﻿Baaru nnaa kɛ̀ Luku kɛ̃̀.
1.
Gbɛ̃ paridee ↄ kpà, lɛ wà yã kɛ̀ kɛ̀ wa tɛ́ tↄ̃kɛ̃ takada guu zɛ́azɛa, 
lán gbɛ̃ kɛ̀ aↄ̃ↄ dɛ yã pì sèedadeenↄ ũ kↄ̃n a baarukparinↄↄ òwe nà zaa káaku. 
Tia sa mapi sↄ̃, lán ma wɛ́ɛ tɛ̀ yã pìnↄzi nà doodo zaa a daɛna, má è à maa mà kɛ̃nnɛ zɛ́azɛa, ma gbɛ̃ bɛ̀ɛde Tiofilu, 
lɛ ǹ yã kɛ̀ wà dànnɛɛ sãnsãn dↄ̃. 
Yudea bùsu kí Hɛrↄdu gurↄ sa'ori kee kuu, à tↄ́n Zakari. À kú Abia sa'orinↄ gãli guumɛ. À naↄ̃ tↄ́n Ɛlizabɛti, Aruna boriimɛ dↄ. 
Aↄ̃ plaaa ń píngi maa Ludanɛ. Aↄ̃ègↄ̃ kuu taari sai, aↄ̃ↄ Dii doka kↄ̃n yã kɛ̀ à dìɛnↄ kũna. 
Mↄde aↄ̃ nɛ́ vĩro, zaakɛ Ɛlizabɛti nɛ́ pãaamɛ, ben aↄ̃ gↄ̃ↄn plaaa ń píngi zi kũ̀. 
Gurↄↄ kɛ̀ sa'ona kà ń gãlia, Zakari bé èe sa'ona Ludaa zĩi kɛɛ. 
Lán sa'ori pìnↄ è kɛ nà, aↄ̃ kàbankpɛ kɛ̀, ben kàbankpɛ Zakari kũ̀, lɛ à gá tuaetiti kpata Dii kpɛ́n. 
Tuaetitikpatagurↄ parii kàkↄ̃a kpɛɛlɛa píngi aↄ̃ↄe adua kɛɛ. 
Ben Dii malaika bↄ̀ à mↄ̀zi à zɛ̀ tuaetitikpataki ↄplazi. 
Kɛ̀ Zakari à è, à kɛ̀ gìri, vĩa à kũ̀. 
Ben malaika pì bènɛ: Ǹton tó vĩa n kũro Zakari. Luda n wɛ́ɛkɛɛ sì, n naↄ̃ Ɛlizabɛti é nɛ́ i gↄ̃gbɛ̃ ũ, nɛ́ tↄ́ kpánɛ Yaaya. 
N pↄↄ é kɛ nna, nɛ́ yáa dↄ, gbɛ̃nↄ é pↄnnaa kɛ à ina yã musu pari, 
zaakɛ eégↄ̃ dɛ Diinɛ gbɛ̃nsi ũmɛ. Eé wɛ̃ɛ ke í gbãa ke miro, Luda Nini égↄ̃ kúa zaa à da gbɛɛɛmmɛ. 
Eé tó Isarailinↄ aɛ dↄ Dii ń Ludaa pari, 
eé dↄ Diinɛ aɛ kↄ̃n Luda Nini gbãaa kɛ̀ Ilia vĩ yãao. Eé tó denↄ lɛ́ kɛ do kↄ̃n ń nɛ́nↄ, eé tó swãyãmarisaideenↄ gbɛ̃ maaanↄ ↄ̃ndↄ̃ↄ sɛ́. Eé tó gbɛ̃nↄ gↄ̃ kú soru guu Diinɛ. 
Ben Zakari bè malaika pìnɛ: Mɛ́ yã pì sãnsãn dↄ̃ diamɛ? Zaakɛ mare zikũnan ma ũ, ben ma naↄ̃ zi kũ̀ dↄ. 
Ben malaika pì wèàla à bè: Mámbe Gabliɛli ũ, mɛɛ̀gↄ̃ zɛna Luda aɛzĩ. Àmbe à ma zĩ mà yã pì onnɛ mà baaru nnaa pì kpánnɛ. 
Ǹ ma, n nɛ́nɛ é naɛ, nɛ́ fↄ̃ ǹ yã oro ai yã pì gá kɛo, kɛ̀ nɛ́ɛ ma yã kɛ̀ eé kɛ a gurↄↄa síro yãnzi. 
Gurↄↄ mↄ̀a sↄ̃ wèe Zakari dãa. À gìkɛna Luda kpɛ́n bↄ̀ ń saɛ. 
Kɛ̀ à bↄ̀, èe fↄ̃ à yã òńyoro, ben wà dↄ̃̀ kɛ̀ à wɛ́ɛgupu è Luda kpɛ́mmɛ. Lán à nɛ́nɛ nàɛ nà, ben èe yã oońnɛ kↄ̃n ↄↄo. 
