﻿ƐFESUDEENƆ.
2.
Á dɛ yã gɛ̀nↄ ũ Ludanɛ a taarinↄ kↄ̃n a durunnↄ yãnzi. 
Á tɛ́ anduna kɛ̀ki tuubazi, a mì sìɛ ĩa gbãadeenↄ kínanɛ, Setãn kɛ̀ kpɛ́ dↄna ludayãmarisaideenↄnɛ aɛ pì. 
Wa píngi wá dɛ lán ń bà yã se. Weè pↄ́ kɛ̀ wa mɛ̀ yezi kↄ̃n yã kɛ̀ wa pↄↄ gbào kɛ. Wa ina guu wá dɛ gbɛ̃ kɛ̀ Luda é pↄfɛ̃ pitaḿmanↄ ũ lán danↄ bà, 
mↄde Luda sùu bíta, à yenzi vĩwe maamaa. 
Gurↄↄ kɛ̀ wá dɛ gɛ̀nↄ ũ wa taarinↄ yãnzi, à wa fɛɛ kↄ̃n Kirisio lɛdo. À a mì sì a gbɛ̃kɛɛ guu. 
Kirisi Yesu guu à wa sɛ à wa vɛ̃ɛo zaa musu, 
lɛ à e à a gbɛ̃kɛ bíta bↄnsaɛ ↄdↄańnɛ anduna kɛ̀ eé mↄ́ guu yãnzi yã maaa kɛ̀ à kɛ̀we kuuna Kirisi Yesu guu musu. 
Luda a mì sì a gbɛ̃kɛɛ guu Yesu náanɛ kɛ̀ á kɛ̀ yãnzi. Beee e bↄ a kiianlo, Luda bé à a gba. 
A mìsina e bↄ a yãkɛna gãzĩnlo, lɛ gbɛ̃ke tón ĩa dãoro yãnzi. 
Luda ↄgbɛn wa ũ. Kirisi Yesu guu à wa kɛ lɛ wàgↄ̃ kú kↄ̃n yã maaa kɛ̀ à gĩakɛ à dìɛwee kɛnao. 
Amↄa kɛ̀ á dɛ bori pãndenↄ ũ ina guu, à laasuu lɛ́ a kuuna ziia. Bã̀ngudeenↄ è beare gɛfↄↄdeenↄ, mↄde aↄ̃ bã̀ngukɛna dɛ gbɛ̃ntee ↄgbɛ ũmɛ. 
Gurↄ beeea á kuu Kirisi sai, á dɛ gbɛ̃ zĩ̀tↄnↄ ũ Isarailinↄnɛ. A baka kú Luda bà kuunańyo kↄ̃n à lɛ́gbɛ̃ńnɛnao guuro. Á kú anduna guu tãmaa sai ludadↄ̃sai. 
Kirisi Yesu guu tia, amↄa kɛ̀ á zã̀ kↄ̃n Ludao yãanↄ a sↄ̃zi kĩi kↄ̃n Kirisi aru gbãaao. 
Àmbe wa kuuna kↄ̃o nnaa ũ, à tò Yudanↄ kↄ̃n bori pãndenↄ gↄ̃̀ mɛ̀ dↄ̃nkↄ̃ ũ. À mɛ̀ guu à íbɛtɛ kɛ̀ da ń dagura bĩi ũu gbòro, 
à Musa doka kpà guuzi kↄ̃n à yãdiɛnanↄ, lɛ à tó aↄ̃ plaa ń píngi gↄ̃ao gbɛ̃ dufu mɛ̀n doo ũ. Lɛn à ń kɛ́ kↄ̃o nna lɛ. 
À íbɛtɛ yã̀a, à ń plaa ń píngi kɛ̀ nna kↄ̃n Ludao mɛ̀ dↄ̃nkↄ̃ pì guu a gana lía yãnzi. 
À mↄ̀ à kɛna nna kↄ̃n Ludao baaru kpà amↄa kɛ̀ á zã̀ kↄ̃n Ludaonↄnɛ kↄ̃n gbɛ̃ kɛ̀ aↄ̃ↄ kĩionↄ dↄ. 
Kirisi yãnzi wa píngi wá zɛ́ vĩ wà sↄ̃ De Ludazi kↄ̃n à Nini dↄ̃nkↄ̃ gbãaao. 
Beee yãnzi á dɛ gbɛ̃ zĩ̀tↄnↄ ke bↄ̀amↄnↄ ũ dↄro, a gↄ̃ bɛdeenↄ ũ kↄ̃n Luda gbɛ̃nↄ, à uadeenↄ. 
Ámbe kpɛ́ kɛ̀ Ludaa bò ɛ̃ɛ kɛ̀ zĩ̀rinↄ kↄ̃n annabinↄↄ dàɛa ũ, bensↄ̃ Kirisi Yesun à ɛ̃daɛgbɛ ũ. 
À guun kpɛ́ pↄ́ píngi è kↄ̃ kũn, ègↄ̃ gbãa Luda kpɛ́ ũ Dii guu. 
À guu apinↄ se, á dɛ kpɛ́ pì bobↄnↄ ũ, ámbe Luda Nini kúkii ũ. 
