﻿YAASINƆ.
27.
Ǹton n zĩnda sáabu kpá zia yã musuro, zaakɛ ń dↄ̃ yã kɛ̀ eé su ziaro. 
Ǹ tó wà n sáabu kpá, ǹton n zĩnda sáabu kpáro. Ǹ tó à bↄ gbɛ̃nↄ lɛ́n, ǹton tó à bↄ n lɛ́nlo. 
Gbɛ̀ tìisi, bùsu'ãatɛ̃ nɛ́ asoomɛ, mↄde yↄ̃nkↄↄ pↄfɛ̃ tìisi dɛ beeenↄla píngi. 
Pɛ̃tɛ̃ pãsĩ, pↄfɛ̃ ègↄ̃ dańla, mↄde dé bé eé nↄ̀sɛgↄ̃aanↄ fↄ̃ↄ? 
Kpãkɛ̃na gbɛ̃zi gbɛ̃ pariinↄ wáa maa dɛ yena gbɛ̃zi asii guula. 
Gbɛ̃nna yã'ↄ̃amma kpáńzi náanɛ vĩ, ibɛɛ lɛ́pɛmmana mↄnafiki vĩ. 
Gbɛ̃ kɛ̀ kãna è zaza kũ zↄ́amɛ, mↄde nↄadɛri pↄ́ kyã̀kyã dↄ̃ro. 
Gbɛ̃ kɛ̀ kɛ̃̀ a uaa èe likↄ̃a zↄ̃ↄ dɛ lán bãa kɛ̀ sã̀sã a sàa bàmɛ. 
Nↄ́si gũ nnannaa kↄ̃n tuaetitio è ń pↄↄ kɛ nna, lɛ́dakↄ̃ana kↄ̃n nↄ̀sɛo doo è gbɛ̃nnanↄ kɛ nna. 
Ǹton pã kpá n gbɛ̃nnaziro ke n de gbɛ̃nna. Tó yã n le, ǹton gá n vĩ̀i ke n dãaro bɛro. N gbɛ̃daaa kɛ̀ kúńyo kĩi maa dɛ n bɛ gbɛ̃ kɛ̀ kú zã̀la. 
Ma nɛ́, ǹgↄ̃ ↄ̃ndↄ̃, ma pↄↄ é kɛmma nna, mɛ́ we ma sↄ̃̀sↄ̃rinↄla. 
Làakaridee è yã pãsĩ e káaku, ben è utɛnɛ, laasuusaidee è gí àgↄ̃ gaa, ben è yã e. 
Tó gbɛ̃ nibↄ fĩa dì a musu, ǹ à uta sí ǹgↄ̃ kũna tↄↄba ũ adee pì gɛ̃ɛ ũ. 
Tó n yã ò gbãngbãn n sa maaa ò n gbɛ̃daaanɛ kↄngↄ idɛ'idɛ, weé da sa zaaa ũmɛ. 
Nↄ swèedee dɛ lán í kɛ̀ e tↄ̃tↄ̃ↄ zɛna sai lou zãa gurↄ bàmɛ, 
à dãdãna dɛ lán ĩa dãdãna bàmɛ, adee e nↄ̀si'í kũu kↄ̃n ↄↄomɛ. 
Lán mↄ̀nↄ è kↄ̃ lɛ́ kɛ nà, lɛn gbɛ̃ntee è a gbɛ̃daaa kɛkɛ lɛ. 
Tó gbɛ̃ làakari dↄ̀ kãkã lía, eé à nɛ́ ble, tó gbɛ̃ a dii yã mà, eé a kpe da. 
Lán gbɛ̃ è a ninii e ín nà, lɛn gbɛ̃nteenↄ ègↄ̃ kↄ̃ laasuu dↄ̃ lɛ. 
Lán gɛ̀nↄ è mↄ́ gaaaro nà kↄ̃n gɛ̀wãao, lɛn gbɛ̃ wɛ́ɛ yena pↄ́zi è mↄ́aro lɛ. 
Lán wè kondogi kↄ̃n vurao maaa dↄ̃ a baasana guu nà, lɛn wè bɛ̀ɛ lí gbɛ̃nɛ à tↄ́bↄna guu lɛ. 
Baa tó n faasaidee dà gón n à sabò lán pↄ́wɛɛ bà, à faasaikɛ é kɛ̃aro. 
Ǹgↄ̃ n pↄ́kãdeenↄ kuuna dↄ̃ maamaa, ǹ làakari dↄ n kpàsa pↄ́nↄa, 
zaakɛ auziki ègↄ̃ kuu gurↄ sãnda píngiro, baa kpata è gↄ̃ gbɛ̃ pↄ́ ũ ai a boriiaro. 
Sɛ̃̀ è yãa, à dufu è bↄɛ, nɛɛ̀ à tàgaa kpá pↄ́nↄa, 
nɛɛ̀ pↄ́kãsãa kɛ kↄ̃n n sãanↄ kão, nɛɛ̀ bú lú kↄ̃n n blè ↄↄo, 
n blènↄ zwii ègↄ̃ dinzi n pↄ́blee ũ, nɛɛ̀ n uadeenↄ kↄ̃n n nↄgbɛ̃ zĩkɛrinↄ gwao. 
