﻿ROMUDEENƆ.
8.
Yã é vɛ̃ɛ gbɛ̃ kɛ̀ aↄ̃ↄ kú Kirisi Yesu guunↄa dↄro, 
zaakɛ kuuna Kirisi Yesu guu Luda Nini kɛ̀ è wɛ̃̀ndi kpáḿma gbãaa ma bↄ durun kↄ̃n gaao ikon. 
Yã kɛ̀ Musa doka e fↄ̃ à kɛ̀ro gbɛ̃ntee gbãasaikɛ yãnzi, Ludaa kɛ̀. À a zĩnda Nɛ́ zĩ̀ gbɛ̃ntee ũ lán wamↄwa durundeenↄ bà durun kɛ̃nnɛna yãnzi, ben à wí dà durun-a a Nɛ́ mɛ̀ pì gãzĩ, 
lɛ yã kɛ̀ doka e wɛtɛɛ yãpuraa kɛwa, wamↄwa kɛ̀ wa dà è dↄwe aɛ dↄro, sé Luda Nini. 
Gbɛ̃ kɛ̀ aↄ̃ dà è dↄńnɛ aɛnↄ è làakari dↄ ń dà yãa, gbɛ̃ kɛ̀ Luda Nini è dↄńnɛ aɛnↄ è làakari dↄ Luda Nini yãa. 
Dà dↄnnɛna aɛ nɛ́ gaamɛ. Luda Nini dↄnnɛna aɛ nɛ́ wɛ̃̀ndi kↄ̃n aafiaomɛ. 
Dà dↄnnɛna aɛ nɛ́ íbɛtɛkpana kↄ̃n Ludaomɛ. Adee è mì siɛ Luda dokanɛro, eé fↄ̃ sero. 
Gbɛ̃ kɛ̀ aↄ̃ dà è dↄńnɛ aɛnↄ yã è ká Ludanɛro. 
Apinↄ sↄ̃, a dà è dↄare aɛro, sé Luda Nini, tó à kú a guu yãpura. Tó gbɛ̃ Kirisi Ninii vĩ sↄ̃ro, à dɛ Kirisi pↄ́ ũro. 
Tó Kirisi kú a guu, baa tó a mɛ̀ gà durun yãnzi, Luda Ninii dɛare wɛ̃̀ndi ũmɛ, kɛ̀ Ludaa tò yã bↄ̀ao nna yãnzi. 
Tó Luda kɛ̀ Yesu fɛ̀ɛ gaan Ninii kú a guu, Luda kɛ̀ Kirisi pì fɛ̀ɛ gaan é wɛ̃̀ndi kpá a mɛ̀ kɛ̀ gà pìa à Ninii kɛ̀ kú a guu gãzĩ. 
Beee yãnzi ma gbɛ̃nↄ, tɛna wa dàzi nɛ́ tiasinlo, pↄyezimɛ. 
Tó á tɛ́ a dàzi, é gamɛ. Tó a a yãzaakɛnanↄ mì dɛ̀ kↄ̃n Luda Nini gbãaao sↄ̃, égↄ̃ kuu. 
Gbɛ̃ kɛ̀ Luda Nini è dↄńnɛ aɛnↄ bé wà Luda nɛ́nↄ ũ. 
Zaakɛ ninii kɛ̀ è tó wà zↄ̀ ble kↄ̃n vĩ̀aon á èro, Luda Nini kɛ̀ tò a gↄ̃ Luda nɛ́nↄ ũun á vĩ, ben weè wii lɛ́ Ludaa kↄ̃n à gbãaao wà be: Baa, wa De. 
Ninii pì è o wa niniinɛ kɛ̀ Luda nɛ́nↄn wa ũ. 
Lán à nɛ́nↄn wa ũ nà, à túbiblerinↄn wa ũ. Luda túbiblerinↄn wa ũ, wé ble lɛdo kↄ̃n Kirisiomɛ. Tó wa nawɛ̃a kɛ̀o, wégↄ̃ kúo à gakui guu. 
Má è wé fↄ̃ wà gurↄↄ kɛ̀kii nawɛ̃a lɛ́kↄ̃zi kↄ̃n gakui kɛ̀ Luda é bↄowe gupuraaaro. 
Luda pↄ́kɛnanↄ píngi wɛ́ɛ dↄ à nɛ́nↄ bↄna gupuraaazi yãana sai. 
Zaakɛ Ludaa tò a pↄ́kɛnanↄ gɛ̃̀ pãpãkɛɛ guu píngi. Èe kɛ aↄ̃ pↄyezinlo, Luda bé à kɛ̀ lɛ, lɛ ń wɛ́ɛdↄzina guu 
anduna bↄ yakana kɛ̀ èe zↄ̀ bleenɛ guu, gbasa àgↄ̃ a zĩnda vĩ Luda nɛ́nↄ gakui guu. 
