ ubꞌisiobꞌ cobꞌa intam e jaꞌ, y conda cꞌapa ubꞌisiobꞌ utajwiobꞌ que ayan cuarenta y siete varas. Y sutpa ubꞌisiobꞌ otronyajr y utajwiobꞌ que treinta y cuatro varas taca xeꞌ intam e jaꞌ coner.
ACT 27:29 Y cocha war abꞌactobꞌ que cꞌani utene ubꞌa e barco taca e tun xeꞌ turu tutiꞌ e rum, cay uriobꞌ cora nuquir taqꞌuin xeꞌ ayan ucꞌabꞌ xeꞌ cachar taca e lazo tupat e barco tuaꞌ ucachi e barco tama e rum macuir e jaꞌ. Y ayan cuatro taqꞌuin cocha era xeꞌ uriobꞌ tupat e barco tama e jaꞌ tuaꞌ uquete uwabꞌu e barco tuaꞌ machi axin utene ubꞌa taca e nuquir tun xeꞌ ayan tutiꞌ e jaꞌ. Y cocha war abꞌactobꞌ, intaca ucojcobꞌ este que asacojpa.
ACT 27:30 Y tin e war apatnobꞌ tama e barco war usicbꞌobꞌ cocha tuaꞌ alocꞌoy ajniobꞌ taca e chuchu barco, y tamar era cay uyemsiobꞌ e chuchu barco tor e jaꞌ. Pues war uche ubꞌobꞌ que cꞌani ani uyustes inteꞌ nuxi taqꞌuin xeꞌ cachar chꞌur taca e lazo tama usuy e nuxi barco. Pero bꞌan war uchiobꞌ tuaꞌ taca umajresobꞌ ani e inmojr winicobꞌ xeꞌ turobꞌ tama e nuxi barco, porque war ubꞌijnuobꞌ tuaꞌ alocꞌoy ajniobꞌ tuaꞌ acꞌotoyobꞌ tut e rum tama e chuchu barco.
ACT 27:31 Pero e Pablo war uwira tucꞌa war anumuy era, y tamar era ojron taca e capitán militar y e soldadobꞌ y che: —Jay e winicobꞌ era machi aquetpobꞌ tujor e nuquir barco nox machix tuaꞌ ixcorpesna tama e chamer, che e Pablo.
ACT 27:32 Entonces e soldadobꞌ ixin uxuriobꞌ e chꞌan xeꞌ cachar e chuchu barco tamar, y tamar era ojri ixin tor e jaꞌ ubꞌajner, y mamajchi ayan tamar.
ACT 27:33 Entonces conda cꞌanix asacojpa e Pablo cay ojron taca e winicobꞌ tama e barco y che: —Ayix dos semana era que nox machi war ixwayan y matucꞌa war icꞌuxi.
ACT 27:34 Y tamar era cꞌani inwareox que más ani bueno tuaꞌ ixweꞌ porque nox ucꞌani tuaꞌ ixqꞌuecꞌo tuaꞌ uyubꞌiox icorpes ibꞌa. Pues mamajchi tuaꞌ achamay era conda caxin tutiꞌ e rum, y mamajchi tuaꞌ usati nien inteꞌ utzutzer ujor, che e Pablo uyare e winicobꞌ era.
ACT 27:35 Y tamar era e Pablo ujajpi ingojr pan y cay utattzꞌi e Dios tamar tutobꞌ, y de allí uxere e pan y cay ucꞌuxi.
ACT 27:36 Entonces tunorobꞌ cay utꞌabꞌse uyalmobꞌ y cay wiobꞌ tunorobꞌ ubꞌan.
ACT 27:37 Y ayanon tama e barco era 276.
ACT 27:38 Y conda cꞌapa wiobꞌ tunorobꞌ, cay ulocsiobꞌ tunor lo que ayanto tama e barco tuaꞌ uchoquiobꞌ tama e jaꞌ, y tamar era cay uchoquiobꞌ tunor e sian trigo tama e jaꞌ.
ACT 27:39 Pues entonces conda sacojpa tin e war apatnobꞌ tama e barco cay uwira que chequer e rum, pero machi unatobꞌ tiaꞌ turobꞌ era. Y ayanto meyra e icꞌar xeꞌ warto aꞌtzꞌo. Pero cay uwirobꞌ que ayan tiaꞌ chequer e rum y que ayan tiaꞌ ayan e sian jiꞌ y que matucꞌa e tun yajaꞌ, y tamar era cay ubꞌijnuobꞌ que bꞌajcꞌat erer uyactobꞌ ajni e barco tut e icꞌar axin esto tut e rum bꞌana tuaꞌ ucorpes ubꞌobꞌ tama e chamer macuir e jaꞌ.
ACT 27:40 Entonces cay uxuriobꞌ e lazo tiaꞌ cachbꞌir e cuatro taqꞌuin, y uyactobꞌ ojri ixin e taqꞌuin macuir e jaꞌ, y de allí ubꞌaniobꞌ e teꞌ lo que acꞌampa tuaꞌ abꞌijresna axin e barco. Entonces cay utꞌabꞌse e vela xeꞌ turu tor e barco xeꞌ acꞌampa tuaꞌ atacsuna axin e barco umen e icꞌar, y tamar era cay ixin e barco tor e jaꞌ esto tutiꞌ e jaꞌ tiaꞌ ayan e jiꞌ.
ACT 27:41 Entonces xana e barco tor e jaꞌ este que uyobꞌi ubꞌa tama e jiꞌ tiaꞌ ma intam e jaꞌ, y ujor e barco era ochoy macuir e jiꞌ y quetpa tzꞌajwan tamar y machi ixto uyubꞌi ajni, motor que innajtto cora tiaꞌ ayan e rum. Pero upat e barco quetpa chꞌur tor e jaꞌ y war ayobꞌorna umen que war atobꞌoy e jaꞌ watar, y tamar era war acꞌapa atijrpa upat e barco.
ACT 27:42 Entonces cay ubꞌijnuobꞌ e soldadobꞌ que más ani bueno tuaꞌ uchamsiobꞌ tunor tin e turobꞌ preso tuaꞌ machi uyubꞌiobꞌ alocꞌoy ajniobꞌ tutobꞌ tiaꞌ war anujxiobꞌ.
ACT 27:43 Pero cocha e capitán militar war ucꞌani tuaꞌ ucorpes e Pablo tuaꞌ machi achamesna, uyare e soldadobꞌ que machi tuaꞌ uchiobꞌ. Entonces uyare tunor e winicobꞌ xeꞌ unatobꞌ anujxiobꞌ tuaꞌ uyacta ubꞌobꞌ axin macuir e jaꞌ tuaꞌ anujxiobꞌ esto tutiꞌ e rum teinxejr.
ACT 27:44 Y e inmojr quetpobꞌ tuaꞌ axiobꞌ tama inteꞌ pachpachteꞌ o tama inteꞌ teꞌ xeꞌ cꞌoccha tama e barco, cocha war atijrpa axin era. Y tamar era tunoron locꞌoyon esto tutiꞌ e rum y mamajchi chamay macuir e jaꞌ.
ACT 28:1 Pues entonces conda cꞌotoyon tunoron tama e taquin rum yajaꞌ y conda cꞌotoy canata que buenuon tunoron, cay canata que e lugar era ucꞌabꞌa Malta xeꞌ jax inteꞌ lugar tiaꞌ ayan e rum tuyuxin e jaꞌ.
ACT 28:2 Y e gente xeꞌ turobꞌ tama e lugar yajaꞌ war atzay uwironobꞌ y cocha cay cꞌaxi e jajar y umen que checta inteꞌ nuxi sisar, cay uxuniobꞌ inteꞌ nuxi cꞌajc y cay upejconobꞌ tuaꞌ waton tutiꞌ e cꞌajc era tuaꞌ caqꞌuixi tamar.
ACT 28:3 Y e Pablo ixin ucꞌopi e siꞌ tuaꞌ uyari tama e cꞌajc, y conda uyari e siꞌ tama e cꞌajc, locꞌoy ajni inteꞌ chan tut e cꞌajc y tobꞌoy ucꞌuxi ucꞌabꞌ e Pablo.
ACT 28:4 Y conda e gente xeꞌ turobꞌ tama e lugar era cay uwirobꞌ que chꞌur e chan tut ucꞌabꞌ e Pablo, cay ubꞌijnuobꞌ que mabꞌambꞌan e winic era y cay ojronobꞌ jaxobꞌ taca y che: —E winic era jax inteꞌ ajchamseyaj, y motor que ajcꞌuna tuaꞌ ucorpes ubꞌa tama e nuxi jaꞌ tiaꞌ qꞌuix achamesna, pero era machi actana tuaꞌ aturuan más umen e Dios porque war uche e mabꞌambꞌanir, che e gente era jaxobꞌ taca.
ACT 28:5 Pero e Pablo intaca utijti ucꞌabꞌ tuaꞌ ojri e nuxi chan macuir e cꞌajc, y tamar era chamay e chan. Y e Pablo matucꞌa unumse ubꞌa.
ACT 28:6 Y e gente war ucojcobꞌ tuaꞌ uwirobꞌ asampa ucꞌabꞌ e Pablo o tuaꞌ taca acucrema tor e rum chamen. Pero conda numuy cora tiempo y war uwirobꞌ que matucꞌa war unumse ubꞌa e Pablo cay tijrpa ubꞌijnusiajobꞌ otronyajr y chenobꞌ: —Jaxir jax inteꞌ dios, che e gente era.
ACT 28:7 Y tama e lugar era ayan inteꞌ nuxi chor tuaꞌ inteꞌ winic xeꞌ más nojta tujam e winicobꞌ tama e lugar era xeꞌ ucꞌabꞌa Publio. Y jaxir atzay uwiron y tamar era upejcon tuaꞌ cacꞌotoy tama uyotot tiaꞌ cay uwesion y cay uyajcꞌon tiaꞌ tuaꞌ cajiri uxteꞌ día.
ACT 28:8 Pero ayan lo que war unumse ubꞌa e Publio era porque ajmuac utata. Y utata era chꞌar tama uchꞌacteꞌ y war ucojco e purer y e numnac. Entonces ixin e Pablo tuaꞌ uwarajse e ajmuac era y cay ucꞌajti taca e Dios y uturbꞌa ucꞌabꞌ tama ujor y tamar era tzꞌacpa.
ACT 28:9 Entonces conda cay unatobꞌ e gente lo que numuy taca utata e Publio, cay utaresobꞌ tunor e sian ajmuacobꞌ lo que ayan tama e lugar era y tunorobꞌ tzꞌacpesnobꞌ ubꞌan.
ACT 28:10 Y tamar era cay sijpobꞌ e gente era tacaron, y conda ixion tuaꞌ cochoy tama inteꞌ nuquir barco tuaꞌ calocꞌoy tama e lugar era, ixiobꞌ tacaron y cay uyajcꞌon tunor lo que ucꞌani tama caxambꞌar era.
ACT 28:11 Pues entonces quetpon uxteꞌ mes tama e lugar Malta, y de allí sutpa catajwi inteꞌ nuquir barco xeꞌ quetpa tama e Malta ubꞌan tama tunor e tiempo era conda ayan e jajar taca e sisar. Pues e nuquir barco era tari tama e chinam Alejandría, pero intiach uwirnar porque ayan chateꞌ chamen dios xeꞌ turu tujor e barco era. Inteꞌ ucꞌabꞌa Cástor y otronteꞌ ucꞌabꞌa Pólux.
ACT 28:12 Conda locꞌoyon tama e lugar era ixion tor e jaꞌ tuaꞌ cacꞌotoy esto tama e chinam Siracusa, y quetpon uxteꞌ día tama e lugar era.
ACT 28:13 Y de allí ixion tor e jaꞌ pero majax innajt tut e rum este que cꞌotoyon tama e chinam Regio xeꞌ turu tama e lugar Italia. Y tama otronteꞌ día cay uyajcꞌon e icꞌar xeꞌ tari tama e sur xeꞌ war utacsuon caxin, y tamar era cꞌotoyon esto tama e chinam Puteoli tama e chateꞌ día.
ACT 28:14 Y tama e chinam Puteoli era catajwi cabꞌa taca cora ajcꞌupesiajobꞌ xeꞌ cay upejcon tuaꞌ caquetpa tacarobꞌ tama inteꞌ semana, y bꞌan cache. Y de allí cajajpi e bꞌir y ixion tuaꞌ cacꞌotoy tama e chinam Roma.
ACT 28:15 Y ayan cora ajcꞌupesiajobꞌ tama e Cristo tama e chinam Roma xeꞌ cay unatobꞌ que cꞌani cacꞌotoy non. Entonces locꞌoyobꞌ tuaꞌ utajwionobꞌ tama e bꞌir, y cꞌotoyobꞌ esto tama e lugar xeꞌ ucꞌabꞌa Foro de Apio y xeꞌ ucꞌabꞌa Tres Tabernas. Y conda e Pablo uwira ut e ajcꞌupesiajobꞌ era cay utattzꞌi ucꞌabꞌa e Dios tamarobꞌ y cay tzayjran tama uyalma.
ACT 28:16 Y conda cꞌotoyon esto tama e chinam Roma, e capitán tuaꞌ e soldadobꞌ uyajcꞌu tunor tin e turobꞌ preso tama ucꞌabꞌ tin e war acꞌotori tujor e inmojr guardia tama e chinam Roma. Pero e Pablo actana tuaꞌ aturuan ubꞌajner tama inteꞌ otot xeꞌ cay utoyi tuaꞌ aturuan tamar. Y quetpa inteꞌ taca soldado tacar tuaꞌ acojcna.
ACT 28:17 Pues entonces conda numuy uxteꞌ día, e Pablo uyebꞌta ixin inteꞌ ojroner esto tama tin e más nuquir winicobꞌ tujam e gente tuaꞌ Israel xeꞌ turobꞌ tama e chinam Roma era tuaꞌ watobꞌ. Y conda yopobꞌ tut e Pablo y cay umorojse ubꞌobꞌ tacar, jaxir cay ojron y che: —Niwermanuox, motor que matucꞌa war inche upater e gente tama e Israel y nien upater e onian bꞌijnusiaj tuaꞌ catata viejobꞌirobꞌ, pero cajchento tuaꞌ inyajra inxin tama e cárcel tama e chinam Jerusalem y de allí ajcꞌunen tuaꞌ inquetpa tama ucꞌabꞌobꞌ e gente romano.
ACT 28:18 Y e gente romano era, conda cay uyubꞌiobꞌ tanibꞌa tuaꞌ unatobꞌ tucꞌa war inche, matucꞌa utajwiobꞌ tamaren tuaꞌ uchamsenobꞌ, y cꞌani ani uyactenobꞌ inxin bꞌan taca.
ACT 28:19 Pero cocha majax bꞌan ucꞌani e gente tama e Israel quetpa tuaꞌ inware que tut e emperador romano tuaꞌ enrna jay ayan lo que war inche, pero nen machi insutpa intuchꞌi nien inteꞌ tujam e gente era xeꞌ cay utuchꞌienobꞌ xeꞌ tuobꞌ e Israel.
ACT 28:20 Y tamar era cay impejcox tuaꞌ ixyopa tara tuaꞌ inwirox y tuaꞌ onjron tacarox, porque tamar taca lo que war cacojco tunoron xeꞌ tuon e Israel y tamar taca era itajwien cacharen taca e cadena era. Bꞌan che e Pablo uyare e winicobꞌ xeꞌ tuobꞌ e Israel xeꞌ yopobꞌ tut era.
ACT 28:21 Entonces ojronobꞌ tin e tuobꞌ e Israel era y uyareobꞌ e Pablo y che: —Non era ma inteꞌ ojroner cachꞌami tuaꞌ e gente tama e departamento Judea xeꞌ war oꞌjron apater, y tin e war ayopa tama e departamento Judea machi war uyareon inteꞌ ojroner tamaret ubꞌan.
ACT 28:22 Pero non era quisinic coybꞌi tunor lo que war anata era porque canata que ayan e gente xeꞌ war oꞌjron upater e secta tabꞌa tic taca, pero non matucꞌa war coybꞌi tamar, che e winicobꞌ era xeꞌ tuobꞌ e Israel xeꞌ turuanobꞌ tama e chinam Roma.
ACT 28:23 Entonces ubꞌijnuobꞌ tucꞌa día tuaꞌ ayopobꞌ e winicobꞌ era tuaꞌ uyubꞌiobꞌ uyojroner e Pablo. Y conda cꞌotoy e día yopobꞌ meyra winicobꞌ tama e otot tiaꞌ turu e Pablo. Pues cay canseyan conda intocto atꞌabꞌay e qꞌuin y bꞌan uche este que namtzꞌa e qꞌuin; war acanseyan tama uyojroner e Dios tama e corpesiaj. Y uturbꞌa ubꞌa tuaꞌ uche acꞌupseyanobꞌ tunorobꞌ tama e Jesús. Y war ucꞌampes meyra uley e Moisés y lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo tuaꞌ uchecsu tutobꞌ que e Jesús jax xeꞌ quetpa tuaꞌ watar.
ACT 28:24 Y ayan tin e cay cꞌupseyanobꞌ tamar lo que war acanseyan e Pablo, pero ayan ubꞌan tin e machi cꞌupseyanobꞌ.
ACT 28:25 Y cocha machi quetpobꞌ intera ubꞌijnusiajobꞌ, ayan tin e cay locꞌoy ixin. Entonces ojron e Pablo otronyajr y che: —Pues uwajpi lo que arobꞌna catata viejobꞌirobꞌ umen Unawalir e Dios tama e profeta Isaías conda che que:
ACT 28:26 Quiqui aware e gente era y che: Nox tuaꞌ iyubꞌi, pero machi tuaꞌ inata tucꞌa war che tunor e ojroner era, y tuaꞌ iwira, pero machi tuaꞌ inata tucꞌa era xeꞌ war iwira.
ACT 28:27 Porque uyalmobꞌ e gente era tzatzran ut, y ayan uchiquinobꞌ pero machi obꞌianobꞌ, y ayan unacꞌutobꞌ pero war umutzꞌi utobꞌ era, y tamar era machi tuaꞌ uwirobꞌ y machi tuaꞌ obꞌianobꞌ y machi tuaꞌ acꞌupseyanobꞌ tama uyalmobꞌ y tamar era machi tuaꞌ asutpobꞌ tut e Dios tuaꞌ atzꞌacpesnobꞌ, xeꞌ che tama uyojroner e Dios xeꞌ tzꞌijbꞌabꞌir umen e profeta Isaías ixnix e tiempo.
ACT 28:28 Natanic nox coner que tunor ucorpesiaj e Dios era axin achecsuna tut e gente xeꞌ majax tuobꞌ e Israel, y jaxirobꞌ cꞌani uyubꞌiobꞌ lo que cꞌani inwareobꞌ, che e Pablo.
ACT 28:29 Entonces conda cꞌapa ojron e Pablo cocha era, locꞌoyobꞌ tunor e gente tuaꞌ e Israel era, war abꞌiritiobꞌ tamar lo que arobꞌnobꞌ umen e Pablo.
ACT 28:30 Entonces e Pablo quetpa chateꞌ año tama e chinam Roma. Y war utoyi inteꞌ otot tuaꞌ aturuan tamar y war uchꞌami tunor xeꞌ ajwarobꞌ tuaꞌ jaxir.
ACT 28:31 Y e Pablo actana tuaꞌ uchecsu tunor lo que ucꞌani, y war ucanse e gente tama uchinam e Dios, y war acanseyan tama Cawinquirar Jesucristo. Y cocha turu tama uyotot jaxir, mamajchi umener uche unumse ubꞌa. Tara acꞌapa tunor niwojroner, che e Lucas.
ROM 1:1 Nen e Pabloen xeꞌ jax inteꞌ man tuaꞌ e Cristo Jesús, y nen pejcbꞌiren umen e Dios tuaꞌ inquetpa inteꞌ apóstol, y quetbꞌiren umen e Dios tuaꞌ inxin inchecsu uyojroner e Dios tama e corpesiaj tut tunor e gente xeꞌ turobꞌ tara tor e rum.
ROM 1:2 Pues ixnix Cadiosir ixin uchecsu tunor e ojroner era tama e corpesiaj tut e profetobꞌ xeꞌ turuanobꞌ tama e onian tiempo y jaxirobꞌ sutpa utzꞌijbꞌobꞌ tunor era tama e ojroner xeꞌ erach xeꞌ tuaꞌ e Dios.
ROM 1:3 Y e ojroner era xeꞌ chꞌar tzꞌijbꞌabꞌir war uwirsion tama Cawinquirar Jesucristo xeꞌ jax Uyunen e Dios. Pues jaxir tari tara tor e rum tuaꞌ aquetpa inteꞌ winic, y tamar era quetpa inteꞌ usitz e rey David xeꞌ turuan tama e onian tiempo.
ROM 1:4 Pero quetpa chequer ubꞌan que jaxir jax Uyunen e Dios y que ayan ucꞌotorer conda sujta bꞌixqꞌuesna tujam e chamenobꞌ umen Unawalir e Dios xeꞌ erach.
ROM 1:5 Y tamar Cawinquirar Jesucristo era ubꞌan que e Dios ixin uyajqꞌuen utacarsiaj y ixin upejquen tuaꞌ inquetpa inteꞌ apóstol tuaꞌ inxin inchecsu uyojroner e Dios tama e corpesiaj tut tunor e gente xeꞌ majax tuobꞌ e Israel tuaꞌ axin acꞌupseyanobꞌ tama Cawinquirar Jesucristo y tuaꞌ axin acꞌupseyanobꞌ tut jaxir ubꞌan. Tunor era tuaꞌ anumuy tuaꞌ atajttzꞌa ucꞌabꞌa Cawinquirar Jesucristo.
ROM 1:6 Y tamar era nox ubꞌan xeꞌ turox tama e chinam Roma pejcbꞌirox umen e Dios tuaꞌ ixquetpa tuox Cawinquirar Jesucristo.
ROM 1:7 Pues war intzꞌijbꞌa e carta era tibꞌa umen que inchoj iut umen e Dios y umen que pejcbꞌirox tuaꞌ ixquetpa erach tut jaxir ubꞌan. Pues Catata Dios taca Cawinquirar Jesucristo axin utacricox y axin ujirijsiox ubꞌan.
ROM 1:8 Pues era cꞌani inwajcꞌu gracias e Dios tamarox tama ucꞌabꞌa Cawinquirar Jesucristo porque tic taca tiaꞌ inxin war incꞌotoy innata que nox meyra war ixcꞌupseyan tama Cawinquirar.
ROM 1:9 Y nen era war unjtzꞌi ut Cadiosir taca tunor niwalma y war inchecsu axin tunor e ojroner tama e corpesiaj lo que ayan tama Uyunen e Dios. Pues jax Cadiosir xeꞌ jax niwajchecsuyaj que nen war incꞌajpesox iraj iraj conda incꞌajti taca e Dios tuaꞌ utacriox axin.
ROM 1:10 Pues nen cꞌani ani inxin inwarajsiox ixnix, y tamar era war incꞌajti taca e Dios coner tuaꞌ uyubꞌien inxin inwarajsiox tama inteꞌ tiempo, pero cꞌani inche lo que ucꞌani e Dios y majax jax taca lo que incꞌani nen.
ROM 1:11 Porque nen era war unsre tuaꞌ inyopa tuaꞌ intacriox ichꞌami icꞌampibꞌir lo que ayan tama Cadiosir y tuaꞌ intacriox ixqꞌuecꞌo ixxana tama ubꞌir e Dios.
ROM 1:12 Pues cꞌani inwareox era que tunoron cꞌani caxin catacarna umen e Dios, porque nen erer intacriox taca nicꞌupesiaj tama Cawinquirar, y nox erer itacren nen ubꞌan umen que war ixcꞌupseyan tama Cawinquirar.
ROM 1:13 Pues entonces niwermanuox natanic que ayan ani conda cay imbꞌijnu meyra tuaꞌ incꞌotoy tiaꞌ turox tuaꞌ inwarajsiox pero ayan lo que war uwabꞌuen tuaꞌ machi inche. Y cꞌani ani incꞌotoy tibꞌa tuaꞌ uyubꞌien intacre meyra gente tiaꞌ turox tuaꞌ uchꞌamiobꞌ ucꞌabꞌa Cadiosir bꞌan cocha war inche tic taca tiaꞌ inxin tujam e inmojr gente xeꞌ majax tuobꞌ e Israel.
ROM 1:14 Porque nen actabꞌiren umen e Dios tuaꞌ inxin inware tunor e gente tama tunor or e rum tama e corpesiaj lo que ayan tama Cawinquirar, motor jay e gente xeꞌ nojta ujor o jay e gente xeꞌ matucꞌa unatobꞌ, motor jay cansebꞌir o jay majax cansebꞌir. Nen ucꞌani tuaꞌ inxin inware tunorobꞌ tamar Cawinquirar.
ROM 1:15 Y tamar era nen war unsre tuaꞌ inxin esto tiaꞌ turox tama e chinam Roma tuaꞌ uyubꞌien inchecsu e ojroner tama e corpesiaj yajaꞌ ubꞌan.
ROM 1:16 Pues cꞌani inwareox era que machi insubꞌajra tuaꞌ inchecsu uyojroner e Dios tama e corpesiaj lo que ayan tama Cawinquirar Jesucristo, porque tamar e ojroner era ayan ucꞌotorer e Dios tuaꞌ axin ucorpes tunor tin e acꞌotoy acꞌupseyan tama e Cristo, motor jay tuaꞌ e Israel o jay majax tuaꞌ e Israel.
ROM 1:17 Pues uyojroner e Dios uchecsuon que tin e acꞌotoy tuaꞌ acorpesna umen e Dios acꞌotoy tamar taca e cꞌupesiaj lo que uche inteꞌ. Bꞌan cocha chꞌar tzꞌijbꞌabꞌir tama uyojroner e Dios que: “Tin e cꞌani aquetpa erach uwirnar tut e Dios ucꞌani tuaꞌ acꞌupseyan tamar tuaꞌ atacarna umener y de allí axin uchꞌami e cuxtar xeꞌ machi tuaꞌ acꞌapa.” Bꞌan chꞌar tzꞌijbꞌabꞌir tama uyojroner e Dios.
ROM 1:18 Pues war achecsuna umen e Dios que watar tichan inteꞌ nuxi qꞌuijnar xeꞌ tuaꞌ acꞌaxi tujor e winicobꞌ xeꞌ mabꞌambꞌan xeꞌ umen que ajmabꞌambꞌanirobꞌ uche ubꞌobꞌ que e Dios machi ani tuaꞌ uwatzꞌi tin e uchiobꞌ e mabꞌambꞌanir, y tamar era war uquete uwabꞌuobꞌ lo que erach tuaꞌ e Dios tuaꞌ machi acanuobꞌ e inmojr.
ROM 1:19 Y e winicobꞌ era war ixto unatobꞌ tamar lo que erach tuaꞌ e Dios porque lo que erer anatanwa tama Cadiosir war aquetpa chequer tutobꞌ umen que Cadiosir ixin uchectes tunor era tutobꞌ.
ROM 1:20 Porque conda wartocto achena or e rum era este coner ayan meyra lo que quetpa chequer tut e winicobꞌ tama e Dios xeꞌ jax era: Que e Dios ayan ucꞌotorer que machi tuaꞌ acꞌapa, y que jaxir erach, y que matucꞌa e bꞌonemar tamar. Tunor era war aquetpa chequer tut e winicobꞌ porque erer uwirobꞌ tunor era tamar lo que chembꞌir umen e Dios. Y tamar era ma cocha erer oꞌjron inteꞌ y che: “Nen matucꞌa innata tama tunor era. ¿Y cocha tuaꞌ injajtzꞌa nen tamar e mabꞌambꞌanir lo que cay inche conda mamajchi cꞌotoy tuaꞌ uyaren que majax bueno tuaꞌ inche tunor e mabꞌambꞌanir era?” xeꞌ che ani inteꞌ. Mamajchi tuaꞌ uyubꞌi oꞌjron cocha era conda achecta watar uqꞌuijnar e Dios porque warix unatobꞌ.
ROM 1:21 Porque tunor e gente war unatobꞌ que ayan inteꞌ Dios xeꞌ bꞌixir, pero machi cꞌani utattzꞌi ut jaxir xeꞌ tawar tuaꞌ uchꞌami tunor e tattzꞌarsiaj era, y machix cꞌani ubꞌijnuobꞌ tuaꞌ uyajcꞌu gracias tama tunor lo que chena tamarobꞌ. Lo que uchiobꞌ jaxirobꞌ axin acay ubꞌijnuobꞌ tamar lo que matucꞌa ucꞌampibꞌir, y ujorobꞌ tojbꞌen tunor, y bꞌutꞌur taca e sian incsibꞌaner. Intaca machix cꞌani ubꞌijnuobꞌ tama e Dios.
ROM 1:22 E winicobꞌ era war utattzꞌi ubꞌobꞌ que nojta ujorobꞌ, pero cꞌani inwareox era que matucꞌa unatobꞌ.
ROM 1:23 Y tamar era machi cꞌani uyujtzꞌiobꞌ ut e Dios xeꞌ machi tuaꞌ acꞌapa, sino que ixin uyujtzꞌiobꞌ ut inteꞌ chamen dios que bꞌan uwirnar cocha inteꞌ winic, o bꞌan uwirnar cocha inteꞌ mut, o bꞌan uwirnar cocha inteꞌ wacax, o bꞌan uwirnar cocha inteꞌ chan. Y bꞌan taca cay uyujtzꞌiobꞌ ut e sian chamen dios cocha era.
ROM 1:24 Y cocha e winicobꞌ era machi cꞌani ubꞌijnuobꞌ jay imbꞌutz o jay majax imbꞌutz tut e Dios lo que cꞌani uchiobꞌ, e Dios ixin uyacta uchiobꞌ lo que war uyusre uchiobꞌ tama uyalmobꞌ, y tamar era e winicobꞌ era cay uchiobꞌ meyra lo que subꞌar uwirnar.
ROM 1:25 Y cocha machix war ucꞌupsiobꞌ lo que erach tama e Dios, ixin uchꞌamiobꞌ e majresiaj, pero war uchebꞌiobꞌ que bueno tunor era. Y war uyujtzꞌiobꞌ ut lo que chena umen e Dios, pero machi war uyujtzꞌiobꞌ ut e Dios xeꞌ cay uche tunor era. Pues Cadiosir tawar tuaꞌ atajttzꞌa iraj iraj. Amén.
ROM 1:26 Y cocha e winicobꞌ tara tor e rum war uyujtzꞌiobꞌ ut e sian chamen diosobꞌ, e Dios ixin uyacta uchiobꞌ e sian mabꞌambꞌanir xeꞌ más usubꞌarir ut. Y tamar era ayan e ixictac xeꞌ cay uchꞌami ubꞌobꞌ jaxobꞌ taca, y machi ixto war ucꞌaniobꞌ inteꞌ winic.
ROM 1:27 Y bꞌan cocha era ayan e winicobꞌ ubꞌan xeꞌ machi ixto war ucꞌani inteꞌ ixic, sino que cay uyusre uchꞌami inteꞌ uyet winiquir. Y tamar era ayan e winicobꞌ xeꞌ war uchiobꞌ e mabꞌambꞌanir xeꞌ más usubꞌarir ut taca uyet winiquirobꞌ. Y tamar era cꞌani unumse ubꞌobꞌ meyra cꞌuxner tama tunor umabꞌambꞌanirobꞌ lo que war uchiobꞌ era xeꞌ cꞌani aquetpa bꞌan cocha inteꞌ nuxi jatzꞌuar tutobꞌ.
ROM 1:28 Y cocha e winicobꞌ era machix ucꞌaniobꞌ lo que erer anatanwa tama e Dios, pues e Dios uyacta ubꞌijnuobꞌ tama tunor e bꞌijnusiaj xeꞌ mabꞌambꞌan, y tamar era ixin uchiobꞌ lo que machi ani tuaꞌ uchiobꞌ.
ROM 1:29 Y bꞌutꞌur ujorobꞌ taca tunor e sian mabꞌambꞌanir, y war uyusreobꞌ tuaꞌ uchꞌamiobꞌ e ixictac axin, y war uyusreobꞌ tuaꞌ uchꞌamiobꞌ uyet winiquir. Y motor que meyra ayan lo que ayan tuobꞌ pero warto uyusreobꞌ tuaꞌ uchꞌamiobꞌ más. Y machi ubꞌijnuobꞌ tuaꞌ uchiobꞌ lo que imbꞌutz. Y war acꞌuxnaqꞌuiobꞌ uwirobꞌ lo que ayan tuaꞌ otronteꞌ, y war uyusreobꞌ tuaꞌ achamsanobꞌ, y war aqꞌuecranobꞌ iraj iraj, y war amajresianobꞌ, y war uyusreobꞌ meyra lo que intuj tama uwerir, y war oꞌjronobꞌ upater e inmojr.
ROM 1:30 Y war uturbꞌa ubꞌobꞌ tuaꞌ utuchꞌiobꞌ otronteꞌ, y war uxejbꞌiobꞌ ut e Dios, y war unatobꞌ que jaxobꞌ taca xeꞌ imbꞌutzobꞌ, y chenobꞌ: “Pero matucꞌa otronteꞌ cocha nen”, chenobꞌ. Y war utattzꞌi ubꞌobꞌ axin, y war ubꞌijnuobꞌ tuaꞌ uchiobꞌ e mabꞌambꞌanir xeꞌ más calapir, y machix war ubꞌijnuobꞌ tuaꞌ ucꞌupse utatobꞌ.
ROM 1:31 Y e winicobꞌ era satpix ujorobꞌ tuaꞌ machi unatobꞌ tin xeꞌ imbꞌutz o tin xeꞌ mabꞌambꞌan, y machi acꞌapa uchiobꞌ lo que quetpa tuaꞌ uchiobꞌ, y machix war ubꞌijnuobꞌ tuaꞌ uyajta utobꞌ upiarobꞌ, y machix war unatobꞌ jay ucꞌani tuaꞌ acꞌumpobꞌ, y nien machix aquetpa incꞌun uwirnarobꞌ tut otronteꞌ.
ROM 1:32 Y war unatobꞌ lo que arobꞌnon umen e Dios que tunor tin e axin uche e mabꞌambꞌanir cocha era ucꞌani tuaꞌ axin tut e cꞌajc. Y motor que war unatobꞌ tunor era, pero warto uchiobꞌ e mabꞌambꞌanir, y este war atzayobꞌ uwirobꞌ tin e war uchiobꞌ e mabꞌambꞌanir cocha era ubꞌan.
ROM 2:1 Y net xeꞌ nipiaret, matucꞌa tamar tuaꞌ alocse abꞌa tama tunor era umen taca que net aware que mabꞌambꞌan uwirnar e inmojr winicobꞌ tamar lo que war uchiobꞌ. Pero tamar era net war ache juzgar abꞌa porque net ubꞌan war ache bꞌan taca lo que war uchiobꞌ e inmojr era. Entonces ¿machi ca war ache juzgar abꞌa tuaꞌ iꞌxin ijajtzꞌa net ubꞌan?
ROM 2:2 Pues war canata que bueno war uche Cadiosir conda axin uche juzgar e winicobꞌ tin e war uchiobꞌ e sian mabꞌambꞌanir cocha era porque e Dios war uche juzgar tamar lo que erach.
ROM 2:3 Pero net xeꞌ nipiaret xeꞌ tuet e Israel ubꞌan, net war aware que mabꞌambꞌan lo que war uchiobꞌ e inmojr winicobꞌ era, pero bꞌan taca war ache net ubꞌan. Y tamar era cꞌani inwaret que ma cocha erer icorpa tamar ujatzꞌuar e Dios jay warto ache e mabꞌambꞌanir cocha era.
ROM 2:4 ¿O war ca abꞌijnu que matucꞌa ucꞌampibꞌir que meyra ayan ucꞌunir e Dios y que ayan meyra ucojcseyaj y que jaxir tzꞌustaca turu? Net machi war anata que jax taca ucꞌunir e Dios era que war upejquet tuaꞌ awacta tunor amabꞌambꞌanir y tuaꞌ isutpa icꞌupseyan tut jaxir.
ROM 2:5 Pero net lo que cay ache: Aqꞌuecꞌojse awalma tuaꞌ machi isutpa icꞌupseyan tut e Dios. Y tamar era war abꞌorojse e sian jatzꞌuar lo que tuaꞌ acꞌaxi tama ajor tama e día conda achecta watar Catata Dios tuaꞌ uchectes tunor uqꞌuijnar upater tin e cay uchiobꞌ e mabꞌambꞌanir.
ROM 2:6 Pues Catata Dios axin utoyi inteꞌ inteꞌ winic lo que tawar tuaꞌ uchꞌami. Axin uyajcꞌu utuanibꞌir tunor tin e cay uchiobꞌ lo que bueno, pero axin uwatzꞌi tunor tin e cay uchiobꞌ lo que mabꞌambꞌan.
ROM 2:7 Porque ayan tin e war usicbꞌobꞌ tuaꞌ uchiobꞌ jax taca lo que imbꞌutz. War usicbꞌobꞌ e tawarer, y e tattzꞌarsiaj y e cuxtar xeꞌ machi tuaꞌ acꞌapa. Y tamar era e Dios tuaꞌ axin uyajcꞌu utuanibꞌir xeꞌ jax e cuxtar xeꞌ machi tuaꞌ acꞌapa.
ROM 2:8 Pero ayan tin e war ubꞌijnu tamar taca ubꞌa, y war uxejbꞌe ut lo que erach, y war uche intaca lo que mabꞌambꞌan. Tunor tin e axin uchiobꞌ cocha era cꞌani ajajtzꞌobꞌ nojta taca tunor uqꞌuijnar e Dios.
ROM 2:9 Y tamar era chequer que ucꞌani tuaꞌ unumse ubꞌobꞌ meyra cꞌuxner tunor tin e cay uchiobꞌ lo que mabꞌambꞌan, motor jay tuobꞌ e Israel, o motor jay majax tuobꞌ e Israel.
ROM 2:10 Pero e Dios axin uyajcꞌu utawarer y utattzꞌarsiaj y ujiriar tunor tin e cay uchiobꞌ lo que imbꞌutz motor jay tuobꞌ e Israel, o motor jay majax tuobꞌ e Israel.
ROM 2:11 Porque e Dios war uwira tucꞌa tucꞌa war uchiobꞌ tunor e gente, y jaxir cꞌani uyajcꞌu inteꞌ inteꞌ winic lo que tawar tuaꞌ uchꞌami. Pues e Dios machi war uwira tiaꞌ ajlugar tin e war uche lo que imbꞌutz.
ROM 2:12 Pues e winicobꞌ xeꞌ majax tuobꞌ e Israel machi war unatobꞌ lo que ayan tama uley e Moisés y war uchiobꞌ e mabꞌambꞌanir, y tamar era war asatpobꞌ motor que ma tiaꞌ cay unatobꞌ lo que ayan tama uley e Moisés. Pero tin e tuobꞌ e Israel war unatobꞌ tama tunor uley e Moisés pero war uchiobꞌ e mabꞌambꞌanir ubꞌan, y tamar era jaxirobꞌ axin achenobꞌ juzgar tamar uley e Moisés, y axin asatpobꞌ ubꞌan.
ROM 2:13 Entonces lo que war che tunor era jax era: Que machi acorpesna inteꞌ winic umen taca que axin uyubꞌi lo que chꞌar tzꞌijbꞌabꞌir tama uley e Moisés, sino que tin e axin acꞌupseyan tut e ley era jax tin e tuaꞌ acorpesna.
ROM 2:14 Pero conda tin e majax tuobꞌ e Israel xeꞌ ma tiaꞌ cay uwirobꞌ lo que chꞌar tzꞌijbꞌabꞌir tama uley e Moisés axin uchiobꞌ lo que chꞌar tzꞌijbꞌabꞌir tamar, pues chequer que ayan inteꞌ ley chꞌar tzꞌijbꞌabꞌir tama uyalmobꞌ, motor que ma tiaꞌ cay uwirobꞌ lo que chꞌar tzꞌijbꞌabꞌir tama uley e Moisés.
ROM 2:15 Porque conda axin uchiobꞌ lo que erach war uchectes que chꞌar tzꞌijbꞌabꞌir inteꞌ ley tama uyalmobꞌ. Y tama uyalmobꞌ era war unatobꞌ que imbꞌutz o que majax imbꞌutz lo que war uchiobꞌ, porque conda axin uchiobꞌ lo que mabꞌambꞌan axin asubꞌajrobꞌ tamar. Y tamar lo que axin uchiobꞌ xeꞌ imbꞌutz war unatobꞌ que imbꞌutz tunor era.
ROM 2:16 Y tunor e bꞌijnusiaj xeꞌ mucur tuaꞌ e winicobꞌ era cꞌani achena juzgar umen Catata Dios tama e Jesucristo xeꞌ war unata tama tunor. Pues axin anumuy tunor era conda watar e día xeꞌ turbꞌana umen Catata Dios bꞌan cocha war incanseyan axin.
ROM 2:17 Y net xeꞌ arobꞌnet que ajisraelet, war atattzꞌi abꞌa que imbꞌutzet tut e Dios umen que war anata tunor lo que chꞌar tzꞌijbꞌabꞌir tama uley e Moisés, y war atattzꞌi abꞌa que tabꞌa e Dios.
ROM 2:18 Y net war anata tucꞌa ucꞌani e Dios, y cay canoet tama tunor lo que ayan tama uley e Moisés tuaꞌ anata ache lo que erach.
ROM 2:19 Y net war anata que imbꞌutzet tuaꞌ abꞌijres tin e tajpem unacꞌut, y anata que net erer ajanchꞌacnes tin e war axanobꞌ tama e incsibꞌaner xeꞌ jax tin e matucꞌa unatobꞌ tamar lo que erach.
ROM 2:20 Y net war anata que erer iquetpa ajcanseyajet tut tin e matucꞌa unatobꞌ, y tut tin e chꞌom maxtacobꞌ, porque tama uley e Moisés morojsebꞌir meyra natanyaj y meyra canseyaj tamar lo que erach.
ROM 2:21 Y tamar era war iꞌxin acanse e inmojr tama uley e Moisés, pero ¿tucꞌa tuaꞌ machi acanse abꞌa net bꞌajxan? Porque net war acanse e gente axin que ma erer axujchꞌianobꞌ, pero net war ixujchꞌian ubꞌan.
ROM 2:22 Net war acanse e gente axin que ma erer axin taca inteꞌ ajnajtir ixic, y net ¿ma ca nic war iꞌxin taca inteꞌ ajnajtir ixic? Y war axejbꞌe ut tunor e chamen dios, pero ¿ma ca nic war ixujchꞌi lo que ayan macuir e otot tiaꞌ turobꞌ e sian chamen dios era?
ROM 2:23 War atattzꞌi abꞌa que tabꞌa uley e Moisés, pero ¿machi ca war asubꞌajres ut e Dios umen que machi war icꞌupseyan tut lo que chꞌar tzꞌijbꞌabꞌir tama e ley era?
ROM 2:24 Chꞌar tzꞌijbꞌabꞌir tama uyojroner e Dios que: “E gente xeꞌ majax tuobꞌ e Israel war uqꞌuijnesobꞌ e Dios umen que war uwirobꞌ lo que war iche nox xeꞌ tuox e Israel.” Bꞌan chꞌar tzꞌijbꞌabꞌir tama uyojroner e Dios.
ROM 2:25 Pues jay iꞌxin icꞌupseyan tut lo que chꞌar tzꞌijbꞌabꞌir tama uley e Moisés, ayan ucꞌampibꞌir jay xujra imbꞌijc uqꞌuewerir atejromar tuaꞌ aquetpa chequer que net tuaꞌ e Dios. Pero jay machi ache lo que chꞌar tzꞌijbꞌabꞌir tama uley e Moisés, matucꞌa ucꞌampibꞌir jay xujra imbꞌijc uqꞌuewerir atejromar.
ROM 2:26 Pero jay inteꞌ winic xeꞌ majax tuaꞌ e Israel y xeꞌ majax xurbꞌir imbꞌijc uqꞌuewerir utejromar war uche lo que chꞌar tzꞌijbꞌabꞌir tama uley e Moisés, jaxir aquetpa bꞌan cocha inteꞌ winic xeꞌ tuaꞌ e Israel tut e Dios motor que majax xurbꞌir imbꞌijc uqꞌuewerir utejromar.
ROM 2:27 Y cꞌani uchiox juzgar e winicobꞌ cocha era xeꞌ majax tuobꞌ e Israel y xeꞌ majax xurbꞌir imbꞌijc uqꞌuewerir utejromar umen que jaxirobꞌ war ucꞌupsiobꞌ lo que chꞌar tzꞌijbꞌabꞌir tama uley e Moisés. Pero nox xeꞌ ajisraelox, motor que xurbꞌir imbꞌijc uqꞌuewerir itejromar, y motor que natanwa imener tunor lo que chꞌar tzꞌijbꞌabꞌir tama uley e Moisés, pero majax nox xeꞌ war ixcꞌupseyan tut.
ROM 2:28 Pues inteꞌ winic xeꞌ tuaꞌ e Israel y xeꞌ xurbꞌir imbꞌijc uqꞌuewerir utejromar ma erer ubꞌijnu tamar taca era.
ROM 2:29 Sino que inteꞌ winic xeꞌ tuaꞌ ixto e Israel jax tin e ixin uchꞌami e cꞌupesiaj tut e Dios tama uyalma, y tamar era war ubꞌijnu tuaꞌ uche lo que ucꞌani e Dios. Jax era lo que arobꞌbꞌir que jax inteꞌ chequerir macuir uyalma inteꞌ winic xeꞌ tuaꞌ ixto e Dios, y jax ubꞌan lo que ayan tama uyalma inteꞌ winic xeꞌ tuaꞌ ixto e Israel. Pues tunor era machi watar tamar lo que chꞌar tzꞌijbꞌabꞌir tama inteꞌ jun, sino que achecta watar tama Unawalir e Dios. Y inteꞌ winic cocha era machi tuaꞌ atajttzꞌa umen taca e winicobꞌ sino que cꞌani atajttzꞌa umen e Dios ubꞌan.
ROM 3:1 Pues ¿ayan ca ucꞌampibꞌir jay aquetpa ajisrael inteꞌ winic? Y ¿ayan ca ucꞌampibꞌir jay xujra imbꞌijc uqꞌuewerir utejromar inteꞌ winic?
ROM 3:2 Pues meyra ayan ucꞌampibꞌir jay aquetpa ajisrael inteꞌ winic, y meyra ayan ucꞌampibꞌir jay xujra imbꞌijc uqꞌuewerir utejromar. Y ayan ucꞌampibꞌir e ajisraelobꞌ era ubꞌan porque sicbꞌabꞌirobꞌ umen e Dios tuaꞌ aꞌjcꞌunobꞌ uley e Moisés.
ROM 3:3 ¿Pero tucꞌa nic tuaꞌ anumuy jay tujam e inmojr winicobꞌ era achecta meyra winicobꞌ xeꞌ machi ucꞌupsiobꞌ que e Dios tuaꞌ acꞌapa uche tunor lo que arobꞌna umener? Pues ¿tamar ca era que e Dios ubꞌan tuaꞌ uyacta lo que quetpa ani tuaꞌ uche?
ROM 3:4 Machi. Y machi tuaꞌ cabꞌijnu que e Dios machi ixto tuaꞌ acꞌapa uche tunor lo que quetpa tuaꞌ uche. Porque Cadiosir cꞌani uche tunor lo que erach iraj iraj motor jay axin amajresian tunor e winicobꞌ. Pues chꞌar tzꞌijbꞌabꞌir tama uyojroner e Dios que: Que net, Cadiosiret, tuaꞌ iquetpa erach tama tunor lo que aware, y net tuaꞌ iquetpa erach conda axin uchietobꞌ juzgar. Bꞌan chꞌar tzꞌijbꞌabꞌir tama uyojroner e Dios.
ROM 3:5 Pero bꞌajcꞌat watar inteꞌ winic xeꞌ che: “Pero jay camabꞌambꞌanir acꞌampa tuaꞌ aquetpa más chequer que erach e Dios, ¿tucꞌa tamar tuaꞌ cacꞌayna umen e Dios otronyajr? ¿O ma ca jax bueno lo que war ubꞌijnu uche e Dios que cꞌani uwatzꞌion tamar e mabꞌambꞌanir lo que war cache?” xeꞌ arobꞌna ani umen inteꞌ. (Nen era war onjron bꞌan cocha inteꞌ winic tara tor e rum, che e Pablo.)
ROM 3:6 Machi, porque jay e Dios majax ani erach ¿cocha ani tuaꞌ axin uche juzgar e gente tara tor e rum?
ROM 3:7 Pero jay nimajresiaj acꞌampa tuaꞌ atajttzꞌa más nojta e Dios que erach ¿tucꞌa tamar war inchena juzgar que ajmabꞌambꞌaniren?
ROM 3:8 Y jay bꞌan ani tunor era, entonces bueno ani tuaꞌ caware que: “¿Tucꞌa tuaꞌ machi caxin cache más e mabꞌambꞌanir tuaꞌ aquetpa más chequer lo que imbꞌutz tama e Dios?” Y bꞌan cocha era war aꞌrobꞌna que non war ani cacanse e gente ubꞌan. Jax era inteꞌ ojroner capater, pero tin e war oꞌjronobꞌ cocha era tawarobꞌ tuaꞌ asatpobꞌ.
ROM 3:9 Pues entonces ¿tucꞌa tuaꞌ caware era? ¿Más ca ayan cacꞌampibꞌir xeꞌ tuon e Israel que e inmojr winicobꞌ tara tor e rum? Machi. Porque wartocto incansiox era que non xeꞌ tuon e Israel bꞌanon taca turon cocha e inmojr winicobꞌ xeꞌ majax tuobꞌ e Israel tut e Dios, y que tunoron xeꞌ turon tara tor e rum turon yebꞌar ucꞌotorer e mabꞌambꞌanir.
ROM 3:10 Chꞌar tzꞌijbꞌabꞌir tama uyojroner e Dios que: Mamajchi xeꞌ erach tut e Dios, nien incojt.
ROM 3:11 Y mamajchi cꞌani uyubꞌi tucꞌa war che e Dios, y machi cꞌani usicbꞌobꞌ ut e Dios.
ROM 3:12 Y tunor e winicobꞌ war usuti upatobꞌ tut e Dios, y tamar era war axiobꞌ tiaꞌ tuaꞌ asatpobꞌ. Mamajchi war uche lo que erach tut e Dios, nien incojt.
ROM 3:13 Y uchorchor tunor e winicobꞌ bꞌan cocha umujr e chamenobꞌ conda apascꞌa ut, y bꞌan intuj tunor uyojronerobꞌ. Y tacar or uyacꞌobꞌ war amajresianobꞌ. Y uyojroner e winicobꞌ bꞌan cocha upuc e chan.
ROM 3:14 Ojronobꞌ tuaꞌ taca ubꞌaxe e gente y tuaꞌ ucꞌayobꞌ.
ROM 3:15 Y tacar uyocobꞌ axiobꞌ wacchetaca tuaꞌ achamsanobꞌ.
ROM 3:16 Y war atijresianobꞌ, y war uche unumse ubꞌobꞌ tunor e inmojr.
ROM 3:17 Y machi unatobꞌ tucꞌa e jiriar.
ROM 3:18 Y machi ubꞌijnuobꞌ tuaꞌ ubꞌacriobꞌ e Dios. Bꞌan chꞌar tzꞌijbꞌabꞌir tama uyojroner e Dios.
ROM 3:19 Pues canata que tunor lo que chꞌar tzꞌijbꞌabꞌir tama uley e Moisés quetpa tzꞌijbꞌabꞌir tuaꞌ tin e turobꞌ yebꞌar ucꞌotorer e ley era xeꞌ jax e gente xeꞌ tuobꞌ e Israel. Y umen que chꞌar tzꞌijbꞌabꞌir tunor era tama uley e Dios tunor e winicobꞌ ucꞌani tuaꞌ umaqui uyejobꞌ, y tunor e winicobꞌ tama tunor or e rum ucꞌani tuaꞌ acꞌaxiobꞌ tama ucꞌabꞌ e Dios conda watar e día tuaꞌ uche juzgar.
ROM 3:20 Mamajchi erer acorpesna umen taca que war acꞌupseyan tut uley e Moisés. Pues uley e Moisés acꞌampa tuaꞌ uchectes ticoit que ajmabꞌambꞌaniron tunoron.
ROM 3:21 Pues entonces machi ixto cꞌani cabꞌijnu tamar uley e Moisés cora era lo que quetpa tuaꞌ e gente tuaꞌ e Israel, sino que cꞌani cabꞌijnu tamar inteꞌ bꞌijnusiaj xeꞌ intiach xeꞌ jax era: Que e Dios uyajcꞌon tuaꞌ canata que erer caquetpa erach tacar jaxir motor que matucꞌa canata tamar uley e Moisés. Y erer cacꞌotoy canata que bꞌan ubꞌan conda caxin cache leer lo que chꞌar tzꞌijbꞌabꞌir tama uley e Moisés y lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo.
ROM 3:22 Pues lo que uche e Dios tuaꞌ uyubꞌion caquetpa erach tacar jax era: Que jaxir axin uchꞌamion que erachon jay cacꞌupseyan tama e Jesucristo. Y bꞌan tuaꞌ uche e Dios tama tunoron xeꞌ cacꞌotoy cacꞌupseyan tama e Cristo, porque tut e Dios mamajchi xeꞌ intiachix uwirnar.
ROM 3:23 Porque inteꞌ intion cꞌapa cache e mabꞌambꞌanir y tamar era quetpon najtir tut e Dios y najtir tut e corpesiaj.
ROM 3:24 Pero coner Cadiosir war uche tuaꞌ caquetpa erach tut jaxir tacar utacarsiaj y machi tuaꞌ catoyi non porque e Cristo Jesús cꞌapa utoyi tamar cacorpesiaj.
ROM 3:25 Pues e Dios uyajcꞌu Uyunen xeꞌ jax e Jesucristo tuaꞌ achamay tut e cruz tuaꞌ utoyi tunor lo que cabꞌeto non umen que cache e mabꞌambꞌanir. Y bꞌan uche e Dios tuaꞌ uchecsu que jaxir erach, porque nien e Dios ma erer umuqui e mabꞌambꞌanir bꞌan taca sino que ucꞌani tuaꞌ atojya. Y quetpa ubꞌan tuaꞌ atojya tunor e mabꞌambꞌanir lo que cay uchiobꞌ e winicobꞌ xeꞌ turuanobꞌ tama e onian tiempo cocha mato jax ani toybꞌir. Pero coner non erer cachꞌami utacarsiaj e Dios tuaꞌ atojya lo que cabꞌeto umen que cay cache e mabꞌambꞌanir conda caxin cacꞌupseyan tama e Jesucristo.
ROM 3:26 Entonces e Dios uyajcꞌu e Jesucristo tuaꞌ achamay tut e cruz tuaꞌ uyubꞌion caquetpa erach tacar umen que quetpa toybꞌir tunor camabꞌambꞌanir umen Cawinquirar. Y e Dios ixin uche cocha era tuaꞌ aquetpa chequer que jaxir erach ubꞌan conda axin uchꞌamion que erachon conda cacꞌupseyan tama e Jesús.
ROM 3:27 Entonces ¿erer ca utattzꞌi ubꞌa inteꞌ winic jay axin uchꞌami e corpesiaj era? Ma cocha erer. Matucꞌa tamar tuaꞌ utattzꞌi ubꞌa. ¿Y tucꞌa tuaꞌ que machi uyubꞌi utattzꞌi ubꞌa? Porque jay acꞌapa ani uche tunor lo que chꞌar tzꞌijbꞌabꞌir tama uley e Moisés, erer ani utattzꞌi ubꞌa. Pero tin e war acꞌupseyan tama e Jesucristo tuaꞌ acorpesna ma erer utattzꞌi ubꞌa.
ROM 3:28 Entonces erer cawira que e Dios uchꞌamion que erachon jay caxin cacꞌupseyan tama e Jesucristo. Pero jaxir machi war ubꞌijnu jay war acꞌapa cache tunor lo que chꞌar tzꞌijbꞌabꞌir tama uley e Moisés conda uchꞌamion. Intaca uyajcꞌon e corpesiaj conda caxin cacꞌupseyan tama e Jesucristo.
ROM 3:29 Y e Dios xeꞌ cꞌapa uyustes tunor e corpesiaj era ¿jax taca ca e Dios xeꞌ tuaꞌ e gente tama e Israel? Machi. E Dios era jax e Dios tuaꞌ e gente xeꞌ majax tuobꞌ e Israel ubꞌan.
ROM 3:30 Pues inteꞌ taca Dios ayan, y jax Cadiosir era xeꞌ war uche tuaꞌ aquetpa erach tacar tunor tin e axin acꞌupseyanobꞌ tamar jaxir. Y machi war ubꞌijnu jay xujra imbꞌijc uqꞌuewerir utejromar o jay machi.
ROM 3:31 Entonces tamar era ¿war ca cacꞌampes e cꞌupesiaj tama e Cristo tuaꞌ catijres ucꞌampibꞌir uley e Moisés? Machi. War cawirse que meyra ayan ucꞌampibꞌir uley e Moisés.
ROM 4:1 Pues entonces ¿tucꞌa erer cacani non xeꞌ tuon e Israel tamar lo que cay uche catata viejobꞌir Abraham?
ROM 4:2 Jay jaxir ayan lo que cay uche que umen quetpa erach tut e Dios, entonces ayan ani tucꞌa tamar tuaꞌ utattzꞌi ubꞌa. Pero jaxir ma erer utattzꞌi ubꞌa tut e Dios.
ROM 4:3 Pues chꞌar tzꞌijbꞌabꞌir tama uyojroner e Dios que: “E Abraham cay cꞌupseyan tama e Dios, y tamar era chꞌajma umen e Dios que erach.” Bꞌan chꞌar tzꞌijbꞌabꞌir tama uyojroner e Dios.
ROM 4:4 Pues inteꞌ man xeꞌ war apatna ucꞌani tuaꞌ uchꞌami utumin bꞌan taca, pero lo que war atojya era ma erer ubꞌijnu que jax inteꞌ tacarsiaj, sino jax lo que quetpa tuaꞌ uchꞌami.
ROM 4:5 Pero tin e machi war apatna pero xeꞌ axin acꞌupseyan tama e Dios xeꞌ erer uchꞌami inteꞌ ajmabꞌambꞌanir, jaxir chꞌajma umen e Dios que erach umen que war acꞌupseyan tamar.
ROM 4:6 Pues bꞌan ubꞌan che e David tama e onian tiempo tiaꞌ chꞌar tzꞌijbꞌabꞌir umener que chojbꞌesbꞌir e winic xeꞌ chꞌajma umen e Dios que erach motor que matucꞌa cay uche xeꞌ imbꞌutz tut e Dios. Pues bꞌan chꞌar tzꞌijbꞌabꞌir tama uyojroner e Dios y che:
ROM 4:7 Chojbꞌesbꞌir e winic xeꞌ cꞌumpa e Dios tacar tama tunor umabꞌambꞌanir, y chojbꞌesbꞌir e winic xeꞌ machix irna más umabꞌambꞌanir umen e Dios.
ROM 4:8 Y chojbꞌesbꞌir e winic xeꞌ machix cꞌajpesna umabꞌambꞌanir umen e Dios. Bꞌan chꞌar tzꞌijbꞌabꞌir tama uyojroner e Dios.
ROM 4:9 Y e chojbꞌesiaj era ¿tuaꞌ taca ca nic tin e xurbꞌir imbꞌijc uqꞌuewerir utejromar? ¿O tuaꞌ ca ubꞌan tin e majax xurbꞌir imbꞌijc uqꞌuewerir utejromar? Pues tuobꞌ chatertiꞌ. Pues cawarix que e Abraham quetpa erach umen que war acꞌupseyan tama e Dios.
ROM 4:10 Pero ¿tucꞌa día chꞌajma e Abraham umen e Dios? ¿Chꞌajma ca conda cꞌapa xujra imbꞌijc uqꞌuewerir utejromar? Machi. Chꞌajma e Abraham conda merato axujra imbꞌijc uqꞌuewerir utejromar.
ROM 4:11 Y de allí cꞌotoy e día conda xujra imbꞌijc uqꞌuewerir utejromar e Abraham pero tuaꞌ aquetpa chequer que jaxir chꞌajma que erach umen e Dios umen que war acꞌupseyan tamar. Y tamar era e Abraham quetpa tatabꞌir tuaꞌ tunor tin e war acꞌupseyanobꞌ tama e Dios tuaꞌ aquetpobꞌ erach tacar motor tin e majax xurbꞌir imbꞌijc uqꞌuewerir utejromar. Y Cadiosir war uchꞌami e winicobꞌ era que erachobꞌ tut jaxir tamar ucꞌupesiajobꞌ.
ROM 4:12 Entonces e Abraham tatabꞌir tuaꞌ tunor tin e war acꞌupseyanobꞌ tama e Dios cocha bꞌan cay uche jaxir conda merato axujra imbꞌijc uqꞌuewerir utejromar. Pero e Abraham tatabꞌir tuaꞌ tunor tin e xurbꞌir imbꞌijc uqꞌuewerir utejromar ubꞌan.
ROM 4:13 Pues e Dios cay uyare e Abraham tama e onian tiempo que jaxir taca umaxtac tuaꞌ uchꞌamiobꞌ tunor or e rum era bꞌan cocha inteꞌ herencia. Pero e ojroner era arobꞌna umen e Dios majax umen que e Abraham war acꞌupseyan tut uley e Moisés, sino que arobꞌna umen que war acꞌupseyan tama e Dios. Y tamar era e Abraham chꞌajma umen e Dios que erach.
ROM 4:14 Porque jay jax taca tin e war acꞌupseyanobꞌ tut uley e Moisés xeꞌ tuaꞌ uchꞌamiobꞌ e herencia era, entonces e cꞌupesiaj tama e Dios matucꞌa ani ucꞌampibꞌir. Y jay bꞌan ani, entonces lo que arobꞌna umen e Dios matucꞌa ani ucꞌampibꞌir ubꞌan. Porque e Dios cꞌapa uyare e Abraham que cꞌani uyajcꞌu tunor or e rum bꞌan cocha inteꞌ herencia tuaꞌ.
ROM 4:15 Pero tama uley e Moisés arobꞌna que ayan e jatzꞌuar xeꞌ watar tujor tunor tin e machi acꞌupseyanobꞌ tut. Pero tiaꞌ matucꞌa inteꞌ ley cocha era ma cocha erer acꞌocchina, porque matucꞌa e ley.
ROM 4:16 Entonces quetpa chequer que lo que arobꞌna umen e Dios tama e herencia era tuaꞌ aꞌjcꞌuna tunor umaxtac e Abraham, pero quetpa tuaꞌ aꞌjcꞌuna ubꞌan tacar utacarsiaj e Dios tunor tin e acꞌupseyanobꞌ tamar. Y tamar era lo que arobꞌna umen e Dios tama e herencia era majax jax taca tuaꞌ tin e acꞌupseyanobꞌ tut uley e Moisés, sino que tuaꞌ tunor tin e acꞌupseyanobꞌ tama e Dios bꞌan cocha cay uche e Abraham tama e onian tiempo. Pues tamar era e Abraham cꞌotoy quetpa tatabꞌir tuaꞌ tunoron xeꞌ war cacꞌupseyan tama e Dios coner.
ROM 4:17 Bꞌan cocha chꞌar tzꞌijbꞌabꞌir tama uyojroner e Dios: “Nen cꞌani inchiet iquetpa tatabꞌir tuaꞌ meyra gente tama tunor or e rum”, che e Dios. Y tamar era chequer que e Abraham cꞌupseyan tama e Dios xeꞌ jax Cadiosir xeꞌ ayan ucꞌotorer tuaꞌ usuti ubꞌixqꞌues e chamenobꞌ, y xeꞌ ayan ucꞌotorer tuaꞌ uyare achecta lo que ma ani tucꞌa.
ROM 4:18 Entonces motor que matucꞌa tamar tuaꞌ ucojco e Abraham cocha onian winiquix, pero jaxir cꞌupseyan tama e Dios y ucojco que bꞌan cocha arobꞌna umen e Dios y bꞌan tuaꞌ alocꞌoy. Y tamar era cꞌotoy quetpa tatabꞌir tuaꞌ meyra gente. Bꞌan cocha arobꞌna umen e Dios y che: “Meyra maxtac tuaꞌ watar tamar achꞌajnar”, xeꞌ arobꞌna umen e Dios.
ROM 4:19 Pero e Abraham machi usati ucꞌupesiaj tama e Dios motor que war ucojco 100 años. Y jaxir uwira que jaxir bꞌan cocha uwixcar xeꞌ jax e Sara onian gentiobꞌ, y que turix tuaꞌ achamayobꞌ y que numuyix e tiempo tuaꞌ achꞌijtesianobꞌ.
ROM 4:20 Pero e Abraham machi uchoqui ucojcseyaj y machi usati ucꞌupesiaj tamar lo que arena umen e Dios, sino que más chꞌiꞌ ucꞌupesiaj tama e Dios. Y jaxir war utattzꞌi ucꞌabꞌa e Dios axin.
ROM 4:21 Porque jaxir unata ixto tama uyalma que e Dios ayan ucꞌotorer tuaꞌ acꞌapa uche tunor lo que arobꞌna umener.
ROM 4:22 Y tamar era e Abraham chꞌajma umen e Dios que erach umen que cay cꞌupseyan tamar.
ROM 4:23 Pues e ojroner era que chꞌajma que erach umen e Dios umen que cꞌupseyan tamar machi tzꞌijbꞌna tuaꞌ taca e Abraham.
ROM 4:24 Pero tzꞌijbꞌabꞌir e ojroner era ubꞌan tama tunoron xeꞌ chꞌajmon que erachon umen e Dios umen que war cacꞌupseyan tamar; non xeꞌ war cacꞌupseyan que Cadiosir era ixin usuti ubꞌixqꞌues e Jesús xeꞌ jax Cawinquirar tujam e chamenobꞌ.
ROM 4:25 Y e Jesucristo era jax xeꞌ ajcꞌuna tuaꞌ achamay tama tunor camabꞌambꞌanir, pero de allí sujta bꞌixqꞌuesna tujam e chamenobꞌ tuaꞌ uchion caquetpa erach tut e Dios.
ROM 5:1 Pues entonces coner que quetpon erach taca e Dios umen que war cacꞌupseyan tamar, cꞌotoyon cachꞌami e jiriar taca e Dios tama Cawinquirar Jesucristo.
ROM 5:2 Pues jax tama e Cristo era que pascꞌa ut e bꞌir ticoit tuaꞌ uyubꞌion cachꞌami utacarsiaj e Dios umen que war cacꞌupseyan tama e Cristo. Y war caqꞌuecꞌo cawawan tama e tacarsiaj era y war catzay cacojco e día conda Cadiosir tuaꞌ uxere utawarer tacaron.
ROM 5:3 Y erer catzay ubꞌan esto conda war canumse cabꞌa, porque canata que conda war canumse cabꞌa axin watar ucꞌotorer e Dios tama cawalma tuaꞌ uyubꞌion cacojco anumuy e cꞌuxner era tzꞌustaca.
ROM 5:4 Y conda cawacta anumuy e cꞌuxner tzꞌustaca cocha era, entonces caxin caqꞌuecꞌo caxana tama ubꞌir e Dios. Y conda caqꞌuecꞌo caxana tama ubꞌir e Dios, entonces cacꞌotoy cabꞌijnu que e Dios axin utacrion nojta.
ROM 5:5 Y conda cacꞌotoy cabꞌijnu que e Dios axin utacrion nojta umen que war acꞌapa uche tunor lo que uyareon, entonces machi ixto tuaꞌ cabꞌijnu jay Cadiosir tuaꞌ uyacta tuaꞌ utacrion porque jaxir cꞌapa uchecsu ubꞌa ticoit que ucꞌanion nojta conda uyajcꞌon Unawalir.
ROM 5:6 Entonces conda non ma cocha erer cacorpes cabꞌa, tari e Cristo tuaꞌ achamay tama camabꞌambꞌanir. Y tari tuaꞌ ucorpeson cocha era tama e tiempo xeꞌ turbꞌana umen e Dios tuaꞌ uche.
ROM 5:7 Pues mamajchi axin uyajcꞌu ubꞌa tuaꞌ achamay upater otronteꞌ motor jay jax inteꞌ winic xeꞌ matucꞌa war uche. Pero conda ayan inteꞌ winic xeꞌ erach ixto, bꞌajcꞌat ayan chi ubꞌijnu tuaꞌ axin uyajcꞌu ubꞌa tuaꞌ achamay upater.
ROM 5:8 Pero Cadiosir ixin uchecsu ticoit que uyajta coit conda uyebꞌta tari e Cristo tuaꞌ achamay capater motor conda non ajmabꞌambꞌanironto.
ROM 5:9 Y coner cocha erachon tut e Dios umen que chamay e Cristo capater, canata ixto yaꞌ que jaxir tuaꞌ ucorpeson tama e jatzꞌuar lo que watar tama ucꞌapesnibꞌir tunor era.
ROM 5:10 Porque Cadiosir ixin usisijres tunor lo que ayan ani tacaron conda uyebꞌta tari Uyunen tuaꞌ achamay capater conda warto caqꞌuijnes ut e Dios iraj iraj. Y coner war catzay cawira cabꞌa taca e Dios, y tamar era erer cabꞌijnu que jaxir axin ucorpeson ixto tacar ucuxtar Cawinquirar Jesucristo cocha turu jaxir tut e qꞌuin war ucꞌajti taca Utata iraj iraj tuaꞌ catacarna.
ROM 5:11 Y majax jax taca era sino que war catzay taca Cadiosir umen lo que uche Cawinquirar Jesucristo capater, pues tama e Cristo era cꞌotoyon cachꞌami e jiriar taca Cadiosir.
ROM 5:12 Pues tama ucajyesnibꞌir or e rum era ma ani tucꞌa e mabꞌambꞌanir tara. Y conda chena inteꞌ winic xeꞌ jax e Adán, matucꞌa e mabꞌambꞌanir tamar. Pero jaxir machi cꞌupseyan tut lo que arobꞌna umen e Dios, y ixin uche e mabꞌambꞌanir, y tamar era ochoy e mabꞌambꞌanir tama or e rum era tamar lo que cay uche inteꞌ taca winic. Y ya tari e chamer tamar, y cay numuy e chamer era tama tunor e winicobꞌ cocha tunoron cay cache e mabꞌambꞌanir ubꞌan.
ROM 5:13 Y motor que ma ani tucꞌa uley e Moisés tama e onian tiempo ayix e mabꞌambꞌanir tara tor e rum. Pero conda matucꞌa e ley upater e mabꞌambꞌanir entonces mamajchi erer uyare otronteꞌ que mabꞌambꞌan lo que war uche.
ROM 5:14 Pero tama utiempo e Adán esto tama utiempo e Moisés war achamayobꞌ e winicobꞌ axin umen que war uchiobꞌ e mabꞌambꞌanir. Pero intiach e mabꞌambꞌanir lo que cay uchiobꞌ e winicobꞌ tama e tiempo yajaꞌ porque machi ucꞌocchiobꞌ inteꞌ ley conda uchiobꞌ e mabꞌambꞌanir cocha matucꞌa e ley. Pero e Adán cay uche e mabꞌambꞌanir cocha machi ucꞌupse lo que arobꞌna umen e Dios, y tamar era más nojta umabꞌambꞌanir e Adán era. Pero e Adán jax inteꞌ checsuyaj tuaꞌ Cawinquirar Jesucristo xeꞌ quetpa tuaꞌ achecta watar después. Pues e Adán tatabꞌir tuaꞌ tunor e gente axin y e Jesucristo jax Cawinquirar tunoron xeꞌ cacꞌupseyan tamar.
ROM 5:15 Entonces e mabꞌambꞌanir lo que cay uche e Adán majax lar tacar e corpesiaj xeꞌ ajcꞌunon umen e Dios. Porque umen inteꞌ taca mabꞌambꞌanir lo que cay uche inteꞌ winic xeꞌ jax e Adán meyra winicobꞌ cꞌotoy chamayobꞌ tamar. Pero más nojta e corpesiaj xeꞌ ajcꞌunon umen Cadiosir xeꞌ chena umen inteꞌ taca winic xeꞌ jax e Jesucristo, y jaxir machi war uyareon tuaꞌ casuti uyeror tamar lo que war uyajcꞌon era. Pero más nojta e corpesiaj que e chamer lo que ajcꞌunon umen e Adán porque e corpesiaj cꞌani axin ucucru e chamer tuaꞌ tunor tin e acꞌotoy acꞌupseyanobꞌ tama Cawinquirar Jesucristo.
ROM 5:16 Y e corpesiaj lo que ajcꞌunon umen e Dios majax lar tacar e chamer lo que ajcꞌunon umen e Adán umen que uche e mabꞌambꞌanir jaxir, porque tujor e mabꞌambꞌanir tari uqꞌuijnar e Dios umen que e Adán uche inteꞌ taca mabꞌambꞌanir, y tamar era checta tari e chamer ticajor tunoron. Pero e corpesiaj lo que ajcꞌunon umen e Dios tuaꞌ uyubꞌion caquetpa erach tacar uche tuaꞌ aquetpa satbꞌir inyajrer tunor e sian mabꞌambꞌanir lo que cay uchiobꞌ e sian gente ixin.
ROM 5:17 Pues cay cꞌotori e chamer umen que cay uche e mabꞌambꞌanir inteꞌ taca winic, pero nacpat era checta inteꞌ nuxi tacarsiaj umen lo que cay uche inteꞌ taca winic xeꞌ jax e Jesucristo. Y tamar era tin e war acꞌupseyanobꞌ tama Cawinquirar war uchꞌamiobꞌ e nuxi tacarsiaj era lo que war aꞌjcꞌuna umen e Dios, y tamar era jaxirobꞌ cꞌani aquetpobꞌ erach taca e Dios y cꞌani acꞌotoriobꞌ tama e cuxtar xeꞌ machi tuaꞌ acꞌapa.
ROM 5:18 Pues umen que inteꞌ taca winic uche e mabꞌambꞌanir tunor e winicobꞌ tara tor e rum quetpobꞌ yebꞌar ucꞌotorer e chamer. Pero umen lo que uche Cawinquirar Jesucristo conda cꞌupseyan tut e Dios este que ixin chamay tunor e winicobꞌ tara tor e rum war aꞌjcꞌunobꞌ tuaꞌ aquetpobꞌ erach taca e Dios, y tamar era cꞌani uchꞌamiobꞌ e cuxtar xeꞌ machi tuaꞌ acꞌapa.
ROM 5:19 Entonces umen que uche e mabꞌambꞌanir inteꞌ taca winic meyra winicobꞌ quetpobꞌ ajmabꞌambꞌanirobꞌ. Pero bꞌan ubꞌan que umen que cꞌupseyan tut e Dios inteꞌ taca winic, meyra winicobꞌ cꞌani aquetpobꞌ erach taca e Dios.
ROM 5:20 Pues entonces checta uley e Moisés tuaꞌ uwirsion tin xeꞌ mabꞌambꞌan, y tamar era meyra gente cay uchiobꞌ lo que mabꞌambꞌan. Pero cocha bꞌoro e mabꞌambꞌanir meyra, más meyra bꞌoro tari utacarsiaj e Dios ubꞌan.
ROM 5:21 Entonces bꞌan cocha ayan ucꞌotorer e mabꞌambꞌanir tuaꞌ uchamsion, y bꞌan ubꞌan ayan ucꞌotorer utacarsiaj e Dios tuaꞌ uyubꞌion caquetpa erach taca e Dios y tuaꞌ uyubꞌion cachꞌami e cuxtar xeꞌ machi tuaꞌ acꞌapa tamar e Jesucristo xeꞌ jax Cawinquirar.
ROM 6:1 Pues ¿cꞌani ca caware que: “Cachic más e mabꞌambꞌanir tuaꞌ aquetpa más chequer utacarsiaj e Dios?”
ROM 6:2 Machi. Pues non xeꞌ chamayon tut e mabꞌambꞌanir ma cocha erer caxin caturuan tama e mabꞌambꞌanir otronyajr.
ROM 6:3 ¿War ca inata que conda chꞌujyon tuaꞌ caquetpa intera taca e Cristo Jesús, chꞌujyon tuaꞌ caquetpa interon tacar uchamer ubꞌan?
ROM 6:4 Pues conda chꞌujyon quetpon bꞌan cocha jay ixion chamayon ani taca e Cristo, y que mujcon tacar ubꞌan. Pero de allí sujta bꞌixqꞌuesnon otronyajr tujam e chamenobꞌ taca e Jesucristo tuaꞌ caturuan imbꞌutz tut e Dios. Pues sujta bꞌixqꞌuesna e Jesucristo tujam e chamenobꞌ tacar ucꞌotorer Catata Dios, y jax e cꞌotorer era ubꞌan xeꞌ tuaꞌ utacrion caturuan imbꞌutz tut e Dios coner.
ROM 6:5 Entonces cocha quetpon intera taca e Cristo conda chamayon tacar, cꞌani caquetpa intera tacar conda caxin casujta cabꞌixqꞌuesna tujam e chamenobꞌ ubꞌan.
ROM 6:6 Y canata que e mabꞌambꞌanir lo que war ani acꞌotori macuir cawalma chamay taca e Cristo tut e cruz, y bꞌan cocha era quetpa tijresbꞌir ucꞌotorer e mabꞌambꞌanir tama cawalma tuaꞌ machi uyubꞌi asutpa uyareon tucꞌa tuaꞌ cache otronyajr.
ROM 6:7 Porque tin e chamen machi ixto war aꞌrobꞌna umen e mabꞌambꞌanir tucꞌa tuaꞌ uche otronyajr.
ROM 6:8 Y jay cꞌapa chamayon taca e Cristo, entonces war cacꞌupseyan tamar que cꞌani caturuan tacar ubꞌan.
ROM 6:9 Porque canata que e Cristo cꞌapa sujta bꞌixqꞌuesna tujam e chamenobꞌ, y tamar era canata que machi ixto tuaꞌ asutpa achamay otronyajr, porque e chamer mix tucꞌa más ucꞌotorer tujor jaxir coner.
ROM 6:10 Conda ixin chamay e Cristo, chamay tuaꞌ utoyi tunor e mabꞌambꞌanir inyajrer, pero era cocha sutpa bꞌixcꞌa otronyajr cꞌani aquetpa taca Catata Dios iraj iraj.
ROM 6:11 Y bꞌanox nox ubꞌan que ucꞌani tuaꞌ ibꞌijnu que chamenox tut e mabꞌambꞌanir, pero que bꞌixirox tut e Dios cocha intera ibꞌijnusiaj taca Cawinquirar Jesucristo coner.
ROM 6:12 Entonces ira iwacta acꞌotori más e mabꞌambꞌanir tama iwerir xeꞌ war asatpa axin, porque jax e mabꞌambꞌanir era xeꞌ war ani utacsuon tuaꞌ cache tunor lo que uyusre uche cawerir.
ROM 6:13 Y ira iwajcꞌu iwerir tuaꞌ acꞌampesna umen e mabꞌambꞌanir tuaꞌ uche lo que majax bueno. Sino que ajcꞌunic ibꞌa e Dios tuaꞌ ixixin iche lo que erach tut jaxir, bꞌan cocha inteꞌ xeꞌ cꞌapa chamay y de allí sutpa bꞌixcꞌa tujam e chamenobꞌ y coner machi ixto tuaꞌ uche más e mabꞌambꞌanir.
ROM 6:14 Y machi ixto tuaꞌ acꞌotori más e mabꞌambꞌanir tamarox umen que machi ixto turox yebꞌar uley e Moisés, sino que coner turox yebꞌar utacarsiaj e Dios.
ROM 6:15 Pues entonces cocha turon yebꞌar utacarsiaj e Dios coner, ¿cꞌani ca caware que: “Cachic más e mabꞌambꞌanir umen que machi ixto turon yebꞌar ucꞌotorer uley e Moisés?” Ma cocha erer.
ROM 6:16 Nox inata que jay manox tuaꞌ inteꞌ patrón, ucꞌani tuaꞌ iche tunor lo que uyareox. Y bꞌan cocha era aquetpa tama tunor cacuxtar ubꞌan, jay manox tuaꞌ e mabꞌambꞌanir, entonces ixtojya tama e chamer. Pero jay manox tuaꞌ e Dios, ixixin ichꞌami e cꞌotorer tuaꞌ ixturuan erach tut jaxir.
ROM 6:17 Pero gracias a Dios que nox mix jax manox tut e mabꞌambꞌanir coner, sino que war ixcꞌupseyan taca tunor iwalma tut e canseyaj tuaꞌ Catata Dios lo que cay cansenox.
ROM 6:18 Pues nox cꞌotoy corpesnox tama ucꞌotorer e mabꞌambꞌanir, y quetpox manox tuaꞌ iche lo que erach tut e Dios.
ROM 6:19 Pues war incꞌampes e ojroner xeꞌ más tzꞌustaca era tuaꞌ inchecsu tunor era tiut umen que intran tuaꞌ iyubꞌi tunor era. Pues ayan ani inteꞌ tiempo conda war iwajcꞌu ibꞌa tuaꞌ iche tunor e mabꞌambꞌanir axin. Pero coner cꞌani inwareox que ajcꞌunic ibꞌa tuaꞌ ixixin iche tunor lo que imbꞌutz tama icuxtar.
ROM 6:20 Pues conda turox ani yebꞌar ucꞌotorer e mabꞌambꞌanir, machi ani ibꞌijnu tuaꞌ iche lo que erach.
ROM 6:21 Pues ¿tucꞌa ilocse tama e sian mabꞌambꞌanir lo que cay iche ani que coner uchiox ixsubꞌajra tut conda ibꞌijnu? Porque tunor tin e axin uchiobꞌ e mabꞌambꞌanir cꞌani uchꞌamiobꞌ e chamer.
ROM 6:22 Pero coner cocha corpesbꞌirox tama ucꞌotorer e mabꞌambꞌanir, nox ixiox iwajcꞌu ibꞌa tut e Dios tuaꞌ iche lo que ucꞌani jaxir. Y tamar era coner ayan ixto lo que war ilocse tama icuxtar era. Ayan e cuxtar xeꞌ erach tara, y conda acꞌapa cacuxtar tara tor e rum ayanto e cuxtar xeꞌ machi tuaꞌ acꞌapa tut e Dios tichan.
ROM 6:23 Pues tin e axin uche e mabꞌambꞌanir cꞌani atojya taca e chamer, pero lo que Cadiosir cꞌani uyajcꞌon non xeꞌ war aquetpa intera cabꞌijnusiaj taca Cawinquirar Jesucristo jax e cuxtar xeꞌ machi tuaꞌ acꞌapa.
ROM 7:1 Pues entonces niwermanuox, war inata tama e ley y war inata que ayan ucꞌotorer e ley era tujor inteꞌ winic intaca conda bꞌixir.
ROM 7:2 Pues ayan inteꞌ chequerir tama inteꞌ ixcarbꞌir. Che tama e ley que jaxir ucꞌani tuaꞌ aquetpa yebꞌar ucꞌotorer uviejo conda bꞌixir. Pero jay uviejo axin achamay e ley che que e ixcarbꞌir era erer axin anujbꞌi taca otronteꞌ.
ROM 7:3 Pero jay e ixic era axin aturuan taca otronteꞌ winic conda bꞌixirto uviejo, jaxir war acꞌaxi tama e mabꞌambꞌanir. Pero jay achamay uviejo, e ley che que jaxir aquetpa libre tut uviejo ani, y tamar era machi war acꞌaxi tama e mabꞌambꞌanir jay axin anujbꞌi taca otronteꞌ winic.
ROM 7:4 Pues entonces niwermanuox, nox xeꞌ turox ani yebꞌar ucꞌotorer uley e Moisés quetpox ani bꞌan cocha inteꞌ ixcarbꞌir tama e ley era. Pero coner cocha tuox e Cristo umen que chamayox tacar, chamenox tut e ley era ubꞌan y tamar era machi ixto turox yebꞌar ucꞌotorer. Coner tunoron xeꞌ war cacꞌupseyan tama Cawinquirar Jesucristo xeꞌ sutpa bꞌixcꞌa tujam e chamenobꞌ quetpon bꞌan cocha inteꞌ ixcarbꞌir tuaꞌ. Y tamar era tunor e gente tuaꞌ unatobꞌ que non ayan cacꞌampibꞌir tut e Dios coner.
ROM 7:5 Conda warto caturuan tama camabꞌambꞌanir uley e Moisés cꞌampa tuaꞌ ubꞌixqꞌues e mabꞌambꞌanir lo que chꞌar ani tama cawalma, y tamar era quetpa tuaꞌ uqꞌuechion caxin esto tut e chamer.
ROM 7:6 Pero coner chamayonix tut uley e Moisés era xeꞌ cꞌotori ani ticajor. Y tamar era machi ixto aquetpa tuaꞌ cacꞌupseyan tut e onian ley era xeꞌ chꞌar tzꞌijbꞌabꞌir tama inteꞌ jun, sino que coner turonix tuaꞌ caturuan tama inteꞌ cuxtar xeꞌ imbꞌutz tacar utacarsiaj Unawalir e Dios xeꞌ turu tama cawalma.
ROM 7:7 Pues entonces ¿cꞌani ca caware que mabꞌambꞌan uley e Moisés umen que jax lo que ubꞌixqꞌues e mabꞌambꞌanir lo que chꞌar ani tama cawalma? Machi. Pues nen machi ani cꞌotoyen innata tucꞌa e mabꞌambꞌanir jay ma ani tucꞌa uley e Moisés. Pues machi ani innata jay mabꞌambꞌan tuaꞌ unsre inchꞌami lo que tuaꞌ otronteꞌ jay majax chꞌar tzꞌijbꞌabꞌir tama uley e Moisés que: “Ira iyusre ichꞌami lo que tuaꞌ otronteꞌ.”
ROM 7:8 Pero e mabꞌambꞌanir uchuqui niwalma y cay ucꞌampes e ley era tuaꞌ utꞌabꞌse e sian mabꞌambꞌan bꞌijnusiaj tama niwalma. Pues tiaꞌ machi unatobꞌ e gente jay ayan inteꞌ ley, matucꞌa ucꞌotorer e mabꞌambꞌanir ubꞌan.
ROM 7:9 Y bꞌan ani nen ubꞌan que ayan ani inteꞌ tiempo conda matucꞌa innata tama uley e Moisés y nen innata que bꞌixiren tut e Dios. Pero tama inteꞌ día cꞌotoy innata tamar lo que chꞌar tzꞌijbꞌabꞌir tama uley e Moisés y entonces bꞌixcꞌa e mabꞌambꞌanir tamaren, y tamar era chenen juzgar que nen ucꞌani tuaꞌ inchamay.
ROM 7:10 Entonces e ley era xeꞌ quetpa tuaꞌ uyajqꞌuen ani e cuxtar, uyajqꞌuen e chamer.
ROM 7:11 Pero e mabꞌambꞌanir usicbꞌa cocha tuaꞌ umajresen y tamar era cay ucꞌampes lo que chꞌar tzꞌijbꞌabꞌir tama uley e Moisés tuaꞌ uqꞌuechien inxin tama ubꞌir e chamer.
ROM 7:12 Pues uley e Moisés ubꞌajner erach tunor y tunor lo que uyareon tuaꞌ cache erach ubꞌan y imbꞌutz y bꞌan cocha ucꞌani tuaꞌ cache.
ROM 7:13 Pero ¿cocha tuaꞌ uchien inchamay lo que imbꞌutz? Pues majax jax e ley era xeꞌ war uqꞌuechien inxin tut e chamer sino que jax e mabꞌambꞌanir xeꞌ chꞌur tama niwalma. Y tamar era quetpa chequer que mabꞌambꞌan lo que chꞌur tama niwalma. Y cꞌampa uley e Moisés xeꞌ erach tuaꞌ uwirsen que mabꞌambꞌan lo que chꞌur tama niwalma.
ROM 7:14 Pues war canata que e ley xeꞌ ajcꞌuna e Moisés tari tut e qꞌuin, pero nen weren y manen tuaꞌ e mabꞌambꞌanir.
ROM 7:15 Y tamar era machi innata tucꞌa war innumse nibꞌa, porque machi uyubꞌien inche lo que cꞌani inche, y lo que más war inxejbꞌe ut jax inche.
ROM 7:16 Pero jay inche lo que machi cꞌani inche, entonces aquetpa chequer taniut que uley e Moisés erach.
ROM 7:17 Y tamar era erer inwira que majax nen xeꞌ war inche tunor era sino que jax e mabꞌambꞌanir lo que chꞌur tama niwalma.
ROM 7:18 Porque nen innata que tama niwalma matucꞌa xeꞌ imbꞌutz. Pues nen unsre tuaꞌ inche lo que imbꞌutz, pero machi uyubꞌien inche.
ROM 7:19 Y machi inche lo que imbꞌutz xeꞌ jax ani incꞌani, sino que inxin inche e mabꞌambꞌanir lo que machi ani cꞌani inche.
ROM 7:20 Entonces jay inche lo que machi ani cꞌani inche, entonces majax nen ani xeꞌ war inche tunor era sino que jax e mabꞌambꞌanir lo que chꞌur tama niwalma.
ROM 7:21 Entonces lo que war anumuy tama niwalma jax era: Que conda nen cꞌani inche lo que imbꞌutz, intajwi que mabꞌambꞌan tunor lo que ayan tama niwalma.
ROM 7:22 Pero tama nibꞌijnusiaj incꞌani inche lo que chꞌar tzꞌijbꞌabꞌir tama uley e Dios.
ROM 7:23 Pero tama niwerir inwira que ayan lo que machi ucꞌani lo que nen incꞌani inche tama nibꞌijnusiaj, y jax era ucꞌotorer e mabꞌambꞌanir xeꞌ turu tama niwerir, y jax era lo que war ucachien inwawan.
ROM 7:24 Pues tzajtaca niut era. ¿Chi tuaꞌ ucorpesen tama nicuerpo era xeꞌ war uqꞌuechien inxin esto tama e chamer?
ROM 7:25 Jax taca e Dios tamar e Jesucristo xeꞌ jax Cawinquirar xeꞌ erer ucorpesen tama e chamer. Intattzꞌi ucꞌabꞌa e Dios tama tunor era. Entonces nen tama nibꞌijnusiaj innata que ucꞌani tuaꞌ incꞌupseyan tut uley e Dios, pero tama niwerir manen tuaꞌ ucꞌotorer e mabꞌambꞌanir.
ROM 8:1 Pues entonces coner era e Dios machi ixto tuaꞌ uchion juzgar jay intera cabꞌijnusiaj taca e Cristo Jesús, y jay machi war cache bꞌan cocha uyusre uche cawerir, sino que war caxana bꞌan cocha ucꞌani Unawalir e Dios.
ROM 8:2 Pues jax taca e cꞌotorer xeꞌ uyajqꞌuen Unawalir e Dios tama e Cristo Jesús xeꞌ war ucorpesen tama ucꞌotorer e mabꞌambꞌanir y tama ucꞌotorer e chamer.
ROM 8:3 Y tamar era cꞌapa uche Cadiosir lo que machi uyubꞌi uche uley e Moisés, porque satpa tunor ucꞌotorer e ley era umen que chꞌar e mabꞌambꞌanir tama uwerir e winicobꞌ. Y lo que uche Cadiosir tuaꞌ ucorpeson tama ucꞌotorer e mabꞌambꞌanir jax era: Uyebꞌta tari Uyunen tuaꞌ aquetpa inteꞌ winic. Y jaxir quetpa tuaꞌ achamesna tuaꞌ utoyi tunor camabꞌambꞌanir. Pues e Dios uyebꞌta tari Uyunen tuaꞌ aquetpa bꞌan cocha e winicobꞌ xeꞌ ajmabꞌambꞌanirobꞌ pero jaxir matucꞌa umabꞌambꞌanir, y tamar uchamer era utijres ucꞌotorer e mabꞌambꞌanir lo que ayan tama uwerir e winicobꞌ.
ROM 8:4 Y bꞌan uche tuaꞌ uyubꞌion cache lo que erach bꞌan cocha ucꞌani uley e Moisés. Y tamar era machi ixto turon tuaꞌ cache cocha ucꞌani cawerir, sino que turon tuaꞌ cache lo que ucꞌani Unawalir e Dios.
ROM 8:5 Pues entonces tin e turobꞌ tuaꞌ uchiobꞌ lo que ucꞌani uwerir war ubꞌijnuobꞌ tamar taca lo que ucꞌaniobꞌ e winicobꞌ tara tor e rum, pero tin e turobꞌ tuaꞌ uchiobꞌ bꞌan cocha ucꞌani Unawalir e Dios war ubꞌijnuobꞌ tamar lo que ucꞌani e Dios.
ROM 8:6 Pues tin e cꞌani uche jax taca lo que ucꞌani uwerir war aqꞌuejcha axin tut e chamer, pero tin e uturbꞌa ubꞌa tuaꞌ uche lo que ucꞌani Unawalir e Dios war aqꞌuejcha axin tut e cuxtar xeꞌ machi tuaꞌ acꞌapa y tut e jiriar.
ROM 8:7 Pues tin e ubꞌijnuobꞌ tuaꞌ taca uchiobꞌ lo que ucꞌani e winicobꞌ tara tor e rum war uxejbꞌiobꞌ ut e Dios, porque machi cꞌani umanxujres ubꞌobꞌ tut uley e Dios y nien machi uyubꞌiobꞌ tuaꞌ uchiobꞌ.
ROM 8:8 Y tamar era tin e turobꞌ tuaꞌ taca uchiobꞌ e mabꞌambꞌanir lo que ucꞌani uche uwerir, ma cocha erer utzayjres e Dios.
ROM 8:9 Pero nox machi ixto war ixturuan tuaꞌ iche lo que uyusre uche iwerir, sino que war ixquetpa intera tacar Unawalir e Dios. Y bꞌan anumuy jay war aturuan Unawalir e Dios tama iwalma. Pero jay machi war aturuan Unawalir e Cristo tama uyalma inteꞌ winic, entonces majax tuaꞌ e Cristo e winic era.
ROM 8:10 Pero jay turu e Cristo tama cawalma conda watar e día tuaꞌ cachamay jax taca cacuerpo xeꞌ tuaꞌ achamay umen que ayan e mabꞌambꞌanir chꞌur tamar, pero cawalma aquetpa bꞌixir umen que quetpon erach tut e Dios.
ROM 8:11 Y jay Unawalir war aturuan tama cawalma xeꞌ jax xeꞌ usuti ubꞌixqꞌues e Jesús tujam e chamenobꞌ, entonces jax Cadiosir era ubꞌan xeꞌ tuaꞌ axin usuti ubꞌixqꞌues cacuerpo tunoron tacar Unawalir e Dios era.
ROM 8:12 Pues entonces niwermanuox, non ayan lo que quetpa tuaꞌ cache, pero majax lo que ucꞌani cawerir.
ROM 8:13 Porque jay caturuan tuaꞌ taca cache lo que uyusre uche cawerir entonces ucꞌani tuaꞌ cachamay y tuaꞌ caxin tut e cꞌajc. Pero jay tacar utacarsiaj Unawalir e Dios cache achamay lo que uyusre uche cawerir, entonces cꞌani caturuan taca Catata Dios tut e qꞌuin tichan.
ROM 8:14 Pues tunor tin e abꞌijresna umen Unawalir e Dios jax umaxtac e Dios.
ROM 8:15 Pues Unawalir e Dios xeꞌ chꞌajma camener machix tuaꞌ uchion canumse cabꞌa bꞌan cocha inteꞌ man xeꞌ mambꞌir inyajrer bꞌan cocha turon ani, y machix tuaꞌ uchion cabꞌacta, cocha jax Unawalir e Dios era xeꞌ uchion caquetpa umaxtac e Dios. Y jax Unawalir e Dios era ubꞌan xeꞌ war uchion caware “Nitatet” conda capejca e Dios.
ROM 8:16 Y jax Unawalir e Dios era ubꞌan xeꞌ quetpa intera taca cawalma y xeꞌ war uyareon tama cawalma que non umaxtacon e Dios.
ROM 8:17 Y umen que umaxtacon e Dios non ubꞌan quetpon tuaꞌ cachꞌami tunor e herencia lo que tꞌabꞌesbꞌir umen e Dios tuaꞌ uyajcꞌon conda cacꞌotoy tut. Y tunor lo que tꞌabꞌesbꞌir era umen e Dios tuaꞌ e Cristo, pero jaxir cꞌani axin uxere tunor e herencia era tacaron y cꞌani uxere tunor utawarer tacaron ubꞌan jay non canumse cabꞌa tacar.
ROM 8:18 Pues imbꞌijnu nen que lo que war canumse cabꞌa tara tor e rum majax nojta conda cabꞌijnu cobꞌa nuxi tawarer xeꞌ tuaꞌ cachꞌami tuaꞌ e Dios conda cacꞌotoy tut jaxir.
ROM 8:19 Y tunor lo que chembꞌir umen e Dios war ucojco y war uyusre tuaꞌ uwira watar e día conda e Dios tuaꞌ uchecsu tunor umaxtac taca tunor utawarerobꞌ tama e día conda jaxir achecta watar otronyajr.
ROM 8:20 Porque conda cucrema e Adán tunor lo que chembꞌir umen e Dios satpa ucꞌampibꞌir ubꞌan. Pero bꞌan numuy majax umen que tunor lo que chembꞌir umen e Dios war ucojco e culpa, sino que umen que bꞌan ubꞌijnu uche e Dios. Pero ayan lo que quetpa tuaꞌ ucojco tuaꞌ uchꞌami lo que chembꞌir umen e Dios era xeꞌ tuaꞌ anumuy tama e día conda Cadiosir asutpa ucorpes tunor era.
ROM 8:21 Porque tunor lo que ayan tara tor e rum xeꞌ chembꞌir umen e Dios war uyusre tuaꞌ uꞌstana tama tunor e mabꞌambꞌanir lo que war uche oꞌcꞌoy axin tunor lo que ayan, y war ucojco tuaꞌ uchꞌami uyeror tama e nuxi corpesiaj lo que tuaꞌ cachꞌami tunoron xeꞌ umaxtacon e Dios.
ROM 8:22 Y non canata que esto coner tunor lo que ayan tara tor e rum xeꞌ chembꞌir umen e Dios war unumse ubꞌa bꞌan cocha jay war aꞌjcna ani bꞌan cocha inteꞌ ixic xeꞌ war acꞌuxun war ucojco tuaꞌ acuxpa uyar.
ROM 8:23 Pero majax jax taca lo que ayan tara tor e rum xeꞌ chembꞌir umen e Dios xeꞌ war unumse ubꞌa coner sino que non ubꞌan. Y motor que non bꞌajxan tuaꞌ cachꞌami Unawalir e Dios bꞌan cocha inteꞌ checsuyaj tuaꞌ e nuxi tuanibꞌir lo que tuaꞌ cachꞌami conda caxin tut e qꞌuin, pero non era war cajcna umen que war canumse cabꞌa nojta cocha war cacojco e hora conda cꞌani acorpesna tunor cacuerpo. Y tamar era cꞌani acorpesna inyajrer tunor cacuxtar tuaꞌ aquetpa chequer que non umaxtacon e Dios.
ROM 8:24 Porque umen que cay cacojco tama e Dios que jaxir erer ucorpeson inyajrer, ixion cachꞌami e corpesiaj. Pero jay inteꞌ winic cꞌapa uwira lo que war ani ucojco tuaꞌ uchꞌami entonces ma erer ubꞌijnu que warto ucojco lo que cꞌani ani uchꞌami, porque chectix tunor era tut. Porque ¿chi tuaꞌ ucojco uchꞌami lo que cꞌapa uwira?
ROM 8:25 Pero jay ayan lo que war cacojco tuaꞌ cachꞌami y machi ixto cawira ut, entonces ucꞌani tuaꞌ cacojco tzꞌustaca este que cacꞌotoy cachꞌami.
ROM 8:26 Pues entonces bꞌanon ubꞌan porque injayjayon y tamar era ucꞌani tuaꞌ cacojco tzꞌustaca tuaꞌ cachꞌami e tacarsiaj lo que cꞌani uyajcꞌon Unawalir e Dios. Porque machi canata cocha tuaꞌ cacꞌajti taca e Dios tamar lo que intam macuir cawalma, pero Unawalir e Dios uwira tunor era y axin ucꞌajti taca e Dios ticabꞌa taca e ajcner xeꞌ ma erer arobꞌna tama inteꞌ ojroner.
ROM 8:27 Y Cadiosir xeꞌ uwira tucꞌa ayan macuir cawalma unata lo que war che tunor lo que war ajcna Unawalir e Dios era, porque Unawalir e Dios war ucꞌajti bꞌan cocha ucꞌani e Dios tuaꞌ atacarnobꞌ tin e tuobꞌ e Dios.
ROM 8:28 Pues canata que Cadiosir axin uche tuaꞌ aquetpa imbꞌutz tunor lo que ayan tuaꞌ tin e uyajta ut e Dios y xeꞌ pejcna umener tuaꞌ aquetpa tuaꞌ.
ROM 8:29 Pues tunor tin e natanwa umen e Dios tama ucajyesnibꞌir tunor era e Dios ubꞌijnu tuaꞌ uche aquetpobꞌ bꞌan cocha Uyunen, pero bꞌan ubꞌijnu uche tama ucajyesnibꞌir tunor era. Y bꞌan uche tuaꞌ aquetpa sacumbꞌir Uyunen tujam e inmojr maxtacobꞌ tuaꞌ e Dios.
ROM 8:30 Y tin e chena tuaꞌ aquetpobꞌ bꞌan cocha Uyunen tama ucajyesnibꞌir tunor era, pejcnobꞌ umen e Dios ubꞌan. Y tin e pejcnobꞌ era, e Dios uche tuaꞌ aquetpobꞌ erach tut. Y tin e chena tuaꞌ aquetpobꞌ erach taca e Dios era, jaxir uche tuaꞌ aquetpa xerbꞌir utawarer tacarobꞌ.
ROM 8:31 Entonces ¿tucꞌa tuaꞌ caware tama tunor era? Cocha turu tacaron Cadiosir, ¿tucꞌa tuaꞌ achena capater umen tin e aqꞌuijna uwiron?
ROM 8:32 Pues Cadiosir cꞌani uyajcꞌon xeꞌ umaxtacon tunor e chojbꞌesiaj, y tamar era jaxir cꞌapa uyajcꞌon esto Uyunen tuaꞌ achamay tamaron tuaꞌ ucorpeson y machi umuqui ticoit. Y cocha uyajcꞌonix Uyunen xeꞌ inteꞌ taca ayan, entonces jaxir tuaꞌ axin uyajcꞌon tunor lo que ayan tacar Uyunen era ubꞌan.
ROM 8:33 Y entonces ¿chi uyubꞌi utuchꞌion xeꞌ sicbꞌabꞌironix umen e Dios? Mamajchi. Pues jax Cadiosir xeꞌ uyare chi xeꞌ erach y chi xeꞌ abꞌeto umen que ayanto e mabꞌambꞌanir tama uyalma.
ROM 8:34 Entonces ¿ayan ca chi erer uyare tuaꞌ casatpa? Mamajchi. Pues e Cristo Jesús machi tuaꞌ usation porque jaxir ixin chamay tamaron y de allí sutpa bꞌixcꞌa tujam e chamenobꞌ, y coner turu tama unojcꞌabꞌ Catata Dios war ucꞌajti tacar tuaꞌ catacarna.
ROM 8:35 ¿Chi entonces uyubꞌi ulocsion tama ucꞌunersiaj e Cristo? ¿O jax ca lo que uchion canumse cabꞌa umen que umaxtacon e Dios? ¿O lo que intran ticoit? ¿O conda ayan chi xeꞌ cꞌani uqꞌuechion caxin tama e cárcel umen que umaxtacon e Dios? ¿Uyubꞌi ca ulocsion tama ucꞌunersiaj e Jesucristo tunor era? Machi. ¿O uyubꞌi ca ulocsion e winar? ¿O conda matucꞌa cabꞌujc? ¿O conda ayan lo que imbꞌacꞌajr uwirnar tut inteꞌ? ¿O uyubꞌi ca ulocsion e chamer tama ucꞌunersiaj e Jesucristo? Pues matucꞌa erer ulocsion tama ucꞌunersiaj e Jesucristo.
ROM 8:36 Bꞌan cocha chꞌar tzꞌijbꞌabꞌir tama uyojroner e Dios: Pues, Cadiosiret, umen taca que war caxana tacaret, non turonix tuaꞌ cachamesna tunor e día, y ubꞌijnuobꞌ e gente que matucꞌa cacꞌampibꞌir bꞌan cocha cora oveja xeꞌ war aqꞌuejcha axin tuaꞌ achamesnobꞌ. Bꞌan chꞌar tzꞌijbꞌabꞌir tama uyojroner e Dios.
ROM 8:37 Pero tama tunor lo que war canumse cabꞌa cocha era war caqꞌuecꞌo cawawan tacar utacarsiaj e Jesucristo xeꞌ war uyajta coit.
ROM 8:38 Y tamar era nen innata ixto yaꞌ que matucꞌa uyubꞌi ulocsion tama ucꞌunersiaj e Dios. Machi uyubꞌi e chamer, y machi uyubꞌi e cuxtar, y machi uyubꞌi e sian angelobꞌ, y machi uyubꞌi tin e ayan ucꞌotorer, y machi uyubꞌi e sian mabꞌambꞌan mein, y machi uyubꞌi lo que ayan ticoit coner, y machi uyubꞌi lo que watar ejcꞌar. Matucꞌa uyubꞌi ulocsion tama ucꞌunersiaj e Dios.
ROM 8:39 Y machi uyubꞌi lo que ayan tichan, y nien machi uyubꞌi lo que ayan ejmar, y nien machi uyubꞌi lo que chena umen e Dios. Matucꞌa uyubꞌi ulocsion tama e cꞌunersiaj lo que Cadiosir ixin uwirsion tama e Cristo Jesús xeꞌ jax Cawinquirar.
ROM 9:1 Pues entonces tunor lo que war inwareox era war inche cocha inteꞌ ajcꞌupesiaj tama e Cristo y machi war inmajresox. Pues Unawalir e Dios war ubꞌijres niwalma y tamar era innata que erach tunor lo que war inwareox era.
ROM 9:2 Pues nen era intzꞌintzꞌa tama niwalma y acꞌuxun niwalma ubꞌan
ROM 9:3 umen que war unsre meyra tuaꞌ acorpesnobꞌ tunor nipiarobꞌ tama e wer xeꞌ jax e gente xeꞌ tuobꞌ e Israel. Y nen era turix tuaꞌ inquetpa bꞌaxbꞌir ani y tuaꞌ inquetpa najtir tut e Cristo jay umen era erer uchꞌamiobꞌ ani e corpesiaj.
ROM 9:4 Pues tunor nipiarobꞌ era tama e wer xeꞌ turobꞌ tara tor e rum coner maxtacobꞌ tuaꞌ inteꞌ winic xeꞌ ucꞌabꞌa Israel xeꞌ turuan tama e onian tiempo. Y tunor e gente tuaꞌ e Israel xeꞌ turuanobꞌ tama e onian tiempo chꞌajmobꞌ umen e Dios tuaꞌ aquetpobꞌ umaxtacobꞌ. Y meyra ixin uche e Dios tacarobꞌ tama e onian tiempo. Pues quetpa utawarer e Dios tacarobꞌ, y e Dios uche cora pacto tacarobꞌ, y ajcꞌunobꞌ uley e Moisés, y ajcꞌunobꞌ cocha tuaꞌ uyujtzꞌiobꞌ ut e Dios tama e templo, y arobꞌnobꞌ lo que e Dios cꞌani axin uche tuaꞌ utacrion.
ROM 9:5 Pues tunor nipiarobꞌ era tama e wer xeꞌ turobꞌ tor e rum coner jax umaxtacobꞌ e Israel era y tuobꞌ uchꞌajnarir e nuquir winicobꞌ xeꞌ turobꞌ tama e onian tiempo. Y tamar e chꞌajnarir era ubꞌan tiaꞌ cuxpa e Cristo xeꞌ jax Cadiosir xeꞌ quetpa tujor tunor lo que ayan y xeꞌ war catattzꞌi iraj iraj. Amén.
ROM 9:6 Pues machi cꞌani caware que e Dios machi cꞌapa uche tunor lo que uyare e gente tuaꞌ e Israel que bꞌan tuaꞌ uche, sino que majax tunor e gente xeꞌ locꞌoyobꞌ tama uchꞌajnar e Israel acꞌupseyanobꞌto tama e Dios bꞌan cocha cay uchiobꞌ e gente tuaꞌ e Israel xeꞌ turuanobꞌ tama e onian tiempo.
ROM 9:7 Y machi quetpobꞌ tama uchꞌajnar e Abraham tunor e maxtac xeꞌ cuxpobꞌ tamar, sino que ojron e Dios y che: “Jax taca tin e locꞌoy tama uchꞌajnar e Isaac tuaꞌ aquetpobꞌ sicbꞌabꞌirobꞌ umen e Dios”, che e Dios.
ROM 9:8 Pues e ojroner era uwirsion que conda acuxpa inteꞌ uyunen tama e Abraham machi war che que jaxir tuaꞌ aquetpa inteꞌ umaxtac e Dios. Sino que jax taca tin e cuxpa umen ucꞌotorer e Dios tuaꞌ aquetpa tama uchꞌajnar e Abraham era.
ROM 9:9 Porque lo que arobꞌna e Abraham umen e Dios jax era: “Cꞌani inyopa otronyajr y cꞌani acuxpa inteꞌ uyar e Sara”, che e Dios.
ROM 9:10 Y ayanto más. Porque e Rebeca xeꞌ turuan tama e onian tiempo ucuxi uyar xeꞌ chachaꞌ y inteꞌ taca utata e maxtacobꞌ era xeꞌ jax catata viejo Isaac.
ROM 9:11 Pero conda merato acuxpobꞌ e chateꞌ maxtac era y conda merato uchiobꞌ lo que imbꞌutz y nien lo que mabꞌambꞌan e Dios uyare e Rebeca y che: “E sacumbꞌir tuaꞌ uche lo que ucꞌani e ijtzꞌimbꞌir”, che e Dios. Y bꞌan che ubꞌan tama inteꞌ ojroner tiaꞌ chꞌar tzꞌijbꞌabꞌir que: “Inyajta ut e Jacob pero e Esaú machi incꞌani”, che e Dios. Y tamar era quetpa chequer que e Dios erer usicbꞌa tin e ucꞌani bꞌan cocha ubꞌijnu uche. Y e Dios upejca tin e ucꞌani y machi ubꞌijnu jay imbꞌutz o jay majax imbꞌutz lo que war uchiobꞌ e gente era.
ROM 9:14 Entonces ¿tucꞌa cawaric tamar era? ¿O mabꞌambꞌan ca lo que ubꞌijnu uche Cadiosir era? Machi.
ROM 9:15 Porque e Dios uyare e Moisés y che: “Cꞌani inchectes nicꞌunersiaj tut xeꞌ incꞌani y cꞌani inyajta ut xeꞌ incꞌani ubꞌan”, che e Dios.
ROM 9:16 Entonces machi tuaꞌ asicbꞌana inteꞌ winic umen taca que bꞌan war ucꞌani y nien umen que uturbꞌa ubꞌa tuaꞌ achꞌajma, sino que cꞌani asicbꞌana inteꞌ jay yajtana ut umen e Dios.
ROM 9:17 Pues chꞌar tzꞌijbꞌabꞌir tama uyojroner e Dios lo que e Dios cay uyare e rey tuaꞌ e Egipto que: “Nen inchiet iquetpa rey tujor e Egipto era tuaꞌ inchecsu tamaret tunor nicꞌotorer y tuaꞌ acꞌotoy unatobꞌ nicꞌabꞌa tunor e gente tara tor e rum”, che e Dios.
ROM 9:18 Y tamar era erer cawira que e Dios erer uyajta ut tin taca xeꞌ ucꞌani, pero que erer uqꞌuecꞌojse uyalma tin e cꞌani uqꞌuecꞌojse ubꞌan.
ROM 9:19 Pues erer ani awaren y che: “Y jay bꞌan quetpa ¿tucꞌa tuaꞌ que e Dios warto uyari ticajor que jax non xeꞌ war cache e mabꞌambꞌanir? Porque ¿chi uyubꞌi uquete uwabꞌu lo que cꞌani uche e Dios?”
ROM 9:20 Pero net xeꞌ winiquet, ¿chiet net tuaꞌ aware e Dios que majax bueno lo que war uche? Pues jay erer ani oꞌjron inteꞌ bꞌejt bꞌajcꞌat axin uyare e ajpacbꞌejt y che: “¿Tucꞌa tuaꞌ achien inquetpa ingojr bꞌejt cocha era?” che ani inteꞌ bꞌejt uyare e ajpacbꞌejt. Pero bꞌajcꞌat asutpa oꞌjron e ajpacbꞌejt otronyajr taca e bꞌejt y che: “¿Tuqꞌuet net tuaꞌ más cꞌani anata?” che ani e ajpacbꞌejt.
ROM 9:21 Pues tin e ajpacbꞌejt, ¿ma ca erer uche lo que ucꞌani taca e tzꞌijc rum? Porque jaxir erer uche inteꞌ bꞌejt xeꞌ más galan tuaꞌ uchꞌubꞌa y erer uche otronteꞌ bꞌejt tuaꞌ axin ucꞌampes iraj iraj tama e tzꞌijc era.
ROM 9:22 Pues bꞌan cocha turu e ajpacbꞌejt era y bꞌan e Dios ubꞌan, jaxir erer uche lo que ucꞌani taca e gente xeꞌ turobꞌ tara tor e rum. Y jay jaxir cꞌani uchectes uqꞌuijnar taca ucꞌotorer tut e gente xeꞌ satrem xeꞌ turobꞌ tara tor e rum, pues erer uche. Pues e Dios cay uturbꞌa ubꞌa tuaꞌ acojcsan tama tin e quetpix tuaꞌ ajajtzꞌobꞌ y xeꞌ tawar tuaꞌ atijresnobꞌ.
ROM 9:23 Pero Cadiosir cꞌani uchectes ubꞌa ticoit ubꞌan que nojta utawarer, y bꞌan war uchectes ticoit non coner xeꞌ sicbꞌabꞌiron umener desde ucajyesnibꞌir tunor era tuaꞌ caxin cachꞌami ucꞌunersiaj y tuaꞌ axejra utawarer tacaron.
ROM 9:24 Porque non xeꞌ pejcbꞌiron umen e Dios majax non taca xeꞌ tuon e Israel sino que ayanon xeꞌ majax tuon e Israel ubꞌan xeꞌ pejcbꞌiron.
ROM 9:25 Bꞌan cocha chꞌar tzꞌijbꞌabꞌir umen e Oseas tama e onian tiempo tamar e gente xeꞌ majax tuobꞌ e Israel y che: Tin e majax nichinam ani cꞌani inware que jax nichinam coner, y tin e machi ani incꞌani, coner cꞌani inware que incꞌani.
ROM 9:26 Y e winicobꞌ xeꞌ turobꞌ tama inteꞌ lugar tiaꞌ arobꞌnobꞌ que: “Nox majax nichinamox”, che e Dios, y yajaꞌ taca tuaꞌ apejcnobꞌ e winicobꞌ que: “Coner umaxtacox e Dios xeꞌ bꞌixir.” Bꞌan chꞌar tzꞌijbꞌabꞌir umen e Oseas xeꞌ jax inteꞌ profeta.
ROM 9:27 Pero tamar e gente xeꞌ tuobꞌ e Israel chꞌar tzꞌijbꞌabꞌir umen e Isaías y che: “Motor que ayan meyra sian gente tuaꞌ e Israel bꞌan cocha e jiꞌ lo que ayan tor e mar, pero jax taca imbꞌijc tuobꞌ xeꞌ tuaꞌ acorpesnobꞌ.
ROM 9:28 Porque Cadiosir acꞌapa uche wacchetaca tama tunor or e rum tunor lo que arobꞌnon umener tama uyojroner.” Bꞌan chꞌar tzꞌijbꞌabꞌir umen e Isaías xeꞌ jax inteꞌ profeta.
ROM 9:29 Y chꞌar tzꞌijbꞌabꞌir umen e Isaías era ubꞌan y che: Jay Cadiosir xeꞌ meyra ayan ucꞌotorer machi ani uyacton taca inteꞌ cachꞌajnarir, satpon ani bꞌan cocha satpobꞌ tin e tuobꞌ ani e chinam Sodoma, y satpon bꞌan ani cocha satpobꞌ tin e tuobꞌ ani e chinam Gomorra. Bꞌan chꞌar tzꞌijbꞌabꞌir umen e Isaías tama e onian tiempo.
ROM 9:30 Pues entonces ¿tucꞌa cawaric tama tunor era? Pues cꞌani caware que tin e majax tuobꞌ e Israel y xeꞌ machi ani war usicbꞌobꞌ cocha tuaꞌ aquetpobꞌ erach taca e Dios, jax jaxirobꞌ xeꞌ quetpobꞌ erach taca e Dios coner umen que cay cꞌupseyanobꞌ tamar.
ROM 9:31 Pero tin e tuobꞌ e Israel xeꞌ cay uche ubꞌobꞌ tuaꞌ acꞌupseyanobꞌ tut uley e Moisés tuaꞌ aquetpobꞌ erach taca e Dios, machi cꞌotoy uchiobꞌ umen que machi obꞌna cꞌupseyanobꞌ tut e ley era.
ROM 9:32 ¿Y tucꞌa tuaꞌ machi cꞌotoy aquetpobꞌ erach taca e Dios? Porque e gente era machi ubꞌijnuobꞌ tuaꞌ acꞌupseyanobꞌ tama e Dios tuaꞌ atacarnobꞌ, sino que cꞌani ani aquetpobꞌ erach taca e Dios tamar taca lo que cay uchiobꞌ. Y tamar era cucremobꞌ porque machi uyubꞌi acꞌupseyanobꞌ tama e Jesucristo. Bꞌanobꞌ cocha inteꞌ xeꞌ uyobꞌi uyoc tama ingojr tun y acucrema, y tamar era war unumse ubꞌobꞌ coner.
ROM 9:33 Bꞌan cocha chꞌar tzꞌijbꞌabꞌir tama uyojroner e Dios y che: Nen inturbꞌix tama e lugar Sión inteꞌ xeꞌ bꞌan cocha ingojr tun xeꞌ uche acucrema e gente conda uyobꞌi ubꞌobꞌ tamar, y e tun era jax xeꞌ axin ucucru e gente conda axin uchecsu ubꞌobꞌ que machi cꞌani acꞌupseyanobꞌ tamar. Pero tin e acꞌotoy acꞌupseyanobꞌ tamar jaxir xeꞌ bꞌan cocha e tun era, ma cocha erer tuaꞌ asubꞌajrobꞌ conda acꞌotoyobꞌ tut e Dios. Bꞌan chꞌar tzꞌijbꞌabꞌir tama uyojroner e Dios.
ROM 10:1 Pues entonces niwermanuox, lo que unsre tama niwalma y lo que war incꞌajti taca e Dios iraj iraj jax era: Que incꞌani tuaꞌ acorpesnobꞌ e gente xeꞌ tuobꞌ e Israel.
ROM 10:2 Pues ayan lo que erer inware tamarobꞌ xeꞌ jax era: Que jaxirobꞌ ayan inteꞌ nuxi useriaj tama e Dios, pero uchebꞌiobꞌ que atzꞌacta tuaꞌ taca acꞌupseyanobꞌ tut uley e Moisés.
ROM 10:3 Pues machi unatobꞌ cocha tuaꞌ aquetpa erach inteꞌ taca e Dios. Y tamar era ixin usicbꞌobꞌ e Dios bꞌan taca cocha ubꞌijnuobꞌ uchiobꞌ, pero machi cꞌani uwirobꞌ que ucꞌani tuaꞌ umanxujres ubꞌobꞌ tut e Dios tuaꞌ uyubꞌi aquetpobꞌ erach tacar.
ROM 10:4 Porque e Jesucristo cꞌapa uche tunor lo que ucꞌani uley e Moisés conda ixin chamay tuaꞌ ucorpeson, y tamar era jaxir uche que tunor tin e axin acꞌupseyanobꞌ tamar, axin aquetpobꞌ erach taca e Dios.
ROM 10:5 Pero tin e cꞌani aquetpa erach taca e Dios tacar taca uley e Moisés ucꞌani ani tuaꞌ uche bꞌan taca cocha chꞌar tzꞌijbꞌabꞌir umen e Moisés conda che: “E winic xeꞌ acꞌapa uche tunor lo que chꞌar tzꞌijbꞌabꞌir tama uley e Moisés cꞌani uchꞌami e cuxtar xeꞌ bꞌutꞌur taca uchojbꞌesiaj e Dios”, xeꞌ chꞌar tzꞌijbꞌabꞌir umen e Moisés.
ROM 10:6 Pero che tama uley e Moisés que inteꞌ erer aquetpa erach taca e Dios jay axin acꞌupseyan tamar, y que ma intran ani porque chꞌar tzꞌijbꞌabꞌir que: “Ira aware tama awalma y che, ¿chi tuaꞌ atꞌabꞌay axin tut e qꞌuin?” xeꞌ war che ¿chi tuaꞌ axin tut e qꞌuin tuaꞌ uyemse e Jesucristo tuaꞌ watar tara tor e rum tuaꞌ ucorpeson?
ROM 10:7 Y machi tuaꞌ aware: “¿Y chi tuaꞌ ecmay axin tama e chꞌen tiaꞌ aquetpobꞌ e chamenobꞌ?” xeꞌ war che ¿chi tuaꞌ axin tut e chꞌen era tuaꞌ utꞌabꞌse watar e Jesucristo tujam e chamenobꞌ tuaꞌ aquetpa tara tor e rum tuaꞌ ucorpeson?
ROM 10:8 ¿Y tucꞌa war che e ojroner xeꞌ che: “Pues e ojroner tama e corpesiaj toit turu; turu tama awej y turu tama awalma?” Y e ojroner era jax lo que ayan tama e cꞌupesiaj. Y jax era lo que war cachecsu tut e gente axin.
ROM 10:9 Porque jay achecsu taca awej que e Jesucristo jax Awinquirar y icꞌupseyan tama awalma que e Dios usuti ubꞌixqꞌues e Jesús tujam e chamenobꞌ, net tuaꞌ icorpesna.
ROM 10:10 Porque tama cawalma cacꞌupseyan tama e Jesucristo tuaꞌ caquetpa erach tut e Dios, y tama cawej cachecsu que e Jesucristo jax Cawinquirar tuaꞌ cacorpesna.
ROM 10:11 Pues chꞌar tzꞌijbꞌabꞌir tama uyojroner e Dios y che: “Tin e acꞌotoy acꞌupseyanobꞌ tama e Jesucristo ma tiaꞌ tuaꞌ asubꞌajrobꞌ conda acꞌotoyobꞌ tut e Dios.” Bꞌan chꞌar tzꞌijbꞌabꞌir tama uyojroner e Dios.
ROM 10:12 Pues mamajchi xeꞌ intiach uwirnar tut e Dios, motor jay tuaꞌ e Israel o motor jay majax tuaꞌ e Israel. Pues inteꞌ taca Cawinquirar y jaxir Uwinquir tujor tunor e winicobꞌ tara tor e rum, y jaxir tuaꞌ axin uchojbꞌes ut tunor tin e axin upejca ucꞌabꞌa.
ROM 10:13 Porque chꞌar tzꞌijbꞌabꞌir tama uyojroner e Dios y che: “Tunor tin e axin upejca ucꞌabꞌa Cawinquirar cꞌani acorpesnobꞌ.” Bꞌan chꞌar tzꞌijbꞌabꞌir tama uyojroner e Dios.
ROM 10:14 Pero ¿cocha tuaꞌ axin upejcobꞌ ucꞌabꞌa Cawinquirar Jesucristo jay ma tiaꞌ cꞌupseyanobꞌ tamar? ¿Y cocha tuaꞌ acꞌotoy acꞌupseyanobꞌ tama Cawinquirar Jesucristo jay ma tiaꞌ uyubꞌiobꞌ oꞌjron inteꞌ tamar? ¿Y cocha tuaꞌ uyubꞌiobꞌ e ojroner tama e corpesiaj era jay mamajchi acꞌotoy tutobꞌ tuaꞌ uchecsu tunor era?
ROM 10:15 ¿Y cocha tuaꞌ axin inteꞌ tuaꞌ uchecsu e ojroner tama e corpesiaj tut e gente era jay mamajchi uyebꞌta axin? Bꞌan cocha chꞌar tzꞌijbꞌabꞌir tama uyojroner e Dios y che: “Galan ucꞌoter tunor tin e uchecsu e ojroner tama e jiriar tut e gente y xeꞌ uchecsu tutobꞌ tunor e ojroner xeꞌ imbꞌutz tama e corpesiaj.” Bꞌan chꞌar tzꞌijbꞌabꞌir tama uyojroner e Dios.
ROM 10:16 Pero majax tunor e gente xeꞌ cꞌani uchꞌami e ojroner tama e corpesiaj conda achecsuna tutobꞌ. Pues chꞌar tzꞌijbꞌabꞌir umen e Isaías tama e onian tiempo y che: “Cawinquiraret, mamajchi war ucꞌupse e ojroner lo que war cawareobꞌ.” Bꞌan chꞌar tzꞌijbꞌabꞌir tama uyojroner e Dios.
ROM 10:17 E cꞌupesiaj watar tut inteꞌ conda war uyubꞌi uyojroner e Dios, y lo que war uyubꞌi era jax e ojroner tama e corpesiaj tama Cawinquirar Jesucristo.
ROM 10:18 Pero cꞌani umbꞌi tibꞌa: “¿Uyubꞌi ca e gente tuaꞌ e Israel e ojroner tama e corpesiaj?” Pues uyubꞌiobꞌ ixto yaꞌ. Porque chꞌar tzꞌijbꞌabꞌir tama uyojroner e Dios y che: Pues obꞌna unucobꞌ ojron tic taca tama tunor or e rum tiaꞌ turobꞌ e gente tuaꞌ e Israel, y tunor uyojronerobꞌ era cꞌotoy esto tama e lugar xeꞌ más innajt tama tunor or e rum era. Bꞌan chꞌar tzꞌijbꞌabꞌir tama uyojroner e Dios.
ROM 10:19 Pero cꞌani umbꞌi tibꞌa otronyajr era: “¿O war ca unatobꞌ tin e tuobꞌ e Israel que e ojroner tama e corpesiaj era quetpa tuaꞌ tunor e gente tara tor e rum?” Pues chꞌar tzꞌijbꞌabꞌir umen e Moisés y che: Cꞌani inche tuaꞌ ixqꞌuijna upater meyra gente, xeꞌ majax inteꞌ chinam umen que jaxirobꞌ war uchꞌamiobꞌ meyra chojbꞌesiaj tuaꞌ e Dios y nox matucꞌa war ichꞌami, y cꞌani inqꞌuijnesox upater inteꞌ chinam que matucꞌa ani unatobꞌ tama e Dios. Bꞌan chꞌar tzꞌijbꞌabꞌir tama uley e Moisés.
ROM 10:20 Y ojron e Isaías y che: Tin e machi ani war usicbꞌen utajwien, Y cay inchectes nibꞌa tut tin e machi war usicbꞌen, xeꞌ chꞌar tzꞌijbꞌabꞌir umen e Isaías.
ROM 10:21 Pero conda ojron tama e gente tuaꞌ e Israel ojron e Isaías y che: “War impejca e gente era tunor e día pero jaxirobꞌ machi cꞌani acꞌupseyanobꞌ taniut y matucꞌa ucꞌaniobꞌ tanibꞌa.”
ROM 11:1 Pues entonces cꞌani umbꞌi tibꞌa: “¿Chojcobꞌ ca inyajrer tin e tuobꞌ e Israel umen e Dios?” Ma cocha erer. Pues nen xeꞌ Pabloen tuen e Israel, y tuen uchꞌajnar e Abraham xeꞌ turuan tama e onian tiempo, y nen chꞌajnaren tuaꞌ e Benjamín xeꞌ turuan tama e onian tiempo ubꞌan.
ROM 11:2 Pues Cadiosir machi uchoqui inyajrer e gente xeꞌ tuobꞌ e Israel xeꞌ sicbꞌabꞌirobꞌ umener tama ucajyesnibꞌir tunor era. Pues nox war inata lo que chꞌar tzꞌijbꞌabꞌir tama uyojroner e Dios tiaꞌ e profeta Elías cay ucꞌajti taca e Dios, y cay uyare e Dios que e gente xeꞌ tuobꞌ e Israel machi ixto war uyujtzꞌiobꞌ ut e Dios y che:
ROM 11:3 “Cadiosiret, e gente xeꞌ tuobꞌ e Israel era cꞌapa uchamsiobꞌ tunor e profetobꞌ, y cay utijresobꞌ tunor e altar tiaꞌ ojytzna oit y nen taca xeꞌ quetpen y nen ubꞌan cꞌani uchamsenobꞌ”, xeꞌ chꞌar tzꞌijbꞌabꞌir tama uyojroner e Dios.
ROM 11:4 Pero e Dios uyare e Elías y che: “Pues nen insicbꞌix 7,000 winicobꞌ xeꞌ ma tiaꞌ cotuanobꞌ tut e chamen dios xeꞌ ucꞌabꞌa Baal”, che e Dios.
ROM 11:5 Y esto coner ayanto cora winicobꞌ xeꞌ tuobꞌ e Israel xeꞌ quetpa sicbꞌabꞌirobꞌ tuaꞌ acorpesnobꞌ umen utacarsiaj e Dios.
ROM 11:6 Y jay tacar utacarsiaj e Dios sicbꞌabꞌirobꞌ e winicobꞌ era, entonces war che que matucꞌa erer uchiobꞌ tuaꞌ uchꞌamiobꞌ e corpesiaj era, porque jay tamar lo que war uchiobꞌ uchꞌamiobꞌ ani utacarsiaj e Dios, entonces asatpa lo que war che e ojroner tacarsiaj.
ROM 11:7 Entonces ¿tucꞌa numuy tama e gente xeꞌ tuobꞌ e Israel? Pues machi uchꞌamiobꞌ e corpesiaj lo que cay usicbꞌobꞌ. Pero tin e sicbꞌabꞌirobꞌ umen e Dios uchꞌamiobꞌ ixto e corpesiaj. Y tunor e inmojr gente xeꞌ tuobꞌ e Israel era qꞌuecꞌojsena uyalmobꞌ.
ROM 11:8 Bꞌan cocha chꞌar tzꞌijbꞌabꞌir tama uyojroner e Dios tamar e gente xeꞌ tuobꞌ e Israel xeꞌ machi war acꞌupseyanobꞌ tut e Dios que: “E Dios uche aquetpobꞌ macar uyalmobꞌ e gente era, y uyajcꞌu unacꞌut pero matucꞌa chequer tutobꞌ xeꞌ tuaꞌ e Dios, y uyajcꞌu uchiquin pero matucꞌa uyubꞌiobꞌ xeꞌ arobꞌnobꞌ umen e Dios, y bꞌan taca aquetpobꞌ esto coner,” che e Dios.
ROM 11:9 Y chꞌar tzꞌijbꞌabꞌir ubꞌan tamar e gente era xeꞌ tuobꞌ e Israel umen e David y che: Tunor e sian nojqꞌuin lo que war uchiobꞌ sutpac cꞌuxner tutobꞌ, y cucremicobꞌ umen lo que ubꞌijnuobꞌ que imbꞌutz ani tut e Dios, y jajtzꞌicobꞌ.
ROM 11:10 Mutzcꞌac unacꞌutobꞌ tuaꞌ machi uyubꞌi eꞌronobꞌ, y gorcajbꞌac upatobꞌ umen ubꞌarir umabꞌambꞌanirobꞌ. Bꞌan chꞌar tzꞌijbꞌabꞌir umen e David.
ROM 11:11 Pues cꞌani umbꞌi tibꞌa, conda e gente tuaꞌ e Israel qꞌuijnobꞌ tamar ucanseyaj e Cristo, ¿cucremobꞌ ca inyajrer? Pues ma cocha erer. Porque conda e gente xeꞌ tuobꞌ e Israel machi ucꞌupsiobꞌ e Dios entonces quetpa que e gente xeꞌ majax tuobꞌ e Israel jax tin e tuaꞌ uchꞌamiobꞌ e corpesiaj. Pero tamar era tin e tuobꞌ Israel, conda uwirobꞌ que tin e majax tuobꞌ e Israel war acorpobꞌ, axin ubꞌijnuobꞌ que jaxirobꞌ cꞌani uchꞌamiobꞌ e corpesiaj era ubꞌan.
ROM 11:12 Pues umen que e gente xeꞌ tuobꞌ e Israel uchiobꞌ e mabꞌambꞌanir e gente tara tor e rum cꞌotoy uchꞌamiobꞌ e corpesiaj tuaꞌ e Dios. Entonces jay umabꞌambꞌanirobꞌ e gente xeꞌ tuobꞌ e Israel era cꞌampa tuaꞌ ataresna e corpesiaj tut tin e majax tuobꞌ e Israel, entonces conda acꞌotoy e hora conda e gente xeꞌ tuobꞌ e Israel acꞌotoy uchꞌamiobꞌ e corpesiaj cꞌani achecta inteꞌ nuxi chojbꞌesiaj xeꞌ más nojta tut tunor e gente tara tor e rum.
ROM 11:13 Pues ayan lo que cꞌani inwareox nox xeꞌ majax tuox e Israel. Y cocha e Dios uyebꞌta tarien tuaꞌ inchecsu uyojroner e Dios tut tin e majax tuobꞌ e Israel, war intzay inche tunor e nuxi patnar era.
ROM 11:14 Pero jay umen que nox cay corpesnox conda iyubꞌi lo que cay inchecsu tiut ayan tin e tuobꞌ e Israel xeꞌ axin atzꞌuniobꞌ tamar e chojbꞌesiaj lo que war ichꞌami nox, bꞌajcꞌat ayan tin e axin uyusre uchꞌamiobꞌ e corpesiaj era ubꞌan.
ROM 11:15 Porque jay umen que cꞌotoy xejbꞌna utobꞌ tunor e gente xeꞌ tuobꞌ e Israel, checta tari e corpesiaj tuaꞌ e inmojr gente tara tor e rum, entonces war che era que cꞌani achecta watar inteꞌ nuxi tzayer más nojta tama e hora conda achꞌajmobꞌ e gente xeꞌ tuobꞌ e Israel era otronyajr. Y lo que cꞌani achecta watar tama e hora yajaꞌ jax era: Que tin e chamen cꞌani asujta abꞌixqꞌuesna tujam e chamenobꞌ.
ROM 11:16 Pues conda aloqꞌuesna imbꞌijc tama e cꞌum tuaꞌ aꞌjcꞌuna e Dios, war che era que tunor lo que alocꞌoy tama e cꞌum era tuaꞌ e Dios ubꞌan. Y jay uwir inteꞌ teꞌ aꞌjcꞌuna e Dios, entonces tunor ucꞌabꞌ e teꞌ era tuaꞌ e Dios ubꞌan.
ROM 11:17 Pues ayan tin e tuobꞌ e Israel xeꞌ larobꞌ cocha cora ucꞌabꞌ teꞌ xeꞌ ucꞌabꞌa olivo xeꞌ quetpa jecchubꞌir, y nox xeꞌ majax tuoxꞌ e Israel larox cocha cora ucꞌabꞌ teꞌ olivo pero xeꞌ ajcꞌopot. Entonces conda cꞌotoy ichꞌami ucꞌabꞌa Cawinquirar Jesucristo tzꞌacbꞌirox tama uwir e teꞌ olivo era. Y tamar era nox interox coner tacar uwir e olivo era y war ichꞌami ucuxtar e olivo era ubꞌan.
ROM 11:18 Pero ma erer ibꞌijnu que nox más ayan icꞌampibꞌir que e gente xeꞌ tuobꞌ e Israel. Porque jay ibꞌijnu que más ayan icꞌampibꞌir cocha era entonces war inajpes que majax nox xeꞌ war iwajcꞌu ucuxtar uwir e teꞌ, sino que jax uwir e teꞌ era xeꞌ war uyajcꞌox e cuxtar.
ROM 11:19 Pues bꞌajcꞌat iꞌxin aware cocha era: “Bꞌan pue, pero ucꞌabꞌ e teꞌ era quetpa jecchubꞌir tuaꞌ uyubꞌi insajca nen tama e teꞌ olivo era.”
ROM 11:20 Bꞌan yaꞌ. Pero jecchuna ucꞌabꞌ e teꞌ era umen que matucꞌa ucꞌupesiaj, y net tzꞌacbꞌiret tama uwir e teꞌ umen taca que net ayan acꞌupesiaj tama e Jesucristo. Y tamar era ira atattzꞌi abꞌa que net más nojtet que ucꞌabꞌ e teꞌ era xeꞌ jecchubꞌir sino que awiric abꞌa tuaꞌ machi iloqꞌuesna tama uwir e teꞌ era ubꞌan.
ROM 11:21 Porque jay Cadiosir machi uyacta bꞌan taca ucꞌabꞌ e teꞌ xeꞌ tuach ani e olivo, machix tuaꞌ uyactet ubꞌan jay machi ache abꞌa imbꞌutz era.
ROM 11:22 Bꞌijnun que nojta ucꞌunersiaj e Dios, pero nojta uqꞌuijnar e Dios ubꞌan. Pues jaxir qꞌuijna taca tin e cucremobꞌ, pero toit net incꞌun uwirnar. Pero net ucꞌani tuaꞌ iquetpa tama ucꞌunersiaj, porque jay machi, net ubꞌan tuaꞌ iloqꞌuesna.
ROM 11:23 Pero e gente tuaꞌ e Israel jay asutpa acꞌupseyanobꞌ tama e Dios otronyajr, entonces axin atzꞌajcobꞌ otronyajr ubꞌan. Pues e Dios ayan ucꞌotorer tuaꞌ asutpa utzꞌaquiobꞌ otronyajr.
ROM 11:24 Porque net xeꞌ majax tuet e Israel bꞌanet cocha inteꞌ ucꞌabꞌ teꞌ xeꞌ ajcꞌopot olivo, pero tzꞌacbꞌiret tama inteꞌ teꞌ olivo xeꞌ bueno xeꞌ majax bꞌan cocha ucꞌani ani tuaꞌ achena. Pero e gente tuaꞌ e Israel xeꞌ bꞌan cocha ucꞌabꞌ e teꞌ xeꞌ tuach e olivo xeꞌ bueno erer ixto atzꞌajcobꞌ otronyajr tama uterarobꞌ era.
ROM 11:25 Pues entonces niwermanuox, ayan lo que cꞌani inwareox era tuaꞌ inata tamar ubꞌijnusiaj e Dios xeꞌ mucur ani ticoit tamar e gente xeꞌ tuobꞌ e Israel era. Y cꞌani inwareox tunor era tuaꞌ machi ibꞌijnu que tunor war inata. Y e bꞌijnusiaj jax era: Que qꞌuecꞌojsena uyalmobꞌ e gente tuaꞌ e Israel tuaꞌ machi acꞌupseyanobꞌ tama e Jesucristo, pero machi tuaꞌ aquetpobꞌ bꞌan taca, sino que watar e día conda cꞌani acꞌotoy acꞌupseyanobꞌ tama e Jesucristo. Pero machi tuaꞌ anumuy tunor era este que acꞌapa acꞌupseyanobꞌ e gente xeꞌ sicbꞌabꞌirobꞌ umen e Dios xeꞌ majax tuobꞌ e Israel.
ROM 11:26 Y tamar era conda achecta watar e día era tunor e gente xeꞌ tuobꞌ e Israel cꞌani acorpesnobꞌ. Bꞌan cocha chꞌar tzꞌijbꞌabꞌir tama uyojroner e Dios: E Ajcorpesiaj axin achecta tama e lugar Sión, y jaxir tuaꞌ ulocse tunor e mabꞌambꞌanir tama umaxtac e Jacob.
ROM 11:27 Y che e Dios, jax era e pacto xeꞌ cꞌani inche taca e gente tuaꞌ e Israel, y conda inche e pacto era tacarobꞌ, cꞌani inlocse tunor umabꞌambꞌanirobꞌ, che e Dios.
ROM 11:28 Pues coner war cawira que e gente tuaꞌ e Israel war uxejbꞌiobꞌ ut e ojroner tama e corpesiaj, y tamar era war uxejbꞌiobꞌ ut e Dios ubꞌan. Pero umen que bꞌan uchiobꞌ nox ajcꞌunox e lugar tuaꞌ ichꞌami e corpesiaj coner. Pero Cadiosir warto uyajta utobꞌ e gente era xeꞌ tuobꞌ e Israel porque sicbꞌabꞌirobꞌ utata viejobꞌirobꞌ tama e onian tiempo.
ROM 11:29 Porque Cadiosir ma tiaꞌ asutpa ulocse lo que ajcꞌubꞌir umener. Y tamar era conda e Dios axin uchojbꞌes ut inteꞌ winic, machi ixto tuaꞌ asutpa ulocse. Y conda e Dios axin usicbꞌa inteꞌ winic tuaꞌ aquetpa tuaꞌ, jaxir machi tuaꞌ asutpa uyare e winic era que mixto jax tuaꞌ coner.
ROM 11:30 Bꞌan cocha turox ani xeꞌ majax tuox e Israel tama e tiempo xeꞌ numuy, machi cꞌupseyanox tut e Dios. Pero umen que e gente tuaꞌ e Israel uyactobꞌ tuaꞌ acꞌupseyanobꞌ tut e Dios, entonces e Dios sutpa y cay uchecsu ucꞌunersiaj tiut nox.
ROM 11:31 Y bꞌan ubꞌan tama e gente tuaꞌ e Israel. Coner machi war acꞌupseyanobꞌ tut e Dios, pero watar e día conda cꞌani achecta watar ucꞌunersiaj e Dios tamarobꞌ otronyajr, bꞌan cocha nox xeꞌ war ichꞌami ucꞌunersiaj e Dios coner.
ROM 11:32 Porque e Dios cꞌapa uche tuaꞌ caquetpa yebꞌar ucꞌotorer e mabꞌambꞌanir tunoron xeꞌ turon tara tor e rum y bꞌan uche tuaꞌ uyubꞌi uchectes ucꞌunersiaj ticoit tunoron xeꞌ turon tara tor e rum ubꞌan.
ROM 11:33 Pues ubꞌijnusiaj e Dios intam, y bꞌan unatanyaj ubꞌan, y jaxir tunor war unata. Pues ma cocha erer canata tunor ubꞌijnusiaj e Dios, y ma cocha erer cacꞌotoy canata lo que war uche Cadiosir ubꞌan.
ROM 11:34 Bꞌan cocha chꞌar tzꞌijbꞌabꞌir tama uyojroner e Dios: “¿Chi war unata lo que war che tunor ubꞌijnusiaj Cawinquirar? ¿Y chi umen cansena e Dios?
ROM 11:35 ¿Y chi war uyajcꞌu Cawinquirar bꞌajxan tuaꞌ asutpa aꞌjcꞌuna uyeror umener otronyajr?” Bꞌan chꞌar tzꞌijbꞌabꞌir tama uyojroner e Dios.
ROM 11:36 Porque tunor lo que ayan tari tuaꞌ e Dios, y tunor lo que ayan chena umen e Dios, y tunor lo que ayan quetpa tuaꞌ acꞌampesna umener ubꞌan. Catattzꞌic ucꞌabꞌa Cadiosir iraj iraj. Amén.
ROM 12:1 Pues entonces niwermanuox, cꞌani inwareox tama ucꞌunersiaj e Dios tuaꞌ iwajcꞌu ibꞌa tut e Dios inyajrer tuaꞌ ixquetpa erach y tuaꞌ ixixin iturbꞌa ibꞌa tama e Dios tuaꞌ itzayjres e Dios tama tunor lo que iche. Y bꞌan ucꞌani tuaꞌ iche, porque tamar era icuxtar cꞌani aquetpa bꞌan cocha inteꞌ ojtznibꞌir xeꞌ galan tut e Dios.
ROM 12:2 Y ira ixturuan más bꞌan cocha ubꞌijnusiajobꞌ e gente tara tor e rum, sino que ustesic ibꞌijnusiaj tuaꞌ aquetpa imbꞌutz tunor ijor. Y tamar era cꞌani ixcꞌotoy inata lo que ucꞌani e Dios, y lo que imbꞌutz tut e Dios, y lo que utzayjres e Dios, y cꞌani inata lo que erach tut e Dios.
ROM 12:3 Pues umen que e Dios ixin uyajqꞌuen meyra utacarsiaj, cꞌani inwareox era que majax bueno jay inteꞌ winic axin ubꞌijnu que más ayan ucꞌampibꞌir que lo que ayan tuaꞌ. Pero inteꞌ intion ucꞌani tuaꞌ cabꞌijnu tamar cacꞌampibꞌir, y tamar era erer canata tamar cacꞌupesiaj xeꞌ ajcꞌunon umen e Dios cobꞌa cacꞌampibꞌir.
ROM 12:4 Porque tama ucuerpo inteꞌ ayan meyra parte. Ayan ucꞌabꞌ y ayan ujor y ayan uyoc y ayan meyra parte. Pero inteꞌ intiobꞌ ayan ucꞌampibꞌir.
ROM 12:5 Y bꞌanon non ubꞌan xeꞌ ajcꞌupesiajon tama e Cristo, motor que meyron pero interon tama ucuerpo e Cristo, y tamar era inteꞌ intion bꞌanon cocha inteꞌ parte tama inteꞌ cuerpo y bꞌan cocha era ucꞌani tuaꞌ catacre cabꞌa, bꞌan cocha cꞌampesna ucꞌabꞌ inteꞌ tuaꞌ uturbꞌa e comida tama uyej tuaꞌ uyubꞌi aweꞌ.
ROM 12:6 Pues e Dios uyajcꞌon cacꞌampibꞌir inteꞌ intion bꞌan cocha ucꞌani jaxir. Y tamar era non ucꞌani tuaꞌ cacꞌampes cacꞌampibꞌir bꞌan cocha ucꞌani jaxir ubꞌan. Entonces jay cacꞌampibꞌir xeꞌ ajcꞌunon umen e Dios jax tuaꞌ cachꞌami inteꞌ ojroner tuaꞌ e Dios y tuaꞌ casutpa caware e gente otronyajr, entonces cꞌupseyanicon tama e Dios tuaꞌ cache tunor era.
ROM 12:7 Y jay cacꞌampibꞌir xeꞌ ajcꞌunon umen e Dios jax tuaꞌ cache lo que ucꞌani otronteꞌ, entonces cachic ixto tunor era. Y jay cacꞌampibꞌir xeꞌ ajcꞌunon umen e Dios jax tuaꞌ cacanseyan tama uyojroner e Dios, caturbꞌic cabꞌa tamar e canseyaj.
ROM 12:8 Y jay cacꞌampibꞌir xeꞌ ajcꞌunon umen e Dios jax tuaꞌ catacre aqꞌuecꞌo axana tama ubꞌir e Dios tin e machi atzay, entonces caturbꞌic cabꞌa tuaꞌ catzayjresobꞌ. Y jay cacꞌampibꞌir xeꞌ ajcꞌunon umen e Dios jax tuaꞌ cawajcꞌu e ofrenda, entonces cawajcꞌuic y machi cabꞌijnu tamar uyeror ut. Y jay cacꞌampibꞌir xeꞌ ajcꞌunon umen e Dios jax tuaꞌ cacꞌotori tujor e inmojr, entonces cacojcuic cabꞌa bien conda war cacꞌotori. Y jay cacꞌampibꞌir xeꞌ ajcꞌunon umen e Dios jax tuaꞌ catacre tin e ayan unecesidad, entonces tzayicon conda cache tunor era.
ROM 12:9 Pues entonces cacꞌanic cabꞌa inteꞌ intion pero cachic taca tunor cawalma. Caxejbꞌuic ut lo que mabꞌambꞌan, y cachic jax taca lo que imbꞌutz.
ROM 12:10 Y cayajtic coit inteꞌ intion y cameqꞌuic cabꞌa xeꞌ ajcꞌupesiajon tama e Jesucristo, y catattzꞌicobꞌ e inmojr ajcꞌupesiajobꞌ inteꞌ intion.
ROM 12:11 Pues patnacon, y machi cawacta acꞌaxi e cꞌoyir tamaron, y caturbꞌic cabꞌa tuaꞌ cache lo que ucꞌani Cawinquirar taca tunor cawalma.
ROM 12:12 Tzayricon umen que war cacojco tama ucorpesiaj e Dios, quetpicon tzꞌustaca conda ayan lo que war canumse cabꞌa. Cacꞌajtic taca e Dios iraj iraj.
ROM 12:13 Catacricobꞌ e ajcꞌupesiajobꞌ tin e ayan unecesidobꞌ, y cachꞌamicobꞌ bien tin e war ayopa tuaꞌ uwarajsion.
ROM 12:14 Cacꞌajtic e chojbꞌesiaj taca e Dios upater tin e war uchion canumse cabꞌa. Cacꞌajtic tamarobꞌ tuaꞌ achojbꞌesnobꞌ y machi cacꞌajtic tuaꞌ abꞌaxnobꞌ.
ROM 12:15 Tzayicon taca tin xeꞌ war atzayobꞌ, y arucon taca tin xeꞌ war aꞌruobꞌ.
ROM 12:16 Caturbꞌic cabꞌa tuaꞌ caturuan catzay conda cawira cabꞌa inteꞌ intion. Machi cawactic oꞌchoy e bꞌijnusiaj tamaron que más nojta cacꞌampibꞌir que otronteꞌ, sino que camanxujresic cabꞌa inteꞌ intion. Y tin e nojta cajor ma erer cawacta cabꞌa tuaꞌ cabꞌijnu que más nojta cajor que otronteꞌ.
ROM 12:17 Jay inteꞌ winic uche e mabꞌambꞌanir capater machi tuaꞌ casutpa cache e mabꞌambꞌanir upater ubꞌan. Caturbꞌanic cabꞌa tuaꞌ cache lo que imbꞌutz tut tunor e gente.
ROM 12:18 Cawiric cabꞌa tuaꞌ machi cache unumse ubꞌa otronteꞌ, y cachic lo que uyubꞌion tuaꞌ cachꞌami e jiriar taca tunor e gente.
ROM 12:19 Pues niwermanuox xeꞌ inchoj iut nimener, ira isuti uyeror lo que war achena ipater, sino que actanic tunor era tama ucꞌabꞌ e Dios xeꞌ tuaꞌ utoyi tin e uche e mabꞌambꞌanir ipater. Bꞌan cocha chꞌar tzꞌijbꞌabꞌir tama uyojroner e Dios: “Nen xeꞌ tuaꞌ inwajcꞌuobꞌ uyeror tamar lo que uchiobꞌ, y nen taca xeꞌ tuaꞌ inwatzꞌiobꞌ”, che Cadiosir.
ROM 12:20 Y chꞌar tzꞌijbꞌabꞌir tama uyojroner e Dios otronyajr que: “Jay ayan inteꞌ xeꞌ war uxejbꞌe oit xeꞌ war aytzꞌa, wesen, y jay war ataqui utiꞌ, ajcꞌun e jaꞌ uyuchꞌic, porque conda ache lo que imbꞌutz tut inteꞌ xeꞌ war uxejbꞌe oit, war ache asubꞌajra e winic era.” Bꞌan chꞌar tzꞌijbꞌabꞌir tama uyojroner e Dios.
ROM 12:21 Ira awacta abꞌa tuaꞌ icucurna umen que isutpa iqꞌuijna ubꞌan conda awira inteꞌ xeꞌ war aqꞌuijna uwiret. Sino que cucrun e mabꞌambꞌanir tacar lo que war ache xeꞌ imbꞌutz.
ROM 13:1 Pues entonces turicon yebꞌar ucꞌotorer tin e war acꞌotoriobꞌ. Porque matucꞌa e cꞌotorer jay machi ajcꞌuna umen e Dios, y tunor e ajcꞌotorerobꞌ turbꞌabꞌirobꞌ umen e Dios.
ROM 13:2 Y tamar era tin e axin asutpa tujor inteꞌ ajcꞌotorer cocha era war asutpa tujor lo que chena umen e Dios ubꞌan. Y tunor tin e uche cocha era aquetpa tuaꞌ ajajtzꞌobꞌ.
ROM 13:3 Porque tunor e ajcꞌotorerobꞌ turbꞌabꞌirobꞌ tuaꞌ ucojcobꞌ tin e war uchiobꞌ lo que imbꞌutz, y machi turobꞌ tuaꞌ abꞌajcꞌujseyanobꞌ. ¿O war ca ibꞌacta tut e ajcꞌotorer? Actan tuaꞌ ache lo que mabꞌambꞌan y chen lo que imbꞌutz tut tunor e ajcꞌotorer y jaxirobꞌ tuaꞌ atzay uwiretobꞌ.
ROM 13:4 Porque e ajcꞌotorerobꞌ cocha era ajtacarsiajobꞌ tuaꞌ e Dios tuaꞌ utacret. Pero jay war ache e mabꞌambꞌanir, ucꞌani tuaꞌ ibꞌacta, porque majax intaca ayan ucꞌotorer e ajcꞌotorerobꞌ era, porque jax upatnar xeꞌ ajcꞌubꞌirobꞌ umen e Dios tuaꞌ axin uwatzꞌiobꞌ tin e war uchiobꞌ e mabꞌambꞌanir.
ROM 13:5 Y tamar era ucꞌani tuaꞌ cose cabꞌa yebꞌar ucꞌotorer tin e war acꞌotoriobꞌ, majax umen taca e bꞌajcꞌut tut inteꞌ jatzꞌuar, sino que umen que bꞌan canata tama cawalma que ucꞌani tuaꞌ cache ubꞌan.
ROM 13:6 Y tamar era catoyi e impuesto ubꞌan porque tin e ajcꞌotorerobꞌ ajtacarsiajobꞌ tuaꞌ e Dios y bꞌan taca upatnarobꞌ.
ROM 13:7 Entonces ajcꞌunic inteꞌ inteꞌ winic lo que aquetpa tuaꞌ atojyobꞌ. Jay aquetpa tuaꞌ camani inteꞌ boleto de ornato, camanic. Y jay aquetpa tuaꞌ catoyi e IVA, catoyic ubꞌan. Y tin e aquetpa tuaꞌ cabꞌacre, cabꞌacric. Y tin e aquetpa tuaꞌ catattzꞌi, catattzꞌic.
ROM 13:8 Y ira ixquetpa ixbꞌeto taca otronteꞌ, sino lo que ucꞌani tuaꞌ cabꞌeto tut tunor e gente jax era: Tuaꞌ cayajta utobꞌ. Pues tin e war uyajta ut upiar war uche lo que arobꞌna tuaꞌ uche umen uley e Moisés.
ROM 13:9 Pues chꞌar tzꞌijbꞌabꞌir tunor lo que arobꞌbꞌiron umen e Dios que non ucꞌani tuaꞌ cobꞌian tut: “Ira iꞌxin taca inteꞌ ajnajtir ixic o taca inteꞌ ajnajtir winic, ira ichamsan, ira ixujchꞌian, ira oꞌsre tuaꞌ achꞌami lo que tuaꞌ otronteꞌ.” Bꞌan che tama uyojroner e Dios. Pero tunor lo que arobꞌbꞌiron umen e Dios tuaꞌ cache era y tunor e inmojr ojroner xeꞌ chꞌar tzꞌijbꞌabꞌir aquetpa natanwa tama e ojroner era: “Yajtan ut apiar bꞌan cocha acꞌani tuaꞌ ayajtna oit umen apiar era.” Bꞌan che tama uyojroner e Dios.
ROM 13:10 Tin e war uyajta ut inteꞌ upiar ma tiaꞌ tuaꞌ uche lo que mabꞌambꞌan upater. Y tamar era war cache tunor lo que chꞌar tzꞌijbꞌabꞌir tama uley e Moisés conda war cayajta ut capiar.
ROM 13:11 Pues entonces cabꞌijnuic tama e tiempo era conda war caturuan tara tor e rum, y canatic que cꞌotoyix e hora tuaꞌ cabꞌixcꞌa tama e waynij. Conda cay cꞌupseyanon tama uyojroner e Dios tama e Jesucristo machi cabꞌijnu jay watar wacchetaca Cawinquirar, pero coner canata que watar e hora conda tuaꞌ achecta Cawinquirar tuaꞌ usuti ubꞌixqꞌueson tuaꞌ cachꞌami e cuxtar taca e Dios tichan.
ROM 13:12 Cꞌanix acꞌapa tunor e acbꞌar, y watarix e janchꞌaquenar tama e día tuaꞌ cacorpesiaj conda tuaꞌ achecta watar Cawinquirar. Y tamar era cawactic uchicobꞌ tunor lo que uchiobꞌ tin e axanobꞌ tama e incsibꞌaner. Y calapic e bꞌujc tuaꞌ e janchꞌaquenar bꞌan cocha ulapi inteꞌ soldado tuaꞌ uyubꞌi ucorpes ubꞌa.
ROM 13:13 Entonces turuanicon tama e janchꞌaquenar, xanacon imbꞌutz tama tunor cacuxtar tara tor e rum. Y ma erer cacaray, y ma erer caxin tut e sian nojqꞌuin, y ma erer cose cabꞌa taca tin e majax nujbꞌiron tacar, y ma erer caturuan tama e sian vicio, y ma erer cacꞌaye cabꞌa, y ma erer caqꞌuijna cawira lo que ayan tuaꞌ otronteꞌ.
ROM 13:14 Sino que cabꞌujcsic cabꞌa tamar Cawinquirar Jesucristo, y machix cabꞌijnu tamar lo que uyusre uche cawerir.
ROM 14:1 Pues entonces jay ayan inteꞌ hermano xeꞌ mato jax nojta tama ucꞌupesiaj tama Cawinquirar más ani bueno tuaꞌ cachꞌami bꞌan taca y que machi cojron tamar lo que ma chequer jay erach o jay majax erach.
ROM 14:2 Entonces ayan tin e ubꞌijnu que bueno tut e Dios tuaꞌ ucꞌuxiobꞌ tunor, pero ayan ubꞌan tin e mato jax nojta tama ucꞌupesiaj tama Cawinquirar xeꞌ war ubꞌijnuobꞌ que bueno tut e Dios tuaꞌ ucꞌuxiobꞌ e cajr taca.
ROM 14:3 Pero tin e unata que bueno tuaꞌ ucꞌuxi tunor ma erer uyare tin e war ucꞌuxi e cajr taca que matucꞌa ucꞌampibꞌir, y tin e war ucꞌuxi e cajr taca ma erer aqꞌuecran taca tin e war ucꞌuxi tunor, porque chꞌajmon tunoron umen e Dios.
ROM 14:4 Pues ¿y tuqꞌuet net tuaꞌ iyojron upater uman Cawinquirar? Pues jax Cawinquirar xeꞌ axin uwira jay imbꞌutz o jay majax imbꞌutz lo que war uche uman era. Pero ucꞌani tuaꞌ aquetpa imbꞌutz lo que war uche e man era umen que Cawinquirar cꞌani utacre tuaꞌ uyubꞌi alocꞌoy imbꞌutz tunor era.
ROM 14:5 Pues entonces ayan otronteꞌ chequerir. Ayan tin e war ubꞌijnuobꞌ que inteꞌ día ayan más ucꞌampibꞌir que e inmojr día porque jax e día conda anojqꞌuiniobꞌ e gente tuaꞌ e Israel. Pero ayan ubꞌan tin e war ubꞌijnuobꞌ que intera día taca porque tunor e día ajcꞌubꞌir umen e Dios. Pero non erer cabꞌijnu inteꞌ intion tuaꞌ canata lo que cꞌani cache tama tunor era.
ROM 14:6 Pues tin e war ucojco inteꞌ día cocha era war uche tunor era tuaꞌ utattzꞌi ucꞌabꞌa Cawinquirar. Y tin e machi war ucojco inteꞌ día cocha era umen que war ubꞌijnu que intera día taca war utattzꞌi ucꞌabꞌa Cawinquirar ubꞌan. Y tin e war ucꞌuxi tunor war uche cocha era tuaꞌ utattzꞌi ucꞌabꞌa Cawinquirar, y war uyajcꞌu gracias e Dios tamar. Y tin e war ucꞌuxi e cajr taca war uche cocha era umen que war ubꞌijnu que bꞌan ucꞌani e Dios y war utattzꞌi ucꞌabꞌa Cawinquirar tamar, y war uyajcꞌu gracias e Dios tamar ubꞌan.
