﻿DANIƐLI.
6.
À kà Dariusunɛ à bùsu gbãadeenↄ diɛ gↄ̃ↄn baswɛɛdo, ben à ń díɛdiɛ a bùsun píngi. 
À gↄ̃ↄn aagↄ̃ↄ dìɛ ń gbɛ̃nsinↄ ũ. Daniɛli nɛ́ gↄ̃ↄn aagↄ̃ↄ pìnↄ dokemɛ. Bùsu gbãadeenↄ è ń yãnↄ tↄ̃kɛ̃ gbɛ̃ pìnↄnɛ, lɛ wàton ásaru kɛ kínanɛro yãnzi. 
Daniɛli ↄ̃ndↄ̃ↄ wɛ́ɛbↄna dɛ gbɛ̃nsinↄla kↄ̃n bùsu gbãadeenↄ ń píngi, ben kína zɛ̀o à à diɛ a bùsu gbɛ̃nsi ũ. 
Ben gbɛ̃nsinↄ kↄ̃n bùsu gbãadeenↄↄ e zɛ́ wɛtɛɛ wà yãke ea kpata kɛ̀ à blè yã musu, mↄde à taari vĩro, aↄ̃ↄe yãke earo, zaakɛ à náanɛ vĩ a yãkɛna guu píngi. È pã kpá yãkeziro è sãsã yãkearo. 
Ben aↄ̃ bè: Wé yãkee e Daniɛliaro, tó èe kɛ à Luda doka musu baasiro. 
Ben gbɛ̃nsinↄ kↄ̃n gbãadeenↄ mì pɛ̀kↄ̃rɛ aↄ̃ gàa wà kína lè wà bè: Kí Dariusu, wà n dↄ̃ kↄ̃n aafiao! 
Wamↄwa gbɛ̃nsinↄ kↄ̃n kínanↄ kↄ̃n zĩ̀kpɛ gbɛ̃nsinↄ kↄ̃n gbãadeenↄ kↄ̃n lɛ́dammarinↄ kↄ̃n n ìbanↄ ń píngi, wa lɛ́ kpàkↄ̃sↄ̃ wá è à maa ǹ yã kɛ̀ diɛ ǹgↄ̃ zĩi kɛɛa. Gurↄ baaakuri daguran tó gbɛ̃ wɛ́ɛ kɛ̀ dii kea ke gbɛ̃nteen yoo, tó èe kɛ mpi baasiro, wà adee sɛ́ wà zu músunↄ wɛ̀ɛn. 
Kí, ǹ yã pì diɛ sa ǹ ↄ da takada kɛ̀n, lɛ gbɛ̃ke tón yã pì liɛro yãnzi. Eégↄ̃ dɛ Midiãnↄ kↄ̃n Pɛsianↄ doka kɛ̀ weé fↄ̃ wà gbororoo ũ. 
Ben kí Dariusu yã pì dìɛ à a ↄↄ dà takadan. 
Kɛ̀ Daniɛli mà wà yã pì dìɛ, à tà bɛ. À kpɛ́ kɛ̀ kú musu windonↄↄ aɛ dↄ Yerusalɛmua wɛ̃wɛ̃na. Ben à kùɛ à adua kɛ̀ à Luda sáabu kpà, lán è kɛ nà lán guu e dↄↄ nà gɛ̃̀n aagↄ̃gↄ̃. 
Ben gbɛ̃ pìnↄ mì pɛ̀kↄ̃rɛ aↄ̃ gàa wà à è èe adua kɛɛ èe dↄnlɛ wɛ́ɛ kɛɛ Ludaa. 
Ben aↄ̃ gàa wà kína lè yã kɛ̀ à dìɛ pì musu wà bè: N yã dìɛ n bè ai gurↄ baaakuri dagura gbɛ̃ kɛ̀ wɛ́ɛ kɛ̀ dii kea ke gbɛ̃nteen yoo, tó èe kɛ mpi baasiro, weé adee sɛ́ wà zu músunↄ wɛ̀ɛ guumɛ. Ben kína bè: Yã pì seka vĩro, à gↄ̃̀ Midiãnↄ kↄ̃n Pɛsianↄ doka kɛ̀ weé fↄ̃ wà gbororoo ũmɛ. 
Ben aↄ̃ bènɛ: Yudanↄ bùsu zĩ̀zↄ Daniɛli è n yã daro ke yã kɛ̀ ń dìɛ pì. Ègↄ̃ adua kɛɛ lán guu e dↄↄ nà gɛ̃̀n aagↄ̃gↄ̃mɛ. 
