﻿EBERUNƆ.
12.
Beee yãnzi wapinↄ se, lán sèedadeenↄↄ diwazi nà lɛ, wà ↄ kpá pↄ́ kɛ̀ è kpáweenↄzi kↄ̃n durun kɛ̀ è wa kakũn aagao píngi, wà bàkpakↄ̃sↄ̃na kɛ̀ Ludaa dìɛwe lɛ́ kↄ̃n mɛnao. 
Wà wɛ́ɛ pɛ́ Yesua kɛ̀ bↄ̀ kↄ̃n wa ludanaanɛkɛna zɛ́o bensↄ̃ à zɛ́ pì kɛ̀ papana. À gana lía fↄ̃̀, èe à wíyã daro pↄnnaa kɛ̀ diɛnanɛ ena yãnzi, ben à gàa à vɛ̃̀ɛ Luda kíblekita ↄplazi. 
À laasuu lɛ́ à yãa, lán à mɛna fↄ̃̀ kↄ̃n durunkɛri kɛ̀ aↄ̃ íbɛtɛ beee taka kpàonↄo, lɛ àton kpasa a kã garo yãnzi. 
Zaakɛ a ↄsikana kↄ̃n durun-o guu, ée zɛ a gi ai a gaa a gaoro. 
Nↄ̀sɛyĩikũyã kɛ̀ wà òare lán nɛ́nↄ bà sã̀agun yↄ́? Wà bè: Ma nɛ́, tó Dii e n totoo, ǹton diɛ pãro. Tó à kpã̀kɛ̃nzi, ǹton tó n kã garo. 
Zaakɛ gbɛ̃ kɛ̀ Dii yezin è toto, è wɛ́ɛ tã gbɛ̃ kɛ̀ à sì a nɛ́ ũua. 
À wɛ́ɛtãmma diɛ totona ũ. Luda bé èe beee kɛare, kɛ̀ à nɛ́nↄn a ũ yãnzi. Nɛ́ kee kuu kɛ̀ à de gí à à totoziↄ́? 
Tó èe a toto lán a nɛ́ kpaaanↄ bàro, ɛ̃ndɛ̃ à nɛ́nↄn a ũro, gitasↄtↄnɛnↄn a ũ. 
Wá denↄ vĩ anduna kɛ̀ aↄ̃ wa toto, ben wa ń yã mà. Lán à dɛ lɛ nà, wà mì siɛ wa ninii Denɛ dɛ beeela wàgↄ̃ kuu. 
Wa denↄ wa toto gurↄplaapↄ ũ aↄ̃ ↄ̃ndↄ̃ lɛ́n. Luda è wa toto wa kaarana yãnzimɛ, lɛ wa kuuna e àgↄ̃ adona lán à bà. 
Totona kee pↄnnaa vĩ a gurↄaↄro, sé pↄsiaa, mↄde gbɛ̃ kɛ̀ totona pì ń kɛ́kɛnↄ è à gbɛ̀ e zãa bↄna maa kↄ̃n aafiao ũ. 
Beee yãnzi à a ↄↄ kɛ̀ aↄ̃ gↄ̃̀ dↄazinↄ kↄ̃n a gbá kɛ̀ aↄ̃ gↄ̃̀ teeenↄ gba gbãaa, 
à zɛ́ sɛ́ súusu, lɛ amↄa kɛ̀ ée tↄ̃ↄtɛɛnↄ tón kↄ̃̀ↄ kũro, aↄ̃ gↄ̃ kↄ̃n aafiao. 
À wɛtɛ àgↄ̃ nna kↄ̃n baade píngio, a kuuna gↄ̃ adona, zaakɛ tó gbɛ̃ kuuna adonaro, eé Dii ero. 
À làakari kɛ, a gbɛ̃ke tón kora Luda gbɛ̃kɛkɛnnɛnazi à gↄ̃ fĩndio'a ũ a tɛ́, à ĩa da gbɛ̃nↄa pari à ń yakaro. 
