﻿1 JON.
3.
Alam-e! Ham kwamin bo nabë hil Amad Anutu ahë neving hil panġsën rot, om sën nenër hil bë nalu hil lob sagaḳ yönon-Anutu nalu hil. Rëḳ alam sën denesepa loḳ aggata-dob-yi lo, og su deraḳ sënë degwa ni rë, in sir duġin Anutu. 
Sa mehö lo-e! Gwëbeng sënë hil atu Anutu nalu, rëḳ hil duġin sën hil rëḳ nid nabë lo, in Anutu su tateḳin meneggëp ranġah rë. Gaḳ hil araḳ ni bë tamusën, sën Yesu rëḳ natöḳ nom ranġah gökin lo, og hil rëḳ nid nabë yi, in hil rëḳ ġalë anon soġek. 
Log alam pin sën denevo kwaj in ġaġek sagi bë anon jaḳ lo, og yö deneġin sir bedenevonġin bë denatu mehönon nijvesa rot nabë sën mehö nivesa Kerisi. 
Gaḳ alam pin sën denevonġ nġaa nipaya lo, og denekeyëh horek, in nġaa nipaya og yiḳ nġaa sën nekeyëh Anutu yi horek. 
Lob ham raḳ ni bë Yesu og nġaa nipaya ti su neggëp vu yi rë, gaḳ töḳ yam ranġah in bë geḳo hil nġaa nipaya nyëvewen vër in hil. 
Mehöti sën negga raḳ yi lo, og su nesepa loḳ nġaa nipaya rë. Gaḳ mehöti sën nesepa loḳ nġaa nipaya yi aggata lo, og hil naraḳ ni bë su nelë Kerisi rë, gesu neraḳ Kerisi ni rë. 
Oo sa hur mahen lo! Ham gweġin ham in mehöti rëḳ tetuhin ham. Mehö sën yö nevonġ nġaa yohvu lo, og yi mehö yohvu nebë sën mehö yohvu Kerisi. 
Satan ḳo nġaa nipaya raḳ nyëmuġinsën bemedo nesepa loḳ, om mehöti sën nesepa loḳ nġaa nipaya lo, og Satan yi alam yi. Rëḳ mu Anutu Nalu töḳ yam ranġah in bë basap Satan gekevoh yi huk na. 
Mehö sën tu Anutu nalu lo, og su nesepa loḳ nġaa nipaya rë. Gaḳ Anutu vonġ beni nebë yi, om su yoh vu bë sepa doḳ nġaa nipaya rë, in tu Anutu nalu. 
Nabë hil nehevonġin bë ajaḳ Anutu nalu lo nij, gajaḳ Satan nalu lo nij, og hil ajaḳ nij nabë sënë: Alam sën su denevonġ nġaa nivesa rë lo, og su Anutu-yi-alam sir rë. Log alam sën su ahëj neving arij lo rë lo, og su Anutu nalu sir ving rë. 
Ham nġo ġaġek sënë vu nyëdahis beyam bë: Hil ahëd geving hil vewen vewen. 
Hil su ġevonġ nġaa nabë Kain. In Satan yi mehö yi, om sën sis ari mediiḳ. Sis ari mediiḳ degwa raḳ va? Degwa nebë yi mehö nesepa loḳ aggata nipaya, gari nesepa loḳ aggata niröpsën-yi. 
Arig lo! Nabë alam sën denesepa loḳ aggata-dob-yi lo sënë degelë ham paya, og ham su gwelëk mejanġa nemamin in nġaa saga. 
Hil ahëd neving arid lo, om hil araḳ ni raḳ sënë bë: Hil hevuu sën hil nadiiḳ na veröḳ yi lo ya, gatöḳ yam sën hil medo malad-tumsën degwata lo. Gaḳ mehöti sën su ahë neving ari lo rë lo, og yö nahën nedo loḳ diiḳsën. 
Mehöti sën nelë ari paya lo, og sënë nipaya böpata rot nebë sën sis yi mediiḳ. Lob ham raḳ ni bë alam sën denesis mehönon medenediiḳ lo, og mala-tumsën sën gevonġ behil medo degwata los degwata lo su neggëp vu sir rë. 
Yesu diiḳ loḳ yah hil bed in bë doḳ vu hil, lob hil araḳ ahëvingsën anon degwa ni raḳ sënë. Om yiḳ hil geving. Hil dahun hil badoḳ vu arid lo nabë saga, genabë hil nadiiḳ og yiḳ ggovek. 
Rëḳ mu nabë mehöti yi nġaa dob sënë neggëp, lob lë gari ti raḳ vu in nġaa ti, rëḳ ruu demi vu ari sënë, gesu loḳ vu yi raḳ yi nġaa rë, loḳ nenër bë ahë neving Anutu in va? 
Oo sa hurmahen lo, hil su ahëd geving arid lo jaḳ vengwënġsën los avid meris mu, gaḳ hil ahëd geving sir yönon beġevonġ huk madoḳ vu sir. 
Nabë hil ġevonġ nabë saga, og rëḳ tato vu hil nabë: Hil nesepa loḳ ġaġek anon yönon, genabë hil ayod neggëp nivesa, om hil su rëḳ aġöneng in Anutu mala rë. 
Gaḳ nabë hil ayod nanër hil nabë hil nehevonġ nġaa nipaya, og hil kwad bo nabë Anutu og böpata kesuu hil ayod meneraḳ nġaa pin ni los degwa. 
Sa mehö lo-e! Nabë hil ayod su nanër hil nabë hil nehevonġ nġaa nipaya rë, og hil su aġöneng in Anutu mala. 
Log nġaa sën hil neḳetaġ in vu yi lo, og nevonġ vu hil. In hil nesepa loḳ yi horek behil nehevonġ nġaa yoh vu sën ahë neving lo. 
Log yi horek nebë sënë: Hil ġevonġ geving Nalu arë nabë yiḳ yi Yesu Kerisi, gehil ahëd geving hil vewen vewen nabë sën nër vu hil vorot lo. 
Nabë mehöti sepa doḳ Anutu yi horek, og luho Anutu detu timu gAnutu nedo loḳ yi. Lob Anon Vabuung sën Anutu vonġ vu hil lo tato vu hil behil naraḳ ni bë Anutu nedo loḳ hil ayod. 
