﻿Matiu.
5.
Baiwa laꞌilaꞌi Yesu ya itadi, be ya finahe hasa uduhuli hesa yai amainiya ya taꞌai. Tau famuli watanina sa obiyo fataꞌiꞌili. 
Habahim ya fatubu ya faꞌatadi. 
Iyen, Salumadi yaluwa yai sa deha, nuwadi ti amna wananaha, Galewa Aba Baꞌisa Nuꞌuna mate iti enehedi. 
Salumadi sa nuwa heyaya, nuwadi ti amna wananaha. Paꞌana Yaubada haba nuwadi ya liba fataludi. 
Tau nuwa lidilidi nuwadi ti amna! Paꞌana Yaubada haba tanoꞌubu ya feledi! 
Salumadi dudulai guliyamna yo gadomaguna lisidi yai, mate nuwadi ti kwade! Yaubada haba ya famohafudi. 
Tau nuwatohatoha, nuwadi ti amna! Paꞌana Yaubada haba ya nuwatohatohaedi hinaga! 
Salumadi nuwadi sa aꞌa, nuwadi ti kwade, paꞌana Yaubada haba sa ita! 
Tau laulau bili salumadi, nuwadi ti kwade. Paꞌana Yaubada haba ya kawa natuwedi! 
Salumadi dudulai debana yai sa ankamkamna, nuwadi ti amna wananaha, paꞌana Galewa Aba Baꞌisa Nuꞌuna iti enehedi! 
Salumamiu dodoga sa liba faheyayamiu, sa fakamkamnamiu yo liba bwalabwala yai wasamiu sa faheyayadi yau debagu yai mate, au kwade. 
Laulauna eseꞌesegana sa ginauli peloweta bwaꞌidi lisidi yai Nuwamiu ti amna yo au kwade, paꞌana maisamiu laꞌilaꞌi galewa yai ya otaꞌota. 
Umi mate dodoga adi alita. Inmoho yena alita ni amnana ya ofi, haba sidohana faꞌamna fuyoina? Ya heyaya, haba peina moho be dodoga ai hewana sa bwaꞌi. 
Yo umi mate tanoꞌubu mahudoꞌina ana mala. Yena siti uduhuli yai sa ginauli hige gonowana ti simo. 
Lampa te gabu ibege ai gulewa ta fabuihomo. Haba aba fataꞌaina yai te tole, be dodoga luma yai mala ya feledi. 
Gonogonowana doha, em mala bena ya sina dodoga ai lisidi, be haba ginauli loholohodi wa ginaulidi sa itadi haba Tamam galewa yai sa fadebasae. 
Tabu emi nuwatuhu mate Yau E laoma bena Peloweta edi lau faꞌata yo Mose ena laugagayo haba ya falautomdi. Higeꞌe. Inmoho fawananahadi haluluna E laoma. 
Galewa yo tanoꞌubu haba sa tauyamuhi. Inmoho, E faliba dudulaimiu mate laugagayo piꞌana o ena koma kiukiu ibege i tauyamuhi ana siga ee–, ginauli mahudoꞌina ya fawananaha. 
Be yena, sai laꞌi laugagayo te ya moꞌa peiyen, yo dodoga haisa ya fatalahadi be sa ginauli doha, haba Galewa Nuꞌuna, sa ita fakium. Na inmoho, sai laꞌi laugagayo te ya famuli watanidi yo dodoga haisa ya fatalahadi be sa famuli watanidi mate ai Galewa Basileiyana haba sa ita hitiꞌi. 
E falibamiu pa'ana, gonowana haba Galewa Nuꞌuna ami sola, yena nuwamiu sa adidili, be tabu Falesiya yo laugagayo tau lau faꞌataedi au lau watanidi, na Yaubada ena nuwatuhu ami lau watan, haba Galewa Basileiyana ami luhuhu sola. 
Beyabeyana haba dodoga sa falibadi, tiyen, <<Tabu au aiyunu mate au atahiyen, na yena sai ya aiyunu mate ai halana haba ya lau fatala.>> 
Inmoho, E falibamiu yena sai hidana ya manabalaꞌen, mate hinaga haba ya lau fatala. Yo yena hidana ya liba faheyaya mate haba Sanhedeli ai matadi ya obiyo. Yo sai hidana ya kawa yauyauleꞌen haba heyaya ya lobahi oyagi alaꞌalana yai. 
