﻿1 PITA.
5.
Mɛ́ɛ lɛ́ daa a gbɛ̃nsinↄa sa. Gbɛ̃nsin ma ũ se. Má dɛ nawɛ̃a kɛ̀ Kirisi kɛ̀ sèedadee ũ, bensↄ̃ ma bà kú kↄ̃n gakui kɛ̀ eé bↄ gupuraaao se. 
Àgↄ̃ dɛ kpàsa kɛ̀ Ludaa kàɛaree dã̀rinↄ ũ. À ↄ ligazi kↄ̃n pↄyezinao, èe kɛ tiasinlo, lán Ludaa yezi nà. Èe kɛ ↄↄwɛtɛna yãnzinlo. À kɛ kↄ̃n nↄ̀sɛo do. 
Àtongae gbãaa ble gbɛ̃ kɛ̀ wà ń náare a ↄzĩ pìnↄaro. À tó a kuuna gↄ̃ a sãa pìnↄ daa zɛ́a, 
é kífura kɛ̀ à gakui è yãaroo e gurↄↄ kɛ̀ Sãdãriki é mↄ́. 
A gↄ̃kparɛnↄ sↄ̃, à a zĩnda kpá gbɛ̃nsinↄa. A píngi à a zĩnda busakↄ̃nɛ, zaakɛ: Luda è íbɛtɛ kpá kↄ̃n ĩadãrinↄ, mↄde à gbɛ̃kɛɛ vĩ kↄ̃n zĩndabusarinↄ. 
Beee yãnzi à a zĩnda busa Luda gbãadeenɛ, eé a sɛ́ lezĩ gurↄↄ kɛ̀ à dìɛa. 
À a yã'ↄ̃ammanↄ tónɛ píngi, zaakɛ è làakari dↄawa. 
A wɛ́ɛ gↄ̃ dↄ, àgↄ̃ kú a làakaria. A ibɛɛ Ibilisi dɛ lán músu ↄ́ↄdↄri bàmɛ. Èe kpáɛ kɛɛazi, èe gbɛ̃ wɛtɛɛ à kũ. 
À gínɛ, à zɛ gbãa ludanaanɛkɛna guu, zaakɛ á dↄ̃ kɛ̀ a Yesude daa kɛ̀ aↄ̃ↄ kú anduna guunↄ ń píngi e nawɛ̃a dↄ̃nkↄ̃ pì kɛɛmɛ se. 
Luda Aubarikapingide a sisi a gakui kɛ̀ è yãarooa Kirisi guu. Tó a nawɛ̃a kɛ̀ féte, eé a bↄ maa, eé a zɛ gíngin, eé a gba gbãaa, eé a kãsãa pɛ́ɛ. 
Àmbe à gbãa vĩ ai gurↄ píngi! Aami. 
Wa gbɛ̃ndo Silasi bé à lá nɛ́ngo kɛ̀ kɛ̃̀mɛare. À kuumɛ gbɛ̃ náanɛdee ũ. Ma lɛ́ dàawa, má dɛ à sèedadee ũ kɛ̀ yã kɛ̀ má ò dɛ Luda gbɛ̃kɛ yãpuraa ũ. À zɛo gíngin. 
Babilↄnu gbɛ̃ kɛ̀ Luda ń sɛ́ lán a bànↄ ì kpàawa. Ma nɛ́ Maaku ì kpàawa dↄ. 
À ì kpákↄ̃a kↄ̃n lɛ́pɛkↄ̃anao yenzi guu. Luda amↄa kɛ̀ á kú Kirisi guunↄ gba aafia a píngi. 
