﻿YAASINƆ.
25.
Sulemanu yáasi kɛ̀ Yuda kí Ɛzɛkaya gbɛ̃nↄↄ kɛ̃̀ takada guunↄn yɛ̀. 
Luda gakui vĩ à yã utɛ, kínanↄ gakui vĩ aↄ̃ yã tàasi kɛ. 
Lán wé fↄ̃ wà ludambɛ lezĩ kↄ̃n tↄↄtɛ lↄ̀o dↄ̃ro nà, lɛn wé fↄ̃ wà kína laasuu dↄ̃ro lɛ. 
Ǹ kondogi gbãsĩ bↄɛ, à pìri é pↄ́ maaa pio, 
ǹ zaakɛrinↄ bↄɛ kína aɛ, à kpata é gbãa kũ yãzɛdee musu. 
Ǹton n zĩnda sɛ́ lezĩ kína aɛro, ǹton vɛ̃ɛ gbɛ̃nsinↄ vɛ̃ɛkiiaro. 
Zaakɛ à sã̀ↄ à bennɛ ǹ mↄ́ aɛ kɛ̀ dɛ à n diɛ kɛ̃sãna gbɛ̃ bɛ̀ɛdeenↄ aɛla. 
Yã kɛ̀ n wɛ́ɛ è, ǹtongↄ̃ wãa kↄ̃n à gↄ̃gↄ̃naoro, zaakɛ tó wà n yã ɛgɛ bò, bↄ́n nɛ́ yãa ǹ kɛɛ? 
Tó nɛ́ɛ yã gↄ̃gↄ̃ↄ kↄ̃n n gbɛ̃daaao, ǹton bↄ kↄ̃n gbɛ̃ pãnde asiioro. 
Tó à mà, eé wí dammamɛ, n tↄ́ zaaa é yãa dↄro. 
Yãmaa'ona a gurↄↄa nna lán mango tɛ̃aa kɛ̀ da kondogi taan bà. 
Ɔ̃ndↄ̃dee lɛ́damma maa gbɛ̃ kɛ̀ nↄ̀sɛ vĩinɛ lán vura zãblebↄ bà. 
Lán í yĩi ègↄ̃ dɛ nà pↄ́kɛ̃rinↄnɛ, lɛn zĩ̀ri náanɛdee dɛ lɛ gbɛ̃ kɛ̀ aↄ̃ à zĩ̀nↄnɛ, è ń nↄ̀sɛ yĩi kũńnɛ. 
Gbɛ̃ kɛ̀ è gbadana lɛ́ gbɛ̃ ben è daroo dɛ lán lou kɛ̀ sìsi à ĩa kàka èe maroo bàmɛ. 
Mɛnadee è tó kína a yãzɛ e, kpaɛna yãzi è tó à yã ble. 
Tó n zↄ́ è, ǹ ble mↄ́kↄ̃ana yão, lɛ ǹton ble bíta ǹ lɛ́ sↄkparo yãnzi. 
Ǹton n gbɛ̃daaa bɛ zɛ́ sↄro, lɛ àton kpasanyo à zanguro yãnzi. 
Gbɛ̃ kɛ̀ yã dì a gbɛ̃daaaa dɛ lán gò ke fɛ̃ɛdaa ke kàlɛ sↄ̃ntɛ bàmɛ. 
Làakarikpaɛna náanɛsaideea nawɛ̃akɛgurↄ dɛ lán swaa gyãree ke gbá ɛrɛ bàmɛ. 
Pↄnna lɛ̀sina pↄsiadeenɛ dɛ lán utasimmana ĩampuu gurↄ ke yↄ̃nku kana bↄ̀a bàmɛ. 
Tó nↄaa e n ibɛɛ dɛɛ, ǹ pↄ́blee kpáa, tó ímiimɛ sↄ̃, ǹ à gba í. 
Tó ń kɛ̀ lɛ, nɛ́ɛ à ↄↄ kaanɛ a lɛ́mmɛ, Dii é fĩa bonnɛ. 
Lán gu'igbãroo kpa ĩa è mↄ́ louo nà, lɛn gbɛ̃pena è mↄ́ uusisinao lɛ. 
Ina kpɛ́ làasin maa dɛ kuuna kpɛ́n lɛdo kↄ̃n nↄ swèedeeola. 
Baaru nna bↄna bùsu zã̀azãn dɛ lán íyĩikpana gbɛ̃ kɛ̀ gbãaa yã̀aa bàmɛ. 
Gbɛ̃ maaa kɛ̀ è we zaakɛrinɛ dɛ lán íbↄkii kɛ̀ à í yana bàmɛ, lán lↄ̀gↄ kɛ̀ à í yàka bà. 
Zↄ́blena à ↄ gɛ̃ɛ maaro, gbɛ̃ bɛ̀ɛlina a zĩndanɛ gakui vĩro. 
Gbɛ̃ kɛ̀ à a zĩndakũna dↄ̃roo dɛ lán wɛ́tɛ kɛ̀ à bĩi gborona bàmɛ. 
