﻿ZIA YÃ.
17.
Malaika gↄ̃ↄn swɛɛplaaa kɛ̀ aↄ̃ↄ zubↄ mɛ̀n swɛɛplaa kũna pìnↄ doke bèmɛ: Ǹ mↄ́ mà yã kɛ̀ eé wí kaarua tↄ́dee kɛ̀ vɛ̃ɛna swaa pariinↄa ↄdↄannɛ. 
Anduna kínanↄ pãpãa kɛ̀o, anduna gbɛ̃nↄ à pãpãkɛna wɛ̃ɛ mì wà kã̀. 
Luda Nini mↄnama guu malaika pì gàamao gbáan. Ben ma nↄgbɛ̃ ke è dina nↄ̀bↄ pãsĩ tɛ̃aaa. Dↄkɛna kↄ̃n Ludao tↄ́nↄ fĩfĩa, à mì mɛ̀n swɛɛplaa, à koba mɛ̀n kuri. 
Nↄgbɛ̃ pì bisa gaarura'ide kↄ̃n à wɛ́ɛ tɛ̃adeeo yina, à zãblebↄ kɛ̀ wà pì kↄ̃n vuraonↄ dana kↄ̃n gbɛ̀ bɛ̀ɛdeenↄ kↄ̃n òsonↄ. À vura togo kũna, tɛ̃̀ pↄ́nↄ kↄ̃n à pãpãkɛna gbãsĩnↄ kán à pà. 
Wà tↄ́ asiidee kɛ̃̀ à mì'aɛa wà bè: 
Má è nↄgbɛ̃ pì Luda gbɛ̃ kɛ̀ wà ń dɛ́dɛ Yesu sèedakɛna yãnzinↄ aru mì à kã̀ èe à dɛɛ. Kɛ̀ ma à è, à yã bↄ̀ ma saɛ maamaa. 
Ben malaika pì ma la à bè: Bↄ́yãnzin à yã bↄ̀ n saɛzi? Mɛ́ nↄgbɛ̃ pì asii onnɛ kↄ̃n nↄ̀bↄ pãsĩ kɛ̀ à à sɛna asiio, kɛ̀ à mì mɛ̀n swɛɛplaa à koba mɛ̀n kuri pì. 
Nↄ̀bↄ pãsĩ kɛ̀ ń è pì kuu yã, ben à kuu tia dↄro, bensↄ̃ eé bↄ gɛ̀wãa wɛ̀ɛ zòoto guu à mì pɛ́ kaatɛnaa. Gbɛ̃ kɛ̀ aↄ̃ↄ kú tↄↄtɛa, kɛ̀ aↄ̃ tↄ́ kú wɛ̃̀ndi takadan zaa anduna daɛgurↄↄaroonↄ, tó aↄ̃ nↄ̀bↄ pãsĩ kɛ̀ kuu yã, ben à kuu tia dↄro, mↄde eé ɛara à mↄ́ pì è, à yã é bↄ ń saɛ. 
Laasuudee kɛ̀ ↄ̃ndↄ̃ↄ vĩ yãn yɛ̀. Mì mɛ̀n swɛɛplaaa pìnↄ nɛ́ sĩ̀sĩ mɛ̀n swɛɛplaaa kɛ̀ nↄgbɛ̃ pì vɛ̃ɛnaanↄmɛ. Kí gↄ̃ↄn swɛɛplaaanↄmɛ dↄ. 
Aↄ̃ gↄ̃ↄn sↄↄroo lɛ̀ɛ, gbɛ̃ doo kuu, gbɛ̃ doo kpɛ́. Tó à mↄ̀, eé gì kɛro. 
Nↄ̀bↄ pãsĩ kɛ̀ kuu yã, ben à kuu tia dↄroo pì nɛ́ kína sↄraagↄ̃deemɛ. Gↄ̃ↄn swɛɛplaaa pìnↄ dokemɛ dↄ. Èe mì pɛɛ kaatɛnaa. 
Koba mɛ̀n kuri kɛ̀ ń è pìnↄ nɛ́ kí gↄ̃ↄn kuri kɛ̀ aↄ̃ↄe kpata ble kↄ̀roonↄmɛ. Mↄde aↄ̃é kí ble gurↄ zaka féte guu kↄ̃n nↄ̀bↄ pãsĩo lɛdo. 
Aↄ̃ gↄ̃ↄn kuri pìnↄ lɛ́ dↄ̃nkↄ̃mɛ. Aↄ̃é ń gbãa kↄ̃n ń ikoo kpá nↄ̀bↄ pãsĩ pìa. 
Aↄ̃é zĩ̀ ká kↄ̃n Sãnɛ Bↄ̀rↄo, mↄde eé zĩ̀ bleḿma, zaakɛ diinↄ Diimɛ, kínanↄ Kínamɛ. À gbɛ̃ náanɛdee kɛ̀ à ń sísi à ń sɛ́nↄↄ kúo. 
Ben malaika pì bèmɛ: Swaa kɛ̀ ń è kaarua vɛ̃ɛnaḿmanↄ nɛ́ gbɛ̃nↄ kↄ̃n pariinↄ kↄ̃n boriinↄ kↄ̃n boriyãnↄmɛ. 
Nↄ̀bↄ pãsĩ kↄ̃n koba mɛ̀n kuri kɛ̀ ń è pìnↄ é za kaarua pìn. Aↄ̃é à kaatɛ aↄ̃ à tó bũu. Aↄ̃é à só aↄ̃é tɛ́ sↄ̃a. 
Zaakɛ Luda a pↄyezi dàńnɛ ń swɛ̃̀n aↄ̃ lɛdolɛ kɛmɛ. Aↄ̃é ń kpata kpá nↄ̀bↄ pãsĩ pìa ai Luda yã gá papao. 
Nↄgbɛ̃ kɛ̀ ń è pì nɛ́ wɛ́tɛda tↄ́dee kɛ̀ iko vĩ anduna kínanↄamɛ. 
