﻿HIBRU.
5.
Mehönon sën detu alam-deneḳo-seriveng hir ggev böp lo pin, og hir huk bë degero mehönon hir ġaġek vu Anutu. Denetunġ nġaa sën mehönon denevonġ vu Anutu los kwaj vesa lo tu seriveng vu yi. Log denevesi seriveng sën mehönon denevonġ loḳ yah hir nġaa nipaya lo vu yi ving. 
Om sën deyoh vu bë kwaj gevonġin alam sën kwaj ma lo, galam sën denevuu Anutu yi aggata ya lo. In deraḳ ni bë yiḳ sir og nij wëëk ma ving nebë sir, om nġaa nipaya yoh vu bë kepë sir geving. 
Nebë saga om sën denevesi seriveng in bë dahun alam hir nġaa nipaya na, gehej geving. 
Om mehöti su yö neḳo yi raḳ meneggooin yi raḳ bë gevonġ huk sënë rë. Gaḳ Anutu yö neggooin yi raḳ nebë sën ggooin Aaron raḳ wirek lo. 
Lob yiḳ Kerisi nebë saga ving. Su yö ggooin yi raḳ tu mehö-neḳo-seriveng rë, gaḳ Anutu ggooin yi raḳ in bë gevonġ huk sënë, lob nër vu yi bë: “Sa naluġ honġ. Sa haḳo honġ gwëbeng.” 
Log nër loḳ len ngwë bë: “Ġetu mehö-ġeneḳo-seriveng degwata los degwata yoh vu Melkisedek.” 
Wirek Yesu tu mehönon menedo dob, og vu buk saga nejom raḳ meneketaġ vu Anutu. Nesu vu Mehö sën yoh vu bë geḳo yi vër in diiḳsën lo, rot bemala ruḳ nekeseh. Dahun yi rot beggurek Anutu babu, lob Anutu bë nenga vu aye. 
Yesu og Anutu Nalu yi, rëḳ neḳo vanë in bë vanë sënë barah yi veröḳ besepa doḳ Anutu aye. 
Om sën tu mehö yohvu yönon, log mëm ḳo alam pin sën denesepa loḳ aye lo yah vu Anutu berëḳ demedo geving yi degwata los degwata. 
Lob Anutu ggooin yi raḳ betunġ ggev böp raḳ yi benër yi bë alam-neḳo-seriveng alaj yoh vu Melkisedek. 
Melkisedek yi ġaġek nġahiseḳë neggëp, lob he bë nanër vu ham, rëḳ gwëbeng ham ayomin dahis raḳ gesu ham yoh vu bë natöḳ jaḳ rë. Om sën he nehevonġ huk böp in bë tateḳin ġaġek sënë degwa vu ham. 
Buk ggovek beyoh vu bë ham natu tatovaha, rëḳ ma geham nahën neraḳ vu in kwa. Om mehöti maḳ rëḳ nök tahu ham gökin doḳ Anutu yi ġaġek degwa muġinsën sën sepëp lo rë. In ham su yoh vu bë gwa nos niwëëk rë, gaḳ ham yoh vu bë nanum rur mu. 
Lob hil araḳ ni bë alam sën denenum rur mu lo, og sir hurmahen nij ḳöḳ besu deyoh vu bë dega nos niwëëk rë. Yiḳ sa peggirin raḳ ġaġek degwa böp böp sën netateḳin bë hil natu alam yohvu lo. 
Gaḳ nos niwëëk og alam sën sir böp neraḳ ggovek lo yö hir nos. Alam nebë sënë og medo mekwaj nevonġ huk in ġaġek los degwa raḳ buk bedeneseggi nġaa pin niröp medeneraḳ ni bë nivesa genipaya. 
