﻿1 KƆRINTIDEENƆ.
3.
Ma gbɛ̃nↄ, mɛ́ɛ fↄ̃ mà yã òare lán mɛɛ̀ o gbɛ̃ kɛ̀ Luda Ninii dↄńnɛ aɛnↄnɛ bàro, ben má òare lán anduna gbɛ̃nↄ bà, zaakɛ nɛ́kpãntɛ̃nↄn a ũ Kirisi guu. 
Zwiin má kpàawa, èe kɛ pↄ́ lↄmadeenlo, zaakɛ ée ká kↄ̀ro. Baa ai tia ée káro, 
zaakɛ dàdeenↄn a ũ ai tia. Lán á zakↄ̃n nà, bensↄ̃ á yãkete vĩ, dàdeenↄn a ũroo? A dà bé à dↄare aɛ. 
Kɛ̀ a gbɛ̃ke bè a zɛ kↄ̃n Pↄluo, ben gbɛ̃ pãnde bè a zɛ kↄ̃n Apoloo, á kú kↄ̃n a dàon gweroo? 
Dén Apoloo ũu? Dén Pↄlu ũu? Zĩkɛrinↄn wa ũ, ben a Kirisi náanɛ kɛ̀ wa gãzĩ. Wa baade e zĩi kɛ̀ Dii dànɛ kɛɛmɛ. 
Ma pↄ́ tↄ̃̀, Apolo í kànɛ, ben Ludaa tò à gbã̀. 
Lɛmɛ pↄ́tↄ̃ri kↄ̃n íkario dɛ pↄ́ke ũro, sé Luda kɛ̀ è tó à gbã. 
Pↄ́tↄ̃ri kↄ̃n íkario sáamɛ. Aↄ̃ baade é a àre e a zĩ lɛ́mmɛ. 
Luda zĩkɛri daanↄn wa ũ. Luda búgbɛn a ũ, Luda kpɛ́n a ũ. 
Gbaa kɛ̀ Ludaa dàmɛ bé à tò ma ɛ̃ɛ kpàɛ lán ɛ̃bori gonidee bà, ben gbɛ̃ pãnde mↄ̀ èe kpɛ́ pì boo. Baade làakari kɛ a kpɛ́bonaa, 
zaakɛ gbɛ̃ke é fↄ̃ à ɛ̃ɛ ke kpáɛ dↄro, sé ɛ̃ɛ kɛ̀ kpaɛna Yesu Kirisi ũu baasiro. 
Tó gbɛ̃ kpɛ́ pì dↄ̀ kↄ̃n vurao ke kondogi ke gbɛ̀ bɛ̀ɛdee ke tó à dↄ̀ kↄ̃n lío ke lá ke sɛ̃̀, 
baade zĩ yãpura é bↄ gupuraaa. Weé e yãkpaɛkɛgurↄↄ zĩ, zaakɛ gu é dↄ kↄ̃n tɛ́omɛ, weé baade zĩ taka gwa tɛ́ pì guu. 
Tó gbɛ̃ zĩi kɛ̀ à kɛ̀ bↄ̀ tɛ́n aafia, adee é àre e. 
Tó gbɛ̃ zĩ tɛ́ kũ̀, eé mↄ́nzi e, adee é bↄ ↄkori lán wè bↄ tɛ́n nà. 
Á dↄ̃ kɛ̀ Luda kpɛ́n a ũ, Luda Ninii kú a guuroo? 
Tó gbɛ̃ Luda kpɛ́ pì yàka, Luda é adee kaatɛ, zaakɛ kpɛ́ pì kuuna adonamɛ, bensↄ̃ ámbe kpɛ́ pì ũ. 
Gbɛ̃ke tón a zĩnda sãsãro. Tó a gbɛ̃kee e a zĩnda diɛɛ anduna kɛ̀ki ↄ̃ndↄ̃ri ũ, à gↄ̃ńnɛ mìsaidee ũ lɛ à e à ↄ̃ndↄ̃ kũ. 
Zaakɛ anduna kɛ̀ki ↄ̃ndↄ̃ↄ dɛ Ludanɛ mìsaiyã ũmɛ. À kɛ̃na Luda yãn wà bè: È ↄ̃ndↄ̃rinↄ kũ ń wɛ́ɛzɛ̃ɛ guu. 
À kɛ̃na dↄ: Dii dↄ̃ kɛ̀ ↄ̃ndↄ̃rinↄ laasuu pã. 
Bee yãnzi gbɛ̃ke tón ĩa dã gbɛ̃ntee yã musuro. Pↄ́ píngi nɛ́ a pↄ́mɛ: 
Pↄlu, Apolo, Pita, anduna, wɛ̃̀ndi, gaa, tia pↄ́nↄ, zia pↄ́nↄn yoo, à píngi nɛ́ a pↄ́mɛ. 
Apinↄ sↄ̃, Kirisi pↄ́n a ũ, Kirisi sↄ̃ nɛ́ Luda pↄ́mɛ. 
