﻿LUKAS.
3.
Tiberius tu alam Rom hir Sisar* menedo yoh vu ta nemadluho menemadvahi vorot, lob vonġ bePontius Pilatus tu kiap pin vu distrik Yudea hir yuseḳë beneġin sir. Log Herot* tu yuseḳë meneġin distrik Galilea, gari Pilip tu yuseḳë meneġin alam ggëp distrik Ituraya los Trakonitis. Log Lusanius tu yuseḳë meneġin distrik Abilene, 
gAnas luho Kayapas detu alam-deneḳo-seriveng hir ggev böp. Lob Sakaria nalu Jon nedo nyëġ-yumeris loḳ buk saga, bAnutu yi ġaġek neyam vu yi. 
Nebë saga, lob neyoh vu begganġ-bu pin sën nedo dus vu bël Yordan, benenër ġaġek vu alam bë degërin sir medejipek bël, lob mëm Anutu rëḳ kevoh hir nġaa nipaya sën neggëp vu sir lo na. 
Sënë yoh vu ġaġek sën mehö-nenër-ġaġek-ranġahsën Yesaya nër meneggëp loḳ Anutu-yi-ḳapiya lo bë: “Mehöti aye neraḳ loḳ nyëġ-yumeris bë: ‘Ham bolinin Mehöböp yi aggata, meham sesor begëp niröp. 
Debahu lii ayo böp böp na, gededev ḳedu böp böp los mahen medegerurin geto geving. Gaggata pin sën neggëp bejusën lo, og dedev gguu beniveröḳ jaḳ. 
In alam pin degelë nġaa sën Anutu gevonġ in geḳo hil nah vu yi lo.’” 
Lob alam nġahiseḳë deya vu yi in bë dejipek bël jaḳ nema, loḳ nër vu sir bë, “Nyël nalu ham! Re nër vu ham bë ham beya in nyëvewen sën rëḳ natöḳ vu ham vu Buk-tamusën agi? 
Ham gwevonġ nġaa niröp noh vu sën ham wërin ayomin lo, in tato nabë ham wërin ham yönon. Gaḳ ham su kwamin bo megweḳo ġaġek jaḳ nah menanër nabë Abraham yi mewis ham. Gaḳ sa nanër vu ham nabë Anutu yoh vu bë gevonġ ġelönġ sëne denatu Abraham yi mewis. 
Yönon, in ḳoov nevu nevaleḳ ḳele ġeġa meneggëp vorot. In ḳele pin sën su denesis anoj nivesa rë lo, og rëḳ buv mebesi jaḳ na nengwah.” 
Nër nebë sënë, lob alam pin deneloḳ tepëḳ in yi bë, “Om he rëḳ ġevonġ nabë va?” 
Loḳ nër yah vu sir bë, “Mehöti sën yi röpröp luu neggëp vu yi lo, og bo ngwë vu mehö ngwë sën neraḳ vu in lo. Gemehöti sën yi nos neggëp lo, yiḳ gevonġ nabë saga geving.” 
Log alam sën deneḳo takës* lo la deyam ving in bë dejipek bël, lob deloḳ tepëḳ vu yi bë, “Tatovaha, log heḳ rëḳ ġevonġ nabë va?” 
Loḳ nër yah vu sir bë, “Ham gweḳo monë takës niröp noh vu sën gavman nër vu ham lo, gaḳ ham su ġodeḳ la sevöḳ na geving rë.” 
Log alam-beġö-yi la deloḳ tepëḳ in sir vu yi bë, “Log heḳ rëḳ ġevonġ nabë va?” Loḳ nër yah vu sir bë, “Ham su ngis mehönon jeggin jeggin los nanër ġaġek kuungsën jaḳ sir in nabë ham ġodeḳ hir monë lu nġaa, gaḳ yiḳ ham gweḳo ham monë sën ggev denebaġo ham lo niröp los ahëmin nivesa beggovek.” 
Alam denġo ġaġek sënë, lob kwaj vo ya niwëëk loḳ ayoj bë, “Maḳ Jon sënë yiḳ maḳ yi Mehö sën Anutu ggooin raḳ in bë geḳo hil nah lo ma ma?” 
Nebë sënë, lob Jon nër yah vu sir bë, “Sa naripek ham raḳ bël. Rëḳ mëm mehö los niwëëk ti kesuu sa rëḳ tamuin sa menam, log sa su mehö niġ vesa yoh vu in bë sa natu yi hur beḳevelekin vaha suu rë. Yi saga sën rëḳ basuh ham begevonġ Anon Vabuung vu ham vahi begevonġ benengwah ga ham vahi. 