ROM 14:7 Pues mamajchi aturuan tuaꞌ taca uche lo que ucꞌani jaxir, sino que ucꞌani tuaꞌ ubꞌijnu tucꞌa ucꞌani Cawinquirar. Y bꞌan ubꞌan que mamajchi erer ubꞌijnu tucꞌa día tuaꞌ achamay.
ROM 14:8 Entonces jay caturuan war caturuan tuaꞌ cache lo que ucꞌani Cawinquirar, y jay caxin cachamay, cachamay tuaꞌ caxin tut Cawinquirar. Y tamar era erer cabꞌijnu que jay caturuan o jay cachamay, tuon Cawinquirar.
ROM 14:9 Porque Cawinquirar Jesucristo chamay tuaꞌ aquetpa Uwinquirar tin e chamen, pero sutpa bꞌixcꞌa tuaꞌ aquetpa Cawinquirar tama tunoron xeꞌ bꞌixiron.
ROM 14:10 Entonces ¿tucꞌa tuaꞌ war atuchꞌi ut awet ajcꞌupesiajir? ¿Y tucꞌa tar war aware que matucꞌa ucꞌampibꞌir? Pues tunoron ucꞌani tuaꞌ cawawan tut e Dios tuaꞌ catojya uyeror ut tama tunor lo que cꞌapa cache tara tor e rum.
ROM 14:11 Porque bꞌan chꞌar tzꞌijbꞌabꞌir tama uyojroner e Dios: Cocha nen bꞌixiren, che Cadiosir, cꞌani inwareox que tunor e winicobꞌ cꞌani ayopobꞌ taniut tuaꞌ acotuanobꞌ, y cꞌani uchecsuobꞌ nicꞌabꞌa que nen jax Udiosirenobꞌ. Bꞌan che tama uyojroner e Dios.
ROM 14:12 Y tamar era chequer que inteꞌ intion ucꞌani tuaꞌ cawawan tut e Dios tuaꞌ cachecsu cabꞌa tut jaxir.
ROM 14:13 Pues entonces machi ixto tuaꞌ catuchꞌi inteꞌ cawet ajcꞌupesiajir umen que war uche lo que ma chequer jay imbꞌutz o jay majax imbꞌutz tut e Dios. Sino que caturbꞌic cabꞌa tuaꞌ machi cache acucrema inteꞌ cawet ajcꞌupesiajir tama Cawinquirar.
ROM 14:14 Pues nen era war innata que tunor e comida erer acꞌujxa y imbꞌutz tut e Dios, y bꞌan war innata umen que ajcꞌupesiajen tama Cawinquirar Jesús. Pero jay ayan inteꞌ xeꞌ war ubꞌijnu que ayan lo que ma erer acꞌujxa, entonces jaxir ma erer ucꞌuxi.
ROM 14:15 Y tamar era jay ayan inteꞌ awet ajcꞌupesiajir xeꞌ axin acꞌuxun uyalma conda uwira lo que war acꞌuxi, entonces ucꞌani tuaꞌ awacta ucꞌujxar e comida era, porque jay machi awacta, entonces machi war ixana tama ucꞌunersiaj e Dios. Entonces ira ache asatpa otronteꞌ xeꞌ cꞌani ani acorpesna tamar uchamer e Cristo umen taca que net cꞌani acꞌuxi lo que acꞌani net.
ROM 14:16 Y ira ache lo que erer ubꞌijnu e gente que mabꞌambꞌan ani motor que toit net war anata que majax mabꞌambꞌan lo que war abꞌijnu ache era.
ROM 14:17 Porque lo que cacꞌuxi y lo que coychꞌi ma erer cabꞌijnu que jax lo que nojta tama uchinam e Dios, sino lo que nojta tama uchinam e Dios jax e cuxtar xeꞌ erach y jax e cuxtar xeꞌ bꞌutꞌur taca e jiriar y taca e tzayer lo que uyajcꞌon Unawalir e Dios.
ROM 14:18 Pues tin e axana imbꞌutz tut e Cristo cocha era war utzayjres e Dios y cꞌani eꞌrna umen e gente que imbꞌutz ubꞌan.
ROM 14:19 Entonces casicbꞌic lo que erer uyajcꞌon e jiriar y casicbꞌic lo que erer cacꞌampes tuaꞌ catacre aqꞌuecꞌo uyalma inteꞌ inteꞌ cawet ajcꞌupesiajir.
ROM 14:20 Ira asati upatnar e Dios tacar lo que acꞌuxi. Pues chequer que erer acꞌujxa tunor e comida, pero mabꞌambꞌan jay caxin cacꞌuxi lo que unata ani otronteꞌ que majax imbꞌutz tut e Dios, porque tamar era war cache acucrema otronteꞌ tama e mabꞌambꞌanir tamar lo que war cacꞌuxi.
ROM 14:21 Pues ma erer cacꞌuxi e wer jay tamar era cꞌani acucrema inteꞌ cawet ajcꞌupesiajir, y ma erer coychꞌi e vino jay tamar era axin asutpa injayjay inteꞌ cawet ajcꞌupesiajir, y nien machi uyubꞌi cache otronteꞌ cosa jay tamar era war cache acucrema inteꞌ cawet ajcꞌupesiajir.
ROM 14:22 Entonces bꞌijnun tuaꞌ anata tucꞌa war acꞌupse tama tunor era, y tꞌabꞌsen lo que abꞌijnu tama tunor era tama awalma, y ira achecsu tut e gente axin. Y tamar era jax taca e Dios xeꞌ tuaꞌ unata lo que war abꞌijnu era. Pues atzay e winic conda unata tama uyalma que majax mabꞌambꞌan lo que war ubꞌijnu uche.
ROM 14:23 Pero jay ma chequer tama uyalma inteꞌ jay imbꞌutz tut e Dios o jay majax imbꞌutz lo que war ucꞌuxi, entonces mabꞌambꞌan war uche, porque ma chequer tama uyalma jay imbꞌutz. Porque mabꞌambꞌan tunor lo que uche inteꞌ conda machi ucꞌupse jay imbꞌutz tut e Dios lo que war uche era.
ROM 15:1 Pues entonces non xeꞌ war caqꞌuecꞌo cacꞌupseyan tama Cawinquirar ucꞌani tuaꞌ catacre axanobꞌ bien tin e mato jax nojta ucꞌupesiaj tama Cawinquirar, y machi tuaꞌ cabꞌijnu catzayjres cabꞌa non taca tamar lo que war cache.
ROM 15:2 Pues inteꞌ intion xeꞌ war caqꞌuecꞌo caxana tama ubꞌir Cawinquirar ucꞌani tuaꞌ cawira tucꞌa erer cache tuaꞌ catacre atzay capiarobꞌ xeꞌ machi war aqꞌuecꞌo axanobꞌ tama ubꞌir e Dios.
ROM 15:3 Porque nien e Cristo machi ubꞌijnu cocha tuaꞌ utzayjres ubꞌa, sino que cay unumse ubꞌa conda cꞌayna umen e nuxi winicobꞌ tuaꞌ e Israel, bꞌan cocha chꞌar tzꞌijbꞌabꞌir tama uyojroner e Dios tama e onian tiempo que: “E ojroner xeꞌ tuaꞌ tin e cay ucꞌayet sutpa cꞌaxi tama nijor nen.” Bꞌan che tama uyojroner e Dios.
ROM 15:4 Pues tunor lo que chꞌar tzꞌijbꞌabꞌir tama uyojroner e Dios quetpa tuaꞌ ucansion y tuaꞌ uchion cacojco tzꞌustaca y tuaꞌ utacrion catzay este que cacꞌotoy cacojco más tama e Dios.
ROM 15:5 Pues que Cadiosir xeꞌ war uyajcꞌox cocha tuaꞌ icojco tzꞌustaca y xeꞌ war utacriox ixtzay tama iwalma, que jaxir utacricox tuaꞌ aquetpa intera taca ibꞌijnusiaj y que tunorox iwiric ibꞌa taca inteꞌ nuxi tzayer bꞌan cocha cay ucansion e Cristo Jesús.
ROM 15:6 Y tamar era erer aquetpa intera taca inuc tuaꞌ itattzꞌi ucꞌabꞌa Cadiosir xeꞌ jax utata Cawinquirar Jesucristo.
ROM 15:7 Pues entonces cachꞌamic cabꞌa inteꞌ intion bꞌan cocha ixin uchꞌamion e Cristo y tamar era cꞌani atajttzꞌa más Cadiosir.
ROM 15:8 Porque lo que nen inware jax era: Que tari e Jesucristo tut e gente tuaꞌ e Israel tuaꞌ acꞌapa uche tunor lo que arobꞌnobꞌ catata viejobꞌirobꞌ umen e Dios ixnix. Y tamar era e Jesucristo cꞌapa uchecsu tut e gente era que Cadiosir acꞌapa uche tunor lo que uyare e gente ixin.
ROM 15:9 Y tari e Cristo ubꞌan tuaꞌ utacre tin e majax tuobꞌ e Israel tuaꞌ acꞌotoy utattzꞌiobꞌ ucꞌabꞌa Cadiosir que meyra ayan ucꞌunersiaj. Bꞌan cocha chꞌar tzꞌijbꞌabꞌir tama uyojroner e Dios: Y tamar era cꞌani intattzꞌi acꞌabꞌa tut e gente xeꞌ majax tuobꞌ e Israel, y cꞌani incꞌaywijres tutobꞌ tuaꞌ intattzꞌi acꞌabꞌa.
ROM 15:10 Y chꞌar tzꞌijbꞌabꞌir otronyajr tama uyojroner e Dios que: Tzayjresic ibꞌa nox xeꞌ majax tuox e Israel taca tin e tuobꞌ e Israel.
ROM 15:11 Y otronyajrto tama uyojroner e Dios chꞌar tzꞌijbꞌabꞌir que: Tattzꞌic ucꞌabꞌa Cawinquirar tunorox xeꞌ majax tuox e Israel xeꞌ turox innajt, y ojronenic taca e gente axin tama tunor lo que cꞌapa uche Cadiosir.
ROM 15:12 Y de allí chꞌar tzꞌijbꞌabꞌir umen e Isaías ubꞌan que: Acuxpa inteꞌ sitz tama uchꞌajnar e Isaí xeꞌ turuan tama e onian tiempo, y e sitz era cꞌani achpa tuaꞌ acꞌotori tujor tunor e gente xeꞌ majax tuobꞌ e Israel, y tunor e gente tama tunor or e rum axin ucojcobꞌ tamar jaxir. Bꞌan che tama uyojroner e Dios.
ROM 15:13 Que e Dios xeꞌ war uyajcꞌox tuaꞌ icojco tamar, ubꞌutꞌic iwalma taca e tzayer y taca e jiriar umen que war ixcꞌupseyan tamar jaxir tuaꞌ uyubꞌi abꞌoro tama iwalma meyra icojcsiaj tama ucꞌotorer Unawalir e Dios.
ROM 15:14 Pues entonces niwermanuox, chequer taniut que nox incꞌun iwirnar, y que war inata meyra, y que tamar era war inata cocha tuaꞌ itacre ibꞌa inteꞌ intiox tuaꞌ ixxana imbꞌutz tut e Dios.
ROM 15:15 Pero tama e carta era war inche nibꞌa tuaꞌ inchecsu ixto tiut tunor lo que war inwareox era tuaꞌ machi inajpes. Pero war inche cocha era umen que bꞌan uyajqꞌuen tuaꞌ inche Nidiosir taca ucꞌunersiaj.
ROM 15:16 Y war unjtzꞌi ut Niwinquirar Jesucristo tujam e gente xeꞌ majax tuobꞌ e Israel. Y nipatnar xeꞌ war inche jax era: Que war inchecsu axin e ojroner tama e corpesiaj lo que ajcꞌubꞌiron umen e Dios. Y bꞌan war inche tuaꞌ uyubꞌien inturbꞌa e gente xeꞌ majax tuobꞌ e Israel era tut e Dios bꞌan cocha inteꞌ ofrenda que erer achꞌajma umener cocha jaxirobꞌ quetpobꞌ pojcbꞌirobꞌ umen Unawalir e Dios.
ROM 15:17 Y cocha nen manen tuaꞌ e Cristo Jesús, nen ayan lo que war uchien intzay que war inche e patnar lo que uyajqꞌuen e Dios tuaꞌ inche.
ROM 15:18 Porque nen era machi cꞌani inche nibꞌa tuaꞌ onjron tamar lo que intiach, sino que cꞌani onjron tamar taca lo que e Cristo cay utacren inche xeꞌ jax conda cay utacren inche acꞌupseyanobꞌ tut e Dios e gente xeꞌ majax tuobꞌ e Israel. Numuy tunor era umen e ojroner lo que cay inwareobꞌ y umen lo que cay inche tutobꞌ xeꞌ imbꞌutz.
ROM 15:19 Y lo que cay inche tutobꞌ xeꞌ imbꞌutz jax era: Que tacar ucꞌotorer e Dios cay inche e sian seña y cay inche e sian milagro tacar ucꞌotorer Unawalir e Dios. Y tamar era cꞌapa inchecsu ixin e ojroner tama e corpesiaj lo que uyajqꞌuen e Cristo esto tama e chinam Jerusalem y tama tunor or e lugar esto tama inteꞌ lugar innajt xeꞌ ucꞌabꞌa Ilírico.
ROM 15:20 Y tamar era inturbꞌa nibꞌa tuaꞌ inchecsu e ojroner tama e corpesiaj tamar taca e lugar tiaꞌ ma tiaꞌ obꞌna tucꞌa ucꞌabꞌa e Cristo. Y tamar era inturbꞌa nibꞌa tuaꞌ machi incanseyan tujor lo que cay canseyan otronteꞌ.
ROM 15:21 Sino que war inche bꞌan cocha chꞌar tzꞌijbꞌabꞌir tama uyojroner e Dios tiaꞌ che: Tin e ma tiaꞌ uyubꞌi tamar jaxir, axin uwirobꞌ ut, y tin e ma tiaꞌ cꞌotoy unatobꞌ tamar jaxir, axin uyubꞌiobꞌ era. Bꞌan chꞌar tzꞌijbꞌabꞌir tama uyojroner e Dios.
ROM 15:22 Pues tamar era cꞌani ani inyopa inwarajsiox, pero este era ma cocha uyubꞌien inyopa motor que war imbꞌijnu tuaꞌ inxin ani.
ROM 15:23 Pero era cocha cꞌapa tunor nipatnar tama e lugarobꞌ era, y cocha warix onsre inyopa tacarox ixnix era,
ROM 15:24 war imbꞌijnu innumuy tacarox tuaꞌ inwarajsiox conda inxin tama nixambꞌar esto tama e lugar España. Y conda acꞌapa cawarajse cabꞌa tama inteꞌ tiempo incojco que cꞌani ixixin itacren taca tunor lo que inxin insati tama nixambꞌar era.
ROM 15:25 Pero era quetpa tuaꞌ inxin esto tama e chinam Jerusalem umen que war inqꞌueche axin cora tacarsiaj tuaꞌ e ajcꞌupesiajobꞌ yajaꞌ.
ROM 15:26 Porque tunor e ajcꞌupesiajobꞌ tama e lugar Macedonia y tama e lugar Acaya cay ubꞌijnuobꞌ que cꞌani umorojsiobꞌ cora tumin tuaꞌ uyebꞌta axin esto tut e ajcꞌupesiajobꞌ xeꞌ más tzajtaca utobꞌ xeꞌ turobꞌ tama e chinam Jerusalem.
ROM 15:27 Pues cay ubꞌijnuobꞌ que bueno tuaꞌ axin umorojsiobꞌ e tumin cocha era umen que jax e gente era xeꞌ tuobꞌ e Israel xeꞌ cay uyebꞌtobꞌ ixin cora ajchecsuyajobꞌ tama uyojroner e Dios. Porque tamar era que cay cꞌupseyanobꞌ e gente tama e lugar Macedonia y que cay cꞌupseyanobꞌ e gente tama e lugar Acaya tama Cawinquirar. Entonces cocha tacarnobꞌ meyra e gente era umen e gente xeꞌ tuobꞌ e Israel, coner jaxirobꞌ cꞌani asutpa utacriobꞌ tin e ajcꞌupesiajobꞌ tama e lugar Israel taca e tumin era lo que erer uyebꞌtobꞌ axin.
ROM 15:28 Y tamar era conda acꞌapa inwacta e tumin era taca e ajcꞌupesiajobꞌ tama e chinam Jerusalem, cꞌani inlocꞌoy tuaꞌ inxin esto tama e lugar España. Pero conda innumuy tiaꞌ turox tama e chinam Roma cꞌani inquetpa cora día tuaꞌ inwarajsiox.
ROM 15:29 Y innata ixto yaꞌ que conda incꞌotoy tiaꞌ turox cꞌani incꞌotoy bꞌutꞌur niwalma taca meyra chojbꞌesiaj tuaꞌ e ojroner tama e Cristo.
ROM 15:30 Pues entonces niwermanuox, cꞌani insutpa incꞌajti tibꞌa tamar ucꞌabꞌa Cawinquirar Jesucristo y tamar e cꞌunersiaj lo que uyajcꞌon Unawalir e Dios tuaꞌ icꞌajti taca e Dios tuaꞌ itacren tama e lucha xeꞌ nawalbꞌir lo que war innumse nibꞌa tamar tuaꞌ uyubꞌi alocꞌoy imbꞌutz tunor lo quetpa tuaꞌ inche era.
ROM 15:31 Y cꞌajtinic taca e Dios que jaxir tuaꞌ axin ucorpesen tama e gente xeꞌ majax ajcꞌupesiajobꞌ tama Cawinquirar xeꞌ turobꞌ tama e lugar Israel, y cꞌajtinic ubꞌan taca e Dios que tuaꞌ achꞌajma bien tunor e ofrenda era lo que war inqꞌueche axin esto tut e ajcꞌupesiajobꞌ xeꞌ turobꞌ tama e chinam Jerusalem.
ROM 15:32 Y tamar era, jay bꞌan ucꞌani e Dios, erer incꞌotoy tibꞌa taca inteꞌ nuxi tzayer tuaꞌ injiri tacarox conda war cawarajse.
ROM 15:33 Que Cadiosir xeꞌ uyajcꞌon e jiriar, quetpac tacarox. Amén.
ROM 16:1 Pues entonces cꞌani inwareox era tama inteꞌ hermana xeꞌ ucꞌabꞌa Febe. Pues jaxir patna meyra tama upatnar Cawinquirar tujam e grupo ajcꞌupesiajobꞌ tama e chinam Cencrea.
ROM 16:2 Pues chꞌamic bien e hermana era tama ucꞌabꞌa Cawinquirar porque bꞌan ucꞌani tuaꞌ cache tama inteꞌ hermano tama cacꞌupesiaj era. Tacrenic e hermana era cocha uyubꞌiox tama tunor lo que uche necesitar, porque jaxir cay utacre meyra gente, y esto nen cay utacren ubꞌan.
ROM 16:3 Y arenic e hermana Priscila taca e hermano Aquila que nen war inwebꞌta axin e cꞌajpesiaj tutobꞌ. Pues jaxirobꞌ cay patnobꞌ tacaren meyra tama upatnar e Cristo Jesús.
ROM 16:4 Y jarixobꞌ cay uturbꞌa ubꞌobꞌ tuaꞌ achamesnobꞌ ani tuaꞌ ucorpesenobꞌ tuaꞌ machi inchamesna nen. Y tamar era cꞌani inwajcꞌuobꞌ gracias tama tunor, y bꞌan cꞌani uchiobꞌ ubꞌan tunor e ajcꞌupesiajobꞌ xeꞌ turobꞌ tama e sian grupo ajcꞌupesiajobꞌ xeꞌ majax tuobꞌ e Israel.
ROM 16:5 Y arenic tunor e ajcꞌupesiajobꞌ xeꞌ umorojse ubꞌobꞌ tama uyotot e hermana Priscila taca e hermano Aquila tuaꞌ utattzꞌi ucꞌabꞌa Cadiosir que nen war inwebꞌta axin e cꞌajpesiaj tutobꞌ. Y arenic e hermano Epeneto xeꞌ inchoj ut nimener que nen war inwebꞌta e cꞌajpesiaj tut. E hermano era jax xeꞌ cꞌupseyan bꞌajxan tama e lugar Acaya.
ROM 16:6 Y arenic e hermana María xeꞌ meyra cay patna tijam que nen war inwebꞌta axin e cꞌajpesiaj tut.
ROM 16:7 Y arenic e hermano Andrónico y e hermano Junias xeꞌ tuobꞌ e Israel ubꞌan que nen war inwebꞌta axin e cꞌajpesiaj tutobꞌ. Pues jaxirobꞌ esto tama e cárcel ixiobꞌ tacaren inyajr, y bien natanbꞌirobꞌ ubꞌan umen e apostolobꞌ. Pues jaxirobꞌ cꞌupseyanobꞌ bꞌajxan tama e Cristo que nen.
ROM 16:8 Y arenic e hermano Amplias xeꞌ intzay inwira tama Cawinquirar que nen war inwebꞌta axin e cꞌajpesiaj tut.
ROM 16:9 Y arenic e hermano Urbano xeꞌ jax inteꞌ nipiar tama upatnar e Cristo que nen war inwebꞌta axin e cꞌajpesiaj tut, y arenic e hermano Estaquis xeꞌ inchoj ut nimener que nen war inwebꞌta axin e cꞌajpesiaj tut ubꞌan.
ROM 16:10 Arenic e hermano Apeles xeꞌ qꞌuecꞌo xana tama e Cristo que nen war inwebꞌta axin e cꞌajpesiaj tut, y bꞌan ubꞌan tama tunor tin e turobꞌ tama uyotot e hermano Aristóbulo.
ROM 16:11 Y arenic e hermano Herodión xeꞌ tuaꞌ e Israel que nen war inwebꞌta axin e cꞌajpesiaj tut, y bꞌan ubꞌan tama tin e war acꞌupseyanobꞌ tama Cawinquirar xeꞌ tuobꞌ ufamilia e hermano Narciso.
ROM 16:12 Y arenic e hermana Trifena taca e hermana Trifosa xeꞌ cay patnobꞌ tama upatnar Cawinquirar ixnix que nen war inwebꞌta axin e cꞌajpesiaj tutobꞌ, y bꞌan ubꞌan tama e hermana Pérsida xeꞌ inchoj ut nimener xeꞌ cay patna meyra tama upatnar Cawinquirar que nen war inwebꞌta axin e cꞌajpesiaj tut.
ROM 16:13 Y arenic e hermano Rufo xeꞌ galan apatna tama tunor upatnar Cawinquirar que nen war inwebꞌta axin e cꞌajpesiaj tut, y bꞌan ubꞌan tama utuꞌ e Rufo era xeꞌ quetpa bꞌan cocha inteꞌ nituꞌ ani.
ROM 16:14 Y arenic e hermano Asíncrito taca e hermano Flegonte y e hermano Hermas y e hermano Patrobas y e hermano Hermas taca tunor e ajcꞌupesiajobꞌ xeꞌ turobꞌ tacarobꞌ que nen war inwebꞌta axin e cꞌajpesiaj tutobꞌ.
ROM 16:15 Y arenic e hermano Filólogo taca e hermana Julia y e hermano Nereo taca uwijtan que nen war inwebꞌta axin e cꞌajpesiaj tutobꞌ. Y arenic e hermana Olimpas taca tunor e ajcꞌupesiajobꞌ tama cacꞌupesiaj xeꞌ turobꞌ tacarobꞌ que nen war inwebꞌta axin e cꞌajpesiaj tutobꞌ.
ROM 16:16 Pues entonces cꞌajpesic ibꞌa inteꞌ intiox taca inteꞌ mecsaj xeꞌ erach. Tunor e sian grupo ajcꞌupesiajobꞌ tama e Cristo war uyebꞌtobꞌ axin e cꞌajpesiaj tibꞌa ubꞌan.
ROM 16:17 Pues entonces niwermanuox, cꞌani insutpa inwareox otronyajr era que chꞌujcunic iwira chi xeꞌ war uxere e ajcꞌupesiajobꞌ axin y xeꞌ war acanseyan lo que majax bꞌan cocha cay incansiox. Pues jax jaxirobꞌ xeꞌ war uche acucrema e ajcꞌupesiajobꞌ axin y cꞌani inwareox era que ira ixxana tacarobꞌ.
ROM 16:18 Porque e winicobꞌ cocha era machi war uyujtzꞌiobꞌ ut Cawinquirar Jesucristo sino que war uchiobꞌ lo que uyusre uchiobꞌ tama uwerir, y war umajres uyalmobꞌ e gente xeꞌ mato jax nojta tama e cꞌupesiaj porque jaxirobꞌ war oꞌjronobꞌ taca e ojroner xeꞌ inchiꞌ y xeꞌ galan uyubꞌnar.
ROM 16:19 Pues natanbꞌir umen tunor e ajcꞌupesiajobꞌ axin que nox icꞌupse e Dios tama tunor, y tamar era nen war intzay tamarox. Pero unsre tuaꞌ inata meyra cocha tuaꞌ iche lo que imbꞌutz, y que matucꞌa tuaꞌ inata cocha tuaꞌ iche lo que mabꞌambꞌan.
ROM 16:20 Y Cadiosir xeꞌ jax xeꞌ uyajcꞌon e jiriar axin ucucru wacchetaca e Satanás tuaꞌ aquetpa yebꞌar utajn iyoc. Cawinquirar Jesús uchojbꞌesicox tunorox.
ROM 16:21 Y e hermano Timoteo xeꞌ cay patna meyra tacaren cꞌani uyebꞌta axin e cꞌajpesiaj tibꞌa, y bꞌan ubꞌan e hermano Lucio taca e hermano Jasón y e hermano Sosípater xeꞌ ajisraelobꞌ tacaren.
ROM 16:22 Y nen ubꞌan xeꞌ nicꞌabꞌa Tercio cꞌani inwebꞌta axin e cꞌajpesiaj tibꞌa tamar ucꞌabꞌa Cawinquirar. Jax nen xeꞌ war intzꞌijbꞌa e ojroner era xeꞌ tuaꞌ e hermano Pablo.
ROM 16:23 Y cꞌani uyebꞌta axin e cꞌajpesiaj tibꞌa e hermano Chayo ubꞌan. Pues nen xeꞌ Pabloen war inquetpa tama uyotot e hermano era y jaxir war uyajcꞌu lugar tama uyotot era tuaꞌ umorojse ubꞌobꞌ e hermanuobꞌ. Y cꞌani uyebꞌta axin e cꞌajpesiaj tibꞌa e hermano Erasto xeꞌ jax e tesorero tama e chinam era, y cꞌani uyebꞌta axin e cꞌajpesiaj tibꞌa e hermano Cuarto ubꞌan.
ROM 16:24 Pues Cawinquirar Jesucristo uchojbꞌesicox inteꞌ intiox. Amén.
ROM 16:25 Pues catattzꞌic ucꞌabꞌa Cadiosir xeꞌ erer uchiox ixqꞌuecꞌo tama icꞌupesiaj tama e Jesucristo. Y e ojroner tama e corpesiaj lo que nen inchecsu tut e gente axin jax xeꞌ war uchiox inata chi Cadiosir coner porque tunor e ojroner era quetpa mucur ani umen e Dios desde conda mato tucꞌa ani or e rum era.
ROM 16:26 Pero era Cadiosir war uchion canata que tunor e ojroner tama e corpesiaj era tzꞌijbꞌabꞌir umen e profetobꞌ tama e onian tiempo, porque jaxirobꞌ utzꞌijbꞌobꞌ lo que arobꞌnobꞌ umen e Dios xeꞌ turu iraj iraj. Y tunor e ojroner era xeꞌ mucur ani ticoit war aꞌjcꞌuna e gente xeꞌ majax tuobꞌ e Israel tuaꞌ unatobꞌ coner tuaꞌ uyubꞌiobꞌ acꞌotoy acꞌupseyanobꞌ tama Cawinquirar y tuaꞌ acꞌotoy oꞌbꞌianobꞌ tut e Dios ubꞌan.
ROM 16:27 Pues Cadiosir xeꞌ inteꞌ taca ayan y xeꞌ war unata tunor lo que ayan uchꞌamic tunor e tattzꞌarsiaj tama e Jesucristo iraj iraj. Amén. Tara acꞌapa tunor niwojroner, che e Pablo.
1CO 1:1 Nen e Pabloen xeꞌ jax inteꞌ apóstol tuaꞌ e Cristo Jesús umen que pejcbꞌiren umen e Dios y umen que bꞌan ucꞌani jaxir. Nen taca e hermano Sóstenes
1CO 1:2 war catzꞌijbꞌa e carta era tibꞌa xeꞌ jax inteꞌ grupo ajcꞌupesiajox tama e Cristo Jesús xeꞌ turox tama e chinam Corinto. Pues nox ustabꞌirox tama e Cristo Jesús umen e Dios tuaꞌ ixcꞌampesna umener. Y nox pejcbꞌirox tuaꞌ aquetpa erach tunor iwirnar bꞌan cocha pejcbꞌirobꞌ tunor tin e war ucꞌajtiobꞌ taca e Dios tama ucꞌabꞌa Cawinquirar Jesucristo tama tunor or e rum, y tamar era Cawinquirar jax Uwinquirarobꞌ jaxirobꞌ ubꞌan.
1CO 1:3 Que Cadiosir xeꞌ jax Catata ubꞌan taca Cawinquirar Jesucristo uyajqꞌuicox utacarsiaj y ujiriar.
1CO 1:4 Pues cꞌani inwareox era que intattzꞌi ucꞌabꞌa Cadiosir tamarox iraj iraj umen que jaxir ixin uyajcꞌox meyra chojbꞌesiaj tama e Cristo Jesús.
1CO 1:5 Porque tamar jaxir ajcꞌunox meyra icꞌampibꞌir tuaꞌ uyubꞌiox ixojron taca e chojbꞌesiaj tic taca y tuaꞌ uyubꞌiox ixcꞌotoy inata tunor lo que erach tut jaxir.
1CO 1:6 Y Cadiosir ixin uchectes ubꞌa tiut que erach tunor lo que arobꞌnox tama e Cristo.
1CO 1:7 Y tamar era nox ajcꞌunox tunor icꞌampibꞌir umen e Dios tuaꞌ ixixin iche tunor upatnar e Dios ya que turoxto war icojco acꞌotoy e día conda tuaꞌ achecta watar Cawinquirar Jesucristo otronyajr.
1CO 1:8 Y jaxir axin uqꞌuecꞌojsion caxana tama ubꞌir ubꞌan tuaꞌ aquetpa imbꞌutz tunor cawirnar este que acꞌapa tunor or e rum era y este que achecta e día conda asutpa watar Cawinquirar Jesucristo otronyajr.
1CO 1:9 Y Cadiosir san tuaꞌ acꞌapa uche tunor lo que uyareon y jax jaxir xeꞌ cay upejcon tuaꞌ caxana tacar Uyunen xeꞌ jax Cawinquirar Jesucristo.
1CO 1:10 Pues entonces niwermanuox, cꞌani incꞌajti tibꞌa tama ucꞌabꞌa Cawinquirar Jesucristo tuaꞌ ixturuan intera tunorox y que machi ixto tuaꞌ ixere ibꞌa xeꞌ ajcꞌupesiajox tama Cawinquirar. Y cꞌani incꞌajti tibꞌa tuaꞌ ixquetpa intera ibꞌijnusiaj inteꞌ intiox y que erer aquetpa inteꞌ taca lo que war icꞌani xeꞌ jax tuaꞌ cache upatnar Cawinquirar Jesucristo.
1CO 1:11 Y war inwareox cocha era niwermanuox, porque ayan inteꞌ ufamilia e hermano Cloé xeꞌ cay uyaren que ayan tin e machi war ucꞌaniobꞌ lo que war ucꞌaniobꞌ e inmojr.
1CO 1:12 Y tamar era inteꞌ intiox war ixojron lo que intiach tut e inmojr. Ayan tin e war oꞌjron y che: “Nen incꞌupse lo que oꞌjron e Pablo.” Y ayan tin e war oꞌjron y che: “Nen incꞌupse lo que oꞌjron e Apolos.” Y ayanto tin e war oꞌjron y che: “Nen incꞌupse lo que oꞌjron e Pedro.” Y ayan ubꞌan tin e war oꞌjron y che: “Nen incꞌupse jax taca lo que oꞌjron e Cristo.”
1CO 1:13 ¿O xerbꞌir ca turu e Cristo tuaꞌ aquetpa tama inteꞌ inteꞌ grupo tibꞌa? ¿O chꞌubꞌnen ca tut e cruz tamarox? ¿O chꞌuybꞌirox ca tama nicꞌabꞌa nen xeꞌ Pabloen? Pues machi.
1CO 1:14 Pero cꞌani intattzꞌi ucꞌabꞌa Nidiosir que mamajchi tijam xeꞌ cay inchꞌuyi, sino que jax taca e hermano Crispo y e hermano Chayo.
1CO 1:15 Y tamar era mamajchi erer oꞌjron y che: “Nen chꞌuybꞌiren tama ucꞌabꞌa e Pablo.”
1CO 1:16 Cꞌajpa nimen era que cay inchꞌuyi ufamilia e hermano Estéfanas ubꞌan, pero de allí ma cꞌar nimen jay ayanto tin e cay inchꞌuyi.
1CO 1:17 Pues e Cristo machi uyebꞌta tarien tuaꞌ inchꞌuyi e gente axin, sino que uyebꞌta tarien tuaꞌ inchecsu uyojroner e Dios tama e corpesiaj tut e gente axin. Pero machi incꞌampes e ojroner xeꞌ intran tuaꞌ oꞌbꞌna tucꞌa war che conda inchecsu uyojroner e Dios axin porque machi cꞌani inlocse ucꞌampibꞌir uchamer e Cristo tama ut e cruz.
1CO 1:18 Pues entonces tin e war asatpobꞌ axin uchebꞌiobꞌ que matucꞌa ucꞌampibꞌir tunor e ojroner tama uchamer e Jesucristo, pero ticoit non xeꞌ war cacorpa e ojroner tama uchamer e Jesucristo jax uchecsuyaj ucꞌotorer e Dios tuaꞌ acorpesian.
1CO 1:19 Bꞌan cocha chꞌar tzꞌijbꞌabꞌir tama uyojroner e Dios tiaꞌ ojron e Dios y che: Nen cꞌani intijres tunor unatanyaj tin e nojta ujorobꞌ, y cꞌani inturbꞌa najtir lo que unatobꞌ que más ayan ucꞌampibꞌir tin e cꞌapa canuobꞌ meyra, Bꞌan che e Dios tama uyojroner.
1CO 1:20 Entonces ¿tucꞌa ucꞌampibꞌir tunor e sian canuar tamar lo que ayan tara tor e rum? ¿Y tucꞌa ucꞌampibꞌir tunor lo que chꞌar tzꞌijbꞌabꞌir tamar lo que ayan tara tor e rum? ¿Y tucꞌa ucꞌampibꞌir tunor e nuxi ojroner tuaꞌ e winicobꞌ tara tor e rum? Matucꞌa, porque Cadiosir ixin usuti tunor e canuar era tuaꞌ aquetpa bꞌan cocha inteꞌ sojc que matucꞌa ucꞌampibꞌir.
1CO 1:21 Porque Cadiosir cay ubꞌijnu tacar unatanyaj tuaꞌ uche aquetpa intran tut e winicobꞌ tara tor e rum tuaꞌ uyubꞌi acꞌotoy unatobꞌ chi Cadiosir tamar taca ujorobꞌ. Pues Cadiosir ubꞌijnu tuaꞌ ucorpes tin e acꞌotoy acꞌupseyanobꞌ tama e ojroner tama e Cristo motor que e gente tara tor e rum war ubꞌijnuobꞌ que tunor e ojroner era tama e corpesiaj matucꞌa ucꞌampibꞌir.
1CO 1:22 Pues e gente tuaꞌ e Israel cꞌani uwirobꞌ achecta inteꞌ milagro tuaꞌ unatobꞌ jay erach tunor era, y e gente xeꞌ majax tuobꞌ e Israel cꞌani uwirobꞌ jay ayan e natanyaj tamar.
1CO 1:23 Pero non war cachecsu axin que chamay e Cristo tama ut e cruz tuaꞌ ucorpes e gente tara tor e rum. Pero e ojroner era axin uqꞌuijnes tunor e gente tuaꞌ e Israel, y e gente xeꞌ majax tuobꞌ e Israel war unatobꞌ que aras ojroner tunor era.
1CO 1:24 Pero tut tunoron xeꞌ pejcbꞌiron umen e Dios xeꞌ tuon e Israel o xeꞌ majax tuon e Israel, pero ticoit non uyojroner e Dios tama e Cristo jax ucꞌotorer e Dios y jax unatanyaj e Dios.
1CO 1:25 Pues conda e winicobꞌ tara tor e rum axin uyubꞌiobꞌ uyojroner e Dios ubꞌijnuobꞌ que e Dios matucꞌa unata. Pero e Dios más unata que tunor e winicobꞌ. Y war ubꞌijnuobꞌ e winicobꞌ tara tor e rum que e Dios machi aqꞌuecꞌo cocha jaxir uyebꞌta tari Uyunen tuaꞌ achamay tut inteꞌ cruz. Pero e Dios más aqꞌuecꞌo que tunor e winicobꞌ tara tor e rum.
1CO 1:26 Pues niwermanuox, erer cabꞌijnu que pejcbꞌiron tunoron umen e Dios, pero que ticajam majax meyron xeꞌ nojta cajor bꞌan cocha ubꞌijnuobꞌ e gente tara tor e rum conda pejcbꞌiron umen e Dios, y majax meyron ticajam xeꞌ ayan cacꞌotorer tuaꞌ cacꞌotori tara tor e rum conda pejcbꞌiron umen e Dios, y majax meyron ticajam xeꞌ ayan meyra catumin conda pejcbꞌiron umen e Dios.
1CO 1:27 Pero Cadiosir ixin usicbꞌa tin e uchebꞌiobꞌ e gente tara tor e rum que matucꞌa ucꞌampibꞌir. Y bꞌan uche tuaꞌ axin usubꞌajres tin e nojta ujorobꞌ tara tor rum. Y Cadiosir ixin usicbꞌa tin e war unatobꞌ e gente tara tor e rum que injayjay turobꞌ tuaꞌ axin usubꞌajres tin e war aqꞌuecꞌuobꞌ tara tor e rum.
1CO 1:28 Y Cadiosir usicbꞌa tin e matucꞌa ucꞌampibꞌir cocha ubꞌijnuobꞌ e gente tara tor e rum, y Cadiosir usicbꞌa tin e majax cꞌajnabꞌir umen e winicobꞌ tara tor e rum tuaꞌ acꞌapa umaqui uyejobꞌ tunor tin e war ubꞌijnuobꞌ que meyra ayan ucꞌampibꞌirobꞌ.
1CO 1:29 Y tamar era mamajchi xeꞌ erer axin utꞌabꞌse ubꞌa tut e Dios tamar lo que cꞌapa uche tara tor e rum.
1CO 1:30 Pero Cadiosir ixin uchion tuaꞌ caquetpa intera cabꞌijnusiaj taca e Cristo Jesús xeꞌ cꞌotoy quetpa tin e war uyajcꞌon e natanyaj xeꞌ tari tama e Dios, y tacar utacarsiaj jaxir war aquetpa imbꞌutz cawirnar tut e Dios, y tamar jaxir ustabꞌiron tuaꞌ caquetpa tuaꞌ e Dios, y tamar jaxir corpesbꞌiron ubꞌan.
1CO 1:31 Y cocha cꞌapa cachꞌami tunor era tuaꞌ e Dios ucꞌani tuaꞌ caware bꞌan cocha chꞌar tzꞌijbꞌabꞌir tama uyojroner e Dios y che: “Tunor tin e cꞌani ani utattzꞌi ubꞌa tamar lo que uyubꞌi uche xeꞌ más bueno ucꞌani tuaꞌ utattzꞌi ucꞌabꞌa Cawinquirar tamar lo que uyubꞌi uche era.” Bꞌan chꞌar tzꞌijbꞌabꞌir tama uyojroner e Dios.
1CO 2:1 Pues entonces niwermanuox, conda tarien tuaꞌ inchecsu tiut lo que erach tama e Dios cay ojronen taca inteꞌ ojroner xeꞌ más chequer tiut porque machi cꞌani intꞌabꞌse nibꞌa tuaꞌ inquetpa ani bꞌan cocha inteꞌ nuxi winic tiut.
1CO 2:2 Porque conda yopen tiut cay imbꞌijnu tuaꞌ onjron tamar taca chi e Jesucristo y cocha ixin chamay tut e cruz.
1CO 2:3 Y conda yopen tiut machi inqꞌuecꞌo y war inchincha umen que war imbꞌacta tiut.
1CO 2:4 Y conda cay incansiox machi inche tamar inteꞌ ojroner bꞌan cocha ucꞌampes ani inteꞌ nuxi ajcanseyaj, sino que cay inchecsu uyojroner e Dios tama e Cristo taca e ojroner xeꞌ ma intran tuaꞌ iyubꞌi. Porque nen war incꞌani tuaꞌ ichꞌami niwojroner umen que war apatna Unawalir e Dios y umen que war achecta ucꞌotorer e Dios.
1CO 2:5 Porque ucꞌani tuaꞌ awawan icꞌupesiaj tamar ucꞌotorer e Dios y majax tamar unatanyaj e winicobꞌ.
1CO 2:6 Pues incꞌampes ixto e natanyaj conda war incanse tin e más nojta ucꞌupesiaj. Pero machi incꞌampes e natanyaj bꞌan cocha ayan tara tor e rum y nien machi incꞌampes e natanyaj bꞌan cocha ucꞌampesobꞌ tin e war acꞌotoriobꞌ tara tor e rum porque tunor era cꞌani acꞌapa asatpa wacchetaca.
1CO 2:7 Pero e natanyaj lo que war inwareox era jax lo que ayan tuaꞌ e Dios xeꞌ quetpa ani mucur tut tunor e winicobꞌ tara tor e rum, pero e natanyaj era jax lo que turu taca e Dios conda ne mato achena or e rum era, y jax e natanyaj era xeꞌ war uwirsion coner tucꞌa e corpesiaj xeꞌ machi tuaꞌ acꞌapa.
1CO 2:8 Y mamajchi xeꞌ war acꞌotori tara tor e rum cay unatobꞌ tucꞌa unatanyaj e Dios era, porque jay unatobꞌ ani machi ani uchamsiobꞌ Cawinquirar xeꞌ meyra ayan utawarer tut e cruz.
1CO 2:9 Pero bꞌan cocha chꞌar tzꞌijbꞌabꞌir tama uyojroner e Dios y che: Lo que ma tiaꞌ irna umen e winicobꞌ y lo que ma tiaꞌ ubꞌna umen e winicobꞌ y lo que ma tiaꞌ cay ubꞌijnuobꞌ e winicobꞌ que erer anumuy, jax lo que e Dios cay uyustes tuaꞌ uyajcꞌu tin e war uyajta ut jaxir. Bꞌan chꞌar tzꞌijbꞌabꞌir tama uyojroner e Dios.
1CO 2:10 Pero jax non xeꞌ cay irsenon tunor era umen e Dios tacar Unawalir. Y jax Unawalir e Dios era xeꞌ war uwira tunor lo que war anumuy tic taca tama tunor or e rum y tama tunor ut e qꞌuin ubꞌan. Y jax Unawalir e Dios era xeꞌ war uwira tunor lo que ayan xeꞌ intam tama Catata Dios ubꞌan.
1CO 2:11 Pues bꞌan cocha lo que ayan macuir uyalma inteꞌ winic que mamajchi erer unata sino que jax taca umajinir e winic era xeꞌ war unata tunor era, y bꞌan ubꞌan lo que ayan macuir uyalma Catata Dios que jax taca Unawalir xeꞌ war unata tunor lo que ucꞌani jaxir.
1CO 2:12 Pero non machi cachꞌami inteꞌ mein lo que ayan tara tor e rum sino que jax Unawalir e Dios xeꞌ ebꞌetbꞌir tari umen Catata Dios xeꞌ cachꞌami non, y tamar era erer cacꞌotoy canata cobꞌa ajcꞌubꞌiron umen Catata Dios.
1CO 2:13 Pues war cachecsu tunor era taca e ojroner xeꞌ ajcꞌunon umen Unawalir e Dios, y machi war cacꞌampes tuqꞌuic tuqꞌuic ojroner lo que oꞌchoy tama cajor. Y tamar era war cachecsu lo que nawalbꞌir tut tin e uchꞌamix Unawalir e Dios.
1CO 2:14 Pero tin e machi uchꞌami Unawalir e Dios ma erer uchꞌami lo que tuaꞌ Unawalir e Dios, porque tut inteꞌ cocha era matucꞌa ucꞌampibꞌir tunor era. Y machi uyubꞌi unata tunor era porque ucꞌani utacarsiaj Unawalir e Dios tuaꞌ acꞌotoy unata tucꞌa tunor era.
1CO 2:15 Pero tin e cꞌapa uchꞌami Unawalir e Dios erer unata tama tunor, y tin e majax ajcꞌupesiaj tama Cawinquirar machi uyubꞌi tuaꞌ unata lo que ayan tama uyalma tin e war acꞌupseyan tama Cawinquirar.
1CO 2:16 Bꞌan cocha chꞌar tzꞌijbꞌabꞌir tama uyojroner e Dios y che: “¿Chi erer acꞌotoy unata lo que war ubꞌijnu Cawinquirar? ¿Y chi erer axin ucanse Cadiosir lo que ucꞌani tuaꞌ uche? Mamajchi, porque Cadiosir war unata tunor lo que ayan.” Bꞌan che tama uyojroner e Dios. Pero non erer cabꞌijnu bꞌan cocha ubꞌijnu e Cristo porque cꞌapa cachꞌami Unawalir.
1CO 3:1 Pues entonces niwermanuox, conda turen tacarox machi uyubꞌien incansiox bꞌan cocha inteꞌ winic xeꞌ aqꞌuecꞌo axana tama ubꞌir e Dios, sino que quetpa tuaꞌ incansiox bꞌan cocha inteꞌ winic tara tor e rum xeꞌ matucꞌa unata tama e Dios, y quetpa tuaꞌ incansiox bꞌan cocha jay maxtacox ani tama tunor lo que ayan tuaꞌ e Cristo.
1CO 3:2 Y cay incansiox taca inteꞌ canseyaj xeꞌ más incꞌun, bꞌan cocha ucꞌani tuaꞌ awesena inteꞌ chꞌurcabꞌ xeꞌ warto aꞌchu que machito uyubꞌi ucꞌuxi e comida xeꞌ más aqꞌuecꞌo. Y bꞌanox nox tama icuxtar nawalbꞌir ubꞌan que machi uyubꞌiox ichꞌami e canseyaj tama uyojroner e Dios que más aqꞌuecꞌo. Y bꞌan turox esto coner.
1CO 3:3 Porque nox warto ixturuan bꞌanto cocha turox ani ixnix y machi war iwacta ibꞌa tuaꞌ ixbꞌijresna umen Unawalir e Dios. Porque nox warto ixcꞌuxnaqꞌui iwira lo que ayan tuaꞌ otronteꞌ, y warto ixbꞌiriti iraj iraj, y war ixere ibꞌa ixixin. Pues tunor lo que war iche era bꞌan taca cocha war uchiobꞌ e winicobꞌ tara tor e rum.
1CO 3:4 Porque ayan tin e war oꞌjron y che: “Nen incꞌupse lo que oꞌjron e Pablo.” Y ayan tin e war oꞌjron y che: “Nen incꞌupse lo que oꞌjron e Apolos.” ¿Machi ca war iturbꞌa ibꞌa bꞌan cocha e winicobꞌ tara tor e rum?
1CO 3:5 Pero ¿tuqꞌuen cora nen? y ¿tucꞌa cora e Apolos? Pues non jax taca manon tuaꞌ e Dios, y jax non xeꞌ cꞌampesnon umener tuaꞌ catacriox ixcꞌotoy ixcꞌupseyan tama Cawinquirar Jesucristo. Nen cay inche e patnar lo que ajcꞌunen umen e Dios, y e Apolos cay uche e patnar lo que ajcꞌuna umen e Dios tuaꞌ uche jaxir ubꞌan.
1CO 3:6 Nen cay impaqꞌui ut e semilla tuaꞌ e Dios tama iwalma, y de allí tari e Apolos y cay utzꞌayi, pero jax e Dios xeꞌ cay uche achꞌiꞌ tunor lo que pacbꞌir era.
1CO 3:7 Pero machi cꞌani catattzꞌi tin e cay pacma, y nien machi cꞌani catattzꞌi tin e cay tzꞌayma, sino que jax taca e Dios xeꞌ tuaꞌ atajttzꞌa porque jax jaxir xeꞌ uchꞌijrse lo que cuxpa tama iwalma xeꞌ jax uyojroner e Dios.
1CO 3:8 Entonces bꞌan cocha tin e apacma y bꞌan ubꞌan tin e atzꞌayma, Cadiosir tuaꞌ axin utoyi inteꞌ inteꞌ bꞌan cocha e patnar lo que uche.
1CO 3:9 Entonces nen taca e Apolos manon tuaꞌ e Dios tuaꞌ cache lo que uyareon. Y nox larox cocha inteꞌ chor tiaꞌ pacbꞌir e jinaj xeꞌ ajcꞌunon umen e Dios tiaꞌ tuaꞌ capatna. Y nox larox cocha ingojr otot ubꞌan xeꞌ war achena umen e Dios.
1CO 3:10 Y nen bꞌanen cocha inteꞌ ajcheyaj otot xeꞌ más nojta innata tamar, y conda nen cay inchecsu uyojroner e Dios tama e Cristo tiut, nen inche lo que lar cocha uwabꞌnibꞌ inteꞌ otot. Pero tanipat era tari otronteꞌ tuaꞌ ucansiox más tama Cawinquirar xeꞌ quetpa lar cocha otronteꞌ ajcheyaj otot xeꞌ war ujachi unac e otot axin. Pero inteꞌ inteꞌ xeꞌ acꞌotoy tanipat cocha era ucꞌani tuaꞌ ubꞌijnu uwira lo que war uche tuaꞌ alocꞌoy lar cocha ucajyesnibꞌir.
1CO 3:11 Porque ma cocha erer aturbꞌana otronteꞌ uwabꞌnibꞌ e otot tujor inteꞌ xeꞌ chembꞌirix bꞌajxan xeꞌ jax e Jesucristo. Y nox ixiox ichꞌami ucꞌabꞌa Cawinquirar Jesucristo conda nen cay inchecsu uyojroner tiut.
1CO 3:12 Pues tin tin xeꞌ apatna bien tama upatnar e Dios era lar cocha tin e axin ujachi unac e otot taca e oro, o taca e plata, o axin ucꞌampes e tun xeꞌ más galan uwirnar. Pero tin tin xeꞌ machi apatnobꞌ bien tama upatnar e Dios larobꞌ cocha tin e war ujachi unac e otot taca ucꞌabꞌ e teꞌ, o taca e ac, o taca e sojc.
1CO 3:13 Y cꞌani aquetpa chequer jay bueno o jay majax bueno e patnar tuaꞌ inteꞌ inteꞌ tin e cay patnobꞌ tama e otot era. Porque watar e día tuaꞌ e juicio conda e Dios cꞌani uwira tunor lo que chena jay bueno o jay majax bueno. Y tama e día yajaꞌ e juicio tuaꞌ aquetpa bꞌan cocha inteꞌ cꞌajc xeꞌ tuaꞌ axin uputa tunor. Y tamar era cꞌani aquetpa chequer jay bueno o jay majax bueno e patnar lo que cay chempa umen inteꞌ inteꞌ jay acꞌapa apuruy tunor o jay aquetpato.
1CO 3:14 Tin e uche inteꞌ otot xeꞌ machi acꞌapa apuruy umen e cꞌajc era cꞌani atojya umen e Dios tamar upatnar era.
1CO 3:15 Pero jay axin acꞌapa apuruy tunor upatnar lo que cay uche tama e otot entonces tin e cay uche e otot era tuaꞌ usati tunor utuanibꞌir lo que cꞌani ani uchꞌami, motor que jaxir axin acorpesna tuaꞌ uyubꞌi acꞌotoy tut e qꞌuin, pero matucꞌa tar tuaꞌ atojya bꞌan cocha inteꞌ winic xeꞌ alocꞌoy ajni tujam e cꞌajc conda war apuruy uyotot que matucꞌa tuaꞌ uyubꞌi uqꞌueche axin.
1CO 3:16 Pues entonces niwermanuox, ¿war ca inata que nox larox cocha inteꞌ otot tuaꞌ e Dios? Pues bꞌan, porque war aturuan Unawalir e Dios tama iwalma.
1CO 3:17 Pero jay ayan tin e axin utijres uyotot e Dios, watar e Dios tuaꞌ utijres e winic era ubꞌan. Porque erach tunor uyotot e Dios y inteꞌ intiox larox cocha inteꞌ otot tuaꞌ jaxir.
1CO 3:18 Pues que mamajchi umajresic ubꞌa, porque jay ayan tijam tin e war ubꞌijnu que unata meyra bꞌan cocha ubꞌijnuobꞌ e gente tara tor e rum, pues ucꞌani tuaꞌ asutpa aquetpa bꞌan cocha inteꞌ xeꞌ matucꞌa unata, y tamar era erer acꞌotoy aquetpa nojta ujor tut e Dios.
1CO 3:19 Porque e natanyaj lo que ayan tuaꞌ e winicobꞌ tara tor e rum matucꞌa ucꞌampibꞌir tut e Dios. Bꞌan cocha chꞌar tzꞌijbꞌabꞌir tama uyojroner e Dios tiaꞌ che: “Cadiosir axin ucucru e winicobꞌ xeꞌ más nojta ujorobꞌ tara tor e rum tamar taca e majresiaj lo que chꞌur tama uyalmobꞌ e winicobꞌ era.” Bꞌan chꞌar tzꞌijbꞌabꞌir tama uyojroner e Dios.
1CO 3:20 Y ayanto tiaꞌ chꞌar tzꞌijbꞌabꞌir tama uyojroner e Dios que: “Unata Cadiosir que tunor ubꞌijnusiajobꞌ e winicobꞌ xeꞌ más nojta ujorobꞌ tara tor e rum matucꞌa ucꞌampibꞌir”, xeꞌ chꞌar tzꞌijbꞌabꞌir tama uyojroner e Dios.
1CO 3:21 Y tamar era mamajchi tuaꞌ utattzꞌi ubꞌa umen que war ani axin tupat inteꞌ winic xeꞌ nojta ujor, porque Cadiosir cꞌapa uyajcꞌox tunor lo que ucꞌani, y tunor lo que ayan tara tor e rum tibꞌa tuaꞌ icꞌampes ubꞌan.
1CO 3:22 Entonces tunor lo que ayan tara tor e rum turix tuaꞌ utacriox. Nen xeꞌ Pabloen turen tuaꞌ intacriox, y e Apolos turu tuaꞌ utacriox, y bꞌan e Pedro ubꞌan; turix tuaꞌ utacriox. Tunor or e rum era turu tuaꞌ utacriox, y bꞌan e cuxtar, y bꞌan e chamer. Y turu lo que ayan coner tuaꞌ utacriox, y bꞌan turu lo que watar otronyajr. Tunor lo que ayan aquetpa tuaꞌ utacriox.
1CO 3:23 Y nox turox tuaꞌ itacre e Cristo, y e Cristo turu tuaꞌ utacre Catata Dios.
1CO 4:1 Pues nox taca tunor e gente ucꞌani tuaꞌ iwiron xeꞌ apostolon que ajtacarsiajon tuaꞌ e Cristo. Y non quetpon tuaꞌ cachecsu uyojroner e Dios axin tamar lo que quetpa mucur ani umener.
1CO 4:2 Pues tin e ajcꞌuna inteꞌ upatnar umen e Dios ucꞌani tuaꞌ uturbꞌa ubꞌa tuaꞌ uche imbꞌutz tunor e patnar era.
1CO 4:3 Y ¿tucꞌa ibꞌijnu nox tamar e patnar lo que war inche nen? Pues nen machi inturbꞌa nibꞌa tamar jay ibꞌijnu que bueno o que majax bueno lo que war inche. Y nien machi inturbꞌa nibꞌa tamar lo que ubꞌijnuobꞌ e inmojr ubꞌan. Y nien machi inche confiar tamar nibꞌijnusiaj tanibꞌa jay bueno o jay majax bueno lo que war inche.
1CO 4:4 Pues nen tama niwalma matucꞌa war innata jay ayan lo que war inche xeꞌ majax bueno, pero machi war inwareox que matucꞌa ayan tamaren. Porque jax taca Cawinquirar xeꞌ tuaꞌ axin uwira tucꞌa ayan tamaren.
1CO 4:5 Y tamar era inwareox que ira ibꞌijnu iwira lo que war uchiobꞌ e gente jay bueno o jay majax bueno, sino que cojconic este que acꞌotoy e hora tuaꞌ e juicio. Porque watar e juicio conda asutpa watar Cawinquirar otronyajr y entonces jaxir tuaꞌ ujanchꞌacnes tunor e mabꞌambꞌanir lo que quetpa mucur tama uyalmobꞌ e gente, y jaxir tuaꞌ uchectes tut tunor e gente lo que war ubꞌijnuobꞌ tama uyalmobꞌ inteꞌ inteꞌ. Y tamar era inteꞌ inteꞌ winic tuaꞌ uchꞌami utuanibꞌir tamar lo que uche, jay tuanibꞌir o jay jatzꞌuar xeꞌ tuaꞌ uchꞌami.
1CO 4:6 Pues niwermanuox, war inwareox tunor era tuaꞌ intacriox iwira cocha tuaꞌ ibꞌijnu tamar e inmojr ajcꞌupesiajobꞌ jay bueno o jay majax bueno lo que war uchiobꞌ. Y war inturbꞌa e Apolos y nen ubꞌan bꞌan cocha inteꞌ chequerir tama tunor era tuaꞌ ixcano ibꞌijnu bꞌan taca cocha chꞌar tzꞌijbꞌabꞌir tama uyojroner e Dios. Pero tamar lo que majax chequer tama uyojroner e Dios ucꞌani tuaꞌ iwacta bꞌan taca. Y tamar era machi tuaꞌ ibꞌijnu tama tin e ajcanseyajobꞌ jay más ayan ucꞌampibꞌir inteꞌ o jay matucꞌa ucꞌampibꞌir otronteꞌ.
1CO 4:7 ¿Y chi uyajqꞌuet acꞌampibꞌir xeꞌ más nojta que e inmojr? Pues jax taca e Dios. ¿Y tucꞌa xeꞌ ayan tabꞌa que majax ajcꞌubꞌiret umen e Dios? Pues matucꞌa porque jax e Dios xeꞌ ixin uyajcꞌon tunor cacꞌampibꞌir y jay cꞌapa cachꞌami tunor era tuaꞌ e Dios, ¿tucꞌa tuaꞌ war catꞌabꞌse cabꞌa que non más ayan cacꞌampibꞌir que e inmojr bꞌan cocha jay machi ani cachꞌami tunor era bꞌan taca?
1CO 4:8 Pues warix ibꞌijnu que bꞌanox cocha inteꞌ xeꞌ cꞌapix uchꞌami tunor lo que ayan tuaꞌ e Dios, y war ibꞌijnu que bꞌanox cocha inteꞌ xeꞌ ayanix meyra lo que ayan tacar, y war ibꞌijnu ubꞌan que nox nuquir ajcꞌotorerox y que non tiut matucꞌa cacꞌampibꞌir. Pues bueno ani jay nox ajcꞌotorerox ani porque tamar era non uyubꞌion ani cacꞌotori tacarox.
1CO 4:9 Pero nen war imbꞌijnu que non xeꞌ apostolon ajcꞌunon umen e Dios tuaꞌ caquetpa bꞌan cocha inteꞌ xeꞌ matucꞌa ucꞌampibꞌir, y que non bꞌanon cocha inteꞌ winic xeꞌ aquetpa tuaꞌ achamesna, y que quetpon bꞌan cocha inteꞌ xeꞌ acꞌampa tuaꞌ atzene e gente tamar, y que bꞌanon tut e angelobꞌ ubꞌan.
1CO 4:10 Pues e gente tara tor e rum ojronobꞌ y chenobꞌ que non xeꞌ apostolon matucꞌa canata umen que war cachecsu uyojroner e Dios axin tama e Cristo. Pero nox war ibꞌijnu que nojta ijor tunorox umen taca que ajcꞌupesiajox tama e Cristo. Non xeꞌ apostolon injayjayon bꞌan cocha ubꞌijnuobꞌ e gente tara tor e rum. Pero nox ibꞌijnu que war ixqꞌuecꞌo. Non xeꞌ apostolon xejbꞌna coit umen e gente axin, pero nox cocha intajch taca war ixxana tama ubꞌir e Dios war ixtajttzꞌa umen e gente que más nuxi winicox.
1CO 4:11 Y este coner war caytzꞌa xeꞌ apostolon, y war ataqui catiꞌ axin, y war calapi e tzuc bꞌujc. Y tic taca tiaꞌ caxin e gente war ucꞌayon este que axin uwatzꞌionobꞌ, y matucꞌa nien inteꞌ cotot.
1CO 4:12 Y non xeꞌ apostolon war capatna meyra taca cacꞌabꞌ tuaꞌ cawese cabꞌa. Y conda ayan chi ayopa tuaꞌ ubꞌaxon, cachojbꞌesobꞌ. Y conda ayan e gente xeꞌ war uchion canumse cabꞌa, non cacojco tuaꞌ anumuy bꞌan taca.
1CO 4:13 Y conda ayan chi xeꞌ war uqꞌuijneson xeꞌ apostolon casutpa cojron incꞌun tacarobꞌ. Y quetpon tut e gente tara tor e rum bꞌan cocha e sojc y bꞌan cocha lo que más tzuc este coner.
1CO 4:14 Pues war intzꞌijbꞌa tunor era tibꞌa majax tuaꞌ insubꞌajresox, sino que umen que cꞌani incansiox que nox larox cocha inteꞌ nimaxtacox tama Cawinquirar y war inyajta iut.
1CO 4:15 Bꞌajcꞌat ayan 10,000 ajcanseyajobꞌ xeꞌ war ucansiox tamar e Cristo iraj iraj, pero ayan inteꞌ taca itatabꞌir tama e Cristo Jesús xeꞌ jax nen. Porque jax nen xeꞌ cay inchecsu tiut tunor uyojroner e Dios tama Cawinquirar Jesucristo conda cay ichꞌami tunor era, y tamar era nen quetpen tatabꞌiren tibꞌa tama Cawinquirar.
1CO 4:16 Entonces cocha quetpen tatabꞌir tibꞌa cꞌani inwareox era que turbꞌanic ibꞌa bꞌan cocha nen.
1CO 4:17 Pues entonces war inwebꞌta axin e Timoteo tibꞌa. Jaxir quetpa bꞌan cocha inteꞌ niunen xeꞌ inchoj ut nimener, y jaxir machi acꞌoy uche tunor lo que ucꞌani Cawinquirar. Pues jaxir cꞌani uchiox ibꞌijnu tama tunor lo que cay iwira tamaren conda turen tacarox y cocha inxana tama ubꞌir e Cristo Jesús. Pues bꞌan cocha incanseyan axin tama tunor era tama inteꞌ inteꞌ grupo ajcꞌupesiajobꞌ y bꞌan tuaꞌ ucansiox e Timoteo ubꞌan.
1CO 4:18 Pues nen innata que ayan tijam tin e cay utꞌabꞌse ubꞌobꞌ que más nojta ucꞌampibꞌirobꞌ, y que cay ojronobꞌ nipater y chenobꞌ que: “E Pablo mix taric tuaꞌ uwarajsion.”
1CO 4:19 Pero nen cꞌani ixto incꞌotoy tiut tuaꞌ inwarajsiox jay bueno tut Cawinquirar Dios. Y conda inyopa cꞌani inwira cobꞌa winicobꞌ xeꞌ cay utꞌabꞌse ubꞌobꞌ que nojta ucꞌampibꞌirobꞌ, porque nen war imbꞌijnu que ojroner taca war uchiobꞌ.
1CO 4:20 Porque uchinam e Dios majax jax taca tuaꞌ tin e unatobꞌ oꞌjronobꞌ sino que chena tuaꞌ tin e unatobꞌ uchecsu ucꞌotorer e Dios conda oꞌjronobꞌ.
1CO 4:21 ¿Y cocha icꞌani tuaꞌ inquetpa conda inyopa tiut? ¿O icꞌani ca tuaꞌ inyopa tacar lo que bꞌan cocha inteꞌ ucꞌabꞌ teꞌ tuaꞌ unstesox tamar lo que ayan tibꞌa? ¿O más ca ani bueno tiut tuaꞌ inyopa taca niwalma bꞌutꞌur taca e cꞌunersiaj y incꞌun niwirnar tunor?
1CO 5:1 Pues checta inteꞌ ojroner taniut que ayan inteꞌ winic tijam xeꞌ ajcꞌupesiajox xeꞌ war uchꞌami ubꞌobꞌ taca uwixcar utata bꞌan taca. Pues motor tin e majax ajcꞌupesiajobꞌ tama Cadiosir ubꞌijnuobꞌ que subꞌar uwirnar lo que war uche e winic era, y esto jaxirobꞌ machi ani uchiobꞌ.
1CO 5:2 Y warto ibꞌijnu que imbꞌutzox tama tunor. Pero lo que ucꞌani ani tuaꞌ ibꞌijnu tama tunor era que jax inteꞌ nuxi subꞌar tibꞌa. Pues e winic xeꞌ war uche e mabꞌambꞌanir era ucꞌani tuaꞌ aꞌjnesna imener tuaꞌ alocꞌoy tijam.
1CO 5:3 Y motor que turen innajt tiut tama nicuerpo pero bꞌijnunic que ya turen tiwejtzꞌer tama nibꞌijnusiaj. Y tamar era cꞌani inwareox que cꞌapa imbꞌijnu inwira tama e winic era que mabꞌambꞌan lo que war uche.
1CO 5:4 Entonces morojsenic ibꞌa tamar ucꞌabꞌa Cawinquirar Jesús y nen tuaꞌ inquetpa tacarox tama nibꞌijnusiaj. Y ucꞌotorer Cawinquirar Jesús tuaꞌ aquetpa tacarox.
1CO 5:5 Y de allí erer ibꞌijnu tuaꞌ ilocse e winic era tijam y quetpac e winic era tama ucꞌabꞌ e Satanás xeꞌ tuaꞌ uche unumse ubꞌa meyra. Porque tamar era bꞌajcꞌat acꞌotoy unata e winic era que mabꞌambꞌan lo que war uche y asutpa uyustes ubꞌa tut e Dios tuaꞌ uyubꞌi acorpesna uyalma tama e día conda asutpa watar Cawinquirar otronyajr.
1CO 5:6 Pues majax bueno tuaꞌ ixtzay tama tunor lo que war anumuy era. Porque ayan inteꞌ ojroner xeꞌ che: “Pues conda aturbꞌana imbꞌijc e levadura xeꞌ uche atꞌabꞌay e harina conda war achena e pan, e levadura era anumuy macuir tunor e cꞌum”, xeꞌ che inteꞌ ojroner.
1CO 5:7 Pues e gente tama e Israel, conda uchiobꞌ e nojqꞌuin xeꞌ ucꞌabꞌa pascua machix tuaꞌ ucꞌuxiobꞌ e pan xeꞌ ayan e levadura tamar. Y bꞌanon non ubꞌan que conda war caxana tama ubꞌir e Dios ma erer cawacta oꞌchoy e mabꞌambꞌanir tamaron. Loqꞌuesic entonces tunor lo que mabꞌambꞌan xeꞌ turuto tijam nox, y quetpenic imbꞌutz bꞌan cocha e pan xeꞌ achena tama e harina xeꞌ machi ayajra e levadura tamar. Y nox tuaꞌ ixquetpa imbꞌutz tut e Dios jay ilocse e winic era tijam. Porque e Cristo ixin chamesna tama ut e cruz tuaꞌ ucorpeson tama tunor camabꞌambꞌanir. Y tamar era jaxir quetpa bꞌan cocha inteꞌ cordero ticabꞌa xeꞌ achamesna tama inteꞌ inteꞌ año umen e gente tuaꞌ e Israel tama e nojqꞌuin pascua.
1CO 5:8 Cachoquic entonces tunor lo que mabꞌambꞌan y tunor e onian bꞌijnusiaj xeꞌ bꞌan cocha e pan xeꞌ ayan e levadura tamar y incuic nojqꞌuinicon tama e nojqꞌuin pascua, pero cachic taca tunor cawalma y caturbꞌic cabꞌa erach tuaꞌ cache tunor era.
1CO 5:9 Pues tama inteꞌ carta xeꞌ cay inche bꞌajxan cay intzꞌijbꞌa tibꞌa que machi ixto tuaꞌ ixxana taca tin e war uchꞌami ubꞌobꞌ bꞌan taca.
1CO 5:10 Pero machi cꞌani inwareox que ucꞌani tuaꞌ iwacta tuaꞌ ixojron taca e gente xeꞌ matucꞌa unatobꞌ tamar Cawinquirar Jesucristo xeꞌ bꞌajcꞌat war uchꞌami ubꞌobꞌ bꞌan taca, o xeꞌ war uyusre uchꞌamiobꞌ lo que majax tuobꞌ, o xeꞌ war axujchꞌianobꞌ, o xeꞌ axin uyujtzꞌiobꞌ ut inteꞌ chamen dios. Porque jay machi cꞌani iwira e gente cocha era ucꞌani ani tuaꞌ iwacta or e rum era inyajrer.
1CO 5:11 Lo que cꞌani ani inwareox que jay ayan inteꞌ winic o inteꞌ ixic xeꞌ war uche ubꞌa que jax inteꞌ ajcꞌupesiaj tama Cawinquirar pero xeꞌ warto uchꞌami ubꞌobꞌ bꞌan taca, o xeꞌ warto uyusre uchꞌami lo que majax tuaꞌ, o xeꞌ war uyujtzꞌi ut inteꞌ chamen dios, o xeꞌ war oꞌjron upater e inmojr, o xeꞌ ajcarerto, o xeꞌ jax inteꞌ ajxujch, ira iwacta axanobꞌ tacarox. Y ira ixixin ixweꞌ tacarobꞌ.
1CO 5:12 Pues majax nen xeꞌ tuaꞌ inxin inche juzgar tin e majax tuobꞌ e Cristo. Pero nox ucꞌani tuaꞌ ibꞌijnu iwira tamar lo que war uchiobꞌ tin e ajcꞌupesiajobꞌ tama Cawinquirar.
1CO 5:13 Pues jax e Dios xeꞌ tuaꞌ axin uche juzgar tin e majax tuobꞌ e Cristo. Pero nox locsenic tijam tin xeꞌ war uche e mabꞌambꞌanir era.
1CO 6:1 Pues entonces jay ayan inteꞌ hermano xeꞌ achecta inteꞌ qꞌuijnar taca otronteꞌ hermano ¿cocha tuaꞌ ibꞌijnu jay bueno tuaꞌ iqꞌueche axin tunor era tut inteꞌ juez xeꞌ majax ajcꞌupesiaj tama Cawinquirar? Porque más ani bueno tuaꞌ aqꞌuejcha axin tunor era tut e grupo ajcꞌupesiajobꞌ tuaꞌ ubꞌijnuobꞌ lo que ucꞌani tuaꞌ achempa.
1CO 6:2 ¿Machi ca inata que nox xeꞌ umaxtacox e Dios aquetpa tuaꞌ ibꞌijnu iwira jay bueno o jay majax bueno lo que cꞌapa uchiobꞌ tunor e gente tara tor e rum? Y jay aquetpa tuaꞌ ibꞌijnu iwira tunor tin e turobꞌ tara tor e rum ¿machi ca uyubꞌiox ibꞌijnu iwira tamar lo que war anumuy tijam xeꞌ chuchu cocha era?
1CO 6:3 ¿Machi ca inata que aquetpa tuaꞌ cabꞌijnu cawira jay bueno o jay majax bueno lo que cꞌapa uchiobꞌ tunor e angelobꞌ? Entonces jay bꞌan aquetpa tuaꞌ cache, entonces ma ani jax intran ticoit tuaꞌ cabꞌijnu cawira lo que ayan tara tor e rum.
1CO 6:4 Entonces jay achecta watar inteꞌ qꞌuijnar tujam cora hermanuobꞌ tamar lo que ayan tara tor e rum ¿cocha tuaꞌ ibꞌijnu jay bueno tuaꞌ iqꞌueche axin tunor era tut inteꞌ juez xeꞌ matucꞌa unata tamar Cawinquirar y nien cocha ucꞌani tuaꞌ aquetpa inteꞌ tama inteꞌ grupo ajcꞌupesiajobꞌ?
1CO 6:5 Pues war onjron cocha era tuaꞌ ixsubꞌajra cora umen que war ibꞌijnu tuaꞌ iqꞌueche axin inteꞌ caso cocha era tut inteꞌ juez xeꞌ matucꞌa unata tamar Cawinquirar. ¿O ma ca majchi tijam nien incojt winic xeꞌ nojta unatanyaj xeꞌ uyubꞌi ubꞌijnu uwira tamar inteꞌ qꞌuijnar tujam cora hermanuobꞌ cocha era?
1CO 6:6 Pero coner lo que war achena jax era Que jay inteꞌ hermano aqꞌuijna taca otronteꞌ hermano uqꞌueche axin tunor era tut inteꞌ juez xeꞌ matucꞌa unata tamar Cawinquirar y war uyare tunor era tut jaxir tuaꞌ ubꞌijnu uwira tama tunor era.
1CO 6:7 Pues chequer taniut que war itijres ibꞌa axin umen que ayan e qꞌuijnar tijam xeꞌ ajcꞌupesiajox que machi inata cocha tuaꞌ iyustes ibꞌa tamar, y tamar era war iqꞌueche axin inteꞌ caso cocha era tut inteꞌ juez xeꞌ majax ajcꞌupesiaj tama Cawinquirar. Pues ¿tucꞌa tuaꞌ machi iwacta asisa e qꞌuijnar bꞌan taca jay inteꞌ hermano uche inteꞌ mabꞌambꞌanir upater otronteꞌ hermano? Pues ¿ma ca jax más ani bueno tuaꞌ iwacta asisa e qꞌuijnar bꞌan taca jay inteꞌ hermano uxujchꞌi lo que ayan tuaꞌ otronteꞌ hermano?
1CO 6:8 Pero nox war iche e mabꞌambꞌanir ipater taca ibꞌa inteꞌ inteꞌ este que ixixin ixujchꞌi lo que ayan tuaꞌ inteꞌ iwet ajcꞌupesiajir.
1CO 6:9 Pero nox war ixto inata que tin e war uche e mabꞌambꞌanir axin machix tuaꞌ oꞌchoy tama uchinam e Dios. Y ira iwacta ibꞌa tuaꞌ ixmajresna porque machi tuaꞌ oꞌchoy tama uchinam e Dios tin e axin uyose ubꞌa taca tin e merato anujbꞌi tacar, o xeꞌ war uyujtzꞌiobꞌ ut inteꞌ chamen dios, o tin e nujbꞌix xeꞌ axin uyose ubꞌa taca otronteꞌ xeꞌ majax tuach. Y machi tuaꞌ oꞌchoy tama uchinam e Dios tin e war uche e mabꞌambꞌanir bꞌan cocha inteꞌ winic xeꞌ war uyusre uchꞌami uyet winiquir, o xeꞌ war uche bꞌan cocha inteꞌ ixic xeꞌ war uyusre uchꞌami uyet ixiquir.
1CO 6:10 Y ira iwacta ibꞌa tuaꞌ ixmajresna tuaꞌ ibꞌijnu que uyubꞌi ani oꞌchoy tama uchinam e Dios tin e war axujchꞌian, o xeꞌ war uyusre uchꞌami lo que majax tuaꞌ, o xeꞌ war acaray. Y ma erer cabꞌijnu que uyubꞌi oꞌchoy tama uchinam e Dios tin e war oꞌjron upater e inmojr, o xeꞌ ulocse lo que ayan tuaꞌ inteꞌ taca e majresiaj.
1CO 6:11 Pues ayan tijam tin e cay uchiobꞌ tunor e mabꞌambꞌanir cocha era conda merato acꞌupseyanobꞌ tama Cawinquirar Jesucristo, pero xeꞌ machi ixto war uchiobꞌ tunor era coner umen que pocbꞌirobꞌix tamar uchꞌichꞌer Cawinquirar Jesucristo y coner tuobꞌ e Dios. Y coner tunorox quetpox erach taca e Dios tamar ucꞌabꞌa Cawinquirar Jesucristo tacar utacarsiaj Unawalir e Dios.
1CO 6:12 Pues bꞌajcꞌat ayopa inteꞌ tiut xeꞌ che: “Nen erer inche tunor lo que incꞌani porque corpesbꞌiren tama Cawinquirar”, xeꞌ che inteꞌ. Pues erer ani cache tunor lo que cacꞌani cache tama Cawinquirar, pero ayan lo que erer cabꞌijnu que majax imbꞌutz tuaꞌ cache. Pues inteꞌ xeꞌ war acꞌupseyan tama Cawinquirar erer uche tuqꞌuic tuqꞌuic. Pero majax imbꞌutz tuaꞌ cawacta cabꞌa tuaꞌ cache lo que erer asutpa uyareon tucꞌa tuaꞌ cache otronyajr.
1CO 6:13 Pues bꞌajcꞌat ayopa otronteꞌ tiut xeꞌ che: “Bꞌan cocha chena e comida tuaꞌ utzayjres unac inteꞌ y bꞌan chena unac inteꞌ tuaꞌ uchꞌami e comida”, xeꞌ che inteꞌ. Pero Cadiosir cꞌani ucꞌapes e comida y cꞌani ucꞌapes unac inteꞌ ubꞌan watar e día. Pero ucuerpo inteꞌ machi chena tuaꞌ axin uyose ubꞌa taca tin e merato anujbꞌi tacar, sino que chena ucuerpo inteꞌ tuaꞌ axin uche lo que ucꞌani Cawinquirar, y Cawinquirar turu tuaꞌ utacre inteꞌ inteꞌ tuaꞌ ucꞌampes ucuerpo tuaꞌ uche lo que imbꞌutz tut jaxir.
1CO 6:14 Y bꞌan cocha Cadiosir ixin usuti ubꞌixqꞌues Cawinquirar Jesucristo tujam e chamenobꞌ y bꞌan tuaꞌ axin usuti ubꞌixqꞌueson non ubꞌan taca ucꞌotorer.
1CO 6:15 Pero ¿machi ca war inata que ucuerpo inteꞌ ajcꞌupesiaj intera taca ucuerpo e Cristo? ¿O bueno ca tiut tuaꞌ aqꞌuejcha axin lo que intera taca ucuerpo e Cristo tuaꞌ aquetpa intera taca inteꞌ ajnajtir ixic ubꞌan? Pues ¡ma cocha erer!
1CO 6:16 ¿O machi ca war inata que jay axin inteꞌ ajcꞌupesiaj tama Cawinquirar tuaꞌ uyose ubꞌa taca inteꞌ ajnajtir ixic que jaxirobꞌ intera aquetpobꞌ? Bꞌan cocha chꞌar tzꞌijbꞌabꞌir tama uyojroner e Dios y che: “Inteꞌ winic xeꞌ axin uyose ubꞌa taca inteꞌ ixic aquetpa intera tacar”, xeꞌ che tama uyojroner e Dios.
1CO 6:17 Pero tin e axin uchꞌami ucꞌabꞌa Cawinquirar axin aquetpa intera tacar tama uyalma.
1CO 6:18 Entonces ajnenic tut tunor e mabꞌambꞌanir cocha era tuaꞌ machi iche bꞌan cocha tin e axin uyose ubꞌobꞌ taca tin e merato anujbꞌi tacar. Pues tunor e inmojr mabꞌambꞌanir lo que erer ani uche inteꞌ, achempa patir ucuerpo. Pero tin e axin uyose ubꞌa taca tin e merato anujbꞌi tacar war uche inteꞌ mabꞌambꞌanir xeꞌ tuaꞌ utijres ucuerpo axin.
1CO 6:19 ¿Y machi ca inata que icuerpo jax uyototir Unawalir e Dios xeꞌ ajcꞌunox umen Catata Dios? Pues Unawalir e Dios war aturuan tama iwalma, y tamar era ma erer ibꞌijnu que ajyumox tamar ibꞌa sino que jax Catata Dios xeꞌ jax cawajyum tunoron.
1CO 6:20 Porque jax Catata Dios xeꞌ ixin umaniox tacar lo que meyra atujri xeꞌ jax uchꞌichꞌer Cawinquirar Jesucristo. Y tamar era ¡cꞌampesic icuerpo tuaꞌ itattzꞌi ucꞌabꞌa Cadiosir tamar!
1CO 7:1 Pues entonces coner era cꞌani inwareox lo que cay iyubꞌi tacaren tama e carta lo que cay itzꞌijbꞌa tanibꞌa. Pues cꞌani inwareox era que bueno ani que inteꞌ sitz xeꞌ cꞌapa chꞌiꞌ axin ubꞌijnu tuaꞌ aquetpa ubꞌajner.
1CO 7:2 Pero cocha e winicobꞌ tara tor e rum war uchiobꞌ meyra mabꞌambꞌanir coner taca e ixictac axin, pues más ani bueno jay inteꞌ inteꞌ sitz axin anujbꞌi taca inteꞌ uwixcar, y que inteꞌ inteꞌ ijchꞌoc axin anujbꞌi taca inteꞌ uviejo.
1CO 7:3 Y bꞌan cocha e winic y bꞌan ubꞌan e ixic que ucꞌani tuaꞌ acꞌapa uchiobꞌ tunor lo que aquetpa tuaꞌ uchiobꞌ tama unujbꞌiarobꞌ.
1CO 7:4 Pues e ixic majax ajyum tama ucuerpo sino que jax uviejo xeꞌ ajyum tamar. Y bꞌan e winic que jaxir majax ajyum tama ucuerpo sino que jax uwixcar xeꞌ ajyum tamar.
1CO 7:5 Y tamar era cꞌani inwareox que ira iwacta tuaꞌ ichꞌami ibꞌa tama inujbꞌiar. Pero jay ibꞌijnu chatertiox tuaꞌ iwacta tunor era tuaꞌ icꞌajti taca e Dios tama inteꞌ tiempo, pues erer. Pero conda acꞌapa e tiempo era ucꞌani tuaꞌ asutpa ichꞌami ibꞌa otronyajr, porque jay iwacta tunor era entonces watar e Satanás tuaꞌ upijchꞌiox tuaꞌ ixcꞌaxi tama e mabꞌambꞌanir.
1CO 7:6 Pues war inwareox que erer ixnujbꞌi tuaꞌ iche tunor era jay icꞌani, pero machi war inwareox que ucꞌani tuaꞌ ixnujbꞌi.
1CO 7:7 Pues nen quisinic que tunor e gente aquetpobꞌ bꞌan cocha nen que machi anujbꞌi, pero inteꞌ inteꞌ ajcꞌuna ucꞌampibꞌir umen e Dios. Ayan tin e uchꞌami inteꞌ ucꞌampibꞌir, y ayan tin e uchꞌami intex ucꞌampibꞌir.
1CO 7:8 Pues ayan inteꞌ niwojroner tuaꞌ tin e turuto ubꞌajner y tin e chamay uwixcar o xeꞌ chamay uviejo. Nen quisinic inware que machi ixnujbꞌi, y que ixquetpa bꞌan cocha nen que matucꞌa niwixcar.
1CO 7:9 Pero jay machi uyubꞌi ucojco ubꞌa inteꞌ, más ani bueno tuaꞌ axin anujbꞌi. Porque más ani bueno tuaꞌ anujbꞌi inteꞌ tuaꞌ machi unumse ubꞌa meyra umen que war uyusre anujbꞌi taca inteꞌ ijchꞌoc.
1CO 7:10 Pues ayan inteꞌ niwojroner tuaꞌ tin e nujbꞌiobꞌix. Y e ojroner era majax tanibꞌa taca sino que tuaꞌ Cawinquirar. Y e ojroner jax era: Que inteꞌ ixcarbꞌir ma erer uchoqui uyacta uviejo.
1CO 7:11 Pero jay inteꞌ ixic uchoqui uyacta uviejo, entonces ucꞌani tuaꞌ aquetpa ubꞌajner y machi ixto tuaꞌ asutpa anujbꞌi otronyajr. Pero erer asutpa uyustes ubꞌa taca uviejo otronyajr. Y bꞌan ubꞌan inteꞌ winic que ma erer uchoqui uyacta uwixcar tuaꞌ utijres unujbꞌiar.
1CO 7:12 Y ayan inteꞌ niwojroner xeꞌ tuaꞌ e inmojr xeꞌ ajcꞌupesiajox, pero e ojroner era war alocꞌoy tanibꞌa y majax tuaꞌ Cawinquirar. Jay ayan inteꞌ hermano xeꞌ majax ani ajcꞌupesiaj tama Cawinquirar conda nujbꞌi y de allí ixin uchꞌami e Cristo pero uwixcar machi war ucꞌani, jay uwixcar turix tuaꞌ aquetpa tacar, entonces e hermano era ma erer uyacta uwixcar tuaꞌ utijres unujbꞌiar.
1CO 7:13 Y jay ayan inteꞌ hermana xeꞌ majax ani ajcꞌupesiaj tama Cawinquirar conda nujbꞌi y de allí ixin uchꞌami e Cristo, pero uviejo machi war ucꞌani, jay uviejo turix tuaꞌ aquetpa tacar, entonces e hermana era ma erer uyacta uviejo tuaꞌ utijres unujbꞌiar.
1CO 7:14 Porque e winic xeꞌ machi war acꞌupseyan tama Cawinquirar war aquetpa chojbꞌesbꞌir umen e Dios umen que nujbꞌibꞌir tacar uwixcar xeꞌ ajcꞌupesiaj tama Cawinquirar. Y e ixic xeꞌ machi war acꞌupseyan tama Cawinquirar war aquetpa chojbꞌesbꞌir umen e Dios umen que nujbꞌibꞌir tacar uviejo xeꞌ ajcꞌupesiaj tama Cawinquirar. Porque jay majax bꞌan ani cocha era entonces umaxtacobꞌ era aquetpobꞌ ani bꞌan cocha jay umaxtacobꞌ tin e uyujtzꞌiobꞌ ut inteꞌ chamen dios. Pero umaxtacobꞌ era aquetpobꞌ chojbꞌesbꞌirobꞌ umen e Dios umen que utuꞌ o utata war acꞌupseyan tama Cawinquirar.
1CO 7:15 Pero jay e winic o e ixic era xeꞌ machi war acꞌupseyan tama Cawinquirar cꞌani ucꞌocchi uchoqui unujbꞌiar umen que uwixcar o uviejo war acꞌupseyan tama Cawinquirar, erer uche. Pues tamar era e hermano o e hermana erer uyacta ubꞌobꞌ tama unujbꞌiar, porque Cadiosir upejcon tuaꞌ caturuan taca e jiriar.
1CO 7:16 Porque inteꞌ hermano ma erer unata jay erer ucorpes uwixcar, y inteꞌ hermana ma erer unata jay erer ucorpes uviejo.
1CO 7:17 Pues cꞌani inwareox lo que nen incanse tama inteꞌ inteꞌ grupo ajcꞌupesiajobꞌ axin, que inteꞌ inteꞌ ajcꞌupesiaj ucꞌani tuaꞌ aturuan bꞌan cocha ucꞌampibꞌir lo que ajcꞌuna umen Cawinquirar y bꞌan cocha turu conda cay pejcna umen e Dios.
1CO 7:18 Entonces jay xurbꞌir imbꞌijc uqꞌuewerir utejromar inteꞌ hermano conda pejcna umen e Dios, pues bꞌan taca tuaꞌ aquetpa. Y jay majax xurbꞌir imbꞌijc uqꞌuewerir utejromar inteꞌ hermano conda pejcna umen e Dios, machi tuaꞌ axin usicbꞌa cocha tuaꞌ axujra imbꞌijc uqꞌuewerir utejromar.
1CO 7:19 Porque Cadiosir atzay uwira tin e xurbꞌir imbꞌijc uqꞌuewerir utejromar y atzay ubꞌan uwira tin e majax xurbꞌir imbꞌijc uqꞌuewerir utejromar, pero lo que más ayan ucꞌampibꞌir tut e Dios jax era: Que inteꞌ axin ucꞌupse tunor lo que arobꞌna tuaꞌ uche umen e Dios.
1CO 7:20 Y tamar era war inwareox que inteꞌ inteꞌ winic ucꞌani tuaꞌ aquetpa bꞌan taca cocha turu conda pejcna umen e Dios.
1CO 7:21 Pues jay ayan awajyum conda pejcnet umen e Dios, ira abꞌijnu tamar. Pero jay ayan cocha tuaꞌ ilocꞌoy yebꞌar ucꞌabꞌ xeꞌ quetpa awajyum, chen.
1CO 7:22 Porque tin e ayan uyajyum conda pejcbꞌir umen Cawinquirar, aquetpa corpesbꞌir tuaꞌ uyujtzꞌi ut e Dios coner. Y tin e matucꞌa uyajyum conda pejcbꞌir umen e Dios, aquetpa man tuaꞌ e Cristo coner.
1CO 7:23 Pues jax Cadiosir xeꞌ ixin utoyi meyra tuaꞌ umanion tuaꞌ caquetpa tuaꞌ, y tamar era ira iwacta ibꞌa tuaꞌ ixturbꞌana yebꞌar ucꞌabꞌ inteꞌ winic.
1CO 7:24 Entonces niwermanuox, xanenic bien inteꞌ intiox tama ubꞌir e Dios, y turuanenic bꞌan taca cocha turox conda pejcnox umen e Dios.
1CO 7:25 Pues ayan otronteꞌ niwojroner tuaꞌ tin e merato anujbꞌi. Nen era matucꞌa inteꞌ ojroner xeꞌ inchꞌami tuaꞌ Cawinquirar tuaꞌ inwareox tama tunor era, pero cꞌani inwareox lo que nen imbꞌijnu tamar, y nen inware que tawaren tacar ucꞌunersiaj Cawinquirar tuaꞌ iche ijor tamaren.
1CO 7:26 Y cocha ayan meyra lo que war anumuy xeꞌ intran tama tunor or e rum coner, nen imbꞌijnu que más ani bueno que inteꞌ sitz o inteꞌ ijchꞌoc aquetpa ani bꞌan taca y que machi anujbꞌi.
1CO 7:27 Pues tin e ayan uwixcar machi tuaꞌ ubꞌijnu tuaꞌ utijres unujbꞌiar era. Y tin e matucꞌa uwixcar machi tuaꞌ ubꞌijnu tuaꞌ uchꞌujcu utajwi uwixcar tuaꞌ anujbꞌi tacar.
1CO 7:28 Pero jay axin anujbꞌi inteꞌ machi war uche e mabꞌambꞌanir tamar. Y jay inteꞌ ijchꞌoc axin anujbꞌi machi war uche e mabꞌambꞌanir tamar. Pero tin e axin anujbꞌi cꞌani unumse ubꞌobꞌ tamar e nujbꞌiar era, y nen quisinic intacriox tuaꞌ machi inumse ibꞌa cocha era.
1CO 7:29 Pues niwermanuox, lo que war inwareox jax era: Que machi aquetpa meyra tiempo tama cacuxtar tara tor e rum. Y tamar era machi aquetpa meyra tiempo tuaꞌ uyubꞌion cache upatnar Cawinquirar. Entonces tin e nujbꞌix ucꞌani tuaꞌ usicbꞌa cocha tuaꞌ uyujtzꞌi ut e Dios iraj iraj bꞌan ani cocha inteꞌ xeꞌ matucꞌa uwixcar.
1CO 7:30 Y tin e war unumse ubꞌobꞌ umen que chamay inteꞌ ufamilia ucꞌani tuaꞌ aturuanobꞌ bꞌan cocha jay machi ani war aquetpa tzajtaca utobꞌ. Y tin e war atzayobꞌ ucꞌani tuaꞌ aturuanobꞌ bꞌan cocha jay machi ani war atzayobꞌ. Y tin e war amanuobꞌ ucꞌani tuaꞌ aquetpobꞌ bꞌan cocha jay majax ani tuobꞌ lo que war umaniobꞌ era.
1CO 7:31 Y tin e war achonma ucꞌani tuaꞌ aturuan bꞌan cocha inteꞌ que machi ani war usati tunor utiempo tama uchonmar era. Porque tunor or e rum lo que cawira coner ucꞌani tuaꞌ asatpa.
1CO 7:32 Pues entonces war incꞌani que machix tuaꞌ ixturuan ibꞌijnu meyra, porque inteꞌ sitz war ubꞌijnu tamar taca upatnar e Dios y cocha tuaꞌ utzayjres Cawinquirar.
1CO 7:33 Pero inteꞌ winic xeꞌ ayan uwixcar war ubꞌijnu tamar lo que ayan tara tor e rum y war ubꞌijnu cocha tuaꞌ utzayjres uwixcar.
1CO 7:34 Y chequer ubꞌan que majax lar inteꞌ ijchꞌoc taca inteꞌ ixic xeꞌ ayan uviejo. Porque inteꞌ ijchꞌoc war ubꞌijnu uche lo que ucꞌani Cawinquirar y war uturbꞌa ubꞌa tuaꞌ uyajcꞌu ubꞌa tut e Dios tama uyalma y tama ucuerpo. Pero inteꞌ ixic xeꞌ ayan uviejo war ubꞌijnu tamar lo que ayan tara tor e rum y war ubꞌijnu cocha tuaꞌ utzayjres uviejo.
1CO 7:35 Pues war inwareox tunor era tuaꞌ intacriox alocꞌoy imbꞌutz tunor tama icuxtar. Machi war imbꞌijnu tuaꞌ inquete inwabꞌu lo que war icꞌani, sino que war imbꞌijnu tuaꞌ intacriox ixquetpa imbꞌutz tama tunor icuxtar y que erer iturbꞌa ibꞌa tamar Cawinquirar inyajrer tuaꞌ iche upatnar iraj iraj.
1CO 7:36 Pues jay ayan inteꞌ tatabꞌir xeꞌ war ubꞌijnu tuaꞌ uyacta anujbꞌi inteꞌ uwijchꞌoc umen que war anumuy meyra año tamar, y jay ubꞌijnu que bꞌan ucꞌani uche, entonces erer uche lo que war ubꞌijnu uche era. Y majax mabꞌambꞌanir tunor era.
1CO 7:37 Pero jay ayan otronteꞌ tatabꞌir xeꞌ war aqꞌuecꞌo tama uyalma que inteꞌ uwijchꞌoc machi tuaꞌ anujbꞌi y unata que erer aquetpa bꞌan cocha war ucꞌani era, pues erer uche lo que war ubꞌijnu tuaꞌ uche era, y bueno lo que war uche.
1CO 7:38 Y tamar era e tatabꞌir xeꞌ uyajcꞌu uwijchꞌoc tuaꞌ anujbꞌi war uche lo que bueno, pero tin e machi war uyajcꞌu uwijchꞌoc tuaꞌ anujbꞌi war uche lo que mejor.
1CO 7:39 Pues inteꞌ ixic xeꞌ ayan uviejo aquetpa cachar tacar uviejo era umen e ley conda turuto e winic era. Pero jay achamay uviejo jaxir aquetpa libre tuaꞌ asutpa anujbꞌi taca otronteꞌ winic, pero jax taca inteꞌ xeꞌ war acꞌupseyan tama Cawinquirar.
1CO 7:40 Pero más ani tuaꞌ aquetpa atzay e ixic era jay machix ani asutpa anujbꞌi otronyajr. Pues era jax taca lo que imbꞌijnu nen, majax lo que uyaren ani e Dios. Pero nen imbꞌijnu que turu Unawalir e Dios tamaren ubꞌan.
1CO 8:1 Pues entonces cꞌani innumuy era esto tamar lo que quetpa ajcꞌubꞌir tut inteꞌ chamen dios. Pero ayan inteꞌ xeꞌ oꞌjron y che: “Pues non war canata tama tunor era, y tamar era non cacꞌuxi tunor lo que cacꞌani”, che inteꞌ. Pero lo más que cacꞌotoy canata lo más que uchion cabꞌijnu que más nojta cajor este que caxin catattzꞌi cabꞌa tamar. Y majax bueno tuaꞌ cache cocha era. Pero conda war cachectes cabꞌa tut e inmojr xeꞌ war cayajta utobꞌ, jax era lo que war uche achꞌiꞌ más nojta cawalma tut e Dios.
1CO 8:2 Pero jay ayan chi xeꞌ war ubꞌijnu que meyra war unata y war utattzꞌi ubꞌa tamar, chequer que matucꞌa unata tamar lo que ucꞌani ani unata tama e Dios.
1CO 8:3 Pero tin e uyajta ut e Dios, war anatanwa umener.
1CO 8:4 Entonces tamar ucꞌujxar lo que aquetpa turbꞌabꞌir tut uyaltar inteꞌ chamen dios, war canata que matucꞌa ucꞌampibꞌir inteꞌ chamen dios tara tor e rum, y que matucꞌa más dios, sino que jax taca Catata Dios xeꞌ turu tichan tut e qꞌuin.
1CO 8:5 Pues arobꞌna umen e gente que ayan e sian diosobꞌ tut e qꞌuin y tara tor e rum, y e gente era chenobꞌ que ayan meyra dios y que ayan meyra ajwinquirobꞌ.
1CO 8:6 Pero ticoit non matucꞌa más dios sino que inteꞌ taca Dios xeꞌ jax Catata Dios xeꞌ turu tichan tut e qꞌuin xeꞌ jax xeꞌ cꞌapa uche tunor lo que ayan, y non turon tuaꞌ taca cache lo que ucꞌani jaxir. Y ticoit non ayan inteꞌ taca Winquir xeꞌ jax e Jesucristo. Pues umen jaxir turu tunor lo que ayan esto non ubꞌan.
1CO 8:7 Pero majax tunor e winicobꞌ xeꞌ war unatobꞌ tama tunor era. Ayan tin e cay uyujtzꞌiobꞌ ut e sian chamen diosobꞌ ixnix xeꞌ warto ubꞌijnuobꞌ esto coner que ayanto ucꞌampibꞌir lo que aquetpa ajcꞌubꞌir tut inteꞌ chamen dios y xeꞌ warto ucꞌuxiobꞌ e comida cocha era ubꞌan. Y cocha mato jax nojta ucꞌupesiajobꞌ tama Cawinquirar, war aquetpobꞌ injayjay tama uyalmobꞌ umen que war ubꞌijnuobꞌ que mabꞌambꞌan tut Catata Dios tuaꞌ ucꞌuxiobꞌ lo aquetpa ajcꞌubꞌir tut inteꞌ chamen dios cocha era. Y tamar era war unatobꞌ que war abꞌontzꞌa uyalmobꞌ umen e comida lo que war ucꞌuxiobꞌ era.
1CO 8:8 Pero jay war canata que matucꞌa ucꞌampibꞌir lo que aquetpa ajcꞌubꞌir tut inteꞌ chamen dios y tamar era caxin cacꞌuxi, ¿jax ca tuaꞌ uchion caquetpa más imbꞌutz taca e Dios? Machi. Y machi tuaꞌ cachꞌami más cacꞌampibꞌir jay cacꞌuxi tunor era, y nien machi tuaꞌ asatpa cacꞌampibꞌir tut e Dios jay machi cacꞌuxi tunor era.
1CO 8:9 Pero nox iwiric tuaꞌ machi iche acucrema tin e mato jax nojta tama ucꞌupesiajobꞌ tama Cawinquirar umen que nox war inata que matucꞌa tuaꞌ inumse ibꞌa jay icꞌuxi lo que war icꞌani era.
1CO 8:10 Pues nox meyra war inata tama tunor era. Pero bꞌajcꞌat inteꞌ tijam xeꞌ war aqꞌuecꞌo tama ucꞌupesiaj acꞌotoy tama inteꞌ templo tuaꞌ inteꞌ chamen dios tuaꞌ ucꞌuxi e wer lo que aquetpa ajcꞌubꞌir tut e chamen dios era. Y bꞌajcꞌat anumuy inteꞌ hermano xeꞌ mato jax nojta tama ucꞌupesiaj tama Cawinquirar y jaxir uwira tiaꞌ war aweꞌ inteꞌ era y bꞌajcꞌat jaxir ubꞌijnu tuaꞌ axin ucꞌuxi e wer era ubꞌan.
1CO 8:11 Pero cocha jaxir war unata que mabꞌambꞌan tuaꞌ aweꞌ tama e templo era, jay jaxir axin uche entonces axin acucrema tamar. Y bꞌan cay uche umen taca que ayan inteꞌ xeꞌ más war unata, y tamar era ixin satpa inteꞌ cawermano xeꞌ chamesna e Cristo tuaꞌ ucorpes.
1CO 8:12 Y tamar era cocha cꞌapa yobꞌna uyalma e hermano era xeꞌ mato jax nojta tama ucꞌupesiaj tama Cawinquirar este que ixin uche e mabꞌambꞌanir, nox ubꞌan war iche e mabꞌambꞌanir upater e Cristo umen que inteꞌ era war uwira lo que war iche nox y tamar era ixin cucrema.
1CO 8:13 Y tamar era nen, jay umen que war ani incꞌuxi e wer xeꞌ quetpa ajcꞌubꞌir tut inteꞌ chamen dios y que tamar era inche acucrema inteꞌ niwermano tuaꞌ uche e mabꞌambꞌanir, entonces nen machi ixto tuaꞌ insutpa incꞌuxi e wer era otronyajr, porque machi incꞌani tuaꞌ inche acucrema inteꞌ niwermano.
1CO 9:1 Pues entonces cꞌani inwareox que nen ayan lo que erer inche umen que apostolen tuaꞌ Cawinquirar. Nen inwirix ut e Jesús xeꞌ jax Cawinquirar conda uchectes ubꞌa taniut tama inteꞌ nimayjut, y nox cꞌotoy corpesnox umen que cay inchecsu uyojroner Cawinquirar tama e corpesiaj tiut.
1CO 9:2 Bꞌajcꞌat ayan tin e machi war ubꞌijnu jay nen apostolen tuaꞌ Cawinquirar Jesucristo. Pero nox war inata que bꞌan, y nox war ixquetpa bꞌan cocha inteꞌ chequerir que nen jax inteꞌ apostolen tuaꞌ Cawinquirar cocha nox cay cꞌupseyanox tama Cawinquirar Jesucristo umen que nen cay inchecsu uyojroner e Dios tiut.
1CO 9:3 Pues jax era lo que inware tunor tin e ayopa taniut xeꞌ war ubꞌijnuobꞌ que nen majax apostolen:
1CO 9:4 Pues nen cocha apostolen tuaꞌ Cawinquirar erer inchꞌami tunor lo que anjcꞌuna tuaꞌ incꞌuxi y tunor lo que anjcꞌuna tuaꞌ unchꞌi.
1CO 9:5 Y nen cocha apostolen tuaꞌ Cawinquirar erer ani inqꞌueche axin inteꞌ niwixcar ubꞌan xeꞌ ajcꞌupesiaj tama Cawinquirar bꞌan cocha war axanobꞌ e inmojr apostolobꞌ taca uwixcarobꞌ, y bꞌan cocha war axanobꞌ uwijtzꞌinobꞌ Cawinquirar, y bꞌan cocha war axana e Pedro ubꞌan.
1CO 9:6 ¿O jax ca taca e Bernabé y nen xeꞌ ucꞌani tuaꞌ capatna tama cacꞌabꞌ tuaꞌ caweꞌ conda war cachecsu axin uyojroner e Dios?
1CO 9:7 ¿O ayan ca inteꞌ soldado xeꞌ axin utoyi ubꞌa conda war acꞌampa tama e ejército? Mamajchi. Y tin e war upaqꞌui inteꞌ chꞌan xeꞌ ucꞌabꞌa uva ¿machi ca ujuxi umaqꞌui lo que ayan tamar? Pues uche. Y bꞌan ubꞌan tama inteꞌ ajcojc oveja ¿machi ca axin uyuchꞌi e chuꞌ conda war uyatzꞌi uchꞌu e oveja era? Pues uyuchꞌi.
1CO 9:8 Y ma erer ibꞌijnu que tunor era bꞌan taca lo que war imbꞌijnu nen porque bꞌan chꞌar tzꞌijbꞌabꞌir tama uley e Moisés ubꞌan.
1CO 9:9 Porque tama uley e Moisés che que: “Ira icachi uyej e wacax conda war axana tujor e trigo tiaꞌ war aloqꞌuesna usojqꞌuir.” Bꞌan chꞌar tzꞌijbꞌabꞌir tama uley e Moisés. Y chequer que Cadiosir war ubꞌijnu tamar tin e man tuaꞌ y majax tamar taca inteꞌ wacax conda ojron cocha era.
1CO 9:10 ¿O war ca ubꞌijnu tamaron conda uyareon cocha era? Pues tamaron. Porque tin e axin uyustes e chor war ubꞌijnu tama e hora conda watar e cosecha, y tin e war ulocse usojqꞌuir e trigo war ubꞌijnu tamar lo que tuaꞌ uchꞌami tama e cosecha era.
1CO 9:11 Pues non cay patnon tijam tuaꞌ catacriox ixcꞌotoy ichꞌami ucꞌunersiaj e Dios. ¿O ma ca jax bueno tuaꞌ cabꞌijnu que quisinic cachꞌami imbꞌijc tacarsiaj tibꞌa tama e patnar lo que war cache era?
1CO 9:12 Porque ayan meyra ajcanseyajobꞌ xeꞌ war ayopobꞌ tiut xeꞌ war atacarnobꞌ imener, y non era más ayan caderecho tuaꞌ uyubꞌion cachꞌami e tacarsiaj tibꞌa ubꞌan. Pero non ma tiaꞌ war cacꞌajti e tacarsiaj tibꞌa motor que uyubꞌion ani cache. Y machi cabꞌijnu tamar lo que war canumse cabꞌa motor que ayan lo que cacꞌani, porque matucꞌa cꞌani cache xeꞌ erer uche aquetpa intran lo que uyubꞌi ani uquete uwabꞌu uyojroner e Dios tama e corpesiaj.
1CO 9:13 Pues nox war inata ubꞌan que tin e war apatnobꞌ tama e templo tama e chinam Jerusalem war awesenobꞌ umen que war apatnobꞌ yajaꞌ. Y tin e turobꞌ tiaꞌ aquetpa ajcꞌubꞌir inteꞌ arac tut e altar tuaꞌ apurutna erer uchꞌamiobꞌ imbꞌijc e wer era tuaꞌ ucꞌuxiobꞌ ubꞌan.
1CO 9:14 Y Cawinquirar war ucꞌani ubꞌan que tin e war uchecsu uyojroner e Dios axin erer uchꞌamiobꞌ e tacarsiaj tamar e patnar lo que war uchiobꞌ era tuaꞌ uyubꞌi awiobꞌ tamar.
1CO 9:15 Pero nen ma tiaꞌ ixien incꞌampes niderecho cocha inteꞌ apóstol tuaꞌ inchꞌami e tacarsiaj cocha era. Y machi war intzꞌijbꞌa tibꞌa era tuaꞌ incꞌajti itacarsiaj. Pues nen era war intzay que war inchecsu uyojroner e Dios axin bꞌan taca y que machi war intojya tamar. Pero jay ucꞌani ani tuaꞌ incꞌajti tuaꞌ intacarna umen que war inchecsu uyojroner e Dios axin, entonces acꞌapa ani tunor e tzayer lo que ayan tama niwalma. Y tamar era más ani bueno taniut tuaꞌ inchamay umen que ma tzꞌacar lo que incꞌani que acꞌapa e tzayer lo que ayan tama niwalma era.
1CO 9:16 Pues nen machi imbꞌijnu tuaꞌ intꞌabꞌse nibꞌa umen que war inchecsu uyojroner e Dios tama e corpesiaj axin porque war inche tunor era umen que bꞌan arobꞌnen tuaꞌ inche umen Cawinquirar. ¿Y cocha nic ani jay nen machi inchecsu uyojroner e Dios axin?
1CO 9:17 Pero jay inche tunor upatnar e Dios umen taca que bꞌan imbꞌijnu inche, entonces ucꞌani ani tuaꞌ intojya tamar. Pero cocha war inche tunor era umen que bꞌan arobꞌnen umen e Dios, entonces war inche umen taca que war incꞌupseyan tut jaxir.
1CO 9:18 Entonces machi war intojya taca e tumin, pero ayan lo que war inchꞌami xeꞌ jax e tzayer lo que achecta tama niwalma conda war inchecsu uyojroner e Dios tut e gente. Pues e tzayer era aquetpa bꞌan cocha nituanibꞌir. Y tamar era mamajchi war inware tuaꞌ utacren motor que uyubꞌien ani inturuan tama nipatnar que war inchecsu uyojroner e Dios axin tama Cawinquirar Jesucristo.
1CO 9:19 Pues motor que nen matucꞌa inteꞌ ajyum tama nijor tara tor e rum xeꞌ war uyaren tucꞌa tuaꞌ inche, pero bꞌan inturbꞌa nibꞌa tut e gente axin tuaꞌ uyubꞌien intacriobꞌ acꞌotoyobꞌ tut e Cristo.
1CO 9:20 Y tamar era conda turen tujam e gente xeꞌ tuobꞌ e Israel, nen inturbꞌa nibꞌa bꞌan cocha jaxirobꞌ tuaꞌ uyubꞌien intacriobꞌ acꞌotoy uchꞌamiobꞌ ucꞌabꞌa Cawinquirar Jesucristo. Entonces war inturbꞌa nibꞌa bꞌan cocha inteꞌ xeꞌ turu yebꞌar uley e Moisés conda turen taca e gente xeꞌ tuobꞌ e Israel tuaꞌ uyubꞌien intacriobꞌ. Pues machi turen yebꞌar uley e Moisés coner, pero bꞌan inturbꞌa nibꞌa tuaꞌ intacriobꞌ.
1CO 9:21 Y bꞌan ubꞌan tama e gente xeꞌ majax tuobꞌ e Israel, conda turen tujamobꞌ inturbꞌa nibꞌa bꞌan cocha jaxirobꞌ xeꞌ machi war ubꞌijnuobꞌ jay ayan inteꞌ uley e Moisés pero tuaꞌ taca intacriobꞌ acꞌotoy uchꞌamiobꞌ ucꞌabꞌa Cawinquirar Jesucristo. Pero machi war inwareox que machi war incꞌupseyan tut uley e Dios, porque nen turen yebꞌar uley e Cristo.
1CO 9:22 Y conda turen tujam e gente xeꞌ mato jax nojta ucꞌupesiaj tama Cawinquirar, inturbꞌa nibꞌa bꞌan cocha jaxirobꞌ tuaꞌ uyubꞌien intacriobꞌ aqꞌuecꞌuobꞌ tama ucꞌupesiajobꞌ tama Cawinquirar Jesucristo. Y tamar era war inturbꞌa nibꞌa bꞌan cocha inteꞌ winic xeꞌ majax nojta nicꞌampibꞌir tuaꞌ uyubꞌien intacre cora gente tuaꞌ acꞌotoy tut e Dios.
1CO 9:23 Y war inche tunor era tuaꞌ inwira alocꞌoy imbꞌutz tunor uyojroner e Dios tama e corpesiaj, y tuaꞌ uyubꞌien inchꞌami nen ubꞌan tunor e nuxi chojbꞌesiaj lo que tuaꞌ cajcꞌuna conda cacꞌotoy tut e qꞌuin.
1CO 9:24 Pues nox war inata que tama inteꞌ ajner axin aꞌjniobꞌ meyra winicobꞌ, pero jax taca inteꞌ winic xeꞌ acꞌotoy bꞌajxan xeꞌ tuaꞌ uchꞌami utuanibꞌir. Y bꞌanon non ubꞌan xeꞌ war caxana tama ubꞌir e Dios, ucꞌani tuaꞌ caturbꞌa cabꞌa tuaꞌ cajni meyra tuaꞌ uyubꞌion cachꞌami catuanibꞌir conda cacꞌotoy tut e qꞌuin.
1CO 9:25 Pues tunor tin e cꞌani aꞌjniobꞌ tama inteꞌ ajner ucꞌani tuaꞌ uturbꞌa ubꞌobꞌ tuaꞌ aqꞌuecꞌuobꞌ meyra tuaꞌ uyubꞌiobꞌ aꞌjniobꞌ más wacchetaca, y tamar era usicbꞌobꞌ lo que más bueno tuaꞌ ucꞌuxiobꞌ y machi acarayobꞌ. Y jaxirobꞌ uchiobꞌ tunor era tuaꞌ uyubꞌi uchꞌamiobꞌ inteꞌ utuanibꞌir xeꞌ jax ucꞌabꞌ e sutaj teꞌ xeꞌ uxojyobꞌ tuaꞌ uturbꞌa tama ujor tin e acꞌotoy bꞌajxan tama e ajner era. Pues jaxirobꞌ uchiobꞌ tunor era tuaꞌ uchꞌamiobꞌ lo que acꞌapa wacchetaca, pero non war cajni tama ubꞌir e Dios tuaꞌ cacꞌotoy cachꞌami e cuxtar xeꞌ machi tuaꞌ acꞌapa.
1CO 9:26 Pero nen xeꞌ Pabloen war inturbꞌa nibꞌa tama tunor e checsuyaj lo que inche tama uyojroner e Dios y machi inche bꞌan cocha inteꞌ xeꞌ war aꞌjni xeꞌ machi unata tiaꞌ tuaꞌ acꞌotoy. Y machi war inturbꞌa nibꞌa bꞌan cocha inteꞌ xeꞌ war atzꞌojyi taca otronteꞌ pero xeꞌ machi obꞌna uyajcꞌu e inteꞌ.
1CO 9:27 Pero nen war inche unumse ubꞌa tunor nicuerpo y war inche nicuerpo tuaꞌ ucꞌupsien tama tunor. Y bꞌan war inche tama niwalma ubꞌan tuaꞌ acꞌapa inche tunor lo que ucꞌani Niwinquirar. Porque nen machi cꞌani inquetpa bꞌan cocha inteꞌ xeꞌ ma tawar tuaꞌ uchꞌami e tuanibꞌir conda cꞌapa incanse meyra gente tama uyojroner e Dios.
1CO 10:1 Pues entonces niwermanuox, cꞌani inwareox tuaꞌ machi inajpes lo que numuy tama catata viejobꞌirobꞌ xeꞌ tuon e Israel conda war axanobꞌ tupat e Moisés tama e onian tiempo. Porque tunorobꞌ war axanobꞌ yebꞌar e tocar lo que turbꞌana umen e Dios tuaꞌ ubꞌijresobꞌ, y tamar era tunorobꞌ numuyobꞌ tama e nuxi jaꞌ xeꞌ ucꞌabꞌa e Chacchac Jaꞌ.
1CO 10:2 Y conda numuyobꞌ tama e tocar era y tama e jaꞌ chempa tamarobꞌ lo que lar tacar e chꞌuymar, y tamar era quetpa chequer que tunorobꞌ tuaꞌ axanobꞌ taca e Moisés tic taca tiaꞌ ucꞌani.
1CO 10:3 Y tunor e gente tuaꞌ e Israel xeꞌ war axanobꞌ tupat e Moisés cay ucꞌuxiobꞌ e maná xeꞌ ebꞌtana tari umen e Dios xeꞌ bꞌan cocha ingojr chuchu pan xeꞌ ecmay tari tut e qꞌuin.
1CO 10:4 Y tunorobꞌ cay uyuchꞌiobꞌ e jaꞌ lo que ajcꞌunobꞌ umen e Dios xeꞌ locꞌoy tama ut inteꞌ nuxi tun. Y e tun era bꞌan cocha e Cristo xeꞌ turu tacarobꞌ tic taca tiaꞌ war anumuyobꞌ tama e choquem lugar.
1CO 10:5 Pero motor que cꞌapa uchiobꞌ tunor era taca e Moisés, pero machi war atzay Cadiosir uwira tin e cay uchiobꞌ e mabꞌambꞌanir y tamar era chamayobꞌ meyra gente bꞌan taca tama e choquem lugar.
1CO 10:6 Pues tunor era aquetpa bꞌan cocha inteꞌ checsuyaj ticabꞌa coner tuaꞌ utacrion canata que majax bueno tuaꞌ cosre cache e mabꞌambꞌanir bꞌan cocha cay uchiobꞌ jaxirobꞌ.
1CO 10:7 Y tamar era ira iyujtzꞌi ut e chamen dios nox bꞌan cocha cay uchiobꞌ e gente tama e choquem lugar, porque chꞌar tzꞌijbꞌabꞌir tama uyojroner e Dios que: “E gente era conda cay uyujtzꞌiobꞌ ut inteꞌ chamen dios xeꞌ bꞌan uwirnar cocha inteꞌ wacax cay turuan wiobꞌ y cay oychꞌiobꞌ, y de allí achpobꞌ tuaꞌ acay asiobꞌ taca e ixictac.” Bꞌan chꞌar tzꞌijbꞌabꞌir tama uyojroner e Dios.
1CO 10:8 Y tamar era machi tuaꞌ caxin cose cabꞌa taca e ixictac xeꞌ majax ticabꞌach, y nien e ixictac machi tuaꞌ uyose ubꞌa taca inteꞌ winic xeꞌ majax uviejo, porque bꞌan uchiobꞌ meyra gente tuaꞌ e Israel tama e choquem lugar, y tamar era chamayobꞌ 23,000 tama inteꞌ taca día.
1CO 10:9 Y ma erer cache cocha uchiobꞌ tin e cay uchiobꞌ e mabꞌambꞌanir tama e choquem lugar tuaꞌ uwirobꞌ ani jay aqꞌuijna Cawinquirar uwira tunor era, porque tamar era jaxirobꞌ chamayobꞌ cꞌuxbꞌir umen e sian chan.
1CO 10:10 Y ira ixqꞌuecran upater Cadiosir cocha cay uchiobꞌ e gente tuaꞌ e Israel tama e onian tiempo porque tamar era meyra gente chamesnobꞌ umen e ángel xeꞌ ajcꞌubꞌir ucꞌotorer umen e Dios tuaꞌ achamsan umen que uchiobꞌ cocha era.
1CO 10:11 Pues tunor era lo que numuy tama catata viejobꞌirobꞌ tama e onian tiempo chꞌar tzꞌijbꞌabꞌir tama uyojroner e Dios tuaꞌ aquetpa inteꞌ checsuyaj ticoit coner tuaꞌ utacrion tuaꞌ machi cache non bꞌan cocha cay uchiobꞌ jaxirobꞌ. Porque non era war caturuan tama ucꞌapesnibꞌir tunor era, ya que cꞌanix acꞌapa or e rum era.
1CO 10:12 Pues tunor tin e war ubꞌijnu que war aqꞌuecꞌo awawan tama ubꞌir e Dios uturbꞌic ubꞌa tuaꞌ machi axin acucrema.
1CO 10:13 Porque inteꞌ inteꞌ bꞌijnusiaj lo que oꞌchoy tama cajor tuaꞌ cache lo que mabꞌambꞌan lar cocha war oꞌchoy tama ujorobꞌ tunor e inmojr gente tara tor e rum ubꞌan. Pero erer cacꞌupseyan tama Cadiosir xeꞌ tuaꞌ ucojcon tuaꞌ machi achecta e bꞌijnusiaj tuaꞌ cache e mabꞌambꞌanir xeꞌ más nojta ticoit que machi ani uyubꞌion caqꞌuecꞌo tut. Porque tama e hora conda achecta e mabꞌambꞌan bꞌijnusiaj era watar Cadiosir tuaꞌ uyajcꞌon cocha tuaꞌ calocꞌoy cajni tut tuaꞌ machi cacucrema tamar.
1CO 10:14 Entonces niwermanuox xeꞌ inchoj iut nimener, loqꞌuenic ajner tut e chamen dios tuaꞌ machi iyujtzꞌi ut.
1CO 10:15 Pues war onjron tacarox cocha era porque war innata que nox nojta ijor tama icanuar y que tamar era erer ibꞌijnu iwira tucꞌa imbꞌutz y tucꞌa majax imbꞌutz. Pues nen innata que erer ibꞌijnu iwira que imbꞌutz tunor lo que war inwareox era.
1CO 10:16 Porque conda caxin coychꞌi lo que ayan tama inteꞌ vaso xeꞌ chojbꞌesbꞌir ut y cawajcꞌu gracias Cadiosir tamar, ¿machi ca war caquetpa intera tacar uchꞌichꞌer Cawinquirar Jesucristo? Y conda caxin cacꞌuxi e pan xeꞌ xejra ¿machi ca war caquetpa intera tacar ucuerpo Cawinquirar Jesucristo?
1CO 10:17 Y motor que meyron pero inteꞌ intion war cacꞌuxi inteꞌ taca e pan era, y tamar era tunoron caquetpa intera tacar ucuerpo Cawinquirar Jesucristo.
1CO 10:18 Entonces chꞌujcunic iwira e gente tuaꞌ e Israel, porque tin e war ucꞌuxi lo que quetpa ajcꞌubꞌir tut e altar lo que ayan tama e templo tama e chinam Jerusalem war aquetpobꞌ intera taca e Dios.
1CO 10:19 Pues y bꞌan ubꞌan tama tin e axin ucꞌuxi lo que aquetpa ajcꞌubꞌir tut inteꞌ chamen dios. Pero ¿tucꞌa war inwareox era? ¿War ca inwareox que ayan ucꞌampibꞌir inteꞌ mabꞌambꞌan mein xeꞌ ya turu tacar inteꞌ chamen dios y que atzay uwira lo que aturbꞌana tut? Pues machi.
1CO 10:20 Pero lo que cꞌani inwareox jax era: Que conda inteꞌ xeꞌ machi war acꞌupseyan tama Cawinquirar axin uturbꞌa e wer tut inteꞌ chamen dios que jaxir war uturbꞌa tunor era tut inteꞌ mabꞌambꞌan mein, y majax tut e Dios. Y nen machi incꞌani que ayan tijam tin e war ucꞌuxi e wer era taca tin e war uyujtzꞌiobꞌ ut inteꞌ mabꞌambꞌan mein, porque jay bꞌan ani iche war ixquetpa intera taca e mabꞌambꞌan mein era.
1CO 10:21 Porque ma cocha erer tuaꞌ caxin coychꞌi lo que ayan tama uvaso Cawinquirar y de allí caxin coychꞌi e copa tuaꞌ inteꞌ mabꞌambꞌan mein ubꞌan. Y ma cocha erer tuaꞌ caxin cacꞌuxi e pan tama umesa Cawinquirar y de allí caxin cacꞌuxi lo que ayan tama umesa inteꞌ mabꞌambꞌan mein ubꞌan.
1CO 10:22 ¿O war ca ibꞌijnu tuaꞌ iqꞌuijnes Cawinquirar tuaꞌ utzunliox? ¿O war ca ibꞌijnu que más war ixqꞌuecꞌo nox que Catata Dios?
1CO 10:23 Entonces non tunor erer cabꞌijnu cache, pero majax tunor xeꞌ uwajpi tamaron xeꞌ war caxana tama ubꞌir e Dios. Y ayan lo que matucꞌa ucꞌampibꞌir tuaꞌ cache; erer caxin cache, pero ayan lo que machi utacrion tuaꞌ achꞌiꞌ cacꞌupesiaj.
1CO 10:24 Y tamar era tunoron ucꞌani tuaꞌ cabꞌijnu tamar lo que war cache y cocha tuaꞌ catacre e inmojr tacar era, y machi tuaꞌ cabꞌijnu tamar taca lo que cꞌani cache non tuaꞌ catzayjres cabꞌa.
1CO 10:25 Pues erer icꞌuxi e wer lo que achojna tama e mercado, pero ira iyubꞌi tiaꞌ tari e wer era tuaꞌ machi ibꞌijnu tama tunor era.
1CO 10:26 Porque chꞌar tzꞌijbꞌabꞌir tama uyojroner e Dios que: “Tunor or e rum y tunor lo que ayan tamar jax tuaꞌ Cawinquirar”, xeꞌ che tama uyojroner e Dios.
1CO 10:27 Entonces jay ayan chi upejcox tuaꞌ ixyopa ixweꞌ tacarobꞌ xeꞌ machi war axanobꞌ tama ubꞌir e Dios y nox ibꞌijnu tuaꞌ ixixin, pues cꞌuxic tunor lo que uyajcꞌox y ira iyubꞌi tiaꞌ tari e wer era tuaꞌ machi ayobꞌna iwalma.
1CO 10:28 Pero jay ayan chi ayopa toit y uyaret y che: “E wer era ajcꞌubꞌir tut inteꞌ chamen Dios”, entonces ma erer acꞌuxi e wer era tuaꞌ machi ayobꞌi uyalma xeꞌ cay uyaret tamar.
1CO 10:29 Pero machi war imbꞌijnu jay cꞌani ani ayobꞌna iwalma nox sino que war imbꞌijnu tamar uyalma otronteꞌ, y tamar era ma erer icꞌuxi e wer era. Pero bꞌajcꞌat ayopa inteꞌ toit xeꞌ uyaret y che: “Pues jay nen ayan lo que cꞌani inxin inche, ¿tucꞌa tuaꞌ ucꞌani tuaꞌ imbꞌijnu jay imbꞌutz o jay majax imbꞌutz tut otronteꞌ?
1CO 10:30 Y jay war intattzꞌi ucꞌabꞌa e Dios tama e wer lo que war incꞌuxi era, ¿tucꞌa tuaꞌ cꞌani ucꞌayen otronteꞌ tamar lo que war incꞌuxi?” xeꞌ che inteꞌ.
1CO 10:31 Pero non, tunor lo que caxin cache ucꞌani tuaꞌ cache tuaꞌ catattzꞌi ucꞌabꞌa Cadiosir tamar, motor que ayan lo que war cacꞌuxi o motor que ayan lo que war coychꞌi.
1CO 10:32 Y tamar era ira iche lo que erer uche acucrema nien tin e tuobꞌ e Israel, y nien tin e majax tuobꞌ e Israel, y nien tin e tuobꞌ e grupo ajcꞌupesiajobꞌ tama Cadiosir.
1CO 10:33 Pero nen lo que war inche, inturbꞌa nibꞌa tuaꞌ intzayjres axin tunor e gente tama tunor lo que war inche. Y machi war imbꞌijnu tuaꞌ taca intzayjres nibꞌa sino que tuaꞌ intzayjres e inmojr conda axin uwira lo que war inche, porque war incꞌani tuaꞌ acorpesnobꞌ tunor e gente era.
1CO 11:1 Chenic ibꞌa bꞌan cocha nen, porque nen war inturbꞌa nibꞌa tuaꞌ inquetpa bꞌan cocha e Cristo.
1CO 11:2 Pues entonces niwermanuox, cꞌani intzayjresox era umen que war icꞌajpes iraj iraj tunor lo que cay inwareox, y umen que war icojco tunor e canseyaj lo que cay ichꞌami tamaren.
1CO 11:3 Pero cꞌani inwareox era tuaꞌ aquetpa chequer tiut que e Cristo jax ujor tunor e winicobꞌ, y e winic jax ujor uwixcar, y Catata Dios jax ujor e Cristo.
1CO 11:4 Y tamar era jay inteꞌ winic axin umaqui ujor conda war ucꞌajti taca e Dios o conda war uchecsu tut e gente lo que arobꞌna umen e Dios, pues subꞌar tunor era tut e Cristo xeꞌ jax ujor.
1CO 11:5 Pero jay inteꞌ ixic machi umaqui ujor conda war ucꞌajti taca e Dios tama inteꞌ servicio o conda war uchecsu tut e gente lo que arobꞌna umen e Dios, pues subꞌar tunor era tut tin e aquetpa tujor jaxir xeꞌ jax uviejo. Pues inteꞌ ixic xeꞌ uche cocha era aquetpa lar cocha jay acꞌapa uxuri tunor utzutzer ujor inyajrer.
1CO 11:6 Entonces jay inteꞌ ixic machi cꞌani umaqui ujor, más ani bueno tuaꞌ ususi tunor utzutzer ujor inyajrer. Pero jay subꞌar unata inteꞌ ixic tuaꞌ asujsa tunor utzutzer ujor, entonces umaquic ujor conda axin tama inteꞌ servicio.
1CO 11:7 Pero inteꞌ winic machix tuaꞌ umaqui ujor conda turu tama inteꞌ servicio tuaꞌ aquetpa galan uwirnar umen que chena bꞌan cocha uwirnar utawarer Catata Dios. Pero tama inteꞌ ixic aquetpa chequer uchecsuyaj inteꞌ winic umen que tama e winic locꞌoy.
1CO 11:8 Porque e bꞌajxan winic chena umen e Dios y machi tari tama inteꞌ ixic, sino que e bꞌajxan ixic chena umen e Dios tama e winic era.
1CO 11:9 Pues e winic chena umen e Dios majax tuaꞌ utacre e ixic, sino que e ixic chena tuaꞌ utacre e winic.
1CO 11:10 Y tamar era inteꞌ ixic ucꞌani tuaꞌ umaqui ujor conda axin tama inteꞌ servicio tuaꞌ aquetpa chequer que jaxir turu yebꞌar ucꞌotorer uviejo y umen que turobꞌ e angelobꞌ ticawejtzꞌer.
1CO 11:11 Pero tama upatnar Cawinquirar ma erer ubꞌijnuobꞌ e ixictac que jaxobꞌ taca tuaꞌ apatnobꞌ, porque ucꞌaniobꞌ utacarsiaj e winicobꞌ ubꞌan. Y e winicobꞌ ma erer ubꞌijnuobꞌ que ubꞌajnerobꞌ tuaꞌ uchiobꞌ tunor upatnar e Dios, porque ucꞌaniobꞌ utacarsiaj e ixictac ubꞌan.
1CO 11:12 Pues bꞌan cocha locꞌoy chena e bꞌajxan ixic tama inteꞌ winic y bꞌan ubꞌan coner que e winic acuxpa tama inteꞌ ixic, pero tunor lo que ayan tari tama Cadiosir.
1CO 11:13 Entonces bꞌijnunic nox jay imbꞌutz tiut tuaꞌ ucꞌajti taca e Dios inteꞌ ixic tama inteꞌ servicio xeꞌ pasar ujor.
1CO 11:14 Pues e gente tara tor e rum ubꞌijnuobꞌ que jay inteꞌ winic uyacta achꞌiꞌ utzutzer ujor que subꞌar tunor era.
1CO 11:15 Pero e gente era ubꞌijnuobꞌ ubꞌan que jay inteꞌ ixic uyacta achꞌiꞌ utzutzer ujor jax era utawarer. Porque utzutzer ujor era ajcꞌubꞌirobꞌ e ixictac umen e Dios tuaꞌ umaquiobꞌ ujor tamar.
1CO 11:16 Pero jay ayan tin e cꞌani oꞌjron tama tunor era, ucꞌani tuaꞌ unata que jax taca war achena nimener y umen inteꞌ inteꞌ grupo ajcꞌupesiajobꞌ tuaꞌ e Dios tama tunor or e lugar era y que matucꞌa más cabꞌijnusiaj tama inteꞌ servicio.
1CO 11:17 Pues entonces tamar lo que ucꞌani tuaꞌ inwareox era ma erer intattzꞌiox tamar lo que war iche tama inteꞌ servicio, porque e gente machi war atacarnobꞌ tama inteꞌ servicio tibꞌa.
1CO 11:18 Porque ayan tin e cay uyaren que conda imorojse ibꞌa tama inteꞌ servicio que ayan tin e war uxere ubꞌobꞌ tama igrupo xeꞌ ajcꞌupesiajox, y nen war incꞌupse cora que bꞌan war anumuy.
1CO 11:19 Pues bꞌan ani ucꞌani tuaꞌ iche tuaꞌ uyubꞌi aquetpa chequer chi chi xeꞌ war axana cocha ucꞌani e Dios y chi xeꞌ majax bueno war axanobꞌ.
1CO 11:20 Y tamar era conda imorojse ibꞌa tuaꞌ icꞌuxi e Santa Cena mix jax cena tuaꞌ Cawinquirar war icꞌuxi sino que jax taca lo que ibꞌijnu iche.
1CO 11:21 Porque conda imorojse ibꞌa cocha era tuaꞌ icꞌuxi e Santa Cena ayan tin e intaca acay ucꞌuxi lo que utares este que abꞌutcꞌa unacꞌobꞌ. Pero ayan e inmojr xeꞌ aquetpobꞌ que war awinobꞌ, y ayan tin e war oychꞌiobꞌ este que acarayobꞌ.
1CO 11:22 Pues ¿ma ca tucꞌa iyotot tiaꞌ erer ixweꞌ y tiaꞌ erer iyuchꞌi? Porque tama tunor lo que war iche era war ichoqui utawarer e grupo ajcꞌupesiajobꞌ tama Cadiosir y war isubꞌajres tin e matucꞌa ayan tacar. ¿O war ca ibꞌijnu que nen war intzay tamar lo que war iche era? Pues nen machix. Y ma cocha erer intattzꞌiox tama tunor era.
1CO 11:23 Pues cꞌani incansiox era bꞌan cocha canoen tama Niwinquirar, porque tama e acbꞌar conda turix tuaꞌ atujchꞌa Cawinquirar Jesús umen e Judas jaxir uchꞌami e pan tama ucꞌabꞌ,
1CO 11:24 y conda cꞌapa uyajcꞌu gracias e Dios, cay uxere y uyare uyajcanuarobꞌ y che: “Cꞌuxic e pan era xeꞌ jax uwerir nicuerpo xeꞌ ajcꞌubꞌir tibꞌa. Chenic tunor era tuaꞌ icꞌajpesen tamar”, che Cawinquirar.
1CO 11:25 Y otronyajrto conda cꞌapa wiobꞌ, ixin Cawinquirar Jesús y uchꞌami e chꞌeu tama ucꞌabꞌ y che: “Lo que ayan tama e chꞌeu era jax tuaꞌ uchectes tiut que ayan inteꞌ pacto xeꞌ imbꞌutz tacarox. Y tic taca tiaꞌ iyuchꞌi e chꞌeu era, chenic tuaꞌ icꞌajpesen tamar”, che Cawinquirar.
1CO 11:26 Y tamar era tic taca tiaꞌ icꞌuxi e pan era y iyuchꞌi lo que ayan tama e chꞌeu nox war ichecsu uchamer Cawinquirar tut e gente axin este que asutpa watar otronyajr.
1CO 11:27 Entonces cꞌani inwareox era que tin e axin ucꞌuxi e pan era y uyuchꞌi lo que ayan tama e chꞌeu era conda ayanto e mabꞌambꞌanir tama uyalma que mato jax checsubꞌir tut e Dios, jaxir war uche e mabꞌambꞌanir upater ucuerpo y upater uchꞌichꞌer Cawinquirar.
1CO 11:28 Y tamar era inteꞌ intion ucꞌani tuaꞌ cabꞌijnu cawira tamar lo que ayan tama cawalma tuaꞌ aquetpa imbꞌutz tunor era tut e Dios, y de allí erer cacꞌuxi e pan y coychꞌi lo que ayan tama e chꞌeu era.
1CO 11:29 Porque tin e axin ucꞌuxi e pan tuaꞌ Cawinquirar y uyuchꞌi lo que ayan tama e chꞌeu era bꞌan taca y machi ubꞌijnu jay ayan ucꞌampibꞌir tunor uchamer ucuerpo Cawinquirar jaxach war utares uqꞌuijnar e Dios tujor.
1CO 11:30 Pues tamar era ayan tijam tin e ajmuac y ayan tin e injayjay y ayan tin e cꞌapa chamayobꞌ ubꞌan.
1CO 11:31 Pero jay non cabꞌijnu cawira tamar lo que ayan tama cawalma entonces machi tuaꞌ acꞌaxi uqꞌuijnar e Dios ticajor.
1CO 11:32 Pero jay machi cabꞌijnu cawira tamar lo que ayan tama cawalma xeꞌ majax imbꞌutz tut e Dios, entonces Cawinquirar axin aqꞌuijna capater, y tamar era axin uwatzꞌion este que cawacta cache lo que majax imbꞌutz tut tuaꞌ machi casatpa taca e gente tara tor e rum.
1CO 11:33 Entonces niwermanuox, conda imorojse ibꞌa tuaꞌ icꞌuxi e Santa Cena tuaꞌ Cawinquirar cojconic ibꞌa inteꞌ intiox tuaꞌ ichꞌami intarer.
1CO 11:34 Y jay ayan chi xeꞌ war aytzꞌa, wec tama uyotot tuaꞌ machi acꞌaxi uqꞌuijnar e Dios tama ijor umen que machi war iche lo que imbꞌutz conda war imorojse ibꞌa. Pues ayanto más tuaꞌ inwareox pero cꞌani inwacta bꞌan taca era este que incꞌotoy inwarajsiox.
1CO 12:1 Pues entonces niwermanuox, ayan lo que cꞌani incansiox tamar cacꞌampibꞌir lo que ajcꞌunon inteꞌ intion umen Unawalir e Dios.
1CO 12:2 Pues nox war inata que conda machito ichꞌami ucꞌabꞌa Cawinquirar Jesucristo que nox cay iturbꞌa ibꞌa tuaꞌ iyujtzꞌi ut e sian chamen dios xeꞌ machi oꞌjron.
1CO 12:3 Y tamar era quisinic inata que tin e axin oꞌjron upater Cawinquirar Jesucristo y che: “¡Bꞌaxbꞌir ucꞌani e Jesús!” ma cocha erer oꞌjron cocha era taca utacarsiaj Unawalir e Dios. Y mamajchi erer oꞌjron y che: “¡E Jesús jax Niwinquirar!” jay machi war atacarna umen Unawalir e Dios.
1CO 12:4 Pues ayan meyra cꞌampibꞌir lo que erer cajcꞌuna umen Unawalir e Dios, y inteꞌ intion intiach cacꞌampibꞌir lo que cachꞌami, pero inteꞌ taca Unawalir e Dios xeꞌ axin uyajcꞌon tunor era.
1CO 12:5 Y ayan ayan lo que erer cache tuaꞌ catacre tin e turobꞌ ticawejtzꞌer, pero inteꞌ taca Cawinquirar xeꞌ war cojytzꞌi ut.
1CO 12:6 Y ayan ayan cocha erer tuaꞌ ucꞌampeson Cadiosir, pero inteꞌ taca Cadiosir xeꞌ war uyajcꞌon cacꞌampibꞌir inteꞌ intion tuaꞌ cache tunor upatnar era.
1CO 12:7 Y Unawalir e Dios axin uchecsu ubꞌa tama cawalma inteꞌ intion tuaꞌ utacrion.
1CO 12:8 Y jax Unawalir e Dios era ubꞌan xeꞌ axin uyajcꞌu cacꞌampibꞌir inteꞌ intion xeꞌ ajcꞌupesiajon. Ayan tin e ajcꞌunobꞌ ucꞌampibꞌir tuaꞌ oꞌjronobꞌ taca unatanyaj e Dios. Y ayan tin e ajcꞌunobꞌ ucꞌampibꞌir tuaꞌ unatobꞌ meyra tuaꞌ e Dios que erer asutpa uchecsuobꞌ tut e inmojr ajcꞌupesiajobꞌ tama Cawinquirar.
1CO 12:9 Y ayan tin e ajcꞌunobꞌ tuaꞌ acꞌupseyanobꞌ meyra tama e Dios tuaꞌ asutpa utacriobꞌ umaxtac e Dios, y ayan tin e ajcꞌunobꞌ ucꞌotorer tuaꞌ axin utzꞌacpesobꞌ tin e ajmuacobꞌ.
1CO 12:10 Y ayan tin e ajcꞌunobꞌ ucꞌotorer tuaꞌ axin uchiobꞌ e sian milagro. Y ayan tin e ajcꞌunobꞌ ucꞌampibꞌir tuaꞌ asutpa uyare e gente lo que arobꞌnobꞌ umen e Dios. Y ayan tin e ajcꞌunobꞌ ucꞌampibꞌir tuaꞌ acꞌotoy unatobꞌ jay jax inteꞌ mabꞌambꞌan mein o jay jax Unawalir e Dios lo que ayan tama inteꞌ. Y ayan tin e ajcꞌunobꞌ ucꞌampibꞌir tuaꞌ oꞌjronobꞌ lo que arobꞌnobꞌ umen e Dios pero tama inteꞌ ojroner xeꞌ ma tiaꞌ ixin cano ojron tamar. Y ayan tin e ajcꞌunobꞌ ucꞌampibꞌir tuaꞌ uchectesobꞌ tut e gente lo que war che inteꞌ ojroner cocha era xeꞌ arobꞌna tama inteꞌ ojroner xeꞌ majax tuach inteꞌ.
1CO 12:11 Pero jax Unawalir e Dios xeꞌ inteꞌ taca ayan xeꞌ war uche tunor era tuaꞌ uyajcꞌon cacꞌampibꞌir inteꞌ intion. Y jaxir uyajcꞌu inteꞌ inteꞌ ajcꞌupesiaj ucꞌampibꞌir bꞌan cocha ucꞌani jaxir.
1CO 12:12 Pues entonces tunoron xeꞌ ajcꞌupesiajon tama Cawinquirar Jesucristo bꞌanon cocha ucuerpo e Cristo tara tor e rum xeꞌ ayan meyra ucꞌampesnar. Y motor que ayan meyra ucꞌampesnar, pero aquetpa inteꞌ taca ucuerpo.
1CO 12:13 Y tunoron xeꞌ war cacꞌupseyan tama Cawinquirar Jesucristo, motor jay tuon e Israel, o motor jay majax tuon e Israel, o motor jay ayan cawajyum o jay matucꞌa, pero tunoron chꞌujyon umen Unawalir e Dios tuaꞌ caquetpa intera cuerpo tama Cawinquirar Jesucristo. Y inteꞌ intion ajcꞌunon ucꞌotorer Unawalir e Dios xeꞌ inteꞌ taca ayan.
1CO 12:14 Pues tama ucuerpo inteꞌ majax jax taca inteꞌ ucꞌampibꞌir, sino que meyra ucꞌampibꞌir.
1CO 12:15 Y jay oꞌjron ani uyoc inteꞌ y che: “Nen majaxen tuaꞌ e cuerpo era porque majaxen inteꞌ cꞌabꞌ”, xeꞌ che ani uyoc inteꞌ. Y motor que oꞌjron ani cocha era pero e oc machi uyubꞌi ulocse ubꞌa najtir tama e cuerpo.
1CO 12:16 Y jay oꞌjron ani uchiquin inteꞌ y che: “Nen majaxen tuaꞌ e cuerpo porque majaxen inteꞌ nacꞌut”, xeꞌ che ani uchiquin inteꞌ. Y motor que oꞌjron ani cocha era pero e chiquin machi uyubꞌi ulocse ubꞌa najtir tama e cuerpo.
1CO 12:17 Y jay tunor e cuerpo era jax taca ani ayan inteꞌ unacꞌut ¿cocha ani tuaꞌ uyubꞌi? Y jay tunor e cuerpo era jax taca ani ayan inteꞌ uchiquin ¿cocha ani tuaꞌ uyubꞌi ojytzꞌian?
1CO 12:18 Pero Cadiosir ixin uyustes e cuerpo era tuaꞌ aquetpa inteꞌ inteꞌ parte bꞌan taca tiaꞌ ucꞌani jaxir.
1CO 12:19 Pero jay inteꞌ taca parte ayan tamar ucuerpo inteꞌ, entonces majax jax inteꞌ cuerpo ani, cocha inteꞌ taca parte ayan.
1CO 12:20 Porque lo que catajwi jax era: Que motor que meyra parte ayan tama ucuerpo inteꞌ, pero inteꞌ taca cuerpo xeꞌ cawira tamar.
1CO 12:21 Entonces jay erer ani oꞌjron inteꞌ unacꞌut inteꞌ, pero ma erer uyare ucꞌabꞌ y che: “Nen machi incꞌaniet.” Y jay erer ani oꞌjron inteꞌ ujor inteꞌ, pero ma erer uyare uyoc y che: “Nen machi incꞌaniet.”
1CO 12:22 Porque inteꞌ parte tuaꞌ ucuerpo inteꞌ xeꞌ cabꞌijnu que más injayjay, conda acꞌapa tunor más ayan ucꞌampibꞌir.
1CO 12:23 Y ayan cora parte tama cacuerpo que cabꞌijnu que majax meyra ucꞌampibꞌir, pero jax e parte xeꞌ más war cacojco tama tunor. Y ayan e parte tama cacuerpo xeꞌ war cacojco bien tuaꞌ machi aquetpa chequer tut e gente.
1CO 12:24 Y ayan e parte tama cacuerpo que erer aquetpa chequer tut e gente. Y bꞌan cocha era uche Cadiosir tama cacuerpo que e parte que cabꞌijnu que majax meyra ucꞌampibꞌir jax xeꞌ aquetpa tuaꞌ uchꞌami más utawarer.
1CO 12:25 Y tamar era machi uyubꞌi tuaꞌ uxere ubꞌa ucuerpo inteꞌ sino que inteꞌ inteꞌ parte ucꞌani tuaꞌ ubꞌijnu ucojco e inmojr parte tama ucuerpo.
1CO 12:26 Y jay axin acꞌuxun inteꞌ parte tama cacuerpo, entonces axin acꞌuxun tunor cacuerpo ubꞌan. Y jay axin atajttzꞌa inteꞌ parte tama cacuerpo, entonces axin atzay tunor cacuerpo tacar ubꞌan.
1CO 12:27 Pues entonces niwermanuox, inteꞌ intion tuon e Cristo, y inteꞌ intion caquetpa inteꞌ parte tama cacuerpo.
1CO 12:28 Y tamar era canata que Cadiosir ixin uyajcꞌu ucꞌampibꞌirobꞌ más nojta cora hermanuobꞌ tujam e sian grupo ajcꞌupesiajobꞌ. Pues ayan tin e aquetpobꞌ apóstol, y ayan tin e aquetpobꞌ tuaꞌ uchꞌamiobꞌ inteꞌ ojroner tuaꞌ e Dios y tuaꞌ asutpa uyareobꞌ e gente otronyajr. Y ayan tin e ajcanseyajobꞌ tamar uyojroner e Dios, y ayan tin e aꞌjcꞌunobꞌ ucꞌotorer tuaꞌ uche e sian milagro, y ayan tin e aꞌjcꞌunobꞌ ucꞌotorer tuaꞌ axin utzꞌacpesobꞌ tin e ajmuac, y ayan tin e aꞌjcꞌunobꞌ tuaꞌ ubꞌijres upatnar e Dios, y ayan tin e aꞌjcꞌunobꞌ ucꞌampibꞌir tuaꞌ uyajcꞌu inteꞌ ojroner xeꞌ tuaꞌ e Dios pero tama inteꞌ ojroner xeꞌ ma tiaꞌ cano ojron tamar.
1CO 12:29 O ¿apostolon ca tunoron? Machi. O ¿tunoron ca xeꞌ erer cachꞌami inteꞌ ojroner tuaꞌ e Dios y asutpa caware e inmojr ajcꞌupesiajobꞌ otronyajr? Machi. O ¿tunoron ca xeꞌ caquetpa ajcanseyajon tamar uyojroner e Dios? Machi. O ¿ayan ca cacꞌotorer tunoron tuaꞌ cache e milagro? Machi.
1CO 12:30 O ¿ayan ca cacꞌotorer tunoron tuaꞌ catzꞌacpes tin e ajmuac? Machi. O ¿erer ca caxin tunoron cawajcꞌu inteꞌ ojroner xeꞌ tuaꞌ e Dios pero tama inteꞌ ojroner xeꞌ ma tiaꞌ canuon cojron tamar? Machi. O ¿erer ca caxin cachecsu tunoron lo que war che inteꞌ ojroner cocha era xeꞌ ajcꞌuna tama inteꞌ ojroner xeꞌ ma tiaꞌ canuon cojron tamar? Pues chequer que majax tunoron xeꞌ uyubꞌion cache tunor era.
1CO 12:31 Bꞌijnunic entonces niwermanuox, tuaꞌ ichꞌami icꞌampibꞌir xeꞌ más nojta tama e Dios. Pero nen era cꞌani inwirsiox inteꞌ bꞌir xeꞌ más ayan ucꞌampibꞌir tama tunor.
1CO 13:1 Pues tunoron ucꞌani tuaꞌ cawirse tunor e gente axin que non ayan ucꞌunersiaj e Dios tamaron. Pero jay nen erer ani onjron tama meyra ojroner tuaꞌ e winicobꞌ tara tor e rum o esto inxin onjron ani tama e ojroner xeꞌ tuaꞌ e angelobꞌ, pero jay tamaren matucꞌa ucꞌunersiaj e Dios entonces matucꞌa ucꞌampibꞌir tunor era y tunor e ojroner era aquetpa lar tacar conda aꞌjca inteꞌ nuxi taqꞌuin.
1CO 13:2 Y motor que nen erer inchꞌami inteꞌ ojroner tuaꞌ e Dios y insutpa inchecsu tut e inmojr ajcꞌupesiajobꞌ otronyajr, y motor que nen innata tunor lo que mucur tut e inmojr umen que e Dios uwirsen, y motor que nen innata meyra tama tunor umen que e Dios ucansen, y motor que nen meyra ayan nicꞌupesiaj tama e Dios este que erer inware inteꞌ nuxi witzir tuaꞌ atobꞌoy axin esto tama e jaꞌ y axin uche, pero motor que uyubꞌien inche tunor era pero jay matucꞌa ucꞌunersiaj e Dios tamaren xeꞌ chequer tut e gente axin, entonces nen matucꞌa nicꞌampibꞌir.
1CO 13:3 Y motor que inxin inxere inwajcꞌu tunor lo que ayan ani tanibꞌa tuaꞌ intacre tin e tzajtaca ut, y motor que inxin inwajcꞌu esto tunor nicuerpo tuaꞌ impurutna tuaꞌ intacre otronteꞌ, pero jay tama tunor era matucꞌa ucꞌunersiaj e Dios tamaren xeꞌ chequer tut e gente axin, entonces nen ani matucꞌa nicꞌampibꞌir y matucꞌa ucꞌampibꞌir tunor lo que cꞌapa inche ani.
1CO 13:4 Pues tunor tin e ayan ucꞌunersiaj e Dios tamar unata ucojco ubꞌa, y aquetpa incꞌun uwirnar, y machi tuaꞌ acꞌuxnaqꞌui uwira lo que ayan tuaꞌ otronteꞌ. Y tin e ayan ucꞌunersiaj e Dios tamar machi tuaꞌ ubꞌijnu que: “Otronteꞌ cocha nen matucꞌa”, y machi tuaꞌ ubꞌijnu que jax taca jaxir xeꞌ ayan ucꞌampibꞌir.
1CO 13:5 Y tin e ayan ucꞌunersiaj e Dios tamar machi tuaꞌ axin uqꞌuijnes e gente axin, y machi tuaꞌ uyusre uchꞌami tunor lo que uwira, y machi aqꞌuijna iraj iraj. Y tin e ayan ucꞌunersiaj e Dios tamar machi utꞌabꞌse e qꞌuijnar tama uyalma tamar lo que chena upater.
1CO 13:6 Y tin e ayan ucꞌunersiaj e Dios tamar machix tuaꞌ atzay uwira que war uche e mabꞌambꞌanir otronteꞌ, sino que cꞌani atzay uwira lo que uche xeꞌ erach otronteꞌ.
1CO 13:7 Y tin e ayan ucꞌunersiaj e Dios tamar taric lo que taric machix tuaꞌ oꞌjron upater inteꞌ upiar y che: “Pero matucꞌa ucꞌampibꞌir nipiar era”, sino que war acꞌupseyan tama e Dios que machi tuaꞌ asatpa upiar era. Y tin e ayan ucꞌunersiaj e Dios tamar cꞌani ucojco que cꞌani alocꞌoy bueno tunor lo que war uche upiar era, y ma tiaꞌ tuaꞌ uchꞌami inteꞌ ojroner upater upiar era.
1CO 13:8 Pues ucꞌunersiaj e Dios lo que ayan tamaron ma tiaꞌ tuaꞌ acꞌapa. Pero conda watar e tiempo conda asutpa watar Cawinquirar cꞌani acꞌapa tunor ucꞌampibꞌir tin e uyubꞌi uchꞌami inteꞌ ojroner tuaꞌ e Dios y asutpa uyare e gente otronyajr, y cꞌani acꞌapa ucꞌampibꞌir tin e uyubꞌi oꞌjron tama inteꞌ ojroner xeꞌ ma tiaꞌ cano oꞌjron tamar, y cꞌani acꞌapa tunor ucꞌampibꞌir tin e acꞌotoy unata meyra tuaꞌ e Dios tuaꞌ asutpa ucanse e gente otronyajr.
1CO 13:9 Porque coner imbꞌijc taca war canata tama tunor, y imbꞌijc taca war cachecsu tut e gente axin tamar lo que ucꞌani e Dios ubꞌan.
1CO 13:10 Pero conda acꞌotoy achecta lo que erach inyajrer tuaꞌ e Dios, entonces lo que imbꞌijc taca war canata cꞌani acꞌapa.
1CO 13:11 Pues conda nen maxtaquento cay ojronen bꞌan taca cocha inteꞌ chuchu maxtac, y cay imbꞌijnu bꞌan cocha uche inteꞌ bꞌiqꞌuit maxtac. Pero conda cꞌapa chꞌien y quetpen inteꞌ nuxi winic, cꞌapa inwacta tunor lo que cay inche conda maxtaquento.
1CO 13:12 Y bꞌan tamar lo que erer canata tama e Dios, coner aquetpa bꞌan cocha conda war cawira cabꞌa tama inteꞌ espejo xeꞌ bꞌonem ut. Pero conda asutpa watar Cawinquirar Jesucristo otronyajr cꞌani cawira ut Catata Dios bꞌan cocha turu jaxir, y tamar era machi ixto tuaꞌ aquetpa intran ticoit tuaꞌ canata tunor tama Cadiosir. Pues lo que war innata tama e Dios coner imbꞌijc taca, pero watar e día conda cꞌani acꞌapa innata tunor tamar jaxir inyajrer. Y bꞌan cocha Cadiosir war unata tunor lo que ayan tamaron coner y bꞌan tuaꞌ cacꞌotoy canata tunor lo que ayan tama e Dios watar e día.
1CO 13:13 Y tamar era erer canata que ayan uxteꞌ lo que machi tuaꞌ acꞌapa xeꞌ jax e cꞌupesiaj tama e Dios, y e cojcsiaj tuaꞌ catacarna umen e Dios, y e cꞌunersiaj tut capiarobꞌ. Pero lo que más ayan ucꞌampibꞌir tama e uxteꞌ era jax e cꞌunersiaj tut capiarobꞌ.
1CO 14:1 Pues entonces casicbꞌanic más ut e Dios tuaꞌ aquetpa más chequer que ayan ucꞌunersiaj e Dios tamaron, pero caturbꞌanic cabꞌa ubꞌan tuaꞌ cachꞌami cacꞌampibꞌir nawalbꞌir tuaꞌ e Dios, pero xeꞌ más tuaꞌ caturbꞌa cabꞌa tuaꞌ cachꞌami jax cacꞌampibꞌir tuaꞌ uyubꞌion cachꞌami inteꞌ ojroner tuaꞌ e Dios y tuaꞌ casutpa cachecsu tunor era tut e inmojr ajcꞌupesiajobꞌ.
1CO 14:2 Pero tin e aꞌjcꞌuna ucꞌampibꞌir nawalbꞌir tuaꞌ oꞌjron tama inteꞌ ojroner xeꞌ ma tiaꞌ cano oꞌjron tamar, machi war upejca e winicobꞌ sino que e Dios, porque mamajchi uyubꞌi unata tucꞌa war che tunor e ojroner era. Y tunor e ojroner xeꞌ oꞌjron cocha era inteꞌ ajcꞌubꞌir umen Unawalir e Dios, pero aquetpa mucur tunor era tut e inmojr y tut tin e war oꞌjron era ubꞌan.
1CO 14:3 Pero tin e uchꞌami inteꞌ ojroner tuaꞌ e Dios y asutpa uchecsu tunor era tut e inmojr ajcꞌupesiajobꞌ war utacre e inmojr era tuaꞌ achꞌiobꞌ tamar ucꞌupesiajobꞌ y war utꞌabꞌse uyalmobꞌ y war ucꞌunles uyalmobꞌ inteꞌ inteꞌ.
1CO 14:4 Pues tin e axin oꞌjron tama inteꞌ ojroner xeꞌ ma tiaꞌ cano oꞌjron tamar, jax taca jaxir war uqꞌuecꞌojse ubꞌa tama uyalma. Pero tin e axin uchꞌami inteꞌ ojroner tuaꞌ e Dios y asutpa uchecsu tunor era tut e inmojr, war uqꞌuecꞌojse axanobꞌ tama ubꞌir e Dios tunor e inmojr hermanuobꞌ era tama e grupo ajcꞌupesiajobꞌ.
1CO 14:5 Pues nen quisinic que tunorox uyubꞌiox ixojron ani tama inteꞌ ojroner xeꞌ ma tiaꞌ canuox ixojron tamar, pero nen más war incꞌani que tunorox uyubꞌiox ichꞌami ani inteꞌ ojroner tuaꞌ e Dios tuaꞌ ixsutpa ichecsu tunor era tut e inmojr. Pues más ayan ucꞌampibꞌir tuaꞌ iche cocha era que jay axin inteꞌ oꞌjron meyra tama inteꞌ ojroner xeꞌ ma tiaꞌ cano oꞌjron tamar. Pero ayan ucꞌampibꞌir e ojroner era jay ayan chi xeꞌ erer uchecsu tucꞌa war che tunor era tut e grupo ajcꞌupesiajobꞌ, porque tamar era erer atacarnobꞌ tunorobꞌ tuaꞌ aqꞌuecꞌo axanobꞌ tama ubꞌir e Dios.
1CO 14:6 Pues niwermanuox, conda nen incꞌotoy tuaꞌ inwarajsiox, ¿tucꞌa nic tuaꞌ ibꞌijnu jay inxin impejcox tamar taca inteꞌ ojroner xeꞌ ma tiaꞌ canoen onjron tamar? Matucꞌa tuaꞌ inata ani lo que war inwareox. Pero ayan ucꞌampibꞌir tiut jay acay inwareox lo que arobꞌnen umen e Dios, o jay acay inchecsu tiut meyra lo que e Dios uchien innata, o jay inchecsu tiut lo que arobꞌnen umen e Dios, o jay inwajcꞌox inteꞌ canseyaj tuaꞌ e Dios. Pues ayan ucꞌampibꞌir jay inche cocha era.
1CO 14:7 Pues erer cabꞌijnu tama inteꞌ instrumento tuaꞌ e música. O erer cabꞌijnu tama inteꞌ flauta o tama inteꞌ arpa. Pues majax bꞌixir e instrumento era pero ayan ucꞌampibꞌir tut tin e unata alajbꞌa tamar. Pero jay ayan tin e machi unata alajbꞌa tamar, ma chequer tucꞌa lajbꞌar xeꞌ war alocꞌoy tamar, y nien ma chequer tucꞌa cꞌay war uche tamar. Y matucꞌa ucꞌampibꞌir tunor era.
1CO 14:8 Y bꞌan ubꞌan cocha era conda ayan inteꞌ tzꞌojyir. Porque inteꞌ soldado unata que conda alajbꞌa inteꞌ winic tama e trompeta que e lajbꞌar era jax inteꞌ orden, y que jaxir ucꞌani tuaꞌ axin uche lo que arobꞌna tama e trompeta era. Pero jay e winic xeꞌ war alajbꞌa tama e trompeta machi unata tucꞌa war uche, entonces ma chequer tunor era tut e sian soldadobꞌ y machi unatobꞌ tucꞌa tuaꞌ uchiobꞌ. Jax taca war uyubꞌiobꞌ que ayan chi xeꞌ war alajbꞌa tama e trompeta.
