﻿YUNUSA.
2.
Zaa kpↄ̀ pì gbɛɛɛn Yunusa wɛ́ɛ kɛ̀ Dii a Ludaa à bè: 
Ma lɛ́ zù Diizi ma kagurakɛna guu, ben à wèmala. Zaa gɛ̀wãa lↄ̀n ma wii pɛ̀, ben à ma yã mà. 
N ma zu ísia lↄ̀n ai zaa à guragura, ísↄ̃ dìdima kↄ̃n à kakanao, n ísↄ̃kana fùta táa ò ma mìla. 
Ma bè n pɛma bↄna n kiia, mↄde mɛ́ ɛara mà wɛ́ɛ si n kpɛ́ kɛ̀ kú adonalɛ. 
Í ma kũ ma waalɛ, í lↄ̀ ma mↄ, burugu fĩ̀kã ma mìzi. 
Ma kpaɛ ai kpiiinↄ kãsãazi, tↄↄtɛ zɛ́ kɛ̀ wɛ̃na vĩroo tàtamalɛ. Ben n ma bↄ gɛ̀wãan, n ma mì sì Dii ma Luda. 
Kɛ̀ má yezi mà anduna tó, Dii, n yã dↄ̀magu, ben ma wɛ́ɛ kɛ̀mma, à n kii le ai n kpɛ́ kɛ̀ kú adonan. 
Gbɛ̃ kɛ̀ aↄ̃ pↄ́ gina yã kũnanↄ kɛ̃̀ Luda aubarikaa, 
mapi sↄ̃, mɛ́ saa omma kↄ̃n sáabukɛnao, mɛ́ lù kɛ̀ má sɛ̀nnɛɛ fĩa bo. Dii bé è ń mì sí. 
Kɛ̀ Dii yã dà kpↄ̀ pìnɛ, ben à Yunusa pìsi ísiaa lɛ́zi. 
