﻿NEBË PESEPSËN.
7.
Nġaa pin sënë ggovek, log sa halë angër lubeluu denare loḳ dob nenga lubeluu, bevare denejom dob yi sanġ lubeluu ahon in bë su degevë dob, ma degevë loo, ma degevë ḳele rë. 
Log sa halë angër ngwë vu sën hes mala neverup lo meraḳ meyam. Ḳo Anutu sën nedo mala-tumsën lo yi ḳanaḳ sepa, log tahi ya niwëëk vu angër lubeluu sën deḳo niwëëk böpata rot in debasap dob los loo lo bë, 
“Ham su pevis megwevonġ paya vu dob, ma loo geḳele lu nġaa rë. Gaḳ he ġebë he Anutu yi ḳanaḳ jaḳ yi hur lo dabaj namuġin rë, loḳ mëm ham gwevonġ.” 
Log sa hanġo alam sën deneḳo ḳanaḳ raḳ dabaj lo bë sir 144,000 deyam vu alam Israel degwaj pin. 
Sir 12,000 vu Yuda yi mewis, log sir 12,000 vu Ruben yi mewis, log sir 12,000 vu Gat yi mewis, 
log 12,000 vu Aser yi mewis, log sir 12,000 vu Naptali yi mewis, log sir 12,000 vu Manase yi mewis, 
log sir 12,000 vu Simeon yi mewis, log 12,000 vu Levi* yi mewis, log sir 12,000 vu Isakar yi mewis, 
log 12,000 vu Sebulun yi mewis, log sir 12,000 vu Yosep yi mewis, log sir 12,000 vu Benyamin yi mewis. Besir pin deḳo Anutu yi ḳanaḳ raḳ dabaj. 
Nġaa pin sënë ggovek, log sa malaġ yah. Lob sa halë alam nġahiseḳë rot desupin sir medenedo, rëḳ mu mehöti su yoh vu bë natevin sir rë. Alam sënë deyam vu mehönon pin, gedeyam vu dob pin, gevu mehönon degwaj ti ti lo pin, gevu ayej agga ti ti lo pin. Beyam denare sëa-los-arë mala ggëp Sipsip Nalu mala. Deröp tob veroo adingseḳë, gedeḳo ḳapah bëḳ ris loḳ nemaj, 
gedereseeh rur bë: “Hil ġaḳo Anutu sën nedo raḳ sëa-los-arë lo luho Sipsip Nalu arëj jaḳ. In luho deḳo hil yom lob gwëbeng hil nado nivesa!” 
Log angër pin denare tetup sëa-los-arë los alam ggev losho nġaa lubeluu sën denedo malaj-tumsën lo ving. Lob depetev medeneggëp loḳ luho malaj bedebë dabaj raḳ dob gedeneḳo Anutu arë rak 
medenenër bë: “Yönon rot! Hil ġaḳo hil Anutu arë jaḳ, behil nanër niwëëk los arë böpata ranġah! Kwa nivesa pin neggëp vu yi, lob hil kwad vesa vu yi behaḳo arë raḳ! Arë böpata rot geyi Mehö niwëëk ata, genġaa pin sënë yö neggëp vu yi degwata los degwata! Yönon rot!” 
Lob ggev ti loḳ tepëḳ vu sa bë, “Alam sën deröp tob veroo agi maḳ sir re lo? Deyam vu tena?” 
Loḳ senër yah vu yi nebë sënë bë, “Sa Mehöböp, saḳ duġin. Gaḳ mu mëm honġ mu nġo ġeraḳ ni.” Loḳ nër yom ggökin vu sa bë, “Alam sënë deḳo maggin los vanë böpata rëḳ denare nij wëëk, om deripek hir tob loḳ Sipsip Nalu niḳöḳ beveroo raḳ. 
Nebë sënë, om sën denare Anutu yi sëa-los-arë mala. Lob denevonġ tavë vu yi buk geranġah loḳ yi dub vabuung. Gemehö sën nedo raḳ sëa-los-arë agi yö ti rëḳ medo geving sir megeġin sir. 
Su rëḳ denadiiḳahëj nah gökin rë, gesu rëḳ ayoj bev in bël nah gökin rë. Hes su rëḳ beek doḳ navij rë, genġaa ti su rëḳ bev jaḳ navij rë. 
In Sipsip Nalu sën nedo raḳ sëa-los-arë lo rëḳ natu hir mehö sën malain sir, begeḳo sir na bël veyë bedenanum bël mala-tumsën-yi. Log Anutu rëḳ jevu malaj bël, gesu rëḳ dengu nah gökin rë.” 