1CO 14:9 Y bꞌan anumuy ubꞌan tamarox conda war ixojron, porque jay ayan inteꞌ tijam xeꞌ war oꞌjron tacar inteꞌ xeꞌ machi unata oꞌjron tamar uyojroner, entonces ¿cocha tuaꞌ unata tucꞌa war che tunor era? Entonces war ani oꞌjron tor e icꞌar taca y matucꞌa ucꞌampibꞌir tunor uyojroner era porque ma chequer tut inteꞌ.
1CO 14:10 Y chequer que ayan meyra ojroner tama tunor or e rum coner, y que ayan ucꞌampibꞌir tunorobꞌ, y tin e war oꞌjronobꞌ tamar war unatobꞌ lo que war che inteꞌ inteꞌ ojroner axin.
1CO 14:11 Pero jay nen matucꞌa innata tucꞌa war che xeꞌ war arobꞌna tama inteꞌ ojroner motor que war inteꞌ winic taniut war oꞌjron, entonces jaxir aquetpa taniut bꞌan cocha inteꞌ ajnajtir winic y nen inquetpa bꞌan cocha inteꞌ ajnajtir winic tut jaxir ubꞌan.
1CO 14:12 Y nox cocha war iyusre meyra tuaꞌ ichꞌami icꞌampibꞌir tuaꞌ Unawalir e Dios, turbꞌanic ibꞌa tuaꞌ ichꞌami icꞌampibꞌir lo que más axin utacre e grupo ajcꞌupesiajobꞌ tuaꞌ aqꞌuecꞌo axanobꞌ tama ubꞌir e Dios.
1CO 14:13 Pues inteꞌ hermano xeꞌ ayan ucꞌampibꞌir tuaꞌ axin uchꞌami inteꞌ ojroner tuaꞌ e Dios y asutpa uyare e inmojr ajcꞌupesiajobꞌ pero tama inteꞌ ojroner xeꞌ ma tiaꞌ cano oꞌjron tamar ucꞌani tuaꞌ ucꞌajti meyra taca e Dios tuaꞌ uchꞌami ucꞌampibꞌir ubꞌan tuaꞌ acꞌotoy unata tucꞌa war che tunor e ojroner era tuaꞌ uyubꞌi uchecsu tunor era tut e inmojr hermanuobꞌ.
1CO 14:14 Y jay nen inxin incꞌajti taca e Dios tama inteꞌ ojroner xeꞌ ma tiaꞌ canoen onjron tamar, entonces jax taca niwalma xeꞌ war ucꞌajti taca e Dios pero nijor matucꞌa unata tucꞌa war anumuy tama tunor era y mucur aquetpa tunor e ojroner era taniut.
1CO 14:15 ¿Tucꞌa tuaꞌ inche entonces? Pues nen cꞌani incꞌajti taca e Dios tama inteꞌ ojroner xeꞌ ma tiaꞌ canoen onjron tamar tama niwalma, pero cꞌani incꞌajti taca e Dios taca nijor ubꞌan tama niwojroner. Y cꞌani incꞌaywijres tama inteꞌ ojroner xeꞌ ma tiaꞌ canoen onjron tamar xeꞌ alocꞌoy tama niwalma, pero cꞌani incꞌaywijres tama niwojroner ubꞌan xeꞌ alocꞌoy tama nijor.
1CO 14:16 Porque jay turet tama inteꞌ servicio y war atattzꞌi ucꞌabꞌa e Dios tama inteꞌ ojroner xeꞌ ma tiaꞌ canoet iyojron tamar xeꞌ war alocꞌoy tama awalma, entonces tin e turu tama awejtzꞌer xeꞌ matucꞌa unata tama tunor era machi uyubꞌi tuaꞌ uyare: “Amén”, o “Catattzꞌi ucꞌabꞌa e Dios”, tamar lo que war aware. Porque jaxir matucꞌa unata tucꞌa war che tunor e ojroner era.
1CO 14:17 Y bꞌajcꞌat galan war alocꞌoy tunor lo que war acꞌajti taca e Dios tuaꞌ atattzꞌi ucꞌabꞌa, pero xeꞌ turu tama awejtzꞌer machi axin achꞌiꞌ tama ucꞌupesiaj jay war ache tunor era tama inteꞌ ojroner xeꞌ ma chequer tut jaxir.
1CO 14:18 Pues nen inwajcꞌu gracias e Dios que nen más uyubꞌien onjron tama inteꞌ ojroner xeꞌ ma tiaꞌ canoen onjron tamar más que tunorox.
1CO 14:19 Pero conda turen tama inteꞌ servicio más ani bueno taniut tuaꞌ inxin incansiox tama cinco ut ojroner xeꞌ aquetpa chequer tiut tuaꞌ uyubꞌien incanse e grupo ajcꞌupesiajobꞌ, que jay inxin inwareox este 10,000 ut ojroner tama inteꞌ ojroner xeꞌ ma tiaꞌ canoen onjron tamar xeꞌ ma chequer tiut.
1CO 14:20 Entonces niwermanuox, ira ibꞌijnu bꞌan cocha inteꞌ maxtac xeꞌ machi unata tin e imbꞌutz y tin e mabꞌambꞌan. Pero quetpenic bꞌan cocha inteꞌ maxtac tamar lo que mabꞌambꞌan porque inteꞌ maxtac machi war unata tucꞌa tunor era. Pero quetpenic bꞌan cocha inteꞌ nuquir winic tamar ibꞌijnusiaj porque inteꞌ cocha era war unata tin e imbꞌutz y tin e mabꞌambꞌan.
1CO 14:21 Pues chꞌar tzꞌijbꞌabꞌir tama uley e Moisés y che: “Cꞌani impejca e gente era tama intex ojroner, y cꞌani incꞌampes e gente xeꞌ tuaꞌ intex lugar tuaꞌ impejcobꞌ ubꞌan, pero nien tamar era machi tuaꞌ oꞌbꞌianobꞌ taniut”, che Cawinquirar.
1CO 14:22 Y tamar era erer cawira que e ojroner xeꞌ alocꞌoy tama tin e ayan ucꞌampibꞌir tuaꞌ oꞌjron tama inteꞌ ojroner xeꞌ ma tiaꞌ cano oꞌjron tamar aquetpa bꞌan cocha inteꞌ checsuyaj tuaꞌ ucꞌotorer e Dios tut tin e machi war acꞌupseyanobꞌ tama Cawinquirar, pero tin e war acꞌupseyanobꞌ machi war atacarnobꞌ. Pero e ojroner xeꞌ alocꞌoy tama tin e ayan ucꞌampibꞌir tuaꞌ uchꞌami inteꞌ ojroner tuaꞌ e Dios y tuaꞌ asutpa uchecsu tunor era tut e inmojr axin utacre tin e war acꞌupseyanobꞌ tama Cawinquirar, pero tin e machi war acꞌupseyanobꞌ tama Cawinquirar machi war atacarnobꞌ cocha machi war uchꞌamiobꞌ e ojroner era.
1CO 14:23 Pero conda nox xeꞌ turox tama inteꞌ grupo ajcꞌupesiajox war imorojse ibꞌa tama inteꞌ servicio y jay tunorox acay ixojron tama inteꞌ inteꞌ ojroner xeꞌ ma tiaꞌ canuox ixojron tamar y jay tamar era oꞌchoy cora winicobꞌ xeꞌ matucꞌa unatobꞌ tama tunor era o jay oꞌchoy cora winicobꞌ xeꞌ machi acꞌupseyanobꞌ tama Cawinquirar ¿machi ca axin oꞌjronobꞌ ipater que nox cꞌapa tunor isasaꞌ?
1CO 14:24 Pero jay inteꞌ intiox war ichecsu inteꞌ inteꞌ ojroner xeꞌ ebꞌetbꞌir tari umen e Dios y tamar era oꞌchoy inteꞌ xeꞌ machi acꞌupseyan tama Cawinquirar o jay oꞌchoy inteꞌ xeꞌ matucꞌa unata tama tunor era, entonces jaxirobꞌ tuaꞌ acꞌotoy ucꞌupsiobꞌ tama uyalmobꞌ que jaxirobꞌ ayan umabꞌambꞌanirobꞌ y que ucꞌani tuaꞌ uyactobꞌ tunor era conda uyubꞌiobꞌ lo que nox war iware era.
1CO 14:25 Y tamar era tunor lo que aquetpa mucur tama uyalmobꞌ e winicobꞌ era cꞌani aquetpa chequer tutobꞌ y tamar era axin acotuanobꞌ tuaꞌ uyujtzꞌiobꞌ ut e Dios y tuaꞌ axin uchecsuobꞌ que chequer que turu e Dios tacarox.
1CO 14:26 Pues entonces niwermanuox, lo que war anumuy jax era: Que conda imorojse ibꞌa tama inteꞌ servicio ayan tin e cꞌani ucꞌaywijres inteꞌ cꞌaywar, y ayan tin e ayan inteꞌ canseyaj xeꞌ cꞌani uchecsu tut e gente, y ayan tin e uchꞌami inteꞌ ojroner tuaꞌ e Dios que cꞌani uchecsu tut e gente, y ayan tin e ayan inteꞌ ojroner xeꞌ uchꞌami tuaꞌ e Dios que cꞌani uyare e gente pero tama inteꞌ ojroner xeꞌ ma tiaꞌ cano oꞌjron tamar, y ayanto tin e cꞌani uchecsu tucꞌa war che tunor e ojroner era. Pero tunor lo que achempa tama inteꞌ servicio ucꞌani tuaꞌ aquetpa inteꞌ tacarsiaj tut e ajcꞌupesiajobꞌ tama e grupo era tuaꞌ uyubꞌi axin achꞌiꞌ tunor uyalmobꞌ tamar Cawinquirar.
1CO 14:27 Y conda ayan tin e acay uchecsu inteꞌ ojroner tuaꞌ e Dios tama inteꞌ ojroner xeꞌ ma tiaꞌ cano oꞌjron tamar, pues erer oꞌjron inteꞌ o chateꞌ o uxteꞌ, pero ma erer oꞌjron otronteꞌ este que acꞌapa oꞌjron inteꞌ. Y conda acꞌapa oꞌjron inteꞌ cocha era ucꞌani tuaꞌ achecsuna tut e gente umener o umen otronteꞌ lo que war che tunor e ojroner era tuaꞌ machi aquetpa mucur. Y bꞌan tuaꞌ achempa tama inteꞌ inteꞌ ojroner cocha era.
1CO 14:28 Pero jay mamajchi turu tama e servicio era tin e uyubꞌi uchecsu tucꞌa war che tunor e ojroner era xeꞌ chena tama inteꞌ ojroner xeꞌ ma tiaꞌ cano oꞌjron inteꞌ tamar, entonces tin e cꞌani ani uyajcꞌu e ojroner era machix tuaꞌ uyajcꞌu tama e servicio era sino que jaxir erer ucꞌajti tzꞌustaca taca e Dios cocha era o erer oꞌjron cocha era tama uyalma.
1CO 14:29 Y bꞌan ubꞌan tama tin e uchꞌami inteꞌ ojroner tuaꞌ e Dios y cꞌani asutpa uchecsu tunor era tut e gente, erer oꞌjronobꞌ chateꞌ o uxteꞌ cocha era, pero e inmojr ajcꞌupesiajobꞌ xeꞌ turobꞌ tama e servicio era ucꞌani tuaꞌ ubꞌijnu uwirobꞌ jay tuaꞌ e Dios tunor lo que war aꞌrobꞌna era.
1CO 14:30 Y conda inteꞌ hermano war awawan war uyajcꞌu inteꞌ ojroner cocha era xeꞌ tuaꞌ e Dios, jay achecta otronteꞌ ojroner tuaꞌ e Dios tut otronteꞌ hermano xeꞌ turu tor e cꞌajn, entonces xeꞌ war awawan war oꞌjron bꞌajxan uyactic e ojroner era tuaꞌ aꞌchpa oꞌjron e inteꞌ.
1CO 14:31 Y tamar era inteꞌ intiox xeꞌ ayan icꞌampibꞌir tuaꞌ ichꞌami inteꞌ ojroner tuaꞌ e Dios y tuaꞌ asutpa ichecsu tunor era tut e inmojr ajcꞌupesiajobꞌ erer ixojron inteꞌ intiox tuaꞌ ichecsu tunor lo que ajcꞌunox umen e Dios, pero inteꞌ inteꞌ tuaꞌ ixojron tuaꞌ uyubꞌi acanuobꞌ tunor e ajcꞌupesiajobꞌ y tuaꞌ uyubꞌi atꞌabꞌesna uyalmobꞌ inteꞌ intiobꞌ.
1CO 14:32 Pero tin e war uyajcꞌu inteꞌ ojroner cocha era erer ucojco lo que ayan tama uyalma xeꞌ uche oꞌjron cocha era.
1CO 14:33 Porque Cadiosir ucꞌani e orden y ucꞌani e jiriar tamaron y machi ucꞌani tuaꞌ aquetpa nutꞌur coit umen lo que war anumuy tama inteꞌ servicio. Pues entonces cꞌani inwareox era lo que war uchiobꞌ tunor e grupo ajcꞌupesiajobꞌ tama Cawinquirar iraj iraj.
1CO 14:34 Pues e ixictac machix tuaꞌ oꞌjronobꞌ tama inteꞌ servicio sino que ucꞌani tuaꞌ aquetpobꞌ tzꞌustaca. Pues bꞌan cocha chꞌar tzꞌijbꞌabꞌir tama uley e Moisés que e ixictac ucꞌani tuaꞌ acꞌupseyanobꞌ tut uviejobꞌ.
1CO 14:35 Y conda ayan lo que majax chequer tut inteꞌ ixic ucꞌani tuaꞌ ucojco este que acꞌotoy tama uyotot tuaꞌ uyubꞌi tuaꞌ uviejo porque majax bueno jay ayan tin e war oꞌjronobꞌ conda war achecsuna uyojroner e Dios.
1CO 14:36 Entonces nox ucꞌani tuaꞌ ibꞌijnu que majax nox xeꞌ iwebꞌta tari uyojroner e Dios, sino que jax e Dios. ¿O war ca ibꞌijnu que jax taca nox xeꞌ war ichꞌami tunor uyojroner e Dios y que mamajchi más erer unata tucꞌa tunor era?
1CO 14:37 Pues jay ayan tin e tijam xeꞌ war ubꞌijnuobꞌ que ayan ucꞌampibꞌir tuaꞌ uchꞌamiobꞌ inteꞌ ojroner tuaꞌ e Dios y tuaꞌ asutpa uchecsuobꞌ tut e gente otronyajr, o jay ayan tin e tijam xeꞌ war ubꞌijnuobꞌ que ayan ucꞌampibꞌir tuaꞌ abꞌijresnobꞌ umen Unawalir e Dios, entonces jax jaxirobꞌ xeꞌ ucꞌani tuaꞌ unatobꞌ que lo que war intzꞌijbꞌa tibꞌa era jax inteꞌ ojroner tuaꞌ Cawinquirar.
1CO 14:38 Pero jay ayan inteꞌ cocha era tijam xeꞌ machi cꞌani ubꞌijnu jay tuaꞌ e Dios lo que war intzꞌijbꞌa tibꞌa era, entonces nox ubꞌan ucꞌani tuaꞌ ibꞌijnu que e winic era majax tuaꞌ e Dios, y machi ixto tuaꞌ icꞌupse lo que axin uyareox.
1CO 14:39 Pues entonces niwermanuox, turbꞌanic ibꞌa tuaꞌ ichꞌami inteꞌ ojroner tuaꞌ e Dios y tuaꞌ asutpa ichecsu tunor era tut e inmojr, y ira iware e gente que machi ixto tuaꞌ oꞌjronobꞌ tama inteꞌ ojroner xeꞌ ma tiaꞌ canuobꞌ oꞌjronobꞌ tamar.
1CO 14:40 Pero ucꞌani tuaꞌ achena bien tunor lo que anumuy tama inteꞌ servicio y ucꞌani tuaꞌ uwajpi bien inteꞌ inteꞌ punto tama tunor e servicio.
1CO 15:1 Pues entonces niwermanuox, cꞌani incꞌajpes tiut tama uyojroner e Dios tama e corpesiaj lo que cay inchecsu tiut. Pues jax e ojroner era xeꞌ cay ichꞌami, y jax ubꞌan xeꞌ war ixqꞌuecꞌo ixwawan tamar esto coner.
1CO 15:2 Pues nox corpesnox conda cay cꞌupseyanox tama e ojroner era xeꞌ cay inchecsu tiut ixnix, y bꞌan turox esto coner jay cay itꞌabꞌse tunor lo que cay inchecsu tiut. Pero tin e machi cay qꞌuecꞌo xana tamar lo que cay incanse, chequer que machi ixto war acꞌupseyan tamar.
1CO 15:3 Pues cay incansiox tama ucajyesnibꞌir tunor era lo que cay inchꞌami nen ubꞌan xeꞌ jax era: Que e Cristo chamay tuaꞌ ucorpeson tama camabꞌambꞌanir bꞌan cocha chꞌar tzꞌijbꞌabꞌir tama uyojroner e Dios.
1CO 15:4 Y que jaxir mujca, pero que tama e uxteꞌ día sujta bꞌixqꞌuesna umen e Dios bꞌan cocha chꞌar tzꞌijbꞌabꞌir tama uyojroner e Dios.
1CO 15:5 Y que de allí jaxir ixin uwirse ubꞌa tut e Pedro, y ixin uwirse ubꞌa tut tunor e inmojr apostolobꞌ ubꞌan.
1CO 15:6 Y de allí ixin uwirse ubꞌa que bꞌixir tut 500 ajcanuarobꞌ tama inteꞌ taca lugar. Y ayan meyra ajcꞌupesiajobꞌ era xeꞌ cay uwirobꞌ ut e Jesús xeꞌ bꞌixirobꞌto esto coner. Pero ayan tin e cꞌapix chamayobꞌ ubꞌan.
1CO 15:7 Y de allí jaxir ixin uwirse ubꞌa que bꞌixir tut e Santiago, y de allí ixin uwirse ubꞌa tut tunor e inmojr apostolobꞌ.
1CO 15:8 Y de allí tama ucꞌapesnibꞌir tunor era Cawinquirar Jesucristo uwirse ubꞌa taniut nen ubꞌan xeꞌ cꞌotoy cꞌupseyanen tamar bꞌan cocha conda acuxpa inteꞌ chꞌurcabꞌ wacchetaca motor que merato acꞌotoy utiempo.
1CO 15:9 Porque nen chuchu nicꞌampibꞌir tut e inmojr apostolobꞌ, y este que imbꞌijnu que ma tawaren tuaꞌ impejcna ani que apostolen, porque jax nen xeꞌ cay inche unumse ubꞌobꞌ tunor e ajcꞌupesiajobꞌ tama Cawinquirar.
1CO 15:10 Pero umen taca que e Dios cay utacren meyra que cꞌotoy quetpen cocha turen coner, y e tacarsiaj era xeꞌ cay uyajqꞌuen Nidiosir machi quetpa bꞌan taca. Porque nen cay patnen más meyra que tunor e inmojr apostolobꞌ, pero majax nen nibꞌajner xeꞌ cay inche tunor era, sino que jax e Dios xeꞌ cay utacren inche.
1CO 15:11 Pero matucꞌa uche jay tamaren o jay tamarobꞌ que nox cay iyubꞌi uyojroner e Dios tama e corpesiaj. Pero lo que numuy jax era: Que cay cachecsu tunor e ojroner era tiut y nox cꞌotoy cꞌupseyanox tama Cawinquirar Jesucristo.
1CO 15:12 Entonces lo que non y tunor e inmojr apostolobꞌ war cachecsu tut e gente axin jax era: Que e Cristo sujta bꞌixqꞌuesna tujam e chamenobꞌ. Y entonces ¿tucꞌa tuaꞌ que ayan tijam tin e war uchecsu tut e inmojr que matucꞌa e día conda tuaꞌ asutpa abꞌixqꞌuesnobꞌ tin e chamenobꞌ?
1CO 15:13 Pero jay machi ani tuaꞌ abꞌixqꞌuesna tin e chamenobꞌ, entonces war che era que nien e Cristo machi ani sujta bꞌixqꞌuesna tujam e chamenobꞌ.
1CO 15:14 Y jay machi ani sutpa bꞌixcꞌa e Cristo tujam e chamenobꞌ, entonces matucꞌa ani ucꞌampibꞌir tunor e ojroner tama e corpesiaj lo que war cachecsu tut e gente axin, y matucꞌa ani ucꞌampibꞌir tunor icꞌupesiaj tama e Cristo.
1CO 15:15 Y jay bꞌan ani que machi sutpa bꞌixcꞌa e Cristo tujam e chamenobꞌ, entonces non caquetpa ani ajmajresiajon upater e Dios porque non war caware e gente axin iraj iraj que Cadiosir jax xeꞌ ixin usuti ubꞌixqꞌues Cawinquirar Jesucristo tujam e chamenobꞌ. Y jay jax ani que tin e chamenobꞌ machi ani tuaꞌ asutpa abꞌixcꞌobꞌ, entonces ma chequer ani jay e Dios ixin ubꞌixqꞌues e Cristo.
1CO 15:16 Porque jay bꞌan ani que machix tuaꞌ abꞌixqꞌuesnobꞌ tin e chamenobꞌ, entonces nien e Cristo machi ani sujta bꞌixqꞌuesna tujam e chamenobꞌ ubꞌan.
1CO 15:17 Y jay machi ani sujta bꞌixqꞌuesna e Cristo tujam e chamenobꞌ, entonces tunor e cꞌupesiaj tibꞌa matucꞌa ani ucꞌampibꞌir y nox turoxto ani tama imabꞌambꞌanir.
1CO 15:18 Y jay bꞌan ani entonces tunor tin e chamayobꞌ xeꞌ war acꞌupseyanobꞌ tama e Cristo satpobꞌix ani inyajrer.
1CO 15:19 Pero non era war cacojco tama e Cristo tuaꞌ ucorpeson tuaꞌ uyubꞌion caxin tut e qꞌuin watar e día. Pero jay Cadiosir machix ani tuaꞌ axin ucorpeson, y jay non intaca ani turon tara tor e rum y de allí axin acꞌapa ani tunor, entonces non más ani tzajtaca coit tama tunor.
1CO 15:20 Pero non canata que san sutpa bꞌixcꞌa e Cristo tujam e chamenobꞌ. Pues jaxir jax xeꞌ quetpa tuaꞌ asujta abꞌixqꞌuesna bꞌajxan tujam e chamenobꞌ, y tamar era jaxir quetpa bꞌan cocha inteꞌ primicia tuaꞌ inteꞌ cosecha.
1CO 15:21 Pues bꞌan cocha tari e chamer umen lo que uche inteꞌ taca winic xeꞌ jax e Adán, y bꞌan ubꞌan tari que erer asujta abꞌixqꞌuesna e gente tujam e chamenobꞌ umen lo que uche inteꞌ taca winic ubꞌan xeꞌ jax e Cristo.
1CO 15:22 Y bꞌan cocha aquetpa tuaꞌ axin achamay tunor e winicobꞌ tara tor e rum umen que tuobꞌ utata viejobꞌir Adán, y bꞌan cocha era ubꞌan que tunoron xeꞌ tuon e Cristo cꞌani cachꞌami e cuxtar xeꞌ machi tuaꞌ acꞌapa.
1CO 15:23 Pero ayan lo que quetpa cocha tuaꞌ achempa tunor era: Bꞌajxan quetpa tuaꞌ asujta abꞌixqꞌuesna e Cristo tujam e chamenobꞌ cocha jaxir quetpa bꞌan cocha e primicia tama e cosecha era, y de allí quetpa que tunor tin e tuon e Cristo cꞌani casujta cabꞌixqꞌuesna conda asutpa watar Cawinquirar Jesucristo otronyajr.
1CO 15:24 Y de allí watar ucꞌapesnibꞌir tunor era conda achecta watar e Cristo tuaꞌ ulocse ucꞌotorer tunor tin e awinquiriobꞌ y tunor tin e ajcꞌamparobꞌ y tunor tin e ajcꞌotorerobꞌ xeꞌ war acꞌotoriobꞌ tara tor e rum. Y conda acꞌapa uche tunor era jax ucꞌapesnibꞌir or e rum era. Y entonces tama e día yajaꞌ e Cristo axin uyajcꞌu tunor lo que ayan tut Utata xeꞌ jax Cadiosir.
1CO 15:25 Porque Cawinquirar Jesucristo cꞌani acꞌotori este que Catata Dios acꞌapa uturbꞌa tunor tin e war aqꞌuijna uwirobꞌ ut yebꞌar utajn uyoc e Cristo.
1CO 15:26 Y conda acꞌapa utijres tunor tin e war ani uche aqꞌuijna, jaxir tuaꞌ axin utijres e chamer ubꞌan.
1CO 15:27 Porque bꞌan chꞌar tzꞌijbꞌabꞌir tama uyojroner e Dios que: “Catata Dios axin uturbꞌa tunor lo que ayan yebꞌar utajn uyoc.” Bꞌan chꞌar tzꞌijbꞌabꞌir tama uyojroner e Dios. Pero conda che: “Tunor lo que ayan”, machi war che que Catata Dios ubꞌan tuaꞌ aquetpa yebꞌar utajn uyoc e Cristo, porque jax jaxir xeꞌ war uturbꞌa tunor era yebꞌar utajn uyoc e Cristo.
1CO 15:28 Y conda aquetpa tunor lo que ayan yebꞌar utajn uyoc e Cristo, entonces e Cristo xeꞌ jax Uyunen e Dios cꞌani uyose ubꞌa yebꞌar ucꞌotorer Catata Dios xeꞌ jax xeꞌ cay uturbꞌa tunor lo que ayan yebꞌar utajn uyoc jaxir. Y tamar era jax Catata Dios xeꞌ tuaꞌ acꞌotori inyajrer tujor tunor lo que ayan.
1CO 15:29 Pero ayan ubꞌan cora gente xeꞌ ucꞌupse que erer ucorpes inteꞌ xeꞌ chamen conda axin achꞌujya upater. Pero jay tin e chamen ma erer ani asujta abꞌixqꞌuesna tujam e chamenobꞌ entonces ¿tucꞌa tuaꞌ war uchꞌuyi ubꞌobꞌ upater inteꞌ xeꞌ chamen cocha era?
1CO 15:30 Y bꞌan tamar lo que war canumse cabꞌa non ubꞌan. Porque jay inteꞌ chamen xeꞌ war acꞌupseyan tama e Cristo ma erer ani asujta abꞌixqꞌuesna entonces ¿tucꞌa tuaꞌ war canumse cabꞌa tamar lo que imbꞌacꞌajr uwirnar iraj iraj tara tor e rum?
1CO 15:31 Porque nen war inchena innumse nibꞌa iraj iraj umen tin e cꞌani uchamsen, pero war intzay meyra ubꞌan tama tunorox xeꞌ war ixqꞌuecꞌo ixxana tama ubꞌir e Cristo Jesús xeꞌ jax Cawinquirar.
1CO 15:32 Y nen inchena innumse nibꞌa conda quetpa tuaꞌ inwajpi nibꞌa taca cora winicobꞌ xeꞌ bꞌan uwirnarobꞌ cocha inteꞌ animal xeꞌ imbꞌacꞌajr uwirnar tara tama e chinam Éfeso. Pero jay machi ani tuaꞌ asujta abꞌixqꞌuesna tin e chamen, entonces ¿tucꞌa ani ucꞌampibꞌir tunor era? Y jay machi ani tuaꞌ asujta abꞌixqꞌuesna tin e chamen, entonces ucꞌani ani tuaꞌ caware bꞌan taca cocha chenobꞌ tin e machi acꞌupseyanobꞌ tama Cawinquirar Jesucristo que: “Incuic cacꞌuxic y coychꞌic, porque ejcꞌar o chabꞌij ucꞌani tuaꞌ cachamay.” Bꞌan arobꞌna umen tin e machi acꞌupseyanobꞌ tama Cawinquirar.
1CO 15:33 Entonces ira iwacta ibꞌa tuaꞌ ixmajresna porque bꞌan cocha arobꞌna que: “Tin e imbꞌutz uwirnar, jay acay axana taca tin e calapir uwirnar cꞌani atijresna tunor lo que imbꞌutz ani tamar”, bꞌan cocha che inteꞌ ojroner.
1CO 15:34 Pero nox sutpenic tuaꞌ ibꞌijnu tamar lo que erach otronyajr, y actanic e mabꞌambꞌanir. Porque ayan tin e tijam xeꞌ machi war unatobꞌ chi Cadiosir. War inwareox cocha era tuaꞌ insubꞌajresox porque nox ucꞌani ani tuaꞌ icanse más uyojroner e Dios tut e gente era.
1CO 15:35 Pues bꞌajcꞌat ayan tin e ayopa tiut tuaꞌ uyubꞌi tibꞌa y che: “¿Y cocha tuaꞌ asujta abꞌixqꞌuesna e gente tujam e chamenobꞌ? ¿Y tucꞌa cuerpo tuaꞌ uchꞌamiobꞌ conda abꞌixcꞌobꞌ?” xeꞌ che inteꞌ.
1CO 15:36 Pues matucꞌa ucꞌampibꞌir tunor e bꞌijnusiaj cocha era, porque conda apajcꞌa inteꞌ ut semilla macu rum, ucꞌani tuaꞌ oꞌcꞌoy tuaꞌ asutpa acuxpa otronyajr tuaꞌ uyubꞌi achꞌiꞌ axin.
1CO 15:37 Pero jax inteꞌ ut e semilla xeꞌ tuaꞌ apajcꞌa macu rum y majax lo que cuxpix, motor jay ubꞌijnu inteꞌ tuaꞌ upaqꞌui ut e semilla tuaꞌ e trigo o jay otronteꞌ ut semilla.
1CO 15:38 Pero de allí jax Cadiosir xeꞌ axin uche achꞌiꞌ axin inteꞌ inteꞌ ut semilla bꞌan cocha ucꞌani jaxir. Y jax Cadiosir ubꞌan xeꞌ axin uyajcꞌu inteꞌ inteꞌ ut semilla uwirnar conda acuxpa bꞌan cocha uterar era.
1CO 15:39 Pues majax inteꞌ taca clase cuerpo xeꞌ ayan tara tor e rum, porque e winicobꞌ ayan inteꞌ clase ucuerpo, y e animalobꞌ ayan otrontex ucuerpo, y e mut ayan otronteꞌ ucuerpo, y bꞌan e chay xeꞌ intex ucuerpo ubꞌan.
1CO 15:40 Pues ayan inteꞌ cuerpo xeꞌ aturuan tut e qꞌuin, y ayan intex cuerpo xeꞌ aturuan tara tor e rum. Pero e cuerpo xeꞌ aturuan tut e qꞌuin ayan uwirnar xeꞌ galan, y e cuerpo xeꞌ aturuan tara tor e rum ayan intex uwirnar xeꞌ galan ubꞌan.
1CO 15:41 Y ut e qꞌuin ayan uwirnar xeꞌ galan y e luna ayan uwirnar xeꞌ galan ubꞌan pero intex. Y intex ubꞌan uwirnar ut e sian lucero xeꞌ galan ubꞌan. Y inteꞌ nuxi lucero ayan inteꞌ uwirnar xeꞌ galan y otronteꞌ lucero ayan intex uwirnar xeꞌ galan ubꞌan.
1CO 15:42 Y bꞌan cocha era ubꞌan tama e cuerpo lo que axin abꞌixqꞌuesna tujam e chamenobꞌ, porque lo que amujca macu rum acꞌapa oꞌcꞌoy, pero conda axin abꞌixqꞌuesna tujam e chamenobꞌ machi ixto tuaꞌ asutpa oꞌcꞌoy otronyajr.
1CO 15:43 Pues cacuerpo lo que ayan ticabꞌa tara tor e rum war asatpa axin porque injayjay y tamar era achamay y amujca, pero cacuerpo lo que tuaꞌ cachꞌami conda caxin cabꞌixqꞌuesna tujam e chamenobꞌ cꞌani aquetpa meyra utawarer. Pues injayjay cacuerpo xeꞌ axin amujca, pero e cuerpo xeꞌ tuaꞌ cachꞌami conda caxin cabꞌixqꞌuesna cꞌani aqꞌuecꞌo y tamar era machi tuaꞌ acꞌapa.
1CO 15:44 E cuerpo xeꞌ axin amujca conda achamay inteꞌ jax inteꞌ cuerpo bꞌan cocha ayan tara tor e rum, pero e cuerpo xeꞌ axin abꞌixqꞌuesna tujam e chamenobꞌ jax xeꞌ tuaꞌ cajcꞌuna tuaꞌ caturuan tamar conda turon tut e qꞌuin. Entonces cocha ayan inteꞌ cacuerpo bꞌan cocha ayan ticabꞌa tara tor e rum, entonces war che era que ayan ubꞌan intex cacuerpo xeꞌ tuaꞌ cachꞌami conda caxin tichan tut e qꞌuin.
1CO 15:45 Pues chꞌar tzꞌijbꞌabꞌir tama uyojroner e Dios que: “E bꞌajxan winic xeꞌ jax e Adán ajcꞌuna ucuxtar tuaꞌ aturuan tara tor e rum.” Pero ayan otronteꞌ winic xeꞌ bꞌan cocha e Adán era xeꞌ jax Cawinquirar Jesucristo xeꞌ ixin uyajcꞌon cacuxtar nawalbꞌir xeꞌ machi tuaꞌ acꞌapa.
1CO 15:46 Entonces erer cawira que majax jax lo que nawalbꞌir xeꞌ tari bꞌajxan sino que jax e cuxtar lo que ayan tara tor e rum. Y de allí tari e cuxtar xeꞌ machi tuaꞌ acꞌapa xeꞌ nawalbꞌir.
1CO 15:47 Porque e bꞌajxan winic chembꞌir tama e tanlum lo que ayan tara tor e rum y tamar era jaxir ayan ucuerpo xeꞌ tuaꞌ e rum era. Pero inteꞌ winic era xeꞌ jax Cawinquirar Jesucristo tari tut e qꞌuin tichan.
1CO 15:48 Tunor tin e ayan ucuerpo tara tor e rum bꞌanobꞌ cocha e bꞌajxan winic xeꞌ chena ucuerpo tama e tanlum. Pero tin e turobꞌ tichan tut e qꞌuin ayan ucuerpo bꞌan cocha jaxir xeꞌ tari tut e qꞌuin xeꞌ jax Cawinquirar Jesucristo.
1CO 15:49 Y bꞌan cocha aquetpa cawirnar tara tor e rum bꞌan cocha e bꞌajxan winic xeꞌ chena tama e tanlum, y bꞌan ubꞌan tuaꞌ aquetpa cawirnar bꞌan cocha jaxir xeꞌ tari tut e qꞌuin xeꞌ jax Cawinquirar Jesucristo.
1CO 15:50 Entonces niwermanuox, lo que cꞌani inwareox tama tunor era jax era: Que lo que ayanon xeꞌ jax cawerir y cabꞌaquer tara tor e rum ma erer axin uchꞌami lo que ayan tama uchinam e Dios xeꞌ machi tuaꞌ acꞌapa, porque lo que erer acꞌapa ma erer aquetpa tamar lo que machi tuaꞌ acꞌapa.
1CO 15:51 Pero cꞌani inwareox inteꞌ ojroner era xeꞌ mucur ani: Que majax tunoron tuaꞌ caxin cachamay, pero que tunoron tuaꞌ caxin cachꞌami inteꞌ cacuerpo xeꞌ imbꞌutz.
1CO 15:52 Y bꞌan tuaꞌ anumuy wacchetaca bꞌan cocha conda umaqui unacꞌut inteꞌ y asutpa upasi otronyajr, y tunor era tuaꞌ anumuy conda axin coybꞌi aꞌjca ulajbꞌar utrompeta e Dios xeꞌ ajtaquix aquetpa tuaꞌ aꞌjca tama e hora yajaꞌ. Porque axin alajbꞌa e trompeta tuaꞌ e Dios y wacchetaca tunor tin e chamayobꞌ xeꞌ war acꞌupseyanobꞌ tama Cawinquirar cꞌani asujta abꞌixqꞌuesnobꞌ tujam e chamenobꞌ y machi ixto tuaꞌ asutpa achamayobꞌ otronyajr. Y tunoron tuaꞌ cachꞌami inyajrer inteꞌ cacuerpo xeꞌ machi tuaꞌ acꞌapa.
1CO 15:53 Porque cacuerpo tara tor e rum xeꞌ asatpa axin ucꞌani tuaꞌ asutpa aquetpa lo que machi uyubꞌi acꞌapa, y cacuerpo tara tor e rum xeꞌ aquetpa tuaꞌ achamay ucꞌani tuaꞌ asutpa aquetpa lo que machi uyubꞌi achamay.
1CO 15:54 Entonces conda cacuerpo tara tor e rum xeꞌ war asatpa axin acꞌotoy aquetpa lo que machi uyubꞌi acꞌapa, y conda cacuerpo tara tor e rum xeꞌ quetpa tuaꞌ achamay acꞌotoy aquetpa lo que machi uyubꞌi achamay, entonces cꞌani acꞌapa achempa lo que chꞌar tzꞌijbꞌabꞌir tama uyojroner e Dios tiaꞌ che que: “Tijresna ixto yaꞌ tunor e chamer coner. Cꞌapa cucurna e chamer inyajrer.
1CO 15:55 Entonces Ajchamer, ¿tiaꞌ turu acꞌotorer coner tuaꞌ axeqꞌuion? Y Ajchamer, ¿tiaꞌ aquetpa tunor atuanibꞌir lo que cꞌani ani achꞌami conda cꞌapa acucron ani?” xeꞌ chꞌar tzꞌijbꞌabꞌir tama uyojroner e Dios.
1CO 15:56 Pues lo que uyajcꞌu ucꞌotorer e chamer tuaꞌ uyubꞌi uxeqꞌuion jax e mabꞌambꞌanir, y lo que uyajcꞌu ucꞌotorer e mabꞌambꞌanir jax e ley.
1CO 15:57 Pero catattzꞌi ucꞌabꞌa Cadiosir xeꞌ ixin uyajcꞌon cacꞌotorer tama Cawinquirar Jesucristo tuaꞌ uyubꞌion cacucru tunor lo que cꞌani ani ucucron.
1CO 15:58 Pues entonces niwermanuox xeꞌ inchoj iut nimener, qꞌuecꞌojsenic ibꞌa y turbꞌanic ibꞌa tuaꞌ ixixin iche más y más tama upatnar Cawinquirar iraj iraj, porque war inata que tunor lo que ixixin iche tama Cawinquirar majax intaca war iche sino que ucꞌani tuaꞌ watar e cosecha tama tunor era.
1CO 16:1 Pues cꞌani inwareox era tamar e tumin lo que war amorojsena tuaꞌ atacarnobꞌ e ajcꞌupesiajobꞌ xeꞌ turobꞌ tama e departamento Judea. Pues lo que ucꞌani tuaꞌ iche jax taca cocha cay inware tunor e grupo ajcꞌupesiajobꞌ xeꞌ turobꞌ tama e departamento Galacia xeꞌ
1CO 16:2 inware y che: Que tama inteꞌ inteꞌ domingo conda war imorojse ibꞌa tuaꞌ iyubꞌi uyojroner e Dios que ucꞌani tuaꞌ imorojse e tumin axin lo que war utꞌabꞌse inteꞌ inteꞌ bꞌan cocha war atojya. Y tamar era conda nen incꞌotoy tuaꞌ inwarajsiox tꞌabꞌesbꞌir ixto imener tunor e tumin era y tamar era machi ixto ucꞌani tuaꞌ ilocse otronteꞌ ofrenda tama e hora yajaꞌ.
1CO 16:3 Entonces conda incꞌotoy tiut cꞌani inwebꞌta axin cora winicobꞌ xeꞌ sicbꞌabꞌir imener tuaꞌ uqꞌuechiobꞌ axin e tumin era xeꞌ tꞌabꞌesbꞌir imener. Y nen cꞌani intzꞌijbꞌa inteꞌ carta esto tuaꞌ e ajcꞌupesiajobꞌ xeꞌ turobꞌ tama e chinam Jerusalem tuaꞌ aqꞌuejcha axin ubꞌan.
1CO 16:4 Y jay aquetpa tuaꞌ inxin nen ubꞌan entonces jaxirobꞌ erer axiobꞌ tacaren.
1CO 16:5 Pues tama e xambꞌar lo que cꞌani inche era ucꞌani tuaꞌ innumuy tama e departamento Macedonia tuaꞌ inwarajse e ajcꞌupesiajobꞌ xeꞌ turobꞌ yajaꞌ, y nacpat era cꞌani incꞌotoy tiaꞌ turox tama e chinam Corinto tuaꞌ inwarajsiox nox ubꞌan.
1CO 16:6 Y bꞌajcꞌat inxin inquetpa tacarox tama inteꞌ tiempo o bꞌajcꞌat inquetpa tunor e invierno tacarox inyajrer. Y tamar era erer itacren tama nixambꞌar tic taca tiaꞌ ucꞌani tuaꞌ inxin otronyajr.
1CO 16:7 Porque nen machi incꞌani tuaꞌ taca inyopa y insutpa inlocꞌoy otronyajr, sino que cꞌani inquetpa tacarox tama inteꞌ tiempo tuaꞌ uyubꞌion cojron meyra tama tunor lo que war anumuy, y bꞌan tuaꞌ cache jay bꞌan ucꞌani Cawinquirar.
1CO 16:8 Pero era cꞌani inquetpa tara tama e chinam Éfeso este que watar e día tuaꞌ e nojqꞌuin Pentecostés.
1CO 16:9 Porque tara pasar e bꞌir ticoit tuaꞌ cawira achꞌiꞌ meyra tunor upatnar Cawinquirar, pero ayan ubꞌan meyra winicobꞌ xeꞌ war aqꞌuijna uwirobꞌ tunor e patnar era.
1CO 16:10 Pues jay acꞌotoy e hermano Timoteo tiaꞌ turox turbꞌanic ibꞌa tuaꞌ iche aturuan atzay tacarox y que matucꞌa tuaꞌ ubꞌijnu, porque jaxir war apatna tama Cawinquirar bꞌan cocha war impatna nen.
1CO 16:11 Y tamar era turbꞌanic ibꞌa que mamajchi tijam axin uxejbꞌe ut e hermano Timoteo era, sino que tacrenic tuaꞌ uyubꞌi uche uxambꞌar taca e ujiriar tama uyalma tuaꞌ uyubꞌi acꞌotoy tiaꞌ turen tara tama e chinam Éfeso, porque war incojco inwira ut bꞌan cocha e inmojr ajcꞌupesiajobꞌ era ubꞌan.
1CO 16:12 Y tama e hermano Apolos, nen cay incꞌajti meyra tacar tuaꞌ axin uwarajsiox taca e inmojr ajcꞌupesiajobꞌ xeꞌ cꞌotoyobꞌ tiut era. Pero jaxir mato jabꞌar tuaꞌ axin coner. Pero conda ajabꞌtzꞌa entonces axin tuaꞌ uwarajsiox.
1CO 16:13 Pues turbꞌanic ibꞌa tuaꞌ icojco ibꞌa tuaꞌ machi ibꞌijnu iche e mabꞌambꞌanir. Y qꞌuecꞌojsenic ibꞌa tuaꞌ ixcꞌupseyan tama tunor uyojroner e Dios. Turbꞌanic ibꞌa cocha winicox tuaꞌ e Dios tunorox. Y qꞌuecꞌojsenic ibꞌa tuaꞌ ixxana tama ubꞌir e Dios.
1CO 16:14 Y tunor lo que ixixin iche, chenic tunor era taca ucꞌunersiaj e Dios tama iwalma.
1CO 16:15 Pues entonces niwermanuox, war inata que e hermano Estéfanas taca tunor ufamiliarobꞌ jax tin e uchꞌamiobꞌ e Cristo bꞌajxan tama tunor e departamento Acaya, y que jaxirobꞌ ixin uyajcꞌu ubꞌobꞌ tuaꞌ utacriobꞌ tunor e ajcꞌupesiajobꞌ tama Cawinquirar axin.
1CO 16:16 Y tamar era cꞌani inwareox tuaꞌ ixcꞌupseyan tutobꞌ jay axin uyareox tucꞌa ucꞌani tuaꞌ iche, y bꞌan tut tunor e ajcꞌupesiajobꞌ cocha era xeꞌ war uyajcꞌu ubꞌobꞌ inyajrer tuaꞌ uchiobꞌ lo que ucꞌani Cadiosir, y bꞌan tut tunor tin e war apatnobꞌ tama Cadiosir.
1CO 16:17 Y war intzay que tari e hermano Estéfanas taca e hermano Fortunato y e hermano Acaico, porque jaxirobꞌ ixin uchiobꞌ tacaren lo que quisinic iche ani nox, pero machi uyubꞌiox umen que machi turox taniut era.
1CO 16:18 Porque jaxirobꞌ cay utꞌabꞌsiobꞌ niwalma meyra taca utacarsiaj e Dios bꞌan cocha cay uchiobꞌ tacarox ubꞌan. Pues conda acꞌotoy e winicobꞌ cocha era tiut ucꞌani tuaꞌ ichecsu icꞌunersiaj tutobꞌ.
1CO 16:19 Pues tunor e grupo ajcꞌupesiajobꞌ xeꞌ turobꞌ tama e departamento Asia war uyebꞌta axin e cꞌajpesiaj tibꞌa. Y e hermano Aquila taca e hermana Priscila y tunor e ajcꞌupesiajobꞌ xeꞌ war umorojse ubꞌobꞌ tama uyotot war uyebꞌtobꞌ axin e cꞌajpesiaj tibꞌa tama Cawinquirar ubꞌan.
1CO 16:20 Y tunor e ajcꞌupesiajobꞌ xeꞌ turobꞌ tiaꞌ turen war uyebꞌtobꞌ axin e cꞌajpesiaj tibꞌa ubꞌan. Cꞌajpesic ibꞌa este que ixixin imeqꞌue ibꞌa tama Cawinquirar.
1CO 16:21 Tamar nicꞌabꞌ war intzꞌijbꞌa e ojroner era xeꞌ che: “Nen xeꞌ Pabloen war incꞌajpesox era.”
1CO 16:22 Pues jay ayan tin e machi ucꞌani Cawinquirar, quetpacobꞌ yebꞌar inteꞌ bꞌax. Niwinquiraret, lar wacchetaca era.
1CO 16:23 Que Cawinquirar Jesús axin uchojbꞌesicox inteꞌ intiox.
1CO 16:24 Cꞌani inwareox tunorox que war inyajta iut inteꞌ intiox tamar ucꞌabꞌa e Cristo Jesús. Tara acꞌapa tunor niwojroner, che e Pablo.
2CO 1:1 Nen e Pabloen xeꞌ jax inteꞌ apóstol tuaꞌ e Cristo Jesús umen que bꞌan ucꞌani Cadiosir. Nen taca e hermano Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌupesiajox tama Cawinquirar Jesucristo xeꞌ turox tama e chinam Corinto, y war catzꞌijbꞌa e carta era ubꞌan tama tunor xeꞌ tuobꞌ e Dios xeꞌ turobꞌ tama e departamento Acaya.
2CO 1:2 Que Cadiosir xeꞌ jax Catata ubꞌan y Cawinquirar Jesucristo uyajqꞌuicox utacarsiaj y ujiriar.
2CO 1:3 Catattzꞌic ucꞌabꞌa Cadiosir xeꞌ jax Utata Cawinquirar Jesucristo, y xeꞌ jax Catata xeꞌ war uyajta coit conda war canumse cabꞌa, y xeꞌ jax Cadiosir xeꞌ war ucꞌunles cawalma iraj iraj.
2CO 1:4 Y jax Cadiosir era ubꞌan xeꞌ axin ucꞌunles cawalma conda war acꞌuxun umen que war canumse cabꞌa. Y tamar era non ubꞌan erer caxin catacre tin e war acꞌuxun uyalmobꞌ umen que war unumse ubꞌobꞌ. Porque bꞌan cocha war catacarna umen e Dios y bꞌan ucꞌani e Dios tuaꞌ asutpa catacre non tin e war unumse ubꞌobꞌ ubꞌan.
2CO 1:5 Porque bꞌan cocha canumse cabꞌa umen que tuon e Cristo y bꞌan ubꞌan tuaꞌ catacarna umen e Cristo tuaꞌ acꞌunlesna cawalma conda war canumse cabꞌa.
2CO 1:6 Y tamar era jay aquetpa tuaꞌ canumse cabꞌa tuaꞌ cache upatnar e Dios, bueno ticoit, porque acꞌampa tunor era tuaꞌ ixtacarna tuaꞌ acꞌunlesna iwalma y tuaꞌ ichꞌami e corpesiaj. Y conda acꞌunlesna cawalma umen e Dios, jax taca tuaꞌ uyubꞌion catacriox tuaꞌ acꞌunlesna iwalma nox ubꞌan. Y tamar era erer asisa iwalma conda watar e hora tuaꞌ inumse ibꞌa bꞌan cocha war canumse cabꞌa non ubꞌan.
2CO 1:7 Y tamar era war aqꞌuecꞌo cacojcsiaj tamarox coner, porque war canata que bꞌan cocha war inumse ibꞌa umen que war ixxana tama ubꞌir e Dios, y bꞌan cocha era ubꞌan tuaꞌ ixtacarna tuaꞌ atꞌabꞌesna iwalma umen e Dios.
2CO 1:8 Pues cawermanuox, quisinic inata cobꞌa cay canumse cabꞌa xeꞌ imbꞌacꞌajr uwirnar tama e departamento Asia. Pues tꞌabꞌay ticajor inteꞌ nuxi qꞌuijnar capater este que ma tzꞌacaron tuaꞌ caqꞌuecꞌo cawawan tut, y ayan hora conda war cabꞌijnu que non chamenonix ixto yaꞌ.
2CO 1:9 Porque non tama cawalma war cabꞌijnu que turix tuaꞌ cachamesna y que mix cocha tuaꞌ calocꞌoy tamar lo que war canumse cabꞌa bꞌan cocha inteꞌ xeꞌ arobꞌna umen inteꞌ juez que ucꞌani tuaꞌ achamesna. Pero ayan ucꞌampibꞌir tunor era cocha tamar cꞌotoyon canata que ma erer cacojco tamar cabꞌa tuaꞌ calocꞌoy tamar lo que war canumse cabꞌa cocha era, porque conda caturbꞌa cabꞌa tama ucꞌabꞌ e Dios inyajrer, cay cawira que jaxir ayan ajchi ucꞌotorer nojta tuaꞌ utacrion, cocha jaxir ayan ucꞌotorer tuaꞌ usuti ubꞌixqꞌues tin e chamen.
2CO 1:10 Y bꞌan uche Cadiosir tamaron que ixin ucorpeson tama cachamer, y bꞌan war uche era ubꞌan. Y war caturbꞌa cabꞌa tuaꞌ cacojco tamar jaxir tuaꞌ ucorpeson iraj iraj.
2CO 1:11 Y nox ubꞌan war ixtacarsan umen que war icꞌajti taca e Dios tuaꞌ ucojcon. Y ayan meyra gente xeꞌ war ucꞌajtiobꞌ tacar ubꞌan tuaꞌ catacarna, y tamar era watar e día conda meyra gente axin utattzꞌiobꞌ ut e Dios tamar lo que war uche tamaron.
2CO 1:12 Pues ayan lo que war ubꞌutꞌi cawalma meyra xeꞌ jax era: Que tama cawalma war canata que ixion cache cabꞌa erach tut tunor e gente tara tor e rum, y war caturbꞌa cabꞌa tuaꞌ machi aquetpa chagojr cajor tut e gente, pero más war catzay que cache imbꞌutz tunor lo que cay cache tiut. Pero jax Cadiosir xeꞌ ixin uyajcꞌon utacarsiaj tuaꞌ uyubꞌion cache tunor era, y majax umen que non ayan meyra canatanyaj.
2CO 1:13 Pero tamar lo que cay catzꞌijbꞌa tama cora ojroner xeꞌ cawebꞌta ixin tibꞌa, caturbꞌa cabꞌa tuaꞌ cawareox jax taca lo que erer aquetpa chequer tiut. Porque nen war incꞌani tuaꞌ ixcꞌotoy iyubꞌi tunor lo que war inchecsu tiut
2CO 1:14 motor que coner ayanto lo que war aquetpa mucur cora tiut tamar lo que cꞌani ani inwareox. Pero war incojco que conda asutpa watar Cawinquirar Jesús otronyajr que nox cꞌani ixtzay que war inata chien nen, y nen ubꞌan tuaꞌ intzay que war innata chiox nox. Bꞌan quisinic inwira anumuy tama e día conda asutpa watar Cawinquirar Jesús otronyajr.
2CO 1:15 Y tamar era cꞌani inwareox que nen cay imbꞌijnu tuaꞌ incꞌotoy inwarajsiox chajr tuaꞌ uyubꞌien ani intzayjresox, pero ma tiaꞌ cꞌotoyen inche.
2CO 1:16 Pues cay imbꞌijnu tuaꞌ incꞌotoy ani inwarajsiox conda ixien esto tama e departamento Macedonia y de allí cꞌani ani insutpa inwarajsiox otronyajr conda sutpa locꞌoyen tama e departamento yajaꞌ. Y cay imbꞌijnu ubꞌan que tamar era nox erer ani itacren tama tunor lo que insati tama nixambꞌar esto tama e departamento Judea jay incꞌotoy ani.
2CO 1:17 ¿O ma ca jax erach que war imbꞌijnu que cꞌani inxin conda inwareox cocha era? ¿O war ca ibꞌijnu que intaca ojronen conda inwareox que cꞌani incꞌotoy inwarajsiox bꞌan ani cocha inteꞌ winic tara tor e rum que coner oꞌjron y che que ayan lo que cꞌani uche pero ejcꞌar asutpa ubꞌijnu que machix tuaꞌ uche?
2CO 1:18 Pero Cadiosir jax Cawajchecsuyaj que majax chagojr cajor conda cawareox que cꞌani cawarajsiox.
2CO 1:19 Y majax chagojr ujor e Jesucristo xeꞌ jax Uyunen e Dios. Porque jaxir xeꞌ cay cachecsu tiut, nen y e Silvano y e Timoteo, ma tiaꞌ tuaꞌ axin oꞌjron coner que bꞌan y ejcꞌar que majax bꞌan, porque tunor e ojroner tuaꞌ e Jesucristo erach tunor.
2CO 1:20 Porque tamar e Cristo era cꞌani acꞌapa achempa tunor lo que quetpa tuaꞌ achena umen Catata Dios. Y tamar utacarsiaj Cawinquirar era non war catattzꞌi ucꞌabꞌa Cadiosir iraj iraj conda caxin caware que bꞌan cocha arobꞌna umen e Dios y bꞌan war achempa umener.
2CO 1:21 Y jax Cadiosir xeꞌ war uqꞌuecꞌojsion tunoron tuaꞌ caxana tama ubꞌir e Cristo, y jax jaxir ubꞌan xeꞌ usicbꞌon tuaꞌ caxin cache lo que war ucꞌani jaxir.
2CO 1:22 Pues bꞌan cocha inteꞌ juez xeꞌ axin uche sellar inteꞌ jun tuaꞌ aquetpa chequer que ayan ucꞌampibꞌir e jun era, y bꞌan uche Cadiosir tacaron conda ixin uturbꞌa Unawalir tama cawalma tuaꞌ cacꞌotoy canata que tuon jaxir, y tuaꞌ cacꞌotoy canata que tunor lo que arobꞌnon umener bꞌan ubꞌan tuaꞌ axin uyajcꞌon.
2CO 1:23 Entonces tamar lo que war cojron era que machi sutpa tarien tama e chinam Corinto otronyajr, Cadiosir jax Niwajchectesiaj porque jaxir war unata tunor lo que ayan tama nijor y tunor lo que ayan tama niwalma y jaxir unata que erach tunor lo que war inwareox era. Porque Cadiosir war unata que jay tarien ani tuaꞌ inwarajsiox quetpa ani tuaꞌ inchiox ixquetpa tzajtaca iut conda inwareox ani que mabꞌambꞌan lo que war iche.
2CO 1:24 Pero machi war imbꞌijnu tuaꞌ inturbꞌa tamarox más lo que ucꞌani tuaꞌ icꞌupse, porque nen taca e Timoteo majax iwinquiraron tamar lo que war ixcꞌupseyan tamar. Y cocha nox qꞌuecꞌoxix tama icꞌupesiaj tama Cawinquirar, entonces capatnar era tacarox jax taca tuaꞌ catzayjresox tama Cawinquirar.
2CO 2:1 Y tamar era cay imbꞌijnu tuaꞌ machi inxin inwarajsiox otronyajr, jay tamar era nox tuaꞌ ixtzꞌintzꞌa tama iwalma.
2CO 2:2 Porque jay nen ani inchiox ixtzꞌintzꞌa tama iwalma, entonces ¿chi nic ani tuaꞌ axin utzayjresen? Jax taca ani nox xeꞌ war ani inchiox ixtzꞌintzꞌa tama iwalma. Y jay bꞌanox ani, entonces ma cocha erer itzayjresen.
2CO 2:3 Y tamar era cay intzꞌijbꞌa tibꞌa bꞌajxan tamar lo que war iche xeꞌ majax imbꞌutz tuaꞌ uyubꞌiox iyustes ibꞌa bꞌajxan que incꞌotoy, porque machi incꞌani tuaꞌ atzꞌintzꞌesna niwalma imener conda incꞌotoy, sino que war incojco tuaꞌ intzayjresna imener. Porque nen era war imbꞌijnu que jay nen incꞌotoy intzay, entonces tunorox tuaꞌ itzayjres ibꞌa ubꞌan.
2CO 2:4 Pero conda cay intzꞌijbꞌa tibꞌa war ani innumse nibꞌa meyra tama niwalma y imbꞌar tunor niwalma este que war unqꞌui. Pero intzꞌijbꞌa inteꞌ carta tibꞌa majax tuaꞌ inchiox ixtzꞌintzꞌa tama iwalma, sino que tuaꞌ inchiox inata cobꞌa war inyajta iut.
2CO 2:5 Pues ¿cꞌarto ca imener e winic xeꞌ cay uche e nuxi mabꞌambꞌanir xeꞌ cay intzꞌijbꞌa tibꞌa tamar? Pues jay ayan tin e warto acꞌuxun uyalmobꞌ uwirobꞌ lo que numuy, pues majax nen taca sino que nox ubꞌan. Pero machix tuaꞌ cawacta e disciplina era tama ujor tin e cay uche tunor era.
2CO 2:6 Porque chequer que manxuran e winic xeꞌ cay uche e mabꞌambꞌanir cocha nox cay itacre uwira tunor era conda tunorox cay iturbꞌa e disciplina tamar. Pero coner erer cabꞌijnu que tzꞌactix tunor e disciplina tamar.
2CO 2:7 Entonces coner ucꞌani tuaꞌ ixcꞌumpa taca e winic era y ucꞌani tuaꞌ ixixin itꞌabꞌse uyalma tuaꞌ machix atzꞌintzꞌa meyra este que bꞌajcꞌat axin ani ubꞌijnu que ma tiaꞌ tuaꞌ asutpa axana tama ubꞌir e Dios otronyajr.
2CO 2:8 Y tamar era cꞌani inwareox que coner ucꞌani tuaꞌ ixsutpa ixixin tut otronyajr tuaꞌ iware que war iyajta ut.
2CO 2:9 Pues tamar era cay intzꞌijbꞌa inteꞌ carta tibꞌa umen que cꞌani ani innata jay turix tuaꞌ icꞌupse tunor niwojroner.
2CO 2:10 Y cꞌani inwareox era que conda ixixin ixcꞌumpa taca inteꞌ cocha era tamar lo que cay uche que nen ubꞌan war incꞌumpa tacar. Porque conda nen inxin incꞌumpa tamar lo que cay uche, jay ayan lo que ucꞌani tuaꞌ acꞌumpa inteꞌ tamar, war inche umen que war inyajta iut y umen que bꞌan war ucꞌani e Cristo tuaꞌ inche.
2CO 2:11 Y bꞌan ucꞌani tuaꞌ cache porque canata que e Satanás war usicbꞌa cocha tuaꞌ utijreson conda ayan tucꞌa tamar war canumse cabꞌa tama cawalma, y war canata ubꞌan que jaxir intaquix war ucojco utajwi cocha tuaꞌ utijreson.
2CO 2:12 Pues conda cꞌotoyen tama e chinam Tróas tuaꞌ inchecsu uyojroner e Dios tama e Cristo tut e gente axin, cay inwira que pasar e bꞌir taniut tuaꞌ inche tunor upatnar Cawinquirar.
2CO 2:13 Pero nen turuanen machi incꞌay tama niwalma porque ma tiaꞌ intajwi e hermano Tito. Y tamar era cay inware e gente yajaꞌ que cꞌani inxin esto tama e departamento Macedonia.
2CO 2:14 Pues entonces cꞌani catattzꞌi ucꞌabꞌa Cadiosir umen que jaxir war uqꞌuecꞌojsion y war uqꞌuechion caxin tic taca tiaꞌ ucꞌani, y war ucꞌampeson tuaꞌ cachecsu uyojroner tut tunor e gente axin. Y war uche tuaꞌ aquetpa galan ojtzꞌun axin tunor uyojroner tama e Cristo bꞌan cocha uyujtznar e ujtzꞌubꞌ xeꞌ galan ojtzꞌun xeꞌ aqꞌuejcha axin umen e icꞌar conda apurutna.
2CO 2:15 Y non xeꞌ war cachecsu uyojroner e Dios tama e corpesiaj axin war caquetpa bꞌan cocha uyujtznar e ujtzꞌubꞌ xeꞌ galan xeꞌ war apurutna umen e Cristo tut e Dios y xeꞌ war aqꞌuejcha axin umen e icꞌar tut tunor tin e war acorpesnobꞌ y tut tunor tin e war asatpobꞌ ubꞌan.
2CO 2:16 Pues tut tin e war asatpobꞌ calapir intuj uyujtzner e ujtzꞌubꞌ era y jax lo que tuaꞌ uqꞌuechiobꞌ axin tut uchamer. Pero tut tin e war acorpesnobꞌ galan ojtzꞌun uyujtzner era y jax xeꞌ war uyajcꞌuobꞌ e cuxtar xeꞌ machi tuaꞌ acꞌapa. Entonces ¿chi tawar tuaꞌ uqꞌueche axin inteꞌ ojroner cocha era?
2CO 2:17 Pero non machi war cache bꞌan cocha tin e war ubꞌijnuobꞌ que jax taca inteꞌ chonmar tunor e patnar tamar uyojroner e Dios tama e corpesiaj, porque tin e ubꞌijnuobꞌ cocha era war uchiobꞌ intiach tunor e ojroner era bꞌan taca cocha ucꞌaniobꞌ. Pero non xeꞌ pejcbꞌiron umen e Dios war caqꞌueche axin uyojroner e Dios bꞌan taca cocha ajcꞌunon umener, y tamar era cojron bꞌan cocha jay war cojron tut e Dios tic taca tiaꞌ war cojron tamar uyojroner e Dios porque tuon e Cristo.
2CO 3:1 Pues entonces conda cacay cojron cocha era ¿war ca ibꞌijnu que war catattzꞌi cabꞌa non taca tiut que meyra ayan ucꞌampibꞌir tunor capatnar? Machi. ¿O ucꞌani ca tuaꞌ cawajcꞌox cora carta tuaꞌ uchecsu tamaron que non ayan cacꞌampibꞌir? Machi. ¿O ucꞌani ca tuaꞌ cacꞌajti cora carta tibꞌa tuaꞌ caqꞌueche axin tuaꞌ cawirse e inmojr tic taca tiaꞌ caxin bꞌan cocha acay uchiobꞌ cora winicobꞌ?
2CO 3:2 Machi. Porque jax nox xeꞌ bꞌanox cocha inteꞌ jun xeꞌ tzꞌijbꞌabꞌir cora ojroner tamar xeꞌ war cawirse e gente axin que non ayan cacꞌampibꞌir, y jax nox xeꞌ jaxox inteꞌ jun xeꞌ tzꞌijbꞌabꞌir tama cawalma xeꞌ chequer tut e gente axin y que erer uchiobꞌ leer tuaꞌ uwirobꞌ que non ayan cacꞌampibꞌir.
2CO 3:3 Pero nox jaxox inteꞌ jun xeꞌ tzꞌijbꞌabꞌir umen e Cristo y xeꞌ ebꞌetbꞌir ixin camener. Pero e ojroner era majax bꞌan cocha inteꞌ ojroner xeꞌ tzꞌijbꞌabꞌir taca e tinta tama inteꞌ jun o xeꞌ quetpa chembꞌir e ojroner tama inteꞌ tun, sino que e ojroner era quetpa tzꞌijbꞌabꞌir tama cawalma umen Unawalir e Dios xeꞌ bꞌixir.
2CO 3:4 Pues war cawareox cocha era porque non ayan cacꞌupesiaj tama Cadiosir tama e Cristo.
2CO 3:5 Y machi war cawareox que non ayan cacꞌampibꞌir umen que imbꞌutz cawirnar, sino que war cawareox que e Dios ixin uyajcꞌon cacꞌampibꞌir tuaꞌ uyubꞌion cache lo que ucꞌani jaxir, y que tamar taca ucꞌotorer erer cache tunor era.
2CO 3:6 Pues Cadiosir ixin uyajcꞌon cacꞌampibꞌir tuaꞌ uyubꞌion cache tunor upatnar tamar ucꞌotorer inteꞌ pacto xeꞌ imbꞌutz. Pero e pacto era majax bꞌan cocha e onian pacto xeꞌ jax uley e Moisés xeꞌ quetpa tzꞌijbꞌabꞌir tama inteꞌ tun xeꞌ quetpa tuaꞌ cacꞌupseyan tut inyajrer. Pero e pacto xeꞌ imbꞌutz era jax lo que war uyajcꞌon cacuxtar xeꞌ imbꞌutz tacar Unawalir e Dios. Porque uley e Moisés che que bꞌan cocha chꞌar tzꞌijbꞌabꞌir y bꞌan ucꞌani tuaꞌ achempa motor que axin achamesna inteꞌ tamar. Porque lo que chꞌar tzꞌijbꞌabꞌir tama uley e Moisés che que ucꞌani tuaꞌ cachamesna inteꞌ intion. Pero Unawalir e Dios uyajcꞌon e cuxtar xeꞌ machi tuaꞌ acꞌapa.
2CO 3:7 Pues uley e Moisés quetpa tzꞌijbꞌabꞌir tama inteꞌ tun, y tama e onian tiempo conda ajcꞌuna tunor e ley era e Moisés, quetpa chequer utawarer e Dios tut e Moisés, y cay ejpray meyra e nuxi janchꞌaquenar era tut e Moisés este que e gente tuaꞌ e Israel machi uyubꞌi uwirobꞌ ut. Pero tunor e nuxi janchꞌaquenar era lo que ayan tama ut e Moisés cay tajpa ixin tama e tiempo. Pero jay checta utawarer e Dios meyra cocha era conda ajcꞌuna uley e Moisés xeꞌ erer achamsan
2CO 3:8 ¿cobꞌato nic tuaꞌ cawira utawarer e Dios coner tamar e ojroner xeꞌ ajcꞌunon umen Unawalir e Dios?
2CO 3:9 Entonces cocha checta meyra utawarer e Dios conda ajcꞌuna uley e Moisés xeꞌ quetpa tuaꞌ uchamsion cocha machi uyubꞌion cache tunor lo que chꞌar tzꞌijbꞌabꞌir tamar, entonces canata ixto yaꞌ que checta más utawarer e Dios tama e ojroner xeꞌ uchecsu ticoit que erer cacorpesna tama tunor camabꞌambꞌanir.
2CO 3:10 Pues ixnix ayan meyra utawarer lo que chꞌar tzꞌijbꞌabꞌir tama uley e Moisés, pero coner quetpa tajpem tunor e tawarer era cocha más nojta war ejpray axin e nuxi tawarer lo que ayan tama e ojroner xeꞌ ajcꞌuna umen Unawalir e Dios.
2CO 3:11 Entonces jay ayan ani meyra tawarer tamar lo que acꞌapa, ¿cobꞌa más utawarer e Dios tuaꞌ aquetpa tamar lo que machi tuaꞌ acꞌapa?
2CO 3:12 Entonces cocha ayan cacꞌupesiaj nojta tama tunor e ojroner era xeꞌ ajcꞌuna umen Unawalir e Dios, machix tuaꞌ casubꞌajra cojron tamar.
2CO 3:13 Pero non machi war cache bꞌan cocha cay uche e Moisés tama e onian tiempo conda cay umaqui ut taca inteꞌ bꞌujc tuaꞌ machi erna umen e gente tuaꞌ e Israel que war atajpa axin tunor e tawarer era lo que cay ejpray tama ut conda uchꞌami e ley, porque ma erer aquetpa inyajrer utawarer e Dios cocha era tama ut.
2CO 3:14 Y bꞌanto turobꞌ e gente tama e Israel esto coner que macar ujorobꞌ bꞌan cocha jay ayan ani inteꞌ bꞌujc tutobꞌ, y tamar era conda axin uchiobꞌ leer lo que ayan tama e onian pacto xeꞌ jax e antiguo testamento ma chequer lo que ayan tamar porque macar ujorobꞌ. Pero coner erer taca aloqꞌuesna lo que war umaqui ujorobꞌ axin conda axin uchꞌamiobꞌ ucꞌabꞌa e Cristo.
2CO 3:15 Y bꞌanto war anumuy esto coner conda axin uchiobꞌ leer uley e Moisés e gente tuaꞌ e Israel, porque macar ujorobꞌ y machi war acꞌotoy unatobꞌ tunor lo que ayan tamar, sino que war aquetpobꞌ bꞌan taca cocha war ubꞌijnuobꞌ.
2CO 3:16 Pero conda inteꞌ winic asutpa uchꞌami ucꞌabꞌa Cawinquirar, apascꞌa ujor y lo que war ani umaqui ut e winic era aloqꞌuesna umen Cawinquirar.
2CO 3:17 Y Cawinquirar era jax Unawalir e Dios, y conda Unawalir Cawinquirar war ubꞌijres inteꞌ, entonces inteꞌ era cꞌani apascꞌa ut e bꞌir tut tuaꞌ uyubꞌi uche lo que ucꞌani e Dios.
2CO 3:18 Y tamar era non mixto jax macar coit coner, sino que war aquetpa coit bꞌan cocha inteꞌ espejo xeꞌ war ejpray axin tunor utawarer Cawinquirar tamar, y tamar era war asutpa coit axin tuaꞌ aquetpa más y más bꞌan cocha Cawinquirar Jesucristo, porque ejcꞌar ejcꞌar war achecta watar más tunor utawarer ticoit. Y war achena tunor era umen Cawinquirar taca Unawalir.
2CO 4:1 Entonces cocha jax Cadiosir xeꞌ cay uyajcꞌon tunor capatnar era tacar ucꞌunersiaj, non ma tiaꞌ tuaꞌ cawacta oꞌchoy e cꞌoyir tama cawalma.
2CO 4:2 Y non cachoquix uchenar tunor lo que erer uche inteꞌ xeꞌ mucur, y cachoquix tunor uchenar lo que erer uche inteꞌ xeꞌ subꞌar uwirnar. Y machi camajresian, y machi war cache intiach lo que che tama uyojroner e Dios. Y tamar era war cachecsu ajtaca lo que canata que erach tama e Dios tut e gente axin, y war capasi cawalma tut e gente tuaꞌ acꞌotoy unatobꞌ tama uyalmobꞌ que imbꞌutz tunor lo que war cacanseyan tama Cadiosir.
2CO 4:3 Pero jay tunor uyojroner e Dios tama e corpesiaj lo que war cachecsu tut e gente axin aquetpa mucur, war aquetpa mucur tut tin e satrem.
2CO 4:4 Y e Satanás xeꞌ jax udiosir e gente tara tor e rum war umaqui ujorobꞌ tin e machi war acꞌupseyanobꞌ tama Cawinquirar. Y bꞌan war uche tuaꞌ uquete uwabꞌu e gente era tuaꞌ machi aquetpa chequer tutobꞌ tunor utawarer e ojroner tama e Cristo xeꞌ war ejpray axin. Y e Cristo era jax uwirnar ut Catata Dios.
2CO 4:5 Y conda war cachecsu uyojroner e Dios, machi caware e gente axin que non imbꞌutz cawirnar y que tamar era war cachecsu uyojroner e Dios axin. Sino que non war cachecsu tut e gente que e Jesucristo jax Cawinquirar, y que non manon tibꞌa umen que tuon e Jesús.
2CO 4:6 Pues tama ucajyesnibꞌir tunor lo que ayan cay ojron Cadiosir y che que tama e incsibꞌaner tuaꞌ alocꞌoy e janchꞌaquenar, y jax Cadiosir era ubꞌan xeꞌ cay uche ejpray ujanchꞌaquenar esto macuir tunor cawalma tuaꞌ uyubꞌion cacꞌotoy canata tucꞌa tunor utawarer Cadiosir lo que cay ejpray locꞌoy tamar ut e Cristo.
2CO 4:7 Pues galan tunor uyojroner e Dios tama e corpesiaj, y bꞌan ajcꞌunon umen e Dios tuaꞌ aquetpa tama cawalma xeꞌ bꞌan cocha inteꞌ bꞌejt xeꞌ chembꞌir tama e tzꞌijc rum. Pues e bꞌejt era matucꞌa ucꞌampibꞌir pero lo que ayan macuir atujri meyra. Y bꞌan uche e Dios tuaꞌ aquetpa chequer que tunor e nuxi cꞌotorer era tari tuaꞌ e Dios y que majax ticabꞌach.
2CO 4:8 Y motor que ayan meyra lo que war canumse cabꞌa iraj iraj, pero ayan ixto cocha tuaꞌ calocꞌoy tamar. Y motor que ayan lo que war cabꞌijnu meyra tamar, pero ma tiaꞌ war cachoqui cacꞌupesiaj.
2CO 4:9 Y motor que ayan tin e war aqꞌuijna uwiron xeꞌ war axin ticapat, pero non war canata que majax choquemon inyajrer. Y motor que ayan tin e axin ucucron tut e rum, pero machi uyubꞌi usation.
2CO 4:10 Y tic taca tiaꞌ caxin chequer tama cacuerpo que cꞌani ani uchamsion e mabꞌambꞌan gente bꞌan cocha uchamsiobꞌ e Jesús. Pero non era war caqꞌuecꞌo cawawan tut lo que watar tuaꞌ aquetpa chequer tut tunor e gente axin que bꞌixir e Jesús y que jaxir war ucorpeson tama e chamer.
2CO 4:11 Y e mabꞌambꞌan gente era war uturbꞌa ubꞌobꞌ iraj iraj tuaꞌ ani uchamsionobꞌ umen que war cachecsu uyojroner e Dios tama e corpesiaj axin. Y tamar era war aquetpa chequer uwirnar Cawinquirar Jesucristo tamaron motor que non winicon taca.
2CO 4:12 Y iraj iraj war acꞌajna cachamer umen que non war cachecsu uyojroner e Dios tama e corpesiaj axin, pero ayan ucꞌampibꞌir tunor era porque tamar era nox cꞌotoyox ichꞌami e cuxtar xeꞌ machi tuaꞌ acꞌapa.
2CO 4:13 Pues bꞌan cocha chꞌar tzꞌijbꞌabꞌir tama uyojroner e Dios tama inteꞌ Salmo y che: “Cꞌupseyanen tama uyojroner e Dios y tamar era cay ojronen tamar”, che tama uyojroner e Dios. Y non cocha war cacꞌupseyan ubꞌan tama uyojroner e Dios war cojron tamar ubꞌan.
2CO 4:14 Y war canata que Cadiosir xeꞌ ixin usuti ubꞌixqꞌues Cawinquirar Jesús tujam e chamenobꞌ cꞌani axin usuti ubꞌixqꞌueson non ubꞌan tacar jaxir. Y tamar era war canata que Cadiosir tuaꞌ uqꞌuechion caxin tunoron esto tut jaxir tichan tut e qꞌuin ubꞌan.
2CO 4:15 Pues numuy tunor era tuaꞌ ixtacarna y tuaꞌ abꞌoro tunor tin e war uchꞌamiobꞌ utacarsiaj e Dios, y tamar era axin abꞌoro ubꞌan tin xeꞌ war uyajcꞌuobꞌ utattzꞌarsiaj e Dios y xeꞌ war utattzꞌiobꞌ utawarer ubꞌan.
2CO 4:16 Entonces motor que war canumse cabꞌa meyra cocha era, pero machi war cawacta oꞌchoy e cꞌoyir tama cawalma. Y motor que war acꞌapa axin cacuerpo umen que war anumuy meyra año tama cajor, pero tunor cawalma war aqꞌuecꞌojsena iraj iraj umen Cadiosir.
2CO 4:17 Pues coner ayan lo que war canumse cabꞌa cora tamar cacuxtar tara tor e rum, pero cꞌani acꞌapa tunor era wacchetaca. Pero tama tunor era ayan lo que axin cachꞌami conda cacꞌotoy tichan tut e qꞌuin xeꞌ jax inteꞌ nuxi tawarer xeꞌ machi tuaꞌ acꞌapa xeꞌ tuaꞌ cajcꞌuna umen e Dios.
2CO 4:18 Pero non era machix tuaꞌ caturbꞌa cabꞌa tamar lo que erer cawira tara tor e rum, porque tunor lo que ayan tara tor e rum war oꞌcꞌoy y war acꞌapa. Y tamar era ucꞌani tuaꞌ caturbꞌa cabꞌa más tamar lo que ayan tichan tut e qꞌuin xeꞌ machi uyubꞌion cawira ut, porque lo que ayan tichan tut e qꞌuin machi tuaꞌ acꞌapa y machi tuaꞌ asatpa.
2CO 5:1 Pues cacuerpo lo que ayan tara tor e rum xeꞌ aquetpa bꞌan cocha inteꞌ otot xeꞌ chembꞌir taca e xan machi tuaꞌ eixna. Y conda cachamay cꞌani acꞌapa lo que quetpa bꞌan cocha cotot tara tor e rum xeꞌ jax cacuerpo. Pero canata que non ayan intex cotot xeꞌ jax cacuerpo xeꞌ imbꞌutz xeꞌ machi tuaꞌ acꞌapa xeꞌ tuaꞌ cachꞌami conda caxin tichan tut e qꞌuin. Pero cotot yajaꞌ tichan tut e qꞌuin chembꞌir umen e Dios y majax umen inteꞌ winic.
2CO 5:2 Porque non coner war cacꞌoyran caturuan tama cacuerpo tara tor e rum umen lo que war canumse cabꞌa tamar, y tamar era war cosre tuaꞌ cabꞌujcse cabꞌa tamar lo que ustabꞌir umen Cadiosir tichan tut e qꞌuin.
2CO 5:3 Y tamar era canata que ayan lo que tuaꞌ cabꞌujcsena tamar conda caxin tichan y que majax pispis tuaꞌ aquetpa cawalma conda cacꞌotoy tut e qꞌuin.
2CO 5:4 Pero coner cocha turonto tama cacuerpo tara tor e rum xeꞌ bꞌan cocha inteꞌ cotot, canata que inyaj cawerir y que ayan lo que war canumse cabꞌa tamar. Y motor que ma ani cꞌani cachoqui cacuerpo lo que ayan tara tor e rum, pero war ixto cosre tuaꞌ cachꞌami cacuerpo xeꞌ imbꞌutz tut e qꞌuin, porque cacuerpo xeꞌ imbꞌutz era cꞌani aquetpa bꞌixir inyajrer.
2CO 5:5 Pues jax Cadiosir xeꞌ cay uyusteson tuaꞌ uyubꞌion cachꞌami intex cacuerpo xeꞌ imbꞌutz xeꞌ tuaꞌ cachꞌami conda caxin tut e qꞌuin, y ixin uyajcꞌon Unawalir tuaꞌ uchion canata que san tuaꞌ uyajcꞌon cacuerpo xeꞌ imbꞌutz bꞌan cocha cay uyareon.
2CO 5:6 Y tamar era non ayan lo que war cacojco tamar y war canata que cocha turonto tama cacuerpo tara tor e rum que turonto najtir tut cacuerpo xeꞌ imbꞌutz xeꞌ tuaꞌ cachꞌami conda caxin caturuan taca Cawinquirar tichan tut e qꞌuin.
2CO 5:7 Pues non era war caxana tama ubꞌir e Dios tamar cacꞌupesiaj tamar jaxir, y machi war cachoqui cacꞌupesiaj tamar umen que machi war cawira ut jaxir tacar unaccoit.
2CO 5:8 Pero non war cacojcsan tamar era y qꞌuisinic cawacta cacuerpo tara tor e rum tuaꞌ caxin caturuan taca Cawinquirar tut e qꞌuin tichan.
2CO 5:9 Y tamar era war caturbꞌa cabꞌa tuaꞌ catzayjres Cawinquirar tama tunor lo que war cache motor que turon macuir cacuerpo tara tor e rum o motor que caxin tut e qꞌuin tuaꞌ caturuan tama cacuerpo xeꞌ imbꞌutz.
2CO 5:10 Porque tunoron ucꞌani tuaꞌ cacꞌotoy cawawan tut e Cristo watar e día tuaꞌ cachꞌami catuanibꞌir. Y inteꞌ intion ayan lo que aquetpa tuaꞌ cachꞌami tamar lo cay cache tama cacuerpo tara tor e rum jay imbꞌutz o jay matucꞌa ucꞌampibꞌir.
2CO 5:11 Y cocha non ubꞌan war cabꞌijnu que ucꞌani tuaꞌ cawawan tut Cawinquirar tuaꞌ cachꞌami uyeror ut tama tunor lo que cache tara tor e rum, war caturbꞌa cabꞌa tuaꞌ caware e gente axin tuaꞌ asutpobꞌ tut e Dios. Y Cadiosir war unata cocha turon y war incojco que nox ubꞌan war inata tama iwalma cocha turon.
2CO 5:12 Pues machi war cojron cocha era tuaꞌ catattzꞌi cabꞌa, sino que war cawajcꞌox tucꞌa tamar tuaꞌ itattzꞌion cora era y tuaꞌ inata tucꞌa tuaꞌ iware e gente tin e war utattzꞌi ubꞌobꞌ que galan ut uwirnarobꞌ y xeꞌ machi war ubꞌijnuobꞌ jay ayan ucꞌampibꞌir lo que ayan macuir uyalma inteꞌ.
2CO 5:13 Pues jay ayan tin e war ubꞌijnu que satrem tunor casasaꞌ, pues satrem ani casasaꞌ umen que war cosre tuaꞌ cache lo que ucꞌani Cadiosir. Y jay ayan tin e war ubꞌijnu que imbꞌutz tunor cajor, pues imbꞌutz turu cajor tuaꞌ uyubꞌion catacriox ixqꞌuecꞌo ixxana tama ubꞌir e Dios.
2CO 5:14 Pues umen que e Cristo war uyajta coit meyra uchion cabꞌijnu que, cocha ixin chamay tama tunor e gente tama tunor or e rum, que tamar era quetpa bꞌan cocha jay ixin chamayon ani tunoron tacar jaxir ubꞌan.
2CO 5:15 Y cocha ixin chamay jaxir tama tunoron, non xeꞌ turonto tara tor e rum machi ixto tuaꞌ taca cache lo que cacꞌani non, sino que ucꞌani tuaꞌ caxin cache lo que ucꞌani Cawinquirar xeꞌ ixin chamay tamaron y xeꞌ sutpa bꞌixcꞌa tuaꞌ utacrion.
2CO 5:16 Y tamar era machi ixto war cabꞌijnu tama inteꞌ winic jay imbꞌutz o jay majax imbꞌutz bꞌan cocha ubꞌijnuobꞌ e gente tara tor e rum. Pues non bꞌan ani cay cabꞌijnu tama e Cristo ubꞌan, bꞌan taca cocha ubꞌijnuobꞌ e winicobꞌ tara tor e rum. Pero machi ixto war cabꞌijnu cocha era tamar jaxir coner.
2CO 5:17 Y tamar era tunor tin e aquetpa intera taca e Cristo coner war aquetpa imbꞌutz tunor ucuxtar. Y lo que ayan ani tamar xeꞌ mabꞌambꞌan cꞌapa locꞌoy, y coner aquetpa imbꞌutz tunor.
2CO 5:18 Pues tunor lo que war anumuy tama inteꞌ winic xeꞌ uche aquetpa intiach uwirnar war achena umen e Dios, porque jax jaxir xeꞌ cay cꞌumpa taca e winicobꞌ tuaꞌ uyajcꞌu ujiriar umen lo que cay uche e Cristo. Y nacpat era ixin uyajcꞌon capatnar tuaꞌ caware e gente que coner ayan e cꞌumpar taca e Dios.
2CO 5:19 Pues lo que war cawareox jax era: Que tama e Cristo Cadiosir war upejca tunor e gente tara tor e rum que jaxir cꞌumpa tacarobꞌ, y que jaxir machix war ucꞌajpes tunor e mabꞌambꞌanir lo que cay uchiobꞌ. Y tamar era e Dios ixin uyajcꞌon capatnar tuaꞌ cachecsu tut tunor e gente tara tor e rum que ayan ucꞌumpar e Dios coner.
2CO 5:20 Y tamar era non quetpon tuaꞌ cojron tacarox tama e Cristo bꞌan cocha jay e Dios war ani uchectes ubꞌa tiut tuaꞌ upejcox conda war cojron non. Y tamar era cꞌani cawareox tamar ucꞌabꞌa e Cristo que cꞌumpenic taca e Dios.
2CO 5:21 Pues e Cristo ma tiaꞌ ixin uche nien imbꞌijc e mabꞌambꞌanir, pero jaxir ixin chamay tamaron tuaꞌ taca utacrion conda ajcꞌuna umen e Dios tuaꞌ ucuchi axin tunor camabꞌambꞌanir, y uche cocha era tuaꞌ uyajcꞌon cocha tuaꞌ cachꞌami e corpesiaj tuaꞌ jaxir tuaꞌ uyubꞌion caquetpa erach bꞌan cocha ucꞌani e Dios.
2CO 6:1 Pues entonces non era, cocha war capatna tacarox tama upatnar e Dios, cꞌani cawareox tuaꞌ machi iwacta bꞌan taca utacarsiaj e Dios lo que cay ichꞌami umen que cay cachecsu tunor era tiut.
2CO 6:2 Porque chꞌar tzꞌijbꞌabꞌir tama uyojroner e Dios tiaꞌ che que: Tama inteꞌ día conda cay acꞌajti tacaren, che e Dios, cay umbꞌi tunor lo que awaren, y tama e día conda cay impejquet tuaꞌ achꞌami e corpesiaj, cay intacriet, che e Dios. Bꞌan chꞌar tzꞌijbꞌabꞌir tama uyojroner e Dios. Pues coner jax e día conda Cadiosir cꞌani utacriox. Y coner jax e día conda ucꞌani tuaꞌ ichꞌami tunor e corpesiaj era.
2CO 6:3 Entonces tunoron ucꞌani tuaꞌ cache cabꞌa tuaꞌ machi caqꞌuijnes nien inteꞌ y nien inteꞌ, porque tamar era machi tuaꞌ axin oꞌjronobꞌ upater lo que war cachecsu tamar e Cristo que majax imbꞌutz tunor era.
2CO 6:4 Y tamar era war cawirse cabꞌa tut tunor e gente axin que war cache lo que ucꞌani tama tunor bꞌan cocha ucꞌani tuaꞌ uche inteꞌ xeꞌ uman e Dios. Y tamar era cawacta anumuy bꞌan taca tunor lo que watar tama cajor, bꞌan cocha e cꞌuxner, o conda ma tzꞌacar lo que ucꞌani inteꞌ, o conda aquetpa intran tunor ticoit.
2CO 6:5 Y cawacta bꞌan taca conda ayan chi xeꞌ axin uwatzꞌion, o conda caqꞌuejcha axin tama e cárcel, o conda axin upucujcse ubꞌobꞌ e sian gente ticoit, o conda cꞌoyon umen que meyra patnon, o conda ma cocha uyubꞌion tuaꞌ cawayan, o conda canumse cabꞌa tama e winar.
2CO 6:6 Y war cawirse tunor lo que war cache tut e gente axin tuaꞌ unatobꞌ que erach cawirnar. Y war cachectes cabꞌa que erach cawirnar umen que war canata uyojroner e Dios, y umen que war caquetpa tzꞌustaca conda ayan tin e war uchion canumse cabꞌa, y umen que incꞌun cawirnar. Y war cawirse e gente axin que ayan Unawalir e Dios tacaron, y que majax majresiaj que war cayajta ut e gente axin ubꞌan.
2CO 6:7 Y war cawirse e gente axin que erach cawirnar umen que war cacansiobꞌ lo que erach, y umen que war cacꞌampes ucꞌotorer e Dios tamar cacanseyaj. Y cacuxtar xeꞌ erach war aquetpa bꞌan cocha inteꞌ arma xeꞌ acꞌampesna tama e tzꞌojyir, y bꞌan cocha era war cacorpes cabꞌa ubꞌan.
2CO 6:8 Y conda war cachecsu uyojroner e Dios tut e gente axin ayan tin e war utattzꞌion, pero ayan tin e intaca axin usubꞌajreson. Y ayan e gente xeꞌ uyareon que atzay uwiron, pero ayan tin e ucꞌayon ubꞌan. Y motor que non war caware ajtaca lo que erach iraj iraj, pero ayan e gente xeꞌ acay uyareon que non ajmajresiajon ubꞌan.
2CO 6:9 Y motor que non natanbꞌiron umen tunor e gente axin, pero ayan tin e che que: “¿Chi e Pablo? o ¿chi e Timoteo?” Y ayan tin e qꞌuix uchamsion, pero iranicto que non bꞌixironto. Y ayan e gente xeꞌ uwatzꞌion, pero machi uchamsion.
2CO 6:10 Y motor que tzajtaca ut cawirnar tamar lo que war canumse cabꞌa, pero non tama cawalma war catzay que war caxana tama ubꞌir e Dios. Y motor que ayan conda matucꞌa catumin, pero Cadiosir war ubꞌutꞌi cawalma axin tuaꞌ uyubꞌion catacre e gente axin. Y motor que ayan conda matucꞌa ayanon inyajrer, pero war cacojco cachꞌami tunor lo que ucꞌani tama Cadiosir.
2CO 6:11 Entonces cawermanuox xeꞌ turox tama e chinam Corinto, cꞌani cawareox era que war capasi cabꞌa tiut tuaꞌ cawareox tunor lo que war cabꞌijnu y que pasar cawalma tiut ubꞌan.
2CO 6:12 Y non era matucꞌa war camuqui tiut, pero nox ayan ixto lo que war imuqui ticoit non.
2CO 6:13 Y tamar era cꞌani incꞌajti tacarox bꞌan cocha inteꞌ tatabꞌir xeꞌ war upejca umaxtac tuaꞌ ipasi ibꞌa ticoit tuaꞌ iwirsion tunor lo que ayan tamar bꞌan cocha cay cache non tiut.
2CO 6:14 Pues entonces ira ibꞌijnu tuaꞌ inutꞌi ibꞌa taca inteꞌ xeꞌ machi war acꞌupseyan tama Cawinquirar. Porque ma cocha erer anutpa lo que erach tacar lo que mabꞌambꞌan, y machi uyubꞌi anutpa e janchꞌaquenar taca e incsibꞌaner.
2CO 6:15 Pues chequer que e Cristo ma erer unutꞌi ubꞌa taca e diablo, porque ma erer atzay uwirobꞌ ubꞌobꞌ. Y bꞌan ubꞌan tama inteꞌ xeꞌ war acꞌupseyan tama Cawinquirar, ma erer unutꞌi ubꞌa taca inteꞌ xeꞌ machi war acꞌupseyan tama Cawinquirar.
2CO 6:16 Y ma cocha erer unutꞌi ubꞌobꞌ inteꞌ chamen dios taca uyotot Catata Dios, pues jax non xeꞌ ajcꞌupesiajon tama e Cristo xeꞌ uyototon Cadiosir xeꞌ bꞌixir. Y tamar era non xeꞌ uyototon Cadiosir ma cocha erer canutꞌi cabꞌa taca inteꞌ chamen dios. Bꞌan cocha chꞌar tzꞌijbꞌabꞌir tama uyojroner e Dios tiaꞌ che: Nen tuaꞌ inturuan tama uyalmobꞌ tunor nimaxtac, che e Dios, y cꞌani inxana tacarobꞌ iraj iraj. Y nen tuaꞌ inquetpa Udiosirenobꞌ, y jaxirobꞌ tuaꞌ aquetpobꞌ nimaxtacobꞌ ubꞌan, che e Dios, Bꞌan chꞌar tzꞌijbꞌabꞌir tama uyojroner e Dios.
2CO 6:17 Y tamar era ojron Cawinquirar Dios otronyajr y che: Loqꞌuenic tujam e ajmabꞌambꞌanirobꞌ y ira iyose ibꞌa tacarobꞌ. Y ira ipijchꞌi lo que erer uchiox ixbꞌontzꞌa, porque jay ixixin ixobꞌian tama niwojroner era nen cꞌani inchꞌamiox, che e Dios.
2CO 6:18 Y nen tuaꞌ inquetpa Itaten, y nox tuaꞌ ixquetpa nimaxtacox. Bꞌan che Cawinquirar Dios xeꞌ nojta ucꞌotorer.
2CO 7:1 Pues entonces cawermanuox xeꞌ inchoj iut camener, jax era lo que Cadiosir uyareon tama uyojroner, y jaxir san tuaꞌ acꞌapa uche tunor era bꞌan taca cocha uyareon. Y tamar era non ucꞌani tuaꞌ cawacta tunor e mabꞌambꞌanir y tunor lo que erer uchion abꞌontzꞌa tama cacuerpo o tama cawalma, y ucꞌani tuaꞌ caturbꞌa cabꞌa tuaꞌ caquetpa erach tunor cabꞌa tuaꞌ aquetpa chequer que war cabꞌacre e Dios.
2CO 7:2 Entonces pasic iwalma tuaꞌ ixtzay iwiron otronyajr era. Porque mamajchi catijres, y mamajchi upater war cojron, y mamajchi war camajres.
2CO 7:3 Pues machi war inwareox cocha era tuaꞌ incꞌayox, porque bꞌan cocha cay inwareox ixnix y bꞌan cꞌani inwareox otronyajr era que nox turox tama niwalma, y war inyajta iut conda warto inturuan tacarox tara tor e rum, y inxin inyajta iut motor jay ucꞌani ani tuaꞌ inchamay tamarox ubꞌan.
2CO 7:4 Pero nen meyra war incojco tamarox, y war intzay inware e inmojr ajcꞌupesiajobꞌ axin tunor lo que war iche era. Y motor que ayan lo que war innumse nibꞌa tamar, pero machi war imbꞌijnu tuaꞌ inwacta, sino que war intzay meyra tama niwalma, y war intzay inche tunor upatnar Cadiosir.
2CO 7:5 Pues cꞌani cawareox que conda cꞌotoyon tara tama e departamento Macedonia machi catajwi cocha tuaꞌ cajiri, porque tic taca tiaꞌ ixion ayan e sian qꞌuijnar. Y war coybꞌi e sian qꞌuecraner tic taca este que cay bꞌacton tama cawalma.
2CO 7:6 Pero Cadiosir xeꞌ unata ucꞌunles uyalmobꞌ tunor tin e tzajtaca utobꞌ, cay ucꞌunles cawalma taca ucꞌoter cawermano Tito.
2CO 7:7 Y tzayon meyra conda cꞌotoy cawermano Tito. Pero majax jax taca umen ucꞌoter que tzayon, sino que más meyra tzayon conda cay uyareon cobꞌa cꞌunlesna uyalma imener conda turuan tacarox. Y más meyra cay tzayon conda coybꞌi que nox war iyusre iwiron otronyajr, y que coner tzajtaca iut cora umen e mabꞌambꞌanir lo que cay inumse ibꞌa tamar, y que war iyusre icꞌupse niwojroner lo que cay inwareox tama inteꞌ carta xeꞌ inwebꞌta ixin tibꞌa. Y tama tunor era war intzay esto coner.
2CO 7:8 Pues motor que cay inchiox cꞌuxun iwalma umen lo que cay intzꞌijbꞌa tama inteꞌ carta, pero bueno que inwebꞌta ixin e carta yax tibꞌa ubꞌan. Pero machi ani incꞌani tuaꞌ inchiox acꞌuxun iwalma tamar lo que cay inwareox tama e carta, pero chꞌajbꞌex e Dios que sisa tunor era coner.
2CO 7:9 Y tamar era war intzay coner, pero majax umen que quetpox war acꞌuxun iwalma, sino umen que cay iyustes ibꞌa tuaꞌ iwacta tunor e mabꞌambꞌanir lo que war ani iche. Pero chequer que nox cay iwacta numuy bꞌan taca e sian cꞌuxner era y que tamar era ixiox itzayjres Cadiosir cocha cay iyustes ibꞌa wacchetaca. Y tamar era chequer que machi ixto war acꞌuxun iwalma umen lo que cay intzꞌijbꞌa tama e carta.
2CO 7:10 Pues tin e axin uyacta anumuy bꞌan taca inteꞌ cꞌuxner tama uyalma cocha era axin utzayjres e Dios jay axin uyustes ubꞌa tuaꞌ uyacta e mabꞌambꞌanir lo que war uche era. Y tamar era machi tuaꞌ caquetpa tzajtaca coit tamar lo que cay unumse ubꞌa inteꞌ porque jaxir axin acorpesna. Pero tin e aquetpa tzajtaca ut bꞌan taca cocha uchiobꞌ e gente tara tor e rum y machi uyustes ubꞌa, cꞌani asatpa tamar.
2CO 7:11 Pues iranic cobꞌa cꞌampesna e cꞌuxner era umen e Dios, porque nox cay icꞌupse niwojroner y tamar era cay iyustes ibꞌa wacchetaca. Y cay ichecsu ibꞌa taniut tama tunor lo que numuy tuaꞌ iwaren que majax nox xeꞌ war iche tunor era, y ayan ani conda cay qꞌuijnox, y ayan ani conda cay bꞌactox. De allí cay iyusre iwiren otronyajr y tuaꞌ iturbꞌa tama e disciplina e hermano xeꞌ war ani aturuan taca uwixcar utata tuaꞌ utoyi lo que cay uche. Pero tama tunor era cay ichectes ibꞌa que matucꞌa war iche nox, sino que jax taca inteꞌ hermano xeꞌ cay uche e mabꞌambꞌanir era.
2CO 7:12 Pues conda cay intzꞌijbꞌa inteꞌ carta tibꞌa machi war imbꞌijnu tamar e winic xeꞌ cay uche e mabꞌambꞌanir y nien machi war imbꞌijnu tamar tin e chena tacar. Sino que war ani imbꞌijnu tuaꞌ intacriox iwira cobꞌa war icꞌanion tut e Dios.
2CO 7:13 Y tamar era non war catzay y cꞌunlesna cawalma imener. Pues entonces ayanto más tzayer tujor lo que cay cachꞌami tibꞌa era y jax conda coybꞌi que war atzay meyra e hermano Tito. Y nox ayan meyra lo que cay iche tuaꞌ itacre achecta e jiriar tama uyalma.
2CO 7:14 Pues non cay catattzꞌiox cora tut e hermano Tito que nox buena genteox conda ne mato ixin jaxir tuaꞌ uwarajsiox, y non ma erer casubꞌajra tamar lo que cay caware era porque bꞌanox. Y bꞌan cocha erach tunor lo que cawareox y bꞌan ubꞌan lo que cay caware e hermano Tito tamarox, y jaxir atzay meyra conda uwirox umen que conda cꞌotoy, cay uwira que bꞌan cocha caware tamarox y bꞌanox ubꞌan.
2CO 7:15 Y tamar era jaxir war uyajta iut tunorox porque conda jaxir axin ubꞌijnu tama e tiempo conda turu tacarox conda quetpa tuaꞌ uyareox lo que inwebꞌta ixin tuaꞌ uchecsu tiut, nox cay cꞌupseyanox tut. Y nox cay bꞌactox tut jaxir y cay ichꞌami y cay itattzꞌi bꞌan cocha jay jax ani nen.
2CO 7:16 Y tamar era nen war intzay tamarox que erer ixto incojco tamarox.
2CO 8:1 Pues entonces niwermanuox, cꞌani cawareox era lo que cay numuy tama e sian grupo ajcꞌupesiajobꞌ xeꞌ turobꞌ tama e departamento Macedonia. Pues cay checta meyra utacarsiaj e Dios tamarobꞌ este que cay ulocsiobꞌ utuminobꞌ lo que qꞌuecher umenerobꞌ tuaꞌ utacriobꞌ e ajcꞌupesiajobꞌ tama e departamento Judea.
2CO 8:2 Y motor que e ajcꞌupesiajobꞌ era ayan meyra lo que cay unumse ubꞌobꞌ tamar pero war atzayobꞌ meyra tama Cawinquirar. Y motor que imbꞌijc taca lo que ayan tuobꞌ pero umen que war atzayobꞌ meyra cay uyajcꞌuobꞌ meyra tama e ofrenda bꞌan cocha jay meyra ayan ani utumin.
2CO 8:3 Y nen era ajchecsuyajen tamar e ajcꞌupesiajobꞌ era que jaxirobꞌ cay uyajcꞌuobꞌ taca tunor uyalmobꞌ tunor lo que uyubꞌi uchiobꞌ tama e ofrenda y de allí cay asutpa uyajcꞌuobꞌ más ubꞌan.
2CO 8:4 Y cay ucꞌajtiobꞌ meyra tacaron tuaꞌ cawacta utacriobꞌ tama e ofrenda lo que war cachꞌami tuaꞌ cawebꞌta axin tuaꞌ catacre umaxtacobꞌ e Dios xeꞌ turobꞌ tama e departamento Judea.
2CO 8:5 Pero jaxirobꞌ cay uchiobꞌ meyra tujor lo que war cabꞌijnu que uyubꞌi uchiobꞌ, y tamar era cay uturbꞌa ubꞌobꞌ tamar Cawinquirar, y de allí sutpa uturbꞌa ubꞌobꞌ tamaron non ubꞌan bꞌan cocha ucꞌani Cadiosir.
2CO 8:6 Y tamar era cay incꞌajti tuaꞌ e hermano Tito xeꞌ jax xeꞌ cay uchꞌami tunor e nuxi ofrenda era tibꞌa ambꞌi tuaꞌ asutpa ucꞌajti tibꞌa tuaꞌ itacre otronyajr era tamar e tacarsiaj lo que cꞌani cawebꞌta axin tama e ajcꞌupesiajobꞌ xeꞌ tzajtaca utobꞌ tama e departamento Judea.
2CO 8:7 Pues nox era war ixqꞌuecꞌo meyra tacar utacarsiaj Unawalir e Dios, y tacar utacarsiaj era war ixcꞌupseyan nojta tama e Dios, y war ixcꞌampesna umen e Dios tuaꞌ ichecsu uyojroner axin, y Cadiosir war uwirsiox meyra lo que war aquetpa mucur tut e inmojr, y war ixtzay ibꞌijnu iche tunor upatnar e Dios, y war ichecsu ibꞌa que war iyajta coit bꞌan cocha cay cacansiox iche. Y tamar era chequer que cꞌani ixixin iche lo que ucꞌani tama tunor e ofrenda era ubꞌan.
2CO 8:8 Pues nen machi war inwareox tucꞌa ucꞌani tuaꞌ iche. Ajtaca cꞌani inwareox era cobꞌa tzayer ayan tuaꞌ e ajcꞌupesiajobꞌ tama e departamento Macedonia conda cay uyajcꞌuobꞌ e ofrenda era, y tamar era jay nox ixixin ixtzay meyra ubꞌan conda iwajcꞌu e ofrenda, erer innata que erach que war iyajta utobꞌ e ajcꞌupesiajobꞌ xeꞌ tzajtaca utobꞌ.
2CO 8:9 Y nox war inata cobꞌa utacarsiaj Cawinquirar Jesucristo y que motor que jaxir ayan meyra lo que ayan tuaꞌ conda turuto tichan taca Catata Dios conda ne mato ayopa tara tor e rum tuaꞌ acuxpa, pero que conda turuan tara tor e rum sutpa tzajtaca ut tuaꞌ uwirsion utacarsiaj. Y bꞌan uche tuaꞌ uchion casutpa rico umen que jaxir quetpa tzajtaca ut conda turu tara tor e rum.
2CO 8:10 Pues nox era ucꞌani tuaꞌ iyubꞌi lo que nen war imbꞌijnu tama tunor e ofrenda era. Pues jax nox xeꞌ cay iwajcꞌu bꞌajxan e ofrenda era ambꞌi, y majax jax taca bꞌajxan tuaꞌ iwajcꞌu pero cay iche tunor era umen que nox war icꞌani iwajcꞌu.
2CO 8:11 Y cocha nox cay tzayox iwajcꞌu e ofrenda ambꞌi y era cꞌani cawira jay warto icꞌani tuaꞌ ixsutpa iwajcꞌu otronyajr. Pero ajcꞌunic inteꞌ intiox bꞌan taca cocha uyubꞌiox tamar lo que ayan tibꞌa.
2CO 8:12 Porque jay inteꞌ hermano cꞌani uyajcꞌu e ofrenda tamar lo que ayan tuaꞌ, Cadiosir atzay uchꞌami lo que war uyajcꞌu era. Pero Cadiosir machi war ucojco uchꞌami ticabꞌa lo que matucꞌa.
2CO 8:13 Y machi war inwareox que nox ucꞌani tuaꞌ inumse ibꞌa tama e winar umen que war itacre e inmojr era, y machi war inwareox que tin e war itacre era axin ani aquetpa meyra lo que ayan tuobꞌ umen que nox war inumse ibꞌa tama inecesidad.
2CO 8:14 Machi. Lo que war inwareox jax era: Que bueno ani tuaꞌ ixquetpa lar tama tunor, y tamar era nox ayan lo que ayanox coner tuaꞌ uyubꞌiox itacriobꞌ tamar unecesidobꞌ. Pero bꞌajcꞌat watar e día conda nox acay inumse ibꞌa tama inecesidad y jaxirobꞌ ayan meyra tuobꞌ tama e tiempo yajaꞌ, entonces jaxirobꞌ erer axin utacriox otronyajr. Pues tamar era erer aquetpa lar lo que ayan tibꞌa tacar lo que ayan tuobꞌ.
2CO 8:15 Bꞌan cocha chꞌar tzꞌijbꞌabꞌir tama uyojroner e Dios que: “Tin e ixin umorojse meyra maná matucꞌa quetpa tuaꞌ conda cꞌapa weꞌ. Y tin e ixin umorojse imbꞌijc taca e maná ixin tzꞌacta lo que umorojse tuaꞌ ucꞌuxi.” Bꞌan chꞌar tzꞌijbꞌabꞌir tama uyojroner e Dios.
2CO 8:16 Pues entonces cꞌani intattzꞌi ucꞌabꞌa e Dios tama e hermano Tito que jaxir turbꞌana tama uyalma umen e Dios tuaꞌ uyusre ucojcox bꞌan cocha war unsre inche nen ubꞌan.
2CO 8:17 Y tamar era jaxir atzay conda cay inware tuaꞌ axin uwarajsiox otronyajr era, pero coner war imbꞌijnu que ixin ani otronyajr tuaꞌ uwarajsiox motor que nen machi ani inware tuaꞌ axin, porque jaxir chequer que war uyusre uwirox otronyajr era.
2CO 8:18 Y taca e hermano Tito era war cawebꞌta axin otronteꞌ hermano xeꞌ cꞌajna umen tunor e grupo ajcꞌupesiajobꞌ tama tunor or e lugar era umen que jaxir war apatna meyra tuaꞌ utacre alocꞌoy uchequerir uyojroner e Dios tama e corpesiaj.
2CO 8:19 Y majax jax taca era sino que jaxir sicbꞌabꞌir ubꞌan umen tunor e grupo ajcꞌupesiajobꞌ tuaꞌ axin axana tacaron tuaꞌ utacrion caqꞌueche axin e ofrenda tut e ajcꞌupesiajobꞌ xeꞌ turobꞌ tama e departamento Judea. Y bꞌan war cache tuaꞌ catattzꞌi ucꞌabꞌa Cawinquirar y tuaꞌ achecsuna tut e ajcꞌupesiajobꞌ yajaꞌ que non war catzay cabꞌijnu catacriobꞌ.
2CO 8:20 Pues non era war caturbꞌa cabꞌa tuaꞌ cacojco tunor e ofrenda era tuaꞌ machi ubꞌijnu nien inteꞌ jay ayan ani chi xeꞌ war uchꞌami mucur e tumin era. Y jax tamar era que ayan cora ajcꞌupesiajobꞌ xeꞌ war axanobꞌ tacaren tuaꞌ uwirobꞌ tama e ofrenda era.
2CO 8:21 Pues non war cacꞌani tuaꞌ alocꞌoy erach tunor lo que war cache tuaꞌ aquetpa imbꞌutz tunor era tut Cawinquirar y tuaꞌ aquetpa imbꞌutz tunor era tut e winicobꞌ ubꞌan.
2CO 8:22 Y tamar era war cawebꞌta axin otronteꞌ ajcꞌupesiaj ubꞌan xeꞌ cay uwirse ubꞌa que war atzay meyra uche lo que ucꞌani Cadiosir, y warto atzay coner ubꞌan tuaꞌ uche e xambꞌar era cocha cay inware cobꞌa tuaꞌ ixixin itacre tama e ofrenda.
2CO 8:23 Y jay ayan chi xeꞌ axin uyubꞌi tibꞌa chi e hermano Tito, pues arenicobꞌ que jaxir jax inteꞌ nipiar y que jaxir apatna tacaren y que coner war acꞌotoy tiut tuaꞌ utacriox. Y jay ayan chi xeꞌ axin uyubꞌi tibꞌa tamar e inmojr hermanuobꞌ era arenicobꞌ que jaxirobꞌ ebꞌetbꞌirobꞌ umen cora grupo ajcꞌupesiajobꞌ y que jaxirobꞌ war utattzꞌiobꞌ ucꞌabꞌa e Cristo axin.
2CO 8:24 Pues quisinic era que nox ixixin iwirse e ajcꞌupesiajobꞌ era que war ixto iyajta utobꞌ, y quisinic que nox ixixin iwirse ubꞌan que erach lo que cay inware cora grupo ajcꞌupesiajobꞌ ixin conda cay intattzꞌiox que nox tuaꞌ ixixin icojcobꞌ tama tunor.
2CO 9:1 Pues tamar e ofrenda lo que war cachꞌami tuaꞌ catacre e ajcꞌupesiajobꞌ tama Cawinquirar xeꞌ turobꞌ tama e departamento Judea, machi ani ucꞌani tuaꞌ intzꞌijbꞌa más tibꞌa, cocha warix inata tama tunor era.
2CO 9:2 Porque warix innata tamarox que warix ibꞌijnu tuaꞌ itacre tama e ofrenda era, y tamar era cay intattzꞌiox tut e ajcꞌupesiajobꞌ xeꞌ turobꞌ tama e departamento Macedonia que nox xeꞌ turox tama e departamento Acaya turix tuaꞌ itacre tama e ofrenda era desde ambꞌi. Y tamar era meyra ajcꞌupesiajobꞌ tama e departamento Macedonia cay tzayobꞌ ubꞌijnuobꞌ tuaꞌ utacriobꞌ tama e ofrenda era ubꞌan.
2CO 9:3 Pero war inwebꞌta axin e Tito taca cora ajcꞌupesiajobꞌ tibꞌa tuaꞌ machi insutpa ajmajresiajen tamar lo que cay inware e ajcꞌupesiajobꞌ era tamarox. Porque ucꞌani tuaꞌ aquetpa ustabꞌir tunor iwofrenda conda incꞌotoy bꞌan cocha cay inware e ajcꞌupesiajobꞌ era.
2CO 9:4 Pero jay majax ani turix tunor iwofrenda conda acꞌotoyobꞌ e ajcꞌupesiajobꞌ tuaꞌ e departamento Macedonia, entonces non tuaꞌ caxin casubꞌajra meyra cocha cay cacojco meyra tamarox. Y machi war cojron tamar e subꞌar lo que nox tuaꞌ ani inumse ibꞌa tamar ubꞌan.
2CO 9:5 Y tamar era nen cay imbꞌijnu que imbꞌutz tuaꞌ inwebꞌta axin e Tito taca cora ajcꞌupesiajobꞌ tuaꞌ utacriox iyustes tunor e ofrenda lo que cay iwareon ambꞌi que cꞌani iche. Y tamar era erer aquetpa turix tunor e ofrenda conda non caxin cacꞌotoy, y erer aquetpa chequer tut tunor e ajcꞌupesiajobꞌ que nox war iwajcꞌu e ofrenda umen que bꞌan war icꞌani y majax umen que nen war ani inwareox que bꞌan ucꞌani tuaꞌ iche.
2CO 9:6 Entonces cꞌaric imener tamar era: Que tin e axin upaqꞌui imbꞌijc, pues imbꞌijc taca tuaꞌ uchꞌami tamar ubꞌan. Pero tin e axin upaqꞌui meyra, cꞌani axin uchꞌami meyra tamar ubꞌan.
2CO 9:7 Pero inteꞌ intion ucꞌani tuaꞌ caxin cawajcꞌu e ofrenda bꞌan cocha cabꞌijnu tama cawalma, porque machi tuaꞌ cawajcꞌu umen taca que ayan tin e war uyareon que bꞌan ucꞌani tuaꞌ cache. Pero ucꞌani tuaꞌ cawajcꞌu taca tunor cawalma, porque Cadiosir uyajta ut tin e war atzay uyajcꞌu uyofrenda.
2CO 9:8 Porque Cadiosir uyubꞌi uyajcꞌon meyra tacarsiaj tama tunor lo que ucꞌani inteꞌ tuaꞌ atzꞌacta tunor lo que ucꞌani tama uyotot, y tuaꞌ atzꞌacta ubꞌan tuaꞌ utacre e inmojr tin e matucꞌa ayan.
2CO 9:9 Bꞌan cocha chꞌar tzꞌijbꞌabꞌir tama uyojroner e Dios tiaꞌ che: Tin e erach uwirnar axin uyajcꞌu meyra tin e tzajtaca ut, y lo que uche xeꞌ imbꞌutz era machi tuaꞌ acꞌapa utuanibꞌir tut e Dios. Bꞌan chꞌar tzꞌijbꞌabꞌir tama uyojroner e Dios.
2CO 9:10 Pues jax Cadiosir xeꞌ war uyajcꞌu tunor ut e semilla tin e tuaꞌ apacma, y jax ubꞌan xeꞌ war uyajcꞌu e comida lo que tuaꞌ ucꞌuxi inteꞌ. Y jax Cadiosir era ubꞌan xeꞌ tuaꞌ axin uyajcꞌon tunor e tumin lo que ucꞌani tuaꞌ uyubꞌion cawajcꞌu e ofrenda bꞌan cocha jay ut e semilla era ani. Y jaxir tuaꞌ axin uchꞌijrse tunor cawofrenda era bꞌan cocha jay jax ani cajinaj. Y jaxir tuaꞌ axin utoyon meyra ubꞌan tama tunor lo que caxin cache xeꞌ imbꞌutz bꞌan cocha jay jax ani lo que war cachꞌami tama tunor lo que war capaqꞌui.
2CO 9:11 Y Cadiosir tuaꞌ uche achecta meyra lo que ayan ticabꞌa y tamar era uyubꞌion cawajcꞌu meyra tama e ofrenda. Y de allí umen que nox war iwajcꞌu e ofrenda era y war iwebꞌta axin, nox war iche que tin e war uchꞌamiobꞌ e ofrenda axin uyajcꞌuobꞌ meyra tattzꞌarsiaj e Dios tama tunor era.
2CO 9:12 Pero conda war cawajcꞌu inteꞌ ofrenda cocha era majax jax taca war catacre e ajcꞌupesiajobꞌ tamar lo que ucꞌani, sino que ayan ucꞌampibꞌir ubꞌan porque war cache utattzꞌiobꞌ e Dios meyra tamar lo que war cache era.
2CO 9:13 Pues tin e war uchꞌamiobꞌ e ofrenda era cꞌani axin utattzꞌiobꞌ ucꞌabꞌa e Dios, y tunor e ofrenda tuaꞌ uchectes tutobꞌ que nox war ixcꞌupseyan tut tunor uyojroner e Cristo. Y jaxirobꞌ tuaꞌ axin utattzꞌiobꞌ ucꞌabꞌa e Dios tamarox umen que cay iwajcꞌu meyra tama e ofrenda lo que war iwajcꞌuobꞌ y lo que war iwajcꞌu tunor e ajcꞌupesiajobꞌ axin tin e ayan unecesidad.
2CO 9:14 Y tamar era e ajcꞌupesiajobꞌ era xeꞌ cay tacarnobꞌ imener cꞌani axin ucꞌajti taca Dios tuaꞌ ixtacarna umener y axin uyajta iut meyra umen e nuxi tacarsiaj lo que Cadiosir ixin uchectes tamarox era.
2CO 9:15 ¡Catattzꞌic ucꞌabꞌa Cadiosir tama e nuxi tacarsiaj lo que ixin uyajcꞌon que machi uyubꞌion cabꞌisi porque nojta meyra tama tunor!
2CO 10:1 Pues entonces nen xeꞌ Pabloen ayan lo que cꞌani inwareox era, pero cꞌani inturbꞌa nibꞌa bꞌan cocha e Cristo xeꞌ umanxujres ubꞌa y xeꞌ incꞌun uwirnar tuaꞌ onjron tacarox era. Pues ayan tin e tijam xeꞌ war oꞌjron nipater que insubꞌajra conda turen tijam tuaꞌ onjron, pero que conda innajt turen tiut inxin inqꞌuecꞌo tama niwojroner lo que intzꞌijbꞌa tama inteꞌ carta tibꞌa. Bꞌan cocha era war oꞌjron cora winicobꞌ nipater.
2CO 10:2 Y tamar era cꞌani incꞌajti tibꞌa era tuaꞌ machi ichien aqꞌuecꞌo tunor niwojroner conda incꞌotoy tiut otronyajr porque erer inata que erer ixto aqꞌuecꞌo niwojroner jay bꞌan ucꞌani. Porque tin e war oꞌjronobꞌ capater que non war cache tunor capatnar bꞌan taca cocha inteꞌ winic tara tor e rum, pues jay machi cꞌani uyustes ubꞌobꞌ e winicobꞌ era entonces nen ucꞌani tuaꞌ aqꞌuecꞌo niwojroner tuaꞌ onjron tacarobꞌ conda incꞌotoy.
2CO 10:3 Pero non motor que winicon tara tor e rum pero machi catzꞌojyi bꞌan cocha uchiobꞌ e winicobꞌ tara tor e rum.
2CO 10:4 Porque bꞌan cocha inteꞌ soldado tara tor e rum xeꞌ axin ucꞌampes lo que qꞌuecher umener tuaꞌ ucucru tin e war aqꞌuijna uwira, non ubꞌan ayan lo que qꞌuecher camener xeꞌ war cacꞌampes tuaꞌ cache upatnar e Dios xeꞌ jax ucꞌotorer e Dios. Pero machi cacꞌampes e arma era bꞌan cocha acꞌampesna umen inteꞌ soldado tara tor e rum. Y tamar era conda non ucꞌani tuaꞌ catzꞌojyi cacꞌampes ucꞌotorer e Dios, y bꞌan cacꞌampes tuaꞌ cacucru tunor ucꞌotorer e Satanás y tuaꞌ cacucru tunor e mabꞌambꞌan bꞌijnusiaj tuaꞌ e gente bꞌan ani cocha e soldadobꞌ xeꞌ axin ucucruobꞌ inteꞌ cuartel o inteꞌ otot xeꞌ más aqꞌuecꞌo xeꞌ tuaꞌ e gente xeꞌ war aqꞌuijna uwirobꞌ.
2CO 10:5 Y tacar ucꞌotorer e Dios caxin catijres tunor e canseyaj lo que matucꞌa ucꞌampibꞌir y tunor e canseyaj lo que war uquete uwabꞌu uyojroner e Dios. Y tacar ucꞌotorer e Dios caxin casuti tunor ubꞌijnusiajobꞌ tin e machi war obꞌianobꞌ tut e Dios tuaꞌ aquetpobꞌ ajcꞌupesiajobꞌ tut e Cristo.
2CO 10:6 Y cꞌani cawareox era que conda acꞌapa iyustes ibꞌa ticoit y tut e Dios tuaꞌ isutpa ixcꞌupseyan tut cawojroner otronyajr, entonces turix tuaꞌ caturbꞌa tama e disciplina tunor tin e machi cꞌani acꞌupseyanobꞌ tut cawojroner y tut uyojroner Cadiosir.
2CO 10:7 Pues nox ayan lo que war icojco porque war iturbꞌa ibꞌa tamar taca lo que iwira tama inteꞌ, y machi war ibꞌijnu jay ayan lo que ayan tama uyalma. Pero jay ayan tin e war ubꞌijnu que jaxir tuaꞌ e Cristo entonces ucꞌani tuaꞌ ubꞌijnu otronyajr era tuaꞌ acꞌotoy uwira que non ubꞌan tuon e Cristo.
2CO 10:8 Y jay nen era inxin intattzꞌi nibꞌa tiut que nen meyra ayan nicꞌotorer pues machi tuaꞌ insubꞌajra inche, porque ajcꞌunen tunor era umen Cawinquirar tuaꞌ uyubꞌien intacriox ixqꞌuecꞌo ixxana tama ubꞌir e Dios, majax tuaꞌ intijresox tamar.
2CO 10:9 Porque machi incꞌani tuaꞌ ibꞌijnu jay nen war ani inturbꞌa nibꞌa tuaꞌ imbꞌajcꞌusiox tamar cora ojroner xeꞌ inwebꞌta tibꞌa más bꞌajxan, porque majax bꞌan.
2CO 10:10 Pues ayan inteꞌ ojroner xeꞌ war axin era xeꞌ che: “Conda e Pablo utzꞌijbꞌa inteꞌ carta ticabꞌa imbꞌar tunor uyojroner, pero conda jaxir turu tacaron tzajtaca ut uwirnar y subꞌar uwirnar conda oꞌjron.” Bꞌan che inteꞌ ojroner nipater xeꞌ war umbꞌi era.
2CO 10:11 Pero tin e war oꞌjron capater cocha era ucꞌani tuaꞌ ubꞌijnu que bꞌan cocha aqꞌuecꞌo cawojroner conda catzꞌijbꞌa tama inteꞌ carta conda turon najtir tiut, y bꞌan ubꞌan tuaꞌ caqꞌuecꞌo cache lo que ucꞌani conda cacꞌotoy tiaꞌ turox.
2CO 10:12 Y coybꞌi inteꞌ ojroner que ayan cora winicobꞌ xeꞌ war acꞌotoyobꞌ tiut xeꞌ war utattzꞌi ubꞌobꞌ jaxobꞌ taca que jaxirobꞌ apostolobꞌ y que jaxirobꞌ nojta ucꞌampibꞌirobꞌ. Pero non ma tiaꞌ tuaꞌ caxin canutꞌi cabꞌa tacarobꞌ porque jaxirobꞌ war uchiobꞌ lo que machi ani tuaꞌ uchiobꞌ. Pues jaxirobꞌ war unutꞌi ubꞌobꞌ jaxobꞌ taca, y tamar era machi war ubꞌijnuobꞌ jay aquetpa imbꞌutz tunor era tut e Dios sino que ajtaca uchiobꞌ lo que oꞌchoy tama ujorobꞌ.
2CO 10:13 Pero non machi cꞌani catattzꞌi cabꞌa tamar lo que machi ajcꞌunon umen e Dios, sino que cꞌani cawareox tamar taca lo que uyajcꞌon Cadiosir tuaꞌ cache. Porque jax Cadiosir xeꞌ ixin uyajcꞌon cacꞌampibꞌir tuaꞌ cache capatnar era, y jax jaxir xeꞌ uyareon tiaꞌ tuaꞌ caxin capatna. Y tamar era cꞌotoyon tuaꞌ cachecsu uyojroner e Dios tama e corpesiaj esto tiaꞌ turox ubꞌan tama e chinam Corinto.
2CO 10:14 Porque cꞌotoyon tiut tuaꞌ cachecsu uyojroner e Dios majax umen que bꞌan taca ochoy ticajor tuaꞌ cache, sino que cꞌotoyon tiut umen que bꞌan arobꞌnon umen e Dios tuaꞌ cache. Y tamar era ererto cacꞌotoy tiut otronyajrto era cocha jax non xeꞌ cꞌotoyon bꞌajxan tuaꞌ cachecsu uyojroner e Dios tama e Cristo tijam nox.
2CO 10:15 Pero non ma tiaꞌ caxin caware que ticabꞌach inteꞌ patnar tuaꞌ e Dios jay jax otronteꞌ xeꞌ cꞌotoy bꞌajxan tuaꞌ ucajyes tunor e patnar era. Pero coner war cacojco que axin achꞌiꞌ más tunor icꞌupesiaj tama Cawinquirar y que tamar era erer ixcꞌotoy iwira cobꞌa cacꞌampibꞌir lo que ajcꞌunon umen e Dios tuaꞌ catacriox y que tamar era que non uyubꞌion capatna más nojta tijam nox ubꞌan.
2CO 10:16 Y de allí cꞌani caxin cachecsu uyojroner e Dios tama e corpesiaj tama e lugar más innajt tiaꞌ turox, pero machi cꞌani caxin capatna tujor upatnar otronteꞌ tuaꞌ machi caxin cabꞌijnu jay nuxi patnar lo que war cache.
2CO 10:17 Pues bꞌan cocha chꞌar tzꞌijbꞌabꞌir tama uyojroner e Dios y che: “Jay ayan tin e cꞌani axin utattzꞌi ubꞌa jax taca, más ani bueno tuaꞌ utattzꞌi ucꞌabꞌa Cawinquirar tamar lo que chena umener.” Bꞌan chꞌar tzꞌijbꞌabꞌir tama uyojroner e Dios.
2CO 10:18 Porque aquetpa imbꞌutz inteꞌ winic jay bꞌan war ubꞌijnu Cawinquirar. Pero jay inteꞌ winic axin utattzꞌi ubꞌa que jaxir meyra ayan ucꞌampibꞌir, entonces matucꞌa ucꞌampibꞌir lo que war uche era.
2CO 11:1 Pues cꞌani inwareox era cora ojroner que bꞌajcꞌat cꞌani ibꞌijnu que matucꞌa ucꞌampibꞌir, y tamar era quisinic que intaca iyubꞌi tzꞌustaca lo que cꞌani inwareox era. Pues cꞌani intattzꞌi nibꞌa cora era.
2CO 11:2 Pues nen war imbꞌijnu tamarox bꞌan cocha ubꞌijnu Cadiosir. Porque nen bꞌanen cocha inteꞌ tatabꞌir y tunorox larox cocha inteꞌ chꞌom ijchꞌoc tanibꞌa, y tamar era nox quetpoxix ajcꞌubꞌir nimener tuaꞌ ixnujbꞌi taca e Cristo.
2CO 11:3 Pero nen war imbꞌacta que bꞌajcꞌat ixquetpa bꞌan cocha inteꞌ ijchꞌoc xeꞌ aquetpa majresbꞌir umen inteꞌ winic, bꞌan cocha cay unumse ubꞌa e Eva xeꞌ jax e bꞌajxan ixic xeꞌ majresna umen e chan xeꞌ jax e Satanás tuaꞌ uche e mabꞌambꞌanir este que satpa. Y bꞌan war imbꞌacta tamarox que bꞌajcꞌat ixixin ixnajtran tama ibꞌijnusiaj tut ubꞌir e Cristo umen que war iyubꞌi meyra canseyaj que majax bꞌan cocha ucꞌani e Dios.
2CO 11:4 Porque nox war iwacta ibꞌa tuaꞌ ixcansena umen tuqꞌuic tuqꞌuic winic xeꞌ acꞌotoy tiut motor que axin uchecsu intex canseyaj tama e Jesús que majax bꞌan cocha cay cachecsu non. Y nox matucꞌa iware motor que axin uchecsu tiut que ucꞌani tuaꞌ ichꞌami inteꞌ mein xeꞌ mabꞌambꞌan bꞌan cocha jay jax ani Unawalir e Dios xeꞌ majax bꞌan cocha cay cacansiox non. Y war iwacta bꞌan taca motor que axin uchecsu tiut intex ojroner tama e corpesiaj xeꞌ majax bꞌan cocha cay cacansiox tuaꞌ ichꞌami bꞌajxan.
2CO 11:5 Pues machi war imbꞌijnu jay nen más chuchu apostolen tut tin e war uche ubꞌobꞌ que más nuxi apostolobꞌ ani.
2CO 11:6 Pues bꞌajcꞌat machi alocꞌoy galan tunor niwojroner bꞌan cocha uchiobꞌ e nuxi apostolobꞌ ani era, pero nen ayan lo que ajcꞌunen umen e Dios xeꞌ jax e natanyaj xeꞌ quetpa chequer tiut conda ixien incansiox.
2CO 11:7 Entonces ¿war ca ibꞌijnu que majax bueno que nen ixien incansiox tunor uyojroner e Dios tamar e corpesiaj bꞌan taca y que machi inwareox que toyenic tamar? ¿O ma ca jax bueno tiut que nen ixien inmanxujres nibꞌa cocha era tuaꞌ injachiox?
2CO 11:8 Pues lo que cay inche conda turen tacarox tama inyajr, cay inchꞌami cora cora e tumin tuaꞌ cora grupo ajcꞌupesiajobꞌ tama inteꞌ inteꞌ lugar. Y tamar era uyubꞌien intacriox bꞌan taca y matucꞌa inlocse tibꞌa.
2CO 11:9 Y tamar era conda turuanen tacarox nen ma tiaꞌ cay inwareox jay ayan lo que ucꞌani, porque conda tariobꞌ cora hermanuobꞌ tama e departamento Macedonia, jaxirobꞌ utaresobꞌ cora ofrenda xeꞌ cay uyajqꞌuenobꞌ tuaꞌ utacren tama tunor lo que ucꞌani. Y tamar era mamajchi cay inware tijam tuaꞌ utacren. Y bꞌan cocha cay inche tama e tiempo xeꞌ numuy era y bꞌan tuaꞌ inche iraj iraj tacarox ubꞌan.
2CO 11:10 Y bꞌan cocha innata ixto yaꞌ que erach tunor e ojroner tama e Cristo, pues bꞌan ubꞌan que mamajchi tuaꞌ ulocse nitzayer lo que ayan tamaren umen que nen ma tiaꞌ tuaꞌ inxin inlocse e tumin tibꞌa xeꞌ turox tama e departamento Acaya umen que war incansiox uyojroner e Dios.
2CO 11:11 ¿Y tucꞌa tuaꞌ war inwareox tunor era? ¿Umen ca que machix war inyajta iut? Pues Cadiosir unata que majax bꞌan, y que nen war incꞌaniox meyra.
2CO 11:12 Pues tunor lo que cay inche era que ma tiaꞌ inlocse itumin tuaꞌ intacriox cꞌani inxin inche iraj iraj ubꞌan, porque machi incꞌani tuaꞌ oꞌjronobꞌ tin e war uche ubꞌobꞌ que nuxi apostolobꞌ ani que jaxirobꞌ war apatnobꞌ ani bꞌan cocha non, porque majax bꞌan.
2CO 11:13 Porque e winicobꞌ era majax apostolobꞌ tuaꞌ e Cristo. Intaca war uche ubꞌobꞌ que jax. Pero jaxirobꞌ ajmajresiajobꞌ taca y matucꞌa ayan tamarobꞌ.
2CO 11:14 Pero tunor era ma erer ubꞌajcꞌusion porque war canata que e Satanás ubꞌan ixin majresian y uche ubꞌa que jax ani inteꞌ ángel xeꞌ erach xeꞌ tuaꞌ e janchꞌaquenar tichan.
2CO 11:15 Pero bꞌan cocha uche e Satanás y bꞌan taca uchiobꞌ tin e war axanobꞌ tama ubꞌir ubꞌan, y tamar era non machi tuaꞌ cabꞌacta cawira jay umanobꞌ e Satanás war uche ubꞌobꞌ que umanobꞌ ani e Cristo. Porque watar e día conda tunorobꞌ tuaꞌ axin uchꞌamiobꞌ uyeror tama tunor lo que cay uchiobꞌ xeꞌ mabꞌambꞌan tara tor e rum.
2CO 11:16 Pues cꞌani inwareox otronyajr era que quisinic que mamajchi tijam tuaꞌ ubꞌijnu que nen matucꞌa ani nisasaꞌ. Pero jay ayan chi bꞌan war ubꞌijnu, actaniquen tuaꞌ onjron cora era bꞌan cocha inteꞌ xeꞌ matucꞌa ani usasaꞌ tuaꞌ uyubꞌien intattzꞌi nibꞌa cora tamar lo que cay innumse nibꞌa.
2CO 11:17 Pues Cawinquirar machi uyaren tuaꞌ inwareox cobꞌa nicꞌampibꞌir, pero nen cꞌani inxin onjron bꞌan cocha inteꞌ xeꞌ matucꞌa ani usasaꞌ cocha cꞌani inxin intattzꞌi nibꞌa cora era tamar nicꞌampibꞌir lo que ajcꞌunen umen e Dios.
2CO 11:18 Pero cocha ayan meyra tin e war utattzꞌi ubꞌobꞌ tamar e cꞌampibꞌir lo que ayan tuobꞌ tara tor e rum, nen ubꞌan cꞌani intattzꞌi nibꞌa nen taca.
2CO 11:19 Pues cocha nox war iche ibꞌa que más ayan lo que inata tama ijor iraj iraj, war ixtzay iwira acꞌotoy tin matucꞌa unatobꞌ tuaꞌ uwarajsiox.
2CO 11:20 Y nox war ixtzay iwira acꞌotoy tin e axin uyareox tucꞌa tuaꞌ iche, y tin e axin ulocse tunor lo que ayan tibꞌa, y nox turix tuaꞌ iche tunor lo que uyareox. Y nox intaca iyubꞌi tin e axin umajresox y tin e axin utattzꞌi ubꞌa tiut, y nox iwacta bꞌan taca tin e axin uyajcꞌox tama icajram y war ixtzay tamar.
2CO 11:21 Pues nen era insubꞌajra imbꞌijnu tuaꞌ inche ani lo que cay uchiobꞌ e nuxi apostolobꞌ ani tamarox. ¿War ca nic che era que nen injayjayen, y que tamar era que machi war inche cocha war uchiobꞌ e apostolobꞌ ani era? Pues entonces jay ayan tin e cꞌani axin utattzꞌi ubꞌa que nojta ucꞌampibꞌir, pues nen erer ani inxin inche ubꞌan, motor que nen imbꞌijnu que war onjron era bꞌan cocha inteꞌ xeꞌ matucꞌa ani usasaꞌ.
2CO 11:22 Pues jay e nuxi apostolobꞌ ani axin utattzꞌi ubꞌobꞌ que uyubꞌiobꞌ oꞌjronobꞌ tama e ojroner hebreo, ucꞌani tuaꞌ inata que nen ubꞌan uyubꞌien onjron tamar. Y jay jaxirobꞌ axin utattzꞌi ubꞌobꞌ que jaxirobꞌ tuobꞌ e Israel, pues nen ubꞌan tuen e Israel. Y jay jaxirobꞌ axin utattzꞌi ubꞌobꞌ que sitzbꞌirobꞌ tuaꞌ e Abraham xeꞌ turuan tama e onian tiempo, pues nen ubꞌan sitzbꞌiren tuaꞌ.
2CO 11:23 Y jay jaxirobꞌ axin utattzꞌi ubꞌobꞌ que umanobꞌ e Cristo, pues nen era imbꞌijnu que war onjron bꞌan cocha inteꞌ xeꞌ matucꞌa ani usasaꞌ. Pero machi cꞌani inwareox tamar lo que inche xeꞌ locꞌoy bueno sino que cꞌani inwareox tamar lo que numuy tamaren umen que nen injayjayen. Y tamar era cꞌani inwareox que nen patnenix más tama upatnar Cawinquirar que jaxirobꞌ, y que nen esto jajtzꞌenix meyra más que jaxirobꞌ, y nen esto qꞌuechbꞌiren ixien tama e cárcel más que jaxirobꞌ, y nen ayan ani meyra veces conda cay imbꞌijnu que cꞌanix inchamesna umen que war inche upatnar Cawinquirar.
2CO 11:24 Cinco veces jajpnen umen e gente tuaꞌ e Israel tuaꞌ uwatzꞌien treinta y nueve veces taca e qꞌuewer.
2CO 11:25 Jajpnen uxyajr umen e soldadobꞌ romano tuaꞌ uwatzꞌienobꞌ taca e teꞌ, y ayan inyajr conda chamesnen ani taca e tun. Y uxyajr cꞌapa muctzꞌa inteꞌ barco macuir e jaꞌ conda nen war inxana tamar, y ayan inyajr conda innumse inteꞌ día y inteꞌ acbꞌar tor e jaꞌ umen que cꞌapa muctzꞌa e barco y intaca turen tama e jaꞌ war incojco chi chi tuaꞌ ayopa ucorpesen.
2CO 11:26 Y nen meyra xambꞌar cay inche, y tamar era ayan meyra lo que cay innumse nibꞌa tamar xeꞌ imbꞌacꞌajr uwirnar. Ayan ani conda qꞌuix ani inchamay tama inteꞌ xucur, y intran taniut conda quetpa tuaꞌ inxana tor e bꞌir tiaꞌ ayan e sian ajxujch. Y chamesnen ani umen taca niwet ajlugarobꞌ tama e Israel, y chamesnen ani umen e gente xeꞌ majax tuobꞌ e Israel. Y chamesnen ani macuir e chinam, y chamesnen ani tama e choquem lugar, y chamayen ani macuir e jaꞌ tama e mar. Y chamesnen ani umen tin e war uche ubꞌobꞌ que ajcꞌupesiajobꞌ ani tama Cawinquirar.
2CO 11:27 Y ayan conda cꞌapa patnen meyra y cꞌoyen meyra, y ayan ani conda machi uyubꞌien inwayan. Y ayan ani conda aintzꞌa meyra y que war ataqui nitiꞌ meyra. Y ayan ani conda machi war inweꞌ, y ayan ani conda sisayen meyra, y ayan ani conda war acꞌapa nibꞌujc.
2CO 11:28 Y tujor tunor era ayanto lo que cay innumse nibꞌa tamar xeꞌ jax lo que uchien imbꞌijnu iraj iraj jay war axanobꞌ imbꞌutz tama ubꞌir e Dios tunor e sian grupo ajcꞌupesiajobꞌ tic taca tiaꞌ cay inchecsu uyojroner e Dios ixin.
2CO 11:29 Pues conda ayan inteꞌ hermano xeꞌ machi aqꞌuecꞌo tama ucꞌupesiaj tama Cawinquirar, nen inquetpa bꞌan cocha jay nen injayjayen ani tama niwalma ubꞌan. Y conda ayan tin e axin uqꞌuijnes inteꞌ hermano tuaꞌ uche acucrema tama e mabꞌambꞌanir, nen inxin inqꞌuijna ubꞌan.
2CO 11:30 Pues jay ucꞌani tuaꞌ inxin intattzꞌi nibꞌa, cꞌani intattzꞌi nibꞌa tamar lo que uchectes que nen injayjayen.
2CO 11:31 Porque war unata Cadiosir xeꞌ jax Utata Cawinquirar Jesús xeꞌ tawar tuaꞌ achojbꞌesna iraj iraj que erach tunor lo que war inwareox era.
2CO 11:32 Y tama inyajr conda turen tama e chinam Damasco e gobernador xeꞌ jax inteꞌ ajcꞌampar tuaꞌ inteꞌ rey xeꞌ ucꞌabꞌa Aretas cay uturbꞌa cora soldadobꞌ tut inteꞌ inteꞌ portón lo que ayan tama e nuxi muro xeꞌ ayan tutiꞌ tunor e chinam yajaꞌ tuaꞌ usicbꞌenobꞌ y tuaꞌ uqꞌuechienobꞌ inxin tama e cárcel umen que nen war inchecsu uyojroner e Dios axin.
2CO 11:33 Pero ayan cora hermanuobꞌ xeꞌ cay utacrenobꞌ xeꞌ uturbꞌenobꞌ macuir inteꞌ nuxi chiquiꞌ y de allí ulocsienobꞌ tama inteꞌ ventana lo que ayan tama e nuxi muro y uyemsenobꞌ taca inteꞌ lazo tama e chiquiꞌ y tamar era nen locꞌoy ajnien.
2CO 12:1 Pues entonces cꞌani inwareox que matucꞌa ucꞌampibꞌir jay inteꞌ axin utattzꞌi ubꞌa ubꞌajner, pero cꞌani inwareox tamar e mayjut lo que irsenen umen e Dios y cꞌani inwareox tamar lo que arobꞌnen umener ubꞌan.
2CO 12:2 Pues ayan inteꞌ winic xeꞌ tuaꞌ e Cristo xeꞌ natanwa nimener xeꞌ qꞌuechbꞌir ixin esto tama e uxteꞌ ut qꞌuin tichan tiaꞌ turu Catata Dios y que ayix catorce año conda numuy tunor era. Y esto coner machi ixto innata jay qꞌuechbꞌir ixin tamar taca uyalma o jay qꞌuechbꞌir ixin taca tunor ucuerpo, jax taca e Dios xeꞌ war unata tunor era.
2CO 12:3 Y cꞌani inwareox otronyajr era que machi innata jay e winic era qꞌuechbꞌir ixin tut e qꞌuin taca tunor ucuerpo o jay tamar taca uyalma, jax taca e Dios xeꞌ war unata tama tunor era.
2CO 12:4 Pero nen innata ixto que e winic era qꞌuechbꞌir ixin esto tiaꞌ turu Catata Dios tiaꞌ galan tunor. Y conda turu yajaꞌ tut e qꞌuin cay uyubꞌi meyra lo que galan xeꞌ ucꞌani tuaꞌ aquetpa mucur tut e winicobꞌ tara tor e rum coner y que ma cocha erer tuaꞌ achecsuna.
2CO 12:5 Pues nen uyubꞌien ani intattzꞌi nibꞌa tamar lo que cay uwira e winic era tut e qꞌuin, pero nen machi tuaꞌ intattzꞌi nibꞌa tamaren taca, sino que tamar taca lo que axin uchecsu que nen injayjayen.
2CO 12:6 Pero jay nen ani inxin intattzꞌi nibꞌa tamar lo que inche, machi war che era que nen cꞌapa ani tunor nisasaꞌ, porque war ani inwareox jax taca lo que erach. Pero machi inche cocha era tuaꞌ machi acꞌotoy ubꞌijnuobꞌ e gente jay nen más nuxi winiquen, porque ucꞌani tuaꞌ ubꞌijnuobꞌ cobꞌa winiquen tamar taca lo que uwirenobꞌ inche y tamar taca lo que uyubꞌienobꞌ onjron.
2CO 12:7 Pues entonces cocha cay arobꞌnen meyra sian ojroner tuaꞌ e Dios xeꞌ galan ixto yaꞌ, ebꞌetna tari taniut lo que bꞌan ani cocha inteꞌ tꞌix xeꞌ war uxeqꞌuien tama nichejchec xeꞌ war acꞌuxun meyra. Pues e tꞌix era jax inteꞌ man tuaꞌ e Satanás xeꞌ cꞌotoy taniut tuaꞌ uqꞌuijnesen inxin iraj iraj. Y bꞌan ajcꞌunen tuaꞌ machi incꞌotoy imbꞌijnu jay nen nuxi winiquen y tuaꞌ machi inxin intattzꞌi nibꞌa tama tunor lo que irsenen umen e Dios.
2CO 12:8 Pero nen incꞌajtix tama uxyajr taca e Dios tuaꞌ ulocse tunor era lo que war uchien acꞌuxun era.
2CO 12:9 Pero ojron e Dios tacaren y che: “Pues nen cꞌapa inwajqꞌuet meyra tacarsiaj xeꞌ atzꞌacta tuaꞌ utacret tama tunor lo que war anumse abꞌa era. Porque más achecta nitacarsiaj tut tin e injayjay turu, y tamar era más cꞌani achecta nitacarsiaj tacaret coner cocha ayan lo que war anumse abꞌa tamar.” Bꞌan uyaren e Dios. Entonces nen era war intzay que injayjayen porque tamar era war achecta tunor utacarsiaj Cawinquirar Jesucristo tuaꞌ utacren taca tunor lo que war innumse nibꞌa.
2CO 12:10 Y tamar era war intzay conda war injayjayran, y war intzay conda ayan tin e war uqꞌuijnesen, y war intzay conda ma tzꞌacar lo que ayan tanibꞌa, y war intzay conda ayan tin e war uchien innumse nibꞌa, y war intzay conda war innumse nibꞌa tamar lo que inyaj taniut umen taca que war inchecsu uyojroner e Dios tama e Cristo tut e gente axin. Porque conda war injayjayran axin más war inqꞌuecꞌo porque tamar era más war uqꞌuecꞌojsen Nidiosir.
2CO 12:11 Pues nen era war inche nibꞌa bꞌan ani cocha inteꞌ xeꞌ matucꞌa ani usasaꞌ umen que war intattzꞌi nibꞌa cora era. Pero jax nox xeꞌ ichien inche cocha era, y jax nox ubꞌan xeꞌ ucꞌani ani tuaꞌ iwaren que imbꞌutz tunor lo que war inche. Porque motor que ayan ani conda nen matucꞌa ani nicꞌampibꞌir tiut, pero nen más ayan nicꞌampibꞌir que tin e war uche ubꞌobꞌ que nuxi apostolobꞌ ani que nox war iturbꞌa ibꞌa tamar iraj iraj.
2CO 12:12 Pues tunor lo que ucꞌani tuaꞌ uche inteꞌ tuaꞌ aquetpa chequer que jaxir jax inteꞌ apóstol tuaꞌ Cawinquirar chempa nimener tiut. Y tamar era nen cay inwirsiox meyra seña tuaꞌ e Dios, y cay inche meyra patnar tacar ucꞌotorer e Dios, y cay inche e milagro tiut ubꞌan. Y machi cꞌoyen inche tunor era conda turen tacarox.
2CO 12:13 Pero cꞌani inwareox era que nen ixien inche nibꞌa tacarox bꞌan cocha cay inche nibꞌa tut tunor e inmojr grupo ajcꞌupesiajobꞌ ubꞌan, pero ma tiaꞌ incꞌajti e tacarsiaj tibꞌa tamar lo que ucꞌani. Pues jay mabꞌambꞌan tiut lo que inche que machi ixien incꞌajti e tumin tibꞌa, cꞌumpenic tacaren era.
2CO 12:14 Pues entonces coner war unstes nibꞌa tuaꞌ inche e uxyajr xambꞌar tiaꞌ turox tuaꞌ inwarajsiox, y conda incꞌotoy machix tuaꞌ incꞌajti e tacarsiaj tibꞌa otronyajr. Porque nen machi war incꞌani tuaꞌ inchꞌami itumin sino que jax nox. Porque majax e maxtac xeꞌ tuaꞌ axin umorojse e tumin tuaꞌ uwese utata y utuꞌ, sino que jax e tatabꞌir y e tubꞌir xeꞌ ucꞌani tuaꞌ uwirobꞌ cocha tuaꞌ uwese umaxtacobꞌ.
2CO 12:15 Pero nen era intzay tuaꞌ inxin insati tunor nitumin y tuaꞌ insati nibꞌa ubꞌan tuaꞌ intacriox ixqꞌuecꞌo ixxana tama ubꞌir e Dios. Y tamar era aquetpa chequer tiut que nen war inyajta iut, pero nox chequer que war asatpa axin icꞌunersiaj tamaren.
2CO 12:16 Pues nox war inata que nen ma tiaꞌ cay inwareox tuaꞌ itacren taca e tumin. Pero war umbꞌi que ayan tin e war oꞌjron nipater y che: “E Pablo ayan ucꞌampibꞌir pero jaxir cay ucꞌampes e majresiaj tuaꞌ uchion cache lo que machi ani cacꞌani”, che e ojroner era nipater.
2CO 12:17 ¿Cay ca nic inmajresox tacar tin e cay inwebꞌta ixiobꞌ tibꞌa? Pues machi.
2CO 12:18 Pues cay incꞌajti taca e Tito tuaꞌ axin uwarajsiox, y ayan otronteꞌ hermano xeꞌ inwebꞌta ixin tacar. ¿Cay ca umajresox e Tito conda turu tacarox? Pues majax bꞌan uche. Porque e Tito y nen war caturuan intera cawirnar y war caturbꞌa cabꞌa tuaꞌ caquetpa bueno tiut y bueno tut tunor e ajcꞌupesiajobꞌ axin ubꞌan.
2CO 12:19 Pues entonces bꞌajcꞌat ayan tin e turobꞌ tijam xeꞌ war ubꞌijnuobꞌ que tunor e ojroner era tuaꞌ taca calocse cabꞌa tacarox. Pero majax bꞌan sino que non war cojron tut e Dios tamar ucꞌabꞌa Cawinquirar Jesucristo tuaꞌ cacꞌumpa tacarox. Y tunor lo que war cache tacarox iraj iraj war cache tuaꞌ taca catacriox ixqꞌuecꞌo ixxana tama ubꞌir e Dios, nox xeꞌ cawermanuox xeꞌ inchoj iut camener.
2CO 12:20 Pero nen era war imbꞌacta cora que conda incꞌotoy tuaꞌ inwarajsiox que inxin inwira que nox majax bꞌan iwirnar cocha quisinic ani inwira, y que nox conda ixixin iwiren que niwirnar machix tuaꞌ aquetpa cocha war icꞌani ubꞌan. Y war imbꞌacta que bꞌajcꞌat ayan tijam tin e machi war ucꞌani lo que cꞌajna umen e inmojr, y que ayan tin e war acꞌuxnaqꞌui uwira otronteꞌ, y que ayan tin e ayan e qꞌuijnar tamar, y que ayan tin e war ubꞌijnu que jax taca ayan ucꞌampibꞌir. Y war imbꞌacta que bꞌajcꞌat ayan tijam tin e war oꞌjron upater otronteꞌ, y que ayan tin e war aqꞌuecran axin, y que ayan tin e war ubꞌijnu que jaxir más ayan ucꞌampibꞌir que e inmojr, y que ayan tin e war utijres axin tunor e culto umen que acay oꞌjron meyra conda majax bꞌan ucꞌani.
2CO 12:21 Y war imbꞌacta que conda inxin incꞌotoy tuaꞌ inwarajsiox otronyajr que bꞌajcꞌat Nidiosir axin uchien insubꞌajra inwirox, y que bꞌajcꞌat aquetpa tuaꞌ inxin anru tamar lo que war uchiobꞌ cora hermanuobꞌ tijam xeꞌ cay uchiobꞌ e mabꞌambꞌanir ixnix y que machi ixto uyactobꞌ tunor era, y que warto uchiobꞌ lo que intuj tut e Dios, y que warto uchiobꞌ e mabꞌambꞌanir taca inteꞌ ixic o taca inteꞌ winic, y que machi ixto acay ubꞌijnu tuaꞌ uyacta uchiobꞌ tunor era lo que cay uchiobꞌ ixnix xeꞌ mabꞌambꞌan.
2CO 13:1 Pues entonces jax era e uxyajr xambꞌar lo que war inche tuaꞌ inwarajsiox, y conda incꞌotoy cꞌani anumuy bꞌan cocha chꞌar tzꞌijbꞌabꞌir tama uyojroner e Dios que: “Cꞌani aquetpa chequer que erach uyojroner inteꞌ jay ayan chateꞌ o uxteꞌ ajchecsuyajobꞌ xeꞌ uwirobꞌ lo que numuy.” Bꞌan chꞌar tzꞌijbꞌabꞌir tama uyojroner e Dios.
2CO 13:2 Pero cꞌani inwareox tunorox era xeꞌ cay iche e mabꞌambꞌanir ixnix y tunor e inmojr ubꞌan que bꞌan cocha cay inwareox tama inteꞌ xambꞌar y bꞌan tuaꞌ inchecsu tiut otronyajr era ubꞌan motor que innajt turen tiut coner pero conda incꞌotoy otronyajr era mamajchi tuaꞌ ajni tut e disciplina jay machi cꞌani uyacta e mabꞌambꞌanir lo que war uche.
2CO 13:3 Y conda cꞌapa inchiox disciplinar cocha era cꞌani aquetpa chequer tiut que ayan ixto ucꞌotorer e Cristo tamaren conda onjron. Y tunor e nuxi patnar lo que axin uche e Cristo tamarox cꞌani uchectes tiut que jaxir majax injayjay ubꞌan, porque jaxir tuaꞌ axin uchectes meyra ucꞌotorer tiut tamar lo que axin uche tamarox.
2CO 13:4 Y motor que Cawinquirar Jesucristo uche ubꞌa que injayjay conda qꞌuejcha ixin tuaꞌ achamesna tut e cruz, pero jaxir sujta bꞌixqꞌuesna tujam e chamenobꞌ umen ucꞌotorer e Dios. Y bꞌan cocha Cawinquirar uche ubꞌa que injayjay tama e tiempo yajaꞌ y bꞌanon ubꞌan, pero umen que intera turon tacar jaxir war caturuan tamar ucꞌotorer tuaꞌ uyubꞌion catacriox.
2CO 13:5 Entonces bꞌijnunic iwira tamarox jay war ixto ixcꞌupseyan tama e Cristo. Otronyajrto cꞌani inwareox que bꞌijnunic iwira tamar ibꞌa era. ¿O turu ca e Cristo Jesús tama iwalma? Pues turu jay war ixcꞌupseyan tamar. Pero tin e intaca war uche ubꞌa que ajcꞌupesiaj tama e Cristo ma erer ubꞌijnu jay turu e Cristo tama uyalma.
2CO 13:6 Pero nen war incojco tamarox que machi tuaꞌ ibꞌijnu que nen intaca war inche nibꞌa que ajcꞌupesiajen tama e Cristo.
2CO 13:7 Y non war cacꞌajti taca e Dios tuaꞌ machi iche e mabꞌambꞌanir. Pero machi war cacꞌajti cocha era tamarox tuaꞌ taca querna que galan tunor lo que war cache, sino que umen que cꞌani cawira que nox ixixin iche imbꞌutz tama tunor. Pues taniut nen era machi uchien imbꞌijnu jay ayan tin e ubꞌijnu jay majax imbꞌutz lo que war cache.
2CO 13:8 Porque machi uyubꞌion cache lo que majax bꞌan cocha lo que erach, sino que ucꞌani tuaꞌ cache ajtaca lo que erach tut e Dios.
2CO 13:9 Y catzay conda caquetpa injayjay jay machi ucꞌani tuaꞌ cachectes ucꞌotorer e Dios tuaꞌ ani cachiox disciplinar, y catzay tamar que nox ixqꞌuecꞌo axin jay war iche imbꞌutz tama tunor. Y tamar era war cacꞌajti taca e Dios tamarox tuaꞌ ixquetpa erach tama tunor.
2CO 13:10 Y tamar era war intzꞌijbꞌa tunor e ojroner tama e jun era conda turento innajt tiut porque machi incꞌani tuaꞌ aquetpa imbꞌar tunor niwojroner conda incꞌotoy tiut. Porque ajcꞌunen tunor nicꞌotorer umen Cawinquirar, majax tuaꞌ incꞌampes tuaꞌ intijresox, sino que tuaꞌ intacriox ixqꞌuecꞌo ixxana tama ubꞌir e Dios.
2CO 13:11 Pues entonces niwermanuox, cꞌani inwacta tunor niwojroner era. Pero cꞌani inwareox que tzayesic ibꞌa tamar Cawinquirar, sicbꞌanic cocha tuaꞌ iyustes ibꞌa axin tuaꞌ ixquetpa más erach tut e Dios, cansenic ibꞌa tuaꞌ iche más lo que imbꞌutz tut e Dios, turbꞌanic ibꞌa tuaꞌ aquetpa intera tunor ibꞌijnusiaj, y turbꞌanic ibꞌa tuaꞌ aquetpa ujiriar e Dios tijam. Y tamar era Cadiosir xeꞌ war uyajta iut y xeꞌ war uyajcꞌon meyra ujiriar tuaꞌ ucojcon iraj iraj aquetpac tama iwalma tunorox.
2CO 13:12 Chenic ibꞌa erach inteꞌ intiox conda itzꞌujtzꞌi ibꞌa tuaꞌ icꞌajpes ibꞌa.
2CO 13:13 Tunor e ajcꞌupesiajobꞌ tama Cawinquirar xeꞌ turobꞌ tama e lugar era war ucꞌajpesox tama inteꞌ cꞌajpesiaj.
2CO 13:14 Entonces cꞌani inchojbꞌesox era y che: “Que utacarsiaj Cawinquirar Jesucristo axin aquetpa taca tunorox, y que ixcꞌotoy inata cobꞌa ucꞌaniox Catata Dios, y que Unawalir e Dios aquetpa tacarox iraj iraj. Amén.” Tara acꞌapa tunor niwojroner, che e Pablo.
GAL 1:1 Nen xeꞌ Pabloen jax inteꞌ apóstol tuaꞌ e Jesucristo, pero majax umen que tzacarbꞌiren tarien umen inteꞌ winic nien que pejcbꞌiren umen e winicobꞌ. Pero nen apostolen umen que pejcbꞌiren umen e Jesucristo y umen Catata Dios xeꞌ ixin usuti ubꞌixqꞌues e Jesucristo tujam e chamenobꞌ.
GAL 1:2 Pues nen taca tunor e hermanuobꞌ xeꞌ turobꞌ tacaren era war catzꞌijbꞌa e carta era tama cora sian grupo ajcꞌupesiajobꞌ xeꞌ turox tama e departamento Galacia.
GAL 1:3 Chꞌamic tunor utacarsiaj y tunor ujiriar Catata Dios y tuaꞌ Cawinquirar Jesucristo
GAL 1:4 xeꞌ jax xeꞌ ixin uyajcꞌu ubꞌa tuaꞌ achamesna tama tunor camabꞌambꞌanir y tuaꞌ ucorpeson tama ucꞌotorer e tiempo era xeꞌ mabꞌambꞌan bꞌan cocha ucꞌani Catata Dios.
GAL 1:5 Catattzꞌic ucꞌabꞌa Catata Dios iraj iraj y ejcꞌar ejcꞌar. Amén.
GAL 1:6 Pues nen era war imbꞌacta inwira que nox war ixlocꞌoy najtir tut ubꞌir Cadiosir wacchetaca cocha era, y que war iwacta tin e cay ichꞌami bꞌajxan xeꞌ jax xeꞌ cay upejcox taca utacarsiaj e Cristo, y que ixiox iturbꞌa ibꞌa tama otronteꞌ ojroner xeꞌ war ichebꞌe que axin uqꞌuechiox ixixin tut e qꞌuin conda ixixin ixchamay.
GAL 1:7 Pero matucꞌa otronteꞌ ojroner xeꞌ uyubꞌi uqꞌuechion caxin tut e qꞌuin conda caxin cachamay. Ajtaca uyojroner e Cristo xeꞌ uyubꞌi ucorpeson. Pero cocha ayan tin e war ucansiox iraj iraj que ayan otronteꞌ ojroner que chenobꞌ que más erach, war ixquetpa nutꞌur iut tama tunor e sian canseyaj era.
GAL 1:8 Pero cꞌani inwareox era que majax bꞌan cocha war ixarobꞌna umen e inmojr xeꞌ war uyareox que ayan otronteꞌ bꞌir tuaꞌ acꞌotoy acorpesna inteꞌ tamar, porque matucꞌa más ojroner xeꞌ tuaꞌ ucorpeson, ajtaca e ojroner tama Cawinquirar Jesucristo. Y tin tin xeꞌ acꞌotoy uyareox que ayan otronteꞌ ojroner xeꞌ más erach, quetpac yebꞌar inteꞌ bꞌax. Y motor jay acꞌotoy inteꞌ ángel o motor jay nen xeꞌ Pabloen incꞌotoy ani inwareox que ayan otronteꞌ ojroner xeꞌ erer ani ucorpeson, pero majax bꞌan porque jax taca Cawinquirar Jesucristo xeꞌ uyubꞌi ucorpeson.