A gbɛ̃ke tóngↄ̃ dɛ pãpãkɛri ke ludayãdarisai ũ lán Isau bàro. À a daudukɛzɛ yà pↄ́ gɛ̃̀n do blena yãnzi. 
Á dↄ̃ kɛ̀ à sa'olɛ wɛ̀tɛ a dea zãa, ben Luda gìnɛ. Baa kɛ̀ à wɛ̀tɛ kↄ̃n wɛ́ɛ'io, èe zɛ́ e à yã kɛ̀ à kɛ̀ liɛro. 
Èe kɛ Sinai kpiii kɛ̀ weé fↄ̃ wà ↄ kɛan a sↄ̃ziro, kɛ̀ èe tɛ́ kũu à gusiaa vĩ kↄ̃n gu bùgubuguo kↄ̃n zàga'ĩao 
kↄ̃n kãkãki'ↄo kↄ̃n Luda kòto gbãaao. Kɛ̀ Isarailinↄ kòto pì mà, aↄ̃ agbaa kpànɛ wà bè àton yãke ońnɛ dↄro, 
zaakɛ aↄ̃é yã kɛ̀ à dìɛńnɛ kɛ̀kii fↄ̃ro à bè: Baa pↄ́kãdee bé à nà kpiii pìa, wà pápa gbɛ̀o wà dɛ. 
Luda pitana pì nɛ́ vĩa yãmɛ maamaa ai Musa bè, vĩa a kũ, ée lugalugaa. 
Mↄde a sↄ̃ Zayↄn kpiiizi kↄ̃n Luda Wɛ̃̀ndide wɛ́tɛ Yerusalɛmu kɛ̀ kú musuo kↄ̃n à malaika pariparii kɛ̀ aↄ̃ kakↄ̃ana gweenↄ 
kↄ̃n daudu kɛ̀ aↄ̃ tↄ́ kɛ̃na gweenↄ kakↄ̃anao kↄ̃n Luda kɛ̀ dɛ gbɛ̃ sãnda píngi yãkpaɛkɛri ũuo kↄ̃n gɛ̀wãa gbɛ̃ maaa kɛ̀ aↄ̃ gↄ̃̀ papananↄ 
kↄ̃n Yesu kɛ̀ dɛ Luda bà kuunańyo dufu yãkɛkɛri ũuo kↄ̃n à aru fãfãna kɛ̀ èe yã maaa oo dɛ Abila pↄ́laao. 
À làakari kɛ àton gí yã'ori pì yã maziro. Lán gbɛ̃ kɛ̀ aↄ̃ gì Luda lɛ́damma mazi tↄↄtɛ kɛ̀nↄↄ e bↄro nà, wapinↄ se, lán Ludaa e lɛ́ daawa zaa musu, tó wa kpɛɛ lìnɛ, weé wa pↄ́ o dↄↄ́? 
À kòto tↄↄtɛ lùgaluga yã, ben à lɛ́ gbɛ̃̀ à bè, é guu lugaluga gɛ̃̀n do dↄ, èe kɛ tↄↄtɛ adonlo, kↄ̃n musuomɛ sa. 
Kɛ̀ à bè, gɛ̃̀n do dↄ, beee e beewe Luda pↄ́kɛna kɛ̀ eé lugalugaa pìnↄ é gɛ̃ zɛ́lamɛ, lɛ pↄ́ kɛ̀ è lugaroonↄ e àgↄ̃ kuu. 
Beee yãnzi lán wée kpata kɛ̀ è nigãroo blee nà, wà Luda sáabu kpá, wàgↄ̃ dↄnzi kɛɛnɛ lán à yezi nà, wàgↄ̃ mì siɛɛnɛ vĩakɛnanɛ guu. 
Zaakɛ wa Luda nɛ́ tɛ́ kɛ̀ è kũḿmamɛ. 
