﻿ZIA YÃ.
20.
Ben ma malaika è bↄna ludambɛ à gɛ̀wãa wɛ̀ɛ zòoto mↄ̀nɛ kũna kↄ̃n mↄ̀kyako gbèreo. 
À kwã kɛ̀ dɛ mlɛ̃̀ zii ũu kɛ̀ wè be Ibilisi ke Setãn kũ̀, ben à mↄ̀ kàa ai wɛ̃̀ wàa sↄↄro. 
Malaika pì à zù gɛ̀wãa wɛ̀ɛ zòoto pì guu, à gbà tàtaàlɛ à kwado sìkↄ̃rɛa, lɛ àton boriinↄ sãsãro ai wɛ̃̀ wàa sↄↄroo pì gá papao. Beee gbɛra weé à gbarɛ féte. 
Ben ma kìtanↄ è kↄ̃n gbɛ̃ kɛ̀ aↄ̃ↄ vɛ̃ɛnaanↄ. Wà ń gbá zɛ́ aↄ̃ yãkpaɛ kɛ kↄ̃n gbɛ̃nↄo. Ma gbɛ̃ kɛ̀ wà ń mì zↄ̃̀ Luda yã kɛ̀ Yesu a sèeda kɛ̀ ona yãnzinↄ è. Aↄ̃ↄe dↄnzi kɛ nↄ̀bↄ pãsĩ ke à takanɛro. Aↄ̃ↄe à sèeda kɛ ń mì'aɛ ke ń ↄↄaro. Aↄ̃ fɛ̀ɛ bↄna gaan aↄ̃ kí blè kↄ̃n Kirisio wɛ̃̀ wàa sↄↄro. 
Gɛ̀nↄ fɛɛna káakupↄn gwe. Gɛ̀ kpaaanↄↄ e fɛɛro ai wɛ̃̀ wàa sↄↄroo pì gàa à pàpao. 
Aubarikadeenↄn gbɛ̃ kɛ̀ aↄ̃ baka kú gɛ̀nↄ fɛɛna káakupↄ guunↄ ũ, aↄ̃ↄ kú adona. Ga plaade iko vĩḿmaro. Aↄ̃égↄ̃ dɛ Luda kↄ̃n Kirisio gbã̀gbãrinↄ ũmɛ, aↄ̃égↄ̃ kí bleeo ai wɛ̃̀ wàa sↄↄro. 
Tó wɛ̃̀ wàa sↄↄroo pì pàpa, weé Setãn bↄ wà à gbarɛ. 
Eé gá borii kɛ̀ aↄ̃ↄ kú anduna gooda siigↄ̃ↄanↄ sãsa, Gↄgu kↄ̃n Magↄguo, eé ń kakↄ̃a lɛ aↄ̃ zĩ̀ ká. Aↄ̃ↄ pari lán ísialɛ bùsu'ãatɛ̃ bà. 
Aↄ̃ dà andunala aↄ̃ lìga Luda gbɛ̃nↄ bùrazi kↄ̃n wɛ́tɛdaa kɛ̀ Ludaa yezio, mↄde tɛ́ bↄ̀ ludambɛ à ń kpáta. 
Wà Ibilisi kɛ̀ ń sãsã sɛ̀ wà zù tɛ́ sɛ̀bɛ kɛ̀ è kũ kↄ̃n ↄfãntɛ̃gbↄ̃o guu, guu kɛ̀ wà nↄ̀bↄ pãsĩ kↄ̃n annabi ɛgɛɛo zùn. Aↄ̃égↄ̃ wãwãa kɛɛ fãantɛ̃ kↄ̃n gwãavĩo gurↄ píngi. 
Ben ma kíblekita pura bíta è kↄ̃n gbɛ̃ kɛ̀ vɛ̃ɛao. Tↄↄtɛ kↄ̃n musuo gusii lɛ̀ à aɛ, guu kúńnɛ dↄro. 
Ben ma gɛ̀wãadeenↄ è, nɛ́ féte gbɛ̃nsi, aↄ̃ↄ zɛna kìta pì aɛ. Wà takadanↄ wɛ̃̀wɛ̃, ben wà takada pãnde wɛ̃̀ dↄ wɛ̃̀ndi takada ũ. Wà yãkpaɛ kɛ̀ kↄ̃n gɛ̀wãadeenↄ aↄ̃ yãkɛnaa lán à kɛ̃na takada pìnↄ guu nà. 
Ísiaa gɛ̀wãadee kɛ̀ aↄ̃ↄ kú a guunↄ kpà. Ga kↄ̃n gɛ̀wãao gɛ̀wãadee kɛ̀ aↄ̃ↄ kú ń guunↄ kpà se. Ben wà yãkpaɛ kɛ̀ kↄ̃n baadeo a yãkɛnaa. 
Wà ga kↄ̃n gɛ̀wãao zù tɛ́ sɛ̀bɛ guu. Tɛ́ sɛ̀bɛ pì nɛ́ ga plaadeemɛ. 
Gbɛ̃ kɛ̀ wèe ń tↄ́ e wɛ̃̀ndi takada guuroonↄn wà ń zú tɛ́ sɛ̀bɛ pì guu. 
