﻿MATIU.
27.
Kɛ̀ guu dↄ̀ kↄngↄ idɛ'idɛ sa'orikinↄ kↄ̃n Yuda gbɛ̃nsinↄ ń píngi yã gↄ̃̀gↄ̃ Yesuzi lɛ wà à dɛ. 
Aↄ̃ à yì, ben aↄ̃ gàa wà à nà bùsu gbɛ̃nsi Pilatinɛ a ↄzĩ. 
Kɛ̀ Yudasi kɛ̀ bↄ̀ à kpɛɛ è yã dàala, à gↄ̃̀ tómadↄ̃yãa guu, ben à gàa kondogi ↄↄ mɛ̀n baaakuri pì sↄkpa sa'orikinↄnɛ kↄ̃n gbɛ̃nsinↄ 
à bèńnɛ: Ma durun kɛ̀, ma taarisaidee kpà gaazi. Ben aↄ̃ bènɛ: Wa bà ũgbaa? N yãn gwe. 
Ben Yudasi ↄↄ pì zù Luda kpɛ́n, ben à tà à gàa à a zĩnda lògo. 
Ben sa'orikinↄ ↄↄ pì sɛ̀ɛ aↄ̃ bè: Ɔↄ pì kana Luda kpɛ́ ↄↄdakii guu zɛ́ vĩro, zaakɛ gbɛ̃dɛ'ↄↄmɛ. 
Kɛ̀ aↄ̃ yã gↄ̃̀gↄ̃, ben aↄ̃ orobori gũ̀tↄkii lù kↄ̃n ↄↄ pìo nibↄnↄ vĩikii ũ. 
Beee yãnzi ai kↄ̃n a gbã̀ao wè be tↄↄtɛ pìnɛ Tↄↄtɛ Arudeezi. 
Ben yã kɛ̀ annabi Yɛrɛmaya ò kɛ̀ à bè: Wà kondogi ↄↄ mɛ̀n baaakuri pì sɛ̀ɛ, ↄↄ kɛ̀ Isarailinↄ zɛ̀o wà kpà à yã musu pì, 
ben wà orobori gũ̀tↄkii lùo lán Dii dìɛmɛ nà. 
Yesu zɛna bùsu gbɛ̃nsi aɛzĩ. Ben gbɛ̃nsi pì à là à bè: Ḿbe Yudanↄ kína ũↄ́? Yesu wèàla à bè: Lɛn ń ò lɛ. 
Gurↄↄ kɛ̀ sa'orikinↄ kↄ̃n gbɛ̃nsinↄↄ e yã didiia, èe yãke weńlaro. 
Ben Pilati bènɛ: Nɛ́ɛ yã parii kɛ̀ wèe didiimmaa maroo? 
Mↄde Yesu e yãke o yã pìnↄ doke musuro, ben yã pì bↄ̀ bùsu gbɛ̃nsi pì saɛ maamaa. 
Banla zĩbaa zĩ píngi bùsu gbɛ̃nsi pì è pisinanↄ doke kɛ̀ gbɛ̃nↄↄ yezi gbarɛńnɛ. 
Gurↄↄ mↄ̀a sↄ̃ pisina tↄ́dee kú gwe wè be Baraba. 
Kɛ̀ parii kàkↄ̃a, ben Pilati ń lá à bè: Dén á yezi mà gbarɛaree? Baraban yↄ́, ke Yesu kɛ̀ wè be Mɛsaya? 
Zaakɛ à dↄ̃ kɛ̀ nↄ̀sɛgↄ̃aanↄ vĩna kↄ̃n Yesuo yãnzin wà à kpàawazi. 
Gurↄↄ kɛ̀ Pilati vɛ̃ɛna a tintia, à naↄ̃ gbɛ̃ zĩ̀a à bè: Ǹton yãke kɛ gbɛ̃ maaa pìnɛro, zaakɛ nanaa kɛ̀ má ò à yã musu gĩa gwãavĩ ĩa dàma maamaa. 
Sa'orikinↄ kↄ̃n gbɛ̃nsinↄ nàkↄ̃rɛ gbɛ̃nↄa aↄ̃ Baraba gbeka, aↄ̃ be wà Yesu dɛ. 
Ben bùsu gbɛ̃nsi pì ń lá à bè: Gↄ̃ↄn plaaa pìnↄ guu, dén á yezi mà gbarɛaree? Ben aↄ̃ bè, Barabamɛ. 
Ben Pilati ń lá à bè: Bↄ́n mɛ́ kɛ kↄ̃n Yesu kɛ̀ wè be Mɛsayao? Baade píngi bè: Ǹ à pá lía. 
