﻿ZIA YÃ.
11.
Ben wà kàba kpàma pↄ́yↄ̃bↄ ũ wà bèmɛ: Ǹ fɛɛ ǹ Luda kpɛ́ yↄ̃ kↄ̃n à gbãgbãkiio, ǹ dↄnziri kɛ̀ aↄ̃ↄ kú gweenↄ naro. 
Ǹ à ua tó, ǹton yↄ̃ro, zaakɛ wà kpà boriinↄamɛ. Aↄ̃é kɛ̀sɛ pɛ́ɛpɛɛ Luda wɛ́tɛdaaa ai mↄ baplaa awɛɛplaa. 
Mɛ́ ma sèedade gↄ̃ↄn plaaanↄ gba zɛ́ aↄ̃ annabikɛyã o gurↄ wàa swɛɛdo kↄ̃n baaagↄ̃ↄo pì guu pↄsia utanↄo dadana. 
Gbɛ̃ pìnↄn kù lí mɛ̀n plaa kↄ̃n dabu mɛ̀n plaaa kɛ̀ zɛna anduna Dii aɛnↄ ũ. 
Tó gbɛ̃ e wɛtɛɛ à ĩa daḿma, tɛ́ é bↄ ń lɛ́n à ń ibɛɛ pìnↄ kpáta. Lɛn gbɛ̃ kɛ̀ èe wɛtɛɛ à ĩa daḿma é ga lɛ. 
Aↄ̃ↄ ludambɛ zɛ́ tatana gbãa vĩ, lɛ lou tón ma gurↄↄ kɛ̀ aↄ̃ↄe annabikɛyã ooro yãnzi. Aↄ̃ í liɛna aru ũ gbãa vĩ dↄ. Aↄ̃é kisia bori sãnda píngi kpá andunazi gurↄↄ kɛ̀ aↄ̃ↄ yezia. 
Tó aↄ̃ ń sèedadekɛna yã̀a, nↄ̀bↄ pãsĩ kɛ̀ è bↄ gɛ̀wãa wɛ̀ɛ zòoto guu é zĩ̀ káńyo à zĩ̀ bleḿma à ń dɛdɛ. 
Aↄ̃ gɛ̀nↄ égↄ̃ kaɛna wɛ́tɛdaa kɛ̀ wà ń Dii pà lía zɛ́daa guu. Yáasi guu wè wɛ́tɛdaa pì sísi Sↄdↄmu ke Igipiti. 
Gbɛ̃ píngi kↄ̃n bori píngio kↄ̃n boriyã píngio kↄ̃n bùsu píngi gbɛ̃nↄ é ń gɛ̀nↄ gwagwa ai gurↄ aagↄ̃ kↄ̃n a kusuo, aↄ̃é we wà ń vĩiro. 
Gbɛ̃ kɛ̀ aↄ̃ↄ kú tↄↄtɛanↄ é pↄnnaa kɛ aↄ̃é zĩbaa kɛ aↄ̃é gba dakↄ̃nɛ, kɛ̀ annabi gↄ̃ↄn plaaa kɛ̀ wãwãa kpàńzi pìnↄ gàga yãnzi. 
Gurↄ aagↄ̃ kↄ̃n a kusuo pì gbɛra Ludaa tò wesa wɛ̃̀ndidee gɛ̃̀ńgu, ben aↄ̃ fɛ̀ɛ wà zɛ̀. Vĩa gbɛ̃ kɛ̀ aↄ̃ ń énↄ kũ̀ maamaa. 
Ben annabi pìnↄ kòto gbãaa mà à bↄ̀ ludambɛ à bèńnɛ: À fɛɛ à mↄ́ kɛ̀. Gurↄↄ kɛ̀ aↄ̃ ibɛɛnↄ wɛ́ɛ fĩḿma, ben aↄ̃ fɛ̀ɛ wà tà musu ludambɛ luguu guu. 
Zĩ beeea tↄↄtɛ nìgãnigã pãsĩpãsĩ, wɛ́tɛdaa pì lɛo kuridee gbòro, ben gↄ̃ↄn bↄrↄ swɛɛplaaanↄ gàga tↄↄtɛnigãnigãna pì guu. Vĩa gbɛ̃ kpaaanↄ kũ̀, ben aↄ̃ bɛ̀ɛ lì Luda Musudenɛ. 
Wãiyoo plaadee gɛ̃̀tɛ, à aagↄ̃dee e kaa sa. 
Malaika swɛɛplaadee a kãkãki pɛ̀. Kòto gbãaanↄ bↄ̀ ludambɛ wà bè: Anduna kpata gↄ̃̀ wa Dii pↄ́ ũ kↄ̃n kína kɛ̀ à kào, eégↄ̃ kí blee gurↄ píngi. 
Gbɛ̃nsi gↄ̃ↄn baro awɛɛsiigↄ̃ↄ kɛ̀ aↄ̃ↄ vɛ̃ɛvɛ̃ɛna ń kìtaa Luda aɛ pìnↄ kùɛkuɛ aↄ̃ dↄnzi kɛ̀nɛ 
wà bè: Dii Luda Gbãapingide kɛ̀ ń kuu yã bensↄ̃ ń kuu ai tia, wa n sáabu kɛ̀, zaakɛ n bↄ kↄ̃n n gbãa bítaomɛ, gbasa n na kíblenaa. 
Boriinↄ pↄ fɛ̃̀, ben n pↄfɛ̃ pìtaḿma. N yãkpaɛkɛna kↄ̃n gɛ̀wãadeenↄ gurↄↄ kà. Nɛ́ fĩa bo n zↄ̀bleri annabinↄnɛ kↄ̃n n gbɛ̃ kɛ̀ aↄ̃ↄe vĩa kɛɛnnɛɛnↄ, nɛ́ féte gbɛ̃nsi, nɛ́ andunadɛrinↄ dɛdɛ. 
Ben wà Luda kpɛ́ kɛ̀ kú musu wɛ̃̀, ben wà Luda bà kuunańyo àkpati è à guu. Lou e pii, èe vĩi, èe pũtãa. Tↄↄtɛ nìgãnigã, lougbɛ pãsĩ kwɛ̀. 