Kɛ̀ kína yã pì mà, à kɛ̀nɛ zaa maamaa. À zɛ̀o à Daniɛli mì sí, ben èe à bↄna zɛ́ wɛtɛɛ ai ↄfãntɛ̃ gàa à gɛ̃̀o kpɛ́n. 
Ben gbɛ̃ pìnↄ ɛ̀ara wà pɛ̀kↄ̃rɛ wà gàa wà kína lè wà bè: Kí, ń Midiãnↄ kↄ̃n Pɛsianↄ doka dↄ̃, wà bè yã kɛ̀ kína dìɛ kↄ̃n yã kɛ̀ à gìzio liɛna vĩro. 
Ben kína bè wà mↄ́ kↄ̃n Daniɛlio wà à zu músunↄ wɛ̀ɛn. Kína bè Daniɛlinɛ: N Luda kɛ̀ nɛɛ̀gↄ̃ dↄnzi kɛɛnɛ gurↄ píngi n bↄ! 
Kɛ̀ wà à zù wɛ̀ɛ pì guu, wà gbɛ̀ sɛ̀ wà tàta wɛ̀ɛ pì lɛ́a, ben kína sèeda kɛ̀a kↄ̃n a tãngao kↄ̃n a bùsu gbãadeenↄ tãnganↄ, lɛ gbɛ̃ke tón yãke liɛ Daniɛli musuro yãnzi. 
Ben kína tà bɛ à gì pↄ́ ble gwãavĩ beeeazi, bensↄ̃ èe a nↄgbɛ̃ ke yã gbekaro. Èe fↄ̃ à ii òro. 
Kɛ̀ guu dↄ̀, guwɛɛ e kɛ̃ɛ, ben kína pì fɛ̀ɛ à gàa músunↄ wɛ̀ɛ pì kiia kpakpaa. 
Kɛ̀ à sↄ̃̀ wɛ̀ɛ pìzi, à lɛ́ zù Daniɛlizi kↄ̃n pↄsiaao à bè: Daniɛli, Daniɛli, Luda Wɛ̃̀ndide zↄ̀bleri! N Luda kɛ̀ nɛɛ̀gↄ̃ dↄnzi kɛɛnɛ gurↄ píngi fↄ̃̀ à n bↄ músunↄ lɛ́zĩↄ́? 
Daniɛli wèàla à bè: Luda n dↄ̃ aafiao Zaaki! 
Ma Luda a malaika zĩ̀, à mↄ̀ à músunↄ lɛ́ nàkↄ̃a, aↄ̃ↄe ma kɛ̃nnaro, zaakɛ ma dɛnɛ taarisaidee ũ. Kí, mɛ́ɛ taari ke kɛnnɛ zikiro. 
Kína pↄↄ kɛ̀ nna maamaa, ben à bè wà Daniɛli gá wà à bↄ wɛ̀ɛ pì guu. Kɛ̀ wà à bↄ̀, wèe e à kɛ̃̀nna gukearo kɛ̀ à Luda náanɛ kɛna yãnzi. 
Ben kína bè wà mↄ́ kↄ̃n gbɛ̃ kɛ̀ aↄ̃ yã dì Daniɛlianↄ, ben wà ń zúzu wɛ̀ɛ pì guu se kↄ̃n ń nɛ́nↄ kↄ̃n ń naↄ̃nↄo. Ai aↄ̃gↄ̃ gá tↄↄtɛ le, músunↄ ń dã aↄ̃ ń kũkũ aↄ̃ ń wánↄ wìwi píngi. 
Kí Dariusu takada kɛ̃̀ gbɛ̃ kɛ̀ aↄ̃ↄ kú a bùsu guunↄnɛ ń píngi kↄ̃n bori sãnda píngio à bè: Àgↄ̃ kú aafiao maamaa! 
Ma yã kɛ̀ dìɛ ma bùsu gbɛ̃ pínginɛ, kɛ̀ aↄ̃gↄ̃ Daniɛli Luda vĩa vĩ aↄ̃ dↄnzi kɛnɛ. Zaakɛ Luda Wɛ̃̀ndide kɛ̀ kuu gurↄ píngin à ũ. À kpata yãana vĩro, ègↄ̃ kí blee gurↄ píngimɛ. 
È gbɛ̃ mì sí è ń bↄ. È dabuyãnↄ kↄ̃n yãbↄnsaɛnↄ kɛ musu kↄ̃n tↄↄtɛo. Àmbe à Daniɛli bↄ̀ músunↄ lɛ́zĩ. 
Daniɛli gbãaa è Dariusu kíblegurↄ kↄ̃n Pɛsia bori Sirusu kíblegurↄↄo. 