GAL 1:9 Pues inwareoxix bꞌajxan era, pero cꞌani insutpa inwareox otronyajr, que jay ayan tin e acꞌotoy uyareox que ayan otronteꞌ bꞌir tuaꞌ acꞌotoy acorpesna inteꞌ que majax bꞌan cocha cay ichꞌami, que jaxir quetpac yebꞌar inteꞌ bꞌax inyajrer.
GAL 1:10 Pues entonces nen era machi war inche nibꞌa tuaꞌ intajttzꞌa umen e winicobꞌ tamar lo que uyubꞌi inwareobꞌ, sino que war inturbꞌa nibꞌa tuaꞌ intajttzꞌa umen e Dios tamar lo que inche. Pues jay nen ani war insicbꞌa tuaꞌ taca intzayjres e gente uwiren, ma cocha erer inquetpa inteꞌ uman e Cristo.
GAL 1:11 Pues entonces niwermanuox, cꞌani inwareox era que e ojroner tama e corpesiaj lo que war inchecsu axin machi tari tama ubꞌijnusiaj inteꞌ winic.
GAL 1:12 Porque nen machi inchꞌami e ojroner era tama inteꞌ winic y mamajchi xeꞌ turu tara tor e rum cay ucansen tama tunor era, sino que jax taca e Jesucristo xeꞌ cay uchecsu tunor era taniut.
GAL 1:13 Pues nox cay iyubꞌi cocha turu niwirnar tama e tiempo ixnix conda warto inxana tama e cꞌupesiaj tuaꞌ e gente tuaꞌ e Israel. Y war inata que tama e tiempo yajaꞌ war inche unumse ubꞌobꞌ meyra tin e war acꞌupseyanobꞌ tama e Cristo este que inturbꞌa nibꞌa tuaꞌ intijres ani tunor e grupo ajcꞌupesiajobꞌ inyajrer.
GAL 1:14 Y tama e tiempo yajaꞌ nen war ani inturbꞌa nibꞌa más nojta tama tunor nicꞌupesiaj ani este que quetpen más nojta que tunor niwet chꞌom maxtaquir porque nen cay inturbꞌa nibꞌa más meyra tuaꞌ incojco tunor e onian bꞌijnusiaj tuaꞌ catata viejobꞌirobꞌ.
GAL 1:15 Pero Cadiosir meyra ayan utacarsiaj xeꞌ cay usicbꞌen conda merato incuxpa ani, y de allí cay upejquen tuaꞌ inquetpa uman. Pues tama inteꞌ hora conda jaxir ubꞌijnu que más imbꞌutz tut,
GAL 1:16 cay uchecsu taniut chi Uyunen xeꞌ jax Cawinquirar Jesucristo. Y tamar era upejquen tuaꞌ inxin inchecsu uyojroner e Dios tama e corpesiaj tut tunor e gente xeꞌ majax tuobꞌ e Israel. Pero tama e hora yajaꞌ ma tiaꞌ ixien umbꞌi tuaꞌ otronteꞌ tama tunor era.
GAL 1:17 Y machi ixien tama e chinam Jerusalem tuaꞌ inwira tin e aquetpobꞌ apostolobꞌ bꞌajxan que nen. Pero lo que inche jax era: Ixien wacchetaca esto tama e lugar Arabia y de allí sutpa ixien wacchetaca esto tama e chinam Damasco.
GAL 1:18 Entonces conda cꞌapa numuy e uxteꞌ año era ixien esto tama e chinam Jerusalem tuaꞌ inwarajse e Pedro, y quetpen tacar quince día.
GAL 1:19 Pero mamajchi más cay inwarajse tujam e apostolobꞌ tama nixambꞌar era, sino que jax taca e Santiago xeꞌ jax uwijtzꞌin Cawinquirar.
GAL 1:20 Y tunor lo que war intzꞌijbꞌa tibꞌa era erer inwareox tut e Dios que erach tunor y que machi war inmajresox nien imbꞌijc.
GAL 1:21 Pero nacpat era ixien tama e lugar Siria y tama e lugar Cilicia.
GAL 1:22 Y tamar era mamajchi tujam e sian grupo ajcꞌupesiajobꞌ tama e Cristo xeꞌ turobꞌ tama e departamento Judea cꞌotoy unatobꞌ chien nen tama e día yajaꞌ.
GAL 1:23 Ajtaca war uyubꞌiobꞌ inteꞌ ojroner xeꞌ che: “Ayan inteꞌ winic xeꞌ war ani usicbꞌon tuaꞌ uchamsion, pero che que coner war axin tic taca tuaꞌ ucanse tunor e gente cocha tuaꞌ acꞌupseyanobꞌ tama e Cristo tuaꞌ acorpesnobꞌ. Y jax era e ojroner lo que cꞌani ani utijres.” Bꞌan che e ojroner xeꞌ checta ixin tut tunor e sian grupo ajcꞌupesiajobꞌ tama e departamento Judea.
GAL 1:24 Y tamar era tunor e hermanuobꞌ yajaꞌ war utattzꞌiobꞌ ucꞌabꞌa Cadiosir que nen war inchecsu uyojroner e Dios tama e corpesiaj coner.
GAL 2:1 Pues entonces conda cꞌapa numuy catorce año ixien otronyajr tama e chinam Jerusalem y ixin e hermano Bernabé tacaren ubꞌan. Y caqꞌueche ixin e hermano Tito ubꞌan.
GAL 2:2 Pero ixien tama e hora era umen que bꞌan arobꞌnen umen e Dios tuaꞌ inche. Y conda cꞌotoyon cay camorojse cabꞌa taca tin e quetpobꞌ líder tama tunor e grupo ajcꞌupesiajobꞌ, y tamar era cay inwareobꞌ tunor lo que war inchecsu tut e gente xeꞌ majax tuobꞌ e Israel tama e corpesiaj. Y bꞌan inche porque machi war incꞌani tuaꞌ aquetpa bꞌan taca tunor nipatnar lo que cay inche y lo que warto inche tujam e gente xeꞌ majax tuobꞌ e Israel.
GAL 2:3 Pero nien e hermano Tito xeꞌ majax tuaꞌ e gente tuaꞌ e Israel machi arobꞌna tuaꞌ axujra imbꞌijc uqꞌuewerir utejromar bꞌan cocha ucꞌani tuaꞌ achena tama tunor e tejromtac tama e lugar Israel cocha bꞌan chꞌar tzꞌijbꞌabꞌir tama uley e Moisés.
GAL 2:4 Pero ayan ubꞌan cora winicobꞌ xeꞌ cay uyose ubꞌobꞌ ticajam mucur xeꞌ war uche ubꞌobꞌ que hermanuobꞌ pero que majax, y cꞌotoyobꞌ tuaꞌ taca utajwiobꞌ cobꞌa cacorpesiaj tama e Cristo Jesús. Pero jaxirobꞌ intaca war ucꞌaniobꞌ tuaꞌ uyosionobꞌ yebꞌar ucꞌotorer uley e Moisés otronyajr.
GAL 2:5 Pero non machi cawactobꞌ tuaꞌ ucucruonobꞌ tamar e ojroner xeꞌ cay cachꞌami tuaꞌ e Dios tama e corpesiaj. Porque jaxirobꞌ war ani ucꞌaniobꞌ que tunor tin e majax tuobꞌ e Israel ucꞌani ani tuaꞌ axujra imbꞌijc uqꞌuewerir utejromar ubꞌan tuaꞌ uyubꞌi ani aquetpobꞌ imbꞌutz tut e Dios. Pero quetpa chequer que erach tunor e ojroner tama e corpesiaj tama Cawinquirar Jesucristo bꞌan taca cocha cay cꞌupseyanox tamar.
GAL 2:6 Pues matucꞌa más canseyaj xeꞌ cay uyajqꞌuenobꞌ tama e corpesiaj tama e Jesucristo tin e chequer que más nuquir winicobꞌ tama e chinam Jerusalem. Pues taniut nen majax más nojta ucꞌampibꞌir inteꞌ xeꞌ nuxi winic que inteꞌ xeꞌ choquem winic porque tut e Dios aquetpobꞌ larobꞌ tunor.
GAL 2:7 Y cocha matucꞌa más bꞌijnusiaj utajwiobꞌ tuaꞌ uyajqꞌuenobꞌ, cꞌotoy unatobꞌ que nen ebꞌetbꞌir tarien umen e Dios tuaꞌ inchecsu uyojroner e Dios tama e corpesiaj tut tin e majax tuobꞌ e Israel, bꞌan cocha e Pedro quetpa sicbꞌabꞌir umen e Dios tuaꞌ uchecsu uyojroner e Dios tama e corpesiaj tut tin e tuobꞌ e Israel.
GAL 2:8 Porque bꞌan cocha quetpa chequer que Cadiosir uyajcꞌu ucꞌotorer e Pedro tuaꞌ aquetpa apóstol tuaꞌ apatna tujam e gente xeꞌ tuobꞌ e Israel, y bꞌan quetpa chequer ubꞌan que Cadiosir ixin uyajqꞌuen nen ucꞌotorer tuaꞌ inquetpa apóstol tuaꞌ impatna tujam e gente xeꞌ majax tuobꞌ e Israel.
GAL 2:9 Pues entonces conda cꞌotoy unatobꞌ e Santiago y e Pedro y e Juan que pejcbꞌiren ixto umen e Dios tuaꞌ inche tunor e patnar era, jaxirobꞌ xeꞌ quetpobꞌ más nuxi líder tama e grupo ajcꞌupesiajobꞌ yajaꞌ cay uchuquiobꞌ nicꞌabꞌ y ucꞌabꞌ e Bernabé tuaꞌ uchecsu ubꞌobꞌ que unatobꞌ que tuon e Dios. Y quetpa que non tuaꞌ caxin cachecsu uyojroner e Dios tama e corpesiaj tut e gente xeꞌ majax tuobꞌ e Israel y que jaxirobꞌ tuaꞌ axin uchecsuobꞌ uyojroner e Dios tama e corpesiaj tut e gente xeꞌ tuobꞌ e Israel.
GAL 2:10 Ajtaca cay uyareonobꞌ que machi tuaꞌ canajpes tuaꞌ catacre tin e tzajtaca utobꞌ tama e lugar Israel, bꞌan cocha warix unsre tuaꞌ inche ubꞌan.
GAL 2:11 Pues ayan inyajr conda turon tama e chinam Antioquía conda yopa e Pedro ubꞌan quetpen nen xeꞌ tuaꞌ inware tut tunor e gente que mabꞌambꞌan lo que war uche.
GAL 2:12 Pues lo que numuy jax era: Conda wartocto ayopa e Pedro cay weꞌ taca tunor e hermanuobꞌ xeꞌ majax tuobꞌ e Israel xeꞌ war che que majax xurbꞌir imbꞌijc uqꞌuewerir utejromarobꞌ. Pero nacpat era cꞌotoyobꞌ cora winicobꞌ xeꞌ tuobꞌ e Israel xeꞌ ebꞌetbꞌir tariobꞌ umen e Santiago xeꞌ turu tama e chinam Jerusalem, y conda e Pedro cay uwira e winicobꞌ era bꞌacta y machi ixto cꞌani aweꞌ taca e hermanuobꞌ era cocha majax xurbꞌir imbꞌijc uqꞌuewerir utejromarobꞌ. Porque bꞌan ubꞌijnusiajobꞌ e winicobꞌ era xeꞌ tuobꞌ e Israel que machi cꞌani awiobꞌ taca tin e majax xurbꞌir imbꞌijc uqꞌuewerir utejromar.
GAL 2:13 Y de allí cocha ayan cora hermanuobꞌ xeꞌ tuobꞌ e Israel tama e grupo ajcꞌupesiajobꞌ era, jaxirobꞌ cay uwirobꞌ tucꞌa war uche e Pedro y tamar era bꞌactobꞌ jaxirobꞌ ubꞌan, y machi ixto cꞌani awiobꞌ taca tin e majax xurbꞌir imbꞌijc uqꞌuewerir utejromar ubꞌan. Y conda e Bernabé uwira tunor era bꞌan cay uche jaxir ubꞌan.
GAL 2:14 Pero conda cay inwira que machi war acꞌupseyanobꞌ tut lo que erach lo que ayan tama uyojroner e Dios tama e corpesiaj, cay inware e Pedro tut tunor e gente era y che: “Net cuxpet tujam e gente tuaꞌ e Israel y chꞌiet tama tunor ucanseyajobꞌ, y jax net ubꞌan xeꞌ cay awacta tunor era ixnix conda cay achꞌami ucꞌabꞌa Cawinquirar Jesucristo. Y era ¿tucꞌa tuaꞌ war ache ubꞌijnuobꞌ tunor e gente era xeꞌ majax tuobꞌ e Israel que ucꞌani ani tuaꞌ acꞌupseyanobꞌ tut tunor e onian canseyaj tuaꞌ e gente tuaꞌ e Israel tuaꞌ aquetpobꞌ imbꞌutz ani tut e Dios? Porque nien net machi war ache lo que war ache ubꞌijnuobꞌ era tin e majax tuobꞌ e Israel”, xeꞌ inware nen xeꞌ Pabloen.
GAL 2:15 Y ojronen taca e Pedro otronyajr y che: “Pues nen y net era ajlugaron tama e Israel, y tamar era machi cay canuon cache tunor e sian mabꞌambꞌanir lo que cay uchiobꞌ tin e majax tuobꞌ e Israel.
GAL 2:16 Pero war canata ubꞌan que axin acorpesna inteꞌ umen taca que war acꞌupseyan tama e Jesucristo, y que machi tuaꞌ acorpesna nien inteꞌ umen que axin acꞌupseyan tut uley e Moisés. Y bꞌan war cache non; war cacꞌupseyan tama e Cristo Jesús tuaꞌ caquetpa imbꞌutz taca e Dios. Porque mamajchi uyubꞌi acorpesna umen taca que axin acꞌupseyan tut uley e Moisés.
GAL 2:17 ’Entonces conda cay cꞌupseyanon tama e Cristo tuaꞌ ucorpeson quetpa chequer ticoit que meyra ani ayan camabꞌambꞌanir. Entonces ¿tucꞌa cawaric tama tunor era? ¿War ca che tunor era que jax e Cristo xeꞌ cay uchion cache tunor e mabꞌambꞌanir era? Machi.
GAL 2:18 Non imbꞌutzon tut e Dios coner umen que cay cꞌupseyanon tama e Cristo. Ixion cawacta tunor uley e Moisés. Pero jay caxin cacanse ani e gente que ucꞌani tuaꞌ acorpesnobꞌ umen que axin acꞌupseyanobꞌ ani tut uley e Moisés, entonces non tuaꞌ caquetpa ani ajmajresiajon.
GAL 2:19 Pues bꞌan cocha inteꞌ chamen que machi uyubꞌi acꞌupseyan tut inteꞌ ley y bꞌanen nen ubꞌan tut uley e Moisés coner. Chamenen tut. Pero chamenen ani ubꞌan tut e Dios ixnix, pero coner bꞌixiren tut.
GAL 2:20 Pues nen ixien chamesnen taca e Cristo conda chꞌubꞌna tut e cruz, y tamar era mix jax nen xeꞌ war inware nibꞌa tucꞌa ucꞌani tuaꞌ inche tama nicuxtar era, sino que jax e Cristo xeꞌ turu tama niwalma. Y e cuxtar xeꞌ aquetpa tama nicuerpo era, turuan umen que war incꞌupseyan tama Uyunen e Dios xeꞌ uyajta niut y xeꞌ uyajcꞌu ubꞌa tuaꞌ achamesna tamaren.
GAL 2:21 Y nen era machi cꞌani inxejbꞌe ut utacarsiaj e Dios, porque jay uyubꞌi ani acorpesna inteꞌ umen que war acꞌupseyan tut uley e Moisés, entonces matucꞌa ani ucꞌampibꞌir que chamay e Cristo tut e cruz tuaꞌ ucorpeson.” Bꞌan inware e Pedro.
GAL 3:1 Pues entonces ayan lo que cꞌani inwareox xeꞌ turox tama e departamento Galacia xeꞌ jax era: ¿Tucꞌa tuaꞌ machi war icꞌampes ijor? ¿O ayan ca chi xeꞌ cay ubꞌaxeox y tamar era que war ichoqui iwacta e cꞌupesiaj tama uyojroner e Dios xeꞌ erach? ¿Machix ca cꞌar imener que conda turuanen tacarox que cay inchecsu tiut tunor uchamer e Jesucristo y cocha chꞌubꞌna tut e cruz tuaꞌ achamay tamaron?
GAL 3:2 Areniquen coner tamar lo que cꞌani umbꞌi tamarox, ¿ichꞌami ca Unawalir e Dios umen que cay cꞌupseyanox tut uley e Moisés? ¿O ichꞌami ca Unawalir e Dios conda cay cꞌupseyanox tama uyojroner e Dios lo que cay iyubꞌi incansiox? Pues chequer que ichꞌami Unawalir e Dios conda cay cꞌupseyanox tama uyojroner e Dios.
GAL 3:3 ¿Y tucꞌa era que machi cꞌani icꞌampes ijor tuaꞌ ibꞌijnu? Porque nox cay xanox bien tama ubꞌir e Dios tacar utacarsiaj Unawalir e Dios, pero era war ichebꞌe que uyubꞌiox ixquetpa erach tut e Dios tamar taca lo que ibꞌijnu nox.
GAL 3:4 Pues tunor lo que cay inumse ibꞌa conda ichꞌami Cawinquirar Jesucristo quetpa bꞌan taca tiut. Y ¿tucꞌa tuaꞌ iwacta ibꞌa inumse ibꞌa meyra cocha era jay war ani inata que matucꞌa ani ucꞌampibꞌir lo que cay ichꞌami? Pero nen war imbꞌijnu que ayan meyra ucꞌampibꞌir.
GAL 3:5 Y conda cay ichꞌami ucꞌotorer Unawalir e Dios este que cay checta cora sian milagro tiut, ¿numuy ca tunor era umen que war iturbꞌa ibꞌa tuaꞌ ixcꞌupseyan tut uley e Moisés? Machi. Cay iwira checta cora milagro tijam umen taca que cay cꞌupseyanox tama uyojroner e Dios lo que cay iyubꞌi.
GAL 3:6 Pues bꞌijnunic tama e Abraham xeꞌ turuan tama e onian tiempo. Jaxir cꞌupseyan tama e Dios, y tamar era arobꞌna umen e Dios que jaxir erach uwirnar.
GAL 3:7 Y cocha e Abraham cꞌupseyan tama e Dios tuaꞌ acorpesna, tunor tin e axin acꞌupseyanobꞌ tama e Dios coner axin aquetpobꞌ umaxtacobꞌ e Abraham ubꞌan porque war uchiobꞌ bꞌan cocha cay uche jaxir tama e onian tiempo.
GAL 3:8 Y tama uyojroner e Dios chequer que cꞌani acꞌotoy aquetpobꞌ erach e gente xeꞌ majax tuobꞌ e Israel xeꞌ axin acꞌupseyanobꞌ tama e Dios. Porque Cadiosir uchecsu inteꞌ ojroner tama e corpesiaj tut e Abraham y che: “Tamaret cꞌani aquetpa chojbꞌesbꞌir utobꞌ tunor e gente xeꞌ turobꞌ tara tor e rum.” Bꞌan chꞌar tzꞌijbꞌabꞌir tama uyojroner e Dios.
GAL 3:9 Entonces cawira que e Abraham cꞌupseyan tama e Dios y tamar era quetpa chojbꞌesbꞌir umener. Y bꞌanon non ubꞌan coner, tunor tin e caxin cacꞌupseyan tama e Dios cꞌani cachojbꞌesna umener bꞌan cocha chojbꞌesna e Abraham.
GAL 3:10 Pero tunor tin e axin uturbꞌa ubꞌobꞌ tuaꞌ acꞌupseyanobꞌ tut uley e Moisés cꞌani aquetpobꞌ yebꞌar inteꞌ bꞌax porque bꞌan che tama uyojroner e Dios que: “Tunor tin e machi acꞌapa uche tunor tunor lo que chꞌar tzꞌijbꞌabꞌir tama uley e Moisés ucꞌani tuaꞌ aquetpa yebꞌar inteꞌ bꞌax.” Bꞌan chꞌar tzꞌijbꞌabꞌir tama uley e Moisés.
GAL 3:11 Y tamar era chequer que mamajchi uyubꞌi ucorpes ubꞌa tut e Dios umen que uche ubꞌa tuaꞌ acꞌupseyan tut uley e Moisés, porque jax Cadiosir xeꞌ cay uyareon tama uyojroner que tin e cꞌani acorpesna umener ucꞌani tuaꞌ acꞌupseyan tamar. Bꞌan cocha chꞌar tzꞌijbꞌabꞌir tama uyojroner e Dios y che: “Tin e cꞌani aquetpa erach tut e Dios ucꞌani tuaꞌ acꞌupseyan tamar tuaꞌ atacarna umener, y de allí cꞌani uchꞌami e cuxtar xeꞌ machi tuaꞌ acꞌapa.” Bꞌan chꞌar tzꞌijbꞌabꞌir tama uyojroner e Dios.
GAL 3:12 Pero conda e Dios cay uyajcꞌu uley e Moisés machi uyare e gente tuaꞌ e Israel que ucꞌani tuaꞌ acꞌupseyanobꞌ tamar jaxir, sino que quetpa que ucꞌani tuaꞌ acꞌupseyanobꞌ tut e ley era inyajrer. Porque chꞌar tzꞌijbꞌabꞌir tama uley e Moisés y che: “Tin e cꞌani aquetpa erach taca e Dios umen que war acꞌupseyan tut uley e Moisés ucꞌani tuaꞌ acꞌapa ucꞌupse e ley era inyajrer.” Bꞌan chꞌar tzꞌijbꞌabꞌir tama uley e Moisés.
GAL 3:13 Pues e Cristo ixin ucorpeson tama tunor e bꞌax lo que ayan ani tamaron tama uley e Moisés. Y tamar era non machi ixto tuaꞌ caquetpa bꞌaxbꞌir porque e Cristo ixin ucꞌocchi e bꞌax era tamaron conda chꞌubꞌna chamay tut e cruz. Porque chꞌar tzꞌijbꞌabꞌir tama uyojroner e Dios que: “Bꞌaxbꞌir tunor tin e achꞌubꞌna tut inteꞌ teꞌ tuaꞌ achamesna tamar”, xeꞌ che tama uyojroner e Dios.
GAL 3:14 Y bꞌan uche e Cristo Jesús tuaꞌ uyubꞌi ichꞌami nox ubꞌan xeꞌ majax tuox e Israel e chojbꞌesiaj lo que quetpa tuaꞌ aꞌjcꞌuna e Abraham. Y tamar era tunoron xeꞌ war cacꞌupseyan tama e Dios erer cachꞌami Unawalir e Dios xeꞌ jax e chojbꞌesiaj lo que quetpa tuaꞌ aꞌjcꞌuna e Abraham umen e Dios.
GAL 3:15 Pues entonces niwermanuox, cꞌani inwareox era tamar lo que cache non xeꞌ winicon tara tor e rum conda inteꞌ winic cꞌani aquetpa intera ubꞌijnusiaj taca otronteꞌ winic tamar lo que cꞌani uchiobꞌ. Pues tin e cꞌani uchiobꞌ cocha era axin uyustes inteꞌ jun xeꞌ sellado y uchiobꞌ firmar, y de allí mamajchi erer usati lo que quetpa tzꞌijbꞌabꞌir tama e jun era y mamajchi erer utzꞌacse ubꞌan.
GAL 3:16 Y bꞌan tama uyojroner e Dios ubꞌan. Y tamar era conda e Dios uyacta inteꞌ ojroner taca e Abraham y taca inteꞌ sitzbꞌir tuaꞌ tamar lo que cꞌani uche, machi uyubꞌi asatpa e ojroner era. Ucꞌani tuaꞌ achempa bꞌan taca cocha arobꞌna umen e Dios. Pero conda che tama uyojroner e Dios que e Dios cꞌani uchojbꞌes ut e Abraham taca inteꞌ “sitzbꞌir” tuaꞌ, machi war che “sitzbꞌirobꞌ” cocha jay war ani oꞌjron taca meyra umaxtac e Abraham. Sino que quetpa e ojroner era taca e Abraham y taca inteꞌ taca sitzbꞌir tuaꞌ xeꞌ jax e Cristo.
GAL 3:17 Pues lo que war inwareox jax era: Que tama e onian tiempo e Dios cay uyare e Abraham que cꞌani uchectes ucꞌotorer tut jaxir. Y nacpat era conda numuy meyra tiempo tama e 430 año, e Dios cay uyajcꞌu uley e Moisés. Pero e ley era xeꞌ tari nacpat tunor era mix cocha erer utijres e ojroner xeꞌ actana taca e Abraham umen e Dios tama e onian tiempo.
GAL 3:18 Porque jay quetpa ani tuaꞌ cacꞌupseyan tut uley e Moisés tuaꞌ cachꞌami lo que quetpa tuaꞌ cajcꞌuna umen e Dios, entonces mix jax umen utacarsiaj e Dios tuaꞌ cachꞌami tunor era sino que jax lo que erer ani camani. Pero lo que numuy jax era: E Dios uyacta inteꞌ ojroner taca e Abraham tuaꞌ uchojbꞌes ut, y tamar era bꞌan cocha arobꞌna e Abraham umen e Dios y bꞌan taca tuaꞌ achempa umener.
GAL 3:19 Pues entonces ¿tucꞌa ucꞌampibꞌir uley e Moisés? Pues ajcꞌuna tujor e ojroner xeꞌ actana taca e Abraham tuaꞌ uchecsu tut e gente tara tor e rum tucꞌa e mabꞌambꞌanir, y e ley era quetpa tuaꞌ acꞌotori este que yopa e Cristo xeꞌ jax e “sitzbꞌir” tuaꞌ e Abraham xeꞌ quetpa tuaꞌ uchꞌami lo que che tama e ojroner xeꞌ actana taca e Abraham tama e onian tiempo. Pues e Dios cay ucꞌampes cora angelobꞌ tuaꞌ uqꞌuechiobꞌ axin e ley era tuaꞌ uyajcꞌuobꞌ e Moisés, y de allí e Moisés sutpa uyajcꞌu e gente tuaꞌ e Israel. Y tamar era ayan e angelobꞌ y ayan e Moisés xeꞌ quetpobꞌ tuyuxin e gente y e Dios.
GAL 3:20 Pero jax taca Cadiosir xeꞌ uyacta e ojroner taca e Abraham, mamajchi más. Majax bꞌan cocha conda ajcꞌuna uley e Moisés conda quetpa e angelobꞌ y e Moisés tuyuxin e Dios y e gente tuaꞌ e Israel.
GAL 3:21 Pues cocha war inwareox era que ayan ucꞌampibꞌir uley e Moisés ¿war ca che era que matucꞌa ucꞌampibꞌir e ojroner xeꞌ actabꞌir umen e Dios? Machi. Porque jay ajcꞌunon ani inteꞌ ley xeꞌ erer ani uyajcꞌon e cuxtar xeꞌ machi tuaꞌ acꞌapa jay cacꞌupseyan tut, entonces erer ani cacorpesna umen taca que cacꞌupseyan tut e ley era. Pero majax bꞌan.
GAL 3:22 Pero lo que chꞌar tzꞌijbꞌabꞌir tama uyojroner e Dios che que tunor e gente tara tor e rum quetpobꞌ yebꞌar ucꞌotorer e mabꞌambꞌanir, y tamar era jax taca tin e axin acꞌupseyanobꞌ tama e Jesucristo xeꞌ erer uchꞌamiobꞌ tunor e chojbꞌesiaj lo que arobꞌna e Abraham umen e Dios.
GAL 3:23 Pues conda merato ayopa Cawinquirar Jesucristo tuaꞌ uyubꞌion cacꞌupseyan tamar, quetpon ani yebꞌar ucꞌotorer uley e Moisés. Y bꞌan quetpon este que Cadiosir uchecsu ticoit chi tamar tuaꞌ cacꞌupseyan xeꞌ jax e Cristo.
GAL 3:24 Pues uley e Moisés cꞌampesna umen e Dios bꞌan cocha catata ucꞌampes inteꞌ man tuaꞌ ucojcon conda chuchuonto. Y tamar era uley e Moisés cꞌampesna umen e Dios tuaꞌ uqꞌuechion caxin tut e Cristo tuaꞌ uyubꞌion cacorpesna conda cacꞌupseyan tamar.
GAL 3:25 Pero era que war ixto cacꞌupseyan tama Cawinquirar Jesucristo tuaꞌ ucorpeson machi ixto tuaꞌ cacojcna más umen inteꞌ man xeꞌ jax ani uley e Moisés.
GAL 3:26 Porque tunoron xeꞌ cay cꞌupseyanon tama e Cristo Jesús cꞌotoy quetpon umaxtacon e Dios.
GAL 3:27 Pues tunor tin e quetpobꞌ chꞌuybꞌir tama ucuerpo e Cristo quetpobꞌ intera uwirnar bꞌan cocha uwirnar e Cristo.
GAL 3:28 Y tamar era matucꞌa lo que uchion caquetpa intiach cawirnar tut e Dios xeꞌ war cacꞌupseyan tama e Cristo. Porque tut jaxir intera tunoron motor jay tuon e Israel, o motor jay majax tuon e Israel, o motor jay ayan cawajyum o jay matucꞌa, o motor jay winic inteꞌ o jay ixic inteꞌ, porque tunoron quetpon intera tama e Cristo Jesús.
GAL 3:29 Y tamar era cocha tunoron tuon e Cristo quetpon umaxtacon e Abraham tama e Cristo ubꞌan, y tamar era non ubꞌan caxin cachꞌami tunor e nuxi herencia lo que arobꞌna e Abraham umen e Dios que bꞌan tuaꞌ uchꞌami.
GAL 4:1 Entonces lo que war inwareox jax era: Jay ayan inteꞌ chuchu sitz xeꞌ chamay utata, jaxir machix tuaꞌ uchꞌami wacchetaca lo que quetpa tuaꞌ utata ani. Y conda chuchuto e sitz era aquetpa bꞌan cocha inteꞌ man tama ufamilia motor que jaxir jax e ajyum tuaꞌ tunor.
GAL 4:2 Y ayan tin e aquetpa tuaꞌ ucojco e chuchu sitz era y ayan tin e aquetpa tuaꞌ uwira tunor lo que ayan tuaꞌ este que acꞌotoy ujabꞌ bꞌan cocha arobꞌna umen utata ani conda tuaꞌ uchꞌami tunor era.
GAL 4:3 Y bꞌan ani tunoron xeꞌ tuon e Israel conda merato ani ayopa e Cristo. Quetpon bꞌan cocha inteꞌ chuchu maxtac y macaron ani yebꞌar ucꞌotorer uley e Moisés, y tamar era quetpon ani bꞌan cocha inteꞌ man tut e ley era.
GAL 4:4 Pero conda tzꞌacta e tiempo xeꞌ ucꞌani e Dios, jaxir uyebꞌta tari Uyunen tuaꞌ acuxpa tama inteꞌ ixic xeꞌ turu tama e lugar Israel, y Uyunen era cꞌotoy quetpa yebꞌar ucꞌotorer uley e Moisés.
GAL 4:5 Pues tari cuxpa Uyunen e Dios cocha era tuaꞌ ucorpeson xeꞌ quetpon ani yebꞌar ucꞌotorer uley e Moisés tuaꞌ cachꞌajma umen e Dios tuaꞌ cacꞌotoy caquetpa umaxtac.
GAL 4:6 Y cocha e Dios cꞌani uchecsu ticoit que non umaxtacon ixto, jaxir uyebꞌta tari Unawalir Uyunen era tuaꞌ aturuan tama cawalma, y Unawalir era xeꞌ turu tama cawalma oꞌjron y che: “Nitatet xeꞌ tanibꞌa.”
GAL 4:7 Y tamar era mixjax manon tama uley e Moisés coner sino que maxtacon ixto tuaꞌ e Dios. Y cocha non umaxtacon e Dios, lo que ayan tuaꞌ jaxir war ucꞌani tuaꞌ cachꞌami cocha inteꞌ herencia tuaꞌ.
GAL 4:8 Pues tama e tiempo conda merato inata chi Cadiosir, manox ani tut cora chamen dios xeꞌ majax bꞌixir.
GAL 4:9 Pero coner cocha war inata chi Cadiosir, o erer caware que jax Cadiosir xeꞌ war unata chiox nox, ¿cocha tuaꞌ ibꞌijnu era tuaꞌ iyose ibꞌa otronyajr yebꞌar cora onian cꞌotorer xeꞌ machi aqꞌuecꞌo y xeꞌ tzajtaca utobꞌ tuaꞌ ixcajcha ixquetpa inteꞌ man tutobꞌ otronyajr?
GAL 4:10 Y chequer que bꞌan war iche porque war ixtzay iwira watar e sian nojqꞌuin tuaꞌ e onian cꞌupesiaj tuaꞌ e gente xeꞌ tuobꞌ e Israel xeꞌ achempa tama inteꞌ día o tama inteꞌ mes o tama inteꞌ tiempo o tama inteꞌ año.
GAL 4:11 Pues nen era war imbꞌijnu meyra tama tunor nipatnar tijam nox que bꞌajcꞌat matucꞌa ucꞌampibꞌir ani tiut, porque cay xanox imbꞌijc tama ubꞌir e Dios lo que cay incansiox, pero de allí cay iwacta tunor era.
GAL 4:12 Pues entonces niwermanuox, cꞌani inwareox era que actanic e onian bꞌijnusiaj bꞌan cocha inwacta nen. Sutpenic chenic ibꞌa cocha nen. Nen quetpen bꞌan cocha inteꞌ tin e majax tuaꞌ e Israel bꞌan cocha turox. Y erer inwareox era que conda turen ani tijam que matucꞌa iche nipater.
GAL 4:13 Y cꞌaric imener que ajmuaquen conda yopen bꞌajxan tuaꞌ inchecsu uyojroner e Dios tiut.
GAL 4:14 Y motor que intran tiut tuaꞌ iwiren tijam ajmuaquen tama e hora yajaꞌ pero nox machi ixejbꞌe niut y nien machi ichoquien najtir, sino que cay iwiren bꞌan cocha jay jaxen ani inteꞌ ángel tuaꞌ e Dios, o bꞌan cocha jay jaxen ani e Cristo Jesús.
GAL 4:15 ¿Pero tucꞌa numuy taca e nuxi tzayer lo que cay icojco conda iwiren tama e hora yajaꞌ? Pues nen cꞌar nimener tamarox que ya ca ani uyubꞌiox ilocse unaqꞌuiut tuaꞌ iwajqꞌuen bꞌajcꞌat bꞌan ani iche tamaren.
GAL 4:16 Y era ¿war ca isutpa ixqꞌuijna iwiren umen taca que war inwareox lo que erach?
GAL 4:17 Pues ayan tin e turobꞌ tiwejtzꞌer xeꞌ quisinic ani ubꞌijresox, pero machi war ubꞌijnuobꞌ tuaꞌ uchiobꞌ bꞌan cocha ucꞌani e Dios. Lo que quisinic uchiobꞌ jaxirobꞌ jax era: Cꞌani uxeriox tuaꞌ machi ixto ixcꞌupseyan tamaren tamar lo que war incansiox. Y war ucꞌaniobꞌ que nox tuaꞌ ixixin tupatobꞌ tuaꞌ iche bꞌan taca cocha ucꞌaniobꞌ jaxirobꞌ.
GAL 4:18 Y bueno tuaꞌ iturbꞌa ibꞌa tamar lo que war ibꞌijnu iche jay erach lo que war icꞌani iche era. Y bꞌan ucꞌani tuaꞌ iche tunor e tiempo y majax jax taca conda turen tacarox.
GAL 4:19 Pues nox bꞌanox cocha nimaxtac, y cꞌani inwareox era que inyaj lo que war innumse nibꞌa tamar lo que war iche nox bꞌan cocha inteꞌ tubꞌir xeꞌ cꞌanix tuaꞌ aqꞌuechuan uchꞌurcabꞌ, y bꞌan tuaꞌ innumse nibꞌa tamarox era este que acꞌapa ixqꞌuecꞌo ixxana tama ubꞌir e Cristo.
GAL 4:20 Quisinic ani que ya turen tiwejtzꞌer tuaꞌ erer ani onjron tacarox y tuaꞌ umbꞌi tucꞌa cꞌani iwaren otronyajr. Porque machi innata tucꞌa tuaꞌ imbꞌijnu tamarox era.
GAL 4:21 Entonces areniquen era jayteox xeꞌ war ibꞌijnu tuaꞌ iyose ibꞌa yebꞌar uley e Moisés otronyajr. ¿O machi ca war iyubꞌi lo que che tama e ley era?
GAL 4:22 Pues chꞌar tzꞌijbꞌabꞌir que e Abraham ayan chateꞌ utejromtac. Y che que inteꞌ cuxpa tama inteꞌ ixic xeꞌ jax inteꞌ man xeꞌ mambꞌir inyajrer, y ayan otronteꞌ tejromtac xeꞌ cuxpa tama uwixcarach e Abraham xeꞌ majax mambꞌir.
GAL 4:23 E sitz xeꞌ cuxpa tama e ixic xeꞌ man cuxpa bꞌan taca cocha inteꞌ cualquier maxtac. Pero e sitz xeꞌ cuxpa tama e ixic xeꞌ majax man cuxpa umen taca que tzꞌacpesna e ixic umen e Dios cocha jaxir machi ani uyubꞌi achꞌijtesian. Y bꞌan uche Cadiosir umen que cay uyacta inteꞌ ojroner taca e Abraham que cꞌani acuxpa inteꞌ uyunen taca e ixic xeꞌ majax man.
GAL 4:24 Pero ayan lo que uchion cabꞌijnu tucꞌa war che e chateꞌ ixictac era, porque erer caware que e chateꞌ ixictac larobꞌ taca chateꞌ pacto. Ayan inteꞌ pacto xeꞌ chembꞌir tor e witzir xeꞌ ucꞌabꞌa Sinaí xeꞌ jax e pacto xeꞌ chembꞌir taca e Moisés. Pues e pacto era lar tacar e ixic xeꞌ jax inteꞌ man xeꞌ ucꞌabꞌa Agar. Pues e sitz xeꞌ cuxpa tama e ixic era lar tacar tunor tin e aquetpobꞌ yebꞌar ucꞌotorer uley e Moisés.
GAL 4:25 Y e Agar era lar tacar e witzir Sinaí xeꞌ turu tama e lugar Arabia, y tunor era lar tacar e chinam Jerusalem tama e día era. Y e chinam era taca tunor tin e aturanobꞌ tamar aquetpobꞌ bꞌan cocha cora man xeꞌ turobꞌ yebꞌar ucꞌotorer uyajyum xeꞌ jax uley e Moisés.
GAL 4:26 Pero e chinam Jerusalem xeꞌ imbꞌutz xeꞌ turu tichan tut e qꞌuin machi turu yebꞌar ucꞌotorer uley e Moisés, y e chinam era lar tacar e ixic xeꞌ majax man. Y e ixic era aquetpa bꞌan ani cocha catuꞌ y non caquetpa bꞌan cocha umaxtac.
GAL 4:27 Porque bꞌan chꞌar tzꞌijbꞌabꞌir tama uyojroner e Dios que: Tzayjres abꞌa net xeꞌ ixiquet xeꞌ machi anata ichꞌijtesian. Aruen umen e tzayer net xeꞌ machi anata tucꞌa e cꞌuxner tama e chꞌijtesiaj. Y inteꞌ ixic xeꞌ chocbꞌir turu cꞌani achꞌijtesian más que inteꞌ ixic xeꞌ ayan uviejo, xeꞌ chꞌar tzꞌijbꞌabꞌir tama uyojroner e Dios.
GAL 4:28 Entonces niwermanuox, non era laron tacar e Isaac xeꞌ jax uyar e ixic xeꞌ majax man. Jaxir cuxpa umen taca que tzꞌacpesna utuꞌ umen ucꞌotorer e Dios. Y bꞌanon non ubꞌan, cuxpon otronyajr tuaꞌ caquetpa umaxtac e Dios taca ucꞌotorer e Dios.
GAL 4:29 Y e sitz xeꞌ ixin cuxpa tama e ixic xeꞌ man ixin uche unumse ubꞌa e Isaac xeꞌ cuxpa taca utacarsiaj Unawalir e Dios. Y bꞌan anumuy coner ubꞌan, que tin e turobꞌ tara tor e rum uche unumse ubꞌobꞌ tin e cuxpobꞌ otronyajr taca utacarsiaj Unawalir e Dios.
GAL 4:30 Pero ¿tucꞌa chꞌar tzꞌijbꞌabꞌir tama uyojroner e Dios tama tunor era? Che que: “Ajnes chic e ixic xeꞌ man taca uyar inyajrer, porque e sitz era ma cocha erer uxere e herencia taca e Isaac xeꞌ cuxpa tama e ixic xeꞌ majax man.” Bꞌan chꞌar tzꞌijbꞌabꞌir tama uyojroner e Dios.
GAL 4:31 Niwermanuox, non era majax bꞌanon cocha e sitz xeꞌ cuxpa tama e ixic xeꞌ man xeꞌ bꞌan cocha tin e aquetpobꞌ yebꞌar ucꞌotorer uley e Moisés, sino que non bꞌanon cocha e Isaac xeꞌ cuxpa tama e ixic xeꞌ majax man. Y tamar era cꞌani inwareox que ira ixsutpa iyose ibꞌa yebꞌar ucꞌotorer uley e Moisés otronyajr.
GAL 5:1 Pues entonces cꞌani inwareox era que e Cristo ixin ulocsion yebꞌar ucꞌotorer e onian bꞌijnusiaj tuaꞌ caquetpa bꞌambꞌir. Y tamar era qꞌuecꞌojsenic ibꞌa tuaꞌ ixquetpa bꞌambꞌir y ira ixcꞌupseyan tut e ojroner xeꞌ che que ucꞌani tuaꞌ axujra imbꞌijc uqꞌuewerir itejromar xeꞌ jax inteꞌ canseyaj xeꞌ cꞌani uchiox ixquetpa cachar otronyajr yebꞌar ucꞌotorer.
GAL 5:2 Ubꞌinic niwojroner era. Nen xeꞌ Pabloen war inwareox era que jay war ibꞌijnu tuaꞌ ixcorpesna ani umen que cꞌani iwacta ibꞌa tuaꞌ axujra imbꞌijc uqꞌuewerir itejromar, pues war che era que matucꞌa ucꞌampibꞌir uchamer e Cristo tiut.
GAL 5:3 Cꞌani inwareox era otronyajr que tunor tin e war uyacta ubꞌa tuaꞌ axujra imbꞌijc uqꞌuewerir utejromar ucꞌani tuaꞌ acꞌapa acꞌupseyanobꞌ tut tunor uley e Moisés ubꞌan.
GAL 5:4 Y nox era xeꞌ war isicbꞌa tuaꞌ ixcorpesna umen que cꞌani ixcꞌupseyan tut uley e Moisés, war iwacta e Cristo tamar lo que war iche, y war ichoqui utacarsiaj e Dios ubꞌan.
GAL 5:5 Pero non xeꞌ war cacꞌupseyan tama e Cristo war cacojco tacar utacarsiaj Unawalir e Dios tuaꞌ caquetpa erach inyajrer tut jaxir.
GAL 5:6 Porque jay intera cabꞌijnusiaj taca e Cristo Jesús matucꞌa uche jay xurbꞌir imbꞌijc uqꞌuewerir catejromar o jay machi. Porque lo que más ayan ucꞌampibꞌir jax era: Que war cacꞌupseyan tama Cadiosir y que umen era war cayajta coit cabꞌa inteꞌ intion.
GAL 5:7 Pues nox cay xanox imbꞌutz tama ubꞌir e Dios, pero ¿chi ca nic cay umajresox era tuaꞌ iwacta ixcꞌupseyan tut lo que erach?
GAL 5:8 Porque lo que war ixcꞌupseyan tamar coner majax tuaꞌ e Dios xeꞌ cay upejcox tuaꞌ ixcꞌupseyan tamar jaxir. Porque Cadiosir upejcox tuaꞌ ixcꞌupseyan tamar lo que erach.
GAL 5:9 Pues bꞌijnunic iwira lo que uche e levadura conda ayajra tama e pan, que motor que imbꞌijc taca xeꞌ ayajra tamar pero que axin oꞌchoy macuir tunor e cꞌum era. Y bꞌan war anumuy tijam ubꞌan que motor que inteꞌ taca winic xeꞌ war umajresox, pero jaxir erer utijresox tunorox tama icꞌupesiaj tama Cawinquirar.
GAL 5:10 Pero nen era war incꞌupseyan tama Cawinquirar que nox machi tuaꞌ aquetpa intiach ibꞌijnusiaj, y que bꞌan cocha war imbꞌijnu nen y bꞌan tuaꞌ ibꞌijnu nox ubꞌan. Pero tin e war umajresox era ucꞌani tuaꞌ ajajtzꞌa umen e Dios tamar lo que war uche, motor jay nuxi winic o jay imbꞌijc taca ucꞌampibꞌir.
GAL 5:11 Pues entonces niwermanuox, bꞌijnunic tamaren jay nen warto ani incanse e gente axin que ucꞌani ani tuaꞌ axujra imbꞌijc uqꞌuewerir utejromar tuaꞌ uyubꞌi acorpesnobꞌ, machi ani war aqꞌuijnobꞌ uwirenobꞌ tin e bꞌan war acꞌupseyanobꞌ. Y jay bꞌan nic ani incanseyan machi ani war inqꞌuijnesobꞌ axin e gente era conda incansiobꞌ que chamay e Cristo tamaron tut e cruz.
GAL 5:12 Pero tin e war usatiox tama tunor e canseyaj era, quisinic que jaxirobꞌ axin uxuriobꞌ utejromar y uchoquiobꞌ inyajrer.
GAL 5:13 Pues niwermanuox, nox pejcbꞌirox umen e Dios tuaꞌ ubꞌaniox tama ucꞌotorer uley e Moisés. Pero ira ixixin iche lo que uyusre iwerir bꞌan cocha uchiobꞌ e gente tara tor e rum umen que quetpox bꞌambꞌir era, sino que tacrenic ibꞌa inteꞌ intiox umen que war iyajta ut ibꞌa.
GAL 5:14 Porque tunor uley e Moisés war oꞌjron tamar taca inteꞌ bꞌijnusiaj que che: “Yajtan ut apiarobꞌ bꞌan cocha acꞌani tuaꞌ ayajtanwa oit umen apiarobꞌ era”, xeꞌ che tama uley e Moisés.
GAL 5:15 Iwiric ibꞌa tuaꞌ machi acꞌapa icꞌuxi ibꞌa inteꞌ intiox, porque jay bꞌan iche entonces axin ixcꞌotoy itijres ibꞌa inyajrer.
GAL 5:16 Pues entonces cꞌani inwareox era que cꞌupsenic lo que war ubꞌijresox Unawalir e Dios tuaꞌ iche y ira isicbꞌa tuaꞌ iche lo que uyusre uche iwerir.
GAL 5:17 Porque tunor lo que uyusre uche cawerir majax bꞌan cocha ucꞌani Unawalir e Dios. Y tunor lo que ucꞌani Unawalir e Dios majax bꞌan cocha ucꞌani cawerir. Y tamar era conda Unawalir e Dios war ubꞌijreson war uwirsion que majax bueno tuaꞌ cache lo que uyusre uche cawerir y tamar era ma erer cache bꞌan taca cocha cacꞌani.
GAL 5:18 Pero jay war cache bꞌan cocha war ubꞌijreson Unawalir e Dios, entonces chequer que machi ixto turon yebꞌar ucꞌotorer uley e Moisés.
GAL 5:19 Y chequer lo que uyusre uche uwerir inteꞌ xeꞌ jax era: Conda inteꞌ axin uyose ubꞌa taca tin e merato anujbꞌi tacar, y conda inteꞌ axin uche lo que intuj tut e Dios, y conda inteꞌ axin uche lo que uche asatpa ujor conda uche.
GAL 5:20 Y lo que uyusre uwerir inteꞌ jax era ubꞌan: Conda inteꞌ axin uyujtzꞌi ut inteꞌ chamen dios, y conda inteꞌ axin abꞌaxon, y conda inteꞌ axin uxejbꞌe ut otronteꞌ, y conda majax intera ubꞌijnusiaj taca e inmojr, y conda axin atzꞌuni tut otronteꞌ, y conda inteꞌ uyacta ubꞌa aqꞌuijna wacchetaca, y conda inteꞌ ucꞌani tuaꞌ aquetpa tunor bꞌan taca cocha ucꞌani jaxir, y conda inteꞌ uche uxere ubꞌobꞌ e inmojr, y conda inteꞌ ubꞌijnu que jax taca ayan ucꞌampibꞌir.
GAL 5:21 Y lo que uyusre uche uwerir inteꞌ jax era ubꞌan: Conda inteꞌ axin acꞌuxnaqꞌui uwira lo que ayan tuaꞌ otronteꞌ, y conda inteꞌ axin acaray, y conda inteꞌ axin ubꞌijnu tamar taca e nojqꞌuin, y conda inteꞌ axin uyusre uche tunor e mabꞌambꞌanir cocha era. Bꞌan uyusre uche uwerir inteꞌ. Pero cꞌani inwareox era bꞌan cocha cay inwareox tama inyajr, que tunor tin e axin uche cocha era machi tuaꞌ oꞌchoy tama uchinam e Dios.
GAL 5:22 Pero tin e bꞌijresbꞌir umen Unawalir e Dios cꞌani achecta tama uyalma que war uyajta ut upiarobꞌ, y que war atzay axana, y que ayan e jiriar tamar, y que machi aqꞌuijna wacchetaca, y que incꞌun uwirnar, y que turix tuaꞌ utacre upiarobꞌ, y que matucꞌa e majresiaj tama uyalma,
GAL 5:23 y que ayan e manxujresiaj tama uyalma, y que ucojco ubꞌa tuaꞌ machi uche e mabꞌambꞌanir. Pues matucꞌa inteꞌ ley upater tunor era.
GAL 5:24 Y tamar era tunoron xeꞌ tuon e Cristo Jesús machi ixto cꞌani cache e mabꞌambꞌanir, sino que war caquetpa bꞌan cocha inteꞌ chamen tut tunor lo que uyusre uche cawerir.
GAL 5:25 Y cocha war caturuan tama ucꞌotorer Unawalir e Dios, cawactic cabꞌa tuaꞌ cabꞌijresna umener.
GAL 5:26 Entonces machix catattzꞌic cabꞌa que otronteꞌ cocha non matucꞌa, y machix capaqꞌuic e qꞌuijnar ticajam, y machix tuaꞌ cacꞌuxnaqꞌui cawira lo que ayan tuaꞌ otronteꞌ ticajam.
GAL 6:1 Pues entonces niwermanuox, jay ayan inteꞌ tijam xeꞌ axin acucrema tama inteꞌ mabꞌambꞌanir, entonces nox xeꞌ war ixqꞌuecꞌo ixxana tama ubꞌir e Dios ucꞌani tuaꞌ ixixin itacre tuaꞌ asutpa tama ubꞌir e Dios otronyajr. Pero tin e war axin tuaꞌ atacarsan era ucꞌani tuaꞌ aquetpobꞌ incꞌun uwirnarobꞌ tut jaxir y ucꞌani tuaꞌ ucojco ubꞌobꞌ tuaꞌ machi apijchnobꞌ umen e mabꞌambꞌanir ubꞌan.
GAL 6:2 Y tacrenic ibꞌa inteꞌ intiox conda ayan tin e war unumse ubꞌa tijam tuaꞌ machi acucrema tamar. Porque jay war iche cocha nen war acꞌapa iche bꞌan taca cocha ucꞌani e Cristo.
GAL 6:3 Pero jay ayan tin e war utattzꞌi ubꞌa que jaxir nuxi winic conda majax bꞌan, intaca war umajres ubꞌa.
GAL 6:4 Bꞌijnunic iwira inteꞌ intiox jay imbꞌutz o jay majax imbꞌutz tunor lo que war iche. Y tamar era erer ixtzay tamar lo que war iche xeꞌ imbꞌutz porque majax bueno tuaꞌ cabꞌijnu jay lar cacꞌampibꞌir cocha otronteꞌ.
GAL 6:5 Porque inteꞌ intion ucꞌani tuaꞌ cache lo que ajcꞌunon umen e Dios tuaꞌ cache.
GAL 6:6 Pues tin e war acansena uyojroner e Dios umen otronteꞌ ucꞌani tuaꞌ uxere uyajcꞌu uyajcanseyaj era imbꞌijc imbꞌijc tama tunor lo que ayan tuaꞌ xeꞌ bueno.
GAL 6:7 Pues ira imajres ibꞌa, porque mamajchi uyubꞌi umajres ut e Dios. Inteꞌ intion caxin cachꞌami e cosecha bꞌan taca cocha cꞌapa capaqꞌui.
GAL 6:8 Pues jay inteꞌ axin uche inteꞌ pacmar tuaꞌ taca utzayjres uwerir, tama uwerir era axin uchꞌami e cosecha xeꞌ jax e chamer. Pero jay inteꞌ axin uche inteꞌ pacmar tuaꞌ utzayjres Unawalir e Dios, entonces axin uchꞌami inteꞌ cosecha tuaꞌ Unawalir e Dios era xeꞌ jax e cuxtar xeꞌ machi tuaꞌ acꞌapa.
GAL 6:9 Pues machi tuaꞌ cacꞌoyran cache lo que imbꞌutz tut Unawalir e Dios, porque watar e día conda caxin cache cosechar catuanibꞌir tuaꞌ e Dios jay machi cawacta tuaꞌ cache lo que imbꞌutz.
GAL 6:10 Y tamar era cachic tunor lo que uyubꞌion cache xeꞌ imbꞌutz tut tunor e gente, pero cachic más meyra lo que imbꞌutz tut tin e ajcꞌupesiajobꞌ tama Cawinquirar.
GAL 6:11 Pues nen xeꞌ Pabloen cay intzꞌijbꞌa taca nicꞌabꞌ tara tama e ojroner era. Y chequer tiut que nen umen que nojta e letra lo que war intzꞌijbꞌa era.
GAL 6:12 Pues tunor tin e war uyareox era que ucꞌani tuaꞌ axujra imbꞌijc uqꞌuewerir itejromar war uchiobꞌ tuaꞌ taca aquetpobꞌ imbꞌutz tut e gente. Pues jaxirobꞌ machi war ucꞌaniobꞌ tuaꞌ axejbꞌna utobꞌ umen que war ani uchecsuobꞌ uyojroner e Dios tama uchamer e Cristo.
GAL 6:13 Y nien tin e xujra imbꞌijc uqꞌuewerir utejromar era machi war acꞌapa uchiobꞌ tunor lo que chꞌar tzꞌijbꞌabꞌir tama uley e Moisés. Pero jaxirobꞌ war uyusre tuaꞌ uwirobꞌ e xuremar era tama iwerir tuaꞌ taca utattzꞌi ubꞌobꞌ tamarox.
GAL 6:14 Pero nen matucꞌa tamar cꞌani inchꞌijse nibꞌa tama nibꞌijnusiaj cocha era sino que cꞌani inchꞌijse nibꞌa tamar taca uchamer Cawinquirar Jesucristo tut e cruz. Pues umen uchamer e Cristo era quetpa chamen taniut tunor lo que ayan tara tor e rum xeꞌ upejca uyalmobꞌ e gente tuaꞌ uchiobꞌ e mabꞌambꞌanir, y nen chamenen ubꞌan tut tunor lo que ayan tara tor e rum.
GAL 6:15 Y tamar era matucꞌa ucꞌampibꞌir jay xurbꞌir imbꞌijc uqꞌuewerir catejromar o jay majax xurbꞌir, porque ticoit non xeꞌ tuon Cawinquirar Jesucristo lo que más ayan ucꞌampibꞌir jax era: Que chequer que intiachix cawirnar umen lo que cay uche e Dios tamaron.
GAL 6:16 Pues tunorox xeꞌ war ixcꞌupseyan tut lo que war intzꞌijbꞌa tibꞌa era chꞌamic ujiriar e Dios y ucꞌunersiaj, y bꞌan tunor tin e erachox xeꞌ umaxtacox e Dios.
GAL 6:17 Pues mamajchi más erer oꞌjron nipater que nen majax manen tuaꞌ e Dios, porque chequer tama niwerir e sian jatzꞌuar lo que cay inchꞌami umen taca que war inchecsu uyojroner e Dios tama uchamer e Jesús.
GAL 6:18 Pues entonces niwermanuox, quetpac utacarsiaj Cawinquirar Jesucristo tacarox. Tara acꞌapa tunor niwojroner, che e Pablo.
EPH 1:1 Nen xeꞌ Pabloen jax inteꞌ apóstol tuaꞌ e Cristo Jesús umen que bꞌan ucꞌani e Dios. Y war intzꞌijbꞌa e carta era tibꞌa xeꞌ war ixxana tama ubꞌir e Dios y xeꞌ war ixquetpa erach iwirnar tama e Cristo Jesús xeꞌ turox tama e chinam Éfeso.
EPH 1:2 Que Catata Dios y e Cristo Jesús axin utacriox y ujirijsiox.
EPH 1:3 Cꞌani catattzꞌi ucꞌabꞌa Cadiosir xeꞌ jax Utata Cawinquirar Jesucristo umen que jaxir ixin uyajcꞌon non xeꞌ turon tama e Cristo tunor e sian chojbꞌesiaj nawalbꞌir lo que ayan tut e qꞌuin tichan.
EPH 1:4 Pues conda merato achena or e rum era non sicbꞌabꞌironix umen e Dios tuaꞌ caquetpa tama e Cristo tuaꞌ cacꞌotoy caturuan erach tut jaxir este que matucꞌa e bꞌonemar tama cawalma.
EPH 1:5 Y umen que Cadiosir war uyajta coit ixin uquetion tuaꞌ cacꞌotoy caquetpa umaxtac xeꞌ tuach umen que e Jesucristo chamay tamaron. Y bꞌan uche Cadiosir umen que bꞌan war ucꞌani.
EPH 1:6 Y tamar era catattzꞌic ucꞌabꞌa Cadiosir tama e nuxi tacarsiaj xeꞌ ayan e tawarer tamar xeꞌ cꞌapa uyajcꞌon non xeꞌ turon tama Cawinquirar Jesucristo xeꞌ yajtabꞌir ut umen e Dios inyajrer.
EPH 1:7 Pues umen que Cadiosir cꞌani utacrion xeꞌ meyron tama e Cristo, ixin umanion tacar uchꞌichꞌer Uyunen era y cꞌumpa tacaron tama tunor camabꞌambꞌanir.
EPH 1:8 Y Cadiosir ixin uyajcꞌon meyra utacarsiaj taca tunor unatanyaj y taca tunor ubꞌijnusiaj.
EPH 1:9 Y bꞌan uche conda ixin uchectes ticoit lo que war ucꞌani uche ixnix. Y tunor lo que war ucꞌani uche era jax taca jaxir xeꞌ war unata. Y jax taca jaxir xeꞌ ubꞌijnu uche tunor era. Y bꞌan cocha atzay ubꞌijnu uche e Dios, y bꞌan uche tama e Cristo.
EPH 1:10 Y lo que war ucꞌani uche Cadiosir xeꞌ tuaꞌ uche tama e día xeꞌ turbꞌana umener jax era: Que cꞌani uturbꞌa tunor lo que ayan yebꞌar ucꞌabꞌ e Cristo. Y bꞌan tuaꞌ uche taca tunor lo que ayan tara tor e rum y taca tunor lo que ayan tut e qꞌuin ubꞌan.
EPH 1:11 Pues entonces sicbꞌabꞌironix umen e Dios xeꞌ ixin uquetion tuaꞌ cachꞌami lo que jaxir cꞌani uyajcꞌon tama e Cristo. Y jaxir axin uche tunor lo que uche bꞌan taca cocha ucꞌani jaxir.
EPH 1:12 Y usicbꞌon non xeꞌ cay cacojco tama e Cristo bꞌajxan umen que war ucꞌani tuaꞌ caquetpa ajtattzꞌarsiajon tut utawarer.
EPH 1:13 Y nox conda cay iyubꞌi uyojroner e Dios xeꞌ erach tama e corpesiaj cay cꞌupseyanox tama e Cristo, y tamar era e Dios cay uchectes ubꞌa tiut que nox tuox jaxir conda uyajcꞌox Unawalir tuaꞌ aturuan tama iwalma bꞌan cocha quetpa arobꞌbꞌir ixnix que bꞌan tuaꞌ anumuy tama tunor tin e axin acꞌupseyan tamar jaxir.
EPH 1:14 Conda canata que ya turu Unawalir e Dios tama cawalma jax lo que uchectes ticoit que Cadiosir cꞌani axin uyajcꞌon tunor e herencia ubꞌan watar e día conda acꞌapa ucorpes tunor tin e tuaꞌ. Catattzꞌic ucꞌabꞌa Cadiosir tama tunor utawarer.
EPH 1:15 Pues entonces cꞌotoy innata tamarox que meyra war ixcꞌupseyan tama Cawinquirar Jesús y que meyra war iyajta ut ibꞌa inteꞌ intiox taca tunor e inmojr ajcꞌupesiajobꞌ tama Cawinquirar.
EPH 1:16 Y desde que cay umbꞌi tunor era machi war inwacta tuaꞌ intattzꞌi ucꞌabꞌa e Dios tamarox y tuaꞌ incꞌajti taca e Dios tamarox.
EPH 1:17 Y tamar era war incꞌajti iraj iraj taca Utata Cawinquirar Jesucristo xeꞌ jax Catata Dios xeꞌ ayan meyra utawarer. Y war incꞌajti taca e Dios tuaꞌ uyajcꞌox unatanyaj xeꞌ nawalbꞌir y que jaxir tuaꞌ uchecsu ubꞌa tiut tuaꞌ ixcꞌotoy inata más y más tamar jaxir.
EPH 1:18 Y war incꞌajti taca e Dios que jaxir tuaꞌ axin ujanchꞌacnes iwalma tuaꞌ ixcꞌotoy inata tucꞌa e cojcsiaj lo que ayan tibꞌa umen que pejcbꞌirox umen e Dios, y que tuaꞌ ixcꞌotoy inata cobꞌa e nuxi herencia xeꞌ galan que jaxir tuaꞌ axin uyajcꞌox umen que erachox tamar jaxir.
EPH 1:19 Y war incꞌajti taca e Dios tuaꞌ ixcꞌotoy inata que nojta ucꞌotorer e Dios xeꞌ turu tama cawalma non xeꞌ war cacꞌupseyan tamar este que machi uyubꞌion cabꞌisi. Porque jax e sian qꞌuecꞌojsiaj era xeꞌ cay ucꞌampes Cadiosir
EPH 1:20 tuaꞌ usuti ubꞌixqꞌues e Cristo tujam e chamenobꞌ y tuaꞌ uche aturuan tuyejtzꞌer unojcꞌabꞌ jaxir tichan tut e qꞌuin.
EPH 1:21 Y Cadiosir ixin uyajcꞌu e Cristo meyra ucꞌotorer tuaꞌ aquetpa tujor tunor e ajcꞌotorerobꞌ y tujor tunor e ajcꞌamparobꞌ y tujor tunor e ajcucursiajobꞌ y tujor tunor e ajwinquirobꞌ xeꞌ turobꞌ tut e qꞌuin. Y jaxir ajcꞌuna más nojta ucꞌampibꞌir que tunor tin e turobꞌ tama e tiempo era y tujor tunor tin e tuaꞌ achectobꞌ tama e tiempo xeꞌ watar.
EPH 1:22 Y Cadiosir ixin uturbꞌa yebꞌar utajn uyoc e Cristo tunor lo que ayan, y jaxir ajcꞌuna tuaꞌ aquetpa ujor tunor tin e war acꞌupseyanobꞌ tamar jaxir xeꞌ jax e iglesia.
EPH 1:23 Y tunor e ajcꞌupesiajobꞌ era war aquetpobꞌ bꞌan cocha ucuerpo e Cristo tara tor e rum, y jaxir war aquetpa ujor e cuerpo era. Y jaxir war ubꞌutꞌi tunor lo que ayan tacar ubꞌa, y bꞌutꞌur tunor lo que ayan cocha jaxir cꞌapa ochoy tama tunor.
EPH 2:1 Pues entonces coner war caxana tama ubꞌir e Dios. Pero ixnix chamenon ani umen que war ani caxana tama e incsibꞌaner y tama e mabꞌambꞌanir.
EPH 2:2 Y cay xanon tama e mabꞌambꞌanir bꞌan cocha ucꞌani e gente tara tor e rum. Y cay cache tunor lo que ucꞌani e diablo xeꞌ jax e ajcꞌotorer xeꞌ acꞌotori tama e icꞌar tara tor e rum. Jaxir jax inteꞌ nuxi mein xeꞌ mabꞌambꞌan xeꞌ war utacsu axin tunor tin e machi cꞌani acꞌupseyanobꞌ tut e Dios tuaꞌ uchiobꞌ más e mabꞌambꞌanir.
EPH 2:3 Y bꞌanon ani ubꞌan conda merato cacꞌupseyan tama Cawinquirar Jesucristo. Pues non cay cacꞌupse cawerir y cay cache tunor e mabꞌambꞌanir lo que uyusre uche y cay cache tunor e mabꞌambꞌanir lo que ayopa tama cabꞌijnusiaj. Y tama tunor era non tawaron ani tuaꞌ cachꞌami ujatzꞌuar e Dios bꞌan cocha aquetpa tuaꞌ uchꞌamiobꞌ e inmojr gente xeꞌ turobꞌ tara tor e rum xeꞌ machi cꞌani uyactobꞌ umabꞌambꞌanirobꞌ.
EPH 2:4 Pero Cadiosir incꞌun uwirnar ticoit non, y war uyajta coit taca inteꞌ cꞌunersiaj xeꞌ nojta,
EPH 2:5 y tamar era conda chamenon ani tama e mabꞌambꞌanir Cadiosir sutpa uyajcꞌon cacuxtar xeꞌ imbꞌutz bꞌan cocha usuti uyajcꞌu ucuxtar e Cristo otronyajr. Y tamar era canata que corpesbꞌiron tamar taca utacarsiaj e Dios.
EPH 2:6 Y Cadiosir ixin ulocsion tama ubꞌir e chamer y usuti ubꞌixqꞌueson tujam e chamenobꞌ taca e Cristo, y uchion caturuan tuyejtzꞌer e Cristo Jesús tichan tut e qꞌuin.
EPH 2:7 Y uche cocha era tuaꞌ uwirse tunor e inmojr tama e tiempo xeꞌ watar cobꞌa e nuxi tacarsiaj lo que war uyajcꞌon era. Y uche tunor era umen que incꞌun uwirnar ticoit non xeꞌ turon tama e Cristo Jesús.
EPH 2:8 Pues non corpesbꞌiron umen utacarsiaj e Dios y umen que cꞌupseyanon tama Cawinquirar. Y cachꞌami e corpesiaj majax tamar lo que cay cache xeꞌ imbꞌutz sino que intaca uyajcꞌon e corpesiaj e Dios.
EPH 2:9 Y tamar era chequer que mamajchi erer acorpesna umen lo que war uche xeꞌ imbꞌutz, y bꞌan quetpa cocha era tuaꞌ aquetpa chequer que mamajchi uyubꞌi utattzꞌi ubꞌa nien imbꞌijc tut e Dios.
EPH 2:10 Pues tunoron chembꞌiron umen e Dios tama e Cristo Jesús tuaꞌ caxin cache meyra lo que imbꞌutz. Y lo que war ucꞌani tuaꞌ cache xeꞌ imbꞌutz ustabꞌir umener conda ma ani tucꞌa or e rum era.
EPH 2:11 Pues entonces bꞌijnunic que nox xeꞌ majax tuox e Israel umen que bꞌan cuxpox war ixarobꞌna umenerobꞌ que matucꞌa icꞌampibꞌir umen que machi war ixuri imbꞌijc uqꞌuewerir itejromar. Pero e gente tuaꞌ e Israel warto uchiobꞌ tunor era y anatanwa umen tunor que jax jaxirobꞌ xeꞌ war uxuriobꞌ imbꞌijc uqꞌuewerir utejromar xeꞌ jax inteꞌ patnar xeꞌ achena taca ucꞌabꞌ inteꞌ winic.
EPH 2:12 Y bꞌijnunic que tama e tiempo xeꞌ numuy najtir ani turox tut e Cristo, y najtir turox tut e gente tuaꞌ e Israel, y najtir turox tut tunor e pacto xeꞌ uchecsu que actana inteꞌ ojroner umen e Dios tuaꞌ uchojbꞌes e gente tuaꞌ e Israel. Y tamar era intaca turox tara tor e rum. Ma ani tucꞌa war icojco tamar y nien machi ani war ibꞌijnu jay ayan ani Idiosir.
EPH 2:13 Pero coner, nox xeꞌ najtir ani turox tut e Cristo Jesús, quetpox intera ibꞌijnusiaj tacar y quetpox tuyejtzꞌer jaxir umen que ixin uwechꞌe uchꞌichꞌer tut e cruz.
EPH 2:14 Porque e Cristo jax xeꞌ ixin usisijres tunor e qꞌuijnar lo que ayan ani tuaꞌ e gente xeꞌ tuobꞌ e Israel taca e gente xeꞌ majax tuobꞌ e Israel. Y jaxir ixin ulocse e qꞌuijnar era lo que quetpa ani bꞌan cocha inteꞌ macteꞌ tut e gente tuaꞌ e Israel y tut e gente xeꞌ majax tuobꞌ e Israel xeꞌ machi ani uyubꞌi uwira ubꞌobꞌ. Y tamar era e Cristo uche tuaꞌ aquetpa intera cabꞌijnusiaj tunoron xeꞌ war cacꞌupseyan tamar jaxir.
EPH 2:15 Y e Cristo uche tuaꞌ asatpa tunor ucꞌotorer uley e Moisés conda ixin chamay tut e cruz. Y bꞌan uche tuaꞌ aquetpa inteꞌ taca chinam tuaꞌ e gente xeꞌ tuobꞌ e Israel taca e gente xeꞌ majax tuobꞌ e Israel. Entonces tin e acꞌotoy acꞌupseyanobꞌ tama e Jesucristo aquetpobꞌ intera ubꞌijnusiajobꞌ tacar e inmojr era. Y jaxir ixin uche tuaꞌ aquetpa e jiriar tama tunoron.
EPH 2:16 Y tamar era e Cristo cꞌapa usisijres tunor e qꞌuijnar lo que ayan ani tuaꞌ e gente xeꞌ tuobꞌ e Israel y lo que ayan ani tuaꞌ e gente xeꞌ majax tuobꞌ e Israel, y tamar era ixin cꞌumpobꞌ taca e Dios y tacar ubꞌobꞌ. Pues e Cristo ixin uche cocha era conda chamay tut e cruz, y tamar era loqꞌuesna tunor uqꞌuijnarobꞌ lo que ayan ani tuobꞌ e chateꞌ chinam era tuaꞌ uyubꞌi aquetpobꞌ intera chinam tama e Cristo coner.
EPH 2:17 Pues entonces conda tari e Cristo tara tor e rum cay uchecsu e jiriar tiut nox xeꞌ majax tuox e Israel xeꞌ najtir ani turox tut e Dios, y cay uchecsu e jiriar ubꞌan tut e gente tuaꞌ e Israel xeꞌ majax najtir turobꞌ tut e Dios.
EPH 2:18 Pues tamar lo que uche e Cristo y umen que ajcꞌunon Unawalir e Dios xeꞌ inteꞌ taca ayan war aquetpa pasar e bꞌir ticoit tunoron coner motor jay tuon e Israel o motor jay majax tuon e Israel tuaꞌ uyubꞌion cacꞌotoy tut Catata Dios.
EPH 2:19 Y tamar era nox xeꞌ majax tuox e Israel mix jax ajnajtir genteox coner y machi ixto war ixturuan tama inteꞌ chinam xeꞌ majax tibꞌa, sino que coner nox interox taca tunor e inmojr maxtacobꞌ tuaꞌ e Dios.
EPH 2:20 Y non era laron cocha ingojr otot xeꞌ chembꞌir taca e petzbꞌir tun. Y inteꞌ intion laron cocha ingojr tun xeꞌ aquetpa tujor uwabꞌnibꞌ e otot era. Y uwabꞌnibꞌ era tiaꞌ war caquetpa jax e canseyaj tuaꞌ e apostolobꞌ y tuaꞌ e profetobꞌ. Y e tun xeꞌ más ayan ucꞌampibꞌir tama uwabꞌnibꞌ era jax e Cristo Jesús.
EPH 2:21 Y tamar Cawinquirar era tunoron war caquetpa bꞌan cocha ingojr otot y inteꞌ intion bꞌanon cocha ingojr tun xeꞌ war acꞌatpuna axin tama unac e otot era este que axin atꞌabꞌay tichan tuaꞌ aquetpa inteꞌ nuxi otot xeꞌ erach tiaꞌ tuaꞌ ojytzna ut e Dios tamar.
EPH 2:22 Y tamar era nox ubꞌan quetpox tama unac e otot era xeꞌ tuaꞌ Cawinquirar. Y Catata Dios war aturuan tama e otot era tama Unawalir. Y tamar era tunorox quetpox bꞌan cocha ingojr otot tiaꞌ war aturuan Catata Dios.
EPH 3:1 Pues nen xeꞌ Pabloen macbꞌiren tara tama e cárcel umen que cay inchecsu uyojroner e Dios tama e Cristo Jesús tut e gente xeꞌ majax tuobꞌ e Israel y umen que cꞌani intacriox nox.
EPH 3:2 Bꞌajcꞌat iyubꞌix que nen ajcꞌunen meyra utacarsiaj e Dios tuaꞌ uyubꞌien insutpa impuqui axin tunor e tacarsiaj era tacarox xeꞌ majax tuox e Israel.
EPH 3:3 Pues irsenen umen e Dios lo que jaxir tuaꞌ axin uche tara tor e rum. Pero tunor era quetpa mucresbꞌir umener desde que ma ani tucꞌa or e rum era bꞌan cocha cay intzꞌijbꞌa tiut tama inyajr.
EPH 3:4 Y conda ixixin iche leer e carta era erer inata que nen cꞌotoyen innata lo que ayan xeꞌ mucur ani tama e Cristo.
EPH 3:5 Pues tama e onian tiempo Cadiosir machi war uchecsu tunor era tut e gente axin. Pero coner war uchectes axin tut tin e apostolobꞌ xeꞌ erach y tut tin e profetobꞌ tacar Unawalir.
EPH 3:6 Y lo que quetpa mucur ani tut e gente tara tor e rum jax era: Que tunor tin e acꞌotoy acꞌupseyanobꞌ tama e Cristo Jesús cꞌani uchꞌamiobꞌ inteꞌ herencia tunorobꞌ. Y tunorobꞌ tuaꞌ uchꞌamiobꞌ e herencia era motor jay tuobꞌ e Israel o motor jay majax tuobꞌ e Israel. Y tunoron cocha era quetponix inteꞌ taca cuerpo tama e Cristo, y aquetpa que e Dios tuaꞌ axin uxere taca tunoron xeꞌ cachꞌami uyojroner e Dios tama e Cristo tunor lo que cay che tama e onian tiempo xeꞌ quetpa tuaꞌ uche.
EPH 3:7 Pues nen tacarnen umen e Dios conda uyajqꞌuen nicꞌampibꞌir tuaꞌ inquetpa uman e Dios tuaꞌ uyubꞌien inxin inchecsu uyojroner e Dios tama e corpesiaj tut e gente axin. Pues jax e Dios xeꞌ cay patna tamaren tacar ucꞌotorer tuaꞌ uyajqꞌuen tunor nicꞌampibꞌir era.
EPH 3:8 Y motor que nen más chuchu nicꞌampibꞌir que tunor tin e tuobꞌ e Dios, pero jax nen xeꞌ ajcꞌunen utacarsiaj e Dios tuaꞌ inxin inchꞌucsu tut tunor e gente xeꞌ majax tuobꞌ e Israel tunor e nuxi tacarsiaj que ma erer cabꞌisi xeꞌ ayan tama e Cristo.
EPH 3:9 Y e Dios uyajqꞌuen tuaꞌ inxin inchecsu tut tunor e gente lo que cay ubꞌijnu uche jaxir conda merato achena or e rum era. Y tunor lo que cay ubꞌijnu uche era mamajchi tut uchecsu esto coner conda cay uyajcꞌon tuaꞌ canata xeꞌ apostolon. Y jaxir xeꞌ uche cocha era jax xeꞌ uche tunor lo que ayan ubꞌan.
EPH 3:10 Y Cadiosir ixin uche cocha era tuaꞌ acꞌotoy unatobꞌ tunor e sian ajcꞌotorerobꞌ y tunor e sian ajcꞌamparobꞌ lo que ayan tut e qꞌuin cobꞌa e nuxi natanyaj lo que ayan tuaꞌ. Y bꞌan taca cocha era tuaꞌ acꞌotoy unatobꞌ conda axin uwirobꞌ lo que war uche Cadiosir tamaron xeꞌ ajcꞌupesiajon tamar.
EPH 3:11 Y Cadiosir uche tunor cocha era umen que bꞌan quetpa chꞌuwan tama uyalma que cꞌani uyajcꞌon e corpesiaj tama e Cristo Jesús xeꞌ jax Cawinquirar.
EPH 3:12 Y tamar era non xeꞌ turon tama e Cristo Jesús xeꞌ war cacꞌupseyan tamar machi ixto tuaꞌ cabꞌacta tuaꞌ cacꞌajti taca Catata Dios porque coner ayan cacꞌupesiaj que jaxir turix tuaꞌ uyubꞌion conda cacꞌajti tacar.
EPH 3:13 Y tamar era cꞌani inwareox que ira ixjayjayran tama iwalma umen que nen war innumse nibꞌa tara tama e cárcel. Porque nen turen tama e cárcel umen que cay intacriox tunorox, y lo que war innumse nibꞌa era acꞌampa tuaꞌ itattzꞌi ucꞌabꞌa Cadiosir tamar umen que jaxir war ucojcuen motor que tara turen tama e cárcel.
EPH 3:14 Y tamar era nen incotuan tut Catata Dios tuaꞌ intattzꞌi ucꞌabꞌa tama tunor lo que war uche.
EPH 3:15 Porque Cadiosir jax e Tatabꞌir tuaꞌ tunor tin e war acꞌupseyanobꞌ tamar, motor jay turobꞌ tut e qꞌuin o motor jay turobꞌ tara tor e rum. Y tamar era tunoron caquetpa intera familía tamar jaxir.
EPH 3:16 Y war incꞌajti taca Catata Dios xeꞌ ayan meyra utawarer que jaxir axin uyajcꞌox ucꞌotorer y que axin uqꞌuecꞌojsiox tama iwalma taca utacarsiaj Unawalir.
EPH 3:17 Y war incꞌajti taca e Dios tuaꞌ aturuan e Cristo tama iwalma umen que war ixcꞌupseyan tamar, y que erer ixqꞌuecꞌo tama ucꞌunersiaj e Cristo y que tunor era erer awiri bien macuir iwalma ubꞌan,
EPH 3:18 y que tamar era erer ixqꞌuecꞌo tuaꞌ uyubꞌiox ixcꞌotoy inata taca tunor e inmojr ajcꞌupesiajobꞌ tama e Cristo cobꞌa nuxi cꞌunersiaj lo que ayan tuaꞌ e Cristo. Porque nojta ucꞌunersiaj e Cristo este que mamajchi xeꞌ erer ubꞌisi cobꞌa unojir y nien cobꞌa utamir, y mamajchi xeꞌ erer ubꞌisi esto tiaꞌ axin tichan tunor ucꞌunersiaj e Cristo era.
EPH 3:19 Y war incꞌajti taca e Dios que erer ixcꞌotoy inata cobꞌa e cꞌunersiaj era que nojta este que mamajchi uyubꞌi ubꞌisi cobꞌa ucꞌunersiaj e Cristo era. Porque tamar era erer axin abꞌutcꞌa iwalma tunorox taca tunor ubꞌutꞌurir e Dios.
EPH 3:20 Pues catattzꞌic ucꞌabꞌa Cadiosir xeꞌ uyubꞌi uche meyra tujor tunor lo que erer cacꞌajti tacar, y xeꞌ uyubꞌi uche meyra tujor tunor lo que erer cabꞌijnu tuaꞌ uche tacar ucꞌotorer xeꞌ war apatna macuir cawalma.
EPH 3:21 Y catattzꞌic ucꞌabꞌa Cadiosir tama tunor e grupo ajcꞌupesiajobꞌ y tama e Cristo Jesús iraj iraj y ejcꞌar ejcꞌar. Amén.
EPH 4:1 Pues nen xeꞌ Pabloen xeꞌ macbꞌiren tara tama e cárcel umen que war inchecsu uyojroner Cawinquirar axin cꞌani inwareox tuaꞌ iturbꞌa ibꞌa tuaꞌ ixturuan bꞌan cocha ucꞌani tuaꞌ uche tunor tin e pejcbꞌirobꞌ umen e Dios.
EPH 4:2 Manxujresic ibꞌa tut e inmojr, y checsunic ibꞌa que incꞌun iwirnar tut e inmojr, y ira ixqꞌuijna wacchetaca taca e inmojr. Y jay ayan inteꞌ iwet ajcꞌupesiajir xeꞌ war uche lo que majax bueno tiut maquic iwej tuaꞌ machi ixqꞌuijna, sino que checsunic que ayan ucꞌunersiaj e Dios tama iwalma.
EPH 4:3 Turbꞌanic ibꞌa tuaꞌ ixquetpa intera tunorox tama Unawalir e Dios, y cojconic ujiriar e Dios lo que ayan tijam xeꞌ war uchiox ixquetpa intera tama e Cristo.
EPH 4:4 Porque ayan inteꞌ taca ucuerpo e Cristo tara tor e rum xeꞌ jax non xeꞌ ajcꞌupesiajon tamar, y ayan inteꞌ taca Unawalir e Dios, y ayan inteꞌ taca corpesiaj xeꞌ war cacojco tamar que Cadiosir war upejcon tuaꞌ cachꞌami.
EPH 4:5 Y ayan inteꞌ taca Cawinquirar, y ayan inteꞌ taca e cꞌupesiaj, y ayan inteꞌ taca e chꞌuymar.
EPH 4:6 Y ayan inteꞌ taca Cadiosir xeꞌ jax e Tatabꞌir tuaꞌ tunoron xeꞌ war cacꞌupseyan tama e Cristo. Y jaxir jax xeꞌ turu tujor tunor tin e turobꞌ, y xeꞌ war apatna tama tunor tin e turobꞌ, y xeꞌ turu macuir tunor tin e turobꞌ.
EPH 4:7 Pues inteꞌ intion ajcꞌunon cacꞌampibꞌir tuaꞌ uyubꞌion cache lo que ucꞌani Cadiosir bꞌan taca cocha uyajcꞌon e Cristo.
EPH 4:8 Bꞌan cocha chꞌar tzꞌijbꞌabꞌir tama uyojroner e Dios que: Conda e Cristo tꞌabꞌay ixin tichan uqꞌueche ixin tacar meyra xeꞌ prisionero ani, y de allí cay uyajcꞌu ucꞌampibꞌirobꞌ e gente axin, bꞌan chꞌar tzꞌijbꞌabꞌir tama uyojroner e Dios.
EPH 4:9 Y ¿tucꞌa erer cabꞌijnu tamar e ojroner xeꞌ che: “Tꞌabꞌay ixin tichan?” Pues erer cabꞌijnu que e Cristo ecmay tari ejmar esto tara tor e rum y de allí sutpa tꞌabꞌay ixin tichan.
EPH 4:10 Entonces jaxir xeꞌ ecmay tari ejmar jax taca xeꞌ sutpa tꞌabꞌay ixin tichan esto tujor tunor ut e qꞌuin tuaꞌ ubꞌutꞌi tamar ubꞌa tunor lo que ayan tut e qꞌuin y tunor lo que ayan tara tor e rum ubꞌan.
EPH 4:11 Y jax e Cristo era ubꞌan xeꞌ cay uyajcꞌu ucꞌampibꞌirobꞌ e gente axin. Y tamar era ayan tin e uyajcꞌu tuaꞌ aquetpobꞌ apostolobꞌ, y ayan tin e ajcꞌunobꞌ tuaꞌ aquetpobꞌ tin e uchꞌamiobꞌ inteꞌ ojroner tuaꞌ e Dios y asutpa uyareobꞌ e gente otronyajr, y ayan tin e ajcꞌunobꞌ ucꞌampibꞌirobꞌ tuaꞌ aquetpobꞌ tin e uchecsu uyojroner e Dios tama e corpesiaj. Y ayan tin e ajcꞌunobꞌ ucꞌampibꞌirobꞌ tuaꞌ aquetpobꞌ ajcojcobꞌ tuaꞌ tunor e ajcꞌupesiajobꞌ tama Cawinquirar, y ayan tin e ajcꞌunobꞌ tuaꞌ aquetpobꞌ ajcanseyajobꞌ tama uyojroner e Dios.
EPH 4:12 Y e Cristo cay uyajcꞌu ucꞌampibꞌirobꞌ tunor e gente era tuaꞌ axin utacriobꞌ tunor tin e ajcꞌupesiajobꞌ tama e Cristo tuaꞌ uꞌstana uwirnarobꞌ tuaꞌ uyubꞌiobꞌ uchiobꞌ tunor upatnar e Dios, y tamar era cꞌani achꞌiꞌ tunor ucuerpo e Cristo tara tor e rum xeꞌ jax tunor tin e war acꞌupseyanobꞌ tamar.
EPH 4:13 Y bꞌan tuaꞌ anumuy este que acꞌotoy caquetpa interon tunoron tama cacꞌupesiaj tama e Cristo, y tuaꞌ acꞌotoy canata meyra tamar Uyunen e Dios. Y bꞌan tuaꞌ anumuy este que acꞌapa achꞌiꞌ cacꞌupesiaj tama e Cristo, y este que cacꞌotoy caquetpa bꞌan taca cocha e Cristo inyajrer.
EPH 4:14 Y tamar era machi ixto tuaꞌ caquetpa bꞌan cocha inteꞌ chuchu maxtac xeꞌ erer amajresna wacchetaca umen inteꞌ canseyaj xeꞌ majax erach. Sino que non ucꞌani tuaꞌ caquetpa nojta tamar cacꞌupesiaj tama e Cristo tuaꞌ machi camajresna umen inteꞌ canseyaj xeꞌ majax bꞌan cocha ucꞌani uyojroner e Dios. Porque ayan tin e war amajresianobꞌ tamar lo que war acanseyanobꞌ xeꞌ war ubꞌijnuobꞌ que jaxirobꞌ nuxi ajcanseyajobꞌ, pero xeꞌ intaca war ulocsiobꞌ tunor era tamar ujorobꞌ. Pero machi war acanseyanobꞌ lo que ucꞌani e Dios, sino que intaca war uche ubꞌobꞌ tuaꞌ ulocsiox ani tama ubꞌir e Dios.
EPH 4:15 Pero non ucꞌani tuaꞌ caware lo que erach taca ucꞌunersiaj e Dios, y tamar era cꞌani cachꞌiꞌ tunoron tuaꞌ cacꞌotoy caquetpa intera taca e Cristo. Y tunoron bꞌanon cocha ucuerpo e Cristo tara tor e rum, y e Cristo jax cajor.
EPH 4:16 Y inteꞌ intion xeꞌ war cacꞌupseyan tama e Cristo bꞌanon cocha inteꞌ bꞌac tama ubꞌaquer e Cristo era, y tamar ucuerpo era war caquetpa cachar inteꞌ intion tacar e chicher, y inteꞌ inteꞌ bꞌac tama ubꞌaquer era war uchꞌami uqꞌuecꞌuar bꞌan cocha ucꞌani tuaꞌ uyubꞌi uche lo que aquetpa tuaꞌ uche. Y conda inteꞌ intion war cache capatnar tama ubꞌaquer era entonces axin achꞌiꞌ tunor e cuerpo y axin uchꞌijrse ubꞌa tama ucꞌunersiaj e Dios axin.
EPH 4:17 Pues entonces ayan inteꞌ ojroner xeꞌ ucꞌani tuaꞌ iwira que cꞌani inwacta tacarox tama ucꞌabꞌa Cawinquirar xeꞌ jax era: Que machi ixto tuaꞌ ixturuan bꞌan cocha tin e machi unatobꞌ chi Cawinquirar. Pues jaxirobꞌ uchiobꞌ bꞌan taca cocha ayopa tama ubꞌijnusiajobꞌ xeꞌ matucꞌa ucꞌampibꞌir.
EPH 4:18 Porque ubꞌijnusiajobꞌ e gente era intaca incsibꞌan tunor. Y war aquetpobꞌ najtir tut e cuxtar xeꞌ ajcꞌuna umen e Dios umen que war uqꞌuecꞌojse uyalmobꞌ tuaꞌ machi unatobꞌ tamar lo que ayan tuaꞌ e Dios.
EPH 4:19 Porque jaxirobꞌ cꞌapa usatiobꞌ tunor e subꞌar lo que ayan ani tamarobꞌ, y tamar era ixin uyajcꞌu ubꞌobꞌ tuaꞌ uchiobꞌ tunor e mabꞌambꞌanir lo que uyusre uchiobꞌ tama uwerirobꞌ este que cay uchiobꞌ lo que más calapir uwirnar. Y tamar era war uyusre uyose ubꞌobꞌ tama tunor era más y más.
EPH 4:20 Pero nox majax bꞌan cay canuox tamar e Cristo.
EPH 4:21 Y bꞌan war inata cocha cay iyubꞌi tunor uyojroner e Dios tama e Cristo y cay cansenox lo que erach tama e Jesús.
EPH 4:22 Y cansenox que ucꞌani tuaꞌ ichoqui tunor e onian bꞌijnusiaj lo que cay uchiox iche e mabꞌambꞌanir, porque tunor e onian bꞌijnusiaj era majresna umen que intaca uyusre uche e mabꞌambꞌanir.
EPH 4:23 Y tamar era ucꞌani tuaꞌ uꞌstana tunor iwalma y tunor ijor tuaꞌ ixquetpa imbꞌutz coner.
EPH 4:24 Entonces bꞌujcsenic ibꞌa tama iwalma taca e bꞌijnusiaj xeꞌ imbꞌutz xeꞌ chembꞌir umen e Dios. Porque tunor e bꞌijnusiaj cocha era matucꞌa e bꞌonemar tamar, y matucꞌa e mabꞌambꞌanir tamar, y matucꞌa e majresiaj tamar.
EPH 4:25 Entonces actanic tunor e majresiaj. Ojronenic jax taca lo que erach taca tunor ipiarobꞌ porque inteꞌ intion laron cocha inteꞌ bꞌac xeꞌ aquetpa tama ucuerpo Cawinquirar.
EPH 4:26 Y jay ixqꞌuijna, ira iwacta aꞌjni ijor tuaꞌ iche e mabꞌambꞌanir. Y ira iwacta eixna e qꞌuijnar tamarox sino que sisijresic ibꞌa tuaꞌ machi ixacbꞌare taca e qꞌuijnar era.
EPH 4:27 Porque jay isisijres tunor e qꞌuijnar wacchetaca entonces machi war iwajcꞌu lugar e diablo tuaꞌ axin ucucruox.
EPH 4:28 Y tin e war axujchꞌian uyactic tunor era y chic patnac coner taca ucꞌabꞌ tuaꞌ uyubꞌi atojya tama upatnar, y tamar era erer axin utacre tin e tzajtaca ut.
EPH 4:29 Y ira iwacta alocꞌoy e mabꞌambꞌan ojroner tama iwej sino que ojronenic taca e ojroner xeꞌ incꞌun uyubꞌnar tuaꞌ uyubꞌi atacarnobꞌ tin e ayan lo que war unumse ubꞌobꞌ, y tuaꞌ uyubꞌi atzayjresnobꞌ tin e war uyubꞌiobꞌ iwojroner era.
EPH 4:30 Y ira iche atzꞌintzꞌa Unawalir e Dios tamar lo que war iche xeꞌ mabꞌambꞌan, porque jax Unawalir e Dios era xeꞌ cay uturbꞌa inteꞌ chequerir tamarox tuaꞌ aquetpa chequer tama e día conda asutpa watar Cawinquirar Jesucristo que nox umaxtacox e Dios.
EPH 4:31 Y choquic tunor lo que uche achꞌajran iwalma. Y choquic tunor lo que uchiox iyusre iche e mabꞌambꞌanir, y choquic tunor e qꞌuijnar. Choquic tunor e qꞌuecraner, y ira iqꞌuijnes ibꞌa. Y choquic tunor e mabꞌambꞌanir inyajrer.
EPH 4:32 Cꞌunlesic iwirnar tut tunor e inmojr, y chectesic tutobꞌ que incꞌun iwalma nox ubꞌan, y cꞌumpesic ibꞌa inteꞌ intiox bꞌan cocha uche Cadiosir tamaron tama e Cristo.
EPH 5:1 Pues entonces cocha nox umaxtacox e Dios xeꞌ inchoj iut umener, turbꞌanic ibꞌa tuaꞌ aquetpa iwirnar bꞌan cocha turu uwirnar jaxir.
EPH 5:2 Cꞌaninic ibꞌa inteꞌ intiox bꞌan cocha e Cristo cay uyajta coit conda ixin uyacta ubꞌa chamesna tamaron. Porque conda chamesna jaxir quetpa ajcꞌubꞌir bꞌan cocha inteꞌ arac xeꞌ war apurutna tor e cꞌajc tuaꞌ atꞌabꞌay axin uyujtznar esto tut e qꞌuin tuaꞌ utzayjres e Dios.
EPH 5:3 Y cocha nox tuoxix e Dios machix tuaꞌ achecta nien inteꞌ ojroner tamarox que ayan tijam tin e war uchꞌami ubꞌobꞌ bꞌan taca, o que ayan tijam tin e war uchiobꞌ lo que calapir, o que ayan tijam tin e war uyusre uchꞌamiobꞌ lo que majax tuobꞌ. Porque tunor era machi uwajpi tama umaxtac e Dios.
EPH 5:4 Y machix tuaꞌ achecta inteꞌ ojroner tamarox que ayan tijam tin e war ucꞌampes inteꞌ ojroner xeꞌ calapir uyubꞌnar, y nien inteꞌ ojroner xeꞌ matucꞌa ucꞌampibꞌir. Y machix tuaꞌ achecta tamarox que ayan tijam tin e war ucꞌampes e aras ojroner xeꞌ mabꞌambꞌan xeꞌ machi uwajpi tamar lo que ucꞌani tuaꞌ uche inteꞌ umaxtac e Dios, sino que ucꞌani tuaꞌ oꞌbꞌna tamarox que war iwajcꞌu gracias e Dios tama tunor.
EPH 5:5 Pues tama e chinam xeꞌ tuaꞌ e Cristo y xeꞌ tuaꞌ Catata Dios cꞌani inata era que ma erer oꞌchoyobꞌ tin e war uchꞌamiobꞌ ubꞌobꞌ bꞌan taca, y ma erer oꞌchoyobꞌ tin e war uchiobꞌ lo que calapir, y ma erer oꞌchoyobꞌ tin e war uyusre uchꞌamiobꞌ lo que majax tuobꞌ, porque tin e war uyusre uchꞌamiobꞌ lo que majax tuobꞌ bꞌanobꞌ cocha tin e war uyujtzꞌiobꞌ ut inteꞌ chamen dios.
EPH 5:6 Pues ira iwacta ibꞌa tuaꞌ ixmajresna umen tin e upejcox taca inteꞌ ojroner xeꞌ tojbꞌen uyubꞌnar, porque watar uqꞌuijnar e Dios tujor tunor tin war uchiobꞌ tunor era cocha machi war acꞌupseyanobꞌ tut jaxir.
EPH 5:7 Y tamar era cꞌani inwareox que ira ixxana taca e gente cocha era xeꞌ machi cꞌani acꞌupseyanobꞌ tut e Dios.
EPH 5:8 Pues ayan inteꞌ tiempo conda nox merato ani inata ixxana tama ubꞌir e Dios y turoxto tama e incsibꞌaner, pero coner war ixxana tama e janchꞌaquenar lo que ayan tama Cawinquirar. Entonces turbꞌanic ibꞌa tuaꞌ ixxana erach tut e Dios tuaꞌ aquetpa chequer tut e gente axin que nox maxtacox tuaꞌ e janchꞌaquenar.
EPH 5:9 Porque cꞌani aquetpa chequer tamar ucuxtar tin e war axanobꞌ tama e janchꞌaquenar que incꞌun uyalmobꞌ, y que imbꞌutz uwirnarobꞌ, y que erach tunor uwirnarobꞌ tut Cawinquirar.
EPH 5:10 Y tamar era cꞌani ixcano iche lo que atzay uwira Cawinquirar.
EPH 5:11 Y ira ixixin iche lo que war uchiobꞌ e gente xeꞌ turobꞌ tama e incsibꞌaner porque matucꞌa ucꞌampibꞌir tunor era, sino que checsunic tutobꞌ que mabꞌambꞌan tunor lo que ayan tama e incsibꞌaner era.
EPH 5:12 Porque tunor lo que axin uchiobꞌ mucur tin e machi cꞌani acꞌupseyanobꞌ tut e Dios, subꞌar uwirnar tuaꞌ cojron tamar.
EPH 5:13 Porque ujanchꞌaquenar e Dios war ujanchꞌacnes tuaꞌ aquetpa chequer tunor e mabꞌambꞌanir lo que war uchiobꞌ mucur e gente era.
EPH 5:14 Porque e janchꞌaquenar tuaꞌ e Dios ujanchꞌacnes tunor lo que war achempa umen e gente tuaꞌ aquetpa chequer jay bueno o jay majax bueno lo que war uchiobꞌ, bꞌan cocha che tama inteꞌ ojroner que: Bꞌixqꞌuen net xeꞌ war iwayan y achpen tujam e chamenobꞌ. Y tamar era e Cristo tuaꞌ ujanchꞌacneset. Bꞌan che e ojroner era.
EPH 5:15 Entonces chꞌujcunic iwira tamar lo que war iche y ira ixquetpa bꞌan cocha inteꞌ xeꞌ matucꞌa unata, sino que bꞌijnunic iwira tucꞌa war iche.
EPH 5:16 Y cꞌampesic inteꞌ inteꞌ día tuaꞌ aquetpa imbꞌutz tut e Dios tunor lo que war iche, porque tama e tiempo era ayan meyra e mabꞌambꞌanir.
EPH 5:17 Y ira ixquetpa bꞌan cocha inteꞌ xeꞌ macar ujor, sino que canoenic tuaꞌ iche lo que ucꞌani Cawinquirar.
EPH 5:18 Y ira ixixin ixcaray taca e vino, porque tamar era intaca axin asatpa ijor, sino que cꞌajtinic taca e Dios iraj iraj tuaꞌ ubꞌutꞌi iwalma tacar Unawalir.
EPH 5:19 Ojronenic inteꞌ intiox taca inteꞌ salmo o taca inteꞌ himno o taca inteꞌ coro. Cꞌaywenic y chenic inteꞌ cꞌay tama iwalma tut Cawinquirar.
EPH 5:20 Y ajcꞌunic gracias Catata Dios iraj iraj tamar ucꞌabꞌa Cawinquirar Jesucristo tama tunor lo que ayan.
EPH 5:21 Pues entonces turbꞌanic ibꞌa tuaꞌ aquetpa incꞌun iwirnar tut ibꞌa inteꞌ intiox, porque tamar era war cobꞌian tut e Cristo.
EPH 5:22 Pues nox xeꞌ ixcarbꞌirox, manxujresic ibꞌa tut iviejo bꞌan cocha war iche tut Cawinquirar.
EPH 5:23 Porque uviejo inteꞌ ixic aquetpa ujorir uwixcar era, y bꞌan cocha era e Cristo aquetpa cajorir tunoron xeꞌ ajcꞌupesiajon tamar. Pues non bꞌanon cocha ucuerpo e Cristo tara tor e rum y jaxir jax Cawajcorpesiaj tama tunoron xeꞌ jax e iglesia.
EPH 5:24 Y tamar era tunorox xeꞌ ixcarbꞌirox ucꞌani tuaꞌ imanxujres ibꞌa tut iviejo bꞌan cocha tunoron xeꞌ ajcꞌupesiajon tama e Cristo war camanxujres cabꞌa tut jaxir tama tunor.
EPH 5:25 Y nox xeꞌ winicox ucꞌani tuaꞌ iyajta ut iwixcar bꞌan cocha e Cristo war uyajta coit tunoron xeꞌ ajcꞌupesiajon tamar xeꞌ jax e iglesia este que ixin uyajcꞌu ubꞌa tuaꞌ achamesna tamaron.
EPH 5:26 Pues jaxir ixin chamay tamaron porque cꞌani uchion caquetpa erach tunoron xeꞌ ajcꞌupesiajon tamar y ixin uyusteson conda upoquion tacar uyojroner xeꞌ checsuna ticoit, bꞌan cocha jay achena ani taca e jaꞌ.
EPH 5:27 Porque e Cristo war ucꞌani que non xeꞌ ajcꞌupesiajon tamar xeꞌ jax e iglesia axin caquetpa tacar jaxir. Y tamar era ucꞌani tuaꞌ caquetpa bꞌan cocha inteꞌ ijchꞌoc xeꞌ turix tuaꞌ anujbꞌi taca inteꞌ sitz xeꞌ ucꞌani tuaꞌ aquetpa galan uwirnar, y que matucꞌa e bꞌonemar tamar, y que mato jax churuc ut y nien imbꞌijc lo que majax imbꞌutz tut unoxip, sino que ucꞌani tuaꞌ aquetpa galan tunor uwirnar. Y bꞌanon non ubꞌan que ucꞌani tuaꞌ caquetpa erach tut e Cristo tuaꞌ uyubꞌion cachꞌajma umener conda asutpa watar otronyajr.
EPH 5:28 Y bꞌan cocha e Cristo war uyajta coit y bꞌan ucꞌani tuaꞌ cayajta ut cawixcar non ubꞌan xeꞌ winicon bꞌan cocha war cayajta coit cabꞌa. Porque e winic xeꞌ axin ucꞌani ut uwixcar jax taca war ucꞌani ubꞌa.
EPH 5:29 Porque mamajchi axin uxejbꞌe ut ucuerpo, sino que axin uwese ubꞌa bien y ucojco ubꞌa bien ubꞌan, y bꞌan war uche e Cristo tama e iglesia xeꞌ jax non xeꞌ ajcꞌupesiajon tamar.
EPH 5:30 Porque non xeꞌ ajcꞌupesiajon tamar bꞌanon cocha ucuerpo e Cristo tara tor e rum, y tamar era inteꞌ intion tuon ucuerpo era.
EPH 5:31 Bꞌan cocha chꞌar tzꞌijbꞌabꞌir tama uyojroner e Dios que: “Y tamar era inteꞌ winic ucꞌani tuaꞌ uyacta utuꞌ y utata tuaꞌ axin uchꞌami uwixcar, y conda uchꞌami ubꞌobꞌ e chatertiobꞌ era axin aquetpobꞌ intera.” Bꞌan chꞌar tzꞌijbꞌabꞌir tama uyojroner e Dios.
EPH 5:32 Pero tunor era jax inteꞌ bꞌijnusiaj xeꞌ intam, pero cꞌani inwareox era que war onjron tama e Cristo y tama e iglesia xeꞌ jax non xeꞌ ajcꞌupesiajon tamar.
EPH 5:33 Pero ucꞌani ubꞌan que inteꞌ inteꞌ winic ucꞌanic ut uwixcar bꞌan cocha war uyajta ut ubꞌa, y bꞌan ubꞌan que inteꞌ inteꞌ ixcarbꞌir ubꞌianic tut uviejo.
EPH 6:1 Pues entonces maxtacox xeꞌ ajcꞌupesiajox tama Cawinquirar, cꞌupsenic ut itata y ut ituꞌ, porque bꞌan ucꞌani tuaꞌ iche.
EPH 6:2 Porque jax era e bꞌajxan ojroner xeꞌ chꞌar tzꞌijbꞌabꞌir tama uley e Moisés xeꞌ che que ucꞌani tuaꞌ achojbꞌesna ut tin e obꞌian tut. Y che e ojroner era que: “Cꞌupsen ut atata y ut atuꞌ.”
EPH 6:3 Y e chojbꞌesiaj che que tin e obꞌian tut e ojroner era: “Cꞌani atzay meyra y cꞌani aquetpa meyra tiempo tama ucuxtar tara tor e rum.” Bꞌan chꞌar tzꞌijbꞌabꞌir tama uyojroner e Dios.
EPH 6:4 Y nox xeꞌ tatabꞌirox ira iche ibꞌa tuaꞌ iqꞌuijnes meyra imaxtac, sino que chꞌijrsenicobꞌ tuaꞌ uyubꞌi obꞌianobꞌ, y cansenobꞌ cocha tuaꞌ axanobꞌ tama ubꞌir Cawinquirar.
EPH 6:5 Y nox xeꞌ manox xeꞌ mambꞌirox inyajrer chꞌabꞌunic ibꞌa tuaꞌ ixcꞌupseyan tut iwajyum tama tunor lo que uyareox iche. Y chenic tunor era taca tunor iwalma bꞌan cocha jay war ani iche tunor era tama e Cristo.
EPH 6:6 Y ira iche cocha uche inteꞌ man xeꞌ war taca apatna conda war eꞌrna umen upatron, pero xeꞌ machi apatna conda machi war eꞌrna umener. Pero nox ucꞌani tuaꞌ iche tunor ipatnar bꞌan cocha inteꞌ man tuaꞌ e Cristo, y chenic tunor ipatnar era taca tunor iwalma bꞌan cocha ucꞌani Cadiosir.
EPH 6:7 Y chenic ipatnar era taca inteꞌ tzayer tuaꞌ alocꞌoy imbꞌutz tut ipatron tunor lo que war iche, bꞌan cocha jay jax ani inteꞌ patnar tuaꞌ Cawinquirar y majax jax taca inteꞌ patnar tuaꞌ inteꞌ winic.
EPH 6:8 Y natanic que tunor lo que axin cache xeꞌ imbꞌutz, que Cawinquirar cꞌani axin utoyon tamar lo que cache era. Y bꞌan tuaꞌ anumuy tama tunor tin e war uche lo que imbꞌutz, motor jay jax inteꞌ man xeꞌ mambꞌir inyajrer o motor jay jax inteꞌ winic xeꞌ jax inteꞌ ajpatnar taca.
EPH 6:9 Y nox xeꞌ patronox, chenic ibꞌa imbꞌutz tut iman xeꞌ mambꞌir inyajrer bꞌan cocha jaxirobꞌ ucꞌani tuaꞌ uche ubꞌobꞌ imbꞌutz tiut. Y ira ibꞌajcꞌuse iman taca iwojroner conda war iware tucꞌa tuaꞌ uchiobꞌ. Bꞌijnunic que nox xeꞌ patronox bꞌan cocha tin e manobꞌ xeꞌ mambꞌirobꞌ inyajrer que tunorox tuox inteꞌ taca Patrón xeꞌ turu tichan tut e qꞌuin xeꞌ jax Cawinquirar. Y jaxir mamajchi tuaꞌ uturbꞌa najtir xeꞌ war acꞌupseyan tamar, y jax jaxir xeꞌ tuaꞌ axin utoyon inteꞌ intion tamar lo que cꞌapa cache tara tor e rum.
EPH 6:10 Pues entonces niwermanuox, qꞌuecꞌojsenic ibꞌa tama Cawinquirar umen que intera turox tacar, porque jaxir meyra ayan ucꞌotorer.
EPH 6:11 Y corpesic ibꞌa taca tunor utacarsiaj e Dios tuaꞌ uyubꞌiox ixqꞌuecꞌo ixwawan tut e diablo tuaꞌ machi ucucruox tacar umajresiaj.
EPH 6:12 Porque non era machi war cache e tzꞌojyir taca inteꞌ winic xeꞌ bꞌan cocha non, sino que war cache e tzꞌojyir taca tunor e sian mein xeꞌ mabꞌambꞌan xeꞌ war axanobꞌ tama e icꞌar tara tor e rum. Y war cache e tzꞌojyir taca e meinobꞌ xeꞌ ajmabꞌambꞌanirobꞌ xeꞌ quetpobꞌ ajcꞌotorerobꞌ, y xeꞌ quetpobꞌ ajcꞌamparobꞌ, y xeꞌ quetpobꞌ ajwinquirobꞌ. Y war cache e tzꞌojyir taca tunor e mabꞌambꞌan meinobꞌ era xeꞌ war acꞌotoriobꞌ tama e incsibꞌaner lo que ayan tara tor e rum.
EPH 6:13 Y tamar era cꞌani inwareox que chꞌamic tunor uqꞌuecꞌojsiaj e Dios xeꞌ tuaꞌ ucojcox tuaꞌ machi ixcucurna conda watar e día tuaꞌ e mabꞌambꞌanir. Y tamar era conda acꞌapa iche tunor lo que uyubꞌiox iche, cꞌani ixquetpa ixwawan.
EPH 6:14 Warenic turix tuaꞌ iche e tzꞌojyir. Y canoenic tunor lo que erach tuaꞌ e Dios tuaꞌ machi ixmajresna xeꞌ bꞌan cocha inteꞌ cinturón lo que ayan cachbꞌir tama unac inteꞌ soldado tuaꞌ uquete tunor ubꞌujc. Y turbꞌanic ibꞌa tuaꞌ ixquetpa erach tama tunor lo que war iche xeꞌ bꞌan cocha inteꞌ taqꞌuin lo que uturbꞌa inteꞌ soldado tuaꞌ ucojco ut ubꞌa.
EPH 6:15 Y turbꞌanic ibꞌa tuaꞌ ixquetpa turix tuaꞌ ichecsu tunor uyojroner e Dios tama e jiriar tut e gente axin, bꞌan cocha inteꞌ soldado conda axin ucachi bien uxanabꞌ tama uyoc y tamar era aquetpa turix tuaꞌ alocꞌoy axana tic taca.
EPH 6:16 Y tama tunor cꞌampesic icꞌupesiaj tama e Dios tuaꞌ ucojcox tama tunor ucucursiaj e diablo, bꞌan cocha inteꞌ soldado xeꞌ ucꞌampes inteꞌ escudo tuaꞌ ucorpes ubꞌa conda atobꞌoy watar inteꞌ susteꞌ xeꞌ ayan e cꞌajc tamar.
EPH 6:17 Y chꞌamic e corpesiaj tuaꞌ Cadiosir tuaꞌ icorpes ibꞌa bꞌan cocha inteꞌ soldado xeꞌ ucꞌampes inteꞌ casco tuaꞌ ucorpes ujor tuaꞌ machi achamesna. Y ojronenic tamar uyojroner e Dios tuaꞌ icucru e Satanás porque uyojroner e Dios era bꞌan cocha inteꞌ machit xeꞌ ajcꞌunon umen Unawalir e Dios bꞌan cocha inteꞌ soldado xeꞌ ucꞌampes umachit tuaꞌ ucucru uyenemigo y bꞌan tuaꞌ cacꞌampes uyojroner e Dios non ubꞌan.
EPH 6:18 Y ira iwacta tuaꞌ icꞌajti taca e Dios iraj iraj tacar utacarsiaj Unawalir. Y turbꞌanic ibꞌa tuaꞌ ichꞌujcu iwira tin ucucursiaj e Satanás ipater. Y cꞌajtinic iraj iraj taca e Dios tuaꞌ atacarnobꞌ tunor e inmojr maxtacobꞌ tuaꞌ e Dios ubꞌan.
EPH 6:19 Y cꞌajtinic taca e Dios tuaꞌ intacarna nen ubꞌan que e Dios tuaꞌ ucansen tucꞌa tuaꞌ inware e gente axin, y que conda inxin onjron que machi tuaꞌ imbꞌacta tuaꞌ inchecsu axin tunor uyojroner e Dios tamar lo que mucur ani tama e corpesiaj.
EPH 6:20 Y nen era quetpen inteꞌ ajchecsuyaj tuaꞌ e corpesiaj lo que ayan tama Cawinquirar Jesucristo motor que nen turen tara tama e cárcel. Y tamar era cꞌajtinic taca e Dios que tuaꞌ inqꞌuecꞌo inchecsu tunor uyojroner e Dios tut e gente axin bꞌan cocha ucꞌani tuaꞌ inche.
EPH 6:21 Pues tuaꞌ inata tucꞌa war inche nen coner cꞌani inwebꞌta axin cawermano Tíquico tuaꞌ uyareox tunor lo que war anumuy tacaren. Pues cawermano era xeꞌ inchoj ut camener jax inteꞌ ajtacarsiaj tama upatnar Cawinquirar xeꞌ machi acꞌoy uche tunor era.
EPH 6:22 Y tamar era war inwebꞌta axin e hermano era tiut tuaꞌ ixcꞌotoy inata tunor lo que war anumuy tacaron y tuaꞌ axin utꞌabꞌse iwalma tunorox.
EPH 6:23 Que Catata Dios y Cawinquirar Jesucristo axin uyajcꞌox ujiriar taca ucꞌunersiaj y que axin uyajcꞌox ucꞌupesiaj tunorox ubꞌan xeꞌ jax niwermanuox.
EPH 6:24 Que utacarsiaj e Dios axin aquetpa taca tunor tin e war uyajta ut Cawinquirar Jesucristo taca inteꞌ cꞌunersiaj xeꞌ machi tuaꞌ acꞌapa. Tara acꞌapa tunor niwojroner, che e Pablo.
PHI 1:1 Pues nen xeꞌ Pabloen taca e Timoteo xeꞌ manon tuaꞌ e Cristo Jesús war catzꞌijbꞌa e carta era tibꞌa xeꞌ ajcꞌupesiajox tama e Cristo Jesús xeꞌ turox tama e chinam Filipos. Y war catzꞌijbꞌa e carta era ubꞌan tama tin e aquetpobꞌ líder tama upatnar e Dios axin y tama tin e ajtacarsiajobꞌ.
PHI 1:2 Chꞌamic tunorox utacarsiaj y ujiriar Catata Dios y tuaꞌ Cawinquirar Jesucristo ubꞌan.
PHI 1:3 Pues iraj iraj conda incꞌajpesox inxin intattzꞌi e Dios tamarox.
PHI 1:4 Y conda incꞌajti taca e Dios tamarox war intzay inche
PHI 1:5 porque cay itacren tama upatnar e Cristo tama e día conda cay cꞌupseyanox tama Cawinquirar Jesucristo, y esto coner war ixpatna tuaꞌ ichecsu uyojroner e Dios tut e gente axin.
PHI 1:6 Y innata ixto que Cadiosir xeꞌ cay uyustes tunor icuxtar conda cay cꞌupseyanox tamar, machi tuaꞌ uyacta uche tunor era este que asutpa watar e Cristo Jesús otronyajr.
PHI 1:7 Pues bueno tuaꞌ imbꞌijnu tamarox cocha era porque inyajta iut inteꞌ intiox. Y nox war ichꞌami utacarsiaj e Dios bꞌan cocha war inchꞌami nen motor que nen macaren tara tama e cárcel tama e chinam Roma. Pero nen motor que turen macuir e cárcel war inchecsu e ojroner tama e corpesiaj tut tunor tin e achecta taniut, y war inwareobꞌ que majax majresiaj uyojroner e Dios sino que erach tunor.
PHI 1:8 Pues Nidiosir jax Niwajchecsuyaj que nen war incꞌaniox meyra taca inteꞌ cꞌunersiaj bꞌan cocha ayan tuaꞌ e Cristo Jesús.
PHI 1:9 Pues lo que war incꞌajti taca e Dios tamarox jax era: Que nox tuaꞌ iyajta ut ibꞌa más, y que tuaꞌ inata más tama Cadiosir, y que tuaꞌ ixcꞌotoy inata lo que war che tunor uyojroner e Dios.
PHI 1:10 Y war incꞌajti taca e Dios tamarox tuaꞌ ibꞌijnu tin tuaꞌ isajca xeꞌ más bueno tuaꞌ aquetpa imbꞌutz tunor icuxtar, y war incꞌajti taca e Dios que machi tuaꞌ atajwina nien imbꞌijc e mabꞌambꞌanir tama icuxtar conda asutpa watar e Cristo.
PHI 1:11 Y jay bꞌan anumuy tamarox cꞌani achecta meyra iyutir xeꞌ erach tama icuxtar taca utacarsiaj e Jesucristo. Y conda bꞌan anumuy cꞌani achecta meyra tawarer y meyra tattzꞌarsiaj tama Cadiosir.
PHI 1:12 Pues entonces niwermanuox, quisinic inata que war acꞌampa meyra tunor lo que war innumse nibꞌa era tama e cárcel tuaꞌ achecsuna más e ojroner tama e corpesiaj.
PHI 1:13 Y tamar era cꞌotoy unatobꞌ tunor e sian soldadobꞌ tama e palacio era y tunor e inmojr gente que nen turen tara tama e cárcel umen taca que war inchecsu uyojroner e Dios tama e Cristo tut e gente.
PHI 1:14 Y umen que turen tara tama e cárcel meyra ajcꞌupesiajobꞌ xeꞌ turobꞌ tama e chinam era cay cꞌupseyanobꞌ más tama Cawinquirar y tamar era cay uchoquiobꞌ e bꞌajcꞌut tuaꞌ axin uchecsuobꞌ más uyojroner e Dios tut e gente axin.
PHI 1:15 Y chequer que ayan ubꞌan tin e war uchecsuobꞌ e ojroner tama e Cristo taca e cꞌuxnaqꞌuir tama uyalmobꞌ o tuaꞌ erer uxere e ajcꞌupesiajobꞌ axin. Pero war uchiobꞌ cocha era tuaꞌ taca eꞌrnobꞌ umen e gente que jaxirobꞌ más ani ayan ucꞌampibꞌirobꞌ que nen. Pero ayan ubꞌan tin e war uchecsuobꞌ e ojroner tama e Cristo umen taca que cꞌani utacriobꞌ e inmojr tuaꞌ acꞌotoy acꞌupseyanobꞌ tama e Cristo.
PHI 1:16 Jaxirobꞌ war uchecsuobꞌ e ojroner era umen que war uyajtobꞌ niut y umen que war unatobꞌ que nen turix tuaꞌ inware tunor tin e acꞌotoyobꞌ taniut tara tiaꞌ turen tama e cárcel que e ojroner tama e Jesucristo majax majresiaj sino que erach tunor.
PHI 1:17 Pero tin e uchecsuobꞌ e ojroner tama e Cristo tuaꞌ taca aꞌrenobꞌ ani que jaxirobꞌ más nuxi winicobꞌ, machi war ubꞌijnuobꞌ tama uyalmobꞌ tuaꞌ uchiobꞌ tunor lo que ucꞌani e Dios. Jaxirobꞌ intaca war ubꞌijnuobꞌ tuaꞌ uchienobꞌ innumse nibꞌa más nojta tiaꞌ turen tara tama e cárcel.
PHI 1:18 ¿Pero tucꞌa cawaric tama tunor era? Pues nen inware que motor que ayan tin e war uchecsuobꞌ e ojroner tama e Cristo tuaꞌ atajttzꞌa ucꞌabꞌa e Dios, y motor que ayan tin e war uchiobꞌ tunor era tuaꞌ taca atajttzꞌobꞌ, pero nen inware que bueno que war achecsuna e ojroner tama e Cristo tut e gente axin, y tamar era war intzay.
PHI 1:19 Y war intzay ubꞌan umen que nen innata que cꞌani inlocꞌoy tama e cárcel umen que nox war icꞌajti taca e Dios tuaꞌ intacarna umener, y umen que ayan Unawalir e Jesucristo xeꞌ war utacren ubꞌan.
PHI 1:20 Y nen era lo que war imbꞌijnu tuaꞌ inche y lo que war incojco tuaꞌ inwira anumuy jax era: Que ma tiaꞌ tuaꞌ insubꞌajra onjron tamar Cawinquirar sino que cꞌani inqꞌuecꞌo tama niwalma tuaꞌ intattzꞌi ucꞌabꞌa e Cristo iraj iraj, motor que turen tara tor e rum o motor jay inchamay y inxin tut e qꞌuin.
PHI 1:21 Porque coner cocha turento tara tor e rum, turen tuaꞌ taca inche lo que ucꞌani e Cristo. Pero jay inxin inchamay, pues taniut nen más ani bueno, porque tamar era nen tuaꞌ inxin inquetpa taca Niwinquirar.
PHI 1:22 Pero jay inquetpato bꞌixir tara tor e rum, pues bꞌixiren tuaꞌ inche tunor upatnar Cawinquirar. Pero tamar era machi innata tin xeꞌ más imbꞌutz taniut tuaꞌ insicbꞌa.
PHI 1:23 Pues intran taniut tunor e bꞌijnusiaj era y machi innata tin xeꞌ más imbꞌutz. Ayan inteꞌ nibꞌijnusiaj que quisinic ani inchamay tuaꞌ inxin inturuan taca e Cristo tichan tut e qꞌuin, porque taniut nen más ani bueno tuaꞌ inxin tut jaxir rajxa era.
PHI 1:24 Pero ayan otronteꞌ nibꞌijnusiaj que tiut nox más ani bueno tuaꞌ inquetpato tara tor e rum porque tamar era uyubꞌien intacriox.
PHI 1:25 Pues chequer taniut era que nen ucꞌanto tuaꞌ inquetpa tara tor e rum tuaꞌ intacriox ixqꞌuecꞌo tamar icꞌupesiaj tama Cawinquirar Jesucristo y tuaꞌ intacriox ixtzay iraj iraj tama icꞌupesiaj era ubꞌan.
PHI 1:26 Y tamar era conda incꞌotoy tiut ixixin itattzꞌi ucꞌabꞌa e Cristo Jesús umen que e Dios uyebꞌta tarien otronyajr tuaꞌ intacriox.
PHI 1:27 Entonces turbꞌanic ibꞌa tuaꞌ iche tunor lo que ucꞌani tuaꞌ ixquetpa tawar tamar uyojroner e Cristo. Y tamar era jay uyubꞌien incꞌotoy o jay machi uyubꞌien incꞌotoy cꞌani umbꞌi tic taca tiaꞌ turen que nox war ixqꞌuecꞌo ixxana tama ubꞌir e Dios. Y turbꞌanic ibꞌa tuaꞌ ixquetpa intera ibꞌijnusiaj tunorox tuaꞌ ichecsu que erach e cꞌupesiaj tama e corpesiaj lo que ayan tama e Cristo.
PHI 1:28 Y ira iwacta ibꞌa tuaꞌ ixbꞌacta tut tin e war aqꞌuijna uwirobꞌ e ojroner tama e corpesiaj, porque conda machi ixbꞌacta tutobꞌ aquetpa chequer tutobꞌ que jaxirobꞌ cꞌani asatpobꞌ y que nox war ixcorpesna umen e Dios.
PHI 1:29 Y tamar era ajcꞌunox tama e Cristo tuaꞌ ixcꞌupseyan tamar, pero majax jax taca era sino que ucꞌani tuaꞌ inumse ibꞌa upater ubꞌan umen que war ixxana tama ubꞌir e Cristo.
PHI 1:30 Y nox ubꞌan war inumse ibꞌa upater e Cristo. Y bꞌan cocha cay innumse nibꞌa conda turen ani tacarox y bꞌan war iyubꞌi que warto innumse nibꞌa coner tiaꞌ turen.
PHI 2:1 Pues cꞌani umbꞌi tibꞌa cora ojroner era: ¿Utzayjres ca iwalma e Cristo? ¿Ucꞌunles ca iwalma e Cristo umen que uyajta iut? ¿War ca inata que turu Unawalir e Dios tama iwalma nox? ¿Ixtzay ca iwira e inmojr ajcꞌupesiajobꞌ? ¿Incꞌun ca iwalma conda iwira e inmojr?
PHI 2:2 Y jay bꞌan turox cocha era entonces turbꞌanic ibꞌa tuaꞌ ixxana taca e inmojr taca inteꞌ taca ibꞌijnusiaj. Y yajtanic ut ibꞌa tamar ucꞌunersiaj e Dios. Y turbꞌanic ibꞌa tuaꞌ aquetpa intera taca iyuseriaj lo que ayan tama iwalma. Y turbꞌanic ibꞌa tuaꞌ ibꞌijnu iche bꞌan cocha ucꞌani e inmojr ajcꞌupesiajobꞌ. Pues jay ixixin iche cocha era cꞌani ixto abꞌutcꞌa niwalma taca e tzayer.
PHI 2:3 Y ma erer iche ibꞌa que tunor ucꞌani tuaꞌ aquetpa bꞌan taca cocha icꞌani nox. Y ira iche ibꞌa que más ayan icꞌampibꞌir nox que lo que ayan. Y manxujresic ibꞌa tut e inmojr, y chojbꞌesic ut e inmojr tamar lo que war uchiobꞌ jaxirobꞌ.
PHI 2:4 Ira ibꞌijnu tamar taca lo que war iche nox, sino que chꞌujcunic iwira tucꞌa war uchiobꞌ e inmojr ubꞌan tuaꞌ uyubꞌiox itacriobꞌ.
PHI 2:5 Y turbꞌanic ibꞌa tuaꞌ ibꞌijnu tamar ibꞌa bꞌan cocha ubꞌijnu tamar ubꞌa e Cristo Jesús.
PHI 2:6 Porque jaxir Dios, y turu bꞌan taca cocha Catata Dios, pero machi ubꞌijnu jay bꞌan taca tuaꞌ aquetpa,
PHI 2:7 sino que uyacta tunor lo que ayan xeꞌ tuach tiaꞌ turu tichan tuyejtzꞌer Catata Dios tuaꞌ watar tara tor e rum tuaꞌ acuxpa bꞌan cocha inteꞌ winic y tuaꞌ aquetpa cocha inteꞌ man.
PHI 2:8 Y tamar era cocha quetpa bꞌan cocha inteꞌ winic ixin umanxujres ubꞌa tuaꞌ acꞌupseyan tut Catata Dios, y ixin chamay tut inteꞌ cruz xeꞌ jax inteꞌ chamer xeꞌ subꞌar uwirnar.
PHI 2:9 Y entonces umen que jaxir cꞌapa cꞌupseyan tut e Dios este que ixin chamay, e Dios ixin utꞌabꞌse ut tuaꞌ aquetpa tujor tunor lo que ayan. Y e Dios ixin uyajcꞌu ucꞌabꞌa xeꞌ tuaꞌ atajttzꞌa más meyra que tunor e inmojr.
PHI 2:10 Y tamar era conda axin aꞌrobꞌna ucꞌabꞌa e Jesús tunor e gente xeꞌ ayan cꞌani acotuanobꞌ tut jaxir. Bꞌan tuaꞌ uchiobꞌ tunor tin e turobꞌ tut e qꞌuin y tunor tin e turobꞌ tor e rum y tunor tin e turobꞌ yebꞌar or e rum.
PHI 2:11 Y tunorobꞌ axin utattzꞌiobꞌ ucꞌabꞌa Catata Dios y tacar uyejobꞌach cꞌani uchecsuobꞌ que: “E Jesucristo jax Cawinquirar.”
PHI 2:12 Entonces niwermanuox xeꞌ inchoj iut nimener, bꞌan cocha cay obꞌianox tamar lo que cay inwareox conda turen ani tiut, ubꞌianenic era ubꞌan motor que najtir turen tiut coner. Y tamar era cꞌani inwareox que turbꞌanic ibꞌa tuaꞌ aquetpa chequer que ayan icorpesiaj tuaꞌ uyubꞌiox ixcꞌotoy tut e qꞌuin. Chenic tunor era taca inteꞌ manxurer tama iwalma porque majax aras tunor era.
PHI 2:13 Porque Cadiosir war apatna tama iwalma tuaꞌ utacriox iyusre lo que ucꞌani jaxir y tuaꞌ utacriox iche lo que ucꞌani jaxir ubꞌan.
PHI 2:14 Y tama tunor lo que cache machix ojronicon upater e gente axin y machix qꞌuecranicon upater e gente ubꞌan.
PHI 2:15 Y caturbꞌic cabꞌa tuaꞌ machi eꞌrna nien imbꞌijc e mabꞌambꞌanir tamaron sino que ucꞌani tuaꞌ aquetpa chequer que erach cawirnar, y tamar era cꞌani anatanwa umen e gente tara tor e rum xeꞌ ajmabꞌambꞌanirobꞌ que umaxtacon e Dios motor jay jaxirobꞌ war axin uchiobꞌ tunor lo que ubꞌijnu uchiobꞌ. Y tamar cacꞌupesiaj tama e Cristo cꞌampacon bꞌan cocha e janchꞌaquenar tut e gente xeꞌ turobꞌ tara tor e rum bꞌan cocha inteꞌ lucero xeꞌ galan ejpray tut e qꞌuin.
PHI 2:16 Y ira ixcꞌoyi ichecsu e ojroner tama e cuxtar xeꞌ machi tuaꞌ acꞌapa tut e gente axin. Y tamar era conda watar e día conda asutpa watar e Cristo otronyajr tuaꞌ uqꞌuechion caxin nen cꞌani intzay meyra umen que cꞌampa nipatnar tijam y que galan locꞌoy y que machi patnen bꞌan taca.
PHI 2:17 Y nox cꞌapa iwajcꞌu ibꞌa tut e Dios bꞌan cocha inteꞌ ofrenda y war inumse ibꞌa umen que war ixcꞌupseyan tama e Jesucristo. Y war ixtzay iche tunor era. Y nen ubꞌan war intzay inche lo que ucꞌani e Dios motor que ucꞌani ani tuaꞌ inchamesna umen que war inchecsu axin e ojroner tama e corpesiaj.
PHI 2:18 Y tamar era tzayjresic ibꞌa tacaren watar lo que watar y chꞌamic nitzayer ubꞌan.
PHI 2:19 Pues jay bꞌan ucꞌani Cawinquirar Jesús war imbꞌijnu tuaꞌ inwebꞌta axin e Timoteo tuaꞌ uwarajsiox. Y tamar era conda incꞌotoy umbꞌi que bueno turox, cꞌani intzay.
PHI 2:20 Pues mamajchi más war ubꞌijnu tamarox cocha war ubꞌijnu e Timoteo porque jaxir war uyusre tama uyalma tuaꞌ utacriox bꞌan cocha war unsre nen.
PHI 2:21 Pues e inmojr ajcꞌupesiajobꞌ tara war ubꞌijnuobꞌ tamar taca lo que cꞌani uchiobꞌ jaxirobꞌ y machi war ubꞌijnuobꞌ tucꞌa ucꞌani e Jesucristo.
PHI 2:22 Pero nox war inata que nojta ucꞌampibꞌir e Timoteo tama e checsuyaj tama e corpesiaj. Pues bꞌan cocha atacarna inteꞌ tatabꞌir umen inteꞌ uyunen, y bꞌan utacren e Timoteo conda quetpa tuaꞌ inxin inchecsu uyojroner e Dios.
PHI 2:23 Pero cocha nen tara turen tama e cárcel machito innata tucꞌa tuaꞌ anumuy tacaren, pero conda ayan lo que innata cꞌani inwebꞌta axin e Timoteo tuaꞌ uyareox.
PHI 2:24 Pues nen war incꞌupseyan tama Cawinquirar que jaxir tuaꞌ utacren inlocꞌoy tama e cárcel era, y que tamar era erer inyopa inwarajsiox nen ubꞌan.
PHI 2:25 Y war imbꞌijnu que ucꞌani tuaꞌ inwebꞌta axin niwermano Epafrodito tiut ubꞌan. Jaxir jax inteꞌ niwet ajpatnarir tama e patnar era y jaxir jax inteꞌ niwet soldadoir tama e Cristo ubꞌan. Pues jax nox xeꞌ iwebꞌta tari e Epafrodito taniut tuaꞌ utacren ipater tama tunor lo que quetpa tuaꞌ inche nen tara.
PHI 2:26 Pues jaxir war uyusre tuaꞌ acꞌotoy uwirox otronyajr era, pero cay ubꞌijnu cora conda cꞌotoy unata que nox war inata que ajmuac jaxir.
PHI 2:27 Y jaxir ajmuac ani tarix e día y erpa meyra esto que cꞌanix ani achamay. Pero intattzꞌi ucꞌabꞌa e Dios xeꞌ incꞌun uwirnar tut jaxir y taniut nen ubꞌan que tzꞌacpa ixto y que machi chamay. Porque jay bꞌan ani numuy, más ani tzajtaca ut niwirnar nen.
PHI 2:28 Y tamar era más war unsre tuaꞌ inwebꞌta axin e Epafrodito tuaꞌ uwarajsiox porque innata que conda ixcꞌotoy iwira ut otronyajr cꞌani ixtzay meyra, y tamar era nen machi tuaꞌ insutpa imbꞌijnu más tamar ubꞌan.
PHI 2:29 Entonces chꞌamic e Epafrodito taca e tzayer, porque jaxir jax inteꞌ iwermano tama Cawinquirar. Y chojresic ut tunor e inmojr xeꞌ war apatnobꞌ tama upatnar Cawinquirar bꞌan cocha war uche jaxir.
PHI 2:30 Porque jaxir conda cay uche upatnar e Cristo machi uyacta motor que cay muacran este que tuix achamay ani tuaꞌ uche lo que iche ani nox jay turox ani tacaren tara.
PHI 3:1 Pues entonces niwermanuox, tzayjresic ibꞌa tama Cawinquirar. Pues era cꞌani inwareox que machi incꞌoy intzꞌijbꞌa lo que inwareoxix conda turen ani tacarox, porque bueno tuaꞌ asutpa iyubꞌi tunor era otronyajr.
PHI 3:2 Y iwiric ibꞌa tut e winicobꞌ xeꞌ cꞌani ucucruox tacar uyojroner que ucꞌani tuaꞌ ixuri imbꞌijc uqꞌuewerir itejromar tuaꞌ ixquetpa erach taca e Dios. Pero e winicobꞌ era mabꞌambꞌan uwirnarobꞌ. Y jaxirobꞌ imbꞌacꞌajr uwirnarobꞌ bꞌan cocha incojt tzꞌiꞌ.
PHI 3:3 Pues jax non xeꞌ erachon taca e Dios y xeꞌ war catacarna umen Unawalir e Dios tuaꞌ cojytzꞌi ut e Cristo. Y jax non xeꞌ war catꞌabꞌse ucꞌampibꞌir e Cristo Jesús. Y machi war cacꞌupseyan tamar lo que war cache tama cawerir tuaꞌ cacorpesna sino que war cacꞌupseyan tama e Cristo tuaꞌ ucorpeson.
PHI 3:4 Pues ayan e winicobꞌ xeꞌ war ubꞌijnuobꞌ que ayan tucꞌa tamar tuaꞌ ucorpes ubꞌobꞌ umen que ayan lo que cꞌapa uchiobꞌ. Jay bꞌan ubꞌijnuobꞌ e winicobꞌ era, nen más ayan lo que cꞌapa inche tuaꞌ incorpes ani nibꞌa tama e tiempo conda merato incꞌupseyan tama e Jesucristo.
PHI 3:5 Pues nen conda incojco ocho día qꞌuechbꞌiren ixien tuaꞌ axujra imbꞌijc uqꞌuewerir nitejromar bꞌan cocha quetpa tuaꞌ achempa tama uley e Moisés. Y nen cuxpen tuaꞌ e gente tuaꞌ e Israel. Y nitata viejobꞌir ixnix e tiempo jax e Benjamín. Y hebreoen, y cuxpen macuir tunor e canseyaj hebreo. Nituꞌ y nitata tuobꞌ e Israel ubꞌan. Y nen inturbꞌa nibꞌa nojta tama tunor uley e Moisés y tamar era quetpen miembro tama inteꞌ grupo religioso xeꞌ ucꞌabꞌa fariseo.
PHI 3:6 Y nen meyra canoen tama tunor e canseyaj lo que ayan tama uley e Moisés este que cay inche unumse ubꞌobꞌ tin e war acꞌupseyanobꞌ tama e Jesucristo. Y nen tama e tiempo yajaꞌ, cocha cay inturbꞌa nibꞌa meyra tuaꞌ umbꞌian tut uley e Moisés, quetpen erach tut e ley era.
PHI 3:7 Y tunor era galan ani uwirnar taniut tama e tiempo yajaꞌ, pero cocha nen coner cꞌapa inchꞌami ucꞌabꞌa Cawinquirar Jesucristo chequer taniut que matucꞌa ucꞌampibꞌir inyajrer. Y tamar era cꞌapa inchoqui tunor era tuaꞌ uyubꞌien inxana taca Nicristo.
PHI 3:8 Pues tunor era lo que cay inche ixnix war imbꞌijnu coner que matucꞌa ucꞌampibꞌir inyajrer, porque lo que ayan tama Niwinquirar Jesucristo más meyra ayan ucꞌampibꞌir, y tamar era cꞌapa inchoqui tunor lo que cay inche ixnix tuaꞌ uyubꞌien incꞌotoy innata chi e Cristo Jesús xeꞌ jax Niwinquirar. Porque taniut nen coner sojc tunor lo que cay inche, pero galan tuaꞌ innata más y más tamar e Cristo.
PHI 3:9 Y lo que incꞌani nen jax era: Que aquetpa intera nibꞌijnusiaj taca e Dios, y que niwirnar tuaꞌ eꞌrna umen e Dios que erach. Pero erach niwirnar tut, majax umen que war incꞌupseyan ani tut tunor lo que chꞌar tzꞌijbꞌabꞌir tama uley e Moisés, sino que erach niwirnar tut e Dios umen que war incꞌupseyan tama e Cristo. Porque inteꞌ aquetpa erach taca e Dios umen taca que acꞌotoy acꞌupseyan tama e Jesucristo.
PHI 3:10 Nen inwactix tunor lo que ayan ani tama nicuxtar umen que nen war unsre tuaꞌ inquetpa bꞌan cocha e Cristo. Y nen cꞌani incꞌupseyan tama ucꞌotorer e Dios tuaꞌ axin utacren tama nicuxtar iraj iraj. E cꞌotorer era jax lo que cꞌampesna umen e Dios conda ixin usuti ubꞌixqꞌues e Cristo tujam e chamenobꞌ. Y cꞌani incani tuaꞌ inquetpa bꞌan cocha e Cristo xeꞌ uturbꞌa ubꞌa tuaꞌ uche tunor lo que ucꞌani e Dios motor que war unumse ubꞌa. Y nen era war unsre tuaꞌ incani inquetpa bꞌan cocha e Cristo, motor que watar e día conda bꞌajcꞌat aquetpa tuaꞌ inchamesna upater.
PHI 3:11 Pues bꞌan cocha sujta bꞌixqꞌuesna e Cristo tujam e chamenobꞌ, y bꞌan war unsre nen ubꞌan tuaꞌ incꞌotoy insujta imbꞌixqꞌuesna tujam e chamenobꞌ.
PHI 3:12 Pues machi war inwareox que nen cꞌapix quetpen bꞌan cocha e Cristo Jesús, y nien machi war inwareox que quetpix erach tunor niwirnar. Nen era war inwareox que war inturbꞌa nibꞌa tama e Cristo Jesús tuaꞌ inxin inqꞌuecꞌo tama niwalma tuaꞌ incꞌotoy inquetpa bꞌan cocha cay ubꞌijnu Cadiosir que nen conda ucorpesen.
PHI 3:13 Niwermanuox, machi war inwareox que cꞌapix quetpen bꞌan cocha e Jesucristo. Pero lo que cꞌani inwareox jax era: Que nen war innajpes lo que quetpa tanipat y war ixto inturbꞌa nibꞌa tuaꞌ inxin anjni tama ubꞌir e Dios tuaꞌ inchꞌami tunor lo que uyubꞌien tuaꞌ e Dios.
PHI 3:14 Pues cacuxtar tara tor e rum bꞌan cocha inteꞌ ajner. Y tamar era war inturbꞌa nibꞌa tama e ajner era tuaꞌ inxin incꞌotoy tut e qꞌuin tuaꞌ uyubꞌien inchꞌami tunor lo que ustabꞌir umen e Dios tuaꞌ uyajqꞌuen. Bꞌan ubꞌijnu e Dios tuaꞌ uyajcꞌon conda cay upejcon tuaꞌ cacꞌupseyan tama e Jesucristo y bꞌan ubꞌijnu tuaꞌ uyajcꞌon umen que war aquetpa intera cabꞌijnusiaj taca e Cristo Jesús coner.
PHI 3:15 Y bꞌan ucꞌani tuaꞌ cabꞌijnu tunoron xeꞌ caqꞌuecꞌo tama cawalma tama cacꞌupesiaj tama Cawinquirar Jesucristo ubꞌan. Jay nox intiach ibꞌijnusiaj tamar lo que war cojron era, Cadiosir tuaꞌ axin uwirsiox lo que erach tama tunor era.
PHI 3:16 Pero non cocha catajwix cocha tuaꞌ caxana tama ubꞌir e Dios machi tuaꞌ caxin cawacta, sino que ajnicon tama ubꞌir Cawinquirar taca tunor cawalma.
PHI 3:17 Pues entonces niwermanuox, chenic nox bꞌan cocha iwira inche nen, y chꞌujcunic iwira chi xeꞌ war uche bꞌan cocha nen tijam nox, porque jaxir erer aquetpa inteꞌ chequerir tamar cocha ucꞌani tuaꞌ ixquetpa ubꞌan.
PHI 3:18 Pues war inwareox tunor era porque ayan meyra tin e war aqꞌuijnobꞌ conda uyubꞌiobꞌ e ojroner tama e Cristo Jesús. Bꞌan cay inwareox ixnix y cꞌani insutpa inwareox otronyajr era que ayan tin e bꞌan war uchiobꞌ. Y era war unqꞌui inwareox que ayan tin e war aqꞌuijnobꞌ uwirobꞌ ut e Cristo Jesús ubꞌan.
PHI 3:19 Pero tunor e winicobꞌ era ucꞌani tuaꞌ asatpobꞌ. Pues jaxirobꞌ ayan inteꞌ udiosobꞌ que jax taca lo que uyusreobꞌ tama uwerirobꞌ. Y jaxirobꞌ atzay uchiobꞌ lo que subꞌar uwirnar. Y ubꞌijnuobꞌ tamar taca lo que ayan tara tor e rum.
PHI 3:20 Pero non ayan cachinam tichan tut e qꞌuin tiaꞌ axin watar Cawajcorpesiaj xeꞌ jax Cawinquirar Jesucristo.
PHI 3:21 Y Cawinquirar Jesucristo ayan ucꞌotorer tuaꞌ uyubꞌi ucucru tunor lo que ayan, y tamar ucꞌotorer era jaxir tuaꞌ axin uche asutpa intiach tunor cacuerpo xeꞌ tzajtaca utobꞌ tuaꞌ aquetpobꞌ bꞌan cocha ucuerpo jaxir xeꞌ ayan meyra utawarer.
PHI 4:1 Pues entonces niwermanuox xeꞌ inchoj iut nimener, cꞌani inwareox era que quisinic inxin inwirox y que intzay conda imbꞌijnu tamarox cocha nox larox cocha inteꞌ nuxi tuanibꞌir tanibꞌa. Y tamar era cꞌani inwareox que qꞌuecꞌojsenic ibꞌa tuaꞌ ixwawan tama Cawinquirar porque nen war inyajta iut tunorox.
PHI 4:2 Pero era cꞌani incꞌajti taca e hermana Evodia y taca e hermana Síntique xeꞌ war aqꞌuijna uwira ubꞌobꞌ tuaꞌ uyustes ubꞌobꞌ y tuaꞌ aquetpobꞌ intera ubꞌijnusiajobꞌ cocha jaxirobꞌ umaxtacobꞌ e Dios tama Cawinquirar.
PHI 4:3 Y net, hermano Epafrodito xeꞌ cay atacren meyra tama upatnar Cawinquirar, cꞌani inwaret tuaꞌ atacre e ixictac era tuaꞌ uyustes ubꞌobꞌ y tuaꞌ acꞌotoy aquetpa intera ubꞌijnusiajobꞌ. Porque jaxirobꞌ cay utacrenobꞌ meyra conda war inchecsu axin uyojroner e Dios tama e corpesiaj. Y ya turobꞌ ubꞌan e hermano Clemente taca e inmojr xeꞌ cay patnobꞌ tacaren. Pues ucꞌabꞌobꞌ e hermanuobꞌ era chꞌarix tzꞌijbꞌabꞌir tama e jun tuaꞌ e cuxtar xeꞌ machi tuaꞌ cꞌapa lo que ayan taca e Dios tichan tut e qꞌuin.
PHI 4:4 Tzayjresic ibꞌa tama Cawinquirar iraj iraj. Cꞌani inwareox otronyajr que tzayjresic ibꞌa.
PHI 4:5 Y chectesic ibꞌa tut e gente axin tuaꞌ unatobꞌ que nox incꞌun iwirnar, porque majax innajt war Cawinquirar ticoit non.
PHI 4:6 Y ira ixmerecna tamar lo que war anumuy sino que cꞌajtinic taca e Dios tama tunor. Cꞌajtinic taca e Dios y tattzꞌic ucꞌabꞌa tama tunor utacarsiaj ubꞌan.
PHI 4:7 Y tamar era Cadiosir axin uyajcꞌon ujiriar xeꞌ machi uyubꞌi ubꞌijnu inteꞌ cobꞌa e jiriar era. Y e jiriar era axin ucojco cawalma y tunor cabꞌijnusiaj tama e Cristo Jesús.
PHI 4:8 Pues niwermanuox, ayanto lo que cꞌani inwareox tama ucꞌapesnibꞌir e carta era xeꞌ jax era: Bꞌijnunic tamar lo que erach y tamar lo que tawar tuaꞌ acꞌajna. Bꞌijnunic tamar lo que imbꞌutz uwirnar y tamar lo que matucꞌa e mabꞌambꞌanir tamar. Bꞌijnunic tamar lo que galan uwirnar y tamar lo que matucꞌa e bꞌonemar tamar. Bꞌijnunic tamar lo que imbꞌutz y tamar lo que uwajpi e tattzꞌarsiaj tamar.
PHI 4:9 Y turbꞌanic ibꞌa tuaꞌ iche tunor lo que cay icani tamaren y tunor lo que cay ichꞌami tamaren ubꞌan. Y tunor lo que cay iyubꞌi tamaren y tunor lo que cay iwira inche nen, chenic nox ubꞌan. Chenic tunor era y Cadiosir xeꞌ uyajcꞌon e jiriar axin aquetpa tacarox.
PHI 4:10 Pues entonces niwermanuox, intattzꞌi ucꞌabꞌa Niwinquirar que nox cay ibꞌijnu tamaren otronyajr era. Machi war inwareox que nox inajpesenix, sino que cꞌani inwareox que chꞌajbꞌex que war itacren era motor que ayan ani conda machi uyubꞌiox itacren.
PHI 4:11 Y war inwareox tunor era majax tuaꞌ inchecsu nibꞌa tiut que nen matucꞌa ayanen o que ucꞌani tuaꞌ iwebꞌta ani watar más e tacarsiaj, porque nen canoen tuaꞌ intzayjres nibꞌa tamar lo que ayan tacaren jay ayan meyra lo que ucꞌani o jay matucꞌa ayan tacaren.
PHI 4:12 Pues nen innata cocha unumse ubꞌa inteꞌ conda matucꞌa ayan tacar, y innata ubꞌan cocha aturuan inteꞌ conda ayan tunor lo que ucꞌani. Pues canoen cocha tuaꞌ intzayjres nibꞌa watar lo que watar, motor jay bꞌutꞌur ninac o jay war aintzꞌa, y motor jay machi acꞌapa incꞌuxi lo que ayan o jay acꞌapa tunor, nen war intzay iraj iraj.
PHI 4:13 Pues tacar utacarsiaj e Cristo uyubꞌien inche tunor lo que ucꞌani tuaꞌ inche.
PHI 4:14 Pero bueno iche conda iwebꞌta tari e tacarsiaj era y tamar era erer intacre nibꞌa tuaꞌ machi innumse nibꞌa más.
PHI 4:15 Pues nox xeꞌ turox tama e chinam Filipos war inata que tama e tiempo ixnix conda cay ichꞌami uyojroner e Dios que ajtaca nox xeꞌ cay ibꞌijnu tuaꞌ itacren tama nixambꞌar, porque conda locꞌoyen tama e departamento Macedonia mamajchi más tujam e sian grupo ajcꞌupesiajobꞌ cay ubꞌijnuobꞌ tuaꞌ utacrenobꞌ taca inteꞌ ofrenda sino que ajtaca nox umen que war ichecsu que war ixtzay tamar e tacarsiaj lo que cay ichꞌami tamaren.
PHI 4:16 Y otronyajrto conda turen tama e chinam Tesalónica ayan ani conda cay iwebꞌta ixin cora ofrenda tuaꞌ itacren tamar lo que incꞌani.
PHI 4:17 Pues machi war unsre tuaꞌ intaca inchꞌami tibꞌa, sino que lo que incꞌani que anichiri lo que war ipaqꞌui bꞌajxan tuaꞌ asutpa ichꞌami uyutir otronyajr, y bꞌan tama e ofrenda xeꞌ war iwajqꞌuen porque Cadiosir tuaꞌ axin usuti más nojta otronyajr.
PHI 4:18 Pues e Epafrodito cꞌapa uyajqꞌuen tunor e ofrenda lo que iwebꞌta tari tacar, y tamar era cꞌapa intoyi tunor y ayanto xeꞌ aquetpa ubꞌan. Pues iwofrenda era quetpa bꞌan cocha uyujtznar ubꞌutzꞌar e ujtzꞌubꞌ conda atꞌabꞌay axin tut e qꞌuin, y iwofrenda era quetpa bꞌan cocha lo que isati tuaꞌ taca itzayjres e Dios, y tamar era atzay e Dios uwira iwofrenda era. Chꞌajbꞌex tibꞌa tama tunor era.
PHI 4:19 Pues Cadiosir axin uyajcꞌox tunor lo que ucꞌaniox umen que tuox e Cristo Jesús. Porque Cadiosir meyra ayan lo que ayan tuaꞌ xeꞌ meyra ayan utawarer tama e Cristo Jesús.
PHI 4:20 Intattzꞌi ucꞌabꞌa Cadiosir iraj iraj xeꞌ jax Catata Dios xeꞌ turu tut e qꞌuin. Amén.
PHI 4:21 Pues cꞌani inwebꞌta axin e cꞌajpesiaj tut tunor xeꞌ tuobꞌ uchinam e Dios tama ucꞌabꞌa e Cristo Jesús. Y e ajcꞌupesiajobꞌ xeꞌ turobꞌ tara tacaren cꞌani uyebꞌta axin e cꞌajpesiaj tibꞌa ubꞌan.
PHI 4:22 Y tin e tuobꞌ uchinam e Dios xeꞌ turobꞌ tara war uyebꞌtobꞌ e cꞌajpesiaj ubꞌan. Y tin e tuobꞌ uchinam e Dios xeꞌ aturuanobꞌ tama uyotot e emperador romano war uyebꞌtobꞌ e cꞌajpesiaj tibꞌa ubꞌan.
PHI 4:23 Utacarsiaj Cawinquirar Jesucristo turic tacarox. Tara acꞌapa tunor niwojroner, che e Pablo.
COL 1:1 Nen e Pabloen xeꞌ jax inteꞌ apóstol tuaꞌ Cawinquirar Jesucristo y tamar era nen quetpen tuaꞌ inwareox lo que ucꞌani e Dios. Y bꞌan quetpen umen que sicbꞌabꞌiren umen e Dios tuaꞌ inxin inche tunor lo que ucꞌani jaxir. Pues nen era taca e Timoteo xeꞌ jax inteꞌ cawermano tama Cawinquirar
COL 1:2 war cawebꞌta axin e carta era tibꞌa xeꞌ turox tama e chinam Colosas. Nox jax cawermanuox xeꞌ erach iwirnar tut e Dios y xeꞌ war ixxana imbꞌutz tama ubꞌir Cawinquirar Jesucristo. Pues war cacꞌajti taca Catata Dios y taca Cawinquirar Jesucristo tuaꞌ axin uyajcꞌox meyra utacarsiaj y tuaꞌ axin uyajcꞌox ujiriar ubꞌan.
COL 1:3 Pues conda war cacꞌajti taca e Dios xeꞌ jax Utata Cawinquirar Jesucristo machi war cawacta tuaꞌ catattzꞌi ucꞌabꞌa e Dios tamarox.
COL 1:4 Pues cꞌotoy canata que nox war ixcꞌupseyan tama e Cawinquirar Jesucristo y que war iyajta ut ibꞌa inteꞌ intiox, y que war iyajta ut tunor e inmojr tin e tuobꞌ e Dios ubꞌan.
COL 1:5 Y bꞌan cay iche umen que cay icojco tuaꞌ ichꞌami inteꞌ nuxi tuanibꞌir xeꞌ ustabꞌir umen e Dios xeꞌ tuaꞌ ichꞌami conda ixcꞌotoy tut e qꞌuin. Y cay icojco ichꞌami tunor era conda cay iyubꞌi e ojroner xeꞌ erach tama e corpesiaj.
COL 1:6 Y bꞌan cocha chectesna tunor e ojroner era tiut tama utacarsiaj e Dios, y bꞌan war achectesna tut e gente axin tama tunor or e rum ubꞌan. Y tamar era ayan meyra gente xeꞌ war acay uchiobꞌ lo que erach tut e Dios, y tamar era ayanto meyra gente xeꞌ war acꞌotoy acꞌupseyanobꞌ tama Cawinquirar bꞌan cocha war anumuy tiaꞌ turox desde que cay iyubꞌi uyojroner e Dios y cay inata que ayan ixto utacarsiaj e Dios.
COL 1:7 Y tunor era cꞌotoy inata umen que bꞌan ucansiox cawermano Epafras xeꞌ inchoj ut camener. Jaxir cay patna tacaron tama inyajr y era jaxir jax inteꞌ ajtacarsiaj tuaꞌ Cawinquirar Jesucristo tuaꞌ utacriox nox.
COL 1:8 Y era que jaxir yopa ticoit cay uyareon que meyra war iyajta ut tunor tin e ajcꞌupesiajobꞌ tama Cawinquirar taca utacarsiaj Unawalir e Dios.
COL 1:9 Y desde que cꞌotoyon canata tama icꞌupesiaj tama Cawinquirar Jesucristo machi cawacta tuaꞌ cacꞌajti taca e Dios tamarox. Y war cacꞌajti taca e Dios tuaꞌ ixcꞌotoy inata tunor lo que ucꞌani Cadiosir, y que erer ixcꞌotoy inata icꞌampes unatanyaj e Dios, y que tuaꞌ aquetpa chequer tiut tunor lo que war ucꞌani Unawalir e Dios iraj iraj.
COL 1:10 Y war cacꞌajti taca e Dios cocha era tuaꞌ ixcꞌotoy iche bꞌan cocha ucꞌani tuaꞌ uchiobꞌ tunor tin e tuobꞌ Cawinquirar, y que tamar era erer ixcꞌotoy iche lo que utzayjres ut e Dios. Y war cacꞌajti taca e Dios cocha era tuaꞌ acay iche meyra lo que erach tut jaxir, y que erer ixcꞌotoy inata más y más lo que ucꞌani Cadiosir.
COL 1:11 Y war cacꞌajti taca e Dios tuaꞌ axin uqꞌuecꞌojsiox meyra tacar e nuxi cꞌotorer lo que cay uchecsu tut e gente ixin tuaꞌ uyubꞌiox ixqꞌuecꞌo ixwawan tut tunor lo que watar, y tuaꞌ uyubꞌiox ixquetpa tzꞌustaca motor que war inumse ibꞌa.
COL 1:12 Y war catattzꞌi ucꞌabꞌa Catata Dios umen que jaxir ixin uyusteson tuaꞌ uyubꞌion cachꞌami lo que tꞌabꞌesbꞌir umener xeꞌ quetpa tuaꞌ uxere taca tunoron xeꞌ tuon e Dios conda caxin cacꞌotoy tut e qꞌuin tiaꞌ ayan ujanchꞌaquenar e Dios.
COL 1:13 Porque Cadiosir ixin ulocsion tama uchinam e incsibꞌaner, y tamar era machi ixto tuaꞌ acꞌotori e diablo ticajor non, y Cadiosir ixin uturbꞌon tama uchinam Uyunen xeꞌ yajtanbꞌir ut umener y tamar era jax Uyunen e Dios era xeꞌ tuaꞌ acꞌotori tama cawalma coner.
COL 1:14 Porque tamar uchamer Uyunen era Cadiosir ixin ucorpeson umen que cꞌapa tojya tunor camabꞌambꞌanir umen Uyunen era.
COL 1:15 Pues entonces Uyunen e Dios era jax taca uchequerir ut Catata Dios xeꞌ machi uyubꞌion cawira ut non, y Uyunen e Dios era jax xeꞌ turix bꞌajxan tama tunor lo que ayan, motor lo que ayan tichan tut e qꞌuin o motor lo que ayan tara tor e rum. Jaxir turix bꞌajxan y tamar era jaxir más ayan ucꞌotorer tama tunor.
COL 1:16 Porque tamar Uyunen era chena tunor lo que ayan tichan tut e qꞌuin y tunor lo que ayan tara tor e rum, bꞌan cocha lo que erer cawira ut y bꞌan cocha lo que machi uyubꞌion cawira ut. Y Uyunen e Dios era más nojta ucꞌotorer tama tunor cocha jaxir ixin uche tunor e sian angelobꞌ lo que ayan tut e qꞌuin xeꞌ jax tin e aquetpobꞌ tuaꞌ acꞌotoriobꞌ tama inteꞌ turtar, y jax tin e aquetpobꞌ tuaꞌ awinquiriobꞌ tut e qꞌuin, y jax tin aquetpobꞌ ajcꞌotorerobꞌ, y jax tin e aquetpobꞌ ajcꞌamparobꞌ tut e qꞌuin ubꞌan. Tunor lo que ayan chena umen Uyunen e Dios, y tamar era tunor lo que ayan aquetpa tuaꞌ jaxir ubꞌan.
COL 1:17 Y Uyunen e Dios era xeꞌ jax e Cristo turu conda ne mato achena ani tunor lo que ayan, y jaxir jax xeꞌ war uquete tunor lo que ayan tama ucꞌabꞌ tuaꞌ machi axin atijrpa.
COL 1:18 Y e Cristo era más ayan ucꞌotorer tama tunor lo que ayan cocha jaxir aquetpa tuaꞌ acꞌotori tujor tunor tin e war acꞌupseyanobꞌ tamar jaxir xeꞌ jax e iglesia. Y jaxir jax ucajyesnibꞌir tama tunor era y jax xeꞌ sutpa bꞌixcꞌa tujam e chamenobꞌ bꞌajxan ubꞌan. Bꞌan uche tuaꞌ acꞌotoy aquetpa ajyum inyajrer tama tunor lo que ayan.
COL 1:19 Porque Catata Dios atzay tuaꞌ aturuan tama e Cristo taca tunor ubꞌutꞌurir.
COL 1:20 Y tamar e chꞌichꞌer lo que uwechꞌe e Cristo tama ut e cruz Catata Dios ixin uchoqui tunor uqꞌuijnar lo que ayan ani taca tunor lo que ayan tara tor e rum y taca tunor lo que ayan tut e qꞌuin, y tama e Cristo era Catata Dios ixin cꞌumpa taca tunor lo que ayan.
COL 1:21 Pues entonces conda merato ixcꞌupseyan tama e Cristo quetpox bꞌan cocha inteꞌ ajnajtir gente y war ani ixqꞌuijna iwira ut e Dios porque war ani ibꞌijnu tuaꞌ iche lo que mabꞌambꞌan y war ani iche meyra lo que mabꞌambꞌan ubꞌan. Pero era Cadiosir ixin uchoqui tunor uqꞌuijnar lo que ayan ani tacarox.
COL 1:22 Y bꞌan uche umen que cay unumse ubꞌa meyra Uyunen tama uwerir este que ixin chamay. Y Cadiosir ixin uche cocha era porque war ucꞌani tuaꞌ acꞌumpa tacarox, y tamar era uche tuaꞌ ixquetpa erach y uche tuaꞌ machi aquetpa más e bꞌonemar tamarox y uche tuaꞌ machi aquetpa tucꞌa tamarox tuaꞌ ixarena otronyajr que ayan ani imabꞌambꞌanir.