Kɛ̀ Zakari sa'ogurↄↄ pàpa, ben à tà bɛ. 
Beee gbɛra à naↄ̃ Ɛlizabɛti nↄ̀ sì, ben à a zĩnda ùtɛ ai mↄ sↄↄro à bè: 
Dii yã kɛ̀ kɛ̀mɛ, à ma wɛ̃nda gwà, à ma bↄ wín. 
À mↄ swɛɛdodee guu Luda malaika Gabliɛli zĩ̀ Galili lakutu kɛ̀ wè be Nazarɛti guu. 
À gàa nↄkparɛ lɛzii kɛ̀ à tↄ́n Mariama kiia. À gↄ̃kpamma vĩ Dauda borii ũ. À tↄ́n Yusufu. 
Kɛ̀ malaika pì gɛ̃̀ à kiia, à bènɛ: Fↄↄ aubarikade! Dii kúnyo. 
Mariama bídi kɛ̀ maamaa yã pìa, à laasuu lɛ̀ à bè: Ì beee mì dɛ diamɛ? 
Ben malaika pì bènɛ: Mariama, ǹton tó vĩa n kũro, zaakɛ Luda gbɛ̃kɛɛ kɛ̀nnɛmɛ. 
Ǹ ma! Nɛ́ nↄ̀ sí ǹ nɛ́ i gↄ̃gbɛ̃ ũ, nɛ́ tↄ́ kpánɛ Yesu. 
Eégↄ̃ dɛ gbɛ̃nsi ũ, weé à sísi Luda Musude Nɛ́. Dii Luda é à kpá à dezi Dauda kpatan, 
eégↄ̃ kí blee Yakubu boriinↄnɛ gurↄ píngi, à kíblena égↄ̃ yãana vĩro. 
Ben Mariama bè malaika pìnɛ: Kɛ̀ má gↄ̃gbɛ̃ dↄ̃ zikiro, beee é sí kɛ diamɛ? 
Malaika wèàla à bè: Luda Nini é summa, Luda Musude gbãaa é danla. Beee yãnzi nɛ́ kɛ̀ nɛ́ ii pì kuuna égↄ̃ adona, weé à sísi Luda Nɛ́. 
N danɛ Ɛlizabɛti nɛ́gↄ̃gbɛ̃ nↄ̀sina se a zikũ guu. Nↄgbɛ̃ kɛ̀ wà dìɛ pãaa ũu pì kú kↄ̃n nↄ̀ mↄ swɛɛdooo tia. 
Zaakɛ Luda kiian baabↄ píngi è sí kɛn. 
Ben Mariama bè: Dii zↄ̀blerin ma ũ. À kɛmɛ lán ń ò nà. Ben malaika pì tà à à tòn. 
Gurↄↄ mↄ̀a Mariama fɛ̀ɛ à gàa lakutu kɛ̀ kú Yudea bùsu gusĩsĩdeen gↄ̃ↄ. 
À gàa Zakari bɛ, ben à ì kpà Ɛlizabɛtia. 
Kɛ̀ Ɛlizabɛti Mariama ì pì mà, à nɛ́ vĩ̀ à gbɛɛɛ guu, ben Luda Nini sù Ɛlizabɛtia, 
à wii gbãaa lɛ̀ à bè: Aubarikadeen n ũ dɛ nↄgbɛ̃ píngila. Aubarikadeen nɛ́ kɛ̀ kú n gbɛɛɛn ũ dↄ. 
Bↄ́n ma ũ kɛ̀ ma Dii da mↄ̀ ma gwaa? 
Gurↄↄ kɛ̀ ma n ì mà dé, nɛ́ kɛ̀ kú ma gbɛɛɛn vĩ̀ kↄ̃n pↄnnaao. 
Aubarikadeen n ũ, mmↄn kɛ̀ n yã kɛ̀ Dii ònnɛɛ sì, kɛ̀ eé kɛ. 
Ben Mariama bè: Mɛ́ɛ Dii tↄ́ sɛɛ lezĩ ma swɛ̃̀ guu, 
ma pↄↄ e kɛɛ nna Luda ma Mìsiria, 
zaakɛ à ma yã dà, mamↄma à zↄ̀bleri kɛ̀ mɛ́ɛ ká pↄ́ke lɛ́zĩroo. Zaa tia ai gurↄ píngi weé bemɛ aubarikadeemɛ, 
zaakɛ Luda gbãade yã bíta kɛ̀mɛ. À tↄ́ kú adona. 
È wɛ̃nda dↄ̃ gbɛ̃ kɛ̀ aↄ̃è a vĩa kɛɛnↄnɛ ai ń boriia. 
