﻿1 KƆRINTIDEENƆ.
7.
Takada kɛ̀ á kɛ̃̀ yã musu, à maamɛ gↄ̃gbɛ̃ gↄ̃ kuu nↄgbɛ̃ sai. 
Mↄde kɛ̀ pãpãkɛna dàgula yãnzi, gↄ̃gbɛ̃ píngi gↄ̃ a zĩnda nↄↄ vĩ, nↄgbɛ̃ píngi gↄ̃ a zĩnda gↄ̃ↄ vĩ. 
Gↄ̃gbɛ̃ gae pↄ́ kɛ̀ kↄ̃sìo kɛ a naↄ̃nɛ. Nↄgbɛ̃ gae kɛ a zãnɛ lɛ se dↄ. 
Nↄgbɛ̃ mɛ̀ kuu a zĩnda pↄ́ ũro, sé à zã pↄ́ ũ. Lɛmɛ dↄ gↄ̃gbɛ̃ mɛ̀ kuu a zĩnda pↄ́ ũro, sé à naↄ̃ pↄ́ ũ. 
Àton gíkↄ̃nɛro, séde á màkↄ̃nɛ, lɛ à làakari dↄ aduakɛnaa gĩa, gbasa à a kɛna kɛ, lɛ Setãn tón ↄ̃ndↄ̃ↄ kɛare, à fu mɛnaaro yãnzi. 
Lɛ́n má dàawa, èe kɛ tiasinlo. 
Má yezi baade píngi gↄ̃ dɛ lán ma bà, mↄde baade kↄ̃n a gbaa kɛ̀ Ludaa dànɛomɛ, gbɛ̃ kɛ̀ kↄ̃n a pↄ́o, gbɛ̃ kɛ̀kãa kↄ̃n a pↄ́o. 
Mɛ́ɛ yã kɛ̀kii oo pↄsɛɛnↄnɛ kↄ̃n gyaanↄnↄ. À maa aↄ̃gↄ̃ kuu ńdo lán ma bà, 
mↄde tó aↄ̃é fↄ̃ wà ń zĩnda kũro, aↄ̃ nↄↄ sɛ́, aↄ̃ zã kɛ, zaakɛ kↄ̃sɛna maa dɛ lugana kↄ̃zila. 
Mɛ́ɛ yã diɛɛ nↄdeenↄnɛ kↄ̃n gↄ̃deenↄ, èe kɛ mapinlo, Diimɛ. Nↄgbɛ̃ tón gí a zãziro, 
gↄ̃gbɛ̃ tón pɛ́ a naↄ̃aro. Tó nↄgbɛ̃ gà à gì a zãzi, à gↄ̃ pↄsɛ kesↄ̃ à ɛara a zãzi. 
Mɛ́ɛ oo gbɛ̃ kpaaanↄnɛ, èe kɛ Dii bé à òro. Tó a gbɛ̃kee nↄ Yesusaidee vĩ, ben nↄↄ pì yezi àgↄ̃ kúo lɛdo, àton pɛ́aro. 
Lɛmɛ dↄ tó nↄgbɛ̃ gↄ̃ Yesusaidee vĩ, ben gↄ̃ↄ pì yezi àgↄ̃ kúo lɛdo, àton gíziro. 
Zaakɛ Luda è gↄ̃ Yesusaide sí a naↄ̃ yãnzi, bensↄ̃ è nↄ Yesusaide sí a zã yãnzi. Tó lɛnlo, aↄ̃ nɛ́nↄ égↄ̃ gbãsĩmɛ. Mↄde tia aↄ̃ kuuna adona. 
Tó Yesusaidee pì gìzi, à gízi. Yã beee taka guu aↄ̃ kuuna kↄ̃n kↄ̃o nɛ́ tiasinlo. Luda a sisi, à a sɛ àgↄ̃ kuu aafiamɛ. 
Nↄgbɛ̃, ke nɛ́ n zã mì sí, ń dↄ̃ↄ́? Gↄ̃gbɛ̃, ke nɛ́ n naↄ̃ mì sí, ń dↄ̃ↄ́? 
Baade zɛ kↄ̃n a gwena kɛ̀ Luda à dìɛn-o gurↄↄ kɛ̀ Dii à sìsi. Lɛn mɛɛ̀ dańnɛ lɛ sↄsinↄ guu píngi. 
Luda gbɛ̃ sìsi bã̀ngukɛnan yoo, àton wɛtɛ à kɛ gɛfↄↄdee ũro. Luda gbɛ̃ sìsi gɛfↄↄdeen yoo, àton bã̀ngu kɛro. 
Bã̀ngukɛna yãke vĩro, bensↄ̃ gɛfↄↄ yãke vĩro, sé àgↄ̃ yã kɛ̀ Ludaa dìɛnↄ kũna. 
Lán baade kuu nà gurↄↄ kɛ̀ Luda à sìsi, à zɛo lɛ. 
Luda n sisi zↄ̀ ũun yoo? Ǹton bídi kɛro. Mↄde tó n ga n gↄ̃na wɛ̃ɛnɛ ũ zɛ́ è, ǹ bↄ zↄ̀bleen. 