COL 1:23 Pero tuaꞌ uyubꞌiox ixcꞌotoy ixturuan taca e Dios tichan ma erer iwacta icꞌupesiaj tama e Cristo, y ucꞌani tuaꞌ ixqꞌuecꞌo ixxana tama ubꞌir e Dios, y ma erer ichoqui icojcsiaj tama e ojroner lo que cayox iyubꞌi tama e corpesiaj tama ucajyesnibꞌir tunor era. Y jax uyojroner e Dios tama e corpesiaj era que war achecsuna axin tama tunor or e rum, y jax nen xeꞌ Pablo xeꞌ war inchecsu axin tunor era iraj iraj ubꞌan.
COL 1:24 Pues entonces cꞌani inwareox era que war intzay tamar lo que uyubꞌien innumse nibꞌa tiaꞌ macaren tara tama e cárcel porque war innata que ayan ucꞌampibꞌir tunor era umen que axin utacriox tuaꞌ ixixin ixquetpa más nojta tama icꞌupesiaj nox xeꞌ turox tama e chinam Colosas, porque bꞌan quetpa tuaꞌ inche cocha era tuaꞌ uyubꞌien intacre e iglesia xeꞌ jax ucuerpo e Cristo tara tor e rum.
COL 1:25 Y e Dios uyajqꞌuen tuaꞌ inquetpa inteꞌ ajtacarsiaj tuaꞌ tunor tin e ajcꞌupesiajobꞌ tama e Cristo, y tamar era ucꞌani tuaꞌ intacriox nox ubꞌan xeꞌ turox tama e chinam Colosas. Y lo que quetpa tuaꞌ inche jax era: Nen ucꞌani tuaꞌ inchecsu tiut tunor lo que ayan tama uyojroner e Dios y tunor lo que ayan tamar xeꞌ intran unatanwar ubꞌan.
COL 1:26 Pues jax uyojroner e Dios era xeꞌ quetpa mucresbꞌir umen e Dios tut tunor e gente tama e onian tiempo, pero coner war uchectes tut tunor tin e war acꞌupseyanobꞌ tamar.
COL 1:27 Y Cadiosir ubꞌijnu tuaꞌ uchectes e ojroner era xeꞌ mucur ani umen que e ojroner era uchecsu que tin e majax tuaꞌ e Israel cꞌani achojbꞌesnobꞌ meyra umen e Dios. Y e ojroner xeꞌ quetpa mucur ani jax era: Que war aturuan e Cristo tama iwalma, y tamar era erer ibꞌijnu que conda ixixin tut e qꞌuin e Cristo cꞌani uxere utawarer tacarox.
COL 1:28 Pues entonces tamar era non war cachecsu e ojroner tama e Cristo tut tunor e gente axin. Y war cawareobꞌ que iwiric tama e mabꞌambꞌanir y war cacanseyan taca tunor unatanyaj e Dios. Y bꞌan war cache tuaꞌ aquetpobꞌ erach tunor e gente era tama e Cristo conda aqꞌuejchobꞌ axin tut e Dios watar e día.
COL 1:29 Y tuaꞌ uyubꞌien inxin inche tunor era war inturbꞌa nibꞌa tuaꞌ impatna meyra bꞌan cocha war apatna Cadiosir tamaren taca ucꞌotorer tuaꞌ inchecsu uyojroner axin.
COL 2:1 Y quisinic inata que war inturbꞌa nibꞌa tuaꞌ impatna meyra tuaꞌ intacriox nox xeꞌ ajcꞌupesiajox tama Cawinquirar xeꞌ turox tama e chinam Colosas, y quisinic inata ubꞌan que war inturbꞌa nibꞌa tuaꞌ intacre tunor tin e ajcꞌupesiajobꞌ xeꞌ turobꞌ tama e chinam Laodicea, y war inturbꞌa nibꞌa ubꞌan tuaꞌ intacre e inmojr ajcꞌupesiajobꞌ xeꞌ mato tiaꞌ cꞌotoy uwirenobꞌ.
COL 2:2 Y war impatna meyra cocha era tuaꞌ axin aqꞌuecꞌojsena uyalmobꞌ tunor e ajcꞌupesiajobꞌ era, y que erer acꞌotoy aquetpobꞌ intera umen que war uyajta ut ubꞌobꞌ inteꞌ intiobꞌ, y war impatna meyra cocha era tuaꞌ acꞌotoy unatobꞌ inyajrer tunor e ojroner tama e Cristo xeꞌ quetpa mucur tama e onian tiempo, y que erer acꞌotoy unatobꞌ que meyra ucꞌampibꞌir tunor e ojroner era.
COL 2:3 Porque tamar e Cristo aquetpa tunor e nuxi natanyaj xeꞌ imbꞌutz, y tamar jaxir erer acꞌotoy unata inteꞌ tama uyojroner e Dios xeꞌ quetpa ani mucur tut e gente tara tor e rum.
COL 2:4 Pues war inwareox tunor era tuaꞌ machi ixixin ixmajresna umen tin e acꞌotoy tiut taca inteꞌ ojroner xeꞌ galan uyubꞌnar pero xeꞌ majax tuaꞌ e Cristo.
COL 2:5 Y motor que nen machi turen tacarox yajaꞌ tama e chinam Colosas, pero turen tacarox tama niwalma y war intzay umbꞌi tamarox que intera ibꞌijnusiaj y que war ixqꞌuecꞌo ixxana tama icꞌupesiaj tama e Cristo.
COL 2:6 Pues bꞌan cocha nox cay ichꞌami ucꞌabꞌa Cawinquirar Jesucristo xanicon tacar bꞌan cocha ucꞌani tuaꞌ cache tunoron xeꞌ intera turon tacar.
COL 2:7 Y turbꞌanic ibꞌa tuaꞌ ixwiri más tama e Cristo, y qꞌuecꞌojsenic ibꞌa más tamar, y cꞌupseyanenic más y más tama e canseyaj tama e Cristo bꞌan cocha cansenox umen e hermano Epafras. Y tattzꞌic ucꞌabꞌa e Dios meyra tama tunor era.
COL 2:8 Y iwiric ibꞌa que mamajchi uxujchꞌi icꞌupesiaj tama e Cristo umen que axin ucansiox tama inteꞌ canseyaj que matucꞌa ucꞌampibꞌir bꞌan cocha ubꞌijnuobꞌ e winicobꞌ tara tor e rum, o umen que axin ucansiox e majresiaj tuaꞌ e nuquir winicobꞌ xeꞌ turobꞌ tara tor e rum ixnix e tiempo bꞌan cocha cansebꞌirobꞌ jaxirobꞌ umen e sian mabꞌambꞌan mein xeꞌ turobꞌ tara tor e rum ubꞌan. Pero tunor e canseyaj era majax bꞌan cocha e canseyaj xeꞌ erach lo que ayan tama Cawinquirar Jesucristo.
COL 2:9 Pues ucꞌani tuaꞌ iwira ibꞌa que mamajchi axin uxujchꞌi icꞌupesiaj tama e Cristo porque tamar ucuerpo jaxir aquetpa tunor ubꞌutꞌurir Catata Dios inyajrer.
COL 2:10 Y tamar era ucꞌani tuaꞌ iwira ibꞌa ubꞌan umen que nox cꞌapa ichꞌami e corpesiaj tuaꞌ e Cristo conda quetpox intera tacar tama iwalma y era bꞌutꞌur ixto iwalma tacar jaxir xeꞌ aquetpa tujor tunor tin e ajcꞌotorerobꞌ y xeꞌ aquetpa tujor tunor tin e ajcꞌamparobꞌ motor jay tut e qꞌuin o motor jay tara tor e rum.
COL 2:11 Y nox cocha quetpox intera taca e Cristo quetpox ubꞌan bꞌan cocha jay xurbꞌir ani imbꞌijc uqꞌuewerir itejromar pero tamar taca iwalma y machi war axujra iwerir umen inteꞌ winic tuaꞌ aloqꞌuesna imbꞌijc iwerir, sino que jax taca inteꞌ patnar xeꞌ chena umen e Cristo tama iwalma.
COL 2:12 Y conda chꞌujyox osenox tama e jaꞌ y tamar era quetpox bꞌan cocha jay mucbꞌirox ani taca e Cristo. Y conda loqꞌuesnox otronyajr tujor e jaꞌ quetpox bꞌan cocha jay sujta bꞌixqꞌuesnox ani tujam e chamenobꞌ taca e Cristo, y bꞌan numuy umen que war ixcꞌupseyan tama ucꞌotorer e Dios xeꞌ ixin usuti ubꞌixqꞌues e Cristo tujam e chamenobꞌ.
COL 2:13 Y nox xeꞌ majax tuox e Israel chamenox ani tama iwalma umen que iche e mabꞌambꞌanir y umen que machi cꞌupseyanox tut e Dios, y tamar era arobꞌnox ani umen e mabꞌambꞌanir lo que ayan ani tama iwalma tucꞌa ucꞌani tuaꞌ iche. Pero coner Cadiosir ixin uyajcꞌox e cuxtar xeꞌ machi tuaꞌ acꞌapa taca e Cristo, y ixin cꞌumpa tacaron y unajpes tunor camabꞌambꞌanir.
COL 2:14 Y lo que uche Cadiosir jax era: Ixin usati tunor lo que quetpa tzꞌijbꞌabꞌir tiaꞌ war che que non tujchꞌon ani umen que cꞌapa cacꞌocchi uley e Moisés y tamar era quetpa ani tuaꞌ cachamesna umener. Pero coner quetpa toybꞌir tunor lo que cabꞌeto tamar conda qꞌuejcha ixin chꞌubꞌna tunor e ley era tut e cruz taca e Cristo, y tamar era cꞌapa tijresna tunor e jun tiaꞌ tzꞌijbꞌabꞌir ani que non tujchꞌon.
COL 2:15 Y Cadiosir ixin ulocse ucꞌotorerobꞌ tunor e sian mabꞌambꞌan mein xeꞌ jax ani ajcꞌotorerobꞌ y xeꞌ jax ani ajcꞌamparobꞌ, y ixin umanxujresobꞌ tunorobꞌ y ixin usubꞌajresobꞌ tunorobꞌ conda e Dios uche aquetpa awawanobꞌ tut e inmojr tuaꞌ aquetpa chequer que cucurnobꞌ umen e Dios conda chamay e Cristo tama ut e cruz.
COL 2:16 Pues ira iturbꞌa ibꞌa tamar jay ayan chi acay ucꞌayox tamar lo que war icꞌuxi o tamar lo que war iyuchꞌi, y ira iturbꞌa ibꞌa tamar jay ayan chi acay ucꞌayox umen que machi cꞌani ixnojqꞌuini tacar tin e tuobꞌ e Israel, o jay machi cꞌani icꞌupse lo que uyareox tamar e día conda chꞌoc e luna, o jay machi cꞌani ixjiri tama e día sábado bꞌan cocha ucꞌani ani tama uley e Moisés.
COL 2:17 Porque tunor era quetpa bꞌan taca cocha inteꞌ chequerir tut e gente tuaꞌ e Israel tamar lo que watar nacpat era, pero coner checta ixto tunor era ticoit non tama e nuxi chojbꞌesiaj lo que war cachꞌami tama e Cristo.
COL 2:18 Y ira iwacta ulocsiobꞌ ituanibꞌir lo aquetpa tuaꞌ ichꞌami conda ixcꞌotoy tut e qꞌuin tin e axin ucꞌayox que nox ucꞌani ani tuaꞌ ixsatpa umen que machi war iyujtzꞌi ut e Dios bꞌan cocha ucꞌani jaxirobꞌ, y que machi war imanxujres ibꞌa meyra cocha ucꞌani jaxirobꞌ, y que machi war iyujtzꞌi ut e angelobꞌ bꞌan cocha ucꞌani jaxirobꞌ. Pero ira icꞌupse inteꞌ xeꞌ oꞌjron cocha era porque war uche ubꞌa que meyra war unata, pero matucꞌa ayan tamar sino que intaca war utattzꞌi ubꞌa tamar e bꞌijnusiaj lo que utajwi tama ujor, porque jax taca e mabꞌambꞌanir lo que ayan tama uwerir xeꞌ war uche ubꞌijnu cocha era.
COL 2:19 Pero inteꞌ cocha era aquetpa najtir tut e Cristo, xeꞌ jax ujor e iglesia xeꞌ turu bꞌan cocha ucuerpo e Cristo tara tor e rum. Y tamar era jaxir war uche achꞌiꞌ tunor ucuerpo era bꞌan cocha ucꞌani e Dios, y war ubꞌijres cocha tuaꞌ achꞌiꞌ inteꞌ inteꞌ bꞌaquer tama tunor ucuerpo, y war uche aqꞌuecꞌo tunor or ubꞌaquer xeꞌ cachbꞌir taca e sian chicher.
COL 2:20 Entonces cocha nox intera ibꞌijnusiaj taca e Cristo war che era que nox chamayox tacar ubꞌan, y tamar era machi ixto turox yebꞌar ucꞌotorer e sian mabꞌambꞌan mein xeꞌ war ani acꞌotoriobꞌ tijor nox xeꞌ turox tara tor e rum, sino que coner bꞌanox cocha inteꞌ chamen que mixto erer aqꞌuejcha axin tama e cárcel jay abꞌeto ani. Y tamar era ira iturbꞌa ibꞌa tamar lo que e sian mabꞌambꞌan mein warto uyareox. Pues nox warto ixcꞌupseyan tutobꞌ conda uyareox y che:
COL 2:21 “Ira ipijchꞌi era, y ira iwejta e yax, y ira iturbꞌa e yax tama icꞌabꞌ”, xeꞌ chenobꞌ e sian mabꞌambꞌan mein era.
COL 2:22 Pero tunor era lo que jaxirobꞌ war uyareon que ma erer capijchꞌi y que ma erer cawejta y que ma erer caturbꞌa tama cacꞌabꞌ cꞌani acꞌapa conda axin acꞌampesna, y tamar era ira iturbꞌa ibꞌa tama tunor e ojroner cocha era porque tunor lo que war ixarobꞌna cocha era jax taca e canseyaj tuaꞌ inteꞌ winic.
COL 2:23 Pues tunor e canseyaj cocha era jax taca tuaꞌ utacsu e gente tuaꞌ axin uchiobꞌ lo que uyusre uchiobꞌ tama uwerir, motor que uwirnar tunor e canseyaj era bꞌan cocha jay ayan ani meyra natanyaj tamar porque e gente war acansenobꞌ tuaꞌ ojytzꞌianobꞌ bꞌan cocha cay ubꞌijnuobꞌ jaxirobꞌ, este que war ucanse e gente que ucꞌani tuaꞌ umanxujres ubꞌobꞌ meyra, y este que jaxobꞌ taca war uche unumse ubꞌobꞌ tama ucuerpuobꞌ. Pero tunor era matucꞌa ucꞌampibꞌir porque tin e war uchiobꞌ cocha era machi war atacarnobꞌ tuaꞌ uyactobꞌ e mabꞌambꞌanir.
COL 3:1 Pues cocha nox bꞌixcꞌoxix taca e Cristo tama iwalma, quetpox bꞌan cocha jay sujta ani bꞌixqꞌuesnox tujam e chamenobꞌ taca e Cristo, y tamar era sicbꞌanic lo que ayan tichan tut e qꞌuin tiaꞌ turu e Cristo xeꞌ war aturuan tama uturtar tuyejtzꞌer unojcꞌabꞌ Catata Dios.
COL 3:2 Y tamar era bꞌijnunic iraj iraj tamar taca lo que ayan tichan tut e qꞌuin, y ira ibꞌijnu iche e mabꞌambꞌanir bꞌan cocha war uchiobꞌ e gente xeꞌ turobꞌ tara tor e rum.
COL 3:3 Y coner cocha machi ixto war iche e mabꞌambꞌanir lo que cay ani iche, bꞌanox cocha inteꞌ xeꞌ chamen tut tunor lo que ayan tara tor e rum. Y bꞌan turox coner tut e mabꞌambꞌanir umen que war ixturuan taca e Cristo xeꞌ turu tuyejtzꞌer Catata Dios xeꞌ turu tut e qꞌuin tichan, pero ma chequer tunor era tut e gente tara tor e rum.
COL 3:4 Pero conda e Cristo xeꞌ cay ubꞌixqꞌueson tama cawalma asutpa achecta tut e gente tara tor e rum, non ubꞌan cꞌani cachectesna tut e gente tacar, y jax e hora yajaꞌ conda cꞌani cachꞌami meyra utawarer e Cristo.
COL 3:5 Entonces chamsenic tunor uyuseriaj e mabꞌambꞌanir lo que ayan tamarox. Y tamar era nox xeꞌ winicox machi ixto tuaꞌ iyose ibꞌa taca otronteꞌ ixic xeꞌ majax iwixcar, y xeꞌ ixictacox machi ixto tuaꞌ iyose ibꞌa taca inteꞌ winic xeꞌ majax iviejo. Y inteꞌ winic ma erer uchꞌami inteꞌ uyet winiquir, y bꞌan inteꞌ ixic que ma erer uchꞌami inteꞌ uyet ixiquir. Y ma erer iyusre tama iwalma tuaꞌ iche cocha era, y ma erer iyusre tama iwalma tuaꞌ iche lo que mabꞌambꞌan. Y ma erer iyusre ichꞌami lo que tuaꞌ otronteꞌ, porque tin e axin uche cocha era war uyujtzꞌi ut lo que ayan tuaꞌ otronteꞌ bꞌan cocha jay jax ani udiosir.
COL 3:6 Porque tunor tin e axin uche cocha era axin watar uqꞌuijnar e Dios tama ujorobꞌ.
COL 3:7 Pues bꞌan cay iche tunorox conda merato ixcꞌupseyan tama e Cristo conda turoxto ani tama e mabꞌambꞌanir.
COL 3:8 Pero coner ucꞌani tuaꞌ iwacta tunor e mabꞌambꞌanir xeꞌ jax e qꞌuecraner, y e qꞌuijnar, y e bꞌijnusiaj tuaꞌ iche e mabꞌambꞌanir, y e ojroner upater otronteꞌ tuaꞌ taca iche unumse ubꞌa, y e ojroner xeꞌ calapir xeꞌ alocꞌoy tama iwej,
COL 3:9 y e majresiaj tijam. Ira iche tunor era porque cꞌapix ichoqui tunor e onian bꞌijnusiaj lo que ayan ani tamarox, y cꞌapa iwacta iche tunor e mabꞌambꞌanir lo que war ani iche conda xanox taca e gente tara tor e rum.
COL 3:10 Pero coner war ichꞌami iwirnar xeꞌ imbꞌutz tuaꞌ e Dios xeꞌ warto uyustes axin iwirnar tuaꞌ ixcꞌotoy ixquetpa bꞌan cocha uwirnar jaxir, y tamar era erer ixcꞌotoy inata meyra tamar jaxir.
COL 3:11 Y tamar era non xeꞌ intera turon taca e Cristo mix cocha tuaꞌ cabꞌijnu jay inteꞌ winic o inteꞌ ixic jax tuaꞌ e Israel o jay majax. Y machix tuaꞌ cabꞌijnu tama inteꞌ winic jay xurbꞌir imbꞌijc uqꞌuewerir utejromar o jay majax xurbꞌir. Y machix tuaꞌ cabꞌijnu jay ajlugar inteꞌ winic o inteꞌ ixic o jay majax, o jay cansebꞌir o jay majax, o jay jax inteꞌ man xeꞌ mambꞌir tuaꞌ aquetpa tuach uyajyum o jay matucꞌa uyajyum. Pero ayan lo que ucꞌani tuaꞌ cabꞌijnu xeꞌ jax era: Que e Cristo jax xeꞌ más ayan ucꞌampibꞌir tama tunor lo que ayan y que jaxir turu tama cawalma.
COL 3:12 Entonces niwermanuox, cocha nox sicbꞌabꞌirox umen e Dios tuaꞌ ixquetpa tuaꞌ, y cocha quetpox chꞌujbꞌabꞌir umener umen que chojresbꞌir iut umener, ucꞌani tuaꞌ iturbꞌa ibꞌa tuaꞌ aquetpa incꞌun iwirnar tut ibꞌa inteꞌ intiox, y ucꞌani tuaꞌ iturbꞌa ibꞌa tuaꞌ aquetpa imbꞌutz iwirnar tut ibꞌa inteꞌ intiox, y ucꞌani tuaꞌ ixxana taca e manxujresiaj, y ucꞌani tuaꞌ ixquetpa tzꞌustaca tut e hermanuobꞌ conda uchiobꞌ lo que majax bueno tut inteꞌ, y ucꞌani tuaꞌ icojco anumuy bꞌan taca tut lo que uchiobꞌ e inmojr ajcꞌupesiajobꞌ jay uchiobꞌ lo que majax bꞌan cocha ibꞌijnusiaj tibꞌa.
COL 3:13 Y machi tuaꞌ ixqꞌuijna wacchetaca tamar lo que war uche inteꞌ ajcꞌupesiaj. Y jay ayan inteꞌ xeꞌ war aqꞌuecran ipater ucꞌani tuaꞌ ixcꞌumpa tacar inteꞌ intiox bꞌan cocha ixin cꞌumpa Cawinquirar Jesucristo tamaron y ixin unajpes tunor camabꞌambꞌanir ubꞌan, y tamar era nox ubꞌan ucꞌani tuaꞌ ixixin ixcꞌumpa inteꞌ intiox.
COL 3:14 Pero lo que ayan más ucꞌampibꞌir tujor tunor jax era: Que nox ixixin iyajta ut ibꞌa inteꞌ intiox, porque tamar era ixixin ixquetpa intera tunorox inyajrer tama Cawinquirar.
COL 3:15 Pues jax Cawinquirar era xeꞌ cay usisijres tunor e qꞌuijnar lo que ayan ani tijam, y tamar era ucꞌani tuaꞌ iwacta acꞌotori ujiriar e Dios tama iwalma inteꞌ intiox coner tuaꞌ ixquetpa intera taca tunor e inmojr ajcꞌupesiajobꞌ, cocha sicbꞌabꞌirox umen e Dios tuaꞌ ixquetpa intera tamar jaxir bꞌan cocha jay inteꞌ intiox jax inteꞌ bꞌac ani tama ubꞌaquer e Jesucristo tara tor e rum. Y tattzꞌic ucꞌabꞌa e Dios tama tunor iraj iraj.
COL 3:16 Y canoenic más y más tama tunor e ojroner lo que ajcꞌunon umen Cawinquirar Jesucristo. Cansenic ibꞌa inteꞌ intiox tunor tama Cawinquirar, y tꞌabꞌsenic iwalma inteꞌ intiox taca tunor unatanyaj e Dios, y cꞌaywijresic inteꞌ intiox inteꞌ salmo y inteꞌ himno y inteꞌ coro, y chenic tunor era tuaꞌ itattzꞌi ucꞌabꞌa e Dios tama tunor lo que cay uche tamarox.
COL 3:17 Y tunor lo que caxin caware y tunor lo que caxin cache, cachenic tunor era tama ucꞌabꞌa Cawinquirar Jesucristo. Y catattzꞌic ucꞌabꞌa Catata Dios tama ucꞌabꞌa Cawinquirar Jesucristo iraj iraj tama tunor lo que war uche tamaron.
COL 3:18 Pues entonces nox xeꞌ ixcarbꞌirox ucꞌani tuaꞌ ixcꞌupseyan tut iviejo xeꞌ tibꞌa porque bꞌan ucꞌani tuaꞌ uche inteꞌ ixic xeꞌ intera turu taca Cawinquirar Jesucristo.
COL 3:19 Y nox xeꞌ winicox cꞌaninic iwixcar xeꞌ tibꞌa y ira iche ibꞌa intran iwirnar tutobꞌ.
COL 3:20 Y nox xeꞌ maxtacox cꞌupseyanenic tut itata y tut ituꞌ tama tunor lo que uyareox tuaꞌ iche porque axin atzay Cadiosir conda uwirox que war ixcꞌupseyan tutobꞌ cocha era.
COL 3:21 Y nox xeꞌ tatabꞌirox ira icꞌaye meyra imaxtac tuaꞌ machi iche acꞌuxun uyalma.
COL 3:22 Y nox xeꞌ manox xeꞌ mambꞌirox inyajrer turbꞌanic ibꞌa tuaꞌ ixcꞌupseyan tut ipatron tama tunor lo que uyareox tuaꞌ iche. Y cꞌupseyanenic tut ipatron iraj iraj taca tunor iwalma umen que war ibꞌacre e Dios, y ira iche bꞌan cocha tin e ajtaca apatnobꞌ conda war eꞌrnobꞌ umen upatron tuaꞌ taca atzay eꞌrnobꞌ umener.
COL 3:23 Y tunor e patnar lo que ixixin iche, chenic tunor era taca tunor iwalma porque war ixpatna tama Cawinquirar Jesucristo y majax jax taca tama inteꞌ winic.
COL 3:24 Y cꞌaric imener que jax Cawinquirar Jesucristo xeꞌ tuaꞌ utoyox tama ipatnar era conda axin uyajcꞌox lo que tꞌabꞌesbꞌir umener, porque war ixpatna tama Cawinquirar Jesucristo y majax tamar taca inteꞌ ipatron tara tor e rum.
COL 3:25 Pero tin e war uche lo que mabꞌambꞌan ucꞌani tuaꞌ atojya ubꞌan tamar e mabꞌambꞌanir lo que war uche era, porque Cadiosir xeꞌ war uwira tunor lo war cache cꞌani ubꞌijnu cocha tuaꞌ utoyon inteꞌ intion tama tunor lo que cꞌapa cache. Porque Cadiosir mamajchi uyacta bꞌan taca que machi utoyi, sino que uwira tunor lo que war uche inteꞌ jay imbꞌutz o jay majax imbꞌutz.
COL 4:1 Y nox xeꞌ patronox chenic lo que imbꞌutz taca inteꞌ inteꞌ iman xeꞌ mambꞌirobꞌ inyajrer. Porque nox xeꞌ patronox ayan ubꞌan inteꞌ ipatron tichan tut e qꞌuin xeꞌ war uwira tucꞌa war iche taca iman y jaxir tuaꞌ utoyox ubꞌan tamar lo que war iche.
COL 4:2 Y cꞌajtinic taca e Dios iraj iraj tama tunor lo que ucꞌani, y choquic tunor e cꞌoyir tuaꞌ uyubꞌiox iwira tucꞌa ucꞌani tuaꞌ icꞌajti tamar, y tattzꞌic ucꞌabꞌa e Dios.
COL 4:3 Y cꞌajtinic taca e Dios tuaꞌ apascꞌa ut e bꞌir taniut tuaꞌ uyubꞌien inxin inchecsu tunor e ojroner xeꞌ mucur ani tama e Cristo. Porque umen taca que war inchecsu e ojroner era xeꞌ mucur ani que turen tama e cárcel coner.
COL 4:4 Y tamar era cꞌajtinic taca e Dios que nen uyubꞌien inchecsu tunor uyojroner e Dios tama e Cristo tut e gente axin, porque bꞌan ucꞌani tuaꞌ inche.
COL 4:5 Y turbꞌanic ibꞌa tuaꞌ aquetpa imbꞌutz iwirnar tut e gente xeꞌ machito acꞌupseyanobꞌ tama Cawinquirar Jesucristo conda war ixojron tacarobꞌ. Y conda itajwi ibꞌa taca inteꞌ cocha era cꞌampesic e tiempo tuaꞌ ichecsu ucꞌunersiaj e Dios tutobꞌ.
COL 4:6 Y conda war ixojron taca e gente cocha era quetpacox incꞌun tama iwojroner, y tamar era ixixin inata tucꞌa tuaꞌ iware otronyajr conda axin uyubꞌi inteꞌ ojroner tamarox.
COL 4:7 Pues entonces lo que war anumuy tamaren cꞌani ixarobꞌna umen e hermano Tíquico conda acꞌotoy tiut taca e carta era. Pues e hermano era xeꞌ inchoj ut nimener war utacren iraj iraj y war uche tunor upatnar Cawinquirar tacaren.
COL 4:8 Y tamar era war inwebꞌta axin tibꞌa tuaꞌ uyubꞌi uyareox tama tunor lo que war innumse nibꞌa y tuaꞌ uyubꞌi utꞌabꞌse iwalma nox ubꞌan.
COL 4:9 Y war inwebꞌta axin ubꞌan e hermano Onésimo xeꞌ machi acꞌoy apatna tama upatnar Cawinquirar, y xeꞌ inchoj ut nimener ubꞌan, y xeꞌ jax inteꞌ ajlugar tibꞌa. Conda acꞌotoyobꞌ jaxirobꞌ cꞌani uyareox tunor lo que war anumuy tara.
COL 4:10 Y e hermano Aristarco xeꞌ turu tama e cárcel tara tacaren war uyebꞌta axin e cꞌajpesiaj tibꞌa, y e hermano Marcos xeꞌ primo hermano taca e hermano Bernabé war uyebꞌta axin e cꞌajpesiaj tibꞌa ubꞌan. Pues tamar e hermano Marcos era cayix inwareox que jay uyubꞌi acꞌotoy uwarajsiox que chꞌamic bien.
COL 4:11 Y e hermano Jesús xeꞌ ucꞌabꞌa Justo ubꞌan war uyebꞌta axin e cꞌajpesiaj tibꞌa. Pues jax taca e uxteꞌ hermanuobꞌ era xeꞌ tuobꞌ e Israel xeꞌ cay patnobꞌ tacaren tuaꞌ cachꞌijse axin uchinam e Dios tara tor e rum. Pues e uxteꞌ hermanuobꞌ era jax e hermano Aristarco y e hermano Marcos y e hermano Jesús. Jaxirobꞌ cay utacrenobꞌ meyra conda cay utꞌabꞌse niwalma tama Cawinquirar.
COL 4:12 Y e hermano Epafras xeꞌ ajlugar tibꞌa y xeꞌ war uche upatnar Cawinquirar Jesucristo iraj iraj war uyebꞌta axin e cꞌajpesiaj tibꞌa. Jaxir war ucꞌajti meyra taca e Dios tamarox que e Dios tuaꞌ axin utacriox ixqꞌuecꞌo ixxana tama ubꞌir y que erer ixcꞌotoy inata tama iwalma tunor lo que ucꞌani Cadiosir.
COL 4:13 Pues cꞌani inwareox tamar e hermano Epafras era que jaxir meyra war ubꞌijnu tamarox y tamar tin e turobꞌ tama e chinam Laodicea y xeꞌ turobꞌ tama e chinam Hierápolis.
COL 4:14 Y e hermano Lucas xeꞌ jax inteꞌ ajtzꞌaconer xeꞌ inchoj ut camener war uyebꞌta axin e cꞌajpesiaj tibꞌa, y bꞌan war uche e hermano Demas ubꞌan.
COL 4:15 Y cꞌajpesicobꞌ tunor e hermanuobꞌ xeꞌ turobꞌ tama e chinam Laodicea, y cꞌajpesic e hermana Ninfas taca tunor e ajcꞌupesiajobꞌ tama e Cristo xeꞌ war umorojse ubꞌobꞌ tama uyotot tuaꞌ utattzꞌiobꞌ ucꞌabꞌa e Dios.
COL 4:16 Pues conda acꞌapa iche leer e carta era tut tunor e hermanuobꞌ tiaꞌ turox, ebꞌtanic chic esto tama e chinam Laodicea tuaꞌ uyubꞌi uchiobꞌ leer tut tunor e grupo ajcꞌupesiajobꞌ yajaꞌ ubꞌan. Y e carta xeꞌ cꞌapa inwebꞌta ixin esto tama e grupo ajcꞌupesiajobꞌ xeꞌ turobꞌ tama e chinam Laodicea, quiqui taresic y chenic leer tut tunor e grupo ajcꞌupesiajobꞌ tiaꞌ turox ubꞌan.
COL 4:17 Y arenic e hermano Arquipo cocha era que: “Quetpac chequer que iꞌxin ache tunor e patnar lo que quetpa tuaꞌ ache, cocha net intera turet taca Cawinquirar Jesucristo”, che e Pablo.
COL 4:18 Pues nen xeꞌ Pabloen war intzꞌijbꞌa e cꞌajpesiaj era taca nicꞌabꞌ tuaꞌ inata que jax nen xeꞌ war inwebꞌta axin e carta era. Y cꞌaric imener tuaꞌ icꞌajti taca e Dios tamaren umen que turen tara tama e cárcel. Utacarsiaj e Dios turic tacarox inteꞌ intiox. Tara acꞌapa tunor niwojroner, che e Pablo.
1TH 1:1 Pues nen xeꞌ Pabloen taca e Silvano y e Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌupesiajobꞌ xeꞌ turox tama e chinam Tesalónica. Pues nox quetpa intera ibꞌijnusiaj taca Cadiosir xeꞌ jax Catata y taca Cawinquirar Jesucristo. Chꞌamic utacarsiaj e Dios taca ujiriar.
1TH 1:2 Pues non era war catattzꞌi ucꞌabꞌa Cadiosir tamarox iraj iraj. Y ma tiaꞌ canajpesox conda war cacꞌajti taca e Dios.
1TH 1:3 Pues war cacꞌajpes tut Catata Dios iraj iraj cobꞌa cay cꞌupseyanox tamar conda cay iche upatnar, y que meyra war ichecsu axin ucꞌunersiaj e Dios tut e gente conda war iche upatnar era, y que cay icojco meyra tama Cawinquirar Jesucristo, y que qꞌuecꞌo xanox tama ubꞌir motor que quetpa tuaꞌ inumse ibꞌa meyra conda cay cꞌupseyanox tamar.
1TH 1:4 Cawermanuox xeꞌ inchoj iut meyra umen e Dios, canata que nox sicbꞌabꞌirox umener.
1TH 1:5 Porque conda cꞌotoyon tiut tuaꞌ cachecsu uyojroner e Dios tama e corpesiaj majax ojroner taca xeꞌ locꞌoy tama cawej, sino que bꞌutꞌur tunor cawojroner taca ucꞌotorer Unawalir e Dios, y chequer tama cawalma que erach tunor lo que war cachecsu tiut. Y nox war inata que quetpa erach tunor cawirnar conda turon tijam este que tacarnox meyra umen lo que cay cachecsu tiut.
1TH 1:6 Y nox cay iturbꞌa ibꞌa tuaꞌ ixquetpa bꞌan cocha non y cay iturbꞌa ibꞌa tuaꞌ ixquetpa bꞌan cocha Cawinquirar ubꞌan. Y tzayox meyra conda cay ichꞌami tunor e ojroner lo que cay cachecsu tiut taca inteꞌ nuxi tzayer xeꞌ ajcꞌubꞌirox umen Unawalir e Dios motor que cay inumse ibꞌa tamar lo que cay ichꞌami.
1TH 1:7 Y tamar era tin e ajcꞌupesiajobꞌ tama e departamento Macedonia y tin e ajcꞌupesiajobꞌ tama e departamento Acaya cay uturbꞌa ubꞌobꞌ tuaꞌ aquetpobꞌ bꞌan cocha nox tama Cawinquirar.
1TH 1:8 Y cay iqꞌueche ixin uyojroner e Dios lo que cay ichꞌami tama tunor or e lugar tama e departamento Macedonia y tama tunor or e lugar tama e departamento Acaya y más innajt bꞌana ubꞌan. Y tamar era tic taca tiaꞌ caxin war catajwi e gente xeꞌ unatobꞌix tamarox y tamar icꞌupesiaj tama e Dios. Y tamar era mix tucꞌa tuaꞌ cawareobꞌ tamarox otronyajr
1TH 1:9 porque e gente era cay uyareon cocha ichꞌamion conda cꞌotoyon tuaꞌ cawarajsiox tama e día yajaꞌ. Y uyareon cocha cay iwacta tunor e chamen diosobꞌ tuaꞌ ixsutpa iyujtzꞌi ut Cadiosir xeꞌ erach y xeꞌ bꞌixir.
1TH 1:10 Y uyareon ubꞌan que war icojco e hora conda cꞌani asutpa watar Uyunen e Dios tut e qꞌuin. Pues jax e Jesús era xeꞌ sujta bꞌixqꞌuesna tujam e chamenobꞌ xeꞌ cꞌani ucorpeson tama uqꞌuijnar e Dios xeꞌ tuaꞌ watar.
1TH 2:1 Pues niwermanuox, nox war inata que conda cꞌotoyon tiut tuaꞌ cawarajsiox, majax tuaꞌ intaca casati e tiempo.
1TH 2:2 Y nox warix inata que conda merato cacꞌotoy tiut que war cacꞌayna meyra umen e gente xeꞌ turobꞌ tama e chinam Filipos y que ulocsiobꞌ cabꞌujc y que uwatzꞌionobꞌ meyra taca inteꞌ teꞌ. Pero conda yopon tiut Cadiosir uyajcꞌon meyra ucꞌotorer tuaꞌ uyubꞌion cachecsu uyojroner tiut motor que ayan meyra tin e machi war ucꞌaniobꞌ.
1TH 2:3 Porque tunor lo que cay cachecsu tiut tama Cadiosir bꞌan taca cocha ayan tama uyojroner e Dios, y matucꞌa war cabꞌijnu tama cajor conda cachecsu tunor era tiut, y conda cache tunor era majax taca inteꞌ aras ojroner war cache,
1TH 2:4 sino que tacar uyojroner e Dios tama e corpesiaj lo que ajcꞌunon umener tuaꞌ cachecsu tut e gente axin, y tamar era machi war caturbꞌa cabꞌa tuaꞌ catzayjres e gente tamar lo que war cachecsu tutobꞌ sino que war cachecsu jax taca lo que ucꞌani Cadiosir cocha jaxir war uwira tunor lo que ayan tama cawalma.
1TH 2:5 Y nox war inata que machi war catattzꞌi e gente taca inteꞌ ojroner xeꞌ galan uyubꞌnar xeꞌ tuaꞌ tix ucꞌupsionobꞌ, y matucꞌa war cache tuaꞌ calocse e tumin tuaꞌ e gente. Pues Cadiosir jax Cawajchecsuyaj que erach tunor lo que war inwareox era.
1TH 2:6 Y ma tiaꞌ war casicbꞌa tuaꞌ catajttzꞌa umen e gente y nien imener y nien umen otronteꞌ.
1TH 2:7 Pues non uyubꞌion ani cachectes cabꞌa tiut que non nuquir winicon umen que apostolon tuaꞌ e Cristo. Pero majax bꞌan cay cache sino que cay cache cabꞌa tiut bꞌan cocha inteꞌ tubꞌir xeꞌ incꞌun uwirnar conda war uchꞌijrse umaxtac.
1TH 2:8 Porque meyra war cachojres iut este que turonix tuaꞌ cawajcꞌu majax jax taca uyojroner e Dios tama e corpesiaj sino que turonix tuaꞌ cawajcꞌu cacuxtar ubꞌan tamarox jay bꞌan ani ucꞌani porque war cacꞌaniox meyra.
1TH 2:9 Niwermanuox, ¿cꞌar ca imener cocha cay patnon meyra tuaꞌ achecta e tumin lo que ucꞌani tamaron conda turonto tacarox? Porque cay patnon tama e día y acbꞌar ubꞌan tuaꞌ catajwi e tumin tuaꞌ uyubꞌion catoyi tunor lo que ucꞌani tuaꞌ cacꞌuxi. Y tamar era machi cꞌaxi tijor nox tunor lo que cay casati tamaron conda cay cachecsu uyojroner e Dios tiut.
1TH 2:10 Y nox ixquetpa ajchecsuyajox ticabꞌa y bꞌan e Dios ubꞌan que erach tunor lo que cay cache conda turon tacarox, y que matucꞌa cay cache que majax imbꞌutz, y que matucꞌa cay cache tuaꞌ casubꞌajres cabꞌa tijam xeꞌ war ixcꞌupseyan tama Cawinquirar.
1TH 2:11 Y war inata ubꞌan que cache cabꞌa tacarox bꞌan cocha inteꞌ tatabꞌir xeꞌ uyare umaxtac conda war uchiobꞌ lo que majax imbꞌutz y xeꞌ utzayjres conda war unumse ubꞌobꞌ.
1TH 2:12 Y cay cawareox tuaꞌ ixixin ixxana tama ubꞌir e Dios bꞌan cocha ucꞌani jaxir y tuaꞌ ixquetpa tawar tut e Dios xeꞌ cꞌapa upejcox tuaꞌ ixixin ixturuan tacar conda acay acꞌotori taca utawarer.
1TH 2:13 Pues non era machi cawacta tuaꞌ catattzꞌi ucꞌabꞌa Cadiosir tamarox porque conda cay ichꞌami lo que cay cachecsu tiut cay iche umen que cꞌotoy inata que jax inteꞌ ojroner xeꞌ tari tuaꞌ e Dios y que majax jax taca inteꞌ ojroner xeꞌ locꞌoy tuaꞌ inteꞌ winic. Pues jax e ojroner era xeꞌ war uyustes uwirnar tunor tin e acꞌotoy acꞌupseyanobꞌ tamar.
1TH 2:14 Y de allí chenox inumse ibꞌa umen iwet ajlugarir umen que machi ucꞌaniobꞌ que nox war ixcꞌupseyan tama Cawinquirar Jesucristo coner. Pues bꞌan ubꞌan war unumse ubꞌobꞌ tin e ajcꞌupesiajobꞌ tama Cawinquirar xeꞌ turobꞌ tama e departamento Judea. Y tamar era erer cawareox que nox war inumse ibꞌa bꞌan taca cocha war unumse ubꞌobꞌ tin e turobꞌ tama e departamento Judea.
1TH 2:15 Porque jax e gente era xeꞌ uchamsiobꞌ Cawinquirar Jesús, y xeꞌ uchamsiobꞌ tunor e profetobꞌ tama e onian tiempo, y xeꞌ cꞌapa uyajnesonobꞌ non ubꞌan. Pues e gente era machi utzayjresobꞌ e Dios y uxejbꞌiobꞌ ut tunor e winicobꞌ axin ubꞌan.
1TH 2:16 Y tamar era conda cꞌotoyon tuaꞌ cachecsu uyojroner e Dios tut tin e majax tuobꞌ e Israel tuaꞌ uyubꞌi acorpesnobꞌ ubꞌan, e gente tuaꞌ e Israel era uturbꞌa ubꞌobꞌ tuaꞌ uquete uwabꞌuon tuaꞌ machi cache. Y tamar era más war abꞌoro axin tunor umabꞌambꞌanirobꞌ. Pero coner war acꞌaxi uqꞌuijnar e Dios tama ujorobꞌ.
1TH 2:17 Pues niwermanuox, conda wartocto calocꞌoy tijam war ayopa ticajor meyra que cꞌani casutpa cawarajsiox otronyajr wacchetaca cocha chꞌurox tama cawalma. Y tamar era war cosre meyra tuaꞌ caxin cawarajsiox otronyajr era.
1TH 2:18 Y cꞌani ani caxin, y nen xeꞌ Pabloen cay inturbꞌa nibꞌa tuaꞌ inxin, pero e tzuc Satanás uxoti coit tuaꞌ machi cache.
1TH 2:19 Pues cꞌani ani cawarajsiox otronyajr era porque jax nox xeꞌ war ichion cacojco más tama e Dios, y jax nox xeꞌ war itzayjreson, y jax nox xeꞌ tuaꞌ ichion cachꞌami catuanibꞌir tuaꞌ e Dios watar e día, y cꞌani catajttzꞌa meyra umen e Dios conda asutpa watar Cawinquirar Jesucristo otronyajr umen que nox war ixxana imbꞌutz tama ubꞌir e Dios.
1TH 2:20 Porque jax nox xeꞌ cꞌani catajttzꞌa tamar umen Cawinquirar y jax nox xeꞌ war itzayjreson ubꞌan.
1TH 3:1 Pues war ani cosre meyra tuaꞌ cacꞌotoy cawarajsiox otronyajr era pero machi uyubꞌion calocꞌoy coner, y tamar era cabꞌijnu tuaꞌ caquetpa cabꞌajner tara tama e chinam Atenas,
1TH 3:2 y tuaꞌ cawebꞌta axin e Timoteo tuaꞌ uwarajsiox. Jaxir jax inteꞌ cawet ajpatnarir tama e Dios xeꞌ meyra uchecsu uyojroner e Dios tama e Cristo axin. Jaxir cꞌani utacriox ixqꞌuecꞌo tama icꞌupesiaj tama Cawinquirar y cꞌani utꞌabꞌse iwalma tuaꞌ ixcꞌupseyan más tama Cawinquirar ubꞌan.
1TH 3:3 Y bꞌan tuaꞌ uche tuaꞌ utacriox tuaꞌ machi aloqꞌuesna nien inteꞌ ajcꞌupesiaj tama ubꞌir e Dios umen lo que war inumse ibꞌa era. Pues nox war inata que ucꞌani tuaꞌ canumse cabꞌa cora tara tor e rum.
1TH 3:4 Pues conda turonto tacarox cay cawareox que cꞌani achena canumse cabꞌa, y bꞌan numuy tacarox, pero war ixto inata tunor era.
1TH 3:5 Y tamar era inwebꞌta ixin e Timoteo tuaꞌ uyubꞌi tibꞌa jay war ixqꞌuecꞌo ixcꞌupseyan tama Cawinquirar. Pues nen cay bꞌacten que bꞌajcꞌat cꞌotoy e ajpijchsiaj tuaꞌ upijchꞌiox y que bꞌajcꞌat intaca patnon tamarox.
1TH 3:6 Pero era sutpa yopa e Timoteo otronyajr tiaꞌ turox y turu tacaron tara tama e chinam Atenas coner. Pues jaxir war uyareon que nox war ixqꞌuecꞌo ixcꞌupseyan tama Cawinquirar y que war iyajta ut ibꞌa inteꞌ intiox. Y war uyareon ubꞌan que ixtzay icꞌajpeson y que war iyusre iwiron bꞌan taca cocha non war cosre cawira iut nox ubꞌan.
1TH 3:7 Y tamar era niwermanuox, motor que war canumse cabꞌa meyra era pero tꞌabꞌesna cawalma conda coybꞌi que war ixqꞌuecꞌo ixcꞌupseyan tama Cawinquirar.
1TH 3:8 Y tamar era tzayon meyra conda coybꞌi que war ixqꞌuecꞌo ixcꞌupseyan tama Cawinquirar bꞌan cocha catzay conda wartocto cacꞌupseyan tama Cawinquirar y bꞌan catzayer tamarox coner ubꞌan.
1TH 3:9 Y ma cocha erer acꞌapa catattzꞌi ucꞌabꞌa e Dios tamarox y tama tunor e nuxi tzayer lo que cꞌapa cachꞌami tamar jaxir.
1TH 3:10 Pues non era war cacꞌajti taca e Dios tama e día y acbꞌar ubꞌan tuaꞌ uyubꞌion caxin cawira iut otronyajr, y tamar era erer catacriox tuaꞌ acꞌapa ixqꞌuecꞌo ixxana tamar icꞌupesiaj tama Cawinquirar.
1TH 3:11 Pues war cacꞌajti taca Catata Dios y taca Cawinquirar Jesús tuaꞌ utacrion tuaꞌ uyubꞌion caxin cawarajsiox.
1TH 3:12 Y war cacꞌajti taca e Dios ubꞌan que ixixin ixcano cocha tuaꞌ iyajta ut ibꞌa inteꞌ intiox inyajrer y que ixixin ixcano iyajta ut tunor e inmojr ajcꞌupesiajobꞌ ubꞌan bꞌan cocha non war cayajta iut.
1TH 3:13 Y jay bꞌan iche entonces cꞌani aqꞌuecꞌo iwalma tuaꞌ aquetpa erach tunor iwirnar, y tamar era machi tuaꞌ ixsubꞌajra tut Catata Dios conda asutpa watar Cawinquirar Jesús taca tunor tin e erach.
1TH 4:1 Pues entonces niwermanuox, cay cawareox cocha tuaꞌ icojco ibꞌa tama icuxtar tuaꞌ uyubꞌiox itzayjres ut e Dios bꞌan cocha cay cacansiox conda turon tacarox. Bꞌan cay iche y bꞌan ucꞌani tuaꞌ iche iraj iraj.
1TH 4:2 Pues nox warto inata tunor e canseyaj lo que cay cawareox tama ucꞌabꞌa Cawinquirar Jesús.
1TH 4:3 Porque ayan lo que Cadiosir war ucꞌani tuaꞌ iche tama icuxtar xeꞌ jax era: Ucꞌani tuaꞌ iturbꞌa ibꞌa erach tut e Dios, y que mamajchi tijam axin uyose ubꞌa taca tin e merato anujbꞌi tacar.
1TH 4:4 Y inteꞌ intiox ucꞌani tuaꞌ inata cocha tuaꞌ ixturuan taca iwixcar tuaꞌ aquetpa imbꞌutz tunor era tut e Dios y tut e gente ubꞌan.
1TH 4:5 Y machi tuaꞌ intaca ibꞌijnu ichꞌami inteꞌ ixic bꞌan cocha uchiobꞌ e winicobꞌ tara tor e rum xeꞌ machi unatobꞌ chi Cadiosir.
1TH 4:6 Y ucꞌani tuaꞌ iwiric tuaꞌ machi imajres inteꞌ iwermano o inteꞌ iwermana taca inteꞌ majresiaj tuaꞌ iche aqꞌuijna uwerir, porque Cadiosir cꞌani uwatzꞌi meyra tunor tin e axin uche cocha era bꞌan cocha cay cawareox.
1TH 4:7 Pues e Dios upejcon tuaꞌ caxin cache lo que erach tut jaxir y majax tuaꞌ caxin cache más e mabꞌambꞌanir.
1TH 4:8 Pero jay ayan tin e axin uxejbꞌe ut e canseyaj era, machi war uxejbꞌe ut e winic xeꞌ war acanseyan, sino que war uxejbꞌe ut e Dios xeꞌ jax xeꞌ uyajcꞌon Unawalir xeꞌ erach.
1TH 4:9 Pues ma ani tucꞌa tamar tuaꞌ catzꞌijbꞌa tibꞌa tuaꞌ iyajta ut ibꞌa inteꞌ intiox, cocha Cadiosir cꞌapa ucansiox tama tunor era.
1TH 4:10 Pues chequer que war iyajta ut ibꞌa taca tunor e hermanuobꞌ tiaꞌ turox tama e departamento Macedonia. Pero cꞌani cawareox era cawermanuox, tuaꞌ iwacta ibꞌa tuaꞌ abꞌoro más icꞌunersiaj tut ibꞌa más ubꞌan.
1TH 4:11 Y turbꞌanic ibꞌa tuaꞌ ixturuan taca inteꞌ chꞌancabꞌar tama iwalma, y ira iyose ibꞌa tamar lo que majax tibꞌa, y patnenic taca icꞌabꞌ tuaꞌ iche lo que tibꞌa bꞌan cocha cay cawareox bꞌajxan.
1TH 4:12 Bꞌan ucꞌani tuaꞌ iche tuaꞌ atzay ixerna umen tunor tin e machi unatobꞌ chi Cadiosir, y tuaꞌ machi acꞌapa lo que ucꞌani tama icuxtar.
1TH 4:13 Pues entonces niwermanuox, machi cacꞌani tuaꞌ ixquetpa bꞌan taca que matucꞌa inata tamar tin e cꞌapa chamayobꞌ. Y machi cacꞌani tuaꞌ ixaru meyra tamar tin e wartocto achamay bꞌan cocha uchiobꞌ tin e machi war ucojcobꞌ tama Cawinquirar.
1TH 4:14 Pues bꞌan cocha cacꞌupse que chamay e Jesús y que de allí sutpa bꞌixcꞌa tujam e chamenobꞌ, y bꞌan ixto cacꞌupse ubꞌan que Cadiosir cꞌani usuti ubꞌixqꞌues tunor tin e chamayobꞌ xeꞌ war acꞌupseyanobꞌ tama e Jesús, y que conda asutpa watar Cawinquirar otronyajr que cꞌani uqꞌueche watar tunor e ajcꞌupesiajobꞌ era tacar ubꞌan.
1TH 4:15 Pues entonces cꞌani cawajcꞌox era inteꞌ canseyaj que cachꞌami tuaꞌ Cawinquirar xeꞌ che que non xeꞌ bꞌixironto tara tor e rum conda asutpa watar Cawinquirar que majax non xeꞌ tuaꞌ caxin bꞌajxan, sino que tin e chamayobꞌ xeꞌ cꞌupseyanobꞌ tama Cawinquirar cꞌani asujta abꞌixqꞌuesnobꞌ bꞌajxan, y de allí cꞌani caqꞌuejcha caxin tichan non ubꞌan tacarobꞌ.
1TH 4:16 Porque Cawinquirar cꞌani ecmay watar tut e qꞌuin y cꞌani aꞌru taca inteꞌ nuxi nuc. Y e más nuxi ángel cꞌani aꞌru taca inteꞌ nuxi nuc ubꞌan. Y cꞌani aꞌru ucorneta e Dios. Y tamar era tunor tin e chamayobꞌ xeꞌ cꞌupseyanobꞌ tama e Cristo cꞌani abꞌixqꞌuesnobꞌ tujam e chamenobꞌ bꞌajxan.
1TH 4:17 Y de allí tunoron xeꞌ quetponto tara tor e rum cꞌani caqꞌuejcha caxin tichan tama e tocar taca tunor tin e bꞌixqꞌuesnobꞌ era tuaꞌ catajwi cabꞌa taca Cawinquirar tama e icꞌar tichan. Y tamar era cꞌani caquetpa tacar Cawinquirar inyajrer.
1TH 4:18 Pues tꞌabꞌsenic iwalma taca e canseyaj era tuaꞌ machi ixquetpa tzajtaca iut tamar tin e chamayobꞌ xeꞌ cꞌupseyanobꞌ tama Cawinquirar.
1TH 5:1 Pues entonces niwermanuox, matucꞌa tamar tuaꞌ inwareox tama e tiempo y nien tama e hora conda cꞌani asutpa watar Cawinquirar Jesucristo otronyajr,
1TH 5:2 porque warix inata tama tunor era. Porque cꞌani acꞌotoy e día conda cꞌani asutpa watar Cawinquirar otronyajr conda mamajchi war ucojco que jax e día era conda tuaꞌ watar, bꞌan cocha conda acꞌotoy inteꞌ ajxujch acbꞌar.
1TH 5:3 Pero watar e día era conda e gente war chenobꞌ que: “Mix tucꞌa tamar tuaꞌ cabꞌijnu yaꞌ”, chenobꞌ. Pero jax tama e hora era conda cꞌani achecta watar inteꞌ nuxi tijresiaj tama ujorobꞌ wacchetaca, bꞌan cocha inteꞌ ixic conda acꞌotoy e hora tuaꞌ aqꞌuechuan uyar que watar inteꞌ nuxi cꞌuxner tamar, y bꞌan e nuxi tijresiaj era que mix cocha tuaꞌ alocꞌoy aꞌjniobꞌ tut.
1TH 5:4 Pero nox niwermanuox, machi turox tama e incsibꞌaner bꞌan cocha tin e machi unatobꞌ chi Cawinquirar. Y tamar era machi tuaꞌ ixbꞌajcꞌusena conda achecta e día conda asutpa watar Cawinquirar Jesucristo bꞌan cocha abꞌajcꞌusena inteꞌ conda achecta inteꞌ ajxujch acbꞌar.
1TH 5:5 Porque cocha tunorox ajcꞌupesiajox tama Cawinquirar war ixturuan tama e janchꞌaquenar y war ixturuan tama e día, y tamar era mix jax mucur tunor era tiut nox bꞌan cocha aquetpa mucur tut tin e aturuanobꞌ tama e incsibꞌaner umen que ajmabꞌambꞌanirobꞌ.
1TH 5:6 Y tamar era machi cawactic cabꞌa tuaꞌ cache bꞌan cocha uchiobꞌ tin e ubꞌijnuobꞌ que matucꞌa ucꞌampibꞌir uyojroner e Dios porque ujorobꞌ e gente era war awayan, pero nox bꞌixqꞌuesic ijor y cojconic ibꞌa tuaꞌ machi iche e mabꞌambꞌanir.
1TH 5:7 Tin e awayan tama e acbꞌar awayanobꞌ, y tin e acaray, tama e acbꞌar acarayobꞌ ubꞌan.
1TH 5:8 Pero cocha non war caturuan tama e día ucꞌani tuaꞌ cacojco cabꞌa tuaꞌ machi cache bꞌan cocha uchiobꞌ tin e turobꞌ tama e acbꞌar. Pues turbꞌanic e cꞌupesiaj tama Cawinquirar y turbꞌanic ucꞌunersiaj e Dios xeꞌ aquetpa bꞌan cocha inteꞌ taqꞌuin lo que uturbꞌa inteꞌ soldado tuaꞌ ucojco ut ubꞌa. Y cojconic tama ucorpesiaj Cawinquirar xeꞌ bꞌan cocha inteꞌ soldado xeꞌ ucꞌampes inteꞌ casco tuaꞌ ucorpes ujor tuaꞌ machi achamesna.
1TH 5:9 Porque Cadiosir machi uquetion tuaꞌ caxin cachꞌami uqꞌuijnar, sino que uquetion tuaꞌ cacorpesna umen lo que uche Cawinquirar Jesucristo
1TH 5:10 xeꞌ ixin chamay tamaron tuaꞌ uyubꞌion caxin caturuan tacar. Y bꞌan tuaꞌ cache jay bꞌixiron tara tor e rum o jay caxin cachamay, pero cꞌani caxin caturuan tacar jaxir watar e día.
1TH 5:11 Y tamar era tꞌabꞌsenic ibꞌa inteꞌ intiox tama e ojroner era y qꞌuecꞌojsenic ibꞌa inteꞌ intiox tamar era ubꞌan, bꞌan cocha warix iche.
1TH 5:12 Pues niwermanuox, cꞌani cawareox era tuaꞌ machi iwactobꞌ bꞌan taca tin e war uchiobꞌ meyra upatnar Cawinquirar tacarox y tin e líder tibꞌa, porque jaxirobꞌ war ubꞌijresox y war ucansiox bꞌan cocha ucꞌani Cawinquirar.
1TH 5:13 Pues chojbꞌesic y yajtanic utobꞌ meyra tama e patnar lo que war uchiobꞌ tacarox. Y turuanic taca e jiriar inteꞌ intiox.
1TH 5:14 Pues cawermanuox, cꞌani cawareox era que arenic tuaꞌ apatna más tin e war acꞌoyi apatnobꞌ, y tacrenic tuaꞌ achpa tama ubꞌir e Dios tin e insis turu, y tacrenic tin e injayjay tuaꞌ aqꞌuecꞌo axanobꞌ, y turbꞌanic ibꞌa tuaꞌ aquetpa incꞌun iwirnar tut tunor e gente.
1TH 5:15 Y iwiric que mamajchi tijam axin utoyi uyeror ut tut tin e cay uche e mabꞌambꞌanir upater, sino que turbꞌanic ibꞌa tuaꞌ iche ajtaca lo que erach tijam y tut tunor e inmojr gente ubꞌan.
1TH 5:16 Entonces turbꞌanic ibꞌa tuaꞌ ixquetpa ixtzay iraj iraj.
1TH 5:17 Cꞌajtinic taca e Dios iraj iraj.
1TH 5:18 Tattzꞌic ucꞌabꞌa Cadiosir taric lo que taric, porque jax lo que ucꞌani Cadiosir tamarox xeꞌ ajcꞌupesiajox tama e Cristo Jesús.
1TH 5:19 Y ira iquete iwabꞌu Unawalir e Dios.
1TH 5:20 Y ira ixejbꞌe ut inteꞌ ojroner xeꞌ ebꞌtana tari umen e Dios.
1TH 5:21 Chꞌujcunic iwira jay imbꞌutz o jay majax imbꞌutz tunor e ojroner cocha era, y chꞌujbꞌanic tunor lo que imbꞌutz,
1TH 5:22 y loqꞌuenic tut tunor e mabꞌambꞌanir.
1TH 5:23 Pues e Dios xeꞌ uyajcꞌon e jiriar uchꞌijsenicox tuaꞌ aquetpa erach inyajrer tunor imajin y tunor iwalma y tunor icuerpo tuaꞌ machi aquetpa nien imbꞌijc e bꞌonemar tuaꞌ e mabꞌambꞌanir tamarox, y que bꞌan taca tuaꞌ ixquetpa este que asutpa watar Cawinquirar Jesucristo otronyajr.
1TH 5:24 Pues Cadiosir xeꞌ cay usicbꞌox ma tiaꞌ ixin majresian y jaxir cꞌani acꞌapa uche tunor lo que cay uyareox.
1TH 5:25 Pues niwermanuox, cꞌajtinic taca e Dios tamaron.
1TH 5:26 Tzꞌujtzꞌinic ibꞌa inteꞌ intiox taca inteꞌ tzꞌujtzꞌiaj xeꞌ erach tut e Dios.
1TH 5:27 Cꞌani inwareox tama ucꞌabꞌa Cawinquirar tuaꞌ iche leer e carta era tut tunor e ajcꞌupesiajobꞌ.
1TH 5:28 Cawinquirar Jesucristo utacricox inteꞌ intiox. Tara acꞌapa tunor niwojroner, che e Pablo.
2TH 1:1 Pues nen xeꞌ Pabloen taca e Silvano y e Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌupesiajox xeꞌ turox tama e chinam Tesalónica xeꞌ intera ibꞌijnusiaj taca Catata Dios y taca Cawinquirar Jesucristo ubꞌan.
2TH 1:2 Chꞌamic utacarsiaj y ujiriar Catata Dios y tuaꞌ Cawinquirar Jesucristo.
2TH 1:3 Pues niwermanuox, war catattzꞌi ucꞌabꞌa Cadiosir tamarox iraj iraj bꞌan cocha ucꞌani tuaꞌ cache. Porque war achꞌiꞌ icꞌupesiaj tama Cadiosir axin, y war iyajta ut ibꞌa más y más axin.
2TH 1:4 Y tamar era war catattzꞌiox tut e sian grupo ajcꞌupesiajobꞌ iraj iraj que war ixqꞌuecꞌo ixcꞌupseyan tama Cadiosir motor que war inumse ibꞌa meyra tama e sian cꞌuxner.
2TH 1:5 Pues chequer que erach Cadiosir conda uche juzgar porque tamar era war ixquetpa tawar tuaꞌ ixochoy tama uchinam cocha war inumse ibꞌa era umen taca que war ixcꞌupseyan tama e Cristo.
2TH 1:6 Pues tawar Cadiosir xeꞌ cꞌani uyajcꞌu uyeror tunor tin e war uchiox inumse ibꞌa era,
2TH 1:7 y tuaꞌ axin uyajcꞌox ujiriar watar e día cocha war inumse ibꞌa meyra era, y bꞌan tuaꞌ axin uyajcꞌon non ubꞌan tama e día conda achecta watar Cawinquirar Jesús tut e qꞌuin macuir uwarar e cꞌajc taca uyangelobꞌ xeꞌ meyra ayan ucꞌotorer.
2TH 1:8 Jaxir watar taca inteꞌ nuxi jatzꞌuar tuaꞌ uwatzꞌi tunor tin e machi unatobꞌ chi Cadiosir y tunor tin e machi acꞌupseyanobꞌ tut uyojroner Cawinquirar Jesús tama e corpesiaj.
2TH 1:9 Jaxirobꞌ tuaꞌ axin ajajtzꞌobꞌ taca inteꞌ nuxi tijresiaj xeꞌ machi tuaꞌ acꞌapa, y ucꞌani tuaꞌ ajujrobꞌ najtir tut Cawinquirar y najtir tut e nuxi tawarer lo que ayan tama ucꞌotorer Cawinquirar.
2TH 1:10 Y bꞌan tuaꞌ anumuy tama e día conda achecta watar Cawinquirar tuaꞌ atajttzꞌa umen tunor tin e tuobꞌ y conda tuaꞌ atzay eꞌrna umen tunor tin e war acꞌupseyanobꞌ tamar. Y cocha nox cꞌapa ichꞌami tunor uyojroner e Dios lo que cay cachecsu tiut, nox ubꞌan tuaꞌ ixquetpa taca tunor e sian ajcꞌupesiajobꞌ era.
2TH 1:11 Pues tamar era war cacꞌajti taca e Dios tamarox iraj iraj que jaxir tuaꞌ axin uyustes tunor iweroj este que ixcꞌotoy ixquetpa erach inyajrer tamar jaxir porque tamar era sicbꞌabꞌirox umener. Y war cacꞌajti taca e Dios ubꞌan que jaxir tuaꞌ utacriox meyra taca ucꞌotorer tuaꞌ ixajcꞌuna tunor lo que imbꞌutz lo que war iyusre ichꞌami tuaꞌ, y que Cadiosir tuaꞌ axin utacriox taca tunor lo que war iche umen que war ixcꞌupseyan tamar.
2TH 1:12 Pues tamar era cꞌani axin atajttzꞌa meyra ucꞌabꞌa Cawinquirar Jesús tamarox, y nox ubꞌan cꞌani ixixin ixtajttzꞌa umen e Dios umen que meyra ayan utacarsiaj Cadiosir y tuaꞌ Cawinquirar Jesucristo ubꞌan.
2TH 2:1 Pues entonces niwermanuox, tama e tiempo conda cꞌani achecta watar Cawinquirar Jesucristo otronyajr conda cꞌani caquetpa morojsebꞌiron tacar, pues ayan lo que cꞌani cawareox tamar,
2TH 2:2 porque jay ayan tin e ayopa tiut xeꞌ uyareox que yopix Cawinquirar, ira iwacta ibꞌa tuaꞌ apocpa iwalma wacchetaca umen inteꞌ ojroner cocha era, y ira iwacta ibꞌa tuaꞌ ixbꞌajcꞌusena porque majax bꞌan. Y motor que ixarobꞌna que jax inteꞌ ojroner xeꞌ ajcꞌuna umen e Dios o jay ichꞌami inteꞌ carta xeꞌ tzꞌijbꞌna ani camener xeꞌ che que yopix Cawinquirar,
2TH 2:3 ira iwacta ibꞌa tuaꞌ ixmajresna porque majax bꞌan. Pues cꞌani asutpa watar Cawinquirar Jesucristo otronyajr, pero bꞌajxan cꞌani acꞌotoy e día conda meyra ajcꞌupesiajobꞌ tuaꞌ axin uyactobꞌ ubꞌir Cawinquirar. Y de allí cꞌani achecta inteꞌ winic xeꞌ tuaꞌ e mabꞌambꞌanir inyajrer xeꞌ jax uman e diablo, pero jaxir aquetpa tuaꞌ ajujra axin tama e cꞌajc watar e día.
2TH 2:4 E winic tuaꞌ e mabꞌambꞌanir era cꞌani axin uxejbꞌe ut tunor lo que axin ojytzna ut umen e gente y axin uxejbꞌe ut Cadiosir ubꞌan. Y jaxir tuaꞌ axin uchꞌijse ubꞌa tujor tunor era y axin uturbꞌa uturtar macuir utemplo e Dios lo que ayan tama e chinam Jerusalem tuaꞌ ojytzna ut umen e gente este que axin uche ubꞌa que jaxir jax ani e Dios.
2TH 2:5 Pues ¿machi ca cꞌar imener que cay inwareox tama tunor era conda turento tacarox?
2TH 2:6 Y nox war inata chi xeꞌ war uquete uwabꞌu e winic tuaꞌ e mabꞌambꞌanir era tuaꞌ machi achectesna este que acꞌotoy e hora tuaꞌ.
2TH 2:7 Pues warix acay tunor lo que war ubꞌijnu uche e winic tuaꞌ e mabꞌambꞌanir era motor que mucurto ticoit coner, ajtaquix aquetpa tuaꞌ aloqꞌuesna tin e war uquete uwabꞌu e winic era tuaꞌ machi uche tunor e mabꞌambꞌanir lo que cꞌanix ani uche.
2TH 2:8 Pero watar e día axin achectesna e winic era xeꞌ tuaꞌ e mabꞌambꞌanir y entonces Cawinquirar Jesús cꞌani axin uchamse tamar taca umusic y axin utijres tamar taca uwarar utawarer tama e hora conda achecta watar.
2TH 2:9 Pero conda ne mato achecta watar Cawinquirar, cꞌani achecta watar e winic xeꞌ tuaꞌ e mabꞌambꞌanir taca ucꞌotorer e Satanás. Y jaxir tuaꞌ umajres e gente taca e sian milagro y taca e sian seña y taca e sian chectesiaj lo que cꞌani ucꞌampes tuaꞌ uche acꞌupseyanobꞌ e gente que erach ani tunor era.
2TH 2:10 Y jaxir cꞌani ucꞌampes meyra sian mabꞌambꞌanir tuaꞌ umajres e gente xeꞌ turix tuaꞌ asatpobꞌ, cocha jaxirobꞌ machi cay uchꞌamiobꞌ lo que erach y nien machi uyajta ut lo que erach tuaꞌ uyubꞌi acorpesnobꞌ.
2TH 2:11 Y tamar era cocha matucꞌa ucꞌaniobꞌ xeꞌ erach, e Dios tuaꞌ uyebꞌta watar inteꞌ nuxi majresiaj ojroner tuaꞌ uche acꞌupseyanobꞌ tamar lo que majax erach.
2TH 2:12 Y bꞌan tuaꞌ anumuy tuaꞌ aquetpobꞌ satrem tunor tin e machi ucꞌani acꞌupseyanobꞌ tamar lo que erach porque jaxirobꞌ war atzayobꞌ uchiobꞌ ajtaca lo que mabꞌambꞌan.
2TH 2:13 Pues entonces niwermanuox xeꞌ yajtanbꞌirox umen Cawinquirar, cꞌani catattzꞌi ucꞌabꞌa e Dios tamarox, porque e Dios cay usicbꞌox conda ne mato achena ani or e rum era tuaꞌ ucorpesox. Pues usicbꞌox tuaꞌ ixquetpa bꞌajxan tuaꞌ ixcorpesna umen upatnar Unawalir e Dios conda cay uyustes tunor iwirnar y umen que cay cꞌupseyanox tamar lo que erach.
2TH 2:14 Pues Cadiosir upejcox tuaꞌ ixcꞌupseyan tamar lo que erach conda cay cachecsu uyojroner e Dios tama e corpesiaj tiut. Y jaxir upejcox ubꞌan tuaꞌ uyubꞌiox ichꞌami tunor utawarer Cawinquirar Jesucristo.
2TH 2:15 Entonces niwermanuox, qꞌuecꞌojsenic ibꞌa tama ubꞌir e Dios y ira inajpes e canseyaj lo que cay cachecsu tiut conda turonto tacarox y lo que cay catzꞌijbꞌa tama inteꞌ carta tibꞌa.
2TH 2:16 Pues e Jesucristo xeꞌ jax Cawinquirar taca Catata Dios war uyajta coit meyra y tacar utacarsiaj war utꞌabꞌse cawalma inyajrer y war uyajcꞌon lo que war cacojco tuaꞌ cachꞌami tuaꞌ jaxir.
2TH 2:17 Que Cawinquirar Jesucristo taca Catata Dios axin utꞌabꞌse iwalma y axin uqꞌuecꞌojsiox tuaꞌ alocꞌoy imbꞌutz tunor lo que iche y tunor lo que iware.
2TH 3:1 Pues entonces niwermanuox, cꞌajtinic taca e Dios tamaron que uyojroner Cawinquirar tama e corpesiaj axin acꞌotoy tama tunor or e rum, y que tic taca tiaꞌ acꞌotoy e ojroner era que cꞌani achꞌajma taca inteꞌ nuxi tzayer bꞌan cocha numuy tacarox.
2TH 3:2 Y cꞌajtinic taca e Dios ubꞌan tuaꞌ machi uchionobꞌ canumse cabꞌa e mabꞌambꞌan winicobꞌ xeꞌ calapir uchiobꞌ, porque chequer que majax tunor xeꞌ war acꞌupseyanobꞌ tama Cawinquirar.
2TH 3:3 Pero erach Cawinquirar xeꞌ cꞌani uqꞌuecꞌojsiox tuaꞌ ixxana tama ubꞌir jaxir y xeꞌ cꞌani ucojcox tuaꞌ machi ixpijchna umen e diablo.
2TH 3:4 Pues non era war cacojco tama Cawinquirar que nox war ixcꞌupseyan tut tunor lo que cay cawareox y que bꞌan tuaꞌ iche iraj iraj ubꞌan.
2TH 3:5 Pues Cawinquirar ubꞌijresicox tuaꞌ iyajta ut e inmojr bꞌan cocha war uche Cadiosir y que ubꞌijresicox tuaꞌ iwacta anumuy bꞌan taca lo que war inumse ibꞌa era bꞌan cocha cay uche e Cristo.
2TH 3:6 Pues entonces niwermanuox, ayan lo que cꞌani cawareox era tamar ucꞌabꞌa Cawinquirar Jesucristo, que ira inutꞌi ibꞌa taca inteꞌ hermano xeꞌ machi cꞌani apatna y xeꞌ machi cꞌani obꞌian tut e canseyaj lo que cay ichꞌami tamaron.
2TH 3:7 Pues nox inata ixto cocha ucꞌani tuaꞌ ixturuan tuaꞌ iche bꞌan cocha cache non. Porque non machi turuanon bꞌan taca conda turon tacarox sino que cay patnon iraj iraj.
2TH 3:8 Y ma tiaꞌ cay wesenon bꞌan taca sino que ixion catoyi tunor lo que cay cacꞌuxi. Y tamar era cay patnon este que cꞌoyon tama e día y tama acbꞌar ubꞌan tuaꞌ machi acꞌaxi tama ijor nox tunor lo que ixion casati tamaron.
2TH 3:9 Pues erer ani cacꞌajti e tacarsiaj tibꞌa bꞌan cocha cay cacansiox, pero machi cache umen que war cabꞌijnu tuaꞌ caquetpa bꞌan cocha inteꞌ chequerir tiut tuaꞌ uyubꞌiox iwira tucꞌa ucꞌani tuaꞌ iche tama Cawinquirar.
2TH 3:10 Porque conda turonto tacarox cawareox que tin e machi apatna machi tuaꞌ aweꞌ ubꞌan.
2TH 3:11 Pues war cawareox cocha era umen que cay coybꞌi que ayan tijam tin e taca turobꞌ y xeꞌ machi war apatnobꞌ, ajtaca war unumsiobꞌ e tiempo tama e sian ojroner lo que war uchiobꞌ upater otronteꞌ.
2TH 3:12 Entonces cꞌani caware tamar ucꞌabꞌa Cawinquirar Jesucristo tunor tin e machi war apatnobꞌ que turicobꞌ tzꞌustaca y que chic patnacobꞌ tuaꞌ utajwiobꞌ e tumin tuaꞌ uyubꞌi umaniobꞌ lo que cꞌani ucꞌuxiobꞌ.
2TH 3:13 Pues cawermanuox, ira ixcꞌoy iche lo que imbꞌutz tut e Dios.
2TH 3:14 Pero jay ayan tin e machi cꞌani acꞌupseyanobꞌ tut lo que war catzꞌijbꞌa tibꞌa era, chꞌujcunic iwira chi y ira inutꞌi ibꞌa tacar tuaꞌ ayopa e subꞌar tamar.
2TH 3:15 Pero ira ibꞌijnu que inteꞌ cocha era tuaꞌ aquetpa bꞌan cocha inteꞌ xeꞌ war aqꞌuijna uwiret, sino que cansenic lo que erer uche bꞌan cocha iche taca inteꞌ iwet ajcꞌupesiajir.
2TH 3:16 Que Cawinquirar xeꞌ tuaꞌ e jiriar uyajqꞌuicox e jiriar iraj iraj tic taca tiaꞌ chicox. Cawinquirar quetpac tacarox inteꞌ intiox.
2TH 3:17 Pues nen xeꞌ Pabloen war intzꞌijbꞌa inteꞌ cꞌajpesiaj tibꞌa taca nicꞌabꞌ bꞌan cocha inche iraj iraj conda inwebꞌta axin inteꞌ carta cocha era.
2TH 3:18 Cawinquirar Jesucristo uwechꞌic utacarsiaj tama ijor tunorox. Tara acꞌapa tunor niwojroner, che e Pablo.
1TI 1:1 Pues nen xeꞌ Pabloen jax inteꞌ apóstol tuaꞌ e Cristo Jesús umen que bꞌan arobꞌnen umen Catata Dios xeꞌ jax Cawajcorpesiaj y umen e Cristo Jesús xeꞌ jax tin e war cacojco tamar.
1TI 1:2 Pues nen war intzꞌijbꞌa e carta era tabꞌa Timoteo xeꞌ laret cocha inteꞌ nisitz tama e cꞌupesiaj. Que e Dios xeꞌ jax Catata taca e Cristo Jesús xeꞌ jax Cawinquirar uyajqꞌuiquet utacarsiaj y ucꞌunersiaj y ujiriar.
1TI 1:3 Pues bꞌan cocha cay inwaret conda cay locꞌoyen tuaꞌ inxin tama e departamento Macedonia y bꞌan cꞌani inwaret otronyajr era, que quetpen tama e chinam Éfeso tuaꞌ aware tin e war ucansiobꞌ lo que majax erach tuaꞌ uyactobꞌ tunor era.
1TI 1:4 Y aren tuaꞌ machi uturbꞌa ubꞌobꞌ más tama tunor e onian ojroner tuaꞌ utata viejobꞌirobꞌ lo que war uchecsuobꞌ tut e gente y tuaꞌ machi uturbꞌa ubꞌobꞌ más tama tunor uchꞌajnarir utata viejobꞌirobꞌ xeꞌ war uchecsuobꞌ tut e gente axin ubꞌan, porque tunor era intaca utꞌabꞌse e sian qꞌuecraner y machi utacrion tuaꞌ cache upatnar Cadiosir xeꞌ achempa taca e cꞌupesiaj.
1TI 1:5 Pues war inwaret tunor era umen que war ucꞌani tuaꞌ cayajta ut cabꞌa inteꞌ intion taca tunor cawalma xeꞌ erach, y taca tunor cabꞌijnusiaj xeꞌ imbꞌutz y taca tunor cacꞌupesiaj tama e Dios xeꞌ majax chateꞌ ut cabꞌijnusiaj tamar.
1TI 1:6 Pero ayan cora ajcanseyajobꞌ xeꞌ najpa umenerobꞌ tunor era este que cay ojronobꞌ lo que matucꞌa ucꞌampibꞌir.
1TI 1:7 E winicobꞌ era cꞌani ani aquetpobꞌ inteꞌ nuxi ajcanseyaj tama uley e Moisés, pero machi war unatobꞌ lo que war oꞌjronobꞌ tamar motor que war acanseyanobꞌ que bꞌan ixto tunor era.
1TI 1:8 Pues war canata que imbꞌutz tunor uley e Moisés jay caxin cacꞌampes bꞌan cocha ucꞌani tuaꞌ acꞌampesna.
1TI 1:9 Pero canatic ubꞌan que inteꞌ ley majax actabꞌir tuaꞌ tin e war uche lo que imbꞌutz, sino que actabꞌir tunor uley e Moisés tuaꞌ tin e machi obꞌian, y tuaꞌ tin e aqꞌuijna uyubꞌiobꞌ lo que imbꞌutz, y tuaꞌ tin e uxejbꞌiobꞌ ut e Dios, y tuaꞌ tin e ajmabꞌambꞌanirobꞌ, y tuaꞌ tin e majax erach, y tuaꞌ tin e uxejbꞌiobꞌ ut tunor e religión, y tuaꞌ tin e uchamse utata, y tuaꞌ tin e uchamse utuꞌ, y tuaꞌ tunor tin e ajchamseyajobꞌ.
1TI 1:10 Y actabꞌir tunor uley e Moisés tuaꞌ tin e axin uyose ubꞌa taca inteꞌ xeꞌ merato anujbꞌi tacar, y tuaꞌ tin e uyusre uchꞌami uyet winiquir y e ixictac xeꞌ uyusre uchꞌami uyet ixiquir, y tuaꞌ tin e ajxujch gente, y tuaꞌ tin e amajresian, y tuaꞌ tin e war uchecsu lo que majax erach, y tuaꞌ tin e axin uche tuqꞌuic tuqꞌuic mabꞌambꞌanir upater e canseyaj xeꞌ erach.
1TI 1:11 Pues tunor e canseyaj xeꞌ erach era aquetpa intera taca uyojroner e Dios tama e corpesiaj xeꞌ tawar tuaꞌ acꞌupesna, pues bꞌan ajcꞌubꞌiren tuaꞌ incanseyan umen Cadiosir xeꞌ chojbꞌesbꞌir ut inyajrer.
1TI 1:12 Pues nen era cꞌani intattzꞌi ucꞌabꞌa e Cristo Jesús xeꞌ jax Cawinquirar xeꞌ uqꞌuecꞌojsen y xeꞌ war unata que tawaren tuaꞌ inxin inche tunor upatnar porque tamar era cay upejquen.
1TI 1:13 Y upejquen tuaꞌ inche upatnar motor que cay inqꞌuijnes meyra e Cristo taca niwojroner y cay inche unumse ubꞌobꞌ meyra uyajcanuarobꞌ este que cay inwatzꞌiobꞌ ubꞌan. Pero Cadiosir cay uwirsen ucꞌunersiaj umen que cay inche tunor era conda merato ani incꞌupseyan tamar, y conda merato ani innata tucꞌa war inche.
1TI 1:14 Y tamar era Cawinquirar cay uyajqꞌuen meyra utacarsiaj y meyra e cꞌupesiaj tamar, y uyajqꞌuen tuaꞌ inyajta ut meyra e Cristo Jesús ubꞌan.
1TI 1:15 Pues jax era inteꞌ ojroner xeꞌ tawar tuaꞌ achꞌajma umen tunor e gente: Que e Cristo Jesús tari tara tor e rum tuaꞌ ucorpes tin e ajmabꞌambꞌanirobꞌ, y que jax nen xeꞌ quetpen e más nuxi ajmabꞌambꞌanir ani.
1TI 1:16 Y tamar taca era Cadiosir cay uchectes meyra ucꞌunersiaj taniut xeꞌ más nuxi ajmabꞌambꞌaniren ani tuaꞌ erer inquetpa inteꞌ chequerir tut e gente axin que e Cristo Jesús machi aqꞌuijna wacchetaca motor taca tin e uche meyra e mabꞌambꞌanir. Y tamar era nen inquetpa inteꞌ chequerir tut tunor tin e ne mato acꞌupseyanobꞌ tama Cawinquirar que inteꞌ intiobꞌ erer uchꞌamiobꞌ e cuxtar xeꞌ machi tuaꞌ acꞌapa ubꞌan.
1TI 1:17 Y tamar era catattzꞌic ucꞌabꞌa Cadiosir iraj iraj xeꞌ jax e más nuxi Ajcꞌotorer xeꞌ ma tiaꞌ tuaꞌ acꞌapa, y xeꞌ ma tiaꞌ tuaꞌ achamay, y xeꞌ machi uyubꞌi eꞌrna ut camener, y xeꞌ jax taca e Dios cocha otronteꞌ matucꞌa. Amén.
1TI 1:18 Pues entonces Timoteo xeꞌ bꞌanet cocha inteꞌ nisitz, cꞌani inwaret era tuaꞌ ache bꞌan cocha arobꞌnet tama inyajr umen inteꞌ xeꞌ cay uchꞌami inteꞌ ojroner tuaꞌ e Dios y xeꞌ sutpa uyaret tunor era otronyajr: Que net ucꞌani tuaꞌ iꞌxin aware tin e war acanseyanobꞌ tamar lo que majax erach que ucꞌani tuaꞌ uyactobꞌ tunor era.
1TI 1:19 Pero cojcon abꞌa tama acꞌupesiaj tama e Cristo y cojcon abꞌa tama abꞌijnusiaj tuaꞌ machi ache e mabꞌambꞌanir. Porque ayan tin e machi cay obꞌianobꞌ tut lo que pejcnobꞌ umen uyalmobꞌ y tamar era ixin uchiobꞌ meyra mabꞌambꞌanir este que ixin usatiobꞌ e cꞌupesiaj tama e Cristo inyajrer.
1TI 1:20 Bꞌan numuy tama e Himeneo y e Alejandro xeꞌ ixin usati ubꞌobꞌ, y tamar era nen ixien inwajcꞌuobꞌ tama ucꞌabꞌ e Satanás tuaꞌ acanuobꞌ tuaꞌ machi uqꞌuijnesobꞌ e Dios taca uyojronerobꞌ.
1TI 2:1 Pues cꞌani inwaret bꞌajxan era que net taca tunor e ajcꞌupesiajobꞌ ucꞌani tuaꞌ icꞌajti taca e Dios tama tunor e gente tuaꞌ uchꞌamiobꞌ uchojbꞌesiaj e Dios, y de allí ucꞌani tuaꞌ itattzꞌi ucꞌabꞌa e Dios tama tunor e gente ubꞌan.
1TI 2:2 Y de allí ucꞌani tuaꞌ icꞌajti taca e Dios tama tunor tin e war acꞌotori y tama tunor e ajcꞌamparobꞌ tuaꞌ uyubꞌion caturuan taca e jiriar y taca inteꞌ chꞌancabꞌar, y tuaꞌ erer cache bꞌan cocha ucꞌani e Dios y tuaꞌ erer caquetpa erach tama cacuxtar.
1TI 2:3 Pues imbꞌutz tunor era tut e Dios, y conda war cacꞌajti tacar cocha era war catzayjres ut Cadiosir xeꞌ jax Cawajcorpesiaj.
1TI 2:4 Porque Cadiosir war ucꞌani que tunor e gente tara tor e rum acꞌotoy acorpesnobꞌ y tuaꞌ acꞌotoy unatobꞌ tucꞌa xeꞌ erach.
1TI 2:5 Porque inteꞌ taca Dios ayan, y ayan inteꞌ taca winic xeꞌ turu yuxin tut e Dios y tut e gente xeꞌ jax e Cristo Jesús.
1TI 2:6 Jaxir ixin uyajcꞌu ubꞌa tuaꞌ achamesna tuaꞌ utoyi tunor camabꞌambꞌanir ticabꞌa y tuaꞌ tunor e gente tara tor e rum ubꞌan tuaꞌ erer cacꞌotoy cachꞌami e corpesiaj tunoron. Pues cꞌotoyix e hora tuaꞌ achecsuna tunor e ojroner tama e corpesiaj tama tunor or e rum y bꞌan war achempa.
1TI 2:7 Y tamar era nen sicbꞌabꞌiren tuaꞌ inquetpa inteꞌ ajchecsuyaj y tuaꞌ inquetpa inteꞌ apóstol tuaꞌ inxin incanse tunor tin e majax tuobꞌ e Israel cocha tuaꞌ acꞌotoy acꞌupseyanobꞌ tama Cawinquirar y tamar lo que erach. Pues tunor lo que war inwaret era jax taca lo que erach y majax majresiaj.
1TI 2:8 Pues nen incꞌani que tunor e winicobꞌ tic taca tiaꞌ turobꞌ axin ucꞌajtiobꞌ taca e Dios taca ucꞌabꞌobꞌ tꞌabꞌesbꞌir tichan y que machi war aqꞌuijnobꞌ y que machi war aqꞌuecranobꞌ.
1TI 2:9 Y incꞌani ubꞌan que e ixictac y e chꞌom ijchꞌoctac axin ucojco ubꞌobꞌ conda war ubꞌujcse ubꞌobꞌ bꞌan cocha war uchiobꞌ coner tuaꞌ machi usubꞌajres ubꞌobꞌ. Y machi tuaꞌ uyustes utzutzer ujor tuaꞌ taca eꞌrna umen e gente y machi tuaꞌ utzꞌiri inteꞌ oro o ingojr perla tama utzutzer ujor y nien machi tuaꞌ ulapi ubꞌujc xeꞌ meyra atujri.
1TI 2:10 Pero lo que ucꞌani tuaꞌ uche e ixictac y e chꞌom ijchꞌoctac jax era: Ucꞌani tuaꞌ uche meyra lo que imbꞌutz tut e Dios bꞌan cocha tawar tuaꞌ achena umen tunor tin e war axanobꞌ erach tama ubꞌir e Dios.
1TI 2:11 Pues e ixictac y e chꞌom ijchꞌoctac ucꞌani tuaꞌ uyubꞌiobꞌ tzꞌustaca tin e war acanseyan tamar uyojroner e Dios y ucꞌani tuaꞌ aquetpobꞌ manxujresbꞌir tut e Dios.
1TI 2:12 Pues nen machi inwacta que inteꞌ ixic axin ucanse e winicobꞌ y machi inwacta tuaꞌ acꞌotori inteꞌ ixic tujor e winicobꞌ, sino que ucꞌani tuaꞌ aturuanobꞌ tzꞌustaca tama inteꞌ servicio.
1TI 2:13 Y bꞌan ucꞌani tuaꞌ aquetpa porque jax e Adán xeꞌ chembꞌir bꞌajxan umen e Dios y nacpat era chena e Eva xeꞌ jax e ixic.
1TI 2:14 Porque majax e Adán xeꞌ quetpa majresbꞌir umen e Satanás sino que jax e Eva xeꞌ quetpa majresbꞌir y xeꞌ jax xeꞌ ixin cucrema tama e mabꞌambꞌanir.
1TI 2:15 Pero inteꞌ ixic axin atacarna conda war ucuxi uyar tuaꞌ machi achamay jay war acꞌupseyan tama e Dios y jay war uyajta ut e inmojr y jay war uche lo que erach tut e Dios y jay war ucojco ubꞌa tamar lo que war uche.
1TI 3:1 Pues ayan inteꞌ ojroner xeꞌ cꞌani inwaret xeꞌ erach: Que tin e uyusre aquetpa inteꞌ líder tama e grupo ajcꞌupesiajobꞌ, bueno e patnar lo que war ucꞌani era.
1TI 3:2 Pues tin e cꞌani aquetpa inteꞌ líder cocha era ucꞌani tuaꞌ aquetpa imbꞌutz tut e gente y que matucꞌa ayan tamar tuaꞌ asubꞌajrna. Y ucꞌani tuaꞌ aquetpa que inteꞌ taca uwixcar, y ucꞌani tuaꞌ ucojco ubꞌa tama tunor, y ucꞌani tuaꞌ uquete ubꞌa tuaꞌ ubꞌijnu jay imbꞌutz tut e Dios lo que war ubꞌijnu uche era, y ucꞌani tuaꞌ uche lo que aquetpa tawar tuaꞌ acꞌajna umen e gente, y ucꞌani tuaꞌ aquetpa turix tuaꞌ uchꞌami inteꞌ ajwara tama uyotot, y ucꞌani tuaꞌ oꞌbꞌna ucanse uyojroner e Dios.
1TI 3:3 Y tin e cꞌani aquetpa inteꞌ líder ma erer axin acaray, y ma erer aquetpa inteꞌ xeꞌ aqꞌuijna este que axin ubꞌijnu atzꞌojyi sino que ucꞌani tuaꞌ aquetpa incꞌun uwirnar tut e gente, y ma erer aquetpa inteꞌ xeꞌ uyusre abꞌiriti iraj iraj, y ma erer aquetpa inteꞌ xeꞌ uturbꞌa ujor tamar taca e tumin.
1TI 3:4 Y tin e cꞌani aquetpa inteꞌ líder ucꞌani tuaꞌ unata acꞌotori tujor uwixcar y tujor umaxtac, y ucꞌani tuaꞌ ucanse umaxtac tuaꞌ oꞌbꞌianobꞌ y tuaꞌ machi axin uchiobꞌ lo que calapir uwirnar.
1TI 3:5 Porque jay inteꞌ winic machi uyubꞌi acꞌotori tujor uwixcar y tujor umaxtac machi tuaꞌ oꞌbꞌna acꞌotori tujor inteꞌ grupo ajcꞌupesiajobꞌ ubꞌan.
1TI 3:6 Y majax bueno tuaꞌ aquetpa líder inteꞌ xeꞌ wartocto acay acꞌupseyan tama e Cristo, porque jay bꞌan achempa jaxir erer ubꞌijnu que coner más nuxi winic que e inmojr, y tamar era erer axin acucrema bꞌan cocha uche e diablo ixnix.
1TI 3:7 Y ucꞌani tuaꞌ aquetpa chequer tut tin e majax ajcꞌupesiajobꞌ tama Cawinquirar que galan uwirnar tin cꞌani aquetpa líder era y que erach tama tunor uyojroner, porque jay majax bꞌan erer axin acucrema tama inteꞌ ojroner upater y erer axin apijchna umen e diablo.
1TI 3:8 Pues tin e tuaꞌ aturbꞌana tuaꞌ aquetpa inteꞌ ajtacarsiaj tama inteꞌ grupo ajcꞌupesiajobꞌ ucꞌani tuaꞌ aquetpa tawar tuaꞌ acꞌajna umen e gente, y ucꞌani tuaꞌ aquetpa erach tama tunor uyojroner, y ucꞌani tuaꞌ aquetpa inteꞌ xeꞌ machi ubꞌijnu oychꞌi, y xeꞌ machi ubꞌijnu tuaꞌ uxujchꞌi e tumin.
1TI 3:9 Y e ajtacarsiaj era ucꞌani tuaꞌ ucꞌupse que erach tunor e canseyaj lo que ayan tama uyojroner e Dios y ma erer aquetpa chateꞌ ubꞌijnusiaj tama tunor era.
1TI 3:10 Pero bꞌajxan ucꞌani tuaꞌ achꞌujcna eꞌrna y jay matucꞌa ayan tamar, entonces erer aquetpa ajtacarsiaj coner.
1TI 3:11 Y uwixcar tin e aquetpa inteꞌ ajtacarsiaj cocha era ucꞌani tuaꞌ aquetpa tawar tuaꞌ acꞌajna umen e gente, y ucꞌani tuaꞌ aquetpa inteꞌ xeꞌ machi oꞌjron upater e inmojr, y xeꞌ ucojco ubꞌa tama tunor, y xeꞌ turix tuaꞌ uche inteꞌ inteꞌ patnar taca e tzayer.
1TI 3:12 Y e ajtacarsiaj era ucꞌani tuaꞌ aquetpa inteꞌ taca uwixcar, y ucꞌani tuaꞌ unata acꞌotori tujor umaxtac y tujor tunor tin e turobꞌ tama uyotot.
1TI 3:13 Pues tin e axin uche galan tunor e patnar era axin atajttzꞌa umen e gente y cꞌani achꞌiꞌ tunor ucꞌupesiaj tama e Cristo Jesús tuaꞌ aqꞌuecꞌo uchecsu uyojroner e Dios.
1TI 3:14 Pues war imbꞌijnu tuaꞌ incꞌotoy inwarajset wacchetaca era, pero cꞌani intzꞌijbꞌa tabꞌa era tuaꞌ inwaret lo que ucꞌani tuaꞌ achempa.
1TI 3:15 Y tamar era jay machi uyubꞌi incꞌotoy rajxa era, erer anata cocha ucꞌani tuaꞌ ucojco ubꞌobꞌ e ajcꞌupesiajobꞌ conda turobꞌ tujam e inmojr umaxtacobꞌ e Dios. Pues tunor e ajcꞌupesiajobꞌ era bꞌanobꞌ cocha inteꞌ uyotot e Dios xeꞌ bꞌixir. Y jax jaxirobꞌ xeꞌ aquetpobꞌ bꞌan ani cocha cora oy xeꞌ uquete e canseyaj tama Cadiosir tama e otot era xeꞌ bꞌixir y aquetpobꞌ bꞌan ani cocha uwabꞌnibꞌ e otot era xeꞌ jax lo que erach.
1TI 3:16 Pues chequer que nojta e ojroner era xeꞌ quetpa mucur ani ticoit que inteꞌ winic erer acꞌotoy aquetpa erach tut e Dios. Y bꞌan numuy umen que checta Cawinquirar y quetpa inteꞌ winic, y que chectesna que erach uwirnar umen Unawalir e Dios, y que irna tara tor e rum umen uyangelobꞌ e Dios, y que chectesna ucꞌabꞌa tut tunor e sian chinamobꞌ tara tor e rum, y que cꞌupesna umen meyra gente tama tunor or e rum, y que qꞌuechbꞌir ixin tichan tut e qꞌuin.
1TI 4:1 Pues chequer tamar lo que che Unawalir e Dios que tama ucꞌapesnibꞌir or e rum era ayan meyra tin e tuaꞌ axin uyactobꞌ e cꞌupesiaj tama e Dios. Y tamar era cꞌani axiobꞌ tupat e sian mein xeꞌ ajmajresiajobꞌ y cꞌani acꞌupseyanobꞌ tamar lo que axin acansenobꞌ umen e sian mabꞌambꞌan mein era.
1TI 4:2 Pues e canseyaj cocha era watar tuaꞌ tin e ajqꞌuecranerobꞌ xeꞌ unatobꞌ amajresian y xeꞌ mix tucꞌa e subꞌar tamarobꞌ.
1TI 4:3 Pues jaxirobꞌ cꞌani ucansiobꞌ e gente que majax bueno tuaꞌ anujbꞌiobꞌ sino que más bueno tuaꞌ aquetpobꞌ ubꞌajnerobꞌ. Y axin acanseyanobꞌ que ayan e comida que ma erer acꞌujxa. Pero non xeꞌ ajcꞌupesiajon tama Cadiosir y xeꞌ war canata lo que erach canata que chembꞌir tunor e comida umen e Dios y que tamar era erer acꞌujxa umen tunor e gente, y que ucꞌani tuaꞌ atajttzꞌa ucꞌabꞌa e Dios tamar.
1TI 4:4 Porque tunor lo que chembꞌir umen e Dios quetpa imbꞌutz tunor, y matucꞌa tamar tuaꞌ caxejbꞌe ut, sino que erer cachꞌami tunor e comida jay catattzꞌi ucꞌabꞌa e Dios tamar.
1TI 4:5 Pues jax uyojroner e Dios taca e tattzꞌarsiaj xeꞌ uche aquetpa imbꞌutz tunor e comida lo que cachꞌami.
1TI 4:6 Jay iꞌxin awirse tunor era tut e hermanuobꞌ, cꞌani aquetpa chequer que net jax inteꞌ man xeꞌ imbꞌutz awirnar tut e Cristo Jesús, cocha war iqꞌuecꞌojsena umen lo que erach lo que war icꞌupseyan tamar y war iqꞌuecꞌojsena umen tunor e canseyaj xeꞌ imbꞌutz lo que cꞌapa achꞌami era.
1TI 4:7 Pues ira achiquini inteꞌ aras ojroner bꞌan cocha ayan tara tor e rum xeꞌ matucꞌa ucꞌampibꞌir, sino que turbꞌan abꞌa tuaꞌ iqꞌuecꞌo ixana tama ubꞌir e Dios.
1TI 4:8 Pues ayan ucꞌampibꞌir jay ayan lo que war cache tuaꞌ caqꞌuecꞌojse cacuerpo tara tor e rum, pero más ayan ucꞌampibꞌir conda cache lo que utacrion caqꞌuecꞌo caxana tama ubꞌir e Dios porque axin acꞌampa conda turonto tara tor e rum y axin acꞌampa conda caxin tut e qꞌuin ubꞌan.
1TI 4:9 Pues jax era inteꞌ ojroner xeꞌ tawar tuaꞌ acꞌupesna umen tunor e gente.
1TI 4:10 Y tamar era war inchecsu uyojroner e Dios tic taca y war inqꞌuecꞌo inwawan tut lo que watar porque inturbꞌix nicojcsiaj tama Nidiosir xeꞌ bꞌixir y xeꞌ jax Uyajcorpesiaj tunor e gente tara tor e rum, pero más Ajcorpesiaj tuaꞌ tin e war acꞌupseyanobꞌ tamar.
1TI 4:11 Entonces aren uchicobꞌ lo que war intzꞌijbꞌa tabꞌa era tunor e ajcꞌupesiajobꞌ, y cansenobꞌ tuaꞌ acꞌupseyanobꞌ tama tunor era ubꞌan.
1TI 4:12 Pero ira awacta ubꞌijnuobꞌ e gente que matucꞌa acꞌampibꞌir umen que chꞌom maxtaquet. Sino que turbꞌan abꞌa tuaꞌ iquetpa inteꞌ chequerir tutobꞌ tama tunor lo que aware, y tama tunor lo que ache, y que war ayajta ut tunor e ajcꞌupesiajobꞌ, y que war iqꞌuecꞌo icꞌupseyan tama e Dios, y que war aquetpa erach awirnar tut tunor e gente.
1TI 4:13 Pero tama e tiempo era conda merato incꞌotoy toit, turbꞌan abꞌa tuaꞌ ache leer uyojroner e Dios tut e gente axin, y tuaꞌ aware e gente tuaꞌ uyustes ubꞌobꞌ tut e Dios, y tuaꞌ icanseyan tama uyojroner e Dios.
1TI 4:14 Y ira awacta ucꞌampesnar acꞌampibꞌir lo que ajcꞌunet umen e Dios conda cay ucꞌatbꞌu ucꞌabꞌobꞌ tama ajor cora líder bꞌan cocha arobꞌnobꞌ tuaꞌ uchiobꞌ umen inteꞌ ojroner xeꞌ ajcꞌunobꞌ umen Unawalir e Dios.
1TI 4:15 Pues chen tunor lo que war intzꞌijbꞌa tabꞌa era y turbꞌan abꞌa tamar inyajrer, porque tamar era cꞌani uwirobꞌ tunor e gente que war abꞌoro lo que anata ache tama upatnar e Dios.
1TI 4:16 Y cojcon abꞌa tama tunor lo que war ache y tama tunor lo que war icanseyan. Ira awacta tuaꞌ ache tunor era, porque tamar era iꞌxin acorpes abꞌa y iꞌxin acorpes tunor tin e axin uyubꞌiobꞌ lo que war achecsu axin ubꞌan.
1TI 5:1 Pues ira acꞌaye inteꞌ onian winic, sino que ucꞌani tuaꞌ oꞌjron tacar bꞌan cocha jay jax ani atata, y ucꞌani tuaꞌ iyojron taca e chꞌom maxtacobꞌ bꞌan cocha jay jax ani awijtzꞌinobꞌ.
1TI 5:2 Y ucꞌani tuaꞌ iyojron taca e onian ixictac bꞌan cocha jay jax ani inteꞌ atuꞌ, y ucꞌani tuaꞌ iyojron taca e chꞌom ijchꞌoctacobꞌ bꞌan cocha jay jax ani awijtanobꞌ xeꞌ intera atata.
1TI 5:3 Y tacren e onian ixictac xeꞌ chamen uviejo xeꞌ mamajchi chi tamar, porque ucꞌani tuaꞌ atacarna inteꞌ ixic cocha era umen e hermanuobꞌ tama inteꞌ inteꞌ grupo ajcꞌupesiajobꞌ.
1TI 5:4 Pero jay inteꞌ onian ixic cocha era ayan umaxtac o usitzobꞌ, entonces jax jaxirobꞌ xeꞌ tuaꞌ axin utacriobꞌ. Porque tunor e cꞌunersiaj acay tama uyotot inteꞌ y tamar era jax umaxtac o usitzobꞌ xeꞌ ucꞌani tuaꞌ asutpa utacre inteꞌ onian ixic cocha era. Pues atzay Cadiosir conda uwira achena tunor era.
1TI 5:5 Pero inteꞌ onian ixic cocha era xeꞌ ucꞌani tuaꞌ atacarna umen inteꞌ grupo ajcꞌupesiajobꞌ jax inteꞌ xeꞌ aquetpa ubꞌajner y xeꞌ war ucojco tamar taca e Dios, y xeꞌ machi war uyacta tuaꞌ ucꞌajti taca e Dios tama e día y acbꞌar ubꞌan.
1TI 5:6 Pero e onian ixictac xeꞌ chamen uviejobꞌ xeꞌ axin uche bꞌan taca cocha ucꞌaniobꞌ chamenix tut e Dios motor que warto axanobꞌ tara tor e rum.
1TI 5:7 Cansen tunor e hermanuobꞌ tama tunor era porque tamar era mamajchi tuaꞌ axin asubꞌajresnobꞌ otronyajr.
1TI 5:8 Pero jay ayan tin e machi cꞌani utacre inteꞌ udolientiobꞌ conda war unumse ubꞌobꞌ umen que matucꞌa lo que ucꞌani o jay ayan tin e machi cꞌani utacre ubꞌobꞌ tin e turobꞌ tamar taca intera otot conda war unumse ubꞌobꞌ, entonces chequer que jaxir war umuqui ucꞌupesiaj tama Cawinquirar y que war aquetpa más matucꞌa ucꞌampibꞌir que inteꞌ xeꞌ matucꞌa unata tamar Cawinquirar.
1TI 5:9 Pues entonces aren tuaꞌ atacarna jax taca e onian ixictac xeꞌ war ucojco sesenta año o más y xeꞌ jax taca inteꞌ uviejo ani.
1TI 5:10 Y ucꞌani tuaꞌ aquetpa natanbꞌir umen e gente que inteꞌ ixic cocha era war uche lo que imbꞌutz tut e Dios iraj iraj, y que cꞌapa uchꞌijrse umaxtac tuaꞌ axanobꞌ tama ubꞌir e Dios, y que ixin uwese tin e cꞌotoy tama uyotot, y que ixin upoqui uyocobꞌ e ajcꞌupesiajobꞌ, y que ixin utacre tin e war unumse ubꞌobꞌ, y que cay uturbꞌa ubꞌa tuaꞌ axin uche meyra lo que imbꞌutz tut e Dios.
1TI 5:11 Pero inteꞌ ixic xeꞌ chamen uviejo xeꞌ mato tucꞌa usesenta año ma erer aquetpa tuaꞌ atacarna umen inteꞌ grupo ajcꞌupesiajobꞌ. Porque jay atacarna ani bꞌajcꞌat achena ubꞌijnu umen uwerir este que asutpa anujbꞌi otronyajr, y tamar era machi tuaꞌ acꞌapa uche tunor lo que cay uyare e Cristo que bꞌan tuaꞌ uche.
1TI 5:12 Y tamar era cꞌani acꞌaxi tunor e mabꞌambꞌanir era tama ujor umen que machi cꞌapa uche tunor lo que cay uyare e Cristo que bꞌan tuaꞌ uche.
1TI 5:13 Pero ayanto más lo que erer anumuy tama inteꞌ ixic cocha era xeꞌ mato tucꞌa usesenta año, porque erer acay axana awara tama inteꞌ inteꞌ otot, y erer ucani e cꞌoyir, y erer acay uqꞌueche axin inteꞌ ojroner upater otronteꞌ, y erer acay uyose ubꞌa tamar lo que majax tuaꞌ, y erer axin oꞌjron lo que majax imbꞌutz tuaꞌ aꞌrobꞌna.
1TI 5:14 Y tamar era lo que inware e ixictac xeꞌ chamen uviejo que mato jax onian ixic que bueno tuaꞌ asutpa anujbꞌiobꞌ otronyajr y tuaꞌ axinto achꞌijtesianobꞌ y tuaꞌ axin ucojcobꞌ umaxtac y uviejo. Y tamar era matucꞌa tamar tuaꞌ axin aꞌrobꞌna upaterobꞌ umen tin e aqꞌuijna uwira upatnar e Dios.
1TI 5:15 Porque ayan e ixictac xeꞌ chamen uviejo xeꞌ cay uyactobꞌ ubꞌir e Dios tuaꞌ asutpa axiobꞌ tupat e Satanás.
1TI 5:16 Y jay inteꞌ hermana ayan inteꞌ ixic xeꞌ chamen uviejo tujam ufamilia ucꞌani tuaꞌ axin utacre tuaꞌ machi acꞌaxi tujor inteꞌ grupo ajcꞌupesiajobꞌ tuaꞌ utacre e ixic era. Y tamar era e grupo ajcꞌupesiajobꞌ era ererto utacriobꞌ tin e aquetpa choquem inyajrer.
1TI 5:17 Pues inteꞌ líder xeꞌ alocꞌoy ubꞌijres tunor lo que war anumuy tama inteꞌ grupo ajcꞌupesiajobꞌ ucꞌani tuaꞌ atojya chajr tamar upatnar era umen e ajcꞌupesiajobꞌ. Pero más ucꞌani tuaꞌ atojya tin e war uchecsu uyojroner e Dios y xeꞌ war acanseyan tamar.
1TI 5:18 Porque chꞌar tzꞌijbꞌabꞌir tama uyojroner e Dios y che: “Ira icachi uyej e wacax conda war axana tujor e trigo tuaꞌ ulocse usojqꞌuir”, xeꞌ che tama uyojroner e Dios. Y ayan ubꞌan tama uyojroner e Dios tiaꞌ che: “Inteꞌ man ucꞌani tuaꞌ atojya tamar upatnar.” Bꞌan che tama uyojroner e Dios.
1TI 5:19 Y ira aturbꞌa abꞌa tama inteꞌ ojroner upater inteꞌ líder jay majax qꞌuechbꞌir umen chateꞌ o uxteꞌ ajchecsuyaj.
1TI 5:20 Pero tin e machi cꞌani uyactobꞌ e mabꞌambꞌanir lo que war uchiobꞌ ucꞌani tuaꞌ acꞌaynobꞌ tut tunor e ajcꞌupesiajobꞌ tuaꞌ acꞌotoy abꞌactobꞌ e inmojr tuaꞌ machi axin uchiobꞌ e mabꞌambꞌanir era ubꞌan.
1TI 5:21 Pues Timoteo, cꞌani inwaret era tut Cadiosir y tut e Cristo Jesús y tut tunor e angelobꞌ xeꞌ sicbꞌabꞌirobꞌ umen e Dios que ucꞌani tuaꞌ icꞌupseyan tut tunor lo que war intzꞌijbꞌa tabꞌa era. Porque ucꞌani tuaꞌ iꞌxin acꞌaye tunor tin e war uchiobꞌ e mabꞌambꞌanir motor jay jax inteꞌ xeꞌ itzay awira o motor jay machi. Porque ucꞌani tuaꞌ achempa lo que erach tut e Dios watar lo que watar.
1TI 5:22 Y conda iꞌxin apacbꞌu acꞌabꞌ tama inteꞌ winic tuaꞌ aquetpa líder tama inteꞌ grupo ajcꞌupesiajobꞌ ucꞌani tuaꞌ awira bꞌajxan jay ayan lo que ayan tama ucuxtar xeꞌ majax bꞌan cocha ucꞌani e Dios. Porque tamar era machi tuaꞌ asutpa acꞌaxi tama ajor net jay machi alocꞌoy uche upatnar era. Cojcon abꞌa tama tunor era.
1TI 5:23 Entonces Timoteo, cocha war taca acꞌuxun anac era, cꞌani inwaret que majax jaꞌ taca tuaꞌ oychꞌi sino que ucꞌani tuaꞌ oychꞌi imbꞌijc vino ubꞌan tuaꞌ usisijres anac.
1TI 5:24 Pues ayan tin e war uche e mabꞌambꞌanir xeꞌ aquetpa chequer tut e gente, y tamar era war asutpa acꞌaxi uyeror tama ujor wacchetaca era. Pero ayan ubꞌan tin e war uche e mabꞌambꞌanir mucur y tamar era machi war aquetpa chequer tama e tiempo era. Pero tama e tiempo xeꞌ watar axin aquetpa chequer tut tunor.
1TI 5:25 Y ayan tin e war uche lo que imbꞌutz xeꞌ aquetpa chequer tut e gente. Y ayan ubꞌan tin e war uche lo que imbꞌutz que majax chequer tut e gente, pero axin aquetpa chequer que imbꞌutz tunor era watar e día.
1TI 6:1 Pues entonces tin e quetpobꞌ inteꞌ man xeꞌ mambꞌir inyajrer ucꞌani tuaꞌ acꞌupseyanobꞌ tut tunor lo que arobꞌnobꞌ umen upatronobꞌ. Y bꞌan ucꞌani tuaꞌ uchiobꞌ tuaꞌ machi asubꞌajrna ucꞌabꞌa Cadiosir y tuaꞌ machi achecta inteꞌ ojroner upater e canseyaj lo que qꞌuecher camener.
1TI 6:2 Y inteꞌ man xeꞌ mambꞌir inyajrer jay ayan upatron xeꞌ ajcꞌupesiaj tama Cawinquirar ubꞌan, ucꞌani tuaꞌ acꞌupseyan más tut y ucꞌani tuaꞌ uturbꞌa ubꞌa más tama upatnar umen que tin e war atacarna umen upatnar era jax inteꞌ umaxtac e Dios xeꞌ chojresbꞌir ut umen e Dios ubꞌan. Pues cansen tunor lo que war intzꞌijbꞌa tabꞌa era taca tunor e ajcꞌupesiajobꞌ y arenobꞌ que bꞌan ucꞌani tuaꞌ uchiobꞌ.
1TI 6:3 Pues jay ayan tin e war ucanse lo que majax erach y xeꞌ machi ucꞌani ucanseyaj Cawinquirar Jesucristo y xeꞌ machi ucꞌani e canseyaj lo que utacrion tuaꞌ caquetpa imbꞌutz tut e Dios
1TI 6:4 jax inteꞌ xeꞌ war uche ubꞌa que más unata motor que matucꞌa war unata. Y jaxir war abꞌiriti axin tama inteꞌ ojroner umen que ajmuac ujor. Y tamar era axin oꞌchoy e cꞌuxnaqꞌuir tama meyra ajcꞌupesiajobꞌ umen lo que war uche jaxir, y meyra ajcꞌupesiajobꞌ machi ixto tuaꞌ ucꞌaniobꞌ lo que ucꞌaniobꞌ e inmojr, y e ajcꞌupesiajobꞌ cꞌani acay uqꞌuijnes ubꞌobꞌ, y axin oꞌchoy e mabꞌambꞌan bꞌijnusiaj tamarobꞌ este que machi ixto tuaꞌ acꞌupseyanobꞌ tamar lo que war aꞌrobꞌnobꞌ umen e inmojr.
1TI 6:5 Y inteꞌ cocha era jax taca inteꞌ ajqꞌuecraner, y chꞌur ujor tamar taca e mabꞌambꞌanir, y machi unata tucꞌa xeꞌ erach. Y inteꞌ cocha era war ubꞌijnu que ucꞌani tuaꞌ uchꞌami e tumin umen taca que war axana tama ubꞌir e Dios.
1TI 6:6 Pues meyra atujri tut e Dios que war caxana tama ubꞌir y que war catzay tamar, porque jay bꞌan cache entonces meyra tuaꞌ caxin cachꞌami tuaꞌ e Dios conda caxin tichan tut e qꞌuin.
1TI 6:7 Pues chequer que matucꞌa caqꞌueche tari conda cuxpon tara tor e rum, y chequer ubꞌan que matucꞌa tuaꞌ caqꞌueche axin conda caxin cachamay.
1TI 6:8 Pero tara tor e rum jay atzꞌacta lo que tuaꞌ cacꞌuxi y jay atzꞌacta e bꞌujc tuaꞌ calapi ucꞌani tuaꞌ catzay tamar lo que ayan ticabꞌa era.
1TI 6:9 Pero tunor tin e war uyusre tuaꞌ utajwi meyra e tumin war uyacta ubꞌobꞌ tuaꞌ acꞌaxiobꞌ tama e mabꞌambꞌanir. Y tamar era acay oꞌchoy meyra useriaj tuaꞌ uchiobꞌ lo que matucꞌa ucꞌampibꞌir y xeꞌ erer uche unumse ubꞌobꞌ, y tamar era axin atijrpa tunor uwirnar este que acꞌaxi axin tama e cꞌajc.
1TI 6:10 Porque e useriaj tuaꞌ uchꞌami meyra e tumin jax ucajyesnibꞌir tama tunor e mabꞌambꞌanir. Pues ayan tin e cay xanobꞌ tama ubꞌir e Dios, y de allí cay uyusre tuaꞌ uchꞌami meyra e tumin y tamar era ixin uyactobꞌ ubꞌir e Dios. Y coner war unumse ubꞌobꞌ meyra tama tunor era.
1TI 6:11 Pues Timoteo, net jax inteꞌ winic tuaꞌ e Dios; loqꞌuen ajner tut tunor e mabꞌambꞌanir cocha era. Turbꞌan abꞌa tama tunor lo que erach, y turbꞌan abꞌa tamar lo que imbꞌutz, y turbꞌan abꞌa tuaꞌ icꞌupseyan más tama e Dios, y yajtan ut inteꞌ cocha inteꞌ. Qꞌuecꞌojsen abꞌa tuaꞌ iwawan tut tunor lo que watar, y quetpen incꞌun awirnar tut tunor.
1TI 6:12 Quete wabꞌun tunor tin e war acanseyan tamar lo que majax bꞌan cocha ucanseyaj Cawinquirar. Cojcon acuxtar xeꞌ machi tuaꞌ acꞌapa xeꞌ pejcnet tuaꞌ achꞌami umen e Dios conda cay achecsu abꞌa tut meyra gente que war icꞌupseyan tama Cawinquirar.
1TI 6:13 Pues Timoteo, cꞌani inwaret tut Cadiosir xeꞌ jax xeꞌ cay uyajcꞌu ucuxtar tunor lo que ayan y tut e Cristo Jesús xeꞌ conda war uchecsu ubꞌa tut inteꞌ nuxi ajcꞌampar xeꞌ ucꞌabꞌa Poncio Pilato cay uchecsu inteꞌ ojroner xeꞌ imbꞌutz, pues tutobꞌ cꞌani inwaret era que:
1TI 6:14 Cꞌupseyanen inyajrer tut lo que war intzꞌijbꞌa tabꞌa era tuaꞌ machi isubꞌajra nien imbꞌijc conda achecta watar Cawinquirar Jesucristo otronyajr.
1TI 6:15 Pues jaxir tuaꞌ achecta watar tama e hora conda Cadiosir ucꞌani, porque jax Cadiosir xeꞌ jax taca Cawajyum xeꞌ chojbꞌesbꞌir ut inyajrer y xeꞌ jax taca e más nuxi Ajcꞌotorer tujor tunor e ajcꞌotorerobꞌ, y jax jaxir xeꞌ jax e más nuxi Ajwinquirar tujor tunor e ajwinquirarobꞌ.
1TI 6:16 Pues jax taca Cadiosir xeꞌ ma tiaꞌ tuaꞌ axin achamay. Y jax jaxir xeꞌ aturuan macuir e janchꞌaquenar tiaꞌ mamajchi erer acꞌotoy tut. Pues ma tiaꞌ erna jaxir nien umen inteꞌ winic, porque inteꞌ winic machi uyubꞌi uwira ut jaxir jay turuto tara tor e rum. Catattzꞌic ucꞌabꞌa Cadiosir xeꞌ meyra ayan ucꞌotorer iraj iraj. Amén.
1TI 6:17 Pues entonces aren tin e ayan meyra utumin tara tor e rum tuaꞌ machi utattzꞌi ubꞌobꞌ tamar lo que ayan tuobꞌ, y aren que machi tuaꞌ ucojcobꞌ tama e tumin porque wacchetaca erer asatpa tunor era, sino que aren tuaꞌ ucojcobꞌ tama e Dios xeꞌ bꞌixir xeꞌ war uyajcꞌon tunor lo que ayan xeꞌ imbꞌutz tuaꞌ uyubꞌion catzay tamar.
1TI 6:18 Aren tin e ayan utumin tuaꞌ uchiobꞌ meyra lo que imbꞌutz tut e Dios y tuaꞌ awechcꞌa ucꞌabꞌobꞌ tut tin e tzajtaca utobꞌ.
1TI 6:19 Porque jay bꞌan uchiobꞌ cꞌani achecta lo que war uyusre uchꞌamiobꞌ tama e tiempo xeꞌ watar, y cꞌani acay aturuanobꞌ tama e cuxtar xeꞌ meyra ayan ucꞌampibꞌir.
1TI 6:20 Pues entonces Timoteo, cojcon tunor e canseyaj lo que ajcꞌubꞌiret, y ira achiquini inteꞌ ojroner xeꞌ matucꞌa ucꞌampibꞌir, y ira oybꞌi lo que arobꞌna umen tin e war utattzꞌi ubꞌobꞌ que jaxobꞌ taca war unatobꞌ meyra lo que mucur.
1TI 6:21 Porque ayan tin e cay cꞌupseyanobꞌ tamar lo que arobꞌnobꞌ umen e winicobꞌ cocha era xeꞌ cay najtranobꞌ tut e Dios este que ixin uyactobꞌ ubꞌir e Dios inyajrer. Que e Dios utacriquet tama tunor. Tara acꞌapa tunor niwojroner, che e Pablo.
2TI 1:1 Pues nen xeꞌ Pabloen jax inteꞌ apóstol tuaꞌ e Cristo Jesús umen que bꞌan ucꞌani e Dios xeꞌ ixin uyajcꞌon e cuxtar tama e Cristo Jesús xeꞌ machi tuaꞌ acꞌapa bꞌan cocha cay uyareon ixnix.
2TI 1:2 War intzꞌijbꞌa e carta era tabꞌa, Timoteo xeꞌ inchoj oit nimener y xeꞌ bꞌanet cocha inteꞌ nisitz. Pues achꞌamic e tacarsiaj taca e cꞌunersiaj y e jiriar tuaꞌ Catata Dios y tuaꞌ Cawinquirar Jesucristo.
2TI 1:3 Pues conda incꞌajbꞌuet inxin intattzꞌi ucꞌabꞌa Cadiosir xeꞌ war unjtzꞌi ut taca inteꞌ bꞌijnusiaj xeꞌ imbꞌutz bꞌan cocha cay uchiobꞌ tunor nitata viejobꞌirobꞌ, y tamar era war incꞌajti taca e Dios tamaret tama e día y acbꞌar ubꞌan.
2TI 1:4 Y acꞌajpa taca nimener conda cay uqꞌuiet conda locꞌoyen, y coner war incꞌani tuaꞌ inwiret otronyajr tuaꞌ erer intzayjres nibꞌa tacaret.
2TI 1:5 Y cꞌar nimener que ayan acꞌupesiaj xeꞌ erach tama e Dios bꞌan cocha ayan tama anoya xeꞌ ucꞌabꞌa Loida y bꞌan cocha ayan tama atuꞌ xeꞌ ucꞌabꞌa Eunice xeꞌ cay cꞌupseyanobꞌ tama e Dios bꞌajxan. Y tamar era war innata que lar acꞌupesiaj tabꞌa tama e Dios ubꞌan.
2TI 1:6 Y tamar era cꞌani inwaret que ira awacta atajpa acꞌampibꞌir lo que ajcꞌunet umen e Dios conda cay incatbꞌu nicꞌabꞌ tamaret conda incꞌajti taca e Dios tamaret.
2TI 1:7 Porque Cadiosir uyajcꞌon ucꞌotorer majax tuaꞌ caxin cabꞌacta sino que uyajcꞌon ucꞌotorer tuaꞌ uqꞌuecꞌojsion, y tuaꞌ aquetpa incꞌun cawirnar, y tuaꞌ uyubꞌion cacojco cabꞌa tuaꞌ machi cache e mabꞌambꞌanir.
2TI 1:8 Y ira isubꞌajra tuaꞌ achecsu uyojroner e Dios tamar Cawinquirar tut e gente axin, y ira isubꞌajra tamaren umen que turen tara tama e cárcel. Pero natan que watar lo que ucꞌani tuaꞌ anumse abꞌa tamar umen que war achecsu uyojroner e Dios axin, pero Cadiosir axin uyajqꞌuet ucꞌotorer tuaꞌ uyubꞌiet anumse tunor era.
2TI 1:9 Porque jax Cadiosir xeꞌ ixin ucorpeson y xeꞌ ixin usicbꞌon tuaꞌ caxin cache lo que erach tut. Y ixin usicbꞌon umen que bꞌan war ucꞌani y majax umen lo que cay cache xeꞌ imbꞌutz tut, sino que usicbꞌon umen que cꞌani uyajcꞌon utacarsiaj tama e Cristo Jesús, y bꞌan cay uche conda ne mato uche or e rum era.
2TI 1:10 Pero coner chectesna ticoit que Cadiosir cꞌani uyajcꞌon utacarsiaj tamar lo que uche conda checta Cawajcorpesiaj xeꞌ jax e Cristo Jesús. Porque jax e Jesús era xeꞌ ixin utijres tunor ucꞌotorer e chamer, y xeꞌ tamar uchamer era ixin uchectes ticoit que erer cachꞌami e cuxtar xeꞌ machi tuaꞌ acꞌapa.
2TI 1:11 Pues jax e ojroner era que Cadiosir usicbꞌen tuaꞌ inchecsu tut e gente axin, y usicbꞌen tuaꞌ inquetpa inteꞌ apóstol y tuaꞌ inquetpa inteꞌ ajcanseyaj tuaꞌ inxin incanse tunor era tut e gente axin.
2TI 1:12 Y umen que cay inchecsu uyojroner e Dios tama e corpesiaj era war innumse nibꞌa coner, pero nen machi insubꞌajra tamar era porque war innata chi tamar war incꞌupseyan. Y cꞌapa inturbꞌa nibꞌa tama e Dios y innata ixto yaꞌ que ayan ucꞌotorer tuaꞌ ucojcuen este que acꞌotoy e día conda asutpa watar jaxir otronyajr.
2TI 1:13 Pues entonces cojcon e canseyaj lo que cay oybꞌi inche y cansen net bꞌan taca cocha era ubꞌan. Pero ucꞌani tuaꞌ icꞌupseyan tama e Cristo Jesús tuaꞌ utacret, y ucꞌani tuaꞌ ayajta ut tunor e gente bꞌan cocha ucꞌani e Cristo ubꞌan.
2TI 1:14 Cojcon tunor e canseyaj xeꞌ erach xeꞌ ajcꞌubꞌiret tacar utacarsiaj Unawalir e Dios xeꞌ war aturuan tama cawalma.
2TI 1:15 Pues warix anata que tunor tin e war acꞌupseyanobꞌ tama Cawinquirar tama e departamento Asia uyactenobꞌix. Y tujam tin e cay uyactenobꞌ aquetpobꞌ e Figelo y e Hermógenes.
2TI 1:16 Pero que Cawinquirar uwirsic meyra ucꞌunersiaj tut e Onesíforo taca tunor tin e turobꞌ tama uyotot, porque jaxir cay yopa taniut tuaꞌ utzayjresen y machi subꞌajra ut tamaren motor que cacharen tara tama e cárcel.
2TI 1:17 Porque conda yopa tama e chinam Roma cay usicbꞌen tuaꞌ unata tiaꞌ turen, y machi utajwien wacchetaca pero machi uyacta tuaꞌ usicbꞌen este que utajwien.
2TI 1:18 Que Cawinquirar axin utacre e Onesíforo era tuaꞌ utajwi meyra ucꞌunersiaj e Dios conda acꞌotoy e día tuaꞌ achena juzgar tunor e gente. Pues net warix anata que jaxir cay utacrion meyra conda turonto tama e chinam Éfeso.
2TI 2:1 Pues Timoteo, bꞌanet cocha inteꞌ nisitz, qꞌuecꞌojsen abꞌa tama e tacarsiaj lo que ayan tama e Cristo Jesús.
2TI 2:2 Pues sicbꞌan cora winicobꞌ xeꞌ ayan ucꞌampibꞌirobꞌ tuaꞌ acanseyanobꞌ y cansenobꞌ e canseyaj lo que cay oybꞌi tamaren conda war incanseyan tut meyra gente y aren e winicobꞌ era tuaꞌ asutpa ucansiobꞌ tunor era tut e inmojr ubꞌan.
2TI 2:3 Y qꞌuecꞌojsen abꞌa tuaꞌ uyubꞌiet anumse abꞌa tut lo que watar tacaron bꞌan cocha inteꞌ soldado xeꞌ imbꞌutz xeꞌ tuaꞌ e Cristo Jesús.
2TI 2:4 Pues tin e aquetpa inteꞌ soldado ma erer uyose ubꞌa tamar lo que majax militar sino que ucꞌani tuaꞌ ubꞌijnu uche jax taca lo que atzay eꞌrna umen tin e aquetpa tujor jaxir. Y bꞌanon ubꞌan xeꞌ manon tuaꞌ Cawinquirar, ucꞌani tuaꞌ cache jax taca lo que atzay eꞌrna umener.
2TI 2:5 Pues tin e axin aꞌsi tama inteꞌ aras erer uchꞌami inteꞌ tuanibꞌir jay upaxi e inmojr xeꞌ war aꞌsiobꞌ tacar, pero ucꞌani tuaꞌ uche bꞌan taca cocha ucꞌani e aras era tuaꞌ uyubꞌi uchꞌami e tuanibꞌir. Y bꞌanon ubꞌan xeꞌ umaxtacon e Dios, ucꞌani tuaꞌ cache bꞌan taca cocha ucꞌani tuaꞌ uyubꞌion cachꞌami catuanibꞌir tuaꞌ.
2TI 2:6 Y tin e axin apatna meyra tama e rum jax xeꞌ tuaꞌ uchꞌami e cosecha era bꞌajxan. Y bꞌan tunoron xeꞌ ajpatnaron tama Cadiosir ubꞌan.
2TI 2:7 Bꞌijnun tamar lo que war inwaret era, y Cawinquirar tuaꞌ axin utacret tuaꞌ icꞌotoy anata tucꞌa war che tunor era.
2TI 2:8 Pues bꞌijnun tamar e Jesucristo xeꞌ sutpa bꞌixcꞌa tujam e chamenobꞌ y xeꞌ tari tama uchꞌajnar e rey David xeꞌ turuan tama e onian tiempo. Jax era uyojroner e Dios tama e corpesiaj lo que war inchecsu tut tunor e gente axin.
2TI 2:9 Y tamar era war innumse nibꞌa coner este que ucachienobꞌ taca inteꞌ cadena y uyosenobꞌ tama e cárcel bꞌan cocha jay ajxujchꞌen ani, pero uyojroner e Dios machi quetpa cachar.
2TI 2:10 Y tamar era war inqꞌuecꞌo inwawan tut tunor lo que war innumse nibꞌa tuaꞌ uyubꞌi acꞌotoy uchꞌamiobꞌ e corpesiaj tama e Cristo Jesús tunor tin e sicbꞌabꞌirobꞌ umen e Dios tuaꞌ uchꞌamiobꞌ e tawarer xeꞌ machi tuaꞌ acꞌapa.
2TI 2:11 Pues jax era inteꞌ ojroner xeꞌ erach: Jay ixionix cachoqui cocha turu ani cawirnar, cꞌani caquetpa bꞌan cocha jay chamayon ani taca e Jesús, y jay bꞌan cache, cꞌani caxin caturuan taca e Jesús ubꞌan.
2TI 2:12 Y jay caqꞌuecꞌo cawawan tut lo que war canumse cabꞌa taca e Cristo Jesús, cꞌani caxin cacꞌotori tacar ubꞌan. Pero jay caxin camuqui que machi canata chi e Cristo Jesús, jaxir cꞌani axin umuqui que machi unata chion non ubꞌan.
2TI 2:13 Jay non machi acꞌapa cache tunor lo que ucꞌani ani tuaꞌ cache xeꞌ ajcꞌupesiajon tama e Cristo Jesús, pero jaxir acꞌapa ixto uche tunor bꞌan taca cocha arobꞌnon umener porque jaxir machi uyubꞌi uche asutpa intiach cocha uwirnar.
2TI 2:14 Pues entonces cꞌajpesic e ajcꞌupesiajobꞌ tama tunor era otronyajr. Aren tuaꞌ uyactobꞌ e bꞌiritir tamar taca inteꞌ ojroner, porque matucꞌa ucꞌampibꞌir tunor era, y intaca axin utijres ujorobꞌ tin e uyubꞌiobꞌ e ojroner cocha era.
2TI 2:15 Turbꞌan abꞌa tuaꞌ alocꞌoy imbꞌutz tunor lo que war ache tut e Dios bꞌan cocha uche inteꞌ ajpatnar xeꞌ war uturbꞌa ubꞌa tuaꞌ alocꞌoy imbꞌutz tunor lo que war uche, y tamar era matucꞌa tamar tuaꞌ asubꞌajra. Y turbꞌan abꞌa tuaꞌ aquetpa erach tunor e canseyaj lo que ache tamar uyojroner e Dios.
2TI 2:16 Ira achiquini inteꞌ tojbꞌen ojroner xeꞌ matucꞌa ucꞌampibꞌir. Porque tunor tin e uturbꞌa ubꞌa tama inteꞌ ojroner cocha era intaca anajtranobꞌ axin más tut e Dios.
2TI 2:17 Porque tunor e tojbꞌen ojroner cocha era awechcꞌa axin tama tunor or e lugar bꞌan cocha inteꞌ chec tama inteꞌ xeꞌ abꞌoro axin. Y bꞌan abꞌoro axin e mabꞌambꞌanir tama uyalmobꞌ tin e war achiquiniobꞌ tama inteꞌ ojroner cocha era. Pues bꞌan cocha era war unumse ubꞌobꞌ e Himeneo y e Fileto coner.
2TI 2:18 Pues jaxirobꞌ ixin uyactobꞌ e canseyaj tamar lo que erach y coner war ucansiobꞌ e gente axin que cꞌapa numuy e hora conda e Dios tuaꞌ asutpa ubꞌixqꞌueson tujam e chamenobꞌ. Y tamar era cay utijresobꞌ ucꞌupesiaj meyra gente este que machi ixto unatobꞌ tucꞌa tuaꞌ acꞌupseyanobꞌ tamar coner.
2TI 2:19 Pero erach uyojroner e Dios xeꞌ ma tiaꞌ tuaꞌ asutpa intiach. Porque bꞌan chꞌar tzꞌijbꞌabꞌir que: “Cawinquirar unata tin xeꞌ tuach”, y che otronyajr que: “Tunor tin e uchecsu ubꞌobꞌ que umaxtacobꞌ e Dios ucꞌani tuaꞌ uyactobꞌ tunor e mabꞌambꞌanir.” Bꞌan chꞌar tzꞌijbꞌabꞌir tama uyojroner e Dios.
2TI 2:20 Pues tama uyotot inteꞌ winic xeꞌ ayan utumin ayan lo que atujri y ayan lo que machi atujri. Ayan lo que chembꞌir tama e oro y ayan lo que chembꞌir tama e plata. Pero ayan ubꞌan tama e otot era lo que chembꞌir tama e teꞌ y lo que chembꞌir tama e tzꞌijc rum. Ayan lo que tuaꞌ acꞌampesna tama inteꞌ nojqꞌuin y ayan lo que tuaꞌ acꞌampesna iraj iraj.
2TI 2:21 Y bꞌan tama e gente ubꞌan. Jay inteꞌ axin uyacta tunor e mabꞌambꞌanir axin aquetpa imbꞌutz tuaꞌ uche lo que galan uwirnar, y axin asutpa erach uwirnar, y axin achecta ucꞌampibꞌir tuaꞌ oꞌbꞌna acꞌampesna umen Cawajcanseyaj cocha ustesna tunor uwirnar tuaꞌ uyubꞌi axin uche tunor lo que imbꞌutz tut e Dios.
2TI 2:22 Entonces ajnen tut tunor e mabꞌambꞌanir lo que uyusre uche inteꞌ chꞌom sitz, y turbꞌan abꞌa tuaꞌ aquetpa erach tunor lo que war ache, y turbꞌan abꞌa tuaꞌ achꞌiꞌ acꞌupesiaj tama e Dios, y turbꞌan abꞌa tuaꞌ ayajta utobꞌ tunor e gente, y turbꞌan abꞌa tuaꞌ acojco e jiriar tama awalma, porque bꞌan cocha era war uchiobꞌ tunor tin e war upejcobꞌ ucꞌabꞌa Cawinquirar y xeꞌ war axanobꞌ imbꞌutz tut.
2TI 2:23 Ira iyojron tacar tin e cꞌani abꞌiriti iraj iraj tamar lo que matucꞌa ucꞌampibꞌir, porque tin e oꞌjron cocha era axin aqꞌuijna wacchetaca.
2TI 2:24 Tin e aquetpa man tuaꞌ Cawinquirar ma erer uyusre abꞌiriti iraj iraj, sino que ucꞌani tuaꞌ aquetpa incꞌun uwirnar tut tunor, y ucꞌani que ayan ucꞌampibꞌir tuaꞌ ucanse uyojroner e Dios, y ucꞌani tuaꞌ uyacta bꞌan taca conda ayan lo que war uche unumse ubꞌa.
2TI 2:25 Y tin e aquetpa man tuaꞌ Cawinquirar ucꞌani tuaꞌ aquetpa incꞌun uwirnar conda war oꞌjron taca tin e machi war ucꞌani uyojroner e Dios. Porque bꞌajcꞌat Cadiosir axin uturbꞌa tama uyalma e winic era tuaꞌ uyacta e mabꞌambꞌanir este que axin uchꞌami lo que erach,
2TI 2:26 y este que axin abꞌixcꞌa ujor tuaꞌ alocꞌoy ajni tut uchꞌenar e diablo tiaꞌ quetpa cachar ani war uche lo que arobꞌna umen e diablo era.
2TI 3:1 Pues entonces ucꞌani tuaꞌ anata que tama ucꞌapesnibꞌir e tiempo era cꞌani asutpa intran tunor.
2TI 3:2 Pues e winicobꞌ tama e tiempo xeꞌ watar cꞌani ubꞌijnuobꞌ tamar taca ubꞌobꞌ y tamar taca e tumin, y cꞌani utattzꞌi ubꞌobꞌ que jaxobꞌ taca ayan ucꞌampibꞌir, y cꞌani ubꞌijnuobꞌ que otronteꞌ cocha jaxirobꞌ matucꞌa, y cꞌani uqꞌuijnesobꞌ e Dios taca uyojronerobꞌ, y machi tuaꞌ acꞌupseyanobꞌ tut utatobꞌ, y machi tuaꞌ atzayobꞌ motor que axin ajcꞌunobꞌ lo que imbꞌutz, y machi tuaꞌ ucꞌaniobꞌ nien inteꞌ religión.
2TI 3:3 Y machi tuaꞌ uyajta utobꞌ upiarobꞌ, y mamajchi tacar cꞌani acꞌumpobꞌ, y cꞌani oꞌjronobꞌ upater e inmojr, y machi tuaꞌ uyubꞌi uquete ubꞌobꞌ tamar lo que uyusre uche uwerirobꞌ, y cꞌani aquetpobꞌ ucatener utobꞌ, y cꞌani uxejbꞌiobꞌ ut tin e war uchiobꞌ lo que imbꞌutz.
2TI 3:4 Y e winicobꞌ tama e tiempo xeꞌ watar cꞌani umajres otronteꞌ que war atzay uwira pero tuaꞌ taca uche unumse ubꞌa inteꞌ, y cꞌani axin uchiobꞌ lo que matucꞌa ucꞌampibꞌir conda merato ubꞌijnuobꞌ jay imbꞌutz o jay majax imbꞌutz, y cꞌani ubꞌijnuobꞌ que jaxobꞌ taca ayan ucꞌampibꞌir, y cꞌani usicbꞌobꞌ jax taca lo que uyusreobꞌ uche uwerir pero machi cꞌani usajcobꞌ e Dios.
2TI 3:5 Y axin uche ubꞌobꞌ que war utattzꞌiobꞌ ut e Dios tut e gente pero axin oꞌjronobꞌ upater tunor era que majresiaj taca conda turobꞌ ubꞌajnerobꞌ. Pero ira aturbꞌa abꞌa tama e gente cocha era.
2TI 3:6 Pues e winicobꞌ era axin umajres e gente tacar ucanseyajobꞌ tuaꞌ uyubꞌi oꞌchoyobꞌ tzꞌustaca tama e ototobꞌ tuaꞌ acay upejca e ixictac xeꞌ wacchetaca amajresna. Pues e ixictac era bꞌutꞌur ubꞌijnusiajobꞌ taca e sian mabꞌambꞌanir, y tamar era aquerejbꞌna axin umen lo que uyusre uche uwerir.
2TI 3:7 Pues war uche ubꞌobꞌ que war acanuobꞌ pero ma tiaꞌ acꞌotoy ucaniobꞌ lo que erach tamar Cawinquirar Jesucristo.
2TI 3:8 Pues tama e onian tiempo ayan ani chateꞌ winicobꞌ xeꞌ obꞌna uchiobꞌ e mágia xeꞌ ucꞌabꞌa Janes y Jambres xeꞌ cꞌani ani uquete uwabꞌuobꞌ tunor lo que war uche e Moisés. Y bꞌanobꞌ e winicobꞌ era ubꞌan, cꞌani uquete uwabꞌuobꞌ tunor lo que erach. Pero satrem ujorobꞌ inyajrer, y cocha machi cꞌani acꞌupseyanobꞌ tama e Dios machi war achꞌajmobꞌ umener ubꞌan.
2TI 3:9 Pero machi tuaꞌ abꞌoro axin lo que war ucansiobꞌ e winicobꞌ era, porque cꞌani aquetpa chequer tut tunor e gente que matucꞌa usasaꞌ, bꞌan cocha numuy tama e Janes y Jambres tama e onian tiempo que irna umen e gente que mabꞌambꞌan lo que war uchiobꞌ.
2TI 3:10 Pero net Timoteo, war anata tunor e canseyaj lo que inwajcꞌu, y cocha inturuan, y lo que war imbꞌijnu tuaꞌ inche. Y war anata tamar nicꞌupesiaj, y que machi inqꞌuijna wacchetaca, y que war inyajta ut tunor e gente, y que inqꞌuecꞌo inwawan tut lo que watar.
2TI 3:11 Y war anata que meyra cay innumse nibꞌa y que ayan tin e aqꞌuijna uwirenobꞌ xeꞌ cay usajquenobꞌ tuaꞌ uchien innumse nibꞌa. Pues bꞌan numuy tama e chinam Antioquía y tama e chinam Iconio y tama e chinam Listra. Pero Cawinquirar ucorpesen tama tunor era.
2TI 3:12 Pues chequer que tunor tin e cꞌani axanobꞌ erach tama ubꞌir e Cristo Jesús cꞌani axejbꞌna utobꞌ umen tin machi war acꞌupseyanobꞌ tama Cadiosir.
2TI 3:13 Pero tin e mabꞌambꞌan uwirnarobꞌ y xeꞌ ajmajresiajobꞌ cꞌani asutpa más calapir uwirnarobꞌ, y cꞌani axin amajresianobꞌ y cꞌani amajresnobꞌ jaxirobꞌ ubꞌan.
2TI 3:14 Entonces Timoteo, turbꞌan abꞌa tuaꞌ ache bꞌan taca cocha e canseyaj lo que cay achꞌami y xeꞌ war anata que majax majresiaj, porque war anata chi umen cansebꞌiret tama tunor era.
2TI 3:15 Porque conda chuchuetto cay anata tunor uyojroner e Dios xeꞌ erer ucanset cocha tuaꞌ atajwi e corpesiaj lo que ayan tama e Cristo Jesús conda axin acꞌupseyan inteꞌ tamar.
2TI 3:16 Pues tunor lo que chꞌar tzꞌijbꞌabꞌir tama uyojroner e Dios ebꞌetbꞌir tari umen e Dios. Y ayan ucꞌampibꞌir tuaꞌ ucansion, y tuaꞌ ucꞌayon conda war cache lo que majax bueno, y ayan ucꞌampibꞌir tuaꞌ uyareon conda ucꞌani tuaꞌ costes cabꞌa, y tuaꞌ ucansion cocha tuaꞌ caxana erach tut e Dios.
2TI 3:17 Y tamar era tin e cꞌani uche upatnar e Dios erer acꞌotoy uchꞌami tunor ucꞌampibꞌir tuaꞌ uyubꞌi axin uche tunor lo que imbꞌutz.
2TI 4:1 Pues entonces Timoteo, ayan lo que cꞌani inwaret tut Catata Dios y tut e Cristo Jesús xeꞌ jax xeꞌ tuaꞌ utoyi uyeror ut tunor tin e bꞌixir y tunor tin e chamen ubꞌan, y xeꞌ tuaꞌ axin acꞌotori tara tor e rum conda achecta watar otronyajr. Pues lo que cꞌani inwaret jax era:
2TI 4:2 Checsun uyojroner e Dios, y quetpen turix tuaꞌ achecsu uyojroner e Dios conda uyubꞌiet y conda machi uyubꞌiet. Irsen tin e war uche e mabꞌambꞌanir que majax bueno lo que war uchiobꞌ. Pejcan tin e machi cꞌani uyactobꞌ umabꞌambꞌanirobꞌ tuaꞌ uyactobꞌ tunor era. Tacren tuaꞌ achpobꞌ axanobꞌ tama ubꞌir e Dios otronyajr. Cojcon abꞌa tuaꞌ machi icꞌoyran conda war icanseyan tama tunor era.
2TI 4:3 Porque acꞌotoy e día conda e gente machi ixto cꞌani uyubꞌiobꞌ e canseyaj xeꞌ erach, sino que tuaꞌ taca uchꞌujcobꞌ e ajcanseyajobꞌ xeꞌ axin acanseyan bꞌan cocha ucꞌaniobꞌ jaxirobꞌ. Y bꞌan tuaꞌ uchiobꞌ porque machi cꞌani uyactobꞌ umabꞌambꞌanirobꞌ.
2TI 4:4 Jaxirobꞌ tuaꞌ umaquiobꞌ uchiquinobꞌ tuaꞌ machi uyubꞌiobꞌ lo que erach. Ajtaca cꞌani uyubꞌiobꞌ tuqꞌuic tuqꞌuic ojroner xeꞌ matucꞌa ucꞌampibꞌir.
2TI 4:5 Pero net Timoteo, cojcon abꞌa tuaꞌ machi axin atijrpa ajor, y qꞌuecꞌojsen abꞌa tuaꞌ iwawan tut tunor lo que watar, y turbꞌan abꞌa tuaꞌ achecsu uyojroner e Dios tama e corpesiaj tut e gente axin. Y chen tunor upatnar Cawinquirar lo que ajcꞌunet tuaꞌ ache bꞌan cocha ucꞌani tuaꞌ achempa.
2TI 4:6 Pues warix acꞌotoy e día conda nen tuaꞌ inchamesna bꞌan cocha achamesna inteꞌ arac tujor inteꞌ altar. Warix acꞌotoy e día conda ucꞌani tuaꞌ inlocꞌoy tara tor e rum.
2TI 4:7 Pues qꞌuecꞌo xanen tama ubꞌir Cawinquirar, y cꞌapa inche tunor e patnar lo que ajcꞌunen tuaꞌ inche, y ma tiaꞌ inwacta tuaꞌ incojco nicꞌupesiaj tama Cawinquirar.
2TI 4:8 Y era ayan nituanibꞌir xeꞌ aquetpa tuaꞌ inchꞌami xeꞌ tuaꞌ anjcꞌuna umen Cawinquirar xeꞌ erach xeꞌ jax xeꞌ tuaꞌ axin utoyi uyeror ut tunor e gente tama e día conda asutpa watar otronyajr. Y majax nen taca xeꞌ tuaꞌ inchꞌami inteꞌ tuanibꞌir sino que bꞌan ubꞌan tunor tin e war uyusre uwira acꞌotoy e día conda asutpa watar Cawinquirar.
2TI 4:9 Pues entonces Timoteo, turbꞌan abꞌa tuaꞌ watet awiren wacchetaca,
2TI 4:10 porque e Demas uyacten tuaꞌ axin esto tama e chinam Tesalónica, porque más war ucꞌani lo que ayan tara tor e rum. Y e Crescente ixin ubꞌan, pero machi uyacten, intaca ixin esto tama e departamento Galacia, y e Tito ixin esto tama e departamento Dalmacia.
2TI 4:11 Ajtaquix e Lucas turu tacaren. Pues sicbꞌan e Marcos y atares tara porque jaxir axin utacren meyra tama upatnar Cadiosir.
2TI 4:12 Pues nen inwebꞌta ixin e Tíquico esto tama e chinam Éfeso.
2TI 4:13 Y conda watet, tares nichumpa xeꞌ inwacta tama uyotot e Carpo xeꞌ turu tama e chinam Tróas. Y tares nijunobꞌ ubꞌan. Pero xeꞌ más war incꞌani tuaꞌ atares jax tunor niqꞌuewer xeꞌ tzꞌijbꞌabꞌir tamar.
2TI 4:14 Y cꞌani inwaret que e Alejandro xeꞌ apatna tama e tenmar taqꞌuin cꞌapa uche meyra mabꞌambꞌanir nipater. Pero Cawinquirar axin uyajcꞌu uyeror ut tama tunor lo que cay uche tacaren.
2TI 4:15 Y tamar era cojcon abꞌa tut jaxir tuaꞌ matucꞌa uche apater net cocha cay uche tacaren, porque jaxir uturbꞌa ubꞌa tuaꞌ uquete uwabꞌu tunor uyojroner e Dios tama e corpesiaj lo que war cachecsu tut e gente axin.
2TI 4:16 Pues conda qꞌuejcha ixien bꞌajxan tut e juez tuaꞌ ubꞌijnu uwira jay ayan lo que inche xeꞌ mabꞌambꞌan tut e ley, mamajchi quetpa tuaꞌ utacren incorpes nibꞌa. Quisinic que e Dios machi axin utoyi uyeror ut tamar lo que cꞌapa uchiobꞌ tacaren.
2TI 4:17 Pero Niwinquirar quetpa taniwejtzꞌer tuaꞌ utacren y tuaꞌ uqꞌuecꞌojsen porque ucꞌanto tuaꞌ inxin tut tin e merato acꞌotoy uyubꞌiobꞌ uyojroner e Dios tama e corpesiaj xeꞌ majax tuobꞌ e Israel. Y Niwinquirar ixin ucorpesen tuaꞌ machi inchamesna umen inteꞌ león.
2TI 4:18 Y jax Niwinquirar era ubꞌan xeꞌ tuaꞌ ucorpsen tama tunor lo que watar y xeꞌ tuaꞌ ucojcuen este que incꞌotoy tut e qꞌuin tiaꞌ war acꞌotori jaxir. Catattzꞌic ucꞌabꞌa Cadiosir iraj iraj. Amén.
2TI 4:19 Pues entonces cꞌajpes tanibꞌa e hermana Priscila taca uviejo xeꞌ jax e hermano Aquila, y cꞌajpes tunor tin e turobꞌ tama uyotot e Onesíforo.
2TI 4:20 Pues e Erasto quetpa tama e chinam Corinto, y inwacta e Trófimo tama e chinam Mileto umen que cay muacran.
2TI 4:21 Turbꞌan abꞌa tuaꞌ abꞌijnu watet bꞌajxan que acꞌotoy utiempo e sisar. Pues uyebꞌta watar e cꞌajpesiaj tabꞌa e hermano Eubulo, y e hermano Pudente, y e hermano Lino, y e hermana Claudia taca tunor e inmojr hermanuobꞌ ubꞌan.
2TI 4:22 Cawinquirar uqꞌuecꞌojsic awalma, y Cadiosir axin utacricox inteꞌ intiox. Tara acꞌapa tunor niwojroner, che e Pablo.
TIT 1:1 Pues nen xeꞌ Pabloen jax inteꞌ uman e Dios y inteꞌ apóstol tuaꞌ e Jesucristo xeꞌ uyebꞌta tarien tuaꞌ incanse tunor tin e sicbꞌabꞌirobꞌ umen e Dios tuaꞌ acꞌotoy acꞌupseyanobꞌ tamar, y tuaꞌ acꞌotoy unatobꞌ lo que erach este que uyactobꞌ tunor umabꞌambꞌanirobꞌ.
TIT 1:2 Pues e cꞌupesiaj taca e natanwar era aquetpobꞌ tama inteꞌ cojcsiaj que cꞌani uchꞌamiobꞌ e cuxtar xeꞌ machi tuaꞌ acꞌapa. Porque jax Cadiosir xeꞌ machi uyubꞌi amajresian xeꞌ cay uyareon conda ne mato achena or e rum era que cꞌani uyajcꞌon e cuxtar xeꞌ machi tuaꞌ acꞌapa.
TIT 1:3 Y esto coner cꞌotoy e día conda cay chectesna tut e gente tara tor e rum que ayan e corpesiaj umen que cay checsuna tunor era nimener umen que arobꞌnen umen Cadiosir xeꞌ jax Cawajcorpesiaj que bꞌan ucꞌani tuaꞌ inche.
TIT 1:4 Pues hermano Tito, war intzꞌijbꞌa e carta era tabꞌa xeꞌ jax nisitzet tama cacꞌupesiaj tama Cawinquirar. Que Catata Dios taca Cawajcorpesiaj xeꞌ jax e Cristo Jesús uyajqꞌuiquet utacarsiaj taca tunor ujiriar.
TIT 1:5 Pues entonces Tito, inwactet tama e lugar Creta tuaꞌ acꞌapa uꞌstes tunor lo que quetpato tuaꞌ achempa conda locꞌoyen. Y tamar era sicbꞌan chi chi tuaꞌ aquetpa líder tama inteꞌ inteꞌ grupo ajcꞌupesiajobꞌ tama inteꞌ inteꞌ chinam, bꞌan cocha cay inwaret tuaꞌ ache conda turento tacaret.
TIT 1:6 Pues tin e axin aquetpa inteꞌ líder ucꞌani tuaꞌ aquetpa cocha era: Que matucꞌa war uche tuaꞌ usubꞌajres ubꞌa tamar, y ucꞌani tuaꞌ aquetpa inteꞌ taca uwixcar, y umaxtac e winic era ucꞌani tuaꞌ acꞌupseyanobꞌ tama Cawinquirar, y ma erer achecta inteꞌ ojroner upater que war uche lo que mabꞌambꞌan, y ucꞌani tuaꞌ obꞌian tut utata.
TIT 1:7 Y cocha inteꞌ líder cocha era ucꞌani tuaꞌ ubꞌijres inteꞌ grupo ajcꞌupesiajobꞌ taca tunor upatnar e Dios, ucꞌani tuaꞌ aquetpa inteꞌ xeꞌ matucꞌa war uche tuaꞌ usubꞌajres ubꞌa tamar, y ma erer aquetpa inteꞌ xeꞌ ubꞌijnu que jax taca lo que ucꞌani jaxir tuaꞌ achempa, y ma erer aquetpa inteꞌ xeꞌ aqꞌuijna wacchetaca, y ma erer aquetpa inteꞌ xeꞌ axin acaray, y ma erer aquetpa inteꞌ xeꞌ aqꞌuijna este que axin uyajcꞌu inteꞌ upiar, y ma erer aquetpa inteꞌ xeꞌ uturbꞌa ujor tamar taca e tumin.
TIT 1:8 Y inteꞌ líder ucꞌani tuaꞌ aquetpa turix tuaꞌ uchꞌami inteꞌ ajwara tama uyotot, y ucꞌani tuaꞌ atzay uwira tunor lo que imbꞌutz, y ucꞌani tuaꞌ unata ucojco ubꞌa tuaꞌ machi uche e mabꞌambꞌanir, y ucꞌani tuaꞌ aquetpa inteꞌ xeꞌ war uturbꞌa ubꞌa tama e Dios, y ucꞌani tuaꞌ aquetpa erach uwirnar, y ucꞌani tuaꞌ uche tunor lo que aquetpa tuaꞌ uche.
TIT 1:9 Y tin e axin aquetpa inteꞌ líder tama inteꞌ grupo ajcꞌupesiajobꞌ ucꞌani tuaꞌ uturbꞌa ubꞌa tamar e canseyaj lo que uchꞌami tama uyojroner e Dios tuaꞌ uyubꞌi ucꞌunles uyalmobꞌ e inmojr taca e canseyaj xeꞌ erach, y tuaꞌ uyubꞌi uche acꞌupseyan tin e war oꞌjronobꞌ upater e canseyaj era.
TIT 1:10 Porque ayan meyra gente xeꞌ ajqꞌuecranerobꞌ y meyra gente tuaꞌ e Israel xeꞌ machi ucꞌaniobꞌ lo que war cacanse xeꞌ erach. Pero e gente cocha era intaca oꞌjronobꞌ y amajresian tut e gente axin.
TIT 1:11 Pues ucꞌani tuaꞌ aquete awabꞌu e gente cocha era porque war axanobꞌ y war acanseyanobꞌ tamar lo que machi ani ucꞌani tuaꞌ acansena este que axin usati ujorobꞌ tunor tin e turobꞌ tama inteꞌ otot. Pero war uchiobꞌ tunor era ajtaca tuaꞌ ulocse e tumin tuaꞌ e gente axin.
TIT 1:12 Pues ayan ani inteꞌ nuxi winic tama ureligión e gente tama e Creta era xeꞌ cay ojron tamar uyet ajlugarir y che: “Tunor niwet ajlugarir tama e Creta era ajmajresiajobꞌ inyajrer, y bꞌanobꞌ cocha inteꞌ animal, y calapir awiobꞌ, y ajcꞌoyir gentiobꞌ.” Bꞌan che inteꞌ uyet ajlugarir tama e Creta era.
TIT 1:13 Pues erach e ojroner era porque bꞌan turobꞌ e gente era. Y tamar era quiqui cꞌayenobꞌ tuaꞌ uyactobꞌ tunor era inyajrer y tuaꞌ uturbꞌa ubꞌobꞌ inyajrer tamar uyojroner e Dios.
TIT 1:14 Y tamar era machi ixto tuaꞌ axin uyubꞌiobꞌ inteꞌ tojbꞌen ojroner xeꞌ axin achecsuna umen tin e tuobꞌ e Israel, y nien machi ixto tuaꞌ axin uyubꞌiobꞌ lo que arobꞌnobꞌ umen tin e machi ucꞌaniobꞌ lo que erach.
TIT 1:15 Pues tut tin e imbꞌutz tunor ubꞌijnusiaj matucꞌa xeꞌ majax imbꞌutz tutobꞌ. Pero tut tin e xex ut ubꞌijnusiajobꞌ y xeꞌ machi acꞌupseyanobꞌ tama Cawinquirar ubꞌijnuobꞌ que matucꞌa xeꞌ imbꞌutz tama tunor. Y bꞌan ubꞌijnuobꞌ umen que tijrem ujorobꞌ, y umen que machi ucojco ubꞌobꞌ tama ubꞌijnusiajobꞌ, y tamar era war uchiobꞌ e mabꞌambꞌanir iraj iraj.
TIT 1:16 Jaxirobꞌ war chenobꞌ que war unatobꞌ chi e Dios y que war acꞌupseyanobꞌ tamar ubꞌan, pero tamar lo que war uchiobꞌ chequer que matucꞌa war unatobꞌ tama e Dios. Pues e gente era war uxejbꞌiobꞌ ut tunor lo que ayan, y mamajchi tut cꞌani obꞌianobꞌ, y matucꞌa ucꞌampibꞌirobꞌ tuaꞌ uchiobꞌ nien imbꞌijc lo que imbꞌutz.
TIT 2:1 Pues entonces Tito, cansen jax taca e canseyaj xeꞌ erach.
TIT 2:2 Aren e onian winicobꞌ que ucꞌani tuaꞌ ucojco ubꞌobꞌ, y que ucꞌani tuaꞌ aquetpobꞌ tawar tuaꞌ atzay eꞌrna umen e inmojr, y que ucꞌani tuaꞌ uquete ubꞌobꞌ tuaꞌ ubꞌijnu jay bueno tut e Dios lo que cꞌani uchiobꞌ, y que ucꞌani tuaꞌ uwirobꞌ que matucꞌa e muaquir tama ucꞌupesiajobꞌ, y que ucꞌani tuaꞌ uyajta utobꞌ tunor upiarobꞌ, y que ucꞌani tuaꞌ aqꞌuecꞌo awawan tut tunor lo que watar.
TIT 2:3 Y bꞌan tama tin e nojta ixictac ubꞌan, aren que ucꞌani tuaꞌ aturuanobꞌ tzꞌustaca, y que machi tuaꞌ oꞌjronobꞌ upater e inmojr, y que machi tuaꞌ axin acaray, y que ucꞌani tuaꞌ aquetpobꞌ ajcanseyajobꞌ tamar lo que imbꞌutz.
TIT 2:4 Y tamar era e ixictac era erer ucansiobꞌ e ixictac xeꞌ mato jax meyra ujabꞌ cocha ucꞌani tuaꞌ uyajta ut uviejo y cocha ucꞌani tuaꞌ uyajta ut umaxtac.
TIT 2:5 Y e nojta ixictac era ucꞌani tuaꞌ ucanse e inmojr ixictac cocha tuaꞌ uquete ubꞌobꞌ tuaꞌ ubꞌijnu jay bueno tut e Dios lo que cꞌani uchiobꞌ era, y ucꞌani tuaꞌ ucansiobꞌ cocha ucꞌani tuaꞌ aquetpobꞌ erach, y cocha ucꞌani tuaꞌ apatnobꞌ macuir uyototobꞌ, y tuaꞌ obꞌianobꞌ tut uviejobꞌ. Pues bꞌan ucꞌani tuaꞌ achempa umenerobꞌ tuaꞌ machi achecta inteꞌ ojroner upater uyojroner e Dios.