À a gã̀sã pòro à a gbãaa ↄ̀dↄańnɛ, à ĩadãrinↄ fã̀akↄ̃a kↄ̃n ń laasuunↄ. 
À gbãadeenↄ bↄ̀ kpatan, à talakanↄ sɛ̀ lezĩ. 
À pↄ́ maaanↄ kpà nↄadɛrinↄa aↄ̃ kã̀, mↄde à ↄↄdeenↄ gbàrɛ ↄkori. 
À a zↄ̀bleri Isarailinↄ ĩan ká, aↄ̃ yã e sãnlo. 
À wɛ̃nda dↄ̃̀ Ibraĩnɛ kↄ̃n a borii pìnↄ lán à ò wa dezinↄnɛ nà. 
Mariama vɛ̃̀ɛ kↄ̃n Ɛlizabɛtio lán mↄ aagↄ̃ↄ bà, ben à tà bɛ. 
Ɛlizabɛti nɛ́'igurↄↄ kà, ben à nɛ́ ì gↄ̃gbɛ̃ ũ. 
Kɛ̀ à fáandideenↄ kↄ̃n à danɛnↄↄ mà lán Dii wɛ̃nda dↄ̃̀nɛ nà, aↄ̃ pↄnnaa kɛ̀o. 
À gurↄ sↄraagↄ̃dee zĩ aↄ̃ mↄ̀ bã̀ngu kɛ nɛ́ pìnɛ, lɛ wà à de Zakari tↄ́ kpánɛ, 
ben à da bè: Auo! Weé à sísi Yaayamɛ. 
Aↄ̃ bènɛ: Gbɛ̃kee kú n danɛnↄ tɛ́ kɛ̀ à tↄ́ beee vĩro. 
Ben aↄ̃ yã ò à denɛ kↄ̃n ↄↄo, lɛ wà dↄ̃ dian à yezi wà tↄ́ kpánɛ nà. 
Zakari walaa gbèka, ben à kɛ̃̀a: À tↄ́n Yaaya. Yã pì bↄ̀ ń saɛ ń píngi. 
Gwe gↄ̃ↄ à nɛ́nɛ gùɛ, à lɛ́ bↄ̀ èe yã oo èe Luda sáabu kpaa. 
Ben vĩa ń fáandideenↄ kũ̀ ń píngi, ben Yudea bùsu gusĩsĩde gbɛ̃nↄↄ e yã pì tↄ̃kɛ̃ɛ ń píngi. 
Ben gbɛ̃ kɛ̀ aↄ̃ yã pì mànↄ kũna ń nↄ̀sɛ guu wà bè: Bↄ́n nɛ́ pì égↄ̃ dɛ a ũ ziaa? Zaakɛ Dii ↄↄ ligazimɛ. 
Luda Nini sù à de Zakaria, ben à annabikɛyã ò à bè: 
Wà Dii Isarailinↄ Luda sáabu kpá! À mↄ̀ à a gbɛ̃nↄ bò. 
À Mìsiri gbãadee bↄ̀we a zↄ̀bleri Dauda bori tɛ́, 
lán à ò a annabinↄ gãzĩ nà zaa gìkɛna. 
Aↄ̃ bè eé wa sí wa ibɛɛnↄa, eé wa bↄ gbɛ̃ kɛ̀ aↄ̃ zàwaguu pìnↄ ↄzĩ. 
Lɛmɛ à wa dezinↄ wɛ̃nda gwà lɛ, à bà kuunańyo yã e sãnlo. 
À la dà wa dezi Ibraĩnɛ 
à bè é wa bↄ wa ibɛɛnↄ ↄzĩ, é wa gba zɛ́ wà dↄazi vĩa sai, 
lɛ wa kuuna gↄ̃nɛ adona gbɛ̃ maaanↄ ũ ai wa wɛ̃̀ndi lɛ́n. 
Mpi sↄ̃ ma nɛ́, weé n sísi Luda Musude annabi, zaakɛ ḿbe nɛ́ dↄ Diinɛ aɛ ǹ zɛ́ kɛkɛnɛ. 
Nɛ́ tó à gbɛ̃nↄ dↄ̃ lán eé ń mì sí nà, lán eé ń durunnↄ kɛ̃ńnɛ nà. 
Zaakɛ wa Ludaa sùu vĩ, bↄna musu eé mↄ́ wa gwa lán gudↄna bà, 
lɛ à guu pu gbɛ̃ kɛ̀ aↄ̃ↄ kú gusiaa guunↄnɛ kↄ̃n gbɛ̃ kɛ̀ aↄ̃ↄ kú gaa lɛ́zĩnↄ, lɛ à wa gbá da aafia zɛ́n. 
Nɛ́ pì bíta kũ̀ à gↄ̃̀ kãgbãadee ũ. A kú gbáan ai gurↄↄ kɛ̀ à bↄ̀ Isarailinↄnɛ gupuraaa. 