Wá dↄ̃ kɛ̀ Luda pↄ́kɛnanↄ píngi e mboo kↄ̃n wãwãao lán nɛ́'i pↄ́ bà ai tia. 
Èe kɛ beeemɛ adoro, wamↄwa kɛ̀ wá Luda Nini vĩ kpɛ́gaau ũunↄ, wée mboo kpãi se ai Luda gↄ̃ gá wa mɛ̀ liɛ à wa sí a nɛ́nↄ ũ. 
Luda wa mì sì lɛ wà wɛ́ɛ dↄ beeezi. Pↄ́ kɛ̀ wà è kↄ̃n wɛ́ɛo nɛ́ wɛ́ɛdↄzina yãn dↄro. Dé bé è wɛ́ɛ dↄ pↄ́ kɛ̀ à gĩakɛ à èzi? 
Tó wa wɛ́ɛ dↄ pↄ́ kɛ̀ wée eroozi sↄ̃, weègↄ̃ dãa kↄ̃n mɛnaomɛ. 
Lɛmɛ sↄ̃ Luda Nini è dↄwalɛ wa gbãasai guu, zaakɛ wá aduakɛna dↄ̃ a zɛ́aro, ben Luda Nini è kúɛ kɛwe Ludanɛ kↄ̃n mbona kɛ̀ à yã gɛ̃̀ onalaao. 
Luda è nↄ̀sɛ guu e bensↄ̃ à a Ninii laasuu dↄ̃, zaakɛ Luda Nini è kúɛ kɛ Luda gbɛ̃nↄnɛ lán Ludaa yezi nàmɛ. 
Wá dↄ̃ kɛ̀ yã píngi è bↄ maa gbɛ̃ kɛ̀ aↄ̃ↄ ye Ludazinↄnɛ, gbɛ̃ kɛ̀ à ń sísi à ń sɛ́ lán èe wɛtɛɛ nànↄ. 
Zaakɛ Ludaa dìɛ zaa káaku kɛ̀ gbɛ̃ kɛ̀ à gĩakɛ à ń dↄ̃nↄ bↄkↄ̃ba kↄ̃n a Nɛ́o, lɛ àgↄ̃ dɛ daudu ũ dãaro pariinↄ tɛ́. 
Gbɛ̃ kɛ̀ à ń díɛ zaa káaku pìnↄn à ń sísi, ben à tò yã bↄ̀ kↄ̃n gbɛ̃ kɛ̀ à ń sísi pìnↄo nna, ben à tò gbɛ̃ kɛ̀ yã bↄ̀ńyo nnaa pìnↄ gↄ̃ gakui vĩ. 
Wé o diamɛ yã beeenↄ musuu? Lán Luda zɛ̀wao nà, dé bé eé fↄ̃ à kpáwee? 
Lán èe gí kↄ̃n a zĩnda Nɛ́oro nà à à kpà wa píngi yãnzi, eé gí pↄ́ píngi naawe gbaa ũ sↄ̃ziↄ́? 
Dé bé eé gbɛ̃ kɛ̀ Luda ń sɛ́nↄ káara kɛɛ? Luda bé è tò yã bↄ̀ńyo nna. 
Dé bé eé yã dawalaa? Kirisi Yesu gà, kɛ̀ dɛ beeelaa à ɛ̀ara à fɛ̀ɛ à kú Luda ↄplaazi, èe kúɛ kɛɛnɛwe. 
Bↄ́ bé eé wa kɛ̃ Kirisi yenzia? Nawɛ̃a ke ĩadamma ke wɛ́ɛtãmma ke nↄaa ke takaasi ke kari ke fɛ̃ɛdaa, aↄ̃ ke é fↄ̃ↄ́? 
À kɛ̃na Luda yãn wà bè: N yãnzi wá kú gaa lɛ́zĩzi zaa kↄngↄ ai uusiɛ, wè wa diɛ lán sãa kɛ̀ weé ń kòto kpánↄ bà. 
Yã beeenↄ guu píngi wá dɛ zĩ̀blerila gbɛ̃ kɛ̀ yewazi gãzĩ. 
Zaakɛ má dↄ̃ sãnsãn kɛ̀ gaa ke wɛ̃̀ndi ke malaikanↄ ke zĩnnↄ ke tia yã ke zia yã ke gbãadeenↄ 
ke musu pↄ́nↄ ke tↄↄtɛ pↄ́nↄ ke Luda pↄ́kɛna pãndenↄ, aↄ̃ ke é fↄ̃ à wa kɛ̃ yenzi kɛ̀ Ludaa vĩwaoaro wa Dii Kirisi Yesu guu. 