Ben à ń lá à bè: Bↄ́ dàn à kɛ̀? Ben aↄ̃ wii lɛ̀ wà kàara wà bè: Ǹ à pá lía. 
Kɛ̀ Pilati è é fↄ̃ à yãke kɛro, zↄka e kaara, ben à í tↄ̀, à a ↄↄ pìpi gbɛ̃nↄ wáa à bè: Ma ↄ bↄ̀ɛ gbɛ̃ pì gana yãn. A yãmɛ. 
Ben gbɛ̃ pìnↄ bè: À dɛna yã wí wa musu kↄ̃n wa nɛ́nↄ. 
Ben à Baraba gbàrɛńnɛ, à bè wà Yesu gbɛ̃ flã̀o wà à pá lía. 
Ben Pilati sozanↄ gɛ̃̀ Yesuo bùsu gbɛ̃nsi pì bɛ, ben aↄ̃ ń gãli kàkↄ̃a ń píngi aↄ̃ lìgazi. 
Aↄ̃ à pↄ́nↄ bↄ̀ɛa aↄ̃ gumusu tɛ̃aa dànɛ, 
ben aↄ̃ lɛ̀ fùra tã̀ aↄ̃ kùnɛ, aↄ̃ kàba nànɛ a ↄplaan gò ũ. Ben aↄ̃ↄe kúɛkuɛɛnɛ, aↄ̃ↄe à faboo wèe bee: Fↄↄ, Yudanↄ kína! 
Aↄ̃ lóu sùa, aↄ̃ kàba pì sɛ̀ aↄ̃ à lɛ̀o a mìa. 
Kɛ̀ aↄ̃ à fabò wà yã̀a, ben aↄ̃ gumusu pì gòàla aↄ̃ à zĩnda pↄ́kãsãanↄ dànɛ, ben aↄ̃ↄe gaa à pá lía. 
Kɛ̀ aↄ̃ bↄ̀ɛ aↄ̃ↄe gaa, aↄ̃ dàkↄ̃rɛ kↄ̃n Sirɛni gbɛ̃ kɛ̀ wè be Simↄo, ben aↄ̃ gã nàa à Yesu líkpangbãroo sɛ́. 
Ben aↄ̃ kà guu kɛ̀ wè be Gↄgↄta kɛ̀ bè mìwatorokii. 
Ben aↄ̃ geepiwɛ̃ɛ kɛ̀ wà yã̀kↄ̃tɛ kↄ̃n ɛ̃zɛ̃o dↄ̀nɛ à mi. Kɛ̀ à í kɛ̀, ben à gì mizi. 
Kɛ̀ aↄ̃ à pà lía, ben aↄ̃ kàbankpɛ kɛ̀ wà à pↄ́kãsãanↄ kpàatɛtɛkↄ̃nɛ. 
Ben aↄ̃ vɛ̃̀ɛ aↄ̃ↄe à dãkpaa gwe. 
Wà yã kɛ̀ wà dìa kɛ̃̀ wà nà à mìla wà bè: 
Ben wà kpãi wɛ́ɛdewɛnↄ pà lía à saɛ gↄ̃ↄn plaa, gbɛ̃ doo à ↄplaazi, gbɛ̃ doo à ↄzɛɛzi. 
Gbɛ̃ kɛ̀ aↄ̃ↄe gɛ̃ɛ zɛ́la gweenↄↄ e ń mì kɛɛ degũdegũ, aↄ̃ↄe à sↄ̃sↄ̃ↄ 
wà bè: Mmↄn kɛ̀ n bè nɛ́ Luda kpɛ́ wí ǹ ɛara ǹ bo gurↄ aagↄ̃ↄ daguran gweroo? Tó ḿbe Luda Nɛ́ ũ, ǹ n zĩnda mì sí ǹ pita lía. 
Lɛmɛ dↄ sa'orikinↄ kↄ̃n ludayãdannɛrinↄ kↄ̃n gbɛ̃nsinↄↄ e à faboo lɛ wà bè: 
À gbɛ̃ pãndenↄ mì sì, mↄde eé fↄ̃ à a zĩnda mì síro. Isarailinↄ kínanloo? À pita lía tia, wé à náanɛ kɛ. 
À Luda náanɛ vĩ. Tó Ludaa yezi, ɛ̃ndɛ̃ à à bↄ sa, zaakɛ à bè ambe Luda Nɛ́ ũ. 
Baa kpãi kɛ̀ wà ń pá lía lɛdoonↄↄ e à sↄ̃sↄ̃ↄ lɛ dↄ. 
Kɛ̀ ↄfãntɛ̃ kà mìdangura, ben gusiaa dà bùsu pìla píngi ai fãantɛ̃ mↄ̀ aagↄ̃. 
