﻿ZIA YÃ.
7.
Beee gbɛra ma malaika gↄ̃ↄn siigↄ̃ↄnↄ è zɛzɛ anduna gooda siigↄ̃ↄnↄa, aↄ̃ baade a gooda ĩa kũna, lɛ ĩa tón vu tↄↄtɛ ke ísiaa ke lí kearo yãnzi. 
Ben ma malaika pãnde è, à bↄ̀ à fɛ̀ɛ ↄfãntɛ̃bↄɛ kpa, à Luda Wɛ̃̀ndide sèedakɛbↄ kũna. À lɛ́ gbãaa zù malaika gↄ̃ↄn siigↄ̃ↄ kɛ̀ wà ń gbá zɛ́ aↄ̃ tↄↄtɛ kↄ̃n ísiaao yaka pìnↄzi 
à bè: Àton tↄↄtɛ ke ísiaa ke línↄ yakaro ai wà sèeda kɛ wa Luda zↄ̀blerinↄ mì'aɛnↄa. 
Ben wà gbɛ̃ kɛ̀ wà sèeda pì kɛ̀ḿmanↄ lɛ́ òmɛ, aↄ̃ gↄ̃ↄn bↄrↄ baswɛɛplaa awɛɛsiigↄ̃mɛ. Aↄ̃ bↄ̀ Isaraili bori píngi guu: 
Yuda boriinↄ gↄ̃ↄn bↄrↄ kuri awɛɛplaa, Rubɛni boriinↄ gↄ̃ↄn bↄrↄ kuri awɛɛplaa, Gada boriinↄ gↄ̃ↄn bↄrↄ kuri awɛɛplaa, 
Asa boriinↄ gↄ̃ↄn bↄrↄ kuri awɛɛplaa, Nafatali boriinↄ gↄ̃ↄn bↄrↄ kuri awɛɛplaa, Manase boriinↄ gↄ̃ↄn bↄrↄ kuri awɛɛplaa, 
Simɛↄ boriinↄ gↄ̃ↄn bↄrↄ kuri awɛɛplaa, Levi boriinↄ gↄ̃ↄn bↄrↄ kuri awɛɛplaa, Isaka boriinↄ gↄ̃ↄn bↄrↄ kuri awɛɛplaa, 
Zɛbuluni boriinↄ gↄ̃ↄn bↄrↄ kuri awɛɛplaa, Yusufu boriinↄ gↄ̃ↄn bↄrↄ kuri awɛɛplaa, Bɛyãmi boriinↄ gↄ̃ↄn bↄrↄ kuri awɛɛplaa. 
Beee gbɛra ma gbɛ̃nↄ è paripari, weé fↄ̃ wà ń lɛ́ dↄ̃ro. Aↄ̃ bↄ̀ bùsu píngi guu, bori píngi guu, gbɛ̃ píngi guu, boriyã píngi guu. Aↄ̃ↄ zɛzɛna kíblekita kↄ̃n Sãnɛ Bↄ̀rↄo aɛ. Aↄ̃ↄ utagyaba puraa dadana, kpakpa lánↄↄ nana ń ↄzĩ. 
Aↄ̃ↄe wii gbãaa lɛɛ wèe bee: Mìsina è bↄ wa Luda kɛ̀ vɛ̃ɛna kìtaa kↄ̃n Sãnɛ Bↄ̀rↄo kiiamɛ. 
Malaikanↄↄ zɛzɛna wà lìga kìta kↄ̃n gbɛ̃nsinↄ kↄ̃n pↄ́ bɛ̃ɛ mɛ̀n siigↄ̃ↄnↄzi ń píngi, ben aↄ̃ kùɛkuɛ kìta pì aɛ wà dↄnzi kɛ̀ Ludanɛ 
wà bè: Aami! Wa Luda bé à tↄ́ vĩ kↄ̃n gakuio kↄ̃n ↄ̃ndↄ̃ↄo kↄ̃n sáabuo kↄ̃n bɛ̀ɛo kↄ̃n ikoo kↄ̃n gbãaao gurↄ píngi. Aami! 
Ben gbɛ̃nsi pìnↄ doke ma la à bè: Dénↄn gyabapuradari kɛ̀nↄ ũu? Aↄ̃ bↄ̀ mámɛ? 
Ma bènɛ: Baa, ḿbe ń dↄ̃. Ben à bèmɛ: Gbɛ̃ kɛ̀ aↄ̃ bↄ̀ wɛ́ɛtãmma bíta guunↄmɛ. Aↄ̃ ń utagyaba pìnↄ pìpi Sãnɛ Bↄ̀rↄ aru guu à pura kũ̀. 
Beee yãnzin aↄ̃ↄ kú Luda kìta aɛzĩzi, aↄ̃ↄe dↄↄzi a kpɛ́n fãantɛ̃ kↄ̃n gwãavĩo. Gbɛ̃ kɛ̀ vɛ̃ɛna kìtaa pì é a kuta kúńla. 
Nↄaa ke ímii é ń dɛ zikiro, ↄfãntɛ̃ é ń lɛ́ro, guu é wãḿmaro, 
zaakɛ Sãnɛ Bↄ̀rↄ kɛ̀ kú kìta pì gura súusu é kɛ ń Dã̀ri ũ, eé dↄńnɛ aɛ ai í wɛ̃̀ndide bↄkiia, Luda é gbasa à ń wɛ́ɛ'i gogońnɛ píngi. 