TIT 2:6 Y tacren tin e chꞌom sitzobꞌ tuaꞌ unatobꞌ que ucꞌani tuaꞌ uquete ubꞌobꞌ tuaꞌ ubꞌijnuobꞌ jay bueno tut e Dios lo que cꞌani uchiobꞌ.
TIT 2:7 Y turbꞌan abꞌa tuaꞌ ache jax taca lo que imbꞌutz tut e chꞌom sitzobꞌ era tuaꞌ acanuobꞌ cocha ucꞌani tuaꞌ uchiobꞌ jaxirobꞌ. Y tamar acanseyaj irsenobꞌ que erach awirnar y que majax aras tunor era.
TIT 2:8 Sicbꞌan e ojroner xeꞌ uwajpi conda war icanseyan tuaꞌ machi apasi e bꞌir tut tin e cꞌani ani utuchꞌiet tamar awojroner. Y tamar era jay ayan tin e war usicbꞌa tucꞌa tamar tuaꞌ oꞌjron apater axin asubꞌajra umen que matucꞌa utajwi tamaret xeꞌ mabꞌambꞌan.
TIT 2:9 Y cansen tin e aquetpa inteꞌ man xeꞌ mambꞌir inyajrer que ucꞌani tuaꞌ obꞌianobꞌ tut uyajyumobꞌ, y que ucꞌani tuaꞌ uturbꞌa ubꞌobꞌ tuaꞌ uchiobꞌ upatnar bꞌan taca cocha ucꞌani uyajyum, y que machi tuaꞌ uyare que machi cꞌani uche lo que arobꞌna umen uyajyum.
TIT 2:10 Y cansen que machi tuaꞌ axujchꞌianobꞌ, sino que ucꞌani tuaꞌ uchiobꞌ jax taca lo que erach. Y tamar era erer acꞌotoy unatobꞌ tunor tin e uwirobꞌ lo que war uchiobꞌ e manobꞌ era que galan e canseyaj tama Cadiosir xeꞌ jax Cawajcorpesiaj.
TIT 2:11 Y cansen tunor lo que war intzꞌijbꞌa tabꞌa era porque coner war achectesna tut tunor e gente tara tor e rum que ayan utacarsiaj e Dios xeꞌ jax xeꞌ utares e corpesiaj.
TIT 2:12 Pues utacarsiaj e Dios war ucansion que ucꞌani tuaꞌ cawacta e mabꞌambꞌanir, y que ucꞌani tuaꞌ cawacta tunor lo que uyusre uche cawerir bꞌan cocha war uchiobꞌ e gente tara tor e rum, y que ucꞌani tuaꞌ caquete cabꞌa tuaꞌ cabꞌijnu jay bueno tut e Dios lo que cꞌani cache, y que ucꞌani tuaꞌ caquetpa erach, y que ucꞌani tuaꞌ cache jax taca lo que atzay uwira e Dios tama cacuxtar tara tor e rum.
TIT 2:13 Y utacarsiaj e Dios war ucansion cocha ucꞌani tuaꞌ caturuan conda warto cacojco uyopar e nuxi chojbꞌesiaj lo que cꞌani uyajcꞌon Cadiosir conda achecta watar e Jesucristo xeꞌ jax Cawajcorpesiaj y xeꞌ jax Cadiosir xeꞌ nojta ubꞌan.
TIT 2:14 Pues jax Cawinquirar Jesucristo era xeꞌ ixin uyajcꞌu ubꞌa tuaꞌ achamesna tuaꞌ ucorpeson tama tunor camabꞌambꞌanir y tuaꞌ uchion caquetpa imbꞌutz tut jaxir. Y tamar era war caquetpa uchinam e Cristo, y war cosre tama cawalma tuaꞌ caxin cache jax taca lo que erach tut jaxir.
TIT 2:15 Pues entonces Tito, lo que war intzꞌijbꞌa tabꞌa era jax lo que ucꞌani tuaꞌ iꞌxin acanse e ajcꞌupesiajobꞌ. Cꞌunles uyalmobꞌ tin e tzajtaca utobꞌ, y cꞌayenobꞌ tunor tin e machi cꞌani uyactobꞌ e mabꞌambꞌanir taca tunor e cꞌotorer xeꞌ ajcꞌunet. Ira awacta oꞌjron tin e cꞌani uyaret que matucꞌa acꞌampibꞌir.
TIT 3:1 Pues cꞌajpesobꞌ tunor e ajcꞌupesiajobꞌ que ucꞌani tuaꞌ uyose ubꞌobꞌ yebꞌar ucꞌotorer e ajcꞌotorer, y que ucꞌani tuaꞌ oꞌbꞌianobꞌ tut tunor e nuquir ajcꞌamparobꞌ, y que ucꞌani tuaꞌ aquetpobꞌ turix tuaꞌ axin uchiobꞌ tunor lo que imbꞌutz.
TIT 3:2 Aren e ajcꞌupesiajobꞌ que machi tuaꞌ utuchꞌiobꞌ otronteꞌ, sino que ucꞌani tuaꞌ aquetpobꞌ incꞌun uwirnarobꞌ tut e gente, y que ucꞌani tuaꞌ ubꞌijnuobꞌ cocha tuaꞌ utacriobꞌ e inmojr, y que ucꞌani tuaꞌ uchecsu ubꞌobꞌ tut e gente que manxujresbꞌir turobꞌ tama uyalmobꞌ.
TIT 3:3 Pues cꞌani inwaret que non ubꞌan intran ani cawirnar, y que machi ani cꞌupseyanon tut e Dios, y que war ani camajresna iraj iraj, y que cacharon ani tama tunor lo que uyusre uche cawerir y tamar lo que galan ani canata cache. Y war ani cache meyra e mabꞌambꞌanir, y cacꞌuxnaqꞌui ani cawira lo que ayan tuaꞌ otronteꞌ, y xejbꞌebꞌir coit ani umen e inmojr y caxejbꞌe cabꞌa ani inteꞌ intion ubꞌan.
TIT 3:4 Pero conda e Dios xeꞌ jax Cawajcorpesiaj cay uwirsion que incꞌun uwirnar y que war uyajta utobꞌ tunor e gente tara tor e rum,
TIT 3:5 ixin ucorpeson. Majax umen que war ani cache lo que imbꞌutz tut jaxir, sino que umen que jaxir ayan ucꞌunersiaj tamaron. Y ixin ucorpeson conda quetpon pocbꞌir umen Unawalir e Dios xeꞌ usuti ucuxpeson otronyajr y xeꞌ ixin uyustes tunor cawirnar.
TIT 3:6 Pues jax Cawajcorpesiaj Jesucristo xeꞌ ixin ucorpeson, y tamar era Cadiosir ixin uyajcꞌon meyra ucꞌotorer conda uyebꞌta tari Unawalir tuaꞌ aquetpa macuir cawalma.
TIT 3:7 Y tamar utacarsiaj era xeꞌ uchion caquetpa erach ixin upasi e bꞌir tuaꞌ uyubꞌion cachꞌami e cuxtar xeꞌ machi tuaꞌ acꞌapa lo que war cacojco tuaꞌ cachꞌami watar e día.
TIT 3:8 Pues tunor e ojroner era tawar tuaꞌ acꞌupesna umen tunor e gente, y tamar era ira awacta tuaꞌ achecsu tunor e ojroner era tut e ajcꞌupesiajobꞌ, porque tunor tin e war acꞌupseyanobꞌ tama e Dios ucꞌani tuaꞌ uturbꞌa ubꞌobꞌ tuaꞌ uchiobꞌ tunor lo que imbꞌutz. Pues tunor era galan y ayan meyra ucꞌampibꞌir tut tunor e ajcꞌupesiajobꞌ.
TIT 3:9 Pero ira awacta abꞌa tuaꞌ iyosena macuir inteꞌ bꞌiritir xeꞌ matucꞌa ucꞌampibꞌir conda war oꞌjron inteꞌ tamar uchꞌajnarir, o conda war aqꞌuecran inteꞌ tamar lo que ayan tama uley e Moisés, porque matucꞌa utacrion cache y matucꞌa ucꞌampibꞌir tunor era.
TIT 3:10 Y jay ayan tin e war uche ubꞌa tuaꞌ uxere inteꞌ grupo ajcꞌupesiajobꞌ, aren chajr tuaꞌ uyacta, y jay machi cꞌani oꞌbꞌian, tzacren loqꞌuic.
TIT 3:11 Pues erer anata que inteꞌ cocha era cꞌochochoj tunor ubꞌijnusiaj tama uyalma y que jax inteꞌ ajmabꞌambꞌanir, y tamar era war aquetpa tijresbꞌir inyajrer umen lo que war uche.
TIT 3:12 Pues entonces Tito, cꞌani inwebꞌta axin e hermano Artemas o e hermano Tíquico toit. Y conda acꞌotoy tin xeꞌ cꞌani inwebꞌta axin, turbꞌan abꞌa tuaꞌ iꞌxin asicbꞌen tama e chinam Nicópolis tiaꞌ war imbꞌijnu inquetpa tama e tiempo tuaꞌ e sisar.
TIT 3:13 Y tacren e hermano Zenas xeꞌ jax inteꞌ abogado xeꞌ war axana era taca e hermano Apolos. Tacrenobꞌ taca tunor lo que ucꞌaniobꞌ tama uxambꞌar era tuaꞌ machi unumse ubꞌobꞌ tor e bꞌir.
TIT 3:14 Pues tunoron xeꞌ ajcꞌupesiajon tama Cawinquirar ucꞌani tuaꞌ cacano cache lo que imbꞌutz uwirnar iraj iraj, y tuaꞌ catacre cabꞌa inteꞌ intion conda ayan lo que ucꞌani tamaron, porque tamar era cꞌani abꞌoro tunor cacꞌampibꞌir tut e Dios.
TIT 3:15 Pues tunor tin e turobꞌ tacaren tara war uyebꞌta axin e cꞌajpesiaj tabꞌa. Y cꞌajpesobꞌ ubꞌan tunor tin e atzay uwiron xeꞌ war acꞌupseyanobꞌ tama Cadiosir tiaꞌ turet. E Dios utacricox inteꞌ intiox. Tara acꞌapa tunor niwojroner, che e Pablo.
PHM 1:1 Pues nen xeꞌ Pabloen turen tara tama e cárcel umen taca que war inchecsu uyojroner e Dios tama e Cristo Jesús tut e gente axin. Pues nen taca e Timoteo war catzꞌijbꞌa e carta era tabꞌa, hermano Filemón, xeꞌ war catzay cawiret y xeꞌ jax inteꞌ capiaret tama upatnar Cawinquirar.
PHM 1:2 Pues war catzꞌijbꞌa e carta era tama e hermana Apia y tama e hermano Arquipo xeꞌ jax inteꞌ capiar tama upatnar Cawinquirar y tama e grupo ajcꞌupesiajobꞌ xeꞌ umorojse ubꞌobꞌ tama oꞌtot, hermano Filemón.
PHM 1:3 Que Cadiosir xeꞌ jax Catata y Cawinquirar Jesucristo utacricox y uyajqꞌuicox ujiriar.
PHM 1:4 Pues entonces Filemón, conda incꞌajti taca e Dios intattzꞌi ucꞌabꞌa tamaret iraj iraj.
PHM 1:5 Y bꞌan war inche umen que cay umbꞌi que net war iqꞌuecꞌo icꞌupseyan tama Cawinquirar Jesús y que war ayajta ut tunor tin e war acꞌupseyanobꞌ tama Cawinquirar ubꞌan.
PHM 1:6 Y war incꞌajti taca e Dios que net tuaꞌ iꞌxin achecsu tut e gente axin cobꞌa war icꞌupseyan tama e Dios, porque tamar era cꞌani icꞌotoy anata cobꞌa e nuxi chojbꞌesiaj lo que ayan ticabꞌa tama e Cristo.
PHM 1:7 Pues war utzayjresen meyra y war utꞌabꞌse niwalma que net war ayajta ut tunor e ajcꞌupesiajobꞌ, porque tamar era war ache achecta e jiriar tama uyalmobꞌ tunorobꞌ era.
PHM 1:8 Pues cocha nen apostolen tuaꞌ e Cristo uyubꞌien ani incꞌampes nicꞌotorer tuaꞌ inwaret lo que ucꞌani tuaꞌ ache,
PHM 1:9 pero taniut nen más bueno tuaꞌ taca incꞌajti tacaret tuaꞌ atacren umen que war cayajta coit cabꞌa. Pues nen xeꞌ Pabloen xeꞌ jaxix inteꞌ onian winiquen xeꞌ turen tama e cárcel umen que cay inchecsu uyojroner e Dios tama e Cristo Jesús tut e gente ixin
PHM 1:10 cꞌani incꞌajti atacarsiaj upater e Onésimo xeꞌ cꞌotoy quetpa niunen tama e Cristo conda turento tara tama e cárcel.
PHM 1:11 Pues chequer que tama inteꞌ tiempo e Onésimo era jax inteꞌ man xeꞌ mambꞌir inyajrer que ma ani tucꞌa ucꞌampibꞌir. Pero coner ayan meyra ucꞌampibꞌir toit net y taniut nen ubꞌan bꞌan cocha war che ucꞌabꞌa Onésimo.
PHM 1:12 Y era inwebꞌta ixin e hermano Onésimo toit net otronyajr. Pero chꞌama bꞌan cocha jay nen ani war incꞌotoy toit.
PHM 1:13 Quisinic ani que aquetpa tacaren tuaꞌ uyubꞌi utacren apater net cocha turen tara tama e cárcel umen que cay inchecsu uyojroner e Dios tama e corpesiaj tut e gente ixin.
PHM 1:14 Pero matucꞌa tuaꞌ inche era este que incꞌotoy innata jay net war acꞌani ache lo que war incꞌajti tabꞌa era, y tamar era jay ayan lo que ache tuaꞌ atacren erer innata que bꞌan war acꞌani ache y majax umen que bꞌan war inwaret.
PHM 1:15 Pues e Onésimo locꞌoy ixin tama inteꞌ tiempo, pero coner sutpix yopa tuaꞌ aquetpa tacaret inyajrer.
PHM 1:16 Y cꞌani aquetpa tacaret otronyajr era, pero majax bꞌan cocha inteꞌ man xeꞌ mambꞌir inyajrer xeꞌ imbꞌijc taca ucꞌampibꞌir. Porque coner ayan meyra ucꞌampibꞌir cocha jaxir jax inteꞌ cawermano tama Cawinquirar xeꞌ chojresbꞌir ut nimener. Pero net ucꞌani tuaꞌ achojres ut más coner cocha jaxir jax inteꞌ cawermano tama Cawinquirar y majax jax taca inteꞌ man xeꞌ mambꞌir inyajrer.
PHM 1:17 Pues entonces hermano Filemón, jay war anata que nen jax apiaren tama upatnar Cawinquirar chꞌama e winic era bꞌan cocha jay nen ani.
PHM 1:18 Y jay ayan lo que cay uche apater o jay ayan lo que abꞌeto tacaret, arenen nen y nen tuaꞌ intoyi.
PHM 1:19 Nen xeꞌ Pabloen war intzꞌijbꞌa e carta era tabꞌa taca nicꞌabꞌ tuaꞌ anata ixto que nen tuaꞌ intoyet, motor que erer incꞌajpeset que net ibꞌeto esto tunor abꞌa tacaren.
PHM 1:20 Y tamar era hermano, unsre inchꞌami inteꞌ tacarsiaj tabꞌa cocha inteꞌ ajcꞌupesiaj tama Cawinquirar. Cꞌunien tama niwalma tamar era tama e Cristo.
PHM 1:21 Pues war intzꞌijbꞌa e carta era tabꞌa porque war innata que net iꞌxin iyobꞌian tamar lo que incꞌajti tacaret. Y innata que iꞌxin ache más que war incꞌajti tacaret era.
PHM 1:22 Pues ayanto inteꞌ ojroner tabꞌa: Ustes inteꞌ cuarto tiaꞌ tuaꞌ inquetpa conda incꞌotoy, porque war incojco tama e Dios que bꞌan cocha war icꞌajti tacar y bꞌan tuaꞌ uche tuaꞌ uyubꞌien inlocꞌoy tara tuaꞌ inxin inwarajsiox.
PHM 1:23 Pues e hermano Epafras xeꞌ turu tacaren tara tama e cárcel umen que war uchecsu uyojroner e Dios tama e Cristo Jesús uyebꞌta axin e cꞌajpesiaj tibꞌa.
PHM 1:24 Y bꞌan ubꞌan tin e war utacrenobꞌ tama upatnar e Dios era xeꞌ jax e hermano Marcos y e hermano Aristarco y e hermano Demas y e hermano Lucas.
PHM 1:25 Cawinquirar Jesucristo utacricox tunorox. Tara acꞌapa tunor niwojroner, che e Pablo.
HEB 1:1 Catata Dios cay ojron cora cora taca catata viejobꞌirobꞌ y cay uwirse ubꞌa tama inteꞌ inteꞌ checsuyaj cora cora, y uche cocha era taca cora profetobꞌ xeꞌ sutpa uyareobꞌ e inmojr gente lo que arobꞌnobꞌ umen e Dios.
HEB 1:2 Pero tama e tiempo era Cadiosir war ucꞌampes Uyunen tuaꞌ upejcon. Y jax Uyunen era xeꞌ cꞌampesna umener tuaꞌ uche tunor e sian lucero lo que ayan tut e qꞌuin y tunor or e rum era ubꞌan. Y jax Uyunen era xeꞌ quetpa tuaꞌ uchꞌami tunor lo que chembꞌir era.
HEB 1:3 Y Uyunen e Dios jax xeꞌ uwirsion cobꞌa tawarer ayan tuaꞌ Catata Dios, y jaxir intera taca Utata tama tunor ubꞌijnusiajobꞌ y tama tunor lo que uchiobꞌ, y jax jaxir xeꞌ uquete tunor lo que ayan tut e qꞌuin y tunor lo que ayan tor e rum tacar ucꞌotorer lo que ayan tama uyojroner. Y jaxir, conda cꞌapa ulocse tunor camabꞌambꞌanir, ixin tuaꞌ aturuan tama uturtar lo que ayan tut e qꞌuin tuyejtzꞌer unojcꞌabꞌ Catata Dios.
HEB 1:4 Pues Uyunen e Dios más nojta que tunor e angelobꞌ cocha jaxir ajcꞌuna inteꞌ ucꞌabꞌa xeꞌ más galan y xeꞌ ayan meyra ucꞌotorer.
HEB 1:5 Porque Catata Dios ma tiaꞌ uyare inteꞌ ángel que: Net jaxet Nisitzet. Pero Catata Dios ixin uyare ixto Cawinquirar y che: Net jax Nisitzet, y coner nen inquetpa Tatabꞌiren tabꞌa. Bꞌan che Catata Dios conda merato ani achena or e rum era. Y Cadiosir ma tiaꞌ uyare inteꞌ ángel que: “Nen Tatabꞌiren tabꞌa”, pero tamar Cawinquirar ojron y che: Nen tuaꞌ inquetpa inteꞌ Tatabꞌir tuaꞌ, y jaxir tuaꞌ aquetpa inteꞌ Sitz tanibꞌa, che e Dios uyare Cawinquirar.
HEB 1:6 Pero conda Catata Dios axin uyebꞌta watar Uyunen xeꞌ inteꞌ taca ayan tuaꞌ asutpa ayopa tara tor e rum tuaꞌ acꞌotori, jaxir tuaꞌ uyare e angelobꞌ y che: Ujtzꞌinic ut Nisitz era tunorox xeꞌ angelox tanibꞌa, xeꞌ tuaꞌ oꞌjron Catata Dios uyare e angelobꞌ.
HEB 1:7 Pero tamar e sian angelobꞌ ojron Catata Dios y che: Chembꞌir uyangelobꞌ e Dios tuaꞌ aquetpobꞌ bꞌan cocha inteꞌ icꞌar, y chembꞌir tuaꞌ aquetpobꞌ bꞌan cocha inteꞌ uyamir cꞌajc. Bꞌan che e Dios tamar uyangelobꞌ.
HEB 1:8 Pero tacar Uyunen, Catata Dios ojron y che: Nidiosiret, ma tiaꞌ tuaꞌ acꞌapa e tiempo conda war icꞌotori, y erach awirnar war icꞌotori tujor achinam.
HEB 1:9 War ayajta ut lo que erach y war axejbꞌe ut lo que mabꞌambꞌan, y tamar era nen xeꞌ jax Atata Diosiren ixien inwajqꞌuet inteꞌ nuxi tzayer xeꞌ más nojta que ajcꞌunobꞌ apiarobꞌ xeꞌ jax e angelobꞌ, che Catata Dios.
HEB 1:10 Y Catata Dios uyare Uyunen otronyajr y che: Y net, Niwinquiraret, cay ache tunor or e rum tama ucajyesnibꞌir tunor era, y taca acꞌabꞌ cay ache tunor ut e qꞌuin.
HEB 1:11 Tunor ut e qꞌuin y tunor or e rum cꞌani acꞌapa, pero net machi tuaꞌ icꞌapa. Y tunor lo que chembꞌir amener ucꞌani tuaꞌ acꞌapa bꞌan cocha inteꞌ bꞌujc conda acay ajanchijran ut este que acꞌapa.
HEB 1:12 Pues tunor ut e qꞌuin cꞌani asutpa intiach bꞌan cocha inteꞌ bꞌujc conda apajca ut actana, y cꞌani asuturpa tunor era bꞌan cocha inteꞌ conda ulapi otronteꞌ ubꞌujc. Pero net, Niwinquiraret, jax taca net xeꞌ turet tama tunor e tiempo, y net ma tiaꞌ tuaꞌ isatpa. Bꞌan che e Dios uyare Uyunen xeꞌ jax Cawinquirar.
HEB 1:13 Pero Catata Dios ma tiaꞌ uyare inteꞌ ángel y che: Turuanen tama ninojcꞌabꞌ era, sino que tamar taca Uyunen ojron y che: Turuanen tama ninojcꞌabꞌ era este que inturbꞌa tunor tin e aqꞌuijna uwiret yebꞌar utajn oꞌc, che e Dios.
HEB 1:14 Pues tunor uyangelobꞌ e Dios chembꞌirobꞌ umener y chenobꞌ tuaꞌ aquetpobꞌ nawal inteꞌ intiobꞌ tuaꞌ axin uchiobꞌ lo que arobꞌnobꞌ umen e Dios xeꞌ war uyebꞌta axiobꞌ tuaꞌ utacriobꞌ tunor tin e tuaꞌ uchꞌamiobꞌ e corpesiaj.
HEB 2:1 Y tamar era ucꞌani tuaꞌ caturbꞌa cabꞌa tuaꞌ cabꞌijnu tama e corpesiaj lo que coybꞌix tuaꞌ machi cawacta oꞌchoy e cꞌoyir tamaron tuaꞌ machi uyubꞌi unajtreson tama ubꞌir e Dios.
HEB 2:2 Pues tama e onian tiempo Catata Dios ucꞌampes uyangelobꞌ tuaꞌ uchecsu e ley tut e Moisés. Y e ley era qꞌuecꞌo y tin e machi cꞌupseyanobꞌ tut quetpobꞌ jatzbꞌirobꞌ tamar. Entonces jay e ley era xeꞌ ajcꞌuna umen e angelobꞌ qꞌuecꞌo y jajtzꞌobꞌ tunor tin e machi cꞌupseyanobꞌ tut
HEB 2:3 ¿ma ca jax más nuxi jatzꞌuar tuaꞌ cachꞌami non jay machi cacꞌupseyan tama e ojroner tama e nuxi corpesiaj lo que arobꞌnon umen Cawinquirar Jesucristo? Jax jaxir xeꞌ cay uchecsu tunor e ojroner era tut e gente ixin, y de allí tin e cay uyubꞌiobꞌ e ojroner era cay uyareon cocha cay uwirobꞌ que erach tunor era.
HEB 2:4 Y Cadiosir cay uchecsu que erach tunor e ojroner tama e corpesiaj era ubꞌan taca meyra chequerir, y taca meyra ucꞌotorer, y taca meyra milagro, y umen que Cadiosir cay uyajcꞌu ucꞌampibꞌir inteꞌ inteꞌ ajcꞌupesiajobꞌ bꞌan cocha ucꞌani jaxir tuaꞌ uyubꞌi uchiobꞌ upatnar e Dios taca ucꞌotorer Unawalir. Y tamar era chequer que non ucꞌani tuaꞌ cobꞌian tut tunor uyojroner Cawinquirar era.
HEB 2:5 Pues watar e día conda Cawinquirar Jesucristo axin acꞌotori tara tor e rum bꞌan cocha caware. Pero majax jax e angelobꞌ xeꞌ tuaꞌ acꞌotoriobꞌ tacar jaxir tama e tiempo yajaꞌ, sino que jax taca non xeꞌ ajcꞌupesiajon tamar.
HEB 2:6 Y tamar era chꞌar tzꞌijbꞌabꞌir tama uyojroner e Dios y che: Nidiosiret, ¿tucꞌa tuaꞌ war acꞌani e gente? Y ¿tucꞌa tuaꞌ machi war anajpesobꞌ? ¿Y tucꞌa cora ucꞌampibꞌir umaxtacobꞌ e ixictac toit net que war abꞌijnu tuaꞌ acojcobꞌ iraj iraj?
HEB 2:7 Pues net ache e winicobꞌ tuaꞌ aquetpobꞌ más chuchu imbꞌijc ucꞌampibꞌir que e angelobꞌ, pero net ache tuaꞌ aquetpa meyra ucꞌampibꞌirobꞌ e winicobꞌ umen que awajcꞌuobꞌ tuaꞌ acꞌotoriobꞌ taca e tawarer y taca e tattzꞌarsiaj tujor tunor lo que chembꞌir amener.
HEB 2:8 Y net cꞌapa aturbꞌa tunor lo que ayan yebꞌar utajn uyoc e winicobꞌ era. Bꞌan chꞌar tzꞌijbꞌabꞌir tama uyojroner e Dios. Y cocha e Dios cꞌapa uturbꞌa tunor lo que ayan yebꞌar utajn uyoc e winicobꞌ, matucꞌa quetpa que majax yebꞌar utajn uyoc e winicobꞌ era. Pero machi ixto chequer jay war amanxuran tunor lo que ayan tut e winicobꞌ coner.
HEB 2:9 Pero cawira ut e Jesús xeꞌ quetpa más chuchu imbꞌijc ucꞌampibꞌir que e angelobꞌ. Y bꞌan quetpa taca utacarsiaj e Dios tuaꞌ uyubꞌi axin achamay tama tunoron. Pero coner cawira ut e Jesús que war acꞌotori taca e tawarer y taca e tattzꞌarsiaj umen que ixin unumse ubꞌa tama e chamer.
HEB 2:10 Porque bꞌan quetpa tuaꞌ uche e Jesús tuaꞌ uyubꞌi utares meyra gente tuaꞌ uchꞌamiobꞌ utawarer e Dios. Y bꞌan uche jaxir conda ixin unumse ubꞌa meyra tuaꞌ acꞌapa uche tunor lo que arobꞌna umen e Dios tuaꞌ uyubꞌi aquetpa ucajyesnibꞌir tama tunor e corpesiaj. Bꞌan uche jaxir xeꞌ uche tunor lo que ayan y xeꞌ jax uyajyum tama tunor ubꞌan.
HEB 2:11 Umen que Uyunen e Dios ixin uche tunor lo que ucꞌani tuaꞌ uyubꞌion caquetpa erach, non war caquetpa erach tacar. Y tamar era jaxir y non war caquetpa intera taca Catata Dios. Y tamar era Uyunen e Dios machi asubꞌajra tuaꞌ upejcon que: “Niwermanuox.”
HEB 2:12 Pues chꞌar tzꞌijbꞌabꞌir tama uyojroner e Dios que ojron Uyunen e Dios y che: Cꞌani inware niwermanuobꞌ tamaret, Nidiosiret, y cꞌani intattzꞌi acꞌabꞌa taca e cꞌay tujam e hermanuobꞌ era xeꞌ morojsebꞌir turobꞌ, che Uyunen e Dios.
HEB 2:13 Y chꞌar tzꞌijbꞌabꞌir tama uyojroner e Dios tiaꞌ ojron Uyunen e Dios otronyajr y che: Cꞌani incꞌupseyan tama Nidiosir. Y otronyajrto che que: Tara turen taca umaxtac e Dios xeꞌ ajcꞌubꞌiren umener. Bꞌan che Uyunen e Dios tama uyojroner e Dios.
HEB 2:14 Pues entonces tunor e maxtac tama inteꞌ familía intera uchꞌichꞌer y intera uwerir tacar utata y utuꞌ, y bꞌan ubꞌan e Jesucristo xeꞌ tari tara tor e rum que jaxir quetpa intera uchꞌichꞌer y intera uwerir taca e inmojr gente tara tor e rum. Y bꞌan uche tuaꞌ uyubꞌi achamay y tamar era tuaꞌ utijres tunor ucꞌotorer e diablo xeꞌ obꞌna achamsan.
HEB 2:15 Y tamar era cꞌapa ulocse tunor ubꞌajcꞌutir tin e war ani ubꞌacre meyra uchamer y xeꞌ quetpobꞌ bꞌan ani cocha inteꞌ xeꞌ war aꞌrobꞌna umen e bꞌajcꞌut lo que ucꞌani tuaꞌ uche tama tunor ucuxtar tara tor e rum.
HEB 2:16 Pues conda e Jesús tari tara tor e rum machi ubꞌijnu tuaꞌ aquetpa inteꞌ ángel tuaꞌ utacre e angelobꞌ, sino que tari tor e rum tuaꞌ uchꞌami uchꞌajnarir e Abraham tuaꞌ utacre e gente tara tor e rum.
HEB 2:17 Y bꞌan quetpa tuaꞌ uche e Jesús porque ucꞌani tuaꞌ aquetpa bꞌan taca cocha inteꞌ uyet winiquir tara tor e rum. Y bꞌan uche tuaꞌ aquetpa casacerdote xeꞌ más nojta xeꞌ incꞌun uwirnar ticoit y xeꞌ tuaꞌ acꞌapa uche tunor lo que ucꞌani tuaꞌ uche, y xeꞌ tuaꞌ axin tut e Dios capater. Y bꞌan uche ubꞌan tuaꞌ acꞌapa ulocse tunor camabꞌambꞌanir tacar uchamer.
HEB 2:18 Pues Cawinquirar Jesucristo cay unumse ubꞌa conda chena ubꞌijnu tuaꞌ uche ani e mabꞌambꞌanir, pero machi uche. Y tamar era tawar jaxir tuaꞌ utacrion tunoron xeꞌ war canumse cabꞌa taca inteꞌ bꞌijnusiaj tuaꞌ cache ani e mabꞌambꞌanir coner ubꞌan.
HEB 3:1 Pues entonces, niwermanuox xeꞌ tuox e Dios, cocha non pejcbꞌironix umen e Dios tuaꞌ caxin tut e qꞌuin watar e día, bꞌijnunic tamar e Jesús xeꞌ quetpa inteꞌ apóstol y xeꞌ quetpa casacerdote xeꞌ más nojta xeꞌ jax xeꞌ war cachectes tut e gente axin que non war cacꞌupseyan tamar.
HEB 3:2 Pues jaxir cꞌapa uche tunor lo que arobꞌna umen e Dios tuaꞌ uche. Y jaxir jax xeꞌ pejcna umen e Dios bꞌan cocha e Moisés xeꞌ cꞌapa uche tunor lo que ucꞌani tama uyotot e Dios xeꞌ jax umaxtac e Israel xeꞌ turuanobꞌ tama e onian tiempo.
HEB 3:3 Pero e Jesús tawar tuaꞌ atajttzꞌa más que e Moisés, bꞌan cocha inteꞌ ajcheyaj otot tawar tuaꞌ atajttzꞌa más que e otot xeꞌ chena umener.
HEB 3:4 Pues tunor e otot lo que ayan tara tor e rum ayan chi umen chembꞌir, pero tunor lo que ayan tut e qꞌuin y tunor lo que ayan tara tor e rum chembꞌir ixto umen e Dios.
HEB 3:5 Pues e Moisés uturbꞌa ubꞌa tuaꞌ uche imbꞌutz tunor lo que war uche tama uyotot e Dios, pero jaxir quetpa inteꞌ man tama e otot era, y quetpa tuaꞌ taca uchecsu lo que tuaꞌ watar.
HEB 3:6 Pero e Cristo quetpa inteꞌ Uyunen tor uyotot e Dios xeꞌ jax non xeꞌ ajcꞌupesiajon tamar, y bꞌan taca tuaꞌ caquetpa jay machi cachoqui cacꞌupesiaj tamar y jay machi cachoqui lo que war cacojco tuaꞌ cachꞌami tuaꞌ jaxir bꞌan cocha war cachecsu tut e gente axin este que acꞌapa or e rum era.
HEB 3:7 Pues Unawalir e Dios ojron cocha era tama uyojroner e Dios y che: Coner, jay erer iyubꞌi lo que war uyareox e Dios,
HEB 3:8 ira iqꞌuecꞌojse iwalma tut e Dios bꞌan cocha cay uchiobꞌ e gente tuaꞌ e Israel tama e choquem lugar conda machi cay obꞌianobꞌ tut e Dios, y conda cay uchiobꞌ meyra lo que mabꞌambꞌan tut e Dios, y tamar era cay ucꞌoyjresobꞌ e Dios.
HEB 3:9 Y meyra cay uchiobꞌ unumse ubꞌa e Dios tama tunor lo que cay uchiobꞌ tama e cuarenta año era. Y cay ucꞌoyjresobꞌ e Dios iraj iraj motor que war uwirobꞌ tunor e sian milagro lo que cay uche e Dios tama e tiempo era.
HEB 3:10 Y tamar era ojron e Dios y che: “Nen qꞌuijnen taca e gente era umen que war uyusre tama uyalmobꞌ tuaꞌ uchiobꞌ ajtaca lo que mabꞌambꞌan taniut, y tamar era machi war ubꞌijnuobꞌ tuaꞌ acano axanobꞌ tama nibꞌir xeꞌ tanibꞌa.”
HEB 3:11 Y tamar era e Dios qꞌuijna upaterobꞌ y che: San machi ixto tuaꞌ oꞌchoyobꞌ tuaꞌ ajiriobꞌ tacaren tama e lugar xeꞌ ustabꞌir nimener lo que ayan tama e lugar Canaán, che e Dios. Bꞌan che Unawalir e Dios tama uyojroner e Dios.
HEB 3:12 Pues entonces niwermanuox, iwiric ibꞌa inteꞌ intiox que mamajchi tijam asatpa umen que oꞌchoy e mabꞌambꞌanir tama uyalma este que axin uyacta ubꞌir e Dios xeꞌ bꞌixir umen que axin uyacta tuaꞌ acꞌupseyan tamar.
HEB 3:13 Pero nox, tꞌabꞌsenic iwalma inteꞌ intiox iraj iraj conda turoxto tara tor e rum tuaꞌ machi iwacta ibꞌa aqꞌuecꞌojsena iwalma umen que war ani ixmajresna umen e mabꞌambꞌanir.
HEB 3:14 Porque cꞌani ixto cachꞌami catuanibꞌir taca e Cristo conda caxin cacꞌotoy tut e qꞌuin jay machi cawacta tuaꞌ caxana tama ubꞌir e Dios taca e cꞌupesiaj bꞌan cocha cay cache tama ucajyesnibꞌir tunor era conda wartocto cachꞌami ucꞌabꞌa Cawinquirar.
HEB 3:15 Y tamar era ira inajpes lo que chꞌar tzꞌijbꞌabꞌir tama uyojroner e Dios que: Coner, jay erer iyubꞌi lo que war uyareox e Dios, ira iqꞌuecꞌojse iwalma tut e Dios cocha cay uchiobꞌ e gente tuaꞌ e Israel tama e choquem lugar. Bꞌan chꞌar tzꞌijbꞌabꞌir tama uyojroner e Dios.
HEB 3:16 ¿Y chiobꞌ ca nic xeꞌ cay uyubꞌiobꞌ uyojroner e Dios y xeꞌ sutpa uyactobꞌ ubꞌir e Dios otronyajr este que cay uxejbꞌiobꞌ ut e Dios inyajrer? Jaxobꞌ taca xeꞌ loqꞌuesnobꞌ tama e lugar Egipto umen e Moisés.
HEB 3:17 ¿Y chi tacar qꞌuijna e Dios tama e cuarenta año era? Pues tacar taca tin e cay uchiobꞌ e mabꞌambꞌanir tama e choquem lugar, y tamar era cꞌapa chamayobꞌ meyra gente tama e choquem lugar yajaꞌ.
HEB 3:18 ¿Y chi tacar cay ojron e Dios y che: “San machi ixto tuaꞌ oꞌchoyobꞌ tuaꞌ ajiriobꞌ tacaren tama e lugar xeꞌ ustabꞌir nimener lo que ayan tama e lugar Canaán?” Jaxobꞌ taca xeꞌ machi cꞌani obꞌianobꞌ tut e Dios.
HEB 3:19 Y tamar era erer cawira que machi ixto actanobꞌ tuaꞌ oꞌchoyobꞌ tama e jiriar xeꞌ ustabꞌir umen e Dios umen que machi cꞌani acꞌupseyanobꞌ tamar jaxir.
HEB 4:1 Pues entonces cocha quetpato e ojroner lo que arobꞌnon umen e Dios que erer ixto cochoy tuaꞌ cajiri tacar, caturbꞌic cabꞌa tamar tuaꞌ machi cawacta bꞌan taca, porque bꞌajcꞌat ayan ticajam tin e axin uyacta e chojbꞌesiaj era y tamar era machi ixto tuaꞌ oꞌchoy ajiri taca e Dios watar e día.
HEB 4:2 Pero non coybꞌix uyojroner e Dios tama e corpesiaj ubꞌan bꞌan cocha cay uyubꞌiobꞌ catata viejobꞌirobꞌ tama e onian tiempo, pero machi tacarnobꞌ umen e ojroner era cocha machi cꞌupseyanobꞌ tamar.
HEB 4:3 Pero tin e war oꞌchoyobꞌ tuaꞌ ajiriobꞌ taca e Dios jax non xeꞌ war cacꞌupseyan tama uyojroner. Bꞌan cocha chꞌar tzꞌijbꞌabꞌir tama uyojroner e Dios y che: Y tamar era e Dios qꞌuijna upaterobꞌ y che: San machi ixto tuaꞌ oꞌchoyobꞌ tuaꞌ ajiriobꞌ tacaren tama e lugar xeꞌ ustabꞌir nimener lo que ayan tama e lugar Canaán, che e Dios. Y bꞌan cay arobꞌnobꞌ e gente tama e onian tiempo motor que quetpa ustabꞌir e jiriar umen e Dios conda ne mato achena ani or e rum era.
HEB 4:4 Pues ayan tiaꞌ chꞌar tzꞌijbꞌabꞌir tama uyojroner e Dios tiaꞌ ojron tama ucꞌapesnibꞌir e semana xeꞌ jax e día sábado y che: Conda e Dios cꞌapa uche tunor or e rum y tunor ut e qꞌuin jiri tama ucꞌapesnibꞌir e semana xeꞌ jax e día sábado. Bꞌan chꞌar tzꞌijbꞌabꞌir tama uyojroner e Dios.
HEB 4:5 Y che otronyajr tama uyojroner e Dios que: San machi ixto tuaꞌ oꞌchoyobꞌ tuaꞌ ajiriobꞌ tacaren tama e lugar xeꞌ ustabꞌir nimener, che e Dios.
HEB 4:6 Pero ayanto más tin e tuaꞌ oꞌchoyobꞌ tuaꞌ ajiriobꞌ taca e Dios. Pero ayan ubꞌan tin e cay uyubꞌiobꞌ uyojroner e Dios tama e corpesiaj tama e onian tiempo xeꞌ machi ochoyobꞌ umen que machi cꞌupseyanobꞌ tut e Dios.
HEB 4:7 Pero ayanto otronteꞌ día xeꞌ ustabꞌir umen e Dios conda erer cochoy tuaꞌ cajiri tacar xeꞌ jax e día coner. Porque e Dios ucꞌampes e David xeꞌ turuan tama e onian tiempo tuaꞌ upejcon otronyajrto tama e día era y che cocha era: Coner, jay erer iyubꞌi lo que war uyareox e Dios, ira iqꞌuecꞌojse iwalma tut jaxir, che e David.
HEB 4:8 Pues jay jax nic ani e Josué xeꞌ cꞌapa uyajcꞌu e jiriar e gente tama e Israel tama e onian tiempo, machi ani war asutpa oꞌjron e Dios tama e jiriar otronyajrto tama e día xeꞌ jax coner.
HEB 4:9 Entonces war che tunor era que quetpato inteꞌ jiriar tuaꞌ e Dios tiaꞌ ererto cochoy non xeꞌ umaxtacon e Dios coner.
HEB 4:10 Porque tin e acꞌotoy tuaꞌ ajiri taca e Dios axin ajiri tama tunor upatnar bꞌan cocha cay jiri e Dios conda cꞌapa uche tunor or e rum y tunor ut e qꞌuin.
HEB 4:11 Y tamar era caturbꞌic cabꞌijnusiaj tuaꞌ cochoy tuaꞌ cajiri taca e Dios coner, y que mamajchi ticajam uchic bꞌan cocha cay uchiobꞌ e gente tama e onian tiempo xeꞌ uyactobꞌ ubꞌir e Dios umen que machi cay cꞌupseyanobꞌ tut uyojroner.
HEB 4:12 Pues uyojroner e Dios bꞌixir y ayan ucꞌotorer, y más ayan uyej que inteꞌ machit xeꞌ chatertiꞌ uyej xeꞌ erer unumse este que uxere tunor orubꞌac inteꞌ taca utúta inteꞌ, y tamar era uyojroner e Dios erer uxere umajin inteꞌ taca uyalma inteꞌ, y erer uchectes tunor lo que war anumuy tama ujor inteꞌ jay imbꞌutz o jay majax imbꞌutz, y erer uchectes lo que war ubꞌijnu uche inteꞌ tama uyalma.
HEB 4:13 Pues matucꞌa xeꞌ chembꞌir umen e Dios que erer aquetpa mucur tut, y tamar era tunor lo que ayan aquetpa chequer tut jaxir, y tunor lo que ayan aquetpa pasbꞌir tut jaxir, y tut jaxir ubꞌan que tunoron non ucꞌani tuaꞌ caxin cachecsu tunor lo que cꞌapa cache motor jay imbꞌutz o motor jay mabꞌambꞌan.
HEB 4:14 Entonces cocha non ayan inteꞌ casacerdote xeꞌ más nojta xeꞌ jax e Jesús xeꞌ jax Uyunen e Dios xeꞌ tꞌabꞌay ixin tut e qꞌuin, qꞌuecꞌojsenic cabꞌa coner tuaꞌ caxana tama e cꞌupesiaj lo que war cachecsu tut e gente axin.
HEB 4:15 Pues casacerdote era xeꞌ más nojta erer uyajta coit conda war canumse cabꞌa umen que injayjayon, cocha jaxir cay unumse ubꞌa tama e bꞌijnusiaj tuaꞌ ani uche e mabꞌambꞌanir bꞌan cocha non, pero jaxir ma tiaꞌ cꞌotoy uche e mabꞌambꞌanir.
HEB 4:16 Y tamar era incuic tuyejtzꞌer uturtar Cawinquirar taca tunor cacꞌupesiaj porque jaxir war uyajta coit y incꞌun uwirnar ticoit, y tamar era jaxir tuaꞌ axin uchojbꞌeson y tuaꞌ axin utacrion tama e hora conda más intran tunor ticoit.
HEB 5:1 Pues tama e onian tiempo inteꞌ xeꞌ cꞌotoy quetpa inteꞌ sacerdote xeꞌ nojta quetpa sicbꞌabꞌir tujam e inmojr winicobꞌ, y de allí turbꞌana e winic era tuaꞌ utacre e inmojr winicobꞌ tut e Dios, y quetpa tuaꞌ axin uyajcꞌu cora ofrenda e Dios y tuaꞌ uchamse cora arac xeꞌ quetpa bꞌan cocha inteꞌ tuanibꞌir tama umabꞌambꞌanirobꞌ e winicobꞌ tut e Dios.
HEB 5:2 Pero inteꞌ cocha era xeꞌ aquetpa inteꞌ sacerdote xeꞌ nojta jax taca inteꞌ winic, y tamar era jaxir unumse ubꞌa bꞌan taca cocha e inmojr winicobꞌ umen que injayjay ubꞌan. Y tamar era erer aquetpa incꞌun uwirnar tut e inmojr winicobꞌ xeꞌ matucꞌa unatobꞌ o xeꞌ war usati ubꞌobꞌ axin tama ubꞌir e Dios.
HEB 5:3 Y e sacerdote xeꞌ más nojta era aquetpa tuaꞌ uchamse cora arac cocha inteꞌ tuanibꞌir tut e Dios tama umabꞌambꞌanirach ubꞌan bꞌan cocha war uche tama e inmojr winicobꞌ cocha jaxir winic ubꞌan.
HEB 5:4 Pues mamajchi uyubꞌi utꞌabꞌse ubꞌa que jax tuaꞌ aquetpa inteꞌ sacerdote xeꞌ nojta taca tunor e tattzꞌarsiaj lo que ayan tama e patnar era, sino que ucꞌani tuaꞌ apejcna umen e Dios. Bꞌan numuy tama e Aarón tama e onian tiempo xeꞌ quetpa inteꞌ sacerdote xeꞌ nojta umen taca que pejcna umen Catata Dios.
HEB 5:5 Y bꞌan numuy taca e Cristo ubꞌan, jaxir machi utꞌabꞌse ubꞌa tuaꞌ aquetpa inteꞌ más nuxi sacerdote sino que bꞌan quetpa umen taca que bꞌan arobꞌna umen Catata Dios conda che que: Net jax Nisitzet, y nen inquetpa Tatabꞌiren tabꞌa coner, che e Dios.
HEB 5:6 Y ojron Catata Dios taca Uyunen era otronyajr tama uyojroner e Dios y che: Net tuaꞌ iquetpa inteꞌ sacerdote bꞌan cocha e Melquisedec. Y net tuaꞌ iquetpa inteꞌ sacerdote inyajrer xeꞌ machi tuaꞌ icꞌapa, che Catata Dios tama uyojroner.
HEB 5:7 Pues conda turuto Cawinquirar Jesucristo tara tor e rum cay upejca e Dios y war ucꞌajti tacar y war aꞌru tut e Dios este que war oyqꞌui umen que war unata que uyubꞌi acorpesna umen e Dios tuaꞌ machi achamesna. Y ubꞌna tunor lo que cay ucꞌajti taca e Dios umen que war uyusre uche tunor lo que arobꞌna umen e Dios.
HEB 5:8 Y motor que Cawinquirar Jesucristo jax Uyunen e Dios, pero jaxir quetpa tuaꞌ acꞌupseyan tut e Dios tamar lo que cay unumse ubꞌa conda turuto tara tor e rum.
HEB 5:9 Y conda cꞌapa uche tunor lo que ucꞌani tuaꞌ aquetpa Cawajcorpesiaj, ixin uyustes e corpesiaj xeꞌ machi tuaꞌ acꞌapa xeꞌ tuaꞌ aꞌjcꞌuna tunor tin e acꞌotoy acꞌupseyanobꞌ tut jaxir.
HEB 5:10 Y jaxir arobꞌna umen e Dios tuaꞌ aquetpa e sacerdote xeꞌ más nojta bꞌan cocha quetpa e Melquisedec tama e onian tiempo.
HEB 5:11 Pues ayanto meyra canseyaj lo que cꞌani cawareox tamar e Melquisedec era, pero intran tunor era tiut cocha nox machi cꞌani iturbꞌa ibꞌa tuaꞌ ixcano tamar.
HEB 5:12 Pues cocha cꞌapa numuy meyra tiempo desde que cay xanox nox tama ubꞌir e Dios ererix ani ixquetpa ajcanseyajox tama uyojroner e Dios. Pero nox era ucꞌanto tuaꞌ ixcansena otronyajrto ucajyesnibꞌir e canseyaj lo que ayan tama uyojroner e Dios. Nox era larox tacar inteꞌ chꞌom sitz xeꞌ asutpa uchꞌami e chuꞌ otronyajr umen que machito oꞌbꞌna ucꞌuxi e wer, y bꞌanox nox ubꞌan y tamar era quetpox injayjay tama icꞌupesiaj tama Cawinquirar.
HEB 5:13 Y tin e war aꞌchu lar tacar inteꞌ chuchu maxtac xeꞌ mato tucꞌa ujuicio, y tamar era machito unata tucꞌa e cuxtar xeꞌ erach tama Cadiosir.
HEB 5:14 Pero tin e canoix ucꞌuxi e wer jax tin e ayanix ut uyej, y bꞌan ubꞌan tin e canoix tama ucajyesnibꞌir e canseyaj lo que ayan tama uyojroner e Dios que warix unata tucꞌa xeꞌ imbꞌutz y warix unata tucꞌa xeꞌ mabꞌambꞌan umen que war uturbꞌa ubꞌa tuaꞌ taca uche lo que imbꞌutz.
HEB 6:1 Y tamar era cꞌani cawacta era e canseyaj tamar lo que ucꞌanto tuaꞌ acano inteꞌ xeꞌ wartocto acay axana tama ubꞌir e Cristo. Y era cꞌani cacansiox lo que ucꞌani tuaꞌ acano inteꞌ xeꞌ chꞌiꞌ meyra tama ucꞌupesiaj tama e Cristo. Y tamar era machi ixto tuaꞌ casutpa cawareox otronyajr cocha tuaꞌ iwacta iche tunor lo que erer uqꞌuechiox ixixin tut e chamer, y machi ixto tuaꞌ casutpa cawareox otronyajr cocha tuaꞌ ixcꞌupseyan tama Cadiosir.
HEB 6:2 Y machi cꞌani casutpa cawareox otronyajr tamar e chꞌuymar, y nien tamar e canseyaj conda apacbꞌuna ucꞌabꞌ inteꞌ tujor inteꞌ ajcꞌupesiaj tuaꞌ aꞌjcꞌuna Unawalir e Dios, y machi cꞌani casutpa cawareox otronyajr tama e canseyaj tama e tiempo conda cꞌani asutpa abꞌixcꞌobꞌ tunor e chamenobꞌ, y machi cꞌani casutpa cawareox otronyajr tama e canseyaj tama e jatzꞌuar tuaꞌ e Dios xeꞌ machi tuaꞌ acꞌapa. Cꞌani cawacta tunor era tuaꞌ uyubꞌion cacansiox era lo que ucꞌani tuaꞌ acano inteꞌ tuaꞌ uyubꞌi aquetpa inteꞌ xeꞌ chꞌix meyra tama ucꞌupesiaj tama e Cristo.
HEB 6:3 Y bꞌan tuaꞌ cache, jay Cadiosir axin utacrion cache.
HEB 6:4 Porque mix cocha erer tuaꞌ acansenobꞌ más tuaꞌ asutpobꞌ uyactobꞌ e mabꞌambꞌanir otronyajr tin e ixix uchꞌamiobꞌ e janchꞌaquenar, y xeꞌ ixix uchꞌamiobꞌ e cuxtar xeꞌ machi tuaꞌ acꞌapa, y xeꞌ ixix uchꞌamiobꞌ Unawalir e Dios.
HEB 6:5 Y mix cocha erer tuaꞌ acansenobꞌ más tuaꞌ asutpobꞌ uyactobꞌ e mabꞌambꞌanir otronyajr tin e ixix uyejtobꞌ que erach e Dios xeꞌ cꞌapa uche tunor lo que chꞌar tzꞌijbꞌabꞌir tama uyojroner, y mix cocha erer tuaꞌ acansenobꞌ más tuaꞌ asutpobꞌ uyactobꞌ e mabꞌambꞌanir otronyajr tin e ixix uchꞌamiobꞌ ucꞌotorer e Dios bꞌan cocha e cꞌotorer xeꞌ tuaꞌ cajcꞌuna tama e tiempo xeꞌ watar.
HEB 6:6 Porque jay inteꞌ cocha era axin uchoqui tunor era tuaꞌ uyacta ubꞌir e Dios inyajrer, mix cocha erer acansena más tuaꞌ asutpa uyacta e mabꞌambꞌanir otronyajr. Porque inteꞌ cocha era war uche achꞌubꞌna Uyunen e Dios tut e cruz otronyajr y war utzene tut e gente tamar.
HEB 6:7 Pues uyalmobꞌ e gente aquetpa bꞌan cocha e rum xeꞌ wacchetaca asajbꞌa axin e jaꞌ tamar conda war acꞌaxi e jajar, y e jajar era bꞌan cocha uyojroner e Dios lo que war oꞌbꞌna umen e gente, y e rum era jay bueno alocꞌoy lo que cꞌapa pajcꞌa tamar tut tin e cay patnobꞌ tamar, arobꞌna que chojbꞌesbꞌir ut e rum era. Y bꞌan era ubꞌan cocha inteꞌ winic conda axin acuxpa uyojroner e Dios tama uyalma, porque axin aꞌrobꞌna tamar jaxir que chojbꞌesbꞌir ut umen e Dios.
HEB 6:8 Pero jay e rum era tꞌix taca acuxpa tamar, entonces cꞌani aꞌrobꞌna que e rum era ucꞌani tuaꞌ abꞌaxna umen e Dios y aquetpa tuaꞌ acꞌapa apurutna. Y bꞌan inteꞌ winic xeꞌ machi cꞌani uyacta e mabꞌambꞌanir, cꞌani acꞌapa apurutna ubꞌan.
HEB 6:9 Pues entonces cawermanuox xeꞌ inchoj iut camener, motor que war capejcox cocha era, pero machi war cabꞌijnu tamarox tama e ojroner era. Porque non war cabꞌijnu que nox ixixin ichꞌami meyra chojbꞌesiaj tuaꞌ e Dios taca icorpesiaj.
HEB 6:10 Porque erach Cadiosir tuaꞌ machi unajpes tunor e patnar lo que cay iche tama upatnar jaxir, y nien machi tuaꞌ unajpes e cꞌunersiaj lo que cay ichecsu tut tin e ajcꞌupesiajobꞌ tama Cawinquirar tamar e tacarsiaj lo que cay uchꞌamiobꞌ tibꞌa. Y bꞌan ixto war iche esto coner.
HEB 6:11 Pues non era quisinic que mamajchi axin uyacta ubꞌir e Dios este que acꞌapa ucuxtar tara tor e rum. Y jay bꞌan iche entonces tunorox tuaꞌ acꞌapa ichꞌami tunor lo que war icojco tuaꞌ ichꞌami tuaꞌ e Dios conda ixixin ixcꞌotoy tut e qꞌuin.
HEB 6:12 Y machi cꞌani cawira que ixixin ixcꞌoyran, sino que cꞌani cawira que ixixin iche bꞌan cocha war uchiobꞌ e inmojr ajcꞌupesiajobꞌ xeꞌ war ucꞌampesobꞌ ucꞌupesiaj tama e Dios, y xeꞌ war ucojcobꞌ tzꞌustaca tuaꞌ uchꞌamiobꞌ tunor lo que arobꞌnobꞌ umen e Dios que bꞌan tuaꞌ aꞌjcꞌunobꞌ watar e día.
HEB 6:13 Pues bꞌijnunic tama e Abraham xeꞌ turuan tama e onian tiempo. Y bꞌijnunic tama e tiempo conda arobꞌna umen e Dios que jaxir tuaꞌ achojbꞌesna meyra umener. Pero cocha e Dios cꞌani uchecsu tut e Abraham que san tuaꞌ anumuy tunor lo que war uyare era, ixin uyacta inteꞌ ojroner tut ubꞌa. Y bꞌan uche e Dios porque mamajchi xeꞌ más nojta ucꞌotorer que jaxir.
HEB 6:14 Y e Dios uyare e Abraham y che: “San cꞌani inchojbꞌeset meyra y cꞌani inche tuaꞌ abꞌoro amaxtac meyra”, che e Dios.
HEB 6:15 Y e Abraham machi cꞌoy ucojco tama e Dios y tamar era ixin uchꞌami lo que arobꞌna umener.
HEB 6:16 Conda inteꞌ winic tara tor e rum axin uyacta inteꞌ ojroner tujor otronteꞌ, uche tut otronteꞌ xeꞌ más nojta ucꞌampibꞌir. Y uche cocha era tuaꞌ aquetpa chequer que cꞌani acꞌapa uche tunor lo que aquetpa tuaꞌ achempa, y tamar era machi tuaꞌ asutpa oꞌjronobꞌ tamar otronyajr.
HEB 6:17 Y bꞌan ixto uche e Dios ubꞌan porque ucꞌani ixto tuaꞌ aquetpa chequer tut tunor tin e tuaꞌ uchꞌamiobꞌ lo que cꞌapa arobꞌnobꞌ umener que ma tiaꞌ tuaꞌ asutpa ubꞌijnu tuaꞌ uyacta bꞌan taca lo que cay ubꞌijnu uche, sino que jaxir tuaꞌ acꞌapa uche tunor lo que ubꞌijnu uche. Y tamar era ixin uyacta inteꞌ ojroner tut ubꞌa taca e Abraham tuaꞌ aquetpa chequer que san tuaꞌ uche tunor era lo que arobꞌna umener.
HEB 6:18 Y tamar era canata tama e chateꞌ ojroner era que e Dios machi uyubꞌi tuaꞌ asutpa intiach, cocha jaxir machi uyubꞌi amajresian. Y tamar era non xeꞌ ixion cawacta e mabꞌambꞌanir y xeꞌ war cacꞌupseyan tama e Cristo erer cacꞌunles cabꞌa que san tuaꞌ cajcꞌuna lo que war cacojco tama e Dios tuaꞌ cachꞌami, cocha jaxir cꞌapa uyareon que cꞌani uyajcꞌon tunor era.
HEB 6:19 Y lo que war cacojco tama cawalma tuaꞌ cachꞌami tuaꞌ e Dios bꞌan turu cocha lo que war aqꞌuecꞌo y que ma cocha erer anijquesna. Y bꞌan era cocha inteꞌ nuxi taqꞌuin xeꞌ pacbꞌir macuir e rum xeꞌ mamajchi uyubꞌi unijques. Y bꞌan era cocha lo que arobꞌnon umen e Dios que bꞌan tuaꞌ uche. Y jay quetpa pacbꞌir tama cawalma lo que war cacojco tuaꞌ cachꞌami tuaꞌ e Dios entonces mamajchi chi uyubꞌi ubꞌoqui alocꞌoy tunor era tamaron. Y lo que war cacojco tuaꞌ cachꞌami tama e Dios war uchion canata que non erer cochoy macuir e tabernáculo lo que ayan tichan tut e qꞌuin tiaꞌ turu Catata Dios y tiaꞌ erer cochoy este macuir e cortina xeꞌ jax e lugar xeꞌ más erach tiaꞌ war aturuan Catata Dios.
HEB 6:20 Y jax e Jesús xeꞌ ixin upasi e bꞌir tamaron tama e cortina era tuaꞌ uyubꞌion cochoy tiaꞌ turu Catata Dios non ubꞌan. Y tamar era e Jesús cꞌotoy quetpa casacerdote xeꞌ más nojta inyajrer bꞌan cocha quetpa e Melquisedec tama e onian tiempo.
HEB 7:1 Pues e Melquisedec jax ani e rey tuaꞌ e chinam Salem y jax ubꞌan inteꞌ sacerdote tuaꞌ e Dios Ajtichaner. Pues tama e onian tiempo e Abraham locꞌoy tuaꞌ axin ucorpes e Lot xeꞌ jax usobrinobꞌir. Y conda cꞌapa uchamse cora rey taca tunor e winicobꞌ xeꞌ turobꞌ tacarobꞌ, y conda war asutpa axin tuaꞌ acꞌotoy tama ulugar otronyajr, locꞌoy e Melquisedec tuaꞌ utajwi e Abraham tiaꞌ war watar tama e bꞌir y cay uchojbꞌes ut.
HEB 7:2 Y tamar era e Abraham sutpa uyajcꞌu udiezmo e Melquisedec tama tunor lo que cay uchꞌami tama e tzꞌojyir era. Pues ucꞌabꞌa e rey Melquisedec war che: “E rey xeꞌ uche lo que erach”, y jaxir rey ubꞌan tuaꞌ e chinam Salem xeꞌ war che: “E rey xeꞌ uyajcꞌu e jiriar.”
HEB 7:3 Pues tamar lo que chꞌar tzꞌijbꞌabꞌir tama uyojroner e Dios tamar e Melquisedec matucꞌa canata jay ayan utata nien jay ayan utuꞌ y nien matucꞌa canata jay ayan utata viejo. Intaca checta. Matucꞌa ucajyesnibꞌir y nien matucꞌa ucꞌapesnibꞌir. Y tamar era e Melquisedec quetpa lar tacar Uyunen e Dios xeꞌ jax inteꞌ sacerdote xeꞌ machi tuaꞌ acꞌapa.
HEB 7:4 Pues bꞌijnunic cora era cobꞌa winic e Melquisedec, porque jaxir ajcꞌuna inteꞌ diezmo umen catata viejobꞌir Abraham tama tunor lo que cay uchꞌami tama e tzꞌojyir.
HEB 7:5 Pues conda numuy e tiempo tunor umaxtacobꞌ e Leví xeꞌ turuan tama e onian tiempo cꞌotoy quetpobꞌ sacerdotiobꞌ. Y jaxirobꞌ uchꞌajnarobꞌ taca e Abraham ubꞌan. Pero usitzobꞌ e Leví arobꞌnobꞌ tama uley e Moisés tuaꞌ ucꞌajtiobꞌ inteꞌ diezmo tuaꞌ tunor e gente tama e Israel motor que jaxirobꞌ sitzbꞌirobꞌ tuaꞌ e Abraham era ubꞌan.
HEB 7:6 Pero e Melquisedec, motor que majax sitzbꞌir tuaꞌ e Leví, pero jaxir ixin uchꞌami e diezmo tuaꞌ e Abraham xeꞌ jax xeꞌ cay uchꞌami e sian chojbꞌesiaj tuaꞌ e Dios. Y de allí e Melquisedec ixin uchojbꞌes ut e Abraham tama e día yajaꞌ.
HEB 7:7 Pues chequer que tin e axin uchojbꞌes ut otronteꞌ más nuxi winic que tin e war achojbꞌesna ut.
HEB 7:8 Pues tin e sacerdote tama e Israel axin uchꞌamiobꞌ e diezmo tuaꞌ e gente pero jaxirobꞌ axin achamayobꞌ ubꞌan. Pero tama e Melquisedec chꞌar tzꞌijbꞌabꞌir tama uyojroner e Dios que jaxir quetpa bꞌan cocha inteꞌ xeꞌ machi tuaꞌ achamay.
HEB 7:9 Y e Leví taca tunor e sacerdote xeꞌ chꞌajnari tariobꞌ tamar quetpobꞌ tuaꞌ uchꞌamiobꞌ e diezmo tuaꞌ e gente tama e Israel axin. Pero erer cabꞌijnu que e Leví era uyajcꞌu e diezmo e Melquisedec ubꞌan, cocha jaxir sitzbꞌir tuaꞌ e Abraham xeꞌ cꞌapa utoyi e Melquisedec tama e onian tiempo.
HEB 7:10 Porque erer cabꞌijnu que conda merato acuxpa e Leví pero jaxir qꞌuechbꞌir ixin tama ucuerpo e Abraham conda ixin uyajcꞌu e diezmo e Melquisedec.
HEB 7:11 Pues entonces e gente tuaꞌ e Israel ajcꞌunobꞌ uley e Moisés umen e sian sacerdotiobꞌ xeꞌ tari tama uchꞌajnar e Aarón xeꞌ jax inteꞌ sitzbꞌir tuaꞌ e Leví. Pero jay e sian sacerdotiobꞌ era erer ani acꞌapa ucorpes tunor tin e war acꞌupseyanobꞌ tut e ley, machi ani ebꞌetna tari otronteꞌ sacerdote tuaꞌ ucorpeson xeꞌ majax tuaꞌ uchꞌajnar e Leví sino que turu bꞌan cocha e Melquisedec.
HEB 7:12 Pero conda aquetpa intiach uchꞌajnar tin e tuaꞌ aquetpa inteꞌ sacerdote, ucꞌani tuaꞌ aquetpa otronteꞌ ley ubꞌan.
HEB 7:13 Pero Cawinquirar Jesucristo xeꞌ jax xeꞌ arobꞌna que jaxir tuaꞌ aquetpa inteꞌ sacerdote machi tari tama uchꞌajnar e Leví sino que tuaꞌ otronteꞌ chꞌajnar. Pero mamajchi quetpa sacerdote tama e chꞌajnar era.
HEB 7:14 Porque natanwa umen tunor que Cawinquirar Jesucristo cuxpa tari tama uchꞌajnar e Judá, y chequer tama uley e Moisés que ma tiaꞌ chꞌar tzꞌijbꞌabꞌir jay tin e tuaꞌ e chꞌajnar era erer aquetpa inteꞌ sacerdote, sino que tamar taca uchꞌajnar e Leví.
HEB 7:15 Y aquetpa más chequer tunor era conda cabꞌijnu que tari otronteꞌ sacerdote xeꞌ jax e Jesucristo xeꞌ majax bꞌan cocha e Aarón sino que xeꞌ bꞌan cocha e Melquisedec.
HEB 7:16 Porque e Jesucristo quetpa sacerdote majax umen que bꞌan ucꞌani inteꞌ ley que che que tunor umaxtac e Aarón tuaꞌ aquetpobꞌ sacerdotiobꞌ, sino que jaxir quetpa sacerdote umen que ayan ucꞌotorer y umen que ayan ucuxtar xeꞌ machi tuaꞌ acꞌapa.
HEB 7:17 Porque jax era lo que che e Dios tamar jaxir: Net tuaꞌ iquetpa inteꞌ sacerdote bꞌan cocha e Melquisedec. Y net tuaꞌ iquetpa inteꞌ sacerdote xeꞌ machi tuaꞌ icꞌapa. Bꞌan che e Dios tama uyojroner.
HEB 7:18 Entonces quetpa bꞌan taca e onian ley xeꞌ tuaꞌ e Moisés porque injayjay turu y porque cꞌotoy quetpa que mix tucꞌa ucꞌampibꞌir.
HEB 7:19 Porque uley e Moisés mamajchi uyubꞌi uche aquetpa erach. Pero non coner ayan inteꞌ xeꞌ más nojta xeꞌ war cacojco tamar xeꞌ jax e Jesucristo, y jaxir war utacrion tuaꞌ cacꞌotoy tut e Dios.
HEB 7:20 Pues entonces Cadiosir ixin uyacta inteꞌ ojroner tamar Cawinquirar Jesucristo que jaxir tuaꞌ aquetpa inteꞌ sacerdote xeꞌ machi tuaꞌ acꞌapa. Pues e inmojr sacerdote xeꞌ tariobꞌ tama uchꞌajnar e Leví matucꞌa inteꞌ ojroner actana tacarobꞌ umen e Dios.
HEB 7:21 Pero tamar Cawinquirar Jesucristo actana ixto inteꞌ ojroner bꞌan cocha chꞌar tzꞌijbꞌabꞌir tama uyojroner e Dios y che: E Dios uyacta inteꞌ ojroner tacar y machi tuaꞌ uyacta e bꞌijnusiaj era y che: “Net tuaꞌ iquetpa inteꞌ sacerdote xeꞌ machi tuaꞌ icꞌapa”, che e Dios tama uyojroner.
HEB 7:22 Entonces Cadiosir ixin uyacta inteꞌ ojroner tama Cawinquirar Jesús y tamar era jax jaxir xeꞌ quetpa cafiador tama e pacto era xeꞌ más imbꞌutz que inteꞌ xeꞌ ajcꞌuna bꞌajxan xeꞌ jax uley e Moisés.
HEB 7:23 Pues tunor e sian sacerdotiobꞌ xeꞌ tariobꞌ tama uchꞌajnar e Leví bꞌoro umen que sutpobꞌ onian gente este que ixin chamayobꞌ y de allí umaxtacobꞌ quetpobꞌ sacerdotiobꞌ otronyajr, y tamar era ma erer aquetpobꞌ que jaxobꞌ taca tuaꞌ aquetpobꞌ sacerdotiobꞌ tama tunor e tiempo cocha axin achamayobꞌ.
HEB 7:24 Pero cocha Cawinquirar Jesús machi tuaꞌ asutpa achamay otronyajr jax tuaꞌ aquetpa bꞌan taca upatnar que jax Casacerdote. Y tamar era mamajchi tuaꞌ axin uchꞌami upatnar era otronyajr.
HEB 7:25 Y tamar era jaxir erer ucorpes inyajrer tunor tin e war atacarna umener tuaꞌ acꞌotoy tut e Dios, cocha jaxir machi tuaꞌ asutpa achamay y cocha jaxir ma tiaꞌ tuaꞌ uyacta tuaꞌ ucꞌajti taca e Dios tamaron.
HEB 7:26 Pues entonces jax Cawinquirar Jesucristo que war cacꞌani tuaꞌ aquetpa Casacerdote xeꞌ más nojta, porque jaxir erach, y jaxir matucꞌa ayan tamar, y jaxir matucꞌa umabꞌambꞌanir, y jaxir majax bꞌombꞌir umen tin e ajmabꞌambꞌanirobꞌ, y jax jaxir xeꞌ quetpa tꞌabꞌesbꞌir tichan tut e qꞌuin tuaꞌ uchꞌami más meyra utawarer que tunor e inmojr.
HEB 7:27 Pero jaxir intiach upatnar tut e inmojr sacerdotiobꞌ xeꞌ más nojta porque inteꞌ sacerdote xeꞌ más nojta cocha era ucꞌani tuaꞌ axin uchamse inteꞌ arac ajqꞌuin ajqꞌuin tuaꞌ aquetpa satbꞌir umabꞌambꞌanirach xeꞌ cꞌapa uche jaxir, y de allí quetpa tuaꞌ asutpa uchamse otronteꞌ arac tuaꞌ aquetpa satbꞌir umabꞌambꞌanirobꞌ tunor e gente. Pero Cawinquirar Jesucristo ixin uyajcꞌu ubꞌa tuaꞌ achamesna tuaꞌ utoyi inyajrer tama tunor umabꞌambꞌanirobꞌ e gente. Y tamar era machi tuaꞌ asutpa achamesna otronyajr tuaꞌ utoyi ani otronyajr tama e mabꞌambꞌanir era, porque jaxir cꞌapa utoyi inyajrer tama tunor camabꞌambꞌanir.
HEB 7:28 Pues tama uley e Moisés chꞌar tzꞌijbꞌabꞌir que e winicobꞌ xeꞌ aquetpobꞌ e sacerdote xeꞌ más nojta jax taca e winicobꞌ xeꞌ injayjayobꞌ cocha werobꞌ. Pero nacpat e tiempo conda ajcꞌuna uley e Moisés e Dios ixin uyacta inteꞌ ojroner tut Uyunen que che que jaxir tuaꞌ aquetpa Casacerdote xeꞌ más nojta. Y bꞌan uche e Dios umen que erach inyajrer Uyunen era.
HEB 8:1 Pues tamar lo que war catzꞌijbꞌa axin era lo que más ayan ucꞌampibꞌir jax era: Que non ayan inteꞌ Casacerdote xeꞌ más nojta xeꞌ war aturuan tama unojcꞌabꞌ uturtar Catata Dios tichan tut e qꞌuin.
HEB 8:2 Y coner Casacerdote era war apatna tama e tabernáculo xeꞌ erach lo que ayan tut e qꞌuin xeꞌ chembꞌir umen Cawinquirar Dios, y majax umen inteꞌ winic.
HEB 8:3 Pues inteꞌ inteꞌ xeꞌ aquetpa inteꞌ sacerdote xeꞌ más nojta turbꞌabꞌirobꞌ tuaꞌ uyajcꞌuobꞌ cora ofrenda y tuaꞌ uchamsiobꞌ cora arac tuaꞌ utoyi tama umabꞌambꞌanirobꞌ e gente, y tamar era Cawinquirar Jesucristo xeꞌ turu tut e qꞌuin ucꞌani tuaꞌ uyajcꞌu cora ofrenda yajaꞌ tichan ubꞌan.
HEB 8:4 Pero jay turuto ani tara tor e rum coner, ma cocha erer ani aquetpa inteꞌ sacerdote cocha ayanto chi xeꞌ aquetpobꞌ sacerdotiobꞌ xeꞌ war uyajcꞌuobꞌ cora ofrenda e Dios bꞌan cocha arobꞌnobꞌ tuaꞌ uchiobꞌ tama uley e Moisés.
HEB 8:5 Pero lo que war uchiobꞌ tin e aquetpobꞌ sacerdotiobꞌ tara tor e rum aquetpa bꞌan cocha inteꞌ uchequerir xeꞌ chꞌur tara tor e rum tamar lo que ayan tut e qꞌuin. Y canata que bꞌan porque conda e Moisés cꞌani uche e tabernáculo arobꞌna umen e Dios y che: “Turbꞌan abꞌa tuaꞌ ache e tabernáculo bꞌan taca cocha uwirnar uchequerir lo que cay inwirset tama ujor e witzir tama e lugar Sinaí”, che e Dios.
HEB 8:6 Pero Casacerdote xeꞌ más nojta ticabꞌa ajcꞌuna upatnar xeꞌ más nojta ubꞌan que e inmojr sacerdote, cocha jaxir cꞌapa uyustes inteꞌ pacto que más ayan ucꞌampibꞌir tut e Dios y tut e winicobꞌ que inteꞌ xeꞌ chembꞌir ixnix, cocha e pacto era chembꞌir taca inteꞌ tuanibꞌir xeꞌ más nojta ucꞌampibꞌir tama tunor.
HEB 8:7 Porque jay uyubꞌi ani ucorpeson e onian pacto xeꞌ chembꞌir taca e Moisés, machi ani ucꞌani otronteꞌ pacto era xeꞌ chembꞌir umen Cawinquirar Jesucristo.
HEB 8:8 Pero Cadiosir, conda uwira e gente tama e tiempo yajaꞌ, uwira que ayan lo que ucꞌanto y tamar era ojron y che: Watar e día, che Cawinquirar Dios, conda cꞌani inche otronteꞌ pacto taca e gente tuaꞌ e Israel, y taca e gente tama uchꞌajnar e Judá.
HEB 8:9 Y e pacto era xeꞌ imbꞌutz lo que cꞌani inche tacarobꞌ majax bꞌan cocha inteꞌ pacto lo que cay inche taca utata viejobꞌirobꞌ conda cay inchuqui ucꞌabꞌobꞌ tuaꞌ inlocsiobꞌ tama e lugar Egipto. Pues jaxirobꞌ machi cꞌupseyanobꞌ tut e onian pacto era, y tamar era ixien inwactobꞌ bꞌan taca, che Cawinquirar Dios.
HEB 8:10 Pues e pacto lo que cꞌani inche taca e gente tuaꞌ e Israel tama e tiempo xeꞌ watar jax era, che Cawinquirar Dios, Cꞌani inturbꞌa niwojroner tama ujorobꞌ, y cꞌani intzꞌijbꞌa tunor era tama uyalmobꞌ ubꞌan. Y tamar era nen tuaꞌ inquetpa Udiosirenobꞌ, y jaxirobꞌ tuaꞌ aquetpobꞌ nimaxtacobꞌ ubꞌan, che Cawinquirar Dios.
HEB 8:11 Y tama e tiempo yajaꞌ mamajchi chi tuaꞌ axin ucanse upiarobꞌ y nien tuaꞌ axin ucanse uyermanuobꞌ tuaꞌ acꞌotoy unatobꞌ chi Cawinquirar Dios, porque tunor e gente tuaꞌ unatobꞌ chien nen, y bꞌan tin e más chuchu este tin e más nojta.
HEB 8:12 Y cꞌani inxin incꞌumpa tacarobꞌ y cꞌani innajpes tunor lo que uchiobꞌ que majax imbꞌutz, y machi ixto tuaꞌ incꞌajpes umabꞌambꞌanirobꞌ otronyajr, che e Dios.
HEB 8:13 Y conda ojron e Dios y che que ayan inteꞌ pacto xeꞌ imbꞌutz, war che era que e onian pacto lo que chembꞌir taca e Moisés war asatpa axin y que war acꞌapa era este que war anajpa axin.
HEB 9:1 Pues tama e onian pacto lo que chembꞌir taca e Moisés chꞌar tzꞌijbꞌabꞌir tunor lo que ucꞌani tuaꞌ achempa tama inteꞌ servicio, pero tunor era quetpa tuaꞌ achempa tama e tabernáculo lo que ayan tara tor e rum.
HEB 9:2 Pues tama e tabernáculo era xeꞌ chena taca e bꞌujc ayan inteꞌ cuarto macuir xeꞌ arobꞌna: “E cuarto xeꞌ erach”, y macuir e cuarto era ayan inteꞌ nuxi uturibꞌ cꞌajc xeꞌ galan atzꞌajbꞌa xeꞌ awawan tor e rum, y ayan inteꞌ mesa tiaꞌ ayan cora pan xeꞌ chembꞌirix ofrecer taca e Dios.
HEB 9:3 Y tama e tabernáculo era ayan otronteꞌ cuarto más macuir xeꞌ arobꞌna: “E cuarto xeꞌ más erach.”
HEB 9:4 Y macuir e cuarto era ayan inteꞌ mesa tiaꞌ apurutna e ujtzꞌubꞌ, y ayan inteꞌ cofre xeꞌ arobꞌna: “Tuaꞌ e pacto”, xeꞌ bꞌochꞌor taca e oro. Y macuir e cofre era ayan inteꞌ bꞌejt xeꞌ chembꞌir taca e oro tiaꞌ ayan imbꞌijc e maná, y ya chꞌar uteꞌ e Aarón xeꞌ nichiri tama e onian tiempo, y ayan cora tun xeꞌ chꞌar ut tiaꞌ chꞌar tzꞌijbꞌabꞌir upacto e Dios.
HEB 9:5 Y tujor e cofre era war chateꞌ angelobꞌ xeꞌ chembꞌir taca e oro. Y e angelobꞌ era arobꞌna: “Querubín”. Y uwirnar e chateꞌ querubín era uchecsu ticoit que ya turu e Dios tama e cofre era. Y ayan uwich e querubín xeꞌ axin tujor e cofre xeꞌ jax e lugar tiaꞌ atzijtzna uchꞌichꞌer e aracꞌobꞌ xeꞌ chamesnobꞌ tuaꞌ aquetpa satbꞌir umabꞌambꞌanirobꞌ e gente. Pero ma jabꞌaren era tuaꞌ inchecsu más tama tunor era.
HEB 9:6 Pues bꞌan ustabꞌir tunor macuir e tabernáculo tiaꞌ ochoyobꞌ e sacerdotiobꞌ ajqꞌuin ajqꞌuin tuaꞌ uchiobꞌ e servicio, pero intaca ochoyobꞌ tama e bꞌajxan cuarto xeꞌ arobꞌna: “E cuarto xeꞌ erach”.
HEB 9:7 Pero e cuarto xeꞌ más macu xeꞌ arobꞌna: “E cuarto xeꞌ más erach”, jax taca uyubꞌi oꞌchoy tin e sacerdote xeꞌ más nojta inyajr tama inteꞌ inteꞌ año. Y conda jaxir oꞌchoy tama e cuarto era uqꞌueche axin uchꞌichꞌer cora aracꞌobꞌ tuaꞌ uturbꞌa tut e Dios tuaꞌ aquetpa satbꞌir umabꞌambꞌanirach, y de allí uche tunor era otronyajrto tuaꞌ aquetpa satbꞌir umabꞌambꞌanirobꞌ e gente ubꞌan.
HEB 9:8 Pues tamar era Unawalir e Dios war ucansion que mato jax pasar ani ticoit e bꞌir xeꞌ axin tut e lugar xeꞌ más erach lo que ayan tichan tut e qꞌuin conda warto ani acꞌampesna e tabernáculo lo que ayan tara tor e rum.
HEB 9:9 Pero tunor era quetpa bꞌan cocha inteꞌ chequerir ticoit tuaꞌ uwirsion que tunor e sian ofrenda y tunor e aracꞌobꞌ xeꞌ chamesnobꞌ tuaꞌ aturbꞌana tut e Dios, machi uyubꞌi tuaꞌ uche aquetpobꞌ erach tin e war uturbꞌobꞌ tunor era tut e Dios, cocha mato tucꞌa e jiriar tama uyalmobꞌ, y warto unatobꞌ tama uyalmobꞌ que abꞌetuobꞌ taca e Dios.
HEB 9:10 Pues tunor e ofrenda lo que cay uchiobꞌ iraj iraj tama e onian tiempo ayan ani ucꞌampibꞌir tuaꞌ taca uyajcꞌu e cꞌumpar jay ucꞌocchiobꞌ uley e Moisés tamar lo que ucꞌuxiobꞌ o tamar lo que uyuchꞌiobꞌ, o jay ixin uchiobꞌ lo que erer uche abꞌontzꞌa ut inteꞌ bꞌan cocha che tama uley e Moisés. Pero tunor era jax taca tuaꞌ atacarnobꞌ e gente tuaꞌ utajwiobꞌ e cꞌumpar tamar lo que ayan chequer patir inteꞌ, y ayan ani ucꞌampibꞌir e ley era ajtaca este que tari e Cristo conda e Dios cay uche tuaꞌ aquetpa intiach tunor era.
HEB 9:11 Pues entonces tari e Cristo xeꞌ quetpa Casacerdote xeꞌ más nojta tuaꞌ uyajcꞌon tunor lo que imbꞌutz lo que ayan tamaron coner. Y e tabernáculo tiaꞌ apatna jaxir majax bꞌan cocha ayan tara tor e rum xeꞌ chembꞌir umen e winicobꞌ, sino que e tabernáculo yajaꞌ erach tunor y más ayan ucꞌampibꞌir.
HEB 9:12 Pero conda e Cristo ixin ochoy tama e lugar xeꞌ más erach lo que ayan tama e tabernáculo xeꞌ turu tut e qꞌuin, machi uqꞌueche ixin uchꞌichꞌer inteꞌ cabro y nien uchꞌichꞌer inteꞌ wacax tuaꞌ ani uturbꞌa tut e Dios, sino que uqꞌueche ixin uchꞌichꞌerach. Pero jaxir inyajr taca uturbꞌa uchꞌichꞌer, y tamar era cꞌapa uyustes inyajrer tunor cacorpesiaj xeꞌ machi tuaꞌ acꞌapa.
HEB 9:13 Pues ayan ani ucꞌampibꞌir uchꞌichꞌer e wacax y uchꞌichꞌer e cabro y utanir e wacax xeꞌ acꞌapa apuruy tama e altar xeꞌ acꞌampesna tuaꞌ atzijtzna tujor tin e ayan e bꞌonemar tama uyalmobꞌ tuaꞌ acꞌotoy aquetpobꞌ imbꞌutz otronyajr.
HEB 9:14 Y cocha ayan ani ucꞌampibꞌir nojta cocha era uchꞌichꞌer e sian aracꞌobꞌ, ¿cobꞌa más ayan ucꞌotorer uchꞌichꞌer e Cristo tuaꞌ acorpesian? Pues tacar utacarsiaj Unawalir e Dios xeꞌ machi tuaꞌ acꞌapa e Cristo ixin uyajcꞌu ubꞌa tuaꞌ achamesna bꞌan ani cocha inteꞌ arac xeꞌ más erach tut e Dios. Y uchꞌichꞌer era xeꞌ ixin uwechꞌe tut e cruz war upoqui tunor lo que ayan ani tama cawalma que uchion canata que cabꞌeto taca e Dios, y uchꞌichꞌer era war upoquion tama tunor camabꞌambꞌanir lo que war ani uqꞌuechion caxin tut e chamer. Y tamar era coner uyubꞌion ixto cache upatnar Cadiosir xeꞌ bꞌixir y xeꞌ machi tuaꞌ acꞌapa.
HEB 9:15 Y tamar era jax e Cristo xeꞌ quetpa tuaꞌ uyustes otronteꞌ pacto tacaron cocha jax taca jaxir xeꞌ erer awawan tujam e Dios y non xeꞌ winicon. Y tamar era tunor tin e pejcnobꞌ umen e Dios erer axin uchꞌamiobꞌ lo que arobꞌnobꞌ umen e Dios que bꞌan tuaꞌ aꞌjcꞌunobꞌ xeꞌ jax e corpesiaj xeꞌ machi tuaꞌ acꞌapa. Pues tacar uchamer e Cristo ixin utoyi tunor e mabꞌambꞌanir y tamar era uyubꞌi aquetpa satbꞌir tunor e mabꞌambꞌanir lo que cay uchiobꞌ tin e turobꞌ tama e tiempo conda ayanto ani ucꞌotorer e onian pacto.
HEB 9:16 Pues inteꞌ tatabꞌir conda ucꞌani tuaꞌ aquetpa chequer chi tuaꞌ uchꞌami tunor lo que ayan tuaꞌ conda axin achamay, axin utzꞌijbꞌa ucꞌabꞌa chi chi era tama inteꞌ jun. Pero conda acꞌapa achamay e winic ayanto otronteꞌ jun lo que ucꞌani tuaꞌ aloqꞌuesna tama e alcaldía tuaꞌ aquetpa chequer que chamay ajchi e winic era. Y de allí tin e aquetpa tuaꞌ uchꞌami tunor era erer axin uchꞌamiobꞌ.
HEB 9:17 Pero e jun matucꞌa ucꞌampibꞌir conda bꞌixirto e winic, sino este que axin achamay y entonces ayan ucꞌotorer e jun.
HEB 9:18 Y tamar era e onian pacto xeꞌ chembꞌir taca e Moisés ajcꞌuna ucꞌotorer taca uchꞌichꞌer inteꞌ arac xeꞌ chamesna.
HEB 9:19 Pues e Moisés, conda cꞌapa uchꞌami tunor e ley tuaꞌ e Dios, ixin uyare tunor e gente. Y de allí ixin uyapru uchꞌichꞌer cora wacax taca uchꞌichꞌer cora cabro y taca e jaꞌ, y de allí ixin uchꞌami inteꞌ ucꞌabꞌ teꞌ xeꞌ ucꞌabꞌa hisopo taca imbꞌijc e lona xeꞌ chacchac cachar tamar y utzꞌiri tama e chꞌich era, y de allí ixin utzijtzru e chꞌich tujor e jun tiaꞌ tzꞌijbꞌabꞌir tunor e ley, y de allí ixin utzijtzru e chꞌich tujor tunor e gente ubꞌan.
HEB 9:20 Y conda cꞌapa uche tunor era ojron e Moisés taca e gente y che: “E chꞌich era jax tuaꞌ uchectes que jax era ucajyesnibꞌir ucꞌotorer e pacto lo que e Dios war uche tacarox era. Y tamar era desde coner nox ucꞌani tuaꞌ ixcꞌupseyan tut”, che e Moisés.
HEB 9:21 Y de allí e Moisés ixin ucꞌampes jax taca e chꞌich era otronyajr conda ixin utzijtzru tama utabernáculo e Dios y tama tunor lo que tuaꞌ acꞌampesna umen e sacerdotiobꞌ conda axin uchiobꞌ inteꞌ servicio.
HEB 9:22 Y tama uley e Moisés era chꞌar tzꞌijbꞌabꞌir que ucꞌani tuaꞌ atzijtzna uchꞌichꞌer inteꞌ arac tujor casi tunor lo que tuaꞌ acꞌampesna tama inteꞌ servicio tut e Dios, y chꞌar tzꞌijbꞌabꞌir ubꞌan que ajtaca aquetpa satbꞌir umabꞌambꞌanir lo que cꞌapa uche inteꞌ conda achamesna inteꞌ arac tuaꞌ aloqꞌuesna uchꞌichꞌer, y tamar taca era erer asatpa umabꞌambꞌanir inteꞌ.
HEB 9:23 Pues entonces erer cawira que tunor lo que ayan macuir e tabernáculo xeꞌ cꞌampesna umen tin e quetpobꞌ yebꞌar uley e Moisés quetpa tuaꞌ apojca taca uchꞌichꞌer inteꞌ arac. Pero tunor era quetpa bꞌan cocha inteꞌ checsuyaj tuaꞌ lo que ayan tichan tut e qꞌuin xeꞌ erach. Pero lo que ayan tama utabernáculo e Dios lo que ayan tichan tut e qꞌuin ucꞌani tuaꞌ apojca taca uchꞌichꞌer inteꞌ xeꞌ más ayan ucꞌampibꞌir xeꞌ jax e Cristo.
HEB 9:24 Porque machi ixin ochoy e Cristo tama inteꞌ tabernáculo lo que ayan tara tor e rum xeꞌ jax taca inteꞌ chequerir tuaꞌ lo que ayan tichan xeꞌ erach, sino que jaxir ixin ochoy tama utabernáculo e Dios lo que ayan tichan tut e qꞌuin tuaꞌ aturuan tut e Dios tuaꞌ utacrion non xeꞌ ajcꞌupesiajon tamar.
HEB 9:25 Y e Cristo war oꞌchoy tama e tabernáculo lo que ayan tut e qꞌuin pero machi war uyajcꞌu ubꞌa otronyajr tuaꞌ achamesna tama inteꞌ inteꞌ año. Pero tin e aquetpa e sacerdote xeꞌ más nojta tara tor e rum quetpa tuaꞌ uqꞌueche axin uchꞌichꞌer inteꞌ arac tama inteꞌ inteꞌ año conda oꞌchoy tama e lugar xeꞌ más erach tama e tabernáculo.
HEB 9:26 Pero e Cristo machi war asutpa uche ofrecer uchꞌichꞌer otronyajr tama inteꞌ inteꞌ año conda war oꞌchoy tama e tabernáculo lo que ayan tut e qꞌuin, porque jay bꞌan ani entonces ucꞌani ani tuaꞌ asutpa achamesna iraj iraj desde ucajyesnibꞌir or e rum era. Pero lo que uche jaxir, checta tari tama e hora conda bꞌan ucꞌani e Dios tuaꞌ uyajcꞌu ubꞌa tuaꞌ achamesna inyajr taca tuaꞌ ulocse tunor e mabꞌambꞌanir inyajrer.
HEB 9:27 Pues bꞌan cocha quetpa tuaꞌ caxin cachamay tunoron inyajr taca, y de allí ucꞌani tuaꞌ querna umen e Dios tuaꞌ uyareon jay imbꞌutz o jay majax imbꞌutz lo que cꞌapa cache tara tor e rum,
HEB 9:28 y bꞌan ubꞌan tama e Cristo que ixin uyajcꞌu ubꞌa tuaꞌ achamesna inyajr taca tuaꞌ ulocse e mabꞌambꞌanir tama meyra gente. Y de allí aquetpa tuaꞌ achecta watar otronyajr, pero majax tuaꞌ asutpa ulocse e mabꞌambꞌanir tuaꞌ e gente otronyajr, sino que tuaꞌ ucorpes tunor tin e war ucojcobꞌ tuaꞌ uwirobꞌ ut jaxir.
HEB 10:1 Pues entonces uley e Moisés jax inteꞌ checsuyaj tuaꞌ lo que quetpa tuaꞌ uche e Cristo, y majax bꞌan taca numuy tunor era. Y tamar era motor que war achamesna inteꞌ arac tama inteꞌ inteꞌ año bꞌan cocha ucꞌani tuaꞌ achena tama uley e Moisés, pero ma tzꞌacar uchꞌichꞌer e aracꞌobꞌ era tuaꞌ ucorpes tin e war ani uyusre tuaꞌ axanobꞌ tama ubꞌir e Dios tama e tiempo yajaꞌ.
HEB 10:2 Porque jay uchꞌichꞌer e sian aracꞌobꞌ era tzꞌacar nic ani tuaꞌ acorpesian, machix ixto ani war achamesna otronteꞌ arac tama inteꞌ inteꞌ año. Porque jay tzꞌacar nic ani e chꞌich era tuaꞌ aloqꞌuesna inyajrer tunor e mabꞌambꞌanir, machix ixto ani war unatobꞌ e gente tama uyalmobꞌ que ayanto lo que abꞌetuobꞌ tut e Dios umen que ayanto umabꞌambꞌanirobꞌ.
HEB 10:3 Pero lo que war anumuy tama tunor e aracꞌobꞌ xeꞌ chamesnobꞌ era jax taca war acꞌampa tuaꞌ acꞌajpesna tama inteꞌ inteꞌ año que ayanto lo que abꞌetuobꞌto e gente era tut e Dios.
HEB 10:4 Porque ma cocha erer ulocse e mabꞌambꞌanir uchꞌichꞌer incojt wacax o uchꞌichꞌer incojt chivo.
HEB 10:5 Y tamar era conda e Cristo tari tara tor e rum ojron taca e Dios y che: Machix cꞌani awira uchamesnar e sian wacax, y tamar era ixiet awajqꞌuen nicuerpo bꞌan cocha inteꞌ winic tuaꞌ uyubꞌien insutpa inwajcꞌu nibꞌa tuaꞌ inchamesna tuaꞌ intoyi tunor e mabꞌambꞌanir tuaꞌ e gente.
HEB 10:6 Y machi ixto war itzay awira que war apurutna e sian aracꞌobꞌ y nien que war achamesna e sian aracꞌobꞌ tuaꞌ aloqꞌuesna ani e mabꞌambꞌanir.
HEB 10:7 Y tamar era cꞌani inwaret, Nidiosiret, que: “Nen tarien tuaꞌ inche bꞌan cocha net acꞌani, bꞌan cocha chꞌar tzꞌijbꞌabꞌir tamaren tama uyojroner e Dios”, che Cawinquirar Jesucristo.
HEB 10:8 Pues bꞌajxan war che tunor era que Cadiosir machi atzay uwira y nien machi ixto war ucꞌani tuaꞌ apurutna tunor e sian aracꞌobꞌ era, y nien machi ixto war ucꞌani tuaꞌ achamesnobꞌ e sian aracꞌobꞌ tuaꞌ aloqꞌuesna ani e mabꞌambꞌanir, motor que bꞌan arobꞌnobꞌ e gente tama e onian tiempo tuaꞌ uchiobꞌ tama uley e Moisés.
HEB 10:9 Y de allí ojron Cawinquirar Jesucristo y che: “Nen tarien tuaꞌ inche bꞌan cocha net acꞌani, Nidiosiret”, che Cawinquirar. Pues war che era que Cadiosir cꞌapa uchoqui tunor ucꞌampibꞌir uchꞌichꞌer e sian aracꞌobꞌ xeꞌ chamesnobꞌ tama e onian tiempo, y que era war uturbꞌa uchamer e Jesucristo tama ulugar tunor era tuaꞌ axin utoyi tunor e mabꞌambꞌanir coner.
HEB 10:10 Y era umen que bꞌan ucꞌani Cadiosir ixin uchion caquetpa erach tacar uchamer e Jesucristo conda ixin uyajcꞌu ubꞌa tuaꞌ acꞌapa utoyi tunor e mabꞌambꞌanir inyajrer.
HEB 10:11 Pues tunor tin e aquetpa inteꞌ sacerdote tama e Israel war uchamsiobꞌ cora aracꞌobꞌ ajqꞌuin ajqꞌuin, pero uchꞌichꞌer e aracꞌobꞌ era ma cocha erer ulocse e mabꞌambꞌanir tuaꞌ e gente.
HEB 10:12 Pero e Jesucristo ixin uyajcꞌu ubꞌa tuaꞌ achamesna tuaꞌ acꞌapa utoyi tunor e mabꞌambꞌanir inyajrer, y tamar era machi ixto tuaꞌ asutpa achamesna otronyajr. Y conda cꞌapa uche tunor era ixin tut e qꞌuin tuaꞌ aturuan tama uturtar tama unojcꞌabꞌ Catata Dios tuaꞌ acꞌotori.
HEB 10:13 Y yajaꞌ taca tuaꞌ aquetpa este que aturbꞌana yebꞌar utajn uyoc tunor tin e war aqꞌuijna uwirobꞌ ut e Jesús.
HEB 10:14 Y jaxir cꞌapa ucorpeson tunoron xeꞌ warto ustana cawirnar axin umen taca que ixin uyajcꞌu ubꞌa inyajr taca tuaꞌ achamesna tamaron.
HEB 10:15 Pues bꞌan ubꞌan uyareon Unawalir e Dios tama uyojroner e Dios tiaꞌ che que:
HEB 10:16 Pues lo que cꞌani inche tama e pacto lo que cꞌani inche taca e gente tuaꞌ e Israel tama e tiempo xeꞌ watar jax era; che Cawinquirar Dios, Cꞌani inturbꞌa niley tama ujorobꞌ, y cꞌani intzꞌijbꞌa tunor era tama uyalmobꞌ ubꞌan, che Unawalir e Dios.
HEB 10:17 Y ojron Unawalir e Dios otronyajr y che: Y machi ixto tuaꞌ incꞌajpes umabꞌambꞌanirobꞌ otronyajr, che Unawalir e Dios.
HEB 10:18 Entonces conda quetpa satbꞌir tunor e mabꞌambꞌanir, machix ixto ucꞌani tuaꞌ achamesna más inteꞌ arac tuaꞌ asutpa aloqꞌuesna más e mabꞌambꞌanir, cocha ustabꞌirix inyajrer tunor era umen e Cristo.
HEB 10:19 Pues entonces niwermanuox, cocha war cacꞌupseyan meyra tama uchꞌichꞌer e Jesús, non erer cochoy tama e lugar xeꞌ más erach tiaꞌ turu Catata Dios.
HEB 10:20 Y jax Cawinquirar Jesucristo xeꞌ ixin upasi e bꞌir xeꞌ galan ticoit xeꞌ ma ani tucꞌa, y xeꞌ jax xeꞌ erer uyajcꞌon e cuxtar xeꞌ machi tuaꞌ acꞌapa. Y e bꞌir era oꞌchoy axin tama e lugar xeꞌ más erach lo que ayan tut e qꞌuin, y e bꞌir era jax lo que cꞌapa upasi Cawinquirar conda wejrtzꞌa e cortina lo que chꞌur tama e templo tama e chinam Jerusalem conda ixin chamay.
HEB 10:21 Pues Cawinquirar Jesucristo jax e sacerdote xeꞌ más nojta y jaxir war acꞌotori tujor tunor umaxtac e Dios.
HEB 10:22 Y cocha war cacꞌupseyan meyra tama uchꞌichꞌer e Cristo cocha era cꞌoticon tuyejtzꞌer Catata Dios taca cawalma xeꞌ incꞌun y taca inteꞌ cꞌupesiaj tama e Dios xeꞌ qꞌuecꞌo. Pues e Dios ixin utzijtzru cawalma taca uchꞌichꞌer e Cristo este que machix ixto war canata tama cawalma jay warto cabꞌeto taca e Dios, y jaxir ixin upoquion taca uchꞌichꞌer bꞌan cocha jay uyates ani tunor cacuerpo taca e jaꞌ xeꞌ charan ut.
HEB 10:23 Y tamar era caqꞌuecꞌojsic cabꞌa tuaꞌ caxin cachꞌami tunor lo que war cacojco tuaꞌ cajcꞌuna umen e Dios, porque Cadiosir xeꞌ ixin uyareon que bꞌan tuaꞌ uche, cꞌani axin uyajcꞌon tunor era watar e día.
HEB 10:24 Y casicbꞌanic cocha tuaꞌ cayajta utobꞌ e inmojr tuaꞌ asutpobꞌ uyajta ut más e inmojr ubꞌan, y casicbꞌanic cocha tuaꞌ abꞌoro lo que war cache xeꞌ imbꞌutz tut e inmojr tuaꞌ asutpa uchiobꞌ más lo que imbꞌutz tut e inmojr ubꞌan.
HEB 10:25 Ira iwacta tuaꞌ ixcꞌotoy tama inteꞌ servicio conda war umorojse ubꞌobꞌ e inmojr, porque ayan tin e bꞌan war uchiobꞌ y machi cꞌani cache bꞌan cocha war uchiobꞌ jaxirobꞌ. Sino que cacꞌunlesic cabꞌa inteꞌ intion más y más coner cocha chequer que watarix e día conda cꞌani asutpa watar Cawinquirar Jesucristo otronyajr.
HEB 10:26 Pues non xeꞌ war canata lo que ayan xeꞌ erach tama Cawinquirar Jesucristo, jay caxin cache e mabꞌambꞌanir umen taca que non war cacꞌani este que caxin cawacta inyajrer tunor lo que ayan tama Cawinquirar, entonces mix majchi más tuaꞌ ulocse camabꞌambꞌanir otronyajr, porque jax taca Cawinquirar Jesucristo xeꞌ ixin chamay tamaron tuaꞌ ulocse camabꞌambꞌanir.
HEB 10:27 Entonces tut tin e ixin uchiobꞌ cocha era intaca aquetpa tuaꞌ ucojcobꞌ e nuxi jatzꞌuar lo que watar tuaꞌ e Dios conda jaxir axin aqꞌuijna inyajrer taca tunor tin e ixin qꞌuijnobꞌ uwirobꞌ ut e Dios este que axin uchoqui tunorobꞌ tama e cꞌajc inyajrer.
HEB 10:28 Pues tama e onian tiempo tin e ixin uxejbꞌe ut uley e Moisés este que machi cꞌani acꞌupseyan tut, jay irna tunor era umen chateꞌ o uxteꞌ winicobꞌ, y jay jaxirobꞌ ixin utuchꞌiobꞌ, entonces inteꞌ era quetpa tuaꞌ achamesna bꞌan taca y mamajchi tuaꞌ uyajta ut tamar era.
HEB 10:29 Pues bꞌijnunic cobꞌa más nuxi jatzꞌuar tuaꞌ uchꞌamiobꞌ tin e axin uqꞌuijnes Uyunen e Dios bꞌan cocha jay war ani utecru ut jaxir yebꞌar utajn uyoc, y xeꞌ axin uyare que matucꞌa ucꞌampibꞌir uchꞌichꞌer e Jesucristo lo que wechcꞌa umener tuaꞌ uyustes e pacto lo que uche tuaꞌ caquetpa erach tut e Dios coner. Y bꞌijnunic cobꞌa más nuxi jatzꞌuar tuaꞌ uchꞌamiobꞌ tin e axin uqꞌuijnes Unawalir e Dios xeꞌ war uchecsu ucꞌunersiaj e Dios tut tunor e gente tara tor e rum. Bꞌijnunic cobꞌa nuxi jatzꞌuar tuaꞌ uchꞌamiobꞌ tin e war uchiobꞌ cocha era.
HEB 10:30 Pues canata que ojron e Dios y che tama uyojroner que: “Jax nen xeꞌ tuaꞌ insuti uyeror tunor tin e axin uche e mabꞌambꞌanir upater otronteꞌ”, che e Dios. Y chꞌar tzꞌijbꞌabꞌir otronyajr que jaxir ojron y che: “Y jax Cawinquirar Dios xeꞌ tuaꞌ uchꞌujcu uwira tucꞌa war cache inteꞌ intion, y tin e war uche lo que mabꞌambꞌan cꞌani ajajtzꞌa meyra umener.” Bꞌan che e Dios tama uyojroner.
HEB 10:31 Meyra tuaꞌ unumse ubꞌa tin e axin uyacta ubꞌir e Dios conda axin ajajpna umener tin e ma tiaꞌ tuaꞌ achamay.
HEB 10:32 Pues entonces nox xeꞌ war ibꞌijnu tuaꞌ ani iwacta ubꞌir e Cristo, ira inajpes tamar lo que cay inumse ibꞌa conda wartocto ixcano tama ujanchꞌaquenar e Cristo. Cꞌajpesic que motor que cay inumse ibꞌa nojta tama e tiempo yajaꞌ, pero iwacta numuy bꞌan taca. Y majax bꞌan ani iche jay war ani ibꞌijnu tuaꞌ iwacta ubꞌir e Cristo tama e tiempo yajaꞌ.
HEB 10:33 Y nox ayan conda cay inumse ibꞌa umen que cay utzeniox e gente, y ayan conda cay uwatzꞌiox, y ayan conda quetpox tzajtaca iut umen que war iwira que war unumse ubꞌobꞌ e inmojr ajcꞌupesiajobꞌ tama Cawinquirar bꞌan cocha era ubꞌan.
HEB 10:34 Y nox cay uqꞌuiox tama iwalma conda iwira tin e turobꞌ tama e cárcel umen taca que war acꞌupseyanobꞌ tama e Cristo, y nox tzayox meyra tama Cadiosir tama e tiempo yajaꞌ este que tzayox motor que war iwira aloqꞌuesna tunor lo que ayan ani tibꞌa umen taca que war ixcꞌupseyan tama e Cristo, cocha nox war inata que más ayan tibꞌa xeꞌ machi tuaꞌ acꞌapa que cꞌani ichꞌami conda ixixin ixcꞌotoy tut e qꞌuin.
HEB 10:35 Ira isati icꞌupesiaj tama Cawinquirar era porque Cadiosir tuaꞌ axin uchojbꞌesox meyra jay machi ixixin iwacta ubꞌir e Cristo.
HEB 10:36 Pero nox ucꞌani tuaꞌ icojco bꞌan taca tuaꞌ uyubꞌiox iche tunor lo que war ucꞌani Cadiosir, porque tamar era ixixin ichꞌami tunor lo que Cadiosir cꞌapa uyareon que bꞌan tuaꞌ uyajcꞌon.
HEB 10:37 Porque chꞌar tzꞌijbꞌabꞌir tama uyojroner e Dios tamar Cawinquirar Jesucristo tiaꞌ che que: Pues jaxir tuaꞌ asutpa watar rajxa era cocha jaxir jax xeꞌ quetpa tuaꞌ watar y machi tuaꞌ eixna watar.
HEB 10:38 Tin e cꞌani aquetpa erach uwirnar taniut, che e Dios, ucꞌani tuaꞌ acꞌupseyan tamaren tuaꞌ atacarna nimener, y de allí axin uchꞌami e cuxtar xeꞌ machi tuaꞌ acꞌapa. Pero tin e axin uyacta nibꞌir, che e Dios, machi ixto tuaꞌ intzay inwira, che e Dios tama uyojroner.
HEB 10:39 Pero non machi war casutpa ticapat tuaꞌ cawacta ubꞌir e Dios tuaꞌ casatpa, sino que non war cacojco cabꞌa tamar cacꞌupesiaj tama e Dios y tamar era war cacorpes cacuxtar axin tacar utacarsiaj e Dios.
HEB 11:1 Pues entonces e cꞌupesiaj tama e Dios jax conda unata inteꞌ tama uyalma que san tuaꞌ uchꞌami lo que war ucojco tama e Dios, y e cꞌupesiaj tama e Dios jax conda war unata inteꞌ tama uyalma que lo que war uyusre uchꞌami tuaꞌ e Dios san tuaꞌ achecta watar motor que ma chequer tut era.
HEB 11:2 Pues bꞌan turuanobꞌ catata viejobꞌirobꞌ tama e onian tiempo porque jaxirobꞌ atzay eꞌrnobꞌ umen e Dios umen que war acꞌupseyanobꞌ tamar.
HEB 11:3 Y non era, umen que war cacꞌupseyan tama e Dios, war canata que jaxir cꞌapa uche tunor or e rum y tunor ut e qꞌuin umen taca que ojron jaxir, y tamar era canata que jaxir cꞌapa uche lo que chequer ticoit coner tacar lo que ma chequer ani.
HEB 11:4 Y e Abel xeꞌ turuan tama e onian tiempo, umen que cay cꞌupseyan tama e Dios, ixin uyajcꞌu inteꞌ ofrenda e Dios bꞌan cocha cꞌajna umener y majax bꞌan cocha ajcꞌuna umen usacun xeꞌ jax e Caín. Y cocha e Abel war acꞌupseyan tama e Dios, jaxir chꞌajma umener que erach conda chꞌajma uyofrenda. Y tamar era, motor que ixin chamay e Abel tama e onian tiempo, pero warto ucansion esto coner que jaxir quetpa erach umen que cꞌupseyan tama e Dios.
HEB 11:5 Y e Enoc xeꞌ turuan tama e onian tiempo, umen que cay cꞌupseyan tama e Dios, machi chamay sino que qꞌuejcha ixin tut e qꞌuin y machi tajwina umen e gente tara tor e rum porque e Dios uqꞌueche ixin. Pero conda merato aqꞌuejcha axin tut e qꞌuin quetpa chequer tut e gente que jaxir atzay eꞌrna umen e Dios.
HEB 11:6 Pues ma cocha erer utzayjres e Dios inteꞌ jay machi war acꞌupseyan tamar, porque tunor tin e war ubꞌijnu tuaꞌ acꞌotoy tut e Dios ucꞌani tuaꞌ ucꞌupse que ayan inteꞌ Dios xeꞌ turu, y que jaxir tuaꞌ axin uchojbꞌes ut meyra tunor tin e axin usajca.
HEB 11:7 Y e Noé xeꞌ turuan tama e onian tiempo, umen que cay ucꞌupse e Dios conda arobꞌna umener que watar inteꞌ tiempo xeꞌ imbꞌacꞌajr uwirnar que mato tiaꞌ eꞌrna umen e gente, jaxir cꞌupseyan tamar lo que arena y cay uche inteꞌ nuxi barco. Y tamar era ixin ucorpes ubꞌa taca tunor umaxtac. Y umen que cꞌupseyan tama e Dios cocha era, e Noé uchectes tut e inmojr gente tara tor e rum que ucꞌani tuaꞌ asatpobꞌ cocha jaxirobꞌ machi cꞌani acꞌupseyanobꞌ tama e Dios. Y e Noé chena erach umen e Dios umen que war acꞌupseyan tamar.
HEB 11:8 Y e Abraham xeꞌ turuan tama e onian tiempo cꞌupseyan tama e Dios conda pejcna umener tuaꞌ axin aturuan tama inteꞌ lugar innajt tiaꞌ tuaꞌ uchꞌami meyra rum. Y motor que e Abraham machi war unata tiaꞌ tuaꞌ acꞌotoy era pero locꞌoy tama ulugar tuaꞌ axin acꞌotoy tama inteꞌ lugar tiaꞌ tuaꞌ aꞌrobꞌna umen e Dios.
HEB 11:9 Y e Abraham, umen que war acꞌupseyan tama e Dios, ixin turuan tama inteꞌ lugar que arobꞌna umen e Dios que tuaꞌ aquetpa tuaꞌ. Pero jaxir turuan tama e lugar era bꞌan cocha inteꞌ ajnajtir gente y turuan tama inteꞌ chuchu otot xeꞌ chembꞌir taca e bꞌujc. Y bꞌan ubꞌan turuanobꞌ e Isaac y e Jacob xeꞌ jax usitzobꞌ e Abraham. Y jaxirobꞌ arobꞌnobꞌ umen e Dios que tuaꞌ uchꞌamiobꞌ e rum era ubꞌan.
HEB 11:10 Pero e Abraham war ucojco tuaꞌ axin aturuan tama inteꞌ chinam xeꞌ más imbꞌutz xeꞌ chembꞌir umen e Dios y xeꞌ machi tuaꞌ acꞌapa. Y jax e Dios xeꞌ cay ubꞌijnu cocha tuaꞌ aquetpa tunor e chinam era ubꞌan. Pues e chinam era aquetpa tut e qꞌuin tiaꞌ turu Catata Dios.
HEB 11:11 Y e Sara xeꞌ turuan tama e onian tiempo xeꞌ jax uwixcar e Abraham, cꞌupseyan tama e Dios ubꞌan, y motor que cꞌapa numuy utiempo tuaꞌ achꞌijtesian ani, pero jaxir ixin uchꞌami e cꞌotorer tuaꞌ e Dios tuaꞌ uyubꞌi achꞌijtesian, porque jaxir cꞌupseyan tama e Dios xeꞌ acꞌapa uche tunor lo que arobꞌna umener.
HEB 11:12 Y tamar era e Abraham, motor que onian winiquix, cꞌotoy chꞌijtesian y checta umaxtac. Y bꞌoruobꞌ meyra usitzobꞌ este que quetpobꞌ bꞌan cocha e sian lucero lo que ayan tut e qꞌuin, y bꞌoruobꞌ meyra este que quetpobꞌ bꞌan cocha e jiꞌ lo que ayan tama utiꞌ e xucur xeꞌ mamajchi erer utziqui.
HEB 11:13 Y tunor e gente era cꞌupseyanobꞌ tama e Dios tama tunor ucuxtarobꞌ tara tor e rum y bꞌan chamayobꞌ ubꞌan motor que machi uchꞌamiobꞌ lo que arobꞌnobꞌ umen e Dios. Jax taca tzayobꞌ tamar lo que uwirobꞌ innajt tutobꞌ xeꞌ quetpa tuaꞌ achecta tama e tiempo xeꞌ watar. Pero jaxirobꞌ uchecsuobꞌ tut e gente axin que jaxirobꞌ ajnajtir gente taca tara tor e rum.
HEB 11:14 Pues tunor tin e axin oꞌjronobꞌ cocha era war uchecsu ubꞌobꞌ que jaxirobꞌ warto usicbꞌobꞌ inteꞌ lugar xeꞌ tuaꞌ aquetpa tuobꞌ watar e día.
HEB 11:15 Y jay war ani ubꞌijnuobꞌ tama e lugar tiaꞌ locꞌoyobꞌ erer ani asutpa axiobꞌ esto yajaꞌ otronyajr.
HEB 11:16 Pero jaxirobꞌ war uyusreobꞌ uwirobꞌ inteꞌ lugar xeꞌ más galan que war che que war usicbꞌobꞌ inteꞌ lugar xeꞌ tuaꞌ aquetpa tuobꞌ tut e qꞌuin. Y tamar era e Dios machi asubꞌajra tuaꞌ uyare que jax Udiosirobꞌ, porque jax jaxir xeꞌ ixin uyustes e lugar xeꞌ tuaꞌ aquetpa tuobꞌ tichan tut e qꞌuin.
HEB 11:17 Y e Abraham, umen que war acꞌupseyan tama e Dios, arena umener tuaꞌ uqꞌueche axin uyunen xeꞌ jax e Isaac tuaꞌ uchamse ani tuaꞌ aquetpa bꞌan cocha inteꞌ arac conda apurutna tujor inteꞌ altar. Pues Cadiosir cꞌani uwira cobꞌa ucꞌupesiaj e Abraham tamar jaxir. Y uyunen era incojt taca ayan tuaꞌ. Pero e Abraham machi bꞌacta tuaꞌ uche lo que arobꞌna umen e Dios cocha jax jaxir xeꞌ cay ojron tacar y che:
HEB 11:18 “Pues tamar e Isaac era tuaꞌ achꞌajnari axin”, che e Dios.
HEB 11:19 Pues e Abraham war unata que tzꞌacar ucꞌotorer e Dios tuaꞌ usuti ubꞌixqꞌues e gente tujam e chamenobꞌ. Y tamar era erer ani aꞌrobꞌna que e Abraham uchꞌami uyunen era otronyajr bꞌan ani cocha inteꞌ xeꞌ sutpa bꞌixcꞌa tujam e chamenobꞌ.
HEB 11:20 Y e Isaac, umen que war acꞌupseyan tama e Dios, cay uyare umaxtac xeꞌ jax e Jacob y e Esaú que cꞌani aꞌjcꞌunobꞌ inteꞌ nuxi chojbꞌesiaj motor que ucꞌanto meyra tiempo tuaꞌ achecta watar e chojbꞌesiaj era.
HEB 11:21 Y e Jacob xeꞌ turuan tama e onian tiempo, umen que war acꞌupseyan tama e Dios ixin uturbꞌa ucꞌabꞌobꞌ tujor umaxtacobꞌ e José xeꞌ jax uyunen y cay uchojbꞌes utobꞌ inteꞌ intiobꞌ. Y uche cocha era conda turix tuaꞌ achamay. Y war abꞌoyo tamar uteꞌ conda cay uyujtzꞌi ut e Dios tamar era.
HEB 11:22 Y e José, umen que war acꞌupseyan tama e Dios, conda cꞌanix tuaꞌ achamay cay ojron taca e gente tuaꞌ e Israel y uyare que ucꞌani tuaꞌ alocꞌoyobꞌ tama e lugar Egipto tama inteꞌ tiempo xeꞌ watar, y uyare tuaꞌ uqꞌuechiobꞌ axin tunor ubꞌaquerir conda alocꞌoyobꞌ porque jaxir war ucꞌani tuaꞌ amujca ubꞌaquer macuir e rum tama e lugar Canaán.
HEB 11:23 Y utatabꞌirobꞌ e Moisés, umen que war acꞌupseyanobꞌ tama e Dios, conda cuxpa uchꞌurcabꞌ xeꞌ jax e Moisés cay umucresobꞌ tama inteꞌ tiempo de tres mes umen que uwirobꞌ que galan e sitz era. Y tamar era machi ubꞌacriobꞌ uyojroner e rey tuaꞌ e Egipto xeꞌ che que ucꞌani ani tuaꞌ achamesna tunor e bꞌiqꞌuit tejromtac tuaꞌ Israel.
HEB 11:24 Y conda cꞌapa chꞌiꞌ e Moisés, cocha war acꞌupseyan tama e Dios, machi uyacta tuaꞌ aꞌrobꞌna que jax usitz uwijchꞌoc e rey tuaꞌ e Egipto.
HEB 11:25 Porque jaxir ubꞌijnu que más ani bueno tuaꞌ unumse ubꞌa taca tunor e gente tuaꞌ e Israel xeꞌ jax uchinam e Dios, porque jaxir machi cꞌani utzayjres ubꞌa tama e mabꞌambꞌanir nien imbꞌijc e tiempo.
HEB 11:26 Porque jaxir cay ubꞌijnu que más ayan ucꞌampibꞌir lo que erer uchꞌami tuaꞌ e Dios motor que ucꞌani tuaꞌ unumse ubꞌa tama e Cristo tuaꞌ uyubꞌi uchꞌami tunor era. Porque jaxir machi ucꞌani tunor e tzayer lo que erer ani uchꞌami jay aquetpa rico taca tunor lo que meyra atujri lo que ayan tama e lugar Egipto jay tamar era ucꞌani tuaꞌ asatpa. Porque jaxir war usicbꞌa e chojbꞌesiaj lo que erer uchꞌami tamar taca e Dios.
HEB 11:27 Y umen que e Moisés war acꞌupseyan tama e Dios, locꞌoy ixin tama e lugar Egipto y machi bꞌacta tut uqꞌuijnar e rey. Y jaxir qꞌuecꞌo xana tama ubꞌir e Dios umen que war unata que turu ixto e Dios tacar motor que machi uwira ut.
HEB 11:28 Y e Moisés, umen que war acꞌupseyan tama e Dios, ixin uche e bꞌajxan pascua conda uyare tunor e gente tama e Israel tuaꞌ uchamse inteꞌ oveja y tuaꞌ utzijtzru axin uchꞌichꞌer tujor inteꞌ inteꞌ puerta tama uyototobꞌ, y tamar era conda numuy e ángel tuaꞌ e chamer machi uchamse nien inteꞌ sitz xeꞌ cuxpa bꞌajxan tama inteꞌ otot tuaꞌ e gente tuaꞌ e Israel, cocha e ángel era war uwira que ayan e chꞌich tzijtzrubꞌir tama uyototobꞌ.
HEB 11:29 Y e gente tuaꞌ e Israel, umen que war acꞌupseyanobꞌ tama e Dios, ixin numuyobꞌ tama e nuxi jaꞌ xeꞌ ucꞌabꞌa e Mar Rojo, pero numuyobꞌ tama e taquin rum y machi nujxiobꞌ. Pero conda tunor e ejército tuaꞌ e rey tuaꞌ e Egipto cꞌani ani unumsiobꞌ e mar era cꞌapa muctzꞌobꞌ tama e jaꞌ y chamayobꞌ cuchpobꞌ tunorobꞌ.
HEB 11:30 Y e gente tuaꞌ e Israel, umen que war acꞌupseyanobꞌ tama e Dios, uwirobꞌ cucrema tunor e nuxi petzbꞌir tun lo que ayan ani tuyejtzꞌer tunor e nuxi chinam Jericó tuaꞌ uyubꞌi oꞌchoyobꞌ tuaꞌ ucucruobꞌ e chinam era. Bꞌan numuy conda cꞌapa xanobꞌ tutiꞌ e chinam era ajqꞌuin ajqꞌuin tama e siete día.
HEB 11:31 Y e Rahab xeꞌ jax ani inteꞌ ajnajtir ixic xeꞌ turuan tama e chinam era, umen que war acꞌupseyan tama e Dios, machi chamay jaxir nien incojt tama ufamilia conda chamesnobꞌ tunor e inmojr gente tama e chinam era umen que machi cꞌupseyanobꞌ tut e Dios. Jaxir tacarna cocha era umen que ixin utacre cora winicobꞌ tuaꞌ e Israel conda cay ochoyobꞌ tama inyajr tuaꞌ uwirobꞌ mucur tuaꞌ acꞌotoy unatobꞌ cobꞌa winicobꞌ ayan tama e chinam era.
HEB 11:32 Pues entonces, ¿tucꞌa más tuaꞌ inwareox tama tunor era? Machi atzꞌacta e tiempo tuaꞌ acꞌapa inwareox tunor lo que locꞌoy uchiobꞌ tunor e gente era umen que war acꞌupseyanobꞌ tama e Dios. Pues cꞌani ani inwareox tama e Gedeón y tama e Barac y tama e Sansón y tama e Jefté y tama e David y tama e Samuel y tama e sian profetobꞌ, pero machi uyubꞌien era.
HEB 11:33 Y umen que war acꞌupseyanobꞌ tama e Dios ayan tin e ucucruobꞌ meyra chinamobꞌ ubꞌajnerobꞌ, y ayan tin e cay cꞌotori tujor inteꞌ chinam, y ayan tin e cay tacarnobꞌ umen e Dios bꞌan cocha arobꞌnobꞌ umener, y ayan tin e cojcnobꞌ umen e Dios conda quetpa macar uyej inteꞌ nuxi león tutobꞌ.
HEB 11:34 Y ayan e gente xeꞌ turuanobꞌ tama e onian tiempo que, umen que war acꞌupseyanobꞌ tama e Dios, ixin utajpes inteꞌ nuxi cꞌajc, y ayan tin e locꞌoy ajniobꞌ tut e machit tuaꞌ machi achamesnobꞌ tamar umen que war acꞌupseyanobꞌ tama e Dios. Y ayan tin e injayjay xeꞌ qꞌuecꞌojsena umen e Dios, y ayan tin e qꞌuecꞌojsena nojta este que ixin ucucruobꞌ inteꞌ ejército tuaꞌ tin e qꞌuijna uwirobꞌ ut e gente tuaꞌ e Israel.
HEB 11:35 Y ayan e ixictac xeꞌ turuanobꞌ tama e onian tiempo xeꞌ, umen que war acꞌupseyanobꞌ tama e Dios, cay uwirobꞌ que sutpa bꞌixcꞌobꞌ tin e uyajta utobꞌ tujam e chamenobꞌ. Y ayan tin e sujmobꞌ nojta este que chamayobꞌ umen que machi cꞌani uyacta e Dios motor que arobꞌnobꞌ que machi ani tuaꞌ achamayobꞌ jay uyactobꞌ ani e Dios, porque jaxirobꞌ war ucojcobꞌ tama e Dios tuaꞌ uchꞌamiobꞌ inteꞌ cuxtar xeꞌ más imbꞌutz conda axin asujta abꞌixqꞌuesnobꞌ tujam e chamenobꞌ.
HEB 11:36 Y umen que war acꞌupseyanobꞌ tama e Dios ayan tin e atzenernuobꞌ umen e gente, y ayan tin e jajtzꞌobꞌ, y ayan tin e cajchobꞌ taca e taqꞌuin, y ayan tin e osenobꞌ tama e cárcel.
HEB 11:37 Y ayan xeꞌ chamesna taca e tun, y ayan xeꞌ chamesnobꞌ xurbꞌir taca inteꞌ sierra, y ayan xeꞌ chenobꞌ unumse ubꞌobꞌ, y ayan tin e chamesbꞌirobꞌ taca inteꞌ machit, y ayan tin e xanobꞌ taca inteꞌ bꞌujc xeꞌ chembꞌir taca uqꞌuewerir e oveja o taca uqꞌuewerir e chivo, y ayan xeꞌ matucꞌa ayan tuobꞌ, y ayan xeꞌ xejbꞌebꞌir utobꞌ umen taca que machi cꞌani uyactobꞌ tuaꞌ acꞌupseyanobꞌ tama e Dios, y ayan tin e cꞌaynobꞌ.
HEB 11:38 Ma tawar e gente xeꞌ turuanobꞌ tara tor e rum tuaꞌ aturuanobꞌ tacar tin e cꞌupseyanobꞌ nojta tama e Dios cocha era cocha ayan meyra e mabꞌambꞌanir tara tor e rum. Porque e gente era cay xanobꞌ tic taca tor e rum bꞌan cocha inteꞌ ajxambꞌar gente. Xanobꞌ tama e choquem lugar y xanobꞌ tor e witzir. Jaxirobꞌ turuanobꞌ tama e chꞌen macu rum y turuanobꞌ tama e lugar xeꞌ xejbꞌna ut umen e inmojr.
HEB 11:39 Pero tunor e gente era motor que atzay irnobꞌ umen e Dios umen que war acꞌupseyanobꞌ meyra tamar, pero machi cꞌotoy uchꞌamiobꞌ lo que cꞌani ani aꞌjcꞌunobꞌ umen e Dios.
HEB 11:40 Pues Cadiosir ayan inteꞌ ubꞌijnusiaj xeꞌ galan porque jaxir war ubꞌijnu tamaron tama e tiempo yajaꞌ, y tamar era ubꞌijnu tuaꞌ ucojco tuaꞌ uche aquetpobꞌ erach e gente yajaꞌ este que axin uche caquetpa erach non ubꞌan.
HEB 12:1 Pues entonces cocha non ayan meyra sian ajchecsuyaj cocha era tama e cꞌupesiaj tama e Dios xeꞌ turuanobꞌ tama e onian tiempo, cawactanic tunor e mabꞌambꞌanir xeꞌ war ucachion, y cachoquic tunor lo que war ulajtzꞌuon, y caturbꞌic cabꞌa tuaꞌ caxana tama e bꞌir xeꞌ ajcꞌunon umen e Dios tuaꞌ caxana tamar y machi tuaꞌ cacꞌoy cache tunor era.
HEB 12:2 Y caturbꞌanic unaccoit tama e Jesús xeꞌ jax ucajyesnibꞌir y xeꞌ jax ucꞌapesnibꞌir tunor cacꞌupesiaj tama e Dios. Pues jax e Jesucristo xeꞌ ixin unumse ubꞌa este que chamesna tut e cruz, pero jaxir machi subꞌajra tama uchamer tut inteꞌ cruz cocha era, porque jaxir war ubꞌijnu tama e nuxi tzayer lo que tuaꞌ uchꞌami conda acꞌapa achamay tut e cruz. Y de allí ixin tut e qꞌuin tiaꞌ ajcꞌuna tuaꞌ aturuan tuyejtzꞌer unojcꞌabꞌ uturtar Catata Dios.
HEB 12:3 Pues entonces bꞌijnunic tamar Cawinquirar Jesucristo xeꞌ cay unumse ubꞌa meyra tamar lo que cay chena tacar umen e gente xeꞌ ajmabꞌambꞌanirobꞌ, pero jaxir matucꞌa uche tamar. Bꞌijnunic tamar era tuaꞌ machi ixcꞌoyran tama iwalma y tuaꞌ machi ixsisa tuaꞌ iwacta ubꞌir e Dios.
HEB 12:4 Porque nox machito isati nien imbꞌijc ichꞌichꞌer umen que machi ixto war iche e mabꞌambꞌanir.
HEB 12:5 O ¿inajpesix ca que nox umaxtacox e Dios y que tamar era jaxir war ucꞌunlesox tacar uyojroner? Porque che cocha era que: Niunenet, ira abꞌijnu que matucꞌa ucꞌampibꞌir tunor era conda e Dios axin ucꞌayet conda ucꞌani tuaꞌ uꞌstes awirnar, y ira iqꞌuijna conda e Dios axin uwatzꞌiet.
HEB 12:6 Porque Cawinquirar Dios axin uwatzꞌi tunor tin e uyajta ut, y axin ucꞌaye tunor tin e uchꞌami tuaꞌ aquetpobꞌ usitzobꞌ. Bꞌan chꞌar tzꞌijbꞌabꞌir tama uyojroner e Dios.
HEB 12:7 Y tamar era actanic ibꞌa bꞌan taca conda e Dios axin uwatzꞌiox tuaꞌ iyustes iwirnar, porque bꞌan uche e Dios taca tunor tin e aquetpobꞌ umaxtac. Porque matucꞌa inteꞌ tatabꞌir xeꞌ machi uwatzꞌi uyunen conda war uche lo que mabꞌambꞌan.
HEB 12:8 Pues e Dios axin ucꞌaye tunor tin e umaxtacobꞌ tuaꞌ axin uyustes uwirnarobꞌ. Pero jay e Dios machi axin ucꞌayox, war che era que nox majax umaxtacox, sino que bꞌanox cocha inteꞌ ajnajtir maxtac xeꞌ matucꞌa utata.
HEB 12:9 Pues conda maxtaconto ani war cajajtzꞌa umen catata tara tor e rum y war cacꞌupseyan tut jaxir tama tunor. Y más ucꞌani tuaꞌ camanxujres cabꞌa tut Catata Dios xeꞌ turu tut e qꞌuin tuaꞌ uyubꞌion cachꞌami e cuxtar xeꞌ machi tuaꞌ acꞌapa.
HEB 12:10 Pues catata tara tor e rum cay uwatzꞌion bꞌan cocha ubꞌijnuobꞌ uche tuaꞌ cacꞌotoy costes cawirnar tama cacuxtar tara tor e rum. Pero e Dios war ucꞌayon tuaꞌ costes cawirnar más nojta este que acꞌotoy aquetpa erach cawirnar bꞌan cocha jaxir.
HEB 12:11 Pues mamajchi war atzay conda war ajajtzꞌa umen utata porque war acꞌuxun tama e hora era. Pero tin e axin acano tamar lo que war unumse ubꞌa era, axin asutpa uwirnar tuaꞌ aquetpa erach y axin uchꞌami e jiriar.
HEB 12:12 Pues entonces qꞌuecꞌojsenic ibꞌa nox xeꞌ iwactix ochoy e cꞌoyir tama iwalma, bꞌan cocha jay injayjay ani icꞌabꞌ, y bꞌan ixto oripix xeꞌ machi ani war aqꞌuecꞌo ubꞌan.
HEB 12:13 Y sicbꞌanic e bꞌir xeꞌ erach tuaꞌ iwirse tin e machi aqꞌuecꞌo axanobꞌ cocha tuaꞌ axanobꞌ bꞌan cocha jay ayan ani inteꞌ uyoc xeꞌ tzꞌej ani. Y tamar era cꞌani acanuobꞌ cocha tuaꞌ axanobꞌ imbꞌutz tama ubꞌir e Dios, bꞌan cocha jay war atzꞌacpa ani uyoc xeꞌ tzꞌej ani o jay war atzꞌacpa ani orupix xeꞌ machi ani aqꞌuecꞌo.
HEB 12:14 Pues entonces turbꞌanic ibꞌa tuaꞌ icojco e jiriar taca tunor e inmojr ajcꞌupesiajobꞌ tama Cawinquirar, y turbꞌanic ibꞌa tuaꞌ ixquetpa erach tunor tama icuxtar, porque tin e majax erach uwirnar machi ixto tuaꞌ axin uwira ut Cawinquirar.
HEB 12:15 Y iwiric que mamajchi axin uyacta tuaꞌ uchꞌami utacarsiaj e Dios lo que arobꞌnon umener que bꞌan tuaꞌ cachꞌami. Y cawiric ticajam que mamajchi axin usati e jiriar taca e inmojr este que axin aqꞌuijna tacarobꞌ inyajrer, porque inteꞌ xeꞌ axin uche cocha era aquetpa bꞌan cocha inteꞌ xeꞌ war uyacta achꞌiꞌ inteꞌ teꞌ macuir uyalma xeꞌ inchꞌaj uyutir que erer achamsan y que erer axin ubꞌoni meyra gente xeꞌ turobꞌ tuyejtzꞌer.
HEB 12:16 Y iwiric que mamajchi tijam axin uchꞌami ubꞌobꞌ bꞌan taca. Y iwiric que mamajchi axin uyare que matucꞌa ucꞌampibꞌir lo que erach tut e Dios. Pues bꞌan uche e Esaú xeꞌ turuan tama e onian tiempo que tamar taca inteꞌ wiar ixin uchoni lo que quetpa tuaꞌ ani uchꞌami tuaꞌ utata cocha inteꞌ bꞌajxan sitz conda ixin chamay utata.
HEB 12:17 Y nox inata que conda cꞌanix achamay utata e Esaú que jaxir cꞌani ani uchꞌami e chojbꞌesiaj tuaꞌ utata, pero ma cocha erer cocha cꞌapa ajcꞌuna e chojbꞌesiaj era uwijtzꞌin. Y motor que jaxir cay uqꞌui tut utata pero mixto cocha erer tuaꞌ aꞌjcꞌuna porque ajcꞌunix uwijtzꞌin e chojbꞌesiaj era.
HEB 12:18 Pues entonces conda non cꞌotoyon tut e Dios machi quetpa tuaꞌ caxin tama or e witzir xeꞌ ucꞌabꞌa Sinaí xeꞌ erer apijchcꞌa cocha cay uchiobꞌ e gente tuaꞌ e Israel tama e onian tiempo. Jaxirobꞌ arobꞌnobꞌ que machi uyubꞌi tuaꞌ atꞌabꞌayobꞌ nien imbꞌijc tama e witzir era cocha war atzꞌajbꞌa taca e cꞌajc, y ayan e nuxi tocar tujor, y incsibꞌan tunor ut, y war aquiricna e icꞌar tacar e jijbꞌiar tut e tocar.
HEB 12:19 Y tama e witzir era e gente tuaꞌ e Israel cay uyubꞌiobꞌ e lajbꞌar tama inteꞌ corneta, y cay uyubꞌiobꞌ ojron unuc e Dios tacarobꞌ. Pero bꞌactobꞌ tunorobꞌ conda cay uyubꞌiobꞌ tunor era y cay ucꞌajtiobꞌ taca e Dios tuaꞌ machi oꞌjron más cocha jaxirobꞌ bꞌactobꞌ meyra conda cay uyubꞌiobꞌ ojron unuc cocha era.
HEB 12:20 Y jaxirobꞌ machi qꞌuecꞌo wawanobꞌ tut lo que cay arobꞌnobꞌ umen e Dios que: “Tunor tin e acꞌotoy uturbꞌa uyoc tama e witzir era ucꞌani tuaꞌ achamesna taca e tun o taca e lanza, y bꞌan ubꞌan ucꞌani tuaꞌ achena taca inteꞌ arac jay acay atꞌabꞌay axin tama e witzir era”, che e Dios.
HEB 12:21 Y imbꞌacꞌajr tunor uwirnar e witzir era, y tamar era ojron e Moisés y che: “Nen war imbꞌacta meyra este que war achincha tunor nicuerpo”, che e Moisés.
HEB 12:22 Pero non machi war caxin cache cocha cay uchiobꞌ e inmojr gente tuaꞌ e Israel era, sino que non yopon tut e Dios. Y e lugar tiaꞌ turu Cadiosir jax e witzir xeꞌ ucꞌabꞌa Sión xeꞌ jax e chinam tuaꞌ e Dios xeꞌ bꞌixir. Y e chinam era tiaꞌ yopon jax xeꞌ ucꞌabꞌa Jerusalem xeꞌ turu tut e qꞌuin tiaꞌ ayan meyra sian angelobꞌ xeꞌ morojsebꞌir turobꞌ war atzayobꞌ.
HEB 12:23 Y non yopon tiaꞌ morojsebꞌir meyra umaxtacobꞌ e Dios xeꞌ tzꞌijbꞌabꞌir ucꞌabꞌobꞌ tama inteꞌ jun tuaꞌ e Dios lo que ayan tut e qꞌuin. Y non yopon tut e Dios xeꞌ tuaꞌ uche juzgar tunor e gente axin, y non yopon tut tunor uyalmobꞌ e winicobꞌ xeꞌ imbꞌutz xeꞌ chembꞌir erach umen e Dios.
HEB 12:24 Y non yopon tut e Jesucristo xeꞌ jax xeꞌ ixin uyustes e pacto xeꞌ imbꞌutz, y xeꞌ jax xeꞌ ixin uyajcꞌu ubꞌa tuaꞌ achamesna tuaꞌ uwechꞌe uchꞌichꞌer tuaꞌ acorpesian. Pues más ayan ucꞌampibꞌir uchꞌichꞌer Cawinquirar Jesucristo que uchꞌichꞌer e Abel xeꞌ turuan tama e onian tiempo xeꞌ chamesna umen usacun. Porque uchꞌichꞌer e Abel uchion cabꞌijnu que ucꞌani ani tuaꞌ achamesna usacun. Pero uchꞌichꞌer e Jesucristo war uyajcꞌon e corpesiaj.
HEB 12:25 Entonces iwiric que mamajchi acay uxejbꞌe ut lo que war uyareon e Dios xeꞌ war upejcon tichan tut e qꞌuin. Porque jay tin e turobꞌ tara tor e rum xeꞌ machi cꞌupseyanobꞌ tut lo que arobꞌnobꞌ umen e Dios machi uyubꞌiobꞌ tuaꞌ alocꞌoy aꞌjniobꞌ tut ujatzꞌuar e Dios conda pejcnobꞌ umener, entonces non más machi tuaꞌ uyubꞌion calocꞌoy cajni tut ujatzꞌuar e Dios jay machi cobꞌian tut uyojroner xeꞌ tari tut e qꞌuin.
HEB 12:26 Pues tama e onian tiempo conda cay ojron e Dios tor e witzir Sinaí nijquesna tunor or e rum, pero coner e Dios war uyareon y che: “Cꞌani innijques or e rum otronyajr era, pero majax jax taca or e rum tuaꞌ innijques tama e tiempo era sino que cꞌani innijques tunor ut e qꞌuin ubꞌan”, che e Dios.
HEB 12:27 Pues conda e Dios uyareon y che: “Otronyajr”, war che era que axin asatpa tunor lo que erer anijquesna, que war che que cꞌani asatpa tunor lo que chembꞌir umener. Y tamar era war canata que tuaꞌ taca aquetpa lo que machi uyubꞌi tuaꞌ anijquesna.
HEB 12:28 Y cocha uchinam e Dios xeꞌ ajcꞌunon umener machi uyubꞌi tuaꞌ anijquesna, catattzꞌic ucꞌabꞌa y coyjtzꞌic ut bꞌan cocha tawar tuaꞌ achempa tut, cocha jaxir nojta y meyra ayan ucꞌotorer.
HEB 12:29 Porque Cadiosir bꞌan cocha inteꞌ cꞌajc xeꞌ erer utijres tunor lo que ayan.
HEB 13:1 Pues entonces yajtanic ut ibꞌa inteꞌ intiox cocha tunorox hermanuox tama e Cristo.
HEB 13:2 Y ira inajpes tuaꞌ ixtzay iwira tunor tin e ayopobꞌ tuaꞌ uwarajsiox tama iyotot, porque tamar era ayan tin e ixin uyajcꞌu tiaꞌ tuaꞌ ajiriobꞌ cora angelobꞌ, motor que machi cay unatobꞌ tama e hora yajaꞌ jay jax inteꞌ ángel era.
HEB 13:3 Y ira inajpes tuaꞌ itacre tin e turobꞌ tama e cárcel bꞌan cocha jay ya ani turox ubꞌan tacarobꞌ, y ira inajpes tuaꞌ itacre tin e war unumse ubꞌobꞌ bꞌan cocha jay nox war ani inumse ibꞌa tacarobꞌ ubꞌan.
HEB 13:4 Pues e nujbꞌiar erach tama tunor y mamajchi tuaꞌ oꞌjron upater tunor era porque tunor lo que axin uche inteꞌ winic taca uwixcar tor uchꞌacteꞌ imbꞌutz tut e Dios xeꞌ jax xeꞌ cay uchion tuaꞌ cache tunor era. Pero tin e axin uyose ubꞌobꞌ taca tin e merato anujbꞌi tacar ucꞌani tuaꞌ ajajtzꞌobꞌ umen e Dios, y bꞌan ubꞌan tin e nujbꞌix xeꞌ axin uyose ubꞌobꞌ taca otronteꞌ xeꞌ majax tuach.
HEB 13:5 Y ira iyusre ichꞌami meyra e tumin, sino que tzayenic tamar lo que ayan tibꞌa era. Porque uyareon e Dios y che: “Mix majchi tuaꞌ inwactox bꞌan taca, y machi ixto tuaꞌ inchoquiox najtir”, che e Dios.
HEB 13:6 Y tamar era erer caqꞌuecꞌojse cawalma y caware que: Cawinquirar jax Cawajtacarsiaj. Nen machi tuaꞌ imbꞌacre lo que axin uche inteꞌ winic tacaren, cocha jax Nidiosir xeꞌ war ucojcuen. Bꞌan ucꞌani tuaꞌ cachecsu tut e Dios.
HEB 13:7 Y ira inajpes tin e cay ubꞌijresox tama ubꞌir e Dios y xeꞌ cay ucansiox uyojroner e Dios. Y bꞌijnunic cobꞌa locꞌoy xeꞌ imbꞌutz tut e Dios umen que jaxirobꞌ war acꞌupseyanobꞌ tama e Cristo, y chenic ubꞌan nox bꞌan cocha war uchiobꞌ jaxirobꞌ.
HEB 13:8 Porque jaxirobꞌ machi uyactobꞌ tuaꞌ uchecsuobꞌ tiut que bꞌan cocha turu e Jesucristo ixnix y bꞌan turu coner y bꞌan tuaꞌ aquetpa ejcꞌar ejcꞌar ubꞌan.
HEB 13:9 Y ira iwacta ibꞌa tuaꞌ ixqꞌuejcha ixixin najtir tut ubꞌir e Dios umen e sian canseyaj xeꞌ matucꞌa ucꞌampibꞌir lo que war anumuy coner. Pues meyra ayan ucꞌampibꞌir e qꞌuecꞌojsiaj lo que erer cachꞌami tama utacarsiaj e Dios, pero lo que ayan tama e sian costumbre lo que meyra gente war uchiobꞌ tamar lo que ucꞌuxiobꞌ matucꞌa ucꞌampibꞌir, porque tin e war uchiobꞌ cocha era machi war utajwiobꞌ ucorpesiaj e Dios tamar.
HEB 13:10 Pero non war cachꞌami lo que chembꞌir umen Cawinquirar Jesucristo conda chamesna tuaꞌ acorpesian, pero tin e sacerdotiobꞌ tama e Israel y tin e war usicbꞌobꞌ e corpesiaj umen que war ucojcobꞌ tunor e onian costumbre lo que ayan tama uley e Moisés machix tuaꞌ atacarnobꞌ umen Cawinquirar cocha machi war ucojcobꞌ tamar.
HEB 13:11 Pues tama e tabernáculo aqꞌuejcha axin uchꞌichꞌer e aracꞌobꞌ xeꞌ chamesnobꞌ esto tama e cuarto xeꞌ más erach umen e sacerdote xeꞌ más nojta tuaꞌ ucꞌajti taca e Dios tuaꞌ aquetpa satbꞌir umabꞌambꞌanirobꞌ e gente, pero ucuerpo e aracꞌobꞌ era machi tuaꞌ acꞌujxa umen e sacerdote era sino que aquetpa tuaꞌ apurutna najtir e chinam.
HEB 13:12 Y tamar era e Jesús ixin uwechꞌe uchꞌichꞌer najtir e chinam Jerusalem ubꞌan tuaꞌ uchion caquetpa erach tunoron xeꞌ war cacꞌupseyan tamar.
HEB 13:13 Cawactic entonces tunor e onian bꞌijnusiaj, y incuic tut e Jesucristo najtir e chinam y canumsic cabꞌa umen que war utzenion e gente bꞌan cocha cay uchiobꞌ upater Cawinquirar conda chamesna umenerobꞌ.
HEB 13:14 Porque tara tor e rum machi tuaꞌ catajwi inteꞌ cachinam xeꞌ machi tuaꞌ acꞌapa, sino que war casicbꞌa inteꞌ cachinam xeꞌ ucꞌanto tuaꞌ cawira ut conda ecmay watar tut e qꞌuin tiaꞌ tuaꞌ caturuan taca Catata Dios iraj iraj.
HEB 13:15 Y tamar era catattzꞌic ut Cadiosir tama ucꞌabꞌa Cawinquirar Jesús iraj iraj. Pues e tattzꞌarsiaj era jax inteꞌ ofrenda xeꞌ war cawajcꞌu tuaꞌ cachecsu tut e gente axin que e Jesús jax Cawinquirar. ¡Catattzꞌic pues ucꞌabꞌa taca tunor cawalma iraj iraj!
HEB 13:16 Y ira inajpes tuaꞌ iche lo que imbꞌutz tut e inmojr, y tuaꞌ itacre ibꞌa inteꞌ intiox, porque jax era bꞌan cocha inteꞌ ofrenda tut e Dios xeꞌ war atzay uwira.
HEB 13:17 Y cꞌupsenic tin e war ubꞌijresox tama ubꞌir e Dios y chenic lo que uyareox tuaꞌ iche. Porque tin e war ubꞌijresox tama e bꞌir era aquetpobꞌ tuaꞌ ucojcobꞌ tunor iwalma porque conda acꞌapa cacuxtar tara tor e rum jaxirobꞌ ucꞌani tuaꞌ uchecsu ubꞌobꞌ taca e Dios tama tunorox. Y turbꞌanic ibꞌa tuaꞌ itacre alocꞌoy imbꞌutz tunor e patnar lo que war uchiobꞌ tin e war ubꞌijresox axin era, porque jay machi war itacriobꞌ tama upatnar e Dios, jaxirobꞌ machi tuaꞌ atzay apatnobꞌ y aquetpobꞌ tzajtaca utobꞌ, y tamar era nox machi tuaꞌ ixtacarna umen e patnar lo que war uchiobꞌ tiaꞌ turox.
HEB 13:18 Cꞌajtinic taca e Dios tamaron. Pues non war canata que matucꞌa ayan tama cawalma xeꞌ majax imbꞌutz tut e Dios, porque non era war cosre tuaꞌ taca cache lo que erach tut jaxir.
HEB 13:19 Y nen cꞌani inwareox tuaꞌ icꞌajti taca e Dios tamaren que jaxir tuaꞌ upasi e bꞌir taniut tuaꞌ uyubꞌien incꞌotoy tiut otronyajr rajxa era.
HEB 13:20 Pues que Cadiosir xeꞌ war uyajcꞌon e jiriar, y xeꞌ ixin ucꞌampes uchꞌichꞌer Cawinquirar Jesús tuaꞌ uyajcꞌu ucꞌampibꞌir e pacto xeꞌ imbꞌutz xeꞌ machi tuaꞌ acꞌapa, y xeꞌ jax xeꞌ ixin usuti ubꞌixqꞌues Cawinquirar Jesús tujam e chamenobꞌ, y xeꞌ jax xeꞌ war ucojcon iraj iraj bꞌan cocha inteꞌ ajcojc oveja ticoit,
HEB 13:21 que Cadiosir era axin uyajcꞌox tunor lo que ucꞌani tuaꞌ uyubꞌiox acꞌapa iche tunor lo que jaxir war ucꞌani tuaꞌ iche, y que jaxir axin uche tunor lo que ucꞌani tamaron tamar e Jesucristo. Catattzꞌi ucꞌabꞌa e Jesucristo ejcꞌar ejcꞌar. Amén.
HEB 13:22 Pues niwermanuox, incꞌajti tacarox tuaꞌ ixquetpa tzꞌustaca conda iche leer tunor e ojroner era lo que inwebꞌta ixin tuaꞌ ucꞌunles iwalma, porque majax nojta tunor e ojroner lo que war intzꞌijbꞌa tibꞌa era.
HEB 13:23 Pues cꞌani inwareox que cawermano Timoteo actana locꞌoy tama e cárcel, y jay jaxir acꞌotoy wacchetaca tiaꞌ turen cꞌani inqꞌueche axin tacaren conda inxin inwarajsiox.
HEB 13:24 Pues cꞌajpesic tunor tin e war ubꞌijresox tama upatnar e Dios yajaꞌ, y cꞌajpesic e inmojr ajcꞌupesiajobꞌ tama Cawinquirar ubꞌan. Tunor e hermanuobꞌ xeꞌ turobꞌ tama e lugar Italia era war uyebꞌtobꞌ axin e cꞌajpesiaj tibꞌa ubꞌan.
HEB 13:25 Que Cadiosir axin utacricox tunorox iraj iraj. Amén. Tara acꞌapa tunor niwojroner.
JAM 1:1 Nen Santiagoen xeꞌ jax inteꞌ man tuaꞌ e Dios y tuaꞌ Cawinquirar Jesucristo. Cꞌani inwebꞌta axin e cꞌajpesiaj tut tunorox xeꞌ jax e doce grupo tuaꞌ e gente tuaꞌ e Israel xeꞌ bꞌoro ixiox tama tunor or e rum.
JAM 1:2 Pues entonces niwermanuox, tzayjresic ibꞌa conda war inumse ibꞌa tama inteꞌ cꞌuxner xeꞌ inyaj uwirnar
JAM 1:3 porque erer inata que conda war inumse ibꞌa umen que war ixcꞌupseyan tama Cawinquirar que war uchiox ixqꞌuecꞌo ixxana tama ubꞌir e Dios.
JAM 1:4 Pero actanic ibꞌa tuaꞌ ixqꞌuecꞌo ixxana tama ubꞌir e Dios, porque tamar era cꞌani ixquetpa más erach tama icuxtar y cꞌani atzꞌacta lo que ayan tama iwalma y mix tucꞌa xeꞌ ucꞌanto tuaꞌ ichꞌami tama icuxtar.
JAM 1:5 Pero jay ayan tin e war unata que ucꞌanto más unatanyaj e Dios, ucꞌajtic taca e Dios y jaxir axin uyajcꞌu tunor lo que ucꞌajti inteꞌ tacar, porque Cadiosir machi utziqui lo que uyajcꞌu y jaxir machi ucꞌaye tin e war ucꞌajti tacar.
JAM 1:6 Pero ucꞌani tuaꞌ ixcꞌupseyan tama e Dios tamar lo que war icꞌajti tacar. Y ira ibꞌijnu tama ijor que: “¿Erach ca nic que erer inchꞌami lo que war incꞌajti taca e Dios era?” porque jay bꞌan ibꞌijnu larox cocha inteꞌ nuxi mar xeꞌ aqꞌuejcha axin teinxejr umen e icꞌar y asujta watar otronyajr umener.
JAM 1:7 Porque tin e war ubꞌijnu cocha era machi tuaꞌ axin uchꞌami lo que war ucꞌajti taca Cawinquirar Dios era.
JAM 1:8 Porque tin e war ubꞌijnu cocha era lar tacar inteꞌ winic xeꞌ chagojr ujor o xeꞌ chateꞌ ubꞌijnusiaj. Porque jaxir intex ubꞌijnusiaj iraj iraj.
JAM 1:9 Pues inteꞌ hermano xeꞌ tzajtaca ut tara tor e rum erer atzay umen que jaxir atꞌabꞌesna umen e Dios.
JAM 1:10 Pero inteꞌ xeꞌ ayan meyra utumin erer atzay conda umanxujres ubꞌa tut e Dios porque ucuxtar tara tor e rum aquetpa bꞌan cocha unichir e cꞌopot xeꞌ axin acꞌapa.
JAM 1:11 Pero conda atobꞌoy watar e qꞌuin axin alucwan e cꞌopot y unichir e cꞌopot era axin oꞌjri, y axin asatpa tunor uwirnar xeꞌ galan ani. Y bꞌan tuaꞌ asatpa ubꞌan inteꞌ xeꞌ ayan meyra utumin conda warto ubꞌorojse uchonmar axin.
JAM 1:12 Atzay e winic xeꞌ machi uyacta ubꞌa tuaꞌ apijchna tuaꞌ uche e mabꞌambꞌanir, porque conda acꞌapa tunor lo que war unumse ubꞌa era jaxir tuaꞌ uchꞌami inteꞌ utuanibꞌir tuaꞌ e Dios. Y e tuanibꞌir era jax lo que Cadiosir cꞌani uyajcꞌu tunor tin e uyajta ut jaxir xeꞌ jax e cuxtar xeꞌ machi tuaꞌ acꞌapa.
JAM 1:13 Conda ayan chi xeꞌ war amaytzꞌa ut tuaꞌ ubꞌijnu uche e mabꞌambꞌanir, ma erer ubꞌijnu que umen e Dios war amajya ut era, porque e Dios mamajchi umayi ut tuaꞌ uche e mabꞌambꞌanir, y nien e Dios machi uyubꞌi tuaꞌ amajya ut tuaꞌ ubꞌijnu uche e mabꞌambꞌanir.
JAM 1:14 Pero apijchna inteꞌ conda aquerejbꞌna y amajresna umen lo que uyusre uche uwerir.
JAM 1:15 Y tamar lo que uyusre uche uwerir inteꞌ acuxpa e mabꞌambꞌanir, y conda abꞌoro axin tunor uyutir e mabꞌambꞌanir entonces achecta watar e chamer.
JAM 1:16 Pues entonces niwermanuox xeꞌ inchoj iut nimener, ira iwacta ibꞌa tuaꞌ ixmajresna.
JAM 1:17 Porque tunor lo que war cachꞌami xeꞌ imbꞌutz y xeꞌ erach war watar tichan tut e qꞌuin tuaꞌ Catata Dios xeꞌ uche tunor lo que chequer ticoit tut e qꞌuin. Pues uwirnar Cadiosir aquetpa bꞌan taca iraj iraj, y tamar jaxir matucꞌa xeꞌ axin aquetpa intiach.
JAM 1:18 Y umen que bꞌan war ucꞌani Cadiosir ixin uyajcꞌon cacuxtar tamar uyojroner xeꞌ erach tuaꞌ caquetpa umaxtac xeꞌ bꞌajxan tama tunor lo que chena umener.
JAM 1:19 Pues entonces niwermanuox xeꞌ inchoj iut nimener, bꞌijnunic era que tunoron xeꞌ winicon ucꞌani tuaꞌ caturbꞌa cabꞌa tuaꞌ cobꞌian wacchetaca, pero que ucꞌani tuaꞌ cacojco cabꞌa tuaꞌ machi cojron wacchetaca y tuaꞌ machi caqꞌuijna wacchetaca ubꞌan.
JAM 1:20 Porque uqꞌuijnar e winicobꞌ machi uche achecta lo que erach tut e Dios.
JAM 1:21 Y tamar era actanic tunor e mabꞌambꞌanir lo que war abꞌoro axin y chꞌamic uyojroner e Dios lo que pacbꞌir tamarox umener taca tunor e manxujresiaj. Porque e ojroner era uyubꞌi ucorpes iwalma.
JAM 1:22 Pero ma tzꞌacar tuaꞌ taca iyubꞌi uyojroner e Dios, sino que ucꞌani tuaꞌ iturbꞌa ibꞌa tamar. Porque jay machi war iche lo que che tamar, intaca war imajres ibꞌa.
JAM 1:23 Pues tin e intaca uyubꞌi uyojroner e Dios y machi uche lo que che tamar aquetpa lar tacar inteꞌ winic xeꞌ axin uwira ut ubꞌa tama inteꞌ espejo.
JAM 1:24 Y uwira ut ubꞌa bꞌajxan pero conda asutpa alocꞌoy tut e espejo era unajpes uwirnar otronyajr.
JAM 1:25 Pero tin e machi unajpes lo que war uyubꞌi tama uley e Dios xeꞌ erach xeꞌ uyubꞌi uyajcꞌon e corpesiaj sino que war uturbꞌa ubꞌa tamar, y machi war uyacta tuaꞌ uche, jaxir axin achojbꞌesna tama tunor lo que axin uche.
JAM 1:26 Y jay ayan tin e war ubꞌijnu que religioso pero xeꞌ machi war umaqui uyej tuaꞌ machi oꞌjron lo que mabꞌambꞌan, jaxir intaca war umajres ubꞌa y aquetpa chequer que matucꞌa ucꞌampibꞌir ureligión era tut e Dios.
JAM 1:27 Pero e religión xeꞌ erach y xeꞌ matucꞌa e bꞌonemar tamar tut Catata Dios jax era: Tuaꞌ catacre e choquem maxtac xeꞌ matucꞌa utatobꞌ, y tuaꞌ catacre e ixictac xeꞌ chamen uviejo tuaꞌ aqꞌuecꞌo uyalmobꞌ tuaꞌ machi aquetpobꞌ tzajtaca utobꞌ, y tuaꞌ machi cabꞌoni cabꞌa tama tunor e mabꞌambꞌanir lo que ayan tara tor e rum.
JAM 2:1 Niwermanuox xeꞌ war ixcꞌupseyan tama Cawinquirar Jesucristo xeꞌ ayan meyra utawarer, ira iturbꞌa ibꞌa tamar inteꞌ xeꞌ ayan meyra utumin, y ira ixejbꞌe ut tin e tzajtaca ut.
JAM 2:2 Bꞌajcꞌat oꞌchoy inteꞌ xeꞌ ayan meyra utumin tijam tama inteꞌ servicio y iwira que ayan ubꞌujc xeꞌ galan y iwira ubꞌan que ayan inteꞌ anillo tor ucꞌabꞌ, y iwira ubꞌan que oꞌchoy inteꞌ xeꞌ tzajtaca ut taca ubꞌujc xeꞌ tzuc y xeꞌ xexex ut.
JAM 2:3 Bꞌajcꞌat iware inteꞌ xeꞌ ayan utumin y che: “Net ajchi, ochen turen tacaron tara.” Pero conda iwira inteꞌ xeꞌ matucꞌa utumin iware: “Net turen tarex tut e rum jay acꞌani, o waren tarex.”
JAM 2:4 Y jay bꞌan war iche taca e gente, que war ichꞌami tin taca xeꞌ ayan utumin y war ixejbꞌe ut tin e tzajtaca ut, ¿ma ca jax mabꞌambꞌan lo que war iche?
JAM 2:5 Pues entonces niwermanuox xeꞌ inchoj iut nimener, ubꞌinic lo que cꞌani inwareox era: Jax e Dios xeꞌ cay usajca tin e tzajtaca ut tara tor e rum tuaꞌ aquetpobꞌ rico tama e cꞌupesiaj y tuaꞌ uchꞌamiobꞌ uchinam e Dios xeꞌ bꞌan cocha inteꞌ herencia cocha bꞌan quetpa tzꞌijbꞌabꞌir tama uyojroner e Dios ixnix que bꞌan cꞌani uyajcꞌu tunor tin e uyajta ut.
JAM 2:6 Pero nox war iqꞌuijnes tin e tzajtaca utobꞌ. Pero ¿ma ca jax tin e ayan utumin xeꞌ axin ucꞌayox y xeꞌ usubꞌajresox este que uquerejbꞌox ixixin tut e ley?
JAM 2:7 ¿Ma ca jax e winic xeꞌ ayan meyra utumin era ubꞌan xeꞌ axin uqꞌuijnes ut e Jesucristo xeꞌ jax Cawinquirar?
JAM 2:8 Entonces jay war icꞌupse uyojroner Cawinquirar tiaꞌ che que: “Yajtanic ut ipiarobꞌ bꞌan cocha war iyajta ut ibꞌa”, entonces war iche lo que imbꞌutz tama tunor era.
JAM 2:9 Pero jay jax taca tin e ayan utumin xeꞌ war icꞌani y tin e tzajtaca ut machi war icꞌani entonces war iche e mabꞌambꞌanir umen que machi war icꞌupse lo que chꞌar tzꞌijbꞌabꞌir tama uley e Dios.
JAM 2:10 Porque jay ayan inteꞌ xeꞌ war ucꞌupse tunor uyojroner e Dios, pero ayan imbꞌijc lo que machi war uche, entonces war uche e mabꞌambꞌanir tut tunor lo que chꞌar tzꞌijbꞌabꞌir tama uyojroner e Dios.
