﻿ƐFESUDEENƆ.
3.
Beee bé à tò mamↄma Pↄlu má dɛ pisina ũ Kirisi Yesunɛ a bori pãndenↄ yãnzi. 
Ée ma lán Luda a gbɛ̃kɛkɛnnɛna zĩi dàmɛ mà kɛ a tɛ́roo? 
Luda a asiiyã ↄ̀dↄamɛ, má kɛ̃̀are féte kↄ̀. 
Tó a à kyó kɛ̀, é fↄ̃ à dↄ̃ lán ma wɛ́ɛ kɛ̃̀ nà Kirisi asiiyã musu. 
Luda e yã pì o gbɛ̃kenɛ yãro, ben tia sa à ↄ̀dↄa a zĩ̀rinↄ kↄ̃n a annabinↄnɛ kↄ̃n a Ninii gbãaao. 
Yã kɛ̀ utɛna yãa pìn yɛ̀: Kirisi Yesu guu baaru nna mana yãnzi bori pãndenↄ gↄ̃̀ Luda túbiblerinↄ ũ lɛdo kↄ̃n Yudanↄ, aↄ̃ gↄ̃̀ńyo mɛ̀dↄ̃nkↄ̃deenↄ ũ. Aↄ̃ baka kú lɛ́ kɛ̀ Ludaa gbɛ̃̀ guu. 
Ma gↄ̃ baaru nnaa pì kpàri ũ gbaa kɛ̀ Ludaa dàmɛ yãnzi kↄ̃n à gbãaa kɛ̀ èe zĩi kɛɛ ma guuo. 
Mamↄma kɛ̀ má kɛ̃sãna Luda gbɛ̃nↄ tɛ́, Luda gbaa pì dàmɛ, ben mɛ́ɛ Kirisi auziki yãanasai baaru kpaa bori pãndenↄnɛ, 
mɛ́ɛ asiiyã kɛ̀ Ludaa e wɛtɛɛ gbɛ̃ sãnda pínginɛ bↄↄńnɛ gupuraaa. Asiiyã pì utɛna Luda kɛ̀ pↄ́ píngi kɛ̀ kiia zaa káaku, 
ben tia sa à tò kpatablerinↄ kↄ̃n ikodee kɛ̀ aↄ̃ↄ kú musunↄ a ↄ̃ndↄ̃ bori pariinↄ dↄ̃̀ sↄsi gãzĩ. 
Luda pↄyezi kɛ̀ kuu zaa gurↄ píngi pì lɛ́ pàpa Kirisi Yesu wa Dii gãzĩ. 
À guu wá zɛ́ vĩ wà sↄ̃ Ludazi kↄ̃n swɛ̃̀o kpaɛna à náanɛkɛna yãnzi. 
Beee yãnzi ma wɛ́ɛ kɛ̀awa àton tó a nↄ̀sɛ yaka nawɛ̃a kɛ̀ mɛ́ɛ kɛɛ a musu yãnziro. A bↄna maaa yãnzimɛ. 
Beee yãnzi mɛɛ̀ kúɛ De Ludanɛ. 
À kiian à bɛdee kɛ̀ aↄ̃ↄ kú musu kↄ̃n tↄↄtɛonↄ ń tↄ́ èn ń píngi. 
Mɛɛ̀ wɛ́ɛ kɛa à a gba gbãaa a nↄ̀sɛ guu kↄ̃n a Ninii gbãaao a auziki gakuide lɛ́n, 
lɛ Kirisi vɛ̃ɛ a swɛ̃̀n a náanɛ kɛ̀ ée kɛɛ yãnzi, a kãsãpɛɛna gↄ̃ gbãa yenzi guu, 
lɛ à e à à yenzi yàasa kↄ̃n à gbã̀ao kↄ̃n à lezĩo kↄ̃n à lↄ̀o gbázɛ dↄ̃ kↄ̃n Luda gbɛ̃nↄ píngi, 
lɛ à e à à yenzi kɛ̀ weé fↄ̃ wà à lɛ́ dↄ̃ píngiroo dↄ̃, Luda papana píngi pɛkↄ̃rɛawa. 
Luda bíta! Eé fↄ̃ à kɛwe dɛ lán weè à wɛ́ɛ kɛ ke weè à laasuu lɛ́ nàla maamaa kↄ̃n gbãaa kɛ̀ èe zĩi kɛɛ wa guuo. 
Wàgↄ̃ à tↄ́ bↄↄ sↄsi kↄ̃n Kirisi Yesuo guu ai wa boriia gurↄ sãnda píngi! Aami. 