Fãantɛ̃ mↄ̀ aagↄ̃n Yesu wii lɛ̀ gbãngbãn à bè: Ɛloi, Ɛloi, lɛma sabatani! Beee bè, ma Luda, ma Luda, à kɛ̀ dia n ma ton? 
Kɛ̀ gbɛ̃ kɛ̀ aↄ̃ↄ zɛna gwe kenↄ yã pì mà, ben aↄ̃ bè: Daaa e Ilia sísii. 
Zaa gwe gↄ̃ↄ aↄ̃ gbɛ̃ doo bàa lɛ̀ à gàa à sabo sɛ̀ à dà geepiwɛ̃ kpã̀kpã guu, à fĩ̀fĩ kapaa, ben à dↄ̀ Yesunɛ à mi. 
Ben gbɛ̃ kpaaanↄ bè: À zɛ gĩa wà gwa tó Ilia é mↄ́ à à mì sí. 
Yesu ɛ̀ara à wii gbãaa lɛ̀ dↄ, ben à a wɛ̃̀ndi gbàrɛ. 
Ben Luda kpɛ́ lábure kɛ̃̀kↄ̃rɛ plaa bↄna musu suna gĩzĩ. Tↄↄtɛ nìgãnigã, gbɛ̀nↄ pàrapara, 
miranↄ wɛ̃̀wɛ̃, ben Luda gbɛ̃nↄ fɛ̀ɛ bↄna gaan pari. 
Yesu fɛɛ bↄna gaan gbɛra aↄ̃ bↄ̀ɛ miran, aↄ̃ gɛ̃̀ Luda wɛ́tɛn, gbɛ̃nↄ ń é pari. 
Kɛ̀ sozanↄ gbɛ̃nsi kↄ̃n a gbɛ̃ kɛ̀ aↄ̃ↄe Yesu dãkpaanↄ tↄↄtɛ nigãnigãna pì è kↄ̃n yã kɛ̀ aↄ̃ↄ kɛ̀nↄ píngi, vĩa ń kũ maamaa aↄ̃ bè: Yãpuramɛ Luda Nɛ́n gbɛ̃ kɛ̀ ũ. 
Nↄgbɛ̃nↄↄ kú gwe pari, aↄ̃ↄe guu gwaa kãaa. Aↄ̃ↄ tɛ́ Yesuzi bↄna Galilimɛ, aↄ̃ègↄ̃ pↄ́blee kɛɛnɛ. 
Ń tɛ́n Mariama Magadalɛni kún kↄ̃n Mariamao Yemisi kↄ̃n Yusufuo da kↄ̃n Zebedi nɛ́nↄ dao. 
Kɛ̀ uusiɛ kɛ̀, Arimatea gbɛ̃ ↄↄdee kɛ̀ wè benɛ Yusufu mↄ̀. Yesu ìbamɛ dↄ. 
À gàa à Yesu gɛ̀ gbèka Pilatia, ben Pilati bè wà kpáa. 
Kɛ̀ Yusufu gɛ̀ pì sɛ̀, a táaru bisa dufu fĩ̀fĩa, 
à à dà a zĩnda gbɛ̀wɛɛ kɛ̀ wà sↄ̀ mira ũu guu. Ben à gbɛ̀ bíta gbegere pà à tà wɛ̀ɛ pìlɛ à tà. 
Mariama Magadalɛni kↄ̃n Mariama pãnde pìo vɛ̃ɛna gwe, aↄ̃ↄ aɛdↄna miraa. 
Kɛ̀ gurↄↄ lìɛ, kámmabogurↄↄ zĩ kà, ben sa'orikinↄ kↄ̃n Farisinↄ gàa Pilati kiia lɛdo 
aↄ̃ bè: Yã kɛ̀ gbɛ̃kɛkɛri pì ò a bɛ̃ɛ zĩ dↄwagu à bè, gurↄ aagↄ̃ↄ gbɛra é fɛɛ. 
Ǹ tó wàgↄ̃ mira pì dãkpaa ai à gurↄ aagↄ̃dee zĩ. Tó lɛnlo, à ìbanↄ é mↄ́ wà à gɛ̀ sɛ́ kpãi, aↄ̃é o gbɛ̃nↄnɛ à fɛ̀ɛ bↄna gaan. Ɛgɛ zãa beee égↄ̃ dɛ à káakupↄla. 
Ben Pilati bèńnɛ: À sozanↄ sí à gá à mira pì dãkpa lán é fↄ̃ nà. 
Ben aↄ̃ gàa wà sèeda kɛ̀ mira lɛ́ gbɛ̀a, aↄ̃ sozanↄ tò gwe aↄ̃gↄ̃ dãkpaa. 
