﻿ZĨRINƆ.
22.
Ma gbɛ̃nↄ kↄ̃n ma mareenↄ, à swã kpá à ma yãzɛ ma tia. 
Kɛ̀ aↄ̃ↄ mà èe yã oońnɛ kↄ̃n Eberu yão, aↄ̃ zɛ̀ kítikiti. Ben Pↄlu bè: 
Yudan ma ũ, wà ma i Taasu, Silisia bùsummɛ, ben ma nɛ́ blè wɛ́tɛ guu kɛ̀. Gamaliɛli kiian ma doka kɛ̀ wa dezinↄ kũna dàdan a zɛ́a. Má aĩa vĩ Ludanɛ lán á kuu nà gbã̀a a píngi. 
Ma wɛ́ɛ tã̀ dↄnzizɛ pì sɛ̀rinↄa ai aↄ̃ gbɛ̃kenↄ gàga, ma gↄ̃gbɛ̃ kↄ̃n nↄgbɛ̃nↄ kũ̀kũ ma ń ká kpɛ́siaan. 
Sa'oriki kↄ̃n gbɛ̃nsinↄↄ dɛ ma sèedadeenↄ ũ ń píngi. Ma takada kɛ̀ aↄ̃ↄ kɛ̃̀ Damasiku Yudanↄnɛ sì ń ↄzĩ, mɛ́ɛ gaa gwe mà gbɛ̃ pìnↄ kũkũ mà suńyo Yerusalɛmu wà wɛ́ɛ tãḿma. 
Kɛ̀ má tɛ́ zɛ́n, ma ka kĩi kↄ̃n Damasikuo ↄfãntɛ̃ kà mìdangura, ben kãndo gupura bíta bↄ̀ ludambɛ à dàmala. 
Ma bↄ ma lɛɛ tↄↄtɛ, ben ma kòto mà wà bèmɛ: Solu, Solu, à kɛ̀ dia nɛ́ɛ wɛ́ɛ tãamaa? 
Ben ma bè: Dén n ũu, Dii? Ben à bèmɛ: Mámbe Yesu Nazarɛti kɛ̀ nɛ́ɛ wɛ́ɛ tãaa ũ. 
Gbɛ̃ kɛ̀ aↄ̃ↄ kúmaonↄ gupuraa pì è, mↄde aↄ̃ↄe gbɛ̃ kɛ̀ èe yã oomao kòto maro. 
Ben ma à là: Bↄ́n mɛ́ kɛɛ, Dii? Ben à bèmɛ mà fɛɛ mà gɛ̃ Damasiku. Gwen weé yã kɛ̀ a dìɛmɛ mà kɛɛ omɛ píngi. 
Gupuraa pì í gbãaa tò ma wɛ́ɛ e guu e dↄro, ben ma gbɛ̃nↄ ma kũ ma ↄↄa aↄ̃ gɛ̃̀mao Damasiku. 
Dↄnziri kee kú gwe kɛ̀ wè benɛ Anania. È mì siɛ Luda dokanɛ, bensↄ̃ Damasiku Yudanↄ píngi è à tↄ́ nnaa sí. 
À mↄ̀ ma kiia à zɛ̀ ma saɛ, ben à bèmɛ: Solu ma gbɛ̃, ǹ ɛara ǹ guu e. Gwe gↄ̃ↄ ma wɛ́ɛ wɛ̃̀, ben ma à è. 
À bè wa dezinↄ Luda bé à ma sɛ lɛ mà wɛ́ɛ si Gbɛ̃ Maalɛ mà yã ma à lɛ́n mà à pↄyezi dↄ̃. 
À bè mɛ́gↄ̃ dɛ à sèedadee ũ màgↄ̃ yã kɛ̀ má è kↄ̃n yã kɛ̀ má mào oo baade pínginɛ. 
Ben à bè bↄ́n mɛ́ɛ dãa dↄↄ, mà fɛɛ mà batisi kɛ ma durunnↄ é kɛ̃ma kↄ̃n à sísinao. 
Kɛ̀ ma ɛara Yerusalɛmu, mɛ́ɛ adua kɛɛ Luda ua, ben ma wɛ́ɛgupu è. 
Ma Dii è, à òmɛ mà kɛ kpakpaa mà bↄ Yerusalɛmu, zaakɛ gbɛ̃nↄ é yã kɛ̀ mɛ́ɛ oo a musu síro. 
Ben ma bè Diinɛ, aↄ̃ↄ dↄ̃ sãnsãn kɛ̀ mɛɛ̀gↄ̃ gɛ̃ɛ aduakɛkpɛ kↄ̃n aduakɛkpɛn-o lɛ màgↄ̃ à náanɛkɛrinↄ kaa kpɛ́siaan wàgↄ̃ ń gbɛ̃ɛ. 
Kɛ̀ wèe à sèedade Sitivĩ dɛɛ sↄ̃, mapi má kú gwe ma zɛ kↄ̃n à dɛ̀rinↄ, má ń utanↄ kũnańnɛ. 
Ben Dii bèmɛ mà gá, é ma zĩ ai bori pãndenↄ kiia zã̀azã. 
Aↄ̃ swã kpà à yãzi ai à gàa à kà bori pãndenↄ yã pìa, ben aↄ̃ nà wiiia wà bè: À à dɛ! Gbɛ̃ kɛ̀ taka kuuna zɛ́ vĩro! 
Aↄ̃ↄe wii lɛɛ aↄ̃ↄe ń utanↄ gbãkɛɛ aↄ̃ↄe bùsuti fãa musu. 
Ben Romu sozanↄ gbɛ̃nsi bè wà gɛ̃ kↄ̃n Pↄluo ń bɛ, wà à gbɛ̃ kↄ̃n flã̀o ai à yãpuraa o wà e wà yã kɛ̀ wèe wiii dↄↄa à yãnzi ma. 
Kɛ̀ wèe Pↄlu ↄↄnↄ poroo lɛ wà à yi, à bè soza bàdee kɛ̀ kú gweenɛ: A à zɛ́ vĩ à Romu gbɛ̃ gbɛ̃ yãkpaɛkɛsaiↄ́? 
Kɛ̀ soza pì yã pì mà, à gàa à bè ń gbɛ̃nsinɛ: Bↄ́n nɛ́ kɛɛ? Gbɛ̃ pì nɛ́ Romu gbɛ̃mɛ. 
Ben gbɛ̃nsi pì mↄ̀ à Pↄlu là à bè: Ǹ omɛ, Romu gbɛ̃n n ũↄ́? À wèàla à bè: Eè. 
Ben gbɛ̃nsi pì bènɛ: Ma ↄↄ bíta kpàmɛ, ben ma gↄ̃ Romu gbɛ̃ ũ. Ben Pↄlu bènɛ: Mapi sↄ̃ wà ma i à ũmɛ. 
Ben gbɛ̃ kɛ̀ aↄ̃ↄ yezi wà yã lalaa yãanↄ bↄ̀ru kpɛɛ gↄ̃ↄ. Kɛ̀ gbɛ̃nsi pì dↄ̃̀ kɛ̀ Pↄlu nɛ́ Romu gbɛ̃mɛ, vĩa à kũ̀ kɛ̀ à tò wà mↄ̀ kàa yãnzi. 
À guu dↄ̀ kɛ̀ gbɛ̃nsi pì yezi à yã kɛ̀ Yudanↄ mↄ̀o sãnsãn ma, à mↄ̀ pòroa, ben à sa'orikinↄ kↄ̃n Yuda gbãadeenↄ kàkↄ̃a à mↄ̀ kↄ̃n Pↄluo ń aɛ. 