Lisina yai, ibe yena em ainauya bena wa felen aba antalasam yai na amainiya wa nuwatuhui mate, hidam ena, ana manabala lisim yai hola otana, 
em ainauya ai aba antalasam u lau afulen, na u fuyo hidam lisina be em fadududulai u ginauli, habahim u fiyoma em ainauya Yaubada u felen. 
Yena sai somo halana yai ya samanim, tau samanin ma'em pilipilina ni, au fadudulai heuheulai, ibe i tolem tau fafadudulai ai lisina be tau fafadudulai i tole lawem pilisiman ai lisina be ai deli i tolem. 
E liba dudulai, ainiya haba wa miya ee–, ana siga am sadi wa famaisa 
Haꞌa ami sibai mate: kelele laugagayo. 
Inmoho, aho te E falibamiu: Sai laꞌi waihin ya ita na nuwa ganahewana yai ya gadolelehiyen, mate haꞌa ya kelele nuwana yai. 
Be yena matam tefa sibam ya falauponom, u limofahi, be u pei! Ibe taum mahudoꞌina i faheyaya be u alagolu ai oyagi alaꞌalana. 
Be yena nima sibam ya falauponom, u ibo motu be u pei! Doꞌata taum mahudoꞌina ya faheyaya be wa alagolu ai oyagi alaꞌalana hesana Gehena. 
Hinaga sa liba, tiyen, Sai lahuna ya tausohoꞌen mate bena tausoho pepana ya uli be ya felen. 
Inmoho, E falibamiu doha ite: <<Waihin sai hige i kelele na lahuna ya tausohoꞌen, be waihin ya nahi boda mate waihin ya kelele. Na yena taumoho sai waihin tautausohona ni ya fai mate taumohona ya kelele hinaga.>> 
Beyabeyana dodoga sa fafalibadi haꞌa ami atahiyen, <<Tabu em angwala u utusi. Somo GUYAU lisina yai wa angwalaꞌen, bena wa ginauli watan.>> 
Inmoho E falibamiu: Yena ami angwala, tabu u angwala hasa galewa, paꞌana Yaubada ena aba tanuwaga nu'una, 
o ai tanohi, paꞌana mate ahena ena aba faꞌanyawasina. Ye tabu Yelusalem hesana au atahi, paꞌana Kin Laꞌilaꞌi ena siti. 
Hinaga tabu u angwala ai kulum, paꞌana ibege kulu maihawadi laꞌi u ginauli be i kafu or i duba. 
Bena wa liba moho uwen, <<Ii–>> o <<Higeꞌe.>> Somo hesa wa libaen, mate Diyabolo lisina yai ya laoma. 
Laugagayo beyabeyana ganahewana yai haꞌa ami sibai. Sa libaen, tiyen, <<Yena sai matam ya oigolu, mate dogana matana hinaga u oigolu. Yo yena sai moꞌam ya oitutu, mate hinaga moꞌana hinaga u oitutu.>> 
Inmoho, ahoꞌite E falibamiu: Sai somo lisim yai ya ginauli faheyaya, mate tabu am hala u abi. Yena sai ya lau-papalinim, tefa hesa u felen be ainiya i oi hinaga. 
Sai bena ya foyahim tau fadudulai matana yai be am luhuluhu ya abi, mate luhuluhu lofalofana hinaga u felen. 
Na yena hiyala dogana ya duduim be ena tobo wa bahei lawen somo yai am sigasiga ya tole, mate hagahagana u abi lawen. 
Yena sai somo ya etai lisim yai, u felen; yo sai somo lisim yai bena ya abi be ya fapaisowa hinaga u felen. 
Haꞌa sa libaen, tiyen: <<Hidam u gadosisiyen, na am waiyunu u ꞌwaiyoꞌoen.>> 
Inmoho, E falibamiu: <<Am waiyunu u fanuha, yo saluma sa liba fafaheyayam, enehedi u lauꞌuꞌula.>> 
Umi haba Tamam galewa yai nanatuna. Ena maihala ya fasina tau heyaya yo tau loholoho enehedi. Usa ya fatamali tau miya dudulai yo tau miya heyaya enehedi. 
Yena salumadi sa gadogadosisiyemiu ibodi ami fanuhadi, paꞌana somo haba Yaubada ya famaisamiu? Mate iti tau takesi tau tano edi laulau. 
Yo yena afa efamiu ibodi ami lautoꞌiyedi, na dodoga haisa higeꞌe, mate haba sidohana? Salumadi Yaubada hige ti sibai edi laulau doha. 
Bena inonomiu sa loholoho wananaha doha Tamamiu galewa yai inonona sa loholoho. 