JAM 2:11 Porque inteꞌ taca Cadiosir xeꞌ che: “Ira iyose ibꞌa taca inteꞌ ixic xeꞌ majax iwixcar”, y jax taca xeꞌ che ubꞌan: “Ira ixchamsan.” Pero jay machi war iyose ibꞌa taca otronteꞌ ixic xeꞌ majax iwixcar pero jay war ixchamsan, mabꞌambꞌan war iche y tamar era war icꞌasi tunor lo que chꞌar tzꞌijbꞌabꞌir tama uley e Moisés.
JAM 2:12 Pues nox ucꞌani tuaꞌ iwira tama tunor lo que iware y tama tunor lo que iche cocha war inata que ucꞌani tuaꞌ ixtojya uyeror ut umen e Dios tama tunor era. Porque e ley era tiaꞌ catajwi e corpesiaj jax xeꞌ tuaꞌ acꞌampesna umen Cadiosir tuaꞌ utoyon ubꞌan tamar lo que cꞌapa cache tara tor e rum jay imbꞌutz o jay majax imbꞌutz.
JAM 2:13 Pues tin e machi aquetpa incꞌun uwirnar tut upiarobꞌ tara tor e rum machi tuaꞌ utajwi que incꞌun uwirnar e Dios tut jaxir conda watar e juicio. Pero tin e aquetpa incꞌun uwirnar tut upiarobꞌ cꞌani utajwi que incꞌun uwirnar e Dios tut jaxir ubꞌan conda watar e juicio.
JAM 2:14 Pues entonces niwermanuox, jay ayan inteꞌ xeꞌ oꞌjron y che: “Pero nen war incꞌupseyan tama e Dios”, pero xeꞌ machi war acꞌupseyan tut e Dios, entonces matucꞌa ucꞌampibꞌir tunor e ojroner era. Y ma cocha erer acorpesna inteꞌ tamar taca inteꞌ ojroner cocha era.
JAM 2:15 Bꞌijnunic iwira tama inteꞌ iwermano xeꞌ war unumse ubꞌa meyra, que matucꞌa ubꞌujc y que matucꞌa tuaꞌ ucꞌuxi ajqꞌuin ajqꞌuin
JAM 2:16 y jay iware: “Quiqui wen y quiqui lapa abꞌujc”, pero matucꞌa iwajcꞌu tuaꞌ itacre, entonces matucꞌa ucꞌampibꞌir tunor lo que war iche era.
JAM 2:17 Y bꞌan anumuy tama e cꞌupesiaj tama e Dios ubꞌan. Jay intaca war caware que war cacꞌupseyan tama e Dios pero machi war cache lo que ucꞌani jaxir, entonces matucꞌa ucꞌampibꞌir e cꞌupesiaj era.
JAM 2:18 Pues bꞌajcꞌat achecta inteꞌ xeꞌ oꞌjron cocha era y che: “Net aware que war icꞌupseyan tama e Dios. Pero nen erer inwaret que war umbꞌian tut e Dios. Pues net ma cocha erer awirsen jay war icꞌupseyan tama e Dios cocha machi war ache lo que ucꞌani jaxir. Pero nen erer inwirset que war incꞌupseyan tamar umen que war inche lo que ucꞌani jaxir”, che inteꞌ.
JAM 2:19 Net aware que acꞌupse que ayan inteꞌ taca e Dios, y bueno war ache tamar era porque bꞌan. Pero cꞌani inwaret que e sian mabꞌambꞌan mein war ubꞌijnuobꞌ cocha era ubꞌan y esto achinchobꞌ umen e bꞌijnusiaj era.
JAM 2:20 Tonto, matucꞌa ucꞌampibꞌir tuaꞌ aware que ayan acꞌupesiaj tama e Dios jay machi war ache lo que ucꞌani jaxir.
JAM 2:21 Pues catata viejobꞌir Abraham xeꞌ turuan tama e onian tiempo cꞌotoy quetpa erach tut e Dios tamar lo que uche conda cꞌani ani uchamse usitz xeꞌ ucꞌabꞌa Isaac tama inteꞌ altar bꞌan cocha arobꞌna umen e Dios tuaꞌ uche.
JAM 2:22 Pues erer cawira que e Abraham uchectes ubꞌa que ayan ucꞌupesiaj tama e Dios tamar lo que cay uche, y tamar taca era cꞌotoy quetpa nojta ucꞌupesiaj tama e Dios.
JAM 2:23 Y bꞌan cocha era cꞌapa chena lo que chꞌar tzꞌijbꞌabꞌir tama uyojroner e Dios y che: “E Abraham cꞌupseyan tama e Dios, y tamar era chꞌajma umen e Dios que erach.” Y tamar era tzay erna e Abraham umen e Dios.
JAM 2:24 Entonces erer cawira que inteꞌ winic acꞌotoy achectesna que erach umen e Dios tamar lo que uche ubꞌan y majax tamar taca lo que war acꞌupseyan tamar.
JAM 2:25 Y bꞌan numuy ubꞌan taca inteꞌ ixic xeꞌ turuan tama e onian tiempo xeꞌ ucꞌabꞌa Rahab xeꞌ jax ani inteꞌ ajnajtir ixic. Jaxir chꞌajma umen e Dios que erach tamar lo que cay uche conda cay utacre cora winicobꞌ tuaꞌ Israel xeꞌ cꞌotoyobꞌ mucur tuaꞌ uwirobꞌ e lugar yajaꞌ. Jaxir umucres e winicobꞌ era tama uyotot tuaꞌ machi atajwinobꞌ umen e soldadobꞌ y de allí utacre locꞌoyobꞌ tama otronteꞌ bꞌir.
JAM 2:26 Entonces bꞌan cocha chamen ucuerpo inteꞌ jay cꞌapa locꞌoy uyalma y bꞌan ucꞌupesiaj inteꞌ ubꞌan, chamen jay machi war acꞌupseyan tut lo que arobꞌna umen e Dios.
JAM 3:1 Pues entonces niwermanuox, majax tunor tuaꞌ aquetpobꞌ ajcanseyajobꞌ tama uyojroner e Dios tijam nox, porque canata que Cadiosir cꞌani uwira jay war acanseyan bien tin e aquetpa ajcanseyaj tama uyojroner.
JAM 3:2 Tunoron canumse cabꞌa cora cora umen que machi alocꞌoy tunor lo que cꞌani cache. Pero jay ayan tin e machi asatpa tama uyojroner, jax inteꞌ xeꞌ erach ixto, y jaxir tzꞌacar tuaꞌ ucojco ubꞌa tama tunor.
JAM 3:3 Conda caturbꞌa inteꞌ taqꞌuin tama uyej inteꞌ chij tuaꞌ cacachi uni uyubꞌion cache axana tic taca tiaꞌ cacꞌani motor jay jax inteꞌ nuxi chij ticoit.
JAM 3:4 Bꞌijnunic tama inteꞌ barco xeꞌ nojta xeꞌ atacasna axin umen inteꞌ nuxi icꞌar, pero axin abꞌijresna umen inteꞌ winic xeꞌ majax nojta. Y e winic era ucꞌampes inteꞌ yar chuchu timón tuaꞌ ubꞌijres axin e nuxi barco tic taca tiaꞌ ucꞌani jaxir.
JAM 3:5 Y bꞌan ubꞌan uyac inteꞌ, jax lo que chuchu tama ucuerpo inteꞌ, pero erer uche meyra. Y bꞌijnunic tama inteꞌ chuchu cꞌajc y cobꞌa nuxi teꞌ erer apurutna umener.
JAM 3:6 Y uyac inteꞌ bꞌan cocha e cꞌajc. Pues uyac inteꞌ aquetpa bꞌan cocha e mabꞌambꞌanir xeꞌ intuj xeꞌ war aquetpa macuir ucuerpo inteꞌ. Y tamar era erer ubꞌoni tunor ucuerpo inteꞌ este que war atzꞌajbꞌa tunor ucuxtar inteꞌ tamar. Porque e cꞌajc era lo que ayan tama cawac tari tama uchꞌenar e diablo.
JAM 3:7 Pues inteꞌ winic erer acꞌotori tujor tunor e animalobꞌ lo que ayan tara tor e rum jay chuchu o jay nojta. Y bꞌan erer uche taca inteꞌ chij o taca inteꞌ mut o taca inteꞌ chan o taca inteꞌ chay, y chequer que bꞌan war uche taca tunor e animalobꞌ era.
JAM 3:8 Pero mamajchi uyubꞌi acꞌotori tujor uyac xeꞌ tuach. Porque mabꞌambꞌan uyac inteꞌ y mamajchi erer umanxujres. Y uyac inteꞌ bꞌutꞌur taca lo que bꞌan cocha upuc e chan xeꞌ erer uchamse inteꞌ.
JAM 3:9 Pues tacar cawac caxin catattzꞌi ucꞌabꞌa Cawinquirar xeꞌ jax Catata Dios, y tamar taca cawac era caxin cabꞌaxe ut capiar ubꞌan xeꞌ chembꞌir umen e Dios bꞌan cocha uwirnar jaxir.
JAM 3:10 Pues tamar taca uyej inteꞌ war alocꞌoy e chojbꞌesiaj y war alocꞌoy e bꞌaxoner ubꞌan. Niwermanuox, majax bueno tuaꞌ cache cocha era.
JAM 3:11 Y ma cocha erer alocꞌoy tama inteꞌ taca ut jaꞌ e jaꞌ xeꞌ inchꞌaj ut y e jaꞌ xeꞌ inchiꞌ ubꞌan.
JAM 3:12 Niwermanuox, inteꞌ uterar higuera machi uyubꞌi uyajcꞌu ingojr ut aceituna y inteꞌ uchꞌajnarir uva machi uyubꞌi uyajcꞌu ingojr higo. Y bꞌan ubꞌan tama inteꞌ ut jaꞌ, machi uyubꞌi uyajcꞌu e jaꞌ xeꞌ inchꞌaj ut y e jaꞌ xeꞌ inchiꞌ ubꞌan.
JAM 3:13 Pues entonces jay ayan inteꞌ tijam xeꞌ nojta ujor y xeꞌ nojta unatanyaj, uwirsic ubꞌa que bꞌan tamar lo que uche xeꞌ imbꞌutz taca e manxujresiaj lo que watar tama e natanyaj era.
JAM 3:14 Pero jay ayan chi xeꞌ uyacta achꞌajran uyalma umen que war acꞌuxnaqꞌui uwira lo que ayan tuaꞌ otronteꞌ y xeꞌ war uche ubꞌa que jax taca xeꞌ imbꞌutz uwirnar, entonces ma erer utattzꞌi ubꞌa porque war umajres ubꞌa tamar lo que erach.
JAM 3:15 Pues inteꞌ natanyaj cocha era machi tari tama e Dios, sino que tari tor e rum era y tari tama ujor e winic y tari tama e diablo.
JAM 3:16 Porque tiaꞌ ayan e cꞌuxnaqꞌuir y tiaꞌ ayan inteꞌ xeꞌ war uche ubꞌa que jax taca xeꞌ imbꞌutz uwirnar, ayan ubꞌan e qꞌuecraner y ayan meyra e mabꞌambꞌanir.
JAM 3:17 Pero tin e ayan e natanyaj xeꞌ tari tut e qꞌuin tichan war uche intaca lo que erach, y ayan ujiriar e Dios tamar, y incꞌun uwirnar, y amanxuran ut. Y inteꞌ cocha era xeꞌ ayan unatanyaj e Dios tamar uyusre utacre e inmojr, y mamajchi uxejbꞌe ut, y turix tuaꞌ uche lo que imbꞌutz.
JAM 3:18 Y tin e war usisijres ubꞌa tacar upiarobꞌ war upaqꞌui e jiriar tama uyalmobꞌ e gente tuaꞌ asutpa uchꞌami uyutir xeꞌ jax e cuxtar xeꞌ erach.
JAM 4:1 Pues ¿tiaꞌ watar e sian qꞌuijnar y e sian qꞌuecraner lo que ayan tijam nox? Pues watar tama iwalma xeꞌ bꞌutꞌur taca tunor lo que uyusre uche iwerir xeꞌ war aticruma macuir iwalma.
JAM 4:2 Pues nox ayan lo que cꞌani ichꞌami xeꞌ merato ichꞌami y tamar era war iche meyra mabꞌambꞌanir este que ixchamsan tuaꞌ ichꞌami lo que icꞌani. War ixcꞌuxnaqꞌui meyra tamar lo que ayan tuaꞌ otronteꞌ, y cocha machi uyubꞌiox ichꞌami war ixqꞌuijna tamar. Pero machi war ichꞌami lo que icꞌani era umen que machi war icꞌajti taca e Dios.
JAM 4:3 Pero jay ixixin icꞌajti lo que war iyusre era taca e Dios machi war ichꞌami umen que war icꞌajti taca inteꞌ mabꞌambꞌan bꞌijnusiaj, porque war icꞌani tuaꞌ taca itzayjres ibꞌa tama iwerir tamar lo que cꞌani ani ichꞌami era.
JAM 4:4 Ajmabꞌambꞌanirox, ¿machi ca inata que tin e atzay uwira lo que ayan tara tor e rum war uxejbꞌe ut e Dios? Porque tin e ubꞌijnu tuaꞌ atzay uwira lo que ayan tara tor e rum war ubꞌijnu tuaꞌ aqꞌuijna uwira ut e Dios.
JAM 4:5 ¿O war ca ibꞌijnu que matucꞌa ucꞌampibꞌir lo que chꞌar tzꞌijbꞌabꞌir tama uyojroner e Dios tiaꞌ che que: “Unawalir e Dios xeꞌ turbꞌana tama cawalma umen Catata Dios war uyajta coit uwiron iraj iraj?” Bꞌan chꞌar tzꞌijbꞌabꞌir tama uyojroner e Dios.
JAM 4:6 Pero Cadiosir war utacrion meyra taca ucꞌunersiaj bꞌan cocha chꞌar tzꞌijbꞌabꞌir tama uyojroner: “E Dios uxejbꞌe ut tin e war uche ubꞌa que jax taquix tara tor e rum, pero war utacre tin e war umanxujres ubꞌa tut jaxir.” Bꞌan chꞌar tzꞌijbꞌabꞌir tama uyojroner e Dios.
JAM 4:7 Entonces osenic ibꞌa yebꞌar ucꞌotorer e Dios, y ira iyubꞌi lo que war uyareox e diablo sino que arenic tuaꞌ alocꞌoy tiwejtzꞌer y jaxir tuaꞌ alocꞌoy ajni tiut.
JAM 4:8 Cꞌotenic tut e Dios y jaxir tuaꞌ ayopa tiaꞌ turox. Ajmabꞌambꞌanirox, poquic icꞌabꞌ tama tunor e mabꞌambꞌanir lo que war iche, y poquic iwalma nox xeꞌ chagojr ijor xeꞌ war ibꞌijnu tuaꞌ iyajta ut e Dios y xeꞌ war ibꞌijnu tuaꞌ iyajta ut lo que ayan tara tor e rum ubꞌan.
JAM 4:9 Cꞌayenic ibꞌa tamar imabꞌambꞌanir, y aruenic tamar, y bꞌijnunic tuaꞌ iwacta inyajrer tunor e mabꞌambꞌanir lo que war iche. Y tin e war atzene tamar e mabꞌambꞌanir lo que war uche ucꞌani tuaꞌ aꞌru tamar y ucꞌani tuaꞌ asubꞌajra tamar.
JAM 4:10 Manxujresic ibꞌa tut e Cawinquirar Dios y jaxir tuaꞌ uchiox ixquetpa más nojta tamar jaxir.
JAM 4:11 Pues entonces niwermanuox, ira ixojron upater otronteꞌ porque tin e war oꞌjron upater inteꞌ hermano o xeꞌ war utuchꞌi ut, war oꞌjron upater uley e Moisés y war uche juzgar. Y jay war ache juzgar e ley era, war isutpa juez tujor y machi war icꞌupseyan tut.
JAM 4:12 Ayan inteꞌ taca xeꞌ uyajcꞌu uley e Moisés xeꞌ jax e Dios y jax taca jaxir xeꞌ aquetpa e juez tama tunor, y jax jaxir xeꞌ erer ucorpeson y xeꞌ erer utijreson. Y net, ¿chiet net tuaꞌ iyojron upater apiarobꞌ?
JAM 4:13 Pues ubꞌinic era tunorox xeꞌ war ixojron cocha era y che: “Coner o ejcꞌar cꞌani caxin tama inteꞌ chinam tuaꞌ caturuan yajaꞌ tama inteꞌ año tuaꞌ cachonma y tuaꞌ cache abꞌoro catumin”, che inteꞌ.
JAM 4:14 Pero nox machi war inata tucꞌa tuaꞌ anumuy tamarox ejcꞌar. Porque nox larox tacar e tocar xeꞌ achecta watar y wacchetaca nien iwira tiaꞌ ixin.
JAM 4:15 Pero lo que ucꞌani tuaꞌ iware jax era: “Jay e Dios ucꞌani erer caturuan y erer cache meyra chonmar.”
JAM 4:16 Pero nox machi war ibꞌijnu tamar era conda ixojron tamar lo que war ibꞌijnu iche y tamar era war taca itattzꞌi ibꞌa y machi war ixsubꞌajra tuaꞌ ixojron cocha era. Pero tunor e tattzꞌarsiaj cocha era mabꞌambꞌan tut e Dios.
JAM 4:17 Entonces tin e war unata uche lo que erach y machi war uche, mabꞌambꞌan war uche.
JAM 5:1 Pues ubꞌinic nox xeꞌ ayan meyra itumin, uqꞌuienic y aruenic porque watar tijor meyra cꞌuxner.
JAM 5:2 Tunor lo que ayan tibꞌa oqꞌuem turu, y ibꞌujc xeꞌ galan ani uwirnar bꞌutꞌur e sian max tamar.
JAM 5:3 Y tunor e sian oro y tunor e sian plata lo que ayan tibꞌa cꞌapix umen e mach. Y e mach xeꞌ cꞌapa utijres itumin jax taca xeꞌ tuaꞌ acꞌapa utijres tunor iwerir ubꞌan bꞌan cocha inteꞌ cꞌajc. Y cocha meyra war abꞌoro itumin tama e tiempo era, más tuaꞌ achꞌiꞌ e cꞌuxner xeꞌ axin watar tama ijor.
JAM 5:4 Ubꞌinic unuc e sian manobꞌ xeꞌ patnobꞌ y xeꞌ machi itoyi. Warto aꞌruobꞌ tuaꞌ uchꞌamiobꞌ utuminobꞌ pero Cawinquirar Dios xeꞌ turu tichan xeꞌ meyra ayan ucꞌotorer war uyubꞌi tunor era.
JAM 5:5 Bꞌijnunic que galan war inumse tunor icuxtar tara tor e rum y que war iwajcꞌu tunor lo que war uyusre iwerir, pero intaca war inojres ibꞌa bꞌan cocha inteꞌ wacax xeꞌ tuaꞌ asutpa achamesna.
JAM 5:6 Nox war iche juzgar y war ichamse tin e matucꞌa war uchiobꞌ y xeꞌ machi uyubꞌiobꞌ ucorpes ubꞌobꞌ tamarox.
JAM 5:7 Pues entonces niwermanuox, cojconic este que asutpa watar Cawinquirar otronyajr. Bꞌijnunic tama inteꞌ ajpatnar xeꞌ cꞌapa upaqꞌui uchor, porque jaxir aquetpa tuaꞌ ucojco acꞌaxi e jajar tuaꞌ uyubꞌi uchꞌami inteꞌ nuxi cosecha.
JAM 5:8 Y nox ubꞌan ucꞌani tuaꞌ icojco uyopar Cawinquirar, y tamar era turbꞌanic ibꞌa tuaꞌ ixqꞌuecꞌo ixxana tamar porque jaxir axin watar wacchetaca.
JAM 5:9 Entonces niwermanuox, ira ixojron upater tin e war uche lo que majax bueno tiut tuaꞌ machi ixchena juzgar umen e Dios, porque jax taca jaxir e Juez tama tunor y jaxir cꞌani asutpa watar wacchetaca.
JAM 5:10 Niwermanuox, chꞌujcunic iwira cocha qꞌuecꞌo xanobꞌ conda war unumse ubꞌobꞌ e profetobꞌ xeꞌ cay ojronobꞌ tama ucꞌabꞌa Cawinquirar Dios tama e onian tiempo.
JAM 5:11 Pues non canata que chojbꞌesbꞌir ut tunor tin e aqꞌuecꞌo awawan tut lo que war unumse ubꞌa bꞌan cocha cay coybꞌi tama e Job xeꞌ turuan tama e onian tiempo xeꞌ cay unumse ubꞌa meyra. Y nox war inata ubꞌan cocha cay qꞌuecꞌo wawan e Job era y cay iyubꞌi cocha chojbꞌesbꞌir ut umen Cawinquirar Dios tama ucꞌapesnibꞌir tunor era. Pues incꞌun uwirnar Cawinquirar Dios ticoit xeꞌ war uyajta coit inteꞌ intion.
JAM 5:12 Pues entonces niwermanuox, iwiric tuaꞌ machi ixojron cocha era y che: “Unaten ut e qꞌuin”, o “Unaten e Dios”, o “Unaten catuꞌ mundo.” Pues nox ucꞌani tuaꞌ iware que: “Bꞌan”, jay bꞌan, y ucꞌani tuaꞌ iware: “Machi”, conda machi. Pero jay war iware: “Bꞌan”, conda majax bꞌan, entonces axin acꞌaxi uqꞌuijnar e Dios tama ijor.
JAM 5:13 Pues jay ayan inteꞌ tijam xeꞌ war unumse ubꞌa, ucꞌajtic taca e Dios. Y jay ayan inteꞌ tijam xeꞌ war atzay, ucꞌaywijresic inteꞌ himno tut e Dios.
JAM 5:14 Y jay ayan inteꞌ tijam xeꞌ ajmuac, upejquic cora anciano tuaꞌ e grupo ajcꞌupesiajobꞌ tuaꞌ watar ucꞌajti taca e Dios y tuaꞌ usajpi ut e ajmuac era taca e aceite tamar ucꞌabꞌa Cawinquirar.
JAM 5:15 Y conda icꞌajti taca e Dios tujor e ajmuac era taca icꞌupesiaj, entonces cꞌani atzꞌacpa y Cawinquirar cꞌani ujachi e ajmuac era otronyajr. Y jay ayan umabꞌambꞌanir e ajmuac era Cadiosir axin acꞌumpa tacar.
JAM 5:16 Checsunic ibꞌa tut e inmojr ajcꞌupesiajobꞌ inteꞌ intiox y cꞌajtinic taca e Dios tama inteꞌ intiox tuaꞌ ixtzꞌacpesna. Porque conda ucꞌajti taca e Dios tin e erach, erer uchꞌamiobꞌ meyra lo que imbꞌutz tuaꞌ.
JAM 5:17 E Elías xeꞌ jax inteꞌ profeta xeꞌ turuan tama e onian tiempo jax ani inteꞌ winic bꞌan cocha non, pero conda ucꞌajti taca e Dios tuaꞌ machi acꞌaxi e jajar, pues machi cꞌaxi e jajar tama uxteꞌ año y medio.
JAM 5:18 Y conda numuy e uxteꞌ año y medio era sutpa ucꞌajti otronyajr taca e Dios tuaꞌ acꞌaxi e jajar otronyajr, y bꞌan numuy cocha ucꞌajti era y cay cꞌaxi e jajar otronyajr, y cay tꞌoxpa e sian cꞌopot y tunor lo que pajcꞌa galan cꞌawan ixin.
JAM 5:19 Pues entonces niwermanuox, jay ayan inteꞌ tijam xeꞌ ixin uyacta ubꞌir e Dios, pero jay ayan chi xeꞌ erer utacre tuaꞌ asutpa otronyajr,
JAM 5:20 natanic que tin e cay utacre tuaꞌ uyacta e mabꞌambꞌanir era war utacre tuaꞌ acorpesna uyalma tama e chamer, y war uche tuaꞌ acꞌumpa e Dios tacar tama tunor umabꞌambꞌanir. Tara acꞌapa tunor niwojroner, che e Santiago.
1PE 1:1 Nen Pedroen xeꞌ jax inteꞌ apóstol tuaꞌ Cawinquirar Jesucristo war intzꞌijbꞌa e carta era tibꞌa xeꞌ niwermanuox. Y cocha ajnesna ixiox innajt war ixturuan tic taca tama tunor e chinamobꞌ tama e departamento Ponto, y tama e departamento Galacia, y tama e departamento Capadocia. Y war ixturuan tama tunor e chinamobꞌ tama e departamento Asia, y tama e departamento Bitinia.
1PE 1:2 Pues sicbꞌabꞌirox umen Catata Dios bꞌan cocha ubꞌijnu uche conda ne mato achena ani or e rum era. Y nox sicbꞌabꞌirox umen Unawalir e Dios tuaꞌ ixcꞌotoy ixcꞌupseyan tut Cawinquirar Jesucristo y tuaꞌ ixquetpa pocbꞌir tamar uchꞌichꞌer jaxir. Que Cadiosir uyajqꞌuicox meyra utacarsiaj y ujiriar.
1PE 1:3 Pues entonces catattzꞌi ucꞌabꞌa Cadiosir xeꞌ jax Utata Cawinquirar Jesucristo que tamar ucꞌunersiaj uchion cacuxpa otronyajr umen que usuti ubꞌixqꞌues e Jesucristo tujam e chamenobꞌ tuaꞌ cacꞌotoy cacojcsan tamar jaxir.
1PE 1:4 Pues tunor lo que war cacojco tuaꞌ cachꞌami tuaꞌ e Dios war atꞌabꞌesna umener tichan tut e qꞌuin tiaꞌ machi tuaꞌ atijresna y tiaꞌ machi tuaꞌ abꞌontzꞌa y tiaꞌ machi tuaꞌ asatpa ut.
1PE 1:5 Y umen que war cacꞌupseyan tamar jaxir, war ucojcon tacar ucꞌotorer este que axin uchectes inyajrer e corpesiaj tama ucꞌapesnibꞌir e tiempo era conda asutpa watar Cawinquirar Jesucristo otronyajr.
1PE 1:6 Entonces tzayenic tama tunor era motor que bꞌajcꞌat ucꞌani tuaꞌ inumse ibꞌa meyra tama e tiempo era.
1PE 1:7 Pues más atujri icꞌupesiaj que e oro xeꞌ erer atijresna. Porque e oro erer atajwina cobꞌa atujri conda aturbꞌana tor e cꞌajc tama ingojr bꞌejt tuaꞌ ajacha, y jay matucꞌa e sojc tamar entonces war che era que meyra utujrir. Y bꞌan ubꞌan icꞌupesiaj, conda war inumse ibꞌa aquetpa chequer cobꞌa icꞌupesiaj jay machi ixcucrema tamar lo que war inumse ibꞌa. Porque e cꞌupesiaj xeꞌ aqꞌuecꞌo cocha era atujri meyra y tamar era tin e war acꞌupseyan tama e Dios cocha era cꞌani atajttzꞌobꞌ y cꞌani achenobꞌ honrar y cꞌani aꞌjcꞌunobꞌ utawarer e Dios conda achecta watar e Jesucristo otronyajr.
1PE 1:8 Pues nox ma tiaꞌ cꞌotoyox iwira ut e Jesucristo pero war iyajta ut. Y motor que machi war iwira ut coner pero war ixcꞌupseyan tamar y war ixtzay nojta tama iwalma este que machi uyubꞌiox iware cobꞌa tzayer war icojco.
1PE 1:9 Y tamar icꞌupesiaj era war ichꞌami lo que war uyusre iwalma xeꞌ jax e corpesiaj.
1PE 1:10 Pues e profetobꞌ xeꞌ turuan tama e onian tiempo cay ubꞌijnuobꞌ meyra tamar e corpesiaj era lo que war cachꞌami non coner, y jaxirobꞌ cay ojronobꞌ meyra tamar ucꞌunersiaj e Dios y lo que aquetpa tuaꞌ cachꞌami non tama e tiempo era.
1PE 1:11 Pues jax Unawalir e Cristo xeꞌ cay uwirse e profetobꞌ era lo que aquetpa tuaꞌ unumse ubꞌa e Cristo y e nuxi tawarer lo que aquetpa tuaꞌ uchꞌami ubꞌan. Y jaxirobꞌ cay usicbꞌobꞌ tuaꞌ unatobꞌ chi era xeꞌ aquetpa tuaꞌ watar y tucꞌa tiempo tuaꞌ achecta ut jaxir bꞌan cocha irsenobꞌ umen Unawalir e Cristo xeꞌ turu tacarobꞌ.
1PE 1:12 Pero e Dios cay uwirse e profetobꞌ era que lo que war uchecsuobꞌ tut e gente machi tuaꞌ anumuy tama e tiempo conda turobꞌto jaxirobꞌ tara tor e rum, sino que tamar e tiempo era. Y jax era e ojroner lo que cay checsuna tiut umen tin e cay uchecsu uyojroner e Dios tama e corpesiaj tiut tama ucꞌotorer Unawalir e Dios xeꞌ ebꞌetbꞌir tari tut e qꞌuin. Y motor tin e angelobꞌ war uyusreobꞌ tuaꞌ uyubꞌiobꞌ más tama tunor e corpesiaj era lo que war cachꞌami non.
1PE 1:13 Pues entonces ustesic ibꞌa tuaꞌ ibꞌijnu tamar lo que cꞌani iche jay imbꞌutz o jay majax imbꞌutz. Cojconic ibꞌa tuaꞌ machi iche e mabꞌambꞌanir sino que turbꞌanic ibꞌa tuaꞌ icojco tama e Jesucristo tuaꞌ erer ichꞌami tunor e tacarsiaj lo que e Dios cꞌani uyajcꞌon conda achecta watar Cawinquirar otronyajr.
1PE 1:14 Y non cocha umaxtacon e Dios xeꞌ war cacꞌupseyan tut jaxir, machi ixto tuaꞌ cache bꞌan cocha cay cosre ani conda merato canata chi e Dios.
1PE 1:15 Pero bꞌan cocha aquetpa erach Cadiosir y bꞌan tuaꞌ caxin cache non ubꞌan, porque erach Cadiosir xeꞌ upejcon.
1PE 1:16 Bꞌan cocha chꞌar tzꞌijbꞌabꞌir tama uyojroner e Dios: “Quetpenic erach porque nen erachen”, che e Dios.
1PE 1:17 Y cocha tunoron war cacꞌajti taca Catata Dios xeꞌ war ubꞌijnu uwira tunor lo que war cache tara tor e rum jay imbꞌutz o jay majax imbꞌutz, y cocha jax jaxir xeꞌ tuaꞌ uyajcꞌu uyeror inteꞌ intion watar e hora, pues non ucꞌani tuaꞌ cabꞌacre ut jaxir iraj iraj tama tunor cacuxtar tara tor e rum.
1PE 1:18 Pues jax Cadiosir xeꞌ ixin ucorpeson tama cacuxtar xeꞌ ma ani tucꞌa ucꞌampibꞌir lo que cachꞌami tuaꞌ catata viejobꞌirobꞌ. Y war inata que e corpesiaj era majax mambꞌir taca e oro o taca e tumin xeꞌ aquetpa tuaꞌ acꞌapa,
1PE 1:19 sino que corpesbꞌiron umen e Cristo xeꞌ chamesna tamaron conda uwechꞌe uchꞌichꞌer tut e cruz. Y tunor era uche tamaron, bꞌan cocha conda achamesna incojt oveja xeꞌ matucꞌa e bꞌonemar tamar, y bꞌan cocha era chamesna e Cristo tamaron.
1PE 1:20 Pues conda ne mato achena ani or e rum era quetpa que e Cristo jax xeꞌ tuaꞌ achamesna tuaꞌ uyajcꞌon e corpesiaj. Pero esto tama e tiempo era cꞌotoy chectesna ticoit tuaꞌ aquetpa Cawajtacarsiaj ticabꞌa.
1PE 1:21 Y umen lo que uche e Cristo tamaron cꞌotoy cꞌupseyanox tama e Dios xeꞌ usuti ubꞌixqꞌues e Cristo tujam e chamenobꞌ y xeꞌ sutpa utattzꞌi ucꞌabꞌa ubꞌan, y tamar era nox war ixcꞌupseyan tama e Dios coner y war icojco tamar tuaꞌ ichꞌami e cuxtar xeꞌ machi tuaꞌ acꞌapa.
1PE 1:22 Y cocha pocbꞌirix tunor iwalma umen que war ixcꞌupseyan tut lo que erach cꞌotoy icꞌani meyra tunor e ajcꞌupesiajobꞌ tama Cawinquirar. Y tamar era cꞌani inwareox que yajtanic ut tunor e ajcꞌupesiajobꞌ era taca tunor iwalma y taca tunor iqꞌuecꞌuar.
1PE 1:23 Porque nox sutpa cuxpox otronyajr, pero majax umen inteꞌ tatabꞌir tara tor e rum xeꞌ aquetpa tuaꞌ achamay, sino que tamar uyojroner e Dios xeꞌ bꞌixir y xeꞌ machi tuaꞌ acꞌapa.
1PE 1:24 Bꞌan cocha chꞌar tzꞌijbꞌabꞌir tama uyojroner e Dios que: E winicobꞌ bꞌan ucuxtarobꞌ cocha e cꞌopot, y tunor lo que ubꞌijnu uchiobꞌ xeꞌ nojta aquetpa bꞌan cocha unichir e cꞌopot xeꞌ galan uwirnar conda asacojpa, pero xeꞌ axin ataqui conda aqꞌuijna uwarar e qꞌuin y axin ojri unichir. Y bꞌan cocha era tuaꞌ achamayobꞌ e winicobꞌ tara tor e rum ubꞌan.
1PE 1:25 Pero uyojroner e Dios ma tiaꞌ tuaꞌ acꞌapa, xeꞌ chꞌar tzꞌijbꞌabꞌir tama uyojroner e Dios. Y jax era uyojroner e Dios tama e corpesiaj xeꞌ checsuna tiut y xeꞌ cay ichꞌami.
1PE 2:1 Y tamar era ucꞌani tuaꞌ iwacta tunor e mabꞌambꞌanir y tunor e majresiaj, y ira iche ibꞌa que war iche lo que imbꞌutz tut e gente jay majax bꞌan war iche, y ira acꞌuxnaqꞌui iwira lo que ayan tuaꞌ otronteꞌ, y ira ixojron upater otronteꞌ.
1PE 2:2 Chenic ibꞌa bꞌan cocha inteꞌ chꞌurcabꞌ xeꞌ wartocto acuxpa xeꞌ war usajca e chuꞌ xeꞌ ayan tama utuꞌ. Y bꞌan cocha era ucꞌani tuaꞌ ichꞌami lo que ayan tama uyojroner e Dios xeꞌ erach ubꞌan. Porque tamar era erer ixchꞌiꞌ tama icuxtar y erer aquetpa chequer que war ichꞌami e corpesiaj.
1PE 2:3 Bꞌan cocha chꞌar tzꞌijbꞌabꞌir tama uyojroner e Dios que: “Tunor tin e axin uyejta ucꞌunersiaj e Cawinquirar Dios war unatobꞌ que galan tunor era.” Bꞌan chꞌar tzꞌijbꞌabꞌir tama uyojroner e Dios.
1PE 2:4 Pues entonces laric tut Cawinquirar xeꞌ bꞌan cocha ingojr tun xeꞌ bꞌixir. Y motor que quetpa chocbꞌir umen e winicobꞌ pero quetpa sicbꞌabꞌir umen e Dios y aquetpa bꞌan cocha ingojr tun xeꞌ meyra atujri tut e Dios.
1PE 2:5 Pues inteꞌ intion laron cocha ingojr tun xeꞌ bꞌixir xeꞌ ayan ucꞌampibꞌir tut e Dios tuaꞌ uche inteꞌ otot tamar. Y tamar era non war caquetpa bꞌan cocha inteꞌ otot tama cawalma tiaꞌ war aturuan Unawalir e Dios. Y laron cocha cora sacerdotion xeꞌ erach xeꞌ turon tuaꞌ catattzꞌi ucꞌabꞌa Catata Dios iraj iraj tama ucꞌabꞌa e Jesucristo.
1PE 2:6 Bꞌan cocha chꞌar tzꞌijbꞌabꞌir tama uyojroner e Dios que: Ubꞌinic, nen inturbꞌa tama e lugar Sión inteꞌ xeꞌ bꞌan cocha ingojr tun. Y e tun era bꞌan cocha xeꞌ aturbꞌana tama uwabꞌnibꞌ inteꞌ otot, y xeꞌ sicbꞌabꞌir umen e Dios y xeꞌ meyra atujri. Y tin e acꞌotoy acꞌupseyan tamar xeꞌ bꞌan cocha e tun era, ma tiaꞌ tuaꞌ asubꞌajra conda acꞌotoy tut Catata Dios, Bꞌan che e Dios tama uyojroner.
1PE 2:7 Pues ticoit non xeꞌ war cacꞌupseyan tama e Cristo atujri meyra, pero tut tin e machi acꞌupseyanobꞌ tamar aquetpa que matucꞌa ucꞌampibꞌir tutobꞌ, porque bꞌan chꞌar tzꞌijbꞌabꞌir tama uyojroner e Dios tiaꞌ che: E tun xeꞌ chocbꞌirix ani umen e ajcheyaj otot ayan meyra ucꞌampibꞌir coner, xeꞌ che tama uyojroner e Dios.
1PE 2:8 Y otronyajrto chꞌar tzꞌijbꞌabꞌir tiaꞌ che que: Ayan inteꞌ xeꞌ lar tacar ingojr tun xeꞌ chꞌar tama ut e bꞌir xeꞌ uche acucrema tunor tin e uyobꞌi ubꞌobꞌ tamar, xeꞌ che tama uyojroner e Dios. Pues tin e acucrema cocha era uchiobꞌ umen que machi ucꞌaniobꞌ e ojroner tama e Jesucristo. Y bꞌan quetpa tuaꞌ anumuy tama tunor tin e machi cꞌani acꞌupseyanobꞌ tama ucꞌabꞌa Cawinquirar Jesucristo.
1PE 2:9 Pues tunoron bꞌanon cocha inteꞌ familía xeꞌ sicbꞌabꞌir umen e Dios, y bꞌanon cocha cora sacerdote xeꞌ aquetpa tuaꞌ cache upatnar Carey tichan, y bꞌanon cocha inteꞌ chinam xeꞌ erach, y bꞌanon cocha inteꞌ chinam xeꞌ mambꞌir umen e Dios. Y bꞌan caquetpa tuaꞌ uyubꞌion caxin cachecsu tut e gente axin tunor e tattzꞌarsiaj tama Cadiosir xeꞌ jax xeꞌ upejcon tuaꞌ calocꞌoy tama e incsibꞌaner y tuaꞌ caturuan tama e janchꞌaquenar xeꞌ galan.
1PE 2:10 Pues tama e tiempo xeꞌ numuy conda merato ichꞌami uyojroner e Dios mato jax chinamox ani, pero coner cꞌotoy ixquetpa uchinamox e Dios. Y tama e tiempo xeꞌ numuy mamajchi cꞌani atzay uwirox, pero coner e Dios war atzay uwirox.
1PE 2:11 Pues entonces niwermanuox xeꞌ inchoj iut nimener, cꞌani inwareox era que non bꞌanon cocha inteꞌ ajxambꞌar tara tor e rum, porque calugar jax lo que chembꞌir umen e Dios tut e qꞌuin. Y tamar era cꞌani inwareox que ira iwacta ibꞌa tuaꞌ ixpijchna umen lo que uyusre uche iwerir porque tunor era jax lo que ucucru ani uyalma inteꞌ.
1PE 2:12 Y xanenic erach tujam tin e merato acꞌotoy unatobꞌ chi Cadiosir, porque bꞌajcꞌat ayan tin e tujam xeꞌ axin oꞌjron ipater que mabꞌambꞌan tunor lo que war iche, pero xeꞌ axin uwira otronyajr que war iche jax taca lo que erach, y tamar era cꞌani utattzꞌiobꞌ ucꞌabꞌa Cadiosir tamar lo que iche conda asutpa watar Cawinquirar otronyajr.
1PE 2:13 Pues umen que bꞌan ucꞌani Cawinquirar, cꞌupseyanenic tut tunor tin e war acꞌotoriobꞌ tara tor e rum. Pues bꞌan ucꞌani tuaꞌ iche tut e presidente, cocha jax xeꞌ más meyra ayan ucꞌotorer.
1PE 2:14 Y bꞌan ucꞌani tuaꞌ iche tut e gobernador ubꞌan porque jaxir ebꞌetna tari umen e presidente tuaꞌ uwatzꞌi tunor tin e war uchiobꞌ lo que mabꞌambꞌan y tuaꞌ utattzꞌi tunor tin e war uchiobꞌ lo que imbꞌutz.
1PE 2:15 Porque Cadiosir war ucꞌani tuaꞌ ixixin iche intaca lo que erach, y tamar era tin e machi unatobꞌ tucꞌa war oꞌjronobꞌ y tin e intaca oꞌjronobꞌ cꞌani amactzꞌa uyejobꞌ tuaꞌ machi oꞌjronobꞌ ipater umen que war uwirobꞌ que erach tunor lo que war iche.
1PE 2:16 Entonces chenic bꞌan cocha uche inteꞌ xeꞌ corpesbꞌirix, pero ira icꞌampes icorpesiaj era tuaꞌ iche e mabꞌambꞌanir mucur, sino que chenic bꞌan cocha ucꞌani tuaꞌ uche inteꞌ xeꞌ jax inteꞌ man tuaꞌ e Dios.
1PE 2:17 Chenic ibꞌa erach tut tunor e gente tuaꞌ atzayobꞌ uwirox. Yajtanic ut tunor tin e ajcꞌupesiajobꞌ tama Cawinquirar. Bꞌacrenic e Dios, y cꞌupsenic lo que che e presidente.
1PE 2:18 Y nox xeꞌ ajpatnarox, cꞌupseyanenic tut ipatron taca tunor iwalma motor jay uche lo que imbꞌutz tiut o motor jay mabꞌambꞌan uche tiut.
1PE 2:19 Pues imbꞌutz tut e Dios tuaꞌ caquetpa tzꞌustaca conda war canumse cabꞌa motor que matucꞌa war cache jay war canumse cabꞌa umen que war cabꞌijnu tuaꞌ caquetpa bꞌan cocha ucꞌani e Dios.
1PE 2:20 Pero jay axin ajajtzꞌa inteꞌ tijam umen que uche e mabꞌambꞌanir ¿cocha tuaꞌ ibꞌijnu jay imbꞌutz tut e Dios tuaꞌ ixquetpa tzꞌustaca conda war ixjajtzꞌa tamar lo que ixbꞌeto? Pero jay ixjajtzꞌa conda war iche intaca lo que imbꞌutz y matucꞌa war ixbꞌeto, entonces ayan ucꞌampibꞌir tut e Dios tuaꞌ ixquetpa tzꞌustaca conda war inumse ibꞌa cocha era.
1PE 2:21 Porque tamar era pejcbꞌirox umen e Dios, porque e Cristo cay unumse ubꞌa meyra tamarox y cay uwirsion cocha tuaꞌ cache non tuaꞌ uyubꞌion caxin cache bꞌan cocha uche jaxir.
1PE 2:22 Porque e Cristo matucꞌa e mabꞌambꞌanir cay uche, y ma tiaꞌ ixin majresian.
1PE 2:23 Y conda cꞌayna matucꞌa ojron, y conda chena unumse ubꞌa matucꞌa uyare tuaꞌ ubꞌajcꞌuse e gente era, sino que uyacta tunor era tama ucꞌabꞌ e Dios xeꞌ uche lo que erach conda uche juzgar.
1PE 2:24 Porque e Cristo ucuchi ixin tunor camabꞌambꞌanir tama ucuerpo conda chꞌubꞌna tut e cruz tuaꞌ cacꞌotoy caquetpa chamen non tut e mabꞌambꞌanir y tuaꞌ cacꞌotoy caturuan tama inteꞌ cuxtar xeꞌ erach. Pues upat e Cristo witcꞌa conda jajtzꞌa y tamar era quetpon tzꞌacpesbꞌir.
1PE 2:25 Pues nox ixnix war ani ixxana cocha inteꞌ oveja xeꞌ ajsatpar, pero coner yopox tut e Cristo xeꞌ aquetpa bꞌan cocha inteꞌ ajcojc oveja tibꞌa nox. Y bꞌan cocha era war ucojco tunor iwalma coner ubꞌan.
1PE 3:1 Pues entonces nox xeꞌ ixcarbꞌirox, manxujresic ibꞌa tut iviejo bꞌan cocha uche e Cristo tut e chamer, porque jay ayan inteꞌ winic xeꞌ machi war ucꞌupse uyojroner e Dios, bꞌajcꞌat erer acꞌotoy acꞌupseyan tama e Cristo umen lo que uwira iche xeꞌ erach y matucꞌa tuaꞌ iware,
1PE 3:2 sino que axin uchꞌami uyojroner e Dios conda uwira que war iche erach tunor y que war ixcꞌupseyan tut tunor lo que war uyareox iche.
1PE 3:3 Y conda iyustes ibꞌa tuaꞌ aquetpa más imbꞌutz iwirnar ira ibꞌijnu tamar taca lo que chequer patir tama icuerpo, o tuaꞌ imani lo que meyra atujri lo que erer atzꞌabꞌpruma ut tuaꞌ iturbꞌa tama utzutzer ijor, o tuaꞌ imani lo que chembꞌir tama e oro tuaꞌ iturbꞌa, o tamar lo que erer ilapi xeꞌ meyra atujri,
1PE 3:4 sino que bꞌijnunic jay ayan ucꞌunersiaj e Dios tama iwalma. Porque ayan meyra ucꞌampibꞌir jay incꞌun uyalma inteꞌ ixic y jay inchiꞌ lo que alocꞌoy tama uyojroner. Porque uwirnar cocha era machi tuaꞌ acꞌapa y meyra atujri tut e Dios ubꞌan.
1PE 3:5 Pues bꞌan cay uchiobꞌ e ixictac tuaꞌ aquetpa galan uwirnarobꞌ xeꞌ xanobꞌ tama ubꞌir e Dios tama e onian tiempo. Jaxirobꞌ cꞌupseyanobꞌ tama e Dios y cꞌupseyanobꞌ tut uviejo ubꞌan.
1PE 3:6 Pues bꞌan cay uche e Sara tama e onian tiempo xeꞌ ucꞌupse tunor lo que arobꞌna umen e Abraham xeꞌ jax uviejo este que cay uyare que: “Jax niwinquiret.” Y nox coner quetpox ijchꞌoctacox tuaꞌ e Sara era jay iche lo que erach tama tunor y jay machi ixixin ixbꞌacta.
1PE 3:7 Y nox xeꞌ winicox, tzayenic tuaꞌ ixturuan taca iwixcar y yajtanic ut porque war canata que uwixcar inteꞌ machi aqꞌuecꞌo cocha aqꞌuecꞌo inteꞌ winic y que jaxirobꞌ ayan ucuxtar e Dios tacarobꞌ bꞌan cocha ayan tacaron. Chenic cocha era porque jay majax bꞌan iche, machi tuaꞌ ichꞌami lo que war icꞌajti taca e Dios.
1PE 3:8 Pues entonces tzayenic tunorox tuaꞌ ixturuan tamar inteꞌ taca bꞌijnusiaj. Y quetpenic incꞌun iwirnar tut inteꞌ cocha inteꞌ, y yajtanic ut ibꞌa inteꞌ intiox xeꞌ ajcꞌupesiajox. Y quetpenic taca inteꞌ tzayer tama iweroj tut e gente, y manxujresic ibꞌa tut ipiar ubꞌan.
1PE 3:9 Y ira isuti uyeror ut tama tin e war uche e mabꞌambꞌanir ipater. Y ira ibꞌaxe tin e war ubꞌaxeox, sino que chojbꞌesic utobꞌ. Porque Cadiosir ixin upejcox tuaꞌ ichꞌami e chojbꞌesiaj.
1PE 3:10 Porque chꞌar tzꞌijbꞌabꞌir tama uyojroner e Dios tiaꞌ che: Tin e uyajta ut ucuxtar y xeꞌ cꞌani aturuan meyra tiempo tara tor e rum umaquic uyej tuaꞌ machi oꞌjron lo que mabꞌambꞌan y tuaꞌ machi amajresian.
1PE 3:11 Loqꞌuenic najtir tut e mabꞌambꞌanir y chenic lo que erach. Sajcanic ujiriar e Dios y xanenic tamar.
1PE 3:12 Porque Cawinquirar ucojco tunor tin e uchiobꞌ lo que imbꞌutz y uchiquini lo que ucꞌajtiobꞌ tacar. Pero usuti uyeroj tupat tut tin e uchiobꞌ e mabꞌambꞌanir. Bꞌan chꞌar tzꞌijbꞌabꞌir tama uyojroner e Dios.
1PE 3:13 Entonces ¿chi tuaꞌ aqꞌuijna uwirox jay imbꞌutz taca war ibꞌijnu iche?
1PE 3:14 Pero jay war inumse ibꞌa tamar lo que war iche xeꞌ erach, tzayenic tamar porque cꞌani ixchojbꞌesna umen e Dios. Ira ibꞌacre nox lo que war ubꞌacriobꞌ e gente tara tor e rum, y ira iwacta aloqꞌuesna e jiriar lo que cay ichꞌami tuaꞌ e Dios.
1PE 3:15 Sino que turbꞌanic ibꞌa tama e Cristo xeꞌ jax Cawinquirar. Y bꞌijnunic iwira tucꞌa tuaꞌ iware tin e uyubꞌi tibꞌa tucꞌa tuaꞌ war icojco tama e Cristo cocha era. Pero iwiric ibꞌa tuaꞌ alocꞌoy incꞌun tunor iwojroner tutobꞌ.
1PE 3:16 Cojconic ibꞌa tuaꞌ inata que imbꞌutz tunor lo que war iche tut e Dios. Y tamar era tunor tin e axin oꞌjronobꞌ ipater umen que war iche intaca lo que imbꞌutz tama e Cristo, axin asubꞌajra utobꞌ tamar lo que cay ojronobꞌ ipater.
1PE 3:17 Entonces jay bꞌan ucꞌani e Dios más ani bueno tuaꞌ inumse ibꞌa umen que cay iche lo que erach que jay war inumse ibꞌa umen que cay iche lo que mabꞌambꞌan.
1PE 3:18 Porque jax e Cristo xeꞌ chamay tuaꞌ utoyi tunor camabꞌambꞌanir inyajrer, y tamar era machi tuaꞌ asutpa achamay otronyajr. Jaxir erach, pero chamay tamaron xeꞌ ajmabꞌambꞌaniron tuaꞌ uqꞌuechion caxin tut Cadiosir. Jaxir chamesna tama ucuerpo pero sutpa bꞌixqꞌuesna umen Unawalir e Dios.
1PE 3:19 Pero conda merato asutpa abꞌixcꞌa ixin tuaꞌ uchecsu uyojroner e Dios tut e sian majinobꞌ tuaꞌ e chamenobꞌ xeꞌ chꞌarobꞌ preso.
1PE 3:20 Y e sian ajchamerobꞌ era jax tin e machi cꞌupseyanobꞌ tut e Dios tama e onian tiempo conda turuto e Noé war uche e nuxi barco. Pues tama e tiempo yajaꞌ e Dios cay cojcsan tama e gente era, cꞌani uwira jay acꞌotoy acꞌupseyanobꞌ ani tut. Pero ajtaca ocho gente xeꞌ jax e Noé taca uwixcar y umaxtac xeꞌ cꞌotoy corpesnobꞌ tama e jaꞌ.
1PE 3:21 Y e jaꞌ era jax uchequerir tuaꞌ e chꞌuymar xeꞌ war ucorpeson. Pues e chꞌuymar era majax bꞌan cocha conda axin aꞌti inteꞌ, sino que jax uchequerir que inteꞌ war uturbꞌa ubꞌa imbꞌutz tut e Dios tamar lo que ayan tama uyalma, y jax era lo que war ucorpeson coner tamar lo que uche e Jesucristo conda sutpa bꞌixcꞌa tujam e chamenobꞌ.
1PE 3:22 Y de allí tꞌabꞌay ixin e Jesucristo tut e qꞌuin y ya turu coner tama unojcꞌabꞌ Catata Dios. Y yebꞌar ucꞌotorer e Cristo era quetpobꞌ tunor e sian angelobꞌ y tunor e sian ajcꞌamparobꞌ y tunor e sian ajcꞌotorerobꞌ lo que ayan tut e qꞌuin.
1PE 4:1 Pues entonces cocha e Cristo cay unumse ubꞌa meyra tama uwerir, nox ucꞌani tuaꞌ ixquetpa turix tuaꞌ inumse ibꞌa tama iwerir ubꞌan, porque tin e axin unumse ubꞌa tama uwerir axin uyacta tunor e mabꞌambꞌanir,
1PE 4:2 y aquetpa tuaꞌ uche bꞌan taca cocha ucꞌani e Dios tama tunor ucuxtar tara tor e rum, y machi ixto tuaꞌ uche lo que uyusre uwerir.
1PE 4:3 Porque cay iche tama e tiempo xeꞌ numuy bꞌan cocha tin e matucꞌa unata tamar Cawinquirar, y meyra cay isati ibꞌa tama e mabꞌambꞌanir, y meyra cay iche lo que uyusre uche iwerir, y carayox, y nojqꞌuiniox, y cay xanox tupat e sian ixictac, y war iyujtzꞌi ut e sian chamen dios.
1PE 4:4 Pero coner tin e warto uchiobꞌ tunor e mabꞌambꞌanir cocha era war ubꞌijnu uwirobꞌ que nox machi ixto cꞌani ixxana tacarobꞌ, y tamar era war uqꞌuijnesox.
1PE 4:5 Pero inteꞌ ajmabꞌambꞌanir cocha era aquetpa tuaꞌ acꞌotoy uchectes ubꞌa tut e Dios watar e día porque jax e Dios xeꞌ tuaꞌ uche juzgar tunor tin e bꞌixirto y tunor tin e chamenix.
1PE 4:6 Y tamar era checsuna uyojroner e Dios tut tin e chamenobꞌ coner, conda mato jax chamenobꞌ ani. Y tunor tin e uchꞌamiobꞌ uyojroner e Dios motor jay chamenobꞌ, pero bꞌixir turu uyalmobꞌ tut e Dios.
1PE 4:7 Pues entonces cocha watarix e día conda tuaꞌ acꞌapa tunor lo que ayan, bꞌijnunic ixto tama tunor lo que cꞌani iche, y turbꞌanic ibꞌa tuaꞌ icꞌajti taca e Dios iraj iraj.
1PE 4:8 Pero lo que ucꞌani tama tunor jax era: Que nox ixixin iyajta ut ibꞌa inteꞌ intiox, porque tin e war uyajta ut uyet ajcꞌupesiajir axin unajpes tunor lo que chena tacar. Y tin e ucꞌani uyet ajcꞌupesiajir war acꞌumpa tacar y war unajpes meyra e mabꞌambꞌanir.
1PE 4:9 Tzayenic tuaꞌ iwacta oꞌchoy inteꞌ hermano conda acꞌotoy tama iyotot y ajcꞌunic tiaꞌ tuaꞌ awayan y tucꞌa tuaꞌ ucꞌuxi y ira ixojron upater.
1PE 4:10 Pues inteꞌ intion ajcꞌunon cacꞌampibꞌir umen e Dios. Pero ucꞌani tuaꞌ cacꞌampes lo que ajcꞌunon era umen e Dios tuaꞌ catacre e inmojr hermanuobꞌ, cocha majax inteꞌ taca upatnar e Dios tuaꞌ achena.
1PE 4:11 Entonces tin e ajcꞌuna ucꞌampibꞌir tuaꞌ uchecsu uyojroner e Dios, ucꞌani tuaꞌ axin uche tunor era bꞌan cocha abꞌijresna umen e Dios. Y tin e ajcꞌuna ucꞌampibꞌir tuaꞌ atacarsan, ucꞌani tuaꞌ uche tunor era taca utacarsiaj e Dios. Pues tunor lo que cache, cachic tuaꞌ atajttzꞌa ucꞌabꞌa Catata Dios tama e Jesucristo. Porque jaxir ayan meyra utawarer y ayan meyra ucꞌotorer xeꞌ ma tiaꞌ tuaꞌ acꞌapa. Amén.
1PE 4:12 Pues entonces niwermanuox xeꞌ inchoj iut nimener, ira ibꞌijnu tamar lo que war inumse ibꞌa era, bꞌan cocha jay jax taca ani nox xeꞌ war inumse ibꞌa.
1PE 4:13 Pero tzayenic que nox uyubꞌiox inumse ibꞌa bꞌan cocha cay unumse ubꞌa e Cristo. Porque tamar era nox cꞌani ixixin ixtzay más nojta tama e día conda achecta watar e Cristo taca tunor utawarer.
1PE 4:14 Pues chojbꞌesbꞌir ut tin e acꞌayna umen taca que war acꞌupseyan tama e Cristo, porque Unawalir e Dios cꞌani aquetpa tacar jaxir taca tunor utawarer.
1PE 4:15 Pero jay ayan tijam tin e war unumse ubꞌa umen que war uche e mabꞌambꞌanir majax bueno tunor era. Entonces tin e war achamsan, o tin e war axujchꞌian, o tin e imbꞌacꞌajr uwirnar, o tin e war uyose ubꞌa tamar lo que majax tuaꞌ y war unumse ubꞌa umener, pues inteꞌ cocha era tawar tuaꞌ unumse ubꞌa porque mabꞌambꞌan lo que war uche.
1PE 4:16 Pero tin e axin unumse ubꞌa umen taca que war acꞌupseyan tama e Cristo ma erer asubꞌajra tamar, sino que utattzꞌic ucꞌabꞌa e Dios que uyubꞌi aꞌrobꞌna que jaxir ajcꞌupesiaj tama e Cristo.
1PE 4:17 Pues entonces jax era e hora conda cꞌani acay atojya uyeror tin e turobꞌ tama uyotot e Dios. Y jay bꞌan acay cocha era tacaron xeꞌ turon tama uyotot e Dios, ¿cobꞌa nic tuaꞌ unumse ubꞌobꞌ tin e machi war acꞌupseyanobꞌ tut uyojroner e Dios tama e corpesiaj conda atojyobꞌ uyeror?
1PE 4:18 Y jay intran tuaꞌ acorpesna inteꞌ xeꞌ war uche lo que imbꞌutz tama tunor ucuxtar tara tor e rum, ¿tucꞌa tuaꞌ anumuy tama tin e majax imbꞌutz, y tin e war uche e mabꞌambꞌanir iraj iraj?
1PE 4:19 Entonces tin e war unumse ubꞌobꞌ umen que bꞌan ucꞌani e Dios, ucꞌani tuaꞌ uturbꞌa uyalmobꞌ tama ucꞌabꞌ e Dios xeꞌ jax xeꞌ uchion y xeꞌ machi tuaꞌ uyacton, y de allí cachic jax taca lo que erach.
1PE 5:1 Pues nen xeꞌ Pedroen cꞌani impejca tin e aquetpobꞌ anciano tama inteꞌ inteꞌ grupo ajcꞌupesiajobꞌ tic taca tiaꞌ turobꞌ. Pues nen jax inteꞌ anciano ubꞌan, y nen cay inwira tunor lo que cay unumse ubꞌa e Cristo, y nen ubꞌan ayan lo que tuaꞌ inchꞌami tama utawarer e Cristo conda uxere tunor era tacaron conda asutpa achecta otronyajr.
1PE 5:2 Pues cojconic tunor tin e aquetpobꞌ yebꞌar icanseyaj bꞌan cocha inteꞌ ajcojc oveja xeꞌ ucojco tunor e oveja lo que aquetpa tama ucꞌabꞌ, porque jax e Dios xeꞌ cay uyajcꞌox tunor ipatnar era. Pero chenic tunor ipatnar era tama tunor iwalma y tama tunor iqꞌuecꞌuar bꞌan cocha ucꞌani e Dios. Y chenic bien tunor ipatnar, majax umen taca que war ixtojya sino que umen que bꞌan war icꞌani iche.
1PE 5:3 Y ira iche ibꞌa que nox ajyumox tujor e gente xeꞌ aquetpobꞌ yebꞌar icanseyaj, sino que ucꞌani tuaꞌ iwirse e gente era cocha tuaꞌ axanobꞌ imbꞌutz tama ubꞌir e Dios tamar lo que war iche xeꞌ erach nox.
1PE 5:4 Porque conda asutpa achecta e más nojta Pastor xeꞌ jax Cawinquirar Jesucristo nox inteꞌ intiox tuaꞌ ixajcꞌuna inteꞌ nuxi tuanibꞌir xeꞌ machi tuaꞌ acꞌapa xeꞌ bꞌan cocha inteꞌ corona xeꞌ ayan meyra tawarer tamar.
1PE 5:5 Y bꞌan ubꞌan tamarox nox xeꞌ chꞌom maxtacox, ucꞌani tuaꞌ iturbꞌa ibꞌa yebꞌar ucꞌabꞌ tin e más ayan ujabꞌ que nox. Y tunoron ubꞌan ucꞌani tuaꞌ camanxujres cabꞌa tut e Dios y tut capiar porque chꞌar tzꞌijbꞌabꞌir tama uyojroner e Dios que: E Dios uxejbꞌe ut tunor tin e uche ubꞌa que jax taca unata, pero utacre taca ucꞌunersiaj tunor tin e war umanxujres ubꞌa. Bꞌan che tama uyojroner e Dios.
1PE 5:6 Entonces manxujresic ibꞌa yebꞌar ucꞌotorer e Dios, y jaxir tuaꞌ utꞌabꞌsiox conda acꞌotoy e hora.
1PE 5:7 Y jay ayan lo que war ulocse e jiriar tama iwalma, actanic tunor era tama ucꞌabꞌ e Dios, porque jaxir turix tuaꞌ utacrion.
1PE 5:8 Y achpenic y chꞌujcunic iwiric porque e diablo xeꞌ war aqꞌuijna uwiron war axana war aꞌru bꞌan cocha inteꞌ nuxi león xeꞌ war usajca tucꞌa tuaꞌ ucꞌuxi.
1PE 5:9 Pero qꞌuecꞌojsenic ibꞌa tuaꞌ ixwawan tut uqꞌuijnar e diablo tamar icꞌupesiaj tama e Dios, cocha war canata que bꞌan war unumse ubꞌobꞌ tunor cawermanuobꞌ xeꞌ turobꞌ tama tunor or e rum.
1PE 5:10 Pero conda acꞌapa anumuy tunor lo que war inumse ibꞌa era Cadiosir uchiox ixquetpa más erach y utacriox tuaꞌ ixqꞌuecꞌo tuaꞌ machi ixcucurna tama ubꞌir e Dios, y jaxir axin uqꞌuecꞌojse uwabꞌuox y uchiox icojco más tama uyojroner e Dios. Porque Cadiosir jax xeꞌ war uchojbꞌeson meyra y jax xeꞌ upejcon tuaꞌ cachꞌami utawarer e Dios taca e Cristo. Y utawarer era machi tuaꞌ acꞌapa.
1PE 5:11 Catattzꞌic ucꞌabꞌa Cadiosir xeꞌ meyra ayan ucꞌotorer xeꞌ machi tuaꞌ acꞌapa. Amén.
1PE 5:12 Pues tacar utacarsiaj e hermano Silvano xeꞌ erach taniut xeꞌ Pedroen war catzꞌijbꞌa e chuchu carta era tibꞌa tuaꞌ intꞌabꞌse iwalma y tuaꞌ inchecsu tiut que erach tunor utacarsiaj e Dios lo que war incansiox era. Ira iwacta tuaꞌ ixqꞌuecꞌo tama utacarsiaj e Dios era.
1PE 5:13 Pues e grupo ajcꞌupesiajobꞌ xeꞌ turobꞌ tama e chinam Babilonia xeꞌ sicbꞌabꞌirobꞌ umen e Dios bꞌan cocha nox, uyebꞌta axin e cꞌajpesiaj tibꞌa, y bꞌan uche e hermano Marcos xeꞌ bꞌan cocha inteꞌ sitz tanibꞌa.
1PE 5:14 Tzꞌujtzꞌinic ibꞌa inteꞌ intiox conda war iche saludar ibꞌa tuaꞌ ichectes ibꞌa que war iyajta ut e Dios. Chꞌamic ujiriar e Dios tunorox xeꞌ tuox e Cristo. Amén. Tara acꞌapa tunor niwojroner, che e Pedro.
2PE 1:1 Nen xeꞌ Simón Pedroen manen y apostolen tuaꞌ e Jesucristo. War intzꞌijbꞌa e carta era tibꞌa xeꞌ cꞌotoy ichꞌami inteꞌ cꞌupesiaj xeꞌ meyra atujri bꞌan cocha cachꞌami non ubꞌan. Pues erach Cadiosir xeꞌ jax Cawajcorpesiaj Jesucristo xeꞌ jax xeꞌ war cacꞌupseyan tamar.
2PE 1:2 Chꞌamic meyra utacarsiaj y ujiriar e Dios umen que war inata meyra tamar Catata Dios y tamar e Jesús xeꞌ jax Cawinquirar.
2PE 1:3 Pues entonces tacar ucꞌotorer Catata Dios ixin uyajcꞌon tunor lo que ucꞌani tuaꞌ caturuan tama inteꞌ cuxtar xeꞌ erach tut jaxir tamar lo que canata tamar jaxir xeꞌ ixin upejcon tuaꞌ cachꞌami utawarer xeꞌ meyra ayan y tuaꞌ caquetpa más erach tacar utacarsiaj.
2PE 1:4 Y tacar ucꞌotorer era ixin uyajcꞌon meyra chojbꞌesiaj xeꞌ meyra atujri bꞌan cocha arobꞌna umener ixnix que bꞌan tuaꞌ uche. Y tamar e chojbꞌesiaj era Catata Dios ixin uyajcꞌon Unawalir tuaꞌ uyubꞌion cacꞌotoy caquetpa erach tut jaxir, y ixin uyajcꞌon lo que ucꞌani tuaꞌ uyubꞌion calocꞌoy tut e mabꞌambꞌanir lo que uyusre uche e gente tara tor e rum.
2PE 1:5 Y tamar era tunor tin e war acꞌupseyan tama e Cristo cocha era ucꞌani tuaꞌ uturbꞌa ubꞌa tuaꞌ uyustes ubꞌa tama ucuxtar, y de allí ucꞌani tuaꞌ usajca tuaꞌ acꞌotoy unata tunor lo que ucꞌani e Dios tuaꞌ uche.
2PE 1:6 Y de allí ucꞌani tuaꞌ uturbꞌa ubꞌa tuaꞌ ucojco ubꞌa tama tunor ucuxtar, y de allí ucꞌani aquetpa tzꞌustaca tama uyalma tut tunor lo que watar, y de allí ucꞌani tuaꞌ aquetpa más erach tama tunor ucuxtar.
2PE 1:7 Y de allí ucꞌani tuaꞌ uturbꞌa ubꞌa tuaꞌ aquetpa incꞌun uyalma tut tunor e hermanuobꞌ, y ucꞌani tuaꞌ uyajta utobꞌ tunor e hermanuobꞌ inteꞌ cocha inteꞌ.
2PE 1:8 Pues jay ayan tunor era tama icuxtar y war abꞌoro axin, entonces cꞌani aquetpa chequer que ayan icꞌampibꞌir, y que majax intaca war ixcꞌupseyan tama Cawinquirar Jesucristo.
2PE 1:9 Pero tin e matucꞌa ayan tama ucuxtar cocha era aquetpa bꞌan cocha jay tajpem unacꞌut o bꞌan cocha inteꞌ xeꞌ wix atajpa unacꞌut, porque inteꞌ cocha era cꞌapa unajpes que tama inyajr pocbꞌir ani tama tunor umabꞌambꞌanir.
2PE 1:10 Y tamar era niwermanuox, turbꞌanic ibꞌa tuaꞌ ixcꞌotoy inata que sicbꞌabꞌirox y que pejcbꞌiroxix umen e Dios. Porque jay iche tunor era, ma tiaꞌ tuaꞌ ixixin ixcucrema.
2PE 1:11 Y tamar era Catata Dios tuaꞌ ixto atzay uyajcꞌox e ocher tama uchinam xeꞌ machi tuaꞌ acꞌapa xeꞌ tuaꞌ Cawinquirar xeꞌ jax Cawajcorpesiaj Jesucristo.
2PE 1:12 Pues tamar era cꞌani insutpa inwareox tunor era iraj iraj motor que warix inata y motor que war ixqꞌuecꞌo ixxana tama tunor lo que erach bꞌan cocha cay incansiox.
2PE 1:13 Pues war imbꞌijnu que bueno tuaꞌ insutpa inwareox otronyajr tama tunor era iraj iraj conda turento tara tor e rum tuaꞌ machi anajpa imener.
2PE 1:14 Porque Cawinquirar Jesucristo cay uwirsen que nen tuaꞌ inlocꞌoy tor e rum wacchetaca era.
2PE 1:15 Y tamar era war inche tunor lo que uyubꞌien tuaꞌ aquetpa cꞌar imener tunor lo que war intzꞌijbꞌa tibꞌa era conda acꞌapa inxin tut e qꞌuin.
2PE 1:16 Pues entonces cꞌani inwareox era que tunor lo que cay incansiox tamar e tiempo conda cꞌani asutpa watar Cawinquirar Jesucristo taca tunor ucꞌotorer, majax inteꞌ ojroner xeꞌ catajwi tamar taca cajor sino que jax lo que erach. Pues non xeꞌ turon taca Cawinquirar tujor e witzir cawira taca unaccoit conda sutpa intiach uwirnar tama utawarer.
2PE 1:17 Y non turon tujor e witzir era conda Catata Dios cay ojron taca inteꞌ nuxi nuc xeꞌ tari tut e qꞌuin y cay utattzꞌi Uyunen y cay uyajcꞌu utawarer y che: “Jaxto era Niunen xeꞌ inyajta ut y xeꞌ intzay inwira”, che e Dios uyare e Jesús.
2PE 1:18 Y non coybꞌi e nuc era xeꞌ tari tut e qꞌuin conda turon taca Cawinquirar tujor e witzir xeꞌ erach yajaꞌ.
2PE 1:19 Pues chequer tamar era que ayan meyra ucꞌampibꞌir lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo. Y bueno tuaꞌ iturbꞌa ibꞌa tamar lo que tzꞌijbꞌabꞌir umenerobꞌ. Porque tunor lo que tzꞌijbꞌabꞌir umenerobꞌ aquetpa bꞌan cocha inteꞌ cꞌajc xeꞌ war atzꞌajbꞌa tama e acbꞌar este que asacojpa y este que atobꞌoy watar e lucero xeꞌ ejpray ut conda war asacojpa xeꞌ bꞌan cocha Cawinquirar Jesucristo conda oꞌchoy tama cawalma.
2PE 1:20 Pero natanic era que tunor tin e cay utzꞌijbꞌobꞌ uyojroner e Dios tama e onian tiempo machi utajwiobꞌ e ojroner lo que utzꞌijbꞌobꞌ tamar taca ujorobꞌ.
2PE 1:21 Porque tin e profetobꞌ tama e onian tiempo ma tiaꞌ cay utzꞌijbꞌobꞌ lo que war ucꞌaniobꞌ jaxirobꞌ, sino que utzꞌijbꞌobꞌ intaca lo que bꞌijresnobꞌ tuaꞌ uchiobꞌ umen Unawalir e Dios.
2PE 2:1 Pero tama e onian tiempo ayan ubꞌan e profetobꞌ xeꞌ ajmajresiajobꞌ tujam e gente tuaꞌ e Israel. Y ayan ubꞌan tijam nox coner. Ayan tin e war ucanse e majresiaj mucur, motor que tut e gente war uche ubꞌobꞌ que erach tunor. Pero jaxirobꞌ ucansiobꞌ jax taca lo que ayopa tama ujorobꞌ xeꞌ mabꞌambꞌan y este que axin umuquiobꞌ ucꞌabꞌa Cawinquirar xeꞌ mambꞌirobꞌ ani umener. Y tamar era ucꞌani tuaꞌ asatpobꞌ wacchetaca.
2PE 2:2 Y meyra gente tuaꞌ axin tupat e ajcanseyajobꞌ era y cꞌani ucꞌupsiobꞌ e canseyaj tuobꞌ xeꞌ subꞌar uwirnar. Y umen e canseyaj era ayan tin e tuaꞌ axin oꞌjronobꞌ upater uyojroner e Dios xeꞌ erach.
2PE 2:3 Y tunor e ajcanseyajobꞌ cocha era axin ubꞌijnuobꞌ tamar taca e tumin y tamar era axin ulocsiobꞌ meyra tumin tibꞌa y axin ucansiox meyra lo que majax erach. Pero watar ujatzꞌuar e Dios tama ujorobꞌ wacchetaca este que axin atijresnobꞌ inyajrer.
2PE 2:4 Porque tama e onian tiempo Cadiosir machi cꞌumpa taca e angelobꞌ xeꞌ cay uchiobꞌ e mabꞌambꞌanir, sino que uyebꞌta ixiobꞌ esto tama uchꞌenar e Satanás tiaꞌ war aquetpobꞌ cachar tama e incsibꞌaner war ucojcobꞌ uyopar e juicio.
2PE 2:5 Y Cadiosir machi cꞌumpa taca e gente xeꞌ turuanobꞌ tama e onian tiempo xeꞌ machi cꞌani uyactobꞌ e mabꞌambꞌanir motor que bꞌan arobꞌnobꞌ umen e Noé xeꞌ jax inteꞌ ajchectesiaj tamar lo que erach. Y tamar era e Dios uyebꞌta tari inteꞌ nuxi jajar tujor tunor e ajmabꞌambꞌanirobꞌ era este que cꞌapa cuchpobꞌ chamayobꞌ tunorobꞌ tama e jaꞌ. Pues ajtaca e Noé taca siete ut upiarobꞌ xeꞌ corpesnobꞌ tama e nuxi jaꞌ era.
2PE 2:6 Y qꞌuijna e Dios ubꞌan taca e gente xeꞌ turuanobꞌ tama e chinam Sodoma y taca e gente xeꞌ turuanobꞌ tama e chinam Gomorra xeꞌ meyra cay uchiobꞌ e mabꞌambꞌanir tama e onian tiempo este que cꞌapa tijresnobꞌ tunorobꞌ umen e Dios tama inteꞌ cꞌajc este que quetpobꞌ bꞌan cocha e tan. Y numuy bꞌan cocha era tuaꞌ aquetpa chequer tut tunor tin e machi acꞌupseyanobꞌ tut e Dios lo que aquetpa tuaꞌ unumse ubꞌobꞌ tama e tiempo xeꞌ watar.
2PE 2:7 Pues Cadiosir ucorpes inteꞌ taca winic tama e lugar era xeꞌ jax e Lot xeꞌ jax inteꞌ winic xeꞌ erach. Pues jaxir cay unumse ubꞌa meyra conda uwira tunor lo que war uchiobꞌ e gente era xeꞌ ajmabꞌambꞌanirobꞌ.
2PE 2:8 Pero e Lot, cocha erach uwirnar cay cꞌuxun meyra tama uyalma conda cay uyubꞌi y conda cay uwira tunor e sian mabꞌambꞌanir lo que war uchiobꞌ e gente era iraj iraj.
2PE 2:9 Y tamar era chequer que Cawinquirar Dios unata ucorpes tunor tin e war uturbꞌa ubꞌa tamar jaxir conda war unumse ubꞌobꞌ. Y chequer ubꞌan que jaxir unata ucojco yebꞌar ucꞌabꞌ tunor tin e machi cꞌani uyacta e mabꞌambꞌanir este que acꞌotoy e día tuaꞌ e juicio.
2PE 2:10 Y bꞌan tuaꞌ anumuy tama tunor tin e war uchiobꞌ lo que intuj tama uwerir, y xeꞌ war uxejbꞌiobꞌ ut tunor tin e ayan ucꞌotorer tara tor e rum. Y bꞌan tuaꞌ anumuy tama tunor tin e mamajchi ubꞌacriobꞌ, y tin e war uchiobꞌ jax taca lo que ucꞌaniobꞌ, y tin e machi abꞌactobꞌ este que axin ucꞌayobꞌ tin e nuquir ajcꞌotorerobꞌ tara tor e rum.
2PE 2:11 Pero e angelobꞌ tuaꞌ Cawinquirar Dios xeꞌ meyra ayan ucꞌotorer y xeꞌ meyra ayan utawarer machi ubꞌijnuobꞌ tuaꞌ ucꞌayobꞌ e ajcꞌotorerobꞌ tara tor e rum tut Cawinquirar Dios.
2PE 2:12 Pero e ajcanseyajobꞌ xeꞌ ajmajresiajobꞌ era ojronobꞌ upater tunor lo que machi unatobꞌ. Jaxirobꞌ bꞌanobꞌ cocha e animalobꞌ xeꞌ matucꞌa uchiquinobꞌ y xeꞌ machi ubꞌijnuobꞌ. E animalobꞌ aquetpobꞌ tuaꞌ amorojsenobꞌ y tuaꞌ achamesnobꞌ. Y bꞌan cocha era tuaꞌ asatpobꞌ e winicobꞌ era ubꞌan.
2PE 2:13 Jaxirobꞌ cꞌani achena unumse ubꞌobꞌ bꞌan taca cocha uchiobꞌ unumse ubꞌobꞌ e inmojr. Jaxirobꞌ atzayobꞌ conda war uchiobꞌ lo que matucꞌa ucꞌampibꞌir tama inteꞌ día. Y conda turobꞌ tijam aquetpobꞌ bꞌan cocha inteꞌ bꞌujc xeꞌ galan uwirnar pero xeꞌ ayan e bꞌonemar tamar xeꞌ aquetpa subꞌar uwirnar, y bꞌan e winicobꞌ era xeꞌ turobꞌ tijam xeꞌ war atzayobꞌ jaxobꞌ taca conda war umajresox o conda war anojqꞌuiniobꞌ tacarox.
2PE 2:14 Y e ajcanseyajobꞌ xeꞌ ajmajresiajobꞌ era, conda axin uwira ut inteꞌ ixic ya war uyusre tuaꞌ uchꞌami. Y machi acꞌoy uchiobꞌ e mabꞌambꞌanir. Y iraj iraj war upijchꞌiobꞌ tunor tin e incꞌun uyalma tuaꞌ amajresna, y jaxirobꞌ ubꞌijnuobꞌ tamar taca e tumin. Pues e winicobꞌ era bꞌaxbꞌirobꞌix inyajrer.
2PE 2:15 Jaxirobꞌ ajsatparobꞌ war axanobꞌ porque ixin uyactobꞌ e bꞌir xeꞌ erach. Cay uchiobꞌ bꞌan cocha uche e profeta Balaam xeꞌ jax uyunen e Beor xeꞌ turuan tama e onian tiempo. Jaxir uyajta ut e tumin lo que uchꞌami umen que war uche e mabꞌambꞌanir.
2PE 2:16 Pero e Balaam era cay cꞌayna tama e mabꞌambꞌanir lo que cay uche umen uchij xeꞌ chena ojron umen e Dios bꞌan cocha ojron e gente tuaꞌ ucꞌaye e Balaam tuaꞌ uyacta tunor lo que war uche xeꞌ mabꞌambꞌan tut e Dios.
2PE 2:17 Y tunor e ajcanseyajobꞌ xeꞌ ajmajresiajobꞌ era larobꞌ tacar inteꞌ ut jaꞌ xeꞌ taqui e jaꞌ tamar. Y larobꞌ tacar inteꞌ tocar xeꞌ aqꞌuejcha axin umen e icꞌar. Y tamar era aquetpa tuaꞌ unumse ubꞌobꞌ tama e incsibꞌaner xeꞌ más calapir uwirnar, y ya taca tuaꞌ aquetpobꞌ tama inteꞌ cꞌuxner xeꞌ machi tuaꞌ acꞌapa.
2PE 2:18 Pues meyra utattzꞌi ubꞌobꞌ e ajcanseyajobꞌ era y meyra ojroner ayan tuobꞌ xeꞌ matucꞌa ucꞌampibꞌir. Y jaxirobꞌ ucꞌampes lo que uyusre uche uwerir inteꞌ tuaꞌ upejca e gente tuaꞌ alocꞌoy tama ubꞌir e Dios. Y tamar era axin ucucruobꞌ meyra gente xeꞌ wartocto uyactobꞌ tunor e mabꞌambꞌanir.
2PE 2:19 Y war uyareobꞌ e gente axin que ayan e corpesiaj tacarobꞌ, pero tamarobꞌ matucꞌa e corpesiaj porque war aquetpobꞌ yebꞌar ucꞌotorer lo que war uchiobꞌ xeꞌ majax imbꞌutz porque machi uyubꞌi uyactobꞌ e mabꞌambꞌanir. Y bꞌan anumuy taca tunor e gente; tunor lo que achempa umenerobꞌ iraj iraj war aquetpa bꞌan cocha uwinquir, cocha umener war aꞌrobꞌnobꞌ tucꞌa tuaꞌ uchiobꞌ.
2PE 2:20 Pues tunor tin e uchꞌamix ucꞌabꞌa Cawinquirar xeꞌ jax Cawajcorpesiaj Jesucristo, y xeꞌ ixin uyacta tunor e mabꞌambꞌanir lo que ayan tara tor e rum, y de allí jay axin uyacta ubꞌa tuaꞌ amajresna otronyajr umen e mabꞌambꞌanir este que asutpa aꞌrobꞌna umener otronyajr tucꞌa tuaꞌ uche, entonces jaxir axin aquetpa más tzajtaca ut ixto que conda mato ani uchꞌami e Cristo.
2PE 2:21 Más ani bueno que ma tiaꞌ cꞌotoy unatobꞌ tucꞌa e bꞌir xeꞌ erach tama e Dios que lo que ixin uchiobꞌ jaxirobꞌ. Porque jaxirobꞌ cꞌotoy unatobꞌ tunor era, pero de allí uyactobꞌ ixto tunor uyojroner e Dios xeꞌ erach lo que ajcꞌunobꞌ ani.
2PE 2:22 Pero tunor era anumuy bꞌan taca cocha e ojroner xeꞌ che: “Incojt tzꞌiꞌ xeꞌ uxeꞌ ubꞌa asutpa umaqꞌui otronyajr lo que cay uxeꞌ era.” Y bꞌan ubꞌan cocha che inteꞌ ojroner: “Incojt chitam xeꞌ war atesna wacchetaca asutpa utzꞌiri ubꞌa tama e anam otronyajr”, bꞌan che inteꞌ ojroner.
2PE 3:1 Pues entonces niwermanuox xeꞌ inchoj iut nimener, jax era e chajr carta lo que war intzꞌijbꞌa tibꞌa. Pues tama e bꞌajxan carta y tama e carta era war incꞌajpesox tuaꞌ ibꞌijnu tamar lo que erach.
2PE 3:2 War incꞌani tuaꞌ aquetpa cꞌar imener tunor uyojronerobꞌ e profetobꞌ xeꞌ erobꞌach xeꞌ turuanobꞌ tama e onian tiempo, y tuaꞌ aquetpa cꞌar imener tunor uyojroner Cawinquirar xeꞌ jax Cawajcorpesiaj xeꞌ cansebꞌirox umen e apostolobꞌ.
2PE 3:3 Pues cꞌani inwareox bꞌajxan era tamar lo que watar porque tamar ucꞌapesnibꞌir e tiempo era cꞌani achecta watar tin e tuaꞌ axin uchiobꞌ bꞌan taca cocha uyusre uche uwerir, y xeꞌ tuaꞌ oꞌjronobꞌ upater lo que erach, y xeꞌ tuaꞌ utzeniox umen que war ixxana tama ubꞌir e Dios.
2PE 3:4 Jaxirobꞌ cꞌani oꞌjronobꞌ taca inteꞌ majresiaj y che: “Pues e Cristo che que cꞌani asutpa watar otronyajr. Y jay erach tunor uyojroner, entonces yopix ani. Pero desde que chamayobꞌ tunor catata viejobꞌirobꞌ ixnix tunor quetpix bꞌan taca cocha turu tunor conda cajyesna or e rum era.” Bꞌan tuaꞌ oꞌjronobꞌ tin e cꞌani oꞌjronobꞌ upater lo que arobꞌna umen e Dios que bꞌan tuaꞌ uche.
2PE 3:5 Pero jaxirobꞌ machi cꞌani uyactobꞌ oꞌchoy tama ujorobꞌ que umen uyojroner e Dios chena tunor ut e qꞌuin y tunor or e rum ixnix e tiempo tujam e jaꞌ y tacar e jaꞌ. Pues numuy tunor era umen taca que ojron e Dios.
2PE 3:6 Pero de allí ebꞌetna tari inteꞌ nuxi jajar umen e Dios tuaꞌ ubꞌutꞌi tunor or e rum, y taca e jaꞌ era utijres tunor or e rum.
2PE 3:7 Y umen taca que ojron e Dios tunor ut e qꞌuin y tunor or e rum war acojcsan este que achecta watar e cꞌajc xeꞌ tuaꞌ acꞌapa uputa tunor. Bꞌan tuaꞌ anumuy tama e día tuaꞌ e juicio conda tuaꞌ atijresnobꞌ tunor e ajmabꞌambꞌanirobꞌ.
2PE 3:8 Pues entonces niwermanuox xeꞌ inchoj iut nimener, ira inajpes que tut Cawinquirar Dios inteꞌ día aquetpa bꞌan cocha 1,000 año, y que 1,000 año aquetpa bꞌan cocha inteꞌ día tut jaxir.
2PE 3:9 Y motor que numuy meyra tiempo cocha cabꞌijnu non, pero Cawinquirar Dios cꞌani acꞌapa uche tunor lo que che jaxir. Pues jaxir war acojcsan, porque machi war ucꞌani tuaꞌ asatpa nien incojt winic tara tor e rum, sino que warto uquisu e día axin tuaꞌ ererto uyactobꞌ tunor umabꞌambꞌanirobꞌ y tuaꞌ asutpobꞌ tut e Dios.
2PE 3:10 Pues entonces cꞌani acꞌotoy e día tuaꞌ Cawinquirar Dios bꞌan cocha conda achecta inteꞌ ajxujch acbꞌar. Pues tama e día yajaꞌ cꞌani atijresna tunor ut e qꞌuin taca inteꞌ nuxi quiricnar xeꞌ imbꞌacꞌajr uyubꞌnar, y tunor lo que ayan tut e qꞌuin cꞌani acꞌapa ajacha umen e cꞌajc, y tunor or e rum y tunor lo que ayan tamar cꞌani acꞌapa asatpa ubꞌan.
2PE 3:11 Entonces cocha chequer que cꞌani atijresna tunor lo que ayan, bꞌijnunic era cocha ucꞌani tuaꞌ caturuan tut e Dios y tut e gente. Porque e Dios ucꞌani tuaꞌ caxin cache jax taca lo que erach tut jaxir
2PE 3:12 tama e tiempo era conda war cacojco tuaꞌ acꞌotoy e día yajaꞌ. Y cꞌani catzay cacojco uyopar e día yax. Pues tama e día yajaꞌ cꞌani atijresna tunor ut e qꞌuin, y tunor lo que ayan cꞌani acꞌapa ajacha umen uyamir e cꞌajc.
2PE 3:13 Pero non war cacojco uyopar e día conda cꞌani achecta ut e qꞌuin xeꞌ imbꞌutz y conda cꞌani achecta or e rum xeꞌ imbꞌutz bꞌan cocha arobꞌna umen e Dios ixnix e tiempo. Pues tama e día yajaꞌ jax taca lo que imbꞌutz y lo que erach tut e Dios tuaꞌ achempa.
2PE 3:14 Pues entonces niwermanuox xeꞌ inchoj iut nimener, cocha war cacojco e día conda cꞌani achecta tunor era, turbꞌanic ibꞌa tuaꞌ ixtajwina umen e Dios que ayan e jiriar tamarox, y que matucꞌa e bꞌonemar, y que matucꞌa e mabꞌambꞌanir.
2PE 3:15 Pero bꞌijnunic que warto ucojco cora Cawinquirar tuaꞌ uyubꞌito uchꞌamiobꞌ e corpesiaj tin e merato acꞌotoyobꞌ tut e Dios. Pues bꞌan che cawermano Pablo xeꞌ inchoj ut camener tamar lo que tzꞌijbꞌabꞌir tibꞌa umener bꞌan cocha e natanyaj lo que ajcꞌuna umen e Dios.
2PE 3:16 Pues tama tunor e ojroner lo que tzꞌijbꞌabꞌir umen cawermano Pablo ojron tama tunor era, motor que ayan lo que intran tuaꞌ canata tucꞌa che tamarobꞌ. Y tamar era ayan tin e majax bien cansebꞌir tama uyojroner e Dios y xeꞌ imbꞌijc taca wiri tama ucꞌupesiajobꞌ tama Cawinquirar xeꞌ war uyapru ucanseyaj e Pablo tamar lo que majax erach. Y bꞌan uchiobꞌ ubꞌan tama tunor uyojroner e Dios, y tamar era cꞌani acꞌaxi uqꞌuijnar e Dios tama ujorobꞌ.
2PE 3:17 Pues entonces niwermanuox xeꞌ inchoj iut nimener, cocha wix inata tama tunor lo que tuaꞌ anumuy era, cojconic ibꞌa tuaꞌ machi ixmajresna tuaꞌ ixqꞌuejcha ixixin umen ucanseyaj tin e machi acꞌupseyanobꞌ tut e Dios este que ixcucrema tama e cuxtar xeꞌ erach xeꞌ qꞌuecꞌoxix ani tamar.
2PE 3:18 Entonces canoenic más tama utacarsiaj e Dios y chꞌienic tamar lo que icani tama Cawinquirar xeꞌ jax Cawajcorpesiaj Jesucristo. Catattzꞌic ucꞌabꞌa iraj iraj. Amén. Tara acꞌapa tunor niwojroner, che e Pedro.
1JO 1:1 Nen xeꞌ Juanen cꞌani intzꞌijbꞌa tibꞌa tama Uyunen e Dios xeꞌ turu conda ne mato ani achena or e rum era y xeꞌ turu iraj iraj. Pues non xeꞌ apostolon cay coybꞌi unuc y cay cawira ut jaxir conda xanon tacar tara tor e rum. Y cawira ut jaxir taca unaccoit y cajajpi ucꞌabꞌ y tamar era canata ixto yaꞌ que jaxir jax inteꞌ winic. Y war cachecsu tiut que tamar jaxir ayan e ojroner xeꞌ erach tama e cuxtar xeꞌ machi tuaꞌ acꞌapa.
1JO 1:2 Pues tin e utares e cuxtar era checta ticoit y non cawira ut, y tamar era cꞌani cachecsu que erach e cuxtar era y cꞌani cawareox que ayan e cuxtar xeꞌ machi tuaꞌ acꞌapa xeꞌ turu taca Catata Dios y xeꞌ yopa y uchectes ubꞌa ticoit.
1JO 1:3 Cꞌani cawareox tamar lo que cawira y tamar lo que coybꞌi tuaꞌ ixquetpa intera ibꞌijnusiaj tacaron, bꞌan cocha quetpon non intera cabꞌijnusiaj taca Catata Dios y tacar Uyunen e Dios xeꞌ jax e Jesucristo.
1JO 1:4 Y tamar era war catzꞌijbꞌa tunor era tibꞌa tuaꞌ abꞌoro tunor itzayer este que abꞌutcꞌa iwalma tamar.
1JO 1:5 Pues jax era e ojroner xeꞌ cansenon umen e Jesucristo, y jax lo que war cacansiox ubꞌan, que e Dios bꞌan cocha inteꞌ janchꞌaquenar xeꞌ erach y que tamar jaxir matucꞌa e incsibꞌaner.
1JO 1:6 Jay caxin ani cache lo que mabꞌambꞌan caquetpa bꞌan cocha inteꞌ xeꞌ war axana tama e incsibꞌaner. Y jay bꞌan turon cocha era, war camajresian jay caware que intera cabꞌijnusiaj taca e Dios, porque machi war cacꞌupseyan tut jaxir xeꞌ bꞌan cocha e janchꞌaquenar xeꞌ erach.
1JO 1:7 Pero jay war cache lo que erach tut e Dios, caquetpa macuir e janchꞌaquenar tiaꞌ turu jaxir. Entonces war caxana imbꞌutz tut e Dios y war aquetpa intera cabꞌijnusiaj taca inteꞌ y taca inteꞌ. Y e Jesús xeꞌ jax Uyunen e Dios war usati tunor camabꞌambꞌanir tacar uchꞌichꞌer.
1JO 1:8 Pero jay caware que matucꞌa e mabꞌambꞌanir tamaron, war camajres cabꞌa non taca y matucꞌa lo que erach tamaron.
1JO 1:9 Pero jay cachecsu tunor camabꞌambꞌanir tut e Dios, erer cacꞌupseyan tamar jaxir xeꞌ erach tuaꞌ usati tunor camabꞌambꞌanir y tuaꞌ uyustes tunor cawirnar.
1JO 1:10 Pero jay caware que ma tiaꞌ ixion cache e mabꞌambꞌanir, war caware tamar era que e Dios war ani amajresian, y chequer que matucꞌa uyojroner e Dios tamaron.
1JO 2:1 Pues entonces nox xeꞌ bꞌanox cocha nimaxtac, nen era war intzꞌijbꞌa tunor era tibꞌa tuaꞌ inata que machi ixto tuaꞌ ibꞌijnu iche e mabꞌambꞌanir. Pero jay ayan tin e axinto uche e mabꞌambꞌanir ayan Cawajcorpesiaj xeꞌ jax e Jesucristo xeꞌ erach xeꞌ erer oꞌjron upater tut Catata Dios tuaꞌ atacarna alocꞌoy tama tunor era.
1JO 2:2 Pues jaxir ixin uyajcꞌu ubꞌa tuaꞌ achamesna tuaꞌ uyubꞌi usati tunor camabꞌambꞌanir. Pero jaxir chamay majax tamaron taca sino que chamay tuaꞌ usati umabꞌambꞌanirobꞌ tunor e inmojr gente tara tor e rum ubꞌan.
1JO 2:3 Pues erer canata que cꞌotoy caquetpa imbꞌutz tut e Dios jay war cacꞌupseyan tut uyojroner iraj iraj.
1JO 2:4 Pero jay ayan tin e oꞌjron y che: “Nen imbꞌutzen tut e Dios”, xeꞌ che inteꞌ, pero jay machi war acꞌupseyan tut uyojroner e Dios chequer que war amajresian y que matucꞌa xeꞌ erach tamar.
1JO 2:5 Pero jay caxin cacꞌupseyan tut tunor uyojroner e Dios war canata que cꞌapa bꞌutcꞌa tunor cawalma taca ucꞌunersiaj e Dios ubꞌan. Y tamar era chequer que war caquetpa intera cabꞌijnusiaj taca e Dios.
1JO 2:6 Entonces tin e war che que intera ubꞌijnusiaj taca e Dios ucꞌani tuaꞌ axana bꞌan cocha cay xana e Jesús conda turuto tara tor e rum.
1JO 2:7 Pues entonces niwermanuox, lo que war catzꞌijbꞌa tibꞌa era majax inteꞌ ojroner xeꞌ ma tiaꞌ cay iyubꞌi, sino que jax taca e ojroner xeꞌ cay iyubꞌi conda cay cꞌupseyanox tama e Cristo. Pues e ojroner era xeꞌ checsuna onix jax lo que iyubꞌix tama ucayesnibꞌir tunor era.
1JO 2:8 Pero imbꞌutz e ojroner lo que war intzꞌijbꞌa tibꞌa era tut e gente tara tor e rum. Y chequer que erach e ojroner era porque e Cristo war uyajta utobꞌ tunor e gente, y tin e war acꞌupseyanobꞌ tamar war uyajta ut ubꞌobꞌ ubꞌan. Y tin e aquetpobꞌ tama e incsibꞌaner war uyubꞌiobꞌ uyojroner e Dios y war uyactobꞌ e mabꞌambꞌanir, y war achecta ujanchꞌaquenar e Dios tamarobꞌ.
1JO 2:9 Pues bꞌajcꞌat ayan inteꞌ xeꞌ oꞌjron y che: “Pero nen war inxana tama e janchꞌaquenar”, xeꞌ che inteꞌ. Pero jay war uxejbꞌe ut uyet ajcꞌupesiajir chequer que turuto tama e incsibꞌaner.
1JO 2:10 Pero tin e war uyajta ut uyet ajcꞌupesiajirobꞌ war axana tama e janchꞌaquenar y matucꞌa war uche tuaꞌ uche acucrema inteꞌ uyet ajcꞌupesiajir tama e mabꞌambꞌanir.
1JO 2:11 Pero tin e war uxejbꞌe ut uyet ajcꞌupesiajir warto axana tama e incsibꞌaner y machi war unata tiaꞌ war axin porque tajpem unacꞌut umen e incsibꞌaner era.
1JO 2:12 Pues war intzꞌijbꞌa tibꞌa nox xeꞌ bꞌanox cocha nimaxtac, porque Cadiosir ixin cꞌumpa tacarox tama tunor imabꞌambꞌanir tuaꞌ acꞌotoy atajttzꞌa ucꞌabꞌa tamarox.
1JO 2:13 Y war intzꞌijbꞌa tibꞌa nox xeꞌ tatabꞌirox umen que war inata chi xeꞌ turu conda ne mato ani achena or e rum. Y war intzꞌijbꞌa tibꞌa nox xeꞌ chꞌom maxtacox umen que cꞌapa icucru tunor ucꞌotorer e diablo. Y war intzꞌijbꞌa tibꞌa nox xeꞌ maxtacox umen que cꞌotoyox inata chi Catata Dios.
1JO 2:14 Y war intzꞌijbꞌa tibꞌa nox xeꞌ tatabꞌirox umen que war inata chi xeꞌ turu conda ne mato ani achena or e rum. Y war intzꞌijbꞌa tibꞌa nox xeꞌ chꞌom maxtacox umen que war ixqꞌuecꞌo, y umen que cꞌapa ichꞌami uyojroner e Dios tama iwalma, y umen que cꞌapa icucru tunor ucꞌotorer e diablo.
1JO 2:15 Y ira icꞌani lo que ucꞌaniobꞌ e gente tara tor e rum xeꞌ mabꞌambꞌan, y ira iyusre ichꞌami lo que ayan tara tor e rum xeꞌ mabꞌambꞌan. Porque jay bꞌan iche, chequer que machi war iyajta ut Catata Dios.
1JO 2:16 Porque machi tari tuaꞌ Catata Dios lo que ayan tara tor e rum xeꞌ mabꞌambꞌan sino que tari tamar taca e mundo. Y lo que ayan tara tor e rum jax era: Lo que uyusre uche uwerir e gente, y lo que uyusre uwira unacꞌut inteꞌ xeꞌ mabꞌambꞌan, y lo que uyusre inteꞌ tuaꞌ utattzꞌi ubꞌa tamar.
1JO 2:17 Pero tunor lo que ayan tara tor e rum y tunor lo que uyusre uche uwerir inteꞌ xeꞌ mabꞌambꞌan cꞌani acꞌapa. Pero tin e uche lo que ucꞌani e Dios machi tuaꞌ acꞌapa.
1JO 2:18 Pues nox xeꞌ bꞌanox cocha nimaxtac, natanic que wix acꞌapa e tiempo era. Porque cay iyubꞌi que cꞌani achecta inteꞌ winic rajxa era xeꞌ war aqꞌuijna meyra upater e Cristo. “Anti-Cristo” ucꞌabꞌa jaxir. Y ayan ubꞌan meyra gente coner xeꞌ war aqꞌuijnobꞌ upater e Cristo. Y tamar era chequer que e tiempo era warix acꞌapa.
1JO 2:19 Pues jaxirobꞌ turobꞌ ani ticajam pero de allí locꞌoy ixiobꞌ porque majax intera ubꞌijnusiajobꞌ tacaron. Porque jay intera ani ubꞌijnusiajobꞌ tacaron machi ani uyactonobꞌ. Pero bꞌan numuy tuaꞌ aquetpa chequer que jaxirobꞌ majax ticabꞌa.
1JO 2:20 Pero nox majax bꞌanox cocha era, porque ichꞌamix Unawalir e Dios y warix inata meyra tamar uyojroner e Dios.
1JO 2:21 Pues war intzꞌijbꞌa tibꞌa tama tunor era majax umen que machi war inata sino que war intzꞌijbꞌa umen que warix inata tama tunor era. Y nox war inata que ma cocha erer alocꞌoy lo que erach tama inteꞌ majresiaj.
1JO 2:22 ¿Y chi ca nic e ajmajresiaj? Pues jax tin e che que e Jesús majax e Cristo, xeꞌ war che que e Jesús machi ani uyubꞌi ucorpeson tama camabꞌambꞌanir. Y e ajmajresiaj jax ubꞌan tin e war aqꞌuijna uwira e Cristo y xeꞌ che que matucꞌa ani ucꞌampibꞌir Catata Dios y xeꞌ che que bꞌan ani e Cristo ubꞌan.
1JO 2:23 Tunor tin e umuqui ucꞌabꞌa Uyunen e Dios machi turu Catata Dios tamar. Y tunor tin e uchecsu que turu Uyunen e Dios tamar turu Catata Dios tamar ubꞌan.
1JO 2:24 Y tamar era cojconic tama iwalma e ojroner lo que cay iyubꞌi conda cay cꞌupseyanox tama e Cristo. Porque jay icojco e ojroner era cꞌani ixquetpa intera taca e Cristo y taca Catata Dios ubꞌan.
1JO 2:25 Y jax era e ojroner lo que Cawinquirar Jesucristo uchecsu ticoit: Que cꞌani uyajcꞌon e cuxtar xeꞌ machi tuaꞌ acꞌapa.
1JO 2:26 Pues war intzꞌijbꞌa tibꞌa era tamar tin e cꞌani ani umajresox.
1JO 2:27 Pues nox cocha ichꞌamix Unawalir e Dios xeꞌ ebꞌetbꞌir tari umen e Jesucristo mix majchi ucꞌani tuaꞌ ucansiox, porque jax Unawalir e Dios xeꞌ axin ucansiox tunor uyojroner e Dios. Y erach tunor ucanseyaj jaxir y machi amajresian. Y tamar era turbꞌanic ibꞌa tuaꞌ ixquetpa intera taca e Cristo bꞌan cocha war ucansiox Unawalir e Dios.
1JO 2:28 Pues entonces nox xeꞌ bꞌanox cocha nimaxtac, quetpenic intera taca e Cristo tuaꞌ machi ixbꞌacta y tuaꞌ machi ixsubꞌajra tut jaxir conda achecta watar otronyajr.
1JO 2:29 Y cocha warix inata que erach e Jesucristo, ucꞌani tuaꞌ inata ubꞌan que tunor tin e axin uche lo que erach, jax umaxtac e Dios ubꞌan.
1JO 3:1 Pues entonces bꞌijnunic cobꞌa uyajta coit Catata Dios que ixin upejcon tuaꞌ caquetpa umaxtac, y bꞌanon. Y tamar era tin e turobꞌ tara tor e rum machi war unatobꞌ cocha turon porque machi war unatobꞌ cocha turu e Dios ubꞌan.
1JO 3:2 Niwermanuox xeꞌ inchoj iut nimener, non umaxtacon e Dios y machito achectesna cocha tuaꞌ caquetpa conda asutpa watar e Cristo. Pero canata que conda achecta e Jesucristo non tuaꞌ caquetpa bꞌan cocha turu jaxir, porque cꞌani cawira uyeroj tacar unaccoit.
1JO 3:3 Y tunor tin e war ucojcobꞌ tuaꞌ acꞌotoy aquetpobꞌ bꞌan cocha e Cristo conda asutpa watar war uyactobꞌ tunor umabꞌambꞌanirobꞌ. Porque e Cristo erach.
1JO 3:4 Pues tunor tin e war uche e mabꞌambꞌanir machi war acꞌupseyan tut uyojroner e Dios. Y jax era lo que war che e ojroner mabꞌambꞌanir: “Tuaꞌ ucꞌocchi uley e Dios.”
1JO 3:5 Y war ixto inata que e Jesucristo tari tara tor e rum tuaꞌ ulocse tunor camabꞌambꞌanir. Y war ixto inata ubꞌan que jaxir matucꞌa nien imbꞌijc e mabꞌambꞌanir tamar.
1JO 3:6 Pues tunor tin e war aquetpa intera taca e Jesucristo machi war axana tama e mabꞌambꞌanir. Pero tunor tin e war axana tama e mabꞌambꞌanir ma tiaꞌ cꞌotoy uwira ut jaxir y nien ma tiaꞌ cꞌotoy unata chi jaxir.
1JO 3:7 Pues nox xeꞌ bꞌanox cocha nimaxtac, ira iwacta ibꞌa tuaꞌ ixmajresna tamar era, porque erach tunor tin e war uche lo que erach, bꞌan cocha erach Cawinquirar.
1JO 3:8 Pero tin e war axana tama e mabꞌambꞌanir war uche lo que ucꞌani e diablo, porque e diablo warix uche e mabꞌambꞌanir tama ucajyesnibꞌir or e rum era. Pero tamar era tari Uyunen e Dios tara tor rum: Tuaꞌ utijres tunor lo que e diablo war uche.
1JO 3:9 Pues entonces tunor tin e cꞌotoy cuxpa otronyajr tama e Dios machi war axana tama e mabꞌambꞌanir porque ayan ucuxtar e Dios tamar. Y tamar era machi ixto uyubꞌi axanobꞌ tama e mabꞌambꞌanir porque quetpobꞌ umaxtacobꞌ e Dios.
1JO 3:10 Y tamar era erer inata chi umaxtac e Dios y chi umaxtac e diablo, porque tunor tin e machi uche lo que erach y nien machi uyajta ut uyet ajcꞌupesiajir, majax tuaꞌ e Dios.
1JO 3:11 Pues jax era e canseyaj lo que cay iyubꞌi tama ucajyesnibꞌir tunor era: Que cayajtic cabꞌa inteꞌ intion.
1JO 3:12 Y machi tuaꞌ caquetpa bꞌan cocha e Caín xeꞌ turuan tama e onian tiempo xeꞌ quetpa intera ubꞌijnusiaj taca e diablo este que ixin uchamse uwijtzꞌin. ¿Y war ca inata tucꞌa tuaꞌ ixin uchamse uwijtzꞌin? Umen que e Caín war uche e mabꞌambꞌanir iraj iraj, pero uwijtzꞌin war uche jax taca lo que erach.
1JO 3:13 Pues entonces niwermanuox, ira iturbꞌa ibꞌa tamar e gente tara tor e rum jay axin uxejbꞌiobꞌ iut.
1JO 3:14 Pues non canata que locꞌoyon tujam tin e satrem y que turon tujam tin e bꞌixirobꞌ tut e Dios porque war cayajta ut cabꞌa taca tunor cawet ajcꞌupesiajir. Pero tin e machi war uyajta ut uyet ajcꞌupesiajir aquetpa chequer que satremto.
1JO 3:15 Tunor tin e war uxejbꞌe ut uyet ajcꞌupesiajir aquetpa bꞌan cocha inteꞌ ajchamseyaj. Y war inata que ma cocha erer aquetpa e cuxtar xeꞌ machi tuaꞌ acꞌapa tamar inteꞌ xeꞌ warto achamsan.
1JO 3:16 Pues chequer ticoit tucꞌa ucꞌunersiaj e Dios tamar lo que cay uche e Jesucristo tamaron, porque jaxir ixin uyajcꞌu ubꞌa tuaꞌ achamesna tamaron. Y non ubꞌan ucꞌani tuaꞌ caturbꞌa cabꞌa tuaꞌ catacre cawermanuobꞌ motor este que caxin cawajcꞌu cabꞌa tuaꞌ cachamesna tamarobꞌ.
1JO 3:17 Y non xeꞌ ayan tucꞌa ayanon tara tor e rum, jay cawira inteꞌ cawermano xeꞌ matucꞌa ayan tacar pero jay matucꞌa cawajcꞌu tuaꞌ catacre, ma cocha erer caware que war cayajta ut e Dios.
1JO 3:18 Pues nox xeꞌ bꞌanox cocha nimaxtac, majax bueno tuaꞌ taca caware que war cayajta ut inteꞌ, sino que ucꞌani tuaꞌ cachectes que erach que war ixto cayajta utobꞌ cawermanuobꞌ tamar lo que war cache tacarobꞌ.
1JO 3:19 Pues bꞌan cocha era erer canata que non umaxtacon e Dios y erer cacꞌotoy cajiri tama cawalma tut jaxir.
1JO 3:20 Porque jay cawalma acay uyareon que majax bueno lo que war cache, Cadiosir xeꞌ más nojta erer utacrion tuaꞌ canata lo que erach, porque jaxir unata tunor.
1JO 3:21 Y tamar era niwermanuox xeꞌ inchoj iut nimener, jay cawalma matucꞌa war uyareon, entonces más axin ajiri cawalma tut e Dios.
1JO 3:22 Y jaxir tuaꞌ axin uyajcꞌon tunor lo que war cacꞌajti tacar, porque war cacꞌupseyan tut uyojroner y war cache bꞌan taca cocha atzay uwiron cache.
1JO 3:23 Y lo que e Dios war uyareon tuaꞌ cache jax era: Tuaꞌ caxin cacꞌupseyan tama Uyunen xeꞌ jax e Jesucristo, y tuaꞌ cayajta ut e hermanuobꞌ inteꞌ intiobꞌ bꞌan cocha uyareon tuaꞌ cache.
1JO 3:24 Y tunor tin e war acꞌupseyanobꞌ tut lo que arobꞌnobꞌ umen e Dios war aturuanobꞌ tama e Dios y e Dios war aturuan tamarobꞌ. Y tamar era erer canata que jaxir war aturuan tamaron porque ixin uyajcꞌon Unawalir.
1JO 4:1 Pues entonces niwermanuox xeꞌ inchoj iut nimener, ira icꞌupse wacchetaca tunor tin e che que tuaꞌ e Dios lo que war oꞌjronobꞌ, sino que bꞌijnunic iwira jay e ojroner era tuaꞌ e Dios o jay majax. Natanic que coner ayan meyra winicobꞌ tara tor e rum xeꞌ war amajresianobꞌ tamar lo que war acanseyanobꞌ y war chenobꞌ que jax uyojroner e Dios tunor era.
1JO 4:2 Y tamar era cꞌani inwareox cocha tuaꞌ inata chi xeꞌ turu Unawalir e Dios tamar. Pues turu Unawalir e Dios tama tunor tin e war acꞌupseyan que e Jesucristo tari tara tor e rum y quetpa bꞌan cocha inteꞌ winic taca ubꞌaquer y taca uwerir.
1JO 4:3 Pero tin e machi ucꞌupse cocha era tama e Jesús machi turu Unawalir e Dios tamar, sino que ayan inteꞌ mabꞌambꞌan mein tamar xeꞌ ucꞌabꞌa: “Anti-Cristo” xeꞌ war aqꞌuijna upater e Jesús. Pues nox cay iyubꞌi que cꞌani achecta watar e mabꞌambꞌan mein era, y coner yix turu tara tor e rum war apatna.
1JO 4:4 Pues entonces nox xeꞌ bꞌanox cocha nimaxtacox, tuoxix e Dios y cꞌapix icucru tunor e ajmajresiajobꞌ cocha era porque Unawalir e Dios xeꞌ turu tacarox más ayan ucꞌotorer que umein e diablo xeꞌ war apatna tama uyalmobꞌ e gente tara tor e rum.
1JO 4:5 Pues e gente era tuobꞌ lo que ayan tara tor e rum y tamar era ojronobꞌ tamar taca lo que ayan tara tor e rum ubꞌan. Y tamar era war oꞌbꞌnobꞌ umen tin e turobꞌ tara tor e rum.
1JO 4:6 Pero non tuon e Dios. Y tin e tuaꞌ e Dios axin uyubꞌi lo que cawareobꞌ tamar uyojroner e Dios. Pero tin e majax tuaꞌ e Dios machi cꞌani uyubꞌi lo que cawareobꞌ tamar uyojroner e Dios. Y tamar era aquetpa chequer tin e turu Unawalir e Dios xeꞌ erach tamar y tin e turu inteꞌ mein xeꞌ ajmajresiaj tamar.
1JO 4:7 Pues entonces niwermanuox xeꞌ inchoj iut nimener, ucꞌani tuaꞌ cayajta ut cabꞌa inteꞌ intion, porque tuaꞌ e Dios tunor tin e war uyajta ut uyet ajcꞌupesiajir. Y tamar era chequer que inteꞌ cocha era jax inteꞌ umaxtac e Dios y jaxir war unata chi e Dios.
1JO 4:8 Pues tin e machi uyajta ut inteꞌ uyet ajcꞌupesiajir ne mato unata chi e Dios, porque e Dios war uyajta ut tunor.
1JO 4:9 Y Cadiosir uchectes ticoit que meyra war uyajta coit conda uyebꞌta tari Uyunen xeꞌ inteꞌ taca ayan tuaꞌ uyubꞌion cachꞌami e cuxtar xeꞌ machi tuaꞌ acꞌapa tamar.
1JO 4:10 Pues ucꞌunersiaj e Dios aquetpa chequer tamar era: Majax que non cay cayajta ut jaxir, sino que jaxir cay uchecsu cobꞌa war uyajta coit conda uyebꞌta tari Uyunen tuaꞌ achamesna tamaron tama ut e cruz tuaꞌ usati tunor camabꞌambꞌanir.
1JO 4:11 Pues entonces niwermanuox xeꞌ inchoj iut nimener, cocha e Dios war uyajta coit meyra cocha era, ¿machi ca tuaꞌ cayajta coit cabꞌa inteꞌ intion ubꞌan?
1JO 4:12 Mato majchi uwira ut e Dios, pero jay war cayajta coit cabꞌa inteꞌ intion, e Dios war aturuan tamaron y ucꞌunersiaj e Dios war aquetpa chequer tamaron iraj iraj.
1JO 4:13 Pues war canata que cꞌapa caturbꞌa cabꞌa tama e Dios y que jaxir turu tamaron umen que jaxir ixin uyajcꞌon Unawalir.
1JO 4:14 Pues non xeꞌ apostolon cawira lo que cay uche e Cristo conda turuto tara tor e rum, y tamar era war cawareox era que Catata Dios uyebꞌta tari Uyunen tuaꞌ aquetpa Ajcorpesiaj tuaꞌ tunor e gente tara tor e rum.
1JO 4:15 Y chic taca tin e uchectes que e Jesús jax Uyunen e Dios, turu Catata Dios tamar y jaxir turu tama Catata Dios.
1JO 4:16 Pues tamar era cꞌotoy canata y cꞌotoy cꞌupseyanon que Cadiosir war uyajta coit, porque Cadiosir incꞌun uwirnar. Y tunor tin e war aturuan incꞌun uwirnar, war aturuan tama e Dios, y e Dios war aturuan tamar jaxir.
1JO 4:17 Y war aquetpa chequer que incꞌun cawirnar y tamar era machi tuaꞌ casubꞌajra tama e día tuaꞌ e juicio, porque bꞌan cocha uwirnar e Cristo y bꞌan cawirnar non ubꞌan tara tor e rum.
1JO 4:18 Pues conda war ixto cayajta ut e Dios matucꞌa casubꞌar tut jaxir. Porque e cꞌunersiaj uyajnes alocꞌoy e subꞌar. Pero tin e war asubꞌajra tut e Dios, war ubꞌacre que watar inteꞌ jatzꞌuar tuaꞌ porque machi war uyajta ut e Dios taca tunor uyalma.
1JO 4:19 Pues war cayajta ut e Dios, porque jaxir cay uyajta coit bꞌajxan.
1JO 4:20 Jay ayan inteꞌ tijam xeꞌ oꞌjron y che: “Pero nen inyajta ut e Dios ubꞌan”, xeꞌ che inteꞌ, pero jay war uxejbꞌe ut uyet ajcꞌupesiajir, chequer que majresiaj taca war uche. Porque jay machi war uyajta ut uyet ajcꞌupesiajir xeꞌ war uwira ut, ma cocha erer uyajta ut e Dios xeꞌ machi war uwira ut.
1JO 4:21 Pues e Jesucristo uyacta inteꞌ ojroner ticoit xeꞌ che: “Tin e uyajta ut e Dios uyajtic ut uyet ajcꞌupesiajir ubꞌan”, che Cawinquirar Jesucristo.
1JO 5:1 Pues tunor tin e war ucꞌupse que e Jesús jax e Cristo jax inteꞌ umaxtac e Dios. Pues tin e axin uyajta ut inteꞌ tatabꞌir tara tor e rum war uyajta utobꞌ tunor umaxtac ubꞌan.
1JO 5:2 Y conda war cayajta ut e Dios y war cacꞌupseyan tut uyojroner, war canata que war cayajta ut umaxtac e Dios ubꞌan.
1JO 5:3 Pues non xeꞌ war cayajta ut e Dios war cacꞌupseyan tut lo que arobꞌnon umener. Y lo que arobꞌnon tuaꞌ cache umener ma imbꞌar ticoit tuaꞌ caqꞌueche axin.
1JO 5:4 Y tunoron xeꞌ cuxpon tama e Dios war caqꞌuecꞌo tama cawalma tuaꞌ cacucru tunor ucꞌotorer e mabꞌambꞌanir. Y lo que war uqꞌuecꞌojsion, jax cacꞌupesiaj tama Cawinquirar Jesucristo.
1JO 5:5 Pues tunor tin e war ucucru ucꞌotorer e mabꞌambꞌanir jax taca tin e war ucꞌupse que e Jesús jax Uyunen e Dios.
1JO 5:6 Pues conda tari e Jesucristo tari taca e jaꞌ y taca e chꞌich. Machi tari tamar taca e jaꞌ sino que taca e chꞌich ubꞌan. Bꞌan war uchecsu ticoit Unawalir e Dios, y Unawalir e Dios era erach tama tunor.
1JO 5:7 Pues ayan uxteꞌ ut era xeꞌ war uchecsuobꞌ tunor era ticoit,
1JO 5:8 Unawalir e Dios y e jaꞌ y e chꞌich. Y bꞌan cocha uchecsu ubꞌa ticoit Unawalir e Dios y bꞌan uchecsu uchꞌichꞌer e Jesucristo y bꞌan e jaꞌ ubꞌan.
1JO 5:9 Pues cachꞌami lo que checsuna umen e winicobꞌ, pero lo que checsunon umen e Dios más atujri. Porque lo que e Dios war uchecsu ticoit era war uyareon tamar Uyunen.
1JO 5:10 Y tin e war acꞌupseyan tama Uyunen e Dios, chectesna tunor era tama uyalma. Pero tin e machi war acꞌupseyan tama e Dios war ani uche aquetpa inteꞌ ajmajresiaj, porque machi war uchꞌami lo que e Dios uchecsu ticoit tamar Uyunen.
1JO 5:11 Y lo que e Dios war uchecsu ticoit jax era: Que jaxir ixin uyajcꞌon e cuxtar xeꞌ machi tuaꞌ acꞌapa, y que e cuxtar era atajwina tamar taca Uyunen.
1JO 5:12 Tin e turu Uyunen e Dios tama uyalma, turu e cuxtar xeꞌ machi tuaꞌ acꞌapa tama uyalma ubꞌan. Pero tin e machi turu Uyunen e Dios tama uyalma, matucꞌa e cuxtar xeꞌ machi tuaꞌ acꞌapa tama uyalma ubꞌan.
1JO 5:13 Pues war intzꞌijbꞌa tunor era tibꞌa xeꞌ war ixcꞌupseyan tama Uyunen e Dios tuaꞌ inata que ayan e cuxtar tamarox xeꞌ machi tuaꞌ acꞌapa.
1JO 5:14 Y non era war canata que tunor lo que war cacꞌajti taca e Dios, jay cacꞌajti bꞌan cocha ucꞌani jaxir, que jaxir war uyubꞌi tunor era.
1JO 5:15 Y cocha war canata que e Dios war uyubꞌi tunor lo que war cacꞌajti tacar cocha era, war canata ubꞌan que cꞌani cachꞌami tunor lo que war cacꞌajti tacar.
1JO 5:16 Y jay ayan inteꞌ tijam xeꞌ uwira inteꞌ uyet ajcꞌupesiajir xeꞌ axin uche inteꞌ mabꞌambꞌanir xeꞌ machi tuaꞌ achamay tamar, ererto icꞌajti taca e Dios tuaꞌ acꞌumpa e Dios taca e ajcꞌupesiaj era. Y e Dios tuaꞌ uyajcꞌu ucuxtar otronyajr. Y bꞌan tuaꞌ icꞌajti tama tunor e ajcꞌupesiajobꞌ xeꞌ axin uche inteꞌ mabꞌambꞌanir xeꞌ machi tuaꞌ achamay inteꞌ tamar. Pero ayan inteꞌ mabꞌambꞌanir xeꞌ axin achamay inteꞌ tamar y machi war inwareox tuaꞌ icꞌajti tamar tin e axin uche cocha era.
1JO 5:17 Pues tunor e mabꞌambꞌanir majax bueno tut e Dios y ayan e mabꞌambꞌanir xeꞌ machi tuaꞌ achamay inteꞌ tamar.
1JO 5:18 Pues canata que tunor tin e quetpobꞌ umaxtacobꞌ e Dios machi ixto war uchiobꞌ e mabꞌambꞌanir, porque Uyunen e Dios war ucojcobꞌ y tamar era machi uyubꞌi tuaꞌ apijchnobꞌ umen e diablo.
1JO 5:19 Y canata que tuon e Dios, y que tunor tin e turobꞌ tara tor e rum war aquetpobꞌ yebꞌar ucꞌotorer e diablo.
1JO 5:20 Y war canata que tari Uyunen e Dios tara tor e rum, y que jaxir ixin uyajcꞌon tuaꞌ cacꞌotoy canata chi e Dios xeꞌ erach. Y tamar era war caturuan tacar jaxir xeꞌ erach xeꞌ jax Uyunen xeꞌ jax e Jesucristo. Jaxir jax e Dios xeꞌ erach y tamar jaxir ayan e cuxtar xeꞌ machi tuaꞌ acꞌapa.
1JO 5:21 Pues nox xeꞌ bꞌanox cocha nimaxtac, ira iwacta ibꞌa tuaꞌ iyujtzꞌi ut e sian chamen dios. Tara acꞌapa tunor niwojroner, che e Juan.
2JO 1:1 Nen xeꞌ Juanen xeꞌ jax inteꞌ anciano tama Cawinquirar war intzꞌijbꞌa e carta era tabꞌa xeꞌ jax inteꞌ ixic xeꞌ sicbꞌabꞌiret umen e Dios. Y war intzꞌijbꞌa tama amaxtac ubꞌan. Pues war inyajta iut tunorox tamar lo que erach, pero majax jax taca nen xeꞌ war inyajta iut sino que bꞌan ubꞌan tunor tin e cꞌotoy unatobꞌ tamar lo que erach.
2JO 1:2 War inyajta iut umen que war ixcꞌupseyan tamar lo que erach bꞌan cocha non, y war inyajta iut ubꞌan umen que war aturuan lo que erach tama cawalma tiaꞌ tuaꞌ aquetpa iraj iraj.
2JO 1:3 Chꞌamic utacarsiaj e Dios taca e cꞌunersiaj y e jiriar tuaꞌ Catata Dios y tuaꞌ Uyunen xeꞌ jax e Jesucristo. Y bꞌan tuaꞌ ichꞌami jay war icojco lo que erach y jay war iyajta ut ibꞌa inteꞌ intiox.
2JO 1:4 Pues cay tzayen meyra conda intajwi cora maxtac tabꞌa xeꞌ war axanobꞌ imbꞌutz tamar lo que erach bꞌan cocha cay uyareon Catata Dios tama uyojroner.
2JO 1:5 Y era hermana xeꞌ war inyajta oit, cꞌani inwaret que ucꞌani tuaꞌ cayajta ut cabꞌa inteꞌ intion. Pues e ojroner era majax inteꞌ ojroner xeꞌ ma tiaꞌ oybꞌi, sino que jax taca e ojroner xeꞌ cay oybꞌi conda cay cꞌupseyanet tama e Cristo.
2JO 1:6 Y conda war cayajta ut cabꞌa inteꞌ intion war cacꞌupseyan tut lo que arobꞌnon umen e Dios. Y jax e ojroner era xeꞌ cay coybꞌi tama ucajyesnibꞌir tunor era que ucꞌani tuaꞌ cayajta ut cabꞌa inteꞌ intion iraj iraj.
2JO 1:7 Pues ucꞌani tuaꞌ inata que ayan meyra ajcanseyajobꞌ xeꞌ ajmajresiajobꞌ xeꞌ war axanobꞌ tara tor e rum coner xeꞌ war acanseyanobꞌ que e Jesucristo machi tari tara tor e rum bꞌan cocha inteꞌ winic. Pero tin e war acanseyan cocha era jax taca inteꞌ ajmajresiaj xeꞌ war aqꞌuijna upater e Jesucristo.
2JO 1:8 Y tamar era cojconic tunor ipatnar lo que cay iche tuaꞌ machi atijrpa, y tuaꞌ uyubꞌiox ichꞌami tunor e tuanibꞌir lo que e Dios tuaꞌ axin uyajcꞌox watar e día.
2JO 1:9 Y iwiric ubꞌan tama tin e war utzꞌacse e canseyaj tamar lo que cay canseyan e Cristo tuaꞌ alocꞌoy más nojta e canseyaj y majax bꞌan cocha arobꞌnon umen e Cristo. Pues tunor tin e war uche cocha era chequer que machi turu Catata Dios tacar. Pero tin e war acanseyan bꞌan taca cocha cay ucansion e Cristo chequer que turu Catata Dios tacar y que turu Uyunen e Dios tacar ubꞌan.
2JO 1:10 Entonces jay ayopa inteꞌ cocha era tuaꞌ uwarajset xeꞌ machi war acanseyan bꞌan cocha ucanseyaj e Cristo, ira iwacta oꞌchoy tama iyotot y ira ixtzay iwira.
2JO 1:11 Porque tin e atzay uwira inteꞌ cocha era war utacre tuaꞌ uche lo que mabꞌambꞌan.
2JO 1:12 Pues ayanto más que cꞌani ani inwareox era, pero machi cꞌani intzꞌijbꞌa tunor era tama e jun era. Pues war incojco tuaꞌ inxin inwarajsiox, y jay bꞌan uyubꞌien inche erer onjron tacarox tiaꞌ turox y tamar era erer catzay meyra.
2JO 1:13 Pues umaxtac awijtzꞌin xeꞌ sicbꞌabꞌirobꞌ umen e Dios ubꞌan uyebꞌtobꞌ axin e cꞌajpesiaj tibꞌa. Tara acꞌapa tunor niwojroner, che e Juan.
3JO 1:1 Nen e Juanen xeꞌ jax inteꞌ anciano tama Cawinquirar war intzꞌijbꞌa e carta era tabꞌa hermano Chayo xeꞌ war inyajta oit tamar lo que erach.
3JO 1:2 Niwermanoet, war incꞌajti taca e Dios que bꞌan cocha war alocꞌoy bueno tunor tama awalma y bꞌan ubꞌan tuaꞌ alocꞌoy bueno tunor lo que ayan tacaret y que bꞌan ubꞌan war iquetpa que matucꞌa e muaquir tamaret.
3JO 1:3 Pues cay umbꞌi tamaret conda yopobꞌ taniut cora ajcꞌupesiajobꞌ tama Cawinquirar. Pues tzayen meyra conda uyarenobꞌ que war ixana imbꞌutz tut lo que erach y que war ituruan bꞌan cocha ucꞌani lo que erach era ubꞌan.
3JO 1:4 Pues ma tiaꞌ inxin intzay más que conda umbꞌi que nimaxtacobꞌ tama e Cristo war axanobꞌ bien tamar lo que erach.
3JO 1:5 Pues niwermanoet xeꞌ inyajta oit, galan tunor lo que war ache tuaꞌ atacre e ajcꞌupesiajobꞌ xeꞌ war axanobꞌ conda acꞌotoyobꞌ toit motor tin e ne mato ani anata chi era.
3JO 1:6 Porque ayan tin e cay uchecsuobꞌ tut e grupo ajcꞌupesiajobꞌ era que galan cay ayajta utobꞌ conda turobꞌ tacaret. Y tamar era quisinic incꞌajti tacaret otronyajr era tuaꞌ isutpa atacre e ajcꞌupesiajobꞌ era otronyajrto tama uxambꞌar bꞌan cocha ucꞌani e Dios.
3JO 1:7 Pues tunor e ajxambꞌarobꞌ era locꞌoyobꞌ tuaꞌ taca uchecsuobꞌ uyojroner e Dios tama ucꞌabꞌa Cawinquirar Jesucristo, y machi war uchꞌamiobꞌ e tacarsiaj tuaꞌ e choquem gente xeꞌ merato acꞌupseyanobꞌ tama Cawinquirar.
3JO 1:8 Y tamar era ucꞌani tuaꞌ catacre tin e war uchecsuobꞌ uyojroner e Dios axin tuaꞌ aquetpa chequer que war cache lo que uyubꞌion tuaꞌ cawira alocꞌoy imbꞌutz tunor upatnar e Dios.
3JO 1:9 Pues inwebꞌta ixin inteꞌ carta tama e grupo ajcꞌupesiajobꞌ xeꞌ turobꞌ majax innajt tiaꞌ turet, pero inteꞌ winic xeꞌ ucꞌabꞌa Diótrefes machi cꞌani ucꞌupse lo que arobꞌna nimener tama e carta cocha jaxir machi uyacta ubꞌa tuaꞌ achena mandar umen otronteꞌ sino que jax taca jaxir xeꞌ uche mandar.
3JO 1:10 Y tamar era jay inyopa tiaꞌ turet cꞌani inwirse tunor e ajcꞌupesiajobꞌ lo que war uche e Diótrefes era. Porque majax bueno tut e Dios lo que war uche que war oꞌjron nipater cocha era. Y majax jax taca era xeꞌ war uche sino que machi cꞌani uchꞌami e ajcꞌupesiajobꞌ conda war axanobꞌ. Pero de allí jay ayan inteꞌ ajcꞌupesiaj xeꞌ cꞌani uchꞌami inteꞌ ajxambꞌar cocha era jaxir axin uquete uwabꞌu tuaꞌ machi uyubꞌi aquetpa tama uyotot e ajcꞌupesiaj era y este ulocse ucꞌabꞌa e ajcꞌupesiaj era tama e lista tuaꞌ e membresía tama e grupo ajcꞌupesiajobꞌ yajaꞌ ubꞌan.
3JO 1:11 Pues entonces niwermanoet xeꞌ inyajta oit, ira ache cocha tin e war uche lo que mabꞌambꞌan, sino que chen lo que erach tut e Dios. Pues tin e war uche lo que erach tuaꞌ e Dios, pero tin e war uche lo que mabꞌambꞌan mato tiaꞌ uwira ut e Dios.
3JO 1:12 Pues e hermano Demetrio xeꞌ war utares e carta era tibꞌa galan uwirnar tut tunor e ajcꞌupesiajobꞌ, y bꞌan turu tut lo que erach ubꞌan. Y cocha anata que nen inware intaca lo que erach, pues erer achꞌami niwojroner era.
3JO 1:13 Pues ayan meyra ojroner xeꞌ cꞌani ani inwaret era, pero machi cꞌani intzꞌijbꞌa tunor tama e jun era.
3JO 1:14 Pues war incojco tuaꞌ incꞌotoy onjron tacaret wacchetaca era.
3JO 1:15 E Dios axin uturbꞌic meyra ujiriar tama awalma. Y tunor tin e atzay uwiret tara uyebꞌta watar e cꞌajpesiaj. Y cꞌajpesic tunor tin e intzay inwira tiaꞌ turet. Tara acꞌapa tunor niwojroner, che e Juan.
JUD 1:1 Nen xeꞌ Judasen jax inteꞌ man tuaꞌ e Jesucristo y ijtzꞌimbꞌiren tuaꞌ e Santiago ubꞌan. Pues war intzꞌijbꞌa e carta era tibꞌa xeꞌ pejcbꞌirox umen Catata Dios xeꞌ war uyajta iut nox xeꞌ cojcbꞌirox umen e Jesucristo.
JUD 1:2 Chꞌamic meyra ucꞌunersiaj e Dios taca ujiriar tama iwalma, y natanic ubꞌan que e Dios meyra war uyajta iut inteꞌ intiox.
JUD 1:3 Pues entonces niwermanuox xeꞌ inchoj iut nimener, ixnix cꞌani ani intzꞌijbꞌa tibꞌa tama e corpesiaj xeꞌ cꞌapix cachꞌami tunoron. Pero majax bꞌan tuaꞌ inche era, sino que cꞌani intzꞌijbꞌa tibꞌa bꞌan cocha e Dios war upejca niwalma tuaꞌ inche. Y tamar era cꞌani inwareox tuaꞌ iturbꞌa ibꞌa tuaꞌ ixqꞌuecꞌo ixturuan tama e cꞌupesiaj lo que ajcꞌunon inteꞌ intion xeꞌ erach cawirnar tut e Dios.
JUD 1:4 Pues ayan tin e war uche ubꞌobꞌ bꞌan cocha inteꞌ ajcꞌupesiaj tuaꞌ taca uyose ubꞌobꞌ tijam, pero intaca war amajresian porque majax ajcꞌupesiajobꞌ. Pues jaxirobꞌ axin uyapruobꞌ utacarsiaj e Dios tacar e mabꞌambꞌanir porque war ucꞌampes utacarsiaj e Dios tuaꞌ uchiobꞌ e mabꞌambꞌanir bꞌan cocha ucꞌaniobꞌ tama uwerir. Pero jaxirobꞌ ajmabꞌambꞌanirobꞌ y war umuquiobꞌ ucꞌabꞌa xeꞌ ajrer taca Ajyum tamaron xeꞌ jax Cawinquirar Jesucristo. Pero chequer tamar lo que chꞌar tzꞌijbꞌabꞌir tama e tiempo ixnix que Cadiosir cꞌani utijres tunor tin e axin uche cocha era.
JUD 1:5 Pues warix inata tunor era pero cꞌani incꞌajpes tibꞌa otronyajr era tamar lo que cay uche Cawinquirar Dios taca e gente tuaꞌ e Israel ixnix. Porque conda loqꞌuesna e gente era tama e lugar Egipto, Cawinquirar Dios ixin ucorpes tunorobꞌ. Pero jax ubꞌan Cawinquirar Dios era xeꞌ ixin utijres tunor tujam e gente era xeꞌ machi war acꞌupseyanobꞌ tamar jaxir.
JUD 1:6 Y bꞌijnunic iwira tamar uyangelobꞌ e Dios ubꞌan, porque tunorobꞌ erobꞌach tut e Dios y inteꞌ intiobꞌ ajcꞌunobꞌ upatnarobꞌ bꞌan cocha ucꞌani e Dios, pero ayan e angelobꞌ xeꞌ ixin uyactobꞌ ulugarobꞌ tuaꞌ axin uchiobꞌ e mabꞌambꞌanir. Y coner macar chꞌarobꞌ y cachbꞌirobꞌ taca e cadena xeꞌ machi tuaꞌ acꞌapa tama e incsibꞌaner, y jax taca war ucojcobꞌ e día tuaꞌ e juicio.
JUD 1:7 Y bꞌijnunic iwira lo que numuy tama e chinam Sodoma y tama e chinam Gomorra y tunor e chinamobꞌ tuyejtzꞌerobꞌ xeꞌ ixin uyose ubꞌobꞌ tama tunor e mabꞌambꞌanir y xeꞌ uchiobꞌ tunor lo que uyusre uche uwerir taca e ixictac y taca e winicobꞌ ubꞌan. Porque ayan tin e turuanobꞌ tacar uyet winiquir y ayan tin e turuanobꞌ tacar uyet ixiquir. Y tamar era e Dios uyebꞌta tari inteꞌ nuxi cꞌajc tut e qꞌuin tama ujorobꞌ tuaꞌ acꞌapa apurutnobꞌ tunorobꞌ inyajrer. Bꞌan numuy tacarobꞌ tuaꞌ aquetpa bꞌan cocha inteꞌ chequerir tut tunor e gente esto coner que bꞌan tuaꞌ unumse ubꞌobꞌ tama inteꞌ cꞌajc xeꞌ machi tuaꞌ acꞌapa tunor tin e axin uche e mabꞌambꞌanir.
JUD 1:8 Y bꞌan cocha era war anumuy tama tin e war umajresox que ajcꞌupesiajobꞌ ubꞌan, porque jaxirobꞌ war uwirobꞌ e mayjut tuaꞌ uchiobꞌ e mabꞌambꞌanir y de allí intaca axin uchiobꞌ lo que war ubꞌijnuobꞌ era este que uchiobꞌ e mabꞌambꞌanir upater ucuerpuobꞌach, y war uxejbꞌiobꞌ ut ucꞌotorer e Dios este que ucꞌayobꞌ tin e ayan utawarer tichan.
JUD 1:9 Pero nien e Miguel xeꞌ jax e bꞌajxan ángel coner machi ucꞌaye e Satanás conda war oꞌjronobꞌ tamar ucuerpo e Moisés conda chamay tuaꞌ uwirobꞌ chi tuaꞌ uchꞌami. Pero e Miguel intaca uyare e Satanás y che: “Cawinquirar Dios ucꞌayiquet”, che e Miguel.
JUD 1:10 Pero e winicobꞌ era axin oꞌjronobꞌ upater tunor lo que machi unatobꞌ. Pero ayan lo que unatobꞌ meyra tamar. Unatobꞌ cocha tuaꞌ uchiobꞌ lo que uyusre uwerir bꞌan taca cocha incojt animal, y tamar era war usati ubꞌobꞌ y war usati uyalmobꞌ ubꞌan.
JUD 1:11 Pues tzajtaca utobꞌ porque cay uchiobꞌ bꞌan cocha uche e Caín que machi cꞌupseyan tut e Dios. Y jaxirobꞌ ixin uyactobꞌ e bꞌir xeꞌ erach upater e tumin bꞌan cocha cay uche e Balaam. Y ixin uchiobꞌ bꞌan cocha e Coré xeꞌ mamajchi ubꞌacre y tamar era chamesna.
JUD 1:12 Y conda iche inteꞌ nojqꞌuin ayan e subꞌar conda achecta inteꞌ winic cocha era cocha calapir aweꞌ y meyra uyuchꞌi. Jaxirobꞌ bꞌanobꞌ cocha inteꞌ ajcojc oveja xeꞌ intaca ucojco ubꞌa. Larobꞌ tacar inteꞌ tojbꞌen tocar xeꞌ intaca acujcha axin umen e icꞌar. Larobꞌ tacar inteꞌ teꞌ xeꞌ machi acꞌawan xeꞌ tawar tuaꞌ ataquijsena inyajrer y tuaꞌ abꞌojca alocꞌoy macuir e rum.
JUD 1:13 Y e winicobꞌ era larobꞌ tacar uyojmar e jaꞌ tama e mar xeꞌ atobꞌoy watar y xeꞌ atobꞌoy axin. Y larobꞌ tacar inteꞌ lucero xeꞌ axin uyacta ulugar tuaꞌ axin tama otronteꞌ lugar tiaꞌ ayan e incsibꞌaner. Pero ayan inteꞌ lugar xeꞌ ustana tiaꞌ calapir e incsibꞌaner tiaꞌ tuaꞌ aquetpobꞌ inyajrer tunor tin e axin uche cocha e winicobꞌ era.
JUD 1:14 Pues ojron tamar era inteꞌ winic tama e onian tiempo xeꞌ ucꞌabꞌa Enoc xeꞌ sitzbꞌir tuaꞌ e Adán tama e siete veces tama utata viejobꞌirobꞌ. Ojron cocha era tama e winicobꞌ xeꞌ uche ubꞌobꞌ que ajcꞌupesiajobꞌ ani y che: “Inwira que tari Cawinquirar taca meyra sian angelobꞌ xeꞌ erobꞌach
JUD 1:15 tuaꞌ uche juzgar tunor e ajmabꞌambꞌanirobꞌ tama tunor e sian mabꞌambꞌanir xeꞌ calapir lo que cay uchiobꞌ y tama tunor e ojroner xeꞌ calapir lo que ojronobꞌ upater e Dios.” Bꞌan chꞌar tzꞌijbꞌabꞌir umen e Enoc.
JUD 1:16 Pues e winicobꞌ era intaca aqꞌuecranobꞌ axin y amurmurtiobꞌ tamar lo que uwirobꞌ. Y axin uchiobꞌ jax taca lo que uyusre uche uwerir. Y axin utattzꞌi ubꞌobꞌ iraj iraj y ojronobꞌ tut otronteꞌ lo que cꞌani uyubꞌi pero tuaꞌ taca uchꞌami lo que ucꞌaniobꞌ tuobꞌ.
JUD 1:17 Pues entonces niwermanuox xeꞌ inchoj iut nimener, cꞌajpesic imener lo que cay ucansiox e apostolobꞌ tuaꞌ Cawinquirar Jesucristo.
JUD 1:18 Porque jaxirobꞌ cay uyareox cocha era y che: “Tama ucꞌapesnibꞌir e tiempo era cꞌani achecta cora winicobꞌ xeꞌ tuaꞌ taca atzeniobꞌ tama tunor lo que erach. Y jaxirobꞌ cꞌani uchiobꞌ intaca lo que uyusre uche uwerirobꞌ.” Bꞌan arobꞌna umen e apostolobꞌ tuaꞌ Cawinquirar Jesucristo.
JUD 1:19 Y e winicobꞌ era xeꞌ war uche ubꞌobꞌ que ajcꞌupesiajobꞌ ani war taca ubꞌijnuobꞌ tuaꞌ uxeriobꞌ e grupo ajcꞌupesiajobꞌ, y war taca ubꞌijnuobꞌ tamar lo que uyusre uche tama uwerir, y matucꞌa Unawalir e Dios tamarobꞌ.
JUD 1:20 Pues entonces niwermanuox xeꞌ inchoj iut nimener, qꞌuecꞌojsenic ibꞌa tama icꞌupesiaj tama Cawinquirar tuaꞌ axin achꞌiꞌ más icuxtar nawalbꞌir. Y cꞌajtinic taca e Dios bꞌan cocha ubꞌijresox Unawalir e Dios.
JUD 1:21 Turbꞌanic ibꞌa tuaꞌ ixquetpa tama ucꞌunersiaj e Dios y cojconic tama Cawinquirar Jesucristo xeꞌ incꞌun uwirnar ticoit y xeꞌ tuaꞌ uyajcꞌon e cuxtar xeꞌ machi tuaꞌ acꞌapa.
JUD 1:22 Y chenic ibꞌa incꞌun iwirnar tut tin e ma chequer tutobꞌ lo que erach.
JUD 1:23 Corpesic tin e satrem turobꞌ bꞌan cocha jay war ani icorpes tin e cꞌaxiobꞌ tama inteꞌ cꞌajc y wacchetaca iquerejbꞌa ilocsiobꞌ. Irsenic ibꞌa que incꞌun iwirnar tut e ajmabꞌambꞌanirobꞌ era, pero iwiric tuaꞌ machi ixcucurna umenerobꞌ, sino que xejbꞌenic ut tunor e mabꞌambꞌanir lo que war uchiobꞌ bꞌan cocha jay inteꞌ winic axin awacarpa tor e rum y acꞌapa ubꞌoni ubꞌa tacar lo que intuj.
JUD 1:24 Intattzꞌi ucꞌabꞌa Nidiosir xeꞌ unata ucojcon tuaꞌ machi cacucrema este que catzay cacꞌotoy caturuan erach tut uturtar Catata Dios tichan tiaꞌ ayan meyra utawarer Cadiosir.
JUD 1:25 Pues ayan inteꞌ taca Catata Dios y jaxir war unata tunor. Y jaxir jax Cawajcorpesiaj. Meyra ayan utawarer. Y jaxir aqꞌuecꞌo y meyra ayan ucꞌotorer, y jaxir jax Cawajcꞌotorer. Bꞌan turu Cadiosir iraj iraj y ejcꞌar ejcꞌar. Y war canata que bꞌan umen que bꞌan irsenon umen Cawinquirar Jesucristo. Tara acꞌapa tunor niwojroner, che e Judas.
REV 1:1 Pues entonces ayan inteꞌ ojroner tamar lo que e Dios cay uwirse e Jesucristo. Y e Jesucristo sutpa uwirse umanobꞌ tamar lo que tuaꞌ anumuy. Y de allí nen xeꞌ Juanen cay inchꞌami tunor e ojroner era tuaꞌ inteꞌ ángel bꞌan cocha cay irsena umen e Jesucristo.
REV 1:2 Y nen war inchecsu tunor e ojroner era bꞌan taca cocha cay inwira y bꞌan taca cocha cay umbꞌi tuaꞌ e Dios y tuaꞌ e Jesucristo.
REV 1:3 Chojbꞌesbꞌir tunor tin e axin uche leer e ojroner era, y tunor tin e uyubꞌi conda war achena leer, y xeꞌ axin acꞌupseyan tut tunor lo que che tamar porque cꞌani anumuy tunor era wacchetaca.
REV 1:4 Pues nen xeꞌ Juanen cꞌani intzꞌijbꞌa inteꞌ ojroner tama e siete grupo ajcꞌupesiajobꞌ xeꞌ turobꞌ tama e departamento Asia. Chꞌamic utacarsiaj y ujiriar Catata Dios xeꞌ turu conda ne mato achena ani or e rum era y xeꞌ turu coner y xeꞌ tuaꞌ aturuan tama ucꞌapesnibꞌir or e rum era ubꞌan. Pues war ichꞌami tunor era tuaꞌ e siete Nawal xeꞌ erach tuaꞌ e Dios xeꞌ turobꞌ tut uturtar Catata Dios,
REV 1:5 y tuaꞌ e Jesucristo xeꞌ jax xeꞌ cay uchecsu ticoit lo que erach tama e Dios. Pues jaxir jax xeꞌ sutpa bꞌixcꞌa inyajrer tujam e chamenobꞌ bꞌajxan, y jaxir ayan ucꞌotorer tujor tunor e reyobꞌ lo que ayan tara tor e rum. Pues jaxir war uyajta coit y jax xeꞌ ixin ucorpeson tama tunor camabꞌambꞌanir tacar uchꞌichꞌer.
REV 1:6 Y jaxir ixin uyajcꞌon ucꞌotorer tuaꞌ caquetpa bꞌan cocha inteꞌ chinam tiaꞌ tuaꞌ acꞌotori jaxir, y jaxir ixin uyajcꞌon ucꞌotorer tuaꞌ caquetpa bꞌan cocha inteꞌ sacerdote tuaꞌ uyubꞌion catattzꞌi ucꞌabꞌa Catata Dios iraj iraj. Catattzꞌic ucꞌabꞌa Cawinquirar Jesucristo porque jaxir axin acꞌotori iraj iraj. Amén.
REV 1:7 ¡Chꞌujcunic iwira! que watar e Cristo otronyajr tama e tocar. Y tunor e sian gente tara tor e rum cꞌani uwirobꞌ ut motor tin e uchamsiobꞌ jaxir ubꞌan. Y tunor e sian chinamobꞌ lo que ayan tara tor e rum cꞌani aruobꞌ conda uwirobꞌ ut. Bꞌan era ya. Amén
REV 1:8 Pues che Cawinquirar Dios: “Nen ucajyesnibꞌiren tama tunor lo que ayan, y nen ucꞌapesnibꞌiren tama tunor lo que ayan ubꞌan. Bꞌanen cocha e letra A xeꞌ jax e bꞌajxan letra tama e abecedario y bꞌanen cocha e letra Y xeꞌ jax ucꞌapesnibꞌir tama e abecedario, che Cawinquirar Dios, y nen ayan meyra nicꞌotorer, y turen conda ne mato achena ani or e rum era, y nen turen coner, y nen tuaꞌ inturuan tama ucꞌapesnibꞌir or e rum era ubꞌan”, che Cawinquirar Dios.
REV 1:9 Pues nen xeꞌ Juanen xeꞌ jax inteꞌ iwet ajcꞌupesiajir war innumse nibꞌa era bꞌan cocha war iche nox, y turen tacarox ubꞌan tama ucꞌabꞌ e Dios xeꞌ war acꞌotori tamaron, y war caquetpa incꞌun cawirnar umen que war catacarna umen e Jesús. Y umen que cay inchecsu uyojroner e Dios ixin y que cay ojronen tamar lo que irsenen umen e Jesús, ebꞌtana tarien tara tama inteꞌ choquem lugar xeꞌ ucꞌabꞌa Patmos xeꞌ jax inteꞌ lugar tiaꞌ ayan e rum xeꞌ aquetpa tuyuxin e jaꞌ.
REV 1:10 Pues tama inteꞌ día tuaꞌ Cawinquirar xeꞌ jax inteꞌ día Domingo war unjtzꞌi ut Cawinquirar y quetpen yebꞌar ucꞌotorer Unawalir e Dios conda cay umbꞌi inteꞌ nuxi nuc xeꞌ bꞌan uyubꞌnar cocha inteꞌ corneta xeꞌ war oꞌjron tanipat.
REV 1:11 Y che e nuc era: —Tzꞌijbꞌan tama inteꞌ jun tunor lo que cꞌani awira era y ebꞌtan chic e jun era tama inteꞌ inteꞌ grupo ajcꞌupesiajobꞌ tama e siete grupo lo que ayan tama e departamento Asia. Entonces ebꞌtan chic inteꞌ jun cocha era tut e grupo ajcꞌupesiajobꞌ xeꞌ turobꞌ tama e chinam Éfeso, y inteꞌ tama e grupo ajcꞌupesiajobꞌ xeꞌ turobꞌ tama e chinam Esmirna, y inteꞌ tama e grupo ajcꞌupesiajobꞌ xeꞌ turobꞌ tama e chinam Pérgamo. Y ebꞌtan chic inteꞌ jun cocha era tama e grupo ajcꞌupesiajobꞌ xeꞌ turobꞌ tama e chinam Tiatira, y inteꞌ tama e grupo ajcꞌupesiajobꞌ xeꞌ turobꞌ tama e chinam Sardis, y inteꞌ tama e grupo ajcꞌupesiajobꞌ xeꞌ turobꞌ tama e chinam Filadelfia, y inteꞌ tama e grupo ajcꞌupesiajobꞌ xeꞌ turobꞌ tama e chinam Laodicea, che e nuc era.
REV 1:12 Entonces sutpen tuaꞌ inwira chi xeꞌ war upejquen era. Y conda inchꞌujcu inwira que ayan siete uturibꞌ cꞌajc xeꞌ war atzꞌajbꞌa xeꞌ chembꞌir taca e oro.
REV 1:13 Y tujam e siete uturibꞌ cꞌajc era checta inteꞌ xeꞌ bꞌan uwirnar cocha Uyunen e winic xeꞌ bꞌujcsebꞌir taca inteꞌ bꞌujc xeꞌ nojta este que acꞌotoy tama unuc uyoc, y cachar inteꞌ cinturón xeꞌ chembꞌir taca e oro yebꞌar ut uchuꞌ.
REV 1:14 Y utzutzer ujor sacsac inyajrer bꞌan cocha utzutzer e oveja o bꞌan cocha uwirnar inteꞌ tocar xeꞌ sacsac. Y uwirnar unacꞌut bꞌan cocha uwarar e cꞌajc.
REV 1:15 Y uyoc chequer ejpray innajt bꞌan cocha e taqꞌuin xeꞌ aloqꞌuesna tama e cꞌajc xeꞌ ucꞌabꞌa bronce. Y uyubꞌnar unuc bꞌan cocha inteꞌ cojn conda achꞌiꞌ xeꞌ war aquiricna ayopa.
REV 1:16 Y tama unojcꞌabꞌ war uqꞌueche siete lucero. Y tama uyej locꞌoy uyac bꞌan cocha inteꞌ machit xeꞌ ayan chateꞌ uyej. Y uyeroj ejpray bꞌan cocha ejpray e qꞌuin tama uyuxin e ajqꞌuin.
REV 1:17 Pero conda inwira ut cucremen tut jaxir bꞌan ani cocha inteꞌ chamen. Pero jaxir uturbꞌa unojcꞌabꞌ tama nijor y che cocha era: —Ira ibꞌacta porque nen ucajyesnibꞌiren tama tunor lo que ayan, y nen ucꞌapesnibꞌiren tama tunor lo que ayan ubꞌan.
REV 1:18 Pues nen bꞌixiren inyajrer, y motor que chamayen pero sutpa bꞌixqꞌuen tujam e chamenobꞌ inyajrer. Y nen ayan nicꞌotorer tuaꞌ inware chi tuaꞌ achamay y chi tuaꞌ asutpa abꞌixcꞌa, y quetpa yebꞌar nicꞌabꞌ tunor e lugar tiaꞌ aquetpobꞌ e chamenobꞌ ubꞌan.
REV 1:19 Tzꞌijbꞌan tunor lo que cay awira y tunor lo que war awira era y tunor lo que cꞌani inchectes toit tamar lo que tuaꞌ watar.
REV 1:20 Cꞌani inchectes toit era lo que war che e siete lucero lo que qꞌuecher nimener tama ninojcꞌabꞌ y lo que war che e siete uturibꞌ cꞌajc xeꞌ chembꞌir taca e oro. Pues e siete lucero era war che tin e aquetpa cocha inteꞌ líder tama inteꞌ inteꞌ grupo ajcꞌupesiajobꞌ. Y e siete uturibꞌ cꞌajc era war che e siete grupo ajcꞌupesiajobꞌ.
REV 2:1 ’Pues tzꞌijbꞌan e carta era tama tin e aquetpa anciano tama e grupo ajcꞌupesiajobꞌ xeꞌ turu tama e chinam Éfeso. Pues bꞌan che tin e uqꞌueche e siete lucero tama unojcꞌabꞌ y xeꞌ war axana tujam e siete uturibꞌ cꞌajc xeꞌ chembꞌir taca e oro y che:
REV 2:2 Nen innata tunor lo que war ache: Que machi war icꞌoy ipatna tama upatnar e Dios y que machi war awacta tuaꞌ ache tunor era, y innata ubꞌan que machi uyubꞌiet awacta bꞌan taca tin e war uche e mabꞌambꞌanir. Y innata que net anata ache uchecsu ubꞌobꞌ tin e war uche ubꞌobꞌ que apostolobꞌ, y que tamar era aquetpa chequer que jax taca cora ajmajresiajobꞌ.
REV 2:3 Y inwira que machi war awacta tuaꞌ ache tunor upatnar e Dios, y que cay anumse abꞌa meyra tama nicꞌabꞌa, y que machi war icꞌoy ache tunor era.
REV 2:4 Pero ayan lo que war ache era que majax imbꞌutz: Que machi ixto war ayajta niut era bꞌan cocha cay ache conda wartocto icꞌupseyan tamaren.
REV 2:5 Y tamar era cꞌajpes amener tiaꞌ locꞌoyet conda cay awacta tuaꞌ ayajta niut y actan era tunor abꞌijnusiaj xeꞌ mabꞌambꞌan y sutpen chen otronyajr lo que cay ache conda wartocto icꞌupseyan tamaren. Pero jay machi ache bꞌan cocha war inwaret era, waten tuaꞌ inlocse acꞌajc lo que warto atzꞌajbꞌa tamaret.
REV 2:6 Pero ayan lo que war ache xeꞌ imbꞌutz taniut: War axejbꞌe ut lo que war uchiobꞌ tin e aꞌrobꞌna nicolaítas xeꞌ war ucansiobꞌ e ajcꞌupesiajobꞌ axin que ererto uchiobꞌ ani e mabꞌambꞌanir. Pues nen ubꞌan war inxejbꞌe ut tunor e canseyaj era.
REV 2:7 Tin e ayan uchiquin uyubꞌic lo que Unawalir e Dios war uyare e siete grupo ajcꞌupesiajobꞌ: Tunor tin e axin uche erach tama ucuxtar, cꞌani aꞌjcꞌuna nimener tuaꞌ umaqꞌuiobꞌ uyutir e teꞌ tuaꞌ e cuxtar xeꞌ machi tuaꞌ acꞌapa lo que ayan tichan tiaꞌ turu Catata Dios. Bꞌan che jaxir xeꞌ ayan e siete lucero tama unojcꞌabꞌ.
REV 2:8 ’Pues tzꞌijbꞌan e carta era tama tin e aquetpa anciano tama e grupo ajcꞌupesiajobꞌ xeꞌ turu tama e chinam Esmirna: Bꞌan che tin e turu conda ne mato achena ani or e rum era y xeꞌ tuaꞌ aturuan tama ucꞌapesnibꞌir or e rum era ubꞌan, jaxir xeꞌ chamesna pero xeꞌ sutpa bꞌixcꞌa tujam e chamenobꞌ.
REV 2:9 Nen innata lo que war anumse abꞌa y que matucꞌa ayan tamaret, pero innata ubꞌan que net meyra ayan tabꞌa tama e Dios. Y innata ubꞌan cobꞌa war oꞌjronobꞌ apater tin e war uche ubꞌobꞌ que tuobꞌ e Israel pero xeꞌ majax sino que jaxirobꞌ aquetpobꞌ tuaꞌ e Satanás porque war uchiobꞌ lo que ucꞌani jaxir.
REV 2:10 Pero ira abꞌacre lo que tuaꞌ anumse abꞌa tama e tiempo xeꞌ watar era, porque ayan tin e tijam xeꞌ axin oꞌsena tama e cárcel umen e diablo tuaꞌ uche ani uyacten. Pero diez día taca tuaꞌ ixquetpa tama e cárcel. Pero ira awacten motor que ayan tin e tijam xeꞌ axin achamesna tamaren, y nen tuaꞌ inwajqꞌuet e cuxtar xeꞌ machi tuaꞌ acꞌapa bꞌan cocha inteꞌ tuanibꞌir.
REV 2:11 Tin e ayan uchiquin uyubꞌic lo que Unawalir e Dios war uyare e siete grupo ajcꞌupesiajobꞌ: Tunor tin e axin uche erach tama ucuxtar machi tuaꞌ unumse ubꞌobꞌ tama otronteꞌ chamer conda acꞌapa achamay. Bꞌan che Unawalir e Dios tama e grupo ajcꞌupesiajobꞌ xeꞌ turobꞌ tama e chinam Esmirna.
REV 2:12 ’Pues tzꞌijbꞌan e carta era tama tin e aquetpa anciano tama e grupo ajcꞌupesiajobꞌ xeꞌ turu tama e chinam Pérgamo: Bꞌan che tin e war uqꞌueche umachit xeꞌ ayan chateꞌ uyej.
REV 2:13 Nen innata que war ituruan tiaꞌ war acꞌotori e Satanás, pero que net machi war awacta tuaꞌ acojco tama nicꞌabꞌa. Y ma tiaꞌ cay awacta tuaꞌ icꞌupseyan tamaren motor que chamesna tijam inteꞌ niman xeꞌ ucꞌabꞌa Antipas. Pues jaxir uturbꞌa ubꞌa tamaren y ma tiaꞌ uyacta tuaꞌ uchecsu niwojroner tut e gente axin este que chamesna tamar. Pues bꞌan achamesna e gente iraj iraj umen e ajmabꞌambꞌanirobꞌ xeꞌ turobꞌ tama e chinam tiaꞌ turet y tiaꞌ turu e Satanás ubꞌan.
REV 2:14 Pero ayan lo que war ache que majax imbꞌutz, porque ayan tin e turobꞌ tama e grupo ajcꞌupesiajobꞌ xeꞌ machi cꞌani uyactobꞌ ucanseyaj e Balaam xeꞌ jax inteꞌ profeta xeꞌ turuan tama e onian tiempo. Porque jaxir cay ucanse e rey Balac tuaꞌ uche acucrema e gente tama e Israel. Y tamar era e Balac cay ucanse e gente yajaꞌ tuaꞌ ucꞌuxiobꞌ lo que turbꞌana tama uyaltar e sian chamen dios, y cay ucanse e gente tuaꞌ uchꞌami ubꞌobꞌ cora cora taca e ixictac y taca e winicobꞌ.
REV 2:15 Y ayan ubꞌan lo que majax imbꞌutz porque ayanto tin e tijam xeꞌ machi ixto war uyactobꞌ e canseyaj tuaꞌ e grupo xeꞌ aꞌrobꞌna nicolaítas.
