﻿ZIA YÃ.
6.
Má è Sãnɛ Bↄ̀rↄ kãɛ'ↄ mɛ̀n swɛɛplaaa pìnↄ káakupↄ gò. Ben má mà pↄ́ bɛ̃ɛ mɛ̀n siigↄ̃ↄ pìnↄ doke yã ò lán lapatana bà à bè: Ǹ mↄ́! 
Ben ma sↄ̃ puraa è, gbɛ̃ kɛ̀ dia sá kũna. Wà kífura kùnɛ, ben à bↄ̀ zĩ̀bleri ũ, lɛ à gá zĩ̀ ble. 
Kɛ̀ Sãnɛ Bↄ̀rↄ kãɛ'ↄ plaadee gò, má mà pↄ́ bɛ̃ɛ plaadee bè: Ǹ mↄ́! 
Sↄ̃ pãnde bↄ̀ dↄ, à dɛ tɛ̃ɛ zónzon. Wà gbɛ̃ kɛ̀ dia gbà zɛ́ à aafia sí andunaa, lɛ gbɛ̃nↄ kↄ̃ dɛdɛ. Wà fɛ̃ɛda ìsi kpàa. 
Kɛ̀ Sãnɛ Bↄ̀rↄ kãɛ'ↄ aagↄ̃dee gò, má mà pↄ́ bɛ̃ɛ aagↄ̃dee bè: Ǹ mↄ́! Ben ma sↄ̃ siaa è, gbɛ̃ kɛ̀ dia zaka kũna. 
Ma kĩi mà lán gbɛ̃ntee kòto bà, à bↄ̀ pↄ́ bɛ̃ɛ mɛ̀n siigↄ̃ↄ pìnↄ tɛ́ à bè: Ése zaka lɛ́ don gurↄ do zĩ ↄↄ ũ. Gbado zaka lɛ́ aagↄ̃n gurↄ do zĩ ↄↄ ũ. Ǹton tó kù línↄ kↄ̃n geepi línↄ yakaro. 
Kɛ̀ Sãnɛ Bↄ̀rↄ kãɛ'ↄ siigↄ̃dee gò, ma pↄ́ bɛ̃ɛ siigↄ̃dee kòto mà à bè: Ǹ mↄ́! 
Ben ma sↄ̃ pufau è, gbɛ̃ kɛ̀ dia tↄ́n Gaa, Gɛ̀wãa tɛ́zi. Wà ń gbá zɛ́ aↄ̃gↄ̃ iko vĩ anduna gbɛ̃nↄ lɛo siigↄ̃deea, aↄ̃ ń dɛdɛ kↄ̃n zĩ̀o kↄ̃n dekaao kↄ̃n gagyãao kↄ̃n nↄ̀bↄ pãsĩnↄ. 
Kɛ̀ Sãnɛ Bↄ̀rↄ kãɛ'ↄ sↄↄrodee gò, ma gbɛ̃ kɛ̀ wà ń dɛ́dɛ Luda yã ona kↄ̃n Yesu sèedakɛnao yãnzi gɛ̀wãadeenↄ è tuaetitikpatakii gĩzĩ. 
Aↄ̃ wii gbãaa lɛ̀ wà bè: Dii kɛ̀ kú adona yãpurade, bↄrɛn nɛ́ yãkpaɛ kɛ kↄ̃n gbɛ̃ kɛ̀ aↄ̃ↄ kú tↄↄtɛanↄ ǹ wa dɛna gɛ̃ɛ boḿmaa? 
Ben wà utagyaba puraa dàda ń baadenɛ, wà bèńnɛ aↄ̃ mɛna féte ai ń Yesu zↄ̀bleri daaa kɛ̀ weé ń dɛdɛ lán ń bànↄ lɛ́ gá káo. 
Kɛ̀ Sãnɛ Bↄ̀rↄ kãɛ'ↄ swɛɛdodee gò, má è tↄↄtɛ nìgãnigã pãsĩpãsĩ, ↄfãntɛ̃ sia kũ̀ níginigi lán bisa kɛ̀ wà dà òsin bà, mↄvura tɛ̃a kũ̀ lán aru bà mámmam. 
Sↄsↄnɛnↄ bↄ̀ ludambɛ aↄ̃ kwɛ̀ tↄↄtɛ lán zàga'ĩa è líbɛ ísi woro nà. 
Ludambɛɛ kɛ̃̀kↄ̃a à kòkokoko lán pɛ̀ bà. Kpiiinↄ kↄ̃n ísia luannↄ sↄ̃ki kpà píngi. 
Anduna kínanↄ kↄ̃n kpatablerinↄ kↄ̃n soza gbɛ̃nsinↄ kↄ̃n auzikideenↄ kↄ̃n gbãadeenↄ kↄ̃n gbɛ̃ píngio zↄ̀nↄ ke wɛ̃ɛnɛnↄ ùtɛ gbɛ̀wɛɛnↄn kↄ̃n gbɛ̀kotoonↄo. 
Aↄ̃ wiii gↄ̃̀ dↄ: Kpiiinↄ kↄ̃n gbɛ̀nↄ à dawala, à wa utɛ gbɛ̃ kɛ̀ vɛ̃ɛna kìtaanɛ, à wa sí Sãnɛ Bↄ̀rↄ pↄfɛ̃a. 
Zaakɛ aↄ̃ pↄfɛ̃pitammagurↄ ìsi kà. Dé bé eé fↄ̃ à bↄn? 
