﻿1 TƐSALONIKADEENƆ.
4.
Yã kɛ̀ gↄ̃̀n yɛ̀, ma gbɛ̃nↄ, á mà wa lɛ́n lán à maa a kuuna ká Ludanɛ nà. Á kuuna dɛ lɛ kↄ̀, mↄde wée wɛ́ɛ kɛɛawa, wée agbaa kpaaare wa Dii Yesu guu, àgↄ̃ kuu lɛ àgↄ̃ gaao. 
Á yã kɛ̀ wá dàare kↄ̃n Dii Yesu tↄ́o dↄ̃. 
Ludaa yezi a kuuna gↄ̃ adona, à mì kɛ̃ pãpãkɛnaa. 
A baade gↄ̃ a zĩnda kũna dↄ̃ kↄ̃n bɛ̀ɛo gbãsĩ sai, 
èe kɛ kↄ̃n dà zaa nidɛnao lán kifii kɛ̀ aↄ̃ↄ Luda dↄ̃roonↄ bànlo. 
Yã pì musu gbɛ̃ke tón a gbɛ̃daaa takii kɛ ke à taari kɛnɛro, zaakɛ Dii é wɛ́ɛ tã yã beee taka kɛ̀rinↄa lán wa gĩakɛ wá òare nà, wa a swã gào. 
Ludaa e wa sísi wàgↄ̃ kú kↄ̃n gbãsĩoro, séde wa kuuna gↄ̃ adona. 
Bee yãnzi gbɛ̃ kɛ̀ gì yãdannɛna kɛ̀zi, èe kɛ gbɛ̃nteen à gìziro, Luda kɛ̀ è a Ninii kɛ̀ kú adona dawaguun à gìzi. 
Wé e wà yekↄ̃zina yã oarero, zaakɛ a zĩndanɛ Luda yekↄ̃zina dàare. 
Á kuuna dɛ lɛ kↄ̀, á ye wa gbɛ̃ kɛ̀ aↄ̃ↄ kú Masedonia bùsu guunↄzi ń píngi. Ma gbɛ̃nↄ, wa lɛ́ dàawa, àgↄ̃ kɛɛ lɛ àgↄ̃ gaao, 
à zɛ́ wɛtɛ àgↄ̃ kuu yãkete sai, à a zĩnda yã kɛ à a zĩnda zĩi kɛ, lán wá dìɛare nà, 
lɛ a kuuna e à ká bàazideenↄnɛ, lɛ àton fu a zĩndaa à da gbɛ̃keziro. 
Ma gbɛ̃nↄ, wá yezi àgↄ̃ yãpuraa dↄ̃ gbɛ̃ kɛ̀ aↄ̃ anduna tònↄ yã musu, lɛ a pↄↄ tóngↄ̃ sia lán gbɛ̃ kɛ̀ aↄ̃ↄ tãmaa vĩroonↄ bàro yãnzi. 
Zaakɛ wá sì kɛ̀ Yesu gà à fɛ̀ɛ, lɛn dↄ Luda é tó gbɛ̃ kɛ̀ aↄ̃ anduna tò Yesu guunↄ ɛara wà mↄ́o lɛdo. 
Yã kɛ̀ wée ooaree kɛ̀ki nɛ́ Dii yãdannɛnamɛ. Wamↄwa gbɛ̃ kpaaa kɛ̀ wégↄ̃ kuu ai Dii mↄ́gurↄↄ zĩnↄ, wé dↄ gbɛ̃ kɛ̀ aↄ̃ anduna tò pìnↄnɛ aɛro. 
Dii bé eé bↄ ludambɛ, à pita kↄ̃n yãdiɛnnɛnao kↄ̃n malaika gbɛ̃nsi kòtoo kↄ̃n Luda kãkãki ↄ́o, gbɛ̃ kɛ̀ aↄ̃ gà Kirisi guunↄ é fɛɛ bↄna gaan káaku, 
beee gbɛra wamↄwa gbɛ̃ kpaaa kɛ̀ wá kuunↄ, weé wa sɛ́ɛńyo lɛdo ai ludambɛ luguun wà da Diilɛ ĩa guu, gbasa wàgↄ̃ kúo ari gurↄ píngi. 
Bee yãnzi à kↄ̃ làakari kpáɛ kↄ̃n yã pìo. 