Jom yi savor loḳ ya nema vorot in tetëhin ḳale ḳale na in yi wit*, gengupin wit* anon jaḳ na yi jök-wit-yi. Gaḳ ḳale ḳale saga og rëḳ besi jaḳ na nengwah sën yö medo netum degwata lo.” 
Jon nenër bengö nivesa vu alam genenër ġaġek nġahiseḳë ving in bë gelu ayoj medegërin sir. 
Rëḳ Jon vo ġaġek raḳ hir yuseḳë Herot*, in ggodeḳ ari avëh Herodias log nevonġ nġaa nipaya vahi ving. 
Genevonġ nġaa nipaya ti sënë ggökin ving: Tunġ Jon ya ḳarabus. 
Log alam pin deneripek bël, lob Yesu ripek bël ving. Ripek bël ggovek gevare nejom raḳ, lob yaġek tateḳin yi 
gAnon Vabuung ni nebë soḳ nuung beluḳ yam raḳ ya yi. Log ġaġek ti yam vu yaġek bë, “Sa naluġ honġ. Sahëġ neving honġ besa halë honġ nivesa.” 
Yesu yi ta mehödahis-menemadluho raḳ, lob mëm ḳo yi huk raḳ. Loḳ alam kwaj nevo yi bë yiḳ Yosep nalu yi. Log yiḳ Yosep ama Heli. 
Ga, Heli ama Matat, geMatat ama Levi* ga, Levi* ama Melki. Ga, Melki ama Yanai ga, Yanai ama Yosep (sënëḳ yö ngwë). 
Ga, Yosep ama Matatias ga, Matatias ama Amos. Ga, Amos ama Naum ga, Naum ama Esli. Ga, Esli ama Nagai. 
Ga, Nagai ama Maat. Ga, Maat ama Matatias (sënëḳ yö ngwë), ga, Matatias ama Semein. Ga, Semein ama Yosek ga, Yosek ama Yoda. 
Ga, Yoda ama Yoanan ga, Yoanan ama Resa. Ga, Resa ama Serubabel ga, Serubabel ama Sealtiel. Ga, Sealtiel ama Neri. 
Ga, Neri ama Melki, (sënëḳ yö ngwë). Ga, Melki ama Adi ga, Adi ama Kosam. Ga, Kosam ama Elmadam ga, Elmadam ama Er. 
Ga, Er ama Yosua ga, Yosua ama Elieser. Ga, Elieser ama Yorim ga, Yorim ama Matat (sënëḳ yö ngwë). Ga, Matat ama Levi (sënëḳ yö ngwë). 
Ga, Levi ama Simeon. Ga, Simeon ama Yuda ga, Yuda ama Yosep (sënëḳ yö ngwë). Ga, Yosep ama Yonam ga, Yonam ama Eliakim. 
Ga, Eliakim ama Melea ga, Melea ama Mena. Ga, Mena ama Matata ga, Matata ama Natan. Ga, Natan ama Davit. 
Ga, Davit ama Yese. Ga, Yese ama Obet ga, Obet ama Boas. Ga, Boas ama Salmon ga, Salmon ama Nason. 
Ga, Nason ama Aminadap ga, Aminadap ama Admin ga, Admin ama Arni. Ga, Arni ama Hesron ga, Hesron ama Peres. Ga, Peres ama Yuda (sënëḳ yö ngwë). 
Ga, Yuda ama Yakop. Ga, Yakop ama Isaak ga, Isaak ama Abraham. Ga, Abraham ama Tera ga, Tera ama Nahor. 
Ga, Nahor ama Seruk ga, Seruk ama Reyu. Ga, Reyu ama Pelek ga, Pelek ama Eber. Ga, Eber ama Sela. 
Ga, Sela ama Kainan. Ga, Kainan ama Arpaksat ga, Arpaksat ama Sem. Ga, Sem ama Noa ga, Noa ama Lamek. 
Ga, Lamek ama Metusala ga, Metusala ama Enok. Ga, Enok ama Yaret ga, Yaret ama Mahalalel. Ga, Mahalalel ama Kainan (sënëḳ yö ngwë). 
Ga, Kainan ama Enos. Ga, Enos ama Set ga, Set ama Adam. Ga, Adam og yiḳ Anutu nalu in tunġ yi. 