Zↄ̀ kɛ̀ Dii à sìsi gↄ̃̀ wɛ̃ɛnɛ ũ Dii pì guumɛ. Lɛmɛ dↄ wɛ̃ɛnɛ kɛ̀ Dii à sìsi gↄ̃̀ zↄ̀ ũ Kirisi guu. 
Luda a lu, à fĩa bò. Àton gↄ̃ gbɛ̃ntee zↄ̀ ũro. 
Ma gbɛ̃nↄ, lán baade kuu nà gurↄↄ kɛ̀ Luda à sìsi, à zɛ kↄ̃n Ludao lɛ. 
Pↄsɛɛnↄ yã musu mɛ́ɛ yãke ma Dii kiiaro, mↄde lán má náanɛ vĩ Dii sùu guu nà, lán ma laasuu dɛ nàn mɛ́ oare. 
Nawɛ̃a kɛ̀ kuu tia bé à tò, mɛ́ɛ daa à maa kɛ̀ gbɛ̃ zɛ kↄ̃n a kuunao. 
Tó ń nↄↄ vĩ, ǹton be nɛ́ à gbarɛro. Tó ń vĩ sↄ̃ro, ǹton wɛtɛ ǹ sɛ́ro. 
Tó ń sɛ̀ sↄ̃, nɛ́ɛ durun kɛro. Tó nↄkparɛ zã kɛ̀ sↄ̃, èe durun kɛro. Gbɛ̃ beeenↄ é yã e andunan, ben má yezi beee taka a lero. 
Ma gbɛ̃nↄ, yã kɛ̀ mɛ́ɛ oon yɛ̀: Gurↄↄ e gↄ̃ zã̀ro. Zaa tia nↄdeenↄ gↄ̃ lán gbɛ̃ kɛ̀ vĩroonↄ bà. 
Ɔ́ↄdↄrinↄ gↄ̃ lán gbɛ̃ kɛ̀ aↄ̃ↄe ↄ́ↄ dↄↄroonↄ bà. Pↄnnadeenↄ gↄ̃ lán gbɛ̃ kɛ̀ aↄ̃ pↄↄ nnaroonↄ bà. Pↄ́lurinↄ gↄ̃ lán gbɛ̃ kɛ̀ aↄ̃ pↄ́ke vĩroonↄ bà. 
Andunablerinↄ gↄ̃ lán gbɛ̃ kɛ̀ aↄ̃ↄe bleeroonↄ bà, zaakɛ lán anduna kɛ̀ kuu nà tiaa e gɛ̃tɛɛmɛ. 
Má yezi àgↄ̃ kuu kã̀hãn saimɛ. Pↄsɛɛ è làakari dↄ Dii yãnↄa, yã kɛ̀ kɛ̀ Diinɛn è kɛ. 
Nↄdee è làakari dↄ anduna yãnↄa, yã kɛ̀ kɛ̀ a naↄ̃nɛn è kɛ, 
à laasuu ègↄ̃ kpàatɛna. Nↄgbɛ̃ pↄsɛɛ ke nↄkparɛ è làakari dↄ Dii yãnↄa, è a mɛ̀ kↄ̃n a niniio kpáa. Nↄzãree sↄ̃ è làakari dↄ anduna yãnↄa, yã kɛ̀ kɛ̀ a zãnɛn è kɛ. 
Èe kɛ mɛ́ɛ gata kpaaarenlo. Ma beee ò a aafia yãnzimɛ, lɛ à yã kɛ a zɛ́a, à a zĩnda kpá Diia gu pãnde gwana sai. 
Tó gbɛ̃ nↄkpamma vĩ, tó à sɛ́gurↄↄ e gɛ̃ɛ, ben à kɛ̀nɛ wíyã ũ, tó à à kàka lán kɛ̀ bà, à à sɛ́ lán à kɛ̀nɛ nà, èe kɛ durun ũro. Aↄ̃ kↄ̃ sɛ́. 
Mↄde tó à yã pì bↄ̀ a nↄ̀sɛmmɛ, ben tiasi e à kákaro, ben à a zĩnda kũna dↄ̃, tó à dà a swɛ̃̀n kɛ̀ é a nↄkparɛ pì sɛ́ro, à kɛ̀ maamɛ. 
Lɛmɛ gbɛ̃ kɛ̀ a pↄ́ sɛ̀ kɛ̀ maa, mↄde gbɛ̃ kɛ̀ èe a pↄ́ sɛ́roo kɛ̀ maa dɛ beeela. 
Nↄgbɛ̃ nɛ́ a zã pↄ́mɛ gurↄↄ kɛ̀ à zã kú kↄ̃n wɛ̃̀ndio. Tó à zã gà à anduna tò, à zɛ́ vĩ à zã kɛ kↄ̃n gↄ̃ↄ kɛ̀ à yezio, mↄde gↄ̃ↄ pì gↄ̃ kuu Dii pↄ́ ũ. 
Baa kↄ̃n beeeo tó à gↄ̃̀ pↄsɛ, mɛ́ɛ daa à pↄↄ égↄ̃ nna dɛ tó à zã kɛ̀la. Mɛ́ɛ daa mapi, má Luda Nini vĩ se. 
