﻿ROMUDEENƆ.
2.
Beee yãnzi mmↄn kɛ̀ nɛɛ̀ gbɛ̃ pãnde taari ee, ń agbaa vĩ ǹ kpáro. Tó n gbɛ̃ pãnde taari è, n n zĩnda dà yãmmɛ, zaakɛ n gbɛ̃taari'eri nɛɛ̀ kɛ lɛ se dↄ. 
Wá dↄ̃ kɛ̀ Luda yãkpaɛkɛna kↄ̃n yã beee taka kɛ̀rinↄↄ kuu a zɛ́amɛ. 
Mmↄn kɛ̀ nɛɛ̀ yã beee taka kɛ̀rinↄ taari e, ben nɛɛ̀ kɛ lɛ se, nɛ́ɛ daa nɛ́ bↄ Luda yãkpaɛkɛnan yↄ́? 
Ke nɛ́ɛ dↄkɛɛ kↄ̃n Luda nnakɛnnɛna bítao kↄ̃n à mɛnao kↄ̃n à sùuomɛ? Ń dↄ̃ kɛ̀ Ludaa e à nnaa kɛɛnnɛ lɛ ǹ n nↄ̀sɛ liɛ yãnzinloo? 
N swãgbãaa kɛ̀, nɛ́ɛ nↄ̀sɛ liɛro, nɛ́ɛ pↄfɛ̃ kaakↄ̃anzi ai Luda pↄfɛ̃pitammagurↄↄ zĩ, tó Luda yãkpaɛkɛna kↄ̃n gbɛ̃nↄ a zɛ́a bↄ̀ gupuraaa. 
Eé fĩa bo baadenɛ a yãkɛnaa. 
Gbɛ̃ kɛ̀ aↄ̃ↄe gakui kↄ̃n bɛ̀ɛo kↄ̃n mɛ̀vãsaio wɛtɛɛ bensↄ̃ aↄ̃ↄe à maaa kɛɛ kↄ̃n mɛnaonↄ é wɛ̃̀ndi kɛ̀ è yãaroo e. 
Gbɛ̃ kɛ̀ ń zĩnda pↄyeziyã e dↄↄńnɛ aɛ aↄ̃ gì yãpuraazi aↄ̃ↄ tɛ́ à zaaazinↄ sↄ̃, Luda é pↄfɛ̃ kↄ̃n pɛ̃tɛ̃o pitaḿma. 
Wɛ́ɛtãmma kↄ̃n wãwãao é zaakɛri píngi le, atɛ̃nsa Yudanↄ, ń gbɛra bori pãndenↄ. 
Luda é maakɛri píngi gba gakui kↄ̃n bɛ̀ɛo kↄ̃n aafiao, atɛ̃nsa Yudanↄ, ń gbɛra bori pãndenↄ. 
Zaakɛ Luda è gbɛ̃ke wɛ́ɛ gwaro. 
Gbɛ̃ kɛ̀ durun kɛ̀ Musa doka dↄ̃sai é kaatɛ lɛ doka pì sai. Gbɛ̃ kɛ̀ durun kɛ̀ nana doka pì ↄzĩ sↄ̃, Luda é yãkpaɛ kɛo doka pì musumɛ. 
Èe kɛ gbɛ̃ kɛ̀ èe doka maa kↄ̃n swão bé à maa Luda kiiaro. Gbɛ̃ kɛ̀ èe zĩi kɛɛa bé eé bↄ maa. 
Tó borii kɛ̀ aↄ̃ Musa doka dↄ̃roonↄ yã kɛ̀ kↄ̃ sìo kɛ̀ kↄ̃n ń zĩndao, aↄ̃ↄ doka vĩ ń zĩndaamɛ. 
Aↄ̃ↄe ↄdↄↄawe kɛ̀ yã kɛ̀ kú doka pì guu kú ń nↄ̀sɛmmɛ. Aↄ̃ laasuu e yãpura kpaaa dↄ, zaakɛ aↄ̃ laasuu mɛ̀n doro, à kenↄ è ń da yãn, à kenↄ è ń bↄn. 
Lɛmɛ yãkpaɛkɛgurↄↄ zĩ Luda é yãkpaɛ kɛ kↄ̃n gbɛ̃nteenↄ yã kɛ̀ utɛna aↄ̃ nↄ̀sɛn musu Kirisi Yesu gãzĩ, lán baaru nnaa kɛ̀ mɛ́ɛ kpaa ò nà. 
N Yuda ina, n zɛ kↄ̃n n Yudakɛɛo, ń Musa doka náanɛ vĩ, nɛ́ɛ yↄ̃̀kↄ̃ kɛɛ Ludao. 
Ń Luda pↄyezi dↄ̃ kↄ̃n yã kɛ̀ zɛ́ vĩo, kɛ̀ wà doka pì dàdannɛ yãnzi. 
Nɛ́ɛ daa ń dɛ vĩ̀anↄ wɛ́ɛdee ũ, gbɛ̃ kɛ̀ aↄ̃ↄ kú gusiaa guunↄ fitia ũ, 
wɛ́ɛsiadeenↄ yãdannɛri ũ, gbɛ̃ dufunↄ aufaa ũ. Nɛ́ɛ daa Luda dokan dↄ̃na kↄ̃n yãpuraao mì ũ. 
Mmↄn kɛ̀ nɛɛ̀ yã da gbɛ̃ pãndenↄnɛ, bↄ́yãnzi nɛɛ̀ da n zĩndanɛziroo? N bè wàton kpãi oro, mpi nɛɛ̀ o sↄ̃ↄ́? 
Nɛɛ̀ be wàton zina kɛro, nɛɛ̀ zina kɛ sↄ̃ↄ́? Nɛɛ̀ kya ká tãanↄn, nɛɛ̀ ń kpɛ́ pↄ́nↄ kpãi o sↄ̃ↄ́? 
Nɛɛ̀ yↄ̃̀kↄ̃ kɛ Luda doka musu, ben n doka pì danasai è Luda tↄ́ yaka. 
Zaakɛ a yãnzin bori pãndenↄ ègↄ̃ Luda tↄ́ zaaa siizi lán wà kɛ̃̀ à yãn nà. 
Tó ń Luda doka kũna, ben bã̀ngukɛna àre vĩnnɛ. Tó nɛ́ɛ à yã da sↄ̃ro, ń sáa kↄ̃n gɛfↄↄdeenↄmɛ. 
Tó gɛfↄↄdee Luda dokanↄ kũna, Luda é gɛfↄↄdee pì gwa sáa kↄ̃n gbɛ̃ kɛ̀ bã̀ngu kɛ̀oroo? 
Baa tó ń doka takada pì kũna bensↄ̃ n bã̀ngu kɛ̀, tó nɛ́ɛ doka pì daro, bã̀ngukɛrisaidee kɛ̀ kũna é tó yã danla. 
Kuuna Yuda ũ yãpuraa nɛ́ mɛ̀baayãnlo, lɛmɛ bã̀ngukɛna yãpuraa nɛ́ mɛ̀baayãnlo se. 
Kuuna Yuda ũ yãpuraa nɛ́ nↄ̀sguuɛyãmɛ, lɛmɛ dↄ bã̀ngukɛna yãpuraa nɛ́ nↄ̀sɛguuyãmɛ se. Luda Nini zĩimɛ, èe kɛ doka takada yãnlo. Luda bé è gbɛ̃ beee taka sáabu kpá, èe kɛ gbɛ̃nteenlo. 
