﻿ROMUDEENƆ.
6.
Wé be diamɛ? Wé gí wàgↄ̃ durun kɛɛ lɛ Luda gbɛ̃kɛɛ e àgↄ̃ kaaran yↄ́? 
Auo! Lɛnlo! Wamↄwa kɛ̀ wá dɛ gɛ̀nↄ ũ durun yã musu, à kɛ̀ dia wégↄ̃ kpɛɛ wàgↄ̃ durun kɛɛ dↄↄ? 
Wamↄwa kɛ̀ wa batisi kɛ̀ Kirisi Yesu pↄ́ ũunↄ, á dↄ̃ kɛ̀ wá kúo à gaa guuroo? 
Wa gao batisikɛna guu, wà wa vĩio lɛ wàgↄ̃ kú kↄ̃n wɛ̃̀ndi dufuo, lán Kirisi fɛ̀ɛ gaan kↄ̃n a De gbãa gakuio à kuu nà. 
Lán wa gↄ̃o mɛ̀ dↄ̃nkↄ̃ ũ à gaa guu nà, lɛn wé gↄ̃o lɛ à fɛɛna guu se. 
Wá dↄ̃ kɛ̀ wa dà zii gào lía, lɛ wa mɛ̀ durundee kaatɛ wàton zↄ̀ ble durunnɛ dↄro, 
zaakɛ gbɛ̃ kɛ̀ gà bↄ̀ durun yãmmɛ. 
Lán wa ga kↄ̃n Kirisio nà, wá à náanɛ vĩ kɛ̀ wégↄ̃ kuuo dↄ. 
Wá dↄ̃ lán Kirisi fɛ̀ɛ gaan nà, eé ga dↄro, gaa gbãa vĩa dↄro. 
Zaakɛ gana kɛ̀ à gà, à gà durun yã musu gɛ̃̀n domɛ, kuuna kɛ̀ à kuu tia sↄ̃, à kuu Luda pↄ́ ũmɛ. 
Lɛn apinↄ se, à a zĩnda diɛ gɛ̀nↄ ũ durun yã musu lɛ, égↄ̃ kuu Luda pↄ́ ũ Kirisi Yesu guu. 
Beee yãnzi àton tó durun kí ble a mɛ̀ kɛ̀ eé gaaa a dà zaaa dↄare aɛ dↄro. 
Àton a mɛ̀gu ke kpá durun-a yãzaakɛbↄ ũro. À a zĩnda kpá Ludaa gbɛ̃ kɛ̀ aↄ̃ fɛ̀ɛ gaan wà kuunↄ ũ, à a mɛ̀guunↄ kpáa yãmaakɛbↄnↄ ũ. 
Àton tó durun gↄ̃ gbãa vĩawa dↄro, zaakɛ á na doka ↄzĩro, sé Luda gbɛ̃kɛɛ. 
Dian gwee? Lán wá kú doka ↄzĩ dↄro nà, sé Luda gbɛ̃kɛɛ ↄzĩ, wégↄ̃ kpɛɛ wàgↄ̃ durun kɛɛn yↄ́? Auo! Lɛnlo! 
Á dↄ̃ kɛ̀ tó a a zĩnda kpà gbɛ̃a ée mì siɛɛnɛ, á dɛ adee zↄ̀ ũnloo? Tó durunn a a zĩnda kpàa, é gamɛ. Tó a mì sìɛ Ludanɛ sↄ̃, é bↄ maa. 
Wa sáabu kɛ̀ kↄ̃n Ludao, zaakɛ durun zↄ̀nↄn a ũ yã, ben a mì sìɛ yã kɛ̀ wà dàare zɛ́azɛanɛ kↄ̃n nↄ̀sɛo do. 
A bↄ durun yãn a gↄ̃ maakɛna zↄ̀nↄ ũ. 
Mɛ́ɛ yã pì oo lán gbɛ̃ntee yã'ona bà a gbãasai yãnzimɛ. Lán a a mɛ̀guunↄ kpà yã pãpãkɛna kↄ̃n yã zaaao zↄ̀nↄ ũ a yã zaaa kɛ̀ nà, lɛn tia dↄ à a mɛ̀guunↄ kpá maakɛna zↄ̀nↄ ũ lɛ a kuuna gↄ̃ adona. 
Kɛ̀ á dɛ durun zↄ̀nↄ ũ yã, a bà kú kↄ̃n maakɛnaoro. 
Àre kpareen á è yã kɛ̀ á kɛ̀ yã kɛ̀ à kɛ̀are wíyã ũ tiaanↄ musuu? Yã pìnↄ mìdɛna nɛ́ gaamɛ. 
Tia sa lán a bↄ durun yãn nà ée dↄↄ Ludazi, a àren kuuna adona ũ, à mìdɛna sↄ̃ nɛ́ wɛ̃̀ndi kɛ̀ è yãaroomɛ. 
Durun asaia nɛ́ gaamɛ, mↄde gbaa kɛ̀ Ludaa dàwe wa Dii Kirisi Yesu guun wɛ̃̀ndi kɛ̀ è yãaroo ũ. 