REV 2:16 Y tamar era cꞌani inwaret tuaꞌ awacta tunor e mabꞌambꞌanir era y sutpen chen lo que ucꞌani e Dios, porque jay machi ache, nen cꞌani incꞌotoy toit wacchetaca tuaꞌ intzꞌoyi upater tin e war uchiobꞌ lo que acansenobꞌ umen e grupo nicolaítas taca nimachit xeꞌ chateꞌ uyej xeꞌ alocꞌoy tama niwej.
REV 2:17 Tin e ayan uchiquin uyubꞌic lo que Unawalir e Dios war uyare e siete grupo ajcꞌupesiajobꞌ: Tunor tin e axin uche erach tama ucuxtar cꞌani inwajcꞌu tuaꞌ ucꞌuxi e maná xeꞌ ojri tari tut e qꞌuin, y cꞌani inwajcꞌu inteꞌ tun xeꞌ sacsac ut xeꞌ ayan inteꞌ ucꞌabꞌa xeꞌ imbꞌutz tzꞌijbꞌabꞌir tamar pero mamajchi unata tucꞌa ucꞌabꞌa era sino que jax taca tin e axin uchꞌami tuaꞌ unata tunor era. Bꞌan che Unawalir e Dios tama e grupo ajcꞌupesiajobꞌ xeꞌ turobꞌ tama e chinam Pérgamo.
REV 2:18 ’Pues tzꞌijbꞌan e carta era tama tin e aquetpa anciano tama e grupo ajcꞌupesiajobꞌ xeꞌ turu tama e chinam Tiatira: Bꞌan che Uyunen e Dios xeꞌ ayan unacꞌut xeꞌ bꞌan uwirnar cocha uwarar e cꞌajc, y unuc uyoc chequer ejpray innajt bꞌan cocha e taqꞌuin xeꞌ aloqꞌuesna tama e cꞌajc xeꞌ ucꞌabꞌa bronce.
REV 2:19 Nen innata tunor lo que war ache: Innata que war ayajta niut, y que war icꞌupseyan tamaren, y que war ipatna tamaren, y que machi war awacta tuaꞌ ache tunor upatnar e Dios. Y innata que war ache más coner que conda wartocto icꞌupseyan tamaren.
REV 2:20 Pero ayan lo que war ache xeꞌ majax imbꞌutz: War awacta oꞌjron e ixic xeꞌ ucꞌabꞌa Jezabel xeꞌ jax inteꞌ ajmabꞌambꞌanir. Jaxir che que war oꞌjron lo que ajcꞌubꞌir umen e Dios, pero majax. Porque jaxir war ucanse e ajcꞌupesiajobꞌ tuaꞌ axiobꞌ taca e ajnajtir ixictac, y war ucansiobꞌ tuaꞌ ucꞌuxiobꞌ lo que turbꞌana tama uyaltar e sian chamen dios.
REV 2:21 Pues nen inwajcꞌuix tiempo tuaꞌ uyacta tunor e mabꞌambꞌanir era y tuaꞌ asutpa tut e Dios, pero jaxir machi cꞌani uyacta umabꞌambꞌanir.
REV 2:22 Y jay machi axin uyacta tunor e mabꞌambꞌanir era, cꞌani inwebꞌta axin inteꞌ muaquir tamar tuaꞌ inche achꞌan tama uchꞌacteꞌ. Y tunor tin uchiobꞌ e mabꞌambꞌanir tacar cꞌani inche unumse ubꞌobꞌ tama e nuxi cꞌuxner xeꞌ watar jay machi axin uyactobꞌ uchenar e mabꞌambꞌanir tuaꞌ e ixic era.
REV 2:23 Y cꞌani inchamse tunor tin e ucꞌupse ucanseyaj e Jezabel era taca inteꞌ muaquir. Y tamar era cꞌani acꞌotoy unatobꞌ tunor e grupo ajcꞌupesiajobꞌ que nen innata tunor lo que ayan tama ujorobꞌ y tunor lo que ayan tama uyalmobꞌ ubꞌan. Pues nen tuaꞌ intoyi uyeror ut tunor tin e war uche lo que imbꞌutz y tunor tin e war uche lo que mabꞌambꞌan.
REV 2:24 Pero ayanox xeꞌ turox tama e chinam Tiatira xeꞌ machi war ichꞌami ucanseyaj e ixic era. Pero ayan tin e war ucꞌupsiobꞌ e ixic era ubꞌan. Y jaxirobꞌ war utattzꞌi ubꞌobꞌ que war unatobꞌ meyra canseyaj xeꞌ intam xeꞌ aquetpa mucur tut e inmojr. Bꞌan ubꞌijnuobꞌ jaxirobꞌ, pero majresiaj tunor era. Porque tunor e canseyaj era tuaꞌ taca e Satanás. Pero matucꞌa más cꞌani inwareox tamar era rajxa era.
REV 2:25 Pero nox cojconic e canseyaj lo que cay ichꞌami tamaren este que insutpa waten otronyajr.
REV 2:26 Tunor tin e axin uche erach tama ucuxtar este que watar ucꞌapesnibꞌir tunor era y xeꞌ uchiobꞌ tunor lo que incꞌani nen, cꞌani inwajcꞌuobꞌ tuaꞌ acꞌotoriobꞌ tujor e sian nuquir chinamobꞌ lo que ayan tara tor e rum.
REV 2:27 Y jaxirobꞌ tuaꞌ aqꞌuecꞌo acꞌotoriobꞌ tujor e gente tara tor e rum bꞌan cocha jay war uqꞌuechiobꞌ inteꞌ bꞌoyteꞌ xeꞌ chembꞌir taca e taqꞌuin tujor e gente. Y e gente tuaꞌ aquetpobꞌ bꞌan cocha uchꞌeir ingojr bꞌejt conda ayojbꞌobꞌ umen e taqꞌuin era. Pues bꞌan cocha ajcꞌunen nicꞌotorer umen Nitata y bꞌan tuaꞌ inwajcꞌu tuaꞌ acꞌotoriobꞌ tujor e gente tin e war uchiobꞌ tunor lo que incꞌani nen.
REV 2:28 Y cꞌani inwajcꞌuobꞌ nitawarer xeꞌ lar tacar e nuxi lucero xeꞌ achecta conda war asacojpa.
REV 2:29 Tin e ayan uchiquin uyubꞌic lo que Unawalir e Dios war uyare e siete grupo ajcꞌupesiajobꞌ. Bꞌan che Unawalir e Dios tama e grupo ajcꞌupesiajobꞌ xeꞌ turobꞌ tama e chinam Tiatira.
REV 3:1 ’Pues tzꞌijbꞌan e carta era tama tin e aquetpa anciano tama e grupo ajcꞌupesiajobꞌ xeꞌ turu tama e chinam Sardis. Bꞌan che tin e ayan e siete Nawal xeꞌ erach tuaꞌ e Dios tamar y xeꞌ ayan e siete lucero tamar ubꞌan y che: Nen innata tunor lo que war ache: Innata que awirnar bꞌan cocha inteꞌ xeꞌ bꞌixir ani pero xeꞌ majax bꞌan, sino que bꞌanet cocha inteꞌ chamen.
REV 3:2 Achpen y pucrun ut e cꞌajc xeꞌ ayanto tama awalma xeꞌ cꞌanix atajpa. Porque nen innata que ma tzꞌacar lo que war ache bꞌan cocha ucꞌani ani e Dios.
REV 3:3 Cꞌajpes amener e canseyaj lo que cay achꞌami tamaren y xanen tamar, y sutpen tut e Dios. Pero jay machi ibꞌixcꞌa, nen inxin waten wacchetaca bꞌan cocha inteꞌ ajxujch, y net machi tuaꞌ anata tucꞌa hora tuaꞌ inyopa.
REV 3:4 Pero ayan ubꞌan cora ajcꞌupesiajobꞌ xeꞌ turobꞌ tijam tama e chinam Sardis xeꞌ ma tiaꞌ ixin ubꞌoni ubꞌobꞌ tama e mabꞌambꞌanir bꞌan cocha jay ixin uxexjres ubꞌujcobꞌ. Pues jaxirobꞌ tuaꞌ axanobꞌ tacaren taca inteꞌ bꞌujc xeꞌ sacsac ut, porque tawar jaxirobꞌ tuaꞌ ulapiobꞌ e bꞌujc era.
REV 3:5 Pues tunor tin e war uche erach tunor tama ucuxtar cꞌani aꞌjcꞌuna e bꞌujc xeꞌ sacsac ut nimener ubꞌan. Y ma tiaꞌ tuaꞌ inlocse ucꞌabꞌobꞌ tama e jun tuaꞌ e cuxtar xeꞌ machi tuaꞌ acꞌapa, sino que nen cꞌani inchecsu ucꞌabꞌobꞌ tut Nitata que tanibꞌa tunorobꞌ. Y bꞌan tuaꞌ inche tut tunor uyangelobꞌ Nitata ubꞌan.
REV 3:6 Tin e ayan uchiquin uyubꞌic lo que Unawalir e Dios war uyare e siete grupo ajcꞌupesiajobꞌ. Bꞌan che Unawalir e Dios tama e grupo ajcꞌupesiajobꞌ xeꞌ turobꞌ tama e chinam Sardis.
REV 3:7 ’Pues tzꞌijbꞌan e carta era tama tin e aquetpa anciano tama e grupo ajcꞌupesiajobꞌ xeꞌ turu tama e chinam Filadelfia: Bꞌan che jaxir xeꞌ erach y xeꞌ matucꞌa e majresiaj tamar y xeꞌ uqꞌueche axin ucꞌotorer e rey David xeꞌ turuan tama e onian tiempo. Pues jaxir ayan ucꞌotorer que conda upasi e puerta tama e cuxtar xeꞌ machi tuaꞌ acꞌapa tut inteꞌ, mamajchi erer umaqui. Y conda jaxir umaqui e puerta era mamajchi tuaꞌ axin upasi.
REV 3:8 Nen innata tunor lo que war ache. Iran era que nen inturbꞌix toit inteꞌ puerta xeꞌ pasar que mamajchi erer umaqui. Y motor que ayan imbꞌijc taca acꞌotorer pero war icꞌupseyan tut niwojroner y machi war amuqui nicꞌabꞌa.
REV 3:9 Pues ayan inteꞌ grupo tiaꞌ turet xeꞌ tuobꞌ e Satanás xeꞌ war utattzꞌi ubꞌobꞌ que tuobꞌ ani e Israel, pero xeꞌ intaca war umajres ubꞌobꞌ. Pero nen cꞌani intzacre axin e gente era tuaꞌ acotuanobꞌ tiut nox tuaꞌ acꞌotoy unatobꞌ que nen war inyajta iut.
REV 3:10 Y cocha acꞌupsix niwojroner tuaꞌ iquetpa tzꞌustaca conda war anumse abꞌa, nen cꞌani incojcuet tuaꞌ machi anumse abꞌa tama e cꞌuxner xeꞌ tuaꞌ axin watar tor e rum era tuaꞌ uche unumse ubꞌobꞌ tunor tin e turobꞌ tara tor e rum.
REV 3:11 Waten wacchetaca, pero cojcon lo que qꞌuecher amener tuaꞌ mamajchi ulocse atuanibꞌir lo que tuaꞌ iꞌxin achꞌami tama e Dios conda icꞌotoy tut e qꞌuin tichan.
REV 3:12 Tunor tin e axin uche erach tunor tama ucuxtar, nen cꞌani inche aquetpobꞌ bꞌan cocha inteꞌ nuxi oy xeꞌ turu macuir uyotot e Dios y ma tiaꞌ tuaꞌ uyactobꞌ e otot era otronyajr. Y cꞌani intzꞌijbꞌa ucꞌabꞌa Nidiosir tamar, y cꞌani intzꞌijbꞌa ucꞌabꞌa uchinam e Dios tamar xeꞌ jax e Jerusalem xeꞌ imbꞌutz xeꞌ tuaꞌ ecmay watar tut e qꞌuin, y cꞌani intzꞌijbꞌa nicꞌabꞌa xeꞌ imbꞌutz tamar ubꞌan.
REV 3:13 Tin e ayan uchiquin uyubꞌic lo que Unawalir e Dios war uyare e siete grupo ajcꞌupesiajobꞌ. Bꞌan che Unawalir e Dios tama e grupo ajcꞌupesiajobꞌ xeꞌ turobꞌ tama e chinam Filadelfia.
REV 3:14 ’Pues tzꞌijbꞌan e carta era tama tin e aquetpa anciano tama e grupo ajcꞌupesiajobꞌ xeꞌ turu tama e chinam Laodicea: Bꞌan che jaxir xeꞌ erach y xeꞌ machi amajresian, y xeꞌ jax e ajcꞌotorer xeꞌ cꞌampesna umen e Dios tuaꞌ uche tunor lo que ayan.
REV 3:15 Nen innata tunor lo que war ache y cꞌani inwaret que laret tacar e cꞌonox siꞌ xeꞌ machi uyari ut e cꞌajc. Intaca atajpa axin. Y bꞌan turet porque machi cꞌani iwacten, pero chequer que machi cꞌani aturbꞌa abꞌa tamaren ubꞌan.
REV 3:16 Pero cocha net bꞌanet cocha e cꞌonox siꞌ xeꞌ machi atzꞌajbꞌa y nien machi apuruy, sino que intaca abꞌutzꞌay axin, cꞌani inxin inchoquiet.
REV 3:17 Pues net war atattzꞌi abꞌa que meyra ayan lo que ayanet y que mix tucꞌa lo que war acꞌani más. Y bꞌan war aware, pero machi war anata lo que e Dios war che apater. Porque tut e Dios tzajtaca awirnar, y matucꞌa ayanet, y tajpem oit, y pispis war ixana.
REV 3:18 Y tamar era cꞌani inwaret tuaꞌ amani tanibꞌa e oro xeꞌ jachesbꞌir tama e cꞌajc tuaꞌ uyubꞌiet iquetpa rico tamaren. Y mana ubꞌan e bꞌujc xeꞌ sacsac ut xeꞌ ayan tanibꞌa xeꞌ bꞌan cocha inteꞌ winic xeꞌ erach tut e Dios tuaꞌ amuqui abꞌa tuaꞌ machi iyerna que pispiset. Y mana inteꞌ remedio xeꞌ ayan tanibꞌa tuaꞌ ayari tama unaqꞌuiut tuaꞌ uyubꞌiet awira lo que ayan tuaꞌ e Dios.
REV 3:19 Tunor tin e war incꞌani inxin impejca tamar lo que war uchiobꞌ xeꞌ majax imbꞌutz, y cꞌani inxin insubꞌajresobꞌ conda war uchiobꞌ e mabꞌambꞌanir tuaꞌ unatobꞌ que majax imbꞌutz lo que war uchiobꞌ era. Turbꞌan abꞌa tama e Dios y actan tunor uchenar e mabꞌambꞌanir.
REV 3:20 Ubꞌin, nen waren tama e puerta war impejcsan, jay ayan tin e uyubꞌi niwojroner y upasi upuerta uyotot nen cꞌani onchoy tuaꞌ inweꞌ tacar y jaxir tuaꞌ aweꞌ tacaren.
REV 3:21 Tunor tin e axin uche erach tama ucuxtar, cꞌani aꞌjcꞌuna nimener tuaꞌ aturuan tacaren tama niturtar, bꞌan cocha nen xeꞌ cꞌapa inche erach tunor tama nicuxtar y de allí ixien tuaꞌ inturuan taca Nitata tama uturtar.
REV 3:22 Tin e ayan uchiquin uyubꞌic lo Unawalir e Dios war uyare e siete grupo ajcꞌupesiajobꞌ. Bꞌan arobꞌnen tuaꞌ intzꞌijbꞌa tama e siete grupo ajcꞌupesiajobꞌ.
REV 4:1 Pues entonces nacpat era sutpa inwira tichan que ayan inteꞌ puerta xeꞌ pasar tut e qꞌuin, y cay umbꞌi inteꞌ nuc xeꞌ jax taca lo que cay umbꞌi bꞌajxan xeꞌ lar uyubꞌnar cocha inteꞌ corneta. Y che e nuc: —Tꞌabꞌen tara, cꞌani inwirset lo que axin anumuy nacpat tunor era, che e nuc era.
REV 4:2 Y wacchetaca quetpen yebꞌar ucꞌotorer Unawalir e Dios, y cay inwira que ayan inteꞌ turtar tut e qꞌuin y que ayan chi xeꞌ turu tamar.
REV 4:3 Y uwirnar xeꞌ turu tama e turtar bꞌan cocha ingojr tun xeꞌ ejpray ut xeꞌ ucꞌabꞌa jaspe xeꞌ sacsac ut o bꞌan uwirnar cocha ingojr tun xeꞌ ejpray ut xeꞌ ucꞌabꞌa carnelina xeꞌ chacchac ut. Y tujor e turtar ayan inteꞌ macchan xeꞌ ejpray ut xeꞌ yaxax uwirnar bꞌan cocha ingojr tun xeꞌ ucꞌabꞌa esmeralda.
REV 4:4 Y inwira que e turtar quetpa xojybꞌir umen veinticuatro turtar, y tamar e veinticuatro turtar era inwira que ayan veinticuatro nuquir winicobꞌ xeꞌ turobꞌ tama inteꞌ inteꞌ uturtarobꞌ. Y bꞌujcsebꞌirobꞌ e nuquir winicobꞌ era taca e sacsac bꞌujc y ayan inteꞌ inteꞌ ucorona tama ujorobꞌ xeꞌ chembꞌir taca e oro.
REV 4:5 Y inwira ajijbꞌi alocꞌoy tama tin e turu tama e turtar xeꞌ turu tuyuxin e veinticuatro turtar era y umbꞌi unuc e Dios xeꞌ bꞌan uyubꞌnar cocha conda aquiricna ut e qꞌuin. Y tut e turtar inwira que ayan siete manojo tꞌixbꞌir tajteꞌ xeꞌ war atzꞌajbꞌa xeꞌ jax e siete Nawal xeꞌ erach tuaꞌ e Dios.
REV 4:6 Y inwira ut e otot tut e turtar era que bꞌan uwirnar cocha e jaꞌ xeꞌ galan ejpray ut. Y inwira ubꞌan que ayan cuatro animalobꞌ xeꞌ bꞌixirobꞌ xeꞌ wawanobꞌ incojt incojt tuyejtzꞌer e turtar era. Y e cuatro animalobꞌ era ayan meyra unacꞌutobꞌ xeꞌ turu tama tunor utobꞌ y xeꞌ turu tama tunor upatobꞌ ubꞌan.
REV 4:7 Y uwirnarobꞌ e cuatro animalobꞌ era jax era: Inteꞌ lar uwirnar cocha inteꞌ león, y inteꞌ lar uwirnar cocha inteꞌ nuxi wacax, y inteꞌ bꞌan uwirnar cocha ut inteꞌ winic, y inteꞌ lar uwirnar cocha incojt oror xeꞌ war atobꞌoy axin.
REV 4:8 Y e cuatro animalobꞌ era ayan tres uwichobꞌ inxejr inxejr uchejchec inteꞌ intiobꞌ, y bꞌutꞌur tunor uwichobꞌ era taca e sian unacꞌut teinxejr teinxejr uwichobꞌ, y ma tiaꞌ uyactobꞌ tuaꞌ oꞌjronobꞌ cocha era nien tama e día y nien acbꞌar y chenobꞌ: Erachet, erachet, erachet, Cawinquirar Dios xeꞌ nojta acꞌotorer tama tunor, porque jax taca net xeꞌ turet conda ne mato achena ani or e rum era y xeꞌ turet coner y xeꞌ tuaꞌ ituruan tama ucꞌapesnibꞌir or e rum era ubꞌan, xeꞌ war oꞌjronobꞌ e cuatro animalobꞌ era.
REV 4:9 Y inyajr inyajr conda e animalobꞌ era acay utattzꞌiobꞌ ucꞌabꞌa Catata Dios otronyajr que meyra ayan utawarer y que tawar tuaꞌ uchꞌami meyra tattzꞌarsiaj y uyajcꞌuobꞌ gracias jaxir xeꞌ turu tama uturtar y xeꞌ turu iraj iraj,
REV 4:10 entonces e veinticuatro nuquir winicobꞌ era acay apacwanobꞌ tut e rum tuaꞌ uyujtzꞌiobꞌ ut jaxir xeꞌ turu iraj iraj, y axin uturbꞌobꞌ ucoronobꞌ inteꞌ intiobꞌ tut uturtar Catata Dios y chenobꞌ:
REV 4:11 Net Cawinquiraret, y net Cadiosiret, tawaret tuaꞌ achꞌami tunor e tawarer y tuaꞌ achꞌami tunor e tattzꞌarsiaj y tuaꞌ achꞌami tunor e cꞌotorer, porque net cꞌapa ache tunor lo que ayan, y chena amener tunor era bꞌan taca cocha acꞌani net, y tunor era quetbꞌir amener ubꞌan. Bꞌan che e veinticuatro nuquir winicobꞌ.
REV 5:1 Entonces inwira que ayan inteꞌ jun xeꞌ tzꞌotbꞌir tama unojcꞌabꞌ tin e turu tama e turtar. Y e jun era tzꞌijbꞌabꞌir tama inxejr inxejr y cachar siete veces taca siete ut sello tama utiꞌ e jun era tiaꞌ atzꞌojta imbꞌijc imbꞌijc axin.
REV 5:2 Y nacpat era inwira que ayan inteꞌ ángel xeꞌ meyra ucꞌotorer xeꞌ war aꞌru taca inteꞌ nuxi nuc y che: —¿Chi tawar tuaꞌ uwechꞌe e jun era y tuaꞌ uwejru uselloir? che e ángel.
REV 5:3 Pero mamajchi tajwina nien tut e qꞌuin y nien tama or e rum y nien yebꞌar or e rum xeꞌ tawar tuaꞌ uwechꞌe e jun era y nien tuaꞌ uwira ut lo que ayan tamar.
REV 5:4 Y tamar era nen cay aruen meyra porque mamajchi tajwina xeꞌ tawar tuaꞌ uwechꞌe e jun era y nien tuaꞌ uwira ut.
REV 5:5 Entonces inteꞌ tujam e veinticuatro nuquir winicobꞌ cay uyaren y che: —Irix iyaru. Porque ayan inteꞌ xeꞌ tawar tuaꞌ uwechꞌe e jun era y tuaꞌ ulocse e siete sello lo que ayan tamar. Porque jaxir bꞌan cocha inteꞌ león xeꞌ locꞌoy tama uchꞌajnarir e Judá xeꞌ jax inteꞌ utata viejobꞌir tuaꞌ e gente xeꞌ tuobꞌ e Israel, y jaxir jax inteꞌ sitzbꞌir tuaꞌ e rey David xeꞌ turuan tama e onian tiempo, y jaxir ucucruix tunor ucꞌotorer e Satanás. Jaxir tawar tuaꞌ uwechꞌe e jun era y tuaꞌ uwejru uselloir, che e nuquir winic era.
REV 5:6 Y tamar era inwira ut Niwinquirar xeꞌ bꞌan uwirnar cocha inteꞌ Cordero xeꞌ chequer que chamesna ani. Pues jaxir war awawan tut e turtar xeꞌ turu tuyuxin e cuatro animalobꞌ xeꞌ bꞌixirobꞌ y xeꞌ turu tuyuxin e veinticuatro nuquir winicobꞌ. Y ayan siete ut ucacho tama ujor y ayan siete unacꞌut tamar xeꞌ quetpa bꞌan cocha e siete Nawal xeꞌ erach tuaꞌ e Dios xeꞌ ebꞌetbꞌir ixin tama tunor or e rum.
REV 5:7 Entonces ixin e Cordero y uchꞌami e jun xeꞌ qꞌuechbꞌir tama unojcꞌabꞌ tin e turu tama e turtar.
REV 5:8 Y conda uchꞌami e jun e cuatro animalobꞌ xeꞌ bꞌixirobꞌ y e veinticuatro nuquir winicobꞌ pacwanobꞌ tut jaxir. Y inteꞌ intiobꞌ tama e veinticuatruobꞌ era ayan uyinstrumentuobꞌ tuaꞌ alajbꞌobꞌ tamar xeꞌ ucꞌabꞌa arpa, y inteꞌ intiobꞌ ayan inteꞌ inteꞌ uchꞌeuobꞌ xeꞌ chembꞌir taca e oro. Y bꞌutꞌur tunor uchꞌeuobꞌ era taca e ujtzꞌubꞌ xeꞌ war apurutna xeꞌ lar cocha ucꞌatmayajobꞌ tin e tuobꞌ e Dios.
REV 5:9 Entonces cay ucꞌaywijresobꞌ inteꞌ cꞌay xeꞌ imbꞌutz y che: Net tawaret tuaꞌ achꞌami e jun era y tuaꞌ awejru uselloir, porque net chamesnet tuaꞌ acorpeson, y amanion taca achꞌichꞌer tuaꞌ uyubꞌion caquetpa umaxtac e Dios non xeꞌ turon tama tunor or e rum xeꞌ tarion tama tunor e sian chꞌajnarir, y xeꞌ tarion tama tunor e ojroner lo que ayan tara tor e rum, y xeꞌ tarion tama tunor e sian chinamobꞌ lo que ayan tara tor e rum ubꞌan.
REV 5:10 Y net achion caquetpa inteꞌ chinam y achion caquetpa sacerdote tuaꞌ Cadiosir y net achion cacꞌotori tama tunor or e rum, che e veinticuatro nuquir winicobꞌ.
REV 5:11 Y nacpat era inwira meyra sian angelobꞌ y umbꞌi unucobꞌ. Y tin e turu tama e turtar y e cuatro animalobꞌ xeꞌ bꞌixirobꞌ y e nuquir winicobꞌ quetpobꞌ xojybꞌirobꞌ umen e sian angelobꞌ era. Y ayan meyra sian angelobꞌ era este que inwira que ayan millones de millones.
REV 5:12 Y ojronobꞌ e angelobꞌ era taca inteꞌ nuxi nuc y chenobꞌ: E Cordero era xeꞌ chamesna tawar tuaꞌ uchꞌami tunor e cꞌotorer y tunor e riqueza y tunor e natanyaj y tunor e qꞌuecꞌojsiaj y tunor e honra y tunor e tawarer y tunor e tattzꞌarsiaj, che e sian angelobꞌ era.
REV 5:13 Y umbꞌi ubꞌan unuc tunor lo que chembꞌir umen e Dios. Umbꞌi unuc tunor lo que ayan tut e qꞌuin, y tunor lo que ayan tor e rum, y tunor lo que ayan yebꞌar or e rum, y tunor lo que ayan tama e jaꞌ. Y ojronobꞌ tunor era lo que chembꞌir umen e Dios y chenobꞌ: Catattzꞌi ucꞌabꞌa Catata Dios xeꞌ turu tama uturtar y Cawinquirar xeꞌ bꞌan cocha inteꞌ Cordero. Y cawajcꞌox tunor e tattzꞌarsiaj y tunor e honor y tunor e tawarer y tunor e cꞌotorer iraj iraj ejcꞌar ejcꞌar, che tunor lo que chembꞌir umen e Dios.
REV 5:14 Y e cuatro animalobꞌ xeꞌ bꞌixirobꞌ chenobꞌ: —¡Bꞌan ucꞌani yaꞌ! chenobꞌ. Y e veinticuatro nuquir winicobꞌ pacwanobꞌ tut e turtar y cay uyujtzꞌiobꞌ ut jaxir xeꞌ turu iraj iraj.
REV 6:1 Entonces inwira e Cordero conda cay uwechꞌe inteꞌ sello xeꞌ jax xeꞌ bꞌajxan tama e siete sello era. Y umbꞌi ojron unuc inteꞌ tujam e cuatro animalobꞌ xeꞌ bꞌixirobꞌ, y unuc era bꞌan uyubꞌnar bꞌan cocha conda aquiricna ut e qꞌuin y che: —Lar, che inteꞌ animal xeꞌ bꞌixir.
REV 6:2 Y tamar era inchꞌujcu inwira que ayan inteꞌ chij xeꞌ sacsac ut, y tin e turu tamar war uqꞌueche axin inteꞌ chꞌantꞌin tama ucꞌabꞌ. Y jaxir ajcꞌuna inteꞌ corona y locꞌoy tuaꞌ aquetpa inteꞌ ajcucursiaj xeꞌ tuaꞌ acucursan.
REV 6:3 Y conda e Cordero cay uwechꞌe otronteꞌ sello umbꞌi unuc otronteꞌ tujam e cuatro animalobꞌ xeꞌ bꞌixirobꞌ xeꞌ che cocha era: —Lar, che inteꞌ animal xeꞌ bꞌixir.
REV 6:4 Y tamar era inwira locꞌoy inteꞌ chij xeꞌ chacchac ut, y tin e turu tamar ajcꞌuna e cꞌotorer tuaꞌ ulocse e jiriar tujam e gente tara tor e rum, y tuaꞌ uche que e winicobꞌ axin uchamse ubꞌobꞌ. Y jaxir ajcꞌuna inteꞌ nuxi machit ubꞌan.
REV 6:5 Y conda e Cordero cay uwechꞌe otronteꞌ sello umbꞌi unuc otronteꞌ tujam e cuatro animalobꞌ xeꞌ bꞌixirobꞌ. Y che jaxir: —Lar, che inteꞌ animal xeꞌ bꞌixir. Y inwira locꞌoy inteꞌ chij xeꞌ negro ut. Y tin e turu tamar ayan inteꞌ bꞌijsibꞌ qꞌuecher umener.
REV 6:6 Y umbꞌi unuc otronteꞌ tujam e cuatro animalobꞌ xeꞌ bꞌixirobꞌ xeꞌ che cocha era: —Watar inteꞌ nuxi verano tama tunor or e rum conda tuaꞌ aquetpa imbꞌijc taca lo que ayan tuaꞌ acꞌujxa umen e gente, este que inteꞌ libra trigo axin atujri lo que atojya inteꞌ man conda apatna tama inteꞌ día. Y amantzꞌa uxteꞌ libra cebada tamar lo que atojya inteꞌ man conda apatna tama inteꞌ día. Pero ira isati e aceite y nien e vino, che inteꞌ animal xeꞌ bꞌixir.
REV 6:7 Y conda e Cordero uwechꞌe otronteꞌ sello umbꞌi unuc otronteꞌ tujam e cuatro animalobꞌ xeꞌ bꞌixirobꞌ xeꞌ che: —Lar, che inteꞌ animal xeꞌ bꞌixir.
REV 6:8 Y inwira locꞌoy inteꞌ chij xeꞌ sacbꞌiren ut, y tin e turu tamar Chamer ucꞌabꞌa y tupat jaxir turu otronteꞌ xeꞌ ajyum tama e lugar tiaꞌ axin e chamenobꞌ. Y ajcꞌunobꞌ e cꞌotorer tuaꞌ axin uchamsiobꞌ inteꞌ gente tiaꞌ ayan cuatro tama tunor or e rum. Y jaxirobꞌ tuaꞌ uchamsiobꞌ e gente taca e winar, y taca e tzꞌojyir, y taca e muaquir, y taca tunor e animalobꞌ xeꞌ uchamse e gente.
REV 6:9 Y conda e Cordero uwechꞌe otronteꞌ sello inwira yebꞌar e altar tiaꞌ e gente ucꞌajti taca e Dios que ayan meyra sian alma tuaꞌ tin e chamesbꞌir umen que cꞌupseyanobꞌ tama uyojroner e Dios y umen que cay uchecsuobꞌ tunor era ixin.
REV 6:10 Y ojronobꞌ e sian alma era taca inteꞌ nuxi nuc y chenobꞌ: —Cawinquiraret xeꞌ meyra ayan acꞌotorer, y net erach awirnar inyajrer y net acꞌapa ache tunor lo que aware. ¿Tucꞌa nic día tuaꞌ iꞌxin ache juzgar e gente tor e rum xeꞌ cꞌapa uchamsionobꞌ? ¿Y tucꞌa nic tiempo tuaꞌ iꞌxin awatzꞌiobꞌ? che e sian alma xeꞌ turobꞌ yebꞌar e altar era.
REV 6:11 Entonces ajcꞌunobꞌ e bꞌujc xeꞌ sacsac y arobꞌnobꞌ que ucꞌanto tuaꞌ ucojcobꞌ otro imbꞌijc era este que axin achamesnobꞌ tunor tin e aquetpato tuaꞌ achamesnobꞌ tujam e ajcꞌupesiajobꞌ xeꞌ turobꞌto tor e rum bꞌan cocha tin e chamesnobꞌ bꞌajxan.
REV 6:12 Y conda e Cordero uwechꞌe otronteꞌ sello numuy inteꞌ nuxi yujcbꞌar y e qꞌuin sutpa incsibꞌan ut bꞌan cocha ubꞌutzꞌar e tajteꞌ. Y e luna wacchetaca sutpa uwirnar cocha e chꞌich.
REV 6:13 Y e sian lucero tut e qꞌuin cꞌapa jotzpa ojriobꞌ tor e rum bꞌan cocha uyutir inteꞌ uterar higo conda ayujcna umen inteꞌ nuxi icꞌar que wacchetaca acꞌapa oꞌjri watar tut e rum.
REV 6:14 Y tunor lo que cawira tut e qꞌuin cꞌapa tijresna bꞌan cocha inteꞌ jun conda atzꞌotpa axin. Y tunor e sian or witzirobꞌ qꞌuitzpa ixiobꞌ tama otronteꞌ lugar, y bꞌan ubꞌan tunor e parte tiaꞌ ayan e rum xeꞌ aquetpa tuyuxin e jaꞌ qꞌuitzpa ixiobꞌ tama inteꞌ inteꞌ lugar ubꞌan.
REV 6:15 Y tunor tin e rey tara tor e rum cꞌani axiobꞌ umucres ubꞌobꞌ macuir inteꞌ chꞌen tiaꞌ ayan e sian nuquir tun, y bꞌan ubꞌan tunor tin e nuquir winicobꞌ, y tunor tin e ajcꞌotorerobꞌ tujor e soldadobꞌ, y tunor tin e ayan utumin, y tunor tin e ayan ucꞌotorer, y tunor tin e ayan uwinquir, y tunor tin e matucꞌa uwinquir, tunorobꞌ tuaꞌ axiobꞌ umucres ubꞌobꞌ inteꞌ intiobꞌ tama inteꞌ inteꞌ chꞌen.
REV 6:16 Y tunorobꞌ cꞌani uyareobꞌ or e witzir y ut e sian nuquir tun y chenobꞌ: —Ojrien cꞌaxien ticajor tuaꞌ amaquion tuaꞌ machi querna umen e Dios xeꞌ turu tor uturtar, y tuaꞌ machi canumse cabꞌa más tama tunor uqꞌuijnar e Cordero, che tunor e gente era watar e día.
REV 6:17 Porque yopix e día conda tuaꞌ watar e nuxi qꞌuijnar tuaꞌ e Dios tujor tunor xeꞌ turobꞌ tara tor e rum. ¿Y chi tuaꞌ awawan tut tunor era?
REV 7:1 Pues entonces nacpat era inwira que ayan cuatro angelobꞌ xeꞌ warobꞌ tama inxejr inxejr tama e cuatro lado lo que ayan tor e rum era. Y war uquete uwabꞌuobꞌ e icꞌar tuaꞌ machi aꞌtzꞌo tama inxejr y nien tama inxejr or e rum era. Y war uquete uwabꞌuobꞌ e icꞌar tuaꞌ machi aꞌtzꞌo or e rum y nien e jaꞌ y nien e sian teꞌ.
REV 7:2 Y de allí inwira que ayan otronteꞌ ángel xeꞌ war watar tama e lugar tiaꞌ atobꞌoy watar e qꞌuin. Y jaxir war uqꞌueche axin inteꞌ sello lo que tuaꞌ ucꞌampes tuaꞌ uturbꞌa useñair e Dios xeꞌ bꞌixir tamar tin e tuaꞌ jaxir. Y entonces ojron e ángel era taca inteꞌ nuxi nuc y uyare e cuatro angelobꞌ xeꞌ ajcꞌunobꞌ ucꞌotorer e Dios tuaꞌ aꞌtzꞌo tunor or e rum y tunor e jaꞌ
REV 7:3 y che: —Machito tuaꞌ iwatzꞌi or e rum, y nien e jaꞌ y nien e sian teobꞌ. Ira iche tunor era este que acꞌapa caturbꞌa useñair e Dios tama ut ujor tunor tin e umanobꞌ e Dios, che e ángel era.
REV 7:4 Y tamar era cay umbꞌi jaytiobꞌ xeꞌ turbꞌana useñair e Dios tamarobꞌ, y ayanobꞌ 144,000 gente. Y tunorobꞌ tuobꞌ e doce chꞌajnarir lo que ayan tuaꞌ e gente tuaꞌ e Israel.
REV 7:5 Y turbꞌana useñair e Dios tama 12,000 gente xeꞌ tuobꞌ uchꞌajnarir e Judá xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e Rubén xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e Gad xeꞌ turuan tama e onian tiempo.
REV 7:6 Y turbꞌana useñair e Dios tama 12,000 gente xeꞌ tuobꞌ uchꞌajnarir e Aser xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e Neftalí xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e Manasés xeꞌ turuan tama e onian tiempo.
REV 7:7 Y turbꞌana useñair e Dios tama 12,000 gente xeꞌ tuobꞌ uchꞌajnarir e Simeón xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e Leví xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e Isacar xeꞌ turuan tama e onian tiempo.
REV 7:8 Y turbꞌana useñair e Dios tama 12,000 gente xeꞌ tuobꞌ uchꞌajnarir e Zabulón xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e José xeꞌ turuan tama e onian tiempo, y turbꞌana useñair e Dios tama 12,000 gente xeꞌ tuobꞌ uchꞌajnarir e Benjamín xeꞌ turuan tama e onian tiempo.
REV 7:9 Pues nacpat era inwira que ayan meyra sian gente xeꞌ warobꞌ tut jaxir xeꞌ turu tama e turtar y tut Cawinquirar xeꞌ jax e Cordero. Pues tunor e sian gente era tariobꞌ tama tunor or e rum tama inteꞌ inteꞌ chꞌajnarir y tama inteꞌ inteꞌ chinam y tama inteꞌ inteꞌ ojroner tiaꞌ chꞌiobꞌ. Y ayan meyra sian gente este que mamajchi uyubꞌi utziqui. Y sacsac tunor ubꞌujcobꞌ, y tunorobꞌ qꞌuecher inteꞌ uyopor xan tama ucꞌabꞌobꞌ.
REV 7:10 Y tunorobꞌ cay aruobꞌ taca inteꞌ nuxi nuc y chenobꞌ: Jax taca Cadiosir xeꞌ turu tama e turtar y jax taca Cawinquirar xeꞌ jax e Cordero xeꞌ ixin uyajcꞌon cacorpesiaj. Bꞌan aruobꞌ tunor e sian gente era.
REV 7:11 Entonces wawanobꞌ tunor e sian angelobꞌ. Y tin e turu tama e turtar y e nuquir winicobꞌ y e cuatro animalobꞌ xeꞌ bꞌixirobꞌ quetpa xojybꞌirobꞌ umen e angelobꞌ era. Y uyacta ubꞌobꞌ pacwanobꞌ tut e rum tuaꞌ uyujtzꞌiobꞌ ut e Dios.
REV 7:12 Y chenobꞌ: Bꞌan ya Cadiosiret, catattzꞌi acꞌabꞌa que meyra ayan atawarer y que meyra anatanyaj, y cawajqꞌuet gracias tama tunor era. Y catattzꞌiet que meyra ayan awonra, y que meyra ayan acꞌotorer y que meyra ayan aqꞌuecꞌojsiaj. Y bꞌan cocha era cꞌani catattzꞌi acꞌabꞌa iraj iraj ejcꞌar ejcꞌar. Amén, che e sian angelobꞌ era.
REV 7:13 Entonces inteꞌ tujam e nuquir winicobꞌ uyubꞌi tanibꞌa y che: —¿Anata ca chiobꞌ era xeꞌ sacsac ubꞌujcobꞌ? ¿Y anata ca tiaꞌ tariobꞌ? che uyaren e nuquir winic era.
REV 7:14 Y nen inware: —Pues nen matucꞌa innata tamar era. ¿Erer ca ani awaren? inware nen. Y jaxir che: —Pues jaxirobꞌ jax xeꞌ locꞌoyobꞌ tama e nuxi cꞌuxner lo que war anumuy tama tunor or e rum era. Y tunorobꞌ ixin upoquiobꞌ ubꞌujcobꞌ tama uchꞌichꞌer e Cordero y tamar era tunorobꞌ quetpobꞌ erach.
REV 7:15 Y tamar era war aquetpobꞌ tut e turtar tiaꞌ machi war uyactobꞌ tuaꞌ utattzꞌiobꞌ ucꞌabꞌa e Dios tama e día y acbꞌar tama utemplo era. Y jaxirobꞌ war acojcnobꞌ iraj iraj umen jaxir xeꞌ turu tama e turtar.
REV 7:16 Y machi ixto tuaꞌ aytzobꞌ más, y machi ixto tuaꞌ ataqui utiobꞌ, y mamajchi tujamobꞌ tuaꞌ apurutna otronyajr umen e qꞌuin y nien machi ixto tuaꞌ unumse ubꞌobꞌ más umen lo que inqꞌuin ut.
REV 7:17 Y e Cordero xeꞌ jax Cawinquirar xeꞌ turu tut e turtar tuaꞌ axin ucojcobꞌ bꞌan cocha acojcna e oveja, y jaxir tuaꞌ uqꞌuechiobꞌ axin tut inteꞌ unuc e cojn tiaꞌ más insis e jaꞌ tuaꞌ uyuchꞌiobꞌ. Y e jaꞌ era jax xeꞌ uyajcꞌu e cuxtar xeꞌ machi tuaꞌ acꞌapa. Y e Dios tuaꞌ utaquijse tunor e jaꞌ xeꞌ alocꞌoy tama unacꞌutobꞌ, che uyaren inteꞌ tujam e nuquir winicobꞌ era.
REV 8:1 Pues entonces conda e Cordero uwechꞌe otronteꞌ sello xeꞌ quetpa este ucꞌapesnibꞌir e siete sello era tunor ut e qꞌuin quetpa tzꞌustaca tama inteꞌ media hora.
REV 8:2 Y nacpat era inwira que warobꞌ siete angelobꞌ tut e Dios. Y inteꞌ intiobꞌ ajcꞌunobꞌ inteꞌ inteꞌ ucornetobꞌ.
REV 8:3 Entonces checta otronteꞌ ángel xeꞌ war uqꞌueche axin inteꞌ resensario xeꞌ chembꞌir taca e oro. Entonces achpa wawan tut e altar xeꞌ chembꞌir taca e oro xeꞌ war tut e turtar. Y jaxir ajcꞌuna meyra ujtzꞌubꞌ tuaꞌ uputa tut e altar tuaꞌ atꞌabꞌay axin e bꞌutz era taca ucꞌajtmayaj tin e tuobꞌ e Dios.
REV 8:4 Y ubꞌutzꞌar e ujtzꞌubꞌ era xeꞌ qꞌuecher tama ucꞌabꞌ e ángel tꞌabꞌay ixin tichan tut e Dios taca ucꞌajtmayajobꞌ tin e acꞌupseyanobꞌ tama e Dios.
REV 8:5 Entonces e ángel ixin ubꞌutꞌi uresensario taca ut e cꞌajc lo que ayan tama e altar, y utobꞌse ixin tor e rum, y tamar era checta inteꞌ nuxi quiricnar tut e qꞌuin, y cay irna que jijbꞌi ut e qꞌuin, y numuy inteꞌ nuxi yujcbꞌar.
REV 8:6 Entonces e siete angelobꞌ xeꞌ ajcꞌunobꞌ inteꞌ inteꞌ ucornetobꞌ achpa wawanobꞌ tuaꞌ aquetpobꞌ turix tuaꞌ alajbꞌobꞌ tamar.
REV 8:7 Y conda e bꞌajxan ángel cay lajbꞌa tama ucorneta tobꞌesna cꞌaxi e sian bꞌat tor e rum, y tobꞌesna cꞌaxi e cꞌajc yabꞌarbꞌir taca e chꞌich tor e rum ubꞌan. Y tamar era cꞌapa puruy casi intajch tama tunor or e rum, y cꞌapa puruy casi intajch tunor e sian teꞌ lo que ayan tama tunor or e rum, y cꞌapa puruy tunor e sian cꞌopot lo que ayan tama tunor or e rum.
REV 8:8 Y conda otronteꞌ ángel cay lajbꞌa tama ucorneta, tobꞌesna cꞌaxi tama e jaꞌ tor e mar lo que lar uwirnar cocha inteꞌ nuxi or e witzir xeꞌ war apuruy. Y tamar era casi intajch tama tunor e jaꞌ sutpa uwirnar bꞌan cocha e chꞌich.
REV 8:9 Y casi intajch tama tunor e sian animalobꞌ lo que ayan macuir e jaꞌ tama e mar cꞌapa chamayobꞌ, y casi intajch tama tunor e sian barco lo que ayan tama e jaꞌ tor e mar cꞌapa tijrpobꞌ ubꞌan.
REV 8:10 Y conda otronteꞌ ángel cay lajbꞌa tama ucorneta ojri tari tut e qꞌuin inteꞌ nuxi lucero xeꞌ war atzꞌajbꞌa bꞌan cocha ingojr otot xeꞌ cꞌaxi tama e jaꞌ. Y cꞌaxi e lucero era tama casi intajch tama tunor e xucur lo que ayan tara tor e rum, y tama casi intajch tama tunor e sian ut jaꞌ tiaꞌ war abꞌocbꞌa alocꞌoy tama tunor or e rum.
REV 8:11 Y e lucero era ucꞌabꞌa Inchꞌaj, y casi intajch tama tunor e jaꞌ era sutpa uchꞌeir ut. Y meyra gente cꞌapa chamayobꞌ umen e jaꞌ era.
REV 8:12 Y conda otronteꞌ ángel cay lajbꞌa tama ucorneta quetpa yobꞌorbꞌir ut casi intajch e qꞌuin, y quetpa yobꞌorbꞌir casi intajch e luna, y bꞌan numuy tama casi intajch tunor e sian lucero ubꞌan. Y tamar era quetpa incsibꞌan utobꞌ casi intajch tama tunor lo que ayan tut e qꞌuin, y machi janchꞌacna casi intajch e día y nien e luna machi janchꞌacna tama casi intajch e acbꞌar y nien e lucero machi janchꞌacna tama casi intajch e acbꞌar ubꞌan.
REV 8:13 Y nacpat era inwira inteꞌ oror xeꞌ war atobꞌoy axin tut e qꞌuin y umbꞌi unuc. Y ojron taca inteꞌ nuxi nuc y che: —Tzajtaca utobꞌ tunor tin e turobꞌ tara tor e rum conda axin uyubꞌiobꞌ e lajbꞌar tama e tres corneta xeꞌ watarto, che e oror era.
REV 9:1 Entonces cay lajbꞌa otronteꞌ ángel tama ucorneta y inwira inteꞌ lucero xeꞌ cꞌaxi tor e rum xeꞌ ojri tari tut e qꞌuin, y ajcꞌuna ucꞌotorer tuaꞌ upasi e chꞌen xeꞌ mamajchi unata cobꞌa utamir.
REV 9:2 Y conda upasi e nuxi chꞌen era, cay locꞌoy e sian bꞌutz macuir e chꞌen este que cꞌapa bꞌutzran tunor ut e qꞌuin y tunor or e rum.
REV 9:3 Y tacar e bꞌutz era locꞌoyobꞌ e sian sajc xeꞌ tobꞌoy ixiobꞌ tama tunor or e rum. Y e sian sajc era ajcꞌuna ucꞌotorer bꞌan cocha ucꞌotorer incojt sinam.
REV 9:4 Y arobꞌnobꞌ tuaꞌ machi upijchꞌiobꞌ e cꞌopot lo que ayan tor e rum y nien e sian teꞌ, sino que tuaꞌ taca upijchꞌiobꞌ e gente xeꞌ matucꞌa useñair e Dios tama ut ujorobꞌ.
REV 9:5 Pero e sajc era machi actanobꞌ tuaꞌ uchamsiobꞌ e gente, sino que tuaꞌ taca uchiobꞌ acꞌuxun tama inteꞌ tiempo de cinco mes. Y e nuxi cꞌuxner lo que ajcꞌunobꞌ e gente aquetpa bꞌan cocha conda acꞌujxa inteꞌ umen incojt sinam.
REV 9:6 Y tama e día era e gente cꞌani usajcobꞌ uchamer pero machi tuaꞌ utajwiobꞌ. Y motor que uyusreobꞌ uchamerobꞌ pero e chamer tuaꞌ alocꞌoy aꞌjni tutobꞌ.
REV 9:7 Y e sian sajc era bꞌan uwirnar cocha incojt chij xeꞌ bꞌujcsebꞌir taca e taqꞌuin xeꞌ turix tuaꞌ axin tama e tzꞌojyir, y tama ujor ayan lo que bꞌan uwirnar cocha inteꞌ corona xeꞌ chembꞌir taca e oro, y uyeroj e sajc era bꞌan cocha uyeroj inteꞌ winic.
REV 9:8 Y utzutzer ujor e sajc era bꞌan cocha utzutzer ujor inteꞌ ixic, y ut uyej bꞌan cocha ut uyej inteꞌ león.
REV 9:9 Y upat e sian sajc era aquetpa bꞌan cocha e taqꞌuin, y conda atobꞌoy axin calapir aquiricna uwich, bꞌan cocha aquiricna uyoc e sian chij conda war aꞌjniobꞌ taca inteꞌ inteꞌ ucarreta tama inteꞌ tzꞌojyir.
REV 9:10 Y ayan unej e sian sajc era ubꞌan. Y tama unej ayan upuc bꞌan cocha ayan tama unej incojt sinam. Y ayan ucꞌotorer tama unej que conda ucꞌuxi e gente machi tuaꞌ acꞌapa acꞌuxun tama inteꞌ tiempo de cinco mes.
REV 9:11 Y ayan inteꞌ xeꞌ war acꞌotori tujor e sian sajc era xeꞌ jax e ángel xeꞌ war acꞌotori tama e nuxi chꞌen ubꞌan. Pues jaxir ayan ucꞌabꞌa xeꞌ tama e ojroner hebreo jax e Abadón, y tama e ojroner griego ucꞌabꞌa Apolión.
REV 9:12 Pues entonces cꞌapa numuy e bꞌajxan cꞌuxner, pero watarto chacojt cꞌuxner.
REV 9:13 Entonces cay lajbꞌa otronteꞌ ángel tama ucorneta y umbꞌi inteꞌ nuc xeꞌ locꞌoy tujam e cuatro cacho lo que ayan tama e altar xeꞌ chembꞌir taca e oro xeꞌ war tut e Dios.
REV 9:14 Entonces ojron e nuc era y uyare e ángel xeꞌ ayan ucorneta y che: —Bꞌana e cuatro angelobꞌ xeꞌ cachar turobꞌ tama utiꞌ e nuxi xucur xeꞌ ucꞌabꞌa Eufrates, xeꞌ che e nuc era.
REV 9:15 Pues quetpobꞌ cachar e cuatro angelobꞌ era tama utiꞌ e xucur yajaꞌ porque jaxirobꞌ quetpa tuaꞌ axin uchamsiobꞌ casi intajch tunor e gente lo que ayan tara tunor or e rum, y jaxirobꞌ intaquix war ucojcobꞌ tucꞌa hora y tucꞌa día y tucꞌa mes y tucꞌa año tuaꞌ abꞌajnobꞌ tuaꞌ axin uchiobꞌ.
REV 9:16 Entonces umbꞌi cobꞌa soldadobꞌ xeꞌ turobꞌ yebꞌar ucꞌabꞌ e cuatro angelobꞌ era, y ayan 200 millones soldadobꞌ y inteꞌ intiobꞌ turobꞌ tujor inteꞌ uchij.
REV 9:17 Y uwirnar e sian chij y tin e turobꞌ tamar lo que inwira tama nimayjut bꞌan cocha era: Pues tunor e sian soldadobꞌ bꞌujcsebꞌir upechuobꞌ taca e taqꞌuin xeꞌ chacchac ut bꞌan cocha e cꞌajc, y yaxax ut cocha e tun xeꞌ ucꞌabꞌa zafiro, y cꞌancꞌan ut cocha e azufre. Y ujor e sian chij era bꞌan cocha ujor inteꞌ león, y tamar uyejobꞌ uyujta alocꞌoy e cꞌajc taca e bꞌutz y e azufre.
REV 9:18 Y e sian chij era cꞌapa uchamsiobꞌ casi intajch tunor e gente lo que ayan tara tor e rum umen lo que uyujta locꞌoy tama uyejobꞌ xeꞌ jax e cꞌajc y e bꞌutz y e azufre.
REV 9:19 Pues ucꞌotorer e chij era turu tama uyejobꞌ y tama unejobꞌ ubꞌan. Porque unejobꞌ e sian chij era quetpa bꞌan cocha incojt chan taca tunor ujor e chan, y tacar unej era war uchamse meyra gente ubꞌan.
REV 9:20 Pero e gente xeꞌ quetpobꞌto xeꞌ machi chamesnobꞌ umen e sian chij machi uyactobꞌ tunor umabꞌambꞌanirobꞌ lo que war uchiobꞌ. Y machi uyactobꞌ tuaꞌ uyujtzꞌiobꞌ ut e sian mabꞌambꞌan mein, y nien machi uyactobꞌ tuaꞌ uyujtzꞌiobꞌ ut e sian chamen diosobꞌ xeꞌ chembꞌir taca oro, o taca e plata, o taca e bronce, o taca e tun, o tama e teꞌ. Y motor que e sian chamen dios era machi eꞌron y machi oꞌbꞌian y machi axana pero e gente era machi uyactobꞌ tuaꞌ uyujtzꞌiobꞌ ut e sian chamen diosobꞌ era.
REV 9:21 Y e gente era machi ixto war uyactobꞌ tuaꞌ uchamse ubꞌobꞌ, y machi war uyactobꞌ tuaꞌ abꞌaxonobꞌ, y machi war uyactobꞌ tuaꞌ axanobꞌ taca e ajnajtir ixictac o taca ajnajtir winicobꞌ, y machi war uyactobꞌ e xujchꞌiar.
REV 10:1 Entonces sutpen inwira otronteꞌ ángel xeꞌ meyra ayan ucꞌotorer xeꞌ ecmay tari tut e qꞌuin. Pues jaxir bꞌujcsebꞌir taca e tocar, y ayan inteꞌ macchan xeꞌ aquetpa tama ujor, y uyeroj ejpray ut bꞌan cocha uwarar e qꞌuin, y uyoc bꞌan uwirnar cocha uyamir ut e cꞌajc xeꞌ achꞌiꞌ uyoc axin.
REV 10:2 Y ayan inteꞌ jun xeꞌ qꞌuecher umener xeꞌ quetpa pasar ut tama ucꞌabꞌ, y uturbꞌa inteꞌ uyoc tor e mar y otronteꞌ uturbꞌa tor e rum.
REV 10:3 Entonces aru e ángel era taca inteꞌ nuxi nuc xeꞌ bꞌan uyubꞌnar cocha unuc inteꞌ león. Y conda aru e ángel era, checta inteꞌ nuxi nuc xeꞌ bꞌan uyubꞌnar cocha inteꞌ quiricnar tama ut e qꞌuin xeꞌ checta siete veces.
REV 10:4 Y conda cꞌapa ojron e siete ut quiricnar era, cꞌani ani intzꞌijbꞌa lo que umbꞌi era pero wacchetaca cay umbꞌi inteꞌ nuc xeꞌ tari tichan tut e qꞌuin xeꞌ uyaren y che: —Cojcon tama awalma lo que cay oybꞌi era porque machito tuaꞌ anatanwa umen e gente, che e nuc era xeꞌ tari tut e qꞌuin.
REV 10:5 Y nacpat era inwira e ángel otronyajr xeꞌ jax xeꞌ war tor e mar taca inteꞌ uyoc y tor e rum taca otronteꞌ xeꞌ ixin uyachi unojcꞌabꞌ tut e qꞌuin tichan
REV 10:6 tuaꞌ uchecsu que erach tunor lo que cꞌani uyare era. Y cay ojron tama ucꞌabꞌa jaxir xeꞌ turu iraj iraj, y xeꞌ cꞌapa uche ut e qꞌuin y tunor lo que ayan tamar, y xeꞌ cꞌapa uche or e rum y tunor lo que ayan tamar, y xeꞌ cꞌapa uche e jaꞌ y tunor lo que ayan macuir e jaꞌ y che: —Machix tuaꞌ acojcna más día era.
REV 10:7 Conda acꞌapa alajbꞌa tama ucorneta e ángel xeꞌ quetpato tuaꞌ alajbꞌa, entonces cꞌani acꞌapa achempa tunor lo que quetpa tuaꞌ uche e Dios bꞌan cocha cay uchecsu tut umanobꞌ xeꞌ jax e profetobꞌ tama e onian tiempo. Bꞌan umbꞌi ojron e ángel era.
REV 10:8 Y nacpat era cay umbꞌi e nuc otronyajr xeꞌ tari tut e qꞌuin xeꞌ che: —Quiqui chꞌama e jun xeꞌ pasar ut xeꞌ qꞌuecher umen e ángel xeꞌ war tor e mar taca inteꞌ uyoc y tor e rum taca otronteꞌ, che e nuc era xeꞌ tari tut e qꞌuin.
REV 10:9 Entonces cꞌotoyen tut e ángel y cay incꞌajti e jun tuaꞌ. Y jaxir uyaren y che: —Jun e jun era y cꞌuxu. Tama awej cꞌani atajwi que inchiꞌ bꞌan cocha e chabꞌ, pero tama anac cꞌani asutpa inchꞌaj ut, che e ángel.
REV 10:10 Entonces ixien inchꞌami e jun xeꞌ qꞌuecher tama ucꞌabꞌ e ángel y cay incꞌuxi. Y tama niwej intajwi que inchiꞌ ucꞌujxar bꞌan cocha e chabꞌ. Pero conda imbꞌuqꞌui ixin sutpa inchꞌaj tama ninac.
REV 10:11 Y nacpat era ojron e ángel tacaren otronyajr y che: —Ucꞌani tuaꞌ iꞌxin achecsu tut e gente otronyajr lo que irsenet umen e Dios tama tunor e sian chꞌajnarir, y tama tunor e nuquir chinamobꞌ, y tama tunor e sian ojroner, y tama tunor e sian rey lo que ayan tara tor e rum, che e ángel.
REV 11:1 Pues entonces ajcꞌunen inteꞌ teꞌ xeꞌ bꞌan cocha ubꞌijsibꞌ inteꞌ tarea tuaꞌ imbꞌisma tamar y arobꞌnen cocha era: —Achpen bꞌisi e templo tuaꞌ e Dios y bꞌisi e altar lo que que ayan tamar, y tziqui awira cobꞌa gente ayan xeꞌ war uyujtzꞌiobꞌ ut e Dios.
REV 11:2 Pero ira abꞌisi or e tinaj tama e templo, porque tunor era ajcꞌubꞌirobꞌix e sian choquem gente. Pues jaxirobꞌ tuaꞌ axin utecruobꞌ e chinam xeꞌ erach tama inteꞌ tiempo de tres año y medio.
REV 11:3 Pues cꞌani inwebꞌta axin chateꞌ ajchecsuyajobꞌ tanibꞌa xeꞌ tuaꞌ aquetpobꞌ bꞌujcsebꞌir tama e bꞌujc xeꞌ bꞌan cocha inteꞌ mucuc xeꞌ chembꞌir tama e tzucchij, y jaxirobꞌ tuaꞌ oꞌjronobꞌ tamaren tama inteꞌ tiempo de tres año y medio, che e nuc era.
REV 11:4 Pues e chateꞌ ajchecsuyajobꞌ era larobꞌ cocha chateꞌ teꞌ xeꞌ ucꞌabꞌa olivo xeꞌ warobꞌ tut e Dios, y larobꞌ cocha e chateꞌ candelero xeꞌ warobꞌ ubꞌan tut e Dios xeꞌ jax Uwinquirar tama tunor or e rum.
REV 11:5 Y jay ayan tin e cꞌani upijchꞌiobꞌ e winicobꞌ era, jaxirobꞌ tuaꞌ uyujtobꞌ alocꞌoy e cꞌajc tama uyejobꞌ tuaꞌ uputa inyajrer tunor tin e war aqꞌuijnobꞌ uwirobꞌ. Y bꞌan cocha era tuaꞌ achamay tunor tin e uche ubꞌobꞌ tuaꞌ upijchꞌiobꞌ e winicobꞌ era.
REV 11:6 Y e chateꞌ ajchecsuyajobꞌ era ayan ucꞌotorer tuaꞌ umaquiobꞌ ut e qꞌuin tuaꞌ machi acꞌaxi e jajar tama tunor e tiempo conda war uchecsuobꞌ lo que arobꞌnobꞌ umen e Dios. Y ayan ucꞌotorer tuaꞌ uche aquetpa e jaꞌ cocha e chꞌich, y ayan ucꞌotorer tuaꞌ uchiobꞌ unumse ubꞌobꞌ tunor e gente tor e rum bꞌan taca cocha ucꞌaniobꞌ jaxirobꞌ y meyra veces jay bꞌan ucꞌaniobꞌ.
REV 11:7 Pero conda acꞌapa uchecsuobꞌ tunor lo que arobꞌnobꞌ umen e Dios, cꞌani achpa alocꞌoy inteꞌ nuxi chan xeꞌ calapir uwirnar tama e nuxi chꞌen xeꞌ mamajchi unata cobꞌa utamir tuaꞌ ucucru e chateꞌ ajchecsuyajobꞌ era. Y bꞌan tuaꞌ uche este que acꞌapa uchamse e winicobꞌ era.
REV 11:8 Y ya aquetpa tutzꞌurobꞌ ucuerpo e chateꞌ chamenobꞌ era tut e calle tama e chinam tiaꞌ chamesna Cawinquirar xeꞌ arobꞌna tama inteꞌ ojroner xeꞌ mucur que jax e Sodoma y que jax e Egipto ubꞌan.
REV 11:9 Y bꞌan taca tuaꞌ aquetpobꞌ chꞌar tor e rum e chateꞌ chamen era tama inteꞌ tiempo de tres día y media. Y cꞌani iꞌrnobꞌ umen e gente tama tunor e sian chꞌajnarir, y umen e gente tama tunor e ojronerobꞌ, y umen tunor e sian chinamobꞌ lo que ayan tama tunor or e rum. Y mamajchi tuaꞌ actana umuqui e winicobꞌ era.
REV 11:10 Y tunor tin e turobꞌ tama tunor or e rum cꞌani atzayobꞌ meyra tama uchamer e chateꞌ ajchecsuyajobꞌ era. Y umen e tzayer era cꞌani acay anojqꞌuiniobꞌ este que axin asijbꞌobꞌ tama inteꞌ intiobꞌ, porque meyra cay unumse ubꞌobꞌ tunor tin e aturuanobꞌ tor e rum umen e chateꞌ profetobꞌ era.
REV 11:11 Pero conda numuy e tres día y media era e Dios uyujta e music tuaꞌ e cuxtar tama e chateꞌ ajchecsuyajobꞌ era otronyajr, y achpobꞌ wawanobꞌ bꞌixir, y tunor tin e uwirobꞌ lo que numuy taca e chateꞌ winicobꞌ era bꞌutcꞌa uyalmobꞌ taca e bꞌajcꞌut.
REV 11:12 Y wacchetaca e chateꞌ ajchecsuyajobꞌ era uyubꞌiobꞌ inteꞌ nuxi nuc xeꞌ tari tichan tut e qꞌuin xeꞌ che: —Tꞌabꞌenic tara, che e nuc. Entonces tꞌabꞌay ixiobꞌ tut e qꞌuin tama inteꞌ tocar. Y tunor tin e cay qꞌuijna uwirobꞌ e chateꞌ ajchecsuyajobꞌ era intaca uwirobꞌ cocha tꞌabꞌay ixiobꞌ tichan.
REV 11:13 Y wacchetaca numuy inteꞌ nuxi yujcbꞌar, y umen e nuxi yujcbꞌar era tijrpa meyra ototobꞌ lo que ayan macuir e chinam era. Y tama inteꞌ inteꞌ cien otot ixin cucrema diez. Y chamayobꞌ 7,000 gente tama e día era. Y tin e quetpobꞌto bꞌixir bꞌactobꞌ tamar era y cay utattzꞌiobꞌ ucꞌabꞌa e Dios xeꞌ turu tichan tut e qꞌuin.
REV 11:14 Pues entonces cꞌapa numuy e chateꞌ cꞌuxner era, pero wacchetaca watarto inteꞌ.
REV 11:15 Entonces e ángel xeꞌ jax ucꞌapesnibꞌir tama e siete angelobꞌ cay lajbꞌa tama ucorneta, y obꞌna meyra nuxi nuc xeꞌ tariobꞌ tut e qꞌuin xeꞌ che: Tin e cay cꞌotoriobꞌ tara tor e rum satpobꞌix, y tin e tuaꞌ acꞌotori coner jax Cawinquirar Dios. Y e Cristo tuaꞌ axin acꞌotori tacar. Y jaxir tuaꞌ acꞌotori iraj iraj y ejcꞌar ejcꞌar. Bꞌan che e sian nuc xeꞌ tari tut e qꞌuin.
REV 11:16 Entonces e veinticuatro nuquir winicobꞌ xeꞌ turobꞌ tut Catata Dios tama inteꞌ inteꞌ uturtarobꞌ cay pacwanobꞌ taca ut ujor tut e rum y uyujtzꞌiobꞌ ut Catata Dios y chenobꞌ:
REV 11:17 Catattzꞌi acꞌabꞌa, Cawinquirar Dios xeꞌ meyra ayan acꞌotorer, porque net turet conda ne mato achena ani or e rum era y turet coner, porque net ixin achꞌami acꞌotorer xeꞌ nojta y coner war icay icꞌotori tara tor e rum.
REV 11:18 Pues cꞌapa qꞌuijnobꞌ meyra e sian choquem gente tara tor e rum, pero cꞌotix e día tuaꞌ awatzꞌiobꞌ, y cꞌotix e hora tuaꞌ ache juzgar tunor tin e chamen ubꞌan. Pero cꞌotix e hora ubꞌan tuaꞌ awajcꞌu utuanibꞌirobꞌ tunor tin e amanobꞌ xeꞌ jax e profetobꞌ, y tunor xeꞌ erach toit, y tunor tin e war utattzꞌiobꞌ acꞌabꞌa motor jay nuquir winicobꞌ o jay matucꞌa unatobꞌ. Y cꞌotix e hora tuaꞌ atijres tunor tin e war utijres or e rum era y lo que ayan tamar, che e veinticuatro nuquir winicobꞌ.
REV 11:19 Y tamar era pascꞌa ut utemplo e Dios xeꞌ turu tichan tut e qꞌuin, y irna e cofre xeꞌ erach tuaꞌ e pacto. Entonces cay jijbꞌi ut e qꞌuin, y cay quiricna ut e qꞌuin, y numuy inteꞌ yujcbꞌar, y cay cꞌaxi meyra bꞌat xeꞌ cꞌobꞌiric ut.
REV 12:1 Pues entonces checta inteꞌ nuxi seña tut e qꞌuin xeꞌ bꞌan uwirnar cocha inteꞌ ixic xeꞌ bꞌochꞌor ubꞌa taca uwarar e qꞌuin bꞌan cocha jay bꞌujcsebꞌir ani tamar, y turu e luna yebꞌar uyoc, y ayan inteꞌ corona tama ujor xeꞌ ayan doce lucero tamar.
REV 12:2 Pues jaxir war ucojco uyar y cꞌotix e hora era tuaꞌ acuxpa y tamar era war aꞌru umen e cꞌuxner lo que war unumse ubꞌa tamar.
REV 12:3 Y wacchetaca checta otronteꞌ nuxi seña tut e qꞌuin xeꞌ jax inteꞌ nuxi chan xeꞌ chacchac ut y xeꞌ ayan siete ujor y diez ucacho, y ayan inteꞌ corona tama inteꞌ inteꞌ ujorobꞌ.
REV 12:4 Y e nuxi chan era uquerejbꞌa ixin casi intajch tama tunor e lucero lo que ayan tut e qꞌuin taca unej, y ujuri ixin tunorobꞌ tut e rum. Y de allí cꞌotoy wawan tut e ixic xeꞌ cꞌanix ucuxi uyar porque e nuxi chan era intaquix war ucojco acuxpa uyar e ixic tuaꞌ ucꞌuxi.
REV 12:5 Entonces e ixic ucuxi inteꞌ yar usitz xeꞌ jax xeꞌ aquetpa tuaꞌ acꞌotori taca inteꞌ bꞌoyteꞌ xeꞌ chembꞌir taca e taqꞌuin tujor tunor e gente tama tunor or e rum. Pero wacchetaca loqꞌuesna e sitz tama ucꞌabꞌ utuꞌ y qꞌuejcha ixin tut e Dios y tut uturtar.
REV 12:6 Y utuꞌ e chuchu sitz era locꞌoy ajni esto tama inteꞌ choquem lugar tiaꞌ quetpa ustabꞌir umen e Dios y tiaꞌ tuaꞌ awesena tama inteꞌ tiempo de tres año y medio.
REV 12:7 Y nacpat era ayan inteꞌ nuxi tzꞌojyir tut e qꞌuin, y tamar era e Miguel xeꞌ jax e más nuquir ángel taca tunor uyangelobꞌ xeꞌ turobꞌ yebꞌar ucꞌotorer cay uchiobꞌ e tzꞌojyir upater e nuxi chan. Y e nuxi chan ayan meyra uyangelobꞌ tacar ubꞌan.
REV 12:8 Pero e nuxi chan taca tunor uyangelobꞌ machi obꞌna ucucruobꞌ e Miguel taca uyangelobꞌ, y tamar era machi actanobꞌ tuaꞌ aquetpobꞌ más tut e qꞌuin e nuxi chan taca uyangelobꞌ.
REV 12:9 Y tamar era loqꞌuesna tunor ulugar e nuxi chan era tut e qꞌuin, jaxir xeꞌ jax e onian chan xeꞌ arobꞌna diablo y Satanás, y jax xeꞌ cay umajres tunor e gente xeꞌ turobꞌ tor e rum. Y jujra ixin tor e rum inyajrer taca tunor uyangelobꞌ.
REV 12:10 Y tamar era umbꞌi inteꞌ nuxi nuc xeꞌ tari tut e qꞌuin xeꞌ che: —Yopix tunor cacorpesiaj y Cadiosir cꞌapa uwirse ubꞌa que ayan ixto ucꞌotorer, y cꞌapa uwirse ubꞌa que jaxir jax e más nuquir Ajcꞌotorer y que ayan meyra ucꞌotorer e Cristo ubꞌan. Porque loqꞌuesnix tut e qꞌuin tin e war utuchꞌi ut tunor cawermanuobꞌ tut e Dios, cocha bꞌan ani war uche tama e día y acbꞌar ubꞌan.
REV 12:11 Pero tunor cawermanuobꞌ era ixin ucucruobꞌ e diablo taca uchꞌichꞌer Cawinquirar xeꞌ jax e Cordero, y taca uyojroner e Dios xeꞌ cay uchecsuobꞌ tic taca, y que machi uyajta ut ucuxtarobꞌ tuaꞌ machi uyacta ubꞌir e Dios motor que aquetpa tuaꞌ achamayobꞌ ani tamar.
REV 12:12 Tzayenic tunor ut e qꞌuin y tunorox xeꞌ turox tamar. Pero nox xeꞌ turox tor e rum y tor e jaꞌ tzajtaca iut porque e diablo ecmay tari tijam nox, y war unata que mix jax meyra día xeꞌ war aquetpa tuaꞌ y tamar era war aqꞌuijna meyra ipater nox, xeꞌ che e nuxi nuc xeꞌ tari tut e qꞌuin.
REV 12:13 Entonces conda e nuxi chan cꞌotoy unata que ojresna tari tor e rum inyajrer, cay qꞌuijna meyra upater e ixic xeꞌ qꞌuecherix usitz.
REV 12:14 Pero e ixic ajcꞌuna chateꞌ uwich xeꞌ nojta bꞌan cocha uwich inteꞌ oror tuaꞌ uyubꞌi atobꞌoy axin innajt tut e nuxi chan tama inteꞌ choquem lugar tiaꞌ tuaꞌ awesena y tiaꞌ tuaꞌ acorpesna tama e nuxi chan tama inteꞌ tiempo de tres año y medio.
REV 12:15 Pero e nuxi chan cay uxeꞌ meyra jaꞌ tama uyej tuaꞌ uche acuchpa e ixic tuaꞌ achamay tamar.
REV 12:16 Pero e rum cay utacre e ixic umen que upasi uyej tuaꞌ uyuchꞌi tunor e jaꞌ lo que locꞌoy tama uyej e nuxi chan.
REV 12:17 Entonces qꞌuijna e nuxi chan más upater e ixic y tamar era ixin upojro e inmojr ufamilia tuaꞌ uwatzꞌi tunor tin e war acꞌupseyanobꞌ tut e Dios y xeꞌ war axanobꞌ tama ucanseyaj e Jesús.
REV 13:1 Entonces ixin e nuxi chan tuaꞌ awawan tutiꞌ e mar. Pues entonces inwira locꞌoy macuir e mar inteꞌ nuxi lagarto xeꞌ mabꞌambꞌan xeꞌ ayan siete ujor y diez ucacho y tama inteꞌ inteꞌ ucacho ayan inteꞌ corona. Y tama inteꞌ inteꞌ ujor tzꞌijbꞌabꞌir cora cꞌabꞌa xeꞌ mabꞌambꞌan xeꞌ tuaꞌ uqꞌuijnes e Dios.
REV 13:2 Y e nuxi mabꞌambꞌan lagarto lo que inwira era bꞌan uwirnar cocha inteꞌ tigre, y ayan uyoc bꞌan cocha uyoc inteꞌ oso, y ayan uyej bꞌan cocha uyej inteꞌ león. Y e nuxi chan ixin uyajcꞌu e nuxi lagarto tuaꞌ acꞌotori tama uturtar y uyajcꞌu meyra ucꞌotorer ubꞌan.
REV 13:3 Y inwira que inteꞌ ujor e nuxi lagarto era chꞌajca y chequer que ucꞌani tuaꞌ achamay tamar, pero ujor era tzꞌacna y machi chamay. Y tunor e gente tor e rum bꞌacta uwirobꞌ y cay ixiobꞌ tupat e nuxi lagarto era.
REV 13:4 Y tamar era tunor e sian gente cay uyujtzꞌiobꞌ ut e nuxi chan tama tunor e cꞌotorer lo que ixin uyajcꞌu e nuxi lagarto. Y utattzꞌiobꞌ ucꞌabꞌa e nuxi lagarto ubꞌan y che: —Mamajchi lar tacar e nuxi lagarto era. Mamajchi uyubꞌi ucucru e nuxi lagarto, chenobꞌ tunor e gente.
REV 13:5 Y e nuxi lagarto ajcꞌuna tuaꞌ utattzꞌi ubꞌa y tuaꞌ oꞌjron meyra ojroner xeꞌ mabꞌambꞌan tuaꞌ uqꞌuijnes e Dios. Y ajcꞌuna tuaꞌ acꞌotori tama inteꞌ tiempo de tres año y medio.
REV 13:6 Y bꞌan cocha era cay uche: Cay ucꞌaye e Dios, y cay ojron meyra ojroner upater ucꞌabꞌa e Dios, y cay uyare meyra ojroner upater uyotot e Dios, y upater tunor tin e turobꞌ tut e qꞌuin.
REV 13:7 Y e nuxi lagarto ajcꞌuna ubꞌan tuaꞌ uche e tzꞌojyir upater tin e tuobꞌ e Dios este que ixin ucucruobꞌ. Y ajcꞌuna ubꞌan tuaꞌ acꞌotori tujor tunor e chꞌajnarir lo que ayan tama tunor e sian familiobꞌ, y tujor tunor e ojroner, y tujor tunor e sian chinamobꞌ lo que ayan tama tunor or e rum.
REV 13:8 Y tunor e gente tama tunor or e rum cay uyujtzꞌiobꞌ ut e nuxi lagarto, tunor tin e majax tzꞌijbꞌabꞌir ucꞌabꞌobꞌ tama e jun tuaꞌ e cuxtar xeꞌ ayan tuaꞌ e Cordero xeꞌ chamesna tamaron bꞌan cocha cay ubꞌijnu Catata Dios tuaꞌ uche conda ne mato achena ani or e rum era.
REV 13:9 Tin e ayan uchiquin uyubꞌic tunor era.
REV 13:10 Pues tin e aquetpa tuaꞌ axin tama e cárcel ucꞌani tuaꞌ aqꞌuejcha axin tama e cárcel, y tin e aquetpa tuaꞌ achamay taca e machit, pues taca e machit tuaꞌ achamesna. Y tamar era tin e tuobꞌ e Dios ucꞌani tuaꞌ aqꞌuecꞌo axanobꞌ tama ubꞌir y tuaꞌ ubꞌijnuobꞌ tuaꞌ machi alocꞌoy aꞌjniobꞌ tut e bꞌir era.
REV 13:11 Y nacpat era inwira locꞌoy otronteꞌ nuxi lagarto xeꞌ locꞌoy macuir e rum. Y e lagarto era ayan chateꞌ ucacho bꞌan cocha ucachoir inteꞌ cordero, pero conda jaxir ojron locꞌoy bꞌan taca cocha e nuxi chan xeꞌ mabꞌambꞌan.
REV 13:12 Y e lagarto era ajcꞌuna meyra ucꞌotorer umen e bꞌajxan lagarto xeꞌ locꞌoy macuir e mar. Entonces e nuxi lagarto era xeꞌ locꞌoy macuir e rum cay utzacre e gente tama tunor or e rum tuaꞌ uyujtzꞌiobꞌ ut e bꞌajxan nuxi lagarto xeꞌ tzꞌacpesna ujor xeꞌ chꞌajca xeꞌ ucꞌani ani achamay tamar.
REV 13:13 Y e nuxi lagarto era xeꞌ locꞌoy macuir e rum cay uche meyra nuxi milagro este que uche ojri e cꞌajc tut e qꞌuin acꞌaxi tama or e rum tut e gente.
REV 13:14 Y umen que actana uche meyra sian milagro cocha era tut e bꞌajxan nuxi lagarto, cay umajres tunor e sian gente tor e rum. Y ixin utzacre tuaꞌ achena inteꞌ chamen dios xeꞌ lar uwirnar cocha e bꞌajxan nuxi lagarto xeꞌ jax xeꞌ machi chamay motor que chꞌacbꞌir ujor taca inteꞌ machit.
REV 13:15 Y inteꞌ nuxi lagarto xeꞌ locꞌoy macuir e rum ajcꞌuna ucꞌotorer tuaꞌ ubꞌixqꞌues e chamen dios era xeꞌ chena bꞌan cocha uwirnar e bꞌajxan nuxi lagarto este que uyubꞌi oꞌjron e chamen dios era. Y e chamen dios era ajcꞌuna ucꞌotorer tuaꞌ uyare achamesna tunor tin e machi cꞌani uyujtzꞌiobꞌ ut.
REV 13:16 Y de allí e chamen dios era cay utzacre tuaꞌ atzꞌijbꞌna useña tama tunor e gente. Y bꞌan ucꞌani tuaꞌ atzꞌijbꞌna tama upat unojcꞌabꞌ e gente o tama ut ujor. Y bꞌan ucꞌani tuaꞌ achena tama tunor e gente motor jay chuchu winic o jay nuquir winic, motor jay tzajtaca ut o jay ayan utumin, y motor que ayan uwinquir o jay matucꞌa; tunor e gente ucꞌani tuaꞌ atzꞌijbꞌna useña e chamen dios era tamarobꞌ.
REV 13:17 Y jay ayan inteꞌ xeꞌ matucꞌa useña e chamen dios era tamar, jaxir machi actana tuaꞌ amano y nien tuaꞌ achonma. Y e seña era lo que tuaꞌ atzꞌijbꞌna tama tunor e gente jax ucꞌabꞌa e nuxi lagarto y jax e número lo que locꞌoy jay atzicna e letra tama ucꞌabꞌa.
REV 13:18 Tunor era ucꞌani meyra natanyaj tuaꞌ acꞌotoy unata inteꞌ tama tunor era. Tin e nojta ujor ucꞌani tuaꞌ utziqui e número tuaꞌ e nuxi lagarto era, xeꞌ jax e número tuaꞌ e winicobꞌ. Y unúmero jaxir jax e 666.
REV 14:1 Pues entonces nacpat era inwira que war e Cordero tujor inteꞌ witzir xeꞌ ucꞌabꞌa Sión. Y tacar jaxir war awawan 144,000 gentiobꞌ. Y tamar ut ujor inteꞌ intiobꞌ ayan lo que chꞌar tzꞌijbꞌabꞌir xeꞌ jax ucꞌabꞌa e Cordero y ucꞌabꞌa e Tatabꞌir tuaꞌ.
REV 14:2 Y wacchetaca umbꞌi inteꞌ nuxi nuc xeꞌ tari tichan tut e qꞌuin xeꞌ aquiricna bꞌan cocha inteꞌ cojn conda war ecmay watar o bꞌan cocha uyubꞌnar conda war aquiricna ut e qꞌuin. Y e nuc lo que umbꞌi bꞌan uyubꞌnar cocha conda achena e lajbꞌar tama cora sian arpa.
REV 14:3 Entonces e 144,000 gente era cay ucꞌaywijresobꞌ inteꞌ cꞌay xeꞌ imbꞌutz tut e turtar y tut e cuatro animalobꞌ xeꞌ bꞌixirobꞌ y tut e nuquir winicobꞌ. Y mamajchi uyubꞌi ucani e cꞌay era, ajtaca e 144,000 gente era xeꞌ corpesbꞌirobꞌ tujam e gente tor e rum.
REV 14:4 Y e gente era jax tin e machi ubꞌoni ubꞌobꞌ taca e ixictac, sino que quetpobꞌ erach. Y axiobꞌ tupat e Cordero tic taca tiaꞌ axin. Pues jaxirobꞌ corpesnobꞌ tujam e winicobꞌ tuaꞌ aquetpobꞌ bꞌan cocha inteꞌ bꞌajxan ofrenda tut e Dios y tut e Cordero.
REV 14:5 Y machi tajwina nien imbꞌijc e majresiaj tama uyejobꞌ, y matucꞌa e bꞌonemar tamarobꞌ. Bꞌan cocha era ochoyobꞌ y wawanobꞌ tut uturtar e Dios.
REV 14:6 Entonces inwira otronteꞌ ángel xeꞌ war atobꞌoy axin tut e qꞌuin tor e icꞌar xeꞌ war uqꞌueche axin uyojroner e Dios tama e corpesiaj xeꞌ machi tuaꞌ acꞌapa tuaꞌ uchecsu tut tunor tin e turobꞌ tor e rum, tama tunor e chꞌajnarir lo que ayan tama tunor e sian familiobꞌ, y tama tunor e ojroner, y tama tunor e sian chinamobꞌ lo que ayan tama tunor or e rum.
REV 14:7 Y ojron e ángel era taca inteꞌ nuxi nuc y che: —Bꞌacrenic e Dios y tattzꞌic ucꞌabꞌa. Pues cꞌotix e hora era conda jaxir tuaꞌ uche juzgar e gente. Laric ujtzꞌinic ut jaxir xeꞌ cꞌapa uche tunor ut e qꞌuin, y tunor or e rum, y tunor e mar, y tunor unuc e cojnobꞌ, che e ángel era.
REV 14:8 Y nacpat era checta otronteꞌ ángel xeꞌ che: —Cucrema tijrpa e nuxi chinam xeꞌ ucꞌabꞌa Babilonia xeꞌ meyra uche e mabꞌambꞌanir. Porque cay uche uyuchꞌiobꞌ lo que uche atijrpa ujorobꞌ tamar ubꞌijnusiajobꞌ tunor e sian chinamobꞌ tama tunor or e rum este que cay uchiobꞌ tunor lo que uyusre uchiobꞌ uwerir, che e ángel era.
REV 14:9 Y nacpat era checta otronteꞌ ángel xeꞌ ojron taca inteꞌ nuxi nuc y che: —Tunor tin e axin uyujtzꞌiobꞌ ut e nuxi lagarto o xeꞌ axin uyujtzꞌiobꞌ ut e chamen dios xeꞌ chembꞌir bꞌan cocha uwirnar, y xeꞌ uyajcꞌu ubꞌa tuaꞌ atzꞌijbꞌna useñair e nuxi lagarto tut ujor o tama upat unojcꞌabꞌ,
REV 14:10 ucꞌani tuaꞌ uchꞌamiobꞌ e nuxi qꞌuijnar tuaꞌ e Dios xeꞌ tuaꞌ watar tama ujorobꞌ. Y jaxirobꞌ tuaꞌ axin unumse ubꞌobꞌ meyra tut tunor uyangelobꞌ e Dios y tut e Cordero tama e cꞌajc xeꞌ war apuruy taca e azufre.
REV 14:11 Y e bꞌutz tuaꞌ e cꞌajc era tiaꞌ war unumse ubꞌobꞌ tuaꞌ atꞌabꞌay axin tichan ejcꞌar ejcꞌar. Y bꞌan tuaꞌ unumse ubꞌobꞌ tunor tin axin uyujtzꞌiobꞌ ut e nuxi lagarto y e chamen dios xeꞌ chembꞌir bꞌan cocha uwirnar o xeꞌ uchꞌamiobꞌ useñair e nuxi lagarto tamarobꞌ. Y ma tiaꞌ tuaꞌ ajiriobꞌ tama e cꞌuxner era nien tama e día y nien tama e acbꞌar ejcꞌar ejcꞌar.
REV 14:12 Y tamar era tunor tin e tuobꞌ e Dios y xeꞌ war acꞌupseyanobꞌ tut uyojroner y xeꞌ war uturbꞌa ubꞌobꞌ tama e Jesús ucꞌani tuaꞌ ucojcobꞌ anumuy tunor era bꞌan taca, che e ángel era.
REV 14:13 Entonces umbꞌi inteꞌ nuc xeꞌ tari tut e qꞌuin xeꞌ uyaren y che: —Tzꞌijbꞌan e ojroner lo que cꞌani inwaret era: “Chojbꞌesbꞌir tunor tin e intera ubꞌijnusiajobꞌ taca Cawinquirar xeꞌ axin achamayobꞌ coner y xeꞌ axin achamayobꞌ tama e día xeꞌ watar, porque machix tuaꞌ unumse ubꞌobꞌ tama e nuxi cꞌuxner lo que ayan tara tor e rum”, xeꞌ che e nuc xeꞌ tari tut e qꞌuin. Y bꞌan che Unawalir e Dios ubꞌan: “Bꞌan ya, porque jaxirobꞌ tuaꞌ axiobꞌ tichan tut e qꞌuin tuaꞌ ajiriobꞌ y tuaꞌ uchꞌamiobꞌ utuanibꞌirobꞌ tama tunor upatnarobꞌ lo que cay uchiobꞌ tara tor e rum”, che Unawalir e Dios.
REV 14:14 Pues entonces inchꞌujcu y inwira que ayan inteꞌ tocar xeꞌ sacsac ut y que ayan inteꞌ xeꞌ turu tujor e tocar era xeꞌ bꞌan uwirnar cocha Uyunen e winic. Y tama ujor ayan inteꞌ corona xeꞌ chembꞌir taca e oro y tama ucꞌabꞌ ayan inteꞌ hoz xeꞌ bien jucbꞌir.
REV 14:15 Y locꞌoy otronteꞌ ángel tama e templo lo que ayan tut e qꞌuin xeꞌ cay aru taca inteꞌ nuxi nuc y uyare tin e turu tujor e tocar y che: —Cꞌotix e hora tuaꞌ iꞌxin amorojse e cosecha lo que ayan tama tunor or e rum. Quiqui osen awoz tamar, che e ángel.
REV 14:16 Y nacpat era tin e turu tujor e tocar cay unumse uyoz tor e rum y umorojse tunor e sian cosecha lo que ayan tara tor e rum.
REV 14:17 Entonces locꞌoy otronteꞌ ángel tama e templo xeꞌ turu tut qꞌuin xeꞌ war uqꞌueche axin inteꞌ hoz tama ucꞌabꞌ ubꞌan xeꞌ bien jucbꞌir.
REV 14:18 Y locꞌoy otronteꞌ ángel tama e altar lo que ayan tama e templo tut e qꞌuin xeꞌ ayan ucꞌotorer tama e cꞌajc y cay ojron taca inteꞌ nuxi nuc y uyare tin e qꞌuecher e hoz xeꞌ bien jucbꞌir y che: —Cꞌotix e hora tuaꞌ iꞌxin amorojse e cosecha tama e uva lo que ayan tor e rum, porque era cꞌapix tacꞌa, che e ángel era.
REV 14:19 Y entonces ixin e ángel y cay unumse uyoz tujor e rum y uxuri tunor uyutir uchꞌajnar e uva y de allí umorojse tunor uyutir era y uyari tama inteꞌ trapich tuaꞌ ayatzpa alocꞌoy tunor uyarar. Pues tunor era que war ayatzpa alocꞌoy uyarar e uva tama e trapich bꞌan cocha conda watar uqꞌuijnar e Dios tujor e gente tara tor e rum.
REV 14:20 Entonces yajtzꞌa locꞌoy tunor uyarar e uva tama e trapich patir e chinam, y conda locꞌoy ujeir era tama e trapich mixto jax uyarar e uva sino que sutpa chꞌich xeꞌ ajni ixin bꞌan cocha inteꞌ cojn este que bꞌutcꞌa tunor inteꞌ nuxi lugar. Y utamir e chꞌich era cꞌotoy esto tama uyej inteꞌ chij y ulargoir uwam e cojn era tiaꞌ ajni ixin ayan 300 kilómetros.
REV 15:1 Pues entonces inwira checta otronteꞌ seña tut e qꞌuin xeꞌ nojta y xeꞌ imbꞌacꞌajr uwirnar. Inwira checta siete angelobꞌ xeꞌ war uqꞌuechiobꞌ axin lo que ayan siete cꞌuxner tamar. Y jax era ucꞌapesnibꞌir tama tunor e sian jatzꞌuar lo que e Dios war uyebꞌta watar tujor e gente tor e rum umen que war aqꞌuijna.
REV 15:2 Entonces inwira lo que lar uwirnar cocha inteꞌ nuxi jaꞌ xeꞌ bꞌan uwirnar cocha inteꞌ espejo xeꞌ turu tor e rum xeꞌ chequer uwarar e cꞌajc tamar. Y inwira que war awawanobꞌ meyra gente tama e nuxi jaꞌ era. Y tunor e gente era jax tin e machi cucurnobꞌ umen e nuxi lagarto y nien umen e chamen dios xeꞌ chembꞌir bꞌan cocha uwirnar, y nien machi uyacta ubꞌobꞌ tuaꞌ atzꞌijbꞌna useñair e nuxi lagarto tamarobꞌ. Y inteꞌ intiobꞌ ajcꞌunobꞌ inteꞌ inteꞌ uyárpa umen e Dios tuaꞌ alajbꞌobꞌ tamar.
REV 15:3 Y cay ucꞌaywijresobꞌ ucꞌay e Moisés xeꞌ jax uman e Dios, y ucꞌaywijresobꞌ e cꞌay xeꞌ tuaꞌ e Cordero y chenobꞌ: Jax net xeꞌ jax Cawinquirar Dios xeꞌ meyra acꞌotorer, galan uwirnar tunor lo que ache y nojta. Pues net matucꞌa ache xeꞌ mabꞌambꞌan y ma tiaꞌ imajresian. Y jax net xeꞌ war acꞌotori tujor tunor e sian chinamobꞌ lo que ayan tara tor e rum.
REV 15:4 Y ¿chi ca nic xeꞌ machi abꞌacta toit, Cawinquiraret? Y ¿chi ca nic xeꞌ machi utattzꞌi acꞌabꞌa? Porque net taca xeꞌ erachet, y tunor e sian gente tama tunor or e rum tuaꞌ watar uyujtzꞌiobꞌ oit, porque war uwirobꞌ que ajtaca net xeꞌ war ache intaca lo que erach, chenobꞌ tama e cꞌay era.
REV 15:5 Entonces inwira que pascꞌa ut e templo xeꞌ turu tichan, y macuir inwira que ayan inteꞌ lugar tiaꞌ ayan meyra utawarer e Dios tiaꞌ chꞌar tꞌabꞌesbꞌir upacto e Dios.
REV 15:6 Y macuir e templo era locꞌoyobꞌ siete angelobꞌ xeꞌ war uqꞌuechiobꞌ axin e siete cꞌuxner. Y jaxirobꞌ bꞌujcsebꞌirobꞌ taca e bꞌujc xeꞌ sacsac y ejpray ut. Y yebꞌar ut uchuꞌ inteꞌ intiobꞌ cachar inteꞌ cinturón xeꞌ chembꞌir taca e oro.
REV 15:7 Y inwira inteꞌ tujam e cuatro animalobꞌ xeꞌ bꞌixirobꞌ xeꞌ ixin uyajcꞌu e siete angelobꞌ inteꞌ inteꞌ uvaso xeꞌ chembꞌir taca e oro. Y tunor e vasuobꞌ era bꞌutꞌur taca uqꞌuijnar e Dios xeꞌ turu iraj iraj.
REV 15:8 Y bꞌutcꞌa e templo era taca e bꞌutz lo que war alocꞌoy tama utawarer e Dios y tama ucꞌotorer. Y mamajchi uyubꞌi oꞌchoy tamar este que acꞌapa anumuy tunor e siete cꞌuxner xeꞌ qꞌuecher umen e siete angelobꞌ era.
REV 16:1 Pues entonces umbꞌi inteꞌ nuxi nuc xeꞌ locꞌoy macuir e templo tut e qꞌuin xeꞌ uyare e siete angelobꞌ y che: —Quiquic jochic uqꞌuijnar e Dios lo que ayan tama e siete vaso tama tunor or e rum, che e nuxi nuc era.
REV 16:2 Entonces ixin e bꞌajxan ángel y ujochi lo que ayan tama uvaso tor e rum, y tunor e gente tin e ayan useñair e nuxi lagarto tamarobꞌ y xeꞌ war uyujtzꞌiobꞌ ut e chamen dios xeꞌ chembꞌir bꞌan cocha uwirnar e lagarto cay checta tutobꞌ meyra chec xeꞌ calapir apojwi y xeꞌ acꞌuxun meyra.
REV 16:3 Entonces ixin otronteꞌ ángel y ujochi uvaso tor e mar, y e jaꞌ tama e mar sutpa bꞌan cocha e chꞌich tuaꞌ inteꞌ winic xeꞌ chamesbꞌir, y chamay tunor lo que ayan ani tama e mar xeꞌ bꞌixirobꞌ.
REV 16:4 Entonces ixin otronteꞌ ángel y ujochi uvaso tama tunor e sian xucur y tama tunor unuc e cojnobꞌ, y tunor e sian jaꞌ era sutpa chꞌich.
REV 16:5 Y tamar era umbꞌi ojron e ángel tuaꞌ e jaꞌ era y che: —Erach lo que war ache, Niwinquiraret, tuaꞌ ache juzgar cocha era. Y net erachet tamar lo que abꞌijnu ache era, net xeꞌ turet conda ne mato achena ani or e rum era y xeꞌ turet coner ubꞌan.
REV 16:6 Porque jaxirobꞌ ixin ulocsiobꞌ uchꞌichꞌer tin e quetpobꞌ erach toit y tin e quetpobꞌ profetobꞌ, y tamar era war awajcꞌu tuaꞌ uyuchꞌiobꞌ e jaꞌ xeꞌ sutpa chꞌich porque tawarobꞌ tamar lo que uchiobꞌ, che e ángel tuaꞌ e jaꞌ era.
REV 16:7 Entonces umbꞌi inteꞌ nuc xeꞌ locꞌoy tut e altar xeꞌ che: —Bꞌan ya Niwinquirar Dios xeꞌ meyra ayan acꞌotorer, porque net erachet inyajrer y tamar era erach tunor lo que ache conda ache juzgar, che e nuc era xeꞌ checta umbꞌi tut e altar.
REV 16:8 Entonces ixin otronteꞌ ángel y ujochi uvaso tama e qꞌuin, y e qꞌuin ajcꞌuna ucꞌotorer tuaꞌ uputa tunor e gente bꞌan cocha e cꞌajc.
REV 16:9 Y tunor e winicobꞌ quetpobꞌ purutbꞌir umen uwarar e qꞌuin. Pero mamajchi ubꞌijnu tuaꞌ uyacta umabꞌambꞌanir y nien tuaꞌ utattzꞌi ucꞌabꞌa e Dios, sino que intaca uxejbꞌiobꞌ ut e Dios y cay ojronobꞌ upater tin e ayan ucꞌotorer tujor tunor e sian cꞌuxner era.
REV 16:10 Entonces ixin otronteꞌ ángel y ujochi uvaso tama uturtar e nuxi lagarto, y quetpa incsibꞌan tama tunor or e lugar tiaꞌ war acꞌotori jaxir. Y tunor e gente cay ucꞌuxi or uyacꞌobꞌ umen e sian cꞌuxner era.
REV 16:11 Y cay ucꞌayobꞌ e Dios xeꞌ turu tichan tama tunor e sian cꞌuxner era, y tama tunor e sian chec lo que ayan tamarobꞌ. Pero nien tamar era machi ixto cꞌani uyactobꞌ e sian mabꞌambꞌanir lo que war uchiobꞌ.
REV 16:12 Entonces ixin otronteꞌ ángel y ujochi uvaso tor e nuxi xucur xeꞌ ucꞌabꞌa Eufrates, y tunor e jaꞌ tama e nuxi xucur era cꞌapa taqui tuaꞌ upasi e bꞌir tiaꞌ tuaꞌ axanobꞌ e nuquir reyobꞌ xeꞌ watobꞌ tama e lugar tiaꞌ atobꞌoy watar e qꞌuin.
REV 16:13 Y de allí inwira uxteꞌ mabꞌambꞌan mein xeꞌ bꞌan uwirnarobꞌ cocha incojt pecpec. Locꞌoy incojt pecpec macuir uyej e nuxi chan, y locꞌoy otronteꞌ pecpec macuir uyej e nuxi lagarto xeꞌ locꞌoy macuir e mar, y locꞌoy otronteꞌ pecpec macuir uyej e nuxi lagarto xeꞌ locꞌoy macuir e rum xeꞌ arobꞌna que jax e profeta xeꞌ amajresian ubꞌan.
REV 16:14 Y e uxteꞌ pecpec era jax umeinobꞌ e sian mabꞌambꞌan mein xeꞌ cay uchiobꞌ cora sian milagro. Y e uxteꞌ mein era alocꞌoyobꞌ tuaꞌ umayobꞌ ut tunor e sian rey lo que ayan tama tunor or e rum tuaꞌ umorojse ubꞌobꞌ tuaꞌ uchiobꞌ e tzꞌojyir upater e Dios xeꞌ meyra ayan ucꞌotorer.
REV 16:15 Entonces ojron Cawinquirar y che: “Cꞌaric imener que nen tuaꞌ waten conda mamajchi war ubꞌijnu bꞌan cocha inteꞌ ajxujch. Chojbꞌesbꞌir tunor tin e bꞌixir turu conda inchecta waten y xeꞌ war ucojco ubꞌobꞌ y xeꞌ lapar ubꞌujc xeꞌ jax e cuxtar xeꞌ erach tut e Dios tuaꞌ machi asubꞌajra tut e gente y tuaꞌ machi atajwina que war axana pispis”, che Cawinquirar.
REV 16:16 Entonces e uxteꞌ mabꞌambꞌan mein ixiobꞌ tuaꞌ usicbꞌobꞌ meyra sian soldadobꞌ tuaꞌ umorojsiobꞌ tama e lugar xeꞌ ucꞌabꞌa Armagedón tama e ojroner hebreo.
REV 16:17 Entonces ixin otronteꞌ ángel y ujochi uvaso tama e icꞌar y umbꞌi inteꞌ nuxi nuc xeꞌ locꞌoy tama e turtar xeꞌ turu tama e templo tut e qꞌuin xeꞌ ojron y che: —Cꞌapix chempa tunor, che e nuc era xeꞌ tari tama e turtar.
REV 16:18 Entonces cay jijbꞌi ut e qꞌuin y cay quiricna ut e qꞌuin, y ut e rum cay chincha umen inteꞌ nuxi yujcbꞌar xeꞌ más nojta que tunor e sian yujcbꞌar lo que cay numuy tara tor e rum desde que cay checta e gente tor e rum.
REV 16:19 Y pascꞌa ut e rum tama e nuxi chinam Babilonia y cꞌaspa ut e rum y quetpa uxteꞌ ut. Y tunor e sian chinamobꞌ tama tunor or e rum cꞌapa cucremobꞌ. Y cꞌajpa umen e Dios tunor e mabꞌambꞌanir lo que cay uchiobꞌ e gente tama e nuxi chinam Babilonia, y tamar era e Dios cay uche uyuchꞌiobꞌ inteꞌ vaso xeꞌ bꞌutꞌur taca uqꞌuijnar y taca e jatzꞌuar.
REV 16:20 Y satpa tunor e sian or witzirobꞌ, y bꞌan numuy taca tunor e rum xeꞌ aquetpa tama uyuxin e jaꞌ.
REV 16:21 Y cay ojri cora sian bꞌat tujor e gente xeꞌ tari tut e qꞌuin que bꞌan ubꞌarir cocha inteꞌ quintal. Y e gente tor e rum cay ucꞌayobꞌ e Dios umen que inyaj utajwiobꞌ e sian bꞌat era.
REV 17:1 Entonces tari inteꞌ tujam e siete angelobꞌ xeꞌ war ani uqꞌuechiobꞌ axin inteꞌ inteꞌ uvaso y che: —Lar era. Cꞌani inwirset e jatzꞌuar lo que tuaꞌ acꞌaxi tujor e nuxi chinam xeꞌ turu tutiꞌ inteꞌ nuxi xucur. Pues e nuxi chinam era aquetpa bꞌan cocha inteꞌ ixic xeꞌ ajmabꞌambꞌanir.
REV 17:2 Jax e ixic era xeꞌ cay ucanse e sian reyobꞌ tama tunor or e rum tuaꞌ uchiobꞌ e mabꞌambꞌanir tacar jaxir. Y e gente tama tunor or e rum cay uyusreobꞌ tuaꞌ uchiobꞌ meyra e mabꞌambꞌanir conda cꞌotoy unatobꞌ lo que war uche e ixic era, che e ángel.
REV 17:3 Entonces sutpa inwira tama nimayjut lo que Unawalir e Dios cay uwirsen y qꞌuejcha ixien tama inteꞌ choquem lugar umen inteꞌ ángel. Y yajaꞌ cay inwira que ayan inteꞌ ixic xeꞌ turu tujor inteꞌ nuxi lagarto xeꞌ chacchac upat y xeꞌ ayan siete ujor y diez ucacho y xeꞌ ayan lo que tzꞌijbꞌabꞌir tamar xeꞌ uqꞌuijnes e Dios.
REV 17:4 Y ubꞌujc e ixic era chacpurem uwirnar. Y tama ubꞌujc ayan ubꞌan lo que chacchac ut y ayan lo que incsibꞌan ut. Y tunor lo que chꞌur tut unuc xeꞌ jax uyujy y uyarita chembꞌir taca e oro. Y tamar uyujy y uyarita era ayan e tun xeꞌ galan ejpray y ayan e tun yujy xeꞌ ucꞌabꞌa perla. Y tamar ucꞌabꞌ qꞌuecher umen inteꞌ vaso xeꞌ chembꞌir taca e oro xeꞌ bꞌutꞌur taca tunor e sian mabꞌambꞌanir lo que cay uche e ixic era tama uwerir.
REV 17:5 Y inwira que ayan lo que tzꞌijbꞌabꞌir tut ujor e ixic era xeꞌ mucur lo que war che xeꞌ che: E NUXI BABILONIA, UTUꞌ E SIAN AJNAJTIR IXICTAC, y UTUꞌ TAMA TUNOR TIN E WAR UCHIOBꞌ E MABꞌAMBꞌANIR XEꞌ MÁS CALAPIR TAMA TUNOR OR E RUM. Bꞌan chꞌar tzꞌijbꞌabꞌir tut ujor e ixic era.
REV 17:6 Y inwira que war acaray e ixic pero que war acaray umen uchꞌichꞌer tin e erach tut e Dios y umen uchꞌichꞌer tin e chamesna umen que war uchecsuobꞌ uyojroner e Jesús. Pero conda inwira tunor era bꞌacten.
REV 17:7 Entonces uyaren e ángel y che: —Y ¿tucꞌa tuaꞌ war ibꞌacta tamar era? Cꞌani inchectes toit era lo que war che e ixic era y lo que war che e nuxi lagarto xeꞌ ayan siete ujor y diez ucacho.
REV 17:8 Pues e nuxi lagarto lo que awira turu ani, y machi turu coner, pero cꞌanix alocꞌoy otronyajr tama uchꞌenar e diablo conda tuaꞌ acꞌapa atijresna inyajrer. Y e gente tara tor e rum cꞌani abꞌacta uwirobꞌ ut e nuxi lagarto era otronyajr. Pues tunor e gente era jax xeꞌ majax tzꞌijbꞌabꞌir ucꞌabꞌobꞌ tama e jun tuaꞌ e cuxtar xeꞌ machi tuaꞌ acꞌapa conda ne mato achena ani or e rum. Y tunorobꞌ cꞌani abꞌacta uwirobꞌ ut e nuxi lagarto xeꞌ turu ani y de allí machi turu y xeꞌ cꞌanix asutpa achecta tutobꞌ otronyajr.
REV 17:9 ’Pues ucꞌani unatanyaj e Dios tuaꞌ cacꞌotoy canata lo que war che tunor era. E siete jorobꞌ tama e nuxi lagarto era war che que ayan siete or e witzir tama e nuxi chinam tiaꞌ turu e ixic xeꞌ ajmabꞌambꞌanir. Y e siete jorobꞌ era war che ubꞌan que ayan siete reyobꞌ tamar.
REV 17:10 Cinco tujam e siete reyobꞌ era chamay ixto, y ayan inteꞌ xeꞌ warto acꞌotori era, y ayan inteꞌ xeꞌ merato achecta. Pero conda achecta jaxir xeꞌ jax ucꞌapesnibꞌir tujam e siete reyobꞌ era, machi tuaꞌ eixna acꞌotori.
REV 17:11 Y de allí tuaꞌ watar otronteꞌ rey xeꞌ jax e nuxi lagarto xeꞌ turu ani y xeꞌ machi turu coner. Y e nuxi lagarto era xeꞌ jax e rey número ocho jax inteꞌ tujam e siete reyobꞌ ubꞌan. Y conda achecta otronyajr ucꞌani tuaꞌ acꞌapa atijresna inyajrer wacchetaca.
REV 17:12 ’Y e diez cacho lo que awira era jax diez reyobꞌ xeꞌ merato achectobꞌ tuaꞌ acꞌotoriobꞌ. Jaxirobꞌ tuaꞌ aꞌjcꞌunobꞌ ucꞌotorer cocha inteꞌ rey pero machi tuaꞌ acꞌotoriobꞌ meyra tiempo. Y cꞌani acꞌotoriobꞌ taca e nuxi lagarto.
REV 17:13 Y cꞌapa ubꞌijnuobꞌ e diez reyobꞌ era que cꞌani uyajcꞌuobꞌ tunor ucꞌotorerobꞌ e nuxi lagarto.
REV 17:14 Cꞌani uchiobꞌ e tzꞌojyir upater e Cordero, pero e Cordero taca tunor tin e war axiobꞌ tupat cꞌani ucucruobꞌ tunorobꞌ era. Porque e Cordero jax Uwinquirar tujor tunor tin e ajwinquirarobꞌ, y jaxir jax e más nuxi Rey xeꞌ aquetpa tujor tunor tin e reyobꞌ. Y tin e war axiobꞌ tupat e Cordero jax taca tin e pejcbꞌirobꞌ y xeꞌ sicbꞌabꞌirobꞌ umener, y tunorobꞌ war axanobꞌ erach tut e Dios, che e ángel.
REV 17:15 Pues entonces e ángel ojron tacaren otronyajr y che: —Lo que war che e nuxi xucur lo que awira era tiaꞌ turu e ixic xeꞌ ajmabꞌambꞌanir, jax tunor e sian gente tin e tari tama tunor e chꞌajnarir, y tama tunor e ojroner, y tama tunor e sian chinamobꞌ lo que ayan tama tunor or e rum.
REV 17:16 Y e nuxi lagarto y e diez cacho era xeꞌ jax e diez reyobꞌ cꞌani uxejbꞌiobꞌ ut e ixic xeꞌ ajmabꞌambꞌanir y cꞌani axin uchoquiobꞌ y uyactobꞌ pispis y axin ucꞌuxiobꞌ uwerir y axin uputobꞌ tunor ubꞌaquer taca e cꞌajc.
REV 17:17 Pues e Dios uturbꞌa tama uyalmobꞌ tuaꞌ acꞌapa uchiobꞌ bꞌan taca cocha ucꞌani jaxir. Y bꞌan numuy conda e diez reyobꞌ quetpobꞌ tama intera ubꞌijnusiaj tuaꞌ uyajcꞌuobꞌ tunor ucꞌotorerobꞌ e nuxi lagarto. Y bꞌan tuaꞌ uchiobꞌ este que acꞌapa achempa tunor lo que arobꞌnobꞌ umen e Dios.
REV 17:18 Pues e ixic era xeꞌ ajmabꞌambꞌanir xeꞌ awira jax e nuxi chinam xeꞌ war acꞌotori tujor tunor e reyobꞌ lo que ayan tama tunor or e rum. Bꞌan uyaren e ángel.
REV 18:1 Entonces inwira otronteꞌ ángel xeꞌ ecmay tari tut e qꞌuin xeꞌ meyra ayan ucꞌotorer. Y or e rum janchꞌaquesna umen utawarer e ángel era.
REV 18:2 Entonces aru jaxir taca inteꞌ nuxi nuc y che: —Cꞌapa tijresna ixto yaꞌ e nuxi chinam. Cꞌapa cucrema inyajrer e nuxi chinam xeꞌ ucꞌabꞌa Babilonia. Jax taca e sian mein xeꞌ mabꞌambꞌan tuaꞌ aturuanobꞌ tama e lugar era coner, y aquetpa ulugarir tiaꞌ tuaꞌ asiobꞌ e sian mabꞌambꞌan mein coner, y tuaꞌ aquetpa e lugar tiaꞌ uchiobꞌ usijcobꞌ e mut xeꞌ más intuj utobꞌ bꞌan cocha e usij.
REV 18:3 Porque tunor e sian chinamobꞌ lo que ayan tara tor e rum cay uyusre uchiobꞌ e mabꞌambꞌanir umen que bꞌan cansenobꞌ umen e chinam Babilonia. Y tunor e nuquir reyobꞌ tara tor e rum ixin uchiobꞌ e mabꞌambꞌanir taca e ixic era. Y tunor e sian ajchonmar tor e rum cꞌotoy quetpobꞌ rico umen lo que uyusre uchꞌamiobꞌ e gente tama e nuxi chinam era. Bꞌan uyaren e ángel.
REV 18:4 Entonces umbꞌi otronteꞌ nuc xeꞌ tari tut e qꞌuin xeꞌ ojron tacaren y che: —Loqꞌuenic wacchetaca tama e chinam era tunorox xeꞌ tanibꞌa tuaꞌ machi iche e mabꞌambꞌanir bꞌan cocha war uchiobꞌ jaxirobꞌ, y tuaꞌ machi ichꞌami e sian cꞌuxner lo que tuaꞌ uchꞌamiobꞌ jaxirobꞌ.
REV 18:5 Porque meyra ayan umabꞌambꞌanir este que bꞌoro ixin tichan tut e qꞌuin. Y cꞌar umen Catata Dios tunor e mabꞌambꞌanir era lo que cay uchiobꞌ.
REV 18:6 Ucꞌani tuaꞌ asutpa uyeror ut tama tunor lo que e chinam Babilonia cay uchiobꞌ upater e inmojr gente. Y tunor lo que uchiobꞌ upater e inmojr, jaxirobꞌ tuaꞌ asutpa atojyobꞌ uyeror chajr tamar. Y cꞌani aꞌjcꞌuna tuaꞌ uyuchꞌiobꞌ chajr xeꞌ más calapir tamar lo que cay uche uyuchꞌiobꞌ e inmojr.
REV 18:7 Y cocha meyra cay utattzꞌi ubꞌa e chinam era que ayan utumin y que ayan meyra utawarer y que galanic e bꞌujc xeꞌ lapar umener, pues bꞌan cocha era tuaꞌ aꞌjcꞌuna meyra ucꞌuxner y cꞌani ajajtzꞌa nojta. Pues e chinam era bꞌan cocha inteꞌ ixic xeꞌ ojron jax taca y che: “Tara turen bꞌan cocha inteꞌ ajcꞌotorer. Majaxen inteꞌ ixic xeꞌ chamen uviejo, y tamar era nen matucꞌa tamar tuaꞌ innumse nibꞌa”, che jaxir jax taca.
REV 18:8 Y tamar era cꞌani acꞌaxi meyra sian cꞌuxner tama ujor wacchetaca. Porque watar e chamer, y watar e cꞌuxner, y watar e winar, y e chinam era cꞌani acꞌapa apurutna inyajrer taca e cꞌajc. Bꞌan tuaꞌ anumuy porque meyra ayan ucꞌotorer Cawinquirar Dios xeꞌ jax xeꞌ tuaꞌ uche juzgar e chinam era tama tunor e mabꞌambꞌanir lo que cay uchiobꞌ. Bꞌan che e nuc era xeꞌ tari tut e qꞌuin.
REV 18:9 Entonces tunor e sian reyobꞌ xeꞌ turobꞌ tara tor e rum xeꞌ cay uyose ubꞌobꞌ taca e ixic era y xeꞌ cay uchꞌamiobꞌ meyra riqueza tuaꞌ cꞌani aruobꞌ y cꞌani aquetpobꞌ tzajtaca utobꞌ conda uwirobꞌ alocꞌoy e bꞌutz tama e chinam era conda war acꞌapa apuruy.
REV 18:10 Pero e sian reyobꞌ cꞌani aquetpobꞌ innajt tut e chinam era umen que war ubꞌacriobꞌ e jatzꞌuar lo que war uchꞌami era. Y jaxirobꞌ tuaꞌ oꞌjronobꞌ y chenobꞌ: —Tzajtaca iut xeꞌ turox tama e chinam Babilonia, nox xeꞌ meyra ayan ani icꞌotorer. Pero era wacchetaca cꞌaxi e jatzꞌuar tama ijor. Bꞌan tuaꞌ oꞌjronobꞌ tama e día yajaꞌ.
REV 18:11 Y bꞌan ubꞌan tuaꞌ uchiobꞌ e sian ajchonmar tama tunor or e rum; cꞌani aruobꞌ meyra y cꞌani aquetpobꞌ tzajtaca utobꞌ umen lo que war unumse ubꞌa e nuxi chinam era, porque mamajchi más tuaꞌ umani lo que war ani uchoniobꞌ e sian ajchonmar era.
REV 18:12 Y mamajchi más tama e chinam era erer umaniobꞌ e oro y nien e plata y nien e tun yujy. Y mamajchi más tama e chinam era tuaꞌ umaniobꞌ e bꞌujc xeꞌ galan y xeꞌ meyra atujri. Y mamajchi más tama e chinam era tuaꞌ umaniobꞌ e teꞌ xeꞌ ayan utacnar y xeꞌ ojtzꞌun y xeꞌ meyra atujri. Y mamajchi más tama e chinam era tuaꞌ umaniobꞌ lo que chembꞌir taca e marfil, y nien lo que chembꞌir taca e teꞌ xeꞌ galan uwirnar cocha e chacal teꞌ. Y mamajchi más tama e chinam era tuaꞌ umaniobꞌ lo que chembꞌir taca e taqꞌuin xeꞌ ucꞌabꞌa bronce, y nien lo que chembꞌir taca e taqꞌuin, y nien lo que chembꞌir taca e tun xeꞌ galan ut xeꞌ ucꞌabꞌa mármol.
REV 18:13 Y mamajchi más tama e chinam era tuaꞌ umaniobꞌ e canela, y nien e cꞌopot xeꞌ galan ojtzꞌun, y nien e ujtzꞌubꞌ, y nien e perfume. Y mamajchi más tuaꞌ umaniobꞌ e vino, y nien e aceite, y nien e harina fina, y nien e trigo. Y mamajchi más tama e chinam era tuaꞌ umaniobꞌ e wacax, y nien e oveja, y nien e chij, y nien e carretón. Y mamajchi más tama e chinam era tuaꞌ umaniobꞌ e gente xeꞌ aquetpobꞌ bꞌan cocha inteꞌ man xeꞌ mambꞌir inyajrer.
REV 18:14 Y cꞌani aꞌrobꞌna e chinam era umen e gente y che: —Pues tunor lo que galan xeꞌ cay iyusre tama iwalma tuaꞌ ichꞌami cꞌapa satpa. Y tunor e sian tumin lo que ayan ani tibꞌa y tunor e tattzꞌarsiaj lo que ayan ani tibꞌa cꞌapa tijrpa. Y mixto cocha tuaꞌ ixsutpa itajwi otronyajr tunor e sian riqueza lo que ayan ani tibꞌa. Bꞌan chenobꞌ tama e chinam era.
REV 18:15 Entonces e sian ajchonmarobꞌ tin e cay chonmobꞌ tama e chinam era y xeꞌ quetpobꞌ rico umener, quetpobꞌ najtir tut e chinam era umen que war ubꞌacriobꞌ tunor e jatzꞌuar lo que war aꞌjcꞌuna e chinam era. Y tamar era cꞌani aruobꞌ y cꞌani aquetpobꞌ tzajtaca utobꞌ tama tunor era.
REV 18:16 Y cꞌani oꞌjronobꞌ tama e chinam era y che: —Tzajtaca iut nox xeꞌ turox ani tama e nuxi chinam era. Turox ani bꞌan cocha inteꞌ ixic xeꞌ galan bꞌujcsebꞌir taca e bꞌujc xeꞌ meyra atujri y xeꞌ chacpurem uwirnar y xeꞌ chacchac ut. Y bꞌanox ani cocha inteꞌ ixic xeꞌ uturbꞌa lo que chembꞌir taca e oro y lo que ayan taca e tun xeꞌ ejpray ut xeꞌ meyra atujri y lo que ayan taca e tun yujy xeꞌ ucꞌabꞌa perla.
REV 18:17 Pero wacchetaca cꞌapa satpa tunor e sian tumin era. Bꞌan tuaꞌ oꞌjronobꞌ tunor e sian ajchonmarobꞌ era. Y tunor tin e war uqꞌuechiobꞌ axin inteꞌ barco tor e jaꞌ cꞌani aquetpobꞌ najtir tut e chinam era. Y bꞌan tuaꞌ uchiobꞌ tunor tin e ajwinquirobꞌ tama inteꞌ barco, y tunor e ajtacarsiajobꞌ tamar, y tunor tin e war axiobꞌ tamar; tunorobꞌ tuaꞌ aquetpobꞌ najtir tut e chinam era.
REV 18:18 Y conda uwirobꞌ e sian bꞌutz lo que war alocꞌoy tama e nuxi chinam era xeꞌ war apuruy, tunorobꞌ tuaꞌ aruobꞌ y chenobꞌ: —Matucꞌa otronteꞌ chinam xeꞌ lar ani cocha era, chenobꞌ.
REV 18:19 Y tunor tin e axanobꞌ tor e barco cocha era axin uyariobꞌ e tanlum tama ujorobꞌ tuaꞌ uchecsu ubꞌobꞌ que tzajtaca utobꞌ y axin aruobꞌ tamar lo que war unumse ubꞌa e nuxi chinam era y che: —Tzajtaca utobꞌ tunor tin e turobꞌ tama e chinam era. Pues tunor tin e ayan ubarco xeꞌ axanobꞌ tor e jaꞌ bꞌoro ani meyra utumin umen lo que cay uchoniobꞌ tama e nuxi chinam era. Pero era wacchetaca tijrpa y satpa tunor lo que ayan ani tamar. Bꞌan tuaꞌ oꞌjronobꞌ e winicobꞌ era.
REV 18:20 Y de allí ojron inteꞌ nuc xeꞌ tari tut e qꞌuin y che: “Pero nox xeꞌ turox tichan tut e qꞌuin tzayenic tamar lo que numuy tama e nuxi chinam era. Tzayenic nox xeꞌ tuox e Dios, y nox xeꞌ apostolox, y nox xeꞌ cay ichecsu tut e gente lo que arobꞌnox umen e Dios. Porque Cadiosir ixin uwatzꞌi e nuxi chinam era tama tunor lo que cay uche ipater.” Bꞌan che e nuc era.
REV 18:21 Entonces inteꞌ ángel xeꞌ ayan meyra ucꞌotorer uchꞌuyi inteꞌ nuxi tun y utobꞌse ixin tama e mar. Entonces ojron e ángel y che: —Bꞌan tuaꞌ axin achena tama e nuxi chinam Babilonia, porque cꞌani acucurna axin tuaꞌ acꞌapa inyajrer y ma tiaꞌ tuaꞌ asutpa eꞌrna ut otronyajr.
REV 18:22 Y ma tiaꞌ más tuaꞌ oꞌbꞌna e música tama ucalle e chinam era, y machi tuaꞌ oꞌbꞌna e lajbꞌar tama e arpa y nien tama e flauta y nien tama e corneta. Y ma tiaꞌ más tuaꞌ oꞌbꞌna aꞌjca inteꞌ ajpatnar y nien ut e chaꞌ machi tuaꞌ oꞌbꞌna aꞌjca tiaꞌ war amujxa ut e trigo tamar.
REV 18:23 Y machi ixto tuaꞌ ajanchꞌacnesna e chinam era umen inteꞌ cꞌajc. Y machi ixto tuaꞌ oꞌbꞌna que ayan inteꞌ nojqꞌuin tuaꞌ inteꞌ nujbꞌiar. Pues tunor e sian ajchonmarobꞌ xeꞌ turobꞌ ani tama e chinam era quetpobꞌ nuquir ajcꞌotorerobꞌ umen e sian chonmar lo que cay uchiobꞌ tama tunor or e rum. Y cay majresna umenerobꞌ tunor e sian chinamobꞌ tama tunor or e rum umen tunor e ajbꞌaxoner lo que ayan tama e chinam era. Bꞌan che e ángel era xeꞌ ayan meyra ucꞌotorer.
REV 18:24 Pues tama e nuxi chinam Babilonia era tajwina uchꞌichꞌer tunor tin e cay uchecsuobꞌ tut e gente lo que arobꞌnobꞌ umen e Dios, y tajwina uchꞌichꞌer tunor tin e tuobꞌ e Dios. Y tajwina uchꞌichꞌer tunor tin e chamesnobꞌ tama tunor or e rum ubꞌan.
REV 19:1 Pues entonces nacpat era cay umbꞌi que war oꞌjronobꞌ meyra gente taca inteꞌ nuxi nuc tut e qꞌuin xeꞌ chenobꞌ: Catattzꞌi ucꞌabꞌa Cadiosir xeꞌ ixin ucorpeson, y xeꞌ meyra ayan utawarer y xeꞌ meyra ayan ucꞌotorer.
REV 19:2 Pues erach Cadiosir inyajrer y tamar era erach tunor lo que uche conda uche juzgar. Jaxir ixin uwatzꞌi e nuxi chinam Babilonia xeꞌ quetpa bꞌan cocha inteꞌ ixic xeꞌ ajmabꞌambꞌanir, porque e ixic era ixin ucanse tunor e sian chinamobꞌ tama tunor or e rum tuaꞌ uchiobꞌ e mabꞌambꞌanir. Y e ixic era ixin uchamse meyra tin e cay uchecsu uyojroner e Dios, y tamar era tojya uyeror ut tamar lo que uche umen e Dios. Bꞌan che e sian gente xeꞌ turobꞌ tut e qꞌuin.
REV 19:3 Y sutpa ojronobꞌ otronyajr y chenobꞌ: —Catattzꞌi ucꞌabꞌa Cadiosir xeꞌ meyra ayan utawarer, pues e sian bꞌutz lo que war alocꞌoy tama e chinam era ma tiaꞌ tuaꞌ acꞌapa alocꞌoy tama tunor e tiempo, che e sian gente era xeꞌ turobꞌ tut e qꞌuin.
REV 19:4 Y tamar era e veinticuatro nuquir winicobꞌ taca e cuatro animalobꞌ xeꞌ bꞌixirobꞌ pacwanobꞌ tut e rum tuaꞌ uyujtzꞌiobꞌ ut e Dios xeꞌ turu tor uturtar y chenobꞌ: —¡Bꞌan ya! Catattzꞌi ucꞌabꞌa Cadiosir, chenobꞌ.
REV 19:5 Entonces ubꞌna locꞌoy inteꞌ nuc xeꞌ tari tut e turtar xeꞌ che: Tattzꞌic ucꞌabꞌa Cadiosir tunorox xeꞌ manox tuaꞌ y xeꞌ war ibꞌacre ut, motor jay nuquir winicox y motor jay chuchuox. ¡Tattzꞌic ucꞌabꞌa! che e nuc xeꞌ tari tut e turtar.
REV 19:6 Entonces umbꞌi lo que bꞌan uyubꞌnar cocha unuc meyra gente xeꞌ war oꞌjronobꞌ taca inteꞌ nuxi nuc, y bꞌan uyubꞌnar cocha inteꞌ nuxi cojn, y bꞌan uyubꞌnar cocha conda war aquiricna ut e qꞌuin y che: Catattzꞌi ucꞌabꞌa Cawinquirar Dios xeꞌ meyra ayan ucꞌotorer, porque jaxir war acꞌotori.
REV 19:7 Tzayenic tunorox. Bꞌutꞌic iwalma taca e tzayer y catattzꞌi ucꞌabꞌa Cadiosir porque cꞌotix e hora tuaꞌ acay e nojqꞌuin tama e nujbꞌiar tuaꞌ e Cordero, y tin e tuaꞌ anujbꞌi tacar cꞌapa ustana.
REV 19:8 Jaxir ajcꞌuna tuaꞌ ulapi e bꞌujc xeꞌ ejpray ut y xeꞌ galan sacsac ut. Bꞌan cocha era ajcꞌuna ubꞌujc porque tunor tin e tuobꞌ e Dios pojcbꞌirobꞌ tama uchꞌichꞌer e Jesucristo tuaꞌ uyubꞌi axanobꞌ erach tut e Dios. Bꞌan che lo que bꞌan uyubꞌnar cocha meyra gente xeꞌ war oꞌjronobꞌ.
REV 19:9 Entonces uyaren e ángel y che: —Tzꞌijbꞌan e ojroner era: “Tzayicobꞌ tunor tin e pejcnobꞌ tuaꞌ acꞌotoyobꞌ tama e nojqꞌuin tama unujbꞌiar Cawinquirar xeꞌ jax e Cordero”, che e ángel. Y uyaren otronyajr y che: —Erach ixto tunor e ojroner era xeꞌ tuaꞌ e Dios, che e ángel.
REV 19:10 Entonces nen cotuanen tut e ángel era tuaꞌ unjtzꞌi ut, pero jaxir uyaren y che: —Ira ache cocha era porque nen manen tuaꞌ e Dios bꞌan cocha net y tunor iwermanuobꞌ xeꞌ war acꞌupseyanobꞌ tut lo que chectesna tama e Jesús. Ujtzꞌin ut e Dios jax taca, che e ángel. Pues jax e checsuyaj tama e Jesús xeꞌ axin ubꞌijres tunor tin e profetobꞌ.
REV 19:11 Entonces inwira que pasar ut e qꞌuin y checta inteꞌ chij xeꞌ sacsac ut. Y ayan inteꞌ xeꞌ turu tujor e chij era xeꞌ ucꞌabꞌa: “Jaxir xeꞌ erach y xeꞌ machi amajresian.” Jaxir uche jax taca lo que erach conda uche juzgar y conda uche e tzꞌojyir.
REV 19:12 Y unacꞌut bꞌan uwirnar cocha uyamir e cꞌajc, y ayan meyra corona tama ujor. Y ayan inteꞌ cꞌabꞌa xeꞌ tzꞌijbꞌabꞌir tama ut ujor xeꞌ mamajchi unata tucꞌa war che, sino que jax taca jaxir unata.
REV 19:13 Y e bꞌujc xeꞌ lapar umen bꞌombꞌir ut taca e chꞌich, y ayan ucꞌabꞌa xeꞌ jax: “Uyojroner e Dios.”
REV 19:14 Y ayan meyra e angelobꞌ xeꞌ war axiobꞌ tupat jaxir bꞌan cocha e sian soldadobꞌ conda axiobꞌ tupat uwinquir. Y sacsac ubꞌujcobꞌ e soldadobꞌ era y ejpray ut. Y tunorobꞌ turobꞌ tujor inteꞌ inteꞌ uchijobꞌ xeꞌ sacsac ut ubꞌan.
REV 19:15 Y tama uyej Uwinquir tunor e sian angelobꞌ era alocꞌoy inteꞌ machit xeꞌ bien jucbꞌir. Y tacar umachit era cꞌani ucucru tunor e sian chinamobꞌ lo que ayan tara tor e rum. Y jaxir tuaꞌ acꞌotori tujor tunor e chinamobꞌ era bꞌan cocha jay war uqꞌueche axin inteꞌ bꞌoyteꞌ xeꞌ chembꞌir taca e taqꞌuin tujor tunor e chinamobꞌ era. Y meyra tuaꞌ achecta uqꞌuijnar e Dios tujor tunor e sian chinamobꞌ era umen Uwinquir tunor e sian angelobꞌ era. Pues tunor era tuaꞌ anumuy conda axin achecta uqꞌuijnar e Dios xeꞌ meyra ayan ucꞌotorer.
REV 19:16 Y tamar ubꞌujc Uwinquir era chꞌar tzꞌijbꞌabꞌir ucꞌabꞌa xeꞌ che: “Jax era e más nuxi Rey xeꞌ aquetpa tujor tunor tin e reyobꞌ, y jax era tin e aquetpa Uwinquirir tujor tunor tin e ajwinquirarobꞌ.” Jax lo que chꞌar tzꞌijbꞌabꞌir tamar ubꞌujc y tamar ut uyaꞌ ubꞌan.
REV 19:17 Entonces inwira que ayan inteꞌ ángel xeꞌ turu tama ut e qꞌuin xeꞌ ixin upejca tunor e sian mut lo que ayan xeꞌ war atobꞌoy axin tama e icꞌar y che: —Laric y morojsenic ibꞌa tuaꞌ ixweꞌ tama e wiar lo que Cadiosir cꞌani uche.
REV 19:18 Laric era y nox tuaꞌ icꞌuxi uwerir e sian rey, y uwerir uwinquir e soldadobꞌ, y uwerir e sian winicobꞌ xeꞌ aqꞌuecꞌo. Y nox tuaꞌ icꞌuxi uwerir e sian chij, y uwerir e ajyum chij ubꞌan. Laric era y cꞌuxic uwerir tunor era motor jay ayan uwinquir o jay matucꞌa uwinquir, y motor tin e chuchu winicobꞌ tama ucꞌampibꞌir o jay nuquir winicobꞌ, che e ángel uyare e sian mut era.
REV 19:19 Y nacpat era inwira que cay umorojse ubꞌobꞌ e nuxi lagarto taca tunor e sian reyobꞌ tara tor e rum y taca tunor e sian soldadobꞌ xeꞌ tuobꞌ tuaꞌ axin uchiobꞌ e tzꞌojyir upater tin e turu tujor e chij xeꞌ sacsac ut y upater tunor e sian soldadobꞌ xeꞌ turobꞌ tacar.
REV 19:20 Pero cꞌapa cucurna e nuxi lagarto xeꞌ locꞌoy macuir e jaꞌ y cajcha. Y cajcha ubꞌan e nuxi lagarto xeꞌ locꞌoy macuir e rum xeꞌ jax e profeta xeꞌ amajresian. Jaxir jax tin e cay uche meyra milagro taca ucꞌotorer e bꞌajxan nuxi lagarto y tamar era cay umajres meyra gente xeꞌ jax tin e ixin uchꞌamiobꞌ useñair e nuxi lagarto y xeꞌ cay uyujtzꞌiobꞌ ut e chamen dios xeꞌ chembꞌir bꞌan cocha uwirnar. Entonces e nuxi lagarto taca e profeta xeꞌ amajresian jujra ixiobꞌ bꞌixir tama e cꞌajc xeꞌ war atzꞌajbꞌa taca e azufre.
REV 19:21 Y e inmojr xeꞌ ixiobꞌ tupat e nuxi lagarto era chamesnobꞌ taca e machit lo que locꞌoy tama uyej jaxir xeꞌ turu tujor e chij. Y tunor e sian mut cay wiobꞌ este que cꞌapa bꞌutcꞌa unacꞌobꞌ taca e sian wer tuaꞌ tunor e gente xeꞌ chamesnobꞌ era.
REV 20:1 Pues entonces inwira inteꞌ ángel xeꞌ war alocꞌoy tut e qꞌuin xeꞌ war uqꞌueche axin inteꞌ llave xeꞌ ayan inteꞌ nuxi cadena tamar xeꞌ tuaꞌ upasi uchꞌenar e diablo xeꞌ jax inteꞌ nuxi chꞌen que mamajchi unata cobꞌa utamir.
REV 20:2 Entonces ixin e ángel era y ucachi e nuxi chan xeꞌ jax e chan xeꞌ turu tama ucajyesnibꞌir or e rum era xeꞌ ucꞌabꞌa Satanás y xeꞌ aꞌrobꞌna e diablo. Y jaxir tuaꞌ aquetpa cachar taca inteꞌ cadena este que acꞌapa 1,000 año.
REV 20:3 Entonces e ángel utobꞌse ixin e diablo tama e nuxi chꞌen que mamajchi unata cobꞌa utamir. Y de allí ixin umaqui e chꞌen era y uturbꞌa inteꞌ sello tut e puerta tuaꞌ aquetpa chequer que ma erer apascꞌa e puerta era. Y tamar era e diablo machi ixto uyubꞌi umajres tunor e sian chinamobꞌ tara tor e rum. Pero conda atzꞌacta 1,000 año cꞌani asutpa abꞌajna e diablo otronyajr tuaꞌ alocꞌoy axin cora, pero tama imbꞌijc taca e tiempo.
REV 20:4 Y de allí inwira que ayan cora turtar y que ayan tin e turobꞌ tamar xeꞌ jax xeꞌ ajcꞌunobꞌ e cꞌotorer umen e Dios tuaꞌ uchiobꞌ juzgar tunor e gente. Y inwira ubꞌan tunor uyalmobꞌ tin e chamesnobꞌ conda xujra ujorobꞌ umen que war acꞌupseyanobꞌ tut lo que chectesna tama e Jesús y umen que war uchecsuobꞌ uyojroner e Dios axin. Pues jaxirobꞌ era jax tin e ma tiaꞌ uyujtzꞌiobꞌ ut e chamen dios xeꞌ chembꞌir cocha uwirnar e nuxi lagarto y nien machi uyactobꞌ tuaꞌ atzꞌijbꞌna ucꞌabꞌa e nuxi lagarto tut ujorobꞌ o nien tama ucꞌabꞌobꞌ. Y jaxirobꞌ sutpa bꞌixcꞌobꞌ tujam e chamenobꞌ y cay cꞌotoriobꞌ taca e Cristo tama 1,000 año.
REV 20:5 Pero e inmojr chamenobꞌ machi tuaꞌ abꞌixcꞌobꞌ este que acꞌapa anumuy 1,000 año. Pero e bꞌixcꞌar era jax xeꞌ tuaꞌ anumuy bꞌajxan conda merato acay 1,000 año. Pues era jax e bꞌajxan bꞌixcꞌar.
REV 20:6 Tzayicobꞌ tunor tin e asutpa abꞌixcꞌobꞌ tama e bꞌajxan bꞌixcꞌar era y erachobꞌ. Pues e otronteꞌ chamer xeꞌ watar matucꞌa ucꞌotorer tujorobꞌ, sino que tuaꞌ aquetpobꞌ bꞌan cocha sacerdotiobꞌ tut e Dios y tut e Cristo. Y tuaꞌ acꞌotoriobꞌ taca e Cristo tama 1,000 año.
REV 20:7 Pues entonces conda acꞌapa anumuy 1,000 año era e Satanás tuaꞌ abꞌajna otronyajr tiaꞌ cachar ani chꞌar.
REV 20:8 Y jaxir tuaꞌ axin umajres tunor e sian chinamobꞌ lo que ayan tama tunor or e rum. Y axin umajres tin e war acꞌotori tujor e lugar Gog y tin e war acꞌotori tujor e lugar Magog. Y cꞌani umorojse tunor e sian soldadobꞌ xeꞌ meyra ayan bꞌan cocha e jiꞌ lo que ayan tutiꞌ e xucur.
REV 20:9 Entonces e sian soldadobꞌ era xanobꞌ meyra tama or e rum tuaꞌ axin uxojyobꞌ e chinam xeꞌ más inchoj ut umen e Dios. Pero e Dios uyebꞌta tari e cꞌajc tut e qꞌuin y cꞌapa purutnobꞌ inyajrer tunor e sian soldadobꞌ era.
REV 20:10 Y e diablo xeꞌ cay umajres tunor e gente tor e rum cꞌapa jujra tama e cꞌajc xeꞌ war atzꞌajbꞌa taca e azufre tiaꞌ chꞌarix e nuxi lagarto y e profeta xeꞌ amajresian ubꞌan. Y yajaꞌ taca tuaꞌ aquetpobꞌ tama e cꞌajc tiaꞌ war apuruyobꞌ tama e día y tama e acbꞌar iraj iraj ejcꞌar ejcꞌar.
REV 20:11 Y de allí inwira inteꞌ nuxi turtar xeꞌ sacsac ut y ayan inteꞌ xeꞌ turu tamar. Y meyra ayan utawarer este que cꞌapa satpa tut tunor or e rum y tunor ut e qꞌuin. Y ma tiaꞌ irna más.
REV 20:12 Y inwira que warobꞌ e sian chamenobꞌ tut e turtar era tiaꞌ turu Catata Dios. Y ayan tin e nuquir winicobꞌ, y ayan tin e majax nojta ucꞌampibꞌirobꞌ xeꞌ warobꞌ tut e turtar era. Y cay pajsa ut cora jun y de allí pajsa ut otronteꞌ jun xeꞌ tuaꞌ e cuxtar xeꞌ machi tuaꞌ acꞌapa. Y de allí tunor e chamenobꞌ era chenobꞌ juzgar inteꞌ intiobꞌ tamar lo que cay uchiobꞌ conda turobꞌ ani tara tor e rum y tamar lo que quetpa tzꞌijbꞌabꞌir tama tunor e jun era.
REV 20:13 Y tunor tin e chamayobꞌ macuir e jaꞌ tama e mar sutpa bꞌixcꞌobꞌ tujam e chamenobꞌ tuaꞌ awawanobꞌ tut e Dios, y tunor tin e turobꞌ tama e lugar tiaꞌ axin e chamenobꞌ sutpa bꞌixcꞌobꞌ tujam e chamenobꞌ tuaꞌ awawanobꞌ tut e Dios ubꞌan. Y inteꞌ intiobꞌ chenobꞌ juzgar tamar lo que cay uchiobꞌ conda turobꞌto ani tara tor e rum.
REV 20:14 Y nacpat era jujrobꞌ inyajrer tunor ucꞌotorer e chamer y e lugar tiaꞌ turobꞌ ani e chamenobꞌ tama e cꞌajc xeꞌ atzꞌajbꞌa taca e asufre. Y e cꞌajc xeꞌ atzꞌajbꞌa taca e asufre era jax e chateꞌ chamer.
REV 20:15 Y tama e cꞌajc era ubꞌan jujra ixiobꞌ tunor tin e machi tzꞌijbꞌna ucꞌabꞌobꞌ tama e jun tuaꞌ e cuxtar xeꞌ machi tuaꞌ acꞌapa.
REV 21:1 Y de allí inwira que imbꞌutz tunor ut e qꞌuin y que imbꞌutz tunor or e rum, porque cꞌapa satpa e bꞌajxan ut e qꞌuin y cꞌapa satpa e bꞌajxan or e rum. Y coner matucꞌa e mar xeꞌ jax e nuxi jaꞌ.
REV 21:2 Entonces inwira e chinam xeꞌ erach xeꞌ jax e Jerusalem xeꞌ imbꞌutz. Y inwira que e chinam era war ecmay watar tut e qꞌuin tiaꞌ turu e Dios. Y galan ustabꞌir e chinam era bꞌan cocha inteꞌ ijchꞌoc xeꞌ galan bꞌujcsebꞌir conda cꞌanix anujbꞌi taca inteꞌ sitz.
REV 21:3 Y umbꞌi inteꞌ nuxi nuc xeꞌ tari tama e turtar xeꞌ turu tut e qꞌuin y che: —Ubꞌinic, coner Catata Dios cꞌani aturuan taca tunor e gente xeꞌ tuobꞌ jaxir. Y jaxir tuaꞌ aturuan tacarobꞌ, y e gente era tuaꞌ aquetpobꞌ uchinam Catata Dios. Y e Dios tuaꞌ aquetpa tacarobꞌ y tuaꞌ aquetpa Udiosirobꞌ.
REV 21:4 Y Cadiosir axin usujqui alocꞌoy e jaꞌ tama unacꞌutobꞌ. Y tama e lugar era mix majchi tuaꞌ achamay, y mix majchi tuaꞌ aꞌru, y mamajchi tuaꞌ aquetpa tzajtaca ut, y mix majchi tuaꞌ unumse ubꞌa taca inteꞌ cꞌuxner, porque tunor lo que ayan ani machi ixto tuaꞌ uwirobꞌ era porque cꞌapa satpa tunor. Bꞌan che e nuc era xeꞌ tari tut e qꞌuin.
REV 21:5 Entonces ojron tin e turu tama e turtar y che: —Ubꞌin, nen cꞌani inche imbꞌutz tunor otronyajr, che uyaren. Y de allí sutpa ojron y che: —Tzꞌijbꞌan tunor era porque erach ixto tunor lo que war inwaret era y tawar tuaꞌ icojco tamar, che uyaren.
REV 21:6 Entonces ojron tamaren otronyajr y che: —Cꞌapa chena tunor nimener. Porque nen ucajyesnibꞌiren tama tunor lo que ayan, y nen ucꞌapesnibꞌiren tama tunor lo que ayan ubꞌan. Bꞌanen cocha e letra A xeꞌ jax e bꞌajxan letra tama e abecedario y bꞌanen cocha e letra Y xeꞌ jax ucꞌapesnibꞌir tama e abecedario. Tin e ataqui utiꞌ cꞌani inwajcꞌu tuaꞌ uyuchꞌi e jaꞌ xeꞌ alocꞌoy tama unuc e cojn xeꞌ uyajcꞌu e cuxtar, y matucꞌa tuaꞌ utoyi tamar.
REV 21:7 Y tunor tin e uche erach tunor tama ucuxtar axin uchꞌami tunor era, y jaxir tuaꞌ aquetpa nimaxtac, y nen tuaꞌ inquetpa Udiosiren.
REV 21:8 Pero tunor tin e abꞌacta tuaꞌ axin tanipat cꞌani ajujra axin tama e cꞌajc xeꞌ war atzꞌajbꞌa taca e azufre. Y bꞌan tuaꞌ anumuy taca tunor tin e machi acꞌupseyanobꞌ tamaren, y tunor tin e uche e mabꞌambꞌanir xeꞌ intuj, y tunor tin e achamsan, y tunor tin e uchꞌami ubꞌobꞌ bꞌan taca; cꞌani ajujra axin tama e cꞌajc. Y bꞌan tuaꞌ anumuy taca tunor tin e abꞌaxon, y tunor tin e uyujtzꞌi ut e chamen dios, y tunor tin e amajresian; cꞌani ajujra axiobꞌ tama e cꞌajc xeꞌ war atzꞌajbꞌa taca e azufre. Jax era e chateꞌ chamer. Bꞌan che jaxir xeꞌ turu tama uturtar.
REV 21:9 Entonces tari taniut inteꞌ ángel xeꞌ jax inteꞌ tujam e siete angelobꞌ xeꞌ uqꞌuechiobꞌ ixin e siete vaso xeꞌ jax ucꞌapesnibꞌir tama e siete cꞌuxner era. Y ojron jaxir tacaren y che: —Lar tacaren, cꞌani inwirset e ijchꞌoc xeꞌ tuaꞌ anujbꞌi taca e Cordero xeꞌ jax Cawinquirar, che e ángel era.
REV 21:10 Y tama e mayjut era xeꞌ war uwirsen Unawalir e Dios, checta inteꞌ ángel xeꞌ uqꞌueche ixien esto tor inteꞌ nuxi witzir. Y conda turen tor e witzir era e ángel cay uwirsen e nuxi chinam xeꞌ erach xeꞌ jax e Jerusalem xeꞌ war eꞌcmay watar tut e qꞌuin tiaꞌ turu Catata Dios.
REV 21:11 Y e chinam era ejpray ixto umen utawarer Catata Dios. Y uwirnar quetpa bꞌan cocha inteꞌ tun xeꞌ ejpray ut xeꞌ ucꞌabꞌa jaspe xeꞌ meyra atujri, y chequer uwirnar bꞌan cocha inteꞌ vidrio.
REV 21:12 Y e nuxi chinam era xojybꞌir taca inteꞌ nuxi macteꞌ xeꞌ chembꞌir taca e petzbꞌir tun xeꞌ tꞌabꞌesna ixin esto tichan. Y tamar e petzbꞌir tun era ayan doce puerta, y tama inteꞌ inteꞌ puerta ayan inteꞌ ángel xeꞌ war acojcsan. Y tama inteꞌ inteꞌ puerta ayan inteꞌ inteꞌ ucꞌabꞌa tzꞌijbꞌabꞌir tama e doce chꞌajnarir lo que tariobꞌ tama umaxtac e Israel.
REV 21:13 Y tama e doce puerta era aquetpa tres tama inxejr inxejr tama e chinam era. Y tama inxejr tiaꞌ atobꞌoy watar e qꞌuin aquetpa tres ut puerta, y tama inxejr tiaꞌ anamtzꞌa e qꞌuin aquetpa tres ubꞌan. Y bꞌan teinxejr yajaꞌ y bꞌan teinxejr bꞌana.
REV 21:14 Y yebꞌar e sian petzbꞌir tun era ayan doce ut tun xeꞌ quetpobꞌ uwabꞌnibꞌ e chinam era. Y tamar ingojr ingojr tun era quetpa tzꞌijbꞌabꞌir ucꞌabꞌobꞌ inteꞌ inteꞌ tama e doce apostolobꞌ tuaꞌ Cawinquirar xeꞌ jax e Cordero.
REV 21:15 Entonces e ángel xeꞌ cay ojron tacaren war uqꞌueche axin inteꞌ yar teꞌ tama ucꞌabꞌ xeꞌ chembꞌir taca e oro xeꞌ tuaꞌ ubꞌisi e nuxi chinam y e doce puerta lo que ayan tamar umacteꞌ e chinam era.
REV 21:16 Entonces ixin ubꞌisi e chinam taca uteꞌ y uwira que bꞌan cocha uwamir, y bꞌan ulargoir, y bꞌan uyaltuir ubꞌan. Y uwira que ayan 2,200 kilómetros tama inxejr inxejr e chinam era.
REV 21:17 Y conda cꞌapa ubꞌisi uwira que ayan 65 metro tamar upimir unac e petzbꞌir tun era. Entonces e ángel uyaren que war ucꞌampes inteꞌ bꞌismar bꞌan cocha abꞌisma e winicobꞌ tara tor e rum.
REV 21:18 Pues e petzbꞌir tun era chembꞌir taca e tun xeꞌ galan uwirnar xeꞌ ucꞌabꞌa jaspe. Y tunor e chinam era chembꞌir taca e oro xeꞌ chequer bꞌan cocha uwirnar e vidrio.
REV 21:19 Y tamar ucajyesnibꞌir e petzbꞌir tun xeꞌ acay tor e rum bꞌujcsebꞌir taca tunor e tun xeꞌ galan uwirnar y xeꞌ meyra atujri. Y e bꞌajxan tun bꞌujcsebꞌir taca e tun xeꞌ aꞌrobꞌna jaspe. Y otro ingojr tun bꞌujcsebꞌir taca e tun xeꞌ aꞌrobꞌna zafiro, y otro ingojr tun quetpa bꞌujcsebꞌir taca e yaxtaren tun, y otro ingojr tun quetpa bꞌujcsebꞌir taca e tun xeꞌ aꞌrobꞌna esmeralda.
REV 21:20 Y otro ingojr tun quetpa bꞌujcsebꞌir taca e cꞌancꞌan tun, y otro ingojr tun quetpa bꞌujcsebꞌir taca e tun xeꞌ aꞌrobꞌna cornalina, y otro ingojr tun quetpa bꞌujcsebꞌir taca e toctun, y otro ingojr tun quetpa bꞌujcsebꞌir taca e tun xeꞌ aꞌrobꞌna berilo, y otro ingojr tun quetpa bꞌujcsebꞌir taca e tun xeꞌ aꞌrobꞌna topacio, y otro ingojr tun quetpa bꞌujcsebꞌir taca e tun xeꞌ aꞌrobꞌna crisoprasa, y otro ingojr tun quetpa bꞌujcsebꞌir taca e yaxtaren tun xeꞌ aꞌrobꞌna jacinto, y otro ingojr tun quetpa bꞌujcsebꞌir taca e tun xeꞌ chacchac xeꞌ aꞌrobꞌna amatista.
REV 21:21 Y inteꞌ inteꞌ puerta tama e doce nuquir puerta lo que ayan tama e chinam era chembꞌir taca intera tun xeꞌ aꞌrobꞌna perla xeꞌ bꞌan cocha e tun yujy. Y e calle xeꞌ jax e bꞌajxan ocher y xeꞌ más nojta tama e chinam era chembꞌir taca e oro xeꞌ chequer bꞌan cocha uwirnar e vidrio.
REV 21:22 Y tama e chinam era matucꞌa e templo porque Cawinquirar Dios xeꞌ meyra ayan ucꞌotorer y e Cordero jax e templo.
REV 21:23 Y tama e chinam era machi ucꞌampes e qꞌuin y nien e luna tuaꞌ ujanchꞌacnes or e lugar, porque jax utawarer Catata Dios y e Cordero xeꞌ ujanchꞌacnes tunor e lugar era.
REV 21:24 Y e gente tama tunor e sian chinamobꞌ lo que ayan tor e rum cꞌani axanobꞌ tama e janchꞌaquenar lo que tari tama e chinam era. Y e sian reyobꞌ lo que ayan tor e rum cꞌani utaresobꞌ utawarer y utattzꞌarsiaj tama e chinam era ubꞌan.
REV 21:25 Y e sian puerta lo que ayan tama e chinam era machi tuaꞌ amajca tama e día. Y yajaꞌ matucꞌa e acbꞌariar y tamar era ma tiaꞌ tuaꞌ amactzꞌa e sian puerta.
REV 21:26 Y tunor e sian chinamobꞌ lo que ayan tor e rum cꞌani utaresobꞌ tunor lo que ayan tuobꞌ xeꞌ imbꞌutz y xeꞌ galan esto tama e chinam era,
REV 21:27 pero machi tuaꞌ oꞌchoy lo que mabꞌambꞌan. Y mamajchi tuaꞌ oꞌchoy tama e chinam era xeꞌ war uche lo que intuj, y nien machi tuaꞌ oꞌchoy tin e amajresian. Ajtaca tuaꞌ oꞌchoyobꞌ tin e tzꞌijbꞌabꞌir ucꞌabꞌobꞌ tama e jun tuaꞌ e cuxtar xeꞌ machi tuaꞌ acꞌapa xeꞌ tuaꞌ e Cordero.
REV 22:1 Pues entonces e ángel cay uwirsen inteꞌ xucur xeꞌ galan charan ut xeꞌ jax tuaꞌ e cuxtar xeꞌ machi tuaꞌ acꞌapa. Y e jaꞌ era janchꞌaquen ut uwirnar bꞌan cocha e vidrio. Pues e xucur era locꞌoy tama uturtar Catata Dios y tuaꞌ e Cordero
REV 22:2 y ixin tuyuxin e calle xeꞌ más bꞌajxan tama e chinam era. Y tama inxejr inxejr e xucur era war e sian teꞌ xeꞌ tuaꞌ e cuxtar xeꞌ machi tuaꞌ acꞌapa. Y acꞌawan e teꞌ era tama inteꞌ inteꞌ mes, xeꞌ war che que uyajcꞌu uyutir doce veces tama inteꞌ año. Y uyopor e teꞌ era acꞌampesna tuaꞌ utzꞌacpes tunor e sian chinamobꞌ.
REV 22:3 Y matucꞌa e bꞌax tama e chinam era. Y yajaꞌ turu uturtar Catata Dios y tuaꞌ e Cordero. Y tunor umanobꞌ e Dios cꞌani uyujtzꞌiobꞌ ut jaxir.
REV 22:4 Y tunor umanobꞌ e Dios era cꞌani uwirobꞌ ut e Dios, y aquetpa tzꞌijbꞌabꞌir ucꞌabꞌa e Dios tut ujorobꞌ.
REV 22:5 Y tama e chinam era matucꞌa e acbꞌariar, y tin e turobꞌ yajaꞌ machi ixto tuaꞌ ucꞌampesobꞌ e cꞌajc y nien e qꞌuin porque jax Cawinquirar Dios xeꞌ tuaꞌ axin ujanchꞌacnes tunor e lugar era. Y tin e turobꞌ tama e chinam era cꞌani acꞌotoriobꞌ iraj iraj.
REV 22:6 Entonces ojron e ángel tacaren y che: —Erach tunor e ojroner lo que war oybꞌi era, y tawar tuaꞌ acojco tamar porque tari tuaꞌ e Dios. Pues jax Cawinquirar Dios era xeꞌ cay ubꞌijres ixin tunor e profetobꞌ y jax jaxir xeꞌ uyebꞌta tarien tuaꞌ inwirse umanobꞌ lo que cꞌanix anumuy era, che uyaren e ángel.
REV 22:7 Y che e Jesús: —Waten wacchetaca. Chojbꞌesbꞌir tunor tin e uturbꞌa ubꞌa tamar lo que tari tuaꞌ e Dios xeꞌ chꞌar tzꞌijbꞌabꞌir tama e jun era, che e Jesús.
REV 22:8 Pues nen xeꞌ Juanen cay umbꞌi y cay inwira tunor era. Pero conda cꞌapa umbꞌi y conda cꞌapa inwira tunor era entonces cotuanen tut e ángel xeꞌ cay uwirsen tunor era tuaꞌ unjtzꞌi ut.
REV 22:9 Pero jaxir uyaren: —Ira ache cocha era porque nen manen tuaꞌ e Dios bꞌan cocha net y bꞌan cocha tunor iwermanuobꞌ xeꞌ jax e profetobꞌ y tunor tin e war uturbꞌa ubꞌobꞌ tamar lo que chꞌar tzꞌijbꞌabꞌir tama e jun era. Ujtzꞌin ut e Dios jax taca, che e ángel.
REV 22:10 Entonces ojron e ángel tacaren otronyajr y che: —Ira amuqui e ojroner lo que irsenet umen e Dios xeꞌ chꞌar tzꞌijbꞌabꞌir tama e jun era, porque watarix e día conda cꞌani acꞌapa achempa tunor.
REV 22:11 Pero tin e mabꞌambꞌan uwirnar uchic más e mabꞌambꞌanir, y tin e calapir uwirnar uchic más lo que calapir. Pero tin e war uche lo que imbꞌutz uchic más lo que imbꞌutz tut e Dios, y tin e erach uwirnar uchic más lo que erach tut e Dios, che e ángel.
REV 22:12 Entonces ojron e Jesús y che: —Nen waten wacchetaca. Y cꞌani intares e tuanibꞌir tuaꞌ intoyi uyeror inteꞌ inteꞌ gente bꞌan taca cocha tawar tuaꞌ uchꞌamiobꞌ tamar lo que cay uchiobꞌ tara tor e rum.
REV 22:13 Nen ucajyesnibꞌiren tama tunor lo que ayan, y nen ucꞌapesnibꞌiren tama tunor lo que ayan ubꞌan. Bꞌanen cocha e letra A xeꞌ jax e bꞌajxan letra tama e abecedario y bꞌanen cocha e letra Y xeꞌ jax ucꞌapesnibꞌir tama e abecedario, che e Jesús.
REV 22:14 Tzayenic tunor tin e axin upojchi ubꞌujcobꞌ tama uchꞌichꞌer e Cordero, porque jaxirobꞌ tuaꞌ aquetpobꞌ tawar tuaꞌ uchꞌamiobꞌ uyutir e teꞌ xeꞌ uyajcꞌu e cuxtar xeꞌ machi tuaꞌ acꞌapa, y tuaꞌ aquetpobꞌ tawar tuaꞌ oꞌchoyobꞌ tama e nuxi puerta xeꞌ jax e ocher tama e chinam era.
REV 22:15 Pero ucꞌani tuaꞌ aquetpobꞌ patir tunor tin e uyusre uchiobꞌ e mabꞌambꞌanir xeꞌ más intuj, y tunor tin e abꞌaxon, y tunor tin e uchiobꞌ lo que uyusre uche uwerir, y tunor tin e achamsan, y tunor tin e uyujtzꞌiobꞌ ut e chamen dios, y tunor tin e amajresian. Tunor tin e axin uchiobꞌ cocha era ucꞌani tuaꞌ aquetpobꞌ patir e chinam era.
REV 22:16 Entonces e Jesús che: —Nen inwebꞌta ixin niwangel tuaꞌ uchecsu tunor era toit net xeꞌ Juan y net ucꞌani tuaꞌ isutpa achecsu tunor era tut e sian grupo ajcꞌupesiajobꞌ. Nen tarien tama uchꞌajnarir e rey David xeꞌ turuan tama e onian tiempo y tamar era nen sitzbꞌiren tuaꞌ. Y nen bꞌanen cocha e lucero xeꞌ ejpray ut xeꞌ alocꞌoy conda war asacojpa, che e Jesús.
REV 22:17 Y de allí ojronobꞌ Unawalir e Dios y tin e tuaꞌ anujbꞌi taca e Cordero y chenobꞌ: —Lar. Pues ojronic tunor tin e uyubꞌi e ojroner era y che: —Lar. Tin e ataqui utiꞌ, taricobꞌ jay bꞌan ucꞌani, taricobꞌ tuaꞌ uyuchꞌi e jaꞌ xeꞌ uyajcꞌu e cuxtar xeꞌ machi tuaꞌ acꞌapa, y matucꞌa e tumin tuaꞌ usati tamar.
REV 22:18 Pues tunor tin e axin uyubꞌi lo que chꞌar tzꞌijbꞌabꞌir tama e jun era xeꞌ irsenen umen e Dios, ayan lo que cꞌani inwareox. Jay ayan tin e axin utzꞌaqui más ojroner tamar lo que chꞌar tzꞌijbꞌabꞌir tama e jun era, e Dios tuaꞌ axin uturbꞌa tunor e sian cꞌuxner tama ujor bꞌan cocha chꞌar tzꞌijbꞌabꞌir tama e jun era.
REV 22:19 Y jay ayan tin e axin ulocse inteꞌ ojroner xeꞌ quetpa tzꞌijbꞌabꞌir tama e jun era xeꞌ irsenen umen e Dios, e Dios tuaꞌ ulocse ubꞌan tuaꞌ machi ucꞌuxi uyutir e teꞌ xeꞌ tuaꞌ e cuxtar xeꞌ machi tuaꞌ acꞌapa, y tuaꞌ machi oꞌchoy tama e chinam xeꞌ erach xeꞌ chectesna tama e jun era.
REV 22:20 Pues jaxir xeꞌ war uchecsu tunor era che: —Nen waten rajxa era. Bꞌan ya Cawinquirar Jesús, lar.
REV 22:21 Que Cawinquirar Jesús axin utacriox inteꞌ intiox. Tara acꞌapa tunor niwojroner, che e Juan.
