﻿1 TƐSALONIKADEENƆ.
5.
Ma gbɛ̃nↄ, yã pì kɛna ke à kɛgurↄↄ onaare zɛ́ vĩro, 
zaakɛ á dↄ̃ sãnsãn lán kpãi è mↄ́ gwãavĩ nà. Lɛn eégↄ̃ dɛ lɛ Dii mↄ́gurↄↄ zĩ. 
Tó gbɛ̃nↄↄ e bee, wá aafia, wá kú wa làakaria, kaatɛna é mↄ́ḿma kãndo lán nɛ́'iwãwãa è mↄ́ nↄ̀sindadeea nà, aↄ̃é bↄro. 
Apinↄ sↄ̃ wa gbɛ̃nↄ, á kú gusiaanlo, gurↄↄ pì é suawa lán kpãi bàro, 
zaakɛ gupura gbɛ̃nↄn a ũ, fãantɛ̃ gbɛ̃nↄn a ũ a píngi. Gwãavĩ ke gusia gbɛ̃nↄn wa ũro. 
Beee yãnzi wàton ii o lán danↄ bàro. Wà itɛ̃ kɛ wàgↄ̃ kú wa làakaria. 
I'orinↄ è ii o gwãavĩ, wɛ̃dɛrinↄ sↄ̃ è wɛ̃dɛɛ kɛ gwãavĩ. 
Wapinↄ sↄ̃, zaakɛ fãantɛ̃ gbɛ̃nↄn wa ũ, wàgↄ̃ kú kↄ̃n làakario, wà ludanaanɛkɛna kↄ̃n yenzio da mↄ̀ uta ũ, wà mìsina tãmaa kú mↄ̀fura ũ. 
Zaakɛ Ludaa e wa diɛ à pↄfɛ̃ pitawaro. À wa diɛ à wa mì sí wa Dii Yesu Kirisi gãzĩmɛ. 
Àmbe à gà wa yãnzi lɛ wàgↄ̃ kúo, tó wá bɛ̃ɛ ke wa anduna tòn yoo. 
Beee yãnzi à lɛ́ dakↄ̃a, à kↄ̃ gba gbãaa, lán ée kɛɛ nà. 
Ma gbɛ̃nↄ, wa wɛ́ɛ kɛ̀awa, à bɛ̀ɛ lí gbɛ̃ kɛ̀ aↄ̃è zĩi kɛ a tɛ́nↄnɛ, kɛ̀ aↄ̃ iko vĩawa Dii guu, aↄ̃ↄe a daa zɛ́anↄ. 
À ń gakui dↄ̃ńnɛ maamaa yenzi guu zĩi kɛ̀ aↄ̃ↄe kɛɛ yãnzi. Àgↄ̃ nna kↄ̃o. 
Ma gbɛ̃nↄ, wa lɛ́ dàawa, à faasaideenↄ da zɛ́a, à gbɛ̃ yĩinↄ gba swɛ̃̀, à làakari dↄ gbãasaideenↄa, à mɛna kↄ̃n baade píngio. 
À làakari kɛ, a gbɛ̃ke tón à zaaa fĩa bo kↄ̃n à zaaaoro. À zɛ́ wɛtɛ àgↄ̃ à maaa kɛɛkↄ̃nɛ kↄ̃n gbɛ̃ píngio gurↄ píngi. 
Àgↄ̃ kú pↄnnaa guu gurↄ píngi. 
Àgↄ̃ adua kɛɛ yãana sai. 
Àgↄ̃ Luda sáabu kpaa yã píngi musu. Beee bé à dɛare à pↄyezi ũ Kirisi Yesu guu. 
Àton Luda Nini tɛ́ kɛ̀ è káńgu dɛdɛro, 
àton kya ká annabikɛyãnlo. 
À yã píngi tàasi kɛ, àgↄ̃ à maaa kũna, 
à mì kɛ̃ zaakɛna bori píngia. 
Luda Aafiade tó a kuuna gↄ̃ kú adona yã sãnda píngi guu, à a nini kↄ̃n a wɛ̃̀ndio kↄ̃n a mɛ̀o dãkpaare aafia taari sai ai wa Dii Yesu Kirisi mↄ́gurↄↄ zĩ. 
Luda kɛ̀ à a sisi à a sɛ náanɛ vĩ, eé yã pì kɛare. 
Ma gbɛ̃nↄ, à adua kɛwe. 
À ì kpá wa gbɛ̃nↄa ń píngi kↄ̃n Luda gbɛ̃nↄ lɛ́pɛmmanao. 
Ma naare Diizi, à takada kɛ̀ kyó kɛ wa gbɛ̃nↄnɛ ń píngi. 
Wa Dii Yesu Kirisi gbɛ̃kɛɛ kɛare. 
