﻿1 TƐSALONIKADEENƆ.
2.
Ma gbɛ̃nↄ, á dↄ̃ a zĩndanɛ, kɛ̀ wa zɛ́ ena a kiia e kɛ pãro. 
Á dↄ̃ lán wà wɛ́ɛ tã̀wa nà, wa nawɛ̃a kɛ̀ káaku zaa Filipi, ben Luda wa gba kùgbãaa, wa à baaru nnaa kpàare ↄsi kↄ̃n ↄsiio. 
Wa nakↄ̃rɛnaawaa dɛ ɛgɛ zɛ́ yã ũro. Wée kɛɛ laasuu zaaa ke a takiikɛna yãnzinlo. 
Lán Luda wa ka a baaru nna kpanaa nà, lɛn weè kpáńnɛ lɛ, èe kɛ gbɛ̃ntee pↄyezin wée wɛtɛɛro, sé Luda wa laasuu tàasikɛri pↄ́. 
Á dↄ̃ kɛ̀ wée yã nnannaa o gbɛ̃kenɛro, bensↄ̃ wée yãke kɛ kↄ̃n mↄnafikio wãkũ yãnziro. Ludan wa sèedadee ũ. 
Wée sáabu wɛtɛ gbɛ̃ntee kiiaro, apinↄ ke gbɛ̃ pãndenↄ. 
Baa kɛ̀ wá à zɛ́ vĩ wà gↄ̃are asoo ũ wa Kirisi zĩ̀rikɛ yãnzi, wá kɛ̀ao busɛbusɛ, lán nↄgbɛ̃ nɛ́dandee è làakari dↄ a nɛ́a nà. 
Kɛ̀ wá yeazi maamaa yãnzi, wée zɛo wà baaru nnaa kɛ̀ bↄ̀ Luda kiia kpáare adoro, kↄ̃n wa zĩnda kpanaawaaomɛ dↄ, zaakɛ a gↄ̃ wa gbɛ̃ yenzideenↄ ũ. 
Ma gbɛ̃nↄ, à tó wa zĩkɛna kↄ̃n nawɛ̃ao yã dↄagu. Gurↄↄ kɛ̀ wée baaru nnaa kɛ̀ bↄ̀ Luda kiia pì kpaaare, weègↄ̃ zĩi kɛɛ fãantɛ̃ kↄ̃n gwãavĩo, lɛ wàton gↄ̃ a gbɛ̃kenɛ asoo ũro yãnzi. 
Ámbe wa sèedadeenↄ ũ, kↄ̃n Ludao dↄ, kɛ̀ wá kú amↄa kɛ̀ a Yesu náanɛ kɛ̀nↄ tɛ́ a zɛ́a nↄ̀sɛpuradeenↄ ũ taari sai. 
Á dↄ̃ kɛ̀ wa yã kɛ̀ a baadenɛ lán de è kɛ a nɛ́nↄnɛ nà. 
Wa lɛ́ dàawa, wa a nↄ̀sɛ kpàɛare, wa nakↄ̃rɛawa, lɛ a kuuna kɛ sɛ̃nkpɛ kↄ̃n gbɛ̃ kɛ̀ Luda ń ká kpata gakuidee kɛ̀ bↄ̀ à kiiannↄo. 
Kɛ̀ a Luda yã kɛ̀ wá òaree pì mà, ée diɛ gbɛ̃ntee pↄ́ ũro, á sì lán à dɛ nà, Luda yã yãpuraa ũ. Àmbe e zĩi kɛɛ amↄa kɛ̀ ée à náanɛ kɛɛnↄ guu. Bee yãnzi dↄ weègↄ̃ Luda sáabu kpaa yãana sai. 
Wa gbɛ̃nↄ, a yã kɛ̀ sɛ̃nkpɛ kↄ̃n Luda gbɛ̃ kɛ̀ aↄ̃ↄ kú Kirisi Yesu guu zaa Yudeanↄo, zaakɛ a bùsudeenↄ wɛ́ɛ tã̀awa se lán Yudanↄↄ tã̀ḿma nà. 
Yudanↄ Dii Yesu dɛ̀ kↄ̃n annabinↄ dↄ, bensↄ̃ aↄ̃ pɛ̀wa. Aↄ̃ yã è ká Ludanɛro, aↄ̃ íbɛtɛ kpà kↄ̃n gbɛ̃ sãnda píngio. 
Aↄ̃è kpáwe wà yã kɛ̀ Luda è gbɛ̃ mì sío o bori pãndenↄnɛ. Lɛn durun kɛ̀ aↄ̃ègↄ̃ kɛɛ gurↄ píngi ègↄ̃ diiàlɛ lɛ. Luda pↄfɛ̃ pìtaḿma sa. 
Wa gbɛ̃nↄ, kɛ̀ wa kɛ̃kↄ̃a gurↄ plaa, wɛ́ɛ bé èe kↄ̃ ero, mↄde wa laasuu kúawa. Wa a bɛgɛɛ kɛ̀ maamaa, wa mɛ̀ wã̀ wà wɛ́ɛ sikↄ̃lɛ. 
Wá yezi wà mↄ́ a gwa dↄ. Mamↄma Pↄlu ma mↄna zɛ́ wɛ̀tɛ à dɛ gɛ̃̀n do ke gɛ̃̀n plaaala, ben Setãn kpàwe. 
Tó wa Dii Yesu mↄ̀, dé bé eégↄ̃ dɛ wa tãmaa kↄ̃n wa pↄnnaao kↄ̃n wa gã̀sazubↄo ũ à aɛ a baasii? 
Zaakɛ ámbe wa gakui kↄ̃n wa pↄnnaao ũ. 
