﻿1 KƆRINTIDEENƆ.
9.
Má a zĩnda vĩnloo? Zĩ̀rin ma ũroo? Mɛ́ɛ wɛ́ɛ si wa Dii Yesulɛroo? Ámbe á dɛ ma zĩi gbɛ̀ ũ Dii guu fá? 
Baa tó má dɛ zĩ̀ri ũ gbɛ̃ pãndenↄnɛro, má dɛare à ũ fá. Kuuna Dii guu ma zĩ̀rikɛɛ sèedan a ũ. 
Yã kɛ̀ mɛɛ̀ o ma zaaborinↄnɛn yɛ̀: 
Má pↄ́blena kↄ̃n íminao zɛ́ vĩ ma zĩi guuroo? 
Má à zɛ́ vĩ màgↄ̃ tɛ́ kↄ̃n nↄ Yesudeeo guu kɛ̀ mɛ́ɛ gaan lán zĩ̀ri kpaaanↄ kↄ̃n Dii dãaronↄ kↄ̃n Pitao bàroo? 
Mamↄma kↄ̃n Banabao wa gↄ̃ↄn plaa, wámbe wá zɛ́ vĩ wà wa ↄzĩi tónloo? 
Dé bé è soza ble a zĩnda bↄ̀kↄ ↄↄo? Dé bé è lí ba, ben è à bɛɛ bleroo? Dé bé ègↄ̃ zù dãa, ben è à zwii miroo? 
Baa kɛ̀ gbɛ̃ntee yãkɛnanↄn má lɛ̀kↄ̃zioare, à kú Musa doka guu lɛroo? 
À kɛ̃na Musa doka takadan wà bè, àton lɛ́sↄ da zùnɛ gurↄↄ kɛ̀ èe pↄ́wɛɛ gbɛ̃ɛro. Zùn Luda è làakari dↄaↄ́? 
Wa yãnzi à yã pì òziroo? Eè, wa yãnzin wà yã pì kɛ̃̀zi, lɛ búbari gae sɛ̃̀ wa kↄ̃n tãmaao, pↄ́wɛɛgbɛ̃ri gae pↄ́ gbɛ̃ kↄ̃n tãmaao, eé a baka e à guu. 
Tó wa Luda yã tↄ̃̀ a tɛ́, ben wa wa baka èawa, yãken yↄ́? 
Tó danↄ zɛ́ beee vĩawa, wé wa pↄ́ o dↄↄ́? Wée sɛ́ɛ zɛ́ beee guuro, wa yã píngi fↄ̃̀, lɛ wàton zɛ́ zↄ̃ Kirisi baaru nnaanɛro yãnzi. 
Á dↄ̃ kɛ̀ Luda ua zĩkɛrinↄ è Luda ua pↄ́ bleroo? Luda gbãgbãkii sa'orinↄ è ń baka le gbãgbãkii pì guuroo? 
Lɛn Dii dìɛ a baarunnakparinↄ gↄ̃ pↄ́ blee baaru pì kpana yã musu lɛ. 
Baa kↄ̃n beeeo mɛ́ɛ zɛ́ pìnↄ ke sɛ́ro, bensↄ̃ mɛ́ɛ beee oo lɛ wà kɛmɛ yãnzinlo. Gaa maamɛ dɛ beeela. Gbɛ̃ke é e à kpá ma ĩadãna kɛ̀nɛro. 
Kirisi baarunnakpana dɛmɛ ĩadãna yã ũro, tiasi bé à ↄ tↄ̃̀ma. Wãiyoo mapi, tó mɛ́ɛ baaru nnaa pì kpaaro. 
Tó mɛ́ɛ zĩi pì kɛɛ kↄ̃n ma zĩnda pↄyeziomɛ, ma wɛ́ɛ dↄ asaiazimɛ. Lán Luda bé à nàmɛ ma ↄzĩ nà, à kↄ̃ sìo mà kɛmɛ. 
Bↄ́mɛ ma asaia ũu? Tó ma baaru nnaa pì kpà ↄsãsãna sai, tó mɛ́ɛ iko kɛ̀ má vĩ baaru nnaa pì kpana guu kɛḿmaro, ma asaian gwe. 
Baa kɛ̀ gbɛ̃kee ma vĩro, ma a zĩnda dìɛ zↄ̀ ũ gbɛ̃ pínginɛ, lɛ mà gbɛ̃nↄ e pari yãnzi. 
Kɛ̀ má kú kↄ̃n Yudanↄ, ma gↄ̃ lán ń bà, lɛ aↄ̃ ma yãzɛ e yãnzi. Kɛ̀ má kú kↄ̃n Musa dokadarinↄ, ma gↄ̃ à dàri ũ, baa kɛ̀ à iko vĩmaro, lɛ à dàrinↄ ma yãzɛ e yãnzimɛ. 
Kɛ̀ má kú kↄ̃n doka pì dàrisaideenↄ, ma gↄ̃ lán ń bà, lɛ aↄ̃ ma yãzɛ e yãnzi. Èe kɛ ma bↄ Luda doka zɛ́nnlo, Kirisi bé à iko vĩma. 
Kɛ̀ má kú kↄ̃n gbɛ̃ busananↄ, ma busa, lɛ aↄ̃ ma yãzɛ e yãnzi. Mɛɛ̀ gↄ̃ pↄ́ píngi ũ gbɛ̃ pínginɛ, baa dia, lɛ mà e mà ń gbɛ̃kenↄ mì sí. 
Yã kɛ̀ mɛɛ̀ kɛ píngi, mɛɛ̀ kɛ Kirisi baaru nna yãnzimɛ, lɛ mà a baka e à aubarika guu. 
Bàkpakↄ̃sↄ̃na guu, gbɛ̃ píngi bé è bàa lɛ́, mↄde á dↄ̃ kɛ̀ gbɛ̃ mɛ̀n doo bé è bleroo? À bàa lɛ́ lɛ se, à e à ble. 
Kↄ̃kↄ̃'ori píngi è a zĩnda tòto kɛ, è a zĩnda foru kɛ yã píngi musu. È kɛ lɛ fùra kɛ̀ è yaka ena yãnzi. Wamↄwa sↄ̃, à kɛ̀ è yakaro yãnzimɛ. 
Beee yãnzi bà kɛ̀ mɛ́ɛ lɛɛ, má dↄ̃ pↄ́ kɛ̀ mɛ́ɛ pɛɛa, èe kɛ mɛ́ɛ ↄsi kaa gukorianlo. 
Auo, mɛɛ̀ ĩa da ma mɛ̀a, mɛɛ̀ ma mɛ̀ takii kɛ, lɛ ma waazikɛna danↄnɛ gbɛra, màton bↄ pãro yãnzi. 
